𑁫. 𑀘𑀫𑁆𑀫𑀓𑁆𑀔𑀦𑁆𑀥𑀓𑁄

𑁧𑁪𑁭. 𑀲𑁄𑀡𑀓𑁄𑀴𑀺𑀯𑀺𑀲𑀯𑀢𑁆𑀣𑀼

𑁨𑁪𑁨. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀅𑀲𑀻𑀢𑀺𑀬𑀸 𑀕𑀸𑀫𑀲𑀳𑀲𑁆𑀲𑁂𑀲𑀼 𑀇𑀲𑁆𑀲𑀭𑀺𑀬𑀸𑀥𑀺𑀧𑀘𑁆𑀘𑀁 𑀭𑀚𑁆𑀚𑀁 𑀓𑀸𑀭𑁂𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀘𑀫𑁆𑀧𑀸𑀬𑀁 𑀲𑁄𑀡𑁄 𑀦𑀸𑀫 𑀓𑁄𑀴𑀺𑀯𑀺𑀲𑁄 [𑀓𑁄𑀴𑀺𑀯𑀻𑀲𑁄 (𑀲𑀻.)] 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀲𑀼𑀔𑀼𑀫𑀸𑀮𑁄 𑀳𑁄𑀢𑀺. 𑀢𑀲𑁆𑀲 𑀧𑀸𑀤𑀢𑀮𑁂𑀲𑀼 𑀮𑁄𑀫𑀸𑀦𑀺 𑀚𑀸𑀢𑀸𑀦𑀺 𑀳𑁄𑀦𑁆𑀢𑀺. 𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀢𑀸𑀦𑀺 𑀅𑀲𑀻𑀢𑀺 𑀕𑀸𑀫𑀺𑀓𑀲𑀳𑀲𑁆𑀲𑀸𑀦𑀺 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀲𑁄𑀡𑀲𑁆𑀲 𑀓𑁄𑀴𑀺𑀯𑀺𑀲𑀲𑁆𑀲 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀸𑀳𑁂𑀲𑀺 𑁋 𑀆𑀕𑀘𑁆𑀙𑀢𑀼 𑀲𑁄𑀡𑁄, 𑀇𑀘𑁆𑀙𑀸𑀫𑀺 𑀲𑁄𑀡𑀲𑁆𑀲 𑀆𑀕𑀢𑀦𑁆𑀢𑀺. 𑀅𑀣 𑀔𑁄 𑀲𑁄𑀡𑀲𑁆𑀲 𑀓𑁄𑀴𑀺𑀯𑀺𑀲𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀲𑁄𑀡𑀁 𑀓𑁄𑀴𑀺𑀯𑀺𑀲𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀭𑀸𑀚𑀸 𑀢𑁂, 𑀢𑀸𑀢 𑀲𑁄𑀡, 𑀧𑀸𑀤𑁂 𑀤𑀓𑁆𑀔𑀺𑀢𑀼𑀓𑀸𑀫𑁄. 𑀫𑀸 𑀔𑁄 𑀢𑁆𑀯𑀁, 𑀢𑀸𑀢 𑀲𑁄𑀡, 𑀬𑁂𑀦 𑀭𑀸𑀚𑀸 𑀢𑁂𑀦 𑀧𑀸𑀤𑁂 𑀅𑀪𑀺𑀧𑁆𑀧𑀲𑀸𑀭𑁂𑀬𑁆𑀬𑀸𑀲𑀺. 𑀭𑀜𑁆𑀜𑁄 𑀧𑀼𑀭𑀢𑁄 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤. 𑀦𑀺𑀲𑀺𑀦𑁆𑀦𑀲𑁆𑀲 𑀢𑁂 𑀭𑀸𑀚𑀸 𑀧𑀸𑀤𑁂 𑀤𑀓𑁆𑀔𑀺𑀲𑁆𑀲𑀢𑀻’’𑀢𑀺. 𑀅𑀣 𑀔𑁄 𑀲𑁄𑀡𑀁 𑀓𑁄𑀴𑀺𑀯𑀺𑀲𑀁 𑀲𑀺𑀯𑀺𑀓𑀸𑀬 𑀆𑀦𑁂𑀲𑀼𑀁. 𑀅𑀣 𑀔𑁄 𑀲𑁄𑀡𑁄 𑀓𑁄𑀴𑀺𑀯𑀺𑀲𑁄 𑀬𑁂𑀦 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑀸𑀚𑀸𑀦𑀁 𑀫𑀸𑀕𑀥𑀁 𑀲𑁂𑀦𑀺𑀬𑀁 𑀩𑀺𑀫𑁆𑀩𑀺𑀲𑀸𑀭𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀭𑀜𑁆𑀜𑁄 𑀧𑀼𑀭𑀢𑁄 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺. 𑀅𑀤𑁆𑀤𑀲𑀸 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀲𑁄𑀡𑀲𑁆𑀲 𑀓𑁄𑀴𑀺𑀯𑀺𑀲𑀲𑁆𑀲 𑀧𑀸𑀤𑀢𑀮𑁂𑀲𑀼 𑀮𑁄𑀫𑀸𑀦𑀺 𑀚𑀸𑀢𑀸𑀦𑀺. 𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀢𑀸𑀦𑀺 𑀅𑀲𑀻𑀢𑀺 𑀕𑀸𑀫𑀺𑀓𑀲𑀳𑀲𑁆𑀲𑀸𑀦𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑁂 𑀅𑀢𑁆𑀣𑁂 𑀅𑀦𑀼𑀲𑀸𑀲𑀺𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺 𑁋 ‘‘𑀢𑀼𑀫𑁆𑀳𑁂 𑀔𑁆𑀯𑀢𑁆𑀣, 𑀪𑀡𑁂, 𑀫𑀬𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑁂 𑀅𑀢𑁆𑀣𑁂 𑀅𑀦𑀼𑀲𑀸𑀲𑀺𑀢𑀸; 𑀕𑀘𑁆𑀙𑀣, 𑀢𑀁 𑀪𑀕𑀯𑀦𑁆𑀢𑀁 𑀧𑀬𑀺𑀭𑀼𑀧𑀸𑀲𑀣; 𑀲𑁄 𑀦𑁄 𑀪𑀕𑀯𑀸 𑀲𑀫𑁆𑀧𑀭𑀸𑀬𑀺𑀓𑁂 𑀅𑀢𑁆𑀣𑁂 𑀅𑀦𑀼𑀲𑀸𑀲𑀺𑀲𑁆𑀲𑀢𑀻’’𑀢𑀺.

𑀅𑀣 𑀔𑁄 𑀢𑀸𑀦𑀺 𑀅𑀲𑀻𑀢𑀺 𑀕𑀸𑀫𑀺𑀓𑀲𑀳𑀲𑁆𑀲𑀸𑀦𑀺 𑀬𑁂𑀦 𑀕𑀺𑀚𑁆𑀛𑀓𑀽𑀝𑁄 𑀧𑀩𑁆𑀩𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀲𑀸𑀕𑀢𑁄 𑀪𑀕𑀯𑀢𑁄 𑀉𑀧𑀝𑁆𑀞𑀸𑀓𑁄 𑀳𑁄𑀢𑀺. 𑀅𑀣 𑀔𑁄 𑀢𑀸𑀦𑀺 𑀅𑀲𑀻𑀢𑀺 𑀕𑀸𑀫𑀺𑀓𑀲𑀳𑀲𑁆𑀲𑀸𑀦𑀺 𑀬𑁂𑀦𑀸𑀬𑀲𑁆𑀫𑀸 𑀲𑀸𑀕𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀸𑀕𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀇𑀫𑀸𑀦𑀺, 𑀪𑀦𑁆𑀢𑁂, 𑀅𑀲𑀻𑀢𑀺 𑀕𑀸𑀫𑀺𑀓𑀲𑀳𑀲𑁆𑀲𑀸𑀦𑀺 𑀇𑀥𑀽𑀧𑀲𑀗𑁆𑀓𑀦𑁆𑀢𑀸𑀦𑀺 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬; 𑀲𑀸𑀥𑀼 𑀫𑀬𑀁, 𑀪𑀦𑁆𑀢𑁂, 𑀮𑀪𑁂𑀬𑁆𑀬𑀸𑀫 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬𑀸’’𑀢𑀺. ‘‘𑀢𑁂𑀦 𑀳𑀺 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀫𑀼𑀳𑀼𑀢𑁆𑀢𑀁 𑀇𑀥𑁂𑀯 𑀢𑀸𑀯 𑀳𑁄𑀣, 𑀬𑀸𑀯𑀸𑀳𑀁 𑀪𑀕𑀯𑀦𑁆𑀢𑀁 𑀧𑀝𑀺𑀯𑁂𑀤𑁂𑀫𑀻’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀕𑀢𑁄 𑀢𑁂𑀲𑀁 𑀅𑀲𑀻𑀢𑀺𑀬𑀸 𑀕𑀸𑀫𑀺𑀓𑀲𑀳𑀲𑁆𑀲𑀸𑀦𑀁 𑀧𑀼𑀭𑀢𑁄 𑀧𑁂𑀓𑁆𑀔𑀫𑀸𑀦𑀸𑀦𑀁 𑀧𑀸𑀝𑀺𑀓𑀸𑀬 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀪𑀕𑀯𑀢𑁄 𑀧𑀼𑀭𑀢𑁄 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀫𑀸𑀦𑀺, 𑀪𑀦𑁆𑀢𑁂, 𑀅𑀲𑀻𑀢𑀺 𑀕𑀸𑀫𑀺𑀓𑀲𑀳𑀲𑁆𑀲𑀸𑀦𑀺 𑀇𑀥𑀽𑀧𑀲𑀗𑁆𑀓𑀦𑁆𑀢𑀸𑀦𑀺 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬; 𑀬𑀲𑁆𑀲 𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀸 𑀓𑀸𑀮𑀁 𑀫𑀜𑁆𑀜𑀢𑀻’’𑀢𑀺. ‘‘𑀢𑁂𑀦 𑀳𑀺 𑀢𑁆𑀯𑀁, 𑀲𑀸𑀕𑀢, 𑀯𑀺𑀳𑀸𑀭𑀧𑀘𑁆𑀙𑀸𑀬𑀸𑀬𑀁 𑀆𑀲𑀦𑀁 𑀧𑀜𑁆𑀜𑀧𑁂𑀳𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀲𑀸𑀕𑀢𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀧𑀻𑀞𑀁 𑀕𑀳𑁂𑀢𑁆𑀯𑀸 𑀪𑀕𑀯𑀢𑁄 𑀧𑀼𑀭𑀢𑁄 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀢𑁂𑀲𑀁 𑀅𑀲𑀻𑀢𑀺𑀬𑀸 𑀕𑀸𑀫𑀺𑀓𑀲𑀳𑀲𑁆𑀲𑀸𑀦𑀁 𑀧𑀼𑀭𑀢𑁄 𑀧𑁂𑀓𑁆𑀔𑀫𑀸𑀦𑀸𑀦𑀁 𑀧𑀸𑀝𑀺𑀓𑀸𑀬 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀯𑀺𑀳𑀸𑀭𑀧𑀘𑁆𑀙𑀸𑀬𑀸𑀬𑀁 𑀆𑀲𑀦𑀁 𑀧𑀜𑁆𑀜𑀧𑁂𑀢𑀺. 𑀅𑀣 𑀔𑁄 𑀪𑀕𑀯𑀸 𑀯𑀺𑀳𑀸𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀺𑀳𑀸𑀭𑀧𑀘𑁆𑀙𑀸𑀬𑀸𑀬𑀁 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀢𑀸𑀦𑀺 𑀅𑀲𑀻𑀢𑀺 𑀕𑀸𑀫𑀺𑀓𑀲𑀳𑀲𑁆𑀲𑀸𑀦𑀺 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀅𑀣 𑀔𑁄 𑀢𑀸𑀦𑀺 𑀅𑀲𑀻𑀢𑀺 𑀕𑀸𑀫𑀺𑀓𑀲𑀳𑀲𑁆𑀲𑀸𑀦𑀺 𑀆𑀬𑀲𑁆𑀫𑀦𑁆𑀢𑀁𑀬𑁂𑀯 𑀲𑀸𑀕𑀢𑀁 𑀲𑀫𑀦𑁆𑀦𑀸𑀳𑀭𑀦𑁆𑀢𑀺, 𑀦𑁄 𑀢𑀣𑀸 𑀪𑀕𑀯𑀦𑁆𑀢𑀁. 𑀅𑀣 𑀔𑁄 𑀪𑀕𑀯𑀸 𑀢𑁂𑀲𑀁 𑀅𑀲𑀻𑀢𑀺𑀬𑀸 𑀕𑀸𑀫𑀺𑀓𑀲𑀳𑀲𑁆𑀲𑀸𑀦𑀁 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀆𑀬𑀲𑁆𑀫𑀦𑁆𑀢𑀁 𑀲𑀸𑀕𑀢𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑁂𑀦 𑀳𑀺 𑀢𑁆𑀯𑀁, 𑀲𑀸𑀕𑀢, 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀳𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀲𑀸𑀕𑀢𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀅𑀦𑁆𑀢𑀮𑀺𑀓𑁆𑀔𑁂 𑀘𑀗𑁆𑀓𑀫𑀢𑀺𑀧𑀺, 𑀢𑀺𑀝𑁆𑀞𑀢𑀺𑀧𑀺, 𑀦𑀺𑀲𑀻𑀤𑀢𑀺𑀧𑀺, 𑀲𑁂𑀬𑁆𑀬𑀫𑁆𑀧𑀺 𑀓𑀧𑁆𑀧𑁂𑀢𑀺, 𑀥𑀽𑀫𑀸𑀬𑀢𑀺𑀧𑀺 [𑀥𑀽𑀧𑀸𑀬𑀢𑀺𑀧𑀺 (𑀲𑀻.), 𑀧𑀥𑀽𑀧𑀸𑀬𑀢𑀺𑀧𑀺 (𑀲𑁆𑀬𑀸.)] 𑀧𑀚𑁆𑀚𑀮𑀢𑀺𑀧𑀺, 𑀅𑀦𑁆𑀢𑀭𑀥𑀸𑀬𑀢𑀺𑀧𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀕𑀢𑁄 𑀆𑀓𑀸𑀲𑁂 𑀅𑀦𑁆𑀢𑀮𑀺𑀓𑁆𑀔𑁂 𑀅𑀦𑁂𑀓𑀯𑀺𑀳𑀺𑀢𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀢𑁆𑀣𑀸 𑀫𑁂, 𑀪𑀦𑁆𑀢𑁂, 𑀪𑀕𑀯𑀸; 𑀲𑀸𑀯𑀓𑁄𑀳𑀫𑀲𑁆𑀫𑀺. 𑀲𑀢𑁆𑀣𑀸 𑀫𑁂, 𑀪𑀦𑁆𑀢𑁂, 𑀪𑀕𑀯𑀸; 𑀲𑀸𑀯𑀓𑁄𑀳𑀫𑀲𑁆𑀫𑀻’’𑀢𑀺. 𑀅𑀣 𑀔𑁄 𑀢𑀸𑀦𑀺 𑀅𑀲𑀻𑀢𑀺 𑀕𑀸𑀫𑀺𑀓𑀲𑀳𑀲𑁆𑀲𑀸𑀦𑀺 ‘‘𑀅𑀘𑁆𑀙𑀭𑀺𑀬𑀁 𑀯𑀢 𑀪𑁄! 𑀅𑀩𑁆𑀪𑀼𑀢𑀁 𑀯𑀢 𑀪𑁄! 𑀲𑀸𑀯𑀓𑁄𑀧𑀺 𑀦𑀸𑀫 𑀏𑀯𑀁 𑀫𑀳𑀺𑀤𑁆𑀥𑀺𑀓𑁄 𑀪𑀯𑀺𑀲𑁆𑀲𑀢𑀺, 𑀏𑀯𑀁 𑀫𑀳𑀸𑀦𑀼𑀪𑀸𑀯𑁄, 𑀅𑀳𑁄 𑀦𑀽𑀦 𑀲𑀢𑁆𑀣𑀸’’𑀢𑀺 𑀪𑀕𑀯𑀦𑁆𑀢𑀁𑀬𑁂𑀯 𑀲𑀫𑀦𑁆𑀦𑀸𑀳𑀭𑀦𑁆𑀢𑀺, 𑀦𑁄 𑀢𑀣𑀸 𑀆𑀬𑀲𑁆𑀫𑀦𑁆𑀢𑀁 𑀲𑀸𑀕𑀢𑀁.

𑀅𑀣 𑀔𑁄 𑀪𑀕𑀯𑀸 𑀢𑁂𑀲𑀁 𑀅𑀲𑀻𑀢𑀺𑀬𑀸 𑀕𑀸𑀫𑀺𑀓𑀲𑀳𑀲𑁆𑀲𑀸𑀦𑀁 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀲𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀤𑀸𑀦𑀓𑀣𑀁 𑀲𑀻𑀮𑀓𑀣𑀁 𑀲𑀕𑁆𑀕𑀓𑀣𑀁, 𑀓𑀸𑀫𑀸𑀦𑀁 𑀆𑀤𑀻𑀦𑀯𑀁 𑀑𑀓𑀸𑀭𑀁 𑀲𑀁𑀓𑀺𑀮𑁂𑀲𑀁, 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑀁 𑀧𑀓𑀸𑀲𑁂𑀲𑀺. 𑀬𑀤𑀸 𑀢𑁂 𑀪𑀕𑀯𑀸 𑀅𑀜𑁆𑀜𑀸𑀲𑀺 𑀓𑀮𑁆𑀮𑀘𑀺𑀢𑁆𑀢𑁂, 𑀫𑀼𑀤𑀼𑀘𑀺𑀢𑁆𑀢𑁂, 𑀯𑀺𑀦𑀻𑀯𑀭𑀡𑀘𑀺𑀢𑁆𑀢𑁂, 𑀉𑀤𑀕𑁆𑀕𑀘𑀺𑀢𑁆𑀢𑁂, 𑀧𑀲𑀦𑁆𑀦𑀘𑀺𑀢𑁆𑀢𑁂, 𑀅𑀣 𑀬𑀸 𑀩𑀼𑀤𑁆𑀥𑀸𑀦𑀁 𑀲𑀸𑀫𑀼𑀓𑁆𑀓𑀁𑀲𑀺𑀓𑀸 𑀥𑀫𑁆𑀫𑀤𑁂𑀲𑀦𑀸, 𑀢𑀁 𑀧𑀓𑀸𑀲𑁂𑀲𑀺 𑁋 𑀤𑀼𑀓𑁆𑀔𑀁, 𑀲𑀫𑀼𑀤𑀬𑀁, 𑀦𑀺𑀭𑁄𑀥𑀁, 𑀫𑀕𑁆𑀕𑀁. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀲𑀼𑀤𑁆𑀥𑀁 𑀯𑀢𑁆𑀣𑀁 𑀅𑀧𑀕𑀢𑀓𑀸𑀴𑀓𑀁 𑀲𑀫𑁆𑀫𑀤𑁂𑀯 𑀭𑀚𑀦𑀁 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬, 𑀏𑀯𑀫𑁂𑀯𑀁 𑀢𑁂𑀲𑀁 𑀅𑀲𑀻𑀢𑀺𑀬𑀸 𑀕𑀸𑀫𑀺𑀓𑀲𑀳𑀲𑁆𑀲𑀸𑀦𑀁 𑀢𑀲𑁆𑀫𑀺𑀁𑀬𑁂𑀯 𑀆𑀲𑀦𑁂 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 𑁋 ‘‘𑀬𑀁𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺. 𑀢𑁂 𑀤𑀺𑀝𑁆𑀞𑀥𑀫𑁆𑀫𑀸 𑀧𑀢𑁆𑀢𑀥𑀫𑁆𑀫𑀸 𑀯𑀺𑀤𑀺𑀢𑀥𑀫𑁆𑀫𑀸 𑀧𑀭𑀺𑀬𑁄𑀕𑀸𑀴𑁆𑀳𑀥𑀫𑁆𑀫𑀸 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑀸 𑀯𑀺𑀕𑀢𑀓𑀣𑀁𑀓𑀣𑀸 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑀸 𑀅𑀧𑀭𑀧𑁆𑀧𑀘𑁆𑀘𑀬𑀸 𑀲𑀢𑁆𑀣𑀼𑀲𑀸𑀲𑀦𑁂 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂. 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀯𑀺𑀯𑀭𑁂𑀬𑁆𑀬, 𑀫𑀽𑀴𑁆𑀳𑀲𑁆𑀲 𑀯𑀸 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀅𑀦𑁆𑀥𑀓𑀸𑀭𑁂 𑀯𑀸 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬 𑁋 ‘‘𑀘𑀓𑁆𑀔𑀼𑀫𑀦𑁆𑀢𑁄 𑀭𑀽𑀧𑀸𑀦𑀺 𑀤𑀓𑁆𑀔𑀦𑁆𑀢𑀻’’𑀢𑀺, 𑀏𑀯𑀫𑁂𑀯𑀁 𑀪𑀕𑀯𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄. 𑀏𑀢𑁂 𑀫𑀬𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀲𑀭𑀡𑀁 𑀕𑀘𑁆𑀙𑀸𑀫. 𑀥𑀫𑁆𑀫𑀜𑁆𑀘, 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀉𑀧𑀸𑀲𑀓𑁂 𑀦𑁄 𑀪𑀕𑀯𑀸 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑁂 𑀲𑀭𑀡𑀁 𑀕𑀢𑁂’’𑀢𑀺.

𑀲𑁄𑀡𑀲𑁆𑀲 𑀧𑀩𑁆𑀩𑀚𑁆𑀚𑀸

𑁨𑁪𑁩. 𑀅𑀣 𑀔𑁄 𑀲𑁄𑀡𑀲𑁆𑀲 𑀓𑁄𑀴𑀺𑀯𑀺𑀲𑀲𑁆𑀲 𑀏𑀢𑀤𑀳𑁄𑀲𑀺 ‘‘𑀬𑀣𑀸 𑀬𑀣𑀸 𑀔𑁄 𑀅𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺, 𑀦𑀬𑀺𑀤𑀁 𑀲𑀼𑀓𑀭𑀁 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑀁 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑀁 𑀲𑀗𑁆𑀔𑀮𑀺𑀔𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀁; 𑀬𑀁𑀦𑀽𑀦𑀸𑀳𑀁 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀢𑀸𑀦𑀺 𑀅𑀲𑀻𑀢𑀺 𑀕𑀸𑀫𑀺𑀓𑀲𑀳𑀲𑁆𑀲𑀸𑀦𑀺 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀫𑀺𑀲𑀼𑀁. 𑀅𑀣 𑀔𑁄 𑀲𑁄𑀡𑁄 𑀓𑁄𑀴𑀺𑀯𑀺𑀲𑁄 𑀅𑀘𑀺𑀭𑀧𑀓𑁆𑀓𑀦𑁆𑀢𑁂𑀲𑀼 𑀢𑁂𑀲𑀼 𑀅𑀲𑀻𑀢𑀺𑀬𑀸 𑀕𑀸𑀫𑀺𑀓𑀲𑀳𑀲𑁆𑀲𑁂𑀲𑀼 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄𑀡𑁄 𑀓𑁄𑀴𑀺𑀯𑀺𑀲𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀬𑀣𑀸 𑀬𑀣𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺, 𑀦𑀬𑀺𑀤𑀁 𑀲𑀼𑀓𑀭𑀁 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑀁 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑀁 𑀲𑀗𑁆𑀔𑀮𑀺𑀔𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀁. 𑀇𑀘𑁆𑀙𑀸𑀫𑀳𑀁, 𑀪𑀦𑁆𑀢𑁂, 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀼𑀁. 𑀧𑀩𑁆𑀩𑀸𑀚𑁂𑀢𑀼 𑀫𑀁, 𑀪𑀦𑁆𑀢𑁂, 𑀪𑀕𑀯𑀸’’𑀢𑀺. 𑀅𑀮𑀢𑁆𑀣 𑀔𑁄 𑀲𑁄𑀡𑁄 𑀓𑁄𑀴𑀺𑀯𑀺𑀲𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀅𑀮𑀢𑁆𑀣 𑀉𑀧𑀲𑀫𑁆𑀧𑀤𑀁. 𑀅𑀘𑀺𑀭𑀼𑀧𑀲𑀫𑁆𑀧𑀦𑁆𑀦𑁄 𑀘 𑀧𑀦𑀸𑀬𑀲𑁆𑀫𑀸 𑀲𑁄𑀡𑁄 𑀲𑀻𑀢𑀯𑀦𑁂 𑀯𑀺𑀳𑀭𑀢𑀺. 𑀢𑀲𑁆𑀲 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀲𑁆𑀲 𑀘𑀗𑁆𑀓𑀫𑀢𑁄 𑀧𑀸𑀤𑀸 𑀪𑀺𑀚𑁆𑀚𑀺𑀁𑀲𑀼. 𑀘𑀗𑁆𑀓𑀫𑁄 𑀮𑁄𑀳𑀺𑀢𑁂𑀦 𑀨𑀼𑀝𑁄 𑀳𑁄𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀕𑀯𑀸𑀖𑀸𑀢𑀦𑀁. [𑀇𑀢𑁄 𑀧𑀭𑀁 𑀬𑀸𑀯 𑀇𑀫𑀲𑁆𑀲 𑀯𑀢𑁆𑀣𑀼𑀲𑁆𑀲 𑀅𑀯𑀲𑀸𑀦𑀁 𑀢𑀸𑀯 𑀧𑀸𑀞𑁄 𑀅. 𑀦𑀺. 𑁬.𑁫𑁫 𑀆𑀤𑀬𑁄] 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑁄𑀡𑀲𑁆𑀲 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀬𑁂 𑀔𑁄 𑀓𑁂𑀘𑀺 𑀪𑀕𑀯𑀢𑁄 𑀲𑀸𑀯𑀓𑀸 𑀆𑀭𑀤𑁆𑀥𑀯𑀻𑀭𑀺𑀬𑀸 𑀯𑀺𑀳𑀭𑀦𑁆𑀢𑀺, 𑀅𑀳𑀁 𑀢𑁂𑀲𑀁 𑀅𑀜𑁆𑀜𑀢𑀭𑁄. 𑀅𑀣 𑀘 𑀧𑀦 𑀫𑁂 𑀦𑀸𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺. 𑀲𑀁𑀯𑀺𑀚𑁆𑀚𑀦𑁆𑀢𑀺 𑀔𑁄 𑀧𑀦 𑀫𑁂 𑀓𑀼𑀮𑁂 𑀪𑁄𑀕𑀸; 𑀲𑀓𑁆𑀓𑀸 𑀪𑁄𑀕𑁂 𑀘 𑀪𑀼𑀜𑁆𑀚𑀺𑀢𑀼𑀁, 𑀧𑀼𑀜𑁆𑀜𑀸𑀦𑀺 𑀘 𑀓𑀸𑀢𑀼𑀁. 𑀬𑀁𑀦𑀽𑀦𑀸𑀳𑀁 𑀳𑀻𑀦𑀸𑀬𑀸𑀯𑀢𑁆𑀢𑀺𑀢𑁆𑀯𑀸 𑀪𑁄𑀕𑁂 𑀘 𑀪𑀼𑀜𑁆𑀚𑁂𑀬𑁆𑀬𑀁, 𑀧𑀼𑀜𑁆𑀜𑀸𑀦𑀺 𑀘 𑀓𑀭𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀢𑁄 𑀲𑁄𑀡𑀲𑁆𑀲 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬 𑀏𑀯𑀫𑁂𑀯 𑁋 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂 𑀅𑀦𑁆𑀢𑀭𑀳𑀺𑀢𑁄 𑀲𑀻𑀢𑀯𑀦𑁂 𑀧𑀸𑀢𑀼𑀭𑀳𑁄𑀲𑀺. 𑀅𑀣 𑀔𑁄 𑀪𑀕𑀯𑀸 𑀲𑀫𑁆𑀩𑀳𑀼𑀮𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀲𑁂𑀦𑀸𑀲𑀦𑀘𑀸𑀭𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑁄 𑀬𑁂𑀦𑀸𑀬𑀲𑁆𑀫𑀢𑁄 𑀲𑁄𑀡𑀲𑁆𑀲 𑀘𑀗𑁆𑀓𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀢𑁄 𑀲𑁄𑀡𑀲𑁆𑀲 𑀘𑀗𑁆𑀓𑀫𑀁 𑀮𑁄𑀳𑀺𑀢𑁂𑀦 𑀨𑀼𑀝𑀁, 𑀤𑀺𑀲𑁆𑀯𑀸𑀦 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑀲𑁆𑀲 𑀦𑁆𑀯𑀸𑀬𑀁, 𑀪𑀺𑀓𑁆𑀔𑀯𑁂, 𑀘𑀗𑁆𑀓𑀫𑁄 𑀮𑁄𑀳𑀺𑀢𑁂𑀦 𑀨𑀼𑀝𑁄, 𑀲𑁂𑀬𑁆𑀬𑀣𑀸𑀧𑀺 𑀕𑀯𑀸𑀖𑀸𑀢𑀦’’𑀦𑁆𑀢𑀺? ‘‘𑀆𑀬𑀲𑁆𑀫𑀢𑁄, 𑀪𑀦𑁆𑀢𑁂, 𑀲𑁄𑀡𑀲𑁆𑀲 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀲𑁆𑀲 𑀘𑀗𑁆𑀓𑀫𑀢𑁄 𑀧𑀸𑀤𑀸 𑀪𑀺𑀚𑁆𑀚𑀺𑀁𑀲𑀼. 𑀢𑀲𑁆𑀲𑀸𑀬𑀁 𑀘𑀗𑁆𑀓𑀫𑁄 𑀮𑁄𑀳𑀺𑀢𑁂𑀦 𑀨𑀼𑀝𑁄, 𑀲𑁂𑀬𑁆𑀬𑀣𑀸𑀧𑀺 𑀕𑀯𑀸𑀖𑀸𑀢𑀦’’𑀦𑁆𑀢𑀺.

𑀅𑀣 𑀔𑁄 𑀪𑀕𑀯𑀸 𑀬𑁂𑀦𑀸𑀬𑀲𑁆𑀫𑀢𑁄 𑀲𑁄𑀡𑀲𑁆𑀲 𑀯𑀺𑀳𑀸𑀭𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀆𑀬𑀲𑁆𑀫𑀸𑀧𑀺 𑀔𑁄 𑀲𑁄𑀡𑁄 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀲𑁄𑀡𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀦𑀦𑀼 𑀢𑁂, 𑀲𑁄𑀡, 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘𑀬𑁂 𑀔𑁄 𑀓𑁂𑀘𑀺 𑀪𑀕𑀯𑀢𑁄 𑀲𑀸𑀯𑀓𑀸 𑀆𑀭𑀤𑁆𑀥𑀯𑀻𑀭𑀺𑀬𑀸 𑀯𑀺𑀳𑀭𑀦𑁆𑀢𑀺, 𑀅𑀳𑀁 𑀢𑁂𑀲𑀁 𑀅𑀜𑁆𑀜𑀢𑀭𑁄. 𑀅𑀣 𑀘 𑀧𑀦 𑀫𑁂 𑀦𑀸𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺. 𑀲𑀁𑀯𑀺𑀚𑁆𑀚𑀦𑁆𑀢𑀺 𑀔𑁄 𑀧𑀦 𑀫𑁂 𑀓𑀼𑀮𑁂 𑀪𑁄𑀕𑀸; 𑀲𑀓𑁆𑀓𑀸 𑀪𑁄𑀕𑁂 𑀘 𑀪𑀼𑀜𑁆𑀚𑀺𑀢𑀼𑀁, 𑀧𑀼𑀜𑁆𑀜𑀸𑀦𑀺 𑀘 𑀓𑀸𑀢𑀼𑀁. 𑀬𑀁𑀦𑀽𑀦𑀸𑀳𑀁 𑀳𑀻𑀦𑀸𑀬𑀸𑀯𑀢𑁆𑀢𑀺𑀢𑁆𑀯𑀸 𑀪𑁄𑀕𑁂 𑀘 𑀪𑀼𑀜𑁆𑀚𑁂𑀬𑁆𑀬𑀁, 𑀧𑀼𑀜𑁆𑀜𑀸𑀦𑀺 𑀘 𑀓𑀭𑁂𑀬𑁆𑀬’’’𑀦𑁆𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’𑀢𑀺. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀲𑁄𑀡, 𑀓𑀼𑀲𑀮𑁄 𑀢𑁆𑀯𑀁 𑀧𑀼𑀩𑁆𑀩𑁂 𑀅𑀕𑀸𑀭𑀺𑀓𑀪𑀽𑀢𑁄 𑀯𑀻𑀡𑀸𑀬 𑀢𑀦𑁆𑀢𑀺𑀲𑁆𑀲𑀭𑁂’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’𑀢𑀺. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀲𑁄𑀡, 𑀬𑀤𑀸 𑀢𑁂 𑀯𑀻𑀡𑀸𑀬 𑀢𑀦𑁆𑀢𑀺𑀬𑁄 𑀅𑀘𑁆𑀘𑀸𑀬𑀢𑀸 𑀳𑁄𑀦𑁆𑀢𑀺, 𑀅𑀧𑀺 𑀦𑀼 𑀢𑁂 𑀯𑀻𑀡𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀭𑀯𑀢𑀻 𑀯𑀸 𑀳𑁄𑀢𑀺, 𑀓𑀫𑁆𑀫𑀜𑁆𑀜𑀸 𑀯𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’𑀢𑀺. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀲𑁄𑀡, 𑀬𑀤𑀸 𑀢𑁂 𑀯𑀻𑀡𑀸𑀬 𑀢𑀦𑁆𑀢𑀺𑀬𑁄 𑀅𑀢𑀺𑀲𑀺𑀣𑀺𑀮𑀸 𑀳𑁄𑀦𑁆𑀢𑀺, 𑀅𑀧𑀺 𑀦𑀼 𑀢𑁂 𑀯𑀻𑀡𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀭𑀯𑀢𑀻 𑀯𑀸 𑀳𑁄𑀢𑀺, 𑀓𑀫𑁆𑀫𑀜𑁆𑀜𑀸 𑀯𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’𑀢𑀺. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀲𑁄𑀡, 𑀬𑀤𑀸 𑀢𑁂 𑀯𑀻𑀡𑀸𑀬 𑀢𑀦𑁆𑀢𑀺𑀬𑁄 𑀦𑁂𑀯 𑀅𑀘𑁆𑀘𑀸𑀬𑀢𑀸 𑀳𑁄𑀦𑁆𑀢𑀺 𑀦𑀸𑀢𑀺𑀲𑀺𑀣𑀺𑀮𑀸, 𑀲𑀫𑁂 𑀕𑀼𑀡𑁂 𑀧𑀢𑀺𑀝𑁆𑀞𑀺𑀢𑀸, 𑀅𑀧𑀺 𑀦𑀼 𑀢𑁂 𑀯𑀻𑀡𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀭𑀯𑀢𑀻 𑀯𑀸 𑀳𑁄𑀢𑀺, 𑀓𑀫𑁆𑀫𑀜𑁆𑀜𑀸 𑀯𑀸’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀲𑁄𑀡, 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀁 𑀉𑀤𑁆𑀥𑀘𑁆𑀘𑀸𑀬 𑀲𑀁𑀯𑀢𑁆𑀢𑀢𑀺, 𑀅𑀢𑀺𑀮𑀻𑀦𑀯𑀻𑀭𑀺𑀬𑀁 𑀓𑁄𑀲𑀚𑁆𑀚𑀸𑀬 𑀲𑀁𑀯𑀢𑁆𑀢𑀢𑀺. 𑀢𑀲𑁆𑀫𑀸𑀢𑀺𑀳 𑀢𑁆𑀯𑀁, 𑀲𑁄𑀡, 𑀯𑀻𑀭𑀺𑀬𑀲𑀫𑀢𑀁 𑀅𑀥𑀺𑀝𑁆𑀞𑀳, 𑀇𑀦𑁆𑀤𑁆𑀭𑀺𑀬𑀸𑀦𑀜𑁆𑀘 𑀲𑀫𑀢𑀁 𑀧𑀝𑀺𑀯𑀺𑀚𑁆𑀛, 𑀢𑀢𑁆𑀣 𑀘 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀸𑀳𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀲𑁄𑀡𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑁄𑀡𑀁 𑀇𑀫𑀺𑀦𑀸 𑀑𑀯𑀸𑀤𑁂𑀦 𑀑𑀯𑀤𑀺𑀢𑁆𑀯𑀸 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑁆𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬 𑀏𑀯𑀫𑁂𑀯 𑁋 𑀲𑀻𑀢𑀯𑀦𑁂 𑀆𑀬𑀲𑁆𑀫𑀢𑁄 𑀲𑁄𑀡𑀲𑁆𑀲 𑀲𑀫𑁆𑀫𑀼𑀔𑁂 𑀅𑀦𑁆𑀢𑀭𑀳𑀺𑀢𑁄 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂 𑀧𑀸𑀢𑀼𑀭𑀳𑁄𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑁄𑀡𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀯𑀻𑀭𑀺𑀬𑀲𑀫𑀢𑀁 𑀅𑀥𑀺𑀝𑁆𑀞𑀸𑀲𑀺, 𑀇𑀦𑁆𑀤𑁆𑀭𑀺𑀬𑀸𑀦𑀜𑁆𑀘 𑀲𑀫𑀢𑀁 𑀧𑀝𑀺𑀯𑀺𑀚𑁆𑀛𑀺, 𑀢𑀢𑁆𑀣 𑀘 𑀦𑀺𑀫𑀺𑀢𑁆𑀢𑀁 𑀅𑀕𑁆𑀕𑀳𑁂𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑁄𑀡𑁄, 𑀏𑀓𑁄 𑀯𑀽𑀧𑀓𑀝𑁆𑀞𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄, 𑀦 𑀘𑀺𑀭𑀲𑁆𑀲𑁂𑀯 𑁋 𑀬𑀲𑁆𑀲𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀸 𑀲𑀫𑁆𑀫𑀤𑁂𑀯 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀦𑁆𑀢𑀺 𑁋 𑀢𑀤𑀦𑀼𑀢𑁆𑀢𑀭𑀁 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺. ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀅𑀪𑀺𑀜𑁆𑀜𑀸𑀲𑀺. 𑀅𑀜𑁆𑀜𑀢𑀭𑁄 𑀘 𑀧𑀦𑀸𑀬𑀲𑁆𑀫𑀸 𑀲𑁄𑀡𑁄 𑀅𑀭𑀳𑀢𑀁 𑀅𑀳𑁄𑀲𑀺.

𑁨𑁪𑁪. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑁄𑀡𑀲𑁆𑀲 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀬𑀁𑀦𑀽𑀦𑀸𑀳𑀁 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀅𑀜𑁆𑀜𑀁 𑀩𑁆𑀬𑀸𑀓𑀭𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑁄𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀲𑁄𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 𑀬𑁄 𑀲𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀅𑀭𑀳𑀁 𑀔𑀻𑀡𑀸𑀲𑀯𑁄 𑀯𑀼𑀲𑀺𑀢𑀯𑀸 𑀓𑀢𑀓𑀭𑀡𑀻𑀬𑁄 𑀑𑀳𑀺𑀢𑀪𑀸𑀭𑁄 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑁄 𑀧𑀭𑀺𑀓𑁆𑀔𑀻𑀡𑀪𑀯𑀲𑀜𑁆𑀜𑁄𑀚𑀦𑁄 𑀲𑀫𑁆𑀫𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑁄, 𑀲𑁄 𑀙𑀝𑁆𑀞𑀸𑀦𑀸𑀦𑀺 𑀅𑀥𑀺𑀫𑀼𑀢𑁆𑀢𑁄 𑀳𑁄𑀢𑀺 𑁋 𑀦𑁂𑀓𑁆𑀔𑀫𑁆𑀫𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀧𑀯𑀺𑀯𑁂𑀓𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀅𑀩𑁆𑀬𑀸𑀧𑀚𑁆𑀚𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀉𑀧𑀸𑀤𑀸𑀦𑀓𑁆𑀔𑀬𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀢𑀡𑁆𑀳𑀓𑁆𑀔𑀬𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀅𑀲𑀫𑁆𑀫𑁄𑀳𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺.

‘‘𑀲𑀺𑀬𑀸 𑀔𑁄 𑀧𑀦, 𑀪𑀦𑁆𑀢𑁂, 𑀇𑀥𑁂𑀓𑀘𑁆𑀘𑀲𑁆𑀲 𑀆𑀬𑀲𑁆𑀫𑀢𑁄 𑀏𑀯𑀫𑀲𑁆𑀲 𑁋 ‘𑀓𑁂𑀯𑀮𑀁 𑀲𑀤𑁆𑀥𑀸𑀫𑀢𑁆𑀢𑀓𑀁 𑀦𑀽𑀦 𑀅𑀬𑀫𑀸𑀬𑀲𑁆𑀫𑀸 𑀦𑀺𑀲𑁆𑀲𑀸𑀬 𑀦𑁂𑀓𑁆𑀔𑀫𑁆𑀫𑀸𑀥𑀺𑀫𑀼𑀢𑁆𑀢𑁄’𑀢𑀺, 𑀦 𑀔𑁄 𑀧𑀦𑁂𑀢𑀁, 𑀪𑀦𑁆𑀢𑁂, 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀔𑀻𑀡𑀸𑀲𑀯𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼, 𑀯𑀼𑀲𑀺𑀢𑀯𑀸, 𑀓𑀢𑀓𑀭𑀡𑀻𑀬𑁄, 𑀓𑀭𑀡𑀻𑀬𑀫𑀢𑁆𑀢𑀸𑀦𑀁 𑀅𑀲𑀫𑀦𑀼𑀧𑀲𑁆𑀲𑀦𑁆𑀢𑁄 𑀓𑀢𑀲𑁆𑀲 𑀯𑀸 𑀧𑀝𑀺𑀘𑀬𑀁 𑀔𑀬𑀸 𑀭𑀸𑀕𑀲𑁆𑀲 𑀯𑀻𑀢𑀭𑀸𑀕𑀢𑁆𑀢𑀸 𑀦𑁂𑀓𑁆𑀔𑀫𑁆𑀫𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀔𑀬𑀸 𑀤𑁄𑀲𑀲𑁆𑀲 𑀯𑀻𑀢𑀤𑁄𑀲𑀢𑁆𑀢𑀸 𑀦𑁂𑀓𑁆𑀔𑀫𑁆𑀫𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀔𑀬𑀸 𑀫𑁄𑀳𑀲𑁆𑀲 𑀯𑀻𑀢𑀫𑁄𑀳𑀢𑁆𑀢𑀸 𑀦𑁂𑀓𑁆𑀔𑀫𑁆𑀫𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺.

‘‘𑀲𑀺𑀬𑀸 𑀔𑁄 𑀧𑀦, 𑀪𑀦𑁆𑀢𑁂, 𑀇𑀥𑁂𑀓𑀘𑁆𑀘𑀲𑁆𑀲 𑀆𑀬𑀲𑁆𑀫𑀢𑁄 𑀏𑀯𑀫𑀲𑁆𑀲 𑁋 ‘𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀁 𑀦𑀽𑀦 𑀅𑀬𑀫𑀸𑀬𑀲𑁆𑀫𑀸 𑀦𑀺𑀓𑀸𑀫𑀬𑀫𑀸𑀦𑁄 𑀧𑀯𑀺𑀯𑁂𑀓𑀸𑀥𑀺𑀫𑀼𑀢𑁆𑀢𑁄’𑀢𑀺. 𑀦 𑀔𑁄 𑀧𑀦𑁂𑀢𑀁, 𑀪𑀦𑁆𑀢𑁂, 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀔𑀻𑀡𑀸𑀲𑀯𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼, 𑀯𑀼𑀲𑀺𑀢𑀯𑀸, 𑀓𑀢𑀓𑀭𑀡𑀻𑀬𑁄, 𑀓𑀭𑀡𑀻𑀬𑀫𑀢𑁆𑀢𑀸𑀦𑀁 [𑀓𑀭𑀡𑀻𑀬𑀁 𑀅𑀢𑁆𑀢𑀦𑁄 (𑀅𑀗𑁆𑀕𑀼𑀢𑁆𑀢𑀭𑀧𑀸𑀴𑀺𑀬𑀁)] 𑀅𑀲𑀫𑀦𑀼𑀧𑀲𑁆𑀲𑀦𑁆𑀢𑁄 𑀓𑀢𑀲𑁆𑀲 𑀯𑀸 𑀧𑀝𑀺𑀘𑀬𑀁, 𑀔𑀬𑀸 𑀭𑀸𑀕𑀲𑁆𑀲 𑀯𑀻𑀢𑀭𑀸𑀕𑀢𑁆𑀢𑀸 𑀧𑀯𑀺𑀯𑁂𑀓𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀔𑀬𑀸 𑀤𑁄𑀲𑀲𑁆𑀲 𑀯𑀻𑀢𑀤𑁄𑀲𑀢𑁆𑀢𑀸 𑀧𑀯𑀺𑀯𑁂𑀓𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀔𑀬𑀸 𑀫𑁄𑀳𑀲𑁆𑀲 𑀯𑀻𑀢𑀫𑁄𑀳𑀢𑁆𑀢𑀸 𑀧𑀯𑀺𑀯𑁂𑀓𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺.

‘‘𑀲𑀺𑀬𑀸 𑀔𑁄 𑀧𑀦, 𑀪𑀦𑁆𑀢𑁂, 𑀇𑀥𑁂𑀓𑀘𑁆𑀘𑀲𑁆𑀲 𑀆𑀬𑀲𑁆𑀫𑀢𑁄 𑀏𑀯𑀫𑀲𑁆𑀲 𑁋 ‘𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀁 𑀦𑀽𑀦 𑀅𑀬𑀫𑀸𑀬𑀲𑁆𑀫𑀸 𑀲𑀸𑀭𑀢𑁄 𑀧𑀘𑁆𑀘𑀸𑀕𑀘𑁆𑀙𑀦𑁆𑀢𑁄 𑀅𑀩𑁆𑀬𑀸𑀧𑀚𑁆𑀚𑀸𑀥𑀺𑀫𑀼𑀢𑁆𑀢𑁄’𑀢𑀺. 𑀦 𑀔𑁄 𑀧𑀦𑁂𑀢𑀁, 𑀪𑀦𑁆𑀢𑁂, 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀔𑀻𑀡𑀸𑀲𑀯𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼, 𑀯𑀼𑀲𑀺𑀢𑀯𑀸, 𑀓𑀢𑀓𑀭𑀡𑀻𑀬𑁄, 𑀓𑀭𑀡𑀻𑀬𑀫𑀢𑁆𑀢𑀸𑀦𑀁 𑀅𑀲𑀫𑀦𑀼𑀧𑀲𑁆𑀲𑀦𑁆𑀢𑁄 𑀓𑀢𑀲𑁆𑀲 𑀯𑀸 𑀧𑀝𑀺𑀘𑀬𑀁, 𑀔𑀬𑀸 𑀭𑀸𑀕𑀲𑁆𑀲 𑀯𑀻𑀢𑀭𑀸𑀕𑀢𑁆𑀢𑀸 𑀅𑀩𑁆𑀬𑀸𑀧𑀚𑁆𑀚𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀔𑀬𑀸 𑀤𑁄𑀲𑀲𑁆𑀲 𑀯𑀻𑀢𑀤𑁄𑀲𑀢𑁆𑀢𑀸 𑀅𑀩𑁆𑀬𑀸𑀧𑀚𑁆𑀚𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀔𑀬𑀸 𑀫𑁄𑀳𑀲𑁆𑀲 𑀯𑀻𑀢𑀫𑁄𑀳𑀢𑁆𑀢𑀸 𑀅𑀩𑁆𑀬𑀸𑀧𑀚𑁆𑀚𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺.

‘‘𑀔𑀬𑀸 𑀭𑀸𑀕𑀲𑁆𑀲 𑀯𑀻𑀢𑀭𑀸𑀕𑀢𑁆𑀢𑀸 𑀉𑀧𑀸𑀤𑀸𑀦𑀓𑁆𑀔𑀬𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀔𑀬𑀸 𑀤𑁄𑀲𑀲𑁆𑀲 𑀯𑀻𑀢𑀤𑁄𑀲𑀢𑁆𑀢𑀸 𑀉𑀧𑀸𑀤𑀸𑀦𑀓𑁆𑀔𑀬𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀔𑀬𑀸 𑀫𑁄𑀳𑀲𑁆𑀲 𑀯𑀻𑀢𑀫𑁄𑀳𑀢𑁆𑀢𑀸 𑀉𑀧𑀸𑀤𑀸𑀦𑀓𑁆𑀔𑀬𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺.

‘‘𑀔𑀬𑀸 𑀭𑀸𑀕𑀲𑁆𑀲 𑀯𑀻𑀢𑀭𑀸𑀕𑀢𑁆𑀢𑀸 𑀢𑀡𑁆𑀳𑀓𑁆𑀔𑀬𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀔𑀬𑀸 𑀤𑁄𑀲𑀲𑁆𑀲 𑀯𑀻𑀢𑀤𑁄𑀲𑀢𑁆𑀢𑀸 𑀢𑀡𑁆𑀳𑀓𑁆𑀔𑀬𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀔𑀬𑀸 𑀫𑁄𑀳𑀲𑁆𑀲 𑀯𑀻𑀢𑀫𑁄𑀳𑀢𑁆𑀢𑀸 𑀢𑀡𑁆𑀳𑀓𑁆𑀔𑀬𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺.

‘‘𑀔𑀬𑀸 𑀭𑀸𑀕𑀲𑁆𑀲 𑀯𑀻𑀢𑀭𑀸𑀕𑀢𑁆𑀢𑀸 𑀅𑀲𑀫𑁆𑀫𑁄𑀳𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀔𑀬𑀸 𑀤𑁄𑀲𑀲𑁆𑀲 𑀯𑀻𑀢𑀤𑁄𑀲𑀢𑁆𑀢𑀸 𑀅𑀲𑀫𑁆𑀫𑁄𑀳𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀔𑀬𑀸 𑀫𑁄𑀳𑀲𑁆𑀲 𑀯𑀻𑀢𑀫𑁄𑀳𑀢𑁆𑀢𑀸 𑀅𑀲𑀫𑁆𑀫𑁄𑀳𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺.

‘‘𑀏𑀯𑀁 𑀲𑀫𑁆𑀫𑀸 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀲𑁆𑀲, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀦𑁄 𑀪𑀼𑀲𑀸 𑀘𑁂𑀧𑀺 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸 𑀘𑀓𑁆𑀔𑀼𑀲𑁆𑀲 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺, 𑀦𑁂𑀯𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀦𑁆𑀢𑀺. 𑀅𑀫𑀺𑀲𑁆𑀲𑀻𑀓𑀢𑀫𑁂𑀯𑀲𑁆𑀲 𑀘𑀺𑀢𑁆𑀢𑀁 𑀳𑁄𑀢𑀺, 𑀞𑀺𑀢𑀁, 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀁, 𑀯𑀬𑀜𑁆𑀘𑀲𑁆𑀲𑀸𑀦𑀼𑀧𑀲𑁆𑀲𑀢𑀺. 𑀪𑀼𑀲𑀸 𑀘𑁂𑀧𑀺 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸 𑀲𑀤𑁆𑀤𑀸…𑀧𑁂… 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀸 𑀕𑀦𑁆𑀥𑀸… 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸 𑀭𑀲𑀸… 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸 𑀨𑁄𑀝𑁆𑀞𑀩𑁆𑀩𑀸… 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀸 𑀥𑀫𑁆𑀫𑀸 𑀫𑀦𑀲𑁆𑀲 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺, 𑀦𑁂𑀯𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀦𑁆𑀢𑀺; 𑀅𑀫𑀺𑀲𑁆𑀲𑀻𑀓𑀢𑀫𑁂𑀯𑀲𑁆𑀲 𑀘𑀺𑀢𑁆𑀢𑀁 𑀳𑁄𑀢𑀺, 𑀞𑀺𑀢𑀁, 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀁, 𑀯𑀬𑀜𑁆𑀘𑀲𑁆𑀲𑀸𑀦𑀼𑀧𑀲𑁆𑀲𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀲𑁂𑀮𑁄 𑀧𑀩𑁆𑀩𑀢𑁄 𑀅𑀘𑁆𑀙𑀺𑀤𑁆𑀤𑁄 𑀅𑀲𑀼𑀲𑀺𑀭𑁄 𑀏𑀓𑀕𑁆𑀖𑀦𑁄, 𑀧𑀼𑀭𑀢𑁆𑀣𑀺𑀫𑀸𑀬 𑀘𑁂𑀧𑀺 𑀤𑀺𑀲𑀸𑀬 𑀆𑀕𑀘𑁆𑀙𑁂𑀬𑁆𑀬 𑀪𑀼𑀲𑀸 𑀯𑀸𑀢𑀯𑀼𑀝𑁆𑀞𑀺, 𑀦𑁂𑀯 𑀦𑀁 𑀲𑀗𑁆𑀓𑀫𑁆𑀧𑁂𑀬𑁆𑀬 𑀦 𑀲𑀫𑁆𑀧𑀓𑀫𑁆𑀧𑁂𑀬𑁆𑀬 𑀦 𑀲𑀫𑁆𑀧𑀯𑁂𑀥𑁂𑀬𑁆𑀬; 𑀧𑀘𑁆𑀙𑀺𑀫𑀸𑀬 𑀘𑁂𑀧𑀺 𑀤𑀺𑀲𑀸𑀬 𑀆𑀕𑀘𑁆𑀙𑁂𑀬𑁆𑀬 𑀪𑀼𑀲𑀸 𑀯𑀸𑀢𑀯𑀼𑀝𑁆𑀞𑀺…𑀧𑁂… 𑀉𑀢𑁆𑀢𑀭𑀸𑀬 𑀘𑁂𑀧𑀺 𑀤𑀺𑀲𑀸𑀬…𑀧𑁂… 𑀤𑀓𑁆𑀔𑀺𑀡𑀸𑀬 𑀘𑁂𑀧𑀺 𑀤𑀺𑀲𑀸𑀬 𑀆𑀕𑀘𑁆𑀙𑁂𑀬𑁆𑀬 𑀪𑀼𑀲𑀸 𑀯𑀸𑀢𑀯𑀼𑀝𑁆𑀞𑀺, 𑀦𑁂𑀯 𑀦𑀁 𑀲𑀗𑁆𑀓𑀫𑁆𑀧𑁂𑀬𑁆𑀬 𑀦 𑀲𑀫𑁆𑀧𑀓𑀫𑁆𑀧𑁂𑀬𑁆𑀬 𑀦 𑀲𑀫𑁆𑀧𑀯𑁂𑀥𑁂𑀬𑁆𑀬, 𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂, 𑀏𑀯𑀁 𑀲𑀫𑁆𑀫𑀸 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀪𑀼𑀲𑀸 𑀘𑁂𑀧𑀺 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸 𑀘𑀓𑁆𑀔𑀼𑀲𑁆𑀲 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺, 𑀦𑁂𑀯𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀦𑁆𑀢𑀺; 𑀅𑀫𑀺𑀲𑁆𑀲𑀻𑀓𑀢𑀫𑁂𑀯𑀲𑁆𑀲 𑀘𑀺𑀢𑁆𑀢𑀁 𑀳𑁄𑀢𑀺, 𑀞𑀺𑀢𑀁, 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀁, 𑀯𑀬𑀜𑁆𑀘𑀲𑁆𑀲𑀸𑀦𑀼𑀧𑀲𑁆𑀲𑀢𑀺. 𑀪𑀼𑀲𑀸 𑀘𑁂𑀧𑀺 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸 𑀲𑀤𑁆𑀤𑀸…𑀧𑁂… 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀸 𑀕𑀦𑁆𑀥𑀸… 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸 𑀭𑀲𑀸… 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸 𑀨𑁄𑀝𑁆𑀞𑀩𑁆𑀩𑀸… 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀸 𑀥𑀫𑁆𑀫𑀸 𑀫𑀦𑀲𑁆𑀲 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺, 𑀦𑁂𑀯𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀦𑁆𑀢𑀺; 𑀅𑀫𑀺𑀲𑁆𑀲𑀻𑀓𑀢𑀫𑁂𑀯𑀲𑁆𑀲 𑀘𑀺𑀢𑁆𑀢𑀁 𑀳𑁄𑀢𑀺, 𑀞𑀺𑀢𑀁, 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀁, 𑀯𑀬𑀜𑁆𑀘𑀲𑁆𑀲𑀸𑀦𑀼𑀧𑀲𑁆𑀲𑀢𑀻’’𑀢𑀺.

𑀦𑁂𑀓𑁆𑀔𑀫𑁆𑀫𑀁 𑀅𑀥𑀺𑀫𑀼𑀢𑁆𑀢𑀲𑁆𑀲, 𑀧𑀯𑀺𑀯𑁂𑀓𑀜𑁆𑀘 𑀘𑁂𑀢𑀲𑁄;

𑀅𑀩𑁆𑀬𑀸𑀧𑀚𑁆𑀚𑀸𑀥𑀺𑀫𑀼𑀢𑁆𑀢𑀲𑁆𑀲, 𑀉𑀧𑀸𑀤𑀸𑀦𑀓𑁆𑀔𑀬𑀲𑁆𑀲 𑀘.

𑀢𑀡𑁆𑀳𑀓𑁆𑀔𑀬𑀸𑀥𑀺𑀫𑀼𑀢𑁆𑀢𑀲𑁆𑀲, 𑀅𑀲𑀫𑁆𑀫𑁄𑀳𑀜𑁆𑀘 𑀘𑁂𑀢𑀲𑁄;

𑀤𑀺𑀲𑁆𑀯𑀸 𑀆𑀬𑀢𑀦𑀼𑀧𑁆𑀧𑀸𑀤𑀁, 𑀲𑀫𑁆𑀫𑀸 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺.

𑀢𑀲𑁆𑀲 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀲𑁆𑀲, 𑀲𑀦𑁆𑀢𑀘𑀺𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀓𑀢𑀲𑁆𑀲 𑀧𑀝𑀺𑀘𑀬𑁄 𑀦𑀢𑁆𑀣𑀺, 𑀓𑀭𑀡𑀻𑀬𑀁 𑀦 𑀯𑀺𑀚𑁆𑀚𑀢𑀺.

𑀲𑁂𑀮𑁄 𑀬𑀣𑀸 𑀏𑀓𑀕𑁆𑀖𑀦𑁄, 𑀯𑀸𑀢𑁂𑀦 𑀦 𑀲𑀫𑀻𑀭𑀢𑀺;

𑀏𑀯𑀁 𑀭𑀽𑀧𑀸 𑀭𑀲𑀸 𑀲𑀤𑁆𑀤𑀸, 𑀕𑀦𑁆𑀥𑀸 𑀨𑀲𑁆𑀲𑀸 𑀘 𑀓𑁂𑀯𑀮𑀸.

𑀇𑀝𑁆𑀞𑀸 𑀥𑀫𑁆𑀫𑀸 𑀅𑀦𑀺𑀝𑁆𑀞𑀸 𑀘, 𑀦 𑀧𑀯𑁂𑀥𑁂𑀦𑁆𑀢𑀺 𑀢𑀸𑀤𑀺𑀦𑁄;

𑀞𑀺𑀢𑀁 𑀘𑀺𑀢𑁆𑀢𑀁 𑀯𑀺𑀧𑁆𑀧𑀫𑀼𑀢𑁆𑀢𑀁, 𑀯𑀬𑀜𑁆𑀘𑀲𑁆𑀲𑀸𑀦𑀼𑀧𑀲𑁆𑀲𑀢𑀻𑀢𑀺.

𑀲𑁄𑀡𑀓𑁄𑀴𑀺𑀯𑀺𑀲𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁧𑁪𑁮. 𑀤𑀺𑀕𑀼𑀡𑀸𑀤𑀺𑀉𑀧𑀸𑀳𑀦𑀧𑀝𑀺𑀓𑁆𑀔𑁂𑀧𑁄

𑁨𑁪𑁫. 𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀓𑀼𑀮𑀧𑀼𑀢𑁆𑀢𑀸 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑀺, 𑀅𑀢𑁆𑀣𑁄 𑀘 𑀯𑀼𑀢𑁆𑀢𑁄, 𑀅𑀢𑁆𑀢𑀸 𑀘 𑀅𑀦𑀼𑀧𑀦𑀻𑀢𑁄. 𑀅𑀣 𑀘, 𑀧𑀦𑀺𑀥𑁂𑀓𑀘𑁆𑀘𑁂 𑀫𑁄𑀖𑀧𑀼𑀭𑀺𑀲𑀸 𑀳𑀲𑀫𑀸𑀦𑀓𑀁, 𑀫𑀜𑁆𑀜𑁂, 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑀺, 𑀢𑁂 𑀧𑀘𑁆𑀙𑀸 𑀯𑀺𑀖𑀸𑀢𑀁 𑀆𑀧𑀚𑁆𑀚𑀦𑁆𑀢𑀻’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑁄𑀡𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑁆𑀯𑀁 𑀔𑁄𑀲𑀺, 𑀲𑁄𑀡, 𑀲𑀼𑀔𑀼𑀫𑀸𑀮𑁄. 𑀅𑀦𑀼𑀚𑀸𑀦𑀸𑀫𑀺 𑀢𑁂, 𑀲𑁄𑀡, 𑀏𑀓𑀧𑀮𑀸𑀲𑀺𑀓𑀁 𑀉𑀧𑀸𑀳𑀦’’𑀦𑁆𑀢𑀺. ‘‘𑀅𑀳𑀁 𑀔𑁄, 𑀪𑀦𑁆𑀢𑁂, 𑀅𑀲𑀻𑀢𑀺𑀲𑀓𑀝𑀯𑀸𑀳𑁂 𑀳𑀺𑀭𑀜𑁆𑀜𑀁 𑀑𑀳𑀸𑀬 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄, 𑀲𑀢𑁆𑀢𑀳𑀢𑁆𑀣𑀺𑀓𑀜𑁆𑀘 𑀅𑀦𑀻𑀓𑀁. 𑀅𑀣𑀸𑀳𑀁 𑀪𑀦𑁆𑀢𑁂 𑀏𑀓𑀧𑀮𑀸𑀲𑀺𑀓𑀁 𑀘𑁂 𑀉𑀧𑀸𑀳𑀦𑀁 𑀧𑀭𑀺𑀳𑀭𑀺𑀲𑁆𑀲𑀸𑀫𑀺, 𑀢𑀲𑁆𑀲 𑀫𑁂 𑀪𑀯𑀺𑀲𑁆𑀲𑀦𑁆𑀢𑀺 𑀯𑀢𑁆𑀢𑀸𑀭𑁄 ‘𑀲𑁄𑀡𑁄 𑀓𑁄𑀴𑀺𑀯𑀺𑀲𑁄 𑀅𑀲𑀻𑀢𑀺𑀲𑀓𑀝𑀯𑀸𑀳𑁂 𑀳𑀺𑀭𑀜𑁆𑀜𑀁 𑀑𑀳𑀸𑀬 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄, 𑀲𑀢𑁆𑀢𑀳𑀢𑁆𑀣𑀺𑀓𑀜𑁆𑀘 𑀅𑀦𑀻𑀓𑀁. 𑀲𑁄 𑀤𑀸𑀦𑀸𑀬𑀁 𑀏𑀓𑀧𑀮𑀸𑀲𑀺𑀓𑀸𑀲𑀼 𑀉𑀧𑀸𑀳𑀦𑀸𑀲𑀼 𑀲𑀢𑁆𑀢𑁄’𑀢𑀺. 𑀲𑀘𑁂 𑀪𑀕𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀦𑀼𑀚𑀸𑀦𑀺𑀲𑁆𑀲𑀢𑀺 𑀅𑀳𑀫𑁆𑀧𑀺 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀺; 𑀦𑁄 𑀘𑁂 𑀪𑀕𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀦𑀼𑀚𑀸𑀦𑀺𑀲𑁆𑀲𑀢𑀺, 𑀅𑀳𑀫𑁆𑀧𑀺 𑀦 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀏𑀓𑀧𑀮𑀸𑀲𑀺𑀓𑀁 𑀉𑀧𑀸𑀳𑀦𑀁. 𑀦, 𑀪𑀺𑀓𑁆𑀔𑀯𑁂, 𑀤𑀺𑀕𑀼𑀡𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸. 𑀦 𑀢𑀺𑀕𑀼𑀡𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸. 𑀦 𑀕𑀼𑀡𑀗𑁆𑀕𑀼𑀡𑀽𑀧𑀸𑀳𑀦𑀸 [𑀕𑀡𑀗𑁆𑀕𑀡𑀽𑀧𑀸𑀳𑀦𑀸 (𑀩𑀳𑀽𑀲𑀼)] 𑀥𑀸𑀭𑁂𑀢𑀩𑁆𑀩𑀸. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑀤𑀺𑀕𑀼𑀡𑀸𑀤𑀺𑀉𑀧𑀸𑀳𑀦𑀧𑀝𑀺𑀓𑁆𑀔𑁂𑀧𑁄 𑀦𑀺𑀝𑁆𑀞𑀺𑀢𑁄.

𑁧𑁪𑁯. 𑀲𑀩𑁆𑀩𑀦𑀻𑀮𑀺𑀓𑀸𑀤𑀺𑀧𑀝𑀺𑀓𑁆𑀔𑁂𑀧𑁄

𑁨𑁪𑁬. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀲𑀩𑁆𑀩𑀦𑀻𑀮𑀺𑀓𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺…𑀧𑁂… 𑀲𑀩𑁆𑀩𑀧𑀻𑀢𑀺𑀓𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺… 𑀲𑀩𑁆𑀩𑀮𑁄𑀳𑀺𑀢𑀺𑀓𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺… 𑀲𑀩𑁆𑀩𑀫𑀜𑁆𑀚𑀺𑀝𑁆𑀞𑀺𑀓𑀸 [𑀲𑀩𑁆𑀩𑀫𑀜𑁆𑀚𑁂𑀝𑁆𑀞𑀺𑀓𑀸 (𑀓.)] 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺 … 𑀲𑀩𑁆𑀩𑀓𑀡𑁆𑀳𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺… 𑀲𑀩𑁆𑀩𑀫𑀳𑀸𑀭𑀗𑁆𑀕𑀭𑀢𑁆𑀢𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺… 𑀲𑀩𑁆𑀩𑀫𑀳𑀸𑀦𑀸𑀫𑀭𑀢𑁆𑀢𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺, ‘‘𑀲𑁂𑀬𑁆𑀬𑀣𑀸𑀧𑀺 𑀕𑀺𑀳𑀻 𑀓𑀸𑀫𑀪𑁄𑀕𑀺𑀦𑁄’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀦𑀻𑀮𑀺𑀓𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸…𑀧𑁂… 𑀦 𑀲𑀩𑁆𑀩𑀧𑀻𑀢𑀺𑀓𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀲𑀩𑁆𑀩𑀮𑁄𑀳𑀺𑀢𑀺𑀓𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀲𑀩𑁆𑀩𑀫𑀜𑁆𑀚𑀺𑀝𑁆𑀞𑀺𑀓𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀲𑀩𑁆𑀩𑀓𑀡𑁆𑀳𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀲𑀩𑁆𑀩𑀫𑀳𑀸𑀭𑀗𑁆𑀕𑀭𑀢𑁆𑀢𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀲𑀩𑁆𑀩𑀫𑀳𑀸𑀦𑀸𑀫𑀭𑀢𑁆𑀢𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀦𑀻𑀮𑀓𑀯𑀤𑁆𑀥𑀺𑀓𑀸 [𑀯𑀝𑁆𑀝𑀺𑀓𑀸 (𑀲𑀻.)] 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺, 𑀧𑀻𑀢𑀓𑀯𑀤𑁆𑀥𑀺𑀓𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺, 𑀮𑁄𑀳𑀺𑀢𑀓𑀯𑀤𑁆𑀥𑀺𑀓𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺, 𑀫𑀜𑁆𑀚𑀺𑀝𑁆𑀞𑀺𑀓𑀯𑀤𑁆𑀥𑀺𑀓𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺, 𑀓𑀡𑁆𑀳𑀯𑀤𑁆𑀥𑀺𑀓𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺, 𑀫𑀳𑀸𑀭𑀗𑁆𑀕𑀭𑀢𑁆𑀢𑀯𑀤𑁆𑀥𑀺𑀓𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺, 𑀫𑀳𑀸𑀦𑀸𑀫𑀭𑀢𑁆𑀢𑀯𑀤𑁆𑀥𑀺𑀓𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺, ‘‘𑀲𑁂𑀬𑁆𑀬𑀣𑀸𑀧𑀺 𑀕𑀺𑀳𑀻 𑀓𑀸𑀫𑀪𑁄𑀕𑀺𑀦𑁄’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀦𑀻𑀮𑀓𑀯𑀤𑁆𑀥𑀺𑀓𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸…𑀧𑁂… 𑀦 𑀧𑀻𑀢𑀓𑀯𑀤𑁆𑀥𑀺𑀓𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀮𑁄𑀳𑀺𑀢𑀓𑀯𑀤𑁆𑀥𑀺𑀓𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀫𑀜𑁆𑀚𑀺𑀝𑁆𑀞𑀺𑀓𑀯𑀤𑁆𑀥𑀺𑀓𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀓𑀡𑁆𑀳𑀯𑀤𑁆𑀥𑀺𑀓𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀫𑀳𑀸𑀭𑀗𑁆𑀕𑀭𑀢𑁆𑀢𑀯𑀤𑁆𑀥𑀺𑀓𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀫𑀳𑀸𑀦𑀸𑀫𑀭𑀢𑁆𑀢𑀯𑀤𑁆𑀥𑀺𑀓𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀔𑀮𑁆𑀮𑀓𑀩𑀤𑁆𑀥𑀸 […𑀩𑀦𑁆𑀥𑀸 (𑀓.)] 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺…𑀧𑁂… 𑀧𑀼𑀝𑀩𑀤𑁆𑀥𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺, 𑀧𑀸𑀮𑀺𑀕𑀼𑀡𑁆𑀞𑀺𑀫𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺, 𑀢𑀽𑀮𑀧𑀼𑀡𑁆𑀡𑀺𑀓𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺, 𑀢𑀺𑀢𑁆𑀢𑀺𑀭𑀧𑀢𑁆𑀢𑀺𑀓𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺, 𑀫𑁂𑀡𑁆𑀟𑀯𑀺𑀲𑀸𑀡𑀯𑀤𑁆𑀥𑀺𑀓𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺, 𑀅𑀚𑀯𑀺𑀲𑀸𑀡𑀯𑀤𑁆𑀥𑀺𑀓𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺, 𑀯𑀺𑀘𑁆𑀙𑀺𑀓𑀸𑀴𑀺𑀓𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺, 𑀫𑁄𑀭𑀧𑀺𑀜𑁆𑀙 [𑀫𑁄𑀭𑀧𑀺𑀜𑁆𑀚 (𑀲𑀻. 𑀲𑁆𑀬𑀸.)] 𑀧𑀭𑀺𑀲𑀺𑀩𑁆𑀩𑀺𑀢𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺, 𑀘𑀺𑀢𑁆𑀭𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺, ‘‘𑀲𑁂𑀬𑁆𑀬𑀣𑀸𑀧𑀺 𑀕𑀺𑀳𑀻 𑀓𑀸𑀫𑀪𑁄𑀕𑀺𑀦𑁄’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀔𑀮𑁆𑀮𑀓𑀩𑀤𑁆𑀥𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸…𑀧𑁂… 𑀦 𑀧𑀼𑀝𑀩𑀤𑁆𑀥𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀧𑀸𑀮𑀺𑀕𑀼𑀡𑁆𑀞𑀺𑀫𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀢𑀽𑀮𑀧𑀼𑀡𑁆𑀡𑀺𑀓𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀢𑀺𑀢𑁆𑀢𑀺𑀭𑀧𑀢𑁆𑀢𑀺𑀓𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀫𑁂𑀡𑁆𑀟𑀯𑀺𑀲𑀸𑀡𑀯𑀤𑁆𑀥𑀺𑀓𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀅𑀚𑀯𑀺𑀲𑀸𑀡𑀯𑀤𑁆𑀥𑀺𑀓𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀯𑀺𑀘𑁆𑀙𑀺𑀓𑀸𑀴𑀺𑀓𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀫𑁄𑀭𑀧𑀺𑀜𑁆𑀙𑀧𑀭𑀺𑀲𑀺𑀩𑁆𑀩𑀺𑀢𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀘𑀺𑀢𑁆𑀭𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀲𑀻𑀳𑀘𑀫𑁆𑀫𑀧𑀭𑀺𑀓𑁆𑀔𑀝𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺…𑀧𑁂… 𑀩𑁆𑀬𑀕𑁆𑀖𑀘𑀫𑁆𑀫𑀧𑀭𑀺𑀓𑁆𑀔𑀝𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺, 𑀤𑀻𑀧𑀺𑀘𑀫𑁆𑀫𑀧𑀭𑀺𑀓𑁆𑀔𑀝𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺, 𑀅𑀚𑀺𑀦𑀘𑀫𑁆𑀫𑀧𑀭𑀺𑀓𑁆𑀔𑀝𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺, 𑀉𑀤𑁆𑀤𑀘𑀫𑁆𑀫𑀧𑀭𑀺𑀓𑁆𑀔𑀝𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺, 𑀫𑀚𑁆𑀚𑀸𑀭𑀘𑀫𑁆𑀫𑀧𑀭𑀺𑀓𑁆𑀔𑀝𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺, 𑀓𑀸𑀴𑀓𑀘𑀫𑁆𑀫𑀧𑀭𑀺𑀓𑁆𑀔𑀝𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺, 𑀮𑀼𑀯𑀓𑀘𑀫𑁆𑀫𑀧𑀭𑀺𑀓𑁆𑀔𑀝𑀸 [𑀉𑀮𑀽𑀓𑀘𑀫𑁆𑀫𑀧𑀭𑀺𑀓𑁆𑀔𑀝𑀸 (𑀬𑁄𑀚𑀦𑀸)] 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺, ‘‘𑀲𑁂𑀬𑁆𑀬𑀣𑀸𑀧𑀺 𑀕𑀺𑀳𑀻 𑀓𑀸𑀫𑀪𑁄𑀕𑀺𑀦𑁄’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀲𑀻𑀳𑀘𑀫𑁆𑀫𑀧𑀭𑀺𑀓𑁆𑀔𑀝𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸…𑀧𑁂… 𑀦 𑀩𑁆𑀬𑀕𑁆𑀖𑀘𑀫𑁆𑀫𑀧𑀭𑀺𑀓𑁆𑀔𑀝𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀤𑀻𑀧𑀺𑀘𑀫𑁆𑀫𑀧𑀭𑀺𑀓𑁆𑀔𑀝𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀅𑀚𑀺𑀦𑀘𑀫𑁆𑀫𑀧𑀭𑀺𑀓𑁆𑀔𑀝𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀉𑀤𑁆𑀤𑀘𑀫𑁆𑀫𑀧𑀭𑀺𑀓𑁆𑀔𑀝𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀫𑀚𑁆𑀚𑀸𑀭𑀘𑀫𑁆𑀫𑀧𑀭𑀺𑀓𑁆𑀔𑀝𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀓𑀸𑀴𑀓𑀘𑀫𑁆𑀫𑀧𑀭𑀺𑀓𑁆𑀔𑀝𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀮𑀼𑀯𑀓𑀘𑀫𑁆𑀫𑀧𑀭𑀺𑀓𑁆𑀔𑀝𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀲𑀩𑁆𑀩𑀦𑀻𑀮𑀺𑀓𑀸𑀤𑀺𑀧𑀝𑀺𑀓𑁆𑀔𑁂𑀧𑁄 𑀦𑀺𑀝𑁆𑀞𑀺𑀢𑁄.

𑁧𑁫𑁦. 𑀑𑀫𑀼𑀓𑁆𑀓𑀕𑀼𑀡𑀗𑁆𑀕𑀼𑀡𑀽𑀧𑀸𑀳𑀦𑀸𑀦𑀼𑀚𑀸𑀦𑀦𑀸

𑁨𑁪𑁭. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀭𑀸𑀚𑀕𑀳𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺, 𑀅𑀜𑁆𑀜𑀢𑀭𑁂𑀦 𑀪𑀺𑀓𑁆𑀔𑀼𑀦𑀸 𑀧𑀘𑁆𑀙𑀸𑀲𑀫𑀡𑁂𑀦. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀔𑀜𑁆𑀚𑀫𑀸𑀦𑁄 𑀪𑀕𑀯𑀦𑁆𑀢𑀁 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀺. 𑀅𑀤𑁆𑀤𑀲𑀸 𑀔𑁄 𑀅𑀜𑁆𑀜𑀢𑀭𑁄 𑀉𑀧𑀸𑀲𑀓𑁄 𑀕𑀼𑀡𑀗𑁆𑀕𑀼𑀡𑀽𑀧𑀸𑀳𑀦𑀸 𑀆𑀭𑁄𑀳𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁; 𑀤𑀺𑀲𑁆𑀯𑀸 𑀉𑀧𑀸𑀳𑀦𑀸 𑀆𑀭𑁄𑀳𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀬𑁂𑀦 𑀲𑁄 𑀪𑀺𑀓𑁆𑀔𑀼 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘‘𑀓𑀺𑀲𑁆𑀲, 𑀪𑀦𑁆𑀢𑁂, 𑀅𑀬𑁆𑀬𑁄 𑀔𑀜𑁆𑀚𑀢𑀻’’𑀢𑀺? ‘‘𑀧𑀸𑀤𑀸 𑀫𑁂, 𑀆𑀯𑀼𑀲𑁄, 𑀨𑀮𑀺𑀢𑀸’’𑀢𑀺 [𑀨𑀸𑀮𑀺𑀢𑀸𑀢𑀺 (𑀓.)]. ‘‘𑀳𑀦𑁆𑀤, 𑀪𑀦𑁆𑀢𑁂, 𑀉𑀧𑀸𑀳𑀦𑀸𑀬𑁄’’𑀢𑀺. ‘‘𑀅𑀮𑀁, 𑀆𑀯𑀼𑀲𑁄, 𑀧𑀝𑀺𑀓𑁆𑀔𑀺𑀢𑁆𑀢𑀸 𑀪𑀕𑀯𑀢𑀸 𑀕𑀼𑀡𑀗𑁆𑀕𑀼𑀡𑀽𑀧𑀸𑀳𑀦𑀸’’𑀢𑀺. ‘‘𑀕𑀡𑁆𑀳𑀸𑀳𑁂𑀢𑀸, 𑀪𑀺𑀓𑁆𑀔𑀼, 𑀉𑀧𑀸𑀳𑀦𑀸𑀬𑁄’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀑𑀫𑀼𑀓𑁆𑀓𑀁 𑀕𑀼𑀡𑀗𑁆𑀕𑀼𑀡𑀽𑀧𑀸𑀳𑀦𑀁. 𑀦, 𑀪𑀺𑀓𑁆𑀔𑀯𑁂, 𑀦𑀯𑀸 𑀕𑀼𑀡𑀗𑁆𑀕𑀼𑀡𑀽𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑀑𑀫𑀼𑀓𑁆𑀓𑀕𑀼𑀡𑀗𑁆𑀕𑀼𑀡𑀽𑀧𑀸𑀳𑀦𑀸𑀦𑀼𑀚𑀸𑀦𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁫𑁧. 𑀅𑀚𑁆𑀛𑀸𑀭𑀸𑀫𑁂 𑀉𑀧𑀸𑀳𑀦𑀧𑀝𑀺𑀓𑁆𑀔𑁂𑀧𑁄

𑁨𑁪𑁮. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀅𑀚𑁆𑀛𑁄𑀓𑀸𑀲𑁂 𑀅𑀦𑀼𑀧𑀸𑀳𑀦𑁄 𑀘𑀗𑁆𑀓𑀫𑀢𑀺. 𑀲𑀢𑁆𑀣𑀸 𑀅𑀦𑀼𑀧𑀸𑀳𑀦𑁄 𑀘𑀗𑁆𑀓𑀫𑀢𑀻𑀢𑀺, 𑀣𑁂𑀭𑀸𑀧𑀺 𑀪𑀺𑀓𑁆𑀔𑀽 𑀅𑀦𑀼𑀧𑀸𑀳𑀦𑀸 𑀘𑀗𑁆𑀓𑀫𑀦𑁆𑀢𑀺. 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽, 𑀲𑀢𑁆𑀣𑀭𑀺 𑀅𑀦𑀼𑀧𑀸𑀳𑀦𑁂 𑀘𑀗𑁆𑀓𑀫𑀫𑀸𑀦𑁂, 𑀣𑁂𑀭𑁂𑀲𑀼𑀧𑀺 𑀪𑀺𑀓𑁆𑀔𑀽𑀲𑀼 𑀅𑀦𑀼𑀧𑀸𑀳𑀦𑁂𑀲𑀼 𑀘𑀗𑁆𑀓𑀫𑀫𑀸𑀦𑁂𑀲𑀼, 𑀲𑀉𑀧𑀸𑀳𑀦𑀸 𑀘𑀗𑁆𑀓𑀫𑀦𑁆𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽, 𑀲𑀢𑁆𑀣𑀭𑀺 𑀅𑀦𑀼𑀧𑀸𑀳𑀦𑁂 𑀘𑀗𑁆𑀓𑀫𑀫𑀸𑀦𑁂, 𑀣𑁂𑀭𑁂𑀲𑀼𑀧𑀺 𑀪𑀺𑀓𑁆𑀔𑀽𑀲𑀼 𑀅𑀦𑀼𑀧𑀸𑀳𑀦𑁂𑀲𑀼 𑀘𑀗𑁆𑀓𑀫𑀫𑀸𑀦𑁂𑀲𑀼, 𑀲𑀉𑀧𑀸𑀳𑀦𑀸 𑀘𑀗𑁆𑀓𑀫𑀺𑀲𑁆𑀲𑀦𑁆𑀢𑀻’’𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽, 𑀲𑀢𑁆𑀣𑀭𑀺 𑀅𑀦𑀼𑀧𑀸𑀳𑀦𑁂 𑀘𑀗𑁆𑀓𑀫𑀫𑀸𑀦𑁂, 𑀣𑁂𑀭𑁂𑀲𑀼𑀧𑀺 𑀪𑀺𑀓𑁆𑀔𑀽𑀲𑀼 𑀅𑀦𑀼𑀧𑀸𑀳𑀦𑁂𑀲𑀼 𑀘𑀗𑁆𑀓𑀫𑀫𑀸𑀦𑁂𑀲𑀼, 𑀲𑀉𑀧𑀸𑀳𑀦𑀸 𑀘𑀗𑁆𑀓𑀫𑀦𑁆𑀢𑀻’’𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… ‘‘𑀓𑀣𑀜𑁆𑀳𑀺 𑀦𑀸𑀫 𑀢𑁂, 𑀪𑀺𑀓𑁆𑀔𑀯𑁂, 𑀫𑁄𑀖𑀧𑀼𑀭𑀺𑀲𑀸, 𑀲𑀢𑁆𑀣𑀭𑀺 𑀅𑀦𑀼𑀧𑀸𑀳𑀦𑁂 𑀘𑀗𑁆𑀓𑀫𑀫𑀸𑀦𑁂, 𑀣𑁂𑀭𑁂𑀲𑀼𑀧𑀺 𑀪𑀺𑀓𑁆𑀔𑀽𑀲𑀼 𑀅𑀦𑀼𑀧𑀸𑀳𑀦𑁂𑀲𑀼 𑀘𑀗𑁆𑀓𑀫𑀫𑀸𑀦𑁂𑀲𑀼, 𑀲𑀉𑀧𑀸𑀳𑀦𑀸 𑀘𑀗𑁆𑀓𑀫𑀺𑀲𑁆𑀲𑀦𑁆𑀢𑀺. 𑀇𑀫𑁂 𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀕𑀺𑀳𑀻 𑀑𑀤𑀸𑀢𑀯𑀢𑁆𑀣𑀯𑀲𑀦𑀓𑀸 𑀅𑀪𑀺𑀚𑀻𑀯𑀦𑀺𑀓𑀲𑁆𑀲 𑀲𑀺𑀧𑁆𑀧𑀲𑁆𑀲 𑀓𑀸𑀭𑀡𑀸 𑀆𑀘𑀭𑀺𑀬𑁂𑀲𑀼 𑀲𑀕𑀸𑀭𑀯𑀸 𑀲𑀧𑁆𑀧𑀢𑀺𑀲𑁆𑀲𑀸 𑀲𑀪𑀸𑀕𑀯𑀼𑀢𑁆𑀢𑀺𑀓𑀸 𑀯𑀺𑀳𑀭𑀺𑀲𑁆𑀲𑀦𑁆𑀢𑀺. 𑀇𑀥 𑀔𑁄 𑀢𑀁, 𑀪𑀺𑀓𑁆𑀔𑀯𑁂, 𑀲𑁄𑀪𑁂𑀣, 𑀬𑀁 𑀢𑀼𑀫𑁆𑀳𑁂 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀩𑁆𑀩𑀚𑀺𑀢𑀸 𑀲𑀫𑀸𑀦𑀸 𑀆𑀘𑀭𑀺𑀬𑁂𑀲𑀼 𑀆𑀘𑀭𑀺𑀬𑀫𑀢𑁆𑀢𑁂𑀲𑀼 𑀉𑀧𑀚𑁆𑀛𑀸𑀬𑁂𑀲𑀼 𑀉𑀧𑀚𑁆𑀛𑀸𑀬𑀫𑀢𑁆𑀢𑁂𑀲𑀼 𑀅𑀕𑀸𑀭𑀯𑀸 𑀅𑀧𑁆𑀧𑀢𑀺𑀲𑁆𑀲𑀸 𑀅𑀲𑀪𑀸𑀕𑀯𑀼𑀢𑁆𑀢𑀺𑀓𑀸 [𑀲𑀕𑀸𑀭𑀯𑀸 𑀲𑀕𑁆𑀕𑀢𑀺𑀲𑁆𑀲𑀸 𑀲𑀪𑀸𑀕𑀯𑀼𑀢𑁆𑀢𑀺𑀓𑀸 (𑀓.)] 𑀯𑀺𑀳𑀭𑁂𑀬𑁆𑀬𑀸𑀣. 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀆𑀘𑀭𑀺𑀬𑁂𑀲𑀼 𑀆𑀘𑀭𑀺𑀬𑀫𑀢𑁆𑀢𑁂𑀲𑀼 𑀉𑀧𑀚𑁆𑀛𑀸𑀬𑁂𑀲𑀼 𑀉𑀧𑀚𑁆𑀛𑀸𑀬𑀫𑀢𑁆𑀢𑁂𑀲𑀼 𑀅𑀦𑀼𑀧𑀸𑀳𑀦𑁂𑀲𑀼 𑀘𑀗𑁆𑀓𑀫𑀫𑀸𑀦𑁂𑀲𑀼 𑀲𑀉𑀧𑀸𑀳𑀦𑁂𑀦 𑀘𑀗𑁆𑀓𑀫𑀺𑀢𑀩𑁆𑀩𑀁. 𑀬𑁄 𑀘𑀗𑁆𑀓𑀫𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀦 𑀘, 𑀪𑀺𑀓𑁆𑀔𑀯𑁂, 𑀅𑀚𑁆𑀛𑀸𑀭𑀸𑀫𑁂 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑁨𑁪𑁯. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀸𑀤𑀔𑀺𑀮𑀸𑀩𑀸𑀥𑁄 𑀳𑁄𑀢𑀺. 𑀢𑀁 𑀪𑀺𑀓𑁆𑀔𑀽 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀉𑀘𑁆𑀘𑀸𑀭𑀫𑁆𑀧𑀺 𑀧𑀲𑁆𑀲𑀸𑀯𑀫𑁆𑀧𑀺 𑀦𑀺𑀓𑁆𑀔𑀸𑀫𑁂𑀦𑁆𑀢𑀺. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀲𑁂𑀦𑀸𑀲𑀦𑀘𑀸𑀭𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑁄 𑀢𑁂 𑀪𑀺𑀓𑁆𑀔𑀽 𑀢𑀁 𑀪𑀺𑀓𑁆𑀔𑀼𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀉𑀘𑁆𑀘𑀸𑀭𑀫𑁆𑀧𑀺 𑀧𑀲𑁆𑀲𑀸𑀯𑀫𑁆𑀧𑀺 𑀦𑀺𑀓𑁆𑀔𑀸𑀫𑁂𑀦𑁆𑀢𑁂, 𑀤𑀺𑀲𑁆𑀯𑀸𑀦 𑀬𑁂𑀦 𑀢𑁂 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀓𑀺𑀁 𑀇𑀫𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀆𑀩𑀸𑀥𑁄’’𑀢𑀺? ‘‘𑀇𑀫𑀲𑁆𑀲, 𑀪𑀦𑁆𑀢𑁂, 𑀆𑀬𑀲𑁆𑀫𑀢𑁄 𑀧𑀸𑀤𑀔𑀺𑀮𑀸𑀩𑀸𑀥𑁄; 𑀇𑀫𑀁 𑀫𑀬𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀉𑀘𑁆𑀘𑀸𑀭𑀫𑁆𑀧𑀺 𑀧𑀲𑁆𑀲𑀸𑀯𑀫𑁆𑀧𑀺 𑀦𑀺𑀓𑁆𑀔𑀸𑀫𑁂𑀫𑀸’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑀲𑁆𑀲 𑀧𑀸𑀤𑀸 𑀯𑀸 𑀤𑀼𑀓𑁆𑀔𑀸, 𑀧𑀸𑀤𑀸 𑀯𑀸 𑀨𑀮𑀺𑀢𑀸, 𑀧𑀸𑀤𑀔𑀺𑀮𑁄 𑀯𑀸 𑀆𑀩𑀸𑀥𑁄 [𑀧𑀸𑀤𑀔𑀺𑀮𑀸𑀩𑀸𑀥𑁄 𑀯𑀸 (𑀲𑁆𑀬𑀸.)] 𑀉𑀧𑀸𑀳𑀦𑀁 𑀥𑀸𑀭𑁂𑀢𑀼’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀅𑀥𑁄𑀢𑁂𑀳𑀺 𑀧𑀸𑀤𑁂𑀳𑀺 𑀫𑀜𑁆𑀘𑀫𑁆𑀧𑀺 𑀧𑀻𑀞𑀫𑁆𑀧𑀺 𑀅𑀪𑀺𑀭𑀼𑀳𑀦𑁆𑀢𑀺; 𑀘𑀻𑀯𑀭𑀫𑁆𑀧𑀺 𑀲𑁂𑀦𑀸𑀲𑀦𑀫𑁆𑀧𑀺 𑀤𑀼𑀲𑁆𑀲𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, ‘𑀇𑀤𑀸𑀦𑀺 𑀫𑀜𑁆𑀘𑀁 𑀯𑀸 𑀧𑀻𑀞𑀁 𑀯𑀸 𑀅𑀪𑀺𑀭𑀼𑀳𑀺𑀲𑁆𑀲𑀸𑀫𑀻’’𑀢𑀺 𑀉𑀧𑀸𑀳𑀦𑀁 𑀥𑀸𑀭𑁂𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀭𑀢𑁆𑀢𑀺𑀬𑀸 𑀉𑀧𑁄𑀲𑀣𑀕𑁆𑀕𑀫𑁆𑀧𑀺 𑀲𑀦𑁆𑀦𑀺𑀲𑀚𑁆𑀚𑀫𑁆𑀧𑀺 𑀕𑀘𑁆𑀙𑀦𑁆𑀢𑀸 𑀅𑀦𑁆𑀥𑀓𑀸𑀭𑁂 𑀔𑀸𑀡𑀼𑀫𑁆𑀧𑀺 𑀓𑀡𑁆𑀝𑀓𑀫𑁆𑀧𑀺 𑀅𑀓𑁆𑀓𑀫𑀦𑁆𑀢𑀺; 𑀧𑀸𑀤𑀸 𑀤𑀼𑀓𑁆𑀔𑀸 𑀳𑁄𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀚𑁆𑀛𑀸𑀭𑀸𑀫𑁂 𑀉𑀧𑀸𑀳𑀦𑀁 𑀥𑀸𑀭𑁂𑀢𑀼𑀁, 𑀉𑀓𑁆𑀓𑀁, 𑀧𑀤𑀻𑀧𑀁, 𑀓𑀢𑁆𑀢𑀭𑀤𑀡𑁆𑀟𑀦𑁆𑀢𑀺.

𑀅𑀚𑁆𑀛𑀸𑀭𑀸𑀫𑁂 𑀉𑀧𑀸𑀳𑀦𑀧𑀝𑀺𑀓𑁆𑀔𑁂𑀧𑁄 𑀦𑀺𑀝𑁆𑀞𑀺𑀢𑁄.

𑁧𑁫𑁨. 𑀓𑀝𑁆𑀞𑀧𑀸𑀤𑀼𑀓𑀸𑀤𑀺𑀧𑀝𑀺𑀓𑁆𑀔𑁂𑀧𑁄

𑁨𑁫𑁦. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀓𑀝𑁆𑀞𑀧𑀸𑀤𑀼𑀓𑀸𑀬𑁄 𑀅𑀪𑀺𑀭𑀼𑀳𑀺𑀢𑁆𑀯𑀸 𑀅𑀚𑁆𑀛𑁄𑀓𑀸𑀲𑁂 𑀘𑀗𑁆𑀓𑀫𑀦𑁆𑀢𑀺, 𑀉𑀘𑁆𑀘𑀸𑀲𑀤𑁆𑀤𑀸 𑀫𑀳𑀸𑀲𑀤𑁆𑀤𑀸 𑀔𑀝𑀔𑀝𑀲𑀤𑁆𑀤𑀸, 𑀅𑀦𑁂𑀓𑀯𑀺𑀳𑀺𑀢𑀁 𑀢𑀺𑀭𑀘𑁆𑀙𑀸𑀦𑀓𑀣𑀁 𑀓𑀣𑁂𑀦𑁆𑀢𑀸, 𑀲𑁂𑀬𑁆𑀬𑀣𑀺𑀤𑀁 [𑀇𑀫𑀸 𑀢𑀺𑀭𑀘𑁆𑀙𑀸𑀦𑀓𑀣𑀸𑀬𑁄 𑀧𑀸𑀘𑀺. 𑁫𑁦𑁮; 𑀤𑀻. 𑀦𑀺. 𑁧.𑁭; 𑀫. 𑀦𑀺. 𑁨.𑁨𑁨𑁩; 𑀲𑀁. 𑀦𑀺. 𑁫.𑁧𑁦𑁮𑁦; 𑀅. 𑀦𑀺. 𑁧𑁦.𑁬𑁯 𑀆𑀤𑀬𑁄] 𑁋 𑀭𑀸𑀚𑀓𑀣𑀁, 𑀘𑁄𑀭𑀓𑀣𑀁, 𑀫𑀳𑀸𑀫𑀢𑁆𑀢𑀓𑀣𑀁, 𑀲𑁂𑀦𑀸𑀓𑀣𑀁, 𑀪𑀬𑀓𑀣𑀁, 𑀬𑀼𑀤𑁆𑀥𑀓𑀣𑀁, 𑀅𑀦𑁆𑀦𑀓𑀣𑀁, 𑀧𑀸𑀦𑀓𑀣𑀁, 𑀯𑀢𑁆𑀣𑀓𑀣𑀁, 𑀲𑀬𑀦𑀓𑀣𑀁, 𑀫𑀸𑀮𑀸𑀓𑀣𑀁, 𑀕𑀦𑁆𑀥𑀓𑀣𑀁, 𑀜𑀸𑀢𑀺𑀓𑀣𑀁, 𑀬𑀸𑀦𑀓𑀣𑀁, 𑀕𑀸𑀫𑀓𑀣𑀁, 𑀦𑀺𑀕𑀫𑀓𑀣𑀁, 𑀦𑀕𑀭𑀓𑀣𑀁, 𑀚𑀦𑀧𑀤𑀓𑀣𑀁, 𑀇𑀢𑁆𑀣𑀺𑀓𑀣𑀁 [𑀇𑀢𑁆𑀣𑀺𑀓𑀣𑀁 𑀧𑀼𑀭𑀺𑀲𑀓𑀣𑀁 (𑀓.)], 𑀲𑀽𑀭𑀓𑀣𑀁, 𑀯𑀺𑀲𑀺𑀔𑀸𑀓𑀣𑀁, 𑀓𑀼𑀫𑁆𑀪𑀝𑁆𑀞𑀸𑀦𑀓𑀣𑀁, 𑀧𑀼𑀩𑁆𑀩𑀧𑁂𑀢𑀓𑀣𑀁, 𑀦𑀸𑀦𑀢𑁆𑀢𑀓𑀣𑀁, 𑀮𑁄𑀓𑀓𑁆𑀔𑀸𑀬𑀺𑀓𑀁, 𑀲𑀫𑀼𑀤𑁆𑀤𑀓𑁆𑀔𑀸𑀬𑀺𑀓𑀁, 𑀇𑀢𑀺𑀪𑀯𑀸𑀪𑀯𑀓𑀣𑀁 𑀇𑀢𑀺 𑀯𑀸; 𑀓𑀻𑀝𑀓𑀫𑁆𑀧𑀺 𑀅𑀓𑁆𑀓𑀫𑀺𑀢𑁆𑀯𑀸 𑀫𑀸𑀭𑁂𑀦𑁆𑀢𑀺, 𑀪𑀺𑀓𑁆𑀔𑀽𑀧𑀺 𑀲𑀫𑀸𑀥𑀺𑀫𑁆𑀳𑀸 𑀘𑀸𑀯𑁂𑀦𑁆𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀓𑀝𑁆𑀞𑀧𑀸𑀤𑀼𑀓𑀸𑀬𑁄 𑀅𑀪𑀺𑀭𑀼𑀳𑀺𑀢𑁆𑀯𑀸 𑀅𑀚𑁆𑀛𑁄𑀓𑀸𑀲𑁂 𑀘𑀗𑁆𑀓𑀫𑀺𑀲𑁆𑀲𑀦𑁆𑀢𑀺, 𑀉𑀘𑁆𑀘𑀸𑀲𑀤𑁆𑀤𑀸 𑀫𑀳𑀸𑀲𑀤𑁆𑀤𑀸 𑀔𑀝𑀔𑀝𑀲𑀤𑁆𑀤𑀸 𑀅𑀦𑁂𑀓𑀯𑀺𑀳𑀺𑀢𑀁 𑀢𑀺𑀭𑀘𑁆𑀙𑀸𑀦𑀓𑀣𑀁 𑀓𑀣𑁂𑀦𑁆𑀢𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀸𑀚𑀓𑀣𑀁, 𑀘𑁄𑀭𑀓𑀣𑀁…𑀧𑁂… 𑀇𑀢𑀺𑀪𑀯𑀸𑀪𑀯𑀓𑀣𑀁 𑀇𑀢𑀺 𑀯𑀸, 𑀓𑀻𑀝𑀓𑀫𑁆𑀧𑀺 𑀅𑀓𑁆𑀓𑀫𑀺𑀢𑁆𑀯𑀸 𑀫𑀸𑀭𑁂𑀲𑁆𑀲𑀦𑁆𑀢𑀺, 𑀪𑀺𑀓𑁆𑀔𑀽𑀧𑀺 𑀲𑀫𑀸𑀥𑀺𑀫𑁆𑀳𑀸 𑀘𑀸𑀯𑁂𑀲𑁆𑀲𑀦𑁆𑀢𑀻’’𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀓𑀝𑁆𑀞𑀧𑀸𑀤𑀼𑀓𑀸𑀬𑁄 𑀅𑀪𑀺𑀭𑀼𑀳𑀺𑀢𑁆𑀯𑀸 𑀅𑀚𑁆𑀛𑁄𑀓𑀸𑀲𑁂 𑀘𑀗𑁆𑀓𑀫𑀦𑁆𑀢𑀺, 𑀉𑀘𑁆𑀘𑀸𑀲𑀤𑁆𑀤𑀸 𑀫𑀳𑀸𑀲𑀤𑁆𑀤𑀸 𑀔𑀝𑀔𑀝𑀲𑀤𑁆𑀤𑀸, 𑀅𑀦𑁂𑀓𑀯𑀺𑀳𑀺𑀢𑀁 𑀢𑀺𑀭𑀘𑁆𑀙𑀸𑀦𑀓𑀣𑀁 𑀓𑀣𑁂𑀦𑁆𑀢𑀸, 𑀲𑁂𑀬𑁆𑀬𑀣𑀺𑀤𑀁, 𑁋 𑀭𑀸𑀚𑀓𑀣𑀁, 𑀘𑁄𑀭𑀓𑀣𑀁…𑀧𑁂… 𑀇𑀢𑀺𑀪𑀯𑀸𑀪𑀯𑀓𑀣𑀁 𑀇𑀢𑀺 𑀯𑀸, 𑀓𑀻𑀝𑀓𑀫𑁆𑀧𑀺 𑀅𑀓𑁆𑀓𑀫𑀺𑀢𑁆𑀯𑀸 𑀫𑀸𑀭𑁂𑀦𑁆𑀢𑀺, 𑀪𑀺𑀓𑁆𑀔𑀽𑀧𑀺 𑀲𑀫𑀸𑀥𑀺𑀫𑁆𑀳𑀸 𑀘𑀸𑀯𑁂𑀦𑁆𑀢𑀻’’𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀓𑀝𑁆𑀞𑀧𑀸𑀤𑀼𑀓𑀸 𑀥𑀸𑀭𑁂𑀢𑀩𑁆𑀩𑀸. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀭𑀸𑀚𑀕𑀳𑁂 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀩𑀸𑀭𑀸𑀡𑀲𑀻 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀩𑀸𑀭𑀸𑀡𑀲𑀻 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀩𑀸𑀭𑀸𑀡𑀲𑀺𑀬𑀁 𑀯𑀺𑀳𑀭𑀢𑀺 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑁋 𑀪𑀕𑀯𑀢𑀸 𑀓𑀝𑁆𑀞𑀧𑀸𑀤𑀼𑀓𑀸 𑀧𑀝𑀺𑀓𑁆𑀔𑀺𑀢𑁆𑀢𑀸𑀢𑀺 𑁋 𑀢𑀸𑀮𑀢𑀭𑀼𑀡𑁂 𑀙𑁂𑀤𑀸𑀧𑁂𑀢𑁆𑀯𑀸 𑀢𑀸𑀮𑀧𑀢𑁆𑀢𑀧𑀸𑀤𑀼𑀓𑀸𑀬𑁄 𑀥𑀸𑀭𑁂𑀦𑁆𑀢𑀺; 𑀢𑀸𑀦𑀺 𑀢𑀸𑀮𑀢𑀭𑀼𑀡𑀸𑀦𑀺 𑀙𑀺𑀦𑁆𑀦𑀸𑀦𑀺 𑀫𑀺𑀮𑀸𑀬𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀢𑀸𑀮𑀢𑀭𑀼𑀡𑁂 𑀙𑁂𑀤𑀸𑀧𑁂𑀢𑁆𑀯𑀸 𑀢𑀸𑀮𑀧𑀢𑁆𑀢𑀧𑀸𑀤𑀼𑀓𑀸𑀬𑁄 𑀥𑀸𑀭𑁂𑀲𑁆𑀲𑀦𑁆𑀢𑀺; 𑀢𑀸𑀦𑀺 𑀢𑀸𑀮𑀢𑀭𑀼𑀡𑀸𑀦𑀺 𑀙𑀺𑀦𑁆𑀦𑀸𑀦𑀺 𑀫𑀺𑀮𑀸𑀬𑀦𑁆𑀢𑀺; 𑀏𑀓𑀺𑀦𑁆𑀤𑁆𑀭𑀺𑀬𑀁 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀚𑀻𑀯𑀁 𑀯𑀺𑀳𑁂𑀞𑁂𑀦𑁆𑀢𑀻’’𑀢𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀔𑀺𑀬𑁆𑀬𑀦𑁆𑀢𑀸𑀦𑀁 𑀯𑀺𑀧𑀸𑀘𑁂𑀦𑁆𑀢𑀸𑀦𑀁. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀢𑀸𑀮𑀢𑀭𑀼𑀡𑁂 𑀙𑁂𑀤𑀸𑀧𑁂𑀢𑁆𑀯𑀸 𑀢𑀸𑀮𑀧𑀢𑁆𑀢𑀧𑀸𑀤𑀼𑀓𑀸𑀬𑁄 𑀥𑀸𑀭𑁂𑀦𑁆𑀢𑀺; 𑀢𑀸𑀦𑀺 𑀢𑀸𑀮𑀢𑀭𑀼𑀡𑀸𑀦𑀺 𑀙𑀺𑀦𑁆𑀦𑀸𑀦𑀺 𑀫𑀺𑀮𑀸𑀬𑀦𑁆𑀢𑀻’’𑀢𑀺? 𑀲𑀘𑁆𑀘𑀁 𑀪𑀕𑀯𑀸𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑁂, 𑀪𑀺𑀓𑁆𑀔𑀯𑁂, 𑀫𑁄𑀖𑀧𑀼𑀭𑀺𑀲𑀸 𑀢𑀸𑀮𑀢𑀭𑀼𑀡𑁂 𑀙𑁂𑀤𑀸𑀧𑁂𑀢𑁆𑀯𑀸 𑀢𑀸𑀮𑀧𑀢𑁆𑀢𑀧𑀸𑀤𑀼𑀓𑀸𑀬𑁄 𑀥𑀸𑀭𑁂𑀲𑁆𑀲𑀦𑁆𑀢𑀺; 𑀢𑀸𑀦𑀺 𑀢𑀸𑀮𑀢𑀭𑀼𑀡𑀸𑀦𑀺 𑀙𑀺𑀦𑁆𑀦𑀸𑀦𑀺 𑀫𑀺𑀮𑀸𑀬𑀦𑁆𑀢𑀺. 𑀚𑀻𑀯𑀲𑀜𑁆𑀜𑀺𑀦𑁄 𑀳𑀺, 𑀪𑀺𑀓𑁆𑀔𑀯𑁂, 𑀫𑀦𑀼𑀲𑁆𑀲𑀸 𑀭𑀼𑀓𑁆𑀔𑀲𑁆𑀫𑀺𑀁. 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀢𑀸𑀮𑀧𑀢𑁆𑀢𑀧𑀸𑀤𑀼𑀓𑀸 𑀥𑀸𑀭𑁂𑀢𑀩𑁆𑀩𑀸. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 ‘𑀪𑀕𑀯𑀢𑀸 𑀢𑀸𑀮𑀧𑀢𑁆𑀢𑀧𑀸𑀤𑀼𑀓𑀸 𑀧𑀝𑀺𑀓𑁆𑀔𑀺𑀢𑁆𑀢𑀸’𑀢𑀺 𑀯𑁂𑀴𑀼𑀢𑀭𑀼𑀡𑁂 𑀙𑁂𑀤𑀸𑀧𑁂𑀢𑁆𑀯𑀸 𑀯𑁂𑀴𑀼𑀧𑀢𑁆𑀢𑀧𑀸𑀤𑀼𑀓𑀸𑀬𑁄 𑀥𑀸𑀭𑁂𑀦𑁆𑀢𑀺. 𑀢𑀸𑀦𑀺 𑀯𑁂𑀴𑀼𑀢𑀭𑀼𑀡𑀸𑀦𑀺 𑀙𑀺𑀦𑁆𑀦𑀸𑀦𑀺 𑀫𑀺𑀮𑀸𑀬𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀯𑁂𑀴𑀼𑀢𑀭𑀼𑀡𑁂 𑀙𑁂𑀤𑀸𑀧𑁂𑀢𑁆𑀯𑀸 𑀯𑁂𑀴𑀼𑀧𑀢𑁆𑀢𑀧𑀸𑀤𑀼𑀓𑀸𑀬𑁄 𑀥𑀸𑀭𑁂𑀲𑁆𑀲𑀦𑁆𑀢𑀺. 𑀢𑀸𑀦𑀺 𑀯𑁂𑀴𑀼𑀢𑀭𑀼𑀡𑀸𑀦𑀺 𑀙𑀺𑀦𑁆𑀦𑀸𑀦𑀺 𑀫𑀺𑀮𑀸𑀬𑀦𑁆𑀢𑀺. 𑀏𑀓𑀺𑀦𑁆𑀤𑁆𑀭𑀺𑀬𑀁 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀚𑀻𑀯𑀁 𑀯𑀺𑀳𑁂𑀞𑁂𑀦𑁆𑀢𑀻’’𑀢𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀔𑀺𑀬𑁆𑀬𑀦𑁆𑀢𑀸𑀦𑀁 𑀯𑀺𑀧𑀸𑀘𑁂𑀦𑁆𑀢𑀸𑀦𑀁. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… 𑀚𑀻𑀯𑀲𑀜𑁆𑀜𑀺𑀦𑁄 𑀳𑀺, 𑀪𑀺𑀓𑁆𑀔𑀯𑁂, 𑀫𑀦𑀼𑀲𑁆𑀲𑀸 𑀭𑀼𑀓𑁆𑀔𑀲𑁆𑀫𑀺𑀁…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀯𑁂𑀴𑀼𑀧𑀢𑁆𑀢𑀧𑀸𑀤𑀼𑀓𑀸 𑀥𑀸𑀭𑁂𑀢𑀩𑁆𑀩𑀸. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑁨𑁫𑁧. 𑀅𑀣 𑀔𑁄 𑀪𑀕𑀯𑀸 𑀩𑀸𑀭𑀸𑀡𑀲𑀺𑀬𑀁 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀪𑀤𑁆𑀤𑀺𑀬𑀁 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀪𑀤𑁆𑀤𑀺𑀬𑀁 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀪𑀤𑁆𑀤𑀺𑀬𑁂 𑀯𑀺𑀳𑀭𑀢𑀺 𑀚𑀸𑀢𑀺𑀬𑀸 𑀯𑀦𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀤𑁆𑀤𑀺𑀬𑀸 𑀪𑀺𑀓𑁆𑀔𑀽 𑀅𑀦𑁂𑀓𑀯𑀺𑀳𑀺𑀢𑀁 𑀧𑀸𑀤𑀼𑀓𑀫𑀡𑁆𑀟𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀢𑀺𑀡𑀧𑀸𑀤𑀼𑀓𑀁 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺, 𑀫𑀼𑀜𑁆𑀚𑀧𑀸𑀤𑀼𑀓𑀁 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺, 𑀧𑀩𑁆𑀩𑀚𑀧𑀸𑀤𑀼𑀓𑀁 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺, 𑀳𑀺𑀦𑁆𑀢𑀸𑀮𑀧𑀸𑀤𑀼𑀓𑀁 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺, 𑀓𑀫𑀮𑀧𑀸𑀤𑀼𑀓𑀁 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺, 𑀓𑀫𑁆𑀩𑀮𑀧𑀸𑀤𑀼𑀓𑀁 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺, 𑀭𑀺𑀜𑁆𑀘𑀦𑁆𑀢𑀺 𑀉𑀤𑁆𑀤𑁂𑀲𑀁 𑀧𑀭𑀺𑀧𑀼𑀘𑁆𑀙𑀁 𑀅𑀥𑀺𑀲𑀻𑀮𑀁 𑀅𑀥𑀺𑀘𑀺𑀢𑁆𑀢𑀁 𑀅𑀥𑀺𑀧𑀜𑁆𑀜𑀁. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀤𑁆𑀤𑀺𑀬𑀸 𑀪𑀺𑀓𑁆𑀔𑀽 𑀅𑀦𑁂𑀓𑀯𑀺𑀳𑀺𑀢𑀁 𑀧𑀸𑀤𑀼𑀓𑀫𑀡𑁆𑀟𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀺𑀲𑁆𑀲𑀦𑁆𑀢𑀺, 𑀢𑀺𑀡𑀧𑀸𑀤𑀼𑀓𑀁 𑀓𑀭𑀺𑀲𑁆𑀲𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀲𑁆𑀲𑀦𑁆𑀢𑀺𑀧𑀺, 𑀫𑀼𑀜𑁆𑀚𑀧𑀸𑀤𑀼𑀓𑀁 𑀓𑀭𑀺𑀲𑁆𑀲𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀲𑁆𑀲𑀦𑁆𑀢𑀺𑀧𑀺, 𑀧𑀩𑁆𑀩𑀚𑀧𑀸𑀤𑀼𑀓𑀁 𑀓𑀭𑀺𑀲𑁆𑀲𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀲𑁆𑀲𑀦𑁆𑀢𑀺𑀧𑀺, 𑀳𑀺𑀦𑁆𑀢𑀸𑀮𑀧𑀸𑀤𑀼𑀓𑀁 𑀓𑀭𑀺𑀲𑁆𑀲𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀲𑁆𑀲𑀦𑁆𑀢𑀺𑀧𑀺, 𑀓𑀫𑀮𑀧𑀸𑀤𑀼𑀓𑀁 𑀓𑀭𑀺𑀲𑁆𑀲𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀲𑁆𑀲𑀦𑁆𑀢𑀺𑀧𑀺, 𑀓𑀫𑁆𑀩𑀮𑀧𑀸𑀤𑀼𑀓𑀁 𑀓𑀭𑀺𑀲𑁆𑀲𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀲𑁆𑀲𑀦𑁆𑀢𑀺𑀧𑀺, 𑀭𑀺𑀜𑁆𑀘𑀺𑀲𑁆𑀲𑀦𑁆𑀢𑀺 𑀉𑀤𑁆𑀤𑁂𑀲𑀁 𑀧𑀭𑀺𑀧𑀼𑀘𑁆𑀙𑀁 𑀅𑀥𑀺𑀲𑀻𑀮𑀁 𑀅𑀥𑀺𑀘𑀺𑀢𑁆𑀢𑀁 𑀅𑀥𑀺𑀧𑀜𑁆𑀜’’𑀦𑁆𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀪𑀤𑁆𑀤𑀺𑀬𑀸 𑀪𑀺𑀓𑁆𑀔𑀽 𑀅𑀦𑁂𑀓𑀯𑀺𑀳𑀺𑀢𑀁 𑀧𑀸𑀤𑀼𑀓𑀫𑀡𑁆𑀟𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀢𑀺𑀡𑀧𑀸𑀤𑀼𑀓𑀁 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺…𑀧𑁂… 𑀭𑀺𑀜𑁆𑀘𑀦𑁆𑀢𑀺 𑀉𑀤𑁆𑀤𑁂𑀲𑀁 𑀧𑀭𑀺𑀧𑀼𑀘𑁆𑀙𑀁 𑀅𑀥𑀺𑀲𑀻𑀮𑀁 𑀅𑀥𑀺𑀘𑀺𑀢𑁆𑀢𑀁 𑀅𑀥𑀺𑀧𑀜𑁆𑀜’’𑀦𑁆𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… ‘‘𑀓𑀣𑀜𑁆𑀳𑀺 𑀦𑀸𑀫 𑀢𑁂, 𑀪𑀺𑀓𑁆𑀔𑀯𑁂, 𑀫𑁄𑀖𑀧𑀼𑀭𑀺𑀲𑀸 𑀅𑀦𑁂𑀓𑀯𑀺𑀳𑀺𑀢𑀁 𑀧𑀸𑀤𑀼𑀓𑀫𑀡𑁆𑀟𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀺𑀲𑁆𑀲𑀦𑁆𑀢𑀺, 𑀢𑀺𑀡𑀧𑀸𑀤𑀼𑀓𑀁 𑀓𑀭𑀺𑀲𑁆𑀲𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀲𑁆𑀲𑀦𑁆𑀢𑀺𑀧𑀺…𑀧𑁂… 𑀭𑀺𑀜𑁆𑀘𑀺𑀲𑁆𑀲𑀦𑁆𑀢𑀺 𑀉𑀤𑁆𑀤𑁂𑀲𑀁 𑀧𑀭𑀺𑀧𑀼𑀘𑁆𑀙𑀁 𑀅𑀥𑀺𑀲𑀻𑀮𑀁 𑀅𑀥𑀺𑀘𑀺𑀢𑁆𑀢𑀁 𑀅𑀥𑀺𑀧𑀜𑁆𑀜𑀁. 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀢𑀺𑀡𑀧𑀸𑀤𑀼𑀓𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀫𑀼𑀜𑁆𑀚𑀧𑀸𑀤𑀼𑀓𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀧𑀩𑁆𑀩𑀚𑀧𑀸𑀤𑀼𑀓𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀳𑀺𑀦𑁆𑀢𑀸𑀮𑀧𑀸𑀤𑀼𑀓𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀓𑀫𑀮𑀧𑀸𑀤𑀼𑀓𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀓𑀫𑁆𑀩𑀮𑀧𑀸𑀤𑀼𑀓𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀲𑁄𑀯𑀡𑁆𑀡𑀫𑀬𑀸 𑀧𑀸𑀤𑀼𑀓𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀭𑀽𑀧𑀺𑀬𑀫𑀬𑀸 𑀧𑀸𑀤𑀼𑀓𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀫𑀡𑀺𑀫𑀬𑀸 𑀧𑀸𑀤𑀼𑀓𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀯𑁂𑀴𑀼𑀭𑀺𑀬𑀫𑀬𑀸 𑀧𑀸𑀤𑀼𑀓𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀨𑀮𑀺𑀓𑀫𑀬𑀸 𑀧𑀸𑀤𑀼𑀓𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀓𑀁𑀲𑀫𑀬𑀸 𑀧𑀸𑀤𑀼𑀓𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀓𑀸𑀘𑀫𑀬𑀸 𑀧𑀸𑀤𑀼𑀓𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀢𑀺𑀧𑀼𑀫𑀬𑀸 𑀧𑀸𑀤𑀼𑀓𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀲𑀻𑀲𑀫𑀬𑀸 𑀧𑀸𑀤𑀼𑀓𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀢𑀫𑁆𑀩𑀮𑁄𑀳𑀫𑀬𑀸 𑀧𑀸𑀤𑀼𑀓𑀸 𑀥𑀸𑀭𑁂𑀢𑀩𑁆𑀩𑀸. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀦 𑀘, 𑀪𑀺𑀓𑁆𑀔𑀯𑁂, 𑀓𑀸𑀘𑀺 𑀲𑀗𑁆𑀓𑀫𑀦𑀺𑀬𑀸 𑀧𑀸𑀤𑀼𑀓𑀸 𑀥𑀸𑀭𑁂𑀢𑀩𑁆𑀩𑀸. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑁄 𑀧𑀸𑀤𑀼𑀓𑀸 𑀥𑀼𑀯𑀝𑁆𑀞𑀸𑀦𑀺𑀬𑀸 𑀅𑀲𑀗𑁆𑀓𑀫𑀦𑀺𑀬𑀸𑀬𑁄 𑁋 𑀯𑀘𑁆𑀘𑀧𑀸𑀤𑀼𑀓𑀁, 𑀧𑀲𑁆𑀲𑀸𑀯𑀧𑀸𑀤𑀼𑀓𑀁, 𑀆𑀘𑀫𑀦𑀧𑀸𑀤𑀼𑀓’’𑀦𑁆𑀢𑀺.

𑁨𑁫𑁨. 𑀅𑀣 𑀔𑁄 𑀪𑀕𑀯𑀸 𑀪𑀤𑁆𑀤𑀺𑀬𑁂 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀲𑀸𑀯𑀢𑁆𑀣𑀺 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀲𑀸𑀯𑀢𑁆𑀣𑀺 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀅𑀘𑀺𑀭𑀯𑀢𑀺𑀬𑀸 𑀦𑀤𑀺𑀬𑀸 𑀕𑀸𑀯𑀻𑀦𑀁 𑀢𑀭𑀦𑁆𑀢𑀻𑀦𑀁 𑀯𑀺𑀲𑀸𑀡𑁂𑀲𑀼𑀧𑀺 𑀕𑀡𑁆𑀳𑀦𑁆𑀢𑀺, 𑀓𑀡𑁆𑀡𑁂𑀲𑀼𑀧𑀺 𑀕𑀡𑁆𑀳𑀦𑁆𑀢𑀺, 𑀕𑀻𑀯𑀸𑀬𑀧𑀺 𑀕𑀡𑁆𑀳𑀦𑁆𑀢𑀺, 𑀙𑁂𑀧𑁆𑀧𑀸𑀧𑀺 𑀕𑀡𑁆𑀳𑀦𑁆𑀢𑀺, 𑀧𑀺𑀝𑁆𑀞𑀺𑀫𑁆𑀧𑀺 𑀅𑀪𑀺𑀭𑀼𑀳𑀦𑁆𑀢𑀺, 𑀭𑀢𑁆𑀢𑀘𑀺𑀢𑁆𑀢𑀸𑀧𑀺 𑀅𑀗𑁆𑀕𑀚𑀸𑀢𑀁 𑀙𑀼𑀧𑀦𑁆𑀢𑀺, 𑀯𑀘𑁆𑀙𑀢𑀭𑀺𑀫𑁆𑀧𑀺 𑀑𑀕𑀸𑀳𑁂𑀢𑁆𑀯𑀸 𑀫𑀸𑀭𑁂𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀕𑀸𑀯𑀻𑀦𑀁 𑀢𑀭𑀦𑁆𑀢𑀻𑀦𑀁 𑀯𑀺𑀲𑀸𑀡𑁂𑀲𑀼𑀧𑀺 𑀕𑀳𑁂𑀲𑁆𑀲𑀦𑁆𑀢𑀺…𑀧𑁂… 𑀲𑁂𑀬𑁆𑀬𑀣𑀸𑀧𑀺 𑀕𑀺𑀳𑀻 𑀓𑀸𑀫𑀪𑁄𑀕𑀺𑀦𑁄’’𑀢𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀔𑀺𑀬𑁆𑀬𑀦𑁆𑀢𑀸𑀦𑀁 𑀯𑀺𑀧𑀸𑀘𑁂𑀦𑁆𑀢𑀸𑀦𑀁. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂,…𑀧𑁂… 𑀲𑀘𑁆𑀘𑀁 𑀪𑀕𑀯𑀸𑀢𑀺…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀕𑀸𑀯𑀻𑀦𑀁 𑀯𑀺𑀲𑀸𑀡𑁂𑀲𑀼 𑀕𑀳𑁂𑀢𑀩𑁆𑀩𑀁, 𑀦 𑀓𑀡𑁆𑀡𑁂𑀲𑀼 𑀕𑀳𑁂𑀢𑀩𑁆𑀩𑀁, 𑀦 𑀕𑀻𑀯𑀸𑀬 𑀕𑀳𑁂𑀢𑀩𑁆𑀩𑀁, 𑀦 𑀙𑁂𑀧𑁆𑀧𑀸𑀬 𑀕𑀳𑁂𑀢𑀩𑁆𑀩𑀁, 𑀦 𑀧𑀺𑀝𑁆𑀞𑀺 𑀅𑀪𑀺𑀭𑀼𑀳𑀺𑀢𑀩𑁆𑀩𑀸. 𑀬𑁄 𑀅𑀪𑀺𑀭𑀼𑀳𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀦 𑀘, 𑀪𑀺𑀓𑁆𑀔𑀯𑁂, 𑀭𑀢𑁆𑀢𑀘𑀺𑀢𑁆𑀢𑁂𑀦 𑀅𑀗𑁆𑀕𑀚𑀸𑀢𑀁 𑀙𑀼𑀧𑀺𑀢𑀩𑁆𑀩𑀁. 𑀬𑁄 𑀙𑀼𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀦 𑀯𑀘𑁆𑀙𑀢𑀭𑀻 𑀫𑀸𑀭𑁂𑀢𑀩𑁆𑀩𑀸. 𑀬𑁄 𑀫𑀸𑀭𑁂𑀬𑁆𑀬, 𑀬𑀣𑀸𑀥𑀫𑁆𑀫𑁄 𑀓𑀸𑀭𑁂𑀢𑀩𑁆𑀩𑁄’’𑀢𑀺.

𑀓𑀝𑁆𑀞𑀧𑀸𑀤𑀼𑀓𑀸𑀤𑀺𑀧𑀝𑀺𑀓𑁆𑀔𑁂𑀧𑁄 𑀦𑀺𑀝𑁆𑀞𑀺𑀢𑁄.

𑁧𑁫𑁩. 𑀬𑀸𑀦𑀸𑀤𑀺𑀧𑀝𑀺𑀓𑁆𑀔𑁂𑀧𑁄

𑁨𑁫𑁩. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀬𑀸𑀦𑁂𑀦 𑀬𑀸𑀬𑀦𑁆𑀢𑀺, 𑀇𑀢𑁆𑀣𑀺𑀬𑀼𑀢𑁆𑀢𑁂𑀦𑀧𑀺 𑀧𑀼𑀭𑀺𑀲𑀦𑁆𑀢𑀭𑁂𑀦, 𑀧𑀼𑀭𑀺𑀲𑀬𑀼𑀢𑁆𑀢𑁂𑀦𑀧𑀺 𑀇𑀢𑁆𑀣𑀦𑁆𑀢𑀭𑁂𑀦. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀲𑁂𑀬𑁆𑀬𑀣𑀸𑀧𑀺 𑀕𑀗𑁆𑀕𑀸𑀫𑀳𑀺𑀬𑀸𑀬𑀸’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀬𑀸𑀦𑁂𑀦 𑀬𑀸𑀬𑀺𑀢𑀩𑁆𑀩𑀁. 𑀬𑁄 𑀬𑀸𑀬𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀓𑁄𑀲𑀮𑁂𑀲𑀼 𑀚𑀦𑀧𑀤𑁂 𑀲𑀸𑀯𑀢𑁆𑀣𑀺𑀁 𑀕𑀘𑁆𑀙𑀦𑁆𑀢𑁄 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀅𑀦𑁆𑀢𑀭𑀸𑀫𑀕𑁆𑀕𑁂 𑀕𑀺𑀮𑀸𑀦𑁄 𑀳𑁄𑀢𑀺. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺. 𑀫𑀦𑀼𑀲𑁆𑀲𑀸 𑀢𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀏𑀢𑀤𑀯𑁄𑀘𑀼𑀁 𑁋 ‘‘𑀓𑀳𑀁, 𑀪𑀦𑁆𑀢𑁂, 𑀅𑀬𑁆𑀬𑁄 𑀕𑀫𑀺𑀲𑁆𑀲𑀢𑀻’’𑀢𑀺? ‘‘𑀲𑀸𑀯𑀢𑁆𑀣𑀺𑀁 𑀔𑁄 𑀅𑀳𑀁, 𑀆𑀯𑀼𑀲𑁄, 𑀕𑀫𑀺𑀲𑁆𑀲𑀸𑀫𑀺 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬𑀸’’𑀢𑀺. ‘‘𑀏𑀳𑀺, 𑀪𑀦𑁆𑀢𑁂, 𑀕𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀦𑀸𑀳𑀁, 𑀆𑀯𑀼𑀲𑁄, 𑀲𑀓𑁆𑀓𑁄𑀫𑀺, 𑀕𑀺𑀮𑀸𑀦𑁄𑀫𑁆𑀳𑀻’’𑀢𑀺. ‘‘𑀏𑀳𑀺, 𑀪𑀦𑁆𑀢𑁂, 𑀬𑀸𑀦𑀁 𑀅𑀪𑀺𑀭𑀼𑀳𑀸’’𑀢𑀺. ‘‘𑀅𑀮𑀁, 𑀆𑀯𑀼𑀲𑁄, 𑀧𑀝𑀺𑀓𑁆𑀔𑀺𑀢𑁆𑀢𑀁 𑀪𑀕𑀯𑀢𑀸 𑀬𑀸𑀦’’𑀦𑁆𑀢𑀺 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑁄 𑀬𑀸𑀦𑀁 𑀦𑀸𑀪𑀺𑀭𑀼𑀳𑀺. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀺𑀮𑀸𑀦𑀲𑁆𑀲 𑀬𑀸𑀦𑀦𑁆𑀢𑀺. 𑀅𑀣 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀇𑀢𑁆𑀣𑀺𑀬𑀼𑀢𑁆𑀢𑀁 𑀦𑀼 𑀔𑁄 𑀧𑀼𑀭𑀺𑀲𑀬𑀼𑀢𑁆𑀢𑀁 𑀦𑀼 𑀔𑁄’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀬𑀼𑀢𑁆𑀢𑀁 𑀳𑀢𑁆𑀣𑀯𑀝𑁆𑀝𑀓𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀬𑀸𑀦𑀼𑀕𑁆𑀖𑀸𑀢𑁂𑀦 𑀩𑀸𑀴𑁆𑀳𑀢𑀭𑀁 𑀅𑀨𑀸𑀲𑀼 𑀅𑀳𑁄𑀲𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀺𑀯𑀺𑀓𑀁 𑀧𑀸𑀝𑀗𑁆𑀓𑀺𑀦𑁆𑀢𑀺.

𑀬𑀸𑀦𑀸𑀤𑀺𑀧𑀝𑀺𑀓𑁆𑀔𑁂𑀧𑁄 𑀦𑀺𑀝𑁆𑀞𑀺𑀢𑁄.

𑁧𑁫𑁪. 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀧𑀝𑀺𑀓𑁆𑀔𑁂𑀧𑁄

𑁨𑁫𑁪. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀸𑀦𑀺 𑀥𑀸𑀭𑁂𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀆𑀲𑀦𑁆𑀤𑀺𑀁, 𑀧𑀮𑁆𑀮𑀗𑁆𑀓𑀁, 𑀕𑁄𑀦𑀓𑀁, 𑀘𑀺𑀢𑁆𑀢𑀓𑀁, 𑀧𑀝𑀺𑀓𑀁, 𑀧𑀝𑀮𑀺𑀓𑀁, 𑀢𑀽𑀮𑀺𑀓𑀁, 𑀯𑀺𑀓𑀢𑀺𑀓𑀁, 𑀉𑀤𑁆𑀥𑀮𑁄𑀫𑀺𑀁 [𑀉𑀦𑁆𑀤𑀮𑁄𑀫𑀺𑀁 (𑀓.), 𑀉𑀤𑁆𑀤𑀮𑁄𑀫𑀺𑀁 (𑀓.)], 𑀏𑀓𑀦𑁆𑀢𑀮𑁄𑀫𑀺𑀁, 𑀓𑀝𑁆𑀝𑀺𑀲𑁆𑀲𑀁, 𑀓𑁄𑀲𑁂𑀬𑁆𑀬𑀁, 𑀓𑀼𑀢𑁆𑀢𑀓𑀁, 𑀳𑀢𑁆𑀣𑀢𑁆𑀣𑀭𑀁, 𑀅𑀲𑁆𑀲𑀢𑁆𑀣𑀭𑀁, 𑀭𑀣𑀢𑁆𑀣𑀭𑀁, 𑀅𑀚𑀺𑀦𑀧𑀯𑁂𑀡𑀺𑀁, 𑀓𑀤𑀮𑀺𑀫𑀺𑀕𑀧𑀯𑀭𑀧𑀘𑁆𑀘𑀢𑁆𑀣𑀭𑀡𑀁, 𑀲𑀉𑀢𑁆𑀢𑀭𑀘𑁆𑀙𑀤𑀁, 𑀉𑀪𑀢𑁄𑀮𑁄𑀳𑀺𑀢𑀓𑀽𑀧𑀥𑀸𑀦𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀯𑀺𑀳𑀸𑀭𑀘𑀸𑀭𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑀸 𑀧𑀲𑁆𑀲𑀺𑀢𑁆𑀯𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀲𑁂𑀬𑁆𑀬𑀣𑀸𑀧𑀺 𑀕𑀺𑀳𑀻 𑀓𑀸𑀫𑀪𑁄𑀕𑀺𑀦𑁄’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀸𑀦𑀺 𑀥𑀸𑀭𑁂𑀢𑀩𑁆𑀩𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀆𑀲𑀦𑁆𑀤𑀺, 𑀧𑀮𑁆𑀮𑀗𑁆𑀓𑁄, 𑀕𑁄𑀦𑀓𑁄, 𑀘𑀺𑀢𑁆𑀢𑀓𑁄, 𑀧𑀝𑀺𑀓𑀸, 𑀧𑀝𑀮𑀺𑀓𑀸, 𑀢𑀽𑀮𑀺𑀓𑀸, 𑀯𑀺𑀓𑀢𑀺𑀓𑀸, 𑀉𑀤𑁆𑀥𑀮𑁄𑀫𑀺, 𑀏𑀓𑀦𑁆𑀢𑀮𑁄𑀫𑀺, 𑀓𑀝𑁆𑀝𑀺𑀲𑁆𑀲𑀁, 𑀓𑁄𑀲𑁂𑀬𑁆𑀬𑀁, 𑀓𑀼𑀢𑁆𑀢𑀓𑀁, 𑀳𑀢𑁆𑀣𑀢𑁆𑀣𑀭𑀁, 𑀅𑀲𑁆𑀲𑀢𑁆𑀣𑀭𑀁, 𑀭𑀣𑀢𑁆𑀣𑀭𑀁, 𑀅𑀚𑀺𑀦𑀧𑀯𑁂𑀡𑀺, 𑀓𑀤𑀮𑀺𑀫𑀺𑀕𑀧𑀯𑀭𑀧𑀘𑁆𑀘𑀢𑁆𑀣𑀭𑀡𑀁, 𑀲𑀉𑀢𑁆𑀢𑀭𑀘𑁆𑀙𑀤𑀁, 𑀉𑀪𑀢𑁄𑀮𑁄𑀳𑀺𑀢𑀓𑀽𑀧𑀥𑀸𑀦𑀁. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀧𑀝𑀺𑀓𑁆𑀔𑁂𑀧𑁄 𑀦𑀺𑀝𑁆𑀞𑀺𑀢𑁄.

𑁧𑁫𑁫. 𑀲𑀩𑁆𑀩𑀘𑀫𑁆𑀫𑀧𑀝𑀺𑀓𑁆𑀔𑁂𑀧𑁄

𑁨𑁫𑁫. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑁋 𑀪𑀕𑀯𑀢𑀸 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀸𑀦𑀺 𑀧𑀝𑀺𑀓𑁆𑀔𑀺𑀢𑁆𑀢𑀸𑀦𑀻𑀢𑀺 𑁋 𑀫𑀳𑀸𑀘𑀫𑁆𑀫𑀸𑀦𑀺 𑀥𑀸𑀭𑁂𑀦𑁆𑀢𑀺, 𑀲𑀻𑀳𑀘𑀫𑁆𑀫𑀁 𑀩𑁆𑀬𑀕𑁆𑀖𑀘𑀫𑁆𑀫𑀁 𑀤𑀻𑀧𑀺𑀘𑀫𑁆𑀫𑀁. 𑀢𑀸𑀦𑀺 𑀫𑀜𑁆𑀘𑀧𑁆𑀧𑀫𑀸𑀡𑁂𑀦𑀧𑀺 𑀙𑀺𑀦𑁆𑀦𑀸𑀦𑀺 𑀳𑁄𑀦𑁆𑀢𑀺, 𑀧𑀻𑀞𑀧𑁆𑀧𑀫𑀸𑀡𑁂𑀦𑀧𑀺 𑀙𑀺𑀦𑁆𑀦𑀸𑀦𑀺 𑀳𑁄𑀦𑁆𑀢𑀺, 𑀅𑀦𑁆𑀢𑁄𑀧𑀺 𑀫𑀜𑁆𑀘𑁂 𑀧𑀜𑁆𑀜𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀩𑀳𑀺𑀧𑀺 𑀫𑀜𑁆𑀘𑁂 𑀧𑀜𑁆𑀜𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀅𑀦𑁆𑀢𑁄𑀧𑀺 𑀧𑀻𑀞𑁂 𑀧𑀜𑁆𑀜𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀩𑀳𑀺𑀧𑀺 𑀧𑀻𑀞𑁂 𑀧𑀜𑁆𑀜𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀯𑀺𑀳𑀸𑀭𑀘𑀸𑀭𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑀸 𑀧𑀲𑁆𑀲𑀺𑀢𑁆𑀯𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀲𑁂𑀬𑁆𑀬𑀣𑀸𑀧𑀺 𑀕𑀺𑀳𑀻 𑀓𑀸𑀫𑀪𑁄𑀕𑀺𑀦𑁄’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀫𑀳𑀸𑀘𑀫𑁆𑀫𑀸𑀦𑀺 𑀥𑀸𑀭𑁂𑀢𑀩𑁆𑀩𑀸𑀦𑀺, 𑀲𑀻𑀳𑀘𑀫𑁆𑀫𑀁 𑀩𑁆𑀬𑀕𑁆𑀖𑀘𑀫𑁆𑀫𑀁 𑀤𑀻𑀧𑀺𑀘𑀫𑁆𑀫𑀁. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑁋 𑀪𑀕𑀯𑀢𑀸 𑀫𑀳𑀸𑀘𑀫𑁆𑀫𑀸𑀦𑀺 𑀧𑀝𑀺𑀓𑁆𑀔𑀺𑀢𑁆𑀢𑀸𑀦𑀻𑀢𑀺 𑁋 𑀕𑁄𑀘𑀫𑁆𑀫𑀸𑀦𑀺 𑀥𑀸𑀭𑁂𑀦𑁆𑀢𑀺. 𑀢𑀸𑀦𑀺 𑀫𑀜𑁆𑀘𑀧𑁆𑀧𑀫𑀸𑀡𑁂𑀦𑀧𑀺 𑀙𑀺𑀦𑁆𑀦𑀸𑀦𑀺 𑀳𑁄𑀦𑁆𑀢𑀺, 𑀧𑀻𑀞𑀧𑁆𑀧𑀫𑀸𑀡𑁂𑀦𑀧𑀺 𑀙𑀺𑀦𑁆𑀦𑀸𑀦𑀺 𑀳𑁄𑀦𑁆𑀢𑀺, 𑀅𑀦𑁆𑀢𑁄𑀧𑀺 𑀫𑀜𑁆𑀘𑁂 𑀧𑀜𑁆𑀜𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀩𑀳𑀺𑀧𑀺 𑀫𑀜𑁆𑀘𑁂 𑀧𑀜𑁆𑀜𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀅𑀦𑁆𑀢𑁄𑀧𑀺 𑀧𑀻𑀞𑁂 𑀧𑀜𑁆𑀜𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀩𑀳𑀺𑀧𑀺 𑀧𑀻𑀞𑁂 𑀧𑀜𑁆𑀜𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀅𑀜𑁆𑀜𑀢𑀭𑁄𑀧𑀺 𑀧𑀸𑀧𑀪𑀺𑀓𑁆𑀔𑀼 𑀅𑀜𑁆𑀜𑀢𑀭𑀲𑁆𑀲 𑀧𑀸𑀧𑀼𑀧𑀸𑀲𑀓𑀲𑁆𑀲 𑀓𑀼𑀮𑀽𑀧𑀓𑁄 𑀳𑁄𑀢𑀺. 𑀅𑀣 𑀔𑁄 𑀲𑁄 𑀧𑀸𑀧𑀪𑀺𑀓𑁆𑀔𑀼 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀢𑀲𑁆𑀲 𑀧𑀸𑀧𑀼𑀧𑀸𑀲𑀓𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀲𑁄 𑀧𑀸𑀧𑀼𑀧𑀸𑀲𑀓𑁄 𑀬𑁂𑀦 𑀲𑁄 𑀧𑀸𑀧𑀪𑀺𑀓𑁆𑀔𑀼 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀧𑀸𑀧𑀪𑀺𑀓𑁆𑀔𑀼𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀢𑀲𑁆𑀲 𑀧𑀸𑀧𑀼𑀧𑀸𑀲𑀓𑀲𑁆𑀲 𑀯𑀘𑁆𑀙𑀓𑁄 𑀳𑁄𑀢𑀺 𑀢𑀭𑀼𑀡𑀓𑁄 𑀅𑀪𑀺𑀭𑀽𑀧𑁄 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄 𑀘𑀺𑀢𑁆𑀭𑁄, 𑀲𑁂𑀬𑁆𑀬𑀣𑀸𑀧𑀺 𑀤𑀻𑀧𑀺𑀘𑁆𑀙𑀸𑀧𑁄. 𑀅𑀣 𑀔𑁄 𑀲𑁄 𑀧𑀸𑀧𑀪𑀺𑀓𑁆𑀔𑀼 𑀢𑀁 𑀯𑀘𑁆𑀙𑀓𑀁 𑀲𑀓𑁆𑀓𑀘𑁆𑀘𑀁 𑀉𑀧𑀦𑀺𑀚𑁆𑀛𑀸𑀬𑀢𑀺. 𑀅𑀣 𑀔𑁄 𑀲𑁄 𑀧𑀸𑀧𑀼𑀧𑀸𑀲𑀓𑁄 𑀢𑀁 𑀧𑀸𑀧𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀲𑁆𑀲, 𑀪𑀦𑁆𑀢𑁂, 𑀅𑀬𑁆𑀬𑁄 𑀇𑀫𑀁 𑀯𑀘𑁆𑀙𑀓𑀁 𑀲𑀓𑁆𑀓𑀘𑁆𑀘𑀁 𑀉𑀧𑀦𑀺𑀚𑁆𑀛𑀸𑀬𑀢𑀻’’𑀢𑀺? ‘‘𑀅𑀢𑁆𑀣𑁄 𑀫𑁂, 𑀆𑀯𑀼𑀲𑁄, 𑀇𑀫𑀲𑁆𑀲 𑀯𑀘𑁆𑀙𑀓𑀲𑁆𑀲 𑀘𑀫𑁆𑀫𑁂𑀦𑀸’’𑀢𑀺. 𑀅𑀣 𑀔𑁄 𑀲𑁄 𑀧𑀸𑀧𑀼𑀧𑀸𑀲𑀓𑁄 𑀢𑀁 𑀯𑀘𑁆𑀙𑀓𑀁 𑀯𑀥𑀺𑀢𑁆𑀯𑀸 𑀘𑀫𑁆𑀫𑀁 𑀯𑀺𑀥𑀼𑀦𑀺𑀢𑁆𑀯𑀸 𑀢𑀲𑁆𑀲 𑀧𑀸𑀧𑀪𑀺𑀓𑁆𑀔𑀼𑀦𑁄 𑀧𑀸𑀤𑀸𑀲𑀺. 𑀅𑀣 𑀔𑁄 𑀲𑁄 𑀧𑀸𑀧𑀪𑀺𑀓𑁆𑀔𑀼 𑀢𑀁 𑀘𑀫𑁆𑀫𑀁 𑀲𑀗𑁆𑀖𑀸𑀝𑀺𑀬𑀸 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀫𑀸𑀲𑀺. 𑀅𑀣 𑀔𑁄 𑀲𑀸 𑀕𑀸𑀯𑀻 𑀯𑀘𑁆𑀙𑀕𑀺𑀤𑁆𑀥𑀺𑀦𑀻 𑀢𑀁 𑀧𑀸𑀧𑀪𑀺𑀓𑁆𑀔𑀼𑀁 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀺. 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀓𑀺𑀲𑁆𑀲 𑀢𑁆𑀬𑀸𑀬𑀁, 𑀆𑀯𑀼𑀲𑁄, 𑀕𑀸𑀯𑀻 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀻’’𑀢𑀺? ‘‘𑀅𑀳𑀫𑁆𑀧𑀺 𑀔𑁄, 𑀆𑀯𑀼𑀲𑁄, 𑀦 𑀚𑀸𑀦𑀸𑀫𑀺 𑀓𑁂𑀦 [𑀓𑁂𑀦𑀘𑀺 (𑀓.)] 𑀫𑁆𑀬𑀸𑀬𑀁 𑀕𑀸𑀯𑀻 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀻’’𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀢𑀲𑁆𑀲 𑀧𑀸𑀧𑀪𑀺𑀓𑁆𑀔𑀼𑀦𑁄 𑀲𑀗𑁆𑀖𑀸𑀝𑀺 𑀮𑁄𑀳𑀺𑀢𑁂𑀦 𑀫𑀓𑁆𑀔𑀺𑀢𑀸 𑀳𑁄𑀢𑀺. 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀬𑀁 𑀧𑀦 𑀢𑁂, 𑀆𑀯𑀼𑀲𑁄, 𑀲𑀗𑁆𑀖𑀸𑀝𑀺 𑀓𑀺𑀁 𑀓𑀢𑀸’’𑀢𑀺? 𑀅𑀣 𑀔𑁄 𑀲𑁄 𑀧𑀸𑀧𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. ‘‘𑀓𑀺𑀁 𑀧𑀦 𑀢𑁆𑀯𑀁, 𑀆𑀯𑀼𑀲𑁄, 𑀧𑀸𑀡𑀸𑀢𑀺𑀧𑀸𑀢𑁂 𑀲𑀫𑀸𑀤𑀧𑁂𑀲𑀻’’𑀢𑀺? ‘‘𑀏𑀯𑀫𑀸𑀯𑀼𑀲𑁄’’𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀼 𑀧𑀸𑀡𑀸𑀢𑀺𑀧𑀸𑀢𑁂 𑀲𑀫𑀸𑀤𑀧𑁂𑀲𑁆𑀲𑀢𑀺, 𑀦𑀦𑀼 𑀪𑀕𑀯𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀧𑀸𑀡𑀸𑀢𑀺𑀧𑀸𑀢𑁄 𑀕𑀭𑀳𑀺𑀢𑁄, 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻 𑀧𑀲𑀢𑁆𑀣𑀸’’𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁.

𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀢𑀁 𑀧𑀸𑀧𑀪𑀺𑀓𑁆𑀔𑀼𑀁 𑀧𑀝𑀺𑀧𑀼𑀘𑁆𑀙𑀺 𑁋 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀪𑀺𑀓𑁆𑀔𑀼, 𑀧𑀸𑀡𑀸𑀢𑀺𑀧𑀸𑀢𑁂 𑀲𑀫𑀸𑀤𑀧𑁂𑀲𑀻’’𑀢𑀺? 𑀲𑀘𑁆𑀘𑀁 𑀪𑀕𑀯𑀸𑀢𑀺…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀧𑀸𑀡𑀸𑀢𑀺𑀧𑀸𑀢𑁂 𑀲𑀫𑀸𑀤𑀧𑁂𑀲𑁆𑀲𑀲𑀺, 𑀦𑀦𑀼 𑀫𑀬𑀸, 𑀫𑁄𑀖𑀧𑀼𑀭𑀺𑀲, 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀧𑀸𑀡𑀸𑀢𑀺𑀧𑀸𑀢𑁄 𑀕𑀭𑀳𑀺𑀢𑁄, 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻 𑀧𑀲𑀢𑁆𑀣𑀸. 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀧𑀸𑀡𑀸𑀢𑀺𑀧𑀸𑀢𑁂 𑀲𑀫𑀸𑀤𑀧𑁂𑀢𑀩𑁆𑀩𑀁. 𑀬𑁄 𑀲𑀫𑀸𑀤𑀧𑁂𑀬𑁆𑀬, 𑀬𑀣𑀸𑀥𑀫𑁆𑀫𑁄 𑀓𑀸𑀭𑁂𑀢𑀩𑁆𑀩𑁄. 𑀦, 𑀪𑀺𑀓𑁆𑀔𑀯𑁂, 𑀕𑁄𑀘𑀫𑁆𑀫𑀁 𑀥𑀸𑀭𑁂𑀢𑀩𑁆𑀩𑀁. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀦 𑀘, 𑀪𑀺𑀓𑁆𑀔𑀯𑁂, 𑀓𑀺𑀜𑁆𑀘𑀺 𑀘𑀫𑁆𑀫𑀁 𑀥𑀸𑀭𑁂𑀢𑀩𑁆𑀩𑀁. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑀲𑀩𑁆𑀩𑀘𑀫𑁆𑀫𑀧𑀝𑀺𑀓𑁆𑀔𑁂𑀧𑁄 𑀦𑀺𑀝𑁆𑀞𑀺𑀢𑁄.

𑁧𑁫𑁬. 𑀕𑀺𑀳𑀺𑀯𑀺𑀓𑀢𑀸𑀦𑀼𑀜𑁆𑀜𑀸𑀢𑀸𑀤𑀺

𑁨𑁫𑁬. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀫𑀦𑀼𑀲𑁆𑀲𑀸𑀦𑀁 𑀫𑀜𑁆𑀘𑀫𑁆𑀧𑀺 𑀧𑀻𑀞𑀫𑁆𑀧𑀺 𑀘𑀫𑁆𑀫𑁄𑀦𑀤𑁆𑀥𑀸𑀦𑀺 𑀳𑁄𑀦𑁆𑀢𑀺, 𑀘𑀫𑁆𑀫𑀯𑀺𑀦𑀤𑁆𑀥𑀸𑀦𑀺. 𑀪𑀺𑀓𑁆𑀔𑀽 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸 𑀦𑀸𑀪𑀺𑀦𑀺𑀲𑀻𑀤𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀺𑀳𑀺𑀯𑀺𑀓𑀢𑀁 𑀅𑀪𑀺𑀦𑀺𑀲𑀻𑀤𑀺𑀢𑀼𑀁, 𑀦 𑀢𑁆𑀯𑁂𑀯 𑀅𑀪𑀺𑀦𑀺𑀧𑀚𑁆𑀚𑀺𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑀺𑀳𑀸𑀭𑀸 𑀘𑀫𑁆𑀫𑀯𑀤𑁆𑀥𑁂𑀳𑀺 𑀑𑀕𑀼𑀫𑁆𑀨𑀺𑀬𑀦𑁆𑀢𑀺 [𑀑𑀕𑀼𑀫𑁆𑀪𑀺𑀬𑀦𑁆𑀢𑀺 (𑀓.)]. 𑀪𑀺𑀓𑁆𑀔𑀽 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸 𑀦𑀸𑀪𑀺𑀦𑀺𑀲𑀻𑀤𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀩𑀦𑁆𑀥𑀦𑀫𑀢𑁆𑀢𑀁 𑀅𑀪𑀺𑀦𑀺𑀲𑀻𑀤𑀺𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀲𑀉𑀧𑀸𑀳𑀦𑀸 𑀕𑀸𑀫𑀁 𑀧𑀯𑀺𑀲𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀲𑁂𑀬𑁆𑀬𑀣𑀸𑀧𑀺 𑀕𑀺𑀳𑀻 𑀓𑀸𑀫𑀪𑁄𑀕𑀺𑀦𑁄’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀲𑀉𑀧𑀸𑀳𑀦𑁂𑀦 𑀕𑀸𑀫𑁄 𑀧𑀯𑀺𑀲𑀺𑀢𑀩𑁆𑀩𑁄. 𑀬𑁄 𑀧𑀯𑀺𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀕𑀺𑀮𑀸𑀦𑁄 𑀳𑁄𑀢𑀺, 𑀦 𑀲𑀓𑁆𑀓𑁄𑀢𑀺 𑀯𑀺𑀦𑀸 𑀉𑀧𑀸𑀳𑀦𑁂𑀦 𑀕𑀸𑀫𑀁 𑀧𑀯𑀺𑀲𑀺𑀢𑀼𑀁. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀺𑀮𑀸𑀦𑁂𑀦 𑀪𑀺𑀓𑁆𑀔𑀼𑀦𑀸 𑀲𑀉𑀧𑀸𑀳𑀦𑁂𑀦 𑀕𑀸𑀫𑀁 𑀧𑀯𑀺𑀲𑀺𑀢𑀼𑀦𑁆𑀢𑀺.

𑀕𑀺𑀳𑀺𑀯𑀺𑀓𑀢𑀸𑀦𑀼𑀜𑁆𑀜𑀸𑀢𑀸𑀤𑀺 𑀦𑀺𑀝𑁆𑀞𑀺𑀢𑀸.

𑁧𑁫𑁭. 𑀲𑁄𑀡𑀓𑀼𑀝𑀺𑀓𑀡𑁆𑀡𑀯𑀢𑁆𑀣𑀼

𑁨𑁫𑁭. [𑀉𑀤𑀸. 𑁪𑁬 𑀲𑁄𑀓𑀲𑀼𑀢𑁆𑀢𑁂𑀦 𑀲𑀁𑀲𑀦𑁆𑀤𑀺𑀢𑁆𑀯𑀸 𑀧𑀲𑁆𑀲𑀺𑀢𑀩𑁆𑀩𑀁] 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀅𑀯𑀦𑁆𑀢𑀻𑀲𑀼 𑀯𑀺𑀳𑀭𑀢𑀺 𑀓𑀼𑀭𑀭𑀖𑀭𑁂 [𑀓𑀼𑀭𑀼𑀭𑀖𑀭𑁂 (𑀓.)] 𑀧𑀧𑀢𑀓𑁂 [𑀧𑀧𑀸𑀢𑁂 (𑀲𑀻. 𑀲𑁆𑀬𑀸.) 𑀧𑀯𑀢𑁆𑀣𑁂 (𑀉𑀤𑀸. 𑁪𑁬)] 𑀧𑀩𑁆𑀩𑀢𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑁄𑀡𑁄 𑀉𑀧𑀸𑀲𑀓𑁄 𑀓𑀼𑀝𑀺𑀓𑀡𑁆𑀡𑁄 𑀆𑀬𑀲𑁆𑀫𑀢𑁄 𑀫𑀳𑀸𑀓𑀘𑁆𑀘𑀸𑀦𑀲𑁆𑀲 𑀉𑀧𑀝𑁆𑀞𑀸𑀓𑁄 𑀳𑁄𑀢𑀺. 𑀅𑀣 𑀔𑁄 𑀲𑁄𑀡𑁄 𑀉𑀧𑀸𑀲𑀓𑁄 𑀓𑀼𑀝𑀺𑀓𑀡𑁆𑀡𑁄 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀘𑁆𑀘𑀸𑀦𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄𑀡𑁄 𑀉𑀧𑀸𑀲𑀓𑁄 𑀓𑀼𑀝𑀺𑀓𑀡𑁆𑀡𑁄 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀘𑁆𑀘𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀬𑀣𑀸 𑀬𑀣𑀸𑀳𑀁, 𑀪𑀦𑁆𑀢𑁂, 𑀅𑀬𑁆𑀬𑁂𑀦 𑀫𑀳𑀸𑀓𑀘𑁆𑀘𑀸𑀦𑁂𑀦 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺, 𑀦𑀬𑀺𑀤𑀁 𑀲𑀼𑀓𑀭𑀁 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑀁 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑀁 𑀲𑀗𑁆𑀔𑀮𑀺𑀔𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀁. 𑀇𑀘𑁆𑀙𑀸𑀫𑀳𑀁, 𑀪𑀦𑁆𑀢𑁂, 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀼𑀁. 𑀧𑀩𑁆𑀩𑀸𑀚𑁂𑀢𑀼 𑀫𑀁, 𑀪𑀦𑁆𑀢𑁂, 𑀅𑀬𑁆𑀬𑁄 𑀫𑀳𑀸𑀓𑀘𑁆𑀘𑀸𑀦𑁄’’𑀢𑀺. ( ) [(𑀏𑀯𑀁 𑀯𑀼𑀢𑁆𑀢𑁂 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀬𑀦𑁄 𑀲𑁄𑀡𑀁 𑀉𑀧𑀸𑀲𑀓𑀁 𑀓𑀼𑀝𑀺𑀓𑀡𑁆𑀡𑀁 𑀏𑀢𑀤𑀯𑁄𑀘) (𑀲𑁆𑀬𑀸. 𑀉𑀤𑀸. 𑁪𑁬)] ‘‘𑀤𑀼𑀓𑁆𑀓𑀭𑀁 𑀔𑁄, 𑀲𑁄𑀡, 𑀬𑀸𑀯𑀚𑀻𑀯𑀁 𑀏𑀓𑀲𑁂𑀬𑁆𑀬𑀁 𑀏𑀓𑀪𑀢𑁆𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀁. 𑀇𑀗𑁆𑀖, 𑀢𑁆𑀯𑀁, 𑀲𑁄𑀡, 𑀢𑀢𑁆𑀣𑁂𑀯 𑀅𑀕𑀸𑀭𑀺𑀓𑀪𑀽𑀢𑁄 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁 𑀅𑀦𑀼𑀬𑀼𑀜𑁆𑀚, 𑀓𑀸𑀮𑀬𑀼𑀢𑁆𑀢𑀁 𑀏𑀓𑀲𑁂𑀬𑁆𑀬𑀁 𑀏𑀓𑀪𑀢𑁆𑀢𑀁 𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺. 𑀅𑀣 𑀔𑁄 𑀲𑁄𑀡𑀲𑁆𑀲 𑀉𑀧𑀸𑀲𑀓𑀲𑁆𑀲 𑀓𑀼𑀝𑀺𑀓𑀡𑁆𑀡𑀲𑁆𑀲 𑀬𑁄 𑀅𑀳𑁄𑀲𑀺 𑀧𑀩𑁆𑀩𑀚𑁆𑀚𑀸𑀪𑀺𑀲𑀗𑁆𑀔𑀸𑀭𑁄 𑀲𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀲𑁄𑀡𑁄 𑀉𑀧𑀸𑀲𑀓𑁄 𑀓𑀼𑀝𑀺𑀓𑀡𑁆𑀡𑁄 …𑀧𑁂… 𑀢𑀢𑀺𑀬𑀫𑁆𑀧𑀺 𑀔𑁄 𑀲𑁄𑀡𑁄 𑀉𑀧𑀸𑀲𑀓𑁄 𑀓𑀼𑀝𑀺𑀓𑀡𑁆𑀡𑁄 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀘𑁆𑀘𑀸𑀦𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄𑀡𑁄 𑀉𑀧𑀸𑀲𑀓𑁄 𑀓𑀼𑀝𑀺𑀓𑀡𑁆𑀡𑁄 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀘𑁆𑀘𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀬𑀣𑀸 𑀬𑀣𑀸𑀳𑀁, 𑀪𑀦𑁆𑀢𑁂, 𑀅𑀬𑁆𑀬𑁂𑀦 𑀫𑀳𑀸𑀓𑀘𑁆𑀘𑀸𑀦𑁂𑀦 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺, 𑀦𑀬𑀺𑀤𑀁 𑀲𑀼𑀓𑀭𑀁 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑀁 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑀁 𑀲𑀗𑁆𑀔𑀮𑀺𑀔𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀁. 𑀇𑀘𑁆𑀙𑀸𑀫𑀳𑀁, 𑀪𑀦𑁆𑀢𑁂, 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀼𑀁. 𑀧𑀩𑁆𑀩𑀸𑀚𑁂𑀢𑀼 𑀫𑀁, 𑀪𑀦𑁆𑀢𑁂, 𑀅𑀬𑁆𑀬𑁄 𑀫𑀳𑀸𑀓𑀘𑁆𑀘𑀸𑀦𑁄’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀲𑁄𑀡𑀁 𑀉𑀧𑀸𑀲𑀓𑀁 𑀓𑀼𑀝𑀺𑀓𑀡𑁆𑀡𑀁 𑀧𑀩𑁆𑀩𑀸𑀚𑁂𑀲𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁄 𑀅𑀧𑁆𑀧𑀪𑀺𑀓𑁆𑀔𑀼𑀓𑁄 𑀳𑁄𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀢𑀺𑀡𑁆𑀡𑀁 𑀯𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦 𑀢𑀢𑁄 𑀢𑀢𑁄 𑀤𑀲𑀯𑀕𑁆𑀕𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑁄𑀡𑀁 𑀉𑀧𑀲𑀫𑁆𑀧𑀸𑀤𑁂𑀲𑀺.

𑀲𑁄𑀡𑀓𑀼𑀝𑀺𑀓𑀡𑁆𑀡𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁧𑁫𑁮. 𑀫𑀳𑀸𑀓𑀘𑁆𑀘𑀸𑀦𑀲𑁆𑀲 𑀧𑀜𑁆𑀘𑀯𑀭𑀧𑀭𑀺𑀤𑀲𑁆𑀲𑀦𑀸

𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑁄𑀡𑀲𑁆𑀲 𑀯𑀲𑁆𑀲𑀁𑀯𑀼𑀝𑁆𑀞𑀲𑁆𑀲 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀲𑀼𑀢𑁄𑀬𑁂𑀯 𑀔𑁄 𑀫𑁂 𑀲𑁄 𑀪𑀕𑀯𑀸 𑀏𑀤𑀺𑀲𑁄 𑀘 𑀏𑀤𑀺𑀲𑁄 𑀘𑀸𑀢𑀺, 𑀦 𑀘 𑀫𑀬𑀸 𑀲𑀫𑁆𑀫𑀼𑀔𑀸 𑀤𑀺𑀝𑁆𑀞𑁄, 𑀕𑀘𑁆𑀙𑁂𑀬𑁆𑀬𑀸𑀳𑀁 𑀢𑀁 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁, 𑀲𑀘𑁂 𑀫𑀁 𑀉𑀧𑀚𑁆𑀛𑀸𑀬𑁄 𑀅𑀦𑀼𑀚𑀸𑀦𑁂𑀬𑁆𑀬𑀸’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑁄𑀡𑁄 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀘𑁆𑀘𑀸𑀦𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀲𑁄𑀡𑁄 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀘𑁆𑀘𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀇𑀥 𑀫𑀬𑁆𑀳𑀁, 𑀪𑀦𑁆𑀢𑁂, 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘𑀲𑀼𑀢𑁄 𑀬𑁂𑀯 𑀔𑁄 𑀫𑁂 𑀲𑁄 𑀪𑀕𑀯𑀸 𑀏𑀤𑀺𑀲𑁄 𑀘 𑀏𑀤𑀺𑀲𑁄 𑀘𑀸𑀢𑀺, 𑀦 𑀘 𑀫𑀬𑀸 𑀲𑀫𑁆𑀫𑀼𑀔𑀸 𑀤𑀺𑀝𑁆𑀞𑁄, 𑀕𑀘𑁆𑀙𑁂𑀬𑁆𑀬𑀸𑀳𑀁 𑀢𑀁 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁, 𑀲𑀘𑁂 𑀫𑀁 𑀉𑀧𑀚𑁆𑀛𑀸𑀬𑁄 𑀅𑀦𑀼𑀚𑀸𑀦𑁂𑀬𑁆𑀬𑀸’𑀢𑀺; 𑀕𑀘𑁆𑀙𑁂𑀬𑁆𑀬𑀸𑀳𑀁, 𑀪𑀦𑁆𑀢𑁂, 𑀢𑀁 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁, 𑀲𑀘𑁂 𑀫𑀁 𑀉𑀧𑀚𑁆𑀛𑀸𑀬𑁄 𑀅𑀦𑀼𑀚𑀸𑀦𑀸𑀢𑀻’’𑀢𑀺. ‘‘𑀲𑀸𑀥𑀼 𑀲𑀸𑀥𑀼, 𑀲𑁄𑀡. 𑀕𑀘𑁆𑀙 𑀢𑁆𑀯𑀁, 𑀲𑁄𑀡, 𑀢𑀁 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁. 𑀤𑀓𑁆𑀔𑀺𑀲𑁆𑀲𑀲𑀺 𑀢𑁆𑀯𑀁, 𑀲𑁄𑀡, 𑀢𑀁 𑀪𑀕𑀯𑀦𑁆𑀢𑀁 𑀧𑀸𑀲𑀸𑀤𑀺𑀓𑀁 𑀧𑀲𑀸𑀤𑀦𑀻𑀬𑀁 𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑀁 𑀲𑀦𑁆𑀢𑀫𑀸𑀦𑀲𑀁 𑀉𑀢𑁆𑀢𑀫𑀤𑀫𑀣𑀲𑀫𑀣𑀁 𑀅𑀫𑀦𑀼𑀧𑁆𑀧𑀢𑁆𑀢𑀁 𑀤𑀦𑁆𑀢𑀁 𑀕𑀼𑀢𑁆𑀢𑀁 𑀬𑀢𑀺𑀦𑁆𑀤𑁆𑀭𑀺𑀬𑀁 𑀦𑀸𑀕𑀁. 𑀢𑁂𑀦 𑀳𑀺 𑀢𑁆𑀯𑀁, 𑀲𑁄𑀡, 𑀫𑀫 𑀯𑀘𑀦𑁂𑀦 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤 𑁋 ‘𑀉𑀧𑀚𑁆𑀛𑀸𑀬𑁄 𑀫𑁂, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀻’’’𑀢𑀺. 𑀏𑀯𑀜𑁆𑀘 𑀯𑀤𑁂𑀳𑀺 𑁋 ‘‘𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁄, 𑀪𑀦𑁆𑀢𑁂, 𑀅𑀧𑁆𑀧𑀪𑀺𑀓𑁆𑀔𑀼𑀓𑁄, 𑀢𑀺𑀡𑁆𑀡𑀁 𑀫𑁂 𑀯𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦 𑀢𑀢𑁄 𑀢𑀢𑁄 𑀤𑀲𑀯𑀕𑁆𑀕𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀉𑀧𑀲𑀫𑁆𑀧𑀤𑀁 𑀅𑀮𑀢𑁆𑀣𑀁; 𑀅𑀧𑁆𑀧𑁂𑀯 𑀦𑀸𑀫 𑀪𑀕𑀯𑀸 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁂 𑀅𑀧𑁆𑀧𑀢𑀭𑁂𑀦 𑀕𑀡𑁂𑀦 𑀉𑀧𑀲𑀫𑁆𑀧𑀤𑀁 𑀅𑀦𑀼𑀚𑀸𑀦𑁂𑀬𑁆𑀬. 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁂, 𑀪𑀦𑁆𑀢𑁂, 𑀓𑀡𑁆𑀳𑀼𑀢𑁆𑀢𑀭𑀸 𑀪𑀽𑀫𑀺 𑀔𑀭𑀸 𑀕𑁄𑀓𑀡𑁆𑀝𑀓𑀳𑀢𑀸; 𑀅𑀧𑁆𑀧𑁂𑀯 𑀦𑀸𑀫 𑀪𑀕𑀯𑀸 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁂 𑀕𑀼𑀡𑀗𑁆𑀕𑀼𑀡𑀽𑀧𑀸𑀳𑀦𑀁 𑀅𑀦𑀼𑀚𑀸𑀦𑁂𑀬𑁆𑀬. 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁂, 𑀪𑀦𑁆𑀢𑁂, 𑀦𑀳𑀸𑀦𑀕𑀭𑀼𑀓𑀸 𑀫𑀦𑀼𑀲𑁆𑀲𑀸 𑀉𑀤𑀓𑀲𑀼𑀤𑁆𑀥𑀺𑀓𑀸; 𑀅𑀧𑁆𑀧𑁂𑀯 𑀦𑀸𑀫 𑀪𑀕𑀯𑀸 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁂 𑀥𑀼𑀯𑀦𑀳𑀸𑀦𑀁 𑀅𑀦𑀼𑀚𑀸𑀦𑁂𑀬𑁆𑀬. 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁂, 𑀪𑀦𑁆𑀢𑁂, 𑀘𑀫𑁆𑀫𑀸𑀦𑀺 𑀅𑀢𑁆𑀣𑀭𑀡𑀸𑀦𑀺, 𑀏𑀴𑀓𑀘𑀫𑁆𑀫𑀁 𑀅𑀚𑀘𑀫𑁆𑀫𑀁 𑀫𑀺𑀕𑀘𑀫𑁆𑀫𑀁. 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀫𑀚𑁆𑀛𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀏𑀭𑀕𑀽 𑀫𑁄𑀭𑀕𑀽 𑀫𑀚𑁆𑀚𑀸𑀭𑀽 [𑀫𑀚𑁆𑀛𑀸𑀭𑀽 (𑀓.)] 𑀚𑀦𑁆𑀢𑀽, 𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂, 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁂 𑀘𑀫𑁆𑀫𑀸𑀦𑀺 𑀅𑀢𑁆𑀣𑀭𑀡𑀸𑀦𑀺, 𑀏𑀴𑀓𑀘𑀫𑁆𑀫𑀁 𑀅𑀚𑀘𑀫𑁆𑀫𑀁 𑀫𑀺𑀕𑀘𑀫𑁆𑀫𑀁; 𑀅𑀧𑁆𑀧𑁂𑀯 𑀦𑀸𑀫 𑀪𑀕𑀯𑀸 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁂 𑀘𑀫𑁆𑀫𑀸𑀦𑀺 𑀅𑀢𑁆𑀣𑀭𑀡𑀸𑀦𑀺 𑀅𑀦𑀼𑀚𑀸𑀦𑁂𑀬𑁆𑀬, 𑀏𑀴𑀓𑀘𑀫𑁆𑀫𑀁 𑀅𑀚𑀘𑀫𑁆𑀫𑀁 𑀫𑀺𑀕𑀘𑀫𑁆𑀫𑀁. 𑀏𑀢𑀭𑀳𑀺, 𑀪𑀦𑁆𑀢𑁂, 𑀫𑀦𑀼𑀲𑁆𑀲𑀸 𑀦𑀺𑀲𑁆𑀲𑀻𑀫𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀘𑀻𑀯𑀭𑀁 𑀤𑁂𑀦𑁆𑀢𑀺 𑁋 ‘𑀇𑀫𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑁂𑀫𑀸’’’𑀢𑀺. 𑀢𑁂 𑀆𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀦𑁆𑀢𑀺 𑁋 ‘𑀇𑀢𑁆𑀣𑀦𑁆𑀦𑀸𑀫𑁂𑀳𑀺 𑀢𑁂, 𑀆𑀯𑀼𑀲𑁄, 𑀫𑀦𑀼𑀲𑁆𑀲𑁂𑀳𑀺 𑀘𑀻𑀯𑀭𑀁 𑀤𑀺𑀦𑁆𑀦’𑀦𑁆𑀢𑀺 𑀢𑁂 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸 𑀦 𑀲𑀸𑀤𑀺𑀬𑀦𑁆𑀢𑀺 𑁋 ‘𑀫𑀸 𑀦𑁄 𑀦𑀺𑀲𑁆𑀲𑀕𑁆𑀕𑀺𑀬𑀁 𑀅𑀳𑁄𑀲𑀻’𑀢𑀺; 𑀅𑀧𑁆𑀧𑁂𑀯 𑀦𑀸𑀫 𑀪𑀕𑀯𑀸 𑀘𑀻𑀯𑀭𑁂 𑀧𑀭𑀺𑀬𑀸𑀬𑀁 𑀆𑀘𑀺𑀓𑁆𑀔𑁂𑀬𑁆𑀬𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀲𑁄𑀡𑁄 𑀆𑀬𑀲𑁆𑀫𑀢𑁄 𑀫𑀳𑀸𑀓𑀘𑁆𑀘𑀸𑀦𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀘𑁆𑀘𑀸𑀦𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀲𑁂𑀦𑀸𑀲𑀦𑀁 𑀲𑀁𑀲𑀸𑀫𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀲𑀸𑀯𑀢𑁆𑀣𑀺 𑀢𑁂𑀦 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀬𑁂𑀦 𑀲𑀸𑀯𑀢𑁆𑀣𑀺 𑀚𑁂𑀢𑀯𑀦𑀁 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀇𑀫𑀲𑁆𑀲, 𑀆𑀦𑀦𑁆𑀤, 𑀆𑀕𑀦𑁆𑀢𑀼𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑁂𑀦𑀸𑀲𑀦𑀁 𑀧𑀜𑁆𑀜𑀸𑀧𑁂𑀳𑀻’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑁋 ‘‘𑀬𑀲𑁆𑀲 𑀔𑁄 𑀫𑀁 𑀪𑀕𑀯𑀸 𑀆𑀡𑀸𑀧𑁂𑀢𑀺, ‘𑀇𑀫𑀲𑁆𑀲, 𑀆𑀦𑀦𑁆𑀤, 𑀆𑀕𑀦𑁆𑀢𑀼𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑁂𑀦𑀸𑀲𑀦𑀁 𑀧𑀜𑁆𑀜𑀸𑀧𑁂𑀳𑀻’𑀢𑀺, 𑀇𑀘𑁆𑀙𑀢𑀺 𑀪𑀕𑀯𑀸 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀏𑀓𑀯𑀺𑀳𑀸𑀭𑁂 𑀯𑀢𑁆𑀣𑀼𑀁, 𑀇𑀘𑁆𑀙𑀢𑀺 𑀪𑀕𑀯𑀸 𑀆𑀬𑀲𑁆𑀫𑀢𑀸 𑀲𑁄𑀡𑁂𑀦 𑀲𑀤𑁆𑀥𑀺𑀁 𑀏𑀓𑀯𑀺𑀳𑀸𑀭𑁂 𑀯𑀢𑁆𑀣𑀼’’𑀦𑁆𑀢𑀺 𑁋 𑀬𑀲𑁆𑀫𑀺𑀁 𑀯𑀺𑀳𑀸𑀭𑁂 𑀪𑀕𑀯𑀸 𑀯𑀺𑀳𑀭𑀢𑀺 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀆𑀬𑀲𑁆𑀫𑀢𑁄 𑀲𑁄𑀡𑀲𑁆𑀲 𑀲𑁂𑀦𑀸𑀲𑀦𑀁 𑀧𑀜𑁆𑀜𑀸𑀧𑁂𑀲𑀺.

𑁨𑁫𑁮. 𑀅𑀣 𑀔𑁄 𑀪𑀕𑀯𑀸 𑀩𑀳𑀼𑀤𑁂𑀯 𑀭𑀢𑁆𑀢𑀺𑀁 𑀅𑀚𑁆𑀛𑁄𑀓𑀸𑀲𑁂 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀯𑀺𑀳𑀸𑀭𑀁 𑀧𑀸𑀯𑀺𑀲𑀺. 𑀆𑀬𑀲𑁆𑀫𑀸𑀧𑀺 𑀔𑁄 𑀲𑁄𑀡𑁄 𑀩𑀳𑀼𑀤𑁂𑀯 𑀭𑀢𑁆𑀢𑀺𑀁 𑀅𑀚𑁆𑀛𑁄𑀓𑀸𑀲𑁂 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀯𑀺𑀳𑀸𑀭𑀁 𑀧𑀸𑀯𑀺𑀲𑀺. 𑀅𑀣 𑀔𑁄 𑀪𑀕𑀯𑀸 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀆𑀬𑀲𑁆𑀫𑀦𑁆𑀢𑀁 𑀲𑁄𑀡𑀁 𑀅𑀚𑁆𑀛𑁂𑀲𑀺 𑁋 ‘‘𑀧𑀝𑀺𑀪𑀸𑀢𑀼 𑀢𑀁, 𑀪𑀺𑀓𑁆𑀔𑀼, 𑀥𑀫𑁆𑀫𑁄 𑀪𑀸𑀲𑀺𑀢𑀼’’𑀦𑁆𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀲𑁄𑀡𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀲𑀩𑁆𑀩𑀸𑀦𑁂𑀯 𑀅𑀝𑁆𑀞𑀓𑀯𑀕𑁆𑀕𑀺𑀓𑀸𑀦𑀺 𑀲𑀭𑁂𑀦 𑀅𑀪𑀸𑀲𑀺. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀢𑁄 𑀲𑁄𑀡𑀲𑁆𑀲 𑀲𑀭𑀪𑀜𑁆𑀜𑀧𑀭𑀺𑀬𑁄𑀲𑀸𑀦𑁂 𑀅𑀩𑁆𑀪𑀸𑀦𑀼𑀫𑁄𑀤𑀺 𑁋 ‘‘𑀲𑀸𑀥𑀼, 𑀲𑀸𑀥𑀼, 𑀪𑀺𑀓𑁆𑀔𑀼. 𑀲𑀼𑀕𑁆𑀕𑀳𑀺𑀢𑀸𑀦𑀺 𑀔𑁄 𑀢𑁂, 𑀪𑀺𑀓𑁆𑀔𑀼, 𑀅𑀝𑁆𑀞𑀓𑀯𑀕𑁆𑀕𑀺𑀓𑀸𑀦𑀺, 𑀲𑀼𑀫𑀦𑀲𑀺𑀓𑀢𑀸𑀦𑀺 𑀲𑀽𑀧𑀥𑀸𑀭𑀺𑀢𑀸𑀦𑀺. 𑀓𑀮𑁆𑀬𑀸𑀡𑀺𑀬𑀸𑀧𑀺 𑀯𑀸𑀘𑀸𑀬 𑀲𑀫𑀦𑁆𑀦𑀸𑀕𑀢𑁄, 𑀯𑀺𑀲𑁆𑀲𑀝𑁆𑀞𑀸𑀬, 𑀅𑀦𑁂𑀮𑀕𑀮𑀸𑀬 [𑀅𑀦𑁂𑀴𑀕𑀮𑀸𑀬 (𑀓.)], 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀺𑀬𑀸. 𑀓𑀢𑀺𑀯𑀲𑁆𑀲𑁄𑀲𑀺 𑀢𑁆𑀯𑀁, 𑀪𑀺𑀓𑁆𑀔𑀽’’𑀢𑀺? ‘‘𑀏𑀓𑀯𑀲𑁆𑀲𑁄𑀳𑀁, 𑀪𑀕𑀯𑀸’’𑀢𑀺. ‘‘𑀓𑀺𑀲𑁆𑀲 𑀧𑀦 𑀢𑁆𑀯𑀁, 𑀪𑀺𑀓𑁆𑀔𑀼, 𑀏𑀯𑀁 𑀘𑀺𑀭𑀁 𑀅𑀓𑀸𑀲𑀻’’𑀢𑀺? ‘‘𑀘𑀺𑀭𑀁 𑀤𑀺𑀝𑁆𑀞𑁄 𑀫𑁂, 𑀪𑀦𑁆𑀢𑁂, 𑀓𑀸𑀫𑁂𑀲𑀼 𑀆𑀤𑀻𑀦𑀯𑁄, 𑀅𑀧𑀺 𑀘 𑀲𑀫𑁆𑀩𑀸𑀥𑀸 𑀖𑀭𑀸𑀯𑀸𑀲𑀸 𑀩𑀳𑀼𑀓𑀺𑀘𑁆𑀘𑀸 𑀩𑀳𑀼𑀓𑀭𑀡𑀻𑀬𑀸’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

[𑀉𑀤𑀸. 𑁪𑁬 𑀉𑀤𑀸𑀦𑁂𑀧𑀺] ‘‘𑀤𑀺𑀲𑁆𑀯𑀸 𑀆𑀤𑀻𑀦𑀯𑀁 𑀮𑁄𑀓𑁂, 𑀜𑀢𑁆𑀯𑀸 𑀥𑀫𑁆𑀫𑀁 𑀦𑀺𑀭𑀽𑀧𑀥𑀺𑀁;

𑀅𑀭𑀺𑀬𑁄 𑀦 𑀭𑀫𑀢𑀻 𑀧𑀸𑀧𑁂, 𑀧𑀸𑀧𑁂 𑀦 𑀭𑀫𑀢𑀻 𑀲𑀼𑀘𑀻’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀲𑁄𑀡𑁄 𑁋 𑀧𑀝𑀺𑀲𑀫𑁆𑀫𑁄𑀤𑀢𑀺 𑀔𑁄 𑀫𑀁 𑀪𑀕𑀯𑀸, 𑀅𑀬𑀁 𑀔𑁆𑀯𑀲𑁆𑀲 𑀓𑀸𑀮𑁄 𑀬𑀁 𑀫𑁂 𑀉𑀧𑀚𑁆𑀛𑀸𑀬𑁄 𑀧𑀭𑀺𑀤𑀲𑁆𑀲𑀻𑀢𑀺 𑁋 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀉𑀧𑀚𑁆𑀛𑀸𑀬𑁄 𑀫𑁂, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀺, 𑀏𑀯𑀜𑁆𑀘 𑀯𑀤𑁂𑀢𑀺 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁄, 𑀪𑀦𑁆𑀢𑁂, 𑀅𑀧𑁆𑀧𑀪𑀺𑀓𑁆𑀔𑀼𑀓𑁄. 𑀢𑀺𑀡𑁆𑀡𑀁 𑀫𑁂 𑀯𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦 𑀢𑀢𑁄 𑀢𑀢𑁄 𑀤𑀲𑀯𑀕𑁆𑀕𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀉𑀧𑀲𑀫𑁆𑀧𑀤𑀁 𑀅𑀮𑀢𑁆𑀣𑀁, 𑀅𑀧𑁆𑀧𑁂𑀯 𑀦𑀸𑀫 𑀪𑀕𑀯𑀸 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁂 𑀅𑀧𑁆𑀧𑀢𑀭𑁂𑀦 𑀕𑀡𑁂𑀦 𑀉𑀧𑀲𑀫𑁆𑀧𑀤𑀁 𑀅𑀦𑀼𑀚𑀸𑀦𑁂𑀬𑁆𑀬. 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁂, 𑀪𑀦𑁆𑀢𑁂, 𑀓𑀡𑁆𑀳𑀼𑀢𑁆𑀢𑀭𑀸 𑀪𑀽𑀫𑀺 𑀔𑀭𑀸 𑀕𑁄𑀓𑀡𑁆𑀝𑀓𑀳𑀢𑀸; 𑀅𑀧𑁆𑀧𑁂𑀯 𑀦𑀸𑀫 𑀪𑀕𑀯𑀸 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁂 𑀕𑀼𑀡𑀗𑁆𑀕𑀼𑀡𑀽𑀧𑀸𑀳𑀦𑀁 𑀅𑀦𑀼𑀚𑀸𑀦𑁂𑀬𑁆𑀬. 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁂, 𑀪𑀦𑁆𑀢𑁂, 𑀦𑀳𑀸𑀦𑀕𑀭𑀼𑀓𑀸 𑀫𑀦𑀼𑀲𑁆𑀲𑀸 𑀉𑀤𑀓𑀲𑀼𑀤𑁆𑀥𑀺𑀓𑀸, 𑀅𑀧𑁆𑀧𑁂𑀯 𑀦𑀸𑀫 𑀪𑀕𑀯𑀸 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁂 𑀥𑀼𑀯𑀦𑀳𑀸𑀦𑀁 𑀅𑀦𑀼𑀚𑀸𑀦𑁂𑀬𑁆𑀬. 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁂, 𑀪𑀦𑁆𑀢𑁂, 𑀘𑀫𑁆𑀫𑀸𑀦𑀺 𑀅𑀢𑁆𑀣𑀭𑀡𑀸𑀦𑀺, 𑀏𑀴𑀓𑀘𑀫𑁆𑀫𑀁 𑀅𑀚𑀘𑀫𑁆𑀫𑀁 𑀫𑀺𑀕𑀘𑀫𑁆𑀫𑀁. 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀫𑀚𑁆𑀛𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀏𑀭𑀕𑀽 𑀫𑁄𑀭𑀕𑀽 𑀫𑀚𑁆𑀚𑀸𑀭𑀽 𑀚𑀦𑁆𑀢𑀽, 𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂, 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁂 𑀘𑀫𑁆𑀫𑀸𑀦𑀺 𑀅𑀢𑁆𑀣𑀭𑀡𑀸𑀦𑀺, 𑀏𑀴𑀓𑀘𑀫𑁆𑀫𑀁 𑀅𑀚𑀘𑀫𑁆𑀫𑀁 𑀫𑀺𑀕𑀘𑀫𑁆𑀫𑀁; 𑀅𑀧𑁆𑀧𑁂𑀯 𑀦𑀸𑀫 𑀪𑀕𑀯𑀸 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁂 𑀘𑀫𑁆𑀫𑀸𑀦𑀺 𑀅𑀢𑁆𑀣𑀭𑀡𑀸𑀦𑀺 𑀅𑀦𑀼𑀚𑀸𑀦𑁂𑀬𑁆𑀬, 𑀏𑀴𑀓𑀘𑀫𑁆𑀫𑀁 𑀅𑀚𑀘𑀫𑁆𑀫𑀁 𑀫𑀺𑀕𑀘𑀫𑁆𑀫𑀁. 𑀏𑀢𑀭𑀳𑀺, 𑀪𑀦𑁆𑀢𑁂, 𑀫𑀦𑀼𑀲𑁆𑀲𑀸 𑀦𑀺𑀲𑁆𑀲𑀻𑀫𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀘𑀻𑀯𑀭𑀁 𑀤𑁂𑀦𑁆𑀢𑀺 𑁋 ‘𑀇𑀫𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑁂𑀫𑀸’𑀢𑀺. 𑀢𑁂 𑀆𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀦𑁆𑀢𑀺 𑁋 ‘𑀇𑀢𑁆𑀣𑀦𑁆𑀦𑀸𑀫𑁂𑀳𑀺 𑀢𑁂, 𑀆𑀯𑀼𑀲𑁄, 𑀫𑀦𑀼𑀲𑁆𑀲𑁂𑀳𑀺 𑀘𑀻𑀯𑀭𑀁 𑀤𑀺𑀦𑁆𑀦’𑀦𑁆𑀢𑀺. 𑀢𑁂 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸 𑀦 𑀲𑀸𑀤𑀺𑀬𑀦𑁆𑀢𑀺 𑁋 ‘𑀫𑀸 𑀦𑁄 𑀦𑀺𑀲𑁆𑀲𑀕𑁆𑀕𑀺𑀬𑀁 𑀅𑀳𑁄𑀲𑀻’𑀢𑀺; 𑀅𑀧𑁆𑀧𑁂𑀯 𑀦𑀸𑀫 𑀪𑀕𑀯𑀸 𑀘𑀻𑀯𑀭𑁂 𑀧𑀭𑀺𑀬𑀸𑀬𑀁 𑀆𑀘𑀺𑀓𑁆𑀔𑁂𑀬𑁆𑀬𑀸’’𑀢𑀺.

𑁨𑁫𑁯. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁄, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀪𑀺𑀓𑁆𑀔𑀼𑀓𑁄. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀯𑀺𑀦𑀬𑀥𑀭𑀧𑀜𑁆𑀘𑀫𑁂𑀦 𑀕𑀡𑁂𑀦 𑀉𑀧𑀲𑀫𑁆𑀧𑀤𑀁. 𑀢𑀢𑁆𑀭𑀺𑀫𑁂 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸 𑁋 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀕𑀚𑀗𑁆𑀕𑀮𑀁 [𑀓𑀚𑀗𑁆𑀕𑀮𑀁 (𑀲𑀻. 𑀲𑁆𑀬𑀸.)] 𑀦𑀸𑀫 𑀦𑀺𑀕𑀫𑁄, 𑀢𑀲𑁆𑀲 𑀧𑀭𑁂𑀦 𑀫𑀳𑀸𑀲𑀸𑀮𑀸, 𑀢𑀢𑁄 𑀧𑀭𑀸 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀑𑀭𑀢𑁄 𑀫𑀚𑁆𑀛𑁂; 𑀧𑀼𑀭𑀢𑁆𑀣𑀺𑀫𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀲𑀮𑁆𑀮𑀯𑀢𑀻 [𑀲𑀮𑀮𑀯𑀢𑀻 (𑀲𑀻.)] 𑀦𑀸𑀫 𑀦𑀤𑀻, 𑀢𑀢𑁄 𑀧𑀭𑀸 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀑𑀭𑀢𑁄 𑀫𑀚𑁆𑀛𑁂; 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀲𑁂𑀢𑀓𑀡𑁆𑀡𑀺𑀓𑀁 𑀦𑀸𑀫 𑀦𑀺𑀕𑀫𑁄, 𑀢𑀢𑁄 𑀧𑀭𑀸 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀑𑀭𑀢𑁄 𑀫𑀚𑁆𑀛𑁂; 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬 𑀣𑀽𑀡𑀁 𑀦𑀸𑀫 𑀩𑁆𑀭𑀸𑀳𑁆𑀫𑀡𑀕𑀸𑀫𑁄, 𑀢𑀢𑁄 𑀧𑀭𑀸 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀑𑀭𑀢𑁄 𑀫𑀚𑁆𑀛𑁂; 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀉𑀲𑀻𑀭𑀤𑁆𑀥𑀚𑁄 𑀦𑀸𑀫 𑀧𑀩𑁆𑀩𑀢𑁄, 𑀢𑀢𑁄 𑀧𑀭𑀸 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀑𑀭𑀢𑁄 𑀫𑀚𑁆𑀛𑁂. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀏𑀯𑀭𑀽𑀧𑁂𑀲𑀼 𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀯𑀺𑀦𑀬𑀥𑀭𑀧𑀜𑁆𑀘𑀫𑁂𑀦 𑀕𑀡𑁂𑀦 𑀉𑀧𑀲𑀫𑁆𑀧𑀤𑀁. 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁂, 𑀪𑀺𑀓𑁆𑀔𑀯𑁂, 𑀓𑀡𑁆𑀳𑀼𑀢𑁆𑀢𑀭𑀸 𑀪𑀽𑀫𑀺 𑀔𑀭𑀸 𑀕𑁄𑀓𑀡𑁆𑀝𑀓𑀳𑀢𑀸. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀕𑀼𑀡𑀗𑁆𑀕𑀼𑀡𑀽𑀧𑀸𑀳𑀦𑀁. 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁂, 𑀪𑀺𑀓𑁆𑀔𑀯𑁂, 𑀦𑀳𑀸𑀦𑀕𑀭𑀼𑀓𑀸 𑀫𑀦𑀼𑀲𑁆𑀲𑀸 𑀉𑀤𑀓𑀲𑀼𑀤𑁆𑀥𑀺𑀓𑀸. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀥𑀼𑀯𑀦𑀳𑀸𑀦𑀁. 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁂, 𑀪𑀺𑀓𑁆𑀔𑀯𑁂, 𑀘𑀫𑁆𑀫𑀸𑀦𑀺 𑀅𑀢𑁆𑀣𑀭𑀡𑀸𑀦𑀺, 𑀏𑀴𑀓𑀘𑀫𑁆𑀫𑀁 𑀅𑀚𑀘𑀫𑁆𑀫𑀁 𑀫𑀺𑀕𑀘𑀫𑁆𑀫𑀁. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀫𑀚𑁆𑀛𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀏𑀭𑀕𑀽 𑀫𑁄𑀭𑀕𑀽 𑀫𑀚𑁆𑀚𑀸𑀭𑀽 𑀚𑀦𑁆𑀢𑀽, 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁂 𑀘𑀫𑁆𑀫𑀸𑀦𑀺 𑀅𑀢𑁆𑀣𑀭𑀡𑀸𑀦𑀺, 𑀏𑀴𑀓𑀘𑀫𑁆𑀫𑀁 𑀅𑀚𑀘𑀫𑁆𑀫𑀁 𑀫𑀺𑀕𑀘𑀫𑁆𑀫𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀘𑀫𑁆𑀫𑀸𑀦𑀺 𑀅𑀢𑁆𑀣𑀭𑀡𑀸𑀦𑀺, 𑀏𑀴𑀓𑀘𑀫𑁆𑀫𑀁 𑀅𑀚𑀘𑀫𑁆𑀫𑀁 𑀫𑀺𑀕𑀘𑀫𑁆𑀫𑀁. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀫𑀦𑀼𑀲𑁆𑀲𑀸 𑀦𑀺𑀲𑁆𑀲𑀻𑀫𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀘𑀻𑀯𑀭𑀁 𑀤𑁂𑀦𑁆𑀢𑀺 𑁋 ‘𑀇𑀫𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑁂𑀫𑀸’𑀢𑀺. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀸𑀤𑀺𑀢𑀼𑀁, 𑀦 𑀢𑀸𑀯 𑀢𑀁 𑀕𑀡𑀦𑀽𑀧𑀕𑀁 𑀬𑀸𑀯 𑀦 𑀳𑀢𑁆𑀣𑀁 𑀕𑀘𑁆𑀙𑀢𑀻’’𑀢𑀺.

𑀫𑀳𑀸𑀓𑀘𑁆𑀘𑀸𑀦𑀲𑁆𑀲 𑀧𑀜𑁆𑀘𑀯𑀭𑀧𑀭𑀺𑀤𑀲𑁆𑀲𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀫𑁆𑀫𑀓𑁆𑀔𑀦𑁆𑀥𑀓𑁄 𑀧𑀜𑁆𑀘𑀫𑁄.

𑁧𑁫𑁯. 𑀢𑀲𑁆𑀲𑀼𑀤𑁆𑀤𑀸𑀦𑀁

𑀭𑀸𑀚𑀸 𑀘 𑀫𑀸𑀕𑀥𑁄 𑀲𑁄𑀡𑁄, 𑀅𑀲𑀻𑀢𑀺𑀲𑀳𑀲𑁆𑀲𑀺𑀲𑁆𑀲𑀭𑁄;

𑀲𑀸𑀕𑀢𑁄 𑀕𑀺𑀚𑁆𑀛𑀓𑀽𑀝𑀲𑁆𑀫𑀺𑀁, 𑀩𑀳𑀼𑀁 𑀤𑀲𑁆𑀲𑁂𑀢𑀺 𑀉𑀢𑁆𑀢𑀭𑀺𑀁.

𑀧𑀩𑁆𑀩𑀚𑁆𑀚𑀸𑀭𑀤𑁆𑀥𑀪𑀺𑀚𑁆𑀚𑀺𑀁𑀲𑀼, 𑀯𑀻𑀡𑀁 𑀏𑀓𑀧𑀮𑀸𑀲𑀺𑀓𑀁;

𑀦𑀻𑀮𑀸 𑀧𑀻𑀢𑀸 𑀮𑁄𑀳𑀺𑀢𑀺𑀓𑀸, 𑀫𑀜𑁆𑀚𑀺𑀝𑁆𑀞𑀸 𑀓𑀡𑁆𑀳𑀫𑁂𑀯 𑀘.

𑀫𑀳𑀸𑀭𑀗𑁆𑀕𑀫𑀳𑀸𑀦𑀸𑀫𑀸, 𑀯𑀤𑁆𑀥𑀺𑀓𑀸 𑀘 𑀧𑀝𑀺𑀓𑁆𑀔𑀺𑀧𑀺;

𑀔𑀮𑁆𑀮𑀓𑀸 𑀧𑀼𑀝𑀧𑀸𑀮𑀺 𑀘, 𑀢𑀽𑀮𑀢𑀺𑀢𑁆𑀢𑀺𑀭𑀫𑁂𑀡𑁆𑀟𑀚𑀸.

𑀯𑀺𑀘𑁆𑀙𑀺𑀓𑀸 𑀫𑁄𑀭𑀘𑀺𑀢𑁆𑀭𑀸 𑀘, 𑀲𑀻𑀳𑀩𑁆𑀬𑀕𑁆𑀖𑀸 𑀘 𑀤𑀻𑀧𑀺𑀓𑀸;

𑀅𑀚𑀺𑀦𑀼𑀤𑁆𑀤𑀸 𑀫𑀚𑁆𑀚𑀸𑀭𑀻 𑀘, 𑀓𑀸𑀴𑀮𑀼𑀯𑀓𑀧𑀭𑀺𑀓𑁆𑀔𑀝𑀸.

𑀨𑀮𑀺𑀢𑀼𑀧𑀸𑀳𑀦𑀸 𑀔𑀺𑀮𑀸, 𑀥𑁄𑀢𑀔𑀸𑀡𑀼𑀔𑀝𑀔𑀝𑀸;

𑀢𑀸𑀮𑀯𑁂𑀴𑀼𑀢𑀺𑀡𑀁 𑀘𑁂𑀯, 𑀫𑀼𑀜𑁆𑀚𑀧𑀩𑁆𑀩𑀚𑀳𑀺𑀦𑁆𑀢𑀸𑀮𑀸.

𑀓𑀫𑀮𑀓𑀫𑁆𑀩𑀮𑀲𑁄𑀯𑀡𑁆𑀡𑀸, 𑀭𑀽𑀧𑀺𑀓𑀸 𑀫𑀡𑀺𑀯𑁂𑀴𑀼𑀭𑀺𑀬𑀸;

𑀨𑀮𑀺𑀓𑀸 𑀓𑀁𑀲𑀓𑀸𑀘𑀸 𑀘, 𑀢𑀺𑀧𑀼𑀲𑀻𑀲𑀜𑁆𑀘 𑀢𑀫𑁆𑀩𑀓𑀸.

𑀕𑀸𑀯𑀻 𑀬𑀸𑀦𑀁 𑀕𑀺𑀮𑀸𑀦𑁄 𑀘, 𑀧𑀼𑀭𑀺𑀲𑀸𑀬𑀼𑀢𑁆𑀢𑀲𑀺𑀯𑀺𑀓𑀸;

𑀲𑀬𑀦𑀸𑀦𑀺 𑀫𑀳𑀸𑀘𑀫𑁆𑀫𑀸, 𑀕𑁄𑀘𑀫𑁆𑀫𑁂𑀳𑀺 𑀘 𑀧𑀸𑀧𑀓𑁄.

𑀕𑀺𑀳𑀻𑀦𑀁 𑀘𑀫𑁆𑀫𑀯𑀤𑁆𑀥𑁂𑀳𑀺, 𑀧𑀯𑀺𑀲𑀦𑁆𑀢𑀺 𑀕𑀺𑀮𑀸𑀬𑀦𑁄;

𑀫𑀳𑀸𑀓𑀘𑁆𑀘𑀸𑀬𑀦𑁄 𑀲𑁄𑀡𑁄, 𑀲𑀭𑁂𑀦 𑀅𑀝𑁆𑀞𑀓𑀯𑀕𑁆𑀕𑀺𑀓𑀁.

𑀉𑀧𑀲𑀫𑁆𑀧𑀤𑀁 𑀧𑀜𑁆𑀘𑀳𑀺, 𑀕𑀼𑀡𑀗𑁆𑀕𑀼𑀡𑀸 𑀥𑀼𑀯𑀲𑀺𑀦𑀸;

𑀘𑀫𑁆𑀫𑀢𑁆𑀣𑀭𑀡𑀸𑀦𑀼𑀜𑁆𑀜𑀸𑀲𑀺, 𑀦 𑀢𑀸𑀯 𑀕𑀡𑀦𑀽𑀧𑀕𑀁;

𑀅𑀤𑀸𑀲𑀺 𑀫𑁂 𑀯𑀭𑁂 𑀧𑀜𑁆𑀘, 𑀲𑁄𑀡𑀢𑁆𑀣𑁂𑀭𑀲𑁆𑀲 𑀦𑀸𑀬𑀓𑁄𑀢𑀺.

𑀇𑀫𑀫𑁆𑀳𑀺 𑀔𑀦𑁆𑀥𑀓𑁂 𑀯𑀢𑁆𑀣𑀽𑀦𑀺 𑀢𑁂𑀲𑀝𑁆𑀞𑀺.

𑀘𑀫𑁆𑀫𑀓𑁆𑀔𑀦𑁆𑀥𑀓𑁄 𑀦𑀺𑀝𑁆𑀞𑀺𑀢𑁄.