𑁧𑁦. 𑀯𑁂𑀯𑀘𑀦𑀳𑀸𑀭𑀯𑀺𑀪𑀗𑁆𑀕𑀯𑀺𑀪𑀸𑀯𑀦𑀸

𑁩𑁭. 𑀬𑁂𑀦 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀪𑀽𑀢𑁂𑀦 𑀧𑀯𑀢𑁆𑀢𑀦𑀳𑀸𑀭𑀯𑀺𑀪𑀗𑁆𑀕𑁂𑀦 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑀸 𑀲𑀼𑀢𑁆𑀢𑀢𑁆𑀣𑀸 𑀯𑀺𑀪𑀢𑁆𑀢𑀸, 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀪𑀽𑀢𑁄 𑀧𑀭𑀺𑀯𑀢𑁆𑀢𑀦𑀳𑀸𑀭𑀯𑀺𑀪𑀗𑁆𑀕𑁄 𑀧𑀭𑀺𑀧𑀼𑀡𑁆𑀡𑁄, ‘‘𑀓𑀢𑀫𑁄 𑀯𑁂𑀯𑀘𑀦𑀳𑀸𑀭𑀯𑀺𑀪𑀗𑁆𑀕𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀓𑀢𑀫𑁄 𑀯𑁂𑀯𑀘𑀦𑁄 𑀳𑀸𑀭𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀦𑀺𑀤𑁆𑀤𑀺𑀝𑁆𑀞𑁂𑀲𑀼 𑀲𑁄𑀴𑀲𑀲𑀼 𑀤𑁂𑀲𑀦𑀸𑀳𑀸𑀭𑀸𑀤𑀻𑀲𑀼 𑀓𑀢𑀫𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀯𑁂𑀯𑀘𑀦𑁄 𑀳𑀸𑀭𑁄 𑀯𑁂𑀯𑀘𑀦𑀳𑀸𑀭𑀯𑀺𑀪𑀗𑁆𑀕𑁄 𑀦𑀸𑀫𑀸𑀢𑀺 𑀧𑀼𑀘𑁆𑀙𑀢𑀺. ‘‘𑀯𑁂𑀯𑀘𑀦𑀸𑀦𑀺 𑀩𑀳𑀽𑀦𑀻’’𑀢𑀺𑀆𑀤𑀺𑀦𑀺𑀤𑁆𑀤𑁂𑀲𑀲𑁆𑀲 𑀇𑀤𑀸𑀦𑀺 𑀫𑀬𑀸 𑀯𑀼𑀘𑁆𑀘𑀫𑀸𑀦𑁄 ‘‘𑀏𑀓𑀁 𑀪𑀕𑀯𑀸 𑀥𑀫𑁆𑀫’’𑀦𑁆𑀢𑀺𑀆𑀤𑀺𑀓𑁄 𑀯𑀺𑀢𑁆𑀣𑀸𑀭𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀯𑁂𑀯𑀘𑀦𑁄 𑀳𑀸𑀭𑁄 𑀯𑁂𑀯𑀘𑀦𑀳𑀸𑀭𑀯𑀺𑀪𑀗𑁆𑀕𑁄 𑀦𑀸𑀫𑀸𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. ‘‘𑀬𑀸𑀦𑀺 𑀯𑁂𑀯𑀘𑀦𑀸𑀦𑀺 𑀦𑀺𑀤𑁆𑀥𑀸𑀭𑀺𑀢𑀸𑀦𑀺, 𑀓𑀢𑀫𑀸𑀦𑀺 𑀢𑀸𑀦𑀺 𑀯𑁂𑀯𑀘𑀦𑀸𑀦𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀬𑀣𑀸 𑀏𑀓’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀓𑀁 𑀯𑀺𑀜𑁆𑀜𑀸𑀢𑀩𑁆𑀩𑀁 𑀥𑀫𑁆𑀫𑀁 𑀲𑀪𑀸𑀯𑀥𑀫𑁆𑀫𑀁 𑀧𑀜𑁆𑀜𑀸𑀧𑁂𑀢𑀩𑁆𑀩𑀁 𑀯𑀸 𑀥𑀫𑁆𑀫𑀁 𑀅𑀜𑁆𑀜𑀫𑀜𑁆𑀜𑁂𑀳𑀺 𑀬𑀣𑀸 𑀬𑁂𑀳𑀺 𑀧𑀓𑀸𑀭𑁂𑀳𑀺 𑀘𑁂𑀯 𑀯𑁂𑀯𑀘𑀦𑁂𑀳𑀺 𑀘 𑀪𑀕𑀯𑀸 𑀦𑀺𑀤𑁆𑀤𑀺𑀲𑀢𑀺, 𑀢𑀣𑀸𑀧𑀓𑀸𑀭𑀸𑀦𑀺 𑀯𑁂𑀯𑀘𑀦𑀸𑀦𑀺 𑀯𑀺𑀜𑁆𑀜𑀸𑀢𑀩𑁆𑀩𑀸𑀦𑀻𑀢𑀺 𑀅𑀢𑁆𑀣𑁄. ‘‘𑀢𑀸𑀦𑀺 𑀯𑁂𑀯𑀘𑀦𑀸𑀦𑀺 𑀓𑀺𑀦𑁆𑀢𑀺 𑀪𑀕𑀯𑀸 𑀆𑀳𑀸’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀬𑀣𑀸𑀳 𑀪𑀕𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀣𑀸 𑀬𑀁𑀬𑀁𑀧𑀓𑀸𑀭𑀸𑀦𑀺 𑀯𑁂𑀯𑀘𑀦𑀸𑀦𑀺 𑁋

‘‘𑀆𑀲𑀸 𑀘 𑀧𑀺𑀳𑀸 𑀘 𑀅𑀪𑀺𑀦𑀦𑁆𑀤𑀦𑀸 𑀘, 𑀅𑀦𑁂𑀓𑀥𑀸𑀢𑀽𑀲𑀼 𑀲𑀭𑀸 𑀧𑀢𑀺𑀝𑁆𑀞𑀺𑀢𑀸;

𑀅𑀜𑁆𑀜𑀸𑀡𑀫𑀽𑀮𑀧𑁆𑀧𑀪𑀯𑀸 𑀧𑀚𑀧𑁆𑀧𑀺𑀢𑀸, 𑀲𑀩𑁆𑀩𑀸 𑀫𑀬𑀸 𑀩𑁆𑀬𑀦𑁆𑀢𑀺𑀓𑀢𑀸 𑀲𑀫𑀽𑀮𑀺𑀓𑀸’’𑀢𑀺. 𑁋

𑀪𑀕𑀯𑀸 𑀆𑀳, 𑀢𑀁𑀢𑀁𑀧𑀓𑀸𑀭𑀸𑀦𑀺 𑀯𑁂𑀯𑀘𑀦𑀸𑀦𑀺 𑀯𑀺𑀜𑁆𑀜𑀸𑀢𑀩𑁆𑀩𑀸𑀦𑀻𑀢𑀺 𑀅𑀢𑁆𑀣𑁄.

𑀏𑀓𑀲𑁆𑀲𑁂𑀯 𑀥𑀫𑁆𑀫𑀲𑁆𑀲 𑀅𑀦𑁂𑀓𑁂𑀳𑀺 𑀧𑀭𑀺𑀬𑀸𑀬𑀪𑀽𑀢𑁂𑀳𑀺 𑀯𑁂𑀯𑀘𑀦𑁂𑀳𑀺 𑀦𑀺𑀤𑁆𑀤𑀺𑀲𑀦𑁂 𑀨𑀮𑀁 𑀅𑀝𑁆𑀞𑀓𑀣𑀸𑀬𑀁 (𑀦𑁂𑀢𑁆𑀢𑀺. 𑀅𑀝𑁆𑀞. 𑁩𑁭) 𑀩𑀳𑀼𑀥𑀸 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀅𑀫𑁆𑀳𑁂𑀳𑀺 𑀦 𑀤𑀲𑁆𑀲𑀺𑀢𑀁. ‘‘𑀓𑀢𑀫𑀸 𑀆𑀲𑀸, 𑀓𑀢𑀫𑀸 𑀧𑀺𑀳𑀸𑀤𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀆𑀲𑀸 𑀦𑀸𑀫 𑀯𑀼𑀘𑁆𑀘𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀸 𑀪𑀯𑀺𑀲𑁆𑀲𑀲𑁆𑀲 𑀅𑀢𑁆𑀣𑀲𑁆𑀲 𑀆𑀲𑀻𑀲𑀦𑀸 𑀅𑀯𑀲𑁆𑀲𑀁 𑀆𑀕𑀫𑀺𑀲𑁆𑀲𑀢𑀻𑀢𑀺 𑀬𑀸 𑀆𑀲𑀸 𑀅𑀲𑁆𑀲 𑀆𑀲𑀻𑀲𑀦𑁆𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀆𑀲𑀻𑀲𑀦𑀸 ‘‘𑀆𑀲𑀸 𑀦𑀸𑀫𑀸’’𑀢𑀺 𑀯𑀼𑀘𑁆𑀘𑀢𑀺. 𑀯𑀢𑁆𑀢𑀫𑀸𑀦𑀲𑁆𑀲 𑀬𑀸 𑀧𑀢𑁆𑀣𑀦𑀸 𑀅𑀲𑁆𑀲 𑀧𑀢𑁆𑀣𑀬𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀺, 𑀲𑁂𑀬𑁆𑀬𑀢𑀭𑀁 𑀯𑀸 𑀅𑀜𑁆𑀜𑀁 𑀤𑀺𑀲𑁆𑀯𑀸 ‘‘𑀏𑀤𑀺𑀲𑁄 𑀅𑀳𑀁 𑀪𑀯𑁂𑀬𑁆𑀬’’𑀦𑁆𑀢𑀺 𑀬𑀸 𑀧𑀺𑀳𑀸 𑀅𑀲𑁆𑀲 𑀧𑀺𑀳𑀬𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀺, 𑀲𑀸 𑀧𑀢𑁆𑀣𑀦𑀸 ‘‘𑀧𑀺𑀳𑀸 𑀦𑀸𑀫𑀸’’𑀢𑀺 𑀯𑀼𑀘𑁆𑀘𑀢𑀺. 𑀅𑀦𑀸𑀕𑀢𑀢𑁆𑀣𑀁 𑀆𑀭𑀩𑁆𑀪 𑀧𑀯𑀢𑁆𑀢𑀸 𑀢𑀡𑁆𑀳𑀸 ‘‘𑀆𑀲𑀸’’𑀢𑀺 𑀯𑀼𑀘𑁆𑀘𑀢𑀺, 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑁆𑀣𑀁 𑀆𑀭𑀩𑁆𑀪 𑀧𑀯𑀢𑁆𑀢𑀸 𑀢𑀡𑁆𑀳𑀸 ‘‘𑀧𑀺𑀳𑀸’’𑀢𑀺 𑀯𑀼𑀘𑁆𑀘𑀢𑀺, 𑀢𑀣𑀸𑀧𑀺 𑀢𑀡𑁆𑀳𑀸𑀪𑀸𑀯𑁂𑀦 𑀏𑀓𑀢𑁆𑀢𑀸 𑀏𑀓𑁄 𑀥𑀫𑁆𑀫𑁄𑀯 𑀅𑀢𑁆𑀣𑀲𑁆𑀲 𑀇𑀘𑁆𑀙𑀺𑀢𑀲𑁆𑀲 𑀦𑀺𑀧𑁆𑀨𑀢𑁆𑀢𑀺 𑀅𑀢𑁆𑀣𑀦𑀺𑀧𑁆𑀨𑀢𑁆𑀢𑀺, 𑀧𑀝𑀺𑀧𑀸𑀮𑁂𑀢𑀺 𑀏𑀢𑀸𑀬 𑀢𑀡𑁆𑀳𑀸𑀬𑀸𑀢𑀺 𑀧𑀝𑀺𑀧𑀸𑀮𑀦𑀸, 𑀅𑀢𑁆𑀣𑀦𑀺𑀧𑁆𑀨𑀢𑁆𑀢𑀺𑀬𑀸 𑀧𑀝𑀺𑀧𑀸𑀮𑀦𑀸𑀢𑀺 𑀅𑀢𑁆𑀣𑀦𑀺𑀧𑁆𑀨𑀢𑁆𑀢𑀺𑀧𑀝𑀺𑀧𑀸𑀮𑀦𑀸. 𑀬𑀸 𑀢𑀡𑁆𑀳𑀸 𑀅𑀲𑁆𑀲 𑀧𑀸𑀮𑀬𑀦𑁆𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀧𑁆𑀧𑀚𑁆𑀚𑀢𑀺, 𑀲𑀸 𑀢𑀡𑁆𑀳𑀸 ‘‘𑀅𑀪𑀺𑀦𑀦𑁆𑀤𑀦𑀸’’𑀢𑀺 𑀯𑀼𑀘𑁆𑀘𑀢𑀺.

‘‘𑀬𑀸 𑀅𑀢𑁆𑀣𑀦𑀺𑀧𑁆𑀨𑀢𑁆𑀢𑀺 𑀢𑀡𑁆𑀳𑀸𑀬 𑀧𑀝𑀺𑀧𑀸𑀮𑁂𑀢𑀩𑁆𑀩𑀸, 𑀓𑀢𑀫𑀸 𑀲𑀸 𑀅𑀢𑁆𑀣𑀦𑀺𑀧𑁆𑀨𑀢𑁆𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀢𑀁 𑀅𑀢𑁆𑀣𑀦𑀺𑀧𑁆𑀨𑀢𑁆𑀢𑀺𑀁 𑀲𑀢𑁆𑀢𑀢𑁄 𑀯𑀸 𑀲𑀗𑁆𑀔𑀸𑀭𑀢𑁄 𑀯𑀸 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀺𑀬𑀁 𑀯𑀸 𑀜𑀸𑀢𑀺𑀁, 𑀧𑀺𑀬𑀁 𑀯𑀸 𑀥𑀫𑁆𑀫’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀜𑀸𑀢𑀺’’𑀦𑁆𑀢𑀺 𑀇𑀫𑀺𑀦𑀸 𑀫𑀺𑀢𑁆𑀢𑀩𑀦𑁆𑀥𑀯𑀸𑀤𑀬𑁄𑀧𑀺 𑀕𑀳𑀺𑀢𑀸. 𑀥𑀫𑁆𑀫𑀁 𑀧𑀦 𑀧𑀺𑀬𑀭𑀽𑀧𑀸𑀭𑀫𑁆𑀫𑀡𑀸𑀤𑀺𑀓𑀁 𑀙𑀩𑁆𑀩𑀺𑀥𑀫𑁆𑀧𑀺 𑀬𑀸𑀬 𑀢𑀡𑁆𑀳𑀸𑀬 𑀢𑀡𑁆𑀳𑀺𑀓𑁄 𑀅𑀪𑀺𑀦𑀦𑁆𑀤𑀢𑀺, 𑀲𑀸 𑀢𑀡𑁆𑀳𑀸 ‘‘𑀅𑀪𑀺𑀦𑀦𑁆𑀤𑀦𑀸 𑀦𑀸𑀫𑀸’’𑀢𑀺 𑀯𑀼𑀘𑁆𑀘𑀢𑀺. 𑀧𑀝𑀺𑀓𑁆𑀓𑀽𑀮𑀁 𑀜𑀸𑀢𑀺𑀁 𑀯𑀸 𑀥𑀫𑁆𑀫𑀁 𑀯𑀸 𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀅𑀧𑁆𑀧𑀝𑀺𑀓𑁆𑀓𑀽𑀮𑀁 𑀜𑀸𑀢𑀺𑀁 𑀯𑀸 𑀥𑀫𑁆𑀫𑀁 𑀯𑀸 𑀲𑀪𑀸𑀯𑀯𑀲𑁂𑀦 𑀅𑀧𑁆𑀧𑀝𑀺𑀓𑁆𑀓𑀽𑀮𑀢𑁄 𑀬𑀸𑀬 𑀢𑀡𑁆𑀳𑀸𑀬 𑀢𑀡𑁆𑀳𑀺𑀓𑁄 𑀅𑀪𑀺𑀦𑀦𑁆𑀤𑀢𑀺, 𑀲𑀸 𑀢𑀡𑁆𑀳𑀸 𑀯𑀸 ‘‘𑀅𑀪𑀺𑀦𑀦𑁆𑀤𑀦𑀸 𑀦𑀸𑀫𑀸’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀬𑁄𑀚𑁂𑀢𑁆𑀯𑀸 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄.

‘‘𑀬𑀸𑀲𑀼 𑀅𑀦𑁂𑀓𑀸𑀲𑀼 𑀥𑀸𑀢𑀽𑀲𑀼 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀢𑀡𑁆𑀳𑀸 ‘𑀲𑀭𑀸’𑀢𑀺 𑀪𑀕𑀯𑀢𑀸 𑀯𑀼𑀢𑁆𑀢𑀸, 𑀓𑀢𑀫𑀸 𑀢𑀸 𑀥𑀸𑀢𑀼𑀬𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀢𑀸 𑀥𑀸𑀢𑀼𑀬𑁄 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀘𑀓𑁆𑀔𑀼𑀥𑀸𑀢𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁.

‘‘𑀢𑀸𑀲𑀼 𑀥𑀸𑀢𑀽𑀲𑀼 𑀓𑀢𑀫𑀸𑀬 𑀥𑀸𑀢𑀼𑀬𑀸 𑀓𑀢𑀫𑀸 𑀲𑀭𑀸 𑀧𑀢𑀺𑀝𑁆𑀞𑀺𑀢𑀸 𑀧𑀯𑀢𑁆𑀢𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀇𑀫𑀸𑀬 𑀥𑀸𑀢𑀼𑀬𑀸 𑀅𑀬𑀁 𑀲𑀭𑀸 𑀧𑀢𑀺𑀝𑁆𑀞𑀺𑀢𑀸 𑀧𑀯𑀢𑁆𑀢𑀸𑀢𑀺 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀲𑀭𑀸𑀢𑀺 𑀓𑁂𑀘𑀺 𑀭𑀽𑀧𑀸𑀥𑀺𑀫𑀼𑀢𑁆𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑁂𑀘𑀻𑀢𑀺 𑀲𑀭𑀸𑀲𑀗𑁆𑀔𑀸𑀢𑀸𑀬 𑀭𑀽𑀧𑀢𑀡𑁆𑀳𑀸𑀬 𑀢𑀡𑁆𑀳𑀺𑀓𑀸 𑀧𑀼𑀕𑁆𑀕𑀮𑀸. 𑀭𑀽𑀧𑀸𑀥𑀺𑀫𑀼𑀢𑁆𑀢𑀸𑀢𑀺 𑀭𑀽𑀧𑀥𑀸𑀢𑀼𑀲𑀗𑁆𑀔𑀸𑀢𑁂 𑀆𑀭𑀫𑁆𑀫𑀡𑁂 𑀅𑀥𑀺𑀫𑀼𑀢𑁆𑀢𑀸 𑀅𑀚𑁆𑀛𑁄𑀲𑀺𑀢𑀸. 𑀇𑀫𑀺𑀦𑀸 𑀧𑀤𑁂𑀦 𑀭𑀽𑀧𑀢𑀡𑁆𑀳𑀸𑀲𑀗𑁆𑀔𑀸𑀢𑀸 𑀲𑀭𑀸 𑀭𑀽𑀧𑀥𑀸𑀢𑀼𑀬𑀸 𑀧𑀢𑀺𑀝𑁆𑀞𑀺𑀢𑀸 𑀧𑀯𑀢𑁆𑀢𑀸𑀢𑀺 𑀕𑀳𑀺𑀢𑀸, ‘‘𑀓𑁂𑀘𑀺 𑀲𑀤𑁆𑀤𑀸𑀥𑀺𑀫𑀼𑀢𑁆𑀢𑀸’’𑀢𑀺𑀆𑀤𑀻𑀳𑀺𑀧𑀺 𑀲𑀤𑁆𑀤𑀢𑀡𑁆𑀳𑀸𑀲𑀗𑁆𑀔𑀸𑀢𑀸𑀤𑀬𑁄 𑀲𑀭𑀸 𑀲𑀤𑁆𑀤𑀥𑀸𑀢𑀼𑀬𑀸𑀤𑀻𑀲𑀼 𑀧𑀢𑀺𑀝𑁆𑀞𑀺𑀢𑀸 𑀧𑀯𑀢𑁆𑀢𑀸 𑀲𑀭𑀸𑀯 𑀕𑀳𑀺𑀢𑀸. 𑀓𑁂𑀘𑀺 𑀥𑀫𑁆𑀫𑀸𑀥𑀺𑀫𑀼𑀢𑁆𑀢𑀸𑀢𑀺 𑀏𑀢𑁆𑀣 𑀥𑀫𑁆𑀫𑀕𑁆𑀕𑀳𑀡𑁂𑀦 𑀘𑀓𑁆𑀔𑀼𑀥𑀸𑀢𑀼𑀲𑁄𑀢𑀥𑀸𑀢𑀼𑀖𑀸𑀦𑀥𑀸𑀢𑀼𑀚𑀺𑀯𑁆𑀳𑀸𑀥𑀸𑀢𑀼𑀓𑀸𑀬𑀥𑀸𑀢𑀼𑀲𑀢𑁆𑀢𑀯𑀺𑀜𑁆𑀜𑀸𑀡𑀥𑀸𑀢𑀼𑀥𑀫𑁆𑀫𑀥𑀸𑀢𑀼𑀬𑁄 𑀕𑀳𑀺𑀢𑀸, 𑀢𑀲𑁆𑀫𑀸 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄 𑀧𑀢𑀺𑀝𑁆𑀞𑀸𑀦𑀪𑀸𑀯𑁂𑀦 𑀕𑀳𑀺𑀢𑀸𑀧𑀺 𑀙𑀩𑁆𑀩𑀺𑀥𑀸𑀯 𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. ‘‘𑀭𑀽𑀧𑀸𑀥𑀺𑀫𑀼𑀢𑁆𑀢𑀸𑀤𑀻𑀲𑀼 𑀓𑀺𑀢𑁆𑀢𑀓𑀸𑀦𑀺 𑀧𑀤𑀸𑀦𑀺 𑀢𑀡𑁆𑀳𑀸𑀧𑀓𑁆𑀔𑁂 𑀢𑀡𑁆𑀳𑀸𑀬 𑀯𑁂𑀯𑀘𑀦𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀏𑀢𑀸𑀤𑀺𑀲𑀸𑀦𑀺 𑀏𑀢𑁆𑀢𑀓𑀸𑀦𑀺 𑀧𑀤𑀸𑀦𑀺 𑀢𑀡𑁆𑀳𑀸𑀧𑀓𑁆𑀔𑁂 𑀢𑀡𑁆𑀳𑀸𑀯𑁂𑀯𑀘𑀦𑀸𑀦𑀻𑀢𑀺 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀬𑀸𑀦𑀺 𑀙 𑀕𑁂𑀳𑀲𑀺𑀢𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀙𑀲𑀼 𑀭𑀽𑀧𑀸𑀤𑀻𑀲𑀼. 𑀙 𑀕𑁂𑀳𑀲𑀺𑀢𑀸𑀦𑀺 𑀤𑁄𑀫𑀦𑀲𑁆𑀲𑀸𑀦𑀻𑀢𑀺 𑀙𑀲𑀼 𑀭𑀽𑀧𑀸𑀤𑀻𑀲𑀼 𑀧𑀯𑀢𑁆𑀢𑀁 𑀢𑀡𑁆𑀳𑀸𑀧𑁂𑀫𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀸𑀦𑀺 𑀙 𑀤𑁄𑀫𑀦𑀲𑁆𑀲𑀸𑀦𑀺. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. ‘‘𑀙 𑀉𑀧𑁂𑀓𑁆𑀔𑀸 𑀕𑁂𑀳𑀲𑀺𑀢𑀸𑀧𑀺 𑀪𑀕𑀯𑀢𑀸 𑀯𑀼𑀢𑁆𑀢𑀸, 𑀓𑀲𑁆𑀫𑀸 𑀦 𑀕𑀳𑀺𑀢𑀸’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀬𑀸 𑀙 𑀉𑀧𑁂𑀓𑁆𑀔𑀸 𑀕𑁂𑀳𑀲𑀺𑀢𑀸, 𑀅𑀬𑀁 𑀤𑀺𑀝𑁆𑀞𑀺𑀧𑀓𑁆𑀔𑁄’’𑀢𑀺 𑀯𑀼𑀢𑁆𑀢𑀁, 𑀤𑀺𑀝𑁆𑀞𑀺𑀧𑀓𑁆𑀔𑀢𑁆𑀢𑀸 𑀦 𑀕𑀳𑀺𑀢𑀸𑀢𑀺 𑀅𑀢𑁆𑀣𑁄.

𑁩𑁮. ‘‘𑀓𑀣𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀢𑀡𑁆𑀳𑀸 𑀏𑀯 𑀕𑀳𑀺𑀢𑀸’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀲𑀸𑀬𑁂𑀯 𑀧𑀢𑁆𑀣𑀦𑀸𑀓𑀸𑀭𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀏𑀯 𑀢𑀡𑁆𑀳𑀸 𑀧𑀢𑁆𑀣𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀦𑀢𑁄 𑀆𑀲𑀸𑀤𑀺𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀸, 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀥𑀫𑁆𑀫𑁂𑀲𑀼 𑀦𑀦𑁆𑀤𑀦𑀢𑁄 ‘‘𑀥𑀫𑁆𑀫𑀦𑀦𑁆𑀤𑀻’’𑀢𑀺 𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀸, 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀥𑀫𑁆𑀫𑁂𑀲𑀼 𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀧𑁂𑀢𑀺 𑀯𑀺𑀬 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀦𑀢𑁄 ‘‘𑀥𑀫𑁆𑀫𑀚𑁆𑀛𑁄𑀲𑀸𑀦’’𑀦𑁆𑀢𑀺 𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀸, 𑀢𑀲𑁆𑀫𑀸 𑀢𑀡𑁆𑀳𑀸𑀬 𑀯𑁂𑀯𑀘𑀦𑀸𑀦𑀺 𑀳𑁄𑀦𑁆𑀢𑀺.

𑀢𑀡𑁆𑀳𑀸𑀬 𑀯𑁂𑀯𑀘𑀦𑀸𑀦𑀺 𑀆𑀘𑀭𑀺𑀬𑁂𑀦 𑀦𑀺𑀤𑁆𑀤𑀺𑀝𑁆𑀞𑀸𑀦𑀺, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑀸𑀦𑀺, ‘‘𑀓𑀢𑀫𑀸𑀦𑀺 𑀘𑀺𑀢𑁆𑀢𑀲𑁆𑀲 𑀯𑁂𑀯𑀘𑀦𑀸𑀦𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀘𑀺𑀢𑁆𑀢𑀁 𑀫𑀦𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀆𑀭𑀫𑁆𑀫𑀡𑀁 𑀘𑀺𑀦𑁆𑀢𑁂𑀢𑀻𑀢𑀺 𑀘𑀺𑀢𑁆𑀢𑀁. 𑀫𑀦𑀢𑀺 𑀚𑀸𑀦𑀸𑀢𑀻𑀢𑀺 𑀫𑀦𑁄. 𑀯𑀺𑀚𑀸𑀦𑀸𑀢𑀻𑀢𑀺 𑀯𑀺𑀜𑁆𑀜𑀸𑀡’’𑀦𑁆𑀢𑀺𑀆𑀤𑀺𑀦𑀸 𑀅𑀢𑁆𑀣𑁄 𑀧𑀓𑀭𑀡𑁂𑀲𑀼 (𑀥. 𑀲. 𑀅𑀝𑁆𑀞. 𑁫) 𑀯𑀼𑀢𑁆𑀢𑁄𑀯, 𑀢𑀲𑁆𑀫𑀸 𑀅𑀫𑁆𑀳𑁂𑀳𑀺 𑀦 𑀯𑀺𑀢𑁆𑀣𑀸𑀭𑀺𑀢𑁄. 𑀯𑁂𑀯𑀘𑀦𑀸𑀦𑀺𑀬𑁂𑀯 𑀇𑀫𑀸𑀦𑀺 𑀇𑀫𑀲𑁆𑀲 𑀯𑁂𑀯𑀘𑀦𑀸𑀦𑀻𑀢𑀺 𑀏𑀢𑁆𑀢𑀓𑀸𑀦𑀺𑀬𑁂𑀯 𑀓𑀣𑀬𑀺𑀲𑁆𑀲𑀸𑀫. ‘‘𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀸𑀩𑀮’’𑀦𑁆𑀢𑀺𑀆𑀤𑀻𑀦𑀺 𑀧𑀜𑁆𑀜𑀸𑀯𑁂𑀯𑀘𑀦𑀸𑀦𑀺.

‘‘𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺𑀆𑀤𑀻𑀦𑀺 𑀩𑀼𑀤𑁆𑀥𑀲𑁆𑀲 𑀯𑁂𑀯𑀘𑀦𑀸𑀦𑀺. ‘‘𑀢𑀸𑀦𑀺 𑀓𑀢𑁆𑀣 𑀤𑁂𑀲𑀺𑀢𑀸𑀦𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀬𑀣𑀸 𑀘 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀬𑀁 𑀯𑀼𑀢𑁆𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀤𑁂𑀲𑀦𑀸𑀬𑀁 𑀬𑀣𑀸 𑀘 𑀬𑀁𑀬𑀁𑀧𑀓𑀸𑀭𑀁 𑀯𑁂𑀯𑀘𑀦𑀁 𑀪𑀕𑀯𑀢𑀸 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁…𑀧𑁂… 𑀪𑀕𑀯𑀢𑁄’’𑀢𑀺 𑀯𑀼𑀢𑁆𑀢𑀁, 𑀏𑀢𑀁𑀧𑀓𑀸𑀭𑀁 𑀯𑁂𑀯𑀘𑀦𑀁 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀬𑀸 𑀯𑁂𑀯𑀘𑀦𑀁 𑀩𑀼𑀤𑁆𑀥𑀲𑁆𑀲 𑀯𑁂𑀯𑀘𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀬𑀣𑀸 𑀘 𑀥𑀫𑁆𑀫𑀸𑀦𑀼𑀲𑁆𑀲𑀢𑀺𑀬𑀁 𑀯𑀼𑀢𑁆𑀢’’𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀯𑀫𑁂𑀯 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

‘‘𑀢𑁂𑀦𑀸𑀳𑀸’’𑀢𑀺𑀆𑀤𑁆𑀬𑀸𑀦𑀼𑀲𑀦𑁆𑀥𑁆𑀬𑀸𑀤𑀺𑀅𑀢𑁆𑀣𑁄 𑀘𑁂𑀯 ‘‘𑀦𑀺𑀬𑀼𑀢𑁆𑀢𑁄 𑀯𑁂𑀯𑀘𑀦𑁄 𑀳𑀸𑀭𑁄’’𑀢𑀺𑀆𑀦𑀼𑀲𑀦𑁆𑀥𑁆𑀬𑀸𑀤𑀺𑀅𑀢𑁆𑀣𑁄 𑀘 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀇𑀢𑀺 𑀯𑁂𑀯𑀘𑀦𑀳𑀸𑀭𑀯𑀺𑀪𑀗𑁆𑀕𑁂 𑀲𑀢𑁆𑀢𑀺𑀩𑀮𑀸𑀦𑀼𑀭𑀽𑀧𑀸 𑀭𑀘𑀺𑀢𑀸

𑀯𑀺𑀪𑀸𑀯𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀡𑁆𑀟𑀺𑀢𑁂𑀳𑀺 𑀧𑀦 𑀅𑀝𑁆𑀞𑀓𑀣𑀸𑀝𑀻𑀓𑀸𑀦𑀼𑀲𑀸𑀭𑁂𑀦 𑀕𑀫𑁆𑀪𑀻𑀭𑀢𑁆𑀣𑁄 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀚𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑁄𑀢𑀺.