𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀤𑀻𑀖𑀦𑀺𑀓𑀸𑀬𑁂

𑀲𑀻𑀮𑀓𑁆𑀔𑀦𑁆𑀥𑀯𑀕𑁆𑀕𑀅𑀪𑀺𑀦𑀯𑀝𑀻𑀓𑀸

𑀕𑀦𑁆𑀣𑀸𑀭𑀫𑁆𑀪𑀓𑀣𑀸

𑀬𑁄 𑀤𑁂𑀲𑁂𑀢𑁆𑀯𑀸𑀦 𑀲𑀤𑁆𑀥𑀫𑁆𑀫𑀁, 𑀕𑀫𑁆𑀪𑀻𑀭𑀁 𑀤𑀼𑀤𑁆𑀤𑀲𑀁 𑀯𑀭𑀁;

𑀤𑀻𑀖𑀤𑀲𑁆𑀲𑀻 𑀘𑀺𑀭𑀁 𑀓𑀸𑀮𑀁, 𑀧𑀢𑀺𑀝𑁆𑀞𑀸𑀧𑁂𑀲𑀺 𑀲𑀸𑀲𑀦𑀁.𑁧.

𑀯𑀺𑀦𑁂𑀬𑁆𑀬𑀚𑁆𑀛𑀸𑀲𑀬𑁂 𑀙𑁂𑀓𑀁, 𑀫𑀳𑀸𑀫𑀢𑀺𑀁 𑀫𑀳𑀸𑀤𑀬𑀁;

𑀦𑀢𑁆𑀯𑀸𑀦 𑀢𑀁 𑀲𑀲𑀤𑁆𑀥𑀫𑁆𑀫𑀕𑀡𑀁 𑀕𑀸𑀭𑀯𑀪𑀸𑀚𑀦𑀁.𑁨.

𑀲𑀗𑁆𑀕𑀻𑀢𑀺𑀢𑁆𑀢𑀬𑀫𑀸𑀭𑀼𑀴𑁆𑀳𑀸, 𑀤𑀻𑀖𑀸𑀕𑀫𑀯𑀭𑀲𑁆𑀲 𑀬𑀸;

𑀲𑀁𑀯𑀡𑁆𑀡𑀦𑀸 𑀬𑀸 𑀘 𑀢𑀲𑁆𑀲𑀸, 𑀯𑀡𑁆𑀡𑀦𑀸 𑀲𑀸𑀥𑀼𑀯𑀡𑁆𑀡𑀺𑀢𑀸. 𑁩.

𑀆𑀘𑀭𑀺𑀬𑀥𑀫𑁆𑀫𑀧𑀸𑀮- 𑀢𑁆𑀣𑁂𑀭𑁂𑀦𑁂𑀯𑀸𑀪𑀺𑀲𑀗𑁆𑀔𑀢𑀸;

𑀲𑀫𑁆𑀫𑀸 𑀦𑀺𑀧𑀼𑀡𑀕𑀫𑁆𑀪𑀻𑀭-𑀤𑀼𑀤𑁆𑀤𑀲𑀢𑁆𑀣𑀧𑁆𑀧𑀓𑀸𑀲𑀦𑀸.𑁪.

𑀓𑀸𑀫𑀜𑁆𑀘 𑀲𑀸 𑀢𑀣𑀸𑀪𑀽𑀢𑀸, 𑀧𑀭𑀫𑁆𑀧𑀭𑀸𑀪𑀢𑀸 𑀧𑀦;

𑀧𑀸𑀞𑀢𑁄 𑀅𑀢𑁆𑀣𑀢𑁄 𑀘𑀸𑀧𑀺, 𑀩𑀳𑀼𑀧𑁆𑀧𑀫𑀸𑀤𑀮𑁂𑀔𑀦𑀸.𑁫.

𑀲𑀗𑁆𑀔𑁂𑀧𑀢𑁆𑀢𑀸 𑀘 𑀲𑁄𑀢𑀽𑀳𑀺, 𑀲𑀫𑁆𑀫𑀸 𑀜𑀸𑀢𑀼𑀁 𑀲𑀼𑀤𑀼𑀓𑁆𑀓𑀭𑀸;

𑀢𑀲𑁆𑀫𑀸 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁, 𑀬𑀸𑀘𑀦𑀁 𑀲𑀫𑀦𑀼𑀲𑁆𑀲𑀭𑀁.𑁬.

𑀬𑁄’𑀦𑁂𑀓𑀲𑁂𑀢𑀦𑀸𑀕𑀺𑀦𑁆𑀤𑁄, 𑀭𑀸𑀚𑀸 𑀦𑀸𑀦𑀸𑀭𑀝𑁆𑀞𑀺𑀲𑁆𑀲𑀭𑁄;

𑀲𑀸𑀲𑀦𑀲𑁄𑀥𑀦𑁂 𑀤𑀴𑁆𑀳𑀁, 𑀲𑀤𑀸 𑀉𑀲𑁆𑀲𑀸𑀳𑀫𑀸𑀦𑀲𑁄.𑁭.

𑀢𑀁 𑀦𑀺𑀲𑁆𑀲𑀸𑀬 ‘‘𑀫𑀫𑁂𑀲𑁄𑀧𑀺, 𑀲𑀢𑁆𑀣𑀼𑀲𑀸𑀲𑀦𑀚𑁄𑀢𑀦𑁂;

𑀅𑀧𑁆𑀧𑁂𑀯 𑀦𑀸𑀫𑀼𑀧𑀢𑁆𑀣𑀫𑁆𑀪𑁄, 𑀪𑀯𑁂𑀬𑁆𑀬𑀸’’𑀢𑀺 𑀯𑀺𑀘𑀺𑀦𑁆𑀢𑀬𑀁.𑁮.

𑀯𑀡𑁆𑀡𑀦𑀁 𑀆𑀭𑀪𑀺𑀲𑁆𑀲𑀸𑀫𑀺, 𑀲𑀸𑀥𑀺𑀧𑁆𑀧𑀸𑀬𑀫𑀳𑀸𑀧𑀬𑀁;

𑀅𑀢𑁆𑀣𑀁 𑀢𑀫𑀼𑀧𑀦𑀺𑀲𑁆𑀲𑀸𑀬, 𑀅𑀜𑁆𑀜𑀜𑁆𑀘𑀸𑀧𑀺 𑀬𑀣𑀸𑀭𑀳𑀁.𑁯.

𑀘𑀓𑁆𑀓𑀸𑀪𑀺𑀯𑀼𑀟𑁆𑀠𑀺𑀓𑀸𑀫𑀸𑀦𑀁, 𑀥𑀻𑀭𑀸𑀦𑀁 𑀘𑀺𑀢𑁆𑀢𑀢𑁄𑀲𑀦𑀁;

𑀲𑀸𑀥𑀼𑀯𑀺𑀮𑀸𑀲𑀺𑀦𑀺𑀁 𑀦𑀸𑀫, 𑀢𑀁 𑀲𑀼𑀡𑀸𑀣 𑀲𑀫𑀸𑀳𑀺𑀢𑀸𑀢𑀺. 𑁧𑁦.

𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸

𑀦𑀸𑀦𑀸𑀦𑀬𑀦𑀺𑀧𑀼𑀡𑀕𑀫𑁆𑀪𑀻𑀭𑀯𑀺𑀘𑀺𑀢𑁆𑀭𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀲𑁆𑀲 𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑀲𑀁𑀯𑀡𑁆𑀡𑀺𑀢𑀲𑁆𑀲 𑀲𑀤𑁆𑀥𑀸𑀯𑀳𑀕𑀼𑀡𑀲𑀫𑁆𑀧𑀦𑁆𑀦𑀲𑁆𑀲 𑀤𑀻𑀖𑀸𑀕𑀫𑀯𑀭𑀲𑁆𑀲 𑀕𑀫𑁆𑀪𑀻𑀭𑀤𑀼𑀭𑀦𑀼𑀩𑁄𑀥𑀢𑁆𑀣𑀤𑀻𑀧𑀓𑀁 𑀲𑀁𑀯𑀡𑁆𑀡𑀦𑀫𑀺𑀫𑀁 𑀓𑀭𑁄𑀦𑁆𑀢𑁄 𑀲𑀓𑀲𑀫𑀬𑀲𑀫𑀬𑀦𑁆𑀢𑀭𑀕𑀳𑀦𑀚𑁆𑀛𑁄𑀕𑀸𑀳𑀦𑀲𑀫𑀢𑁆𑀣𑁄 𑀫𑀳𑀸𑀯𑁂𑀬𑁆𑀬𑀸𑀓𑀭𑀡𑁄𑀬𑀫𑀸𑀘𑀭𑀺𑀬𑁄 𑀲𑀁𑀯𑀡𑁆𑀡𑀦𑀸𑀭𑀫𑁆𑀪𑁂 𑀭𑀢𑀦𑀢𑁆𑀢𑀬𑀧𑀡𑀸𑀫𑀧𑀬𑁄𑀚𑀦𑀸𑀤𑀺𑀯𑀺𑀥𑀸𑀦𑀸𑀦𑀺 𑀓𑀭𑁄𑀦𑁆𑀢𑁄 𑀧𑀞𑀫𑀁 𑀢𑀸𑀯 𑀭𑀢𑀦𑀢𑁆𑀢𑀬𑀧𑀡𑀸𑀫𑀁 𑀓𑀸𑀢𑀼𑀁 ‘‘𑀓𑀭𑀼𑀡𑀸𑀲𑀻𑀢𑀮𑀳𑀤𑀬’’𑀦𑁆𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣 𑀘 𑀲𑀁𑀯𑀡𑁆𑀡𑀦𑀸𑀭𑀫𑁆𑀪𑁂 𑀭𑀢𑀦𑀢𑁆𑀢𑀬𑀧𑀡𑀸𑀫𑀓𑀭𑀡𑀧𑁆𑀧𑀬𑁄𑀚𑀦𑀁 𑀢𑀢𑁆𑀣 𑀢𑀢𑁆𑀣 𑀩𑀳𑀼𑀥𑀸 𑀧𑀧𑀜𑁆𑀘𑁂𑀦𑁆𑀢𑀺 𑀆𑀘𑀭𑀺𑀬𑀸. 𑀢𑀣𑀸 𑀳𑀺 𑀯𑀡𑁆𑀡𑀬𑀦𑁆𑀢𑀺 𑁋

‘‘𑀲𑀁𑀯𑀡𑁆𑀡𑀦𑀸𑀭𑀫𑁆𑀪𑁂 𑀲𑀢𑁆𑀣𑀭𑀺 𑀧𑀡𑀸𑀫𑀓𑀭𑀡𑀁 𑀥𑀫𑁆𑀫𑀲𑁆𑀲 𑀲𑁆𑀯𑀸𑀓𑁆𑀔𑀸𑀢𑀪𑀸𑀯𑁂𑀦 𑀲𑀢𑁆𑀣𑀭𑀺 𑀧𑀲𑀸𑀤𑀚𑀦𑀦𑀢𑁆𑀣𑀁, 𑀲𑀢𑁆𑀣𑀼 𑀘 𑀅𑀯𑀺𑀢𑀣𑀤𑁂𑀲𑀦𑀪𑀸𑀯𑀧𑁆𑀧𑀓𑀸𑀲𑀦𑁂𑀦 𑀥𑀫𑁆𑀫𑁂 𑀧𑀲𑀸𑀤𑀚𑀦𑀦𑀢𑁆𑀣𑀁. 𑀢𑀤𑀼𑀪𑀬𑀧𑁆𑀧𑀲𑀸𑀤𑀸 𑀳𑀺 𑀫𑀳𑀢𑁄 𑀅𑀢𑁆𑀣𑀲𑁆𑀲 𑀲𑀺𑀤𑁆𑀥𑀺 𑀳𑁄𑀢𑀻’’𑀢𑀺 (𑀥. 𑀲. 𑀝𑀻. 𑁧-𑁧).

𑀅𑀣 𑀯𑀸 ‘‘𑀭𑀢𑀦𑀢𑁆𑀢𑀬𑀧𑀡𑀸𑀫𑀯𑀘𑀦𑀁 𑀅𑀢𑁆𑀢𑀦𑁄 𑀭𑀢𑀦𑀢𑁆𑀢𑀬𑀧𑁆𑀧𑀲𑀸𑀤𑀲𑁆𑀲 𑀯𑀺𑀜𑁆𑀜𑀸𑀧𑀦𑀢𑁆𑀣𑀁, 𑀢𑀁 𑀧𑀦 𑀯𑀺𑀜𑁆𑀜𑀽𑀦𑀁 𑀘𑀺𑀢𑁆𑀢𑀸𑀭𑀸𑀥𑀦𑀢𑁆𑀣𑀁, 𑀢𑀁 𑀅𑀝𑁆𑀞𑀓𑀣𑀸𑀬 𑀕𑀸𑀳𑀡𑀢𑁆𑀣𑀁, 𑀢𑀁 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀦𑀺𑀧𑁆𑀨𑀸𑀤𑀦𑀢𑁆𑀣’’𑀦𑁆𑀢𑀺. 𑀅𑀣 𑀯𑀸 ‘‘𑀲𑀁𑀯𑀡𑁆𑀡𑀦𑀸𑀭𑀫𑁆𑀪𑁂 𑀭𑀢𑀦𑀢𑁆𑀢𑀬𑀯𑀦𑁆𑀤𑀦𑀸 𑀲𑀁𑀯𑀡𑁆𑀡𑁂𑀢𑀩𑁆𑀩𑀲𑁆𑀲 𑀥𑀫𑁆𑀫𑀲𑁆𑀲 𑀧𑀪𑀯𑀦𑀺𑀲𑁆𑀲𑀬𑀯𑀺𑀲𑀼𑀤𑁆𑀥𑀺𑀧𑀝𑀺𑀯𑁂𑀤𑀦𑀢𑁆𑀣𑀁, 𑀢𑀁 𑀧𑀦 𑀥𑀫𑁆𑀫𑀲𑀁𑀯𑀡𑁆𑀡𑀦𑀸𑀲𑀼 𑀯𑀺𑀜𑁆𑀜𑀽𑀦𑀁 𑀩𑀳𑀼𑀫𑀸𑀦𑀼𑀧𑁆𑀧𑀸𑀤𑀦𑀢𑁆𑀣𑀁, 𑀢𑀁 𑀲𑀫𑁆𑀫𑀤𑁂𑀯 𑀢𑁂𑀲𑀁 𑀉𑀕𑁆𑀕𑀳𑀡𑀥𑀸𑀭𑀡𑀸𑀤𑀺𑀓𑁆𑀓𑀫𑀮𑀤𑁆𑀥𑀩𑁆𑀩𑀸𑀬 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀲𑀩𑁆𑀩𑀳𑀺𑀢𑀲𑀼𑀔𑀦𑀺𑀧𑁆𑀨𑀸𑀤𑀦𑀢𑁆𑀣’’𑀦𑁆𑀢𑀺. 𑀅𑀣 𑀯𑀸 ‘‘𑀫𑀗𑁆𑀕𑀮𑀪𑀸𑀯𑀢𑁄, 𑀲𑀩𑁆𑀩𑀓𑀺𑀭𑀺𑀬𑀸𑀲𑀼 𑀧𑀼𑀩𑁆𑀩𑀓𑀺𑀘𑁆𑀘𑀪𑀸𑀯𑀢𑁄, 𑀧𑀡𑁆𑀟𑀺𑀢𑁂𑀳𑀺 𑀲𑀫𑀸𑀘𑀭𑀺𑀢𑀪𑀸𑀯𑀢𑁄, 𑀆𑀬𑀢𑀺𑀁 𑀧𑀭𑁂𑀲𑀁 𑀤𑀺𑀝𑁆𑀞𑀸𑀦𑀼𑀕𑀢𑀺𑀆𑀧𑀚𑁆𑀚𑀦𑀢𑁄 𑀘 𑀲𑀁𑀯𑀡𑁆𑀡𑀦𑀸𑀬𑀁 𑀭𑀢𑀦𑀢𑁆𑀢𑀬𑀧𑀡𑀸𑀫𑀓𑀺𑀭𑀺𑀬𑀸’’𑀢𑀺. 𑀅𑀣 𑀯𑀸 ‘‘𑀘𑀢𑀼𑀕𑀫𑁆𑀪𑀻𑀭𑀪𑀸𑀯𑀬𑀼𑀢𑁆𑀢𑀁 𑀥𑀫𑁆𑀫𑀯𑀺𑀦𑀬𑀁 𑀲𑀁𑀯𑀡𑁆𑀡𑁂𑀢𑀼𑀓𑀸𑀫𑀲𑁆𑀲 𑀫𑀳𑀸𑀲𑀫𑀼𑀤𑁆𑀤𑀁 𑀑𑀕𑀸𑀳𑀦𑁆𑀢𑀲𑁆𑀲 𑀯𑀺𑀬 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀲𑀫𑀦𑁆𑀦𑀸𑀕𑀢𑀲𑁆𑀲𑀸𑀧𑀺 𑀫𑀳𑀦𑁆𑀢𑀁 𑀪𑀬𑀁 𑀲𑀫𑁆𑀪𑀯𑀢𑀺, 𑀪𑀬𑀓𑁆𑀔𑀬𑀸𑀯𑀳𑀜𑁆𑀘𑁂𑀢𑀁 𑀭𑀢𑀦𑀢𑁆𑀢𑀬𑀕𑀼𑀡𑀸𑀦𑀼𑀲𑁆𑀲𑀭𑀡𑀚𑀦𑀺𑀢𑀁 𑀧𑀡𑀸𑀫𑀧𑀽𑀚𑀸𑀯𑀺𑀥𑀸𑀦𑀁, 𑀢𑀢𑁄 𑀘 𑀲𑀁𑀯𑀡𑁆𑀡𑀦𑀸𑀬𑀁 𑀭𑀢𑀦𑀢𑁆𑀢𑀬𑀧𑀡𑀸𑀫𑀓𑀺𑀭𑀺𑀬𑀸’’𑀢𑀺. 𑀅𑀣 𑀯𑀸 ‘‘𑀅𑀲𑀢𑁆𑀣𑀭𑀺𑀧𑀺 𑀲𑀢𑁆𑀣𑀸𑀪𑀺𑀦𑀺𑀯𑁂𑀲𑀲𑁆𑀲 𑀮𑁄𑀓𑀲𑁆𑀲 𑀬𑀣𑀸𑀪𑀽𑀢𑀁 𑀲𑀢𑁆𑀣𑀭𑀺 𑀏𑀯 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀲𑀢𑁆𑀣𑀼𑀲𑀫𑁆𑀪𑀸𑀯𑀦𑀢𑁆𑀣𑀁, 𑀅𑀲𑀢𑁆𑀣𑀭𑀺 𑀘 𑀲𑀢𑁆𑀣𑀼𑀲𑀫𑁆𑀪𑀸𑀯𑀦𑀧𑀭𑀺𑀘𑁆𑀘𑀚𑀸𑀧𑀦𑀢𑁆𑀣𑀁, ‘𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀁 𑀥𑀫𑁆𑀫𑀯𑀺𑀦𑀬𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸 𑀅𑀢𑁆𑀢𑀦𑁄 𑀤𑀳𑀢𑀻’𑀢𑀺 (𑀧𑀸𑀭𑀸. 𑁧𑁯𑁫) 𑀘 𑀯𑀼𑀢𑁆𑀢𑀤𑁄𑀲𑀧𑀭𑀺𑀳𑀭𑀡𑀢𑁆𑀣𑀁 𑀲𑀁𑀯𑀡𑁆𑀡𑀦𑀸𑀬𑀁 𑀧𑀡𑀸𑀫𑀓𑀺𑀭𑀺𑀬𑀸’’𑀢𑀺. 𑀅𑀣 𑀯𑀸 ‘‘𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀡𑀸𑀫𑀯𑀺𑀥𑀸𑀦𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀪𑀸𑀯𑀸𑀥𑀺𑀕𑀫𑀸𑀬 𑀩𑀼𑀤𑁆𑀥𑀬𑀸𑀦𑀁 𑀧𑀝𑀺𑀧𑀚𑁆𑀚𑀦𑁆𑀢𑀸𑀦𑀁 𑀉𑀲𑁆𑀲𑀸𑀳𑀚𑀦𑀦𑀢𑁆𑀣𑀁, 𑀲𑀤𑁆𑀥𑀫𑁆𑀫𑀲𑁆𑀲 𑀘 𑀧𑀡𑀸𑀫𑀯𑀺𑀥𑀸𑀦𑁂𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑀪𑀸𑀯𑀸𑀥𑀺𑀕𑀫𑀸𑀬 𑀧𑀘𑁆𑀘𑁂𑀓𑀩𑀼𑀤𑁆𑀥𑀬𑀸𑀦𑀁 𑀧𑀝𑀺𑀧𑀚𑁆𑀚𑀦𑁆𑀢𑀸𑀦𑀁 𑀉𑀲𑁆𑀲𑀸𑀳𑀚𑀦𑀦𑀢𑁆𑀣𑀁, 𑀲𑀗𑁆𑀖𑀲𑁆𑀲 𑀘 𑀧𑀡𑀸𑀫𑀯𑀺𑀥𑀸𑀦𑁂𑀦 𑀧𑀭𑀫𑀢𑁆𑀣𑀲𑀗𑁆𑀖𑀪𑀸𑀯𑀸𑀥𑀺𑀕𑀫𑀸𑀬 𑀲𑀸𑀯𑀓𑀬𑀸𑀦𑀁 𑀧𑀝𑀺𑀧𑀚𑁆𑀚𑀦𑁆𑀢𑀸𑀦𑀁 𑀉𑀲𑁆𑀲𑀸𑀳𑀚𑀦𑀦𑀢𑁆𑀣𑀁 𑀲𑀁𑀯𑀡𑁆𑀡𑀦𑀸𑀬𑀁 𑀧𑀡𑀸𑀫𑀓𑀺𑀭𑀺𑀬𑀸’’𑀢𑀺. 𑀅𑀣 𑀯𑀸 ‘‘𑀫𑀗𑁆𑀕𑀮𑀸𑀤𑀺𑀓𑀸𑀦𑀺 𑀲𑀢𑁆𑀣𑀸𑀦𑀺 𑀅𑀦𑀦𑁆𑀢𑀭𑀸𑀬𑀸𑀦𑀺, 𑀘𑀺𑀭𑀝𑁆𑀞𑀺𑀢𑀺𑀓𑀸𑀦𑀺, 𑀩𑀳𑀼𑀫𑀢𑀸𑀦𑀺 𑀘 𑀪𑀯𑀦𑁆𑀢𑀻𑀢𑀺 𑀏𑀯𑀁𑀮𑀤𑁆𑀥𑀺𑀓𑀸𑀦𑀁 𑀘𑀺𑀢𑁆𑀢𑀧𑀭𑀺𑀢𑁄𑀲𑀦𑀢𑁆𑀣𑀁 𑀲𑀁𑀯𑀡𑁆𑀡𑀦𑀸𑀬𑀁 𑀧𑀡𑀸𑀫𑀓𑀺𑀭𑀺𑀬𑀸’’𑀢𑀺. 𑀅𑀣 𑀯𑀸 ‘‘𑀲𑁄𑀢𑀼𑀚𑀦𑀸𑀦𑀁 𑀬𑀣𑀸𑀯𑀼𑀢𑁆𑀢𑀧𑀡𑀸𑀫𑁂𑀦 𑀅𑀦𑀦𑁆𑀢𑀭𑀸𑀬𑁂𑀦 𑀉𑀕𑁆𑀕𑀳𑀡𑀥𑀸𑀭𑀡𑀸𑀤𑀺𑀦𑀺𑀧𑁆𑀨𑀸𑀤𑀦𑀢𑁆𑀣𑀁 𑀲𑀁𑀯𑀡𑁆𑀡𑀦𑀸𑀬𑀁 𑀧𑀡𑀸𑀫𑀓𑀺𑀭𑀺𑀬𑀸. 𑀲𑁄𑀢𑀼𑀚𑀦𑀸𑀦𑀼𑀕𑁆𑀕𑀳𑀫𑁂𑀯 𑀳𑀺 𑀧𑀥𑀸𑀦𑀁 𑀓𑀢𑁆𑀯𑀸 𑀆𑀘𑀭𑀺𑀬𑁂𑀳𑀺 𑀲𑀁𑀯𑀡𑁆𑀡𑀦𑀸𑀭𑀫𑁆𑀪𑁂 𑀣𑀼𑀢𑀺𑀧𑀡𑀸𑀫𑀧𑀭𑀺𑀤𑀻𑀧𑀓𑀸𑀦𑀺 𑀯𑀸𑀓𑁆𑀬𑀸𑀦𑀺 𑀦𑀺𑀓𑁆𑀔𑀺𑀧𑀻𑀬𑀦𑁆𑀢𑀺, 𑀇𑀢𑀭𑀣𑀸 𑀯𑀺𑀦𑀸𑀧𑀺 𑀢𑀁 𑀦𑀺𑀓𑁆𑀔𑁂𑀧𑀁 𑀓𑀸𑀬𑀫𑀦𑁄𑀧𑀡𑀸𑀫𑁂𑀦𑁂𑀯 𑀬𑀣𑀸𑀥𑀺𑀧𑁆𑀧𑁂𑀢𑀧𑁆𑀧𑀬𑁄𑀚𑀦𑀲𑀺𑀤𑁆𑀥𑀺𑀢𑁄 𑀓𑀺𑀫𑁂𑀢𑁂𑀦 𑀕𑀦𑁆𑀣𑀕𑀸𑀭𑀯𑀓𑀭𑀡𑁂𑀦𑀸’’𑀢𑀺 𑀘 𑀏𑀯𑀫𑀸𑀤𑀺𑀦𑀸. 𑀫𑀬𑀁 𑀧𑀦 𑀇𑀥𑀸𑀥𑀺𑀧𑁆𑀧𑁂𑀢𑀫𑁂𑀯 𑀧𑀬𑁄𑀚𑀦𑀁 𑀤𑀲𑁆𑀲𑀬𑀺𑀲𑁆𑀲𑀸𑀫, 𑀢𑀲𑁆𑀫𑀸 𑀲𑀁𑀯𑀡𑁆𑀡𑀦𑀸𑀭𑀫𑁆𑀪𑁂 𑀭𑀢𑀦𑀢𑁆𑀢𑀬𑀧𑀡𑀸𑀫𑀓𑀭𑀡𑀁 𑀬𑀣𑀸𑀧𑀝𑀺𑀜𑁆𑀜𑀸𑀢𑀲𑀁𑀯𑀡𑁆𑀡𑀦𑀸𑀬 𑀅𑀦𑀦𑁆𑀢𑀭𑀸𑀬𑁂𑀦 𑀧𑀭𑀺𑀲𑀫𑀸𑀧𑀦𑀢𑁆𑀣𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀤𑀫𑁂𑀯 𑀘 𑀧𑀬𑁄𑀚𑀦𑀁 𑀆𑀘𑀭𑀺𑀬𑁂𑀦 𑀇𑀥𑀸𑀥𑀺𑀧𑁆𑀧𑁂𑀢𑀁. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀇𑀢𑀺 𑀫𑁂 𑀧𑀲𑀦𑁆𑀦𑀫𑀢𑀺𑀦𑁄 …𑀧𑁂… 𑀢𑀲𑁆𑀲𑀸𑀦𑀼𑀪𑀸𑀯𑁂𑀦𑀸’’𑀢𑀺. 𑀭𑀢𑀦𑀢𑁆𑀢𑀬𑀧𑀡𑀸𑀫𑀓𑀭𑀡𑀜𑁆𑀳𑀺 𑀬𑀣𑀸𑀧𑀝𑀺𑀜𑁆𑀜𑀸𑀢𑀲𑀁𑀯𑀡𑁆𑀡𑀦𑀸𑀬 𑀅𑀦𑀦𑁆𑀢𑀭𑀸𑀬𑁂𑀦 𑀧𑀭𑀺𑀲𑀫𑀸𑀧𑀦𑀢𑁆𑀣𑀁 𑀭𑀢𑀦𑀢𑁆𑀢𑀬𑀧𑀽𑀚𑀸𑀬 𑀧𑀜𑁆𑀜𑀸𑀧𑀸𑀝𑀯𑀪𑀸𑀯𑀢𑁄, 𑀢𑀸𑀬 𑀘 𑀧𑀜𑁆𑀜𑀸𑀧𑀸𑀝𑀯𑀁 𑀭𑀸𑀕𑀸𑀤𑀺𑀫𑀮𑀯𑀺𑀥𑀫𑀦𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀬𑀲𑁆𑀫𑀺𑀁 𑀫𑀳𑀸𑀦𑀸𑀫 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀢𑀣𑀸𑀕𑀢𑀁 𑀅𑀦𑀼𑀲𑁆𑀲𑀭𑀢𑀺, 𑀦𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀦 𑀤𑁄𑀲𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀦 𑀫𑁄𑀳𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀉𑀚𑀼𑀕𑀢𑀫𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀳𑁄𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁬.𑁧𑁦; 𑀅. 𑀦𑀺. 𑁧𑁧.𑁧𑁧).

𑀢𑀲𑁆𑀫𑀸 𑀭𑀢𑀦𑀢𑁆𑀢𑀬𑀧𑀽𑀚𑀸𑀬 𑀯𑀺𑀓𑁆𑀔𑀸𑀮𑀺𑀢𑀫𑀮𑀸𑀬 𑀧𑀜𑁆𑀜𑀸𑀬 𑀧𑀸𑀝𑀯𑀲𑀺𑀤𑁆𑀥𑀺. 𑀅𑀣 𑀯𑀸 𑀭𑀢𑀦𑀢𑁆𑀢𑀬𑀧𑀽𑀚𑀸𑀬 𑀧𑀜𑁆𑀜𑀸𑀧𑀤𑀝𑁆𑀞𑀸𑀦𑀲𑀫𑀸𑀥𑀺𑀳𑁂𑀢𑀼𑀢𑁆𑀢𑀸 𑀧𑀜𑁆𑀜𑀸𑀧𑀸𑀝𑀯𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀉𑀚𑀼𑀕𑀢𑀘𑀺𑀢𑁆𑀢𑁄 𑀔𑁄 𑀧𑀦 𑀫𑀳𑀸𑀦𑀸𑀫 𑀅𑀭𑀺𑀬𑀲𑀸𑀯𑀓𑁄 𑀮𑀪𑀢𑀺 𑀅𑀢𑁆𑀣𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑁄𑀧𑀲𑀁𑀳𑀺𑀢𑀁 𑀧𑀸𑀫𑁄𑀚𑁆𑀚𑀁, 𑀧𑀫𑀼𑀤𑀺𑀢𑀲𑁆𑀲 𑀧𑀻𑀢𑀺 𑀚𑀸𑀬𑀢𑀺, 𑀧𑀻𑀢𑀺𑀫𑀦𑀲𑁆𑀲 𑀓𑀸𑀬𑁄 𑀧𑀲𑁆𑀲𑀫𑁆𑀪𑀢𑀺, 𑀧𑀲𑁆𑀲𑀤𑁆𑀥𑀓𑀸𑀬𑁄 𑀲𑀼𑀔𑀁 𑀯𑁂𑀤𑀬𑀢𑀺, 𑀲𑀼𑀔𑀺𑀦𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀻’’𑀢𑀺 (𑀅. 𑀦𑀺. 𑁬.𑁧𑁦; 𑀅. 𑀦𑀺. 𑁧𑁧.𑁧𑁧).

𑀲𑀫𑀸𑀥𑀺𑀲𑁆𑀲 𑀘 𑀧𑀜𑁆𑀜𑀸𑀬 𑀧𑀤𑀝𑁆𑀞𑀸𑀦𑀪𑀸𑀯𑁄 ‘‘𑀲𑀫𑀸𑀳𑀺𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻’’𑀢𑀺 (𑀲𑀁. 𑀦𑀺. 𑁩.𑁫; 𑁪.𑁯𑁯; 𑁫.𑁧𑁦𑁭𑁧; 𑀦𑁂𑀢𑁆𑀢𑀺. 𑁪𑁦; 𑀧𑁂𑀝𑀓𑁄. 𑁬𑁬; 𑀫𑀺. 𑀧. 𑁧𑁪) 𑀯𑀼𑀢𑁆𑀢𑁄𑀬𑁂𑀯. 𑀢𑀢𑁄 𑀏𑀯𑀁 𑀧𑀝𑀼𑀪𑀽𑀢𑀸𑀬 𑀧𑀜𑁆𑀜𑀸𑀬 𑀔𑁂𑀤𑀫𑀪𑀺𑀪𑀼𑀬𑁆𑀬 𑀧𑀝𑀺𑀜𑁆𑀜𑀸𑀢𑀁 𑀲𑀁𑀯𑀡𑁆𑀡𑀦𑀁 𑀲𑀫𑀸𑀧𑀬𑀺𑀲𑁆𑀲𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀭𑀢𑀦𑀢𑁆𑀢𑀬𑀧𑀡𑀸𑀫𑀓𑀭𑀡𑀜𑁆𑀳𑀺…𑀧𑁂… 𑀧𑀜𑁆𑀜𑀸𑀧𑀸𑀝𑀯𑀪𑀸𑀯𑀢𑁄’’𑀢𑀺. 𑀅𑀣 𑀯𑀸 𑀭𑀢𑀦𑀢𑁆𑀢𑀬𑀧𑀽𑀚𑀸𑀬 𑀆𑀬𑀼𑀯𑀡𑁆𑀡𑀲𑀼𑀔𑀩𑀮𑀯𑀟𑁆𑀠𑀦𑀢𑁄 𑀅𑀦𑀦𑁆𑀢𑀭𑀸𑀬𑁂𑀦 𑀧𑀭𑀺𑀲𑀫𑀸𑀧𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀭𑀢𑀦𑀢𑁆𑀢𑀬𑀧𑀡𑀸𑀫𑁂𑀦 𑀳𑀺 𑀆𑀬𑀼𑀯𑀡𑁆𑀡𑀲𑀼𑀔𑀩𑀮𑀸𑀦𑀺 𑀯𑀟𑁆𑀠𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀅𑀪𑀺𑀯𑀸𑀤𑀦𑀲𑀻𑀮𑀺𑀲𑁆𑀲, 𑀦𑀺𑀘𑁆𑀘𑀁 𑀯𑀼𑀟𑁆𑀠𑀸𑀧𑀘𑀸𑀬𑀺𑀦𑁄;

𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀯𑀟𑁆𑀠𑀦𑁆𑀢𑀺, 𑀆𑀬𑀼 𑀯𑀡𑁆𑀡𑁄 𑀲𑀼𑀔𑀁 𑀩𑀮’’𑀦𑁆𑀢𑀺. (𑀥. 𑀧. 𑁧𑁦𑁯);

𑀢𑀢𑁄 𑀆𑀬𑀼𑀯𑀡𑁆𑀡𑀲𑀼𑀔𑀩𑀮𑀯𑀼𑀤𑁆𑀥𑀺𑀬𑀸 𑀳𑁄𑀢𑁆𑀯𑁂𑀯 𑀓𑀸𑀭𑀺𑀬𑀦𑀺𑀝𑁆𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀭𑀢𑀦𑀢𑁆𑀢𑀬𑀧𑀽𑀚𑀸𑀬 𑀆𑀬𑀼…𑀧𑁂… 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺. 𑀅𑀣 𑀯𑀸 𑀭𑀢𑀦𑀢𑁆𑀢𑀬𑀧𑀽𑀚𑀸𑀬 𑀧𑀝𑀺𑀪𑀸𑀦𑀸𑀧𑀭𑀺𑀳𑀸𑀦𑀸𑀯𑀳𑀢𑁆𑀢𑀸 𑀅𑀦𑀦𑁆𑀢𑀭𑀸𑀬𑁂𑀦 𑀧𑀭𑀺𑀲𑀫𑀸𑀧𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀧𑀭𑀺𑀳𑀸𑀦𑀸𑀯𑀳𑀸 𑀳𑀺 𑀭𑀢𑀦𑀢𑁆𑀢𑀬𑀧𑀽𑀚𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀲𑀢𑁆𑀢𑀺𑀫𑁂 𑀪𑀺𑀓𑁆𑀔𑀯𑁂, 𑀅𑀧𑀭𑀺𑀳𑀸𑀦𑀻𑀬𑀸 𑀥𑀫𑁆𑀫𑀸, 𑀓𑀢𑀫𑁂 𑀲𑀢𑁆𑀢? 𑀲𑀢𑁆𑀣𑀼𑀕𑀸𑀭𑀯𑀢𑀸, 𑀥𑀫𑁆𑀫𑀕𑀸𑀭𑀯𑀢𑀸, 𑀲𑀗𑁆𑀖𑀕𑀸𑀭𑀯𑀢𑀸, 𑀲𑀺𑀓𑁆𑀔𑀸𑀕𑀸𑀭𑀯𑀢𑀸, 𑀲𑀫𑀸𑀥𑀺𑀕𑀸𑀭𑀯𑀢𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀲𑁄𑀯𑀘𑀲𑁆𑀲𑀢𑀸’’𑀢𑀺 (𑀅. 𑀦𑀺. 𑁭.𑁩𑁪) 𑀢𑀢𑁄 𑀧𑀝𑀺𑀪𑀸𑀦𑀸𑀧𑀭𑀺𑀳𑀸𑀦𑁂𑀦 𑀳𑁄𑀢𑁆𑀯𑁂𑀯 𑀬𑀣𑀸𑀧𑀝𑀺𑀜𑁆𑀜𑀸𑀢𑀧𑀭𑀺𑀲𑀫𑀸𑀧𑀦𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀭𑀢𑀦𑀢𑁆𑀢𑀬…𑀧𑁂… 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺. 𑀅𑀣 𑀯𑀸 𑀧𑀲𑀸𑀤𑀯𑀢𑁆𑀣𑀽𑀲𑀼 𑀧𑀽𑀚𑀸𑀬 𑀧𑀼𑀜𑁆𑀜𑀸𑀢𑀺𑀲𑀬𑀪𑀸𑀯𑀢𑁄 𑀅𑀦𑀦𑁆𑀢𑀭𑀸𑀬𑁂𑀦 𑀧𑀭𑀺𑀲𑀫𑀸𑀧𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀧𑀼𑀜𑁆𑀜𑀸𑀢𑀺𑀲𑀬𑀸 𑀳𑀺 𑀧𑀲𑀸𑀤𑀯𑀢𑁆𑀣𑀽𑀲𑀼 𑀧𑀽𑀚𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀧𑀽𑀚𑀸𑀭𑀳𑁂 𑀧𑀽𑀚𑀬𑀢𑁄, 𑀩𑀼𑀤𑁆𑀥𑁂 𑀬𑀤𑀺𑀯 𑀲𑀸𑀯𑀓𑁂;

𑀧𑀧𑀜𑁆𑀘𑀲𑀫𑀢𑀺𑀓𑁆𑀓𑀦𑁆𑀢𑁂, 𑀢𑀺𑀡𑁆𑀡𑀲𑁄𑀓𑀧𑀭𑀺𑀤𑁆𑀤𑀯𑁂.

𑀢𑁂 𑀢𑀸𑀤𑀺𑀲𑁂 𑀧𑀽𑀚𑀬𑀢𑁄, 𑀦𑀺𑀩𑁆𑀩𑀼𑀢𑁂 𑀅𑀓𑀼𑀢𑁄𑀪𑀬𑁂;

𑀦 𑀲𑀓𑁆𑀓𑀸 𑀧𑀼𑀜𑁆𑀜𑀁 𑀲𑀗𑁆𑀔𑀸𑀢𑀼𑀁, 𑀇𑀫𑁂𑀢𑁆𑀢𑀫𑀧𑀺 𑀓𑁂𑀦𑀘𑀻’’𑀢𑀺. (𑀔𑀼. 𑀧𑀸. 𑁧𑁯𑁬; 𑀅𑀧. 𑁧.𑁧𑁦.𑁨);

𑀧𑀼𑀜𑁆𑀜𑀸𑀢𑀺𑀲𑀬𑁄 𑀘 𑀬𑀣𑀸𑀥𑀺𑀧𑁆𑀧𑁂𑀢𑀧𑀭𑀺𑀲𑀫𑀸𑀧𑀦𑀼𑀧𑀸𑀬𑁄. 𑀬𑀣𑀸𑀳 𑁋

‘‘𑀏𑀲 𑀤𑁂𑀯𑀫𑀦𑀼𑀲𑁆𑀲𑀸𑀦𑀁, 𑀲𑀩𑁆𑀩𑀓𑀸𑀫𑀤𑀤𑁄 𑀦𑀺𑀥𑀺;

𑀬𑀁 𑀬𑀤𑁂𑀯𑀸𑀪𑀺𑀧𑀢𑁆𑀣𑁂𑀦𑁆𑀢𑀺, 𑀲𑀩𑁆𑀩𑀫𑁂𑀢𑁂𑀦 𑀮𑀩𑁆𑀪𑀢𑀻’’𑀢𑀺. (𑀔𑀼. 𑀧𑀸. 𑁮.𑁧𑁦);

𑀉𑀧𑀸𑀬𑁂𑀲𑀼 𑀘 𑀧𑀝𑀺𑀧𑀦𑁆𑀦𑀲𑁆𑀲 𑀳𑁄𑀢𑁆𑀯𑁂𑀯 𑀓𑀸𑀭𑀺𑀬𑀦𑀺𑀝𑁆𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀧𑀲𑀸𑀤𑀯𑀢𑁆𑀣𑀽𑀲𑀼…𑀧𑁂… 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺. 𑀏𑀯𑀁 𑀭𑀢𑀦𑀢𑁆𑀢𑀬𑀧𑀽𑀚𑀸 𑀦𑀺𑀭𑀢𑀺𑀲𑀬𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀲𑀫𑁆𑀩𑀼𑀤𑁆𑀥𑀺𑀬𑀸 𑀅𑀧𑀭𑀺𑀫𑁂𑀬𑁆𑀬𑀧𑁆𑀧𑀪𑀸𑀯𑁄 𑀧𑀼𑀜𑁆𑀜𑀸𑀢𑀺𑀲𑀬𑁄𑀢𑀺 𑀩𑀳𑀼𑀯𑀺𑀥𑀦𑁆𑀢𑀭𑀸𑀬𑁂𑀧𑀺 𑀮𑁄𑀓𑀲𑀦𑁆𑀦𑀺𑀯𑀸𑀲𑁂 𑀅𑀦𑁆𑀢𑀭𑀸𑀬𑀦𑀺𑀩𑀦𑁆𑀥𑀦𑀲𑀓𑀮𑀲𑀁𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀸𑀬 𑀧𑀳𑁄𑀢𑀺, 𑀪𑀬𑀸𑀤𑀺𑀉𑀧𑀤𑁆𑀤𑀯𑀜𑁆𑀘 𑀦𑀺𑀯𑀸𑀭𑁂𑀢𑀺. 𑀢𑀲𑁆𑀫𑀸 𑀲𑀼𑀯𑀼𑀢𑁆𑀢𑀁 ‘‘𑀲𑀁𑀯𑀡𑁆𑀡𑀦𑀸𑀭𑀫𑁆𑀪𑁂 𑀭𑀢𑀦𑀢𑁆𑀢𑀬𑀧𑀡𑀸𑀫𑀓𑀭𑀡𑀁 𑀬𑀣𑀸𑀧𑀝𑀺𑀜𑁆𑀜𑀸𑀢𑀲𑀁𑀯𑀡𑁆𑀡𑀦𑀸𑀬 𑀅𑀦𑀦𑁆𑀢𑀭𑀸𑀬𑁂𑀦 𑀧𑀭𑀺𑀲𑀫𑀸𑀧𑀦𑀢𑁆𑀣𑀦𑁆𑀢𑀺 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺.

𑀏𑀯𑀁 𑀧𑀦 𑀲𑀧𑀬𑁄𑀚𑀦𑀁 𑀭𑀢𑀦𑀢𑁆𑀢𑀬𑀧𑀡𑀸𑀫𑀁 𑀓𑀢𑁆𑀢𑀼𑀓𑀸𑀫𑁄 𑀩𑀼𑀤𑁆𑀥𑀭𑀢𑀦𑀫𑀽𑀮𑀓𑀢𑁆𑀢𑀸 𑀲𑁂𑀲𑀭𑀢𑀦𑀸𑀦𑀁 𑀧𑀞𑀫𑀁 𑀢𑀲𑁆𑀲 𑀧𑀡𑀸𑀫𑀁 𑀓𑀸𑀢𑀼𑀫𑀸𑀳 𑁋 ‘‘𑀓𑀭𑀼𑀡𑀸𑀲𑀻𑀢𑀮𑀳𑀤𑀬𑀁…𑀧𑁂… 𑀕𑀢𑀺𑀯𑀺𑀫𑀼𑀢𑁆𑀢’’𑀦𑁆𑀢𑀺. 𑀩𑀼𑀤𑁆𑀥𑀭𑀢𑀦𑀫𑀽𑀮𑀓𑀸𑀦𑀺 𑀳𑀺 𑀥𑀫𑁆𑀫𑀲𑀗𑁆𑀖𑀭𑀢𑀦𑀸𑀦𑀺, 𑀢𑁂𑀲𑀼 𑀘 𑀥𑀫𑁆𑀫𑀭𑀢𑀦𑀫𑀽𑀮𑀓𑀁 𑀲𑀗𑁆𑀖𑀭𑀢𑀦𑀁, 𑀢𑀣𑀸𑀪𑀸𑀯𑁄 𑀘 ‘‘𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬 𑀪𑀕𑀯𑀸, 𑀘𑀦𑁆𑀤𑀓𑀺𑀭𑀡𑀦𑀺𑀓𑀭𑁄 𑀯𑀺𑀬 𑀢𑁂𑀦 𑀤𑁂𑀲𑀺𑀢𑁄 𑀥𑀫𑁆𑀫𑁄, 𑀘𑀦𑁆𑀤𑀓𑀺𑀭𑀡𑀲𑀫𑀼𑀧𑁆𑀧𑀸𑀤𑀺𑀢𑀧𑀻𑀡𑀺𑀢𑁄 𑀮𑁄𑀓𑁄 𑀯𑀺𑀬 𑀲𑀗𑁆𑀖𑁄’’𑀢𑀺 𑀏𑀯𑀫𑀸𑀤𑀻𑀳𑀺 𑀅𑀝𑁆𑀞𑀓𑀣𑀸𑀬𑀫𑀸𑀕𑀢𑀉𑀧𑀫𑀸𑀳𑀺 𑀯𑀺𑀪𑀸𑀯𑁂𑀢𑀩𑁆𑀩𑁄. 𑀅𑀣 𑀯𑀸 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀕𑁆𑀕𑁄𑀢𑀺 𑀓𑀢𑁆𑀯𑀸 𑀧𑀞𑀫𑀁 𑀩𑀼𑀤𑁆𑀥𑁄, 𑀢𑀧𑁆𑀧𑀪𑀯𑀢𑁄, 𑀢𑀤𑀼𑀧𑀤𑁂𑀲𑀺𑀢𑀢𑁄 𑀘 𑀢𑀤𑀦𑀦𑁆𑀢𑀭𑀁 𑀥𑀫𑁆𑀫𑁄, 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀲𑀸𑀥𑀸𑀭𑀡𑀢𑁄, 𑀢𑀤𑀸𑀲𑁂𑀯𑀦𑀢𑁄 𑀘 𑀢𑀤𑀦𑀦𑁆𑀢𑀭𑀁 𑀲𑀗𑁆𑀖𑁄 𑀯𑀼𑀢𑁆𑀢𑁄. ‘‘𑀲𑀩𑁆𑀩𑀲𑀢𑁆𑀢𑀸𑀦𑀁 𑀯𑀸 𑀳𑀺𑀢𑁂 𑀯𑀺𑀦𑀺𑀬𑁄𑀚𑀓𑁄𑀢𑀺 𑀓𑀢𑁆𑀯𑀸 𑀧𑀞𑀫𑀁 𑀩𑀼𑀤𑁆𑀥𑁄, 𑀲𑀩𑁆𑀩𑀲𑀢𑁆𑀢𑀳𑀺𑀢𑀢𑁆𑀢𑀸 𑀢𑀤𑀦𑀦𑁆𑀢𑀭𑀁 𑀥𑀫𑁆𑀫𑁄, 𑀳𑀺𑀢𑀸𑀥𑀺𑀕𑀫𑀸𑀬 𑀧𑀝𑀺𑀧𑀦𑁆𑀦𑁄 𑀅𑀥𑀺𑀕𑀢𑀳𑀺𑀢𑁄 𑀘𑀸𑀢𑀺 𑀓𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 𑀲𑀗𑁆𑀖𑁄 𑀯𑀼𑀢𑁆𑀢𑁄’’𑀢𑀺 𑀅𑀝𑁆𑀞𑀓𑀣𑀸𑀕𑀢𑀦𑀬𑁂𑀦 𑀅𑀦𑀼𑀧𑀼𑀩𑁆𑀩𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀩𑀼𑀤𑁆𑀥𑀭𑀢𑀦𑀧𑀡𑀸𑀫𑀜𑁆𑀘 𑀓𑀭𑁄𑀦𑁆𑀢𑁄 𑀓𑁂𑀯𑀮𑀧𑀡𑀸𑀫𑀢𑁄 𑀣𑁄𑀫𑀦𑀸𑀧𑀼𑀩𑁆𑀩𑀗𑁆𑀕𑀫𑁄𑀯𑀲𑀸𑀢𑀺𑀲𑀬𑁄𑀢𑀺 ‘‘𑀓𑀭𑀼𑀡𑀸𑀲𑀻𑀢𑀮𑀳𑀤𑀬’’𑀦𑁆𑀢𑀺𑀆𑀤𑀺𑀧𑀤𑁂𑀳𑀺 𑀣𑁄𑀫𑀦𑀸𑀧𑀼𑀩𑁆𑀩𑀗𑁆𑀕𑀫𑀢𑀁 𑀤𑀲𑁆𑀲𑁂𑀢𑀺. 𑀣𑁄𑀫𑀦𑀸𑀧𑀼𑀩𑁆𑀩𑀗𑁆𑀕𑀫𑁂𑀦 𑀳𑀺 𑀧𑀡𑀸𑀫𑁂𑀦 𑀲𑀢𑁆𑀣𑀼 𑀕𑀼𑀡𑀸𑀢𑀺𑀲𑀬𑀬𑁄𑀕𑁄, 𑀢𑀢𑁄 𑀘𑀲𑁆𑀲 𑀅𑀦𑀼𑀢𑁆𑀢𑀭𑀯𑀦𑁆𑀤𑀦𑀻𑀬𑀪𑀸𑀯𑁄, 𑀢𑁂𑀦 𑀘 𑀅𑀢𑁆𑀢𑀦𑁄 𑀧𑀡𑀸𑀫𑀲𑁆𑀲 𑀔𑁂𑀢𑁆𑀢𑀗𑁆𑀕𑀢𑀪𑀸𑀯𑁄, 𑀢𑁂𑀦 𑀘𑀲𑁆𑀲 𑀔𑁂𑀢𑁆𑀢𑀗𑁆𑀕𑀢𑀲𑁆𑀲 𑀧𑀡𑀸𑀫𑀲𑁆𑀲 𑀬𑀣𑀸𑀥𑀺𑀧𑁆𑀧𑁂𑀢𑀦𑀺𑀧𑁆𑀨𑀢𑁆𑀢𑀺𑀳𑁂𑀢𑀼𑀪𑀸𑀯𑁄 𑀤𑀲𑁆𑀲𑀺𑀢𑁄𑀢𑀺. 𑀣𑁄𑀫𑀦𑀸𑀧𑀼𑀩𑁆𑀩𑀗𑁆𑀕𑀫𑀢𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 𑀬𑀲𑁆𑀲𑀸 𑀲𑀁𑀯𑀡𑁆𑀡𑀦𑀁 𑀓𑀢𑁆𑀢𑀼𑀓𑀸𑀫𑁄, 𑀲𑀸 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸 𑀓𑀭𑀼𑀡𑀸𑀧𑀜𑁆𑀜𑀸𑀧𑁆𑀧𑀥𑀸𑀦𑀸𑀬𑁂𑀯, 𑀦 𑀯𑀺𑀦𑀬𑀤𑁂𑀲𑀦𑀸 𑀯𑀺𑀬 𑀓𑀭𑀼𑀡𑀸𑀧𑁆𑀧𑀥𑀸𑀦𑀸, 𑀦𑀸𑀧𑀺 𑀅𑀪𑀺𑀥𑀫𑁆𑀫𑀤𑁂𑀲𑀦𑀸 𑀯𑀺𑀬 𑀧𑀜𑁆𑀜𑀸𑀧𑁆𑀧𑀥𑀸𑀦𑀸𑀢𑀺 𑀢𑀤𑀼𑀪𑀬𑀧𑁆𑀧𑀥𑀸𑀦𑀫𑁂𑀯 𑀣𑁄𑀫𑀦𑀫𑀸𑀭𑀪𑀢𑀺. 𑀏𑀲𑀸 𑀳𑀺 𑀆𑀘𑀭𑀺𑀬𑀲𑁆𑀲 𑀧𑀓𑀢𑀺, 𑀬𑀤𑀺𑀤𑀁 𑀆𑀭𑀫𑁆𑀪𑀸𑀦𑀼𑀭𑀽𑀧𑀣𑁄𑀫𑀦𑀸. 𑀢𑁂𑀦𑁂𑀯 𑀘 𑀯𑀺𑀦𑀬𑀤𑁂𑀲𑀦𑀸𑀬 𑀲𑀁𑀯𑀡𑁆𑀡𑀦𑀸𑀭𑀫𑁆𑀪𑁂 ‘‘𑀬𑁄 𑀓𑀧𑁆𑀧𑀓𑁄𑀝𑀻𑀳𑀺𑀧𑀺…𑀧𑁂… 𑀫𑀳𑀸𑀓𑀸𑀭𑀼𑀡𑀺𑀓𑀲𑁆𑀲 𑀢𑀲𑁆𑀲𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑀕𑀦𑁆𑀣𑀸𑀭𑀫𑁆𑀪𑀓𑀣𑀸) 𑀓𑀭𑀼𑀡𑀸𑀧𑁆𑀧𑀥𑀸𑀦𑀁, 𑀅𑀪𑀺𑀥𑀫𑁆𑀫𑀤𑁂𑀲𑀦𑀸𑀬 𑀲𑀁𑀯𑀡𑁆𑀡𑀦𑀸𑀭𑀫𑁆𑀪𑁂 ‘‘𑀓𑀭𑀼𑀡𑀸 𑀯𑀺𑀬…𑀧𑁂… 𑀬𑀣𑀸𑀭𑀼𑀘𑀻’’𑀢𑀺 (𑀥. 𑀲. 𑀅𑀝𑁆𑀞. 𑁧) 𑀧𑀜𑁆𑀜𑀸𑀧𑁆𑀧𑀥𑀸𑀦𑀜𑁆𑀘 𑀣𑁄𑀫𑀦𑀫𑀸𑀭𑀤𑁆𑀥𑀁. 𑀯𑀺𑀦𑀬𑀤𑁂𑀲𑀦𑀸 𑀳𑀺 𑀆𑀲𑀬𑀸𑀤𑀺𑀦𑀺𑀭𑀧𑁂𑀓𑁆𑀔𑀓𑁂𑀯𑀮𑀓𑀭𑀼𑀡𑀸𑀬 𑀧𑀸𑀓𑀢𑀺𑀓𑀲𑀢𑁆𑀢𑁂𑀦𑀸𑀧𑀺 𑀅𑀲𑁄𑀢𑀩𑁆𑀩𑀸𑀭𑀳𑀁 𑀲𑀼𑀡𑀦𑁆𑀢𑁄, 𑀅𑀧𑀼𑀘𑁆𑀙𑀺𑀢𑀩𑁆𑀩𑀸𑀭𑀳𑀁 𑀧𑀼𑀘𑁆𑀙𑀦𑁆𑀢𑁄, 𑀅𑀯𑀢𑁆𑀢𑀩𑁆𑀩𑀸𑀭𑀳𑀜𑁆𑀘 𑀯𑀤𑀦𑁆𑀢𑁄 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑀻𑀢𑀺 𑀓𑀭𑀼𑀡𑀸𑀧𑁆𑀧𑀥𑀸𑀦𑀸. 𑀢𑀣𑀸 𑀳𑀺 𑀉𑀓𑁆𑀓𑀁𑀲𑀧𑀭𑀺𑀬𑀦𑁆𑀢𑀕𑀢𑀳𑀺𑀭𑁄𑀢𑁆𑀢𑀧𑁆𑀧𑁄𑀧𑀺 𑀪𑀕𑀯𑀸 𑀮𑁄𑀓𑀺𑀬𑀲𑀸𑀥𑀼𑀚𑀦𑁂𑀳𑀺𑀧𑀺 𑀧𑀭𑀺𑀳𑀭𑀺𑀢𑀩𑁆𑀩𑀸𑀦𑀺 ‘‘𑀲𑀺𑀔𑀭𑀡𑀻, 𑀲𑀫𑁆𑀪𑀺𑀦𑁆𑀦𑀸’’𑀢𑀺𑀆𑀤𑀺𑀯𑀘𑀦𑀸𑀦𑀺, (𑀧𑀸𑀭𑀸. 𑁧𑁮𑁫) 𑀬𑀣𑀸𑀧𑀭𑀸𑀥𑀜𑁆𑀘 𑀕𑀭𑀳𑀯𑀘𑀦𑀸𑀦𑀺 𑀫𑀳𑀸𑀓𑀭𑀼𑀡𑀸𑀲𑀜𑁆𑀘𑁄𑀤𑀺𑀢𑀫𑀸𑀦𑀲𑁄 𑀫𑀳𑀸𑀧𑀭𑀺𑀲𑀫𑀚𑁆𑀛𑁂 𑀅𑀪𑀸𑀲𑀺, 𑀢𑀁𑀢𑀁𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺 𑀓𑀸𑀭𑀡𑀸𑀧𑁂𑀓𑁆𑀔𑀸𑀬 𑀘 𑀯𑁂𑀭𑀜𑁆𑀚𑀸𑀤𑀻𑀲𑀼 𑀲𑀸𑀭𑀻𑀭𑀺𑀓𑀁 𑀔𑁂𑀤𑀫𑀦𑀼𑀪𑁄𑀲𑀺. 𑀢𑀲𑁆𑀫𑀸 𑀓𑀺𑀜𑁆𑀘𑀸𑀧𑀺 𑀪𑀽𑀫𑀦𑁆𑀢𑀭𑀧𑀘𑁆𑀘𑀬𑀸𑀓𑀸𑀭𑀲𑀫𑀬𑀦𑁆𑀢𑀭𑀓𑀣𑀸𑀦𑀁 𑀯𑀺𑀬 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸𑀧𑀺 𑀲𑀫𑀼𑀝𑁆𑀞𑀸𑀧𑀺𑀓𑀸 𑀧𑀜𑁆𑀜𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑀸𑀬 𑀅𑀢𑀺𑀲𑀬𑀓𑀺𑀘𑁆𑀘𑀯𑀢𑀻, 𑀓𑀭𑀼𑀡𑀸𑀬 𑀓𑀺𑀘𑁆𑀘𑀁 𑀧𑀦 𑀢𑀢𑁄𑀧𑀺 𑀅𑀥𑀺𑀓𑀦𑁆𑀢𑀺 𑀯𑀺𑀦𑀬𑀤𑁂𑀲𑀦𑀸𑀬 𑀓𑀭𑀼𑀡𑀸𑀧𑁆𑀧𑀥𑀸𑀦𑀢𑀸 𑀯𑀼𑀢𑁆𑀢𑀸. 𑀓𑀭𑀼𑀡𑀸𑀩𑁆𑀬𑀸𑀧𑀸𑀭𑀸𑀥𑀺𑀓𑀢𑀸𑀬 𑀳𑀺 𑀤𑁂𑀲𑀦𑀸𑀬 𑀓𑀭𑀼𑀡𑀸𑀧𑀥𑀸𑀦𑀢𑀸, 𑀅𑀪𑀺𑀥𑀫𑁆𑀫𑀤𑁂𑀲𑀦𑀸 𑀧𑀦 𑀓𑁂𑀯𑀮𑀧𑀜𑁆𑀜𑀸𑀧𑁆𑀧𑀥𑀸𑀦𑀸 𑀧𑀭𑀫𑀢𑁆𑀣𑀥𑀫𑁆𑀫𑀸𑀦𑀁 𑀬𑀣𑀸𑀲𑀪𑀸𑀯𑀧𑀝𑀺𑀯𑁂𑀥𑀲𑀫𑀢𑁆𑀣𑀸𑀬 𑀧𑀜𑁆𑀜𑀸𑀬 𑀢𑀢𑁆𑀣 𑀲𑀸𑀢𑀺𑀲𑀬𑀧𑁆𑀧𑀯𑀢𑁆𑀢𑀺𑀢𑁄. 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸 𑀧𑀦 𑀓𑀭𑀼𑀡𑀸𑀧𑀜𑁆𑀜𑀸𑀧𑁆𑀧𑀥𑀸𑀦𑀸 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀆𑀲𑀬𑀸𑀦𑀼𑀲𑀬𑀸𑀥𑀺𑀫𑀼𑀢𑁆𑀢𑀺𑀘𑀭𑀺𑀢𑀸𑀤𑀺𑀪𑁂𑀤𑀧𑀭𑀺𑀘𑁆𑀙𑀺𑀦𑁆𑀤𑀦𑀲𑀫𑀢𑁆𑀣𑀸𑀬 𑀧𑀜𑁆𑀜𑀸𑀬 𑀲𑀢𑁆𑀢𑁂𑀲𑀼 𑀘 𑀫𑀳𑀸𑀓𑀭𑀼𑀡𑀸𑀬 𑀢𑀢𑁆𑀣 𑀲𑀸𑀢𑀺𑀲𑀬𑀧𑁆𑀧𑀯𑀢𑁆𑀢𑀺𑀢𑁄. 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀬 𑀳𑀺 𑀫𑀳𑀸𑀓𑀭𑀼𑀡𑀸𑀬 𑀲𑀫𑀸𑀧𑀢𑁆𑀢𑀺𑀩𑀳𑀼𑀮𑁄 𑀯𑀺𑀦𑁂𑀬𑁆𑀬𑀲𑀦𑁆𑀢𑀸𑀦𑁂 𑀢𑀤𑀚𑁆𑀛𑀸𑀲𑀬𑀸𑀦𑀼𑀮𑁄𑀫𑁂𑀦 𑀕𑀫𑁆𑀪𑀻𑀭𑀫𑀢𑁆𑀣𑀧𑀤𑀁 𑀧𑀢𑀺𑀝𑁆𑀞𑀧𑁂𑀲𑀺. 𑀢𑀲𑁆𑀫𑀸 𑀆𑀭𑀫𑁆𑀪𑀸𑀦𑀼𑀭𑀽𑀧𑀁 𑀓𑀭𑀼𑀡𑀸𑀧𑀜𑁆𑀜𑀸𑀧𑁆𑀧𑀥𑀸𑀦𑀫𑁂𑀯 𑀣𑁄𑀫𑀦𑀁 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀅𑀬𑀫𑁂𑀢𑁆𑀣 𑀲𑀫𑀼𑀤𑀸𑀬𑀢𑁆𑀣𑁄.

𑀅𑀬𑀁 𑀧𑀦 𑀅𑀯𑀬𑀯𑀢𑁆𑀣𑁄 𑁋 𑀓𑀺𑀭𑀢𑀻𑀢𑀺 𑀓𑀭𑀼𑀡𑀸, 𑀧𑀭𑀤𑀼𑀓𑁆𑀔𑀁 𑀯𑀺𑀓𑁆𑀔𑀺𑀧𑀢𑀺 𑀧𑀘𑁆𑀘𑀬𑀯𑁂𑀓𑀮𑁆𑀮𑀓𑀭𑀡𑁂𑀦 𑀅𑀧𑀦𑁂𑀢𑀻𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀔𑀺𑀢𑁂𑀲𑀼 𑀯𑀸 𑀓𑀺𑀭𑀺𑀬𑀢𑀺 𑀧𑀲𑀸𑀭𑀺𑀬𑀢𑀻𑀢𑀺 𑀓𑀭𑀼𑀡𑀸. 𑀅𑀣 𑀯𑀸 𑀓𑀺𑀡𑀸𑀢𑀻𑀢𑀺 𑀓𑀭𑀼𑀡𑀸, 𑀧𑀭𑀤𑀼𑀓𑁆𑀔𑁂 𑀲𑀢𑀺 𑀓𑀸𑀭𑀼𑀡𑀺𑀓𑀁 𑀳𑀺𑀁𑀲𑀢𑀺 𑀯𑀺𑀩𑀸𑀥𑀢𑀺, 𑀧𑀭𑀤𑀼𑀓𑁆𑀔𑀁 𑀯𑀸 𑀯𑀺𑀦𑀸𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀧𑀭𑀤𑀼𑀓𑁆𑀔𑁂 𑀲𑀢𑀺 𑀲𑀸𑀥𑀽𑀦𑀁 𑀓𑀫𑁆𑀧𑀦𑀁 𑀳𑀤𑀬𑀔𑁂𑀤𑀁 𑀓𑀭𑁄𑀢𑀻𑀢𑀺 𑀯𑀸 𑀓𑀭𑀼𑀡𑀸. 𑀅𑀣 𑀯𑀸 𑀓𑀫𑀺𑀢𑀺 𑀲𑀼𑀔𑀁, 𑀢𑀁 𑀭𑀼𑀦𑁆𑀥𑀢𑀻𑀢𑀺 𑀓𑀭𑀼𑀡𑀸. 𑀏𑀲𑀸 𑀳𑀺 𑀧𑀭𑀤𑀼𑀓𑁆𑀔𑀸𑀧𑀦𑀬𑀦𑀓𑀸𑀫𑀢𑀸𑀮𑀓𑁆𑀔𑀡𑀸 𑀅𑀢𑁆𑀢𑀲𑀼𑀔𑀦𑀺𑀭𑀧𑁂𑀓𑁆𑀔𑀢𑀸𑀬 𑀓𑀸𑀭𑀼𑀡𑀺𑀓𑀸𑀦𑀁 𑀲𑀼𑀔𑀁 𑀭𑀼𑀦𑁆𑀥𑀢𑀺 𑀯𑀺𑀩𑀦𑁆𑀥𑀢𑀻𑀢𑀺, 𑀲𑀩𑁆𑀩𑀢𑁆𑀣 𑀲𑀤𑁆𑀤𑀲𑀢𑁆𑀣𑀸𑀦𑀼𑀲𑀸𑀭𑁂𑀦 𑀧𑀤𑀦𑀺𑀧𑁆𑀨𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀉𑀡𑁆𑀳𑀸𑀪𑀺𑀢𑀢𑁆𑀢𑁂𑀳𑀺 𑀲𑁂𑀯𑀻𑀬𑀢𑀻𑀢𑀺 𑀲𑀻𑀢𑀁, 𑀉𑀡𑁆𑀳𑀸𑀪𑀺𑀲𑀫𑀦𑀁. 𑀢𑀁 𑀮𑀸𑀢𑀺 𑀕𑀡𑁆𑀳𑀸𑀢𑀻𑀢𑀺 𑀲𑀻𑀢𑀮𑀁, ‘‘𑀘𑀺𑀢𑁆𑀢𑀁 𑀯𑀸 𑀢𑁂 𑀔𑀺𑀧𑀺𑀲𑁆𑀲𑀸𑀫𑀺, 𑀳𑀤𑀬𑀁 𑀯𑀸 𑀢𑁂 𑀨𑀸𑀮𑁂𑀲𑁆𑀲𑀸𑀫𑀻’’𑀢𑀺 (𑀲𑀁. 𑀦𑀺. 𑁧.𑁨𑁪𑁬; 𑀲𑀼. 𑀦𑀺. 𑀆𑀴𑀯𑀓𑀲𑀼𑀢𑁆𑀢) 𑀏𑀢𑁆𑀣 𑀉𑀭𑁄 ‘‘𑀳𑀤𑀬’’𑀦𑁆𑀢𑀺 𑀯𑀼𑀢𑁆𑀢𑀁, ‘‘𑀯𑀓𑁆𑀓𑀁 𑀳𑀤𑀬’’𑀦𑁆𑀢𑀺 (𑀫. 𑀦𑀺. 𑁧.𑁧𑁧𑁦; 𑁨.𑁧𑁧𑁪; 𑁩.𑁧𑁫𑁪) 𑀏𑀢𑁆𑀣 𑀳𑀤𑀬𑀯𑀢𑁆𑀣𑀼, ‘‘𑀳𑀤𑀬𑀸 𑀳𑀤𑀬𑀁 𑀫𑀜𑁆𑀜𑁂 𑀅𑀜𑁆𑀜𑀸𑀬 𑀢𑀘𑁆𑀙𑀢𑀻’’𑀢𑀺 (𑀫. 𑀦𑀺. 𑁧.𑁬𑁩) 𑀏𑀢𑁆𑀣 𑀘𑀺𑀢𑁆𑀢𑀁, 𑀇𑀥𑀸𑀧𑀺 𑀘𑀺𑀢𑁆𑀢𑀫𑁂𑀯 𑀅𑀩𑁆𑀪𑀦𑁆𑀢𑀭𑀝𑁆𑀞𑁂𑀦 𑀳𑀤𑀬𑀁. 𑀅𑀢𑁆𑀢𑀦𑁄 𑀲𑀪𑀸𑀯𑀁 𑀯𑀸 𑀳𑀭𑀢𑀻𑀢𑀺 𑀳𑀤𑀬𑀁, 𑀭-𑀓𑀸𑀭𑀲𑁆𑀲 𑀤-𑀓𑀸𑀭𑀁 𑀓𑀢𑁆𑀯𑀸𑀢𑀺 𑀦𑁂𑀭𑀼𑀢𑁆𑀢𑀺𑀓𑀸. 𑀓𑀭𑀼𑀡𑀸𑀬 𑀲𑀻𑀢𑀮𑀁 𑀳𑀤𑀬𑀫𑀲𑁆𑀲𑀸𑀢𑀺 𑀓𑀭𑀼𑀡𑀸𑀲𑀻𑀢𑀮𑀳𑀤𑀬𑁄, 𑀢𑀁 𑀓𑀭𑀼𑀡𑀸𑀲𑀻𑀢𑀮𑀳𑀤𑀬𑀁.

𑀓𑀸𑀫𑀜𑁆𑀘𑁂𑀢𑁆𑀣 𑀧𑀭𑁂𑀲𑀁 𑀳𑀺𑀢𑁄𑀧𑀲𑀁𑀳𑀸𑀭𑀲𑀼𑀔𑀸𑀤𑀺𑀅𑀧𑀭𑀺𑀳𑀸𑀦𑀺𑀚𑁆𑀛𑀸𑀦𑀲𑀪𑀸𑀯𑀢𑀸𑀬, 𑀩𑁆𑀬𑀸𑀧𑀸𑀤𑀸𑀤𑀻𑀦𑀁 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀢𑀸𑀬 𑀘 𑀲𑀢𑁆𑀢𑀲𑀦𑁆𑀢𑀸𑀦𑀕𑀢𑀲𑀦𑁆𑀢𑀸𑀧𑀯𑀺𑀘𑁆𑀙𑁂𑀤𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀫𑁂𑀢𑁆𑀢𑀸𑀫𑀼𑀤𑀺𑀢𑀸𑀦𑀫𑁆𑀧𑀺 𑀘𑀺𑀢𑁆𑀢𑀲𑀻𑀢𑀮𑀪𑀸𑀯𑀓𑀸𑀭𑀡𑀢𑀸 𑀉𑀧𑀮𑀩𑁆𑀪𑀢𑀺, 𑀢𑀣𑀸𑀧𑀺 𑀧𑀭𑀤𑀼𑀓𑁆𑀔𑀸𑀧𑀦𑀬𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀧𑀭𑀽𑀧𑀢𑀸𑀧𑀸𑀲𑀳𑀦𑀭𑀲𑀸 𑀅𑀯𑀺𑀳𑀺𑀁𑀲𑀸𑀪𑀽𑀢𑀸 𑀓𑀭𑀼𑀡𑀸𑀯 𑀯𑀺𑀲𑁂𑀲𑁂𑀦 𑀪𑀕𑀯𑀢𑁄 𑀘𑀺𑀢𑁆𑀢𑀲𑁆𑀲 𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀺 𑀯𑀺𑀬 𑀲𑀻𑀢𑀺𑀪𑀸𑀯𑀦𑀺𑀫𑀺𑀢𑁆𑀢𑀦𑁆𑀢𑀺 𑀢𑀲𑁆𑀲𑀸𑀬𑁂𑀯 𑀘𑀺𑀢𑁆𑀢𑀲𑀻𑀢𑀮𑀪𑀸𑀯𑀓𑀸𑀭𑀡𑀢𑀸 𑀯𑀼𑀢𑁆𑀢𑀸. 𑀓𑀭𑀼𑀡𑀸𑀫𑀼𑀔𑁂𑀦 𑀯𑀸 𑀫𑁂𑀢𑁆𑀢𑀸𑀫𑀼𑀤𑀺𑀢𑀸𑀦𑀫𑁆𑀧𑀺 𑀳𑀤𑀬𑀲𑀻𑀢𑀮𑀪𑀸𑀯𑀓𑀸𑀭𑀡𑀢𑀸 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀲𑀩𑁆𑀩𑀢𑁆𑀣 𑀦𑀺𑀭𑀯𑀲𑁂𑀲𑀢𑁆𑀣𑁄 𑀉𑀧𑀤𑀺𑀲𑀻𑀬𑀢𑀺, 𑀧𑀥𑀸𑀦𑀲𑀳𑀘𑀭𑀡𑀸𑀯𑀺𑀦𑀸𑀪𑀸𑀯𑀸𑀤𑀺𑀦𑀬𑁂𑀳𑀺𑀧𑀺 𑀬𑀣𑀸𑀮𑀩𑁆𑀪𑀫𑀸𑀦𑀁 𑀕𑀬𑁆𑀳𑀫𑀸𑀦𑀢𑁆𑀢𑀸. 𑀅𑀧𑀺𑀘𑁂𑀢𑁆𑀣 𑀢𑀁𑀲𑀫𑁆𑀧𑀬𑀼𑀢𑁆𑀢𑀜𑀸𑀡𑀲𑁆𑀲 𑀙𑀅𑀲𑀸𑀥𑀸𑀭𑀡𑀜𑀸𑀡𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀅𑀲𑀸𑀥𑀸𑀭𑀡𑀜𑀸𑀡𑀯𑀺𑀲𑁂𑀲𑀦𑀺𑀩𑀦𑁆𑀥𑀦𑀪𑀽𑀢𑀸 𑀲𑀸𑀢𑀺𑀲𑀬𑀁, 𑀦𑀺𑀭𑀯𑀲𑁂𑀲𑀜𑁆𑀘 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀯𑀺𑀬 𑀲𑀯𑀺𑀲𑀬𑀩𑁆𑀬𑀸𑀧𑀺𑀢𑀸𑀬 𑀫𑀳𑀸𑀓𑀭𑀼𑀡𑀸𑀪𑀸𑀯𑀫𑀼𑀧𑀕𑀢𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑀲𑀸𑀢𑀺𑀲𑀬𑀪𑀸𑀯𑀧𑁆𑀧𑀢𑁆𑀢𑀸 𑀓𑀭𑀼𑀡𑀸𑀯 𑀳𑀤𑀬𑀲𑀻𑀢𑀮𑀢𑁆𑀢𑀳𑁂𑀢𑀼𑀪𑀸𑀯𑁂𑀦 𑀯𑀼𑀢𑁆𑀢𑀸. 𑀅𑀣 𑀯𑀸 𑀲𑀢𑀺𑀧𑀺 𑀫𑁂𑀢𑁆𑀢𑀸𑀫𑀼𑀤𑀺𑀢𑀸𑀦𑀁 𑀧𑀭𑁂𑀲𑀁 𑀳𑀺𑀢𑁄𑀧𑀲𑀁𑀳𑀸𑀭𑀲𑀼𑀔𑀸𑀤𑀺𑀅𑀧𑀭𑀺𑀳𑀸𑀦𑀺𑀚𑁆𑀛𑀸𑀦𑀲𑀪𑀸𑀯𑀢𑀸𑀬 𑀲𑀸𑀢𑀺𑀲𑀬𑁂 𑀳𑀤𑀬𑀲𑀻𑀢𑀮𑀪𑀸𑀯𑀦𑀺𑀩𑀦𑁆𑀥𑀦𑀢𑁆𑀢𑁂 𑀲𑀓𑀮𑀩𑀼𑀤𑁆𑀥𑀕𑀼𑀡𑀯𑀺𑀲𑁂𑀲𑀓𑀸𑀭𑀡𑀢𑀸𑀬 𑀢𑀸𑀲𑀫𑁆𑀧𑀺 𑀓𑀸𑀭𑀡𑀦𑁆𑀢𑀺 𑀓𑀭𑀼𑀡𑀸𑀬 𑀏𑀯 𑀳𑀤𑀬𑀲𑀻𑀢𑀮𑀪𑀸𑀯𑀓𑀸𑀭𑀡𑀢𑀸 𑀯𑀼𑀢𑁆𑀢𑀸. 𑀓𑀭𑀼𑀡𑀸𑀦𑀺𑀤𑀸𑀦𑀸 𑀳𑀺 𑀲𑀩𑁆𑀩𑁂𑀧𑀺 𑀩𑀼𑀤𑁆𑀥𑀕𑀼𑀡𑀸. 𑀓𑀭𑀼𑀡𑀸𑀦𑀼𑀪𑀸𑀯𑀦𑀺𑀩𑁆𑀩𑀸𑀧𑀺𑀬𑀫𑀸𑀦𑀲𑀁𑀲𑀸𑀭𑀤𑀼𑀓𑁆𑀔𑀲𑀦𑁆𑀢𑀸𑀧𑀲𑁆𑀲 𑀳𑀺 𑀪𑀕𑀯𑀢𑁄 𑀧𑀭𑀤𑀼𑀓𑁆𑀔𑀸𑀧𑀦𑀬𑀦𑀓𑀸𑀫𑀢𑀸𑀬 𑀅𑀦𑁂𑀓𑀸𑀦𑀺𑀧𑀺 𑀓𑀧𑁆𑀧𑀸𑀦𑀫𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀅𑀓𑀺𑀮𑀦𑁆𑀢𑀭𑀽𑀧𑀲𑁆𑀲𑁂𑀯 𑀦𑀺𑀭𑀯𑀲𑁂𑀲𑀩𑀼𑀤𑁆𑀥𑀓𑀭𑀥𑀫𑁆𑀫𑀲𑀫𑁆𑀪𑀭𑀡𑀦𑀺𑀭𑀢𑀲𑁆𑀲 𑀲𑀫𑀥𑀺𑀕𑀢𑀥𑀫𑁆𑀫𑀸𑀥𑀺𑀧𑀢𑁂𑀬𑁆𑀬𑀲𑁆𑀲 𑀘 𑀲𑀦𑁆𑀦𑀺𑀳𑀺𑀢𑁂𑀲𑀼𑀧𑀺 𑀲𑀢𑁆𑀢𑀲𑀗𑁆𑀖𑀸𑀢𑀲𑀫𑀼𑀧𑀦𑀻𑀢𑀳𑀤𑀬𑀽𑀧𑀢𑀸𑀧𑀦𑀺𑀫𑀺𑀢𑁆𑀢𑁂𑀲𑀼 𑀦 𑀈𑀲𑀓𑀫𑁆𑀧𑀺 𑀘𑀺𑀢𑁆𑀢𑀲𑀻𑀢𑀺𑀪𑀸𑀯𑀲𑁆𑀲 𑀅𑀜𑁆𑀜𑀣𑀢𑁆𑀢𑀫𑀳𑁄𑀲𑀻𑀢𑀺. 𑀢𑀻𑀲𑀼 𑀘𑁂𑀢𑁆𑀣 𑀯𑀺𑀓𑀧𑁆𑀧𑁂𑀲𑀼 𑀧𑀞𑀫𑁂 𑀯𑀺𑀓𑀧𑁆𑀧𑁂 𑀅𑀯𑀺𑀲𑁂𑀲𑀪𑀽𑀢𑀸 𑀩𑀼𑀤𑁆𑀥𑀪𑀽𑀫𑀺𑀕𑀢𑀸, 𑀤𑀼𑀢𑀺𑀬𑁂 𑀢𑀣𑁂𑀯 𑀫𑀳𑀸𑀓𑀭𑀼𑀡𑀸𑀪𑀸𑀯𑀽𑀧𑀕𑀢𑀸, 𑀢𑀢𑀺𑀬𑁂 𑀧𑀞𑀫𑀸𑀪𑀺𑀦𑀻𑀳𑀸𑀭𑀢𑁄 𑀧𑀝𑁆𑀞𑀸𑀬 𑀢𑀻𑀲𑀼𑀧𑀺 𑀅𑀯𑀢𑁆𑀣𑀸𑀲𑀼 𑀧𑀯𑀢𑁆𑀢𑀸 𑀪𑀕𑀯𑀢𑁄 𑀓𑀭𑀼𑀡𑀸 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀚𑀸𑀦𑀸𑀢𑀻𑀢𑀺 𑀧𑀜𑁆𑀜𑀸, 𑀬𑀣𑀸𑀲𑀪𑀸𑀯𑀁 𑀧𑀓𑀸𑀭𑁂𑀳𑀺 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀅𑀢𑁆𑀣𑁄. 𑀧𑀜𑁆𑀜𑀧𑁂𑀢𑀻𑀢𑀺 𑀯𑀸 𑀧𑀜𑁆𑀜𑀸, 𑀢𑀁 𑀢𑀤𑀢𑁆𑀣𑀁 𑀧𑀸𑀓𑀝𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀸𑀬𑁂𑀯 𑀜𑁂𑀬𑁆𑀬𑀸𑀯𑀭𑀡𑀧𑁆𑀧𑀳𑀸𑀦𑀢𑁄 𑀧𑀓𑀸𑀭𑁂𑀳𑀺 𑀥𑀫𑁆𑀫𑀲𑀪𑀸𑀯𑀚𑁄𑀢𑀦𑀝𑁆𑀞𑁂𑀦 𑀧𑀚𑁆𑀚𑁄𑀢𑁄𑀢𑀺 𑀧𑀜𑁆𑀜𑀸𑀧𑀚𑁆𑀚𑁄𑀢𑁄. 𑀧𑀜𑁆𑀜𑀯𑀢𑁄 𑀳𑀺 𑀏𑀓𑀧𑀮𑁆𑀮𑀗𑁆𑀓𑁂𑀦𑀧𑀺 𑀦𑀺𑀲𑀺𑀦𑁆𑀦𑀲𑁆𑀲 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀏𑀓𑀧𑀚𑁆𑀚𑁄𑀢𑀸 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀘𑀢𑁆𑀢𑀸𑀭𑁄𑀫𑁂 𑀪𑀺𑀓𑁆𑀔𑀯𑁂, 𑀧𑀚𑁆𑀚𑁄𑀢𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀘𑀦𑁆𑀤𑀧𑀚𑁆𑀚𑁄𑀢𑁄, 𑀲𑀽𑀭𑀺𑀬𑀧𑀚𑁆𑀚𑁄𑀢𑁄, 𑀅𑀕𑁆𑀕𑀺𑀧𑀚𑁆𑀚𑁄𑀢𑁄, 𑀧𑀜𑁆𑀜𑀸𑀧𑀚𑁆𑀚𑁄𑀢𑁄, 𑀇𑀫𑁂 𑀔𑁄 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀧𑀚𑁆𑀚𑁄𑀢𑀸. 𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀧𑀚𑁆𑀚𑁄𑀢𑀸𑀦𑀁 𑀬𑀤𑀺𑀤𑀁 𑀧𑀜𑁆𑀜𑀸𑀧𑀚𑁆𑀚𑁄𑀢𑁄’’𑀢𑀺 (𑀅. 𑀦𑀺. 𑁪.𑁧𑁪𑁫). 𑀢𑁂𑀦 𑀯𑀺𑀳𑀢𑁄 𑀯𑀺𑀲𑁂𑀲𑁂𑀦 𑀲𑀫𑀼𑀕𑁆𑀖𑀸𑀝𑀺𑀢𑁄𑀢𑀺 𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑁄, 𑀯𑀺𑀲𑁂𑀲𑀢𑀸 𑀘𑁂𑀢𑁆𑀣 𑀉𑀧𑀭𑀺 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀫𑀼𑀬𑁆𑀳𑀦𑁆𑀢𑀺 𑀢𑁂𑀦, 𑀲𑀬𑀁 𑀯𑀸 𑀫𑀼𑀬𑁆𑀳𑀢𑀺, 𑀫𑀼𑀬𑁆𑀳𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 𑀫𑁄𑀳𑁄, 𑀅𑀯𑀺𑀚𑁆𑀚𑀸. 𑀲𑁆𑀯𑁂𑀯 𑀯𑀺𑀲𑀬𑀲𑀪𑀸𑀯𑀧𑀝𑀺𑀘𑁆𑀙𑀸𑀤𑀦𑀢𑁄 𑀅𑀦𑁆𑀥𑀓𑀸𑀭𑀲𑀭𑀺𑀓𑁆𑀔𑀢𑀸𑀬 𑀢𑀫𑁄 𑀯𑀺𑀬𑀸𑀢𑀺 𑀫𑁄𑀳𑀢𑀫𑁄. 𑀲𑀢𑀺𑀧𑀺 𑀢𑀫𑀲𑀤𑁆𑀤𑀲𑁆𑀲 𑀲𑀤𑀺𑀲𑀓𑀧𑁆𑀧𑀦𑀫𑀦𑁆𑀢𑀭𑁂𑀦 𑀅𑀯𑀺𑀚𑁆𑀚𑀸𑀯𑀸𑀘𑀓𑀢𑁆𑀢𑁂 𑀫𑁄𑀳𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑁂𑀦 𑀢𑀩𑁆𑀩𑀺𑀲𑁂𑀲𑀓𑀢𑀸𑀯𑁂𑀢𑁆𑀣 𑀬𑀼𑀢𑁆𑀢𑀸𑀢𑀺 𑀲𑀤𑀺𑀲𑀓𑀧𑁆𑀧𑀦𑀸. 𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑁄 𑀫𑁄𑀳𑀢𑀫𑁄 𑀬𑀲𑁆𑀲𑀸𑀢𑀺 𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫𑁄, 𑀢𑀁 𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫𑀁.

𑀦𑀦𑀼 𑀘 𑀲𑀩𑁆𑀩𑁂𑀲𑀫𑁆𑀧𑀺 𑀔𑀻𑀡𑀸𑀲𑀯𑀸𑀦𑀁 𑀧𑀜𑁆𑀜𑀸𑀧𑀚𑁆𑀚𑁄𑀢𑁂𑀦 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀳𑀢𑀢𑀸 𑀲𑀫𑁆𑀪𑀯𑀢𑀺, 𑀅𑀣 𑀓𑀲𑁆𑀫𑀸 𑀅𑀜𑁆𑀜𑀲𑀸𑀥𑀸𑀭𑀡𑀸𑀯𑀺𑀲𑁂𑀲𑀕𑀼𑀡𑁂𑀦 𑀪𑀕𑀯𑀢𑁄 𑀣𑁄𑀫𑀦𑀸 𑀯𑀼𑀢𑁆𑀢𑀸𑀢𑀺? 𑀲𑀯𑀸𑀲𑀦𑀧𑁆𑀧𑀳𑀸𑀦𑁂𑀦 𑀅𑀦𑀜𑁆𑀜𑀲𑀸𑀥𑀸𑀭𑀡𑀯𑀺𑀲𑁂𑀲𑀢𑀸𑀲𑀫𑁆𑀪𑀯𑀢𑁄. 𑀲𑀩𑁆𑀩𑁂𑀲𑀫𑁆𑀧𑀺 𑀳𑀺 𑀔𑀻𑀡𑀸𑀲𑀯𑀸𑀦𑀁 𑀧𑀜𑁆𑀜𑀸𑀧𑀚𑁆𑀚𑁄𑀢𑀳𑀢𑀸𑀯𑀺𑀚𑁆𑀚𑀦𑁆𑀥𑀓𑀸𑀭𑀢𑁆𑀢𑁂𑀧𑀺 𑀲𑀢𑀺 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑁂𑀳𑀺 𑀯𑀺𑀬 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀸𑀦𑀁 𑀲𑀸𑀯𑀓𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀲𑀯𑀸𑀲𑀦𑀧𑁆𑀧𑀳𑀸𑀦𑁂𑀦 𑀓𑀺𑀮𑁂𑀲𑀧𑁆𑀧𑀳𑀸𑀦𑀲𑁆𑀲 𑀯𑀺𑀲𑁂𑀲𑁄 𑀯𑀺𑀚𑁆𑀚𑀢𑁂𑀯𑀸𑀢𑀺. 𑀅𑀣 𑀯𑀸 𑀧𑀭𑁄𑀧𑀤𑁂𑀲𑀫𑀦𑁆𑀢𑀭𑁂𑀦 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀅𑀘𑁆𑀘𑀦𑁆𑀢𑀁 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀯𑀺𑀕𑀫𑀲𑁆𑀲 𑀦𑀺𑀧𑁆𑀨𑀸𑀤𑀺𑀢𑀢𑁆𑀢𑀸 (𑀦𑀺𑀩𑁆𑀩𑀢𑁆𑀢𑀺𑀢𑀢𑁆𑀢𑀸 𑀫. 𑀦𑀺. 𑀝𑀻. 𑁧.𑁧), 𑀢𑀢𑁆𑀣 𑀘 𑀲𑀩𑁆𑀩𑀜𑁆𑀜𑀼𑀢𑀸𑀬 𑀩𑀮𑁂𑀲𑀼 𑀘 𑀯𑀲𑀻𑀪𑀸𑀯𑀲𑁆𑀲 𑀲𑀫𑀥𑀺𑀕𑀢𑀢𑁆𑀢𑀸, 𑀧𑀭𑀲𑀦𑁆𑀢𑀢𑀺𑀬𑀜𑁆𑀘 𑀥𑀫𑁆𑀫𑀤𑁂𑀲𑀦𑀸𑀢𑀺𑀲𑀬𑀸𑀦𑀼𑀪𑀸𑀯𑁂𑀦 𑀲𑀫𑁆𑀫𑀤𑁂𑀯 𑀢𑀲𑁆𑀲 𑀧𑀯𑀢𑁆𑀢𑀺𑀢𑀢𑁆𑀢𑀸, 𑀪𑀕𑀯𑀸𑀬𑁂𑀯 𑀯𑀺𑀲𑁂𑀲𑀢𑁄 𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫𑀪𑀸𑀯𑁂𑀦 𑀣𑁄𑀫𑁂𑀢𑀩𑁆𑀩𑁄𑀢𑀺. 𑀇𑀫𑀲𑁆𑀫𑀺𑀜𑁆𑀘 𑀅𑀢𑁆𑀣𑀯𑀺𑀓𑀧𑁆𑀧𑁂 𑀧𑀜𑁆𑀜𑀸𑀧𑀚𑁆𑀚𑁄𑀢𑀧𑀤𑁂𑀦 𑀲𑀲𑀦𑁆𑀢𑀸𑀦𑀕𑀢𑀫𑁄𑀳𑀯𑀺𑀥𑀫𑀦𑀸 𑀧𑀝𑀺𑀯𑁂𑀥𑀧𑀜𑁆𑀜𑀸 𑀘𑁂𑀯 𑀧𑀭𑀲𑀦𑁆𑀢𑀸𑀦𑀕𑀢𑀫𑁄𑀳𑀯𑀺𑀥𑀫𑀦𑀸 𑀤𑁂𑀲𑀦𑀸𑀧𑀜𑁆𑀜𑀸 𑀘 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁂𑀦, 𑀏𑀓𑀲𑁂𑀲𑀦𑀬𑁂𑀦 𑀯𑀸 𑀲𑀗𑁆𑀕𑀳𑀺𑀢𑀸. 𑀦 𑀢𑀼 𑀧𑀼𑀭𑀺𑀫𑀲𑁆𑀫𑀺𑀁 𑀅𑀢𑁆𑀣𑀯𑀺𑀓𑀧𑁆𑀧𑁂 𑀯𑀺𑀬 𑀧𑀝𑀺𑀯𑁂𑀥𑀧𑀜𑁆𑀜𑀸𑀬𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀧𑀭𑁄 𑀦𑀬𑁄 𑁋 𑀪𑀕𑀯𑀢𑁄 𑀜𑀸𑀡𑀲𑁆𑀲 𑀜𑁂𑀬𑁆𑀬𑀧𑀭𑀺𑀬𑀦𑁆𑀢𑀺𑀓𑀢𑁆𑀢𑀸 𑀲𑀓𑀮𑀜𑁂𑀬𑁆𑀬𑀥𑀫𑁆𑀫𑀲𑀪𑀸𑀯𑀸𑀯𑀩𑁄𑀥𑀦𑀲𑀫𑀢𑁆𑀣𑁂𑀦 𑀅𑀦𑀸𑀯𑀭𑀡𑀜𑀸𑀡𑀲𑀗𑁆𑀔𑀸𑀢𑁂𑀦 𑀧𑀜𑁆𑀜𑀸𑀧𑀚𑁆𑀚𑁄𑀢𑁂𑀦 𑀲𑀓𑀮𑀜𑁂𑀬𑁆𑀬𑀥𑀫𑁆𑀫𑀲𑀪𑀸𑀯𑀘𑁆𑀙𑀸𑀤𑀓𑀫𑁄𑀳𑀢𑀫𑀲𑁆𑀲 𑀯𑀺𑀳𑀢𑀢𑁆𑀢𑀸 𑀅𑀦𑀸𑀯𑀭𑀡𑀜𑀸𑀡𑀪𑀽𑀢𑁂𑀦 𑀅𑀦𑀜𑁆𑀜𑀲𑀸𑀥𑀸𑀭𑀡𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫𑀪𑀸𑀯𑁂𑀦 𑀪𑀕𑀯𑀢𑁄 𑀣𑁄𑀫𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀇𑀫𑀲𑁆𑀫𑀺𑀁 𑀧𑀦 𑀅𑀢𑁆𑀣𑀯𑀺𑀓𑀧𑁆𑀧𑁂 𑀫𑁄𑀳𑀢𑀫𑀯𑀺𑀥𑀫𑀦𑀦𑁆𑀢𑁂 𑀅𑀥𑀺𑀕𑀢𑀢𑁆𑀢𑀸 𑀅𑀦𑀸𑀯𑀭𑀡𑀜𑀸𑀡𑀁 𑀓𑀸𑀭𑀡𑀽𑀧𑀘𑀸𑀭𑁂𑀦 𑀲𑀓𑀲𑀦𑁆𑀢𑀸𑀦𑁂 𑀫𑁄𑀳𑀢𑀫𑀯𑀺𑀥𑀫𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀲𑀯𑀸𑀲𑀦𑀧𑁆𑀧𑀳𑀸𑀦𑀫𑁂𑀯 𑀳𑀺 𑀓𑀺𑀮𑁂𑀲𑀸𑀦𑀁 𑀜𑁂𑀬𑁆𑀬𑀸𑀯𑀭𑀡𑀧𑁆𑀧𑀳𑀸𑀦𑀦𑁆𑀢𑀺, 𑀧𑀭𑀲𑀦𑁆𑀢𑀸𑀦𑁂 𑀧𑀦 𑀫𑁄𑀳𑀢𑀫𑀯𑀺𑀥𑀫𑀦𑀲𑁆𑀲 𑀓𑀸𑀭𑀡𑀪𑀸𑀯𑀢𑁄 𑀨𑀮𑀽𑀧𑀘𑀸𑀭𑁂𑀦 𑀅𑀦𑀸𑀯𑀭𑀡𑀜𑀸𑀡𑀫𑁂𑀯 𑀫𑁄𑀳𑀢𑀫𑀯𑀺𑀥𑀫𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀦𑀸𑀯𑀭𑀡𑀜𑀸𑀡𑀦𑁆𑀢𑀺 𑀘 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁂𑀯, 𑀬𑁂𑀦 𑀥𑀫𑁆𑀫𑀤𑁂𑀲𑀦𑀸𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀺 𑀓𑀭𑁄𑀢𑀺. 𑀢𑀤𑀺𑀤𑀜𑁆𑀳𑀺 𑀜𑀸𑀡𑀤𑁆𑀯𑀬𑀁 𑀅𑀢𑁆𑀣𑀢𑁄 𑀏𑀓𑀫𑁂𑀯. 𑀅𑀦𑀯𑀲𑁂𑀲𑀲𑀗𑁆𑀔𑀢𑀸𑀲𑀗𑁆𑀔𑀢𑀲𑀫𑁆𑀫𑀼𑀢𑀺𑀥𑀫𑁆𑀫𑀸𑀭𑀫𑁆𑀫𑀡𑀢𑀸𑀬 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀢𑀢𑁆𑀣𑀸𑀯𑀭𑀡𑀸𑀪𑀸𑀯𑀢𑁄 𑀦𑀺𑀲𑁆𑀲𑀗𑁆𑀕𑀘𑀸𑀭𑀫𑀼𑀧𑀸𑀤𑀸𑀬 𑀅𑀦𑀸𑀯𑀭𑀡𑀜𑀸𑀡𑀦𑁆𑀢𑀺, 𑀯𑀺𑀲𑀬𑀧𑁆𑀧𑀯𑀢𑁆𑀢𑀺𑀫𑀼𑀔𑁂𑀦 𑀧𑀦 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀤𑁆𑀯𑀺𑀥𑀸 𑀓𑀢𑁆𑀯𑀸 𑀙𑀴𑀸𑀲𑀸𑀥𑀸𑀭𑀡𑀜𑀸𑀡𑀪𑁂𑀤𑁂 𑀯𑀼𑀢𑁆𑀢𑀁.

𑀓𑀺𑀁 𑀧𑀦𑁂𑀢𑁆𑀣 𑀓𑀸𑀭𑀡𑀁 𑀅𑀯𑀺𑀚𑁆𑀚𑀸𑀲𑀫𑀼𑀕𑁆𑀖𑀸𑀢𑁄𑀬𑁂𑀯𑁂𑀓𑁄 𑀧𑀳𑀸𑀦𑀲𑀫𑁆𑀧𑀢𑁆𑀢𑀺𑀯𑀲𑁂𑀦 𑀪𑀕𑀯𑀢𑁄 𑀣𑁄𑀫𑀦𑀸𑀬 𑀕𑀬𑁆𑀳𑀢𑀺, 𑀦 𑀧𑀦 𑀲𑀸𑀢𑀺𑀲𑀬𑀁 𑀦𑀺𑀭𑀯𑀲𑁂𑀲𑀓𑀺𑀮𑁂𑀲𑀧𑁆𑀧𑀳𑀸𑀦𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀢𑀧𑁆𑀧𑀳𑀸𑀦𑀯𑀘𑀦𑁂𑀦𑁂𑀯 𑀳𑀺 𑀢𑀤𑁂𑀓𑀝𑁆𑀞𑀢𑀸𑀬 𑀲𑀓𑀮𑀲𑀁𑀓𑀺𑀮𑁂𑀲𑀲𑀫𑀼𑀕𑁆𑀖𑀸𑀢𑀲𑁆𑀲 𑀚𑁄𑀢𑀺𑀢𑀪𑀸𑀯𑀢𑁄 𑀦𑀺𑀭𑀯𑀲𑁂𑀲𑀓𑀺𑀮𑁂𑀲𑀧𑁆𑀧𑀳𑀸𑀦𑀫𑁂𑀢𑁆𑀣 𑀕𑀬𑁆𑀳𑀢𑀺. 𑀦 𑀳𑀺 𑀲𑁄 𑀲𑀁𑀓𑀺𑀮𑁂𑀲𑁄 𑀅𑀢𑁆𑀣𑀺, 𑀬𑁄 𑀦𑀺𑀭𑀯𑀲𑁂𑀲𑀸𑀯𑀺𑀚𑁆𑀚𑀸𑀲𑀫𑀼𑀕𑁆𑀖𑀸𑀢𑀦𑁂𑀦 𑀦 𑀧𑀳𑀻𑀬𑀢𑀻𑀢𑀺. 𑀅𑀣 𑀯𑀸 𑀲𑀓𑀮𑀓𑀼𑀲𑀮𑀥𑀫𑁆𑀫𑀼𑀧𑁆𑀧𑀢𑁆𑀢𑀺𑀬𑀸, 𑀲𑀁𑀲𑀸𑀭𑀦𑀺𑀯𑀢𑁆𑀢𑀺𑀬𑀸 𑀘 𑀯𑀺𑀚𑁆𑀚𑀸 𑀯𑀺𑀬 𑀦𑀺𑀭𑀯𑀲𑁂𑀲𑀸𑀓𑀼𑀲𑀮𑀥𑀫𑁆𑀫𑀼𑀧𑁆𑀧𑀢𑁆𑀢𑀺𑀬𑀸, 𑀲𑀁𑀲𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀘 𑀅𑀯𑀺𑀚𑁆𑀚𑀸𑀬𑁂𑀯 𑀧𑀥𑀸𑀦𑀓𑀸𑀭𑀡𑀦𑁆𑀢𑀺 𑀢𑀩𑁆𑀩𑀺𑀖𑀸𑀢𑀯𑀘𑀦𑁂𑀦𑁂𑀯 𑀲𑀓𑀮𑀲𑀁𑀓𑀺𑀮𑁂𑀲𑀲𑀫𑀼𑀕𑁆𑀖𑀸𑀢𑀯𑀘𑀦𑀲𑀺𑀤𑁆𑀥𑀺𑀢𑁄 𑀲𑁄𑀬𑁂𑀯𑁂𑀓𑁄 𑀕𑀬𑁆𑀳𑀢𑀻𑀢𑀺. 𑀅𑀣 𑀯𑀸 𑀲𑀓𑀮𑀲𑀁𑀓𑀺𑀮𑁂𑀲𑀥𑀫𑁆𑀫𑀸𑀦𑀁 𑀫𑀼𑀤𑁆𑀥𑀪𑀽𑀢𑀢𑁆𑀢𑀸 𑀅𑀯𑀺𑀚𑁆𑀚𑀸𑀬 𑀢𑀁 𑀲𑀫𑀼𑀕𑁆𑀖𑀸𑀢𑁄𑀬𑁂𑀯𑁂𑀓𑁄 𑀕𑀬𑁆𑀳𑀢𑀺. 𑀬𑀣𑀸𑀳 𑁋

‘‘𑀅𑀯𑀺𑀚𑁆𑀚𑀸 𑀫𑀼𑀤𑁆𑀥𑀸𑀢𑀺 𑀚𑀸𑀦𑀸𑀳𑀺, 𑀯𑀺𑀚𑁆𑀚𑀸 𑀫𑀼𑀤𑁆𑀥𑀸𑀥𑀺𑀧𑀸𑀢𑀺𑀦𑀻;

𑀲𑀤𑁆𑀥𑀸𑀲𑀢𑀺𑀲𑀫𑀸𑀥𑀻𑀳𑀺, 𑀙𑀦𑁆𑀤𑀯𑀻𑀭𑀺𑀬𑁂𑀦 𑀲𑀁𑀬𑀼𑀢𑀸’’𑀢𑀺. (𑀲𑀼. 𑀦𑀺. 𑁧𑁦𑁩𑁨; 𑀘𑀽𑀴. 𑀦𑀺. 𑁫𑁧);

𑀲𑀦𑀭𑀸𑀫𑀭𑀮𑁄𑀓𑀕𑀭𑀼𑀦𑁆𑀢𑀺 𑀏𑀢𑁆𑀣 𑀧𑀦 𑀧𑀞𑀫𑀧𑀓𑀢𑀺𑀬𑀸 𑀅𑀯𑀺𑀪𑀸𑀕𑁂𑀦 𑀲𑀢𑁆𑀢𑁄𑀧𑀺 𑀦𑀭𑁄𑀢𑀺 𑀯𑀼𑀘𑁆𑀘𑀢𑀺, 𑀇𑀥 𑀧𑀦 𑀤𑀼𑀢𑀺𑀬𑀧𑀓𑀢𑀺𑀬𑀸 𑀫𑀦𑀼𑀚𑀧𑀼𑀭𑀺𑀲𑁄𑀬𑁂𑀯, 𑀇𑀢𑀭𑀣𑀸 𑀮𑁄𑀓𑀲𑀤𑁆𑀤𑀲𑁆𑀲 𑀅𑀯𑀢𑁆𑀢𑀩𑁆𑀩𑀢𑀸 𑀲𑀺𑀬𑀸. ‘‘𑀬𑀣𑀸 𑀳𑀺 𑀧𑀞𑀫𑀧𑀓𑀢𑀺𑀪𑀽𑀢𑁄 𑀲𑀢𑁆𑀢𑁄 𑀇𑀢𑀭𑀸𑀬 𑀧𑀓𑀢𑀺𑀬𑀸 𑀲𑁂𑀝𑁆𑀞𑀝𑁆𑀞𑁂𑀦 𑀧𑀼𑀭𑁂 𑀉𑀘𑁆𑀘𑀝𑁆𑀞𑀸𑀦𑁂 𑀲𑁂𑀢𑀺 𑀧𑀯𑀢𑁆𑀢𑀢𑀻𑀢𑀺 𑀧𑀼𑀭𑀺𑀲𑁄𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀚𑁂𑀝𑁆𑀞𑀪𑀸𑀯𑀁 𑀦𑁂𑀢𑀻𑀢𑀺 𑀦𑀭𑁄𑀢𑀺. 𑀧𑀼𑀢𑁆𑀢𑀪𑀸𑀢𑀼𑀪𑀽𑀢𑁄𑀧𑀺 𑀳𑀺 𑀧𑀼𑀕𑁆𑀕𑀮𑁄 𑀫𑀸𑀢𑀼𑀚𑁂𑀝𑁆𑀞𑀪𑀕𑀺𑀦𑀻𑀦𑀁 𑀧𑀺𑀢𑀼𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺, 𑀧𑀕𑁂𑀯 𑀪𑀢𑁆𑀢𑀼𑀪𑀽𑀢𑁄 𑀇𑀢𑀭𑀸𑀲’’𑀦𑁆𑀢𑀺 (𑀯𑀺. 𑀅𑀝𑁆𑀞. 𑁪𑁩-𑁪𑁬) 𑀦𑀸𑀯𑀸𑀯𑀺𑀫𑀸𑀦𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀁. 𑀏𑀓𑀲𑁂𑀲𑀧𑁆𑀧𑀓𑀧𑁆𑀧𑀦𑁂𑀦 𑀧𑀼𑀣𑀼𑀯𑀘𑀦𑀦𑁆𑀢𑀯𑀺𑀕𑁆𑀕𑀳𑁂𑀦 𑀯𑀸 𑀦𑀭𑀸, 𑀫𑀭𑀡𑀁 𑀫𑀭𑁄, 𑀲𑁄 𑀦𑀢𑁆𑀣𑀺 𑀬𑁂𑀲𑀦𑁆𑀢𑀺 𑀅𑀫𑀭𑀸, 𑀲𑀳 𑀦𑀭𑁂𑀳𑀺, 𑀅𑀫𑀭𑁂𑀳𑀺 𑀘𑀸𑀢𑀺 𑀲𑀦𑀭𑀸𑀫𑀭𑁄.𑀕𑀭𑀢𑀺 𑀉𑀕𑁆𑀕𑀘𑁆𑀙𑀢𑀺 𑀉𑀕𑁆𑀕𑀢𑁄 𑀧𑀸𑀓𑀝𑁄 𑀪𑀯𑀢𑀻𑀢𑀺 𑀕𑀭𑀼, 𑀕𑀭𑀲𑀤𑁆𑀤𑁄 𑀳𑀺 𑀉𑀕𑁆𑀕𑀫𑁂. 𑀅𑀧𑀺𑀘 𑀧𑀸𑀲𑀸𑀡𑀘𑁆𑀙𑀢𑁆𑀢𑀁 𑀯𑀺𑀬 𑀪𑀸𑀭𑀺𑀬𑀝𑁆𑀞𑁂𑀦 ‘‘𑀕𑀭𑀽’’𑀢𑀺 𑀯𑀼𑀘𑁆𑀘𑀢𑀺.

𑀫𑀸𑀢𑀸𑀧𑀺𑀢𑀸𑀘𑀭𑀺𑀬𑁂𑀲𑀼, 𑀤𑀼𑀚𑁆𑀚𑀭𑁂 𑀅𑀮𑀳𑀼𑀫𑁆𑀳𑀺 𑀘;

𑀫𑀳𑀦𑁆𑀢𑁂 𑀘𑀼𑀕𑁆𑀕𑀢𑁂 𑀘𑁂𑀯, 𑀦𑀺𑀙𑁂𑀓𑀸𑀤𑀺𑀓𑀭𑁂𑀲𑀼 𑀘;

𑀢𑀣𑀸 𑀯𑀡𑁆𑀡𑀯𑀺𑀲𑁂𑀲𑁂𑀲𑀼, 𑀕𑀭𑀼𑀲𑀤𑁆𑀤𑁄 𑀧𑀯𑀢𑁆𑀢𑀢𑀺.

𑀇𑀥 𑀧𑀦 𑀲𑀩𑁆𑀩𑀮𑁄𑀓𑀸𑀘𑀭𑀺𑀬𑁂 𑀢𑀣𑀸𑀕𑀢𑁂. 𑀓𑁂𑀘𑀺 𑀧𑀦 ‘‘𑀕𑀭𑀼, 𑀕𑀼𑀭𑀽𑀢𑀺 𑀘 𑀤𑁆𑀯𑀺𑀥𑀸 𑀕𑀳𑁂𑀢𑁆𑀯𑀸 𑀪𑀸𑀭𑀺𑀬𑀯𑀸𑀘𑀓𑀢𑁆𑀢𑁂 𑀕𑀭𑀼𑀲𑀤𑁆𑀤𑁄, 𑀆𑀘𑀭𑀺𑀬𑀯𑀸𑀘𑀓𑀢𑁆𑀢𑁂 𑀢𑀼 𑀕𑀼𑀭𑀼𑀲𑀤𑁆𑀤𑁄’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀧𑀸𑀴𑀺𑀯𑀺𑀲𑀬𑁂 𑀳𑀺 𑀲𑀩𑁆𑀩𑁂𑀲𑀫𑁆𑀧𑀺 𑀬𑀣𑀸𑀯𑀼𑀢𑁆𑀢𑀸𑀦𑀫𑀢𑁆𑀣𑀸𑀦𑀁 𑀯𑀸𑀘𑀓𑀢𑁆𑀢𑁂 𑀕𑀭𑀼𑀲𑀤𑁆𑀤𑁄𑀬𑁂𑀯𑀺𑀘𑁆𑀙𑀺𑀢𑀩𑁆𑀩𑁄 𑀅𑀓𑀸𑀭𑀲𑁆𑀲 𑀆𑀓𑀸𑀭𑀪𑀸𑀯𑁂𑀦 ‘‘𑀕𑀸𑀭𑀯’’𑀦𑁆𑀢𑀺 𑀢𑀤𑁆𑀥𑀺𑀢𑀦𑁆𑀢𑀧𑀤𑀲𑁆𑀲 𑀲𑀯𑀼𑀤𑁆𑀥𑀺𑀓𑀲𑁆𑀲 𑀤𑀲𑁆𑀲𑀦𑀢𑁄. 𑀲𑀓𑁆𑀓𑀢𑀪𑀸𑀲𑀸𑀯𑀺𑀲𑀬𑁂 𑀧𑀦 𑀕𑀼𑀭𑀼𑀲𑀤𑁆𑀤𑁄𑀬𑁂𑀯𑀺𑀘𑁆𑀙𑀺𑀢𑀩𑁆𑀩𑁄 𑀉𑀓𑀸𑀭𑀲𑁆𑀲 𑀯𑀼𑀤𑁆𑀥𑀺𑀪𑀸𑀯𑁂𑀦 𑀅𑀜𑁆𑀜𑀣𑀸 𑀢𑀤𑁆𑀥𑀺𑀢𑀦𑁆𑀢𑀧𑀤𑀲𑁆𑀲 𑀤𑀲𑁆𑀲𑀦𑀢𑁄𑀢𑀺. 𑀲𑀦𑀭𑀸𑀫𑀭𑁄 𑀘 𑀲𑁄 𑀮𑁄𑀓𑁄 𑀘𑀸𑀢𑀺 𑀲𑀦𑀭𑀸𑀫𑀭𑀮𑁄𑀓𑁄, 𑀢𑀲𑁆𑀲 𑀕𑀭𑀽𑀢𑀺 𑀢𑀣𑀸, 𑀢𑀁 𑀲𑀦𑀭𑀸𑀫𑀭𑀮𑁄𑀓𑀕𑀭𑀼𑀁.‘‘𑀲𑀦𑀭𑀫𑀭𑀽𑀮𑁄𑀓𑀕𑀭𑀼’’𑀦𑁆𑀢𑀺𑀧𑀺 𑀧𑀞𑀦𑁆𑀢𑀺, 𑀢𑀤𑀧𑀺 𑀅𑀭𑀺𑀬𑀸𑀕𑀸𑀣𑀢𑁆𑀢𑀸 𑀯𑀼𑀢𑁆𑀢𑀺𑀮𑀓𑁆𑀔𑀡𑀢𑁄, 𑀅𑀢𑁆𑀣𑀢𑁄 𑀘 𑀬𑀼𑀢𑁆𑀢𑀫𑁂𑀯. 𑀅𑀢𑁆𑀣𑀢𑁄 𑀳𑀺 𑀤𑀻𑀖𑀸𑀬𑀼𑀓𑀸𑀧𑀺 𑀲𑀫𑀸𑀦𑀸 𑀬𑀣𑀸𑀧𑀭𑀺𑀘𑁆𑀙𑁂𑀤𑀁 𑀫𑀭𑀡𑀲𑀪𑀸𑀯𑀢𑁆𑀢𑀸 𑀫𑀭𑀽𑀢𑀺 𑀤𑁂𑀯𑀸 𑀯𑀼𑀘𑁆𑀘𑀦𑁆𑀢𑀺. 𑀏𑀢𑁂𑀦 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀯𑀺𑀬 𑀢𑀤𑀯𑀲𑀺𑀝𑁆𑀞𑀲𑀢𑁆𑀢𑀸𑀦𑀫𑁆𑀧𑀺 𑀬𑀣𑀸𑀭𑀳𑀁 𑀕𑀼𑀡𑀯𑀺𑀲𑁂𑀲𑀸𑀯𑀳𑀢𑀸𑀬 𑀪𑀕𑀯𑀢𑁄 𑀉𑀧𑀓𑀸𑀭𑀓𑀢𑀁 𑀤𑀲𑁆𑀲𑁂𑀢𑀺. 𑀦𑀦𑀼 𑀘𑁂𑀢𑁆𑀣 𑀤𑁂𑀯𑀫𑀦𑀼𑀲𑁆𑀲𑀸 𑀧𑀥𑀸𑀦𑀪𑀽𑀢𑀸, 𑀅𑀣 𑀓𑀲𑁆𑀫𑀸 𑀢𑁂𑀲𑀁 𑀅𑀧𑁆𑀧𑀥𑀸𑀦𑀢𑀸 𑀦𑀺𑀤𑁆𑀤𑀺𑀲𑀻𑀬𑀢𑀻𑀢𑀺? 𑀅𑀢𑁆𑀣𑀢𑁄 𑀧𑀥𑀸𑀦𑀢𑀸𑀬 𑀕𑀳𑁂𑀢𑀩𑁆𑀩𑀢𑁆𑀢𑀸. 𑀅𑀜𑁆𑀜𑁄 𑀳𑀺 𑀲𑀤𑁆𑀤𑀓𑁆𑀓𑀫𑁄, 𑀅𑀜𑁆𑀜𑁄 𑀅𑀢𑁆𑀣𑀓𑁆𑀓𑀫𑁄𑀢𑀺 𑀲𑀤𑁆𑀤𑀓𑁆𑀓𑀫𑀸𑀦𑀼𑀲𑀸𑀭𑁂𑀦 𑀧𑀥𑀸𑀦𑀸𑀧𑀥𑀸𑀦𑀪𑀸𑀯𑁄 𑀦 𑀘𑁄𑀤𑁂𑀢𑀩𑁆𑀩𑁄. 𑀏𑀤𑀺𑀲𑁂𑀲𑀼 𑀳𑀺 𑀲𑀫𑀸𑀲𑀧𑀤𑁂𑀲𑀼 𑀧𑀥𑀸𑀦𑀫𑁆𑀧𑀺 𑀅𑀧𑁆𑀧𑀥𑀸𑀦𑀁 𑀯𑀺𑀬 𑀦𑀺𑀤𑁆𑀤𑀺𑀲𑀻𑀬𑀢𑀺 𑀬𑀣𑀸 𑀢𑀁 ‘‘𑀲𑀭𑀸𑀚𑀺𑀓𑀸𑀬 𑀧𑀭𑀺𑀲𑀸𑀬𑀸’’𑀢𑀺, 𑀢𑀲𑁆𑀫𑀸 𑀲𑀩𑁆𑀩𑀢𑁆𑀣 𑀅𑀢𑁆𑀣𑀢𑁄𑀯 𑀅𑀥𑀺𑀧𑁆𑀧𑀸𑀬𑁄 𑀕𑀯𑁂𑀲𑀺𑀢𑀩𑁆𑀩𑁄, 𑀦 𑀩𑁆𑀬𑀜𑁆𑀚𑀦𑀫𑀢𑁆𑀢𑁂𑀦. 𑀬𑀣𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀅𑀢𑁆𑀣𑀜𑁆𑀳𑀺 𑀦𑀸𑀣𑁄 𑀲𑀭𑀡𑀁 𑀅𑀯𑁄𑀘,

𑀦 𑀩𑁆𑀬𑀜𑁆𑀚𑀦𑀁 𑀮𑁄𑀓𑀳𑀺𑀢𑁄 𑀫𑀳𑁂𑀲𑀺.

𑀢𑀲𑁆𑀫𑀸 𑀅𑀓𑀢𑁆𑀯𑀸 𑀭𑀢𑀺𑀫𑀓𑁆𑀔𑀭𑁂𑀲𑀼,

𑀅𑀢𑁆𑀣𑁂 𑀦𑀺𑀯𑁂𑀲𑁂𑀬𑁆𑀬 𑀫𑀢𑀺𑀁 𑀫𑀢𑀺𑀫𑀸’’𑀢𑀺. (𑀓𑀗𑁆𑀔𑀸. 𑀅𑀝𑁆𑀞. 𑀧𑀞𑀫𑀧𑀸𑀭𑀸𑀚𑀺𑀓𑀓𑀡𑁆𑀟𑀯𑀡𑁆𑀡𑀦𑀸);

𑀓𑀸𑀫𑀜𑁆𑀘𑁂𑀢𑁆𑀣 𑀲𑀢𑁆𑀢𑀲𑀗𑁆𑀔𑀸𑀭𑀪𑀸𑀚𑀦𑀯𑀲𑁂𑀦 𑀢𑀺𑀯𑀺𑀥𑁄 𑀮𑁄𑀓𑁄, 𑀕𑀭𑀼𑀪𑀸𑀯𑀲𑁆𑀲 𑀧𑀦 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀕𑀭𑀼𑀓𑀭𑀡𑀲𑀫𑀢𑁆𑀣𑀲𑁆𑀲𑁂𑀯 𑀬𑀼𑀚𑁆𑀚𑀦𑀢𑁄 𑀲𑀢𑁆𑀢𑀮𑁄𑀓𑀯𑀲𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀲𑁄 𑀳𑀺 𑀮𑁄𑀓𑀻𑀬𑀦𑁆𑀢𑀺 𑀏𑀢𑁆𑀣 𑀧𑀼𑀜𑁆𑀜𑀸𑀧𑀼𑀜𑁆𑀜𑀸𑀦𑀺, 𑀢𑀩𑁆𑀩𑀺𑀧𑀸𑀓𑁄 𑀘𑀸𑀢𑀺 𑀮𑁄𑀓𑁄, 𑀤𑀲𑁆𑀲𑀦𑀢𑁆𑀣𑁂 𑀘 𑀮𑁄𑀓𑀲𑀤𑁆𑀤𑀫𑀺𑀘𑁆𑀙𑀦𑁆𑀢𑀺 𑀲𑀤𑁆𑀤𑀯𑀺𑀤𑀽. 𑀅𑀫𑀭𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀉𑀧𑀧𑀢𑁆𑀢𑀺𑀤𑁂𑀯𑀸 𑀅𑀥𑀺𑀧𑁆𑀧𑁂𑀢𑀸. 𑀅𑀧𑀭𑁄 𑀦𑀬𑁄 𑁋 𑀲𑀫𑀽𑀳𑀢𑁆𑀣𑁄 𑀏𑀢𑁆𑀣 𑀮𑁄𑀓𑀲𑀤𑁆𑀤𑁄 𑀲𑀫𑀼𑀤𑀸𑀬𑀯𑀲𑁂𑀦 𑀮𑁄𑀓𑀻𑀬𑀢𑀺 𑀧𑀜𑁆𑀜𑀸𑀧𑀻𑀬𑀢𑀻𑀢𑀺 𑀓𑀢𑁆𑀯𑀸. 𑀲𑀳 𑀦𑀭𑁂𑀳𑀻𑀢𑀺 𑀲𑀦𑀭𑀸, 𑀢𑁂𑀬𑁂𑀯 𑀅𑀫𑀭𑀸𑀢𑀺 𑀲𑀦𑀭𑀸𑀫𑀭𑀸, 𑀢𑁂𑀲𑀁 𑀮𑁄𑀓𑁄 𑀢𑀣𑀸, 𑀧𑀼𑀭𑀺𑀫𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁. 𑀅𑀫𑀭𑀲𑀤𑁆𑀤𑁂𑀦 𑀘𑁂𑀢𑁆𑀣 𑀉𑀧𑀧𑀢𑁆𑀢𑀺𑀤𑁂𑀯𑀸 𑀯𑀺𑀬 𑀯𑀺𑀲𑀼𑀤𑁆𑀥𑀺𑀤𑁂𑀯𑀸𑀧𑀺 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀢𑁂𑀧𑀺 𑀳𑀺 𑀧𑀭𑀫𑀢𑁆𑀣𑀢𑁄 𑀫𑀭𑀡𑀸𑀪𑀸𑀯𑀢𑁄 𑀅𑀫𑀭𑀸. 𑀇𑀫𑀲𑁆𑀫𑀺𑀁 𑀧𑀦 𑀅𑀢𑁆𑀣𑀯𑀺𑀓𑀧𑁆𑀧𑁂 𑀦𑀭𑀸𑀫𑀭𑀸𑀦𑀫𑁂𑀯 𑀕𑀳𑀡𑀁 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑀯𑀲𑁂𑀦 𑀬𑀣𑀸 ‘‘𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺 (𑀤𑀻. 𑀦𑀺. 𑁧.𑁧𑁫𑁭, 𑁨𑁫𑁫). 𑀢𑀣𑀸 𑀳𑀺 𑀲𑀩𑁆𑀩𑀸𑀦𑀢𑁆𑀣𑀧𑀭𑀺𑀳𑀸𑀦𑀧𑀼𑀩𑁆𑀩𑀗𑁆𑀕𑀫𑀸𑀬 𑀦𑀺𑀭𑀯𑀲𑁂𑀲𑀳𑀺𑀢𑀲𑀼𑀔𑀯𑀺𑀥𑀸𑀦𑀢𑀧𑁆𑀧𑀭𑀸𑀬 𑀦𑀺𑀭𑀢𑀺𑀲𑀬𑀸𑀬 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀸, 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀧𑀚𑀸𑀬 𑀅𑀘𑁆𑀘𑀦𑁆𑀢𑀫𑀼𑀧𑀓𑀸𑀭𑀺𑀢𑀸𑀬 𑀅𑀧𑀭𑀺𑀫𑀺𑀢𑀦𑀺𑀭𑀼𑀧𑀫𑀧𑁆𑀧𑀪𑀸𑀯𑀕𑀼𑀡𑀲𑀫𑀗𑁆𑀕𑀺𑀢𑀸𑀬 𑀘 𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀫𑁄 𑀪𑀕𑀯𑀸 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀅𑀧𑀭𑀺𑀫𑀸𑀡𑀸𑀦𑀁 𑀲𑀢𑁆𑀢𑀸𑀦𑀁 𑀉𑀢𑁆𑀢𑀫𑀫𑀦𑀜𑁆𑀜𑀲𑀸𑀥𑀸𑀭𑀡𑀁 𑀕𑀸𑀭𑀯𑀝𑁆𑀞𑀸𑀦𑀦𑁆𑀢𑀺. 𑀓𑀸𑀫𑀜𑁆𑀘 𑀇𑀢𑁆𑀣𑀻𑀦𑀫𑁆𑀧𑀺 𑀢𑀣𑀸𑀉𑀧𑀓𑀸𑀭𑀢𑁆𑀢𑀸 𑀪𑀕𑀯𑀸 𑀕𑀭𑀼𑀬𑁂𑀯, 𑀧𑀥𑀸𑀦𑀪𑀽𑀢𑀁 𑀧𑀦 𑀮𑁄𑀓𑀁 𑀤𑀲𑁆𑀲𑁂𑀢𑀼𑀁 𑀧𑀼𑀭𑀺𑀲𑀮𑀺𑀗𑁆𑀕𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦𑁂𑀭𑀼𑀢𑁆𑀢𑀺𑀓𑀸 𑀧𑀦 𑀅𑀯𑀺𑀲𑁂𑀲𑀦𑀺𑀘𑁆𑀙𑀺𑀢𑀝𑁆𑀞𑀸𑀦𑁂 𑀢𑀣𑀸 𑀦𑀺𑀤𑁆𑀤𑀺𑀝𑁆𑀞𑀫𑀺𑀘𑁆𑀙𑀦𑁆𑀢𑀺 𑀬𑀣𑀸 ‘‘𑀦𑀭𑀸 𑀦𑀸𑀕𑀸 𑀘 𑀕𑀦𑁆𑀥𑀩𑁆𑀩𑀸, 𑀅𑀪𑀺𑀯𑀸𑀤𑁂𑀢𑁆𑀯𑀸𑀦 𑀧𑀓𑁆𑀓𑀫𑀼’’𑀦𑁆𑀢𑀺 (𑀅𑀧. 𑁧.𑁧.𑁪𑁮). 𑀢𑀣𑀸 𑀘𑀸𑀳𑀼 𑁋

‘‘𑀦𑀧𑀼𑀁𑀲𑀓𑁂𑀦 𑀮𑀺𑀗𑁆𑀕𑁂𑀦, 𑀲𑀤𑁆𑀤𑁄𑀤𑀸𑀳𑀼 𑀧𑀼𑀫𑁂𑀦 𑀯𑀸;

𑀦𑀺𑀤𑁆𑀤𑀺𑀲𑁆𑀲𑀢𑀻𑀢𑀺 𑀜𑀸𑀢𑀩𑁆𑀩𑀫𑀯𑀺𑀲𑁂𑀲𑀯𑀺𑀦𑀺𑀘𑁆𑀙𑀺𑀢𑁂’’𑀢𑀺.

𑀯𑀦𑁆𑀤𑁂𑀢𑀺 𑀏𑀢𑁆𑀣 𑀧𑀦 𑁋

𑀯𑀢𑁆𑀢𑀫𑀸𑀦𑀸𑀬 𑀧𑀜𑁆𑀘𑀫𑁆𑀬𑀁, 𑀲𑀢𑁆𑀢𑀫𑁆𑀬𑀜𑁆𑀘 𑀯𑀺𑀪𑀢𑁆𑀢𑀺𑀬𑀁;

𑀏𑀢𑁂𑀲𑀼 𑀢𑀻𑀲𑀼 𑀞𑀸𑀦𑁂𑀲𑀼, 𑀯𑀦𑁆𑀤𑁂𑀲𑀤𑁆𑀤𑁄 𑀧𑀯𑀢𑁆𑀢𑀢𑀺.

𑀇𑀥 𑀧𑀦 𑀯𑀢𑁆𑀢𑀫𑀸𑀦𑀸𑀬𑀁 𑀅𑀜𑁆𑀜𑀸𑀲𑀫𑀲𑀫𑁆𑀪𑀯𑀢𑁄. 𑀢𑀢𑁆𑀣 𑀘 𑀉𑀢𑁆𑀢𑀫𑀧𑀼𑀭𑀺𑀲𑀯𑀲𑁂𑀦𑀢𑁆𑀣𑁄 𑀕𑀳𑁂𑀢𑀩𑁆𑀩𑁄 ‘‘𑀅𑀳𑀁 𑀯𑀦𑁆𑀤𑀸𑀫𑀻’’𑀢𑀺. 𑀦𑀫𑀦𑀣𑀼𑀢𑀺𑀬𑀢𑁆𑀣𑁂𑀲𑀼 𑀘 𑀯𑀦𑁆𑀤𑀲𑀤𑁆𑀤𑀫𑀺𑀘𑁆𑀙𑀦𑁆𑀢𑀺 𑀆𑀘𑀭𑀺𑀬𑀸, 𑀢𑁂𑀦 𑀘 𑀲𑀼𑀕𑀢𑀧𑀤𑀁, 𑀦𑀸𑀣𑀧𑀤𑀁 𑀯𑀸 𑀅𑀚𑁆𑀛𑀸𑀳𑀭𑀺𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀲𑁄𑀪𑀦𑀁 𑀕𑀢𑀁 𑀕𑀫𑀦𑀁 𑀏𑀢𑀲𑁆𑀲𑀸𑀢𑀺 𑀲𑀼𑀕𑀢𑁄. 𑀕𑀫𑀦𑀜𑁆𑀘𑁂𑀢𑁆𑀣 𑀓𑀸𑀬𑀕𑀫𑀦𑀁, 𑀜𑀸𑀡𑀕𑀫𑀦𑀜𑁆𑀘, 𑀓𑀸𑀬𑀕𑀫𑀦𑀫𑁆𑀧𑀺 𑀯𑀺𑀦𑁂𑀬𑁆𑀬𑀚𑀦𑁄𑀧𑀲𑀗𑁆𑀓𑀫𑀦𑀁, 𑀧𑀓𑀢𑀺𑀕𑀫𑀦𑀜𑁆𑀘𑀸𑀢𑀺 𑀤𑀼𑀩𑁆𑀩𑀺𑀥𑀁. 𑀪𑀕𑀯𑀢𑁄 𑀳𑀺 𑀯𑀺𑀦𑁂𑀬𑁆𑀬𑀚𑀦𑁄𑀧𑀲𑀗𑁆𑀓𑀫𑀦𑀁 𑀏𑀓𑀦𑁆𑀢𑁂𑀦 𑀢𑁂𑀲𑀁 𑀳𑀺𑀢𑀲𑀼𑀔𑀦𑀺𑀧𑁆𑀨𑀸𑀤𑀦𑀢𑁄 𑀲𑁄𑀪𑀦𑀁, 𑀢𑀣𑀸 𑀮𑀓𑁆𑀔𑀡𑀸𑀦𑀼𑀩𑁆𑀬𑀜𑁆𑀚𑀦𑀧𑀝𑀺𑀫𑀡𑁆𑀟𑀺𑀢𑀭𑀽𑀧𑀓𑀸𑀬𑀢𑀸𑀬 𑀤𑀼𑀢𑀯𑀺𑀮𑀫𑁆𑀩𑀺𑀢𑀔𑀮𑀺𑀢𑀸𑀦𑀼𑀓𑀟𑁆𑀠𑀦𑀦𑀺𑀧𑁆𑀧𑀻𑀴𑀦𑀼𑀓𑁆𑀓𑀼𑀝𑀺𑀓-𑀓𑀼𑀝𑀺𑀮𑀸𑀓𑀼𑀮𑀢𑀸𑀤𑀺𑀤𑁄𑀲𑀭𑀳𑀺𑀢- 𑀫𑀯𑀳𑀲𑀺𑀢𑀭𑀸𑀚𑀳𑀁𑀲- 𑀯𑀲𑀪𑀯𑀸𑀭𑀡𑀫𑀺𑀕𑀭𑀸𑀚𑀕𑀫𑀦𑀁 𑀧𑀓𑀢𑀺𑀕𑀫𑀦𑀜𑁆𑀘, 𑀯𑀺𑀫𑀮𑀯𑀺𑀧𑀼𑀮𑀓𑀭𑀼𑀡𑀸𑀲𑀢𑀺𑀯𑀻𑀭𑀺𑀬𑀸𑀤𑀺𑀕𑀼𑀡𑀯𑀺𑀲𑁂𑀲𑀲𑀳𑀺𑀢𑀫𑁆𑀧𑀺 𑀜𑀸𑀡𑀕𑀫𑀦𑀁 𑀅𑀪𑀺𑀦𑀻𑀳𑀸𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀫𑀳𑀸𑀩𑁄𑀥𑀺, 𑀢𑀸𑀯 𑀦𑀺𑀭𑀯𑀚𑁆𑀚𑀢𑀸𑀬 𑀲𑁄𑀪𑀦𑀫𑁂𑀯𑀸𑀢𑀺. 𑀅𑀣 𑀯𑀸 ‘‘𑀲𑀬𑀫𑁆𑀪𑀽𑀜𑀸𑀡𑁂𑀦 𑀲𑀓𑀮𑀫𑁆𑀧𑀺 𑀮𑁄𑀓𑀁 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀯𑀲𑁂𑀦 𑀧𑀭𑀺𑀚𑀸𑀦𑀦𑁆𑀢𑁄 𑀲𑀫𑁆𑀫𑀸 𑀕𑀢𑁄 𑀅𑀯𑀕𑀢𑁄𑀢𑀺 𑀲𑀼𑀕𑀢𑁄. 𑀬𑁄 𑀳𑀺 𑀕𑀢𑁆𑀬𑀢𑁆𑀣𑁄, 𑀲𑁄 𑀩𑀼𑀤𑁆𑀥𑀬𑀢𑁆𑀣𑁄. 𑀬𑁄 𑀘 𑀩𑀼𑀤𑁆𑀥𑀬𑀢𑁆𑀣𑁄, 𑀲𑁄 𑀕𑀢𑁆𑀬𑀢𑁆𑀣𑁄𑀢𑀺. 𑀢𑀣𑀸 𑀮𑁄𑀓𑀲𑀫𑀼𑀤𑀬𑀁 𑀧𑀳𑀸𑀦𑀸𑀪𑀺𑀲𑀫𑀬𑀯𑀲𑁂𑀦 𑀧𑀚𑀳𑀦𑁆𑀢𑁄 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀫𑀸𑀧𑀸𑀤𑁂𑀦𑁆𑀢𑁄 𑀲𑀫𑁆𑀫𑀸 𑀕𑀢𑁄 𑀅𑀢𑀻𑀢𑁄𑀢𑀺 𑀲𑀼𑀕𑀢𑁄. 𑀮𑁄𑀓𑀦𑀺𑀭𑁄𑀥𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑀯𑀲𑁂𑀦 𑀲𑀫𑁆𑀫𑀸 𑀕𑀢𑁄 𑀅𑀥𑀺𑀕𑀢𑁄𑀢𑀺 𑀲𑀼𑀕𑀢𑁄. 𑀮𑁄𑀓𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀪𑀸𑀯𑀦𑀸𑀪𑀺𑀲𑀫𑀬𑀯𑀲𑁂𑀦 𑀲𑀫𑁆𑀫𑀸 𑀕𑀢𑁄 𑀧𑀝𑀺𑀧𑀦𑁆𑀦𑁄𑀢𑀺 𑀲𑀼𑀕𑀢𑁄, 𑀅𑀬𑀜𑁆𑀘𑀢𑁆𑀣𑁄 ‘𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀬𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸, 𑀢𑁂 𑀓𑀺𑀮𑁂𑀲𑁂 𑀦 𑀧𑀼𑀦𑁂𑀢𑀺 𑀦 𑀧𑀘𑁆𑀘𑁂𑀢𑀺 𑀦 𑀧𑀘𑁆𑀘𑀸𑀕𑀘𑁆𑀙𑀢𑀻’𑀢𑀺 (𑀫𑀳𑀸𑀦𑀺. 𑁩𑁮; 𑀘𑀽𑀴𑀦𑀺. 𑁨𑁭) 𑀲𑀼𑀕𑀢𑁄𑀢𑀺𑀆𑀤𑀺𑀦𑀸 𑀦𑀺𑀤𑁆𑀤𑁂𑀲𑀦𑀬𑁂𑀦 𑀯𑀺𑀪𑀸𑀯𑁂𑀢𑀩𑁆𑀩𑁄.

𑀅𑀧𑀭𑁄 𑀦𑀬𑁄 𑁋 𑀲𑀼𑀦𑁆𑀤𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁, 𑀦𑀺𑀩𑁆𑀩𑀸𑀦𑀫𑁂𑀯 𑀯𑀸 𑀕𑀢𑁄 𑀅𑀥𑀺𑀕𑀢𑁄𑀢𑀺 𑀲𑀼𑀕𑀢𑁄. 𑀪𑀽𑀢𑀁 𑀢𑀘𑁆𑀙𑀁 𑀅𑀢𑁆𑀣𑀲𑀁𑀳𑀺𑀢𑀁 𑀬𑀣𑀸𑀭𑀳𑀁 𑀓𑀸𑀮𑀬𑀼𑀢𑁆𑀢𑀫𑁂𑀯 𑀯𑀸𑀘𑀁 𑀯𑀺𑀦𑁂𑀬𑁆𑀬𑀸𑀦𑀁 𑀲𑀫𑁆𑀫𑀸 𑀕𑀤𑀢𑀻𑀢𑀺 𑀯𑀸 𑀲𑀼𑀕𑀢𑁄, 𑀤-𑀓𑀸𑀭𑀲𑁆𑀲 𑀢-𑀓𑀸𑀭𑀁 𑀓𑀢𑁆𑀯𑀸, 𑀢𑀁 𑀲𑀼𑀕𑀢𑀁. 𑀧𑀼𑀜𑁆𑀜𑀸𑀧𑀼𑀜𑁆𑀜𑀓𑀫𑁆𑀫𑁂𑀳𑀺 𑀉𑀧𑀧𑀚𑁆𑀚𑀦𑀯𑀲𑁂𑀦 𑀕𑀦𑁆𑀢𑀩𑁆𑀩𑀸𑀢𑀺 𑀕𑀢𑀺𑀬𑁄, 𑀉𑀧𑀧𑀢𑁆𑀢𑀺𑀪𑀯𑀯𑀺𑀲𑁂𑀲𑀸. 𑀢𑀸 𑀧𑀦 𑀦𑀺𑀭𑀬𑀸𑀤𑀺𑀪𑁂𑀤𑁂𑀦 𑀧𑀜𑁆𑀘𑀯𑀺𑀥𑀸, 𑀲𑀓𑀮𑀲𑁆𑀲𑀸𑀧𑀺 𑀪𑀯𑀕𑀸𑀫𑀺𑀓𑀫𑁆𑀫𑀲𑁆𑀲 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑁂𑀦 𑀅𑀯𑀺𑀧𑀸𑀓𑀸𑀭𑀳𑀪𑀸𑀯𑀓𑀭𑀡𑁂𑀦 𑀦𑀺𑀯𑀢𑁆𑀢𑀺𑀢𑀢𑁆𑀢𑀸 𑀧𑀜𑁆𑀘𑀳𑀺𑀧𑀺 𑀢𑀸𑀳𑀺 𑀯𑀺𑀲𑀁𑀬𑀼𑀢𑁆𑀢𑁄 𑀳𑀼𑀢𑁆𑀯𑀸 𑀫𑀼𑀢𑁆𑀢𑁄𑀢𑀺 𑀕𑀢𑀺𑀯𑀺𑀫𑀼𑀢𑁆𑀢𑁄. 𑀉𑀤𑁆𑀥𑀫𑀼𑀤𑁆𑀥𑀪𑀯𑀕𑀸𑀫𑀺𑀦𑁄 𑀳𑀺 𑀤𑁂𑀯𑀸 𑀢𑀁𑀢𑀁𑀓𑀫𑁆𑀫𑀯𑀺𑀧𑀸𑀓𑀤𑀸𑀦𑀓𑀸𑀮𑀸𑀦𑀼𑀭𑀽𑀧𑁂𑀦 𑀢𑀢𑁄 𑀢𑀢𑁄 𑀪𑀯𑀢𑁄 𑀫𑀼𑀢𑁆𑀢𑀸𑀧𑀺 𑀫𑀼𑀢𑁆𑀢𑀫𑀢𑁆𑀢𑀸𑀯, 𑀦 𑀧𑀦 𑀯𑀺𑀲𑀜𑁆𑀜𑁄𑀕𑀯𑀲𑁂𑀦 𑀫𑀼𑀢𑁆𑀢𑀸, 𑀕𑀢𑀺𑀧𑀭𑀺𑀬𑀸𑀧𑀦𑁆𑀦𑀸 𑀘 𑀢𑀁𑀢𑀁𑀪𑀯𑀕𑀸𑀫𑀺𑀓𑀫𑁆𑀫𑀲𑁆𑀲 𑀅𑀭𑀺𑀬𑀫𑀕𑁆𑀕𑁂𑀦 𑀅𑀦𑀺𑀯𑀢𑁆𑀢𑀺𑀢𑀢𑁆𑀢𑀸, 𑀦 𑀢𑀣𑀸 𑀪𑀕𑀯𑀸. 𑀪𑀕𑀯𑀸 𑀧𑀦 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀯𑀺𑀲𑀁𑀬𑀼𑀢𑁆𑀢𑁄 𑀳𑀼𑀢𑁆𑀯𑀸 𑀫𑀼𑀢𑁆𑀢𑁄𑀢𑀺. 𑀢𑀲𑁆𑀫𑀸 𑀅𑀦𑁂𑀦 𑀪𑀕𑀯𑀢𑁄 𑀓𑀢𑁆𑀣𑀘𑀺𑀧𑀺 𑀕𑀢𑀺𑀬𑀸 𑀅𑀧𑀭𑀺𑀬𑀸𑀧𑀦𑁆𑀦𑀢𑀁 𑀤𑀲𑁆𑀲𑁂𑀢𑀺. 𑀬𑀢𑁄 𑀘 𑀪𑀕𑀯𑀸 ‘‘𑀤𑁂𑀯𑀸𑀢𑀺𑀤𑁂𑀯𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑁂𑀯𑀸𑀳 𑁋

‘‘𑀬𑁂𑀦 𑀤𑁂𑀯𑀽𑀧𑀧𑀢𑁆𑀬𑀲𑁆𑀲, 𑀕𑀦𑁆𑀥𑀩𑁆𑀩𑁄 𑀯𑀸 𑀯𑀺𑀳𑀗𑁆𑀕𑀫𑁄;

𑀬𑀓𑁆𑀔𑀢𑁆𑀢𑀁 𑀬𑁂𑀦 𑀕𑀘𑁆𑀙𑁂𑀬𑁆𑀬𑀁, 𑀫𑀦𑀼𑀲𑁆𑀲𑀢𑁆𑀢𑀜𑁆𑀘 𑀅𑀩𑁆𑀩𑀚𑁂;

𑀢𑁂 𑀫𑀬𑁆𑀳𑀁 𑀆𑀲𑀯𑀸 𑀔𑀻𑀡𑀸, 𑀯𑀺𑀤𑁆𑀥𑀲𑁆𑀢𑀸 𑀯𑀺𑀦𑀴𑀻𑀓𑀢𑀸’’𑀢𑀺. (𑀅. 𑀦𑀺. 𑁪.𑁩𑁬);

𑀢𑀁𑀢𑀁𑀕𑀢𑀺𑀲𑀁𑀯𑀢𑁆𑀢𑀦𑀓𑀸𑀦𑀜𑁆𑀳𑀺 𑀓𑀫𑁆𑀫𑀓𑀺𑀮𑁂𑀲𑀸𑀦𑀁 𑀫𑀳𑀸𑀩𑁄𑀥𑀺𑀫𑀽𑀮𑁂𑀬𑁂𑀯 𑀅𑀕𑁆𑀕𑀫𑀕𑁆𑀕𑁂𑀦 𑀧𑀳𑀻𑀦𑀢𑁆𑀢𑀸 𑀦𑀢𑁆𑀣𑀺 𑀪𑀕𑀯𑀢𑁄 𑀢𑀁𑀢𑀁𑀕𑀢𑀺𑀧𑀭𑀺𑀬𑀸𑀧𑀦𑁆𑀦𑀢𑀸𑀢𑀺 𑀅𑀘𑁆𑀘𑀦𑁆𑀢𑀫𑁂𑀯 𑀪𑀕𑀯𑀸 𑀲𑀩𑁆𑀩𑀪𑀯𑀬𑁄𑀦𑀺𑀕𑀢𑀺𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀲𑀢𑁆𑀢𑀸𑀯𑀸𑀲𑀲𑀢𑁆𑀢𑀦𑀺𑀓𑀸𑀬𑁂𑀳𑀺 𑀧𑀭𑀺𑀫𑀼𑀢𑁆𑀢𑁄𑀢𑀺. 𑀅𑀣 𑀯𑀸 𑀓𑀸𑀫𑀁 𑀲𑀉𑀧𑀸𑀤𑀺𑀲𑁂𑀲𑀸𑀬𑀧𑀺 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀢𑀸𑀳𑀺 𑀕𑀢𑀻𑀳𑀺 𑀯𑀺𑀫𑀼𑀢𑁆𑀢𑁄, 𑀏𑀲𑀸 𑀧𑀦 ‘‘𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫’’𑀦𑁆𑀢𑀺 𑀏𑀢𑁆𑀣𑁂𑀯𑀦𑁆𑀢𑁄𑀕𑀥𑀸𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸𑀯 𑀣𑁄𑀫𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀏𑀢𑁆𑀣 𑀧𑀦 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀯𑀲𑁂𑀦 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀪𑀕𑀯𑀢𑁄 𑀣𑁄𑀫𑀦𑀸 𑀓𑀢𑀸 𑀳𑁄𑀢𑀺. 𑀢𑁂𑀲𑀼 𑀅𑀦𑀸𑀯𑀭𑀡𑀜𑀸𑀡𑀸𑀥𑀺𑀕𑀫𑁄, 𑀲𑀳 𑀯𑀸𑀲𑀦𑀸𑀬 𑀓𑀺𑀮𑁂𑀲𑀸𑀦𑀫𑀘𑁆𑀘𑀦𑁆𑀢𑀧𑁆𑀧𑀳𑀸𑀦𑀁, 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺 𑀘 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺 𑀦𑀸𑀫, 𑀮𑀸𑀪𑀲𑀓𑁆𑀓𑀸𑀭𑀸𑀤𑀺𑀦𑀺𑀭𑀧𑁂𑀓𑁆𑀔𑀘𑀺𑀢𑁆𑀢𑀲𑁆𑀲 𑀧𑀦 𑀲𑀩𑁆𑀩𑀤𑀼𑀓𑁆𑀔𑀦𑀺𑀬𑁆𑀬𑀸𑀦𑀺𑀓𑀥𑀫𑁆𑀫𑀤𑁂𑀲𑀦𑀸𑀧𑀬𑁄𑀕𑀢𑁄 𑀤𑁂𑀯𑀤𑀢𑁆𑀢𑀸𑀤𑀻𑀲𑀼𑀧𑀺 𑀯𑀺𑀭𑀼𑀤𑁆𑀥𑀲𑀢𑁆𑀢𑁂𑀲𑀼 𑀦𑀺𑀘𑁆𑀘𑀁 𑀳𑀺𑀢𑀚𑁆𑀛𑀸𑀲𑀬𑀢𑀸, 𑀯𑀺𑀦𑀻𑀢𑀩𑁆𑀩𑀲𑀢𑁆𑀢𑀸𑀦𑀁 𑀜𑀸𑀡𑀧𑀭𑀺𑀧𑀸𑀓𑀓𑀸𑀮𑀸𑀕𑀫𑀦𑀜𑁆𑀘 𑀆𑀲𑀬𑀢𑁄 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺 𑀦𑀸𑀫. 𑀲𑀸 𑀧𑀦 𑀆𑀲𑀬𑀧𑀬𑁄𑀕𑀢𑁄 𑀤𑀼𑀯𑀺𑀥𑀸, 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺 𑀢𑀺𑀯𑀺𑀥𑀸 𑀘 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺 𑀇𑀫𑀸𑀬 𑀕𑀸𑀣𑀸𑀬 𑀬𑀣𑀸𑀭𑀳𑀁 𑀧𑀓𑀸𑀲𑀺𑀢𑀸 𑀳𑁄𑀢𑀺. ‘‘𑀓𑀭𑀼𑀡𑀸𑀲𑀻𑀢𑀮𑀳𑀤𑀬’’𑀦𑁆𑀢𑀺 𑀳𑀺 𑀏𑀢𑁂𑀦 𑀆𑀲𑀬𑀢𑁄 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺, 𑀲𑀫𑁆𑀫𑀸 𑀕𑀤𑀦𑀢𑁆𑀣𑁂𑀦 𑀲𑀼𑀕𑀢𑀲𑀤𑁆𑀤𑁂𑀦 𑀧𑀬𑁄𑀕𑀢𑁄 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺. ‘‘𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫𑀁 𑀕𑀢𑀺𑀯𑀺𑀫𑀼𑀢𑁆𑀢’’𑀦𑁆𑀢𑀺 𑀏𑀢𑁂𑀳𑀺, 𑀘𑀢𑀼𑀲𑀘𑁆𑀘𑀧𑀝𑀺𑀯𑁂𑀥𑀢𑁆𑀣𑁂𑀦 𑀘 𑀲𑀼𑀕𑀢𑀲𑀤𑁆𑀤𑁂𑀦 𑀢𑀺𑀯𑀺𑀥𑀸𑀧𑀺 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺, 𑀅𑀯𑀲𑀺𑀝𑁆𑀞𑀝𑁆𑀞𑁂𑀦 𑀧𑀦 𑀢𑁂𑀦, ‘‘𑀲𑀦𑀭𑀸𑀫𑀭𑀮𑁄𑀓𑀕𑀭𑀼’’𑀦𑁆𑀢𑀺 𑀘 𑀏𑀢𑁂𑀦 𑀲𑀩𑁆𑀩𑀸𑀧𑀺 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺, 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺 𑀘 𑀧𑀓𑀸𑀲𑀺𑀢𑀸 𑀳𑁄𑀢𑀺.

𑀅𑀣 𑀯𑀸 𑀳𑁂𑀢𑀼𑀨𑀮𑀲𑀢𑁆𑀢𑀽𑀧𑀓𑀸𑀭𑀯𑀲𑁂𑀦 𑀢𑀻𑀳𑀸𑀓𑀸𑀭𑁂𑀳𑀺 𑀣𑁄𑀫𑀦𑀸 𑀓𑀢𑀸. 𑀢𑀢𑁆𑀣 𑀳𑁂𑀢𑀼 𑀦𑀸𑀫 𑀫𑀳𑀸𑀓𑀭𑀼𑀡𑀸𑀲𑀫𑀸𑀬𑁄𑀕𑁄, 𑀩𑁄𑀥𑀺𑀲𑀫𑁆𑀪𑀸𑀭𑀲𑀫𑁆𑀪𑀭𑀡𑀜𑁆𑀘, 𑀢𑀤𑀼𑀪𑀬𑀫𑁆𑀧𑀺 𑀧𑀞𑀫𑀧𑀤𑁂𑀦 𑀬𑀣𑀸𑀭𑀼𑀢𑀢𑁄, 𑀲𑀸𑀫𑀢𑁆𑀣𑀺𑀬𑀢𑁄 𑀘 𑀧𑀓𑀸𑀲𑀺𑀢𑀁. 𑀨𑀮𑀁 𑀧𑀦 𑀜𑀸𑀡𑀧𑁆𑀧𑀳𑀸𑀦𑀆𑀦𑀼𑀪𑀸𑀯𑀭𑀽𑀧𑀓𑀸𑀬𑀲𑀫𑁆𑀧𑀤𑀸𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀁. 𑀢𑀢𑁆𑀣 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀧𑀤𑀝𑁆𑀞𑀸𑀦𑀁 𑀫𑀕𑁆𑀕𑀜𑀸𑀡𑀁, 𑀢𑀫𑁆𑀫𑀽𑀮𑀓𑀸𑀦𑀺 𑀘 𑀤𑀲𑀩𑀮𑀸𑀤𑀺𑀜𑀸𑀡𑀸𑀦𑀺 𑀜𑀸𑀡𑀲𑀫𑁆𑀧𑀤𑀸, 𑀲𑀯𑀸𑀲𑀦𑀲𑀓𑀮𑀲𑀁𑀓𑀺𑀮𑁂𑀲𑀸𑀦𑀫𑀘𑁆𑀘𑀦𑁆𑀢𑀫𑀦𑀼𑀧𑁆𑀧𑀸𑀤𑀥𑀫𑁆𑀫𑀢𑀸𑀧𑀸𑀤𑀦𑀁 𑀧𑀳𑀸𑀦𑀲𑀫𑁆𑀧𑀤𑀸, 𑀬𑀣𑀺𑀘𑁆𑀙𑀺𑀢𑀦𑀺𑀧𑁆𑀨𑀸𑀤𑀦𑁂 𑀆𑀥𑀺𑀧𑀘𑁆𑀘𑀁 𑀆𑀦𑀼𑀪𑀸𑀯𑀲𑀫𑁆𑀧𑀤𑀸, 𑀲𑀓𑀮𑀮𑁄𑀓𑀦𑀬𑀦𑀸𑀪𑀺𑀲𑁂𑀓𑀪𑀽𑀢𑀸 𑀧𑀦 𑀮𑀓𑁆𑀔𑀡𑀸𑀦𑀼𑀩𑁆𑀬𑀜𑁆𑀚𑀦𑀧𑀝𑀺𑀫𑀡𑁆𑀟𑀺𑀢𑀸 𑀅𑀢𑁆𑀢𑀪𑀸𑀯𑀲𑀫𑁆𑀧𑀢𑁆𑀢𑀺 𑀭𑀽𑀧𑀓𑀸𑀬𑀲𑀫𑁆𑀧𑀤𑀸. 𑀢𑀸𑀲𑀼 𑀜𑀸𑀡𑀧𑁆𑀧𑀳𑀸𑀦𑀲𑀫𑁆𑀧𑀤𑀸 𑀤𑀼𑀢𑀺𑀬𑀧𑀤𑁂𑀦, 𑀲𑀘𑁆𑀘𑀧𑀝𑀺𑀯𑁂𑀥𑀢𑁆𑀣𑁂𑀦 𑀘 𑀲𑀼𑀕𑀢𑀲𑀤𑁆𑀤𑁂𑀦 𑀧𑀓𑀸𑀲𑀺𑀢𑀸, 𑀆𑀦𑀼𑀪𑀸𑀯𑀲𑀫𑁆𑀧𑀤𑀸 𑀢𑀢𑀺𑀬𑀧𑀤𑁂𑀦, 𑀭𑀽𑀧𑀓𑀸𑀬𑀲𑀫𑁆𑀧𑀤𑀸 𑀲𑁄𑀪𑀦𑀓𑀸𑀬𑀕𑀫𑀦𑀢𑁆𑀣𑁂𑀦 𑀲𑀼𑀕𑀢𑀲𑀤𑁆𑀤𑁂𑀦 𑀮𑀓𑁆𑀔𑀡𑀸𑀦𑀼𑀩𑁆𑀬𑀜𑁆𑀚𑀦𑀧𑀸𑀭𑀺𑀧𑀽𑀭𑀺𑀬𑀸 𑀯𑀺𑀦𑀸 𑀢𑀤𑀪𑀸𑀯𑀢𑁄. 𑀬𑀣𑀸𑀯𑀼𑀢𑁆𑀢𑀸 𑀤𑀼𑀯𑀺𑀥𑀸𑀧𑀺 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺 𑀲𑀢𑁆𑀢𑀽𑀧𑀓𑀸𑀭𑀲𑀫𑁆𑀧𑀤𑀸, 𑀲𑀸 𑀧𑀦 𑀲𑀫𑁆𑀫𑀸 𑀕𑀤𑀦𑀢𑁆𑀣𑁂𑀦 𑀲𑀼𑀕𑀢𑀲𑀤𑁆𑀤𑁂𑀦 𑀧𑀓𑀸𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀧𑀺𑀘 𑀇𑀫𑀸𑀬 𑀕𑀸𑀣𑀸𑀬 𑀲𑀫𑁆𑀫𑀸𑀲𑀫𑁆𑀩𑁄𑀥𑀺 𑀢𑀫𑁆𑀫𑀽𑀮 𑁋 𑀢𑀧𑁆𑀧𑀝𑀺𑀧𑀢𑁆𑀢𑀺𑀬𑀸𑀤𑀬𑁄 𑀅𑀦𑁂𑀓𑁂 𑀩𑀼𑀤𑁆𑀥𑀕𑀼𑀡𑀸 𑀆𑀘𑀭𑀺𑀬𑁂𑀦 𑀧𑀓𑀸𑀲𑀺𑀢𑀸 𑀳𑁄𑀦𑁆𑀢𑀺. 𑀏𑀲𑀸 𑀳𑀺 𑀆𑀘𑀭𑀺𑀬𑀸𑀦𑀁 𑀧𑀓𑀢𑀺, 𑀬𑀤𑀺𑀤𑀁 𑀬𑁂𑀦 𑀓𑁂𑀦𑀘𑀺 𑀧𑀓𑀸𑀭𑁂𑀦 𑀅𑀢𑁆𑀣𑀦𑁆𑀢𑀭𑀯𑀺𑀜𑁆𑀜𑀸𑀧𑀦𑀁. 𑀓𑀣𑀁? ‘‘𑀓𑀭𑀼𑀡𑀸𑀲𑀻𑀢𑀮𑀳𑀤𑀬’’𑀦𑁆𑀢𑀺 𑀳𑀺 𑀏𑀢𑁂𑀦 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀫𑀽𑀮𑀁 𑀤𑀲𑁆𑀲𑁂𑀢𑀺. 𑀫𑀳𑀸𑀓𑀭𑀼𑀡𑀸𑀲𑀜𑁆𑀘𑁄𑀤𑀺𑀢𑀫𑀸𑀦𑀲𑁄 𑀳𑀺 𑀪𑀕𑀯𑀸 𑀲𑀁𑀲𑀸𑀭𑀧𑀗𑁆𑀓𑀢𑁄 𑀲𑀢𑁆𑀢𑀸𑀦𑀁 𑀲𑀫𑀼𑀤𑁆𑀥𑀭𑀡𑀢𑁆𑀣𑀁 𑀓𑀢𑀸𑀪𑀺𑀦𑀻𑀳𑀸𑀭𑁄 𑀅𑀦𑀼𑀧𑀼𑀩𑁆𑀩𑁂𑀦 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀫𑀥𑀺𑀕𑀢𑁄𑀢𑀺 𑀓𑀭𑀼𑀡𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀫𑀽𑀮𑀁. ‘‘𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫’’𑀦𑁆𑀢𑀺 𑀏𑀢𑁂𑀦 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀤𑀲𑁆𑀲𑁂𑀢𑀺. 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀧𑀤𑀝𑁆𑀞𑀸𑀦𑀜𑁆𑀳𑀺 𑀅𑀕𑁆𑀕𑀫𑀕𑁆𑀕𑀜𑀸𑀡𑀁, 𑀅𑀕𑁆𑀕𑀫𑀕𑁆𑀕𑀜𑀸𑀡𑀧𑀤𑀝𑁆𑀞𑀸𑀦𑀜𑁆𑀘 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 ‘‘𑀲𑀫𑁆𑀫𑀸𑀲𑀫𑁆𑀩𑁄𑀥𑀻’’𑀢𑀺 𑀯𑀼𑀘𑁆𑀘𑀢𑀺. 𑀲𑀫𑁆𑀫𑀸 𑀕𑀫𑀦𑀢𑁆𑀣𑁂𑀦 𑀲𑀼𑀕𑀢𑀲𑀤𑁆𑀤𑁂𑀦 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺 𑀮𑀻𑀦𑀼𑀤𑁆𑀥𑀘𑁆𑀘𑀧𑀢𑀺𑀝𑁆𑀞𑀸𑀦𑀸𑀬𑀽𑀳𑀦𑀓𑀸𑀫𑀲𑀼𑀔𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀲𑀲𑁆𑀲𑀢𑀼𑀘𑁆𑀙𑁂𑀤𑀸𑀪𑀺𑀦𑀺𑀯𑁂𑀲𑀸𑀤𑀺𑀅𑀦𑁆𑀢𑀤𑁆𑀯𑀬𑀭𑀳𑀺𑀢𑀸𑀬 𑀓𑀭𑀼𑀡𑀸𑀧𑀜𑁆𑀜𑀸𑀧𑀭𑀺𑀕𑁆𑀕𑀳𑀺𑀢𑀸𑀬 𑀫𑀚𑁆𑀛𑀺𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀧𑀓𑀸𑀲𑀦𑀢𑁄, 𑀇𑀢𑀭𑁂𑀳𑀺 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀧𑀥𑀸𑀦𑀸𑀧𑁆𑀧𑀥𑀸𑀦𑀧𑁆𑀧𑀪𑁂𑀤𑀁 𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑀺. 𑀲𑀁𑀲𑀸𑀭𑀫𑀳𑁄𑀖𑀢𑁄 𑀲𑀢𑁆𑀢𑀲𑀦𑁆𑀢𑀸𑀭𑀡𑀜𑁆𑀳𑁂𑀢𑁆𑀣 𑀧𑀥𑀸𑀦𑀁, 𑀢𑀤𑀜𑁆𑀜𑀫𑀧𑁆𑀧𑀥𑀸𑀦𑀁. 𑀢𑁂𑀲𑀼 𑀘 𑀧𑀥𑀸𑀦𑁂𑀦 𑀧𑀬𑁄𑀚𑀦𑁂𑀦 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺, 𑀇𑀢𑀭𑁂𑀦 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺𑀁, 𑀢𑀤𑀼𑀪𑀬𑁂𑀦 𑀘 𑀅𑀢𑁆𑀢𑀳𑀺𑀢𑀧𑀝𑀺𑀧𑀦𑁆𑀦𑀸𑀤𑀻𑀲𑀼 𑀘𑀢𑀽𑀲𑀼 𑀧𑀼𑀕𑁆𑀕𑀮𑁂𑀲𑀼 𑀪𑀕𑀯𑀢𑁄 𑀘𑀢𑀼𑀢𑁆𑀣𑀧𑀼𑀕𑁆𑀕𑀮𑀪𑀸𑀯𑀁 𑀧𑀓𑀸𑀲𑁂𑀢𑀺. 𑀢𑁂𑀦 𑀘 𑀅𑀦𑀼𑀢𑁆𑀢𑀭𑀁 𑀤𑀓𑁆𑀔𑀺𑀡𑁂𑀬𑁆𑀬𑀪𑀸𑀯𑀁, 𑀉𑀢𑁆𑀢𑀫𑀜𑁆𑀘 𑀯𑀦𑁆𑀤𑀦𑀻𑀬𑀪𑀸𑀯𑀁, 𑀅𑀢𑁆𑀢𑀦𑁄 𑀘 𑀯𑀦𑁆𑀤𑀦𑀸𑀬 𑀔𑁂𑀢𑁆𑀢𑀗𑁆𑀕𑀢𑀪𑀸𑀯𑀁 𑀯𑀺𑀪𑀸𑀯𑁂𑀢𑀺.

𑀅𑀧𑀺𑀘 𑀓𑀭𑀼𑀡𑀸𑀕𑁆𑀕𑀳𑀡𑁂𑀦 𑀮𑁄𑀓𑀺𑀬𑁂𑀲𑀼 𑀫𑀳𑀕𑁆𑀕𑀢𑀪𑀸𑀯𑀧𑁆𑀧𑀢𑁆𑀢𑀸𑀲𑀸𑀥𑀸𑀭𑀡𑀕𑀼𑀡𑀤𑀻𑀧𑀦𑀢𑁄 𑀲𑀩𑁆𑀩𑀮𑁄𑀓𑀺𑀬𑀕𑀼𑀡𑀲𑀫𑁆𑀧𑀢𑁆𑀢𑀺 𑀤𑀲𑁆𑀲𑀺𑀢𑀸, 𑀧𑀜𑁆𑀜𑀸𑀕𑁆𑀕𑀳𑀡𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀤𑀝𑁆𑀞𑀸𑀦𑀫𑀕𑁆𑀕𑀜𑀸𑀡𑀤𑀻𑀧𑀦𑀢𑁄 𑀲𑀩𑁆𑀩𑀮𑁄𑀓𑀼𑀢𑁆𑀢𑀭𑀕𑀼𑀡𑀲𑀫𑁆𑀧𑀢𑁆𑀢𑀺. 𑀢𑀤𑀼𑀪𑀬𑀕𑁆𑀕𑀳𑀡𑀲𑀺𑀤𑁆𑀥𑁄 𑀳𑀺 𑀅𑀢𑁆𑀣𑁄 ‘‘𑀲𑀦𑀭𑀸𑀫𑀭𑀮𑁄𑀓𑀕𑀭𑀼’’𑀦𑁆𑀢𑀺𑀆𑀤𑀺𑀦𑀸 𑀯𑀺𑀧𑀜𑁆𑀘𑀻𑀬𑀢𑀻𑀢𑀺. 𑀓𑀭𑀼𑀡𑀸𑀕𑁆𑀕𑀳𑀡𑁂𑀦 𑀘 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀫𑀼𑀧𑀕𑀫𑀦𑀁 𑀤𑀲𑁆𑀲𑁂𑀢𑀺, 𑀧𑀜𑁆𑀜𑀸𑀕𑁆𑀕𑀳𑀡𑁂𑀦 𑀅𑀧𑀕𑀫𑀦𑀁. 𑀢𑀣𑀸 𑀓𑀭𑀼𑀡𑀸𑀕𑁆𑀕𑀳𑀡𑁂𑀦 𑀮𑁄𑀓𑀲𑀫𑀜𑁆𑀜𑀸𑀦𑀼𑀭𑀽𑀧𑀁 𑀪𑀕𑀯𑀢𑁄 𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑀺 𑀮𑁄𑀓𑀯𑁄𑀳𑀸𑀭𑀯𑀺𑀲𑀬𑀢𑁆𑀢𑀸 𑀓𑀭𑀼𑀡𑀸𑀬, 𑀧𑀜𑁆𑀜𑀸𑀕𑁆𑀕𑀳𑀡𑁂𑀦 𑀮𑁄𑀓𑀲𑀫𑀜𑁆𑀜𑀸𑀬 𑀅𑀦𑀢𑀺𑀥𑀸𑀯𑀦𑀁. 𑀲𑀪𑀸𑀯𑀸𑀦𑀯𑀩𑁄𑀥𑁂𑀦 𑀳𑀺 𑀥𑀫𑁆𑀫𑀸𑀦𑀁 𑀲𑀪𑀸𑀯𑀁 𑀅𑀢𑀺𑀥𑀸𑀯𑀺𑀢𑁆𑀯𑀸 𑀲𑀢𑁆𑀢𑀸𑀤𑀺𑀧𑀭𑀸𑀫𑀲𑀦𑀁 𑀳𑁄𑀢𑀺. 𑀢𑀣𑀸 𑀓𑀭𑀼𑀡𑀸𑀕𑁆𑀕𑀳𑀡𑁂𑀦 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑀁 𑀤𑀲𑁆𑀲𑁂𑀢𑀺, 𑀧𑀜𑁆𑀜𑀸𑀕𑁆𑀕𑀳𑀡𑁂𑀦 𑀢𑀻𑀲𑀼 𑀓𑀸𑀮𑁂𑀲𑀼 𑀅𑀧𑁆𑀧𑀝𑀺𑀳𑀢𑀜𑀸𑀡𑀁, 𑀘𑀢𑀼𑀲𑀘𑁆𑀘𑀜𑀸𑀡𑀁, 𑀘𑀢𑀼𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑀁, 𑀘𑀢𑀼𑀯𑁂𑀲𑀸𑀭𑀚𑁆𑀚𑀜𑀸𑀡𑀁, 𑀓𑀭𑀼𑀡𑀸𑀕𑁆𑀕𑀳𑀡𑁂𑀦 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀜𑀸𑀡𑀲𑁆𑀲 𑀕𑀳𑀺𑀢𑀢𑁆𑀢𑀸 𑀲𑁂𑀲𑀸𑀲𑀸𑀥𑀸𑀭𑀡𑀜𑀸𑀡𑀸𑀦𑀺, 𑀙 𑀅𑀪𑀺𑀜𑁆𑀜𑀸, 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼 𑀅𑀓𑀫𑁆𑀧𑀦𑀜𑀸𑀡𑀸𑀦𑀺, 𑀤𑀲 𑀩𑀮𑀸𑀦𑀺, 𑀘𑀼𑀤𑁆𑀤𑀲 𑀩𑀼𑀤𑁆𑀥𑀕𑀼𑀡𑀸, 𑀲𑁄𑀴𑀲 𑀜𑀸𑀡𑀘𑀭𑀺𑀬𑀸, 𑀅𑀝𑁆𑀞𑀸𑀭𑀲 𑀩𑀼𑀤𑁆𑀥𑀥𑀫𑁆𑀫𑀸, 𑀘𑀢𑀼𑀘𑀢𑁆𑀢𑀸𑀭𑀻𑀲 𑀜𑀸𑀡𑀯𑀢𑁆𑀣𑀽𑀦𑀺, 𑀲𑀢𑁆𑀢𑀲𑀢𑁆𑀢𑀢𑀺 𑀜𑀸𑀡𑀯𑀢𑁆𑀣𑀽𑀦𑀻𑀢𑀺 𑀏𑀯𑀫𑀸𑀤𑀻𑀦𑀁 𑀅𑀦𑁂𑀓𑁂𑀲𑀁 𑀧𑀜𑁆𑀜𑀸𑀧𑀪𑁂𑀤𑀸𑀦𑀁 𑀯𑀲𑁂𑀦 𑀜𑀸𑀡𑀘𑀸𑀭𑀁 𑀤𑀲𑁆𑀲𑁂𑀢𑀺. 𑀢𑀣𑀸 𑀓𑀭𑀼𑀡𑀸𑀕𑁆𑀕𑀳𑀡𑁂𑀦 𑀘𑀭𑀡𑀲𑀫𑁆𑀧𑀢𑁆𑀢𑀺𑀁, 𑀧𑀜𑁆𑀜𑀸𑀕𑁆𑀕𑀳𑀡𑁂𑀦 𑀯𑀺𑀚𑁆𑀚𑀸𑀲𑀫𑁆𑀧𑀢𑁆𑀢𑀺𑀁. 𑀓𑀭𑀼𑀡𑀸𑀕𑁆𑀕𑀳𑀡𑁂𑀦 𑀅𑀢𑁆𑀢𑀸𑀥𑀺𑀧𑀢𑀺𑀢𑀸, 𑀧𑀜𑁆𑀜𑀸𑀕𑁆𑀕𑀳𑀡𑁂𑀦 𑀥𑀫𑁆𑀫𑀸𑀥𑀺𑀧𑀢𑀺𑀢𑀸. 𑀓𑀭𑀼𑀡𑀸𑀕𑁆𑀕𑀳𑀡𑁂𑀦 𑀮𑁄𑀓𑀦𑀸𑀣𑀪𑀸𑀯𑁄, 𑀧𑀜𑁆𑀜𑀸𑀕𑁆𑀕𑀳𑀡𑁂𑀦 𑀅𑀢𑁆𑀢𑀦𑀸𑀣𑀪𑀸𑀯𑁄. 𑀢𑀣𑀸 𑀓𑀭𑀼𑀡𑀸𑀕𑁆𑀕𑀳𑀡𑁂𑀦 𑀧𑀼𑀩𑁆𑀩𑀓𑀸𑀭𑀻𑀪𑀸𑀯𑁄, 𑀧𑀜𑁆𑀜𑀸𑀕𑁆𑀕𑀳𑀡𑁂𑀦 𑀓𑀢𑀜𑁆𑀜𑀼𑀢𑀸. 𑀓𑀭𑀼𑀡𑀸𑀕𑁆𑀕𑀳𑀡𑁂𑀦 𑀅𑀧𑀭𑀦𑁆𑀢𑀧𑀢𑀸, 𑀧𑀜𑁆𑀜𑀸𑀕𑁆𑀕𑀳𑀡𑁂𑀦 𑀅𑀦𑀢𑁆𑀢𑀦𑁆𑀢𑀧𑀢𑀸. 𑀓𑀭𑀼𑀡𑀸𑀕𑁆𑀕𑀳𑀡𑁂𑀦 𑀯𑀸 𑀩𑀼𑀤𑁆𑀥𑀓𑀭𑀥𑀫𑁆𑀫𑀲𑀺𑀤𑁆𑀥𑀺, 𑀧𑀜𑁆𑀜𑀸𑀕𑁆𑀕𑀳𑀡𑁂𑀦 𑀩𑀼𑀤𑁆𑀥𑀪𑀸𑀯𑀲𑀺𑀤𑁆𑀥𑀺. 𑀢𑀣𑀸 𑀓𑀭𑀼𑀡𑀸𑀕𑁆𑀕𑀳𑀡𑁂𑀦 𑀧𑀭𑀲𑀦𑁆𑀢𑀸𑀭𑀡𑀁, 𑀧𑀜𑁆𑀜𑀸𑀕𑁆𑀕𑀳𑀡𑁂𑀦 𑀅𑀢𑁆𑀢𑀲𑀦𑁆𑀢𑀸𑀭𑀡𑀁. 𑀢𑀣𑀸 𑀓𑀭𑀼𑀡𑀸𑀕𑁆𑀕𑀳𑀡𑁂𑀦 𑀲𑀩𑁆𑀩𑀲𑀢𑁆𑀢𑁂𑀲𑀼 𑀅𑀦𑀼𑀕𑁆𑀕𑀳𑀘𑀺𑀢𑁆𑀢𑀢𑀸, 𑀧𑀜𑁆𑀜𑀸𑀕𑁆𑀕𑀳𑀡𑁂𑀦 𑀲𑀩𑁆𑀩𑀥𑀫𑁆𑀫𑁂𑀲𑀼 𑀯𑀺𑀭𑀢𑁆𑀢𑀘𑀺𑀢𑁆𑀢𑀢𑀸 𑀤𑀲𑁆𑀲𑀺𑀢𑀸 𑀳𑁄𑀢𑀺 𑀲𑀩𑁆𑀩𑁂𑀲𑀜𑁆𑀘 𑀩𑀼𑀤𑁆𑀥𑀕𑀼𑀡𑀸𑀦𑀁 𑀓𑀭𑀼𑀡𑀸 𑀆𑀤𑀺 𑀢𑀦𑁆𑀦𑀺𑀤𑀸𑀦𑀪𑀸𑀯𑀢𑁄, 𑀧𑀜𑁆𑀜𑀸 𑀧𑀭𑀺𑀬𑁄𑀲𑀸𑀦𑀁 𑀢𑀢𑁄 𑀉𑀢𑁆𑀢𑀭𑀺 𑀓𑀭𑀡𑀻𑀬𑀸𑀪𑀸𑀯𑀢𑁄. 𑀇𑀢𑀺 𑀆𑀤𑀺𑀧𑀭𑀺𑀬𑁄𑀲𑀸𑀦𑀤𑀲𑁆𑀲𑀦𑁂𑀦 𑀲𑀩𑁆𑀩𑁂 𑀩𑀼𑀤𑁆𑀥𑀕𑀼𑀡𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺. 𑀢𑀣𑀸 𑀓𑀭𑀼𑀡𑀸𑀕𑁆𑀕𑀳𑀡𑁂𑀦 𑀲𑀻𑀮𑀓𑁆𑀔𑀦𑁆𑀥𑀧𑀼𑀩𑁆𑀩𑀗𑁆𑀕𑀫𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀓𑀭𑀼𑀡𑀸𑀦𑀺𑀤𑀸𑀦𑀜𑁆𑀳𑀺 𑀲𑀻𑀮𑀁 𑀢𑀢𑁄 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀯𑀺𑀭𑀢𑀺𑀧𑁆𑀧𑀯𑀢𑁆𑀢𑀺𑀢𑁄, 𑀲𑀸 𑀘 𑀛𑀸𑀦𑀢𑁆𑀢𑀬𑀲𑀫𑁆𑀧𑀬𑁄𑀕𑀺𑀦𑀻𑀢𑀺, 𑀧𑀜𑁆𑀜𑀸𑀯𑀘𑀦𑁂𑀦 𑀧𑀜𑁆𑀜𑀸𑀓𑁆𑀔𑀦𑁆𑀥𑁄. 𑀲𑀻𑀮𑀜𑁆𑀘 𑀲𑀩𑁆𑀩𑀩𑀼𑀤𑁆𑀥𑀕𑀼𑀡𑀸𑀦𑀁 𑀆𑀤𑀺, 𑀲𑀫𑀸𑀥𑀺 𑀫𑀚𑁆𑀛𑁂, 𑀧𑀜𑁆𑀜𑀸 𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀏𑀯𑀫𑁆𑀧𑀺 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀸 𑀲𑀩𑁆𑀩𑁂 𑀩𑀼𑀤𑁆𑀥𑀕𑀼𑀡𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺 𑀦𑀬𑀢𑁄 𑀤𑀲𑁆𑀲𑀺𑀢𑀢𑁆𑀢𑀸. 𑀏𑀲𑁄 𑀏𑀯 𑀳𑀺 𑀦𑀺𑀭𑀯𑀲𑁂𑀲𑀢𑁄 𑀩𑀼𑀤𑁆𑀥𑀕𑀼𑀡𑀸𑀦𑀁 𑀤𑀲𑁆𑀲𑀦𑀼𑀧𑀸𑀬𑁄, 𑀬𑀤𑀺𑀤𑀁 𑀦𑀬𑀕𑁆𑀕𑀸𑀳𑀡𑀁, 𑀅𑀜𑁆𑀜𑀣𑀸 𑀓𑁄 𑀦𑀸𑀫 𑀲𑀫𑀢𑁆𑀣𑁄 𑀪𑀕𑀯𑀢𑁄 𑀕𑀼𑀡𑁂 𑀅𑀦𑀼𑀧𑀤𑀁 𑀦𑀺𑀭𑀯𑀲𑁂𑀲𑀢𑁄 𑀤𑀲𑁆𑀲𑁂𑀢𑀼𑀁. 𑀢𑁂𑀦𑁂𑀯𑀸𑀳 𑁋

‘‘𑀩𑀼𑀤𑁆𑀥𑁄𑀧𑀺 𑀩𑀼𑀤𑁆𑀥𑀲𑁆𑀲 𑀪𑀡𑁂𑀬𑁆𑀬 𑀯𑀡𑁆𑀡𑀁,

𑀓𑀧𑁆𑀧𑀫𑁆𑀧𑀺 𑀘𑁂 𑀅𑀜𑁆𑀜𑀫𑀪𑀸𑀲𑀫𑀸𑀦𑁄.

𑀔𑀻𑀬𑁂𑀣 𑀓𑀧𑁆𑀧𑁄 𑀘𑀺𑀭𑀤𑀻𑀖𑀫𑀦𑁆𑀢𑀭𑁂,

𑀯𑀡𑁆𑀡𑁄 𑀦 𑀔𑀻𑀬𑁂𑀣 𑀢𑀣𑀸𑀕𑀢𑀲𑁆𑀲𑀸’’𑀢𑀺.

𑀢𑁂𑀦𑁂𑀯 𑀘 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦𑀸𑀧𑀺 𑀩𑀼𑀤𑁆𑀥𑀕𑀼𑀡𑀧𑀭𑀺𑀘𑁆𑀙𑁂𑀤𑀦𑀁 𑀧𑀢𑀺 𑀪𑀕𑀯𑀢𑀸 𑀅𑀦𑀼𑀬𑀼𑀢𑁆𑀢𑁂𑀦 ‘‘𑀦𑁄 𑀳𑁂𑀢𑀁 𑀪𑀦𑁆𑀢𑁂’’𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀅𑀧𑀺 𑀘 𑀫𑁂 𑀪𑀦𑁆𑀢𑁂 𑀥𑀫𑁆𑀫𑀦𑁆𑀯𑀬𑁄 𑀯𑀺𑀤𑀺𑀢𑁄’’𑀢𑀺 𑀲𑀫𑁆𑀧𑀲𑀸𑀤𑀦𑀻𑀬𑀲𑀼𑀢𑁆𑀢𑁂 𑀯𑀼𑀢𑁆𑀢𑀁.

𑀏𑀯𑀁 𑀲𑀗𑁆𑀔𑁂𑀧𑁂𑀦 𑀲𑀓𑀮𑀲𑀩𑁆𑀩𑀜𑁆𑀜𑀼𑀕𑀼𑀡𑁂𑀳𑀺 𑀪𑀕𑀯𑀢𑁄 𑀣𑁄𑀫𑀦𑀸𑀧𑀼𑀩𑁆𑀩𑀗𑁆𑀕𑀫𑀁 𑀧𑀡𑀸𑀫𑀁 𑀓𑀢𑁆𑀯𑀸 𑀇𑀤𑀸𑀦𑀺 𑀲𑀤𑁆𑀥𑀫𑁆𑀫𑀲𑁆𑀲𑀸𑀧𑀺 𑀣𑁄𑀫𑀦𑀸𑀧𑀼𑀩𑁆𑀩𑀗𑁆𑀕𑀫𑀁 𑀧𑀡𑀸𑀫𑀁 𑀓𑀭𑁄𑀦𑁆𑀢𑁄 ‘‘𑀩𑀼𑀤𑁆𑀥𑁄𑀧𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣𑀸𑀬𑀁 𑀲𑀳 𑀧𑀤𑀲𑀫𑁆𑀩𑀦𑁆𑀥𑁂𑀦 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀣𑀸𑀯𑀼𑀢𑁆𑀢𑀯𑀺𑀯𑀺𑀥𑀕𑀼𑀡𑀕𑀡𑀲𑀫𑀦𑁆𑀦𑀸𑀕𑀢𑁄 𑀩𑀼𑀤𑁆𑀥𑁄𑀧𑀺 𑀬𑀁 𑀅𑀭𑀺𑀬𑀫𑀕𑁆𑀕𑀲𑀗𑁆𑀔𑀸𑀢𑀁 𑀥𑀫𑁆𑀫𑀁, 𑀲𑀳 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀢𑁆𑀢𑀺𑀥𑀫𑁆𑀫𑁂𑀦 𑀯𑀸 𑀅𑀭𑀺𑀬𑀫𑀕𑁆𑀕𑀪𑀽𑀢𑀁 𑀥𑀫𑁆𑀫𑀁 𑀪𑀸𑀯𑁂𑀢𑁆𑀯𑀸 𑀘𑁂𑀯 𑀬𑀁 𑀨𑀮𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀁 𑀥𑀫𑁆𑀫𑀁, 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀧𑀝𑀺𑀧𑀢𑁆𑀢𑀺𑀥𑀫𑁆𑀫𑁂𑀳𑀺 𑀯𑀸 𑀲𑀳 𑀨𑀮𑀦𑀺𑀩𑁆𑀩𑀸𑀦𑀪𑀽𑀢𑀁 𑀥𑀫𑁆𑀫𑀁 𑀲𑀘𑁆𑀙𑀺𑀓𑀢𑁆𑀯𑀸 𑀘 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀲𑀗𑁆𑀔𑀸𑀢𑀁 𑀩𑀼𑀤𑁆𑀥𑀪𑀸𑀯𑀫𑀼𑀧𑀕𑀢𑁄, 𑀯𑀻𑀢𑀫𑀮𑀫𑀦𑀼𑀢𑁆𑀢𑀭𑀁 𑀢𑀁 𑀥𑀫𑁆𑀫𑀫𑁆𑀧𑀺 𑀯𑀦𑁆𑀤𑁂𑀢𑀺.

𑀢𑀢𑁆𑀣 𑀩𑀼𑀤𑁆𑀥𑀲𑀤𑁆𑀤𑀲𑁆𑀲 𑀢𑀸𑀯 ‘‘𑀩𑀼𑀚𑁆𑀛𑀺𑀢𑀸 𑀲𑀘𑁆𑀘𑀸𑀦𑀻𑀢𑀺 𑀩𑀼𑀤𑁆𑀥𑁄. 𑀩𑁄𑀥𑁂𑀢𑀸 𑀧𑀚𑀸𑀬𑀸𑀢𑀺 𑀩𑀼𑀤𑁆𑀥𑁄’’𑀢𑀺𑀆𑀤𑀺𑀦𑀸 𑀦𑀺𑀤𑁆𑀤𑁂𑀲𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀣 𑀯𑀸 𑀅𑀕𑁆𑀕𑀫𑀕𑁆𑀕𑀜𑀸𑀡𑀸𑀥𑀺𑀕𑀫𑁂𑀦 𑀲𑀯𑀸𑀲𑀦𑀸𑀬 𑀲𑀫𑁆𑀫𑁄𑀳𑀦𑀺𑀤𑁆𑀤𑀸𑀬 𑀅𑀘𑁆𑀘𑀦𑁆𑀢𑀯𑀺𑀕𑀫𑀦𑀢𑁄, 𑀅𑀧𑀭𑀺𑀫𑀺𑀢𑀕𑀼𑀡𑀕𑀡𑀸𑀮𑀗𑁆𑀓𑀢𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑁆𑀧𑀢𑁆𑀢𑀺𑀬𑀸 𑀯𑀺𑀓𑀲𑀺𑀢𑀪𑀸𑀯𑀢𑁄 𑀘 𑀩𑀼𑀤𑁆𑀥𑀯𑀸𑀢𑀺 𑀩𑀼𑀤𑁆𑀥𑁄 𑀚𑀸𑀕𑀭𑀡𑀯𑀺𑀓𑀲𑀦𑀢𑁆𑀣𑀯𑀲𑁂𑀦. 𑀅𑀣 𑀯𑀸 𑀓𑀲𑁆𑀲𑀘𑀺𑀧𑀺 𑀜𑁂𑀬𑁆𑀬𑀥𑀫𑁆𑀫𑀲𑁆𑀲 𑀅𑀦𑀯𑀩𑀼𑀤𑁆𑀥𑀲𑁆𑀲 𑀅𑀪𑀸𑀯𑁂𑀦 𑀜𑁂𑀬𑁆𑀬𑀯𑀺𑀲𑁂𑀲𑀲𑁆𑀲 𑀓𑀫𑁆𑀫𑀪𑀸𑀯𑀸𑀕𑀳𑀡𑀢𑁄 𑀓𑀫𑁆𑀫𑀯𑀘𑀦𑀺𑀘𑁆𑀙𑀸𑀬𑀸𑀪𑀸𑀯𑁂𑀦 𑀅𑀯𑀕𑀫𑀦𑀢𑁆𑀣𑀯𑀲𑁂𑀦 𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑁄𑀯 𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀩𑀼𑀤𑁆𑀥𑀯𑀸𑀢𑀺 𑀩𑀼𑀤𑁆𑀥𑁄𑀢𑀺𑀧𑀺 𑀯𑀢𑁆𑀢𑀩𑁆𑀩𑁄. 𑀧𑀤𑁂𑀲𑀕𑁆𑀕𑀳𑀡𑁂 𑀳𑀺 𑀅𑀲𑀢𑀺 𑀕𑀳𑁂𑀢𑀩𑁆𑀩𑀲𑁆𑀲 𑀦𑀺𑀧𑁆𑀧𑀤𑁂𑀲𑀢𑀸𑀯 𑀯𑀺𑀜𑁆𑀜𑀸𑀬𑀢𑀺 𑀬𑀣𑀸 ‘‘𑀤𑀺𑀓𑁆𑀔𑀺𑀢𑁄 𑀦 𑀤𑀤𑀸𑀢𑀻’’𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀓𑀫𑁆𑀫𑀯𑀺𑀲𑁂𑀲𑀸𑀦𑀧𑁂𑀓𑁆𑀔𑀸 𑀓𑀢𑁆𑀢𑀭𑀺 𑀏𑀯 𑀩𑀼𑀤𑁆𑀥𑀲𑀤𑁆𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸, 𑀅𑀢𑁆𑀣𑀢𑁄 𑀧𑀦 𑀧𑀸𑀭𑀫𑀺𑀢𑀸𑀧𑀭𑀺𑀪𑀸𑀯𑀺𑀢𑁄 𑀲𑀬𑀫𑁆𑀪𑀼𑀜𑀸𑀡𑁂𑀦 𑀲𑀳 𑀯𑀸𑀲𑀦𑀸𑀬 𑀯𑀺𑀳𑀢𑀯𑀺𑀤𑁆𑀥𑀲𑁆𑀢𑀦𑀺𑀭𑀯𑀲𑁂𑀲𑀓𑀺𑀮𑁂𑀲𑁄𑀫𑀳𑀸𑀓𑀭𑀼𑀡𑀸𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀤𑀺𑀅𑀧𑀭𑀺𑀫𑁂𑀬𑁆𑀬𑀕𑀼𑀡𑀕𑀡𑀸𑀥𑀸𑀭𑁄 𑀔𑀦𑁆𑀥𑀲𑀦𑁆𑀢𑀸𑀦𑁄 𑀩𑀼𑀤𑁆𑀥𑁄, 𑀬𑀣𑀸𑀳 𑁋

‘‘𑀩𑀼𑀤𑁆𑀥𑁄𑀢𑀺 𑀬𑁄 𑀲𑁄 𑀪𑀕𑀯𑀸 𑀲𑀬𑀫𑁆𑀪𑀽 𑀅𑀦𑀸𑀘𑀭𑀺𑀬𑀓𑁄 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀲𑀸𑀫𑀁 𑀲𑀘𑁆𑀘𑀸𑀦𑀺 𑀅𑀪𑀺𑀲𑀫𑁆𑀩𑀼𑀚𑁆𑀛𑀺, 𑀢𑀢𑁆𑀣 𑀘 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄, 𑀩𑀮𑁂𑀲𑀼 𑀘 𑀯𑀲𑀻𑀪𑀸𑀯’’𑀦𑁆𑀢𑀺 (𑀫𑀳𑀸𑀦𑀺. 𑁧𑁯𑁨; 𑀘𑀽𑀴𑀦𑀺. 𑁯𑁭; 𑀧𑀝𑀺. 𑀫. 𑁧𑁬𑁧).

𑀅𑀧𑀺𑀲𑀤𑁆𑀤𑁄 𑀲𑀫𑁆𑀪𑀸𑀯𑀦𑁂, 𑀢𑁂𑀦 𑀏𑀯𑀁 𑀕𑀼𑀡𑀯𑀺𑀲𑁂𑀲𑀬𑀼𑀢𑁆𑀢𑁄 𑀲𑁄𑀧𑀺 𑀦𑀸𑀫 𑀪𑀕𑀯𑀸 𑀈𑀤𑀺𑀲𑀁 𑀥𑀫𑁆𑀫𑀁 𑀪𑀸𑀯𑁂𑀢𑁆𑀯𑀸, 𑀲𑀘𑁆𑀙𑀺𑀓𑀢𑁆𑀯𑀸 𑀘 𑀩𑀼𑀤𑁆𑀥𑀪𑀸𑀯𑀫𑀼𑀧𑀕𑀢𑁄, 𑀓𑀸 𑀦𑀸𑀫 𑀓𑀣𑀸 𑀅𑀜𑁆𑀜𑁂𑀲𑀁 𑀲𑀸𑀯𑀓𑀸𑀤𑀺𑀪𑀸𑀯𑀫𑀼𑀧𑀕𑀫𑀦𑁂𑀢𑀺 𑀥𑀫𑁆𑀫𑁂 𑀲𑀫𑁆𑀪𑀸𑀯𑀦𑀁 𑀤𑀻𑀧𑁂𑀢𑀺. 𑀩𑀼𑀤𑁆𑀥𑀪𑀸𑀯𑀦𑁆𑀢𑀺 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁. 𑀬𑁂𑀦 𑀳𑀺 𑀦𑀺𑀫𑀺𑀢𑁆𑀢𑀪𑀽𑀢𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀤𑀝𑁆𑀞𑀸𑀦𑁂𑀦 𑀅𑀕𑁆𑀕𑀫𑀕𑁆𑀕𑀜𑀸𑀡𑁂𑀦, 𑀅𑀕𑁆𑀕𑀫𑀕𑁆𑀕𑀜𑀸𑀡𑀧𑀤𑀝𑁆𑀞𑀸𑀦𑁂𑀦 𑀘 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀪𑀕𑀯𑀢𑀺 ‘‘𑀩𑀼𑀤𑁆𑀥𑁄’’𑀢𑀺 𑀦𑀸𑀫𑀁, 𑀢𑀤𑀸𑀭𑀫𑁆𑀫𑀡𑀜𑁆𑀘 𑀜𑀸𑀡𑀁 𑀧𑀯𑀢𑁆𑀢𑀢𑀺, 𑀢𑀫𑁂𑀯𑀺𑀥 ‘‘𑀪𑀸𑀯𑁄’’𑀢𑀺 𑀯𑀼𑀘𑁆𑀘𑀢𑀺. 𑀪𑀯𑀦𑁆𑀢𑀺 𑀩𑀼𑀤𑁆𑀥𑀺𑀲𑀤𑁆𑀤𑀸 𑀏𑀢𑁂𑀦𑀸𑀢𑀺 𑀳𑀺 𑀪𑀸𑀯𑁄. 𑀢𑀣𑀸 𑀳𑀺 𑀯𑀤𑀦𑁆𑀢𑀺 𑁋

‘‘𑀬𑁂𑀦 𑀬𑁂𑀦 𑀦𑀺𑀫𑀺𑀢𑁆𑀢𑁂𑀦, 𑀩𑀼𑀤𑁆𑀥𑀺 𑀲𑀤𑁆𑀤𑁄 𑀘 𑀯𑀢𑁆𑀢𑀢𑁂;

𑀢𑀁𑀢𑀁𑀦𑀺𑀫𑀺𑀢𑁆𑀢𑀓𑀁 𑀪𑀸𑀯𑀧𑀘𑁆𑀘𑀬𑁂𑀳𑀺 𑀉𑀤𑀻𑀭𑀺𑀢’’𑀦𑁆𑀢𑀺.

𑀪𑀸𑀯𑁂𑀢𑁆𑀯𑀸𑀢𑀺 𑀉𑀧𑁆𑀧𑀸𑀤𑁂𑀢𑁆𑀯𑀸, 𑀯𑀟𑁆𑀠𑁂𑀢𑁆𑀯𑀸 𑀯𑀸. 𑀲𑀘𑁆𑀙𑀺𑀓𑀢𑁆𑀯𑀸𑀢𑀺 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸. 𑀘𑁂𑀯-𑀲𑀤𑁆𑀤𑁄 𑀘-𑀲𑀤𑁆𑀤𑁄 𑀘 𑀢𑀤𑀼𑀪𑀬𑀢𑁆𑀣 𑀲𑀫𑀼𑀘𑁆𑀘𑀬𑁂. 𑀢𑁂𑀦 𑀳𑀺 𑀲𑀤𑁆𑀤𑀤𑁆𑀯𑀬𑁂𑀦 𑀦 𑀓𑁂𑀯𑀮𑀁 𑀪𑀕𑀯𑀸 𑀥𑀫𑁆𑀫𑀲𑁆𑀲 𑀪𑀸𑀯𑀦𑀸𑀫𑀢𑁆𑀢𑁂𑀦 𑀩𑀼𑀤𑁆𑀥𑀪𑀸𑀯𑀫𑀼𑀧𑀕𑀢𑁄, 𑀦𑀸𑀧𑀺 𑀲𑀘𑁆𑀙𑀺𑀓𑀺𑀭𑀺𑀬𑀸𑀫𑀢𑁆𑀢𑁂𑀦, 𑀅𑀣 𑀔𑁄 𑀢𑀤𑀼𑀪𑀬𑁂𑀦𑁂𑀯𑀸𑀢𑀺 𑀲𑀫𑀼𑀘𑁆𑀘𑀺𑀦𑁄𑀢𑀺. 𑀉𑀧𑀕𑀢𑁄𑀢𑀺 𑀧𑀢𑁆𑀢𑁄, 𑀅𑀥𑀺𑀕𑀢𑁄𑀢𑀺 𑀅𑀢𑁆𑀣𑁄. 𑀏𑀢𑀲𑁆𑀲 ‘‘𑀩𑀼𑀤𑁆𑀥𑀪𑀸𑀯’’𑀦𑁆𑀢𑀺 𑀧𑀤𑁂𑀦 𑀲𑀫𑁆𑀩𑀦𑁆𑀥𑁄. 𑀯𑀻𑀢𑀫𑀮𑀦𑁆𑀢𑀺 𑀏𑀢𑁆𑀣 𑀯𑀺𑀭𑀳𑀯𑀲𑁂𑀦 𑀏𑀢𑀺 𑀧𑀯𑀢𑁆𑀢𑀢𑀻𑀢𑀺 𑀯𑀻𑀢𑁄, 𑀫𑀮𑀢𑁄 𑀯𑀻𑀢𑁄, 𑀯𑀻𑀢𑀁 𑀯𑀸 𑀫𑀮𑀁 𑀬𑀲𑁆𑀲𑀸𑀢𑀺 𑀯𑀻𑀢𑀫𑀮𑁄, 𑀢𑀁 𑀯𑀻𑀢𑀫𑀮𑀁. ‘‘𑀕𑀢𑀫𑀮’’𑀦𑁆𑀢𑀺𑀧𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀏𑀯𑀁 𑀲𑀢𑀺 𑀲𑀉𑀧𑀲𑀕𑁆𑀕𑁄 𑀯𑀺𑀬 𑀅𑀦𑀼𑀧𑀲𑀕𑁆𑀕𑁄𑀧𑀺 𑀕𑀢𑀲𑀤𑁆𑀤𑁄 𑀯𑀺𑀭𑀳𑀢𑁆𑀣𑀯𑀸𑀘𑀓𑁄 𑀯𑁂𑀤𑀺𑀢𑀩𑁆𑀩𑁄 𑀥𑀸𑀢𑀽𑀦𑀫𑀦𑁂𑀓𑀢𑁆𑀣𑀢𑁆𑀢𑀸. 𑀕𑀘𑁆𑀙𑀢𑀺 𑀅𑀧𑀕𑀘𑁆𑀙𑀢𑀻𑀢𑀺 𑀳𑀺 𑀕𑀢𑁄, 𑀥𑀫𑁆𑀫𑁄. 𑀕𑀢𑀁 𑀯𑀸 𑀫𑀮𑀁, 𑀧𑀼𑀭𑀺𑀫𑀦𑀬𑁂𑀦 𑀲𑀫𑀸𑀲𑁄. 𑀅𑀦𑀼𑀢𑁆𑀢𑀭𑀦𑁆𑀢𑀺 𑀉𑀢𑁆𑀢𑀭𑀯𑀺𑀭𑀳𑀺𑀢𑀁. 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀫𑀸𑀦𑁂 𑀅𑀧𑀸𑀬𑀢𑁄, 𑀲𑀁𑀲𑀸𑀭𑀢𑁄 𑀘 𑀅𑀧𑀢𑀫𑀸𑀦𑁂 𑀓𑀢𑁆𑀯𑀸 𑀥𑀸𑀭𑁂𑀢𑀻𑀢𑀺 𑀥𑀫𑁆𑀫𑁄, 𑀦𑀯𑀯𑀺𑀥𑁄 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄. 𑀢𑀧𑁆𑀧𑀓𑀸𑀲𑀦𑀢𑁆𑀢𑀸, 𑀲𑀘𑁆𑀙𑀺𑀓𑀺𑀭𑀺𑀬𑀸𑀲𑀫𑁆𑀫𑀲𑀦𑀧𑀭𑀺𑀬𑀸𑀬𑀲𑁆𑀲 𑀘 𑀮𑀩𑁆𑀪𑀫𑀸𑀦𑀢𑁆𑀢𑀸 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄𑀧𑀺 𑀇𑀥 𑀲𑀗𑁆𑀕𑀳𑀺𑀢𑁄. 𑀢𑀣𑀸 𑀳𑀺 ‘‘𑀅𑀪𑀺𑀥𑀫𑁆𑀫𑀦𑀬𑀲𑀫𑀼𑀤𑁆𑀤𑀁 𑀅𑀥𑀺𑀕𑀘𑁆𑀙𑀺, 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀲𑀫𑁆𑀫𑀲𑀻’’𑀢𑀺 𑀘 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁, 𑀢𑀣𑀸 ‘‘𑀬𑀁 𑀥𑀫𑁆𑀫𑀁 𑀪𑀸𑀯𑁂𑀢𑁆𑀯𑀸 𑀲𑀘𑁆𑀙𑀺𑀓𑀢𑁆𑀯𑀸’’𑀢𑀺 𑀘 𑀯𑀼𑀢𑁆𑀢𑀢𑁆𑀢𑀸 𑀪𑀸𑀯𑀦𑀸𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑁄𑀕𑁆𑀬𑀢𑀸𑀬 𑀩𑀼𑀤𑁆𑀥𑀓𑀭𑀥𑀫𑁆𑀫𑀪𑀽𑀢𑀸𑀳𑀺 𑀧𑀸𑀭𑀫𑀺𑀢𑀸𑀳𑀺 𑀲𑀳 𑀧𑀼𑀩𑁆𑀩𑀪𑀸𑀕𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀤𑀬𑁄𑀧𑀺 𑀇𑀥 𑀲𑀗𑁆𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀸𑀧𑀺 𑀳𑀺 𑀯𑀺𑀕𑀢𑀧𑀝𑀺𑀧𑀓𑁆𑀔𑀢𑀸𑀬 𑀯𑀻𑀢𑀫𑀮𑀸, 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑀸𑀬 𑀅𑀦𑀼𑀢𑁆𑀢𑀭𑀸 𑀘. 𑀓𑀣𑀁 𑀧𑀦 𑀢𑀸 𑀪𑀸𑀯𑁂𑀢𑁆𑀯𑀸, 𑀲𑀘𑁆𑀙𑀺𑀓𑀢𑁆𑀯𑀸 𑀘 𑀪𑀕𑀯𑀸 𑀩𑀼𑀤𑁆𑀥𑀪𑀸𑀯𑀫𑀼𑀧𑀕𑀢𑁄𑀢𑀺? 𑀯𑀼𑀘𑁆𑀘𑀢𑁂 𑁋 𑀲𑀢𑁆𑀢𑀸𑀦𑀜𑁆𑀳𑀺 𑀲𑀁𑀲𑀸𑀭𑀯𑀝𑁆𑀝𑀤𑀼𑀓𑁆𑀔𑀦𑀺𑀲𑁆𑀲𑀭𑀡𑀸𑀬 [𑀦𑀺𑀲𑁆𑀲𑀭𑀡𑀢𑁆𑀣𑀸𑀬 (𑀧𑀡𑁆𑀡𑀸𑀲 𑀝𑀻.) 𑀦𑀺𑀲𑁆𑀲𑀭𑀡𑁂 (𑀓𑀢𑁆𑀣𑀘𑀺)] 𑀓𑀢𑀫𑀳𑀸𑀪𑀺𑀦𑀻𑀳𑀸𑀭𑁄 𑀫𑀳𑀸𑀓𑀭𑀼𑀡𑀸𑀥𑀺𑀯𑀸𑀲𑀦𑀧𑁂𑀲𑀮𑀚𑁆𑀛𑀸𑀲𑀬𑁄 𑀧𑀜𑁆𑀜𑀸𑀯𑀺𑀲𑁂𑀲𑀧𑀭𑀺𑀬𑁄𑀤𑀸𑀢𑀦𑀺𑀫𑁆𑀫𑀮𑀸𑀦𑀁 𑀤𑀸𑀦𑀤𑀫𑀲𑀜𑁆𑀜𑀫𑀸𑀤𑀻𑀦𑀁 𑀉𑀢𑁆𑀢𑀫𑀥𑀫𑁆𑀫𑀸𑀦𑀁 𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀲𑀓𑁆𑀓𑀘𑁆𑀘𑀁 𑀦𑀺𑀭𑀦𑁆𑀢𑀭𑀁 𑀦𑀺𑀭𑀯𑀲𑁂𑀲𑀁 𑀪𑀸𑀯𑀦𑀸𑀲𑀘𑁆𑀙𑀺𑀓𑀺𑀭𑀺𑀬𑀸𑀳𑀺 𑀓𑀫𑁆𑀫𑀸𑀤𑀻𑀲𑀼 𑀅𑀥𑀺𑀕𑀢𑀯𑀲𑀻𑀪𑀸𑀯𑁄 𑀅𑀘𑁆𑀙𑀭𑀺𑀬𑀸𑀘𑀺𑀦𑁆𑀢𑁂𑀬𑁆𑀬𑀫𑀳𑀸𑀦𑀼𑀪𑀸𑀯𑁄 𑀅𑀥𑀺𑀲𑀻𑀮𑀸𑀥𑀺𑀘𑀺𑀢𑁆𑀢𑀸𑀦𑀁 𑀧𑀭𑀫𑀼𑀓𑁆𑀓𑀁𑀲𑀧𑀸𑀭𑀫𑀺𑀧𑁆𑀧𑀢𑁆𑀢𑁄 𑀪𑀕𑀯𑀸 𑀧𑀘𑁆𑀘𑀬𑀸𑀓𑀸𑀭𑁂 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀫𑀼𑀔𑁂𑀦 𑀫𑀳𑀸𑀯𑀚𑀺𑀭𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀲𑀗𑁆𑀔𑀸𑀢𑀁 𑀩𑀼𑀤𑁆𑀥𑀪𑀸𑀯𑀫𑀼𑀧𑀕𑀢𑁄𑀢𑀺.

𑀇𑀫𑀸𑀬 𑀧𑀦 𑀕𑀸𑀣𑀸𑀬 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀲𑀫𑁆𑀧𑀤𑀸𑀤𑀻𑀳𑀺 𑀅𑀦𑁂𑀓𑁂𑀳𑀺 𑀕𑀼𑀡𑁂𑀳𑀺 𑀬𑀣𑀸𑀭𑀳𑀁 𑀲𑀤𑁆𑀥𑀫𑁆𑀫𑀁 𑀣𑁄𑀫𑁂𑀢𑀺. 𑀓𑀣𑀁? 𑀏𑀢𑁆𑀣 𑀳𑀺 ‘‘𑀪𑀸𑀯𑁂𑀢𑁆𑀯𑀸’’𑀢𑀺 𑀏𑀢𑁂𑀦 𑀯𑀺𑀚𑁆𑀚𑀸𑀲𑀫𑁆𑀧𑀤𑀸𑀬 𑀣𑁄𑀫𑁂𑀢𑀺, ‘‘𑀲𑀘𑁆𑀙𑀺𑀓𑀢𑁆𑀯𑀸’’𑀢𑀺 𑀏𑀢𑁂𑀦 𑀯𑀺𑀫𑀼𑀢𑁆𑀢𑀺𑀲𑀫𑁆𑀧𑀤𑀸𑀬. 𑀢𑀣𑀸 𑀧𑀞𑀫𑁂𑀦 𑀛𑀸𑀦𑀲𑀫𑁆𑀧𑀤𑀸𑀬, 𑀤𑀼𑀢𑀺𑀬𑁂𑀦 𑀯𑀺𑀫𑁄𑀓𑁆𑀔𑀲𑀫𑁆𑀧𑀤𑀸𑀬. 𑀧𑀞𑀫𑁂𑀦 𑀯𑀸 𑀲𑀫𑀸𑀥𑀺𑀲𑀫𑁆𑀧𑀤𑀸𑀬, 𑀤𑀼𑀢𑀺𑀬𑁂𑀦 𑀲𑀫𑀸𑀧𑀢𑁆𑀢𑀺𑀲𑀫𑁆𑀧𑀤𑀸𑀬. 𑀅𑀣 𑀯𑀸 𑀧𑀞𑀫𑁂𑀦 𑀔𑀬𑀜𑀸𑀡𑀪𑀸𑀯𑁂𑀦, 𑀤𑀼𑀢𑀺𑀬𑁂𑀦 𑀅𑀦𑀼𑀧𑁆𑀧𑀸𑀤𑀜𑀸𑀡𑀪𑀸𑀯𑁂𑀦. 𑀧𑀞𑀫𑁂𑀦 𑀯𑀸 𑀯𑀺𑀚𑁆𑀚𑀽𑀧𑀫𑀢𑀸𑀬, 𑀤𑀼𑀢𑀺𑀬𑁂𑀦 𑀯𑀚𑀺𑀭𑀽𑀧𑀫𑀢𑀸𑀬. 𑀧𑀞𑀫𑁂𑀦 𑀯𑀸 𑀯𑀺𑀭𑀸𑀕𑀲𑀫𑁆𑀧𑀢𑁆𑀢𑀺𑀬𑀸, 𑀤𑀼𑀢𑀺𑀬𑁂𑀦 𑀦𑀺𑀭𑁄𑀥𑀲𑀫𑁆𑀧𑀢𑁆𑀢𑀺𑀬𑀸. 𑀢𑀣𑀸 𑀧𑀞𑀫𑁂𑀦 𑀦𑀺𑀬𑁆𑀬𑀸𑀦𑀪𑀸𑀯𑁂𑀦, 𑀤𑀼𑀢𑀺𑀬𑁂𑀦 𑀦𑀺𑀲𑁆𑀲𑀭𑀡𑀪𑀸𑀯𑁂𑀦. 𑀧𑀞𑀫𑁂𑀦 𑀯𑀸 𑀳𑁂𑀢𑀼𑀪𑀸𑀯𑁂𑀦, 𑀤𑀼𑀢𑀺𑀬𑁂𑀦 𑀅𑀲𑀗𑁆𑀔𑀢𑀪𑀸𑀯𑁂𑀦. 𑀧𑀞𑀫𑁂𑀦 𑀯𑀸 𑀤𑀲𑁆𑀲𑀦𑀪𑀸𑀯𑁂𑀦, 𑀤𑀼𑀢𑀺𑀬𑁂𑀦 𑀯𑀺𑀯𑁂𑀓𑀪𑀸𑀯𑁂𑀦. 𑀧𑀞𑀫𑁂𑀦 𑀯𑀸 𑀅𑀥𑀺𑀧𑀢𑀺𑀪𑀸𑀯𑁂𑀦, 𑀤𑀼𑀢𑀺𑀬𑁂𑀦 𑀅𑀫𑀢𑀪𑀸𑀯𑁂𑀦 𑀥𑀫𑁆𑀫𑀁 𑀣𑁄𑀫𑁂𑀢𑀺. 𑀅𑀣 𑀯𑀸 ‘‘𑀬𑀁 𑀥𑀫𑁆𑀫𑀁 𑀪𑀸𑀯𑁂𑀢𑁆𑀯𑀸 𑀩𑀼𑀤𑁆𑀥𑀪𑀸𑀯𑀁 𑀉𑀧𑀕𑀢𑁄’’𑀢𑀺 𑀏𑀢𑁂𑀦 𑀲𑁆𑀯𑀸𑀓𑁆𑀔𑀸𑀢𑀢𑀸𑀬 𑀥𑀫𑁆𑀫𑀁 𑀣𑁄𑀫𑁂𑀢𑀺, ‘‘𑀲𑀘𑁆𑀙𑀺𑀓𑀢𑁆𑀯𑀸’’𑀢𑀺 𑀏𑀢𑁂𑀦 𑀲𑀦𑁆𑀤𑀺𑀝𑁆𑀞𑀺𑀓𑀢𑀸𑀬. 𑀢𑀣𑀸 𑀧𑀞𑀫𑁂𑀦 𑀅𑀓𑀸𑀮𑀺𑀓𑀢𑀸𑀬, 𑀤𑀼𑀢𑀺𑀬𑁂𑀦 𑀏𑀳𑀺𑀧𑀲𑁆𑀲𑀺𑀓𑀢𑀸𑀬. 𑀧𑀞𑀫𑁂𑀦 𑀯𑀸 𑀑𑀧𑀦𑁂𑀬𑁆𑀬𑀺𑀓𑀢𑀸𑀬, 𑀤𑀼𑀢𑀺𑀬𑁂𑀦 𑀧𑀘𑁆𑀘𑀢𑁆𑀢𑀁𑀯𑁂𑀤𑀺𑀢𑀩𑁆𑀩𑀢𑀸𑀬. 𑀧𑀞𑀫𑁂𑀦 𑀯𑀸 𑀲𑀳 𑀧𑀼𑀩𑁆𑀩𑀪𑀸𑀕𑀲𑀻𑀮𑀸𑀤𑀻𑀳𑀺 𑀲𑁂𑀓𑁆𑀔𑁂𑀳𑀺 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀳𑀺, 𑀤𑀼𑀢𑀺𑀬𑁂𑀦 𑀲𑀳 𑀅𑀲𑀗𑁆𑀔𑀢𑀥𑀸𑀢𑀼𑀬𑀸 𑀅𑀲𑁂𑀓𑁆𑀔𑁂𑀳𑀺 𑀥𑀫𑁆𑀫𑀁 𑀣𑁄𑀫𑁂𑀢𑀺.

‘‘𑀯𑀻𑀢𑀫𑀮’’𑀦𑁆𑀢𑀺 𑀇𑀫𑀺𑀦𑀸 𑀧𑀦 𑀲𑀁𑀓𑀺𑀮𑁂𑀲𑀸𑀪𑀸𑀯𑀤𑀻𑀧𑀦𑁂𑀦 𑀯𑀺𑀲𑀼𑀤𑁆𑀥𑀢𑀸𑀬 𑀥𑀫𑁆𑀫𑀁 𑀣𑁄𑀫𑁂𑀢𑀺, ‘‘𑀅𑀦𑀼𑀢𑁆𑀢𑀭’’𑀦𑁆𑀢𑀺 𑀏𑀢𑁂𑀦 𑀅𑀜𑁆𑀜𑀲𑁆𑀲 𑀯𑀺𑀲𑀺𑀝𑁆𑀞𑀲𑁆𑀲 𑀅𑀪𑀸𑀯𑀤𑀻𑀧𑀦𑁂𑀦 𑀧𑀭𑀺𑀧𑀼𑀡𑁆𑀡𑀢𑀸𑀬. 𑀧𑀞𑀫𑁂𑀦 𑀯𑀸 𑀧𑀳𑀸𑀦𑀲𑀫𑁆𑀧𑀤𑀸𑀬, 𑀤𑀼𑀢𑀺𑀬𑁂𑀦 𑀲𑀪𑀸𑀯𑀲𑀫𑁆𑀧𑀤𑀸𑀬. 𑀧𑀞𑀫𑁂𑀦 𑀯𑀸 𑀪𑀸𑀯𑀦𑀸𑀨𑀮𑀬𑁄𑀕𑁆𑀬𑀢𑀸𑀬. 𑀪𑀸𑀯𑀦𑀸𑀕𑀼𑀡𑁂𑀦 𑀳𑀺 𑀲𑁄 𑀲𑀁𑀓𑀺𑀮𑁂𑀲𑀫𑀮𑀲𑀫𑀼𑀕𑁆𑀖𑀸𑀢𑀓𑁄, 𑀢𑀲𑁆𑀫𑀸𑀦𑁂𑀦 𑀪𑀸𑀯𑀦𑀸𑀓𑀺𑀭𑀺𑀬𑀸𑀬 𑀨𑀮𑀫𑀸𑀳. 𑀤𑀼𑀢𑀺𑀬𑁂𑀦 𑀲𑀘𑁆𑀙𑀺𑀓𑀺𑀭𑀺𑀬𑀸𑀨𑀮𑀬𑁄𑀕𑁆𑀬𑀢𑀸𑀬. 𑀢𑀤𑀼𑀢𑁆𑀢𑀭𑀺𑀓𑀭𑀡𑀻𑀬𑀸𑀪𑀸𑀯𑀢𑁄 𑀳𑀺 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑀸𑀬 𑀅𑀦𑀼𑀢𑁆𑀢𑀭𑀪𑀸𑀯𑁄 𑀲𑀘𑁆𑀙𑀺𑀓𑀺𑀭𑀺𑀬𑀸𑀦𑀺𑀩𑁆𑀩𑀢𑁆𑀢𑀺𑀢𑁄, 𑀢𑀲𑁆𑀫𑀸𑀦𑁂𑀦 𑀲𑀘𑁆𑀙𑀺𑀓𑀺𑀭𑀺𑀬𑀸𑀨𑀮𑀫𑀸𑀳𑀸𑀢𑀺.

𑀏𑀯𑀁 𑀲𑀗𑁆𑀔𑁂𑀧𑁂𑀦𑁂𑀯 𑀲𑀩𑁆𑀩𑀲𑀤𑁆𑀥𑀫𑁆𑀫𑀕𑀼𑀡𑁂𑀳𑀺 𑀲𑀤𑁆𑀥𑀫𑁆𑀫𑀲𑁆𑀲𑀸𑀧𑀺 𑀣𑁄𑀫𑀦𑀸𑀧𑀼𑀩𑁆𑀩𑀗𑁆𑀕𑀫𑀁 𑀧𑀡𑀸𑀫𑀁 𑀓𑀢𑁆𑀯𑀸 𑀇𑀤𑀸𑀦𑀺 𑀅𑀭𑀺𑀬𑀲𑀗𑁆𑀖𑀲𑁆𑀲𑀸𑀧𑀺 𑀣𑁄𑀫𑀦𑀸𑀧𑀼𑀩𑁆𑀩𑀗𑁆𑀕𑀫𑀁 𑀧𑀡𑀸𑀫𑀁 𑀓𑀭𑁄𑀦𑁆𑀢𑁄 ‘‘𑀲𑀼𑀕𑀢𑀲𑁆𑀲 𑀑𑀭𑀲𑀸𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀼𑀕𑀢𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑀦𑀺𑀤𑁆𑀤𑁂𑀲𑁄, ‘‘𑀧𑀼𑀢𑁆𑀢𑀸𑀦’’𑀦𑁆𑀢𑀺 𑀏𑀢𑁂𑀦 𑀲𑀫𑁆𑀩𑀚𑁆𑀛𑀺𑀢𑀩𑁆𑀩𑁄. 𑀉𑀭𑀲𑀺 𑀪𑀯𑀸, 𑀚𑀸𑀢𑀸, 𑀲𑀁𑀯𑀼𑀤𑁆𑀥𑀸 𑀯𑀸 𑀑𑀭𑀲𑀸, 𑀅𑀢𑁆𑀢𑀚𑁄 𑀔𑁂𑀢𑁆𑀢𑀚𑁄 𑀅𑀦𑁆𑀢𑁂𑀯𑀸𑀲𑀺𑀓𑁄 𑀤𑀺𑀦𑁆𑀦𑀓𑁄𑀢𑀺 𑀘𑀢𑀼𑀩𑁆𑀩𑀺𑀥𑁂𑀲𑀼 𑀧𑀼𑀢𑁆𑀢𑁂𑀲𑀼 𑀅𑀢𑁆𑀢𑀚𑀸, 𑀢𑀁𑀲𑀭𑀺𑀓𑁆𑀔𑀢𑀸𑀬 𑀧𑀦 𑀅𑀭𑀺𑀬𑀧𑀼𑀕𑁆𑀕𑀮𑀸 ‘‘𑀑𑀭𑀲𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀬𑀣𑀸 𑀳𑀺 𑀫𑀦𑀼𑀲𑁆𑀲𑀸𑀦𑀁 𑀑𑀭𑀲𑀧𑀼𑀢𑁆𑀢𑀸 𑀅𑀢𑁆𑀢𑀚𑀸𑀢𑀢𑀸𑀬 𑀧𑀺𑀢𑀼𑀲𑀦𑁆𑀢𑀓𑀲𑁆𑀲 𑀤𑀸𑀬𑀚𑁆𑀚𑀲𑁆𑀲 𑀯𑀺𑀲𑁂𑀲𑀪𑀸𑀕𑀺𑀦𑁄 𑀳𑁄𑀦𑁆𑀢𑀺, 𑀏𑀯𑀫𑁂𑀢𑁂𑀧𑀺 𑀲𑀤𑁆𑀥𑀫𑁆𑀫𑀲𑀯𑀦𑀦𑁆𑀢𑁂 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑀸𑀢𑀢𑀸𑀬 𑀪𑀕𑀯𑀢𑁄 𑀲𑀦𑁆𑀢𑀓𑀲𑁆𑀲 𑀯𑀺𑀫𑀼𑀢𑁆𑀢𑀺𑀲𑀼𑀔𑀲𑁆𑀲 𑀥𑀫𑁆𑀫𑀭𑀢𑀦𑀲𑁆𑀲 𑀘 𑀤𑀸𑀬𑀚𑁆𑀚𑀲𑁆𑀲 𑀯𑀺𑀲𑁂𑀲𑀪𑀸𑀕𑀺𑀦𑁄𑀢𑀺. 𑀅𑀣 𑀯𑀸 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀸𑀦𑀼𑀪𑀸𑀯𑁂𑀦 𑀅𑀭𑀺𑀬𑀪𑀽𑀫𑀺𑀁 𑀑𑀓𑁆𑀓𑀫𑀫𑀸𑀦𑀸, 𑀑𑀓𑁆𑀓𑀦𑁆𑀢𑀸 𑀘 𑀅𑀭𑀺𑀬𑀲𑀸𑀯𑀓𑀸 𑀪𑀕𑀯𑀢𑁄 𑀉𑀭𑁂 𑀯𑀸𑀬𑀸𑀫𑀚𑀦𑀺𑀢𑀸𑀪𑀺𑀚𑀸𑀢𑀢𑀸𑀬 𑀲𑀤𑀺𑀲𑀓𑀧𑁆𑀧𑀦𑀫𑀦𑁆𑀢𑀭𑁂𑀦 𑀦𑀺𑀧𑁆𑀧𑀭𑀺𑀬𑀸𑀬𑁂𑀦𑁂𑀯 ‘‘𑀑𑀭𑀲𑀸’’𑀢𑀺 𑀯𑀢𑁆𑀢𑀩𑁆𑀩𑀢𑀫𑀭𑀳𑀦𑁆𑀢𑀺. 𑀢𑀣𑀸 𑀳𑀺 𑀢𑁂 𑀪𑀕𑀯𑀢𑀸 𑀆𑀲𑀬𑀸𑀦𑀼𑀲𑀬𑀘𑀭𑀺𑀬𑀸𑀥𑀺𑀫𑀼𑀢𑁆𑀢𑀺𑀆𑀤𑀺𑀑𑀮𑁄𑀓𑀦𑁂𑀦, 𑀯𑀚𑁆𑀚𑀸𑀦𑀼𑀘𑀺𑀦𑁆𑀢𑀦𑁂𑀦 𑀘 𑀳𑀤𑀬𑁂 𑀓𑀢𑁆𑀯𑀸 𑀯𑀚𑁆𑀚𑀢𑁄 𑀦𑀺𑀯𑀸𑀭𑁂𑀢𑁆𑀯𑀸 𑀅𑀦𑀯𑀚𑁆𑀚𑁂 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑁂𑀦 𑀲𑀻𑀮𑀸𑀤𑀺𑀥𑀫𑁆𑀫𑀲𑀭𑀻𑀭𑀧𑁄𑀲𑀦𑁂𑀦 𑀲𑀁𑀯𑀟𑁆𑀠𑀸𑀧𑀺𑀢𑀸. 𑀬𑀣𑀸𑀳 𑀪𑀕𑀯𑀸 𑀇𑀢𑀺𑀯𑀼𑀢𑁆𑀢𑀓𑁂 ‘‘𑀅𑀳𑀫𑀲𑁆𑀫𑀺 𑀪𑀺𑀓𑁆𑀔𑀯𑁂 𑀩𑁆𑀭𑀸𑀳𑁆𑀫𑀡𑁄…𑀧𑁂… 𑀢𑀲𑁆𑀲 𑀫𑁂 𑀢𑀼𑀫𑁆𑀳𑁂 𑀧𑀼𑀢𑁆𑀢𑀸 𑀑𑀭𑀲𑀸 𑀫𑀼𑀔𑀢𑁄 𑀚𑀸𑀢𑀸’’𑀢𑀺𑀆𑀤𑀺 (𑀇𑀢𑀺𑀯𑀼. 𑁧𑁦𑁦). 𑀦𑀦𑀼 𑀲𑀸𑀯𑀓𑀤𑁂𑀲𑀺𑀢𑀸𑀧𑀺 𑀤𑁂𑀲𑀦𑀸 𑀅𑀭𑀺𑀬𑀪𑀸𑀯𑀸𑀯𑀳𑀸𑀢𑀺? 𑀲𑀘𑁆𑀘𑀁, 𑀲𑀸 𑀧𑀦 𑀢𑀫𑁆𑀫𑀽𑀮𑀺𑀓𑀢𑁆𑀢𑀸, 𑀮𑀓𑁆𑀔𑀡𑀸𑀤𑀺𑀯𑀺𑀲𑁂𑀲𑀸𑀪𑀸𑀯𑀢𑁄 𑀘 ‘‘𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀸’’ 𑀇𑀘𑁆𑀘𑁂𑀯 𑀲𑀗𑁆𑀔𑁆𑀬𑀁 𑀕𑀢𑀸, 𑀢𑀲𑁆𑀫𑀸 𑀪𑀕𑀯𑀢𑁄 𑀑𑀭𑀲𑀧𑀼𑀢𑁆𑀢𑀪𑀸𑀯𑁄𑀬𑁂𑀯 𑀢𑁂𑀲𑀁 𑀯𑀢𑁆𑀢𑀩𑁆𑀩𑁄𑀢𑀺, 𑀏𑀢𑁂𑀦 𑀘𑀢𑀼𑀩𑁆𑀩𑀺𑀥𑁂𑀲𑀼 𑀧𑀼𑀢𑁆𑀢𑁂𑀲𑀼 𑀅𑀭𑀺𑀬𑀲𑀗𑁆𑀖𑀲𑁆𑀲 𑀅𑀢𑁆𑀢𑀚𑀧𑀼𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀅𑀢𑁆𑀢𑀦𑁄 𑀓𑀼𑀮𑀁 𑀧𑀼𑀦𑁂𑀦𑁆𑀢𑀺 𑀲𑁄𑀥𑁂𑀦𑁆𑀢𑀺, 𑀫𑀸𑀢𑀸𑀧𑀺𑀢𑀽𑀦𑀁 𑀯𑀸 𑀳𑀤𑀬𑀁 𑀧𑀽𑀭𑁂𑀦𑁆𑀢𑀻𑀢𑀺 𑀧𑀼𑀢𑁆𑀢𑀸, 𑀅𑀢𑁆𑀢𑀚𑀸𑀤𑀬𑁄. 𑀅𑀭𑀺𑀬𑀸 𑀧𑀦 𑀥𑀫𑁆𑀫𑀢𑀦𑁆𑀢𑀺𑀯𑀺𑀲𑁄𑀥𑀦𑁂𑀦, 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀢𑁆𑀢𑀺𑀬𑀸 𑀘𑀺𑀢𑁆𑀢𑀸𑀭𑀸𑀥𑀦𑁂𑀦 𑀘 𑀢𑀧𑁆𑀧𑀝𑀺𑀪𑀸𑀕𑀢𑀸𑀬 𑀪𑀕𑀯𑀢𑁄 𑀧𑀼𑀢𑁆𑀢𑀸 𑀦𑀸𑀫, 𑀢𑁂𑀲𑀁. 𑀢𑀲𑁆𑀲 ‘‘𑀲𑀫𑀽𑀳’’𑀦𑁆𑀢𑀺 𑀧𑀤𑁂𑀦 𑀲𑀫𑁆𑀩𑀦𑁆𑀥𑁄.

𑀲𑀁𑀓𑀺𑀮𑁂𑀲𑀦𑀺𑀫𑀺𑀢𑁆𑀢𑀁 𑀳𑀼𑀢𑁆𑀯𑀸 𑀕𑀼𑀡𑀁 𑀫𑀸𑀭𑁂𑀢𑀺 𑀯𑀺𑀩𑀸𑀥𑀢𑀻𑀢𑀺 𑀫𑀸𑀭𑁄, 𑀤𑁂𑀯𑀧𑀼𑀢𑁆𑀢𑀫𑀸𑀭𑁄. 𑀲𑀺𑀦𑀸𑀢𑀺 𑀧𑀭𑁂 𑀩𑀦𑁆𑀥𑀢𑀺 𑀏𑀢𑀸𑀬𑀸𑀢𑀺 𑀲𑁂𑀦𑀸, 𑀫𑀸𑀭𑀲𑁆𑀲 𑀲𑁂𑀦𑀸 𑀢𑀣𑀸, 𑀫𑀸𑀭𑀜𑁆𑀘 𑀫𑀸𑀭𑀲𑁂𑀦𑀜𑁆𑀘 𑀫𑀣𑁂𑀦𑁆𑀢𑀺 𑀯𑀺𑀮𑁄𑀣𑁂𑀦𑁆𑀢𑀻𑀢𑀺 𑀫𑀸𑀭𑀲𑁂𑀦𑀫𑀣𑀦𑀸, 𑀢𑁂𑀲𑀁. ‘‘𑀫𑀸𑀭𑀫𑀸𑀭𑀲𑁂𑀦𑀫𑀣𑀦𑀸𑀦’’𑀦𑁆𑀢𑀺 𑀳𑀺 𑀯𑀢𑁆𑀢𑀩𑁆𑀩𑁂𑀧𑀺 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑀯𑀲𑁂𑀦 𑀏𑀯𑀁 𑀯𑀼𑀢𑁆𑀢𑀁. 𑀫𑀸𑀭𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑁂𑀦 𑀯𑀸 𑀲𑁂𑀦𑀸𑀲𑀤𑁆𑀤𑁂𑀦 𑀫𑀸𑀭𑀲𑁂𑀦𑀸 𑀕𑀳𑁂𑀢𑀩𑁆𑀩𑀸, 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀘𑁂𑀢𑁆𑀣 𑀭𑀲𑁆𑀲𑁄. ‘‘𑀫𑀸𑀭𑀲𑁂𑀦𑀫𑀤𑁆𑀤𑀦𑀸𑀦’’𑀦𑁆𑀢𑀺𑀧𑀺 𑀓𑀢𑁆𑀣𑀘𑀺 𑀧𑀸𑀞𑁄, 𑀲𑁄 𑀅𑀬𑀼𑀢𑁆𑀢𑁄𑀯 𑀅𑀭𑀺𑀬𑀸𑀚𑀸𑀢𑀺𑀓𑀢𑁆𑀢𑀸 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬. 𑀦𑀦𑀼 𑀘 𑀅𑀭𑀺𑀬𑀲𑀸𑀯𑀓𑀸𑀦𑀁 𑀫𑀕𑁆𑀕𑀸𑀥𑀺𑀕𑀫𑀲𑀫𑀬𑁂 𑀪𑀕𑀯𑀢𑁄 𑀯𑀺𑀬 𑀢𑀤𑀦𑁆𑀢𑀭𑀸𑀬𑀓𑀭𑀡𑀢𑁆𑀣𑀁 𑀤𑁂𑀯𑀧𑀼𑀢𑁆𑀢𑀫𑀸𑀭𑁄 𑀯𑀸 𑀫𑀸𑀭𑀲𑁂𑀦𑀸 𑀯𑀸 𑀦 𑀅𑀧𑀲𑀸𑀤𑁂𑀢𑀺, 𑀅𑀣 𑀓𑀲𑁆𑀫𑀸 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺? 𑀅𑀧𑀲𑀸𑀤𑁂𑀢𑀩𑁆𑀩𑀪𑀸𑀯𑀓𑀸𑀭𑀡𑀲𑁆𑀲 𑀯𑀺𑀫𑀣𑀺𑀢𑀢𑁆𑀢𑀸. 𑀢𑁂𑀲𑀜𑁆𑀳𑀺 𑀅𑀧𑀲𑀸𑀤𑁂𑀢𑀩𑁆𑀩𑀢𑀸𑀬 𑀓𑀸𑀭𑀡𑁂 𑀲𑀁𑀓𑀺𑀮𑁂𑀲𑁂 𑀯𑀺𑀫𑀣𑀺𑀢𑁂 𑀢𑁂𑀧𑀺 𑀯𑀺𑀫𑀣𑀺𑀢𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺. 𑀅𑀣 𑀯𑀸 𑀔𑀦𑁆𑀥𑀸𑀪𑀺𑀲𑀗𑁆𑀔𑀸𑀭𑀫𑀸𑀭𑀸𑀦𑀁 𑀯𑀺𑀬 𑀤𑁂𑀯𑀧𑀼𑀢𑁆𑀢𑀫𑀸𑀭𑀲𑁆𑀲𑀸𑀧𑀺 𑀕𑀼𑀡𑀫𑀸𑀭𑀡𑁂 𑀲𑀳𑀸𑀬𑀪𑀸𑀯𑀽𑀧𑀕𑀫𑀦𑀢𑁄 𑀓𑀺𑀮𑁂𑀲𑀩𑀮𑀓𑀸𑀬𑁄 𑀇𑀥 ‘‘𑀫𑀸𑀭𑀲𑁂𑀦𑀸’’𑀢𑀺 𑀯𑀼𑀘𑁆𑀘𑀢𑀺 𑀬𑀣𑀸𑀳 𑀪𑀕𑀯𑀸 𑁋

‘‘𑀓𑀸𑀫𑀸 𑀢𑁂 𑀧𑀞𑀫𑀸 𑀲𑁂𑀦𑀸, 𑀤𑀼𑀢𑀺𑀬𑀸 𑀅𑀭𑀢𑀺 𑀯𑀼𑀘𑁆𑀘𑀢𑀺;

𑀢𑀢𑀺𑀬𑀸 𑀔𑀼𑀧𑁆𑀧𑀺𑀧𑀸𑀲𑀸 𑀢𑁂, 𑀘𑀢𑀼𑀢𑁆𑀣𑀻 𑀢𑀡𑁆𑀳𑀸 𑀧𑀯𑀼𑀘𑁆𑀘𑀢𑀺.

𑀧𑀜𑁆𑀘𑀫𑀁 𑀣𑀺𑀦𑀫𑀺𑀤𑁆𑀥𑀁 𑀢𑁂, 𑀙𑀝𑁆𑀞𑀸 𑀪𑀻𑀭𑀽 𑀧𑀯𑀼𑀘𑁆𑀘𑀢𑀺;

𑀲𑀢𑁆𑀢𑀫𑀻 𑀯𑀺𑀘𑀺𑀓𑀺𑀘𑁆𑀙𑀸 𑀢𑁂, 𑀫𑀓𑁆𑀔𑁄 𑀣𑀫𑁆𑀪𑁄 𑀢𑁂 𑀅𑀝𑁆𑀞𑀫𑁄.

𑀮𑀸𑀪𑁄 𑀲𑀺𑀮𑁄𑀓𑁄 𑀲𑀓𑁆𑀓𑀸𑀭𑁄,

𑀫𑀺𑀘𑁆𑀙𑀸𑀮𑀤𑁆𑀥𑁄 𑀘 𑀬𑁄 𑀬𑀲𑁄;

𑀬𑁄 𑀘𑀢𑁆𑀢𑀸𑀦𑀁 𑀲𑀫𑀼𑀓𑁆𑀓𑀁𑀲𑁂,

𑀧𑀭𑁂 𑀘 𑀅𑀯𑀚𑀸𑀦𑀢𑀺.

𑀏𑀲𑀸 𑀦𑀫𑀼𑀘𑀺 𑀢𑁂 𑀲𑁂𑀦𑀸, 𑀓𑀡𑁆𑀳𑀲𑁆𑀲𑀸𑀪𑀺𑀧𑁆𑀧𑀳𑀸𑀭𑀺𑀦𑀻;

𑀦 𑀦𑀁 𑀅𑀲𑀽𑀭𑁄 𑀚𑀺𑀦𑀸𑀢𑀺, 𑀚𑁂𑀢𑁆𑀯𑀸 𑀘 𑀮𑀪𑀢𑁂 𑀲𑀼𑀔’’𑀦𑁆𑀢𑀺. (𑀲𑀼. 𑀦𑀺. 𑁪𑁩𑁮; 𑀫𑀳𑀸𑀦𑀺. 𑁨𑁮; 𑀘𑀽𑀴𑀦𑀺. 𑁪𑁭);

𑀲𑀸 𑀘 𑀢𑁂𑀳𑀺 𑀅𑀭𑀺𑀬𑀲𑀸𑀯𑀓𑁂𑀳𑀺 𑀤𑀺𑀬𑀟𑁆𑀠𑀲𑀳𑀲𑁆𑀲𑀪𑁂𑀤𑀸, 𑀅𑀦𑀦𑁆𑀢𑀪𑁂𑀤𑀸 𑀯𑀸 𑀓𑀺𑀮𑁂𑀲𑀯𑀸𑀳𑀺𑀦𑀻 𑀲𑀢𑀺𑀥𑀫𑁆𑀫𑀯𑀺𑀘𑀬𑀯𑀻𑀭𑀺𑀬𑀲𑀫𑀣𑀸𑀤𑀺𑀕𑀼𑀡𑀧𑀳𑀭𑀡𑀻𑀳𑀺 𑀑𑀥𑀺𑀲𑁄 𑀫𑀣𑀺𑀢𑀸, 𑀯𑀺𑀤𑁆𑀥𑀁𑀲𑀺𑀢𑀸, 𑀯𑀺𑀳𑀢𑀸 𑀘, 𑀢𑀲𑁆𑀫𑀸 ‘‘𑀫𑀸𑀭𑀲𑁂𑀦𑀫𑀣𑀦𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀯𑀺𑀮𑁄𑀣𑀦𑀜𑁆𑀘𑁂𑀢𑁆𑀣 𑀯𑀺𑀤𑁆𑀥𑀁𑀲𑀦𑀁, 𑀯𑀺𑀳𑀦𑀦𑀁 𑀯𑀸. 𑀅𑀧𑀺𑀘 𑀔𑀦𑁆𑀥𑀸𑀪𑀺𑀲𑀗𑁆𑀔𑀸𑀭𑀫𑀘𑁆𑀘𑀼𑀤𑁂𑀯𑀧𑀼𑀢𑁆𑀢𑀫𑀸𑀭𑀸𑀦𑀁 𑀢𑁂𑀲𑀁 𑀲𑀳𑀸𑀬𑀪𑀸𑀯𑀽𑀧𑀕𑀫𑀦𑀢𑀸𑀬 𑀲𑁂𑀦𑀸𑀲𑀗𑁆𑀔𑀸𑀢𑀲𑁆𑀲 𑀓𑀺𑀮𑁂𑀲𑀫𑀸𑀭𑀲𑁆𑀲 𑀘 𑀫𑀣𑀦𑀢𑁄 ‘‘𑀫𑀸𑀭𑀲𑁂𑀦𑀫𑀣𑀦𑀸’’𑀢𑀺𑀧𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀏𑀯𑀜𑁆𑀘 𑀲𑀢𑀺 𑀧𑀜𑁆𑀘𑀫𑀸𑀭𑀦𑀺𑀫𑁆𑀫𑀣𑀦𑀪𑀸𑀯𑁂𑀦 𑀅𑀢𑁆𑀣𑁄 𑀧𑀭𑀺𑀧𑀼𑀡𑁆𑀡𑁄 𑀳𑁄𑀢𑀺. 𑀅𑀭𑀺𑀬𑀲𑀸𑀯𑀓𑀸𑀧𑀺 𑀳𑀺 𑀲𑀫𑀼𑀤𑀬𑀧𑁆𑀧𑀳𑀸𑀦𑀧𑀭𑀺𑀜𑁆𑀜𑀸𑀯𑀲𑁂𑀦 𑀔𑀦𑁆𑀥𑀫𑀸𑀭𑀁, 𑀲𑀳𑀸𑀬𑀯𑁂𑀓𑀮𑁆𑀮𑀓𑀭𑀡𑁂𑀦 𑀲𑀩𑁆𑀩𑀣𑀸, 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑁂𑀦 𑀘 𑀅𑀪𑀺𑀲𑀗𑁆𑀔𑀸𑀭𑀫𑀸𑀭𑀁, 𑀩𑀮𑀯𑀺𑀥𑀫𑀦𑀯𑀺𑀲𑀬𑀸𑀢𑀺𑀓𑁆𑀓𑀫𑀦𑀯𑀲𑁂𑀦 𑀫𑀘𑁆𑀘𑀼𑀫𑀸𑀭𑀁, 𑀤𑁂𑀯𑀧𑀼𑀢𑁆𑀢𑀫𑀸𑀭𑀜𑁆𑀘 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀯𑀲𑁂𑀦 𑀲𑀩𑁆𑀩𑀲𑁄 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑁂𑀦 𑀓𑀺𑀮𑁂𑀲𑀫𑀸𑀭𑀁 𑀫𑀣𑁂𑀦𑁆𑀢𑀻𑀢𑀺, 𑀇𑀫𑀺𑀦𑀸 𑀧𑀦 𑀢𑁂𑀲𑀁 𑀑𑀭𑀲𑀧𑀼𑀢𑁆𑀢𑀪𑀸𑀯𑁂 𑀓𑀸𑀭𑀡𑀁, 𑀢𑀻𑀲𑀼 𑀧𑀼𑀢𑁆𑀢𑁂𑀲𑀼 𑀘 𑀅𑀦𑀼𑀚𑀸𑀢𑀢𑀁 𑀤𑀲𑁆𑀲𑁂𑀢𑀺. 𑀫𑀸𑀭𑀲𑁂𑀦𑀫𑀣𑀦𑀢𑀸𑀬 𑀳𑀺 𑀢𑁂 𑀪𑀕𑀯𑀢𑁄 𑀑𑀭𑀲𑀧𑀼𑀢𑁆𑀢𑀸, 𑀅𑀦𑀼𑀚𑀸𑀢𑀸 𑀘𑀸𑀢𑀺.

𑀅𑀝𑁆𑀞𑀦𑁆𑀦𑀦𑁆𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄, 𑀢𑁂𑀦𑀲𑀢𑀺𑀧𑀺 𑀢𑁂𑀲𑀁 𑀢𑀁𑀢𑀁𑀪𑁂𑀤𑁂𑀦 𑀅𑀦𑁂𑀓𑀲𑀢𑀲𑀳𑀲𑁆𑀲𑀲𑀗𑁆𑀔𑁆𑀬𑀸𑀪𑁂𑀤𑁂 𑀅𑀭𑀺𑀬𑀪𑀸𑀯𑀓𑀭𑀫𑀕𑁆𑀕𑀨𑀮𑀥𑀫𑁆𑀫𑀪𑁂𑀤𑁂𑀦 𑀇𑀫𑀁 𑀕𑀡𑀦𑀧𑀭𑀺𑀘𑁆𑀙𑁂𑀤𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀺 𑀫𑀕𑁆𑀕𑀝𑁆𑀞𑀨𑀮𑀝𑁆𑀞𑀪𑀸𑀯𑀸𑀦𑀢𑀺𑀯𑀢𑁆𑀢𑀦𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀧𑀺-𑀲𑀤𑁆𑀤𑁄, 𑀅𑀧𑀺-𑀲𑀤𑁆𑀤𑁄 𑀯𑀸 𑀧𑀤𑀮𑀻𑀴𑀸𑀤𑀺𑀦𑀸 𑀓𑀸𑀭𑀡𑁂𑀦 𑀅𑀝𑁆𑀞𑀸𑀦𑁂 𑀧𑀬𑀼𑀢𑁆𑀢𑁄, 𑀲𑁄 ‘‘𑀅𑀭𑀺𑀬𑀲𑀗𑁆𑀖’’𑀦𑁆𑀢𑀺 𑀏𑀢𑁆𑀣 𑀬𑁄𑀚𑁂𑀢𑀩𑁆𑀩𑁄, 𑀢𑁂𑀦 𑀦 𑀓𑁂𑀯𑀮𑀁 𑀩𑀼𑀤𑁆𑀥𑀥𑀫𑁆𑀫𑁂𑀬𑁂𑀯, 𑀅𑀣 𑀔𑁄 𑀅𑀭𑀺𑀬𑀲𑀗𑁆𑀖𑀫𑁆𑀧𑀻𑀢𑀺 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀬𑀤𑀺𑀧𑀺 𑀅𑀯𑀬𑀯𑀯𑀺𑀦𑀺𑀫𑀼𑀢𑁆𑀢𑁄 𑀲𑀫𑀼𑀤𑀸𑀬𑁄 𑀦𑀸𑀫 𑀓𑁄𑀘𑀺 𑀦𑀢𑁆𑀣𑀺 𑀅𑀯𑀬𑀯𑀁 𑀉𑀧𑀸𑀤𑀸𑀬 𑀲𑀫𑀼𑀤𑀸𑀬𑀲𑁆𑀲 𑀯𑀢𑁆𑀢𑀩𑁆𑀩𑀢𑁆𑀢𑀸, 𑀅𑀯𑀺𑀜𑁆𑀜𑀸𑀬𑀫𑀸𑀦𑀲𑀫𑀼𑀤𑀸𑀬𑀁 𑀧𑀦 𑀯𑀺𑀜𑁆𑀜𑀸𑀬𑀫𑀸𑀦𑀲𑀫𑀼𑀤𑀸𑀬𑁂𑀦 𑀯𑀺𑀲𑁂𑀲𑀺𑀢𑀼𑀫𑀭𑀳𑀢𑀻𑀢𑀺 𑀆𑀳 ‘‘𑀅𑀝𑁆𑀞𑀦𑁆𑀦𑀫𑁆𑀧𑀺 𑀲𑀫𑀽𑀳’’𑀦𑁆𑀢𑀺, 𑀏𑀢𑁂𑀦 ‘‘𑀅𑀭𑀺𑀬𑀲𑀗𑁆𑀖’’𑀦𑁆𑀢𑀺 𑀏𑀢𑁆𑀣 𑀦 𑀬𑁂𑀦 𑀓𑁂𑀦𑀘𑀺 𑀲𑀡𑁆𑀞𑀸𑀦𑀸𑀤𑀺𑀦𑀸, 𑀓𑀸𑀬𑀲𑀸𑀫𑀕𑁆𑀕𑀺𑀬𑀸 𑀯𑀸 𑀲𑀫𑀼𑀤𑀸𑀬𑀪𑀸𑀯𑁄, 𑀅𑀧𑀺 𑀢𑀼 𑀫𑀕𑁆𑀕𑀝𑁆𑀞𑀨𑀮𑀝𑁆𑀞𑀪𑀸𑀯𑁂𑀦𑁂𑀯𑀸𑀢𑀺 𑀯𑀺𑀲𑁂𑀲𑁂𑀢𑀺. 𑀅𑀯𑀬𑀯𑀫𑁂𑀯 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀊𑀳𑀺𑀢𑀩𑁆𑀩𑁄 𑀯𑀺𑀢𑀓𑁆𑀓𑁂𑀢𑀩𑁆𑀩𑁄, 𑀲𑀁𑀊𑀳𑀦𑀺𑀢𑀩𑁆𑀩𑁄 𑀯𑀸 𑀲𑀗𑁆𑀖𑀝𑀺𑀢𑀩𑁆𑀩𑁄𑀢𑀺 𑀲𑀫𑀽𑀳𑁄, 𑀲𑁄𑀬𑁂𑀯 𑀲𑀫𑁄𑀳𑁄 𑀯𑀘𑀦𑀲𑀺𑀮𑀺𑀝𑁆𑀞𑀢𑀸𑀤𑀺𑀦𑀸. 𑀤𑁆𑀯𑀺𑀥𑀸𑀧𑀺 𑀳𑀺 𑀧𑀸𑀞𑁄 𑀬𑀼𑀚𑁆𑀚𑀢𑀺. 𑀆𑀭𑀓𑀢𑁆𑀢𑀸 𑀓𑀺𑀮𑁂𑀲𑁂𑀳𑀺, 𑀅𑀦𑀬𑁂 𑀦 𑀇𑀭𑀺𑀬𑀦𑀢𑁄, 𑀅𑀬𑁂 𑀘 𑀇𑀭𑀺𑀬𑀦𑀢𑁄 𑀅𑀭𑀺𑀬𑀸 𑀦𑀺𑀭𑀼𑀢𑁆𑀢𑀺𑀦𑀬𑁂𑀦. 𑀅𑀣 𑀯𑀸 𑀲𑀤𑁂𑀯𑀓𑁂𑀦 𑀮𑁄𑀓𑁂𑀦 𑀲𑀭𑀡𑀦𑁆𑀢𑀺 𑀅𑀭𑀡𑀻𑀬𑀢𑁄 𑀉𑀧𑀕𑀦𑁆𑀢𑀩𑁆𑀩𑀢𑁄, 𑀉𑀧𑀕𑀢𑀸𑀦𑀜𑁆𑀘 𑀢𑀤𑀢𑁆𑀣𑀲𑀺𑀤𑁆𑀥𑀺𑀢𑁄 𑀅𑀭𑀺𑀬𑀸, 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑁂𑀦 𑀲𑀁𑀳𑀢𑁄, 𑀲𑀫𑀕𑁆𑀕𑀁 𑀯𑀸 𑀓𑀫𑁆𑀫𑀁 𑀲𑀫𑀼𑀤𑀸𑀬𑀯𑀲𑁂𑀦 𑀲𑀫𑀼𑀧𑀕𑀢𑁄𑀢𑀺 𑀲𑀗𑁆𑀖𑁄, 𑀅𑀭𑀺𑀬𑀸𑀦𑀁 𑀲𑀗𑁆𑀖𑁄, 𑀅𑀭𑀺𑀬𑁄 𑀘 𑀲𑁄 𑀲𑀗𑁆𑀖𑁄 𑀘 𑀬𑀣𑀸𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀯𑀸 𑀅𑀭𑀺𑀬𑀲𑀗𑁆𑀖𑁄, 𑀢𑀁 𑀅𑀭𑀺𑀬𑀲𑀗𑁆𑀖𑀁. 𑀪𑀕𑀯𑀢𑁄 𑀅𑀧𑀭𑀪𑀸𑀕𑁂 𑀩𑀼𑀤𑁆𑀥𑀥𑀫𑁆𑀫𑀭𑀢𑀦𑀸𑀦𑀫𑁆𑀧𑀺 𑀲𑀫𑀥𑀺𑀕𑀫𑁄 𑀲𑀗𑁆𑀖𑀭𑀢𑀦𑀸𑀥𑀻𑀦𑁄𑀢𑀺 𑀅𑀭𑀺𑀬𑀲𑀗𑁆𑀖𑀲𑁆𑀲 𑀩𑀳𑀽𑀧𑀓𑀸𑀭𑀢𑀁 𑀤𑀲𑁆𑀲𑁂𑀢𑀼𑀁 𑀇𑀥𑁂𑀯 ‘‘𑀲𑀺𑀭𑀲𑀸 𑀯𑀦𑁆𑀤𑁂’’𑀢𑀺 𑀯𑀼𑀢𑁆𑀢𑀁. 𑀅𑀯𑀲𑁆𑀲𑀜𑁆𑀘𑀸𑀬𑀫𑀢𑁆𑀣𑁄 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑁄 𑀯𑀺𑀦𑀬𑀝𑁆𑀞𑀓𑀣𑀸𑀤𑀻𑀲𑀼𑀧𑀺 (𑀧𑀸𑀭𑀸. 𑀅𑀝𑁆𑀞. 𑀕𑀦𑁆𑀣𑀸𑀭𑀫𑁆𑀪𑀓𑀣𑀸) 𑀢𑀣𑀸 𑀯𑀼𑀢𑁆𑀢𑀢𑁆𑀢𑀸. 𑀓𑁂𑀘𑀺 𑀧𑀦 𑀧𑀼𑀭𑀺𑀫𑀕𑀸𑀣𑀸𑀲𑀼𑀧𑀺 𑀢𑀁 𑀧𑀤𑀫𑀸𑀦𑁂𑀢𑁆𑀯𑀸 𑀬𑁄𑀚𑁂𑀦𑁆𑀢𑀺, 𑀢𑀤𑀬𑀼𑀢𑁆𑀢𑀫𑁂𑀯 𑀭𑀢𑀦𑀢𑁆𑀢𑀬𑀲𑁆𑀲 𑀅𑀲𑀸𑀥𑀸𑀭𑀡𑀕𑀼𑀡𑀧𑁆𑀧𑀓𑀸𑀲𑀦𑀝𑁆𑀞𑀸𑀦𑀢𑁆𑀢𑀸, 𑀬𑀣𑀸𑀯𑀼𑀢𑁆𑀢𑀓𑀸𑀭𑀡𑀲𑁆𑀲 𑀘 𑀲𑀩𑁆𑀩𑁂𑀲𑀫𑁆𑀧𑀺 𑀲𑀁𑀯𑀡𑁆𑀡𑀦𑀸𑀓𑀸𑀭𑀸𑀦𑀫𑀥𑀺𑀧𑁆𑀧𑁂𑀢𑀢𑁆𑀢𑀸𑀢𑀺.

𑀇𑀫𑀸𑀬 𑀧𑀦 𑀕𑀸𑀣𑀸𑀬 𑀅𑀭𑀺𑀬𑀲𑀗𑁆𑀖𑀲𑁆𑀲 𑀧𑀪𑀯𑀲𑀫𑁆𑀧𑀤𑀸 𑀧𑀳𑀸𑀦𑀲𑀫𑁆𑀧𑀤𑀸𑀤𑀬𑁄 𑀅𑀦𑁂𑀓𑁂 𑀕𑀼𑀡𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺. 𑀓𑀣𑀁? ‘‘𑀲𑀼𑀕𑀢𑀲𑁆𑀲 𑀑𑀭𑀲𑀸𑀦𑀁 𑀧𑀼𑀢𑁆𑀢𑀸𑀦’’𑀦𑁆𑀢𑀺 𑀳𑀺 𑀏𑀢𑁂𑀦 𑀅𑀭𑀺𑀬𑀲𑀗𑁆𑀖𑀲𑁆𑀲 𑀧𑀪𑀯𑀲𑀫𑁆𑀧𑀤𑀁 𑀤𑀲𑁆𑀲𑁂𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑀪𑀯𑀢𑀸𑀤𑀻𑀧𑀦𑀢𑁄. ‘‘𑀫𑀸𑀭𑀲𑁂𑀦𑀫𑀣𑀦𑀸𑀦’’𑀦𑁆𑀢𑀺 𑀏𑀢𑁂𑀦 𑀧𑀳𑀸𑀦𑀲𑀫𑁆𑀧𑀤𑀁 𑀲𑀓𑀮𑀲𑀁𑀓𑀺𑀮𑁂𑀲𑀧𑁆𑀧𑀳𑀸𑀦𑀤𑀻𑀧𑀦𑀢𑁄. ‘‘𑀅𑀝𑁆𑀞𑀦𑁆𑀦𑀫𑁆𑀧𑀺 𑀲𑀫𑀽𑀳’’𑀦𑁆𑀢𑀺 𑀏𑀢𑁂𑀦 𑀜𑀸𑀡𑀲𑀫𑁆𑀧𑀤𑀁 𑀫𑀕𑁆𑀕𑀝𑁆𑀞𑀨𑀮𑀝𑁆𑀞𑀪𑀸𑀯𑀤𑀻𑀧𑀦𑀢𑁄. ‘‘𑀅𑀭𑀺𑀬𑀲𑀗𑁆𑀖’’𑀦𑁆𑀢𑀺 𑀏𑀢𑁂𑀦 𑀲𑀪𑀸𑀯𑀲𑀫𑁆𑀧𑀤𑀁 𑀲𑀩𑁆𑀩𑀲𑀗𑁆𑀖𑀸𑀦𑀁 𑀅𑀕𑁆𑀕𑀪𑀸𑀯𑀤𑀻𑀧𑀦𑀢𑁄. 𑀅𑀣 𑀯𑀸 ‘‘𑀲𑀼𑀕𑀢𑀲𑁆𑀲 𑀑𑀭𑀲𑀸𑀦𑀁 𑀧𑀼𑀢𑁆𑀢𑀸𑀦’’𑀦𑁆𑀢𑀺 𑀅𑀭𑀺𑀬𑀲𑀗𑁆𑀖𑀲𑁆𑀲 𑀯𑀺𑀲𑀼𑀤𑁆𑀥𑀦𑀺𑀲𑁆𑀲𑀬𑀪𑀸𑀯𑀤𑀻𑀧𑀦𑀁. ‘‘𑀫𑀸𑀭𑀲𑁂𑀦𑀫𑀣𑀦𑀸𑀦’’𑀦𑁆𑀢𑀺 𑀲𑀫𑁆𑀫𑀸𑀉𑀚𑀼𑀜𑀸𑀬𑀲𑀸𑀫𑀻𑀘𑀺𑀧𑀝𑀺𑀧𑀦𑁆𑀦𑀪𑀸𑀯𑀤𑀻𑀧𑀦𑀁. ‘‘𑀅𑀝𑁆𑀞𑀦𑁆𑀦𑀫𑁆𑀧𑀺 𑀲𑀫𑀽𑀳’’𑀦𑁆𑀢𑀺 𑀆𑀳𑀼𑀦𑁂𑀬𑁆𑀬𑀸𑀤𑀺𑀪𑀸𑀯𑀤𑀻𑀧𑀦𑀁. ‘‘𑀅𑀭𑀺𑀬𑀲𑀗𑁆𑀖’’𑀦𑁆𑀢𑀺 𑀅𑀦𑀼𑀢𑁆𑀢𑀭𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀪𑀸𑀯𑀤𑀻𑀧𑀦𑀁. 𑀢𑀣𑀸 ‘‘𑀲𑀼𑀕𑀢𑀲𑁆𑀲 𑀑𑀭𑀲𑀸𑀦𑀁 𑀧𑀼𑀢𑁆𑀢𑀸𑀦’’𑀦𑁆𑀢𑀺 𑀏𑀢𑁂𑀦 𑀅𑀭𑀺𑀬𑀲𑀗𑁆𑀖𑀲𑁆𑀲 𑀮𑁄𑀓𑀼𑀢𑁆𑀢𑀭𑀲𑀭𑀡𑀕𑀫𑀦𑀲𑀩𑁆𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀮𑁄𑀓𑀼𑀢𑁆𑀢𑀭𑀲𑀭𑀡𑀕𑀫𑀦𑁂𑀦 𑀳𑀺 𑀢𑁂 𑀪𑀕𑀯𑀢𑁄 𑀑𑀭𑀲𑀧𑀼𑀢𑁆𑀢𑀸 𑀚𑀸𑀢𑀸. ‘‘𑀫𑀸𑀭𑀲𑁂𑀦𑀫𑀣𑀦𑀸𑀦’𑀦𑁆𑀢𑀺 𑀏𑀢𑁂𑀦 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀤𑀸𑀲𑀺𑀤𑁆𑀥𑀁 𑀧𑀼𑀩𑁆𑀩𑀪𑀸𑀕𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀓𑀢𑀸𑀪𑀺𑀦𑀻𑀳𑀸𑀭𑀸 𑀳𑀺 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸 𑀫𑀸𑀭𑀁, 𑀫𑀸𑀭𑀲𑁂𑀦𑀁 𑀯𑀸 𑀅𑀪𑀺𑀯𑀺𑀚𑀺𑀦𑀦𑁆𑀢𑀺. ‘‘𑀅𑀝𑁆𑀞𑀦𑁆𑀦𑀫𑁆𑀧𑀺 𑀲𑀫𑀽𑀳’’𑀦𑁆𑀢𑀺 𑀏𑀢𑁂𑀦 𑀯𑀺𑀤𑁆𑀥𑀲𑁆𑀢𑀯𑀺𑀧𑀓𑁆𑀔𑁂 𑀲𑁂𑀓𑁆𑀔𑀸𑀲𑁂𑀓𑁆𑀔𑀥𑀫𑁆𑀫𑁂 𑀤𑀲𑁆𑀲𑁂𑀢𑀺 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀫𑀕𑁆𑀕𑀨𑀮𑀥𑀫𑁆𑀫𑀸𑀦𑀁 𑀤𑀲𑁆𑀲𑀺𑀢𑀢𑁆𑀢𑀸. ‘‘𑀅𑀭𑀺𑀬𑀲𑀗𑁆𑀖’’𑀦𑁆𑀢𑀺 𑀏𑀢𑁂𑀦 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑀪𑀸𑀯𑀁 𑀤𑀲𑁆𑀲𑁂𑀢𑀺 𑀅𑀦𑀼𑀢𑁆𑀢𑀭𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀪𑀸𑀯𑀲𑁆𑀲 𑀤𑀲𑁆𑀲𑀺𑀢𑀢𑁆𑀢𑀸. 𑀲𑀭𑀡𑀕𑀫𑀦𑀜𑁆𑀘 𑀲𑀸𑀯𑀓𑀸𑀦𑀁 𑀲𑀩𑁆𑀩𑀕𑀼𑀡𑀲𑁆𑀲 𑀆𑀤𑀺, 𑀲𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸 𑀲𑁂𑀓𑁆𑀔𑀸 𑀲𑀻𑀮𑀓𑁆𑀔𑀦𑁆𑀥𑀸𑀤𑀬𑁄 𑀫𑀚𑁆𑀛𑁂, 𑀅𑀲𑁂𑀓𑁆𑀔𑀸 𑀲𑀻𑀮𑀓𑁆𑀔𑀦𑁆𑀥𑀸𑀤𑀬𑁄 𑀧𑀭𑀺𑀬𑁄𑀲𑀸𑀦𑀦𑁆𑀢𑀺𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀸 𑀲𑀗𑁆𑀔𑁂𑀧𑀢𑁄 𑀲𑀩𑁆𑀩𑁂𑀧𑀺 𑀅𑀭𑀺𑀬𑀲𑀗𑁆𑀖𑀕𑀼𑀡𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀻𑀢𑀺.

𑀏𑀯𑀁 𑀕𑀸𑀣𑀸𑀢𑁆𑀢𑀬𑁂𑀦 𑀲𑀗𑁆𑀔𑁂𑀧𑀢𑁄 𑀲𑀓𑀮𑀕𑀼𑀡𑀲𑀁𑀓𑀺𑀢𑁆𑀢𑀦𑀫𑀼𑀔𑁂𑀦 𑀭𑀢𑀦𑀢𑁆𑀢𑀬𑀲𑁆𑀲 𑀧𑀡𑀸𑀫𑀁 𑀓𑀢𑁆𑀯𑀸 𑀇𑀤𑀸𑀦𑀺 𑀢𑀁 𑀦𑀺𑀧𑀘𑁆𑀘𑀓𑀸𑀭𑀁 𑀬𑀣𑀸𑀥𑀺𑀧𑁆𑀧𑁂𑀢𑀧𑀬𑁄𑀚𑀦𑁂 𑀧𑀭𑀺𑀡𑀸𑀫𑁂𑀦𑁆𑀢𑁄 ‘‘𑀇𑀢𑀺 𑀫𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀦𑀺𑀤𑀲𑁆𑀲𑀦𑁂. 𑀢𑁂𑀦 𑀕𑀸𑀣𑀸𑀢𑁆𑀢𑀬𑁂𑀦 𑀬𑀣𑀸𑀯𑀼𑀢𑁆𑀢𑀦𑀬𑀁 𑀦𑀺𑀤𑀲𑁆𑀲𑁂𑀢𑀺. 𑀫𑁂𑀢𑀺 𑀅𑀢𑁆𑀢𑀸𑀦𑀁 𑀓𑀭𑀡𑀯𑀘𑀦𑁂𑀦 𑀓𑀢𑁆𑀢𑀼𑀪𑀸𑀯𑁂𑀦 𑀦𑀺𑀤𑁆𑀤𑀺𑀲𑀢𑀺. 𑀢𑀲𑁆𑀲 ‘‘𑀬𑀁 𑀧𑀼𑀜𑁆𑀜𑀁 𑀫𑀬𑀸 𑀮𑀤𑁆𑀥’’𑀦𑁆𑀢𑀺 𑀧𑀸𑀞𑀲𑁂𑀲𑁂𑀦 𑀲𑀫𑁆𑀩𑀦𑁆𑀥𑁄, 𑀲𑀫𑁆𑀧𑀤𑀸𑀦𑀦𑀺𑀤𑁆𑀤𑁂𑀲𑁄 𑀯𑀸 𑀏𑀲𑁄, ‘‘𑀅𑀢𑁆𑀣𑀻’’𑀢𑀺 𑀧𑀸𑀞𑀲𑁂𑀲𑁄, 𑀲𑀸𑀫𑀺𑀦𑀺𑀤𑁆𑀤𑁂𑀲𑁄 𑀯𑀸 ‘‘𑀬𑀁 𑀫𑀫 𑀧𑀼𑀜𑁆𑀜𑀁 𑀯𑀦𑁆𑀤𑀦𑀸𑀫𑀬’’𑀦𑁆𑀢𑀺. 𑀧𑀲𑀻𑀤𑀻𑀬𑀢𑁂 𑀧𑀲𑀦𑁆𑀦𑀸, 𑀢𑀸𑀤𑀺𑀲𑀸 𑀫𑀢𑀺 𑀧𑀜𑁆𑀜𑀸, 𑀘𑀺𑀢𑁆𑀢𑀁 𑀯𑀸 𑀬𑀲𑁆𑀲𑀸𑀢𑀺 𑀧𑀲𑀦𑁆𑀦𑀫𑀢𑀺, 𑀅𑀜𑁆𑀜𑀧𑀤𑀮𑀺𑀗𑁆𑀕𑀧𑁆𑀧𑀥𑀸𑀦𑀢𑁆𑀢𑀸 𑀇𑀫𑀲𑁆𑀲 𑀲𑀫𑀸𑀲𑀧𑀤𑀲𑁆𑀲 ‘‘𑀧𑀲𑀦𑁆𑀦𑀫𑀢𑀺𑀦𑁄’’𑀢𑀺 𑀯𑀼𑀢𑁆𑀢𑀁. 𑀭𑀢𑀺𑀁 𑀦𑀬𑀢𑀺, 𑀚𑀦𑁂𑀢𑀺, 𑀯𑀳𑀢𑀻𑀢𑀺 𑀯𑀸 𑀭𑀢𑀦𑀁, 𑀲𑀢𑁆𑀢𑀯𑀺𑀥𑀁, 𑀤𑀲𑀯𑀺𑀥𑀁 𑀯𑀸 𑀭𑀢𑀦𑀁, 𑀢𑀫𑀺𑀯 𑀇𑀫𑀸𑀦𑀻𑀢𑀺 𑀦𑁂𑀭𑀼𑀢𑁆𑀢𑀺𑀓𑀸. 𑀲𑀤𑀺𑀲𑀓𑀧𑁆𑀧𑀦𑀫𑀜𑁆𑀜𑀢𑁆𑀭 𑀧𑀦 𑀬𑀣𑀸𑀯𑀼𑀢𑁆𑀢𑀯𑀘𑀦𑀢𑁆𑀣𑁂𑀦𑁂𑀯 𑀩𑀼𑀤𑁆𑀥𑀸𑀤𑀻𑀦𑀁 𑀭𑀢𑀦𑀪𑀸𑀯𑁄 𑀬𑀼𑀚𑁆𑀚𑀢𑀺. 𑀢𑁂𑀲𑀜𑁆𑀳𑀺 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁧𑁫𑁭, 𑁨𑁫𑁫) 𑀬𑀣𑀸𑀪𑀽𑀢𑀕𑀼𑀡𑁂 𑀆𑀯𑀚𑁆𑀚𑀦𑁆𑀢𑀲𑁆𑀲 𑀅𑀫𑀢𑀸𑀥𑀺𑀕𑀫𑀳𑁂𑀢𑀼𑀪𑀽𑀢𑀁 𑀅𑀦𑀧𑁆𑀧𑀓𑀁 𑀧𑀻𑀢𑀺𑀧𑀸𑀫𑁄𑀚𑁆𑀚𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀣𑀸𑀳 𑁋

‘‘𑀬𑀲𑁆𑀫𑀺𑀁 𑀫𑀳𑀸𑀦𑀸𑀫 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀢𑀣𑀸𑀕𑀢𑀁 𑀅𑀦𑀼𑀲𑁆𑀲𑀭𑀢𑀺, 𑀦𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀦 𑀤𑁄𑀲…𑀧𑁂… 𑀦 𑀫𑁄𑀳…𑀧𑁂… 𑀉𑀚𑀼𑀕𑀢𑀫𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀳𑁄𑀢𑀺 𑀢𑀣𑀸𑀕𑀢𑀁 𑀆𑀭𑀩𑁆𑀪. 𑀉𑀚𑀼𑀕𑀢𑀘𑀺𑀢𑁆𑀢𑁄 𑀔𑁄 𑀧𑀦 𑀫𑀳𑀸𑀦𑀸𑀫 𑀅𑀭𑀺𑀬𑀲𑀸𑀯𑀓𑁄 𑀮𑀪𑀢𑀺 𑀅𑀢𑁆𑀣𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑀽𑀧𑀲𑀁𑀳𑀺𑀢𑀁 𑀧𑀸𑀫𑁄𑀚𑁆𑀚𑀁, 𑀧𑀫𑀼𑀤𑀺𑀢𑀲𑁆𑀲 𑀧𑀻𑀢𑀺 𑀚𑀸𑀬𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁬.𑁧𑁦; 𑁧𑁧.𑁧𑁧).

𑀘𑀺𑀢𑁆𑀢𑀻𑀓𑀢𑀸𑀤𑀺𑀪𑀸𑀯𑁄 𑀯𑀸 𑀭𑀢𑀦𑀝𑁆𑀞𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀝𑁆𑀞𑀓𑀣𑀸𑀲𑀼 𑁋

‘‘𑀘𑀺𑀢𑁆𑀢𑀻𑀓𑀢𑀁 𑀫𑀳𑀕𑁆𑀖𑀜𑁆𑀘, 𑀅𑀢𑀼𑀮𑀁 𑀤𑀼𑀮𑁆𑀮𑀪𑀤𑀲𑁆𑀲𑀦𑀁;

𑀅𑀦𑁄𑀫𑀲𑀢𑁆𑀢𑀧𑀭𑀺𑀪𑁄𑀕𑀁, 𑀭𑀢𑀦𑀁 𑀢𑁂𑀦 𑀯𑀼𑀘𑁆𑀘𑀢𑀻’’𑀢𑀺. (𑀔𑀼. 𑀧𑀸. 𑀅𑀝𑁆𑀞. 𑁬.𑁩; 𑀉𑀤𑀸𑀦. 𑀅𑀝𑁆𑀞. 𑁪𑁭; 𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁩; 𑀲𑀼. 𑀦𑀺. 𑁧.𑁨𑁨𑁬; 𑀫𑀳𑀸𑀦𑀺. 𑀅𑀝𑁆𑀞. 𑁧.𑁨𑁨𑁬);

𑀘𑀺𑀢𑁆𑀢𑀻𑀓𑀢𑀪𑀸𑀯𑀸𑀤𑀬𑁄 𑀘 𑀅𑀦𑀜𑁆𑀜𑀲𑀸𑀥𑀸𑀭𑀡𑀸 𑀲𑀸𑀢𑀺𑀲𑀬𑀢𑁄 𑀩𑀼𑀤𑁆𑀥𑀸𑀤𑀻𑀲𑀼𑀬𑁂𑀯 𑀮𑀩𑁆𑀪𑀦𑁆𑀢𑀻𑀢𑀺. 𑀯𑀺𑀢𑁆𑀣𑀸𑀭𑁄 𑀭𑀢𑀦𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 (𑀔𑀼. 𑀧𑀸. 𑀅𑀝𑁆𑀞. 𑁬.𑁩; 𑀲𑀼. 𑀦𑀺. 𑀅𑀝𑁆𑀞. 𑁧.𑁨𑁨𑁬) 𑀕𑀳𑁂𑀢𑀩𑁆𑀩𑁄. 𑀅𑀬𑀫𑀢𑁆𑀣𑁄 𑀧𑀦 𑀦𑀺𑀩𑁆𑀩𑀘𑀦𑀢𑁆𑀣𑀯𑀲𑁂𑀦 𑀦 𑀯𑀼𑀢𑁆𑀢𑁄, 𑀅𑀣 𑀓𑁂𑀦𑀸𑀢𑀺 𑀘𑁂? 𑀮𑁄𑀓𑁂 𑀭𑀢𑀦𑀲𑀫𑁆𑀫𑀢𑀲𑁆𑀲 𑀯𑀢𑁆𑀣𑀼𑀦𑁄 𑀕𑀭𑀼𑀓𑀸𑀢𑀩𑁆𑀩𑀢𑀸𑀤𑀺𑀅𑀢𑁆𑀣𑀯𑀲𑁂𑀦𑀸𑀢𑀺 𑀲𑀤𑁆𑀤𑀯𑀺𑀤𑀽. 𑀲𑀸𑀥𑀽𑀦𑀜𑁆𑀘 𑀭𑀫𑀦𑀢𑁄, 𑀲𑀁𑀲𑀸𑀭𑀡𑁆𑀡𑀯𑀸 𑀘 𑀢𑀭𑀡𑀢𑁄, 𑀲𑀼𑀕𑀢𑀺𑀦𑀺𑀩𑁆𑀩𑀸𑀦𑀜𑁆𑀘 𑀦𑀬𑀦𑀢𑁄 𑀭𑀢𑀦𑀁 𑀢𑀼𑀮𑁆𑀬𑀢𑁆𑀣𑀲𑀫𑀸𑀲𑀯𑀲𑁂𑀦, 𑀅𑀮𑀫𑀢𑀺𑀧𑀧𑀜𑁆𑀘𑁂𑀦. 𑀏𑀓𑀲𑁂𑀲𑀧𑀓𑀧𑁆𑀧𑀦𑁂𑀦, 𑀧𑀼𑀣𑀼𑀯𑀘𑀦𑀦𑀺𑀩𑁆𑀩𑀘𑀦𑁂𑀦 𑀯𑀸 𑀭𑀢𑀦𑀸𑀦𑀺. 𑀢𑀺𑀡𑁆𑀡𑀁 𑀲𑀫𑀽𑀳𑁄, 𑀢𑀻𑀡𑀺 𑀯𑀸 𑀲𑀫𑀸𑀳𑀝𑀸𑀦𑀺, 𑀢𑀬𑁄 𑀯𑀸 𑀅𑀯𑀬𑀯𑀸 𑀅𑀲𑁆𑀲𑀸𑀢𑀺 𑀢𑀬𑀁, 𑀭𑀢𑀦𑀸𑀦𑀫𑁂𑀯 𑀢𑀬𑀁, 𑀦𑀸𑀜𑁆𑀜𑁂𑀲𑀦𑁆𑀢𑀺 𑀭𑀢𑀦𑀢𑁆𑀢𑀬𑀁. 𑀅𑀯𑀬𑀯𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀧𑀦 𑀲𑀫𑀼𑀤𑀸𑀬𑀲𑁆𑀲 𑀅𑀪𑀸𑀯𑀢𑁄 𑀢𑀻𑀡𑀺 𑀏𑀯 𑀭𑀢𑀦𑀸𑀦𑀺 𑀢𑀣𑀸 𑀯𑀼𑀘𑁆𑀘𑀦𑁆𑀢𑀺, 𑀦 𑀲𑀫𑀼𑀤𑀸𑀬𑀫𑀢𑁆𑀢𑀁, 𑀲𑀫𑀼𑀤𑀸𑀬𑀸𑀧𑁂𑀓𑁆𑀔𑀸𑀬 𑀧𑀦 𑀏𑀓𑀯𑀘𑀦𑀁 𑀓𑀢𑀁. 𑀯𑀦𑁆𑀤𑀻𑀬𑀢𑁂 𑀯𑀦𑁆𑀤𑀦𑀸, 𑀲𑀸𑀯 𑀯𑀦𑁆𑀤𑀦𑀸𑀫𑀬𑀁 𑀬𑀣𑀸 ‘‘𑀤𑀸𑀦𑀫𑀬𑀁 𑀲𑀻𑀮𑀫𑀬’’𑀦𑁆𑀢𑀺 (𑀤𑀻. 𑀦𑀺. 𑁩.𑁩𑁦𑁫; 𑀇𑀢𑀺𑀯𑀼. 𑁬𑁦; 𑀦𑁂𑀢𑁆𑀢𑀺. 𑁩𑁩). 𑀯𑀦𑁆𑀤𑀦𑀸 𑀘𑁂𑀢𑁆𑀣 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑁂𑀳𑀺 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀕𑀼𑀡𑀦𑀺𑀦𑁆𑀦𑀢𑀸, 𑀣𑁄𑀫𑀦𑀸 𑀯𑀸. 𑀅𑀧𑀺𑀘 𑀢𑀲𑁆𑀲𑀸 𑀘𑁂𑀢𑀦𑀸𑀬 𑀲𑀳𑀚𑀸𑀢𑀸𑀤𑁄𑀧𑀓𑀸𑀭𑁂𑀓𑁄 𑀲𑀤𑁆𑀥𑀸𑀧𑀜𑁆𑀜𑀸𑀲𑀢𑀺𑀯𑀻𑀭𑀺𑀬𑀸𑀤𑀺𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁄 𑀯𑀦𑁆𑀤𑀦𑀸, 𑀢𑀸𑀬 𑀧𑀓𑀢𑀦𑁆𑀢𑀺 𑀯𑀦𑁆𑀤𑀦𑀸𑀫𑀬𑀁 𑀬𑀣𑀸 ‘‘𑀲𑁄𑀯𑀡𑁆𑀡𑀫𑀬𑀁 𑀭𑀽𑀧𑀺𑀬𑀫𑀬’’𑀦𑁆𑀢𑀺, 𑀅𑀢𑁆𑀣𑀢𑁄 𑀧𑀦 𑀬𑀣𑀸𑀯𑀼𑀢𑁆𑀢𑀘𑁂𑀢𑀦𑀸𑀯. 𑀭𑀢𑀦𑀢𑁆𑀢𑀬𑁂, 𑀭𑀢𑀦𑀢𑁆𑀢𑀬𑀲𑁆𑀲 𑀯𑀸 𑀯𑀦𑁆𑀤𑀦𑀸𑀫𑀬𑀁 𑀭𑀢𑀦𑀢𑁆𑀢𑀬𑀯𑀦𑁆𑀤𑀦𑀸𑀫𑀬𑀁. 𑀧𑀼𑀚𑁆𑀚𑀪𑀯𑀨𑀮𑀦𑀺𑀩𑁆𑀩𑀢𑁆𑀢𑀦𑀢𑁄 𑀧𑀼𑀜𑁆𑀜𑀁 𑀦𑀺𑀭𑀼𑀢𑁆𑀢𑀺𑀦𑀬𑁂𑀦, 𑀅𑀢𑁆𑀢𑀦𑁄 𑀓𑀸𑀭𑀓𑀁, 𑀲𑀦𑁆𑀢𑀸𑀦𑀁 𑀯𑀸 𑀧𑀼𑀦𑀸𑀢𑀺 𑀯𑀺𑀲𑁄𑀥𑁂𑀢𑀻𑀢𑀺 𑀧𑀼𑀜𑁆𑀜𑀁, 𑀲𑀓𑀫𑁆𑀫𑀓𑀢𑁆𑀢𑀸 𑀥𑀸𑀢𑀼𑀲𑁆𑀲 𑀓𑀸𑀭𑀺𑀢𑀯𑀲𑁂𑀦 𑀅𑀢𑁆𑀣𑀯𑀺𑀯𑀭𑀡𑀁 𑀮𑀩𑁆𑀪𑀢𑀺, 𑀲𑀤𑁆𑀤𑀦𑀺𑀧𑁆𑀨𑀢𑁆𑀢𑀺 𑀧𑀦 𑀲𑀼𑀤𑁆𑀥𑀯𑀲𑁂𑀦𑁂𑀯𑀸𑀢𑀺 𑀲𑀤𑁆𑀤𑀯𑀺𑀤𑀽.

𑀢𑀁𑀢𑀁𑀲𑀫𑁆𑀧𑀢𑁆𑀢𑀺𑀬𑀸 𑀯𑀺𑀩𑀦𑁆𑀥𑀦𑀯𑀲𑁂𑀦 𑀲𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀅𑀦𑁆𑀢𑀭𑁂 𑀯𑁂𑀫𑀚𑁆𑀛𑁂 𑀏𑀢𑀺 𑀆𑀕𑀘𑁆𑀙𑀢𑀻𑀢𑀺 𑀅𑀦𑁆𑀢𑀭𑀸𑀬𑁄, 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀅𑀦𑀢𑁆𑀣𑁄. 𑀧𑀡𑀸𑀫𑀧𑀬𑁄𑀚𑀦𑁂 𑀯𑀼𑀢𑁆𑀢𑀯𑀺𑀥𑀺𑀦𑀸 𑀲𑀼𑀝𑁆𑀞𑀼 𑀯𑀺𑀳𑀢𑁄 𑀯𑀺𑀤𑁆𑀥𑀲𑁆𑀢𑁄 𑀅𑀦𑁆𑀢𑀭𑀸𑀬𑁄 𑀅𑀲𑁆𑀲𑀸𑀢𑀺 𑀲𑀼𑀯𑀺𑀳𑀢𑀦𑁆𑀢𑀭𑀸𑀬𑁄. 𑀯𑀺𑀳𑀦𑀦𑀜𑁆𑀘𑁂𑀢𑁆𑀣 𑀢𑀤𑀼𑀧𑁆𑀧𑀸𑀤𑀓𑀳𑁂𑀢𑀼𑀧𑀭𑀺𑀳𑀭𑀡𑀯𑀲𑁂𑀦 𑀢𑁂𑀲𑀁 𑀅𑀦𑁆𑀢𑀭𑀸𑀬𑀸𑀦𑀫𑀦𑀼𑀧𑁆𑀧𑀢𑁆𑀢𑀺𑀓𑀭𑀡𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀳𑀼𑀢𑁆𑀯𑀸𑀢𑀺 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸, 𑀢𑀲𑁆𑀲 ‘‘𑀅𑀢𑁆𑀣𑀁 𑀧𑀓𑀸𑀲𑀬𑀺𑀲𑁆𑀲𑀸𑀫𑀻’’𑀢𑀺 𑀏𑀢𑁂𑀦 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲𑀸𑀢𑀺 𑀬𑀁-𑀲𑀤𑁆𑀤𑁂𑀦 𑀉𑀤𑁆𑀤𑀺𑀝𑁆𑀞𑀲𑁆𑀲 𑀯𑀦𑁆𑀤𑀦𑀸𑀫𑀬𑀧𑀼𑀜𑁆𑀜𑀲𑁆𑀲. 𑀆𑀦𑀼𑀪𑀸𑀯𑁂𑀦𑀸𑀢𑀺 𑀩𑀮𑁂𑀦.

‘‘𑀢𑁂𑀚𑁄 𑀉𑀲𑁆𑀲𑀸𑀳𑀫𑀦𑁆𑀢𑀸 𑀘, 𑀧𑀪𑀽 𑀲𑀢𑁆𑀢𑀻𑀢𑀺 𑀧𑀜𑁆𑀘𑀺𑀫𑁂;

‘𑀆𑀦𑀼𑀪𑀸𑀯𑁄’𑀢𑀺 𑀯𑀼𑀘𑁆𑀘𑀦𑁆𑀢𑀺, ‘𑀧𑀪𑀸𑀯𑁄’𑀢𑀺 𑀘 𑀢𑁂 𑀯𑀤𑁂’’𑀢𑀺. 𑁋

𑀯𑀼𑀢𑁆𑀢𑁂𑀲𑀼 𑀳𑀺 𑀅𑀢𑁆𑀣𑁂𑀲𑀼 𑀇𑀥 𑀲𑀢𑁆𑀢𑀺𑀬𑀁 𑀯𑀢𑁆𑀢𑀢𑀺. 𑀅𑀦𑀼 𑀧𑀼𑀦𑀧𑁆𑀧𑀼𑀦𑀁 𑀢𑀁𑀲𑀫𑀗𑁆𑀕𑀺𑀁 𑀪𑀸𑀯𑁂𑀢𑀺 𑀯𑀟𑁆𑀠𑁂𑀢𑀻𑀢𑀺 𑀳𑀺 𑀅𑀦𑀼𑀪𑀸𑀯𑁄, 𑀲𑁄𑀬𑁂𑀯 𑀆𑀦𑀼𑀪𑀸𑀯𑁄𑀢𑀺 𑀉𑀤𑀸𑀦𑀝𑁆𑀞𑀓𑀣𑀸𑀬𑀁, 𑀅𑀢𑁆𑀣𑀢𑁄 𑀧𑀦 𑀬𑀣𑀸𑀮𑀤𑁆𑀥𑀲𑀫𑁆𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀓𑀲𑁆𑀲 𑀧𑀼𑀭𑀺𑀫𑀓𑀫𑁆𑀫𑀲𑁆𑀲 𑀩𑀮𑀸𑀦𑀼𑀧𑁆𑀧𑀤𑀸𑀦𑀯𑀲𑀲𑀗𑁆𑀔𑀸𑀢𑀸 𑀯𑀦𑁆𑀤𑀦𑀸𑀫𑀬𑀧𑀼𑀜𑁆𑀜𑀲𑁆𑀲 𑀲𑀢𑁆𑀢𑀺𑀬𑁂𑀯, 𑀲𑀸 𑀘 𑀲𑀼𑀯𑀺𑀳𑀢𑀦𑁆𑀢𑀭𑀸𑀬𑀢𑀸𑀬 𑀓𑀭𑀡𑀁, 𑀳𑁂𑀢𑀼 𑀯𑀸 𑀲𑀫𑁆𑀪𑀯𑀢𑀺.

𑀏𑀢𑁆𑀣 𑀧𑀦 ‘‘𑀧𑀲𑀦𑁆𑀦𑀫𑀢𑀺𑀦𑁄’’𑀢𑀺 𑀏𑀢𑁂𑀦 𑀅𑀢𑁆𑀢𑀦𑁄 𑀧𑀲𑀸𑀤𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. ‘‘𑀭𑀢𑀦𑀢𑁆𑀢𑀬𑀯𑀦𑁆𑀤𑀦𑀸𑀫𑀬’’𑀦𑁆𑀢𑀺 𑀏𑀢𑁂𑀦 𑀭𑀢𑀦𑀢𑁆𑀢𑀬𑀲𑁆𑀲 𑀔𑁂𑀢𑁆𑀢𑀪𑀸𑀯𑀲𑀫𑁆𑀧𑀢𑁆𑀢𑀺𑀁, 𑀢𑀢𑁄 𑀘 𑀢𑀲𑁆𑀲 𑀧𑀼𑀜𑁆𑀜𑀲𑁆𑀲 𑀅𑀢𑁆𑀢𑀦𑁄 𑀧𑀲𑀸𑀤𑀲𑀫𑁆𑀧𑀢𑁆𑀢𑀺𑀬𑀸, 𑀭𑀢𑀦𑀢𑁆𑀢𑀬𑀲𑁆𑀲 𑀘 𑀔𑁂𑀢𑁆𑀢𑀪𑀸𑀯𑀲𑀫𑁆𑀧𑀢𑁆𑀢𑀺𑀬𑀸𑀢𑀺 𑀤𑁆𑀯𑀻𑀳𑀺 𑀅𑀗𑁆𑀕𑁂𑀳𑀺 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀬 𑀉𑀧𑀖𑀸𑀢𑀓𑀉𑀧𑀤𑁆𑀤𑀯𑀸𑀦𑀁 𑀯𑀺𑀳𑀦𑀦𑁂 𑀲𑀫𑀢𑁆𑀣𑀢𑀁 𑀤𑀻𑀧𑁂𑀢𑀺. 𑀘𑀢𑀼𑀭𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀤𑀸𑀦𑀘𑁂𑀢𑀦𑀸 𑀯𑀺𑀬 𑀳𑀺 𑀤𑁆𑀯𑀬𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀧𑀡𑀸𑀫𑀘𑁂𑀢𑀦𑀸𑀧𑀺 𑀅𑀦𑁆𑀢𑀭𑀸𑀬𑀯𑀺𑀳𑀦𑀦𑁂𑀦 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀢𑀺.

𑀏𑀯𑀁 𑀭𑀢𑀦𑀢𑁆𑀢𑀬𑀲𑁆𑀲 𑀦𑀺𑀧𑀘𑁆𑀘𑀓𑀸𑀭𑀓𑀭𑀡𑁂 𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀲𑁆𑀲𑀸 𑀥𑀫𑁆𑀫𑀤𑁂𑀲𑀦𑀸𑀬 𑀅𑀢𑁆𑀣𑀁 𑀲𑀁𑀯𑀡𑁆𑀡𑁂𑀢𑀼𑀓𑀸𑀫𑁄, 𑀢𑀤𑀧𑀺 𑀲𑀁𑀯𑀡𑁆𑀡𑁂𑀢𑀩𑁆𑀩𑀥𑀫𑁆𑀫𑀪𑀸𑀯𑁂𑀦 𑀤𑀲𑁆𑀲𑁂𑀢𑁆𑀯𑀸 𑀕𑀼𑀡𑀸𑀪𑀺𑀢𑁆𑀣𑀯𑀦𑀯𑀺𑀲𑁂𑀲𑁂𑀦 𑀅𑀪𑀺𑀢𑁆𑀣𑀯𑁂𑀢𑀼𑀁 ‘‘𑀤𑀻𑀖𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀅𑀬𑀜𑁆𑀳𑀺 𑀆𑀘𑀭𑀺𑀬𑀲𑁆𑀲 𑀧𑀓𑀢𑀺, 𑀬𑀤𑀺𑀤𑀁 𑀢𑀁𑀢𑀁𑀲𑀁𑀯𑀡𑁆𑀡𑀦𑀸𑀲𑀼 𑀆𑀤𑀺𑀢𑁄 𑀢𑀲𑁆𑀲 𑀢𑀲𑁆𑀲 𑀲𑀁𑀯𑀡𑁆𑀡𑁂𑀢𑀩𑁆𑀩𑀥𑀫𑁆𑀫𑀲𑁆𑀲 𑀯𑀺𑀲𑁂𑀲𑀕𑀼𑀡𑀓𑀺𑀢𑁆𑀢𑀦𑁂𑀦 𑀣𑁄𑀫𑀦𑀸. 𑀢𑀣𑀸 𑀳𑀺 𑀢𑁂𑀲𑀼 𑀢𑁂𑀲𑀼 𑀧𑀧𑀜𑁆𑀘𑀲𑀽𑀤𑀦𑀻𑀲𑀸𑀭𑀢𑁆𑀣𑀧𑀓𑀸𑀲𑀦𑀻𑀫𑀦𑁄𑀭𑀣𑀧𑀽𑀭𑀡𑀻𑀅𑀝𑁆𑀞𑀲𑀸𑀮𑀺𑀦𑀻𑀆𑀤𑀻𑀲𑀼 𑀬𑀣𑀸𑀓𑁆𑀓𑀫𑀁 ‘‘𑀧𑀭𑀯𑀸𑀤𑀫𑀣𑀦𑀲𑁆𑀲, 𑀜𑀸𑀡𑀧𑁆𑀧𑀪𑁂𑀤𑀚𑀦𑀦𑀲𑁆𑀲, 𑀥𑀫𑁆𑀫𑀓𑀣𑀺𑀓𑀧𑀼𑀗𑁆𑀕𑀯𑀸𑀦𑀁 𑀯𑀺𑀘𑀺𑀢𑁆𑀢𑀧𑀝𑀺𑀪𑀸𑀦𑀚𑀦𑀦𑀲𑁆𑀲,

𑀢𑀲𑁆𑀲 𑀕𑀫𑁆𑀪𑀻𑀭𑀜𑀸𑀡𑁂𑀳𑀺, 𑀑𑀕𑀸𑀴𑁆𑀳𑀲𑁆𑀲 𑀅𑀪𑀺𑀡𑁆𑀳𑀲𑁄;

𑀦𑀸𑀦𑀸𑀦𑀬𑀯𑀺𑀘𑀺𑀢𑁆𑀢𑀲𑁆𑀲, 𑀅𑀪𑀺𑀥𑀫𑁆𑀫𑀲𑁆𑀲 𑀆𑀤𑀺𑀢𑁄’’𑀢𑀺. 𑀆𑀤𑀺𑀦𑀸 𑁋

𑀣𑁄𑀫𑀦𑀸 𑀓𑀢𑀸. 𑀢𑀢𑁆𑀣 𑀤𑀻𑀖𑀲𑁆𑀲𑀸𑀢𑀺 𑀤𑀻𑀖𑀦𑀸𑀫𑀓𑀲𑁆𑀲. 𑀤𑀻𑀖𑀲𑀼𑀢𑁆𑀢𑀗𑁆𑀓𑀺𑀢𑀲𑁆𑀲𑀸𑀢𑀺 𑀤𑀻𑀖𑁂𑀳𑀺 𑀅𑀪𑀺𑀆𑀬𑀢𑀯𑀘𑀦𑀧𑁆𑀧𑀩𑀦𑁆𑀥𑀯𑀦𑁆𑀢𑁂𑀳𑀺 𑀲𑀼𑀢𑁆𑀢𑁂𑀳𑀺 𑀮𑀓𑁆𑀔𑀺𑀢𑀲𑁆𑀲, 𑀅𑀦𑁂𑀦 ‘‘𑀤𑀻𑀖𑁄’’𑀢𑀺 𑀅𑀬𑀁 𑀇𑀫𑀲𑁆𑀲 𑀆𑀕𑀫𑀲𑁆𑀲 𑀅𑀢𑁆𑀣𑀸𑀦𑀼𑀕𑀢𑀸 𑀲𑀫𑀜𑁆𑀜𑀸𑀢𑀺 𑀤𑀲𑁆𑀲𑁂𑀢𑀺. 𑀦𑀦𑀼 𑀘 𑀲𑀼𑀢𑁆𑀢𑀸𑀦𑀺𑀬𑁂𑀯 𑀆𑀕𑀫𑁄, 𑀓𑀣𑀁 𑀲𑁄 𑀢𑁂𑀳𑀺 𑀅𑀗𑁆𑀓𑀻𑀬𑀢𑀻𑀢𑀺? 𑀲𑀘𑁆𑀘𑀫𑁂𑀢𑀁 𑀧𑀭𑀫𑀢𑁆𑀣𑀢𑁄, 𑀧𑀜𑁆𑀜𑀢𑁆𑀢𑀺𑀢𑁄 𑀧𑀦 𑀲𑀼𑀢𑁆𑀢𑀸𑀦𑀺 𑀉𑀧𑀸𑀤𑀸𑀬 𑀆𑀕𑀫𑀪𑀸𑀯𑀲𑁆𑀲 𑀧𑀜𑁆𑀜𑀢𑁆𑀢𑀢𑁆𑀢𑀸 𑀅𑀯𑀬𑀯𑁂𑀳𑀺 𑀲𑀼𑀢𑁆𑀢𑁂𑀳𑀺 𑀅𑀯𑀬𑀯𑀻𑀪𑀽𑀢𑁄 𑀆𑀕𑀫𑁄 𑀅𑀗𑁆𑀓𑀻𑀬𑀢𑀺. 𑀬𑀣𑁂𑀯 𑀳𑀺 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀫𑀼𑀤𑀸𑀬𑁂 ‘‘𑀲𑀼𑀢𑁆𑀢’’𑀦𑁆𑀢𑀺 𑀯𑁄𑀳𑀸𑀭𑁄, 𑀏𑀯𑀁 𑀲𑀼𑀢𑁆𑀢𑀲𑀫𑀼𑀤𑀸𑀬𑁂 𑀆𑀕𑀫𑀯𑁄𑀳𑀸𑀭𑁄𑀢𑀺. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀺𑀦𑀺𑀧𑀼𑀡𑀢𑁆𑀣𑀪𑀸𑀯𑀢𑁄 𑀦𑀺𑀧𑀼𑀡𑀲𑁆𑀲. 𑀆𑀕𑀘𑁆𑀙𑀦𑁆𑀢𑀺 𑀅𑀢𑁆𑀢𑀢𑁆𑀣𑀧𑀭𑀢𑁆𑀣𑀸𑀤𑀬𑁄 𑀏𑀢𑁆𑀣, 𑀏𑀢𑁂𑀦, 𑀏𑀢𑀲𑁆𑀫𑀸𑀢𑀺 𑀯𑀸 𑀆𑀕𑀫𑁄, 𑀉𑀢𑁆𑀢𑀫𑀝𑁆𑀞𑁂𑀦, 𑀧𑀢𑁆𑀣𑀦𑀻𑀬𑀝𑁆𑀞𑁂𑀦 𑀘 𑀲𑁄 𑀯𑀭𑁄𑀢𑀺 𑀆𑀕𑀫𑀯𑀭𑁄. 𑀅𑀧𑀺𑀘 𑀆𑀕𑀫𑀲𑀫𑁆𑀫𑀢𑁂𑀳𑀺 𑀩𑀸𑀳𑀺𑀭𑀓𑀧𑀯𑁂𑀤𑀺𑀢𑁂𑀳𑀺 𑀪𑀸𑀭𑀢𑀧𑀼𑀭𑀸𑀡𑀓𑀣𑀸𑀦𑀭𑀲𑀻𑀳𑀧𑀼𑀭𑀸𑀡𑀓𑀣𑀸𑀤𑀻𑀳𑀺 𑀯𑀭𑁄𑀢𑀺𑀧𑀺 𑀆𑀕𑀫𑀯𑀭𑁄, 𑀢𑀲𑁆𑀲. 𑀩𑀼𑀤𑁆𑀥𑀸𑀦𑀫𑀦𑀼𑀩𑀼𑀤𑁆𑀥𑀸 𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑀸, 𑀩𑀼𑀤𑁆𑀥𑀸𑀦𑀁 𑀲𑀘𑁆𑀘𑀧𑀝𑀺𑀯𑁂𑀥𑀁 𑀅𑀦𑀼𑀕𑀫𑁆𑀫 𑀧𑀝𑀺𑀯𑀺𑀤𑁆𑀥𑀲𑀘𑁆𑀘𑀸 𑀅𑀕𑁆𑀕𑀲𑀸𑀯𑀓𑀸𑀤𑀬𑁄 𑀅𑀭𑀺𑀬𑀸, 𑀢𑁂𑀳𑀺 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀯𑀲𑁂𑀦, 𑀕𑀼𑀡𑀲𑀁𑀯𑀡𑁆𑀡𑀦𑀸𑀯𑀲𑁂𑀦 𑀘 𑀲𑀁𑀯𑀡𑁆𑀡𑀺𑀢𑁄𑀢𑀺 𑀢𑀣𑀸. 𑀅𑀣 𑀯𑀸 𑀩𑀼𑀤𑁆𑀥𑀸 𑀘 𑀅𑀦𑀼𑀩𑀼𑀤𑁆𑀥𑀸 𑀘, 𑀢𑁂𑀳𑀺 𑀲𑀁𑀯𑀡𑁆𑀡𑀺𑀢𑁄 𑀬𑀣𑀸𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀢𑀣𑀸, 𑀢𑀲𑁆𑀲. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦𑁂𑀯 𑀳𑀺 𑀢𑀺𑀡𑁆𑀡𑀫𑁆𑀧𑀺 𑀧𑀺𑀝𑀓𑀸𑀦𑀁 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀓𑁆𑀓𑀫𑁄 𑀪𑀸𑀲𑀺𑀢𑁄, 𑀢𑀢𑁄 𑀧𑀭𑀁 𑀲𑀗𑁆𑀕𑀸𑀬𑀦𑀸𑀤𑀺𑀯𑀲𑁂𑀦 𑀲𑀸𑀯𑀓𑁂𑀳𑀻𑀢𑀺 𑀆𑀘𑀭𑀺𑀬𑀸 𑀯𑀤𑀦𑁆𑀢𑀺. 𑀯𑀼𑀢𑁆𑀢𑀜𑁆𑀘 𑀫𑀚𑁆𑀛𑀺𑀫𑀸𑀕𑀫𑀝𑁆𑀞𑀓𑀣𑀸𑀬 𑀉𑀧𑀸𑀮𑀺𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 ‘‘𑀯𑁂𑀬𑁆𑀬𑀸𑀓𑀭𑀡𑀲𑁆𑀲𑀸𑀢𑀺 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀅𑀢𑁆𑀣𑀤𑀻𑀧𑀓𑀲𑁆𑀲. 𑀪𑀕𑀯𑀢𑀸 𑀳𑀺 𑀅𑀩𑁆𑀬𑀸𑀓𑀢𑀁 𑀢𑀦𑁆𑀢𑀺𑀧𑀤𑀁 𑀦𑀸𑀫 𑀦𑀢𑁆𑀣𑀺, 𑀲𑀩𑁆𑀩𑁂𑀲𑀁𑀬𑁂𑀯 𑀅𑀢𑁆𑀣𑁄 𑀓𑀣𑀺𑀢𑁄’’𑀢𑀺 (𑀫. 𑀦𑀺. 𑀅𑀝𑁆𑀞. 𑁩.𑁭𑁬). 𑀲𑀤𑁆𑀥𑀸𑀯𑀳𑀕𑀼𑀡𑀲𑁆𑀲𑀸𑀢𑀺 𑀩𑀼𑀤𑁆𑀥𑀸𑀤𑀻𑀲𑀼 𑀧𑀲𑀸𑀤𑀸𑀯𑀳𑀕𑀼𑀡𑀲𑁆𑀲. 𑀦𑀦𑀼 𑀘 𑀲𑀩𑁆𑀩𑀫𑁆𑀧𑀺 𑀩𑀼𑀤𑁆𑀥𑀯𑀘𑀦𑀁 𑀢𑁂𑀧𑀺𑀝𑀓𑀁 𑀲𑀤𑁆𑀥𑀸𑀯𑀳𑀕𑀼𑀡𑀫𑁂𑀯, 𑀅𑀣 𑀓𑀲𑁆𑀫𑀸 𑀅𑀬𑀫𑀜𑁆𑀜𑀲𑀸𑀥𑀸𑀭𑀡𑀕𑀼𑀡𑁂𑀦 𑀣𑁄𑀫𑀺𑀢𑁄𑀢𑀺? 𑀲𑀸𑀢𑀺𑀲𑀬𑀢𑁄 𑀇𑀫𑀲𑁆𑀲 𑀢𑀕𑁆𑀕𑀼𑀡𑀲𑀫𑁆𑀧𑀦𑁆𑀦𑀢𑁆𑀢𑀸. 𑀅𑀬𑀜𑁆𑀳𑀺 𑀆𑀕𑀫𑁄 𑀩𑁆𑀭𑀳𑁆𑀫𑀚𑀸𑀮𑀸𑀤𑀻𑀲𑀼 𑀲𑀻𑀮𑀤𑀺𑀝𑁆𑀞𑀸𑀤𑀻𑀦𑀁 𑀅𑀦𑀯𑀲𑁂𑀲𑀦𑀺𑀤𑁆𑀤𑁂𑀲𑀸𑀤𑀺𑀯𑀲𑁂𑀦, 𑀫𑀳𑀸𑀧𑀤𑀸𑀦𑀸𑀤𑀻𑀲𑀼 (𑀤𑀻. 𑀦𑀺. 𑁨.𑁩) 𑀧𑀼𑀭𑀺𑀫𑀩𑀼𑀤𑁆𑀥𑀸𑀦𑀫𑁆𑀧𑀺 𑀕𑀼𑀡𑀦𑀺𑀤𑁆𑀤𑁂𑀲𑀸𑀤𑀺𑀯𑀲𑁂𑀦, 𑀧𑀸𑀣𑀺𑀓𑀲𑀼𑀢𑁆𑀢𑀸𑀤𑀻𑀲𑀼 (𑀤𑀻. 𑀦𑀺. 𑁩.𑁧.𑁪) 𑀢𑀺𑀢𑁆𑀣𑀺𑀬𑁂 𑀫𑀤𑁆𑀤𑀺𑀢𑁆𑀯𑀸 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀲𑀻𑀳𑀦𑀸𑀤𑀦𑀤𑀦𑀸𑀤𑀺𑀯𑀲𑁂𑀦, 𑀅𑀦𑀼𑀢𑁆𑀢𑀭𑀺𑀬𑀲𑀼𑀢𑁆𑀢𑀸𑀤𑀻𑀲𑀼 𑀯𑀺𑀲𑁂𑀲𑀢𑁄 𑀩𑀼𑀤𑁆𑀥𑀕𑀼𑀡𑀯𑀺𑀪𑀸𑀯𑀦𑁂𑀦 𑀭𑀢𑀦𑀢𑁆𑀢𑀬𑁂 𑀲𑀸𑀢𑀺𑀲𑀬𑀁 𑀲𑀤𑁆𑀥𑀁 𑀆𑀯𑀳𑀢𑀻𑀢𑀺.

𑀏𑀯𑀁 𑀲𑀁𑀯𑀡𑁆𑀡𑁂𑀢𑀩𑁆𑀩𑀥𑀫𑁆𑀫𑀲𑁆𑀲 𑀅𑀪𑀺𑀢𑁆𑀣𑀯𑀦𑀫𑁆𑀧𑀺 𑀓𑀢𑁆𑀯𑀸 𑀇𑀤𑀸𑀦𑀺 𑀲𑀁𑀯𑀡𑁆𑀡𑀦𑀸𑀬 𑀲𑀫𑁆𑀧𑀢𑀺 𑀯𑀓𑁆𑀔𑀫𑀸𑀦𑀸𑀬 𑀆𑀕𑀫𑀦𑀯𑀺𑀲𑀼𑀤𑁆𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀢𑁆𑀣𑀧𑁆𑀧𑀓𑀸𑀲𑀦𑀢𑁆𑀣’’𑀦𑁆𑀢𑀺𑀆𑀤𑀺𑀫𑀸𑀳. 𑀇𑀫𑀸𑀬 𑀳𑀺 𑀕𑀸𑀣𑀸𑀬 𑀲𑀗𑁆𑀕𑀻𑀢𑀺𑀢𑁆𑀢𑀬𑀫𑀸𑀭𑀼𑀴𑁆𑀳𑀤𑀻𑀖𑀸𑀕𑀫𑀝𑁆𑀞𑀓𑀣𑀸𑀢𑁄𑀯 𑀲𑀻𑀳𑀴𑀪𑀸𑀲𑀸𑀫𑀢𑁆𑀢𑀁 𑀯𑀺𑀦𑀸 𑀅𑀬𑀁 𑀯𑀓𑁆𑀔𑀫𑀸𑀦𑀲𑀁𑀯𑀡𑁆𑀡𑀦𑀸 𑀆𑀕𑀢𑀸, 𑀦𑀸𑀜𑁆𑀜𑀢𑁄, 𑀢𑀤𑁂𑀯 𑀓𑀸𑀭𑀡𑀁 𑀓𑀢𑁆𑀯𑀸 𑀯𑀢𑁆𑀢𑀩𑁆𑀩𑀸, 𑀦𑀸𑀜𑁆𑀜𑀦𑁆𑀢𑀺 𑀅𑀢𑁆𑀢𑀦𑁄 𑀲𑀁𑀯𑀡𑁆𑀡𑀦𑀸𑀬 𑀆𑀕𑀫𑀦𑀯𑀺𑀲𑀼𑀤𑁆𑀥𑀺𑀁 𑀤𑀲𑁆𑀲𑁂𑀢𑀺. 𑀅𑀧𑀭𑁄 𑀦𑀬𑁄 𑁋 𑀧𑀭𑀫𑀦𑀺𑀧𑀼𑀡𑀕𑀫𑁆𑀪𑀻𑀭𑀁 𑀩𑀼𑀤𑁆𑀥𑀯𑀺𑀲𑀬𑀫𑀸𑀕𑀫𑀯𑀭𑀁 𑀅𑀢𑁆𑀢𑀦𑁄 𑀩𑀮𑁂𑀦𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫𑀻𑀢𑀺 𑀅𑀜𑁆𑀜𑁂𑀳𑀺 𑀯𑀢𑁆𑀢𑀼𑀫𑁆𑀧𑀺 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀲𑀁𑀯𑀡𑁆𑀡𑀦𑀸𑀦𑀺𑀲𑁆𑀲𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀢𑁆𑀣𑀧𑁆𑀧𑀓𑀸𑀲𑀦𑀢𑁆𑀣’’𑀦𑁆𑀢𑀺𑀆𑀤𑀺. 𑀇𑀫𑀸𑀬 𑀳𑀺 𑀧𑀼𑀩𑁆𑀩𑀸𑀘𑀭𑀺𑀬𑀸𑀦𑀼𑀪𑀸𑀯𑀁 𑀦𑀺𑀲𑁆𑀲𑀸𑀬𑁂𑀯 𑀢𑀲𑁆𑀲 𑀅𑀢𑁆𑀣𑀁 𑀯𑀡𑁆𑀡𑀬𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀢𑀦𑁄 𑀲𑀁𑀯𑀡𑁆𑀡𑀦𑀸𑀦𑀺𑀲𑁆𑀲𑀬𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 ‘‘𑀅𑀢𑁆𑀣𑀧𑁆𑀧𑀓𑀸𑀲𑀦𑀢𑁆𑀣’’𑀦𑁆𑀢𑀺 𑀧𑀸𑀞𑀢𑁆𑀣𑁄, 𑀲𑀪𑀸𑀯𑀢𑁆𑀣𑁄, 𑀜𑁂𑀬𑁆𑀬𑀢𑁆𑀣𑁄, 𑀧𑀸𑀞𑀸𑀦𑀼𑀭𑀽𑀧𑀢𑁆𑀣𑁄, 𑀢𑀤𑀦𑀼𑀭𑀽𑀧𑀢𑁆𑀣𑁄, 𑀲𑀸𑀯𑀲𑁂𑀲𑀢𑁆𑀣𑁄, 𑀦𑀺𑀯𑀭𑀲𑁂𑀲𑀢𑁆𑀣𑁄, 𑀦𑀻𑀢𑀢𑁆𑀣𑁄, 𑀦𑁂𑀬𑁆𑀬𑀢𑁆𑀣𑁄𑀢𑀺𑀆𑀤𑀺𑀦𑀸 𑀅𑀦𑁂𑀓𑀧𑁆𑀧𑀓𑀸𑀭𑀲𑁆𑀲 𑀅𑀢𑁆𑀣𑀲𑁆𑀲 𑀧𑀓𑀸𑀲𑀦𑀢𑁆𑀣𑀸𑀬, 𑀧𑀓𑀸𑀲𑀦𑀸𑀬 𑀯𑀸. 𑀕𑀸𑀣𑀸𑀩𑀦𑁆𑀥𑀲𑀫𑁆𑀧𑀢𑁆𑀢𑀺𑀬𑀸 𑀤𑁆𑀯𑀺𑀪𑀸𑀯𑁄. 𑀅𑀢𑁆𑀣𑁄 𑀓𑀣𑀻𑀬𑀢𑀺 𑀏𑀢𑀸𑀬𑀸𑀢𑀺 𑀅𑀢𑁆𑀣𑀓𑀣𑀸, 𑀲𑀸𑀬𑁂𑀯 𑀅𑀝𑁆𑀞𑀓𑀣𑀸 𑀢𑁆𑀣-𑀓𑀸𑀭𑀲𑁆𑀲 𑀝𑁆𑀞-𑀓𑀸𑀭𑀁 𑀓𑀢𑁆𑀯𑀸 𑀬𑀣𑀸 ‘‘𑀤𑀼𑀓𑁆𑀔𑀲𑁆𑀲 𑀧𑀻𑀴𑀦𑀝𑁆𑀞𑁄’’𑀢𑀺 (𑀧𑀝𑀺. 𑀫. 𑁧.𑁧𑁭; 𑁨.𑁮), 𑀅𑀬𑀜𑁆𑀘 𑀲𑀲𑀜𑁆𑀜𑁄𑀕𑀯𑀺𑀥𑀺 𑀅𑀭𑀺𑀬𑀸𑀚𑀸𑀢𑀺𑀪𑀸𑀯𑀢𑁄. 𑀅𑀓𑁆𑀔𑀭𑀘𑀺𑀦𑁆𑀢𑀓𑀸𑀧𑀺 𑀳𑀺 ‘‘𑀢𑀣𑀸𑀦𑀁𑀝𑁆𑀞 𑀬𑀼𑀕’’𑀦𑁆𑀢𑀺 𑀮𑀓𑁆𑀔𑀡𑀁 𑀯𑀢𑁆𑀯𑀸 𑀇𑀤𑀫𑁂𑀯𑀼𑀤𑀸𑀳𑀭𑀦𑁆𑀢𑀺.

𑀬𑀸𑀬’𑀢𑁆𑀣𑀫𑀪𑀺𑀯𑀡𑁆𑀡𑁂𑀦𑁆𑀢𑀺, 𑀩𑁆𑀬𑀜𑁆𑀚𑀦𑀢𑁆𑀣𑀧𑀤𑀸𑀦𑀼𑀕𑀁;

𑀦𑀺𑀤𑀸𑀦𑀯𑀢𑁆𑀣𑀼𑀲𑀫𑁆𑀩𑀦𑁆𑀥𑀁, 𑀏𑀲𑀸 𑀅𑀝𑁆𑀞𑀓𑀣𑀸 𑀫𑀢𑀸.

𑀆𑀤𑀺𑀢𑁄𑀢𑀺𑀆𑀤𑀺𑀫𑁆𑀳𑀺 𑀧𑀞𑀫𑀲𑀗𑁆𑀕𑀻𑀢𑀺𑀬𑀁. 𑀙𑀴𑀪𑀺𑀜𑁆𑀜𑀢𑀸𑀬 𑀧𑀭𑀫𑁂𑀦 𑀘𑀺𑀢𑁆𑀢𑀯𑀲𑀻𑀪𑀸𑀯𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸, 𑀛𑀸𑀦𑀸𑀤𑀻𑀲𑀼 𑀧𑀜𑁆𑀘𑀯𑀲𑀺𑀢𑀸 𑀲𑀩𑁆𑀪𑀸𑀯𑀢𑁄 𑀘 𑀯𑀲𑀺𑀦𑁄, 𑀣𑁂𑀭𑀸 𑀫𑀳𑀸𑀓𑀲𑁆𑀲𑀧𑀸𑀤𑀬𑁄, 𑀢𑁂𑀲𑀁 𑀲𑀢𑁂𑀳𑀺 𑀧𑀜𑁆𑀘𑀳𑀺.𑀬𑀸 𑀲𑀗𑁆𑀕𑀻𑀢𑀸𑀢𑀺 𑀬𑀸 𑀅𑀝𑁆𑀞𑀓𑀣𑀸 𑀅𑀢𑁆𑀣𑀁 𑀧𑀓𑀸𑀲𑁂𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑁂 ‘‘𑀅𑀬𑀫𑁂𑀢𑀲𑁆𑀲 𑀅𑀢𑁆𑀣𑁄, 𑀅𑀬𑀫𑁂𑀢𑀲𑁆𑀲 𑀅𑀢𑁆𑀣𑁄’’𑀢𑀺 𑀲𑀗𑁆𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀸. 𑀅𑀦𑀼𑀲𑀗𑁆𑀕𑀻𑀢𑀸 𑀘 𑀧𑀘𑁆𑀙𑀸𑀧𑀻𑀢𑀺 𑀦 𑀓𑁂𑀯𑀮𑀁 𑀧𑀞𑀫𑀲𑀗𑁆𑀕𑀻𑀢𑀺𑀬𑀫𑁂𑀯, 𑀅𑀣 𑀔𑁄 𑀧𑀘𑁆𑀙𑀸 𑀤𑀼𑀢𑀺𑀬𑀢𑀢𑀺𑀬𑀲𑀗𑁆𑀕𑀻𑀢𑀻𑀲𑀼𑀧𑀺. 𑀦 𑀘 𑀧𑀜𑁆𑀘𑀳𑀺 𑀯𑀲𑀺𑀲𑀢𑁂𑀳𑀺 𑀆𑀤𑀺𑀢𑁄 𑀲𑀗𑁆𑀕𑀻𑀢𑀸𑀬𑁂𑀯, 𑀅𑀧𑀺 𑀢𑀼 𑀬𑀲𑀢𑁆𑀣𑁂𑀭𑀸𑀤𑀻𑀳𑀺 𑀅𑀦𑀼𑀲𑀗𑁆𑀕𑀻𑀢𑀸 𑀘𑀸𑀢𑀺 𑀲𑀳 𑀲𑀫𑀼𑀘𑁆𑀘𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀫𑀼𑀘𑁆𑀘𑀬𑀤𑁆𑀯𑀬𑀜𑁆𑀳𑀺 𑀧𑀘𑁆𑀘𑁂𑀓𑀁 𑀓𑀺𑀭𑀺𑀬𑀸𑀓𑀸𑀮𑀁 𑀲𑀫𑀼𑀘𑁆𑀘𑀺𑀦𑁄𑀢𑀺.

𑀅𑀣 𑀧𑁄𑀭𑀸𑀡𑀝𑁆𑀞𑀓𑀣𑀸𑀬 𑀯𑀺𑀚𑁆𑀚𑀫𑀸𑀦𑀸𑀬 𑀓𑀺𑀫𑁂𑀢𑀸𑀬 𑀅𑀥𑀼𑀦𑀸 𑀧𑀼𑀦 𑀓𑀢𑀸𑀬 𑀲𑀁𑀯𑀡𑁆𑀡𑀦𑀸𑀬𑀸𑀢𑀺 𑀧𑀼𑀦𑀭𑀼𑀢𑁆𑀢𑀺𑀬𑀸, 𑀦𑀺𑀭𑀢𑁆𑀣𑀓𑀢𑀸𑀬 𑀘 𑀤𑁄𑀲𑀁 𑀲𑀫𑀦𑀼𑀲𑁆𑀲𑀭𑀺𑀢𑁆𑀯𑀸 𑀢𑀁 𑀧𑀭𑀺𑀳𑀭𑀦𑁆𑀢𑁄 ‘‘𑀲𑀻𑀳𑀴𑀤𑀻𑀧’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀁 𑀧𑀭𑀺𑀳𑀭𑀡𑁂𑀦𑁂𑀯 𑀳𑀺 𑀇𑀫𑀺𑀲𑁆𑀲𑀸 𑀲𑀁𑀯𑀡𑁆𑀡𑀦𑀸𑀬 𑀦𑀺𑀫𑀺𑀢𑁆𑀢𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀲𑀻𑀳𑀁 𑀮𑀸𑀢𑀺 𑀕𑀡𑁆𑀳𑀸𑀢𑀻𑀢𑀺 𑀲𑀻𑀳𑀴𑁄 𑀮-𑀓𑀸𑀭𑀲𑁆𑀲 𑀴-𑀓𑀸𑀭𑀁 𑀓𑀢𑁆𑀯𑀸 𑀬𑀣𑀸 ‘‘𑀕𑀭𑀼𑀴𑁄’’𑀢𑀺. 𑀢𑀲𑁆𑀫𑀺𑀁 𑀯𑀁𑀲𑁂 𑀆𑀤𑀺𑀧𑀼𑀭𑀺𑀲𑁄 𑀲𑀻𑀳𑀓𑀼𑀫𑀸𑀭𑁄, 𑀢𑀩𑁆𑀩𑀁𑀲𑀚𑀸𑀢𑀸 𑀧𑀦 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀔𑀢𑁆𑀢𑀺𑀬𑀸, 𑀲𑀩𑁆𑀩𑁂𑀧𑀺 𑀘 𑀚𑀦𑀸 𑀢𑀤𑁆𑀥𑀺𑀢𑀯𑀲𑁂𑀦, 𑀲𑀤𑀺𑀲𑀯𑁄𑀳𑀸𑀭𑁂𑀦 𑀯𑀸 𑀲𑀻𑀳𑀴𑀸, 𑀢𑁂𑀲𑀁 𑀦𑀺𑀯𑀸𑀲𑀤𑀻𑀧𑁄𑀧𑀺 𑀢𑀤𑁆𑀥𑀺𑀢𑀯𑀲𑁂𑀦, 𑀞𑀸𑀦𑀻𑀦𑀸𑀫𑁂𑀦 𑀯𑀸 ‘‘𑀲𑀻𑀳𑀴𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀚𑀮𑀫𑀚𑁆𑀛𑁂 𑀤𑀺𑀧𑁆𑀧𑀢𑀺, 𑀤𑁆𑀯𑀺𑀥𑀸 𑀯𑀸 𑀆𑀧𑁄 𑀏𑀢𑁆𑀣 𑀲𑀦𑁆𑀤𑀢𑀻𑀢𑀺 𑀤𑀺𑀧𑁄, 𑀲𑁄𑀬𑁂𑀯 𑀤𑀻𑀧𑁄, 𑀪𑁂𑀤𑀸𑀧𑁂𑀓𑁆𑀔𑀸𑀬 𑀢𑁂𑀲𑀁 𑀤𑀻𑀧𑁄𑀢𑀺 𑀢𑀣𑀸. 𑀧𑀦𑀲𑀤𑁆𑀤𑁄 𑀅𑀭𑀼𑀘𑀺𑀲𑀁𑀲𑀽𑀘𑀦𑁂, 𑀢𑁂𑀦 𑀓𑀸𑀫𑀜𑁆𑀘 𑀲𑀸 𑀲𑀗𑁆𑀕𑀻𑀢𑀺𑀢𑁆𑀢𑀬𑀫𑀸𑀭𑀼𑀴𑁆𑀳𑀸, 𑀢𑀣𑀸𑀧𑀺 𑀧𑀼𑀦 𑀏𑀯𑀁𑀪𑀽𑀢𑀸𑀢𑀺 𑀅𑀭𑀼𑀘𑀺𑀬𑀪𑀸𑀯𑀁 𑀲𑀁𑀲𑀽𑀘𑁂𑀢𑀺. 𑀢𑀤𑀢𑁆𑀣𑀲𑀫𑁆𑀩𑀦𑁆𑀥𑀢𑀸𑀬 𑀧𑀦 𑀧𑀼𑀭𑀺𑀫𑀕𑀸𑀣𑀸𑀬 ‘‘𑀓𑀸𑀫𑀜𑁆𑀘 𑀲𑀗𑁆𑀕𑀻𑀢𑀸 𑀅𑀦𑀼𑀲𑀗𑁆𑀕𑀻𑀢𑀸 𑀘𑀸’’𑀢𑀺 𑀲𑀸𑀦𑀼𑀕𑁆𑀕𑀳𑀢𑁆𑀣𑀬𑁄𑀚𑀦𑀸 𑀲𑀫𑁆𑀪𑀯𑀢𑀺. 𑀅𑀜𑁆𑀜𑀢𑁆𑀣𑀸𑀧𑀺 𑀳𑀺 𑀢𑀣𑀸 𑀤𑀺𑀲𑁆𑀲𑀢𑀻𑀢𑀺. 𑀆𑀪𑀢𑀸𑀢𑀺 𑀚𑀫𑁆𑀩𑀼𑀤𑀻𑀧𑀢𑁄 𑀆𑀦𑀻𑀢𑀸. 𑀅𑀣𑀸𑀢𑀺 𑀲𑀗𑁆𑀕𑀻𑀢𑀺𑀓𑀸𑀮𑀢𑁄 𑀧𑀘𑁆𑀙𑀸, 𑀏𑀯𑀁 𑀲𑀢𑀺 𑀆𑀪𑀢𑀧𑀤𑁂𑀦 𑀲𑀫𑁆𑀩𑀦𑁆𑀥𑁄. 𑀅𑀣𑀸𑀢𑀺 𑀯𑀸 𑀫𑀳𑀸𑀫𑀳𑀺𑀦𑁆𑀤𑀢𑁆𑀣𑁂𑀭𑁂𑀦𑀸𑀪𑀢𑀓𑀸𑀮𑀢𑁄 𑀧𑀘𑁆𑀙𑀸, 𑀏𑀯𑀁 𑀲𑀢𑀺 𑀞𑀧𑀺𑀢𑀧𑀤𑁂𑀦 𑀲𑀫𑁆𑀩𑀦𑁆𑀥𑁄. 𑀲𑀸 𑀳𑀺 𑀥𑀫𑁆𑀫𑀲𑀗𑁆𑀕𑀸𑀳𑀓𑀢𑁆𑀣𑁂𑀭𑁂𑀳𑀺 𑀧𑀞𑀫𑀁 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀲𑀗𑁆𑀕𑀸𑀬𑀺𑀢𑁆𑀯𑀸 𑀢𑀲𑁆𑀲 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀦𑀼𑀭𑀽𑀧𑁂𑀦𑁂𑀯 𑀯𑀸𑀘𑀦𑀸𑀫𑀕𑁆𑀕𑀁 𑀆𑀭𑁄𑀧𑀺𑀢𑀢𑁆𑀢𑀸 𑀢𑀺𑀲𑁆𑀲𑁄 𑀲𑀗𑁆𑀕𑀻𑀢𑀺𑀬𑁄 𑀆𑀭𑀼𑀴𑁆𑀳𑀸𑀬𑁂𑀯, 𑀢𑀢𑁄 𑀧𑀘𑁆𑀙𑀸 𑀘 𑀫𑀳𑀸𑀫𑀳𑀺𑀦𑁆𑀤𑀢𑁆𑀣𑁂𑀭𑁂𑀦 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀫𑀸𑀪𑀢𑀸, 𑀧𑀘𑁆𑀙𑀸 𑀧𑀦 𑀢𑀫𑁆𑀩𑀧𑀡𑁆𑀡𑀺𑀬𑁂𑀳𑀺 𑀫𑀳𑀸𑀣𑁂𑀭𑁂𑀳𑀺 𑀦𑀺𑀓𑀸𑀬𑀦𑁆𑀢𑀭𑀮𑀤𑁆𑀥𑀺𑀲𑀗𑁆𑀓𑀭𑀧𑀭𑀺𑀳𑀭𑀡𑀢𑁆𑀣𑀁 𑀲𑀻𑀳𑀴𑀪𑀸𑀲𑀸𑀬 𑀞𑀧𑀺𑀢𑀸𑀢𑀺. 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁄 𑀧𑀦 𑀧𑀘𑁆𑀙𑀺𑀫𑀲𑀫𑁆𑀩𑀦𑁆𑀥𑀫𑁂𑀯 𑀤𑀼𑀤𑁆𑀤𑀲𑀢𑁆𑀢𑀸 𑀧𑀓𑀸𑀲𑁂𑀢𑀺. 𑀢𑀣𑀸 ‘‘𑀤𑀻𑀧𑀯𑀸𑀲𑀻𑀦𑀫𑀢𑁆𑀣𑀸𑀬𑀸’’𑀢𑀺 𑀇𑀤𑀫𑁆𑀧𑀺 ‘‘𑀞𑀧𑀺𑀢𑀸’’𑀢𑀺 𑀘 ‘‘𑀅𑀧𑀦𑁂𑀢𑁆𑀯𑀸 𑀆𑀭𑁄𑀧𑁂𑀦𑁆𑀢𑁄’’𑀢𑀺 𑀘 𑀏𑀢𑁂𑀳𑀺 𑀧𑀤𑁂𑀳𑀺 𑀲𑀫𑁆𑀩𑀚𑁆𑀛𑀺𑀢𑀩𑁆𑀩𑀁. 𑀏𑀓𑀧𑀤𑀫𑁆𑀧𑀺 𑀳𑀺 𑀆𑀯𑀼𑀢𑁆𑀢𑀺𑀬𑀸𑀤𑀺𑀦𑀬𑁂𑀳𑀺 𑀅𑀦𑁂𑀓𑀢𑁆𑀣𑀲𑀫𑁆𑀩𑀦𑁆𑀥𑀫𑀼𑀧𑀕𑀘𑁆𑀙𑀢𑀺. 𑀧𑀼𑀭𑀺𑀫𑀲𑀫𑁆𑀩𑀦𑁆𑀥𑁂𑀦 𑀘𑁂𑀢𑁆𑀣 𑀲𑀻𑀳𑀴𑀤𑀻𑀧𑀯𑀸𑀲𑀻𑀦𑀫𑀢𑁆𑀣𑀸𑀬 𑀦𑀺𑀓𑀸𑀬𑀦𑁆𑀢𑀭𑀮𑀤𑁆𑀥𑀺𑀲𑀗𑁆𑀓𑀭𑀧𑀭𑀺𑀳𑀭𑀡𑁂𑀦 𑀲𑀻𑀳𑀴𑀪𑀸𑀲𑀸𑀬 𑀞𑀧𑀺𑀢𑀸𑀢𑀺 𑀢𑀫𑁆𑀩𑀧𑀡𑁆𑀡𑀺𑀬𑀢𑁆𑀣𑁂𑀭𑁂𑀳𑀺 𑀞𑀧𑀦𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑀺. 𑀧𑀘𑁆𑀙𑀺𑀫𑀲𑀫𑁆𑀩𑀦𑁆𑀥𑁂𑀦 𑀧𑀦 𑀇𑀫𑀸𑀬 𑀲𑀁𑀯𑀡𑁆𑀡𑀦𑀸𑀬 𑀚𑀫𑁆𑀩𑀼𑀤𑀻𑀧𑀯𑀸𑀲𑀻𑀦𑀁, 𑀅𑀜𑁆𑀜𑀤𑀻𑀧𑀯𑀸𑀲𑀻𑀦𑀜𑁆𑀘 𑀅𑀢𑁆𑀣𑀸𑀬 𑀲𑀻𑀳𑀴𑀪𑀸𑀲𑀸𑀧𑀦𑀬𑀦𑀲𑁆𑀲, 𑀢𑀦𑁆𑀢𑀺𑀦𑀬𑀸𑀦𑀼𑀘𑁆𑀙𑀯𑀺𑀓𑀪𑀸𑀲𑀸𑀭𑁄𑀧𑀦𑀲𑁆𑀲 𑀘 𑀧𑀬𑁄𑀚𑀦𑀦𑁆𑀢𑀺. 𑀫𑀳𑀸𑀇𑀲𑁆𑀲𑀭𑀺𑀬𑀢𑁆𑀢𑀸 𑀫𑀳𑀺𑀦𑁆𑀤𑁄𑀢𑀺 𑀭𑀸𑀚𑀓𑀼𑀫𑀸𑀭𑀓𑀸𑀮𑁂 𑀦𑀸𑀫𑀁, 𑀧𑀘𑁆𑀙𑀸 𑀧𑀦 𑀕𑀼𑀡𑀫𑀳𑀦𑁆𑀢𑀢𑀸𑀬 𑀫𑀳𑀸𑀫𑀳𑀺𑀦𑁆𑀤𑁄𑀢𑀺 𑀯𑀼𑀘𑁆𑀘𑀢𑀺. 𑀲𑀻𑀳𑀴𑀪𑀸𑀲𑀸 𑀦𑀸𑀫 𑀅𑀦𑁂𑀓𑀓𑁆𑀔𑀭𑁂𑀳𑀺 𑀏𑀓𑀢𑁆𑀣𑀲𑁆𑀲𑀸𑀧𑀺 𑀯𑁄𑀳𑀭𑀡𑀢𑁄 𑀧𑀭𑁂𑀲𑀁 𑀯𑁄𑀳𑀭𑀺𑀢𑀼𑀁 𑀅𑀢𑀺𑀤𑀼𑀓𑁆𑀓𑀭𑀸 𑀓𑀜𑁆𑀘𑀼𑀓𑀲𑀤𑀺𑀲𑀸 𑀲𑀻𑀳𑀴𑀸𑀦𑀁 𑀲𑀫𑀼𑀤𑀸𑀘𑀺𑀡𑁆𑀡𑀸 𑀪𑀸𑀲𑀸.

𑀏𑀯𑀁 𑀳𑁄𑀢𑀼 𑀧𑁄𑀭𑀸𑀡𑀝𑁆𑀞𑀓𑀣𑀸𑀬, 𑀅𑀥𑀼𑀦𑀸 𑀓𑀭𑀺𑀬𑀫𑀸𑀦𑀸 𑀧𑀦 𑀅𑀝𑁆𑀞𑀓𑀣𑀸 𑀓𑀣𑀁 𑀓𑀭𑀻𑀬𑀢𑀻𑀢𑀺 𑀅𑀦𑀼𑀬𑁄𑀕𑁂 𑀲𑀢𑀺 𑀇𑀫𑀺𑀲𑁆𑀲𑀸 𑀅𑀝𑁆𑀞𑀓𑀣𑀸𑀬 𑀓𑀭𑀡𑀧𑁆𑀧𑀓𑀸𑀭𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀧𑀦𑁂𑀢𑁆𑀯𑀸𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀢𑀢𑁄 𑀫𑀽𑀮𑀝𑁆𑀞𑀓𑀣𑀸𑀢𑁄 𑀲𑀻𑀳𑀴𑀪𑀸𑀲𑀁 𑀅𑀧𑀦𑁂𑀢𑁆𑀯𑀸 𑀧𑁄𑀢𑁆𑀣𑀓𑁂 𑀅𑀦𑀸𑀭𑁄𑀧𑀺𑀢𑀪𑀸𑀯𑁂𑀦 𑀦𑀺𑀭𑀗𑁆𑀓𑀭𑀺𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄, 𑀏𑀢𑁂𑀦 𑀅𑀬𑀁 𑀯𑀓𑁆𑀔𑀫𑀸𑀦𑀸 𑀅𑀝𑁆𑀞𑀓𑀣𑀸 𑀲𑀗𑁆𑀕𑀻𑀢𑀺𑀢𑁆𑀢𑀬𑀫𑀸𑀭𑁄𑀧𑀺𑀢𑀸𑀬 𑀫𑀽𑀮𑀝𑁆𑀞𑀓𑀣𑀸𑀬 𑀲𑀻𑀳𑀴𑀪𑀸𑀲𑀸𑀧𑀦𑀬𑀦𑀫𑀢𑁆𑀢𑀫𑀜𑁆𑀜𑀢𑁆𑀭 𑀅𑀢𑁆𑀣𑀢𑁄 𑀲𑀁𑀲𑀦𑁆𑀤𑀢𑀺 𑀘𑁂𑀯 𑀲𑀫𑁂𑀢𑀺 𑀘 𑀬𑀣𑀸 ‘‘𑀕𑀗𑁆𑀕𑁄𑀤𑀓𑁂𑀦 𑀬𑀫𑀼𑀦𑁄𑀤𑀓’’𑀦𑁆𑀢𑀺 𑀤𑀲𑁆𑀲𑁂𑀢𑀺. ‘‘𑀫𑀦𑁄𑀭𑀫’’ 𑀫𑀺𑀘𑁆𑀘𑀸𑀤𑀻𑀦𑀺 ‘‘𑀪𑀸𑀲’’𑀦𑁆𑀢𑀺 𑀏𑀢𑀲𑁆𑀲 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀪𑀸𑀯𑀤𑀻𑀧𑀓𑀸𑀦𑀺 𑀯𑀺𑀲𑁂𑀲𑀦𑀸𑀦𑀺. 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀪𑀸𑀯𑁂𑀦 𑀳𑀺 𑀧𑀡𑁆𑀟𑀺𑀢𑀸𑀦𑀁 𑀫𑀦𑀁 𑀭𑀫𑀬𑀢𑀻𑀢𑀺 𑀫𑀦𑁄𑀭𑀫𑀸. 𑀢𑀦𑁄𑀢𑀺 𑀅𑀢𑁆𑀣𑀫𑁂𑀢𑀸𑀬, 𑀢𑀦𑀻𑀬𑀢𑀺 𑀯𑀸 𑀅𑀢𑁆𑀣𑀯𑀲𑁂𑀦 𑀯𑀺𑀯𑀭𑀻𑀬𑀢𑀺, 𑀯𑀝𑁆𑀝𑀢𑁄 𑀯𑀸 𑀲𑀢𑁆𑀢𑁂 𑀢𑀸𑀭𑁂𑀢𑀺, 𑀦𑀸𑀦𑀸𑀢𑁆𑀣𑀯𑀺𑀲𑀬𑀁 𑀯𑀸 𑀓𑀗𑁆𑀔𑀁 𑀢𑀭𑀦𑁆𑀢𑀺 𑀏𑀢𑀸𑀬𑀸𑀢𑀺 𑀢𑀦𑁆𑀢𑀺, 𑀧𑀸𑀴𑀺. 𑀢𑀲𑁆𑀲𑀸 𑀦𑀬𑀲𑀗𑁆𑀔𑀸𑀢𑀸𑀬 𑀕𑀢𑀺𑀬𑀸 𑀙𑀯𑀺𑀁 𑀙𑀸𑀬𑀁 𑀅𑀦𑀼𑀕𑀢𑀸𑀢𑀺 𑀢𑀦𑁆𑀢𑀺𑀦𑀬𑀸𑀦𑀼𑀘𑁆𑀙𑀯𑀺𑀓𑀸. 𑀅𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀪𑀸𑀲𑀦𑁆𑀢𑀭𑀲𑀁𑀓𑀺𑀡𑁆𑀡𑀤𑁄𑀲𑀯𑀺𑀭𑀳𑀺𑀢𑀢𑀸𑀬 𑀯𑀺𑀕𑀢𑀤𑁄𑀲𑀸, 𑀢𑀸𑀤𑀺𑀲𑀁 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀪𑀽𑀢𑀁 𑁋

‘‘𑀲𑀸 𑀫𑀸𑀕𑀥𑀻 𑀫𑀽𑀮𑀪𑀸𑀲𑀸, 𑀦𑀭𑀸 𑀬𑀸𑀬𑀸’𑀤𑀺𑀓𑀧𑁆𑀧𑀺𑀓𑀸;

𑀩𑁆𑀭𑀳𑁆𑀫𑀸𑀦𑁄 𑀘𑀲𑁆𑀲𑀼𑀢𑀸𑀮𑀸𑀧𑀸, 𑀲𑀫𑁆𑀩𑀼𑀤𑁆𑀥𑀸 𑀘𑀸𑀧𑀺 𑀪𑀸𑀲𑀭𑁂’’𑀢𑀺. 𑁋

𑀯𑀼𑀢𑁆𑀢𑀁 𑀧𑀸𑀴𑀺𑀕𑀢𑀺𑀪𑀸𑀲𑀁 𑀧𑁄𑀢𑁆𑀣𑀓𑁂 𑀮𑀺𑀔𑀦𑀯𑀲𑁂𑀦 𑀆𑀭𑁄𑀧𑁂𑀦𑁆𑀢𑁄𑀢𑀺 𑀅𑀢𑁆𑀣𑁄, 𑀇𑀫𑀺𑀦𑀸 𑀲𑀤𑁆𑀤𑀤𑁄𑀲𑀸𑀪𑀸𑀯𑀫𑀸𑀳.

𑀲𑀫𑀬𑀁 𑀅𑀯𑀺𑀮𑁄𑀫𑁂𑀦𑁆𑀢𑁄𑀢𑀺 𑀲𑀺𑀤𑁆𑀥𑀦𑁆𑀢𑀫𑀯𑀺𑀭𑁄𑀥𑁂𑀦𑁆𑀢𑁄, 𑀇𑀫𑀺𑀦𑀸 𑀧𑀦 𑀅𑀢𑁆𑀣𑀤𑁄𑀲𑀸𑀪𑀸𑀯𑀫𑀸𑀳. 𑀅𑀯𑀺𑀭𑀼𑀤𑁆𑀥𑀢𑁆𑀢𑀸 𑀏𑀯 𑀳𑀺 𑀢𑁂 𑀣𑁂𑀭𑀯𑀸𑀤𑀸𑀧𑀺 𑀇𑀥 𑀧𑀓𑀸𑀲𑀬𑀺𑀲𑁆𑀲𑀦𑁆𑀢𑀺. 𑀓𑁂𑀲𑀁 𑀧𑀦 𑀲𑀫𑀬𑀦𑁆𑀢𑀺 𑀆𑀳 ‘‘𑀣𑁂𑀭𑀸𑀦’’𑀦𑁆𑀢𑀺𑀆𑀤𑀺, 𑀏𑀢𑁂𑀦 𑀭𑀸𑀳𑀼𑀮𑀸𑀘𑀭𑀺𑀬𑀸𑀤𑀻𑀦𑀁 𑀚𑁂𑀢𑀯𑀦𑀯𑀸𑀲𑀻𑀅𑀪𑀬𑀕𑀺𑀭𑀺𑀯𑀸𑀲𑀻𑀦𑀺𑀓𑀸𑀬𑀸𑀦𑀁 𑀲𑀫𑀬𑀁 𑀦𑀺𑀯𑀢𑁆𑀢𑁂𑀢𑀺. 𑀣𑀺𑀭𑁂𑀳𑀺 𑀲𑀻𑀮𑀲𑀼𑀢𑀛𑀸𑀦𑀯𑀺𑀫𑀼𑀢𑁆𑀢𑀺𑀲𑀗𑁆𑀔𑀸𑀢𑁂𑀳𑀺 𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀢𑀺 𑀣𑁂𑀭𑀸. 𑀬𑀣𑀸𑀳 ‘‘𑀘𑀢𑁆𑀢𑀸𑀭𑁄𑀫𑁂 𑀪𑀺𑀓𑁆𑀔𑀯𑁂 𑀣𑁂𑀭𑀓𑀭𑀡𑀸 𑀥𑀫𑁆𑀫𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼 𑀲𑀻𑀮𑀯𑀸 𑀳𑁄𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁪.𑁨𑁨). 𑀅𑀧𑀺𑀘 𑀲𑀘𑁆𑀘𑀥𑀫𑁆𑀫𑀸𑀤𑀻𑀳𑀺 𑀣𑀺𑀭𑀓𑀭𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀣𑁂𑀭𑀸. 𑀬𑀣𑀸𑀳 𑀥𑀫𑁆𑀫𑀭𑀸𑀚𑀸 𑀥𑀫𑁆𑀫𑀧𑀤𑁂 𑁋

‘‘𑀬𑀫𑁆𑀳𑀺 𑀲𑀘𑁆𑀘𑀜𑁆𑀘 𑀥𑀫𑁆𑀫𑁄 𑀘, 𑀅𑀳𑀺𑀁𑀲𑀸 𑀲𑀁𑀬𑀫𑁄 𑀤𑀫𑁄;

𑀲 𑀯𑁂 𑀯𑀦𑁆𑀢𑀫𑀮𑁄 𑀥𑀻𑀭𑁄, ‘𑀣𑁂𑀭𑁄’𑀇𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺. (𑀥. 𑀧. 𑁨𑁬𑁦);

𑀢𑁂𑀲𑀁. 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀸𑀤𑀻𑀳𑀺 𑀆𑀕𑀢𑀸 𑀆𑀘𑀭𑀺𑀬𑀧𑀭𑀫𑁆𑀧𑀭𑀸 𑀣𑁂𑀭𑀯𑀁𑀲𑁄, 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀸 𑀳𑀼𑀢𑁆𑀯𑀸 𑀆𑀕𑀫𑀸𑀥𑀺𑀕𑀫𑀲𑀫𑁆𑀧𑀦𑁆𑀦𑀢𑁆𑀢𑀸 𑀧𑀜𑁆𑀜𑀸𑀧𑀚𑁆𑀚𑁄𑀢𑁂𑀦 𑀢𑀲𑁆𑀲 𑀲𑀫𑀼𑀚𑁆𑀚𑀮𑀦𑀢𑁄 𑀢𑀁 𑀧𑀓𑀸𑀭𑁂𑀦 𑀤𑀻𑀧𑁂𑀦𑁆𑀢𑀺, 𑀢𑀲𑁆𑀫𑀺𑀁 𑀯𑀸 𑀧𑀤𑀻𑀧𑀲𑀤𑀺𑀲𑀸𑀢𑀺 𑀣𑁂𑀭𑀯𑀁𑀲𑀧𑀤𑀺𑀧𑀸. 𑀯𑀺𑀯𑀺𑀥𑁂𑀦 𑀆𑀓𑀸𑀭𑁂𑀦 𑀦𑀺𑀘𑁆𑀙𑀻𑀬𑀢𑀻𑀢𑀺 𑀯𑀺𑀦𑀺𑀘𑁆𑀙𑀬𑁄, 𑀕𑀡𑁆𑀞𑀺𑀝𑁆𑀞𑀸𑀦𑁂𑀲𑀼 𑀔𑀻𑀮𑀫𑀤𑁆𑀤𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸 𑀯𑀺𑀫𑀢𑀺𑀘𑁆𑀙𑁂𑀤𑀦𑀻𑀓𑀣𑀸, 𑀲𑀼𑀝𑁆𑀞𑀼 𑀦𑀺𑀧𑀼𑀡𑁄 𑀲𑀡𑁆𑀳𑁄 𑀯𑀺𑀦𑀺𑀘𑁆𑀙𑀬𑁄 𑀏𑀢𑁂𑀲𑀦𑁆𑀢𑀺 𑀲𑀼𑀦𑀺𑀧𑀼𑀡𑀯𑀺𑀦𑀺𑀘𑁆𑀙𑀬𑀸. 𑀅𑀣 𑀯𑀸 𑀯𑀺𑀦𑀺𑀘𑁆𑀙𑀺𑀦𑁄𑀢𑀻𑀢𑀺 𑀯𑀺𑀦𑀺𑀘𑁆𑀙𑀬𑁄, 𑀬𑀣𑀸𑀯𑀼𑀢𑁆𑀢𑀯𑀺𑀲𑀬𑀁 𑀜𑀸𑀡𑀁, 𑀲𑀼𑀝𑁆𑀞𑀼 𑀦𑀺𑀧𑀼𑀡𑁄 𑀙𑁂𑀓𑁄 𑀯𑀺𑀦𑀺𑀘𑁆𑀙𑀬𑁄 𑀏𑀢𑁂𑀲𑀦𑁆𑀢𑀺 𑀲𑀼𑀦𑀺𑀧𑀼𑀡𑀯𑀺𑀦𑀺𑀘𑁆𑀙𑀬𑀸. 𑀫𑀳𑀸𑀫𑁂𑀖𑀯𑀦𑁂 𑀞𑀺𑀢𑁄 𑀯𑀺𑀳𑀸𑀭𑁄 𑀫𑀳𑀸𑀯𑀺𑀳𑀸𑀭𑁄, 𑀬𑁄 𑀲𑀢𑁆𑀣𑀼 𑀫𑀳𑀸𑀩𑁄𑀥𑀺𑀦𑀸 𑀯𑀺𑀭𑁄𑀘𑀢𑀺, 𑀢𑀲𑁆𑀫𑀺𑀁 𑀯𑀲𑀦𑀲𑀻𑀮𑀸 𑀫𑀳𑀸𑀯𑀺𑀳𑀸𑀭𑀯𑀸𑀲𑀺𑀦𑁄, 𑀢𑀸𑀤𑀺𑀲𑀸𑀦𑀁 𑀲𑀫𑀬𑀁 𑀅𑀯𑀺𑀮𑁄𑀫𑁂𑀦𑁆𑀢𑁄𑀢𑀺 𑀅𑀢𑁆𑀣𑁄, 𑀏𑀢𑁂𑀦 𑀫𑀳𑀸𑀓𑀲𑁆𑀲𑀧𑀸𑀤𑀺𑀣𑁂𑀭𑀧𑀭𑀫𑁆𑀧𑀭𑀸𑀕𑀢𑁄, 𑀢𑀢𑁄𑀬𑁂𑀯 𑀅𑀯𑀺𑀧𑀭𑀺𑀢𑁄 𑀲𑀡𑁆𑀳𑀲𑀼𑀔𑀼𑀫𑁄 𑀯𑀺𑀦𑀺𑀘𑁆𑀙𑀬𑁄𑀢𑀺 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 𑀲𑀫𑀬𑀲𑁆𑀲 𑀧𑀫𑀸𑀡𑀪𑀽𑀢𑀢𑀁 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀯𑀲𑁂𑀦 𑀤𑀲𑁆𑀲𑁂𑀢𑀺.

𑀳𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀪𑀢𑀫𑀢𑁆𑀣𑀦𑁆𑀢𑀺 𑀏𑀓𑀢𑁆𑀣 𑀯𑀼𑀢𑀫𑁆𑀧𑀺 𑀧𑀼𑀦 𑀅𑀜𑁆𑀜𑀢𑁆𑀣 𑀆𑀪𑀢𑀫𑀢𑁆𑀣𑀁 𑀧𑀼𑀦𑀭𑀼𑀢𑁆𑀢𑀺𑀪𑀸𑀯𑀢𑁄, 𑀕𑀦𑁆𑀣𑀕𑀭𑀼𑀓𑀪𑀸𑀯𑀢𑁄 𑀘 𑀘𑀚𑀺𑀢𑁆𑀯𑀸 𑀢𑀲𑁆𑀲 𑀆𑀕𑀫𑀯𑀭𑀲𑁆𑀲 𑀅𑀢𑁆𑀣𑀁 𑀧𑀓𑀸𑀲𑀬𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄.

𑀏𑀯𑀁 𑀓𑀭𑀡𑀧𑁆𑀧𑀓𑀸𑀭𑀫𑁆𑀧𑀺 𑀤𑀲𑁆𑀲𑁂𑀢𑁆𑀯𑀸 ‘‘𑀤𑀻𑀧𑀯𑀸𑀲𑀻𑀦𑀫𑀢𑁆𑀣𑀸𑀬𑀸’’𑀢𑀺 𑀯𑀼𑀢𑁆𑀢𑀧𑁆𑀧𑀬𑁄𑀚𑀦𑀢𑁄 𑀅𑀜𑁆𑀜𑀫𑁆𑀧𑀺 𑀲𑀁𑀯𑀡𑁆𑀡𑀦𑀸𑀬 𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀼𑀚𑀦𑀲𑁆𑀲 𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀼𑀚𑀦𑀲𑁆𑀲 𑀘𑀸𑀢𑀺 𑀘-𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀢𑁆𑀣𑁄, 𑀢𑁂𑀦 𑀦 𑀓𑁂𑀯𑀮𑀁 𑀚𑀫𑁆𑀩𑀼𑀤𑀻𑀧𑀯𑀸𑀲𑀻𑀦𑀫𑁂𑀯 𑀅𑀢𑁆𑀣𑀸𑀬, 𑀅𑀣 𑀔𑁄 𑀲𑀸𑀥𑀼𑀚𑀦𑀢𑁄𑀲𑀦𑀢𑁆𑀣𑀜𑁆𑀘𑀸𑀢𑀺 𑀲𑀫𑀼𑀘𑁆𑀘𑀺𑀦𑁄𑀢𑀺. 𑀢𑁂𑀦𑁂𑀯 𑀘 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀯𑀸𑀲𑀻𑀦𑀫𑁆𑀧𑀺 𑀅𑀢𑁆𑀣𑀸𑀬𑀸𑀢𑀺 𑀅𑀬𑀫𑀢𑁆𑀣𑁄 𑀲𑀺𑀤𑁆𑀥𑁄 𑀳𑁄𑀢𑀺 𑀉𑀕𑁆𑀕𑀳𑀡𑀸𑀤𑀺𑀲𑀼𑀓𑀭𑀢𑀸𑀬 𑀢𑁂𑀲𑀫𑁆𑀧𑀺 𑀩𑀳𑀽𑀧𑀓𑀸𑀭𑀢𑁆𑀢𑀸. 𑀘𑀺𑀭𑀝𑁆𑀞𑀺𑀢𑀢𑁆𑀣𑀜𑁆𑀘𑀸𑀢𑀺 𑀏𑀢𑁆𑀣𑀸𑀧𑀺 𑀘-𑀲𑀤𑁆𑀤𑁄 𑀦 𑀓𑁂𑀯𑀮𑀁 𑀢𑀤𑀼𑀪𑀬𑀢𑁆𑀣𑀫𑁂𑀯, 𑀅𑀧𑀺 𑀢𑀼 𑀢𑀺𑀯𑀺𑀥𑀲𑁆𑀲𑀸𑀧𑀺 𑀲𑀸𑀲𑀦𑀥𑀫𑁆𑀫𑀲𑁆𑀲, 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑁆𑀲 𑀯𑀸 𑀧𑀜𑁆𑀘𑀯𑀲𑁆𑀲𑀲𑀳𑀲𑁆𑀲𑀧𑀭𑀺𑀫𑀸𑀡𑀁 𑀘𑀺𑀭𑀓𑀸𑀮𑀁 𑀞𑀺𑀢𑀢𑁆𑀣𑀜𑁆𑀘𑀸𑀢𑀺 𑀲𑀫𑀼𑀘𑁆𑀘𑀬𑀢𑁆𑀣𑀫𑁂𑀯 𑀤𑀲𑁆𑀲𑁂𑀢𑀺. 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑁆𑀲 𑀳𑀺 𑀞𑀺𑀢𑀺𑀬𑀸 𑀧𑀝𑀺𑀧𑀢𑁆𑀢𑀺𑀥𑀫𑁆𑀫𑀧𑀝𑀺𑀯𑁂𑀥𑀥𑀫𑁆𑀫𑀸𑀦𑀫𑁆𑀧𑀺 𑀞𑀺𑀢𑀺 𑀳𑁄𑀢𑀺 𑀢𑀲𑁆𑀲𑁂𑀯 𑀢𑁂𑀲𑀁 𑀫𑀽𑀮𑀪𑀸𑀯𑀢𑁄. 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄 𑀧𑀦 𑀲𑀼𑀦𑀺𑀓𑁆𑀔𑀺𑀢𑁆𑀢𑁂𑀦 𑀧𑀤𑀩𑁆𑀬𑀜𑁆𑀚𑀦𑁂𑀦, 𑀢𑀤𑀢𑁆𑀣𑁂𑀦 𑀘 𑀘𑀺𑀭𑀁 𑀲𑀫𑁆𑀫𑀸 𑀧𑀢𑀺𑀝𑁆𑀞𑀸𑀢𑀺, 𑀲𑀁𑀯𑀡𑁆𑀡𑀦𑀸𑀬 𑀘 𑀧𑀤𑀩𑁆𑀬𑀜𑁆𑀚𑀦𑀁 𑀅𑀯𑀺𑀧𑀭𑀻𑀢𑀁 𑀲𑀼𑀦𑀺𑀓𑁆𑀔𑀺𑀢𑁆𑀢𑀁, 𑀢𑀤𑀢𑁆𑀣𑁄𑀧𑀺 𑀅𑀯𑀺𑀧𑀭𑀻𑀢𑁄 𑀲𑀼𑀦𑀺𑀓𑁆𑀔𑀺𑀢𑁆𑀢𑁄 𑀳𑁄𑀢𑀺, 𑀢𑀲𑁆𑀫𑀸 𑀲𑀁𑀯𑀡𑁆𑀡𑀦𑀸𑀬 𑀅𑀯𑀺𑀧𑀭𑀻𑀢𑀲𑁆𑀲 𑀧𑀤𑀩𑁆𑀬𑀜𑁆𑀚𑀦𑀲𑁆𑀲, 𑀢𑀤𑀢𑁆𑀣𑀲𑁆𑀲 𑀘 𑀲𑀼𑀦𑀺𑀓𑁆𑀔𑀺𑀢𑁆𑀢𑀲𑁆𑀲 𑀉𑀧𑀸𑀬𑀪𑀸𑀯𑀫𑀼𑀧𑀸𑀤𑀸𑀬 𑀯𑀼𑀢𑁆𑀢𑀁 ‘‘𑀘𑀺𑀭𑀝𑁆𑀞𑀺𑀢𑀢𑁆𑀣𑀜𑁆𑀘 𑀥𑀫𑁆𑀫𑀲𑁆𑀲𑀸’’𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀤𑁆𑀯𑁂𑀫𑁂 𑀪𑀺𑀓𑁆𑀔𑀯𑁂 𑀥𑀫𑁆𑀫𑀸 𑀲𑀤𑁆𑀥𑀫𑁆𑀫𑀲𑁆𑀲 𑀞𑀺𑀢𑀺𑀬𑀸 𑀅𑀲𑀫𑁆𑀫𑁄𑀲𑀸𑀬 𑀅𑀦𑀦𑁆𑀢𑀭𑀥𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀤𑁆𑀯𑁂? 𑀲𑀼𑀦𑀺𑀓𑁆𑀔𑀺𑀢𑁆𑀢𑀜𑁆𑀘 𑀧𑀤𑀩𑁆𑀬𑀜𑁆𑀚𑀦𑀁, 𑀅𑀢𑁆𑀣𑁄 𑀘 𑀲𑀼𑀦𑀻𑀢𑁄, 𑀇𑀫𑁂 𑀔𑁄…𑀧𑁂… 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁨.𑁨𑁧).

𑀏𑀯𑀁 𑀧𑀬𑁄𑀚𑀦𑀫𑁆𑀧𑀺 𑀤𑀲𑁆𑀲𑁂𑀢𑁆𑀯𑀸 𑀯𑀓𑁆𑀔𑀫𑀸𑀦𑀸𑀬 𑀲𑀁𑀯𑀡𑁆𑀡𑀦𑀸𑀬 𑀫𑀳𑀢𑁆𑀢𑀧𑀭𑀺𑀘𑁆𑀘𑀸𑀕𑁂𑀦 𑀕𑀦𑁆𑀣𑀕𑀭𑀼𑀓𑀪𑀸𑀯𑀁 𑀧𑀭𑀺𑀳𑀭𑀺𑀢𑀼𑀫𑀸𑀳 ‘‘𑀲𑀻𑀮𑀓𑀣𑀸’’𑀢𑀺𑀆𑀤𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀦 𑀢𑀁 𑀯𑀺𑀘𑀭𑀬𑀺𑀲𑁆𑀲𑀸𑀫𑀻’’𑀢𑀺. 𑀅𑀧𑀭𑁄 𑀦𑀬𑁄 𑁋 𑀬𑀤𑀝𑁆𑀞𑀓𑀣𑀁 𑀓𑀢𑁆𑀢𑀼𑀓𑀸𑀫𑁄, 𑀢𑀤𑁂𑀓𑀤𑁂𑀲𑀪𑀸𑀯𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄 𑀕𑀳𑁂𑀢𑀩𑁆𑀩𑁄𑀢𑀺 𑀓𑀣𑀺𑀓𑀸𑀦𑀁 𑀉𑀧𑀤𑁂𑀲𑀁 𑀓𑀭𑁄𑀦𑁆𑀢𑁄 𑀢𑀢𑁆𑀣 𑀯𑀺𑀘𑀸𑀭𑀺𑀢𑀥𑀫𑁆𑀫𑁂 𑀉𑀤𑁆𑀤𑁂𑀲𑀯𑀲𑁂𑀦 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀲𑀻𑀮𑀓𑀣𑀸’’𑀢𑀺𑀆𑀤𑀺. 𑀢𑀢𑁆𑀣 𑀲𑀻𑀮𑀓𑀣𑀸𑀢𑀺 𑀘𑀸𑀭𑀺𑀢𑁆𑀢𑀯𑀸𑀭𑀺𑀢𑁆𑀢𑀸𑀤𑀺𑀯𑀲𑁂𑀦 𑀲𑀻𑀮𑀯𑀺𑀢𑁆𑀣𑀸𑀭𑀓𑀣𑀸. 𑀥𑀼𑀢𑀥𑀫𑁆𑀫𑀸𑀢𑀺 𑀧𑀺𑀡𑁆𑀟𑀧𑀸𑀢𑀺𑀓𑀗𑁆𑀕𑀸𑀤𑀬𑁄 𑀢𑁂𑀭𑀲 𑀓𑀺𑀮𑁂𑀲𑀥𑀼𑀦𑀦𑀓𑀥𑀫𑁆𑀫𑀸. 𑀓𑀫𑁆𑀫𑀝𑁆𑀞𑀸𑀦𑀸𑀦𑀻𑀢𑀺 𑀪𑀸𑀯𑀦𑀸𑀲𑀗𑁆𑀔𑀸𑀢𑀲𑁆𑀲 𑀬𑁄𑀕𑀓𑀫𑁆𑀫𑀲𑁆𑀲 𑀧𑀯𑀢𑁆𑀢𑀺𑀝𑁆𑀞𑀸𑀦𑀢𑁆𑀢𑀸 𑀓𑀫𑁆𑀫𑀝𑁆𑀞𑀸𑀦𑀦𑀸𑀫𑀸𑀦𑀺 𑀥𑀫𑁆𑀫𑀚𑀸𑀢𑀸𑀦𑀺. 𑀢𑀸𑀦𑀺 𑀧𑀦 𑀧𑀸𑀴𑀺𑀬𑀫𑀸𑀕𑀢𑀸𑀦𑀺 𑀅𑀝𑁆𑀞𑀢𑀺𑀁 𑀲𑁂𑀯 𑀦 𑀕𑀳𑁂𑀢𑀩𑁆𑀩𑀸𑀦𑀺, 𑀅𑀣 𑀔𑁄 𑀅𑀝𑁆𑀞𑀓𑀣𑀸𑀬𑀫𑀸𑀕𑀢𑀸𑀦𑀺𑀧𑀺 𑀤𑁆𑀯𑁂𑀢𑀺 𑀜𑀸𑀧𑁂𑀢𑀼𑀁 ‘‘𑀲𑀩𑁆𑀩𑀸𑀦𑀺𑀧𑀻’’𑀢𑀺 𑀯𑀼𑀢𑁆𑀢𑀁. 𑀘𑀭𑀺 𑀬𑀸𑀯𑀺𑀥𑀸𑀦𑀲𑀳𑀺𑀢𑁄𑀢𑀺 𑀭𑀸𑀕𑀘𑀭𑀺𑀢𑀸𑀤𑀻𑀦𑀁 𑀲𑀪𑀸𑀯𑀸𑀤𑀺𑀯𑀺𑀥𑀸𑀦𑁂𑀦 𑀲𑀳 𑀧𑀯𑀢𑁆𑀢𑁄, 𑀇𑀤𑀁 𑀧𑀦 ‘‘𑀛𑀸𑀦𑀲𑀫𑀸𑀧𑀢𑁆𑀢𑀺𑀯𑀺𑀢𑁆𑀣𑀸𑀭𑁄’’𑀢𑀺 𑀇𑀫𑀲𑁆𑀲 𑀯𑀺𑀲𑁂𑀲𑀦𑀁. 𑀏𑀢𑁆𑀣 𑀘 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺 𑀛𑀸𑀦𑀁, 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺 𑀲𑀫𑀸𑀧𑀢𑁆𑀢𑀺. 𑀢𑀤𑀼𑀪𑀬𑀫𑁆𑀧𑀺 𑀯𑀸 𑀧𑀝𑀺𑀮𑀤𑁆𑀥𑀫𑀢𑁆𑀢𑀁 𑀛𑀸𑀦𑀁, 𑀲𑀫𑀸𑀧𑀚𑁆𑀚𑀦𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑀁 𑀲𑀫𑀸𑀧𑀢𑁆𑀢𑀺. 𑀅𑀧𑀺𑀘 𑀢𑀤𑀧𑀺 𑀉𑀪𑀬𑀁 𑀛𑀸𑀦𑀫𑁂𑀯, 𑀨𑀮𑀲𑀫𑀸𑀧𑀢𑁆𑀢𑀺𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑁄 𑀧𑀦 𑀲𑀫𑀸𑀧𑀢𑁆𑀢𑀺, 𑀢𑀸𑀲𑀁 𑀯𑀺𑀢𑁆𑀣𑀸𑀭𑁄𑀢𑀺 𑀅𑀢𑁆𑀣𑁄.

𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀪𑁂𑀤𑀸𑀦𑀁 𑀙𑀦𑁆𑀦𑀫𑁆𑀧𑀺 𑀅𑀪𑀺𑀜𑁆𑀜𑀸𑀦𑀁 𑀕𑀳𑀡𑀢𑁆𑀣𑀁 ‘‘𑀲𑀩𑁆𑀩𑀸 𑀘 𑀅𑀪𑀺𑀜𑁆𑀜𑀸𑀬𑁄’’𑀢𑀺 𑀯𑀼𑀢𑁆𑀢𑀁. 𑀜𑀸𑀡𑀯𑀺𑀪𑀗𑁆𑀕𑀸𑀤𑀻𑀲𑀼 (𑀯𑀺𑀪. 𑁭𑁫𑁧) 𑀆𑀕𑀢𑀦𑀬𑁂𑀦 𑀏𑀓𑀯𑀺𑀥𑀸𑀤𑀺𑀦𑀸 𑀪𑁂𑀤𑁂𑀦 𑀧𑀜𑁆𑀜𑀸𑀬 𑀲𑀗𑁆𑀓𑀮𑀬𑀺𑀢𑁆𑀯𑀸 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸, 𑀕𑀡𑁂𑀢𑁆𑀯𑀸 𑀯𑀸 𑀯𑀺𑀦𑀺𑀘𑁆𑀙𑀬𑀦𑀁 𑀧𑀜𑁆𑀜𑀸𑀲𑀗𑁆𑀓𑀮𑀦𑀯𑀺𑀦𑀺𑀘𑁆𑀙𑀬𑁄. 𑀅𑀭𑀺𑀬𑀸𑀦𑀻𑀢𑀺 𑀩𑀼𑀤𑁆𑀥𑀸𑀤𑀻𑀳𑀺 𑀅𑀭𑀺𑀬𑁂𑀳𑀺 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀢𑁆𑀢𑀸, 𑀅𑀭𑀺𑀬𑀪𑀸𑀯𑀲𑀸𑀥𑀓𑀢𑁆𑀢𑀸 𑀯𑀸 𑀅𑀭𑀺𑀬𑀸𑀦𑀺 𑀉𑀢𑁆𑀢𑀭𑀧𑀤𑀮𑁄𑀧𑁂𑀦. 𑀅𑀯𑀺𑀢𑀣𑀪𑀸𑀯𑁂𑀦 𑀯𑀸 𑀅𑀭𑀡𑀻𑀬𑀢𑁆𑀢𑀸, 𑀅𑀯𑀕𑀦𑁆𑀢𑀩𑁆𑀩𑀢𑁆𑀢𑀸 𑀅𑀭𑀺𑀬𑀸𑀦𑀺, ‘‘𑀲𑀘𑁆𑀘𑀸𑀦𑀻’’𑀢𑀺𑀫𑀲𑁆𑀲 𑀯𑀺𑀲𑁂𑀲𑀦𑀁.

𑀳𑁂𑀢𑀸𑀤𑀺𑀧𑀘𑁆𑀘𑀬𑀥𑀫𑁆𑀫𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑀸𑀤𑀺𑀪𑀸𑀯𑁂𑀦 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀸𑀦𑀫𑀼𑀧𑀓𑀸𑀭𑀓𑀢𑀸 𑀧𑀘𑁆𑀘𑀬𑀸𑀓𑀸𑀭𑁄, 𑀢𑀲𑁆𑀲 𑀤𑁂𑀲𑀦𑀸 𑀢𑀣𑀸, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀣𑀸𑀢𑀺 𑀅𑀢𑁆𑀣𑁄. 𑀲𑀸 𑀧𑀦 𑀦𑀺𑀓𑀸𑀬𑀦𑁆𑀢𑀭𑀮𑀤𑁆𑀥𑀺𑀲𑀗𑁆𑀓𑀭𑀭𑀳𑀺𑀢𑀢𑀸𑀬 𑀲𑀼𑀝𑁆𑀞𑀼 𑀧𑀭𑀺𑀲𑀼𑀤𑁆𑀥𑀸, 𑀖𑀦𑀯𑀺𑀦𑀺𑀩𑁆𑀪𑁄𑀕𑀲𑁆𑀲 𑀘 𑀲𑀼𑀤𑀼𑀓𑁆𑀓𑀭𑀢𑀸𑀬 𑀦𑀺𑀧𑀼𑀡𑀸, 𑀏𑀓𑀢𑁆𑀢𑀸𑀤𑀺𑀦𑀬𑀲𑀳𑀺𑀢𑀸 𑀘 𑀢𑀢𑁆𑀣 𑀯𑀺𑀘𑀸𑀭𑀺𑀢𑀸𑀢𑀺 𑀆𑀳 ‘‘𑀲𑀼𑀧𑀭𑀺𑀲𑀼𑀤𑁆𑀥𑀦𑀺𑀧𑀼𑀡𑀦𑀬𑀸’’𑀢𑀺. 𑀧𑀤𑀢𑁆𑀢𑀬𑀫𑁆𑀧𑀺 𑀳𑁂𑀢𑀁 𑀧𑀘𑁆𑀘𑀬𑀸𑀓𑀸𑀭𑀤𑁂𑀲𑀦𑀸𑀬 𑀯𑀺𑀲𑁂𑀲𑀦𑀁. 𑀧𑀝𑀺𑀲𑀫𑁆𑀪𑀺𑀤𑀸𑀤𑀻𑀲𑀼 𑀆𑀕𑀢𑀦𑀬𑀁 𑀅𑀯𑀺𑀲𑁆𑀲𑀚𑁆𑀚𑀺𑀢𑁆𑀯𑀸𑀯 𑀯𑀺𑀘𑀸𑀭𑀺𑀢𑀢𑁆𑀢𑀸 𑀅𑀯𑀺𑀫𑀼𑀢𑁆𑀢𑁄 𑀢𑀦𑁆𑀢𑀺𑀫𑀕𑁆𑀕𑁄 𑀬𑀲𑁆𑀲𑀸𑀢𑀺 𑀅𑀯𑀺𑀫𑀼𑀢𑁆𑀢𑀢𑀦𑁆𑀢𑀺 𑀫𑀕𑁆𑀕𑀸. 𑀫𑀕𑁆𑀕𑁄𑀢𑀺 𑀘𑁂𑀢𑁆𑀣 𑀧𑀸𑀴𑀺𑀲𑀗𑁆𑀔𑀸𑀢𑁄 𑀉𑀧𑀸𑀬𑁄 𑀢𑀁𑀢𑀤𑀢𑁆𑀣𑀸𑀦𑀁 𑀅𑀯𑀩𑁄𑀥𑀲𑁆𑀲, 𑀲𑀘𑁆𑀘𑀧𑀝𑀺𑀯𑁂𑀥𑀲𑁆𑀲 𑀯𑀸 𑀉𑀧𑀸𑀬𑀪𑀸𑀯𑀢𑁄. 𑀧𑀩𑀦𑁆𑀥𑁄 𑀯𑀸 𑀤𑀻𑀖𑀪𑀸𑀯𑁂𑀦 𑀧𑀓𑀢𑀺𑀫𑀕𑁆𑀕𑀲𑀤𑀺𑀲𑀢𑁆𑀢𑀸, 𑀇𑀤𑀁 𑀧𑀦 ‘‘𑀯𑀺𑀧𑀲𑁆𑀲𑀦𑀸, 𑀪𑀸𑀯𑀦𑀸’’𑀢𑀺 𑀧𑀤𑀤𑁆𑀯𑀬𑀲𑁆𑀲 𑀯𑀺𑀲𑁂𑀲𑀦𑀁.

𑀇𑀢𑀺 𑀧𑀦 𑀲𑀩𑁆𑀩𑀦𑁆𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀧𑀭𑀺𑀲𑀫𑀸𑀧𑀦𑁂 𑀬𑀣𑀸𑀉𑀤𑁆𑀤𑀺𑀝𑁆𑀞𑀉𑀤𑁆𑀤𑁂𑀲𑀲𑁆𑀲 𑀧𑀭𑀺𑀦𑀺𑀝𑁆𑀞𑀺𑀢𑀢𑁆𑀢𑀸, 𑀏𑀢𑁆𑀢𑀓𑀁 𑀲𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀧𑀦𑀸𑀢𑀺 𑀯𑀘𑀦𑀸𑀮𑀗𑁆𑀓𑀸𑀭𑀫𑀢𑁆𑀢𑀁 𑀯𑀺𑀲𑀼𑀁 𑀅𑀢𑁆𑀣𑀸𑀪𑀸𑀯𑀢𑁄. 𑀧𑀤𑀢𑁆𑀣𑀲𑀁𑀓𑀺𑀡𑁆𑀡𑀲𑁆𑀲, 𑀯𑀢𑁆𑀢𑀩𑁆𑀩𑀲𑁆𑀲 𑀘 𑀅𑀯𑀼𑀢𑁆𑀢𑀲𑁆𑀲 𑀅𑀯𑀲𑁂𑀲𑀲𑁆𑀲 𑀅𑀪𑀸𑀯𑀢𑁄 𑀲𑀼𑀯𑀺𑀜𑁆𑀜𑁂𑀬𑁆𑀬𑀪𑀸𑀯𑁂𑀦 𑀲𑀼𑀧𑀭𑀺𑀲𑀼𑀤𑁆𑀥𑀁, ‘‘𑀲𑀩𑁆𑀩’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄, 𑀪𑀸𑀯𑀦𑀧𑀼𑀁𑀲𑀓𑀁 𑀯𑀸 𑀏𑀢𑀁 ‘‘𑀯𑀼𑀢𑁆𑀢’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀩𑀚𑁆𑀛𑀦𑀢𑁄. 𑀪𑀺𑀬𑁆𑀬𑁄𑀢𑀺 𑀅𑀢𑀺𑀭𑁂𑀓𑀁, 𑀅𑀢𑀺𑀯𑀺𑀢𑁆𑀣𑀸𑀭𑀦𑁆𑀢𑀺 𑀅𑀢𑁆𑀣𑁄, 𑀏𑀢𑁂𑀦 𑀧𑀤𑀢𑁆𑀣𑀫𑀢𑁆𑀢𑀫𑁂𑀯 𑀯𑀺𑀘𑀸𑀭𑀬𑀺𑀲𑁆𑀲𑀸𑀫𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀢𑀁 𑀲𑀩𑁆𑀩𑀁 𑀇𑀥 𑀅𑀝𑁆𑀞𑀓𑀣𑀸𑀬 𑀦 𑀯𑀺𑀘𑀸𑀭𑀬𑀺𑀲𑁆𑀲𑀸𑀫𑀺 𑀧𑀼𑀦𑀭𑀼𑀢𑁆𑀢𑀺𑀪𑀸𑀯𑀢𑁄, 𑀕𑀦𑁆𑀣𑀕𑀭𑀼𑀓𑀪𑀸𑀯𑀢𑁄 𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀘𑀭𑀬𑀺𑀲𑁆𑀲𑀸𑀫𑀻𑀢𑀺 𑀘 𑀕𑀸𑀣𑀸𑀪𑀸𑀯𑀢𑁄 𑀦 𑀯𑀼𑀤𑁆𑀥𑀺𑀪𑀸𑀯𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀏𑀯𑀫𑁆𑀧𑀺 𑀏𑀲 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄 𑀆𑀕𑀫𑀸𑀦𑀫𑀢𑁆𑀣𑀁 𑀦 𑀧𑀓𑀸𑀲𑁂𑀬𑁆𑀬, 𑀅𑀣 𑀲𑀩𑁆𑀩𑁄𑀧𑁂𑀲𑁄 𑀇𑀥 𑀯𑀺𑀘𑀸𑀭𑀺𑀢𑀩𑁆𑀩𑁄𑀬𑁂𑀯𑀸𑀢𑀺 𑀘𑁄𑀤𑀦𑀸𑀬 𑀢𑀣𑀸 𑀅𑀯𑀺𑀘𑀸𑀭𑀡𑀲𑁆𑀲 𑀏𑀓𑀦𑁆𑀢𑀓𑀸𑀭𑀡𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀢𑀁 𑀧𑀭𑀺𑀳𑀭𑀦𑁆𑀢𑁄 ‘‘𑀫𑀚𑁆𑀛𑁂 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀫𑀚𑁆𑀛𑁂𑀢𑀺 𑀔𑀼𑀤𑁆𑀤𑀓𑀢𑁄 𑀅𑀜𑁆𑀜𑁂𑀲𑀁 𑀘𑀢𑀼𑀦𑁆𑀦𑀫𑁆𑀧𑀺 𑀆𑀕𑀫𑀸𑀦𑀁 𑀅𑀩𑁆𑀪𑀦𑁆𑀢𑀭𑁂. 𑀳𑀺-𑀲𑀤𑁆𑀤𑁄 𑀓𑀸𑀭𑀡𑁂, 𑀢𑁂𑀦 𑀬𑀣𑀸𑀯𑀼𑀢𑁆𑀢𑀁 𑀓𑀸𑀭𑀡𑀁 𑀚𑁄𑀢𑁂𑀢𑀺. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀘𑀢𑀽𑀲𑀼 𑀆𑀕𑀫𑁂𑀲𑀼. 𑀬𑀣𑀸𑀪𑀸𑀲𑀺𑀢𑀦𑁆𑀢𑀺 𑀪𑀕𑀯𑀢𑀸 𑀬𑀁 𑀬𑀁 𑀤𑁂𑀲𑀺𑀢𑀁, 𑀤𑁂𑀲𑀺𑀢𑀸𑀦𑀼𑀭𑀽𑀧𑀁 𑀯𑀸. 𑀅𑀧𑀺 𑀘 𑀲𑀁𑀯𑀡𑁆𑀡𑀓𑁂𑀳𑀺 𑀲𑀁𑀯𑀡𑁆𑀡𑀦𑀸𑀯𑀲𑁂𑀦 𑀬𑀁 𑀬𑀁 𑀪𑀸𑀲𑀺𑀢𑀁, 𑀪𑀸𑀲𑀺𑀢𑀸𑀦𑀼𑀭𑀽𑀧𑀦𑁆𑀢𑀺𑀧𑀺 𑀅𑀢𑁆𑀣𑁄. 𑀇𑀘𑁆𑀘𑁂𑀯𑀸𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁂𑀦 𑀬𑀣𑀸𑀯𑀼𑀢𑁆𑀢𑀁 𑀓𑀸𑀭𑀡𑀁 𑀦𑀺𑀤𑀲𑁆𑀲𑁂𑀢𑀺, 𑀇𑀫𑀺𑀦𑀸𑀯 𑀓𑀸𑀭𑀡𑁂𑀦, 𑀇𑀤𑀫𑁂𑀯 𑀯𑀸 𑀓𑀸𑀭𑀡𑀁 𑀫𑀦𑀲𑀺 𑀲𑀦𑁆𑀦𑀺𑀥𑀸𑀬𑀸𑀢𑀺 𑀅𑀢𑁆𑀣𑁄. 𑀓𑀢𑁄𑀢𑀺 𑀏𑀢𑁆𑀣𑀸𑀧𑀺 ‘‘𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄 𑀏𑀲𑀸’’𑀢𑀺 𑀧𑀤𑀁 𑀓𑀫𑁆𑀫𑀪𑀸𑀯𑁂𑀦 𑀲𑀫𑁆𑀩𑀚𑁆𑀛𑀢𑀺 𑀆𑀯𑀼𑀢𑁆𑀢𑀺𑀬𑀸𑀤𑀺𑀦𑀬𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀫𑁆𑀧𑀻𑀢𑀺 𑀢𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀫𑁆𑀧𑀺 𑀜𑀸𑀡𑁂𑀦 𑀕𑀳𑁂𑀢𑁆𑀯𑀸𑀦. 𑀏𑀢𑀸𑀬𑀸𑀢𑀺 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀦𑀸𑀫 𑀏𑀢𑀸𑀬 𑀅𑀝𑁆𑀞𑀓𑀣𑀸𑀬. 𑀏𑀢𑁆𑀣 𑀘 ‘‘𑀫𑀚𑁆𑀛𑁂 𑀞𑀢𑁆𑀯𑀸’’𑀢𑀺 𑀏𑀢𑁂𑀦 𑀫𑀚𑁆𑀛𑀢𑁆𑀢𑀪𑀸𑀯𑀤𑀻𑀧𑀦𑁂𑀦 𑀯𑀺𑀲𑁂𑀲𑀢𑁄 𑀘𑀢𑀼𑀦𑁆𑀦𑀫𑁆𑀧𑀺 𑀆𑀕𑀫𑀸𑀦𑀁 𑀲𑀸𑀥𑀸𑀭𑀡𑀝𑁆𑀞𑀓𑀣𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄, 𑀦 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀻𑀆𑀤𑀬𑁄 𑀯𑀺𑀬 𑀅𑀲𑀸𑀥𑀸𑀭𑀡𑀝𑁆𑀞𑀓𑀣𑀸𑀢𑀺 𑀤𑀲𑁆𑀲𑁂𑀢𑀺. 𑀅𑀯𑀺𑀲𑁂𑀲𑀢𑁄 𑀧𑀦 𑀯𑀺𑀦𑀬𑀸𑀪𑀺𑀥𑀫𑁆𑀫𑀸𑀦𑀫𑁆𑀧𑀺 𑀬𑀣𑀸𑀭𑀳𑀁 𑀲𑀸𑀥𑀸𑀭𑀡𑀝𑁆𑀞𑀓𑀣𑀸 𑀳𑁄𑀢𑀺𑀬𑁂𑀯, 𑀢𑁂𑀳𑀺 𑀲𑀫𑁆𑀫𑀺𑀲𑁆𑀲𑀢𑀸𑀬 𑀘 𑀢𑀤𑀯𑀲𑁂𑀲𑀲𑁆𑀲 𑀔𑀼𑀤𑁆𑀤𑀓𑀸𑀕𑀫𑀲𑁆𑀲 𑀯𑀺𑀲𑁂𑀲𑀢𑁄 𑀲𑀸𑀥𑀸𑀭𑀡𑀸 𑀲𑀫𑀸𑀦𑀸𑀧𑀺 𑀢𑀁 𑀞𑀧𑁂𑀢𑁆𑀯𑀸 𑀘𑀢𑀼𑀦𑁆𑀦𑀫𑁂𑀯 𑀆𑀕𑀫𑀸𑀦𑀁 𑀲𑀸𑀥𑀸𑀭𑀡𑀸𑀢𑁆𑀯𑁂𑀯 𑀯𑀼𑀢𑁆𑀢𑀸𑀢𑀺.

𑀇𑀢𑀺 𑀲𑁄𑀴𑀲𑀕𑀸𑀣𑀸𑀯𑀡𑁆𑀡𑀦𑀸.

𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀤𑀸𑀦𑀓𑀣𑀸𑀯𑀡𑁆𑀡𑀦𑀸

𑀏𑀯𑀁 𑀬𑀣𑀸𑀯𑀼𑀢𑁆𑀢𑁂𑀦 𑀯𑀺𑀯𑀺𑀥𑁂𑀦 𑀦𑀬𑁂𑀦 𑀧𑀡𑀸𑀫𑀸𑀤𑀺𑀓𑀁 𑀧𑀓𑀭𑀡𑀸𑀭𑀫𑁆𑀪𑀯𑀺𑀥𑀸𑀦𑀁 𑀓𑀢𑁆𑀯𑀸 𑀇𑀤𑀸𑀦𑀺 𑀯𑀺𑀪𑀸𑀕𑀯𑀦𑁆𑀢𑀸𑀦𑀁 𑀲𑀪𑀸𑀯𑀯𑀺𑀪𑀸𑀯𑀦𑀁 𑀯𑀺𑀪𑀸𑀕𑀤𑀲𑁆𑀲𑀦𑀯𑀲𑁂𑀦𑁂𑀯 𑀲𑀼𑀯𑀺𑀪𑀸𑀯𑀺𑀢𑀁, 𑀲𑀼𑀯𑀺𑀜𑁆𑀜𑀸𑀧𑀺𑀢𑀜𑁆𑀘 𑀳𑁄𑀢𑀻𑀢𑀺 𑀧𑀞𑀫𑀁 𑀢𑀸𑀯 𑀯𑀕𑁆𑀕𑀲𑀼𑀢𑁆𑀢𑀯𑀲𑁂𑀦 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀤𑀻𑀖𑀸𑀕𑀫𑁄 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀢𑁆𑀣𑀸𑀢𑀺 ‘‘𑀤𑀻𑀖𑀲𑁆𑀲 𑀆𑀕𑀫𑀯𑀭𑀲𑁆𑀲 𑀅𑀢𑁆𑀣𑀁 𑀧𑀓𑀸𑀲𑀬𑀺𑀲𑁆𑀲𑀸𑀫𑀻’’𑀢𑀺 𑀬𑀤𑀺𑀤𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀺𑀁 𑀯𑀘𑀦𑁂. ‘‘𑀬𑀲𑁆𑀲 𑀅𑀢𑁆𑀣𑀁 𑀧𑀓𑀸𑀲𑀬𑀺𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀜𑁆𑀜𑀸𑀢𑀁, 𑀲𑁄 𑀤𑀻𑀖𑀸𑀕𑀫𑁄 𑀦𑀸𑀫 𑀯𑀕𑁆𑀕𑀲𑀼𑀢𑁆𑀢𑀯𑀲𑁂𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄, 𑀏𑀯𑀁 𑀯𑀺𑀪𑀸𑀕𑁄𑀢𑀺 𑀯𑀸 𑀅𑀢𑁆𑀣𑁄. 𑀅𑀣 𑀯𑀸 𑀢𑀢𑁆𑀣𑀸𑀢𑀺 ‘‘𑀤𑀻𑀖𑀸𑀕𑀫𑀦𑀺𑀲𑁆𑀲𑀺𑀢’’𑀦𑁆𑀢𑀺 𑀬𑀁 𑀯𑀼𑀢𑁆𑀢𑀁, 𑀏𑀢𑀲𑁆𑀫𑀺𑀁 𑀯𑀘𑀦𑁂. 𑀬𑁄 𑀤𑀻𑀖𑀸𑀕𑀫𑁄 𑀯𑀼𑀢𑁆𑀢𑁄, 𑀲𑁄 𑀤𑀻𑀖𑀸𑀕𑀫𑁄 𑀦𑀸𑀫 𑀯𑀕𑁆𑀕𑀲𑀼𑀢𑁆𑀢𑀯𑀲𑁂𑀦. 𑀏𑀯𑀁 𑀯𑀺𑀪𑀚𑀺𑀢𑀩𑁆𑀩𑁄, 𑀏𑀤𑀺𑀲𑁄𑀢𑀺 𑀯𑀸 𑀅𑀢𑁆𑀣𑁄. ‘‘𑀤𑀻𑀖𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀳𑀺 𑀯𑀼𑀢𑁆𑀢𑀁 𑀤𑀽𑀭𑀯𑀘𑀦𑀁 𑀢𑀁-𑀲𑀤𑁆𑀤𑁂𑀦 𑀧𑀝𑀺𑀦𑀺𑀤𑁆𑀤𑀺𑀲𑀢𑀺 𑀯𑀺𑀬 ‘‘𑀤𑀻𑀖𑀸𑀕𑀫𑀦𑀺𑀲𑁆𑀲𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁 𑀆𑀲𑀦𑁆𑀦𑀯𑀘𑀦𑀫𑁆𑀧𑀺 𑀢𑀁-𑀲𑀤𑁆𑀤𑁂𑀦 𑀧𑀝𑀺𑀦𑀺𑀤𑁆𑀤𑀺𑀲𑀢𑀺 𑀅𑀢𑁆𑀢𑀦𑁄 𑀩𑀼𑀤𑁆𑀥𑀺𑀬𑀁 𑀧𑀭𑀫𑁆𑀫𑀼𑀔𑀁 𑀯𑀺𑀬 𑀧𑀭𑀺𑀯𑀢𑁆𑀢𑀫𑀸𑀦𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑀢𑁄. 𑀏𑀤𑀺𑀲𑁂𑀲𑀼 𑀳𑀺 𑀞𑀸𑀦𑁂𑀲𑀼 𑀅𑀢𑁆𑀢𑀦𑁄 𑀩𑀼𑀤𑁆𑀥𑀺𑀬𑀁 𑀲𑀫𑁆𑀫𑀼𑀔𑀁 𑀯𑀸 𑀧𑀭𑀫𑁆𑀫𑀼𑀔𑀁 𑀯𑀸 𑀧𑀭𑀺𑀯𑀢𑁆𑀢𑀫𑀸𑀦𑀁 𑀬𑀣𑀸 𑀢𑀣𑀸 𑀯𑀸 𑀧𑀝𑀺𑀦𑀺𑀤𑁆𑀤𑀺𑀲𑀺𑀢𑀼𑀁 𑀯𑀝𑁆𑀝𑀢𑀺 𑀲𑀤𑁆𑀤𑀫𑀢𑁆𑀢𑀧𑀝𑀺𑀦𑀺𑀤𑁆𑀤𑁂𑀲𑁂𑀦 𑀅𑀢𑁆𑀣𑀲𑁆𑀲𑀸𑀯𑀺𑀭𑁄𑀥𑀦𑀢𑁄. 𑀯𑀕𑁆𑀕𑀲𑀼𑀢𑁆𑀢𑀸𑀤𑀻𑀦𑀁 𑀦𑀺𑀩𑁆𑀩𑀘𑀦𑀁 𑀧𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀢𑀬𑁄 𑀯𑀕𑁆𑀕𑀸 𑀬𑀲𑁆𑀲𑀸𑀢𑀺 𑀢𑀺𑀯𑀕𑁆𑀕𑁄. 𑀘𑀢𑀼𑀢𑁆𑀢𑀺𑀁𑀲 𑀲𑀼𑀢𑁆𑀢𑀸𑀦𑀺 𑀏𑀢𑁆𑀣 𑀲𑀗𑁆𑀕𑀬𑁆𑀳𑀦𑁆𑀢𑀺, 𑀢𑁂𑀲𑀁 𑀯𑀸 𑀲𑀗𑁆𑀕𑀳𑁄 𑀕𑀡𑀦𑀸 𑀏𑀢𑁆𑀣𑀸𑀢𑀺 𑀘𑀢𑀼𑀢𑁆𑀢𑀺𑀁𑀲𑀲𑀼𑀢𑁆𑀢𑀲𑀗𑁆𑀕𑀳𑁄.

𑀅𑀢𑁆𑀢𑀦𑁄 𑀲𑀁𑀯𑀡𑁆𑀡𑀦𑀸𑀬 𑀧𑀞𑀫𑀲𑀗𑁆𑀕𑀻𑀢𑀺𑀬𑀁 𑀦𑀺𑀓𑁆𑀔𑀺𑀢𑁆𑀢𑀸𑀦𑀼𑀓𑁆𑀓𑀫𑁂𑀦𑁂𑀯 𑀧𑀯𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀲𑁆𑀲…𑀧𑁂… 𑀦𑀺𑀤𑀸𑀦𑀫𑀸𑀤𑀻’’𑀢𑀺 𑀯𑀼𑀢𑁆𑀢𑀁. 𑀆𑀤𑀺𑀪𑀸𑀯𑁄 𑀳𑁂𑀢𑁆𑀣 𑀲𑀗𑁆𑀕𑀻𑀢𑀺𑀓𑁆𑀓𑀫𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀓𑀲𑁆𑀫𑀸 𑀧𑀦 𑀘𑀢𑀽𑀲𑀼 𑀆𑀕𑀫𑁂𑀲𑀼 𑀤𑀻𑀖𑀸𑀕𑀫𑁄 𑀧𑀞𑀫𑀁 𑀲𑀗𑁆𑀕𑀻𑀢𑁄, 𑀢𑀢𑁆𑀣 𑀘 𑀲𑀻𑀮𑀓𑁆𑀔𑀦𑁆𑀥𑀯𑀕𑁆𑀕𑁄 𑀧𑀞𑀫𑀁 𑀦𑀺𑀓𑁆𑀔𑀺𑀢𑁆𑀢𑁄, 𑀢𑀲𑁆𑀫𑀺𑀜𑁆𑀘 𑀩𑁆𑀭𑀳𑁆𑀫𑀚𑀸𑀮𑀲𑀼𑀢𑁆𑀢𑀁, 𑀢𑀢𑁆𑀣𑀸𑀧𑀺 𑀦𑀺𑀤𑀸𑀦𑀦𑁆𑀢𑀺? 𑀦𑀸𑀬𑀫𑀦𑀼𑀬𑁄𑀕𑁄 𑀓𑀢𑁆𑀣𑀘𑀺𑀧𑀺 𑀦 𑀧𑀯𑀢𑁆𑀢𑀢𑀺 𑀲𑀩𑁆𑀩𑀢𑁆𑀣𑁂𑀯 𑀯𑀘𑀦𑀓𑁆𑀓𑀫𑀫𑀢𑁆𑀢𑀁 𑀧𑀝𑀺𑀘𑁆𑀘 𑀅𑀦𑀼𑀬𑀼𑀜𑁆𑀚𑀺𑀢𑀩𑁆𑀩𑀢𑁄. 𑀅𑀧𑀺𑀘 𑀲𑀤𑁆𑀥𑀸𑀯𑀳𑀕𑀼𑀡𑀢𑁆𑀢𑀸 𑀤𑀻𑀖𑀸𑀕𑀫𑁄𑀯 𑀧𑀞𑀫𑀁 𑀲𑀗𑁆𑀕𑀻𑀢𑁄. 𑀲𑀤𑁆𑀥𑀸 𑀳𑀺 𑀓𑀼𑀲𑀮𑀥𑀫𑁆𑀫𑀸𑀦𑀁 𑀩𑀻𑀚𑀁. 𑀬𑀣𑀸𑀳 ‘‘𑀲𑀤𑁆𑀥𑀸 𑀩𑀻𑀚𑀁 𑀢𑀧𑁄 𑀯𑀼𑀝𑁆𑀞𑀻’’𑀢𑀺 (𑀲𑀁. 𑀦𑀺. 𑁨.𑁧𑁯𑁭; 𑀲𑀼. 𑀦𑀺. 𑁭𑁭). 𑀲𑀤𑁆𑀥𑀸𑀯𑀳𑀕𑀼𑀡𑀢𑀸 𑀘𑀲𑁆𑀲 𑀳𑁂𑀝𑁆𑀞𑀸 𑀤𑀲𑁆𑀲𑀺𑀢𑀸𑀬𑁂𑀯. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀓𑀢𑀺𑀧𑀬𑀲𑀼𑀢𑁆𑀢𑀲𑀗𑁆𑀕𑀳𑀢𑀸𑀬 𑀘𑁂𑀯 𑀅𑀧𑁆𑀧𑀧𑀭𑀺𑀫𑀸𑀡𑀢𑀸𑀬 𑀘 𑀉𑀕𑁆𑀕𑀳𑀡𑀥𑀸𑀭𑀡𑀸𑀤𑀺𑀲𑀼𑀔𑀢𑁄 𑀧𑀞𑀫𑀁 𑀲𑀗𑁆𑀕𑀻𑀢𑁄. 𑀢𑀣𑀸 𑀳𑁂𑀲 𑀘𑀢𑀼𑀢𑁆𑀢𑀺𑀁𑀲𑀲𑀼𑀢𑁆𑀢𑀲𑀗𑁆𑀕𑀳𑁄, 𑀘𑀢𑀼𑀲𑀝𑁆𑀞𑀺𑀪𑀸𑀡𑀯𑀸𑀭𑀧𑀭𑀺𑀫𑀸𑀡𑁄 𑀘. 𑀲𑀻𑀮𑀓𑀣𑀸𑀩𑀸𑀳𑀼𑀮𑁆𑀮𑀢𑁄 𑀧𑀦 𑀲𑀻𑀮𑀓𑁆𑀔𑀦𑁆𑀥𑀯𑀕𑁆𑀕𑁄 𑀧𑀞𑀫𑀁 𑀦𑀺𑀓𑁆𑀔𑀺𑀢𑁆𑀢𑁄. 𑀲𑀻𑀮𑀜𑁆𑀳𑀺 𑀲𑀸𑀲𑀦𑀲𑁆𑀲 𑀆𑀤𑀺 𑀲𑀻𑀮𑀧𑀢𑀺𑀝𑁆𑀞𑀸𑀦𑀢𑁆𑀢𑀸 𑀲𑀩𑁆𑀩𑀕𑀼𑀡𑀸𑀦𑀁. 𑀢𑁂𑀦𑁂𑀯𑀸𑀳 ‘‘𑀢𑀲𑁆𑀫𑀸 𑀢𑀺𑀳 𑀢𑁆𑀯𑀁 𑀪𑀺𑀓𑁆𑀔𑀼 𑀆𑀤𑀺𑀫𑁂𑀯 𑀯𑀺𑀲𑁄𑀥𑁂𑀳𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼. 𑀓𑁄 𑀘𑀸𑀤𑀺 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁? 𑀲𑀻𑀮𑀜𑁆𑀘 𑀲𑀼𑀯𑀺𑀲𑀼𑀤𑁆𑀥’’𑀦𑁆𑀢𑀺𑀆𑀤𑀺 (𑀲𑀁. 𑀦𑀺. 𑁫.𑁪𑁬𑁯). 𑀲𑀻𑀮𑀓𑁆𑀔𑀦𑁆𑀥𑀓𑀣𑀸𑀩𑀸𑀳𑀼𑀮𑁆𑀮𑀢𑁄 𑀳𑀺 𑀲𑁄 ‘‘𑀲𑀻𑀮𑀓𑁆𑀔𑀦𑁆𑀥𑀯𑀕𑁆𑀕𑁄’’𑀢𑀺 𑀯𑀼𑀢𑁆𑀢𑁄. 𑀤𑀺𑀝𑁆𑀞𑀺𑀯𑀺𑀦𑀺𑀯𑁂𑀞𑀦𑀓𑀣𑀸𑀪𑀸𑀯𑀢𑁄 𑀧𑀦 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀲𑁆𑀲 𑀦𑀺𑀭𑀯𑀲𑁂𑀲𑀤𑀺𑀝𑁆𑀞𑀺𑀯𑀺𑀪𑀚𑀦𑀁 𑀩𑁆𑀭𑀳𑁆𑀫𑀚𑀸𑀮𑀲𑀼𑀢𑁆𑀢𑀁 𑀧𑀞𑀫𑀁 𑀦𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀧𑀺𑀝𑀓𑁂 𑀳𑀺 𑀩𑀼𑀤𑁆𑀥𑀯𑀘𑀦𑁂 𑀩𑁆𑀭𑀳𑁆𑀫𑀚𑀸𑀮𑀲𑀤𑀺𑀲𑀁 𑀤𑀺𑀝𑁆𑀞𑀺𑀕𑀢𑀸𑀦𑀺 𑀦𑀺𑀕𑁆𑀕𑀼𑀫𑁆𑀩𑀁 𑀦𑀺𑀚𑁆𑀚𑀝𑀁 𑀓𑀢𑁆𑀯𑀸 𑀯𑀺𑀪𑀢𑁆𑀢𑀲𑀼𑀢𑁆𑀢𑀁 𑀦𑀢𑁆𑀣𑀺. 𑀦𑀺𑀤𑀸𑀦𑀁 𑀧𑀦 𑀧𑀞𑀫𑀲𑀗𑁆𑀕𑀻𑀢𑀺𑀬𑀁 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁂𑀦 𑀧𑀼𑀝𑁆𑀞𑁂𑀦 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀤𑁂𑀲𑀓𑀸𑀮𑀸𑀤𑀺𑀦𑀺𑀤𑀲𑁆𑀲𑀦𑀢𑁆𑀣𑀁 𑀧𑀞𑀫𑀁 𑀦𑀺𑀓𑁆𑀔𑀺𑀢𑁆𑀢𑀦𑁆𑀢𑀺. 𑀢𑁂𑀦𑀸𑀳 ‘‘𑀩𑁆𑀭𑀳𑁆𑀫𑀚𑀸𑀮𑀲𑁆𑀲𑀸𑀧𑀻’’𑀢𑀺𑀆𑀤𑀺. 𑀢𑀢𑁆𑀣 𑀘 ‘‘𑀆𑀬𑀲𑁆𑀫𑀢𑀸’’𑀢𑀺𑀆𑀤𑀺𑀦𑀸 𑀤𑁂𑀲𑀓𑀁 𑀦𑀺𑀬𑀫𑁂𑀢𑀺, 𑀧𑀞𑀫𑀲𑀗𑁆𑀕𑀻𑀢𑀺𑀓𑀸𑀮𑁂𑀢𑀺 𑀧𑀦 𑀓𑀸𑀮𑀦𑁆𑀢𑀺, 𑀅𑀬𑀫𑀢𑁆𑀣𑁄 𑀉𑀧𑀭𑀺 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸