𑁮. 𑀘𑀻𑀯𑀭𑀓𑁆𑀔𑀦𑁆𑀥𑀓𑁄

𑁨𑁦𑁨. 𑀚𑀻𑀯𑀓𑀯𑀢𑁆𑀣𑀼

𑁩𑁨𑁬. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑁂𑀲𑀸𑀮𑀻 𑀇𑀤𑁆𑀥𑀸 𑀘𑁂𑀯 𑀳𑁄𑀢𑀺 𑀨𑀺𑀢𑀸 [𑀨𑀻𑀢𑀸 (𑀩𑀳𑀽𑀲𑀼)] 𑀘 𑀩𑀳𑀼𑀚𑀦𑀸 𑀘 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑀸 𑀘 𑀲𑀼𑀪𑀺𑀓𑁆𑀔𑀸 𑀘; 𑀲𑀢𑁆𑀢 𑀘 𑀧𑀸𑀲𑀸𑀤𑀲𑀳𑀲𑁆𑀲𑀸𑀦𑀺 𑀲𑀢𑁆𑀢 𑀘 𑀧𑀸𑀲𑀸𑀤𑀲𑀢𑀸𑀦𑀺 𑀲𑀢𑁆𑀢 𑀘 𑀧𑀸𑀲𑀸𑀤𑀸; 𑀲𑀢𑁆𑀢 𑀘 𑀓𑀽𑀝𑀸𑀕𑀸𑀭𑀲𑀳𑀲𑁆𑀲𑀸𑀦𑀺 𑀲𑀢𑁆𑀢 𑀘 𑀓𑀽𑀝𑀸𑀕𑀸𑀭𑀲𑀢𑀸𑀦𑀺 𑀲𑀢𑁆𑀢 𑀘 𑀓𑀽𑀝𑀸𑀕𑀸𑀭𑀸𑀦𑀺; 𑀲𑀢𑁆𑀢 𑀘 𑀆𑀭𑀸𑀫𑀲𑀳𑀲𑁆𑀲𑀸𑀦𑀺 𑀲𑀢𑁆𑀢 𑀘 𑀆𑀭𑀸𑀫𑀲𑀢𑀸𑀦𑀺 𑀲𑀢𑁆𑀢 𑀘 𑀆𑀭𑀸𑀫𑀸; 𑀲𑀢𑁆𑀢 𑀘 𑀧𑁄𑀓𑁆𑀔𑀭𑀡𑀻𑀲𑀳𑀲𑁆𑀲𑀸𑀦𑀺 𑀲𑀢𑁆𑀢 𑀘 𑀧𑁄𑀓𑁆𑀔𑀭𑀡𑀻𑀲𑀢𑀸𑀦𑀺 𑀲𑀢𑁆𑀢 𑀘 𑀧𑁄𑀓𑁆𑀔𑀭𑀡𑀺𑀬𑁄; 𑀅𑀫𑁆𑀩𑀧𑀸𑀮𑀻 𑀘 𑀕𑀡𑀺𑀓𑀸 𑀅𑀪𑀺𑀭𑀽𑀧𑀸 𑀳𑁄𑀢𑀺 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑀸, 𑀧𑀤𑀓𑁆𑀔𑀺𑀡𑀸 [𑀧𑀤𑀓𑁆𑀔𑀸 (𑀲𑁆𑀬𑀸.)] 𑀦𑀘𑁆𑀘𑁂 𑀘 𑀕𑀻𑀢𑁂 𑀘 𑀯𑀸𑀤𑀺𑀢𑁂 𑀘, 𑀅𑀪𑀺𑀲𑀝𑀸 𑀅𑀢𑁆𑀣𑀺𑀓𑀸𑀦𑀁 𑀅𑀢𑁆𑀣𑀺𑀓𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀧𑀜𑁆𑀜𑀸𑀲𑀸𑀬 𑀘 𑀭𑀢𑁆𑀢𑀺𑀁 𑀕𑀘𑁆𑀙𑀢𑀺; 𑀢𑀸𑀬 𑀘 𑀯𑁂𑀲𑀸𑀮𑀻 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀉𑀧𑀲𑁄𑀪𑀢𑀺. 𑀅𑀣 𑀔𑁄 𑀭𑀸𑀚𑀕𑀳𑀓𑁄 𑀦𑁂𑀕𑀫𑁄 𑀯𑁂𑀲𑀸𑀮𑀺𑀁 𑀅𑀕𑀫𑀸𑀲𑀺 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦. 𑀅𑀤𑁆𑀤𑀲𑀸 𑀔𑁄 𑀭𑀸𑀚𑀕𑀳𑀓𑁄 𑀦𑁂𑀕𑀫𑁄 𑀯𑁂𑀲𑀸𑀮𑀺𑀁 𑀇𑀤𑁆𑀥𑀜𑁆𑀘𑁂𑀯 𑀨𑀺𑀢𑀜𑁆𑀘 𑀩𑀳𑀼𑀚𑀦𑀜𑁆𑀘 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑀜𑁆𑀘 𑀲𑀼𑀪𑀺𑀓𑁆𑀔𑀜𑁆𑀘; 𑀲𑀢𑁆𑀢 𑀘 𑀧𑀸𑀲𑀸𑀤𑀲𑀳𑀲𑁆𑀲𑀸𑀦𑀺 𑀲𑀢𑁆𑀢 𑀘 𑀧𑀸𑀲𑀸𑀤𑀲𑀢𑀸𑀦𑀺 𑀲𑀢𑁆𑀢 𑀘 𑀧𑀸𑀲𑀸𑀤𑁂; 𑀲𑀢𑁆𑀢 𑀘 𑀓𑀽𑀝𑀸𑀕𑀸𑀭𑀲𑀳𑀲𑁆𑀲𑀸𑀦𑀺 𑀲𑀢𑁆𑀢 𑀘 𑀓𑀽𑀝𑀸𑀕𑀸𑀭𑀲𑀢𑀸𑀦𑀺 𑀲𑀢𑁆𑀢 𑀘 𑀓𑀽𑀝𑀸𑀕𑀸𑀭𑀸𑀦𑀺; 𑀲𑀢𑁆𑀢 𑀘 𑀆𑀭𑀸𑀫𑀲𑀳𑀲𑁆𑀲𑀸𑀦𑀺 𑀲𑀢𑁆𑀢 𑀘 𑀆𑀭𑀸𑀫𑀲𑀢𑀸𑀦𑀺 𑀲𑀢𑁆𑀢 𑀘 𑀆𑀭𑀸𑀫𑁂; 𑀲𑀢𑁆𑀢 𑀘 𑀧𑁄𑀓𑁆𑀔𑀭𑀡𑀻𑀲𑀳𑀲𑁆𑀲𑀸𑀦𑀺 𑀲𑀢𑁆𑀢 𑀘 𑀧𑁄𑀓𑁆𑀔𑀭𑀡𑀻𑀲𑀢𑀸𑀦𑀺 𑀲𑀢𑁆𑀢 𑀘 𑀧𑁄𑀓𑁆𑀔𑀭𑀡𑀺𑀬𑁄; 𑀅𑀫𑁆𑀩𑀧𑀸𑀮𑀺𑀜𑁆𑀘 𑀕𑀡𑀺𑀓𑀁 𑀅𑀪𑀺𑀭𑀽𑀧𑀁 𑀤𑀲𑁆𑀲𑀦𑀻𑀬𑀁 𑀧𑀸𑀲𑀸𑀤𑀺𑀓𑀁 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑀁, 𑀧𑀤𑀓𑁆𑀔𑀺𑀡𑀁 [𑀧𑀤𑀓𑁆𑀔𑀁 (𑀲𑁆𑀬𑀸.)] 𑀦𑀘𑁆𑀘𑁂 𑀘 𑀕𑀻𑀢𑁂 𑀘 𑀯𑀸𑀤𑀺𑀢𑁂 𑀘, 𑀅𑀪𑀺𑀲𑀝𑀁 𑀅𑀢𑁆𑀣𑀺𑀓𑀸𑀦𑀁 𑀅𑀢𑁆𑀣𑀺𑀓𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀧𑀜𑁆𑀜𑀸𑀲𑀸𑀬 𑀘 𑀭𑀢𑁆𑀢𑀺𑀁 𑀕𑀘𑁆𑀙𑀦𑁆𑀢𑀺𑀁, 𑀢𑀸𑀬 𑀘 𑀯𑁂𑀲𑀸𑀮𑀺𑀁 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀉𑀧𑀲𑁄𑀪𑀦𑁆𑀢𑀺𑀁.

𑁩𑁨𑁭. 𑀅𑀣 𑀔𑁄 𑀭𑀸𑀚𑀕𑀳𑀓𑁄 𑀦𑁂𑀕𑀫𑁄 𑀯𑁂𑀲𑀸𑀮𑀺𑀬𑀁 𑀢𑀁 𑀓𑀭𑀡𑀻𑀬𑀁 𑀢𑀻𑀭𑁂𑀢𑁆𑀯𑀸 𑀧𑀼𑀦𑀤𑁂𑀯 𑀭𑀸𑀚𑀕𑀳𑀁 𑀧𑀘𑁆𑀘𑀸𑀕𑀜𑁆𑀙𑀺. 𑀬𑁂𑀦 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑀸𑀚𑀸𑀦𑀁 𑀫𑀸𑀕𑀥𑀁 𑀲𑁂𑀦𑀺𑀬𑀁 𑀩𑀺𑀫𑁆𑀩𑀺𑀲𑀸𑀭𑀁 𑀏𑀢𑀤𑀯𑁄𑀘 𑁋 ‘‘𑀯𑁂𑀲𑀸𑀮𑀻, 𑀤𑁂𑀯, 𑀇𑀤𑁆𑀥𑀸 𑀘𑁂𑀯 𑀨𑀺𑀢𑀸 𑀘 𑀩𑀳𑀼𑀚𑀦𑀸 𑀘 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑀸 𑀘 𑀲𑀼𑀪𑀺𑀓𑁆𑀔𑀸 𑀘; 𑀲𑀢𑁆𑀢 𑀘 𑀧𑀸𑀲𑀸𑀤𑀲𑀳𑀲𑁆𑀲𑀸𑀦𑀺…𑀧𑁂… 𑀢𑀸𑀬 𑀘 𑀯𑁂𑀲𑀸𑀮𑀻 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀉𑀧𑀲𑁄𑀪𑀢𑀺. 𑀲𑀸𑀥𑀼, 𑀤𑁂𑀯, 𑀫𑀬𑀫𑁆𑀧𑀺 𑀕𑀡𑀺𑀓𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀸’’𑀢𑀺 [𑀯𑀼𑀝𑁆𑀞𑀸𑀧𑁂𑀬𑁆𑀬𑀸𑀫 (𑀓.)]. ‘‘𑀢𑁂𑀦 𑀳𑀺, 𑀪𑀡𑁂, 𑀢𑀸𑀤𑀺𑀲𑀺𑀁 𑀓𑀼𑀫𑀸𑀭𑀺𑀁 𑀚𑀸𑀦𑀸𑀣 𑀬𑀁 𑀢𑀼𑀫𑁆𑀳𑁂 𑀕𑀡𑀺𑀓𑀁 𑀯𑀼𑀝𑁆𑀞𑀸𑀧𑁂𑀬𑁆𑀬𑀸𑀣𑀸’’𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀸𑀚𑀕𑀳𑁂 𑀲𑀸𑀮𑀯𑀢𑀻 𑀦𑀸𑀫 𑀓𑀼𑀫𑀸𑀭𑀻 𑀅𑀪𑀺𑀭𑀽𑀧𑀸 𑀳𑁄𑀢𑀺 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑀸. 𑀅𑀣 𑀔𑁄 𑀭𑀸𑀚𑀕𑀳𑀓𑁄 𑀦𑁂𑀕𑀫𑁄 𑀲𑀸𑀮𑀯𑀢𑀺𑀁 𑀓𑀼𑀫𑀸𑀭𑀺𑀁 𑀕𑀡𑀺𑀓𑀁 𑀯𑀼𑀝𑁆𑀞𑀸𑀧𑁂𑀲𑀺. 𑀅𑀣 𑀔𑁄 𑀲𑀸𑀮𑀯𑀢𑀻 𑀕𑀡𑀺𑀓𑀸 𑀦𑀘𑀺𑀭𑀲𑁆𑀲𑁂𑀯 𑀧𑀤𑀓𑁆𑀔𑀺𑀡𑀸 𑀅𑀳𑁄𑀲𑀺 𑀦𑀘𑁆𑀘𑁂 𑀘 𑀕𑀻𑀢𑁂 𑀘 𑀯𑀸𑀤𑀺𑀢𑁂 𑀘, 𑀅𑀪𑀺𑀲𑀝𑀸 𑀅𑀢𑁆𑀣𑀺𑀓𑀸𑀦𑀁 𑀅𑀢𑁆𑀣𑀺𑀓𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀧𑀝𑀺𑀲𑀢𑁂𑀦 𑀘 𑀭𑀢𑁆𑀢𑀺𑀁 𑀕𑀘𑁆𑀙𑀢𑀺. 𑀅𑀣 𑀔𑁄 𑀲𑀸𑀮𑀯𑀢𑀻 𑀕𑀡𑀺𑀓𑀸 𑀦𑀘𑀺𑀭𑀲𑁆𑀲𑁂𑀯 𑀕𑀩𑁆𑀪𑀺𑀦𑀻 𑀅𑀳𑁄𑀲𑀺. 𑀅𑀣 𑀔𑁄 𑀲𑀸𑀮𑀯𑀢𑀺𑀬𑀸 𑀕𑀡𑀺𑀓𑀸𑀬 𑀏𑀢𑀤𑀳𑁄𑀲𑀺 𑁋 ‘‘𑀇𑀢𑁆𑀣𑀻 𑀔𑁄 𑀕𑀩𑁆𑀪𑀺𑀦𑀻 𑀧𑀼𑀭𑀺𑀲𑀸𑀦𑀁 𑀅𑀫𑀦𑀸𑀧𑀸. 𑀲𑀘𑁂 𑀫𑀁 𑀓𑁄𑀘𑀺 𑀚𑀸𑀦𑀺𑀲𑁆𑀲𑀢𑀺 𑀲𑀸𑀮𑀯𑀢𑀻 𑀕𑀡𑀺𑀓𑀸 𑀕𑀩𑁆𑀪𑀺𑀦𑀻𑀢𑀺, 𑀲𑀩𑁆𑀩𑁄 𑀫𑁂 𑀲𑀓𑁆𑀓𑀸𑀭𑁄 𑀪𑀜𑁆𑀚𑀺𑀲𑁆𑀲𑀢𑀺 [𑀧𑀭𑀺𑀳𑀸𑀬𑀺𑀲𑁆𑀲𑀢𑀺 (𑀲𑀻. 𑀲𑁆𑀬𑀸.)]. 𑀬𑀁𑀦𑀽𑀦𑀸𑀳𑀁 𑀕𑀺𑀮𑀸𑀦𑀁 𑀧𑀝𑀺𑀯𑁂𑀤𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀲𑀸𑀮𑀯𑀢𑀻 𑀕𑀡𑀺𑀓𑀸 𑀤𑁄𑀯𑀸𑀭𑀺𑀓𑀁 𑀆𑀡𑀸𑀧𑁂𑀲𑀺 𑁋 ‘‘𑀫𑀸, 𑀪𑀡𑁂 𑀤𑁄𑀯𑀸𑀭𑀺𑀓, 𑀓𑁄𑀘𑀺 𑀧𑀼𑀭𑀺𑀲𑁄 𑀧𑀸𑀯𑀺𑀲𑀺. 𑀬𑁄 𑀘 𑀫𑀁 𑀧𑀼𑀘𑁆𑀙𑀢𑀺, ‘𑀕𑀺𑀮𑀸𑀦𑀸’𑀢𑀺 𑀧𑀝𑀺𑀯𑁂𑀤𑁂𑀳𑀻’’𑀢𑀺. ‘‘𑀏𑀯𑀁, 𑀅𑀬𑁆𑀬𑁂’’𑀢𑀺 𑀔𑁄 𑀲𑁄 𑀤𑁄𑀯𑀸𑀭𑀺𑀓𑁄 𑀲𑀸𑀮𑀯𑀢𑀺𑀬𑀸 𑀕𑀡𑀺𑀓𑀸𑀬 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄 𑀲𑀸𑀮𑀯𑀢𑀻 𑀕𑀡𑀺𑀓𑀸 𑀢𑀲𑁆𑀲 𑀕𑀩𑁆𑀪𑀲𑁆𑀲 𑀧𑀭𑀺𑀧𑀸𑀓𑀫𑀦𑁆𑀯𑀸𑀬 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀅𑀣 𑀔𑁄 𑀲𑀸𑀮𑀯𑀢𑀻 𑀕𑀡𑀺𑀓𑀸 𑀤𑀸𑀲𑀺𑀁 𑀆𑀡𑀸𑀧𑁂𑀲𑀺 𑁋 ‘‘𑀳𑀦𑁆𑀤, 𑀚𑁂, 𑀇𑀫𑀁 𑀤𑀸𑀭𑀓𑀁 𑀓𑀢𑁆𑀢𑀭𑀲𑀼𑀧𑁆𑀧𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀦𑀻𑀳𑀭𑀺𑀢𑁆𑀯𑀸 𑀲𑀗𑁆𑀓𑀸𑀭𑀓𑀽𑀝𑁂 𑀙𑀟𑁆𑀟𑁂𑀳𑀻’’𑀢𑀺. ‘‘𑀏𑀯𑀁, 𑀅𑀬𑁆𑀬𑁂’’𑀢𑀺 𑀔𑁄 𑀲𑀸 𑀤𑀸𑀲𑀻 𑀲𑀸𑀮𑀯𑀢𑀺𑀬𑀸 𑀕𑀡𑀺𑀓𑀸𑀬 𑀧𑀝𑀺𑀲𑁆𑀲𑀼𑀢𑁆𑀯𑀸 𑀢𑀁 𑀤𑀸𑀭𑀓𑀁 𑀓𑀢𑁆𑀢𑀭𑀲𑀼𑀧𑁆𑀧𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀦𑀻𑀳𑀭𑀺𑀢𑁆𑀯𑀸 𑀲𑀗𑁆𑀓𑀸𑀭𑀓𑀽𑀝𑁂 𑀙𑀟𑁆𑀟𑁂𑀲𑀺.

𑁩𑁨𑁮. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀪𑀬𑁄 𑀦𑀸𑀫 𑀭𑀸𑀚𑀓𑀼𑀫𑀸𑀭𑁄 𑀓𑀸𑀮𑀲𑁆𑀲𑁂𑀯 𑀭𑀸𑀚𑀼𑀧𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑁄 𑀅𑀤𑁆𑀤𑀲 𑀢𑀁 𑀤𑀸𑀭𑀓𑀁 𑀓𑀸𑀓𑁂𑀳𑀺 𑀲𑀫𑁆𑀧𑀭𑀺𑀓𑀺𑀡𑁆𑀡𑀁, 𑀤𑀺𑀲𑁆𑀯𑀸𑀦 𑀫𑀦𑀼𑀲𑁆𑀲𑁂 𑀧𑀼𑀘𑁆𑀙𑀺 𑁋 ‘‘𑀓𑀺𑀁 𑀏𑀢𑀁, 𑀪𑀡𑁂, 𑀓𑀸𑀓𑁂𑀳𑀺 𑀲𑀫𑁆𑀧𑀭𑀺𑀓𑀺𑀡𑁆𑀡’’𑀦𑁆𑀢𑀺? ‘‘𑀤𑀸𑀭𑀓𑁄, 𑀤𑁂𑀯𑀸’’𑀢𑀺. ‘‘𑀚𑀻𑀯𑀢𑀺, 𑀪𑀡𑁂’’𑀢𑀺? ‘‘𑀚𑀻𑀯𑀢𑀺, 𑀤𑁂𑀯𑀸’’𑀢𑀺. ‘‘𑀢𑁂𑀦 𑀳𑀺, 𑀪𑀡𑁂, 𑀢𑀁 𑀤𑀸𑀭𑀓𑀁 𑀅𑀫𑁆𑀳𑀸𑀓𑀁 𑀅𑀦𑁆𑀢𑁂𑀧𑀼𑀭𑀁 𑀦𑁂𑀢𑁆𑀯𑀸 𑀥𑀸𑀢𑀻𑀦𑀁 𑀤𑁂𑀣 𑀧𑁄𑀲𑁂𑀢𑀼’’𑀦𑁆𑀢𑀺. ‘‘𑀏𑀯𑀁, 𑀤𑁂𑀯𑀸’’𑀢𑀺 𑀔𑁄 𑀢𑁂 𑀫𑀦𑀼𑀲𑁆𑀲𑀸 𑀅𑀪𑀬𑀲𑁆𑀲 𑀭𑀸𑀚𑀓𑀼𑀫𑀸𑀭𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀢𑀁 𑀤𑀸𑀭𑀓𑀁 𑀅𑀪𑀬𑀲𑁆𑀲 𑀭𑀸𑀚𑀓𑀼𑀫𑀸𑀭𑀲𑁆𑀲 𑀅𑀦𑁆𑀢𑁂𑀧𑀼𑀭𑀁 𑀦𑁂𑀢𑁆𑀯𑀸 𑀥𑀸𑀢𑀻𑀦𑀁 𑀅𑀤𑀁𑀲𑀼 𑁋 ‘‘𑀧𑁄𑀲𑁂𑀣𑀸’’𑀢𑀺. 𑀢𑀲𑁆𑀲 𑀚𑀻𑀯𑀢𑀻𑀢𑀺 ‘𑀚𑀻𑀯𑀓𑁄’𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀓𑀼𑀫𑀸𑀭𑁂𑀦 𑀧𑁄𑀲𑀸𑀧𑀺𑀢𑁄𑀢𑀺 ‘𑀓𑁄𑀫𑀸𑀭𑀪𑀘𑁆𑀘𑁄’𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀦𑀘𑀺𑀭𑀲𑁆𑀲𑁂𑀯 𑀯𑀺𑀜𑁆𑀜𑀼𑀢𑀁 𑀧𑀸𑀧𑀼𑀡𑀺. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀬𑁂𑀦 𑀅𑀪𑀬𑁄 𑀭𑀸𑀚𑀓𑀼𑀫𑀸𑀭𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀪𑀬𑀁 𑀭𑀸𑀚𑀓𑀼𑀫𑀸𑀭𑀁 𑀏𑀢𑀤𑀯𑁄𑀘 𑁋 ‘‘𑀓𑀸 𑀫𑁂, 𑀤𑁂𑀯, 𑀫𑀸𑀢𑀸, 𑀓𑁄 𑀧𑀺𑀢𑀸’’𑀢𑀺? ‘‘𑀅𑀳𑀫𑁆𑀧𑀺 𑀔𑁄 𑀢𑁂, 𑀪𑀡𑁂 𑀚𑀻𑀯𑀓, 𑀫𑀸𑀢𑀭𑀁 𑀦 𑀚𑀸𑀦𑀸𑀫𑀺; 𑀅𑀧𑀺 𑀘𑀸𑀳𑀁 𑀢𑁂 𑀧𑀺𑀢𑀸; 𑀫𑀬𑀸𑀲𑀺 [𑀫𑀬𑀸𑀧𑀺 (𑀓.)] 𑀧𑁄𑀲𑀸𑀧𑀺𑀢𑁄’’𑀢𑀺. 𑀅𑀣 𑀔𑁄 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀇𑀫𑀸𑀦𑀺 𑀔𑁄 𑀭𑀸𑀚𑀓𑀼𑀮𑀸𑀦𑀺 𑀦 𑀲𑀼𑀓𑀭𑀸𑀦𑀺 𑀅𑀲𑀺𑀧𑁆𑀧𑁂𑀦 𑀉𑀧𑀚𑀻𑀯𑀺𑀢𑀼𑀁. 𑀬𑀁𑀦𑀽𑀦𑀸𑀳𑀁 𑀲𑀺𑀧𑁆𑀧𑀁 𑀲𑀺𑀓𑁆𑀔𑁂𑀬𑁆𑀬’’𑀦𑁆𑀢𑀺.

𑁩𑁨𑁯. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀢𑀓𑁆𑀓𑀲𑀺𑀮𑀸𑀬𑀁 [𑀢𑀓𑁆𑀓𑀲𑀻𑀮𑀸𑀬𑀁 (𑀓.)] 𑀤𑀺𑀲𑀸𑀧𑀸𑀫𑁄𑀓𑁆𑀔𑁄 𑀯𑁂𑀚𑁆𑀚𑁄 𑀧𑀝𑀺𑀯𑀲𑀢𑀺. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀅𑀪𑀬𑀁 𑀭𑀸𑀚𑀓𑀼𑀫𑀸𑀭𑀁 𑀅𑀦𑀸𑀧𑀼𑀘𑁆𑀙𑀸 𑀬𑁂𑀦 𑀢𑀓𑁆𑀓𑀲𑀺𑀮𑀸 𑀢𑁂𑀦 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀬𑁂𑀦 𑀢𑀓𑁆𑀓𑀲𑀺𑀮𑀸, 𑀬𑁂𑀦 𑀯𑁂𑀚𑁆𑀚𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀯𑁂𑀚𑁆𑀚𑀁 𑀏𑀢𑀤𑀯𑁄𑀘 𑁋 ‘‘𑀇𑀘𑁆𑀙𑀸𑀫𑀳𑀁, 𑀆𑀘𑀭𑀺𑀬, 𑀲𑀺𑀧𑁆𑀧𑀁 𑀲𑀺𑀓𑁆𑀔𑀺𑀢𑀼’’𑀦𑁆𑀢𑀺. ‘‘𑀢𑁂𑀦 𑀳𑀺, 𑀪𑀡𑁂 𑀚𑀻𑀯𑀓, 𑀲𑀺𑀓𑁆𑀔𑀲𑁆𑀲𑀽’’𑀢𑀺. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀩𑀳𑀼𑀜𑁆𑀘 𑀕𑀡𑁆𑀳𑀸𑀢𑀺 𑀮𑀳𑀼𑀜𑁆𑀘 𑀕𑀡𑁆𑀳𑀸𑀢𑀺 𑀲𑀼𑀝𑁆𑀞𑀼 𑀘 𑀉𑀧𑀥𑀸𑀭𑁂𑀢𑀺, 𑀕𑀳𑀺𑀢𑀜𑁆𑀘𑀲𑁆𑀲 𑀦 𑀲𑀫𑁆𑀫𑀼𑀲𑁆𑀲𑀢𑀺 [𑀦 𑀧𑀫𑀼𑀲𑁆𑀲𑀢𑀺 (𑀲𑀻. 𑀲𑁆𑀬𑀸.)]. 𑀅𑀣 𑀔𑁄 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀲𑀢𑁆𑀢𑀦𑁆𑀦𑀁 𑀯𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀏𑀢𑀤𑀳𑁄𑀲𑀺 𑁋 ‘‘𑀅𑀳𑀁, 𑀔𑁄 𑀩𑀳𑀼𑀜𑁆𑀘 𑀕𑀡𑁆𑀳𑀸𑀫𑀺 𑀮𑀳𑀼𑀜𑁆𑀘 𑀕𑀡𑁆𑀳𑀸𑀫𑀺 𑀲𑀼𑀝𑁆𑀞𑀼 𑀘 𑀉𑀧𑀥𑀸𑀭𑁂𑀫𑀺, 𑀕𑀳𑀺𑀢𑀜𑁆𑀘 𑀫𑁂 𑀦 𑀲𑀫𑁆𑀫𑀼𑀲𑁆𑀲𑀢𑀺, 𑀲𑀢𑁆𑀢 𑀘 𑀫𑁂 𑀯𑀲𑁆𑀲𑀸𑀦𑀺 𑀅𑀥𑀻𑀬𑀦𑁆𑀢𑀲𑁆𑀲, 𑀦𑀬𑀺𑀫𑀲𑁆𑀲 𑀲𑀺𑀧𑁆𑀧𑀲𑁆𑀲 𑀅𑀦𑁆𑀢𑁄 𑀧𑀜𑁆𑀜𑀸𑀬𑀢𑀺. 𑀓𑀤𑀸 𑀇𑀫𑀲𑁆𑀲 𑀲𑀺𑀧𑁆𑀧𑀲𑁆𑀲 𑀅𑀦𑁆𑀢𑁄 𑀧𑀜𑁆𑀜𑀸𑀬𑀺𑀲𑁆𑀲𑀢𑀻’’𑀢𑀺. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀬𑁂𑀦 𑀲𑁄 𑀯𑁂𑀚𑁆𑀚𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀯𑁂𑀚𑁆𑀚𑀁 𑀏𑀢𑀤𑀯𑁄𑀘 𑁋 ‘‘𑀅𑀳𑀁 𑀔𑁄, 𑀆𑀘𑀭𑀺𑀬, 𑀩𑀳𑀼𑀜𑁆𑀘 𑀕𑀡𑁆𑀳𑀸𑀫𑀺 𑀮𑀳𑀼𑀜𑁆𑀘 𑀕𑀡𑁆𑀳𑀸𑀫𑀺 𑀲𑀼𑀝𑁆𑀞𑀼 𑀘 𑀉𑀧𑀥𑀸𑀭𑁂𑀫𑀺, 𑀕𑀳𑀺𑀢𑀜𑁆𑀘 𑀫𑁂 𑀦 𑀲𑀫𑁆𑀫𑀼𑀲𑁆𑀲𑀢𑀺, 𑀲𑀢𑁆𑀢 𑀘 𑀫𑁂 𑀯𑀲𑁆𑀲𑀸𑀦𑀺 𑀅𑀥𑀻𑀬𑀦𑁆𑀢𑀲𑁆𑀲, 𑀦𑀬𑀺𑀫𑀲𑁆𑀲 𑀲𑀺𑀧𑁆𑀧𑀲𑁆𑀲 𑀅𑀦𑁆𑀢𑁄 𑀧𑀜𑁆𑀜𑀸𑀬𑀢𑀺. 𑀓𑀤𑀸 𑀇𑀫𑀲𑁆𑀲 𑀲𑀺𑀧𑁆𑀧𑀲𑁆𑀲 𑀅𑀦𑁆𑀢𑁄 𑀧𑀜𑁆𑀜𑀸𑀬𑀺𑀲𑁆𑀲𑀢𑀻’’𑀢𑀺? ‘‘𑀢𑁂𑀦 𑀳𑀺, 𑀪𑀡𑁂 𑀚𑀻𑀯𑀓, 𑀔𑀡𑀺𑀢𑁆𑀢𑀺𑀁 𑀆𑀤𑀸𑀬 𑀢𑀓𑁆𑀓𑀲𑀺𑀮𑀸𑀬 𑀲𑀫𑀦𑁆𑀢𑀸 𑀬𑁄𑀚𑀦𑀁 𑀆𑀳𑀺𑀡𑁆𑀟𑀺𑀢𑁆𑀯𑀸 𑀬𑀁 𑀓𑀺𑀜𑁆𑀘𑀺 𑀅𑀪𑁂𑀲𑀚𑁆𑀚𑀁 𑀧𑀲𑁆𑀲𑁂𑀬𑁆𑀬𑀸𑀲𑀺 𑀢𑀁 𑀆𑀳𑀭𑀸’’𑀢𑀺. ‘‘𑀏𑀯𑀁, 𑀆𑀘𑀭𑀺𑀬𑀸’’𑀢𑀺 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀢𑀲𑁆𑀲 𑀯𑁂𑀚𑁆𑀚𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀔𑀡𑀺𑀢𑁆𑀢𑀺𑀁 𑀆𑀤𑀸𑀬 𑀢𑀓𑁆𑀓𑀲𑀺𑀮𑀸𑀬 𑀲𑀫𑀦𑁆𑀢𑀸 𑀬𑁄𑀚𑀦𑀁 𑀆𑀳𑀺𑀡𑁆𑀟𑀦𑁆𑀢𑁄 𑀦 𑀓𑀺𑀜𑁆𑀘𑀺 𑀅𑀪𑁂𑀲𑀚𑁆𑀚𑀁 𑀅𑀤𑁆𑀤𑀲. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀬𑁂𑀦 𑀲𑁄 𑀯𑁂𑀚𑁆𑀚𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀯𑁂𑀚𑁆𑀚𑀁 𑀏𑀢𑀤𑀯𑁄𑀘 𑁋 ‘‘𑀆𑀳𑀺𑀡𑁆𑀟𑀦𑁆𑀢𑁄𑀫𑁆𑀳𑀺, 𑀆𑀘𑀭𑀺𑀬, 𑀢𑀓𑁆𑀓𑀲𑀺𑀮𑀸𑀬 𑀲𑀫𑀦𑁆𑀢𑀸 𑀬𑁄𑀚𑀦𑀁, 𑀦 𑀓𑀺𑀜𑁆𑀘𑀺 [𑀆𑀳𑀺𑀡𑁆𑀝𑀦𑁆𑀢𑁄 𑀦 𑀓𑀺𑀜𑁆𑀘𑀺 (𑀓.)] 𑀅𑀪𑁂𑀲𑀚𑁆𑀚𑀁 𑀅𑀤𑁆𑀤𑀲’’𑀦𑁆𑀢𑀺. ‘‘𑀲𑀼𑀲𑀺𑀓𑁆𑀔𑀺𑀢𑁄𑀲𑀺, 𑀪𑀡𑁂 𑀚𑀻𑀯𑀓. 𑀅𑀮𑀁 𑀢𑁂 𑀏𑀢𑁆𑀢𑀓𑀁 𑀚𑀻𑀯𑀺𑀓𑀸𑀬𑀸’’𑀢𑀺 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀧𑀭𑀺𑀢𑁆𑀢𑀁 𑀧𑀸𑀣𑁂𑀬𑁆𑀬𑀁 𑀧𑀸𑀤𑀸𑀲𑀺. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀢𑀁 𑀧𑀭𑀺𑀢𑁆𑀢𑀁 𑀧𑀸𑀣𑁂𑀬𑁆𑀬𑀁 𑀆𑀤𑀸𑀬 𑀬𑁂𑀦 𑀭𑀸𑀚𑀕𑀳𑀁 𑀢𑁂𑀦 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀢𑀁 𑀧𑀭𑀺𑀢𑁆𑀢𑀁 𑀧𑀸𑀣𑁂𑀬𑁆𑀬𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀸𑀓𑁂𑀢𑁂 𑀧𑀭𑀺𑀓𑁆𑀔𑀬𑀁 𑀅𑀕𑀫𑀸𑀲𑀺. 𑀅𑀣 𑀔𑁄 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀇𑀫𑁂 𑀔𑁄 𑀫𑀕𑁆𑀕𑀸 𑀓𑀦𑁆𑀢𑀸𑀭𑀸 𑀅𑀧𑁆𑀧𑁄𑀤𑀓𑀸 𑀅𑀧𑁆𑀧𑀪𑀓𑁆𑀔𑀸, 𑀦 𑀲𑀼𑀓𑀭𑀸 𑀅𑀧𑀸𑀣𑁂𑀬𑁆𑀬𑁂𑀦 𑀕𑀦𑁆𑀢𑀼𑀁. 𑀬𑀁𑀦𑀽𑀦𑀸𑀳𑀁 𑀧𑀸𑀣𑁂𑀬𑁆𑀬𑀁 𑀧𑀭𑀺𑀬𑁂𑀲𑁂𑀬𑁆𑀬’’𑀦𑁆𑀢𑀺.

𑀚𑀻𑀯𑀓𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁨𑁦𑁩. 𑀲𑁂𑀝𑁆𑀞𑀺𑀪𑀭𑀺𑀬𑀸𑀯𑀢𑁆𑀣𑀼

𑁩𑁩𑁦. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀸𑀓𑁂𑀢𑁂 𑀲𑁂𑀝𑁆𑀞𑀺𑀪𑀭𑀺𑀬𑀸𑀬 𑀲𑀢𑁆𑀢𑀯𑀲𑁆𑀲𑀺𑀓𑁄 𑀲𑀻𑀲𑀸𑀩𑀸𑀥𑁄 𑀳𑁄𑀢𑀺. 𑀩𑀳𑀽 𑀫𑀳𑀦𑁆𑀢𑀸 𑀫𑀳𑀦𑁆𑀢𑀸 𑀤𑀺𑀲𑀸𑀧𑀸𑀫𑁄𑀓𑁆𑀔𑀸 𑀯𑁂𑀚𑁆𑀚𑀸 𑀆𑀕𑀦𑁆𑀢𑁆𑀯𑀸 𑀦𑀸𑀲𑀓𑁆𑀔𑀺𑀁𑀲𑀼 𑀅𑀭𑁄𑀕𑀁 𑀓𑀸𑀢𑀼𑀁. 𑀩𑀳𑀼𑀁 𑀳𑀺𑀭𑀜𑁆𑀜𑀁 𑀆𑀤𑀸𑀬 𑀅𑀕𑀫𑀁𑀲𑀼. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀲𑀸𑀓𑁂𑀢𑀁 𑀧𑀯𑀺𑀲𑀺𑀢𑁆𑀯𑀸 𑀫𑀦𑀼𑀲𑁆𑀲𑁂 𑀧𑀼𑀘𑁆𑀙𑀺 𑁋 ‘‘𑀓𑁄, 𑀪𑀡𑁂, 𑀕𑀺𑀮𑀸𑀦𑁄, 𑀓𑀁 𑀢𑀺𑀓𑀺𑀘𑁆𑀙𑀸𑀫𑀻’’𑀢𑀺? ‘‘𑀏𑀢𑀺𑀲𑁆𑀲𑀸, 𑀆𑀘𑀭𑀺𑀬, 𑀲𑁂𑀝𑁆𑀞𑀺𑀪𑀭𑀺𑀬𑀸𑀬 𑀲𑀢𑁆𑀢𑀯𑀲𑁆𑀲𑀺𑀓𑁄 𑀲𑀻𑀲𑀸𑀩𑀸𑀥𑁄; 𑀕𑀘𑁆𑀙, 𑀆𑀘𑀭𑀺𑀬, 𑀲𑁂𑀝𑁆𑀞𑀺𑀪𑀭𑀺𑀬𑀁 𑀢𑀺𑀓𑀺𑀘𑁆𑀙𑀸𑀳𑀻’’𑀢𑀺. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀬𑁂𑀦 𑀲𑁂𑀝𑁆𑀞𑀺𑀲𑁆𑀲 𑀕𑀳𑀧𑀢𑀺𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀤𑁄𑀯𑀸𑀭𑀺𑀓𑀁 𑀆𑀡𑀸𑀧𑁂𑀲𑀺 𑁋 ‘‘𑀕𑀘𑁆𑀙, 𑀪𑀡𑁂 𑀤𑁄𑀯𑀸𑀭𑀺𑀓, 𑀲𑁂𑀝𑁆𑀞𑀺𑀪𑀭𑀺𑀬𑀸𑀬 𑀧𑀸𑀯𑀤 𑁋 ‘𑀯𑁂𑀚𑁆𑀚𑁄, 𑀅𑀬𑁆𑀬𑁂, 𑀆𑀕𑀢𑁄, 𑀲𑁄 𑀢𑀁 𑀤𑀝𑁆𑀞𑀼𑀓𑀸𑀫𑁄’’’𑀢𑀺. ‘‘𑀏𑀯𑀁, 𑀆𑀘𑀭𑀺𑀬𑀸’’𑀢𑀺 𑀔𑁄 𑀲𑁄 𑀤𑁄𑀯𑀸𑀭𑀺𑀓𑁄 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀲𑁂𑀝𑁆𑀞𑀺𑀪𑀭𑀺𑀬𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑁂𑀝𑁆𑀞𑀺𑀪𑀭𑀺𑀬𑀁 𑀏𑀢𑀤𑀯𑁄𑀘 𑁋 ‘‘𑀯𑁂𑀚𑁆𑀚𑁄, 𑀅𑀬𑁆𑀬𑁂, 𑀆𑀕𑀢𑁄; 𑀲𑁄 𑀢𑀁 𑀤𑀝𑁆𑀞𑀼𑀓𑀸𑀫𑁄’’𑀢𑀺. ‘‘𑀓𑀻𑀤𑀺𑀲𑁄, 𑀪𑀡𑁂 𑀤𑁄𑀯𑀸𑀭𑀺𑀓, 𑀯𑁂𑀚𑁆𑀚𑁄’’𑀢𑀺? ‘‘𑀤𑀳𑀭𑀓𑁄, 𑀅𑀬𑁆𑀬𑁂’’𑀢𑀺. ‘‘𑀅𑀮𑀁, 𑀪𑀡𑁂 𑀤𑁄𑀯𑀸𑀭𑀺𑀓, 𑀓𑀺𑀁 𑀫𑁂 𑀤𑀳𑀭𑀓𑁄 𑀯𑁂𑀚𑁆𑀚𑁄 𑀓𑀭𑀺𑀲𑁆𑀲𑀢𑀺? 𑀩𑀳𑀽 𑀫𑀳𑀦𑁆𑀢𑀸 𑀫𑀳𑀦𑁆𑀢𑀸 𑀤𑀺𑀲𑀸𑀧𑀸𑀫𑁄𑀓𑁆𑀔𑀸 𑀯𑁂𑀚𑁆𑀚𑀸 𑀆𑀕𑀦𑁆𑀢𑁆𑀯𑀸 𑀦𑀸𑀲𑀓𑁆𑀔𑀺𑀁𑀲𑀼 𑀅𑀭𑁄𑀕𑀁 𑀓𑀸𑀢𑀼𑀁. 𑀩𑀳𑀼𑀁 𑀳𑀺𑀭𑀜𑁆𑀜𑀁 𑀆𑀤𑀸𑀬 𑀅𑀕𑀫𑀁𑀲𑀽’’𑀢𑀺. 𑀅𑀣 𑀔𑁄 𑀲𑁄 𑀤𑁄𑀯𑀸𑀭𑀺𑀓𑁄 𑀬𑁂𑀦 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀚𑀻𑀯𑀓𑀁 𑀓𑁄𑀫𑀸𑀭𑀪𑀘𑁆𑀘𑀁 𑀏𑀢𑀤𑀯𑁄𑀘 𑁋 ‘‘𑀲𑁂𑀝𑁆𑀞𑀺𑀪𑀭𑀺𑀬𑀸, 𑀆𑀘𑀭𑀺𑀬, 𑀏𑀯𑀫𑀸𑀳 𑁋 ‘𑀅𑀮𑀁, 𑀪𑀡𑁂 𑀤𑁄𑀯𑀸𑀭𑀺𑀓, 𑀓𑀺𑀁 𑀫𑁂 𑀤𑀳𑀭𑀓𑁄 𑀯𑁂𑀚𑁆𑀚𑁄 𑀓𑀭𑀺𑀲𑁆𑀲𑀢𑀺? 𑀩𑀳𑀽 𑀫𑀳𑀦𑁆𑀢𑀸 𑀫𑀳𑀦𑁆𑀢𑀸 𑀤𑀺𑀲𑀸𑀧𑀸𑀫𑁄𑀓𑁆𑀔𑀸 𑀯𑁂𑀚𑁆𑀚𑀸 𑀆𑀕𑀦𑁆𑀢𑁆𑀯𑀸 𑀦𑀸𑀲𑀓𑁆𑀔𑀺𑀁𑀲𑀼 𑀅𑀭𑁄𑀕𑀁 𑀓𑀸𑀢𑀼𑀁. 𑀩𑀳𑀼𑀁 𑀳𑀺𑀭𑀜𑁆𑀜𑀁 𑀆𑀤𑀸𑀬 𑀅𑀕𑀫𑀁𑀲𑀽’’’𑀢𑀺. ‘‘𑀕𑀘𑁆𑀙, 𑀪𑀡𑁂 𑀤𑁄𑀯𑀸𑀭𑀺𑀓, 𑀲𑁂𑀝𑁆𑀞𑀺𑀪𑀭𑀺𑀬𑀸𑀬 𑀧𑀸𑀯𑀤 𑁋 ‘𑀯𑁂𑀚𑁆𑀚𑁄, 𑀅𑀬𑁆𑀬𑁂, 𑀏𑀯𑀫𑀸𑀳 𑁋 𑀫𑀸 𑀓𑀺𑀭, 𑀅𑀬𑁆𑀬𑁂, 𑀧𑀼𑀭𑁂 𑀓𑀺𑀜𑁆𑀘𑀺 𑀅𑀤𑀸𑀲𑀺. 𑀬𑀤𑀸 𑀅𑀭𑁄𑀕𑀸 𑀅𑀳𑁄𑀲𑀺 𑀢𑀤𑀸 𑀬𑀁 𑀇𑀘𑁆𑀙𑁂𑀬𑁆𑀬𑀸𑀲𑀺 𑀢𑀁 𑀤𑀚𑁆𑀚𑁂𑀬𑁆𑀬𑀸𑀲𑀻’’’𑀢𑀺. ‘‘𑀏𑀯𑀁, 𑀆𑀘𑀭𑀺𑀬𑀸’’𑀢𑀺 𑀔𑁄 𑀲𑁄 𑀤𑁄𑀯𑀸𑀭𑀺𑀓𑁄 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀲𑁂𑀝𑁆𑀞𑀺𑀪𑀭𑀺𑀬𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑁂𑀝𑁆𑀞𑀺𑀪𑀭𑀺𑀬𑀁 𑀏𑀢𑀤𑀯𑁄𑀘 𑁋 ‘‘𑀯𑁂𑀚𑁆𑀚𑁄, 𑀅𑀬𑁆𑀬𑁂, 𑀏𑀯𑀫𑀸𑀳 𑁋 ‘𑀫𑀸 𑀓𑀺𑀭, 𑀅𑀬𑁆𑀬𑁂, 𑀧𑀼𑀭𑁂 𑀓𑀺𑀜𑁆𑀘𑀺 𑀅𑀤𑀸𑀲𑀺. 𑀬𑀤𑀸 𑀅𑀭𑁄𑀕𑀸 𑀅𑀳𑁄𑀲𑀺 𑀢𑀤𑀸 𑀬𑀁 𑀇𑀘𑁆𑀙𑁂𑀬𑁆𑀬𑀸𑀲𑀺 𑀢𑀁 𑀤𑀚𑁆𑀚𑁂𑀬𑁆𑀬𑀸𑀲𑀻’’’𑀢𑀺. ‘‘𑀢𑁂𑀦 𑀳𑀺, 𑀪𑀡𑁂 𑀤𑁄𑀯𑀸𑀭𑀺𑀓, 𑀯𑁂𑀚𑁆𑀚𑁄 𑀆𑀕𑀘𑁆𑀙𑀢𑀽’’𑀢𑀺. ‘‘𑀏𑀯𑀁, 𑀅𑀬𑁆𑀬𑁂’’𑀢𑀺 𑀔𑁄 𑀲𑁄 𑀤𑁄𑀯𑀸𑀭𑀺𑀓𑁄 𑀲𑁂𑀝𑁆𑀞𑀺𑀪𑀭𑀺𑀬𑀸𑀬 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀚𑀻𑀯𑀓𑀁 𑀓𑁄𑀫𑀸𑀭𑀪𑀘𑁆𑀘𑀁 𑀏𑀢𑀤𑀯𑁄𑀘 𑁋 ‘‘𑀲𑁂𑀝𑁆𑀞𑀺𑀪𑀭𑀺𑀬𑀸 𑀢𑀁, 𑀆𑀘𑀭𑀺𑀬, 𑀧𑀓𑁆𑀓𑁄𑀲𑀢𑀻’’𑀢𑀺.

𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀬𑁂𑀦 𑀲𑁂𑀝𑁆𑀞𑀺𑀪𑀭𑀺𑀬𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑁂𑀝𑁆𑀞𑀺𑀪𑀭𑀺𑀬𑀸𑀬 𑀯𑀺𑀓𑀸𑀭𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑁂𑀝𑁆𑀞𑀺𑀪𑀭𑀺𑀬𑀁 𑀏𑀢𑀤𑀯𑁄𑀘 𑁋 ‘‘𑀧𑀲𑀢𑁂𑀦, 𑀅𑀬𑁆𑀬𑁂, 𑀲𑀧𑁆𑀧𑀺𑀦𑀸 𑀅𑀢𑁆𑀣𑁄’’𑀢𑀺. 𑀅𑀣 𑀔𑁄 𑀲𑁂𑀝𑁆𑀞𑀺𑀪𑀭𑀺𑀬𑀸 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀧𑀲𑀢𑀁 𑀲𑀧𑁆𑀧𑀺𑀁 𑀤𑀸𑀧𑁂𑀲𑀺. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀢𑀁 𑀧𑀲𑀢𑀁 𑀲𑀧𑁆𑀧𑀺𑀁 𑀦𑀸𑀦𑀸𑀪𑁂𑀲𑀚𑁆𑀚𑁂𑀳𑀺 𑀦𑀺𑀧𑁆𑀧𑀘𑀺𑀢𑁆𑀯𑀸 𑀲𑁂𑀝𑁆𑀞𑀺𑀪𑀭𑀺𑀬𑀁 𑀫𑀜𑁆𑀘𑀓𑁂 𑀉𑀢𑁆𑀢𑀸𑀦𑀁 𑀦𑀺𑀧𑀸𑀢𑁂𑀢𑁆𑀯𑀸 [𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 (𑀲𑀻. 𑀲𑁆𑀬𑀸.)] 𑀦𑀢𑁆𑀣𑀼𑀢𑁄 𑀅𑀤𑀸𑀲𑀺. 𑀅𑀣 𑀔𑁄 𑀢𑀁 𑀲𑀧𑁆𑀧𑀺𑀁 𑀦𑀢𑁆𑀣𑀼𑀢𑁄 𑀤𑀺𑀦𑁆𑀦𑀁 𑀫𑀼𑀔𑀢𑁄 𑀉𑀕𑁆𑀕𑀜𑁆𑀙𑀺. 𑀅𑀣 𑀔𑁄 𑀲𑁂𑀝𑁆𑀞𑀺𑀪𑀭𑀺𑀬𑀸 𑀧𑀝𑀺𑀕𑁆𑀕𑀳𑁂 𑀦𑀺𑀝𑁆𑀞𑀼𑀪𑀺𑀢𑁆𑀯𑀸 𑀤𑀸𑀲𑀺𑀁 𑀆𑀡𑀸𑀧𑁂𑀲𑀺 𑁋 ‘‘𑀳𑀦𑁆𑀤, 𑀚𑁂, 𑀇𑀫𑀁 𑀲𑀧𑁆𑀧𑀺𑀁 𑀧𑀺𑀘𑀼𑀦𑀸 𑀕𑀡𑁆𑀳𑀸𑀳𑀻’’𑀢𑀺. 𑀅𑀣 𑀔𑁄 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀘𑁆𑀙𑀭𑀺𑀬𑀁 [𑀅𑀘𑁆𑀙𑀭𑀺𑀬𑀁 𑀯𑀢 𑀪𑁄 (𑀲𑁆𑀬𑀸.)] 𑀬𑀸𑀯 𑀮𑀽𑀔𑀸𑀬𑀁 𑀖𑀭𑀡𑀻, 𑀬𑀢𑁆𑀭 𑀳𑀺 𑀦𑀸𑀫 𑀇𑀫𑀁 𑀙𑀟𑁆𑀟𑀦𑀻𑀬𑀥𑀫𑁆𑀫𑀁 𑀲𑀧𑁆𑀧𑀺𑀁 𑀧𑀺𑀘𑀼𑀦𑀸 𑀕𑀸𑀳𑀸𑀧𑁂𑀲𑁆𑀲𑀢𑀺. 𑀩𑀳𑀼𑀓𑀸𑀦𑀺 𑀘 𑀫𑁂 𑀫𑀳𑀕𑁆𑀖𑀸𑀦𑀺 [𑀫𑀳𑀕𑁆𑀖𑀸𑀦𑀺 𑀫𑀳𑀕𑁆𑀖𑀸𑀦𑀺 (𑀲𑀻. 𑀲𑁆𑀬𑀸.)] 𑀪𑁂𑀲𑀚𑁆𑀚𑀸𑀦𑀺 𑀉𑀧𑀕𑀢𑀸𑀦𑀺. 𑀓𑀺𑀫𑁆𑀧𑀺 𑀫𑀸𑀬𑀁 𑀓𑀺𑀜𑁆𑀘𑀺 [𑀓𑀜𑁆𑀘𑀺 (𑀲𑁆𑀬𑀸.)] 𑀤𑁂𑀬𑁆𑀬𑀥𑀫𑁆𑀫𑀁 𑀤𑀲𑁆𑀲𑀢𑀻’’𑀢𑀺. 𑀅𑀣 𑀔𑁄 𑀲𑁂𑀝𑁆𑀞𑀺𑀪𑀭𑀺𑀬𑀸 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀯𑀺𑀓𑀸𑀭𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀚𑀻𑀯𑀓𑀁 𑀓𑁄𑀫𑀸𑀭𑀪𑀘𑁆𑀘𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀲𑁆𑀲 𑀢𑁆𑀯𑀁, 𑀆𑀘𑀭𑀺𑀬, 𑀯𑀺𑀫𑀦𑁄𑀲𑀻’’𑀢𑀺? 𑀇𑀥 𑀫𑁂 𑀏𑀢𑀤𑀳𑁄𑀲𑀺 𑁋 ‘‘𑀅𑀘𑁆𑀙𑀭𑀺𑀬𑀁 𑀬𑀸𑀯 𑀮𑀽𑀔𑀸𑀬𑀁 𑀥𑀭𑀡𑀻, 𑀬𑀢𑁆𑀭 𑀳𑀺 𑀦𑀸𑀫 𑀇𑀫𑀁 𑀙𑀟𑁆𑀟𑀦𑀻𑀬𑀥𑀫𑁆𑀫𑀁 𑀲𑀧𑁆𑀧𑀺𑀁 𑀧𑀺𑀘𑀼𑀦𑀸 𑀕𑀸𑀳𑀸𑀧𑁂𑀲𑁆𑀲𑀢𑀺. 𑀩𑀳𑀼𑀓𑀸𑀦𑀺 𑀘 𑀫𑁂 𑀫𑀳𑀕𑁆𑀖𑀸𑀦𑀺 𑀲𑀚𑁆𑀚𑀸𑀦𑀺 𑀉𑀧𑀕𑀢𑀸𑀦𑀺. 𑀓𑀺𑀫𑁆𑀧𑀺 𑀫𑀸𑀬𑀁 𑀓𑀺𑀜𑁆𑀘𑀺 𑀤𑁂𑀬𑁆𑀬𑀥𑀫𑁆𑀫𑀁 𑀤𑀲𑁆𑀲𑀢𑀻’’𑀢𑀺. ‘‘𑀫𑀬𑀁 𑀔𑁄, 𑀆𑀘𑀭𑀺𑀬, 𑀆𑀕𑀸𑀭𑀺𑀓𑀸 𑀦𑀸𑀫 𑀉𑀧𑀚𑀸𑀦𑀸𑀫𑁂𑀢𑀲𑁆𑀲 𑀲𑀁𑀬𑀫𑀲𑁆𑀲. 𑀯𑀭𑀫𑁂𑀢𑀁 𑀲𑀧𑁆𑀧𑀺 𑀤𑀸𑀲𑀸𑀦𑀁 𑀯𑀸 𑀓𑀫𑁆𑀫𑀓𑀭𑀸𑀦𑀁 𑀯𑀸 𑀧𑀸𑀤𑀩𑁆𑀪𑀜𑁆𑀚𑀦𑀁 𑀯𑀸 𑀧𑀤𑀻𑀧𑀓𑀭𑀡𑁂 𑀯𑀸 𑀆𑀲𑀺𑀢𑁆𑀢𑀁. 𑀫𑀸 𑀔𑁄 𑀢𑁆𑀯𑀁, 𑀆𑀘𑀭𑀺𑀬, 𑀯𑀺𑀫𑀦𑁄 𑀅𑀳𑁄𑀲𑀺. 𑀦 𑀢𑁂 𑀤𑁂𑀬𑁆𑀬𑀥𑀫𑁆𑀫𑁄 𑀳𑀸𑀬𑀺𑀲𑁆𑀲𑀢𑀻’’𑀢𑀺. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀲𑁂𑀝𑁆𑀞𑀺𑀪𑀭𑀺𑀬𑀸𑀬 𑀲𑀢𑁆𑀢𑀯𑀲𑁆𑀲𑀺𑀓𑀁 𑀲𑀻𑀲𑀸𑀩𑀸𑀥𑀁 𑀏𑀓𑁂𑀦𑁂𑀯 𑀦𑀢𑁆𑀣𑀼𑀓𑀫𑁆𑀫𑁂𑀦 𑀅𑀧𑀓𑀟𑁆𑀠𑀺. 𑀅𑀣 𑀔𑁄 𑀲𑁂𑀝𑁆𑀞𑀺𑀪𑀭𑀺𑀬𑀸 𑀅𑀭𑁄𑀕𑀸 𑀲𑀫𑀸𑀦𑀸 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀘𑀢𑁆𑀢𑀸𑀭𑀺 𑀲𑀳𑀲𑁆𑀲𑀸𑀦𑀺 𑀧𑀸𑀤𑀸𑀲𑀺. 𑀧𑀼𑀢𑁆𑀢𑁄 𑁋 𑀫𑀸𑀢𑀸 𑀫𑁂 𑀅𑀭𑁄𑀕𑀸 𑀞𑀺𑀢𑀸𑀢𑀺 𑀘𑀢𑁆𑀢𑀸𑀭𑀺 𑀲𑀳𑀲𑁆𑀲𑀸𑀦𑀺 𑀧𑀸𑀤𑀸𑀲𑀺. 𑀲𑀼𑀡𑀺𑀲𑀸 𑁋 𑀲𑀲𑁆𑀲𑀼 𑀫𑁂 𑀅𑀭𑁄𑀕𑀸 𑀞𑀺𑀢𑀸𑀢𑀺 𑀘𑀢𑁆𑀢𑀸𑀭𑀺 𑀲𑀳𑀲𑁆𑀲𑀸𑀦𑀺 𑀧𑀸𑀤𑀸𑀲𑀺. 𑀲𑁂𑀝𑁆𑀞𑀺 𑀕𑀳𑀧𑀢𑀺 𑁋 𑀪𑀭𑀺𑀬𑀸 𑀫𑁂 𑀅𑀭𑁄𑀕𑀸 𑀞𑀺𑀢𑀸𑀢𑀺 𑀘𑀢𑁆𑀢𑀸𑀭𑀺 𑀲𑀳𑀲𑁆𑀲𑀸𑀦𑀺 𑀧𑀸𑀤𑀸𑀲𑀺 𑀤𑀸𑀲𑀜𑁆𑀘 𑀤𑀸𑀲𑀺𑀜𑁆𑀘 𑀅𑀲𑁆𑀲𑀭𑀣𑀜𑁆𑀘.

𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀢𑀸𑀦𑀺 𑀲𑁄𑀴𑀲𑀲𑀳𑀲𑁆𑀲𑀸𑀦𑀺 𑀆𑀤𑀸𑀬 𑀤𑀸𑀲𑀜𑁆𑀘 𑀤𑀸𑀲𑀺𑀜𑁆𑀘 𑀅𑀲𑁆𑀲𑀭𑀣𑀜𑁆𑀘 𑀬𑁂𑀦 𑀭𑀸𑀚𑀕𑀳𑀁 𑀢𑁂𑀦 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀬𑁂𑀦 𑀭𑀸𑀚𑀕𑀳𑀁 𑀬𑁂𑀦 𑀅𑀪𑀬𑁄 𑀭𑀸𑀚𑀓𑀼𑀫𑀸𑀭𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀪𑀬𑀁 𑀭𑀸𑀚𑀓𑀼𑀫𑀸𑀭𑀁 𑀏𑀢𑀤𑀯𑁄𑀘 𑁋 ‘‘𑀇𑀤𑀁 𑀫𑁂, 𑀤𑁂𑀯, 𑀧𑀞𑀫𑀓𑀫𑁆𑀫𑀁 𑀲𑁄𑀴𑀲𑀲𑀳𑀲𑁆𑀲𑀸𑀦𑀺 𑀤𑀸𑀲𑁄 𑀘 𑀤𑀸𑀲𑀻 𑀘 𑀅𑀲𑁆𑀲𑀭𑀣𑁄 𑀘. 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀫𑁂 𑀤𑁂𑀯𑁄 𑀧𑁄𑀲𑀸𑀯𑀦𑀺𑀓’’𑀦𑁆𑀢𑀺. ‘‘𑀅𑀮𑀁, 𑀪𑀡𑁂 𑀚𑀻𑀯𑀓; 𑀢𑀼𑀬𑁆𑀳𑀫𑁂𑀯 𑀳𑁄𑀢𑀼. 𑀅𑀫𑁆𑀳𑀸𑀓𑀜𑁆𑀜𑁂𑀯 𑀅𑀦𑁆𑀢𑁂𑀧𑀼𑀭𑁂 𑀦𑀺𑀯𑁂𑀲𑀦𑀁 𑀫𑀸𑀧𑁂𑀳𑀻’’𑀢𑀺. ‘‘𑀏𑀯𑀁, 𑀤𑁂𑀯𑀸’’𑀢𑀺 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀅𑀪𑀬𑀲𑁆𑀲 𑀭𑀸𑀚𑀓𑀼𑀫𑀸𑀭𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀅𑀪𑀬𑀲𑁆𑀲 𑀭𑀸𑀚𑀓𑀼𑀫𑀸𑀭𑀲𑁆𑀲 𑀅𑀦𑁆𑀢𑁂𑀧𑀼𑀭𑁂 𑀦𑀺𑀯𑁂𑀲𑀦𑀁 𑀫𑀸𑀧𑁂𑀲𑀺.

𑀲𑁂𑀝𑁆𑀞𑀺𑀪𑀭𑀺𑀬𑀸𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁨𑁦𑁪. 𑀩𑀺𑀫𑁆𑀩𑀺𑀲𑀸𑀭𑀭𑀸𑀚𑀯𑀢𑁆𑀣𑀼

𑁩𑁩𑁧. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀲𑁂𑀦𑀺𑀬𑀲𑁆𑀲 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀪𑀕𑀦𑁆𑀤𑀮𑀸𑀩𑀸𑀥𑁄 𑀳𑁄𑀢𑀺. 𑀲𑀸𑀝𑀓𑀸 𑀮𑁄𑀳𑀺𑀢𑁂𑀦 𑀫𑀓𑁆𑀔𑀺𑀬𑀦𑁆𑀢𑀺. 𑀤𑁂𑀯𑀺𑀬𑁄 𑀤𑀺𑀲𑁆𑀯𑀸 𑀉𑀧𑁆𑀧𑀡𑁆𑀟𑁂𑀦𑁆𑀢𑀺 𑁋 ‘‘𑀉𑀢𑀼𑀦𑀻 𑀤𑀸𑀦𑀺 𑀤𑁂𑀯𑁄, 𑀧𑀼𑀧𑁆𑀨𑀁 𑀤𑁂𑀯𑀲𑁆𑀲 𑀉𑀧𑁆𑀧𑀦𑁆𑀦𑀁, 𑀦 𑀘𑀺𑀭𑀁 [𑀦𑀘𑀺𑀭𑀲𑁆𑀲𑁂𑀯 (𑀲𑁆𑀬𑀸.)] 𑀤𑁂𑀯𑁄 𑀯𑀺𑀚𑀸𑀬𑀺𑀲𑁆𑀲𑀢𑀻’’𑀢𑀺. 𑀢𑁂𑀦 𑀭𑀸𑀚𑀸 𑀫𑀗𑁆𑀓𑀼 𑀳𑁄𑀢𑀺. 𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀅𑀪𑀬𑀁 𑀭𑀸𑀚𑀓𑀼𑀫𑀸𑀭𑀁 𑀏𑀢𑀤𑀯𑁄𑀘 𑁋 ‘‘𑀫𑀬𑁆𑀳𑀁 𑀔𑁄, 𑀪𑀡𑁂 𑀅𑀪𑀬, 𑀢𑀸𑀤𑀺𑀲𑁄 𑀆𑀩𑀸𑀥𑁄, 𑀲𑀸𑀝𑀓𑀸 𑀮𑁄𑀳𑀺𑀢𑁂𑀦 𑀫𑀓𑁆𑀔𑀺𑀬𑀦𑁆𑀢𑀺, 𑀤𑁂𑀯𑀺𑀬𑁄 𑀫𑀁 𑀤𑀺𑀲𑁆𑀯𑀸 𑀉𑀧𑁆𑀧𑀡𑁆𑀟𑁂𑀦𑁆𑀢𑀺 𑁋 ‘𑀉𑀢𑀼𑀦𑀻 𑀤𑀸𑀦𑀺 𑀤𑁂𑀯𑁄, 𑀧𑀼𑀧𑁆𑀨𑀁 𑀤𑁂𑀯𑀲𑁆𑀲 𑀉𑀧𑁆𑀧𑀦𑁆𑀦𑀁, 𑀦 𑀘𑀺𑀭𑀁 𑀤𑁂𑀯𑁄 𑀯𑀺𑀚𑀸𑀬𑀺𑀲𑁆𑀲𑀢𑀻’𑀢𑀺. 𑀇𑀗𑁆𑀖, 𑀪𑀡𑁂 𑀅𑀪𑀬, 𑀢𑀸𑀤𑀺𑀲𑀁 𑀯𑁂𑀚𑁆𑀚𑀁 𑀚𑀸𑀦𑀸𑀳𑀺 𑀬𑁄 𑀫𑀁 𑀢𑀺𑀓𑀺𑀘𑁆𑀙𑁂𑀬𑁆𑀬𑀸’’𑀢𑀺. ‘‘𑀅𑀬𑀁, 𑀤𑁂𑀯, 𑀅𑀫𑁆𑀳𑀸𑀓𑀁 𑀚𑀻𑀯𑀓𑁄 𑀯𑁂𑀚𑁆𑀚𑁄 𑀢𑀭𑀼𑀡𑁄 𑀪𑀤𑁆𑀭𑀓𑁄. 𑀲𑁄 𑀤𑁂𑀯𑀁 𑀢𑀺𑀓𑀺𑀘𑁆𑀙𑀺𑀲𑁆𑀲𑀢𑀻’’𑀢𑀺. ‘‘𑀢𑁂𑀦 𑀳𑀺, 𑀪𑀡𑁂 𑀅𑀪𑀬, 𑀚𑀻𑀯𑀓𑀁 𑀯𑁂𑀚𑁆𑀚𑀁 𑀆𑀡𑀸𑀧𑁂𑀳𑀺; 𑀲𑁄 𑀫𑀁 𑀢𑀺𑀓𑀺𑀘𑁆𑀙𑀺𑀲𑁆𑀲𑀢𑀻’’𑀢𑀺. 𑀅𑀣 𑀔𑁄 𑀅𑀪𑀬𑁄 𑀭𑀸𑀚𑀓𑀼𑀫𑀸𑀭𑁄 𑀚𑀻𑀯𑀓𑀁 𑀓𑁄𑀫𑀸𑀭𑀪𑀘𑁆𑀘𑀁 𑀆𑀡𑀸𑀧𑁂𑀲𑀺 𑁋 ‘‘𑀕𑀘𑁆𑀙, 𑀪𑀡𑁂 𑀚𑀻𑀯𑀓, 𑀭𑀸𑀚𑀸𑀦𑀁 𑀢𑀺𑀓𑀺𑀘𑁆𑀙𑀸𑀳𑀻’’𑀢𑀺. ‘‘𑀏𑀯𑀁, 𑀤𑁂𑀯𑀸’’𑀢𑀺 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀅𑀪𑀬𑀲𑁆𑀲 𑀭𑀸𑀚𑀓𑀼𑀫𑀸𑀭𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀦𑀔𑁂𑀦 𑀪𑁂𑀲𑀚𑁆𑀚𑀁 𑀆𑀤𑀸𑀬 𑀬𑁂𑀦 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑀸𑀚𑀸𑀦𑀁 𑀫𑀸𑀕𑀥𑀁 𑀲𑁂𑀦𑀺𑀬𑀁 𑀩𑀺𑀫𑁆𑀩𑀺𑀲𑀸𑀭𑀁 𑀏𑀢𑀤𑀯𑁄𑀘 𑁋 ‘‘𑀆𑀩𑀸𑀥𑀁 𑀢𑁂, 𑀤𑁂𑀯, 𑀧𑀲𑁆𑀲𑀸𑀫𑀸’’𑀢𑀺 [𑀧𑀲𑁆𑀲𑀸𑀫𑀻𑀢𑀺 (𑀲𑁆𑀬𑀸.)]. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀲𑁂𑀦𑀺𑀬𑀲𑁆𑀲 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀪𑀕𑀦𑁆𑀤𑀮𑀸𑀩𑀸𑀥𑀁 𑀏𑀓𑁂𑀦𑁂𑀯 𑀆𑀮𑁂𑀧𑁂𑀦 𑀅𑀧𑀓𑀟𑁆𑀠𑀺. 𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀅𑀭𑁄𑀕𑁄 𑀲𑀫𑀸𑀦𑁄 𑀧𑀜𑁆𑀘 𑀇𑀢𑁆𑀣𑀺𑀲𑀢𑀸𑀦𑀺 𑀲𑀩𑁆𑀩𑀸𑀮𑀗𑁆𑀓𑀸𑀭𑀁 𑀪𑀽𑀲𑀸𑀧𑁂𑀢𑁆𑀯𑀸 𑀑𑀫𑀼𑀜𑁆𑀘𑀸𑀧𑁂𑀢𑁆𑀯𑀸 𑀧𑀼𑀜𑁆𑀚𑀁 𑀓𑀸𑀭𑀸𑀧𑁂𑀢𑁆𑀯𑀸 𑀚𑀻𑀯𑀓𑀁 𑀓𑁄𑀫𑀸𑀭𑀪𑀘𑁆𑀘𑀁 𑀏𑀢𑀤𑀯𑁄𑀘 𑁋 ‘‘𑀏𑀢𑀁, 𑀪𑀡𑁂 𑀚𑀻𑀯𑀓, 𑀧𑀜𑁆𑀘𑀦𑁆𑀦𑀁 𑀇𑀢𑁆𑀣𑀺𑀲𑀢𑀸𑀦𑀁 𑀲𑀩𑁆𑀩𑀸𑀮𑀗𑁆𑀓𑀸𑀭𑀁 𑀢𑀼𑀬𑁆𑀳𑀁 𑀳𑁄𑀢𑀽’’𑀢𑀺. ‘‘𑀅𑀮𑀁, 𑀤𑁂𑀯, 𑀅𑀥𑀺𑀓𑀸𑀭𑀁 𑀫𑁂 𑀤𑁂𑀯𑁄 𑀲𑀭𑀢𑀽’’𑀢𑀺. ‘‘𑀢𑁂𑀦 𑀳𑀺, 𑀪𑀡𑁂 𑀚𑀻𑀯𑀓, 𑀫𑀁 𑀉𑀧𑀝𑁆𑀞𑀳, 𑀇𑀢𑁆𑀣𑀸𑀕𑀸𑀭𑀜𑁆𑀘, 𑀩𑀼𑀤𑁆𑀥𑀧𑁆𑀧𑀫𑀼𑀔𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖’’𑀦𑁆𑀢𑀺. ‘‘𑀏𑀯𑀁, 𑀤𑁂𑀯𑀸’’𑀢𑀺 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀲𑁂𑀦𑀺𑀬𑀲𑁆𑀲 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀺.

𑀩𑀺𑀫𑁆𑀩𑀺𑀲𑀸𑀭𑀭𑀸𑀚𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁨𑁦𑁫. 𑀭𑀸𑀚𑀕𑀳𑀲𑁂𑀝𑁆𑀞𑀺𑀯𑀢𑁆𑀣𑀼

𑁩𑁩𑁨. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀸𑀚𑀕𑀳𑀓𑀲𑁆𑀲 𑀲𑁂𑀝𑁆𑀞𑀺𑀲𑁆𑀲 𑀲𑀢𑁆𑀢𑀯𑀲𑁆𑀲𑀺𑀓𑁄 𑀲𑀻𑀲𑀸𑀩𑀸𑀥𑁄 𑀳𑁄𑀢𑀺. 𑀩𑀳𑀽 𑀫𑀳𑀦𑁆𑀢𑀸 𑀫𑀳𑀦𑁆𑀢𑀸 𑀤𑀺𑀲𑀸𑀧𑀸𑀫𑁄𑀓𑁆𑀔𑀸 𑀯𑁂𑀚𑁆𑀚𑀸 𑀆𑀕𑀦𑁆𑀢𑁆𑀯𑀸 𑀦𑀸𑀲𑀓𑁆𑀔𑀺𑀁𑀲𑀼 𑀅𑀭𑁄𑀕𑀁 𑀓𑀸𑀢𑀼𑀁. 𑀩𑀳𑀼𑀁 𑀳𑀺𑀭𑀜𑁆𑀜𑀁 𑀆𑀤𑀸𑀬 𑀅𑀕𑀫𑀁𑀲𑀼. 𑀅𑀧𑀺 𑀘, 𑀯𑁂𑀚𑁆𑀚𑁂𑀳𑀺 𑀧𑀘𑁆𑀘𑀓𑁆𑀔𑀸𑀢𑁄 𑀳𑁄𑀢𑀺. 𑀏𑀓𑀘𑁆𑀘𑁂 𑀯𑁂𑀚𑁆𑀚𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀧𑀜𑁆𑀘𑀫𑀁 𑀤𑀺𑀯𑀲𑀁 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀓𑀸𑀮𑀁 𑀓𑀭𑀺𑀲𑁆𑀲𑀢𑀻’’𑀢𑀺. 𑀏𑀓𑀘𑁆𑀘𑁂 𑀯𑁂𑀚𑁆𑀚𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀲𑀢𑁆𑀢𑀫𑀁 𑀤𑀺𑀯𑀲𑀁 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀓𑀸𑀮𑀁 𑀓𑀭𑀺𑀲𑁆𑀲𑀢𑀻’’𑀢𑀺. 𑀅𑀣 𑀔𑁄 𑀭𑀸𑀚𑀕𑀳𑀓𑀲𑁆𑀲 𑀦𑁂𑀕𑀫𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀩𑀳𑀽𑀧𑀓𑀸𑀭𑁄 𑀭𑀜𑁆𑀜𑁄 𑀘𑁂𑀯 𑀦𑁂𑀕𑀫𑀲𑁆𑀲 𑀘. 𑀅𑀧𑀺 𑀘, 𑀯𑁂𑀚𑁆𑀚𑁂𑀳𑀺 𑀧𑀘𑁆𑀘𑀓𑁆𑀔𑀸𑀢𑁄. 𑀏𑀓𑀘𑁆𑀘𑁂 𑀯𑁂𑀚𑁆𑀚𑀸 𑀏𑀯𑀫𑀸𑀳𑀁𑀲𑀼 𑁋 ‘𑀧𑀜𑁆𑀘𑀫𑀁 𑀤𑀺𑀯𑀲𑀁 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀓𑀸𑀮𑀁 𑀓𑀭𑀺𑀲𑁆𑀲𑀢𑀻’𑀢𑀺. 𑀏𑀓𑀘𑁆𑀘𑁂 𑀯𑁂𑀚𑁆𑀚𑀸 𑀏𑀯𑀫𑀸𑀳𑀁𑀲𑀼 𑁋 ‘𑀲𑀢𑁆𑀢𑀫𑀁 𑀤𑀺𑀯𑀲𑀁 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀓𑀸𑀮𑀁 𑀓𑀭𑀺𑀲𑁆𑀲𑀢𑀻’𑀢𑀺. 𑀅𑀬𑀜𑁆𑀘 𑀭𑀜𑁆𑀜𑁄 𑀚𑀻𑀯𑀓𑁄 𑀯𑁂𑀚𑁆𑀚𑁄 𑀢𑀭𑀼𑀡𑁄 𑀪𑀤𑁆𑀭𑀓𑁄. 𑀬𑀁𑀦𑀽𑀦 𑀫𑀬𑀁 𑀭𑀸𑀚𑀸𑀦𑀁 𑀚𑀻𑀯𑀓𑀁 𑀯𑁂𑀚𑁆𑀚𑀁 𑀬𑀸𑀘𑁂𑀬𑁆𑀬𑀸𑀫 𑀲𑁂𑀝𑁆𑀞𑀺𑀁 𑀕𑀳𑀧𑀢𑀺𑀁 𑀢𑀺𑀓𑀺𑀘𑁆𑀙𑀺𑀢𑀼’’𑀦𑁆𑀢𑀺. 𑀅𑀣 𑀔𑁄 𑀭𑀸𑀚𑀕𑀳𑀓𑁄 𑀦𑁂𑀕𑀫𑁄 𑀬𑁂𑀦 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑀸𑀚𑀸𑀦𑀁 𑀫𑀸𑀕𑀥𑀁 𑀲𑁂𑀦𑀺𑀬𑀁 𑀩𑀺𑀫𑁆𑀩𑀺𑀲𑀸𑀭𑀁 𑀏𑀢𑀤𑀯𑁄𑀘 𑁋 ‘‘𑀅𑀬𑀁, 𑀤𑁂𑀯, 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀩𑀳𑀽𑀧𑀓𑀸𑀭𑁄 𑀤𑁂𑀯𑀲𑁆𑀲 𑀘𑁂𑀯 𑀦𑁂𑀕𑀫𑀲𑁆𑀲 𑀘; 𑀅𑀧𑀺 𑀘, 𑀯𑁂𑀚𑁆𑀚𑁂𑀳𑀺 𑀧𑀘𑁆𑀘𑀓𑁆𑀔𑀸𑀢𑁄. 𑀏𑀓𑀘𑁆𑀘𑁂 𑀯𑁂𑀚𑁆𑀚𑀸 𑀏𑀯𑀫𑀸𑀳𑀁𑀲𑀼 𑁋 𑀧𑀜𑁆𑀘𑀫𑀁 𑀤𑀺𑀯𑀲𑀁 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀓𑀸𑀮𑀁 𑀓𑀭𑀺𑀲𑁆𑀲𑀢𑀻𑀢𑀺. 𑀏𑀓𑀘𑁆𑀘𑁂 𑀯𑁂𑀚𑁆𑀚𑀸 𑀏𑀯𑀫𑀸𑀳𑀁𑀲𑀼 𑁋 𑀲𑀢𑁆𑀢𑀫𑀁 𑀤𑀺𑀯𑀲𑀁 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀓𑀸𑀮𑀁 𑀓𑀭𑀺𑀲𑁆𑀲𑀢𑀻𑀢𑀺. 𑀲𑀸𑀥𑀼 𑀤𑁂𑀯𑁄 𑀚𑀻𑀯𑀓𑀁 𑀯𑁂𑀚𑁆𑀚𑀁 𑀆𑀡𑀸𑀧𑁂𑀢𑀼 𑀲𑁂𑀝𑁆𑀞𑀺𑀁 𑀕𑀳𑀧𑀢𑀺𑀁 𑀢𑀺𑀓𑀺𑀘𑁆𑀙𑀺𑀢𑀼’’𑀦𑁆𑀢𑀺.

𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀚𑀻𑀯𑀓𑀁 𑀓𑁄𑀫𑀸𑀭𑀪𑀘𑁆𑀘𑀁 𑀆𑀡𑀸𑀧𑁂𑀲𑀺 𑁋 ‘‘𑀕𑀘𑁆𑀙, 𑀪𑀡𑁂 𑀚𑀻𑀯𑀓, 𑀲𑁂𑀝𑁆𑀞𑀺𑀁 𑀕𑀳𑀧𑀢𑀺𑀁 𑀢𑀺𑀓𑀺𑀘𑁆𑀙𑀸𑀳𑀻’’𑀢𑀺. ‘‘𑀏𑀯𑀁, 𑀤𑁂𑀯𑀸’’𑀢𑀺 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀲𑁂𑀦𑀺𑀬𑀲𑁆𑀲 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑁂𑀝𑁆𑀞𑀺𑀲𑁆𑀲 𑀕𑀳𑀧𑀢𑀺𑀲𑁆𑀲 𑀯𑀺𑀓𑀸𑀭𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑁂𑀝𑁆𑀞𑀺𑀁 𑀕𑀳𑀧𑀢𑀺𑀁 𑀏𑀢𑀤𑀯𑁄𑀘 𑁋 ‘‘𑀲𑀘𑁂 𑀢𑁆𑀯𑀁, 𑀕𑀳𑀧𑀢𑀺, 𑀅𑀭𑁄𑀕𑁄 𑀪𑀯𑁂𑀬𑁆𑀬𑀸𑀲𑀺 [𑀲𑀘𑀸𑀳𑀁 𑀢𑀁 𑀕𑀳𑀧𑀢𑀺 𑀅𑀭𑁄𑀕𑀸𑀧𑁂𑀬𑁆𑀬𑀁 (𑀲𑀻.), 𑀲𑀘𑀸𑀳𑀁 𑀢𑀁 𑀕𑀳𑀧𑀢𑀺 𑀅𑀭𑁄𑀕𑀁 𑀓𑀭𑁂𑀬𑁆𑀬𑀁 (𑀲𑁆𑀬𑀸.)] 𑀓𑀺𑀁 𑀫𑁂 𑀅𑀲𑁆𑀲 𑀤𑁂𑀬𑁆𑀬𑀥𑀫𑁆𑀫𑁄’’𑀢𑀺? ‘‘𑀲𑀩𑁆𑀩𑀁 𑀲𑀸𑀧𑀢𑁂𑀬𑁆𑀬𑀜𑁆𑀘 𑀢𑁂, 𑀆𑀘𑀭𑀺𑀬, 𑀳𑁄𑀢𑀼, 𑀅𑀳𑀜𑁆𑀘 𑀢𑁂 𑀤𑀸𑀲𑁄’’𑀢𑀺. ‘‘𑀲𑀓𑁆𑀔𑀺𑀲𑁆𑀲𑀲𑀺 𑀧𑀦 𑀢𑁆𑀯𑀁, 𑀕𑀳𑀧𑀢𑀺, 𑀏𑀓𑁂𑀦 𑀧𑀲𑁆𑀲𑁂𑀦 𑀲𑀢𑁆𑀢𑀫𑀸𑀲𑁂 𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺? ‘‘𑀲𑀓𑁆𑀓𑁄𑀫𑀳𑀁, 𑀆𑀘𑀭𑀺𑀬, 𑀏𑀓𑁂𑀦 𑀧𑀲𑁆𑀲𑁂𑀦 𑀲𑀢𑁆𑀢𑀫𑀸𑀲𑁂 𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺. ‘‘𑀲𑀓𑁆𑀔𑀺𑀲𑁆𑀲𑀲𑀺 𑀧𑀦 𑀢𑁆𑀯𑀁, 𑀕𑀳𑀧𑀢𑀺, 𑀤𑀼𑀢𑀺𑀬𑁂𑀦 𑀧𑀲𑁆𑀲𑁂𑀦 𑀲𑀢𑁆𑀢𑀫𑀸𑀲𑁂 𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺? ‘‘𑀲𑀓𑁆𑀓𑁄𑀫𑀳𑀁, 𑀆𑀘𑀭𑀺𑀬, 𑀤𑀼𑀢𑀺𑀬𑁂𑀦 𑀧𑀲𑁆𑀲𑁂𑀦 𑀲𑀢𑁆𑀢𑀫𑀸𑀲𑁂 𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺. ‘‘𑀲𑀓𑁆𑀔𑀺𑀲𑁆𑀲𑀲𑀺 𑀧𑀦 𑀢𑁆𑀯𑀁, 𑀕𑀳𑀧𑀢𑀺, 𑀉𑀢𑁆𑀢𑀸𑀦𑁄 𑀲𑀢𑁆𑀢𑀫𑀸𑀲𑁂 𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺? ‘‘𑀲𑀓𑁆𑀓𑁄𑀫𑀳𑀁, 𑀆𑀘𑀭𑀺𑀬, 𑀉𑀢𑁆𑀢𑀸𑀦𑁄 𑀲𑀢𑁆𑀢𑀫𑀸𑀲𑁂 𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺.

𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀲𑁂𑀝𑁆𑀞𑀺𑀁 𑀕𑀳𑀧𑀢𑀺𑀁 𑀫𑀜𑁆𑀘𑀓𑁂 𑀦𑀺𑀧𑀸𑀢𑁂𑀢𑁆𑀯𑀸 [𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 (𑀲𑀻. 𑀲𑁆𑀬𑀸.)] 𑀫𑀜𑁆𑀘𑀓𑁂 [𑀫𑀜𑁆𑀘𑀓𑁂𑀦 (𑀲𑀻.)] 𑀲𑀫𑁆𑀩𑀦𑁆𑀥𑀺𑀢𑁆𑀯𑀸 𑀲𑀻𑀲𑀘𑁆𑀙𑀯𑀺𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 [𑀨𑀸𑀮𑁂𑀢𑁆𑀯𑀸 (𑀲𑀻.)] 𑀲𑀺𑀩𑁆𑀩𑀺𑀦𑀺𑀁 𑀯𑀺𑀦𑀸𑀫𑁂𑀢𑁆𑀯𑀸 𑀤𑁆𑀯𑁂 𑀧𑀸𑀡𑀓𑁂 𑀦𑀻𑀳𑀭𑀺𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀤𑀲𑁆𑀲𑁂𑀲𑀺 𑁋 ‘‘𑀧𑀲𑁆𑀲𑀣𑀬𑁆𑀬𑁂 [𑀧𑀲𑁆𑀲𑁂𑀲𑁆𑀬𑀸𑀣 (𑀲𑀻.), 𑀧𑀲𑁆𑀲𑀣 (𑀲𑁆𑀬𑀸.), 𑀧𑀲𑁆𑀲𑀣𑀬𑁆𑀬𑁄 (𑀓.)], 𑀇𑀫𑁂 𑀤𑁆𑀯𑁂 𑀧𑀸𑀡𑀓𑁂, 𑀏𑀓𑀁 𑀔𑀼𑀤𑁆𑀤𑀓𑀁 𑀏𑀓𑀁 𑀫𑀳𑀮𑁆𑀮𑀓𑀁. 𑀬𑁂 𑀢𑁂 𑀆𑀘𑀭𑀺𑀬𑀸 𑀏𑀯𑀫𑀸𑀳𑀁𑀲𑀼 𑁋 𑀧𑀜𑁆𑀘𑀫𑀁 𑀤𑀺𑀯𑀲𑀁 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀓𑀸𑀮𑀁 𑀓𑀭𑀺𑀲𑁆𑀲𑀢𑀻𑀢𑀺 𑁋 𑀢𑁂𑀳𑀸𑀬𑀁 𑀫𑀳𑀮𑁆𑀮𑀓𑁄 𑀧𑀸𑀡𑀓𑁄 𑀤𑀺𑀝𑁆𑀞𑁄. 𑀧𑀜𑁆𑀘𑀫𑀁 𑀤𑀺𑀯𑀲𑀁 𑀲𑁂𑀝𑁆𑀞𑀺𑀲𑁆𑀲 𑀕𑀳𑀧𑀢𑀺𑀲𑁆𑀲 𑀫𑀢𑁆𑀣𑀮𑀼𑀗𑁆𑀕𑀁 𑀧𑀭𑀺𑀬𑀸𑀤𑀺𑀬𑀺𑀲𑁆𑀲𑀢𑀺. 𑀫𑀢𑁆𑀣𑀮𑀼𑀗𑁆𑀕𑀲𑁆𑀲 𑀧𑀭𑀺𑀬𑀸𑀤𑀸𑀦𑀸 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀓𑀸𑀮𑀁 𑀓𑀭𑀺𑀲𑁆𑀲𑀢𑀺. 𑀲𑀼𑀤𑀺𑀝𑁆𑀞𑁄 𑀢𑁂𑀳𑀺 𑀆𑀘𑀭𑀺𑀬𑁂𑀳𑀺. 𑀬𑁂 𑀢𑁂 𑀆𑀘𑀭𑀺𑀬𑀸 𑀏𑀯𑀫𑀸𑀳𑀁𑀲𑀼 𑁋 𑀲𑀢𑁆𑀢𑀫𑀁 𑀤𑀺𑀯𑀲𑀁 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀓𑀸𑀮𑀁 𑀓𑀭𑀺𑀲𑁆𑀲𑀢𑀻𑀢𑀺 𑁋 𑀢𑁂𑀳𑀸𑀬𑀁 𑀔𑀼𑀤𑁆𑀤𑀓𑁄 𑀧𑀸𑀡𑀓𑁄 𑀤𑀺𑀝𑁆𑀞𑁄. 𑀲𑀢𑁆𑀢𑀫𑀁 𑀤𑀺𑀯𑀲𑀁 𑀲𑁂𑀝𑁆𑀞𑀺𑀲𑁆𑀲 𑀕𑀳𑀧𑀢𑀺𑀲𑁆𑀲 𑀫𑀢𑁆𑀣𑀮𑀼𑀗𑁆𑀕𑀁 𑀧𑀭𑀺𑀬𑀸𑀤𑀺𑀬𑀺𑀲𑁆𑀲𑀢𑀺. 𑀫𑀢𑁆𑀣𑀮𑀼𑀗𑁆𑀕𑀲𑁆𑀲 𑀧𑀭𑀺𑀬𑀸𑀤𑀸𑀦𑀸 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀓𑀸𑀮𑀁 𑀓𑀭𑀺𑀲𑁆𑀲𑀢𑀺. 𑀲𑀼𑀤𑀺𑀝𑁆𑀞𑁄 𑀢𑁂𑀳𑀺 𑀆𑀘𑀭𑀺𑀬𑁂𑀳𑀻’’𑀢𑀺. 𑀲𑀺𑀩𑁆𑀩𑀺𑀦𑀺𑀁 𑀲𑀫𑁆𑀧𑀝𑀺𑀧𑀸𑀝𑁂𑀢𑁆𑀯𑀸 𑀲𑀻𑀲𑀘𑁆𑀙𑀯𑀺𑀁 𑀲𑀺𑀩𑁆𑀩𑀺𑀢𑁆𑀯𑀸 𑀆𑀮𑁂𑀧𑀁 𑀅𑀤𑀸𑀲𑀺. 𑀅𑀣 𑀔𑁄 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀲𑀢𑁆𑀢𑀸𑀳𑀲𑁆𑀲 𑀅𑀘𑁆𑀘𑀬𑁂𑀦 𑀚𑀻𑀯𑀓𑀁 𑀓𑁄𑀫𑀸𑀭𑀪𑀘𑁆𑀘𑀁 𑀏𑀢𑀤𑀯𑁄𑀘 𑁋 ‘‘𑀦𑀸𑀳𑀁, 𑀆𑀘𑀭𑀺𑀬, 𑀲𑀓𑁆𑀓𑁄𑀫𑀺 𑀏𑀓𑁂𑀦 𑀧𑀲𑁆𑀲𑁂𑀦 𑀲𑀢𑁆𑀢𑀫𑀸𑀲𑁂 𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺. ‘‘𑀦𑀦𑀼 𑀫𑁂 𑀢𑁆𑀯𑀁, 𑀕𑀳𑀧𑀢𑀺, 𑀧𑀝𑀺𑀲𑁆𑀲𑀼𑀡𑀺 𑁋 𑀲𑀓𑁆𑀓𑁄𑀫𑀳𑀁, 𑀆𑀘𑀭𑀺𑀬, 𑀏𑀓𑁂𑀦 𑀧𑀲𑁆𑀲𑁂𑀦 𑀲𑀢𑁆𑀢𑀫𑀸𑀲𑁂 𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺? ‘‘𑀲𑀘𑁆𑀘𑀸𑀳𑀁, 𑀆𑀘𑀭𑀺𑀬, 𑀧𑀝𑀺𑀲𑁆𑀲𑀼𑀡𑀺𑀁, 𑀅𑀧𑀸𑀳𑀁 𑀫𑀭𑀺𑀲𑁆𑀲𑀸𑀫𑀺, 𑀦𑀸𑀳𑀁 𑀲𑀓𑁆𑀓𑁄𑀫𑀺 𑀏𑀓𑁂𑀦 𑀧𑀲𑁆𑀲𑁂𑀦 𑀲𑀢𑁆𑀢𑀫𑀸𑀲𑁂 𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺. ‘‘𑀢𑁂𑀦 𑀳𑀺 𑀢𑁆𑀯𑀁, 𑀕𑀳𑀧𑀢𑀺, 𑀤𑀼𑀢𑀺𑀬𑁂𑀦 𑀧𑀲𑁆𑀲𑁂𑀦 𑀲𑀢𑁆𑀢𑀫𑀸𑀲𑁂 𑀦𑀺𑀧𑀚𑁆𑀚𑀸𑀳𑀻’’𑀢𑀺. 𑀅𑀣 𑀔𑁄 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀲𑀢𑁆𑀢𑀸𑀳𑀲𑁆𑀲 𑀅𑀘𑁆𑀘𑀬𑁂𑀦 𑀚𑀻𑀯𑀓𑀁 𑀓𑁄𑀫𑀸𑀭𑀪𑀘𑁆𑀘𑀁 𑀏𑀢𑀤𑀯𑁄𑀘 𑁋 ‘‘𑀦𑀸𑀳𑀁, 𑀆𑀘𑀭𑀺𑀬, 𑀲𑀓𑁆𑀓𑁄𑀫𑀺 𑀤𑀼𑀢𑀺𑀬𑁂𑀦 𑀧𑀲𑁆𑀲𑁂𑀦 𑀲𑀢𑁆𑀢𑀫𑀸𑀲𑁂 𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺. ‘‘𑀦𑀦𑀼 𑀫𑁂 𑀢𑁆𑀯𑀁, 𑀕𑀳𑀧𑀢𑀺, 𑀧𑀝𑀺𑀲𑁆𑀲𑀼𑀡𑀺 𑁋 𑀲𑀓𑁆𑀓𑁄𑀫𑀳𑀁, 𑀆𑀘𑀭𑀺𑀬, 𑀤𑀼𑀢𑀺𑀬𑁂𑀦 𑀧𑀲𑁆𑀲𑁂𑀦 𑀲𑀢𑁆𑀢𑀫𑀸𑀲𑁂 𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺? ‘‘𑀲𑀘𑁆𑀘𑀸𑀳𑀁, 𑀆𑀘𑀭𑀺𑀬, 𑀧𑀝𑀺𑀲𑁆𑀲𑀼𑀡𑀺𑀁, 𑀅𑀧𑀸𑀳𑀁 𑀫𑀭𑀺𑀲𑁆𑀲𑀸𑀫𑀺, 𑀦𑀸𑀳𑀁, 𑀆𑀘𑀭𑀺𑀬, 𑀲𑀓𑁆𑀓𑁄𑀫𑀺 𑀤𑀼𑀢𑀺𑀬𑁂𑀦 𑀧𑀲𑁆𑀲𑁂𑀦 𑀲𑀢𑁆𑀢𑀫𑀸𑀲𑁂 𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺. ‘‘𑀢𑁂𑀦 𑀳𑀺 𑀢𑁆𑀯𑀁, 𑀕𑀳𑀧𑀢𑀺, 𑀉𑀢𑁆𑀢𑀸𑀦𑁄 𑀲𑀢𑁆𑀢𑀫𑀸𑀲𑁂 𑀦𑀺𑀧𑀚𑁆𑀚𑀸𑀳𑀻’’𑀢𑀺. 𑀅𑀣 𑀔𑁄 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀲𑀢𑁆𑀢𑀸𑀳𑀲𑁆𑀲 𑀅𑀘𑁆𑀘𑀬𑁂𑀦 𑀚𑀻𑀯𑀓𑀁 𑀓𑁄𑀫𑀸𑀭𑀪𑀘𑁆𑀘𑀁 𑀏𑀢𑀤𑀯𑁄𑀘 𑁋 ‘‘𑀦𑀸𑀳𑀁, 𑀆𑀘𑀭𑀺𑀬, 𑀲𑀓𑁆𑀓𑁄𑀫𑀺 𑀉𑀢𑁆𑀢𑀸𑀦𑁄 𑀲𑀢𑁆𑀢𑀫𑀸𑀲𑁂 𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺. ‘‘𑀦𑀦𑀼 𑀫𑁂 𑀢𑁆𑀯𑀁, 𑀕𑀳𑀧𑀢𑀺, 𑀧𑀝𑀺𑀲𑁆𑀲𑀼𑀡𑀺 𑁋 𑀲𑀓𑁆𑀓𑁄𑀫𑀳𑀁, 𑀆𑀘𑀭𑀺𑀬, 𑀉𑀢𑁆𑀢𑀸𑀦𑁄 𑀲𑀢𑁆𑀢𑀫𑀸𑀲𑁂 𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺? ‘‘𑀲𑀘𑁆𑀘𑀸𑀳𑀁, 𑀆𑀘𑀭𑀺𑀬, 𑀧𑀝𑀺𑀲𑁆𑀲𑀼𑀡𑀺𑀁, 𑀅𑀧𑀸𑀳𑀁 𑀫𑀭𑀺𑀲𑁆𑀲𑀸𑀫𑀺, 𑀦𑀸𑀳𑀁 𑀲𑀓𑁆𑀓𑁄𑀫𑀺 𑀉𑀢𑁆𑀢𑀸𑀦𑁄 𑀲𑀢𑁆𑀢𑀫𑀸𑀲𑁂 𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺. ‘‘𑀅𑀳𑀁 𑀘𑁂 𑀢𑀁, 𑀕𑀳𑀧𑀢𑀺, 𑀦 𑀯𑀤𑁂𑀬𑁆𑀬𑀁, 𑀏𑀢𑁆𑀢𑀓𑀫𑁆𑀧𑀺 𑀢𑁆𑀯𑀁 𑀦 𑀦𑀺𑀧𑀚𑁆𑀚𑁂𑀬𑁆𑀬𑀸𑀲𑀺, 𑀅𑀧𑀺 𑀘 𑀧𑀝𑀺𑀓𑀘𑁆𑀘𑁂𑀯 𑀫𑀬𑀸 𑀜𑀸𑀢𑁄 𑁋 𑀢𑀻𑀳𑀺 𑀲𑀢𑁆𑀢𑀸𑀳𑁂𑀳𑀺 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀅𑀭𑁄𑀕𑁄 𑀪𑀯𑀺𑀲𑁆𑀲𑀢𑀻𑀢𑀺. 𑀉𑀝𑁆𑀞𑁂𑀳𑀺, 𑀕𑀳𑀧𑀢𑀺, 𑀅𑀭𑁄𑀕𑁄𑀲𑀺. 𑀚𑀸𑀦𑀸𑀲𑀺 𑀓𑀺𑀁 𑀫𑁂 𑀤𑁂𑀬𑁆𑀬𑀥𑀫𑁆𑀫𑁄’’𑀢𑀺? ‘‘𑀲𑀩𑁆𑀩𑀁 𑀲𑀸𑀧𑀢𑁂𑀬𑁆𑀬𑀜𑁆𑀘 𑀢𑁂, 𑀆𑀘𑀭𑀺𑀬, 𑀳𑁄𑀢𑀼, 𑀅𑀳𑀜𑁆𑀘 𑀢𑁂 𑀤𑀸𑀲𑁄’’𑀢𑀺. ‘‘𑀅𑀮𑀁, 𑀕𑀳𑀧𑀢𑀺, 𑀫𑀸 𑀫𑁂 𑀢𑁆𑀯𑀁 𑀲𑀩𑁆𑀩𑀁 𑀲𑀸𑀧𑀢𑁂𑀬𑁆𑀬𑀁 𑀅𑀤𑀸𑀲𑀺, 𑀫𑀸 𑀘 𑀫𑁂 𑀤𑀸𑀲𑁄. 𑀭𑀜𑁆𑀜𑁄 𑀲𑀢𑀲𑀳𑀲𑁆𑀲𑀁 𑀤𑁂𑀳𑀺, 𑀫𑀬𑁆𑀳𑀁 𑀲𑀢𑀲𑀳𑀲𑁆𑀲’’𑀦𑁆𑀢𑀺. 𑀅𑀣 𑀔𑁄 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀅𑀭𑁄𑀕𑁄 𑀲𑀫𑀸𑀦𑁄 𑀭𑀜𑁆𑀜𑁄 𑀲𑀢𑀲𑀳𑀲𑁆𑀲𑀁 𑀅𑀤𑀸𑀲𑀺, 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀲𑀢𑀲𑀳𑀲𑁆𑀲𑀁.

𑀭𑀸𑀚𑀕𑀳𑀲𑁂𑀝𑁆𑀞𑀺𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁨𑁦𑁬. 𑀲𑁂𑀝𑁆𑀞𑀺𑀧𑀼𑀢𑁆𑀢𑀯𑀢𑁆𑀣𑀼

𑁩𑁩𑁩. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀩𑀸𑀭𑀸𑀡𑀲𑁂𑀬𑁆𑀬𑀓𑀲𑁆𑀲 𑀲𑁂𑀝𑁆𑀞𑀺𑀧𑀼𑀢𑁆𑀢𑀲𑁆𑀲 𑀫𑁄𑀓𑁆𑀔𑀘𑀺𑀓𑀸𑀬 𑀓𑀻𑀴𑀦𑁆𑀢𑀲𑁆𑀲 𑀅𑀦𑁆𑀢𑀕𑀡𑁆𑀞𑀸𑀩𑀸𑀥𑁄 𑀳𑁄𑀢𑀺, 𑀬𑁂𑀦 𑀬𑀸𑀕𑀼𑀧𑀺 𑀧𑀻𑀢𑀸 𑀦 𑀲𑀫𑁆𑀫𑀸 𑀧𑀭𑀺𑀡𑀸𑀫𑀁 𑀕𑀘𑁆𑀙𑀢𑀺, 𑀪𑀢𑁆𑀢𑀫𑁆𑀧𑀺 𑀪𑀼𑀢𑁆𑀢𑀁 𑀦 𑀲𑀫𑁆𑀫𑀸 𑀧𑀭𑀺𑀡𑀸𑀫𑀁 𑀕𑀘𑁆𑀙𑀢𑀺, 𑀉𑀘𑁆𑀘𑀸𑀭𑁄𑀧𑀺 𑀧𑀲𑁆𑀲𑀸𑀯𑁄𑀧𑀺 𑀦 𑀧𑀕𑀼𑀡𑁄. 𑀲𑁄 𑀢𑁂𑀦 𑀓𑀺𑀲𑁄 𑀳𑁄𑀢𑀺 𑀮𑀽𑀔𑁄 𑀤𑀼𑀩𑁆𑀩𑀡𑁆𑀡𑁄 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑁄 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑁄. 𑀅𑀣 𑀔𑁄 𑀩𑀸𑀭𑀸𑀡𑀲𑁂𑀬𑁆𑀬𑀓𑀲𑁆𑀲 𑀲𑁂𑀝𑁆𑀞𑀺𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀬𑁆𑀳𑀁 𑀔𑁄 𑀧𑀼𑀢𑁆𑀢𑀲𑁆𑀲 𑀢𑀸𑀤𑀺𑀲𑁄 𑀆𑀩𑀸𑀥𑁄, 𑀬𑁂𑀦 𑀬𑀸𑀕𑀼𑀧𑀺 𑀧𑀻𑀢𑀸 𑀦 𑀲𑀫𑁆𑀫𑀸 𑀧𑀭𑀺𑀡𑀸𑀫𑀁 𑀕𑀘𑁆𑀙𑀢𑀺, 𑀪𑀢𑁆𑀢𑀫𑁆𑀧𑀺 𑀪𑀼𑀢𑁆𑀢𑀁 𑀦 𑀲𑀫𑁆𑀫𑀸 𑀧𑀭𑀺𑀡𑀸𑀫𑀁 𑀕𑀘𑁆𑀙𑀢𑀺, 𑀉𑀘𑁆𑀘𑀸𑀭𑁄𑀧𑀺 𑀧𑀲𑁆𑀲𑀸𑀯𑁄𑀧𑀺 𑀦 𑀧𑀕𑀼𑀡𑁄. 𑀲𑁄 𑀢𑁂𑀦 𑀓𑀺𑀲𑁄 𑀮𑀽𑀔𑁄 𑀤𑀼𑀩𑁆𑀩𑀡𑁆𑀡𑁄 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑁄 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑁄. 𑀬𑀁𑀦𑀽𑀦𑀸𑀳𑀁 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀚𑀻𑀯𑀓𑀁 𑀯𑁂𑀚𑁆𑀚𑀁 𑀬𑀸𑀘𑁂𑀬𑁆𑀬𑀁 𑀧𑀼𑀢𑁆𑀢𑀁 𑀫𑁂 𑀢𑀺𑀓𑀺𑀘𑁆𑀙𑀺𑀢𑀼’’𑀦𑁆𑀢𑀺. 𑀅𑀣 𑀔𑁄 𑀩𑀸𑀭𑀸𑀡𑀲𑁂𑀬𑁆𑀬𑀓𑁄 𑀲𑁂𑀝𑁆𑀞𑀺 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀬𑁂𑀦 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑀸𑀚𑀸𑀦𑀁 𑀫𑀸𑀕𑀥𑀁 𑀲𑁂𑀦𑀺𑀬𑀁 𑀩𑀺𑀫𑁆𑀩𑀺𑀲𑀸𑀭𑀁 𑀏𑀢𑀤𑀯𑁄𑀘 𑁋 ‘‘𑀫𑀬𑁆𑀳𑀁 𑀔𑁄, 𑀤𑁂𑀯, 𑀧𑀼𑀢𑁆𑀢𑀲𑁆𑀲 𑀢𑀸𑀤𑀺𑀲𑁄 𑀆𑀩𑀸𑀥𑁄, 𑀬𑁂𑀦 𑀬𑀸𑀕𑀼𑀧𑀺 𑀧𑀻𑀢𑀸 𑀦 𑀲𑀫𑁆𑀫𑀸 𑀧𑀭𑀺𑀡𑀸𑀫𑀁 𑀕𑀘𑁆𑀙𑀢𑀺, 𑀪𑀢𑁆𑀢𑀫𑁆𑀧𑀺 𑀪𑀼𑀢𑁆𑀢𑀁 𑀦 𑀲𑀫𑁆𑀫𑀸 𑀧𑀭𑀺𑀡𑀸𑀫𑀁 𑀕𑀘𑁆𑀙𑀢𑀺, 𑀉𑀘𑁆𑀘𑀸𑀭𑁄𑀧𑀺 𑀧𑀲𑁆𑀲𑀸𑀯𑁄𑀧𑀺 𑀦 𑀧𑀕𑀼𑀡𑁄. 𑀲𑁄 𑀢𑁂𑀦 𑀓𑀺𑀲𑁄 𑀮𑀽𑀔𑁄 𑀤𑀼𑀩𑁆𑀩𑀡𑁆𑀡𑁄 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑁄 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑁄. 𑀲𑀸𑀥𑀼 𑀤𑁂𑀯𑁄 𑀚𑀻𑀯𑀓𑀁 𑀯𑁂𑀚𑁆𑀚𑀁 𑀆𑀡𑀸𑀧𑁂𑀢𑀼 𑀧𑀼𑀢𑁆𑀢𑀁 𑀫𑁂 𑀢𑀺𑀓𑀺𑀘𑁆𑀙𑀺𑀢𑀼’’𑀦𑁆𑀢𑀺.

𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀚𑀻𑀯𑀓𑀁 𑀓𑁄𑀫𑀸𑀭𑀪𑀘𑁆𑀘𑀁 𑀆𑀡𑀸𑀧𑁂𑀲𑀺 𑁋 ‘‘𑀕𑀘𑁆𑀙, 𑀪𑀡𑁂 𑀚𑀻𑀯𑀓, 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀩𑀸𑀭𑀸𑀡𑀲𑁂𑀬𑁆𑀬𑀓𑀁 𑀲𑁂𑀝𑁆𑀞𑀺𑀧𑀼𑀢𑁆𑀢𑀁 𑀢𑀺𑀓𑀺𑀘𑁆𑀙𑀸𑀳𑀻’’𑀢𑀺. ‘‘𑀏𑀯𑀁, 𑀤𑁂𑀯𑀸’’𑀢𑀺 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀲𑁂𑀦𑀺𑀬𑀲𑁆𑀲 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀬𑁂𑀦 𑀩𑀸𑀭𑀸𑀡𑀲𑁂𑀬𑁆𑀬𑀓𑁄 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀩𑀸𑀭𑀸𑀡𑀲𑁂𑀬𑁆𑀬𑀓𑀲𑁆𑀲 𑀲𑁂𑀝𑁆𑀞𑀺𑀧𑀼𑀢𑁆𑀢𑀲𑁆𑀲 𑀯𑀺𑀓𑀸𑀭𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀚𑀦𑀁 𑀉𑀲𑁆𑀲𑀸𑀭𑁂𑀢𑁆𑀯𑀸 𑀢𑀺𑀭𑁄𑀓𑀭𑀡𑀺𑀬𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀣𑀫𑁆𑀪𑁂 𑀉𑀩𑁆𑀩𑀦𑁆𑀥𑀺𑀢𑁆𑀯𑀸 [𑀉𑀧𑀦𑀺𑀩𑀦𑁆𑀥𑀺𑀢𑁆𑀯𑀸 (𑀲𑀻. 𑀲𑁆𑀬𑀸.)] 𑀪𑀭𑀺𑀬𑀁 𑀧𑀼𑀭𑀢𑁄 𑀞𑀧𑁂𑀢𑁆𑀯𑀸 𑀉𑀤𑀭𑀘𑁆𑀙𑀯𑀺𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀅𑀦𑁆𑀢𑀕𑀡𑁆𑀞𑀺𑀁 𑀦𑀻𑀳𑀭𑀺𑀢𑁆𑀯𑀸 𑀪𑀭𑀺𑀬𑀸𑀬 𑀤𑀲𑁆𑀲𑁂𑀲𑀺 𑁋 ‘‘𑀧𑀲𑁆𑀲 𑀢𑁂 𑀲𑀸𑀫𑀺𑀓𑀲𑁆𑀲 𑀆𑀩𑀸𑀥𑀁, 𑀇𑀫𑀺𑀦𑀸 𑀬𑀸𑀕𑀼𑀧𑀺 𑀧𑀻𑀢𑀸 𑀦 𑀲𑀫𑁆𑀫𑀸 𑀧𑀭𑀺𑀡𑀸𑀫𑀁 𑀕𑀘𑁆𑀙𑀢𑀺, 𑀪𑀢𑁆𑀢𑀫𑁆𑀧𑀺 𑀪𑀼𑀢𑁆𑀢𑀁 𑀦 𑀲𑀫𑁆𑀫𑀸 𑀧𑀭𑀺𑀡𑀸𑀫𑀁 𑀕𑀘𑁆𑀙𑀢𑀺, 𑀉𑀘𑁆𑀘𑀸𑀭𑁄𑀧𑀺 𑀧𑀲𑁆𑀲𑀸𑀯𑁄𑀧𑀺 𑀦 𑀧𑀕𑀼𑀡𑁄; 𑀇𑀫𑀺𑀦𑀸𑀬𑀁 𑀓𑀺𑀲𑁄 𑀮𑀽𑀔𑁄 𑀤𑀼𑀩𑁆𑀩𑀡𑁆𑀡𑁄 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑁄 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑁄’’𑀢𑀺. 𑀅𑀦𑁆𑀢𑀕𑀡𑁆𑀞𑀺𑀁 𑀯𑀺𑀦𑀺𑀯𑁂𑀞𑁂𑀢𑁆𑀯𑀸 𑀅𑀦𑁆𑀢𑀸𑀦𑀺 𑀧𑀝𑀺𑀧𑀯𑁂𑀲𑁂𑀢𑁆𑀯𑀸 𑀉𑀤𑀭𑀘𑁆𑀙𑀯𑀺𑀁 𑀲𑀺𑀩𑁆𑀩𑀺𑀢𑁆𑀯𑀸 𑀆𑀮𑁂𑀧𑀁 𑀅𑀤𑀸𑀲𑀺. 𑀅𑀣 𑀔𑁄 𑀩𑀸𑀭𑀸𑀡𑀲𑁂𑀬𑁆𑀬𑀓𑁄 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑁄𑀕𑁄 𑀅𑀳𑁄𑀲𑀺. 𑀅𑀣 𑀔𑁄 𑀩𑀸𑀭𑀸𑀡𑀲𑁂𑀬𑁆𑀬𑀓𑁄 𑀲𑁂𑀝𑁆𑀞𑀺 ‘𑀧𑀼𑀢𑁆𑀢𑁄 𑀫𑁂 𑀅𑀭𑁄𑀕𑁄 𑀞𑀺𑀢𑁄’𑀢𑀺 [𑀅𑀭𑁄𑀕𑀸𑀧𑀺𑀢𑁄𑀢𑀺 (𑀲𑀻.)] 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀲𑁄𑀴𑀲𑀲𑀳𑀲𑁆𑀲𑀸𑀦𑀺 𑀧𑀸𑀤𑀸𑀲𑀺. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀢𑀸𑀦𑀺 𑀲𑁄𑀴𑀲𑀲𑀳𑀲𑁆𑀲𑀸𑀦𑀺 𑀆𑀤𑀸𑀬 𑀧𑀼𑀦𑀤𑁂𑀯 𑀭𑀸𑀚𑀕𑀳𑀁 𑀧𑀘𑁆𑀘𑀸𑀕𑀜𑁆𑀙𑀺.

𑀲𑁂𑀝𑁆𑀞𑀺𑀧𑀼𑀢𑁆𑀢𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁨𑁦𑁭. 𑀧𑀚𑁆𑀚𑁄𑀢𑀭𑀸𑀚𑀯𑀢𑁆𑀣𑀼

𑁩𑁩𑁪. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀜𑁆𑀜𑁄 [𑀉𑀚𑁆𑀚𑁂𑀦𑀺𑀬𑀁 𑀭𑀜𑁆𑀜𑁄 (𑀲𑁆𑀬𑀸.)] 𑀧𑀚𑁆𑀚𑁄𑀢𑀲𑁆𑀲 𑀧𑀡𑁆𑀟𑀼𑀭𑁄𑀕𑀸𑀩𑀸𑀥𑁄 𑀳𑁄𑀢𑀺. 𑀩𑀳𑀽 𑀫𑀳𑀦𑁆𑀢𑀸 𑀫𑀳𑀦𑁆𑀢𑀸 𑀤𑀺𑀲𑀸𑀧𑀸𑀫𑁄𑀓𑁆𑀔𑀸 𑀯𑁂𑀚𑁆𑀚𑀸 𑀆𑀕𑀦𑁆𑀢𑁆𑀯𑀸 𑀦𑀸𑀲𑀓𑁆𑀔𑀺𑀁𑀲𑀼 𑀅𑀭𑁄𑀕𑀁 𑀓𑀸𑀢𑀼𑀁. 𑀩𑀳𑀼𑀁 𑀳𑀺𑀭𑀜𑁆𑀜𑀁 𑀆𑀤𑀸𑀬 𑀅𑀕𑀫𑀁𑀲𑀼. 𑀅𑀣 𑀔𑁄 𑀭𑀸𑀚𑀸 𑀧𑀚𑁆𑀚𑁄𑀢𑁄 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀲𑁂𑀦𑀺𑀬𑀲𑁆𑀲 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀸𑀳𑁂𑀲𑀺 𑁋 ‘‘𑀫𑀬𑁆𑀳𑀁 𑀔𑁄 𑀢𑀸𑀤𑀺𑀲𑁄 𑀆𑀩𑀸𑀥𑁄, 𑀲𑀸𑀥𑀼 𑀤𑁂𑀯𑁄 𑀚𑀻𑀯𑀓𑀁 𑀯𑁂𑀚𑁆𑀚𑀁 𑀆𑀡𑀸𑀧𑁂𑀢𑀼, 𑀲𑁄 𑀫𑀁 𑀢𑀺𑀓𑀺𑀘𑁆𑀙𑀺𑀲𑁆𑀲𑀢𑀻’’𑀢𑀺. 𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀚𑀻𑀯𑀓𑀁 𑀓𑁄𑀫𑀸𑀭𑀪𑀘𑁆𑀘𑀁 𑀆𑀡𑀸𑀧𑁂𑀲𑀺 𑁋 ‘‘𑀕𑀘𑁆𑀙, 𑀪𑀡𑁂 𑀚𑀻𑀯𑀓; 𑀉𑀚𑁆𑀚𑁂𑀦𑀺𑀁 𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀧𑀚𑁆𑀚𑁄𑀢𑀁 𑀢𑀺𑀓𑀺𑀘𑁆𑀙𑀸𑀳𑀻’’𑀢𑀺. ‘‘𑀏𑀯𑀁, 𑀤𑁂𑀯𑀸’’𑀢𑀺 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀲𑁂𑀦𑀺𑀬𑀲𑁆𑀲 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀉𑀚𑁆𑀚𑁂𑀦𑀺𑀁 𑀕𑀦𑁆𑀢𑁆𑀯𑀸 𑀬𑁂𑀦 𑀭𑀸𑀚𑀸 𑀧𑀚𑁆𑀚𑁄𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑀜𑁆𑀜𑁄 𑀧𑀚𑁆𑀚𑁄𑀢𑀲𑁆𑀲 𑀯𑀺𑀓𑀸𑀭𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀭𑀸𑀚𑀸𑀦𑀁 𑀧𑀚𑁆𑀚𑁄𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀧𑁆𑀧𑀺𑀁 𑀤𑁂𑀳𑀺 [𑀇𑀤𑀁 𑀧𑀤𑀤𑁆𑀯𑀬𑀁 𑀲𑀻. 𑀲𑁆𑀬𑀸. 𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺], 𑀲𑀧𑁆𑀧𑀺𑀁 𑀤𑁂𑀯, 𑀦𑀺𑀧𑁆𑀧𑀘𑀺𑀲𑁆𑀲𑀸𑀫𑀺. 𑀢𑀁 𑀤𑁂𑀯𑁄 𑀧𑀺𑀯𑀺𑀲𑁆𑀲𑀢𑀻’’𑀢𑀺. ‘‘𑀅𑀮𑀁, 𑀪𑀡𑁂 𑀚𑀻𑀯𑀓, 𑀬𑀁 𑀢𑁂 𑀲𑀓𑁆𑀓𑀸 𑀯𑀺𑀦𑀸 𑀲𑀧𑁆𑀧𑀺𑀦𑀸 𑀅𑀭𑁄𑀕𑀁 𑀓𑀸𑀢𑀼𑀁 𑀢𑀁 𑀓𑀭𑁄𑀳𑀺. 𑀚𑁂𑀕𑀼𑀘𑁆𑀙𑀁 𑀫𑁂 𑀲𑀧𑁆𑀧𑀺, 𑀧𑀝𑀺𑀓𑀽𑀮’’𑀦𑁆𑀢𑀺. 𑀅𑀣 𑀔𑁄 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀇𑀫𑀲𑁆𑀲 𑀔𑁄 𑀭𑀜𑁆𑀜𑁄 𑀢𑀸𑀤𑀺𑀲𑁄 𑀆𑀩𑀸𑀥𑁄, 𑀦 𑀲𑀓𑁆𑀓𑀸 𑀯𑀺𑀦𑀸 𑀲𑀧𑁆𑀧𑀺𑀦𑀸 𑀅𑀭𑁄𑀕𑀁 𑀓𑀸𑀢𑀼𑀁. 𑀬𑀁𑀦𑀽𑀦𑀸𑀳𑀁 𑀲𑀧𑁆𑀧𑀺𑀁 𑀦𑀺𑀧𑁆𑀧𑀘𑁂𑀬𑁆𑀬𑀁 𑀓𑀲𑀸𑀯𑀯𑀡𑁆𑀡𑀁 𑀓𑀲𑀸𑀯𑀕𑀦𑁆𑀥𑀁 𑀓𑀲𑀸𑀯𑀭𑀲’’𑀦𑁆𑀢𑀺. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀦𑀸𑀦𑀸𑀪𑁂𑀲𑀚𑁆𑀚𑁂𑀳𑀺 𑀲𑀧𑁆𑀧𑀺𑀁 𑀦𑀺𑀧𑁆𑀧𑀘𑀺 𑀓𑀲𑀸𑀯𑀯𑀡𑁆𑀡𑀁 𑀓𑀲𑀸𑀯𑀕𑀦𑁆𑀥𑀁 𑀓𑀲𑀸𑀯𑀭𑀲𑀁. 𑀅𑀣 𑀔𑁄 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀇𑀫𑀲𑁆𑀲 𑀔𑁄 𑀭𑀜𑁆𑀜𑁄 𑀲𑀧𑁆𑀧𑀺 𑀧𑀻𑀢𑀁 𑀧𑀭𑀺𑀡𑀸𑀫𑁂𑀦𑁆𑀢𑀁 𑀉𑀤𑁆𑀤𑁂𑀓𑀁 𑀤𑀲𑁆𑀲𑀢𑀺. 𑀘𑀡𑁆𑀟𑁄𑀬𑀁 𑀭𑀸𑀚𑀸 𑀖𑀸𑀢𑀸𑀧𑁂𑀬𑁆𑀬𑀸𑀧𑀺 𑀫𑀁. 𑀬𑀁𑀦𑀽𑀦𑀸𑀳𑀁 𑀧𑀝𑀺𑀓𑀘𑁆𑀘𑁂𑀯 𑀆𑀧𑀼𑀘𑁆𑀙𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀬𑁂𑀦 𑀭𑀸𑀚𑀸 𑀧𑀚𑁆𑀚𑁄𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑀸𑀚𑀸𑀦𑀁 𑀧𑀚𑁆𑀚𑁄𑀢𑀁 𑀏𑀢𑀤𑀯𑁄𑀘 𑁋 ‘‘𑀫𑀬𑀁 𑀔𑁄, 𑀤𑁂𑀯, 𑀯𑁂𑀚𑁆𑀚𑀸 𑀦𑀸𑀫 𑀢𑀸𑀤𑀺𑀲𑁂𑀦 𑀫𑀼𑀳𑀼𑀢𑁆𑀢𑁂𑀦 𑀫𑀽𑀮𑀸𑀦𑀺 𑀉𑀤𑁆𑀥𑀭𑀸𑀫 𑀪𑁂𑀲𑀚𑁆𑀚𑀸𑀦𑀺 𑀲𑀁𑀳𑀭𑀸𑀫. 𑀲𑀸𑀥𑀼 𑀤𑁂𑀯𑁄 𑀯𑀸𑀳𑀦𑀸𑀕𑀸𑀭𑁂𑀲𑀼 𑀘 𑀤𑁆𑀯𑀸𑀭𑁂𑀲𑀼 𑀘 𑀆𑀡𑀸𑀧𑁂𑀢𑀼 𑁋 𑀬𑁂𑀦 𑀯𑀸𑀳𑀦𑁂𑀦 𑀚𑀻𑀯𑀓𑁄 𑀇𑀘𑁆𑀙𑀢𑀺 𑀢𑁂𑀦 𑀯𑀸𑀳𑀦𑁂𑀦 𑀕𑀘𑁆𑀙𑀢𑀼, 𑀬𑁂𑀦 𑀤𑁆𑀯𑀸𑀭𑁂𑀦 𑀇𑀘𑁆𑀙𑀢𑀺 𑀢𑁂𑀦 𑀤𑁆𑀯𑀸𑀭𑁂𑀦 𑀕𑀘𑁆𑀙𑀢𑀼, 𑀬𑀁 𑀓𑀸𑀮𑀁 𑀇𑀘𑁆𑀙𑀢𑀺 𑀢𑀁 𑀓𑀸𑀮𑀁 𑀕𑀘𑁆𑀙𑀢𑀼, 𑀬𑀁 𑀓𑀸𑀮𑀁 𑀇𑀘𑁆𑀙𑀢𑀺 𑀢𑀁 𑀓𑀸𑀮𑀁 𑀧𑀯𑀺𑀲𑀢𑀽’’𑀢𑀺. 𑀅𑀣 𑀔𑁄 𑀭𑀸𑀚𑀸 𑀧𑀚𑁆𑀚𑁄𑀢𑁄 𑀯𑀸𑀳𑀦𑀸𑀕𑀸𑀭𑁂𑀲𑀼 𑀘 𑀤𑁆𑀯𑀸𑀭𑁂𑀲𑀼 𑀘 𑀆𑀡𑀸𑀧𑁂𑀲𑀺 𑁋 ‘‘𑀬𑁂𑀦 𑀯𑀸𑀳𑀦𑁂𑀦 𑀚𑀻𑀯𑀓𑁄 𑀇𑀘𑁆𑀙𑀢𑀺 𑀢𑁂𑀦 𑀯𑀸𑀳𑀦𑁂𑀦 𑀕𑀘𑁆𑀙𑀢𑀼, 𑀬𑁂𑀦 𑀤𑁆𑀯𑀸𑀭𑁂𑀦 𑀇𑀘𑁆𑀙𑀢𑀺 𑀢𑁂𑀦 𑀤𑁆𑀯𑀸𑀭𑁂𑀦 𑀕𑀘𑁆𑀙𑀢𑀼, 𑀬𑀁 𑀓𑀸𑀮𑀁 𑀇𑀘𑁆𑀙𑀢𑀺 𑀢𑀁 𑀓𑀸𑀮𑀁 𑀕𑀘𑁆𑀙𑀢𑀼, 𑀬𑀁 𑀓𑀸𑀮𑀁 𑀇𑀘𑁆𑀙𑀢𑀺 𑀢𑀁 𑀓𑀸𑀮𑀁 𑀧𑀯𑀺𑀲𑀢𑀽’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀜𑁆𑀜𑁄 𑀧𑀚𑁆𑀚𑁄𑀢𑀲𑁆𑀲 𑀪𑀤𑁆𑀤𑀯𑀢𑀺𑀓𑀸 𑀦𑀸𑀫 𑀳𑀢𑁆𑀣𑀺𑀦𑀺𑀓𑀸 𑀧𑀜𑁆𑀜𑀸𑀲𑀬𑁄𑀚𑀦𑀺𑀓𑀸 𑀳𑁄𑀢𑀺. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀭𑀜𑁆𑀜𑁄 𑀧𑀚𑁆𑀚𑁄𑀢𑀲𑁆𑀲 𑀲𑀧𑁆𑀧𑀺𑀁 [𑀢𑀁 𑀲𑀧𑁆𑀧𑀺𑀁 (𑀲𑁆𑀬𑀸.)] 𑀉𑀧𑀦𑀸𑀫𑁂𑀲𑀺 𑁋 ‘‘𑀓𑀲𑀸𑀯𑀁 𑀤𑁂𑀯𑁄 𑀧𑀺𑀯𑀢𑀽’’𑀢𑀺. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀭𑀸𑀚𑀸𑀦𑀁 𑀧𑀚𑁆𑀚𑁄𑀢𑀁 𑀲𑀧𑁆𑀧𑀺𑀁 𑀧𑀸𑀬𑁂𑀢𑁆𑀯𑀸 𑀳𑀢𑁆𑀣𑀺𑀲𑀸𑀮𑀁 𑀕𑀦𑁆𑀢𑁆𑀯𑀸 𑀪𑀤𑁆𑀤𑀯𑀢𑀺𑀓𑀸𑀬 𑀳𑀢𑁆𑀣𑀺𑀦𑀺𑀓𑀸𑀬 𑀦𑀕𑀭𑀫𑁆𑀳𑀸 𑀦𑀺𑀧𑁆𑀧𑀢𑀺.

𑀅𑀣 𑀔𑁄 𑀭𑀜𑁆𑀜𑁄 𑀧𑀚𑁆𑀚𑁄𑀢𑀲𑁆𑀲 𑀢𑀁 𑀲𑀧𑁆𑀧𑀺 𑀧𑀻𑀢𑀁 𑀧𑀭𑀺𑀡𑀸𑀫𑁂𑀦𑁆𑀢𑀁 𑀉𑀤𑁆𑀤𑁂𑀓𑀁 𑀅𑀤𑀸𑀲𑀺. 𑀅𑀣 𑀔𑁄 𑀭𑀸𑀚𑀸 𑀧𑀚𑁆𑀚𑁄𑀢𑁄 𑀫𑀦𑀼𑀲𑁆𑀲𑁂 𑀏𑀢𑀤𑀯𑁄𑀘 𑁋 ‘‘𑀤𑀼𑀝𑁆𑀞𑁂𑀦, 𑀪𑀡𑁂, 𑀚𑀻𑀯𑀓𑁂𑀦 𑀲𑀧𑁆𑀧𑀺𑀁 𑀧𑀸𑀬𑀺𑀢𑁄𑀫𑁆𑀳𑀺. 𑀢𑁂𑀦 𑀳𑀺, 𑀪𑀡𑁂, 𑀚𑀻𑀯𑀓𑀁 𑀯𑁂𑀚𑁆𑀚𑀁 𑀯𑀺𑀘𑀺𑀦𑀣𑀸’’𑀢𑀺. ‘‘𑀪𑀤𑁆𑀤𑀯𑀢𑀺𑀓𑀸𑀬, 𑀤𑁂𑀯, 𑀳𑀢𑁆𑀣𑀺𑀦𑀺𑀓𑀸𑀬 𑀦𑀕𑀭𑀫𑁆𑀳𑀸 𑀦𑀺𑀧𑁆𑀧𑀢𑀺𑀢𑁄’’𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀜𑁆𑀜𑁄 𑀧𑀚𑁆𑀚𑁄𑀢𑀲𑁆𑀲 𑀓𑀸𑀓𑁄 𑀦𑀸𑀫 𑀤𑀸𑀲𑁄 𑀲𑀝𑁆𑀞𑀺𑀬𑁄𑀚𑀦𑀺𑀓𑁄 𑀳𑁄𑀢𑀺, 𑀅𑀫𑀦𑀼𑀲𑁆𑀲𑁂𑀦 𑀧𑀝𑀺𑀘𑁆𑀘 𑀚𑀸𑀢𑁄. 𑀅𑀣 𑀔𑁄 𑀭𑀸𑀚𑀸 𑀧𑀚𑁆𑀚𑁄𑀢𑁄 𑀓𑀸𑀓𑀁 𑀤𑀸𑀲𑀁 𑀆𑀡𑀸𑀧𑁂𑀲𑀺 𑁋 ‘‘𑀕𑀘𑁆𑀙, 𑀪𑀡𑁂 𑀓𑀸𑀓, 𑀚𑀻𑀯𑀓𑀁 𑀯𑁂𑀚𑁆𑀚𑀁 𑀦𑀺𑀯𑀢𑁆𑀢𑁂𑀳𑀺 𑁋 𑀭𑀸𑀚𑀸 𑀢𑀁, 𑀆𑀘𑀭𑀺𑀬, 𑀦𑀺𑀯𑀢𑁆𑀢𑀸𑀧𑁂𑀢𑀻𑀢𑀺. 𑀏𑀢𑁂 𑀔𑁄, 𑀪𑀡𑁂 𑀓𑀸𑀓, 𑀯𑁂𑀚𑁆𑀚𑀸 𑀦𑀸𑀫 𑀩𑀳𑀼𑀫𑀸𑀬𑀸. 𑀫𑀸 𑀘𑀲𑁆𑀲 𑀓𑀺𑀜𑁆𑀘𑀺 𑀧𑀝𑀺𑀕𑁆𑀕𑀳𑁂𑀲𑀻’’𑀢𑀺.

𑀅𑀣 𑀔𑁄 𑀓𑀸𑀓𑁄 𑀤𑀸𑀲𑁄 𑀚𑀻𑀯𑀓𑀁 𑀓𑁄𑀫𑀸𑀭𑀪𑀘𑁆𑀘𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀓𑁄𑀲𑀫𑁆𑀩𑀺𑀬𑀁 𑀲𑀫𑁆𑀪𑀸𑀯𑁂𑀲𑀺

𑀧𑀸𑀢𑀭𑀸𑀲𑀁 𑀓𑀭𑁄𑀦𑁆𑀢𑀁. 𑀅𑀣 𑀔𑁄 𑀓𑀸𑀓𑁄 𑀤𑀸𑀲𑁄 𑀚𑀻𑀯𑀓𑀁 𑀓𑁄𑀫𑀸𑀭𑀪𑀘𑁆𑀘𑀁 𑀏𑀢𑀤𑀯𑁄𑀘 𑁋 ‘‘𑀭𑀸𑀚𑀸 𑀢𑀁, 𑀆𑀘𑀭𑀺𑀬, 𑀦𑀺𑀯𑀢𑁆𑀢𑀸𑀧𑁂𑀢𑀻’’𑀢𑀺. ‘‘𑀆𑀕𑀫𑁂𑀳𑀺, 𑀪𑀡𑁂 𑀓𑀸𑀓, 𑀬𑀸𑀯 𑀪𑀼𑀜𑁆𑀚𑀸𑀫 [𑀪𑀼𑀜𑁆𑀚𑀸𑀫𑀺 (𑀲𑀻. 𑀲𑁆𑀬𑀸.)]. 𑀳𑀦𑁆𑀤, 𑀪𑀡𑁂 𑀓𑀸𑀓, 𑀪𑀼𑀜𑁆𑀚𑀲𑁆𑀲𑀽’’𑀢𑀺. ‘‘𑀅𑀮𑀁, 𑀆𑀘𑀭𑀺𑀬, 𑀭𑀜𑁆𑀜𑀸𑀫𑁆𑀳𑀺 𑀆𑀡𑀢𑁆𑀢𑁄 𑁋 𑀏𑀢𑁂 𑀔𑁄, 𑀪𑀡𑁂 𑀓𑀸𑀓, 𑀯𑁂𑀚𑁆𑀚𑀸 𑀦𑀸𑀫 𑀩𑀳𑀼𑀫𑀸𑀬𑀸, 𑀫𑀸 𑀘𑀲𑁆𑀲 𑀓𑀺𑀜𑁆𑀘𑀺 𑀧𑀝𑀺𑀕𑁆𑀕𑀳𑁂𑀲𑀻’’𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀦𑀔𑁂𑀦 𑀪𑁂𑀲𑀚𑁆𑀚𑀁 𑀑𑀮𑀼𑀫𑁆𑀧𑁂𑀢𑁆𑀯𑀸 𑀆𑀫𑀮𑀓𑀜𑁆𑀘 𑀔𑀸𑀤𑀢𑀺 𑀧𑀸𑀦𑀻𑀬𑀜𑁆𑀘 𑀧𑀺𑀯𑀢𑀺. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀓𑀸𑀓𑀁 𑀤𑀸𑀲𑀁 𑀏𑀢𑀤𑀯𑁄𑀘 𑁋 ‘‘𑀳𑀦𑁆𑀤, 𑀪𑀡𑁂 𑀓𑀸𑀓, 𑀆𑀫𑀮𑀓𑀜𑁆𑀘 𑀔𑀸𑀤 𑀧𑀸𑀦𑀻𑀬𑀜𑁆𑀘 𑀧𑀺𑀯𑀲𑁆𑀲𑀽’’𑀢𑀺. 𑀅𑀣 𑀔𑁄 𑀓𑀸𑀓𑁄 𑀤𑀸𑀲𑁄 𑁋 𑀅𑀬𑀁 𑀔𑁄 𑀯𑁂𑀚𑁆𑀚𑁄 𑀆𑀫𑀮𑀓𑀜𑁆𑀘 𑀔𑀸𑀤𑀢𑀺 𑀧𑀸𑀦𑀻𑀬𑀜𑁆𑀘 𑀧𑀺𑀯𑀢𑀺, 𑀦 𑀅𑀭𑀳𑀢𑀺 𑀓𑀺𑀜𑁆𑀘𑀺 𑀧𑀸𑀧𑀓𑀁 𑀳𑁄𑀢𑀼𑀦𑁆𑀢𑀺 𑁋 𑀉𑀧𑀟𑁆𑀠𑀸𑀫𑀮𑀓𑀜𑁆𑀘 𑀔𑀸𑀤𑀺 𑀧𑀸𑀦𑀻𑀬𑀜𑁆𑀘 𑀅𑀧𑀸𑀬𑀺. 𑀢𑀲𑁆𑀲 𑀢𑀁 𑀉𑀧𑀟𑁆𑀠𑀸𑀫𑀮𑀓𑀁 𑀔𑀸𑀤𑀺𑀢𑀁 𑀢𑀢𑁆𑀣𑁂𑀯 𑀦𑀺𑀘𑁆𑀙𑀸𑀭𑁂𑀲𑀺. 𑀅𑀣 𑀔𑁄 𑀓𑀸𑀓𑁄 𑀤𑀸𑀲𑁄 𑀚𑀻𑀯𑀓𑀁 𑀓𑁄𑀫𑀸𑀭𑀪𑀘𑁆𑀘𑀁 𑀏𑀢𑀤𑀯𑁄𑀘 𑁋 ‘‘𑀅𑀢𑁆𑀣𑀺 𑀫𑁂, 𑀆𑀘𑀭𑀺𑀬, 𑀚𑀻𑀯𑀺𑀢’’𑀦𑁆𑀢𑀺? ‘‘𑀫𑀸, 𑀪𑀡𑁂 𑀓𑀸𑀓, 𑀪𑀸𑀬𑀺, 𑀢𑁆𑀯𑀁 𑀘𑁂𑀯 𑀅𑀭𑁄𑀕𑁄 𑀪𑀯𑀺𑀲𑁆𑀲𑀲𑀺 𑀭𑀸𑀚𑀸 𑀘. 𑀘𑀡𑁆𑀟𑁄 𑀲𑁄 𑀭𑀸𑀚𑀸 𑀖𑀸𑀢𑀸𑀧𑁂𑀬𑁆𑀬𑀸𑀧𑀺 𑀫𑀁, 𑀢𑁂𑀦𑀸𑀳𑀁 𑀦 𑀦𑀺𑀯𑀢𑁆𑀢𑀸𑀫𑀻’’𑀢𑀺 𑀪𑀤𑁆𑀤𑀯𑀢𑀺𑀓𑀁 𑀳𑀢𑁆𑀣𑀺𑀦𑀺𑀓𑀁 𑀓𑀸𑀓𑀲𑁆𑀲 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀬𑁂𑀦 𑀭𑀸𑀚𑀕𑀳𑀁 𑀢𑁂𑀦 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀬𑁂𑀦 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀲𑁂𑀦𑀺𑀬𑀲𑁆𑀲 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. ‘‘𑀲𑀼𑀝𑁆𑀞𑀼, 𑀪𑀡𑁂 𑀚𑀻𑀯𑀓, 𑀅𑀓𑀸𑀲𑀺 𑀬𑀫𑁆𑀧𑀺 𑀦 𑀦𑀺𑀯𑀢𑁆𑀢𑁄, 𑀘𑀡𑁆𑀟𑁄 𑀲𑁄 𑀭𑀸𑀚𑀸 𑀖𑀸𑀢𑀸𑀧𑁂𑀬𑁆𑀬𑀸𑀧𑀺 𑀢’’𑀦𑁆𑀢𑀺. 𑀅𑀣 𑀔𑁄 𑀭𑀸𑀚𑀸 𑀧𑀚𑁆𑀚𑁄𑀢𑁄 𑀅𑀭𑁄𑀕𑁄 𑀲𑀫𑀸𑀦𑁄 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀸𑀳𑁂𑀲𑀺 𑁋 ‘‘𑀆𑀕𑀘𑁆𑀙𑀢𑀼 𑀚𑀻𑀯𑀓𑁄, 𑀯𑀭𑀁 𑀤𑀲𑁆𑀲𑀸𑀫𑀻’’𑀢𑀺. ‘‘𑀅𑀮𑀁, 𑀅𑀬𑁆𑀬𑁄 [𑀤𑁂𑀯 (𑀲𑁆𑀬𑀸.)], 𑀅𑀥𑀺𑀓𑀸𑀭𑀁 𑀫𑁂 𑀤𑁂𑀯𑁄 𑀲𑀭𑀢𑀽’’𑀢𑀺.

𑀧𑀚𑁆𑀚𑁄𑀢𑀭𑀸𑀚𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁨𑁦𑁮. 𑀲𑀺𑀯𑁂𑀬𑁆𑀬𑀓𑀤𑀼𑀲𑁆𑀲𑀬𑀼𑀕𑀓𑀣𑀸

𑁩𑁩𑁫. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀜𑁆𑀜𑁄 𑀧𑀚𑁆𑀚𑁄𑀢𑀲𑁆𑀲 𑀲𑀺𑀯𑁂𑀬𑁆𑀬𑀓𑀁 𑀤𑀼𑀲𑁆𑀲𑀬𑀼𑀕𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑁋 𑀩𑀳𑀽𑀦𑀁 [𑀩𑀳𑀼𑀦𑁆𑀦𑀁 (𑀲𑀻. 𑀲𑁆𑀬𑀸.)] 𑀤𑀼𑀲𑁆𑀲𑀸𑀦𑀁 𑀩𑀳𑀽𑀦𑀁 𑀤𑀼𑀲𑁆𑀲𑀬𑀼𑀕𑀸𑀦𑀁 𑀩𑀳𑀽𑀦𑀁 𑀤𑀼𑀲𑁆𑀲𑀬𑀼𑀕𑀲𑀢𑀸𑀦𑀁 𑀩𑀳𑀽𑀦𑀁 𑀤𑀼𑀲𑁆𑀲𑀬𑀼𑀕𑀲𑀳𑀲𑁆𑀲𑀸𑀦𑀁 𑀩𑀳𑀽𑀦𑀁 𑀤𑀼𑀲𑁆𑀲𑀬𑀼𑀕𑀲𑀢𑀲𑀳𑀲𑁆𑀲𑀸𑀦𑀁 𑀅𑀕𑁆𑀕𑀜𑁆𑀘 𑀲𑁂𑀝𑁆𑀞𑀜𑁆𑀘 𑀫𑁄𑀓𑁆𑀔𑀜𑁆𑀘 𑀉𑀢𑁆𑀢𑀫𑀜𑁆𑀘 𑀧𑀯𑀭𑀜𑁆𑀘. 𑀅𑀣 𑀔𑁄 𑀭𑀸𑀚𑀸 𑀧𑀚𑁆𑀚𑁄𑀢𑁄 𑀢𑀁 𑀲𑀺𑀯𑁂𑀬𑁆𑀬𑀓𑀁 𑀤𑀼𑀲𑁆𑀲𑀬𑀼𑀕𑀁 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀧𑀸𑀳𑁂𑀲𑀺. 𑀅𑀣 𑀔𑁄 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀇𑀤𑀁 𑀔𑁄 𑀫𑁂 𑀲𑀺𑀯𑁂𑀬𑁆𑀬𑀓𑀁 𑀤𑀼𑀲𑁆𑀲𑀬𑀼𑀕𑀁 𑀭𑀜𑁆𑀜𑀸 𑀧𑀚𑁆𑀚𑁄𑀢𑁂𑀦 𑀧𑀳𑀺𑀢𑀁 𑁋 𑀩𑀳𑀽𑀦𑀁 𑀤𑀼𑀲𑁆𑀲𑀸𑀦𑀁 𑀩𑀳𑀽𑀦𑀁 𑀤𑀼𑀲𑁆𑀲𑀬𑀼𑀕𑀸𑀦𑀁 𑀩𑀳𑀽𑀦𑀁 𑀤𑀼𑀲𑁆𑀲𑀬𑀼𑀕𑀲𑀢𑀸𑀦𑀁 𑀩𑀳𑀽𑀦𑀁 𑀤𑀼𑀲𑁆𑀲𑀬𑀼𑀕𑀲𑀳𑀲𑁆𑀲𑀸𑀦𑀁 𑀩𑀳𑀽𑀦𑀁 𑀤𑀼𑀲𑁆𑀲𑀬𑀼𑀕𑀲𑀢𑀲𑀳𑀲𑁆𑀲𑀸𑀦𑀁 𑀅𑀕𑁆𑀕𑀜𑁆𑀘 𑀲𑁂𑀝𑁆𑀞𑀜𑁆𑀘 𑀫𑁄𑀓𑁆𑀔𑀜𑁆𑀘 𑀉𑀢𑁆𑀢𑀫𑀜𑁆𑀘 𑀧𑀯𑀭𑀜𑁆𑀘. 𑀦𑀬𑀺𑀤𑀁 𑀅𑀜𑁆𑀜𑁄 𑀓𑁄𑀘𑀺 𑀧𑀘𑁆𑀘𑀸𑀭𑀳𑀢𑀺 𑀅𑀜𑁆𑀜𑀢𑁆𑀭 𑀢𑁂𑀦 𑀪𑀕𑀯𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦, 𑀭𑀜𑁆𑀜𑀸 𑀯𑀸 𑀫𑀸𑀕𑀥𑁂𑀦 𑀲𑁂𑀦𑀺𑀬𑁂𑀦 𑀩𑀺𑀫𑁆𑀩𑀺𑀲𑀸𑀭𑁂𑀦𑀸’’𑀢𑀺.

𑀲𑀺𑀯𑁂𑀬𑁆𑀬𑀓𑀤𑀼𑀲𑁆𑀲𑀬𑀼𑀕𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁦𑁯. 𑀲𑀫𑀢𑁆𑀢𑀺𑀁𑀲𑀯𑀺𑀭𑁂𑀘𑀦𑀓𑀣𑀸

𑁩𑁩𑁬. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀢𑁄 𑀓𑀸𑀬𑁄 𑀤𑁄𑀲𑀸𑀪𑀺𑀲𑀦𑁆𑀦𑁄 𑀳𑁄𑀢𑀺. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀤𑁄𑀲𑀸𑀪𑀺𑀲𑀦𑁆𑀦𑁄 𑀔𑁄, 𑀆𑀦𑀦𑁆𑀤, 𑀢𑀣𑀸𑀕𑀢𑀲𑁆𑀲 𑀓𑀸𑀬𑁄. 𑀇𑀘𑁆𑀙𑀢𑀺 𑀢𑀣𑀸𑀕𑀢𑁄 𑀯𑀺𑀭𑁂𑀘𑀦𑀁 𑀧𑀸𑀢𑀼’’𑀦𑁆𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀚𑀻𑀯𑀓𑀁 𑀓𑁄𑀫𑀸𑀭𑀪𑀘𑁆𑀘𑀁 𑀏𑀢𑀤𑀯𑁄𑀘 𑁋 ‘‘𑀤𑁄𑀲𑀸𑀪𑀺𑀲𑀦𑁆𑀦𑁄 𑀔𑁄, 𑀆𑀯𑀼𑀲𑁄 𑀚𑀻𑀯𑀓, 𑀢𑀣𑀸𑀕𑀢𑀲𑁆𑀲 𑀓𑀸𑀬𑁄. 𑀇𑀘𑁆𑀙𑀢𑀺 𑀢𑀣𑀸𑀕𑀢𑁄 𑀯𑀺𑀭𑁂𑀘𑀦𑀁 𑀧𑀸𑀢𑀼’’𑀦𑁆𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂 𑀆𑀦𑀦𑁆𑀤, 𑀪𑀕𑀯𑀢𑁄 𑀓𑀸𑀬𑀁 𑀓𑀢𑀺𑀧𑀸𑀳𑀁 𑀲𑀺𑀦𑁂𑀳𑁂𑀣𑀸’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀓𑀸𑀬𑀁 𑀓𑀢𑀺𑀧𑀸𑀳𑀁 𑀲𑀺𑀦𑁂𑀳𑁂𑀢𑁆𑀯𑀸 𑀬𑁂𑀦 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀚𑀻𑀯𑀓𑀁 𑀓𑁄𑀫𑀸𑀭𑀪𑀘𑁆𑀘𑀁 𑀏𑀢𑀤𑀯𑁄𑀘 𑁋 ‘‘𑀲𑀺𑀦𑀺𑀤𑁆𑀥𑁄 𑀔𑁄, 𑀆𑀯𑀼𑀲𑁄 𑀚𑀻𑀯𑀓, 𑀢𑀣𑀸𑀕𑀢𑀲𑁆𑀲 𑀓𑀸𑀬𑁄. 𑀬𑀲𑁆𑀲 𑀤𑀸𑀦𑀺 𑀓𑀸𑀮𑀁 𑀫𑀜𑁆𑀜𑀲𑀻’’𑀢𑀺. 𑀅𑀣 𑀔𑁄 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀦 𑀔𑁄 𑀫𑁂𑀢𑀁 𑀧𑀢𑀺𑀭𑀽𑀧𑀁 𑀬𑁄𑀳𑀁 𑀪𑀕𑀯𑀢𑁄 𑀑𑀴𑀸𑀭𑀺𑀓𑀁 𑀯𑀺𑀭𑁂𑀘𑀦𑀁 𑀤𑀤𑁂𑀬𑁆𑀬’’𑀦𑁆𑀢𑀺. 𑀢𑀻𑀡𑀺 𑀉𑀧𑁆𑀧𑀮𑀳𑀢𑁆𑀣𑀸𑀦𑀺 𑀦𑀸𑀦𑀸𑀪𑁂𑀲𑀚𑁆𑀚𑁂𑀳𑀺 𑀧𑀭𑀺𑀪𑀸𑀯𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁 𑀉𑀧𑁆𑀧𑀮𑀳𑀢𑁆𑀣𑀁 𑀪𑀕𑀯𑀢𑁄 𑀉𑀧𑀦𑀸𑀫𑁂𑀲𑀺 𑁋 ‘‘𑀇𑀫𑀁, 𑀪𑀦𑁆𑀢𑁂, 𑀪𑀕𑀯𑀸 𑀧𑀞𑀫𑀁 𑀉𑀧𑁆𑀧𑀮𑀳𑀢𑁆𑀣𑀁 𑀉𑀧𑀲𑀺𑀗𑁆𑀖𑀢𑀼. 𑀇𑀤𑀁 𑀪𑀕𑀯𑀦𑁆𑀢𑀁 𑀤𑀲𑀓𑁆𑀔𑀢𑁆𑀢𑀼𑀁 𑀯𑀺𑀭𑁂𑀘𑁂𑀲𑁆𑀲𑀢𑀻’’𑀢𑀺. 𑀤𑀼𑀢𑀺𑀬𑀁 𑀉𑀧𑁆𑀧𑀮𑀳𑀢𑁆𑀣𑀁 𑀪𑀕𑀯𑀢𑁄 𑀉𑀧𑀦𑀸𑀫𑁂𑀲𑀺 𑁋 ‘‘𑀇𑀫𑀁, 𑀪𑀦𑁆𑀢𑁂, 𑀪𑀕𑀯𑀸 𑀤𑀼𑀢𑀺𑀬𑀁 𑀉𑀧𑁆𑀧𑀮𑀳𑀢𑁆𑀣𑀁 𑀉𑀧𑀲𑀺𑀗𑁆𑀖𑀢𑀼. 𑀇𑀤𑀁 𑀪𑀕𑀯𑀦𑁆𑀢𑀁 𑀤𑀲𑀓𑁆𑀔𑀢𑁆𑀢𑀼𑀁 𑀯𑀺𑀭𑁂𑀘𑁂𑀲𑁆𑀲𑀢𑀻’’𑀢𑀺. 𑀢𑀢𑀺𑀬𑀁 𑀉𑀧𑁆𑀧𑀮𑀳𑀢𑁆𑀣𑀁 𑀪𑀕𑀯𑀢𑁄 𑀉𑀧𑀦𑀸𑀫𑁂𑀲𑀺 𑁋 ‘‘𑀇𑀫𑀁, 𑀪𑀦𑁆𑀢𑁂, 𑀪𑀕𑀯𑀸 𑀢𑀢𑀺𑀬𑀁 𑀉𑀧𑁆𑀧𑀮𑀳𑀢𑁆𑀣𑀁 𑀉𑀧𑀲𑀺𑀗𑁆𑀖𑀢𑀼. 𑀇𑀤𑀁 𑀪𑀕𑀯𑀦𑁆𑀢𑀁 𑀤𑀲𑀓𑁆𑀔𑀢𑁆𑀢𑀼𑀁 𑀯𑀺𑀭𑁂𑀘𑁂𑀲𑁆𑀲𑀢𑀻’’𑀢𑀺. 𑀏𑀯𑀁 𑀪𑀕𑀯𑀢𑁄 𑀲𑀫𑀢𑁆𑀢𑀺𑀁𑀲𑀸𑀬 𑀯𑀺𑀭𑁂𑀘𑀦𑀁 𑀪𑀯𑀺𑀲𑁆𑀲𑀢𑀻𑀢𑀺. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀪𑀕𑀯𑀢𑁄 𑀲𑀫𑀢𑁆𑀢𑀺𑀁𑀲𑀸𑀬 𑀯𑀺𑀭𑁂𑀘𑀦𑀁 𑀤𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀩𑀳𑀺 𑀤𑁆𑀯𑀸𑀭𑀓𑁄𑀝𑁆𑀞𑀓𑀸 𑀦𑀺𑀓𑁆𑀔𑀦𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀬𑀸 𑀔𑁄 𑀪𑀕𑀯𑀢𑁄 𑀲𑀫𑀢𑁆𑀢𑀺𑀁𑀲𑀸𑀬 𑀯𑀺𑀭𑁂𑀘𑀦𑀁 𑀤𑀺𑀦𑁆𑀦𑀁. 𑀤𑁄𑀲𑀸𑀪𑀺𑀲𑀦𑁆𑀦𑁄 𑀢𑀣𑀸𑀕𑀢𑀲𑁆𑀲 𑀓𑀸𑀬𑁄. 𑀦 𑀪𑀕𑀯𑀦𑁆𑀢𑀁 𑀲𑀫𑀢𑁆𑀢𑀺𑀁𑀲𑀓𑁆𑀔𑀢𑁆𑀢𑀼𑀁 𑀯𑀺𑀭𑁂𑀘𑁂𑀲𑁆𑀲𑀢𑀺, 𑀏𑀓𑀽𑀦𑀢𑁆𑀢𑀺𑀁𑀲𑀓𑁆𑀔𑀢𑁆𑀢𑀼𑀁 𑀪𑀕𑀯𑀦𑁆𑀢𑀁 𑀯𑀺𑀭𑁂𑀘𑁂𑀲𑁆𑀲𑀢𑀺. 𑀅𑀧𑀺 𑀘, 𑀪𑀕𑀯𑀸 𑀯𑀺𑀭𑀺𑀢𑁆𑀢𑁄 𑀦𑀳𑀸𑀬𑀺𑀲𑁆𑀲𑀢𑀺. 𑀦𑀳𑀸𑀢𑀁 𑀪𑀕𑀯𑀦𑁆𑀢𑀁 𑀲𑀓𑀺𑀁 𑀯𑀺𑀭𑁂𑀘𑁂𑀲𑁆𑀲𑀢𑀺. 𑀏𑀯𑀁 𑀪𑀕𑀯𑀢𑁄 𑀲𑀫𑀢𑁆𑀢𑀺𑀁𑀲𑀸𑀬 𑀯𑀺𑀭𑁂𑀘𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀇𑀥𑀸𑀦𑀦𑁆𑀤, 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀩𑀳𑀺 𑀤𑁆𑀯𑀸𑀭𑀓𑁄𑀝𑁆𑀞𑀓𑀸 𑀦𑀺𑀓𑁆𑀔𑀦𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀫𑀬𑀸 𑀔𑁄 𑀪𑀕𑀯𑀢𑁄 𑀲𑀫𑀢𑁆𑀢𑀺𑀁𑀲𑀸𑀬 𑀯𑀺𑀭𑁂𑀘𑀦𑀁 𑀤𑀺𑀦𑁆𑀦𑀁. 𑀤𑁄𑀲𑀸𑀪𑀺𑀲𑀦𑁆𑀦𑁄 𑀢𑀣𑀸𑀕𑀢𑀲𑁆𑀲 𑀓𑀸𑀬𑁄. 𑀦 𑀪𑀕𑀯𑀦𑁆𑀢𑀁 𑀲𑀫𑀢𑀺𑀁𑀲𑀓𑁆𑀔𑀢𑁆𑀢𑀼𑀁 𑀯𑀺𑀭𑁂𑀘𑁂𑀲𑁆𑀲𑀢𑀺, 𑀏𑀓𑀽𑀦𑀢𑀺𑀁𑀲𑀓𑁆𑀔𑀢𑁆𑀢𑀼𑀁 𑀪𑀕𑀯𑀦𑁆𑀢𑀁 𑀯𑀺𑀭𑁂𑀘𑁂𑀲𑁆𑀲𑀢𑀺. 𑀅𑀧𑀺 𑀘, 𑀪𑀕𑀯𑀸 𑀯𑀺𑀭𑀺𑀢𑁆𑀢𑁄 𑀦𑀳𑀸𑀬𑀺𑀲𑁆𑀲𑀢𑀺. 𑀦𑀳𑀸𑀢𑀁 𑀪𑀕𑀯𑀦𑁆𑀢𑀁 𑀲𑀓𑀺𑀁 𑀯𑀺𑀭𑁂𑀘𑁂𑀲𑁆𑀲𑀢𑀺. 𑀏𑀯𑀁 𑀪𑀕𑀯𑀢𑁄 𑀲𑀫𑀢𑁆𑀢𑀺𑀁𑀲𑀸𑀬 𑀯𑀺𑀭𑁂𑀘𑀦𑀁 𑀪𑀯𑀺𑀲𑁆𑀲𑀢𑀻’𑀢𑀺. 𑀢𑁂𑀦 𑀳𑀸𑀦𑀦𑁆𑀤, 𑀉𑀡𑁆𑀳𑁄𑀤𑀓𑀁 𑀧𑀝𑀺𑀬𑀸𑀤𑁂𑀳𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀉𑀡𑁆𑀳𑁄𑀤𑀓𑀁 𑀧𑀝𑀺𑀬𑀸𑀤𑁂𑀲𑀺.

𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀯𑀺𑀭𑀺𑀢𑁆𑀢𑁄, 𑀪𑀦𑁆𑀢𑁂, 𑀪𑀕𑀯𑀸’’𑀢𑀺? ‘‘𑀯𑀺𑀭𑀺𑀢𑁆𑀢𑁄𑀫𑁆𑀳𑀺, 𑀚𑀻𑀯𑀓𑀸’’𑀢𑀺. 𑀇𑀥 𑀫𑀬𑁆𑀳𑀁, 𑀪𑀦𑁆𑀢𑁂, 𑀩𑀳𑀺 𑀤𑁆𑀯𑀸𑀭𑀓𑁄𑀝𑁆𑀞𑀓𑀸 𑀦𑀺𑀓𑁆𑀔𑀦𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀬𑀸 𑀔𑁄 𑀪𑀕𑀯𑀢𑁄 𑀲𑀫𑀢𑁆𑀢𑀺𑀁𑀲𑀸𑀬 𑀯𑀺𑀭𑁂𑀘𑀦𑀁 𑀤𑀺𑀦𑁆𑀦𑀁. 𑀤𑁄𑀲𑀸𑀪𑀺𑀲𑀦𑁆𑀦𑁄 𑀢𑀣𑀸𑀕𑀢𑀲𑁆𑀲 𑀓𑀸𑀬𑁄. 𑀦 𑀪𑀕𑀯𑀦𑁆𑀢𑀁 𑀲𑀫𑀢𑁆𑀢𑀺𑀁𑀲𑀓𑁆𑀔𑀢𑁆𑀢𑀼𑀁 𑀯𑀺𑀭𑁂𑀘𑁂𑀲𑁆𑀲𑀢𑀺, 𑀏𑀓𑀽𑀦𑀢𑁆𑀢𑀺𑀁𑀲𑀓𑁆𑀔𑀢𑁆𑀢𑀼𑀁 𑀪𑀕𑀯𑀦𑁆𑀢𑀁 𑀯𑀺𑀭𑁂𑀘𑁂𑀲𑁆𑀲𑀢𑀺. 𑀅𑀧𑀺 𑀘, 𑀪𑀕𑀯𑀸 𑀯𑀺𑀭𑀺𑀢𑁆𑀢𑁄 𑀦𑀳𑀸𑀬𑀺𑀲𑁆𑀲𑀢𑀺. 𑀦𑀳𑀸𑀢𑀁 𑀪𑀕𑀯𑀦𑁆𑀢𑀁 𑀲𑀓𑀺𑀁 𑀯𑀺𑀭𑁂𑀘𑁂𑀲𑁆𑀲𑀢𑀺. 𑀏𑀯𑀁 𑀪𑀕𑀯𑀢𑁄 𑀲𑀫𑀢𑁆𑀢𑀺𑀁𑀲𑀸𑀬 𑀯𑀺𑀭𑁂𑀘𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺. 𑀦𑀳𑀸𑀬𑀢𑀼, 𑀪𑀦𑁆𑀢𑁂, 𑀪𑀕𑀯𑀸, 𑀦𑀳𑀸𑀬𑀢𑀼 𑀲𑀼𑀕𑀢𑁄𑀢𑀺. 𑀅𑀣 𑀔𑁄 𑀪𑀕𑀯𑀸 𑀉𑀡𑁆𑀳𑁄𑀤𑀓𑀁 𑀦𑀳𑀸𑀬𑀺. 𑀦𑀳𑀸𑀢𑀁 𑀪𑀕𑀯𑀦𑁆𑀢𑀁 𑀲𑀓𑀺𑀁 𑀯𑀺𑀭𑁂𑀘𑁂𑀲𑀺. 𑀏𑀯𑀁 𑀪𑀕𑀯𑀢𑁄 𑀲𑀫𑀢𑁆𑀢𑀺𑀁𑀲𑀸𑀬 𑀯𑀺𑀭𑁂𑀘𑀦𑀁 𑀅𑀳𑁄𑀲𑀺. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀬𑀸𑀯, 𑀪𑀦𑁆𑀢𑁂, 𑀪𑀕𑀯𑀢𑁄 𑀓𑀸𑀬𑁄 𑀧𑀓𑀢𑀢𑁆𑀢𑁄 𑀳𑁄𑀢𑀺, 𑀅𑀮𑀁 [𑀅𑀳𑀁 𑀢𑀸𑀯 𑀬𑀽𑀲𑀧𑀺𑀡𑁆𑀝𑀧𑀸𑀢𑁂𑀦𑀸𑀢𑀺 (𑀲𑀻.), 𑀅𑀮𑀁 𑀬𑀽𑀲𑀧𑀺𑀡𑁆𑀝𑀓𑁂𑀦𑀸𑀢𑀺 (𑀲𑁆𑀬𑀸.)] 𑀬𑀽𑀲𑀧𑀺𑀡𑁆𑀟𑀧𑀸𑀢𑁂𑀦𑀸’’𑀢𑀺.

𑀲𑀫𑀢𑁆𑀢𑀺𑀁𑀲𑀯𑀺𑀭𑁂𑀘𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁧𑁦. 𑀯𑀭𑀬𑀸𑀘𑀦𑀸𑀓𑀣𑀸

𑁩𑁩𑁭. 𑀅𑀣 𑀔𑁄 𑀪𑀕𑀯𑀢𑁄 𑀓𑀸𑀬𑁄 𑀦𑀘𑀺𑀭𑀲𑁆𑀲𑁂𑀯 𑀧𑀓𑀢𑀢𑁆𑀢𑁄 𑀅𑀳𑁄𑀲𑀺. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀢𑀁 𑀲𑀺𑀯𑁂𑀬𑁆𑀬𑀓𑀁 𑀤𑀼𑀲𑁆𑀲𑀬𑀼𑀕𑀁 𑀆𑀤𑀸𑀬 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀏𑀓𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀯𑀭𑀁 𑀬𑀸𑀘𑀸𑀫𑀻’’𑀢𑀺. ‘‘𑀅𑀢𑀺𑀓𑁆𑀓𑀦𑁆𑀢𑀯𑀭𑀸 𑀔𑁄, 𑀚𑀻𑀯𑀓, 𑀢𑀣𑀸𑀕𑀢𑀸’’𑀢𑀺. ‘‘𑀬𑀜𑁆𑀘, 𑀪𑀦𑁆𑀢𑁂, 𑀓𑀧𑁆𑀧𑀢𑀺 𑀬𑀜𑁆𑀘 𑀅𑀦𑀯𑀚𑁆𑀚’’𑀦𑁆𑀢𑀺. ‘‘𑀯𑀤𑁂𑀳𑀺, 𑀚𑀻𑀯𑀓𑀸’’𑀢𑀺. ‘‘𑀪𑀕𑀯𑀸, 𑀪𑀦𑁆𑀢𑁂, 𑀧𑀁𑀲𑀼𑀓𑀽𑀮𑀺𑀓𑁄, 𑀪𑀺𑀓𑁆𑀔𑀼𑀲𑀗𑁆𑀖𑁄 𑀘. 𑀇𑀤𑀁 𑀫𑁂, 𑀪𑀦𑁆𑀢𑁂, 𑀲𑀺𑀯𑁂𑀬𑁆𑀬𑀓𑀁 𑀤𑀼𑀲𑁆𑀲𑀬𑀼𑀕𑀁 𑀭𑀜𑁆𑀜𑀸 𑀧𑀚𑁆𑀚𑁄𑀢𑁂𑀦 𑀧𑀳𑀺𑀢𑀁 𑁋 𑀩𑀳𑀽𑀦𑀁 𑀤𑀼𑀲𑁆𑀲𑀸𑀦𑀁 𑀩𑀳𑀽𑀦𑀁 𑀤𑀼𑀲𑁆𑀲𑀬𑀼𑀕𑀸𑀦𑀁 𑀩𑀳𑀽𑀦𑀁 𑀤𑀼𑀲𑁆𑀲𑀬𑀼𑀕𑀲𑀢𑀸𑀦𑀁 𑀩𑀳𑀽𑀦𑀁 𑀤𑀼𑀲𑁆𑀲𑀬𑀼𑀕𑀲𑀳𑀲𑁆𑀲𑀸𑀦𑀁 𑀩𑀳𑀽𑀦𑀁 𑀤𑀼𑀲𑁆𑀲𑀬𑀼𑀕𑀲𑀢𑀲𑀳𑀲𑁆𑀲𑀸𑀦𑀁 𑀅𑀕𑁆𑀕𑀜𑁆𑀘 𑀲𑁂𑀝𑁆𑀞𑀜𑁆𑀘 𑀫𑁄𑀓𑁆𑀔𑀜𑁆𑀘 𑀉𑀢𑁆𑀢𑀫𑀜𑁆𑀘 𑀧𑀯𑀭𑀜𑁆𑀘. 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑀺𑀯𑁂𑀬𑁆𑀬𑀓𑀁 𑀤𑀼𑀲𑁆𑀲𑀬𑀼𑀕𑀁; 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀕𑀳𑀧𑀢𑀺𑀘𑀻𑀯𑀭𑀁 𑀅𑀦𑀼𑀚𑀸𑀦𑀸𑀢𑀽’’𑀢𑀺. 𑀧𑀝𑀺𑀕𑁆𑀕𑀳𑁂𑀲𑀺 𑀪𑀕𑀯𑀸 𑀲𑀺𑀯𑁂𑀬𑁆𑀬𑀓𑀁 𑀤𑀼𑀲𑁆𑀲𑀬𑀼𑀕𑀁. 𑀅𑀣 𑀔𑁄 𑀪𑀕𑀯𑀸 𑀚𑀻𑀯𑀓𑀁 𑀓𑁄𑀫𑀸𑀭𑀪𑀘𑁆𑀘𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺 𑀲𑀫𑀸𑀤𑀧𑁂𑀲𑀺 𑀲𑀫𑀼𑀢𑁆𑀢𑁂𑀚𑁂𑀲𑀺 𑀲𑀫𑁆𑀧𑀳𑀁𑀲𑁂𑀲𑀺. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀪𑀕𑀯𑀢𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑀺𑀢𑁄 𑀲𑀫𑀸𑀤𑀧𑀺𑀢𑁄 𑀲𑀫𑀼𑀢𑁆𑀢𑁂𑀚𑀺𑀢𑁄 𑀲𑀫𑁆𑀧𑀳𑀁𑀲𑀺𑀢𑁄 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀳𑀧𑀢𑀺𑀘𑀻𑀯𑀭𑀁. 𑀬𑁄 𑀇𑀘𑁆𑀙𑀢𑀺, 𑀧𑀁𑀲𑀼𑀓𑀽𑀮𑀺𑀓𑁄 𑀳𑁄𑀢𑀼. 𑀬𑁄 𑀇𑀘𑁆𑀙𑀢𑀺, 𑀕𑀳𑀧𑀢𑀺𑀘𑀻𑀯𑀭𑀁 𑀲𑀸𑀤𑀺𑀬𑀢𑀼. 𑀇𑀢𑀭𑀻𑀢𑀭𑁂𑀦𑀧𑀸𑀳𑀁 [𑀧𑀳𑀁 (𑀲𑀻.), 𑀘𑀸𑀳𑀁 (𑀲𑁆𑀬𑀸.)], 𑀪𑀺𑀓𑁆𑀔𑀯𑁂, 𑀲𑀦𑁆𑀢𑀼𑀝𑁆𑀞𑀺𑀁 𑀯𑀡𑁆𑀡𑁂𑀫𑀻’’𑀢𑀺.

𑀅𑀲𑁆𑀲𑁄𑀲𑀼𑀁 𑀔𑁄 𑀭𑀸𑀚𑀕𑀳𑁂 𑀫𑀦𑀼𑀲𑁆𑀲𑀸 𑁋 ‘‘𑀪𑀕𑀯𑀢𑀸 𑀓𑀺𑀭 𑀪𑀺𑀓𑁆𑀔𑀽𑀦𑀁 𑀕𑀳𑀧𑀢𑀺𑀘𑀻𑀯𑀭𑀁 𑀅𑀦𑀼𑀜𑁆𑀜𑀸𑀢’’𑀦𑁆𑀢𑀺. 𑀢𑁂 𑀘 𑀫𑀦𑀼𑀲𑁆𑀲𑀸 𑀳𑀝𑁆𑀞𑀸 𑀅𑀳𑁂𑀲𑀼𑀁 𑀉𑀤𑀕𑁆𑀕𑀸 ‘‘𑀇𑀤𑀸𑀦𑀺 𑀔𑁄 𑀫𑀬𑀁 𑀤𑀸𑀦𑀸𑀦𑀺 𑀤𑀲𑁆𑀲𑀸𑀫 𑀧𑀼𑀜𑁆𑀜𑀸𑀦𑀺 𑀓𑀭𑀺𑀲𑁆𑀲𑀸𑀫, 𑀬𑀢𑁄 𑀪𑀕𑀯𑀢𑀸 𑀪𑀺𑀓𑁆𑀔𑀽𑀦𑀁 𑀕𑀳𑀧𑀢𑀺𑀘𑀻𑀯𑀭𑀁 𑀅𑀦𑀼𑀜𑁆𑀜𑀸𑀢’’𑀦𑁆𑀢𑀺. 𑀏𑀓𑀸𑀳𑁂𑀦𑁂𑀯 𑀭𑀸𑀚𑀕𑀳𑁂 𑀩𑀳𑀽𑀦𑀺 𑀘𑀻𑀯𑀭𑀲𑀳𑀲𑁆𑀲𑀸𑀦𑀺 𑀉𑀧𑁆𑀧𑀚𑁆𑀚𑀺𑀁𑀲𑀼.

𑀅𑀲𑁆𑀲𑁄𑀲𑀼𑀁 𑀔𑁄 𑀚𑀸𑀦𑀧𑀤𑀸 𑀫𑀦𑀼𑀲𑁆𑀲𑀸 𑁋 ‘‘𑀪𑀕𑀯𑀢𑀸 𑀓𑀺𑀭 𑀪𑀺𑀓𑁆𑀔𑀽𑀦𑀁 𑀕𑀳𑀧𑀢𑀺𑀘𑀻𑀯𑀭𑀁 𑀅𑀦𑀼𑀜𑁆𑀜𑀸𑀢’’𑀦𑁆𑀢𑀺. 𑀢𑁂 𑀘 𑀫𑀦𑀼𑀲𑁆𑀲𑀸 𑀳𑀝𑁆𑀞𑀸 𑀅𑀳𑁂𑀲𑀼𑀁 𑀉𑀤𑀕𑁆𑀕𑀸 𑁋 ‘‘𑀇𑀤𑀸𑀦𑀺 𑀔𑁄 𑀫𑀬𑀁 𑀤𑀸𑀦𑀸𑀦𑀺 𑀤𑀲𑁆𑀲𑀸𑀫 𑀧𑀼𑀜𑁆𑀜𑀸𑀦𑀺 𑀓𑀭𑀺𑀲𑁆𑀲𑀸𑀫, 𑀬𑀢𑁄 𑀪𑀕𑀯𑀢𑀸 𑀪𑀺𑀓𑁆𑀔𑀽𑀦𑀁 𑀕𑀳𑀧𑀢𑀺𑀘𑀻𑀯𑀭𑀁 𑀅𑀦𑀼𑀜𑁆𑀜𑀸𑀢’’𑀦𑁆𑀢𑀺. 𑀚𑀦𑀧𑀤𑁂𑀧𑀺 𑀏𑀓𑀸𑀳𑁂𑀦𑁂𑀯 𑀩𑀳𑀽𑀦𑀺 𑀘𑀻𑀯𑀭𑀲𑀳𑀲𑁆𑀲𑀸𑀦𑀺 𑀉𑀧𑁆𑀧𑀚𑁆𑀚𑀺𑀁𑀲𑀼.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀗𑁆𑀖𑀲𑁆𑀲 𑀧𑀸𑀯𑀸𑀭𑁄 𑀉𑀧𑁆𑀧𑀦𑁆𑀦𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀸𑀯𑀸𑀭𑀦𑁆𑀢𑀺.

𑀓𑁄𑀲𑁂𑀬𑁆𑀬𑀧𑀸𑀯𑀸𑀭𑁄 𑀉𑀧𑁆𑀧𑀦𑁆𑀦𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑁄𑀲𑁂𑀬𑁆𑀬𑀧𑀸𑀯𑀸𑀭𑀦𑁆𑀢𑀺.

𑀓𑁄𑀚𑀯𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑁄𑀚𑀯𑀦𑁆𑀢𑀺.

𑀯𑀭𑀬𑀸𑀘𑀦𑀸𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀧𑀞𑀫𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.

𑁨𑁧𑁧. 𑀓𑀫𑁆𑀩𑀮𑀸𑀦𑀼𑀚𑀸𑀦𑀦𑀸𑀤𑀺𑀓𑀣𑀸

𑁩𑁩𑁮. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀓𑀸𑀲𑀺𑀭𑀸𑀚𑀸 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀅𑀟𑁆𑀠𑀓𑀸𑀲𑀺𑀓𑀁 𑀓𑀫𑁆𑀩𑀮𑀁 𑀧𑀸𑀳𑁂𑀲𑀺 𑀉𑀧𑀟𑁆𑀠𑀓𑀸𑀲𑀺𑀦𑀁 𑀔𑀫𑀫𑀸𑀦𑀁. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀢𑀁 𑀅𑀟𑁆𑀠𑀓𑀸𑀲𑀺𑀓𑀁 𑀓𑀫𑁆𑀩𑀮𑀁 𑀆𑀤𑀸𑀬 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀬𑀁 𑀫𑁂, 𑀪𑀦𑁆𑀢𑁂, 𑀅𑀟𑁆𑀠𑀓𑀸𑀲𑀺𑀓𑁄 𑀓𑀫𑁆𑀩𑀮𑁄 𑀓𑀸𑀲𑀺𑀭𑀜𑁆𑀜𑀸 𑀧𑀳𑀺𑀢𑁄 𑀉𑀧𑀟𑁆𑀠𑀓𑀸𑀲𑀺𑀦𑀁 𑀔𑀫𑀫𑀸𑀦𑁄. 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀓𑀫𑁆𑀩𑀮𑀁, 𑀬𑀁 𑀫𑀫𑀲𑁆𑀲 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺. 𑀧𑀝𑀺𑀕𑁆𑀕𑀳𑁂𑀲𑀺 𑀪𑀕𑀯𑀸 𑀓𑀫𑁆𑀩𑀮𑀁. 𑀅𑀣 𑀔𑁄 𑀪𑀕𑀯𑀸 𑀚𑀻𑀯𑀓𑀁 𑀓𑁄𑀫𑀸𑀭𑀪𑀘𑁆𑀘𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺…𑀧𑁂… 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀩𑀮’’𑀦𑁆𑀢𑀺.

𑁩𑁩𑁯. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀗𑁆𑀖𑀲𑁆𑀲 𑀉𑀘𑁆𑀘𑀸𑀯𑀘𑀸𑀦𑀺 𑀘𑀻𑀯𑀭𑀸𑀦𑀺 𑀉𑀧𑁆𑀧𑀦𑁆𑀦𑀸𑀦𑀺 𑀳𑁄𑀦𑁆𑀢𑀺. 𑀅𑀣 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀺𑀁 𑀦𑀼 𑀔𑁄 𑀪𑀕𑀯𑀢𑀸 𑀘𑀻𑀯𑀭𑀁 𑀅𑀦𑀼𑀜𑁆𑀜𑀸𑀢𑀁, 𑀓𑀺𑀁 𑀅𑀦𑀦𑀼𑀜𑁆𑀜𑀸𑀢’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀙 𑀘𑀻𑀯𑀭𑀸𑀦𑀺 𑁋 𑀔𑁄𑀫𑀁 𑀓𑀧𑁆𑀧𑀸𑀲𑀺𑀓𑀁 𑀓𑁄𑀲𑁂𑀬𑁆𑀬𑀁 𑀓𑀫𑁆𑀩𑀮𑀁 𑀲𑀸𑀡𑀁 𑀪𑀗𑁆𑀕𑀦𑁆𑀢𑀺.

𑁩𑁪𑁦. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀬𑁂 𑀢𑁂 𑀪𑀺𑀓𑁆𑀔𑀽 𑀕𑀳𑀧𑀢𑀺𑀘𑀻𑀯𑀭𑀁 𑀲𑀸𑀤𑀺𑀬𑀦𑁆𑀢𑀺 𑀢𑁂 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸 𑀧𑀁𑀲𑀼𑀓𑀽𑀮𑀁 𑀦 𑀲𑀸𑀤𑀺𑀬𑀦𑁆𑀢𑀺 𑁋 𑀏𑀓𑀁𑀬𑁂𑀯 𑀪𑀕𑀯𑀢𑀸 𑀘𑀻𑀯𑀭𑀁 𑀅𑀦𑀼𑀜𑁆𑀜𑀸𑀢𑀁, 𑀦 𑀤𑁆𑀯𑁂𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀳𑀧𑀢𑀺𑀘𑀻𑀯𑀭𑀁 𑀲𑀸𑀤𑀺𑀬𑀦𑁆𑀢𑁂𑀦 𑀧𑀁𑀲𑀼𑀓𑀽𑀮𑀫𑁆𑀧𑀺 𑀲𑀸𑀤𑀺𑀬𑀺𑀢𑀼𑀁; 𑀢𑀤𑀼𑀪𑀬𑁂𑀦𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀦𑁆𑀢𑀼𑀝𑁆𑀞𑀺𑀁 𑀯𑀡𑁆𑀡𑁂𑀫𑀻𑀢𑀺.

𑀓𑀫𑁆𑀩𑀮𑀸𑀦𑀼𑀚𑀸𑀦𑀦𑀸𑀤𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁧𑁨. 𑀧𑀁𑀲𑀼𑀓𑀽𑀮𑀧𑀭𑀺𑀬𑁂𑀲𑀦𑀓𑀣𑀸

𑁩𑁪𑁧. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀓𑁄𑀲𑀮𑁂𑀲𑀼 𑀚𑀦𑀧𑀤𑁂 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀸 𑀳𑁄𑀦𑁆𑀢𑀺. 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀲𑀼𑀲𑀸𑀦𑀁 𑀑𑀓𑁆𑀓𑀫𑀺𑀁𑀲𑀼 𑀧𑀁𑀲𑀼𑀓𑀽𑀮𑀸𑀬, 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀦𑀸𑀕𑀫𑁂𑀲𑀼𑀁. 𑀬𑁂 𑀢𑁂 𑀪𑀺𑀓𑁆𑀔𑀽 𑀲𑀼𑀲𑀸𑀦𑀁 𑀑𑀓𑁆𑀓𑀫𑀺𑀁𑀲𑀼 𑀧𑀁𑀲𑀼𑀓𑀽𑀮𑀸𑀬 𑀢𑁂 𑀧𑀁𑀲𑀼𑀓𑀽𑀮𑀸𑀦𑀺 𑀮𑀪𑀺𑀁𑀲𑀼. 𑀬𑁂 𑀢𑁂 𑀪𑀺𑀓𑁆𑀔𑀽 𑀦𑀸𑀕𑀫𑁂𑀲𑀼𑀁 𑀢𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀫𑁆𑀳𑀸𑀓𑀫𑁆𑀧𑀺, 𑀆𑀯𑀼𑀲𑁄, 𑀪𑀸𑀕𑀁 𑀤𑁂𑀣𑀸’’𑀢𑀺. 𑀢𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀦 𑀫𑀬𑀁, 𑀆𑀯𑀼𑀲𑁄, 𑀢𑀼𑀫𑁆𑀳𑀸𑀓𑀁 𑀪𑀸𑀕𑀁 𑀤𑀲𑁆𑀲𑀸𑀫. 𑀓𑀺𑀲𑁆𑀲 𑀢𑀼𑀫𑁆𑀳𑁂 𑀦𑀸𑀕𑀫𑀺𑀢𑁆𑀣𑀸’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀦𑀸𑀕𑀫𑁂𑀦𑁆𑀢𑀸𑀦𑀁 𑀦𑀸𑀓𑀸𑀫𑀸 𑀪𑀸𑀕𑀁 𑀤𑀸𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀓𑁄𑀲𑀮𑁂𑀲𑀼 𑀚𑀦𑀧𑀤𑁂 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀸 𑀳𑁄𑀦𑁆𑀢𑀺. 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀲𑀼𑀲𑀸𑀦𑀁 𑀑𑀓𑁆𑀓𑀫𑀺𑀁𑀲𑀼 𑀧𑀁𑀲𑀼𑀓𑀽𑀮𑀸𑀬, 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀆𑀕𑀫𑁂𑀲𑀼𑀁. 𑀬𑁂 𑀢𑁂 𑀪𑀺𑀓𑁆𑀔𑀽 𑀲𑀼𑀲𑀸𑀦𑀁 𑀑𑀓𑁆𑀓𑀫𑀺𑀁𑀲𑀼 𑀧𑀁𑀲𑀼𑀓𑀽𑀮𑀸𑀬 𑀢𑁂 𑀧𑀁𑀲𑀼𑀓𑀽𑀮𑀸𑀦𑀺 𑀮𑀪𑀺𑀁𑀲𑀼. 𑀬𑁂 𑀢𑁂 𑀪𑀺𑀓𑁆𑀔𑀽 𑀆𑀕𑀫𑁂𑀲𑀼𑀁 𑀢𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀫𑁆𑀳𑀸𑀓𑀫𑁆𑀧𑀺, 𑀆𑀯𑀼𑀲𑁄, 𑀪𑀸𑀕𑀁 𑀤𑁂𑀣𑀸’’𑀢𑀺. 𑀢𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀦 𑀫𑀬𑀁, 𑀆𑀯𑀼𑀲𑁄, 𑀢𑀼𑀫𑁆𑀳𑀸𑀓𑀁 𑀪𑀸𑀕𑀁 𑀤𑀲𑁆𑀲𑀸𑀫. 𑀓𑀺𑀲𑁆𑀲 𑀢𑀼𑀫𑁆𑀳𑁂 𑀦 𑀑𑀓𑁆𑀓𑀫𑀺𑀢𑁆𑀣𑀸’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀕𑀫𑁂𑀦𑁆𑀢𑀸𑀦𑀁 𑀅𑀓𑀸𑀫𑀸 𑀪𑀸𑀕𑀁 𑀤𑀸𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀓𑁄𑀲𑀮𑁂𑀲𑀼 𑀚𑀦𑀧𑀤𑁂 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀸 𑀳𑁄𑀦𑁆𑀢𑀺. 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀧𑀞𑀫𑀁 𑀲𑀼𑀲𑀸𑀦𑀁 𑀑𑀓𑁆𑀓𑀫𑀺𑀁𑀲𑀼 𑀧𑀁𑀲𑀼𑀓𑀽𑀮𑀸𑀬, 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀧𑀘𑁆𑀙𑀸 𑀑𑀓𑁆𑀓𑀫𑀺𑀁𑀲𑀼. 𑀬𑁂 𑀢𑁂 𑀪𑀺𑀓𑁆𑀔𑀽 𑀧𑀞𑀫𑀁 𑀲𑀼𑀲𑀸𑀦𑀁 𑀑𑀓𑁆𑀓𑀫𑀺𑀁𑀲𑀼 𑀧𑀁𑀲𑀼𑀓𑀽𑀮𑀸𑀬 𑀢𑁂 𑀧𑀁𑀲𑀼𑀓𑀽𑀮𑀸𑀦𑀺 𑀮𑀪𑀺𑀁𑀲𑀼. 𑀬𑁂 𑀢𑁂 𑀪𑀺𑀓𑁆𑀔𑀽 𑀧𑀘𑁆𑀙𑀸 𑀑𑀓𑁆𑀓𑀫𑀺𑀁𑀲𑀼 𑀢𑁂 𑀦 𑀮𑀪𑀺𑀁𑀲𑀼. 𑀢𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀫𑁆𑀳𑀸𑀓𑀫𑁆𑀧𑀺, 𑀆𑀯𑀼𑀲𑁄, 𑀪𑀸𑀕𑀁 𑀤𑁂𑀣𑀸’’𑀢𑀺. 𑀢𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀦 𑀫𑀬𑀁, 𑀆𑀯𑀼𑀲𑁄, 𑀢𑀼𑀫𑁆𑀳𑀸𑀓𑀁 𑀪𑀸𑀕𑀁 𑀤𑀲𑁆𑀲𑀸𑀫. 𑀓𑀺𑀲𑁆𑀲 𑀢𑀼𑀫𑁆𑀳𑁂 𑀧𑀘𑁆𑀙𑀸 𑀑𑀓𑁆𑀓𑀫𑀺𑀢𑁆𑀣𑀸’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀘𑁆𑀙𑀸 𑀑𑀓𑁆𑀓𑀦𑁆𑀢𑀸𑀦𑀁 𑀦𑀸𑀓𑀸𑀫𑀸 𑀪𑀸𑀕𑀁 𑀤𑀸𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀓𑁄𑀲𑀮𑁂𑀲𑀼 𑀚𑀦𑀧𑀤𑁂 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀸 𑀳𑁄𑀦𑁆𑀢𑀺. 𑀢𑁂 𑀲𑀤𑀺𑀲𑀸 𑀲𑀼𑀲𑀸𑀦𑀁 𑀑𑀓𑁆𑀓𑀫𑀺𑀁𑀲𑀼 𑀧𑀁𑀲𑀼𑀓𑀽𑀮𑀸𑀬. 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀧𑀁𑀲𑀼𑀓𑀽𑀮𑀸𑀦𑀺 𑀮𑀪𑀺𑀁𑀲𑀼, 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀦 𑀮𑀪𑀺𑀁𑀲𑀼. 𑀬𑁂 𑀢𑁂 𑀪𑀺𑀓𑁆𑀔𑀽 𑀦 𑀮𑀪𑀺𑀁𑀲𑀼, 𑀢𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀫𑁆𑀳𑀸𑀓𑀫𑁆𑀧𑀺, 𑀆𑀯𑀼𑀲𑁄, 𑀪𑀸𑀕𑀁 𑀤𑁂𑀣𑀸’’𑀢𑀺. 𑀢𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀦 𑀫𑀬𑀁, 𑀆𑀯𑀼𑀲𑁄, 𑀢𑀼𑀫𑁆𑀳𑀸𑀓𑀁 𑀪𑀸𑀕𑀁 𑀤𑀲𑁆𑀲𑀸𑀫. 𑀓𑀺𑀲𑁆𑀲 𑀢𑀼𑀫𑁆𑀳𑁂 𑀦 𑀮𑀪𑀺𑀢𑁆𑀣𑀸’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀤𑀺𑀲𑀸𑀦𑀁 𑀑𑀓𑁆𑀓𑀦𑁆𑀢𑀸𑀦𑀁 𑀅𑀓𑀸𑀫𑀸 𑀪𑀸𑀕𑀁 𑀤𑀸𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀓𑁄𑀲𑀮𑁂𑀲𑀼 𑀚𑀦𑀧𑀤𑁂 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀸 𑀳𑁄𑀦𑁆𑀢𑀺. 𑀢𑁂 𑀓𑀢𑀺𑀓𑀁 𑀓𑀢𑁆𑀯𑀸 𑀲𑀼𑀲𑀸𑀦𑀁 𑀑𑀓𑁆𑀓𑀫𑀺𑀁𑀲𑀼 𑀧𑀁𑀲𑀼𑀓𑀽𑀮𑀸𑀬. 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀧𑀁𑀲𑀼𑀓𑀽𑀮𑀸𑀦𑀺 𑀮𑀪𑀺𑀁𑀲𑀼, 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀦 𑀮𑀪𑀺𑀁𑀲𑀼. 𑀬𑁂 𑀢𑁂 𑀪𑀺𑀓𑁆𑀔𑀽 𑀦 𑀮𑀪𑀺𑀁𑀲𑀼 𑀢𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀫𑁆𑀳𑀸𑀓𑀫𑁆𑀧𑀺, 𑀆𑀯𑀼𑀲𑁄, 𑀪𑀸𑀕𑀁 𑀤𑁂𑀣𑀸’’𑀢𑀺. 𑀢𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀦 𑀫𑀬𑀁, 𑀆𑀯𑀼𑀲𑁄, 𑀢𑀼𑀫𑁆𑀳𑀸𑀓𑀁 𑀪𑀸𑀕𑀁 𑀤𑀲𑁆𑀲𑀸𑀫. 𑀓𑀺𑀲𑁆𑀲 𑀢𑀼𑀫𑁆𑀳𑁂 𑀦 𑀮𑀪𑀺𑀢𑁆𑀣𑀸’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑀢𑀺𑀓𑀁 𑀓𑀢𑁆𑀯𑀸 𑀑𑀓𑁆𑀓𑀦𑁆𑀢𑀸𑀦𑀁 𑀅𑀓𑀸𑀫𑀸 𑀪𑀸𑀕𑀁 𑀤𑀸𑀢𑀼𑀦𑁆𑀢𑀺.

𑀧𑀁𑀲𑀼𑀓𑀽𑀮𑀧𑀭𑀺𑀬𑁂𑀲𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁧𑁩. 𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑀲𑀫𑁆𑀫𑀼𑀢𑀺𑀓𑀣𑀸

𑁩𑁪𑁨. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀫𑀦𑀼𑀲𑁆𑀲𑀸 𑀘𑀻𑀯𑀭𑀁 𑀆𑀤𑀸𑀬 𑀆𑀭𑀸𑀫𑀁 𑀆𑀕𑀘𑁆𑀙𑀦𑁆𑀢𑀺. 𑀢𑁂 𑀧𑀝𑀺𑀕𑁆𑀕𑀸𑀳𑀓𑀁 𑀅𑀮𑀪𑀫𑀸𑀦𑀸 𑀧𑀝𑀺𑀳𑀭𑀦𑁆𑀢𑀺. 𑀘𑀻𑀯𑀭𑀁 𑀧𑀭𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀪𑀺𑀓𑁆𑀔𑀼𑀁 𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑀁 𑀲𑀫𑁆𑀫𑀦𑁆𑀦𑀺𑀢𑀼𑀁 𑁋 𑀬𑁄 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀕𑀳𑀺𑀢𑀸𑀕𑀳𑀺𑀢𑀜𑁆𑀘 𑀚𑀸𑀦𑁂𑀬𑁆𑀬. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄. 𑀧𑀞𑀫𑀁 𑀪𑀺𑀓𑁆𑀔𑀼 𑀬𑀸𑀘𑀺𑀢𑀩𑁆𑀩𑁄; 𑀬𑀸𑀘𑀺𑀢𑁆𑀯𑀸 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑀁 𑀲𑀫𑁆𑀫𑀦𑁆𑀦𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑀁 𑀲𑀫𑁆𑀫𑀦𑁆𑀦𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑀲𑁆𑀲 𑀲𑀫𑁆𑀫𑀼𑀢𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀲𑀫𑁆𑀫𑀢𑁄 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑁄. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑀸 𑀪𑀺𑀓𑁆𑀔𑀽 𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀢𑀢𑁆𑀣𑁂𑀯 𑀉𑀚𑁆𑀛𑀺𑀢𑁆𑀯𑀸 𑀧𑀓𑁆𑀓𑀫𑀦𑁆𑀢𑀺. 𑀘𑀻𑀯𑀭𑀁 𑀦𑀲𑁆𑀲𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀪𑀺𑀓𑁆𑀔𑀼𑀁 𑀘𑀻𑀯𑀭𑀦𑀺𑀤𑀳𑀓𑀁 𑀲𑀫𑁆𑀫𑀦𑁆𑀦𑀺𑀢𑀼𑀁 𑁋 𑀬𑁄 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦𑀺𑀳𑀺𑀢𑀸𑀦𑀺𑀳𑀺𑀢𑀜𑁆𑀘 𑀚𑀸𑀦𑁂𑀬𑁆𑀬. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄. 𑀧𑀞𑀫𑀁 𑀪𑀺𑀓𑁆𑀔𑀼 𑀬𑀸𑀘𑀺𑀢𑀩𑁆𑀩𑁄; 𑀬𑀸𑀘𑀺𑀢𑁆𑀯𑀸 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀘𑀻𑀯𑀭𑀦𑀺𑀤𑀳𑀓𑀁 𑀲𑀫𑁆𑀫𑀦𑁆𑀦𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀘𑀻𑀯𑀭𑀦𑀺𑀤𑀳𑀓𑀁 𑀲𑀫𑁆𑀫𑀦𑁆𑀦𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀘𑀻𑀯𑀭𑀦𑀺𑀤𑀳𑀓𑀲𑁆𑀲 𑀲𑀫𑁆𑀫𑀼𑀢𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀲𑀫𑁆𑀫𑀢𑁄 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀘𑀻𑀯𑀭𑀦𑀺𑀤𑀳𑀓𑁄. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑀲𑀫𑁆𑀫𑀼𑀢𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁧𑁪. 𑀪𑀡𑁆𑀟𑀸𑀕𑀸𑀭𑀲𑀫𑁆𑀫𑀼𑀢𑀺𑀆𑀤𑀺𑀓𑀣𑀸

𑁩𑁪𑁩. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀘𑀻𑀯𑀭𑀦𑀺𑀤𑀳𑀓𑁄 𑀪𑀺𑀓𑁆𑀔𑀼 𑀫𑀡𑁆𑀟𑀧𑁂𑀧𑀺 𑀭𑀼𑀓𑁆𑀔𑀫𑀽𑀮𑁂𑀧𑀺 𑀦𑀺𑀩𑁆𑀩𑀓𑁄𑀲𑁂𑀧𑀺 𑀘𑀻𑀯𑀭𑀁 𑀦𑀺𑀤𑀳𑀢𑀺, 𑀉𑀦𑁆𑀤𑀽𑀭𑁂𑀳𑀺𑀧𑀺 𑀉𑀧𑀘𑀺𑀓𑀸𑀳𑀺𑀧𑀺 𑀔𑀚𑁆𑀚𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀪𑀡𑁆𑀟𑀸𑀕𑀸𑀭𑀁 𑀲𑀫𑁆𑀫𑀦𑁆𑀦𑀺𑀢𑀼𑀁, 𑀬𑀁 𑀲𑀗𑁆𑀖𑁄 𑀆𑀓𑀗𑁆𑀔𑀢𑀺 𑀯𑀺𑀳𑀸𑀭𑀁 𑀯𑀸 𑀅𑀟𑁆𑀠𑀬𑁄𑀕𑀁 𑀯𑀸 𑀧𑀸𑀲𑀸𑀤𑀁 𑀯𑀸 𑀳𑀫𑁆𑀫𑀺𑀬𑀁 𑀯𑀸 𑀕𑀼𑀳𑀁 𑀯𑀸. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀯𑀺𑀳𑀸𑀭𑀁 𑀪𑀡𑁆𑀟𑀸𑀕𑀸𑀭𑀁 𑀲𑀫𑁆𑀫𑀦𑁆𑀦𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀯𑀺𑀳𑀸𑀭𑀁 𑀪𑀡𑁆𑀟𑀸𑀕𑀸𑀭𑀁 𑀲𑀫𑁆𑀫𑀦𑁆𑀦𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀯𑀺𑀳𑀸𑀭𑀲𑁆𑀲 𑀪𑀡𑁆𑀟𑀸𑀕𑀸𑀭𑀲𑁆𑀲 𑀲𑀫𑁆𑀫𑀼𑀢𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀲𑀫𑁆𑀫𑀢𑁄 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑁄 𑀯𑀺𑀳𑀸𑀭𑁄 𑀪𑀡𑁆𑀟𑀸𑀕𑀸𑀭𑀁. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀗𑁆𑀖𑀲𑁆𑀲 𑀪𑀡𑁆𑀟𑀸𑀕𑀸𑀭𑁂 𑀘𑀻𑀯𑀭𑀁 𑀅𑀕𑀼𑀢𑁆𑀢𑀁 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀪𑀺𑀓𑁆𑀔𑀼𑀁 𑀪𑀡𑁆𑀟𑀸𑀕𑀸𑀭𑀺𑀓𑀁 𑀲𑀫𑁆𑀫𑀦𑁆𑀦𑀺𑀢𑀼𑀁 𑁋 𑀬𑁄 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀕𑀼𑀢𑁆𑀢𑀸𑀕𑀼𑀢𑁆𑀢𑀜𑁆𑀘 𑀚𑀸𑀦𑁂𑀬𑁆𑀬. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄. 𑀧𑀞𑀫𑀁 𑀪𑀺𑀓𑁆𑀔𑀼 𑀬𑀸𑀘𑀺𑀢𑀩𑁆𑀩𑁄; 𑀬𑀸𑀘𑀺𑀢𑁆𑀯𑀸 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀪𑀡𑁆𑀟𑀸𑀕𑀸𑀭𑀺𑀓𑀁 𑀲𑀫𑁆𑀫𑀦𑁆𑀦𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀪𑀡𑁆𑀟𑀸𑀕𑀸𑀭𑀺𑀓𑀁 𑀲𑀫𑁆𑀫𑀦𑁆𑀦𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀲𑀫𑁆𑀫𑀼𑀢𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀲𑀫𑁆𑀫𑀢𑁄 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀪𑀡𑁆𑀟𑀸𑀕𑀸𑀭𑀺𑀓𑁄. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀪𑀡𑁆𑀟𑀸𑀕𑀸𑀭𑀺𑀓𑀁 𑀯𑀼𑀝𑁆𑀞𑀸𑀧𑁂𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀪𑀡𑁆𑀟𑀸𑀕𑀸𑀭𑀺𑀓𑁄 𑀯𑀼𑀝𑁆𑀞𑀸𑀧𑁂𑀢𑀩𑁆𑀩𑁄. 𑀬𑁄 𑀯𑀼𑀝𑁆𑀞𑀸𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀗𑁆𑀖𑀲𑁆𑀲 𑀪𑀡𑁆𑀟𑀸𑀕𑀸𑀭𑁂 𑀘𑀻𑀯𑀭𑀁 𑀉𑀲𑁆𑀲𑀦𑁆𑀦𑀁 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀼𑀔𑀻𑀪𑀽𑀢𑁂𑀦 𑀲𑀗𑁆𑀖𑁂𑀦 𑀪𑀸𑀚𑁂𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀗𑁆𑀖𑁄 𑀘𑀻𑀯𑀭𑀁 𑀪𑀸𑀚𑁂𑀦𑁆𑀢𑁄 𑀓𑁄𑀮𑀸𑀳𑀮𑀁 𑀅𑀓𑀸𑀲𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀪𑀺𑀓𑁆𑀔𑀼𑀁 𑀘𑀻𑀯𑀭𑀪𑀸𑀚𑀓𑀁 𑀲𑀫𑁆𑀫𑀦𑁆𑀦𑀺𑀢𑀼𑀁 𑁋 𑀬𑁄 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀪𑀸𑀚𑀺𑀢𑀸𑀪𑀸𑀚𑀺𑀢𑀜𑁆𑀘 𑀚𑀸𑀦𑁂𑀬𑁆𑀬. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄. 𑀧𑀞𑀫𑀁 𑀪𑀺𑀓𑁆𑀔𑀼 𑀬𑀸𑀘𑀺𑀢𑀩𑁆𑀩𑁄; 𑀬𑀸𑀘𑀺𑀢𑁆𑀯𑀸 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀘𑀻𑀯𑀭𑀪𑀸𑀚𑀓𑀁 𑀲𑀫𑁆𑀫𑀦𑁆𑀦𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀘𑀻𑀯𑀭𑀪𑀸𑀚𑀓𑀁 𑀲𑀫𑁆𑀫𑀦𑁆𑀦𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀘𑀻𑀯𑀭𑀪𑀸𑀚𑀓𑀲𑁆𑀲 𑀲𑀫𑁆𑀫𑀼𑀢𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀲𑀫𑁆𑀫𑀢𑁄 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀘𑀻𑀯𑀭𑀪𑀸𑀚𑀓𑁄. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀅𑀣 𑀔𑁄 𑀘𑀻𑀯𑀭𑀪𑀸𑀚𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀣𑀁 𑀦𑀼 𑀔𑁄 𑀘𑀻𑀯𑀭𑀁 𑀪𑀸𑀚𑁂𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀞𑀫𑀁 𑀉𑀘𑁆𑀘𑀺𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀯𑀡𑁆𑀡𑀸𑀯𑀡𑁆𑀡𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀕𑀡𑁂𑀢𑁆𑀯𑀸 𑀯𑀕𑁆𑀕𑀁 𑀩𑀦𑁆𑀥𑀺𑀢𑁆𑀯𑀸 𑀘𑀻𑀯𑀭𑀧𑀝𑀺𑀯𑀻𑀲𑀁 𑀞𑀧𑁂𑀢𑀼𑀦𑁆𑀢𑀺.

𑀅𑀣 𑀔𑁄 𑀘𑀻𑀯𑀭𑀪𑀸𑀚𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀣𑀁 𑀦𑀼 𑀔𑁄 𑀲𑀸𑀫𑀡𑁂𑀭𑀸𑀦𑀁 𑀘𑀻𑀯𑀭𑀧𑀝𑀺𑀯𑀻𑀲𑁄 𑀤𑀸𑀢𑀩𑁆𑀩𑁄’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀸𑀫𑀡𑁂𑀭𑀸𑀦𑀁 𑀉𑀧𑀟𑁆𑀠𑀧𑀝𑀺𑀯𑀻𑀲𑀁 𑀤𑀸𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀲𑀓𑁂𑀦 𑀪𑀸𑀕𑁂𑀦 𑀉𑀢𑁆𑀢𑀭𑀺𑀢𑀼𑀓𑀸𑀫𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀢𑁆𑀢𑀭𑀦𑁆𑀢𑀲𑁆𑀲 𑀲𑀓𑀁 𑀪𑀸𑀕𑀁 𑀤𑀸𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀅𑀢𑀺𑀭𑁂𑀓𑀪𑀸𑀕𑁂𑀦 𑀉𑀢𑁆𑀢𑀭𑀺𑀢𑀼𑀓𑀸𑀫𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀦𑀼𑀓𑁆𑀔𑁂𑀧𑁂 𑀤𑀺𑀦𑁆𑀦𑁂 𑀅𑀢𑀺𑀭𑁂𑀓𑀪𑀸𑀕𑀁 𑀤𑀸𑀢𑀼𑀦𑁆𑀢𑀺.

𑀅𑀣 𑀔𑁄 𑀘𑀻𑀯𑀭𑀪𑀸𑀚𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀣𑀁 𑀦𑀼 𑀔𑁄 𑀘𑀻𑀯𑀭𑀧𑀝𑀺𑀯𑀻𑀲𑁄 𑀤𑀸𑀢𑀩𑁆𑀩𑁄, 𑀆𑀕𑀢𑀧𑀝𑀺𑀧𑀸𑀝𑀺𑀬𑀸 [𑀆𑀕𑀢𑀸𑀕𑀢𑀧𑀝𑀺𑀧𑀸𑀝𑀺𑀬𑀸 (𑀓.)] 𑀦𑀼 𑀔𑁄 𑀉𑀤𑀸𑀳𑀼 𑀬𑀣𑀸𑀯𑀼𑀟𑁆𑀠’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀺𑀓𑀮𑀓𑁂 𑀢𑁄𑀲𑁂𑀢𑁆𑀯𑀸 𑀓𑀼𑀲𑀧𑀸𑀢𑀁 𑀓𑀸𑀢𑀼𑀦𑁆𑀢𑀺.

𑀪𑀡𑁆𑀟𑀸𑀕𑀸𑀭𑀲𑀫𑁆𑀫𑀼𑀢𑀺𑀆𑀤𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁧𑁫. 𑀘𑀻𑀯𑀭𑀭𑀚𑀦𑀓𑀣𑀸

𑁩𑁪𑁪. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀙𑀓𑀡𑁂𑀦𑀧𑀺 𑀧𑀡𑁆𑀟𑀼𑀫𑀢𑁆𑀢𑀺𑀓𑀸𑀬𑀧𑀺 𑀘𑀻𑀯𑀭𑀁 𑀭𑀚𑀦𑁆𑀢𑀺. 𑀘𑀻𑀯𑀭𑀁 𑀤𑀼𑀩𑁆𑀩𑀡𑁆𑀡𑀁 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀙 𑀭𑀚𑀦𑀸𑀦𑀺 𑁋 𑀫𑀽𑀮𑀭𑀚𑀦𑀁, 𑀔𑀦𑁆𑀥𑀭𑀚𑀦𑀁, 𑀢𑀘𑀭𑀚𑀦𑀁, 𑀧𑀢𑁆𑀢𑀭𑀚𑀦𑀁, 𑀧𑀼𑀧𑁆𑀨𑀭𑀚𑀦𑀁, 𑀨𑀮𑀭𑀚𑀦𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀲𑀻𑀢𑀼𑀤𑀓𑀸𑀬 [𑀲𑀻𑀢𑀼𑀦𑁆𑀤𑀺𑀓𑀸𑀬 (𑀲𑀻.), 𑀲𑀻𑀢𑀽𑀤𑀓𑀸𑀬 (𑀲𑁆𑀬𑀸.)] 𑀘𑀻𑀯𑀭𑀁 𑀭𑀚𑀦𑁆𑀢𑀺. 𑀘𑀻𑀯𑀭𑀁 𑀤𑀼𑀕𑁆𑀕𑀦𑁆𑀥𑀁 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀭𑀚𑀦𑀁 𑀧𑀘𑀺𑀢𑀼𑀁 𑀘𑀼𑀮𑁆𑀮𑀁 𑀭𑀚𑀦𑀓𑀼𑀫𑁆𑀪𑀺𑀦𑁆𑀢𑀺. 𑀭𑀚𑀦𑀁 𑀉𑀢𑁆𑀢𑀭𑀺𑀬𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀢𑁆𑀢𑀭𑀸𑀴𑀼𑀫𑁆𑀧𑀁 [𑀉𑀢𑁆𑀢𑀭𑀸𑀴𑀼𑀧𑀁 (𑀬𑁄𑀚𑀦𑀸), 𑀉𑀢𑁆𑀢𑀭𑀸𑀴𑀼𑀧𑀁 (𑀲𑁆𑀬𑀸.)] 𑀩𑀦𑁆𑀥𑀺𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀦 𑀚𑀸𑀦𑀦𑁆𑀢𑀺 𑀭𑀚𑀦𑀁 𑀧𑀓𑁆𑀓𑀁 𑀯𑀸 𑀅𑀧𑀓𑁆𑀓𑀁 𑀯𑀸. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀤𑀓𑁂 𑀯𑀸 𑀦𑀔𑀧𑀺𑀝𑁆𑀞𑀺𑀓𑀸𑀬 𑀯𑀸 𑀣𑁂𑀯𑀓𑀁 𑀤𑀸𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀭𑀚𑀦𑀁 𑀑𑀭𑁄𑀧𑁂𑀦𑁆𑀢𑀸 𑀓𑀼𑀫𑁆𑀪𑀺𑀁 𑀆𑀯𑀺𑀜𑁆𑀙𑀦𑁆𑀢𑀺 [𑀆𑀯𑀺𑀜𑁆𑀚𑀦𑁆𑀢𑀺 (𑀲𑀻.), 𑀆𑀯𑀝𑁆𑀝𑀦𑁆𑀢𑀺 (𑀲𑁆𑀬𑀸.)]. 𑀓𑀼𑀫𑁆𑀪𑀻 𑀪𑀺𑀚𑁆𑀚𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀭𑀚𑀦𑀼𑀴𑀼𑀗𑁆𑀓𑀁 [𑀭𑀚𑀦𑀸𑀴𑀼𑀗𑁆𑀓𑀁 (𑀬𑁄𑀚𑀦𑀸)] 𑀤𑀡𑁆𑀟𑀓𑀣𑀸𑀮𑀓𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽𑀦𑀁 𑀭𑀚𑀦𑀪𑀸𑀚𑀦𑀁 𑀦 𑀲𑀁𑀯𑀺𑀚𑁆𑀚𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀭𑀚𑀦𑀓𑁄𑀮𑀫𑁆𑀩𑀁 𑀭𑀚𑀦𑀖𑀝𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀧𑀸𑀢𑀺𑀬𑀸𑀧𑀺 𑀧𑀢𑁆𑀢𑁂𑀧𑀺 𑀘𑀻𑀯𑀭𑀁 𑀑𑀫𑀤𑁆𑀤𑀦𑁆𑀢𑀺. 𑀘𑀻𑀯𑀭𑀁 𑀧𑀭𑀺𑀪𑀺𑀚𑁆𑀚𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀭𑀚𑀦𑀤𑁄𑀡𑀺𑀓𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀙𑀫𑀸𑀬 𑀘𑀻𑀯𑀭𑀁 𑀧𑀢𑁆𑀣𑀭𑀦𑁆𑀢𑀺. 𑀘𑀻𑀯𑀭𑀁 𑀧𑀁𑀲𑀼𑀓𑀺𑀢𑀁 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀡𑀲𑀦𑁆𑀣𑀸𑀭𑀓𑀦𑁆𑀢𑀺.

𑀢𑀺𑀡𑀲𑀦𑁆𑀣𑀸𑀭𑀓𑁄 𑀉𑀧𑀘𑀺𑀓𑀸𑀳𑀺 𑀔𑀚𑁆𑀚𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀘𑀻𑀯𑀭𑀯𑀁𑀲𑀁 𑀘𑀻𑀯𑀭𑀭𑀚𑁆𑀚𑀼𑀦𑁆𑀢𑀺.

𑀫𑀚𑁆𑀛𑁂𑀦 𑀮𑀕𑁆𑀕𑁂𑀦𑁆𑀢𑀺. 𑀭𑀚𑀦𑀁 𑀉𑀪𑀢𑁄 𑀕𑀮𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑀡𑁆𑀡𑁂 𑀩𑀦𑁆𑀥𑀺𑀢𑀼𑀦𑁆𑀢𑀺.

𑀓𑀡𑁆𑀡𑁄 𑀚𑀻𑀭𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑀡𑁆𑀡𑀲𑀼𑀢𑁆𑀢𑀓𑀦𑁆𑀢𑀺.

𑀭𑀚𑀦𑀁 𑀏𑀓𑀢𑁄 𑀕𑀮𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀫𑁆𑀧𑀭𑀺𑀯𑀢𑁆𑀢𑀓𑀁 𑀲𑀫𑁆𑀧𑀭𑀺𑀯𑀢𑁆𑀢𑀓𑀁 𑀭𑀚𑁂𑀢𑀼𑀁, 𑀦 𑀘 𑀅𑀘𑁆𑀙𑀺𑀦𑁆𑀦𑁂 𑀣𑁂𑀯𑁂 𑀧𑀓𑁆𑀓𑀫𑀺𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀘𑀻𑀯𑀭𑀁 𑀧𑀢𑁆𑀣𑀺𑀦𑁆𑀦𑀁 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀤𑀓𑁂 𑀑𑀲𑀸𑀭𑁂𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀘𑀻𑀯𑀭𑀁 𑀨𑀭𑀼𑀲𑀁 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀸𑀡𑀺𑀦𑀸 𑀆𑀓𑁄𑀝𑁂𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀅𑀘𑁆𑀙𑀺𑀦𑁆𑀦𑀓𑀸𑀦𑀺 𑀘𑀻𑀯𑀭𑀸𑀦𑀺 𑀥𑀸𑀭𑁂𑀦𑁆𑀢𑀺 𑀤𑀦𑁆𑀢𑀓𑀸𑀲𑀸𑀯𑀸𑀦𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 [𑀲𑁂𑀬𑁆𑀬𑀣𑀸𑀧𑀺 (?)] 𑀕𑀺𑀳𑀻 𑀓𑀸𑀫𑀪𑁄𑀕𑀺𑀦𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀅𑀘𑁆𑀙𑀺𑀦𑁆𑀦𑀓𑀸𑀦𑀺 𑀘𑀻𑀯𑀭𑀸𑀦𑀺 𑀥𑀸𑀭𑁂𑀢𑀩𑁆𑀩𑀸𑀦𑀺. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀘𑀻𑀯𑀭𑀭𑀚𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁧𑁬. 𑀙𑀺𑀦𑁆𑀦𑀓𑀘𑀻𑀯𑀭𑀸𑀦𑀼𑀚𑀸𑀦𑀦𑀸

𑁩𑁪𑁫. 𑀅𑀣 𑀔𑁄 𑀪𑀕𑀯𑀸 𑀭𑀸𑀚𑀕𑀳𑁂 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀤𑀓𑁆𑀔𑀺𑀡𑀸𑀕𑀺𑀭𑀺 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀫𑀕𑀥𑀔𑁂𑀢𑁆𑀢𑀁 𑀅𑀘𑁆𑀙𑀺𑀩𑀤𑁆𑀥𑀁 [𑀅𑀘𑁆𑀘𑀺𑀩𑀤𑁆𑀥𑀁 (𑀲𑀻. 𑀲𑁆𑀬𑀸.), 𑀅𑀘𑁆𑀙𑀺𑀩𑀦𑁆𑀥𑀁 (𑀓.)] 𑀧𑀸𑀴𑀺𑀩𑀤𑁆𑀥𑀁 𑀫𑀭𑀺𑀬𑀸𑀤𑀩𑀤𑁆𑀥𑀁 𑀲𑀺𑀗𑁆𑀖𑀸𑀝𑀓𑀩𑀤𑁆𑀥𑀁, 𑀤𑀺𑀲𑁆𑀯𑀸𑀦 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀧𑀲𑁆𑀲𑀲𑀺 𑀦𑁄 𑀢𑁆𑀯𑀁, 𑀆𑀦𑀦𑁆𑀤, 𑀫𑀕𑀥𑀔𑁂𑀢𑁆𑀢𑀁 𑀅𑀘𑁆𑀙𑀺𑀩𑀤𑁆𑀥𑀁 𑀧𑀸𑀴𑀺𑀩𑀤𑁆𑀥𑀁 𑀫𑀭𑀺𑀬𑀸𑀤𑀩𑀤𑁆𑀥𑀁 𑀲𑀺𑀗𑁆𑀖𑀸𑀝𑀓𑀩𑀤𑁆𑀥’’𑀦𑁆𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’𑀢𑀺. ‘‘𑀉𑀲𑁆𑀲𑀳𑀲𑀺 𑀢𑁆𑀯𑀁, 𑀆𑀦𑀦𑁆𑀤, 𑀪𑀺𑀓𑁆𑀔𑀽𑀦𑀁 𑀏𑀯𑀭𑀽𑀧𑀸𑀦𑀺 𑀘𑀻𑀯𑀭𑀸𑀦𑀺 𑀲𑀁𑀯𑀺𑀤𑀳𑀺𑀢𑀼’’𑀦𑁆𑀢𑀺? ‘‘𑀉𑀲𑁆𑀲𑀳𑀸𑀫𑀺, 𑀪𑀕𑀯𑀸’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀤𑀓𑁆𑀔𑀺𑀡𑀸𑀕𑀺𑀭𑀺𑀲𑁆𑀫𑀺𑀁 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀧𑀼𑀦𑀤𑁂𑀯 𑀭𑀸𑀚𑀕𑀳𑀁 𑀧𑀘𑁆𑀘𑀸𑀕𑀜𑁆𑀙𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀲𑀫𑁆𑀩𑀳𑀼𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀘𑀻𑀯𑀭𑀸𑀦𑀺 𑀲𑀁𑀯𑀺𑀤𑀳𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀧𑀲𑁆𑀲𑀢𑀼 𑀫𑁂 [𑀧𑀲𑁆𑀲𑀣 𑀢𑀼𑀫𑁆𑀳𑁂 (𑀓.)], 𑀪𑀦𑁆𑀢𑁂, 𑀪𑀕𑀯𑀸 𑀘𑀻𑀯𑀭𑀸𑀦𑀺 𑀲𑀁𑀯𑀺𑀤𑀳𑀺𑀢𑀸𑀦𑀻’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀧𑀡𑁆𑀟𑀺𑀢𑁄, 𑀪𑀺𑀓𑁆𑀔𑀯𑁂, 𑀆𑀦𑀦𑁆𑀤𑁄; 𑀫𑀳𑀸𑀧𑀜𑁆𑀜𑁄, 𑀪𑀺𑀓𑁆𑀔𑀯𑁂, 𑀆𑀦𑀦𑁆𑀤𑁄; 𑀬𑀢𑁆𑀭 𑀳𑀺 𑀦𑀸𑀫 𑀫𑀬𑀸 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀆𑀚𑀸𑀦𑀺𑀲𑁆𑀲𑀢𑀺, 𑀓𑀼𑀲𑀺𑀫𑁆𑀧𑀺 𑀦𑀸𑀫 𑀓𑀭𑀺𑀲𑁆𑀲𑀢𑀺, 𑀅𑀟𑁆𑀠𑀓𑀼𑀲𑀺𑀫𑁆𑀧𑀺 𑀦𑀸𑀫 𑀓𑀭𑀺𑀲𑁆𑀲𑀢𑀺, 𑀫𑀡𑁆𑀟𑀮𑀫𑁆𑀧𑀺 𑀦𑀸𑀫 𑀓𑀭𑀺𑀲𑁆𑀲𑀢𑀺, 𑀅𑀟𑁆𑀠𑀫𑀡𑁆𑀟𑀮𑀫𑁆𑀧𑀺 𑀦𑀸𑀫 𑀓𑀭𑀺𑀲𑁆𑀲𑀢𑀺, 𑀯𑀺𑀯𑀝𑁆𑀝𑀫𑁆𑀧𑀺 𑀦𑀸𑀫 𑀓𑀭𑀺𑀲𑁆𑀲𑀢𑀺, 𑀅𑀦𑀼𑀯𑀺𑀯𑀝𑁆𑀝𑀫𑁆𑀧𑀺 𑀦𑀸𑀫 𑀓𑀭𑀺𑀲𑁆𑀲𑀢𑀺, 𑀕𑀻𑀯𑁂𑀬𑁆𑀬𑀓𑀫𑁆𑀧𑀺 𑀦𑀸𑀫 𑀓𑀭𑀺𑀲𑁆𑀲𑀢𑀺, 𑀚𑀗𑁆𑀖𑁂𑀬𑁆𑀬𑀓𑀫𑁆𑀧𑀺 𑀦𑀸𑀫 𑀓𑀭𑀺𑀲𑁆𑀲𑀢𑀺, 𑀩𑀸𑀳𑀦𑁆𑀢𑀫𑁆𑀧𑀺 𑀦𑀸𑀫 𑀓𑀭𑀺𑀲𑁆𑀲𑀢𑀺, 𑀙𑀺𑀦𑁆𑀦𑀓𑀁 𑀪𑀯𑀺𑀲𑁆𑀲𑀢𑀺, 𑀲𑀢𑁆𑀣𑀮𑀽𑀔𑀁 𑀲𑀫𑀡𑀲𑀸𑀭𑀼𑀧𑁆𑀧𑀁 𑀧𑀘𑁆𑀘𑀢𑁆𑀣𑀺𑀓𑀸𑀦𑀜𑁆𑀘 𑀅𑀦𑀪𑀺𑀘𑁆𑀙𑀺𑀢𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀙𑀺𑀦𑁆𑀦𑀓𑀁 𑀲𑀗𑁆𑀖𑀸𑀝𑀺𑀁 𑀙𑀺𑀦𑁆𑀦𑀓𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀙𑀺𑀦𑁆𑀦𑀓𑀁 𑀅𑀦𑁆𑀢𑀭𑀯𑀸𑀲𑀓’’𑀦𑁆𑀢𑀺.

𑀙𑀺𑀦𑁆𑀦𑀓𑀘𑀻𑀯𑀭𑀸𑀦𑀼𑀚𑀸𑀦𑀦𑀸 𑀦𑀺𑀝𑁆𑀞𑀺𑀢𑀸.

𑁨𑁧𑁭. 𑀢𑀺𑀘𑀻𑀯𑀭𑀸𑀦𑀼𑀚𑀸𑀦𑀦𑀸

𑁩𑁪𑁬. 𑀅𑀣 𑀔𑁄 𑀪𑀕𑀯𑀸 𑀭𑀸𑀚𑀕𑀳𑁂 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀯𑁂𑀲𑀸𑀮𑀻 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀤𑁆𑀤𑀲 𑀔𑁄 𑀪𑀕𑀯𑀸 𑀅𑀦𑁆𑀢𑀭𑀸 𑀘 𑀭𑀸𑀚𑀕𑀳𑀁 𑀅𑀦𑁆𑀢𑀭𑀸 𑀘 𑀯𑁂𑀲𑀸𑀮𑀺𑀁 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀘𑀻𑀯𑀭𑁂𑀳𑀺 𑀉𑀩𑁆𑀪𑀡𑁆𑀟𑀺𑀢𑁂 [𑀉𑀩𑁆𑀪𑀡𑁆𑀟𑀻𑀓𑀢𑁂 (𑀲𑁆𑀬𑀸.)] 𑀲𑀻𑀲𑁂𑀧𑀺 𑀘𑀻𑀯𑀭𑀪𑀺𑀲𑀺𑀁 𑀓𑀭𑀺𑀢𑁆𑀯𑀸 𑀔𑀦𑁆𑀥𑁂𑀧𑀺 𑀘𑀻𑀯𑀭𑀪𑀺𑀲𑀺𑀁 𑀓𑀭𑀺𑀢𑁆𑀯𑀸 𑀓𑀝𑀺𑀬𑀸𑀧𑀺 𑀘𑀻𑀯𑀭𑀪𑀺𑀲𑀺𑀁 𑀓𑀭𑀺𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁂, 𑀤𑀺𑀲𑁆𑀯𑀸𑀦 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀅𑀢𑀺𑀮𑀳𑀼𑀁 𑀔𑁄 𑀇𑀫𑁂 𑀫𑁄𑀖𑀧𑀼𑀭𑀺𑀲𑀸 𑀘𑀻𑀯𑀭𑁂 𑀩𑀸𑀳𑀼𑀮𑁆𑀮𑀸𑀬 𑀆𑀯𑀢𑁆𑀢𑀸. 𑀬𑀁𑀦𑀽𑀦𑀸𑀳𑀁 𑀪𑀺𑀓𑁆𑀔𑀽𑀦𑀁 𑀘𑀻𑀯𑀭𑁂 𑀲𑀻𑀫𑀁 𑀩𑀦𑁆𑀥𑁂𑀬𑁆𑀬𑀁, 𑀫𑀭𑀺𑀬𑀸𑀤𑀁 𑀞𑀧𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀯𑁂𑀲𑀸𑀮𑀻 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀕𑁄𑀢𑀫𑀓𑁂 𑀘𑁂𑀢𑀺𑀬𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀲𑀻𑀢𑀸𑀲𑀼 𑀳𑁂𑀫𑀦𑁆𑀢𑀺𑀓𑀸𑀲𑀼 𑀭𑀢𑁆𑀢𑀻𑀲𑀼 𑀅𑀦𑁆𑀢𑀭𑀝𑁆𑀞𑀓𑀸𑀲𑀼 𑀳𑀺𑀫𑀧𑀸𑀢𑀲𑀫𑀬𑁂 𑀭𑀢𑁆𑀢𑀺𑀁 𑀅𑀚𑁆𑀛𑁄𑀓𑀸𑀲𑁂 𑀏𑀓𑀘𑀻𑀯𑀭𑁄 𑀦𑀺𑀲𑀻𑀤𑀺. 𑀦 𑀪𑀕𑀯𑀦𑁆𑀢𑀁 𑀲𑀻𑀢𑀁 𑀅𑀳𑁄𑀲𑀺. 𑀦𑀺𑀓𑁆𑀔𑀦𑁆𑀢𑁂 𑀧𑀞𑀫𑁂 𑀬𑀸𑀫𑁂 𑀲𑀻𑀢𑀁 𑀪𑀕𑀯𑀦𑁆𑀢𑀁 𑀅𑀳𑁄𑀲𑀺. 𑀤𑀼𑀢𑀺𑀬𑀁 𑀪𑀕𑀯𑀸 𑀘𑀻𑀯𑀭𑀁 𑀧𑀸𑀭𑀼𑀧𑀺. 𑀦 𑀪𑀕𑀯𑀦𑁆𑀢𑀁 𑀲𑀻𑀢𑀁 𑀅𑀳𑁄𑀲𑀺. 𑀦𑀺𑀓𑁆𑀔𑀦𑁆𑀢𑁂 𑀫𑀚𑁆𑀛𑀺𑀫𑁂 𑀬𑀸𑀫𑁂 𑀲𑀻𑀢𑀁 𑀪𑀕𑀯𑀦𑁆𑀢𑀁 𑀅𑀳𑁄𑀲𑀺. 𑀢𑀢𑀺𑀬𑀁 𑀪𑀕𑀯𑀸 𑀘𑀻𑀯𑀭𑀁 𑀧𑀸𑀭𑀼𑀧𑀺. 𑀦 𑀪𑀕𑀯𑀦𑁆𑀢𑀁 𑀲𑀻𑀢𑀁 𑀅𑀳𑁄𑀲𑀺. 𑀦𑀺𑀓𑁆𑀔𑀦𑁆𑀢𑁂 𑀧𑀘𑁆𑀙𑀺𑀫𑁂 𑀬𑀸𑀫𑁂 𑀉𑀤𑁆𑀥𑀲𑁆𑀢𑁂 𑀅𑀭𑀼𑀡𑁂 𑀦𑀦𑁆𑀤𑀺𑀫𑀼𑀔𑀺𑀬𑀸 𑀭𑀢𑁆𑀢𑀺𑀬𑀸 𑀲𑀻𑀢𑀁 𑀪𑀕𑀯𑀦𑁆𑀢𑀁 𑀅𑀳𑁄𑀲𑀺. 𑀘𑀢𑀼𑀢𑁆𑀣𑀁 𑀪𑀕𑀯𑀸 𑀘𑀻𑀯𑀭𑀁 𑀧𑀸𑀭𑀼𑀧𑀺. 𑀦 𑀪𑀕𑀯𑀦𑁆𑀢𑀁 𑀲𑀻𑀢𑀁 𑀅𑀳𑁄𑀲𑀺. 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀬𑁂𑀧𑀺 𑀔𑁄 𑀢𑁂 𑀓𑀼𑀮𑀧𑀼𑀢𑁆𑀢𑀸 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀲𑀻𑀢𑀸𑀮𑀼𑀓𑀸 𑀲𑀻𑀢𑀪𑀻𑀭𑀼𑀓𑀸 𑀢𑁂𑀧𑀺 𑀲𑀓𑁆𑀓𑁄𑀦𑁆𑀢𑀺 𑀢𑀺𑀘𑀻𑀯𑀭𑁂𑀦 𑀬𑀸𑀧𑁂𑀢𑀼𑀁. 𑀬𑀁𑀦𑀽𑀦𑀸𑀳𑀁 𑀪𑀺𑀓𑁆𑀔𑀽𑀦𑀁 𑀘𑀻𑀯𑀭𑁂 𑀲𑀻𑀫𑀁 𑀩𑀦𑁆𑀥𑁂𑀬𑁆𑀬𑀁, 𑀫𑀭𑀺𑀬𑀸𑀤𑀁 𑀞𑀧𑁂𑀬𑁆𑀬𑀁, 𑀢𑀺𑀘𑀻𑀯𑀭𑀁 𑀅𑀦𑀼𑀚𑀸𑀦𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀇𑀥𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑀭𑀸 𑀘 𑀭𑀸𑀚𑀕𑀳𑀁 𑀅𑀦𑁆𑀢𑀭𑀸 𑀘 𑀯𑁂𑀲𑀸𑀮𑀺𑀁 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄 𑀅𑀤𑁆𑀤𑀲𑀁 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀘𑀻𑀯𑀭𑁂𑀳𑀺 𑀉𑀩𑁆𑀪𑀡𑁆𑀟𑀺𑀢𑁂 𑀲𑀻𑀲𑁂𑀧𑀺 𑀘𑀻𑀯𑀭𑀪𑀺𑀲𑀺𑀁 𑀓𑀭𑀺𑀢𑁆𑀯𑀸 𑀔𑀦𑁆𑀥𑁂𑀧𑀺 𑀘𑀻𑀯𑀭𑀪𑀺𑀲𑀺𑀁 𑀓𑀭𑀺𑀢𑁆𑀯𑀸 𑀓𑀝𑀺𑀬𑀸𑀧𑀺 𑀘𑀻𑀯𑀭𑀪𑀺𑀲𑀺𑀁 𑀓𑀭𑀺𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁂, 𑀤𑀺𑀲𑁆𑀯𑀸𑀦 𑀫𑁂 𑀏𑀢𑀤𑀳𑁄𑀲𑀺 𑁋 ‘𑀅𑀢𑀺𑀮𑀳𑀼𑀁 𑀔𑁄 𑀇𑀫𑁂 𑀫𑁄𑀖𑀧𑀼𑀭𑀺𑀲𑀸 𑀘𑀻𑀯𑀭𑁂 𑀩𑀸𑀳𑀼𑀮𑁆𑀮𑀸𑀬 𑀆𑀯𑀢𑁆𑀢𑀸. 𑀬𑀁𑀦𑀽𑀦𑀸𑀳𑀁 𑀪𑀺𑀓𑁆𑀔𑀽𑀦𑀁 𑀘𑀻𑀯𑀭𑁂 𑀲𑀻𑀫𑀁 𑀩𑀦𑁆𑀥𑁂𑀬𑁆𑀬𑀁, 𑀫𑀭𑀺𑀬𑀸𑀤𑀁 𑀞𑀧𑁂𑀬𑁆𑀬’𑀦𑁆𑀢𑀺. 𑀇𑀥𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀻𑀢𑀸𑀲𑀼 𑀳𑁂𑀫𑀦𑁆𑀢𑀺𑀓𑀸𑀲𑀼 𑀭𑀢𑁆𑀢𑀻𑀲𑀼 𑀅𑀦𑁆𑀢𑀭𑀝𑁆𑀞𑀓𑀸𑀲𑀼 𑀳𑀺𑀫𑀧𑀸𑀢𑀲𑀫𑀬𑁂 𑀭𑀢𑁆𑀢𑀺𑀁 𑀅𑀚𑁆𑀛𑁄𑀓𑀸𑀲𑁂 𑀏𑀓𑀘𑀻𑀯𑀭𑁄 𑀦𑀺𑀲𑀻𑀤𑀺𑀁. 𑀦 𑀫𑀁 𑀲𑀻𑀢𑀁 𑀅𑀳𑁄𑀲𑀺. 𑀦𑀺𑀓𑁆𑀔𑀦𑁆𑀢𑁂 𑀧𑀞𑀫𑁂 𑀬𑀸𑀫𑁂 𑀲𑀻𑀢𑀁 𑀫𑀁 𑀅𑀳𑁄𑀲𑀺. 𑀤𑀼𑀢𑀺𑀬𑀸𑀳𑀁 𑀘𑀻𑀯𑀭𑀁 𑀧𑀸𑀭𑀼𑀧𑀺𑀁. 𑀦 𑀫𑀁 𑀲𑀻𑀢𑀁 𑀅𑀳𑁄𑀲𑀺. 𑀦𑀺𑀓𑁆𑀔𑀦𑁆𑀢𑁂 𑀫𑀚𑁆𑀛𑀺𑀫𑁂 𑀬𑀸𑀫𑁂 𑀲𑀻𑀢𑀁 𑀫𑀁 𑀅𑀳𑁄𑀲𑀺. 𑀢𑀢𑀺𑀬𑀸𑀳𑀁 𑀘𑀻𑀯𑀭𑀁 𑀧𑀸𑀭𑀼𑀧𑀺𑀁. 𑀦 𑀫𑀁 𑀲𑀻𑀢𑀁 𑀅𑀳𑁄𑀲𑀺. 𑀦𑀺𑀓𑁆𑀔𑀦𑁆𑀢𑁂 𑀧𑀘𑁆𑀙𑀺𑀫𑁂 𑀬𑀸𑀫𑁂 𑀉𑀤𑁆𑀥𑀲𑁆𑀢𑁂 𑀅𑀭𑀼𑀡𑁂 𑀦𑀦𑁆𑀤𑀺𑀫𑀼𑀔𑀺𑀬𑀸 𑀭𑀢𑁆𑀢𑀺𑀬𑀸 𑀲𑀻𑀢𑀁 𑀫𑀁 𑀅𑀳𑁄𑀲𑀺. 𑀘𑀢𑀼𑀢𑁆𑀣𑀸𑀳𑀁 𑀘𑀻𑀯𑀭𑀁 𑀧𑀸𑀭𑀼𑀧𑀺𑀁. 𑀦 𑀫𑀁 𑀲𑀻𑀢𑀁 𑀅𑀳𑁄𑀲𑀺. 𑀢𑀲𑁆𑀲 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀏𑀢𑀤𑀳𑁄𑀲𑀺 𑁋 ‘‘𑀬𑁂𑀧𑀺 𑀔𑁄 𑀢𑁂 𑀓𑀼𑀮𑀧𑀼𑀢𑁆𑀢𑀸 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀲𑀻𑀢𑀸𑀮𑀼𑀓𑀸 𑀲𑀻𑀢𑀪𑀻𑀭𑀼𑀓𑀸 𑀢𑁂𑀧𑀺 𑀲𑀓𑁆𑀓𑁄𑀦𑁆𑀢𑀺 𑀢𑀺𑀘𑀻𑀯𑀭𑁂𑀦 𑀬𑀸𑀧𑁂𑀢𑀼𑀁. 𑀬𑀁𑀦𑀽𑀦𑀸𑀳𑀁 𑀪𑀺𑀓𑁆𑀔𑀽𑀦𑀁 𑀘𑀻𑀯𑀭𑁂 𑀲𑀻𑀫𑀁 𑀩𑀦𑁆𑀥𑁂𑀬𑁆𑀬𑀁, 𑀫𑀭𑀺𑀬𑀸𑀤𑀁 𑀞𑀧𑁂𑀬𑁆𑀬𑀁, 𑀢𑀺𑀘𑀻𑀯𑀭𑀁 𑀅𑀦𑀼𑀚𑀸𑀦𑁂𑀬𑁆𑀬’𑀦𑁆𑀢𑀺. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀘𑀻𑀯𑀭𑀁 𑁋 𑀤𑀺𑀕𑀼𑀡𑀁 𑀲𑀗𑁆𑀖𑀸𑀝𑀺𑀁, 𑀏𑀓𑀘𑁆𑀘𑀺𑀬𑀁 𑀉𑀢𑁆𑀢𑀭𑀸𑀲𑀗𑁆𑀕𑀁, 𑀏𑀓𑀘𑁆𑀘𑀺𑀬𑀁 𑀅𑀦𑁆𑀢𑀭𑀯𑀸𑀲𑀓’’𑀦𑁆𑀢𑀺.

𑀢𑀺𑀘𑀻𑀯𑀭𑀸𑀦𑀼𑀚𑀸𑀦𑀦𑀸 𑀦𑀺𑀝𑁆𑀞𑀺𑀢𑀸.

𑁨𑁧𑁮. 𑀅𑀢𑀺𑀭𑁂𑀓𑀘𑀻𑀯𑀭𑀓𑀣𑀸

𑁩𑁪𑁭. [𑀧𑀸𑀭𑀸. 𑁪𑁬𑁧] 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀪𑀕𑀯𑀢𑀸 𑀢𑀺𑀘𑀻𑀯𑀭𑀁 𑀅𑀦𑀼𑀜𑁆𑀜𑀸𑀢𑀦𑁆𑀢𑀺 𑀅𑀜𑁆𑀜𑁂𑀦𑁂𑀯 𑀢𑀺𑀘𑀻𑀯𑀭𑁂𑀦 𑀕𑀸𑀫𑀁 𑀧𑀯𑀺𑀲𑀦𑁆𑀢𑀺, 𑀅𑀜𑁆𑀜𑁂𑀦 𑀢𑀺𑀘𑀻𑀯𑀭𑁂𑀦 𑀆𑀭𑀸𑀫𑁂 𑀅𑀘𑁆𑀙𑀦𑁆𑀢𑀺, 𑀅𑀜𑁆𑀜𑁂𑀦 𑀢𑀺𑀘𑀻𑀯𑀭𑁂𑀦 𑀦𑀳𑀸𑀦𑀁 𑀑𑀢𑀭𑀦𑁆𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀅𑀢𑀺𑀭𑁂𑀓𑀘𑀻𑀯𑀭𑀁 𑀥𑀸𑀭𑁂𑀲𑁆𑀲𑀦𑁆𑀢𑀻’’𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀅𑀢𑀺𑀭𑁂𑀓𑀘𑀻𑀯𑀭𑀁 𑀥𑀸𑀭𑁂𑀢𑀩𑁆𑀩𑀁. 𑀬𑁄 𑀥𑀸𑀭𑁂𑀬𑁆𑀬, 𑀬𑀣𑀸𑀥𑀫𑁆𑀫𑁄 𑀓𑀸𑀭𑁂𑀢𑀩𑁆𑀩𑁄’’𑀢𑀺.

[𑀧𑀸𑀭𑀸. 𑁪𑁬𑁧] 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀅𑀢𑀺𑀭𑁂𑀓𑀘𑀻𑀯𑀭𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀆𑀬𑀲𑁆𑀫𑀸 𑀘 𑀆𑀦𑀦𑁆𑀤𑁄 𑀢𑀁 𑀘𑀻𑀯𑀭𑀁 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀤𑀸𑀢𑀼𑀓𑀸𑀫𑁄 𑀳𑁄𑀢𑀺. 𑀆𑀬𑀲𑁆𑀫𑀸 𑀘 𑀲𑀸𑀭𑀺𑀧𑀼𑀢𑁆𑀢𑁄 𑀲𑀸𑀓𑁂𑀢𑁂 𑀯𑀺𑀳𑀭𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀪𑀕𑀯𑀢𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁 ‘𑀦 𑀅𑀢𑀺𑀭𑁂𑀓𑀘𑀻𑀯𑀭𑀁 𑀥𑀸𑀭𑁂𑀢𑀩𑁆𑀩’𑀦𑁆𑀢𑀺. 𑀇𑀤𑀜𑁆𑀘 𑀫𑁂 𑀅𑀢𑀺𑀭𑁂𑀓𑀘𑀻𑀯𑀭𑀁 𑀉𑀧𑁆𑀧𑀦𑁆𑀦𑀁. 𑀅𑀳𑀜𑁆𑀘𑀺𑀫𑀁 𑀘𑀻𑀯𑀭𑀁 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀤𑀸𑀢𑀼𑀓𑀸𑀫𑁄. 𑀆𑀬𑀲𑁆𑀫𑀸 𑀘 𑀲𑀸𑀭𑀺𑀧𑀼𑀢𑁆𑀢𑁄 𑀲𑀸𑀓𑁂𑀢𑁂 𑀯𑀺𑀳𑀭𑀢𑀺. 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. ‘‘𑀓𑀻𑀯𑀘𑀺𑀭𑀁 𑀧𑀦𑀸𑀦𑀦𑁆𑀤, 𑀲𑀸𑀭𑀺𑀧𑀼𑀢𑁆𑀢𑁄 𑀆𑀕𑀘𑁆𑀙𑀺𑀲𑁆𑀲𑀢𑀻’’𑀢𑀺? ‘‘𑀦𑀯𑀫𑀁 𑀯𑀸, 𑀪𑀕𑀯𑀸, 𑀤𑀺𑀯𑀲𑀁, 𑀤𑀲𑀫𑀁 𑀯𑀸’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑀲𑀸𑀳𑀧𑀭𑀫𑀁 𑀅𑀢𑀺𑀭𑁂𑀓𑀘𑀻𑀯𑀭𑀁 𑀥𑀸𑀭𑁂𑀢𑀼’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽𑀦𑀁 𑀅𑀢𑀺𑀭𑁂𑀓𑀘𑀻𑀯𑀭𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀅𑀣 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀣𑀁 𑀦𑀼 𑀔𑁄 𑀅𑀫𑁆𑀳𑁂𑀳𑀺 𑀅𑀢𑀺𑀭𑁂𑀓𑀘𑀻𑀯𑀭𑁂 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀢𑀺𑀭𑁂𑀓𑀘𑀻𑀯𑀭𑀁 𑀯𑀺𑀓𑀧𑁆𑀧𑁂𑀢𑀼𑀦𑁆𑀢𑀺.

𑁩𑁪𑁮. 𑀅𑀣 𑀔𑁄 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀩𑀸𑀭𑀸𑀡𑀲𑀻 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀩𑀸𑀭𑀸𑀡𑀲𑀻 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀩𑀸𑀭𑀸𑀡𑀲𑀺𑀬𑀁 𑀯𑀺𑀳𑀭𑀢𑀺 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑁆𑀢𑀭𑀯𑀸𑀲𑀓𑁄 𑀙𑀺𑀤𑁆𑀤𑁄 𑀳𑁄𑀢𑀺. 𑀅𑀣 𑀔𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀢𑀤𑀳𑁄𑀲𑀺 𑁋 ‘‘𑀪𑀕𑀯𑀢𑀸 𑀢𑀺𑀘𑀻𑀯𑀭𑀁 𑀅𑀦𑀼𑀜𑁆𑀜𑀸𑀢𑀁 𑁋 𑀤𑀺𑀕𑀼𑀡𑀸 𑀲𑀗𑁆𑀖𑀸𑀝𑀺, 𑀏𑀓𑀘𑁆𑀘𑀺𑀬𑁄 𑀉𑀢𑁆𑀢𑀭𑀸𑀲𑀗𑁆𑀕𑁄, 𑀏𑀓𑀘𑁆𑀘𑀺𑀬𑁄 𑀅𑀦𑁆𑀢𑀭𑀯𑀸𑀲𑀓𑁄. 𑀅𑀬𑀜𑁆𑀘 𑀫𑁂 𑀅𑀦𑁆𑀢𑀭𑀯𑀸𑀲𑀓𑁄 𑀙𑀺𑀤𑁆𑀤𑁄. 𑀬𑀁𑀦𑀽𑀦𑀸𑀳𑀁 𑀅𑀕𑁆𑀕𑀴𑀁 𑀅𑀘𑁆𑀙𑀼𑀧𑁂𑀬𑁆𑀬𑀁, 𑀲𑀫𑀦𑁆𑀢𑀢𑁄 𑀤𑀼𑀧𑀝𑁆𑀝𑀁 𑀪𑀯𑀺𑀲𑁆𑀲𑀢𑀺, 𑀫𑀚𑁆𑀛𑁂 𑀏𑀓𑀘𑁆𑀘𑀺𑀬’’𑀦𑁆𑀢𑀺. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀅𑀕𑁆𑀕𑀴𑀁 𑀅𑀘𑁆𑀙𑀼𑀧𑁂𑀲𑀺. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀲𑁂𑀦𑀸𑀲𑀦𑀘𑀸𑀭𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑁄 𑀢𑀁 𑀪𑀺𑀓𑁆𑀔𑀼𑀁 𑀅𑀕𑁆𑀕𑀴𑀁 𑀅𑀘𑁆𑀙𑀼𑀧𑁂𑀦𑁆𑀢𑀁 [𑀅𑀘𑁆𑀙𑀼𑀧𑀦𑁆𑀢𑀁 (𑀓.)], 𑀤𑀺𑀲𑁆𑀯𑀸𑀦 𑀬𑁂𑀦 𑀲𑁄 𑀪𑀺𑀓𑁆𑀔𑀼 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀁 𑀢𑁆𑀯𑀁, 𑀪𑀺𑀓𑁆𑀔𑀼, 𑀓𑀭𑁄𑀲𑀻’’𑀢𑀺? ‘‘𑀅𑀕𑁆𑀕𑀴𑀁, 𑀪𑀕𑀯𑀸, 𑀅𑀘𑁆𑀙𑀼𑀧𑁂𑀫𑀻’’𑀢𑀺. ‘‘𑀲𑀸𑀥𑀼 𑀲𑀸𑀥𑀼, 𑀪𑀺𑀓𑁆𑀔𑀼; 𑀲𑀸𑀥𑀼 𑀔𑁄 𑀢𑁆𑀯𑀁, 𑀪𑀺𑀓𑁆𑀔𑀼, 𑀅𑀕𑁆𑀕𑀴𑀁 𑀅𑀘𑁆𑀙𑀼𑀧𑁂𑀲𑀻’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀳𑀢𑀸𑀦𑀁 𑀤𑀼𑀲𑁆𑀲𑀸𑀦𑀁 𑀅𑀳𑀢𑀓𑀧𑁆𑀧𑀸𑀦𑀁 𑀤𑀺𑀕𑀼𑀡𑀁 𑀲𑀗𑁆𑀖𑀸𑀝𑀺𑀁, 𑀏𑀓𑀘𑁆𑀘𑀺𑀬𑀁 𑀉𑀢𑁆𑀢𑀭𑀸𑀲𑀗𑁆𑀕𑀁, 𑀏𑀓𑀘𑁆𑀘𑀺𑀬𑀁 𑀅𑀦𑁆𑀢𑀭𑀯𑀸𑀲𑀓𑀁; 𑀉𑀢𑀼𑀤𑁆𑀥𑀝𑀸𑀦𑀁 𑀤𑀼𑀲𑁆𑀲𑀸𑀦𑀁 𑀘𑀢𑀼𑀕𑁆𑀕𑀼𑀡𑀁 𑀲𑀗𑁆𑀖𑀸𑀝𑀺𑀁, 𑀤𑀺𑀕𑀼𑀡𑀁 𑀉𑀢𑁆𑀢𑀭𑀸𑀲𑀗𑁆𑀕𑀁, 𑀤𑀺𑀕𑀼𑀡𑀁 𑀅𑀦𑁆𑀢𑀭𑀯𑀸𑀲𑀓𑀁; 𑀧𑀁𑀲𑀼𑀓𑀽𑀮𑁂 𑀬𑀸𑀯𑀤𑀢𑁆𑀣𑀁; 𑀧𑀸𑀧𑀡𑀺𑀓𑁂 𑀉𑀲𑁆𑀲𑀸𑀳𑁄 𑀓𑀭𑀡𑀻𑀬𑁄. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀕𑁆𑀕𑀴𑀁 𑀢𑀼𑀦𑁆𑀦𑀁 𑀑𑀯𑀝𑁆𑀝𑀺𑀓𑀁 𑀓𑀡𑁆𑀟𑀼𑀲𑀓𑀁 𑀤𑀴𑁆𑀳𑀻𑀓𑀫𑁆𑀫’’𑀦𑁆𑀢𑀺.

𑀅𑀢𑀺𑀭𑁂𑀓𑀘𑀻𑀯𑀭𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁧𑁯. 𑀯𑀺𑀲𑀸𑀔𑀸𑀯𑀢𑁆𑀣𑀼

𑁩𑁪𑁯. 𑀅𑀣 𑀔𑁄 𑀪𑀕𑀯𑀸 𑀩𑀸𑀭𑀸𑀡𑀲𑀺𑀬𑀁 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀲𑀸𑀯𑀢𑁆𑀣𑀺 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀲𑀸𑀯𑀢𑁆𑀣𑀺 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀯𑀺𑀲𑀸𑀔𑀁 𑀫𑀺𑀕𑀸𑀭𑀫𑀸𑀢𑀭𑀁 𑀪𑀕𑀯𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺 𑀲𑀫𑀸𑀤𑀧𑁂𑀲𑀺 𑀲𑀫𑀼𑀢𑁆𑀢𑁂𑀚𑁂𑀲𑀺 𑀲𑀫𑁆𑀧𑀳𑀁𑀲𑁂𑀲𑀺. 𑀅𑀣 𑀔𑁄 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸, 𑀪𑀕𑀯𑀢𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑀺𑀢𑀸 𑀲𑀫𑀸𑀤𑀧𑀺𑀢𑀸 𑀲𑀫𑀼𑀢𑁆𑀢𑁂𑀚𑀺𑀢𑀸 𑀲𑀫𑁆𑀧𑀳𑀁𑀲𑀺𑀢𑀸, 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀥𑀺𑀯𑀸𑀲𑁂𑀢𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀅𑀣 𑀔𑁄 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀘𑀸𑀢𑀼𑀤𑁆𑀤𑀻𑀧𑀺𑀓𑁄 𑀫𑀳𑀸𑀫𑁂𑀖𑁄 𑀧𑀸𑀯𑀲𑁆𑀲𑀺. 𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀬𑀣𑀸, 𑀪𑀺𑀓𑁆𑀔𑀯𑁂, 𑀚𑁂𑀢𑀯𑀦𑁂 𑀯𑀲𑁆𑀲𑀢𑀺 𑀏𑀯𑀁 𑀘𑀢𑀽𑀲𑀼 𑀤𑀻𑀧𑁂𑀲𑀼 𑀯𑀲𑁆𑀲𑀢𑀺. 𑀑𑀯𑀲𑁆𑀲𑀸𑀧𑁂𑀣, 𑀪𑀺𑀓𑁆𑀔𑀯𑁂, 𑀓𑀸𑀬𑀁. 𑀅𑀬𑀁 𑀧𑀘𑁆𑀙𑀺𑀫𑀓𑁄 𑀘𑀸𑀢𑀼𑀤𑁆𑀤𑀻𑀧𑀺𑀓𑁄 𑀫𑀳𑀸𑀫𑁂𑀖𑁄’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀦𑀺𑀓𑁆𑀔𑀺𑀢𑁆𑀢𑀘𑀻𑀯𑀭𑀸 𑀓𑀸𑀬𑀁 𑀑𑀯𑀲𑁆𑀲𑀸𑀧𑁂𑀦𑁆𑀢𑀺. 𑀅𑀣 𑀔𑁄 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸 𑀧𑀡𑀻𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀤𑀸𑀲𑀺𑀁 𑀆𑀡𑀸𑀧𑁂𑀲𑀺 𑁋 ‘‘𑀕𑀘𑁆𑀙, 𑀚𑁂. 𑀆𑀭𑀸𑀫𑀁 𑀕𑀦𑁆𑀢𑁆𑀯𑀸 𑀓𑀸𑀮𑀁 𑀆𑀭𑁄𑀘𑁂𑀳𑀺 𑁋 𑀓𑀸𑀮𑁄, 𑀪𑀦𑁆𑀢𑁂, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’𑀦𑁆𑀢𑀺. ‘‘𑀏𑀯𑀁, 𑀅𑀬𑁆𑀬𑁂’’𑀢𑀺 𑀔𑁄 𑀲𑀸 𑀤𑀸𑀲𑀻 𑀯𑀺𑀲𑀸𑀔𑀸𑀬 𑀫𑀺𑀕𑀸𑀭𑀫𑀸𑀢𑀼𑀬𑀸 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀆𑀭𑀸𑀫𑀁 𑀕𑀦𑁆𑀢𑁆𑀯𑀸 𑀅𑀤𑁆𑀤𑀲 𑀪𑀺𑀓𑁆𑀔𑀽 𑀦𑀺𑀓𑁆𑀔𑀺𑀢𑁆𑀢𑀘𑀻𑀯𑀭𑁂 𑀓𑀸𑀬𑀁 𑀑𑀯𑀲𑁆𑀲𑀸𑀧𑁂𑀦𑁆𑀢𑁂, 𑀤𑀺𑀲𑁆𑀯𑀸𑀦 ‘𑀦𑀢𑁆𑀣𑀺 𑀆𑀭𑀸𑀫𑁂 𑀪𑀺𑀓𑁆𑀔𑀽, 𑀆𑀚𑀻𑀯𑀓𑀸 𑀓𑀸𑀬𑀁 𑀑𑀯𑀲𑁆𑀲𑀸𑀧𑁂𑀦𑁆𑀢𑀻’𑀢𑀺 𑀬𑁂𑀦 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀺𑀲𑀸𑀔𑀁 𑀫𑀺𑀕𑀸𑀭𑀫𑀸𑀢𑀭𑀁 𑀏𑀢𑀤𑀯𑁄𑀘 𑁋 ‘‘𑀦𑀢𑁆𑀣𑀬𑁆𑀬𑁂, 𑀆𑀭𑀸𑀫𑁂 𑀪𑀺𑀓𑁆𑀔𑀽, 𑀆𑀚𑀻𑀯𑀓𑀸 𑀓𑀸𑀬𑀁 𑀑𑀯𑀲𑁆𑀲𑀸𑀧𑁂𑀦𑁆𑀢𑀻’’𑀢𑀺. 𑀅𑀣 𑀔𑁄 𑀯𑀺𑀲𑀸𑀔𑀸𑀬 𑀫𑀺𑀕𑀸𑀭𑀫𑀸𑀢𑀼𑀬𑀸 𑀧𑀡𑁆𑀟𑀺𑀢𑀸𑀬 𑀯𑀺𑀬𑀢𑁆𑀢𑀸𑀬 𑀫𑁂𑀥𑀸𑀯𑀺𑀦𑀺𑀬𑀸 𑀏𑀢𑀤𑀳𑁄𑀲𑀺 𑁋 ‘‘𑀦𑀺𑀲𑁆𑀲𑀁𑀲𑀬𑀁 𑀔𑁄 𑀅𑀬𑁆𑀬𑀸 𑀦𑀺𑀓𑁆𑀔𑀺𑀢𑁆𑀢𑀘𑀻𑀯𑀭𑀸 𑀓𑀸𑀬𑀁 𑀑𑀯𑀲𑁆𑀲𑀸𑀧𑁂𑀦𑁆𑀢𑀺. 𑀲𑀸𑀬𑀁 𑀩𑀸𑀮𑀸 𑀫𑀜𑁆𑀜𑀺𑀢𑁆𑀣 𑁋 𑀦𑀢𑁆𑀣𑀺 𑀆𑀭𑀸𑀫𑁂 𑀪𑀺𑀓𑁆𑀔𑀽, 𑀆𑀚𑀻𑀯𑀓𑀸 𑀓𑀸𑀬𑀁 𑀑𑀯𑀲𑁆𑀲𑀸𑀧𑁂𑀦𑁆𑀢𑀻’’𑀢𑀺, 𑀧𑀼𑀦 𑀤𑀸𑀲𑀺𑀁 𑀆𑀡𑀸𑀧𑁂𑀲𑀺 𑁋 ‘‘𑀕𑀘𑁆𑀙, 𑀚𑁂. 𑀆𑀭𑀸𑀫𑀁 𑀕𑀦𑁆𑀢𑁆𑀯𑀸 𑀓𑀸𑀮𑀁 𑀆𑀭𑁄𑀘𑁂𑀳𑀺 𑁋 𑀓𑀸𑀮𑁄, 𑀪𑀦𑁆𑀢𑁂, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’𑀦𑁆𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀕𑀢𑁆𑀢𑀸𑀦𑀺 𑀲𑀻𑀢𑀺𑀁 𑀓𑀭𑀺𑀢𑁆𑀯𑀸 [𑀲𑀻𑀢𑀻𑀓𑀭𑀺𑀢𑁆𑀯𑀸 (𑀲𑁆𑀬𑀸.)] 𑀓𑀮𑁆𑀮𑀓𑀸𑀬𑀸 𑀘𑀻𑀯𑀭𑀸𑀦𑀺 𑀕𑀳𑁂𑀢𑁆𑀯𑀸 𑀬𑀣𑀸𑀯𑀺𑀳𑀸𑀭𑀁 𑀧𑀯𑀺𑀲𑀺𑀁𑀲𑀼. 𑀅𑀣 𑀔𑁄 𑀲𑀸 𑀤𑀸𑀲𑀻 𑀆𑀭𑀸𑀫𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽 𑀅𑀧𑀲𑁆𑀲𑀦𑁆𑀢𑀻 ‘𑀦𑀢𑁆𑀣𑀺 𑀆𑀭𑀸𑀫𑁂 𑀪𑀺𑀓𑁆𑀔𑀽, 𑀲𑀼𑀜𑁆𑀜𑁄 𑀆𑀭𑀸𑀫𑁄’𑀢𑀺 𑀬𑁂𑀦 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀺𑀲𑀸𑀔𑀁 𑀫𑀺𑀕𑀸𑀭𑀫𑀸𑀢𑀭𑀁 𑀏𑀢𑀤𑀯𑁄𑀘 𑁋 ‘‘𑀦𑀢𑁆𑀣𑀬𑁆𑀬𑁂, 𑀆𑀭𑀸𑀫𑁂 𑀪𑀺𑀓𑁆𑀔𑀽, 𑀲𑀼𑀜𑁆𑀜𑁄 𑀆𑀭𑀸𑀫𑁄’’𑀢𑀺. 𑀅𑀣 𑀔𑁄 𑀯𑀺𑀲𑀸𑀔𑀸𑀬 𑀫𑀺𑀕𑀸𑀭𑀫𑀸𑀢𑀼𑀬𑀸 𑀧𑀡𑁆𑀟𑀺𑀢𑀸𑀬 𑀯𑀺𑀬𑀢𑁆𑀢𑀸𑀬 𑀫𑁂𑀥𑀸𑀯𑀺𑀦𑀺𑀬𑀸 𑀏𑀢𑀤𑀳𑁄𑀲𑀺 𑁋 ‘‘𑀦𑀺𑀲𑁆𑀲𑀁𑀲𑀬𑀁 𑀔𑁄 𑀅𑀬𑁆𑀬𑀸 𑀕𑀢𑁆𑀢𑀸𑀦𑀺 𑀲𑀻𑀢𑀺𑀁 𑀓𑀭𑀺𑀢𑁆𑀯𑀸 𑀓𑀮𑁆𑀮𑀓𑀸𑀬𑀸 𑀘𑀻𑀯𑀭𑀸𑀦𑀺 𑀕𑀳𑁂𑀢𑁆𑀯𑀸 𑀬𑀣𑀸𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑀸. 𑀲𑀸𑀬𑀁 𑀩𑀸𑀮𑀸 𑀫𑀜𑁆𑀜𑀺𑀢𑁆𑀣 𑁋 𑀦𑀢𑁆𑀣𑀺 𑀆𑀭𑀸𑀫𑁂 𑀪𑀺𑀓𑁆𑀔𑀽, 𑀲𑀼𑀜𑁆𑀜𑁄 𑀆𑀭𑀸𑀫𑁄’’𑀢𑀺, 𑀧𑀼𑀦 𑀤𑀸𑀲𑀺𑀁 𑀆𑀡𑀸𑀧𑁂𑀲𑀺 𑁋 ‘‘𑀕𑀘𑁆𑀙, 𑀚𑁂. 𑀆𑀭𑀸𑀫𑀁 𑀕𑀦𑁆𑀢𑁆𑀯𑀸 𑀓𑀸𑀮𑀁 𑀆𑀭𑁄𑀘𑁂𑀳𑀺 𑁋 𑀓𑀸𑀮𑁄, 𑀪𑀦𑁆𑀢𑁂, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’𑀦𑁆𑀢𑀺.

𑁩𑁫𑁦. 𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀲𑀦𑁆𑀤𑀳𑀣 [𑀲𑀦𑁆𑀦𑀳𑀣 (𑀲𑀻. 𑀲𑁆𑀬𑀸.)], 𑀪𑀺𑀓𑁆𑀔𑀯𑁂, 𑀧𑀢𑁆𑀢𑀘𑀻𑀯𑀭𑀁; 𑀓𑀸𑀮𑁄 𑀪𑀢𑁆𑀢𑀲𑁆𑀲𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑁆𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬, 𑀏𑀯𑀫𑁂𑀯 𑁋 𑀚𑁂𑀢𑀯𑀦𑁂 𑀅𑀦𑁆𑀢𑀭𑀳𑀺𑀢𑁄 𑀯𑀺𑀲𑀸𑀔𑀸𑀬 𑀫𑀺𑀕𑀸𑀭𑀫𑀸𑀢𑀼𑀬𑀸 𑀓𑁄𑀝𑁆𑀞𑀓𑁂 𑀧𑀸𑀢𑀼𑀭𑀳𑁄𑀲𑀺. 𑀦𑀺𑀲𑀻𑀤𑀺 𑀪𑀕𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦. 𑀅𑀣 𑀔𑁄 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸 𑁋 ‘‘𑀅𑀘𑁆𑀙𑀭𑀺𑀬𑀁 𑀯𑀢 𑀪𑁄! 𑀅𑀩𑁆𑀪𑀼𑀢𑀁 𑀯𑀢 𑀪𑁄! 𑀢𑀣𑀸𑀕𑀢𑀲𑁆𑀲 𑀫𑀳𑀺𑀤𑁆𑀥𑀺𑀓𑀢𑀸 𑀫𑀳𑀸𑀦𑀼𑀪𑀸𑀯𑀢𑀸, 𑀬𑀢𑁆𑀭 𑀳𑀺 𑀦𑀸𑀫 𑀚𑀡𑁆𑀡𑀼𑀓𑀫𑀢𑁆𑀢𑁂𑀲𑀼𑀧𑀺 𑀑𑀖𑁂𑀲𑀼 𑀧𑀯𑀢𑁆𑀢𑀫𑀸𑀦𑁂𑀲𑀼, 𑀓𑀝𑀺𑀫𑀢𑁆𑀢𑁂𑀲𑀼𑀧𑀺 𑀑𑀖𑁂𑀲𑀼 𑀧𑀯𑀢𑁆𑀢𑀫𑀸𑀦𑁂𑀲𑀼, 𑀦 𑀳𑀺 𑀦𑀸𑀫 𑀏𑀓𑀪𑀺𑀓𑁆𑀔𑀼𑀲𑁆𑀲𑀧𑀺 [𑀧𑀯𑀢𑁆𑀢𑀫𑀸𑀦𑁂𑀲𑀼 𑀦 𑀏𑀓𑀪𑀺𑀓𑁆𑀔𑀼𑀲𑁆𑀲𑀧𑀺 (?)] 𑀧𑀸𑀤𑀸 𑀯𑀸 𑀘𑀻𑀯𑀭𑀸𑀦𑀺 𑀯𑀸 𑀅𑀮𑁆𑀮𑀸𑀦𑀺 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑁋 𑀳𑀝𑁆𑀞𑀸 𑀉𑀤𑀕𑁆𑀕𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀲𑀫𑁆𑀧𑀯𑀸𑀭𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀪𑀼𑀢𑁆𑀢𑀸𑀯𑀺𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀝𑁆𑀞𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀯𑀭𑀸𑀦𑀺 𑀬𑀸𑀘𑀸𑀫𑀻’’𑀢𑀺. ‘‘𑀅𑀢𑀺𑀓𑁆𑀓𑀦𑁆𑀢𑀯𑀭𑀸 𑀔𑁄, 𑀯𑀺𑀲𑀸𑀔𑁂, 𑀢𑀣𑀸𑀕𑀢𑀸’’𑀢𑀺. ‘‘𑀬𑀸𑀦𑀺 𑀘, 𑀪𑀦𑁆𑀢𑁂, 𑀓𑀧𑁆𑀧𑀺𑀬𑀸𑀦𑀺 𑀬𑀸𑀦𑀺 𑀘 𑀅𑀦𑀯𑀚𑁆𑀚𑀸𑀦𑀻’’𑀢𑀺. ‘‘𑀯𑀤𑁂𑀳𑀺, 𑀯𑀺𑀲𑀸𑀔𑁂’’𑀢𑀺. ‘‘𑀇𑀘𑁆𑀙𑀸𑀫𑀳𑀁, 𑀪𑀦𑁆𑀢𑁂, 𑀲𑀗𑁆𑀖𑀲𑁆𑀲 𑀬𑀸𑀯𑀚𑀻𑀯𑀁 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀤𑀸𑀢𑀼𑀁, 𑀆𑀕𑀦𑁆𑀢𑀼𑀓𑀪𑀢𑁆𑀢𑀁 𑀤𑀸𑀢𑀼𑀁, 𑀕𑀫𑀺𑀓𑀪𑀢𑁆𑀢𑀁 𑀤𑀸𑀢𑀼𑀁, 𑀕𑀺𑀮𑀸𑀦𑀪𑀢𑁆𑀢𑀁 𑀤𑀸𑀢𑀼𑀁, 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀪𑀢𑁆𑀢𑀁 𑀤𑀸𑀢𑀼𑀁, 𑀕𑀺𑀮𑀸𑀦𑀪𑁂𑀲𑀚𑁆𑀚𑀁 𑀤𑀸𑀢𑀼𑀁, 𑀥𑀼𑀯𑀬𑀸𑀕𑀼𑀁 𑀤𑀸𑀢𑀼𑀁, 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀉𑀤𑀓𑀲𑀸𑀝𑀺𑀓𑀁 𑀤𑀸𑀢𑀼’’𑀦𑁆𑀢𑀺. ‘‘𑀓𑀺𑀁 𑀧𑀦 𑀢𑁆𑀯𑀁, 𑀯𑀺𑀲𑀸𑀔𑁂, 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑀸 𑀢𑀣𑀸𑀕𑀢𑀁 𑀅𑀝𑁆𑀞 𑀯𑀭𑀸𑀦𑀺 𑀬𑀸𑀘𑀲𑀻’’𑀢𑀺?

‘‘𑀇𑀥𑀸𑀳𑀁, 𑀪𑀦𑁆𑀢𑁂, 𑀤𑀸𑀲𑀺𑀁 𑀆𑀡𑀸𑀧𑁂𑀲𑀺𑀁 𑁋 ‘𑀕𑀘𑁆𑀙, 𑀚𑁂. 𑀆𑀭𑀸𑀫𑀁 𑀕𑀦𑁆𑀢𑁆𑀯𑀸 𑀓𑀸𑀮𑀁 𑀆𑀭𑁄𑀘𑁂𑀳𑀺 𑁋 𑀓𑀸𑀮𑁄, 𑀪𑀦𑁆𑀢𑁂, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’’𑀦𑁆𑀢𑀺. 𑀅𑀣 𑀔𑁄 𑀲𑀸, 𑀪𑀦𑁆𑀢𑁂, 𑀤𑀸𑀲𑀻 𑀆𑀭𑀸𑀫𑀁 𑀕𑀦𑁆𑀢𑁆𑀯𑀸 𑀅𑀤𑁆𑀤𑀲 𑀪𑀺𑀓𑁆𑀔𑀽 𑀦𑀺𑀓𑁆𑀔𑀺𑀢𑁆𑀢𑀘𑀻𑀯𑀭𑁂 𑀓𑀸𑀬𑀁 𑀑𑀯𑀲𑁆𑀲𑀸𑀧𑁂𑀦𑁆𑀢𑁂, 𑀤𑀺𑀲𑁆𑀯𑀸𑀦 ‘‘𑀦𑀢𑁆𑀣𑀺 𑀆𑀭𑀸𑀫𑁂 𑀪𑀺𑀓𑁆𑀔𑀽, 𑀆𑀚𑀻𑀯𑀓𑀸 𑀓𑀸𑀬𑀁 𑀑𑀯𑀲𑁆𑀲𑀸𑀧𑁂𑀦𑁆𑀢𑀻’’𑀢𑀺 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀁 𑀏𑀢𑀤𑀯𑁄𑀘 𑁋 ‘‘𑀦𑀢𑁆𑀣𑀬𑁆𑀬𑁂, 𑀆𑀭𑀸𑀫𑁂 𑀪𑀺𑀓𑁆𑀔𑀽, 𑀆𑀚𑀻𑀯𑀓𑀸 𑀓𑀸𑀬𑀁 𑀑𑀯𑀲𑁆𑀲𑀸𑀧𑁂𑀦𑁆𑀢𑀻’’𑀢𑀺. 𑀅𑀲𑀼𑀘𑀺, 𑀪𑀦𑁆𑀢𑁂, 𑀦𑀕𑁆𑀕𑀺𑀬𑀁 𑀚𑁂𑀕𑀼𑀘𑁆𑀙𑀁 𑀧𑀝𑀺𑀓𑀽𑀮𑀁. 𑀇𑀫𑀸𑀳𑀁, 𑀪𑀦𑁆𑀢𑁂, 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑀸 𑀇𑀘𑁆𑀙𑀸𑀫𑀺 𑀲𑀗𑁆𑀖𑀲𑁆𑀲 𑀬𑀸𑀯𑀚𑀻𑀯𑀁 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀤𑀸𑀢𑀼𑀁.

‘‘𑀧𑀼𑀦 𑀘𑀧𑀭𑀁, 𑀪𑀦𑁆𑀢𑁂, 𑀆𑀕𑀦𑁆𑀢𑀼𑀓𑁄 𑀪𑀺𑀓𑁆𑀔𑀼 𑀦 𑀯𑀻𑀣𑀺𑀓𑀼𑀲𑀮𑁄 𑀦 𑀕𑁄𑀘𑀭𑀓𑀼𑀲𑀮𑁄 𑀓𑀺𑀮𑀦𑁆𑀢𑁄 𑀧𑀺𑀡𑁆𑀟𑀸𑀬 𑀘𑀭𑀢𑀺. 𑀲𑁄 𑀫𑁂 𑀆𑀕𑀦𑁆𑀢𑀼𑀓𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀯𑀻𑀣𑀺𑀓𑀼𑀲𑀮𑁄 𑀕𑁄𑀘𑀭𑀓𑀼𑀲𑀮𑁄 𑀅𑀓𑀺𑀮𑀦𑁆𑀢𑁄 𑀧𑀺𑀡𑁆𑀟𑀸𑀬 𑀘𑀭𑀺𑀲𑁆𑀲𑀢𑀺. 𑀇𑀫𑀸𑀳𑀁, 𑀪𑀦𑁆𑀢𑁂, 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑀸 𑀇𑀘𑁆𑀙𑀸𑀫𑀺 𑀲𑀗𑁆𑀖𑀲𑁆𑀲 𑀬𑀸𑀯𑀚𑀻𑀯𑀁 𑀆𑀕𑀦𑁆𑀢𑀼𑀓𑀪𑀢𑁆𑀢𑀁 𑀤𑀸𑀢𑀼𑀁.

‘‘𑀧𑀼𑀦 𑀘𑀧𑀭𑀁, 𑀪𑀦𑁆𑀢𑁂, 𑀕𑀫𑀺𑀓𑁄 𑀪𑀺𑀓𑁆𑀔𑀼 𑀅𑀢𑁆𑀢𑀦𑁄 𑀪𑀢𑁆𑀢𑀁 𑀧𑀭𑀺𑀬𑁂𑀲𑀫𑀸𑀦𑁄 𑀲𑀢𑁆𑀣𑀸 𑀯𑀸 𑀯𑀺𑀳𑀸𑀬𑀺𑀲𑁆𑀲𑀢𑀺, 𑀬𑀢𑁆𑀣 𑀯𑀸 𑀯𑀸𑀲𑀁 𑀕𑀦𑁆𑀢𑀼𑀓𑀸𑀫𑁄 𑀪𑀯𑀺𑀲𑁆𑀲𑀢𑀺 𑀢𑀢𑁆𑀣 𑀯𑀺𑀓𑀸𑀮𑁂 𑀉𑀧𑀕𑀘𑁆𑀙𑀺𑀲𑁆𑀲𑀢𑀺, 𑀓𑀺𑀮𑀦𑁆𑀢𑁄 𑀅𑀤𑁆𑀥𑀸𑀦𑀁 𑀕𑀫𑀺𑀲𑁆𑀲𑀢𑀺. 𑀲𑁄 𑀫𑁂 𑀕𑀫𑀺𑀓𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑀢𑁆𑀣𑀸 𑀦 𑀯𑀺𑀳𑀸𑀬𑀺𑀲𑁆𑀲𑀢𑀺, 𑀬𑀢𑁆𑀣 𑀯𑀸𑀲𑀁 𑀕𑀦𑁆𑀢𑀼𑀓𑀸𑀫𑁄 𑀪𑀯𑀺𑀲𑁆𑀲𑀢𑀺 𑀢𑀢𑁆𑀣 𑀓𑀸𑀮𑁂 𑀉𑀧𑀕𑀘𑁆𑀙𑀺𑀲𑁆𑀲𑀢𑀺, 𑀅𑀓𑀺𑀮𑀦𑁆𑀢𑁄 𑀅𑀤𑁆𑀥𑀸𑀦𑀁 𑀕𑀫𑀺𑀲𑁆𑀲𑀢𑀺. 𑀇𑀫𑀸𑀳𑀁, 𑀪𑀦𑁆𑀢𑁂, 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑀸 𑀇𑀘𑁆𑀙𑀸𑀫𑀺 𑀲𑀗𑁆𑀖𑀲𑁆𑀲 𑀬𑀸𑀯𑀚𑀻𑀯𑀁 𑀕𑀫𑀺𑀓𑀪𑀢𑁆𑀢𑀁 𑀤𑀸𑀢𑀼𑀁.

‘‘𑀧𑀼𑀦 𑀘𑀧𑀭𑀁, 𑀪𑀦𑁆𑀢𑁂, 𑀕𑀺𑀮𑀸𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀧𑁆𑀧𑀸𑀬𑀸𑀦𑀺 𑀪𑁄𑀚𑀦𑀸𑀦𑀺 𑀅𑀮𑀪𑀦𑁆𑀢𑀲𑁆𑀲 𑀆𑀩𑀸𑀥𑁄 𑀯𑀸 𑀅𑀪𑀺𑀯𑀟𑁆𑀠𑀺𑀲𑁆𑀲𑀢𑀺, 𑀓𑀸𑀮𑀁𑀓𑀺𑀭𑀺𑀬𑀸 𑀯𑀸 𑀪𑀯𑀺𑀲𑁆𑀲𑀢𑀺. 𑀢𑀲𑁆𑀲 𑀫𑁂 𑀕𑀺𑀮𑀸𑀦𑀪𑀢𑁆𑀢𑀁 𑀪𑀼𑀢𑁆𑀢𑀲𑁆𑀲 𑀆𑀩𑀸𑀥𑁄 𑀦 𑀅𑀪𑀺𑀯𑀟𑁆𑀠𑀺𑀲𑁆𑀲𑀢𑀺, 𑀓𑀸𑀮𑀁𑀓𑀺𑀭𑀺𑀬𑀸 𑀦 𑀪𑀯𑀺𑀲𑁆𑀲𑀢𑀺. 𑀇𑀫𑀸𑀳𑀁, 𑀪𑀦𑁆𑀢𑁂, 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑀸 𑀇𑀘𑁆𑀙𑀸𑀫𑀺 𑀲𑀗𑁆𑀖𑀲𑁆𑀲 𑀬𑀸𑀯𑀚𑀻𑀯𑀁 𑀕𑀺𑀮𑀸𑀦𑀪𑀢𑁆𑀢𑀁 𑀤𑀸𑀢𑀼𑀁. ‘‘𑀧𑀼𑀦 𑀘𑀧𑀭𑀁, 𑀪𑀦𑁆𑀢𑁂, 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑁄 𑀪𑀺𑀓𑁆𑀔𑀼 𑀅𑀢𑁆𑀢𑀦𑁄 𑀪𑀢𑁆𑀢𑀁 𑀧𑀭𑀺𑀬𑁂𑀲𑀫𑀸𑀦𑁄 𑀕𑀺𑀮𑀸𑀦𑀲𑁆𑀲 𑀉𑀲𑁆𑀲𑀽𑀭𑁂 𑀪𑀢𑁆𑀢𑀁 𑀦𑀻𑀳𑀭𑀺𑀲𑁆𑀲𑀢𑀺, 𑀪𑀢𑁆𑀢𑀘𑁆𑀙𑁂𑀤𑀁 𑀓𑀭𑀺𑀲𑁆𑀲𑀢𑀺. 𑀲𑁄 𑀫𑁂 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀕𑀺𑀮𑀸𑀦𑀲𑁆𑀲 𑀓𑀸𑀮𑁂𑀦 𑀪𑀢𑁆𑀢𑀁 𑀦𑀻𑀳𑀭𑀺𑀲𑁆𑀲𑀢𑀺, 𑀪𑀢𑁆𑀢𑀘𑁆𑀙𑁂𑀤𑀁 𑀦 𑀓𑀭𑀺𑀲𑁆𑀲𑀢𑀺. 𑀇𑀫𑀸𑀳𑀁, 𑀪𑀦𑁆𑀢𑁂, 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑀸 𑀇𑀘𑁆𑀙𑀸𑀫𑀺 𑀲𑀗𑁆𑀖𑀲𑁆𑀲 𑀬𑀸𑀯𑀚𑀻𑀯𑀁 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀪𑀢𑁆𑀢𑀁 𑀤𑀸𑀢𑀼𑀁.

‘‘𑀧𑀼𑀦 𑀘𑀧𑀭𑀁, 𑀪𑀦𑁆𑀢𑁂, 𑀕𑀺𑀮𑀸𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀧𑁆𑀧𑀸𑀬𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑀅𑀮𑀪𑀦𑁆𑀢𑀲𑁆𑀲 𑀆𑀩𑀸𑀥𑁄 𑀯𑀸 𑀅𑀪𑀺𑀯𑀟𑁆𑀠𑀺𑀲𑁆𑀲𑀢𑀺, 𑀓𑀸𑀮𑀁𑀓𑀺𑀭𑀺𑀬𑀸 𑀯𑀸 𑀪𑀯𑀺𑀲𑁆𑀲𑀢𑀺. 𑀢𑀲𑁆𑀲 𑀫𑁂 𑀕𑀺𑀮𑀸𑀦𑀪𑁂𑀲𑀚𑁆𑀚𑀁 𑀧𑀭𑀺𑀪𑀼𑀢𑁆𑀢𑀲𑁆𑀲 𑀆𑀩𑀸𑀥𑁄 𑀦 𑀅𑀪𑀺𑀯𑀟𑁆𑀠𑀺𑀲𑁆𑀲𑀢𑀺, 𑀓𑀸𑀮𑀁𑀓𑀺𑀭𑀺𑀬𑀸 𑀦 𑀪𑀯𑀺𑀲𑁆𑀲𑀢𑀺. 𑀇𑀫𑀸𑀳𑀁, 𑀪𑀦𑁆𑀢𑁂, 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑀸 𑀇𑀘𑁆𑀙𑀸𑀫𑀺 𑀲𑀗𑁆𑀖𑀲𑁆𑀲 𑀬𑀸𑀯𑀚𑀻𑀯𑀁 𑀕𑀺𑀮𑀸𑀦𑀪𑁂𑀲𑀚𑁆𑀚𑀁 𑀤𑀸𑀢𑀼𑀁.

‘‘𑀧𑀼𑀦 𑀘𑀧𑀭𑀁, 𑀪𑀦𑁆𑀢𑁂, 𑀪𑀕𑀯𑀢𑀸 𑀅𑀦𑁆𑀥𑀓𑀯𑀺𑀦𑁆𑀤𑁂 𑀤𑀲𑀸𑀦𑀺𑀲𑀁𑀲𑁂 𑀲𑀫𑁆𑀧𑀲𑁆𑀲𑀫𑀸𑀦𑁂𑀦 𑀬𑀸𑀕𑀼 𑀅𑀦𑀼𑀜𑁆𑀜𑀸𑀢𑀸. 𑀢𑁆𑀬𑀸𑀳𑀁, 𑀪𑀦𑁆𑀢𑁂, 𑀆𑀦𑀺𑀲𑀁𑀲𑁂 𑀲𑀫𑁆𑀧𑀲𑁆𑀲𑀫𑀸𑀦𑀸 𑀇𑀘𑁆𑀙𑀸𑀫𑀺 𑀲𑀗𑁆𑀖𑀲𑁆𑀲 𑀬𑀸𑀯𑀚𑀻𑀯𑀁 𑀥𑀼𑀯𑀬𑀸𑀕𑀼𑀁 𑀤𑀸𑀢𑀼𑀁.

‘‘𑀇𑀥, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀅𑀘𑀺𑀭𑀯𑀢𑀺𑀬𑀸 𑀦𑀤𑀺𑀬𑀸 𑀯𑁂𑀲𑀺𑀬𑀸𑀳𑀺 𑀲𑀤𑁆𑀥𑀺𑀁 𑀦𑀕𑁆𑀕𑀸 𑀏𑀓𑀢𑀺𑀢𑁆𑀣𑁂 𑀦𑀳𑀸𑀬𑀦𑁆𑀢𑀺. 𑀢𑀸, 𑀪𑀦𑁆𑀢𑁂, 𑀯𑁂𑀲𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑁄 𑀉𑀧𑁆𑀧𑀡𑁆𑀟𑁂𑀲𑀼𑀁 𑁋 ‘𑀓𑀺𑀁 𑀦𑀼 𑀔𑁄 𑀦𑀸𑀫 𑀢𑀼𑀫𑁆𑀳𑀸𑀓𑀁, 𑀅𑀬𑁆𑀬𑁂, 𑀤𑀳𑀭𑀸𑀦𑀁 [𑀤𑀳𑀭𑀸𑀦𑀁 𑀤𑀳𑀭𑀸𑀦𑀁 (𑀲𑀻.)] 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀺𑀡𑁆𑀡𑁂𑀦, 𑀦𑀦𑀼 𑀦𑀸𑀫 𑀓𑀸𑀫𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸; 𑀬𑀤𑀸 𑀚𑀺𑀡𑁆𑀡𑀸 𑀪𑀯𑀺𑀲𑁆𑀲𑀣 𑀢𑀤𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀲𑁆𑀲𑀣. 𑀏𑀯𑀁 𑀢𑀼𑀫𑁆𑀳𑀸𑀓𑀁 𑀉𑀪𑁄 𑀅𑀢𑁆𑀣𑀸 𑀧𑀭𑀺𑀕𑁆𑀕𑀳𑀺𑀢𑀸 𑀪𑀯𑀺𑀲𑁆𑀲𑀦𑁆𑀢𑀻’𑀢𑀺. 𑀢𑀸, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀯𑁂𑀲𑀺𑀬𑀸𑀳𑀺 𑀉𑀧𑁆𑀧𑀡𑁆𑀟𑀺𑀬𑀫𑀸𑀦𑀸 𑀫𑀗𑁆𑀓𑀽 𑀅𑀳𑁂𑀲𑀼𑀁. 𑀅𑀲𑀼𑀘𑀺, 𑀪𑀦𑁆𑀢𑁂, 𑀫𑀸𑀢𑀼𑀕𑀸𑀫𑀲𑁆𑀲 𑀦𑀕𑁆𑀕𑀺𑀬𑀁 𑀚𑁂𑀕𑀼𑀘𑁆𑀙𑀁 𑀧𑀝𑀺𑀓𑀽𑀮𑀁. 𑀇𑀫𑀸𑀳𑀁, 𑀪𑀦𑁆𑀢𑁂, 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑀸 𑀇𑀘𑁆𑀙𑀸𑀫𑀺 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀬𑀸𑀯𑀚𑀻𑀯𑀁 𑀉𑀤𑀓𑀲𑀸𑀝𑀺𑀓𑀁 𑀤𑀸𑀢𑀼’’𑀦𑁆𑀢𑀺.

𑁩𑁫𑁧. ‘‘𑀓𑀺𑀁 𑀧𑀦 𑀢𑁆𑀯𑀁, 𑀯𑀺𑀲𑀸𑀔𑁂, 𑀆𑀦𑀺𑀲𑀁𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑀸 𑀢𑀣𑀸𑀕𑀢𑀁 𑀅𑀝𑁆𑀞 𑀯𑀭𑀸𑀦𑀺 𑀬𑀸𑀘𑀲𑀻’’𑀢𑀺? ‘‘𑀇𑀥, 𑀪𑀦𑁆𑀢𑁂, 𑀤𑀺𑀲𑀸𑀲𑀼 𑀯𑀲𑁆𑀲𑀁𑀯𑀼𑀝𑁆𑀞𑀸 𑀪𑀺𑀓𑁆𑀔𑀽 𑀲𑀸𑀯𑀢𑁆𑀣𑀺𑀁 𑀆𑀕𑀘𑁆𑀙𑀺𑀲𑁆𑀲𑀦𑁆𑀢𑀺 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬. 𑀢𑁂 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺𑀲𑁆𑀲𑀦𑁆𑀢𑀺 𑁋 ‘𑀇𑀢𑁆𑀣𑀦𑁆𑀦𑀸𑀫𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀓𑀸𑀮𑀗𑁆𑀓𑀢𑁄, 𑀢𑀲𑁆𑀲 𑀓𑀸 𑀕𑀢𑀺 𑀓𑁄 𑀅𑀪𑀺𑀲𑀫𑁆𑀧𑀭𑀸𑀬𑁄’𑀢𑀺? 𑀢𑀁 𑀪𑀕𑀯𑀸 𑀩𑁆𑀬𑀸𑀓𑀭𑀺𑀲𑁆𑀲𑀢𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀯𑀸 𑀲𑀓𑀤𑀸𑀕𑀸𑀫𑀺𑀨𑀮𑁂 𑀯𑀸 𑀅𑀦𑀸𑀕𑀸𑀫𑀺𑀨𑀮𑁂 𑀯𑀸 𑀅𑀭𑀳𑀢𑁆𑀢𑁂 𑀯𑀸. 𑀢𑁆𑀬𑀸𑀳𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑁋 ‘𑀆𑀕𑀢𑀧𑀼𑀩𑁆𑀩𑀸 𑀦𑀼 𑀔𑁄, 𑀪𑀦𑁆𑀢𑁂, 𑀢𑁂𑀦 𑀅𑀬𑁆𑀬𑁂𑀦 𑀲𑀸𑀯𑀢𑁆𑀣𑀻’𑀢𑀺? 𑀲𑀘𑁂 𑀫𑁂 𑀯𑀓𑁆𑀔𑀦𑁆𑀢𑀺 𑁋 ‘𑀆𑀕𑀢𑀧𑀼𑀩𑁆𑀩𑀸 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀸𑀯𑀢𑁆𑀣𑀻’𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀘𑁆𑀙𑀺𑀲𑁆𑀲𑀸𑀫𑀺 𑁋 𑀦𑀺𑀲𑁆𑀲𑀁𑀲𑀬𑀁 𑀫𑁂 𑀧𑀭𑀺𑀪𑀼𑀢𑁆𑀢𑀁 𑀢𑁂𑀦 𑀅𑀬𑁆𑀬𑁂𑀦 𑀯𑀲𑁆𑀲𑀺𑀓𑀲𑀸𑀝𑀺𑀓𑀸 𑀯𑀸 𑀆𑀕𑀦𑁆𑀢𑀼𑀓𑀪𑀢𑁆𑀢𑀁 𑀯𑀸 𑀕𑀫𑀺𑀓𑀪𑀢𑁆𑀢𑀁 𑀯𑀸 𑀕𑀺𑀮𑀸𑀦𑀪𑀢𑁆𑀢𑀁 𑀯𑀸 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀪𑀢𑁆𑀢𑀁 𑀯𑀸 𑀕𑀺𑀮𑀸𑀦𑀪𑁂𑀲𑀚𑁆𑀚𑀁 𑀯𑀸 𑀥𑀼𑀯𑀬𑀸𑀕𑀼 𑀯𑀸𑀢𑀺. 𑀢𑀲𑁆𑀲𑀸 𑀫𑁂 𑀢𑀤𑀦𑀼𑀲𑁆𑀲𑀭𑀦𑁆𑀢𑀺𑀬𑀸 𑀧𑀸𑀫𑀼𑀚𑁆𑀚𑀁 𑀚𑀸𑀬𑀺𑀲𑁆𑀲𑀢𑀺, 𑀧𑀫𑀼𑀤𑀺𑀢𑀸𑀬 𑀧𑀻𑀢𑀺 𑀚𑀸𑀬𑀺𑀲𑁆𑀲𑀢𑀺, 𑀧𑀻𑀢𑀺𑀫𑀦𑀸𑀬 𑀓𑀸𑀬𑁄 𑀧𑀲𑁆𑀲𑀫𑁆𑀪𑀺𑀲𑁆𑀲𑀢𑀺, 𑀧𑀲𑁆𑀲𑀤𑁆𑀥𑀓𑀸𑀬𑀸 𑀲𑀼𑀔𑀁 𑀯𑁂𑀤𑀺𑀬𑀺𑀲𑁆𑀲𑀸𑀫𑀺, 𑀲𑀼𑀔𑀺𑀦𑀺𑀬𑀸 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀺𑀲𑁆𑀲𑀢𑀺. 𑀲𑀸 𑀫𑁂 𑀪𑀯𑀺𑀲𑁆𑀲𑀢𑀺 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀸 𑀩𑀮𑀪𑀸𑀯𑀦𑀸 𑀩𑁄𑀚𑁆𑀛𑀗𑁆𑀕𑀪𑀸𑀯𑀦𑀸. 𑀇𑀫𑀸𑀳𑀁, 𑀪𑀦𑁆𑀢𑁂, 𑀆𑀦𑀺𑀲𑀁𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑀸 𑀢𑀣𑀸𑀕𑀢𑀁 𑀅𑀝𑁆𑀞 𑀯𑀭𑀸𑀦𑀺 𑀬𑀸𑀘𑀸𑀫𑀻’’𑀢𑀺. ‘‘𑀲𑀸𑀥𑀼 𑀲𑀸𑀥𑀼, 𑀯𑀺𑀲𑀸𑀔𑁂; 𑀲𑀸𑀥𑀼 𑀔𑁄 𑀢𑁆𑀯𑀁, 𑀯𑀺𑀲𑀸𑀔𑁂, 𑀇𑀫𑀁 𑀆𑀦𑀺𑀲𑀁𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑀸 𑀢𑀣𑀸𑀕𑀢𑀁 𑀅𑀝𑁆𑀞 𑀯𑀭𑀸𑀦𑀺 𑀬𑀸𑀘𑀲𑀺. 𑀅𑀦𑀼𑀚𑀸𑀦𑀸𑀫𑀺 𑀢𑁂, 𑀯𑀺𑀲𑀸𑀔𑁂, 𑀅𑀝𑁆𑀞 𑀯𑀭𑀸𑀦𑀻’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀯𑀺𑀲𑀸𑀔𑀁 𑀫𑀺𑀕𑀸𑀭𑀫𑀸𑀢𑀭𑀁 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀅𑀦𑀼𑀫𑁄𑀤𑀺 𑁋

‘‘𑀬𑀸 𑀅𑀦𑁆𑀦𑀧𑀸𑀦𑀁 𑀤𑀤𑀢𑀺𑀧𑁆𑀧𑀫𑁄𑀤𑀺𑀢𑀸;

𑀲𑀻𑀮𑀽𑀧𑀧𑀦𑁆𑀦𑀸 𑀲𑀼𑀕𑀢𑀲𑁆𑀲 𑀲𑀸𑀯𑀺𑀓𑀸;

𑀤𑀤𑀸𑀢𑀺 𑀤𑀸𑀦𑀁 𑀅𑀪𑀺𑀪𑀼𑀬𑁆𑀬 𑀫𑀘𑁆𑀙𑀭𑀁;

𑀲𑁄𑀯𑀕𑁆𑀕𑀺𑀓𑀁 𑀲𑁄𑀓𑀦𑀼𑀤𑀁 𑀲𑀼𑀔𑀸𑀯𑀳𑀁.

‘‘𑀤𑀺𑀩𑁆𑀩𑀁 𑀲𑀸 𑀮𑀪𑀢𑁂 𑀆𑀬𑀼𑀁 [𑀤𑀺𑀩𑁆𑀩𑀁 𑀩𑀮𑀁 𑀲𑀸 𑀮𑀪𑀢𑁂 𑀘 𑀆𑀬𑀼𑀁 (𑀲𑀻. 𑀲𑁆𑀬𑀸.)];

𑀆𑀕𑀫𑁆𑀫 𑀫𑀕𑁆𑀕𑀁 𑀯𑀺𑀭𑀚𑀁 𑀅𑀦𑀗𑁆𑀕𑀡𑀁;

𑀲𑀸 𑀧𑀼𑀜𑁆𑀜𑀓𑀸𑀫𑀸 𑀲𑀼𑀔𑀺𑀦𑀻 𑀅𑀦𑀸𑀫𑀬𑀸;

𑀲𑀕𑁆𑀕𑀫𑁆𑀳𑀺 𑀓𑀸𑀬𑀫𑁆𑀳𑀺 𑀘𑀺𑀭𑀁 𑀧𑀫𑁄𑀤𑀢𑀻’’𑀢𑀺.

𑁩𑁫𑁨. 𑀅𑀣 𑀔𑁄 𑀪𑀕𑀯𑀸 𑀯𑀺𑀲𑀸𑀔𑀁 𑀫𑀺𑀕𑀸𑀭𑀫𑀸𑀢𑀭𑀁 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀅𑀦𑀼𑀫𑁄𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀺𑀓𑀲𑀸𑀝𑀺𑀓𑀁, 𑀆𑀕𑀦𑁆𑀢𑀼𑀓𑀪𑀢𑁆𑀢𑀁, 𑀕𑀫𑀺𑀓𑀪𑀢𑁆𑀢𑀁, 𑀕𑀺𑀮𑀸𑀦𑀪𑀢𑁆𑀢𑀁, 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀪𑀢𑁆𑀢𑀁, 𑀕𑀺𑀮𑀸𑀦𑀪𑁂𑀲𑀚𑁆𑀚𑀁, 𑀥𑀼𑀯𑀬𑀸𑀕𑀼𑀁, 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀉𑀤𑀓𑀲𑀸𑀝𑀺𑀓’’𑀦𑁆𑀢𑀺.

𑀯𑀺𑀲𑀸𑀔𑀸𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑀯𑀺𑀲𑀸𑀔𑀸𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.

𑁨𑁨𑁦. 𑀦𑀺𑀲𑀻𑀤𑀦𑀸𑀤𑀺𑀅𑀦𑀼𑀚𑀸𑀦𑀦𑀸

𑁩𑁫𑁩. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀧𑀡𑀻𑀢𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀫𑀼𑀝𑁆𑀞𑀲𑁆𑀲𑀢𑀻 𑀅𑀲𑀫𑁆𑀧𑀚𑀸𑀦𑀸 𑀦𑀺𑀤𑁆𑀤𑀁 𑀑𑀓𑁆𑀓𑀫𑀦𑁆𑀢𑀺. 𑀢𑁂𑀲𑀁 𑀫𑀼𑀝𑁆𑀞𑀲𑁆𑀲𑀢𑀻𑀦𑀁 𑀅𑀲𑀫𑁆𑀧𑀚𑀸𑀦𑀸𑀦𑀁 𑀦𑀺𑀤𑁆𑀤𑀁 𑀑𑀓𑁆𑀓𑀫𑀦𑁆𑀢𑀸𑀦𑀁 𑀲𑀼𑀧𑀺𑀦𑀦𑁆𑀢𑁂𑀦 𑀅𑀲𑀼𑀘𑀺 𑀫𑀼𑀘𑁆𑀘𑀢𑀺, 𑀲𑁂𑀦𑀸𑀲𑀦𑀁 𑀅𑀲𑀼𑀘𑀺𑀦𑀸 𑀫𑀓𑁆𑀔𑀺𑀬𑀢𑀺. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀧𑀘𑁆𑀙𑀸𑀲𑀫𑀡𑁂𑀦 𑀲𑁂𑀦𑀸𑀲𑀦𑀘𑀸𑀭𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑁄 𑀅𑀤𑁆𑀤𑀲 𑀲𑁂𑀦𑀸𑀲𑀦𑀁 𑀅𑀲𑀼𑀘𑀺𑀦𑀸 𑀫𑀓𑁆𑀔𑀺𑀢𑀁, 𑀤𑀺𑀲𑁆𑀯𑀸𑀦 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑀺𑀁 𑀏𑀢𑀁, 𑀆𑀦𑀦𑁆𑀤, 𑀲𑁂𑀦𑀸𑀲𑀦𑀁 𑀫𑀓𑁆𑀔𑀺𑀢’’𑀦𑁆𑀢𑀺? ‘‘𑀏𑀢𑀭𑀳𑀺, 𑀪𑀦𑁆𑀢𑁂, 𑀪𑀺𑀓𑁆𑀔𑀽 𑀧𑀡𑀻𑀢𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀫𑀼𑀝𑁆𑀞𑀲𑁆𑀲𑀢𑀻 𑀅𑀲𑀫𑁆𑀧𑀚𑀸𑀦𑀸 𑀦𑀺𑀤𑁆𑀤𑀁 𑀑𑀓𑁆𑀓𑀫𑀦𑁆𑀢𑀺. 𑀢𑁂𑀲𑀁 𑀫𑀼𑀝𑁆𑀞𑀲𑁆𑀲𑀢𑀻𑀦𑀁 𑀅𑀲𑀫𑁆𑀧𑀚𑀸𑀦𑀸𑀦𑀁 𑀦𑀺𑀤𑁆𑀤𑀁 𑀑𑀓𑁆𑀓𑀫𑀦𑁆𑀢𑀸𑀦𑀁 𑀲𑀼𑀧𑀺𑀦𑀦𑁆𑀢𑁂𑀦 𑀅𑀲𑀼𑀘𑀺 𑀫𑀼𑀘𑁆𑀘𑀢𑀺; 𑀢𑀬𑀺𑀤𑀁, 𑀪𑀕𑀯𑀸, 𑀲𑁂𑀦𑀸𑀲𑀦𑀁 𑀅𑀲𑀼𑀘𑀺𑀦𑀸 𑀫𑀓𑁆𑀔𑀺𑀢’’𑀦𑁆𑀢𑀺. ‘‘𑀏𑀯𑀫𑁂𑀢𑀁, 𑀆𑀦𑀦𑁆𑀤, 𑀏𑀯𑀫𑁂𑀢𑀁, 𑀆𑀦𑀦𑁆𑀤. 𑀫𑀼𑀘𑁆𑀘𑀢𑀺 𑀳𑀺, 𑀆𑀦𑀦𑁆𑀤, 𑀫𑀼𑀝𑁆𑀞𑀲𑁆𑀲𑀢𑀻𑀦𑀁 𑀅𑀲𑀫𑁆𑀧𑀚𑀸𑀦𑀸𑀦𑀁 𑀦𑀺𑀤𑁆𑀤𑀁 𑀑𑀓𑁆𑀓𑀫𑀦𑁆𑀢𑀸𑀦𑀁 𑀲𑀼𑀧𑀺𑀦𑀦𑁆𑀢𑁂𑀦 𑀅𑀲𑀼𑀘𑀺. 𑀬𑁂 𑀢𑁂, 𑀆𑀦𑀦𑁆𑀤, 𑀪𑀺𑀓𑁆𑀔𑀽 𑀉𑀧𑀝𑁆𑀞𑀺𑀢𑀲𑁆𑀲𑀢𑀻 𑀲𑀫𑁆𑀧𑀚𑀸𑀦𑀸 𑀦𑀺𑀤𑁆𑀤𑀁 𑀑𑀓𑁆𑀓𑀫𑀦𑁆𑀢𑀺, 𑀢𑁂𑀲𑀁 𑀅𑀲𑀼𑀘𑀺 𑀦 𑀫𑀼𑀘𑁆𑀘𑀢𑀺. 𑀬𑁂𑀧𑀺 𑀢𑁂, 𑀆𑀦𑀦𑁆𑀤, 𑀧𑀼𑀣𑀼𑀚𑁆𑀚𑀦𑀸 𑀓𑀸𑀫𑁂𑀲𑀼 𑀯𑀻𑀢𑀭𑀸𑀕𑀸, 𑀢𑁂𑀲𑀫𑁆𑀧𑀺 𑀅𑀲𑀼𑀘𑀺 𑀦 𑀫𑀼𑀘𑁆𑀘𑀢𑀺. 𑀅𑀝𑁆𑀞𑀸𑀦𑀫𑁂𑀢𑀁, 𑀆𑀦𑀦𑁆𑀤, 𑀅𑀦𑀯𑀓𑀸𑀲𑁄 𑀬𑀁 𑀅𑀭𑀳𑀢𑁄 𑀅𑀲𑀼𑀘𑀺 𑀫𑀼𑀘𑁆𑀘𑁂𑀬𑁆𑀬𑀸’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀇𑀥𑀸𑀳𑀁, 𑀪𑀺𑀓𑁆𑀔𑀯𑁂, 𑀆𑀦𑀦𑁆𑀤𑁂𑀦 𑀧𑀘𑁆𑀙𑀸𑀲𑀫𑀡𑁂𑀦 𑀲𑁂𑀦𑀸𑀲𑀦𑀘𑀸𑀭𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑁄 𑀅𑀤𑁆𑀤𑀲𑀁 𑀲𑁂𑀦𑀸𑀲𑀦𑀁 𑀅𑀲𑀼𑀘𑀺𑀦𑀸 𑀫𑀓𑁆𑀔𑀺𑀢𑀁, 𑀤𑀺𑀲𑁆𑀯𑀸𑀦 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺𑀁 ‘𑀓𑀺𑀁 𑀏𑀢𑀁, 𑀆𑀦𑀦𑁆𑀤, 𑀲𑁂𑀦𑀸𑀲𑀦𑀁 𑀫𑀓𑁆𑀔𑀺𑀢’𑀦𑁆𑀢𑀺? ‘𑀏𑀢𑀭𑀳𑀺, 𑀪𑀦𑁆𑀢𑁂, 𑀪𑀺𑀓𑁆𑀔𑀽 𑀧𑀡𑀻𑀢𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀫𑀼𑀝𑁆𑀞𑀲𑁆𑀲𑀢𑀻 𑀅𑀲𑀫𑁆𑀧𑀚𑀸𑀦𑀸 𑀦𑀺𑀤𑁆𑀤𑀁 𑀑𑀓𑁆𑀓𑀫𑀦𑁆𑀢𑀺. 𑀢𑁂𑀲𑀁 𑀫𑀼𑀝𑁆𑀞𑀲𑁆𑀲𑀢𑀻𑀦𑀁 𑀅𑀲𑀫𑁆𑀧𑀚𑀸𑀦𑀸𑀦𑀁 𑀦𑀺𑀤𑁆𑀤𑀁 𑀑𑀓𑁆𑀓𑀫𑀦𑁆𑀢𑀸𑀦𑀁 𑀲𑀼𑀧𑀺𑀦𑀦𑁆𑀢𑁂𑀦 𑀅𑀲𑀼𑀘𑀺 𑀫𑀼𑀘𑁆𑀘𑀢𑀺; 𑀢𑀬𑀺𑀤𑀁, 𑀪𑀕𑀯𑀸, 𑀲𑁂𑀦𑀸𑀲𑀦𑀁 𑀅𑀲𑀼𑀘𑀺𑀦𑀸 𑀫𑀓𑁆𑀔𑀺𑀢’𑀦𑁆𑀢𑀺. ‘𑀏𑀯𑀫𑁂𑀢𑀁, 𑀆𑀦𑀦𑁆𑀤, 𑀏𑀯𑀫𑁂𑀢𑀁, 𑀆𑀦𑀦𑁆𑀤, 𑀫𑀼𑀘𑁆𑀘𑀢𑀺 𑀳𑀺, 𑀆𑀦𑀦𑁆𑀤, 𑀫𑀼𑀝𑁆𑀞𑀲𑁆𑀲𑀢𑀻𑀦𑀁 𑀅𑀲𑀫𑁆𑀧𑀚𑀸𑀦𑀸𑀦𑀁 𑀦𑀺𑀤𑁆𑀤𑀁 𑀑𑀓𑁆𑀓𑀫𑀦𑁆𑀢𑀸𑀦𑀁 𑀲𑀼𑀧𑀺𑀦𑀦𑁆𑀢𑁂𑀦 𑀅𑀲𑀼𑀘𑀺. 𑀬𑁂 𑀢𑁂, 𑀆𑀦𑀦𑁆𑀤, 𑀪𑀺𑀓𑁆𑀔𑀽 𑀉𑀧𑀝𑁆𑀞𑀺𑀢𑀲𑁆𑀲𑀢𑀻 𑀲𑀫𑁆𑀧𑀚𑀸𑀦𑀸 𑀦𑀺𑀤𑁆𑀤𑀁 𑀑𑀓𑁆𑀓𑀫𑀦𑁆𑀢𑀺, 𑀢𑁂𑀲𑀁 𑀅𑀲𑀼𑀘𑀺 𑀦 𑀫𑀼𑀘𑁆𑀘𑀢𑀺. 𑀬𑁂𑀧𑀺 𑀢𑁂, 𑀆𑀦𑀦𑁆𑀤, 𑀧𑀼𑀣𑀼𑀚𑁆𑀚𑀦𑀸 𑀓𑀸𑀫𑁂𑀲𑀼 𑀯𑀻𑀢𑀭𑀸𑀕𑀸 𑀢𑁂𑀲𑀫𑁆𑀧𑀺 𑀅𑀲𑀼𑀘𑀺 𑀦 𑀫𑀼𑀘𑁆𑀘𑀢𑀺. 𑀅𑀝𑁆𑀞𑀸𑀦𑀫𑁂𑀢𑀁, 𑀆𑀦𑀦𑁆𑀤, 𑀅𑀦𑀯𑀓𑀸𑀲𑁄 𑀬𑀁 𑀅𑀭𑀳𑀢𑁄 𑀅𑀲𑀼𑀘𑀺 𑀫𑀼𑀘𑁆𑀘𑁂𑀬𑁆𑀬𑀸’’’𑀢𑀺.

‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀆𑀤𑀻𑀦𑀯𑀸 𑀫𑀼𑀝𑁆𑀞𑀲𑁆𑀲𑀢𑀺𑀲𑁆𑀲 𑀅𑀲𑀫𑁆𑀧𑀚𑀸𑀦𑀲𑁆𑀲 𑀦𑀺𑀤𑁆𑀤𑀁 𑀑𑀓𑁆𑀓𑀫𑀢𑁄 𑁋 𑀤𑀼𑀓𑁆𑀔𑀁 𑀲𑀼𑀧𑀢𑀺, 𑀤𑀼𑀓𑁆𑀔𑀁 𑀧𑀝𑀺𑀩𑀼𑀚𑁆𑀛𑀢𑀺, 𑀧𑀸𑀧𑀓𑀁 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺, 𑀤𑁂𑀯𑀢𑀸 𑀦 𑀭𑀓𑁆𑀔𑀦𑁆𑀢𑀺, 𑀅𑀲𑀼𑀘𑀺 𑀫𑀼𑀘𑁆𑀘𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀆𑀤𑀻𑀦𑀯𑀸 𑀫𑀼𑀝𑁆𑀞𑀲𑁆𑀲𑀢𑀺𑀲𑁆𑀲 𑀅𑀲𑀫𑁆𑀧𑀚𑀸𑀦𑀲𑁆𑀲 𑀦𑀺𑀤𑁆𑀤𑀁 𑀑𑀓𑁆𑀓𑀫𑀢𑁄.

‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀆𑀦𑀺𑀲𑀁𑀲𑀸 𑀉𑀧𑀝𑁆𑀞𑀺𑀢𑀲𑁆𑀲𑀢𑀺𑀲𑁆𑀲 𑀲𑀫𑁆𑀧𑀚𑀸𑀦𑀲𑁆𑀲 𑀦𑀺𑀤𑁆𑀤𑀁 𑀑𑀓𑁆𑀓𑀫𑀢𑁄 𑁋 𑀲𑀼𑀔𑀁 𑀲𑀼𑀧𑀢𑀺, 𑀲𑀼𑀔𑀁 𑀧𑀝𑀺𑀩𑀼𑀚𑁆𑀛𑀢𑀺, 𑀦 𑀧𑀸𑀧𑀓𑀁 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺, 𑀤𑁂𑀯𑀢𑀸 𑀭𑀓𑁆𑀔𑀦𑁆𑀢𑀺, 𑀅𑀲𑀼𑀘𑀺 𑀦 𑀫𑀼𑀘𑁆𑀘𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀆𑀦𑀺𑀲𑀁𑀲𑀸 𑀉𑀧𑀝𑁆𑀞𑀺𑀢𑀲𑁆𑀲𑀢𑀺𑀲𑁆𑀲 𑀲𑀫𑁆𑀧𑀚𑀸𑀦𑀲𑁆𑀲 𑀦𑀺𑀤𑁆𑀤𑀁 𑀑𑀓𑁆𑀓𑀫𑀢𑁄.

‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑀸𑀬𑀕𑀼𑀢𑁆𑀢𑀺𑀬𑀸 𑀘𑀻𑀯𑀭𑀕𑀼𑀢𑁆𑀢𑀺𑀬𑀸 𑀲𑁂𑀦𑀸𑀲𑀦𑀕𑀼𑀢𑁆𑀢𑀺𑀬𑀸 𑀦𑀺𑀲𑀻𑀤𑀦’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀢𑀺𑀔𑀼𑀤𑁆𑀤𑀓𑀁 𑀦𑀺𑀲𑀻𑀤𑀦𑀁 𑀦 𑀲𑀩𑁆𑀩𑀁 𑀲𑁂𑀦𑀸𑀲𑀦𑀁 𑀲𑀁𑀕𑁄𑀧𑁂𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑀸𑀯𑀫𑀳𑀦𑁆𑀢𑀁 𑀧𑀘𑁆𑀘𑀢𑁆𑀣𑀭𑀡𑀁 𑀆𑀓𑀗𑁆𑀔𑀢𑀺 𑀢𑀸𑀯𑀫𑀳𑀦𑁆𑀢𑀁 𑀧𑀘𑁆𑀘𑀢𑁆𑀣𑀭𑀡𑀁 𑀓𑀸𑀢𑀼𑀦𑁆𑀢𑀺.

𑁩𑁫𑁪. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀉𑀧𑀚𑁆𑀛𑀸𑀬𑀲𑁆𑀲 𑀆𑀬𑀲𑁆𑀫𑀢𑁄 𑀩𑁂𑀮𑀝𑁆𑀞𑀲𑀻𑀲𑀲𑁆𑀲 𑀣𑀼𑀮𑁆𑀮𑀓𑀘𑁆𑀙𑀸𑀩𑀸𑀥𑁄 𑀳𑁄𑀢𑀺. 𑀢𑀲𑁆𑀲 𑀮𑀲𑀺𑀓𑀸𑀬 𑀘𑀻𑀯𑀭𑀸𑀦𑀺 𑀓𑀸𑀬𑁂 𑀮𑀕𑁆𑀕𑀦𑁆𑀢𑀺. 𑀢𑀸𑀦𑀺 𑀪𑀺𑀓𑁆𑀔𑀽 𑀉𑀤𑀓𑁂𑀦 𑀢𑁂𑀫𑁂𑀢𑁆𑀯𑀸 𑀢𑁂𑀫𑁂𑀢𑁆𑀯𑀸 𑀅𑀧𑀓𑀟𑁆𑀠𑀦𑁆𑀢𑀺. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀲𑁂𑀦𑀸𑀲𑀦𑀘𑀸𑀭𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑁄 𑀢𑁂 𑀪𑀺𑀓𑁆𑀔𑀽 𑀢𑀸𑀦𑀺 𑀘𑀻𑀯𑀭𑀸𑀦𑀺 𑀉𑀤𑀓𑁂𑀦 𑀢𑁂𑀫𑁂𑀢𑁆𑀯𑀸 𑀢𑁂𑀫𑁂𑀢𑁆𑀯𑀸 𑀅𑀧𑀓𑀟𑁆𑀠𑀦𑁆𑀢𑁂, 𑀤𑀺𑀲𑁆𑀯𑀸𑀦 𑀬𑁂𑀦 𑀢𑁂 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀗𑁆𑀓𑀫𑀺𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀓𑀺𑀁 𑀇𑀫𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀆𑀩𑀸𑀥𑁄’’𑀢𑀺? ‘‘𑀇𑀫𑀲𑁆𑀲, 𑀪𑀦𑁆𑀢𑁂, 𑀆𑀬𑀲𑁆𑀫𑀢𑁄 𑀣𑀼𑀮𑁆𑀮𑀓𑀘𑁆𑀙𑀸𑀩𑀸𑀥𑁄. 𑀮𑀲𑀺𑀓𑀸𑀬 𑀘𑀻𑀯𑀭𑀸𑀦𑀺 𑀓𑀸𑀬𑁂 𑀮𑀕𑁆𑀕𑀦𑁆𑀢𑀺. 𑀢𑀸𑀦𑀺 𑀫𑀬𑀁 𑀉𑀤𑀓𑁂𑀦 𑀢𑁂𑀫𑁂𑀢𑁆𑀯𑀸 𑀢𑁂𑀫𑁂𑀢𑁆𑀯𑀸 𑀅𑀧𑀓𑀟𑁆𑀠𑀸𑀫𑀸’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑀲𑁆𑀲 𑀓𑀡𑁆𑀟𑀼 𑀯𑀸 𑀧𑀺𑀴𑀓𑀸 𑀯𑀸 𑀅𑀲𑁆𑀲𑀸𑀯𑁄 𑀯𑀸 𑀣𑀼𑀮𑁆𑀮𑀓𑀘𑁆𑀙𑀼 𑀯𑀸 𑀆𑀩𑀸𑀥𑁄 𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀺’’𑀦𑁆𑀢𑀺.

𑁩𑁫𑁫. 𑀅𑀣 𑀔𑁄 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸 𑀫𑀼𑀔𑀧𑀼𑀜𑁆𑀙𑀦𑀘𑁄𑀴𑀁 [𑀫𑀼𑀔𑀧𑀼𑀜𑁆𑀚𑀦𑀘𑁄𑀴𑀁 (𑀓.)] 𑀆𑀤𑀸𑀬 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀫𑀼𑀔𑀧𑀼𑀜𑁆𑀙𑀦𑀘𑁄𑀴𑀁, 𑀬𑀁 𑀫𑀫𑀲𑁆𑀲 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺. 𑀧𑀝𑀺𑀕𑁆𑀕𑀳𑁂𑀲𑀺 𑀪𑀕𑀯𑀸 𑀫𑀼𑀔𑀧𑀼𑀜𑁆𑀙𑀦𑀘𑁄𑀴𑀁. 𑀅𑀣 𑀔𑁄 𑀪𑀕𑀯𑀸 𑀯𑀺𑀲𑀸𑀔𑀁 𑀫𑀺𑀕𑀸𑀭𑀫𑀸𑀢𑀭𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺 𑀲𑀫𑀸𑀤𑀧𑁂𑀲𑀺 𑀲𑀫𑀼𑀢𑁆𑀢𑁂𑀚𑁂𑀲𑀺 𑀲𑀫𑁆𑀧𑀳𑀁𑀲𑁂𑀲𑀺. 𑀅𑀣 𑀔𑁄 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸 𑀪𑀕𑀯𑀢𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑀺𑀢𑀸 𑀲𑀫𑀸𑀤𑀧𑀺𑀢𑀸 𑀲𑀫𑀼𑀢𑁆𑀢𑁂𑀚𑀺𑀢𑀸 𑀲𑀫𑁆𑀧𑀳𑀁𑀲𑀺𑀢𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀫𑀼𑀔𑀧𑀼𑀜𑁆𑀙𑀦𑀘𑁄𑀴𑀓’’𑀦𑁆𑀢𑀺 [𑀫𑀼𑀔𑀧𑀼𑀜𑁆𑀙𑀦𑀘𑁄𑀮𑀦𑁆𑀢𑀺 (𑀲𑁆𑀬𑀸.)].

𑁩𑁫𑁬. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑁄𑀚𑁄 𑀫𑀮𑁆𑀮𑁄 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀲𑀳𑀸𑀬𑁄 𑀳𑁄𑀢𑀺. 𑀭𑁄𑀚𑀲𑁆𑀲 𑀫𑀮𑁆𑀮𑀲𑁆𑀲 𑀔𑁄𑀫𑀧𑀺𑀮𑁄𑀢𑀺𑀓𑀸 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀳𑀢𑁆𑀣𑁂 𑀦𑀺𑀓𑁆𑀔𑀺𑀢𑁆𑀢𑀸 𑀳𑁄𑀢𑀺. 𑀆𑀬𑀲𑁆𑀫𑀢𑁄 𑀘 𑀆𑀦𑀦𑁆𑀤𑀲𑁆𑀲 𑀔𑁄𑀫𑀧𑀺𑀮𑁄𑀢𑀺𑀓𑀸𑀬 𑀅𑀢𑁆𑀣𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀯𑀺𑀲𑁆𑀲𑀸𑀲𑀁 𑀕𑀳𑁂𑀢𑀼𑀁 𑁋 𑀲𑀦𑁆𑀤𑀺𑀝𑁆𑀞𑁄 𑀘 𑀳𑁄𑀢𑀺, 𑀲𑀫𑁆𑀪𑀢𑁆𑀢𑁄 𑀘, 𑀆𑀮𑀧𑀺𑀢𑁄 𑀘, 𑀚𑀻𑀯𑀢𑀺 𑀘, 𑀚𑀸𑀦𑀸𑀢𑀺 𑀘, 𑀕𑀳𑀺𑀢𑁂 𑀫𑁂 𑀅𑀢𑁆𑀢𑀫𑀦𑁄 𑀪𑀯𑀺𑀲𑁆𑀲𑀢𑀻𑀢𑀺. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀇𑀫𑁂𑀳𑀺 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀯𑀺𑀲𑁆𑀲𑀸𑀲𑀁 𑀕𑀳𑁂𑀢𑀼𑀦𑁆𑀢𑀺.