𑁧𑁪𑁮. 𑀤𑀺𑀕𑀼𑀡𑀸𑀤𑀺𑀉𑀧𑀸𑀳𑀦𑀧𑀝𑀺𑀓𑁆𑀔𑁂𑀧𑁄

𑁨𑁪𑁫. 𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀓𑀼𑀮𑀧𑀼𑀢𑁆𑀢𑀸 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑀺, 𑀅𑀢𑁆𑀣𑁄 𑀘 𑀯𑀼𑀢𑁆𑀢𑁄, 𑀅𑀢𑁆𑀢𑀸 𑀘 𑀅𑀦𑀼𑀧𑀦𑀻𑀢𑁄. 𑀅𑀣 𑀘, 𑀧𑀦𑀺𑀥𑁂𑀓𑀘𑁆𑀘𑁂 𑀫𑁄𑀖𑀧𑀼𑀭𑀺𑀲𑀸 𑀳𑀲𑀫𑀸𑀦𑀓𑀁, 𑀫𑀜𑁆𑀜𑁂, 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑀺, 𑀢𑁂 𑀧𑀘𑁆𑀙𑀸 𑀯𑀺𑀖𑀸𑀢𑀁 𑀆𑀧𑀚𑁆𑀚𑀦𑁆𑀢𑀻’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑁄𑀡𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑁆𑀯𑀁 𑀔𑁄𑀲𑀺, 𑀲𑁄𑀡, 𑀲𑀼𑀔𑀼𑀫𑀸𑀮𑁄. 𑀅𑀦𑀼𑀚𑀸𑀦𑀸𑀫𑀺 𑀢𑁂, 𑀲𑁄𑀡, 𑀏𑀓𑀧𑀮𑀸𑀲𑀺𑀓𑀁 𑀉𑀧𑀸𑀳𑀦’’𑀦𑁆𑀢𑀺. ‘‘𑀅𑀳𑀁 𑀔𑁄, 𑀪𑀦𑁆𑀢𑁂, 𑀅𑀲𑀻𑀢𑀺𑀲𑀓𑀝𑀯𑀸𑀳𑁂 𑀳𑀺𑀭𑀜𑁆𑀜𑀁 𑀑𑀳𑀸𑀬 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄, 𑀲𑀢𑁆𑀢𑀳𑀢𑁆𑀣𑀺𑀓𑀜𑁆𑀘 𑀅𑀦𑀻𑀓𑀁. 𑀅𑀣𑀸𑀳𑀁 𑀪𑀦𑁆𑀢𑁂 𑀏𑀓𑀧𑀮𑀸𑀲𑀺𑀓𑀁 𑀘𑁂 𑀉𑀧𑀸𑀳𑀦𑀁 𑀧𑀭𑀺𑀳𑀭𑀺𑀲𑁆𑀲𑀸𑀫𑀺, 𑀢𑀲𑁆𑀲 𑀫𑁂 𑀪𑀯𑀺𑀲𑁆𑀲𑀦𑁆𑀢𑀺 𑀯𑀢𑁆𑀢𑀸𑀭𑁄 ‘𑀲𑁄𑀡𑁄 𑀓𑁄𑀴𑀺𑀯𑀺𑀲𑁄 𑀅𑀲𑀻𑀢𑀺𑀲𑀓𑀝𑀯𑀸𑀳𑁂 𑀳𑀺𑀭𑀜𑁆𑀜𑀁 𑀑𑀳𑀸𑀬 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄, 𑀲𑀢𑁆𑀢𑀳𑀢𑁆𑀣𑀺𑀓𑀜𑁆𑀘 𑀅𑀦𑀻𑀓𑀁. 𑀲𑁄 𑀤𑀸𑀦𑀸𑀬𑀁 𑀏𑀓𑀧𑀮𑀸𑀲𑀺𑀓𑀸𑀲𑀼 𑀉𑀧𑀸𑀳𑀦𑀸𑀲𑀼 𑀲𑀢𑁆𑀢𑁄’𑀢𑀺. 𑀲𑀘𑁂 𑀪𑀕𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀦𑀼𑀚𑀸𑀦𑀺𑀲𑁆𑀲𑀢𑀺 𑀅𑀳𑀫𑁆𑀧𑀺 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀺; 𑀦𑁄 𑀘𑁂 𑀪𑀕𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀦𑀼𑀚𑀸𑀦𑀺𑀲𑁆𑀲𑀢𑀺, 𑀅𑀳𑀫𑁆𑀧𑀺 𑀦 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀏𑀓𑀧𑀮𑀸𑀲𑀺𑀓𑀁 𑀉𑀧𑀸𑀳𑀦𑀁. 𑀦, 𑀪𑀺𑀓𑁆𑀔𑀯𑁂, 𑀤𑀺𑀕𑀼𑀡𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸. 𑀦 𑀢𑀺𑀕𑀼𑀡𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸. 𑀦 𑀕𑀼𑀡𑀗𑁆𑀕𑀼𑀡𑀽𑀧𑀸𑀳𑀦𑀸 [𑀕𑀡𑀗𑁆𑀕𑀡𑀽𑀧𑀸𑀳𑀦𑀸 (𑀩𑀳𑀽𑀲𑀼)] 𑀥𑀸𑀭𑁂𑀢𑀩𑁆𑀩𑀸. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑀤𑀺𑀕𑀼𑀡𑀸𑀤𑀺𑀉𑀧𑀸𑀳𑀦𑀧𑀝𑀺𑀓𑁆𑀔𑁂𑀧𑁄 𑀦𑀺𑀝𑁆𑀞𑀺𑀢𑁄.