𑁪. 𑀲𑀫𑀣𑀓𑁆𑀔𑀦𑁆𑀥𑀓𑀁

𑁧. 𑀲𑀫𑁆𑀫𑀼𑀔𑀸𑀯𑀺𑀦𑀬𑁄

𑁧𑁮𑁫. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀅𑀲𑀫𑁆𑀫𑀼𑀔𑀻𑀪𑀽𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀺 𑁋 𑀢𑀚𑁆𑀚𑀦𑀻𑀬𑀫𑁆𑀧𑀺, 𑀦𑀺𑀬𑀲𑁆𑀲𑀫𑁆𑀧𑀺, 𑀧𑀩𑁆𑀩𑀸𑀚𑀦𑀻𑀬𑀫𑁆𑀧𑀺, 𑀧𑀝𑀺𑀲𑀸𑀭𑀡𑀻𑀬𑀫𑁆𑀧𑀺, 𑀉𑀓𑁆𑀔𑁂𑀧𑀦𑀻𑀬𑀫𑁆𑀧𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀅𑀲𑀫𑁆𑀫𑀼𑀔𑀻𑀪𑀽𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑀫𑁆𑀫𑀸𑀦𑀺 𑀓𑀭𑀺𑀲𑁆𑀲𑀦𑁆𑀢𑀺 𑁋 𑀢𑀚𑁆𑀚𑀦𑀻𑀬𑀫𑁆𑀧𑀺, 𑀦𑀺𑀬𑀲𑁆𑀲𑀫𑁆𑀧𑀺, 𑀧𑀩𑁆𑀩𑀸𑀚𑀦𑀻𑀬𑀫𑁆𑀧𑀺, 𑀧𑀝𑀺𑀲𑀸𑀭𑀡𑀻𑀬𑀫𑁆𑀧𑀺, 𑀉𑀓𑁆𑀔𑁂𑀧𑀦𑀻𑀬𑀫𑁆𑀧𑀻’’𑀢𑀺! 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀅𑀲𑀫𑁆𑀫𑀼𑀔𑀻𑀪𑀽𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀺 𑁋 𑀢𑀚𑁆𑀚𑀦𑀻𑀬𑀫𑁆𑀧𑀺, 𑀦𑀺𑀬𑀲𑁆𑀲𑀫𑁆𑀧𑀺, 𑀧𑀩𑁆𑀩𑀸𑀚𑀦𑀻𑀬𑀫𑁆𑀧𑀺, 𑀧𑀝𑀺𑀲𑀸𑀭𑀡𑀻𑀬𑀫𑁆𑀧𑀺, 𑀉𑀓𑁆𑀔𑁂𑀧𑀦𑀻𑀬𑀫𑁆𑀧𑀻’’𑀢𑀺? ‘‘𑀲𑀘𑁆𑀘𑀁 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸 𑁋 ‘‘𑀅𑀦𑀦𑀼𑀘𑁆𑀙𑀯𑀺𑀓𑀁, 𑀪𑀺𑀓𑁆𑀔𑀯𑁂, 𑀢𑁂𑀲𑀁 𑀫𑁄𑀖𑀧𑀼𑀭𑀺𑀲𑀸𑀦𑀁 𑀅𑀦𑀦𑀼𑀮𑁄𑀫𑀺𑀓𑀁 𑀅𑀧𑁆𑀧𑀢𑀺𑀭𑀽𑀧𑀁 𑀅𑀲𑁆𑀲𑀸𑀫𑀡𑀓𑀁 𑀅𑀓𑀧𑁆𑀧𑀺𑀬𑀁 𑀅𑀓𑀭𑀡𑀻𑀬𑀁. 𑀓𑀣𑀜𑁆𑀳𑀺 𑀦𑀸𑀫 𑀢𑁂, 𑀪𑀺𑀓𑁆𑀔𑀯𑁂, 𑀫𑁄𑀖𑀧𑀼𑀭𑀺𑀲𑀸 𑀅𑀲𑀫𑁆𑀫𑀼𑀔𑀻𑀪𑀽𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑀫𑁆𑀫𑀸𑀦𑀺 𑀓𑀭𑀺𑀲𑁆𑀲𑀦𑁆𑀢𑀺 𑁋 𑀢𑀚𑁆𑀚𑀦𑀻𑀬𑀫𑁆𑀧𑀺, 𑀦𑀺𑀬𑀲𑁆𑀲𑀫𑁆𑀧𑀺, 𑀧𑀩𑁆𑀩𑀸𑀚𑀦𑀻𑀬𑀫𑁆𑀧𑀺, 𑀧𑀝𑀺𑀲𑀸𑀭𑀡𑀻𑀬𑀫𑁆𑀧𑀺, 𑀉𑀓𑁆𑀔𑁂𑀧𑀦𑀻𑀬𑀫𑁆𑀧𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 𑀦, 𑀪𑀺𑀓𑁆𑀔𑀯𑁂, 𑀅𑀲𑀫𑁆𑀫𑀼𑀔𑀻𑀪𑀽𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁 𑁋 𑀢𑀚𑁆𑀚𑀦𑀻𑀬𑀁 𑀯𑀸, 𑀦𑀺𑀬𑀲𑁆𑀲𑀁 𑀯𑀸, 𑀧𑀩𑁆𑀩𑀸𑀚𑀦𑀻𑀬𑀁 𑀯𑀸, 𑀧𑀝𑀺𑀲𑀸𑀭𑀡𑀻𑀬𑀁 𑀯𑀸, 𑀉𑀓𑁆𑀔𑁂𑀧𑀦𑀻𑀬𑀁 𑀯𑀸. 𑀬𑁄 𑀓𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑁧𑁮𑁬. ‘‘𑀅𑀥𑀫𑁆𑀫𑀯𑀸𑀤𑀻 𑀧𑀼𑀕𑁆𑀕𑀮𑁄 𑀅𑀥𑀫𑁆𑀫𑀯𑀸𑀤𑀻 𑀲𑀫𑁆𑀩𑀳𑀼𑀮𑀸 𑀅𑀥𑀫𑁆𑀫𑀯𑀸𑀤𑀻 𑀲𑀗𑁆𑀖𑁄. 𑀥𑀫𑁆𑀫𑀯𑀸𑀤𑀻 𑀧𑀼𑀕𑁆𑀕𑀮𑁄 𑀥𑀫𑁆𑀫𑀯𑀸𑀤𑀻 𑀲𑀫𑁆𑀩𑀳𑀼𑀮𑀸 𑀥𑀫𑁆𑀫𑀯𑀸𑀤𑀻 𑀲𑀗𑁆𑀖𑁄.

𑀓𑀡𑁆𑀳𑀧𑀓𑁆𑀔𑀦𑀯𑀓𑀁

𑁧𑁮𑁭. ‘‘𑀅𑀥𑀫𑁆𑀫𑀯𑀸𑀤𑀻 𑀧𑀼𑀕𑁆𑀕𑀮𑁄 𑀥𑀫𑁆𑀫𑀯𑀸𑀤𑀺𑀁 𑀧𑀼𑀕𑁆𑀕𑀮𑀁 𑀲𑀜𑁆𑀜𑀸𑀧𑁂𑀢𑀺 𑀦𑀺𑀚𑁆𑀛𑀸𑀧𑁂𑀢𑀺 𑀧𑁂𑀓𑁆𑀔𑁂𑀢𑀺 𑀅𑀦𑀼𑀧𑁂𑀓𑁆𑀔𑁂𑀢𑀺 𑀤𑀲𑁆𑀲𑁂𑀢𑀺 𑀅𑀦𑀼𑀤𑀲𑁆𑀲𑁂𑀢𑀺 𑁋 𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄, 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦𑀁, 𑀇𑀫𑀁 𑀕𑀡𑁆𑀳𑀸𑀳𑀺, 𑀇𑀫𑀁 𑀭𑁄𑀘𑁂𑀳𑀻𑀢𑀺. 𑀏𑀯𑀜𑁆𑀘𑁂𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁆𑀫𑀢𑀺, 𑀅𑀥𑀫𑁆𑀫𑁂𑀦 𑀯𑀽𑀧𑀲𑀫𑁆𑀫𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑀧𑀢𑀺𑀭𑀽𑀧𑀓𑁂𑀦.

‘‘𑀅𑀥𑀫𑁆𑀫𑀯𑀸𑀤𑀻 𑀧𑀼𑀕𑁆𑀕𑀮𑁄 𑀥𑀫𑁆𑀫𑀯𑀸𑀤𑀻 𑀲𑀫𑁆𑀩𑀳𑀼𑀮𑁂 𑀲𑀜𑁆𑀜𑀸𑀧𑁂𑀢𑀺 𑀦𑀺𑀚𑁆𑀛𑀸𑀧𑁂𑀢𑀺 𑀧𑁂𑀓𑁆𑀔𑁂𑀢𑀺 𑀅𑀦𑀼𑀧𑁂𑀓𑁆𑀔𑁂𑀢𑀺 𑀤𑀲𑁆𑀲𑁂𑀢𑀺 𑀅𑀦𑀼𑀤𑀲𑁆𑀲𑁂𑀢𑀺 𑁋 𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄, 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦𑀁, 𑀇𑀫𑀁 𑀕𑀡𑁆𑀳𑀣, 𑀇𑀫𑀁 𑀭𑁄𑀘𑁂𑀣𑀸𑀢𑀺. 𑀏𑀯𑀜𑁆𑀘𑁂𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁆𑀫𑀢𑀺, 𑀅𑀥𑀫𑁆𑀫𑁂𑀦 𑀯𑀽𑀧𑀲𑀫𑁆𑀫𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑀧𑀢𑀺𑀭𑀽𑀧𑀓𑁂𑀦.

‘‘𑀅𑀥𑀫𑁆𑀫𑀯𑀸𑀤𑀻 𑀧𑀼𑀕𑁆𑀕𑀮𑁄 𑀥𑀫𑁆𑀫𑀯𑀸𑀤𑀺𑀁 𑀲𑀗𑁆𑀖𑀁 𑀲𑀜𑁆𑀜𑀸𑀧𑁂𑀢𑀺 𑀦𑀺𑀚𑁆𑀛𑀸𑀧𑁂𑀢𑀺 𑀧𑁂𑀓𑁆𑀔𑁂𑀢𑀺 𑀅𑀦𑀼𑀧𑁂𑀓𑁆𑀔𑁂𑀢𑀺 𑀤𑀲𑁆𑀲𑁂𑀢𑀺 𑀅𑀦𑀼𑀤𑀲𑁆𑀲𑁂𑀢𑀺 𑁋 𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄, 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦𑀁, 𑀇𑀫𑀁 𑀕𑀡𑁆𑀳𑀸𑀳𑀺, 𑀇𑀫𑀁 𑀭𑁄𑀘𑁂𑀳𑀻𑀢𑀺 [𑀇𑀫𑀁 𑀕𑀡𑁆𑀳𑀣, 𑀇𑀫𑀁 𑀭𑁄𑀘𑁂𑀣𑀸𑀢𑀺 (𑀓.)]. 𑀏𑀯𑀜𑁆𑀘𑁂𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁆𑀫𑀢𑀺, 𑀅𑀥𑀫𑁆𑀫𑁂𑀦 𑀯𑀽𑀧𑀲𑀫𑁆𑀫𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑀧𑀢𑀺𑀭𑀽𑀧𑀓𑁂𑀦.

‘‘𑀅𑀥𑀫𑁆𑀫𑀯𑀸𑀤𑀻 𑀲𑀫𑁆𑀩𑀳𑀼𑀮𑀸 𑀥𑀫𑁆𑀫𑀯𑀸𑀤𑀺𑀁 𑀧𑀼𑀕𑁆𑀕𑀮𑀁 𑀲𑀜𑁆𑀜𑀸𑀧𑁂𑀦𑁆𑀢𑀺 𑀦𑀺𑀚𑁆𑀛𑀸𑀧𑁂𑀦𑁆𑀢𑀺 𑀧𑁂𑀓𑁆𑀔𑁂𑀦𑁆𑀢𑀺 𑀅𑀦𑀼𑀧𑁂𑀓𑁆𑀔𑁂𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑀺 𑀅𑀦𑀼𑀤𑀲𑁆𑀲𑁂𑀦𑁆𑀢𑀺 𑁋 𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄, 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦𑀁, 𑀇𑀫𑀁 𑀕𑀡𑁆𑀳𑀸𑀳𑀺, 𑀇𑀫𑀁 𑀭𑁄𑀘𑁂𑀳𑀻𑀢𑀺. 𑀏𑀯𑀜𑁆𑀘𑁂𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁆𑀫𑀢𑀺, 𑀅𑀥𑀫𑁆𑀫𑁂𑀦 𑀯𑀽𑀧𑀲𑀫𑁆𑀫𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑀧𑀢𑀺𑀭𑀽𑀧𑀓𑁂𑀦.

‘‘𑀅𑀥𑀫𑁆𑀫𑀯𑀸𑀤𑀻 𑀲𑀫𑁆𑀩𑀳𑀼𑀮𑀸 𑀥𑀫𑁆𑀫𑀯𑀸𑀤𑀻 𑀲𑀫𑁆𑀩𑀳𑀼𑀮𑁂 𑀲𑀜𑁆𑀜𑀸𑀧𑁂𑀦𑁆𑀢𑀺 𑀦𑀺𑀚𑁆𑀛𑀸𑀧𑁂𑀦𑁆𑀢𑀺 𑀧𑁂𑀓𑁆𑀔𑁂𑀦𑁆𑀢𑀺 𑀅𑀦𑀼𑀧𑁂𑀓𑁆𑀔𑁂𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑀺 𑀅𑀦𑀼𑀤𑀲𑁆𑀲𑁂𑀦𑁆𑀢𑀺 𑁋 𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄, 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦𑀁, 𑀇𑀫𑀁 𑀕𑀡𑁆𑀳𑀣, 𑀇𑀫𑀁 𑀭𑁄𑀘𑁂𑀣𑀸𑀢𑀺. 𑀏𑀯𑀜𑁆𑀘𑁂𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁆𑀫𑀢𑀺, 𑀅𑀥𑀫𑁆𑀫𑁂𑀦 𑀯𑀽𑀧𑀲𑀫𑁆𑀫𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑀧𑀢𑀺𑀭𑀽𑀧𑀓𑁂𑀦.

‘‘𑀅𑀥𑀫𑁆𑀫𑀯𑀸𑀤𑀻 𑀲𑀫𑁆𑀩𑀳𑀼𑀮𑀸 𑀥𑀫𑁆𑀫𑀯𑀸𑀤𑀺𑀁 𑀲𑀗𑁆𑀖𑀁 𑀲𑀜𑁆𑀜𑀸𑀧𑁂𑀦𑁆𑀢𑀺 𑀦𑀺𑀚𑁆𑀛𑀸𑀧𑁂𑀦𑁆𑀢𑀺 𑀧𑁂𑀓𑁆𑀔𑁂𑀦𑁆𑀢𑀺 𑀅𑀦𑀼𑀧𑁂𑀓𑁆𑀔𑁂𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑀺 𑀅𑀦𑀼𑀤𑀲𑁆𑀲𑁂𑀦𑁆𑀢𑀺 𑁋 𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄, 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦𑀁, 𑀇𑀫𑀁 𑀕𑀡𑁆𑀳𑀸𑀳𑀺, 𑀇𑀫𑀁 𑀭𑁄𑀘𑁂𑀳𑀻𑀢𑀺. 𑀏𑀯𑀜𑁆𑀘𑁂𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁆𑀫𑀢𑀺, 𑀅𑀥𑀫𑁆𑀫𑁂𑀦 𑀯𑀽𑀧𑀲𑀫𑁆𑀫𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑀧𑀢𑀺𑀭𑀽𑀧𑀓𑁂𑀦.

‘‘𑀅𑀥𑀫𑁆𑀫𑀯𑀸𑀤𑀻 𑀲𑀗𑁆𑀖𑁄 𑀥𑀫𑁆𑀫𑀯𑀸𑀤𑀺𑀁 𑀧𑀼𑀕𑁆𑀕𑀮𑀁 𑀲𑀜𑁆𑀜𑀸𑀧𑁂𑀢𑀺 𑀦𑀺𑀚𑁆𑀛𑀸𑀧𑁂𑀢𑀺 𑀧𑁂𑀓𑁆𑀔𑁂𑀢𑀺 𑀅𑀦𑀼𑀧𑁂𑀓𑁆𑀔𑁂𑀢𑀺 𑀤𑀲𑁆𑀲𑁂𑀢𑀺 𑀅𑀦𑀼𑀤𑀲𑁆𑀲𑁂𑀢𑀺 𑁋 𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄, 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦𑀁, 𑀇𑀫𑀁 𑀕𑀡𑁆𑀳𑀸𑀳𑀺, 𑀇𑀫𑀁 𑀭𑁄𑀘𑁂𑀳𑀻𑀢𑀺. 𑀏𑀯𑀜𑁆𑀘𑁂𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁆𑀫𑀢𑀺, 𑀅𑀥𑀫𑁆𑀫𑁂𑀦 𑀯𑀽𑀧𑀲𑀫𑁆𑀫𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑀧𑀢𑀺𑀭𑀽𑀧𑀓𑁂𑀦.

‘‘𑀅𑀥𑀫𑁆𑀫𑀯𑀸𑀤𑀻 𑀲𑀗𑁆𑀖𑁄 𑀥𑀫𑁆𑀫𑀯𑀸𑀤𑀻 𑀲𑀫𑁆𑀩𑀳𑀼𑀮𑁂 𑀲𑀜𑁆𑀜𑀸𑀧𑁂𑀢𑀺 𑀦𑀺𑀚𑁆𑀛𑀸𑀧𑁂𑀢𑀺 𑀧𑁂𑀓𑁆𑀔𑁂𑀢𑀺 𑀅𑀦𑀼𑀧𑁂𑀓𑁆𑀔𑁂𑀢𑀺 𑀤𑀲𑁆𑀲𑁂𑀢𑀺 𑀅𑀦𑀼𑀤𑀲𑁆𑀲𑁂𑀢𑀺 𑁋 𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄, 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦𑀁, 𑀇𑀫𑀁 𑀕𑀡𑁆𑀳𑀣, 𑀇𑀫𑀁 𑀭𑁄𑀘𑁂𑀣𑀸𑀢𑀺. 𑀏𑀯𑀜𑁆𑀘𑁂𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁆𑀫𑀢𑀺, 𑀅𑀥𑀫𑁆𑀫𑁂𑀦 𑀯𑀽𑀧𑀲𑀫𑁆𑀫𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑀧𑀢𑀺𑀭𑀽𑀧𑀓𑁂𑀦.

‘‘𑀅𑀥𑀫𑁆𑀫𑀯𑀸𑀤𑀻 𑀲𑀗𑁆𑀖𑁄 𑀥𑀫𑁆𑀫𑀯𑀸𑀤𑀺𑀁 𑀲𑀗𑁆𑀖𑀁 𑀲𑀜𑁆𑀜𑀸𑀧𑁂𑀢𑀺 𑀦𑀺𑀚𑁆𑀛𑀸𑀧𑁂𑀢𑀺 𑀧𑁂𑀓𑁆𑀔𑁂𑀢𑀺 𑀅𑀦𑀼𑀧𑁂𑀓𑁆𑀔𑁂𑀢𑀺 𑀤𑀲𑁆𑀲𑁂𑀢𑀺 𑀅𑀦𑀼𑀤𑀲𑁆𑀲𑁂𑀢𑀺 𑁋 𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄, 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦𑀁, 𑀇𑀫𑀁 𑀕𑀡𑁆𑀳𑀸𑀳𑀺, 𑀇𑀫𑀁 𑀭𑁄𑀘𑁂𑀳𑀻𑀢𑀺. 𑀏𑀯𑀜𑁆𑀘𑁂𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁆𑀫𑀢𑀺, 𑀅𑀥𑀫𑁆𑀫𑁂𑀦 𑀯𑀽𑀧𑀲𑀫𑁆𑀫𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑀧𑀢𑀺𑀭𑀽𑀧𑀓𑁂𑀦.

𑀓𑀡𑁆𑀳𑀧𑀓𑁆𑀔𑀦𑀯𑀓𑀁 𑀦𑀺𑀝𑁆𑀞𑀺𑀢𑀁.

𑀲𑀼𑀓𑁆𑀓𑀧𑀓𑁆𑀔𑀦𑀯𑀓𑀁

𑁧𑁮𑁮. ‘‘𑀥𑀫𑁆𑀫𑀯𑀸𑀤𑀻 𑀧𑀼𑀕𑁆𑀕𑀮𑁄 𑀅𑀥𑀫𑁆𑀫𑀯𑀸𑀤𑀺𑀁 𑀧𑀼𑀕𑁆𑀕𑀮𑀁 𑀲𑀜𑁆𑀜𑀸𑀧𑁂𑀢𑀺 𑀦𑀺𑀚𑁆𑀛𑀸𑀧𑁂𑀢𑀺 𑀧𑁂𑀓𑁆𑀔𑁂𑀢𑀺 𑀅𑀦𑀼𑀧𑁂𑀓𑁆𑀔𑁂𑀢𑀺 𑀤𑀲𑁆𑀲𑁂𑀢𑀺 𑀅𑀦𑀼𑀤𑀲𑁆𑀲𑁂𑀢𑀺 𑁋 𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄, 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦𑀁, 𑀇𑀫𑀁 𑀕𑀡𑁆𑀳𑀸𑀳𑀺, 𑀇𑀫𑀁 𑀭𑁄𑀘𑁂𑀳𑀻𑀢𑀺. 𑀏𑀯𑀜𑁆𑀘𑁂𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁆𑀫𑀢𑀺, 𑀥𑀫𑁆𑀫𑁂𑀦 𑀯𑀽𑀧𑀲𑀫𑁆𑀫𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦.

‘‘𑀥𑀫𑁆𑀫𑀯𑀸𑀤𑀻 𑀧𑀼𑀕𑁆𑀕𑀮𑁄 𑀅𑀥𑀫𑁆𑀫𑀯𑀸𑀤𑀻 𑀲𑀫𑁆𑀩𑀳𑀼𑀮𑁂 𑀲𑀜𑁆𑀜𑀸𑀧𑁂𑀢𑀺 𑀦𑀺𑀚𑁆𑀛𑀸𑀧𑁂𑀢𑀺 𑀧𑁂𑀓𑁆𑀔𑁂𑀢𑀺 𑀅𑀦𑀼𑀧𑁂𑀓𑁆𑀔𑁂𑀢𑀺 𑀤𑀲𑁆𑀲𑁂𑀢𑀺 𑀅𑀦𑀼𑀤𑀲𑁆𑀲𑁂𑀢𑀺 𑁋 𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄, 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦𑀁, 𑀇𑀫𑀁 𑀕𑀡𑁆𑀳𑀣, 𑀇𑀫𑀁 𑀭𑁄𑀘𑁂𑀣𑀸𑀢𑀺. 𑀏𑀯𑀜𑁆𑀘𑁂𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁆𑀫𑀢𑀺, 𑀥𑀫𑁆𑀫𑁂𑀦 𑀯𑀽𑀧𑀲𑀫𑁆𑀫𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦.

‘‘𑀥𑀫𑁆𑀫𑀯𑀸𑀤𑀻 𑀧𑀼𑀕𑁆𑀕𑀮𑁄 𑀅𑀥𑀫𑁆𑀫𑀯𑀸𑀤𑀺𑀁 𑀲𑀗𑁆𑀖𑀁 𑀲𑀜𑁆𑀜𑀸𑀧𑁂𑀢𑀺 𑀦𑀺𑀚𑁆𑀛𑀸𑀧𑁂𑀢𑀺 𑀧𑁂𑀓𑁆𑀔𑁂𑀢𑀺 𑀅𑀦𑀼𑀧𑁂𑀓𑁆𑀔𑁂𑀢𑀺 𑀤𑀲𑁆𑀲𑁂𑀢𑀺 𑀅𑀦𑀼𑀤𑀲𑁆𑀲𑁂𑀢𑀺 𑁋 𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄, 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦𑀁, 𑀇𑀫𑀁 𑀕𑀡𑁆𑀳𑀸𑀳𑀺, 𑀇𑀫𑀁 𑀭𑁄𑀘𑁂𑀳𑀻𑀢𑀺. 𑀏𑀯𑀜𑁆𑀘𑁂𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁆𑀫𑀢𑀺, 𑀥𑀫𑁆𑀫𑁂𑀦 𑀯𑀽𑀧𑀲𑀫𑁆𑀫𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦.

‘‘𑀥𑀫𑁆𑀫𑀯𑀸𑀤𑀻 𑀲𑀫𑁆𑀩𑀳𑀼𑀮𑀸 𑀅𑀥𑀫𑁆𑀫𑀯𑀸𑀤𑀺𑀁 𑀧𑀼𑀕𑁆𑀕𑀮𑀁 𑀲𑀜𑁆𑀜𑀸𑀧𑁂𑀦𑁆𑀢𑀺 𑀦𑀺𑀚𑁆𑀛𑀸𑀧𑁂𑀦𑁆𑀢𑀺 𑀧𑁂𑀓𑁆𑀔𑁂𑀦𑁆𑀢𑀺 𑀅𑀦𑀼𑀧𑁂𑀓𑁆𑀔𑁂𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑀺 𑀅𑀦𑀼𑀤𑀲𑁆𑀲𑁂𑀦𑁆𑀢𑀺 𑁋 𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄, 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦𑀁, 𑀇𑀫𑀁 𑀕𑀡𑁆𑀳𑀸𑀳𑀺, 𑀇𑀫𑀁 𑀭𑁄𑀘𑁂𑀳𑀻𑀢𑀺. 𑀏𑀯𑀜𑁆𑀘𑁂𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁆𑀫𑀢𑀺, 𑀥𑀫𑁆𑀫𑁂𑀦 𑀯𑀽𑀧𑀲𑀫𑁆𑀫𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦.

‘‘𑀥𑀫𑁆𑀫𑀯𑀸𑀤𑀻 𑀲𑀫𑁆𑀩𑀳𑀼𑀮𑀸 𑀅𑀥𑀫𑁆𑀫𑀯𑀸𑀤𑀻 𑀲𑀫𑁆𑀩𑀳𑀼𑀮𑁂 𑀲𑀜𑁆𑀜𑀸𑀧𑁂𑀦𑁆𑀢𑀺 𑀦𑀺𑀚𑁆𑀛𑀸𑀧𑁂𑀦𑁆𑀢𑀺 𑀧𑁂𑀓𑁆𑀔𑁂𑀦𑁆𑀢𑀺 𑀅𑀦𑀼𑀧𑁂𑀓𑁆𑀔𑁂𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑀺 𑀅𑀦𑀼𑀤𑀲𑁆𑀲𑁂𑀦𑁆𑀢𑀺 𑁋 𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄, 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦𑀁, 𑀇𑀫𑀁 𑀕𑀡𑁆𑀳𑀣, 𑀇𑀫𑀁 𑀭𑁄𑀘𑁂𑀣𑀸𑀢𑀺. 𑀏𑀯𑀜𑁆𑀘𑁂𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁆𑀫𑀢𑀺, 𑀥𑀫𑁆𑀫𑁂𑀦 𑀯𑀽𑀧𑀲𑀫𑁆𑀫𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦.

‘‘𑀥𑀫𑁆𑀫𑀯𑀸𑀤𑀻 𑀲𑀫𑁆𑀩𑀳𑀼𑀮𑀸 𑀅𑀥𑀫𑁆𑀫𑀯𑀸𑀤𑀺𑀁 𑀲𑀗𑁆𑀖𑀁 𑀲𑀜𑁆𑀜𑀸𑀧𑁂𑀦𑁆𑀢𑀺 𑀦𑀺𑀚𑁆𑀛𑀸𑀧𑁂𑀦𑁆𑀢𑀺 𑀧𑁂𑀓𑁆𑀔𑁂𑀦𑁆𑀢𑀺 𑀅𑀦𑀼𑀧𑁂𑀓𑁆𑀔𑁂𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑀺 𑀅𑀦𑀼𑀤𑀲𑁆𑀲𑁂𑀦𑁆𑀢𑀺 𑁋 𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄, 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦𑀁, 𑀇𑀫𑀁 𑀕𑀡𑁆𑀳𑀸𑀳𑀺, 𑀇𑀫𑀁 𑀭𑁄𑀘𑁂𑀳𑀻𑀢𑀺. 𑀏𑀯𑀜𑁆𑀘𑁂𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁆𑀫𑀢𑀺, 𑀥𑀫𑁆𑀫𑁂𑀦 𑀯𑀽𑀧𑀲𑀫𑁆𑀫𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦.

‘‘𑀥𑀫𑁆𑀫𑀯𑀸𑀤𑀻 𑀲𑀗𑁆𑀖𑁄 𑀅𑀥𑀫𑁆𑀫𑀯𑀸𑀤𑀺𑀁 𑀧𑀼𑀕𑁆𑀕𑀮𑀁 𑀲𑀜𑁆𑀜𑀸𑀧𑁂𑀢𑀺 𑀦𑀺𑀚𑁆𑀛𑀸𑀧𑁂𑀢𑀺 𑀧𑁂𑀓𑁆𑀔𑁂𑀢𑀺 𑀅𑀦𑀼𑀧𑁂𑀓𑁆𑀔𑁂𑀢𑀺 𑀤𑀲𑁆𑀲𑁂𑀢𑀺 𑀅𑀦𑀼𑀤𑀲𑁆𑀲𑁂𑀢𑀺 𑁋 𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄, 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦𑀁, 𑀇𑀫𑀁 𑀕𑀡𑁆𑀳𑀸𑀳𑀺, 𑀇𑀫𑀁 𑀭𑁄𑀘𑁂𑀳𑀻𑀢𑀺. 𑀏𑀯𑀜𑁆𑀘𑁂𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁆𑀫𑀢𑀺, 𑀥𑀫𑁆𑀫𑁂𑀦 𑀯𑀽𑀧𑀲𑀫𑁆𑀫𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦.

‘‘𑀥𑀫𑁆𑀫𑀯𑀸𑀤𑀻 𑀲𑀗𑁆𑀖𑁄 𑀅𑀥𑀫𑁆𑀫𑀯𑀸𑀤𑀻 𑀲𑀫𑁆𑀩𑀳𑀼𑀮𑁂 𑀲𑀜𑁆𑀜𑀸𑀧𑁂𑀢𑀺 𑀦𑀺𑀚𑁆𑀛𑀸𑀧𑁂𑀢𑀺 𑀧𑁂𑀓𑁆𑀔𑁂𑀢𑀺 𑀅𑀦𑀼𑀧𑁂𑀓𑁆𑀔𑁂𑀢𑀺 𑀤𑀲𑁆𑀲𑁂𑀢𑀺 𑀅𑀦𑀼𑀤𑀲𑁆𑀲𑁂𑀢𑀺 𑁋 𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄, 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦𑀁, 𑀇𑀫𑀁 𑀕𑀡𑁆𑀳𑀣, 𑀇𑀫𑀁 𑀭𑁄𑀘𑁂𑀣𑀸𑀢𑀺. 𑀏𑀯𑀜𑁆𑀘𑁂𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁆𑀫𑀢𑀺, 𑀥𑀫𑁆𑀫𑁂𑀦 𑀯𑀽𑀧𑀲𑀫𑁆𑀫𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦.

‘‘𑀥𑀫𑁆𑀫𑀯𑀸𑀤𑀻 𑀲𑀗𑁆𑀖𑁄 𑀅𑀥𑀫𑁆𑀫𑀯𑀸𑀤𑀺𑀁 𑀲𑀗𑁆𑀖𑀁 𑀲𑀜𑁆𑀜𑀸𑀧𑁂𑀢𑀺 𑀦𑀺𑀚𑁆𑀛𑀸𑀧𑁂𑀢𑀺 𑀧𑁂𑀓𑁆𑀔𑁂𑀢𑀺 𑀅𑀦𑀼𑀧𑁂𑀓𑁆𑀔𑁂𑀢𑀺 𑀤𑀲𑁆𑀲𑁂𑀢𑀺 𑀅𑀦𑀼𑀤𑀲𑁆𑀲𑁂𑀢𑀺 𑁋 𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄, 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦𑀁, 𑀇𑀫𑀁 𑀕𑀡𑁆𑀳𑀸𑀳𑀺, 𑀇𑀫𑀁 𑀭𑁄𑀘𑁂𑀳𑀻𑀢𑀺. 𑀏𑀯𑀜𑁆𑀘𑁂𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁆𑀫𑀢𑀺, 𑀥𑀫𑁆𑀫𑁂𑀦 𑀯𑀽𑀧𑀲𑀫𑁆𑀫𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦𑀸’’𑀢𑀺.

𑀲𑀼𑀓𑁆𑀓𑀧𑀓𑁆𑀔𑀦𑀯𑀓𑀁 𑀦𑀺𑀝𑁆𑀞𑀺𑀢𑀁.

𑁨. 𑀲𑀢𑀺𑀯𑀺𑀦𑀬𑁄

𑁧𑁮𑁯. [𑀇𑀤𑀁 𑀯𑀢𑁆𑀣𑀼 𑀧𑀸𑀭𑀸. 𑁩𑁮𑁦 𑀆𑀤𑀬𑁄] 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀢𑀸 𑀤𑀩𑁆𑀩𑁂𑀦 𑀫𑀮𑁆𑀮𑀧𑀼𑀢𑁆𑀢𑁂𑀦 𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑁂𑀦 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀢𑀁 𑀳𑁄𑀢𑀺. 𑀬𑀁 𑀓𑀺𑀜𑁆𑀘𑀺 𑀲𑀸𑀯𑀓𑁂𑀦 𑀧𑀢𑁆𑀢𑀩𑁆𑀩𑀁 𑀲𑀩𑁆𑀩𑀁 𑀢𑁂𑀦 𑀅𑀦𑀼𑀧𑁆𑀧𑀢𑁆𑀢𑀁 𑀳𑁄𑀢𑀺. 𑀦𑀢𑁆𑀣𑀺 𑀘𑀲𑁆𑀲 𑀓𑀺𑀜𑁆𑀘𑀺 𑀉𑀢𑁆𑀢𑀭𑀺 [𑀉𑀢𑁆𑀢𑀭𑀺𑀁 (𑀲𑀻.)] 𑀓𑀭𑀡𑀻𑀬𑀁, 𑀓𑀢𑀲𑁆𑀲 𑀯𑀸 𑀧𑀢𑀺𑀘𑀬𑁄. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀤𑀩𑁆𑀩𑀲𑁆𑀲 𑀫𑀮𑁆𑀮𑀧𑀼𑀢𑁆𑀢𑀲𑁆𑀲 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀫𑀬𑀸 𑀔𑁄 𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑁂𑀦 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀢𑀁. 𑀬𑀁 𑀓𑀺𑀜𑁆𑀘𑀺 𑀲𑀸𑀯𑀓𑁂𑀦 𑀧𑀢𑁆𑀢𑀩𑁆𑀩𑀁 𑀲𑀩𑁆𑀩𑀁 𑀫𑀬𑀸 𑀅𑀦𑀼𑀧𑁆𑀧𑀢𑁆𑀢𑀁. 𑀦𑀢𑁆𑀣𑀺 𑀘 𑀫𑁂 𑀓𑀺𑀜𑁆𑀘𑀺 𑀉𑀢𑁆𑀢𑀭𑀺𑀓𑀭𑀡𑀻𑀬𑀁, 𑀓𑀢𑀲𑁆𑀲 𑀯𑀸 𑀧𑀢𑀺𑀘𑀬𑁄. 𑀓𑀺𑀁 𑀦𑀼 𑀔𑁄 𑀅𑀳𑀁 𑀲𑀗𑁆𑀖𑀲𑁆𑀲 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀭𑁂𑀬𑁆𑀬’’𑀦𑁆𑀢𑀺?

𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀤𑀩𑁆𑀩𑀲𑁆𑀲 𑀫𑀮𑁆𑀮𑀧𑀼𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀲𑁆𑀲 𑀲𑁂𑀦𑀸𑀲𑀦𑀜𑁆𑀘 𑀧𑀜𑁆𑀜𑀧𑁂𑀬𑁆𑀬𑀁 𑀪𑀢𑁆𑀢𑀸𑀦𑀺 𑀘 𑀉𑀤𑁆𑀤𑀺𑀲𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀤𑀩𑁆𑀩𑁄 𑀫𑀮𑁆𑀮𑀧𑀼𑀢𑁆𑀢𑁄 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀤𑀩𑁆𑀩𑁄 𑀫𑀮𑁆𑀮𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀥 𑀫𑀬𑁆𑀳𑀁, 𑀪𑀦𑁆𑀢𑁂, 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘𑀫𑀬𑀸 𑀔𑁄 𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑁂𑀦 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀢𑀁. 𑀬𑀁 𑀓𑀺𑀜𑁆𑀘𑀺 𑀲𑀸𑀯𑀓𑁂𑀦 𑀧𑀢𑁆𑀢𑀩𑁆𑀩𑀁, 𑀲𑀩𑁆𑀩𑀁 𑀫𑀬𑀸 𑀅𑀦𑀼𑀧𑁆𑀧𑀢𑁆𑀢𑀁. 𑀦𑀢𑁆𑀣𑀺 𑀘 𑀫𑁂 𑀓𑀺𑀜𑁆𑀘𑀺 𑀉𑀢𑁆𑀢𑀭𑀺𑀓𑀭𑀡𑀻𑀬𑀁, 𑀓𑀢𑀲𑁆𑀲 𑀯𑀸 𑀧𑀢𑀺𑀘𑀬𑁄. 𑀓𑀺𑀁 𑀦𑀼 𑀔𑁄 𑀅𑀳𑀁 𑀲𑀗𑁆𑀖𑀲𑁆𑀲 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀭𑁂𑀬𑁆𑀬’𑀦𑁆𑀢𑀺? 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀢𑀤𑀳𑁄𑀲𑀺 𑁋 ‘𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀲𑁆𑀲 𑀲𑁂𑀦𑀸𑀲𑀦𑀜𑁆𑀘 𑀧𑀜𑁆𑀜𑀧𑁂𑀬𑁆𑀬𑀁 𑀪𑀢𑁆𑀢𑀸𑀦𑀺 𑀘 𑀉𑀤𑁆𑀤𑀺𑀲𑁂𑀬𑁆𑀬’𑀦𑁆𑀢𑀺. 𑀇𑀘𑁆𑀙𑀸𑀫𑀳𑀁, 𑀪𑀦𑁆𑀢𑁂, 𑀲𑀗𑁆𑀖𑀲𑁆𑀲 𑀲𑁂𑀦𑀸𑀲𑀦𑀜𑁆𑀘 𑀧𑀜𑁆𑀜𑀸𑀧𑁂𑀢𑀼𑀁 𑀪𑀢𑁆𑀢𑀸𑀦𑀺 𑀘 𑀉𑀤𑁆𑀤𑀺𑀲𑀺𑀢𑀼’’𑀦𑁆𑀢𑀺. ‘‘𑀲𑀸𑀥𑀼 𑀲𑀸𑀥𑀼, 𑀤𑀩𑁆𑀩. 𑀢𑁂𑀦 𑀳𑀺 𑀢𑁆𑀯𑀁, 𑀤𑀩𑁆𑀩, 𑀲𑀗𑁆𑀖𑀲𑁆𑀲 𑀲𑁂𑀦𑀸𑀲𑀦𑀜𑁆𑀘 𑀧𑀜𑁆𑀜𑀧𑁂𑀳𑀺 𑀪𑀢𑁆𑀢𑀸𑀦𑀺 𑀘 𑀉𑀤𑁆𑀤𑀺𑀲𑀸𑀳𑀻’’𑀢𑀺 [𑀉𑀤𑁆𑀤𑀺𑀲𑀸𑀢𑀺 (𑀧𑀸𑀭𑀸. 𑁩𑁮𑁦)]. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀤𑀩𑁆𑀩𑁄 𑀫𑀮𑁆𑀮𑀧𑀼𑀢𑁆𑀢𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀤𑀩𑁆𑀩𑀁 𑀫𑀮𑁆𑀮𑀧𑀼𑀢𑁆𑀢𑀁 𑀲𑁂𑀦𑀸𑀲𑀦𑀧𑀜𑁆𑀜𑀸𑀧𑀓𑀜𑁆𑀘 𑀪𑀢𑁆𑀢𑀼𑀤𑁆𑀤𑁂𑀲𑀓𑀜𑁆𑀘 𑀲𑀫𑁆𑀫𑀦𑁆𑀦𑀢𑀼. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄. 𑀧𑀞𑀫𑀁 𑀤𑀩𑁆𑀩𑁄 𑀫𑀮𑁆𑀮𑀧𑀼𑀢𑁆𑀢𑁄 𑀬𑀸𑀘𑀺𑀢𑀩𑁆𑀩𑁄 [𑀤𑀩𑁆𑀩𑁄 𑀬𑀸𑀘𑀺𑀢𑀩𑁆𑀩𑁄 (𑀲𑁆𑀬𑀸. 𑀓.)]. 𑀬𑀸𑀘𑀺𑀢𑁆𑀯𑀸 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁧𑁯𑁦. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀆𑀬𑀲𑁆𑀫𑀦𑁆𑀢𑀁 𑀤𑀩𑁆𑀩𑀁 𑀫𑀮𑁆𑀮𑀧𑀼𑀢𑁆𑀢𑀁 𑀲𑁂𑀦𑀸𑀲𑀦𑀧𑀜𑁆𑀜𑀸𑀧𑀓𑀜𑁆𑀘 𑀪𑀢𑁆𑀢𑀼𑀤𑁆𑀤𑁂𑀲𑀓𑀜𑁆𑀘 𑀲𑀫𑁆𑀫𑀦𑁆𑀦𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀲𑀗𑁆𑀖𑁄 𑀆𑀬𑀲𑁆𑀫𑀦𑁆𑀢𑀁 𑀤𑀩𑁆𑀩𑀁 𑀫𑀮𑁆𑀮𑀧𑀼𑀢𑁆𑀢𑀁 𑀲𑁂𑀦𑀸𑀲𑀦𑀧𑀜𑁆𑀜𑀸𑀧𑀓𑀜𑁆𑀘 𑀪𑀢𑁆𑀢𑀼𑀤𑁆𑀤𑁂𑀲𑀓𑀜𑁆𑀘 𑀲𑀫𑁆𑀫𑀦𑁆𑀦𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀆𑀬𑀲𑁆𑀫𑀢𑁄 𑀤𑀩𑁆𑀩𑀲𑁆𑀲 𑀫𑀮𑁆𑀮𑀧𑀼𑀢𑁆𑀢𑀲𑁆𑀲 𑀲𑁂𑀦𑀸𑀲𑀦𑀧𑀜𑁆𑀜𑀸𑀧𑀓𑀲𑁆𑀲 𑀘 𑀪𑀢𑁆𑀢𑀼𑀤𑁆𑀤𑁂𑀲𑀓𑀲𑁆𑀲 𑀘 𑀲𑀫𑁆𑀫𑀼𑀢𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀲𑀫𑁆𑀫𑀢𑁄 𑀲𑀗𑁆𑀖𑁂𑀦 𑀆𑀬𑀲𑁆𑀫𑀸 𑀤𑀩𑁆𑀩𑁄 𑀫𑀮𑁆𑀮𑀧𑀼𑀢𑁆𑀢𑁄 𑀲𑁂𑀦𑀸𑀲𑀦𑀧𑀜𑁆𑀜𑀸𑀧𑀓𑁄 𑀘 𑀪𑀢𑁆𑀢𑀼𑀤𑁆𑀤𑁂𑀲𑀓𑁄 𑀘. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑁧𑁯𑁧. 𑀲𑀫𑁆𑀫𑀢𑁄 𑀘 𑀧𑀦𑀸𑀬𑀲𑁆𑀫𑀸 𑀤𑀩𑁆𑀩𑁄 𑀫𑀮𑁆𑀮𑀧𑀼𑀢𑁆𑀢𑁄 𑀲𑀪𑀸𑀕𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀓𑀚𑁆𑀛𑀁 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀲𑀼𑀢𑁆𑀢𑀦𑁆𑀢𑀺𑀓𑀸 𑀢𑁂𑀲𑀁 𑀏𑀓𑀚𑁆𑀛𑀁 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀢𑀺 𑁋 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀲𑀼𑀢𑁆𑀢𑀦𑁆𑀢𑀁 𑀲𑀗𑁆𑀕𑀸𑀬𑀺𑀲𑁆𑀲𑀦𑁆𑀢𑀻𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀯𑀺𑀦𑀬𑀥𑀭𑀸 𑀢𑁂𑀲𑀁 𑀏𑀓𑀚𑁆𑀛𑀁 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀢𑀺 𑁋 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀯𑀺𑀦𑀬𑀁 𑀯𑀺𑀦𑀺𑀘𑁆𑀙𑀺𑀦𑀺𑀲𑁆𑀲𑀦𑁆𑀢𑀻𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀥𑀫𑁆𑀫𑀓𑀣𑀺𑀓𑀸 𑀢𑁂𑀲𑀁 𑀏𑀓𑀚𑁆𑀛𑀁 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀢𑀺 𑁋 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀥𑀫𑁆𑀫𑀁 𑀲𑀸𑀓𑀘𑁆𑀙𑀺𑀲𑁆𑀲𑀦𑁆𑀢𑀻𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀛𑀸𑀬𑀺𑀦𑁄 𑀢𑁂𑀲𑀁 𑀏𑀓𑀚𑁆𑀛𑀁 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀢𑀺 𑁋 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀦 𑀩𑁆𑀬𑀸𑀩𑀸𑀥𑀺𑀲𑁆𑀲𑀦𑁆𑀢𑀻𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀢𑀺𑀭𑀘𑁆𑀙𑀸𑀦𑀓𑀣𑀺𑀓𑀸 𑀓𑀸𑀬𑀤𑀴𑁆𑀳𑀺𑀩𑀳𑀼𑀮𑀸 [𑀓𑀸𑀬𑀤𑀟𑁆𑀠𑀺𑀩𑀳𑀼𑀮𑀸 (𑀲𑀻.)] 𑀯𑀺𑀳𑀭𑀦𑁆𑀢𑀺 𑀢𑁂𑀲𑀫𑁆𑀧𑀺 𑀏𑀓𑀚𑁆𑀛𑀁 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀢𑀺 𑁋 𑀇𑀫𑀸𑀬𑀧𑀺𑀫𑁂 𑀆𑀬𑀲𑁆𑀫𑀦𑁆𑀢𑁄 𑀭𑀢𑀺𑀬𑀸 𑀅𑀘𑁆𑀙𑀺𑀲𑁆𑀲𑀦𑁆𑀢𑀻𑀢𑀺. 𑀬𑁂𑀧𑀺 𑀢𑁂 𑀪𑀺𑀓𑁆𑀔𑀽 𑀯𑀺𑀓𑀸𑀮𑁂 𑀆𑀕𑀘𑁆𑀙𑀦𑁆𑀢𑀺 𑀢𑁂𑀲𑀫𑁆𑀧𑀺 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑁂𑀦𑁂𑀯 𑀆𑀮𑁄𑀓𑁂𑀦 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀢𑀺; 𑀅𑀧𑀺𑀲𑀼 𑀪𑀺𑀓𑁆𑀔𑀽 𑀲𑀜𑁆𑀘𑀺𑀘𑁆𑀘 𑀯𑀺𑀓𑀸𑀮𑁂 𑀆𑀕𑀘𑁆𑀙𑀦𑁆𑀢𑀺 𑁋 𑀫𑀬𑀁 𑀆𑀬𑀲𑁆𑀫𑀢𑁄 𑀤𑀩𑁆𑀩𑀲𑁆𑀲 𑀫𑀮𑁆𑀮𑀧𑀼𑀢𑁆𑀢𑀲𑁆𑀲 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀧𑀲𑁆𑀲𑀺𑀲𑁆𑀲𑀸𑀫𑀸𑀢𑀺.

𑀢𑁂 𑀆𑀬𑀲𑁆𑀫𑀦𑁆𑀢𑀁 𑀤𑀩𑁆𑀩𑀁 𑀫𑀮𑁆𑀮𑀧𑀼𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑀦𑁆𑀢𑀺 𑁋 ‘‘𑀅𑀫𑁆𑀳𑀸𑀓𑀁, 𑀆𑀯𑀼𑀲𑁄 𑀤𑀩𑁆𑀩, 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀳𑀻’’𑀢𑀺. 𑀢𑁂 𑀆𑀬𑀲𑁆𑀫𑀸 𑀤𑀩𑁆𑀩𑁄 𑀫𑀮𑁆𑀮𑀧𑀼𑀢𑁆𑀢𑁄 𑀏𑀯𑀁 𑀯𑀤𑁂𑀢𑀺 𑁋 ‘‘𑀓𑀢𑁆𑀣 𑀆𑀬𑀲𑁆𑀫𑀦𑁆𑀢𑀸 𑀇𑀘𑁆𑀙𑀦𑁆𑀢𑀺 𑀓𑀢𑁆𑀣 𑀧𑀜𑁆𑀜𑀧𑁂𑀫𑀻’’𑀢𑀺? 𑀢𑁂 𑀲𑀜𑁆𑀘𑀺𑀘𑁆𑀘 𑀤𑀽𑀭𑁂 𑀅𑀧𑀤𑀺𑀲𑀦𑁆𑀢𑀺 𑁋 ‘‘𑀅𑀫𑁆𑀳𑀸𑀓𑀁, 𑀆𑀯𑀼𑀲𑁄 𑀤𑀩𑁆𑀩, 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀳𑀺. 𑀅𑀫𑁆𑀳𑀸𑀓𑀁, 𑀆𑀯𑀼𑀲𑁄, 𑀘𑁄𑀭𑀧𑀧𑀸𑀢𑁂 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀳𑀺. 𑀅𑀫𑁆𑀳𑀸𑀓𑀁, 𑀆𑀯𑀼𑀲𑁄, 𑀇𑀲𑀺𑀕𑀺𑀮𑀺𑀧𑀲𑁆𑀲𑁂 𑀓𑀸𑀴𑀲𑀺𑀮𑀸𑀬𑀁 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀳𑀺. 𑀅𑀫𑁆𑀳𑀸𑀓𑀁, 𑀆𑀯𑀼𑀲𑁄, 𑀯𑁂𑀪𑀸𑀭𑀧𑀲𑁆𑀲𑁂 𑀲𑀢𑁆𑀢𑀧𑀡𑁆𑀡𑀺𑀕𑀼𑀳𑀸𑀬𑀁 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀳𑀺. 𑀅𑀫𑁆𑀳𑀸𑀓𑀁, 𑀆𑀯𑀼𑀲𑁄, 𑀲𑀻𑀢𑀯𑀦𑁂 𑀲𑀧𑁆𑀧𑀲𑁄𑀡𑁆𑀟𑀺𑀓𑀧𑀩𑁆𑀪𑀸𑀭𑁂 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀳𑀺. 𑀅𑀫𑁆𑀳𑀸𑀓𑀁, 𑀆𑀯𑀼𑀲𑁄, 𑀕𑁄𑀢𑀫𑀓𑀓𑀦𑁆𑀤𑀭𑀸𑀬𑀁 [𑀕𑁄𑀫𑀝𑀓𑀦𑁆𑀤𑀭𑀸𑀬𑀁 (𑀲𑁆𑀬𑀸. 𑀓𑀁.)] 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀳𑀺. 𑀅𑀫𑁆𑀳𑀸𑀓𑀁, 𑀆𑀯𑀼𑀲𑁄, 𑀢𑀺𑀦𑁆𑀤𑀼𑀓𑀓𑀦𑁆𑀤𑀭𑀸𑀬𑀁 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀳𑀺. 𑀅𑀫𑁆𑀳𑀸𑀓𑀁, 𑀆𑀯𑀼𑀲𑁄, 𑀢𑀧𑁄𑀤𑀓𑀦𑁆𑀤𑀭𑀸𑀬𑀁 [𑀓𑀧𑁄𑀢𑀓𑀦𑁆𑀤𑀭𑀸𑀬𑀁 (𑀓.)] 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀳𑀺. 𑀅𑀫𑁆𑀳𑀸𑀓𑀁, 𑀆𑀯𑀼𑀲𑁄, 𑀢𑀧𑁄𑀤𑀸𑀭𑀸𑀫𑁂 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀳𑀺. 𑀅𑀫𑁆𑀳𑀸𑀓𑀁, 𑀆𑀯𑀼𑀲𑁄, 𑀚𑀻𑀯𑀓𑀫𑁆𑀩𑀯𑀦𑁂 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀳𑀺. 𑀅𑀫𑁆𑀳𑀸𑀓𑀁, 𑀆𑀯𑀼𑀲𑁄, 𑀫𑀤𑁆𑀤𑀓𑀼𑀘𑁆𑀙𑀺𑀫𑁆𑀳𑀺 𑀫𑀺𑀕𑀤𑀸𑀬𑁂 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀳𑀻’’𑀢𑀺.

𑀢𑁂𑀲𑀁 𑀆𑀬𑀲𑁆𑀫𑀸 𑀤𑀩𑁆𑀩𑁄 𑀫𑀮𑁆𑀮𑀧𑀼𑀢𑁆𑀢𑁄 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀅𑀗𑁆𑀕𑀼𑀮𑀺𑀬𑀸 𑀚𑀮𑀫𑀸𑀦𑀸𑀬 𑀧𑀼𑀭𑀢𑁄 𑀧𑀼𑀭𑀢𑁄 𑀕𑀘𑁆𑀙𑀢𑀺. 𑀢𑁂𑀧𑀺 𑀢𑁂𑀦𑁂𑀯 𑀆𑀮𑁄𑀓𑁂𑀦 𑀆𑀬𑀲𑁆𑀫𑀢𑁄 𑀤𑀩𑁆𑀩𑀲𑁆𑀲 𑀫𑀮𑁆𑀮𑀧𑀼𑀢𑁆𑀢𑀲𑁆𑀲 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀕𑀘𑁆𑀙𑀦𑁆𑀢𑀺. 𑀢𑁂𑀲𑀁 𑀆𑀬𑀲𑁆𑀫𑀸 𑀤𑀩𑁆𑀩𑁄 𑀫𑀮𑁆𑀮𑀧𑀼𑀢𑁆𑀢𑁄 𑀏𑀯𑀁 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀢𑀺 𑁋 𑀅𑀬𑀁 𑀫𑀜𑁆𑀘𑁄, 𑀇𑀤𑀁 𑀧𑀻𑀞𑀁, 𑀅𑀬𑀁 𑀪𑀺𑀲𑀺, 𑀇𑀤𑀁 𑀩𑀺𑀩𑁆𑀩𑁄𑀳𑀦𑀁 [𑀩𑀺𑀫𑁆𑀩𑁄𑀳𑀦𑀁 (𑀲𑀻. 𑀲𑁆𑀬𑀸. 𑀓𑀁.)], 𑀇𑀤𑀁 𑀯𑀘𑁆𑀘𑀝𑁆𑀞𑀸𑀦𑀁, 𑀇𑀤𑀁 𑀧𑀲𑁆𑀲𑀸𑀯𑀝𑁆𑀞𑀸𑀦𑀁, 𑀇𑀤𑀁 𑀧𑀸𑀦𑀻𑀬𑀁, 𑀇𑀤𑀁 𑀧𑀭𑀺𑀪𑁄𑀚𑀦𑀻𑀬𑀁, 𑀅𑀬𑀁 𑀓𑀢𑁆𑀢𑀭𑀤𑀡𑁆𑀟𑁄, 𑀇𑀤𑀁 𑀲𑀗𑁆𑀖𑀲𑁆𑀲 𑀓𑀢𑀺𑀓𑀲𑀡𑁆𑀞𑀸𑀦𑀁, 𑀇𑀫𑀁 𑀓𑀸𑀮𑀁 𑀧𑀯𑀺𑀲𑀺𑀢𑀩𑁆𑀩𑀁, 𑀇𑀫𑀁 𑀓𑀸𑀮𑀁 𑀦𑀺𑀓𑁆𑀔𑀫𑀺𑀢𑀩𑁆𑀩𑀦𑁆𑀢𑀺. 𑀢𑁂𑀲𑀁 𑀆𑀬𑀲𑁆𑀫𑀸 𑀤𑀩𑁆𑀩𑁄 𑀫𑀮𑁆𑀮𑀧𑀼𑀢𑁆𑀢𑁄 𑀏𑀯𑀁 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀧𑀼𑀦𑀤𑁂𑀯 𑀯𑁂𑀴𑀼𑀯𑀦𑀁 𑀧𑀘𑁆𑀘𑀸𑀕𑀘𑁆𑀙𑀢𑀺.

𑁧𑁯𑁨. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀸 [𑀫𑁂𑀢𑁆𑀢𑀺𑀬𑀪𑀼𑀫𑁆𑀫𑀚𑀓𑀸 (𑀲𑀻. 𑀲𑁆𑀬𑀸. 𑀓𑀁.)] 𑀪𑀺𑀓𑁆𑀔𑀽 𑀦𑀯𑀓𑀸 𑀘𑁂𑀯 𑀳𑁄𑀦𑁆𑀢𑀺 𑀅𑀧𑁆𑀧𑀧𑀼𑀜𑁆𑀜𑀸 𑀘. 𑀬𑀸𑀦𑀺 𑀲𑀗𑁆𑀖𑀲𑁆𑀲 𑀮𑀸𑀫𑀓𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀢𑀸𑀦𑀺 𑀢𑁂𑀲𑀁 𑀧𑀸𑀧𑀼𑀡𑀦𑁆𑀢𑀺 𑀮𑀸𑀫𑀓𑀸𑀦𑀺 𑀘 𑀪𑀢𑁆𑀢𑀸𑀦𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀸𑀚𑀕𑀳𑁂 𑀫𑀦𑀼𑀲𑁆𑀲𑀸 𑀇𑀘𑁆𑀙𑀦𑁆𑀢𑀺 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀪𑀺𑀲𑀗𑁆𑀔𑀸𑀭𑀺𑀓𑀁 𑀧𑀺𑀡𑁆𑀟𑀧𑀸𑀢𑀁 𑀤𑀸𑀢𑀼𑀁 𑁋 𑀲𑀧𑁆𑀧𑀺𑀫𑁆𑀧𑀺, 𑀢𑁂𑀮𑀫𑁆𑀧𑀺, 𑀉𑀢𑁆𑀢𑀭𑀺𑀪𑀗𑁆𑀕𑀫𑁆𑀧𑀺. 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀸𑀦𑀁 𑀧𑀦 𑀪𑀺𑀓𑁆𑀔𑀽𑀦𑀁 𑀧𑀸𑀓𑀢𑀺𑀓𑀁 𑀤𑁂𑀦𑁆𑀢𑀺 𑁋 𑀬𑀣𑀸𑀭𑀦𑁆𑀥𑀁 [𑀬𑀣𑀸𑀭𑀤𑁆𑀥𑀁 (𑀲𑁆𑀬𑀸.)] 𑀓𑀡𑀸𑀚𑀓𑀁 𑀩𑀺𑀮𑀗𑁆𑀕𑀤𑀼𑀢𑀺𑀬𑀁. 𑀢𑁂 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑁆𑀧𑀝𑀺𑀓𑁆𑀓𑀦𑁆𑀢𑀸 𑀣𑁂𑀭𑁂 𑀪𑀺𑀓𑁆𑀔𑀽 𑀧𑀼𑀘𑁆𑀙𑀦𑁆𑀢𑀺 𑁋 ‘‘𑀢𑀼𑀫𑁆𑀳𑀸𑀓𑀁, 𑀆𑀯𑀼𑀲𑁄, 𑀪𑀢𑁆𑀢𑀕𑁆𑀕𑁂 𑀓𑀺𑀁 𑀅𑀳𑁄𑀲𑀺, 𑀢𑀼𑀫𑁆𑀳𑀸𑀓𑀁 𑀓𑀺𑀁 𑀅𑀳𑁄𑀲𑀻’’𑀢𑀺 [𑀓𑀺𑀁 𑀦𑀸𑀳𑁄𑀲𑀺 (𑀲𑁆𑀬𑀸. 𑀓𑀁.)]? 𑀏𑀓𑀘𑁆𑀘𑁂 𑀣𑁂𑀭𑀸 𑀏𑀯𑀁 𑀯𑀤𑀦𑁆𑀢𑀺 𑁋 ‘‘𑀅𑀫𑁆𑀳𑀸𑀓𑀁, 𑀆𑀯𑀼𑀲𑁄, 𑀲𑀧𑁆𑀧𑀺 𑀅𑀳𑁄𑀲𑀺, 𑀢𑁂𑀮𑀁 𑀅𑀳𑁄𑀲𑀺, 𑀉𑀢𑁆𑀢𑀭𑀺𑀪𑀗𑁆𑀕𑀁 𑀅𑀳𑁄𑀲𑀻’’𑀢𑀺. 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀸 𑀧𑀦 𑀪𑀺𑀓𑁆𑀔𑀽 𑀏𑀯𑀁 𑀯𑀤𑀦𑁆𑀢𑀺 𑁋 ‘‘𑀅𑀫𑁆𑀳𑀸𑀓𑀁, 𑀆𑀯𑀼𑀲𑁄, 𑀦 𑀓𑀺𑀜𑁆𑀘𑀺 𑀅𑀳𑁄𑀲𑀺 𑁋 𑀧𑀸𑀓𑀢𑀺𑀓𑀁 𑀬𑀣𑀸𑀭𑀦𑁆𑀥𑀁 𑀓𑀡𑀸𑀚𑀓𑀁 𑀩𑀺𑀮𑀗𑁆𑀕𑀤𑀼𑀢𑀺𑀬’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀓𑀮𑁆𑀬𑀸𑀡𑀪𑀢𑁆𑀢𑀺𑀓𑁄 𑀕𑀳𑀧𑀢𑀺 𑀲𑀗𑁆𑀖𑀲𑁆𑀲 𑀘𑀢𑀼𑀓𑁆𑀓𑀪𑀢𑁆𑀢𑀁 𑀤𑁂𑀢𑀺 𑀦𑀺𑀘𑁆𑀘𑀪𑀢𑁆𑀢𑀁. 𑀲𑁄 𑀪𑀢𑁆𑀢𑀕𑁆𑀕𑁂 𑀲𑀧𑀼𑀢𑁆𑀢𑀤𑀸𑀭𑁄 𑀉𑀧𑀢𑀺𑀝𑁆𑀞𑀺𑀢𑁆𑀯𑀸 𑀧𑀭𑀺𑀯𑀺𑀲𑀢𑀺 𑁋 𑀅𑀜𑁆𑀜𑁂 𑀑𑀤𑀦𑁂𑀦 𑀧𑀼𑀘𑁆𑀙𑀦𑁆𑀢𑀺, 𑀅𑀜𑁆𑀜𑁂 𑀲𑀽𑀧𑁂𑀦 𑀧𑀼𑀘𑁆𑀙𑀦𑁆𑀢𑀺, 𑀅𑀜𑁆𑀜𑁂 𑀢𑁂𑀮𑁂𑀦 𑀧𑀼𑀘𑁆𑀙𑀦𑁆𑀢𑀺, 𑀅𑀜𑁆𑀜𑁂 𑀉𑀢𑁆𑀢𑀭𑀺𑀪𑀗𑁆𑀕𑁂𑀦 𑀧𑀼𑀘𑁆𑀙𑀦𑁆𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀓𑀮𑁆𑀬𑀸𑀡𑀪𑀢𑁆𑀢𑀺𑀓𑀲𑁆𑀲 𑀕𑀳𑀧𑀢𑀺𑀦𑁄 𑀪𑀢𑁆𑀢𑀁 𑀲𑁆𑀯𑀸𑀢𑀦𑀸𑀬 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀉𑀤𑁆𑀤𑀺𑀝𑁆𑀞𑀁 𑀳𑁄𑀢𑀺. 𑀅𑀣 𑀔𑁄 𑀓𑀮𑁆𑀬𑀸𑀡𑀪𑀢𑁆𑀢𑀺𑀓𑁄 𑀕𑀳𑀧𑀢𑀺 𑀆𑀭𑀸𑀫𑀁 𑀅𑀕𑀫𑀸𑀲𑀺 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦. 𑀲𑁄 𑀬𑁂𑀦𑀸𑀬𑀲𑁆𑀫𑀸 𑀤𑀩𑁆𑀩𑁄 𑀫𑀮𑁆𑀮𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀤𑀩𑁆𑀩𑀁 𑀫𑀮𑁆𑀮𑀧𑀼𑀢𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀓𑀮𑁆𑀬𑀸𑀡𑀪𑀢𑁆𑀢𑀺𑀓𑀁 𑀕𑀳𑀧𑀢𑀺𑀁 𑀆𑀬𑀲𑁆𑀫𑀸 𑀤𑀩𑁆𑀩𑁄 𑀫𑀮𑁆𑀮𑀧𑀼𑀢𑁆𑀢𑁄 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺 𑀲𑀫𑀸𑀤𑀧𑁂𑀲𑀺 𑀲𑀫𑀼𑀢𑁆𑀢𑁂𑀚𑁂𑀲𑀺 𑀲𑀫𑁆𑀧𑀳𑀁𑀲𑁂𑀲𑀺. 𑀅𑀣 𑀔𑁄 𑀓𑀮𑁆𑀬𑀸𑀡𑀪𑀢𑁆𑀢𑀺𑀓𑁄 𑀕𑀳𑀧𑀢𑀺 𑀆𑀬𑀲𑁆𑀫𑀢𑀸 𑀤𑀩𑁆𑀩𑁂𑀦 𑀫𑀮𑁆𑀮𑀧𑀼𑀢𑁆𑀢𑁂𑀦 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑀺𑀢𑁄 𑀲𑀫𑀸𑀤𑀧𑀺𑀢𑁄 𑀲𑀫𑀼𑀢𑁆𑀢𑁂𑀚𑀺𑀢𑁄 𑀲𑀫𑁆𑀧𑀳𑀁𑀲𑀺𑀢𑁄 𑀆𑀬𑀲𑁆𑀫𑀦𑁆𑀢𑀁 𑀤𑀩𑁆𑀩𑀁 𑀫𑀮𑁆𑀮𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀲𑁆𑀲, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀖𑀭𑁂 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢𑀁 𑀉𑀤𑁆𑀤𑀺𑀝𑁆𑀞’’𑀦𑁆𑀢𑀺? ‘‘𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀸𑀦𑀁 𑀔𑁄, 𑀕𑀳𑀧𑀢𑀺, 𑀪𑀺𑀓𑁆𑀔𑀽𑀦𑀁 𑀢𑀼𑀫𑁆𑀳𑀸𑀓𑀁 𑀖𑀭𑁂 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢𑀁 𑀉𑀤𑁆𑀤𑀺𑀝𑁆𑀞’’𑀦𑁆𑀢𑀺. 𑀅𑀣 𑀔𑁄 𑀓𑀮𑁆𑀬𑀸𑀡𑀪𑀢𑁆𑀢𑀺𑀓𑁄 𑀕𑀳𑀧𑀢𑀺 𑀅𑀦𑀢𑁆𑀢𑀫𑀦𑁄 𑀅𑀳𑁄𑀲𑀺. 𑀓𑀣𑀜𑁆𑀳𑀺 𑀦𑀸𑀫 𑀧𑀸𑀧𑀪𑀺𑀓𑁆𑀔𑀽 𑀅𑀫𑁆𑀳𑀸𑀓𑀁 𑀖𑀭𑁂 𑀪𑀼𑀜𑁆𑀚𑀺𑀲𑁆𑀲𑀦𑁆𑀢𑀻𑀢𑀺 𑀖𑀭𑀁 𑀕𑀦𑁆𑀢𑁆𑀯𑀸 𑀤𑀸𑀲𑀺𑀁 𑀆𑀡𑀸𑀧𑁂𑀲𑀺 𑁋 ‘‘𑀬𑁂, 𑀚𑁂, 𑀲𑁆𑀯𑁂 𑀪𑀢𑁆𑀢𑀺𑀓𑀸 𑀆𑀕𑀘𑁆𑀙𑀦𑁆𑀢𑀺 𑀢𑁂 𑀓𑁄𑀝𑁆𑀞𑀓𑁂 𑀆𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀓𑀡𑀸𑀚𑀓𑁂𑀦 𑀩𑀺𑀮𑀗𑁆𑀕𑀤𑀼𑀢𑀺𑀬𑁂𑀦 𑀧𑀭𑀺𑀯𑀺𑀲𑀸’’𑀢𑀺. ‘‘𑀏𑀯𑀁 𑀅𑀬𑁆𑀬𑀸’’𑀢𑀺 𑀔𑁄 𑀲𑀸 𑀤𑀸𑀲𑀻 𑀓𑀮𑁆𑀬𑀸𑀡𑀪𑀢𑁆𑀢𑀺𑀓𑀲𑁆𑀲 𑀕𑀳𑀧𑀢𑀺𑀦𑁄 𑀧𑀘𑁆𑀘𑀲𑁆𑀲𑁄𑀲𑀺.

𑀅𑀣 𑀔𑁄 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀸 𑀪𑀺𑀓𑁆𑀔𑀽 𑁋 𑀳𑀺𑀬𑁆𑀬𑁄 𑀔𑁄, 𑀆𑀯𑀼𑀲𑁄, 𑀅𑀫𑁆𑀳𑀸𑀓𑀁 𑀓𑀮𑁆𑀬𑀸𑀡𑀪𑀢𑁆𑀢𑀺𑀓𑀲𑁆𑀲 𑀕𑀳𑀧𑀢𑀺𑀦𑁄 𑀪𑀢𑁆𑀢𑀁 𑀉𑀤𑁆𑀤𑀺𑀝𑁆𑀞𑀁; 𑀲𑁆𑀯𑁂 𑀅𑀫𑁆𑀳𑁂 𑀓𑀮𑁆𑀬𑀸𑀡𑀪𑀢𑁆𑀢𑀺𑀓𑁄 𑀕𑀳𑀧𑀢𑀺 𑀲𑀧𑀼𑀢𑁆𑀢𑀤𑀸𑀭𑁄 𑀉𑀧𑀢𑀺𑀝𑁆𑀞𑀺𑀢𑁆𑀯𑀸 𑀧𑀭𑀺𑀯𑀺𑀲𑀺𑀲𑁆𑀲𑀢𑀺; 𑀅𑀜𑁆𑀜𑁂 𑀑𑀤𑀦𑁂𑀦 𑀧𑀼𑀘𑁆𑀙𑀺𑀲𑁆𑀲𑀦𑁆𑀢𑀺, 𑀅𑀜𑁆𑀜𑁂 𑀲𑀽𑀧𑁂𑀦 𑀧𑀼𑀘𑁆𑀙𑀺𑀲𑁆𑀲𑀦𑁆𑀢𑀺, 𑀅𑀜𑁆𑀜𑁂 𑀢𑁂𑀮𑁂𑀦 𑀧𑀼𑀘𑁆𑀙𑀺𑀲𑁆𑀲𑀦𑁆𑀢𑀺, 𑀅𑀜𑁆𑀜𑁂 𑀉𑀢𑁆𑀢𑀭𑀺𑀪𑀗𑁆𑀕𑁂𑀦 𑀧𑀼𑀘𑁆𑀙𑀺𑀲𑁆𑀲𑀦𑁆𑀢𑀻𑀢𑀺. 𑀢𑁂 𑀢𑁂𑀦𑁂𑀯 𑀲𑁄𑀫𑀦𑀲𑁆𑀲𑁂𑀦 𑀦 𑀘𑀺𑀢𑁆𑀢𑀭𑀽𑀧𑀁 𑀭𑀢𑁆𑀢𑀺𑀬𑀸 𑀲𑀼𑀧𑀺𑀁𑀲𑀼. 𑀅𑀣 𑀔𑁄 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀸 𑀪𑀺𑀓𑁆𑀔𑀽 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀓𑀮𑁆𑀬𑀸𑀡𑀪𑀢𑁆𑀢𑀺𑀓𑀲𑁆𑀲 𑀕𑀳𑀧𑀢𑀺𑀦𑁄 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼. 𑀅𑀤𑁆𑀤𑀲𑀸 𑀔𑁄 𑀲𑀸 𑀤𑀸𑀲𑀻 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑁂 𑀪𑀺𑀓𑁆𑀔𑀽 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑁂; 𑀤𑀺𑀲𑁆𑀯𑀸𑀦 𑀓𑁄𑀝𑁆𑀞𑀓𑁂 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀦𑀺𑀲𑀻𑀤𑀣, 𑀪𑀦𑁆𑀢𑁂’’𑀢𑀺. 𑀅𑀣 𑀔𑁄 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀦𑀺𑀲𑁆𑀲𑀁𑀲𑀬𑀁 𑀔𑁄 𑀦 𑀢𑀸𑀯 𑀪𑀢𑁆𑀢𑀁 𑀲𑀺𑀤𑁆𑀥𑀁 𑀪𑀯𑀺𑀲𑁆𑀲𑀢𑀺 𑀬𑀣𑀸 𑀫𑀬𑀁 𑀓𑁄𑀝𑁆𑀞𑀓𑁂 𑀦𑀺𑀲𑀻𑀤𑀸𑀧𑀺𑀬𑀸𑀫𑀸’’𑀢𑀺 [𑀦𑀺𑀲𑀻𑀤𑀸𑀧𑁂𑀬𑁆𑀬𑀸𑀫𑀸𑀢𑀺 (𑀓.)]. 𑀅𑀣 𑀔𑁄 𑀲𑀸 𑀤𑀸𑀲𑀻 𑀓𑀡𑀸𑀚𑀓𑁂𑀦 [𑀓𑀸𑀡𑀸𑀚𑀓𑁂𑀦 (𑀲𑁆𑀬𑀸. 𑀓𑀁.)] 𑀩𑀺𑀮𑀗𑁆𑀕𑀤𑀼𑀢𑀺𑀬𑁂𑀦 𑀉𑀧𑀕𑀜𑁆𑀙𑀺 𑁋 𑀪𑀼𑀜𑁆𑀚𑀣, 𑀪𑀦𑁆𑀢𑁂𑀢𑀺. ‘‘𑀫𑀬𑀁 𑀔𑁄, 𑀪𑀕𑀺𑀦𑀺, 𑀦𑀺𑀘𑁆𑀘𑀪𑀢𑁆𑀢𑀺𑀓𑀸’’𑀢𑀺. ‘‘𑀚𑀸𑀦𑀸𑀫𑀺 𑀅𑀬𑁆𑀬𑀸 𑀦𑀺𑀘𑁆𑀘𑀪𑀢𑁆𑀢𑀺𑀓𑀸𑀢𑀺. 𑀅𑀧𑀺 𑀘𑀸𑀳𑀁 𑀳𑀺𑀬𑁆𑀬𑁄𑀯 𑀕𑀳𑀧𑀢𑀺𑀦𑀸 𑀆𑀡𑀢𑁆𑀢𑀸 𑁋 ‘𑀬𑁂, 𑀚𑁂, 𑀲𑁆𑀯𑁂 𑀪𑀢𑁆𑀢𑀺𑀓𑀸 𑀆𑀕𑀘𑁆𑀙𑀦𑁆𑀢𑀺, 𑀢𑁂 𑀓𑁄𑀝𑁆𑀞𑀓𑁂 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀓𑀡𑀸𑀚𑀓𑁂𑀦 𑀩𑀺𑀮𑀗𑁆𑀕𑀤𑀼𑀢𑀺𑀬𑁂𑀦 𑀧𑀭𑀺𑀯𑀺𑀲𑀸’𑀢𑀺. 𑀪𑀼𑀜𑁆𑀚𑀣, 𑀪𑀦𑁆𑀢𑁂’’𑀢𑀺. 𑀅𑀣 𑀔𑁄 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀸 𑀪𑀺𑀓𑁆𑀔𑀽 𑁋 𑀳𑀺𑀬𑁆𑀬𑁄 𑀔𑁄, 𑀆𑀯𑀼𑀲𑁄, 𑀓𑀮𑁆𑀬𑀸𑀡𑀪𑀢𑁆𑀢𑀺𑀓𑁄 𑀕𑀳𑀧𑀢𑀺 𑀆𑀭𑀸𑀫𑀁 𑀅𑀕𑀫𑀸𑀲𑀺 𑀤𑀩𑁆𑀩𑀲𑁆𑀲 𑀫𑀮𑁆𑀮𑀧𑀼𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑁂. 𑀦𑀺𑀲𑁆𑀲𑀁𑀲𑀬𑀁 𑀔𑁄 𑀫𑀬𑀁 𑀤𑀩𑁆𑀩𑁂𑀦 𑀫𑀮𑁆𑀮𑀧𑀼𑀢𑁆𑀢𑁂𑀦 𑀕𑀳𑀧𑀢𑀺𑀦𑁄 𑀅𑀦𑁆𑀢𑀭𑁂 𑀧𑀭𑀺𑀪𑀺𑀦𑁆𑀦𑀸𑀢𑀺 [𑀲𑀦𑁆𑀢𑀺𑀓𑁂 𑀧𑀭𑀺𑀪𑀺𑀦𑁆𑀦𑀸𑀢𑀺 (𑀲𑁆𑀬𑀸. 𑀓𑀁.)]. 𑀢𑁂 𑀢𑁂𑀦𑁂𑀯 𑀤𑁄𑀫𑀦𑀲𑁆𑀲𑁂𑀦 𑀦 𑀘𑀺𑀢𑁆𑀢𑀭𑀽𑀧𑀁 𑀪𑀼𑀜𑁆𑀚𑀺𑀁𑀲𑀼. 𑀅𑀣 𑀔𑁄 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀸 𑀪𑀺𑀓𑁆𑀔𑀽 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑁆𑀧𑀝𑀺𑀓𑁆𑀓𑀦𑁆𑀢𑀸 𑀆𑀭𑀸𑀫𑀁 𑀕𑀦𑁆𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀲𑀸𑀫𑁂𑀢𑁆𑀯𑀸 𑀩𑀳𑀸𑀭𑀸𑀫𑀓𑁄𑀝𑁆𑀞𑀓𑁂 𑀲𑀗𑁆𑀖𑀸𑀝𑀺𑀧𑀮𑁆𑀮𑀢𑁆𑀣𑀺𑀓𑀸𑀬 𑀦𑀺𑀲𑀻𑀤𑀺𑀁𑀲𑀼 𑀢𑀼𑀡𑁆𑀳𑀻𑀪𑀽𑀢𑀸 𑀫𑀗𑁆𑀓𑀼𑀪𑀽𑀢𑀸 𑀧𑀢𑁆𑀢𑀓𑁆𑀔𑀦𑁆𑀥𑀸 𑀅𑀥𑁄𑀫𑀼𑀔𑀸 𑀧𑀚𑁆𑀛𑀸𑀬𑀦𑁆𑀢𑀸 𑀅𑀧𑁆𑀧𑀝𑀺𑀪𑀸𑀦𑀸.

𑀅𑀣 𑀔𑁄 𑀫𑁂𑀢𑁆𑀢𑀺𑀬𑀸 𑀪𑀺𑀓𑁆𑀔𑀼𑀦𑀻 𑀬𑁂𑀦 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀸 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀯𑀦𑁆𑀤𑀸𑀫𑀺 𑀅𑀬𑁆𑀬𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀸 𑀪𑀺𑀓𑁆𑀔𑀽 𑀦𑀸𑀮𑀧𑀺𑀁𑀲𑀼. 𑀤𑀼𑀢𑀺𑀬𑀫𑁆𑀧𑀺 𑀔𑁄…𑀧𑁂… 𑀢𑀢𑀺𑀬𑀫𑁆𑀧𑀺 𑀔𑁄 𑀫𑁂𑀢𑁆𑀢𑀺𑀬𑀸 𑀪𑀺𑀓𑁆𑀔𑀼𑀦𑀻 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀯𑀦𑁆𑀤𑀸𑀫𑀺 𑀅𑀬𑁆𑀬𑀸’’𑀢𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀸 𑀪𑀺𑀓𑁆𑀔𑀽 𑀦𑀸𑀮𑀧𑀺𑀁𑀲𑀼. ‘‘𑀓𑁆𑀬𑀸𑀳𑀁 𑀅𑀬𑁆𑀬𑀸𑀦𑀁 𑀅𑀧𑀭𑀚𑁆𑀛𑀸𑀫𑀺? 𑀓𑀺𑀲𑁆𑀲 𑀫𑀁 𑀅𑀬𑁆𑀬𑀸 𑀦𑀸𑀮𑀧𑀦𑁆𑀢𑀻’’𑀢𑀺? ‘‘𑀢𑀣𑀸 𑀳𑀺 𑀧𑀦 𑀢𑁆𑀯𑀁, 𑀪𑀕𑀺𑀦𑀺, 𑀅𑀫𑁆𑀳𑁂 𑀤𑀩𑁆𑀩𑁂𑀦 𑀫𑀮𑁆𑀮𑀧𑀼𑀢𑁆𑀢𑁂𑀦 𑀯𑀺𑀳𑁂𑀞𑀺𑀬𑀫𑀸𑀦𑁂 𑀅𑀚𑁆𑀛𑀼𑀧𑁂𑀓𑁆𑀔𑀲𑀻’’𑀢𑀺? ‘‘𑀓𑁆𑀬𑀸𑀳𑀁, 𑀅𑀬𑁆𑀬𑀸, 𑀓𑀭𑁄𑀫𑀻’’𑀢𑀺? ‘‘𑀲𑀘𑁂 𑀔𑁄 𑀢𑁆𑀯𑀁, 𑀪𑀕𑀺𑀦𑀺, 𑀇𑀘𑁆𑀙𑁂𑀬𑁆𑀬𑀸𑀲𑀺, 𑀅𑀚𑁆𑀚𑁂𑀯 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀤𑀩𑁆𑀩𑀁 𑀫𑀮𑁆𑀮𑀧𑀼𑀢𑁆𑀢𑀁 𑀦𑀸𑀲𑀸𑀧𑁂𑀬𑁆𑀬𑀸’’𑀢𑀺. ‘‘𑀓𑁆𑀬𑀸𑀳𑀁, 𑀅𑀬𑁆𑀬𑀸, 𑀓𑀭𑁄𑀫𑀺? 𑀓𑀺𑀁 𑀫𑀬𑀸 𑀲𑀓𑁆𑀓𑀸 𑀓𑀸𑀢𑀼’’𑀦𑁆𑀢𑀺? ‘‘𑀏𑀳𑀺 𑀢𑁆𑀯𑀁, 𑀪𑀕𑀺𑀦𑀺, 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀯𑀁 𑀯𑀤𑁂𑀳𑀺 𑁋 ‘𑀇𑀤𑀁, 𑀪𑀦𑁆𑀢𑁂, 𑀦𑀘𑁆𑀙𑀦𑁆𑀦𑀁 𑀦𑀧𑁆𑀧𑀢𑀺𑀭𑀽𑀧𑀁, 𑀬𑀸𑀬𑀁, 𑀪𑀦𑁆𑀢𑁂, 𑀤𑀺𑀲𑀸 𑀅𑀪𑀬𑀸 𑀅𑀦𑀻𑀢𑀺𑀓𑀸 𑀅𑀦𑀼𑀧𑀤𑁆𑀤𑀯𑀸 𑀲𑀸𑀬𑀁 𑀤𑀺𑀲𑀸 𑀲𑀪𑀬𑀸 𑀲𑀈𑀢𑀺𑀓𑀸 𑀲𑀉𑀧𑀤𑁆𑀤𑀯𑀸; 𑀬𑀢𑁄 𑀦𑀺𑀯𑀸𑀢𑀁 𑀢𑀢𑁄 𑀲𑀯𑀸𑀢𑀁 [𑀢𑀢𑁄 𑀧𑀯𑀸𑀢𑀁 (𑀲𑀻. 𑀲𑁆𑀬𑀸. 𑀓𑀁.)]; 𑀉𑀤𑀓𑀁 𑀫𑀜𑁆𑀜𑁂 𑀆𑀤𑀺𑀢𑁆𑀢𑀁; 𑀅𑀬𑁆𑀬𑁂𑀦𑀫𑁆𑀳𑀺 𑀤𑀩𑁆𑀩𑁂𑀦 𑀫𑀮𑁆𑀮𑀧𑀼𑀢𑁆𑀢𑁂𑀦 𑀤𑀽𑀲𑀺𑀢𑀸’’’𑀢𑀺. ‘‘𑀏𑀯𑀁 𑀅𑀬𑁆𑀬𑀸’’𑀢𑀺 𑀔𑁄 𑀫𑁂𑀢𑁆𑀢𑀺𑀬𑀸 𑀪𑀺𑀓𑁆𑀔𑀼𑀦𑀻 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀝𑀺𑀲𑁆𑀲𑀼𑀢𑁆𑀯𑀸 [𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 (𑀲𑁆𑀬𑀸. 𑀓𑀁.)] 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀫𑁂𑀢𑁆𑀢𑀺𑀬𑀸 [𑀲𑀸 𑀫𑁂𑀢𑁆𑀢𑀺𑀬𑀸 (𑀲𑁆𑀬𑀸. 𑀓.)] 𑀪𑀺𑀓𑁆𑀔𑀼𑀦𑀻 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀤𑀁, 𑀪𑀦𑁆𑀢𑁂, 𑀦𑀘𑁆𑀙𑀦𑁆𑀦𑀁 𑀦𑀧𑁆𑀧𑀢𑀺𑀭𑀽𑀧𑀁, 𑀬𑀸𑀬𑀁, 𑀪𑀦𑁆𑀢𑁂, 𑀤𑀺𑀲𑀸 𑀅𑀪𑀬𑀸 𑀅𑀦𑀻𑀢𑀺𑀓𑀸 𑀅𑀦𑀼𑀧𑀤𑁆𑀤𑀯𑀸 𑀲𑀸𑀬𑀁 𑀤𑀺𑀲𑀸 𑀲𑀪𑀬𑀸 𑀲𑀈𑀢𑀺𑀓𑀸 𑀲𑀉𑀧𑀤𑁆𑀤𑀯𑀸; 𑀬𑀢𑁄 𑀦𑀺𑀯𑀸𑀢𑀁 𑀢𑀢𑁄 𑀲𑀯𑀸𑀢𑀁; 𑀉𑀤𑀓𑀁 𑀫𑀜𑁆𑀜𑁂 𑀆𑀤𑀺𑀢𑁆𑀢𑀁; 𑀅𑀬𑁆𑀬𑁂𑀦𑀫𑁆𑀳𑀺 𑀤𑀩𑁆𑀩𑁂𑀦 𑀫𑀮𑁆𑀮𑀧𑀼𑀢𑁆𑀢𑁂𑀦 𑀤𑀽𑀲𑀺𑀢𑀸’’𑀢𑀺.

𑁧𑁯𑁩. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀤𑀩𑁆𑀩𑀁 𑀫𑀮𑁆𑀮𑀧𑀼𑀢𑁆𑀢𑀁 𑀧𑀝𑀺𑀧𑀼𑀘𑁆𑀙𑀺 𑁋 ‘‘𑀲𑀭𑀲𑀺 𑀢𑁆𑀯𑀁, 𑀤𑀩𑁆𑀩, 𑀏𑀯𑀭𑀽𑀧𑀁 𑀓𑀢𑁆𑀢𑀸 𑀬𑀣𑀸𑀬𑀁 𑀪𑀺𑀓𑁆𑀔𑀼𑀦𑀻 𑀆𑀳𑀸’’𑀢𑀺? ‘‘𑀬𑀣𑀸 𑀫𑀁, 𑀪𑀦𑁆𑀢𑁂, 𑀪𑀕𑀯𑀸 𑀚𑀸𑀦𑀸𑀢𑀻’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀤𑀩𑁆𑀩𑀁 𑀫𑀮𑁆𑀮𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀭𑀲𑀺 𑀢𑁆𑀯𑀁, 𑀤𑀩𑁆𑀩, 𑀏𑀯𑀭𑀽𑀧𑀁 𑀓𑀢𑁆𑀢𑀸 𑀬𑀣𑀸𑀬𑀁 𑀪𑀺𑀓𑁆𑀔𑀼𑀦𑀻 𑀆𑀳𑀸’’𑀢𑀺? ‘‘𑀬𑀣𑀸 𑀫𑀁, 𑀪𑀦𑁆𑀢𑁂, 𑀪𑀕𑀯𑀸 𑀚𑀸𑀦𑀸𑀢𑀻’’𑀢𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀤𑀩𑁆𑀩𑀁 𑀫𑀮𑁆𑀮𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀭𑀲𑀺 𑀢𑁆𑀯𑀁, 𑀤𑀩𑁆𑀩, 𑀏𑀯𑀭𑀽𑀧𑀁 𑀓𑀢𑁆𑀢𑀸 𑀬𑀣𑀸𑀬𑀁 𑀪𑀺𑀓𑁆𑀔𑀼𑀦𑀻 𑀆𑀳𑀸’’𑀢𑀺? ‘‘𑀬𑀣𑀸 𑀫𑀁, 𑀪𑀦𑁆𑀢𑁂, 𑀪𑀕𑀯𑀸 𑀚𑀸𑀦𑀸𑀢𑀻’’𑀢𑀺. ‘‘𑀦 𑀔𑁄, 𑀤𑀩𑁆𑀩, 𑀤𑀩𑁆𑀩𑀸 𑀏𑀯𑀁 𑀦𑀺𑀩𑁆𑀩𑁂𑀞𑁂𑀦𑁆𑀢𑀺. 𑀲𑀘𑁂 𑀢𑀬𑀸 𑀓𑀢𑀁 𑀓𑀢𑀦𑁆𑀢𑀺 𑀯𑀤𑁂𑀳𑀺. 𑀲𑀘𑁂 𑀅𑀓𑀢𑀁 𑀅𑀓𑀢𑀦𑁆𑀢𑀺 𑀯𑀤𑁂𑀳𑀻’’𑀢𑀺. ‘‘𑀬𑀢𑁄𑀳𑀁, 𑀪𑀦𑁆𑀢𑁂, 𑀚𑀸𑀢𑁄 𑀦𑀸𑀪𑀺𑀚𑀸𑀦𑀸𑀫𑀺 𑀲𑀼𑀧𑀺𑀦𑀦𑁆𑀢𑁂𑀦𑀧𑀺 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀢𑀸, 𑀧𑀕𑁂𑀯 𑀚𑀸𑀕𑀭𑁄’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀫𑁂𑀢𑁆𑀢𑀺𑀬𑀁 𑀪𑀺𑀓𑁆𑀔𑀼𑀦𑀺𑀁 𑀦𑀸𑀲𑁂𑀣. 𑀇𑀫𑁂 𑀘 𑀪𑀺𑀓𑁆𑀔𑀽 𑀅𑀦𑀼𑀬𑀼𑀜𑁆𑀚𑀣𑀸’’𑀢𑀺. 𑀇𑀤𑀁 𑀯𑀢𑁆𑀯𑀸 𑀪𑀕𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀸𑀯𑀺𑀲𑀺.

𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀫𑁂𑀢𑁆𑀢𑀺𑀬𑀁 𑀪𑀺𑀓𑁆𑀔𑀼𑀦𑀺𑀁 𑀦𑀸𑀲𑁂𑀲𑀼𑀁. 𑀅𑀣 𑀔𑁄 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀸 𑀪𑀺𑀓𑁆𑀔𑀽 𑀢𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘𑀼𑀁 𑁋 ‘‘𑀫𑀸𑀯𑀼𑀲𑁄, 𑀫𑁂𑀢𑁆𑀢𑀺𑀬𑀁 𑀪𑀺𑀓𑁆𑀔𑀼𑀦𑀺𑀁 𑀦𑀸𑀲𑁂𑀣, 𑀦 𑀲𑀸 𑀓𑀺𑀜𑁆𑀘𑀺 𑀅𑀧𑀭𑀚𑁆𑀛𑀢𑀺; 𑀅𑀫𑁆𑀳𑁂𑀳𑀺 𑀲𑀸 𑀉𑀲𑁆𑀲𑀸𑀳𑀺𑀢𑀸 𑀓𑀼𑀧𑀺𑀢𑁂𑀳𑀺 𑀅𑀦𑀢𑁆𑀢𑀫𑀦𑁂𑀳𑀺 𑀘𑀸𑀯𑀦𑀸𑀥𑀺𑀧𑁆𑀧𑀸𑀬𑁂𑀳𑀻’’𑀢𑀺. ‘‘𑀓𑀺𑀁 𑀧𑀦 𑀢𑀼𑀫𑁆𑀳𑁂, 𑀆𑀯𑀼𑀲𑁄, 𑀆𑀬𑀲𑁆𑀫𑀦𑁆𑀢𑀁 𑀤𑀩𑁆𑀩𑀁 𑀫𑀮𑁆𑀮𑀧𑀼𑀢𑁆𑀢𑀁 𑀅𑀫𑀽𑀮𑀺𑀓𑀸𑀬 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀣𑀸’’𑀢𑀺? ‘‘𑀏𑀯𑀫𑀸𑀯𑀼𑀲𑁄’’𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀸 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀤𑀩𑁆𑀩𑀁 𑀫𑀮𑁆𑀮𑀧𑀼𑀢𑁆𑀢𑀁 𑀅𑀫𑀽𑀮𑀺𑀓𑀸𑀬 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀲𑁆𑀲𑀦𑁆𑀢𑀻’’𑀢𑀺! 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁 …𑀧𑁂… ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀸 𑀪𑀺𑀓𑁆𑀔𑀽 𑀤𑀩𑁆𑀩𑀁 𑀫𑀮𑁆𑀮𑀧𑀼𑀢𑁆𑀢𑀁 𑀅𑀫𑀽𑀮𑀺𑀓𑀸𑀬 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀦𑁆𑀢𑀻’’𑀢𑀺? ‘‘𑀲𑀘𑁆𑀘𑀁 𑀪𑀕𑀯𑀸’’𑀢𑀺…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋

‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀤𑀩𑁆𑀩𑀲𑁆𑀲 𑀫𑀮𑁆𑀮𑀧𑀼𑀢𑁆𑀢𑀲𑁆𑀲 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀲𑁆𑀲 𑀲𑀢𑀺𑀯𑀺𑀦𑀬𑀁 𑀤𑁂𑀢𑀼. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀤𑀸𑀢𑀩𑁆𑀩𑁄 𑁋 ‘‘𑀢𑁂𑀦, 𑀪𑀺𑀓𑁆𑀔𑀯𑁂, 𑀤𑀩𑁆𑀩𑁂𑀦 𑀫𑀮𑁆𑀮𑀧𑀼𑀢𑁆𑀢𑁂𑀦 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸, 𑀯𑀼𑀟𑁆𑀠𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸, 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸, 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸, 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀇𑀫𑁂 𑀫𑀁, 𑀪𑀦𑁆𑀢𑁂, 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀸 𑀪𑀺𑀓𑁆𑀔𑀽 𑀅𑀫𑀽𑀮𑀺𑀓𑀸𑀬 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀦𑁆𑀢𑀺. 𑀲𑁄𑀳𑀁, 𑀪𑀦𑁆𑀢𑁂, 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑁄 𑀲𑀗𑁆𑀖𑀁 𑀲𑀢𑀺𑀯𑀺𑀦𑀬𑀁 𑀬𑀸𑀘𑀸𑀫𑀻’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑁄. 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑁄 𑁋 ‘𑀇𑀫𑁂 𑀫𑀁, 𑀪𑀦𑁆𑀢𑁂 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀸 𑀪𑀺𑀓𑁆𑀔𑀽 𑀅𑀫𑀽𑀮𑀺𑀓𑀸𑀬 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀦𑁆𑀢𑀺. 𑀲𑁄𑀳𑀁 [𑀲𑁄𑀳𑀁 𑀪𑀦𑁆𑀢𑁂 (𑀓.)] 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑁄 𑀢𑀢𑀺𑀬𑀫𑁆𑀧𑀺, 𑀪𑀦𑁆𑀢𑁂, 𑀲𑀗𑁆𑀖𑀁 𑀲𑀢𑀺𑀯𑀺𑀦𑀬𑀁 𑀬𑀸𑀘𑀸𑀫𑀻’𑀢𑀺. ‘‘𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁧𑁯𑁪. 𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀫𑁂 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀸 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀤𑀩𑁆𑀩𑀁 𑀫𑀮𑁆𑀮𑀧𑀼𑀢𑁆𑀢𑀁 𑀅𑀫𑀽𑀮𑀺𑀓𑀸𑀬 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀦𑁆𑀢𑀺. 𑀆𑀬𑀲𑁆𑀫𑀸 𑀤𑀩𑁆𑀩𑁄 𑀫𑀮𑁆𑀮𑀧𑀼𑀢𑁆𑀢𑁄 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑁄 𑀲𑀗𑁆𑀖𑀁 𑀲𑀢𑀺𑀯𑀺𑀦𑀬𑀁 𑀬𑀸𑀘𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀆𑀬𑀲𑁆𑀫𑀢𑁄 𑀤𑀩𑁆𑀩𑀲𑁆𑀲 𑀫𑀮𑁆𑀮𑀧𑀼𑀢𑁆𑀢𑀲𑁆𑀲 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀲𑁆𑀲 𑀲𑀢𑀺𑀯𑀺𑀦𑀬𑀁 𑀤𑀤𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀫𑁂 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀸 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀤𑀩𑁆𑀩𑀁 𑀫𑀮𑁆𑀮𑀧𑀼𑀢𑁆𑀢𑀁 𑀅𑀫𑀽𑀮𑀺𑀓𑀸𑀬 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀦𑁆𑀢𑀺. 𑀆𑀬𑀲𑁆𑀫𑀸 𑀤𑀩𑁆𑀩𑁄 𑀫𑀮𑁆𑀮𑀧𑀼𑀢𑁆𑀢𑁄 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑁄 𑀲𑀗𑁆𑀖𑀁 𑀲𑀢𑀺𑀯𑀺𑀦𑀬𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀆𑀬𑀲𑁆𑀫𑀢𑁄 𑀤𑀩𑁆𑀩𑀲𑁆𑀲 𑀫𑀮𑁆𑀮𑀧𑀼𑀢𑁆𑀢𑀲𑁆𑀲 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀲𑁆𑀲 𑀲𑀢𑀺𑀯𑀺𑀦𑀬𑀁 𑀤𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀆𑀬𑀲𑁆𑀫𑀢𑁄 𑀤𑀩𑁆𑀩𑀲𑁆𑀲 𑀫𑀮𑁆𑀮𑀧𑀼𑀢𑁆𑀢𑀲𑁆𑀲 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀲𑁆𑀲 𑀲𑀢𑀺𑀯𑀺𑀦𑀬𑀲𑁆𑀲 𑀤𑀸𑀦𑀁, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺 𑁋 𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀫𑁂 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀸 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀤𑀩𑁆𑀩𑀁 𑀫𑀮𑁆𑀮𑀧𑀼𑀢𑁆𑀢𑀁 𑀅𑀫𑀽𑀮𑀺𑀓𑀸𑀬 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀦𑁆𑀢𑀺. 𑀆𑀬𑀲𑁆𑀫𑀸 𑀤𑀩𑁆𑀩𑁄 𑀫𑀮𑁆𑀮𑀧𑀼𑀢𑁆𑀢𑁄 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑁄 𑀲𑀗𑁆𑀖𑀁 𑀲𑀢𑀺𑀯𑀺𑀦𑀬𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀆𑀬𑀲𑁆𑀫𑀢𑁄 𑀤𑀩𑁆𑀩𑀲𑁆𑀲 𑀫𑀮𑁆𑀮𑀧𑀼𑀢𑁆𑀢𑀲𑁆𑀲 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀲𑁆𑀲 𑀲𑀢𑀺𑀯𑀺𑀦𑀬𑀁 𑀤𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀆𑀬𑀲𑁆𑀫𑀢𑁄 𑀤𑀩𑁆𑀩𑀲𑁆𑀲 𑀫𑀮𑁆𑀮𑀧𑀼𑀢𑁆𑀢𑀲𑁆𑀲 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀲𑁆𑀲 𑀲𑀢𑀺𑀯𑀺𑀦𑀬𑀲𑁆𑀲 𑀤𑀸𑀦𑀁, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀺𑀦𑁆𑀦𑁄 𑀲𑀗𑁆𑀖𑁂𑀦 𑀆𑀬𑀲𑁆𑀫𑀢𑁄 𑀤𑀩𑁆𑀩𑀲𑁆𑀲 𑀫𑀮𑁆𑀮𑀧𑀼𑀢𑁆𑀢𑀲𑁆𑀲 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀲𑁆𑀲 𑀲𑀢𑀺𑀯𑀺𑀦𑀬𑁄. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑁧𑁯𑁫. ‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀺𑀓𑀸𑀦𑀺 𑀲𑀢𑀺𑀯𑀺𑀦𑀬𑀲𑁆𑀲 𑀤𑀸𑀦𑀸𑀦𑀺. 𑀲𑀼𑀤𑁆𑀥𑁄 𑀳𑁄𑀢𑀺 𑀪𑀺𑀓𑁆𑀔𑀼 𑀅𑀦𑀸𑀧𑀢𑁆𑀢𑀺𑀓𑁄, 𑀅𑀦𑀼𑀯𑀤𑀦𑁆𑀢𑀺 𑀘 𑀦𑀁, 𑀬𑀸𑀘𑀢𑀺 𑀘, 𑀢𑀲𑁆𑀲 𑀲𑀗𑁆𑀖𑁄 𑀲𑀢𑀺𑀯𑀺𑀦𑀬𑀁 𑀤𑁂𑀢𑀺 𑀥𑀫𑁆𑀫𑁂𑀦 𑀲𑀫𑀕𑁆𑀕𑁂𑀦 𑁋 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀥𑀫𑁆𑀫𑀺𑀓𑀸𑀦𑀺 𑀲𑀢𑀺𑀯𑀺𑀦𑀬𑀲𑁆𑀲 𑀤𑀸𑀦𑀸𑀦𑀻’’𑀢𑀺.

𑁩. 𑀅𑀫𑀽𑀴𑁆𑀳𑀯𑀺𑀦𑀬𑁄

𑁧𑁯𑁬. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀕𑀕𑁆𑀕𑁄 𑀪𑀺𑀓𑁆𑀔𑀼 𑀉𑀫𑁆𑀫𑀢𑁆𑀢𑀓𑁄 𑀳𑁄𑀢𑀺, 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁄. 𑀢𑁂𑀦 𑀉𑀫𑁆𑀫𑀢𑁆𑀢𑀓𑁂𑀦 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁂𑀦 𑀩𑀳𑀼𑀁 𑀅𑀲𑁆𑀲𑀸𑀫𑀡𑀓𑀁 𑀅𑀚𑁆𑀛𑀸𑀘𑀺𑀡𑁆𑀡𑀁 𑀳𑁄𑀢𑀺 𑀪𑀸𑀲𑀺𑀢𑀧𑀭𑀺𑀓𑁆𑀓𑀦𑁆𑀢𑀁. 𑀪𑀺𑀓𑁆𑀔𑀽 𑀕𑀕𑁆𑀕𑀁 𑀪𑀺𑀓𑁆𑀔𑀼𑀁 𑀉𑀫𑁆𑀫𑀢𑁆𑀢𑀓𑁂𑀦 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁂𑀦 𑀅𑀚𑁆𑀛𑀸𑀘𑀺𑀡𑁆𑀡𑁂𑀦 𑀆𑀧𑀢𑁆𑀢𑀺𑀬𑀸 𑀘𑁄𑀤𑁂𑀦𑁆𑀢𑀺 𑁋 ‘‘𑀲𑀭𑀢𑀸𑀬𑀲𑁆𑀫𑀸 𑀏𑀯𑀭𑀽𑀧𑀺𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀸’’𑀢𑀺? 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘‘𑀅𑀳𑀁 𑀔𑁄, 𑀆𑀯𑀼𑀲𑁄, 𑀉𑀫𑁆𑀫𑀢𑁆𑀢𑀓𑁄 𑀅𑀳𑁄𑀲𑀺𑀁 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁄. 𑀢𑁂𑀦 𑀫𑁂 𑀉𑀫𑁆𑀫𑀢𑁆𑀢𑀓𑁂𑀦 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁂𑀦 𑀩𑀳𑀼𑀁 𑀅𑀲𑁆𑀲𑀸𑀫𑀡𑀓𑀁 𑀅𑀚𑁆𑀛𑀸𑀘𑀺𑀡𑁆𑀡𑀁 𑀪𑀸𑀲𑀺𑀢𑀧𑀭𑀺𑀓𑁆𑀓𑀦𑁆𑀢𑀁. 𑀦𑀸𑀳𑀁 𑀢𑀁 𑀲𑀭𑀸𑀫𑀺. 𑀫𑀽𑀴𑁆𑀳𑁂𑀦 𑀫𑁂 𑀏𑀢𑀁 𑀓𑀢’’𑀦𑁆𑀢𑀺. 𑀏𑀯𑀫𑁆𑀧𑀺 𑀦𑀁 𑀯𑀼𑀘𑁆𑀘𑀫𑀸𑀦𑀸 𑀘𑁄𑀤𑁂𑀦𑁆𑀢𑁂𑀯 𑁋 ‘‘𑀲𑀭𑀢𑀸𑀬𑀲𑁆𑀫𑀸 𑀏𑀯𑀭𑀽𑀧𑀺𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀸’’𑀢𑀺? 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸..𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀽 𑀕𑀕𑁆𑀕𑀁 𑀪𑀺𑀓𑁆𑀔𑀼𑀁 𑀉𑀫𑁆𑀫𑀢𑁆𑀢𑀓𑁂𑀦 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁂𑀦 𑀅𑀚𑁆𑀛𑀸𑀘𑀺𑀡𑁆𑀡𑁂𑀦 𑀆𑀧𑀢𑁆𑀢𑀺𑀬𑀸 𑀘𑁄𑀤𑁂𑀲𑁆𑀲𑀦𑁆𑀢𑀺 𑁋 ‘‘𑀲𑀭𑀢𑀸𑀬𑀲𑁆𑀫𑀸 𑀏𑀯𑀭𑀽𑀧𑀺𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀸’𑀢𑀺! 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘𑀅𑀳𑀁 𑀔𑁄, 𑀆𑀯𑀼𑀲𑁄, 𑀉𑀫𑁆𑀫𑀢𑁆𑀢𑀓𑁄 𑀅𑀳𑁄𑀲𑀺𑀁 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁄. 𑀢𑁂𑀦 𑀫𑁂 𑀉𑀫𑁆𑀫𑀢𑁆𑀢𑀓𑁂𑀦 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁂𑀦 𑀩𑀳𑀼𑀁 𑀅𑀲𑁆𑀲𑀸𑀫𑀡𑀓𑀁 𑀅𑀚𑁆𑀛𑀸𑀘𑀺𑀡𑁆𑀡𑀁 𑀪𑀸𑀲𑀺𑀢𑀧𑀭𑀺𑀓𑁆𑀓𑀦𑁆𑀢𑀁. 𑀦𑀸𑀳𑀁 𑀢𑀁 𑀲𑀭𑀸𑀫𑀺. 𑀫𑀽𑀴𑁆𑀳𑁂𑀦 𑀫𑁂 𑀏𑀢𑀁 𑀓𑀢’𑀦𑁆𑀢𑀺. 𑀏𑀯𑀫𑁆𑀧𑀺 𑀦𑀁 𑀯𑀼𑀘𑁆𑀘𑀫𑀸𑀦𑀸 𑀘𑁄𑀤𑁂𑀦𑁆𑀢𑁂𑀯 𑁋 ‘‘𑀲𑀭𑀢𑀸𑀬𑀲𑁆𑀫𑀸 𑀏𑀯𑀭𑀽𑀧𑀺𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀸’’𑀢𑀺? 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂…𑀧𑁂… 𑀲𑀘𑁆𑀘𑀁 𑀪𑀕𑀯𑀸’’𑀢𑀺…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋

‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀕𑀕𑁆𑀕𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀫𑀽𑀴𑁆𑀳𑀲𑁆𑀲 𑀅𑀫𑀽𑀴𑁆𑀳𑀯𑀺𑀦𑀬𑀁 𑀤𑁂𑀢𑀼. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀤𑀸𑀢𑀩𑁆𑀩𑁄 𑁋 ‘‘𑀢𑁂𑀦, 𑀪𑀺𑀓𑁆𑀔𑀯𑁂, 𑀕𑀕𑁆𑀕𑁂𑀦 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸, 𑀯𑀼𑀟𑁆𑀠𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸, 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸, 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸, 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀅𑀳𑀁, 𑀪𑀦𑁆𑀢𑁂, 𑀉𑀫𑁆𑀫𑀢𑁆𑀢𑀓𑁄 𑀅𑀳𑁄𑀲𑀺𑀁 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁄. 𑀢𑁂𑀦 𑀫𑁂 𑀉𑀫𑁆𑀫𑀢𑁆𑀢𑀓𑁂𑀦 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁂𑀦 𑀩𑀳𑀼𑀁 𑀅𑀲𑁆𑀲𑀸𑀫𑀡𑀓𑀁 𑀅𑀚𑁆𑀛𑀸𑀘𑀺𑀡𑁆𑀡𑀁 𑀪𑀸𑀲𑀺𑀢𑀧𑀭𑀺𑀓𑁆𑀓𑀦𑁆𑀢𑀁. 𑀫𑀁 𑀪𑀺𑀓𑁆𑀔𑀽 𑀉𑀫𑁆𑀫𑀢𑁆𑀢𑀓𑁂𑀦 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁂𑀦 𑀅𑀚𑁆𑀛𑀸𑀘𑀺𑀡𑁆𑀡𑁂𑀦 𑀆𑀧𑀢𑁆𑀢𑀺𑀬𑀸 𑀘𑁄𑀤𑁂𑀦𑁆𑀢𑀺 𑁋 ‘𑀲𑀭𑀢𑀸𑀬𑀲𑁆𑀫𑀸 𑀏𑀯𑀭𑀽𑀧𑀺𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀸’𑀢𑀺? 𑀢𑁆𑀬𑀸𑀳𑀁 𑀏𑀯𑀁 𑀯𑀤𑀸𑀫𑀺 𑁋 ‘𑀅𑀳𑀁 𑀔𑁄, 𑀆𑀯𑀼𑀲𑁄, 𑀉𑀫𑁆𑀫𑀢𑁆𑀢𑀓𑁄 𑀅𑀳𑁄𑀲𑀺𑀁 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁄. 𑀢𑁂𑀦 𑀫𑁂 𑀉𑀫𑁆𑀫𑀢𑁆𑀢𑀓𑁂𑀦 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁂𑀦 𑀩𑀳𑀼𑀁 𑀅𑀲𑁆𑀲𑀸𑀫𑀡𑀓𑀁 𑀅𑀚𑁆𑀛𑀸𑀘𑀺𑀡𑁆𑀡𑀁 𑀪𑀸𑀲𑀺𑀢𑀧𑀭𑀺𑀓𑁆𑀓𑀦𑁆𑀢𑀁. 𑀦𑀸𑀳𑀁 𑀢𑀁 𑀲𑀭𑀸𑀫𑀺. 𑀫𑀽𑀴𑁆𑀳𑁂𑀦 𑀫𑁂 𑀏𑀢𑀁 𑀓𑀢’𑀦𑁆𑀢𑀺. 𑀏𑀯𑀫𑁆𑀧𑀺 𑀫𑀁 𑀯𑀼𑀘𑁆𑀘𑀫𑀸𑀦𑀸 𑀘𑁄𑀤𑁂𑀦𑁆𑀢𑁂𑀯 𑁋 ‘𑀲𑀭𑀢𑀸𑀬𑀲𑁆𑀫𑀸 𑀏𑀯𑀭𑀽𑀧𑀺𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀸’𑀢𑀺? 𑀲𑁄𑀳𑀁, 𑀪𑀦𑁆𑀢𑁂, 𑀅𑀫𑀽𑀴𑁆𑀳𑁄 𑀲𑀗𑁆𑀖𑀁 𑀅𑀫𑀽𑀴𑁆𑀳𑀯𑀺𑀦𑀬𑀁 𑀬𑀸𑀘𑀸𑀫𑀻’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑁄. 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑁄 𑁋 ‘𑀅𑀳𑀁, 𑀪𑀦𑁆𑀢𑁂, 𑀉𑀫𑁆𑀫𑀢𑁆𑀢𑀓𑁄 𑀅𑀳𑁄𑀲𑀺𑀁 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁄. 𑀢𑁂𑀦 𑀫𑁂 𑀉𑀫𑁆𑀫𑀢𑁆𑀢𑀓𑁂𑀦 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁂𑀦 𑀩𑀳𑀼𑀁 𑀅𑀲𑁆𑀲𑀸𑀫𑀡𑀓𑀁 𑀅𑀚𑁆𑀛𑀸𑀘𑀺𑀡𑁆𑀡𑀁 𑀪𑀸𑀲𑀺𑀢𑀧𑀭𑀺𑀓𑁆𑀓𑀦𑁆𑀢𑀁. 𑀫𑀁 𑀪𑀺𑀓𑁆𑀔𑀽 𑀉𑀫𑁆𑀫𑀢𑁆𑀢𑀓𑁂𑀦 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁂𑀦 𑀅𑀚𑁆𑀛𑀸𑀘𑀺𑀡𑁆𑀡𑁂𑀦 𑀆𑀧𑀢𑁆𑀢𑀺𑀬𑀸 𑀘𑁄𑀤𑁂𑀦𑁆𑀢𑀺 𑁋 ‘𑀲𑀭𑀢𑀸𑀬𑀲𑁆𑀫𑀸 𑀏𑀯𑀭𑀽𑀧𑀺𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀸’𑀢𑀺? 𑀢𑁆𑀬𑀸𑀳𑀁 𑀏𑀯𑀁 𑀯𑀤𑀸𑀫𑀺 𑁋 ‘𑀅𑀳𑀁 𑀔𑁄, 𑀆𑀯𑀼𑀲𑁄, 𑀉𑀫𑁆𑀫𑀢𑁆𑀢𑀓𑁄 𑀅𑀳𑁄𑀲𑀺𑀁 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁄. 𑀢𑁂𑀦 𑀫𑁂 𑀉𑀫𑁆𑀫𑀢𑁆𑀢𑀓𑁂𑀦 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁂𑀦 𑀩𑀳𑀼𑀁 𑀅𑀲𑁆𑀲𑀸𑀫𑀡𑀓𑀁 𑀅𑀚𑁆𑀛𑀸𑀘𑀺𑀡𑁆𑀡𑀁 𑀪𑀸𑀲𑀺𑀢𑀧𑀭𑀺𑀓𑁆𑀓𑀦𑁆𑀢𑀁. 𑀦𑀸𑀳𑀁 𑀢𑀁 𑀲𑀭𑀸𑀫𑀺 𑀫𑀽𑀴𑁆𑀳𑁂𑀦 𑀫𑁂 𑀏𑀢𑀁 𑀓𑀢’𑀦𑁆𑀢𑀺. 𑀏𑀯𑀫𑁆𑀧𑀺 𑀫𑀁 𑀯𑀼𑀘𑁆𑀘𑀫𑀸𑀦𑀸 𑀘𑁄𑀤𑁂𑀦𑁆𑀢𑁂𑀯 𑁋 ‘𑀲𑀭𑀢𑀸𑀬𑀲𑁆𑀫𑀸 𑀏𑀯𑀭𑀽𑀧𑀺𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀸’𑀢𑀺? 𑀲𑁄𑀳𑀁 𑀅𑀫𑀽𑀴𑁆𑀳𑁄 [𑀲𑁄𑀳𑀁 𑀪𑀦𑁆𑀢𑁂 𑀅𑀫𑀽𑀴𑁆𑀳𑁄 (𑀓.)] 𑀢𑀢𑀺𑀬𑀫𑁆𑀧𑀺, 𑀪𑀦𑁆𑀢𑁂, 𑀲𑀗𑁆𑀖𑀁 𑀅𑀫𑀽𑀴𑁆𑀳𑀯𑀺𑀦𑀬𑀁 𑀬𑀸𑀘𑀸𑀫𑀻’𑀢𑀺. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁧𑁯𑁭. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀕𑀕𑁆𑀕𑁄 𑀪𑀺𑀓𑁆𑀔𑀼 𑀉𑀫𑁆𑀫𑀢𑁆𑀢𑀓𑁄 𑀅𑀳𑁄𑀲𑀺 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁄. 𑀢𑁂𑀦 𑀉𑀫𑁆𑀫𑀢𑁆𑀢𑀓𑁂𑀦 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁂𑀦 𑀩𑀳𑀼𑀁 𑀅𑀲𑁆𑀲𑀸𑀫𑀡𑀓𑀁 𑀅𑀚𑁆𑀛𑀸𑀘𑀺𑀡𑁆𑀡𑀁 𑀪𑀸𑀲𑀺𑀢𑀧𑀭𑀺𑀓𑁆𑀓𑀦𑁆𑀢𑀁. 𑀪𑀺𑀓𑁆𑀔𑀽 𑀕𑀕𑁆𑀕𑀁 𑀪𑀺𑀓𑁆𑀔𑀼𑀁 𑀉𑀫𑁆𑀫𑀢𑁆𑀢𑀓𑁂𑀦 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁂𑀦 𑀅𑀚𑁆𑀛𑀸𑀘𑀺𑀡𑁆𑀡𑁂𑀦 𑀆𑀧𑀢𑁆𑀢𑀺𑀬𑀸 𑀘𑁄𑀤𑁂𑀦𑁆𑀢𑀺 𑁋 ‘𑀲𑀭𑀢𑀸𑀬𑀲𑁆𑀫𑀸 𑀏𑀯𑀭𑀽𑀧𑀺𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀸’𑀢𑀺? 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘𑀅𑀳𑀁 𑀔𑁄, 𑀆𑀯𑀼𑀲𑁄, 𑀉𑀫𑁆𑀫𑀢𑁆𑀢𑀓𑁄 𑀅𑀳𑁄𑀲𑀺𑀁 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁄. 𑀢𑁂𑀦 𑀫𑁂 𑀉𑀫𑁆𑀫𑀢𑁆𑀢𑀓𑁂𑀦 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁂𑀦 𑀩𑀳𑀼𑀁 𑀅𑀲𑁆𑀲𑀸𑀫𑀡𑀓𑀁 𑀅𑀚𑁆𑀛𑀸𑀘𑀺𑀡𑁆𑀡𑀁 𑀪𑀸𑀲𑀺𑀢𑀧𑀭𑀺𑀓𑁆𑀓𑀦𑁆𑀢𑀁. 𑀦𑀸𑀳𑀁 𑀢𑀁 𑀲𑀭𑀸𑀫𑀺, 𑀫𑀽𑀴𑁆𑀳𑁂𑀦 𑀫𑁂 𑀏𑀢𑀁 𑀓𑀢’𑀦𑁆𑀢𑀺. 𑀏𑀯𑀫𑁆𑀧𑀺 𑀦𑀁 𑀯𑀼𑀘𑁆𑀘𑀫𑀸𑀦𑀸 𑀘𑁄𑀤𑁂𑀦𑁆𑀢𑁂𑀯 𑁋 ‘𑀲𑀭𑀢𑀸𑀬𑀲𑁆𑀫𑀸 𑀏𑀯𑀭𑀽𑀧𑀺𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀸’𑀢𑀺? 𑀲𑁄 𑀅𑀫𑀽𑀴𑁆𑀳𑁄 𑀲𑀗𑁆𑀖𑀁 𑀅𑀫𑀽𑀴𑁆𑀳𑀯𑀺𑀦𑀬𑀁 𑀬𑀸𑀘𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀕𑀕𑁆𑀕𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀫𑀽𑀴𑁆𑀳𑀲𑁆𑀲 𑀅𑀫𑀽𑀴𑁆𑀳𑀯𑀺𑀦𑀬𑀁 𑀤𑀤𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀕𑀕𑁆𑀕𑁄 𑀪𑀺𑀓𑁆𑀔𑀼 𑀉𑀫𑁆𑀫𑀢𑁆𑀢𑀓𑁄 𑀅𑀳𑁄𑀲𑀺 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁄. 𑀢𑁂𑀦 𑀉𑀫𑁆𑀫𑀢𑁆𑀢𑀓𑁂𑀦 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁂𑀦 𑀩𑀳𑀼𑀁 𑀅𑀲𑁆𑀲𑀸𑀫𑀡𑀓𑀁 𑀅𑀚𑁆𑀛𑀸𑀘𑀺𑀡𑁆𑀡𑀁 𑀪𑀸𑀲𑀺𑀢𑀧𑀭𑀺𑀓𑁆𑀓𑀦𑁆𑀢𑀁. 𑀪𑀺𑀓𑁆𑀔𑀽 𑀕𑀕𑁆𑀕𑀁 𑀪𑀺𑀓𑁆𑀔𑀼𑀁 𑀉𑀫𑁆𑀫𑀢𑁆𑀢𑀓𑁂𑀦 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁂𑀦 𑀅𑀚𑁆𑀛𑀸𑀘𑀺𑀡𑁆𑀡𑁂𑀦 𑀆𑀧𑀢𑁆𑀢𑀺𑀬𑀸 𑀘𑁄𑀤𑁂𑀦𑁆𑀢𑀺 𑁋 ‘𑀲𑀭𑀢𑀸𑀬𑀲𑁆𑀫𑀸 𑀏𑀯𑀭𑀽𑀧𑀺𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀸’𑀢𑀺? 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘𑀅𑀳𑀁 𑀔𑁄, 𑀆𑀯𑀼𑀲𑁄, 𑀉𑀫𑁆𑀫𑀢𑁆𑀢𑀓𑁄 𑀅𑀳𑁄𑀲𑀺𑀁 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁄. 𑀢𑁂𑀦 𑀫𑁂 𑀉𑀫𑁆𑀫𑀢𑁆𑀢𑀓𑁂𑀦 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁂𑀦 𑀩𑀳𑀼𑀁 𑀅𑀲𑁆𑀲𑀸𑀫𑀡𑀓𑀁 𑀅𑀚𑁆𑀛𑀸𑀘𑀺𑀡𑁆𑀡𑀁 𑀪𑀸𑀲𑀺𑀢𑀧𑀭𑀺𑀓𑁆𑀓𑀦𑁆𑀢𑀁. 𑀦𑀸𑀳𑀁 𑀢𑀁 𑀲𑀭𑀸𑀫𑀺 𑀫𑀽𑀴𑁆𑀳𑁂𑀦 𑀫𑁂 𑀏𑀢𑀁 𑀓𑀢’𑀦𑁆𑀢𑀺. 𑀏𑀯𑀫𑁆𑀧𑀺 𑀦𑀁 𑀯𑀼𑀘𑁆𑀘𑀫𑀸𑀦𑀸 𑀘𑁄𑀤𑁂𑀦𑁆𑀢𑁂𑀯 𑁋 ‘𑀲𑀭𑀢𑀸𑀬𑀲𑁆𑀫𑀸 𑀏𑀯𑀭𑀽𑀧𑀺𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀸’𑀢𑀺? 𑀲𑁄 𑀅𑀫𑀽𑀴𑁆𑀳𑁄 𑀲𑀗𑁆𑀖𑀁 𑀅𑀫𑀽𑀴𑁆𑀳𑀯𑀺𑀦𑀬𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀕𑀕𑁆𑀕𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀫𑀽𑀴𑁆𑀳𑀲𑁆𑀲 𑀅𑀫𑀽𑀴𑁆𑀳𑀯𑀺𑀦𑀬𑀁 𑀤𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀕𑀕𑁆𑀕𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀫𑀽𑀴𑁆𑀳𑀲𑁆𑀲 𑀅𑀫𑀽𑀴𑁆𑀳𑀯𑀺𑀦𑀬𑀲𑁆𑀲 𑀤𑀸𑀦𑀁, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂….

‘‘𑀤𑀺𑀦𑁆𑀦𑁄 𑀲𑀗𑁆𑀖𑁂𑀦 𑀕𑀕𑁆𑀕𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀫𑀽𑀴𑁆𑀳𑀲𑁆𑀲 𑀅𑀫𑀽𑀴𑁆𑀳𑀯𑀺𑀦𑀬𑁄. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑁧𑁯𑁮. ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑀺𑀓𑀸𑀦𑀺 𑀅𑀫𑀽𑀴𑁆𑀳𑀯𑀺𑀦𑀬𑀲𑁆𑀲 𑀤𑀸𑀦𑀸𑀦𑀺, 𑀢𑀻𑀡𑀺 𑀥𑀫𑁆𑀫𑀺𑀓𑀸𑀦𑀺. 𑀓𑀫𑁆𑀫𑀸𑀦𑀺 𑀢𑀻𑀡𑀺 𑀅𑀥𑀫𑁆𑀫𑀺𑀓𑀸𑀦𑀺 𑀅𑀫𑀽𑀴𑁆𑀳𑀯𑀺𑀦𑀬𑀲𑁆𑀲 𑀤𑀸𑀦𑀸𑀦𑀺?

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀳𑁄𑀢𑀺. 𑀢𑀫𑁂𑀦𑀁 𑀘𑁄𑀤𑁂𑀢𑀺 𑀲𑀗𑁆𑀖𑁄 𑀯𑀸, 𑀲𑀫𑁆𑀩𑀳𑀼𑀮𑀸 𑀯𑀸, 𑀏𑀓𑀧𑀼𑀕𑁆𑀕𑀮𑁄 𑀯𑀸 𑁋 ‘𑀲𑀭𑀢𑀸𑀬𑀲𑁆𑀫𑀸 𑀏𑀯𑀭𑀽𑀧𑀺𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀸’𑀢𑀺? 𑀲𑁄 𑀲𑀭𑀫𑀸𑀦𑁄𑀯 𑀏𑀯𑀁 𑀯𑀤𑁂𑀢𑀺 𑁋 ‘𑀦 𑀔𑁄 𑀅𑀳𑀁, 𑀆𑀯𑀼𑀲𑁄, 𑀲𑀭𑀸𑀫𑀺 𑀏𑀯𑀭𑀽𑀧𑀺𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀸’𑀢𑀺. 𑀢𑀲𑁆𑀲 𑀲𑀗𑁆𑀖𑁄 𑀅𑀫𑀽𑀴𑁆𑀳𑀯𑀺𑀦𑀬𑀁 𑀤𑁂𑀢𑀺. 𑀅𑀥𑀫𑁆𑀫𑀺𑀓𑀁 𑀅𑀫𑀽𑀴𑁆𑀳𑀯𑀺𑀦𑀬𑀲𑁆𑀲 𑀤𑀸𑀦𑀁.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀳𑁄𑀢𑀺. 𑀢𑀫𑁂𑀦𑀁 𑀘𑁄𑀤𑁂𑀢𑀺 𑀲𑀗𑁆𑀖𑁄 𑀯𑀸, 𑀲𑀫𑁆𑀩𑀳𑀼𑀮𑀸 𑀯𑀸, 𑀏𑀓𑀧𑀼𑀕𑁆𑀕𑀮𑁄 𑀯𑀸 𑁋 ‘𑀲𑀭𑀢𑀸𑀬𑀲𑁆𑀫𑀸 𑀏𑀯𑀭𑀽𑀧𑀺𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀸’𑀢𑀺? 𑀲𑁄 𑀲𑀭𑀫𑀸𑀦𑁄𑀯 𑀏𑀯𑀁 𑀯𑀤𑁂𑀢𑀺 𑁋 ‘𑀲𑀭𑀸𑀫𑀺 𑀔𑁄 𑀅𑀳𑀁, 𑀆𑀯𑀼𑀲𑁄, 𑀬𑀣𑀸𑀲𑀼𑀧𑀺𑀦𑀦𑁆𑀢𑁂𑀦𑀸’𑀢𑀺. 𑀢𑀲𑁆𑀲 𑀲𑀗𑁆𑀖𑁄 𑀅𑀫𑀽𑀴𑁆𑀳𑀯𑀺𑀦𑀬𑀁 𑀤𑁂𑀢𑀺. 𑀅𑀥𑀫𑁆𑀫𑀺𑀓𑀁 𑀅𑀫𑀽𑀴𑁆𑀳𑀯𑀺𑀦𑀬𑀲𑁆𑀲 𑀤𑀸𑀦𑀁.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀳𑁄𑀢𑀺. 𑀢𑀫𑁂𑀦𑀁 𑀘𑁄𑀤𑁂𑀢𑀺 𑀲𑀗𑁆𑀖𑁄 𑀯𑀸, 𑀲𑀫𑁆𑀩𑀳𑀼𑀮𑀸 𑀯𑀸, 𑀏𑀓𑀧𑀼𑀕𑁆𑀕𑀮𑁄 𑀯𑀸 𑁋 ‘𑀲𑀭𑀢𑀸𑀬𑀲𑁆𑀫𑀸 𑀏𑀯𑀭𑀽𑀧𑀺𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀸’𑀢𑀺? 𑀲𑁄 𑀅𑀦𑀼𑀫𑁆𑀫𑀢𑁆𑀢𑀓𑁄 𑀉𑀫𑁆𑀫𑀢𑁆𑀢𑀓𑀸𑀮𑀬𑀁 𑀓𑀭𑁄𑀢𑀺 𑁋 ‘𑀅𑀳𑀫𑁆𑀧𑀺 𑀔𑁄 𑀏𑀯𑀁 𑀓𑀭𑁄𑀫𑀺. 𑀢𑀼𑀫𑁆𑀳𑁂𑀧𑀺 𑀏𑀯𑀁 𑀓𑀭𑁄𑀣. 𑀫𑀬𑁆𑀳𑀫𑁆𑀧𑀺 𑀏𑀢𑀁 𑀓𑀧𑁆𑀧𑀢𑀺. 𑀢𑀼𑀫𑁆𑀳𑀸𑀓𑀫𑁆𑀧𑁂𑀢𑀁 𑀓𑀧𑁆𑀧𑀢𑀻’𑀢𑀺. 𑀢𑀲𑁆𑀲 𑀲𑀗𑁆𑀖𑁄 𑀅𑀫𑀽𑀴𑁆𑀳𑀯𑀺𑀦𑀬𑀁 𑀤𑁂𑀢𑀺. 𑀅𑀥𑀫𑁆𑀫𑀺𑀓𑀁 𑀅𑀫𑀽𑀴𑁆𑀳𑀯𑀺𑀦𑀬𑀲𑁆𑀲 𑀤𑀸𑀦𑀁. 𑀇𑀫𑀸𑀦𑀺 𑀢𑀻𑀡𑀺 𑀅𑀥𑀫𑁆𑀫𑀺𑀓𑀸𑀦𑀺 𑀅𑀫𑀽𑀴𑁆𑀳𑀯𑀺𑀦𑀬𑀲𑁆𑀲 𑀤𑀸𑀦𑀸𑀦𑀺.

𑁧𑁯𑁯. ‘‘𑀓𑀢𑀫𑀸𑀦𑀺 𑀢𑀻𑀡𑀺 𑀥𑀫𑁆𑀫𑀺𑀓𑀸𑀦𑀺 𑀅𑀫𑀽𑀴𑁆𑀳𑀯𑀺𑀦𑀬𑀲𑁆𑀲 𑀤𑀸𑀦𑀸𑀦𑀺?

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀉𑀫𑁆𑀫𑀢𑁆𑀢𑀓𑁄 𑀳𑁄𑀢𑀺 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁄. 𑀢𑁂𑀦 𑀉𑀫𑁆𑀫𑀢𑁆𑀢𑀓𑁂𑀦 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁂𑀦 𑀩𑀳𑀼𑀁 𑀅𑀲𑁆𑀲𑀸𑀫𑀡𑀓𑀁 𑀅𑀚𑁆𑀛𑀸𑀘𑀺𑀡𑁆𑀡𑀁 𑀳𑁄𑀢𑀺 𑀪𑀸𑀲𑀺𑀢𑀧𑀭𑀺𑀓𑁆𑀓𑀦𑁆𑀢𑀁. 𑀢𑀫𑁂𑀦𑀁 𑀘𑁄𑀤𑁂𑀢𑀺 𑀲𑀗𑁆𑀖𑁄 𑀯𑀸, 𑀲𑀫𑁆𑀩𑀳𑀼𑀮𑀸 𑀯𑀸, 𑀏𑀓𑀧𑀼𑀕𑁆𑀕𑀮𑁄 𑀯𑀸 𑁋 ‘𑀲𑀭𑀢𑀸𑀬𑀲𑁆𑀫𑀸 𑀏𑀯𑀭𑀽𑀧𑀺𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀸’𑀢𑀺? 𑀲𑁄 𑀅𑀲𑁆𑀲𑀭𑀫𑀸𑀦𑁄𑀯 𑀏𑀯𑀁 𑀯𑀤𑁂𑀢𑀺 𑁋 ‘𑀦 𑀔𑁄 𑀅𑀳𑀁, 𑀆𑀯𑀼𑀲𑁄, 𑀲𑀭𑀸𑀫𑀺 𑀏𑀯𑀭𑀽𑀧𑀺𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀸’𑀢𑀺. 𑀢𑀲𑁆𑀲 𑀲𑀗𑁆𑀖𑁄 𑀅𑀫𑀽𑀴𑁆𑀳𑀯𑀺𑀦𑀬𑀁 𑀤𑁂𑀢𑀺. 𑀥𑀫𑁆𑀫𑀺𑀓𑀁 𑀅𑀫𑀽𑀴𑁆𑀳𑀯𑀺𑀦𑀬𑀲𑁆𑀲 𑀤𑀸𑀦𑀁.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀉𑀫𑁆𑀫𑀢𑁆𑀢𑀓𑁄 𑀳𑁄𑀢𑀺 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁄. 𑀢𑁂𑀦 𑀉𑀫𑁆𑀫𑀢𑁆𑀢𑀓𑁂𑀦 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁂𑀦 𑀩𑀳𑀼𑀁 𑀅𑀲𑁆𑀲𑀸𑀫𑀡𑀓𑀁 𑀅𑀚𑁆𑀛𑀸𑀘𑀺𑀡𑁆𑀡𑀁 𑀳𑁄𑀢𑀺 𑀪𑀸𑀲𑀺𑀢𑀧𑀭𑀺𑀓𑁆𑀓𑀦𑁆𑀢𑀁. 𑀢𑀫𑁂𑀦𑀁 𑀘𑁄𑀤𑁂𑀢𑀺 𑀲𑀗𑁆𑀖𑁄 𑀯𑀸, 𑀲𑀫𑁆𑀩𑀳𑀼𑀮𑀸 𑀯𑀸, 𑀏𑀓𑀧𑀼𑀕𑁆𑀕𑀮𑁄 𑀯𑀸 𑁋 ‘𑀲𑀭𑀢𑀸𑀬𑀲𑁆𑀫𑀸 𑀏𑀯𑀭𑀽𑀧𑀺𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀸’𑀢𑀺? 𑀲𑁄 𑀅𑀲𑁆𑀲𑀭𑀫𑀸𑀦𑁄𑀯 𑀏𑀯𑀁 𑀯𑀤𑁂𑀢𑀺 𑁋 ‘𑀲𑀭𑀸𑀫𑀺 𑀔𑁄 𑀅𑀳𑀁, 𑀆𑀯𑀼𑀲𑁄, 𑀬𑀣𑀸 𑀲𑀼𑀧𑀺𑀦𑀦𑁆𑀢𑁂𑀦𑀸’𑀢𑀺. 𑀢𑀲𑁆𑀲 𑀲𑀗𑁆𑀖𑁄 𑀅𑀫𑀽𑀴𑁆𑀳𑀯𑀺𑀦𑀬𑀁 𑀤𑁂𑀢𑀺. 𑀥𑀫𑁆𑀫𑀺𑀓𑀁 𑀅𑀫𑀽𑀴𑁆𑀳𑀯𑀺𑀦𑀬𑀲𑁆𑀲 𑀤𑀸𑀦𑀁.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀉𑀫𑁆𑀫𑀢𑁆𑀢𑀓𑁄 𑀳𑁄𑀢𑀺 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁄. 𑀢𑁂𑀦 𑀉𑀫𑁆𑀫𑀢𑁆𑀢𑀓𑁂𑀦 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁂𑀦 𑀩𑀳𑀼𑀁 𑀅𑀲𑁆𑀲𑀸𑀫𑀡𑀓𑀁 𑀅𑀚𑁆𑀛𑀸𑀘𑀺𑀡𑁆𑀡𑀁 𑀳𑁄𑀢𑀺 𑀪𑀸𑀲𑀺𑀢𑀧𑀭𑀺𑀓𑁆𑀓𑀦𑁆𑀢𑀁. 𑀢𑀫𑁂𑀦𑀁 𑀘𑁄𑀤𑁂𑀢𑀺 𑀲𑀗𑁆𑀖𑁄 𑀯𑀸, 𑀲𑀫𑁆𑀩𑀳𑀼𑀮𑀸 𑀯𑀸, 𑀏𑀓𑀧𑀼𑀕𑁆𑀕𑀮𑁄 𑀯𑀸 𑁋 ‘𑀲𑀭𑀢𑀸𑀬𑀲𑁆𑀫𑀸 𑀏𑀯𑀭𑀽𑀧𑀺𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀸’𑀢𑀺? 𑀲𑁄 𑀉𑀫𑁆𑀫𑀢𑁆𑀢𑀓𑁄 𑀉𑀫𑁆𑀫𑀢𑁆𑀢𑀓𑀸𑀮𑀬𑀁 𑀓𑀭𑁄𑀢𑀺 𑁋 ‘𑀅𑀳𑀫𑁆𑀧𑀺 𑀏𑀯𑀁 𑀓𑀭𑁄𑀫𑀺. 𑀢𑀼𑀫𑁆𑀳𑁂𑀧𑀺 𑀏𑀯𑀁 𑀓𑀭𑁄𑀣. 𑀫𑀬𑁆𑀳𑀫𑁆𑀧𑀺 𑀏𑀢𑀁 𑀓𑀧𑁆𑀧𑀢𑀺. 𑀢𑀼𑀫𑁆𑀳𑀸𑀓𑀫𑁆𑀧𑁂𑀢𑀁 𑀓𑀧𑁆𑀧𑀢𑀻’𑀢𑀺. 𑀢𑀲𑁆𑀲 𑀲𑀗𑁆𑀖𑁄 𑀅𑀫𑀽𑀴𑁆𑀳𑀯𑀺𑀦𑀬𑀁 𑀤𑁂𑀢𑀺. 𑀥𑀫𑁆𑀫𑀺𑀓𑀁 𑀅𑀫𑀽𑀴𑁆𑀳𑀯𑀺𑀦𑀬𑀲𑁆𑀲 𑀤𑀸𑀦𑀁. ‘‘𑀇𑀫𑀸𑀦𑀺 𑀢𑀻𑀡𑀺 𑀥𑀫𑁆𑀫𑀺𑀓𑀸𑀦𑀺 𑀅𑀫𑀽𑀴𑁆𑀳𑀯𑀺𑀦𑀬𑀲𑁆𑀲 𑀤𑀸𑀦𑀸𑀦𑀻’’𑀢𑀺.

𑁪. 𑀧𑀝𑀺𑀜𑁆𑀜𑀸𑀢𑀓𑀭𑀡𑀁

𑁨𑁦𑁦. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀅𑀧𑁆𑀧𑀝𑀺𑀜𑁆𑀜𑀸𑀬 𑀪𑀺𑀓𑁆𑀔𑀽𑀦𑀁 𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀺 𑁋 𑀢𑀚𑁆𑀚𑀦𑀻𑀬𑀫𑁆𑀧𑀺, 𑀦𑀺𑀬𑀲𑁆𑀲𑀫𑁆𑀧𑀺, 𑀧𑀩𑁆𑀩𑀸𑀚𑀦𑀻𑀬𑀫𑁆𑀧𑀺, 𑀧𑀝𑀺𑀲𑀸𑀭𑀡𑀻𑀬𑀫𑁆𑀧𑀺, 𑀉𑀓𑁆𑀔𑁂𑀧𑀦𑀻𑀬𑀫𑁆𑀧𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀅𑀧𑁆𑀧𑀝𑀺𑀜𑁆𑀜𑀸𑀬 𑀪𑀺𑀓𑁆𑀔𑀽𑀦𑀁 𑀓𑀫𑁆𑀫𑀸𑀦𑀺 𑀓𑀭𑀺𑀲𑁆𑀲𑀦𑁆𑀢𑀺 𑁋 𑀢𑀚𑁆𑀚𑀦𑀻𑀬𑀫𑁆𑀧𑀺, 𑀦𑀺𑀬𑀲𑁆𑀲𑀫𑁆𑀧𑀺, 𑀧𑀩𑁆𑀩𑀸𑀚𑀦𑀻𑀬𑀫𑁆𑀧𑀺, 𑀧𑀝𑀺𑀲𑀸𑀭𑀡𑀻𑀬𑀫𑁆𑀧𑀺, 𑀉𑀓𑁆𑀔𑁂𑀧𑀦𑀻𑀬𑀫𑁆𑀧𑀻’’𑀢𑀺! 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂…𑀧𑁂… ‘‘𑀲𑀘𑁆𑀘𑀁 𑀪𑀕𑀯𑀸’’𑀢𑀺…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀝𑀺𑀜𑁆𑀜𑀸𑀬 𑀪𑀺𑀓𑁆𑀔𑀽𑀦𑀁 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁 𑁋 𑀢𑀚𑁆𑀚𑀦𑀻𑀬𑀁 𑀯𑀸, 𑀦𑀺𑀬𑀲𑁆𑀲𑀁 𑀯𑀸, 𑀧𑀩𑁆𑀩𑀸𑀚𑀦𑀻𑀬𑀁 𑀯𑀸, 𑀧𑀝𑀺𑀲𑀸𑀭𑀡𑀻𑀬𑀁 𑀯𑀸, 𑀉𑀓𑁆𑀔𑁂𑀧𑀦𑀻𑀬𑀁 𑀯𑀸. 𑀬𑁄 𑀓𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑁨𑁦𑁧. ‘‘𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑀺𑀓𑀁 𑀳𑁄𑀢𑀺 𑀧𑀝𑀺𑀜𑁆𑀜𑀸𑀢𑀓𑀭𑀡𑀁, 𑀏𑀯𑀁 𑀥𑀫𑁆𑀫𑀺𑀓𑀁. 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑀺𑀓𑀁 𑀳𑁄𑀢𑀺 𑀧𑀝𑀺𑀜𑁆𑀜𑀸𑀢𑀓𑀭𑀡𑀁?

‘‘𑀪𑀺𑀓𑁆𑀔𑀼 𑀧𑀸𑀭𑀸𑀚𑀺𑀓𑀁 𑀅𑀚𑁆𑀛𑀸𑀧𑀦𑁆𑀦𑁄 𑀳𑁄𑀢𑀺. 𑀢𑀫𑁂𑀦𑀁 𑀘𑁄𑀤𑁂𑀢𑀺 𑀲𑀗𑁆𑀖𑁄 𑀯𑀸, 𑀲𑀫𑁆𑀩𑀳𑀼𑀮𑀸 𑀯𑀸, 𑀏𑀓𑀧𑀼𑀕𑁆𑀕𑀮𑁄 𑀯𑀸 𑁋 ‘𑀧𑀸𑀭𑀸𑀚𑀺𑀓𑀁 𑀆𑀬𑀲𑁆𑀫𑀸 𑀅𑀚𑁆𑀛𑀸𑀧𑀦𑁆𑀦𑁄’𑀢𑀺? 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘𑀦 𑀔𑁄 𑀅𑀳𑀁, 𑀆𑀯𑀼𑀲𑁄, 𑀧𑀸𑀭𑀸𑀚𑀺𑀓𑀁 𑀅𑀚𑁆𑀛𑀸𑀧𑀦𑁆𑀦𑁄, 𑀲𑀗𑁆𑀖𑀸𑀤𑀺𑀲𑁂𑀲𑀁 𑀅𑀚𑁆𑀛𑀸𑀧𑀦𑁆𑀦𑁄’𑀢𑀺. 𑀢𑀁 𑀲𑀗𑁆𑀖𑁄 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀓𑀸𑀭𑁂𑀢𑀺. 𑀅𑀥𑀫𑁆𑀫𑀺𑀓𑀁 𑀧𑀝𑀺𑀜𑁆𑀜𑀸𑀢𑀓𑀭𑀡𑀁.

‘‘𑀪𑀺𑀓𑁆𑀔𑀼 𑀧𑀸𑀭𑀸𑀚𑀺𑀓𑀁 𑀅𑀚𑁆𑀛𑀸𑀧𑀦𑁆𑀦𑁄 𑀳𑁄𑀢𑀺. 𑀢𑀫𑁂𑀦𑀁 𑀘𑁄𑀤𑁂𑀢𑀺 𑀲𑀗𑁆𑀖𑁄 𑀯𑀸, 𑀲𑀫𑁆𑀩𑀳𑀼𑀮𑀸 𑀯𑀸, 𑀏𑀓𑀧𑀼𑀕𑁆𑀕𑀮𑁄 𑀯𑀸 𑁋 ‘𑀧𑀸𑀭𑀸𑀚𑀺𑀓𑀁 𑀆𑀬𑀲𑁆𑀫𑀸 𑀅𑀚𑁆𑀛𑀸𑀧𑀦𑁆𑀦𑁄’𑀢𑀺? 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘𑀦 𑀔𑁄 𑀅𑀳𑀁, 𑀆𑀯𑀼𑀲𑁄, 𑀧𑀸𑀭𑀸𑀚𑀺𑀓𑀁 𑀅𑀚𑁆𑀛𑀸𑀧𑀦𑁆𑀦𑁄, 𑀣𑀼𑀮𑁆𑀮𑀘𑁆𑀘𑀬𑀁…𑀧𑁂… 𑀧𑀸𑀘𑀺𑀢𑁆𑀢𑀺𑀬𑀁…𑀧𑁂… 𑀧𑀸𑀝𑀺𑀤𑁂𑀲𑀦𑀻𑀬𑀁…𑀧𑁂… 𑀤𑀼𑀓𑁆𑀓𑀝𑀁…𑀧𑁂… 𑀤𑀼𑀩𑁆𑀪𑀸𑀲𑀺𑀢𑀁 𑀅𑀚𑁆𑀛𑀸𑀧𑀦𑁆𑀦𑁄’𑀢𑀺. 𑀢𑀁 𑀲𑀗𑁆𑀖𑁄 𑀤𑀼𑀩𑁆𑀪𑀸𑀲𑀺𑀢𑁂𑀦 𑀓𑀸𑀭𑁂𑀢𑀺. 𑀅𑀥𑀫𑁆𑀫𑀺𑀓𑀁 𑀧𑀝𑀺𑀜𑁆𑀜𑀸𑀢𑀓𑀭𑀡𑀁.

‘‘𑀪𑀺𑀓𑁆𑀔𑀼 𑀲𑀗𑁆𑀖𑀸𑀤𑀺𑀲𑁂𑀲𑀁…𑀧𑁂… 𑀣𑀼𑀮𑁆𑀮𑀘𑁆𑀘𑀬𑀁…𑀧𑁂… 𑀧𑀸𑀘𑀺𑀢𑁆𑀢𑀺𑀬𑀁…𑀧𑁂… 𑀧𑀸𑀝𑀺𑀤𑁂𑀲𑀦𑀻𑀬𑀁…𑀧𑁂… 𑀤𑀼𑀓𑁆𑀓𑀝𑀁…𑀧𑁂… 𑀤𑀼𑀩𑁆𑀪𑀸𑀲𑀺𑀢𑀁 𑀅𑀚𑁆𑀛𑀸𑀧𑀦𑁆𑀦𑁄 𑀳𑁄𑀢𑀺. 𑀢𑀫𑁂𑀦𑀁 𑀘𑁄𑀤𑁂𑀢𑀺 𑀲𑀗𑁆𑀖𑁄 𑀯𑀸, 𑀲𑀫𑁆𑀩𑀳𑀼𑀮𑀸 𑀯𑀸, 𑀏𑀓𑀧𑀼𑀕𑁆𑀕𑀮𑁄 𑀯𑀸 𑁋 ‘𑀤𑀼𑀩𑁆𑀪𑀸𑀲𑀺𑀢𑀁 𑀆𑀬𑀲𑁆𑀫𑀸 𑀅𑀚𑁆𑀛𑀸𑀧𑀦𑁆𑀦𑁄’𑀢𑀺? 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘𑀦 𑀔𑁄 𑀅𑀳𑀁, 𑀆𑀯𑀼𑀲𑁄, 𑀤𑀼𑀩𑁆𑀪𑀸𑀲𑀺𑀢𑀁 𑀅𑀚𑁆𑀛𑀸𑀧𑀦𑁆𑀦𑁄, 𑀧𑀸𑀭𑀸𑀚𑀺𑀓𑀁 𑀅𑀚𑁆𑀛𑀸𑀧𑀦𑁆𑀦𑁄’𑀢𑀺. 𑀢𑀁 𑀲𑀗𑁆𑀖𑁄 𑀧𑀸𑀭𑀸𑀚𑀺𑀓𑁂𑀦 𑀓𑀸𑀭𑁂𑀢𑀺. 𑀅𑀥𑀫𑁆𑀫𑀺𑀓𑀁 𑀧𑀝𑀺𑀜𑁆𑀜𑀸𑀢𑀓𑀭𑀡𑀁.

‘‘𑀪𑀺𑀓𑁆𑀔𑀼 𑀤𑀼𑀩𑁆𑀪𑀸𑀲𑀺𑀢𑀁 𑀅𑀚𑁆𑀛𑀸𑀧𑀦𑁆𑀦𑁄 𑀳𑁄𑀢𑀺. 𑀢𑀫𑁂𑀦𑀁 𑀘𑁄𑀤𑁂𑀢𑀺 𑀲𑀗𑁆𑀖𑁄 𑀯𑀸, 𑀲𑀫𑁆𑀩𑀳𑀼𑀮𑀸 𑀯𑀸, 𑀏𑀓𑀧𑀼𑀕𑁆𑀕𑀮𑁄 𑀯𑀸 𑁋 ‘𑀤𑀼𑀩𑁆𑀪𑀸𑀲𑀺𑀢𑀁 𑀆𑀬𑀲𑁆𑀫𑀸 𑀅𑀚𑁆𑀛𑀸𑀧𑀦𑁆𑀦𑁄’𑀢𑀺? 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘𑀦 𑀔𑁄 𑀅𑀳𑀁, 𑀆𑀯𑀼𑀲𑁄, 𑀤𑀼𑀩𑁆𑀪𑀸𑀲𑀺𑀢𑀁 𑀅𑀚𑁆𑀛𑀸𑀧𑀦𑁆𑀦𑁄, 𑀲𑀗𑁆𑀖𑀸𑀤𑀺𑀲𑁂𑀲𑀁…𑀧𑁂… 𑀣𑀼𑀮𑁆𑀮𑀘𑁆𑀘𑀬𑀁…𑀧𑁂… 𑀧𑀸𑀘𑀺𑀢𑁆𑀢𑀺𑀬𑀁…𑀧𑁂… 𑀧𑀸𑀝𑀺𑀤𑁂𑀲𑀦𑀻𑀬𑀁…𑀧𑁂… 𑀤𑀼𑀓𑁆𑀓𑀝𑀁 𑀅𑀚𑁆𑀛𑀸𑀧𑀦𑁆𑀦𑁄’𑀢𑀺. 𑀢𑀁 𑀲𑀗𑁆𑀖𑁄 𑀤𑀼𑀓𑁆𑀓𑀝𑁂𑀦 𑀓𑀸𑀭𑁂𑀢𑀺. 𑀅𑀥𑀫𑁆𑀫𑀺𑀓𑀁 𑀧𑀝𑀺𑀜𑁆𑀜𑀸𑀢𑀓𑀭𑀡𑀁. ‘‘𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑀺𑀓𑀁 𑀳𑁄𑀢𑀺 𑀧𑀝𑀺𑀜𑁆𑀜𑀸𑀢𑀓𑀭𑀡𑀁.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀺𑀓𑀁 𑀳𑁄𑀢𑀺 𑀧𑀝𑀺𑀜𑁆𑀜𑀸𑀢𑀓𑀭𑀡𑀁? 𑀪𑀺𑀓𑁆𑀔𑀼 𑀧𑀸𑀭𑀸𑀚𑀺𑀓𑀁 𑀅𑀚𑁆𑀛𑀸𑀧𑀦𑁆𑀦𑁄 𑀳𑁄𑀢𑀺. 𑀢𑀫𑁂𑀦𑀁 𑀘𑁄𑀤𑁂𑀢𑀺 𑀲𑀗𑁆𑀖𑁄 𑀯𑀸, 𑀲𑀫𑁆𑀩𑀳𑀼𑀮𑀸 𑀯𑀸, 𑀏𑀓𑀧𑀼𑀕𑁆𑀕𑀮𑁄 𑀯𑀸 𑁋 ‘𑀧𑀸𑀭𑀸𑀚𑀺𑀓𑀁 𑀆𑀬𑀲𑁆𑀫𑀸 𑀅𑀚𑁆𑀛𑀸𑀧𑀦𑁆𑀦𑁄’𑀢𑀺? 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘𑀆𑀫, 𑀆𑀯𑀼𑀲𑁄, 𑀧𑀸𑀭𑀸𑀚𑀺𑀓𑀁 𑀅𑀚𑁆𑀛𑀸𑀧𑀦𑁆𑀦𑁄’𑀢𑀺. 𑀢𑀁 𑀲𑀗𑁆𑀖𑁄 𑀧𑀸𑀭𑀸𑀚𑀺𑀓𑁂𑀦 𑀓𑀸𑀭𑁂𑀢𑀺. 𑀥𑀫𑁆𑀫𑀺𑀓𑀁 𑀧𑀝𑀺𑀜𑁆𑀜𑀸𑀢𑀓𑀭𑀡𑀁.

‘‘𑀪𑀺𑀓𑁆𑀔𑀼 𑀲𑀗𑁆𑀖𑀸𑀤𑀺𑀲𑁂𑀲𑀁…𑀧𑁂… 𑀣𑀼𑀮𑁆𑀮𑀘𑁆𑀘𑀬𑀁…𑀧𑁂… 𑀧𑀸𑀘𑀺𑀢𑁆𑀢𑀺𑀬𑀁…𑀧𑁂… 𑀧𑀸𑀝𑀺𑀤𑁂𑀲𑀦𑀻𑀬𑀁…𑀧𑁂… 𑀤𑀼𑀓𑁆𑀓𑀝𑀁…𑀧𑁂… 𑀤𑀼𑀩𑁆𑀪𑀸𑀲𑀺𑀢𑀁 𑀅𑀚𑁆𑀛𑀸𑀧𑀦𑁆𑀦𑁄 𑀳𑁄𑀢𑀺. 𑀢𑀫𑁂𑀦𑀁 𑀘𑁄𑀤𑁂𑀢𑀺 𑀲𑀗𑁆𑀖𑁄 𑀯𑀸, 𑀲𑀫𑁆𑀩𑀳𑀼𑀮𑀸 𑀯𑀸, 𑀏𑀓𑀧𑀼𑀕𑁆𑀕𑀮𑁄 𑀯𑀸 𑁋 ‘𑀤𑀼𑀩𑁆𑀪𑀸𑀲𑀺𑀢𑀁 𑀆𑀬𑀲𑁆𑀫𑀸 𑀅𑀚𑁆𑀛𑀸𑀧𑀦𑁆𑀦𑁄’𑀢𑀺? 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘𑀆𑀫, 𑀆𑀯𑀼𑀲𑁄, 𑀤𑀼𑀩𑁆𑀪𑀸𑀲𑀺𑀢𑀁 𑀅𑀚𑁆𑀛𑀸𑀧𑀦𑁆𑀦𑁄’𑀢𑀺. 𑀢𑀁 𑀲𑀗𑁆𑀖𑁄 𑀤𑀼𑀩𑁆𑀪𑀸𑀲𑀺𑀢𑁂𑀦 𑀓𑀸𑀭𑁂𑀢𑀺. 𑀥𑀫𑁆𑀫𑀺𑀓𑀁 𑀧𑀝𑀺𑀜𑁆𑀜𑀸𑀢𑀓𑀭𑀡𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀺𑀓𑀁 𑀳𑁄𑀢𑀺 𑀧𑀝𑀺𑀜𑁆𑀜𑀸𑀢𑀓𑀭𑀡’’𑀦𑁆𑀢𑀺.

𑁫. 𑀬𑁂𑀪𑀼𑀬𑁆𑀬𑀲𑀺𑀓𑀸

𑁨𑁦𑁨. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀲𑀗𑁆𑀖𑀫𑀚𑁆𑀛𑁂 𑀪𑀡𑁆𑀟𑀦𑀚𑀸𑀢𑀸 𑀓𑀮𑀳𑀚𑀸𑀢𑀸 𑀯𑀺𑀯𑀸𑀤𑀸𑀧𑀦𑁆𑀦𑀸 𑀅𑀜𑁆𑀜𑀫𑀜𑁆𑀜𑀁 𑀫𑀼𑀔𑀲𑀢𑁆𑀢𑀻𑀳𑀺 𑀯𑀺𑀢𑀼𑀤𑀦𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀦 𑀲𑀓𑁆𑀓𑁄𑀦𑁆𑀢𑀺 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀼𑀁. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀏𑀯𑀭𑀽𑀧𑀁 𑀅𑀥𑀺𑀓𑀭𑀡𑀁 𑀬𑁂𑀪𑀼𑀬𑁆𑀬𑀲𑀺𑀓𑀸𑀬 𑀯𑀽𑀧𑀲𑀫𑁂𑀢𑀼𑀁. 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀲𑀮𑀸𑀓𑀕𑁆𑀕𑀸𑀳𑀸𑀧𑀓𑁄 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄 𑁋 𑀬𑁄 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀕𑀳𑀺𑀢𑀸𑀕𑀳𑀺𑀢𑀼𑀜𑁆𑀘 𑀚𑀸𑀦𑁂𑀬𑁆𑀬. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄. 𑀧𑀞𑀫𑀁 𑀪𑀺𑀓𑁆𑀔𑀼 𑀬𑀸𑀘𑀺𑀢𑀩𑁆𑀩𑁄, 𑀬𑀸𑀘𑀺𑀢𑁆𑀯𑀸 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁨𑁦𑁩. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀲𑀮𑀸𑀓𑀕𑁆𑀕𑀸𑀳𑀸𑀧𑀓𑀁 𑀲𑀫𑁆𑀫𑀦𑁆𑀦𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀲𑀮𑀸𑀓𑀕𑁆𑀕𑀸𑀳𑀸𑀧𑀓𑀁 𑀲𑀫𑁆𑀫𑀦𑁆𑀦𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀮𑀸𑀓𑀕𑁆𑀕𑀸𑀳𑀸𑀧𑀓𑀲𑁆𑀲 𑀲𑀫𑁆𑀫𑀼𑀢𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀲𑀫𑁆𑀫𑀢𑁄 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀲𑀮𑀸𑀓𑀕𑁆𑀕𑀸𑀳𑀸𑀧𑀓𑁄. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑁨𑁦𑁪. ‘‘𑀤𑀲𑀬𑀺𑀫𑁂, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑀺𑀓𑀸 𑀲𑀮𑀸𑀓𑀕𑁆𑀕𑀸𑀳𑀸, 𑀤𑀲 𑀥𑀫𑁆𑀫𑀺𑀓𑀸 [𑀤𑀲 𑀥𑀫𑁆𑀫𑀺𑀓𑀸 𑀲𑀮𑀸𑀓𑀕𑁆𑀕𑀸𑀳𑀸 (𑀓.)]. 𑀓𑀢𑀫𑁂 𑀤𑀲 𑀅𑀥𑀫𑁆𑀫𑀺𑀓𑀸 𑀲𑀮𑀸𑀓𑀕𑁆𑀕𑀸𑀳𑀸? 𑀑𑀭𑀫𑀢𑁆𑀢𑀓𑀜𑁆𑀘 𑀅𑀥𑀺𑀓𑀭𑀡𑀁 𑀳𑁄𑀢𑀺, 𑀦 𑀘 𑀕𑀢𑀺𑀕𑀢𑀁 𑀳𑁄𑀢𑀺, 𑀦 𑀘 𑀲𑀭𑀺𑀢𑀲𑀸𑀭𑀺𑀢𑀁 𑀳𑁄𑀢𑀺, 𑀚𑀸𑀦𑀸𑀢𑀺 𑀅𑀥𑀫𑁆𑀫𑀯𑀸𑀤𑀻 𑀩𑀳𑀼𑀢𑀭𑀸𑀢𑀺, 𑀅𑀧𑁆𑀧𑁂𑀯 𑀦𑀸𑀫 𑀅𑀥𑀫𑁆𑀫𑀯𑀸𑀤𑀻 𑀩𑀳𑀼𑀢𑀭𑀸 𑀅𑀲𑁆𑀲𑀽𑀢𑀺, 𑀚𑀸𑀦𑀸𑀢𑀺 𑀲𑀗𑁆𑀖𑁄 𑀪𑀺𑀚𑁆𑀚𑀺𑀲𑁆𑀲𑀢𑀻𑀢𑀺, 𑀅𑀧𑁆𑀧𑁂𑀯 𑀦𑀸𑀫 𑀲𑀗𑁆𑀖𑁄 𑀪𑀺𑀚𑁆𑀚𑁂𑀬𑁆𑀬𑀸𑀢𑀺, 𑀅𑀥𑀫𑁆𑀫𑁂𑀦 𑀕𑀡𑁆𑀳𑀦𑁆𑀢𑀺, 𑀯𑀕𑁆𑀕𑀸 𑀕𑀡𑁆𑀳𑀦𑁆𑀢𑀺, 𑀦 𑀘 𑀬𑀣𑀸𑀤𑀺𑀝𑁆𑀞𑀺𑀬𑀸 𑀕𑀡𑁆𑀳𑀦𑁆𑀢𑀺 𑁋 𑀇𑀫𑁂 𑀤𑀲 𑀅𑀥𑀫𑁆𑀫𑀺𑀓𑀸 𑀲𑀮𑀸𑀓𑀕𑁆𑀕𑀸𑀳𑀸.

‘‘𑀓𑀢𑀫𑁂 𑀤𑀲 𑀥𑀫𑁆𑀫𑀺𑀓𑀸 𑀲𑀮𑀸𑀓𑀕𑁆𑀕𑀸𑀳𑀸? 𑀦 𑀘 𑀑𑀭𑀫𑀢𑁆𑀢𑀓𑀁 𑀅𑀥𑀺𑀓𑀭𑀡𑀁 𑀳𑁄𑀢𑀺, 𑀕𑀢𑀺𑀕𑀢𑀜𑁆𑀘 𑀳𑁄𑀢𑀺, 𑀲𑀭𑀺𑀢𑀲𑀸𑀭𑀺𑀢𑀜𑁆𑀘 𑀳𑁄𑀢𑀺, 𑀚𑀸𑀦𑀸𑀢𑀺 𑀥𑀫𑁆𑀫𑀯𑀸𑀤𑀻 𑀩𑀳𑀼𑀢𑀭𑀸𑀢𑀺, 𑀅𑀧𑁆𑀧𑁂𑀯 𑀦𑀸𑀫 𑀥𑀫𑁆𑀫𑀯𑀸𑀤𑀻 𑀩𑀳𑀼𑀢𑀭𑀸 𑀅𑀲𑁆𑀲𑀽𑀢𑀺, 𑀚𑀸𑀦𑀸𑀢𑀺 𑀲𑀗𑁆𑀖𑁄 𑀦 𑀪𑀺𑀚𑁆𑀚𑀺𑀲𑁆𑀲𑀢𑀻𑀢𑀺, 𑀅𑀧𑁆𑀧𑁂𑀯 𑀦𑀸𑀫 𑀲𑀗𑁆𑀖𑁄 𑀦 𑀪𑀺𑀚𑁆𑀚𑁂𑀬𑁆𑀬𑀸𑀢𑀺, 𑀥𑀫𑁆𑀫𑁂𑀦 𑀕𑀡𑁆𑀳𑀦𑁆𑀢𑀺, 𑀲𑀫𑀕𑁆𑀕𑀸 𑀕𑀡𑁆𑀳𑀦𑁆𑀢𑀺, 𑀬𑀣𑀸𑀤𑀺𑀝𑁆𑀞𑀺𑀬𑀸 𑀘 𑀕𑀡𑁆𑀳𑀦𑁆𑀢𑀺 𑁋 𑀇𑀫𑁂 𑀤𑀲 𑀥𑀫𑁆𑀫𑀺𑀓𑀸 𑀲𑀮𑀸𑀓𑀕𑁆𑀕𑀸𑀳𑀸’’𑀢𑀺.

𑁬. 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸

𑁨𑁦𑁫. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀉𑀧𑀯𑀸𑀴𑁄 𑀪𑀺𑀓𑁆𑀔𑀼 𑀲𑀗𑁆𑀖𑀫𑀚𑁆𑀛𑁂 𑀆𑀧𑀢𑁆𑀢𑀺𑀬𑀸 𑀅𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑁄 𑀅𑀯𑀚𑀸𑀦𑀺𑀢𑁆𑀯𑀸 𑀧𑀝𑀺𑀚𑀸𑀦𑀸𑀢𑀺, 𑀧𑀝𑀺𑀚𑀸𑀦𑀺𑀢𑁆𑀯𑀸 𑀅𑀯𑀚𑀸𑀦𑀸𑀢𑀺, 𑀅𑀜𑁆𑀜𑁂𑀦𑀜𑁆𑀜𑀁 𑀧𑀝𑀺𑀘𑀭𑀢𑀺, 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀉𑀧𑀯𑀸𑀴𑁄 𑀪𑀺𑀓𑁆𑀔𑀼 𑀲𑀗𑁆𑀖𑀫𑀚𑁆𑀛𑁂 𑀆𑀧𑀢𑁆𑀢𑀺𑀬𑀸 𑀅𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑁄 𑀅𑀯𑀚𑀸𑀦𑀺𑀢𑁆𑀯𑀸 𑀧𑀝𑀺𑀚𑀸𑀦𑀺𑀲𑁆𑀲𑀢𑀺, 𑀧𑀝𑀺𑀚𑀸𑀦𑀺𑀢𑁆𑀯𑀸 𑀅𑀯𑀚𑀸𑀦𑀺𑀲𑁆𑀲𑀢𑀺, 𑀅𑀜𑁆𑀜𑁂𑀦𑀜𑁆𑀜𑀁 𑀧𑀝𑀺𑀘𑀭𑀺𑀲𑁆𑀲𑀢𑀺, 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀺𑀲𑁆𑀲𑀢𑀻’’𑀢𑀺! 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂…𑀧𑁂… ‘‘𑀲𑀘𑁆𑀘𑀁 𑀪𑀕𑀯𑀸’’𑀢𑀺…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀉𑀧𑀯𑀸𑀴𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀁 𑀓𑀭𑁄𑀢𑀼. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀓𑀸𑀢𑀩𑁆𑀩𑀁. 𑀧𑀞𑀫𑀁 𑀉𑀧𑀯𑀸𑀴𑁄 𑀪𑀺𑀓𑁆𑀔𑀼 𑀘𑁄𑀤𑁂𑀢𑀩𑁆𑀩𑁄, 𑀘𑁄𑀤𑁂𑀢𑁆𑀯𑀸 𑀲𑀸𑀭𑁂𑀢𑀩𑁆𑀩𑁄, 𑀲𑀸𑀭𑁂𑀢𑁆𑀯𑀸 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑀩𑁆𑀩𑁄, 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑁆𑀯𑀸 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁨𑁦𑁬. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀉𑀧𑀯𑀸𑀴𑁄 𑀪𑀺𑀓𑁆𑀔𑀼 𑀲𑀗𑁆𑀖𑀫𑀚𑁆𑀛𑁂 𑀆𑀧𑀢𑁆𑀢𑀺𑀬𑀸 𑀅𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑁄 𑀅𑀯𑀚𑀸𑀦𑀺𑀢𑁆𑀯𑀸 𑀧𑀝𑀺𑀚𑀸𑀦𑀸𑀢𑀺, 𑀧𑀝𑀺𑀚𑀸𑀦𑀺𑀢𑁆𑀯𑀸 𑀅𑀯𑀚𑀸𑀦𑀸𑀢𑀺, 𑀅𑀜𑁆𑀜𑁂𑀦𑀜𑁆𑀜𑀁 𑀧𑀝𑀺𑀘𑀭𑀢𑀺, 𑀲𑀫𑁆𑀧𑀚𑀸𑀦𑀫𑀼𑀲𑀸 ‘𑀪𑀸𑀲𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀉𑀧𑀯𑀸𑀴𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀉𑀧𑀯𑀸𑀴𑁄 𑀪𑀺𑀓𑁆𑀔𑀼 𑀲𑀗𑁆𑀖𑀫𑀚𑁆𑀛𑁂 𑀆𑀧𑀢𑁆𑀢𑀺𑀬𑀸 𑀅𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑁄 𑀅𑀯𑀚𑀸𑀦𑀺𑀢𑁆𑀯𑀸 𑀧𑀝𑀺𑀚𑀸𑀦𑀸𑀢𑀺, 𑀧𑀝𑀺𑀚𑀸𑀦𑀺𑀢𑁆𑀯𑀸 𑀅𑀯𑀚𑀸𑀦𑀸𑀢𑀺, 𑀅𑀜𑁆𑀜𑁂𑀦𑀜𑁆𑀜𑀁 𑀧𑀝𑀺𑀘𑀭𑀢𑀺, 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀢𑀺. 𑀲𑀗𑁆𑀖𑁄 𑀉𑀧𑀯𑀸𑀴𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀁 𑀓𑀭𑁄𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀉𑀧𑀯𑀸𑀴𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀲𑁆𑀲 𑀓𑀭𑀡𑀁, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂….

‘‘𑀓𑀢𑀁 𑀲𑀗𑁆𑀖𑁂𑀦 𑀉𑀧𑀯𑀸𑀴𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀁. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑁨𑁦𑁭. ‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀺𑀓𑀸𑀦𑀺 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀲𑁆𑀲 𑀓𑀭𑀡𑀸𑀦𑀺. 𑀅𑀲𑀼𑀘𑀺 𑀘 𑀳𑁄𑀢𑀺, 𑀅𑀮𑀚𑁆𑀚𑀻 𑀘, 𑀲𑀸𑀦𑀼𑀯𑀸𑀤𑁄 𑀘, 𑀢𑀲𑁆𑀲 𑀲𑀗𑁆𑀖𑁄 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀁 𑀓𑀭𑁄𑀢𑀺 𑀥𑀫𑁆𑀫𑁂𑀦, 𑀲𑀫𑀕𑁆𑀕𑁂𑀦 𑁋 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀥𑀫𑁆𑀫𑀺𑀓𑀸𑀦𑀺 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀲𑁆𑀲 𑀓𑀭𑀡𑀸𑀦𑀺.

𑀅𑀥𑀫𑁆𑀫𑀓𑀫𑁆𑀫𑀤𑁆𑀯𑀸𑀤𑀲𑀓𑀁

𑁨𑁦𑁮. ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘. 𑀅𑀲𑀫𑁆𑀫𑀼𑀔𑀸 𑀓𑀢𑀁 𑀳𑁄𑀢𑀺, 𑀅𑀧𑁆𑀧𑀝𑀺𑀧𑀼𑀘𑁆𑀙𑀸𑀓𑀢𑀁 𑀳𑁄𑀢𑀺, 𑀅𑀧𑁆𑀧𑀝𑀺𑀜𑁆𑀜𑀸𑀬 𑀓𑀢𑀁 𑀳𑁄𑀢𑀺…𑀧𑁂… 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘.

𑀥𑀫𑁆𑀫𑀓𑀫𑁆𑀫𑀤𑁆𑀯𑀸𑀤𑀲𑀓𑀁

𑁨𑁦𑁯. ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘. 𑀲𑀫𑁆𑀫𑀼𑀔𑀸 𑀓𑀢𑀁 𑀳𑁄𑀢𑀺, 𑀧𑀝𑀺𑀧𑀼𑀘𑁆𑀙𑀸𑀓𑀢𑀁 𑀳𑁄𑀢𑀺, 𑀧𑀝𑀺𑀜𑁆𑀜𑀸𑀬 𑀓𑀢𑀁 𑀳𑁄𑀢𑀺…𑀧𑁂… 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘.

𑀆𑀓𑀗𑁆𑀔𑀫𑀸𑀦𑀙𑀓𑁆𑀓𑀁

𑁨𑁧𑁦. ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀪𑀡𑁆𑀟𑀦𑀓𑀸𑀭𑀓𑁄 𑀳𑁄𑀢𑀺 𑀓𑀮𑀳𑀓𑀸𑀭𑀓𑁄 𑀯𑀺𑀯𑀸𑀤𑀓𑀸𑀭𑀓𑁄 𑀪𑀲𑁆𑀲𑀓𑀸𑀭𑀓𑁄 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄; 𑀩𑀸𑀮𑁄 𑀳𑁄𑀢𑀺 𑀅𑀩𑁆𑀬𑀢𑁆𑀢𑁄 𑀆𑀧𑀢𑁆𑀢𑀺𑀩𑀳𑀼𑀮𑁄 𑀅𑀦𑀧𑀤𑀸𑀦𑁄; 𑀕𑀺𑀳𑀺𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀅𑀦𑀦𑀼𑀮𑁄𑀫𑀺𑀓𑁂𑀳𑀺 𑀕𑀺𑀳𑀺𑀲𑀁𑀲𑀕𑁆𑀕𑁂𑀳𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀅𑀥𑀺𑀲𑀻𑀮𑁂 𑀲𑀻𑀮𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀅𑀚𑁆𑀛𑀸𑀘𑀸𑀭𑁂 𑀆𑀘𑀸𑀭𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀅𑀢𑀺𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀯𑀺𑀧𑀦𑁆𑀦𑁄 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂…𑀧𑁂….

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂…𑀧𑁂… 𑀩𑀼𑀤𑁆𑀥𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀥𑀫𑁆𑀫𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀲𑀗𑁆𑀖𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀢𑀺𑀡𑁆𑀡𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀏𑀓𑁄 𑀪𑀡𑁆𑀟𑀦𑀓𑀸𑀭𑀓𑁄 𑀳𑁄𑀢𑀺…𑀧𑁂… 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄; 𑀏𑀓𑁄 𑀩𑀸𑀮𑁄 𑀳𑁄𑀢𑀺 𑀅𑀩𑁆𑀬𑀢𑁆𑀢𑁄 𑀆𑀧𑀢𑁆𑀢𑀺𑀩𑀳𑀼𑀮𑁄 𑀅𑀦𑀧𑀤𑀸𑀦𑁄; 𑀏𑀓𑁄 𑀕𑀺𑀳𑀺𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀅𑀦𑀦𑀼𑀮𑁄𑀫𑀺𑀓𑁂𑀳𑀺 𑀕𑀺𑀳𑀺𑀲𑀁𑀲𑀕𑁆𑀕𑁂𑀳𑀺 𑁋 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀲𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀏𑀓𑁄 𑀅𑀥𑀺𑀲𑀻𑀮𑁂 𑀲𑀻𑀮𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀏𑀓𑁄 𑀅𑀚𑁆𑀛𑀸𑀘𑀸𑀭𑁂 𑀆𑀘𑀸𑀭𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀏𑀓𑁄 𑀅𑀢𑀺𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀯𑀺𑀧𑀦𑁆𑀦𑁄 𑀳𑁄𑀢𑀺 𑁋 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂…𑀧𑁂….

‘‘𑀅𑀧𑀭𑁂𑀲𑀫𑁆𑀧𑀺, 𑀪𑀺𑀓𑁆𑀔𑀯𑁂…𑀧𑁂… 𑀏𑀓𑁄 𑀩𑀼𑀤𑁆𑀥𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀏𑀓𑁄 𑀥𑀫𑁆𑀫𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀏𑀓𑁄 𑀲𑀗𑁆𑀖𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺 𑁋 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀁 𑀓𑀭𑁂𑀬𑁆𑀬.

𑀅𑀝𑁆𑀞𑀸𑀭𑀲𑀯𑀢𑁆𑀢𑀁

𑁨𑁧𑁧. ‘‘𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀓𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁. 𑀢𑀢𑁆𑀭𑀸𑀬𑀁 𑀲𑀫𑁆𑀫𑀸𑀯𑀢𑁆𑀢𑀦𑀸 𑁋

𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄, 𑀦 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑀫𑁆𑀫𑀼𑀢𑀺 𑀲𑀸𑀤𑀺𑀢𑀩𑁆𑀩𑀸, 𑀲𑀫𑁆𑀫𑀢𑁂𑀦𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀦 𑀑𑀯𑀤𑀺𑀢𑀩𑁆𑀩𑀸…𑀧𑁂… 𑀦 𑀪𑀺𑀓𑁆𑀔𑀽𑀳𑀺 𑀲𑀫𑁆𑀧𑀬𑁄𑀚𑁂𑀢𑀩𑁆𑀩’’𑀦𑁆𑀢𑀺. 𑀅𑀣 𑀔𑁄 𑀲𑀗𑁆𑀖𑁄 𑀉𑀧𑀯𑀸𑀴𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀁 𑀅𑀓𑀸𑀲𑀺.

𑁭. 𑀢𑀺𑀡𑀯𑀢𑁆𑀣𑀸𑀭𑀓𑀁

𑁨𑁧𑁨. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽𑀦𑀁 𑀪𑀡𑁆𑀟𑀦𑀚𑀸𑀢𑀸𑀦𑀁 𑀓𑀮𑀳𑀚𑀸𑀢𑀸𑀦𑀁 𑀯𑀺𑀯𑀸𑀤𑀸𑀧𑀦𑁆𑀦𑀸𑀦𑀁 𑀯𑀺𑀳𑀭𑀢𑀁 𑀩𑀳𑀼𑀁 𑀅𑀲𑁆𑀲𑀸𑀫𑀡𑀓𑀁 𑀅𑀚𑁆𑀛𑀸𑀘𑀺𑀡𑁆𑀡𑀁 𑀳𑁄𑀢𑀺 𑀪𑀸𑀲𑀺𑀢𑀧𑀭𑀺𑀓𑁆𑀓𑀦𑁆𑀢𑀁. 𑀅𑀣 𑀔𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀅𑀫𑁆𑀳𑀸𑀓𑀁 𑀔𑁄 𑀪𑀡𑁆𑀟𑀦𑀚𑀸𑀢𑀸𑀦𑀁 𑀓𑀮𑀳𑀚𑀸𑀢𑀸𑀦𑀁 𑀯𑀺𑀯𑀸𑀤𑀸𑀧𑀦𑁆𑀦𑀸𑀦𑀁 𑀯𑀺𑀳𑀭𑀢𑀁 𑀩𑀳𑀼𑀁 𑀅𑀲𑁆𑀲𑀸𑀫𑀡𑀓𑀁 𑀅𑀚𑁆𑀛𑀸𑀘𑀺𑀡𑁆𑀡𑀁 𑀪𑀸𑀲𑀺𑀢𑀧𑀭𑀺𑀓𑁆𑀓𑀦𑁆𑀢𑀁. 𑀲𑀘𑁂 𑀫𑀬𑀁 𑀇𑀫𑀸𑀳𑀺 𑀆𑀧𑀢𑁆𑀢𑀻𑀳𑀺 𑀅𑀜𑁆𑀜𑀫𑀜𑁆𑀜𑀁 𑀓𑀸𑀭𑁂𑀲𑁆𑀲𑀸𑀫, 𑀲𑀺𑀬𑀸𑀧𑀺 𑀢𑀁 𑀅𑀥𑀺𑀓𑀭𑀡𑀁 𑀓𑀓𑁆𑀔𑀴𑀢𑁆𑀢𑀸𑀬 𑀯𑀸𑀴𑀢𑁆𑀢𑀸𑀬 [𑀓𑀓𑁆𑀔𑀴𑀢𑀸𑀬 𑀯𑀸𑀴𑀢𑀸𑀬 (𑀲𑁆𑀬𑀸. 𑀓𑀁.)] 𑀪𑁂𑀤𑀸𑀬 𑀲𑀁𑀯𑀢𑁆𑀢𑁂𑀬𑁆𑀬. 𑀓𑀣𑀁 𑀦𑀼 𑀔𑁄 𑀅𑀫𑁆𑀳𑁂𑀳𑀺 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀪𑀡𑁆𑀟𑀦𑀚𑀸𑀢𑀸𑀦𑀁 𑀓𑀮𑀳𑀚𑀸𑀢𑀸𑀦𑀁 𑀯𑀺𑀯𑀸𑀤𑀸𑀧𑀦𑁆𑀦𑀸𑀦𑀁 𑀯𑀺𑀳𑀭𑀢𑀁 𑀩𑀳𑀼𑀁 𑀅𑀲𑁆𑀲𑀸𑀫𑀡𑀓𑀁 𑀅𑀚𑁆𑀛𑀸𑀘𑀺𑀡𑁆𑀡𑀁 𑀳𑁄𑀢𑀺 𑀪𑀸𑀲𑀺𑀢𑀧𑀭𑀺𑀓𑁆𑀓𑀦𑁆𑀢𑀁. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 [𑀢𑀢𑁆𑀭 𑀘𑁂 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀽𑀦𑀁 (𑀲𑁆𑀬𑀸.)] 𑀏𑀯𑀁 𑀳𑁄𑀢𑀺 𑁋 ‘𑀅𑀫𑁆𑀳𑀸𑀓𑀁 𑀔𑁄 𑀪𑀡𑁆𑀟𑀦𑀚𑀸𑀢𑀸𑀦𑀁 𑀓𑀮𑀳𑀚𑀸𑀢𑀸𑀦𑀁 𑀯𑀺𑀯𑀸𑀤𑀸𑀧𑀦𑁆𑀦𑀸𑀦𑀁 𑀯𑀺𑀳𑀭𑀢𑀁 𑀩𑀳𑀼𑀁 𑀅𑀲𑁆𑀲𑀸𑀫𑀡𑀓𑀁 𑀅𑀚𑁆𑀛𑀸𑀘𑀺𑀡𑁆𑀡𑀁 𑀪𑀸𑀲𑀺𑀢𑀧𑀭𑀺𑀓𑁆𑀓𑀦𑁆𑀢𑀁; 𑀲𑀘𑁂 𑀫𑀬𑀁 𑀇𑀫𑀸𑀳𑀺 𑀆𑀧𑀢𑁆𑀢𑀻𑀳𑀺 𑀅𑀜𑁆𑀜𑀫𑀜𑁆𑀜𑀁 𑀓𑀸𑀭𑁂𑀲𑁆𑀲𑀸𑀫, 𑀲𑀺𑀬𑀸𑀧𑀺 𑀢𑀁 𑀅𑀥𑀺𑀓𑀭𑀡𑀁 𑀓𑀓𑁆𑀔𑀴𑀢𑁆𑀢𑀸𑀬 𑀯𑀸𑀴𑀢𑁆𑀢𑀸𑀬 𑀪𑁂𑀤𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀸’𑀢𑀺, 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀏𑀯𑀭𑀽𑀧𑀁 𑀅𑀥𑀺𑀓𑀭𑀡𑀁 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀯𑀽𑀧𑀲𑀫𑁂𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀯𑀽𑀧𑀲𑀫𑁂𑀢𑀩𑁆𑀩𑀁. 𑀲𑀩𑁆𑀩𑁂𑀳𑁂𑀯 𑀏𑀓𑀚𑁆𑀛𑀁 𑀲𑀦𑁆𑀦𑀺𑀧𑀢𑀺𑀢𑀩𑁆𑀩𑀁, 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀫𑁆𑀳𑀸𑀓𑀁 𑀪𑀡𑁆𑀟𑀦𑀚𑀸𑀢𑀸𑀦𑀁 𑀓𑀮𑀳𑀚𑀸𑀢𑀸𑀦𑀁 𑀯𑀺𑀯𑀸𑀤𑀸𑀧𑀦𑁆𑀦𑀸𑀦𑀁 𑀯𑀺𑀳𑀭𑀢𑀁 𑀩𑀳𑀼𑀁 𑀅𑀲𑁆𑀲𑀸𑀫𑀡𑀓𑀁 𑀅𑀚𑁆𑀛𑀸𑀘𑀺𑀡𑁆𑀡𑀁 𑀪𑀸𑀲𑀺𑀢𑀧𑀭𑀺𑀓𑁆𑀓𑀦𑁆𑀢𑀁. 𑀲𑀘𑁂 𑀫𑀬𑀁 𑀇𑀫𑀸𑀳𑀺 𑀆𑀧𑀢𑁆𑀢𑀻𑀳𑀺 𑀅𑀜𑁆𑀜𑀫𑀜𑁆𑀜𑀁 𑀓𑀸𑀭𑁂𑀲𑁆𑀲𑀸𑀫, 𑀲𑀺𑀬𑀸𑀧𑀺 𑀢𑀁 𑀅𑀥𑀺𑀓𑀭𑀡𑀁 𑀓𑀓𑁆𑀔𑀴𑀢𑁆𑀢𑀸𑀬 𑀯𑀸𑀴𑀢𑁆𑀢𑀸𑀬 𑀪𑁂𑀤𑀸𑀬 𑀲𑀁𑀯𑀢𑁆𑀢𑁂𑀬𑁆𑀬. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀫𑀁 𑀅𑀥𑀺𑀓𑀭𑀡𑀁 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀯𑀽𑀧𑀲𑀫𑁂𑀬𑁆𑀬, 𑀞𑀧𑁂𑀢𑁆𑀯𑀸 𑀣𑀼𑀮𑁆𑀮𑀯𑀚𑁆𑀚𑀁, 𑀞𑀧𑁂𑀢𑁆𑀯𑀸 𑀕𑀺𑀳𑀺𑀧𑁆𑀧𑀝𑀺𑀲𑀁𑀬𑀼𑀢𑁆𑀢’’𑀦𑁆𑀢𑀺. ‘‘𑀏𑀓𑀢𑁄𑀧𑀓𑁆𑀔𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀓𑁄 𑀧𑀓𑁆𑀔𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀦𑁆𑀢𑀼 𑀫𑁂 𑀆𑀬𑀲𑁆𑀫𑀦𑁆𑀢𑀸. 𑀅𑀫𑁆𑀳𑀸𑀓𑀁 𑀪𑀡𑁆𑀟𑀦𑀚𑀸𑀢𑀸𑀦𑀁 𑀓𑀮𑀳𑀚𑀸𑀢𑀸𑀦𑀁 𑀯𑀺𑀯𑀸𑀤𑀸𑀧𑀦𑁆𑀦𑀸𑀦𑀁 𑀯𑀺𑀳𑀭𑀢𑀁 𑀩𑀳𑀼𑀁 𑀅𑀲𑁆𑀲𑀸𑀫𑀡𑀓𑀁 𑀅𑀚𑁆𑀛𑀸𑀘𑀺𑀡𑁆𑀡𑀁 𑀪𑀸𑀲𑀺𑀢𑀧𑀭𑀺𑀓𑁆𑀓𑀦𑁆𑀢𑀁. 𑀲𑀘𑁂 𑀫𑀬𑀁 𑀇𑀫𑀸𑀳𑀺 𑀆𑀧𑀢𑁆𑀢𑀻𑀳𑀺 𑀅𑀜𑁆𑀜𑀫𑀜𑁆𑀜𑀁 𑀓𑀸𑀭𑁂𑀲𑁆𑀲𑀸𑀫, 𑀲𑀺𑀬𑀸𑀧𑀺 𑀢𑀁 𑀅𑀥𑀺𑀓𑀭𑀡𑀁 𑀓𑀓𑁆𑀔𑀴𑀢𑁆𑀢𑀸𑀬 𑀯𑀸𑀴𑀢𑁆𑀢𑀸𑀬 𑀪𑁂𑀤𑀸𑀬 𑀲𑀁𑀯𑀢𑁆𑀢𑁂𑀬𑁆𑀬. 𑀬𑀤𑀸𑀬𑀲𑁆𑀫𑀦𑁆𑀢𑀸𑀦𑀁 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀬𑀸 𑀘𑁂𑀯 𑀆𑀬𑀲𑁆𑀫𑀦𑁆𑀢𑀸𑀦𑀁 𑀆𑀧𑀢𑁆𑀢𑀺, 𑀬𑀸 𑀘 𑀅𑀢𑁆𑀢𑀦𑁄 𑀆𑀧𑀢𑁆𑀢𑀺, 𑀆𑀬𑀲𑁆𑀫𑀦𑁆𑀢𑀸𑀦𑀜𑁆𑀘𑁂𑀯 𑀅𑀢𑁆𑀣𑀸𑀬, 𑀅𑀢𑁆𑀢𑀦𑁄 𑀘 𑀅𑀢𑁆𑀣𑀸𑀬, 𑀲𑀗𑁆𑀖𑀫𑀚𑁆𑀛𑁂 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀤𑁂𑀲𑁂𑀬𑁆𑀬𑀁, 𑀞𑀧𑁂𑀢𑁆𑀯𑀸 𑀣𑀼𑀮𑁆𑀮𑀯𑀚𑁆𑀚𑀁, 𑀞𑀧𑁂𑀢𑁆𑀯𑀸 𑀕𑀺𑀳𑀺𑀧𑁆𑀧𑀝𑀺𑀲𑀁𑀬𑀼𑀢𑁆𑀢’’𑀦𑁆𑀢𑀺.

‘‘𑀅𑀣𑀸𑀧𑀭𑁂𑀲𑀁 𑀏𑀓𑀢𑁄𑀧𑀓𑁆𑀔𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀓𑁄 𑀧𑀓𑁆𑀔𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀦𑁆𑀢𑀼 𑀫𑁂 𑀆𑀬𑀲𑁆𑀫𑀦𑁆𑀢𑀸. 𑀅𑀫𑁆𑀳𑀸𑀓𑀁 𑀪𑀡𑁆𑀟𑀦𑀚𑀸𑀢𑀸𑀦𑀁 𑀓𑀮𑀳𑀚𑀸𑀢𑀸𑀦𑀁 𑀯𑀺𑀯𑀸𑀤𑀸𑀧𑀦𑁆𑀦𑀸𑀦𑀁 𑀯𑀺𑀳𑀭𑀢𑀁 𑀩𑀳𑀼𑀁 𑀅𑀲𑁆𑀲𑀸𑀫𑀡𑀓𑀁 𑀅𑀚𑁆𑀛𑀸𑀘𑀺𑀡𑁆𑀡𑀁 𑀪𑀸𑀲𑀺𑀢𑀧𑀭𑀺𑀓𑁆𑀓𑀦𑁆𑀢𑀁. 𑀲𑀘𑁂 𑀫𑀬𑀁 𑀇𑀫𑀸𑀳𑀺 𑀆𑀧𑀢𑁆𑀢𑀻𑀳𑀺 𑀅𑀜𑁆𑀜𑀫𑀜𑁆𑀜𑀁 𑀓𑀸𑀭𑁂𑀲𑁆𑀲𑀸𑀫, 𑀲𑀺𑀬𑀸𑀧𑀺 𑀢𑀁 𑀅𑀥𑀺𑀓𑀭𑀡𑀁 𑀓𑀓𑁆𑀔𑀴𑀢𑁆𑀢𑀸𑀬 𑀯𑀸𑀴𑀢𑁆𑀢𑀸𑀬 𑀪𑁂𑀤𑀸𑀬 𑀲𑀁𑀯𑀢𑁆𑀢𑁂𑀬𑁆𑀬. 𑀬𑀤𑀸𑀬𑀲𑁆𑀫𑀦𑁆𑀢𑀸𑀦𑀁 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀬𑀸 𑀘𑁂𑀯 𑀆𑀬𑀲𑁆𑀫𑀦𑁆𑀢𑀸𑀦𑀁 𑀆𑀧𑀢𑁆𑀢𑀺, 𑀬𑀸 𑀘 𑀅𑀢𑁆𑀢𑀦𑁄 𑀆𑀧𑀢𑁆𑀢𑀺, 𑀆𑀬𑀲𑁆𑀫𑀦𑁆𑀢𑀸𑀦𑀜𑁆𑀘𑁂𑀯 𑀅𑀢𑁆𑀣𑀸𑀬, 𑀅𑀢𑁆𑀢𑀦𑁄 𑀘 𑀅𑀢𑁆𑀣𑀸𑀬, 𑀲𑀗𑁆𑀖𑀫𑀚𑁆𑀛𑁂 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀤𑁂𑀲𑁂𑀬𑁆𑀬𑀁, 𑀞𑀧𑁂𑀢𑁆𑀯𑀸 𑀣𑀼𑀮𑁆𑀮𑀯𑀚𑁆𑀚𑀁, 𑀞𑀧𑁂𑀢𑁆𑀯𑀸 𑀕𑀺𑀳𑀺𑀧𑁆𑀧𑀝𑀺𑀲𑀁𑀬𑀼𑀢𑁆𑀢’’𑀦𑁆𑀢𑀺.

𑁨𑁧𑁩. ‘‘𑀅𑀣𑀸𑀧𑀭𑁂𑀲𑀁 𑀏𑀓𑀢𑁄𑀧𑀓𑁆𑀔𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀫𑁆𑀳𑀸𑀓𑀁 𑀪𑀡𑁆𑀟𑀦𑀚𑀸𑀢𑀸𑀦𑀁 𑀓𑀮𑀳𑀚𑀸𑀢𑀸𑀦𑀁 𑀯𑀺𑀯𑀸𑀤𑀸𑀧𑀦𑁆𑀦𑀸𑀦𑀁 𑀯𑀺𑀳𑀭𑀢𑀁 𑀩𑀳𑀼𑀁 𑀅𑀲𑁆𑀲𑀸𑀫𑀡𑀓𑀁 𑀅𑀚𑁆𑀛𑀸𑀘𑀺𑀡𑁆𑀡𑀁 𑀪𑀸𑀲𑀺𑀢𑀧𑀭𑀺𑀓𑁆𑀓𑀦𑁆𑀢𑀁. 𑀲𑀘𑁂 𑀫𑀬𑀁 𑀇𑀫𑀸𑀳𑀺 𑀆𑀧𑀢𑁆𑀢𑀻𑀳𑀺 𑀅𑀜𑁆𑀜𑀫𑀜𑁆𑀜𑀁 𑀓𑀸𑀭𑁂𑀲𑁆𑀲𑀸𑀫, 𑀲𑀺𑀬𑀸𑀧𑀺 𑀢𑀁 𑀅𑀥𑀺𑀓𑀭𑀡𑀁 𑀓𑀓𑁆𑀔𑀴𑀢𑁆𑀢𑀸𑀬 𑀯𑀸𑀴𑀢𑁆𑀢𑀸𑀬 𑀪𑁂𑀤𑀸𑀬 𑀲𑀁𑀯𑀢𑁆𑀢𑁂𑀬𑁆𑀬. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀬𑀸 𑀘𑁂𑀯 𑀇𑀫𑁂𑀲𑀁 𑀆𑀬𑀲𑁆𑀫𑀦𑁆𑀢𑀸𑀦𑀁 𑀆𑀧𑀢𑁆𑀢𑀺, 𑀬𑀸 𑀘 𑀅𑀢𑁆𑀢𑀦𑁄 𑀆𑀧𑀢𑁆𑀢𑀺, 𑀇𑀫𑁂𑀲𑀜𑁆𑀘𑁂𑀯 𑀆𑀬𑀲𑁆𑀫𑀦𑁆𑀢𑀸𑀦𑀁 𑀅𑀢𑁆𑀣𑀸𑀬, 𑀅𑀢𑁆𑀢𑀦𑁄 𑀘 𑀅𑀢𑁆𑀣𑀸𑀬, 𑀲𑀗𑁆𑀖𑀫𑀚𑁆𑀛𑁂 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀤𑁂𑀲𑁂𑀬𑁆𑀬𑀁, 𑀞𑀧𑁂𑀢𑁆𑀯𑀸 𑀣𑀼𑀮𑁆𑀮𑀯𑀚𑁆𑀚𑀁, 𑀞𑀧𑁂𑀢𑁆𑀯𑀸 𑀕𑀺𑀳𑀺𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀁. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀫𑁆𑀳𑀸𑀓𑀁 𑀪𑀡𑁆𑀟𑀦𑀚𑀸𑀢𑀸𑀦𑀁 𑀓𑀮𑀳𑀚𑀸𑀢𑀸𑀦𑀁 𑀯𑀺𑀯𑀸𑀤𑀸𑀧𑀦𑁆𑀦𑀸𑀦𑀁 𑀯𑀺𑀳𑀭𑀢𑀁 𑀩𑀳𑀼𑀁 𑀅𑀲𑁆𑀲𑀸𑀫𑀡𑀓𑀁 𑀅𑀚𑁆𑀛𑀸𑀘𑀺𑀡𑁆𑀡𑀁 𑀪𑀸𑀲𑀺𑀢𑀧𑀭𑀺𑀓𑁆𑀓𑀦𑁆𑀢𑀁. 𑀲𑀘𑁂 𑀫𑀬𑀁 𑀇𑀫𑀸𑀳𑀺 𑀆𑀧𑀢𑁆𑀢𑀻𑀳𑀺 𑀅𑀜𑁆𑀜𑀫𑀜𑁆𑀜𑀁 𑀓𑀸𑀭𑁂𑀲𑁆𑀲𑀸𑀫, 𑀲𑀺𑀬𑀸𑀧𑀺 𑀢𑀁 𑀅𑀥𑀺𑀓𑀭𑀡𑀁 𑀓𑀓𑁆𑀔𑀴𑀢𑁆𑀢𑀸𑀬 𑀯𑀸𑀴𑀢𑁆𑀢𑀸𑀬 𑀪𑁂𑀤𑀸𑀬 𑀲𑀁𑀯𑀢𑁆𑀢𑁂𑀬𑁆𑀬. 𑀅𑀳𑀁 𑀬𑀸 𑀘𑁂𑀯 𑀇𑀫𑁂𑀲𑀁 𑀆𑀬𑀲𑁆𑀫𑀦𑁆𑀢𑀸𑀦𑀁 𑀆𑀧𑀢𑁆𑀢𑀺, 𑀬𑀸 𑀘 𑀅𑀢𑁆𑀢𑀦𑁄 𑀆𑀧𑀢𑁆𑀢𑀺, 𑀇𑀫𑁂𑀲𑀜𑁆𑀘𑁂𑀯 𑀆𑀬𑀲𑁆𑀫𑀦𑁆𑀢𑀸𑀦𑀁 𑀅𑀢𑁆𑀣𑀸𑀬, 𑀅𑀢𑁆𑀢𑀦𑁄 𑀘 𑀅𑀢𑁆𑀣𑀸𑀬, 𑀲𑀗𑁆𑀖𑀫𑀚𑁆𑀛𑁂 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀤𑁂𑀲𑁂𑀫𑀺, 𑀞𑀧𑁂𑀢𑁆𑀯𑀸 𑀣𑀼𑀮𑁆𑀮𑀯𑀚𑁆𑀚𑀁, 𑀞𑀧𑁂𑀢𑁆𑀯𑀸 𑀕𑀺𑀳𑀺𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀁. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀅𑀫𑁆𑀳𑀸𑀓𑀁 𑀇𑀫𑀸𑀲𑀁 𑀆𑀧𑀢𑁆𑀢𑀻𑀦𑀁 𑀲𑀗𑁆𑀖𑀫𑀚𑁆𑀛𑁂 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀤𑁂𑀲𑀦𑀸, 𑀞𑀧𑁂𑀢𑁆𑀯𑀸 𑀣𑀼𑀮𑁆𑀮𑀯𑀚𑁆𑀚𑀁, 𑀞𑀧𑁂𑀢𑁆𑀯𑀸 𑀕𑀺𑀳𑀺𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀁, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑁂𑀲𑀺𑀢𑀸 𑀅𑀫𑁆𑀳𑀸𑀓𑀁 𑀇𑀫𑀸 𑀆𑀧𑀢𑁆𑀢𑀺𑀬𑁄 𑀲𑀗𑁆𑀖𑀫𑀚𑁆𑀛𑁂 𑀢𑀺𑀡𑀯𑀢𑁆𑀣𑀸𑀭𑀓𑁂𑀦, 𑀞𑀧𑁂𑀢𑁆𑀯𑀸 𑀣𑀼𑀮𑁆𑀮𑀯𑀚𑁆𑀚𑀁, 𑀞𑀧𑁂𑀢𑁆𑀯𑀸 𑀕𑀺𑀳𑀺𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀁. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑁨𑁧𑁪. ‘‘𑀅𑀣𑀸𑀧𑀭𑁂𑀲𑀁 𑀏𑀓𑀢𑁄𑀧𑀓𑁆𑀔𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀫𑁆𑀳𑀸𑀓𑀁 𑀪𑀡𑁆𑀟𑀦𑀚𑀸𑀢𑀸𑀦𑀁 𑀓𑀮𑀳𑀚𑀸𑀢𑀸𑀦𑀁 𑀯𑀺𑀯𑀸𑀤𑀸𑀧𑀦𑁆𑀦𑀸𑀦𑀁 𑀯𑀺𑀳𑀭𑀢𑀁 𑀩𑀳𑀼𑀁 𑀅𑀲𑁆𑀲𑀸𑀫𑀡𑀓𑀁 𑀅𑀚𑁆𑀛𑀸𑀘𑀺𑀡𑁆𑀡𑀁 𑀪𑀸𑀲𑀺𑀢𑀧𑀭𑀺𑀓𑁆𑀓𑀦𑁆𑀢𑀁. 𑀲𑀘𑁂 𑀫𑀬𑀁 𑀇𑀫𑀸𑀳𑀺 𑀆𑀧𑀢𑁆𑀢𑀻𑀳𑀺 𑀅𑀜𑁆𑀜𑀫𑀜𑁆𑀜𑀁 𑀓𑀸𑀭𑁂𑀲𑁆𑀲𑀸𑀫, 𑀲𑀺𑀬𑀸𑀧𑀺 𑀢𑀁 𑀅𑀥𑀺𑀓𑀭𑀡𑀁 𑀓𑀓𑁆𑀔𑀴𑀢𑁆𑀢𑀸𑀬 𑀯𑀸𑀴𑀢𑁆𑀢𑀸𑀬 𑀪𑁂𑀤𑀸𑀬 𑀲𑀁𑀯𑀢𑁆𑀢𑁂𑀬𑁆𑀬. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀬𑀸 𑀘𑁂𑀯 𑀇𑀫𑁂𑀲𑀁 𑀆𑀬𑀲𑁆𑀫𑀦𑁆𑀢𑀸𑀦𑀁 𑀆𑀧𑀢𑁆𑀢𑀺, 𑀬𑀸 𑀘 𑀅𑀢𑁆𑀢𑀦𑁄 𑀆𑀧𑀢𑁆𑀢𑀺, 𑀇𑀫𑁂𑀲𑀜𑁆𑀘𑁂𑀯 𑀆𑀬𑀲𑁆𑀫𑀦𑁆𑀢𑀸𑀦𑀁 𑀅𑀢𑁆𑀣𑀸𑀬, 𑀅𑀢𑁆𑀢𑀦𑁄 𑀘 𑀅𑀢𑁆𑀣𑀸𑀬, 𑀲𑀗𑁆𑀖𑀫𑀚𑁆𑀛𑁂 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀤𑁂𑀲𑁂𑀬𑁆𑀬𑀁, 𑀞𑀧𑁂𑀢𑁆𑀯𑀸 𑀣𑀼𑀮𑁆𑀮𑀯𑀚𑁆𑀚𑀁, 𑀞𑀧𑁂𑀢𑁆𑀯𑀸 𑀕𑀺𑀳𑀺𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀁. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀫𑁆𑀳𑀸𑀓𑀁 𑀪𑀡𑁆𑀟𑀦𑀚𑀸𑀢𑀸𑀦𑀁 𑀓𑀮𑀳𑀚𑀸𑀢𑀸𑀦𑀁 𑀯𑀺𑀯𑀸𑀤𑀸𑀧𑀦𑁆𑀦𑀸𑀦𑀁 𑀯𑀺𑀳𑀭𑀢𑀁 𑀩𑀳𑀼𑀁 𑀅𑀲𑁆𑀲𑀸𑀫𑀡𑀓𑀁 𑀅𑀚𑁆𑀛𑀸𑀘𑀺𑀡𑁆𑀡𑀁 𑀪𑀸𑀲𑀺𑀢𑀧𑀭𑀺𑀓𑁆𑀓𑀦𑁆𑀢𑀁. 𑀲𑀘𑁂 𑀫𑀬𑀁 𑀇𑀫𑀸𑀳𑀺 𑀆𑀧𑀢𑁆𑀢𑀻𑀳𑀺 𑀅𑀜𑁆𑀜𑀫𑀜𑁆𑀜𑀁 𑀓𑀸𑀭𑁂𑀲𑁆𑀲𑀸𑀫, 𑀲𑀺𑀬𑀸𑀧𑀺 𑀢𑀁 𑀅𑀥𑀺𑀓𑀭𑀡𑀁 𑀓𑀓𑁆𑀔𑀴𑀢𑁆𑀢𑀸𑀬 𑀯𑀸𑀴𑀢𑁆𑀢𑀸𑀬 𑀪𑁂𑀤𑀸𑀬 𑀲𑀁𑀯𑀢𑁆𑀢𑁂𑀬𑁆𑀬. 𑀅𑀳𑀁 𑀬𑀸 𑀘𑁂𑀯 𑀇𑀫𑁂𑀲𑀁 𑀆𑀬𑀲𑁆𑀫𑀦𑁆𑀢𑀸𑀦𑀁 𑀆𑀧𑀢𑁆𑀢𑀺, 𑀬𑀸 𑀘 𑀅𑀢𑁆𑀢𑀦𑁄 𑀆𑀧𑀢𑁆𑀢𑀺, 𑀇𑀫𑁂𑀲𑀜𑁆𑀘𑁂𑀯 𑀆𑀬𑀲𑁆𑀫𑀦𑁆𑀢𑀸𑀦𑀁 𑀅𑀢𑁆𑀣𑀸𑀬, 𑀅𑀢𑁆𑀢𑀦𑁄 𑀘 𑀅𑀢𑁆𑀣𑀸𑀬, 𑀲𑀗𑁆𑀖𑀫𑀚𑁆𑀛𑁂 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀤𑁂𑀲𑁂𑀫𑀺, 𑀞𑀧𑁂𑀢𑁆𑀯𑀸 𑀣𑀼𑀮𑁆𑀮𑀯𑀚𑁆𑀚𑀁, 𑀞𑀧𑁂𑀢𑁆𑀯𑀸 𑀕𑀺𑀳𑀺𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀁. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀅𑀫𑁆𑀳𑀸𑀓𑀁 𑀇𑀫𑀸𑀲𑀁 𑀆𑀧𑀢𑁆𑀢𑀻𑀦𑀁 𑀲𑀗𑁆𑀖𑀫𑀚𑁆𑀛𑁂 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀤𑁂𑀲𑀦𑀸, 𑀞𑀧𑁂𑀢𑁆𑀯𑀸 𑀣𑀼𑀮𑁆𑀮𑀯𑀚𑁆𑀚𑀁, 𑀞𑀧𑁂𑀢𑁆𑀯𑀸 𑀕𑀺𑀳𑀺𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀁, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑁂𑀲𑀺𑀢𑀸 𑀅𑀫𑁆𑀳𑀸𑀓𑀁 𑀇𑀫𑀸 𑀆𑀧𑀢𑁆𑀢𑀺𑀬𑁄 𑀲𑀗𑁆𑀖𑀫𑀚𑁆𑀛𑁂 𑀢𑀺𑀡𑀯𑀢𑁆𑀣𑀸𑀭𑀓𑁂𑀦, 𑀞𑀧𑁂𑀢𑁆𑀯𑀸 𑀣𑀼𑀮𑁆𑀮𑀯𑀚𑁆𑀚𑀁, 𑀞𑀧𑁂𑀢𑁆𑀯𑀸 𑀕𑀺𑀳𑀺𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀁. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

‘‘𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀢𑁂 𑀪𑀺𑀓𑁆𑀔𑀽 𑀢𑀸𑀳𑀺 𑀆𑀧𑀢𑁆𑀢𑀻𑀳𑀺 𑀯𑀼𑀝𑁆𑀞𑀺𑀢𑀸 𑀳𑁄𑀦𑁆𑀢𑀺, 𑀞𑀧𑁂𑀢𑁆𑀯𑀸 𑀣𑀼𑀮𑁆𑀮𑀯𑀚𑁆𑀚𑀁, 𑀞𑀧𑁂𑀢𑁆𑀯𑀸 𑀕𑀺𑀳𑀺𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀁, 𑀞𑀧𑁂𑀢𑁆𑀯𑀸 𑀤𑀺𑀝𑁆𑀞𑀸𑀯𑀺𑀓𑀫𑁆𑀫𑀁, 𑀞𑀧𑁂𑀢𑁆𑀯𑀸 𑀬𑁂 𑀦 𑀢𑀢𑁆𑀣 𑀳𑁄𑀦𑁆𑀢𑀻’’𑀢𑀺.

𑁮. 𑀅𑀥𑀺𑀓𑀭𑀡𑀁

𑁨𑁧𑁫. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 (𑀪𑀺𑀓𑁆𑀔𑀽𑀧𑀺 𑀪𑀺𑀓𑁆𑀔𑀽𑀳𑀺 𑀯𑀺𑀯𑀤𑀦𑁆𑀢𑀺,) [( ) 𑀦𑀢𑁆𑀣𑀺 (𑀲𑀻. 𑀲𑁆𑀬𑀸. 𑀓𑀁.)] 𑀪𑀺𑀓𑁆𑀔𑀽𑀧𑀺 𑀪𑀺𑀓𑁆𑀔𑀼𑀦𑀻𑀳𑀺 𑀯𑀺𑀯𑀤𑀦𑁆𑀢𑀺, 𑀪𑀺𑀓𑁆𑀔𑀼𑀦𑀺𑀬𑁄𑀧𑀺 𑀪𑀺𑀓𑁆𑀔𑀽𑀳𑀺 𑀯𑀺𑀯𑀤𑀦𑁆𑀢𑀺, 𑀙𑀦𑁆𑀦𑁄𑀧𑀺 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀦𑀻𑀦𑀁 𑀅𑀦𑀼𑀧𑀔𑀚𑁆𑀚 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀯𑀺𑀯𑀤𑀢𑀺, 𑀪𑀺𑀓𑁆𑀔𑀼𑀦𑀻𑀦𑀁 𑀧𑀓𑁆𑀔𑀁 𑀕𑀸𑀳𑁂𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀙𑀦𑁆𑀦𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀦𑀻𑀦𑀁 𑀅𑀦𑀼𑀧𑀔𑀚𑁆𑀚 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀯𑀺𑀯𑀤𑀺𑀲𑁆𑀲𑀢𑀺, 𑀪𑀺𑀓𑁆𑀔𑀼𑀦𑀻𑀦𑀁 𑀧𑀓𑁆𑀔𑀁 𑀕𑀸𑀳𑁂𑀲𑁆𑀲𑀢𑀻𑀢𑀺! 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂…𑀧𑁂… 𑀲𑀘𑁆𑀘𑀁 𑀪𑀕𑀯𑀸’’𑀢𑀺…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋

[𑀧𑀭𑀺. 𑁨𑁭𑁫] ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀥𑀺𑀓𑀭𑀡𑀸𑀦𑀺 𑁋 𑀯𑀺𑀯𑀸𑀤𑀸𑀥𑀺𑀓𑀭𑀡𑀁, 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁, 𑀆𑀧𑀢𑁆𑀢𑀸𑀥𑀺𑀓𑀭𑀡𑀁, 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 [𑀓𑀺𑀘𑁆𑀘𑀸𑀥𑀺𑀓𑀭𑀡𑀜𑁆𑀘 (𑀓.)].

‘‘𑀢𑀢𑁆𑀣 𑀓𑀢𑀫𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 [𑀧𑀭𑀺. 𑁩𑁧𑁪]? 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 [𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀁 (𑀓.)] 𑀯𑀺𑀯𑀤𑀦𑁆𑀢𑀺 𑁋 𑀥𑀫𑁆𑀫𑁄𑀢𑀺 𑀯𑀸 𑀅𑀥𑀫𑁆𑀫𑁄𑀢𑀺 𑀯𑀸, 𑀯𑀺𑀦𑀬𑁄𑀢𑀺 𑀯𑀸 𑀅𑀯𑀺𑀦𑀬𑁄𑀢𑀺 𑀯𑀸, 𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀯𑀸 𑀅𑀪𑀸𑀲𑀺𑀢𑀁 𑀅𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀯𑀸, 𑀆𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦𑀸𑀢𑀺 𑀯𑀸 𑀅𑀦𑀸𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦𑀸𑀢𑀺 𑀯𑀸, 𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀯𑀸 𑀅𑀧𑁆𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀯𑀸, 𑀆𑀧𑀢𑁆𑀢𑀻𑀢𑀺 𑀯𑀸 𑀅𑀦𑀸𑀧𑀢𑁆𑀢𑀻𑀢𑀺 𑀯𑀸, 𑀮𑀳𑀼𑀓𑀸 𑀆𑀧𑀢𑁆𑀢𑀻𑀢𑀺 𑀯𑀸 𑀕𑀭𑀼𑀓𑀸 𑀆𑀧𑀢𑁆𑀢𑀻𑀢𑀺 𑀯𑀸, 𑀲𑀸𑀯𑀲𑁂𑀲𑀸 𑀆𑀧𑀢𑁆𑀢𑀻𑀢𑀺 𑀯𑀸 𑀅𑀦𑀯𑀲𑁂𑀲𑀸 𑀆𑀧𑀢𑁆𑀢𑀻𑀢𑀺 𑀯𑀸, 𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀯𑀸 𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀯𑀸? 𑀬𑀁 𑀢𑀢𑁆𑀣 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀦𑀸𑀦𑀸𑀯𑀸𑀤𑁄 𑀅𑀜𑁆𑀜𑀣𑀸𑀯𑀸𑀤𑁄 𑀯𑀺𑀧𑀘𑁆𑀘𑀢𑀸𑀬 𑀯𑁄𑀳𑀸𑀭𑁄 𑀫𑁂𑀥𑀕𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀁.

‘‘𑀢𑀢𑁆𑀣 𑀓𑀢𑀫𑀁 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁? [𑀧𑀭𑀺. 𑁩𑁧𑁫] 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀁 𑀅𑀦𑀼𑀯𑀤𑀦𑁆𑀢𑀺 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀯𑀸 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀯𑀸 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀯𑀸 𑀆𑀚𑀻𑀯𑀯𑀺𑀧𑀢𑁆𑀢𑀺𑀬𑀸 𑀯𑀸. 𑀬𑁄 𑀢𑀢𑁆𑀣 𑀅𑀦𑀼𑀯𑀸𑀤𑁄 𑀅𑀦𑀼𑀯𑀤𑀦𑀸 𑀅𑀦𑀼𑀮𑁆𑀮𑀧𑀦𑀸 𑀅𑀦𑀼𑀪𑀡𑀦𑀸 𑀅𑀦𑀼𑀲𑀫𑁆𑀧𑀯𑀗𑁆𑀓𑀢𑀸 𑀅𑀩𑁆𑀪𑀼𑀲𑁆𑀲𑀳𑀦𑀢𑀸 𑀅𑀦𑀼𑀩𑀮𑀧𑁆𑀧𑀤𑀸𑀦𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁.

‘‘𑀢𑀢𑁆𑀣 𑀓𑀢𑀫𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑀁? 𑀧𑀜𑁆𑀘𑀧𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀆𑀧𑀢𑁆𑀢𑀸𑀥𑀺𑀓𑀭𑀡𑀁, 𑀲𑀢𑁆𑀢𑀧𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁.

‘‘𑀢𑀢𑁆𑀣 𑀓𑀢𑀫𑀁 𑀓𑀺𑀘𑁆𑀘𑀸𑀥𑀺𑀓𑀭𑀡𑀁? [𑀧𑀭𑀺. 𑁩𑁧𑁭] 𑀬𑀸 𑀲𑀗𑁆𑀖𑀲𑁆𑀲 𑀓𑀺𑀘𑁆𑀘𑀬𑀢𑀸, 𑀓𑀭𑀡𑀻𑀬𑀢𑀸, 𑀅𑀧𑀮𑁄𑀓𑀦𑀓𑀫𑁆𑀫𑀁, 𑀜𑀢𑁆𑀢𑀺𑀓𑀫𑁆𑀫𑀁, 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁, 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀓𑀺𑀘𑁆𑀘𑀸𑀥𑀺𑀓𑀭𑀡𑀁.

𑁨𑁧𑁬. ‘‘𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀓𑀺𑀁 𑀫𑀽𑀮𑀁? 𑀙 𑀯𑀺𑀯𑀸𑀤𑀫𑀽𑀮𑀸𑀦𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁. 𑀢𑀻𑀡𑀺𑀧𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁, 𑀢𑀻𑀡𑀺𑀧𑀺 𑀓𑀼𑀲𑀮𑀫𑀽𑀮𑀸𑀦𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁. [𑀧𑀭𑀺. 𑁨𑁭𑁨; 𑀅. 𑀦𑀺. 𑁨.𑁩𑁫-𑁩𑁬; 𑀫. 𑀦𑀺. 𑁩.𑁪𑁪] 𑀓𑀢𑀫𑀸𑀦𑀺 𑀙 𑀯𑀺𑀯𑀸𑀤𑀫𑀽𑀮𑀸𑀦𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁? 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑁄𑀥𑀦𑁄 𑀳𑁄𑀢𑀺 𑀉𑀧𑀦𑀸𑀳𑀻. 𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑁄𑀥𑀦𑁄 𑀳𑁄𑀢𑀺 𑀉𑀧𑀦𑀸𑀳𑀻, 𑀲𑁄 𑀲𑀢𑁆𑀣𑀭𑀺𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀥𑀫𑁆𑀫𑁂𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀲𑀗𑁆𑀖𑁂𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀲𑀺𑀓𑁆𑀔𑀸𑀬𑀧𑀺 𑀦 𑀧𑀭𑀺𑀧𑀽𑀭𑀓𑀸𑀭𑀻 𑀳𑁄𑀢𑀺. 𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀥𑀫𑁆𑀫𑁂𑀧𑀺…𑀧𑁂… 𑀲𑀗𑁆𑀖𑁂𑀧𑀺…𑀧𑁂… 𑀲𑀺𑀓𑁆𑀔𑀸𑀬𑀧𑀺 𑀦 𑀧𑀭𑀺𑀧𑀽𑀭𑀓𑀸𑀭𑀻, 𑀲𑁄 𑀲𑀗𑁆𑀖𑁂 𑀯𑀺𑀯𑀸𑀤𑀁 𑀚𑀦𑁂𑀢𑀺. 𑀬𑁄 𑀳𑁄𑀢𑀺 𑀯𑀺𑀯𑀸𑀤𑁄 𑀩𑀳𑀼𑀚𑀦𑀸𑀳𑀺𑀢𑀸𑀬 𑀩𑀳𑀼𑀚𑀦𑀸𑀲𑀼𑀔𑀸𑀬 𑀩𑀳𑀼𑀦𑁄 𑀚𑀦𑀲𑁆𑀲 𑀅𑀦𑀢𑁆𑀣𑀸𑀬 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀏𑀯𑀭𑀽𑀧𑀜𑁆𑀘𑁂 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀯𑀺𑀯𑀸𑀤𑀫𑀽𑀮𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀲𑀫𑀦𑀼𑀧𑀲𑁆𑀲𑁂𑀬𑁆𑀬𑀸𑀣, 𑀢𑀢𑁆𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀢𑀲𑁆𑀲𑁂𑀯 𑀧𑀸𑀧𑀓𑀲𑁆𑀲 𑀯𑀺𑀯𑀸𑀤𑀫𑀽𑀮𑀲𑁆𑀲 𑀧𑀳𑀸𑀦𑀸𑀬 𑀯𑀸𑀬𑀫𑁂𑀬𑁆𑀬𑀸𑀣. 𑀏𑀯𑀭𑀽𑀧𑀜𑁆𑀘𑁂 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀯𑀺𑀯𑀸𑀤𑀫𑀽𑀮𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀦 𑀲𑀫𑀦𑀼𑀧𑀲𑁆𑀲𑁂𑀬𑁆𑀬𑀸𑀣, 𑀢𑀢𑁆𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀢𑀲𑁆𑀲𑁂𑀯 𑀧𑀸𑀧𑀓𑀲𑁆𑀲 𑀯𑀺𑀯𑀸𑀤𑀫𑀽𑀮𑀲𑁆𑀲 𑀆𑀬𑀢𑀺𑀁 𑀅𑀦𑀯𑀲𑁆𑀲𑀯𑀸𑀬 𑀧𑀝𑀺𑀧𑀚𑁆𑀚𑁂𑀬𑁆𑀬𑀸𑀣. 𑀏𑀯𑀫𑁂𑀢𑀲𑁆𑀲 𑀧𑀸𑀧𑀓𑀲𑁆𑀲 𑀯𑀺𑀯𑀸𑀤𑀫𑀽𑀮𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺. 𑀏𑀯𑀫𑁂𑀢𑀲𑁆𑀲 𑀧𑀸𑀧𑀓𑀲𑁆𑀲 𑀯𑀺𑀯𑀸𑀤𑀫𑀽𑀮𑀲𑁆𑀲 𑀆𑀬𑀢𑀺𑀁 𑀅𑀦𑀯𑀲𑁆𑀲𑀯𑁄 𑀳𑁄𑀢𑀺.

[𑀧𑀭𑀺.𑁨𑁭𑁨] ‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀫𑀓𑁆𑀔𑀻 𑀳𑁄𑀢𑀺 𑀧𑀴𑀸𑀲𑀻…𑀧𑁂… 𑀇𑀲𑁆𑀲𑀼𑀓𑀻 𑀳𑁄𑀢𑀺 𑀫𑀘𑁆𑀙𑀭𑀻, 𑀲𑀞𑁄 𑀳𑁄𑀢𑀺 𑀫𑀸𑀬𑀸𑀯𑀻, 𑀧𑀸𑀧𑀺𑀘𑁆𑀙𑁄 𑀳𑁄𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀻, 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀻 𑀳𑁄𑀢𑀺 𑀆𑀥𑀸𑀦𑀕𑁆𑀕𑀸𑀳𑀻 𑀤𑀼𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀻. 𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀻 𑀳𑁄𑀢𑀺 𑀆𑀥𑀸𑀦𑀕𑁆𑀕𑀸𑀳𑀻 𑀤𑀼𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀻, 𑀲𑁄 𑀲𑀢𑁆𑀣𑀭𑀺𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀥𑀫𑁆𑀫𑁂𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀲𑀗𑁆𑀖𑁂𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀲𑀺𑀓𑁆𑀔𑀸𑀬𑀧𑀺 𑀦 𑀧𑀭𑀺𑀧𑀽𑀭𑀓𑀸𑀭𑀻 𑀳𑁄𑀢𑀺. 𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀥𑀫𑁆𑀫𑁂𑀧𑀺…𑀧𑁂… 𑀲𑀗𑁆𑀖𑁂𑀧𑀺…𑀧𑁂… 𑀲𑀺𑀓𑁆𑀔𑀸𑀬𑀧𑀺 𑀦 𑀧𑀭𑀺𑀧𑀽𑀭𑀓𑀸𑀭𑀻, 𑀲𑁄 𑀲𑀗𑁆𑀖𑁂 𑀯𑀺𑀯𑀸𑀤𑀁 𑀚𑀦𑁂𑀢𑀺. 𑀬𑁄 𑀳𑁄𑀢𑀺 𑀯𑀺𑀯𑀸𑀤𑁄 𑀩𑀳𑀼𑀚𑀦𑀸𑀳𑀺𑀢𑀸𑀬 𑀩𑀳𑀼𑀚𑀦𑀸𑀲𑀼𑀔𑀸𑀬 𑀩𑀳𑀼𑀦𑁄 𑀚𑀦𑀲𑁆𑀲 𑀅𑀦𑀢𑁆𑀣𑀸𑀬 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀏𑀯𑀭𑀽𑀧𑀜𑁆𑀘𑁂 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀯𑀺𑀯𑀸𑀤𑀫𑀽𑀮𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀲𑀫𑀦𑀼𑀧𑀲𑁆𑀲𑁂𑀬𑁆𑀬𑀸𑀣, 𑀢𑀢𑁆𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀢𑀲𑁆𑀲𑁂𑀯 𑀧𑀸𑀧𑀓𑀲𑁆𑀲 𑀯𑀺𑀯𑀸𑀤𑀫𑀽𑀮𑀲𑁆𑀲 𑀧𑀳𑀸𑀦𑀸𑀬 𑀯𑀸𑀬𑀫𑁂𑀬𑁆𑀬𑀸𑀣. 𑀏𑀯𑀭𑀽𑀧𑀜𑁆𑀘𑁂 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀯𑀺𑀯𑀸𑀤𑀫𑀽𑀮𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀦 𑀲𑀫𑀦𑀼𑀧𑀲𑁆𑀲𑁂𑀬𑁆𑀬𑀸𑀣, 𑀢𑀢𑁆𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀢𑀲𑁆𑀲𑁂𑀯 𑀧𑀸𑀧𑀓𑀲𑁆𑀲 𑀯𑀺𑀯𑀸𑀤𑀫𑀽𑀮𑀲𑁆𑀲 𑀆𑀬𑀢𑀺𑀁 𑀅𑀦𑀯𑀲𑁆𑀲𑀯𑀸𑀬 𑀧𑀝𑀺𑀧𑀚𑁆𑀚𑁂𑀬𑁆𑀬𑀸𑀣. 𑀏𑀯𑀫𑁂𑀢𑀲𑁆𑀲 𑀧𑀸𑀧𑀓𑀲𑁆𑀲 𑀯𑀺𑀯𑀸𑀤𑀫𑀽𑀮𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺. 𑀏𑀯𑀫𑁂𑀢𑀲𑁆𑀲 𑀧𑀸𑀧𑀓𑀲𑁆𑀲 𑀯𑀺𑀯𑀸𑀤𑀫𑀽𑀮𑀲𑁆𑀲 𑀆𑀬𑀢𑀺𑀁 𑀅𑀦𑀯𑀲𑁆𑀲𑀯𑁄 𑀳𑁄𑀢𑀺. 𑀇𑀫𑀸𑀦𑀺 𑀙 𑀯𑀺𑀯𑀸𑀤𑀫𑀽𑀮𑀸𑀦𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁.

‘‘𑀓𑀢𑀫𑀸𑀦𑀺 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁? 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀮𑀼𑀤𑁆𑀥𑀘𑀺𑀢𑁆𑀢𑀸 𑀯𑀺𑀯𑀤𑀦𑁆𑀢𑀺, 𑀤𑀼𑀝𑁆𑀞𑀘𑀺𑀢𑁆𑀢𑀸 𑀯𑀺𑀯𑀤𑀦𑁆𑀢𑀺, 𑀫𑀽𑀴𑁆𑀳𑀘𑀺𑀢𑁆𑀢𑀸 𑀯𑀺𑀯𑀤𑀦𑁆𑀢𑀺 𑁋 𑀥𑀫𑁆𑀫𑁄𑀢𑀺 𑀯𑀸 𑀅𑀥𑀫𑁆𑀫𑁄𑀢𑀺 𑀯𑀸, 𑀯𑀺𑀦𑀬𑁄𑀢𑀺 𑀯𑀸 𑀅𑀯𑀺𑀦𑀬𑁄𑀢𑀺 𑀯𑀸, 𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀯𑀸 𑀅𑀪𑀸𑀲𑀺𑀢𑀁 𑀅𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀯𑀸, 𑀆𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦𑀸𑀢𑀺 𑀯𑀸 𑀅𑀦𑀸𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦𑀸𑀢𑀺 𑀯𑀸, 𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀯𑀸 𑀅𑀧𑁆𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀯𑀸, 𑀆𑀧𑀢𑁆𑀢𑀻𑀢𑀺 𑀯𑀸 𑀅𑀦𑀸𑀧𑀢𑁆𑀢𑀻𑀢𑀺 𑀯𑀸, 𑀮𑀳𑀼𑀓𑀸 𑀆𑀧𑀢𑁆𑀢𑀻𑀢𑀺 𑀯𑀸 𑀕𑀭𑀼𑀓𑀸 𑀆𑀧𑀢𑁆𑀢𑀻𑀢𑀺 𑀯𑀸, 𑀲𑀸𑀯𑀲𑁂𑀲𑀸 𑀆𑀧𑀢𑁆𑀢𑀻𑀢𑀺 𑀯𑀸 𑀅𑀦𑀯𑀲𑁂𑀲𑀸 𑀆𑀧𑀢𑁆𑀢𑀻𑀢𑀺 𑀯𑀸, 𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀯𑀸 𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀯𑀸. 𑀇𑀫𑀸𑀦𑀺 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁.

‘‘𑀓𑀢𑀫𑀸𑀦𑀺 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁? 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀅𑀮𑀼𑀤𑁆𑀥𑀘𑀺𑀢𑁆𑀢𑀸 𑀯𑀺𑀯𑀤𑀦𑁆𑀢𑀺, 𑀅𑀤𑀼𑀝𑁆𑀞𑀘𑀺𑀢𑁆𑀢𑀸 𑀯𑀺𑀯𑀤𑀦𑁆𑀢𑀺, 𑀅𑀫𑀽𑀴𑁆𑀳𑀘𑀺𑀢𑁆𑀢𑀸 𑀯𑀺𑀯𑀤𑀦𑁆𑀢𑀺 𑁋 𑀥𑀫𑁆𑀫𑁄𑀢𑀺 𑀯𑀸 𑀅𑀥𑀫𑁆𑀫𑁄𑀢𑀺 𑀯𑀸…𑀧𑁂… 𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀯𑀸 𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀯𑀸. 𑀇𑀫𑀸𑀦𑀺 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁.

𑁨𑁧𑁭. [𑀧𑀭𑀺. 𑁨𑁭𑁨] ‘‘𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀓𑀺𑀁 𑀫𑀽𑀮𑀁? 𑀙 𑀅𑀦𑀼𑀯𑀸𑀤𑀫𑀽𑀮𑀸𑀦𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁. 𑀢𑀻𑀡𑀺𑀧𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁, 𑀢𑀻𑀡𑀺𑀧𑀺 𑀓𑀼𑀲𑀮𑀫𑀽𑀮𑀸𑀦𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁, 𑀓𑀸𑀬𑁄𑀧𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁, 𑀯𑀸𑀘𑀸𑀧𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁. ‘‘𑀓𑀢𑀫𑀸𑀦𑀺 𑀙 𑀅𑀦𑀼𑀯𑀸𑀤𑀫𑀽𑀮𑀸𑀦𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁? 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑁄𑀥𑀦𑁄 𑀳𑁄𑀢𑀺 𑀉𑀧𑀦𑀸𑀳𑀻. 𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑁄𑀥𑀦𑁄 𑀳𑁄𑀢𑀺 𑀉𑀧𑀦𑀸𑀳𑀻, 𑀲𑁄 𑀲𑀢𑁆𑀣𑀭𑀺𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀥𑀫𑁆𑀫𑁂𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀲𑀗𑁆𑀖𑁂𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀲𑀺𑀓𑁆𑀔𑀸𑀬𑀧𑀺 𑀦 𑀧𑀭𑀺𑀧𑀽𑀭𑀓𑀸𑀭𑀻 𑀳𑁄𑀢𑀺. 𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀥𑀫𑁆𑀫𑁂𑀧𑀺…𑀧𑁂… 𑀲𑀗𑁆𑀖𑁂𑀧𑀺…𑀧𑁂… 𑀲𑀺𑀓𑁆𑀔𑀸𑀬𑀧𑀺 𑀦 𑀧𑀭𑀺𑀧𑀽𑀭𑀓𑀸𑀭𑀻, 𑀲𑁄 𑀲𑀗𑁆𑀖𑁂 𑀅𑀦𑀼𑀯𑀸𑀤𑀁 𑀚𑀦𑁂𑀢𑀺. 𑀬𑁄 𑀳𑁄𑀢𑀺 𑀅𑀦𑀼𑀯𑀸𑀤𑁄 𑀩𑀳𑀼𑀚𑀦𑀸𑀳𑀺𑀢𑀸𑀬 𑀩𑀳𑀼𑀚𑀦𑀸𑀲𑀼𑀔𑀸𑀬 𑀩𑀳𑀼𑀦𑁄 𑀚𑀦𑀲𑁆𑀲 𑀅𑀦𑀢𑁆𑀣𑀸𑀬 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀏𑀯𑀭𑀽𑀧𑀜𑁆𑀘𑁂 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀅𑀦𑀼𑀯𑀸𑀤𑀫𑀽𑀮𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀲𑀫𑀦𑀼𑀧𑀲𑁆𑀲𑁂𑀬𑁆𑀬𑀸𑀣, 𑀢𑀢𑁆𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀢𑀲𑁆𑀲𑁂𑀯 𑀧𑀸𑀧𑀓𑀲𑁆𑀲 𑀅𑀦𑀼𑀯𑀸𑀤𑀫𑀽𑀮𑀲𑁆𑀲 𑀧𑀳𑀸𑀦𑀸𑀬 𑀯𑀸𑀬𑀫𑁂𑀬𑁆𑀬𑀸𑀣. 𑀏𑀯𑀭𑀽𑀧𑀜𑁆𑀘𑁂 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀅𑀦𑀼𑀯𑀸𑀤𑀫𑀽𑀮𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀦 𑀲𑀫𑀦𑀼𑀧𑀲𑁆𑀲𑁂𑀬𑁆𑀬𑀸𑀣, 𑀢𑀢𑁆𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀢𑀲𑁆𑀲𑁂𑀯 𑀧𑀸𑀧𑀓𑀲𑁆𑀲 𑀅𑀦𑀼𑀯𑀸𑀤𑀫𑀽𑀮𑀲𑁆𑀲 𑀆𑀬𑀢𑀺𑀁 𑀅𑀦𑀯𑀲𑁆𑀲𑀯𑀸𑀬 𑀧𑀝𑀺𑀧𑀚𑁆𑀚𑁂𑀬𑁆𑀬𑀸𑀣. 𑀏𑀯𑀫𑁂𑀢𑀲𑁆𑀲 𑀧𑀸𑀧𑀓𑀲𑁆𑀲 𑀅𑀦𑀼𑀯𑀸𑀤𑀫𑀽𑀮𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺. 𑀏𑀯𑀫𑁂𑀢𑀲𑁆𑀲 𑀧𑀸𑀧𑀓𑀲𑁆𑀲 𑀅𑀦𑀼𑀯𑀸𑀤𑀫𑀽𑀮𑀲𑁆𑀲 𑀆𑀬𑀢𑀺𑀁 𑀅𑀦𑀯𑀲𑁆𑀲𑀯𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀫𑀓𑁆𑀔𑀻 𑀳𑁄𑀢𑀺 𑀧𑀴𑀸𑀲𑀻…𑀧𑁂… 𑀇𑀲𑁆𑀲𑀼𑀓𑀻 𑀳𑁄𑀢𑀺 𑀫𑀘𑁆𑀙𑀭𑀻, 𑀲𑀞𑁄 𑀳𑁄𑀢𑀺 𑀫𑀸𑀬𑀸𑀯𑀻, 𑀧𑀸𑀧𑀺𑀘𑁆𑀙𑁄 𑀳𑁄𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀻, 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀻 𑀳𑁄𑀢𑀺 𑀆𑀥𑀸𑀦𑀕𑁆𑀕𑀸𑀳𑀻 𑀤𑀼𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀻. 𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀻 𑀳𑁄𑀢𑀺 𑀆𑀥𑀸𑀦𑀕𑁆𑀕𑀸𑀳𑀻 𑀤𑀼𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀻, 𑀲𑁄 𑀲𑀢𑁆𑀣𑀭𑀺𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀥𑀫𑁆𑀫𑁂𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀲𑀗𑁆𑀖𑁂𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀲𑀺𑀓𑁆𑀔𑀸𑀬𑀧𑀺 𑀦 𑀧𑀭𑀺𑀧𑀽𑀭𑀓𑀸𑀭𑀻 𑀳𑁄𑀢𑀺. 𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀥𑀫𑁆𑀫𑁂𑀧𑀺…𑀧𑁂… 𑀲𑀗𑁆𑀖𑁂𑀧𑀺…𑀧𑁂… 𑀲𑀺𑀓𑁆𑀔𑀸𑀬𑀧𑀺 𑀦 𑀧𑀭𑀺𑀧𑀽𑀭𑀓𑀸𑀭𑀻, 𑀲𑁄 𑀲𑀗𑁆𑀖𑁂 𑀅𑀦𑀼𑀯𑀸𑀤𑀁 𑀚𑀦𑁂𑀢𑀺. 𑀬𑁄 𑀳𑁄𑀢𑀺 𑀅𑀦𑀼𑀯𑀸𑀤𑁄 𑀩𑀳𑀼𑀚𑀦𑀸𑀳𑀺𑀢𑀸𑀬 𑀩𑀳𑀼𑀚𑀦𑀸𑀲𑀼𑀔𑀸𑀬 𑀩𑀳𑀼𑀦𑁄 𑀚𑀦𑀲𑁆𑀲 𑀅𑀦𑀢𑁆𑀣𑀸𑀬 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀏𑀯𑀭𑀽𑀧𑀜𑁆𑀘𑁂 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀅𑀦𑀼𑀯𑀸𑀤𑀫𑀽𑀮𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀲𑀫𑀦𑀼𑀧𑀲𑁆𑀲𑁂𑀬𑁆𑀬𑀸𑀣, 𑀢𑀢𑁆𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀢𑀲𑁆𑀲𑁂𑀯 𑀧𑀸𑀧𑀓𑀲𑁆𑀲 𑀅𑀦𑀼𑀯𑀸𑀤𑀫𑀽𑀮𑀲𑁆𑀲 𑀧𑀳𑀸𑀦𑀸𑀬 𑀯𑀸𑀬𑀫𑁂𑀬𑁆𑀬𑀸𑀣. 𑀏𑀯𑀭𑀽𑀧𑀜𑁆𑀘𑁂 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀅𑀦𑀼𑀯𑀸𑀤𑀫𑀽𑀮𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀦 𑀲𑀫𑀦𑀼𑀧𑀲𑁆𑀲𑁂𑀬𑁆𑀬𑀸𑀣, 𑀢𑀢𑁆𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀢𑀲𑁆𑀲𑁂𑀯 𑀧𑀸𑀧𑀓𑀲𑁆𑀲 𑀅𑀦𑀼𑀯𑀸𑀤𑀫𑀽𑀮𑀲𑁆𑀲 𑀆𑀬𑀢𑁆𑀢𑀺𑀁 𑀅𑀦𑀯𑀲𑁆𑀲𑀯𑀸𑀬 𑀧𑀝𑀺𑀧𑀚𑁆𑀚𑁂𑀬𑁆𑀬𑀸𑀣. 𑀏𑀯𑀫𑁂𑀢𑀲𑁆𑀲 𑀧𑀸𑀧𑀓𑀲𑁆𑀲 𑀅𑀦𑀼𑀯𑀸𑀤𑀫𑀽𑀮𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺. 𑀏𑀯𑀫𑁂𑀢𑀲𑁆𑀲 𑀧𑀸𑀧𑀓𑀲𑁆𑀲 𑀅𑀦𑀼𑀯𑀸𑀤𑀫𑀽𑀮𑀲𑁆𑀲 𑀆𑀬𑀢𑀺𑀁 𑀅𑀦𑀯𑀲𑁆𑀲𑀯𑁄 𑀳𑁄𑀢𑀺. 𑀇𑀫𑀸𑀦𑀺 𑀙 𑀅𑀦𑀼𑀯𑀸𑀤𑀫𑀽𑀮𑀸𑀦𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁.

‘‘𑀓𑀢𑀫𑀸𑀦𑀺 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁? 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀁 𑀮𑀼𑀤𑁆𑀥𑀘𑀺𑀢𑁆𑀢𑀸 𑀅𑀦𑀼𑀯𑀤𑀦𑁆𑀢𑀺, 𑀤𑀼𑀝𑁆𑀞𑀘𑀺𑀢𑁆𑀢𑀸 𑀅𑀦𑀼𑀯𑀤𑀦𑁆𑀢𑀺, 𑀫𑀽𑀴𑁆𑀳𑀘𑀺𑀢𑁆𑀢𑀸 𑀅𑀦𑀼𑀯𑀤𑀦𑁆𑀢𑀺 𑁋 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀯𑀸, 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀯𑀸, 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀯𑀸, 𑀆𑀚𑀻𑀯𑀯𑀺𑀧𑀢𑁆𑀢𑀺𑀬𑀸 𑀯𑀸. 𑀇𑀫𑀸𑀦𑀺 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁.

‘‘𑀓𑀢𑀫𑀸𑀦𑀺 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁? 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀁 𑀅𑀮𑀼𑀤𑁆𑀥𑀘𑀺𑀢𑁆𑀢𑀸 𑀅𑀦𑀼𑀯𑀤𑀦𑁆𑀢𑀺, 𑀅𑀤𑀼𑀝𑁆𑀞𑀘𑀺𑀢𑁆𑀢𑀸 𑀅𑀦𑀼𑀯𑀤𑀦𑁆𑀢𑀺, 𑀅𑀫𑀽𑀴𑁆𑀳𑀘𑀺𑀢𑁆𑀢𑀸 𑀅𑀦𑀼𑀯𑀤𑀦𑁆𑀢𑀺 𑁋 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀯𑀸, 𑀆𑀘𑀭𑀯𑀺𑀧𑀢𑁆𑀢𑀺𑀬𑀸 𑀯𑀸, 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀯𑀸, 𑀆𑀚𑀻𑀯𑀯𑀺𑀧𑀢𑁆𑀢𑀺𑀬𑀸 𑀯𑀸. 𑀇𑀫𑀸𑀦𑀺 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁.

‘‘𑀓𑀢𑀫𑁄 𑀓𑀸𑀬𑁄 [𑀓𑀢𑀫𑁄 𑀘 𑀓𑀸𑀬𑁄 (𑀲𑁆𑀬𑀸. 𑀓𑀁.)] 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁? 𑀇𑀥𑁂𑀓𑀘𑁆𑀘𑁄 𑀤𑀼𑀩𑁆𑀩𑀡𑁆𑀡𑁄 𑀳𑁄𑀢𑀺, 𑀤𑀼𑀤𑁆𑀤𑀲𑁆𑀲𑀺𑀓𑁄, 𑀑𑀓𑁄𑀝𑀺𑀫𑀓𑁄, 𑀩𑀳𑁆𑀯𑀸𑀩𑀸𑀥𑁄, 𑀓𑀸𑀡𑁄 𑀯𑀸, 𑀓𑀼𑀡𑀻 𑀯𑀸, 𑀔𑀜𑁆𑀚𑁄 𑀯𑀸, 𑀧𑀓𑁆𑀔𑀳𑀢𑁄 𑀯𑀸, 𑀬𑁂𑀦 𑀦𑀁 𑀅𑀦𑀼𑀯𑀤𑀦𑁆𑀢𑀺. 𑀅𑀬𑀁 𑀓𑀸𑀬𑁄 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁.

‘‘𑀓𑀢𑀫𑀸 𑀯𑀸𑀘𑀸 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁? 𑀇𑀥𑁂𑀓𑀘𑁆𑀘𑁄 𑀤𑀼𑀩𑁆𑀩𑀘𑁄 𑀳𑁄𑀢𑀺, 𑀫𑀫𑁆𑀫𑀦𑁄, 𑀏𑀴𑀕𑀮𑀯𑀸𑀘𑁄, 𑀬𑀸𑀬 𑀦𑀁 𑀅𑀦𑀼𑀯𑀤𑀦𑁆𑀢𑀺. 𑀅𑀬𑀁 𑀯𑀸𑀘𑀸 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁.

𑁨𑁧𑁮. ‘‘𑀆𑀧𑀢𑁆𑀢𑀸𑀥𑀺𑀓𑀭𑀡𑀲𑁆𑀲 𑀓𑀺𑀁 𑀫𑀽𑀮𑀁? 𑀙 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸 𑀆𑀧𑀢𑁆𑀢𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁. 𑀅𑀢𑁆𑀣𑀸𑀧𑀢𑁆𑀢𑀺 𑀓𑀸𑀬𑀢𑁄 𑀲𑀫𑀼𑀝𑁆𑀞𑀸𑀢𑀺, 𑀦 𑀯𑀸𑀘𑀢𑁄, 𑀦 𑀘𑀺𑀢𑁆𑀢𑀢𑁄. 𑀅𑀢𑁆𑀣𑀸𑀧𑀢𑁆𑀢𑀺 𑀯𑀸𑀘𑀢𑁄 𑀲𑀫𑀼𑀝𑁆𑀞𑀸𑀢𑀺, 𑀦 𑀓𑀸𑀬𑀢𑁄, 𑀦 𑀘𑀺𑀢𑁆𑀢𑀢𑁄. 𑀅𑀢𑁆𑀣𑀸𑀧𑀢𑁆𑀢𑀺 𑀓𑀸𑀬𑀢𑁄 𑀘 𑀯𑀸𑀘𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀦 𑀘𑀺𑀢𑁆𑀢𑀢𑁄. 𑀅𑀢𑁆𑀣𑀸𑀧𑀢𑁆𑀢𑀺 𑀓𑀸𑀬𑀢𑁄 𑀘 𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀦 𑀯𑀸𑀘𑀢𑁄. 𑀅𑀢𑁆𑀣𑀸𑀧𑀢𑁆𑀢𑀺 𑀯𑀸𑀘𑀢𑁄 𑀘 𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀦 𑀓𑀸𑀬𑀢𑁄. 𑀅𑀢𑁆𑀣𑀸𑀧𑀢𑁆𑀢𑀺 𑀓𑀸𑀬𑀢𑁄 𑀘 𑀯𑀸𑀘𑀢𑁄 𑀘 𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺. 𑀇𑀫𑁂 𑀙 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸 𑀆𑀧𑀢𑁆𑀢𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀁.

𑁨𑁧𑁯. ‘‘𑀓𑀺𑀘𑁆𑀘𑀸𑀥𑀺𑀓𑀭𑀡𑀲𑁆𑀲 𑀓𑀺𑀁 𑀫𑀽𑀮𑀁? 𑀓𑀺𑀘𑁆𑀘𑀸𑀥𑀺𑀓𑀭𑀡𑀲𑁆𑀲 𑀏𑀓𑀁 𑀫𑀽𑀮𑀁 𑁋 𑀲𑀗𑁆𑀖𑁄.

𑁨𑁨𑁦. ‘‘𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀓𑀼𑀲𑀮𑀁, 𑀅𑀓𑀼𑀲𑀮𑀁, 𑀅𑀩𑁆𑀬𑀸𑀓𑀢𑀁. 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀲𑀺𑀬𑀸 𑀓𑀼𑀲𑀮𑀁, 𑀲𑀺𑀬𑀸 𑀅𑀓𑀼𑀲𑀮𑀁, 𑀲𑀺𑀬𑀸 𑀅𑀩𑁆𑀬𑀸𑀓𑀢𑀁. 𑀢𑀢𑁆𑀣 𑀓𑀢𑀫𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀓𑀼𑀲𑀮𑀁? 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀓𑀼𑀲𑀮𑀘𑀺𑀢𑁆𑀢𑀸 𑀯𑀺𑀯𑀤𑀦𑁆𑀢𑀺 𑁋 𑀥𑀫𑁆𑀫𑁄𑀢𑀺 𑀯𑀸 𑀅𑀥𑀫𑁆𑀫𑁄𑀢𑀺 𑀯𑀸…𑀧𑁂… 𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀯𑀸 𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀯𑀸. 𑀬𑀁 𑀢𑀢𑁆𑀣 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀦𑀸𑀦𑀸𑀯𑀸𑀤𑁄 𑀅𑀜𑁆𑀜𑀣𑀸𑀯𑀸𑀤𑁄 𑀯𑀺𑀧𑀘𑁆𑀘𑀢𑀸𑀬 𑀯𑁄𑀳𑀸𑀭𑁄 𑀫𑁂𑀥𑀕𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀓𑀼𑀲𑀮𑀁.

‘‘𑀢𑀢𑁆𑀣 𑀓𑀢𑀫𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀅𑀓𑀼𑀲𑀮𑀁? 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀅𑀓𑀼𑀲𑀮𑀘𑀺𑀢𑁆𑀢𑀸 𑀯𑀺𑀯𑀤𑀦𑁆𑀢𑀺 𑁋 𑀥𑀫𑁆𑀫𑁄𑀢𑀺 𑀯𑀸 𑀅𑀥𑀫𑁆𑀫𑁄𑀢𑀺 𑀯𑀸…𑀧𑁂… 𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀯𑀸 𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀯𑀸. 𑀬𑀁 𑀢𑀢𑁆𑀣 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀦𑀸𑀦𑀸𑀯𑀸𑀤𑁄 𑀅𑀜𑁆𑀜𑀣𑀸𑀯𑀸𑀤𑁄 𑀯𑀺𑀧𑀘𑁆𑀘𑀢𑀸𑀬 𑀯𑁄𑀳𑀸𑀭𑁄 𑀫𑁂𑀥𑀕𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀅𑀓𑀼𑀲𑀮𑀁.

‘‘𑀢𑀢𑁆𑀣 𑀓𑀢𑀫𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀅𑀩𑁆𑀬𑀸𑀓𑀢𑀁? 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑀸 𑀯𑀺𑀯𑀤𑀦𑁆𑀢𑀺 𑁋 𑀥𑀫𑁆𑀫𑁄𑀢𑀺 𑀯𑀸 𑀅𑀥𑀫𑁆𑀫𑁄𑀢𑀺 𑀯𑀸…𑀧𑁂… 𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀯𑀸 𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀯𑀸. 𑀬𑀁 𑀢𑀢𑁆𑀣 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀦𑀸𑀦𑀸𑀯𑀸𑀤𑁄 𑀅𑀜𑁆𑀜𑀣𑀸𑀯𑀸𑀤𑁄 𑀯𑀺𑀧𑀘𑁆𑀘𑀢𑀸𑀬 𑀯𑁄𑀳𑀸𑀭𑁄 𑀫𑁂𑀥𑀕𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀅𑀩𑁆𑀬𑀸𑀓𑀢𑀁.

𑁨𑁨𑁧. ‘‘𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀓𑀼𑀲𑀮𑀁, 𑀅𑀓𑀼𑀲𑀮𑀁, 𑀅𑀩𑁆𑀬𑀸𑀓𑀢𑀁. 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀲𑀺𑀬𑀸 𑀓𑀼𑀲𑀮𑀁, 𑀲𑀺𑀬𑀸 𑀅𑀓𑀼𑀲𑀮𑀁, 𑀲𑀺𑀬𑀸 𑀅𑀩𑁆𑀬𑀸𑀓𑀢𑀁. 𑀢𑀢𑁆𑀣 𑀓𑀢𑀫𑀁 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀓𑀼𑀲𑀮𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀁 𑀓𑀼𑀲𑀮𑀘𑀺𑀢𑁆𑀢𑀸 𑀅𑀦𑀼𑀯𑀤𑀦𑁆𑀢𑀺 𑁋 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀯𑀸, 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀯𑀸, 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀯𑀸, 𑀆𑀚𑀻𑀯𑀯𑀺𑀧𑀢𑁆𑀢𑀺𑀬𑀸 𑀯𑀸. 𑀬𑁄 𑀢𑀢𑁆𑀣 𑀅𑀦𑀼𑀯𑀸𑀤𑁄 𑀅𑀦𑀼𑀯𑀤𑀦𑀸 𑀅𑀦𑀼𑀮𑁆𑀮𑀧𑀦𑀸 𑀅𑀦𑀼𑀪𑀡𑀦𑀸 𑀅𑀦𑀼𑀲𑀫𑁆𑀧𑀯𑀗𑁆𑀓𑀢𑀸 𑀅𑀩𑁆𑀪𑀼𑀲𑁆𑀲𑀳𑀦𑀢𑀸 𑀅𑀦𑀼𑀩𑀮𑀧𑁆𑀧𑀤𑀸𑀦𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀓𑀼𑀲𑀮𑀁.

‘‘𑀢𑀢𑁆𑀣 𑀓𑀢𑀫𑀁 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀅𑀓𑀼𑀲𑀮𑀁? 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀁 𑀅𑀓𑀼𑀲𑀮𑀘𑀺𑀢𑁆𑀢𑀸 𑀅𑀦𑀼𑀯𑀤𑀦𑁆𑀢𑀺 𑁋 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀯𑀸, 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀯𑀸, 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀯𑀸, 𑀆𑀚𑀻𑀯𑀯𑀺𑀧𑀢𑁆𑀢𑀺𑀬𑀸 𑀯𑀸. 𑀬𑁄 𑀢𑀢𑁆𑀣 𑀅𑀦𑀼𑀯𑀸𑀤𑁄 𑀅𑀦𑀼𑀯𑀤𑀦𑀸 𑀅𑀦𑀼𑀮𑁆𑀮𑀧𑀦𑀸 𑀅𑀦𑀼𑀪𑀡𑀦𑀸 𑀅𑀦𑀼𑀲𑀫𑁆𑀧𑀯𑀗𑁆𑀓𑀢𑀸 𑀅𑀩𑁆𑀪𑀼𑀲𑁆𑀲𑀳𑀦𑀢𑀸 𑀅𑀦𑀼𑀩𑀮𑀧𑁆𑀧𑀤𑀸𑀦𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀅𑀓𑀼𑀲𑀮𑀁.

‘‘𑀢𑀢𑁆𑀣 𑀓𑀢𑀫𑀁 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀅𑀩𑁆𑀬𑀸𑀓𑀢𑀁? 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀁 𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑀸 𑀅𑀦𑀼𑀯𑀤𑀦𑁆𑀢𑀺 𑁋 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀯𑀸, 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀯𑀸, 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀯𑀸, 𑀆𑀚𑀻𑀯𑀯𑀺𑀧𑀢𑁆𑀢𑀺𑀬𑀸 𑀯𑀸. 𑀬𑁄 𑀢𑀢𑁆𑀣 𑀅𑀦𑀼𑀯𑀸𑀤𑁄 𑀅𑀦𑀼𑀯𑀤𑀦𑀸 𑀅𑀦𑀼𑀮𑁆𑀮𑀧𑀦𑀸 𑀅𑀦𑀼𑀪𑀡𑀦𑀸 𑀅𑀦𑀼𑀲𑀫𑁆𑀧𑀯𑀗𑁆𑀓𑀢𑀸 𑀅𑀩𑁆𑀪𑀼𑀲𑁆𑀲𑀳𑀦𑀢𑀸 𑀅𑀦𑀼𑀩𑀮𑀧𑁆𑀧𑀤𑀸𑀦𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀅𑀩𑁆𑀬𑀸𑀓𑀢𑀁.

𑁨𑁨𑁨. ‘‘𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀓𑀼𑀲𑀮𑀁 [𑀇𑀤𑀁 𑀧𑀤𑀁 𑀓𑁂𑀲𑀼𑀘𑀺 𑀦𑀢𑁆𑀣𑀺], 𑀅𑀓𑀼𑀲𑀮𑀁, 𑀅𑀩𑁆𑀬𑀸𑀓𑀢𑀁? 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀲𑀺𑀬𑀸 𑀅𑀓𑀼𑀲𑀮𑀁, 𑀲𑀺𑀬𑀸 𑀅𑀩𑁆𑀬𑀸𑀓𑀢𑀁; 𑀦𑀢𑁆𑀣𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀓𑀼𑀲𑀮𑀁. 𑀢𑀢𑁆𑀣 𑀓𑀢𑀫𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀅𑀓𑀼𑀲𑀮𑀁? 𑀬𑀁 𑀚𑀸𑀦𑀦𑁆𑀢𑁄 𑀲𑀜𑁆𑀚𑀸𑀦𑀦𑁆𑀢𑁄 𑀘𑁂𑀘𑁆𑀘 𑀅𑀪𑀺𑀯𑀺𑀢𑀭𑀺𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑁄 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀅𑀓𑀼𑀲𑀮𑀁.

‘‘𑀢𑀢𑁆𑀣 𑀓𑀢𑀫𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀅𑀩𑁆𑀬𑀸𑀓𑀢𑀁? 𑀬𑀁 𑀅𑀚𑀸𑀦𑀦𑁆𑀢𑁄 𑀅𑀲𑀜𑁆𑀚𑀸𑀦𑀦𑁆𑀢𑁄 𑀅𑀘𑁂𑀘𑁆𑀘 𑀅𑀦𑀪𑀺𑀯𑀺𑀢𑀭𑀺𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑁄 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀅𑀩𑁆𑀬𑀸𑀓𑀢𑀁.

𑁨𑁨𑁩. ‘‘𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀓𑀼𑀲𑀮𑀁, 𑀅𑀓𑀼𑀲𑀮𑀁, 𑀅𑀩𑁆𑀬𑀸𑀓𑀢𑀁? 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀲𑀺𑀬𑀸 𑀓𑀼𑀲𑀮𑀁, 𑀲𑀺𑀬𑀸 𑀅𑀓𑀼𑀲𑀮𑀁, 𑀲𑀺𑀬𑀸 𑀅𑀩𑁆𑀬𑀸𑀓𑀢𑀁. 𑀢𑀢𑁆𑀣 𑀓𑀢𑀫𑀁 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀓𑀼𑀲𑀮𑀁? 𑀬𑀁 𑀲𑀗𑁆𑀖𑁄 𑀓𑀼𑀲𑀮𑀘𑀺𑀢𑁆𑀢𑁄 𑀓𑀫𑁆𑀫𑀁 𑀓𑀭𑁄𑀢𑀺 𑁋 𑀅𑀧𑀮𑁄𑀓𑀦𑀓𑀫𑁆𑀫𑀁, 𑀜𑀢𑁆𑀢𑀺𑀓𑀫𑁆𑀫𑀁, 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁, 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀓𑀼𑀲𑀮𑀁.

‘‘𑀢𑀢𑁆𑀣 𑀓𑀢𑀫𑀁 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀅𑀓𑀼𑀲𑀮𑀁? 𑀬𑀁 𑀲𑀗𑁆𑀖𑁄 𑀅𑀓𑀼𑀲𑀮𑀘𑀺𑀢𑁆𑀢𑁄 𑀓𑀫𑁆𑀫𑀁 𑀓𑀭𑁄𑀢𑀺 𑁋 𑀅𑀧𑀮𑁄𑀓𑀦𑀓𑀫𑁆𑀫𑀁, 𑀜𑀢𑁆𑀢𑀺𑀓𑀫𑁆𑀫𑀁, 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁, 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀅𑀓𑀼𑀲𑀮𑀁.

‘‘𑀢𑀢𑁆𑀣 𑀓𑀢𑀫𑀁 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀅𑀩𑁆𑀬𑀸𑀓𑀢𑀁? 𑀬𑀁 𑀲𑀗𑁆𑀖𑁄 𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑁄 𑀓𑀫𑁆𑀫𑀁 𑀓𑀭𑁄𑀢𑀺 𑁋 𑀅𑀧𑀮𑁄𑀓𑀦𑀓𑀫𑁆𑀫𑀁, 𑀜𑀢𑁆𑀢𑀺𑀓𑀫𑁆𑀫𑀁, 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁, 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀅𑀩𑁆𑀬𑀸𑀓𑀢𑀁.

𑁨𑁨𑁪. [𑀧𑀭𑀺. 𑁩𑁫𑁫] ‘‘𑀯𑀺𑀯𑀸𑀤𑁄 𑀯𑀺𑀯𑀸𑀤𑀸𑀥𑀺𑀓𑀭𑀡𑀁, 𑀯𑀺𑀯𑀸𑀤𑁄 𑀦𑁄 𑀅𑀥𑀺𑀓𑀭𑀡𑀁, 𑀅𑀥𑀺𑀓𑀭𑀡𑀁 𑀦𑁄 𑀯𑀺𑀯𑀸𑀤𑁄, 𑀅𑀥𑀺𑀓𑀭𑀡𑀜𑁆𑀘𑁂𑀯 𑀯𑀺𑀯𑀸𑀤𑁄 𑀘. 𑀲𑀺𑀬𑀸 𑀯𑀺𑀯𑀸𑀤𑁄 𑀯𑀺𑀯𑀸𑀤𑀸𑀥𑀺𑀓𑀭𑀡𑀁, 𑀲𑀺𑀬𑀸 𑀯𑀺𑀯𑀸𑀤𑁄 𑀦𑁄 𑀅𑀥𑀺𑀓𑀭𑀡𑀁, 𑀲𑀺𑀬𑀸 𑀅𑀥𑀺𑀓𑀭𑀡𑀁 𑀦𑁄 𑀯𑀺𑀯𑀸𑀤𑁄, 𑀲𑀺𑀬𑀸 𑀅𑀥𑀺𑀓𑀭𑀡𑀜𑁆𑀘𑁂𑀯 𑀯𑀺𑀯𑀸𑀤𑁄 𑀘.

‘‘𑀢𑀢𑁆𑀣 𑀓𑀢𑀫𑁄 𑀯𑀺𑀯𑀸𑀤𑁄 𑀯𑀺𑀯𑀸𑀤𑀸𑀥𑀺𑀓𑀭𑀡𑀁? 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀯𑀺𑀯𑀤𑀦𑁆𑀢𑀺 𑁋 𑀥𑀫𑁆𑀫𑁄𑀢𑀺 𑀯𑀸 𑀅𑀥𑀫𑁆𑀫𑁄𑀢𑀺 𑀯𑀸…𑀧𑁂… 𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀯𑀸 𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀯𑀸. 𑀬𑀁 𑀢𑀢𑁆𑀣 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀦𑀸𑀦𑀸𑀯𑀸𑀤𑁄 𑀅𑀜𑁆𑀜𑀣𑀸𑀯𑀸𑀤𑁄 𑀯𑀺𑀧𑀘𑁆𑀘𑀢𑀸𑀬 𑀯𑁄𑀳𑀸𑀭𑁄 𑀫𑁂𑀥𑀕𑀁 𑁋 𑀅𑀬𑀁 𑀯𑀺𑀯𑀸𑀤𑁄 𑀯𑀺𑀯𑀸𑀤𑀸𑀥𑀺𑀓𑀭𑀡𑀁.

‘‘𑀢𑀢𑁆𑀣 𑀓𑀢𑀫𑁄 𑀯𑀺𑀯𑀸𑀤𑁄 𑀦𑁄 𑀅𑀥𑀺𑀓𑀭𑀡𑀁? 𑀫𑀸𑀢𑀸𑀧𑀺 𑀧𑀼𑀢𑁆𑀢𑁂𑀦 𑀯𑀺𑀯𑀤𑀢𑀺, 𑀧𑀼𑀢𑁆𑀢𑁄𑀧𑀺 𑀫𑀸𑀢𑀭𑀸 𑀯𑀺𑀯𑀤𑀢𑀺, 𑀧𑀺𑀢𑀸𑀧𑀺 𑀧𑀼𑀢𑁆𑀢𑁂𑀦 𑀯𑀺𑀯𑀤𑀢𑀺, 𑀧𑀼𑀢𑁆𑀢𑁄𑀧𑀺 𑀧𑀺𑀢𑀭𑀸 𑀯𑀺𑀯𑀤𑀢𑀺, 𑀪𑀸𑀢𑀸𑀧𑀺 𑀪𑀸𑀢𑀭𑀸 𑀯𑀺𑀯𑀤𑀢𑀺, 𑀪𑀸𑀢𑀸𑀧𑀺 𑀪𑀕𑀺𑀦𑀺𑀬𑀸 𑀯𑀺𑀯𑀤𑀢𑀺, 𑀪𑀕𑀺𑀦𑀻𑀧𑀺 𑀪𑀸𑀢𑀭𑀸 𑀯𑀺𑀯𑀤𑀢𑀺, 𑀲𑀳𑀸𑀬𑁄𑀧𑀺 𑀲𑀳𑀸𑀬𑁂𑀦 𑀯𑀺𑀯𑀤𑀢𑀺 𑁋 𑀅𑀬𑀁 𑀯𑀺𑀯𑀸𑀤𑁄 𑀦𑁄 𑀅𑀥𑀺𑀓𑀭𑀡𑀁.

‘‘𑀢𑀢𑁆𑀣 𑀓𑀢𑀫𑀁 𑀅𑀥𑀺𑀓𑀭𑀡𑀁 𑀦𑁄 𑀯𑀺𑀯𑀸𑀤𑁄? 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁, 𑀆𑀧𑀢𑁆𑀢𑀸𑀥𑀺𑀓𑀭𑀡𑀁, 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑁋 𑀇𑀤𑀁 𑀅𑀥𑀺𑀓𑀭𑀡𑀁 𑀦𑁄 𑀯𑀺𑀯𑀸𑀤𑁄.

‘‘𑀢𑀢𑁆𑀣 𑀓𑀢𑀫𑀁 𑀅𑀥𑀺𑀓𑀭𑀡𑀜𑁆𑀘𑁂𑀯 𑀯𑀺𑀯𑀸𑀤𑁄 𑀘? 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀅𑀥𑀺𑀓𑀭𑀡𑀜𑁆𑀘𑁂𑀯 𑀯𑀺𑀯𑀸𑀤𑁄 𑀘.