𑁨𑁨𑁧. 𑀧𑀘𑁆𑀙𑀺𑀫𑀯𑀺𑀓𑀧𑁆𑀧𑀦𑀼𑀧𑀕𑀘𑀻𑀯𑀭𑀸𑀤𑀺𑀓𑀣𑀸

𑁩𑁫𑁮. 𑀅𑀣 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀬𑀸𑀦𑀺 𑀢𑀸𑀦𑀺 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀸𑀦𑀺 𑀢𑀺𑀘𑀻𑀯𑀭𑀦𑁆𑀢𑀺 𑀯𑀸 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀢𑀺 𑀯𑀸 𑀦𑀺𑀲𑀻𑀤𑀦𑀦𑁆𑀢𑀺 𑀯𑀸 𑀧𑀘𑁆𑀘𑀢𑁆𑀣𑀭𑀡𑀦𑁆𑀢𑀺 𑀯𑀸 𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀻𑀢𑀺 𑀯𑀸 𑀫𑀼𑀔𑀧𑀼𑀜𑁆𑀙𑀦𑀘𑁄𑀴𑀦𑁆𑀢𑀺 𑀯𑀸 𑀧𑀭𑀺𑀓𑁆𑀔𑀸𑀭𑀘𑁄𑀴𑀦𑁆𑀢𑀺 𑀯𑀸, 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀸𑀦𑀺 𑀦𑀼 𑀔𑁄, 𑀉𑀤𑀸𑀳𑀼, 𑀯𑀺𑀓𑀧𑁆𑀧𑁂𑀢𑀩𑁆𑀩𑀸𑀦𑀻’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀯𑀺𑀓𑀧𑁆𑀧𑁂𑀢𑀼𑀁; 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀯𑀲𑁆𑀲𑀸𑀦𑀁 𑀘𑀸𑀢𑀼𑀫𑀸𑀲𑀁 𑀅𑀥𑀺𑀝𑁆𑀞𑀸𑀢𑀼𑀁, 𑀢𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑀼𑀁; 𑀦𑀺𑀲𑀻𑀤𑀦𑀁 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀯𑀺𑀓𑀧𑁆𑀧𑁂𑀢𑀼𑀁; 𑀧𑀘𑁆𑀘𑀢𑁆𑀣𑀭𑀡𑀁 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀯𑀺𑀓𑀧𑁆𑀧𑁂𑀢𑀼𑀁; 𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀺𑀁 𑀬𑀸𑀯𑀆𑀩𑀸𑀥𑀸 𑀅𑀥𑀺𑀝𑁆𑀞𑀸𑀢𑀼𑀁 𑀢𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑀼𑀁; 𑀫𑀼𑀔𑀧𑀼𑀜𑁆𑀙𑀦𑀘𑁄𑀴𑀁 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀯𑀺𑀓𑀧𑁆𑀧𑁂𑀢𑀼𑀁; 𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀯𑀺𑀓𑀧𑁆𑀧𑁂𑀢𑀼𑀦𑁆𑀢𑀺.

𑀅𑀣 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀺𑀢𑁆𑀢𑀓𑀁 𑀧𑀘𑁆𑀙𑀺𑀫𑀁 𑀦𑀼 𑀔𑁄 𑀘𑀻𑀯𑀭𑀁 𑀯𑀺𑀓𑀧𑁆𑀧𑁂𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀬𑀸𑀫𑁂𑀦 𑀅𑀝𑁆𑀞𑀗𑁆𑀕𑀼𑀮𑀁 𑀲𑀼𑀕𑀢𑀗𑁆𑀕𑀼𑀮𑁂𑀦 𑀘𑀢𑀼𑀭𑀗𑁆𑀕𑀼𑀮𑀯𑀺𑀢𑁆𑀣𑀢𑀁 𑀧𑀘𑁆𑀙𑀺𑀫𑀁 𑀘𑀻𑀯𑀭𑀁 𑀯𑀺𑀓𑀧𑁆𑀧𑁂𑀢𑀼𑀦𑁆𑀢𑀺.

𑁩𑁫𑁯. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀢𑁄 𑀫𑀳𑀸𑀓𑀲𑁆𑀲𑀧𑀲𑁆𑀲 𑀧𑀁𑀲𑀼𑀓𑀽𑀮𑀓𑀢𑁄 𑀕𑀭𑀼𑀓𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀼𑀢𑁆𑀢𑀮𑀽𑀔𑀁 𑀓𑀸𑀢𑀼𑀦𑁆𑀢𑀺. 𑀯𑀺𑀓𑀡𑁆𑀡𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀺𑀓𑀡𑁆𑀡𑀁 𑀉𑀤𑁆𑀥𑀭𑀺𑀢𑀼𑀦𑁆𑀢𑀺. 𑀲𑀼𑀢𑁆𑀢𑀸 𑀑𑀓𑀺𑀭𑀺𑀬𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀦𑀼𑀯𑀸𑀢𑀁 𑀧𑀭𑀺𑀪𑀡𑁆𑀟𑀁 𑀆𑀭𑁄𑀧𑁂𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀗𑁆𑀖𑀸𑀝𑀺𑀬𑀸 𑀧𑀢𑁆𑀢𑀸 𑀮𑀼𑀚𑁆𑀚𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀧𑀤𑀓𑀁 𑀓𑀸𑀢𑀼𑀦𑁆𑀢𑀺.

𑁩𑁬𑁦. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀺𑀘𑀻𑀯𑀭𑁂 𑀓𑀬𑀺𑀭𑀫𑀸𑀦𑁂 𑀲𑀩𑁆𑀩𑀁 𑀙𑀺𑀦𑁆𑀦𑀓𑀁 𑀦𑀧𑁆𑀧𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀙𑀺𑀦𑁆𑀦𑀓𑀸𑀦𑀺 𑀏𑀓𑀁 𑀅𑀘𑁆𑀙𑀺𑀦𑁆𑀦𑀓𑀦𑁆𑀢𑀺.

𑀤𑁆𑀯𑁂 𑀙𑀺𑀦𑁆𑀦𑀓𑀸𑀦𑀺 𑀏𑀓𑀁 𑀅𑀘𑁆𑀙𑀺𑀦𑁆𑀦𑀓𑀁 𑀦𑀧𑁆𑀧𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀅𑀘𑁆𑀙𑀺𑀦𑁆𑀦𑀓𑀸𑀦𑀺 𑀏𑀓𑀁 𑀙𑀺𑀦𑁆𑀦𑀓𑀦𑁆𑀢𑀺.

𑀤𑁆𑀯𑁂 𑀅𑀘𑁆𑀙𑀺𑀦𑁆𑀦𑀓𑀸𑀦𑀺 𑀏𑀓𑀁 𑀙𑀺𑀦𑁆𑀦𑀓𑀁 𑀦𑀧𑁆𑀧𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀦𑁆𑀯𑀸𑀥𑀺𑀓𑀫𑁆𑀧𑀺 𑀆𑀭𑁄𑀧𑁂𑀢𑀼𑀁, 𑀦 𑀘, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀁 𑀅𑀘𑁆𑀙𑀺𑀦𑁆𑀦𑀓𑀁 𑀥𑀸𑀭𑁂𑀢𑀩𑁆𑀩𑀁. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑁩𑁬𑁧. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀩𑀳𑀼𑀁 𑀘𑀻𑀯𑀭𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀲𑁄 𑀘 𑀢𑀁 𑀘𑀻𑀯𑀭𑀁 𑀫𑀸𑀢𑀸𑀧𑀺𑀢𑀽𑀦𑀁 𑀤𑀸𑀢𑀼𑀓𑀸𑀫𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀫𑀸𑀢𑀸𑀧𑀺𑀢𑀭𑁄𑀢𑀺 [𑀫𑀸𑀢𑀸𑀧𑀺𑀢𑀽𑀦𑀁 𑀔𑁄 (𑀲𑀻.)] 𑀔𑁄, 𑀪𑀺𑀓𑁆𑀔𑀯𑁂, 𑀤𑀤𑀫𑀸𑀦𑁂 [𑀯𑀤𑀫𑀸𑀦𑁄 (𑀓.), 𑀯𑀤𑀫𑀸𑀦𑁂 (?)] 𑀓𑀺𑀁 𑀯𑀤𑁂𑀬𑁆𑀬𑀸𑀫? 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀫𑀸𑀢𑀸𑀧𑀺𑀢𑀽𑀦𑀁 𑀤𑀸𑀢𑀼𑀁. 𑀦 𑀘, 𑀪𑀺𑀓𑁆𑀔𑀯𑁂, 𑀲𑀤𑁆𑀥𑀸𑀤𑁂𑀬𑁆𑀬𑀁 𑀯𑀺𑀦𑀺𑀧𑀸𑀢𑁂𑀢𑀩𑁆𑀩𑀁. 𑀬𑁄 𑀯𑀺𑀦𑀺𑀧𑀸𑀢𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑁩𑁬𑁨. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀅𑀦𑁆𑀥𑀯𑀦𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀦𑁆𑀢𑀭𑀼𑀢𑁆𑀢𑀭𑁂𑀦 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀘𑁄𑀭𑀸 𑀢𑀁 𑀘𑀻𑀯𑀭𑀁 𑀅𑀯𑀳𑀭𑀺𑀁𑀲𑀼. 𑀲𑁄 𑀪𑀺𑀓𑁆𑀔𑀼 𑀤𑀼𑀘𑁆𑀘𑁄𑀴𑁄 𑀳𑁄𑀢𑀺 𑀮𑀽𑀔𑀘𑀻𑀯𑀭𑁄. 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀓𑀺𑀲𑁆𑀲 𑀢𑁆𑀯𑀁, 𑀆𑀯𑀼𑀲𑁄, 𑀤𑀼𑀘𑁆𑀘𑁄𑀴𑁄 𑀮𑀽𑀔𑀘𑀻𑀯𑀭𑁄𑀲𑀻’’𑀢𑀺? ‘‘𑀇𑀥𑀸𑀳𑀁 [𑀲𑁄 𑀅𑀳𑀁 (𑀓𑀢𑁆𑀣𑀘𑀺)], 𑀆𑀯𑀼𑀲𑁄, 𑀅𑀦𑁆𑀥𑀯𑀦𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀦𑁆𑀢𑀭𑀼𑀢𑁆𑀢𑀭𑁂𑀦 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺𑀁. 𑀘𑁄𑀭𑀸 𑀢𑀁 𑀘𑀻𑀯𑀭𑀁 𑀅𑀯𑀳𑀭𑀺𑀁𑀲𑀼. 𑀢𑁂𑀦𑀸𑀳𑀁 𑀤𑀼𑀘𑁆𑀘𑁄𑀴𑁄 𑀮𑀽𑀔𑀘𑀻𑀯𑀭𑁄’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀲𑀦𑁆𑀢𑀭𑀼𑀢𑁆𑀢𑀭𑁂𑀦 𑀕𑀸𑀫𑁄 𑀧𑀯𑀺𑀲𑀺𑀢𑀩𑁆𑀩𑁄. 𑀬𑁄 𑀧𑀯𑀺𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀅𑀲𑁆𑀲𑀢𑀺𑀬𑀸 𑀲𑀦𑁆𑀢𑀭𑀼𑀢𑁆𑀢𑀭𑁂𑀦 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀦𑀦𑀼, 𑀆𑀯𑀼𑀲𑁄 𑀆𑀦𑀦𑁆𑀤, 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀁 𑁋 ‘𑀦 𑀲𑀦𑁆𑀢𑀭𑀼𑀢𑁆𑀢𑀭𑁂𑀦 𑀕𑀸𑀫𑁄 𑀧𑀯𑀺𑀲𑀺𑀢𑀩𑁆𑀩𑁄’𑀢𑀺? 𑀓𑀺𑀲𑁆𑀲 𑀢𑁆𑀯𑀁, 𑀆𑀯𑀼𑀲𑁄 𑀆𑀦𑀦𑁆𑀤, 𑀲𑀦𑁆𑀢𑀭𑀼𑀢𑁆𑀢𑀭𑁂𑀦 𑀕𑀸𑀫𑀁 𑀧𑀯𑀺𑀝𑁆𑀞𑁄’’𑀢𑀺? ‘‘𑀲𑀘𑁆𑀘𑀁, 𑀆𑀯𑀼𑀲𑁄, 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀁 𑁋 ‘𑀦 𑀲𑀦𑁆𑀢𑀭𑀼𑀢𑁆𑀢𑀭𑁂𑀦 𑀕𑀸𑀫𑁄 𑀧𑀯𑀺𑀲𑀺𑀢𑀩𑁆𑀩𑁄’𑀢𑀺. 𑀅𑀧𑀺 𑀘𑀸𑀳𑀁 𑀅𑀲𑁆𑀲𑀢𑀺𑀬𑀸 𑀧𑀯𑀺𑀝𑁆𑀞𑁄’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁.

𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀧𑀘𑁆𑀘𑀬𑀸 𑀲𑀗𑁆𑀖𑀸𑀝𑀺𑀬𑀸 𑀦𑀺𑀓𑁆𑀔𑁂𑀧𑀸𑀬 𑁋 𑀕𑀺𑀮𑀸𑀦𑁄 𑀯𑀸 𑀳𑁄𑀢𑀺, 𑀯𑀲𑁆𑀲𑀺𑀓𑀲𑀗𑁆𑀓𑁂𑀢𑀁 𑀯𑀸 𑀳𑁄𑀢𑀺, 𑀦𑀤𑀻𑀧𑀸𑀭𑀁 𑀕𑀦𑁆𑀢𑀼𑀁 𑀯𑀸 𑀳𑁄𑀢𑀺, 𑀅𑀕𑁆𑀕𑀴𑀕𑀼𑀢𑁆𑀢𑀺𑀯𑀺𑀳𑀸𑀭𑁄 𑀯𑀸 𑀳𑁄𑀢𑀺, 𑀅𑀢𑁆𑀣𑀢𑀓𑀣𑀺𑀦𑀁 𑀯𑀸 𑀳𑁄𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀧𑀘𑁆𑀘𑀬𑀸 𑀲𑀗𑁆𑀖𑀸𑀝𑀺𑀬𑀸 𑀦𑀺𑀓𑁆𑀔𑁂𑀧𑀸𑀬.

𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀧𑀘𑁆𑀘𑀬𑀸 𑀉𑀢𑁆𑀢𑀭𑀸𑀲𑀗𑁆𑀕𑀲𑁆𑀲 𑀦𑀺𑀓𑁆𑀔𑁂𑀧𑀸𑀬…𑀧𑁂… 𑀅𑀦𑁆𑀢𑀭𑀯𑀸𑀲𑀓𑀲𑁆𑀲 𑀦𑀺𑀓𑁆𑀔𑁂𑀧𑀸𑀬 𑁋 𑀕𑀺𑀮𑀸𑀦𑁄 𑀯𑀸 𑀳𑁄𑀢𑀺, 𑀯𑀲𑁆𑀲𑀺𑀓𑀲𑀗𑁆𑀓𑁂𑀢𑀁 𑀯𑀸 𑀳𑁄𑀢𑀺, 𑀦𑀤𑀻𑀧𑀸𑀭𑀁 𑀕𑀦𑁆𑀢𑀼𑀁 𑀯𑀸 𑀳𑁄𑀢𑀺, 𑀅𑀕𑁆𑀕𑀴𑀕𑀼𑀢𑁆𑀢𑀺𑀯𑀺𑀳𑀸𑀭𑁄 𑀯𑀸 𑀳𑁄𑀢𑀺, 𑀅𑀢𑁆𑀣𑀢𑀓𑀣𑀺𑀦𑀁 𑀯𑀸 𑀳𑁄𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀧𑀘𑁆𑀘𑀬𑀸 𑀉𑀢𑁆𑀢𑀭𑀸𑀲𑀗𑁆𑀕𑀲𑁆𑀲 𑀅𑀦𑁆𑀢𑀭𑀯𑀸𑀲𑀓𑀲𑁆𑀲 𑀦𑀺𑀓𑁆𑀔𑁂𑀧𑀸𑀬.

𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀧𑀘𑁆𑀘𑀬𑀸 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀬 𑀦𑀺𑀓𑁆𑀔𑁂𑀧𑀸𑀬 𑁋 𑀕𑀺𑀮𑀸𑀦𑁄 𑀯𑀸 𑀳𑁄𑀢𑀺, 𑀦𑀺𑀲𑁆𑀲𑀻𑀫𑀁 𑀕𑀦𑁆𑀢𑀼𑀁 𑀯𑀸 𑀳𑁄𑀢𑀺, 𑀦𑀤𑀻𑀧𑀸𑀭𑀁 𑀕𑀦𑁆𑀢𑀼𑀁 𑀯𑀸 𑀳𑁄𑀢𑀺, 𑀅𑀕𑁆𑀕𑀴𑀕𑀼𑀢𑁆𑀢𑀺𑀯𑀺𑀳𑀸𑀭𑁄 𑀯𑀸 𑀳𑁄𑀢𑀺, 𑀯𑀲𑁆𑀲𑀺𑀓𑀲𑀸𑀝𑀺𑀓𑀸 𑀅𑀓𑀢𑀸 𑀯𑀸 𑀳𑁄𑀢𑀺 𑀯𑀺𑀧𑁆𑀧𑀓𑀢𑀸 𑀯𑀸. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀧𑀘𑁆𑀘𑀬𑀸 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀬 𑀦𑀺𑀓𑁆𑀔𑁂𑀧𑀸𑀬𑀸𑀢𑀺.

𑀧𑀘𑁆𑀙𑀺𑀫𑀯𑀺𑀓𑀧𑁆𑀧𑀦𑀼𑀧𑀕𑀘𑀻𑀯𑀭𑀸𑀤𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.