𑁨𑁨𑁪. 𑀕𑀺𑀮𑀸𑀦𑀯𑀢𑁆𑀣𑀼𑀓𑀣𑀸

𑁩𑁬𑁫. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀼𑀘𑁆𑀙𑀺𑀯𑀺𑀓𑀸𑀭𑀸𑀩𑀸𑀥𑁄 𑀳𑁄𑀢𑀺. 𑀲𑁄 𑀲𑀓𑁂 𑀫𑀼𑀢𑁆𑀢𑀓𑀭𑀻𑀲𑁂 𑀧𑀮𑀺𑀧𑀦𑁆𑀦𑁄 𑀲𑁂𑀢𑀺. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀧𑀘𑁆𑀙𑀸𑀲𑀫𑀡𑁂𑀦 𑀲𑁂𑀦𑀸𑀲𑀦𑀘𑀸𑀭𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑁄 𑀬𑁂𑀦 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀺𑀳𑀸𑀭𑁄 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀲𑀓𑁂 𑀫𑀼𑀢𑁆𑀢𑀓𑀭𑀻𑀲𑁂 𑀧𑀮𑀺𑀧𑀦𑁆𑀦𑀁 𑀲𑀬𑀫𑀸𑀦𑀁, 𑀤𑀺𑀲𑁆𑀯𑀸𑀦 𑀬𑁂𑀦 𑀲𑁄 𑀪𑀺𑀓𑁆𑀔𑀼 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀁 𑀢𑁂, 𑀪𑀺𑀓𑁆𑀔𑀼, 𑀆𑀩𑀸𑀥𑁄’’𑀢𑀺? ‘‘𑀓𑀼𑀘𑁆𑀙𑀺𑀯𑀺𑀓𑀸𑀭𑁄 𑀫𑁂, 𑀪𑀕𑀯𑀸’’𑀢𑀺. ‘‘𑀅𑀢𑁆𑀣𑀺 𑀧𑀦 𑀢𑁂, 𑀪𑀺𑀓𑁆𑀔𑀼, 𑀉𑀧𑀝𑁆𑀞𑀸𑀓𑁄’’𑀢𑀺? ‘‘𑀦𑀢𑁆𑀣𑀺, 𑀪𑀕𑀯𑀸’’𑀢𑀺. ‘‘𑀓𑀺𑀲𑁆𑀲 𑀢𑀁 𑀪𑀺𑀓𑁆𑀔𑀽 𑀦 𑀉𑀧𑀝𑁆𑀞𑁂𑀦𑁆𑀢𑀻’’𑀢𑀺? ‘‘𑀅𑀳𑀁 𑀔𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀽𑀦𑀁 𑀅𑀓𑀸𑀭𑀓𑁄; 𑀢𑁂𑀦 𑀫𑀁 𑀪𑀺𑀓𑁆𑀔𑀽 𑀦 𑀉𑀧𑀝𑁆𑀞𑁂𑀦𑁆𑀢𑀻’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀕𑀘𑁆𑀙𑀸𑀦𑀦𑁆𑀤, 𑀉𑀤𑀓𑀁 𑀆𑀳𑀭, 𑀇𑀫𑀁 𑀪𑀺𑀓𑁆𑀔𑀼𑀁 𑀦𑀳𑀸𑀧𑁂𑀲𑁆𑀲𑀸𑀫𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀉𑀤𑀓𑀁 𑀆𑀳𑀭𑀺. 𑀪𑀕𑀯𑀸 𑀉𑀤𑀓𑀁 𑀆𑀲𑀺𑀜𑁆𑀘𑀺. 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀧𑀭𑀺𑀥𑁄𑀯𑀺. 𑀪𑀕𑀯𑀸 𑀲𑀻𑀲𑀢𑁄 𑀅𑀕𑁆𑀕𑀳𑁂𑀲𑀺. 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀧𑀸𑀤𑀢𑁄 𑀉𑀘𑁆𑀘𑀸𑀭𑁂𑀢𑁆𑀯𑀸 𑀫𑀜𑁆𑀘𑀓𑁂 𑀦𑀺𑀧𑀸𑀢𑁂𑀲𑀼𑀁. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀽 𑀧𑀝𑀺𑀧𑀼𑀘𑁆𑀙𑀺 𑁋 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀅𑀫𑀼𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀪𑀺𑀓𑁆𑀔𑀼 𑀕𑀺𑀮𑀸𑀦𑁄’’𑀢𑀺? ‘‘𑀅𑀢𑁆𑀣𑀺, 𑀪𑀕𑀯𑀸’’𑀢𑀺. ‘‘𑀓𑀺𑀁 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀆𑀩𑀸𑀥𑁄’’𑀢𑀺? ‘‘𑀢𑀲𑁆𑀲, 𑀪𑀦𑁆𑀢𑁂, 𑀆𑀬𑀲𑁆𑀫𑀢𑁄 𑀓𑀼𑀘𑁆𑀙𑀺𑀯𑀺𑀓𑀸𑀭𑀸𑀩𑀸𑀥𑁄’’𑀢𑀺. ‘‘𑀅𑀢𑁆𑀣𑀺 𑀧𑀦, 𑀪𑀺𑀓𑁆𑀔𑀯𑁂, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑀝𑁆𑀞𑀸𑀓𑁄’’𑀢𑀺? ‘‘𑀦𑀢𑁆𑀣𑀺, 𑀪𑀕𑀯𑀸’’𑀢𑀺. ‘‘𑀓𑀺𑀲𑁆𑀲 𑀢𑀁 𑀪𑀺𑀓𑁆𑀔𑀽 𑀦 𑀉𑀧𑀝𑁆𑀞𑁂𑀦𑁆𑀢𑀻’’𑀢𑀺? ‘‘𑀏𑀲𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀦𑀁 𑀅𑀓𑀸𑀭𑀓𑁄; 𑀢𑁂𑀦 𑀢𑀁 𑀪𑀺𑀓𑁆𑀔𑀽 𑀦 𑀉𑀧𑀝𑁆𑀞𑁂𑀦𑁆𑀢𑀻’’𑀢𑀺. ‘‘𑀦𑀢𑁆𑀣𑀺 𑀯𑁄, 𑀪𑀺𑀓𑁆𑀔𑀯𑁂, 𑀫𑀸𑀢𑀸, 𑀦𑀢𑁆𑀣𑀺 𑀧𑀺𑀢𑀸, 𑀬𑁂 𑀯𑁄 𑀉𑀧𑀝𑁆𑀞𑀳𑁂𑀬𑁆𑀬𑀼𑀁. 𑀢𑀼𑀫𑁆𑀳𑁂 𑀘𑁂, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀫𑀜𑁆𑀜𑀁 𑀦 𑀉𑀧𑀝𑁆𑀞𑀳𑀺𑀲𑁆𑀲𑀣, 𑀅𑀣 𑀓𑁄 𑀘𑀭𑀳𑀺 𑀉𑀧𑀝𑁆𑀞𑀳𑀺𑀲𑁆𑀲𑀢𑀺? 𑀬𑁄, 𑀪𑀺𑀓𑁆𑀔𑀯𑁂, 𑀫𑀁 𑀉𑀧𑀝𑁆𑀞𑀳𑁂𑀬𑁆𑀬 𑀲𑁄 𑀕𑀺𑀮𑀸𑀦𑀁 𑀉𑀧𑀝𑁆𑀞𑀳𑁂𑀬𑁆𑀬. 𑀲𑀘𑁂 𑀉𑀧𑀚𑁆𑀛𑀸𑀬𑁄 𑀳𑁄𑀢𑀺, 𑀉𑀧𑀚𑁆𑀛𑀸𑀬𑁂𑀦 𑀬𑀸𑀯𑀚𑀻𑀯𑀁 𑀉𑀧𑀝𑁆𑀞𑀸𑀢𑀩𑁆𑀩𑁄; 𑀯𑀼𑀝𑁆𑀞𑀸𑀦𑀫𑀲𑁆𑀲 𑀆𑀕𑀫𑁂𑀢𑀩𑁆𑀩𑀁. 𑀲𑀘𑁂 𑀆𑀘𑀭𑀺𑀬𑁄 𑀳𑁄𑀢𑀺, 𑀆𑀘𑀭𑀺𑀬𑁂𑀦 𑀬𑀸𑀯𑀚𑀻𑀯𑀁 𑀉𑀧𑀝𑁆𑀞𑀸𑀢𑀩𑁆𑀩𑁄; 𑀯𑀼𑀝𑁆𑀞𑀸𑀦𑀫𑀲𑁆𑀲 𑀆𑀕𑀫𑁂𑀢𑀩𑁆𑀩𑀁. 𑀲𑀘𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀳𑁄𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀬𑀸𑀯𑀚𑀻𑀯𑀁 𑀉𑀧𑀝𑁆𑀞𑀸𑀢𑀩𑁆𑀩𑁄; 𑀯𑀼𑀝𑁆𑀞𑀸𑀦𑀫𑀲𑁆𑀲 𑀆𑀕𑀫𑁂𑀢𑀩𑁆𑀩𑀁. 𑀲𑀘𑁂 𑀅𑀦𑁆𑀢𑁂𑀯𑀸𑀲𑀺𑀓𑁄 𑀳𑁄𑀢𑀺, 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀬𑀸𑀯𑀚𑀻𑀯𑀁 𑀉𑀧𑀝𑁆𑀞𑀸𑀢𑀩𑁆𑀩𑁄; 𑀯𑀼𑀝𑁆𑀞𑀸𑀦𑀫𑀲𑁆𑀲 𑀆𑀕𑀫𑁂𑀢𑀩𑁆𑀩𑀁. 𑀲𑀘𑁂 𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑁄 𑀳𑁄𑀢𑀺, 𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑁂𑀦 𑀬𑀸𑀯𑀚𑀻𑀯𑀁 𑀉𑀧𑀝𑁆𑀞𑀸𑀢𑀩𑁆𑀩𑁄; 𑀯𑀼𑀝𑁆𑀞𑀸𑀦𑀫𑀲𑁆𑀲 𑀆𑀕𑀫𑁂𑀢𑀩𑁆𑀩𑀁. 𑀲𑀘𑁂 𑀲𑀫𑀸𑀦𑀸𑀘𑀭𑀺𑀬𑀓𑁄 𑀳𑁄𑀢𑀺, 𑀲𑀫𑀸𑀦𑀸𑀘𑀭𑀺𑀬𑀓𑁂𑀦 𑀬𑀸𑀯𑀚𑀻𑀯𑀁 𑀉𑀧𑀝𑁆𑀞𑀸𑀢𑀩𑁆𑀩𑁄; 𑀯𑀼𑀝𑁆𑀞𑀸𑀦𑀫𑀲𑁆𑀲 𑀆𑀕𑀫𑁂𑀢𑀩𑁆𑀩𑀁. 𑀲𑀘𑁂 𑀦 𑀳𑁄𑀢𑀺 𑀉𑀧𑀚𑁆𑀛𑀸𑀬𑁄 𑀯𑀸 𑀆𑀘𑀭𑀺𑀬𑁄 𑀯𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀯𑀸 𑀅𑀦𑁆𑀢𑁂𑀯𑀸𑀲𑀺𑀓𑁄 𑀯𑀸 𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑁄 𑀯𑀸 𑀲𑀫𑀸𑀦𑀸𑀘𑀭𑀺𑀬𑀓𑁄 𑀯𑀸 𑀲𑀗𑁆𑀖𑁂𑀦 𑀉𑀧𑀝𑁆𑀞𑀸𑀢𑀩𑁆𑀩𑁄. 𑀦𑁄 𑀘𑁂 𑀉𑀧𑀝𑁆𑀞𑀳𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲’’.

𑁩𑁬𑁬. 𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀕𑀺𑀮𑀸𑀦𑁄 𑀤𑀽𑀧𑀝𑁆𑀞𑁄 𑀳𑁄𑀢𑀺 𑁋 𑀅𑀲𑀧𑁆𑀧𑀸𑀬𑀓𑀸𑀭𑀻 𑀳𑁄𑀢𑀺, 𑀲𑀧𑁆𑀧𑀸𑀬𑁂 𑀫𑀢𑁆𑀢𑀁 𑀦 𑀚𑀸𑀦𑀸𑀢𑀺, 𑀪𑁂𑀲𑀚𑁆𑀚𑀁 𑀦 𑀧𑀝𑀺𑀲𑁂𑀯𑀺𑀢𑀸 𑀳𑁄𑀢𑀺, 𑀅𑀢𑁆𑀣𑀓𑀸𑀫𑀲𑁆𑀲 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀲𑁆𑀲 𑀬𑀣𑀸𑀪𑀽𑀢𑀁 𑀆𑀩𑀸𑀥𑀁 𑀦𑀸𑀯𑀺𑀓𑀢𑁆𑀢𑀸 𑀳𑁄𑀢𑀺 ‘𑀅𑀪𑀺𑀓𑁆𑀓𑀫𑀦𑁆𑀢𑀁 𑀯𑀸 𑀅𑀪𑀺𑀓𑁆𑀓𑀫𑀢𑀻𑀢𑀺, 𑀧𑀝𑀺𑀓𑁆𑀓𑀫𑀦𑁆𑀢𑀁 𑀯𑀸 𑀧𑀝𑀺𑀓𑁆𑀓𑀫𑀢𑀻𑀢𑀺, 𑀞𑀺𑀢𑀁 𑀯𑀸 𑀞𑀺𑀢𑁄’𑀢𑀺, 𑀉𑀧𑁆𑀧𑀦𑁆𑀦𑀸𑀦𑀁 𑀲𑀸𑀭𑀻𑀭𑀺𑀓𑀸𑀦𑀁 𑀯𑁂𑀤𑀦𑀸𑀦𑀁 𑀤𑀼𑀓𑁆𑀔𑀸𑀦𑀁 𑀢𑀺𑀩𑁆𑀩𑀸𑀦𑀁 𑀔𑀭𑀸𑀦𑀁 𑀓𑀝𑀼𑀓𑀸𑀦𑀁 𑀅𑀲𑀸𑀢𑀸𑀦𑀁 𑀅𑀫𑀦𑀸𑀧𑀸𑀦𑀁 𑀧𑀸𑀡𑀳𑀭𑀸𑀦𑀁 𑀅𑀦𑀥𑀺𑀯𑀸𑀲𑀓𑀚𑀸𑀢𑀺𑀓𑁄 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀕𑀺𑀮𑀸𑀦𑁄 𑀤𑀽𑀧𑀝𑁆𑀞𑁄 𑀳𑁄𑀢𑀺.

𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀕𑀺𑀮𑀸𑀦𑁄 𑀲𑀽𑀧𑀝𑁆𑀞𑁄 𑀳𑁄𑀢𑀺 𑁋 𑀲𑀧𑁆𑀧𑀸𑀬𑀓𑀸𑀭𑀻 𑀳𑁄𑀢𑀺, 𑀲𑀧𑁆𑀧𑀸𑀬𑁂 𑀫𑀢𑁆𑀢𑀁 𑀚𑀸𑀦𑀸𑀢𑀺, 𑀪𑁂𑀲𑀚𑁆𑀚𑀁 𑀧𑀝𑀺𑀲𑁂𑀯𑀺𑀢𑀸 𑀳𑁄𑀢𑀺, 𑀅𑀢𑁆𑀣𑀓𑀸𑀫𑀲𑁆𑀲 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀲𑁆𑀲 𑀬𑀣𑀸𑀪𑀽𑀢𑀁 𑀆𑀩𑀸𑀥𑀁 𑀆𑀯𑀺𑀓𑀢𑁆𑀢𑀸 𑀳𑁄𑀢𑀺 ‘𑀅𑀪𑀺𑀓𑁆𑀓𑀫𑀦𑁆𑀢𑀁 𑀯𑀸 𑀅𑀪𑀺𑀓𑁆𑀓𑀫𑀢𑀻𑀢𑀺, 𑀧𑀝𑀺𑀓𑁆𑀓𑀫𑀦𑁆𑀢𑀁 𑀯𑀸 𑀧𑀝𑀺𑀓𑁆𑀓𑀫𑀢𑀻𑀢𑀺, 𑀞𑀺𑀢𑀁 𑀯𑀸 𑀞𑀺𑀢𑁄’𑀢𑀺, 𑀉𑀧𑁆𑀧𑀦𑁆𑀦𑀸𑀦𑀁 𑀲𑀸𑀭𑀻𑀭𑀺𑀓𑀸𑀦𑀁 𑀯𑁂𑀤𑀦𑀸𑀦𑀁 𑀤𑀼𑀓𑁆𑀔𑀸𑀦𑀁 𑀢𑀺𑀩𑁆𑀩𑀸𑀦𑀁 𑀔𑀭𑀸𑀦𑀁 𑀓𑀝𑀼𑀓𑀸𑀦𑀁 𑀅𑀲𑀸𑀢𑀸𑀦𑀁 𑀅𑀫𑀦𑀸𑀧𑀸𑀦𑀁 𑀧𑀸𑀡𑀳𑀭𑀸𑀦𑀁 𑀅𑀥𑀺𑀯𑀸𑀲𑀓𑀚𑀸𑀢𑀺𑀓𑁄 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀕𑀺𑀮𑀸𑀦𑁄 𑀲𑀽𑀧𑀝𑁆𑀞𑁄 𑀳𑁄𑀢𑀺.

𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑁄 𑀦𑀸𑀮𑀁 𑀕𑀺𑀮𑀸𑀦𑀁 𑀉𑀧𑀝𑁆𑀞𑀸𑀢𑀼𑀁 𑁋 𑀦 𑀧𑀝𑀺𑀩𑀮𑁄 𑀳𑁄𑀢𑀺 𑀪𑁂𑀲𑀚𑁆𑀚𑀁 𑀲𑀁𑀯𑀺𑀥𑀸𑀢𑀼𑀁, 𑀲𑀧𑁆𑀧𑀸𑀬𑀸𑀲𑀧𑁆𑀧𑀸𑀬𑀁 𑀦 𑀚𑀸𑀦𑀸𑀢𑀺, 𑀅𑀲𑀧𑁆𑀧𑀸𑀬𑀁 𑀉𑀧𑀦𑀸𑀫𑁂𑀢𑀺 𑀲𑀧𑁆𑀧𑀸𑀬𑀁 𑀅𑀧𑀦𑀸𑀫𑁂𑀢𑀺, 𑀆𑀫𑀺𑀲𑀦𑁆𑀢𑀭𑁄 𑀕𑀺𑀮𑀸𑀦𑀁 𑀉𑀧𑀝𑁆𑀞𑀸𑀢𑀺 𑀦𑁄 𑀫𑁂𑀢𑁆𑀢𑀘𑀺𑀢𑁆𑀢𑁄, 𑀚𑁂𑀕𑀼𑀘𑁆𑀙𑀻 𑀳𑁄𑀢𑀺 𑀉𑀘𑁆𑀘𑀸𑀭𑀁 𑀯𑀸 𑀧𑀲𑁆𑀲𑀸𑀯𑀁 𑀯𑀸 𑀔𑁂𑀴𑀁 𑀯𑀸 𑀯𑀦𑁆𑀢𑀁 𑀯𑀸 𑀦𑀻𑀳𑀸𑀢𑀼𑀁, 𑀦 𑀧𑀝𑀺𑀩𑀮𑁄 𑀳𑁄𑀢𑀺 𑀕𑀺𑀮𑀸𑀦𑀁 𑀓𑀸𑀮𑁂𑀦 𑀓𑀸𑀮𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑀼𑀁 𑀲𑀫𑀸𑀤𑀧𑁂𑀢𑀼𑀁 𑀲𑀫𑀼𑀢𑁆𑀢𑁂𑀚𑁂𑀢𑀼𑀁 𑀲𑀫𑁆𑀧𑀳𑀁𑀲𑁂𑀢𑀼𑀁. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑁄 𑀦𑀸𑀮𑀁 𑀕𑀺𑀮𑀸𑀦𑀁 𑀉𑀧𑀝𑁆𑀞𑀸𑀢𑀼𑀁.

𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑁄 𑀅𑀮𑀁 𑀕𑀺𑀮𑀸𑀦𑀁 𑀉𑀧𑀝𑁆𑀞𑀸𑀢𑀼𑀁 𑁋 𑀧𑀝𑀺𑀩𑀮𑁄 𑀳𑁄𑀢𑀺 𑀪𑁂𑀲𑀚𑁆𑀚𑀁 𑀲𑀁𑀯𑀺𑀥𑀸𑀢𑀼𑀁, 𑀲𑀧𑁆𑀧𑀸𑀬𑀸𑀲𑀧𑁆𑀧𑀸𑀬𑀁 𑀚𑀸𑀦𑀸𑀢𑀺, 𑀅𑀲𑀧𑁆𑀧𑀸𑀬𑀁 𑀅𑀧𑀦𑀸𑀫𑁂𑀢𑀺 𑀲𑀧𑁆𑀧𑀸𑀬𑀁 𑀉𑀧𑀦𑀸𑀫𑁂𑀢𑀺, 𑀫𑁂𑀢𑁆𑀢𑀘𑀺𑀢𑁆𑀢𑁄 𑀕𑀺𑀮𑀸𑀦𑀁 𑀉𑀧𑀝𑁆𑀞𑀸𑀢𑀺 𑀦𑁄 𑀆𑀫𑀺𑀲𑀦𑁆𑀢𑀭𑁄, 𑀅𑀚𑁂𑀕𑀼𑀘𑁆𑀙𑀻 𑀳𑁄𑀢𑀺 𑀉𑀘𑁆𑀘𑀸𑀭𑀁 𑀯𑀸 𑀧𑀲𑁆𑀲𑀸𑀯𑀁 𑀯𑀸 𑀔𑁂𑀴𑀁 𑀯𑀸 𑀯𑀦𑁆𑀢𑀁 𑀯𑀸 𑀦𑀻𑀳𑀸𑀢𑀼𑀁, 𑀧𑀝𑀺𑀩𑀮𑁄 𑀳𑁄𑀢𑀺 𑀕𑀺𑀮𑀸𑀦𑀁 𑀓𑀸𑀮𑁂𑀦 𑀓𑀸𑀮𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑀼𑀁 𑀲𑀫𑀸𑀤𑀧𑁂𑀢𑀼𑀁 𑀲𑀫𑀼𑀢𑁆𑀢𑁂𑀚𑁂𑀢𑀼𑀁 𑀲𑀫𑁆𑀧𑀳𑀁𑀲𑁂𑀢𑀼𑀁. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑁄 𑀅𑀮𑀁 𑀕𑀺𑀮𑀸𑀦𑀁 𑀉𑀧𑀝𑁆𑀞𑀸𑀢𑀼𑀦𑁆𑀢𑀺.

𑀕𑀺𑀮𑀸𑀦𑀯𑀢𑁆𑀣𑀼𑀓𑀣𑀸 𑀦𑀺𑀝𑁆𑀞𑀺𑀢𑀸.