𑁯. 𑀧𑁄𑀝𑁆𑀞𑀧𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑀧𑁄𑀝𑁆𑀞𑀧𑀸𑀤𑀧𑀭𑀺𑀩𑁆𑀩𑀸𑀚𑀓𑀯𑀢𑁆𑀣𑀼𑀯𑀡𑁆𑀡𑀦𑀸

𑁪𑁦𑁬. 𑀏𑀯𑀁 𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢𑀁 𑀲𑀁𑀯𑀡𑁆𑀡𑁂𑀢𑁆𑀯𑀸 𑀇𑀤𑀸𑀦𑀺 𑀧𑁄𑀝𑁆𑀞𑀧𑀸𑀤𑀲𑀼𑀢𑁆𑀢𑀁 𑀲𑀁𑀯𑀡𑁆𑀡𑁂𑀦𑁆𑀢𑁄 𑀬𑀣𑀸𑀦𑀼𑀧𑀼𑀩𑁆𑀩𑀁 𑀲𑀁𑀯𑀡𑁆𑀡𑀦𑁄𑀓𑀸𑀲𑀲𑁆𑀲 𑀧𑀢𑁆𑀢𑀪𑀸𑀯𑀁 𑀯𑀺𑀪𑀸𑀯𑁂𑀢𑀼𑀁, 𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢𑀲𑁆𑀲𑀸𑀦𑀦𑁆𑀢𑀭𑀁 𑀲𑀗𑁆𑀕𑀻𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀧𑁄𑀝𑁆𑀞𑀧𑀸𑀤𑀲𑀼𑀢𑁆𑀢𑀪𑀸𑀯𑀁 𑀯𑀸 𑀧𑀓𑀸𑀲𑁂𑀢𑀼𑀁 ‘‘𑀏𑀯𑀁 𑀫𑁂 𑀲𑀼𑀢𑀁…𑀧𑁂… 𑀲𑀸𑀯𑀢𑁆𑀣𑀺𑀬𑀦𑁆𑀢𑀺 𑀧𑁄𑀝𑁆𑀞𑀧𑀸𑀤𑀲𑀼𑀢𑁆𑀢’’𑀦𑁆𑀢𑀺 𑀆𑀳. ‘‘𑀲𑀸𑀯𑀢𑁆𑀣𑀺𑀬’’𑀦𑁆𑀢𑀺 𑀇𑀤𑀁 𑀲𑀫𑀻𑀧𑀢𑁆𑀣𑁂 𑀪𑀼𑀫𑁆𑀫𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀸𑀯𑀢𑁆𑀣𑀺𑀁 𑀉𑀧𑀦𑀺𑀲𑁆𑀲𑀸𑀬𑀸’’𑀢𑀺 𑀯𑀼𑀢𑁆𑀢𑀁, 𑀘𑀻𑀯𑀭𑀸𑀤𑀺𑀧𑀘𑁆𑀘𑀬𑀧𑀝𑀺𑀩𑀤𑁆𑀥𑀢𑀸𑀬 𑀉𑀧𑀦𑀺𑀲𑁆𑀲𑀬𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀚𑁂𑀢𑁄 𑀦𑀸𑀫 𑀭𑀸𑀚𑀓𑀼𑀫𑀸𑀭𑁄, 𑀢𑁂𑀦 𑀭𑁄𑀧𑀺𑀢𑀢𑁆𑀢𑀸 𑀲𑀁𑀯𑀟𑁆𑀠𑀺𑀢𑀢𑁆𑀢𑀸 𑀧𑀭𑀺𑀧𑀸𑀮𑀺𑀢𑀢𑁆𑀢𑀸 𑀚𑁂𑀢𑀲𑁆𑀲 𑀯𑀦𑀁 𑀉𑀧𑀯𑀦𑀦𑁆𑀢𑀺 𑀅𑀢𑁆𑀣𑀫𑀸𑀳 ‘‘𑀚𑁂𑀢𑀲𑁆𑀲 𑀓𑀼𑀫𑀸𑀭𑀲𑁆𑀲 𑀯𑀦𑁂’’𑀢𑀺. 𑀲𑀼𑀤𑀢𑁆𑀢𑁄 𑀦𑀸𑀫 𑀕𑀳𑀧𑀢𑀺 𑀅𑀦𑀸𑀣𑀸𑀦𑀁 𑀧𑀺𑀡𑁆𑀟𑀲𑁆𑀲 𑀤𑀸𑀬𑀓𑀢𑁆𑀢𑀸 𑀅𑀦𑀸𑀣𑀧𑀺𑀡𑁆𑀟𑀺𑀓𑁄. 𑀢𑁂𑀦 𑀚𑁂𑀢𑀲𑁆𑀲 𑀳𑀢𑁆𑀣𑀢𑁄 𑀅𑀝𑁆𑀞𑀸𑀭𑀲𑀳𑀺𑀭𑀜𑁆𑀜𑀓𑁄𑀝𑀺𑀲𑀦𑁆𑀣𑀭𑀡𑁂𑀦 𑀢𑀁 𑀓𑀺𑀡𑀺𑀢𑁆𑀯𑀸 𑀅𑀝𑁆𑀞𑀸𑀭𑀲𑀳𑀺𑀭𑀜𑁆𑀜𑀓𑁄𑀝𑀻𑀳𑁂𑀯 𑀲𑁂𑀦𑀸𑀲𑀦𑀁 𑀓𑀸𑀭𑀸𑀧𑁂𑀢𑁆𑀯𑀸 𑀅𑀝𑁆𑀞𑀸𑀭𑀲𑀳𑀺𑀭𑀜𑁆𑀜𑀓𑁄𑀝𑀻𑀳𑁂𑀯 𑀯𑀺𑀳𑀸𑀭𑀫𑀳𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀏𑀯𑀁 𑀘𑀢𑀼𑀧𑀜𑁆𑀜𑀸𑀲𑀳𑀺𑀭𑀜𑁆𑀜𑀓𑁄𑀝𑀺𑀧𑀭𑀺𑀘𑁆𑀘𑀸𑀕𑁂𑀦 𑀲𑁄 𑀆𑀭𑀸𑀫𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀦𑀺𑀬𑁆𑀬𑀸𑀢𑀺𑀢𑁄. 𑀢𑁂𑀦𑀸𑀳 ‘‘𑀅𑀦𑀸𑀣𑀧𑀺𑀡𑁆𑀟𑀺𑀓𑁂𑀦 𑀕𑀳𑀧𑀢𑀺𑀦𑀸 𑀆𑀭𑀸𑀫𑁄 𑀓𑀸𑀭𑀺𑀢𑁄’’𑀢𑀺. 𑀧𑀼𑀧𑁆𑀨𑀨𑀮𑀧𑀮𑁆𑀮𑀯𑀸𑀤𑀺𑀕𑀼𑀡𑀲𑀫𑁆𑀧𑀢𑁆𑀢𑀺𑀬𑀸, 𑀧𑀸𑀡𑀺𑀦𑁄 𑀦𑀺𑀯𑀸𑀲𑀨𑀸𑀲𑀼𑀢𑀸𑀤𑀺𑀦𑀸 𑀯𑀸 𑀯𑀺𑀲𑁂𑀲𑁂𑀦 𑀧𑀩𑁆𑀩𑀚𑀺𑀢𑀸 𑀢𑀢𑁄 𑀢𑀢𑁄 𑀆𑀕𑀫𑁆𑀫 𑀭𑀫𑀦𑁆𑀢𑀺 𑀅𑀦𑀼𑀓𑁆𑀓𑀡𑁆𑀞𑀺𑀢𑀸 𑀳𑀼𑀢𑁆𑀯𑀸 𑀦𑀺𑀯𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀆𑀭𑀸𑀫𑁄. 𑀅𑀣 𑀯𑀸 𑀬𑀣𑀸𑀯𑀼𑀢𑁆𑀢𑀕𑀼𑀡𑀲𑀫𑁆𑀧𑀢𑁆𑀢𑀺𑀬𑀸 𑀢𑀢𑁆𑀣 𑀢𑀢𑁆𑀣 𑀕𑀢𑁂𑀧𑀺 𑀅𑀢𑁆𑀢𑀦𑁄 𑀅𑀩𑁆𑀪𑀦𑁆𑀢𑀭𑁂 𑀆𑀦𑁂𑀢𑁆𑀯𑀸 𑀭𑀫𑁂𑀢𑀻𑀢𑀺 𑀆𑀭𑀸𑀫𑁄.

𑀨𑁄𑀝𑁄 𑀬𑀲𑁆𑀲 𑀧𑀸𑀤𑁂𑀲𑀼 𑀚𑀸𑀢𑁄𑀢𑀺 𑀧𑁄𑀝𑁆𑀞𑀧𑀸𑀤𑁄. 𑀨𑁄𑀝𑁄 𑀧𑁄𑀝𑁆𑀞𑁄𑀢𑀺 𑀳𑀺 𑀧𑀭𑀺𑀬𑀸𑀬𑁄. 𑀧𑀭𑀺𑀩𑁆𑀩𑀸𑀚𑀓𑁄 𑀤𑀼𑀯𑀺𑀥𑁄 𑀙𑀦𑁆𑀦𑀧𑀭𑀺𑀩𑁆𑀩𑀸𑀚𑀓𑁄, 𑀅𑀘𑁆𑀙𑀦𑁆𑀦𑀧𑀭𑀺𑀩𑁆𑀩𑀸𑀚𑀓𑁄 𑀘. 𑀢𑀢𑁆𑀣 𑀅𑀘𑁆𑀙𑀦𑁆𑀦𑀧𑀭𑀺𑀩𑁆𑀩𑀸𑀚𑀓𑁄𑀧𑀺 𑀅𑀘𑁂𑀮𑀓𑁄 𑀆𑀚𑀻𑀯𑀓𑁄𑀢𑀺 𑀤𑀼𑀯𑀺𑀥𑁄. 𑀢𑁂𑀲𑀼 𑀅𑀘𑁂𑀮𑀓𑁄 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀦𑀕𑁆𑀕𑁄, 𑀆𑀚𑀻𑀯𑀓𑁄 𑀧𑀦 𑀉𑀧𑀭𑀺 𑀏𑀓𑀫𑁂𑀯 𑀯𑀢𑁆𑀣𑀁 𑀉𑀧𑀓𑀘𑁆𑀙𑀓𑀦𑁆𑀢𑀭𑁂 𑀧𑀯𑁂𑀲𑁂𑀢𑁆𑀯𑀸 𑀧𑀭𑀺𑀳𑀭𑀢𑀺, 𑀳𑁂𑀝𑁆𑀞𑀸 𑀦𑀕𑁆𑀕𑁄. 𑀅𑀬𑀁 𑀧𑀦 𑀤𑀼𑀯𑀺𑀥𑁄𑀧𑁂𑀲 𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀙𑀦𑁆𑀦𑀧𑀭𑀺𑀩𑁆𑀩𑀸𑀚𑀓𑁄’’𑀢𑀺, 𑀯𑀢𑁆𑀣𑀘𑁆𑀙𑀸𑀬𑀸𑀙𑀸𑀤𑀦𑀧𑀩𑁆𑀩𑀚𑁆𑀚𑀽𑀧𑀕𑀢𑀢𑁆𑀢𑀸 𑀙𑀦𑁆𑀦𑀧𑀭𑀺𑀩𑁆𑀩𑀸𑀚𑀓𑀲𑀗𑁆𑀔𑁆𑀬𑀁 𑀕𑀢𑁄𑀢𑀺 𑀅𑀢𑁆𑀣𑁄. 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑁄𑀢𑀺 𑀫𑀳𑀸𑀯𑀺𑀪𑀯𑀢𑀸𑀬 𑀫𑀳𑀸𑀲𑀸𑀭𑀢𑀁 𑀧𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑁄. 𑀕𑀡𑀸𑀘𑀭𑀺𑀬𑁄𑀢𑀺 𑀲𑀸𑀧𑁂𑀓𑁆𑀔𑀢𑀸𑀬 𑀲𑀫𑀸𑀲𑁄. 𑀲𑀫𑀬𑀦𑁆𑀢𑀺 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁄, 𑀏𑀓𑀲𑁂𑀲𑀦𑀺𑀤𑁆𑀤𑁂𑀲𑁄 𑀯𑀸, 𑀢𑀁 𑀢𑀁 𑀲𑀫𑀬𑀦𑁆𑀢𑀺 𑀅𑀢𑁆𑀣𑁄. 𑀧𑀯𑀤𑀦𑁆𑀢𑀻𑀢𑀺 𑀧𑀓𑀸𑀭𑀢𑁄 𑀯𑀤𑀦𑁆𑀢𑀺, 𑀅𑀢𑁆𑀢𑀦𑀸 𑀅𑀢𑁆𑀢𑀦𑀸 𑀉𑀕𑁆𑀕𑀳𑀺𑀢𑀦𑀺𑀬𑀸𑀫𑁂𑀦 𑀬𑀣𑀸 𑀢𑀣𑀸 𑀲𑀫𑀬𑀁 𑀯𑀤𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀸𑀭𑀼𑀓𑁆𑀔𑁄𑀢𑀺 𑀢𑀲𑁆𑀲 𑀦𑀸𑀫𑀁. 𑀧𑀪𑀼𑀢𑀺 𑀲𑀤𑁆𑀤𑁂𑀦 𑀢𑁄𑀤𑁂𑀬𑁆𑀬𑀚𑀸𑀡𑀼𑀲𑁄𑀡𑀻𑀲𑁄𑀡𑀤𑀡𑁆𑀟𑀓𑀽𑀝𑀤𑀦𑁆𑀢𑀸𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺, 𑀆𑀤𑀺𑀲𑀤𑁆𑀤𑁂𑀦 𑀧𑀦 𑀙𑀦𑁆𑀦𑀧𑀭𑀺𑀩𑁆𑀩𑀸𑀚𑀓𑀸𑀤𑀺𑀓𑁂. 𑀢𑀺𑀦𑁆𑀤𑀼𑀓𑁄 𑀦𑀸𑀫 𑀓𑀸𑀴𑀓𑁆𑀔𑀦𑁆𑀥𑀭𑀼𑀓𑁆𑀔𑁄. 𑀘𑀻𑀭𑀦𑁆𑀢𑀺 𑀧𑀦𑁆𑀢𑀺. 𑀢𑀺𑀦𑁆𑀤𑀼𑀓𑀸 𑀘𑀻𑀭𑀁 𑀏𑀢𑁆𑀣 𑀲𑀦𑁆𑀢𑀻𑀢𑀺 𑀢𑀺𑀦𑁆𑀤𑀼𑀓𑀘𑀻𑀭𑁄. 𑀢𑀣𑀸 𑀏𑀓𑀸 𑀲𑀸𑀮𑀸 𑀏𑀢𑁆𑀣𑀸𑀢𑀺 𑀏𑀓𑀲𑀸𑀮𑀓𑁄. 𑀪𑀽𑀢𑀧𑀼𑀩𑁆𑀩𑀕𑀢𑀺𑀬𑀸 𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀲𑁆𑀫𑀸’’𑀢𑀺𑀆𑀤𑀺𑀫𑀸𑀳. 𑀇𑀢𑀺 𑀓𑀢𑁆𑀯𑀸𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦. ‘‘𑀢𑀲𑁆𑀫𑀺’’𑀦𑁆𑀢𑀺𑀆𑀤𑀺𑀦𑀸 𑀬𑀣𑀸𑀧𑀸𑀞𑀁 𑀯𑀺𑀪𑀢𑁆𑀬𑀦𑁆𑀢𑀤𑀲𑁆𑀲𑀦𑀁.

𑀅𑀦𑁂𑀓𑀸𑀓𑀸𑀭𑀸𑀦𑀯𑀲𑁂𑀲𑀜𑁂𑀬𑁆𑀬𑀢𑁆𑀣𑀯𑀺𑀪𑀸𑀕𑀢𑁄, 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺𑀢𑁄 𑀘 𑀪𑀕𑀯𑀢𑁄 𑀜𑀸𑀡𑀁 𑀮𑁄𑀓𑁂 𑀧𑀢𑁆𑀣𑀝𑀫𑀺𑀯 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀢𑁆𑀣𑀭𑀺𑀢𑁆𑀯𑀸’’𑀢𑀺, 𑀬𑀢𑁄 𑀢𑀲𑁆𑀲 𑀜𑀸𑀡𑀚𑀸𑀮𑀢𑀸 𑀯𑀼𑀘𑁆𑀘𑀢𑀺. 𑀯𑁂𑀦𑁂𑀬𑁆𑀬𑀸𑀦𑀁 𑀢𑀤𑀦𑁆𑀢𑁄𑀕𑀥𑀪𑀸𑀯𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀯. 𑀯𑁂𑀦𑁂𑀬𑁆𑀬𑀲𑀢𑁆𑀢𑀧𑀭𑀺𑀕𑁆𑀕𑀡𑁆𑀳𑀦𑀢𑁆𑀣𑀁 𑀲𑀫𑀦𑁆𑀦𑀸𑀳𑀸𑀭𑁂 𑀓𑀢𑁂 𑀧𑀞𑀫𑀁 𑀦𑁂𑀲𑀁 𑀯𑁂𑀦𑁂𑀬𑁆𑀬𑀪𑀸𑀯𑁂𑀦𑁂𑀯 𑀉𑀧𑀝𑁆𑀞𑀸𑀦𑀁 𑀳𑁄𑀢𑀺, 𑀅𑀣 𑀲𑀭𑀡𑀕𑀫𑀦𑀸𑀤𑀺𑀯𑀲𑁂𑀦 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺 𑀯𑀻𑀫𑀁𑀲𑀻𑀬𑀢𑀻𑀢𑀺 𑀆𑀳 ‘‘𑀓𑀺𑀦𑁆𑀦𑀼 𑀔𑁄 𑀪𑀯𑀺𑀲𑁆𑀲𑀢𑀻𑀢𑀺 𑀉𑀧𑀧𑀭𑀺𑀓𑁆𑀔𑀦𑁆𑀢𑁄’’𑀢𑀺. 𑀦𑀺𑀭𑁄𑀥𑀦𑁆𑀢𑀺 𑀲𑀜𑁆𑀜𑀸𑀦𑀺𑀭𑁄𑀥𑀁. 𑀦𑀺𑀭𑁄𑀥𑀸 𑀯𑀼𑀝𑁆𑀞𑀸𑀦𑀦𑁆𑀢𑀺 𑀢𑀢𑁄 𑀦𑀺𑀭𑁄𑀥𑀢𑁄 𑀯𑀼𑀝𑁆𑀞𑀸𑀦𑀁 𑀲𑀜𑁆𑀜𑀼𑀧𑁆𑀧𑀢𑁆𑀢𑀺𑀁. 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀜𑀸𑀡𑁂𑀦 𑀲𑀁𑀲𑀦𑁆𑀤𑀺𑀢𑁆𑀯𑀸𑀢𑀺 𑀬𑀣𑀸 𑀢𑁂 𑀦𑀺𑀭𑁄𑀥𑀁, 𑀦𑀺𑀭𑁄𑀥𑀢𑁄 𑀯𑀼𑀝𑁆𑀞𑀸𑀦𑀜𑁆𑀘 𑀩𑁆𑀬𑀸𑀓𑀭𑀺𑀁𑀲𑀼, 𑀩𑁆𑀬𑀸𑀓𑀭𑀺𑀲𑁆𑀲𑀦𑁆𑀢𑀺 𑀘, 𑀢𑀣𑀸 𑀩𑁆𑀬𑀸𑀓𑀭𑀡𑀯𑀲𑁂𑀦 𑀲𑀁𑀲𑀦𑁆𑀤𑀺𑀢𑁆𑀯𑀸. 𑀓𑀢𑀺𑀧𑀸𑀳𑀘𑁆𑀘𑀬𑁂𑀦𑀸𑀢𑀺 𑀤𑁆𑀯𑀻𑀳𑀢𑀻𑀳𑀘𑁆𑀘𑀬𑁂𑀦. 𑀧𑀸𑀴𑀺𑀬𑀫𑁂𑀯 𑀳𑀺 𑀇𑀫𑀫𑀢𑁆𑀣𑀁 𑀯𑀓𑁆𑀔𑀢𑀺. 𑀲𑀭𑀡𑀁 𑀕𑀫𑀺𑀲𑁆𑀲𑀢𑀻𑀢𑀺 ‘‘𑀲𑀭𑀡’’𑀫𑀺𑀢𑀺 𑀕𑀫𑀺𑀲𑁆𑀲𑀢𑀺. ‘‘𑀳𑀢𑁆𑀣𑀺𑀲𑀸𑀭𑀺𑀧𑀼𑀢𑁆𑀢𑁄𑀢𑀺 𑀳𑀢𑁆𑀣𑀺𑀲𑀸𑀭𑀺𑀦𑁄 𑀧𑀼𑀢𑁆𑀢𑁄’’𑀢𑀺 (𑀤𑀻. 𑀦𑀺. 𑀝𑀻. 𑁧.𑁪𑁦𑁬) 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑀁. 𑀅𑀥𑀼𑀦𑀸 𑀧𑀦 ‘‘𑀘𑀺𑀢𑁆𑀢𑁄 𑀳𑀢𑁆𑀣𑀺𑀲𑀸𑀭𑀺𑀧𑀼𑀢𑁆𑀢𑁄’’ 𑀢𑁆𑀯𑁂𑀯 𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀘𑀺𑀢𑁆𑀢𑁄 𑀦𑀸𑀫 𑀳𑀢𑁆𑀣𑀸𑀘𑀭𑀺𑀬𑀲𑁆𑀲 𑀧𑀼𑀢𑁆𑀢𑁄𑀢𑀺 𑀅𑀢𑁆𑀣𑁄.

𑀲𑀼𑀭𑀢𑁆𑀢𑀤𑀼𑀧𑀝𑁆𑀝𑀦𑁆𑀢𑀺 𑀭𑀚𑀦𑁂𑀦 𑀲𑀫𑁆𑀫𑀸 𑀭𑀢𑁆𑀢𑀁 𑀤𑀺𑀕𑀼𑀡𑀁 𑀅𑀦𑁆𑀢𑀭𑀯𑀸𑀲𑀓𑀁 𑀧𑀭𑀺𑀯𑀢𑁆𑀢𑀦𑀯𑀲𑁂𑀦 𑀦𑀺𑀯𑀸𑀲𑁂𑀢𑁆𑀯𑀸. ‘‘𑀬𑀼𑀕𑀦𑁆𑀥𑀭𑀧𑀩𑁆𑀩𑀢𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸’’𑀢𑀺 𑀇𑀤𑀁 𑀧𑀭𑀺𑀓𑀧𑁆𑀧𑀯𑀘𑀦𑀁 ‘‘𑀢𑀸𑀤𑀺𑀲𑁄 𑀅𑀢𑁆𑀣𑀺 𑀘𑁂, 𑀢𑀁 𑀯𑀺𑀬𑀸’’𑀢𑀺. 𑀫𑁂𑀖𑀯𑀡𑁆𑀡𑀦𑁆𑀢𑀺 𑀭𑀢𑁆𑀢𑀫𑁂𑀖𑀯𑀡𑁆𑀡𑀁, 𑀲𑀜𑁆𑀛𑀸𑀧𑀪𑀸𑀦𑀼𑀭𑀜𑁆𑀚𑀺𑀢𑀫𑁂𑀖𑀲𑀗𑁆𑀓𑀸𑀲𑀦𑁆𑀢𑀺 𑀅𑀢𑁆𑀣𑁄. 𑀧𑀞𑀫𑁂𑀦 𑀘𑁂𑀢𑁆𑀣 𑀲𑀡𑁆𑀞𑀸𑀦𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺, 𑀤𑀼𑀢𑀺𑀬𑁂𑀦 𑀯𑀡𑁆𑀡𑀲𑀫𑁆𑀧𑀢𑁆𑀢𑀺𑀁. 𑀏𑀓𑀁𑀲𑀯𑀭𑀕𑀢𑀦𑁆𑀢𑀺 𑀯𑀸𑀫𑀁𑀲𑀯𑀭𑀧𑁆𑀧𑀯𑀢𑁆𑀢𑀁. 𑀢𑀣𑀸 𑀳𑀺 𑀲𑀼𑀢𑁆𑀢𑀦𑀺𑀧𑀸𑀢𑀝𑁆𑀞𑀓𑀣𑀸𑀬𑀁 𑀯𑀗𑁆𑀕𑀻𑀲𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀁 ‘‘𑀏𑀓𑀁𑀲𑀦𑁆𑀢𑀺 𑀘 𑀯𑀸𑀫𑀁𑀲𑀁 𑀧𑀸𑀭𑀼𑀧𑀺𑀢𑁆𑀯𑀸 𑀞𑀺𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀬𑀢𑁄 𑀬𑀣𑀸 𑀯𑀸𑀫𑀁𑀲𑀁 𑀧𑀸𑀭𑀼𑀧𑀺𑀢𑁆𑀯𑀸 𑀞𑀺𑀢𑀁 𑀳𑁄𑀢𑀺, 𑀢𑀣𑀸 𑀘𑀻𑀯𑀭𑀁 𑀓𑀢𑁆𑀯𑀸𑀢𑀺 𑀏𑀯𑀫𑀲𑁆𑀲𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺 [𑀲𑀼. 𑀦𑀺. 𑀅𑀝𑁆𑀞. 𑀦𑀺𑀕𑁆𑀭𑁄𑀥𑀓𑀧𑁆𑀧𑀲𑀼𑀢𑁆𑀢 (𑀯𑀗𑁆𑀕𑀻𑀲𑀲𑀼𑀢𑁆𑀢) 𑀯𑀡𑁆𑀡𑀦𑀸] 𑀢𑀢𑁆𑀣 𑀏𑀢𑀦𑁆𑀢𑀺 ‘‘𑀏𑀓𑀁𑀲𑀁 𑀘𑀻𑀯𑀭𑀁 𑀓𑀢𑁆𑀯𑀸’’𑀢𑀺 𑀯𑀘𑀦𑀁. 𑀬𑀢𑁄𑀢𑀺 𑀬𑀣𑀸𑀯𑀼𑀢𑁆𑀢𑀯𑀘𑀦𑀲𑁆𑀲 𑀧𑀸𑀭𑀼𑀧𑀺𑀢𑁆𑀯𑀸 𑀞𑀺𑀢𑀲𑁆𑀲𑁂𑀯 𑀅𑀥𑀺𑀯𑀘𑀦𑀢𑁆𑀢𑀸 𑀏𑀯𑀫𑀲𑁆𑀲 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀘𑁆𑀘𑀕𑁆𑀖𑀦𑁆𑀢𑀺 𑀏𑀓𑀁 𑀓𑀢𑁆𑀯𑀸 𑀅𑀦𑀥𑀺𑀝𑁆𑀞𑀺𑀢𑀓𑀸𑀮𑁂 𑀧𑀸𑀝𑁂𑀓𑁆𑀓𑀁 𑀫𑀳𑀕𑁆𑀖𑀁, 𑀧𑀘𑁆𑀘𑀕𑁆𑀖𑀁 𑀯𑀸 𑀅𑀪𑀺𑀦𑀯𑀁, 𑀅𑀩𑁆𑀪𑀼𑀡𑁆𑀳𑁂 𑀢𑀗𑁆𑀔𑀡𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀼𑀭𑀺𑀫𑀜𑁆𑀘𑁂𑀢𑁆𑀣 𑀅𑀢𑁆𑀣𑀯𑀺𑀓𑀧𑁆𑀧𑀁 𑀓𑁂𑀘𑀺 𑀦 𑀇𑀘𑁆𑀙𑀢𑀺. 𑀢𑀣𑀸 𑀳𑀺 𑀆𑀘𑀭𑀺𑀬𑁂𑀦𑁂𑀯 𑀉𑀤𑀸𑀦𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁 ‘‘𑀧𑀘𑁆𑀘𑀕𑁆𑀖𑁂𑀢𑀺 𑀅𑀪𑀺𑀦𑀯𑁂, 𑀧𑀘𑁆𑀘𑁂𑀓𑀁 𑀫𑀳𑀕𑁆𑀖𑀢𑀸𑀬 𑀧𑀘𑁆𑀘𑀕𑁆𑀖𑁂𑀢𑀺 𑀓𑁂𑀘𑀺, 𑀢𑀁 𑀦 𑀲𑀼𑀦𑁆𑀤𑀭𑀁. 𑀦 𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀫𑀳𑀕𑁆𑀖𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺, 𑀧𑀭𑀺𑀪𑀼𑀜𑁆𑀚𑀦𑁆𑀢𑀺 𑀘𑀸’’𑀢𑀺, 𑀇𑀥𑀸𑀧𑀺 𑀢𑁂𑀦 𑀧𑀘𑁆𑀙𑀺𑀫𑁄𑀬𑁂𑀯 𑀅𑀢𑁆𑀣𑀯𑀺𑀓𑀧𑁆𑀧𑁄 𑀕𑀳𑀺𑀢𑁄. 𑀅𑀪𑀺𑀦𑀯𑀢𑀸𑀬 ‘‘𑀧𑀘𑁆𑀘𑀕𑁆𑀖’’𑀦𑁆𑀢𑀺 𑀘 𑀇𑀤𑀁 𑀆𑀤𑀺𑀢𑁄 𑀢𑀣𑀸 𑀮𑀤𑁆𑀥𑀯𑁄𑀳𑀸𑀭𑁂𑀦, 𑀅𑀦𑀜𑁆𑀜𑀧𑀭𑀺𑀪𑁄𑀕𑀢𑀸𑀬 𑀘 𑀯𑀼𑀢𑁆𑀢𑀁, 𑀢𑀣𑀸 𑀯𑀸 𑀲𑀢𑁆𑀣𑀼 𑀅𑀥𑀺𑀝𑁆𑀞𑀸𑀦𑁂𑀦 𑀢𑀁 𑀧𑀢𑁆𑀢𑀁 𑀲𑀩𑁆𑀩𑀓𑀸𑀮𑀁 ‘‘𑀧𑀘𑁆𑀘𑀕𑁆𑀖’’𑀦𑁆𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀲𑁂𑀮𑀫𑀬𑀧𑀢𑁆𑀢𑀦𑁆𑀢𑀺 𑀫𑀼𑀕𑁆𑀕𑀯𑀡𑁆𑀡𑀲𑀺𑀮𑀸𑀫𑀬𑀁 𑀘𑀢𑀼𑀫𑀳𑀸𑀭𑀸𑀚𑀤𑀢𑁆𑀢𑀺𑀬𑀁 𑀧𑀢𑁆𑀢𑀁. 𑀅𑀬𑀫𑁂𑀯 𑀳𑀺 𑀪𑀕𑀯𑀢𑀸 𑀦𑀺𑀘𑁆𑀘𑀧𑀭𑀺𑀪𑀼𑀢𑁆𑀢𑁄 𑀧𑀢𑁆𑀢𑁄 𑀲𑀫𑀘𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸𑀤𑀻𑀲𑀼𑀧𑀺 (𑀅. 𑀦𑀺. 𑀅𑀝𑁆𑀞. 𑁨.𑁨.𑁩𑁭) 𑀢𑀣𑀸 𑀯𑀼𑀢𑁆𑀢𑀢𑁆𑀢𑀸.

𑁪𑁦𑁭. 𑀅𑀢𑁆𑀢𑀦𑁄 𑀭𑀼𑀘𑀺𑀯𑀲𑁂𑀦 𑀅𑀚𑁆𑀛𑀸𑀲𑀬𑀯𑀲𑁂𑀦, 𑀦 𑀧𑀭𑁂𑀳𑀺 𑀉𑀲𑁆𑀲𑀸𑀳𑀺𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀅𑀢𑀺𑀧𑁆𑀧𑀕𑀪𑀸𑀯𑀫𑁂𑀯 𑀤𑀺𑀲𑁆𑀯𑀸’’𑀢𑀺 𑀘 𑀇𑀤𑀁 𑀪𑀽𑀢𑀓𑀣𑀦𑀁 𑀦 𑀢𑀸𑀯 𑀪𑀺𑀓𑁆𑀔𑀸𑀘𑀭𑀡𑀯𑁂𑀮𑀸 𑀲𑀫𑁆𑀧𑀢𑁆𑀢𑀸𑀢𑀺 𑀤𑀲𑁆𑀲𑀦𑀢𑁆𑀣𑀁. 𑀪𑀕𑀯𑀸 𑀳𑀺 𑀢𑀤𑀸 𑀓𑀸𑀮𑀲𑁆𑀲𑁂𑀯 𑀯𑀺𑀳𑀸𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 ‘‘𑀯𑀸𑀲𑀦𑀸𑀪𑀸𑀕𑀺𑀬𑀸𑀬 𑀥𑀫𑁆𑀫𑀤𑁂𑀲𑀦𑀸𑀬 𑀧𑁄𑀝𑁆𑀞𑀧𑀸𑀤𑀁 𑀅𑀦𑀼𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺. 𑀧𑀸𑀴𑀺𑀬𑀁 𑀅𑀢𑀺𑀧𑁆𑀧𑀕𑁄 𑀔𑁄𑀢𑀺 𑀏𑀢𑁆𑀣 ‘‘𑀧𑀕𑁄’’𑀢𑀺 𑀇𑀤𑀁 𑀓𑀘𑁆𑀘𑀸𑀬𑀦𑀫𑀢𑁂𑀦 𑀧-𑀇𑀘𑁆𑀘𑀼𑀧𑀲𑀕𑁆𑀕𑀢𑁄 𑀑-𑀓𑀸𑀭𑀕-𑀓𑀸𑀭𑀸𑀕𑀫𑀦𑁂 𑀲𑀺𑀤𑁆𑀥𑀁. 𑀧-𑀲𑀤𑁆𑀤𑁄𑀬𑁂𑀯 𑀧𑀸𑀢𑁄𑀅𑀢𑁆𑀣𑀁 𑀯𑀤𑀢𑀺. 𑀅𑀜𑁆𑀜𑁂𑀲𑀁 𑀧𑀦 𑀲𑀤𑁆𑀤𑀯𑀺𑀤𑀽𑀦𑀁 𑀫𑀢𑁂𑀦 𑀧𑀸𑀢𑁄𑀧𑀤𑀫𑀺𑀯 𑀦𑁂𑀧𑀸𑀢𑀺𑀓𑀁. 𑀢𑁂𑀦𑁂𑀯 𑀢𑀢𑁆𑀣 𑀢𑀢𑁆𑀣 𑀅𑀝𑁆𑀞𑀓𑀣𑀸𑀲𑀼 (𑀤𑀻. 𑀦𑀺. 𑀅𑀝𑁆𑀞. 𑁩.𑁧) 𑀯𑀼𑀢𑁆𑀢𑀁 ‘‘𑀅𑀢𑀺𑀧𑁆𑀧𑀕𑁄 𑀔𑁄𑀢𑀺 𑀅𑀢𑀺𑀯𑀺𑀬 𑀧𑀸𑀢𑁄’’𑀢𑀺. 𑀅𑀧𑀺𑀘 𑀧𑀞𑀫𑀁 𑀕𑀘𑁆𑀙𑀢𑀺 𑀤𑀺𑀯𑀲𑀪𑀸𑀯𑁂𑀦 𑀧𑀯𑀢𑁆𑀢𑀢𑀻𑀢𑀺 𑀧𑀕𑁄𑀢𑀺 𑀦𑀺𑀩𑁆𑀩𑀘𑀦𑀁 𑀇𑀫𑀺𑀦𑀸 𑀤𑀲𑁆𑀲𑀺𑀢𑀁. 𑀤𑀼𑀯𑀺𑀥𑁄 𑀔𑀮𑀼𑀲𑀤𑁆𑀤𑁄 𑀯𑀺𑀬 𑀳𑀺 𑀧𑀕𑁄𑀢𑀺 𑀲𑀤𑁆𑀤𑁄 𑀦𑀸𑀫𑀦𑀺𑀧𑀸𑀢𑁄𑀧𑀲𑀕𑁆𑀕𑀯𑀲𑁂𑀦 𑀢𑀺𑀯𑀺𑀥𑁄. 𑀏𑀯𑀜𑁆𑀳𑀺 𑀇𑀥 ‘‘𑀅𑀢𑀺𑀧𑁆𑀧𑀕𑀪𑀸𑀯𑀫𑁂𑀯 𑀤𑀺𑀲𑁆𑀯𑀸’’𑀢𑀺 𑀯𑀘𑀦𑀁 𑀉𑀧𑀧𑀦𑁆𑀦𑀁 𑀳𑁄𑀢𑀺.

𑀬𑀁𑀦𑀽𑀦𑀸𑀢𑀺 𑀏𑀲 𑀦𑀺𑀧𑀸𑀢𑁄 𑀅𑀜𑁆𑀜𑀢𑁆𑀣 𑀲𑀁𑀲𑀬𑀧𑀭𑀺𑀤𑀻𑀧𑀦𑁄, 𑀇𑀥 𑀧𑀦 𑀲𑀁𑀲𑀬𑀧𑀢𑀺𑀭𑀽𑀧𑀓𑀧𑀭𑀺𑀤𑀻𑀧𑀦𑁄𑀯. 𑀓𑀲𑁆𑀫𑀸 ‘‘𑀲𑀁𑀲𑀬𑀧𑀭𑀺𑀤𑀻𑀧𑀦𑁂’’𑀢𑀺 𑀯𑀼𑀢𑁆𑀢𑀁, 𑀦𑀦𑀼 𑀩𑀼𑀤𑁆𑀥𑀸𑀦𑀁 𑀲𑀁𑀲𑀬𑁄 𑀦𑀢𑁆𑀣𑀻𑀢𑀺 𑀆𑀳 ‘‘𑀩𑀼𑀤𑁆𑀥𑀸𑀦𑀜𑁆𑀘𑀸’’𑀢𑀺𑀆𑀤𑀺. 𑀲𑀁𑀲𑀬𑁄 𑀦𑀸𑀫 𑀦𑀢𑁆𑀣𑀺 𑀩𑁄𑀥𑀺𑀫𑀽𑀮𑁂 𑀏𑀯 𑀢𑀲𑁆𑀲 𑀲𑀫𑀼𑀕𑁆𑀖𑀸𑀝𑀺𑀢𑀢𑁆𑀢𑀸. 𑀧𑀭𑀺𑀯𑀺𑀢𑀓𑁆𑀓𑀧𑀼𑀩𑁆𑀩𑀪𑀸𑀕𑁄𑀢𑀺 𑀅𑀥𑀺𑀧𑁆𑀧𑁂𑀢𑀓𑀺𑀘𑁆𑀘𑀲𑁆𑀲 𑀧𑀼𑀩𑁆𑀩𑀪𑀸𑀕𑁂 𑀧𑀯𑀢𑁆𑀢𑀧𑀭𑀺𑀯𑀺𑀢𑀓𑁆𑀓𑁄. 𑀏𑀲𑀸𑀢𑀺 ‘‘𑀓𑀭𑀺𑀲𑁆𑀲𑀸𑀫, 𑀦 𑀓𑀭𑀺𑀲𑁆𑀲𑀸𑀫𑀸’’𑀢𑀺𑀆𑀤𑀺𑀓𑁄 𑀏𑀲 𑀘𑀺𑀢𑁆𑀢𑀸𑀘𑀸𑀭𑁄 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀮𑀩𑁆𑀪𑀢𑀺 𑀲𑀫𑁆𑀪𑀯𑀢𑀺 𑀯𑀺𑀘𑀸𑀭𑀡𑀯𑀲𑁂𑀦𑁂𑀯 𑀧𑀯𑀢𑁆𑀢𑀦𑀢𑁄, 𑀦 𑀧𑀦 𑀲𑀁𑀲𑀬𑀯𑀲𑁂𑀦. 𑀢𑁂𑀦𑀸𑀳𑀸𑀢𑀺 𑀬𑁂𑀦𑁂𑀲 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀮𑀩𑁆𑀪𑀢𑀺, 𑀢𑁂𑀦 𑀪𑀕𑀯𑀸 𑀏𑀯𑀫𑀸𑀳𑀸𑀢𑀺 𑀇𑀫𑀫𑁂𑀯 𑀧𑀸𑀴𑀺𑀁 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀲𑀸𑀥𑀓𑀁 𑀓𑀭𑁄𑀢𑀺. 𑀅𑀬𑀁 𑀅𑀝𑁆𑀞𑀓𑀣𑀸𑀢𑁄 𑀅𑀧𑀭𑁄 𑀦𑀬𑁄 𑁋 𑀬𑀁𑀦𑀽𑀦𑀸𑀢𑀺 𑀧𑀭𑀺𑀓𑀧𑁆𑀧𑀦𑁂 𑀦𑀺𑀧𑀸𑀢𑁄. ‘‘𑀉𑀧𑀲𑀗𑁆𑀓𑀫𑁂𑀬𑁆𑀬’’𑀦𑁆𑀢𑀺 𑀓𑀺𑀭𑀺𑀬𑀸𑀧𑀤𑁂𑀦 𑀯𑀼𑀘𑁆𑀘𑀫𑀸𑀦𑁄𑀬𑁂𑀯 𑀳𑀺 𑀅𑀢𑁆𑀣𑁄 𑀅𑀦𑁂𑀦 𑀚𑁄𑀢𑀻𑀬𑀢𑀺. 𑀢𑀲𑁆𑀫𑀸 𑀅𑀳𑀁 𑀬𑀁𑀦𑀽𑀦 𑀬𑀤𑀺 𑀧𑀦 𑀉𑀧𑀲𑀗𑁆𑀓𑀫𑁂𑀬𑁆𑀬𑀁 𑀲𑀸𑀥𑀼 𑀯𑀢𑀸𑀢𑀺 𑀬𑁄𑀚𑀦𑀸. ‘‘𑀬𑀤𑀺 𑀧𑀦𑀸’’𑀢𑀺 𑀇𑀤𑀫𑁆𑀧𑀺 𑀢𑁂𑀦 𑀲𑀫𑀸𑀦𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀬𑀤𑀺 𑀧𑀦𑀸𑀳𑀦𑁆𑀢𑀺 𑀅𑀢𑁆𑀣𑁄’’𑀢𑀺.

𑁪𑁦𑁮. 𑀅𑀲𑁆𑀲𑀸𑀢𑀺 𑀧𑀭𑀺𑀩𑁆𑀩𑀸𑀚𑀓𑀧𑀭𑀺𑀲𑀸𑀬. 𑀉𑀤𑁆𑀥𑀁𑀕𑀫𑀦𑀯𑀲𑁂𑀦𑀸𑀢𑀺 𑀉𑀦𑁆𑀦𑀢𑀩𑀳𑀼𑀮𑀢𑀸𑀬 𑀉𑀕𑁆𑀕𑀦𑁆𑀢𑁆𑀯𑀸 𑀉𑀕𑁆𑀕𑀦𑁆𑀢𑁆𑀯𑀸 𑀧𑀯𑀢𑁆𑀢𑀦𑀯𑀲𑁂𑀦. 𑀤𑀺𑀲𑀸𑀲𑀼 𑀧𑀢𑁆𑀣𑀝𑀯𑀲𑁂𑀦𑀸𑀢𑀺 𑀯𑀺𑀧𑀼𑀮𑀪𑀸𑀯𑁂𑀦 𑀪𑀽𑀢𑀧𑀭𑀫𑁆𑀧𑀭𑀸𑀬 𑀲𑀩𑁆𑀩𑀤𑀺𑀲𑀸𑀲𑀼 𑀧𑀢𑁆𑀣𑀭𑀡𑀯𑀲𑁂𑀦. 𑀏𑀢𑁆𑀣 𑀘 𑀧𑀸𑀴𑀺𑀬𑀁 𑀬𑀣𑀸 𑀉𑀦𑁆𑀦𑀢𑀧𑀸𑀬𑁄 𑀲𑀤𑁆𑀤𑁄 𑀉𑀦𑁆𑀦𑀸𑀤𑁄, 𑀏𑀯𑀁 𑀯𑀺𑀧𑀼𑀮𑀪𑀸𑀯𑁂𑀦 𑀉𑀧𑀭𑀽𑀧𑀭𑀺 𑀧𑀯𑀢𑁆𑀢𑁄𑀧𑀺 𑀉𑀦𑁆𑀦𑀸𑀤𑁄𑀬𑁂𑀯𑀸𑀢𑀺 𑀢𑀤𑀼𑀪𑀬𑀁 𑀏𑀓𑀚𑁆𑀛𑀁 𑀓𑀢𑁆𑀯𑀸 ‘‘𑀉𑀦𑁆𑀦𑀸𑀤𑀺𑀦𑀺𑀬𑀸’’𑀢𑀺 𑀯𑀼𑀢𑁆𑀢𑀁, 𑀧𑀼𑀦 𑀢𑀤𑀼𑀪𑀬𑀫𑁂𑀯 𑀯𑀺𑀪𑀸𑀕𑀁 𑀓𑀢𑁆𑀯𑀸 ‘‘𑀉𑀘𑁆𑀘𑀸𑀲𑀤𑁆𑀤𑀫𑀳𑀸𑀲𑀤𑁆𑀤𑀸𑀬𑀸’’𑀢𑀺. 𑀅𑀢𑁄 𑀧𑀸𑀴𑀺𑀦𑀬𑀸𑀦𑀼𑀭𑀽𑀧𑀫𑁂𑀯 𑀅𑀢𑁆𑀣𑀁 𑀯𑀺𑀯𑀭𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀤𑀸𑀦𑀺 𑀧𑀭𑀺𑀩𑁆𑀩𑀸𑀚𑀓𑀧𑀭𑀺𑀲𑀸𑀬 𑀉𑀘𑁆𑀘𑀸𑀲𑀤𑁆𑀤𑀫𑀳𑀸𑀲𑀤𑁆𑀤𑀢𑀸𑀓𑀸𑀭𑀡𑀁, 𑀢𑀲𑁆𑀲 𑀘 𑀧𑀯𑀢𑁆𑀢𑀺𑀆𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑁂𑀲𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀩𑀸𑀮𑀸𑀢𑀧𑁂𑀢𑀺 𑀅𑀪𑀺𑀦𑀯𑀼𑀕𑁆𑀕𑀢𑀲𑀽𑀭𑀺𑀬𑀸𑀢𑀧𑁂. 𑀓𑀸𑀫𑀲𑁆𑀲𑀸𑀤𑁄 𑀦𑀸𑀫 𑀓𑀸𑀫𑀕𑀼𑀡𑀲𑁆𑀲𑀸𑀤𑁄. 𑀪𑀯𑀲𑁆𑀲𑀸𑀤𑁄 𑀦𑀸𑀫 𑀓𑀸𑀫𑀭𑀸𑀕𑀸𑀤𑀺𑀲𑀳𑀕𑀢𑁄 𑀪𑀯𑁂𑀲𑀼 𑀅𑀲𑁆𑀲𑀸𑀤𑁄.

𑀲𑀽𑀭𑀺𑀬𑀼𑀕𑁆𑀕𑀫𑀦𑁂 𑀔𑀚𑁆𑀚𑁄𑀧𑀦𑀫𑀺𑀯 𑀦𑀺𑀧𑁆𑀧𑀪𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀔𑀚𑁆𑀚𑁄𑀧𑀦𑀓𑀽𑀧𑀫𑀸 𑀚𑀸𑀢𑀸’’𑀢𑀺. 𑀮𑀸𑀪𑀲𑀓𑁆𑀓𑀸𑀭𑁄𑀧𑀺 𑀦𑁄 𑀧𑀭𑀺𑀳𑀻𑀦𑁄𑀢𑀺 𑀅𑀢𑁆𑀣𑁄 𑀩𑀸𑀯𑁂𑀭𑀼𑀚𑀸𑀢𑀓𑁂𑀦 (𑀚𑀸. 𑁧.𑁪.𑁧𑁫𑁪) 𑀤𑀻𑀧𑁂𑀢𑀩𑁆𑀩𑁄. 𑀧𑀭𑀺𑀲𑀤𑁄𑀲𑁄𑀢𑀺 𑀧𑀭𑀺𑀲𑀸𑀬 𑀧𑀯𑀢𑁆𑀢𑀤𑁄𑀲𑁄.

𑁪𑁦𑁯. 𑀲𑀡𑁆𑀞𑀧𑁂𑀲𑀻𑀢𑀺 𑀲𑀜𑁆𑀜𑀫𑀦𑀯𑀲𑁂𑀦 𑀲𑀫𑁆𑀫𑀤𑁂𑀯 𑀞𑀧𑁂𑀲𑀺. 𑀲𑀡𑁆𑀞𑀧𑀦𑀜𑁆𑀘𑁂𑀢𑁆𑀣 𑀢𑀺𑀭𑀘𑁆𑀙𑀸𑀦𑀓𑀣𑀸𑀬 𑀅𑀜𑁆𑀜𑀫𑀜𑁆𑀜𑀲𑁆𑀫𑀺𑀁 𑀅𑀕𑀸𑀭𑀯𑀲𑁆𑀲 𑀘𑀚𑀸𑀧𑀦𑀯𑀲𑁂𑀦 𑀆𑀘𑀸𑀭𑀲𑀺𑀓𑁆𑀔𑀸𑀧𑀦𑀁, 𑀬𑀣𑀸𑀯𑀼𑀢𑁆𑀢𑀤𑁄𑀲𑀲𑁆𑀲 𑀦𑀺𑀕𑀽𑀳𑀦𑀜𑁆𑀘 𑀳𑁄𑀢𑀻𑀢𑀺 𑀆𑀳 ‘‘𑀲𑀺𑀓𑁆𑀔𑀸𑀧𑁂𑀲𑀻’’𑀢𑀺𑀆𑀤𑀺. 𑀦𑀦𑁆𑀢𑀺 𑀧𑀭𑀺𑀲𑀁. 𑀅𑀧𑁆𑀧𑀲𑀤𑁆𑀤𑀦𑁆𑀢𑀺 𑀦𑀺𑀲𑁆𑀲𑀤𑁆𑀤𑀁 𑀉𑀘𑁆𑀘𑀸𑀲𑀤𑁆𑀤𑀫𑀳𑀸𑀲𑀤𑁆𑀤𑀸𑀪𑀸𑀯𑀁. ‘‘𑀏𑀓𑁄 𑀦𑀺𑀲𑀻𑀤𑀢𑀻’’𑀢𑀺𑀆𑀤𑀺 𑀅𑀢𑁆𑀣𑀸𑀧𑀢𑁆𑀢𑀺𑀤𑀲𑁆𑀲𑀦𑀁. 𑀯𑀼𑀤𑁆𑀥𑀺𑀦𑁆𑀢𑀺 𑀮𑀸𑀪𑀕𑀼𑀡𑀯𑀼𑀤𑁆𑀥𑀺𑀁. 𑀧𑀢𑁆𑀣𑀬𑀫𑀸𑀦𑁄𑀢𑀺 𑀧𑀢𑁆𑀣𑀬𑀦𑀳𑁂𑀢𑀼. 𑀫𑀸𑀦𑀦𑁆𑀢𑁂 𑀳𑀺 𑀮𑀓𑁆𑀔𑀡𑁂, 𑀳𑁂𑀢𑀼𑀫𑁆𑀳𑀺 𑀘 𑀇𑀘𑁆𑀙𑀦𑁆𑀢𑀺 𑀲𑀤𑁆𑀤𑀯𑀺𑀤𑀽. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀢𑀼𑀁 ‘‘𑀧𑀭𑀺𑀩𑁆𑀩𑀸𑀚𑀓𑀸 𑀓𑀺𑀭𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀅𑀧𑀭𑀤𑁆𑀥𑀦𑁆𑀢𑀺 𑀅𑀧𑀭𑀚𑁆𑀛𑀺𑀢𑀁. 𑀦𑀧𑁆𑀧𑀫𑀚𑁆𑀚𑀦𑁆𑀢𑀻𑀢𑀺 𑀧𑀫𑀸𑀤𑀁 𑀦 𑀆𑀧𑀚𑁆𑀚𑀦𑁆𑀢𑀺, 𑀦 𑀅𑀕𑀸𑀭𑀯𑀁 𑀓𑀭𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁪𑁧𑁦. 𑀦𑁄 𑀆𑀕𑀢𑁂 𑀆𑀦𑀦𑁆𑀤𑁄𑀢𑀺 𑀅𑀫𑁆𑀳𑀸𑀓𑀁 𑀪𑀕𑀯𑀢𑀺 𑀆𑀕𑀢𑁂 𑀆𑀦𑀦𑁆𑀤𑁄 𑀧𑀻𑀢𑀺 𑀳𑁄𑀢𑀺. ‘‘𑀘𑀺𑀭𑀲𑁆𑀲𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀸 𑀇𑀫𑀁 𑀧𑀭𑀺𑀬𑀸𑀬𑀫𑀓𑀸𑀲𑀻’’𑀢𑀺 𑀯𑀘𑀦𑀁 𑀧𑀼𑀩𑁆𑀩𑁂𑀧𑀺 𑀢𑀢𑁆𑀣 𑀆𑀕𑀢𑀧𑀼𑀩𑁆𑀩𑀢𑁆𑀢𑀸 𑀯𑀼𑀢𑁆𑀢𑀯𑀘𑀦𑀫𑀺𑀯 𑀳𑁄𑀢𑀻𑀢𑀺 𑀘𑁄𑀤𑀦𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀧𑀭𑀺𑀳𑀭𑀦𑁆𑀢𑁄 ‘‘𑀓𑀲𑁆𑀫𑀸 𑀆𑀳𑀸’’𑀢𑀺𑀆𑀤𑀺𑀫𑀸𑀳. 𑀧𑀺𑀬𑀲𑀫𑀼𑀤𑀸𑀘𑀸𑀭𑀸𑀢𑀺 𑀧𑀺𑀬𑀸𑀮𑀸𑀧𑀸. 𑀢𑀲𑁆𑀫𑀸𑀢𑀺 𑀢𑀣𑀸 𑀧𑀺𑀬𑀲𑀫𑀼𑀤𑀸𑀘𑀸𑀭𑀲𑁆𑀲 𑀧𑀯𑀢𑁆𑀢𑀦𑀢𑁄. 𑀦 𑀓𑁂𑀯𑀮𑀁 𑀅𑀬𑀫𑁂𑀯, 𑀅𑀣 𑀔𑁄 𑀅𑀜𑁆𑀜𑁂𑀧𑀺 𑀧𑀩𑁆𑀩𑀚𑀺𑀢𑀸 𑀬𑁂𑀪𑀼𑀬𑁆𑀬𑁂𑀦 𑀪𑀕𑀯𑀢𑁄 𑀅𑀧𑀘𑀺𑀢𑀺𑀁 𑀓𑀭𑁄𑀦𑁆𑀢𑁂𑀯𑀸𑀢𑀺 𑀢𑀤𑀜𑁆𑀜𑁂𑀲𑀫𑁆𑀧𑀺 𑀩𑀸𑀳𑀼𑀮𑁆𑀮𑀓𑀫𑁆𑀫𑁂𑀦 𑀢𑀤𑀢𑁆𑀣𑀁 𑀲𑀸𑀥𑁂𑀢𑀼𑀁 ‘‘𑀪𑀕𑀯𑀦𑁆𑀢𑀜𑁆𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀉𑀘𑁆𑀘𑀸𑀓𑀼𑀮𑀻𑀦𑀢𑀸𑀬𑀸’’𑀢𑀺, 𑀫𑀳𑀸𑀲𑀫𑁆𑀫𑀢𑀭𑀸𑀚𑀢𑁄 𑀧𑀝𑁆𑀞𑀸𑀬 𑀅𑀲𑀫𑁆𑀪𑀺𑀦𑁆𑀦𑀔𑀢𑁆𑀢𑀺𑀬𑀓𑀼𑀮𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀢𑀣𑀸 𑀳𑀺 𑀲𑁄𑀡𑀤𑀡𑁆𑀟𑁂𑀦 𑀯𑀼𑀢𑁆𑀢𑀁 ‘‘𑀲𑀫𑀡𑁄 𑀔𑀮𑀼 𑀪𑁄 𑀕𑁄𑀢𑀫𑁄 𑀉𑀘𑁆𑀘𑀸𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀅𑀲𑀫𑁆𑀪𑀺𑀦𑁆𑀦𑀔𑀢𑁆𑀢𑀺𑀬𑀓𑀼𑀮𑀸’’𑀢𑀺, (𑀤𑀻. 𑀦𑀺. 𑁧.𑁩𑁦𑁪) 𑀢𑁂𑀦 𑀲𑀸𑀲𑀦𑁂 𑀅𑀧𑁆𑀧𑀲𑀦𑁆𑀦𑀸𑀦𑀫𑁆𑀧𑀺 𑀓𑀼𑀮𑀕𑀸𑀭𑀯𑁂𑀦 𑀪𑀕𑀯𑀢𑀺 𑀅𑀧𑀘𑀺𑀢𑀺𑀁 𑀤𑀲𑁆𑀲𑁂𑀢𑀺. 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀓𑀸 𑀦𑀸𑀫 𑀓𑀣𑀸𑀢𑀺 𑀬𑀣𑀸𑀯𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑀩𑁆𑀪𑀦𑁆𑀢𑀭𑁂 𑀓𑀻𑀤𑀺𑀲𑀸 𑀦𑀸𑀫 𑀓𑀣𑀸. 𑀯𑀺𑀧𑁆𑀧𑀓𑀢𑀸𑀢𑀺 𑀆𑀭𑀤𑁆𑀥𑀸 𑀳𑀼𑀢𑁆𑀯𑀸 𑀅𑀧𑀭𑀺𑀬𑁄𑀲𑀺𑀢𑀸. ‘‘𑀓𑀸 𑀓𑀣𑀸 𑀯𑀺𑀧𑁆𑀧𑀓𑀢𑀸’’𑀢𑀺 𑀧𑀦 𑀯𑀤𑀦𑁆𑀢𑁄 𑀅𑀢𑁆𑀣𑀢𑁄 𑀢𑀲𑁆𑀲𑀸 𑀧𑀭𑀺𑀬𑁄𑀲𑀸𑀧𑀦𑀁 𑀧𑀝𑀺𑀚𑀸𑀦𑀸𑀢𑀺 𑀦𑀸𑀫. 𑀓𑀸 𑀓𑀣𑀸𑀢𑀺 𑀘 𑀅𑀯𑀺𑀲𑁂𑀲𑀘𑁄𑀤𑀦𑀸, 𑀢𑀲𑁆𑀫𑀸 𑀬𑀲𑁆𑀲𑀸 𑀢𑀲𑁆𑀲𑀸 𑀲𑀩𑁆𑀩𑀲𑁆𑀲𑀸𑀧𑀺 𑀓𑀣𑀸𑀬 𑀧𑀭𑀺𑀬𑁄𑀲𑀸𑀧𑀦𑀁 𑀧𑀝𑀺𑀜𑁆𑀜𑀸𑀢𑀁 𑀳𑁄𑀢𑀺, 𑀢𑀜𑁆𑀘 𑀧𑀝𑀺𑀚𑀸𑀦𑀦𑀁 𑀧𑀤𑁂𑀲𑀜𑁆𑀜𑀼𑀦𑁄 𑀅𑀯𑀺𑀲𑀁𑀬𑀦𑁆𑀢𑀺 𑀆𑀳 ‘‘𑀬𑀸𑀯…𑀧𑁂… 𑀲𑀩𑁆𑀩𑀜𑁆𑀜𑀼𑀧𑀯𑀸𑀭𑀡𑀁 𑀧𑀯𑀸𑀭𑁂𑀲𑀻’’𑀢𑀺. 𑀏𑀲𑀸𑀢𑀺 𑀧𑀭𑀺𑀩𑁆𑀩𑀸𑀚𑀓𑀧𑀭𑀺𑀲𑀸𑀬 𑀓𑀣𑀺𑀢𑀸 𑀭𑀸𑀚𑀓𑀣𑀸𑀤𑀺𑀓𑀸. 𑀦𑀺𑀲𑁆𑀲𑀸𑀭𑀸𑀢𑀺 𑀦𑀺𑀭𑀢𑁆𑀣𑀓𑀪𑀸𑀯𑁂𑀦 𑀲𑀸𑀭𑀭𑀳𑀺𑀢𑀸.

𑀅𑀪𑀺𑀲𑀜𑁆𑀜𑀸𑀦𑀺𑀭𑁄𑀥𑀓𑀣𑀸𑀯𑀡𑁆𑀡𑀦𑀸

𑁪𑁧𑁧. ‘‘𑀢𑀺𑀝𑁆𑀞𑀢𑁂𑀲𑀸’’𑀢𑀺 𑀏𑀢𑀲𑁆𑀲 𑀆𑀧𑀦𑁆𑀦𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀘𑁂’’𑀢𑀺𑀆𑀤𑀺𑀫𑀸𑀳. 𑀲𑀼𑀓𑀸𑀭𑀡𑀦𑁆𑀢𑀺 𑀲𑀼𑀦𑁆𑀤𑀭𑀁 𑀅𑀢𑁆𑀣𑀸𑀯𑀳𑀁 𑀳𑀺𑀢𑀸𑀯𑀳𑀁 𑀓𑀸𑀭𑀡𑀁. 𑀬𑀢𑁆𑀣𑀸𑀢𑀺 𑀅𑀜𑁆𑀜𑀢𑀭𑀺𑀲𑁆𑀲𑀁 𑀲𑀸𑀮𑀸𑀬𑀁. 𑀦𑀸𑀦𑀸𑀢𑀺𑀢𑁆𑀣𑀲𑀗𑁆𑀔𑀸𑀢𑀸𑀲𑀼 𑀮𑀤𑁆𑀥𑀻𑀲𑀼 𑀦𑀺𑀬𑀼𑀢𑁆𑀢𑀸𑀢𑀺 𑀦𑀸𑀦𑀸𑀢𑀺𑀢𑁆𑀣𑀺𑀬𑀸𑀡𑀺𑀬𑀲𑀤𑁆𑀤𑁂𑀦. 𑀡𑀺𑀓𑀲𑀤𑁆𑀤𑁂𑀦 𑀯𑀸 𑀓-𑀓𑀸𑀭𑀲𑁆𑀲 𑀬-𑀓𑀸𑀭𑀁 𑀓𑀢𑁆𑀯𑀸 𑀬𑀣𑀸 ‘‘𑀅𑀦𑁆𑀢𑀺𑀬𑁄’’𑀢𑀺. ‘‘𑀅𑀬𑀁 𑀓𑀺𑀁 𑀯𑀤𑀢𑀺 𑀅𑀬𑀁 𑀓𑀺𑀁 𑀯𑀤𑀢𑀻’’𑀢𑀺 𑀓𑀼𑀢𑀽𑀳𑀮𑀁 𑀓𑁄𑀮𑀸𑀳𑀮𑀫𑁂𑀢𑁆𑀣 𑀅𑀢𑁆𑀣𑀻𑀢𑀺 𑀓𑁄𑀢𑀽𑀳𑀮𑀸, 𑀲𑀸 𑀏𑀯 𑀲𑀸𑀮𑀸 𑀓𑁄𑀢𑀽𑀳𑀮𑀲𑀸𑀮𑀸𑀢𑀺 𑀆𑀳 ‘‘𑀓𑁄𑀢𑀽𑀳𑀮𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀢𑁄’’𑀢𑀺. 𑀉𑀧𑀲𑀕𑁆𑀕𑀫𑀢𑁆𑀢𑀁 𑀥𑀸𑀢𑁆𑀯𑀢𑁆𑀣𑀸𑀦𑀼𑀯𑀢𑁆𑀢𑀦𑀢𑁄. 𑀲𑀜𑁆𑀜𑀸𑀲𑀻𑀲𑁂𑀦𑀸𑀬𑀁 𑀤𑁂𑀲𑀦𑀸, 𑀢𑀲𑁆𑀫𑀸 𑀲𑀜𑁆𑀜𑀸𑀲𑀳𑀕𑀢𑀸 𑀲𑀩𑁆𑀩𑁂𑀧𑀺 𑀥𑀫𑁆𑀫𑀸 𑀕𑀬𑁆𑀳𑀦𑁆𑀢𑀺, 𑀢𑀢𑁆𑀣 𑀧𑀦 𑀘𑀺𑀢𑁆𑀢𑀁 𑀧𑀥𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀘𑀺𑀢𑁆𑀢𑀦𑀺𑀭𑁄𑀥𑁂’’𑀢𑀺. 𑀧𑀳𑀸𑀦𑀯𑀲𑁂𑀦 𑀧𑀦 𑀅𑀘𑁆𑀘𑀦𑁆𑀢𑀦𑀺𑀭𑁄𑀥𑀲𑁆𑀲 𑀢𑁂𑀳𑀺 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸, 𑀅𑀯𑀺𑀲𑀬𑀢𑁆𑀢𑀸 𑀘 ‘‘𑀔𑀡𑀺𑀓𑀦𑀺𑀭𑁄𑀥𑁂’’𑀢𑀺 𑀆𑀳. 𑀓𑀸𑀫𑀁 𑀲𑁄𑀧𑀺 𑀢𑁂𑀲𑀁 𑀅𑀯𑀺𑀲𑀬𑁄𑀯, 𑀅𑀢𑁆𑀣𑀢𑁄 𑀧𑀦 𑀦𑀺𑀭𑁄𑀥𑀓𑀣𑀸 𑀯𑀼𑀘𑁆𑀘𑀫𑀸𑀦𑀸 𑀢𑀢𑁆𑀣𑁂𑀯 𑀢𑀺𑀝𑁆𑀞𑀢𑀺, 𑀢𑀲𑁆𑀫𑀸 𑀅𑀢𑁆𑀣𑀸𑀧𑀢𑁆𑀢𑀺𑀫𑀢𑁆𑀢𑀁 𑀧𑀢𑀺 𑀢𑀣𑀸 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀲𑁆𑀲𑀸𑀢𑀺 𑀅𑀪𑀺𑀲𑀜𑁆𑀜𑀸𑀦𑀺𑀭𑁄𑀥𑀓𑀣𑀸𑀬. ‘‘𑀓𑀺𑀢𑁆𑀢𑀺𑀖𑁄𑀲𑁄’’𑀢𑀺 ‘𑀅𑀳𑁄 𑀩𑀼𑀤𑁆𑀥𑀸𑀦𑀼𑀪𑀸𑀯𑁄, 𑀪𑀯𑀦𑁆𑀢𑀭𑀧𑀝𑀺𑀘𑁆𑀙𑀦𑁆𑀦𑀫𑁆𑀧𑀺 𑀓𑀸𑀭𑀡𑀁 𑀏𑀯𑀁 𑀳𑀢𑁆𑀣𑀸𑀫𑀮𑀓𑀁 𑀯𑀺𑀬 𑀧𑀘𑁆𑀘𑀓𑁆𑀔𑀢𑁄 𑀤𑀲𑁆𑀲𑁂𑀢𑀺, 𑀲𑀸𑀯𑀓𑁂 𑀘 𑀏𑀤𑀺𑀲𑁂 𑀲𑀁𑀯𑀭𑀲𑀫𑀸𑀤𑀸𑀦𑁂 𑀧𑀢𑀺𑀝𑁆𑀞𑀸𑀧𑁂𑀢𑀻’𑀢𑀺 𑀣𑀼𑀢𑀺𑀖𑁄𑀲𑁄 𑀬𑀸𑀯 𑀪𑀯𑀕𑁆𑀕𑀸 𑀧𑀢𑁆𑀣𑀭𑀢𑀻𑀢𑀺. 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑀁. 𑀇𑀤𑀸𑀦𑀺 𑀧𑀦 ‘‘𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀪𑀕𑀯𑀢𑁄 𑀓𑀣𑀸𑀓𑀺𑀢𑁆𑀢𑀺𑀖𑁄𑀲𑁄 𑀧𑀢𑁆𑀣𑀭𑀢𑀻’’𑀢𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺. 𑀧𑀝𑀺𑀪𑀸𑀕𑀓𑀺𑀭𑀺𑀬𑀦𑁆𑀢𑀺 𑀧𑀴𑀸𑀲𑀯𑀲𑁂𑀦 𑀧𑀝𑀺𑀪𑀸𑀕𑀪𑀽𑀢𑀁 𑀧𑀬𑁄𑀕𑀁. 𑀪𑀯𑀦𑁆𑀢𑀭𑀲𑀫𑀬𑀦𑁆𑀢𑀺 𑀢𑀢𑁆𑀭 𑀢𑀢𑁆𑀭 𑀯𑀼𑀝𑁆𑀞𑀸𑀦𑀲𑀫𑀬𑀁 𑀅𑀪𑀽𑀢𑀧𑀭𑀺𑀓𑀧𑁆𑀧𑀺𑀢𑀁 𑀓𑀺𑀜𑁆𑀘𑀺 𑀉𑀲𑁆𑀲𑀸𑀭𑀺𑀬𑀯𑀢𑁆𑀣𑀼𑀁 𑀅𑀢𑁆𑀢𑀦𑁄 𑀲𑀫𑀬𑀁 𑀓𑀢𑁆𑀯𑀸 𑀓𑀣𑁂𑀦𑁆𑀢𑀺. 𑀓𑀺𑀜𑁆𑀘𑀺𑀤𑁂𑀯 𑀲𑀺𑀓𑁆𑀔𑀸𑀧𑀤𑀦𑁆𑀢𑀺 ‘‘𑀏𑀓𑀫𑀽𑀮𑀓𑁂𑀦 𑀪𑀯𑀺𑀢𑀩𑁆𑀩𑀁, 𑀏𑀢𑁆𑀢𑀓𑀁 𑀯𑁂𑀮𑀁 𑀏𑀓𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀦𑀺𑀲𑀻𑀤𑀺𑀢𑀩𑁆𑀩’’𑀦𑁆𑀢𑀺 𑀏𑀯𑀫𑀸𑀤𑀺𑀓𑀁 𑀓𑀺𑀜𑁆𑀘𑀺𑀤𑁂𑀯 𑀓𑀸𑀭𑀡𑀁 𑀲𑀺𑀓𑁆𑀔𑀸𑀓𑁄𑀝𑁆𑀞𑀸𑀲𑀁 𑀓𑀢𑁆𑀯𑀸 𑀧𑀜𑁆𑀜𑀧𑁂𑀦𑁆𑀢𑀺. 𑀦𑀺𑀭𑁄𑀥𑀓𑀣𑀦𑁆𑀢𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀓𑀣𑀁.

𑀢𑁂𑀲𑀽𑀢𑀺 𑀓𑁄𑀢𑀽𑀳𑀮𑀲𑀸𑀮𑀸𑀬𑀁 𑀲𑀦𑁆𑀦𑀺𑀧𑀢𑀺𑀢𑁂𑀲𑀼 𑀦𑀸𑀦𑀸𑀢𑀺𑀢𑁆𑀣𑀺𑀬𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼. 𑀏𑀓𑀘𑁆𑀘𑁂𑀢𑀺 𑀏𑀓𑁂. 𑀧𑀼𑀭𑀺𑀫𑁄𑀢𑀺 ‘‘𑀅𑀳𑁂𑀢𑀽 𑀅𑀧𑁆𑀧𑀘𑁆𑀘𑀬𑀸 𑀧𑀼𑀭𑀺𑀲𑀲𑁆𑀲 𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀦𑁆𑀢𑀺𑀧𑀺 𑀦𑀺𑀭𑀼𑀚𑁆𑀛𑀦𑁆𑀢𑀺𑀧𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀯𑀸𑀤𑀻. 𑀏𑀢𑁆𑀣𑀸𑀢𑀺 𑀘𑀢𑀽𑀲𑀼 𑀯𑀸𑀤𑀻𑀲𑀼. 𑀬𑁆𑀯𑀸𑀬𑀁 𑀇𑀥 𑀉𑀧𑁆𑀧𑀚𑁆𑀚𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀫𑀸𑀧𑀢𑁆𑀢𑀺𑀦𑁆𑀢𑀺 𑀅𑀲𑀜𑁆𑀜𑀻𑀪𑀯𑀸𑀯𑀳𑀁 𑀯𑀸𑀬𑁄𑀓𑀲𑀺𑀡𑀧𑀭𑀺𑀓𑀫𑁆𑀫𑀁, 𑀆𑀓𑀸𑀲𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀯𑀸 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺𑀁, 𑀧𑀜𑁆𑀘𑀫𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺𑀁 𑀯𑀸. 𑀦𑀺𑀭𑁄𑀥𑁂𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀲𑀜𑁆𑀜𑀸𑀦𑀺𑀭𑁄𑀥𑁂. 𑀳𑁂𑀢𑀼𑀁 𑀅𑀧𑀲𑁆𑀲𑀦𑁆𑀢𑁄𑀢𑀺 𑀬𑁂𑀦 𑀳𑁂𑀢𑀼𑀦𑀸 𑀅𑀲𑀜𑁆𑀜𑀻𑀪𑀯𑁂 𑀲𑀜𑁆𑀜𑀸𑀬 𑀦𑀺𑀭𑁄𑀥𑁄 𑀲𑀩𑁆𑀩𑀲𑁄 𑀅𑀦𑀼𑀧𑁆𑀧𑀸𑀤𑁄, 𑀬𑁂𑀦 𑀘 𑀢𑀢𑁄 𑀘𑀼𑀢𑀲𑁆𑀲 𑀇𑀥 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀲𑀜𑁆𑀜𑀸𑀬 𑀉𑀧𑁆𑀧𑀸𑀤𑁄, 𑀢𑀤𑀼𑀪𑀬𑀫𑁆𑀧𑀺 𑀳𑁂𑀢𑀼𑀁 𑀅𑀯𑀺𑀲𑀬𑀢𑀸𑀬 𑀅𑀧𑀲𑁆𑀲𑀦𑁆𑀢𑁄.

𑀤𑀼𑀢𑀺𑀬𑁄𑀢𑀺 ‘‘𑀲𑀜𑁆𑀜𑀸 𑀳𑀺 𑀪𑁄 𑀧𑀼𑀭𑀺𑀲𑀲𑁆𑀲 𑀅𑀢𑁆𑀢𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀯𑀸𑀤𑀻. 𑀦𑀦𑁆𑀢𑀺 𑀧𑀞𑀫𑀯𑀸𑀤𑀺𑀁. 𑀦𑀺𑀲𑁂𑀥𑁂𑀢𑁆𑀯𑀸𑀢𑀺 ‘‘𑀦 𑀔𑁄 𑀧𑀦 𑀫𑁂𑀢𑀁 𑀪𑁄 𑀏𑀯𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸. 𑀫𑀺𑀕𑀲𑀺𑀗𑁆𑀕𑀢𑀸𑀧𑀲𑀲𑁆𑀲𑀸𑀢𑀺 𑀏𑀯𑀁𑀦𑀸𑀫𑀓𑀢𑀸𑀧𑀲𑀲𑁆𑀲. 𑀢𑀲𑁆𑀲 𑀓𑀺𑀭 𑀫𑀢𑁆𑀣𑀓𑁂 𑀫𑀺𑀕𑀲𑀺𑀗𑁆𑀕𑀸𑀓𑀸𑀭𑁂𑀦 𑀤𑁆𑀯𑁂 𑀘𑀽𑀴𑀸 𑀉𑀝𑁆𑀞𑀳𑀺𑀁𑀲𑀼, ‘‘𑀇𑀲𑀺𑀲𑀺𑀗𑁆𑀕𑁄’’𑀢𑀺𑀧𑀺 𑀢𑀲𑁆𑀲 𑀦𑀸𑀫𑀁. 𑀅𑀲𑀜𑁆𑀜𑀓𑀪𑀸𑀯𑀦𑁆𑀢𑀺 𑀫𑀼𑀜𑁆𑀙𑀸𑀧𑀢𑁆𑀢𑀺𑀬𑀸 𑀓𑀺𑀭𑀺𑀬𑀸𑀫𑀬𑀲𑀜𑁆𑀜𑀸𑀯𑀲𑁂𑀦 𑀯𑀺𑀕𑀢𑀲𑀜𑁆𑀜𑀺𑀪𑀸𑀯𑀁. 𑀯𑀓𑁆𑀔𑀢𑀺 𑀳𑀺 ‘‘𑀯𑀺𑀲𑀜𑁆𑀜𑀻 𑀳𑀼𑀢𑁆𑀯𑀸’’𑀢𑀺. 𑀘𑀢𑁆𑀢𑀸𑀮𑀻𑀲𑀦𑀺𑀧𑀸𑀢𑁂 𑀆𑀕𑀢𑀦𑀬𑁂𑀦 𑀫𑀺𑀕𑀲𑀺𑀗𑁆𑀕𑀢𑀸𑀧𑀲𑀯𑀢𑁆𑀣𑀼𑀁 𑀲𑀗𑁆𑀔𑁂𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀫𑀺𑀕𑀲𑀺𑀗𑁆𑀕𑀢𑀸𑀧𑀲𑁄 𑀓𑀺𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀓𑀺𑀮𑁂𑀲𑀸𑀦𑀁 𑀲𑀦𑁆𑀢𑀸𑀧𑀦𑀢𑁄 𑀅𑀢𑁆𑀢𑀦𑁆𑀢𑀧𑁄. 𑀤𑀼𑀓𑁆𑀓𑀭𑀢𑀧𑀢𑀸𑀬 𑀖𑁄𑀭𑀢𑀧𑁄 𑀢𑀺𑀩𑁆𑀩𑀢𑀧𑁄. 𑀦𑀺𑀩𑁆𑀩𑀺𑀲𑁂𑀯𑀦𑀪𑀸𑀯𑀸𑀧𑀸𑀤𑀦𑁂𑀦 𑀲𑀩𑁆𑀩𑀲𑁄 𑀫𑀺𑀮𑀸𑀧𑀺𑀢𑀘𑀓𑁆𑀔𑀸𑀤𑀺𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀢𑀸𑀬 𑀧𑀭𑀫𑀥𑀺𑀢𑀺𑀦𑁆𑀤𑁆𑀭𑀺𑀬𑁄.𑀲𑀓𑁆𑀓𑀯𑀺𑀫𑀸𑀦𑀦𑁆𑀢𑀺 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀲𑀦𑀁 𑀲𑀦𑁆𑀥𑀸𑀬𑀸𑀳. 𑀢𑀜𑁆𑀳𑀺 𑀢𑀣𑀸𑀭𑀽𑀧𑀧𑀘𑁆𑀘𑀬𑀸 𑀓𑀤𑀸𑀘𑀺 𑀉𑀡𑁆𑀳𑀁, 𑀓𑀤𑀸𑀘𑀺 𑀣𑀤𑁆𑀥𑀁, 𑀓𑀤𑀸𑀘𑀺 𑀘𑀮𑀺𑀢𑀁 𑀳𑁄𑀢𑀺. ‘‘𑀲𑀓𑁆𑀓…𑀧𑁂… 𑀧𑀢𑁆𑀣𑁂𑀢𑀻’’𑀢𑀺 𑀅𑀬𑁄𑀦𑀺𑀲𑁄 𑀘𑀺𑀦𑁆𑀢𑁂𑀢𑁆𑀯𑀸 𑀧𑁂𑀲𑁂𑀲𑀺. 𑀪𑀕𑁆𑀕𑁄𑀢𑀺 𑀪𑀜𑁆𑀚𑀺𑀢𑀓𑀼𑀲𑀮𑀚𑁆𑀛𑀸𑀲𑀬𑁄, 𑀅𑀥𑀼𑀦𑀸 𑀧𑀦 ‘‘𑀮𑀕𑁆𑀕𑁄’’𑀢𑀺 𑀧𑀸𑀞𑀁 𑀮𑀺𑀔𑀦𑁆𑀢𑀺. 𑀢𑁂𑀦 𑀤𑀺𑀩𑁆𑀩𑀨𑀲𑁆𑀲𑁂𑀦𑀸𑀢𑀺 𑀳𑀢𑁆𑀣𑀕𑁆𑀕𑀳𑀡𑀫𑀢𑁆𑀢𑀤𑀺𑀩𑁆𑀩𑀨𑀲𑁆𑀲𑁂𑀦. 𑀢𑀦𑁆𑀢𑀺 𑀢𑀣𑀸 𑀲𑀜𑁆𑀜𑀸𑀧𑀝𑀺𑀮𑀸𑀪𑀁. 𑀏𑀯𑀫𑀸𑀳𑀸𑀢𑀺 𑀏𑀯𑀁 ‘‘𑀲𑀜𑁆𑀜𑀸 𑀳𑀺 𑀪𑁄 𑀧𑀼𑀭𑀺𑀲𑀲𑁆𑀲 𑀅𑀢𑁆𑀢𑀸’’𑀢𑀺𑀆𑀤𑀺𑀦𑀸 𑀆𑀓𑀸𑀭𑁂𑀦 𑀲𑀜𑁆𑀜𑀸𑀦𑀺𑀭𑁄𑀥𑀫𑀸𑀳. 𑀇𑀫𑀺𑀦𑀸𑀯 𑀦𑀬𑁂𑀦 𑀇𑀢𑁄 𑀧𑀭𑁂𑀲𑀼𑀧𑀺 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀧𑀸𑀴𑀺𑀫𑀸𑀳𑀭𑀺𑀢𑁆𑀯𑀸 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀢𑀢𑀺𑀬𑁄𑀢𑀺 ‘‘𑀲𑀦𑁆𑀢𑀺 𑀳𑀺 𑀪𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀯𑀸𑀤𑀻. 𑀆𑀣𑀩𑁆𑀩𑀡𑀧𑀬𑁄𑀕𑀦𑁆𑀢𑀺 𑀆𑀣𑀩𑁆𑀩𑀡𑀯𑁂𑀤𑀯𑀺𑀳𑀺𑀢𑀁 𑀆𑀣𑀩𑁆𑀩𑀡𑀺𑀓𑀸𑀦𑀁 𑀯𑀺𑀲𑀜𑁆𑀜𑀺𑀪𑀸𑀯𑀸𑀧𑀸𑀤𑀦𑀧𑁆𑀧𑀬𑁄𑀕𑀁. 𑀉𑀧𑀓𑀟𑁆𑀠𑀦𑀁 𑀆𑀳𑀭𑀡𑀁. 𑀅𑀧𑀓𑀟𑁆𑀠𑀦𑀁 𑀅𑀧𑀳𑀭𑀡𑀁. 𑀆𑀣𑀩𑁆𑀩𑀡𑀁 𑀧𑀬𑁄𑀚𑁂𑀢𑁆𑀯𑀸𑀢𑀺 𑀆𑀣𑀩𑁆𑀩𑀡𑀯𑁂𑀤𑁂 𑀆𑀕𑀢𑀁 𑀅𑀕𑁆𑀕𑀺𑀚𑀼𑀳𑀦𑀧𑀼𑀩𑁆𑀩𑀓𑀁 𑀫𑀦𑁆𑀢𑀧𑀤𑀁 𑀧𑀬𑁄𑀚𑁂𑀢𑁆𑀯𑀸 𑀲𑀻𑀲𑀘𑁆𑀙𑀺𑀦𑁆𑀦𑀢𑀸𑀤𑀺𑀤𑀲𑁆𑀲𑀦𑁂𑀦 𑀲𑀜𑁆𑀜𑀸𑀦𑀺𑀭𑁄𑀥𑀫𑀸𑀳. 𑀢𑀲𑁆𑀲𑀸𑀢𑀺 𑀬𑀲𑁆𑀲 𑀲𑀻𑀲𑀘𑁆𑀙𑀺𑀦𑁆𑀦𑀢𑀸𑀤𑀺 𑀤𑀲𑁆𑀲𑀺𑀢𑀁, 𑀢𑀲𑁆𑀲.

𑀘𑀢𑀼𑀢𑁆𑀣𑁄𑀢𑀺 ‘‘𑀲𑀦𑁆𑀢𑀺 𑀳𑀺 𑀪𑁄 𑀤𑁂𑀯𑀢𑀸 𑀫𑀳𑀺𑀤𑁆𑀥𑀺𑀓𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀯𑀸𑀤𑀻. 𑀬𑀓𑁆𑀔𑀤𑀸𑀲𑀻𑀦𑀦𑁆𑀢𑀺 𑀤𑁂𑀯𑀤𑀸𑀲𑀻𑀦𑀁, 𑀬𑀸 ‘‘𑀬𑁄𑀕𑀯𑀢𑀺𑀬𑁄’’𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺, 𑀬𑁄𑀕𑀺𑀦𑀺𑀬𑁄𑀢𑀺𑀧𑀺 𑀧𑀸𑀓𑀝𑀸. 𑀫𑀤𑀦𑀺𑀤𑁆𑀤𑀦𑁆𑀢𑀺 𑀲𑀼𑀭𑀸𑀫𑀤𑀦𑀺𑀫𑀺𑀢𑁆𑀢𑀓𑀁 𑀲𑀼𑀧𑀦𑀁. 𑀤𑁂𑀯𑀢𑀽𑀧𑀳𑀸𑀭𑀦𑁆𑀢𑀺 𑀦𑀘𑁆𑀘𑀦𑀕𑀸𑀬𑀦𑀸𑀤𑀺𑀦𑀸 𑀤𑁂𑀯𑀢𑀸𑀦𑀁 𑀧𑀽𑀚𑀁. 𑀲𑀼𑀭𑀸𑀧𑀸𑀢𑀺𑀦𑁆𑀢𑀺 𑀧𑀸𑀢𑀺𑀧𑀼𑀡𑁆𑀡𑀁 𑀲𑀼𑀭𑀁. 𑀤𑀺𑀯𑀸𑀢𑀺 𑀅𑀢𑀺𑀤𑀺𑀯𑀸, 𑀉𑀲𑁆𑀲𑀽𑀭𑁂𑀢𑀺 𑀅𑀢𑁆𑀣𑁄. 𑀢𑀦𑁆𑀢𑀺 𑀢𑀣𑀸 𑀲𑀼𑀧𑀺𑀢𑁆𑀯𑀸 𑀯𑀼𑀝𑁆𑀞𑀳𑀦𑀁. 𑀲𑀼𑀢𑁆𑀢𑀓𑀸𑀮𑁂 𑀤𑁂𑀯𑀢𑀸𑀦𑀁 𑀲𑀜𑁆𑀜𑀸𑀧𑀓𑀟𑁆𑀠𑀦𑀯𑀲𑁂𑀦 𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑀸, 𑀧𑀩𑀼𑀤𑁆𑀥𑀓𑀸𑀮𑁂 𑀲𑀜𑁆𑀜𑀼𑀧𑀓𑀟𑁆𑀠𑀦𑀯𑀲𑁂𑀦 𑀦𑀺𑀭𑁄𑀥𑀸 𑀯𑀼𑀝𑁆𑀞𑀺𑀢𑀸𑀢𑀺 𑀫𑀜𑁆𑀜𑀫𑀸𑀦𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀴𑀫𑀽𑀕𑀓𑀣𑀸 𑀯𑀺𑀬𑀸𑀢𑀺 𑀇𑀫𑁂𑀲𑀁 𑀧𑀡𑁆𑀟𑀺𑀢𑀫𑀸𑀦𑀻𑀦𑀁 𑀓𑀣𑀸 𑀅𑀦𑁆𑀥𑀩𑀸𑀮𑀓𑀣𑀸𑀲𑀤𑀺𑀲𑀻. 𑀘𑀢𑁆𑀢𑀸𑀭𑁄 𑀦𑀺𑀭𑁄𑀥𑁂𑀢𑀺 𑀅𑀜𑁆𑀜𑀫𑀜𑁆𑀜𑀯𑀺𑀥𑀼𑀭𑁂 𑀘𑀢𑁆𑀢𑀸𑀭𑁄𑀧𑀺 𑀦𑀺𑀭𑁄𑀥𑁂. 𑀏𑀓𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀏𑀓𑀲𑀪𑀸𑀯𑁂𑀦𑁂𑀯 𑀪𑀯𑀺𑀢𑀩𑁆𑀩𑀁. 𑀦 𑀩𑀳𑀼𑀦𑀸𑀢𑀺 𑀦 𑀘 𑀅𑀜𑁆𑀜𑀫𑀜𑁆𑀜𑀯𑀺𑀭𑀼𑀤𑁆𑀥𑁂𑀦 𑀩𑀳𑀼𑀯𑀺𑀥𑁂𑀦 𑀦𑀸𑀦𑀸𑀲𑀪𑀸𑀯𑁂𑀦 𑀪𑀯𑀺𑀢𑀩𑁆𑀩𑀁. 𑀢𑁂𑀦𑀸𑀧𑀺 𑀏𑀓𑁂𑀦𑀸𑀢𑀺 𑀏𑀓𑀲𑀪𑀸𑀯𑀪𑀽𑀢𑁂𑀦 𑀢𑁂𑀦𑀸𑀧𑀺 𑀦𑀺𑀭𑁄𑀥𑁂𑀦. 𑀅𑀜𑁆𑀜𑁂𑀦𑁂𑀯𑀸𑀢𑀺 𑀢𑁂𑀳𑀺 𑀯𑀼𑀢𑁆𑀢𑀸𑀓𑀸𑀭𑀢𑁄 𑀅𑀜𑁆𑀜𑀸𑀓𑀸𑀭𑁂𑀦𑁂𑀯 𑀪𑀯𑀺𑀢𑀩𑁆𑀩𑀁. 𑀲𑁄𑀢𑀺 𑀏𑀓𑀲𑀪𑀸𑀯𑀪𑀽𑀢𑁄 𑀦𑀺𑀭𑁄𑀥𑁄. 𑀅𑀜𑁆𑀜𑀢𑁆𑀭 𑀲𑀩𑁆𑀩𑀜𑁆𑀜𑀼𑀦𑀸𑀢𑀺 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀁 𑀞𑀧𑁂𑀢𑁆𑀯𑀸. 𑀇𑀥𑀸𑀢𑀺 𑀓𑁄𑀢𑀽𑀳𑀮𑀲𑀸𑀮𑀸𑀬𑀁. 𑀅𑀬𑀁 𑀦𑀺𑀭𑁄𑀥𑁄 𑀅𑀬𑀁 𑀦𑀺𑀭𑁄𑀥𑁄𑀢𑀺 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀩𑁆𑀬𑀸𑀧𑀦𑀺𑀘𑁆𑀙𑀸𑀯𑀘𑀦𑀁 𑀲𑀢𑁆𑀣𑀸 𑀅𑀢𑁆𑀢𑀦𑁄 𑀤𑁂𑀲𑀦𑀸𑀯𑀺𑀮𑀸𑀲𑁂𑀦 𑀅𑀦𑁂𑀓𑀸𑀓𑀸𑀭𑀯𑁄𑀓𑀸𑀭𑀁 𑀦𑀺𑀭𑁄𑀥𑀁 𑀯𑀺𑀪𑀸𑀯𑁂𑀲𑁆𑀲𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀓𑀢𑀁. 𑀅𑀳𑁄 𑀦𑀽𑀦𑀸𑀢𑀺 𑀏𑀢𑁆𑀣 𑀅𑀳𑁄𑀢𑀺 𑀅𑀘𑁆𑀙𑀭𑀺𑀬𑁂 𑀦𑀺𑀧𑀸𑀢𑁄, 𑀦𑀽𑀦𑀸𑀢𑀺 𑀅𑀦𑀼𑀲𑁆𑀲𑀭𑀡𑁂. 𑀢𑀲𑁆𑀫𑀸 𑀅𑀳𑁄 𑀦𑀽𑀦 𑀪𑀕𑀯𑀸𑀢𑀺 𑀅𑀦𑀜𑁆𑀜𑀲𑀸𑀥𑀸𑀭𑀡𑀤𑁂𑀲𑀦𑀢𑁆𑀢𑀸 𑀪𑀕𑀯𑀸 𑀦𑀺𑀭𑁄𑀥𑀫𑁆𑀧𑀺 𑀅𑀳𑁄 𑀅𑀘𑁆𑀙𑀭𑀺𑀬𑀁 𑀓𑀢𑁆𑀯𑀸 𑀆𑀭𑀸𑀥𑁂𑀬𑁆𑀬 𑀫𑀜𑁆𑀜𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀳𑁄 𑀦𑀽𑀦 𑀲𑀼𑀕𑀢𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀅𑀘𑁆𑀙𑀭𑀺𑀬𑀯𑀺𑀪𑀸𑀯𑀦𑀢𑁄 𑀏𑀯 𑀘𑁂𑀢𑁆𑀣 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀆𑀫𑁂𑀟𑀺𑀢𑀯𑀘𑀦𑀁. 𑀅𑀘𑁆𑀙𑀭𑀺𑀬𑀢𑁆𑀣𑁄𑀧𑀺 𑀳𑁂𑀲 𑀅𑀳𑁄𑀲𑀤𑁆𑀤𑁄 𑀅𑀦𑀼𑀲𑁆𑀲𑀭𑀡𑀫𑀼𑀔𑁂𑀦𑁂𑀯 𑀧𑁄𑀝𑁆𑀞𑀧𑀸𑀤𑁂𑀦 𑀕𑀳𑀺𑀢𑁄. 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀅𑀦𑀼𑀲𑁆𑀲𑀭𑀡𑀢𑁆𑀣𑁂 𑀦𑀺𑀧𑀸𑀢𑀤𑁆𑀯𑀬’’𑀦𑁆𑀢𑀺. 𑀢𑁂𑀦𑀸𑀢𑀺 𑀅𑀦𑀼𑀲𑁆𑀲𑀭𑀡𑀢𑁆𑀣𑀫𑀼𑀔𑁂𑀦 𑀧𑀯𑀢𑁆𑀢𑀦𑀢𑁄. ‘‘𑀅𑀳𑁄…𑀧𑁂… 𑀲𑀼𑀕𑀢𑁄’’𑀢𑀺 𑀯𑀘𑀦𑁂𑀦 𑀏𑀢𑀤𑀳𑁄𑀲𑀻𑀢𑀺 𑀬𑁄𑀚𑀦𑀸. ‘‘𑀬𑀁𑀢𑀁𑀲𑀤𑁆𑀤𑀸 𑀦𑀺𑀘𑁆𑀘𑀲𑀫𑁆𑀩𑀦𑁆𑀥𑀸’’𑀢𑀺 𑀲𑀸𑀥𑀺𑀧𑁆𑀧𑀸𑀬𑀁 𑀬𑁄𑀚𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀬𑁄 𑀏𑀢𑁂𑀲’’𑀦𑁆𑀢𑀺𑀆𑀤𑀺𑀫𑀸𑀳. 𑀓𑀸𑀮𑀤𑁂𑀲𑀧𑀼𑀕𑁆𑀕𑀮𑀸𑀤𑀺𑀯𑀺𑀪𑀸𑀕𑁂𑀦 𑀩𑀳𑀼𑀪𑁂𑀤𑀢𑁆𑀢𑀸 𑀇𑀫𑁂𑀲𑀁 𑀦𑀺𑀭𑁄𑀥𑀥𑀫𑁆𑀫𑀸𑀦𑀦𑁆𑀢𑀺 𑀩𑀳𑀼𑀢𑁆𑀢𑁂 𑀲𑀸𑀫𑀺𑀯𑀘𑀦𑀁, 𑀓𑀼𑀲𑀮𑀲𑀤𑁆𑀤𑀬𑁄𑀕𑁂 𑀘𑁂𑀢𑀁 𑀪𑀼𑀫𑁆𑀫𑀢𑁆𑀣𑁂 𑀤𑀝𑁆𑀞𑀩𑁆𑀩𑀁. 𑀓𑀼𑀲𑀮𑁄 𑀦𑀺𑀧𑀼𑀡𑁄 𑀙𑁂𑀓𑁄𑀢𑀺 𑀧𑀭𑀺𑀬𑀸𑀬𑀯𑀘𑀦𑀫𑁂𑀢𑀁. 𑀅𑀳𑁄 𑀦𑀽𑀦 𑀓𑀣𑁂𑀬𑁆𑀬𑀸𑀢𑀺 𑀅𑀘𑁆𑀙𑀭𑀺𑀬𑀁 𑀓𑀢𑁆𑀯𑀸 𑀓𑀣𑁂𑀬𑁆𑀬 𑀫𑀜𑁆𑀜𑁂. 𑀲𑁄 𑀲𑀼𑀕𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀘𑀺𑀡𑁆𑀡𑀯𑀲𑀺𑀢𑀸𑀬𑀸𑀢𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀁 𑀘𑀺𑀡𑁆𑀡𑀯𑀲𑀻𑀪𑀸𑀯𑀢𑁆𑀢𑀸. 𑀲𑀪𑀸𑀯𑀁 𑀚𑀸𑀦𑀸𑀢𑀻𑀢𑀺 𑀦𑀺𑀭𑁄𑀥𑀲𑀪𑀸𑀯𑀁 𑀬𑀸𑀣𑀸𑀯𑀢𑁄 𑀚𑀸𑀦𑀸𑀢𑀺.

𑀅𑀳𑁂𑀢𑀼𑀓𑀲𑀜𑁆𑀜𑀼𑀧𑁆𑀧𑀸𑀤𑀦𑀺𑀭𑁄𑀥𑀓𑀣𑀸𑀯𑀡𑁆𑀡𑀦𑀸

𑁪𑁧𑁨. 𑀖𑀭𑀫𑀚𑁆𑀛𑁂𑀬𑁂𑀯 𑀧𑀓𑁆𑀔𑀮𑀺𑀢𑀸𑀢𑀺 𑀬𑀣𑀸 𑀖𑀭𑀢𑁄 𑀩𑀳𑀺 𑀕𑀦𑁆𑀢𑀼𑀓𑀸𑀫𑀸 𑀧𑀼𑀭𑀺𑀲𑀸 𑀫𑀕𑁆𑀕𑀁 𑀅𑀦𑁄𑀢𑀭𑀺𑀢𑁆𑀯𑀸 𑀖𑀭𑀯𑀺𑀯𑀭𑁂 𑀲𑀫𑀢𑀮𑁂 𑀯𑀺𑀯𑀝𑀗𑁆𑀕𑀡𑁂 𑀏𑀯 𑀧𑀓𑁆𑀔𑀮𑀦𑀁 𑀧𑀢𑁆𑀢𑀸, 𑀏𑀯𑀁𑀲𑀫𑁆𑀧𑀤𑀫𑀺𑀤𑀦𑁆𑀢𑀺 𑀅𑀢𑁆𑀣𑁄. 𑀅𑀲𑀸𑀥𑀸𑀭𑀡𑁄 𑀳𑁂𑀢𑀼, 𑀲𑀸𑀥𑀸𑀭𑀡𑁄 𑀧𑀘𑁆𑀘𑀬𑁄𑀢𑀺 𑀏𑀯𑀫𑀸𑀤𑀺𑀯𑀺𑀪𑀸𑀕𑁄 𑀅𑀜𑁆𑀜𑀢𑁆𑀭 𑀯𑀼𑀢𑁆𑀢𑁄, 𑀇𑀥 𑀧𑀦 𑀢𑁂𑀦 𑀯𑀺𑀪𑀸𑀕𑁂𑀦 𑀧𑀬𑁄𑀚𑀦𑀁 𑀦𑀢𑁆𑀣𑀺 𑀲𑀜𑁆𑀜𑀸𑀬 𑀅𑀓𑀸𑀭𑀡𑀪𑀸𑀯𑀧𑀝𑀺𑀓𑁆𑀔𑁂𑀧𑀧𑀭𑀢𑁆𑀢𑀸 𑀘𑁄𑀤𑀦𑀸𑀬𑀸𑀢𑀺 𑀯𑀼𑀢𑁆𑀢𑀁 ‘‘𑀓𑀸𑀭𑀡𑀲𑁆𑀲𑁂𑀯 𑀦𑀸𑀫’’𑀦𑁆𑀢𑀺. 𑀬𑀁 𑀧𑀦 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁 ‘‘𑀲𑀳𑁂𑀢𑀽 𑀳𑀺 𑀧𑁄𑀝𑁆𑀞𑀧𑀸𑀤 𑀲𑀧𑁆𑀧𑀘𑁆𑀘𑀬𑀸 𑀧𑀼𑀭𑀺𑀲𑀲𑁆𑀲 𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀦𑁆𑀢𑀺𑀧𑀺 𑀦𑀺𑀭𑀼𑀚𑁆𑀛𑀦𑁆𑀢𑀺𑀧𑀻’’𑀢𑀺, 𑀢𑀢𑁆𑀣 𑀲𑀳𑁂𑀢𑀽 𑀲𑀧𑁆𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸 𑀧𑀦 𑀦𑀺𑀭𑀼𑀚𑁆𑀛𑀦𑁆𑀢𑀺𑀬𑁂𑀯, 𑀦 𑀢𑀺𑀝𑁆𑀞𑀦𑁆𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀦𑀺𑀭𑀼𑀚𑁆𑀛𑀦𑁆𑀢𑀺𑀧𑀻’’𑀢𑀺 𑀯𑀘𑀦𑀁, 𑀦 𑀢𑀼 𑀦𑀺𑀭𑁄𑀥𑀲𑁆𑀲 𑀲𑀳𑁂𑀢𑀼𑀲𑀧𑀘𑁆𑀘𑀬𑀢𑀸𑀤𑀲𑁆𑀲𑀦𑀢𑁆𑀣𑀁. 𑀉𑀧𑁆𑀧𑀸𑀤𑁄𑀬𑁂𑀯 𑀳𑀺 𑀲𑀳𑁂𑀢𑀼𑀓𑁄, 𑀦 𑀦𑀺𑀭𑁄𑀥𑁄. 𑀬𑀤𑀺 𑀳𑀺 𑀦𑀺𑀭𑁄𑀥𑁄𑀧𑀺 𑀲𑀳𑁂𑀢𑀼𑀓𑁄 𑀲𑀺𑀬𑀸, 𑀢𑀲𑁆𑀲𑀧𑀺 𑀧𑀼𑀦 𑀦𑀺𑀭𑁄𑀥𑁂𑀦 𑀪𑀯𑀺𑀢𑀩𑁆𑀩𑀁 𑀅𑀗𑁆𑀓𑀼𑀭𑀸𑀤𑀻𑀦𑀁 𑀧𑀼𑀦 𑀅𑀗𑁆𑀓𑀼𑀭𑀸𑀤𑀺𑀦𑀸 𑀯𑀺𑀬, 𑀦 𑀘 𑀢𑀲𑁆𑀲 𑀧𑀼𑀦 𑀦𑀺𑀭𑁄𑀥𑁄 𑀅𑀢𑁆𑀣𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀸𑀴𑀺𑀬𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀜𑁆𑀘 𑀦𑀬𑁄 𑀔𑀡𑀦𑀺𑀭𑁄𑀥𑀯𑀲𑁂𑀦 𑀯𑀼𑀢𑁆𑀢𑁄. 𑀬𑁄 𑀧𑀦 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀯𑀲𑁂𑀦 𑀲𑀩𑁆𑀩𑀲𑁄 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁄, 𑀲𑁄 ‘‘𑀲𑀳𑁂𑀢𑀼𑀓𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄 𑀢𑀣𑀸𑀭𑀽𑀧𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀯𑀺𑀦𑀸 𑀅𑀪𑀸𑀯𑀢𑁄. 𑀢𑁂𑀦𑀸𑀳 𑀪𑀕𑀯𑀸 ‘‘𑀲𑀺𑀓𑁆𑀔𑀸 𑀏𑀓𑀸 𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀢𑀺, 𑀲𑀺𑀓𑁆𑀔𑀸 𑀏𑀓𑀸 𑀲𑀜𑁆𑀜𑀸 𑀦𑀺𑀭𑀼𑀚𑁆𑀛𑀢𑀻’’𑀢𑀺 (𑀤𑀻. 𑀦𑀺. 𑁧.𑁪𑁧𑁨) 𑀢𑀢𑁄 𑀏𑀯 𑀘 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁪𑁧𑁩) 𑀯𑀼𑀢𑁆𑀢𑀁 ‘‘𑀲𑀜𑁆𑀜𑀸𑀬 𑀲𑀳𑁂𑀢𑀼𑀓𑀁 𑀉𑀧𑁆𑀧𑀸𑀤𑀦𑀺𑀭𑁄𑀥𑀁 𑀤𑀻𑀧𑁂𑀢𑀼’’𑀦𑁆𑀢𑀺. 𑀏𑀢𑀜𑁆𑀳𑀺 𑀧𑀸𑀴𑀺𑀯𑀘𑀦𑀁, 𑀅𑀝𑁆𑀞𑀓𑀣𑀸𑀯𑀘𑀦𑀜𑁆𑀘 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀺𑀓𑁆𑀔𑀸𑀢𑀺 𑀳𑁂𑀢𑁆𑀯𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀁, 𑀬-𑀓𑀸𑀭𑀮𑁄𑀧𑁄 𑀯𑀸 ‘‘𑀲𑀗𑁆𑀔𑁆𑀬𑀸𑀧𑀺 𑀢𑀫𑁆𑀳𑀸 𑀯𑀦𑀧𑀢𑁆𑀢𑀸 𑀧𑀓𑁆𑀓𑀫𑀺𑀢𑀩𑁆𑀩’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁧𑁯𑁨) 𑀯𑀺𑀬. 𑀳𑁂𑀢𑀼𑀪𑀸𑀯𑁄 𑀘𑀲𑁆𑀲𑀸 𑀉𑀧𑀭𑀺 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀏𑀓𑀲𑀤𑁆𑀤𑁄 𑀘 𑀅𑀜𑁆𑀜𑀧𑀭𑀺𑀬𑀸𑀬𑁄, 𑀦 𑀲𑀗𑁆𑀔𑁆𑀬𑀸𑀯𑀸𑀘𑀻 ‘‘𑀇𑀢𑁆𑀣𑁂𑀓𑁂 𑀲𑀢𑁄 𑀲𑀢𑁆𑀢𑀲𑁆𑀲𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁮𑁫-𑁯𑁧, 𑁯𑁪-𑁯𑁮; 𑀫. 𑀦𑀺. 𑁩.𑁨𑁧) 𑀯𑀺𑀬𑀸𑀢𑀺 𑀆𑀳 ‘‘𑀲𑀺𑀓𑁆𑀔𑀸𑀬 𑀏𑀓𑀘𑁆𑀘𑀸 𑀲𑀜𑁆𑀜𑀸 𑀚𑀸𑀬𑀦𑁆𑀢𑀻’’𑀢𑀺. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁪𑁧𑁩. 𑀯𑀺𑀢𑁆𑀣𑀸𑀭𑁂𑀢𑀼𑀓𑀫𑁆𑀬𑀢𑀸𑀢𑀺 𑀯𑀺𑀢𑁆𑀣𑀸𑀭𑁂𑀢𑀼𑀓𑀸𑀫𑀢𑀸𑀬. 𑀧𑀼𑀘𑁆𑀙𑀸𑀯𑀲𑁂𑀦𑀸𑀢𑀺 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸𑀯𑀲𑁂𑀦, 𑀯𑀺𑀢𑁆𑀣𑀸𑀭𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸𑀯𑀲𑁂𑀦𑀸𑀢𑀺 𑀯𑀸 𑀲𑀫𑀸𑀲𑁄. ‘‘𑀧𑁄𑀝𑁆𑀞𑀧𑀸𑀤𑀲𑁆𑀲𑁂𑀯𑀸𑀬𑀁 𑀧𑀼𑀘𑁆𑀙𑀸’’𑀢𑀺 𑀆𑀲𑀗𑁆𑀓𑀸𑀬 ‘‘𑀪𑀕𑀯𑀸 𑀅𑀯𑁄𑀘𑀸’’𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁. 𑀲𑀜𑁆𑀜𑀸𑀬…𑀧𑁂… 𑀤𑀻𑀧𑁂𑀢𑀼𑀁 𑀢𑀸 𑀤𑀲𑁆𑀲𑁂𑀦𑁆𑀢𑁄𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁆𑀣𑀸𑀢𑀺 𑀢𑀲𑁆𑀲𑀁 𑀉𑀧𑀭𑀺 𑀯𑀓𑁆𑀔𑀫𑀸𑀦𑀸𑀬 𑀤𑁂𑀲𑀦𑀸𑀬. 𑀢𑀢𑀺𑀬𑀸𑀢𑀺 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸 𑀆𑀕𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀅𑀬𑀁…𑀧𑁂… 𑀤𑁂𑀲𑀺𑀢𑁄𑀢𑀺 𑀏𑀢𑁆𑀣 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀯𑀲𑁂𑀦 𑀆𑀕𑀢𑀸. 𑀓𑀲𑁆𑀫𑀸𑀢𑀺 𑀘𑁂? 𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸, 𑀲𑀪𑀸𑀯𑀢𑁄, 𑀉𑀧𑀓𑀸𑀭𑀢𑁄 𑀘 𑀬𑀣𑀸𑀭𑀳𑀁 𑀧𑀜𑁆𑀜𑀸𑀓𑁆𑀔𑀦𑁆𑀥𑁂 𑀅𑀯𑀭𑁄𑀥𑀢𑁆𑀢𑀸 𑀲𑀗𑁆𑀕𑀳𑀺𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀣𑀸 𑀳𑀺 𑀘𑀽𑀴𑀯𑁂𑀤𑀮𑁆𑀮𑀲𑀼𑀢𑁆𑀢𑁂 𑀯𑀼𑀢𑁆𑀢𑀁 ‘‘𑀬𑀸 𑀘𑀸𑀯𑀼𑀲𑁄 𑀯𑀺𑀲𑀸𑀔 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀬𑁄 𑀘 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄, 𑀇𑀫𑁂 𑀥𑀫𑁆𑀫𑀸 𑀧𑀜𑁆𑀜𑀸𑀓𑁆𑀔𑀦𑁆𑀥𑁂 𑀲𑀗𑁆𑀕𑀳𑀺𑀢𑀸’’𑀢𑀺 (𑀫. 𑀦𑀺. 𑁧.𑁪𑁬𑁨) 𑀓𑀸𑀫𑀜𑁆𑀘𑁂𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀢𑀺𑀲𑁆𑀲𑁄𑀧𑀺 𑀲𑀺𑀓𑁆𑀔𑀸 𑀆𑀕𑀢𑀸, 𑀢𑀣𑀸𑀧𑀺 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸𑀬 𑀏𑀯 𑀅𑀪𑀺𑀲𑀜𑁆𑀜𑀸𑀦𑀺𑀭𑁄𑀥𑁄 𑀤𑀲𑁆𑀲𑀺𑀢𑁄. 𑀇𑀢𑀭𑀸 𑀧𑀦 𑀢𑀲𑁆𑀲𑀸 𑀲𑀫𑁆𑀪𑀸𑀭𑀪𑀸𑀯𑁂𑀦 𑀆𑀦𑀻𑀢𑀸𑀢𑀺 𑀅𑀬𑀫𑀢𑁆𑀣𑁄 𑀧𑀸𑀴𑀺𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑁄𑀢𑀺 𑀧𑀜𑁆𑀘 𑀓𑀸𑀫𑀓𑁄𑀝𑁆𑀞𑀸𑀲𑁂 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀦𑀓𑀭𑀸𑀕𑁄. 𑀅𑀲𑀫𑀼𑀧𑁆𑀧𑀦𑁆𑀦𑀓𑀸𑀫𑀘𑀸𑀭𑁄𑀢𑀺 𑀯𑀢𑁆𑀢𑀫𑀸𑀦𑀼𑀧𑁆𑀧𑀦𑁆𑀦𑀢𑀸𑀯𑀲𑁂𑀦 𑀦𑀲𑀫𑀼𑀧𑁆𑀧𑀦𑁆𑀦𑁄 𑀬𑁄 𑀓𑁄𑀘𑀺 𑀓𑀸𑀫𑀘𑀸𑀭𑁄, 𑀬𑀸 𑀓𑀸𑀘𑀺 𑀮𑁄𑀪𑀼𑀧𑁆𑀧𑀢𑁆𑀢𑀺. 𑀅𑀥𑀼𑀦𑀸 𑀧𑀦 ‘‘𑀅𑀲𑀫𑀼𑀧𑁆𑀧𑀦𑁆𑀦𑀓𑀸𑀫𑀭𑀸𑀕𑁄’’𑀢𑀺 𑀧𑀸𑀞𑁄, 𑀲𑁄 𑀅𑀬𑀼𑀢𑁆𑀢𑁄𑀯 𑀅𑀢𑁆𑀣𑀢𑁄 𑀯𑀺𑀭𑀼𑀤𑁆𑀥𑀢𑁆𑀢𑀸. 𑀓𑀸𑀫𑀭𑀸𑀕𑁄 𑀘𑁂𑀢𑁆𑀣 𑀯𑀺𑀲𑀬𑀯𑀲𑁂𑀦 𑀦𑀺𑀬𑀫𑀺𑀢𑀢𑁆𑀢𑀸 𑀓𑀸𑀫𑀕𑀼𑀡𑀸𑀭𑀫𑁆𑀫𑀡𑁄𑀯 𑀮𑁄𑀪𑁄 𑀤𑀝𑁆𑀞𑀩𑁆𑀩𑁄, 𑀓𑀸𑀫𑀘𑀸𑀭𑁄 𑀧𑀦 𑀛𑀸𑀦𑀦𑀺𑀓𑀦𑁆𑀢𑀺𑀪𑀯𑀭𑀸𑀕𑀸𑀤𑀺𑀧𑁆𑀧𑀪𑁂𑀤𑁄 𑀲𑀩𑁆𑀩𑁄𑀧𑀺 𑀮𑁄𑀪𑀘𑀸𑀭𑁄. 𑀓𑀸𑀫𑀦𑀝𑁆𑀞𑁂𑀦, 𑀓𑀸𑀫𑁂𑀲𑀼 𑀧𑀯𑀢𑁆𑀢𑀦𑀝𑁆𑀞𑁂𑀦 𑀘 𑀓𑀸𑀫𑀘𑀸𑀭𑁄. 𑀲𑀩𑁆𑀩𑁂𑀧𑀺 𑀳𑀺 𑀢𑁂𑀪𑀽𑀫𑀓𑀥𑀫𑁆𑀫𑀸 𑀓𑀸𑀫𑀦𑀻𑀬𑀝𑁆𑀞𑁂𑀦 𑀓𑀸𑀫𑀸. 𑀬𑀲𑁆𑀫𑀸 𑀉𑀪𑀬𑁂𑀲𑀫𑁆𑀧𑀺 𑀲𑀳𑀘𑀭𑀡𑀜𑀸𑀬𑁂𑀦 𑀓𑀸𑀫𑀲𑀜𑁆𑀜𑀸𑀪𑀸𑀯𑁄 𑀳𑁄𑀢𑀺, 𑀢𑀲𑁆𑀫𑀸 ‘‘𑀓𑀸𑀫𑀲𑀜𑁆𑀜𑀸’’𑀢𑀺 𑀧𑀤𑀼𑀤𑁆𑀥𑀸𑀭𑀁 𑀓𑀢𑁆𑀯𑀸 𑀢𑀤𑀼𑀪𑀬𑀫𑁂𑀯 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀅𑀲𑀫𑀼𑀧𑁆𑀧𑀦𑁆𑀦𑀓𑀸𑀫𑀘𑀸𑀭𑀢𑁄 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑀲𑁆𑀲 𑀯𑀺𑀲𑁂𑀲𑀤𑀲𑁆𑀲𑀦𑀁, 𑀅𑀲𑀫𑀼𑀧𑁆𑀧𑀦𑁆𑀦𑀓𑀸𑀫𑀘𑀸𑀭𑀲𑁆𑀲𑁂𑀯 𑀯𑀸 𑀇𑀥𑀸𑀥𑀺𑀧𑁆𑀧𑁂𑀢𑀪𑀸𑀯𑀤𑀲𑁆𑀲𑀦𑀁. 𑀓𑀸𑀫𑀁 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑁄𑀧𑀺 𑀅𑀲𑀫𑀼𑀧𑁆𑀧𑀦𑁆𑀦𑁄 𑀏𑀯 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀲𑀫𑀼𑀕𑁆𑀖𑀸𑀝𑀻𑀬𑀢𑀺, 𑀢𑀲𑁆𑀫𑀺𑀁 𑀧𑀦 𑀲𑀫𑀼𑀕𑁆𑀖𑀸𑀝𑀺𑀢𑁂𑀧𑀺 𑀦 𑀲𑀩𑁆𑀩𑁄 𑀭𑀸𑀕𑁄 𑀲𑀫𑀼𑀕𑁆𑀖𑀸𑀝𑀁 𑀕𑀘𑁆𑀙𑀢𑀺 𑀢𑀲𑁆𑀲 𑀅𑀕𑁆𑀕𑀫𑀕𑁆𑀕𑁂𑀦 𑀲𑀫𑀼𑀕𑁆𑀖𑀸𑀝𑀺𑀢𑀢𑁆𑀢𑀸. 𑀢𑀲𑁆𑀫𑀸 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑀕𑁆𑀕𑀳𑀡𑁂𑀦 𑀇𑀢𑀭𑀲𑁆𑀲 𑀲𑀩𑁆𑀩𑀲𑁆𑀲 𑀕𑀳𑀡𑀁 𑀦 𑀳𑁄𑀢𑀻𑀢𑀺 𑀉𑀪𑀬𑀢𑁆𑀣𑀲𑀸𑀥𑀸𑀭𑀡𑁂𑀦 𑀧𑀭𑀺𑀬𑀸𑀬𑁂𑀦 𑀉𑀪𑀬𑀫𑁂𑀯 𑀲𑀗𑁆𑀕𑀳𑁂𑀢𑁆𑀯𑀸 𑀧𑀸𑀴𑀺𑀬𑀁 𑀓𑀸𑀫𑀲𑀜𑁆𑀜𑀸𑀕𑁆𑀕𑀳𑀡𑀁 𑀓𑀢𑀁, 𑀅𑀢𑁄 𑀢𑀤𑀼𑀪𑀬𑀁 𑀲𑀭𑀽𑀧𑀢𑁄, 𑀯𑀺𑀲𑁂𑀲𑀢𑁄 𑀘 𑀤𑀲𑁆𑀲𑁂𑀢𑁆𑀯𑀸 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀪𑀸𑀯𑀢𑁄 ‘‘𑀅𑀲𑀫𑀼𑀧𑁆𑀧𑀦𑁆𑀦𑀓𑀸𑀫𑀘𑀸𑀭𑁄 𑀧𑀦 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸𑀢𑀺 𑀅𑀲𑀫𑀼𑀧𑁆𑀧𑀦𑁆𑀦𑀓𑀸𑀫𑀘𑀸𑀭𑀲𑁆𑀲𑁂𑀯 𑀇𑀥 𑀯𑀝𑁆𑀝𑀦𑀢𑁄 𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀢𑀲𑁆𑀲𑀸𑀢𑀺 𑀧𑀞𑀫𑀚𑁆𑀛𑀸𑀦𑀲𑀫𑀗𑁆𑀕𑀺𑀦𑁄 𑀧𑀼𑀕𑁆𑀕𑀮𑀲𑁆𑀲. 𑀲𑀤𑀺𑀲𑀢𑁆𑀢𑀸𑀢𑀺 𑀓𑀸𑀫𑀲𑀜𑁆𑀜𑀸𑀤𑀺𑀪𑀸𑀯𑁂𑀦 𑀲𑀫𑀸𑀦𑀢𑁆𑀢𑀸, 𑀏𑀢𑁂𑀦 𑀧𑀸𑀴𑀺𑀬𑀁 ‘‘𑀧𑀼𑀭𑀺𑀫𑀸’’𑀢𑀺 𑀇𑀤𑀁 𑀲𑀤𑀺𑀲𑀓𑀧𑁆𑀧𑀦𑀸𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀅𑀦𑀸𑀕𑀢𑀸 𑀳𑀺 𑀇𑀥 ‘‘𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀯𑀼𑀢𑁆𑀢𑀸 𑀅𑀦𑀼𑀧𑁆𑀧𑀸𑀤𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀢𑀲𑁆𑀫𑀸 𑀅𑀦𑀸𑀕𑀢𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀅𑀦𑀼𑀧𑁆𑀧𑀦𑁆𑀦𑀸𑀯 𑀦𑀼𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁.

𑀯𑀺𑀯𑁂𑀓𑀚𑀧𑀻𑀢𑀺𑀲𑀼𑀔𑀲𑀗𑁆𑀔𑀸𑀢𑀸𑀢𑀺 𑀯𑀺𑀯𑁂𑀓𑀚𑀧𑀻𑀢𑀺𑀲𑀼𑀔𑁂𑀳𑀺 𑀲𑀳 𑀅𑀓𑁆𑀔𑀸𑀢𑀸, 𑀦 𑀯𑀺𑀯𑁂𑀓𑀚𑀧𑀻𑀢𑀺𑀲𑀼𑀔𑀸𑀦𑀻𑀢𑀺 𑀅𑀓𑁆𑀔𑀸𑀢𑀸. 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀳𑀺 𑀲𑀜𑁆𑀜𑀸𑀬𑁂𑀯 𑀇𑀥𑀸𑀥𑀺𑀧𑁆𑀧𑁂𑀢𑀸, 𑀦 𑀯𑀺𑀯𑁂𑀓𑀚𑀧𑀻𑀢𑀺𑀲𑀼𑀔𑀸𑀦𑀺. 𑀅𑀣 𑀯𑀸 𑀯𑀺𑀯𑁂𑀓𑀚𑀧𑀻𑀢𑀺𑀲𑀼𑀔𑀓𑁄𑀝𑁆𑀞𑀸𑀲𑀺𑀓𑀸𑀢𑀺 𑀅𑀢𑁆𑀣𑁄. 𑀲𑀗𑁆𑀔𑀸𑀢𑀲𑀤𑁆𑀤𑁄 𑀳𑁂𑀢𑁆𑀣 𑀓𑁄𑀝𑁆𑀞𑀸𑀲𑀢𑁆𑀣𑁄 ‘‘𑀅𑀤𑀺𑀦𑁆𑀦𑀁 𑀣𑁂𑀬𑁆𑀬𑀲𑀗𑁆𑀔𑀸𑀢𑀁 𑀆𑀤𑀺𑀬𑁂𑀬𑁆𑀬𑀸’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁮𑁯, 𑁯𑁧) 𑀯𑀺𑀬. 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀑𑀴𑀸𑀭𑀺𑀓𑀗𑁆𑀕𑀧𑁆𑀧𑀳𑀸𑀦𑀯𑀲𑁂𑀦 𑀦𑀸𑀦𑀢𑁆𑀣𑀲𑀜𑁆𑀜𑀸𑀧𑀝𑀺𑀖𑀲𑀜𑁆𑀜𑀸𑀳𑀺 𑀦𑀺𑀧𑀼𑀡𑀢𑀸𑀬 𑀲𑀼𑀔𑀼𑀫𑀸. 𑀪𑀽𑀢𑀢𑀸𑀬 𑀲𑀘𑁆𑀘𑀸. 𑀢𑀤𑁂𑀯𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀪𑀽𑀢𑀸’’𑀢𑀺 𑀇𑀫𑀺𑀦𑀸. 𑀲𑀼𑀔𑀼𑀫𑀪𑀸𑀯𑁂𑀦, 𑀧𑀭𑀫𑀢𑁆𑀣𑀪𑀸𑀯𑁂𑀦 𑀘 𑀅𑀯𑀺𑀧𑀭𑀻𑀢𑀲𑀪𑀸𑀯𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀩𑁆𑀬𑀸𑀲𑀯𑀲𑁂𑀦 𑀬𑀣𑀸𑀧𑀸𑀞𑀫𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀲𑀯𑀲𑁂𑀦𑀧𑀺 𑀬𑀣𑀸𑀧𑀸𑀞𑀫𑁂𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀣 𑀯𑀸’’𑀢𑀺𑀆𑀤𑀺𑀫𑀸𑀳. 𑀲𑀫𑀸𑀲𑀩𑁆𑀬𑀸𑀲𑀯𑀲𑁂𑀦 𑀳𑀺 𑀤𑁆𑀯𑀺𑀥𑀸 𑀧𑀸𑀞𑁄 𑀤𑀺𑀲𑁆𑀲𑀢𑀺. ‘‘𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀑𑀴𑀸𑀭𑀺𑀓𑀗𑁆𑀕𑀧𑁆𑀧𑀳𑀸𑀦𑀯𑀲𑁂𑀦𑀸’’𑀢𑀺 𑀇𑀫𑀺𑀦𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀪𑀸𑀯𑀦𑀸𑀦𑀼𑀪𑀸𑀯𑀲𑀺𑀤𑁆𑀥𑀸, 𑀲𑀜𑁆𑀜𑀸𑀬 𑀲𑀡𑁆𑀳𑀲𑀼𑀔𑀼𑀫𑀢𑀸 𑀦𑀻𑀯𑀭𑀡𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀯𑀺𑀜𑁆𑀜𑀸𑀬𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀪𑀽𑀢𑀢𑀸𑀬𑀸𑀢𑀺 𑀲𑀼𑀔𑀼𑀫𑀪𑀸𑀯𑁂𑀦, 𑀧𑀭𑀫𑀢𑁆𑀣𑀪𑀸𑀯𑁂𑀦 𑀘 𑀅𑀯𑀺𑀧𑀭𑀻𑀢𑀢𑀸𑀬, 𑀯𑀺𑀚𑁆𑀚𑀫𑀸𑀦𑀢𑀸𑀬 𑀯𑀸. 𑀯𑀺𑀯𑁂𑀓𑀚𑁂𑀳𑀻𑀢𑀺 𑀦𑀻𑀯𑀭𑀡𑀯𑀺𑀯𑁂𑀓𑀢𑁄 𑀚𑀸𑀢𑁂𑀳𑀺. 𑀇𑀤𑀸𑀦𑀺 𑀛𑀸𑀦𑀲𑀫𑀗𑁆𑀕𑀻𑀯𑀲𑁂𑀦 𑀯𑀼𑀢𑁆𑀢𑀲𑁆𑀲 𑀤𑀼𑀢𑀺𑀬𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀸 𑀅𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑀯𑀸𑀭𑁂𑀲𑀼.

𑀲𑀫𑀸𑀧𑀚𑁆𑀚𑀦𑀸𑀥𑀺𑀝𑁆𑀞𑀸𑀦𑀁 𑀯𑀺𑀬 𑀯𑀼𑀝𑁆𑀞𑀸𑀦𑀫𑁆𑀧𑀺𑀛𑀸𑀦𑁂 𑀧𑀭𑀺𑀬𑀸𑀧𑀦𑁆𑀦𑀁 𑀳𑁄𑀢𑀺 𑀬𑀣𑀸 𑀢𑀁 𑀥𑀫𑁆𑀫𑀸𑀦𑀁 𑀪𑀗𑁆𑀕𑀓𑁆𑀔𑀡𑁄 𑀥𑀫𑁆𑀫𑁂𑀲𑀼, 𑀆𑀯𑀚𑁆𑀚𑀦𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀺 𑀧𑀦 𑀦 𑀛𑀸𑀦𑀧𑀭𑀺𑀬𑀸𑀧𑀦𑁆𑀦𑀸𑀦𑀺, 𑀢𑀲𑁆𑀫𑀸 𑀛𑀸𑀦𑀧𑀭𑀺𑀬𑀸𑀧𑀦𑁆𑀦𑀫𑁂𑀯 𑀯𑀲𑀻𑀓𑀭𑀡𑀁 𑀕𑀳𑁂𑀢𑁆𑀯𑀸 ‘‘𑀲𑀫𑀸𑀧𑀚𑁆𑀚𑀦𑁆𑀢𑁄, 𑀅𑀥𑀺𑀝𑁆𑀞𑀳𑀦𑁆𑀢𑁄, 𑀯𑀼𑀝𑁆𑀞𑀳𑀦𑁆𑀢𑁄 𑀘 𑀲𑀺𑀓𑁆𑀔𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀦𑁆𑀢𑀺 𑀧𑀞𑀫𑀚𑁆𑀛𑀸𑀦𑀁. 𑀢𑁂𑀦…𑀧𑁂… 𑀛𑀸𑀦𑁂𑀦𑀸𑀢𑀺 𑀇𑀤𑀫𑁆𑀧𑀺 ‘‘𑀲𑀺𑀓𑁆𑀔𑀸’’𑀢𑀺 𑀏𑀢𑀲𑁆𑀲 𑀲𑀁𑀯𑀡𑁆𑀡𑀦𑀸𑀧𑀤𑀁. 𑀢𑁂𑀦𑀸𑀢𑀺 𑀘 𑀳𑁂𑀢𑀼𑀫𑁆𑀳𑀺 𑀓𑀭𑀡𑀯𑀘𑀦𑀁, 𑀧𑀞𑀫𑀚𑁆𑀛𑀸𑀦𑁂𑀦 𑀳𑁂𑀢𑀼𑀦𑀸𑀢𑀺 𑀅𑀢𑁆𑀣𑁄. 𑀳𑁂𑀢𑀼𑀪𑀸𑀯𑁄 𑀘𑁂𑀢𑁆𑀣 𑀛𑀸𑀦𑀲𑁆𑀲 𑀯𑀺𑀯𑁂𑀓𑀚𑀧𑀻𑀢𑀺𑀲𑀼𑀔𑀲𑀼𑀔𑀼𑀫𑀲𑀘𑁆𑀘𑀲𑀜𑁆𑀜𑀸𑀬 𑀉𑀧𑁆𑀧𑀢𑁆𑀢𑀺𑀬𑀸 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀪𑀸𑀯𑁄. 𑀓𑀸𑀫𑀲𑀜𑁆𑀜𑀸𑀬 𑀧𑀦 𑀦𑀺𑀭𑁄𑀥𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀸𑀯𑁄𑀯. 𑀲𑁄 𑀘 𑀔𑁄 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦. 𑀢𑀣𑀸 𑀘𑁂𑀯 𑀳𑁂𑀝𑁆𑀞𑀸 𑀲𑀁𑀯𑀡𑁆𑀡𑀺𑀢𑀁 ‘‘𑀢𑀣𑀸𑀭𑀽𑀧𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀯𑀺𑀦𑀸 𑀅𑀪𑀸𑀯𑀢𑁄’’𑀢𑀺 𑀏𑀢𑁂𑀦𑀼𑀧𑀸𑀬𑁂𑀦𑀸𑀢𑀺 𑀬𑁆𑀯𑀸𑀬𑀁 𑀧𑀞𑀫𑀚𑁆𑀛𑀸𑀦𑀢𑀧𑁆𑀧𑀝𑀺𑀧𑀓𑁆𑀔𑀲𑀜𑁆𑀜𑀸𑀯𑀲𑁂𑀦 ‘‘𑀲𑀺𑀓𑁆𑀔𑀸 𑀏𑀓𑀸 𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀢𑀺, 𑀲𑀺𑀓𑁆𑀔𑀸 𑀏𑀓𑀸 𑀲𑀜𑁆𑀜𑀸 𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀏𑀢𑁆𑀣 𑀦𑀬𑁄 𑀯𑀼𑀢𑁆𑀢𑁄, 𑀏𑀢𑁂𑀦 𑀦𑀬𑁂𑀦. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑀯𑀸𑀭𑁂𑀲𑀼.

𑁪𑁧𑁪. 𑀇𑀤𑀸𑀦𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀧𑀭𑀫𑀸𑀬 𑀏𑀯 𑀲𑀜𑁆𑀜𑀸𑀬 𑀤𑀲𑁆𑀲𑀦𑁂 𑀓𑀸𑀭𑀡𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀬𑀲𑁆𑀫𑀸 𑀇𑀤𑀜𑁆𑀘…𑀧𑁂… 𑀉𑀤𑁆𑀥𑀝𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀓𑁂𑀲𑀁 𑀧𑀦𑀺𑀤𑀁 𑀅𑀗𑁆𑀕𑀢𑁄 𑀲𑀫𑁆𑀫𑀲𑀦𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀬𑀸’’𑀢𑀺𑀆𑀤𑀺. 𑀅𑀗𑁆𑀕𑀢𑁄𑀢𑀺 𑀛𑀸𑀦𑀗𑁆𑀕𑀢𑁄. 𑀇𑀤𑀜𑁆𑀳𑀺 𑀅𑀦𑀼𑀧𑀤𑀥𑀫𑁆𑀫𑀯𑀺𑀧𑀲𑁆𑀲𑀦𑀸𑀬 𑀮𑀓𑁆𑀔𑀡𑀯𑀘𑀦𑀁. 𑀅𑀦𑀼𑀧𑀤𑀥𑀫𑁆𑀫𑀯𑀺𑀧𑀲𑁆𑀲𑀦𑀜𑁆𑀳𑀺 𑀓𑀭𑁄𑀦𑁆𑀢𑁄 𑀲𑀫𑀸𑀧𑀢𑁆𑀢𑀺𑀁 𑀧𑀢𑁆𑀯𑀸 𑀅𑀗𑁆𑀕𑀢𑁄𑀯 𑀲𑀫𑁆𑀫𑀲𑀦𑀁 𑀓𑀭𑁄𑀢𑀺, 𑀦 𑀘 𑀲𑀜𑁆𑀜𑀸 𑀲𑀫𑀸𑀧𑀢𑁆𑀢𑀺𑀬𑀸 𑀓𑀺𑀜𑁆𑀘𑀺 𑀅𑀗𑁆𑀕𑀁 𑀳𑁄𑀢𑀺. 𑀅𑀣 𑀘 𑀧𑀦𑁂𑀢𑀁 𑀯𑀼𑀢𑁆𑀢𑀁 ‘‘𑀇𑀤𑀜𑁆𑀘 𑀲𑀜𑁆𑀜𑀸 𑀲𑀜𑁆𑀜𑀸𑀢𑀺 𑀏𑀯𑀁 𑀅𑀗𑁆𑀕𑀢𑁄 𑀲𑀫𑁆𑀫𑀲𑀦𑀁 𑀉𑀤𑁆𑀥𑀝’’𑀦𑁆𑀢𑀺, 𑀢𑀲𑁆𑀫𑀸 𑀮𑀓𑁆𑀔𑀡𑀯𑀘𑀦𑀫𑁂𑀢𑀁. 𑀅𑀗𑁆𑀕𑀢𑁄𑀢𑀺 𑀯𑀸 𑀅𑀯𑀬𑀯𑀢𑁄𑀢𑀺 𑀅𑀢𑁆𑀣𑁄, 𑀅𑀦𑀼𑀧𑀤𑀥𑀫𑁆𑀫𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀮𑀸𑀧𑀢𑁄𑀢𑀺 𑀲𑀫𑀽𑀳𑀢𑁄. 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀢𑀁𑀢𑀁𑀲𑀜𑁆𑀜𑀸𑀦𑀁 𑀉𑀧𑁆𑀧𑀸𑀤𑀦𑀺𑀭𑁄𑀥𑁂 𑀯𑀼𑀘𑁆𑀘𑀫𑀸𑀦𑁂 𑀅𑀗𑁆𑀕𑀯𑀲𑁂𑀦 𑀲𑁄 𑀯𑀼𑀢𑁆𑀢𑁄 𑀳𑁄𑀢𑀺, 𑀢𑀲𑁆𑀫𑀸 ‘‘𑀇𑀤𑀜𑁆𑀘𑀸’’𑀢𑀺𑀆𑀤𑀺𑀦𑀸 𑀅𑀗𑁆𑀕𑀢𑁄𑀯 𑀲𑀫𑁆𑀫𑀲𑀦𑀁 𑀤𑀲𑁆𑀲𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀲𑁆𑀫𑀸𑀢𑀺 𑀲𑀜𑁆𑀜𑀸𑀯𑀲𑁂𑀦𑁂𑀯 𑀅𑀗𑁆𑀕𑀢𑁄 𑀲𑀫𑁆𑀫𑀲𑀦𑀲𑁆𑀲 𑀉𑀤𑁆𑀥𑀝𑀢𑁆𑀢𑀸. 𑀢𑀤𑁂𑀯𑀸𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀫𑁂𑀯, 𑀦 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀢𑀢𑁆𑀣 𑀧𑀝𑀼𑀲𑀜𑁆𑀜𑀸𑀪𑀸𑀯𑀢𑁄.

‘‘𑀬𑁄’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀬𑀢𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀬𑁄 𑀦𑀸𑀫𑀸’’𑀢𑀺 𑀬𑀣𑀸 ‘‘𑀆𑀤𑀺𑀫𑁆𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀆𑀤𑀺𑀢𑁄’’𑀢𑀺 𑀯𑀼𑀘𑁆𑀘𑀢𑀺 𑀅𑀢𑁆𑀣𑁂 𑀧𑀭𑀺𑀕𑁆𑀕𑀬𑁆𑀳𑀫𑀸𑀦𑁂 𑀬𑀣𑀸𑀬𑀼𑀢𑁆𑀢𑀯𑀺𑀪𑀢𑁆𑀢𑀺𑀬𑀸𑀯 𑀢𑁄-𑀲𑀤𑁆𑀤𑀲𑁆𑀲 𑀮𑀩𑁆𑀪𑀦𑀢𑁄. 𑀦𑀸𑀫-𑀲𑀤𑁆𑀤𑁄 𑀘𑁂𑀢𑁆𑀣 𑀔𑁄-𑀲𑀤𑁆𑀤𑁄 𑀯𑀺𑀬 𑀯𑀸𑀘𑀸𑀲𑀺𑀮𑀺𑀝𑁆𑀞𑀢𑀸𑀫𑀢𑁆𑀢𑀁. 𑀲𑀲𑁆𑀲𑁂𑀤𑀦𑁆𑀢𑀺 𑀲𑀓𑀁, 𑀅𑀢𑁆𑀢𑀦𑀸 𑀅𑀥𑀺𑀕𑀢𑀛𑀸𑀦𑀁, 𑀢𑀲𑁆𑀫𑀺𑀁 𑀲𑀜𑁆𑀜𑀸 𑀲𑀓𑀲𑀜𑁆𑀜𑀸, 𑀲𑀸 𑀏𑀢𑀲𑁆𑀲𑀢𑁆𑀣𑀻𑀢𑀺 𑀲𑀓𑀲𑀜𑁆𑀜𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀢𑁆𑀢𑀦𑁄 𑀧𑀞𑀫𑀚𑁆𑀛𑀸𑀦𑀲𑀜𑁆𑀜𑀸𑀬 𑀲𑀜𑁆𑀜𑀯𑀸’’𑀢𑀺. 𑀈𑀓𑀸𑀭𑁄 𑀘𑁂𑀢𑁆𑀣 𑀉𑀧𑀭𑀺 𑀯𑀼𑀘𑁆𑀘𑀫𑀸𑀦𑀦𑀺𑀭𑁄𑀥𑀧𑀸𑀤𑀓𑀢𑀸𑀬 𑀲𑀸𑀢𑀺𑀲𑀬𑀸𑀬 𑀛𑀸𑀦𑀲𑀜𑁆𑀜𑀸𑀬 𑀅𑀢𑁆𑀣𑀺𑀪𑀸𑀯𑀚𑁄𑀢𑀓𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀦𑁂𑀯𑀸𑀳 ‘‘𑀅𑀦𑀼𑀧𑀼𑀩𑁆𑀩𑁂𑀦 𑀲𑀜𑁆𑀜𑀕𑁆𑀕𑀁 𑀨𑀼𑀲𑀢𑀻’’𑀢𑀺𑀆𑀤𑀺. 𑀢𑀲𑁆𑀫𑀸 𑀢𑀢𑁆𑀣 𑀢𑀢𑁆𑀣 𑀲𑀓𑀲𑀜𑁆𑀜𑀺𑀢𑀸𑀕𑁆𑀕𑀳𑀡𑁂𑀦 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀛𑀸𑀦𑁂 𑀲𑀩𑁆𑀩𑀲𑁄 𑀲𑀼𑀘𑀺𑀡𑁆𑀡𑀯𑀲𑀻𑀪𑀸𑀯𑁄 𑀤𑀻𑀧𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀮𑁄𑀓𑀺𑀬𑀸𑀦𑀦𑁆𑀢𑀺 𑀦𑀺𑀤𑁆𑀥𑀸𑀭𑀡𑁂 𑀲𑀸𑀫𑀺𑀯𑀘𑀦𑀁, 𑀲𑀸𑀫𑀺𑀅𑀢𑁆𑀣𑁂 𑀏𑀯 𑀯𑀸. 𑀬𑀤𑀕𑁆𑀕𑁂𑀦 𑀳𑀺 𑀢𑀁 𑀢𑁂𑀲𑀼 𑀲𑁂𑀝𑁆𑀞𑀁, 𑀢𑀤𑀕𑁆𑀕𑁂𑀦 𑀢𑁂𑀲𑀫𑁆𑀧𑀺 𑀲𑁂𑀝𑁆𑀞𑀦𑁆𑀢𑀺. 𑀯𑀺𑀪𑀢𑁆𑀢𑀸𑀯𑀥𑀺𑀅𑀢𑁆𑀣𑁂 𑀯𑀸 𑀲𑀸𑀫𑀺𑀯𑀘𑀦𑀁. 𑀏𑀢𑁆𑀣 𑀧𑀦 ‘‘𑀮𑁄𑀓𑀺𑀬𑀸𑀦’’𑀦𑁆𑀢𑀺 𑀯𑀺𑀲𑁂𑀲𑀦𑀁 𑀮𑁄𑀓𑀼𑀢𑁆𑀢𑀭𑀲𑀫𑀸𑀧𑀢𑁆𑀢𑀻𑀳𑀺 𑀢𑀲𑁆𑀲 𑀅𑀲𑁂𑀝𑁆𑀞𑀪𑀸𑀯𑀢𑁄 𑀓𑀢𑀁. 𑀲𑁂𑀲𑀁 ‘‘𑀓𑀺𑀘𑁆𑀘𑀓𑀸𑀭𑀓𑀲𑀫𑀸𑀧𑀢𑁆𑀢𑀻𑀦’’𑀦𑁆𑀢𑀺 𑀧𑀦 𑀯𑀺𑀲𑁂𑀲𑀦𑀁 𑀅𑀓𑀺𑀘𑁆𑀘𑀓𑀸𑀭𑀓𑀲𑀫𑀸𑀧𑀢𑁆𑀢𑀺𑀢𑁄 𑀢𑀲𑁆𑀲 𑀅𑀲𑁂𑀝𑁆𑀞𑀪𑀸𑀯𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀓𑀺𑀘𑁆𑀘𑀓𑀸𑀭𑀓𑀢𑀸 𑀘𑀲𑁆𑀲𑀸 ‘‘𑀬𑀣𑁂𑀯 𑀳𑀺 𑀢𑀢𑁆𑀣 𑀲𑀜𑁆𑀜𑀸, 𑀏𑀯𑀁 𑀨𑀲𑁆𑀲𑀸𑀤𑀬𑁄𑀧𑀻’’𑀢𑀺, ‘‘𑀬𑀤𑀕𑁆𑀕𑁂𑀦 𑀳𑀺 𑀢𑀢𑁆𑀣 𑀥𑀫𑁆𑀫𑀸 𑀲𑀗𑁆𑀔𑀸𑀭𑀸𑀯𑀲𑁂𑀲𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀧𑀓𑀢𑀺𑀯𑀺𑀧𑀲𑁆𑀲𑀓𑀸𑀦𑀁 𑀲𑀫𑁆𑀫𑀲𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀭𑀽𑀧𑁂𑀦 𑀞𑀺𑀢𑀸, 𑀢𑀤𑀕𑁆𑀕𑁂𑀦 𑀳𑁂𑀝𑁆𑀞𑀺𑀫𑀲𑀫𑀸𑀧𑀢𑁆𑀢𑀺𑀥𑀫𑁆𑀫𑀸 𑀯𑀺𑀬 𑀧𑀝𑀼𑀓𑀺𑀘𑁆𑀘𑀓𑀭𑀡𑀲𑀫𑀢𑁆𑀣𑀸𑀧𑀺 𑀦 𑀳𑁄𑀦𑁆𑀢𑀻’’𑀢𑀺 𑀘 𑀅𑀝𑁆𑀞𑀓𑀣𑀸𑀲𑀼 (𑀯𑀺𑀲𑀼𑀤𑁆𑀥𑀺. 𑁧.𑁨𑁮𑁭) 𑀧𑀝𑀼𑀲𑀜𑁆𑀜𑀸𑀓𑀺𑀘𑁆𑀘𑀸𑀪𑀸𑀯𑀯𑀘𑀦𑀢𑁄 𑀯𑀺𑀜𑁆𑀜𑀸𑀬𑀢𑀺. 𑀲𑁆𑀯𑀸𑀬𑀫𑀢𑁆𑀣𑁄 𑀧𑀭𑀫𑀢𑁆𑀣𑀫𑀜𑁆𑀚𑀽𑀲𑀸𑀬 𑀦𑀸𑀫 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀝𑀻𑀓𑀸𑀬 𑀆𑀭𑀼𑀧𑁆𑀧𑀓𑀣𑀸𑀬𑀁 (𑀯𑀺𑀲𑀼𑀤𑁆𑀥𑀺. 𑀝𑀻. 𑁧.𑁨𑁮𑁬) 𑀆𑀘𑀭𑀺𑀬𑁂𑀦 𑀲𑀯𑀺𑀲𑁂𑀲𑀁 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀓𑁂𑀘𑀺 𑀧𑀦 ‘‘𑀬𑀣𑀸 𑀳𑁂𑀝𑁆𑀞𑀺𑀫𑀸 𑀳𑁂𑀝𑁆𑀞𑀺𑀫𑀸 𑀲𑀫𑀸𑀧𑀢𑁆𑀢𑀺𑀬𑁄 𑀉𑀧𑀭𑀺𑀫𑀸𑀦𑀁 𑀉𑀧𑀭𑀺𑀫𑀸𑀦𑀁 𑀲𑀫𑀸𑀧𑀢𑁆𑀢𑀻𑀦𑀁 𑀅𑀥𑀺𑀝𑁆𑀞𑀸𑀦𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀺, 𑀦 𑀏𑀯𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺 𑀓𑀲𑁆𑀲𑀘𑀺𑀧𑀺 𑀅𑀥𑀺𑀝𑁆𑀞𑀸𑀦𑀁 𑀲𑀸𑀥𑁂𑀢𑀺, 𑀢𑀲𑁆𑀫𑀸 𑀲𑀸 𑀅𑀓𑀺𑀘𑁆𑀘𑀓𑀸𑀭𑀺𑀓𑀸 𑀇𑀢𑀭𑀸 𑀓𑀺𑀘𑁆𑀘𑀓𑀸𑀭𑀺𑀓𑀸’’𑀢𑀺 𑀯𑀤𑀦𑁆𑀢𑀺, 𑀢𑀤𑀬𑀼𑀢𑁆𑀢𑀁 𑀢𑀲𑁆𑀲𑀸𑀧𑀺 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀧𑀭𑀺𑀤𑀫𑀦𑀸𑀤𑀻𑀦𑀁 𑀅𑀥𑀺𑀝𑁆𑀞𑀸𑀦𑀓𑀺𑀘𑁆𑀘𑀲𑀸𑀥𑀦𑀢𑁄, 𑀢𑀲𑁆𑀫𑀸 𑀧𑀼𑀭𑀺𑀫𑁄𑀬𑁂𑀯 𑀅𑀢𑁆𑀣𑁄 𑀬𑀼𑀢𑁆𑀢𑁄. 𑀓𑀲𑁆𑀫𑀸 𑀘𑁂𑀢𑀁 𑀢𑁂𑀲𑀫𑀕𑁆𑀕𑀦𑁆𑀢𑀺 𑀆𑀳 ‘‘𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬’’𑀦𑁆𑀢𑀺𑀆𑀤𑀺. ‘‘𑀇𑀢𑀻’’𑀢𑀺 𑀯𑀢𑁆𑀯𑀸 ‘‘𑀮𑁄𑀓𑀺𑀬𑀸𑀦𑀁…𑀧𑁂… 𑀅𑀕𑁆𑀕𑀢𑁆𑀢𑀸’’𑀢𑀺 𑀢𑀲𑁆𑀲𑀢𑁆𑀣𑁄 𑀯𑀼𑀢𑁆𑀢𑁄, ‘‘𑀅𑀕𑁆𑀕𑀢𑁆𑀢𑀸’’𑀢𑀺 𑀏𑀢𑁆𑀣 𑀯𑀸 𑀦𑀺𑀤𑀲𑁆𑀲𑀦𑀫𑁂𑀢𑀁.

𑀧𑀓𑀧𑁆𑀧𑁂𑀢𑀻𑀢𑀺 𑀲𑀁𑀯𑀺𑀤𑀳𑀢𑀺. 𑀛𑀸𑀦𑀁 𑀲𑀫𑀸𑀧𑀚𑁆𑀚𑀦𑁆𑀢𑁄 𑀳𑀺 𑀛𑀸𑀦𑀲𑀼𑀔𑀁 𑀅𑀢𑁆𑀢𑀦𑀺 𑀲𑀁𑀯𑀺𑀤𑀳𑀢𑀺 𑀦𑀸𑀫. 𑀅𑀪𑀺𑀲𑀗𑁆𑀔𑀭𑁄𑀢𑀻𑀢𑀺 𑀆𑀬𑀽𑀳𑀢𑀺 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄 𑀳𑀺 𑀲𑀫𑀼𑀤𑀸𑀬𑀢𑁆𑀣𑁄. 𑀬𑀲𑁆𑀫𑀸 𑀧𑀦 𑀦𑀺𑀓𑀦𑁆𑀢𑀺𑀯𑀲𑁂𑀦 𑀘𑁂𑀢𑀦𑀸𑀓𑀺𑀘𑁆𑀘𑀲𑁆𑀲 𑀫𑀢𑁆𑀣𑀓𑀧𑁆𑀧𑀢𑁆𑀢𑀺, 𑀢𑀲𑁆𑀫𑀸 𑀨𑀮𑀽𑀧𑀘𑀸𑀭𑁂𑀦 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀺𑀓𑀦𑁆𑀢𑀺𑀁…𑀧𑁂… 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁. 𑀇𑀫𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀢𑀺 𑀇𑀤𑀸𑀦𑀺 𑀮𑀩𑁆𑀪𑀫𑀸𑀦𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀸. 𑀢𑀁𑀲𑀫𑀢𑀺𑀓𑁆𑀓𑀫𑁂𑀦𑁂𑀯 𑀉𑀧𑀭𑀺𑀛𑀸𑀦𑀢𑁆𑀣𑀸𑀬 𑀘𑁂𑀢𑀦𑀸𑀪𑀺𑀲𑀗𑁆𑀔𑀭𑀡𑀲𑀫𑁆𑀪𑀯𑀢𑁄 𑀦𑀺𑀭𑀼𑀚𑁆𑀛𑁂𑀬𑁆𑀬𑀼𑀁. 𑀅𑀜𑁆𑀜𑀸𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀳𑀺 𑀅𑀜𑁆𑀜𑀸. 𑀑𑀴𑀸𑀭𑀺𑀓𑀸𑀢𑀺 𑀢𑀢𑁄 𑀣𑀽𑀮𑀢𑀭𑀸. 𑀓𑀸 𑀧𑀦 𑀢𑀸𑀢𑀺 𑀆𑀳 ‘‘𑀪𑀯𑀗𑁆𑀕𑀲𑀜𑁆𑀜𑀸’’𑀢𑀺. 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀢𑁄 𑀯𑀼𑀝𑁆𑀞𑀸𑀬 𑀏𑀯 𑀳𑀺 𑀉𑀧𑀭𑀺𑀛𑀸𑀦𑀢𑁆𑀣𑀸𑀬 𑀘𑁂𑀢𑀦𑀸𑀪𑀺𑀲𑀗𑁆𑀔𑀭𑀡𑀸𑀦𑀺 𑀪𑀯𑁂𑀬𑁆𑀬𑀼𑀁, 𑀏𑀯𑀜𑁆𑀘 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀸 𑀦𑀺𑀭𑀼𑀚𑁆𑀛𑁂𑀬𑁆𑀬𑀼𑀁, 𑀯𑀼𑀝𑁆𑀞𑀸𑀦𑀜𑁆𑀘 𑀪𑀯𑀗𑁆𑀕𑀯𑀲𑁂𑀦 𑀳𑁄𑀢𑀺, 𑀢𑀢𑁄 𑀧𑀭𑀫𑁆𑀧𑀺 𑀬𑀸𑀯 𑀉𑀧𑀭𑀺𑀛𑀸𑀦𑀲𑀫𑀸𑀧𑀚𑁆𑀚𑀦𑀁, 𑀢𑀸𑀯 𑀅𑀦𑁆𑀢𑀭𑀦𑁆𑀢𑀭𑀸 𑀪𑀯𑀗𑁆𑀕𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀢𑀸 𑀘 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀳𑀺 𑀑𑀴𑀸𑀭𑀺𑀓𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀘𑁂𑀢𑁂𑀦𑁆𑀢𑁄𑀯𑀸𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀚𑁆𑀛𑀸𑀦𑀁 𑀏𑀓𑀁 𑀤𑁆𑀯𑁂 𑀘𑀺𑀢𑁆𑀢𑀯𑀸𑀭𑁂𑀧𑀺 𑀲𑀫𑀸𑀧𑀚𑁆𑀚𑀦𑀯𑀲𑁂𑀦 𑀧𑀓𑀧𑁆𑀧𑁂𑀦𑁆𑀢𑁄 𑀏𑀯. 𑀦 𑀘𑁂𑀢𑁂𑀢𑀻𑀢𑀺 𑀢𑀣𑀸 𑀳𑁂𑀝𑁆𑀞𑀺𑀫𑀛𑀸𑀦𑁂𑀲𑀼 𑀯𑀺𑀬 𑀯𑀸 𑀧𑀼𑀩𑁆𑀩𑀸𑀪𑁄𑀕𑀸𑀪𑀸𑀯𑀢𑁄 𑀦 𑀧𑀓𑀧𑁆𑀧𑁂𑀢𑀺 𑀦𑀸𑀫. 𑀧𑀼𑀩𑁆𑀩𑀸𑀪𑁄𑀕𑀯𑀲𑁂𑀦 𑀳𑀺 𑀛𑀸𑀦𑀁 𑀧𑀓𑀧𑁆𑀧𑁂𑀦𑁆𑀢𑁄 𑀇𑀥 ‘‘𑀘𑁂𑀢𑁂𑀢𑀻’’𑀢𑀺 𑀯𑀼𑀢𑁆𑀢𑁄. 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑁄𑀯𑀸𑀢𑀺 𑀢𑀢𑁆𑀣 𑀅𑀧𑁆𑀧𑀳𑀻𑀦𑀦𑀺𑀓𑀦𑁆𑀢𑀺𑀓𑀢𑀸𑀯𑀲𑁂𑀦 𑀆𑀬𑀽𑀳𑀦𑁆𑀢𑁄 𑀏𑀯. 𑀦𑀸𑀪𑀺𑀲𑀗𑁆𑀔𑀭𑁄𑀢𑀻𑀢𑀺 𑀢𑀣𑀸 𑀳𑁂𑀝𑁆𑀞𑀺𑀫𑀛𑀸𑀦𑁂𑀲𑀼 𑀯𑀺𑀬 𑀯𑀸 𑀧𑀼𑀩𑁆𑀩𑀸𑀪𑁄𑀕𑀸𑀪𑀸𑀯𑀢𑁄 𑀦𑀸𑀬𑀽𑀳𑀢𑀺 𑀦𑀸𑀫. ‘‘𑀅𑀳𑀫𑁂𑀢𑀁 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀫𑀺 𑀉𑀧𑀲𑀫𑁆𑀧𑀸𑀤𑁂𑀫𑀺 𑀲𑀫𑀸𑀧𑀚𑁆𑀚𑀸𑀫𑀻’’𑀢𑀺 𑀳𑀺 𑀏𑀯𑀁 𑀅𑀪𑀺𑀲𑀗𑁆𑀔𑀭𑀡𑀁 𑀢𑀢𑁆𑀣 𑀲𑀸𑀮𑀬𑀲𑁆𑀲𑁂𑀯 𑀳𑁄𑀢𑀺, 𑀦 𑀅𑀦𑀸𑀮𑀬𑀲𑁆𑀲, 𑀢𑀲𑁆𑀫𑀸 𑀏𑀓𑀤𑁆𑀯𑀺𑀘𑀺𑀢𑁆𑀢𑀓𑁆𑀔𑀡𑀺𑀓𑀫𑁆𑀧𑀺 𑀛𑀸𑀦𑀁 𑀧𑀯𑀢𑁆𑀢𑁂𑀦𑁆𑀢𑁄 𑀢𑀢𑁆𑀣 𑀅𑀧𑁆𑀧𑀳𑀻𑀦𑀦𑀺𑀓𑀦𑁆𑀢𑀺𑀓𑀢𑀸𑀬 ‘‘𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑁄 𑀏𑀯𑀸’’𑀢𑀺 𑀯𑀼𑀢𑁆𑀢𑁄. 𑀬𑀲𑁆𑀫𑀸 𑀧𑀦𑀲𑁆𑀲 𑀢𑀣𑀸 𑀳𑁂𑀝𑁆𑀞𑀺𑀫𑀛𑀸𑀦𑁂𑀲𑀼 𑀯𑀺𑀬 𑀯𑀸 𑀢𑀢𑁆𑀣 𑀧𑀼𑀩𑁆𑀩𑀸𑀪𑁄𑀕𑁄 𑀦𑀢𑁆𑀣𑀺, 𑀢𑀲𑁆𑀫𑀸 ‘‘𑀦 𑀅𑀪𑀺𑀲𑀗𑁆𑀔𑀭𑁄𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀯𑀺𑀯𑀭𑀡𑀁. 𑀢𑀢𑁆𑀣 𑀬𑀲𑁆𑀫𑀸 𑀇𑀫𑀲𑁆𑀲…𑀧𑁂… 𑀅𑀢𑁆𑀣𑀺, 𑀢𑀲𑁆𑀫𑀸 ‘‘𑀦 𑀘𑁂𑀢𑁂𑀢𑀺, 𑀦𑀸𑀪𑀺𑀲𑀗𑁆𑀔𑀭𑁄𑀢𑀻’’𑀢𑀺 𑀘 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀆𑀪𑁄𑀕𑀲𑀫𑀦𑁆𑀦𑀸𑀳𑀸𑀭𑁄𑀢𑀺 𑀆𑀪𑁄𑀕𑀲𑀗𑁆𑀔𑀸𑀢𑁄, 𑀆𑀪𑁄𑀕𑀯𑀲𑁂𑀦 𑀯𑀸 𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀁, 𑀆𑀭𑀫𑁆𑀫𑀡𑀲𑁆𑀲 𑀯𑀸 𑀘𑀺𑀢𑁆𑀢𑀸𑀪𑀺𑀫𑀼𑀔𑀁 𑀅𑀦𑁆𑀯𑀸𑀳𑀸𑀭𑁄. ‘‘𑀲𑁆𑀯𑀸𑀬𑀫𑀢𑁆𑀣𑁄’’𑀢𑀺𑀆𑀤𑀺𑀦𑀸 𑀢𑀤𑁂𑀯𑀢𑁆𑀣𑀁 𑀉𑀧𑀫𑀸𑀬 𑀧𑀝𑀺𑀧𑀸𑀤𑁂𑀢𑀺. 𑀧𑀼𑀢𑁆𑀢𑀖𑀭𑀸𑀘𑀺𑀓𑁆𑀔𑀡𑁂𑀦𑀸𑀢𑀺 𑀧𑀼𑀢𑁆𑀢𑀖𑀭𑀲𑁆𑀲 𑀆𑀭𑁄𑀘𑀦𑀦𑀬𑁂𑀦.

𑀕𑀦𑁆𑀢𑁆𑀯𑀸 𑀆𑀤𑀸𑀬 𑀆𑀕𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀘𑁆𑀙𑀸𑀪𑀸𑀕𑁂𑀢𑀺 𑀆𑀲𑀦𑀲𑀸𑀮𑀸𑀬 𑀧𑀘𑁆𑀙𑀺𑀫𑀤𑀺𑀲𑀸𑀬𑀁 𑀞𑀺𑀢𑀲𑁆𑀲 𑀧𑀺𑀢𑀼𑀖𑀭𑀲𑁆𑀲 𑀧𑀘𑁆𑀙𑀸𑀪𑀸𑀕𑁂. 𑀢𑀢𑁄𑀢𑀺 𑀧𑀼𑀢𑁆𑀢𑀖𑀭𑀢𑁄. 𑀮𑀤𑁆𑀥𑀖𑀭𑀫𑁂𑀯𑀸𑀢𑀺 𑀬𑀢𑁄𑀦𑁂𑀦 𑀪𑀺𑀓𑁆𑀔𑀸 𑀮𑀤𑁆𑀥𑀸, 𑀢𑀫𑁂𑀯 𑀖𑀭𑀁 𑀧𑀼𑀢𑁆𑀢𑀕𑁂𑀳𑀫𑁂𑀯. 𑀆𑀲𑀦𑀲𑀸𑀮𑀸 𑀯𑀺𑀬 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺 𑀢𑀢𑁄 𑀧𑀺𑀢𑀼𑀖𑀭𑀧𑀼𑀢𑁆𑀢𑀖𑀭𑀝𑁆𑀞𑀸𑀦𑀺𑀬𑀸𑀦𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀻𑀦𑀁 𑀉𑀧𑀕𑀦𑁆𑀢𑀩𑁆𑀩𑀢𑁄. 𑀧𑀺𑀢𑀼𑀕𑁂𑀳𑀁 𑀯𑀺𑀬 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺 𑀅𑀫𑀦𑀲𑀺𑀓𑀸𑀢𑀩𑁆𑀩𑀢𑁄, 𑀫𑀚𑁆𑀛𑁂 𑀞𑀺𑀢𑀢𑁆𑀢𑀸 𑀘. 𑀧𑀼𑀢𑁆𑀢𑀕𑁂𑀳𑀁 𑀯𑀺𑀬 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀫𑀦𑀲𑀺𑀓𑀸𑀢𑀩𑁆𑀩𑀢𑁄, 𑀧𑀭𑀺𑀬𑀦𑁆𑀢𑁂 𑀞𑀺𑀢𑀢𑁆𑀢𑀸 𑀘. 𑀧𑀺𑀢𑀼𑀖𑀭𑀁 𑀅𑀫𑀦𑀲𑀺𑀓𑀭𑀺𑀢𑁆𑀯𑀸𑀢𑀺 𑀧𑀯𑀺𑀲𑀺𑀢𑁆𑀯𑀸 𑀲𑀫𑀢𑀺𑀓𑁆𑀓𑀦𑁆𑀢𑀫𑁆𑀧𑀺 𑀧𑀺𑀢𑀼𑀖𑀭𑀁 𑀅𑀫𑀦𑀲𑀺𑀓𑀭𑀺𑀢𑁆𑀯𑀸. 𑀧𑀼𑀢𑁆𑀢𑀖𑀭𑀲𑁆𑀲𑁂𑀯 𑀆𑀘𑀺𑀓𑁆𑀔𑀡𑀁 𑀯𑀺𑀬 𑀏𑀓𑀁 𑀤𑁆𑀯𑁂 𑀘𑀺𑀢𑁆𑀢𑀯𑀸𑀭𑁂 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀫𑁆𑀧𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀅𑀫𑀦𑀲𑀺𑀓𑀭𑀺𑀢𑁆𑀯𑀸 𑀧𑀭𑀢𑁄 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀢𑁆𑀣𑀸𑀬 𑀏𑀯 𑀫𑀦𑀲𑀺𑀓𑀸𑀭𑁄 𑀤𑀝𑁆𑀞𑀩𑁆𑀩𑁄. 𑀏𑀯𑀁 𑀅𑀫𑀦𑀲𑀺𑀓𑀸𑀭𑀲𑀸𑀫𑀜𑁆𑀜𑁂𑀦, 𑀫𑀦𑀲𑀺𑀓𑀸𑀭𑀲𑀸𑀫𑀜𑁆𑀜𑁂𑀦 𑀘 𑀉𑀧𑀫𑁄𑀧𑀫𑁂𑀬𑁆𑀬𑀢𑀸 𑀯𑀼𑀢𑁆𑀢𑀸 𑀆𑀘𑀺𑀓𑁆𑀔𑀡𑁂𑀦𑀧𑀺 𑀫𑀦𑀲𑀺𑀓𑀸𑀭𑀲𑁆𑀲𑁂𑀯 𑀚𑁄𑀢𑀦𑀢𑁄. 𑀦 𑀳𑀺 𑀫𑀦𑀲𑀺𑀓𑀸𑀭𑁂𑀦 𑀯𑀺𑀦𑀸 𑀆𑀘𑀺𑀓𑁆𑀔𑀡𑀁 𑀲𑀫𑁆𑀪𑀯𑀢𑀺.

𑀢𑀸 𑀛𑀸𑀦𑀲𑀜𑁆𑀜𑀸𑀢𑀺 𑀏𑀓𑀁 𑀤𑁆𑀯𑁂 𑀘𑀺𑀢𑁆𑀢𑀯𑀸𑀭𑁂 𑀧𑀯𑀢𑁆𑀢𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀛𑀸𑀦𑀲𑀜𑁆𑀜𑀸. 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀜𑁆𑀳𑀺 𑀬𑀣𑀸𑀭𑀳𑀁 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀓𑀼𑀲𑀮𑀓𑀺𑀭𑀺𑀬𑀚𑀯𑀦𑀁 𑀤𑁆𑀯𑀺𑀓𑁆𑀔𑀢𑁆𑀢𑀼𑀫𑁂𑀯 𑀚𑀯𑀢𑀺, 𑀦 𑀢𑀤𑀼𑀢𑁆𑀢𑀭𑀺. 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺 𑀲𑀭𑀲𑀯𑀲𑁂𑀦𑁂𑀯 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀩𑀮𑁂𑀦 𑀧𑀦 𑀉𑀧𑀭𑀺 𑀅𑀦𑀼𑀧𑁆𑀧𑀸𑀤𑁄. 𑀬𑀣𑀸 𑀘 𑀛𑀸𑀦𑀲𑀜𑁆𑀜𑀸𑀦𑀁, 𑀏𑀯𑀁 𑀇𑀢𑀭𑀲𑀜𑁆𑀜𑀸𑀦𑀫𑁆𑀧𑀻𑀢𑀺 𑀆𑀳 ‘‘𑀅𑀜𑁆𑀜𑀸 𑀘𑀸’’𑀢𑀺𑀆𑀤𑀺. 𑀦𑀼𑀧𑁆𑀧𑀚𑁆𑀚𑀦𑁆𑀢𑀺 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁄 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀪𑀺𑀓𑁆𑀔𑀽𑀢𑀺 𑀬𑀣𑀸𑀯𑀼𑀢𑁆𑀢𑁂 𑀲𑀜𑁆𑀜𑀕𑁆𑀕𑁂 𑀞𑀺𑀢𑀪𑀸𑀯𑁂𑀦 𑀧𑀝𑀺𑀧𑀦𑁆𑀦𑁄 𑀪𑀺𑀓𑁆𑀔𑀼, 𑀲𑁄 𑀘 𑀔𑁄 𑀅𑀦𑀸𑀕𑀸𑀫𑀻 𑀯𑀸 𑀅𑀭𑀳𑀸 𑀯𑀸 𑀤𑁆𑀯𑀻𑀳𑀺 𑀨𑀮𑁂𑀳𑀺 𑀲𑀫𑀦𑁆𑀦𑀸𑀕𑀫𑁄, 𑀢𑀺𑀡𑁆𑀡𑀁 𑀲𑀗𑁆𑀔𑀸𑀭𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺, 𑀲𑁄𑀴𑀲𑀯𑀺𑀥𑀸 𑀜𑀸𑀡𑀘𑀭𑀺𑀬𑀸, 𑀦𑀯𑀯𑀺𑀥𑀸 𑀲𑀫𑀸𑀥𑀺𑀘𑀭𑀺𑀬𑀸𑀢𑀺 𑀇𑀫𑁂𑀲𑀁 𑀯𑀲𑁂𑀦 𑀦𑀺𑀭𑁄𑀥𑀧𑀝𑀺𑀧𑀸𑀤𑀦𑀧𑀝𑀺𑀧𑀢𑁆𑀢𑀺𑀁 𑀧𑀝𑀺𑀧𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀅𑀦𑀼𑀧𑀼𑀩𑁆𑀩𑀦𑀺𑀭𑁄𑀥𑀯𑀲𑁂𑀦 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀅𑀧𑁆𑀧𑀯𑀢𑁆𑀢𑀺𑀬𑁂𑀯 𑀲𑀜𑁆𑀜𑀸𑀯𑁂𑀤𑀦𑀸𑀲𑀻𑀲𑁂𑀦 ‘‘𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥’’𑀦𑁆𑀢𑀺 𑀯𑀼𑀢𑁆𑀢𑀸. 𑀨𑀼𑀲𑀢𑀻𑀢𑀺 𑀏𑀢𑁆𑀣 𑀨𑀼𑀲𑀦𑀁 𑀦𑀸𑀫 𑀯𑀺𑀦𑁆𑀤𑀦𑀁 𑀧𑀝𑀺𑀮𑀤𑁆𑀥𑀻𑀢𑀺 𑀤𑀲𑁆𑀲𑁂𑀢𑀺 ‘‘𑀯𑀺𑀦𑁆𑀤𑀢𑀺 𑀧𑀝𑀺𑀮𑀪𑀢𑀻’’𑀢𑀺 𑀇𑀫𑀺𑀦𑀸. 𑀅𑀢𑁆𑀣𑀢𑁄 𑀧𑀦 𑀯𑀼𑀢𑁆𑀢𑀦𑀬𑁂𑀦 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀲𑀩𑁆𑀩𑀲𑁄 𑀅𑀧𑁆𑀧𑀯𑀢𑁆𑀢𑀺𑀬𑁂𑀯.

𑀦𑀺𑀭𑀢𑁆𑀣𑀓𑀢𑀸𑀬 𑀉𑀧𑀲𑀕𑁆𑀕𑀫𑀢𑁆𑀢𑀁, 𑀢𑀲𑁆𑀫𑀸 𑀲𑀜𑁆𑀜𑀸 𑀇𑀘𑁆𑀘𑁂𑀯 𑀅𑀢𑁆𑀣𑁄. 𑀦𑀺𑀭𑁄𑀥𑀧𑀤𑁂𑀦 𑀅𑀦𑀦𑁆𑀢𑀭𑀺𑀓𑀁 𑀓𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀧𑀤𑁂 𑀯𑀢𑁆𑀢𑀩𑁆𑀩𑁂 𑀢𑁂𑀲𑀁 𑀤𑁆𑀯𑀺𑀦𑁆𑀦𑀫𑀦𑁆𑀢𑀭𑁂 𑀲𑀫𑁆𑀧𑀚𑀸𑀦𑀧𑀤𑀁 𑀞𑀧𑀺𑀢𑀦𑁆𑀢𑀺 𑀆𑀳 ‘‘𑀦𑀺𑀭𑁄𑀥𑀧𑀤𑁂𑀦 𑀅𑀦𑁆𑀢𑀭𑀺𑀓𑀁 𑀓𑀢𑁆𑀯𑀸 𑀯𑀼𑀢𑁆𑀢’’𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀦𑀼…𑀧𑁂… 𑀅𑀢𑁆𑀣𑁄’’𑀢𑀺, 𑀢𑁂𑀦 𑀅𑀬𑀼𑀢𑁆𑀢𑀲𑀫𑀸𑀲𑁄𑀬𑀁 𑀬𑀣𑀸𑀭𑀼𑀢𑀧𑀸𑀞𑁄𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀭𑀸𑀧𑀻𑀢𑀺 𑀢𑀲𑁆𑀫𑀺𑀁 𑀬𑀣𑀸𑀧𑀤𑀫𑀦𑀼𑀧𑀼𑀩𑁆𑀩𑀺𑀞𑀧𑀦𑁂𑀧𑀺 𑀅𑀬𑀁 𑀯𑀺𑀲𑁂𑀲𑀢𑁆𑀣𑁄𑀢𑀺 𑀬𑁄𑀚𑀦𑀸. 𑀲𑀫𑁆𑀧𑀚𑀸𑀦𑀦𑁆𑀢𑀲𑁆𑀲𑀸𑀢𑀺 𑀢𑀁 𑀢𑀁 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀢𑀢𑁆𑀣 𑀢𑀢𑁆𑀣 𑀲𑀗𑁆𑀔𑀸𑀭𑀸𑀦𑀁 𑀲𑀫𑁆𑀫𑀲𑀦𑀯𑀲𑁂𑀦 𑀧𑀚𑀸𑀦𑀦𑁆𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲. 𑀅𑀦𑁆𑀢𑁂𑀢𑀺 𑀬𑀣𑀸𑀯𑀼𑀢𑁆𑀢𑀸𑀬 𑀦𑀺𑀭𑁄𑀥𑀧𑀝𑀺𑀧𑀸𑀤𑀦𑀧𑀝𑀺𑀧𑀢𑁆𑀢𑀺𑀬𑀸 𑀧𑀭𑀺𑀬𑁄𑀲𑀸𑀦𑁂. 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀲𑀫𑁆𑀧𑀚𑀸𑀦𑀦𑁆𑀢𑀲𑁆𑀲𑀸𑀢𑀺 𑀲𑀫𑁆𑀧𑀚𑀸𑀦𑀓𑀸𑀭𑀺𑀦𑁄, 𑀇𑀫𑀺𑀦𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀧𑀸𑀝𑀺𑀳𑀸𑀭𑀺𑀓𑀧𑀜𑁆𑀜𑀸𑀬 𑀲𑀤𑁆𑀥𑀺𑀁 𑀅𑀢𑁆𑀣𑀲𑀸𑀥𑀺𑀓𑀸 𑀧𑀜𑁆𑀜𑀸 𑀓𑀺𑀘𑁆𑀘𑀢𑁄 𑀤𑀲𑁆𑀲𑀺𑀢𑀸 𑀳𑁄𑀢𑀺. 𑀢𑁂𑀦𑀸𑀳 ‘‘𑀧𑀡𑁆𑀟𑀺𑀢𑀲𑁆𑀲 𑀪𑀺𑀓𑁆𑀔𑀼𑀦𑁄’’𑀢𑀺. 𑀯𑀘𑀦𑀲𑁂𑀲𑀸𑀧𑁂𑀓𑁆𑀔𑀸’ 𑀦𑀧𑁂𑀓𑁆𑀔𑀢𑀸 𑀤𑁆𑀯𑀺𑀦𑁆𑀦𑀁 𑀯𑀺𑀓𑀧𑁆𑀧𑀸𑀦𑀁 𑀯𑀺𑀲𑁂𑀲𑁄.

𑀲𑀁𑀯𑀡𑁆𑀡𑀦𑁄𑀓𑀸𑀲𑀸𑀦𑀼𑀧𑁆𑀧𑀢𑁆𑀢𑀺𑀢𑁄 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀓𑀣𑀸 𑀓𑀣𑁂𑀢𑀩𑁆𑀩𑀸. 𑀲𑀩𑁆𑀩𑀸𑀓𑀸𑀭𑁂𑀦𑀸𑀢𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀲𑀭𑀽𑀧𑀯𑀺𑀲𑁂𑀲𑁄, 𑀲𑀫𑀸𑀧𑀚𑁆𑀚𑀦𑀓𑁄, 𑀲𑀫𑀸𑀧𑀚𑁆𑀚𑀦𑀝𑁆𑀞𑀸𑀦𑀁, 𑀲𑀫𑀸𑀧𑀚𑁆𑀚𑀦𑀓𑀸𑀭𑀡𑀁, 𑀲𑀫𑀸𑀧𑀚𑁆𑀚𑀦𑀸𑀓𑀸𑀭𑁄𑀢𑀺 𑀏𑀯𑀫𑀸𑀤𑀺𑀦𑀸 𑀲𑀩𑁆𑀩𑀧𑁆𑀧𑀓𑀸𑀭𑁂𑀦. 𑀢𑀢𑁆𑀣𑀸𑀢𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁩𑁦𑁭) 𑀓𑀣𑀺𑀢𑀢𑁄𑀯𑀸𑀢𑀺 𑀓𑀣𑀺𑀢𑀝𑁆𑀞𑀸𑀦𑀢𑁄 𑀏𑀯, 𑀢𑁂𑀯𑀻𑀲𑀢𑀺𑀫𑀧𑀭𑀺𑀘𑁆𑀙𑁂𑀤𑀢𑁄𑀢𑀺 𑀅𑀢𑁆𑀣𑁄, 𑀦 𑀇𑀥 𑀢𑀁 𑀯𑀤𑀸𑀫 𑀧𑀼𑀦𑀭𑀼𑀢𑁆𑀢𑀺𑀪𑀸𑀯𑀢𑁄, 𑀕𑀦𑁆𑀣𑀕𑀭𑀼𑀓𑀪𑀸𑀯𑀢𑁄 𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀸𑀴𑀺𑀬𑀁 𑀏𑀯𑀁 𑀔𑁄 𑀅𑀳𑀦𑁆𑀢𑀺 𑀏𑀢𑁆𑀣 𑀆𑀓𑀸𑀭𑀢𑁆𑀣𑁄 𑀏𑀯𑀁-𑀲𑀤𑁆𑀤𑁄 𑀉𑀕𑁆𑀕𑀳𑀺𑀢𑀸𑀓𑀸𑀭𑀤𑀲𑁆𑀲𑀦𑀦𑁆𑀢𑀺 𑀓𑀢𑁆𑀯𑀸. 𑀏𑀯𑀁 𑀧𑁄𑀝𑁆𑀞𑀧𑀸𑀤𑀸𑀢𑀺 𑀏𑀢𑁆𑀣 𑀧𑀦 𑀲𑀫𑁆𑀧𑀝𑀺𑀘𑁆𑀙𑀦𑀢𑁆𑀣𑁄 𑀢𑀣𑁂𑀯 𑀅𑀦𑀼𑀚𑀸𑀦𑀦𑀦𑁆𑀢𑀺 𑀓𑀢𑁆𑀯𑀸. 𑀢𑁂𑀦𑀸𑀳 ‘‘𑀲𑀼𑀉𑀕𑁆𑀕𑀢𑀺𑀢𑀁 𑀢𑀬𑀸’𑀢𑀺 𑀅𑀦𑀼𑀚𑀸𑀦𑀦𑁆𑀢𑁄’’𑀢𑀺.

𑁪𑁧𑁫. 𑀲𑀜𑁆𑀜𑀸 𑀅𑀕𑁆𑀕𑀸 𑀏𑀢𑁆𑀣𑀸𑀢𑀺 𑀲𑀜𑁆𑀜𑀕𑁆𑀕𑀁, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁. 𑀅𑀯𑀲𑁂𑀲𑀲𑀫𑀸𑀧𑀢𑁆𑀢𑀻𑀲𑀼𑀧𑀺 𑀲𑀜𑁆𑀜𑀕𑁆𑀕𑀁 𑀅𑀢𑁆𑀣𑀻𑀢𑀺 𑀏𑀢𑁆𑀣 𑀧𑀦 𑀲𑀜𑁆𑀜𑀕𑁆𑀕𑀪𑀸𑀯𑁄 ‘‘𑀲𑀜𑁆𑀜𑀕𑁆𑀕’’𑀦𑁆𑀢𑀺 𑀯𑀼𑀢𑁆𑀢𑁄, 𑀲𑀜𑁆𑀜𑀸𑀬𑁂𑀯 𑀅𑀕𑁆𑀕𑀦𑁆𑀢𑀺 𑀢𑀼𑀮𑁆𑀬𑀸𑀥𑀺𑀓𑀭𑀡𑀲𑀫𑀸𑀲𑁄 𑀯𑀸. ‘‘𑀧𑀼𑀣𑀽’’𑀢𑀺 𑀅𑀬𑀁 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄, 𑀦𑀺𑀓𑀸𑀭𑀮𑁄𑀧𑁄 𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀩𑀳𑀽𑀦𑀻’’𑀢𑀺. ‘‘𑀬𑀣𑀸’’𑀢𑀺 𑀇𑀫𑀺𑀦𑀸 𑀓𑀭𑀡𑀧𑁆𑀧𑀓𑀸𑀭𑀲𑀗𑁆𑀔𑀸𑀢𑁄 𑀧𑀓𑀸𑀭𑀯𑀺𑀲𑁂𑀲𑁄 𑀕𑀳𑀺𑀢𑁄, 𑀦 𑀧𑀓𑀸𑀭𑀲𑀸𑀫𑀜𑁆𑀜𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀧𑀣𑀯𑀻𑀓𑀲𑀺𑀡𑀸𑀤𑀻𑀲𑀽’’𑀢𑀺𑀆𑀤𑀺𑀦𑀸. ‘‘𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺𑀆𑀤𑀺 𑀢𑀩𑁆𑀩𑀺𑀯𑀭𑀡𑀁. 𑀛𑀸𑀦𑀸𑀦𑀁 𑀢𑀸𑀯 𑀬𑀼𑀢𑁆𑀢𑁄 𑀓𑀭𑀡𑀪𑀸𑀯𑁄 𑀲𑀜𑁆𑀜𑀸𑀦𑀺𑀭𑁄𑀥𑀨𑀼𑀲𑀦𑀲𑁆𑀲 𑀲𑀸𑀥𑀓𑀢𑀫𑀪𑀸𑀯𑀢𑁄, 𑀓𑀲𑀺𑀡𑀸𑀦𑀁 𑀧𑀦 𑀓𑀣𑀦𑁆𑀢𑀺? 𑀢𑁂𑀲𑀫𑁆𑀧𑀺 𑀲𑁄 𑀬𑀼𑀢𑁆𑀢𑁄 𑀏𑀯. 𑀬𑀤𑀕𑁆𑀕𑁂𑀦 𑀳𑀺 𑀛𑀸𑀦𑀸𑀦𑀁 𑀦𑀺𑀭𑁄𑀥𑀨𑀼𑀲𑀦𑀲𑁆𑀲 𑀲𑀸𑀥𑀓𑀢𑀫𑀪𑀸𑀯𑁄, 𑀢𑀤𑀕𑁆𑀕𑁂𑀦 𑀓𑀲𑀺𑀡𑀸𑀦𑀫𑁆𑀧𑀺 𑀢𑀤𑀯𑀺𑀦𑀸𑀪𑀸𑀯𑀢𑁄. 𑀅𑀦𑁂𑀓𑀓𑀭𑀡𑀸𑀧𑀺 𑀘 𑀓𑀺𑀭𑀺𑀬𑀸 𑀳𑁄𑀢𑀺𑀬𑁂𑀯 𑀬𑀣𑀸 ‘‘𑀅𑀜𑁆𑀜𑁂𑀦 𑀫𑀕𑁆𑀕𑁂𑀦 𑀬𑀸𑀦𑁂𑀦 𑀤𑀻𑀧𑀺𑀓𑀸𑀬 𑀕𑀘𑁆𑀙𑀢𑀻’’𑀢𑀺.

𑀏𑀓𑀯𑀸𑀭𑀦𑁆𑀢𑀺 𑀲𑀓𑀺𑀁. 𑀧𑀼𑀭𑀺𑀫𑀲𑀜𑁆𑀜𑀸𑀦𑀺𑀭𑁄𑀥𑀦𑁆𑀢𑀺 𑀓𑀸𑀫𑀲𑀜𑁆𑀜𑀸𑀦𑀺𑀭𑁄𑀥𑀁, 𑀦 𑀧𑀦 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀲𑀜𑁆𑀜𑀺𑀢𑀁 𑀲𑀜𑁆𑀜𑀸𑀦𑀺𑀭𑁄𑀥𑀁. 𑀏𑀓𑀁 𑀲𑀜𑁆𑀜𑀕𑁆𑀕𑀦𑁆𑀢𑀺 𑀏𑀓𑀁 𑀲𑀜𑁆𑀜𑀸𑀪𑀽𑀢𑀁 𑀅𑀕𑁆𑀕𑀁, 𑀏𑀓𑁄 𑀲𑀜𑁆𑀜𑀕𑁆𑀕𑀪𑀸𑀯𑁄 𑀯𑀸 𑀳𑁂𑀝𑁆𑀞𑀺𑀫𑀸𑀬 𑀲𑀜𑁆𑀜𑀸𑀬 𑀉𑀓𑁆𑀓𑀝𑁆𑀞𑀪𑀸𑀯𑀢𑁄. 𑀲𑀜𑁆𑀜𑀸 𑀘 𑀲𑀸 𑀅𑀕𑁆𑀕𑀜𑁆𑀘𑀸𑀢𑀺 𑀳𑀺 𑀲𑀜𑁆𑀜𑀕𑁆𑀕𑀁, 𑀦 𑀲𑀜𑁆𑀜𑀸𑀲𑀼 𑀅𑀕𑁆𑀕𑀦𑁆𑀢𑀺. 𑀬𑀣𑀸 𑀧𑀦 𑀲𑀜𑁆𑀜𑀸 𑀅𑀕𑁆𑀕𑁄 𑀏𑀢𑁆𑀣𑀸𑀢𑀺 𑀲𑀜𑁆𑀜𑀕𑁆𑀕𑀁, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁, 𑀏𑀯𑀁 𑀲𑁂𑀲𑀛𑀸𑀦𑀫𑁆𑀧𑀺. 𑀬𑁂𑀦 𑀘 𑀦𑀺𑀫𑀺𑀢𑁆𑀢𑁂𑀦 𑀛𑀸𑀦𑀁 ‘‘𑀲𑀜𑁆𑀜𑀕𑁆𑀕’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀤𑁂𑀯 𑀲𑀜𑁆𑀜𑀸𑀲𑀗𑁆𑀔𑀸𑀢𑀁 𑀦𑀺𑀫𑀺𑀢𑁆𑀢𑀁 𑀪𑀸𑀯𑀮𑁄𑀧𑁂𑀦, 𑀪𑀸𑀯𑀧𑁆𑀧𑀥𑀸𑀦𑁂𑀦 𑀯𑀸 𑀇𑀥𑀸𑀥𑀺𑀧𑁆𑀧𑁂𑀢𑀁. 𑀤𑁆𑀯𑁂 𑀯𑀸𑀭𑁂𑀢𑀺 𑀤𑁆𑀯𑀺𑀓𑁆𑀔𑀢𑁆𑀢𑀼𑀁. 𑀲𑀢𑀲𑀳𑀲𑁆𑀲𑀁 𑀲𑀜𑁆𑀜𑀕𑁆𑀕𑀸𑀦𑀻𑀢𑀺 𑀫𑀺𑀕𑀧𑀤𑀯𑀴𑀜𑁆𑀚𑀦𑀦𑀺𑀤𑁆𑀤𑁂𑀲𑁄. 𑀲𑁂𑀲𑀓𑀲𑀺𑀡𑁂𑀲𑀽𑀢𑀺 𑀓𑀲𑀺𑀡𑀸𑀦𑀫𑁂𑀯 𑀕𑀳𑀡𑀁 𑀦𑀺𑀭𑁄𑀥𑀓𑀣𑀸𑀬 𑀅𑀥𑀺𑀓𑀢𑀢𑁆𑀢𑀸, 𑀢𑀢𑁄 𑀏𑀯 𑀘𑁂𑀢𑁆𑀣 𑀛𑀸𑀦𑀕𑁆𑀕𑀳𑀡𑁂𑀦𑀧𑀺 𑀓𑀲𑀺𑀡𑀚𑁆𑀛𑀸𑀦𑀸𑀦𑀺 𑀏𑀯 𑀕𑀳𑀺𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸 ‘‘𑀧𑀣𑀯𑀻𑀓𑀲𑀺𑀡𑁂𑀦 𑀓𑀭𑀡𑀪𑀽𑀢𑁂𑀦𑀸’’𑀢𑀺 𑀢𑀤𑀸𑀭𑀫𑁆𑀫𑀡𑀺𑀓𑀁 𑀛𑀸𑀦𑀁 𑀅𑀦𑀸𑀫𑀲𑀺𑀢𑁆𑀯𑀸 𑀯𑀼𑀢𑁆𑀢𑀁, 𑀏𑀯𑀁 ‘‘𑀧𑀞𑀫𑀚𑁆𑀛𑀸𑀦𑁂𑀦 𑀓𑀭𑀡𑀪𑀽𑀢𑁂𑀦𑀸’’𑀢𑀺 𑀢𑀤𑀸𑀭𑀫𑁆𑀫𑀡𑀁 𑀅𑀦𑀸𑀫𑀲𑀺𑀢𑁆𑀯𑀸 𑀯𑀤𑀢𑀺. ‘‘𑀇𑀢𑀻’’𑀢𑀺𑀆𑀤𑀺𑀦𑀸 𑀢𑀤𑁂𑀯𑀢𑁆𑀣𑀁 𑀲𑀗𑁆𑀕𑀳𑁂𑀢𑁆𑀯𑀸 𑀦𑀺𑀕𑀫𑀦𑀁 𑀓𑀭𑁄𑀢𑀺. 𑀲𑀩𑁆𑀩𑀫𑁆𑀧𑀻𑀢𑀺 𑀏𑀓𑀯𑀸𑀭𑀁 𑀲𑀫𑀸𑀧𑀦𑁆𑀦𑀚𑁆𑀛𑀸𑀦𑀲𑀜𑁆𑀜𑀫𑁆𑀧𑀺. 𑀲𑀗𑁆𑀕𑀳𑁂𑀢𑁆𑀯𑀸𑀢𑀺 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑁂𑀦 𑀢𑀁𑀲𑀪𑀸𑀯𑀸𑀦𑀢𑀺𑀯𑀢𑁆𑀢𑀦𑀢𑁄 𑀲𑀗𑁆𑀕𑀳𑀁 𑀓𑀢𑁆𑀯𑀸, 𑀲𑀫𑀸𑀧𑀚𑁆𑀚𑀦𑀯𑀲𑁂𑀦, 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑁂𑀦 𑀘 𑀏𑀓𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀧𑀭𑀸𑀧𑀭𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁. 𑀩𑀳𑀽𑀦𑀺 𑀲𑀜𑁆𑀜𑀕𑁆𑀕𑀸𑀦𑀺 𑀳𑁄𑀦𑁆𑀢𑀺.

𑁪𑁧𑁬. 𑀧𑀞𑀫𑀦𑀬𑁂 𑀛𑀸𑀦𑀧𑀤𑀝𑁆𑀞𑀸𑀦𑀁 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀦𑁆𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀲𑁂𑀦 𑀲𑀜𑁆𑀜𑀸𑀜𑀸𑀡𑀸𑀦𑀺 𑀤𑀲𑁆𑀲𑀺𑀢𑀸𑀦𑀺. 𑀤𑀼𑀢𑀺𑀬𑀦𑀬𑁂 𑀧𑀦 𑀬𑀲𑁆𑀫𑀸 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀫𑀕𑁆𑀕𑁂𑀦 𑀖𑀝𑁂𑀦𑁆𑀢𑀲𑁆𑀲 𑀫𑀕𑁆𑀕𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀯𑀲𑁂𑀦 𑀲𑀜𑁆𑀜𑀸𑀜𑀸𑀡𑀸𑀦𑀺 𑀤𑀲𑁆𑀲𑀺𑀢𑀸𑀦𑀺. 𑀢𑀢𑀺𑀬𑀦𑀬𑁂 𑀘 𑀬𑀲𑁆𑀫𑀸 𑀧𑀞𑀫𑀦𑀬𑁄 𑀑𑀴𑀸𑀭𑀺𑀓𑁄, 𑀤𑀼𑀢𑀺𑀬𑀦𑀬𑁄𑀧𑀺 𑀫𑀺𑀲𑁆𑀲𑀓𑁄𑀢𑀺 𑀢𑀤𑀼𑀪𑀬𑀁 𑀅𑀲𑀫𑁆𑀪𑀸𑀯𑁂𑀢𑁆𑀯𑀸 𑀅𑀘𑁆𑀘𑀦𑁆𑀢𑀲𑀼𑀔𑀼𑀫𑀕𑀫𑁆𑀪𑀻𑀭𑀁 𑀦𑀺𑀩𑁆𑀩𑀢𑁆𑀢𑀺𑀢𑀮𑁄𑀓𑀼𑀢𑁆𑀢𑀭𑀫𑁂𑀯 𑀤𑀲𑁆𑀲𑁂𑀢𑀼𑀁 𑀫𑀕𑁆𑀕𑀨𑀮𑀯𑀲𑁂𑀦 𑀲𑀜𑁆𑀜𑀸𑀜𑀸𑀡𑀸𑀦𑀺 𑀤𑀲𑁆𑀲𑀺𑀢𑀸𑀦𑀺. 𑀢𑀬𑁄𑀧𑁂𑀢𑁂 𑀦𑀬𑀸 𑀫𑀕𑁆𑀕𑀲𑁄𑀥𑀦𑀯𑀲𑁂𑀦 𑀤𑀲𑁆𑀲𑀺𑀢𑀸.

‘‘𑀅𑀬𑀁 𑀧𑀦𑁂𑀢𑁆𑀣 𑀲𑀸𑀭𑁄’’𑀢𑀺 𑀯𑀺𑀪𑀸𑀯𑁂𑀢𑀼𑀁 𑀢𑀺𑀧𑀺𑀝𑀓𑀫𑀳𑀸𑀲𑀺𑀯𑀢𑁆𑀣𑁂𑀭𑀯𑀸𑀤𑁄 𑀆𑀪𑀢𑁄. 𑀢𑀣𑀸 𑀳𑀺 ‘‘𑀅𑀭𑀳𑀢𑁆𑀢𑀨𑀮𑀲𑀜𑁆𑀜𑀸𑀬 𑀉𑀧𑁆𑀧𑀸𑀤𑀸’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑀅𑀝𑁆𑀞. 𑁧.𑁪𑁧𑁬) 𑀣𑁂𑀭𑀯𑀸𑀤𑀸𑀦𑀼𑀓𑀽𑀮𑀫𑁂𑀯 𑀉𑀧𑀭𑀺 𑀅𑀢𑁆𑀣𑁄 𑀲𑀁𑀯𑀡𑁆𑀡𑀺𑀢𑁄𑀢𑀺. 𑀇𑀫𑁂 𑀪𑀺𑀓𑁆𑀔𑀽𑀢𑀺 𑀧𑀼𑀭𑀺𑀫𑀯𑀸𑀤𑀺𑀦𑁄 𑀪𑀺𑀓𑁆𑀔𑀽. 𑀢𑀤𑀸 𑀤𑀻𑀖𑀦𑀺𑀓𑀸𑀬𑀢𑀦𑁆𑀢𑀺𑀁 𑀧𑀭𑀺𑀯𑀢𑁆𑀢𑀦𑁆𑀢𑁂 𑀇𑀫𑀁 𑀞𑀸𑀦𑀁 𑀧𑀢𑁆𑀯𑀸 𑀬𑀣𑀸𑀯𑀼𑀢𑁆𑀢𑀧𑀝𑀺𑀧𑀸𑀝𑀺𑀬𑀸 𑀢𑀬𑁄 𑀦𑀬𑁂 𑀓𑀣𑁂𑀦𑁆𑀢𑁂 𑀪𑀺𑀓𑁆𑀔𑀽 𑀲𑀦𑁆𑀥𑀸𑀬 𑀏𑀯𑀁 𑀣𑁂𑀭𑁄 𑀯𑀤𑀢𑀺. 𑀦𑀺𑀭𑁄𑀥𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑀲𑁆𑀫𑀺𑀁 𑀓𑀣𑀺𑀢𑁂 𑀢𑀤𑀦𑀦𑁆𑀢𑀭𑀁 𑀲𑀜𑁆𑀜𑀸𑀜𑀸𑀡𑀼𑀧𑁆𑀧𑀢𑁆𑀢𑀺𑀁 𑀧𑀼𑀘𑁆𑀙𑀦𑁆𑀢𑁄 𑀅𑀢𑁆𑀣𑀢𑁄 𑀦𑀺𑀭𑁄𑀥𑀸 𑀯𑀼𑀝𑁆𑀞𑀸𑀦𑀁 𑀧𑀼𑀘𑁆𑀙𑀢𑀺 𑀦𑀸𑀫. 𑀦𑀺𑀭𑁄𑀥𑀢𑁄 𑀘 𑀯𑀼𑀝𑁆𑀞𑀸𑀦𑀁 𑀅𑀭𑀳𑀢𑁆𑀢𑀨𑀮𑀼𑀧𑁆𑀧𑀢𑁆𑀢𑀺𑀬𑀸 𑀯𑀸 𑀲𑀺𑀬𑀸, 𑀅𑀦𑀸𑀕𑀸𑀫𑀺𑀨𑀮𑀼𑀧𑁆𑀧𑀢𑁆𑀢𑀺𑀬𑀸 𑀯𑀸, 𑀢𑀢𑁆𑀣 𑀲𑀜𑁆𑀜𑀸 𑀧𑀥𑀸𑀦𑀸, 𑀢𑀤𑀦𑀦𑁆𑀢𑀭𑀜𑁆𑀘 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀦𑁆𑀢𑀺 𑀢𑀤𑀼𑀪𑀬𑀁 𑀦𑀺𑀤𑁆𑀥𑀸𑀭𑁂𑀦𑁆𑀢𑁄 𑀣𑁂𑀭𑁄 ‘‘𑀧𑁄𑀝𑁆𑀞𑀧𑀸𑀤𑁄 𑀳𑁂𑀝𑁆𑀞𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀪𑀕𑀯𑀸𑀢𑀺 𑀆𑀮𑀧𑀦𑀯𑀘𑀦𑀁.

𑀬𑀣𑀸 𑀫𑀕𑁆𑀕𑀯𑀻𑀣𑀺𑀬𑀁 𑀫𑀕𑁆𑀕𑀨𑀮𑀜𑀸𑀡𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀦𑀺𑀬𑀫𑀢𑁄 𑀫𑀕𑁆𑀕𑀨𑀮𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀸𑀦𑀺 𑀳𑁄𑀦𑁆𑀢𑀺, 𑀏𑀯𑀁 𑀨𑀮𑀲𑀫𑀸𑀧𑀢𑁆𑀢𑀺𑀯𑀻𑀣𑀺𑀬𑀁 𑀨𑀮𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀧𑀘𑁆𑀙𑀸 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡’’𑀦𑁆𑀢𑀺. ‘‘𑀇𑀤𑀁 𑀅𑀭𑀳𑀢𑁆𑀢𑀨𑀮’’𑀦𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀲𑁆𑀲 𑀉𑀧𑁆𑀧𑀢𑁆𑀢𑀺𑀆𑀓𑀸𑀭𑀤𑀲𑁆𑀲𑀦𑀁. 𑀅𑀬𑀫𑁂𑀯 𑀧𑀘𑁆𑀘𑀬𑁄 𑀇𑀤𑀧𑁆𑀧𑀘𑁆𑀘𑀬𑁄 𑀫-𑀓𑀸𑀭𑀲𑁆𑀲 𑀤-𑀓𑀸𑀭𑀁 𑀓𑀢𑁆𑀯𑀸. 𑀤-𑀓𑀸𑀭𑁂𑀦𑀧𑀺 𑀧𑀓𑀢𑀺𑀧𑀤𑀫𑀺𑀘𑁆𑀙𑀦𑁆𑀢𑀺 𑀓𑁂𑀘𑀺 𑀲𑀤𑁆𑀤𑀯𑀺𑀤𑀽. 𑀲𑁄 𑀧𑀦 𑀣𑁂𑀭𑀯𑀸𑀤𑁂 𑀦 𑀨𑀮𑀲𑀫𑀸𑀥𑀺𑀲𑀜𑁆𑀜𑀸 𑀏𑀯𑀸𑀢𑀺 𑀆𑀳 ‘‘𑀨𑀮𑀲𑀫𑀸𑀥𑀺𑀲𑀜𑁆𑀜𑀸𑀧𑀘𑁆𑀘𑀬𑀸’’𑀢𑀺, 𑀅𑀭𑀳𑀢𑁆𑀢𑀨𑀮𑀲𑀫𑀸𑀥𑀺𑀲𑀳𑀕𑀢𑀲𑀜𑁆𑀜𑀸𑀧𑀘𑁆𑀘𑀬𑀸𑀢𑀺 𑀅𑀢𑁆𑀣𑁄. 𑀓𑀺𑀭𑀸𑀢𑀺 𑀅𑀦𑀼𑀲𑁆𑀲𑀭𑀡𑀢𑁆𑀣𑁂 𑀦𑀺𑀧𑀸𑀢𑁄. 𑀬𑀣𑀸𑀥𑀺𑀕𑀢𑀥𑀫𑁆𑀫𑀸𑀦𑀼𑀲𑁆𑀲𑀭𑀡𑀧𑀓𑁆𑀔𑀺𑀬𑀸 𑀳𑀺 𑀧𑀘𑁆𑀘𑀯𑁂𑀓𑁆𑀔𑀡𑀸. 𑀲𑀫𑀸𑀥𑀺𑀲𑀻𑀲𑁂𑀦 𑀘𑁂𑀢𑁆𑀣 𑀲𑀩𑁆𑀩𑀁 𑀅𑀭𑀳𑀢𑁆𑀢𑀨𑀮𑀁 𑀕𑀳𑀺𑀢𑀁 𑀲𑀳𑀘𑀭𑀡𑀜𑀸𑀬𑁂𑀦, 𑀢𑀲𑁆𑀫𑀺𑀁 𑀅𑀲𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀅𑀲𑀫𑁆𑀪𑀯𑁄𑀢𑀺 𑀧𑀸𑀴𑀺𑀬𑀁 ‘‘𑀇𑀤𑀧𑁆𑀧𑀘𑁆𑀘𑀬𑀸’’𑀢𑀺 𑀯𑀼𑀢𑁆𑀢𑀁. 𑀏𑀯𑀫𑀺𑀥 𑀤𑀻𑀖𑀪𑀸𑀡𑀓𑀸𑀦𑀁 𑀫𑀢𑁂𑀦 𑀨𑀮𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀏𑀓𑀦𑁆𑀢𑀺𑀓𑀢𑀸 𑀤𑀲𑁆𑀲𑀺𑀢𑀸. 𑀘𑀽𑀴𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑀼𑀢𑁆𑀢𑀝𑁆𑀞𑀓𑀣𑀸𑀬𑀁 𑀧𑀦 𑀏𑀯𑀁 𑀯𑀼𑀢𑁆𑀢𑀁 ‘‘𑀲𑀸 𑀧𑀦 𑀦 𑀲𑀩𑁆𑀩𑁂𑀲𑀁 𑀧𑀭𑀺𑀧𑀼𑀡𑁆𑀡𑀸 𑀳𑁄𑀢𑀺. 𑀏𑀓𑁄 𑀳𑀺 𑀧𑀳𑀻𑀦𑀓𑀺𑀮𑁂𑀲𑀫𑁂𑀯 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀏𑀓𑁄 𑀅𑀯𑀲𑀺𑀝𑁆𑀞𑀓𑀺𑀮𑁂𑀲𑀫𑁂𑀯, 𑀏𑀓𑁄 𑀫𑀕𑁆𑀕𑀫𑁂𑀯, 𑀏𑀓𑁄 𑀨𑀮𑀫𑁂𑀯, 𑀏𑀓𑁄 𑀦𑀺𑀩𑁆𑀩𑀸𑀦𑀫𑁂𑀯. 𑀇𑀫𑀸𑀲𑀼 𑀧𑀦 𑀧𑀜𑁆𑀘𑀲𑀼 𑀧𑀘𑁆𑀘𑀯𑁂𑀓𑁆𑀔𑀡𑀸𑀲𑀼 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀦𑁄 𑀮𑀤𑁆𑀥𑀼𑀁 𑀦 𑀯𑀝𑁆𑀝𑀦𑁆𑀢𑀻’’𑀢𑀺 (𑀫. 𑀦𑀺. 𑀅𑀝𑁆𑀞. 𑁧.𑁧𑁭𑁫), 𑀢𑀤𑁂𑀢𑀁 𑀫𑀚𑁆𑀛𑀺𑀫𑀪𑀸𑀡𑀓𑀸𑀦𑀁 𑀫𑀢𑁂𑀦 𑀯𑀼𑀢𑁆𑀢𑀁. 𑀆𑀪𑀺𑀥𑀫𑁆𑀫𑀺𑀓𑀸 𑀧𑀦 𑀯𑀤𑀦𑁆𑀢𑀺 𑁋

‘‘𑀫𑀕𑁆𑀕𑀁 𑀨𑀮𑀜𑁆𑀘 𑀦𑀺𑀩𑁆𑀩𑀸𑀦𑀁, 𑀧𑀘𑁆𑀘𑀯𑁂𑀓𑁆𑀔𑀢𑀺 𑀧𑀡𑁆𑀟𑀺𑀢𑁄;

𑀳𑀻𑀦𑁂 𑀓𑀺𑀮𑁂𑀲𑁂 𑀲𑁂𑀲𑁂 𑀘, 𑀧𑀘𑁆𑀘𑀯𑁂𑀓𑁆𑀔𑀢𑀺 𑀯𑀸 𑀦 𑀯𑀸’’𑀢𑀺. (𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀝𑁆𑀞𑀓𑀣𑀸𑀬𑀁 𑀓𑀫𑁆𑀫𑀝𑁆𑀞𑀸𑀦𑀲𑀗𑁆𑀕𑀳𑀯𑀺𑀪𑀸𑀕𑁂 𑀯𑀺𑀲𑀼𑀤𑁆𑀥𑀺𑀪𑁂𑀤𑁂);

𑀲𑀜𑁆𑀜𑀸𑀅𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁪𑁧𑁭. ‘‘𑀕𑀸𑀫𑀲𑀽𑀓𑀭𑁄’’𑀢𑀺 𑀇𑀫𑀺𑀦𑀸 𑀯𑀦𑀲𑀽𑀓𑀭𑀫𑀧𑀦𑁂𑀢𑀺. 𑀏𑀯𑀜𑁆𑀳𑀺 𑀉𑀧𑀫𑀸𑀯𑀘𑀦𑀁 𑀲𑀽𑀧𑀧𑀦𑁆𑀦𑀁 𑀳𑁄𑀢𑀻𑀢𑀺. 𑀤𑁂𑀲𑀦𑀸𑀬 𑀲𑀡𑁆𑀳𑀪𑀸𑀯𑁂𑀦 𑀲𑀸𑀭𑀫𑁆𑀪𑀫𑀓𑁆𑀔𑀇𑀲𑁆𑀲𑀸𑀤𑀺𑀫𑀮𑀯𑀺𑀲𑁄𑀥𑀦𑀢𑁄 𑀲𑀼𑀢𑀫𑀬𑀜𑀸𑀡𑀁 𑀦𑁆𑀳𑀸𑀧𑀺𑀢𑀁 𑀯𑀺𑀬, 𑀲𑀼𑀔𑀼𑀫𑀪𑀸𑀯𑁂𑀦 𑀅𑀦𑀼𑀯𑀺𑀮𑀺𑀢𑁆𑀢𑀁 𑀯𑀺𑀬, 𑀢𑀺𑀮𑀓𑁆𑀔𑀡𑀩𑁆𑀪𑀸𑀳𑀢𑀢𑀸𑀬 𑀓𑀼𑀡𑁆𑀟𑀮𑀸𑀤𑁆𑀬𑀸𑀮𑀗𑁆𑀓𑀸𑀭𑀯𑀺𑀪𑀽𑀲𑀺𑀢𑀁 𑀯𑀺𑀬 𑀘 𑀳𑁄𑀢𑀺. 𑀢𑀤𑀦𑀼𑀧𑀯𑀺𑀲𑀢𑁄 𑀜𑀸𑀡𑀲𑁆𑀲, 𑀢𑀣𑀸𑀪𑀸𑀯𑀸 𑀢𑀁𑀲𑀫𑀗𑁆𑀕𑀺𑀦𑁄 𑀘 𑀧𑀼𑀕𑁆𑀕𑀮𑀲𑁆𑀲 𑀢𑀣𑀸𑀪𑀸𑀯𑀸𑀧𑀢𑁆𑀢𑀺, 𑀦𑀺𑀭𑁄𑀥𑀓𑀣𑀸𑀬 𑀦𑀺𑀯𑁂𑀤𑀦𑀜𑁆𑀘𑀲𑁆𑀲 𑀲𑀺𑀭𑀺𑀲𑀬𑀦𑁂 𑀧𑀯𑁂𑀲𑀦𑀲𑀤𑀺𑀲𑀦𑁆𑀢𑀺 𑀆𑀳 ‘‘𑀲𑀡𑁆𑀳𑀲𑀼𑀔𑀼𑀫…𑀧𑁂… 𑀆𑀭𑀸𑀧𑀺𑀢𑁄𑀧𑀻’’𑀢𑀺. 𑀢𑀢𑁆𑀣𑀸𑀢𑀺 𑀢𑀺𑀲𑁆𑀲𑀁 𑀦𑀺𑀭𑁄𑀥𑀓𑀣𑀸𑀬𑀁. 𑀫𑀦𑁆𑀤𑀩𑀼𑀤𑁆𑀥𑀺𑀢𑀸𑀬 𑀲𑀼𑀔𑀁 𑀦 𑀯𑀺𑀦𑁆𑀤𑀦𑁆𑀢𑁄 𑀅𑀮𑀪𑀦𑁆𑀢𑁄, 𑀅𑀚𑀸𑀦𑀦𑁆𑀢𑁄 𑀯𑀸. 𑀫𑀮𑀯𑀺𑀤𑀽𑀲𑀺𑀢𑀢𑀸𑀬 𑀕𑀽𑀣𑀝𑁆𑀞𑀸𑀦𑀲𑀤𑀺𑀲𑀁. 𑀅𑀢𑁆𑀢𑀦𑁄 𑀮𑀤𑁆𑀥𑀺𑀦𑁆𑀢𑀺 𑀅𑀢𑁆𑀢𑀤𑀺𑀝𑁆𑀞𑀺𑀁. 𑀅𑀦𑀼𑀫𑀢𑀺𑀁 𑀕𑀳𑁂𑀢𑁆𑀯𑀸𑀢𑀺 𑀅𑀦𑀼𑀜𑁆𑀜𑀁 𑀕𑀳𑁂𑀢𑁆𑀯𑀸 ‘‘𑀏𑀤𑀺𑀲𑁄 𑀫𑁂 𑀅𑀢𑁆𑀢𑀸’’𑀢𑀺 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸, 𑀅𑀢𑁆𑀢𑀦𑁄 𑀮𑀤𑁆𑀥𑀺𑀬𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀧𑀸𑀴𑀺𑀬𑀁 𑀓𑀁 𑀧𑀦𑀸𑀢𑀺 𑀑𑀴𑀸𑀭𑀺𑀓𑁄, 𑀫𑀦𑁄𑀫𑀬𑁄, 𑀅𑀭𑀽𑀧𑀻𑀢𑀺 𑀢𑀺𑀡𑁆𑀡𑀁 𑀅𑀢𑁆𑀢𑀯𑀸𑀤𑀸𑀦𑀁 𑀯𑀲𑁂𑀦 𑀢𑀺𑀯𑀺𑀥𑁂𑀲𑀼 𑀅𑀢𑁆𑀢𑀸𑀦𑁂𑀲𑀼 𑀓𑀢𑀭𑀁 𑀅𑀢𑁆𑀢𑀸𑀦𑀁 𑀧𑀘𑁆𑀘𑁂𑀲𑀻𑀢𑀺 𑀅𑀢𑁆𑀣𑁄. ‘‘𑀤𑁂𑀲𑀦𑀸𑀬 𑀲𑀼𑀓𑀼𑀲𑀮𑁄’’𑀢𑀺 𑀇𑀫𑀺𑀦𑀸 ‘‘𑀅𑀯𑀲𑁆𑀲𑀁 𑀫𑁂 𑀪𑀕𑀯𑀸 𑀮𑀤𑁆𑀥𑀺𑀁 𑀯𑀺𑀤𑁆𑀥𑀁𑀲𑁂𑀲𑁆𑀲𑀢𑀻’’𑀢𑀺 𑀢𑀲𑁆𑀲 𑀫𑀦𑀲𑀺𑀓𑀸𑀭𑀁 𑀤𑀲𑁆𑀲𑁂𑀢𑀺. 𑀧𑀭𑀺𑀳𑀭𑀦𑁆𑀢𑁄𑀢𑀺 𑀯𑀺𑀤𑁆𑀥𑀁𑀲𑀦𑀢𑁄 𑀅𑀧𑀦𑁂𑀦𑁆𑀢𑁄, 𑀅𑀭𑀽𑀧𑀻 𑀅𑀢𑁆𑀢𑀸𑀢𑀺 𑀅𑀢𑁆𑀢𑀦𑁄 𑀮𑀤𑁆𑀥𑀺𑀁 𑀦𑀺𑀕𑀽𑀳𑀦𑁆𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀸𑀴𑀺𑀬𑀁 ‘‘𑀑𑀴𑀸𑀭𑀺𑀓𑀁 𑀔𑁄’’𑀢𑀺𑀆𑀤𑀺𑀫𑁆𑀳𑀺 𑀧𑀭𑀺𑀩𑁆𑀩𑀸𑀚𑀓𑀯𑀘𑀦𑁂 𑀅𑀬𑀫𑀥𑀺𑀧𑁆𑀧𑀸𑀬𑁄 𑁋 𑀬𑀲𑁆𑀫𑀸 𑀘𑀢𑀼𑀲𑀦𑁆𑀢𑀢𑀺𑀭𑀽𑀧𑀧𑁆𑀧𑀩𑀦𑁆𑀥𑀁 𑀏𑀓𑀢𑁆𑀢𑀯𑀲𑁂𑀦 𑀕𑀳𑁂𑀢𑁆𑀯𑀸 𑀭𑀽𑀧𑀻𑀪𑀸𑀯𑀢𑁄 ‘‘𑀑𑀴𑀸𑀭𑀺𑀓𑁄 𑀅𑀢𑁆𑀢𑀸’’𑀢𑀺 𑀧𑀘𑁆𑀘𑁂𑀢𑀺 𑀅𑀢𑁆𑀢𑀯𑀸𑀤𑀻, 𑀅𑀦𑁆𑀦𑀧𑀸𑀦𑁄𑀧𑀝𑁆𑀞𑀸𑀦𑀢𑀜𑁆𑀘𑀲𑁆𑀲 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 ‘‘𑀲𑀲𑁆𑀲𑀢𑁄’’𑀢𑀺 𑀫𑀜𑁆𑀜𑀢𑀺, 𑀭𑀽𑀧𑀻𑀪𑀸𑀯𑀢𑁄 𑀏𑀯 𑀘 𑀲𑀜𑁆𑀜𑀸𑀬 𑀅𑀜𑁆𑀜𑀢𑁆𑀢𑀁 𑀜𑀸𑀬𑀸𑀕𑀢𑀫𑁂𑀯, 𑀬𑀁 𑀯𑁂𑀤𑀯𑀸𑀤𑀺𑀦𑁄 ‘‘𑀅𑀦𑁆𑀦𑀫𑀬𑁄, 𑀧𑀸𑀦𑀫𑀬𑁄’’𑀢𑀺 𑀘 𑀤𑁆𑀯𑀺𑀥𑀸 𑀯𑁄𑀳𑀭𑀦𑁆𑀢𑀺, 𑀢𑀲𑁆𑀫𑀸 𑀧𑀭𑀺𑀩𑁆𑀩𑀸𑀚𑀓𑁄 𑀢𑀁 𑀅𑀢𑁆𑀢𑀯𑀸𑀤𑀺𑀫𑀢𑀁 𑀅𑀢𑁆𑀢𑀸𑀦𑀁 𑀲𑀦𑁆𑀥𑀸𑀬 ‘‘𑀑𑀴𑀸𑀭𑀺𑀓𑀁 𑀔𑁄’’𑀢𑀺𑀆𑀤𑀺𑀫𑀸𑀳𑀸𑀢𑀺.

‘‘𑀑𑀴𑀸𑀭𑀺𑀓𑁄 𑀘 𑀳𑀺 𑀢𑁂 𑀧𑁄𑀝𑁆𑀞𑀧𑀸𑀤 𑀅𑀢𑁆𑀢𑀸 𑀅𑀪𑀯𑀺𑀲𑁆𑀲𑀸’’𑀢𑀺𑀆𑀤𑀺𑀫𑁆𑀳𑀺 𑀪𑀕𑀯𑀢𑁄 𑀯𑀘𑀦𑁂 𑀘𑀸𑀬𑀫𑀥𑀺𑀧𑁆𑀧𑀸𑀬𑁄 𑁋 𑀬𑀤𑀺 𑀅𑀢𑁆𑀢𑀸 𑀭𑀽𑀧𑀻 𑀪𑀯𑁂𑀬𑁆𑀬, 𑀏𑀯𑀁 𑀲𑀢𑀺 𑀭𑀽𑀧𑀁 𑀅𑀢𑁆𑀢𑀸 𑀲𑀺𑀬𑀸, 𑀦 𑀘 𑀲𑀜𑁆𑀜𑀻 𑀲𑀜𑁆𑀜𑀸𑀬 𑀅𑀭𑀽𑀧𑀪𑀸𑀯𑀢𑁄, 𑀭𑀽𑀧𑀥𑀫𑁆𑀫𑀸𑀦𑀜𑁆𑀘 𑀅𑀲𑀜𑁆𑀚𑀸𑀦𑀦𑀲𑀪𑀸𑀯𑀢𑁆𑀢𑀸. 𑀭𑀽𑀧𑀻 𑀘 𑀲𑀫𑀸𑀦𑁄 𑀬𑀤𑀺 𑀢𑀯 𑀫𑀢𑁂𑀦 𑀦𑀺𑀘𑁆𑀘𑁄, 𑀲𑀜𑁆𑀜𑀸 𑀘 𑀅𑀧𑀭𑀸𑀧𑀭𑀁 𑀧𑀯𑀢𑁆𑀢𑀦𑀢𑁄 𑀢𑀢𑁆𑀣 𑀢𑀢𑁆𑀣 𑀪𑀺𑀚𑁆𑀚𑀢𑀻𑀢𑀺 𑀪𑁂𑀤𑀲𑀩𑁆𑀪𑀸𑀯𑀢𑁄 𑀅𑀦𑀺𑀘𑁆𑀘𑀸, 𑀏𑀯𑀫𑁆𑀧𑀺 ‘‘𑀅𑀜𑁆𑀜𑀸 𑀲𑀜𑁆𑀜𑀸, 𑀅𑀜𑁆𑀜𑁄 𑀅𑀢𑁆𑀢𑀸’’𑀢𑀺 𑀲𑀜𑁆𑀜𑀸𑀬 𑀅𑀪𑀸𑀯𑀢𑁄 𑀅𑀘𑁂𑀢𑀦𑁄𑀯 𑀅𑀢𑁆𑀢𑀸 𑀳𑁄𑀢𑀺, 𑀢𑀲𑁆𑀫𑀸 𑀏𑀲 𑀅𑀢𑁆𑀢𑀸 𑀦 𑀓𑀫𑁆𑀫𑀲𑁆𑀲 𑀓𑀸𑀭𑀓𑁄, 𑀦 𑀘 𑀨𑀮𑀲𑁆𑀲 𑀉𑀧𑀪𑀼𑀜𑁆𑀚𑀦𑀓𑁄𑀢𑀺 𑀆𑀧𑀦𑁆𑀦𑀫𑁂𑀯𑀸𑀢𑀺 𑀇𑀫𑀁 𑀤𑁄𑀲𑀁 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀸 ‘‘𑀑𑀴𑀸𑀭𑀺𑀓𑁄 𑀘𑀸’’𑀢𑀺𑀆𑀤𑀺𑀫𑀸𑀳𑀸𑀢𑀺. 𑀢𑀢𑁆𑀣𑀸𑀢𑀺 ‘‘𑀭𑀽𑀧𑀻 𑀅𑀢𑁆𑀢𑀸’’𑀢𑀺 𑀯𑀸𑀤𑁂. 𑀧𑀘𑁆𑀘𑀸𑀕𑀘𑁆𑀙𑀢𑁄𑀢𑀺 𑀲𑁂𑀲𑀓𑀺𑀭𑀺𑀬𑀸𑀧𑁂𑀓𑁆𑀔𑀸𑀬 𑀓𑀫𑁆𑀫𑀢𑁆𑀣𑁂𑀬𑁂𑀯 𑀉𑀧𑀬𑁄𑀕𑀯𑀘𑀦𑀁, 𑀧𑀘𑁆𑀘𑀸𑀕𑀘𑁆𑀙𑀢𑁄𑀢𑀺 𑀘 𑀧𑀘𑁆𑀘𑀸𑀕𑀘𑁆𑀙𑀦𑁆𑀢𑀲𑁆𑀲, 𑀚𑀸𑀦𑀦𑁆𑀢𑀲𑁆𑀲, 𑀧𑀝𑀺𑀘𑁆𑀘 𑀯𑀸𑀤𑁂𑀦 𑀧𑀯𑀢𑁆𑀢𑀲𑁆𑀲𑀸𑀢𑀺 𑀯𑀸 𑀅𑀢𑁆𑀣𑁄. ‘‘𑀅𑀜𑁆𑀜𑀸 𑀘 𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀢𑀺, 𑀅𑀜𑁆𑀜𑀸 𑀘 𑀲𑀜𑁆𑀜𑀸 𑀦𑀺𑀭𑀼𑀚𑁆𑀛𑀦𑁆𑀢𑀻’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀉𑀧𑁆𑀧𑀸𑀤𑀧𑀼𑀩𑁆𑀩𑀓𑁄 𑀦𑀺𑀭𑁄𑀥𑁄, 𑀦 𑀘 𑀉𑀧𑁆𑀧𑀦𑁆𑀦𑀁 𑀅𑀦𑀺𑀭𑀼𑀚𑁆𑀛𑀦𑀓𑀁 𑀦𑀸𑀫 𑀅𑀢𑁆𑀣𑀻𑀢𑀺 𑀘𑁄𑀤𑀦𑀁 𑀲𑁄𑀥𑁂𑀢𑀼𑀁 ‘‘𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀢𑀺𑀧𑀺 𑀦𑁂𑀲𑀁 𑀏𑀓𑀸𑀮𑀫𑁆𑀩𑀡𑀯𑀢𑁆𑀣𑀼𑀓𑀪𑀸𑀯𑁂 𑀉𑀧𑁆𑀧𑀸𑀤𑀦𑀺𑀭𑁄𑀥𑀸𑀥𑀺𑀓𑀸𑀭𑀢𑁆𑀢𑀸 𑀏𑀓𑀼𑀧𑁆𑀧𑀸𑀤𑀦𑀺𑀭𑁄𑀥𑀪𑀸𑀯𑁄𑀯 𑀯𑀼𑀢𑁆𑀢𑁄. 𑀅𑀧𑀭𑀸𑀧𑀭𑀦𑁆𑀢𑀺 𑀧𑁄𑀗𑁆𑀔𑀸𑀦𑀼𑀧𑁄𑀗𑁆𑀔.

𑁪𑁧𑁮-𑁪𑁨𑁦. 𑀧𑀸𑀴𑀺𑀬𑀁 𑀫𑀦𑁄𑀫𑀬𑀦𑁆𑀢𑀺 𑀛𑀸𑀦𑀫𑀦𑀲𑁄 𑀯𑀲𑁂𑀦 𑀫𑀦𑁄𑀫𑀬𑀁. 𑀬𑁄 𑀳𑀺 𑀩𑀸𑀳𑀺𑀭𑀧𑀘𑁆𑀘𑀬𑀦𑀺𑀭𑀧𑁂𑀓𑁆𑀔𑁄, 𑀲𑁄 𑀫𑀦𑀲𑀸𑀯 𑀦𑀺𑀩𑁆𑀩𑀢𑁆𑀢𑁄𑀢𑀺 𑀫𑀦𑁄𑀫𑀬𑁄. 𑀭𑀽𑀧𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀲𑀭𑀻𑀭𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀬𑀁 𑀯𑁂𑀤𑀯𑀸𑀤𑀺𑀦𑁄 ‘‘𑀆𑀦𑀦𑁆𑀤𑀫𑀬𑁄, 𑀯𑀺𑀜𑁆𑀜𑀸𑀡𑀫𑀬𑁄’’𑀢𑀺 𑀘 𑀤𑁆𑀯𑀺𑀥𑀸 𑀯𑁄𑀳𑀭𑀦𑁆𑀢𑀺. 𑀢𑀢𑁆𑀭𑀸𑀧𑀻𑀢𑀺 ‘‘𑀫𑀦𑁄𑀫𑀬𑁄 𑀅𑀢𑁆𑀢𑀸’’𑀢𑀺 𑀯𑀸𑀤𑁂𑀧𑀺. 𑀤𑁄𑀲𑁂 𑀤𑀺𑀦𑁆𑀦𑁂𑀢𑀺 ‘‘𑀅𑀜𑁆𑀜𑀸𑀯 𑀲𑀜𑁆𑀜𑀸 𑀪𑀯𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀤𑁄𑀲𑁂 𑀤𑀺𑀦𑁆𑀦𑁂 𑀅𑀢𑁆𑀢𑀦𑁄 𑀮𑀤𑁆𑀥𑀺𑀁𑀬𑁂𑀯 𑀯𑀤𑀦𑁆𑀢𑁄 ‘‘𑀅𑀭𑀽𑀧𑀺𑀁 𑀔𑁄’’𑀢𑀺𑀆𑀤𑀺𑀫𑀸𑀳𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀥𑀸𑀧𑀺 𑀧𑀼𑀭𑀺𑀫𑀯𑀸𑀤𑁂 𑀯𑀼𑀢𑁆𑀢𑀦𑀬𑁂𑀦 ‘‘𑀬𑀤𑀺 𑀅𑀢𑁆𑀢𑀸 𑀫𑀦𑁄𑀫𑀬𑁄 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀻 𑀅𑀳𑀻𑀦𑀺𑀦𑁆𑀤𑁆𑀭𑀺𑀬𑁄 𑀪𑀯𑁂𑀬𑁆𑀬, 𑀏𑀯𑀁 𑀲𑀢𑀺 𑀭𑀽𑀧𑀁 𑀅𑀢𑁆𑀢𑀸 𑀲𑀺𑀬𑀸, 𑀦 𑀘 𑀲𑀜𑁆𑀜𑀻 𑀲𑀜𑁆𑀜𑀸𑀬 𑀅𑀭𑀽𑀧𑀪𑀸𑀯𑀢𑁄’’𑀢𑀺𑀆𑀤𑀺 𑀲𑀩𑁆𑀩𑀁 𑀤𑁄𑀲𑀤𑀲𑁆𑀲𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀫𑀢𑁆𑀣𑀜𑁆𑀳𑀺 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀸 ‘‘𑀫𑀦𑁄𑀫𑀬𑁄 𑀘 𑀳𑀺 𑀢𑁂 𑀧𑁄𑀝𑁆𑀞𑀧𑀸𑀤𑀸’’𑀢𑀺𑀆𑀤𑀺𑀫𑀯𑁄𑀘. 𑀓𑀲𑁆𑀫𑀸 𑀧𑀦𑀸𑀬𑀁 𑀧𑀭𑀺𑀩𑁆𑀩𑀸𑀚𑀓𑁄 𑀧𑀞𑀫𑀁 𑀑𑀴𑀸𑀭𑀺𑀓𑀁 𑀅𑀢𑁆𑀢𑀸𑀦𑀁 𑀧𑀝𑀺𑀚𑀸𑀦𑀺𑀢𑁆𑀯𑀸 𑀢𑀁 𑀮𑀤𑁆𑀥𑀺𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀧𑀼𑀦 𑀫𑀦𑁄𑀫𑀬𑀁 𑀅𑀢𑁆𑀢𑀸𑀦𑀁 𑀧𑀝𑀺𑀚𑀸𑀦𑀸𑀢𑀺? 𑀢𑀫𑁆𑀧𑀺 𑀯𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀧𑀼𑀦 𑀅𑀭𑀽𑀧𑀺𑀁 𑀅𑀢𑁆𑀢𑀸𑀦𑀁 𑀧𑀝𑀺𑀚𑀸𑀦𑀸𑀢𑀻𑀢𑀺? 𑀓𑀸𑀫𑀜𑁆𑀘𑁂𑀢𑁆𑀣 𑀓𑀸𑀭𑀡𑀁 ‘‘𑀢𑀢𑁄 𑀲𑁄 𑀅𑀭𑀽𑀧𑀻 𑀅𑀢𑁆𑀢𑀸𑀢𑀺 𑀏𑀯𑀁𑀮𑀤𑁆𑀥𑀺𑀓𑁄 𑀲𑀫𑀸𑀦𑁄𑀧𑀺…𑀧𑁂… 𑀆𑀤𑀺𑀫𑀸𑀳𑀸’’𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯, 𑀢𑀣𑀸𑀧𑀺 𑀇𑀫𑁂 𑀢𑀺𑀢𑁆𑀣𑀺𑀬𑀸 𑀦𑀸𑀫 𑀅𑀦𑀯𑀝𑁆𑀞𑀺𑀢𑀘𑀺𑀢𑁆𑀢𑀸 𑀣𑀼𑀲𑀭𑀸𑀲𑀺𑀫𑁆𑀳𑀺 𑀦𑀺𑀔𑀸𑀢𑀔𑀸𑀡𑀼𑀓𑁄 𑀯𑀺𑀬 𑀘𑀜𑁆𑀘𑀮𑀸𑀢𑀺 𑀓𑀸𑀭𑀡𑀦𑁆𑀢𑀭𑀫𑁆𑀧𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀦𑀸𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀜𑁆𑀜𑀸 𑀦𑀧𑁆𑀧𑀢𑀺𑀝𑁆𑀞𑀸𑀢𑀻𑀢𑀺 𑀆𑀭𑀫𑁆𑀫𑀡𑁂 𑀲𑀜𑁆𑀚𑀸𑀦𑀦𑀯𑀲𑁂𑀦 𑀲𑀜𑁆𑀜𑀸 𑀦 𑀧𑀢𑀺𑀝𑁆𑀞𑀸𑀢𑀺, 𑀆𑀭𑀫𑁆𑀫𑀡𑁂 𑀲𑀜𑁆𑀜𑀁 𑀦 𑀓𑀭𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀜𑁆𑀜𑀸𑀧𑀢𑀺𑀝𑁆𑀞𑀸𑀦𑀓𑀸𑀮𑁂𑀢𑀺 𑀏𑀢𑁆𑀣𑀸𑀧𑀺 𑀅𑀬𑀁 𑀦𑀬𑁄.

𑀢𑀢𑁆𑀭𑀸𑀧𑀻𑀢𑀺 ‘‘𑀅𑀭𑀽𑀧𑀻 𑀅𑀢𑁆𑀢𑀸’’𑀢𑀺 𑀯𑀸𑀤𑁂𑀧𑀺. 𑀲𑀜𑁆𑀜𑀸𑀬𑀸𑀢𑀺 𑀧𑀓𑀢𑀺𑀲𑀜𑁆𑀜𑀸𑀬, 𑀏𑀯𑀁 𑀪𑀤𑀦𑁆𑀢𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 (𑀤𑀻. 𑀦𑀺. 𑀝𑀻. 𑁧.𑁪𑁧𑁮-𑁪𑁨𑁦) 𑀯𑀼𑀢𑁆𑀢𑀁. 𑀅𑀜𑁆𑀜𑀲𑁆𑀫𑀺𑀁 𑀢𑀺𑀢𑁆𑀣𑀸𑀬𑀢𑀦𑁂 𑀉𑀧𑁆𑀧𑀸𑀤𑀦𑀺𑀭𑁄𑀥𑀦𑁆𑀢𑀺 𑀳𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀦 𑀯𑁂𑀤𑀺𑀓𑀸𑀦𑀁 𑀫𑀢𑁂𑀦 𑀦𑀸𑀦𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀸𑀬 𑀦𑀸𑀦𑀸𑀭𑀫𑁆𑀫𑀡𑀸𑀬 𑀲𑀜𑁆𑀜𑀸𑀬 𑀉𑀧𑁆𑀧𑀸𑀤𑀦𑀺𑀭𑁄𑀥𑀫𑀺𑀘𑁆𑀙𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀓𑁂𑀘𑀺 𑀧𑀦 ‘‘𑀆𑀘𑀭𑀺𑀬𑀲𑀜𑁆𑀜𑀸𑀬𑀸’’𑀢𑀺 𑀧𑀞𑀦𑁆𑀢𑀺, 𑀢𑀤𑀬𑀼𑀢𑁆𑀢𑀁 𑀅𑀢𑁆𑀣𑀲𑁆𑀲 𑀯𑀺𑀭𑀼𑀤𑁆𑀥𑀢𑁆𑀢𑀸, 𑀣𑁂𑀭𑁂𑀦 𑀘 𑀅𑀦𑀼𑀤𑁆𑀥𑀝𑀢𑁆𑀢𑀸. 𑀅𑀧𑀭𑀸𑀧𑀭𑀁 𑀧𑀯𑀢𑁆𑀢𑀸𑀬 𑀲𑀜𑁆𑀜𑀸𑀬 𑀉𑀧𑁆𑀧𑀸𑀤𑀯𑀬𑀤𑀲𑁆𑀲𑀦𑀢𑁄 𑀉𑀧𑁆𑀧𑀸𑀤𑀦𑀺𑀭𑁄𑀥𑀁 𑀇𑀘𑁆𑀙𑀢𑀺. 𑀢𑀣𑀸𑀧𑀺 ‘‘𑀲𑀜𑁆𑀜𑀸 𑀲𑀜𑁆𑀜𑀸’’𑀢𑀺 𑀧𑀯𑀢𑁆𑀢𑀲𑀫𑀜𑁆𑀜𑀁 ‘‘𑀅𑀢𑁆𑀢𑀸’’𑀢𑀺 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀅𑀯𑀺𑀘𑁆𑀙𑁂𑀤𑀁 𑀧𑀭𑀺𑀓𑀧𑁆𑀧𑁂𑀦𑁆𑀢𑁄 𑀲𑀲𑁆𑀲𑀢𑀁 𑀫𑀜𑁆𑀜𑀢𑀺. 𑀢𑁂𑀦𑀸𑀳 ‘‘𑀅𑀢𑁆𑀢𑀸𑀦𑀁 𑀧𑀦 𑀲𑀲𑁆𑀲𑀢𑀁 𑀫𑀜𑁆𑀜𑀢𑀻’’𑀢𑀺. 𑀢𑀲𑁆𑀫𑀸𑀢𑀺 𑀅𑀧𑀭𑀸𑀧𑀭𑀁 𑀧𑀯𑀢𑁆𑀢𑀲𑀜𑁆𑀜𑀸𑀬 𑀦𑀸𑀫𑀫𑀢𑁆𑀢𑁂𑀦 𑀲𑀲𑁆𑀲𑀢𑀁 𑀫𑀜𑁆𑀜𑀦𑀢𑁄. 𑀲𑀜𑁆𑀜𑀸𑀬 𑀉𑀧𑁆𑀧𑀸𑀤𑀦𑀺𑀭𑁄𑀥𑀫𑀢𑁆𑀢𑁂 𑀅𑀝𑁆𑀞𑀢𑁆𑀯𑀸 𑀢𑀤𑀼𑀢𑁆𑀢𑀭𑀺 𑀲𑀲𑁆𑀲𑀢𑀕𑁆𑀕𑀸𑀳𑀲𑁆𑀲 𑀕𑀳𑀡𑀢𑁄 𑀤𑁄𑀲𑀁 𑀤𑀲𑁆𑀲𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀣𑁂𑀯𑀸𑀢𑀺 𑀬𑀣𑀸 ‘‘𑀭𑀽𑀧𑀻 𑀅𑀢𑁆𑀢𑀸, 𑀫𑀦𑁄𑀫𑀬𑁄 𑀅𑀢𑁆𑀢𑀸’’𑀢𑀺 𑀘 𑀯𑀸𑀤𑀤𑁆𑀯𑀬𑁂 𑀅𑀢𑁆𑀢𑀦𑁄 𑀅𑀲𑀜𑁆𑀜𑀢𑀸, 𑀏𑀯𑀜𑁆𑀘𑀲𑁆𑀲 ‘‘𑀅𑀘𑁂𑀢𑀦𑀢𑀸’’𑀢𑀺𑀆𑀤𑀺𑀤𑁄𑀲𑀧𑁆𑀧𑀲𑀗𑁆𑀕𑁄 𑀤𑀼𑀦𑁆𑀦𑀺𑀯𑀸𑀭𑁄, 𑀢𑀣𑁂𑀯 𑀇𑀫𑀲𑁆𑀫𑀺𑀁 𑀯𑀸𑀤𑁂𑀧𑀻𑀢𑀺 𑀅𑀢𑁆𑀣𑁄. 𑀫𑀺𑀘𑁆𑀙𑀸𑀤𑀲𑁆𑀲𑀦𑁂𑀦𑀸𑀢𑀺 𑀅𑀢𑁆𑀢𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑁂𑀦 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑁂𑀦. 𑀅𑀪𑀺𑀪𑀽𑀢𑀢𑁆𑀢𑀸𑀢𑀺 𑀅𑀦𑀸𑀤𑀺𑀓𑀸𑀮𑀪𑀸𑀯𑀺𑀢𑀪𑀸𑀯𑁂𑀦 𑀅𑀚𑁆𑀛𑁄𑀢𑁆𑀣𑀝𑀢𑁆𑀢𑀸, 𑀦𑀺𑀯𑀸𑀭𑀺𑀢𑀜𑀸𑀡𑀘𑀸𑀭𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑁂𑀦 𑀲𑀦𑁆𑀢𑀢𑀺𑀖𑀦𑁂𑀦, 𑀲𑀫𑀽𑀳𑀖𑀦𑁂𑀦 𑀘 𑀯𑀜𑁆𑀘𑀺𑀢𑁄 𑀩𑀸𑀮𑁄 𑀧𑀩𑀦𑁆𑀥𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀥𑀫𑁆𑀫𑀲𑀫𑀽𑀳𑀁 𑀫𑀺𑀘𑁆𑀙𑀸𑀕𑀸𑀳𑀯𑀲𑁂𑀦 ‘‘𑀅𑀢𑁆𑀢𑀸’’𑀢𑀺 𑀘 ‘‘𑀦𑀺𑀘𑁆𑀘𑁄’’𑀢𑀺 𑀘 𑀅𑀪𑀺𑀦𑀺𑀯𑀺𑀲𑁆𑀲 𑀯𑁄𑀳𑀭𑀢𑀺, 𑀢𑀁 𑀏𑀓𑀢𑁆𑀢𑀲𑀜𑁆𑀜𑀺𑀢𑀁 𑀲𑀦𑁆𑀢𑀢𑀺𑀖𑀦𑀁, 𑀲𑀫𑀽𑀳𑀖𑀦𑀜𑁆𑀘 𑀯𑀺𑀦𑀺𑀪𑀼𑀚𑁆𑀚 𑀬𑀸𑀣𑀸𑀯𑀢𑁄 𑀚𑀸𑀦𑀦𑀁 𑀖𑀦𑀯𑀺𑀦𑀺𑀩𑁆𑀪𑁄𑀕𑁄, 𑀲𑁄 𑀘 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀢𑀺𑀢𑁆𑀣𑀺𑀬𑀸𑀦𑀁 𑀦𑀢𑁆𑀣𑀺. 𑀢𑀲𑁆𑀫𑀸 𑀅𑀬𑀫𑁆𑀧𑀺 𑀧𑀭𑀺𑀩𑁆𑀩𑀸𑀚𑀓𑁄 𑀢𑀸𑀤𑀺𑀲𑀲𑁆𑀲 𑀜𑀸𑀡𑀧𑀭𑀺𑀧𑀸𑀓𑀲𑁆𑀲 𑀅𑀪𑀸𑀯𑀢𑁄 𑀯𑀼𑀘𑁆𑀘𑀫𑀸𑀦𑀫𑁆𑀧𑀺 𑀦𑀸𑀦𑀢𑁆𑀢𑀁 𑀦𑀸𑀜𑁆𑀜𑀸𑀲𑀻𑀢𑀺 𑀆𑀳 ‘‘𑀢𑀁 𑀦𑀸𑀦𑀢𑁆𑀢𑀁 𑀅𑀚𑀸𑀦𑀦𑁆𑀢𑁄’’𑀢𑀺. 𑀲𑀜𑁆𑀜𑀸 𑀦𑀸𑀫𑀸𑀬𑀁 𑀦𑀸𑀦𑀸𑀭𑀫𑁆𑀫𑀡𑀸 𑀦𑀸𑀦𑀸𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀢𑀺, 𑀯𑁂𑀢𑀺 𑀘𑀸𑀢𑀺 𑀯𑁂𑀤𑀺𑀓𑀸𑀦𑀁 𑀫𑀢𑀁. 𑀲𑀜𑁆𑀜𑀸𑀬 𑀉𑀧𑁆𑀧𑀸𑀤𑀦𑀺𑀭𑁄𑀥𑀁 𑀧𑀲𑁆𑀲𑀦𑁆𑀢𑁄𑀧𑀺 𑀲𑀜𑁆𑀜𑀸𑀫𑀬𑀁 𑀲𑀜𑁆𑀜𑀸𑀪𑀽𑀢𑀁 𑀅𑀢𑁆𑀢𑀸𑀦𑀁 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀬𑀣𑀸𑀯𑀼𑀢𑁆𑀢𑀖𑀦𑀯𑀺𑀦𑀺𑀩𑁆𑀪𑁄𑀕𑀸𑀪𑀸𑀯𑀢𑁄 𑀦𑀺𑀘𑁆𑀘𑀫𑁂𑀯 𑀓𑀢𑁆𑀯𑀸 𑀤𑀺𑀝𑁆𑀞𑀺𑀫𑀜𑁆𑀜𑀦𑀸𑀬 𑀫𑀜𑁆𑀜𑀢𑀺. 𑀢𑀣𑀸𑀪𑀽𑀢𑀲𑁆𑀲 𑀘 𑀢𑀲𑁆𑀲 𑀲𑀡𑁆𑀳𑀲𑀼𑀔𑀼𑀫𑀧𑀭𑀫𑀕𑀫𑁆𑀪𑀻𑀭𑀥𑀫𑁆𑀫𑀢𑀸 𑀦 𑀜𑀸𑀬𑀢𑁂𑀯𑀸𑀢𑀺 𑀇𑀤𑀁 𑀓𑀸𑀭𑀡𑀁 𑀧𑀲𑁆𑀲𑀦𑁆𑀢𑁂𑀦 𑀪𑀕𑀯𑀢𑀸 ‘‘𑀤𑀼𑀚𑁆𑀚𑀸𑀦𑀁 𑀔𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀣𑀲𑁆𑀲 𑀪𑀕𑀯𑀸’’𑀢𑀺𑀆𑀤𑀺𑀫𑀸𑀳.

𑀤𑀺𑀝𑁆𑀞𑀺𑀆𑀤𑀻𑀲𑀼 ‘‘𑀏𑀯𑀫𑁂𑀢’’𑀦𑁆𑀢𑀺 𑀤𑀲𑁆𑀲𑀦𑀁 𑀅𑀪𑀺𑀦𑀺𑀯𑀺𑀲𑀦𑀁 𑀤𑀺𑀝𑁆𑀞𑀺. 𑀢𑀲𑁆𑀲𑀸 𑀏𑀯 𑀧𑀼𑀩𑁆𑀩𑀪𑀸𑀕𑀪𑀽𑀢𑀁 ‘‘𑀏𑀯𑀫𑁂𑀢’’𑀦𑁆𑀢𑀺 𑀦𑀺𑀚𑁆𑀛𑀸𑀦𑀯𑀲𑁂𑀦 𑀔𑀫𑀦𑀁 𑀔𑀦𑁆𑀢𑀺. 𑀢𑀣𑀸 𑀭𑁄𑀘𑀦𑀁 𑀭𑀼𑀘𑀺.‘‘𑀅𑀜𑁆𑀜𑀣𑀸𑀬𑁂𑀯𑀸’’𑀢𑀺𑀆𑀤𑀺 𑀢𑁂𑀲𑀁 𑀤𑀺𑀝𑁆𑀞𑀺𑀆𑀤𑀻𑀦𑀁 𑀯𑀺𑀪𑀚𑁆𑀚 𑀤𑀲𑁆𑀲𑀦𑀁. 𑀢𑀢𑁆𑀣 𑀅𑀜𑁆𑀜𑀣𑀸𑀬𑁂𑀯𑀸𑀢𑀺 𑀬𑀣𑀸 𑀅𑀭𑀺𑀬𑀯𑀺𑀦𑀬𑁂 𑀅𑀦𑁆𑀢𑀤𑁆𑀯𑀬𑀁 𑀅𑀦𑀼𑀧𑀕𑀫𑁆𑀫 𑀫𑀚𑁆𑀛𑀺𑀫𑀧𑀝𑀺𑀧𑀤𑀸𑀯𑀲𑁂𑀦 𑀤𑀲𑁆𑀲𑀦𑀁 𑀳𑁄𑀢𑀺, 𑀢𑀢𑁄 𑀅𑀜𑁆𑀜𑀣𑀸𑀬𑁂𑀯. 𑀅𑀜𑁆𑀜𑀤𑁂𑀯𑀸𑀢𑀺 𑀬𑀁 𑀧𑀭𑀫𑀢𑁆𑀣𑀢𑁄 𑀯𑀺𑀚𑁆𑀚𑀢𑀺 𑀔𑀦𑁆𑀥𑀸𑀬𑀢𑀦𑀸𑀤𑀺, 𑀢𑀲𑁆𑀲 𑀘𑀸𑀧𑀺 𑀅𑀦𑀺𑀘𑁆𑀘𑀢𑀸𑀤𑀺, 𑀢𑀢𑁄 𑀅𑀜𑁆𑀜𑀤𑁂𑀯 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑀁 𑀅𑀢𑁆𑀢𑀲𑀲𑁆𑀲𑀢𑀸𑀤𑀺𑀓𑀁 𑀢𑀬𑀸 𑀔𑀫𑀢𑁂 𑀘𑁂𑀯 𑀭𑀼𑀘𑁆𑀘𑀢𑁂 𑀘𑀸𑀢𑀺 𑀅𑀢𑁆𑀣𑁄. 𑀆𑀪𑀼𑀲𑁄 𑀬𑀼𑀜𑁆𑀚𑀦𑀁 𑀆𑀬𑁄𑀕𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀼𑀢𑁆𑀢𑀧𑀬𑀼𑀢𑁆𑀢𑀢𑀸’’𑀢𑀺. 𑀧𑀝𑀺𑀧𑀢𑁆𑀢𑀺𑀬𑀸𑀢𑀺 𑀧𑀭𑀫𑀢𑁆𑀢𑀘𑀺𑀦𑁆𑀢𑀦𑀸𑀤𑀺𑀧𑀭𑀺𑀩𑁆𑀩𑀸𑀚𑀓𑀧𑀝𑀺𑀧𑀢𑁆𑀢𑀺𑀬𑀸. 𑀆𑀘𑀭𑀺𑀬𑀲𑁆𑀲 𑀪𑀸𑀯𑁄 𑀆𑀘𑀭𑀺𑀬𑀓𑀁, 𑀬𑀣𑀸 𑀢𑀣𑀸 𑀑𑀯𑀸𑀤𑀸𑀦𑀼𑀲𑀸𑀲𑀦𑀁, 𑀢𑀤𑀲𑁆𑀲𑀢𑁆𑀣𑀻𑀢𑀺 𑀆𑀘𑀭𑀺𑀬𑀓𑁄 𑀬𑀣𑀸 ‘‘𑀲𑀤𑁆𑀥𑁄’’𑀢𑀺 𑀆𑀳 ‘‘𑀅𑀜𑁆𑀜𑀢𑁆𑀣𑀸’’𑀢𑀺𑀆𑀤𑀺. 𑀅𑀜𑁆𑀜𑀲𑁆𑀫𑀺𑀁 𑀢𑀺𑀢𑁆𑀣𑀸𑀬𑀢𑀦𑁂 𑀢𑀯 𑀆𑀘𑀭𑀺𑀬𑀪𑀸𑀯𑁄 𑀅𑀢𑁆𑀣𑀻𑀢𑀺 𑀬𑁄𑀚𑀦𑀸. ‘‘𑀢𑁂𑀦𑀸’’𑀢𑀺𑀆𑀤𑀺 𑀲𑀳 𑀬𑁄𑀚𑀦𑀸𑀬 𑀬𑀣𑀸𑀯𑀸𑀓𑁆𑀬𑀁 𑀤𑀲𑁆𑀲𑀦𑀁. ‘‘𑀅𑀬𑀁 𑀧𑀭𑀫𑀢𑁆𑀣𑁄, 𑀅𑀬𑀁 𑀲𑀫𑁆𑀫𑀼𑀢𑀻’’𑀢𑀺 𑀇𑀫𑀲𑁆𑀲 𑀯𑀺𑀪𑀸𑀕𑀲𑁆𑀲 𑀤𑀼𑀩𑁆𑀩𑀺𑀪𑀸𑀕𑀢𑁆𑀢𑀸 𑀤𑀼𑀚𑁆𑀚𑀸𑀦𑀁 𑀏𑀢𑀁 𑀦𑀸𑀦𑀢𑁆𑀢𑀁. ‘‘𑀬𑀚𑁆𑀚𑁂𑀢𑀁 𑀤𑀼𑀚𑁆𑀚𑀸𑀦𑀁 𑀢𑀸𑀯 𑀢𑀺𑀝𑁆𑀞𑀢𑀼, 𑀅𑀜𑁆𑀜𑀁 𑀧𑀦𑀢𑁆𑀣𑀁 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀣𑀸 𑀧𑀝𑀺𑀧𑀦𑁆𑀦𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀧𑀭𑀺𑀩𑁆𑀩𑀸𑀚𑀓𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀜𑁆𑀜𑁄 𑀯𑀸 𑀲𑀜𑁆𑀜𑀸𑀢𑁄𑀢𑀺 𑀲𑀜𑁆𑀜𑀸𑀲𑀪𑀸𑀯𑀢𑁄 𑀅𑀜𑁆𑀜𑀲𑀪𑀸𑀯𑁄 𑀯𑀸 𑀅𑀢𑁆𑀢𑀸 𑀳𑁄𑀢𑀽𑀢𑀺 𑀅𑀢𑁆𑀣𑁄. 𑀅𑀥𑀼𑀦𑀸 𑀧𑀦 ‘‘𑀅𑀜𑁆𑀜𑀸 𑀯𑀸 𑀲𑀜𑁆𑀜𑀸’’𑀢𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺. 𑀅𑀲𑁆𑀲𑀸𑀢𑀺 𑀅𑀢𑁆𑀢𑀦𑁄.

𑀮𑁄𑀓𑀻𑀬𑀢𑀺 𑀤𑀺𑀲𑁆𑀲𑀢𑀺, 𑀧𑀢𑀺𑀝𑁆𑀞𑀳𑀢𑀺 𑀯𑀸 𑀏𑀢𑁆𑀣 𑀧𑀼𑀜𑁆𑀜𑀧𑀸𑀧𑀁, 𑀢𑀩𑁆𑀩𑀺𑀧𑀸𑀓𑁄 𑀘𑀸𑀢𑀺 𑀮𑁄𑀓𑁄, 𑀅𑀢𑁆𑀢𑀸. 𑀲𑁄 𑀳𑀺𑀲𑁆𑀲 𑀓𑀸𑀭𑀓𑁄, 𑀯𑁂𑀤𑀓𑁄 𑀘𑀸𑀢𑀺 𑀇𑀘𑁆𑀙𑀺𑀢𑁄. 𑀤𑀺𑀝𑁆𑀞𑀺𑀕𑀢𑀦𑁆𑀢𑀺 ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺𑀆𑀤𑀺 (𑀤𑀻. 𑀦𑀺. 𑁧.𑁩𑁧; 𑀉𑀤𑀸. 𑁫𑁫) 𑀦𑀬𑀧𑀯𑀢𑁆𑀢𑀁 𑀤𑀺𑀝𑁆𑀞𑀺𑀕𑀢𑀁. 𑀦 𑀳𑁂𑀲 𑀤𑀺𑀝𑁆𑀞𑀸𑀪𑀺𑀦𑀺𑀯𑁂𑀲𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀅𑀢𑁆𑀣𑀦𑀺𑀲𑁆𑀲𑀺𑀢𑁄 𑀢𑀤𑀲𑀁𑀯𑀢𑁆𑀢𑀦𑀢𑁄. 𑀬𑁄 𑀳𑀺 𑀢𑀁 𑀲𑀁𑀯𑀢𑁆𑀢𑀦𑀓𑁄, 𑀲𑁄 ‘‘𑀢𑀁 𑀦𑀺𑀲𑁆𑀲𑀺𑀢𑁄’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑁂𑀬𑁆𑀬 𑀬𑀣𑀸 𑀢𑀁 𑀧𑀼𑀜𑁆𑀜𑀜𑀸𑀡𑀲𑀫𑁆𑀪𑀸𑀭𑁄. 𑀏𑀢𑁂𑀦𑁂𑀯 𑀦𑀬𑁂𑀦 𑀦 𑀥𑀫𑁆𑀫𑀦𑀺𑀲𑁆𑀲𑀺𑀢𑀢𑀸𑀧𑀺 𑀲𑀁𑀯𑀡𑁆𑀡𑁂𑀢𑀩𑁆𑀩𑀸. 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀆𑀤𑀺 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀁, 𑀢𑀤𑁂𑀯 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀁 𑀬𑀣𑀸 ‘‘𑀯𑀺𑀦𑀬𑁄 𑀏𑀯 𑀯𑁂𑀦𑀬𑀺𑀓𑁄’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁮). 𑀢𑁂𑀦𑀸𑀳 ‘‘𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀔𑀸𑀢𑀲𑁆𑀲𑀸’’𑀢𑀺𑀆𑀤𑀺. 𑀲𑀩𑁆𑀩𑀫𑁆𑀧𑀺 𑀯𑀸𑀓𑁆𑀬𑀁 𑀅𑀦𑁆𑀢𑁄𑀕𑀥𑀸𑀯𑀥𑀸𑀭𑀡𑀁 𑀢𑀲𑁆𑀲 𑀅𑀯𑀥𑀸𑀭𑀡𑀨𑀮𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀆𑀤𑀺𑀫𑀢𑁆𑀢’’𑀦𑁆𑀢𑀺. 𑀢𑀤𑀺𑀥 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀯. 𑀲𑀸 𑀳𑀺 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀺𑀢𑁂 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑁂 𑀆𑀤𑀺𑀪𑀽𑀢𑀸, 𑀦 𑀅𑀜𑁆𑀜𑀢𑁆𑀣 𑀯𑀺𑀬 𑀆𑀚𑀻𑀯𑀝𑁆𑀞𑀫𑀓𑀸𑀤𑀺 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀫𑀢𑁆𑀢’’𑀦𑁆𑀢𑀺 𑀇𑀫𑀺𑀦𑀸. 𑀦𑀺𑀩𑁆𑀩𑀺𑀦𑁆𑀤𑀦𑀢𑁆𑀣𑀸𑀬𑀸𑀢𑀺 𑀉𑀓𑁆𑀓𑀡𑁆𑀞𑀺𑀢𑀪𑀸𑀯𑀸𑀬. ‘‘𑀅𑀪𑀺𑀚𑀸𑀦𑀦𑀸𑀬𑀸𑀢𑀺 𑀜𑀸𑀢𑀧𑀭𑀺𑀜𑁆𑀜𑀸𑀯𑀲𑁂𑀦 𑀅𑀪𑀺𑀚𑀸𑀦𑀦𑀢𑁆𑀣𑀸𑀬. 𑀲𑀫𑁆𑀩𑀼𑀚𑁆𑀛𑀦𑀢𑁆𑀣𑀸𑀬𑀸𑀢𑀺 𑀢𑀻𑀭𑀡𑀧𑀳𑀸𑀦𑀧𑀭𑀺𑀜𑁆𑀜𑀸𑀯𑀲𑁂𑀦 𑀲𑀫𑁆𑀩𑁄𑀥𑀦𑀢𑁆𑀣𑀸𑀬𑀸’’𑀢𑀺 𑀯𑀤𑀦𑁆𑀢𑀺. 𑀅𑀧𑀺𑀘 𑀅𑀪𑀺𑀚𑀸𑀦𑀦𑀸𑀬𑀸𑀢𑀺 𑀅𑀪𑀺𑀜𑁆𑀜𑀸𑀧𑀜𑁆𑀜𑀸𑀯𑀲𑁂𑀦 𑀚𑀸𑀦𑀦𑀸𑀬. 𑀢𑀁 𑀧𑀦 𑀯𑀝𑁆𑀝𑀲𑁆𑀲 𑀧𑀘𑁆𑀘𑀓𑁆𑀔𑀓𑀭𑀡𑀫𑁂𑀯 𑀳𑁄𑀢𑀻𑀢𑀺 𑀆𑀳 ‘‘𑀧𑀘𑁆𑀘𑀓𑁆𑀔𑀓𑀺𑀭𑀺𑀬𑀸𑀬𑀸’’𑀢𑀺. 𑀲𑀫𑁆𑀩𑀼𑀚𑁆𑀛𑀦𑀢𑁆𑀣𑀸𑀬𑀸𑀢𑀺 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀯𑀲𑁂𑀦 𑀧𑀝𑀺𑀯𑁂𑀥𑀢𑁆𑀣𑀸𑀬. 𑀤𑀺𑀝𑁆𑀞𑀸𑀪𑀺𑀦𑀺𑀯𑁂𑀲𑀲𑁆𑀲 𑀲𑀁𑀲𑀸𑀭𑀯𑀝𑁆𑀝𑁂 𑀦𑀺𑀩𑁆𑀩𑀺𑀤𑀸𑀯𑀺𑀭𑀸𑀕𑀦𑀺𑀭𑁄𑀥𑀼𑀧𑀲𑀫𑀸𑀲𑀁𑀯𑀢𑁆𑀢𑀦𑀁 𑀯𑀝𑁆𑀝𑀦𑁆𑀢𑁄𑀕𑀥𑀢𑁆𑀢𑀸, 𑀢𑀲𑁆𑀲 𑀯𑀝𑁆𑀝𑀲𑀫𑁆𑀩𑀦𑁆𑀥𑀦𑀢𑁄 𑀘. 𑀢𑀣𑀸 𑀅𑀪𑀺𑀜𑁆𑀜𑀸𑀲𑀫𑁆𑀩𑁄𑀥𑀦𑀺𑀩𑁆𑀩𑀸𑀦𑀸𑀲𑀁𑀯𑀢𑁆𑀢𑀦𑀜𑁆𑀘 𑀤𑀝𑁆𑀞𑀩𑁆𑀩𑀁.

𑀓𑀸𑀫𑀁 𑀢𑀡𑁆𑀳𑀸𑀧𑀺 𑀤𑀼𑀓𑁆𑀔𑀲𑀪𑀸𑀯𑀸 𑀏𑀯, 𑀢𑀲𑁆𑀲𑀸 𑀧𑀦 𑀲𑀫𑀼𑀤𑀬𑀪𑀸𑀯𑁂𑀦 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸 ‘‘𑀢𑀡𑁆𑀳𑀁 𑀞𑀧𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀧𑀪𑀸𑀯𑀦𑀢𑁄𑀢𑀺 𑀉𑀧𑁆𑀧𑀸𑀤𑀦𑀢𑁄. 𑀤𑀼𑀓𑁆𑀔𑀁 𑀧𑀪𑀸𑀯𑁂𑀦𑁆𑀢𑀻𑀧𑀺 𑀢𑀡𑁆𑀳𑀸 𑀅𑀯𑀺𑀚𑁆𑀚𑀸𑀤𑀺𑀧𑀘𑁆𑀘𑀬𑀦𑁆𑀢𑀭𑀲𑀳𑀺𑀢𑀸 𑀏𑀯 𑀧𑀪𑀸𑀯𑁂𑀢𑀺, 𑀦 𑀓𑁂𑀯𑀮𑀸𑀢𑀺 𑀆𑀳 ‘‘𑀲𑀧𑁆𑀧𑀘𑁆𑀘𑀬𑀸’’𑀢𑀺. 𑀅𑀧𑁆𑀧𑀯𑀢𑁆𑀢𑀻𑀢𑀺 𑀅𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁. 𑀦 𑀧𑀯𑀢𑁆𑀢𑀦𑁆𑀢𑀺 𑀏𑀢𑁆𑀣 𑀤𑀼𑀓𑁆𑀔𑀲𑀫𑀼𑀤𑀬𑀸, 𑀏𑀢𑀲𑁆𑀫𑀺𑀁 𑀯𑀸 𑀅𑀥𑀺𑀕𑀢𑁂𑀢𑀺 𑀳𑀺 𑀅𑀧𑁆𑀧𑀯𑀢𑁆𑀢𑀺. 𑀤𑀼𑀓𑁆𑀔𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀕𑀘𑁆𑀙𑀢𑀺, 𑀢𑀤𑀢𑁆𑀣𑀜𑁆𑀘 𑀲𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀸𑀢𑀺 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑀝𑀺𑀧𑀤𑀸. 𑀫𑀕𑁆𑀕𑀧𑀸𑀢𑀼𑀪𑀸𑀯𑁄𑀢𑀺 𑀫𑀕𑁆𑀕𑀲𑀫𑀼𑀧𑁆𑀧𑀸𑀤𑁄. 𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀢𑀺 𑀨𑀮𑀲𑁆𑀲𑀸𑀥𑀺𑀕𑀫𑀯𑀲𑁂𑀦 𑀧𑀘𑁆𑀘𑀓𑁆𑀔𑀓𑀭𑀡𑀁. 𑀢𑀁 𑀆𑀓𑀸𑀭𑀦𑁆𑀢𑀺 𑀢𑀁 𑀢𑀼𑀡𑁆𑀳𑀻𑀪𑀸𑀯𑀲𑀗𑁆𑀔𑀸𑀢𑀁 𑀕𑀫𑀦𑀮𑀺𑀗𑁆𑀕 𑀆𑀭𑁄𑀘𑁂𑀦𑁆𑀢𑁄 𑀯𑀺𑀬, 𑀦 𑀧𑀦 𑀅𑀪𑀺𑀫𑀼𑀔𑀁 𑀆𑀭𑁄𑀘𑁂𑀢𑀺.

𑁪𑁨𑁧. 𑀲𑀫𑀦𑁆𑀢𑀢𑁄 𑀦𑀺𑀕𑁆𑀕𑀡𑁆𑀳𑀦𑀯𑀲𑁂𑀦 𑀢𑁄𑀤𑀦𑀁 𑀯𑀺𑀚𑁆𑀛𑀦𑀁 𑀲𑀦𑁆𑀦𑀺𑀢𑁄𑀤𑀓𑀁. 𑀫𑀦𑁄𑀕𑀡𑀸𑀤𑀻𑀦𑀁 𑀯𑀺𑀲𑁂𑀲𑀦𑀲𑁆𑀲 𑀦𑀧𑀼𑀁𑀲𑀓𑀮𑀺𑀗𑁆𑀕𑁂𑀦 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 ‘‘𑀯𑀸𑀘𑀸𑀬 𑀲𑀦𑁆𑀦𑀺𑀢𑁄𑀤𑀓𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀯𑀘𑀦𑀧𑀢𑁄𑀤𑀓𑁂𑀦𑀸’’𑀢𑀺. 𑀅𑀣 𑀯𑀸 ‘‘𑀯𑀸𑀘𑀸𑀬𑀸’’𑀢𑀺 𑀇𑀤𑀁 ‘‘𑀲𑀦𑁆𑀦𑀺𑀢𑁄𑀤𑀓𑁂𑀦𑀸’’𑀢𑀺 𑀏𑀢𑁆𑀣 𑀓𑀭𑀡𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. ‘‘𑀯𑀘𑀦𑀧𑀢𑁄𑀤𑀓𑁂𑀦𑀸’’𑀢𑀺 𑀳𑀺 𑀯𑀘𑀦𑁂𑀦 𑀧𑀢𑁄𑀤𑀓𑁂𑀦𑀸𑀢𑀺 𑀅𑀢𑁆𑀣𑁄, ‘‘𑀯𑀸𑀘𑀸𑀬𑀸’’𑀢𑀺 𑀯𑀸 𑀲𑀫𑁆𑀩𑀦𑁆𑀥𑁂 𑀲𑀸𑀫𑀺𑀯𑀘𑀦𑀁. 𑀯𑀸𑀘𑀸𑀬 𑀲𑀦𑁆𑀦𑀺𑀢𑁄𑀤𑀦𑀓𑀺𑀭𑀺𑀬𑀸𑀬 𑀲𑀚𑁆𑀛𑀩𑁆𑀪𑀭𑀺𑀢𑀫𑀓𑀁𑀲𑀽𑀢𑀺 𑀬𑁄𑀚𑁂𑀢𑀩𑁆𑀩𑀁. ‘‘𑀲𑀚𑁆𑀛𑀩𑁆𑀪𑀭𑀺𑀢’’𑀦𑁆𑀢𑀺 𑀏𑀢𑀲𑁆𑀲 ‘‘𑀲𑀁 𑀅𑀥𑀺 𑀅𑀪𑀺 𑀅𑀭𑀺𑀪’’𑀦𑁆𑀢𑀺 𑀧𑀤𑀘𑁆𑀙𑁂𑀤𑁄, 𑀲𑀫𑀦𑁆𑀢𑀢𑁄 𑀪𑀼𑀲𑀁 𑀅𑀭𑀺𑀢𑀦𑁆𑀢𑀺 𑀅𑀢𑁆𑀣𑁄, 𑀲𑀢𑀫𑀢𑁆𑀢𑁂𑀳𑀺 𑀢𑀼𑀢𑁆𑀢𑀓𑁂𑀳𑀺 𑀯𑀺𑀬 𑀯𑀺𑀯𑀺𑀥𑁂𑀳𑀺 𑀧𑀭𑀺𑀩𑁆𑀩𑀸𑀚𑀓𑀯𑀸𑀘𑀸𑀢𑁄𑀤𑀦𑁂𑀳𑀺 𑀢𑀼𑀤𑀺𑀁 𑀲𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀉𑀧𑀭𑀺 𑀯𑀺𑀚𑁆𑀛𑀺𑀁𑀲𑀽’’𑀢𑀺. 𑀲𑀪𑀸𑀯𑀢𑁄 𑀯𑀺𑀚𑁆𑀚𑀫𑀸𑀦𑀦𑁆𑀢𑀺 𑀧𑀭𑀫𑀢𑁆𑀣𑀲𑀪𑀸𑀯𑀢𑁄 𑀉𑀧𑀮𑀩𑁆𑀪𑀫𑀸𑀦𑀁, 𑀦 𑀧𑀓𑀢𑀺𑀆𑀤𑀺 𑀯𑀺𑀬 𑀅𑀦𑀼𑀧𑀮𑀩𑁆𑀪𑀫𑀸𑀦𑀁. 𑀢𑀘𑁆𑀙𑀦𑁆𑀢𑀺 𑀲𑀘𑁆𑀘𑀁. 𑀢𑀣𑀦𑁆𑀢𑀺 𑀅𑀯𑀺𑀧𑀭𑀻𑀢𑀁. 𑀅𑀢𑁆𑀣𑀢𑁄 𑀯𑁂𑀯𑀘𑀦𑀫𑁂𑀯 𑀢𑀁 𑀧𑀤𑀢𑁆𑀢𑀬𑀁. 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂𑀲𑀽𑀢𑀺 𑀯𑀺𑀲𑀬𑁂 𑀪𑀼𑀫𑁆𑀫𑀁, 𑀢𑁂 𑀥𑀫𑁆𑀫𑁂 𑀯𑀺𑀲𑀬𑀁 𑀓𑀢𑁆𑀯𑀸. 𑀞𑀺𑀢𑀲𑀪𑀸𑀯𑀦𑁆𑀢𑀺 𑀅𑀯𑀝𑁆𑀞𑀺𑀢𑀲𑀪𑀸𑀯𑀁, 𑀢𑀤𑀼𑀧𑁆𑀧𑀸𑀤𑀓𑀦𑁆𑀢𑀺 𑀅𑀢𑁆𑀣𑁄. 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀦𑀺𑀬𑀸𑀫𑀦𑀺𑀬𑀢𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑀫𑁆𑀧𑀸𑀧𑀦𑀦𑀺𑀬𑀸𑀫𑁂𑀦 𑀦𑀺𑀬𑀢𑀁. 𑀇𑀤𑀸𑀦𑀺 𑀧𑀦 ‘‘𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀦𑀺𑀬𑀸𑀫𑀢’’𑀦𑁆𑀢𑀺 𑀧𑀸𑀞𑁄, 𑀲𑁄 𑀦 𑀧𑁄𑀭𑀸𑀡𑁄 𑀆𑀘𑀭𑀺𑀬𑁂𑀦 𑀅𑀦𑀼𑀤𑁆𑀥𑀝𑀢𑁆𑀢𑀸. 𑀓𑀲𑁆𑀫𑀸 𑀧𑀦𑁂𑀲𑀸 𑀧𑀝𑀺𑀧𑀤𑀸 𑀥𑀫𑁆𑀫𑀝𑁆𑀞𑀺𑀢𑀢𑀸 𑀥𑀫𑁆𑀫𑀦𑀺𑀬𑀸𑀫𑀢𑀸𑀢𑀺 𑀆𑀳 ‘‘𑀩𑀼𑀤𑁆𑀥𑀸𑀦𑀜𑁆𑀳𑀻’’𑀢𑀺𑀆𑀤𑀺. 𑀲𑀸𑀢𑀺 𑀧𑀝𑀺𑀧𑀤𑀸. 𑀏𑀤𑀺𑀲𑀸𑀢𑀺 ‘‘𑀥𑀫𑁆𑀫𑀝𑁆𑀞𑀺𑀢𑀢’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀸.

𑀘𑀺𑀢𑁆𑀢𑀳𑀢𑁆𑀣𑀺𑀲𑀸𑀭𑀺𑀧𑀼𑀢𑁆𑀢𑀧𑁄𑀝𑁆𑀞𑀧𑀸𑀤𑀯𑀢𑁆𑀣𑀼𑀯𑀡𑁆𑀡𑀦𑀸

𑁪𑁨𑁨. 𑀳𑀢𑁆𑀣𑀺𑀁 𑀲𑀸𑀭𑁂𑀢𑀺 𑀤𑀫𑁂𑀢𑀻𑀢𑀺 𑀳𑀢𑁆𑀣𑀺𑀲𑀸𑀭𑀻, 𑀳𑀢𑁆𑀣𑀸𑀘𑀭𑀺𑀬𑁄. 𑀲𑀼𑀔𑀼𑀫𑁂𑀲𑀼 𑀅𑀢𑁆𑀣𑀦𑁆𑀢𑀭𑁂𑀲𑀽𑀢𑀺 𑀔𑀦𑁆𑀥𑀸𑀬𑀢𑀦𑀸𑀤𑀻𑀲𑀼 𑀲𑀼𑀔𑀼𑀫𑀜𑀸𑀡𑀕𑁄𑀘𑀭𑁂𑀲𑀼 𑀥𑀫𑁆𑀫𑁂𑀲𑀼. 𑀅𑀪𑀺𑀥𑀫𑁆𑀫𑀺𑀓𑁄 𑀓𑀺𑀭𑁂𑀲. 𑀓𑀼𑀲𑀮𑁄𑀢𑀺 𑀧𑀼𑀩𑁆𑀩𑁂𑀧𑀺 𑀩𑀼𑀤𑁆𑀥𑀲𑀸𑀲𑀦𑁂 𑀓𑀢𑀧𑀭𑀺𑀘𑀬𑀢𑀸𑀬 𑀙𑁂𑀓𑁄. 𑀢𑀸𑀤𑀺𑀲𑁂 𑀘𑀺𑀢𑁆𑀢𑁂𑀢𑀺 𑀕𑀺𑀳𑀺𑀪𑀸𑀯𑀘𑀺𑀢𑁆𑀢𑁂. 𑀇𑀢𑀭𑁄 𑀧𑀦 𑀢𑀁 𑀲𑀼𑀢𑁆𑀯𑀸𑀯 𑀦 𑀯𑀺𑀩𑁆𑀪𑀫𑀺, 𑀧𑀩𑁆𑀩𑀚𑁆𑀚𑀸𑀬𑀫𑁂𑀯 𑀅𑀪𑀺𑀭𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀕𑀺𑀳𑀺𑀪𑀸𑀯𑁂 𑀆𑀦𑀺𑀲𑀁𑀲𑀓𑀣𑀸𑀬 𑀓𑀣𑀺𑀢𑀢𑁆𑀢𑀸𑀢𑀺 𑀏𑀢𑁆𑀣 𑀲𑀻𑀮𑀯𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀣𑀸 𑀓𑀣𑀦𑁂𑀦 𑀯𑀺𑀩𑁆𑀪𑀫𑀦𑁂 𑀦𑀺𑀬𑁄𑀚𑀺𑀢𑀢𑁆𑀢𑀸 𑀇𑀤𑀸𑀦𑀺 𑀲𑀬𑀫𑁆𑀧𑀺 𑀲𑀻𑀮𑀯𑀸 𑀏𑀯 𑀳𑀼𑀢𑁆𑀯𑀸 𑀙 𑀯𑀸𑀭𑁂 𑀯𑀺𑀩𑁆𑀪𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁄 𑀕𑀳𑁂𑀢𑀩𑁆𑀩𑁄. 𑀓𑀫𑁆𑀫𑀲𑀭𑀺𑀓𑁆𑀔𑀓𑁂𑀦 𑀳𑀺 𑀓𑀫𑁆𑀫𑀨𑀮𑁂𑀦 𑀪𑀯𑀺𑀢𑀩𑁆𑀩𑀁. 𑀓𑀣𑁂𑀦𑁆𑀢𑀸𑀦𑀦𑁆𑀢𑀺 𑀅𑀦𑀸𑀤𑀭𑁂 𑀲𑀸𑀫𑀺𑀯𑀘𑀦𑀁. 𑀫𑀳𑀸𑀲𑀸𑀯𑀓𑀲𑁆𑀲 𑀓𑀣𑀺𑀢𑁂𑀢𑀺 𑀫𑀳𑀸𑀲𑀸𑀯𑀓𑀪𑀽𑀢𑁂𑀦 𑀫𑀳𑀸𑀓𑁄𑀝𑁆𑀞𑀺𑀓𑀢𑁆𑀣𑁂𑀭𑁂𑀦 𑀅𑀧𑀲𑀸𑀤𑀦𑀯𑀲𑁂𑀦 𑀓𑀣𑀺𑀢𑁂, 𑀓𑀣𑀦𑀦𑀺𑀫𑀺𑀢𑁆𑀢𑀁 𑀧𑀢𑀺𑀝𑁆𑀞𑀁 𑀮𑀤𑁆𑀥𑀼𑀁 𑀅𑀲𑀓𑁆𑀓𑁄𑀦𑁆𑀢𑁄𑀢𑀺 𑀅𑀢𑁆𑀣𑁄. ‘‘𑀯𑀺𑀩𑁆𑀪𑀫𑀺𑀢𑁆𑀯𑀸 𑀕𑀺𑀳𑀻 𑀚𑀸𑀢𑁄’’𑀢𑀺 𑀇𑀤𑀁 𑀲𑀢𑁆𑀢𑀫𑀯𑀸𑀭𑀫𑀺𑀯 𑀯𑀼𑀢𑁆𑀢𑀁. 𑀥𑀫𑁆𑀫𑀧𑀤𑀝𑁆𑀞𑀓𑀣𑀸𑀬𑀁 (𑀥. 𑀧. 𑀅𑀝𑁆𑀞. 𑁧.𑁩 𑀘𑀺𑀢𑁆𑀢𑀳𑀢𑁆𑀣𑀢𑁆𑀣𑁂𑀭𑀯𑀢𑁆𑀣𑀼) 𑀧𑀦 𑀓𑀼𑀤𑀸𑀮𑀧𑀡𑁆𑀟𑀺𑀢𑀚𑀸𑀢𑀓𑁂 (𑀚𑀸. 𑀅𑀝𑁆𑀞. 𑁧.𑁧.𑁭 𑀓𑀼𑀤𑁆𑀤𑀸𑀮𑀚𑀸𑀢𑀓𑀯𑀡𑁆𑀡𑀦𑀸) 𑀘 𑀙𑀓𑁆𑀔𑀢𑁆𑀢𑀼𑀫𑁂𑀯 𑀯𑀺𑀩𑁆𑀪𑀫𑀦𑀯𑀸𑀭𑁄 𑀯𑀼𑀢𑁆𑀢𑁄. 𑀕𑀺𑀳𑀺𑀲𑀳𑀸𑀬𑀓𑁄𑀢𑀺 𑀕𑀺𑀳𑀺𑀓𑀸𑀮𑁂 𑀲𑀳𑀸𑀬𑀓𑁄. 𑀅𑀧𑀲𑀓𑁆𑀓𑀦𑁆𑀢𑁄𑀧𑀺 𑀦𑀸𑀫𑀸𑀢𑀺 𑀅𑀧𑀺 𑀦𑀸𑀫 𑀅𑀧𑀲𑀓𑁆𑀓𑀦𑁆𑀢𑁄, 𑀕𑀸𑀭𑀬𑁆𑀳𑀯𑀘𑀦𑀫𑁂𑀢𑀁. 𑀧𑀩𑁆𑀩𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀧𑀩𑁆𑀩𑀚𑁆𑀚𑀸 𑀯𑀝𑁆𑀝𑀢𑀺.

𑁪𑁨𑁩. 𑀧𑀜𑁆𑀜𑀸𑀘𑀓𑁆𑀔𑀼𑀦𑁄 𑀦𑀢𑁆𑀣𑀺𑀢𑀸𑀬𑀸𑀢𑀺 𑀲𑀼𑀯𑀼𑀢𑁆𑀢𑀤𑀼𑀭𑀼𑀢𑁆𑀢𑀲𑀫𑀯𑀺𑀲𑀫𑀤𑀲𑁆𑀲𑀦𑀲𑀫𑀢𑁆𑀣𑀲𑁆𑀲 𑀧𑀜𑁆𑀜𑀸𑀘𑀓𑁆𑀔𑀼𑀦𑁄 𑀅𑀪𑀸𑀯𑁂𑀦. 𑀬𑀸𑀤𑀺𑀲𑁂𑀦 𑀘𑀓𑁆𑀔𑀼𑀦𑀸 𑀲𑁄 ‘‘𑀘𑀓𑁆𑀔𑀼𑀫𑀸’’𑀢𑀺 𑀯𑀼𑀢𑁆𑀢𑁄, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀼𑀪𑀸𑀲𑀺𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀬𑀁 𑀅𑀝𑁆𑀞𑀓𑀣𑀸𑀢𑁄 𑀅𑀧𑀭𑁄 𑀦𑀬𑁄 𑁋 𑀏𑀓𑀁𑀲𑀺𑀓𑀸𑀢𑀺 𑀏𑀓𑀦𑁆𑀢𑀺𑀓𑀸, 𑀦𑀺𑀩𑁆𑀩𑀸𑀦𑀯𑀳𑀪𑀸𑀯𑁂𑀦 𑀦𑀺𑀘𑁆𑀙𑀺𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀜𑁆𑀜𑀢𑁆𑀢𑀸𑀢𑀺 𑀯𑀯𑀢𑁆𑀣𑀧𑀺𑀢𑀸. 𑀦 𑀏𑀓𑀁𑀲𑀺𑀓𑀸𑀢𑀺 𑀦 𑀏𑀓𑀦𑁆𑀢𑀺𑀓𑀸 𑀦𑀺𑀩𑁆𑀩𑀸𑀦𑀸𑀯𑀳𑀪𑀸𑀯𑁂𑀦 𑀦𑀺𑀘𑁆𑀙𑀺𑀢𑀸 𑀯𑀝𑁆𑀝𑀦𑁆𑀢𑁄𑀕𑀥𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀬𑀫𑀢𑁆𑀣𑁄 𑀳𑀺 ‘‘𑀓𑀲𑁆𑀫𑀸 𑀘𑁂𑀢𑁂 𑀧𑁄𑀝𑁆𑀞𑀧𑀸𑀤 𑀫𑀬𑀸 𑀏𑀓𑀁𑀲𑀺𑀓𑀸 𑀥𑀫𑁆𑀫𑀸 𑀤𑁂𑀲𑀺𑀢𑀸 𑀧𑀜𑁆𑀜𑀢𑁆𑀢𑀸, 𑀏𑀢𑁂 𑀧𑁄𑀝𑁆𑀞𑀧𑀸𑀤 𑀅𑀢𑁆𑀣𑀲𑀁𑀳𑀺𑀢𑀸…𑀧𑁂… 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺𑀆𑀤𑀺𑀲𑀼𑀢𑁆𑀢𑀧𑀤𑁂𑀳𑀺 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀻𑀢𑀺.

𑀏𑀓𑀁𑀲𑀺𑀓𑀥𑀫𑁆𑀫𑀯𑀡𑁆𑀡𑀦𑀸

𑁪𑁨𑁫. ‘‘𑀓𑀲𑁆𑀫𑀸 𑀆𑀭𑀪𑀻’’𑀢𑀺 𑀓𑀸𑀭𑀡𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀤𑀲𑁆𑀲𑀦𑀢𑁆𑀣’’𑀦𑁆𑀢𑀺 𑀧𑀬𑁄𑀚𑀦𑀁 𑀯𑀺𑀲𑁆𑀲𑀚𑁆𑀚𑀺𑀢𑀁. 𑀨𑀮𑁂 𑀳𑀺 𑀲𑀺𑀤𑁆𑀥𑁂 𑀳𑁂𑀢𑀼𑀧𑀺 𑀲𑀺𑀤𑁆𑀥𑁄 𑀳𑁄𑀢𑀻𑀢𑀺, 𑀅𑀬𑀁 𑀆𑀘𑀭𑀺𑀬𑀫𑀢𑀺 (𑀤𑀻. 𑀦𑀺. 𑀝𑀻. 𑁧.𑁪𑁨𑁫) 𑀅𑀧𑀭𑁂 𑀧𑀦 ‘‘𑀏𑀤𑀺𑀲𑁂𑀲𑀼 𑀅𑀢𑁆𑀣𑀲𑀤𑁆𑀤𑁄 𑀓𑀸𑀭𑀡𑁂 𑀯𑀢𑁆𑀢𑀢𑀺, 𑀳𑁂𑀢𑁆𑀯𑀢𑁆𑀣𑁂 𑀘 𑀧𑀘𑁆𑀘𑀢𑁆𑀢𑀯𑀘𑀦𑀁, 𑀢𑀲𑁆𑀫𑀸 𑀅𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀤𑀲𑁆𑀲𑀦𑀦𑁆𑀢𑀺 𑀏𑀢𑁆𑀣 𑀅𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀤𑀲𑁆𑀲𑀦𑀓𑀸𑀭𑀡𑀸’’𑀢𑀺 𑀅𑀢𑁆𑀣𑀫𑀺𑀘𑁆𑀙𑀦𑁆𑀢𑀺. 𑀧𑀜𑁆𑀜𑀸𑀧𑀺𑀢𑀦𑀺𑀝𑁆𑀞𑀸𑀬𑀸𑀢𑀺 𑀧𑀯𑁂𑀤𑀺𑀢𑀯𑀺𑀫𑀼𑀢𑁆𑀢𑀺𑀫𑀕𑁆𑀕𑀲𑁆𑀲. 𑀯𑀝𑁆𑀝𑀤𑀼𑀓𑁆𑀔𑀧𑀭𑀺𑀬𑁄𑀲𑀸𑀦𑀁 𑀕𑀘𑁆𑀙𑀢𑀺 𑀏𑀢𑀸𑀬𑀸𑀢𑀺 𑀦𑀺𑀝𑁆𑀞𑀸𑀢𑀺 𑀳𑀺 𑀯𑀺𑀫𑀼𑀢𑁆𑀢𑀺 𑀯𑀼𑀢𑁆𑀢𑀸 ‘‘𑀕𑁄𑀝𑁆𑀞𑀸 𑀧𑀝𑁆𑀞𑀺𑀢𑀕𑀸𑀯𑁄’’𑀢𑀺 (𑀫. 𑀦𑀺. 𑁧.𑁧𑁫𑁬) 𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢𑀧𑀤𑁂 𑀯𑀺𑀬 𑀞𑀸-𑀲𑀤𑁆𑀤𑀲𑁆𑀲 𑀕𑀢𑀺𑀅𑀢𑁆𑀣𑁂 𑀧𑀯𑀢𑁆𑀢𑀦𑀢𑁄. 𑀦𑀺𑀝𑁆𑀞𑀸𑀫𑀕𑁆𑀕𑁄 𑀘 𑀇𑀥 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 ‘‘𑀦𑀺𑀝𑁆𑀞𑀸’’𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀢𑀲𑁆𑀲𑁂𑀯 𑀳𑀺 𑀦𑀺𑀬𑁆𑀬𑀸𑀦𑀺𑀓𑀢𑀸, 𑀅𑀦𑀺𑀬𑁆𑀬𑀸𑀦𑀺𑀓𑀢𑀸 𑀘 𑀯𑀼𑀘𑁆𑀘𑀢𑀺, 𑀦 𑀦𑀺𑀝𑁆𑀞𑀸𑀬. 𑀦𑀺𑀬𑁆𑀬𑀸𑀢𑀻𑀢𑀺 𑀦𑀺𑀬𑁆𑀬𑀸𑀦𑀺𑀓𑀸 𑀬-𑀓𑀸𑀭𑀲𑁆𑀲 𑀓-𑀓𑀸𑀭𑀁 𑀓𑀢𑁆𑀯𑀸. 𑀅𑀦𑀻𑀬𑀲𑀤𑁆𑀤𑁄 𑀳𑀺 𑀩𑀳𑀼𑀮𑀁 𑀓𑀢𑁆𑀢𑀼𑀢𑁆𑀣𑀸𑀪𑀺𑀥𑀸𑀬𑀓𑁄, 𑀦 𑀦𑀺𑀬𑁆𑀬𑀸𑀦𑀺𑀓𑀸 𑀅𑀦𑀺𑀬𑁆𑀬𑀸𑀦𑀺𑀓𑀸, 𑀢𑀲𑁆𑀲𑀸 𑀪𑀸𑀯𑁄 𑀢𑀣𑀸. 𑀦𑀺𑀬𑁆𑀬𑀸𑀦𑀁 𑀯𑀸 𑀦𑀺𑀕𑁆𑀕𑀫𑀦𑀁 𑀦𑀺𑀲𑁆𑀲𑀭𑀡𑀁, 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀯𑀽𑀧𑀲𑀫𑁄𑀢𑀺 𑀅𑀢𑁆𑀣𑁄, 𑀦𑀺𑀬𑁆𑀬𑀸𑀦𑀫𑁂𑀯 𑀦𑀺𑀬𑁆𑀬𑀸𑀦𑀺𑀓𑀁, 𑀦 𑀦𑀺𑀬𑁆𑀬𑀸𑀦𑀺𑀓𑀁 𑀅𑀦𑀺𑀬𑁆𑀬𑀸𑀦𑀺𑀓𑀁, 𑀲𑁄 𑀏𑀯 𑀪𑀸𑀯𑁄 𑀲𑀪𑀸𑀯𑁄 𑀅𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑁄, 𑀢𑀲𑁆𑀲 𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁.

‘‘𑀲𑀩𑁆𑀩𑁂 𑀳𑀻’’𑀢𑀺𑀆𑀤𑀺 𑀢𑀤𑀢𑁆𑀣𑀯𑀺𑀯𑀭𑀡𑀁. 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁 𑀦𑀺𑀝𑁆𑀞𑀫𑀺𑀢𑀺 𑀧𑀜𑁆𑀜𑀧𑁂𑀢𑀺 𑀬𑀣𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀮𑁄𑀓𑀣𑀽𑀧𑀺𑀓𑀸𑀤𑀺𑀯𑀲𑁂𑀦 𑀦𑀺𑀝𑁆𑀞𑀁 𑀧𑀜𑁆𑀜𑀧𑁂𑀦𑁆𑀢𑀻𑀢𑀺 ‘‘𑀦𑀺𑀩𑁆𑀩𑀸𑀦𑀁 𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀯𑀘𑀦𑀲𑀸𑀫𑀜𑁆𑀜𑀫𑀢𑁆𑀢𑀁 𑀕𑀳𑁂𑀢𑁆𑀯𑀸 𑀢𑀣𑀸 𑀧𑀜𑁆𑀜𑀧𑁂𑀦𑁆𑀢𑀺. 𑀮𑁄𑀓𑀣𑀽𑀧𑀺𑀓𑀸 𑀦𑀸𑀫 𑀩𑁆𑀭𑀳𑁆𑀫𑀪𑀽𑀫𑀺 𑀯𑀼𑀘𑁆𑀘𑀢𑀺 𑀮𑁄𑀓𑀲𑁆𑀲 𑀣𑀽𑀧𑀺𑀓𑀲𑀤𑀺𑀲𑀢𑀸𑀧𑀭𑀺𑀓𑀧𑁆𑀧𑀦𑁂𑀦. 𑀓𑁂𑀘𑀺 𑀧𑀦 ‘‘𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀪𑀽𑀫𑀺𑀁 𑀮𑁄𑀓𑀣𑀽𑀧𑀺𑀓𑀸’’𑀢𑀺 𑀯𑀤𑀦𑁆𑀢𑀺, 𑀢𑀤𑀬𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀲𑀼 𑀢𑀣𑀸 𑀅𑀯𑀘𑀦𑀢𑁄. 𑀆𑀤𑀺𑀲𑀤𑁆𑀤𑁂𑀦 𑀘𑁂𑀢𑁆𑀣 ‘‘𑀅𑀜𑁆𑀜𑁄 𑀧𑀼𑀭𑀺𑀲𑁄, 𑀅𑀜𑁆𑀜𑀸 𑀧𑀓𑀢𑀻’’𑀢𑀺 𑀧𑀓𑀢𑀺𑀧𑀼𑀭𑀺𑀲𑀦𑁆𑀢𑀭𑀸𑀯𑀩𑁄𑀥𑁄 𑀫𑁄𑀓𑁆𑀔𑁄, 𑀩𑀼𑀤𑁆𑀥𑀺𑀆𑀤𑀺𑀕𑀼𑀡𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀅𑀢𑁆𑀢𑀦𑁄 𑀅𑀲𑀓𑀢𑁆𑀢𑀦𑀺 𑀅𑀯𑀝𑁆𑀞𑀸𑀦𑀁 𑀫𑁄𑀓𑁆𑀔𑁄, 𑀓𑀸𑀬𑀯𑀺𑀧𑀢𑁆𑀢𑀺𑀓𑀢𑀺 𑀚𑀸𑀢𑀺𑀩𑀦𑁆𑀥𑀸𑀦𑀁 𑀅𑀧𑀯𑀚𑁆𑀚𑀦𑀯𑀲𑁂𑀦 𑀅𑀧𑁆𑀧𑀯𑀢𑁆𑀢𑁄 𑀫𑁄𑀓𑁆𑀔𑁄, 𑀧𑀭𑁂𑀦 𑀧𑀼𑀭𑀺𑀲𑁂𑀦 𑀧𑀮𑁄𑀓𑀢𑀸 𑀫𑁄𑀓𑁆𑀔𑁄, 𑀢𑀁𑀲𑀫𑀻𑀧𑀢𑀸 𑀫𑁄𑀓𑁆𑀔𑁄, 𑀢𑀁𑀲𑀫𑀸𑀬𑁄𑀕𑁄 𑀫𑁄𑀓𑁆𑀔𑁄𑀢𑀺 𑀏𑀯𑀫𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀦𑀺𑀝𑁆𑀞𑀁 𑀅𑀧𑀜𑁆𑀜𑀧𑁂𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺. 𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀞𑀫𑀚𑁆𑀛𑀸𑀦𑀩𑁆𑀭𑀳𑁆𑀫𑀮𑁄𑀓𑁄 𑀦𑀺𑀝𑁆𑀞𑀸. 𑀢𑀢𑁆𑀣 𑀳𑀺 𑀦𑁂𑀲𑀁 𑀦𑀺𑀘𑁆𑀘𑀸𑀪𑀺𑀦𑀺𑀯𑁂𑀲𑁄 𑀬𑀣𑀸 𑀢𑀁 𑀩𑀓𑀲𑁆𑀲 𑀩𑁆𑀭𑀳𑁆𑀫𑀼𑀦𑁄, (𑀫. 𑀦𑀺. 𑁧.𑁫𑁦𑁧) 𑀯𑁂𑀔𑀦𑀲𑀸𑀤𑀺𑀢𑀸𑀧𑀲𑀸𑀦𑀁 𑀆𑀪𑀲𑁆𑀲𑀭𑀸, 𑀲𑀜𑁆𑀘𑀬𑀸𑀤𑀺𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀲𑀼𑀪𑀓𑀺𑀡𑁆𑀳𑀸, 𑀆𑀚𑀻𑀯𑀓𑀸𑀦𑀁 ‘‘𑀅𑀦𑀦𑁆𑀢𑀫𑀸𑀦𑀲𑁄’’𑀢𑀺 𑀧𑀭𑀺𑀓𑀧𑁆𑀧𑀺𑀢𑁄 𑀅𑀲𑀜𑁆𑀜𑀻𑀪𑀯𑁄. 𑀇𑀫𑀲𑁆𑀫𑀺𑀁 𑀧𑀦 𑀲𑀸𑀲𑀦𑁂 𑀅𑀭𑀳𑀢𑁆𑀢𑀁 𑀦𑀺𑀝𑁆𑀞𑀸, 𑀲𑀩𑁆𑀩𑁂𑀧𑀺 𑀘𑁂𑀢𑁂 𑀤𑀺𑀝𑁆𑀞𑀺𑀯𑀲𑁂𑀦 𑀩𑁆𑀭𑀳𑁆𑀫𑀮𑁄𑀓𑀸𑀤𑀻𑀦𑀺 𑀅𑀭𑀳𑀢𑁆𑀢𑀫𑀜𑁆𑀜𑀦𑀸𑀬 ‘‘𑀦𑀺𑀩𑁆𑀩𑀸𑀦𑀁 𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀯𑀘𑀦𑀲𑀸𑀫𑀜𑁆𑀜𑀫𑀢𑁆𑀢𑀁 𑀕𑀳𑁂𑀢𑁆𑀯𑀸 𑀢𑀣𑀸 𑀧𑀜𑁆𑀜𑀧𑁂𑀦𑁆𑀢𑀺, 𑀦 𑀧𑀦 𑀧𑀭𑀫𑀢𑁆𑀣𑀢𑁄 𑀦𑁂𑀲𑀁𑀲𑀫𑀬𑁂 𑀦𑀺𑀩𑁆𑀩𑀸𑀦𑀧𑀜𑁆𑀜𑀸𑀧𑀦𑀲𑁆𑀲 𑀮𑀩𑁆𑀪𑀦𑀢𑁄𑀢𑀺 𑀆𑀳 ‘‘𑀲𑀸 𑀘 𑀦 𑀦𑀺𑀬𑁆𑀬𑀸𑀦𑀺𑀓𑀸’’𑀢𑀺𑀆𑀤𑀺. 𑀬𑀣𑀸𑀧𑀜𑁆𑀜𑀢𑁆𑀢𑀸𑀢𑀺 𑀬𑁂𑀦 𑀬𑁂𑀦 𑀧𑀓𑀸𑀭𑁂𑀦 𑀧𑀜𑁆𑀜𑀢𑁆𑀢𑀸, 𑀧𑀜𑁆𑀜𑀢𑁆𑀢𑀧𑁆𑀧𑀓𑀸𑀭𑀸 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀦 𑀦𑀺𑀬𑁆𑀬𑀸𑀢𑀻𑀢𑀺 ‘‘𑀬𑁂𑀦𑀸𑀓𑀸𑀭𑁂𑀦 𑀦𑀺𑀝𑁆𑀞𑀸 𑀧𑀸𑀧𑀼𑀡𑀻𑀬𑀢𑀻’’𑀢𑀺 𑀢𑁂𑀳𑀺 𑀧𑀯𑁂𑀤𑀺𑀢𑀸, 𑀢𑁂𑀦𑀸𑀓𑀸𑀭𑁂𑀦 𑀢𑀲𑁆𑀲𑀸 𑀅𑀧𑀢𑁆𑀢𑀩𑁆𑀩𑀢𑀸𑀬 𑀦 𑀦𑀺𑀬𑁆𑀬𑀸𑀢𑀺. 𑀧𑀡𑁆𑀟𑀺𑀢𑁂𑀳𑀺 𑀧𑀝𑀺𑀓𑁆𑀔𑀺𑀢𑁆𑀢𑀸𑀢𑀺 ‘‘𑀦𑀸𑀬𑀁 𑀦𑀺𑀝𑁆𑀞𑀸 𑀧𑀝𑀺𑀧𑀤𑀸 𑀯𑀝𑁆𑀝𑀲𑁆𑀲 𑀅𑀦𑀢𑀺𑀓𑁆𑀓𑀫𑀦𑀢𑁄’’𑀢𑀺 𑀩𑀼𑀤𑁆𑀥𑀸𑀤𑀻𑀳𑀺 𑀧𑀡𑁆𑀟𑀺𑀢𑁂𑀳𑀺 𑀧𑀝𑀺𑀓𑁆𑀔𑀺𑀢𑁆𑀢𑀸. 𑀦𑀺𑀯𑀢𑁆𑀢𑀢𑀻𑀢𑀺 𑀧𑀝𑀺𑀓𑁆𑀔𑁂𑀧𑀓𑀸𑀭𑀡𑀯𑀘𑀦𑀁, 𑀬𑀲𑁆𑀫𑀸 𑀢𑁂𑀳𑀺 𑀧𑀜𑁆𑀜𑀢𑁆𑀢𑀸 𑀦𑀺𑀝𑁆𑀞𑀸 𑀧𑀝𑀺𑀧𑀤𑀸 𑀦 𑀦𑀺𑀬𑁆𑀬𑀸𑀢𑀺 𑀦 𑀕𑀘𑁆𑀙𑀢𑀺, 𑀅𑀜𑁆𑀜𑀤𑀢𑁆𑀣𑀼 𑀢𑀁𑀲𑀫𑀗𑁆𑀕𑀺𑀦𑀁 𑀧𑀼𑀕𑁆𑀕𑀮𑀁 𑀲𑀁𑀲𑀸𑀭𑁂 𑀏𑀯 𑀧𑀭𑀺𑀩𑁆𑀪𑀫𑀸𑀧𑁂𑀦𑁆𑀢𑀻 𑀦𑀺𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀧𑀡𑁆𑀟𑀺𑀢𑁂𑀳𑀺 𑀧𑀝𑀺𑀓𑁆𑀔𑀺𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀢𑀦𑁆𑀢𑀺 𑀅𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀁.

𑀚𑀸𑀦𑀁, 𑀧𑀲𑁆𑀲𑀦𑁆𑀢𑀺 𑀘 𑀧𑀼𑀣𑀼𑀯𑀘𑀦𑀯𑀺𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀚𑀸𑀦𑀦𑁆𑀢𑀸 𑀧𑀲𑁆𑀲𑀦𑁆𑀢𑀸’’𑀢𑀺. 𑀕𑀘𑁆𑀙𑀦𑁆𑀢𑀸𑀤𑀺𑀲𑀤𑁆𑀤𑀸𑀦𑀜𑁆𑀳𑀺 ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀚𑀸𑀦𑀁 𑀲𑀪𑀺𑀓𑁆𑀔𑀼𑀓𑀁 𑀆𑀭𑀸𑀫𑀁 𑀅𑀦𑀸𑀧𑀼𑀘𑁆𑀙𑀸 𑀧𑀯𑀺𑀲𑁂𑀬𑁆𑀬𑀸’’𑀢𑀺𑀆𑀤𑀻𑀲𑀼 (𑀧𑀸𑀘𑀺. 𑁧𑁦𑁨𑁪) 𑀮𑀺𑀗𑁆𑀕𑀯𑀲𑁂𑀦 𑀯𑀺𑀧𑀭𑀺𑀬𑀸𑀬𑁄, 𑀚𑀸𑀦𑀦𑁆𑀢𑀻𑀢𑀺 𑀅𑀢𑁆𑀣𑁄. ‘‘𑀬𑀸𑀘𑀁 𑀅𑀤𑀤𑀫𑀧𑁆𑀧𑀺𑀬𑁄’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁩𑁪𑁬; 𑀚𑀸. 𑁧.𑁭.𑁫𑁫) 𑀯𑀺𑀪𑀢𑁆𑀢𑀺𑀯𑀲𑁂𑀦, 𑀬𑀸𑀘𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀇𑀥 𑀧𑀦 𑀧𑀼𑀣𑀼𑀯𑀘𑀦𑀯𑀲𑁂𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀥𑀸𑀦𑀁 𑀚𑀸𑀦𑀦𑀁 𑀦𑀸𑀫 𑀧𑀘𑁆𑀘𑀓𑁆𑀔𑀢𑁄 𑀚𑀸𑀦𑀦𑀁 𑀢𑀲𑁆𑀲 𑀚𑁂𑀝𑁆𑀞𑀪𑀸𑀯𑀢𑁄, 𑀤𑀲𑁆𑀲𑀦𑀫𑀧𑁆𑀧𑀥𑀸𑀦𑀁 𑀢𑀲𑁆𑀲 𑀲𑀁𑀲𑀬𑀸𑀦𑀼𑀩𑀦𑁆𑀥𑀢𑁆𑀢𑀸𑀢𑀺 𑀅𑀬𑀁 𑀓𑀫𑁄 𑀯𑀼𑀢𑁆𑀢𑁄 ‘‘𑀚𑀸𑀦𑀁 𑀧𑀲𑁆𑀲’’𑀦𑁆𑀢𑀺. 𑀢𑁂𑀦𑁂𑀢𑁆𑀣 𑀚𑀸𑀦𑀦𑁂𑀦 𑀤𑀲𑁆𑀲𑀦𑀁 𑀯𑀺𑀲𑁂𑀲𑁂𑀢𑀺. 𑀏𑀯𑀜𑁆𑀳𑀺 𑀤𑀺𑀝𑁆𑀞𑀧𑀼𑀩𑁆𑀩𑀸𑀦𑀺 𑀔𑁄 𑀢𑀲𑁆𑀫𑀺𑀁 𑀮𑁄𑀓𑁂 𑀫𑀦𑀼𑀲𑁆𑀲𑀸𑀦𑀁 𑀲𑀭𑀻𑀭𑀲𑀡𑁆𑀞𑀸𑀦𑀸𑀤𑀻𑀦𑀻𑀢𑀺 𑀏𑀓𑀢𑁄 𑀅𑀥𑀺𑀧𑁆𑀧𑀸𑀬𑀤𑀲𑁆𑀲𑀦𑀁 𑀲𑀽𑀧𑀧𑀦𑁆𑀦𑀁 𑀳𑁄𑀢𑀺. 𑀅𑀬𑀜𑁆𑀳𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄 ‘‘𑀓𑀺𑀁 𑀢𑀼𑀫𑁆𑀳𑀸𑀓𑀁 𑀏𑀓𑀦𑁆𑀢𑀲𑀼𑀔𑁂 𑀮𑁄𑀓𑁂 𑀧𑀘𑁆𑀘𑀓𑁆𑀔𑀢𑁄 𑀜𑀸𑀡𑀤𑀲𑁆𑀲𑀦𑀁 𑀅𑀢𑁆𑀣𑀻’’𑀢𑀺. 𑀚𑀸𑀦𑀦𑁆𑀢𑀺 𑀯𑀸 𑀢𑀲𑁆𑀲 𑀮𑁄𑀓𑀲𑁆𑀲 𑀅𑀦𑀼𑀫𑀸𑀦𑀯𑀺𑀲𑀬𑀢𑀁 𑀯𑀼𑀘𑁆𑀘𑀢𑀺, 𑀧𑀲𑁆𑀲𑀦𑁆𑀢𑀺 𑀧𑀘𑁆𑀘𑀓𑁆𑀔𑀢𑁄 𑀯𑀺𑀲𑀬𑀢𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 ‘‘𑀅𑀧𑀺 𑀢𑀼𑀫𑁆𑀳𑀸𑀓𑀁 𑀮𑁄𑀓𑁄 𑀧𑀘𑁆𑀘𑀓𑁆𑀔𑀢𑁄 𑀜𑀸𑀢𑁄, 𑀉𑀤𑀸𑀳𑀼 𑀅𑀦𑀼𑀫𑀸𑀦𑀢𑁄’’𑀢𑀺.

𑀬𑀲𑁆𑀫𑀸 𑀧𑀦 𑀮𑁄𑀓𑁂 𑀧𑀘𑁆𑀘𑀓𑁆𑀔𑀪𑀽𑀢𑁄 𑀅𑀢𑁆𑀣𑁄 𑀇𑀦𑁆𑀤𑁆𑀭𑀺𑀬𑀕𑁄𑀘𑀭𑀪𑀸𑀯𑁂𑀦 𑀧𑀸𑀓𑀝𑁄, 𑀢𑀲𑁆𑀫𑀸 𑀧𑀸𑀓𑀝𑁂𑀦 𑀅𑀢𑁆𑀣𑁂𑀦 𑀅𑀥𑀺𑀧𑁆𑀧𑀸𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀤𑀺𑀝𑁆𑀞𑀧𑀼𑀩𑁆𑀩𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑀺𑀝𑁆𑀞𑀧𑀤𑁂𑀦 𑀯𑀸 𑀤𑀲𑁆𑀲𑀦𑀁, 𑀢𑀤𑀦𑀼𑀕𑀢𑀜𑁆𑀘 𑀚𑀸𑀦𑀦𑀁 𑀕𑀳𑁂𑀢𑁆𑀯𑀸 𑀢𑀤𑀼𑀪𑀬𑁂𑀦𑁂𑀯 𑀅𑀢𑁆𑀣𑁂𑀦 𑀅𑀥𑀺𑀧𑁆𑀧𑀸𑀬𑀁 𑀯𑀺𑀪𑀸𑀯𑁂𑀢𑀼𑀁 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺𑀧𑀺 𑀤𑀝𑁆𑀞𑀩𑁆𑀩𑀁. 𑀤𑀺𑀝𑁆𑀞𑀧𑀼𑀩𑁆𑀩𑀸𑀦𑀻𑀢𑀺 𑀳𑀺 𑀤𑀲𑁆𑀲𑀦𑁂𑀦, 𑀢𑀤𑀦𑀼𑀕𑀢𑁂𑀦 𑀘 𑀜𑀸𑀡𑁂𑀦 𑀕𑀳𑀺𑀢𑀧𑀼𑀩𑁆𑀩𑀸𑀦𑀻𑀢𑀺 𑀅𑀢𑁆𑀣𑁄. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀲𑀭𑀻𑀭𑀲𑀡𑁆𑀞𑀸𑀦𑀸𑀤𑀻𑀦𑀻’’𑀢𑀺 𑀲𑀫𑀭𑀺𑀬𑀸𑀤𑀯𑀘𑀦𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺. ‘‘𑀅𑀧𑁆𑀧𑀸𑀝𑀺𑀳𑀻𑀭𑀓𑀢’’𑀦𑁆𑀢𑀺 𑀅𑀬𑀁 𑀅𑀦𑀼𑀦𑀸𑀲𑀺𑀓𑀮𑁄𑀧𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀅𑀧𑁆𑀧𑀸𑀝𑀺𑀳𑀻𑀭𑀓𑀁 𑀢’’𑀦𑁆𑀢𑀺. 𑀢𑀁 𑀯𑀘𑀦𑀁 𑀅𑀧𑁆𑀧𑀸𑀝𑀺𑀳𑀻𑀭𑀓𑀁 𑀲𑀫𑁆𑀧𑀚𑁆𑀚𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀧𑁆𑀧𑀸𑀝𑀺𑀳𑀻𑀭𑀧𑀤𑁂 𑀅𑀦𑀼𑀦𑀸𑀲𑀺𑀓𑀮𑁄𑀧𑁄, ‘‘𑀓𑀢’’𑀦𑁆𑀢𑀺 𑀘 𑀏𑀓𑀁 𑀧𑀤𑀦𑁆𑀢𑀺 𑀓𑁂𑀘𑀺, 𑀢𑀤𑀬𑀼𑀢𑁆𑀢𑀁 𑀲𑀫𑀸𑀲𑀲𑀫𑁆𑀪𑀯𑀢𑁄, 𑀅𑀦𑀼𑀦𑀸𑀲𑀺𑀓𑀮𑁄𑀧𑀲𑁆𑀲 𑀘 𑀅𑀯𑀢𑁆𑀢𑀩𑁆𑀩𑀢𑁆𑀢𑀸. 𑀏𑀯𑀫𑁂𑀢𑁆𑀣 𑀯𑀡𑁆𑀡𑀬𑀦𑁆𑀢𑀺 𑁋 𑀧𑀝𑀺𑀧𑀓𑁆𑀔𑀳𑀭𑀡𑀢𑁄 𑀧𑀝𑀺𑀳𑀸𑀭𑀺𑀬𑀁, 𑀢𑀤𑁂𑀯 𑀧𑀸𑀝𑀺𑀳𑀸𑀭𑀺𑀬𑀁. 𑀅𑀢𑁆𑀢𑀦𑀸 𑀉𑀢𑁆𑀢𑀭𑀯𑀺𑀭𑀳𑀺𑀢𑀯𑀘𑀦𑀁. 𑀧𑀸𑀝𑀺𑀳𑀸𑀭𑀺𑀬𑀫𑁂𑀯𑁂𑀢𑁆𑀣 ‘‘𑀧𑀸𑀝𑀺𑀳𑀻𑀭𑀓’’𑀦𑁆𑀢𑀺 𑀯𑀼𑀢𑁆𑀢𑀁 𑀧𑀭𑁂𑀳𑀺 𑀯𑀼𑀘𑁆𑀘𑀫𑀸𑀦𑀉𑀢𑁆𑀢𑀭𑁂𑀳𑀺 𑀲𑀉𑀢𑁆𑀢𑀭𑀢𑁆𑀢𑀸, 𑀦 𑀧𑀸𑀝𑀺𑀳𑀻𑀭𑀓𑀦𑁆𑀢𑀺 𑀅𑀧𑁆𑀧𑀸𑀝𑀺𑀳𑀻𑀭𑀓𑀁. 𑀯𑀺𑀭𑀳𑀢𑁆𑀣𑁄 𑀘𑁂𑀢𑁆𑀣 𑀅-𑀲𑀤𑁆𑀤𑁄. 𑀢𑁂𑀦𑀸𑀳 ‘‘𑀧𑀝𑀺𑀳𑀭𑀡𑀯𑀺𑀭𑀳𑀺𑀢’’𑀦𑁆𑀢𑀺. 𑀲𑀉𑀢𑁆𑀢𑀭𑀜𑁆𑀳𑀺 𑀯𑀘𑀦𑀁 𑀢𑁂𑀦 𑀉𑀢𑁆𑀢𑀭𑀯𑀘𑀦𑁂𑀦 𑀧𑀝𑀺𑀳𑀭𑀻𑀬𑀢𑀺 𑀯𑀺𑀧𑀭𑀺𑀯𑀢𑁆𑀢𑀻𑀬𑀢𑀺, 𑀢𑀲𑁆𑀫𑀸 𑀉𑀢𑁆𑀢𑀭𑀯𑀘𑀦𑀁 𑀧𑀝𑀺𑀳𑀭𑀡𑀁 𑀦𑀸𑀫, 𑀢𑀢𑁄 𑀯𑀺𑀭𑀳𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸 𑀏𑀯 𑀦𑀺𑀬𑁆𑀬𑀸𑀦𑀲𑁆𑀲 𑀧𑀝𑀺𑀳𑀭𑀡𑀫𑀕𑁆𑀕𑀲𑁆𑀲 𑀅𑀪𑀸𑀯𑀢𑁄 ‘‘𑀅𑀦𑀺𑀬𑁆𑀬𑀸𑀦𑀺𑀓’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀦𑀺𑀬𑁆𑀬𑀸𑀦𑀺𑀓’’𑀦𑁆𑀢𑀺.

𑁪𑁨𑁬. 𑀯𑀺𑀮𑀸𑀲𑁄 𑀇𑀢𑁆𑀣𑀺𑀮𑀻𑀴𑀸, 𑀬𑁄 ‘‘𑀲𑀺𑀗𑁆𑀕𑀸𑀭𑀪𑀸𑀯𑀚𑀸 𑀓𑀺𑀭𑀺𑀬𑀸’’𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀆𑀓𑀧𑁆𑀧𑁄 𑀓𑁂𑀲𑀩𑀦𑁆𑀥𑀯𑀢𑁆𑀣𑀕𑁆𑀕𑀳𑀡𑀸𑀤𑀺𑀆𑀓𑀸𑀭𑀯𑀺𑀲𑁂𑀲𑁄, 𑀯𑁂𑀲𑀲𑀁𑀯𑀺𑀥𑀸𑀦𑀁 𑀯𑀸. 𑀆𑀤𑀺𑀲𑀤𑁆𑀤𑁂𑀦 𑀳𑀸𑀯𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀳𑀸𑀯𑀸𑀢𑀺 𑀳𑀺 𑀘𑀸𑀢𑀼𑀭𑀺𑀬𑀁 𑀯𑀼𑀘𑁆𑀘𑀢𑀺.

𑀢𑀬𑁄𑀅𑀢𑁆𑀢𑀧𑀝𑀺𑀮𑀸𑀪𑀯𑀡𑁆𑀡𑀦𑀸

𑁪𑁨𑁮. 𑀆𑀳𑀺𑀢𑁄 𑀅𑀳𑀁𑀫𑀸𑀦𑁄 𑀏𑀢𑁆𑀣𑀸𑀢𑀺 𑀅𑀢𑁆𑀢𑀸, 𑀅𑀢𑁆𑀢𑀪𑀸𑀯𑁄𑀢𑀺 𑀆𑀳 ‘‘𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄’’𑀢𑀺. 𑀓𑀣𑀁 𑀤𑀲𑁆𑀲𑁂𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀑𑀴𑀸𑀭𑀺𑀓𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁂𑀦𑀸’’𑀢𑀺𑀆𑀤𑀺. 𑀓𑀸𑀫𑀪𑀯𑀁 𑀤𑀲𑁆𑀲𑁂𑀢𑀺 𑀇𑀢𑀭𑀪𑀯𑀤𑁆𑀯𑀬𑀢𑁆𑀢𑀪𑀸𑀯𑀢𑁄 𑀑𑀴𑀸𑀭𑀺𑀓𑀢𑁆𑀢𑀸. 𑀭𑀽𑀧𑀪𑀯𑀁 𑀤𑀲𑁆𑀲𑁂𑀢𑀺 𑀛𑀸𑀦𑀫𑀦𑁂𑀦 𑀦𑀺𑀩𑁆𑀩𑀢𑁆𑀢𑀁 𑀳𑀼𑀢𑁆𑀯𑀸 𑀭𑀽𑀧𑀻𑀪𑀸𑀯𑁂𑀦 𑀉𑀧𑀮𑀩𑁆𑀪𑀦𑀢𑁄. 𑀅𑀭𑀽𑀧𑀪𑀯𑀁 𑀤𑀲𑁆𑀲𑁂𑀢𑀺 𑀅𑀭𑀽𑀧𑀻𑀪𑀸𑀯𑁂𑀦 𑀉𑀧𑀮𑀩𑁆𑀪𑀦𑀢𑁄. 𑀲𑀁𑀓𑀺𑀮𑁂𑀲𑀺𑀓𑀸 𑀥𑀫𑁆𑀫𑀸 𑀦𑀸𑀫 𑀤𑁆𑀯𑀸𑀤𑀲 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀢𑀤𑀪𑀸𑀯𑁂 𑀓𑀲𑁆𑀲𑀘𑀺 𑀲𑀁𑀓𑀺𑀮𑁂𑀲𑀲𑁆𑀲 𑀅𑀲𑀫𑁆𑀪𑀯𑀢𑁄. 𑀯𑁄𑀤𑀸𑀦𑀺𑀬𑀸 𑀥𑀫𑁆𑀫𑀸 𑀦𑀸𑀫 𑀲𑀫𑀣𑀯𑀺𑀧𑀲𑁆𑀲𑀦𑀸 𑀢𑀸𑀲𑀁 𑀯𑀲𑁂𑀦 𑀲𑀩𑁆𑀩𑀲𑁄 𑀘𑀺𑀢𑁆𑀢𑀯𑁄𑀤𑀸𑀦𑀲𑁆𑀲 𑀲𑀺𑀚𑁆𑀛𑀦𑀢𑁄.

𑁪𑁨𑁯. 𑀧𑀝𑀺𑀧𑀓𑁆𑀔𑀥𑀫𑁆𑀫𑀸𑀦𑀁 𑀅𑀲𑀫𑀼𑀘𑁆𑀙𑁂𑀤𑁂 𑀲𑀢𑀺 𑀦 𑀓𑀤𑀸𑀘𑀺𑀧𑀺 𑀅𑀦𑀯𑀚𑁆𑀚𑀥𑀫𑁆𑀫𑀸𑀦𑀁 𑀯𑀸 𑀧𑀸𑀭𑀺𑀧𑀽𑀭𑀻, 𑀯𑁂𑀧𑀼𑀮𑁆𑀮𑀁 𑀯𑀸 𑀲𑀫𑁆𑀪𑀯𑀢𑀺, 𑀲𑀫𑀼𑀘𑁆𑀙𑁂𑀤𑁂 𑀧𑀦 𑀲𑀢𑀺 𑀲𑀫𑁆𑀪𑀯𑀢𑀻𑀢𑀺 𑀫𑀕𑁆𑀕𑀨𑀮𑀧𑀜𑁆𑀜𑀸𑀦𑀫𑁂𑀯 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁, 𑀢𑀸 𑀳𑀺 𑀲𑀓𑀺𑀁 𑀧𑀭𑀺𑀧𑀼𑀡𑁆𑀡𑀸𑀧𑀺 𑀅𑀧𑀭𑀺𑀳𑀻𑀦𑀥𑀫𑁆𑀫𑀢𑁆𑀢𑀸 𑀧𑀭𑀺𑀧𑀼𑀡𑁆𑀡𑀸 𑀏𑀯 𑀪𑀯𑀦𑁆𑀢𑀺. 𑀢𑀭𑀼𑀡𑀧𑀻𑀢𑀻𑀢𑀺 𑀉𑀧𑁆𑀧𑀦𑁆𑀦𑀫𑀢𑁆𑀢𑀸 𑀅𑀮𑀤𑁆𑀥𑀸𑀲𑁂𑀯𑀦𑀸 𑀤𑀼𑀩𑁆𑀩𑀮𑀧𑀻𑀢𑀺. 𑀩𑀮𑀯𑀢𑀼𑀝𑁆𑀞𑀻𑀢𑀺 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀮𑀤𑁆𑀥𑀸𑀲𑁂𑀯𑀦𑀸 𑀉𑀧𑀭𑀺𑀯𑀺𑀲𑁂𑀲𑀸𑀥𑀺𑀕𑀫𑀲𑁆𑀲 𑀧𑀘𑁆𑀘𑀬𑀪𑀽𑀢𑀸 𑀣𑀺𑀭𑀢𑀭𑀸 𑀧𑀻𑀢𑀺. 𑀇𑀤𑀸𑀦𑀺 𑀲𑀗𑁆𑀔𑁂𑀧𑀢𑁄 𑀧𑀺𑀡𑁆𑀟𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀺𑀁 𑀯𑀼𑀢𑁆𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀁 𑀯𑀺𑀳𑀸𑀭𑀁 𑀲𑀬𑀁…𑀧𑁂… 𑀯𑀺𑀳𑀭𑀺𑀲𑁆𑀲𑀢𑀻𑀢𑀺 𑀅𑀯𑁄𑀘𑀼𑀫𑁆𑀳𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀁 𑀯𑀺𑀳𑀸𑀭𑀁 ‘‘𑀲𑀁𑀓𑀺𑀮𑁂𑀲𑀺𑀓𑀯𑁄𑀤𑀸𑀦𑀺𑀬𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀪𑀺𑀯𑀼𑀤𑁆𑀥𑀺𑀦𑀺𑀝𑁆𑀞𑀁 𑀧𑀜𑁆𑀜𑀸𑀬 𑀧𑀸𑀭𑀺𑀧𑀽𑀭𑀺𑀯𑁂𑀧𑀼𑀮𑁆𑀮𑀪𑀽𑀢𑀁 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀅𑀧𑀭𑀧𑁆𑀧𑀘𑁆𑀘𑀬𑁂𑀦 𑀜𑀸𑀡𑁂𑀦 𑀧𑀘𑁆𑀘𑀓𑁆𑀔𑀢𑁄 𑀲𑀫𑁆𑀧𑀸𑀤𑁂𑀢𑁆𑀯𑀸 𑀯𑀺𑀳𑀭𑀺𑀲𑁆𑀲𑀢𑀻’’𑀢𑀺 𑀓𑀣𑀬𑀺𑀫𑁆𑀳𑀸𑀢𑀺. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂. 𑀢𑀲𑁆𑀲𑀸𑀢𑀺 𑀑𑀯𑀸𑀤𑀓𑀭𑀲𑁆𑀲 𑀪𑀺𑀓𑁆𑀔𑀼𑀦𑁄. 𑀏𑀯𑀁 𑀯𑀺𑀳𑀭𑀢𑁄𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀯𑀺𑀳𑀭𑀡𑀳𑁂𑀢𑀼, 𑀯𑀺𑀳𑀭𑀦𑁆𑀢𑀲𑁆𑀲 𑀯𑀸. 𑀢𑀦𑁆𑀦𑀺𑀫𑀺𑀢𑁆𑀢𑀁 𑀧𑀸𑀫𑁄𑀚𑁆𑀚𑀁, 𑀧𑀫𑁄𑀤𑀧𑁆𑀧𑀪𑀯𑀸 𑀧𑀻𑀢𑀺, 𑀢𑀧𑁆𑀧𑀘𑁆𑀘𑀬𑀪𑀽𑀢𑀁 𑀧𑀲𑁆𑀲𑀤𑁆𑀥𑀺𑀤𑁆𑀯𑀬𑀁, 𑀢𑀣𑀸 𑀲𑀽𑀧𑀝𑁆𑀞𑀺𑀢𑀸 𑀲𑀢𑀺, 𑀉𑀓𑁆𑀓𑀁𑀲𑀕𑀢𑀢𑀸𑀬 𑀉𑀢𑁆𑀢𑀫𑀜𑀸𑀡𑀁. 𑀲𑀼𑀔𑁄 𑀘 𑀯𑀺𑀳𑀸𑀭𑁄 𑀪𑀯𑀺𑀲𑁆𑀲𑀢𑀻𑀢𑀺 𑀬𑁄𑀚𑀦𑀸. 𑀓𑀸𑀬𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀻 𑀳𑀺 ‘‘𑀧𑀲𑁆𑀲𑀤𑁆𑀥𑀻’’𑀢𑀺 𑀯𑀼𑀢𑁆𑀢𑀸, 𑀅𑀬𑀫𑁂𑀯 𑀯𑀸 𑀧𑀸𑀞𑁄. ‘‘𑀦𑀸𑀫𑀓𑀸𑀬𑀧𑀲𑁆𑀲𑀤𑁆𑀥𑀻’’𑀢𑀺𑀧𑀺 𑀧𑀞𑀦𑁆𑀢𑀺, 𑀢𑀤𑀬𑀼𑀢𑁆𑀢𑀫𑁂𑀯 𑀧𑀲𑁆𑀲𑀤𑁆𑀥𑀺𑀤𑁆𑀯𑀬𑀲𑁆𑀲 𑀅𑀯𑀺𑀦𑀸𑀪𑀸𑀯𑀢𑁄. 𑀓𑀲𑁆𑀫𑀸 𑀧𑀦𑁂𑀲 𑀲𑀼𑀔𑁄 𑀯𑀺𑀳𑀸𑀭𑁄𑀢𑀺 𑀆𑀳 ‘‘𑀲𑀩𑁆𑀩𑀯𑀺𑀳𑀸𑀭𑁂𑀲𑀽’’𑀢𑀺𑀆𑀤𑀺, 𑀲𑀩𑁆𑀩𑁂𑀲𑀼𑀧𑀺 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑀸𑀤𑀻𑀲𑀼 𑀲𑀦𑁆𑀢𑀧𑀡𑀻𑀢𑀢𑀸𑀬 𑀇𑀫𑀲𑁆𑀲𑁂𑀯 𑀲𑀼𑀔𑀢𑁆𑀢𑀸 ‘‘𑀲𑀼𑀔𑁄 𑀯𑀺𑀳𑀸𑀭𑁄’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀣𑀁 𑀲𑀼𑀔𑁄𑀢𑀺 𑀯𑀼𑀢𑁆𑀢𑀁 ‘‘𑀉𑀧𑀲𑀦𑁆𑀢𑁄 𑀧𑀭𑀫𑀫𑀥𑀼𑀭𑁄’’𑀢𑀺.

𑀧𑀞𑀫𑀚𑁆𑀛𑀸𑀦𑁂 𑀧𑀝𑀺𑀮𑀤𑁆𑀥𑀫𑀢𑁆𑀢𑁂 𑀳𑀻𑀦𑀪𑀸𑀯𑀢𑁄 𑀧𑀻𑀢𑀺 𑀤𑀼𑀩𑁆𑀩𑀮𑀸 𑀧𑀸𑀫𑁄𑀚𑁆𑀚𑀧𑀓𑁆𑀔𑀺𑀓𑀸, 𑀲𑀼𑀪𑀸𑀯𑀺𑀢𑁂 𑀧𑀦 𑀢𑀲𑁆𑀫𑀺𑀁 𑀧𑀕𑀼𑀡𑁂 𑀲𑀸 𑀧𑀡𑀻𑀢𑀸 𑀩𑀮𑀯𑀪𑀸𑀯𑀢𑁄 𑀧𑀭𑀺𑀧𑀼𑀡𑁆𑀡𑀓𑀺𑀘𑁆𑀘𑀸 𑀧𑀻𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀧𑀞𑀫𑀚𑁆𑀛𑀸𑀦𑁂 𑀧𑀸𑀫𑁄𑀚𑁆𑀚𑀸𑀤𑀬𑁄 𑀙𑀧𑀺 𑀥𑀫𑁆𑀫𑀸 𑀮𑀩𑁆𑀪𑀦𑁆𑀢𑀻’’𑀢𑀺. 𑀧𑀸𑀫𑁄𑀚𑁆𑀚𑀁 𑀦𑀺𑀯𑀢𑁆𑀢𑀢𑀻𑀢𑀺 𑀤𑀼𑀩𑁆𑀩𑀮𑀧𑀻𑀢𑀺𑀲𑀗𑁆𑀔𑀸𑀢𑀁 𑀧𑀸𑀫𑁄𑀚𑁆𑀚𑀁 𑀙𑀲𑀼 𑀥𑀫𑁆𑀫𑁂𑀲𑀼 𑀦𑀺𑀯𑀢𑁆𑀢𑀢𑀺 𑀳𑀸𑀬𑀢𑀺. 𑀯𑀺𑀢𑀓𑁆𑀓𑀯𑀺𑀘𑀸𑀭𑀓𑁆𑀔𑁄𑀪𑀯𑀺𑀭𑀳𑀺𑀢𑁂𑀦 𑀳𑀺 𑀘𑀢𑀼𑀓𑁆𑀓𑀦𑀬𑀯𑀺𑀪𑀢𑁆𑀢𑁂 𑀤𑀼𑀢𑀺𑀬𑀚𑁆𑀛𑀸𑀦𑁂 𑀲𑀩𑁆𑀩𑀤𑀸 𑀧𑀻𑀢𑀺 𑀩𑀮𑀯𑀢𑀻 𑀏𑀯 𑀳𑁄𑀢𑀺, 𑀦 𑀧𑀞𑀫𑀚𑁆𑀛𑀸𑀦𑁂 𑀯𑀺𑀬 𑀓𑀤𑀸𑀘𑀺 𑀤𑀼𑀩𑁆𑀩𑀮𑀸𑀢𑀺 𑀏𑀯𑀁 𑀯𑀼𑀢𑁆𑀢𑀁. 𑀧𑀻𑀢𑀺 𑀦𑀺𑀯𑀢𑁆𑀢𑀢𑀺 𑀢𑀧𑁆𑀧𑀳𑀸𑀦𑁂𑀦𑁂𑀯 𑀢𑀢𑀺𑀬𑀚𑁆𑀛𑀸𑀦𑀲𑁆𑀲 𑀮𑀩𑁆𑀪𑀦𑀢𑁄. ‘‘𑀲𑀼𑀔𑁄 𑀯𑀺𑀳𑀸𑀭𑁄’’𑀢𑀺 𑀇𑀫𑀺𑀦𑀸 𑀲𑀫𑀸𑀥𑀺 𑀕𑀳𑀺𑀢𑁄𑀢𑀺 𑀆𑀳 ‘‘𑀢𑀣𑀸 𑀘𑀢𑀼𑀢𑁆𑀣𑁂’’𑀢𑀺. 𑀬𑁂 𑀧𑀦 ‘‘𑀲𑀼𑀔𑁄 𑀯𑀺𑀳𑀸𑀭𑁄’𑀢𑀺 𑀏𑀢𑁂𑀦 𑀲𑀼𑀔𑀁 𑀕𑀳𑀺𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀁 𑀫𑀢𑁂𑀦 𑀲𑀦𑁆𑀢𑀯𑀼𑀢𑁆𑀢𑀺𑀢𑀸𑀬 𑀉𑀧𑁂𑀓𑁆𑀔𑀸𑀧𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 ‘‘𑀲𑀼𑀔’’𑀫𑀺𑀘𑁆𑀘𑁂𑀯 𑀪𑀸𑀲𑀺𑀢𑀸𑀢𑀺 (𑀯𑀺𑀪. 𑀅𑀝𑁆𑀞. 𑁨𑁩𑁨; 𑀯𑀺𑀲𑀼𑀤𑁆𑀥𑀺. 𑁨.𑁬𑁪𑁪; 𑀫𑀳𑀸𑀦𑀺. 𑀅𑀝𑁆𑀞. 𑁨𑁭; 𑀧𑀝𑀺. 𑀫. 𑀅𑀝𑁆𑀞. 𑁧𑁦𑁫) 𑀓𑀢𑁆𑀯𑀸 𑀢𑀣𑀸 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀫𑀲𑁆𑀫𑀺𑀁𑀬𑁂𑀯 𑀤𑀻𑀖𑀦𑀺𑀓𑀸𑀬𑁂 (𑀤𑀻. 𑀦𑀺. 𑁧.𑁪𑁩𑁨; 𑁩.𑁧𑁬𑁬, 𑁩𑁫𑁮) 𑀆𑀕𑀢𑀁 𑀅𑀦𑁂𑀓𑀥𑀸 𑀤𑁂𑀲𑀦𑀸𑀦𑀬𑀫𑀼𑀤𑁆𑀥𑀭𑀺𑀢𑁆𑀯𑀸 𑀇𑀥 𑀤𑁂𑀲𑀺𑀢𑀦𑀬𑀁 𑀦𑀺𑀬𑀫𑁂𑀢𑀼𑀁 ‘‘𑀇𑀫𑁂𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀼𑀤𑁆𑀥…𑀧𑁂… 𑀓𑀣𑀺𑀢𑀦𑁆𑀢𑀺 𑀉𑀧𑀭𑀺𑀫𑀕𑁆𑀕𑀁 𑀅𑀓𑀣𑁂𑀢𑁆𑀯𑀸 𑀓𑁂𑀯𑀮𑀁 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀫𑁂𑀯 𑀛𑀸𑀦𑀁 𑀓𑀣𑀺𑀢𑀁. 𑀘𑀢𑀽𑀳𑀺…𑀧𑁂… 𑀓𑀣𑀺𑀢𑀸𑀢𑀺 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀪𑀸𑀯𑁂𑀦 𑀛𑀸𑀦𑀸𑀦𑀺 𑀓𑀣𑁂𑀢𑁆𑀯𑀸 𑀢𑀢𑁄 𑀧𑀭𑀁 𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀓𑀸 𑀘𑀢𑁆𑀢𑀸𑀭𑁄𑀧𑀺 𑀫𑀕𑁆𑀕𑀸 𑀓𑀣𑀺𑀢𑀸. 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀨𑀮𑀲𑀫𑀸𑀧𑀢𑁆𑀢𑀺 𑀓𑀣𑀺𑀢𑀸𑀢𑀺 𑀧𑀞𑀫𑀚𑁆𑀛𑀸𑀦𑀺𑀓𑀸𑀤𑀺𑀓𑀸 𑀨𑀮𑀲𑀫𑀸𑀧𑀢𑁆𑀢𑀺𑀬𑁄 𑀅𑀓𑀣𑁂𑀢𑁆𑀯𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀸 𑀏𑀯 𑀨𑀮𑀲𑀫𑀸𑀧𑀢𑁆𑀢𑀺 𑀓𑀣𑀺𑀢𑀸. 𑀧𑀻𑀢𑀺𑀯𑁂𑀯𑀘𑀦𑀫𑁂𑀯 𑀓𑀢𑁆𑀯𑀸𑀢𑀺 𑀤𑁆𑀯𑀺𑀦𑁆𑀦𑀁 𑀧𑀻𑀢𑀻𑀦𑀁 𑀏𑀓𑀲𑁆𑀫𑀺𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀅𑀦𑀼𑀧𑁆𑀧𑀚𑁆𑀚𑀦𑀢𑁄 𑀧𑀸𑀫𑁄𑀚𑁆𑀚𑀁 𑀧𑀻𑀢𑀺𑀯𑁂𑀯𑀘𑀦𑀫𑁂𑀯 𑀓𑀢𑁆𑀯𑀸, 𑀢𑀤𑀼𑀪𑀬𑀁 𑀅𑀪𑁂𑀤𑀢𑁄 𑀓𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀻𑀢𑀺𑀲𑀼𑀔𑀸𑀦𑀁 𑀅𑀧𑀭𑀺𑀘𑁆𑀘𑀢𑁆𑀢𑀢𑁆𑀢𑀸, ‘‘𑀲𑀼𑀔𑁄 𑀯𑀺𑀳𑀸𑀭𑁄’’𑀢𑀺 𑀘 𑀲𑀸𑀢𑀺𑀲𑀬𑀲𑁆𑀲 𑀲𑀼𑀔𑀯𑀺𑀳𑀸𑀭𑀲𑁆𑀲 𑀕𑀳𑀺𑀢𑀢𑁆𑀢𑀸 ‘‘𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑀨𑀮𑀲𑀫𑀸𑀧𑀢𑁆𑀢𑀺 𑀦𑀸𑀫 𑀓𑀣𑀺𑀢𑀸’’𑀢𑀺 𑀯𑀼𑀢𑁆𑀢𑀁. 𑀓𑀸𑀫𑀁 𑀧𑀞𑀫𑀚𑁆𑀛𑀸𑀦𑁂𑀧𑀺 𑀧𑀻𑀢𑀺𑀲𑀼𑀔𑀸𑀦𑀺 𑀮𑀩𑁆𑀪𑀦𑁆𑀢𑀺, 𑀢𑀸𑀦𑀺 𑀧𑀦 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀭𑀺𑀓𑁆𑀔𑁄𑀪𑁂𑀦 𑀦 𑀢𑀢𑁆𑀣 𑀲𑀦𑁆𑀢𑀧𑀡𑀻𑀢𑀸𑀦𑀺, 𑀇𑀥 𑀘 𑀲𑀦𑁆𑀢𑀧𑀡𑀻𑀢𑀸𑀦𑁂𑀯 𑀅𑀥𑀺𑀧𑁆𑀧𑁂𑀢𑀸𑀦𑀺, 𑀢𑀲𑁆𑀫𑀸 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑀸 𑀏𑀯 𑀨𑀮𑀲𑀫𑀸𑀧𑀢𑁆𑀢𑀺 𑀕𑀳𑀺𑀢𑀸, 𑀦 𑀧𑀞𑀫𑀚𑁆𑀛𑀸𑀦𑀺𑀓𑀸𑀢𑀺 𑀤𑀝𑁆𑀞𑀩𑁆𑀩𑀁.

𑁪𑁩𑁨-𑁪𑁩𑁭. 𑀯𑀺𑀪𑀸𑀯𑀦𑀢𑁆𑀣𑁄𑀢𑀺 𑀧𑀓𑀸𑀲𑀦𑀢𑁆𑀣𑁄 𑀲𑀭𑀽𑀧𑀢𑁄 𑀦𑀺𑀭𑀽𑀧𑀦𑀢𑁆𑀣𑁄 ‘‘𑀦 𑀲𑀫𑀡𑁄 𑀕𑁄𑀢𑀫𑁄 𑀩𑁆𑀭𑀸𑀳𑁆𑀫𑀡𑁂 𑀚𑀺𑀡𑁆𑀡𑁂 …𑀧𑁂… 𑀅𑀪𑀺𑀯𑀸𑀤𑁂𑀢𑀺 𑀯𑀸 𑀧𑀘𑁆𑀘𑀼𑀝𑁆𑀞𑁂𑀢𑀺 𑀯𑀸 𑀆𑀲𑀦𑁂𑀦 𑀯𑀸 𑀦𑀺𑀫𑀦𑁆𑀢𑁂𑀢𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁮.𑁧𑁧; 𑀧𑀸𑀭𑀸. 𑁨) 𑀯𑀺𑀬. 𑀢𑁂𑀦𑀸𑀳 ‘‘𑀅𑀬𑀁 𑀲𑁄’’𑀢𑀺𑀆𑀤𑀺. ‘‘𑀅𑀬𑀁 𑀅𑀢𑁆𑀢𑀧𑀝𑀺𑀮𑀸𑀪𑁄 𑀲𑁄 𑀏𑀯𑀸’’𑀢𑀺 𑀏𑀯𑀁 𑀲𑀭𑀽𑀧𑀢𑁄 𑀯𑀺𑀪𑀸𑀯𑁂𑀢𑁆𑀯𑀸 𑀧𑀓𑀸𑀲𑁂𑀢𑁆𑀯𑀸. 𑀅𑀬𑀦𑁆𑀢𑀺 𑀳𑀺 𑀪𑀕𑀯𑀢𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁 𑀅𑀢𑁆𑀢𑀧𑀝𑀺𑀮𑀸𑀪𑀁 𑀆𑀲𑀦𑁆𑀦𑀧𑀘𑁆𑀘𑀓𑁆𑀔𑀪𑀸𑀯𑁂𑀦 𑀧𑀘𑁆𑀘𑀸𑀫𑀲𑀢𑀺, 𑀲𑁄𑀢𑀺 𑀧𑀦 𑀧𑀭𑁂𑀳𑀺 𑀧𑀼𑀘𑁆𑀙𑀺𑀬𑀫𑀸𑀦𑀁 𑀧𑀭𑀫𑁆𑀫𑀼𑀔𑀪𑀸𑀯𑁂𑀦. 𑀦 𑀦𑀁 𑀏𑀯𑀁 𑀯𑀤𑀸𑀫𑀸𑀢𑀺 𑀏𑀢𑁆𑀣 𑀦𑀦𑁆𑀢𑀺 𑀑𑀴𑀸𑀭𑀺𑀓𑀫𑀢𑁆𑀢𑀧𑀝𑀺𑀮𑀸𑀪𑀁. 𑀲𑀧𑁆𑀧𑀸𑀝𑀺𑀳𑀻𑀭𑀓𑀢𑀦𑁆𑀢𑀺 𑀏𑀢𑁆𑀣 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀭𑁂𑀳𑀺 𑀘𑁄𑀤𑀺𑀢𑀯𑀘𑀦𑀧𑀝𑀺𑀳𑀸𑀭𑀓𑀁 𑀲𑀉𑀢𑁆𑀢𑀭𑀯𑀘𑀦𑀁 𑀲𑀧𑁆𑀧𑀸𑀝𑀺𑀳𑀻𑀭𑀓𑀦𑁆𑀢𑀺 𑀳𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄. 𑀢𑀼𑀘𑁆𑀙𑁄𑀢𑀺 𑀫𑀼𑀲𑀸 𑀅𑀪𑀽𑀢𑁄. 𑀲𑁄𑀢𑀺 𑀫𑀦𑁄𑀫𑀬𑁄, 𑀅𑀭𑀽𑀧𑁄 𑀯𑀸 𑀅𑀢𑁆𑀢𑀧𑀝𑀺𑀮𑀸𑀪𑁄. 𑀲𑁆𑀯𑁂𑀯𑀸𑀢𑀺 𑀲𑁄 𑀏𑀯 𑀑𑀴𑀸𑀭𑀺𑀓𑁄 𑀅𑀢𑁆𑀢𑀧𑀝𑀺𑀮𑀸𑀪𑁄. 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀘𑁆𑀘𑁄 𑀳𑁄𑀢𑀻𑀢𑀺 𑀢𑀲𑁆𑀫𑀺𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀫𑀬𑁂 𑀯𑀺𑀚𑁆𑀚𑀫𑀸𑀦𑁄 𑀳𑁄𑀢𑀺. 𑀅𑀢𑁆𑀢𑀧𑀝𑀺𑀮𑀸𑀪𑁄𑀢𑁆𑀯𑁂𑀯 𑀦𑀺𑀬𑁆𑀬𑀸𑀢𑁂𑀲𑀻𑀢𑀺 𑀅𑀢𑁆𑀢𑀧𑀝𑀺𑀮𑀸𑀪𑀲𑀤𑁆𑀤𑁂𑀦 𑀢𑀣𑀸 𑀏𑀯 𑀧𑀭𑀺𑀬𑁄𑀲𑀸𑀧𑁂𑀲𑀺, 𑀦 𑀧𑀦 𑀦𑀁 ‘‘𑀅𑀢𑁆𑀢𑀧𑀝𑀺𑀮𑀸𑀪𑁄’’𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀻𑀢𑀺 𑀧𑀜𑁆𑀜𑀢𑁆𑀢𑀺𑀁 𑀲𑀭𑀽𑀧𑀢𑁄 𑀦𑀻𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀲𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀭𑀽𑀧𑀸𑀤𑀬𑁄 𑀘𑁂𑀢𑁆𑀣 𑀥𑀫𑁆𑀫𑀸𑀢𑀺 𑀭𑀽𑀧𑀯𑁂𑀤𑀦𑀸𑀤𑀬𑁄 𑀏𑀯 𑀏𑀢𑁆𑀣 𑀮𑁄𑀓𑁂 𑀲𑀪𑀸𑀯𑀥𑀫𑁆𑀫𑀸. 𑀦𑀸𑀫𑀫𑀢𑁆𑀢𑀫𑁂𑀢𑀦𑁆𑀢𑀺 𑀭𑀽𑀧𑀸𑀤𑀺𑀓𑁂 𑀧𑀜𑁆𑀘𑀓𑁆𑀔𑀦𑁆𑀥𑁂 𑀉𑀧𑀸𑀤𑀸𑀬 𑀦𑀸𑀫𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀫𑁂𑀢𑀁 ‘‘𑀅𑀢𑁆𑀢𑀧𑀝𑀺𑀮𑀸𑀪𑁄’’𑀢𑀺. 𑀏𑀯𑀭𑀽𑀧𑀸 𑀯𑁄𑀳𑀸𑀭𑀸𑀢𑀺 ‘‘𑀑𑀴𑀸𑀭𑀺𑀓𑁄 𑀅𑀢𑁆𑀢𑀧𑀝𑀺𑀮𑀸𑀪𑁄’’𑀢𑀺𑀆𑀤𑀺𑀯𑁄𑀳𑀸𑀭𑀸. 𑀦𑀸𑀫𑀧𑀜𑁆𑀜𑀢𑁆𑀢𑀺𑀯𑀲𑁂𑀦𑀸𑀢𑀺 𑀦𑀸𑀫𑀪𑀽𑀢𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀯𑀲𑁂𑀦. ‘‘𑀅𑀢𑁆𑀢𑀧𑀝𑀺𑀮𑀸𑀪𑁄’𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀻’’𑀢𑀺 𑀦𑀺𑀬𑁆𑀬𑀸𑀢𑀦𑀢𑁆𑀣𑀁.

𑁪𑁩𑁮. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸𑀢𑀺 𑀭𑀽𑀧𑀸𑀤𑀺𑀓𑁂 𑀉𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀫𑁂𑀢𑀁 𑀅𑀢𑁆𑀢𑀧𑀝𑀺𑀮𑀸𑀪𑁄𑀢𑀺 𑀇𑀫𑀫𑀢𑁆𑀣𑀁 ‘‘𑀬𑀲𑁆𑀫𑀺𑀁 𑀘𑀺𑀢𑁆𑀢 𑀲𑀫𑀬𑁂’’𑀢𑀺𑀆𑀤𑀺𑀦𑀸 𑀯𑀢𑁆𑀯𑀸. 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸𑀢𑀺 𑀬𑀣𑀸 𑀧𑀭𑁂 𑀧𑀼𑀘𑁆𑀙𑁂𑀬𑁆𑀬𑀼𑀁, 𑀢𑀣𑀸 𑀓𑀸𑀮𑀯𑀺𑀪𑀸𑀕𑀢𑁄 𑀧𑀝𑀺𑀧𑀤𑀸𑀦𑀺 𑀧𑀼𑀘𑁆𑀙𑀺𑀢𑁆𑀯𑀸. 𑀯𑀺𑀦𑀬𑀦𑀢𑁆𑀣𑀦𑁆𑀢𑀺 𑀬𑀣𑀸𑀧𑀼𑀘𑁆𑀙𑀺𑀢𑀲𑁆𑀲 𑀅𑀢𑁆𑀣𑀲𑁆𑀲 𑀜𑀸𑀧𑀦𑀯𑀲𑁂𑀦 𑀯𑀺𑀦𑀬𑀦𑀢𑁆𑀣𑀸𑀬. 𑀬𑁂 𑀢𑁂 𑀅𑀢𑀻𑀢𑀸 𑀥𑀫𑁆𑀫𑀸𑀢𑀺 𑀅𑀢𑀻𑀢𑀲𑀫𑀬𑁂 𑀅𑀢𑀻𑀢𑀢𑁆𑀢𑀧𑀝𑀺𑀮𑀸𑀪𑀲𑁆𑀲 𑀉𑀧𑀸𑀤𑀸𑀦𑀪𑀽𑀢𑀸 𑀭𑀽𑀧𑀸𑀤𑀬𑁄 𑀥𑀫𑁆𑀫𑀸. 𑀢𑁂 𑀏𑀢𑀭𑀳𑀺 𑀦𑀢𑁆𑀣𑀺 𑀦𑀺𑀭𑀼𑀤𑁆𑀥𑀢𑁆𑀢𑀸. 𑀢𑀢𑁄 𑀏𑀯 ‘‘𑀅𑀳𑁂𑀲𑀼’’𑀦𑁆𑀢𑀺 𑀲𑀗𑁆𑀔𑁆𑀬𑀁 𑀕𑀢𑀸. 𑀢𑀲𑁆𑀫𑀸𑀢𑀺 𑀉𑀧𑀸𑀤𑀸𑀦𑀲𑁆𑀲 𑀅𑀢𑀻𑀢𑀲𑁆𑀫𑀺𑀁𑀬𑁂𑀯 𑀲𑀫𑀬𑁂 𑀮𑀩𑁆𑀪𑀦𑀢𑁄. 𑀲𑁄𑀧𑀻𑀢𑀺 𑀢𑀤𑀼𑀧𑀸𑀤𑀸𑀦𑁄 𑀫𑁂 𑀅𑀢𑁆𑀢𑀧𑀝𑀺𑀮𑀸𑀪𑁄𑀧𑀺. 𑀢𑀲𑁆𑀫𑀺𑀁𑀬𑁂𑀯 𑀲𑀫𑀬𑁂𑀢𑀺 𑀅𑀢𑀻𑀢𑁂 𑀏𑀯 𑀲𑀫𑀬𑁂. 𑀲𑀘𑁆𑀘𑁄 𑀅𑀳𑁄𑀲𑀻𑀢𑀺 𑀪𑀽𑀢𑁄 𑀯𑀺𑀚𑁆𑀚𑀫𑀸𑀦𑁄 𑀯𑀺𑀬 𑀅𑀳𑁄𑀲𑀺. 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀦𑁆𑀢𑀺 𑀅𑀦𑀸𑀕𑀢𑀸𑀦𑀜𑁆𑀘𑁂𑀯𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀜𑁆𑀘 𑀭𑀽𑀧𑀸𑀤𑀺𑀥𑀫𑁆𑀫𑀸𑀦𑀁 𑀉𑀧𑀸𑀤𑀸𑀦𑀪𑀽𑀢𑀸𑀦𑀁. 𑀢𑀤𑀸 𑀅𑀪𑀸𑀯𑀸𑀢𑀺 𑀢𑀲𑁆𑀫𑀺𑀁 𑀅𑀢𑀻𑀢𑀲𑀫𑀬𑁂 𑀅𑀪𑀸𑀯𑀸 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸. 𑀢𑀤𑀼𑀧𑀸𑀤𑀸𑀦𑀪𑀽𑀢𑁄 𑀅𑀦𑀸𑀕𑀢𑁄, 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀘 𑀅𑀢𑁆𑀢𑀧𑀝𑀺𑀮𑀸𑀪𑁄 𑀢𑀲𑁆𑀫𑀺𑀁 𑀅𑀢𑀻𑀢 𑀲𑀫𑀬𑁂 𑀫𑁄𑀖𑁄 𑀢𑀼𑀘𑁆𑀙𑁄 𑀫𑀼𑀲𑀸 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀅𑀢𑁆𑀣𑀢𑁄𑀢𑀺 𑀧𑀜𑁆𑀜𑀢𑁆𑀢𑀺𑀅𑀢𑁆𑀣𑀢𑁄. 𑀦𑀸𑀫𑀫𑀢𑁆𑀢𑀫𑁂𑀯𑀸𑀢𑀺 𑀲𑀫𑀜𑁆𑀜𑀸𑀫𑀢𑁆𑀢𑀫𑁂𑀯. 𑀧𑀭𑀫𑀢𑁆𑀣𑀢𑁄 𑀅𑀦𑀼𑀧𑀮𑀩𑁆𑀪𑀫𑀸𑀦𑀢𑁆𑀢𑀸 𑀅𑀢𑁆𑀢𑀧𑀝𑀺𑀮𑀸𑀪𑀁 𑀧𑀝𑀺𑀚𑀸𑀦𑀸𑀢𑀺.

‘‘𑀏𑀲𑁂𑀯 𑀦𑀬𑁄’’𑀢𑀺 𑀇𑀫𑀺𑀦𑀸 𑀬𑁂 𑀢𑁂 𑀅𑀦𑀸𑀕𑀢𑀸 𑀥𑀫𑁆𑀫𑀸, 𑀢𑁂 𑀏𑀢𑀭𑀳𑀺 𑀦𑀢𑁆𑀣𑀺, ‘‘𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀧𑀦 𑀲𑀗𑁆𑀔𑁆𑀬𑀁 𑀕𑀢𑀸, 𑀢𑀲𑁆𑀫𑀸 𑀲𑁄𑀧𑀺 𑀫𑁂 𑀅𑀢𑁆𑀢𑀧𑀝𑀺𑀮𑀸𑀪𑁄 𑀢𑀲𑁆𑀫𑀺𑀁𑀬𑁂𑀯 𑀲𑀫𑀬𑁂 𑀲𑀘𑁆𑀘𑁄 𑀪𑀯𑀺𑀲𑁆𑀲𑀢𑀺. 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀧𑀦 𑀥𑀫𑁆𑀫𑀸𑀦𑀁 𑀢𑀤𑀸 𑀅𑀪𑀸𑀯𑀸 𑀢𑀲𑁆𑀫𑀺𑀁 𑀲𑀫𑀬𑁂 ‘‘𑀫𑁄𑀖𑁄 𑀅𑀢𑀻𑀢𑁄, 𑀫𑁄𑀖𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁄’’𑀢𑀺 𑀏𑀯𑀁 𑀅𑀢𑁆𑀣𑀢𑁄 𑀦𑀸𑀫𑀫𑀢𑁆𑀢𑀫𑁂𑀯 𑀅𑀢𑁆𑀢𑀧𑀝𑀺𑀮𑀸𑀪𑀁 𑀧𑀝𑀺𑀚𑀸𑀦𑀸𑀢𑀺. 𑀬𑁂 𑀇𑀫𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀥𑀫𑁆𑀫𑀸, 𑀢𑁂 𑀏𑀢𑀭𑀳𑀺 ‘‘𑀅𑀢𑁆𑀣𑀻’’𑀢𑀺 𑀲𑀗𑁆𑀔𑁆𑀬𑀁 𑀕𑀢𑀸, 𑀢𑀲𑁆𑀫𑀸 𑀬𑁆𑀯𑀸𑀬𑀁 𑀫𑁂 𑀅𑀢𑁆𑀢𑀧𑀝𑀺𑀮𑀸𑀪𑁄, 𑀲𑁄 𑀇𑀤𑀸𑀦𑀺 𑀲𑀘𑁆𑀘𑁄 𑀳𑁄𑀢𑀺. 𑀅𑀢𑀻𑀢𑀸𑀦𑀸𑀕𑀢𑀸𑀦𑀁 𑀧𑀦 𑀥𑀫𑁆𑀫𑀸𑀦𑀁 𑀅𑀥𑀼𑀦𑀸 𑀅𑀪𑀸𑀯𑀸 𑀏𑀢𑀭𑀳𑀺 ‘‘𑀫𑁄𑀖𑁄 𑀅𑀢𑀻𑀢𑁄, 𑀫𑁄𑀖𑁄 𑀅𑀦𑀸𑀕𑀢𑁄’’𑀢𑀺 𑀏𑀯𑀁 𑀅𑀢𑁆𑀣𑀢𑁄 𑀦𑀸𑀫𑀫𑀢𑁆𑀢𑀫𑁂𑀯 𑀅𑀢𑁆𑀢𑀧𑀝𑀺𑀮𑀸𑀪𑀁 𑀧𑀝𑀺𑀚𑀸𑀦𑀸𑀢𑀻𑀢𑀺 𑀇𑀫𑀫𑀢𑁆𑀣𑀁 𑀅𑀢𑀺𑀤𑀺𑀲𑀢𑀺.

𑁪𑁩𑁯-𑁪𑁪𑁩. 𑀲𑀁𑀲𑀦𑁆𑀤𑀺𑀢𑀼𑀦𑁆𑀢𑀺 𑀲𑀫𑀸𑀦𑁂𑀢𑀼𑀁. 𑀕𑀯𑀸𑀢𑀺 𑀕𑀸𑀯𑀺𑀢𑁄. 𑀢𑀢𑁆𑀣𑀸𑀢𑀺 𑀔𑀻𑀭𑀸𑀤𑀻𑀲𑀼 𑀧𑀜𑁆𑀘𑀕𑁄𑀭𑀲𑁂𑀲𑀼. 𑀬𑀲𑁆𑀫𑀺𑀁 𑀲𑀫𑀬𑁂 𑀔𑀻𑀭𑀁 𑀳𑁄𑀢𑀻𑀢𑀺 𑀬𑀲𑁆𑀫𑀺𑀁 𑀓𑀸𑀮𑁂 𑀪𑀽𑀢𑀼𑀧𑀸𑀤𑀸𑀬𑀲𑀜𑁆𑀜𑀺𑀢𑀁 𑀉𑀧𑀸𑀤𑀸𑀦𑀯𑀺𑀲𑁂𑀲𑀁 𑀉𑀧𑀸𑀤𑀸𑀬 𑀔𑀻𑀭𑀧𑀜𑁆𑀜𑀢𑁆𑀢𑀺 𑀳𑁄𑀢𑀺. 𑀦 𑀢𑀲𑁆𑀫𑀺𑀁…𑀧𑁂… 𑀕𑀘𑁆𑀙𑀢𑀺 𑀔𑀻𑀭𑀧𑀜𑁆𑀜𑀢𑁆𑀢𑀺𑀉𑀧𑀸𑀤𑀸𑀦𑀲𑁆𑀲 𑀪𑀽𑀢𑀼𑀧𑀸𑀤𑀸𑀬𑀭𑀽𑀧𑀲𑁆𑀲 𑀤𑀥𑀺𑀆𑀤𑀺𑀧𑀜𑁆𑀜𑀢𑁆𑀢𑀺𑀬𑀸 𑀅𑀦𑀼𑀧𑀸𑀤𑀸𑀦𑀢𑁄. 𑀧𑀝𑀺𑀦𑀺𑀬𑀢𑀯𑀢𑁆𑀣𑀼𑀓𑀸 𑀳𑀺 𑀏𑀢𑀸 𑀮𑁄𑀓𑀲𑀫𑀜𑁆𑀜𑀸. 𑀢𑁂𑀦𑀸𑀳 ‘‘𑀬𑁂 𑀥𑀫𑁆𑀫𑁂 𑀉𑀧𑀸𑀤𑀸𑀬𑀸’’𑀢𑀺𑀆𑀤𑀺. 𑀲𑀗𑁆𑀔𑀸𑀬𑀢𑀺 𑀓𑀣𑀻𑀬𑀢𑀺 𑀏𑀢𑀸𑀬𑀸𑀢𑀺 𑀲𑀗𑁆𑀔𑀸. 𑀅𑀢𑁆𑀢𑀁 𑀦𑀻𑀳𑀭𑀺𑀢𑁆𑀯𑀸 𑀉𑀘𑁆𑀘𑀦𑁆𑀢𑀺 𑀯𑀤𑀦𑁆𑀢𑀺 𑀏𑀢𑀸𑀬𑀸𑀢𑀺 𑀦𑀺𑀭𑀼𑀢𑁆𑀢𑀺. 𑀢𑀁 𑀢𑀤𑀢𑁆𑀣𑀁 𑀦𑀫𑀦𑁆𑀢𑀺 𑀲𑀢𑁆𑀢𑀸 𑀏𑀢𑁂𑀦𑀸𑀢𑀺 𑀦𑀸𑀫𑀁, 𑀢𑀣𑀸 𑀯𑁄𑀳𑀭𑀦𑁆𑀢𑀺 𑀏𑀢𑁂𑀦𑀸𑀢𑀺 𑀯𑁄𑀳𑀸𑀭𑁄, 𑀧𑀜𑁆𑀜𑀢𑁆𑀢𑀺𑀬𑁂𑀯. ‘‘𑀬𑀲𑁆𑀫𑀺𑀁 𑀲𑀫𑀬𑁂’’𑀢𑀺𑀆𑀤𑀺𑀦𑀸 𑀔𑀻𑀭𑁂 𑀯𑀼𑀢𑁆𑀢𑀦𑀬𑀁 𑀤𑀥𑀺𑀆𑀤𑀻𑀲𑀼𑀧𑀺 ‘‘𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣𑀸’’𑀢𑀺 𑀅𑀢𑀺𑀤𑀺𑀲𑀢𑀺.

𑀲𑀫𑀦𑀼𑀚𑀸𑀦𑀦𑀫𑀢𑁆𑀢𑀓𑀸𑀦𑀻𑀢𑀺 ‘‘𑀇𑀤𑀁 𑀔𑀻𑀭𑀁, 𑀇𑀤𑀁 𑀤𑀥𑀻’’𑀢𑀺𑀆𑀤𑀺𑀦𑀸 𑀢𑀸𑀤𑀺𑀲𑁂𑀲𑀼 𑀪𑀽𑀢𑀼𑀧𑀸𑀤𑀸𑀬𑀭𑀽𑀧𑀯𑀺𑀲𑁂𑀲𑁂𑀲𑀼 𑀮𑁄𑀓𑁂 𑀧𑀭𑀫𑁆𑀧𑀭𑀸𑀕𑀢𑀁 𑀧𑀜𑁆𑀜𑀢𑁆𑀢𑀺𑀁 𑀅𑀧𑁆𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀫𑀦𑀼𑀚𑀸𑀦𑀦𑀁 𑀯𑀺𑀬 𑀧𑀘𑁆𑀘𑀬𑀯𑀺𑀲𑁂𑀲𑀯𑀺𑀲𑀺𑀝𑁆𑀞𑀁 𑀭𑀽𑀧𑀸𑀤𑀺𑀔𑀦𑁆𑀥𑀲𑀫𑀽𑀳𑀁 𑀉𑀧𑀸𑀤𑀸𑀬 ‘‘𑀑𑀴𑀸𑀭𑀺𑀓𑁄 𑀅𑀢𑁆𑀢𑀧𑀝𑀺𑀮𑀸𑀪𑁄’’𑀢𑀺 𑀘 ‘‘𑀫𑀦𑁄𑀫𑀬𑁄 𑀅𑀢𑁆𑀢𑀧𑀝𑀺𑀮𑀸𑀪𑁄’’𑀢𑀺 𑀘 ‘‘𑀅𑀭𑀽𑀧𑁄 𑀅𑀢𑁆𑀢𑀧𑀝𑀺𑀮𑀸𑀪𑁄’’𑀢𑀺 𑀘 𑀢𑀣𑀸 𑀢𑀣𑀸 𑀲𑀫𑀦𑀼𑀚𑀸𑀦𑀦𑀫𑀢𑁆𑀢𑀓𑀸𑀦𑀺, 𑀦 𑀘 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑁄 𑀉𑀧𑀸𑀤𑀸𑀦𑀢𑁄 𑀅𑀜𑁆𑀜𑁄 𑀓𑁄𑀘𑀺 𑀧𑀭𑀫𑀢𑁆𑀣𑀢𑁄 𑀅𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀺𑀭𑀼𑀢𑁆𑀢𑀺𑀫𑀢𑁆𑀢𑀓𑀸𑀦𑀻𑀢𑀺 𑀲𑀤𑁆𑀤𑀦𑀺𑀭𑀼𑀢𑁆𑀢𑀺𑀬𑀸 𑀕𑀳𑀡𑀽𑀧𑀸𑀬𑀫𑀢𑁆𑀢𑀓𑀸𑀦𑀺. ‘‘𑀲𑀢𑁆𑀢𑁄 𑀨𑀲𑁆𑀲𑁄’’𑀢𑀺𑀆𑀤𑀺𑀦𑀸 𑀳𑀺 𑀲𑀤𑁆𑀤𑀕𑁆𑀕𑀳𑀡𑀼𑀢𑁆𑀢𑀭𑀓𑀸𑀮𑀁 𑀢𑀤𑀦𑀼𑀯𑀺𑀤𑁆𑀥𑀧𑀡𑁆𑀡𑀢𑁆𑀢𑀺𑀕𑁆𑀕𑀳𑀡𑀫𑀼𑀔𑁂𑀦𑁂𑀯 𑀢𑀤𑀢𑁆𑀣𑀸𑀯𑀩𑁄𑀥𑁄. 𑀢𑀣𑀸 𑀘𑀸𑀳𑀼 𑁋

‘‘𑀧𑀞𑀫𑀁 𑀲𑀤𑁆𑀤𑀁 𑀲𑁄𑀢𑁂𑀦, 𑀢𑀻𑀢𑀁 𑀤𑀼𑀢𑀺𑀬𑀘𑁂𑀢𑀲𑀸;

𑀦𑀸𑀫𑀁 𑀢𑀢𑀺𑀬𑀘𑀺𑀢𑁆𑀢𑁂𑀦, 𑀅𑀢𑁆𑀣𑀁 𑀘𑀢𑀼𑀢𑁆𑀣𑀘𑁂𑀢𑀲𑀸’’𑀢𑀺. (𑀫𑀡𑀺𑀲𑀸𑀭𑀫𑀜𑁆𑀚𑀼𑀲𑀸𑀝𑀻𑀓𑀸𑀬𑀁 𑀧𑀘𑁆𑀘𑀬𑀲𑀗𑁆𑀕𑀳𑀯𑀺𑀪𑀸𑀕𑁂𑀧𑀺);

𑀯𑀘𑀦𑀧𑀣𑀫𑀢𑁆𑀢𑀓𑀸𑀦𑀻𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀦𑀺𑀭𑀼𑀢𑁆𑀢𑀺𑀬𑁂𑀯 𑀳𑀺 𑀅𑀜𑁆𑀜𑁂𑀲𑀫𑁆𑀧𑀺 𑀤𑀺𑀝𑁆𑀞𑀸𑀦𑀼𑀕𑀢𑀺𑀫𑀸𑀧𑀚𑁆𑀚𑀦𑁆𑀢𑀸𑀦𑀁 𑀓𑀸𑀭𑀡𑀝𑁆𑀞𑁂𑀦 𑀯𑀘𑀦𑀧𑀣𑁄. 𑀯𑁄𑀳𑀸𑀭𑀫𑀢𑁆𑀢𑀓𑀸𑀦𑀻𑀢𑀺 𑀢𑀣𑀸 𑀢𑀣𑀸 𑀯𑁄𑀳𑀸𑀭𑀫𑀢𑁆𑀢𑀓𑀸𑀦𑀺. 𑀦𑀸𑀫𑀧𑀡𑁆𑀡𑀢𑁆𑀢𑀺𑀫𑀢𑁆𑀢𑀓𑀸𑀦𑀻𑀢𑀺 𑀢𑀲𑁆𑀲𑁂𑀯 𑀧𑀭𑀺𑀬𑀸𑀬𑁄, 𑀢𑀁𑀢𑀁𑀦𑀸𑀫𑀧𑀜𑁆𑀜𑀸𑀧𑀦𑀫𑀢𑁆𑀢𑀓𑀸𑀦𑀻𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀫𑁂𑀢𑀦𑁆𑀢𑀺 ‘‘𑀅𑀢𑁆𑀢𑀧𑀝𑀺𑀮𑀸𑀪𑁄’’𑀢𑀺 𑀯𑀸 ‘‘𑀲𑀢𑁆𑀢𑁄’’𑀢𑀺 𑀯𑀸 ‘‘𑀧𑁄𑀲𑁄’’𑀢𑀺 𑀯𑀸 𑀲𑀩𑁆𑀩𑀫𑁂𑀢𑀁 𑀯𑁄𑀳𑀸𑀭𑀫𑀢𑁆𑀢𑀓𑀁. 𑀓𑀲𑁆𑀫𑀸𑀢𑀺 𑀘𑁂, 𑀧𑀭𑀫𑀢𑁆𑀣𑀢𑁄 𑀅𑀦𑀼𑀧𑀮𑀩𑁆𑀪𑀦𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀼𑀜𑁆𑀜𑁄𑀢𑀺 𑀧𑀭𑀫𑀢𑁆𑀣𑀢𑁄 𑀯𑀺𑀯𑀺𑀢𑁆𑀢𑁄.

𑀬𑀚𑁆𑀚𑁂𑀯𑀁 𑀓𑀲𑁆𑀫𑀸 𑀘𑁂𑀲𑀸 𑀩𑀼𑀤𑁆𑀥𑁂𑀳𑀺𑀧𑀺 𑀯𑀼𑀘𑁆𑀘𑀢𑀻𑀢𑀺 𑀘𑁄𑀤𑀦𑀁 𑀲𑁄𑀥𑁂𑀦𑁆𑀢𑁄 ‘‘𑀩𑀼𑀤𑁆𑀥𑀸𑀦𑀁 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀲𑀫𑁆𑀫𑀼𑀢𑀺𑀬𑀸 𑀯𑁄𑀳𑀸𑀭𑀲𑁆𑀲 𑀓𑀣𑀦𑀁 𑀲𑀫𑁆𑀫𑀼𑀢𑀺𑀓𑀣𑀸. 𑀧𑀭𑀫𑀢𑁆𑀣𑀲𑁆𑀲 𑀲𑀪𑀸𑀯𑀥𑀫𑁆𑀫𑀲𑁆𑀲 𑀓𑀣𑀦𑀁 𑀧𑀭𑀫𑀢𑁆𑀣𑀓𑀣𑀸. 𑀧𑀭𑀫𑀢𑁆𑀣𑀲𑀦𑁆𑀦𑀺𑀲𑁆𑀲𑀺𑀢𑀓𑀣𑀸𑀪𑀸𑀯𑀢𑁄 𑀅𑀦𑀺𑀘𑁆𑀘𑀸𑀤𑀺𑀓𑀣𑀸𑀧𑀺 ‘‘𑀧𑀭𑀫𑀢𑁆𑀣𑀓𑀣𑀸’’𑀢𑀺 𑀯𑀼𑀢𑁆𑀢𑀸. 𑀧𑀭𑀫𑀢𑁆𑀣𑀥𑀫𑁆𑀫𑁄𑀬𑁂𑀯 𑀳𑀺 ‘‘𑀅𑀦𑀺𑀘𑁆𑀘𑁄, 𑀤𑀼𑀓𑁆𑀔𑁄’’𑀢𑀺 𑀘 𑀯𑀼𑀘𑁆𑀘𑀢𑀺, 𑀦 𑀲𑀫𑁆𑀫𑀼𑀢𑀺𑀥𑀫𑁆𑀫𑁄.

‘‘𑀅𑀦𑀺𑀘𑁆𑀘𑀸 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸, 𑀤𑀼𑀓𑁆𑀔𑀸𑀦𑀢𑁆𑀢𑀸 𑀘 𑀲𑀗𑁆𑀔𑀢𑀸;

𑀦𑀺𑀩𑁆𑀩𑀸𑀦𑀜𑁆𑀘𑁂𑀯 𑀧𑀜𑁆𑀜𑀢𑁆𑀢𑀺, 𑀅𑀦𑀢𑁆𑀢𑀸 𑀇𑀢𑀺 𑀦𑀺𑀘𑁆𑀙𑀬𑀸’’ 𑀢𑀺. (𑀧𑀭𑀺. 𑁨𑁫𑁭) 𑁋

𑀯𑀘𑀦𑀢𑁄 𑀧𑀦𑁂𑀲 ‘‘𑀅𑀦𑀢𑁆𑀢𑀸’’𑀢𑀺 𑀯𑀼𑀘𑁆𑀘𑀢𑀺, 𑀔𑀦𑁆𑀥𑀸𑀤𑀺𑀧𑀜𑁆𑀜𑀢𑁆𑀢𑀺 𑀧𑀦 𑀢𑀚𑁆𑀚𑀸𑀧𑀜𑁆𑀜𑀢𑁆𑀢𑀺 𑀯𑀺𑀬 𑀧𑀭𑀫𑀢𑁆𑀣𑀲𑀦𑁆𑀦𑀺𑀲𑁆𑀲𑀬𑀸, 𑀆𑀲𑀦𑁆𑀦𑀢𑀭𑀸 𑀘, 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀆𑀤𑀬𑁄 𑀯𑀺𑀬 𑀦 𑀤𑀽𑀭𑁂, 𑀢𑀲𑁆𑀫𑀸 𑀔𑀦𑁆𑀥𑀸𑀤𑀺𑀓𑀣𑀸𑀧𑀺 ‘‘𑀧𑀭𑀫𑀢𑁆𑀣𑀓𑀣𑀸’’𑀢𑀺 𑀯𑀼𑀢𑁆𑀢𑀸, 𑀔𑀦𑁆𑀥𑀸𑀤𑀺𑀲𑀻𑀲𑁂𑀦 𑀯𑀸 𑀢𑀤𑀼𑀧𑀸𑀤𑀸𑀦𑀲𑀪𑀸𑀯𑀥𑀫𑁆𑀫𑀸 𑀏𑀯 𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀦𑀦𑀼 𑀘 𑀲𑀪𑀸𑀯𑀥𑀫𑁆𑀫𑀸𑀧𑀺 𑀲𑀫𑁆𑀫𑀼𑀢𑀺𑀫𑀼𑀔𑁂𑀦𑁂𑀯 𑀤𑁂𑀲𑀦𑀫𑀸𑀭𑁄𑀳𑀦𑁆𑀢𑀺, 𑀦 𑀧𑀭𑀫𑀢𑁆𑀣𑀫𑀼𑀔𑁂𑀦, 𑀢𑀲𑁆𑀫𑀸 𑀲𑀩𑁆𑀩𑀸𑀧𑀺 𑀤𑁂𑀲𑀦𑀸 𑀲𑀫𑁆𑀫𑀼𑀢𑀺𑀓𑀣𑀸𑀯 𑀲𑀺𑀬𑀸𑀢𑀺? 𑀦𑀬𑀺𑀤𑀫𑁂𑀯𑀁 𑀓𑀣𑁂𑀢𑀩𑁆𑀩𑀥𑀫𑁆𑀫𑀯𑀺𑀪𑀸𑀕𑁂𑀦 𑀓𑀣𑀸𑀯𑀺𑀪𑀸𑀕𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸, 𑀦 𑀘 𑀲𑀤𑁆𑀤𑁄 𑀓𑁂𑀦𑀘𑀺 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑁂𑀦 𑀯𑀺𑀦𑀸 𑀅𑀢𑁆𑀣𑀁 𑀧𑀓𑀸𑀲𑁂𑀢𑀻𑀢𑀺.

𑀓𑀲𑁆𑀫𑀸 𑀘𑁂𑀯𑀁 𑀤𑀼𑀩𑁆𑀩𑀺𑀥𑀸 𑀩𑀼𑀤𑁆𑀥𑀸𑀦𑀁 𑀓𑀣𑀸 𑀧𑀯𑀢𑁆𑀢𑀢𑀻𑀢𑀺 𑀅𑀦𑀼𑀬𑁄𑀕𑀁 𑀓𑀸𑀭𑀡𑀯𑀺𑀪𑀸𑀯𑀦𑁂𑀦 𑀧𑀭𑀺𑀳𑀭𑀺𑀢𑀼𑀁 ‘‘𑀢𑀢𑁆𑀣 𑀬𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀢𑁆𑀣𑀁 𑀯𑀺𑀚𑀸𑀦𑀺𑀢𑀼𑀁 𑀘𑀢𑀼𑀲𑀘𑁆𑀘𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀯𑀝𑁆𑀝𑀢𑁄 𑀦𑀺𑀬𑁆𑀬𑀸𑀢𑀼𑀁 𑀅𑀭𑀳𑀢𑁆𑀢𑀲𑀗𑁆𑀔𑀸𑀢𑀁 𑀚𑀬𑀕𑁆𑀕𑀸𑀳𑀁 𑀕𑀳𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀬𑀲𑁆𑀫𑀸 𑀧𑀭𑀫𑀢𑁆𑀣𑀓𑀣𑀸𑀬 𑀏𑀯 𑀲𑀘𑁆𑀘𑀲𑀫𑁆𑀧𑀝𑀺𑀯𑁂𑀥𑁄, 𑀅𑀭𑀺𑀬𑀲𑀘𑁆𑀘𑀓𑀣𑀸 𑀘 𑀲𑀺𑀔𑀸𑀧𑁆𑀧𑀢𑁆𑀢𑀸 𑀤𑁂𑀲𑀦𑀸, 𑀢𑀲𑁆𑀫𑀸 𑀯𑀺𑀦𑁂𑀬𑁆𑀬𑀧𑀼𑀕𑁆𑀕𑀮𑀯𑀲𑁂𑀦 𑀆𑀤𑀺𑀢𑁄 𑀲𑀫𑁆𑀫𑀼𑀢𑀺𑀓𑀣𑀁 𑀓𑀣𑁂𑀦𑁆𑀢𑁄𑀧𑀺 𑀪𑀕𑀯𑀸 𑀧𑀭𑀢𑁄 𑀧𑀭𑀫𑀢𑁆𑀣𑀓𑀣𑀁𑀬𑁂𑀯 𑀓𑀣𑁂𑀢𑀻𑀢𑀺 𑀆𑀳 ‘‘𑀢𑀲𑁆𑀲𑀸’’𑀢𑀺𑀆𑀤𑀺. ‘‘𑀆𑀤𑀺𑀢𑁄𑀯 𑀲𑀫𑁆𑀫𑀼𑀢𑀺𑀓𑀣𑀁 𑀓𑀣𑁂𑀢𑀻’’𑀢𑀺 𑀳𑀺 𑀯𑀤𑀦𑁆𑀢𑁄 𑀧𑀭𑀢𑁄 𑀧𑀭𑀫𑀢𑁆𑀣𑀓𑀣𑀫𑁆𑀧𑀺 𑀓𑀣𑁂𑀢𑀻𑀢𑀺 𑀤𑀻𑀧𑁂𑀢𑀺, 𑀇𑀢𑀭𑀢𑁆𑀣 𑀧𑀦 ‘‘𑀆𑀤𑀺𑀢𑁄𑀯 𑀓𑀣𑁂𑀢𑀻’’𑀢𑀺 𑀅𑀯𑀤𑀦𑁆𑀢𑁄 𑀲𑀩𑁆𑀩𑀢𑁆𑀣𑀧𑀻𑀢𑀺. ‘‘𑀢𑀣𑀸’’𑀢𑀺𑀆𑀤𑀺𑀦𑀸 𑀓𑀣𑀸𑀤𑁆𑀯𑀬𑀓𑀣𑀦𑁂 𑀧𑀭𑀺𑀬𑀸𑀬𑀦𑁆𑀢𑀭𑀁 𑀯𑀺𑀪𑀸𑀯𑁂𑀢𑀺. 𑀩𑁄𑀥𑁂𑀢𑁆𑀯𑀸𑀢𑀺 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀢𑀣𑀸 𑀢𑀣𑀸 𑀤𑁂𑀲𑁂𑀢𑀩𑁆𑀩𑀫𑀢𑁆𑀣𑀁 𑀚𑀸𑀦𑀸𑀧𑁂𑀢𑁆𑀯𑀸, 𑀇𑀫𑀺𑀦𑀸 𑀧𑀦 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 𑁋 𑀓𑀢𑁆𑀣𑀘𑀺 𑀲𑀫𑁆𑀫𑀼𑀢𑀺𑀓𑀣𑀸𑀧𑀼𑀩𑁆𑀩𑀺𑀓𑀸 𑀧𑀭𑀫𑀢𑁆𑀣𑀓𑀣𑀸 𑀳𑁄𑀢𑀺 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑀯𑀲𑁂𑀦, 𑀓𑀢𑁆𑀣𑀘𑀺 𑀧𑀭𑀫𑀢𑁆𑀣𑀓𑀣𑀸𑀧𑀼𑀩𑁆𑀩𑀺𑀓𑀸 𑀲𑀫𑁆𑀫𑀼𑀢𑀺𑀓𑀣𑀸, 𑀇𑀢𑀺 𑀯𑀺𑀦𑁂𑀬𑁆𑀬𑀤𑀫𑁆𑀫𑀓𑀼𑀲𑀮𑀲𑁆𑀲 𑀲𑀢𑁆𑀣𑀼 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀲𑁂𑀦 𑀢𑀣𑀸 𑀢𑀣𑀸 𑀤𑁂𑀲𑀦𑀸 𑀧𑀯𑀢𑁆𑀢𑀢𑀻𑀢𑀺. 𑀲𑀩𑁆𑀩𑀢𑁆𑀣 𑀧𑀦 𑀪𑀕𑀯𑀸 𑀥𑀫𑁆𑀫𑀢𑀁 𑀅𑀯𑀺𑀚𑀳𑀦𑁆𑀢𑁄 𑀏𑀯 𑀲𑀫𑁆𑀫𑀼𑀢𑀺𑀫𑀦𑀼𑀯𑀢𑁆𑀢𑀢𑀺, 𑀲𑀫𑁆𑀫𑀼𑀢𑀺𑀁 𑀅𑀧𑀭𑀺𑀘𑁆𑀘𑀚𑀦𑁆𑀢𑁄𑀬𑁂𑀯 𑀥𑀫𑁆𑀫𑀢𑀁 𑀯𑀺𑀪𑀸𑀯𑁂𑀢𑀺, 𑀦𑀁 𑀢𑀢𑁆𑀣 𑀅𑀪𑀺𑀦𑀺𑀯𑁂𑀲𑀸𑀢𑀺𑀥𑀸𑀯𑀦𑀸𑀦𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀚𑀦𑀧𑀤𑀦𑀺𑀭𑀼𑀢𑁆𑀢𑀺𑀁 𑀦𑀸𑀪𑀺𑀦𑀺𑀯𑀺𑀲𑁂𑀬𑁆𑀬, 𑀲𑀫𑀜𑁆𑀜𑀁 𑀦𑀸𑀢𑀺𑀥𑀸𑀯𑁂𑀬𑁆𑀬𑀸’’𑀢𑀺 (𑀤𑀻. 𑀦𑀺. 𑀝𑀻. 𑁧.𑁪𑁩𑁯-𑁪𑁪𑁩).

𑀧𑀞𑀫𑀁 𑀲𑀫𑁆𑀫𑀼𑀢𑀺𑀓𑀣𑀸𑀓𑀣𑀦𑀁 𑀧𑀦 𑀯𑁂𑀦𑁂𑀬𑁆𑀬𑀯𑀲𑁂𑀦 𑀬𑁂𑀪𑀼𑀬𑁆𑀬𑁂𑀦 𑀩𑀼𑀤𑁆𑀥𑀸𑀦𑀫𑀸𑀘𑀺𑀡𑁆𑀡𑀦𑁆𑀢𑀺 𑀢𑀁 𑀓𑀸𑀭𑀡𑁂𑀦 𑀲𑀤𑁆𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀓𑀢𑀺𑀬𑀸 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀮𑀽𑀔𑀸𑀓𑀸𑀭𑀸𑀢𑀺 𑀯𑁂𑀦𑁂𑀬𑁆𑀬𑀸𑀦𑀫𑀦𑀪𑀺𑀲𑀫𑁆𑀩𑀼𑀚𑁆𑀛𑀦𑀯𑀲𑁂𑀦 𑀮𑀽𑀔𑀲𑀤𑀺𑀲𑀸. 𑀦𑀦𑀼 𑀘 𑀲𑀫𑁆𑀫𑀼𑀢𑀺 𑀦𑀸𑀫 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀅𑀪𑀽𑀢𑀸, 𑀢𑀁 𑀓𑀣𑀁 𑀩𑀼𑀤𑁆𑀥𑀸 𑀓𑀣𑁂𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀫𑁆𑀫𑀼𑀢𑀺𑀓𑀣𑀁 𑀓𑀣𑁂𑀦𑁆𑀢𑀸𑀧𑀻’’𑀢𑀺𑀆𑀤𑀺. 𑀲𑀘𑁆𑀘𑀫𑁂𑀯𑀸𑀢𑀺 𑀢𑀣𑀫𑁂𑀯. 𑀲𑀪𑀸𑀯𑀫𑁂𑀯𑀸𑀢𑀺 𑀲𑀫𑁆𑀫𑀼𑀢𑀺𑀪𑀸𑀯𑁂𑀦 𑀢𑀁𑀲𑀪𑀸𑀯𑀫𑁂𑀯. 𑀢𑁂𑀦𑀸𑀳 ‘‘𑀅𑀫𑀼𑀲𑀸𑀯𑀸’’𑀢𑀺. 𑀧𑀭𑀫𑀢𑁆𑀣𑀲𑁆𑀲 𑀧𑀦 𑀲𑀘𑁆𑀘𑀸𑀤𑀺𑀪𑀸𑀯𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺.

𑀓𑁄 𑀧𑀦𑀺𑀫𑁂𑀲𑀁 𑀲𑀫𑁆𑀫𑀼𑀢𑀺𑀧𑀭𑀫𑀢𑁆𑀣𑀥𑀫𑁆𑀫𑀸𑀦𑀁 𑀯𑀺𑀲𑁂𑀲𑁄𑀢𑀺? 𑀬𑀲𑁆𑀫𑀺𑀁 𑀪𑀺𑀦𑁆𑀦𑁂, 𑀩𑀼𑀤𑁆𑀥𑀺𑀬𑀸 𑀯𑀸 𑀅𑀯𑀬𑀯𑀯𑀺𑀦𑀺𑀩𑁆𑀪𑁄𑀕𑁂 𑀓𑀢𑁂 𑀦 𑀢𑀁𑀲𑀜𑁆𑀜𑀸, 𑀲𑁄 𑀖𑀝𑀧𑀝𑀸𑀤𑀺𑀧𑁆𑀧𑀪𑁂𑀤𑁄 𑀲𑀫𑁆𑀫𑀼𑀢𑀺, 𑀢𑀩𑁆𑀩𑀺𑀧𑀭𑀺𑀬𑀸𑀬𑀢𑁄 𑀧𑀭𑀫𑀢𑁆𑀣𑁄. 𑀦 𑀳𑀺 𑀓𑀓𑁆𑀔𑀴𑀨𑀼𑀲𑀦𑀸𑀤𑀺𑀲𑀪𑀸𑀯𑁂 𑀅𑀬𑀁 𑀦𑀬𑁄 𑀮𑀩𑁆𑀪𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀯𑀼𑀢𑁆𑀢𑀦𑀬𑁂𑀦 𑀲𑀫𑁆𑀫𑀼𑀢𑀺 𑀘 𑀲𑀘𑁆𑀘𑀲𑀪𑀸𑀯𑀸 𑀏𑀯𑀸𑀢𑀺 𑀆𑀳 ‘‘𑀤𑀼𑀯𑁂 𑀲𑀘𑁆𑀘𑀸𑀦𑀺 𑀅𑀓𑁆𑀔𑀸𑀲𑀻’’𑀢𑀺𑀆𑀤𑀺. 𑀢𑀢𑁆𑀣 𑀤𑀼𑀯𑁂 𑀲𑀘𑁆𑀘𑀸𑀦𑀺 𑀅𑀓𑁆𑀔𑀸𑀲𑀻𑀢𑀺 𑀦𑀸𑀦𑀸𑀤𑁂𑀲𑀪𑀸𑀲𑀸𑀓𑀼𑀲𑀮𑁄 𑀢𑀺𑀡𑁆𑀡𑀁 𑀯𑁂𑀤𑀸𑀦𑀫𑀢𑁆𑀣𑀲𑀁𑀯𑀡𑁆𑀡𑀦𑀓𑁄 𑀆𑀘𑀭𑀺𑀬𑁄 𑀯𑀺𑀬 𑀦𑀸𑀦𑀸𑀯𑀺𑀥𑀲𑀫𑁆𑀫𑀼𑀢𑀺𑀧𑀭𑀫𑀢𑁆𑀣𑀓𑀼𑀲𑀮𑁄 𑀪𑀕𑀯𑀸 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀤𑀼𑀯𑁂𑀬𑁂𑀯 𑀲𑀘𑁆𑀘𑀸𑀦𑀺 𑀅𑀓𑁆𑀔𑀸𑀲𑀻𑀢𑀺 𑀅𑀢𑁆𑀣𑁄. 𑀢𑀁 𑀲𑀭𑀽𑀧𑀢𑁄, 𑀧𑀭𑀺𑀫𑀸𑀡𑀢𑁄 𑀘 𑀤𑀲𑁆𑀲𑁂𑀢𑀺 ‘‘𑀲𑀫𑁆𑀫𑀼𑀢𑀺𑀁 𑀧𑀭𑀫𑀢𑁆𑀣𑀜𑁆𑀘, 𑀢𑀢𑀺𑀬𑀁 𑀦𑀽𑀧𑀮𑀩𑁆𑀪𑀢𑀻’’𑀢𑀺 𑀇𑀫𑀺𑀦𑀸. 𑀯𑀤𑀢𑀁 𑀯𑀭𑁄𑀢𑀺 𑀲𑀩𑁆𑀩𑁂𑀲𑀁 𑀯𑀤𑀦𑁆𑀢𑀸𑀦𑀁 𑀯𑀭𑁄. 𑀮𑁄𑀓𑀲𑀗𑁆𑀓𑁂𑀢𑀫𑀢𑁆𑀢𑀲𑀺𑀤𑁆𑀥𑀸 𑀲𑀫𑁆𑀫𑀼𑀢𑀺. 𑀧𑀭𑀫𑁄 𑀉𑀢𑁆𑀢𑀫𑁄 𑀅𑀯𑀺𑀧𑀭𑀻𑀢𑁄 𑀬𑀣𑀸𑀪𑀽𑀢𑀲𑀪𑀸𑀯𑁄 𑀧𑀭𑀫𑀢𑁆𑀣𑁄.

𑀇𑀤𑀸𑀦𑀺 𑀦𑁂𑀲𑀁 𑀲𑀘𑁆𑀘𑀲𑀪𑀸𑀯𑀁 𑀲𑀳 𑀓𑀸𑀭𑀡𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀲𑀗𑁆𑀓𑁂𑀢𑀯𑀘𑀦’’𑀦𑁆𑀢𑀺 𑀕𑀸𑀣𑀸 𑀯𑀼𑀢𑁆𑀢𑀸. 𑀬𑀲𑁆𑀫𑀸 𑀮𑁄𑀓𑀲𑀫𑁆𑀫𑀼𑀢𑀺𑀓𑀸𑀭𑀡𑀁, 𑀢𑀲𑁆𑀫𑀸 𑀲𑀗𑁆𑀓𑁂𑀢𑀯𑀘𑀦𑀁 𑀲𑀘𑁆𑀘𑀁, 𑀬𑀲𑁆𑀫𑀸 𑀘 𑀥𑀫𑁆𑀫𑀸𑀦𑀁 𑀪𑀽𑀢𑀮𑀓𑁆𑀔𑀡𑀁, 𑀢𑀲𑁆𑀫𑀸 𑀧𑀭𑀫𑀢𑁆𑀣𑀯𑀘𑀦𑀁 𑀲𑀘𑁆𑀘𑀦𑁆𑀢𑀺 𑀬𑁄𑀚𑀦𑀸. 𑀮𑁄𑀓𑀲𑀫𑁆𑀫𑀼𑀢𑀺𑀓𑀸𑀭𑀡𑀦𑁆𑀢𑀺 𑀳𑀺 𑀲𑀗𑁆𑀓𑁂𑀢𑀯𑀘𑀦𑀲𑁆𑀲 𑀲𑀘𑁆𑀘𑀪𑀸𑀯𑁂 𑀓𑀸𑀭𑀡𑀤𑀲𑁆𑀲𑀦𑀁, 𑀮𑁄𑀓𑀲𑀺𑀤𑁆𑀥𑀸 𑀲𑀫𑁆𑀫𑀼𑀢𑀺 𑀲𑀗𑁆𑀓𑁂𑀢𑀯𑀘𑀦𑀲𑁆𑀲 𑀅𑀯𑀺𑀲𑀁𑀯𑀸𑀤𑀦𑀢𑀸𑀬 𑀓𑀸𑀭𑀡𑀦𑁆𑀢𑀺 𑀅𑀢𑁆𑀣𑁄, 𑀯𑀺𑀲𑀁𑀯𑀸𑀤𑀦𑀸𑀪𑀸𑀯𑀢𑁄 𑀲𑀗𑁆𑀓𑁂𑀢𑀯𑀘𑀦𑀁 𑀲𑀘𑁆𑀘𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀥𑀫𑁆𑀫𑀸𑀦𑀁 𑀪𑀽𑀢𑀮𑀓𑁆𑀔𑀡𑀦𑁆𑀢𑀺 𑀘 𑀧𑀭𑀫𑀢𑁆𑀣𑀯𑀘𑀦𑀲𑁆𑀲 𑀲𑀘𑁆𑀘𑀪𑀸𑀯𑁂 𑀓𑀸𑀭𑀡𑀤𑀲𑁆𑀲𑀦𑀁. 𑀲𑀪𑀸𑀯𑀥𑀫𑁆𑀫𑀸𑀦𑀁 𑀬𑁄 𑀪𑀽𑀢𑁄 𑀅𑀯𑀺𑀧𑀭𑀻𑀢𑁄 𑀲𑀪𑀸𑀯𑁄, 𑀢𑀲𑁆𑀲 𑀮𑀓𑁆𑀔𑀡𑀁 𑀅𑀗𑁆𑀕𑀦𑀁 𑀜𑀸𑀧𑀦𑀦𑁆𑀢𑀺 𑀅𑀢𑁆𑀣𑁄, 𑀬𑀸𑀣𑀸𑀯𑀢𑁄 𑀅𑀯𑀺𑀲𑀁𑀯𑀸𑀤𑀦𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 𑀧𑀭𑀫𑀢𑁆𑀣𑀯𑀘𑀦𑀁 𑀲𑀘𑁆𑀘𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀦𑀗𑁆𑀕𑀡𑀲𑀼𑀢𑁆𑀢𑀝𑀻𑀓𑀸𑀬𑀁 𑀧𑀦 𑀆𑀘𑀭𑀺𑀬𑁂𑀦𑁂𑀯 𑀦𑀺𑀲𑁆𑀲𑀓𑁆𑀓𑀯𑀘𑀦𑁂𑀦 𑀧𑀤𑀫𑀼𑀮𑁆𑀮𑀺𑀗𑁆𑀕𑁂𑀢𑁆𑀯𑀸 ‘‘𑀮𑁄𑀓𑀲𑀫𑁆𑀫𑀼𑀢𑀺𑀓𑀸𑀭𑀡𑀸𑀢𑀺 𑀮𑁄𑀓𑀲𑀫𑀜𑁆𑀜𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀦𑀢𑁄. 𑀥𑀫𑁆𑀫𑀸𑀦𑀦𑁆𑀢𑀺 𑀲𑀪𑀸𑀯𑀥𑀫𑁆𑀫𑀸𑀦𑀁. 𑀪𑀽𑀢𑀓𑀸𑀭𑀡𑀸𑀢𑀺 𑀬𑀣𑀸𑀪𑀽𑀢𑀲𑀪𑀸𑀯𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀦𑀢𑁄’’𑀢𑀺 𑀯𑀼𑀢𑁆𑀢𑀁.

𑀅𑀜𑁆𑀜𑀢𑁆𑀣 𑀧𑀦 𑁋

‘‘𑀢𑀲𑁆𑀫𑀸 𑀯𑁄𑀳𑀭𑀓𑀼𑀲𑀮𑀲𑁆𑀲, 𑀮𑁄𑀓𑀦𑀸𑀣𑀲𑁆𑀲 𑀲𑀢𑁆𑀣𑀼𑀦𑁄;

𑀲𑀫𑁆𑀫𑀼𑀢𑀺𑀁 𑀯𑁄𑀳𑀭𑀦𑁆𑀢𑀲𑁆𑀲, 𑀫𑀼𑀲𑀸𑀯𑀸𑀤𑁄 𑀦 𑀚𑀸𑀬𑀢𑀻’’𑀢𑀺. (𑀫. 𑀦𑀺. 𑀅𑀝𑁆𑀞. 𑁧.𑁫𑁭; 𑀅. 𑀦𑀺. 𑀅𑀝𑁆𑀞. 𑁧.𑁧𑁭𑁦; 𑀇𑀢𑀺𑀯𑀼. 𑀅𑀝𑁆𑀞. 𑁨𑁪) 𑁋

𑀅𑀬𑀫𑁆𑀧𑀺 𑀕𑀼𑀡𑀧𑀭𑀺𑀤𑀻𑀧𑀦𑀻 𑀕𑀸𑀣𑀸 𑀤𑀺𑀲𑁆𑀲𑀢𑀺. 𑀢𑀢𑁆𑀣 𑀢𑀲𑁆𑀫𑀸𑀢𑀺 𑀲𑀘𑁆𑀘𑀲𑁆𑀲 𑀤𑀼𑀯𑀺𑀥𑀢𑁆𑀢𑀸, 𑀲𑀗𑁆𑀓𑁂𑀢𑀯𑀘𑀦𑀲𑁆𑀲 𑀯𑀸 𑀲𑀘𑁆𑀘𑀪𑀸𑀯𑀢𑁄. 𑀲𑀫𑁆𑀫𑀼𑀢𑀺𑀁 𑀯𑁄𑀳𑀭𑀦𑁆𑀢𑀲𑁆𑀲𑀸𑀢𑀺 ‘‘𑀧𑀼𑀕𑁆𑀕𑀮𑁄 𑀲𑀢𑁆𑀢𑁄’’𑀢𑀺𑀆𑀤𑀺𑀦𑀸 𑀮𑁄𑀓𑀲𑀫𑀜𑁆𑀜𑀁 𑀓𑀣𑁂𑀦𑁆𑀢𑀲𑁆𑀲 𑀫𑀼𑀲𑀸𑀯𑀸𑀤𑁄 𑀦𑀸𑀫 𑀦 𑀚𑀸𑀬𑀢𑀻𑀢𑀺 𑀅𑀢𑁆𑀣𑁄. 𑀅𑀧𑀺𑀘 ‘‘𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀺 𑀪𑀕𑀯𑀸 𑀧𑀼𑀕𑁆𑀕𑀮 𑀓𑀣𑀁 𑀓𑀣𑁂𑀢𑀺 𑀳𑀺𑀭𑁄𑀢𑁆𑀢𑀧𑁆𑀧𑀤𑀻𑀧𑀦𑀢𑁆𑀣𑀁, 𑀓𑀫𑁆𑀫𑀲𑁆𑀲𑀓𑀢𑀸𑀤𑀻𑀧𑀦𑀢𑁆𑀣𑀁, 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑀤𑀻𑀧𑀦𑀢𑁆𑀣𑀁, 𑀆𑀦𑀦𑁆𑀢𑀭𑀺𑀬𑀤𑀻𑀧𑀦𑀢𑁆𑀣𑀁, 𑀩𑁆𑀭𑀳𑁆𑀫𑀯𑀺𑀳𑀸𑀭𑀤𑀻𑀧𑀦𑀢𑁆𑀣𑀁, 𑀧𑀼𑀩𑁆𑀩𑁂𑀦𑀺𑀯𑀸𑀲𑀤𑀻𑀧𑀦𑀢𑁆𑀣𑀁, 𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺𑀤𑀻𑀧𑀦𑀢𑁆𑀣𑀁, 𑀮𑁄𑀓𑀲𑀫𑁆𑀫𑀼𑀢𑀺𑀬𑀸 𑀅𑀧𑁆𑀧𑀳𑀸𑀦𑀢𑁆𑀣𑀜𑁆𑀘𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑀅𑀝𑁆𑀞. 𑁧.𑁫𑁭; 𑀅. 𑀦𑀺. 𑀅𑀝𑁆𑀞. 𑁧.𑁧𑁭𑁦; 𑀇𑀢𑀺𑀯𑀼. 𑀅𑀝𑁆𑀞. 𑁨𑁪; 𑀓𑀣𑀸. 𑀅𑀦𑀼𑀝𑀻. 𑁧) 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀓𑀸𑀭𑀡𑀫𑁆𑀧𑀺 𑀆𑀳𑀭𑀺𑀢𑁆𑀯𑀸 𑀇𑀥 𑀯𑀢𑁆𑀢𑀩𑁆𑀩𑀁.

𑀬𑀤𑀺 𑀢𑀣𑀸𑀕𑀢𑁄 𑀧𑀭𑀫𑀢𑁆𑀣𑀲𑀘𑁆𑀘𑀁 𑀲𑀫𑁆𑀫𑀤𑁂𑀯 𑀅𑀪𑀺𑀲𑀫𑁆𑀩𑀼𑀚𑁆𑀛𑀺𑀢𑁆𑀯𑀸 𑀞𑀺𑀢𑁄𑀧𑀺 𑀮𑁄𑀓𑀲𑀫𑀜𑁆𑀜𑀸𑀪𑀽𑀢𑀁 𑀲𑀫𑁆𑀫𑀼𑀢𑀺𑀲𑀘𑁆𑀘𑀁 𑀕𑀳𑁂𑀢𑁆𑀯𑀸𑀯 𑀯𑀤𑀢𑀺, 𑀏𑀯𑀜𑁆𑀘𑁂𑀢𑁆𑀣 𑀓𑁄 𑀮𑁄𑀓𑀺𑀬𑀫𑀳𑀸𑀚𑀦𑁂𑀳𑀺 𑀯𑀺𑀲𑁂𑀲𑁄𑀢𑀺 𑀯𑀼𑀢𑁆𑀢𑀁 ‘‘𑀬𑀸𑀳𑀻’’𑀢𑀺𑀆𑀤𑀺, 𑀅𑀬𑀁 𑀧𑀸𑀴𑀺𑀬𑀁 𑀲𑀫𑁆𑀩𑀦𑁆𑀥𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀮𑁄𑀓𑀺𑀬𑀫𑀳𑀸𑀚𑀦𑁄 𑀅𑀧𑁆𑀧𑀳𑀻𑀦𑀧𑀭𑀸𑀫𑀸𑀲𑀢𑁆𑀢𑀸 ‘‘𑀏𑀢𑀁 𑀫𑀫𑀸’’𑀢𑀺𑀆𑀤𑀺𑀦𑀸 𑀧𑀭𑀸𑀫𑀲𑀦𑁆𑀢𑁄 𑀯𑁄𑀳𑀭𑀢𑀺. 𑀢𑀣𑀸𑀕𑀢𑁄 𑀧𑀦 𑀲𑀩𑁆𑀩𑀲𑁄 𑀧𑀳𑀻𑀦𑀧𑀭𑀸𑀫𑀸𑀲𑀢𑁆𑀢𑀸 𑀅𑀧𑀭𑀸𑀫𑀲𑀦𑁆𑀢𑁄𑀯 𑀬𑀲𑁆𑀫𑀸 𑀮𑁄𑀓𑀲𑀫𑀜𑁆𑀜𑀸𑀳𑀺 𑀯𑀺𑀦𑀸 𑀮𑁄𑀓𑀺𑀬𑁄 𑀅𑀢𑁆𑀣𑁄 𑀮𑁄𑀓𑁂𑀦 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑁄, 𑀢𑀲𑁆𑀫𑀸 𑀢𑀸𑀳𑀺 𑀢𑀁 𑀯𑁄𑀳𑀭𑀢𑀺. 𑀢𑀣𑀸 𑀯𑁄𑀳𑀭𑀦𑁆𑀢𑁄 𑀘 𑀅𑀢𑁆𑀢𑀦𑁄 𑀤𑁂𑀲𑀦𑀸𑀯𑀺𑀮𑀸𑀲𑁂𑀦 𑀯𑁂𑀦𑁂𑀬𑁆𑀬𑀲𑀢𑁆𑀢𑁂 𑀧𑀭𑀫𑀢𑁆𑀣𑀲𑀘𑁆𑀘𑁂 𑀧𑀢𑀺𑀝𑁆𑀞𑀸𑀧𑁂𑀢𑀻𑀢𑀺. 𑀤𑁂𑀲𑀦𑀁 𑀯𑀺𑀦𑀺𑀯𑀝𑁆𑀝𑁂𑀢𑁆𑀯𑀸𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀬 𑀤𑀺𑀝𑁆𑀞𑀸𑀪𑀺𑀦𑀺𑀯𑁂𑀲𑀧𑀝𑀺𑀲𑀜𑁆𑀜𑀼𑀢𑁆𑀢𑀸𑀬 𑀯𑀝𑁆𑀝𑀓𑀣𑀸𑀬 𑀯𑀺𑀦𑀺𑀯𑀢𑁆𑀢𑁂𑀢𑁆𑀯𑀸 𑀯𑀺𑀯𑁂𑀘𑁂𑀢𑁆𑀯𑀸. 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀦𑀺𑀝𑁆𑀞𑀸𑀧𑁂𑀲𑀻𑀢𑀺 ‘‘𑀅𑀧𑀭𑀸𑀫𑀲’’𑀦𑁆𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀢𑀡𑁆𑀳𑀸𑀫𑀸𑀦𑀧𑀭𑀸𑀫𑀸𑀲𑀧𑁆𑀧𑀳𑀸𑀦𑀓𑀺𑀢𑁆𑀢𑀦𑁂𑀦 𑀢𑀧𑁆𑀧𑀳𑀸𑀬𑀓𑀅𑀭𑀳𑀢𑁆𑀢𑀲𑀗𑁆𑀔𑀸𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀧𑀭𑀺𑀬𑁄𑀲𑀸𑀧𑁂𑀲𑀺. 𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀢𑁄 𑀦 𑀯𑀺𑀪𑀢𑁆𑀢𑀁, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀇𑀢𑀺 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬 𑀧𑀭𑀫𑀲𑀼𑀔𑀼𑀫𑀕𑀫𑁆𑀪𑀻𑀭𑀤𑀼𑀭𑀦𑀼𑀩𑁄𑀥𑀢𑁆𑀣𑀧𑀭𑀺𑀤𑀻𑀧𑀦𑀸𑀬 𑀲𑀼𑀯𑀺𑀫𑀮𑀯𑀺𑀧𑀼𑀮𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀚𑀦𑀦𑀸𑀬 𑀲𑀸𑀥𑀼𑀯𑀺𑀮𑀸𑀲𑀺𑀦𑀺𑀬𑀸 𑀦𑀸𑀫 𑀮𑀻𑀦𑀢𑁆𑀣𑀧𑀓𑀸𑀲𑀦𑀺𑀬𑀸 𑀧𑁄𑀝𑁆𑀞𑀧𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑀓𑀸𑀲𑀦𑀸.

𑀧𑁄𑀝𑁆𑀞𑀧𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.