𑁮. 𑀅𑀥𑀺𑀓𑀭𑀡𑀁

𑁨𑁧𑁫. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 (𑀪𑀺𑀓𑁆𑀔𑀽𑀧𑀺 𑀪𑀺𑀓𑁆𑀔𑀽𑀳𑀺 𑀯𑀺𑀯𑀤𑀦𑁆𑀢𑀺,) [( ) 𑀦𑀢𑁆𑀣𑀺 (𑀲𑀻. 𑀲𑁆𑀬𑀸. 𑀓𑀁.)] 𑀪𑀺𑀓𑁆𑀔𑀽𑀧𑀺 𑀪𑀺𑀓𑁆𑀔𑀼𑀦𑀻𑀳𑀺 𑀯𑀺𑀯𑀤𑀦𑁆𑀢𑀺, 𑀪𑀺𑀓𑁆𑀔𑀼𑀦𑀺𑀬𑁄𑀧𑀺 𑀪𑀺𑀓𑁆𑀔𑀽𑀳𑀺 𑀯𑀺𑀯𑀤𑀦𑁆𑀢𑀺, 𑀙𑀦𑁆𑀦𑁄𑀧𑀺 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀦𑀻𑀦𑀁 𑀅𑀦𑀼𑀧𑀔𑀚𑁆𑀚 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀯𑀺𑀯𑀤𑀢𑀺, 𑀪𑀺𑀓𑁆𑀔𑀼𑀦𑀻𑀦𑀁 𑀧𑀓𑁆𑀔𑀁 𑀕𑀸𑀳𑁂𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀙𑀦𑁆𑀦𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀦𑀻𑀦𑀁 𑀅𑀦𑀼𑀧𑀔𑀚𑁆𑀚 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀯𑀺𑀯𑀤𑀺𑀲𑁆𑀲𑀢𑀺, 𑀪𑀺𑀓𑁆𑀔𑀼𑀦𑀻𑀦𑀁 𑀧𑀓𑁆𑀔𑀁 𑀕𑀸𑀳𑁂𑀲𑁆𑀲𑀢𑀻𑀢𑀺! 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂…𑀧𑁂… 𑀲𑀘𑁆𑀘𑀁 𑀪𑀕𑀯𑀸’’𑀢𑀺…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋

[𑀧𑀭𑀺. 𑁨𑁭𑁫] ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀥𑀺𑀓𑀭𑀡𑀸𑀦𑀺 𑁋 𑀯𑀺𑀯𑀸𑀤𑀸𑀥𑀺𑀓𑀭𑀡𑀁, 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁, 𑀆𑀧𑀢𑁆𑀢𑀸𑀥𑀺𑀓𑀭𑀡𑀁, 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 [𑀓𑀺𑀘𑁆𑀘𑀸𑀥𑀺𑀓𑀭𑀡𑀜𑁆𑀘 (𑀓.)].

‘‘𑀢𑀢𑁆𑀣 𑀓𑀢𑀫𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 [𑀧𑀭𑀺. 𑁩𑁧𑁪]? 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 [𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀁 (𑀓.)] 𑀯𑀺𑀯𑀤𑀦𑁆𑀢𑀺 𑁋 𑀥𑀫𑁆𑀫𑁄𑀢𑀺 𑀯𑀸 𑀅𑀥𑀫𑁆𑀫𑁄𑀢𑀺 𑀯𑀸, 𑀯𑀺𑀦𑀬𑁄𑀢𑀺 𑀯𑀸 𑀅𑀯𑀺𑀦𑀬𑁄𑀢𑀺 𑀯𑀸, 𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀯𑀸 𑀅𑀪𑀸𑀲𑀺𑀢𑀁 𑀅𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀯𑀸, 𑀆𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦𑀸𑀢𑀺 𑀯𑀸 𑀅𑀦𑀸𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦𑀸𑀢𑀺 𑀯𑀸, 𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀯𑀸 𑀅𑀧𑁆𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀯𑀸, 𑀆𑀧𑀢𑁆𑀢𑀻𑀢𑀺 𑀯𑀸 𑀅𑀦𑀸𑀧𑀢𑁆𑀢𑀻𑀢𑀺 𑀯𑀸, 𑀮𑀳𑀼𑀓𑀸 𑀆𑀧𑀢𑁆𑀢𑀻𑀢𑀺 𑀯𑀸 𑀕𑀭𑀼𑀓𑀸 𑀆𑀧𑀢𑁆𑀢𑀻𑀢𑀺 𑀯𑀸, 𑀲𑀸𑀯𑀲𑁂𑀲𑀸 𑀆𑀧𑀢𑁆𑀢𑀻𑀢𑀺 𑀯𑀸 𑀅𑀦𑀯𑀲𑁂𑀲𑀸 𑀆𑀧𑀢𑁆𑀢𑀻𑀢𑀺 𑀯𑀸, 𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀯𑀸 𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀯𑀸? 𑀬𑀁 𑀢𑀢𑁆𑀣 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀦𑀸𑀦𑀸𑀯𑀸𑀤𑁄 𑀅𑀜𑁆𑀜𑀣𑀸𑀯𑀸𑀤𑁄 𑀯𑀺𑀧𑀘𑁆𑀘𑀢𑀸𑀬 𑀯𑁄𑀳𑀸𑀭𑁄 𑀫𑁂𑀥𑀕𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀁.

‘‘𑀢𑀢𑁆𑀣 𑀓𑀢𑀫𑀁 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁? [𑀧𑀭𑀺. 𑁩𑁧𑁫] 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀁 𑀅𑀦𑀼𑀯𑀤𑀦𑁆𑀢𑀺 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀯𑀸 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀯𑀸 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀯𑀸 𑀆𑀚𑀻𑀯𑀯𑀺𑀧𑀢𑁆𑀢𑀺𑀬𑀸 𑀯𑀸. 𑀬𑁄 𑀢𑀢𑁆𑀣 𑀅𑀦𑀼𑀯𑀸𑀤𑁄 𑀅𑀦𑀼𑀯𑀤𑀦𑀸 𑀅𑀦𑀼𑀮𑁆𑀮𑀧𑀦𑀸 𑀅𑀦𑀼𑀪𑀡𑀦𑀸 𑀅𑀦𑀼𑀲𑀫𑁆𑀧𑀯𑀗𑁆𑀓𑀢𑀸 𑀅𑀩𑁆𑀪𑀼𑀲𑁆𑀲𑀳𑀦𑀢𑀸 𑀅𑀦𑀼𑀩𑀮𑀧𑁆𑀧𑀤𑀸𑀦𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁.

‘‘𑀢𑀢𑁆𑀣 𑀓𑀢𑀫𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑀁? 𑀧𑀜𑁆𑀘𑀧𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀆𑀧𑀢𑁆𑀢𑀸𑀥𑀺𑀓𑀭𑀡𑀁, 𑀲𑀢𑁆𑀢𑀧𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁.

‘‘𑀢𑀢𑁆𑀣 𑀓𑀢𑀫𑀁 𑀓𑀺𑀘𑁆𑀘𑀸𑀥𑀺𑀓𑀭𑀡𑀁? [𑀧𑀭𑀺. 𑁩𑁧𑁭] 𑀬𑀸 𑀲𑀗𑁆𑀖𑀲𑁆𑀲 𑀓𑀺𑀘𑁆𑀘𑀬𑀢𑀸, 𑀓𑀭𑀡𑀻𑀬𑀢𑀸, 𑀅𑀧𑀮𑁄𑀓𑀦𑀓𑀫𑁆𑀫𑀁, 𑀜𑀢𑁆𑀢𑀺𑀓𑀫𑁆𑀫𑀁, 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁, 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀓𑀺𑀘𑁆𑀘𑀸𑀥𑀺𑀓𑀭𑀡𑀁.

𑁨𑁧𑁬. ‘‘𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀓𑀺𑀁 𑀫𑀽𑀮𑀁? 𑀙 𑀯𑀺𑀯𑀸𑀤𑀫𑀽𑀮𑀸𑀦𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁. 𑀢𑀻𑀡𑀺𑀧𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁, 𑀢𑀻𑀡𑀺𑀧𑀺 𑀓𑀼𑀲𑀮𑀫𑀽𑀮𑀸𑀦𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁. [𑀧𑀭𑀺. 𑁨𑁭𑁨; 𑀅. 𑀦𑀺. 𑁨.𑁩𑁫-𑁩𑁬; 𑀫. 𑀦𑀺. 𑁩.𑁪𑁪] 𑀓𑀢𑀫𑀸𑀦𑀺 𑀙 𑀯𑀺𑀯𑀸𑀤𑀫𑀽𑀮𑀸𑀦𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁? 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑁄𑀥𑀦𑁄 𑀳𑁄𑀢𑀺 𑀉𑀧𑀦𑀸𑀳𑀻. 𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑁄𑀥𑀦𑁄 𑀳𑁄𑀢𑀺 𑀉𑀧𑀦𑀸𑀳𑀻, 𑀲𑁄 𑀲𑀢𑁆𑀣𑀭𑀺𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀥𑀫𑁆𑀫𑁂𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀲𑀗𑁆𑀖𑁂𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀲𑀺𑀓𑁆𑀔𑀸𑀬𑀧𑀺 𑀦 𑀧𑀭𑀺𑀧𑀽𑀭𑀓𑀸𑀭𑀻 𑀳𑁄𑀢𑀺. 𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀥𑀫𑁆𑀫𑁂𑀧𑀺…𑀧𑁂… 𑀲𑀗𑁆𑀖𑁂𑀧𑀺…𑀧𑁂… 𑀲𑀺𑀓𑁆𑀔𑀸𑀬𑀧𑀺 𑀦 𑀧𑀭𑀺𑀧𑀽𑀭𑀓𑀸𑀭𑀻, 𑀲𑁄 𑀲𑀗𑁆𑀖𑁂 𑀯𑀺𑀯𑀸𑀤𑀁 𑀚𑀦𑁂𑀢𑀺. 𑀬𑁄 𑀳𑁄𑀢𑀺 𑀯𑀺𑀯𑀸𑀤𑁄 𑀩𑀳𑀼𑀚𑀦𑀸𑀳𑀺𑀢𑀸𑀬 𑀩𑀳𑀼𑀚𑀦𑀸𑀲𑀼𑀔𑀸𑀬 𑀩𑀳𑀼𑀦𑁄 𑀚𑀦𑀲𑁆𑀲 𑀅𑀦𑀢𑁆𑀣𑀸𑀬 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀏𑀯𑀭𑀽𑀧𑀜𑁆𑀘𑁂 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀯𑀺𑀯𑀸𑀤𑀫𑀽𑀮𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀲𑀫𑀦𑀼𑀧𑀲𑁆𑀲𑁂𑀬𑁆𑀬𑀸𑀣, 𑀢𑀢𑁆𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀢𑀲𑁆𑀲𑁂𑀯 𑀧𑀸𑀧𑀓𑀲𑁆𑀲 𑀯𑀺𑀯𑀸𑀤𑀫𑀽𑀮𑀲𑁆𑀲 𑀧𑀳𑀸𑀦𑀸𑀬 𑀯𑀸𑀬𑀫𑁂𑀬𑁆𑀬𑀸𑀣. 𑀏𑀯𑀭𑀽𑀧𑀜𑁆𑀘𑁂 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀯𑀺𑀯𑀸𑀤𑀫𑀽𑀮𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀦 𑀲𑀫𑀦𑀼𑀧𑀲𑁆𑀲𑁂𑀬𑁆𑀬𑀸𑀣, 𑀢𑀢𑁆𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀢𑀲𑁆𑀲𑁂𑀯 𑀧𑀸𑀧𑀓𑀲𑁆𑀲 𑀯𑀺𑀯𑀸𑀤𑀫𑀽𑀮𑀲𑁆𑀲 𑀆𑀬𑀢𑀺𑀁 𑀅𑀦𑀯𑀲𑁆𑀲𑀯𑀸𑀬 𑀧𑀝𑀺𑀧𑀚𑁆𑀚𑁂𑀬𑁆𑀬𑀸𑀣. 𑀏𑀯𑀫𑁂𑀢𑀲𑁆𑀲 𑀧𑀸𑀧𑀓𑀲𑁆𑀲 𑀯𑀺𑀯𑀸𑀤𑀫𑀽𑀮𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺. 𑀏𑀯𑀫𑁂𑀢𑀲𑁆𑀲 𑀧𑀸𑀧𑀓𑀲𑁆𑀲 𑀯𑀺𑀯𑀸𑀤𑀫𑀽𑀮𑀲𑁆𑀲 𑀆𑀬𑀢𑀺𑀁 𑀅𑀦𑀯𑀲𑁆𑀲𑀯𑁄 𑀳𑁄𑀢𑀺.

[𑀧𑀭𑀺.𑁨𑁭𑁨] ‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀫𑀓𑁆𑀔𑀻 𑀳𑁄𑀢𑀺 𑀧𑀴𑀸𑀲𑀻…𑀧𑁂… 𑀇𑀲𑁆𑀲𑀼𑀓𑀻 𑀳𑁄𑀢𑀺 𑀫𑀘𑁆𑀙𑀭𑀻, 𑀲𑀞𑁄 𑀳𑁄𑀢𑀺 𑀫𑀸𑀬𑀸𑀯𑀻, 𑀧𑀸𑀧𑀺𑀘𑁆𑀙𑁄 𑀳𑁄𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀻, 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀻 𑀳𑁄𑀢𑀺 𑀆𑀥𑀸𑀦𑀕𑁆𑀕𑀸𑀳𑀻 𑀤𑀼𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀻. 𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀻 𑀳𑁄𑀢𑀺 𑀆𑀥𑀸𑀦𑀕𑁆𑀕𑀸𑀳𑀻 𑀤𑀼𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀻, 𑀲𑁄 𑀲𑀢𑁆𑀣𑀭𑀺𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀥𑀫𑁆𑀫𑁂𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀲𑀗𑁆𑀖𑁂𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀲𑀺𑀓𑁆𑀔𑀸𑀬𑀧𑀺 𑀦 𑀧𑀭𑀺𑀧𑀽𑀭𑀓𑀸𑀭𑀻 𑀳𑁄𑀢𑀺. 𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀥𑀫𑁆𑀫𑁂𑀧𑀺…𑀧𑁂… 𑀲𑀗𑁆𑀖𑁂𑀧𑀺…𑀧𑁂… 𑀲𑀺𑀓𑁆𑀔𑀸𑀬𑀧𑀺 𑀦 𑀧𑀭𑀺𑀧𑀽𑀭𑀓𑀸𑀭𑀻, 𑀲𑁄 𑀲𑀗𑁆𑀖𑁂 𑀯𑀺𑀯𑀸𑀤𑀁 𑀚𑀦𑁂𑀢𑀺. 𑀬𑁄 𑀳𑁄𑀢𑀺 𑀯𑀺𑀯𑀸𑀤𑁄 𑀩𑀳𑀼𑀚𑀦𑀸𑀳𑀺𑀢𑀸𑀬 𑀩𑀳𑀼𑀚𑀦𑀸𑀲𑀼𑀔𑀸𑀬 𑀩𑀳𑀼𑀦𑁄 𑀚𑀦𑀲𑁆𑀲 𑀅𑀦𑀢𑁆𑀣𑀸𑀬 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀏𑀯𑀭𑀽𑀧𑀜𑁆𑀘𑁂 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀯𑀺𑀯𑀸𑀤𑀫𑀽𑀮𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀲𑀫𑀦𑀼𑀧𑀲𑁆𑀲𑁂𑀬𑁆𑀬𑀸𑀣, 𑀢𑀢𑁆𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀢𑀲𑁆𑀲𑁂𑀯 𑀧𑀸𑀧𑀓𑀲𑁆𑀲 𑀯𑀺𑀯𑀸𑀤𑀫𑀽𑀮𑀲𑁆𑀲 𑀧𑀳𑀸𑀦𑀸𑀬 𑀯𑀸𑀬𑀫𑁂𑀬𑁆𑀬𑀸𑀣. 𑀏𑀯𑀭𑀽𑀧𑀜𑁆𑀘𑁂 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀯𑀺𑀯𑀸𑀤𑀫𑀽𑀮𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀦 𑀲𑀫𑀦𑀼𑀧𑀲𑁆𑀲𑁂𑀬𑁆𑀬𑀸𑀣, 𑀢𑀢𑁆𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀢𑀲𑁆𑀲𑁂𑀯 𑀧𑀸𑀧𑀓𑀲𑁆𑀲 𑀯𑀺𑀯𑀸𑀤𑀫𑀽𑀮𑀲𑁆𑀲 𑀆𑀬𑀢𑀺𑀁 𑀅𑀦𑀯𑀲𑁆𑀲𑀯𑀸𑀬 𑀧𑀝𑀺𑀧𑀚𑁆𑀚𑁂𑀬𑁆𑀬𑀸𑀣. 𑀏𑀯𑀫𑁂𑀢𑀲𑁆𑀲 𑀧𑀸𑀧𑀓𑀲𑁆𑀲 𑀯𑀺𑀯𑀸𑀤𑀫𑀽𑀮𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺. 𑀏𑀯𑀫𑁂𑀢𑀲𑁆𑀲 𑀧𑀸𑀧𑀓𑀲𑁆𑀲 𑀯𑀺𑀯𑀸𑀤𑀫𑀽𑀮𑀲𑁆𑀲 𑀆𑀬𑀢𑀺𑀁 𑀅𑀦𑀯𑀲𑁆𑀲𑀯𑁄 𑀳𑁄𑀢𑀺. 𑀇𑀫𑀸𑀦𑀺 𑀙 𑀯𑀺𑀯𑀸𑀤𑀫𑀽𑀮𑀸𑀦𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁.

‘‘𑀓𑀢𑀫𑀸𑀦𑀺 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁? 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀮𑀼𑀤𑁆𑀥𑀘𑀺𑀢𑁆𑀢𑀸 𑀯𑀺𑀯𑀤𑀦𑁆𑀢𑀺, 𑀤𑀼𑀝𑁆𑀞𑀘𑀺𑀢𑁆𑀢𑀸 𑀯𑀺𑀯𑀤𑀦𑁆𑀢𑀺, 𑀫𑀽𑀴𑁆𑀳𑀘𑀺𑀢𑁆𑀢𑀸 𑀯𑀺𑀯𑀤𑀦𑁆𑀢𑀺 𑁋 𑀥𑀫𑁆𑀫𑁄𑀢𑀺 𑀯𑀸 𑀅𑀥𑀫𑁆𑀫𑁄𑀢𑀺 𑀯𑀸, 𑀯𑀺𑀦𑀬𑁄𑀢𑀺 𑀯𑀸 𑀅𑀯𑀺𑀦𑀬𑁄𑀢𑀺 𑀯𑀸, 𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀯𑀸 𑀅𑀪𑀸𑀲𑀺𑀢𑀁 𑀅𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀯𑀸, 𑀆𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦𑀸𑀢𑀺 𑀯𑀸 𑀅𑀦𑀸𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦𑀸𑀢𑀺 𑀯𑀸, 𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀯𑀸 𑀅𑀧𑁆𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀯𑀸, 𑀆𑀧𑀢𑁆𑀢𑀻𑀢𑀺 𑀯𑀸 𑀅𑀦𑀸𑀧𑀢𑁆𑀢𑀻𑀢𑀺 𑀯𑀸, 𑀮𑀳𑀼𑀓𑀸 𑀆𑀧𑀢𑁆𑀢𑀻𑀢𑀺 𑀯𑀸 𑀕𑀭𑀼𑀓𑀸 𑀆𑀧𑀢𑁆𑀢𑀻𑀢𑀺 𑀯𑀸, 𑀲𑀸𑀯𑀲𑁂𑀲𑀸 𑀆𑀧𑀢𑁆𑀢𑀻𑀢𑀺 𑀯𑀸 𑀅𑀦𑀯𑀲𑁂𑀲𑀸 𑀆𑀧𑀢𑁆𑀢𑀻𑀢𑀺 𑀯𑀸, 𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀯𑀸 𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀯𑀸. 𑀇𑀫𑀸𑀦𑀺 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁.

‘‘𑀓𑀢𑀫𑀸𑀦𑀺 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁? 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀅𑀮𑀼𑀤𑁆𑀥𑀘𑀺𑀢𑁆𑀢𑀸 𑀯𑀺𑀯𑀤𑀦𑁆𑀢𑀺, 𑀅𑀤𑀼𑀝𑁆𑀞𑀘𑀺𑀢𑁆𑀢𑀸 𑀯𑀺𑀯𑀤𑀦𑁆𑀢𑀺, 𑀅𑀫𑀽𑀴𑁆𑀳𑀘𑀺𑀢𑁆𑀢𑀸 𑀯𑀺𑀯𑀤𑀦𑁆𑀢𑀺 𑁋 𑀥𑀫𑁆𑀫𑁄𑀢𑀺 𑀯𑀸 𑀅𑀥𑀫𑁆𑀫𑁄𑀢𑀺 𑀯𑀸…𑀧𑁂… 𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀯𑀸 𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀯𑀸. 𑀇𑀫𑀸𑀦𑀺 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁.

𑁨𑁧𑁭. [𑀧𑀭𑀺. 𑁨𑁭𑁨] ‘‘𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀓𑀺𑀁 𑀫𑀽𑀮𑀁? 𑀙 𑀅𑀦𑀼𑀯𑀸𑀤𑀫𑀽𑀮𑀸𑀦𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁. 𑀢𑀻𑀡𑀺𑀧𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁, 𑀢𑀻𑀡𑀺𑀧𑀺 𑀓𑀼𑀲𑀮𑀫𑀽𑀮𑀸𑀦𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁, 𑀓𑀸𑀬𑁄𑀧𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁, 𑀯𑀸𑀘𑀸𑀧𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁. ‘‘𑀓𑀢𑀫𑀸𑀦𑀺 𑀙 𑀅𑀦𑀼𑀯𑀸𑀤𑀫𑀽𑀮𑀸𑀦𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁? 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑁄𑀥𑀦𑁄 𑀳𑁄𑀢𑀺 𑀉𑀧𑀦𑀸𑀳𑀻. 𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑁄𑀥𑀦𑁄 𑀳𑁄𑀢𑀺 𑀉𑀧𑀦𑀸𑀳𑀻, 𑀲𑁄 𑀲𑀢𑁆𑀣𑀭𑀺𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀥𑀫𑁆𑀫𑁂𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀲𑀗𑁆𑀖𑁂𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀲𑀺𑀓𑁆𑀔𑀸𑀬𑀧𑀺 𑀦 𑀧𑀭𑀺𑀧𑀽𑀭𑀓𑀸𑀭𑀻 𑀳𑁄𑀢𑀺. 𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀥𑀫𑁆𑀫𑁂𑀧𑀺…𑀧𑁂… 𑀲𑀗𑁆𑀖𑁂𑀧𑀺…𑀧𑁂… 𑀲𑀺𑀓𑁆𑀔𑀸𑀬𑀧𑀺 𑀦 𑀧𑀭𑀺𑀧𑀽𑀭𑀓𑀸𑀭𑀻, 𑀲𑁄 𑀲𑀗𑁆𑀖𑁂 𑀅𑀦𑀼𑀯𑀸𑀤𑀁 𑀚𑀦𑁂𑀢𑀺. 𑀬𑁄 𑀳𑁄𑀢𑀺 𑀅𑀦𑀼𑀯𑀸𑀤𑁄 𑀩𑀳𑀼𑀚𑀦𑀸𑀳𑀺𑀢𑀸𑀬 𑀩𑀳𑀼𑀚𑀦𑀸𑀲𑀼𑀔𑀸𑀬 𑀩𑀳𑀼𑀦𑁄 𑀚𑀦𑀲𑁆𑀲 𑀅𑀦𑀢𑁆𑀣𑀸𑀬 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀏𑀯𑀭𑀽𑀧𑀜𑁆𑀘𑁂 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀅𑀦𑀼𑀯𑀸𑀤𑀫𑀽𑀮𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀲𑀫𑀦𑀼𑀧𑀲𑁆𑀲𑁂𑀬𑁆𑀬𑀸𑀣, 𑀢𑀢𑁆𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀢𑀲𑁆𑀲𑁂𑀯 𑀧𑀸𑀧𑀓𑀲𑁆𑀲 𑀅𑀦𑀼𑀯𑀸𑀤𑀫𑀽𑀮𑀲𑁆𑀲 𑀧𑀳𑀸𑀦𑀸𑀬 𑀯𑀸𑀬𑀫𑁂𑀬𑁆𑀬𑀸𑀣. 𑀏𑀯𑀭𑀽𑀧𑀜𑁆𑀘𑁂 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀅𑀦𑀼𑀯𑀸𑀤𑀫𑀽𑀮𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀦 𑀲𑀫𑀦𑀼𑀧𑀲𑁆𑀲𑁂𑀬𑁆𑀬𑀸𑀣, 𑀢𑀢𑁆𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀢𑀲𑁆𑀲𑁂𑀯 𑀧𑀸𑀧𑀓𑀲𑁆𑀲 𑀅𑀦𑀼𑀯𑀸𑀤𑀫𑀽𑀮𑀲𑁆𑀲 𑀆𑀬𑀢𑀺𑀁 𑀅𑀦𑀯𑀲𑁆𑀲𑀯𑀸𑀬 𑀧𑀝𑀺𑀧𑀚𑁆𑀚𑁂𑀬𑁆𑀬𑀸𑀣. 𑀏𑀯𑀫𑁂𑀢𑀲𑁆𑀲 𑀧𑀸𑀧𑀓𑀲𑁆𑀲 𑀅𑀦𑀼𑀯𑀸𑀤𑀫𑀽𑀮𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺. 𑀏𑀯𑀫𑁂𑀢𑀲𑁆𑀲 𑀧𑀸𑀧𑀓𑀲𑁆𑀲 𑀅𑀦𑀼𑀯𑀸𑀤𑀫𑀽𑀮𑀲𑁆𑀲 𑀆𑀬𑀢𑀺𑀁 𑀅𑀦𑀯𑀲𑁆𑀲𑀯𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀫𑀓𑁆𑀔𑀻 𑀳𑁄𑀢𑀺 𑀧𑀴𑀸𑀲𑀻…𑀧𑁂… 𑀇𑀲𑁆𑀲𑀼𑀓𑀻 𑀳𑁄𑀢𑀺 𑀫𑀘𑁆𑀙𑀭𑀻, 𑀲𑀞𑁄 𑀳𑁄𑀢𑀺 𑀫𑀸𑀬𑀸𑀯𑀻, 𑀧𑀸𑀧𑀺𑀘𑁆𑀙𑁄 𑀳𑁄𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀻, 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀻 𑀳𑁄𑀢𑀺 𑀆𑀥𑀸𑀦𑀕𑁆𑀕𑀸𑀳𑀻 𑀤𑀼𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀻. 𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀻 𑀳𑁄𑀢𑀺 𑀆𑀥𑀸𑀦𑀕𑁆𑀕𑀸𑀳𑀻 𑀤𑀼𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀻, 𑀲𑁄 𑀲𑀢𑁆𑀣𑀭𑀺𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀥𑀫𑁆𑀫𑁂𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀲𑀗𑁆𑀖𑁂𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀲𑀺𑀓𑁆𑀔𑀸𑀬𑀧𑀺 𑀦 𑀧𑀭𑀺𑀧𑀽𑀭𑀓𑀸𑀭𑀻 𑀳𑁄𑀢𑀺. 𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀥𑀫𑁆𑀫𑁂𑀧𑀺…𑀧𑁂… 𑀲𑀗𑁆𑀖𑁂𑀧𑀺…𑀧𑁂… 𑀲𑀺𑀓𑁆𑀔𑀸𑀬𑀧𑀺 𑀦 𑀧𑀭𑀺𑀧𑀽𑀭𑀓𑀸𑀭𑀻, 𑀲𑁄 𑀲𑀗𑁆𑀖𑁂 𑀅𑀦𑀼𑀯𑀸𑀤𑀁 𑀚𑀦𑁂𑀢𑀺. 𑀬𑁄 𑀳𑁄𑀢𑀺 𑀅𑀦𑀼𑀯𑀸𑀤𑁄 𑀩𑀳𑀼𑀚𑀦𑀸𑀳𑀺𑀢𑀸𑀬 𑀩𑀳𑀼𑀚𑀦𑀸𑀲𑀼𑀔𑀸𑀬 𑀩𑀳𑀼𑀦𑁄 𑀚𑀦𑀲𑁆𑀲 𑀅𑀦𑀢𑁆𑀣𑀸𑀬 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀏𑀯𑀭𑀽𑀧𑀜𑁆𑀘𑁂 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀅𑀦𑀼𑀯𑀸𑀤𑀫𑀽𑀮𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀲𑀫𑀦𑀼𑀧𑀲𑁆𑀲𑁂𑀬𑁆𑀬𑀸𑀣, 𑀢𑀢𑁆𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀢𑀲𑁆𑀲𑁂𑀯 𑀧𑀸𑀧𑀓𑀲𑁆𑀲 𑀅𑀦𑀼𑀯𑀸𑀤𑀫𑀽𑀮𑀲𑁆𑀲 𑀧𑀳𑀸𑀦𑀸𑀬 𑀯𑀸𑀬𑀫𑁂𑀬𑁆𑀬𑀸𑀣. 𑀏𑀯𑀭𑀽𑀧𑀜𑁆𑀘𑁂 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀅𑀦𑀼𑀯𑀸𑀤𑀫𑀽𑀮𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀦 𑀲𑀫𑀦𑀼𑀧𑀲𑁆𑀲𑁂𑀬𑁆𑀬𑀸𑀣, 𑀢𑀢𑁆𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀢𑀲𑁆𑀲𑁂𑀯 𑀧𑀸𑀧𑀓𑀲𑁆𑀲 𑀅𑀦𑀼𑀯𑀸𑀤𑀫𑀽𑀮𑀲𑁆𑀲 𑀆𑀬𑀢𑁆𑀢𑀺𑀁 𑀅𑀦𑀯𑀲𑁆𑀲𑀯𑀸𑀬 𑀧𑀝𑀺𑀧𑀚𑁆𑀚𑁂𑀬𑁆𑀬𑀸𑀣. 𑀏𑀯𑀫𑁂𑀢𑀲𑁆𑀲 𑀧𑀸𑀧𑀓𑀲𑁆𑀲 𑀅𑀦𑀼𑀯𑀸𑀤𑀫𑀽𑀮𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺. 𑀏𑀯𑀫𑁂𑀢𑀲𑁆𑀲 𑀧𑀸𑀧𑀓𑀲𑁆𑀲 𑀅𑀦𑀼𑀯𑀸𑀤𑀫𑀽𑀮𑀲𑁆𑀲 𑀆𑀬𑀢𑀺𑀁 𑀅𑀦𑀯𑀲𑁆𑀲𑀯𑁄 𑀳𑁄𑀢𑀺. 𑀇𑀫𑀸𑀦𑀺 𑀙 𑀅𑀦𑀼𑀯𑀸𑀤𑀫𑀽𑀮𑀸𑀦𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁.

‘‘𑀓𑀢𑀫𑀸𑀦𑀺 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁? 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀁 𑀮𑀼𑀤𑁆𑀥𑀘𑀺𑀢𑁆𑀢𑀸 𑀅𑀦𑀼𑀯𑀤𑀦𑁆𑀢𑀺, 𑀤𑀼𑀝𑁆𑀞𑀘𑀺𑀢𑁆𑀢𑀸 𑀅𑀦𑀼𑀯𑀤𑀦𑁆𑀢𑀺, 𑀫𑀽𑀴𑁆𑀳𑀘𑀺𑀢𑁆𑀢𑀸 𑀅𑀦𑀼𑀯𑀤𑀦𑁆𑀢𑀺 𑁋 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀯𑀸, 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀯𑀸, 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀯𑀸, 𑀆𑀚𑀻𑀯𑀯𑀺𑀧𑀢𑁆𑀢𑀺𑀬𑀸 𑀯𑀸. 𑀇𑀫𑀸𑀦𑀺 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁.

‘‘𑀓𑀢𑀫𑀸𑀦𑀺 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁? 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀁 𑀅𑀮𑀼𑀤𑁆𑀥𑀘𑀺𑀢𑁆𑀢𑀸 𑀅𑀦𑀼𑀯𑀤𑀦𑁆𑀢𑀺, 𑀅𑀤𑀼𑀝𑁆𑀞𑀘𑀺𑀢𑁆𑀢𑀸 𑀅𑀦𑀼𑀯𑀤𑀦𑁆𑀢𑀺, 𑀅𑀫𑀽𑀴𑁆𑀳𑀘𑀺𑀢𑁆𑀢𑀸 𑀅𑀦𑀼𑀯𑀤𑀦𑁆𑀢𑀺 𑁋 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀯𑀸, 𑀆𑀘𑀭𑀯𑀺𑀧𑀢𑁆𑀢𑀺𑀬𑀸 𑀯𑀸, 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀯𑀸, 𑀆𑀚𑀻𑀯𑀯𑀺𑀧𑀢𑁆𑀢𑀺𑀬𑀸 𑀯𑀸. 𑀇𑀫𑀸𑀦𑀺 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁.

‘‘𑀓𑀢𑀫𑁄 𑀓𑀸𑀬𑁄 [𑀓𑀢𑀫𑁄 𑀘 𑀓𑀸𑀬𑁄 (𑀲𑁆𑀬𑀸. 𑀓𑀁.)] 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁? 𑀇𑀥𑁂𑀓𑀘𑁆𑀘𑁄 𑀤𑀼𑀩𑁆𑀩𑀡𑁆𑀡𑁄 𑀳𑁄𑀢𑀺, 𑀤𑀼𑀤𑁆𑀤𑀲𑁆𑀲𑀺𑀓𑁄, 𑀑𑀓𑁄𑀝𑀺𑀫𑀓𑁄, 𑀩𑀳𑁆𑀯𑀸𑀩𑀸𑀥𑁄, 𑀓𑀸𑀡𑁄 𑀯𑀸, 𑀓𑀼𑀡𑀻 𑀯𑀸, 𑀔𑀜𑁆𑀚𑁄 𑀯𑀸, 𑀧𑀓𑁆𑀔𑀳𑀢𑁄 𑀯𑀸, 𑀬𑁂𑀦 𑀦𑀁 𑀅𑀦𑀼𑀯𑀤𑀦𑁆𑀢𑀺. 𑀅𑀬𑀁 𑀓𑀸𑀬𑁄 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁.

‘‘𑀓𑀢𑀫𑀸 𑀯𑀸𑀘𑀸 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁? 𑀇𑀥𑁂𑀓𑀘𑁆𑀘𑁄 𑀤𑀼𑀩𑁆𑀩𑀘𑁄 𑀳𑁄𑀢𑀺, 𑀫𑀫𑁆𑀫𑀦𑁄, 𑀏𑀴𑀕𑀮𑀯𑀸𑀘𑁄, 𑀬𑀸𑀬 𑀦𑀁 𑀅𑀦𑀼𑀯𑀤𑀦𑁆𑀢𑀺. 𑀅𑀬𑀁 𑀯𑀸𑀘𑀸 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁.

𑁨𑁧𑁮. ‘‘𑀆𑀧𑀢𑁆𑀢𑀸𑀥𑀺𑀓𑀭𑀡𑀲𑁆𑀲 𑀓𑀺𑀁 𑀫𑀽𑀮𑀁? 𑀙 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸 𑀆𑀧𑀢𑁆𑀢𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁. 𑀅𑀢𑁆𑀣𑀸𑀧𑀢𑁆𑀢𑀺 𑀓𑀸𑀬𑀢𑁄 𑀲𑀫𑀼𑀝𑁆𑀞𑀸𑀢𑀺, 𑀦 𑀯𑀸𑀘𑀢𑁄, 𑀦 𑀘𑀺𑀢𑁆𑀢𑀢𑁄. 𑀅𑀢𑁆𑀣𑀸𑀧𑀢𑁆𑀢𑀺 𑀯𑀸𑀘𑀢𑁄 𑀲𑀫𑀼𑀝𑁆𑀞𑀸𑀢𑀺, 𑀦 𑀓𑀸𑀬𑀢𑁄, 𑀦 𑀘𑀺𑀢𑁆𑀢𑀢𑁄. 𑀅𑀢𑁆𑀣𑀸𑀧𑀢𑁆𑀢𑀺 𑀓𑀸𑀬𑀢𑁄 𑀘 𑀯𑀸𑀘𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀦 𑀘𑀺𑀢𑁆𑀢𑀢𑁄. 𑀅𑀢𑁆𑀣𑀸𑀧𑀢𑁆𑀢𑀺 𑀓𑀸𑀬𑀢𑁄 𑀘 𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀦 𑀯𑀸𑀘𑀢𑁄. 𑀅𑀢𑁆𑀣𑀸𑀧𑀢𑁆𑀢𑀺 𑀯𑀸𑀘𑀢𑁄 𑀘 𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀦 𑀓𑀸𑀬𑀢𑁄. 𑀅𑀢𑁆𑀣𑀸𑀧𑀢𑁆𑀢𑀺 𑀓𑀸𑀬𑀢𑁄 𑀘 𑀯𑀸𑀘𑀢𑁄 𑀘 𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺. 𑀇𑀫𑁂 𑀙 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸 𑀆𑀧𑀢𑁆𑀢𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁.

𑁨𑁧𑁯. ‘‘𑀓𑀺𑀘𑁆𑀘𑀸𑀥𑀺𑀓𑀭𑀡𑀲𑁆𑀲 𑀓𑀺𑀁 𑀫𑀽𑀮𑀁? 𑀓𑀺𑀘𑁆𑀘𑀸𑀥𑀺𑀓𑀭𑀡𑀲𑁆𑀲 𑀏𑀓𑀁 𑀫𑀽𑀮𑀁 𑁋 𑀲𑀗𑁆𑀖𑁄.

𑁨𑁨𑁦. ‘‘𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀓𑀼𑀲𑀮𑀁, 𑀅𑀓𑀼𑀲𑀮𑀁, 𑀅𑀩𑁆𑀬𑀸𑀓𑀢𑀁. 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀲𑀺𑀬𑀸 𑀓𑀼𑀲𑀮𑀁, 𑀲𑀺𑀬𑀸 𑀅𑀓𑀼𑀲𑀮𑀁, 𑀲𑀺𑀬𑀸 𑀅𑀩𑁆𑀬𑀸𑀓𑀢𑀁. 𑀢𑀢𑁆𑀣 𑀓𑀢𑀫𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀓𑀼𑀲𑀮𑀁? 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀓𑀼𑀲𑀮𑀘𑀺𑀢𑁆𑀢𑀸 𑀯𑀺𑀯𑀤𑀦𑁆𑀢𑀺 𑁋 𑀥𑀫𑁆𑀫𑁄𑀢𑀺 𑀯𑀸 𑀅𑀥𑀫𑁆𑀫𑁄𑀢𑀺 𑀯𑀸…𑀧𑁂… 𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀯𑀸 𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀯𑀸. 𑀬𑀁 𑀢𑀢𑁆𑀣 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀦𑀸𑀦𑀸𑀯𑀸𑀤𑁄 𑀅𑀜𑁆𑀜𑀣𑀸𑀯𑀸𑀤𑁄 𑀯𑀺𑀧𑀘𑁆𑀘𑀢𑀸𑀬 𑀯𑁄𑀳𑀸𑀭𑁄 𑀫𑁂𑀥𑀕𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀓𑀼𑀲𑀮𑀁.

‘‘𑀢𑀢𑁆𑀣 𑀓𑀢𑀫𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀅𑀓𑀼𑀲𑀮𑀁? 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀅𑀓𑀼𑀲𑀮𑀘𑀺𑀢𑁆𑀢𑀸 𑀯𑀺𑀯𑀤𑀦𑁆𑀢𑀺 𑁋 𑀥𑀫𑁆𑀫𑁄𑀢𑀺 𑀯𑀸 𑀅𑀥𑀫𑁆𑀫𑁄𑀢𑀺 𑀯𑀸…𑀧𑁂… 𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀯𑀸 𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀯𑀸. 𑀬𑀁 𑀢𑀢𑁆𑀣 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀦𑀸𑀦𑀸𑀯𑀸𑀤𑁄 𑀅𑀜𑁆𑀜𑀣𑀸𑀯𑀸𑀤𑁄 𑀯𑀺𑀧𑀘𑁆𑀘𑀢𑀸𑀬 𑀯𑁄𑀳𑀸𑀭𑁄 𑀫𑁂𑀥𑀕𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀅𑀓𑀼𑀲𑀮𑀁.

‘‘𑀢𑀢𑁆𑀣 𑀓𑀢𑀫𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀅𑀩𑁆𑀬𑀸𑀓𑀢𑀁? 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑀸 𑀯𑀺𑀯𑀤𑀦𑁆𑀢𑀺 𑁋 𑀥𑀫𑁆𑀫𑁄𑀢𑀺 𑀯𑀸 𑀅𑀥𑀫𑁆𑀫𑁄𑀢𑀺 𑀯𑀸…𑀧𑁂… 𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀯𑀸 𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀯𑀸. 𑀬𑀁 𑀢𑀢𑁆𑀣 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀦𑀸𑀦𑀸𑀯𑀸𑀤𑁄 𑀅𑀜𑁆𑀜𑀣𑀸𑀯𑀸𑀤𑁄 𑀯𑀺𑀧𑀘𑁆𑀘𑀢𑀸𑀬 𑀯𑁄𑀳𑀸𑀭𑁄 𑀫𑁂𑀥𑀕𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀅𑀩𑁆𑀬𑀸𑀓𑀢𑀁.

𑁨𑁨𑁧. ‘‘𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀓𑀼𑀲𑀮𑀁, 𑀅𑀓𑀼𑀲𑀮𑀁, 𑀅𑀩𑁆𑀬𑀸𑀓𑀢𑀁. 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀲𑀺𑀬𑀸 𑀓𑀼𑀲𑀮𑀁, 𑀲𑀺𑀬𑀸 𑀅𑀓𑀼𑀲𑀮𑀁, 𑀲𑀺𑀬𑀸 𑀅𑀩𑁆𑀬𑀸𑀓𑀢𑀁. 𑀢𑀢𑁆𑀣 𑀓𑀢𑀫𑀁 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀓𑀼𑀲𑀮𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀁 𑀓𑀼𑀲𑀮𑀘𑀺𑀢𑁆𑀢𑀸 𑀅𑀦𑀼𑀯𑀤𑀦𑁆𑀢𑀺 𑁋 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀯𑀸, 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀯𑀸, 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀯𑀸, 𑀆𑀚𑀻𑀯𑀯𑀺𑀧𑀢𑁆𑀢𑀺𑀬𑀸 𑀯𑀸. 𑀬𑁄 𑀢𑀢𑁆𑀣 𑀅𑀦𑀼𑀯𑀸𑀤𑁄 𑀅𑀦𑀼𑀯𑀤𑀦𑀸 𑀅𑀦𑀼𑀮𑁆𑀮𑀧𑀦𑀸 𑀅𑀦𑀼𑀪𑀡𑀦𑀸 𑀅𑀦𑀼𑀲𑀫𑁆𑀧𑀯𑀗𑁆𑀓𑀢𑀸 𑀅𑀩𑁆𑀪𑀼𑀲𑁆𑀲𑀳𑀦𑀢𑀸 𑀅𑀦𑀼𑀩𑀮𑀧𑁆𑀧𑀤𑀸𑀦𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀓𑀼𑀲𑀮𑀁.

‘‘𑀢𑀢𑁆𑀣 𑀓𑀢𑀫𑀁 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀅𑀓𑀼𑀲𑀮𑀁? 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀁 𑀅𑀓𑀼𑀲𑀮𑀘𑀺𑀢𑁆𑀢𑀸 𑀅𑀦𑀼𑀯𑀤𑀦𑁆𑀢𑀺 𑁋 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀯𑀸, 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀯𑀸, 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀯𑀸, 𑀆𑀚𑀻𑀯𑀯𑀺𑀧𑀢𑁆𑀢𑀺𑀬𑀸 𑀯𑀸. 𑀬𑁄 𑀢𑀢𑁆𑀣 𑀅𑀦𑀼𑀯𑀸𑀤𑁄 𑀅𑀦𑀼𑀯𑀤𑀦𑀸 𑀅𑀦𑀼𑀮𑁆𑀮𑀧𑀦𑀸 𑀅𑀦𑀼𑀪𑀡𑀦𑀸 𑀅𑀦𑀼𑀲𑀫𑁆𑀧𑀯𑀗𑁆𑀓𑀢𑀸 𑀅𑀩𑁆𑀪𑀼𑀲𑁆𑀲𑀳𑀦𑀢𑀸 𑀅𑀦𑀼𑀩𑀮𑀧𑁆𑀧𑀤𑀸𑀦𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀅𑀓𑀼𑀲𑀮𑀁.

‘‘𑀢𑀢𑁆𑀣 𑀓𑀢𑀫𑀁 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀅𑀩𑁆𑀬𑀸𑀓𑀢𑀁? 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀁 𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑀸 𑀅𑀦𑀼𑀯𑀤𑀦𑁆𑀢𑀺 𑁋 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀯𑀸, 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀯𑀸, 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀯𑀸, 𑀆𑀚𑀻𑀯𑀯𑀺𑀧𑀢𑁆𑀢𑀺𑀬𑀸 𑀯𑀸. 𑀬𑁄 𑀢𑀢𑁆𑀣 𑀅𑀦𑀼𑀯𑀸𑀤𑁄 𑀅𑀦𑀼𑀯𑀤𑀦𑀸 𑀅𑀦𑀼𑀮𑁆𑀮𑀧𑀦𑀸 𑀅𑀦𑀼𑀪𑀡𑀦𑀸 𑀅𑀦𑀼𑀲𑀫𑁆𑀧𑀯𑀗𑁆𑀓𑀢𑀸 𑀅𑀩𑁆𑀪𑀼𑀲𑁆𑀲𑀳𑀦𑀢𑀸 𑀅𑀦𑀼𑀩𑀮𑀧𑁆𑀧𑀤𑀸𑀦𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀅𑀩𑁆𑀬𑀸𑀓𑀢𑀁.

𑁨𑁨𑁨. ‘‘𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀓𑀼𑀲𑀮𑀁 [𑀇𑀤𑀁 𑀧𑀤𑀁 𑀓𑁂𑀲𑀼𑀘𑀺 𑀦𑀢𑁆𑀣𑀺], 𑀅𑀓𑀼𑀲𑀮𑀁, 𑀅𑀩𑁆𑀬𑀸𑀓𑀢𑀁? 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀲𑀺𑀬𑀸 𑀅𑀓𑀼𑀲𑀮𑀁, 𑀲𑀺𑀬𑀸 𑀅𑀩𑁆𑀬𑀸𑀓𑀢𑀁; 𑀦𑀢𑁆𑀣𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀓𑀼𑀲𑀮𑀁. 𑀢𑀢𑁆𑀣 𑀓𑀢𑀫𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀅𑀓𑀼𑀲𑀮𑀁? 𑀬𑀁 𑀚𑀸𑀦𑀦𑁆𑀢𑁄 𑀲𑀜𑁆𑀚𑀸𑀦𑀦𑁆𑀢𑁄 𑀘𑁂𑀘𑁆𑀘 𑀅𑀪𑀺𑀯𑀺𑀢𑀭𑀺𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑁄 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀅𑀓𑀼𑀲𑀮𑀁.

‘‘𑀢𑀢𑁆𑀣 𑀓𑀢𑀫𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀅𑀩𑁆𑀬𑀸𑀓𑀢𑀁? 𑀬𑀁 𑀅𑀚𑀸𑀦𑀦𑁆𑀢𑁄 𑀅𑀲𑀜𑁆𑀚𑀸𑀦𑀦𑁆𑀢𑁄 𑀅𑀘𑁂𑀘𑁆𑀘 𑀅𑀦𑀪𑀺𑀯𑀺𑀢𑀭𑀺𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑁄 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀅𑀩𑁆𑀬𑀸𑀓𑀢𑀁.

𑁨𑁨𑁩. ‘‘𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀓𑀼𑀲𑀮𑀁, 𑀅𑀓𑀼𑀲𑀮𑀁, 𑀅𑀩𑁆𑀬𑀸𑀓𑀢𑀁? 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀲𑀺𑀬𑀸 𑀓𑀼𑀲𑀮𑀁, 𑀲𑀺𑀬𑀸 𑀅𑀓𑀼𑀲𑀮𑀁, 𑀲𑀺𑀬𑀸 𑀅𑀩𑁆𑀬𑀸𑀓𑀢𑀁. 𑀢𑀢𑁆𑀣 𑀓𑀢𑀫𑀁 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀓𑀼𑀲𑀮𑀁? 𑀬𑀁 𑀲𑀗𑁆𑀖𑁄 𑀓𑀼𑀲𑀮𑀘𑀺𑀢𑁆𑀢𑁄 𑀓𑀫𑁆𑀫𑀁 𑀓𑀭𑁄𑀢𑀺 𑁋 𑀅𑀧𑀮𑁄𑀓𑀦𑀓𑀫𑁆𑀫𑀁, 𑀜𑀢𑁆𑀢𑀺𑀓𑀫𑁆𑀫𑀁, 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁, 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀓𑀼𑀲𑀮𑀁.

‘‘𑀢𑀢𑁆𑀣 𑀓𑀢𑀫𑀁 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀅𑀓𑀼𑀲𑀮𑀁? 𑀬𑀁 𑀲𑀗𑁆𑀖𑁄 𑀅𑀓𑀼𑀲𑀮𑀘𑀺𑀢𑁆𑀢𑁄 𑀓𑀫𑁆𑀫𑀁 𑀓𑀭𑁄𑀢𑀺 𑁋 𑀅𑀧𑀮𑁄𑀓𑀦𑀓𑀫𑁆𑀫𑀁, 𑀜𑀢𑁆𑀢𑀺𑀓𑀫𑁆𑀫𑀁, 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁, 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀅𑀓𑀼𑀲𑀮𑀁.

‘‘𑀢𑀢𑁆𑀣 𑀓𑀢𑀫𑀁 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀅𑀩𑁆𑀬𑀸𑀓𑀢𑀁? 𑀬𑀁 𑀲𑀗𑁆𑀖𑁄 𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑁄 𑀓𑀫𑁆𑀫𑀁 𑀓𑀭𑁄𑀢𑀺 𑁋 𑀅𑀧𑀮𑁄𑀓𑀦𑀓𑀫𑁆𑀫𑀁, 𑀜𑀢𑁆𑀢𑀺𑀓𑀫𑁆𑀫𑀁, 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁, 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀅𑀩𑁆𑀬𑀸𑀓𑀢𑀁.

𑁨𑁨𑁪. [𑀧𑀭𑀺. 𑁩𑁫𑁫] ‘‘𑀯𑀺𑀯𑀸𑀤𑁄 𑀯𑀺𑀯𑀸𑀤𑀸𑀥𑀺𑀓𑀭𑀡𑀁, 𑀯𑀺𑀯𑀸𑀤𑁄 𑀦𑁄 𑀅𑀥𑀺𑀓𑀭𑀡𑀁, 𑀅𑀥𑀺𑀓𑀭𑀡𑀁 𑀦𑁄 𑀯𑀺𑀯𑀸𑀤𑁄, 𑀅𑀥𑀺𑀓𑀭𑀡𑀜𑁆𑀘𑁂𑀯 𑀯𑀺𑀯𑀸𑀤𑁄 𑀘. 𑀲𑀺𑀬𑀸 𑀯𑀺𑀯𑀸𑀤𑁄 𑀯𑀺𑀯𑀸𑀤𑀸𑀥𑀺𑀓𑀭𑀡𑀁, 𑀲𑀺𑀬𑀸 𑀯𑀺𑀯𑀸𑀤𑁄 𑀦𑁄 𑀅𑀥𑀺𑀓𑀭𑀡𑀁, 𑀲𑀺𑀬𑀸 𑀅𑀥𑀺𑀓𑀭𑀡𑀁 𑀦𑁄 𑀯𑀺𑀯𑀸𑀤𑁄, 𑀲𑀺𑀬𑀸 𑀅𑀥𑀺𑀓𑀭𑀡𑀜𑁆𑀘𑁂𑀯 𑀯𑀺𑀯𑀸𑀤𑁄 𑀘.

‘‘𑀢𑀢𑁆𑀣 𑀓𑀢𑀫𑁄 𑀯𑀺𑀯𑀸𑀤𑁄 𑀯𑀺𑀯𑀸𑀤𑀸𑀥𑀺𑀓𑀭𑀡𑀁? 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀯𑀺𑀯𑀤𑀦𑁆𑀢𑀺 𑁋 𑀥𑀫𑁆𑀫𑁄𑀢𑀺 𑀯𑀸 𑀅𑀥𑀫𑁆𑀫𑁄𑀢𑀺 𑀯𑀸…𑀧𑁂… 𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀯𑀸 𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀯𑀸. 𑀬𑀁 𑀢𑀢𑁆𑀣 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀦𑀸𑀦𑀸𑀯𑀸𑀤𑁄 𑀅𑀜𑁆𑀜𑀣𑀸𑀯𑀸𑀤𑁄 𑀯𑀺𑀧𑀘𑁆𑀘𑀢𑀸𑀬 𑀯𑁄𑀳𑀸𑀭𑁄 𑀫𑁂𑀥𑀕𑀁 𑁋 𑀅𑀬𑀁 𑀯𑀺𑀯𑀸𑀤𑁄 𑀯𑀺𑀯𑀸𑀤𑀸𑀥𑀺𑀓𑀭𑀡𑀁.

‘‘𑀢𑀢𑁆𑀣 𑀓𑀢𑀫𑁄 𑀯𑀺𑀯𑀸𑀤𑁄 𑀦𑁄 𑀅𑀥𑀺𑀓𑀭𑀡𑀁? 𑀫𑀸𑀢𑀸𑀧𑀺 𑀧𑀼𑀢𑁆𑀢𑁂𑀦 𑀯𑀺𑀯𑀤𑀢𑀺, 𑀧𑀼𑀢𑁆𑀢𑁄𑀧𑀺 𑀫𑀸𑀢𑀭𑀸 𑀯𑀺𑀯𑀤𑀢𑀺, 𑀧𑀺𑀢𑀸𑀧𑀺 𑀧𑀼𑀢𑁆𑀢𑁂𑀦 𑀯𑀺𑀯𑀤𑀢𑀺, 𑀧𑀼𑀢𑁆𑀢𑁄𑀧𑀺 𑀧𑀺𑀢𑀭𑀸 𑀯𑀺𑀯𑀤𑀢𑀺, 𑀪𑀸𑀢𑀸𑀧𑀺 𑀪𑀸𑀢𑀭𑀸 𑀯𑀺𑀯𑀤𑀢𑀺, 𑀪𑀸𑀢𑀸𑀧𑀺 𑀪𑀕𑀺𑀦𑀺𑀬𑀸 𑀯𑀺𑀯𑀤𑀢𑀺, 𑀪𑀕𑀺𑀦𑀻𑀧𑀺 𑀪𑀸𑀢𑀭𑀸 𑀯𑀺𑀯𑀤𑀢𑀺, 𑀲𑀳𑀸𑀬𑁄𑀧𑀺 𑀲𑀳𑀸𑀬𑁂𑀦 𑀯𑀺𑀯𑀤𑀢𑀺 𑁋 𑀅𑀬𑀁 𑀯𑀺𑀯𑀸𑀤𑁄 𑀦𑁄 𑀅𑀥𑀺𑀓𑀭𑀡𑀁.

‘‘𑀢𑀢𑁆𑀣 𑀓𑀢𑀫𑀁 𑀅𑀥𑀺𑀓𑀭𑀡𑀁 𑀦𑁄 𑀯𑀺𑀯𑀸𑀤𑁄? 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁, 𑀆𑀧𑀢𑁆𑀢𑀸𑀥𑀺𑀓𑀭𑀡𑀁, 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑁋 𑀇𑀤𑀁 𑀅𑀥𑀺𑀓𑀭𑀡𑀁 𑀦𑁄 𑀯𑀺𑀯𑀸𑀤𑁄.

‘‘𑀢𑀢𑁆𑀣 𑀓𑀢𑀫𑀁 𑀅𑀥𑀺𑀓𑀭𑀡𑀜𑁆𑀘𑁂𑀯 𑀯𑀺𑀯𑀸𑀤𑁄 𑀘? 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀅𑀥𑀺𑀓𑀭𑀡𑀜𑁆𑀘𑁂𑀯 𑀯𑀺𑀯𑀸𑀤𑁄 𑀘.

𑁨𑁨𑁫. [𑀧𑀭𑀺. 𑁩𑁫𑁬] ‘‘𑀅𑀦𑀼𑀯𑀸𑀤𑁄 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁, 𑀅𑀦𑀼𑀯𑀸𑀤𑁄 𑀦𑁄 𑀅𑀥𑀺𑀓𑀭𑀡𑀁, 𑀅𑀥𑀺𑀓𑀭𑀡𑀁 𑀦𑁄 𑀅𑀦𑀼𑀯𑀸𑀤𑁄, 𑀅𑀥𑀺𑀓𑀭𑀡𑀜𑁆𑀘𑁂𑀯 𑀅𑀦𑀼𑀯𑀸𑀤𑁄 𑀘. 𑀲𑀺𑀬𑀸 𑀅𑀦𑀼𑀯𑀸𑀤𑁄 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁, 𑀲𑀺𑀬𑀸 𑀅𑀦𑀼𑀯𑀸𑀤𑁄 𑀦𑁄 𑀅𑀥𑀺𑀓𑀭𑀡𑀁, 𑀲𑀺𑀬𑀸 𑀅𑀥𑀺𑀓𑀭𑀡𑀁 𑀦𑁄 𑀅𑀦𑀼𑀯𑀸𑀤𑁄, 𑀲𑀺𑀬𑀸 𑀅𑀥𑀺𑀓𑀭𑀡𑀜𑁆𑀘𑁂𑀯 𑀅𑀦𑀼𑀯𑀸𑀤𑁄 𑀘.

‘‘𑀢𑀢𑁆𑀣 𑀓𑀢𑀫𑁄 𑀅𑀦𑀼𑀯𑀸𑀤𑁄 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁? 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀁 𑀅𑀦𑀼𑀯𑀤𑀦𑁆𑀢𑀺 𑁋 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀯𑀸, 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀯𑀸, 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀯𑀸, 𑀆𑀚𑀻𑀯𑀯𑀺𑀧𑀢𑁆𑀢𑀺𑀬𑀸 𑀯𑀸. 𑀬𑁄 𑀢𑀢𑁆𑀣 𑀅𑀦𑀼𑀯𑀸𑀤𑁄 𑀅𑀦𑀼𑀯𑀤𑀦𑀸 𑀅𑀦𑀼𑀮𑁆𑀮𑀧𑀦𑀸 𑀅𑀦𑀼𑀪𑀡𑀦𑀸 𑀅𑀦𑀼𑀲𑀫𑁆𑀧𑀯𑀗𑁆𑀓𑀢𑀸 𑀅𑀩𑁆𑀪𑀼𑀲𑁆𑀲𑀳𑀦𑀢𑀸 𑀅𑀦𑀼𑀩𑀮𑀧𑁆𑀧𑀤𑀸𑀦𑀁 𑁋 𑀅𑀬𑀁 𑀅𑀦𑀼𑀯𑀸𑀤𑁄 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁.

‘‘𑀢𑀢𑁆𑀣 𑀓𑀢𑀫𑁄 𑀅𑀦𑀼𑀯𑀸𑀤𑁄 𑀦𑁄 𑀅𑀥𑀺𑀓𑀭𑀡𑀁? 𑀫𑀸𑀢𑀸𑀧𑀺 𑀧𑀼𑀢𑁆𑀢𑀁 𑀅𑀦𑀼𑀯𑀤𑀢𑀺, 𑀧𑀼𑀢𑁆𑀢𑁄𑀧𑀺 𑀫𑀸𑀢𑀭𑀁 𑀅𑀦𑀼𑀯𑀤𑀢𑀺, 𑀧𑀺𑀢𑀸𑀧𑀺 𑀧𑀼𑀢𑁆𑀢𑀁 𑀅𑀦𑀼𑀯𑀤𑀢𑀺, 𑀧𑀼𑀢𑁆𑀢𑁄𑀧𑀺 𑀧𑀺𑀢𑀭𑀁 𑀅𑀦𑀼𑀯𑀤𑀢𑀺, 𑀪𑀸𑀢𑀸𑀧𑀺 𑀪𑀸𑀢𑀭𑀁 𑀅𑀦𑀼𑀯𑀤𑀢𑀺, 𑀪𑀸𑀢𑀸𑀧𑀺 𑀪𑀕𑀺𑀦𑀺𑀁 𑀅𑀦𑀼𑀯𑀤𑀢𑀺, 𑀪𑀕𑀺𑀦𑀻𑀧𑀺 𑀪𑀸𑀢𑀭𑀁 𑀅𑀦𑀼𑀯𑀤𑀢𑀺, 𑀲𑀳𑀸𑀬𑁄𑀧𑀺 𑀲𑀳𑀸𑀬𑀁 𑀅𑀦𑀼𑀯𑀤𑀢𑀺 𑁋 𑀅𑀬𑀁 𑀅𑀦𑀼𑀯𑀸𑀤𑁄 𑀦𑁄 𑀅𑀥𑀺𑀓𑀭𑀡𑀁.

‘‘𑀢𑀢𑁆𑀣 𑀓𑀢𑀫𑀁 𑀅𑀥𑀺𑀓𑀭𑀡𑀁 𑀦𑁄 𑀅𑀦𑀼𑀯𑀸𑀤𑁄? 𑀆𑀧𑀢𑁆𑀢𑀸𑀥𑀺𑀓𑀭𑀡𑀁, 𑀓𑀺𑀘𑁆𑀘𑀸𑀥𑀺𑀓𑀭𑀡𑀁, 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑁋 𑀇𑀤𑀁 𑀅𑀥𑀺𑀓𑀭𑀡𑀁 𑀦𑁄 𑀅𑀦𑀼𑀯𑀸𑀤𑁄.

‘‘𑀢𑀢𑁆𑀣 𑀓𑀢𑀫𑀁 𑀅𑀥𑀺𑀓𑀭𑀡𑀜𑁆𑀘𑁂𑀯 𑀅𑀦𑀼𑀯𑀸𑀤𑁄 𑀘? 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀅𑀥𑀺𑀓𑀭𑀡𑀜𑁆𑀘𑁂𑀯 𑀅𑀦𑀼𑀯𑀸𑀤𑁄 𑀘.

𑁨𑁨𑁬. [𑀧𑀭𑀺. 𑁩𑁫𑁭] ‘‘𑀆𑀧𑀢𑁆𑀢𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁, 𑀆𑀧𑀢𑁆𑀢𑀺 𑀦𑁄 𑀅𑀥𑀺𑀓𑀭𑀡𑀁, 𑀅𑀥𑀺𑀓𑀭𑀡𑀁 𑀦𑁄 𑀆𑀧𑀢𑁆𑀢𑀺, 𑀅𑀥𑀺𑀓𑀭𑀡𑀜𑁆𑀘𑁂𑀯 𑀆𑀧𑀢𑁆𑀢𑀺 𑀘. 𑀲𑀺𑀬𑀸 𑀆𑀧𑀢𑁆𑀢𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁, 𑀲𑀺𑀬𑀸 𑀆𑀧𑀢𑁆𑀢𑀺 𑀦𑁄 𑀅𑀥𑀺𑀓𑀭𑀡𑀁, 𑀲𑀺𑀬𑀸 𑀅𑀥𑀺𑀓𑀭𑀡𑀁 𑀦𑁄 𑀆𑀧𑀢𑁆𑀢𑀺, 𑀲𑀺𑀬𑀸 𑀅𑀥𑀺𑀓𑀭𑀡𑀜𑁆𑀘𑁂𑀯 𑀆𑀧𑀢𑁆𑀢𑀺 𑀘. ‘‘𑀢𑀢𑁆𑀣 𑀓𑀢𑀫𑀁 𑀆𑀧𑀢𑁆𑀢𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁? 𑀧𑀜𑁆𑀘𑀧𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀆𑀧𑀢𑁆𑀢𑀸𑀥𑀺𑀓𑀭𑀡𑀁, 𑀲𑀢𑁆𑀢𑀧𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑁋 𑀅𑀬𑀁 𑀆𑀧𑀢𑁆𑀢𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁.

‘‘𑀢𑀢𑁆𑀣 𑀓𑀢𑀫𑀁 𑀆𑀧𑀢𑁆𑀢𑀺 𑀦𑁄 𑀅𑀥𑀺𑀓𑀭𑀡𑀁? 𑀲𑁄𑀢𑀸𑀧𑀢𑁆𑀢𑀺 𑀲𑀫𑀸𑀧𑀢𑁆𑀢𑀺 𑁋 𑀅𑀬𑀁 𑀆𑀧𑀢𑁆𑀢𑀺 𑀦𑁄 𑀅𑀥𑀺𑀓𑀭𑀡𑀁.

‘‘𑀢𑀢𑁆𑀣 𑀓𑀢𑀫𑀁 𑀅𑀥𑀺𑀓𑀭𑀡𑀁 𑀦𑁄 𑀆𑀧𑀢𑁆𑀢𑀺? 𑀓𑀺𑀘𑁆𑀘𑀸𑀥𑀺𑀓𑀭𑀡𑀁, 𑀯𑀺𑀯𑀸𑀤𑀸𑀥𑀺𑀓𑀭𑀡𑀁, 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑁋 𑀇𑀤𑀁 𑀅𑀥𑀺𑀓𑀭𑀡𑀁 𑀦𑁄 𑀆𑀧𑀢𑁆𑀢𑀺.

‘‘𑀢𑀢𑁆𑀣 𑀓𑀢𑀫𑀁 𑀅𑀥𑀺𑀓𑀭𑀡𑀜𑁆𑀘𑁂𑀯 𑀆𑀧𑀢𑁆𑀢𑀺 𑀘? 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀅𑀥𑀺𑀓𑀭𑀡𑀜𑁆𑀘𑁂𑀯 𑀆𑀧𑀢𑁆𑀢𑀺 𑀘.

𑁨𑁨𑁭. [𑀧𑀭𑀺. 𑁩𑁫𑁮] ‘‘𑀓𑀺𑀘𑁆𑀘𑀁 𑀓𑀺𑀘𑁆𑀘𑀸𑀥𑀺𑀓𑀭𑀡𑀁, 𑀓𑀺𑀘𑁆𑀘𑀁 𑀦𑁄 𑀅𑀥𑀺𑀓𑀭𑀡𑀁, 𑀅𑀥𑀺𑀓𑀭𑀡𑀁 𑀦𑁄 𑀓𑀺𑀘𑁆𑀘𑀁, 𑀅𑀥𑀺𑀓𑀭𑀡𑀜𑁆𑀘𑁂𑀯 𑀓𑀺𑀘𑁆𑀘𑀜𑁆𑀘. 𑀲𑀺𑀬𑀸 𑀓𑀺𑀘𑁆𑀘𑀁 𑀓𑀺𑀘𑁆𑀘𑀸𑀥𑀺𑀓𑀭𑀡𑀁, 𑀲𑀺𑀬𑀸 𑀓𑀺𑀘𑁆𑀘𑀁 𑀦𑁄 𑀅𑀥𑀺𑀓𑀭𑀡𑀁, 𑀲𑀺𑀬𑀸 𑀅𑀥𑀺𑀓𑀭𑀡𑀁 𑀦𑁄 𑀓𑀺𑀘𑁆𑀘𑀁, 𑀲𑀺𑀬𑀸 𑀅𑀥𑀺𑀓𑀭𑀡𑀜𑁆𑀘𑁂𑀯 𑀓𑀺𑀘𑁆𑀘𑀜𑁆𑀘.

‘‘𑀢𑀢𑁆𑀣 𑀓𑀢𑀫𑀁 𑀓𑀺𑀘𑁆𑀘𑀁 𑀓𑀺𑀘𑁆𑀘𑀸𑀥𑀺𑀓𑀭𑀡𑀁? 𑀬𑀸 𑀲𑀗𑁆𑀖𑀲𑁆𑀲 𑀓𑀺𑀘𑁆𑀘𑀬𑀢𑀸, 𑀓𑀭𑀡𑀻𑀬𑀢𑀸, 𑀅𑀧𑀮𑁄𑀓𑀦𑀓𑀫𑁆𑀫𑀁, 𑀜𑀢𑁆𑀢𑀺𑀓𑀫𑁆𑀫𑀁, 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁, 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀁 𑁋 𑀇𑀤𑀁 𑀓𑀺𑀘𑁆𑀘𑀁 𑀓𑀺𑀘𑁆𑀘𑀸𑀥𑀺𑀓𑀭𑀡𑀁.

‘‘𑀢𑀢𑁆𑀣 𑀓𑀢𑀫𑀁 𑀓𑀺𑀘𑁆𑀘𑀁 𑀦𑁄 𑀅𑀥𑀺𑀓𑀭𑀡𑀁? 𑀆𑀘𑀭𑀺𑀬𑀓𑀺𑀘𑁆𑀘𑀁, 𑀉𑀧𑀚𑁆𑀛𑀸𑀬𑀓𑀺𑀘𑁆𑀘𑀁, 𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑀺𑀘𑁆𑀘𑀁, 𑀲𑀫𑀸𑀦𑀸𑀘𑀭𑀺𑀬𑀓𑀺𑀘𑁆𑀘𑀁 𑁋 𑀇𑀤𑀁 𑀓𑀺𑀘𑁆𑀘𑀁 𑀦𑁄 𑀅𑀥𑀺𑀓𑀭𑀡𑀁.

‘‘𑀢𑀢𑁆𑀣 𑀓𑀢𑀫𑀁 𑀅𑀥𑀺𑀓𑀭𑀡𑀁 𑀦𑁄 𑀓𑀺𑀘𑁆𑀘𑀁? 𑀯𑀺𑀯𑀸𑀤𑀸𑀥𑀺𑀓𑀭𑀡𑀁, 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁, 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑁋 𑀇𑀤𑀁 𑀅𑀥𑀺𑀓𑀭𑀡𑀁 𑀦𑁄 𑀓𑀺𑀘𑁆𑀘𑀁.

‘‘𑀢𑀢𑁆𑀣 𑀓𑀢𑀫𑀁 𑀅𑀥𑀺𑀓𑀭𑀡𑀜𑁆𑀘𑁂𑀯 𑀓𑀺𑀘𑁆𑀘𑀜𑁆𑀘? 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀅𑀥𑀺𑀓𑀭𑀡𑀜𑁆𑀘𑁂𑀯 𑀓𑀺𑀘𑁆𑀘𑀜𑁆𑀘.