𑁧𑁦. 𑀯𑁂𑀯𑀘𑀦𑀳𑀸𑀭𑀲𑀫𑁆𑀧𑀸𑀢𑀯𑀺𑀪𑀸𑀯𑀦𑀸

𑁭𑁨. 𑀬𑁂𑀦 𑀬𑁂𑀦 𑀧𑀭𑀺𑀯𑀢𑁆𑀢𑀦𑀳𑀸𑀭𑀲𑀫𑁆𑀧𑀸𑀢𑁂𑀦 𑀲𑀼𑀢𑁆𑀢𑀧𑁆𑀧𑀤𑁂𑀲𑀢𑁆𑀣𑀸 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑀸, 𑀲𑁄 𑀧𑀭𑀺𑀯𑀢𑁆𑀢𑀦𑁄 𑀳𑀸𑀭𑀲𑀫𑁆𑀧𑀸𑀢𑁄𑀢𑀺 𑀧𑀭𑀺𑀧𑀼𑀡𑁆𑀡𑁄, ‘‘𑀓𑀢𑀫𑁄 𑀯𑁂𑀯𑀘𑀦𑁄 𑀳𑀸𑀭𑀲𑀫𑁆𑀧𑀸𑀢𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀢𑀫𑁄 𑀯𑁂𑀯𑀘𑀦𑁄 𑀳𑀸𑀭𑀲𑀫𑁆𑀧𑀸𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁.

‘‘𑀓𑀢𑀫𑁂𑀲𑀁 𑀲𑀼𑀢𑁆𑀢𑀧𑁆𑀧𑀤𑁂𑀲𑀢𑁆𑀣𑀸𑀦𑀁, 𑀲𑀼𑀢𑁆𑀢𑀧𑀤𑀸𑀦𑀁 𑀯𑀸 𑀓𑀢𑀫𑀸𑀦𑀺 𑀯𑁂𑀯𑀘𑀦𑀸𑀦𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀲𑁆𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀸 ‘‘𑀢𑀲𑁆𑀫𑀸…𑀧𑁂… 𑀕𑁄𑀘𑀭𑁄’’𑀢𑀺 𑀕𑀸𑀣𑀸 𑀯𑀼𑀢𑁆𑀢𑀸, 𑀢𑀸𑀬 𑀕𑀸𑀣𑀸𑀬 ‘‘𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲𑀸’’𑀢𑀺 𑀧𑀤𑁂𑀦 𑀯𑀼𑀢𑁆𑀢𑀲𑁆𑀲 𑀘𑀺𑀢𑁆𑀢𑀲𑁆𑀲, ‘‘𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲𑀸’’𑀢𑀺 𑀏𑀢𑁆𑀣 𑀘𑀺𑀢𑁆𑀢𑀲𑁆𑀲 𑀧𑀤𑀲𑁆𑀲 𑀯𑀸 ‘‘𑀘𑀺𑀢𑁆𑀢𑀁…𑀧𑁂… 𑀯𑀺𑀚𑀸𑀦𑀺𑀢𑀢𑁆𑀢’’𑀦𑁆𑀢𑀺 𑀬𑀁 𑀯𑀘𑀦𑀁 𑀯𑀼𑀢𑁆𑀢𑀁, 𑀇𑀤𑀁 𑀯𑀘𑀦𑀁 𑀯𑁂𑀯𑀘𑀦𑀁, ‘‘𑀫𑀸𑀦𑀲𑀁 𑀳𑀤𑀬’’𑀦𑁆𑀢𑀺𑀆𑀤𑀺𑀯𑀘𑀦𑀫𑁆𑀧𑀺 (𑀥. 𑀲. 𑁧𑁭, 𑁬𑁩) 𑀘𑀺𑀢𑁆𑀢𑀲𑁆𑀲 𑀯𑁂𑀯𑀘𑀦𑀁. ‘‘𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄’’𑀢𑀺 𑀏𑀢𑁆𑀣 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀲𑁆𑀲 ‘‘𑀦𑁂𑀓𑁆𑀔𑀫𑁆𑀫𑀲𑀗𑁆𑀓𑀧𑁆𑀧𑁄 𑀅𑀩𑁆𑀬𑀸𑀧𑀸𑀤𑀲𑀗𑁆𑀓𑀧𑁆𑀧𑁄 𑀅𑀯𑀺𑀳𑀺𑀁𑀲𑀸𑀲𑀗𑁆𑀓𑀧𑁆𑀧𑁄’’𑀢𑀺 𑀬𑀁 𑀯𑀘𑀦𑀁 𑀯𑀼𑀢𑁆𑀢𑀁, 𑀇𑀤𑀁 𑀯𑀘𑀦𑀁 𑀯𑁂𑀯𑀘𑀦𑀁, ‘‘𑀢𑀓𑁆𑀓𑁄 𑀯𑀺𑀢𑀓𑁆𑀓𑁄’’𑀢𑀺𑀆𑀤𑀺 (𑀥. 𑀲. 𑁭) 𑀯𑀘𑀦𑀫𑁆𑀧𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀲𑁆𑀲 𑀯𑁂𑀯𑀘𑀦𑀁. ‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑁄’’𑀢𑀺 𑀏𑀢𑁆𑀣 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀤𑀲𑁆𑀲 ‘‘𑀲𑀫𑁆𑀫𑀸𑀤𑀺𑀝𑁆𑀞𑀺 𑀦𑀸𑀫 𑀧𑀜𑁆𑀜𑀸𑀲𑀢𑁆𑀣𑀁 𑀧𑀜𑁆𑀜𑀸𑀔𑀕𑁆𑀕𑁄 𑀧𑀜𑁆𑀜𑀸𑀭𑀢𑀦𑀁 𑀧𑀜𑁆𑀜𑀸𑀧𑀢𑁄𑀤𑁄 𑀧𑀜𑁆𑀜𑀸𑀧𑀸𑀲𑀸𑀤𑁄’’𑀢𑀺 𑀬𑀁 𑀯𑀘𑀦𑀁 𑀯𑀼𑀢𑁆𑀢𑀁, 𑀇𑀤𑀁 𑀯𑀘𑀦𑀁 𑀯𑁂𑀯𑀘𑀦𑀁, ‘‘𑀧𑀜𑁆𑀜𑀸 𑀧𑀚𑀸𑀦𑀦𑀸 𑀯𑀺𑀘𑀬𑁄’’𑀢𑀺𑀆𑀤𑀺 (𑀥. 𑀲. 𑁧𑁬) 𑀯𑀘𑀦𑀫𑁆𑀧𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀤𑀲𑁆𑀲 𑀯𑁂𑀯𑀘𑀦𑀁. ‘‘𑀣𑀺𑀦𑀁 𑀣𑀺𑀬𑀦𑀸 𑀣𑀺𑀬𑀺𑀢𑀢𑁆𑀢𑀁 𑀘𑀺𑀢𑁆𑀢𑀲𑁆𑀲, 𑀘𑀺𑀢𑁆𑀢𑀲𑁆𑀲 𑀅𑀓𑀮𑁆𑀮𑀢𑀸 𑀅𑀓𑀫𑁆𑀫𑀜𑁆𑀜𑀢𑀸 𑀑𑀦𑀸𑀳𑁄 𑀧𑀭𑀺𑀬𑁄𑀦𑀸𑀳𑁄 𑀅𑀦𑁆𑀢𑁄𑀲𑀗𑁆𑀓𑁄𑀘𑁄’’𑀢𑀺 (𑀥. 𑀲. 𑁧𑁧𑁬𑁨-𑁧𑁧𑁬𑁩) 𑀬𑀁 𑀯𑀘𑀦𑀁 𑀯𑀼𑀢𑁆𑀢𑀁, 𑀇𑀤𑀁 𑀯𑀘𑀦𑀁 𑀣𑀺𑀦𑀲𑁆𑀲 𑀯𑁂𑀯𑀘𑀦𑀁. ‘‘𑀓𑀸𑀬𑀲𑁆𑀲 𑀅𑀓𑀮𑁆𑀮𑀢𑀸 𑀅𑀓𑀫𑁆𑀫𑀜𑁆𑀜𑀢𑀸 𑀓𑀸𑀬𑀸𑀮𑀲𑀺𑀬𑀁 𑀲𑁄𑀧𑁆𑀧𑀁 𑀲𑀼𑀧𑀦𑀸 𑀲𑀼𑀧𑁆𑀧𑀺𑀢𑀢𑁆𑀢’’𑀦𑁆𑀢𑀺 (𑀥. 𑀲. 𑁧𑁧𑁬𑁩) 𑀬𑀁 𑀯𑀘𑀦𑀁 𑀯𑀼𑀢𑁆𑀢𑀁, 𑀇𑀤𑀁 𑀯𑀘𑀦𑀁 𑀫𑀺𑀤𑁆𑀥𑀲𑁆𑀲 𑀯𑁂𑀯𑀘𑀦𑀁. ‘‘𑀪𑀺𑀓𑁆𑀔𑀓𑁄 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀓𑀁 (𑀧𑀸𑀭𑀸. 𑁪𑁫; 𑀯𑀺𑀪. 𑁫𑁧𑁦) 𑀬𑀁 𑀯𑀘𑀦𑀁 𑀯𑀼𑀢𑁆𑀢𑀁, 𑀇𑀤𑀁 𑀯𑀘𑀦𑀁 𑀪𑀺𑀓𑁆𑀔𑀼𑀧𑀤𑀲𑁆𑀲 𑀯𑁂𑀯𑀘𑀦𑀁. ‘‘𑀤𑀼𑀕𑁆𑀕𑀢𑀺 𑀅𑀧𑀸𑀬𑁄 𑀯𑀺𑀦𑀺𑀧𑀸𑀢𑁄 𑀯𑀝𑁆𑀝𑀤𑀼𑀓𑁆𑀔𑀁 𑀲𑀁𑀲𑀸𑀭𑁄’’𑀢𑀺𑀆𑀤𑀺𑀓𑀁 𑀬𑀁 𑀯𑀘𑀦𑀁 𑀯𑀼𑀢𑁆𑀢𑀁, 𑀇𑀤𑀁 𑀯𑀘𑀦𑀁 𑀤𑀼𑀕𑁆𑀕𑀢𑀺𑀧𑀤𑀲𑁆𑀲 𑀯𑁂𑀯𑀘𑀦𑀁. 𑀇𑀢𑀺 𑀯𑁂𑀯𑀘𑀦𑀸𑀦𑀺 𑀦𑀻𑀳𑀭𑀺𑀢𑀸𑀦𑀺.

‘‘𑀏𑀢𑁆𑀢𑀓𑁄𑀯 𑀯𑁂𑀯𑀘𑀦𑀳𑀸𑀭𑀲𑀫𑁆𑀧𑀸𑀢𑁄 𑀧𑀭𑀺𑀧𑀼𑀡𑁆𑀡𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀦𑀺𑀬𑀼𑀢𑁆𑀢𑁄 𑀯𑁂𑀯𑀘𑀦𑁄 𑀳𑀸𑀭𑀲𑀫𑁆𑀧𑀸𑀢𑁄’’𑀢𑀺 𑀯𑀼𑀢𑁆𑀢𑀁. 𑀬𑁂𑀦 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀪𑀽𑀢𑁂𑀦 𑀯𑁂𑀯𑀘𑀦𑀳𑀸𑀭𑀲𑀫𑁆𑀧𑀸𑀢𑁂𑀦 𑀯𑁂𑀯𑀘𑀦𑀸𑀦𑀺 𑀦𑀻𑀳𑀭𑀺𑀢𑀸𑀦𑀺, 𑀲𑁄 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀪𑀽𑀢𑁄 𑀯𑁂𑀯𑀘𑀦𑀳𑀸𑀭𑀲𑀫𑁆𑀧𑀸𑀢𑁄 𑀦𑀺𑀬𑀼𑀢𑁆𑀢𑁄 𑀬𑀣𑀸𑀲𑀫𑁆𑀪𑀯𑀁 𑀦𑀻𑀳𑀭𑀺𑀢𑁆𑀯𑀸 𑀬𑀼𑀚𑁆𑀚𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄 𑀕𑀳𑀺𑀢𑁄𑀢𑀺.

𑀇𑀢𑀺 𑀯𑁂𑀯𑀘𑀦𑀳𑀸𑀭𑀲𑀫𑁆𑀧𑀸𑀢𑁂 𑀲𑀢𑁆𑀢𑀺𑀩𑀮𑀸𑀦𑀼𑀭𑀽𑀧𑀸 𑀭𑀘𑀺𑀢𑀸

𑀯𑀺𑀪𑀸𑀯𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀡𑁆𑀟𑀺𑀢𑁂𑀳𑀺 𑀧𑀦…𑀧𑁂… 𑀕𑀳𑁂𑀢𑀩𑁆𑀩𑁄𑀢𑀺.