𑁯. 𑀅𑀥𑀺𑀓𑀭𑀡𑀯𑀽𑀧𑀲𑀫𑀦𑀲𑀫𑀣𑁄

𑀲𑀫𑁆𑀫𑀼𑀔𑀸𑀯𑀺𑀦𑀬𑁄

𑁨𑁨𑁮. [𑀧𑀭𑀺. 𑁨𑁯𑁨-𑁨𑁯𑁩, 𑁩𑁦𑁭 𑀆𑀤𑀬𑁄] ‘‘𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀓𑀢𑀺𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀢𑀺? 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀤𑁆𑀯𑀻𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀢𑀺 𑁋 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘, 𑀬𑁂𑀪𑀼𑀬𑁆𑀬𑀲𑀺𑀓𑀸𑀬 𑀘. 𑀲𑀺𑀬𑀸 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀏𑀓𑀁 𑀲𑀫𑀣𑀁 𑀅𑀦𑀸𑀕𑀫𑁆𑀫 𑀬𑁂𑀪𑀼𑀬𑁆𑀬𑀲𑀺𑀓𑀁, 𑀏𑀓𑁂𑀦 𑀲𑀫𑀣𑁂𑀦 𑀲𑀫𑁂𑀬𑁆𑀬 𑁋 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦𑀸𑀢𑀺? 𑀲𑀺𑀬𑀸𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀬𑀣𑀸 𑀓𑀣𑀁 𑀯𑀺𑀬? 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀯𑀺𑀯𑀤𑀦𑁆𑀢𑀺 𑁋 𑀥𑀫𑁆𑀫𑁄𑀢𑀺 𑀯𑀸 𑀅𑀥𑀫𑁆𑀫𑁄𑀢𑀺 𑀯𑀸, 𑀯𑀺𑀦𑀬𑁄𑀢𑀺 𑀯𑀸 𑀅𑀯𑀺𑀦𑀬𑁄𑀢𑀺 𑀯𑀸, 𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀯𑀸 𑀅𑀪𑀸𑀲𑀺𑀢𑀁 𑀅𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀯𑀸, 𑀆𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦𑀸𑀢𑀺 𑀯𑀸 𑀅𑀦𑀸𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦𑀸𑀢𑀺 𑀯𑀸, 𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀯𑀸 𑀅𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀯𑀸, 𑀆𑀧𑀢𑁆𑀢𑀻𑀢𑀺 𑀯𑀸 𑀅𑀦𑀸𑀧𑀢𑁆𑀢𑀻𑀢𑀺 𑀯𑀸, 𑀮𑀳𑀼𑀓𑀸 𑀆𑀧𑀢𑁆𑀢𑀻𑀢𑀺 𑀯𑀸 𑀕𑀭𑀼𑀓𑀸 𑀆𑀧𑀢𑁆𑀢𑀻𑀢𑀺 𑀯𑀸, 𑀲𑀸𑀯𑀲𑁂𑀲𑀸 𑀆𑀧𑀢𑁆𑀢𑀻𑀢𑀺 𑀯𑀸 𑀅𑀦𑀯𑀲𑁂𑀲𑀸 𑀆𑀧𑀢𑁆𑀢𑀻𑀢𑀺 𑀯𑀸, 𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀯𑀸 𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀯𑀸.

‘‘𑀢𑁂 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀲𑀓𑁆𑀓𑁄𑀦𑁆𑀢𑀺 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀼𑀁, 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀥𑀺𑀓𑀭𑀡𑀁 𑀯𑀽𑀧𑀲𑀦𑁆𑀢𑀁. 𑀓𑁂𑀦 𑀯𑀽𑀧𑀲𑀦𑁆𑀢𑀁? 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦. 𑀓𑀺𑀜𑁆𑀘 𑀢𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑀲𑁆𑀫𑀺𑀁? 𑀲𑀗𑁆𑀖𑀲𑀫𑁆𑀫𑀼𑀔𑀢𑀸, 𑀥𑀫𑁆𑀫𑀲𑀫𑁆𑀫𑀼𑀔𑀢𑀸, 𑀯𑀺𑀦𑀬𑀲𑀫𑁆𑀫𑀼𑀔𑀢𑀸, 𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸. 𑀓𑀸 𑀘 𑀢𑀢𑁆𑀣 𑀲𑀗𑁆𑀖𑀲𑀫𑁆𑀫𑀼𑀔𑀢𑀸? 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸 𑀢𑁂 𑀆𑀕𑀢𑀸 𑀳𑁄𑀦𑁆𑀢𑀺, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀆𑀳𑀝𑁄 𑀳𑁄𑀢𑀺, 𑀲𑀫𑁆𑀫𑀼𑀔𑀻𑀪𑀽𑀢𑀸 𑀦 𑀧𑀝𑀺𑀓𑁆𑀓𑁄𑀲𑀦𑁆𑀢𑀺 𑁋 𑀅𑀬𑀁 𑀢𑀢𑁆𑀣 𑀲𑀗𑁆𑀖𑀲𑀫𑁆𑀫𑀼𑀔𑀢𑀸. 𑀓𑀸 𑀘 𑀢𑀢𑁆𑀣 𑀥𑀫𑁆𑀫𑀲𑀫𑁆𑀫𑀼𑀔𑀢𑀸, 𑀯𑀺𑀦𑀬𑀲𑀫𑁆𑀫𑀼𑀔𑀢𑀸? 𑀬𑁂𑀦 𑀥𑀫𑁆𑀫𑁂𑀦 𑀬𑁂𑀦 𑀯𑀺𑀦𑀬𑁂𑀦 𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁆𑀫𑀢𑀺 𑁋 𑀅𑀬𑀁 𑀢𑀢𑁆𑀣 𑀥𑀫𑁆𑀫𑀲𑀫𑁆𑀫𑀼𑀔𑀢𑀸, 𑀯𑀺𑀦𑀬𑀲𑀫𑁆𑀫𑀼𑀔𑀢𑀸. 𑀓𑀸 𑀘 𑀢𑀢𑁆𑀣 𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸? 𑀬𑁄 𑀘 𑀯𑀺𑀯𑀤𑀢𑀺, 𑀬𑁂𑀦 𑀘 𑀯𑀺𑀯𑀤𑀢𑀺, 𑀉𑀪𑁄 𑀅𑀢𑁆𑀣𑀧𑀘𑁆𑀘𑀢𑁆𑀣𑀺𑀓𑀸 𑀲𑀫𑁆𑀫𑀼𑀔𑀻𑀪𑀽𑀢𑀸 𑀳𑁄𑀦𑁆𑀢𑀺 𑁋 𑀅𑀬𑀁 𑀢𑀢𑁆𑀣 𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸. 𑀏𑀯𑀁 𑀯𑀽𑀧𑀲𑀦𑁆𑀢𑀁 𑀘𑁂, 𑀪𑀺𑀓𑁆𑀔𑀯𑁂, 𑀅𑀥𑀺𑀓𑀭𑀡𑀁 𑀓𑀸𑀭𑀓𑁄 𑀉𑀓𑁆𑀓𑁄𑀝𑁂𑀢𑀺, 𑀉𑀓𑁆𑀓𑁄𑀝𑀦𑀓𑀁 𑀧𑀸𑀘𑀺𑀢𑁆𑀢𑀺𑀬𑀁; 𑀙𑀦𑁆𑀤𑀤𑀸𑀬𑀓𑁄 𑀔𑀻𑀬𑀢𑀺, 𑀔𑀻𑀬𑀦𑀓𑀁 𑀧𑀸𑀘𑀺𑀢𑁆𑀢𑀺𑀬𑀁.

𑁨𑁨𑁯. ‘‘𑀢𑁂 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀦 𑀲𑀓𑁆𑀓𑁄𑀦𑁆𑀢𑀺 𑀢𑀁 𑀅𑀥𑀺𑀓𑀭𑀡𑀁 𑀢𑀲𑁆𑀫𑀺𑀁 𑀆𑀯𑀸𑀲𑁂 𑀯𑀽𑀧𑀲𑀫𑁂𑀢𑀼𑀁, 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺, 𑀬𑀲𑁆𑀫𑀺𑀁 𑀆𑀯𑀸𑀲𑁂 𑀲𑀫𑁆𑀩𑀳𑀼𑀮𑀸 [𑀩𑀳𑀼𑀢𑀭𑀸 (𑀲𑀻. 𑀲𑁆𑀬𑀸.)] 𑀪𑀺𑀓𑁆𑀔𑀽, 𑀲𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄. 𑀢𑁂 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀢𑀁 𑀆𑀯𑀸𑀲𑀁 𑀕𑀘𑁆𑀙𑀦𑁆𑀢𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀓𑁆𑀓𑁄𑀦𑁆𑀢𑀺 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀼𑀁, 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀥𑀺𑀓𑀭𑀡𑀁 𑀯𑀽𑀧𑀲𑀦𑁆𑀢𑀁. 𑀓𑁂𑀦 𑀯𑀽𑀧𑀲𑀦𑁆𑀢𑀁? 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦. 𑀓𑀺𑀜𑁆𑀘 𑀢𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑀲𑁆𑀫𑀺𑀁? 𑀲𑀗𑁆𑀖𑀲𑀫𑁆𑀫𑀼𑀔𑀢𑀸, 𑀥𑀫𑁆𑀫𑀲𑀫𑁆𑀫𑀼𑀔𑀢𑀸, 𑀯𑀺𑀦𑀬𑀲𑀫𑁆𑀫𑀼𑀔𑀢𑀸, 𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸. 𑀓𑀸 𑀘 𑀢𑀢𑁆𑀣 𑀲𑀗𑁆𑀖𑀲𑀫𑁆𑀫𑀼𑀔𑀢𑀸? 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸 𑀢𑁂 𑀆𑀕𑀢𑀸 𑀳𑁄𑀦𑁆𑀢𑀺, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀆𑀳𑀝𑁄 𑀳𑁄𑀢𑀺, 𑀲𑀫𑁆𑀫𑀼𑀔𑀻𑀪𑀽𑀢𑀸 𑀦 𑀧𑀝𑀺𑀓𑁆𑀓𑁄𑀲𑀦𑁆𑀢𑀺 𑁋 𑀅𑀬𑀁 𑀢𑀢𑁆𑀣 𑀲𑀗𑁆𑀖𑀲𑀫𑁆𑀫𑀼𑀔𑀢𑀸. 𑀓𑀸 𑀘 𑀢𑀢𑁆𑀣 𑀥𑀫𑁆𑀫𑀲𑀫𑁆𑀫𑀼𑀔𑀢𑀸, 𑀯𑀺𑀦𑀬𑀲𑀫𑁆𑀫𑀼𑀔𑀢𑀸? 𑀬𑁂𑀦 𑀥𑀫𑁆𑀫𑁂𑀦 𑀬𑁂𑀦 𑀯𑀺𑀦𑀬𑁂𑀦 𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁆𑀫𑀢𑀺 𑁋 𑀅𑀬𑀁 𑀢𑀢𑁆𑀣 𑀥𑀫𑁆𑀫𑀲𑀫𑁆𑀫𑀼𑀔𑀢𑀸, 𑀯𑀺𑀦𑀬𑀲𑀫𑁆𑀫𑀼𑀔𑀢𑀸. 𑀓𑀸 𑀘 𑀢𑀢𑁆𑀣 𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸? 𑀬𑁄 𑀘 𑀯𑀺𑀯𑀤𑀢𑀺, 𑀬𑁂𑀦 𑀘 𑀯𑀺𑀯𑀤𑀢𑀺, 𑀉𑀪𑁄 𑀅𑀢𑁆𑀣𑀧𑀘𑁆𑀘𑀢𑁆𑀣𑀺𑀓𑀸 𑀲𑀫𑁆𑀫𑀼𑀔𑀻𑀪𑀽𑀢𑀸 𑀳𑁄𑀦𑁆𑀢𑀺 𑁋 𑀅𑀬𑀁 𑀢𑀢𑁆𑀣 𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸. 𑀏𑀯𑀁 𑀯𑀽𑀧𑀲𑀦𑁆𑀢𑀁 𑀘𑁂, 𑀪𑀺𑀓𑁆𑀔𑀯𑁂, 𑀅𑀥𑀺𑀓𑀭𑀡𑀁 𑀓𑀸𑀭𑀓𑁄 𑀉𑀓𑁆𑀓𑁄𑀝𑁂𑀢𑀺, 𑀉𑀓𑁆𑀓𑁄𑀝𑀦𑀓𑀁 𑀧𑀸𑀘𑀺𑀢𑁆𑀢𑀺𑀬𑀁; 𑀙𑀦𑁆𑀤𑀤𑀸𑀬𑀓𑁄 𑀔𑀻𑀬𑀢𑀺, 𑀔𑀻𑀬𑀦𑀓𑀁 𑀧𑀸𑀘𑀺𑀢𑁆𑀢𑀺𑀬𑀁.

𑁨𑁩𑁦. ‘‘𑀢𑁂 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀢𑀁 𑀆𑀯𑀸𑀲𑀁 𑀆𑀕𑀘𑁆𑀙𑀦𑁆𑀢𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀦 𑀲𑀓𑁆𑀓𑁄𑀦𑁆𑀢𑀺 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀼𑀁, 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺, 𑀢𑀁 𑀆𑀯𑀸𑀲𑀁 𑀕𑀦𑁆𑀢𑁆𑀯𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘𑀇𑀤𑀁 𑀔𑁄, 𑀆𑀯𑀼𑀲𑁄, 𑀅𑀥𑀺𑀓𑀭𑀡𑀁 𑀏𑀯𑀁 𑀚𑀸𑀢𑀁, 𑀏𑀯𑀁 𑀲𑀫𑀼𑀧𑁆𑀧𑀦𑁆𑀦𑀁; 𑀲𑀸𑀥𑀸𑀬𑀲𑁆𑀫𑀦𑁆𑀢𑀸 𑀇𑀫𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀦𑁆𑀢𑀼 𑀥𑀫𑁆𑀫𑁂𑀦 𑀯𑀺𑀦𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦, 𑀬𑀣𑀬𑀺𑀤𑀁 𑀅𑀥𑀺𑀓𑀭𑀡𑀁 𑀲𑀼𑀯𑀽𑀧𑀲𑀦𑁆𑀢𑀁 𑀅𑀲𑁆𑀲𑀸’𑀢𑀺.

‘‘𑀲𑀘𑁂, 𑀪𑀺𑀓𑁆𑀔𑀯𑁂, 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀯𑀼𑀟𑁆𑀠𑀢𑀭𑀸 𑀳𑁄𑀦𑁆𑀢𑀺, 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀦𑀯𑀓𑀢𑀭𑀸, 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀆𑀯𑀸𑀲𑀺𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘𑀇𑀗𑁆𑀖 𑀢𑀼𑀫𑁆𑀳𑁂, 𑀆𑀬𑀲𑁆𑀫𑀦𑁆𑀢𑁄, 𑀫𑀼𑀳𑀼𑀢𑁆𑀢𑀁 𑀏𑀓𑀫𑀦𑁆𑀢𑀁 𑀳𑁄𑀣, 𑀬𑀸𑀯 𑀫𑀬𑀁 𑀫𑀦𑁆𑀢𑁂𑀫𑀸’𑀢𑀺. 𑀲𑀘𑁂 𑀧𑀦, 𑀪𑀺𑀓𑁆𑀔𑀯𑁂, 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀦𑀯𑀓𑀢𑀭𑀸 𑀳𑁄𑀦𑁆𑀢𑀺, 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀯𑀼𑀟𑁆𑀠𑀢𑀭𑀸, 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀆𑀯𑀸𑀲𑀺𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘𑀢𑁂𑀦 𑀳𑀺 𑀢𑀼𑀫𑁆𑀳𑁂, 𑀆𑀬𑀲𑁆𑀫𑀦𑁆𑀢𑁄, 𑀫𑀼𑀳𑀼𑀢𑁆𑀢𑀁 𑀇𑀥𑁂𑀯 𑀢𑀸𑀯 𑀳𑁄𑀣, 𑀬𑀸𑀯 𑀫𑀬𑀁 𑀫𑀦𑁆𑀢𑁂𑀫𑀸’𑀢𑀺.

‘‘𑀲𑀘𑁂 𑀧𑀦, 𑀪𑀺𑀓𑁆𑀔𑀯𑁂, 𑀆𑀯𑀸𑀲𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀫𑀦𑁆𑀢𑀬𑀫𑀸𑀦𑀸𑀦𑀁 𑀏𑀯𑀁 𑀳𑁄𑀢𑀺 𑁋 ‘𑀦 𑀫𑀬𑀁 𑀲𑀓𑁆𑀓𑁄𑀫 𑀇𑀫𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀼𑀁 𑀥𑀫𑁆𑀫𑁂𑀦 𑀯𑀺𑀦𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦𑀸’𑀢𑀺, 𑀦 𑀢𑀁 𑀅𑀥𑀺𑀓𑀭𑀡𑀁 𑀆𑀯𑀸𑀲𑀺𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁. 𑀲𑀘𑁂 𑀧𑀦, 𑀪𑀺𑀓𑁆𑀔𑀯𑁂, 𑀆𑀯𑀸𑀲𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀫𑀦𑁆𑀢𑀬𑀫𑀸𑀦𑀸𑀦𑀁 𑀏𑀯𑀁 𑀳𑁄𑀢𑀺 𑁋 ‘𑀲𑀓𑁆𑀓𑁄𑀫 𑀫𑀬𑀁 𑀇𑀫𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀼𑀁 𑀥𑀫𑁆𑀫𑁂𑀦 𑀯𑀺𑀦𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦𑀸’𑀢𑀺, 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀆𑀯𑀸𑀲𑀺𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘𑀲𑀘𑁂 𑀢𑀼𑀫𑁆𑀳𑁂, 𑀆𑀬𑀲𑁆𑀫𑀦𑁆𑀢𑁄, 𑀅𑀫𑁆𑀳𑀸𑀓𑀁 𑀇𑀫𑀁 𑀅𑀥𑀺𑀓𑀭𑀡𑀁 𑀬𑀣𑀸𑀚𑀸𑀢𑀁 𑀬𑀣𑀸𑀲𑀫𑀼𑀧𑁆𑀧𑀦𑁆𑀦𑀁 𑀆𑀭𑁄𑀘𑁂𑀲𑁆𑀲𑀣, 𑀬𑀣𑀸 𑀘 𑀫𑀬𑀁 𑀇𑀫𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀲𑁆𑀲𑀸𑀫 𑀥𑀫𑁆𑀫𑁂𑀦 𑀯𑀺𑀦𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦 𑀢𑀣𑀸 𑀲𑀼𑀯𑀽𑀧𑀲𑀦𑁆𑀢𑀁 𑀪𑀯𑀺𑀲𑁆𑀲𑀢𑀺. 𑀏𑀯𑀁 𑀫𑀬𑀁 𑀇𑀫𑀁 𑀅𑀥𑀺𑀓𑀭𑀡𑀁 𑀲𑀫𑁆𑀧𑀝𑀺𑀘𑁆𑀙𑀺𑀲𑁆𑀲𑀸𑀫. 𑀦𑁄 𑀘𑁂 𑀢𑀼𑀫𑁆𑀳𑁂, 𑀆𑀬𑀲𑁆𑀫𑀦𑁆𑀢𑁄, 𑀅𑀫𑁆𑀳𑀸𑀓𑀁 𑀇𑀫𑀁 𑀅𑀥𑀺𑀓𑀭𑀡𑀁 𑀬𑀣𑀸𑀚𑀸𑀢𑀁 𑀬𑀣𑀸𑀲𑀫𑀼𑀧𑁆𑀧𑀦𑁆𑀦𑀁 𑀆𑀭𑁄𑀘𑁂𑀲𑁆𑀲𑀣, 𑀬𑀣𑀸 𑀘 𑀫𑀬𑀁 𑀇𑀫𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀲𑁆𑀲𑀸𑀫 𑀥𑀫𑁆𑀫𑁂𑀦 𑀯𑀺𑀦𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦 𑀢𑀣𑀸 𑀦 𑀲𑀼𑀯𑀽𑀧𑀲𑀦𑁆𑀢𑀁 𑀪𑀯𑀺𑀲𑁆𑀲𑀢𑀺, 𑀦 𑀫𑀬𑀁 𑀇𑀫𑀁 𑀅𑀥𑀺𑀓𑀭𑀡𑀁 𑀲𑀫𑁆𑀧𑀝𑀺𑀘𑁆𑀙𑀺𑀲𑁆𑀲𑀸𑀫𑀸’𑀢𑀺. 𑀏𑀯𑀁 𑀲𑀼𑀧𑀭𑀺𑀕𑁆𑀕𑀳𑀺𑀢𑀁 𑀔𑁄, 𑀪𑀺𑀓𑁆𑀔𑀯𑁂, 𑀓𑀢𑁆𑀯𑀸 𑀆𑀯𑀸𑀲𑀺𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀢𑀁 𑀅𑀥𑀺𑀓𑀭𑀡𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁.

‘‘𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀆𑀕𑀦𑁆𑀢𑀼𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘𑀬𑀣𑀸𑀚𑀸𑀢𑀁 𑀬𑀣𑀸𑀲𑀫𑀼𑀧𑁆𑀧𑀦𑁆𑀦𑀁 𑀫𑀬𑀁 𑀇𑀫𑀁 𑀅𑀥𑀺𑀓𑀭𑀡𑀁 𑀆𑀬𑀲𑁆𑀫𑀦𑁆𑀢𑀸𑀦𑀁 𑀆𑀭𑁄𑀘𑁂𑀲𑁆𑀲𑀸𑀫. 𑀲𑀘𑁂 𑀆𑀬𑀲𑁆𑀫𑀦𑁆𑀢𑀸 𑀲𑀓𑁆𑀓𑁄𑀦𑁆𑀢𑀺 𑀏𑀢𑁆𑀢𑀓𑁂𑀦 𑀯𑀸 𑀏𑀢𑁆𑀢𑀓𑁂𑀦 𑀯𑀸 𑀅𑀦𑁆𑀢𑀭𑁂𑀦 𑀇𑀫𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀼𑀁 𑀥𑀫𑁆𑀫𑁂𑀦 𑀯𑀺𑀦𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦 𑀢𑀣𑀸 𑀲𑀼𑀯𑀽𑀧𑀲𑀦𑁆𑀢𑀁 𑀪𑀯𑀺𑀲𑁆𑀲𑀢𑀺. 𑀏𑀯𑀁 𑀫𑀬𑀁 𑀇𑀫𑀁 𑀅𑀥𑀺𑀓𑀭𑀡𑀁 𑀆𑀬𑀲𑁆𑀫𑀦𑁆𑀢𑀸𑀦𑀁 𑀦𑀺𑀬𑁆𑀬𑀸𑀤𑁂𑀲𑁆𑀲𑀸𑀫. 𑀦𑁄 𑀘𑁂 𑀆𑀬𑀲𑁆𑀫𑀦𑁆𑀢𑀸 𑀲𑀓𑁆𑀓𑁄𑀦𑁆𑀢𑀺 𑀏𑀢𑁆𑀢𑀓𑁂𑀦 𑀯𑀸 𑀏𑀢𑁆𑀢𑀓𑁂𑀦 𑀯𑀸 𑀅𑀦𑁆𑀢𑀭𑁂𑀦 𑀇𑀫𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀼𑀁 𑀥𑀫𑁆𑀫𑁂𑀦 𑀯𑀺𑀦𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦 𑀢𑀣𑀸 𑀦 𑀲𑀼𑀯𑀽𑀧𑀲𑀦𑁆𑀢𑀁 𑀪𑀯𑀺𑀲𑁆𑀲𑀢𑀺, 𑀦 𑀫𑀬𑀁 𑀇𑀫𑀁 𑀅𑀥𑀺𑀓𑀭𑀡𑀁 𑀆𑀬𑀲𑁆𑀫𑀦𑁆𑀢𑀸𑀦𑀁 𑀦𑀺𑀬𑁆𑀬𑀸𑀤𑁂𑀲𑁆𑀲𑀸𑀫. 𑀫𑀬𑀫𑁂𑀯 𑀇𑀫𑀲𑁆𑀲 𑀅𑀥𑀺𑀓𑀭𑀡𑀲𑁆𑀲 𑀲𑀸𑀫𑀺𑀦𑁄 𑀪𑀯𑀺𑀲𑁆𑀲𑀸𑀫𑀸’𑀢𑀺. 𑀏𑀯𑀁 𑀲𑀼𑀧𑀭𑀺𑀕𑁆𑀕𑀳𑀺𑀢𑀁 𑀔𑁄, 𑀪𑀺𑀓𑁆𑀔𑀯𑁂, 𑀓𑀢𑁆𑀯𑀸 𑀆𑀕𑀦𑁆𑀢𑀼𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀢𑀁 𑀅𑀥𑀺𑀓𑀭𑀡𑀁 𑀆𑀯𑀸𑀲𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀦𑀺𑀬𑁆𑀬𑀸𑀤𑁂𑀢𑀩𑁆𑀩𑀁.

‘‘𑀢𑁂 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀲𑀓𑁆𑀓𑁄𑀦𑁆𑀢𑀺 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀼𑀁, 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀥𑀺𑀓𑀭𑀡𑀁 𑀯𑀽𑀧𑀲𑀦𑁆𑀢𑀁. 𑀓𑁂𑀦 𑀯𑀽𑀧𑀲𑀦𑁆𑀢𑀁? 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦. 𑀓𑀺𑀜𑁆𑀘 𑀢𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑀲𑁆𑀫𑀺𑀁? 𑀲𑀗𑁆𑀖𑀲𑀫𑁆𑀫𑀼𑀔𑀢𑀸, 𑀥𑀫𑁆𑀫𑀲𑀫𑁆𑀫𑀼𑀔𑀢𑀸, 𑀯𑀺𑀦𑀬𑀲𑀫𑁆𑀫𑀼𑀔𑀢𑀸, 𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸…𑀧𑁂… 𑀏𑀯𑀁 𑀯𑀽𑀧𑀲𑀦𑁆𑀢𑀁 𑀘𑁂, 𑀪𑀺𑀓𑁆𑀔𑀯𑁂, 𑀅𑀥𑀺𑀓𑀭𑀡𑀁 𑀓𑀸𑀭𑀓𑁄 𑀉𑀓𑁆𑀓𑁄𑀝𑁂𑀢𑀺, 𑀉𑀓𑁆𑀓𑁄𑀝𑀦𑀓𑀁 𑀧𑀸𑀘𑀺𑀢𑁆𑀢𑀺𑀬𑀁; 𑀙𑀦𑁆𑀤𑀤𑀸𑀬𑀓𑁄 𑀔𑀻𑀬𑀢𑀺, 𑀔𑀻𑀬𑀦𑀓𑀁 𑀧𑀸𑀘𑀺𑀢𑁆𑀢𑀺𑀬𑀁.

𑀉𑀩𑁆𑀩𑀸𑀳𑀺𑀓𑀸𑀬𑀯𑀽𑀧𑀲𑀫𑀦𑀁

𑁨𑁩𑁧. ‘‘𑀢𑁂𑀳𑀺 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀢𑀲𑁆𑀫𑀺𑀁 𑀅𑀥𑀺𑀓𑀭𑀡𑁂 𑀯𑀺𑀦𑀺𑀘𑁆𑀙𑀺𑀬𑀫𑀸𑀦𑁂 𑀅𑀦𑀦𑁆𑀢𑀸𑀦𑀺 [𑀅𑀦𑀕𑁆𑀕𑀸𑀦𑀺 (𑀲𑀻.)] 𑀘𑁂𑀯 𑀪𑀲𑁆𑀲𑀸𑀦𑀺 𑀚𑀸𑀬𑀦𑁆𑀢𑀺, 𑀦 𑀘𑁂𑀓𑀲𑁆𑀲 [𑀦 𑀘𑁂𑀢𑀲𑁆𑀲 (𑀓.)] 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺, 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀏𑀯𑀭𑀽𑀧𑀁 𑀅𑀥𑀺𑀓𑀭𑀡𑀁 𑀉𑀩𑁆𑀩𑀸𑀳𑀺𑀓𑀸𑀬 𑀯𑀽𑀧𑀲𑀫𑁂𑀢𑀼𑀁. ‘‘𑀤𑀲𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀉𑀩𑁆𑀩𑀸𑀳𑀺𑀓𑀸𑀬 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄 𑁋 𑀲𑀻𑀮𑀯𑀸 𑀳𑁄𑀢𑀺, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀺 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻, 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼; 𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀺 𑀲𑀼𑀢𑀥𑀭𑁄 𑀲𑀼𑀢𑀲𑀦𑁆𑀦𑀺𑀘𑀬𑁄, 𑀬𑁂 𑀢𑁂 𑀥𑀫𑁆𑀫𑀸 𑀆𑀤𑀺𑀓𑀮𑁆𑀬𑀸𑀡𑀸 𑀫𑀚𑁆𑀛𑁂𑀓𑀮𑁆𑀬𑀸𑀡𑀸 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀸 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀪𑀺𑀯𑀤𑀦𑁆𑀢𑀺, 𑀢𑀣𑀸𑀭𑀽𑀧𑀲𑁆𑀲 𑀥𑀫𑁆𑀫𑀸 𑀩𑀳𑀼𑀲𑁆𑀲𑀼𑀢𑀸 𑀳𑁄𑀦𑁆𑀢𑀺, 𑀥𑀸𑀢𑀸 [𑀥𑀢𑀸 (𑀲𑀻. 𑀲𑁆𑀬𑀸.)] 𑀯𑀘𑀲𑀸 𑀧𑀭𑀺𑀘𑀺𑀢𑀸 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸; 𑀉𑀪𑀬𑀸𑀦𑀺 𑀔𑁄 𑀧𑀦𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀸𑀦𑀺 𑀯𑀺𑀢𑁆𑀣𑀸𑀭𑁂𑀦 𑀲𑁆𑀯𑀸𑀕𑀢𑀸𑀦𑀺 𑀳𑁄𑀦𑁆𑀢𑀺 𑀲𑀼𑀯𑀺𑀪𑀢𑁆𑀢𑀸𑀦𑀺 𑀲𑀼𑀧𑁆𑀧𑀯𑀢𑁆𑀢𑀻𑀦𑀺 𑀲𑀼𑀯𑀺𑀦𑀺𑀘𑁆𑀙𑀺𑀢𑀸𑀦𑀺 𑀲𑀼𑀢𑁆𑀢𑀲𑁄 𑀅𑀦𑀼𑀩𑁆𑀬𑀜𑁆𑀚𑀦𑀲𑁄; 𑀯𑀺𑀦𑀬𑁂 𑀔𑁄 𑀧𑀦 𑀞𑀺𑀢𑁄 [𑀙𑁂𑀓𑁄 (𑀓.)] 𑀳𑁄𑀢𑀺 𑀅𑀲𑀁𑀳𑀻𑀭𑁄; 𑀧𑀝𑀺𑀩𑀮𑁄 𑀳𑁄𑀢𑀺 𑀉𑀪𑁄 𑀅𑀢𑁆𑀣𑀧𑀘𑁆𑀘𑀢𑁆𑀣𑀺𑀓𑁂 𑀅𑀲𑁆𑀲𑀸𑀲𑁂𑀢𑀼𑀁 𑀲𑀜𑁆𑀜𑀸𑀧𑁂𑀢𑀼𑀁 𑀦𑀺𑀚𑁆𑀛𑀸𑀧𑁂𑀢𑀼𑀁 𑀧𑁂𑀓𑁆𑀔𑁂𑀢𑀼𑀁 𑀧𑀲𑀸𑀤𑁂𑀢𑀼𑀁; 𑀅𑀥𑀺𑀓𑀭𑀡𑀲𑀫𑀼𑀧𑁆𑀧𑀸𑀤𑀯𑀽𑀧𑀲𑀫𑀦𑀓𑀼𑀲𑀮𑁄 𑀳𑁄𑀢𑀺; 𑀅𑀥𑀺𑀓𑀭𑀡𑀁 𑀚𑀸𑀦𑀸𑀢𑀺; 𑀅𑀥𑀺𑀓𑀭𑀡𑀲𑀫𑀼𑀤𑀬𑀁 𑀚𑀸𑀦𑀸𑀢𑀺; 𑀅𑀥𑀺𑀓𑀭𑀡𑀦𑀺𑀭𑁄𑀥𑀁 𑀚𑀸𑀦𑀸𑀢𑀺; 𑀅𑀥𑀺𑀓𑀭𑀡𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑀝𑀺𑀧𑀤𑀁 𑀚𑀸𑀦𑀸𑀢𑀺. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀇𑀫𑁂𑀳𑀺 𑀤𑀲𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀪𑀺𑀓𑁆𑀔𑀼𑀁 𑀉𑀩𑁆𑀩𑀸𑀳𑀺𑀓𑀸𑀬 𑀲𑀫𑁆𑀫𑀦𑁆𑀦𑀺𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄. 𑀧𑀞𑀫𑀁 𑀪𑀺𑀓𑁆𑀔𑀼 𑀬𑀸𑀘𑀺𑀢𑀩𑁆𑀩𑁄, 𑀬𑀸𑀘𑀺𑀢𑁆𑀯𑀸 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁨𑁩𑁨. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀫𑁆𑀳𑀸𑀓𑀁 𑀇𑀫𑀲𑁆𑀫𑀺𑀁 𑀅𑀥𑀺𑀓𑀭𑀡𑁂 𑀯𑀺𑀦𑀺𑀘𑁆𑀙𑀺𑀬𑀫𑀸𑀦𑁂 𑀅𑀦𑀦𑁆𑀢𑀸𑀦𑀺 𑀘𑁂𑀯 𑀪𑀲𑁆𑀲𑀸𑀦𑀺 𑀚𑀸𑀬𑀦𑁆𑀢𑀺, 𑀦 𑀘𑁂𑀓𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀜𑁆𑀘 𑀇𑀢𑁆𑀣𑀦𑁆𑀦𑀸𑀫𑀜𑁆𑀘 𑀪𑀺𑀓𑁆𑀔𑀼𑀁 𑀲𑀫𑁆𑀫𑀦𑁆𑀦𑁂𑀬𑁆𑀬 𑀉𑀩𑁆𑀩𑀸𑀳𑀺𑀓𑀸𑀬 𑀇𑀫𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀼𑀁. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀫𑁆𑀳𑀸𑀓𑀁 𑀇𑀫𑀲𑁆𑀫𑀺𑀁 𑀅𑀥𑀺𑀓𑀭𑀡𑁂 𑀯𑀺𑀦𑀺𑀘𑁆𑀙𑀺𑀬𑀫𑀸𑀦𑁂 𑀅𑀦𑀦𑁆𑀢𑀸𑀦𑀺 𑀘𑁂𑀯 𑀪𑀲𑁆𑀲𑀸𑀦𑀺 𑀚𑀸𑀬𑀦𑁆𑀢𑀺, 𑀦 𑀘𑁂𑀓𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀜𑁆𑀘 𑀇𑀢𑁆𑀣𑀦𑁆𑀦𑀸𑀫𑀜𑁆𑀘 𑀪𑀺𑀓𑁆𑀔𑀼𑀁 𑀲𑀫𑁆𑀫𑀦𑁆𑀦𑀢𑀺 𑀉𑀩𑁆𑀩𑀸𑀳𑀺𑀓𑀸𑀬 𑀇𑀫𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀼𑀁. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀘 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀘 𑀪𑀺𑀓𑁆𑀔𑀼𑀦𑁄 𑀲𑀫𑁆𑀫𑀼𑀢𑀺 𑀉𑀩𑁆𑀩𑀸𑀳𑀺𑀓𑀸𑀬 𑀇𑀫𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀼𑀁, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀲𑀫𑁆𑀫𑀢𑁄 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑁄 𑀘 𑀇𑀢𑁆𑀣𑀦𑁆𑀦𑀸𑀫𑁄 𑀘 𑀪𑀺𑀓𑁆𑀔𑀼 𑀉𑀩𑁆𑀩𑀸𑀳𑀺𑀓𑀸𑀬 𑀇𑀫𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀼𑀁. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

‘‘𑀢𑁂 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀲𑀓𑁆𑀓𑁄𑀦𑁆𑀢𑀺 𑀢𑀁 𑀅𑀥𑀺𑀓𑀭𑀡𑀁 𑀉𑀩𑁆𑀩𑀸𑀳𑀺𑀓𑀸𑀬 𑀯𑀽𑀧𑀲𑀫𑁂𑀢𑀼𑀁, 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀥𑀺𑀓𑀭𑀡𑀁 𑀯𑀽𑀧𑀲𑀦𑁆𑀢𑀁. 𑀓𑁂𑀦 𑀯𑀽𑀧𑀲𑀦𑁆𑀢𑀁? 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦. 𑀓𑀺𑀜𑁆𑀘 𑀢𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑀲𑁆𑀫𑀺𑀁? 𑀥𑀫𑁆𑀫𑀲𑀫𑁆𑀫𑀼𑀔𑀢𑀸, 𑀯𑀺𑀦𑀬𑀲𑀫𑁆𑀫𑀼𑀔𑀢𑀸, 𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸…𑀧𑁂… 𑀏𑀯𑀁 𑀯𑀽𑀧𑀲𑀦𑁆𑀢𑀁 𑀘𑁂, 𑀪𑀺𑀓𑁆𑀔𑀯𑁂, 𑀅𑀥𑀺𑀓𑀭𑀡𑀁 𑀓𑀸𑀭𑀓𑁄 𑀉𑀓𑁆𑀓𑁄𑀝𑁂𑀢𑀺, 𑀉𑀓𑁆𑀓𑁄𑀝𑀦𑀓𑀁 𑀧𑀸𑀘𑀺𑀢𑁆𑀢𑀺𑀬𑀁.

𑁨𑁩𑁩. ‘‘𑀢𑁂𑀳𑀺 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀢𑀲𑁆𑀫𑀺𑀁 𑀅𑀥𑀺𑀓𑀭𑀡𑁂 𑀯𑀺𑀦𑀺𑀘𑁆𑀙𑀺𑀬𑀫𑀸𑀦𑁂 𑀢𑀢𑁆𑀭𑀸𑀲𑁆𑀲 𑀪𑀺𑀓𑁆𑀔𑀼 𑀥𑀫𑁆𑀫𑀓𑀣𑀺𑀓𑁄, 𑀢𑀲𑁆𑀲 𑀦𑁂𑀯 𑀲𑀼𑀢𑁆𑀢𑀁 𑀆𑀕𑀢𑀁 𑀳𑁄𑀢𑀺, 𑀦𑁄 𑀲𑀼𑀢𑁆𑀢𑀯𑀺𑀪𑀗𑁆𑀕𑁄, 𑀲𑁄 𑀅𑀢𑁆𑀣𑀁 𑀅𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀩𑁆𑀬𑀜𑁆𑀚𑀦𑀘𑁆𑀙𑀸𑀬𑀸𑀬 𑀅𑀢𑁆𑀣𑀁 𑀧𑀝𑀺𑀩𑀸𑀳𑀢𑀺, 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀢𑁂 𑀪𑀺𑀓𑁆𑀔𑀽 𑀜𑀸𑀧𑁂𑀢𑀩𑁆𑀩𑀸 𑁋

‘‘𑀲𑀼𑀡𑀦𑁆𑀢𑀼 𑀫𑁂 𑀆𑀬𑀲𑁆𑀫𑀦𑁆𑀢𑀸. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀥𑀫𑁆𑀫𑀓𑀣𑀺𑀓𑁄. 𑀇𑀫𑀲𑁆𑀲 𑀦𑁂𑀯 𑀲𑀼𑀢𑁆𑀢𑀁 𑀆𑀕𑀢𑀁 𑀳𑁄𑀢𑀺, 𑀦𑁄 𑀲𑀼𑀢𑁆𑀢𑀯𑀺𑀪𑀗𑁆𑀕𑁄. 𑀲𑁄 𑀅𑀢𑁆𑀣𑀁 𑀅𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀩𑁆𑀬𑀜𑁆𑀚𑀦𑀘𑁆𑀙𑀸𑀬𑀸𑀬 𑀅𑀢𑁆𑀣𑀁 𑀧𑀝𑀺𑀩𑀸𑀳𑀢𑀺. 𑀬𑀤𑀸𑀬𑀲𑁆𑀫𑀦𑁆𑀢𑀸𑀦𑀁 𑀧𑀢𑁆𑀢𑀓𑀮𑁆𑀮𑀁, 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀇𑀫𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀬𑁆𑀬𑀸𑀫𑀸𑀢𑀺.

‘‘𑀢𑁂 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀢𑀁 𑀪𑀺𑀓𑁆𑀔𑀼𑀁 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀲𑀓𑁆𑀓𑁄𑀦𑁆𑀢𑀺 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀼𑀁, 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀥𑀺𑀓𑀭𑀡𑀁 𑀯𑀽𑀧𑀲𑀦𑁆𑀢𑀁. 𑀓𑁂𑀦 𑀯𑀽𑀧𑀲𑀦𑁆𑀢𑀁? 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦. 𑀓𑀺𑀜𑁆𑀘 𑀢𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑀲𑁆𑀫𑀺𑀁? 𑀥𑀫𑁆𑀫𑀲𑀫𑁆𑀫𑀼𑀔𑀢𑀸, 𑀯𑀺𑀦𑀬𑀲𑀫𑁆𑀫𑀼𑀔𑀢𑀸, 𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸…𑀧𑁂… 𑀏𑀯𑀁 𑀯𑀽𑀧𑀲𑀦𑁆𑀢𑀁 𑀘𑁂, 𑀪𑀺𑀓𑁆𑀔𑀯𑁂, 𑀅𑀥𑀺𑀓𑀭𑀡𑀁 𑀓𑀸𑀭𑀓𑁄 𑀉𑀓𑁆𑀓𑁄𑀝𑁂𑀢𑀺, 𑀉𑀓𑁆𑀓𑁄𑀝𑀦𑀓𑀁 𑀧𑀸𑀘𑀺𑀢𑁆𑀢𑀺𑀬𑀁.

‘‘𑀢𑁂𑀳𑀺 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀢𑀲𑁆𑀫𑀺𑀁 𑀅𑀥𑀺𑀓𑀭𑀡𑁂 𑀯𑀺𑀦𑀺𑀘𑁆𑀙𑀺𑀬𑀫𑀸𑀦𑁂 𑀢𑀢𑁆𑀭𑀸𑀲𑁆𑀲 𑀪𑀺𑀓𑁆𑀔𑀼 𑀥𑀫𑁆𑀫𑀓𑀣𑀺𑀓𑁄, 𑀢𑀲𑁆𑀲 𑀲𑀼𑀢𑁆𑀢𑀜𑁆𑀳𑀺 𑀔𑁄 𑀆𑀕𑀢𑀁 𑀳𑁄𑀢𑀺, 𑀦𑁄 𑀲𑀼𑀢𑁆𑀢𑀯𑀺𑀪𑀗𑁆𑀕𑁄, 𑀲𑁄 𑀅𑀢𑁆𑀣𑀁 𑀅𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀩𑁆𑀬𑀜𑁆𑀚𑀦𑀘𑁆𑀙𑀸𑀬𑀸𑀬 𑀅𑀢𑁆𑀣𑀁 𑀧𑀝𑀺𑀩𑀸𑀳𑀢𑀺, 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀢𑁂 𑀪𑀺𑀓𑁆𑀔𑀽 𑀜𑀸𑀧𑁂𑀢𑀩𑁆𑀩𑀸 𑁋

‘‘𑀲𑀼𑀡𑀦𑁆𑀢𑀼 𑀫𑁂 𑀆𑀬𑀲𑁆𑀫𑀦𑁆𑀢𑀸. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀥𑀫𑁆𑀫𑀓𑀣𑀺𑀓𑁄. 𑀇𑀫𑀲𑁆𑀲 𑀲𑀼𑀢𑁆𑀢𑀜𑁆𑀳𑀺 𑀔𑁄 𑀆𑀕𑀢𑀁 𑀳𑁄𑀢𑀺, 𑀦𑁄 𑀲𑀼𑀢𑁆𑀢𑀯𑀺𑀪𑀗𑁆𑀕𑁄. 𑀲𑁄 𑀅𑀢𑁆𑀣𑀁 𑀅𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀩𑁆𑀬𑀜𑁆𑀚𑀦𑀘𑁆𑀙𑀸𑀬𑀸𑀬 𑀅𑀢𑁆𑀣𑀁 𑀧𑀝𑀺𑀩𑀸𑀳𑀢𑀺. 𑀬𑀤𑀸𑀬𑀲𑁆𑀫𑀦𑁆𑀢𑀸𑀦𑀁 𑀧𑀢𑁆𑀢𑀓𑀮𑁆𑀮𑀁, 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀇𑀫𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀬𑁆𑀬𑀸𑀫𑀸𑀢𑀺.

‘‘𑀢𑁂 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀢𑀁 𑀪𑀺𑀓𑁆𑀔𑀼𑀁 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀲𑀓𑁆𑀓𑁄𑀦𑁆𑀢𑀺 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀼𑀁, 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀥𑀺𑀓𑀭𑀡𑀁 𑀯𑀽𑀧𑀲𑀦𑁆𑀢𑀁. 𑀓𑁂𑀦 𑀯𑀽𑀧𑀲𑀦𑁆𑀢𑀁? 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦. 𑀓𑀺𑀜𑁆𑀘 𑀢𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑀲𑁆𑀫𑀺𑀁? 𑀥𑀫𑁆𑀫𑀲𑀫𑁆𑀫𑀼𑀔𑀢𑀸, 𑀯𑀺𑀦𑀬𑀲𑀫𑁆𑀫𑀼𑀔𑀢𑀸, 𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸…𑀧𑁂… 𑀏𑀯𑀁 𑀯𑀽𑀧𑀲𑀦𑁆𑀢𑀁 𑀘𑁂, 𑀪𑀺𑀓𑁆𑀔𑀯𑁂, 𑀅𑀥𑀺𑀓𑀭𑀡𑀁 𑀓𑀸𑀭𑀓𑁄 𑀉𑀓𑁆𑀓𑁄𑀝𑁂𑀢𑀺, 𑀉𑀓𑁆𑀓𑁄𑀝𑀦𑀓𑀁 𑀧𑀸𑀘𑀺𑀢𑁆𑀢𑀺𑀬𑀁.

𑀬𑁂𑀪𑀼𑀬𑁆𑀬𑀲𑀺𑀓𑀸𑀯𑀺𑀦𑀬𑁄

𑁨𑁩𑁪. ‘‘𑀢𑁂 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀦 𑀲𑀓𑁆𑀓𑁄𑀦𑁆𑀢𑀺 𑀢𑀁 𑀅𑀥𑀺𑀓𑀭𑀡𑀁 𑀉𑀩𑁆𑀩𑀸𑀳𑀺𑀓𑀸𑀬 𑀯𑀽𑀧𑀲𑀫𑁂𑀢𑀼𑀁, 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀢𑀁 𑀅𑀥𑀺𑀓𑀭𑀡𑀁 𑀲𑀗𑁆𑀖𑀲𑁆𑀲 𑀦𑀺𑀬𑁆𑀬𑀸𑀤𑁂𑀢𑀩𑁆𑀩𑀁 𑁋 ‘𑀦 𑀫𑀬𑀁 [𑀦 𑀘 𑀫𑀬𑀁 (𑀓.)], 𑀪𑀦𑁆𑀢𑁂, 𑀲𑀓𑁆𑀓𑁄𑀫 𑀇𑀫𑀁 𑀅𑀥𑀺𑀓𑀭𑀡𑀁 𑀉𑀩𑁆𑀩𑀸𑀳𑀺𑀓𑀸𑀬 𑀯𑀽𑀧𑀲𑀫𑁂𑀢𑀼𑀁, 𑀲𑀗𑁆𑀖𑁄𑀯 𑀇𑀫𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀽’𑀢𑀺. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀏𑀯𑀭𑀽𑀧𑀁 𑀅𑀥𑀺𑀓𑀭𑀡𑀁 𑀬𑁂𑀪𑀼𑀬𑁆𑀬𑀲𑀺𑀓𑀸𑀬 𑀯𑀽𑀧𑀲𑀫𑁂𑀢𑀼𑀁. 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀲𑀮𑀸𑀓𑀕𑁆𑀕𑀸𑀳𑀸𑀧𑀓𑁄 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄 𑁋 𑀬𑁄 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀕𑀳𑀺𑀢𑀸𑀕𑀳𑀺𑀢𑀜𑁆𑀘 𑀚𑀸𑀦𑁂𑀬𑁆𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄. 𑀧𑀞𑀫𑀁 𑀪𑀺𑀓𑁆𑀔𑀼 𑀬𑀸𑀘𑀺𑀢𑀩𑁆𑀩𑁄, 𑀬𑀸𑀘𑀺𑀢𑁆𑀯𑀸 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀲𑀮𑀸𑀓𑀕𑁆𑀕𑀸𑀳𑀸𑀧𑀓𑀁 𑀲𑀫𑁆𑀫𑀦𑁆𑀦𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀲𑀮𑀸𑀓𑀕𑁆𑀕𑀸𑀳𑀸𑀧𑀓𑀁 𑀲𑀫𑁆𑀫𑀦𑁆𑀦𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀮𑀸𑀓𑀕𑁆𑀕𑀸𑀳𑀸𑀧𑀓𑀲𑁆𑀲 𑀲𑀫𑁆𑀫𑀼𑀢𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀲𑀫𑁆𑀫𑀢𑁄 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀲𑀮𑀸𑀓𑀕𑁆𑀕𑀸𑀳𑀸𑀧𑀓𑁄. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

‘‘𑀢𑁂𑀦 𑀲𑀮𑀸𑀓𑀕𑁆𑀕𑀸𑀳𑀸𑀧𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀮𑀸𑀓𑀸 𑀕𑀸𑀳𑁂𑀢𑀩𑁆𑀩𑀸. 𑀬𑀣𑀸 𑀩𑀳𑀼𑀢𑀭𑀸 𑀪𑀺𑀓𑁆𑀔𑀽 𑀥𑀫𑁆𑀫𑀯𑀸𑀤𑀺𑀦𑁄 𑀯𑀤𑀦𑁆𑀢𑀺 𑀢𑀣𑀸 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀩𑁆𑀩𑀁. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀥𑀺𑀓𑀭𑀡𑀁 𑀯𑀽𑀧𑀲𑀦𑁆𑀢𑀁. 𑀓𑁂𑀦 𑀯𑀽𑀧𑀲𑀦𑁆𑀢𑀁? 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘, 𑀬𑁂𑀪𑀼𑀬𑁆𑀬𑀲𑀺𑀓𑀸𑀬 𑀘. 𑀓𑀺𑀜𑁆𑀘 𑀢𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑀲𑁆𑀫𑀺𑀁? 𑀲𑀗𑁆𑀖𑀲𑀫𑁆𑀫𑀼𑀔𑀢𑀸, 𑀥𑀫𑁆𑀫𑀲𑀫𑁆𑀫𑀼𑀔𑀢𑀸, 𑀯𑀺𑀦𑀬𑀲𑀫𑁆𑀫𑀼𑀔𑀢𑀸, 𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸. 𑀓𑀸 𑀘 𑀢𑀢𑁆𑀣 𑀲𑀗𑁆𑀖𑀲𑀫𑁆𑀫𑀼𑀔𑀢𑀸? 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸 𑀢𑁂 𑀆𑀕𑀢𑀸 𑀳𑁄𑀦𑁆𑀢𑀺, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀆𑀳𑀝𑁄 𑀳𑁄𑀢𑀺, 𑀲𑀫𑁆𑀫𑀼𑀔𑀻𑀪𑀽𑀢𑀸 𑀦 𑀧𑀝𑀺𑀓𑁆𑀓𑁄𑀲𑀦𑁆𑀢𑀺 𑁋 𑀅𑀬𑀁 𑀢𑀢𑁆𑀣 𑀲𑀗𑁆𑀖𑀲𑀫𑁆𑀫𑀼𑀔𑀢𑀸. 𑀓𑀸 𑀘 𑀢𑀢𑁆𑀣 𑀥𑀫𑁆𑀫𑀲𑀫𑁆𑀫𑀼𑀔𑀢𑀸, 𑀯𑀺𑀦𑀬𑀲𑀫𑁆𑀫𑀼𑀔𑀢𑀸? 𑀬𑁂𑀦 𑀥𑀫𑁆𑀫𑁂𑀦 𑀬𑁂𑀦 𑀯𑀺𑀦𑀬𑁂𑀦 𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁆𑀫𑀢𑀺 𑁋 𑀅𑀬𑀁 𑀢𑀢𑁆𑀣 𑀥𑀫𑁆𑀫𑀲𑀫𑁆𑀫𑀼𑀔𑀢𑀸, 𑀯𑀺𑀦𑀬𑀲𑀫𑁆𑀫𑀼𑀔𑀢𑀸. 𑀓𑀸 𑀘 𑀢𑀢𑁆𑀣 𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸? 𑀬𑁄 𑀘 𑀯𑀺𑀯𑀤𑀢𑀺, 𑀬𑁂𑀦 𑀘 𑀯𑀺𑀯𑀤𑀢𑀺, 𑀉𑀪𑁄 𑀅𑀢𑁆𑀣𑀧𑀘𑁆𑀘𑀢𑁆𑀣𑀺𑀓𑀸 𑀲𑀫𑁆𑀫𑀼𑀔𑀻𑀪𑀽𑀢𑀸 𑀳𑁄𑀦𑁆𑀢𑀺 𑁋 𑀅𑀬𑀁 𑀢𑀢𑁆𑀣 𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸. 𑀓𑀸 𑀘 𑀢𑀢𑁆𑀣 𑀬𑁂𑀪𑀼𑀬𑁆𑀬𑀲𑀺𑀓𑀸𑀬? 𑀬𑀸 𑀬𑁂𑀪𑀼𑀬𑁆𑀬𑀲𑀺𑀓𑀸𑀓𑀫𑁆𑀫𑀲𑁆𑀲 𑀓𑀺𑀭𑀺𑀬𑀸 𑀓𑀭𑀡𑀁 𑀉𑀧𑀕𑀫𑀦𑀁 𑀅𑀚𑁆𑀛𑀼𑀧𑀕𑀫𑀦𑀁 𑀅𑀥𑀺𑀯𑀸𑀲𑀦𑀸 𑀅𑀧𑁆𑀧𑀝𑀺𑀓𑁆𑀓𑁄𑀲𑀦𑀸 𑁋 𑀅𑀬𑀁 𑀢𑀢𑁆𑀣 𑀬𑁂𑀪𑀼𑀬𑁆𑀬𑀲𑀺𑀓𑀸𑀬. 𑀏𑀯𑀁 𑀯𑀽𑀧𑀲𑀦𑁆𑀢𑀁 𑀘𑁂, 𑀪𑀺𑀓𑁆𑀔𑀯𑁂, 𑀅𑀥𑀺𑀓𑀭𑀡𑀁 𑀓𑀸𑀭𑀓𑁄 𑀉𑀓𑁆𑀓𑁄𑀝𑁂𑀢𑀺, 𑀉𑀓𑁆𑀓𑁄𑀝𑀦𑀓𑀁 𑀧𑀸𑀘𑀺𑀢𑁆𑀢𑀺𑀬𑀁; 𑀙𑀦𑁆𑀤𑀤𑀸𑀬𑀓𑁄 𑀔𑀻𑀬𑀢𑀺, 𑀔𑀻𑀬𑀦𑀓𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑀢𑀺𑀯𑀺𑀥𑀲𑀮𑀸𑀓𑀕𑁆𑀕𑀸𑀳𑁄

𑁨𑁩𑁫. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀸𑀯𑀢𑁆𑀣𑀺𑀬𑀸 𑀏𑀯𑀁 𑀚𑀸𑀢𑀁 𑀏𑀯𑀁 𑀲𑀫𑀼𑀧𑁆𑀧𑀦𑁆𑀦𑀁 𑀅𑀥𑀺𑀓𑀭𑀡𑀁 𑀳𑁄𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑁋 𑀅𑀲𑀦𑁆𑀢𑀼𑀝𑁆𑀞𑀸 𑀲𑀸𑀯𑀢𑁆𑀣𑀺𑀬𑀸 𑀲𑀗𑁆𑀖𑀲𑁆𑀲 𑀅𑀥𑀺𑀓𑀭𑀡𑀯𑀽𑀧𑀲𑀫𑀦𑁂𑀦 𑁋 𑀅𑀲𑁆𑀲𑁄𑀲𑀼𑀁 𑀔𑁄 𑀅𑀫𑀼𑀓𑀲𑁆𑀫𑀺𑀁 𑀓𑀺𑀭 𑀆𑀯𑀸𑀲𑁂 𑀲𑀫𑁆𑀩𑀳𑀼𑀮𑀸 𑀣𑁂𑀭𑀸 𑀯𑀺𑀳𑀭𑀦𑁆𑀢𑀺 𑀩𑀳𑀼𑀲𑁆𑀲𑀼𑀢𑀸 𑀆𑀕𑀢𑀸𑀕𑀫𑀸 𑀥𑀫𑁆𑀫𑀥𑀭𑀸 𑀯𑀺𑀦𑀬𑀥𑀭𑀸 𑀫𑀸𑀢𑀺𑀓𑀸𑀥𑀭𑀸 𑀧𑀡𑁆𑀟𑀺𑀢𑀸 𑀯𑀺𑀬𑀢𑁆𑀢𑀸 𑀫𑁂𑀥𑀸𑀯𑀺𑀦𑁄 𑀮𑀚𑁆𑀚𑀺𑀦𑁄 𑀓𑀼𑀓𑁆𑀓𑀼𑀘𑁆𑀘𑀓𑀸 𑀲𑀺𑀓𑁆𑀔𑀸𑀓𑀸𑀫𑀸. 𑀢𑁂 𑀘𑁂 𑀣𑁂𑀭𑀸 𑀇𑀫𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀬𑁆𑀬𑀼𑀁 𑀥𑀫𑁆𑀫𑁂𑀦 𑀯𑀺𑀦𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦, 𑀏𑀯𑀫𑀺𑀤𑀁 𑀅𑀥𑀺𑀓𑀭𑀡𑀁 𑀲𑀼𑀯𑀽𑀧𑀲𑀦𑁆𑀢𑀁 𑀅𑀲𑁆𑀲𑀸𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀢𑀁 𑀆𑀯𑀸𑀲𑀁 𑀕𑀦𑁆𑀢𑁆𑀯𑀸 𑀢𑁂 𑀣𑁂𑀭𑁂 𑀏𑀢𑀤𑀯𑁄𑀘𑀼𑀁 𑁋 ‘‘𑀇𑀤𑀁, 𑀪𑀦𑁆𑀢𑁂, 𑀅𑀥𑀺𑀓𑀭𑀡𑀁 𑀏𑀯𑀁 𑀚𑀸𑀢𑀁, 𑀏𑀯𑀁 𑀲𑀫𑀼𑀧𑁆𑀧𑀦𑁆𑀦𑀁. 𑀲𑀸𑀥𑀼, 𑀪𑀦𑁆𑀢𑁂, 𑀣𑁂𑀭𑀸 𑀇𑀫𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀦𑁆𑀢𑀼 𑀥𑀫𑁆𑀫𑁂𑀦 𑀯𑀺𑀦𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦, 𑀬𑀣𑀬𑀺𑀤𑀁 𑀅𑀥𑀺𑀓𑀭𑀡𑀁 𑀲𑀼𑀯𑀽𑀧𑀲𑀦𑁆𑀢𑀁 𑀅𑀲𑁆𑀲𑀸’’𑀢𑀺. 𑀅𑀣 𑀔𑁄 𑀢𑁂 𑀣𑁂𑀭𑀸 𑁋 𑀬𑀣𑀸 𑀲𑀸𑀯𑀢𑁆𑀣𑀺𑀬𑀸 𑀲𑀗𑁆𑀖𑁂𑀦 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑀺𑀢𑀁 𑀢𑀣𑀸 𑀲𑀼𑀯𑀽𑀧𑀲𑀦𑁆𑀢𑀦𑁆𑀢𑀺 [𑀬𑀣𑀸 𑀲𑀼𑀯𑀽𑀧𑀲𑀦𑁆𑀢𑀁 (𑀲𑀻. 𑀲𑁆𑀬𑀸.)] 𑁋 𑀢𑀣𑀸 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀲𑀼𑀁.

𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑁋 𑀅𑀲𑀦𑁆𑀢𑀼𑀝𑁆𑀞𑀸 𑀲𑀸𑀯𑀢𑁆𑀣𑀺𑀬𑀸 𑀲𑀗𑁆𑀖𑀲𑁆𑀲 𑀅𑀥𑀺𑀓𑀭𑀡𑀯𑀽𑀧𑀲𑀫𑀦𑁂𑀦, 𑀅𑀲𑀦𑁆𑀢𑀼𑀝𑁆𑀞𑀸 𑀲𑀫𑁆𑀩𑀳𑀼𑀮𑀸𑀦𑀁 𑀣𑁂𑀭𑀸𑀦𑀁 𑀅𑀥𑀺𑀓𑀭𑀡𑀯𑀽𑀧𑀲𑀫𑀦𑁂𑀦 𑁋 𑀅𑀲𑁆𑀲𑁄𑀲𑀼𑀁 𑀔𑁄 𑀅𑀫𑀼𑀓𑀲𑁆𑀫𑀺𑀁 𑀓𑀺𑀭 𑀆𑀯𑀸𑀲𑁂 𑀢𑀬𑁄 𑀣𑁂𑀭𑀸 𑀯𑀺𑀳𑀭𑀦𑁆𑀢𑀺…𑀧𑁂… 𑀤𑁆𑀯𑁂 𑀣𑁂𑀭𑀸 𑀯𑀺𑀳𑀭𑀦𑁆𑀢𑀺…𑀧𑁂… 𑀏𑀓𑁄 𑀣𑁂𑀭𑁄 𑀯𑀺𑀳𑀭𑀢𑀺 𑀩𑀳𑀼𑀲𑁆𑀲𑀼𑀢𑁄 𑀆𑀕𑀢𑀸𑀕𑀫𑁄 𑀥𑀫𑁆𑀫𑀥𑀭𑁄 𑀯𑀺𑀦𑀬𑀥𑀭𑁄 𑀫𑀸𑀢𑀺𑀓𑀸𑀥𑀭𑁄 𑀧𑀡𑁆𑀟𑀺𑀢𑁄 𑀯𑀺𑀬𑀢𑁆𑀢𑁄 𑀫𑁂𑀥𑀸𑀯𑀻 𑀮𑀚𑁆𑀚𑀻 𑀓𑀼𑀓𑁆𑀓𑀼𑀘𑁆𑀘𑀓𑁄 𑀲𑀺𑀓𑁆𑀔𑀸𑀓𑀸𑀫𑁄. 𑀲𑁄 𑀘𑁂 𑀣𑁂𑀭𑁄 𑀇𑀫𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀬𑁆𑀬 𑀥𑀫𑁆𑀫𑁂𑀦 𑀯𑀺𑀦𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦, 𑀏𑀯𑀫𑀺𑀤𑀁 𑀅𑀥𑀺𑀓𑀭𑀡𑀁 𑀲𑀼𑀯𑀽𑀧𑀲𑀦𑁆𑀢𑀁 𑀅𑀲𑁆𑀲𑀸𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀢𑀁 𑀆𑀯𑀸𑀲𑀁 𑀕𑀦𑁆𑀢𑁆𑀯𑀸 𑀢𑀁 𑀣𑁂𑀭𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀇𑀤𑀁, 𑀪𑀦𑁆𑀢𑁂, 𑀅𑀥𑀺𑀓𑀭𑀡𑀁 𑀏𑀯𑀁 𑀚𑀸𑀢𑀁, 𑀏𑀯𑀁 𑀲𑀫𑀼𑀧𑁆𑀧𑀦𑁆𑀦𑀁. 𑀲𑀸𑀥𑀼, 𑀪𑀦𑁆𑀢𑁂, 𑀣𑁂𑀭𑁄 𑀇𑀫𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀼 𑀥𑀫𑁆𑀫𑁂𑀦 𑀯𑀺𑀦𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦, 𑀬𑀣𑀬𑀺𑀤𑀁 𑀅𑀥𑀺𑀓𑀭𑀡𑀁 𑀲𑀼𑀯𑀽𑀧𑀲𑀦𑁆𑀢𑀁 𑀅𑀲𑁆𑀲𑀸’’𑀢𑀺. 𑀅𑀣 𑀔𑁄 𑀲𑁄 𑀣𑁂𑀭𑁄 𑁋 𑀬𑀣𑀸 𑀲𑀸𑀯𑀢𑁆𑀣𑀺𑀬𑀸 𑀲𑀗𑁆𑀖𑁂𑀦 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑀺𑀢𑀁, 𑀬𑀣𑀸 𑀲𑀫𑁆𑀩𑀳𑀼𑀮𑁂𑀳𑀺 𑀣𑁂𑀭𑁂𑀳𑀺 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑀺𑀢𑀁, 𑀬𑀣𑀸 𑀢𑀻𑀳𑀺 𑀣𑁂𑀭𑁂𑀳𑀺 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑀺𑀢𑀁, 𑀬𑀣𑀸 𑀤𑁆𑀯𑀻𑀳𑀺 𑀣𑁂𑀭𑁂𑀳𑀺 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑀺𑀢𑀁, 𑀢𑀣𑀸 𑀲𑀼𑀯𑀽𑀧𑀲𑀦𑁆𑀢𑀦𑁆𑀢𑀺 𑁋 𑀢𑀣𑀸 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀲𑀺.

𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀅𑀲𑀦𑁆𑀢𑀼𑀝𑁆𑀞𑀸 𑀲𑀸𑀯𑀢𑁆𑀣𑀺𑀬𑀸 𑀲𑀗𑁆𑀖𑀲𑁆𑀲 𑀅𑀥𑀺𑀓𑀭𑀡𑀯𑀽𑀧𑀲𑀫𑀦𑁂𑀦, 𑀅𑀲𑀦𑁆𑀢𑀼𑀝𑁆𑀞𑀸 𑀲𑀫𑁆𑀩𑀳𑀼𑀮𑀸𑀦𑀁 𑀣𑁂𑀭𑀸𑀦𑀁 𑀅𑀥𑀺𑀓𑀭𑀡𑀯𑀽𑀧𑀲𑀫𑀦𑁂𑀦, 𑀅𑀲𑀦𑁆𑀢𑀼𑀝𑁆𑀞𑀸 𑀢𑀺𑀡𑁆𑀡𑀁 𑀣𑁂𑀭𑀸𑀦𑀁 𑀅𑀥𑀺𑀓𑀭𑀡𑀯𑀽𑀧𑀲𑀫𑀦𑁂𑀦, 𑀅𑀲𑀦𑁆𑀢𑀼𑀝𑁆𑀞𑀸 𑀤𑁆𑀯𑀺𑀦𑁆𑀦𑀁 𑀣𑁂𑀭𑀸𑀦𑀁 𑀅𑀥𑀺𑀓𑀭𑀡𑀯𑀽𑀧𑀲𑀫𑀦𑁂𑀦, 𑀅𑀲𑀦𑁆𑀢𑀼𑀝𑁆𑀞𑀸 𑀏𑀓𑀲𑁆𑀲 𑀣𑁂𑀭𑀲𑁆𑀲 𑀅𑀥𑀺𑀓𑀭𑀡𑀯𑀽𑀧𑀲𑀫𑀦𑁂𑀦, 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… ‘‘𑀦𑀺𑀳𑀢𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀥𑀺𑀓𑀭𑀡𑀁 𑀲𑀦𑁆𑀢𑀁 𑀯𑀽𑀧𑀲𑀦𑁆𑀢𑀁 𑀲𑀼𑀯𑀽𑀧𑀲𑀦𑁆𑀢𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀲𑀜𑁆𑀜𑀢𑁆𑀢𑀺𑀬𑀸 𑀢𑀬𑁄 𑀲𑀮𑀸𑀓𑀕𑁆𑀕𑀸𑀳𑁂 𑁋 𑀕𑀽𑀴𑁆𑀳𑀓𑀁, 𑀲𑀓𑀡𑁆𑀡𑀚𑀧𑁆𑀧𑀓𑀁, 𑀯𑀺𑀯𑀝𑀓𑀁.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀕𑀽𑀴𑁆𑀳𑀓𑁄 𑀲𑀮𑀸𑀓𑀕𑁆𑀕𑀸𑀳𑁄 𑀳𑁄𑀢𑀺? 𑀢𑁂𑀦 𑀲𑀮𑀸𑀓𑀕𑁆𑀕𑀸𑀳𑀸𑀧𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀮𑀸𑀓𑀸𑀬𑁄 𑀯𑀡𑁆𑀡𑀸𑀯𑀡𑁆𑀡𑀸𑀬𑁄 𑀓𑀢𑁆𑀯𑀸 𑀏𑀓𑀫𑁂𑀓𑁄 𑀪𑀺𑀓𑁆𑀔𑀼 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀅𑀬𑀁 𑀏𑀯𑀁𑀯𑀸𑀤𑀺𑀲𑁆𑀲 𑀲𑀮𑀸𑀓𑀸, 𑀅𑀬𑀁 𑀏𑀯𑀁𑀯𑀸𑀤𑀺𑀲𑁆𑀲 𑀲𑀮𑀸𑀓𑀸. 𑀬𑀁 𑀇𑀘𑁆𑀙𑀲𑀺 𑀢𑀁 𑀕𑀡𑁆𑀳𑀸𑀳𑀻’𑀢𑀺. 𑀕𑀳𑀺𑀢𑁂 𑀯𑀢𑁆𑀢𑀩𑁆𑀩𑁄 𑁋 ‘𑀫𑀸 𑀘 𑀓𑀲𑁆𑀲𑀘𑀺 𑀤𑀲𑁆𑀲𑁂𑀳𑀻’𑀢𑀺. 𑀲𑀘𑁂 𑀚𑀸𑀦𑀸𑀢𑀺 𑁋 𑀅𑀥𑀫𑁆𑀫𑀯𑀸𑀤𑀻 𑀩𑀳𑀼𑀢𑀭𑀸𑀢𑀺, 𑀤𑀼𑀕𑁆𑀕𑀳𑁄𑀢𑀺, 𑀧𑀘𑁆𑀘𑀼𑀓𑁆𑀓𑀟𑁆𑀠𑀺𑀢𑀩𑁆𑀩𑀁. 𑀲𑀘𑁂 𑀚𑀸𑀦𑀸𑀢𑀺 𑁋 𑀥𑀫𑁆𑀫𑀯𑀸𑀤𑀻 𑀩𑀳𑀼𑀢𑀭𑀸𑀢𑀺, 𑀲𑀼𑀕𑁆𑀕𑀳𑁄𑀢𑀺, 𑀲𑀸𑀯𑁂𑀢𑀩𑁆𑀩𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀕𑀽𑀴𑁆𑀳𑀓𑁄 𑀲𑀮𑀸𑀓𑀕𑁆𑀕𑀸𑀳𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑀓𑀡𑁆𑀡𑀚𑀧𑁆𑀧𑀓𑁄 𑀲𑀮𑀸𑀓𑀕𑁆𑀕𑀸𑀳𑁄 𑀳𑁄𑀢𑀺? 𑀢𑁂𑀦 𑀲𑀮𑀸𑀓𑀕𑁆𑀕𑀸𑀳𑀸𑀧𑀓𑁂𑀦 𑀪𑀺𑀓𑁆𑀔𑀼𑀦𑀸 𑀏𑀓𑀫𑁂𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑀓𑀡𑁆𑀡𑀓𑁂 𑀆𑀭𑁄𑀘𑁂𑀢𑀩𑁆𑀩𑀁 𑁋 ‘𑀅𑀬𑀁 𑀏𑀯𑀁𑀯𑀸𑀤𑀺𑀲𑁆𑀲 𑀲𑀮𑀸𑀓𑀸, 𑀅𑀬𑀁 𑀏𑀯𑀁𑀯𑀸𑀤𑀺𑀲𑁆𑀲 𑀲𑀮𑀸𑀓𑀸. 𑀬𑀁 𑀇𑀘𑁆𑀙𑀲𑀺 𑀢𑀁 𑀕𑀡𑁆𑀳𑀸𑀳𑀻’𑀢𑀺. 𑀕𑀳𑀺𑀢𑁂 𑀯𑀢𑁆𑀢𑀩𑁆𑀩𑁄 𑁋 ‘𑀫𑀸 𑀘 𑀓𑀲𑁆𑀲𑀘𑀺 𑀆𑀭𑁄𑀘𑁂𑀳𑀻’𑀢𑀺. 𑀲𑀘𑁂 𑀚𑀸𑀦𑀸𑀢𑀺 𑁋 𑀅𑀥𑀫𑁆𑀫𑀯𑀸𑀤𑀻 𑀩𑀳𑀼𑀢𑀭𑀸𑀢𑀺, 𑀤𑀼𑀕𑁆𑀕𑀳𑁄𑀢𑀺, 𑀧𑀘𑁆𑀘𑀼𑀓𑁆𑀓𑀟𑁆𑀠𑀺𑀢𑀩𑁆𑀩𑀁. 𑀲𑀘𑁂 𑀚𑀸𑀦𑀸𑀢𑀺 𑁋 𑀥𑀫𑁆𑀫𑀯𑀸𑀤𑀻 𑀩𑀳𑀼𑀢𑀭𑀸𑀢𑀺, 𑀲𑀼𑀕𑁆𑀕𑀳𑁄𑀢𑀺, 𑀲𑀸𑀯𑁂𑀢𑀩𑁆𑀩𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀲𑀓𑀡𑁆𑀡𑀚𑀧𑁆𑀧𑀓𑁄 𑀲𑀮𑀸𑀓𑀕𑁆𑀕𑀸𑀳𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀯𑀺𑀯𑀝𑀓𑁄 𑀲𑀮𑀸𑀓𑀕𑁆𑀕𑀸𑀳𑁄 𑀳𑁄𑀢𑀺? 𑀲𑀘𑁂 𑀚𑀸𑀦𑀸𑀢𑀺 𑁋 𑀥𑀫𑁆𑀫𑀯𑀸𑀤𑀻 𑀩𑀳𑀼𑀢𑀭𑀸𑀢𑀺, 𑀯𑀺𑀲𑁆𑀲𑀝𑁆𑀞𑁂𑀦𑁂𑀯 𑀯𑀺𑀯𑀝𑁂𑀦 𑀕𑀸𑀳𑁂𑀢𑀩𑁆𑀩𑁄. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀯𑀝𑀓𑁄 𑀲𑀮𑀸𑀓𑀕𑁆𑀕𑀸𑀳𑁄 𑀳𑁄𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀲𑀮𑀸𑀓𑀕𑁆𑀕𑀸𑀳𑀸’’𑀢𑀺.

𑀲𑀢𑀺𑀯𑀺𑀦𑀬𑁄

𑁨𑁩𑁬. [𑀧𑀭𑀺. 𑁨𑁯𑁨-𑁨𑁯𑁩, 𑁩𑁦𑁭 𑀆𑀤𑀬𑁄] ‘‘𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀓𑀢𑀺𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀢𑀺? 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀘𑀢𑀽𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀢𑀺 𑁋 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘, 𑀲𑀢𑀺𑀯𑀺𑀦𑀬𑁂𑀦 𑀘, 𑀅𑀫𑀽𑀴𑁆𑀳𑀯𑀺𑀦𑀬𑁂𑀦 𑀘, 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀬 𑀘. 𑀲𑀺𑀬𑀸 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀤𑁆𑀯𑁂 𑀲𑀫𑀣𑁂 𑀅𑀦𑀸𑀕𑀫𑁆𑀫 𑁋 𑀅𑀫𑀽𑀴𑁆𑀳𑀯𑀺𑀦𑀬𑀜𑁆𑀘, 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀜𑁆𑀘; 𑀤𑁆𑀯𑀻𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑁂𑀬𑁆𑀬 𑁋 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘, 𑀲𑀢𑀺𑀯𑀺𑀦𑀬𑁂𑀦 𑀘𑀸𑀢𑀺? 𑀲𑀺𑀬𑀸𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀬𑀣𑀸 𑀓𑀣𑀁 𑀯𑀺𑀬? 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀁 𑀅𑀫𑀽𑀮𑀺𑀓𑀸𑀬 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀦𑁆𑀢𑀺. 𑀢𑀲𑁆𑀲 𑀔𑁄, 𑀪𑀺𑀓𑁆𑀔𑀯𑁂 [𑀢𑀲𑁆𑀲 𑀔𑁄 𑀢𑀁 𑀪𑀺𑀓𑁆𑀔𑀯𑁂 (𑀲𑁆𑀬𑀸. 𑀓.)], 𑀪𑀺𑀓𑁆𑀔𑀼𑀦𑁄 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀲𑁆𑀲 𑀲𑀢𑀺𑀯𑀺𑀦𑀬𑁄 𑀤𑀸𑀢𑀩𑁆𑀩𑁄. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀤𑀸𑀢𑀩𑁆𑀩𑁄 𑁋

‘‘𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕 𑀓𑀭𑀺𑀢𑁆𑀯𑀸…𑀧𑁂… 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀫𑀁, 𑀪𑀦𑁆𑀢𑁂, 𑀪𑀺𑀓𑁆𑀔𑀽 𑀅𑀫𑀽𑀮𑀺𑀓𑀸𑀬 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀦𑁆𑀢𑀺. 𑀲𑁄𑀳𑀁, 𑀪𑀦𑁆𑀢𑁂, 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑁄 𑀲𑀗𑁆𑀖𑀁 𑀲𑀢𑀺𑀯𑀺𑀦𑀬𑀁 𑀬𑀸𑀘𑀸𑀫𑀻’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑁄. 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑁄. 𑀩𑁆𑀬𑀢𑁆𑀢𑁂𑀦𑀁 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀪𑀺𑀓𑁆𑀔𑀽 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀅𑀫𑀽𑀮𑀺𑀓𑀸𑀬 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀦𑁆𑀢𑀺. 𑀲𑁄 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑁄 𑀲𑀗𑁆𑀖𑀁 𑀲𑀢𑀺𑀯𑀺𑀦𑀬𑀁 𑀬𑀸𑀘𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀲𑁆𑀲 𑀲𑀢𑀺𑀯𑀺𑀦𑀬𑀁 𑀤𑀤𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀪𑀺𑀓𑁆𑀔𑀽 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀅𑀫𑀽𑀮𑀺𑀓𑀸𑀬 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀦𑁆𑀢𑀺. 𑀲𑁄 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑁄 𑀲𑀗𑁆𑀖𑀁 𑀲𑀢𑀺𑀯𑀺𑀦𑀬𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀲𑁆𑀲 𑀲𑀢𑀺𑀯𑀺𑀦𑀬𑀁 𑀤𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀲𑁆𑀲 𑀲𑀢𑀺𑀯𑀺𑀦𑀬𑀲𑁆𑀲 𑀤𑀸𑀦𑀁, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂….

‘‘𑀤𑀺𑀦𑁆𑀦𑁄 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀲𑁆𑀲 𑀲𑀢𑀺𑀯𑀺𑀦𑀬𑁄. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

‘‘𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀥𑀺𑀓𑀭𑀡𑀁 𑀯𑀽𑀧𑀲𑀦𑁆𑀢𑀁. 𑀓𑁂𑀦 𑀯𑀽𑀧𑀲𑀦𑁆𑀢𑀁? 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀲𑀢𑀺𑀯𑀺𑀦𑀬𑁂𑀦 𑀘. 𑀓𑀺𑀜𑁆𑀘 𑀢𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑀲𑁆𑀫𑀺𑀁? 𑀲𑀗𑁆𑀖𑀲𑀫𑁆𑀫𑀼𑀔𑀢𑀸, 𑀥𑀫𑁆𑀫𑀲𑀫𑁆𑀫𑀼𑀔𑀢𑀸, 𑀯𑀺𑀦𑀬𑀲𑀫𑁆𑀫𑀼𑀔𑀢𑀸, 𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸…𑀧𑁂… 𑀓𑀸 𑀘 𑀢𑀢𑁆𑀣 𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸? 𑀬𑁄 𑀘 𑀅𑀦𑀼𑀯𑀤𑀢𑀺, 𑀬𑀜𑁆𑀘 𑀅𑀦𑀼𑀯𑀤𑀢𑀺, 𑀉𑀪𑁄 𑀲𑀫𑁆𑀫𑀼𑀔𑀻𑀪𑀽𑀢𑀸 𑀳𑁄𑀦𑁆𑀢𑀺 𑁋 𑀅𑀬𑀁 𑀢𑀢𑁆𑀣 𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸. 𑀓𑀺𑀜𑁆𑀘 𑀢𑀢𑁆𑀣 𑀲𑀢𑀺𑀯𑀺𑀦𑀬𑀲𑁆𑀫𑀺𑀁? 𑀬𑀸 𑀲𑀢𑀺𑀯𑀺𑀦𑀬𑀲𑁆𑀲 𑀓𑀫𑁆𑀫𑀲𑁆𑀲 𑀓𑀺𑀭𑀺𑀬𑀸 𑀓𑀭𑀡𑀁 𑀉𑀧𑀕𑀫𑀦𑀁 𑀅𑀚𑁆𑀛𑀼𑀧𑀕𑀫𑀦𑀁 𑀅𑀥𑀺𑀯𑀸𑀲𑀦𑀸 𑀅𑀧𑁆𑀧𑀝𑀺𑀓𑁆𑀓𑁄𑀲𑀦𑀸 𑁋 𑀇𑀤𑀁 𑀢𑀢𑁆𑀣 𑀲𑀢𑀺𑀯𑀺𑀦𑀬𑀲𑁆𑀫𑀺𑀁. 𑀏𑀯𑀁 𑀯𑀽𑀧𑀲𑀦𑁆𑀢𑀁 𑀘𑁂, 𑀪𑀺𑀓𑁆𑀔𑀯𑁂, 𑀅𑀥𑀺𑀓𑀭𑀡𑀁 𑀓𑀸𑀭𑀓𑁄 𑀉𑀓𑁆𑀓𑁄𑀝𑁂𑀢𑀺, 𑀉𑀓𑁆𑀓𑁄𑀝𑀦𑀓𑀁 𑀧𑀸𑀘𑀺𑀢𑁆𑀢𑀺𑀬𑀁; 𑀙𑀦𑁆𑀤𑀤𑀸𑀬𑀓𑁄 𑀔𑀻𑀬𑀢𑀺, 𑀔𑀻𑀬𑀦𑀓𑀁 𑀧𑀸𑀘𑀺𑀢𑁆𑀢𑀺𑀬𑀁.

𑀅𑀫𑀽𑀴𑁆𑀳𑀯𑀺𑀦𑀬𑁄

𑁨𑁩𑁭. ‘‘𑀲𑀺𑀬𑀸 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀤𑁆𑀯𑁂 𑀲𑀫𑀣𑁂 𑀅𑀦𑀸𑀕𑀫𑁆𑀫 𑁋 𑀲𑀢𑀺𑀯𑀺𑀦𑀬𑀜𑁆𑀘, 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀜𑁆𑀘; 𑀤𑁆𑀯𑀻𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑁂𑀬𑁆𑀬 𑁋 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘, 𑀅𑀫𑀽𑀴𑁆𑀳𑀯𑀺𑀦𑀬𑁂𑀦 𑀘𑀸𑀢𑀺? 𑀲𑀺𑀬𑀸𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀬𑀣𑀸 𑀓𑀣𑀁 𑀯𑀺𑀬? 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀉𑀫𑁆𑀫𑀢𑁆𑀢𑀓𑁄 𑀳𑁄𑀢𑀺 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁄. 𑀢𑁂𑀦 𑀉𑀫𑁆𑀫𑀢𑁆𑀢𑀓𑁂𑀦 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁂𑀦 𑀩𑀳𑀼𑀁 𑀅𑀲𑁆𑀲𑀸𑀫𑀡𑀓𑀁 𑀅𑀚𑁆𑀛𑀸𑀘𑀺𑀡𑁆𑀡𑀁 𑀳𑁄𑀢𑀺 𑀪𑀸𑀲𑀺𑀢𑀧𑀭𑀺𑀓𑁆𑀓𑀦𑁆𑀢𑀁. 𑀢𑀁 𑀪𑀺𑀓𑁆𑀔𑀽 𑀉𑀫𑁆𑀫𑀢𑁆𑀢𑀓𑁂𑀦 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁂𑀦 𑀅𑀚𑁆𑀛𑀸𑀘𑀺𑀡𑁆𑀡𑁂𑀦 𑀆𑀧𑀢𑁆𑀢𑀺𑀬𑀸 𑀘𑁄𑀤𑁂𑀦𑁆𑀢𑀺 𑁋 ‘𑀲𑀭𑀢𑀸𑀬𑀲𑁆𑀫𑀸 𑀏𑀯𑀭𑀽𑀧𑀺𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀸’𑀢𑀺. 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘𑀅𑀳𑀁 𑀔𑁄, 𑀆𑀯𑀼𑀲𑁄, 𑀉𑀫𑁆𑀫𑀢𑁆𑀢𑀓𑁄 𑀅𑀳𑁄𑀲𑀺𑀁 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁄. 𑀢𑁂𑀦 𑀫𑁂 𑀉𑀫𑁆𑀫𑀢𑁆𑀢𑀓𑁂𑀦 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁂𑀦 𑀩𑀳𑀼𑀁 𑀅𑀲𑁆𑀲𑀸𑀫𑀡𑀓𑀁 𑀅𑀚𑁆𑀛𑀸𑀘𑀺𑀡𑁆𑀡𑀁 𑀪𑀸𑀲𑀺𑀢𑀧𑀭𑀺𑀓𑁆𑀓𑀦𑁆𑀢𑀁. 𑀦𑀸𑀳𑀁 𑀢𑀁 𑀲𑀭𑀸𑀫𑀺. 𑀫𑀽𑀴𑁆𑀳𑁂𑀦 𑀫𑁂 𑀏𑀢𑀁 𑀓𑀢’𑀦𑁆𑀢𑀺. 𑀏𑀯𑀫𑁆𑀧𑀺 𑀦𑀁 𑀯𑀼𑀘𑁆𑀘𑀫𑀸𑀦𑀸 𑀘𑁄𑀤𑁂𑀦𑁆𑀢𑁂𑀯 𑁋 ‘𑀲𑀭𑀢𑀸𑀬𑀲𑁆𑀫𑀸 𑀏𑀯𑀭𑀽𑀧𑀺𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀸’𑀢𑀺. ‘‘𑀢𑀲𑁆𑀲 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀫𑀽𑀴𑁆𑀳𑀲𑁆𑀲 𑀅𑀫𑀽𑀴𑁆𑀳𑀯𑀺𑀦𑀬𑁄 𑀤𑀸𑀢𑀩𑁆𑀩𑁄. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀤𑀸𑀢𑀩𑁆𑀩𑁄 𑁋

‘‘𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸…𑀧𑁂… 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀅𑀳𑀁, 𑀪𑀦𑁆𑀢𑁂, 𑀉𑀫𑁆𑀫𑀢𑁆𑀢𑀓𑁄 𑀅𑀳𑁄𑀲𑀺𑀁 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁄. 𑀢𑁂𑀦 𑀫𑁂 𑀉𑀫𑁆𑀫𑀢𑁆𑀢𑀓𑁂𑀦 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁂𑀦 𑀩𑀳𑀼𑀁 𑀅𑀲𑁆𑀲𑀸𑀫𑀡𑀓𑀁 𑀅𑀚𑁆𑀛𑀸𑀘𑀺𑀡𑁆𑀡𑀁 𑀪𑀸𑀲𑀺𑀢𑀧𑀭𑀺𑀓𑁆𑀓𑀦𑁆𑀢𑀁. 𑀫𑀁 𑀪𑀺𑀓𑁆𑀔𑀽 𑀉𑀫𑁆𑀫𑀢𑁆𑀢𑀓𑁂𑀦 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁂𑀦 𑀅𑀚𑁆𑀛𑀸𑀘𑀺𑀡𑁆𑀡𑁂𑀦 𑀆𑀧𑀢𑁆𑀢𑀺𑀬𑀸 𑀘𑁄𑀤𑁂𑀦𑁆𑀢𑀺 𑁋 ‘𑀲𑀭𑀢𑀸𑀬𑀲𑁆𑀫𑀸 𑀏𑀯𑀭𑀽𑀧𑀺𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀸’𑀢𑀺. 𑀢𑁆𑀬𑀸𑀳𑀁 𑀏𑀯𑀁 𑀯𑀤𑀸𑀫𑀺 𑁋 ‘𑀅𑀳𑀁 𑀔𑁄, 𑀆𑀯𑀼𑀲𑁄, 𑀉𑀫𑁆𑀫𑀢𑁆𑀢𑀓𑁄 𑀅𑀳𑁄𑀲𑀺𑀁 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁄. 𑀢𑁂𑀦 𑀫𑁂 𑀉𑀫𑁆𑀫𑀢𑁆𑀢𑀓𑁂𑀦 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁂𑀦 𑀩𑀳𑀼𑀁 𑀅𑀲𑁆𑀲𑀸𑀫𑀡𑀓𑀁 𑀅𑀚𑁆𑀛𑀸𑀘𑀺𑀡𑁆𑀡𑀁 𑀪𑀸𑀲𑀺𑀢𑀧𑀭𑀺𑀓𑁆𑀓𑀦𑁆𑀢𑀁. 𑀦𑀸𑀳𑀁 𑀢𑀁 𑀲𑀭𑀸𑀫𑀺. 𑀫𑀽𑀴𑁆𑀳𑁂𑀦 𑀫𑁂 𑀏𑀢𑀁 𑀓𑀢’𑀦𑁆𑀢𑀺. 𑀏𑀯𑀫𑁆𑀧𑀺 𑀫𑀁 𑀯𑀼𑀘𑁆𑀘𑀫𑀸𑀦𑀸 𑀘𑁄𑀤𑁂𑀦𑁆𑀢𑁂𑀯 𑁋 ‘𑀲𑀭𑀢𑀸𑀬𑀲𑁆𑀫𑀸 𑀏𑀯𑀭𑀽𑀧𑀺𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀸’𑀢𑀺. ‘𑀲𑁄𑀳𑀁, 𑀪𑀦𑁆𑀢𑁂, 𑀅𑀫𑀽𑀴𑁆𑀳𑁄 𑀲𑀗𑁆𑀖𑀁 𑀅𑀫𑀽𑀴𑁆𑀳𑀯𑀺𑀦𑀬𑀁 𑀬𑀸𑀘𑀸𑀫𑀻’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑁄. 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑁄. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀉𑀫𑁆𑀫𑀢𑁆𑀢𑀓𑁄 𑀅𑀳𑁄𑀲𑀺 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁄. 𑀢𑁂𑀦 𑀉𑀫𑁆𑀫𑀢𑁆𑀢𑀓𑁂𑀦 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁂𑀦 𑀩𑀳𑀼𑀁 𑀅𑀲𑁆𑀲𑀸𑀫𑀡𑀓𑀁 𑀅𑀚𑁆𑀛𑀸𑀘𑀺𑀡𑁆𑀡𑀁 𑀪𑀸𑀲𑀺𑀢𑀧𑀭𑀺𑀓𑁆𑀓𑀦𑁆𑀢𑀁. 𑀢𑀁 𑀪𑀺𑀓𑁆𑀔𑀽 𑀉𑀫𑁆𑀫𑀢𑁆𑀢𑀓𑁂𑀦 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁂𑀦 𑀅𑀚𑁆𑀛𑀸𑀘𑀺𑀡𑁆𑀡𑁂𑀦 𑀆𑀧𑀢𑁆𑀢𑀺𑀬𑀸 𑀘𑁄𑀤𑁂𑀦𑁆𑀢𑀺 𑁋 ‘𑀲𑀭𑀢𑀸𑀬𑀲𑁆𑀫𑀸 𑀏𑀯𑀭𑀽𑀧𑀺𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀸’𑀢𑀺. 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘𑀅𑀳𑀁 𑀔𑁄, 𑀆𑀯𑀼𑀲𑁄, 𑀉𑀫𑁆𑀫𑀢𑁆𑀢𑀓𑁄 𑀅𑀳𑁄𑀲𑀺𑀁 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁄. 𑀢𑁂𑀦 𑀫𑁂 𑀉𑀫𑁆𑀫𑀢𑁆𑀢𑀓𑁂𑀦 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁂𑀦 𑀩𑀳𑀼𑀁 𑀅𑀲𑁆𑀲𑀸𑀫𑀡𑀓𑀁 𑀅𑀚𑁆𑀛𑀸𑀘𑀺𑀡𑁆𑀡𑀁 𑀪𑀸𑀲𑀺𑀢𑀧𑀭𑀺𑀓𑁆𑀓𑀦𑁆𑀢𑀁. 𑀦𑀸𑀳𑀁 𑀢𑀁 𑀲𑀭𑀸𑀫𑀺. 𑀫𑀽𑀴𑁆𑀳𑁂𑀦 𑀫𑁂 𑀏𑀢𑀁 𑀓𑀢’𑀦𑁆𑀢𑀺. 𑀏𑀯𑀫𑁆𑀧𑀺 𑀦𑀁 𑀯𑀼𑀘𑁆𑀘𑀫𑀸𑀦𑀸 𑀘𑁄𑀤𑁂𑀦𑁆𑀢𑁂𑀯 𑁋 ‘𑀲𑀭𑀢𑀸𑀬𑀲𑁆𑀫𑀸 𑀏𑀯𑀭𑀽𑀧𑀺𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀸’𑀢𑀺. 𑀲𑁄 𑀅𑀫𑀽𑀴𑁆𑀳𑁄 𑀲𑀗𑁆𑀖𑀁 𑀅𑀫𑀽𑀴𑁆𑀳𑀯𑀺𑀦𑀬𑀁 𑀬𑀸𑀘𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀫𑀽𑀴𑁆𑀳𑀲𑁆𑀲 𑀅𑀫𑀽𑀴𑁆𑀳𑀯𑀺𑀦𑀬𑀁 𑀤𑀤𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀉𑀫𑁆𑀫𑀢𑁆𑀢𑀓𑁄 𑀅𑀳𑁄𑀲𑀺 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁄. 𑀢𑁂𑀦 𑀉𑀫𑁆𑀫𑀢𑁆𑀢𑀓𑁂𑀦 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁂𑀦 𑀩𑀳𑀼𑀁 𑀅𑀲𑁆𑀲𑀸𑀫𑀡𑀓𑀁 𑀅𑀚𑁆𑀛𑀸𑀘𑀺𑀡𑁆𑀡𑀁 𑀪𑀸𑀲𑀺𑀢𑀧𑀭𑀺𑀓𑁆𑀓𑀦𑁆𑀢𑀁. 𑀢𑀁 𑀪𑀺𑀓𑁆𑀔𑀽 𑀉𑀫𑁆𑀫𑀢𑁆𑀢𑀓𑁂𑀦 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁂𑀦 𑀅𑀚𑁆𑀛𑀸𑀘𑀺𑀡𑁆𑀡𑁂𑀦 𑀆𑀧𑀢𑁆𑀢𑀺𑀬𑀸 𑀘𑁄𑀤𑁂𑀦𑁆𑀢𑀺 𑁋 ‘𑀲𑀭𑀢𑀸𑀬𑀲𑁆𑀫𑀸 𑀏𑀯𑀭𑀽𑀧𑀺𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀸’𑀢𑀺. 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘𑀅𑀳𑀁 𑀔𑁄, 𑀆𑀯𑀼𑀲𑁄, 𑀉𑀫𑁆𑀫𑀢𑁆𑀢𑀓𑁄 𑀅𑀳𑁄𑀲𑀺𑀁 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁄. 𑀢𑁂𑀦 𑀫𑁂 𑀉𑀫𑁆𑀫𑀢𑁆𑀢𑀓𑁂𑀦 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁂𑀦 𑀩𑀳𑀼𑀁 𑀅𑀲𑁆𑀲𑀸𑀫𑀡𑀓𑀁 𑀅𑀚𑁆𑀛𑀸𑀘𑀺𑀡𑁆𑀡𑀁 𑀪𑀸𑀲𑀺𑀢𑀧𑀭𑀺𑀓𑁆𑀓𑀦𑁆𑀢𑀁. 𑀦𑀸𑀳𑀁 𑀢𑀁 𑀲𑀭𑀸𑀫𑀺. 𑀫𑀽𑀴𑁆𑀳𑁂𑀦 𑀫𑁂 𑀏𑀢𑀁 𑀓𑀢’𑀦𑁆𑀢𑀺. 𑀏𑀯𑀫𑁆𑀧𑀺 𑀦𑀁 𑀯𑀼𑀘𑁆𑀘𑀫𑀸𑀦𑀸 𑀘𑁄𑀤𑁂𑀦𑁆𑀢𑁂𑀯 𑁋 ‘𑀲𑀭𑀢𑀸𑀬𑀲𑁆𑀫𑀸 𑀏𑀯𑀭𑀽𑀧𑀺𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀸’𑀢𑀺. 𑀲𑁄 𑀅𑀫𑀽𑀴𑁆𑀳𑁄 𑀲𑀗𑁆𑀖𑀁 𑀅𑀫𑀽𑀴𑁆𑀳𑀯𑀺𑀦𑀬𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀫𑀽𑀴𑁆𑀳𑀲𑁆𑀲 𑀅𑀫𑀽𑀴𑁆𑀳𑀯𑀺𑀦𑀬𑀁 𑀤𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀫𑀽𑀴𑁆𑀳𑀲𑁆𑀲 𑀅𑀫𑀽𑀴𑁆𑀳𑀯𑀺𑀦𑀬𑀲𑁆𑀲 𑀤𑀸𑀦𑀁, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂….

‘‘𑀤𑀺𑀦𑁆𑀦𑁄 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀫𑀽𑀴𑁆𑀳𑀲𑁆𑀲 𑀅𑀫𑀽𑀴𑁆𑀳𑀯𑀺𑀦𑀬𑁄. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

‘‘𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀥𑀺𑀓𑀭𑀡𑀁 𑀯𑀽𑀧𑀲𑀦𑁆𑀢𑀁. 𑀓𑁂𑀦 𑀯𑀽𑀧𑀲𑀦𑁆𑀢𑀁? 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘, 𑀅𑀫𑀽𑀴𑁆𑀳𑀯𑀺𑀦𑀬𑁂𑀦 𑀘. 𑀓𑀺𑀜𑁆𑀘 𑀢𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑀲𑁆𑀫𑀺𑀁? 𑀲𑀗𑁆𑀖𑀲𑀫𑁆𑀫𑀼𑀔𑀢𑀸, 𑀥𑀫𑁆𑀫𑀲𑀫𑁆𑀫𑀼𑀔𑀢𑀸, 𑀯𑀺𑀦𑀬𑀲𑀫𑁆𑀫𑀼𑀔𑀢𑀸, 𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸…𑀧𑁂… 𑀓𑀺𑀜𑁆𑀘 𑀢𑀢𑁆𑀣 𑀅𑀫𑀽𑀴𑁆𑀳𑀯𑀺𑀦𑀬𑀲𑁆𑀫𑀺𑀁? 𑀬𑀸 𑀅𑀫𑀽𑀴𑁆𑀳𑀯𑀺𑀦𑀬𑀲𑁆𑀲 𑀓𑀫𑁆𑀫𑀲𑁆𑀲 𑀓𑀺𑀭𑀺𑀬𑀸 𑀓𑀭𑀡𑀁 𑀉𑀧𑀕𑀫𑀦𑀁 𑀅𑀚𑁆𑀛𑀼𑀧𑀕𑀫𑀦𑀁 𑀅𑀥𑀺𑀯𑀸𑀲𑀦𑀸 𑀅𑀧𑁆𑀧𑀝𑀺𑀓𑁆𑀓𑁄𑀲𑀦𑀸 𑁋 𑀇𑀤𑀁 𑀢𑀢𑁆𑀣 𑀅𑀫𑀽𑀴𑁆𑀳𑀯𑀺𑀦𑀬𑀲𑁆𑀫𑀺𑀁. 𑀏𑀯𑀁 𑀯𑀽𑀧𑀲𑀦𑁆𑀢𑀁 𑀘𑁂, 𑀪𑀺𑀓𑁆𑀔𑀯𑁂, 𑀅𑀥𑀺𑀓𑀭𑀡𑀁 𑀓𑀸𑀭𑀓𑁄 𑀉𑀓𑁆𑀓𑁄𑀝𑁂𑀢𑀺, 𑀉𑀓𑁆𑀓𑁄𑀝𑀦𑀓𑀁 𑀧𑀸𑀘𑀺𑀢𑁆𑀢𑀺𑀬𑀁; 𑀙𑀦𑁆𑀤𑀤𑀸𑀬𑀓𑁄 𑀔𑀻𑀬𑀢𑀺, 𑀔𑀻𑀬𑀦𑀓𑀁 𑀧𑀸𑀘𑀺𑀢𑁆𑀢𑀺𑀬𑀁.

𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀯𑀺𑀦𑀬𑁄

𑁨𑁩𑁮. ‘‘𑀲𑀺𑀬𑀸 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀤𑁆𑀯𑁂 𑀲𑀫𑀣𑁂 𑀅𑀦𑀸𑀕𑀫𑁆𑀫 𑁋 𑀲𑀢𑀺𑀯𑀺𑀦𑀬𑀜𑁆𑀘, 𑀅𑀫𑀽𑀴𑁆𑀳𑀯𑀺𑀦𑀬𑀜𑁆𑀘; 𑀤𑁆𑀯𑀻𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑁂𑀬𑁆𑀬 𑁋 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘, 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀬 𑀘𑀸𑀢𑀺? 𑀲𑀺𑀬𑀸𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀬𑀣𑀸 𑀓𑀣𑀁 𑀯𑀺𑀬? 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀲𑀗𑁆𑀖𑀫𑀚𑁆𑀛𑁂 𑀕𑀭𑀼𑀓𑀸𑀬 𑀆𑀧𑀢𑁆𑀢𑀺𑀬𑀸 𑀘𑁄𑀤𑁂𑀢𑀺 𑁋 ‘𑀲𑀭𑀢𑀸𑀬𑀲𑁆𑀫𑀸 𑀏𑀯𑀭𑀽𑀧𑀺𑀁 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀸, 𑀧𑀸𑀭𑀸𑀚𑀺𑀓𑀁 𑀯𑀸 𑀧𑀸𑀭𑀸𑀚𑀺𑀓𑀲𑀸𑀫𑀦𑁆𑀢𑀁 𑀯𑀸’𑀢𑀺. 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘𑀦 𑀔𑁄 𑀅𑀳𑀁, 𑀆𑀯𑀼𑀲𑁄, 𑀲𑀭𑀸𑀫𑀺 𑀏𑀯𑀭𑀽𑀧𑀺𑀁 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀸, 𑀧𑀸𑀭𑀸𑀚𑀺𑀓𑀁 𑀯𑀸 𑀧𑀸𑀭𑀸𑀚𑀺𑀓𑀲𑀸𑀫𑀦𑁆𑀢𑀁 𑀯𑀸’𑀢𑀺. 𑀢𑀫𑁂𑀦𑀁 𑀲𑁄 𑀦𑀺𑀩𑁆𑀩𑁂𑀞𑁂𑀦𑁆𑀢𑀁 𑀅𑀢𑀺𑀯𑁂𑀞𑁂𑀢𑀺 𑁋 ‘𑀇𑀗𑁆𑀖𑀸𑀬𑀲𑁆𑀫𑀸 𑀲𑀸𑀥𑀼𑀓𑀫𑁂𑀯 𑀚𑀸𑀦𑀸𑀳𑀺, 𑀬𑀤𑀺 𑀲𑀭𑀲𑀺 𑀏𑀯𑀭𑀽𑀧𑀺𑀁 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀸, 𑀧𑀸𑀭𑀸𑀚𑀺𑀓𑀁 𑀯𑀸 𑀧𑀸𑀭𑀸𑀚𑀺𑀓𑀲𑀸𑀫𑀦𑁆𑀢𑀁 𑀯𑀸’𑀢𑀺. 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘𑀦 𑀔𑁄 𑀅𑀳𑀁, 𑀆𑀯𑀼𑀲𑁄, 𑀲𑀭𑀸𑀫𑀺 𑀏𑀯𑀭𑀽𑀧𑀺𑀁 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀸, 𑀧𑀸𑀭𑀸𑀚𑀺𑀓𑀁 𑀯𑀸 𑀧𑀸𑀭𑀸𑀚𑀺𑀓𑀲𑀸𑀫𑀦𑁆𑀢𑀁 𑀯𑀸. 𑀲𑀭𑀸𑀫𑀺 𑀘 𑀔𑁄 𑀅𑀳𑀁, 𑀆𑀯𑀼𑀲𑁄, 𑀏𑀯𑀭𑀽𑀧𑀺𑀁 𑀅𑀧𑁆𑀧𑀫𑀢𑁆𑀢𑀺𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀸’𑀢𑀺. 𑀢𑀫𑁂𑀦𑀁 𑀲𑁄 𑀦𑀺𑀩𑁆𑀩𑁂𑀞𑁂𑀦𑁆𑀢𑀁 𑀅𑀢𑀺𑀯𑁂𑀞𑁂𑀢𑀺 𑁋 ‘𑀇𑀗𑁆𑀖𑀸𑀬𑀲𑁆𑀫𑀸 𑀲𑀸𑀥𑀼𑀓𑀫𑁂𑀯 𑀚𑀸𑀦𑀸𑀳𑀺, 𑀬𑀤𑀺 𑀲𑀭𑀲𑀺 𑀏𑀯𑀭𑀽𑀧𑀺𑀁 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀸, 𑀧𑀸𑀭𑀸𑀚𑀺𑀓𑀁 𑀯𑀸 𑀧𑀸𑀭𑀸𑀚𑀺𑀓𑀲𑀸𑀫𑀦𑁆𑀢𑀁 𑀯𑀸’𑀢𑀺. 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘𑀇𑀫𑀜𑁆𑀳𑀺 𑀦𑀸𑀫𑀸𑀳𑀁, 𑀆𑀯𑀼𑀲𑁄, 𑀅𑀧𑁆𑀧𑀫𑀢𑁆𑀢𑀺𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀅𑀧𑀼𑀝𑁆𑀞𑁄 𑀧𑀝𑀺𑀚𑀸𑀦𑀺𑀲𑁆𑀲𑀸𑀫𑀺. 𑀓𑀺𑀁 𑀧𑀦𑀸𑀳𑀁 𑀏𑀯𑀭𑀽𑀧𑀺𑀁 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸, 𑀧𑀸𑀭𑀸𑀚𑀺𑀓𑀁 𑀯𑀸 𑀧𑀸𑀭𑀸𑀚𑀺𑀓𑀲𑀸𑀫𑀦𑁆𑀢𑀁 𑀯𑀸, 𑀧𑀼𑀝𑁆𑀞𑁄 𑀦 𑀧𑀝𑀺𑀚𑀸𑀦𑀺𑀲𑁆𑀲𑀸𑀫𑀻’𑀢𑀺? 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘𑀇𑀫𑀜𑁆𑀳𑀺 𑀦𑀸𑀫 𑀢𑁆𑀯𑀁, 𑀆𑀯𑀼𑀲𑁄, 𑀅𑀧𑁆𑀧𑀫𑀢𑁆𑀢𑀺𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀅𑀧𑀼𑀝𑁆𑀞𑁄 𑀦 𑀧𑀝𑀺𑀚𑀸𑀦𑀺𑀲𑁆𑀲𑀲𑀺. 𑀓𑀺𑀁 𑀧𑀦 𑀢𑁆𑀯𑀁 𑀏𑀯𑀭𑀽𑀧𑀺𑀁 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸, 𑀧𑀸𑀭𑀸𑀚𑀺𑀓𑀁 𑀯𑀸 𑀧𑀸𑀭𑀸𑀚𑀺𑀓𑀲𑀸𑀫𑀦𑁆𑀢𑀁 𑀯𑀸, 𑀅𑀧𑀼𑀝𑁆𑀞𑁄 𑀧𑀝𑀺𑀚𑀸𑀦𑀺𑀲𑁆𑀲𑀲𑀺? 𑀇𑀗𑁆𑀖𑀸𑀬𑀲𑁆𑀫𑀸 𑀲𑀸𑀥𑀼𑀓𑀫𑁂𑀯 𑀚𑀸𑀦𑀸𑀳𑀺, 𑀬𑀤𑀺 𑀲𑀭𑀲𑀺 𑀏𑀯𑀭𑀽𑀧𑀺𑀁 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀸, 𑀧𑀸𑀭𑀸𑀚𑀺𑀓𑀁 𑀯𑀸 𑀧𑀸𑀭𑀸𑀚𑀺𑀓𑀲𑀸𑀫𑀦𑁆𑀢𑀁 𑀯𑀸’𑀢𑀺. 𑀲𑁄 𑀏𑀯𑀁 𑀯𑀤𑁂𑀲𑀺 𑁋 ‘𑀲𑀭𑀸𑀫𑀺 𑀔𑁄 𑀅𑀳𑀁, 𑀆𑀯𑀼𑀲𑁄, 𑀏𑀯𑀭𑀽𑀧𑀺𑀁 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀸, 𑀧𑀸𑀭𑀸𑀚𑀺𑀓𑀁 𑀯𑀸 𑀧𑀸𑀭𑀸𑀚𑀺𑀓𑀲𑀸𑀫𑀦𑁆𑀢𑀁 𑀯𑀸. 𑀤𑀯𑀸 𑀫𑁂 𑀏𑀢𑀁 𑀯𑀼𑀢𑁆𑀢𑀁, 𑀭𑀯𑀸 𑀫𑁂 𑀏𑀢𑀁 𑀯𑀼𑀢𑁆𑀢𑀁 𑁋 𑀦𑀸𑀳𑀁 𑀢𑀁 𑀲𑀭𑀸𑀫𑀺 𑀏𑀯𑀭𑀽𑀧𑀺𑀁 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀸, 𑀧𑀸𑀭𑀸𑀚𑀺𑀓𑀁 𑀯𑀸 𑀧𑀸𑀭𑀸𑀚𑀺𑀓𑀲𑀸𑀫𑀦𑁆𑀢𑀁 𑀯𑀸’𑀢𑀺. 𑀢𑀲𑁆𑀲 𑀔𑁄, 𑀪𑀺𑀓𑁆𑀔𑀯𑁂 [𑀢𑀲𑁆𑀲 𑀔𑁄 𑀢𑀁 𑀪𑀺𑀓𑁆𑀔𑀯𑁂 (𑀓.) 𑀢𑀲𑁆𑀲 𑀔𑁆𑀯𑀢𑀁 𑀪𑀺𑀓𑁆𑀔𑀯𑁂 (𑀲𑁆𑀬𑀸.)], 𑀪𑀺𑀓𑁆𑀔𑀼𑀦𑁄 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀓𑀸𑀢𑀩𑁆𑀩𑀁. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀲𑀗𑁆𑀖𑀫𑀚𑁆𑀛𑁂 𑀕𑀭𑀼𑀓𑀸𑀬 𑀆𑀧𑀢𑁆𑀢𑀺𑀬𑀸 𑀅𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑁄 𑀅𑀯𑀚𑀸𑀦𑀺𑀢𑁆𑀯𑀸 𑀧𑀝𑀺𑀚𑀸𑀦𑀸𑀢𑀺, 𑀧𑀝𑀺𑀚𑀸𑀦𑀺𑀢𑁆𑀯𑀸 𑀅𑀯𑀚𑀸𑀦𑀸𑀢𑀺, 𑀅𑀜𑁆𑀜𑁂𑀦𑀸𑀜𑁆𑀜𑀁 𑀧𑀝𑀺𑀘𑀭𑀢𑀺, 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀲𑀗𑁆𑀖𑀫𑀚𑁆𑀛𑁂 𑀕𑀭𑀼𑀓𑀸𑀬 𑀆𑀧𑀢𑁆𑀢𑀺𑀬𑀸 𑀅𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑁄 𑀅𑀯𑀚𑀸𑀦𑀺𑀢𑁆𑀯𑀸 𑀧𑀝𑀺𑀚𑀸𑀦𑀸𑀢𑀺, 𑀧𑀝𑀺𑀚𑀸𑀦𑀺𑀢𑁆𑀯𑀸 𑀅𑀯𑀚𑀸𑀦𑀸𑀢𑀺, 𑀅𑀜𑁆𑀜𑁂𑀦𑀸𑀜𑁆𑀜𑀁 𑀧𑀝𑀺𑀘𑀭𑀢𑀺, 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀢𑀺. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀁 𑀓𑀭𑁄𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀲𑁆𑀲 𑀓𑀭𑀡𑀁, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂….

‘‘𑀓𑀢𑀁 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀁. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

‘‘𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀥𑀺𑀓𑀭𑀡𑀁 𑀯𑀽𑀧𑀲𑀦𑁆𑀢𑀁. 𑀓𑁂𑀦 𑀯𑀽𑀧𑀲𑀦𑁆𑀢𑀁? 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘, 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀬 𑀘. 𑀓𑀺𑀜𑁆𑀘 𑀢𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑀲𑁆𑀫𑀺𑀁? 𑀲𑀗𑁆𑀖𑀲𑀫𑁆𑀫𑀼𑀔𑀢𑀸, 𑀥𑀫𑁆𑀫𑀲𑀫𑁆𑀫𑀼𑀔𑀢𑀸, 𑀯𑀺𑀦𑀬𑀲𑀫𑁆𑀫𑀼𑀔𑀢𑀸…𑀧𑁂… 𑀓𑀸 𑀘 𑀢𑀢𑁆𑀣 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀬? 𑀬𑀸 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀲𑁆𑀲 𑀓𑀺𑀭𑀺𑀬𑀸 𑀓𑀭𑀡𑀁 𑀉𑀧𑀕𑀫𑀦𑀁 𑀅𑀚𑁆𑀛𑀼𑀧𑀕𑀫𑀦𑀁 𑀅𑀥𑀺𑀯𑀸𑀲𑀦𑀸 𑀅𑀧𑁆𑀧𑀝𑀺𑀓𑁆𑀓𑁄𑀲𑀦𑀸 𑁋 𑀅𑀬𑀁 𑀢𑀢𑁆𑀣 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀬. 𑀏𑀯𑀁 𑀯𑀽𑀧𑀲𑀦𑁆𑀢𑀁 𑀘𑁂, 𑀪𑀺𑀓𑁆𑀔𑀯𑁂, 𑀅𑀥𑀺𑀓𑀭𑀡𑀁 𑀓𑀸𑀭𑀓𑁄 𑀉𑀓𑁆𑀓𑁄𑀝𑁂𑀢𑀺, 𑀉𑀓𑁆𑀓𑁄𑀝𑀦𑀓𑀁 𑀧𑀸𑀘𑀺𑀢𑁆𑀢𑀺𑀬𑀁; 𑀙𑀦𑁆𑀤𑀤𑀸𑀬𑀓𑁄 𑀔𑀻𑀬𑀢𑀺, 𑀔𑀻𑀬𑀦𑀓𑀁 𑀧𑀸𑀘𑀺𑀢𑁆𑀢𑀺𑀬𑀁.

𑀧𑀝𑀺𑀜𑁆𑀜𑀸𑀢𑀓𑀭𑀡𑀁

𑁨𑁩𑁯. [𑀧𑀭𑀺. 𑁨𑁯𑁫, 𑁩𑁦𑁬, 𑁩𑁦𑁮 𑀆𑀤𑀬𑁄] ‘‘𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀓𑀢𑀺𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀢𑀺? 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀢𑀻𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀢𑀺 𑁋 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘, 𑀧𑀝𑀺𑀜𑁆𑀜𑀸𑀢𑀓𑀭𑀡𑁂𑀦 𑀘, 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀘. 𑀲𑀺𑀬𑀸 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀏𑀓𑀁 𑀲𑀫𑀣𑀁 𑀅𑀦𑀸𑀕𑀫𑁆𑀫 𑁋 𑀢𑀺𑀡𑀯𑀢𑁆𑀣𑀸𑀭𑀓𑀁, 𑀤𑁆𑀯𑀻𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑁂𑀬𑁆𑀬 𑁋 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘, 𑀧𑀝𑀺𑀜𑁆𑀜𑀸𑀢𑀓𑀭𑀡𑁂𑀦 𑀘𑀸𑀢𑀺? 𑀲𑀺𑀬𑀸𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀬𑀣𑀸 𑀓𑀣𑀁 𑀯𑀺𑀬? 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀳𑁄𑀢𑀺. 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀏𑀓𑀁 𑀪𑀺𑀓𑁆𑀔𑀼𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀅𑀳𑀁, 𑀆𑀯𑀼𑀲𑁄, 𑀇𑀢𑁆𑀣𑀦𑁆𑀦𑀸𑀫𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄; 𑀢𑀁 𑀧𑀝𑀺𑀤𑁂𑀲𑁂𑀫𑀻’𑀢𑀺. 𑀢𑁂𑀦 𑀯𑀢𑁆𑀢𑀩𑁆𑀩𑁄 𑁋 ‘𑀧𑀲𑁆𑀲𑀲𑀻’𑀢𑀺? ‘𑀆𑀫 𑀧𑀲𑁆𑀲𑀸𑀫𑀻’𑀢𑀺. ‘𑀆𑀬𑀢𑀺𑀁 𑀲𑀁𑀯𑀭𑁂𑀬𑁆𑀬𑀸𑀲𑀻’𑀢𑀺.

‘‘𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀥𑀺𑀓𑀭𑀡𑀁 𑀯𑀽𑀧𑀲𑀦𑁆𑀢𑀁. 𑀓𑁂𑀦 𑀯𑀽𑀧𑀲𑀦𑁆𑀢𑀁? 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘, 𑀧𑀝𑀺𑀜𑁆𑀜𑀸𑀢𑀓𑀭𑀡𑁂𑀦 𑀘. 𑀓𑀺𑀜𑁆𑀘 𑀢𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑀲𑁆𑀫𑀺𑀁? 𑀥𑀫𑁆𑀫𑀲𑀫𑁆𑀫𑀼𑀔𑀢𑀸, 𑀯𑀺𑀦𑀬𑀲𑀫𑁆𑀫𑀼𑀔𑀢𑀸, 𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸…𑀧𑁂… 𑀓𑀸 𑀘 𑀢𑀢𑁆𑀣 𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸? 𑀬𑁄 𑀘 𑀤𑁂𑀲𑁂𑀢𑀺, 𑀬𑀲𑁆𑀲 𑀘 𑀤𑁂𑀲𑁂𑀢𑀺, 𑀉𑀪𑁄 𑀲𑀫𑁆𑀫𑀼𑀔𑀻𑀪𑀽𑀢𑀸 𑀳𑁄𑀦𑁆𑀢𑀺 𑁋 𑀅𑀬𑀁 𑀢𑀢𑁆𑀣 𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸. 𑀓𑀺𑀜𑁆𑀘 𑀢𑀢𑁆𑀣 𑀧𑀝𑀺𑀜𑁆𑀜𑀸𑀢𑀓𑀭𑀡𑀲𑁆𑀫𑀺𑀁? 𑀬𑀸 𑀧𑀝𑀺𑀜𑁆𑀜𑀸𑀢𑀓𑀭𑀡𑀲𑁆𑀲 𑀓𑀫𑁆𑀫𑀲𑁆𑀲 𑀓𑀺𑀭𑀺𑀬𑀸 𑀓𑀭𑀡𑀁 𑀉𑀧𑀕𑀫𑀦𑀁 𑀅𑀚𑁆𑀛𑀼𑀧𑀕𑀫𑀦𑀁 𑀅𑀥𑀺𑀯𑀸𑀲𑀦𑀸 𑀅𑀧𑁆𑀧𑀝𑀺𑀓𑁆𑀓𑁄𑀲𑀦𑀸 𑁋 𑀇𑀤𑀁 𑀢𑀢𑁆𑀣 𑀧𑀝𑀺𑀜𑁆𑀜𑀸𑀢𑀓𑀭𑀡𑀲𑁆𑀫𑀺𑀁. 𑀏𑀯𑀁 𑀯𑀽𑀧𑀲𑀦𑁆𑀢𑀁 𑀘𑁂, 𑀪𑀺𑀓𑁆𑀔𑀯𑁂, 𑀅𑀥𑀺𑀓𑀭𑀡𑀁 𑀧𑀝𑀺𑀕𑁆𑀕𑀸𑀳𑀓𑁄 𑀉𑀓𑁆𑀓𑁄𑀝𑁂𑀢𑀺, 𑀉𑀓𑁆𑀓𑁄𑀝𑀦𑀓𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀏𑀯𑀜𑁆𑀘𑁂𑀢𑀁 𑀮𑀪𑁂𑀣, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀮𑀪𑁂𑀣, 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀯𑀼𑀟𑁆𑀠𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘𑀅𑀳𑀁, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄; 𑀢𑀁 𑀧𑀝𑀺𑀤𑁂𑀲𑁂𑀫𑀻’𑀢𑀺. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀢𑁂 𑀪𑀺𑀓𑁆𑀔𑀽 𑀜𑀸𑀧𑁂𑀢𑀩𑁆𑀩𑀸 𑁋

‘‘𑀲𑀼𑀡𑀦𑁆𑀢𑀼 𑀫𑁂 𑀆𑀬𑀲𑁆𑀫𑀦𑁆𑀢𑀸. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀲𑀭𑀢𑀺, 𑀯𑀺𑀯𑀭𑀢𑀺, 𑀉𑀢𑁆𑀢𑀸𑀦𑀺𑀁 𑀓𑀭𑁄𑀢𑀺 𑀤𑁂𑀲𑁂𑀢𑀺. 𑀬𑀤𑀸𑀬𑀲𑁆𑀫𑀦𑁆𑀢𑀸𑀦𑀁 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀧𑀢𑁆𑀢𑀺𑀁 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬𑀦𑁆𑀢𑀺. 𑀢𑁂𑀦 𑀯𑀢𑁆𑀢𑀩𑁆𑀩𑁄 𑁋 ‘𑀧𑀲𑁆𑀲𑀲𑀻’𑀢𑀺? ‘𑀆𑀫 𑀧𑀲𑁆𑀲𑀸𑀫𑀻’𑀢𑀺. ‘𑀆𑀬𑀢𑀺𑀁 𑀲𑀁𑀯𑀭𑁂𑀬𑁆𑀬𑀸𑀲𑀻’𑀢𑀺.

‘‘𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀥𑀺𑀓𑀭𑀡𑀁 𑀯𑀽𑀧𑀲𑀦𑁆𑀢𑀁. 𑀓𑁂𑀦 𑀯𑀽𑀧𑀲𑀦𑁆𑀢𑀁? 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘, 𑀧𑀝𑀺𑀜𑁆𑀜𑀸𑀢𑀓𑀭𑀡𑁂𑀦 𑀘. 𑀓𑀺𑀜𑁆𑀘 𑀢𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑀲𑁆𑀫𑀺𑀁? 𑀥𑀫𑁆𑀫𑀲𑀫𑁆𑀫𑀼𑀔𑀢𑀸, 𑀯𑀺𑀦𑀬𑀲𑀫𑁆𑀫𑀼𑀔𑀢𑀸, 𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸…𑀧𑁂… 𑀓𑀸 𑀘 𑀢𑀢𑁆𑀣 𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸? 𑀬𑁄 𑀘 𑀤𑁂𑀲𑁂𑀢𑀺, 𑀬𑀲𑁆𑀲 𑀘 𑀤𑁂𑀲𑁂𑀢𑀺, 𑀉𑀪𑁄 𑀲𑀫𑁆𑀫𑀼𑀔𑀻𑀪𑀽𑀢𑀸 𑀳𑁄𑀦𑁆𑀢𑀺 𑁋 𑀅𑀬𑀁 𑀢𑀢𑁆𑀣 𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸. 𑀓𑀺𑀜𑁆𑀘 𑀢𑀢𑁆𑀣 𑀧𑀝𑀺𑀜𑁆𑀜𑀸𑀢𑀓𑀭𑀡𑀲𑁆𑀫𑀺𑀁? 𑀬𑀸 𑀧𑀝𑀺𑀜𑁆𑀜𑀸𑀢𑀓𑀭𑀡𑀲𑁆𑀲 𑀓𑀫𑁆𑀫𑀲𑁆𑀲 𑀓𑀺𑀭𑀺𑀬𑀸 𑀓𑀭𑀡𑀁 𑀉𑀧𑀕𑀫𑀦𑀁 𑀅𑀚𑁆𑀛𑀼𑀧𑀕𑀫𑀦𑀁 𑀅𑀥𑀺𑀯𑀸𑀲𑀦𑀸 𑀅𑀧𑁆𑀧𑀝𑀺𑀓𑁆𑀓𑁄𑀲𑀦𑀸 𑁋 𑀇𑀤𑀁 𑀢𑀢𑁆𑀣 𑀧𑀝𑀺𑀜𑁆𑀜𑀸𑀢𑀓𑀭𑀡𑀲𑁆𑀫𑀺𑀁. 𑀏𑀯𑀁 𑀯𑀽𑀧𑀲𑀦𑁆𑀢𑀁 𑀘𑁂, 𑀪𑀺𑀓𑁆𑀔𑀯𑁂, 𑀅𑀥𑀺𑀓𑀭𑀡𑀁 𑀧𑀝𑀺𑀕𑁆𑀕𑀸𑀳𑀓𑁄 𑀉𑀓𑁆𑀓𑁄𑀝𑁂𑀢𑀺, 𑀉𑀓𑁆𑀓𑁄𑀝𑀦𑀓𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀏𑀯𑀜𑁆𑀘𑁂𑀢𑀁 𑀮𑀪𑁂𑀣, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀮𑀪𑁂𑀣, 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀯𑀼𑀟𑁆𑀠𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀅𑀳𑀁, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄; 𑀢𑀁 𑀧𑀝𑀺𑀤𑁂𑀲𑁂𑀫𑀻’𑀢𑀺. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀲𑀭𑀢𑀺, 𑀯𑀺𑀯𑀭𑀢𑀺, 𑀉𑀢𑁆𑀢𑀸𑀦𑀺𑀁 𑀓𑀭𑁄𑀢𑀺, 𑀤𑁂𑀲𑁂𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀧𑀢𑁆𑀢𑀺𑀁 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬𑀦𑁆𑀢𑀺. 𑀢𑁂𑀦 𑀯𑀢𑁆𑀢𑀩𑁆𑀩𑁄 𑁋 ‘𑀧𑀲𑁆𑀲𑀲𑀻’𑀢𑀺? ‘𑀆𑀫 𑀧𑀲𑁆𑀲𑀸𑀫𑀻’𑀢𑀺. ‘𑀆𑀬𑀢𑀺𑀁 𑀲𑀁𑀯𑀭𑁂𑀬𑁆𑀬𑀸𑀲𑀻’𑀢𑀺.

‘‘𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀥𑀺𑀓𑀭𑀡𑀁 𑀯𑀽𑀧𑀲𑀦𑁆𑀢𑀁. 𑀓𑁂𑀦 𑀯𑀽𑀧𑀲𑀦𑁆𑀢𑀁? 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘, 𑀧𑀝𑀺𑀜𑁆𑀜𑀸𑀢𑀓𑀭𑀡𑁂𑀦 𑀘. 𑀓𑀺𑀜𑁆𑀘 𑀢𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑀲𑁆𑀫𑀺𑀁? 𑀲𑀗𑁆𑀖𑀲𑀫𑁆𑀫𑀼𑀔𑀢𑀸, 𑀥𑀫𑁆𑀫𑀲𑀫𑁆𑀫𑀼𑀔𑀢𑀸, 𑀯𑀺𑀦𑀬𑀲𑀫𑁆𑀫𑀼𑀔𑀢𑀸, 𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸…𑀧𑁂… 𑀏𑀯𑀁 𑀯𑀽𑀧𑀲𑀦𑁆𑀢𑀁 𑀘𑁂, 𑀪𑀺𑀓𑁆𑀔𑀯𑁂, 𑀅𑀥𑀺𑀓𑀭𑀡𑀁 𑀧𑀝𑀺𑀕𑁆𑀕𑀸𑀳𑀓𑁄 𑀉𑀓𑁆𑀓𑁄𑀝𑁂𑀢𑀺, 𑀉𑀓𑁆𑀓𑁄𑀝𑀦𑀓𑀁 𑀧𑀸𑀘𑀺𑀢𑁆𑀢𑀺𑀬𑀁; 𑀙𑀦𑁆𑀤𑀤𑀸𑀬𑀓𑁄 𑀔𑀻𑀬𑀢𑀺, 𑀔𑀻𑀬𑀦𑀓𑀁 𑀧𑀸𑀘𑀺𑀢𑁆𑀢𑀺𑀬𑀁.

𑀢𑀺𑀡𑀯𑀢𑁆𑀣𑀸𑀭𑀓𑀁

𑁨𑁪𑁦. ‘‘𑀲𑀺𑀬𑀸 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀏𑀓𑀁 𑀲𑀫𑀣𑀁 𑀅𑀦𑀸𑀕𑀫𑁆𑀫 𑁋 𑀧𑀝𑀺𑀜𑁆𑀜𑀸𑀢𑀓𑀭𑀡𑀁, 𑀤𑁆𑀯𑀻𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑁂𑀬𑁆𑀬 𑁋 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘, 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀘𑀸𑀢𑀺? 𑀲𑀺𑀬𑀸𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀬𑀣𑀸 𑀓𑀣𑀁 𑀯𑀺𑀬? 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀪𑀡𑁆𑀟𑀦𑀚𑀸𑀢𑀸𑀦𑀁 𑀓𑀮𑀳𑀚𑀸𑀢𑀸𑀦𑀁 𑀯𑀺𑀯𑀸𑀤𑀸𑀧𑀦𑁆𑀦𑀸𑀦𑀁 𑀯𑀺𑀳𑀭𑀢𑀁 𑀩𑀳𑀼𑀁 𑀅𑀲𑁆𑀲𑀸𑀫𑀡𑀓𑀁 𑀅𑀚𑁆𑀛𑀸𑀘𑀺𑀡𑁆𑀡𑀁 𑀳𑁄𑀢𑀺 𑀪𑀸𑀲𑀺𑀢𑀧𑀭𑀺𑀓𑁆𑀓𑀦𑁆𑀢𑀁. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘𑀅𑀫𑁆𑀳𑀸𑀓𑀁 𑀔𑁄 𑀪𑀡𑁆𑀟𑀦𑀚𑀸𑀢𑀸𑀦𑀁 𑀓𑀮𑀳𑀚𑀸𑀢𑀸𑀦𑀁 𑀯𑀺𑀯𑀸𑀤𑀸𑀧𑀦𑁆𑀦𑀸𑀦𑀁 𑀯𑀺𑀳𑀭𑀢𑀁 𑀩𑀳𑀼𑀁 𑀅𑀲𑁆𑀲𑀸𑀫𑀡𑀓𑀁 𑀅𑀚𑁆𑀛𑀸𑀘𑀺𑀡𑁆𑀡𑀁 𑀪𑀸𑀲𑀺𑀢𑀧𑀭𑀺𑀓𑁆𑀓𑀦𑁆𑀢𑀁. 𑀲𑀘𑁂 𑀫𑀬𑀁 𑀇𑀫𑀸𑀳𑀺 𑀆𑀧𑀢𑁆𑀢𑀻𑀳𑀺 𑀅𑀜𑁆𑀜𑀫𑀜𑁆𑀜𑀁 𑀓𑀸𑀭𑁂𑀲𑁆𑀲𑀸𑀫, 𑀲𑀺𑀬𑀸𑀧𑀺 𑀢𑀁 𑀅𑀥𑀺𑀓𑀭𑀡𑀁 𑀓𑀓𑁆𑀔𑀴𑀢𑁆𑀢𑀸𑀬 𑀯𑀸𑀴𑀢𑁆𑀢𑀸𑀬 𑀪𑁂𑀤𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀸’𑀢𑀺. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀏𑀯𑀭𑀽𑀧𑀁 𑀅𑀥𑀺𑀓𑀭𑀡𑀁 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀯𑀽𑀧𑀲𑀫𑁂𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀯𑀽𑀧𑀲𑀫𑁂𑀢𑀩𑁆𑀩𑀁. 𑀲𑀩𑁆𑀩𑁂𑀳𑁂𑀯 𑀏𑀓𑀚𑁆𑀛𑀁 𑀲𑀦𑁆𑀦𑀺𑀧𑀢𑀺𑀢𑀩𑁆𑀩𑀁, 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀫𑁆𑀳𑀸𑀓𑀁 𑀪𑀡𑁆𑀟𑀦𑀚𑀸𑀢𑀸𑀦𑀁 𑀓𑀮𑀳𑀚𑀸𑀢𑀸𑀦𑀁 𑀯𑀺𑀯𑀸𑀤𑀸𑀧𑀦𑁆𑀦𑀸𑀦𑀁 𑀯𑀺𑀳𑀭𑀢𑀁 𑀩𑀳𑀼𑀁 𑀅𑀲𑁆𑀲𑀸𑀫𑀡𑀓𑀁 𑀅𑀚𑁆𑀛𑀸𑀘𑀺𑀡𑁆𑀡𑀁 𑀪𑀸𑀲𑀺𑀢𑀧𑀭𑀺𑀓𑁆𑀓𑀦𑁆𑀢𑀁. 𑀲𑀘𑁂 𑀫𑀬𑀁 𑀇𑀫𑀸𑀳𑀺 𑀆𑀧𑀢𑁆𑀢𑀻𑀳𑀺 𑀅𑀜𑁆𑀜𑀫𑀜𑁆𑀜𑀁 𑀓𑀸𑀭𑁂𑀲𑁆𑀲𑀸𑀫, 𑀲𑀺𑀬𑀸𑀧𑀺 𑀢𑀁 𑀅𑀥𑀺𑀓𑀭𑀡𑀁 𑀓𑀓𑁆𑀔𑀴𑀢𑁆𑀢𑀸𑀬 𑀯𑀸𑀴𑀢𑁆𑀢𑀸𑀬 𑀪𑁂𑀤𑀸𑀬 𑀲𑀁𑀯𑀢𑁆𑀢𑁂𑀬𑁆𑀬. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀫𑀁 𑀅𑀥𑀺𑀓𑀭𑀡𑀁 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀯𑀽𑀧𑀲𑀫𑁂𑀬𑁆𑀬, 𑀞𑀧𑁂𑀢𑁆𑀯𑀸 𑀣𑀼𑀮𑁆𑀮𑀯𑀚𑁆𑀚𑀁, 𑀞𑀧𑁂𑀢𑁆𑀯𑀸 𑀕𑀺𑀳𑀺𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀦𑁆𑀢𑀺. ‘‘𑀏𑀓𑀢𑁄𑀧𑀓𑁆𑀔𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀓𑁄 𑀧𑀓𑁆𑀔𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀦𑁆𑀢𑀼 𑀫𑁂 𑀆𑀬𑀲𑁆𑀫𑀦𑁆𑀢𑀸. 𑀅𑀫𑁆𑀳𑀸𑀓𑀁 𑀪𑀡𑁆𑀟𑀦𑀚𑀸𑀢𑀸𑀦𑀁 𑀓𑀮𑀳𑀚𑀸𑀢𑀸𑀦𑀁 𑀯𑀺𑀯𑀸𑀤𑀸𑀧𑀦𑁆𑀦𑀸𑀦𑀁 𑀯𑀺𑀳𑀭𑀢𑀁 𑀩𑀳𑀼𑀁 𑀅𑀲𑁆𑀲𑀸𑀫𑀡𑀓𑀁 𑀅𑀚𑁆𑀛𑀸𑀘𑀺𑀡𑁆𑀡𑀁 𑀪𑀸𑀲𑀺𑀢𑀧𑀭𑀺𑀓𑁆𑀓𑀦𑁆𑀢𑀁. 𑀲𑀘𑁂 𑀫𑀬𑀁 𑀇𑀫𑀸𑀳𑀺 𑀆𑀧𑀢𑁆𑀢𑀻𑀳𑀺 𑀅𑀜𑁆𑀜𑀫𑀜𑁆𑀜𑀁 𑀓𑀸𑀭𑁂𑀲𑁆𑀲𑀸𑀫, 𑀲𑀺𑀬𑀸𑀧𑀺 𑀢𑀁 𑀅𑀥𑀺𑀓𑀭𑀡𑀁 𑀓𑀓𑁆𑀔𑀴𑀢𑁆𑀢𑀸𑀬 𑀯𑀸𑀴𑀢𑁆𑀢𑀸𑀬 𑀪𑁂𑀤𑀸𑀬 𑀲𑀁𑀯𑀢𑁆𑀢𑁂𑀬𑁆𑀬. 𑀬𑀤𑀸𑀬𑀲𑁆𑀫𑀦𑁆𑀢𑀸𑀦𑀁 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀬𑀸 𑀘𑁂𑀯 𑀆𑀬𑀲𑁆𑀫𑀦𑁆𑀢𑀸𑀦𑀁 𑀆𑀧𑀢𑁆𑀢𑀺, 𑀬𑀸 𑀘 𑀅𑀢𑁆𑀢𑀦𑁄 𑀆𑀧𑀢𑁆𑀢𑀺, 𑀆𑀬𑀲𑁆𑀫𑀦𑁆𑀢𑀸𑀦𑀜𑁆𑀘𑁂𑀯 𑀅𑀢𑁆𑀣𑀸𑀬, 𑀅𑀢𑁆𑀢𑀦𑁄 𑀘 𑀅𑀢𑁆𑀣𑀸𑀬, 𑀲𑀗𑁆𑀖𑀫𑀚𑁆𑀛𑁂 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀤𑁂𑀲𑁂𑀬𑁆𑀬𑀁, 𑀞𑀧𑁂𑀢𑁆𑀯𑀸 𑀣𑀼𑀮𑁆𑀮𑀯𑀚𑁆𑀚𑀁, 𑀞𑀧𑁂𑀢𑁆𑀯𑀸 𑀕𑀺𑀳𑀺𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀦𑁆𑀢𑀺.

𑁨𑁪𑁧. ‘‘𑀅𑀣𑀸𑀧𑀭𑁂𑀲𑀁 𑀏𑀓𑀢𑁄𑀧𑀓𑁆𑀔𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀓𑁄 𑀧𑀓𑁆𑀔𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀦𑁆𑀢𑀼 𑀫𑁂 𑀆𑀬𑀲𑁆𑀫𑀦𑁆𑀢𑀸. 𑀅𑀫𑁆𑀳𑀸𑀓𑀁 𑀪𑀡𑁆𑀟𑀦𑀚𑀸𑀢𑀸𑀦𑀁 𑀓𑀮𑀳𑀚𑀸𑀢𑀸𑀦𑀁 𑀯𑀺𑀯𑀸𑀤𑀸𑀧𑀦𑁆𑀦𑀸𑀦𑀁 𑀯𑀺𑀳𑀭𑀢𑀁 𑀩𑀳𑀼𑀁 𑀅𑀲𑁆𑀲𑀸𑀫𑀡𑀓𑀁 𑀅𑀚𑁆𑀛𑀸𑀘𑀺𑀡𑁆𑀡𑀁 𑀪𑀸𑀲𑀺𑀢𑀧𑀭𑀺𑀓𑁆𑀓𑀦𑁆𑀢𑀁. 𑀲𑀘𑁂 𑀫𑀬𑀁 𑀇𑀫𑀸𑀳𑀺 𑀆𑀧𑀢𑁆𑀢𑀻𑀳𑀺 𑀅𑀜𑁆𑀜𑀫𑀜𑁆𑀜𑀁 𑀓𑀸𑀭𑁂𑀲𑁆𑀲𑀸𑀫, 𑀲𑀺𑀬𑀸𑀧𑀺 𑀢𑀁 𑀅𑀥𑀺𑀓𑀭𑀡𑀁 𑀓𑀓𑁆𑀔𑀴𑀢𑁆𑀢𑀸𑀬 𑀯𑀸𑀴𑀢𑁆𑀢𑀸𑀬 𑀪𑁂𑀤𑀸𑀬 𑀲𑀁𑀯𑀢𑁆𑀢𑁂𑀬𑁆𑀬. 𑀬𑀤𑀸𑀬𑀲𑁆𑀫𑀦𑁆𑀢𑀸𑀦𑀁 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀬𑀸 𑀘𑁂𑀯 𑀆𑀬𑀲𑁆𑀫𑀦𑁆𑀢𑀸𑀦𑀁 𑀆𑀧𑀢𑁆𑀢𑀺, 𑀬𑀸 𑀘 𑀅𑀢𑁆𑀢𑀦𑁄 𑀆𑀧𑀢𑁆𑀢𑀺, 𑀆𑀬𑀲𑁆𑀫𑀦𑁆𑀢𑀸𑀦𑀜𑁆𑀘𑁂𑀯 𑀅𑀢𑁆𑀣𑀸𑀬, 𑀅𑀢𑁆𑀢𑀦𑁄 𑀘 𑀅𑀢𑁆𑀣𑀸𑀬, 𑀲𑀗𑁆𑀖𑀫𑀚𑁆𑀛𑁂 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀤𑁂𑀲𑁂𑀬𑁆𑀬𑀁, 𑀞𑀧𑁂𑀢𑁆𑀯𑀸 𑀣𑀼𑀮𑁆𑀮𑀯𑀚𑁆𑀚𑀁, 𑀞𑀧𑁂𑀢𑁆𑀯𑀸 𑀕𑀺𑀳𑀺𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀦𑁆𑀢𑀺.

𑁨𑁪𑁨. ‘‘𑀅𑀣𑀸𑀧𑀭𑁂𑀲𑀁 𑀏𑀓𑀢𑁄𑀧𑀓𑁆𑀔𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀫𑁆𑀳𑀸𑀓𑀁 𑀪𑀡𑁆𑀟𑀦𑀚𑀸𑀢𑀸𑀦𑀁 𑀓𑀮𑀳𑀚𑀸𑀢𑀸𑀦𑀁 𑀯𑀺𑀯𑀸𑀤𑀸𑀧𑀦𑁆𑀦𑀸𑀦𑀁 𑀯𑀺𑀳𑀭𑀢𑀁 𑀩𑀳𑀼𑀁 𑀅𑀲𑁆𑀲𑀸𑀫𑀡𑀓𑀁 𑀅𑀚𑁆𑀛𑀸𑀘𑀺𑀡𑁆𑀡𑀁 𑀪𑀸𑀲𑀺𑀢𑀧𑀭𑀺𑀓𑁆𑀓𑀦𑁆𑀢𑀁. 𑀲𑀘𑁂 𑀫𑀬𑀁 𑀇𑀫𑀸𑀳𑀺 𑀆𑀧𑀢𑁆𑀢𑀻𑀳𑀺 𑀅𑀜𑁆𑀜𑀫𑀜𑁆𑀜𑀁 𑀓𑀸𑀭𑁂𑀲𑁆𑀲𑀸𑀫, 𑀲𑀺𑀬𑀸𑀧𑀺 𑀢𑀁 𑀅𑀥𑀺𑀓𑀭𑀡𑀁 𑀓𑀓𑁆𑀔𑀴𑀢𑁆𑀢𑀸𑀬 𑀯𑀸𑀴𑀢𑁆𑀢𑀸𑀬 𑀪𑁂𑀤𑀸𑀬 𑀲𑀁𑀯𑀢𑁆𑀢𑁂𑀬𑁆𑀬. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀬𑀸 𑀘𑁂𑀯 𑀇𑀫𑁂𑀲𑀁 𑀆𑀬𑀲𑁆𑀫𑀦𑁆𑀢𑀸𑀦𑀁 𑀆𑀧𑀢𑁆𑀢𑀺, 𑀬𑀸 𑀘 𑀅𑀢𑁆𑀢𑀦𑁄 𑀆𑀧𑀢𑁆𑀢𑀺, 𑀇𑀫𑁂𑀲𑀜𑁆𑀘𑁂𑀯 𑀆𑀬𑀲𑁆𑀫𑀦𑁆𑀢𑀸𑀦𑀁 𑀅𑀢𑁆𑀣𑀸𑀬, 𑀅𑀢𑁆𑀢𑀦𑁄 𑀘 𑀅𑀢𑁆𑀣𑀸𑀬, 𑀲𑀗𑁆𑀖𑀫𑀚𑁆𑀛𑁂 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀤𑁂𑀲𑁂𑀬𑁆𑀬𑀁, 𑀞𑀧𑁂𑀢𑁆𑀯𑀸 𑀣𑀼𑀮𑁆𑀮𑀯𑀚𑁆𑀚𑀁, 𑀞𑀧𑁂𑀢𑁆𑀯𑀸 𑀕𑀺𑀳𑀺𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀁. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀫𑁆𑀳𑀸𑀓𑀁 𑀪𑀡𑁆𑀟𑀦𑀚𑀸𑀢𑀸𑀦𑀁 𑀓𑀮𑀳𑀚𑀸𑀢𑀸𑀦𑀁 𑀯𑀺𑀯𑀸𑀤𑀸𑀧𑀦𑁆𑀦𑀸𑀦𑀁 𑀯𑀺𑀳𑀭𑀢𑀁 𑀩𑀳𑀼𑀁 𑀅𑀲𑁆𑀲𑀸𑀫𑀡𑀓𑀁 𑀅𑀚𑁆𑀛𑀸𑀘𑀺𑀡𑁆𑀡𑀁 𑀪𑀸𑀲𑀺𑀢𑀧𑀭𑀺𑀓𑁆𑀓𑀦𑁆𑀢𑀁. 𑀲𑀘𑁂 𑀫𑀬𑀁 𑀇𑀫𑀸𑀳𑀺 𑀆𑀧𑀢𑁆𑀢𑀻𑀳𑀺 𑀅𑀜𑁆𑀜𑀫𑀜𑁆𑀜𑀁 𑀓𑀸𑀭𑁂𑀲𑁆𑀲𑀸𑀫, 𑀲𑀺𑀬𑀸𑀧𑀺 𑀢𑀁 𑀅𑀥𑀺𑀓𑀭𑀡𑀁 𑀓𑀓𑁆𑀔𑀴𑀢𑁆𑀢𑀸𑀬 𑀯𑀸𑀴𑀢𑁆𑀢𑀸𑀬 𑀪𑁂𑀤𑀸𑀬 𑀲𑀁𑀯𑀢𑁆𑀢𑁂𑀬𑁆𑀬. 𑀅𑀳𑀁 𑀬𑀸 𑀘𑁂𑀯 𑀇𑀫𑁂𑀲𑀁 𑀆𑀬𑀲𑁆𑀫𑀦𑁆𑀢𑀸𑀦𑀁 𑀆𑀧𑀢𑁆𑀢𑀺, 𑀬𑀸 𑀘 𑀅𑀢𑁆𑀢𑀦𑁄 𑀆𑀧𑀢𑁆𑀢𑀺, 𑀇𑀫𑁂𑀲𑀜𑁆𑀘𑁂𑀯 𑀆𑀬𑀲𑁆𑀫𑀦𑁆𑀢𑀸𑀦𑀁 𑀅𑀢𑁆𑀣𑀸𑀬, 𑀅𑀢𑁆𑀢𑀦𑁄 𑀘 𑀅𑀢𑁆𑀣𑀸𑀬, 𑀲𑀗𑁆𑀖𑀫𑀚𑁆𑀛𑁂 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀤𑁂𑀲𑁂𑀫𑀺, 𑀞𑀧𑁂𑀢𑁆𑀯𑀸 𑀣𑀼𑀮𑁆𑀮𑀯𑀚𑁆𑀚𑀁, 𑀞𑀧𑁂𑀢𑁆𑀯𑀸 𑀕𑀺𑀳𑀺𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀁. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀅𑀫𑁆𑀳𑀸𑀓𑀁 𑀇𑀫𑀸𑀲𑀁 𑀆𑀧𑀢𑁆𑀢𑀻𑀦𑀁 𑀲𑀗𑁆𑀖𑀫𑀚𑁆𑀛𑁂 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀤𑁂𑀲𑀦𑀸, 𑀞𑀧𑁂𑀢𑁆𑀯𑀸 𑀣𑀼𑀮𑁆𑀮𑀯𑀚𑁆𑀚𑀁, 𑀞𑀧𑁂𑀢𑁆𑀯𑀸 𑀕𑀺𑀳𑀺𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀁, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑁂𑀲𑀺𑀢𑀸 𑀅𑀫𑁆𑀳𑀸𑀓𑀁 𑀇𑀫𑀸 𑀆𑀧𑀢𑁆𑀢𑀺𑀬𑁄 𑀲𑀗𑁆𑀖𑀫𑀚𑁆𑀛𑁂 𑀢𑀺𑀡𑀯𑀢𑁆𑀣𑀸𑀭𑀓𑁂𑀦, 𑀞𑀧𑁂𑀢𑁆𑀯𑀸 𑀣𑀼𑀮𑁆𑀮𑀯𑀚𑁆𑀚𑀁, 𑀞𑀧𑁂𑀢𑁆𑀯𑀸 𑀕𑀺𑀳𑀺𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀁. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

‘‘𑀅𑀣𑀸𑀧𑀭𑁂𑀲𑀁…𑀧𑁂… 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

‘‘𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀥𑀺𑀓𑀭𑀡𑀁 𑀯𑀽𑀧𑀲𑀦𑁆𑀢𑀁. 𑀓𑁂𑀦 𑀯𑀽𑀧𑀲𑀦𑁆𑀢𑀁? 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘, 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀘. 𑀓𑀺𑀜𑁆𑀘 𑀢𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑀲𑁆𑀫𑀺𑀁? 𑀲𑀗𑁆𑀖𑀲𑀫𑁆𑀫𑀼𑀔𑀢𑀸, 𑀥𑀫𑁆𑀫𑀲𑀫𑁆𑀫𑀼𑀔𑀢𑀸, 𑀯𑀺𑀦𑀬𑀲𑀫𑁆𑀫𑀼𑀔𑀢𑀸, 𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸.

‘‘𑀓𑀸 𑀘 𑀢𑀢𑁆𑀣 𑀲𑀗𑁆𑀖𑀲𑀫𑁆𑀫𑀼𑀔𑀢𑀸? 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸, 𑀢𑁂 𑀆𑀕𑀢𑀸 𑀳𑁄𑀦𑁆𑀢𑀺, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀆𑀳𑀝𑁄 𑀳𑁄𑀢𑀺, 𑀲𑀫𑁆𑀫𑀼𑀔𑀻𑀪𑀽𑀢𑀸 𑀦 𑀧𑀝𑀺𑀓𑁆𑀓𑁄𑀲𑀦𑁆𑀢𑀺 𑁋 𑀅𑀬𑀁 𑀢𑀢𑁆𑀣 𑀲𑀗𑁆𑀖𑀲𑀫𑁆𑀫𑀼𑀔𑀢𑀸.

‘‘𑀓𑀸 𑀘 𑀢𑀢𑁆𑀣 𑀥𑀫𑁆𑀫𑀲𑀫𑁆𑀫𑀼𑀔𑀢𑀸, 𑀯𑀺𑀦𑀬𑀲𑀫𑁆𑀫𑀼𑀔𑀢𑀸? 𑀬𑁂𑀦 𑀥𑀫𑁆𑀫𑁂𑀦 𑀬𑁂𑀦 𑀯𑀺𑀦𑀬𑁂𑀦 𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁆𑀫𑀢𑀺 𑁋 𑀅𑀬𑀁 𑀢𑀢𑁆𑀣 𑀥𑀫𑁆𑀫𑀲𑀫𑁆𑀫𑀼𑀔𑀢𑀸, 𑀯𑀺𑀦𑀬𑀲𑀫𑁆𑀫𑀼𑀔𑀢𑀸.

‘‘𑀓𑀸 𑀘 𑀢𑀢𑁆𑀣 𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸? 𑀬𑁄 𑀘 𑀤𑁂𑀲𑁂𑀢𑀺, 𑀬𑀲𑁆𑀲 𑀘 𑀤𑁂𑀲𑁂𑀢𑀺, 𑀉𑀪𑁄 𑀲𑀫𑁆𑀫𑀼𑀔𑀻𑀪𑀽𑀢𑀸 𑀳𑁄𑀦𑁆𑀢𑀺 𑁋 𑀅𑀬𑀁 𑀢𑀢𑁆𑀣 𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸.

‘‘𑀓𑀺𑀜𑁆𑀘 𑀢𑀢𑁆𑀣 𑀢𑀺𑀡𑀯𑀢𑁆𑀣𑀸𑀭𑀓𑀲𑁆𑀫𑀺𑀁? 𑀬𑀸 𑀢𑀺𑀡𑀯𑀢𑁆𑀣𑀸𑀭𑀓𑀲𑁆𑀲 𑀓𑀫𑁆𑀫𑀲𑁆𑀲 𑀓𑀺𑀭𑀺𑀬𑀸 𑀓𑀭𑀡𑀁 𑀉𑀧𑀕𑀫𑀦𑀁 𑀅𑀚𑁆𑀛𑀼𑀧𑀕𑀫𑀦𑀁 𑀅𑀥𑀺𑀯𑀸𑀲𑀦𑀸 𑀅𑀧𑁆𑀧𑀝𑀺𑀓𑁆𑀓𑁄𑀲𑀦𑀸 𑁋 𑀇𑀤𑀁 𑀢𑀢𑁆𑀣 𑀢𑀺𑀡𑀯𑀢𑁆𑀣𑀸𑀭𑀓𑀲𑁆𑀫𑀺𑀁. 𑀏𑀯𑀁 𑀯𑀽𑀧𑀲𑀦𑁆𑀢𑀁 𑀘𑁂, 𑀪𑀺𑀓𑁆𑀔𑀯𑁂, 𑀅𑀥𑀺𑀓𑀭𑀡𑀁 𑀧𑀝𑀺𑀕𑁆𑀕𑀸𑀳𑀓𑁄 𑀉𑀓𑁆𑀓𑁄𑀝𑁂𑀢𑀺, 𑀉𑀓𑁆𑀓𑁄𑀝𑀦𑀓𑀁 𑀧𑀸𑀘𑀺𑀢𑁆𑀢𑀺𑀬𑀁; 𑀙𑀦𑁆𑀤𑀤𑀸𑀬𑀓𑁄 𑀔𑀻𑀬𑀢𑀺, 𑀔𑀻𑀬𑀦𑀓𑀁 𑀧𑀸𑀘𑀺𑀢𑁆𑀢𑀺𑀬𑀁.

[𑀧𑀭𑀺. 𑁨𑁯𑁫, 𑁩𑁦𑁭, 𑁩𑁦𑁮] ‘‘𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀓𑀢𑀺𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀢𑀺? 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀏𑀓𑁂𑀦 𑀲𑀫𑀣𑁂𑀦 𑀲𑀫𑁆𑀫𑀢𑀺 𑁋 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦𑀸’’𑀢𑀺.

𑀲𑀫𑀣𑀓𑁆𑀔𑀦𑁆𑀥𑀓𑀁 𑀦𑀺𑀝𑁆𑀞𑀺𑀢𑀁 𑀘𑀢𑀼𑀢𑁆𑀣𑀁.