𑁩. 𑀦𑀺𑀤𑁆𑀤𑁂𑀲𑀯𑀸𑀭𑀅𑀢𑁆𑀣𑀯𑀺𑀪𑀸𑀯𑀦𑀸

𑀲𑁄𑀴𑀲𑀳𑀸𑀭𑀦𑀺𑀤𑁆𑀤𑁂𑀲𑀯𑀺𑀪𑀸𑀯𑀦𑀸

𑁪. 𑀳𑀸𑀭𑀸𑀤𑀻𑀲𑀼 𑀲𑀫𑀼𑀤𑀸𑀬𑀲𑁆𑀲 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀲𑁆𑀲 𑀉𑀤𑁆𑀤𑁂𑀲𑁄 𑀉𑀤𑁆𑀤𑀺𑀝𑁆𑀞𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀓𑀢𑀫𑁄 𑀦𑀺𑀤𑁆𑀤𑁂𑀲𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀉𑀤𑁆𑀤𑀺𑀝𑁆𑀞𑁂 𑀳𑀸𑀭𑀸𑀤𑀬𑁄 𑀦𑀺𑀤𑁆𑀤𑀺𑀲𑀺𑀢𑀼𑀁 ‘‘𑀢𑀢𑁆𑀣 𑀲𑀗𑁆𑀔𑁂𑀧𑀢𑁄 𑀦𑁂𑀢𑁆𑀢𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀏𑀯𑀁 𑀉𑀤𑁆𑀤𑀺𑀝𑁆𑀞𑁂 𑀳𑀸𑀭𑀸𑀤𑀬𑁄 𑀦𑀺𑀤𑁆𑀤𑀺𑀲𑀺𑀢𑀼𑀁 ‘𑀢𑀢𑁆𑀣 𑀲𑀗𑁆𑀔𑁂𑀧𑀢𑁄’𑀢𑀺𑀆𑀤𑀺 𑀆𑀭𑀤𑁆𑀥’’𑀦𑁆𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁪) 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 ‘‘𑀢𑀢𑁆𑀣 𑀓𑀢𑀫𑁂 𑀲𑁄𑀴𑀲 𑀳𑀸𑀭𑀸? 𑀤𑁂𑀲𑀦𑀸 𑀯𑀺𑀘𑀬𑁄’’𑀢𑀺𑀆𑀤𑀺𑀉𑀤𑁆𑀤𑁂𑀲𑀧𑀸𑀞𑁂. 𑀲𑀗𑁆𑀔𑁂𑀧𑀢𑁄𑀢𑀺 𑀲𑀫𑀸𑀲𑀢𑁄. 𑀦𑁂𑀢𑁆𑀢𑀻𑀢𑀺 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀁. 𑀓𑀺𑀢𑁆𑀢𑀺𑀢𑀸𑀢𑀺 𑀓𑀣𑀺𑀢𑀸, 𑀇𑀤𑀸𑀦𑀺 𑀦𑀺𑀤𑁆𑀤𑁂𑀲𑀢𑁄 𑀓𑀣𑁂𑀲𑁆𑀲𑀸𑀫𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁧. ‘‘𑀅𑀲𑁆𑀲𑀸𑀤𑀸𑀤𑀻𑀦𑀯𑀢𑀸, 𑀦𑀺𑀲𑁆𑀲𑀭𑀡𑀫𑁆𑀧𑀺 𑀘 𑀨𑀮𑀁 𑀉𑀧𑀸𑀬𑁄 𑀘.

𑀆𑀡𑀢𑁆𑀢𑀻 𑀘 𑀪𑀕𑀯𑀢𑁄, 𑀬𑁄𑀕𑀻𑀦𑀁 𑀤𑁂𑀲𑀦𑀸𑀳𑀸𑀭𑁄’’𑀢𑀺. 𑁋

𑀕𑀸𑀣𑀸𑀬𑀁 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁂𑀦 𑀲𑀼𑀢𑁆𑀢𑁂 𑀆𑀕𑀢𑀸 𑀅𑀲𑁆𑀲𑀸𑀤𑁄𑀧𑀺 𑀆𑀤𑀻𑀦𑀯𑀢𑀸 𑀆𑀤𑀻𑀦𑀯𑁄𑀧𑀺 𑀦𑀺𑀲𑁆𑀲𑀭𑀡𑀫𑁆𑀧𑀺 𑀨𑀮𑀫𑁆𑀧𑀺 𑀉𑀧𑀸𑀬𑁄𑀧𑀺 𑀬𑁄𑀕𑀻𑀦𑀁 𑀅𑀢𑁆𑀣𑀸𑀬 𑀪𑀕𑀯𑀢𑁄 𑀆𑀡𑀢𑁆𑀢𑀺𑀧𑀺 𑀇𑀫𑁂 𑀥𑀫𑁆𑀫𑀸 𑀤𑀲𑁆𑀲𑀺𑀢𑀸 𑀲𑀁𑀯𑀡𑁆𑀡𑀺𑀢𑀸 𑀲𑀁𑀯𑀡𑁆𑀡𑀦𑀸𑀯𑀲𑁂𑀦 𑀜𑀸𑀧𑀺𑀢𑀸, 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀤𑁂𑀲𑀦𑀸𑀳𑀸𑀭𑁄 𑀦𑀸𑀫𑀸𑀢𑀺 𑀅𑀢𑁆𑀣𑀬𑁄𑀚𑀦𑀸.

𑀯𑀘𑀦𑀢𑁆𑀣𑀸𑀤𑀬𑁄 𑀅𑀝𑁆𑀞𑀓𑀣𑀸𑀬𑀁 𑀯𑀺𑀢𑁆𑀣𑀸𑀭𑀢𑁄 𑀯𑀼𑀢𑁆𑀢𑀸𑀯, 𑀢𑀲𑁆𑀫𑀸 𑀓𑀺𑀜𑁆𑀘𑀺𑀫𑀢𑁆𑀢𑀫𑁂𑀯 𑀓𑀣𑁂𑀲𑁆𑀲𑀸𑀫𑀺. 𑀅𑀲𑁆𑀲𑀸𑀤𑀻𑀬𑀢𑁂𑀢𑀺 𑀅𑀲𑁆𑀲𑀸𑀤𑁄, 𑀓𑁄 𑀲𑁄? 𑀲𑀼𑀔𑀁, 𑀲𑁄𑀫𑀦𑀲𑁆𑀲𑀁, 𑀇𑀝𑁆𑀞𑀸𑀭𑀫𑁆𑀫𑀡𑀪𑀽𑀢𑀸 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀘. 𑀅𑀲𑁆𑀲𑀸𑀤𑁂𑀢𑀺 𑀏𑀢𑀸𑀬𑀸𑀢𑀺 𑀯𑀸 𑀅𑀲𑁆𑀲𑀸𑀤𑁄, 𑀓𑁄 𑀲𑁄? 𑀢𑀡𑁆𑀳𑀸, 𑀯𑀺𑀧𑀮𑁆𑀮𑀸𑀲𑀸 𑀘. 𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀳𑀺 𑀏𑀓𑀘𑁆𑀘𑁂 𑀲𑀢𑁆𑀢𑀸 𑀅𑀦𑀺𑀝𑁆𑀞𑀫𑁆𑀧𑀺 𑀆𑀭𑀫𑁆𑀫𑀡𑀁 𑀇𑀝𑁆𑀞𑀸𑀓𑀸𑀭𑁂𑀦 𑀅𑀲𑁆𑀲𑀸𑀤𑁂𑀦𑁆𑀢𑀺.

𑀆𑀪𑀼𑀲𑀁 𑀓𑀫𑁆𑀫𑁂𑀦 𑀤𑀻𑀦𑀁 𑀤𑀼𑀓𑁆𑀔𑀸𑀤𑀺 𑀳𑀼𑀢𑁆𑀯𑀸 𑀯𑀸𑀢𑀺 𑀧𑀯𑀢𑁆𑀢𑀢𑀻𑀢𑀺 𑀆𑀤𑀻𑀦𑀯𑁄, 𑀤𑀼𑀓𑁆𑀔𑀸𑀤𑀺. 𑀅𑀣 𑀯𑀸 𑀅𑀢𑀺𑀯𑀺𑀬 𑀆𑀤𑀻𑀦𑀁 𑀓𑀧𑀡𑀁 𑀳𑀼𑀢𑁆𑀯𑀸 𑀯𑀸𑀢𑀺 𑀧𑀯𑀢𑁆𑀢𑀢𑀻𑀢𑀺 𑀆𑀤𑀻𑀦𑀯𑁄, 𑀓𑀧𑀡𑀫𑀦𑀼𑀲𑁆𑀲𑁄, 𑀢𑀣𑀸𑀪𑀸𑀯𑀸 𑀘 𑀢𑁂𑀪𑀽𑀫𑀓𑀸 𑀥𑀫𑁆𑀫𑀸 𑀅𑀦𑀺𑀘𑁆𑀘𑀢𑀸𑀤𑀺𑀬𑁄𑀕𑀢𑁄.

𑀦𑀺𑀲𑁆𑀲𑀭𑀢𑀺 𑀏𑀢𑁂𑀦𑀸𑀢𑀺 𑀦𑀺𑀲𑁆𑀲𑀭𑀡𑀁, 𑀅𑀭𑀺𑀬𑀫𑀕𑁆𑀕𑁄. 𑀦𑀺𑀲𑁆𑀲𑀭𑀢𑀻𑀢𑀺 𑀯𑀸 𑀦𑀺𑀲𑁆𑀲𑀭𑀡𑀁, 𑀦𑀺𑀩𑁆𑀩𑀸𑀦𑀁. 𑀧𑀺-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀦𑀺𑀲𑁆𑀲𑀭𑀡𑀪𑁂𑀤𑁄 𑀅𑀝𑁆𑀞𑀓𑀣𑀸𑀬𑀁 (𑀦𑁂𑀢𑁆𑀢𑀺. 𑀅𑀝𑁆𑀞. 𑁪 𑀳𑀸𑀭𑀲𑀗𑁆𑀔𑁂𑀧) 𑀩𑀳𑀼𑀥𑀸 𑀯𑀼𑀢𑁆𑀢𑁄𑀯.

𑀨𑀮𑀢𑀺 𑀧𑀯𑀢𑁆𑀢𑀢𑀻𑀢𑀺 𑀨𑀮𑀁, 𑀤𑁂𑀲𑀦𑀸𑀬 𑀨𑀮𑀁. 𑀬𑀤𑀺𑀧𑀺 𑀤𑁂𑀲𑀦𑀸 𑀨𑀮𑀦𑀺𑀧𑁆𑀨𑀸𑀤𑀺𑀓𑀸 𑀦 𑀳𑁄𑀢𑀺, 𑀢𑀣𑀸𑀧𑀺 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀼𑀜𑁆𑀜𑀲𑀫𑁆𑀪𑀸𑀭𑀸 𑀲𑀫𑁆𑀪𑀯𑀦𑁆𑀢𑀺, 𑀧𑀼𑀜𑁆𑀜𑀲𑀫𑁆𑀪𑀸𑀭𑀳𑁂𑀢𑀼𑀢𑁄 𑀨𑀮𑀁 𑀧𑀯𑀢𑁆𑀢𑀁, 𑀢𑀲𑁆𑀫𑀸 𑀤𑁂𑀲𑀦𑀸𑀬 𑀨𑀮𑀁 𑀦𑀸𑀫𑀸𑀢𑀺. 𑀓𑀢𑀫𑀁 𑀢𑀁? 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀆𑀬𑀼𑀯𑀡𑁆𑀡𑀲𑀼𑀔𑀩𑀮𑀬𑀲𑀧𑀭𑀺𑀯𑀸𑀭𑀅𑀥𑀺𑀧𑀢𑁂𑀬𑁆𑀬𑀉𑀧𑀥𑀺𑀲𑀫𑁆𑀧𑀢𑁆𑀢𑀺𑀘𑀓𑁆𑀓𑀯𑀢𑁆𑀢𑀺𑀲𑀺𑀭𑀺𑀤𑁂𑀯𑀭𑀚𑁆𑀚- 𑀲𑀺𑀭𑀺𑀘𑀢𑀼𑀲𑀫𑁆𑀧𑀢𑁆𑀢𑀺𑀘𑀓𑁆𑀓𑀲𑀻𑀮𑀲𑀫𑀸𑀥𑀺𑀲𑀫𑁆𑀧𑀤𑀸 𑀯𑀺𑀚𑁆𑀚𑀸𑀪𑀺𑀜𑁆𑀜𑀸 𑀧𑀝𑀺𑀲𑀫𑁆𑀪𑀺𑀤𑀸 𑀲𑀸𑀯𑀓𑀩𑁄𑀥𑀺𑀧𑀘𑁆𑀘𑁂𑀓𑀩𑁄𑀥𑀺𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑁄.

𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀁 𑀉𑀧𑀕𑀦𑁆𑀢𑁆𑀯𑀸 𑀅𑀬𑀢𑀺 𑀧𑀯𑀢𑁆𑀢𑀢𑀺 𑀨𑀮𑀁 𑀏𑀢𑁂𑀦𑀸𑀢𑀺 𑀉𑀧𑀸𑀬𑁄, 𑀓𑁄 𑀲𑁄? 𑀅𑀭𑀺𑀬𑀫𑀕𑁆𑀕𑀲𑁆𑀲 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸. 𑀧𑀼𑀭𑀺𑀫𑀸 𑀧𑀝𑀺𑀧𑀤𑀸 𑀳𑀺 𑀧𑀘𑁆𑀙𑀺𑀫𑀸𑀬 𑀧𑀝𑀺𑀧𑀤𑀸𑀬 𑀅𑀥𑀺𑀕𑀫𑀽𑀧𑀸𑀬𑁄, 𑀧𑀭𑀫𑁆𑀧𑀭𑀸𑀬 𑀫𑀕𑁆𑀕𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀲𑁆𑀲 𑀘 𑀉𑀧𑀸𑀬𑁄. 𑀓𑁂𑀘𑀺 ‘‘𑀫𑀕𑁆𑀕𑁄𑀧𑀺 𑀉𑀧𑀸𑀬𑁄’’𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀁 𑀫𑀢𑁂𑀦 𑀦𑀺𑀩𑁆𑀩𑀸𑀦𑀫𑁂𑀯 𑀦𑀺𑀲𑁆𑀲𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 𑀲𑀺𑀬𑀸. ‘‘𑀢𑁂 𑀧𑀳𑀸𑀬 𑀢𑀭𑁂 𑀑𑀖𑀦𑁆𑀢𑀺 𑀇𑀤𑀁 𑀦𑀺𑀲𑁆𑀲𑀭𑀡’’𑀦𑁆𑀢𑀺 (𑀦𑁂𑀢𑁆𑀢𑀺. 𑁫) 𑀧𑀦 𑀅𑀭𑀺𑀬𑀫𑀕𑁆𑀕𑀲𑁆𑀲 𑀦𑀺𑀲𑁆𑀲𑀭𑀡𑀪𑀸𑀯𑀁 𑀯𑀓𑁆𑀔𑀢𑀺, 𑀢𑀲𑁆𑀫𑀸 𑀓𑁂𑀲𑀜𑁆𑀘𑀺 𑀯𑀸𑀤𑁄 𑀦 𑀕𑀳𑁂𑀢𑀩𑁆𑀩𑁄.

𑀆𑀡𑀢𑁆𑀢𑀻𑀢𑀺 𑀆𑀡𑀸𑀭𑀳𑀲𑁆𑀲 𑀪𑀕𑀯𑀢𑁄 𑀯𑁂𑀦𑁂𑀬𑁆𑀬𑀸𑀦𑀁 𑀳𑀺𑀢𑀲𑀺𑀤𑁆𑀥𑀺𑀬𑀸 ‘‘𑀏𑀯𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀧𑀝𑀺𑀧𑀚𑁆𑀚𑀸𑀳𑀺, 𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺𑀁 𑀫𑀸 𑀧𑀝𑀺𑀧𑀚𑁆𑀚𑀸𑀳𑀻’’𑀢𑀺 𑀯𑀺𑀥𑀸𑀦𑀁 𑀆𑀡𑀸𑀞𑀧𑀦𑀁 𑀆𑀡𑀢𑁆𑀢𑀺 𑀦𑀸𑀫.

𑀬𑀼𑀚𑁆𑀚𑀦𑁆𑀢𑀺 𑀧𑀬𑀼𑀚𑁆𑀚𑀦𑁆𑀢𑀺 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸𑀲𑀽𑀢𑀺 𑀬𑁄𑀕𑀺𑀦𑁄, 𑀯𑁂𑀦𑁂𑀬𑁆𑀬𑀸, 𑀢𑁂𑀲𑀁 𑀬𑁄𑀕𑀻𑀦𑀁 𑀅𑀢𑁆𑀣𑀸𑀬𑀸𑀢𑀺 𑀯𑀘𑀦𑀲𑁂𑀲𑀁 𑀦𑀻𑀳𑀭𑀺𑀢𑁆𑀯𑀸 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀲𑀼𑀢𑁆𑀢𑁂 𑀆𑀕𑀢𑀸𑀦𑀁 𑀲𑀩𑁆𑀩𑁂𑀲𑀁 𑀅𑀲𑁆𑀲𑀸𑀤𑀸𑀤𑀻𑀦𑀁 𑀏𑀓𑀤𑁂𑀲𑀸𑀕𑀢𑀸𑀦𑀫𑁆𑀧𑀺 𑀦𑀻𑀳𑀭𑀺𑀢𑁆𑀯𑀸 𑀲𑀩𑁆𑀩𑁂𑀲𑀁 𑀯𑀺𑀪𑀚𑀦𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀤𑁂𑀲𑀦𑀸𑀳𑀸𑀭𑁄𑀢𑀺 𑀦𑀺𑀤𑁆𑀤𑁂𑀲𑀢𑁄 𑀕𑀳𑁂𑀢𑀩𑁆𑀩𑁄, 𑀲𑁄 𑀘 𑀯𑀺𑀪𑀚𑀦𑀸𑀓𑀸𑀭𑁄 𑀤𑁂𑀲𑀦𑀸𑀳𑀸𑀭𑀯𑀺𑀪𑀗𑁆𑀕𑁂 (𑀦𑁂𑀢𑁆𑀢𑀺. 𑁫) 𑀆𑀕𑀫𑀺𑀲𑁆𑀲𑀢𑀻𑀢𑀺 𑀇𑀥 𑀦 𑀤𑀲𑁆𑀲𑀺𑀢𑁄𑀢𑀺.

𑀤𑁂𑀲𑀦𑀸𑀳𑀸𑀭𑀦𑀺𑀤𑁆𑀤𑁂𑀲𑁄 𑀦𑀺𑀤𑁆𑀤𑀺𑀝𑁆𑀞𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀓𑀢𑀫𑁄 𑀯𑀺𑀘𑀬𑀳𑀸𑀭𑀦𑀺𑀤𑁆𑀤𑁂𑀲𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑁋

𑁨. ‘‘𑀬𑀁 𑀧𑀼𑀘𑁆𑀙𑀺𑀢𑀜𑁆𑀘 𑀯𑀺𑀲𑁆𑀲𑀚𑁆𑀚𑀺𑀢𑀜𑁆𑀘, 𑀲𑀼𑀢𑁆𑀢𑀲𑁆𑀲 𑀬𑀸 𑀘 𑀅𑀦𑀼𑀕𑀻𑀢𑀺.

𑀲𑀼𑀢𑁆𑀢𑀲𑁆𑀲 𑀬𑁄 𑀧𑀯𑀺𑀘𑀬𑁄, 𑀳𑀸𑀭𑁄 𑀯𑀺𑀘𑀬𑁄𑀢𑀺 𑀦𑀺𑀤𑁆𑀤𑀺𑀝𑁆𑀞𑁄’’𑀢𑀺. 𑁋

𑀕𑀸𑀣𑀸 𑀯𑀼𑀢𑁆𑀢𑀸. 𑀢𑀢𑁆𑀣 𑀲𑀼𑀢𑁆𑀢𑀲𑁆𑀲 𑀬𑀁 𑀧𑀼𑀘𑁆𑀙𑀺𑀢𑀜𑁆𑀘 𑀬𑀸 𑀧𑀼𑀘𑁆𑀙𑀸 𑀯𑀺𑀘𑀬𑀫𑀸𑀦𑀸 𑀘 𑀲𑀼𑀢𑁆𑀢𑀲𑁆𑀲 𑀬𑀁 𑀯𑀺𑀲𑁆𑀲𑀚𑁆𑀚𑀺𑀢𑀜𑁆𑀘 𑀬𑀸 𑀯𑀺𑀲𑁆𑀲𑀚𑁆𑀚𑀦𑀸 𑀯𑀺𑀘𑀬𑀫𑀸𑀦𑀸 𑀘 𑀲𑀼𑀢𑁆𑀢𑀲𑁆𑀲 𑀬𑁄 𑀧𑀤𑀸𑀤𑀺𑀯𑀺𑀘𑀬𑁄, 𑀅𑀲𑁆𑀲𑀸𑀤𑀸𑀤𑀺𑀯𑀺𑀘𑀬𑁄 𑀘 𑀅𑀢𑁆𑀣𑀺, 𑀢𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀯𑀺𑀘𑀬𑀫𑀸𑀦𑀸 𑀧𑀼𑀘𑁆𑀙𑀸𑀤𑀬𑁄 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁂𑀦 𑀯𑀺𑀘𑀺𑀬𑀦𑁆𑀢𑀺, 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀯𑀺𑀘𑀬𑁄 𑀳𑀸𑀭𑁄𑀢𑀺 𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀅𑀢𑁆𑀣𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑀧𑀼𑀘𑁆𑀙𑀻𑀬𑀢𑁂 𑀧𑀼𑀘𑁆𑀙𑀺𑀢𑀁. 𑀯𑀺𑀲𑁆𑀲𑀚𑁆𑀚𑀻𑀬𑀢𑁂 𑀯𑀺𑀲𑁆𑀲𑀚𑁆𑀚𑀺𑀢𑀦𑁆𑀢𑀺 𑀪𑀸𑀯𑀲𑀸𑀥𑀦𑀢𑁆𑀣𑁄 𑀤𑀝𑁆𑀞𑀩𑁆𑀩𑁄, 𑀦 𑀓𑀫𑁆𑀫𑀲𑀸𑀥𑀦𑀢𑁆𑀣𑁄. 𑀢𑁂𑀦 𑀯𑀼𑀢𑁆𑀢𑀁 𑀝𑀻𑀓𑀸𑀬𑀁 ‘‘𑀪𑀸𑀯𑀢𑁆𑀣𑁂 𑀢𑁄𑀢𑀺 𑀆𑀳 𑁋 ‘𑀯𑀺𑀲𑁆𑀲𑀚𑁆𑀚𑀺𑀢𑀦𑁆𑀢𑀺 𑀯𑀺𑀲𑁆𑀲𑀚𑁆𑀚𑀦𑀸’’’𑀢𑀺.

‘‘𑀲𑀼𑀢𑁆𑀢𑀲𑁆𑀲𑀸’’𑀢𑀺 𑀦𑀺𑀬𑀫𑀺𑀢𑀢𑁆𑀢𑀸 𑀲𑀁𑀯𑀡𑁆𑀡𑀦𑀸𑀯𑀲𑁂𑀦 𑀅𑀝𑁆𑀞𑀓𑀣𑀸𑀬𑀁 𑀆𑀕𑀢𑀁 𑀦 𑀕𑀳𑁂𑀢𑀩𑁆𑀩𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑁄 𑀯𑀺𑀘𑀬𑁄 𑀳𑀸𑀭𑁄 𑀅𑀝𑁆𑀞𑀓𑀣𑀸𑀬𑀁 (𑀦𑁂𑀢𑁆𑀢𑀺. 𑀅𑀝𑁆𑀞. 𑁪 𑀳𑀸𑀭𑀲𑀗𑁆𑀔𑁂𑀧) 𑀯𑀼𑀢𑁆𑀢𑁄𑀯. 𑀓𑀣𑀁? 𑁋

‘‘𑀅𑀬𑀁 𑀧𑀼𑀘𑁆𑀙𑀸 𑀅𑀤𑀺𑀝𑁆𑀞𑀚𑁄𑀢𑀦𑀸 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸 𑀯𑀺𑀫𑀢𑀺𑀘𑁆𑀙𑁂𑀤𑀦𑀸 𑀅𑀦𑀼𑀫𑀢𑀺𑀧𑀼𑀘𑁆𑀙𑀸 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀸 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀸 𑀏𑀓𑀸𑀥𑀺𑀝𑁆𑀞𑀸𑀦𑀸 𑀅𑀦𑁂𑀓𑀸𑀥𑀺𑀝𑁆𑀞𑀸𑀦𑀸 𑀲𑀫𑁆𑀫𑀼𑀢𑀺𑀯𑀺𑀲𑀬𑀸 𑀧𑀭𑀫𑀢𑁆𑀣𑀯𑀺𑀲𑀬𑀸 𑀅𑀢𑀻𑀢𑀯𑀺𑀲𑀬𑀸 𑀅𑀦𑀸𑀕𑀢𑀯𑀺𑀲𑀬𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀺𑀲𑀬𑀸’’𑀢𑀺𑀆𑀤𑀺𑀦𑀸 𑀧𑀼𑀘𑁆𑀙𑀸𑀯𑀺𑀘𑀬𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀇𑀤𑀁 𑀯𑀺𑀲𑁆𑀲𑀚𑁆𑀚𑀦𑀁 𑀏𑀓𑀁𑀲𑀩𑁆𑀬𑀸𑀓𑀭𑀡𑀁 𑀯𑀺𑀪𑀚𑁆𑀚𑀩𑁆𑀬𑀸𑀓𑀭𑀡𑀁 𑀧𑀝𑀺𑀧𑀼𑀘𑁆𑀙𑀸𑀩𑁆𑀬𑀸𑀓𑀭𑀡𑀁 𑀞𑀧𑀦𑀁 𑀲𑀸𑀯𑀲𑁂𑀲𑀁 𑀦𑀺𑀭𑀯𑀲𑁂𑀲𑀁 𑀲𑀉𑀢𑁆𑀢𑀭𑀁 𑀦𑀺𑀭𑀼𑀢𑁆𑀢𑀭𑀁 𑀮𑁄𑀓𑀺𑀬𑀁 𑀮𑁄𑀓𑀼𑀢𑁆𑀢𑀭’’𑀦𑁆𑀢𑀺𑀆𑀤𑀺𑀦𑀸 𑀯𑀺𑀲𑁆𑀲𑀚𑁆𑀚𑀦𑀯𑀺𑀘𑀬𑁄.

‘‘𑀅𑀬𑀁 𑀧𑀼𑀘𑁆𑀙𑀸 𑀇𑀫𑀺𑀦𑀸 𑀲𑀫𑁂𑀢𑀺, 𑀏𑀢𑁂𑀦 𑀦 𑀲𑀫𑁂𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀢𑁆𑀣𑀁 𑀆𑀦𑁂𑀢𑁆𑀯𑀸, 𑀯𑀺𑀘𑀬𑁄 𑀧𑀼𑀩𑁆𑀩𑁂𑀦𑀸𑀧𑀭𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀘 𑀯𑀺𑀘𑀬𑁄 𑀧𑀼𑀩𑁆𑀩𑀸𑀧𑀭𑀯𑀺𑀘𑀬𑁄. ‘‘𑀅𑀬𑀁 𑀅𑀦𑀼𑀕𑀻𑀢𑀺 𑀯𑀼𑀢𑁆𑀢𑀢𑁆𑀣𑀲𑀗𑁆𑀕𑀳𑀸 𑀅𑀯𑀼𑀢𑁆𑀢𑀢𑁆𑀣𑀲𑀗𑁆𑀕𑀳𑀸 𑀢𑀤𑀼𑀪𑀬𑀢𑁆𑀣𑀲𑀗𑁆𑀕𑀳𑀸 𑀓𑀼𑀲𑀮𑀢𑁆𑀣𑀲𑀗𑁆𑀕𑀳𑀸 𑀅𑀓𑀼𑀲𑀮𑀢𑁆𑀣𑀲𑀗𑁆𑀕𑀳𑀸’’𑀢𑀺𑀆𑀤𑀺𑀦𑀸 𑀅𑀦𑀼𑀕𑀻𑀢𑀺𑀯𑀺𑀘𑀬𑁄. 𑀅𑀲𑁆𑀲𑀸𑀤𑀸𑀤𑀻𑀲𑀼 𑀲𑀼𑀔𑀯𑁂𑀤𑀦𑀸𑀬 ‘‘𑀇𑀝𑁆𑀞𑀸𑀭𑀫𑁆𑀫𑀡𑀸𑀦𑀼𑀪𑀯𑀦𑀮𑀓𑁆𑀔𑀡𑀸’’𑀢𑀺𑀆𑀤𑀺𑀦𑀸, 𑀢𑀡𑁆𑀳𑀸𑀬 ‘‘𑀆𑀭𑀫𑁆𑀫𑀡𑀕𑁆𑀕𑀳𑀡𑀮𑀓𑁆𑀔𑀡𑀸’’𑀢𑀺𑀆𑀤𑀺𑀦𑀸, 𑀯𑀺𑀧𑀮𑁆𑀮𑀸𑀲𑀸𑀦𑀁 ‘‘𑀯𑀺𑀧𑀭𑀻𑀢𑀕𑁆𑀕𑀳𑀡𑀮𑀓𑁆𑀔𑀡𑀸’’𑀢𑀺𑀆𑀤𑀺𑀦𑀸, 𑀅𑀯𑀲𑀺𑀝𑁆𑀞𑀸𑀦𑀁 𑀢𑁂𑀪𑀽𑀫𑀓𑀥𑀫𑁆𑀫𑀸𑀦𑀁 ‘‘𑀬𑀣𑀸𑀲𑀓𑀮𑀓𑁆𑀔𑀡𑀸’’𑀢𑀺𑀆𑀤𑀺𑀦𑀸 𑀲𑀩𑁆𑀩𑁂𑀲𑀜𑁆𑀘 𑀤𑁆𑀯𑀸𑀯𑀻𑀲𑀢𑀺𑀬𑀸 𑀢𑀺𑀓𑁂𑀲𑀼, 𑀤𑁆𑀯𑀸𑀘𑀢𑁆𑀢𑀸𑀮𑀻𑀲𑀸𑀥𑀺𑀓𑁂 𑀘 𑀤𑀼𑀓𑀲𑀢𑁂 𑀮𑀩𑁆𑀪𑀫𑀸𑀦𑀧𑀤𑀯𑀲𑁂𑀦 𑀢𑀁𑀢𑀁𑀅𑀲𑁆𑀲𑀸𑀤𑀢𑁆𑀣𑀯𑀺𑀲𑁂𑀲𑀦𑀺𑀤𑁆𑀥𑀸𑀭𑀡𑀁 𑀅𑀲𑁆𑀲𑀸𑀤𑀯𑀺𑀘𑀬𑁄.

𑀤𑀼𑀓𑁆𑀔𑀯𑁂𑀤𑀦𑀸𑀬 ‘‘𑀅𑀦𑀺𑀝𑁆𑀞𑀸𑀦𑀼𑀪𑀯𑀦𑀮𑀓𑁆𑀔𑀡𑀸’’𑀢𑀺𑀆𑀤𑀺𑀦𑀸, 𑀤𑀼𑀓𑁆𑀔𑀲𑀘𑁆𑀘𑀸𑀦𑀁 ‘‘𑀧𑀝𑀺𑀲𑀦𑁆𑀥𑀺𑀮𑀓𑁆𑀔𑀡𑀸’’𑀢𑀺𑀆𑀤𑀺𑀦𑀸, 𑀅𑀦𑀺𑀘𑁆𑀘𑀢𑀸𑀤𑀻𑀦𑀁 𑀆𑀤𑀺𑀅𑀦𑁆𑀢𑀯𑀦𑁆𑀢𑀢𑀸𑀬 𑀅𑀦𑀺𑀘𑁆𑀘𑀦𑁆𑀢𑀺𑀓𑀢𑀸𑀬 𑀘 ‘‘𑀅𑀦𑀺𑀘𑁆𑀘𑀸’’𑀢𑀺𑀆𑀤𑀺𑀦𑀸 𑀲𑀩𑁆𑀩𑁂𑀲𑀜𑁆𑀘 𑀮𑁄𑀓𑀺𑀬𑀥𑀫𑁆𑀫𑀸𑀦𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀳𑀸𑀦𑀪𑀸𑀕𑀺𑀬𑀢𑀸𑀤𑀺𑀯𑀲𑁂𑀦 𑀆𑀤𑀻𑀦𑀯𑀯𑀼𑀢𑁆𑀢𑀺𑀬𑀸 𑀑𑀓𑀸𑀭𑀦𑀺𑀤𑁆𑀥𑀸𑀭𑀡𑁂𑀦 𑀆𑀤𑀻𑀦𑀯𑀯𑀺𑀘𑀬𑁄. 𑀦𑀺𑀲𑁆𑀲𑀭𑀡𑀧𑀤𑁂 𑀅𑀭𑀺𑀬𑀫𑀕𑁆𑀕𑀲𑁆𑀲 𑀆𑀕𑀫𑀦𑀢𑁄 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑀺𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀯𑀺𑀪𑀸𑀕𑀯𑀺𑀲𑁂𑀲𑀦𑀺𑀤𑁆𑀥𑀸𑀭𑀡𑀯𑀲𑁂𑀦, 𑀦𑀺𑀩𑁆𑀩𑀸𑀦𑀲𑁆𑀲 𑀬𑀣𑀸𑀯𑀼𑀢𑁆𑀢𑀧𑀭𑀺𑀬𑀸𑀬𑀯𑀺𑀪𑀸𑀕𑀯𑀺𑀲𑁂𑀲𑀦𑀺𑀤𑁆𑀥𑀸𑀭𑀡𑀯𑀲𑁂𑀦𑀸𑀢𑀺 𑀏𑀯𑀁 𑀦𑀺𑀲𑁆𑀲𑀭𑀡𑀯𑀺𑀘𑀬𑁄. 𑀨𑀮𑀸𑀤𑀻𑀦𑀁 𑀢𑀁𑀢𑀁𑀲𑀼𑀢𑁆𑀢𑀤𑁂𑀲𑀦𑀸𑀬 𑀲𑀸𑀥𑁂𑀢𑀩𑁆𑀩𑀨𑀮𑀲𑁆𑀲 𑀢𑀤𑀼𑀧𑀸𑀬𑀲𑁆𑀲 𑀢𑀢𑁆𑀣 𑀢𑀢𑁆𑀣 𑀲𑀼𑀢𑁆𑀢𑀯𑀺𑀥𑀺𑀯𑀘𑀦𑀲𑁆𑀲 𑀘 𑀯𑀺𑀪𑀸𑀕𑀦𑀺𑀤𑁆𑀥𑀸𑀭𑀡𑀯𑀲𑁂𑀦 𑀯𑀺𑀘𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀧𑀤𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀧𑀼𑀘𑁆𑀙𑀸𑀧𑀼𑀩𑁆𑀩𑀸𑀧𑀭𑀸𑀦𑀼𑀕𑀻𑀢𑀻𑀦𑀁, 𑀅𑀲𑁆𑀲𑀸𑀤𑀸𑀤𑀻𑀦𑀜𑁆𑀘 𑀯𑀺𑀲𑁂𑀲𑀦𑀺𑀤𑁆𑀥𑀸𑀭𑀡𑀯𑀲𑁂𑀦𑁂𑀯 𑀯𑀺𑀘𑀬𑀮𑀓𑁆𑀔𑀡𑁄 ‘‘𑀯𑀺𑀘𑀬𑁄 𑀳𑀸𑀭𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄𑀢𑀺 𑁋

𑀏𑀯𑀁 𑀯𑀼𑀢𑁆𑀢𑁄𑀯.

𑀯𑀺𑀲𑁆𑀲𑀚𑁆𑀚𑀦𑀯𑀺𑀲𑁂𑀲𑁄 𑀧𑀦 𑀝𑀻𑀓𑀸𑀬𑀁 𑀯𑀼𑀢𑁆𑀢𑁄. 𑀓𑀣𑀁? 𑁋

‘‘𑀘𑀓𑁆𑀔𑀼 𑀅𑀦𑀺𑀘𑁆𑀘’’𑀦𑁆𑀢𑀺 𑀧𑀼𑀝𑁆𑀞𑁂 ‘‘𑀆𑀫, 𑀘𑀓𑁆𑀔𑀼 𑀅𑀦𑀺𑀘𑁆𑀘𑀫𑁂𑀯𑀸’’𑀢𑀺 𑀏𑀓𑀦𑁆𑀢𑀢𑁄 𑀯𑀺𑀲𑁆𑀲𑀚𑁆𑀚𑀦𑀁 𑀏𑀓𑀁𑀲𑀩𑁆𑀬𑀸𑀓𑀭𑀡𑀁, ‘‘𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀪𑀸𑀯𑁂𑀢𑀩𑁆𑀩𑀁, 𑀲𑀘𑁆𑀙𑀺𑀓𑀸𑀢𑀩𑁆𑀩𑀜𑁆𑀘𑀸’’𑀢𑀺 𑀧𑀼𑀝𑁆𑀞𑁂 ‘‘𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀁 𑀪𑀸𑀯𑁂𑀢𑀩𑁆𑀩𑀁, 𑀨𑀮𑀧𑀭𑀺𑀬𑀸𑀧𑀦𑁆𑀦𑀁 𑀲𑀘𑁆𑀙𑀺𑀓𑀸𑀢𑀩𑁆𑀩’’𑀦𑁆𑀢𑀺 𑀯𑀺𑀪𑀚𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀁 𑀯𑀺𑀪𑀚𑁆𑀚𑀩𑁆𑀬𑀸𑀓𑀭𑀡𑀁, ‘‘𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀓𑀼𑀲𑀮’’𑀦𑁆𑀢𑀺 𑀧𑀼𑀝𑁆𑀞𑁂 ‘‘𑀓𑀺𑀁 𑀅𑀦𑀯𑀚𑁆𑀚𑀝𑁆𑀞𑁄 𑀓𑀼𑀲𑀮𑀢𑁆𑀣𑁄, 𑀉𑀤𑀸𑀳𑀼 𑀲𑀼𑀔𑀯𑀺𑀧𑀸𑀓𑀝𑁆𑀞𑁄’’𑀢𑀺 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀁 𑀧𑀝𑀺𑀧𑀼𑀘𑁆𑀙𑀸𑀩𑁆𑀬𑀸𑀓𑀭𑀡𑀁, ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸, 𑀅𑀲𑀲𑁆𑀲𑀢𑁄 𑀯𑀸’’𑀢𑀺 𑀯𑀼𑀢𑁆𑀢𑁂 ‘‘𑀅𑀩𑁆𑀬𑀸𑀓𑀢𑀫𑁂𑀢’’𑀦𑁆𑀢𑀺𑀆𑀤𑀺𑀦𑀸 𑀅𑀯𑀺𑀲𑁆𑀲𑀚𑁆𑀚𑀦𑀁 𑀞𑀧𑀦𑀁, ‘‘𑀓𑀺𑀁 𑀧𑀦𑁂𑀢𑁂 ‘𑀓𑀼𑀲𑀮𑀸’𑀢𑀺 𑀯𑀸 ‘𑀥𑀫𑁆𑀫𑀸’𑀢𑀺 𑀯𑀸 𑀏𑀓𑀢𑁆𑀣𑀸, 𑀉𑀤𑀸𑀳𑀼 𑀦𑀸𑀦𑀢𑁆𑀣𑀸’’𑀢𑀺 𑀇𑀤𑀁 𑀧𑀼𑀘𑁆𑀙𑀦𑀁 𑀲𑀸𑀯𑀲𑁂𑀲𑀁. 𑀯𑀺𑀲𑁆𑀲𑀚𑁆𑀚𑀦𑀲𑁆𑀲 𑀧𑀦 𑀲𑀸𑀯𑀲𑁂𑀲𑀢𑁄 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀲𑁂𑀦 𑀤𑁂𑀲𑀦𑀸𑀬𑀁 𑀯𑁂𑀤𑀺𑀢𑀩𑁆𑀩𑀸. 𑀅𑀧𑀸𑀝𑀺𑀳𑀻𑀭𑀓𑀁 𑀲𑀉𑀢𑁆𑀢𑀭𑀁 𑀲𑀧𑁆𑀧𑀸𑀝𑀺𑀳𑀻𑀭𑀓𑀁 𑀦𑀺𑀭𑀼𑀢𑁆𑀢𑀭𑀁, 𑀲𑁂𑀲𑀁 𑀯𑀺𑀘𑀬𑀳𑀸𑀭𑀦𑀺𑀤𑁆𑀤𑁂𑀲𑁂 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺 𑁋

𑀯𑀼𑀢𑁆𑀢𑁄𑀯. 𑀲𑀁𑀯𑀡𑁆𑀡𑀦𑀸𑀲𑀼 𑀯𑀼𑀢𑁆𑀢𑁄 𑀅𑀢𑁆𑀣𑁄 𑀅𑀦𑀸𑀓𑀼𑀮𑁄 𑀧𑀸𑀓𑀝𑁄 𑀬𑀢𑀺𑀧𑁄𑀢𑁂𑀳𑀺 𑀯𑀺𑀜𑁆𑀜𑀸𑀢𑁄, 𑀲𑁄 𑀲𑀩𑁆𑀩𑀢𑁆𑀣 𑀅𑀫𑁆𑀳𑁂𑀳𑀺 𑀦 𑀯𑀺𑀪𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄.

𑀯𑀺𑀘𑀬𑀳𑀸𑀭𑀦𑀺𑀤𑁆𑀤𑁂𑀲𑁄 𑀦𑀺𑀤𑁆𑀤𑀺𑀝𑁆𑀞𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀓𑀢𑀫𑁄 𑀬𑀼𑀢𑁆𑀢𑀺𑀳𑀸𑀭𑀦𑀺𑀤𑁆𑀤𑁂𑀲𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑁋

𑁩. ‘‘𑀲𑀩𑁆𑀩𑁂𑀲𑀁 𑀳𑀸𑀭𑀸𑀦𑀁, 𑀬𑀸 𑀪𑀽𑀫𑀻 𑀬𑁄 𑀘 𑀕𑁄𑀘𑀭𑁄 𑀢𑁂𑀲𑀁.

𑀬𑀼𑀢𑁆𑀢𑀸𑀬𑀼𑀢𑁆𑀢𑀧𑀭𑀺𑀓𑁆𑀔𑀸, 𑀳𑀸𑀭𑁄 𑀬𑀼𑀢𑁆𑀢𑀻𑀢𑀺 𑀦𑀺𑀤𑁆𑀤𑀺𑀝𑁆𑀞𑁄’’𑀢𑀺. 𑁋

𑀕𑀸𑀣𑀸 𑀯𑀼𑀢𑁆𑀢𑀸. 𑀢𑀢𑁆𑀣 𑀲𑀩𑁆𑀩𑁂𑀲𑀁 𑀲𑁄𑀴𑀲𑀦𑁆𑀦𑀁 𑀳𑀸𑀭𑀸𑀦𑀁 𑀬𑀸 𑀪𑀽𑀫𑀺 𑀧𑀯𑀢𑁆𑀢𑀦𑀝𑁆𑀞𑀸𑀦𑀪𑀽𑀢𑀁 𑀩𑁆𑀬𑀜𑁆𑀚𑀦𑀁, 𑀬𑁄 𑀕𑁄𑀘𑀭𑁄 𑀲𑀼𑀢𑁆𑀢𑀢𑁆𑀣𑁄 𑀘 𑀅𑀢𑁆𑀣𑀺, 𑀢𑁂𑀲𑀁 𑀪𑀽𑀫𑀺𑀲𑀗𑁆𑀔𑀸𑀢𑀩𑁆𑀬𑀜𑁆𑀚𑀦𑀕𑁄𑀘𑀭𑀲𑀗𑁆𑀔𑀸𑀢𑀲𑀼𑀢𑁆𑀢𑀢𑁆𑀣𑀸𑀦𑀁 𑀬𑀸 𑀬𑀼𑀢𑁆𑀢𑀸𑀬𑀼𑀢𑁆𑀢𑀧𑀭𑀺𑀓𑁆𑀔𑀸 𑀬𑀼𑀢𑁆𑀢𑀸𑀬𑀼𑀢𑁆𑀢𑀻𑀦𑀁 𑀯𑀺𑀘𑀸𑀭𑀡𑀸 𑀲𑀁𑀯𑀡𑁆𑀡𑀦𑀸 𑀓𑀢𑀸, 𑀲𑁄 𑀬𑀼𑀢𑁆𑀢𑀺𑀅𑀬𑀼𑀢𑁆𑀢𑀺𑀧𑀭𑀺𑀓𑁆𑀔𑀸𑀯𑀺𑀘𑀸𑀭𑀡𑀲𑀗𑁆𑀔𑀸𑀢𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 ‘‘𑀬𑀼𑀢𑁆𑀢𑀺 𑀳𑀸𑀭𑁄’’𑀢𑀺 𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀅𑀢𑁆𑀣𑀬𑁄𑀚𑀦𑀸.

𑀢𑁂𑀲𑀁 𑀳𑀸𑀭𑀸𑀦𑀁 𑀪𑀽𑀫𑀺𑀪𑀽𑀢𑀲𑁆𑀲 𑀲𑀼𑀢𑁆𑀢𑁂 𑀆𑀕𑀢𑀲𑁆𑀲 𑀩𑁆𑀬𑀜𑁆𑀚𑀦𑀲𑁆𑀲 𑀬𑀼𑀢𑁆𑀢𑀺𑀪𑀸𑀯𑁄 𑀤𑀼𑀯𑀺𑀥𑁄 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀪𑀸𑀯𑁄, 𑀅𑀥𑀺𑀧𑁆𑀧𑁂𑀢𑀢𑁆𑀣𑀯𑀸𑀘𑀓𑀪𑀸𑀯𑁄 𑀘. 𑀕𑁄𑀘𑀭𑀪𑀽𑀢𑀲𑁆𑀲 𑀧𑀦 𑀲𑀼𑀢𑁆𑀢𑁂 𑀆𑀕𑀢𑀲𑁆𑀲 𑀬𑀼𑀢𑁆𑀢𑀺𑀪𑀸𑀯𑁄 𑀲𑀼𑀢𑁆𑀢𑀯𑀺𑀦𑀬𑀥𑀫𑁆𑀫𑀢𑀸𑀳𑀺 𑀅𑀯𑀺𑀮𑁄𑀫𑀦𑀁. 𑀅𑀬𑀼𑀢𑁆𑀢𑀺𑀪𑀸𑀯𑁄 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀕𑀳𑁂𑀢𑀩𑁆𑀩𑁄.

𑀬𑀼𑀢𑁆𑀢𑀺𑀳𑀸𑀭𑀦𑀺𑀤𑁆𑀤𑁂𑀲𑁄 𑀦𑀺𑀤𑁆𑀤𑀺𑀝𑁆𑀞𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀓𑀢𑀫𑁄 𑀧𑀤𑀝𑁆𑀞𑀸𑀦𑀳𑀸𑀭𑀦𑀺𑀤𑁆𑀤𑁂𑀲𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑁋

𑁪. ‘‘𑀥𑀫𑁆𑀫𑀁 𑀤𑁂𑀲𑁂𑀢𑀺 𑀚𑀺𑀦𑁄, 𑀢𑀲𑁆𑀲 𑀘 𑀥𑀫𑁆𑀫𑀲𑁆𑀲 𑀬𑀁 𑀧𑀤𑀝𑁆𑀞𑀸𑀦𑀁.

𑀇𑀢𑀺 𑀬𑀸𑀯 𑀲𑀩𑁆𑀩𑀥𑀫𑁆𑀫𑀸, 𑀏𑀲𑁄 𑀳𑀸𑀭𑁄 𑀧𑀤𑀝𑁆𑀞𑀸𑀦𑁄’’𑀢𑀺. 𑁋

𑀕𑀸𑀣𑀸 𑀯𑀼𑀢𑁆𑀢𑀸. 𑀢𑀢𑁆𑀣 𑀥𑀫𑁆𑀫𑀦𑁆𑀢𑀺 𑀬𑀁 𑀓𑀺𑀜𑁆𑀘𑀺 𑀓𑀼𑀲𑀮𑀸𑀤𑀺𑀥𑀫𑁆𑀫𑀁 𑀲𑀼𑀢𑁆𑀢𑁂 𑀚𑀺𑀦𑁄 𑀤𑁂𑀲𑁂𑀢𑀺, 𑀢𑀲𑁆𑀲 𑀲𑀼𑀢𑁆𑀢𑁂 𑀚𑀺𑀦𑁂𑀦 𑀤𑁂𑀲𑀺𑀢𑀲𑁆𑀲 𑀓𑀼𑀲𑀮𑀸𑀤𑀺𑀥𑀫𑁆𑀫𑀲𑁆𑀲 𑀬𑀜𑁆𑀘 𑀧𑀤𑀝𑁆𑀞𑀸𑀦𑀁 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀁, 𑀢𑀁 𑀢𑀁 𑀧𑀤𑀝𑁆𑀞𑀸𑀦𑀜𑁆𑀘𑀸𑀢𑀺 𑀏𑀯𑀁 𑀯𑀼𑀢𑁆𑀢𑀦𑀬𑁂𑀦 𑀬𑀸𑀯 𑀬𑀢𑁆𑀢𑀓𑀸 𑀲𑀩𑁆𑀩𑁂 𑀥𑀫𑁆𑀫𑀸 𑀲𑀼𑀢𑁆𑀢𑁂 𑀚𑀺𑀦𑁂𑀦 𑀤𑁂𑀲𑀺𑀢𑀸, 𑀢𑀢𑁆𑀢𑀓𑀸𑀦𑀁 𑀲𑀩𑁆𑀩𑁂𑀲𑀁 𑀥𑀫𑁆𑀫𑀸𑀦𑀁 𑀬𑀜𑁆𑀘 𑀧𑀤𑀝𑁆𑀞𑀸𑀦𑀁 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀁, 𑀢𑀲𑁆𑀲 𑀘 𑀧𑀤𑀝𑁆𑀞𑀸𑀦𑀲𑁆𑀲 𑀬𑀜𑁆𑀘 𑀧𑀤𑀝𑁆𑀞𑀸𑀦𑀁 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀁, 𑀢𑀁 𑀢𑀁 𑀧𑀤𑀝𑁆𑀞𑀸𑀦𑀜𑁆𑀘, 𑀇𑀢𑀺 𑀏𑀯𑀁 𑀯𑀼𑀢𑁆𑀢𑀦𑀬𑁂𑀦 𑀬𑀸𑀯 𑀬𑀢𑁆𑀢𑀓𑀸 𑀲𑀩𑁆𑀩𑁂 𑀧𑀤𑀝𑁆𑀞𑀸𑀦𑀥𑀫𑁆𑀫𑀸 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸𑀯, 𑀢𑀢𑁆𑀢𑀓𑀸𑀦𑀺 𑀲𑀩𑁆𑀩𑀸𑀦𑀺 𑀥𑀫𑁆𑀫𑀧𑀤𑀝𑁆𑀞𑀸𑀦𑀸𑀦𑀺 𑀬𑀣𑀸𑀦𑀼𑀭𑀽𑀧𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁂𑀦 𑀓𑀣𑀺𑀢𑀸𑀦𑀺, 𑀏𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 ‘‘𑀧𑀤𑀝𑁆𑀞𑀸𑀦𑁄 𑀳𑀸𑀭𑁄’’𑀢𑀺 𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀅𑀢𑁆𑀣𑀬𑁄𑀚𑀦𑀸.

𑀲𑀼𑀢𑁆𑀢𑁂 𑀤𑁂𑀲𑀺𑀢𑀓𑀼𑀲𑀮𑀥𑀫𑁆𑀫𑀲𑁆𑀲 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀸𑀤𑀺 𑀧𑀤𑀝𑁆𑀞𑀸𑀦𑀁, 𑀲𑀼𑀢𑁆𑀢𑁂 𑀤𑁂𑀲𑀺𑀢𑀅𑀓𑀼𑀲𑀮𑀥𑀫𑁆𑀫𑀲𑁆𑀲 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀅𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀅𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀸𑀤𑀺 𑀧𑀤𑀝𑁆𑀞𑀸𑀦𑀁, 𑀅𑀩𑁆𑀬𑀸𑀓𑀢𑀲𑁆𑀲 𑀥𑀫𑁆𑀫𑀲𑁆𑀲 𑀬𑀣𑀸𑀭𑀳𑀁 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀧𑀤𑀝𑁆𑀞𑀸𑀦𑀦𑁆𑀢𑀺𑀆𑀤𑀺𑀦𑀸 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀦𑁆𑀢𑀺.

𑀧𑀤𑀝𑁆𑀞𑀸𑀦𑀳𑀸𑀭𑀦𑀺𑀤𑁆𑀤𑁂𑀲𑁄 𑀦𑀺𑀤𑁆𑀤𑀺𑀝𑁆𑀞𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀓𑀢𑀫𑁄 𑀮𑀓𑁆𑀔𑀡𑀳𑀸𑀭𑀦𑀺𑀤𑁆𑀤𑁂𑀲𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑁋

𑁫. ‘‘𑀯𑀼𑀢𑁆𑀢𑀫𑁆𑀳𑀺 𑀏𑀓𑀥𑀫𑁆𑀫𑁂, 𑀬𑁂 𑀥𑀫𑁆𑀫𑀸 𑀏𑀓𑀮𑀓𑁆𑀔𑀡𑀸 𑀓𑁂𑀘𑀺.

𑀯𑀼𑀢𑁆𑀢𑀸 𑀪𑀯𑀦𑁆𑀢𑀺 𑀲𑀩𑁆𑀩𑁂, 𑀲𑁄 𑀳𑀸𑀭𑁄 𑀮𑀓𑁆𑀔𑀡𑁄 𑀦𑀸𑀫𑀸’’𑀢𑀺. 𑁋

𑀕𑀸𑀣𑀸 𑀯𑀼𑀢𑁆𑀢𑀸. 𑀢𑀢𑁆𑀣 𑀏𑀓𑀥𑀫𑁆𑀫𑁂 𑀲𑀼𑀢𑁆𑀢𑁂 𑀪𑀕𑀯𑀢𑀸 𑀯𑀼𑀢𑁆𑀢𑀫𑁆𑀳𑀺, 𑀅𑀝𑁆𑀞𑀓𑀣𑀸𑀬𑀁 𑀦𑀺𑀤𑁆𑀥𑀸𑀭𑀺𑀢𑁂 𑀯𑀸 𑀲𑀢𑀺 𑀢𑁂𑀦 𑀥𑀫𑁆𑀫𑁂𑀦 𑀬𑁂 𑀓𑁂𑀘𑀺 𑀥𑀫𑁆𑀫𑀸 𑀏𑀓𑀮𑀓𑁆𑀔𑀡𑀸 𑀪𑀯𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀲𑀼𑀢𑁆𑀢𑁂 𑀲𑀭𑀽𑀧𑀢𑁄 𑀅𑀯𑀼𑀢𑁆𑀢𑀸𑀧𑀺 𑀲𑀫𑀸𑀦𑀮𑀓𑁆𑀔𑀡𑀢𑀸𑀬 𑀲𑀁𑀯𑀡𑁆𑀡𑁂𑀢𑀩𑁆𑀩𑀪𑀸𑀯𑁂𑀦 𑀆𑀦𑁂𑀢𑁆𑀯𑀸 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀸 𑀪𑀯𑀦𑁆𑀢𑀺, 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 ‘‘𑀮𑀓𑁆𑀔𑀡𑁄 𑀦𑀸𑀫 𑀳𑀸𑀭𑁄’’𑀢𑀺 𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀅𑀢𑁆𑀣𑀬𑁄𑀚𑀦𑀸.

𑀏𑀓𑀁 𑀲𑀫𑀸𑀦𑀁 𑀮𑀓𑁆𑀔𑀡𑀁 𑀏𑀢𑁂𑀲𑀦𑁆𑀢𑀺 𑀏𑀓𑀮𑀓𑁆𑀔𑀡𑀸, 𑀲𑀫𑀸𑀦𑀮𑀓𑁆𑀔𑀡𑀸, 𑀲𑀳𑀘𑀸𑀭𑀺𑀢𑀸𑀬 𑀯𑀸 𑀲𑀫𑀸𑀦𑀓𑀺𑀘𑁆𑀘𑀢𑀸𑀬 𑀯𑀸 𑀲𑀫𑀸𑀦𑀳𑁂𑀢𑀼𑀢𑀸𑀬 𑀯𑀸 𑀲𑀫𑀸𑀦𑀨𑀮𑀢𑀸𑀬 𑀯𑀸 𑀲𑀫𑀸𑀦𑀸𑀭𑀫𑁆𑀫𑀡𑀢𑀸𑀬 𑀯𑀸 𑀅𑀯𑀼𑀢𑁆𑀢𑀸𑀧𑀺 𑀦𑀺𑀤𑁆𑀥𑀸𑀭𑀺𑀢𑀸𑀢𑀺. 𑀓𑀣𑀁? 𑁋 ‘‘𑀦𑀸𑀦𑀢𑁆𑀢𑀓𑀸𑀬𑀸𑀦𑀸𑀦𑀢𑁆𑀢𑀲𑀜𑁆𑀜𑀺𑀦𑁄 (𑀤𑀻. 𑀦𑀺. 𑁩.𑁩𑁪𑁧, 𑁩𑁫𑁭, 𑁩𑁫𑁯; 𑀅. 𑀦𑀺. 𑁯.𑁨𑁪), 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸’’𑀢𑀺𑀆𑀤𑀻𑀲𑀼 𑀲𑀳𑀘𑀸𑀭𑀺𑀢𑀸𑀬 𑀲𑀜𑁆𑀜𑀸𑀬 𑀲𑀳𑀕𑀢𑀸 𑀥𑀫𑁆𑀫𑀸 𑀦𑀺𑀤𑁆𑀥𑀸𑀭𑀺𑀢𑀸. ‘‘𑀤𑀤𑀁 𑀫𑀺𑀢𑁆𑀢𑀸𑀦𑀺 𑀕𑀦𑁆𑀣𑀢𑀻’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁨𑁪𑁬; 𑀲𑀼. 𑀦𑀺. 𑁧𑁮𑁯) 𑀲𑀫𑀸𑀦𑀓𑀺𑀘𑁆𑀘𑀢𑀸, 𑀧𑀺𑀬𑀯𑀘𑀦𑀅𑀢𑁆𑀣𑀘𑀭𑀺𑀬𑀸 𑀲𑀫𑀸𑀦𑀢𑁆𑀣𑀢𑀸𑀧𑀺 𑀦𑀺𑀤𑁆𑀥𑀸𑀭𑀺𑀢𑀸, ‘‘𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁧𑁨𑁬; 𑀲𑀁. 𑀦𑀺. 𑁨.𑁧; 𑀫𑀳𑀸𑀯. 𑁧; 𑀯𑀺𑀪. 𑁨𑁨𑁫; 𑀉𑀤𑀸. 𑁧; 𑀦𑁂𑀢𑁆𑀢𑀺. 𑁨𑁪) 𑀲𑀫𑀸𑀦𑀳𑁂𑀢𑀼𑀢𑀸𑀬 𑀲𑀜𑁆𑀜𑀸𑀤𑀬𑁄𑀧𑀺 𑀦𑀺𑀤𑁆𑀥𑀸𑀭𑀺𑀢𑀸, ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁧𑁨𑁬; 𑀲𑀁. 𑀦𑀺. 𑁨.𑁧; 𑀫𑀳𑀸𑀯. 𑁧; 𑀯𑀺𑀪. 𑁨𑁨𑁫; 𑀉𑀤𑀸. 𑁧; 𑀦𑁂𑀢𑁆𑀢𑀺. 𑁨𑁪) 𑀲𑀫𑀸𑀦𑀨𑀮𑀢𑀸𑀬 𑀢𑀡𑁆𑀳𑀼𑀧𑀸𑀤𑀸𑀦𑀸𑀤𑀬𑁄𑀧𑀺 𑀦𑀺𑀤𑁆𑀥𑀸𑀭𑀺𑀢𑀸, ‘‘𑀭𑀽𑀧𑀁 𑀅𑀲𑁆𑀲𑀸𑀤𑁂𑀢𑀺 𑀅𑀪𑀺𑀦𑀦𑁆𑀤𑀢𑀺, 𑀢𑀁 𑀆𑀭𑀩𑁆𑀪 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀻𑀲𑀼 (𑀧𑀝𑁆𑀞𑀸. 𑁧.𑁧.𑁪𑁨𑁪) 𑀲𑀫𑀸𑀦𑀸𑀭𑀫𑁆𑀫𑀡𑀢𑀸𑀬 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀯𑁂𑀤𑀦𑀸𑀤𑀬𑁄𑀧𑀺 𑀦𑀺𑀤𑁆𑀥𑀸𑀭𑀺𑀢𑀸, 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑀸𑀢𑀺 𑀅𑀢𑁆𑀣𑁄𑀢𑀺. 𑀯𑀺𑀢𑁆𑀣𑀸𑀭𑁄 𑀯𑀺𑀪𑀗𑁆𑀕𑀯𑀸𑀭𑁂 (𑀦𑁂𑀢𑁆𑀢𑀺. 𑁨𑁩) 𑀆𑀕𑀫𑀺𑀲𑁆𑀲𑀢𑀺.

𑀮𑀓𑁆𑀔𑀡𑁄 𑀳𑀸𑀭𑁄 𑀦𑀺𑀤𑁆𑀤𑀺𑀝𑁆𑀞𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀓𑀢𑀫𑁄 𑀘𑀢𑀼𑀩𑁆𑀬𑀽𑀳𑁄 𑀳𑀸𑀭𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑁋

𑁬. ‘‘𑀦𑁂𑀭𑀼𑀢𑁆𑀢𑀫𑀥𑀺𑀧𑁆𑀧𑀸𑀬𑁄, 𑀩𑁆𑀬𑀜𑁆𑀚𑀦𑀫𑀣 𑀤𑁂𑀲𑀦𑀸𑀦𑀺𑀤𑀸𑀦𑀜𑁆𑀘;

𑀧𑀼𑀩𑁆𑀩𑀸𑀧𑀭𑀸𑀦𑀼𑀲𑀦𑁆𑀥𑀻, 𑀏𑀲𑁄 𑀳𑀸𑀭𑁄 𑀘𑀢𑀼𑀩𑁆𑀬𑀽𑀳𑁄’’𑀢𑀺. 𑁋

𑀕𑀸𑀣𑀸 𑀯𑀼𑀢𑁆𑀢𑀸. 𑀢𑀢𑁆𑀣 𑀦𑁂𑀭𑀼𑀢𑁆𑀢𑀁 𑀲𑀼𑀢𑁆𑀢𑀧𑀤𑀦𑀺𑀩𑁆𑀩𑀘𑀦𑀜𑁆𑀘 𑀩𑀼𑀤𑁆𑀥𑀸𑀦𑀁 𑀢𑀲𑁆𑀲 𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀤𑁂𑀲𑀓𑀸𑀦𑀁, 𑀲𑀸𑀯𑀓𑀸𑀦𑀁 𑀯𑀸 𑀅𑀥𑀺𑀧𑁆𑀧𑀸𑀬𑁄 𑀘 𑀅𑀢𑁆𑀣𑀩𑁆𑀬𑀜𑁆𑀚𑀦𑁂𑀦 𑀩𑁆𑀬𑀜𑁆𑀚𑀦𑀫𑀼𑀔𑁂𑀦 𑀤𑁂𑀲𑀦𑀸𑀦𑀺𑀤𑀸𑀦𑀜𑁆𑀘 𑀧𑀼𑀩𑁆𑀩𑀸𑀧𑀭𑁂𑀦 𑀅𑀦𑀼𑀲𑀦𑁆𑀥𑀺 𑀘 𑀏𑀢𑁂 𑀦𑀺𑀭𑀼𑀢𑁆𑀢𑀸𑀤𑀬𑁄 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁂𑀦 𑀯𑀺𑀪𑀸𑀯𑀻𑀬𑀦𑁆𑀢𑀺, 𑀏𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 ‘‘𑀘𑀢𑀼𑀩𑁆𑀬𑀽𑀳𑁄 𑀳𑀸𑀭𑁄’’𑀢𑀺 𑀦𑀺𑀤𑁆𑀤𑀺𑀝𑁆𑀞𑁄. 𑀤𑁂𑀲𑀦𑀸𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀤𑁂𑀲𑀓𑀲𑁆𑀲 𑀅𑀚𑁆𑀛𑀸𑀲𑀬𑀸𑀤𑀺 𑀤𑁂𑀲𑀦𑀸𑀦𑀺𑀤𑀸𑀦𑀁 𑀦𑀸𑀫. 𑀘𑀢𑀼𑀩𑁆𑀬𑀽𑀳𑀳𑀸𑀭𑀲𑁆𑀲 𑀩𑀳𑀼𑀯𑀺𑀲𑀬𑀢𑁆𑀢𑀸 𑀯𑀺𑀪𑀗𑁆𑀕𑁂 (𑀦𑁂𑀢𑁆𑀢𑀺. 𑁨𑁫 𑀆𑀤𑀬𑁄) 𑀮𑀓𑁆𑀔𑀡𑀲𑀫𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀓𑀣𑀬𑀺𑀲𑁆𑀲𑀸𑀫.

𑀘𑀢𑀼𑀩𑁆𑀬𑀽𑀳𑀳𑀸𑀭𑀦𑀺𑀤𑁆𑀤𑁂𑀲𑁄 𑀦𑀺𑀤𑁆𑀤𑀺𑀝𑁆𑀞𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀓𑀢𑀫𑁄 𑀆𑀯𑀝𑁆𑀝𑀳𑀸𑀭𑀦𑀺𑀤𑁆𑀤𑁂𑀲𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑁋

𑁭. ‘‘𑀏𑀓𑀫𑁆𑀳𑀺 𑀧𑀤𑀝𑁆𑀞𑀸𑀦𑁂, 𑀧𑀭𑀺𑀬𑁂𑀲𑀢𑀺 𑀲𑁂𑀲𑀓𑀁 𑀧𑀤𑀝𑁆𑀞𑀸𑀦𑀁;

𑀆𑀯𑀝𑁆𑀝𑀢𑀺 𑀧𑀝𑀺𑀧𑀓𑁆𑀔𑁂, 𑀆𑀯𑀝𑁆𑀝𑁄 𑀦𑀸𑀫 𑀲𑁄 𑀳𑀸𑀭𑁄’’𑀢𑀺. 𑁋

𑀕𑀸𑀣𑀸 𑀯𑀼𑀢𑁆𑀢𑀸. 𑀢𑀢𑁆𑀣 𑀧𑀭𑀓𑁆𑀓𑀫𑀥𑀸𑀢𑀼𑀆𑀤𑀻𑀦𑀁 𑀧𑀤𑀝𑁆𑀞𑀸𑀦𑁂 𑀏𑀓𑀫𑁆𑀳𑀺 𑀆𑀭𑀫𑁆𑀪𑀥𑀸𑀢𑀼𑀆𑀤𑀺𑀓𑁂 𑀤𑁂𑀲𑀦𑀸𑀭𑀼𑀴𑁆𑀳𑁂 𑀲𑀢𑀺 𑀯𑀺𑀲𑀪𑀸𑀕𑀢𑀸𑀬 𑀯𑀸 𑀲𑁂𑀲𑀓𑀁 𑀧𑀤𑀝𑁆𑀞𑀸𑀦𑀁 𑀧𑀭𑀺𑀬𑁂𑀲𑀢𑀺, 𑀤𑁂𑀲𑀦𑀸𑀬 𑀲𑀭𑀽𑀧𑀢𑁄 𑀅𑀕𑁆𑀕𑀳𑀡𑁂𑀦 𑀯𑀸 𑀲𑁂𑀲𑀓𑀁 𑀧𑀤𑀝𑁆𑀞𑀸𑀦𑀁 𑀧𑀭𑀺𑀬𑁂𑀲𑀢𑀺, 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁂𑀦 𑀧𑀭𑀺𑀬𑁂𑀲𑀺𑀢𑁆𑀯𑀸 𑀬𑁄𑀚𑁂𑀦𑁆𑀢𑁄 𑀤𑁂𑀲𑀦𑀁 𑀧𑀫𑀸𑀤𑀸𑀤𑀻𑀦𑀁 𑀧𑀤𑀝𑁆𑀞𑀸𑀦𑀪𑀽𑀢𑁂 𑀓𑁄𑀲𑀚𑁆𑀚𑀸𑀤𑀺𑀓𑁂 𑀧𑀝𑀺𑀧𑀓𑁆𑀔𑁂 𑀆𑀯𑀝𑁆𑀝𑀢𑀺 𑀆𑀯𑀝𑁆𑀝𑀸𑀧𑁂𑀢𑀺, 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 ‘‘𑀆𑀯𑀝𑁆𑀝𑁄 𑀳𑀸𑀭𑁄 𑀦𑀸𑀫𑀸’’𑀢𑀺 𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀅𑀢𑁆𑀣𑀬𑁄𑀚𑀦𑀸.

‘‘𑀧𑀝𑀺𑀧𑀓𑁆𑀔𑁂’’𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁, 𑀲𑁂𑀲𑁂𑀧𑀺 𑀲𑀪𑀸𑀕𑁂 𑀆𑀯𑀝𑁆𑀝𑀦𑀢𑁄. 𑀦 𑀳𑀺 𑀆𑀭𑀫𑁆𑀪𑀥𑀸𑀢𑀼𑀆𑀤𑀺𑀓𑁂 𑀤𑁂𑀲𑀦𑀸𑀭𑀼𑀴𑁆𑀳𑁂 𑀲𑀢𑀺 𑀢𑀧𑁆𑀧𑀝𑀺𑀧𑀓𑁆𑀔𑁂 𑀓𑁄𑀲𑀚𑁆𑀚𑀸𑀤𑀺𑀓𑁂𑀬𑁂𑀯 𑀤𑁂𑀲𑀦𑀁 𑀆𑀯𑀝𑁆𑀝𑁂𑀢𑀺, 𑀅𑀣 𑀔𑁄 𑀅𑀯𑀲𑁂𑀲𑀯𑀻𑀭𑀺𑀬𑀸𑀭𑀫𑁆𑀪𑀸𑀤𑀺𑀓𑁂𑀧𑀺 𑀤𑁂𑀲𑀦𑀁 𑀆𑀯𑀝𑁆𑀝𑁂𑀢𑀻𑀢𑀺.

𑀆𑀯𑀝𑁆𑀝𑀳𑀸𑀭𑀦𑀺𑀤𑁆𑀤𑁂𑀲𑁄 𑀦𑀺𑀤𑁆𑀤𑀺𑀝𑁆𑀞𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀓𑀢𑀫𑁄 𑀯𑀺𑀪𑀢𑁆𑀢𑀺𑀳𑀸𑀭𑀦𑀺𑀤𑁆𑀤𑁂𑀲𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑁋

𑁮. ‘‘𑀥𑀫𑁆𑀫𑀜𑁆𑀘 𑀧𑀤𑀝𑁆𑀞𑀸𑀦𑀁, 𑀪𑀽𑀫𑀺𑀜𑁆𑀘 𑀯𑀺𑀪𑀚𑀢𑁂 𑀅𑀬𑀁 𑀳𑀸𑀭𑁄.

𑀲𑀸𑀥𑀸𑀭𑀡𑁂 𑀅𑀲𑀸𑀥𑀸𑀭𑀡𑁂 𑀘 𑀦𑁂𑀬𑁆𑀬𑁄 𑀯𑀺𑀪𑀢𑁆𑀢𑀻’’𑀢𑀺. 𑁋

𑀕𑀸𑀣𑀸 𑀯𑀼𑀢𑁆𑀢𑀸. 𑀢𑀢𑁆𑀣 𑀓𑀼𑀲𑀮𑀸𑀤𑀺𑀯𑀲𑁂𑀦 𑀅𑀦𑁂𑀓𑀯𑀺𑀥𑀁 𑀲𑀪𑀸𑀯𑀥𑀫𑁆𑀫𑀜𑁆𑀘 𑀤𑀸𑀦𑀲𑀻𑀮𑀸𑀤𑀺𑀧𑀤𑀝𑁆𑀞𑀸𑀦𑀜𑁆𑀘 ‘‘𑀤𑀲𑁆𑀲𑀦𑀪𑀽𑀫𑀺 𑀪𑀸𑀯𑀦𑀸𑀪𑀽𑀫𑀻’’𑀢𑀺 𑀏𑀯𑀫𑀸𑀤𑀺𑀓𑀁 𑀪𑀽𑀫𑀺𑀜𑁆𑀘 𑀲𑀸𑀥𑀸𑀭𑀡𑁂 𑀘 𑀅𑀲𑀸𑀥𑀸𑀭𑀡𑁂 𑀘 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁂𑀦 𑀯𑀺𑀪𑀚𑀢𑁂, 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 ‘‘𑀯𑀺𑀪𑀢𑁆𑀢𑀺 𑀳𑀸𑀭𑁄’’𑀢𑀺 𑀦𑁂𑀬𑁆𑀬𑁄𑀢𑀺 𑀅𑀢𑁆𑀣𑀬𑁄𑀚𑀦𑀸.

‘‘𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀼𑀢𑁆𑀢𑀸 𑀓𑀼𑀲𑀮𑀸 𑀯𑀸𑀲𑀦𑀸𑀪𑀸𑀕𑀺𑀬𑀸, 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀼𑀢𑁆𑀢𑀸 𑀓𑀼𑀲𑀮𑀸 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀸’’𑀢𑁆𑀬𑀸𑀤𑀺𑀦𑀸, ‘‘𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀼𑀢𑁆𑀢𑀸 𑀅𑀓𑀼𑀲𑀮𑀸 𑀓𑀺𑀮𑁂𑀲𑀪𑀸𑀕𑀺𑀬𑀸’’𑀢𑁆𑀬𑀸𑀤𑀺𑀦𑀸 𑀥𑀫𑁆𑀫𑀜𑁆𑀘, ‘‘𑀇𑀤𑀁 𑀲𑀻𑀮𑀁 𑀇𑀫𑀲𑁆𑀲 𑀫𑀳𑀕𑁆𑀕𑀢𑀯𑀺𑀲𑁂𑀲𑀲𑁆𑀲 𑀧𑀤𑀝𑁆𑀞𑀸𑀦𑀁, 𑀇𑀤𑀁 𑀲𑀻𑀮𑀁 𑀇𑀤𑀁 𑀛𑀸𑀦𑀁 𑀇𑀫𑀲𑁆𑀲 𑀮𑁄𑀓𑀼𑀢𑁆𑀢𑀭𑀲𑁆𑀲 𑀧𑀤𑀝𑁆𑀞𑀸𑀦’’𑀦𑁆𑀢𑁆𑀬𑀸𑀤𑀺𑀦𑀸 𑀧𑀤𑀝𑁆𑀞𑀸𑀦𑀜𑁆𑀘, ‘‘𑀤𑀲𑁆𑀲𑀦𑀧𑀳𑀸𑀢𑀩𑁆𑀩𑀲𑁆𑀲 𑀧𑀼𑀣𑀼𑀚𑁆𑀚𑀦𑁄 𑀪𑀽𑀫𑀺, 𑀪𑀸𑀯𑀦𑀸𑀧𑀳𑀸𑀢𑀩𑁆𑀩𑀲𑁆𑀲 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀪𑀽𑀫𑀺’’𑀢𑁆𑀬𑀸𑀤𑀺𑀦𑀸 𑀪𑀽𑀫𑀺𑀜𑁆𑀘, ‘‘𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸 𑀧𑀼𑀣𑀼𑀚𑁆𑀚𑀦𑀲𑁄𑀢𑀸𑀧𑀦𑁆𑀦𑀸𑀦𑀁 𑀲𑀸𑀥𑀸𑀭𑀡𑀸’’𑀢𑁆𑀬𑀸𑀤𑀺𑀦𑀸 𑀲𑀸𑀥𑀸𑀭𑀡𑁂 𑀘, ‘‘𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸 𑀅𑀦𑀸𑀕𑀸𑀫𑀺𑀅𑀭𑀳𑀦𑁆𑀢𑀸𑀦𑀁 𑀅𑀲𑀸𑀥𑀸𑀭𑀡𑀸’’𑀢𑁆𑀬𑀸𑀤𑀺𑀦𑀸 𑀅𑀲𑀸𑀥𑀸𑀭𑀡𑁂 𑀘 𑀬𑁂𑀦 𑀯𑀺𑀪𑀚𑀢𑀺, 𑀲𑁄 𑀯𑀺𑀪𑀢𑁆𑀢𑀺 𑀳𑀸𑀭𑁄 𑀦𑀸𑀫𑀸𑀢𑀺𑀆𑀤𑀺𑀦𑀸 (𑀦𑁂𑀢𑁆𑀢𑀺. 𑁩𑁩-𑁩𑁪) 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀯𑀺𑀪𑀚𑀦𑀸𑀓𑀸𑀭𑁄 𑀕𑀳𑁂𑀢𑀩𑁆𑀩𑁄.

𑀯𑀺𑀪𑀢𑁆𑀢𑀺𑀳𑀸𑀭𑀦𑀺𑀤𑁆𑀤𑁂𑀲𑁄 𑀦𑀺𑀤𑁆𑀤𑀺𑀝𑁆𑀞𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀓𑀢𑀫𑁄 𑀧𑀭𑀺𑀯𑀢𑁆𑀢𑀦𑀳𑀸𑀭𑀦𑀺𑀤𑁆𑀤𑁂𑀲𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑁋

𑁯. ‘‘𑀓𑀼𑀲𑀮𑀸𑀓𑀼𑀲𑀮𑁂 𑀥𑀫𑁆𑀫𑁂, 𑀦𑀺𑀤𑁆𑀤𑀺𑀝𑁆𑀞𑁂 𑀪𑀸𑀯𑀺𑀢𑁂 𑀧𑀳𑀻𑀦𑁂 𑀘.

𑀧𑀭𑀺𑀯𑀢𑁆𑀢𑀢𑀺 𑀧𑀝𑀺𑀧𑀓𑁆𑀔𑁂, 𑀳𑀸𑀭𑁄 𑀧𑀭𑀺𑀯𑀢𑁆𑀢𑀦𑁄 𑀦𑀸𑀫𑀸’’𑀢𑀺. 𑁋

𑀕𑀸𑀣𑀸 𑀯𑀼𑀢𑁆𑀢𑀸. 𑀢𑀢𑁆𑀣 𑀲𑀼𑀢𑁆𑀢𑁂 𑀪𑀸𑀯𑀺𑀢𑁂 𑀪𑀸𑀯𑀺𑀢𑀩𑁆𑀩𑁂 𑀓𑀼𑀲𑀮𑁂 𑀅𑀦𑀯𑀚𑁆𑀚𑀥𑀫𑁆𑀫𑁂 𑀦𑀺𑀤𑁆𑀤𑀺𑀝𑁆𑀞𑁂 𑀓𑀣𑀺𑀢𑁂, 𑀲𑀁𑀯𑀡𑁆𑀡𑀺𑀢𑁂 𑀯𑀸 𑀧𑀳𑀻𑀦𑁂 𑀧𑀳𑀸𑀢𑀩𑁆𑀩𑁂 𑀅𑀓𑀼𑀲𑀮𑁂 𑀲𑀸𑀯𑀚𑁆𑀚𑀥𑀫𑁆𑀫𑁂 𑀦𑀺𑀤𑁆𑀤𑀺𑀝𑁆𑀞𑁂 𑀓𑀣𑀺𑀢𑁂, 𑀲𑀁𑀯𑀡𑁆𑀡𑀺𑀢𑁂 𑀯𑀸 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀧𑀝𑀺𑀧𑀓𑁆𑀔𑁂 𑀯𑀺𑀧𑀭𑀻𑀢𑀥𑀫𑁆𑀫𑁂 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁂𑀦 𑀧𑀭𑀺𑀯𑀢𑁆𑀢𑀢𑀺 𑀧𑀭𑀺𑀯𑀢𑁆𑀢𑁂𑀢𑀺, 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 ‘‘𑀧𑀭𑀺𑀯𑀢𑁆𑀢𑀦𑁄 𑀳𑀸𑀭𑁄 𑀦𑀸𑀫𑀸’’𑀢𑀺 𑀯𑁂𑀤𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑀬𑁄𑀚𑀦𑀸.

‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑁆𑀲 𑀧𑀼𑀭𑀺𑀲𑀧𑀼𑀕𑁆𑀕𑀮𑀲𑁆𑀲 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀦𑀺𑀚𑁆𑀚𑀺𑀡𑁆𑀡𑀸 𑀪𑀯𑀢𑀻’’𑀢𑀺𑀆𑀤𑀺𑀦𑀸 𑀘 ‘‘𑀬𑀲𑁆𑀲 𑀯𑀸 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑀲𑁆𑀲 𑀧𑀸𑀡𑀸𑀢𑀺𑀧𑀸𑀢𑁄 𑀧𑀳𑀻𑀦𑁄’’𑀢𑀺𑀆𑀤𑀺𑀦𑀸 𑀘 ‘‘𑀪𑀼𑀜𑁆𑀚𑀺𑀢𑀩𑁆𑀩𑀸 𑀓𑀸𑀫𑀸 …𑀧𑁂… 𑀓𑀸𑀫𑁂𑀳𑀺 𑀯𑁂𑀭𑀫𑀡𑀻 𑀢𑁂𑀲𑀁 𑀅𑀥𑀫𑁆𑀫𑁄’’𑀢𑀺𑀆𑀤𑀺𑀦𑀸 𑀘 𑀧𑀝𑀺𑀧𑀓𑁆𑀔𑁂 𑀧𑀭𑀺𑀯𑀢𑁆𑀢𑀦𑀪𑀸𑀯𑀁 𑀯𑀺𑀪𑀗𑁆𑀕𑀯𑀸𑀭𑁂 (𑀦𑁂𑀢𑁆𑀢𑀺. 𑁩𑁫 𑀆𑀤𑀬𑁄) 𑀯𑀓𑁆𑀔𑀢𑀻𑀢𑀺 𑀦 𑀯𑀺𑀢𑁆𑀣𑀸𑀭𑀺𑀢𑀸.

𑀧𑀭𑀺𑀯𑀢𑁆𑀢𑀦𑀳𑀸𑀭𑀦𑀺𑀤𑁆𑀤𑁂𑀲𑁄 𑀦𑀺𑀤𑁆𑀤𑀺𑀝𑁆𑀞𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀓𑀢𑀫𑁄 𑀯𑁂𑀯𑀘𑀦𑀳𑀸𑀭𑀦𑀺𑀤𑁆𑀤𑁂𑀲𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑁋

𑁧𑁦. ‘‘𑀯𑁂𑀯𑀘𑀦𑀸𑀦𑀺 𑀩𑀳𑀽𑀦𑀺 𑀢𑀼, 𑀲𑀼𑀢𑁆𑀢𑁂 𑀯𑀼𑀢𑁆𑀢𑀸𑀦𑀺 𑀏𑀓𑀥𑀫𑁆𑀫𑀲𑁆𑀲.

𑀬𑁄 𑀚𑀸𑀦𑀸𑀢𑀺 𑀲𑀼𑀢𑁆𑀢𑀯𑀺𑀤𑀽, 𑀯𑁂𑀯𑀘𑀦𑁄 𑀦𑀸𑀫 𑀲𑁄 𑀳𑀸𑀭𑁄’’𑀢𑀺. 𑁋

𑀕𑀸𑀣𑀸 𑀯𑀼𑀢𑁆𑀢𑀸. 𑀢𑀢𑁆𑀣 𑀏𑀓𑀥𑀫𑁆𑀫𑀲𑁆𑀲 𑀧𑀤𑀢𑁆𑀣𑀲𑁆𑀲 𑀲𑀼𑀢𑁆𑀢𑁂 𑀯𑀼𑀢𑁆𑀢𑀸𑀦𑀺 𑀢𑀼 𑀯𑀼𑀢𑁆𑀢𑀸𑀦𑀺 𑀏𑀯, 𑀩𑀳𑀽𑀦𑀺 𑀢𑀼 𑀩𑀳𑀽𑀦𑀺 𑀏𑀯 𑀯𑁂𑀯𑀘𑀦𑀸𑀦𑀺 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁂𑀦 𑀬𑁄 𑀲𑀼𑀢𑁆𑀢𑀯𑀺𑀤𑀽 𑀚𑀸𑀦𑀸𑀢𑀺, 𑀚𑀸𑀦𑀺𑀢𑁆𑀯𑀸 𑀏𑀓𑀲𑁆𑀫𑀺𑀁𑀬𑁂𑀯 𑀧𑀤𑀢𑁆𑀣𑁂 𑀬𑁄𑀚𑁂𑀢𑀺, 𑀢𑀲𑁆𑀲 𑀲𑀼𑀢𑁆𑀢𑀯𑀺𑀤𑀼𑀦𑁄 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 ‘‘𑀯𑁂𑀯𑀘𑀦𑁄 𑀦𑀸𑀫 𑀳𑀸𑀭𑁄’’𑀢𑀺 𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀅𑀢𑁆𑀣𑀬𑁄𑀚𑀦𑀸.

𑀏𑀢𑁆𑀣 𑀘 𑀬𑁄 𑀲𑁄-𑀲𑀤𑁆𑀤𑀸 𑀅𑀲𑀫𑀸𑀦𑀢𑁆𑀣𑀸 𑀘 𑀳𑁄𑀦𑁆𑀢𑀻𑀢𑀺 ‘‘𑀬𑁄 𑀲𑀼𑀢𑁆𑀢𑀯𑀺𑀤𑀽’’𑀢𑀺 𑀯𑀢𑁆𑀯𑀸 ‘‘𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺. ‘‘𑀪𑀕𑀯𑀸’’𑀢𑀺 𑀧𑀤𑀲𑁆𑀲 𑀏𑀓𑀲𑁆𑀫𑀺𑀁𑀬𑁂𑀯 𑀅𑀢𑁆𑀣𑁂 𑀪𑀕𑀯𑀢𑀺 ‘‘𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸, 𑀨𑀮𑀦𑀺𑀧𑁆𑀨𑀢𑁆𑀢𑀺𑀕𑀢𑁄 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄 𑀅𑀥𑀺𑀕𑀢𑀧𑀝𑀺𑀲𑀫𑁆𑀪𑀺𑀤𑁄 𑀘𑀢𑀼𑀬𑁄𑀕𑀯𑀺𑀧𑁆𑀧𑀳𑀻𑀦𑁄 𑀅𑀕𑀢𑀺𑀕𑀫𑀦𑀯𑀻𑀢𑀺𑀯𑀢𑁆𑀢𑁄 𑀉𑀤𑁆𑀥𑀝𑀲𑀮𑁆𑀮𑁄 𑀦𑀺𑀭𑀼𑀴𑁆𑀳𑀯𑀡𑁄 𑀫𑀤𑁆𑀤𑀺𑀢𑀓𑀡𑁆𑀝𑀓𑁄 𑀦𑀺𑀩𑁆𑀩𑀸𑀧𑀺𑀢𑀧𑀭𑀺𑀬𑀼𑀝𑁆𑀞𑀸𑀦𑁄 𑀩𑀦𑁆𑀥𑀦𑀸𑀢𑀻𑀢𑁄 𑀕𑀦𑁆𑀣𑀯𑀺𑀦𑀺𑀯𑁂𑀞𑀦𑁄 𑀅𑀚𑁆𑀛𑀸𑀲𑀬𑀯𑀻𑀢𑀺𑀯𑀢𑁆𑀢𑁄 𑀪𑀺𑀦𑁆𑀦𑀦𑁆𑀥𑀓𑀸𑀭𑁄 𑀘𑀓𑁆𑀔𑀼𑀫𑀸 𑀮𑁄𑀓𑀥𑀫𑁆𑀫𑀲𑀫𑀢𑀺𑀓𑁆𑀓𑀦𑁆𑀢𑁄 𑀅𑀦𑀼𑀭𑁄𑀥𑀯𑀺𑀭𑁄𑀥𑀯𑀺𑀧𑁆𑀧𑀬𑀼𑀢𑁆𑀢𑁄 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀥𑀫𑁆𑀫𑁂𑀲𑀼 𑀅𑀲𑀗𑁆𑀔𑁂𑀧𑀕𑀢𑁄 𑀩𑀦𑁆𑀥𑀦𑀸𑀢𑀺𑀯𑀢𑁆𑀢𑁄 𑀞𑀧𑀺𑀢𑀲𑀗𑁆𑀕𑀸𑀫𑁄 𑀅𑀪𑀺𑀓𑁆𑀓𑀦𑁆𑀢𑀢𑀭𑁄 𑀉𑀓𑁆𑀓𑀸𑀥𑀭𑁄 𑀆𑀮𑁄𑀓𑀓𑀭𑁄 𑀧𑀚𑁆𑀚𑁄𑀢𑀓𑀭𑁄 𑀢𑀫𑁄𑀦𑀼𑀤𑁄 𑀭𑀡𑀜𑁆𑀚𑀳𑁄 𑀅𑀧𑀭𑀺𑀫𑀸𑀡𑀯𑀡𑁆𑀡𑁄 𑀅𑀧𑁆𑀧𑀫𑁂𑀬𑁆𑀬𑀯𑀡𑁆𑀡𑁄 𑀅𑀲𑀗𑁆𑀔𑁂𑀬𑁆𑀬𑀯𑀡𑁆𑀡𑁄 𑀆𑀪𑀗𑁆𑀓𑀭𑁄 𑀧𑀪𑀗𑁆𑀓𑀭𑁄 𑀥𑀫𑁆𑀫𑁄𑀪𑀸𑀲𑀧𑀚𑁆𑀚𑁄𑀢𑀓𑀭𑁄’’𑀢𑀺 (𑀦𑁂𑀢𑁆𑀢𑀺. 𑁩𑁮) 𑀏𑀯𑀫𑀸𑀤𑀻𑀦𑀺 𑀩𑀳𑀽𑀦𑀺 𑀯𑁂𑀯𑀘𑀦𑀸𑀦𑀺 𑀬𑁄𑀚𑀺𑀢𑀸𑀦𑀺. 𑀯𑀺𑀢𑁆𑀣𑀸𑀭𑁄 𑀯𑀺𑀪𑀗𑁆𑀕𑀯𑀸𑀭𑁂 (𑀦𑁂𑀢𑁆𑀢𑀺. 𑁩𑁭 𑀆𑀤𑀬𑁄) 𑀆𑀕𑀫𑀺𑀲𑁆𑀲𑀢𑀺.

𑀯𑁂𑀯𑀘𑀦𑀳𑀸𑀭𑀦𑀺𑀤𑁆𑀤𑁂𑀲𑁄 𑀦𑀺𑀤𑁆𑀤𑀺𑀝𑁆𑀞𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀓𑀢𑀫𑁄 𑀧𑀜𑁆𑀜𑀢𑁆𑀢𑀺𑀳𑀸𑀭𑀦𑀺𑀤𑁆𑀤𑁂𑀲𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑁋

𑁧𑁧. ‘‘𑀏𑀓𑀁 𑀪𑀕𑀯𑀸 𑀥𑀫𑁆𑀫𑀁, 𑀧𑀜𑁆𑀜𑀢𑁆𑀢𑀻𑀳𑀺 𑀯𑀺𑀯𑀺𑀥𑀸𑀳𑀺 𑀤𑁂𑀲𑁂𑀢𑀺.

𑀲𑁄 𑀆𑀓𑀸𑀭𑁄 𑀜𑁂𑀬𑁆𑀬𑁄, 𑀧𑀜𑁆𑀜𑀢𑁆𑀢𑀻 𑀦𑀸𑀫 𑀲𑁄 𑀳𑀸𑀭𑁄’’𑀢𑀺. 𑁋

𑀕𑀸𑀣𑀸 𑀯𑀼𑀢𑁆𑀢𑀸. 𑀢𑀢𑁆𑀣 𑀪𑀕𑀯𑀸 𑀏𑀓𑀁 𑀔𑀦𑁆𑀥𑀸𑀤𑀺𑀥𑀫𑁆𑀫𑀁 𑀯𑀺𑀯𑀺𑀥𑀸𑀳𑀺 𑀦𑀺𑀓𑁆𑀔𑁂𑀧𑀧𑁆𑀧𑀪𑀯𑀧𑀜𑁆𑀜𑀢𑁆𑀢𑀸𑀤𑀻𑀳𑀺 𑀧𑀜𑁆𑀜𑀢𑁆𑀢𑀻𑀳𑀺 𑀬𑁂𑀦 𑀧𑀜𑁆𑀜𑀸𑀧𑁂𑀢𑀩𑁆𑀩𑀸𑀓𑀸𑀭𑁂𑀦 𑀤𑁂𑀲𑁂𑀢𑀺, 𑀲𑁄 𑀧𑀜𑁆𑀜𑀸𑀧𑁂𑀢𑀩𑁆𑀩𑀸𑀓𑀸𑀭𑁄 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁂𑀦 𑀯𑀺𑀪𑀸𑀯𑀺𑀢𑁄, 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 ‘‘𑀧𑀜𑁆𑀜𑀢𑁆𑀢𑀺 𑀳𑀸𑀭𑁄 𑀦𑀸𑀫𑀸’’𑀢𑀺 𑀜𑁂𑀬𑁆𑀬𑁄𑀢𑀺 𑀅𑀢𑁆𑀣𑀬𑁄𑀚𑀦𑀸.

𑀢𑀢𑁆𑀣 𑀯𑀺𑀯𑀺𑀥𑀸𑀳𑀺 𑀧𑀜𑁆𑀜𑀢𑁆𑀢𑀻𑀳𑀺 𑀦𑀺𑀓𑁆𑀔𑁂𑀧𑀧𑀜𑁆𑀜𑀢𑁆𑀢𑀺𑀧𑀪𑀯𑀧𑀜𑁆𑀜𑀢𑁆𑀢𑀺𑀧𑀭𑀺𑀜𑁆𑀜𑀸𑀧𑀜𑁆𑀜𑀢𑁆𑀢𑀺𑀧𑀳𑀸𑀦𑀧𑀜𑁆𑀜𑀢𑁆𑀢𑀺- 𑀪𑀸𑀯𑀦𑀸𑀧𑀜𑁆𑀜𑀢𑁆𑀢𑀺𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀜𑁆𑀜𑀢𑁆𑀢𑀺𑀦𑀺𑀭𑁄𑀥𑀧𑀜𑁆𑀜𑀢𑁆𑀢𑀺𑀦𑀺𑀩𑁆𑀩𑀺𑀤𑀸𑀧𑀜𑁆𑀜𑀢𑁆𑀢𑀻𑀢𑀺 𑀏𑀯𑀫𑀸𑀤𑀺𑀧𑀜𑁆𑀜𑀢𑁆𑀢𑀻𑀳𑀺 𑀏𑀓𑀧𑀤𑀢𑁆𑀣𑀲𑁆𑀲𑁂𑀯 𑀧𑀜𑁆𑀜𑀸𑀧𑁂𑀢𑀩𑁆𑀩𑀸𑀓𑀸𑀭𑀯𑀺𑀪𑀸𑀯𑀦𑀸𑀮𑀓𑁆𑀔𑀡𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀧𑀜𑁆𑀜𑀢𑁆𑀢𑀺 𑀳𑀸𑀭𑁄 𑀦𑀸𑀫𑀸𑀢𑀺.

𑀢𑀢𑁆𑀣 ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺 𑀅𑀬𑀁 𑀧𑀜𑁆𑀜𑀢𑁆𑀢𑀺 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁, 𑀙𑀦𑁆𑀦𑀁 𑀥𑀸𑀢𑀽𑀦𑀁, 𑀅𑀝𑁆𑀞𑀸𑀭𑀲𑀦𑁆𑀦𑀁 𑀥𑀸𑀢𑀽𑀦𑀁, 𑀤𑁆𑀯𑀸𑀤𑀲𑀦𑁆𑀦𑀁 𑀆𑀬𑀢𑀦𑀸𑀦𑀁, 𑀤𑀲𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀦𑀺𑀓𑁆𑀔𑁂𑀧𑀧𑀜𑁆𑀜𑀢𑁆𑀢𑀺.

‘‘𑀓𑀩𑀴𑀻𑀓𑀸𑀭𑁂 𑀘𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁂 𑀅𑀢𑁆𑀣𑀺 𑀭𑀸𑀕𑁄, 𑀅𑀢𑁆𑀣𑀺 𑀦𑀦𑁆𑀤𑀻, 𑀅𑀢𑁆𑀣𑀺 𑀢𑀡𑁆𑀳𑀸, 𑀧𑀢𑀺𑀝𑁆𑀞𑀺𑀢𑀁 𑀢𑀢𑁆𑀣 𑀯𑀺𑀜𑁆𑀜𑀸𑀡𑀁 𑀯𑀺𑀭𑀼𑀴𑁆𑀳𑀁. 𑀬𑀢𑁆𑀣 𑀧𑀢𑀺𑀝𑁆𑀞𑀺𑀢𑀁 𑀯𑀺𑀜𑁆𑀜𑀸𑀡𑀁 𑀯𑀺𑀭𑀼𑀴𑁆𑀳𑀁, 𑀅𑀢𑁆𑀣𑀺 𑀢𑀢𑁆𑀣 𑀦𑀸𑀫𑀭𑀽𑀧𑀲𑁆𑀲 𑀅𑀯𑀓𑁆𑀓𑀦𑁆𑀢𑀺. 𑀬𑀢𑁆𑀣 𑀅𑀢𑁆𑀣𑀺 𑀦𑀸𑀫𑀭𑀽𑀧𑀲𑁆𑀲 𑀅𑀯𑀓𑁆𑀓𑀦𑁆𑀢𑀺, 𑀅𑀢𑁆𑀣𑀺 𑀢𑀢𑁆𑀣 𑀲𑀗𑁆𑀔𑀸𑀭𑀸𑀦𑀁 𑀯𑀼𑀤𑁆𑀥𑀻’’𑀢𑀺 (𑀲𑀁. 𑀦𑀺. 𑁨.𑁬𑁪; 𑀓𑀣𑀸. 𑁨𑁯𑁬) 𑀏𑀯𑀫𑀸𑀤𑀺 𑀧𑀪𑀯𑀧𑀜𑁆𑀜𑀢𑁆𑀢𑀺 𑀤𑀼𑀓𑁆𑀔𑀲𑁆𑀲 𑀘 𑀲𑀫𑀼𑀤𑀬𑀲𑁆𑀲 𑀘𑀸𑀢𑀺.

‘‘𑀓𑀩𑀴𑀻𑀓𑀸𑀭𑁂 𑀘𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁂 𑀦𑀢𑁆𑀣𑀺 𑀭𑀸𑀕𑁄, 𑀦𑀢𑁆𑀣𑀺 𑀦𑀦𑁆𑀤𑀻, 𑀦𑀢𑁆𑀣𑀺 𑀢𑀡𑁆𑀳𑀸’’𑀢𑀺 (𑀲𑀁. 𑀦𑀺. 𑁨.𑁬𑁪; 𑀓𑀣𑀸. 𑁨𑁯𑁬) 𑀏𑀯𑀫𑀸𑀤𑀺 𑀧𑀭𑀺𑀜𑁆𑀜𑀸𑀧𑀜𑁆𑀜𑀢𑁆𑀢𑀺 𑀤𑀼𑀓𑁆𑀔𑀲𑁆𑀲, ‘‘𑀧𑀳𑀸𑀦𑀧𑀜𑁆𑀜𑀢𑁆𑀢𑀺 𑀲𑀫𑀼𑀤𑀬𑀲𑁆𑀲, 𑀪𑀸𑀯𑀦𑀸𑀧𑀜𑁆𑀜𑀢𑁆𑀢𑀺 𑀫𑀕𑁆𑀕𑀲𑁆𑀲, 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀜𑁆𑀜𑀢𑁆𑀢𑀺 𑀦𑀺𑀭𑁄𑀥𑀲𑁆𑀲𑀸’’𑀢𑀺 𑀘 ‘‘𑀦𑀺𑀓𑁆𑀔𑁂𑀧𑀧𑀜𑁆𑀜𑀢𑁆𑀢𑀺 𑀲𑀼𑀢𑀫𑀬𑀺𑀬𑀸 𑀧𑀜𑁆𑀜𑀸𑀬, 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀜𑁆𑀜𑀢𑁆𑀢𑀺 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀲𑁆𑀲, 𑀧𑀯𑀢𑁆𑀢𑀦𑀸𑀧𑀜𑁆𑀜𑀢𑁆𑀢𑀺 𑀥𑀫𑁆𑀫𑀘𑀓𑁆𑀓𑀲𑁆𑀲𑀸’’𑀢𑀺 𑀏𑀯𑀫𑀸𑀤𑀺𑀯𑀺𑀢𑁆𑀣𑀸𑀭𑁄 𑀯𑀺𑀪𑀗𑁆𑀕𑁂 (𑀦𑁂𑀢𑁆𑀢𑀺. 𑁩𑁯 𑀆𑀤𑀬𑁄) 𑀆𑀕𑀫𑀺𑀲𑁆𑀲𑀢𑀻𑀢𑀺.

𑀧𑀡𑁆𑀡𑀢𑁆𑀢𑀺𑀳𑀸𑀭𑀦𑀺𑀤𑁆𑀤𑁂𑀲𑁄 𑀦𑀺𑀤𑁆𑀤𑀺𑀝𑁆𑀞𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀓𑀢𑀫𑁄 𑀑𑀢𑀭𑀡𑀳𑀸𑀭𑀦𑀺𑀤𑁆𑀤𑁂𑀲𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑁋

𑁧𑁨. ‘‘𑀬𑁄 𑀘 𑀧𑀝𑀺𑀘𑁆𑀘𑀼𑀧𑁆𑀧𑀸𑀤𑁄, 𑀇𑀦𑁆𑀤𑁆𑀭𑀺𑀬𑀔𑀦𑁆𑀥𑀸 𑀘 𑀥𑀸𑀢𑀼𑀆𑀬𑀢𑀦𑀸.

𑀏𑀢𑁂𑀳𑀺 𑀑𑀢𑀭𑀢𑀺 𑀬𑁄, 𑀑𑀢𑀭𑀡𑁄 𑀦𑀸𑀫 𑀲𑁄 𑀳𑀸𑀭𑁄’’𑀢𑀺. 𑁋

𑀕𑀸𑀣𑀸 𑀯𑀼𑀢𑁆𑀢𑀸. 𑀢𑀢𑁆𑀣 𑀬𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀘 𑀬𑁂 𑀇𑀦𑁆𑀤𑁆𑀭𑀺𑀬𑀔𑀦𑁆𑀥𑀸 𑀘 𑀬𑀸𑀦𑀺 𑀥𑀸𑀢𑀼𑀆𑀬𑀢𑀦𑀸𑀦𑀺 𑀘 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁂𑀦 𑀦𑀺𑀤𑁆𑀥𑀸𑀭𑀺𑀢𑀸𑀦𑀺, 𑀏𑀢𑁂𑀳𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀺𑀦𑁆𑀤𑁆𑀭𑀺𑀬𑀔𑀦𑁆𑀥𑀥𑀸𑀢𑀸𑀬𑀢𑀦𑁂𑀳𑀺, 𑀲𑀼𑀢𑁆𑀢𑁂 𑀆𑀕𑀢𑀧𑀤𑀢𑁆𑀣𑀫𑀼𑀔𑁂𑀦 𑀦𑀺𑀤𑁆𑀥𑀸𑀭𑀺𑀬𑀫𑀸𑀦𑁂𑀳𑀺 𑀘 𑀬𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀑𑀢𑀭𑀢𑀺 𑀑𑀕𑀸𑀳𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀺𑀓𑁂 𑀢𑀢𑁆𑀣 𑀯𑀸𑀘𑀓𑀯𑀲𑁂𑀦, 𑀢𑀢𑁆𑀣 𑀜𑀸𑀧𑀓𑀯𑀲𑁂𑀦 𑀯𑀸 𑀅𑀦𑀼𑀧𑀯𑀺𑀲𑀢𑀺, 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀑𑀢𑀭𑀡𑁄 𑀳𑀸𑀭𑁄 𑀦𑀸𑀫𑀸𑀢𑀺 𑀅𑀢𑁆𑀣𑀬𑁄𑀚𑀦𑀸.

𑀢𑀢𑁆𑀣 𑀇𑀦𑁆𑀤𑁆𑀭𑀺𑀬𑀔𑀦𑁆𑀥𑀸𑀢𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀘 𑀔𑀦𑁆𑀥𑀸 𑀘𑀸𑀢𑀺 𑀇𑀦𑁆𑀤𑁆𑀭𑀺𑀬𑀔𑀦𑁆𑀥𑀸. 𑀥𑀸𑀢𑀼𑀆𑀬𑀢𑀦𑀸𑀢𑀺 𑀥𑀸𑀢𑀼𑀬𑁄 𑀘 𑀆𑀬𑀢𑀦𑀸𑀦𑀺 𑀘 𑀥𑀸𑀢𑀼𑀆𑀬𑀢𑀦𑀸. 𑀓𑀣𑀁 𑀑𑀢𑀭𑀡𑁄? ‘‘𑀉𑀤𑁆𑀥𑀁 𑀅𑀥𑁄 𑀲𑀩𑁆𑀩𑀥𑀺 𑀯𑀺𑀧𑁆𑀧𑀫𑀼𑀢𑁆𑀢𑁄’’𑀢𑀺𑀆𑀤𑀺 (𑀦𑁂𑀢𑁆𑀢𑀺. 𑁪𑁨) 𑀧𑀸𑀞𑁄.

𑀉𑀤𑁆𑀥𑀦𑁆𑀢𑀺 𑀭𑀽𑀧𑀥𑀸𑀢𑀼 𑀘 𑀅𑀭𑀽𑀧𑀥𑀸𑀢𑀼 𑀘. 𑀅𑀥𑁄𑀢𑀺 𑀓𑀸𑀫𑀥𑀸𑀢𑀼. 𑀲𑀩𑁆𑀩𑀥𑀺 𑀯𑀺𑀧𑁆𑀧𑀫𑀼𑀢𑁆𑀢𑁄𑀢𑀺 𑀢𑁂𑀥𑀸𑀢𑀼𑀓𑁂 𑀅𑀬𑀁 𑀅𑀲𑁂𑀓𑁆𑀔𑀸𑀯𑀺𑀫𑀼𑀢𑁆𑀢𑀺. 𑀢𑀸𑀦𑀺𑀬𑁂𑀯 𑀅𑀲𑁂𑀓𑁆𑀔𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺, 𑀅𑀬𑀁 𑀇𑀦𑁆𑀤𑁆𑀭𑀺𑀬𑁂𑀳𑀺 𑀑𑀢𑀭𑀡𑀸.

𑀢𑀸𑀦𑀺𑀬𑁂𑀯 𑀅𑀲𑁂𑀓𑁆𑀔𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀯𑀺𑀚𑁆𑀚𑀸, 𑀯𑀺𑀚𑁆𑀚𑀼𑀧𑁆𑀧𑀸𑀤𑀸 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑁄…𑀧𑁂… 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑁄 𑀳𑁄𑀢𑀺, 𑀅𑀬𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂𑀳𑀺 𑀑𑀢𑀭𑀡𑀸.

𑀢𑀸𑀦𑀺𑀬𑁂𑀯 𑀅𑀲𑁂𑀓𑁆𑀔𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑀸𑀦𑀺 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀦 𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀦, 𑀅𑀬𑀁 𑀔𑀦𑁆𑀥𑁂𑀳𑀺 𑀑𑀢𑀭𑀡𑀸.

𑀢𑀸𑀦𑀺𑀬𑁂𑀯 𑀅𑀲𑁂𑀓𑁆𑀔𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀲𑀗𑁆𑀔𑀸𑀭𑀧𑀭𑀺𑀬𑀸𑀧𑀦𑁆𑀦𑀸𑀦𑀺 𑀬𑁂 𑀲𑀗𑁆𑀔𑀸𑀭𑀸 𑀅𑀦𑀸𑀲𑀯𑀸, 𑀦𑁄 𑀘 𑀪𑀯𑀗𑁆𑀕𑀸, 𑀢𑁂 𑀲𑀗𑁆𑀔𑀸𑀭𑀸 𑀥𑀫𑁆𑀫𑀥𑀸𑀢𑀼𑀲𑀗𑁆𑀕𑀳𑀺𑀢𑀸, 𑀅𑀬𑀁 𑀥𑀸𑀢𑀽𑀳𑀺 𑀑𑀢𑀭𑀡𑀸.

𑀲𑀸 𑀥𑀫𑁆𑀫𑀥𑀸𑀢𑀼 𑀥𑀫𑁆𑀫𑀸𑀬𑀢𑀦𑀧𑀭𑀺𑀬𑀸𑀧𑀦𑁆𑀦𑀸, 𑀬𑀁 𑀆𑀬𑀢𑀦𑀁 𑀅𑀦𑀸𑀲𑀯𑀁, 𑀦𑁄 𑀘 𑀪𑀯𑀗𑁆𑀕𑀁, 𑀅𑀬𑀁 𑀆𑀬𑀢𑀦𑁂𑀳𑀺 𑀑𑀢𑀭𑀡𑀸𑀢𑀺 𑀏𑀯𑀫𑀸𑀤𑀻𑀳𑀺 𑀯𑀺𑀪𑀗𑁆𑀕𑁂 (𑀦𑁂𑀢𑁆𑀢𑀺. 𑁪𑁨 𑀆𑀤𑀬𑁄) 𑀆𑀕𑀫𑀺𑀲𑁆𑀲𑀢𑀻𑀢𑀺.

𑀑𑀢𑀭𑀡𑀳𑀸𑀭𑀦𑀺𑀤𑁆𑀤𑁂𑀲𑁄 𑀦𑀺𑀤𑁆𑀤𑀺𑀝𑁆𑀞𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀓𑀢𑀫𑁄 𑀲𑁄𑀥𑀦𑀳𑀸𑀭𑀦𑀺𑀤𑁆𑀤𑁂𑀲𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑁋

𑁧𑁩. ‘‘𑀯𑀺𑀲𑁆𑀲𑀚𑁆𑀚𑀺𑀢𑀫𑁆𑀳𑀺 𑀧𑀜𑁆𑀳𑁂, 𑀕𑀸𑀣𑀸𑀬𑀁 𑀧𑀼𑀘𑁆𑀙𑀺𑀢𑀸 𑀬𑀫𑀸𑀭𑀩𑁆𑀪.

𑀲𑀼𑀤𑁆𑀥𑀸𑀲𑀼𑀤𑁆𑀥𑀧𑀭𑀺𑀓𑁆𑀔𑀸, 𑀳𑀸𑀭𑁄 𑀲𑁄 𑀲𑁄𑀥𑀦𑁄 𑀦𑀸𑀫𑀸’’𑀢𑀺. 𑁋

𑀕𑀸𑀣𑀸 𑀯𑀼𑀢𑁆𑀢𑀸. 𑀢𑀢𑁆𑀣 𑀢𑀺𑀲𑁆𑀲𑀁 𑀕𑀸𑀣𑀸𑀬𑀁 𑀆𑀭𑀼𑀴𑁆𑀳𑁂 𑀧𑀜𑁆𑀳𑁂 𑀜𑀸𑀢𑀼𑀫𑀺𑀘𑁆𑀙𑀺𑀢𑁂 𑀅𑀢𑁆𑀣𑁂 𑀪𑀕𑀯𑀢𑀸 𑀯𑀺𑀲𑁆𑀲𑀚𑁆𑀚𑀦𑀕𑀸𑀣𑀸𑀬𑀁 𑀯𑀺𑀲𑁆𑀲𑀚𑁆𑀚𑀺𑀢𑀫𑁆𑀳𑀺 𑀬𑀁 𑀲𑀼𑀢𑁆𑀢𑀢𑁆𑀣𑀁 𑀆𑀭𑀩𑁆𑀪 𑀅𑀥𑀺𑀓𑀺𑀘𑁆𑀘 𑀲𑀸 𑀕𑀸𑀣𑀸 𑀧𑀼𑀘𑁆𑀙𑀺𑀢𑀸 𑀧𑀼𑀘𑁆𑀙𑀦𑀢𑁆𑀣𑀸𑀬 𑀞𑀧𑀺𑀢𑀸, 𑀢𑀲𑁆𑀲 𑀲𑀼𑀢𑁆𑀢𑀢𑁆𑀣𑀲𑁆𑀲 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁂𑀦 𑀲𑀼𑀤𑁆𑀥𑀸𑀲𑀼𑀤𑁆𑀥𑀧𑀭𑀺𑀓𑁆𑀔𑀸 𑀯𑀺𑀘𑀸𑀭𑀡𑀸 𑀪𑀯𑁂, 𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀲𑁄𑀥𑀦𑁄 𑀳𑀸𑀭𑁄 𑀦𑀸𑀫𑀸𑀢𑀺 𑀅𑀢𑁆𑀣𑀬𑁄𑀚𑀦𑀸.

𑀓𑀣𑀁? ‘‘𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄 𑀮𑁄𑀓𑁄’’𑀢𑀺 𑀧𑀤𑀁 𑀲𑁄𑀥𑀺𑀢𑀁, 𑀆𑀭𑀫𑁆𑀪𑁄 𑀦 𑀲𑁄𑀥𑀺𑀢𑁄. ‘‘𑀯𑀺𑀯𑀺𑀘𑁆𑀙𑀸 𑀧𑀫𑀸𑀤𑀸 𑀦𑀧𑁆𑀧𑀓𑀸𑀲𑀢𑀻’’𑀢𑀺 𑀧𑀤𑀁 𑀲𑁄𑀥𑀺𑀢𑀁, 𑀆𑀭𑀫𑁆𑀪𑁄 𑀦 𑀲𑁄𑀥𑀺𑀢𑁄. ‘‘𑀚𑀧𑁆𑀧𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀫𑀻’’𑀢𑀺 𑀧𑀤𑀁 𑀲𑁄𑀥𑀺𑀢𑀁, 𑀆𑀭𑀫𑁆𑀪𑁄 𑀦 𑀲𑁄𑀥𑀺𑀢𑁄. ‘‘𑀤𑀼𑀓𑁆𑀔𑀫𑀲𑁆𑀲 𑀫𑀳𑀩𑁆𑀪𑀬’’𑀦𑁆𑀢𑀺 𑀧𑀤𑀜𑁆𑀘 𑀲𑁄𑀥𑀺𑀢𑀁, 𑀆𑀭𑀫𑁆𑀪𑁄 𑀘 𑀲𑁄𑀥𑀺𑀢𑁄𑀢𑀺. 𑀏𑀯𑀁 𑀧𑀤𑀸𑀤𑀻𑀦𑀁 𑀲𑁄𑀥𑀺𑀢𑀸𑀲𑁄𑀥𑀺𑀢𑀪𑀸𑀯𑀯𑀺𑀘𑀸𑀭𑁄 𑀳𑀸𑀭𑁄 𑀲𑁄𑀥𑀦𑁄 𑀦𑀸𑀫. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀯𑀺𑀪𑀗𑁆𑀕𑁂 (𑀦𑁂𑀢𑁆𑀢𑀺. 𑁪𑁫 𑀆𑀤𑀬𑁄) 𑀆𑀕𑀫𑀺𑀲𑁆𑀲𑀢𑀻𑀢𑀺.

𑀲𑁄𑀥𑀦𑀳𑀸𑀭𑀦𑀺𑀤𑁆𑀤𑁂𑀲𑁄 𑀦𑀺𑀤𑁆𑀤𑀺𑀝𑁆𑀞𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀓𑀢𑀫𑁄 𑀅𑀥𑀺𑀝𑁆𑀞𑀸𑀦𑀳𑀸𑀭𑀦𑀺𑀤𑁆𑀤𑁂𑀲𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑁋

𑁧𑁪. ‘‘𑀏𑀓𑀢𑁆𑀢𑀢𑀸𑀬 𑀥𑀫𑁆𑀫𑀸, 𑀬𑁂𑀧𑀺 𑀘 𑀯𑁂𑀫𑀢𑁆𑀢𑀢𑀸𑀬 𑀦𑀺𑀤𑁆𑀤𑀺𑀝𑁆𑀞𑀸.

𑀢𑁂 𑀦 𑀯𑀺𑀓𑀧𑁆𑀧𑀬𑀺𑀢𑀩𑁆𑀩𑀸, 𑀏𑀲𑁄 𑀳𑀸𑀭𑁄 𑀅𑀥𑀺𑀝𑁆𑀞𑀸𑀦𑁄’’𑀢𑀺. 𑁋

𑀕𑀸𑀣𑀸 𑀯𑀼𑀢𑁆𑀢𑀸. 𑀢𑀢𑁆𑀣 𑀬𑁂 𑀤𑀼𑀓𑁆𑀔𑀲𑀘𑁆𑀘𑀸𑀤𑀬𑁄 𑀥𑀫𑁆𑀫𑀸 𑀏𑀓𑀢𑁆𑀢𑀢𑀸𑀬 𑀲𑀸𑀫𑀜𑁆𑀜𑁂𑀦𑀧𑀺 𑀘 𑀯𑁂𑀫𑀢𑁆𑀢𑀢𑀸𑀬 𑀯𑀺𑀲𑁂𑀲𑁂𑀦𑀧𑀺 𑀦𑀺𑀤𑁆𑀤𑀺𑀝𑁆𑀞𑀸, 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑀸 𑀤𑀼𑀓𑁆𑀔𑀲𑀘𑁆𑀘𑀸𑀤𑀬𑁄 𑀥𑀫𑁆𑀫𑀸 𑀦 𑀯𑀺𑀓𑀧𑁆𑀧𑀬𑀺𑀢𑀩𑁆𑀩𑀸 𑀲𑀸𑀫𑀜𑁆𑀜𑀯𑀺𑀲𑁂𑀲𑀓𑀧𑁆𑀧𑀦𑀸𑀬 𑀯𑁄𑀳𑀸𑀭𑀪𑀸𑀯𑁂𑀦 𑀅𑀦𑀯𑀝𑁆𑀞𑀸𑀦𑀢𑁄, 𑀓𑀸𑀮𑀤𑀺𑀲𑀸𑀯𑀺𑀲𑁂𑀲𑀸𑀤𑀻𑀦𑀁 𑀯𑀺𑀬 𑀅𑀧𑁂𑀓𑁆𑀔𑀸𑀲𑀺𑀤𑁆𑀥𑀺𑀢𑁄 𑀘, 𑀏𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀅𑀥𑀺𑀝𑁆𑀞𑀸𑀦𑁄 𑀳𑀸𑀭𑁄𑀢𑀺 𑀅𑀢𑁆𑀣𑀬𑁄𑀚𑀦𑀸.

𑀢𑀢𑁆𑀣 𑀏𑀓𑀢𑁆𑀢𑀢𑀸𑀬𑀸𑀢𑀺 𑀏𑀓𑀲𑁆𑀲 𑀲𑀫𑀸𑀦𑀲𑁆𑀲 𑀪𑀸𑀯𑁄 𑀏𑀓𑀢𑁆𑀢𑀁, 𑀏𑀓𑀢𑁆𑀢𑀫𑁂𑀯 𑀏𑀓𑀢𑁆𑀢𑀢𑀸, 𑀢𑀸𑀬. 𑀏𑀓𑀲𑀤𑁆𑀤𑁄 𑀘𑁂𑀢𑁆𑀣 𑀲𑀫𑀸𑀦𑀢𑁆𑀣𑀯𑀸𑀘𑀓𑁄, 𑀦 𑀲𑀗𑁆𑀔𑁆𑀬𑀸𑀯𑀸𑀘𑀓𑁄𑀢𑀺. 𑀯𑁂𑀫𑀢𑁆𑀢𑀢𑀸𑀬𑀸𑀢𑀺 𑀯𑀺𑀲𑀺𑀝𑁆𑀞𑀸 𑀫𑀢𑁆𑀢𑀸 𑀯𑀺𑀫𑀢𑁆𑀢𑀸, 𑀯𑀺𑀫𑀢𑁆𑀢𑀸 𑀏𑀯 𑀯𑁂𑀫𑀢𑁆𑀢𑀁, 𑀯𑁂𑀫𑀢𑁆𑀢𑀲𑁆𑀲 𑀪𑀸𑀯𑁄 𑀯𑁂𑀫𑀢𑁆𑀢𑀢𑀸, 𑀢𑀸𑀬. 𑀬𑀣𑀸 𑀳𑀺 ‘‘𑀅𑀚𑁆𑀚 𑀲𑁆𑀯𑁂’’𑀢𑀺 𑀯𑀼𑀘𑁆𑀘𑀫𑀸𑀦𑀸 𑀓𑀸𑀮𑀯𑀺𑀲𑁂𑀲𑀸 𑀅𑀦𑀯𑀝𑁆𑀞𑀺𑀢𑀸 𑀪𑀯𑀦𑁆𑀢𑀺, ‘‘𑀧𑀼𑀭𑀺𑀫𑀸 𑀤𑀺𑀲𑀸, 𑀧𑀘𑁆𑀙𑀺𑀫𑀸 𑀤𑀺𑀲𑀸’’𑀢𑀺 𑀯𑀼𑀘𑁆𑀘𑀫𑀸𑀦𑀸 𑀤𑀺𑀲𑀸𑀯𑀺𑀲𑁂𑀲𑀸, 𑀏𑀯𑀁 𑀲𑀸𑀫𑀜𑁆𑀜𑀯𑀺𑀲𑁂𑀲𑀸 𑀘 𑀅𑀢𑁆𑀣𑀲𑁆𑀲 𑀲𑀪𑀸𑀯𑀸𑀢𑀺. 𑀢𑀣𑀸 𑀳𑀺 ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑀁 𑀚𑀸𑀢𑀺𑀆𑀤𑀺𑀁 𑀅𑀧𑁂𑀓𑁆𑀔𑀸𑀬 𑀲𑀸𑀫𑀜𑁆𑀜𑀁 𑀲𑀫𑀸𑀦𑀫𑁆𑀧𑀺 𑀲𑀘𑁆𑀘𑀸𑀧𑁂𑀓𑁆𑀔𑀸𑀬 𑀯𑀺𑀲𑁂𑀲𑁄 𑀳𑁄𑀢𑀺. 𑀏𑀲 𑀦𑀬𑁄 𑀲𑀫𑀼𑀤𑀬𑀲𑀘𑁆𑀘𑀸𑀤𑀻𑀲𑀼𑀧𑀻𑀢𑀺. ‘‘𑀤𑀼𑀓𑁆𑀔’’𑀦𑁆𑀢𑀺 𑀏𑀓𑀢𑁆𑀢𑀢𑀸. ‘‘𑀚𑀸𑀢𑀺 𑀤𑀼𑀓𑁆𑀔𑀸, 𑀚𑀭𑀸 𑀤𑀼𑀓𑁆𑀔𑀸, 𑀫𑀭𑀡𑀁 𑀤𑀼𑀓𑁆𑀔’’𑀦𑁆𑀢𑀺 𑀏𑀯𑀫𑀸𑀤𑀺 𑀯𑁂𑀫𑀢𑁆𑀢𑀢𑀸. ‘‘𑀤𑀼𑀓𑁆𑀔𑀲𑀫𑀼𑀤𑀬𑁄’’𑀢𑀺 𑀏𑀓𑀢𑁆𑀢𑀢𑀸, ‘‘𑀢𑀡𑁆𑀳𑀸 𑀧𑁄𑀦𑁄𑀪𑀯𑀺𑀓𑀸 𑀦𑀦𑁆𑀤𑀻𑀭𑀸𑀕𑀲𑀳𑀕𑀢𑀸’’𑀢𑀺 𑀏𑀯𑀫𑀸𑀤𑀺 𑀯𑁂𑀫𑀢𑁆𑀢𑀢𑀸𑀢𑀺 𑀏𑀯𑀫𑀸𑀤𑀺 𑀯𑀺𑀢𑁆𑀣𑀸𑀭𑁄 𑀯𑀺𑀪𑀗𑁆𑀕𑁂 (𑀦𑁂𑀢𑁆𑀢𑀺. 𑁪𑁬 𑀆𑀤𑀬𑁄) 𑀆𑀕𑀫𑀺𑀲𑁆𑀲𑀢𑀻𑀢𑀺.

𑀅𑀥𑀺𑀝𑁆𑀞𑀸𑀦𑀳𑀸𑀭𑀦𑀺𑀤𑁆𑀤𑁂𑀲𑁄 𑀦𑀺𑀤𑁆𑀤𑀺𑀝𑁆𑀞𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀓𑀢𑀫𑁄 𑀧𑀭𑀺𑀓𑁆𑀔𑀸𑀭𑀳𑀸𑀭𑀦𑀺𑀤𑁆𑀤𑁂𑀲𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑁋

𑁧𑁫. ‘‘𑀬𑁂 𑀥𑀫𑁆𑀫𑀸 𑀬𑀁 𑀥𑀫𑁆𑀫𑀁, 𑀚𑀦𑀬𑀦𑁆𑀢𑀺𑀧𑁆𑀧𑀘𑁆𑀘𑀬𑀸 𑀧𑀭𑀫𑁆𑀧𑀭𑀢𑁄.

𑀳𑁂𑀢𑀼𑀫𑀯𑀓𑀟𑁆𑀠𑀬𑀺𑀢𑁆𑀯𑀸, 𑀏𑀲𑁄 𑀳𑀸𑀭𑁄 𑀧𑀭𑀺𑀓𑁆𑀔𑀸𑀭𑁄’’𑀢𑀺. 𑁋

𑀕𑀸𑀣𑀸 𑀯𑀼𑀢𑁆𑀢𑀸. 𑀢𑀢𑁆𑀣 𑀅𑀯𑀺𑀚𑁆𑀚𑀸𑀤𑀺𑀓𑀸 𑀬𑁂 𑀧𑀘𑁆𑀘𑀬𑀥𑀫𑁆𑀫𑀸 𑀲𑀗𑁆𑀔𑀸𑀭𑀸𑀤𑀺𑀓𑀁 𑀬𑀁 𑀨𑀮𑀥𑀫𑁆𑀫𑀁 𑀧𑀘𑁆𑀘𑀬𑀸 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀭𑀫𑁆𑀧𑀭𑀢𑁄 𑀧𑀭𑀫𑁆𑀧𑀭𑀧𑀘𑁆𑀘𑀬𑀪𑀸𑀯𑁂𑀦 𑀚𑀦𑀬𑀦𑁆𑀢𑀺, 𑀢𑀲𑁆𑀲 𑀲𑀗𑁆𑀔𑀸𑀭𑀸𑀤𑀺𑀨𑀮𑀲𑁆𑀲 𑀧𑀘𑁆𑀘𑀬𑀁 𑀧𑀭𑀺𑀓𑁆𑀔𑀸𑀭𑀪𑀽𑀢𑀁 𑀧𑀼𑀭𑀺𑀫𑀼𑀧𑁆𑀧𑀦𑁆𑀦𑀁 𑀅𑀯𑀺𑀚𑁆𑀚𑀸𑀤𑀺𑀓𑀁 𑀅𑀲𑀸𑀥𑀸𑀭𑀡𑀁 𑀚𑀦𑀓𑀁 𑀳𑁂𑀢𑀼𑀁, 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀺𑀓𑀁 𑀲𑀸𑀥𑀸𑀭𑀡𑀁 𑀧𑀘𑁆𑀘𑀬𑀳𑁂𑀢𑀼𑀜𑁆𑀘 𑀅𑀯𑀓𑀟𑁆𑀠𑀬𑀺𑀢𑁆𑀯𑀸 𑀲𑀼𑀢𑁆𑀢𑀢𑁄 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀬𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀧𑀭𑀺𑀓𑁆𑀔𑀸𑀭𑀲𑀁𑀯𑀡𑁆𑀡𑀦𑀸𑀪𑀸𑀯𑁂𑀦 𑀧𑀯𑀢𑁆𑀢𑁄, 𑀏𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀧𑀭𑀺𑀓𑁆𑀔𑀸𑀭𑁄 𑀳𑀸𑀭𑁄 𑀦𑀸𑀫𑀸𑀢𑀺 𑀅𑀢𑁆𑀣𑀬𑁄𑀚𑀦𑀸. 𑀅𑀯𑀺𑀚𑁆𑀚𑀸𑀤𑀬𑁄 𑀳𑀺 𑀅𑀯𑀺𑀚𑁆𑀚𑀸𑀤𑀻𑀦𑀁 𑀅𑀲𑀸𑀥𑀸𑀭𑀡𑀳𑁂𑀢𑀽 𑀪𑀯𑀦𑁆𑀢𑀺, 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀬𑁄 𑀲𑀸𑀥𑀸𑀭𑀡𑀧𑀘𑁆𑀘𑀬𑀸. 𑀢𑁂𑀦𑀸𑀳 𑁋 ‘‘𑀅𑀲𑀸𑀥𑀸𑀭𑀡𑀮𑀓𑁆𑀔𑀡𑁄 𑀳𑁂𑀢𑀼, 𑀲𑀸𑀥𑀸𑀭𑀡𑀮𑀓𑁆𑀔𑀡𑁄 𑀧𑀘𑁆𑀘𑀬𑁄’’𑀢𑀺, ‘‘𑀅𑀯𑀺𑀚𑁆𑀚𑀸 𑀅𑀯𑀺𑀚𑁆𑀚𑀸𑀬 𑀳𑁂𑀢𑀼, 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀧𑀘𑁆𑀘𑀬𑁄’’𑀢𑀺𑀆𑀤𑀺𑀓𑀁 (𑀦𑁂𑀢𑁆𑀢𑀺. 𑁪𑁯) 𑀯𑀺𑀪𑀗𑁆𑀕𑀯𑀘𑀦𑀜𑁆𑀘.

𑀧𑀭𑀺𑀓𑁆𑀔𑀸𑀭𑀳𑀸𑀭𑀦𑀺𑀤𑁆𑀤𑁂𑀲𑁄 𑀦𑀺𑀤𑁆𑀤𑀺𑀝𑁆𑀞𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀓𑀢𑀫𑁄 𑀲𑀫𑀸𑀭𑁄𑀧𑀦𑀳𑀸𑀭𑀦𑀺𑀤𑁆𑀤𑁂𑀲𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑁋

𑁧𑁬. ‘‘𑀬𑁂 𑀥𑀫𑁆𑀫𑀸 𑀬𑀁𑀫𑀽𑀮𑀸, 𑀬𑁂 𑀘𑁂𑀓𑀢𑁆𑀣𑀸 𑀧𑀓𑀸𑀲𑀺𑀢𑀸 𑀫𑀼𑀦𑀺𑀦𑀸.

𑀢𑁂 𑀲𑀫𑀸𑀭𑁄𑀧𑀬𑀺𑀢𑀩𑁆𑀩𑀸, 𑀏𑀲 𑀲𑀫𑀸𑀭𑁄𑀧𑀦𑁄 𑀳𑀸𑀭𑁄’’𑀢𑀺. 𑁋

𑀕𑀸𑀣𑀸 𑀯𑀼𑀢𑁆𑀢𑀸. 𑀢𑀢𑁆𑀣 𑀬𑁂 𑀲𑀻𑀮𑀸𑀤𑀬𑁄 𑀥𑀫𑁆𑀫𑀸 𑀬𑀁𑀫𑀽𑀮𑀸 𑀬𑁂𑀲𑀁 𑀲𑀫𑀸𑀥𑀺𑀆𑀤𑀻𑀦𑀁 𑀫𑀽𑀮𑀸, 𑀢𑁂 𑀲𑀻𑀮𑀸𑀤𑀬𑁄 𑀥𑀫𑁆𑀫𑀸 𑀢𑁂𑀲𑀁 𑀲𑀫𑀸𑀥𑀺𑀆𑀤𑀻𑀦𑀁 𑀧𑀤𑀝𑁆𑀞𑀸𑀦𑀪𑀸𑀯𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁂𑀦 𑀲𑀫𑀸𑀭𑁄𑀧𑀬𑀺𑀢𑀩𑁆𑀩𑀸, 𑀬𑁂 𑀘 𑀭𑀸𑀕𑀯𑀺𑀭𑀸𑀕𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀲𑁂𑀓𑁆𑀔𑀨𑀮𑀓𑀸𑀫𑀥𑀸𑀢𑀼𑀲𑀫𑀢𑀺𑀓𑁆𑀓𑀫𑀦𑀸𑀤𑀺𑀲𑀤𑁆𑀤𑀸 𑀅𑀦𑀸𑀕𑀸𑀫𑀺𑀨𑀮𑀢𑁆𑀣𑀢𑀸𑀬 𑀏𑀓𑀢𑁆𑀣𑀸 𑀲𑀫𑀸𑀦𑀢𑁆𑀣𑀸𑀢𑀺 𑀩𑀼𑀤𑁆𑀥𑀫𑀼𑀦𑀺𑀦𑀸 𑀧𑀓𑀸𑀲𑀺𑀢𑀸, 𑀢𑁂 𑀭𑀸𑀕…𑀧𑁂… 𑀢𑀺𑀓𑁆𑀓𑀫𑀦𑀸𑀤𑀺𑀲𑀤𑁆𑀤𑀸 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀪𑀸𑀯𑁂𑀦 𑀲𑀫𑀸𑀭𑁄𑀧𑀬𑀺𑀢𑀩𑁆𑀩𑀸, 𑀏𑀲𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀲𑀫𑀸𑀭𑁄𑀧𑀦𑁄 𑀳𑀸𑀭𑁄 𑀦𑀸𑀫𑀸𑀢𑀺 𑀅𑀢𑁆𑀣𑀬𑁄𑀚𑀦𑀸.

𑀏𑀢𑁆𑀣 𑀘 𑀲𑀻𑀮𑀸𑀤𑀺𑀓𑁆𑀔𑀦𑁆𑀥𑀢𑁆𑀢𑀬𑀲𑁆𑀲 𑀧𑀭𑀺𑀬𑀸𑀬𑀦𑁆𑀢𑀭𑀯𑀺𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀻 𑀓𑀣𑀺𑀢𑀸, 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀻 𑀘 𑀧𑀳𑀸𑀢𑀩𑁆𑀩𑀲𑁆𑀲 𑀧𑀳𑀸𑀦𑁂𑀦 𑀳𑁄𑀢𑀻𑀢𑀺 𑀪𑀸𑀯𑀦𑀸𑀲𑀫𑀸𑀭𑁄𑀧𑀦𑀧𑀳𑀸𑀦𑀲𑀫𑀸𑀭𑁄𑀧𑀦𑀸𑀧𑀺 𑀤𑀲𑁆𑀲𑀺𑀢𑀸𑀢𑀺 𑀘𑀢𑀼𑀩𑁆𑀩𑀺𑀥𑁄 𑀲𑀫𑀸𑀭𑁄𑀧𑀦𑁄 𑀧𑀤𑀝𑁆𑀞𑀸𑀦𑀲𑀫𑀸𑀭𑁄𑀧𑀦𑁄, 𑀯𑁂𑀯𑀘𑀦𑀲𑀫𑀸𑀭𑁄𑀧𑀦𑁄, 𑀪𑀸𑀯𑀦𑀸𑀲𑀫𑀸𑀭𑁄𑀧𑀦𑁄, 𑀧𑀳𑀸𑀦𑀲𑀫𑀸𑀭𑁄𑀧𑀦𑁄𑀢𑀺.

𑀢𑀢𑁆𑀣 𑀓𑀸𑀬𑀺𑀓𑀲𑀼𑀘𑀭𑀺𑀢𑀁, 𑀯𑀸𑀘𑀲𑀺𑀓𑀲𑀼𑀘𑀭𑀺𑀢𑀜𑁆𑀘 𑀲𑀻𑀮𑀓𑁆𑀔𑀦𑁆𑀥𑁄, 𑀫𑀦𑁄𑀲𑀼𑀘𑀭𑀺𑀢𑁂 𑀅𑀦𑀪𑀺𑀚𑁆𑀛𑀸, 𑀅𑀩𑁆𑀬𑀸𑀧𑀸𑀤𑁄 𑀘 𑀲𑀫𑀸𑀥𑀺𑀓𑁆𑀔𑀦𑁆𑀥𑁄, 𑀲𑀫𑁆𑀫𑀸𑀤𑀺𑀝𑁆𑀞𑀺 𑀧𑀜𑁆𑀜𑀸𑀓𑁆𑀔𑀦𑁆𑀥𑁄. 𑀲𑀻𑀮𑀓𑁆𑀔𑀦𑁆𑀥𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑀲𑁆𑀲 𑀧𑀤𑀝𑁆𑀞𑀸𑀦𑀁, 𑀲𑀫𑀸𑀥𑀺𑀓𑁆𑀔𑀦𑁆𑀥𑁄 𑀧𑀜𑁆𑀜𑀸𑀓𑁆𑀔𑀦𑁆𑀥𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀲𑀻𑀮𑀓𑁆𑀔𑀦𑁆𑀥𑁄, 𑀲𑀫𑀸𑀥𑀺𑀓𑁆𑀔𑀦𑁆𑀥𑁄 𑀘 𑀲𑀫𑀣𑀲𑁆𑀲 𑀧𑀤𑀝𑁆𑀞𑀸𑀦𑀁, 𑀧𑀜𑁆𑀜𑀸𑀓𑁆𑀔𑀦𑁆𑀥𑁄 𑀯𑀺𑀧𑀲𑁆𑀲𑀦𑀸𑀬 𑀧𑀤𑀝𑁆𑀞𑀸𑀦𑀁. 𑀲𑀫𑀣𑁄 𑀭𑀸𑀕𑀯𑀺𑀭𑀸𑀕𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀧𑀤𑀝𑁆𑀞𑀸𑀦𑀁, 𑀯𑀺𑀧𑀲𑁆𑀲𑀦𑀸 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀬𑀸 𑀧𑀤𑀝𑁆𑀞𑀸𑀦𑀦𑁆𑀢𑀺 𑀏𑀯𑀫𑀸𑀤𑀺 𑀧𑀤𑀝𑁆𑀞𑀸𑀦𑀲𑀫𑀸𑀭𑁄𑀧𑀦𑁄. 𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀲𑁂𑀓𑁆𑀔𑀨𑀮𑀁, 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺 𑀅𑀲𑁂𑀓𑁆𑀔𑀨𑀮𑀁, 𑀇𑀤𑀁 𑀯𑁂𑀯𑀘𑀦𑀁. 𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀅𑀦𑀸𑀕𑀸𑀫𑀺𑀨𑀮𑀁, 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺 𑀅𑀕𑁆𑀕𑀨𑀮𑀁 𑀅𑀭𑀳𑀢𑁆𑀢𑀁, 𑀇𑀤𑀁 𑀯𑁂𑀯𑀘𑀦𑀁. 𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀓𑀸𑀫𑀥𑀸𑀢𑀼𑀲𑀫𑀢𑀺𑀓𑁆𑀓𑀫𑀦𑀁, 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀢𑁂𑀥𑀸𑀢𑀼𑀲𑀫𑀢𑀺𑀓𑁆𑀓𑀫𑀦𑀁, 𑀇𑀤𑀁 𑀯𑁂𑀯𑀘𑀦𑀁. 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁, 𑀧𑀜𑁆𑀜𑀸𑀩𑀮𑀁, 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸, 𑀧𑀜𑁆𑀜𑀸𑀓𑁆𑀔𑀦𑁆𑀥𑁄𑀢𑀺 𑀏𑀯𑀫𑀸𑀤𑀺 𑀯𑁂𑀯𑀘𑀦𑀦𑁆𑀢𑀺 𑀏𑀯𑀫𑀸𑀤𑀺 𑀯𑁂𑀯𑀘𑀦𑀲𑀫𑀸𑀭𑁄𑀧𑀦𑁄. 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺, 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀪𑀸𑀯𑀺𑀬𑀫𑀸𑀦𑁂𑀲𑀼 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺, 𑀘𑀢𑀽𑀲𑀼 𑀲𑀫𑁆𑀫𑀧𑁆𑀧𑀥𑀸𑀦𑁂𑀲𑀼 𑀪𑀸𑀯𑀺𑀬𑀫𑀸𑀦𑁂𑀲𑀼 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀻𑀢𑀺 𑀏𑀯𑀫𑀸𑀤𑀺 𑀪𑀸𑀯𑀦𑀸𑀲𑀫𑀸𑀭𑁄𑀧𑀦𑁄. 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄 𑀅𑀲𑀼𑀪𑁂 ‘‘𑀲𑀼𑀪’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑀁 𑀧𑀚𑀳𑀢𑀺, 𑀓𑀩𑀴𑀻𑀓𑀸𑀭𑁄 𑀘𑀲𑁆𑀲 𑀆𑀳𑀸𑀭𑁄 𑀧𑀭𑀺𑀜𑁆𑀜𑀁 𑀕𑀘𑁆𑀙𑀢𑀺, 𑀓𑀸𑀫𑀼𑀧𑀸𑀤𑀸𑀦𑁂𑀦 𑀘 𑀅𑀦𑀼𑀧𑀸𑀤𑀸𑀦𑁄 𑀪𑀯𑀢𑀺, 𑀓𑀸𑀫𑀬𑁄𑀕𑁂𑀦 𑀘 𑀯𑀺𑀲𑀁𑀬𑀼𑀢𑁆𑀢𑁄 𑀪𑀯𑀢𑀺, 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑁂𑀦 𑀘 𑀯𑀺𑀧𑁆𑀧𑀬𑀼𑀚𑁆𑀚𑀢𑀺, 𑀓𑀸𑀫𑀸𑀲𑀯𑁂𑀦 𑀘 𑀅𑀦𑀸𑀲𑀯𑁄 𑀪𑀯𑀢𑀺, 𑀓𑀸𑀫𑁄𑀖𑀜𑁆𑀘 𑀉𑀢𑁆𑀢𑀺𑀡𑁆𑀡𑁄 𑀪𑀯𑀢𑀺, 𑀭𑀸𑀕𑀲𑀮𑁆𑀮𑁂𑀦 𑀘 𑀯𑀺𑀲𑀮𑁆𑀮𑁄 𑀪𑀯𑀢𑀺, 𑀭𑀽𑀧𑀽𑀧𑀺𑀓𑀸 𑀘𑀲𑁆𑀲 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺 𑀧𑀭𑀺𑀜𑁆𑀜𑀁 𑀕𑀘𑁆𑀙𑀢𑀺, 𑀭𑀽𑀧𑀥𑀸𑀢𑀼𑀬𑀁 𑀘𑀲𑁆𑀲 𑀭𑀸𑀕𑁄 𑀧𑀳𑀻𑀦𑁄 𑀪𑀯𑀢𑀺, 𑀦 𑀘 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀯𑁂𑀤𑀦𑀸𑀲𑀽𑀢𑀺 𑀏𑀯𑀫𑀸𑀤𑀺 𑀧𑀳𑀸𑀦𑀲𑀫𑀸𑀭𑁄𑀧𑀦𑁄𑀢𑀺 𑀏𑀯𑀫𑀸𑀤𑀺 𑀲𑀫𑀸𑀭𑁄𑀧𑀦𑁄 𑀳𑀸𑀭𑁄 𑀦𑀺𑀬𑀼𑀢𑁆𑀢𑁄𑀢𑀺.

𑀇𑀢𑀺 𑀲𑀢𑁆𑀢𑀺𑀩𑀮𑀸𑀦𑀼𑀭𑀽𑀧𑀸 𑀭𑀘𑀺𑀢𑀸.

𑀲𑁄𑀴𑀲𑀳𑀸𑀭𑀦𑀺𑀤𑁆𑀤𑁂𑀲𑀯𑀺𑀪𑀸𑀯𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀬𑀦𑀺𑀤𑁆𑀤𑁂𑀲𑀯𑀺𑀪𑀸𑀯𑀦𑀸

𑁧𑁭. 𑀳𑀸𑀭𑀦𑀺𑀤𑁆𑀤𑁂𑀲𑀸 𑀦𑀺𑀤𑁆𑀤𑀺𑀝𑁆𑀞𑀸, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑀸, ‘‘𑀓𑀢𑀫𑁂 𑀦𑀬𑀦𑀺𑀤𑁆𑀤𑁂𑀲𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀡𑁆𑀳𑀜𑁆𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀏𑀯𑀁 𑀉𑀤𑁆𑀤𑁂𑀲𑀓𑁆𑀓𑀫𑁂𑀦𑁂𑀯 𑀳𑀸𑀭𑁂 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀇𑀤𑀸𑀦𑀺 𑀦𑀬𑁂 𑀦𑀺𑀤𑁆𑀤𑀺𑀲𑀺𑀢𑀼𑀁 ‘‘𑀢𑀡𑁆𑀳𑀜𑁆𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀲𑀼𑀢𑁆𑀢𑁂 𑀆𑀕𑀢𑀁 𑀢𑀡𑁆𑀳𑀜𑁆𑀘 𑀅𑀯𑀺𑀚𑁆𑀚𑀜𑁆𑀘 𑀅𑀢𑁆𑀣𑀢𑁄 𑀦𑀺𑀤𑁆𑀥𑀸𑀭𑀡𑀯𑀲𑁂𑀦 𑀕𑀳𑀺𑀢𑀁 𑀢𑀡𑁆𑀳𑀜𑁆𑀘 𑀅𑀯𑀺𑀚𑁆𑀚𑀜𑁆𑀘 𑀲𑀁𑀓𑀺𑀮𑁂𑀲𑀧𑀓𑁆𑀔𑀁 𑀦𑁂𑀢𑀺, 𑀲𑀼𑀢𑁆𑀢𑁂 𑀆𑀕𑀢𑁂𑀦 𑀲𑀫𑀣𑁂𑀦, 𑀲𑀼𑀢𑁆𑀢𑁂 𑀆𑀕𑀢𑀸𑀬 𑀯𑀺𑀧𑀲𑁆𑀲𑀦𑀸𑀬 𑀅𑀢𑁆𑀣𑀢𑁄 𑀦𑀺𑀤𑁆𑀥𑀸𑀭𑀡𑀯𑀲𑁂𑀦 𑀯𑀸 𑀕𑀳𑀺𑀢𑁂𑀦 𑀲𑀫𑀣𑁂𑀦, 𑀕𑀳𑀺𑀢𑀸𑀬 𑀯𑀺𑀧𑀲𑁆𑀲𑀦𑀸𑀬 𑀯𑁄𑀤𑀸𑀦𑀧𑀓𑁆𑀔𑀁 𑀦𑁂𑀢𑀺, 𑀦𑀬𑀦𑁆𑀢𑁄 𑀘 𑀲𑀘𑁆𑀘𑁂𑀳𑀺 𑀬𑁄𑀚𑁂𑀢𑁆𑀯𑀸 𑀦𑁂𑀢𑀺, 𑀅𑀬𑀁 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀲𑁄 𑀦𑀦𑁆𑀤𑀺𑀬𑀸𑀯𑀝𑁆𑀝𑁄 𑀦𑀬𑁄 𑀦𑀸𑀫𑀸𑀢𑀺 𑀅𑀢𑁆𑀣𑀬𑁄𑀚𑀦𑀸.

𑀏𑀢𑁆𑀣 𑀘 𑀅𑀢𑁆𑀣𑀦𑀬𑀲𑁆𑀲 𑀪𑀽𑀫𑀺, 𑀲𑀁𑀯𑀡𑁆𑀡𑀦𑀸 𑀘 𑀕𑀸𑀣𑀸𑀬𑀁 ‘‘𑀦𑀬𑁄’’𑀢𑀺 𑀯𑀼𑀢𑁆𑀢𑀸, 𑀢𑀲𑁆𑀫𑀸 ‘‘𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄’’𑀢𑀺 𑀯𑀼𑀢𑁆𑀢𑀁. 𑀦 𑀳𑀺 𑀅𑀢𑁆𑀣𑀦𑀬𑁄 𑀲𑀁𑀯𑀡𑁆𑀡𑀦𑀸, 𑀘𑀢𑀼𑀲𑀘𑁆𑀘𑀧𑀝𑀺𑀯𑁂𑀥𑀲𑁆𑀲 𑀅𑀦𑀼𑀭𑀽𑀧𑁄 𑀧𑀼𑀩𑁆𑀩𑀪𑀸𑀕𑁂 𑀅𑀦𑀼𑀕𑀸𑀳𑀡𑀦𑀬𑁄 𑀅𑀢𑁆𑀣𑀦𑀬𑁄𑀯. 𑀢𑀲𑁆𑀲 𑀧𑀦 𑀅𑀢𑁆𑀣𑀦𑀬𑀲𑁆𑀲 𑀬𑀸 𑀲𑀁𑀯𑀡𑁆𑀡𑀦𑀸 𑀉𑀕𑁆𑀖𑀝𑀺𑀢𑀜𑁆𑀜𑀼𑀆𑀤𑀻𑀦𑀁 𑀯𑀲𑁂𑀦 𑀢𑀡𑁆𑀳𑀸𑀤𑀺𑀫𑀼𑀔𑁂𑀦 𑀦𑀬𑀪𑀽𑀫𑀺𑀭𑀘𑀦𑀸 𑀧𑀯𑀢𑁆𑀢𑀸, 𑀢𑀲𑁆𑀲 𑀲𑀁𑀯𑀡𑁆𑀡𑀦𑀸𑀯 𑀦𑀬𑀯𑁄𑀳𑀸𑀭𑁄 𑀓𑀢𑁄𑀢𑀺 𑀯𑀺𑀢𑁆𑀣𑀸𑀭𑀢𑁄 𑀳𑀸𑀭𑀲𑀫𑁆𑀧𑀸𑀢𑁂 (𑀦𑁂𑀢𑁆𑀢𑀺. 𑁭𑁮-𑁭𑁯) 𑀆𑀕𑀫𑀺𑀲𑁆𑀲𑀢𑀺.

𑀦𑀦𑁆𑀤𑀺𑀬𑀸𑀯𑀝𑁆𑀝𑀦𑀬𑀦𑀺𑀤𑁆𑀤𑁂𑀲𑁄 𑀦𑀺𑀤𑁆𑀤𑀺𑀝𑁆𑀞𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀓𑀢𑀫𑁄 𑀢𑀺𑀧𑀼𑀓𑁆𑀔𑀮𑀦𑀬𑀦𑀺𑀤𑁆𑀤𑁂𑀲𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑁋

𑁧𑁮. ‘‘𑀬𑁄 𑀅𑀓𑀼𑀲𑀮𑁂 𑀲𑀫𑀽𑀮𑁂𑀳𑀺, 𑀦𑁂𑀢𑀺 𑀓𑀼𑀲𑀮𑁂 𑀘 𑀓𑀼𑀲𑀮𑀫𑀽𑀮𑁂𑀳𑀺.

𑀪𑀽𑀢𑀁 𑀢𑀣𑀁 𑀅𑀯𑀺𑀢𑀣𑀁, 𑀢𑀺𑀧𑀼𑀓𑁆𑀔𑀮𑀁 𑀢𑀁 𑀦𑀬𑀁 𑀆𑀳𑀽’’𑀢𑀺. 𑁋

𑀕𑀸𑀣𑀸 𑀯𑀼𑀢𑁆𑀢𑀸. 𑀢𑀢𑁆𑀣 𑀬𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀅𑀓𑀼𑀲𑀮𑁂 𑀲𑀫𑀽𑀮𑁂𑀳𑀺 𑀅𑀢𑁆𑀢𑀦𑁄 𑀅𑀓𑀼𑀲𑀮𑀲𑁆𑀲 𑀢𑀻𑀳𑀺 𑀮𑁄𑀪𑀸𑀤𑀻𑀳𑀺 𑀫𑀽𑀮𑁂𑀳𑀺 𑀲𑀁𑀓𑀺𑀮𑁂𑀲𑀧𑀓𑁆𑀔𑀁 𑀦𑁂𑀢𑀺, 𑀓𑀼𑀲𑀮𑁂 𑀘 𑀓𑀼𑀲𑀮𑀫𑀽𑀮𑁂𑀳𑀺 𑀢𑀻𑀳𑀺 𑀅𑀮𑁄𑀪𑀸𑀤𑀻𑀳𑀺 𑀯𑁄𑀤𑀸𑀦𑀧𑀓𑁆𑀔𑀁 𑀦𑁂𑀢𑀺, 𑀦𑀬𑀦𑁆𑀢𑁄 𑀘 𑀪𑀽𑀢𑀁 𑀓𑀼𑀲𑀮𑀸𑀓𑀼𑀲𑀮𑀁 𑀦𑁂𑀢𑀺, 𑀦 𑀅𑀪𑀽𑀢𑀁 𑀫𑀸𑀬𑀸𑀫𑀭𑀻𑀘𑀺𑀆𑀤𑀬𑁄 𑀯𑀺𑀬, 𑀢𑀣𑀁 𑀓𑀼𑀲𑀮𑀸𑀓𑀼𑀲𑀮𑀁 𑀦𑁂𑀢𑀺, 𑀦 𑀖𑀝𑀸𑀤𑀬𑁄 𑀯𑀺𑀬 𑀲𑀫𑁆𑀫𑀼𑀢𑀺𑀲𑀘𑁆𑀘𑀫𑀢𑁆𑀢𑀁, 𑀅𑀯𑀺𑀢𑀣𑀁 𑀓𑀼𑀲𑀮𑀸𑀓𑀼𑀲𑀮𑀁 𑀦𑁂𑀢𑀺, 𑀦 𑀯𑀺𑀢𑀣𑀁. 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀲𑀪𑀸𑀯𑀢𑁄 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀪𑀽𑀢𑀸 𑀧𑀭𑀫𑀢𑁆𑀣𑀲𑀘𑁆𑀘𑀢𑁆𑀢𑀸 𑀢𑀣𑀸, 𑀅𑀓𑀼𑀲𑀮𑀲𑁆𑀲 𑀇𑀝𑁆𑀞𑀯𑀺𑀧𑀸𑀓𑀢𑀸𑀪𑀸𑀯𑀢𑁄, 𑀓𑀼𑀲𑀮𑀲𑁆𑀲 𑀘 𑀅𑀦𑀺𑀝𑁆𑀞𑀯𑀺𑀧𑀸𑀓𑀢𑀸𑀪𑀸𑀯𑀢𑁄 𑀯𑀺𑀧𑀸𑀓𑁂 𑀲𑀢𑀺 𑀅𑀯𑀺𑀲𑀁𑀯𑀸𑀤𑀓𑀢𑁆𑀢𑀸 𑀅𑀯𑀺𑀢𑀣𑀸 𑀪𑀯𑀦𑁆𑀢𑀺, 𑀓𑀼𑀲𑀮𑀸𑀓𑀼𑀲𑀮𑀸 𑀳𑀺 𑀏𑀢𑁂𑀲𑀁 𑀢𑀺𑀡𑁆𑀡𑀁 ‘‘𑀪𑀽𑀢𑀁, 𑀢𑀣𑀁, 𑀅𑀯𑀺𑀢𑀣’’𑀦𑁆𑀢𑀺 𑀧𑀤𑀸𑀦𑀁 𑀓𑀼𑀲𑀮𑀸𑀓𑀼𑀲𑀮𑀯𑀺𑀲𑁂𑀲𑀦𑀢𑀸 𑀤𑀝𑁆𑀞𑀩𑁆𑀩𑀸.

𑀅𑀣 𑀯𑀸 𑀅𑀓𑀼𑀲𑀮𑀫𑀽𑀮𑁂𑀳𑀺 𑀅𑀓𑀼𑀲𑀮𑀸𑀦𑀺, 𑀓𑀼𑀲𑀮𑀫𑀽𑀮𑁂𑀳𑀺 𑀘 𑀓𑀼𑀲𑀮𑀸𑀦𑀺 𑀦𑀬𑀦𑁆𑀢𑁄 𑀅𑀬𑀁 𑀦𑀬𑁄 𑀪𑀽𑀢𑀁 𑀢𑀣𑀁 𑀅𑀯𑀺𑀢𑀣𑀁 𑀦𑁂𑀢𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀬𑁄𑀚𑁂𑀢𑀺. 𑀤𑀼𑀓𑁆𑀔𑀸𑀤𑀻𑀦𑀺 𑀳𑀺 𑀩𑀸𑀥𑀓𑀸𑀤𑀺𑀪𑀸𑀯𑀢𑁄 𑀅𑀜𑁆𑀜𑀣𑀸𑀪𑀸𑀯𑀸𑀪𑀸𑀯𑁂𑀦 𑀪𑀽𑀢𑀸𑀦𑀺, 𑀲𑀘𑁆𑀘𑀲𑀪𑀸𑀯𑀢𑁆𑀢𑀸 𑀢𑀣𑀸𑀦𑀺, 𑀅𑀯𑀺𑀲𑀁𑀯𑀸𑀤𑀦𑀢𑁄 𑀅𑀯𑀺𑀢𑀣𑀸𑀦𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀦𑀺 𑀅𑀯𑀺𑀢𑀣𑀸𑀦𑀺 𑀅𑀦𑀜𑁆𑀜𑀣𑀸𑀦𑀻’’𑀢𑀺 𑀲𑀁. 𑀦𑀺. 𑁫.𑁧𑁦𑁯𑁦; 𑀧𑀝𑀺. 𑀫. 𑁨.𑁮). 𑀅𑀓𑀼𑀲𑀮𑀸𑀤𑀺𑀲𑀼𑀢𑁆𑀢𑀢𑁆𑀣𑀲𑁆𑀲 𑀘𑀢𑀼𑀲𑀘𑁆𑀘𑀬𑁄𑀚𑀦𑀫𑀼𑀔𑁂𑀦 𑀦𑀬𑀦𑀮𑀓𑁆𑀔𑀡𑀁 𑀢𑀁 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀁 𑀢𑀺𑀧𑀼𑀓𑁆𑀔𑀮𑀁 𑀦𑀬𑀦𑁆𑀢𑀺 𑀆𑀳𑀽𑀢𑀺 𑀅𑀢𑁆𑀣𑀬𑁄𑀚𑀦𑀸.

𑀢𑀢𑁆𑀣 𑀢𑀻𑀳𑀺 𑀳𑁂𑀢𑀽𑀳𑀺 𑀧𑀼𑀓𑁆𑀔𑀮𑁄 𑀲𑁄𑀪𑀦𑁄𑀢𑀺 𑀢𑀺𑀧𑀼𑀓𑁆𑀔𑀮𑁄 𑀅𑀓𑀼𑀲𑀮𑀸𑀤𑀺𑀓𑁄 𑀅𑀢𑁆𑀣𑀦𑀬𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄𑀢𑀺 𑀞𑀸𑀦𑀽𑀧𑀘𑀸𑀭𑀢𑁄 𑀢𑀺𑀧𑀼𑀓𑁆𑀔𑀮𑀦𑀬𑁄 𑀦𑀸𑀫𑀸𑀢𑀺. 𑀯𑀺𑀢𑁆𑀣𑀸𑀭𑁄 𑀧𑀦 𑀳𑀸𑀭𑀲𑀫𑁆𑀧𑀸𑀢𑁂 (𑀦𑁂𑀢𑁆𑀢𑀺. 𑁮𑁭-𑁮𑁮) 𑀆𑀕𑀫𑀺𑀲𑁆𑀲𑀢𑀺.

𑀢𑀺𑀧𑀼𑀓𑁆𑀔𑀮𑀦𑀬𑀦𑀺𑀤𑁆𑀤𑁂𑀲𑁄 𑀦𑀺𑀤𑁆𑀤𑀺𑀝𑁆𑀞𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀓𑀢𑀫𑁄 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀦𑀬𑀦𑀺𑀤𑁆𑀤𑁂𑀲𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑁋

𑁧𑁯. ‘‘𑀬𑁄 𑀦𑁂𑀢𑀺 𑀯𑀺𑀧𑀮𑁆𑀮𑀸𑀲𑁂𑀳𑀺, 𑀓𑀺𑀮𑁂𑀲𑁂 𑀇𑀦𑁆𑀤𑁆𑀭𑀺𑀬𑁂𑀳𑀺 𑀲𑀤𑁆𑀥𑀫𑁆𑀫𑁂.

𑀏𑀢𑀁 𑀦𑀬𑀁 𑀦𑀬𑀯𑀺𑀤𑀽, 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀁 𑀆𑀳𑀽’’𑀢𑀺. 𑁋

𑀕𑀸𑀣𑀸 𑀯𑀼𑀢𑁆𑀢𑀸. 𑀢𑀢𑁆𑀣 𑀬𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀲𑀼𑀢𑁆𑀢𑁂 𑀯𑀼𑀢𑁆𑀢𑁂𑀳𑀺 𑀯𑀺𑀧𑀮𑁆𑀮𑀸𑀲𑁂𑀳𑀺 𑀓𑀺𑀮𑁂𑀲𑁂 𑀲𑀁𑀓𑀺𑀮𑁂𑀲𑀧𑀓𑁆𑀔𑀁 𑀦𑁂𑀢𑀺, 𑀲𑀼𑀢𑁆𑀢𑁂 𑀯𑀼𑀢𑁆𑀢𑁂𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀲𑀤𑁆𑀥𑀫𑁆𑀫𑁂 𑀯𑁄𑀤𑀸𑀦𑀧𑀓𑁆𑀔𑀁 𑀦𑁂𑀢𑀺, 𑀏𑀢𑀁 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀁 𑀦𑀬𑀯𑀺𑀤𑀽 𑀲𑀤𑁆𑀥𑀫𑁆𑀫𑀦𑀬𑀓𑁄𑀯𑀺𑀤𑀸, 𑀅𑀢𑁆𑀣𑀦𑀬𑀓𑀼𑀲𑀮𑀸 𑀏𑀯 𑀯𑀸 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀁 𑀦𑀬𑀦𑁆𑀢𑀺 𑀆𑀳𑀽𑀢𑀺 𑀅𑀢𑁆𑀣𑀬𑁄𑀚𑀦𑀸.

𑀢𑀢𑁆𑀣 𑀯𑀺𑀧𑀮𑁆𑀮𑀸𑀲𑁂𑀳𑀻𑀢𑀺 𑀅𑀲𑀼𑀪𑁂 𑀲𑀼𑀪𑀁, 𑀤𑀼𑀓𑁆𑀔𑁂 𑀲𑀼𑀔𑀁, 𑀅𑀦𑀺𑀘𑁆𑀘𑁂 𑀦𑀺𑀘𑁆𑀘𑀁, 𑀅𑀦𑀢𑁆𑀢𑀦𑀺 𑀅𑀢𑁆𑀢𑀸𑀢𑀺 𑀘𑀢𑀽𑀳𑀺 𑀯𑀺𑀧𑀮𑁆𑀮𑀸𑀲𑁂𑀳𑀺. 𑀇𑀦𑁆𑀤𑁆𑀭𑀺𑀬𑁂𑀳𑀻𑀢𑀺 𑀲𑀤𑁆𑀥𑀸𑀤𑀻𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺. 𑀲𑀤𑁆𑀥𑀫𑁆𑀫𑁂𑀢𑀺 𑀧𑀝𑀺𑀧𑀢𑁆𑀢𑀺𑀧𑀝𑀺𑀯𑁂𑀥𑀲𑀤𑁆𑀥𑀫𑁆𑀫𑁂. 𑀲𑁂𑀲𑀫𑁂𑀢𑁆𑀣 𑀯𑀼𑀢𑁆𑀢𑀦𑀬𑀫𑁂𑀯. 𑀯𑀺𑀢𑁆𑀣𑀸𑀭𑁄 𑀧𑀦 𑀳𑀸𑀭𑀲𑀫𑁆𑀧𑀸𑀢𑁂 (𑀦𑁂𑀢𑁆𑀢𑀺. 𑁮𑁬-𑁮𑁭) 𑀆𑀕𑀫𑀺𑀲𑁆𑀲𑀢𑀻𑀢𑀺.

𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀦𑀬𑀦𑀺𑀤𑁆𑀤𑁂𑀲𑁄 𑀦𑀺𑀤𑁆𑀤𑀺𑀝𑁆𑀞𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀓𑀢𑀫𑁄 𑀤𑀺𑀲𑀸𑀮𑁄𑀘𑀦𑀦𑀬𑀦𑀺𑀤𑁆𑀤𑁂𑀲𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑁋

𑁨𑁦. ‘‘𑀯𑁂𑀬𑁆𑀬𑀸𑀓𑀭𑀡𑁂𑀲𑀼 𑀳𑀺 𑀬𑁂, 𑀓𑀼𑀲𑀮𑀸𑀓𑀼𑀲𑀮𑀸 𑀢𑀳𑀺𑀁 𑀢𑀳𑀺𑀁 𑀯𑀼𑀢𑁆𑀢𑀸.

𑀫𑀦𑀲𑀸 𑀯𑁄𑀮𑁄𑀓𑀬𑀢𑁂, 𑀢𑀁 𑀔𑀼 𑀤𑀺𑀲𑀸𑀮𑁄𑀘𑀦𑀁 𑀆𑀳𑀽’’𑀢𑀺. 𑁋

𑀕𑀸𑀣𑀸 𑀯𑀼𑀢𑁆𑀢𑀸. ‘‘𑀲𑀻𑀳𑀮𑁄𑀘𑀦𑀁 𑀆𑀳𑀽’’𑀢𑀺 𑀧𑀸𑀞𑁄 𑀮𑀺𑀔𑀺𑀢𑁄, 𑀲𑁄 𑀧𑀦 𑀦 𑀣𑁂𑀭𑀲𑁆𑀲 𑀧𑀸𑀞𑁄𑀢𑀺 𑀤𑀝𑁆𑀞𑀩𑁆𑀩𑁄 𑀪𑀺𑀦𑁆𑀦𑀮𑀓𑁆𑀔𑀡𑀢𑁆𑀢𑀸. 𑀢𑀢𑁆𑀣 𑀢𑀳𑀺𑀁 𑀢𑀳𑀺𑀁 𑀯𑁂𑀬𑁆𑀬𑀸𑀓𑀭𑀡𑁂𑀲𑀼 𑀬𑁂 𑀓𑀼𑀲𑀮𑀸𑀓𑀼𑀲𑀮𑀸 𑀦𑀬𑀲𑁆𑀲 𑀤𑀺𑀲𑀸𑀪𑀽𑀢𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸, 𑀢𑁂 𑀓𑀼𑀲𑀮𑀸𑀓𑀼𑀲𑀮𑁂 𑀦𑀬𑀲𑁆𑀲 𑀤𑀺𑀲𑀸𑀪𑀽𑀢𑀥𑀫𑁆𑀫𑁂 𑀅𑀩𑀳𑀺 𑀅𑀩𑁆𑀪𑀦𑁆𑀢𑀭𑀁 𑀘𑀺𑀢𑁆𑀢𑁂 𑀏𑀯 𑀬𑀁 𑀑𑀮𑁄𑀓𑀦𑀁 𑀓𑀭𑁄𑀢𑀺, 𑀢𑀁 𑀑𑀮𑁄𑀓𑀦𑀁 𑀔𑀼 𑀑𑀮𑁄𑀓𑀦𑀁 𑀏𑀯 𑀤𑀺𑀲𑀸𑀮𑁄𑀘𑀦𑀦𑁆𑀢𑀺 𑀆𑀳𑀽𑀢𑀺 𑀅𑀢𑁆𑀣𑀬𑁄𑀚𑀦𑀸.

𑀢𑀢𑁆𑀣 𑀯𑁂𑀬𑁆𑀬𑀸𑀓𑀭𑀡𑁂𑀲𑀽𑀢𑀺 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀣𑀦𑀬𑀲𑁆𑀲 𑀬𑁄𑀚𑀦𑀢𑁆𑀣𑀁 𑀓𑀢𑁂𑀲𑀼 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑀯𑀺𑀲𑁆𑀲𑀚𑁆𑀚𑀦𑁂𑀲𑀼. 𑀓𑀼𑀲𑀮𑀸𑀢𑀺 𑀯𑁄𑀤𑀸𑀦𑀺𑀬𑀸. 𑀅𑀓𑀼𑀲𑀮𑀸𑀢𑀺 𑀲𑀁𑀓𑀺𑀮𑁂𑀲𑀺𑀓𑀸. 𑀯𑀼𑀢𑁆𑀢𑀸𑀢𑀺 𑀲𑀼𑀢𑁆𑀢𑀢𑁄 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀓𑀣𑀺𑀢𑀸. 𑀑𑀮𑁄𑀓𑀬𑀢𑁂𑀢𑀺 𑀢𑁂 𑀓𑀼𑀲𑀮𑀸𑀤𑀺𑀥𑀫𑁆𑀫𑁂 𑀘𑀺𑀢𑁆𑀢𑁂𑀦𑁂𑀯 ‘‘𑀅𑀬𑀁 𑀧𑀞𑀫𑀸 𑀤𑀺𑀲𑀸, 𑀅𑀬𑀁 𑀤𑀼𑀢𑀺𑀬𑀸 𑀤𑀺𑀲𑀸’’𑀢𑀺𑀆𑀤𑀺𑀦𑀸 𑀢𑀲𑁆𑀲 𑀢𑀲𑁆𑀲 𑀦𑀬𑀲𑁆𑀲 𑀤𑀺𑀲𑀸𑀪𑀸𑀯𑁂𑀦 𑀉𑀧𑀧𑀭𑀺𑀓𑁆𑀔𑀢𑀺, 𑀯𑀺𑀘𑀸𑀭𑁂𑀢𑀻𑀢𑀺 𑀅𑀢𑁆𑀣𑁄. 𑀔𑀽𑀢𑀺 𑀅𑀯𑀥𑀸𑀭𑀡𑀢𑁆𑀣𑁂 𑀦𑀺𑀧𑀸𑀢𑁄, 𑀢𑁂𑀦 𑀤𑀺𑀲𑀸𑀮𑁄𑀘𑀦𑀦𑀬𑁄 𑀓𑁄𑀘𑀺 𑀅𑀢𑁆𑀣𑀯𑀺𑀲𑁂𑀲𑁄 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀻𑀢𑀺.

𑁨𑁧. 𑀤𑀺𑀲𑀸𑀮𑁄𑀘𑀦𑀦𑀬𑀦𑀺𑀤𑁆𑀤𑁂𑀲𑁄 𑀦𑀺𑀤𑁆𑀤𑀺𑀝𑁆𑀞𑁄. 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄. ‘‘𑀓𑀢𑀫𑁄 𑀅𑀗𑁆𑀓𑀼𑀲𑀦𑀬𑀦𑀺𑀤𑁆𑀤𑁂𑀲𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀑𑀮𑁄𑀓𑁂𑀢𑁆𑀯𑀸’’𑀢𑀺𑀆𑀤𑀺𑀕𑀸𑀣𑀸 𑀯𑀼𑀢𑁆𑀢𑀸. 𑀢𑀢𑁆𑀣 𑀢𑀁𑀢𑀁𑀦𑀬𑀤𑀺𑀲𑀸𑀪𑀽𑀢𑁂 𑀲𑀩𑁆𑀩𑁂 𑀓𑀼𑀲𑀮𑀸𑀓𑀼𑀲𑀮𑁂 𑀤𑀺𑀲𑀸𑀮𑁄𑀘𑀦𑁂𑀦 𑀑𑀮𑁄𑀓𑁂𑀢𑁆𑀯𑀸 𑀉𑀓𑁆𑀔𑀺𑀧𑀺𑀬 𑀲𑀼𑀢𑁆𑀢𑀢𑁄 𑀉𑀤𑁆𑀥𑀭𑀺𑀢𑁆𑀯𑀸 𑀬𑀁 𑀲𑀫𑀸𑀦𑁂𑀢𑀺 𑀬𑀁 𑀲𑀫𑀸𑀦𑀬𑀦𑀁 𑀓𑀭𑁄𑀢𑀺, 𑀅𑀬𑀁 𑀲𑀫𑀸𑀦𑀬𑀦𑀲𑀗𑁆𑀔𑀸𑀢𑁄 𑀦𑀬𑁄 𑀅𑀗𑁆𑀓𑀼𑀲𑁄 𑀦𑀬𑁄 𑀦𑀸𑀫𑀸𑀢𑀺 𑀅𑀢𑁆𑀣𑀬𑁄𑀚𑀦𑀸.

𑀏𑀢𑁆𑀣 𑀘 𑀅𑀗𑁆𑀓𑀼𑀲𑁄 𑀦𑀸𑀫 𑀳𑀢𑁆𑀣𑀻𑀦𑀁 𑀇𑀘𑁆𑀙𑀺𑀢𑀝𑁆𑀞𑀸𑀦𑀁 𑀆𑀦𑀬𑀦𑀓𑀸𑀭𑀡𑀪𑀽𑀢𑁄 𑀯𑀚𑀺𑀭𑀸𑀤𑀺𑀫𑀬𑁄 𑀢𑀺𑀓𑁆𑀔𑀕𑁆𑀕𑁄 𑀉𑀚𑀼𑀯𑀗𑁆𑀓𑀪𑀽𑀢𑁄 𑀤𑀩𑁆𑀩𑀲𑀫𑁆𑀪𑀸𑀭𑀯𑀺𑀲𑁂𑀲𑁄, 𑀅𑀬𑀫𑁆𑀧𑀺 𑀦𑀬𑁄 𑀅𑀗𑁆𑀓𑀼𑀲𑁄 𑀯𑀺𑀬𑀸𑀢𑀺 𑀅𑀢𑁆𑀣𑁂𑀦 𑀅𑀗𑁆𑀓𑀼𑀲𑁄. 𑀏𑀢𑁂𑀦 𑀳𑀺 𑀦𑀬𑁂𑀦 𑀇𑀘𑁆𑀙𑀺𑀢𑀁 𑀲𑀼𑀢𑁆𑀢𑀢𑁆𑀣𑀁 𑀦𑀬𑀢𑀻𑀢𑀺. 𑀫𑀼𑀔𑁆𑀬𑀢𑁄 𑀧𑀦 𑀅𑀗𑁆𑀓𑁂 𑀯𑀺𑀚𑁆𑀛𑀦𑀝𑁆𑀞𑀸𑀦𑁂 𑀉𑀤𑁆𑀥𑀝𑁄 𑀅𑀲𑀢𑀺 𑀅𑀦𑁆𑀢𑁄 𑀧𑀯𑀺𑀲𑀢𑀻𑀢𑀺 𑀅𑀗𑁆𑀓𑀼𑀲𑁄. 𑀅𑀗𑁆𑀓𑀲𑀤𑁆𑀤𑀽𑀧𑀧𑀤𑀉𑀧𑀼𑀩𑁆𑀩𑀅𑀲𑀥𑀸𑀢𑀼 𑀅𑀧𑀘𑁆𑀘𑀬𑁄𑀢𑀺. 𑀅𑀬𑀫𑁆𑀧𑀺 𑀦𑀬𑁄 𑀓𑁄𑀘𑀺𑀧𑀺 𑀅𑀢𑁆𑀣𑀯𑀺𑀲𑁂𑀲𑁄 𑀦 𑀳𑁄𑀢𑀻𑀢𑀺.

𑀲𑁄𑀴𑀲 𑀳𑀸𑀭𑀦𑀺𑀤𑁆𑀤𑁂𑀲𑀸 𑀘𑁂𑀯 𑀧𑀜𑁆𑀘 𑀦𑀬𑀦𑀺𑀤𑁆𑀤𑁂𑀲𑀸 𑀘 𑀆𑀘𑀭𑀺𑀬𑁂𑀦 𑀦𑀺𑀤𑁆𑀤𑀺𑀝𑁆𑀞𑀸. 𑀅𑀫𑁆𑀳𑁂𑀳𑀺 𑀘 𑀜𑀸𑀢𑀸, ‘‘𑀲𑀁𑀯𑀡𑁆𑀡𑁂𑀢𑀩𑁆𑀩𑀲𑀼𑀢𑁆𑀢𑁂 𑀓𑀺𑀁 𑀲𑁄𑀴𑀲 𑀳𑀸𑀭𑀸 𑀧𑀞𑀫𑀁 𑀬𑁄𑀚𑁂𑀢𑀩𑁆𑀩𑀸, 𑀉𑀤𑀸𑀳𑀼 𑀦𑀬𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑁋

𑁨𑁨. ‘‘𑀲𑁄𑀴𑀲 𑀳𑀸𑀭𑀸 𑀧𑀞𑀫𑀁, 𑀤𑀺𑀲𑀸𑀮𑁄𑀘𑀦𑀢𑁄 𑀤𑀺𑀲𑀸 𑀯𑀺𑀮𑁄𑀓𑁂𑀢𑁆𑀯𑀸.

𑀲𑀗𑁆𑀔𑀺𑀧𑀺𑀬 𑀅𑀗𑁆𑀓𑀼𑀲𑁂𑀦 𑀳𑀺, 𑀦𑀬𑁂𑀳𑀺 𑀢𑀺𑀳𑀺 𑀦𑀺𑀤𑁆𑀤𑀺𑀲𑁂 𑀲𑀼𑀢𑁆𑀢’’𑀦𑁆𑀢𑀺. 𑁋

𑀕𑀸𑀣𑀫𑀸𑀳. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀏𑀯𑀁 𑀳𑀸𑀭𑁂, 𑀦𑀬𑁂 𑀘 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀇𑀤𑀸𑀦𑀺 𑀦𑁂𑀲𑀁 𑀬𑁄𑀚𑀦𑀓𑁆𑀓𑀫𑀁 𑀤𑀲𑁆𑀲𑁂𑀦𑁆𑀢𑁄 ‘𑀲𑁄𑀴𑀲 𑀳𑀸𑀭𑀸 𑀧𑀞𑀫’𑀦𑁆𑀢𑀺𑀆𑀤𑀺𑀫𑀸𑀳𑀸’’𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁨𑁨) 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑁄𑀴𑀲 𑀳𑀸𑀭𑀸 𑀩𑁆𑀬𑀜𑁆𑀚𑀦𑀧𑀭𑀺𑀬𑁂𑀝𑁆𑀞𑀺𑀪𑀸𑀯𑀢𑁄 𑀲𑀁𑀯𑀡𑁆𑀡𑁂𑀢𑀩𑁆𑀩𑀲𑀼𑀢𑁆𑀢𑁂 𑀲𑀁𑀯𑀡𑁆𑀡𑀦𑀸𑀪𑀸𑀯𑁂𑀦 𑀧𑀞𑀫𑀁 𑀬𑁄𑀚𑁂𑀢𑀩𑁆𑀩𑀸, 𑀬𑁄𑀚𑁂𑀦𑁆𑀢𑁂𑀦 𑀦𑀺𑀤𑁆𑀤𑀺𑀝𑁆𑀞𑀸 𑀳𑀸𑀭𑀸𑀦𑀼𑀓𑁆𑀓𑀫𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀸, 𑀦 𑀉𑀧𑁆𑀧𑀝𑀺𑀧𑀸𑀝𑀺𑀬𑀸. 𑀳𑀸𑀭𑀲𑀁𑀯𑀡𑁆𑀡𑀦𑀸𑀦𑀼𑀓𑁆𑀓𑀫𑁂𑀦 𑀲𑀁𑀯𑀡𑁆𑀡𑁂𑀢𑀩𑁆𑀩𑀁 𑀧𑀞𑀫𑀁 𑀲𑀁𑀯𑀡𑁆𑀡𑁂𑀢𑁆𑀯𑀸 𑀧𑀘𑁆𑀙𑀸 𑀤𑀺𑀲𑀸𑀮𑁄𑀘𑀦𑁂𑀦 𑀑𑀮𑁄𑀓𑁂𑀢𑁆𑀯𑀸 𑀅𑀗𑁆𑀓𑀼𑀲𑀦𑀬𑁂𑀦 𑀦𑁂𑀢𑁆𑀯𑀸 𑀢𑀻𑀳𑀺 𑀅𑀢𑁆𑀣𑀦𑀬𑁂𑀳𑀺 𑀦𑀺𑀤𑁆𑀤𑀺𑀲𑁂𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀇𑀢𑀺 𑀲𑀢𑁆𑀢𑀺𑀩𑀮𑀸𑀦𑀼𑀭𑀽𑀧𑀸 𑀭𑀘𑀺𑀢𑀸

𑀦𑀬𑀦𑀺𑀤𑁆𑀤𑁂𑀲𑀯𑀺𑀪𑀸𑀯𑀦𑀸 𑀦𑀺𑀝𑁆𑀞𑀺𑀢𑀸.

𑀤𑁆𑀯𑀸𑀤𑀲𑀧𑀤𑀯𑀺𑀪𑀸𑀯𑀦𑀸

𑀦𑁂𑀢𑁆𑀢𑀺𑀯𑀺𑀲𑀬𑀁 𑀲𑀸𑀲𑀦𑀯𑀭𑀲𑀗𑁆𑀔𑀸𑀢𑀁 𑀲𑀁𑀯𑀡𑁆𑀡𑁂𑀢𑀩𑁆𑀩𑀲𑀼𑀢𑁆𑀢𑀁 𑀬𑁂𑀲𑀁 𑀩𑁆𑀬𑀜𑁆𑀚𑀦𑀧𑀤𑀸𑀦𑀁, 𑀅𑀢𑁆𑀣𑀧𑀤𑀸𑀦𑀜𑁆𑀘 𑀯𑀲𑁂𑀦 ‘‘𑀤𑁆𑀯𑀸𑀤𑀲 𑀧𑀤𑀸𑀦𑀺 𑀲𑀼𑀢𑁆𑀢’’𑀦𑁆𑀢𑀺 𑀲𑀗𑁆𑀕𑀳𑀯𑀸𑀭𑁂 𑀯𑀼𑀢𑁆𑀢𑀁, ‘‘𑀓𑀢𑀫𑀸𑀦𑀺 𑀢𑀸𑀦𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀲𑀭𑀽𑀧𑀢𑁄 𑀦𑀺𑀤𑁆𑀤𑀺𑀲𑀺𑀢𑀼𑀁 𑁋

𑁨𑁩. ‘‘𑀅𑀓𑁆𑀔𑀭𑀁 𑀧𑀤𑀁 𑀩𑁆𑀬𑀜𑁆𑀚𑀦𑀁, 𑀦𑀺𑀭𑀼𑀢𑁆𑀢𑀺 𑀢𑀣𑁂𑀯 𑀦𑀺𑀤𑁆𑀤𑁂𑀲𑁄.

𑀆𑀓𑀸𑀭𑀙𑀝𑁆𑀞𑀯𑀘𑀦𑀁, 𑀏𑀢𑁆𑀢𑀸𑀯 𑀩𑁆𑀬𑀜𑁆𑀚𑀦𑀁 𑀲𑀩𑁆𑀩𑀁.

𑁨𑁪. 𑀲𑀗𑁆𑀓𑀸𑀲𑀦𑀸 𑀧𑀓𑀸𑀲𑀦𑀸, 𑀯𑀺𑀯𑀭𑀡𑀸 𑀯𑀺𑀪𑀚𑀦𑀼𑀢𑁆𑀢𑀸𑀦𑀻𑀓𑀫𑁆𑀫𑀧𑀜𑁆𑀜𑀢𑁆𑀢𑀺.

𑀏𑀢𑁂𑀳𑀺 𑀙𑀳𑀺 𑀧𑀤𑁂𑀳𑀺, 𑀅𑀢𑁆𑀣𑁄 𑀓𑀫𑁆𑀫𑀜𑁆𑀘 𑀦𑀺𑀤𑁆𑀤𑀺𑀝𑁆𑀞’’𑀦𑁆𑀢𑀺. 𑁋

𑀕𑀸𑀣𑀸𑀤𑁆𑀯𑀬𑀁 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀇𑀤𑀸𑀦𑀺 𑀬𑁂𑀲𑀁 𑀩𑁆𑀬𑀜𑁆𑀚𑀦𑀧𑀤𑀸𑀦𑀁, 𑀅𑀢𑁆𑀣𑀧𑀤𑀸𑀦𑀜𑁆𑀘 𑀯𑀲𑁂𑀦 ‘𑀤𑁆𑀯𑀸𑀤𑀲 𑀧𑀤𑀸𑀦𑀺 ‘𑀲𑀼𑀢𑁆𑀢’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀸𑀦𑀺 𑀧𑀤𑀸𑀦𑀺 𑀦𑀺𑀤𑁆𑀤𑀺𑀲𑀺𑀢𑀼𑀁 ‘𑀅𑀓𑁆𑀔𑀭𑀧𑀤’𑀦𑁆𑀢𑀺𑀆𑀤𑀺𑀫𑀸𑀳𑀸’’𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁨𑁩) 𑀯𑀼𑀢𑁆𑀢𑀁.

𑀢𑀢𑁆𑀣 𑀓𑁂𑀦𑀝𑁆𑀞𑁂𑀦 𑀅𑀓𑁆𑀔𑀭𑀦𑁆𑀢𑀺? 𑀅𑀓𑁆𑀔𑀭𑀝𑁆𑀞𑁂𑀦 𑀅𑀲𑀜𑁆𑀘𑀭𑀡𑀝𑁆𑀞𑁂𑀦. 𑀅𑀓𑀸𑀭𑀸𑀤𑀺𑀯𑀡𑁆𑀡𑁄 𑀳𑀺 𑀅𑀓𑀸𑀭𑀸𑀤𑀺𑀢𑁄 𑀇𑀓𑀸𑀭𑀸𑀤𑀺𑀧𑀭𑀺𑀬𑀸𑀬𑀁 𑀦𑀓𑁆𑀔𑀭𑀢𑀺, 𑀦 𑀲𑀜𑁆𑀘𑀭𑀢𑀺, 𑀦 𑀲𑀗𑁆𑀓𑀫𑀢𑀺. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀧𑀭𑀺𑀬𑁄𑀲𑀺𑀢𑁂 𑀧𑀤𑁂 𑀯𑀡𑁆𑀡𑁄 𑀅𑀓𑁆𑀔𑀭𑀁 𑀧𑀭𑀺𑀬𑀸𑀬𑀯𑀲𑁂𑀦 𑀅𑀓𑁆𑀔𑀭𑀡𑀢𑁄 𑀅𑀲𑀜𑁆𑀘𑀭𑀡𑀢𑁄’’𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁨𑁩). 𑀅𑀧𑀭𑀺𑀬𑁄𑀲𑀺𑀢𑁂 𑀧𑀤𑁂𑀢𑀺 𑀘 𑀯𑀺𑀪𑀢𑁆𑀬𑀦𑁆𑀢𑀪𑀸𑀯𑀁 𑀅𑀧𑁆𑀧𑀢𑁆𑀢𑁂 𑀤𑁆𑀯𑀺𑀢𑀺𑀘𑀢𑀼𑀓𑁆𑀔𑀭𑀯𑀦𑁆𑀢𑁂𑀲𑀼 𑀧𑀤𑁂𑀲𑀼 𑀏𑀓𑀤𑁆𑀯𑀺𑀢𑀺𑀓𑁆𑀔𑀭𑀫𑀢𑁆𑀢𑁂𑀬𑁂𑀯 𑀅𑀓𑁆𑀔𑀭𑀁 𑀦𑀸𑀫, 𑀧𑀭𑀺𑀬𑁄𑀲𑀺𑀢𑁂 𑀧𑀤𑀁𑀬𑁂𑀯, 𑀦 𑀅𑀓𑁆𑀔𑀭𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀤𑀁 𑀧𑀦 𑀧𑀯𑁂𑀲𑀦𑀢𑁄 𑀅𑀢𑁆𑀣𑀯𑀲𑁂𑀦 𑀧𑀭𑀺𑀬𑀸𑀬𑀁 𑀲𑀜𑁆𑀘𑀭𑀦𑁆𑀢𑀁 𑀯𑀺𑀬 𑀳𑁄𑀢𑀺, 𑀦 𑀏𑀯𑀁 𑀅𑀓𑀸𑀭𑀸𑀤𑀺𑀯𑀡𑁆𑀡𑁄 𑀅𑀯𑁂𑀯𑀘𑀦𑀢𑁆𑀢𑀸. ‘‘𑀫𑀸 𑀏𑀯𑀁 𑀫𑀜𑁆𑀜𑀲𑀻’’𑀢𑀺𑀆𑀤𑀻𑀲𑀼 𑀯𑀸 𑀏𑀓𑀓𑁆𑀔𑀭𑀧𑀤𑀸 𑀫𑀸-𑀓𑀸𑀭𑀸𑀤𑀺 𑀅𑀓𑁆𑀔𑀭𑀁 𑀦𑀸𑀫, 𑀯𑀺𑀪𑀢𑁆𑀬𑀦𑁆𑀢𑀁 𑀧𑀤𑀁 𑀧𑀦 𑀧𑀤𑀫𑁂𑀯 𑀳𑁄𑀢𑀺.

𑀧𑀚𑁆𑀚𑀢𑀺 𑀅𑀢𑁆𑀣𑁄 𑀏𑀢𑁂𑀦𑀸𑀢𑀺 𑀧𑀤𑀁. 𑀢𑀁 𑀦𑀸𑀫𑀸𑀔𑁆𑀬𑀸𑀢𑁄𑀧𑀲𑀕𑁆𑀕𑀦𑀺𑀧𑀸𑀢𑀧𑁆𑀧𑀪𑁂𑀤𑁂𑀦 𑀘𑀢𑀼𑀩𑁆𑀩𑀺𑀥𑀁. 𑀢𑀢𑁆𑀣 𑀤𑀩𑁆𑀩𑀧𑀥𑀸𑀦𑀁 ‘‘𑀨𑀲𑁆𑀲𑁄 𑀯𑁂𑀤𑀦𑀸 𑀘𑀺𑀢𑁆𑀢’’𑀦𑁆𑀢𑀺 𑀏𑀯𑀫𑀸𑀤𑀺𑀓𑀁 𑀦𑀸𑀫𑀧𑀤𑀁. 𑀢𑀢𑁆𑀣 𑀳𑀺 𑀤𑀩𑁆𑀩𑀫𑀸𑀯𑀺𑀪𑀽𑀢𑀭𑀽𑀧𑀁, 𑀓𑀺𑀭𑀺𑀬𑀸 𑀅𑀦𑀸𑀯𑀺𑀪𑀽𑀢𑀭𑀽𑀧𑀸. 𑀓𑀺𑀭𑀺𑀬𑀸𑀧𑀥𑀸𑀦𑀁 ‘‘𑀨𑀼𑀲𑀢𑀺 𑀯𑁂𑀤𑀬𑀢𑀺 𑀯𑀺𑀚𑀸𑀦𑀸𑀢𑀻’’𑀢𑀺 𑀏𑀯𑀫𑀸𑀤𑀺𑀓𑀁 𑀆𑀔𑁆𑀬𑀸𑀢𑀧𑀤𑀁 𑀦𑀸𑀫. 𑀢𑀢𑁆𑀣 𑀳𑀺 𑀨𑀼𑀲𑀦𑀸𑀤𑀺𑀓𑀺𑀭𑀺𑀬𑀸 𑀆𑀯𑀺𑀪𑀽𑀢𑀭𑀽𑀧𑀸, 𑀤𑀩𑁆𑀩𑀫𑀦𑀸𑀯𑀺𑀪𑀽𑀢𑀭𑀽𑀧𑀁. 𑀓𑀺𑀭𑀺𑀬𑀸𑀯𑀺𑀲𑁂𑀲𑀩𑁄𑀥𑀳𑁂𑀢𑀼𑀪𑀽𑀢𑀁 𑀧-𑀉𑀧-𑀇𑀢𑀺𑀏𑀯𑀫𑀸𑀤𑀺𑀓𑀁 𑀉𑀧𑀲𑀕𑁆𑀕𑀧𑀤𑀁 𑀦𑀸𑀫. ‘‘𑀘𑀺𑀭𑀧𑁆𑀧𑀯𑀸𑀲𑀺𑀁 (𑀥. 𑀧. 𑁨𑁧𑁯) 𑀉𑀧𑀯𑀼𑀢𑁆𑀣’’𑀦𑁆𑀢𑀺 (𑀅. 𑀦𑀺. 𑁩.𑁭𑁧; 𑀲𑀼. 𑀦𑀺. 𑁪𑁦𑁫) 𑀏𑀯𑀫𑀸𑀤𑀻𑀲𑀼 𑀳𑀺 𑀧-𑀉𑀧𑀸𑀤𑀺𑀲𑀤𑁆𑀤𑀸 𑀯𑀲𑀦𑀸𑀤𑀺𑀓𑀺𑀭𑀺𑀬𑀸𑀬 𑀯𑀺𑀬𑁄𑀕𑀸𑀤𑀺𑀯𑀺𑀲𑀺𑀝𑁆𑀞𑀢𑀁 𑀤𑀻𑀧𑁂𑀦𑁆𑀢𑀺. 𑀯𑀘𑀦𑀢𑁆𑀣𑁄 𑀧𑀦 𑀦𑀸𑀫𑀧𑀤𑀆𑀔𑁆𑀬𑀸𑀢𑀧𑀤𑀤𑁆𑀯𑀬𑀁 𑀉𑀧𑀕𑀦𑁆𑀢𑁆𑀯𑀸 𑀢𑀲𑁆𑀲 𑀧𑀤𑀤𑁆𑀯𑀬𑀲𑁆𑀲 𑀅𑀢𑁆𑀣𑀁 𑀲𑀚𑁆𑀚𑀦𑁆𑀢𑀻𑀢𑀺 𑀉𑀧𑀲𑀕𑁆𑀕𑀸𑀢𑀺 𑀤𑀝𑁆𑀞𑀩𑁆𑀩𑁄. 𑀓𑀺𑀭𑀺𑀬𑀸𑀬 𑀘𑁂𑀯 𑀤𑀩𑁆𑀩𑀲𑁆𑀲 𑀘 𑀲𑀭𑀽𑀧𑀯𑀺𑀲𑁂𑀲𑀧𑀓𑀸𑀲𑀦𑀳𑁂𑀢𑀼𑀪𑀽𑀢𑀁 ‘‘𑀏𑀯𑀁, 𑀇𑀢𑀻’’𑀢𑀺 𑀏𑀯𑀫𑀸𑀤𑀺𑀓𑀁 𑀦𑀺𑀧𑀸𑀢𑀧𑀤𑀁 𑀅𑀲𑁆𑀲𑀧𑀺 𑀲𑀁𑀯𑀡𑁆𑀡𑀦𑀸𑀬𑀧𑀺 𑀇𑀘𑁆𑀙𑀺𑀢𑀢𑁆𑀢𑀸, 𑀅𑀓𑁆𑀔𑀭𑁂𑀦 𑀧𑀦 𑀓𑀣𑀁 𑀕𑀳𑀺𑀢𑁄𑀢𑀺 𑀘𑁂? 𑀅𑀓𑁆𑀔𑀭𑁂𑀳𑀺 𑀲𑀼𑀬𑁆𑀬𑀫𑀸𑀦𑁂𑀳𑀺 𑀲𑀼𑀡𑀦𑁆𑀢𑀸𑀦𑀁 𑀯𑀺𑀲𑁂𑀲𑀯𑀺𑀥𑀸𑀦𑀲𑁆𑀲 𑀓𑀢𑀢𑁆𑀢𑀸 𑀧𑀤𑀧𑀭𑀺𑀬𑁄𑀲𑀸𑀦𑁂 𑀧𑀤𑀢𑁆𑀣𑀲𑀫𑁆𑀧𑀝𑀺𑀧𑀢𑁆𑀢𑀺 𑀳𑁄𑀢𑀺. 𑀢𑀲𑁆𑀫𑀸 𑀅𑀓𑁆𑀔𑀭𑁂𑀦𑀧𑀺 𑀅𑀢𑁆𑀣𑀸𑀓𑀸𑀭𑁄 𑀕𑀳𑀺𑀢𑁄𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀓𑁆𑀔𑀭𑁂𑀳𑀺 𑀲𑀗𑁆𑀓𑀸𑀲𑁂𑀢𑀺, 𑀧𑀤𑁂𑀳𑀺 𑀧𑀓𑀸𑀲𑁂𑀢𑀺, 𑀅𑀓𑁆𑀔𑀭𑁂𑀳𑀺 𑀘 𑀧𑀤𑁂𑀳𑀺 𑀘 𑀉𑀕𑁆𑀖𑀝𑁂𑀢𑀻’’𑀢𑀺 (𑀦𑁂𑀢𑁆𑀢𑀺. 𑁯) 𑀘.

𑀯𑀺𑀯𑀭𑀡𑀸 𑀯𑀺𑀢𑁆𑀣𑀸𑀭𑀡𑀸. 𑀯𑀺𑀪𑀚𑀦𑀸 𑀘 𑀉𑀢𑁆𑀢𑀸𑀦𑀻𑀓𑀫𑁆𑀫𑀜𑁆𑀘 𑀧𑀜𑁆𑀜𑀢𑁆𑀢𑀺 𑀘 𑀯𑀺𑀪𑀚𑀦𑀼𑀢𑁆𑀢𑀸𑀦𑀻𑀓𑀫𑁆𑀫𑀧𑀜𑁆𑀜𑀢𑁆𑀢𑀻𑀢𑀺 𑀲𑀫𑀸𑀳𑀸𑀭𑁂 𑀅𑀬𑀁 𑀤𑁆𑀯𑀦𑁆𑀤𑀲𑀫𑀸𑀲𑁄. 𑀢𑀢𑁆𑀣 𑀯𑀺𑀪𑀸𑀕𑀓𑀭𑀡𑀁 𑀯𑀺𑀪𑀚𑀦𑀁 𑀦𑀸𑀫. 𑀩𑁆𑀬𑀜𑁆𑀚𑀦𑀸𑀓𑀸𑀭𑁂𑀳𑀺 𑀬𑁄 𑀅𑀢𑁆𑀣𑀸𑀓𑀸𑀭𑁄 𑀦𑀺𑀤𑁆𑀤𑀺𑀲𑀺𑀬𑀫𑀸𑀦𑁄, 𑀲𑁄 𑀅𑀢𑁆𑀣𑀸𑀓𑀸𑀭𑁄 𑀯𑀺𑀯𑀭𑀡𑀯𑀺𑀪𑀚𑀦𑀸𑀢𑀺 𑀤𑁆𑀯𑀻𑀳𑀺 𑀅𑀢𑁆𑀣𑀧𑀤𑁂𑀳𑀺 𑀦𑀺𑀤𑁆𑀤𑀺𑀲𑀺𑀢𑁄. 𑀧𑀸𑀓𑀝𑀓𑀭𑀡𑀁 𑀉𑀢𑁆𑀢𑀸𑀦𑀻𑀓𑀫𑁆𑀫𑀁 𑀦𑀸𑀫. 𑀧𑀓𑀸𑀭𑁂𑀳𑀺 𑀜𑀸𑀧𑀦𑀁 𑀧𑀜𑁆𑀜𑀢𑁆𑀢𑀺. 𑀦𑀺𑀭𑀼𑀢𑁆𑀢𑀺𑀦𑀺𑀤𑁆𑀤𑁂𑀲𑀲𑀗𑁆𑀔𑀸𑀢𑁂𑀳𑀺 𑀩𑁆𑀬𑀜𑁆𑀚𑀦𑀧𑀤𑁂𑀳𑀺 𑀧𑀓𑀸𑀲𑀺𑀬𑀫𑀸𑀦𑁄 𑀬𑁄 𑀅𑀢𑁆𑀣𑀸𑀓𑀸𑀭𑁄 𑀅𑀢𑁆𑀣𑀺, 𑀲𑁄 𑀅𑀢𑁆𑀣𑀸𑀓𑀸𑀭𑁄 𑀉𑀢𑁆𑀢𑀸𑀦𑀻𑀓𑀫𑁆𑀫𑀧𑀜𑁆𑀜𑀢𑁆𑀢𑀻𑀳𑀺 𑀧𑀝𑀺𑀦𑀺𑀤𑁆𑀤𑀺𑀲𑀺𑀢𑁄. 𑀏𑀢𑁂𑀳𑀺 𑀲𑀗𑁆𑀓𑀸𑀲𑀦𑀸𑀤𑀻𑀳𑀺 𑀙𑀳𑀺 𑀅𑀢𑁆𑀣𑀧𑀤𑁂𑀳𑀺 𑀅𑀢𑁆𑀣𑁄 𑀲𑀼𑀢𑁆𑀢𑀢𑁆𑀣𑁄 𑀕𑀳𑀺𑀢𑁄, 𑀓𑀫𑁆𑀫𑀜𑁆𑀘 𑀉𑀕𑁆𑀖𑀝𑀦𑀸𑀤𑀺𑀓𑀫𑁆𑀫𑀜𑁆𑀘 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺 𑀅𑀢𑁆𑀣𑁄. 𑀬𑁂𑀦 𑀲𑀼𑀢𑁆𑀢𑀢𑁆𑀣𑁂𑀦 𑀉𑀕𑁆𑀖𑀝𑀺𑀢𑀜𑁆𑀜𑀼𑀦𑁄 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀲𑀫𑁆𑀩𑁄𑀥𑀦𑀓𑀺𑀭𑀺𑀬𑀸𑀲𑀗𑁆𑀔𑀸𑀢𑀲𑁆𑀲 𑀉𑀕𑁆𑀖𑀝𑀦𑀓𑀫𑁆𑀫𑀲𑁆𑀲 𑀦𑀺𑀩𑁆𑀩𑀢𑁆𑀢𑀺 𑀪𑀯𑁂, 𑀲𑁄 𑀲𑀼𑀢𑁆𑀢𑀢𑁆𑀣𑁄 𑀲𑀗𑁆𑀓𑀸𑀲𑀦𑀸𑀧𑀓𑀸𑀲𑀦𑀸𑀓𑀸𑀭𑁄 𑀳𑁄𑀢𑀺. 𑀬𑁂𑀦 𑀲𑀼𑀢𑁆𑀢𑀢𑁆𑀣𑁂𑀦 𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀦𑁄 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀩𑁄𑀥𑀦𑀓𑀺𑀭𑀺𑀬𑀸𑀲𑀗𑁆𑀔𑀸𑀢𑀲𑁆𑀲 𑀯𑀺𑀧𑀜𑁆𑀘𑀦𑀓𑀫𑁆𑀫𑀲𑁆𑀲 𑀦𑀺𑀩𑁆𑀩𑀢𑁆𑀢𑀺, 𑀲𑁄 𑀲𑀼𑀢𑁆𑀢𑀢𑁆𑀣𑁄 𑀯𑀺𑀯𑀭𑀡𑀸𑀯𑀺𑀪𑀚𑀦𑀸𑀓𑀸𑀭𑁄 𑀳𑁄𑀢𑀺. 𑀬𑁂𑀦 𑀲𑀼𑀢𑁆𑀢𑀢𑁆𑀣𑁂𑀦 𑀦𑁂𑀬𑁆𑀬𑀲𑁆𑀲 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀧𑀩𑁄𑀥𑀦𑀓𑀺𑀭𑀺𑀬𑀸𑀲𑀗𑁆𑀔𑀸𑀢𑀲𑁆𑀲 𑀦𑀬𑀓𑀫𑁆𑀫𑀲𑁆𑀲 𑀦𑀺𑀩𑁆𑀩𑀢𑁆𑀢𑀺, 𑀲𑁄 𑀲𑀼𑀢𑁆𑀢𑀢𑁆𑀣𑁄 𑀉𑀢𑁆𑀢𑀸𑀦𑀻𑀓𑀫𑁆𑀫𑀧𑀜𑁆𑀜𑀢𑁆𑀢𑀸𑀓𑀸𑀭𑁄 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑁄. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀘𑀭𑀺𑀬𑁄 ‘‘𑀲𑀼𑀢𑁆𑀢𑀢𑁆𑀣𑁂𑀦 𑀳𑀺 𑀤𑁂𑀲𑀦𑀸𑀬 𑀧𑀯𑀢𑁆𑀢𑀺𑀬𑀫𑀸𑀦𑁂𑀦 𑀉𑀕𑁆𑀖𑀝𑀺𑀢𑀜𑁆𑀜𑀼𑀆𑀤𑀺𑀯𑁂𑀦𑁂𑀬𑁆𑀬𑀸𑀦𑀁 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀧𑀩𑁄𑀥𑀦𑀓𑀺𑀭𑀺𑀬𑀸𑀦𑀺𑀩𑁆𑀩𑀢𑁆𑀢𑀺, 𑀲𑁄 𑀘 𑀲𑀼𑀢𑁆𑀢𑀢𑁆𑀣𑁄 𑀲𑀗𑁆𑀓𑀸𑀲𑀦𑀸𑀤𑀺𑀆𑀓𑀸𑀭𑁄’’𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁨𑁪).

‘‘𑀬𑀣𑀸𑀯𑀼𑀢𑁆𑀢𑁂𑀳𑀺 𑀢𑀻𑀳𑀺 𑀅𑀢𑁆𑀣𑀦𑀬𑁂𑀳𑀺 𑀘𑁂𑀯 𑀙𑀳𑀺 𑀅𑀢𑁆𑀣𑀧𑀤𑁂𑀳𑀺 𑀘 𑀅𑀬𑀼𑀢𑁆𑀢𑁄𑀧𑀺 𑀅𑀢𑁆𑀣𑁄 𑀓𑀺𑀁 𑀓𑁄𑀘𑀺 𑀅𑀢𑁆𑀣𑀺, 𑀉𑀤𑀸𑀳𑀼 𑀲𑀩𑁆𑀩𑁄 𑀅𑀢𑁆𑀣𑁄 𑀬𑀼𑀢𑁆𑀢𑁄 𑀏𑀯𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑁋

𑁨𑁫. ‘‘𑀢𑀻𑀡𑀺 𑀘 𑀦𑀬𑀸 𑀅𑀦𑀽𑀦𑀸, 𑀅𑀢𑁆𑀣𑀲𑁆𑀲 𑀘 𑀙𑀧𑁆𑀧𑀤𑀸𑀦𑀺 𑀕𑀡𑀺𑀢𑀸𑀦𑀺.

𑀦𑀯𑀳𑀺 𑀧𑀤𑁂𑀳𑀺 𑀪𑀕𑀯𑀢𑁄, 𑀯𑀘𑀦𑀲𑁆𑀲𑀢𑁆𑀣𑁄 𑀲𑀫𑀸𑀬𑀼𑀢𑁆𑀢𑁄’’𑀢𑀺. 𑁋

𑀕𑀸𑀣𑀫𑀸𑀳. 𑀢𑀢𑁆𑀣 𑀢𑀻𑀡𑀻𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀦𑀺𑀤𑁆𑀤𑁂𑀲𑁄, 𑀢𑀬𑁄𑀢𑀺 𑀧𑀦 𑀧𑀓𑀢𑀺𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄 𑀯𑀢𑁆𑀢𑀩𑁆𑀩𑁄. 𑀕𑀡𑀺𑀢𑀸 𑀅𑀦𑀽𑀦𑀸 𑀢𑀬𑁄 𑀅𑀢𑁆𑀣𑀲𑁆𑀲 𑀦𑀬𑀸 𑀘 𑀕𑀡𑀺𑀢𑀸𑀦𑀺 𑀅𑀦𑀽𑀦𑀸𑀦𑀺 𑀙 𑀅𑀢𑁆𑀣𑀲𑁆𑀲 𑀧𑀤𑀸𑀦𑀺 𑀘 𑀦𑀺𑀤𑁆𑀤𑀺𑀝𑁆𑀞𑀸𑀦𑀺, 𑀦𑀺𑀤𑁆𑀤𑀺𑀝𑁆𑀞𑁂𑀳𑀺 𑀘 𑀅𑀢𑁆𑀣𑀧𑀤𑁂𑀳𑀺 𑀪𑀕𑀯𑀢𑁄 𑀯𑀘𑀦𑀲𑁆𑀲 𑀲𑀩𑁆𑀩𑁄 𑀅𑀢𑁆𑀣𑁄 𑀲𑀫𑀸𑀬𑀼𑀢𑁆𑀢𑁄𑀯 𑀅𑀬𑀼𑀢𑁆𑀢𑁄 𑀓𑁄𑀘𑀺 𑀅𑀢𑁆𑀣𑁄 𑀦𑀢𑁆𑀣𑀻𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀅𑀢𑁆𑀣𑀲𑁆𑀲𑀸𑀢𑀺 𑀲𑀼𑀢𑁆𑀢𑀢𑁆𑀣𑀲𑁆𑀲. 𑀦𑀬𑀸𑀢𑀺 𑀦𑁂𑀢𑁆𑀢𑀺𑀅𑀢𑁆𑀣𑀦𑀬𑀸. 𑀧𑀤𑀸𑀦𑀻𑀢𑀺 𑀦𑁂𑀢𑁆𑀢𑀺𑀅𑀢𑁆𑀣𑀧𑀤𑀸𑀦𑀺.

𑁨𑁬. 𑀬𑁂 𑀳𑀸𑀭𑀸𑀤𑀬𑁄 𑀦𑀺𑀤𑁆𑀤𑀺𑀝𑁆𑀞𑀸, 𑀢𑁂 𑀳𑀸𑀭𑀸𑀤𑀬𑁄 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀲𑁆𑀲 𑀧𑀤𑀢𑁆𑀣𑁂 𑀲𑀼𑀔𑀕𑁆𑀕𑀳𑀡𑀢𑁆𑀣𑀁 𑀕𑀡𑀦𑀯𑀲𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀢𑁆𑀣𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀢𑁆𑀣𑀲𑁆𑀲 𑀲𑀫𑀽𑀳𑀲𑁆𑀲 𑀅𑀯𑀬𑀯𑀪𑀽𑀢𑀸𑀦𑀺 𑀦𑀯𑀪𑁂𑀤𑀸𑀦𑀺 𑀅𑀢𑁆𑀣𑀧𑀤𑀸𑀦𑀺 𑀲𑀼𑀢𑁆𑀢𑀩𑁆𑀬𑀜𑁆𑀚𑀦𑀲𑁆𑀲 𑀅𑀢𑁆𑀣𑀲𑁆𑀲 𑀧𑀭𑀺𑀬𑁂𑀝𑁆𑀞𑀺𑀲𑀗𑁆𑀔𑀸𑀢𑀸𑀬 𑀲𑀁𑀯𑀡𑁆𑀡𑀦𑀸𑀬 𑀕𑀡𑀦𑀢𑁄 𑀘𑀢𑀼𑀯𑀻𑀲𑀢𑀺 𑀩𑁆𑀬𑀜𑁆𑀚𑀦𑀧𑀤𑀸𑀦𑀺 𑀳𑁄𑀦𑁆𑀢𑀺, 𑀅𑀢𑁆𑀣𑀧𑀤𑀩𑁆𑀬𑀜𑁆𑀚𑀦𑀧𑀤𑀪𑀽𑀢𑀁 𑀉𑀪𑀬𑀁 𑀲𑀗𑁆𑀔𑁂𑀧𑀬𑀢𑁄 𑀲𑀫𑁆𑀧𑀺𑀡𑁆𑀟𑀬𑀢𑁄 𑀢𑁂𑀢𑁆𑀢𑀺𑀁𑀲𑀸 𑀢𑁂𑀢𑁆𑀢𑀺𑀁𑀲𑀯𑀺𑀥𑀸 𑀏𑀢𑁆𑀢𑀺𑀓𑀸 𑀢𑁂𑀢𑁆𑀢𑀺𑀁𑀲𑀯𑀺𑀥𑀸𑀯 𑀦𑁂𑀢𑁆𑀢𑀻𑀢𑀺 𑀬𑁄𑀚𑀦𑀸.

𑀢𑀢𑁆𑀣 𑀦𑀯𑀧𑁆𑀧𑀤𑀸𑀦𑀻𑀢𑀺 𑀢𑀬𑁄 𑀅𑀢𑁆𑀣𑀦𑀬𑀸, 𑀙 𑀅𑀢𑁆𑀣𑀧𑀤𑀸𑀦𑀺 𑀘. 𑀘𑀢𑀼𑀩𑁆𑀩𑀻𑀲𑀸𑀢𑀺 𑀲𑁄𑀴𑀲 𑀳𑀸𑀭𑀸, 𑀙 𑀩𑁆𑀬𑀜𑁆𑀚𑀦𑀧𑀤𑀸𑀦𑀺, 𑀤𑁆𑀯𑁂 𑀤𑀺𑀲𑀸𑀮𑁄𑀘𑀦𑀦𑀬𑀅𑀗𑁆𑀓𑀼𑀲𑀦𑀬𑀸 𑀘𑀸𑀢𑀺 𑀏𑀯𑀁 𑀢𑁂𑀢𑁆𑀢𑀺𑀁𑀲𑀯𑀺𑀥𑀸 𑀘 𑀦𑁂𑀢𑁆𑀢𑀺 𑀦𑀸𑀫, 𑀇𑀢𑁄 𑀯𑀺𑀦𑀺𑀫𑀼𑀢𑁆𑀢𑁄 𑀅𑀜𑁆𑀜𑁄 𑀓𑁄𑀘𑀺 𑀦𑁂𑀢𑁆𑀢𑀺𑀧𑀤𑀢𑁆𑀣𑁄 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

‘‘𑀏𑀯𑀁 𑀢𑁂𑀢𑁆𑀢𑀺𑀁𑀲𑀧𑀤𑀢𑁆𑀣𑀸𑀬 𑀦𑁂𑀢𑁆𑀢𑀺𑀬𑀸 𑀳𑀸𑀭𑀦𑀬𑀸𑀦𑀁 𑀓𑀢𑀫𑁄 𑀤𑁂𑀲𑀦𑀸𑀳𑀸𑀭𑀯𑀺𑀘𑀬𑀳𑀸𑀭𑁄’’𑀢𑀺𑀆𑀤𑀺 𑀤𑁂𑀲𑀦𑀸𑀓𑁆𑀓𑀫𑁂𑀦𑁂𑀯 𑀲𑀺𑀤𑁆𑀥𑁄, 𑀏𑀯𑀁 𑀲𑀺𑀤𑁆𑀥𑁂 𑀲𑀢𑀺𑀧𑀺 ‘‘𑀲𑁄𑀴𑀲 𑀳𑀸𑀭𑀸 𑀧𑀞𑀫’’𑀦𑁆𑀢𑀺 𑀆𑀭𑀫𑁆𑀪𑁄 ‘‘𑀲𑀩𑁆𑀩𑁂𑀧𑀺𑀫𑁂 𑀳𑀸𑀭𑀸 𑀘𑁂𑀯 𑀦𑀬𑀸 𑀘 𑀇𑀫𑀺𑀦𑀸 𑀤𑀲𑁆𑀲𑀺𑀢𑀓𑁆𑀓𑀫𑁂𑀦𑁂𑀯 𑀲𑀁𑀯𑀡𑁆𑀡𑁂𑀢𑀩𑁆𑀩𑁂𑀲𑀼 𑀲𑀼𑀢𑁆𑀢𑁂𑀲𑀼 𑀲𑀁𑀯𑀡𑁆𑀡𑀦𑀸𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀸, 𑀦 𑀉𑀧𑁆𑀧𑀝𑀺𑀧𑀸𑀝𑀺𑀬𑀸’’𑀢𑀺 𑀇𑀫𑀫𑀢𑁆𑀣𑀁 𑀤𑀻𑀧𑁂𑀢𑀺. 𑀤𑀻𑀧𑀦𑀯𑀘𑀦𑀲𑀯𑀦𑀸𑀦𑀼𑀲𑀸𑀭𑁂𑀦 𑀜𑀸𑀧𑁂𑀢𑀺, 𑀢𑀲𑁆𑀫𑀸 𑀏𑀯𑀁 𑀓𑀫𑁄 𑀤𑀲𑁆𑀲𑀺𑀢𑁄, 𑀅𑀲𑁆𑀲𑀸𑀤𑀸𑀤𑀻𑀦𑀯𑀦𑀺𑀲𑁆𑀲𑀭𑀡𑀸𑀦𑀺 𑀥𑀫𑁆𑀫𑀤𑁂𑀲𑀦𑀸𑀬 𑀦𑀺𑀲𑁆𑀲𑀬𑀸𑀦𑀺, 𑀨𑀮𑀜𑁆𑀘 𑀥𑀫𑁆𑀫𑀤𑁂𑀲𑀦𑀸𑀬 𑀨𑀮𑀁, 𑀉𑀧𑀸𑀬𑁄 𑀘 𑀥𑀫𑁆𑀫𑀤𑁂𑀲𑀦𑀸𑀬 𑀉𑀧𑀸𑀬𑁄, 𑀆𑀡𑀢𑁆𑀢𑀺 𑀘 𑀥𑀫𑁆𑀫𑀤𑁂𑀲𑀦𑀸𑀬 𑀲𑀭𑀻𑀭𑀁. 𑀤𑁂𑀲𑀦𑀸𑀳𑀸𑀭𑀲𑁆𑀲 𑀢𑀸𑀲𑀁 𑀅𑀲𑁆𑀲𑀸𑀤𑀸𑀤𑀻𑀦𑀯𑀦𑀺𑀲𑁆𑀲𑀭𑀡𑀨𑀮𑀼𑀧𑀸𑀬𑀸𑀡𑀢𑁆𑀢𑀻𑀦𑀁 𑀯𑀺𑀪𑀸𑀯𑀦𑀲𑀪𑀸𑀯𑀢𑁆𑀢𑀸.

𑀦𑀺𑀤𑁆𑀥𑀸𑀭𑀡𑁂𑀦 𑀯𑀺𑀦𑀸𑀧𑀺 𑀧𑀓𑀢𑀺𑀬𑀸 𑀲𑀩𑁆𑀩𑀲𑀁𑀯𑀡𑁆𑀡𑁂𑀢𑀩𑁆𑀩𑀲𑀼𑀢𑁆𑀢𑁂𑀲𑀼 𑀅𑀦𑀭𑀽𑀧𑀸𑀢𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸, 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀸𑀦𑀁 𑀯𑀺𑀘𑀬𑀳𑀸𑀭𑀸𑀤𑀻𑀦𑀁 𑀦𑀺𑀲𑁆𑀲𑀬𑀪𑀸𑀯𑀢𑁄 𑀘 𑀧𑀞𑀫𑀁 𑀤𑁂𑀲𑀦𑀸𑀳𑀸𑀭𑁄 𑀤𑀲𑁆𑀲𑀺𑀢𑁄.