𑁭. 𑀆𑀯𑀝𑁆𑀝𑀳𑀸𑀭𑀲𑀫𑁆𑀧𑀸𑀢𑀯𑀺𑀪𑀸𑀯𑀦𑀸

𑁬𑁯. 𑀬𑁂𑀦 𑀬𑁂𑀦 𑀘𑀢𑀼𑀩𑁆𑀬𑀽𑀳𑀳𑀸𑀭𑀲𑀫𑁆𑀧𑀸𑀢𑁂𑀦 𑀦𑀺𑀭𑀼𑀢𑁆𑀬𑀸𑀥𑀺𑀧𑁆𑀧𑀸𑀬𑀦𑀺𑀤𑀸𑀦𑀧𑀼𑀩𑁆𑀩𑀸𑀧𑀭𑀸𑀦𑀼𑀲𑀦𑁆𑀥𑀬𑁄 𑀯𑀺𑀪𑀢𑁆𑀢𑀸, 𑀲𑁄 𑀘𑀢𑀼𑀩𑁆𑀬𑀽𑀳𑀳𑀸𑀭𑀲𑀫𑁆𑀧𑀸𑀢𑁄 𑀧𑀭𑀺𑀧𑀼𑀡𑁆𑀡𑁄, ‘‘𑀓𑀢𑀫𑁄 𑀆𑀯𑀝𑁆𑀝𑀳𑀸𑀭𑀲𑀫𑁆𑀧𑀸𑀢𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀢𑀫𑁄 𑀆𑀯𑀝𑁆𑀝𑁄 𑀳𑀸𑀭𑀲𑀫𑁆𑀧𑀸𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀢𑀫𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀆𑀯𑀝𑁆𑀝𑀳𑀸𑀭𑀲𑀫𑁆𑀧𑀸𑀢𑁄 𑀦𑀸𑀫𑀸𑀢𑀺 𑀧𑀼𑀘𑁆𑀙𑀢𑀺.

‘‘𑀓𑀢𑀫𑁂 𑀲𑀼𑀢𑁆𑀢𑀢𑁆𑀣𑀸 𑀓𑀣𑀁 𑀆𑀯𑀝𑁆𑀝𑁂𑀢𑀩𑁆𑀩𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀲𑁆𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑁂𑀓𑁆𑀔𑀫𑁆𑀫𑀲𑀗𑁆𑀓𑀧𑁆𑀧𑀲𑀗𑁆𑀔𑀸𑀢𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀩𑀳𑀼𑀮𑁄 𑀓𑀲𑀺𑀡𑀸𑀤𑀺𑀯𑀲𑁂𑀦, 𑀅𑀯𑀺𑀳𑀺𑀁𑀲𑀸𑀲𑀗𑁆𑀓𑀧𑁆𑀧𑀲𑀗𑁆𑀔𑀸𑀢𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀩𑀳𑀼𑀮𑁄 𑀫𑁂𑀢𑁆𑀢𑀸𑀤𑀺𑀯𑀲𑁂𑀦 𑀅𑀥𑀺𑀕𑀢𑀸𑀬 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬 𑀘𑀺𑀢𑁆𑀢𑀁 𑀞𑀧𑁂𑀦𑁆𑀢𑁄 𑀲𑀁𑀓𑀺𑀮𑁂𑀲𑀢𑁄 𑀭𑀓𑁆𑀔𑀺𑀢𑀘𑀺𑀢𑁆𑀢𑁄 𑀦𑀸𑀫 𑀳𑁄𑀢𑀺, ‘‘𑀢𑀲𑁆𑀫𑀸 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄’’𑀢𑀺 𑀇𑀫𑀺𑀦𑀸 𑀭𑀓𑁆𑀔𑀺𑀢𑀘𑀺𑀢𑁆𑀢𑁂 𑀯𑀼𑀢𑁆𑀢𑁂 𑀲𑀢𑀺 𑀬𑀸 𑀏𑀓𑀕𑁆𑀕𑀢𑀸 𑀆𑀯𑀝𑁆𑀝𑁂𑀢𑀩𑁆𑀩𑀸, 𑀲𑀸 𑀅𑀬𑀁 𑀏𑀓𑀕𑁆𑀕𑀢𑀸 𑀲𑀫𑀣𑁄. ‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑁄’’𑀢𑀺 𑀇𑀫𑀺𑀦𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑁂 𑀯𑀼𑀢𑁆𑀢𑁂 𑀲𑀢𑀺 𑀬𑀸 𑀧𑀜𑁆𑀜𑀸 𑀆𑀯𑀝𑁆𑀝𑁂𑀢𑀩𑁆𑀩𑀸, 𑀲𑀸 𑀅𑀬𑀁 𑀧𑀜𑁆𑀜𑀸 𑀯𑀺𑀧𑀲𑁆𑀲𑀦𑀸. ‘‘𑀜𑀢𑁆𑀯𑀸𑀦 𑀉𑀤𑀬𑀩𑁆𑀩𑀬’’𑀦𑁆𑀢𑀺 𑀇𑀫𑀺𑀦𑀸 𑀉𑀤𑀬𑀩𑁆𑀩𑀬𑀜𑀸𑀡𑀲𑀫𑀦𑁆𑀦𑀸𑀕𑀢𑁂 𑀯𑀼𑀢𑁆𑀢𑁂 𑀲𑀢𑀺 𑀬𑀸 𑀤𑀼𑀓𑁆𑀔𑀧𑀭𑀺𑀚𑀸𑀦𑀦𑀸 𑀆𑀯𑀝𑁆𑀝𑁂𑀢𑀩𑁆𑀩𑀸, 𑀲𑀸 𑀅𑀬𑀁 𑀤𑀼𑀓𑁆𑀔𑀧𑀭𑀺𑀚𑀸𑀦𑀦𑀸 𑀤𑀼𑀓𑁆𑀔𑀧𑀭𑀺𑀜𑁆𑀜𑀸. ‘‘𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀽 𑀪𑀺𑀓𑁆𑀔𑀽’’𑀢𑀺 𑀇𑀫𑀺𑀦𑀸 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀬𑀁 𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀯𑀦𑀁 𑀯𑀼𑀢𑁆𑀢𑀁, 𑀇𑀤𑀁 𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀯𑀦𑀁 𑀲𑀫𑀼𑀤𑀬𑀧𑁆𑀧𑀳𑀸𑀦𑀁. ‘‘𑀲𑀫𑁆𑀫𑀸 𑀤𑀼𑀕𑁆𑀕𑀢𑀺𑀬𑁄 𑀚𑀳𑁂’’𑀢𑀺 𑀇𑀫𑀺𑀦𑀸 𑀬𑁄 𑀲𑀩𑁆𑀩𑀤𑀼𑀕𑁆𑀕𑀢𑀺𑀚𑀳𑀦𑀲𑀗𑁆𑀔𑀸𑀢𑁄 𑀅𑀦𑀼𑀧𑁆𑀧𑀸𑀤𑁄 𑀯𑀼𑀢𑁆𑀢𑁄, 𑀲𑁄 𑀅𑀬𑀁 𑀅𑀦𑀼𑀧𑁆𑀧𑀸𑀤𑁄 𑀦𑀺𑀭𑁄𑀥𑁄. 𑀇𑀢𑀺 𑀤𑀼𑀓𑁆𑀔𑀧𑀭𑀺𑀜𑁆𑀜𑀸𑀬 𑀧𑀭𑀺𑀜𑁆𑀜𑁂𑀢𑀩𑁆𑀩𑀁 𑀤𑀼𑀓𑁆𑀔𑀲𑀘𑁆𑀘𑀁 𑀆𑀯𑀝𑁆𑀝𑁂𑀢𑀩𑁆𑀩𑀁, 𑀲𑀫𑀼𑀤𑀬𑀧𑁆𑀧𑀳𑀸𑀦𑁂𑀦 𑀧𑀳𑀸𑀢𑀩𑁆𑀩𑀁 𑀲𑀫𑀼𑀤𑀬𑀲𑀘𑁆𑀘𑀁 𑀆𑀯𑀝𑁆𑀝𑁂𑀢𑀩𑁆𑀩𑀁, 𑀦𑀺𑀭𑁄𑀥𑁂𑀦 𑀦𑀺𑀭𑁄𑀥𑀲𑀘𑁆𑀘𑀁 𑀆𑀯𑀝𑁆𑀝𑁂𑀢𑀩𑁆𑀩𑀁, 𑀲𑀫𑀣𑀯𑀺𑀧𑀲𑁆𑀲𑀦𑀸𑀳𑀺 𑀫𑀕𑁆𑀕𑀲𑀘𑁆𑀘𑀁 𑀆𑀯𑀝𑁆𑀝𑁂𑀢𑀩𑁆𑀩𑀦𑁆𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀆𑀯𑀝𑁆𑀝𑁂𑀢𑀩𑁆𑀩𑀸𑀦𑀻𑀢𑀺.

‘‘𑀏𑀢𑁆𑀢𑀓𑁄𑀯 𑀆𑀯𑀝𑁆𑀝𑁄 𑀳𑀸𑀭𑀲𑀫𑁆𑀧𑀸𑀢𑁄 𑀧𑀭𑀺𑀧𑀼𑀡𑁆𑀡𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀦𑀺𑀬𑀼𑀢𑁆𑀢𑁄 𑀆𑀯𑀝𑁆𑀝𑁄 𑀳𑀸𑀭𑀲𑀫𑁆𑀧𑀸𑀢𑁄’’𑀢𑀺 𑀯𑀼𑀢𑁆𑀢𑀁. 𑀬𑁂𑀦 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀪𑀽𑀢𑁂𑀦 𑀆𑀯𑀝𑁆𑀝𑀳𑀸𑀭𑀲𑀫𑁆𑀧𑀸𑀢𑁂𑀦 𑀲𑀫𑀣𑀸𑀤𑀬𑁄 𑀆𑀯𑀝𑁆𑀝𑁂𑀢𑀩𑁆𑀩𑀸, 𑀲𑁄 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀪𑀽𑀢𑁄 𑀆𑀯𑀝𑁆𑀝𑀳𑀸𑀭𑀲𑀫𑁆𑀧𑀸𑀢𑁄 𑀦𑀺𑀬𑀼𑀢𑁆𑀢𑁄 𑀬𑀣𑀸𑀭𑀳𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀬𑀼𑀚𑁆𑀚𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄𑀢𑀺.

𑀇𑀢𑀺 𑀆𑀯𑀝𑁆𑀝𑀳𑀸𑀭𑀲𑀫𑁆𑀧𑀸𑀢𑁂 𑀲𑀢𑁆𑀢𑀺𑀩𑀮𑀸𑀦𑀼𑀭𑀽𑀧𑀸 𑀭𑀘𑀺𑀢𑀸

𑀯𑀺𑀪𑀸𑀯𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀡𑁆𑀟𑀺𑀢𑁂𑀳𑀺 𑀧𑀦…𑀧𑁂… 𑀕𑀳𑁂𑀢𑀩𑁆𑀩𑁄𑀢𑀺.