𑁧𑁦. 𑀲𑀼𑀪𑀲𑀼𑀢𑁆𑀢𑀯𑀡𑁆𑀡𑀦𑀸

𑀲𑀼𑀪𑀫𑀸𑀡𑀯𑀓𑀯𑀢𑁆𑀣𑀼𑀯𑀡𑁆𑀡𑀦𑀸

𑁪𑁪𑁪. 𑀏𑀯𑀁 𑀧𑁄𑀝𑁆𑀞𑀧𑀸𑀤𑀲𑀼𑀢𑁆𑀢𑀁 𑀲𑀁𑀯𑀡𑁆𑀡𑁂𑀢𑁆𑀯𑀸 𑀇𑀤𑀸𑀦𑀺 𑀲𑀼𑀪𑀲𑀼𑀢𑁆𑀢𑀁 𑀲𑀁𑀯𑀡𑁆𑀡𑁂𑀦𑁆𑀢𑁄 𑀬𑀣𑀸𑀦𑀼𑀧𑀼𑀩𑁆𑀩𑀁 𑀲𑀁𑀯𑀡𑁆𑀡𑀦𑁄𑀓𑀸𑀲𑀲𑁆𑀲 𑀧𑀢𑁆𑀢𑀪𑀸𑀯𑀁 𑀯𑀺𑀪𑀸𑀯𑁂𑀢𑀼𑀁, 𑀧𑁄𑀝𑁆𑀞𑀧𑀸𑀤𑀲𑀼𑀢𑁆𑀢𑀲𑁆𑀲𑀸𑀦𑀦𑁆𑀢𑀭𑀁 𑀲𑀗𑁆𑀕𑀻𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀲𑀼𑀪𑀲𑀼𑀢𑁆𑀢𑀪𑀸𑀯𑀁 𑀯𑀸 𑀧𑀓𑀸𑀲𑁂𑀢𑀼𑀁 ‘‘𑀏𑀯𑀁 𑀫𑁂 𑀲𑀼𑀢𑀁…𑀧𑁂… 𑀲𑀸𑀯𑀢𑁆𑀣𑀺𑀬𑀦𑁆𑀢𑀺 𑀲𑀼𑀪𑀲𑀼𑀢𑁆𑀢’’𑀦𑁆𑀢𑀺 𑀆𑀳. 𑀅𑀦𑀼𑀦𑀸𑀲𑀺𑀓𑀮𑁄𑀧𑁂𑀦 ‘‘𑀅𑀘𑀺𑀭 𑀧𑀭𑀺𑀦𑀺𑀩𑁆𑀩𑀼𑀢𑁂’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀅𑀘𑀺𑀭𑀁 𑀧𑀭𑀺𑀦𑀺𑀩𑁆𑀩𑀼𑀢𑁂’’𑀢𑀺 𑀇𑀫𑀺𑀦𑀸 𑀬𑀣𑀸 𑀧𑁄𑀝𑁆𑀞𑀧𑀸𑀤𑀲𑀼𑀢𑁆𑀢𑁂 ‘‘𑀅𑀧𑁆𑀧𑀸𑀝𑀺𑀳𑀻𑀭𑀓 𑀢𑀁 𑀪𑀸𑀲𑀺𑀢𑀁 𑀲𑀫𑁆𑀧𑀚𑁆𑀚𑀢𑀻’’𑀢𑀺, 𑀅𑀘𑀺𑀭𑀁 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀅𑀲𑁆𑀲𑀸𑀢𑀺 𑀯𑀸 𑀅𑀘𑀺𑀭𑀧𑀭𑀺𑀦𑀺𑀩𑁆𑀩𑀼𑀢𑁄 𑀬𑀣𑀸 ‘‘𑀅𑀘𑀺𑀭𑀧𑀓𑁆𑀓𑀦𑁆𑀢𑁄, 𑀫𑀸𑀲𑀚𑀸𑀢𑁄’’𑀢𑀺. 𑀅𑀢𑁆𑀣𑀫𑀢𑁆𑀢𑀁 𑀧𑀦 𑀤𑀲𑁆𑀲𑁂𑀢𑀼𑀁 𑀏𑀯𑀁 𑀯𑀼𑀢𑁆𑀢𑀁. 𑀅𑀘𑀺𑀭𑀧𑀭𑀺𑀦𑀺𑀩𑁆𑀩𑀼𑀢𑁂𑀢𑀺 𑀘 𑀲𑀢𑁆𑀣𑀼 𑀧𑀭𑀺𑀦𑀺𑀩𑁆𑀩𑀼𑀢𑀪𑀸𑀯𑀲𑁆𑀲 𑀘𑀺𑀭𑀓𑀸𑀮𑀢𑀸𑀧𑀝𑀺𑀓𑁆𑀔𑁂𑀧𑁂𑀦 𑀆𑀲𑀦𑁆𑀦𑀢𑀸𑀫𑀢𑁆𑀢𑀁 𑀤𑀲𑁆𑀲𑀺𑀢𑀁, 𑀓𑀸𑀮𑀧𑀭𑀺𑀘𑁆𑀙𑁂𑀤𑁄 𑀧𑀦 𑀦 𑀤𑀲𑁆𑀲𑀺𑀢𑁄𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀭𑀺𑀦𑀺𑀩𑁆𑀩𑀸𑀦𑀢𑁄’’𑀢𑀺𑀆𑀤𑀺𑀫𑀸𑀳. 𑀯𑀺𑀲𑀸𑀔𑀧𑀼𑀡𑁆𑀡𑀫𑀺𑀢𑁄 𑀉𑀤𑁆𑀥𑀁 𑀬𑀸𑀯 𑀚𑁂𑀝𑁆𑀞𑀧𑀼𑀡𑁆𑀡𑀫𑀻, 𑀢𑀸𑀯 𑀓𑀸𑀮𑀁 𑀲𑀦𑁆𑀥𑀸𑀬 ‘‘𑀫𑀸𑀲𑀫𑀢𑁆𑀢𑁂’’𑀢𑀺 𑀯𑀼𑀢𑁆𑀢𑀁. 𑀫𑀢𑁆𑀢𑀲𑀤𑁆𑀤𑁂𑀦 𑀧𑀦 𑀢𑀲𑁆𑀲 𑀓𑀸𑀮𑀲𑁆𑀲 𑀓𑀺𑀜𑁆𑀘𑀺 𑀅𑀲𑀫𑁆𑀧𑀼𑀡𑁆𑀡𑀢𑀁 𑀚𑁄𑀢𑁂𑀢𑀺. 𑀢𑀼𑀤𑀺𑀲𑀜𑁆𑀜𑀺𑀢𑁄 𑀕𑀸𑀫𑁄 𑀦𑀺𑀯𑀸𑀲𑁄 𑀏𑀢𑀲𑁆𑀲𑀸𑀢𑀺 𑀢𑁄𑀤𑁂𑀬𑁆𑀬𑁄. 𑀢𑀁 𑀧𑀦𑁂𑀲 𑀬𑀲𑁆𑀫𑀸 𑀲𑁄𑀡𑀤𑀡𑁆𑀟𑁄 (𑀤𑀻. 𑀦𑀺. 𑁧.𑁩𑁦𑁦) 𑀯𑀺𑀬 𑀘𑀫𑁆𑀧𑀁, 𑀓𑀽𑀝𑀤𑀦𑁆𑀢𑁄 (𑀤𑀻. 𑀦𑀺. 𑁧.𑁩𑁨𑁩) 𑀯𑀺𑀬 𑀘 𑀔𑀸𑀡𑀼𑀫𑀢𑀁 𑀅𑀚𑁆𑀛𑀸𑀯𑀲𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀢𑀲𑁆𑀲 𑀅𑀥𑀺𑀧𑀢𑀺𑀢𑁆𑀢𑀸’’𑀢𑀺, 𑀇𑀲𑁆𑀲𑀭𑀪𑀸𑀯𑀢𑁄𑀢𑀺 𑀅𑀢𑁆𑀣𑁄. 𑀅𑀬𑀫𑁆𑀧𑀺 𑀳𑀺 𑀭𑀜𑁆𑀜𑁄 𑀧𑀲𑁂𑀦𑀤𑀺𑀓𑁄𑀲𑀮𑀲𑁆𑀲 𑀧𑀼𑀭𑁄𑀳𑀺𑀢𑀩𑁆𑀭𑀸𑀳𑁆𑀫𑀡𑁄. 𑀧𑀼𑀢𑁆𑀢𑀫𑁆𑀧𑀺 𑀆𑀳𑀸𑀢𑀺 𑀲𑀼𑀪𑀁 𑀫𑀸𑀡𑀯𑀫𑁆𑀧𑀺 𑀑𑀯𑀤𑀦𑁆𑀢𑁄 𑀆𑀳.

𑀅𑀜𑁆𑀚𑀦𑀸𑀦𑀦𑁆𑀢𑀺 𑀅𑀓𑁆𑀔𑀺𑀅𑀜𑁆𑀚𑀦𑀢𑁆𑀣𑀸𑀬 𑀖𑀁𑀲𑀺𑀢𑀅𑀜𑁆𑀚𑀦𑀸𑀦𑀁. 𑀯𑀫𑁆𑀫𑀺𑀓𑀸𑀦𑀦𑁆𑀢𑀺 𑀓𑀺𑀫𑀺𑀲𑀫𑀸𑀳𑀝𑀯𑀫𑁆𑀫𑀺𑀓𑀸𑀦𑀁 𑀲𑀜𑁆𑀘𑀬𑀁 𑀤𑀺𑀲𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀥𑀽𑀦𑀦𑁆𑀢𑀺 𑀫𑀓𑁆𑀔𑀺𑀓𑀫𑀥𑀽𑀦𑀁. 𑀲𑀫𑀸𑀳𑀸𑀭𑀦𑁆𑀢𑀺 𑀫𑀓𑀭𑀦𑁆𑀤𑀲𑀦𑁆𑀦𑀺𑀘𑀬𑀁. 𑀧𑀡𑁆𑀟𑀺𑀢𑁄 𑀖𑀭𑀫𑀸𑀯𑀲𑁂𑀢𑀺 𑀬𑀲𑁆𑀫𑀸 𑀅𑀧𑁆𑀧𑀢𑀭𑀧𑁆𑀧𑀢𑀭𑁂𑀧𑀺 𑀕𑀬𑁆𑀳𑀫𑀸𑀦𑁂 𑀪𑁄𑀕𑀸 𑀔𑀻𑀬𑀦𑁆𑀢𑀺, 𑀅𑀧𑁆𑀧𑀢𑀭𑀧𑁆𑀧𑀢𑀭𑁂𑀧𑀺 𑀘 𑀲𑀜𑁆𑀘𑀺𑀬𑀫𑀸𑀦𑁂 𑀯𑀟𑁆𑀠𑀦𑁆𑀢𑀺, 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀫𑀼𑀧𑀫𑀢𑁆𑀢𑀬𑀁 𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀯𑀺𑀜𑁆𑀜𑀼𑀚𑀸𑀢𑀺𑀓𑁄 𑀓𑀺𑀜𑁆𑀘𑀺𑀧𑀺 𑀯𑀬𑀫𑀓𑀢𑁆𑀯𑀸 𑀆𑀬𑀫𑁂𑀯 𑀉𑀧𑁆𑀧𑀸𑀤𑁂𑀦𑁆𑀢𑁄 𑀖𑀭𑁂𑀯𑀲𑁂 𑀖𑀭𑀸𑀯𑀸𑀲𑀫𑀦𑀼𑀢𑀺𑀝𑁆𑀞𑁂𑀬𑁆𑀬𑀸𑀢𑀺 𑀮𑁄𑀪𑀸𑀤𑁂𑀲𑀺𑀢𑀧𑀝𑀺𑀧𑀢𑁆𑀢𑀺𑀁 𑀉𑀧𑀤𑀺𑀲𑀢𑀺.

𑀅𑀤𑀸𑀦𑀫𑁂𑀯 𑀲𑀺𑀓𑁆𑀔𑀸𑀧𑁂𑀢𑁆𑀯𑀸 𑀲𑀺𑀓𑁆𑀔𑀸𑀧𑀦𑀳𑁂𑀢𑀼 𑀮𑁄𑀪𑀸𑀪𑀺𑀪𑀽𑀢𑀢𑀸𑀬 𑀢𑀲𑁆𑀫𑀺𑀁𑀬𑁂𑀯 𑀖𑀭𑁂 𑀲𑀼𑀦𑀔𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀮𑁄𑀪𑀯𑀲𑀺𑀓𑀲𑁆𑀲 𑀳𑀺 𑀤𑀼𑀕𑁆𑀕𑀢𑀺 𑀧𑀸𑀝𑀺𑀓𑀗𑁆𑀔𑀸, ‘‘𑀚𑀦𑀯𑀲𑀪𑁄 𑀦𑀸𑀫 𑀬𑀓𑁆𑀔𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀻’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁧𑁫𑁦) 𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀼𑀩𑁆𑀩𑀧𑀭𑀺𑀘𑀬𑁂𑀦 𑀅𑀢𑀺𑀯𑀺𑀬 𑀧𑀺𑀬𑀸𑀬𑀢𑀺. 𑀯𑀼𑀢𑁆𑀢𑀜𑁆𑀳𑀺 ‘‘𑀧𑀼𑀩𑁆𑀩𑁂𑀯 𑀲𑀦𑁆𑀦𑀺𑀯𑀸𑀲𑁂𑀦𑀸’’𑀢𑀺𑀆𑀤𑀺 (𑀚𑀸. 𑁧.𑁨.𑁧𑁭𑁪). 𑀦𑀺𑀓𑁆𑀔𑀦𑁆𑀢𑁂𑀢𑀺 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀩𑀳𑀺 𑀦𑀺𑀕𑁆𑀕𑀢𑁂. 𑀲𑀼𑀪𑀁 𑀫𑀸𑀡𑀯𑀁 𑀅𑀦𑀼𑀕𑁆𑀕𑀡𑁆𑀳𑀺𑀢𑀼𑀓𑀸𑀫𑁄 𑀏𑀓𑀓𑁄𑀯 𑀪𑀕𑀯𑀸 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀪𑀼𑀓𑁆𑀓𑀸𑀭𑀦𑁆𑀢𑀺 ‘‘𑀪𑀼 𑀪𑀽’’𑀢𑀺 𑀲𑀼𑀦𑀔𑀲𑀤𑁆𑀤𑀓𑀭𑀡𑀁. ‘‘𑀪𑁄 𑀪𑁄’’𑀢𑀺 𑀩𑁆𑀭𑀸𑀳𑁆𑀫𑀡𑀲𑀫𑀼𑀤𑀸𑀘𑀸𑀭𑁂𑀦 𑀧𑀭𑀺𑀪𑀯𑀺𑀢𑁆𑀯𑀸 𑀧𑀭𑀺𑀪𑀯𑀦𑀳𑁂𑀢𑀼. ‘‘𑀪𑁄𑀯𑀸𑀤𑀺 𑀦𑀸𑀫 𑀲𑁄 𑀳𑁄𑀢𑀺, 𑀲𑀘𑁂 𑀳𑁄𑀢𑀺 𑀲𑀓𑀺𑀜𑁆𑀘𑀦𑁄’’𑀢𑀺 (𑀥. 𑀧. 𑁩𑁯𑁬; 𑀲𑀼. 𑀦𑀺. 𑁬𑁨𑁫) 𑀳𑀺 𑀯𑀼𑀢𑁆𑀢𑀁. 𑀦𑀦𑀼 𑀘 𑀳𑁂𑀝𑁆𑀞𑀸 ‘‘𑀅𑀤𑀸𑀦𑀫𑁂𑀯 𑀲𑀺𑀓𑁆𑀔𑀸𑀧𑁂𑀢𑁆𑀯𑀸 𑀲𑀼𑀦𑀔𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀆𑀳, 𑀓𑀲𑁆𑀫𑀸 𑀧𑀦𑁂𑀢𑁆𑀣 ‘‘𑀧𑀼𑀩𑁆𑀩𑁂𑀧𑀺 𑀫𑀁 ‘𑀪𑁄 𑀪𑁄’𑀢𑀺 𑀧𑀭𑀺𑀪𑀯𑀺𑀢𑁆𑀯𑀸 𑀲𑀼𑀦𑀔𑁄 𑀚𑀸𑀢𑁄’’𑀢𑀺 𑀯𑀤𑀢𑀻𑀢𑀺? 𑀢𑀣𑀸 𑀦𑀺𑀩𑁆𑀩𑀢𑁆𑀢𑀺𑀬𑀸 𑀢𑀤𑀼𑀪𑀬𑀲𑀸𑀥𑀸𑀭𑀡𑀨𑀮𑀢𑁆𑀢𑀸. 𑀆𑀦𑀺𑀲𑀁𑀲𑀨𑀮𑀜𑁆𑀳𑀺 𑀲𑀸𑀥𑀸𑀭𑀡𑀓𑀫𑁆𑀫𑁂𑀦𑀧𑀺 𑀚𑀸𑀢𑀁, 𑀦 𑀯𑀺𑀧𑀸𑀓𑀨𑀮𑀁 𑀯𑀺𑀬 𑀏𑀓𑀓𑀫𑁆𑀫𑁂𑀦𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀯𑀻𑀘𑀺𑀁 𑀕𑀫𑀺𑀲𑁆𑀲𑀲𑀺 𑀓𑀢𑁄𑀓𑀸𑀲𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀩𑀸𑀳𑀺𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀪𑀸𑀯𑀢𑁄. ‘‘𑀚𑀸𑀦𑀸𑀢𑀺 𑀫𑀁 𑀲𑀫𑀡𑁄 𑀕𑁄𑀢𑀫𑁄’’𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑀼𑀢𑁆𑀯𑀸. 𑀉𑀤𑁆𑀥𑀦𑀦𑁆𑀢𑀭𑁂𑀢𑀺 𑀘𑀼𑀮𑁆𑀮𑀺𑀓𑀦𑁆𑀢𑀭𑁂. 𑀦𑀦𑁆𑀢𑀺 𑀲𑀼𑀦𑀔𑀁.

𑀢𑀁 𑀧𑀯𑀢𑁆𑀢𑀺𑀦𑁆𑀢𑀺 𑀪𑀕𑀯𑀢𑀸 𑀬𑀣𑀸𑀯𑀼𑀢𑁆𑀢𑀓𑀸𑀭𑀡𑀁. 𑀩𑁆𑀭𑀸𑀳𑁆𑀫𑀡𑀘𑀸𑀭𑀺𑀢𑁆𑀢𑀲𑁆𑀲 𑀅𑀧𑀭𑀺𑀳𑀸𑀧𑀺𑀢𑀢𑀁 𑀲𑀦𑁆𑀥𑀸𑀬, 𑀢𑀣𑀸 𑀧𑀺𑀢𑀭𑀁 𑀉𑀓𑁆𑀓𑀁𑀲𑁂𑀦𑁆𑀢𑁄 ‘‘𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀆𑀳. 𑀫𑀼𑀔𑀸𑀭𑀼𑀴𑁆𑀳𑀦𑁆𑀢𑀺 𑀲𑀬𑀁𑀧𑀝𑀺𑀪𑀸𑀦𑀯𑀲𑁂𑀦 𑀫𑀼𑀔𑀫𑀸𑀭𑀼𑀴𑁆𑀳𑀁. 𑀢𑀁 𑀧𑀯𑀢𑁆𑀢𑀺𑀁 𑀧𑀼𑀘𑁆𑀙𑀻𑀢𑀺 ‘‘𑀲𑀼𑀢𑀫𑁂𑀢𑀁 𑀪𑁄 𑀕𑁄𑀢𑀫 𑀫𑀬𑁆𑀳𑀁 𑀧𑀺𑀢𑀸 𑀲𑀼𑀦𑀔𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀢𑀼𑀫𑁆𑀳𑁂𑀳𑀺 𑀯𑀼𑀢𑁆𑀢𑀁, ‘‘𑀓𑀺𑀫𑀺𑀤𑀁 𑀲𑀘𑁆𑀘𑀁 𑀯𑀸 𑀅𑀲𑀘𑁆𑀘𑀁 𑀯𑀸’’𑀢𑀺 𑀧𑀼𑀘𑁆𑀙𑀺. 𑀢𑀣𑁂𑀯 𑀯𑀢𑁆𑀯𑀸𑀢𑀺 𑀬𑀣𑀸 𑀧𑀼𑀩𑁆𑀩𑁂 𑀲𑀼𑀦𑀔𑀲𑁆𑀲 𑀯𑀼𑀢𑁆𑀢𑀁, 𑀢𑀣𑁂𑀯 𑀯𑀢𑁆𑀯𑀸. 𑀅𑀯𑀺𑀲𑀁𑀯𑀸𑀤𑀦𑀢𑁆𑀣𑀦𑁆𑀢𑀺 𑀲𑀘𑁆𑀘𑀸𑀧𑀦𑀢𑁆𑀣𑀁, ‘‘𑀢𑁄𑀤𑁂𑀬𑁆𑀬𑀩𑁆𑀭𑀸𑀳𑁆𑀫𑀡𑁄 𑀲𑀼𑀦𑀔𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀯𑀘𑀦𑀲𑁆𑀲 𑀅𑀯𑀺𑀲𑀁𑀯𑀸𑀤𑀦𑁂𑀦 𑀅𑀢𑁆𑀢𑀦𑁄 𑀅𑀯𑀺𑀲𑀁𑀯𑀸𑀤𑀺𑀪𑀸𑀯𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀧𑁆𑀧𑁄𑀤𑀓𑀦𑁆𑀢𑀺 𑀅𑀧𑁆𑀧𑀓𑁂𑀦 𑀉𑀤𑀓𑁂𑀦 𑀲𑀫𑁆𑀧𑀸𑀤𑀺𑀢𑀁. 𑀫𑀥𑀼𑀧𑀸𑀬𑀸𑀲𑀦𑁆𑀢𑀺 𑀲𑀸𑀤𑀼𑀭𑀲𑀁, 𑀫𑀥𑀼𑀬𑁄𑀚𑀺𑀢𑀁 𑀯𑀸 𑀧𑀸𑀬𑀸𑀲𑀁. 𑀢𑀣𑀸 𑀅𑀓𑀸𑀲𑀺, 𑀬𑀣𑀸 𑀪𑀕𑀯𑀢𑀸 𑀯𑀼𑀢𑁆𑀢𑀁. ‘‘𑀲𑀩𑁆𑀩𑀁 𑀤𑀲𑁆𑀲𑁂𑀲𑀻𑀢𑀺 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀲𑁄 𑀲𑀼𑀦𑀔𑁄 𑀢𑀁 𑀲𑀩𑁆𑀩𑀁 𑀦𑁂𑀢𑁆𑀯𑀸 𑀤𑀲𑁆𑀲𑁂𑀲𑀺, 𑀦 𑀚𑀸𑀢𑀺𑀲𑁆𑀲𑀭𑀢𑀸𑀬. 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀪𑀼𑀓𑁆𑀓𑀭𑀡𑀁 𑀧𑀦 𑀧𑀼𑀭𑀺𑀫𑀚𑀸𑀢𑀺𑀲𑀺𑀤𑁆𑀥𑀯𑀸𑀲𑀦𑀸𑀯𑀲𑁂𑀦𑀸’’𑀢𑀺 (𑀤𑀻. 𑀦𑀺. 𑀝𑀻. 𑁧.𑁪𑁪𑁪) 𑀏𑀯𑀁 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑀁. 𑀉𑀧𑀭𑀺𑀧𑀡𑁆𑀡𑀸𑀲𑀓𑁂 𑀧𑀦 𑀘𑀽𑀴𑀓𑀫𑁆𑀫𑀯𑀺𑀪𑀗𑁆𑀕𑀲𑀼𑀢𑁆𑀢𑀝𑁆𑀞𑀓𑀣𑀸𑀬𑀁 ‘‘𑀲𑀼𑀦𑀔𑁄 ‘𑀜𑀸𑀢𑁄𑀫𑁆𑀳𑀺 𑀇𑀫𑀺𑀦𑀸’𑀢𑀺 𑀭𑁄𑀤𑀺𑀢𑁆𑀯𑀸 ‘𑀳𑀼𑀁 𑀳𑀼’𑀦𑁆𑀢𑀺 𑀓𑀭𑁄𑀦𑁆𑀢𑁄 𑀥𑀦𑀦𑀺𑀥𑀸𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀧𑀸𑀤𑁂𑀦 𑀧𑀣𑀯𑀺𑀁 𑀔𑀡𑀺𑀢𑁆𑀯𑀸 𑀲𑀜𑁆𑀜𑀁 𑀅𑀤𑀸𑀲𑀻’’𑀢𑀺 (𑀫. 𑀦𑀺. 𑀅𑀝𑁆𑀞. 𑁩.𑁨𑁮𑁯) 𑀚𑀸𑀢𑀺𑀲𑁆𑀲𑀭𑀸𑀓𑀸𑀭𑀫𑀸𑀳, 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

‘‘𑀪𑀯𑀧𑀝𑀺𑀘𑁆𑀙𑀦𑁆𑀦𑀁 𑀦𑀸𑀫 𑀏𑀯𑀭𑀽𑀧𑀁 𑀲𑀼𑀦𑀔𑀧𑀝𑀺𑀲𑀦𑁆𑀥𑀺𑀅𑀦𑁆𑀢𑀭𑀁 𑀧𑀸𑀓𑀝𑀁 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲, 𑀅𑀤𑁆𑀥𑀸 𑀏𑀲 𑀲𑀩𑁆𑀩𑀜𑁆𑀜𑀽’’𑀢𑀺 𑀪𑀕𑀯𑀢𑀺 𑀧𑀲𑀦𑁆𑀦𑀘𑀺𑀢𑁆𑀢𑁄. 𑀅𑀗𑁆𑀕𑀯𑀺𑀚𑁆𑀚𑀸𑀧𑀸𑀞𑀓𑁄 𑀓𑀺𑀭𑁂𑀲. 𑀢𑁂𑀦𑀲𑁆𑀲 𑀏𑀢𑀤𑀳𑁄𑀲𑀺 ‘‘𑀇𑀫𑀁 𑀥𑀫𑁆𑀫𑀧𑀡𑁆𑀡𑀸𑀓𑀸𑀭𑀁 𑀓𑀢𑁆𑀯𑀸 𑀲𑀫𑀡𑀁 𑀕𑁄𑀢𑀫𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺, 𑀢𑀢𑁄 𑀲𑁄 𑀘𑀼𑀤𑁆𑀤𑀲 𑀧𑀜𑁆𑀳𑁂 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀘𑀼𑀤𑁆𑀤𑀲 𑀧𑀜𑁆𑀳𑁂 𑀧𑀼𑀘𑁆𑀙𑀺𑀢𑁆𑀯𑀸’’𑀢𑀺. 𑀢𑀢𑁆𑀣 𑀘𑀼𑀤𑁆𑀤𑀲 𑀧𑀜𑁆𑀳𑁂𑀢𑀺 ‘‘𑀤𑀺𑀲𑁆𑀲𑀦𑁆𑀢𑀺 𑀳𑀺 𑀪𑁄 𑀕𑁄𑀢𑀫 𑀫𑀦𑀼𑀲𑁆𑀲𑀸 𑀅𑀧𑁆𑀧𑀸𑀬𑀼𑀓𑀸, 𑀤𑀺𑀲𑁆𑀲𑀦𑁆𑀢𑀺 𑀤𑀻𑀖𑀸𑀬𑀼𑀓𑀸. 𑀤𑀺𑀲𑁆𑀲𑀦𑁆𑀢𑀺 𑀩𑀯𑁆𑀳𑀸𑀩𑀸𑀥𑀸, 𑀅𑀧𑁆𑀧𑀸𑀩𑀸𑀥𑀸. 𑀤𑀼𑀩𑁆𑀩𑀡𑁆𑀡𑀸, 𑀯𑀡𑁆𑀡𑀯𑀦𑁆𑀢𑁄. 𑀅𑀧𑁆𑀧𑁂𑀲𑀓𑁆𑀔𑀸, 𑀫𑀳𑁂𑀲𑀓𑁆𑀔𑀸. 𑀅𑀧𑁆𑀧𑀪𑁄𑀕𑀸, 𑀫𑀳𑀸𑀪𑁄𑀕𑀸. 𑀦𑀻𑀘𑀓𑀼𑀮𑀻𑀦𑀸, 𑀉𑀘𑁆𑀘𑀸𑀓𑀼𑀮𑀻𑀦𑀸. 𑀤𑀺𑀲𑁆𑀲𑀦𑁆𑀢𑀺 𑀤𑀼𑀧𑁆𑀧𑀜𑁆𑀜𑀸, 𑀤𑀺𑀲𑁆𑀲𑀦𑁆𑀢𑀺 𑀧𑀜𑁆𑀜𑀯𑀦𑁆𑀢𑁄. 𑀓𑁄 𑀦𑀼 𑀔𑁄 𑀪𑁄 𑀕𑁄𑀢𑀫 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀫𑀦𑀼𑀲𑁆𑀲𑀸𑀦𑀁𑀬𑁂𑀯 𑀲𑀢𑀁 𑀫𑀦𑀼𑀲𑁆𑀲𑀪𑀽𑀢𑀸𑀦𑀁 𑀤𑀺𑀲𑁆𑀲𑀦𑁆𑀢𑀺 𑀳𑀻𑀦𑀧𑀡𑀻𑀢𑀢𑀸’’𑀢𑀺 (𑀫. 𑀦𑀺. 𑁩.𑁨𑁮𑁯) 𑀇𑀫𑁂 𑀘𑀽𑀴𑀓𑀫𑁆𑀫𑀯𑀺𑀪𑀗𑁆𑀕𑀲𑀼𑀢𑁆𑀢𑁂 𑀆𑀕𑀢𑁂 𑀘𑀼𑀤𑁆𑀤𑀲 𑀧𑀜𑁆𑀳𑁂. ‘‘𑀓𑀫𑁆𑀫𑀲𑁆𑀲𑀓𑀸 𑀫𑀸𑀡𑀯 𑀲𑀢𑁆𑀢𑀸 𑀓𑀫𑁆𑀫𑀤𑀸𑀬𑀸𑀤𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁩.𑁨𑁮𑁯) 𑀲𑀗𑁆𑀔𑁂𑀧𑀢𑁄, 𑀯𑀺𑀢𑁆𑀣𑀸𑀭𑀢𑁄 𑀘 𑀯𑀺𑀲𑁆𑀲𑀚𑁆𑀚𑀦𑀧𑀭𑀺𑀬𑁄𑀲𑀸𑀦𑁂 𑀪𑀕𑀯𑀦𑁆𑀢𑀁 𑀲𑀭𑀡𑀁 𑀕𑀢𑁄. 𑀅𑀗𑁆𑀕𑀲𑀼𑀪𑀢𑀸𑀬 ‘‘𑀲𑀼𑀪𑁄’’ 𑀢𑀺𑀲𑁆𑀲 𑀦𑀸𑀫𑀁. 𑀫𑀸𑀡𑀯𑁄𑀢𑀺 𑀧𑀦 𑀫𑀳𑀮𑁆𑀮𑀓𑀓𑀸𑀮𑁂𑀧𑀺 𑀢𑀭𑀼𑀡𑀯𑁄𑀳𑀸𑀭𑁂𑀦 𑀦𑀁 𑀯𑁄𑀳𑀭𑀢𑀺. 𑀅𑀢𑁆𑀢𑀦𑁄 𑀪𑁄𑀕𑀕𑀸𑀫𑀢𑁄𑀢𑀺 𑀢𑀼𑀤𑀺𑀕𑀸𑀫𑀢𑁄 𑀆𑀕𑀦𑁆𑀢𑁆𑀯𑀸 𑀢𑀗𑁆𑀔𑀡𑀺𑀓𑀁 𑀯𑀲𑀢𑀺. 𑀢𑁂𑀦𑁂𑀯 𑀧𑀸𑀴𑀺𑀬𑀁 ‘‘𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦𑀸’’𑀢𑀺 𑀯𑀼𑀢𑁆𑀢𑀁.

𑁪𑁪𑁫. ‘‘𑀏𑀓𑀸 𑀘 𑀫𑁂 𑀓𑀗𑁆𑀔𑀸 𑀅𑀢𑁆𑀣𑀻’’𑀢𑀺 𑀇𑀫𑀺𑀦𑀸 𑀉𑀧𑀭𑀺 𑀧𑀼𑀘𑁆𑀙𑀺𑀬𑀫𑀸𑀦𑀲𑁆𑀲 𑀧𑀜𑁆𑀳𑀲𑁆𑀲 𑀧𑀕𑁂𑀯 𑀢𑁂𑀦 𑀅𑀪𑀺𑀲𑀗𑁆𑀔𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀫𑀸𑀡𑀯𑀓𑀦𑁆𑀢𑀺 𑀔𑀼𑀤𑁆𑀤𑀓𑀫𑀸𑀡𑀯𑀁 ‘‘𑀏𑀓𑀧𑀼𑀢𑁆𑀢𑀓𑁄, (𑀫. 𑀦𑀺. 𑁨.𑁨𑁯𑁬, 𑁩𑁫𑁩; 𑀧𑀸𑀭𑀸. 𑁨𑁬) 𑀧𑀺𑀬𑀧𑀼𑀢𑁆𑀢𑀓𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀓-𑀲𑀤𑁆𑀤𑀲𑁆𑀲 𑀔𑀼𑀤𑁆𑀤𑀓𑀢𑁆𑀣𑁂 𑀧𑀯𑀢𑁆𑀢𑀦𑀢𑁄. 𑀯𑀺𑀲𑀪𑀸𑀕𑀯𑁂𑀤𑀦𑀸𑀢𑀺 𑀤𑀼𑀓𑁆𑀔𑀯𑁂𑀤𑀦𑀸. 𑀲𑀸 𑀳𑀺 𑀓𑀼𑀲𑀮𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑁂 𑀅𑀢𑁆𑀢𑀪𑀸𑀯𑁂 𑀉𑀧𑁆𑀧𑀚𑁆𑀚𑀦𑀓𑀲𑀼𑀔𑀯𑁂𑀤𑀦𑀸𑀧𑀝𑀺𑀧𑀓𑁆𑀔𑀪𑀸𑀯𑀢𑁄 ‘‘𑀯𑀺𑀲𑀪𑀸𑀕𑀯𑁂𑀤𑀦𑀸’’𑀢𑀺 𑀘 𑀓𑀸𑀬𑀁 𑀕𑀸𑀴𑁆𑀳𑀸 𑀳𑀼𑀢𑁆𑀯𑀸 𑀩𑀸𑀥𑀦𑀢𑁄 𑀧𑀻𑀴𑀦𑀢𑁄 ‘‘𑀆𑀩𑀸𑀥𑁄’’𑀢𑀺 𑀘 𑀯𑀼𑀘𑁆𑀘𑀢𑀺. 𑀓𑀻𑀤𑀺𑀲𑀸 𑀧𑀦 𑀲𑀸𑀢𑀺 𑀆𑀳 ‘‘𑀬𑀸 𑀏𑀓𑀤𑁂𑀲𑁂’’𑀢𑀺𑀆𑀤𑀺. 𑀏𑀓𑀤𑁂𑀲𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸𑀢𑀺 𑀲𑀭𑀻𑀭𑁂𑀓𑀤𑁂𑀲𑁂 𑀉𑀝𑁆𑀞𑀳𑀺𑀢𑁆𑀯𑀸𑀧𑀺 𑀅𑀧𑀭𑀺𑀯𑀢𑁆𑀢𑀺𑀪𑀸𑀯𑀓𑀭𑀡𑀢𑁄 𑀅𑀬𑀧𑀝𑁆𑀝𑁂𑀦 𑀆𑀩𑀦𑁆𑀥𑀺𑀢𑁆𑀯𑀸 𑀯𑀺𑀬 𑀕𑀡𑁆𑀳𑀸𑀢𑀺, 𑀇𑀫𑀺𑀦𑀸 𑀩𑀮𑀯𑀭𑁄𑀕𑁄 𑀆𑀩𑀸𑀥𑁄 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀓𑀺𑀘𑁆𑀙𑀚𑀻𑀯𑀺𑀢𑀓𑀭𑁄𑀢𑀺 𑀅𑀲𑀼𑀔𑀚𑀻𑀯𑀺𑀢𑀸𑀯𑀳𑁄, 𑀇𑀫𑀺𑀦𑀸 𑀤𑀼𑀩𑁆𑀩𑀮𑁄 𑀅𑀧𑁆𑀧𑀫𑀢𑁆𑀢𑀓𑁄 𑀭𑁄𑀕𑁄 𑀆𑀢𑀗𑁆𑀓𑁄 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀉𑀝𑁆𑀞𑀸𑀦𑀦𑁆𑀢𑀺 𑀲𑀬𑀦𑀦𑀺𑀲𑀚𑁆𑀚𑀸𑀤𑀺𑀢𑁄 𑀉𑀝𑁆𑀞𑀳𑀦𑀁, 𑀢𑁂𑀦 𑀬𑀣𑀸 𑀢𑀣𑀸 𑀅𑀧𑀭𑀸𑀧𑀭𑀁 𑀲𑀭𑀻𑀭𑀲𑁆𑀲 𑀧𑀭𑀺𑀯𑀢𑁆𑀢𑀦𑀁 𑀯𑀤𑀢𑀺. 𑀕𑀭𑀼𑀓𑀦𑁆𑀢𑀺 𑀪𑀸𑀭𑀺𑀬𑀁 𑀅𑀓𑀺𑀘𑁆𑀘𑀲𑀺𑀤𑁆𑀥𑀺𑀓𑀁. 𑀕𑀺𑀮𑀸𑀦𑀲𑁆𑀲𑁂𑀯 𑀓𑀸𑀬𑁂 𑀩𑀮𑀁 𑀦 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀮𑀳𑀼𑀝𑁆𑀞𑀸𑀦𑁂𑀦 𑀘𑁂𑀢𑁆𑀣 𑀕𑁂𑀮𑀜𑁆𑀜𑀸𑀪𑀸𑀯𑁄 𑀧𑀼𑀘𑁆𑀙𑀺𑀢𑁄. 𑀳𑁂𑀝𑁆𑀞𑀸 𑀘𑀢𑀽𑀳𑀺 𑀧𑀤𑁂𑀳𑀺 𑀅𑀨𑀸𑀲𑀼𑀯𑀺𑀳𑀸𑀭𑀸𑀪𑀸𑀯𑀁 𑀧𑀼𑀘𑁆𑀙𑀺𑀢𑁆𑀯𑀸𑀧𑀺 𑀇𑀤𑀸𑀦𑀺 𑀧𑀼𑀦 𑀨𑀸𑀲𑀼𑀯𑀺𑀳𑀸𑀭𑀪𑀸𑀯𑀁 𑀧𑀼𑀘𑁆𑀙𑀢𑀺, 𑀢𑁂𑀦 𑀲𑀯𑀺𑀲𑁂𑀲𑁄 𑀏𑀢𑁆𑀣 𑀨𑀸𑀲𑀼𑀯𑀺𑀳𑀸𑀭𑁄 𑀧𑀼𑀘𑁆𑀙𑀺𑀢𑁄𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀅𑀲𑀢𑀺𑀧𑀺 𑀳𑀺 𑀅𑀢𑀺𑀲𑀬𑀢𑁆𑀣𑀚𑁄𑀢𑀦𑁂 𑀲𑀤𑁆𑀤𑁂 𑀅𑀢𑁆𑀣𑀸𑀧𑀢𑁆𑀢𑀺𑀢𑁄 𑀅𑀢𑀺𑀲𑀬𑀢𑁆𑀣𑁄 𑀮𑀩𑁆𑀪𑀢𑁂𑀯 𑀬𑀣𑀸 ‘‘𑀅𑀪𑀺𑀭𑀽𑀧𑀲𑁆𑀲 𑀓𑀜𑁆𑀜𑀸 𑀤𑀸𑀢𑀩𑁆𑀩𑀸’’𑀢𑀺. 𑀢𑁂𑀦𑀸𑀳 ‘‘𑀕𑀫𑀦𑀝𑁆𑀞𑀸𑀦𑀸’’𑀢𑀺𑀆𑀤𑀺. 𑀧𑀼𑀭𑀺𑀫𑀁 𑀆𑀡𑀸𑀧𑀦𑀯𑀘𑀦𑀁, 𑀇𑀤𑀁 𑀧𑀦 𑀧𑀼𑀘𑁆𑀙𑀺𑀢𑀩𑁆𑀩𑀸𑀓𑀸𑀭𑀤𑀲𑁆𑀲𑀦𑀦𑁆𑀢𑀺 𑀅𑀬𑀫𑀺𑀫𑁂𑀲𑀁 𑀯𑀺𑀲𑁂𑀲𑁄𑀢𑀺 𑀤𑀲𑁆𑀲𑁂𑀢𑀺 ‘‘𑀅𑀣𑀲𑁆𑀲𑀸’’𑀢𑀺𑀆𑀤𑀺𑀦𑀸.

𑁪𑁪𑁭. 𑀓𑀸𑀮𑁄 𑀦𑀸𑀫 𑀉𑀧𑀲𑀗𑁆𑀓𑀫𑀦𑀲𑁆𑀲 𑀬𑀼𑀢𑁆𑀢𑀧𑀢𑁆𑀢𑀓𑀸𑀮𑁄, 𑀲𑀫𑀬𑁄 𑀦𑀸𑀫 𑀢𑀲𑁆𑀲𑁂𑀯 𑀧𑀘𑁆𑀘𑀬𑀲𑀸𑀫𑀕𑁆𑀕𑀻, 𑀅𑀢𑁆𑀣𑀢𑁄 𑀧𑀦𑁂𑀲 𑀢𑀚𑁆𑀚𑀁 𑀲𑀭𑀻𑀭𑀩𑀮𑀜𑁆𑀘𑁂𑀯 𑀢𑀧𑁆𑀧𑀘𑁆𑀘𑀬𑀧𑀭𑀺𑀲𑁆𑀲𑀬𑀸𑀪𑀸𑀯𑁄 𑀘. 𑀉𑀧𑀸𑀤𑀸𑀦𑀁 𑀦𑀸𑀫 𑀜𑀸𑀡𑁂𑀦 𑀢𑁂𑀲𑀁 𑀕𑀳𑀡𑀁 𑀲𑀮𑁆𑀮𑀓𑁆𑀔𑀡𑀦𑁆𑀢𑀺 𑀆𑀳 ‘‘𑀧𑀜𑁆𑀜𑀸𑀬𑀸’’𑀢𑀺𑀆𑀤𑀺. ‘‘𑀲𑁆𑀯𑁂 𑀕𑀫𑀦𑀓𑀸𑀮𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀇𑀫𑀺𑀦𑀸 𑀓𑀸𑀮𑀁, ‘‘𑀓𑀸𑀬𑁂’’𑀢𑀺𑀆𑀤𑀺𑀦𑀸 𑀲𑀫𑀬𑀜𑁆𑀘 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀺. 𑀨𑀭𑀺𑀲𑁆𑀲𑀢𑀻𑀢𑀺 𑀨𑀭𑀡𑀯𑀲𑁂𑀦 𑀞𑀲𑁆𑀲𑀢𑀺.

𑁪𑁪𑁮. 𑀘𑁂𑀢𑀺𑀬𑀭𑀝𑁆𑀞𑁂𑀢𑀺 𑀘𑁂𑀢𑀺𑀭𑀝𑁆𑀞𑁂. 𑀬-𑀓𑀸𑀭𑁂𑀦 𑀳𑀺 𑀧𑀤𑀁 𑀯𑀟𑁆𑀠𑁂𑀢𑁆𑀯𑀸 𑀏𑀯𑀁 𑀯𑀼𑀢𑁆𑀢𑀁. ‘‘𑀘𑁂𑀢𑀺𑀭𑀝𑁆𑀞𑀢𑁄 𑀅𑀜𑁆𑀜𑀁 𑀯𑀺𑀲𑀼𑀁𑀬𑁂𑀯𑁂𑀓𑀁 𑀭𑀝𑁆𑀞’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. ‘‘𑀬𑀲𑁆𑀫𑀸 𑀫𑀭𑀡𑀁 𑀦𑀸𑀫 𑀢𑀸𑀤𑀺𑀲𑀸𑀦𑀁 𑀤𑀲𑀩𑀮𑀸𑀦𑀁 𑀭𑁄𑀕𑀯𑀲𑁂𑀦𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀬𑁂𑀦 𑀭𑁄𑀕𑁂𑀦 𑀢𑀁 𑀚𑀸𑀢𑀁, 𑀢𑀲𑁆𑀲 𑀲𑀭𑀽𑀧𑀧𑀼𑀘𑁆𑀙𑀸, 𑀓𑀸𑀭𑀡𑀧𑀼𑀘𑁆𑀙𑀸, 𑀫𑀭𑀡𑀳𑁂𑀢𑀼𑀓𑀘𑀺𑀢𑁆𑀢𑀲𑀦𑁆𑀢𑀸𑀧𑀧𑀼𑀘𑁆𑀙𑀸, 𑀢𑀲𑁆𑀲 𑀘 𑀲𑀦𑁆𑀢𑀸𑀧𑀲𑁆𑀲 𑀲𑀩𑁆𑀩𑀮𑁄𑀓𑀲𑀸𑀥𑀸𑀭𑀡𑀢𑀸, 𑀢𑀣𑀸 𑀫𑀭𑀡𑀲𑁆𑀲 𑀘 𑀅𑀧𑁆𑀧𑀝𑀺𑀓𑀭𑀡𑀢𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀫𑀭𑀡𑀧𑀝𑀺𑀲𑀜𑁆𑀜𑀼𑀢𑁆𑀢𑀁 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀓𑀣𑁂𑀲𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀪𑁄 𑀆𑀦𑀦𑁆𑀤𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀓𑁄 𑀦𑀸𑀫𑀸’’𑀢𑀺𑀆𑀤𑀺𑀦𑀸 𑀳𑀺 𑀭𑁄𑀕𑀁 𑀧𑀼𑀘𑁆𑀙𑀢𑀺, ‘‘𑀓𑀺𑀁 𑀪𑀕𑀯𑀸 𑀧𑀭𑀺𑀪𑀼𑀜𑁆𑀚𑀻’’𑀢𑀺 𑀇𑀫𑀺𑀦𑀸 𑀓𑀸𑀭𑀡𑀁, ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀦𑀸 𑀘𑀺𑀢𑁆𑀢𑀲𑀦𑁆𑀢𑀸𑀧𑀁, ‘‘𑀲𑀢𑁆𑀣𑀸 𑀦𑀸𑀫𑀸’’𑀢𑀺𑀆𑀤𑀺𑀦𑀸 𑀢𑀲𑁆𑀲 𑀲𑀩𑁆𑀩𑀮𑁄𑀓𑀲𑀸𑀥𑀸𑀭𑀡𑀢𑀁, ‘‘𑀏𑀓𑀸 𑀤𑀸𑀦𑀻’’𑀢𑀺𑀆𑀤𑀺𑀦𑀸 𑀫𑀭𑀡𑀲𑁆𑀲 𑀅𑀧𑁆𑀧𑀝𑀺𑀓𑀭𑀡𑀢𑀁 𑀤𑀲𑁆𑀲𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀫𑀳𑀸𑀚𑀸𑀦𑀻𑀢𑀺 𑀫𑀳𑀸𑀳𑀸𑀦𑀺. 𑀬𑀢𑁆𑀭𑀸𑀢𑀺 𑀬𑁂𑀦 𑀓𑀸𑀭𑀡𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀢𑁂𑀦 𑀓𑁄 𑀤𑀸𑀦𑀺 𑀅𑀜𑁆𑀜𑁄 𑀫𑀭𑀡𑀸 𑀫𑀼𑀘𑁆𑀘𑀺𑀲𑁆𑀲𑀢𑀻𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. 𑀇𑀤𑀸𑀦𑀻𑀢𑀺 𑀘 𑀅𑀢𑁆𑀢𑀦𑁄 𑀫𑀦𑀲𑀺𑀓𑀸𑀭𑀁 𑀧𑀢𑀺 𑀯𑁄𑀳𑀸𑀭𑀫𑀢𑁆𑀢𑁂𑀦 𑀯𑀼𑀢𑁆𑀢𑀁. 𑀮𑀚𑁆𑀚𑀺𑀲𑁆𑀲𑀢𑀻𑀢𑀺 𑀮𑀚𑁆𑀚𑀸 𑀯𑀺𑀬 𑀪𑀯𑀺𑀲𑁆𑀲𑀢𑀺, 𑀯𑀺𑀚𑁆𑀚𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀧𑀻𑀢𑀪𑁂𑀲𑀚𑁆𑀚𑀸𑀦𑀼𑀭𑀽𑀧𑀁 𑀆𑀳𑀸𑀭𑀪𑁄𑀚𑀦𑀁 𑀧𑁄𑀭𑀸𑀡𑀸𑀘𑀺𑀡𑁆𑀡𑀦𑁆𑀢𑀺 𑀆𑀳 ‘‘𑀧𑀻𑀢…𑀧𑁂… 𑀤𑀢𑁆𑀯𑀸’’𑀢𑀺.

𑀳𑀼𑀢𑁆𑀯𑀸𑀢𑀺 𑀧𑀸𑀞𑀲𑁂𑀲𑁄 𑀲𑀦𑁆𑀢𑀺𑀓𑀸𑀯𑀘𑀭𑀪𑀸𑀯𑀲𑁆𑀲 𑀯𑀺𑀲𑁂𑀲𑀦𑀢𑁄. 𑀫𑀸𑀭𑁄 𑀧𑀸𑀧𑀺𑀫𑀸 𑀯𑀺𑀬 𑀦 𑀭𑀦𑁆𑀥𑀕𑀯𑁂𑀲𑀻, 𑀉𑀢𑁆𑀢𑀭𑀫𑀸𑀡𑀯𑁄 𑀯𑀺𑀬 𑀘 𑀦 𑀯𑀻𑀫𑀁𑀲𑀦𑀸𑀥𑀺𑀧𑁆𑀧𑀸𑀬𑁄, 𑀅𑀧𑀺 𑀢𑀼 𑀔𑀮𑀼 𑀉𑀧𑀝𑁆𑀞𑀸𑀓𑁄 𑀳𑀼𑀢𑁆𑀯𑀸 𑀲𑀦𑁆𑀢𑀺𑀓𑀸𑀯𑀘𑀭𑁄𑀢𑀺 𑀳𑀺 𑀯𑀺𑀲𑁂𑀲𑁂𑀢𑀺. 𑀦 𑀭𑀦𑁆𑀥𑀕𑀯𑁂𑀲𑀻𑀢𑀺 𑀦 𑀙𑀺𑀤𑁆𑀤𑀕𑀯𑁂𑀲𑀻. 𑀬𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀯𑀺𑀫𑁄𑀓𑁆𑀔𑀼𑀧𑀸𑀬𑁂𑀲𑀼 𑀦𑀺𑀬𑁆𑀬𑀸𑀦𑀺𑀓𑀥𑀫𑁆𑀫𑁂𑀲𑀼. 𑀥𑀭𑀦𑁆𑀢𑀻𑀢𑀺 𑀅𑀥𑀼𑀦𑀸 𑀢𑀺𑀝𑁆𑀞𑀦𑁆𑀢𑀺, 𑀧𑀯𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁪𑁪𑁯. 𑀅𑀢𑁆𑀣𑀢𑁄 𑀧𑀬𑀼𑀢𑁆𑀢𑀢𑀸𑀬 𑀲𑀤𑁆𑀤𑀧𑀬𑁄𑀕𑀲𑁆𑀲 𑀲𑀤𑁆𑀤𑀧𑀩𑀦𑁆𑀥𑀮𑀓𑁆𑀔𑀡𑀸𑀦𑀺 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀢𑀤𑀢𑁆𑀣𑀪𑀽𑀢𑁂𑀳𑀺 𑀲𑀻𑀮𑀸𑀤𑀻𑀳𑀺 𑀢𑀻𑀳𑀺 𑀥𑀫𑁆𑀫𑀓𑁆𑀔𑀦𑁆𑀥𑁂𑀳𑀺 𑀲𑀗𑁆𑀕𑀬𑁆𑀳𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀢𑀻𑀡𑀺 𑀧𑀺𑀝𑀓𑀸𑀦𑀺 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑁂𑀢𑁆𑀯𑀸’’𑀢𑀺. 𑀲𑀗𑁆𑀔𑀺𑀢𑁆𑀢𑁂𑀦 𑀓𑀣𑀺𑀢𑀦𑁆𑀢𑀺 ‘‘𑀢𑀺𑀡𑁆𑀡𑀁 𑀔𑁄 𑀫𑀸𑀡𑀯 𑀔𑀦𑁆𑀥𑀸𑀦’’𑀦𑁆𑀢𑀺 𑀏𑀯𑀁 𑀕𑀡𑀦𑀢𑁄, 𑀲𑀸𑀫𑀜𑁆𑀜𑀢𑁄 𑀘 𑀲𑀗𑁆𑀔𑁂𑀧𑁂𑀦𑁂𑀯 𑀓𑀣𑀺𑀢𑀁. ‘‘𑀓𑀢𑀫𑁂𑀲𑀁 𑀢𑀺𑀡𑁆𑀡’’𑀦𑁆𑀢𑀺 𑀅𑀬𑀁 𑀅𑀤𑀺𑀝𑁆𑀞𑀚𑁄𑀢𑀦𑀸𑀧𑀼𑀘𑁆𑀙𑀸𑀬𑁂𑀯, 𑀦 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸. 𑀫𑀸𑀡𑀯𑀲𑁆𑀲𑁂𑀯 𑀳𑀺 𑀅𑀬𑀁 𑀧𑀼𑀘𑁆𑀙𑀸, 𑀦 𑀣𑁂𑀭𑀲𑁆𑀲𑀸𑀢𑀺 𑀆𑀳 ‘‘𑀫𑀸𑀡𑀯𑁄’’𑀢𑀺𑀆𑀤𑀺. 𑀅𑀜𑁆𑀜𑀢𑁆𑀣 𑀧𑀦 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸𑀬𑁂𑀯 𑀤𑀺𑀲𑁆𑀲𑀢𑀺, 𑀦 𑀅𑀤𑀺𑀝𑁆𑀞𑀚𑁄𑀢𑀦𑀸𑀧𑀼𑀘𑁆𑀙𑀸. 𑀇𑀥 𑀧𑀦 𑀅𑀝𑁆𑀞𑀓𑀣𑀸𑀬𑀁 𑀏𑀯𑀁 𑀯𑀼𑀢𑁆𑀢𑀁, 𑀢𑀤𑁂𑀢𑀁 𑀅𑀝𑁆𑀞𑀓𑀣𑀸𑀧𑀫𑀸𑀡𑀢𑁄 𑀧𑀘𑁆𑀘𑁂𑀢𑀩𑁆𑀩𑀁. 𑀢𑀤𑀸 𑀧𑀯𑀢𑁆𑀢𑀫𑀸𑀦𑀜𑁆𑀳𑀺 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀅𑀝𑁆𑀞𑀓𑀣𑀫𑁆𑀧𑀺 𑀲𑀗𑁆𑀕𑀳𑀫𑀸𑀭𑁄𑀧𑀺𑀁𑀲𑀼. 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸𑀪𑀸𑀯𑁂 𑀧𑀦𑀲𑁆𑀲 𑀣𑁂𑀭𑀲𑁆𑀲𑁂𑀯 𑀯𑀘𑀦𑀢𑀸 𑀲𑀺𑀬𑀸.

𑀲𑀻𑀮𑀓𑁆𑀔𑀦𑁆𑀥𑀯𑀡𑁆𑀡𑀦𑀸

𑁪𑁫𑁦-𑁪𑁫𑁩. 𑀲𑀻𑀮𑀓𑁆𑀔𑀦𑁆𑀥𑀲𑁆𑀲𑀸𑀢𑀺 𑀏𑀢𑁆𑀣 𑀧𑀤𑀢𑁆𑀣𑀯𑀺𑀧𑀮𑁆𑀮𑀸𑀲𑀓𑀸𑀭𑀻 𑀇𑀢𑀺𑀲𑀤𑁆𑀤𑁄 𑀮𑀼𑀢𑁆𑀢𑁄, 𑀅𑀢𑁆𑀣𑀦𑀺𑀤𑁆𑀤𑁂𑀲𑁄 𑀯𑀺𑀬 𑀲𑀤𑁆𑀤𑀦𑀺𑀤𑁆𑀤𑁂𑀲𑁄 𑀯𑀸, 𑀬𑀣𑀸𑀭𑀼𑀢𑁄 𑀘 𑀇𑀢𑀺𑀲𑀤𑁆𑀤𑁄 𑀆𑀤𑁆𑀬𑀢𑁆𑀣𑁄, 𑀧𑀓𑀸𑀭𑀢𑁆𑀣𑁄 𑀯𑀸, 𑀢𑁂𑀦 ‘‘𑀅𑀭𑀺𑀬𑀲𑁆𑀲 𑀲𑀫𑀸𑀥𑀺𑀓𑁆𑀔𑀦𑁆𑀥𑀲𑁆𑀲…𑀧𑁂… 𑀧𑀢𑀺𑀝𑁆𑀞𑀧𑁂𑀲𑀻’’𑀢𑀺 𑀅𑀬𑀁 𑀧𑀸𑀞𑁄 𑀕𑀳𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑁂𑀲𑀼 𑀤𑀲𑁆𑀲𑀺𑀢𑁂𑀲𑀽’’𑀢𑀺, 𑀢𑁂𑀲𑀼 𑀢𑀻𑀲𑀼 𑀔𑀦𑁆𑀥𑁂𑀲𑀼 𑀉𑀤𑁆𑀤𑁂𑀲𑀯𑀲𑁂𑀦 𑀤𑀲𑁆𑀲𑀺𑀢𑁂𑀲𑀽𑀢𑀺 𑀅𑀢𑁆𑀣𑁄. 𑀪𑀕𑀯𑀢𑀸 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀲𑀸𑀫𑀜𑁆𑀜𑀨𑀮𑀸𑀤𑀻𑀲𑀼 (𑀤𑀻. 𑀦𑀺. 𑁧.𑁧𑁯𑁪) 𑀤𑁂𑀲𑀺𑀢𑀦𑀬𑁂𑀦𑁂𑀯, 𑀢𑁂𑀦 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀩𑀼𑀤𑁆𑀥𑀪𑀸𑀲𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀸𑀲𑀦𑁂 𑀦 𑀲𑀻𑀮𑀫𑁂𑀯 𑀲𑀸𑀭𑁄𑀢𑀺 𑀅𑀭𑀺𑀬𑀫𑀕𑁆𑀕𑀲𑀸𑀭𑁂 𑀪𑀕𑀯𑀢𑁄 𑀲𑀸𑀲𑀦𑁂 𑀬𑀣𑀸𑀤𑀲𑁆𑀲𑀺𑀢𑀁 𑀲𑀻𑀮𑀁 𑀲𑀸𑀭𑁄 𑀏𑀯 𑀦 𑀳𑁄𑀢𑀺 𑀲𑀸𑀭𑀯𑀢𑁄 𑀫𑀳𑀢𑁄 𑀭𑀼𑀓𑁆𑀔𑀲𑁆𑀲 𑀧𑀧𑀝𑀺𑀓𑀝𑁆𑀞𑀸𑀦𑀺𑀓𑀢𑁆𑀢𑀸. 𑀅𑀝𑁆𑀞𑀸𑀦𑀧𑀬𑀼𑀢𑁆𑀢𑁄 𑀳𑀺 𑀏𑀯𑀲𑀤𑁆𑀤𑁄 𑀬𑀣𑀸𑀞𑀸𑀦𑁂 𑀦 𑀬𑁄𑀚𑁂𑀢𑀩𑁆𑀩𑁄. 𑀬𑀚𑁆𑀚𑁂𑀯𑀁 𑀓𑀲𑁆𑀫𑀸 𑀢𑀫𑀺𑀥 𑀕𑀳𑀺𑀢𑀦𑁆𑀢𑀺 𑀆𑀳 ‘‘𑀓𑁂𑀯𑀮’’𑀦𑁆𑀢𑀺𑀆𑀤𑀺. 𑀛𑀸𑀦𑀸𑀤𑀺𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂 𑀅𑀥𑀺𑀕𑀦𑁆𑀢𑀼𑀓𑀸𑀫𑀲𑁆𑀲 𑀅𑀥𑀺𑀝𑁆𑀞𑀸𑀦𑀫𑀢𑁆𑀢𑀁 𑀢𑀢𑁆𑀣 𑀅𑀧𑁆𑀧𑀢𑀺𑀝𑁆𑀞𑀺𑀢𑀲𑁆𑀲 𑀢𑁂𑀲𑀫𑀲𑀫𑁆𑀪𑀯𑀢𑁄. 𑀯𑀼𑀢𑁆𑀢𑀜𑁆𑀳𑀺 ‘‘𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀦𑀭𑁄 𑀲𑀧𑀜𑁆𑀜𑁄’’𑀢𑀺𑀆𑀤𑀺 (𑀲𑀁. 𑀦𑀺. 𑁧.𑁨𑁩, 𑁧𑁯𑁨; 𑀧𑁂𑀝𑀓𑁄. 𑁨𑁨) 𑀅𑀣 𑀯𑀸 𑀲𑀸𑀲𑀦𑁂 𑀦 𑀲𑀻𑀮𑀫𑁂𑀯 𑀲𑀸𑀭𑁄𑀢𑀺 𑀓𑀸𑀫𑀜𑁆𑀘𑁂𑀢𑁆𑀣 𑀲𑀸𑀲𑀦𑁂 𑀫𑀕𑁆𑀕𑀨𑀮𑀲𑀻𑀮𑀲𑀗𑁆𑀔𑀸𑀢𑀁 𑀮𑁄𑀓𑀼𑀢𑁆𑀢𑀭𑀲𑀻𑀮𑀫𑁆𑀧𑀺 𑀲𑀸𑀭𑀫𑁂𑀯, 𑀢𑀣𑀸𑀧𑀺 𑀦 𑀲𑀻𑀮𑀓𑁆𑀔𑀦𑁆𑀥𑁄 𑀏𑀯 𑀲𑀸𑀭𑁄 𑀳𑁄𑀢𑀺, 𑀅𑀣 𑀔𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑁄𑀧𑀺 𑀧𑀜𑁆𑀜𑀸𑀓𑁆𑀔𑀦𑁆𑀥𑁄𑀧𑀺 𑀲𑀸𑀭𑁄 𑀏𑀯𑀸𑀢𑀺 𑀏𑀯𑀫𑁆𑀧𑁂𑀢𑁆𑀣 𑀬𑀣𑀸𑀧𑀬𑀼𑀢𑁆𑀢𑁂𑀦 𑀏𑀯𑀲𑀤𑁆𑀤𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄, 𑀧𑀼𑀭𑀺𑀫𑁄𑀬𑁂𑀯 𑀧𑀦𑀢𑁆𑀣𑁄 𑀬𑀼𑀢𑁆𑀢𑀢𑀭𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀇𑀢𑁄 𑀉𑀢𑁆𑀢𑀭𑀻’’𑀢𑀺𑀆𑀤𑀺. 𑀅𑀜𑁆𑀜𑀫𑁆𑀧𑀺 𑀓𑀢𑁆𑀢𑀩𑁆𑀩𑀦𑁆𑀢𑀺 𑀲𑁂𑀲𑀔𑀦𑁆𑀥𑀤𑁆𑀯𑀬𑀁.

𑀲𑀫𑀸𑀥𑀺𑀓𑁆𑀔𑀦𑁆𑀥𑀯𑀡𑁆𑀡𑀦𑀸

𑁪𑁫𑁪. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀣𑁂𑀭𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑀁 𑀧𑀼𑀝𑁆𑀞𑁄𑀧𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀸𑀤𑀺𑀓𑁂 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀦𑀦𑀼 𑀏𑀯𑀁 𑀲𑀦𑁆𑀢𑁂 𑀅𑀜𑁆𑀜𑀁 𑀧𑀼𑀝𑁆𑀞𑁄 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑁄 𑀅𑀫𑁆𑀩𑀁 𑀧𑀼𑀝𑁆𑀞𑁄 𑀮𑀩𑀼𑀚𑀁 𑀩𑁆𑀬𑀸𑀓𑀭𑁄𑀦𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀈𑀤𑀺𑀲𑀻 𑀘𑁄𑀤𑀦𑀸 𑀇𑀥 𑀅𑀦𑁄𑀓𑀸𑀲𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀣𑀜𑁆𑀘…𑀧𑁂… 𑀆𑀭𑀪𑀻’’𑀢𑀺 𑀆𑀳, 𑀢𑁂𑀦𑁂𑀢𑁆𑀣 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀸𑀤𑀬𑁄𑀧𑀺 𑀲𑀫𑀸𑀥𑀺𑀉𑀧𑀓𑀸𑀭𑀓𑀢𑀁 𑀉𑀧𑀸𑀤𑀸𑀬 𑀲𑀫𑀸𑀥𑀺𑀓𑁆𑀔𑀦𑁆𑀥𑀧𑀓𑁆𑀔𑀺𑀓𑀪𑀸𑀯𑁂𑀦 𑀉𑀤𑁆𑀤𑀺𑀝𑁆𑀞𑀸𑀢𑀺 𑀤𑀲𑁆𑀲𑁂𑀢𑀺. 𑀬𑁂 𑀢𑁂 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀸𑀤𑀬𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀤𑁂𑀲𑀦𑀸𑀦𑀦𑁆𑀢𑀭𑀁 𑀅𑀪𑀺𑀜𑁆𑀜𑀸𑀤𑁂𑀲𑀦𑀸𑀬 𑀅𑀯𑀲𑀭𑁄𑀢𑀺 𑀓𑀢𑁆𑀯𑀸 𑀭𑀽𑀧𑀚𑁆𑀛𑀸𑀦𑀸𑀦𑁂𑀯 𑀆𑀕𑀢𑀸𑀦𑀺,𑀦 𑀅𑀭𑀽𑀧𑀚𑁆𑀛𑀸𑀦𑀸𑀦𑀺. 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀧𑀸𑀤𑀺𑀓𑀸 𑀳𑀺 𑀲𑀧𑀭𑀺𑀪𑀡𑁆𑀟𑀸 𑀙𑀧𑀺 𑀅𑀪𑀺𑀜𑁆𑀜𑀸𑀬𑁄. 𑀬𑀲𑁆𑀫𑀸 𑀧𑀦 𑀮𑁄𑀓𑀺𑀬𑀸𑀪𑀺𑀜𑁆𑀜𑀸𑀬𑁄 𑀇𑀚𑁆𑀛𑀫𑀸𑀦𑀸 𑀅𑀝𑁆𑀞𑀲𑀼 𑀲𑀫𑀸𑀧𑀢𑁆𑀢𑀻𑀲𑀼 𑀘𑀼𑀤𑁆𑀤𑀲𑀯𑀺𑀥𑁂𑀦 𑀘𑀺𑀢𑁆𑀢𑀧𑀭𑀺𑀤𑀫𑀦𑁂𑀦 𑀯𑀺𑀦𑀸 𑀦 𑀇𑀚𑁆𑀛𑀦𑁆𑀢𑀺, 𑀢𑀲𑁆𑀫𑀸 𑀅𑀪𑀺𑀜𑁆𑀜𑀸𑀲𑀼 𑀤𑁂𑀲𑀺𑀬𑀫𑀸𑀦𑀸𑀲𑀼 𑀅𑀭𑀽𑀧𑀚𑁆𑀛𑀸𑀦𑀸𑀦𑀺𑀧𑀺 𑀤𑁂𑀲𑀺𑀢𑀸𑀦𑁂𑀯 𑀳𑁄𑀦𑁆𑀢𑀺 𑀦𑀸𑀦𑀦𑁆𑀢𑀭𑀺𑀓𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀆𑀦𑁂𑀢𑁆𑀯𑀸 𑀧𑀦 𑀤𑀻𑀧𑁂𑀢𑀩𑁆𑀩𑀸𑀦𑀻’’𑀢𑀺, 𑀯𑀼𑀢𑁆𑀢𑀦𑀬𑁂𑀦 𑀤𑁂𑀲𑀺𑀢𑀸𑀦𑁂𑀯 𑀓𑀢𑁆𑀯𑀸 𑀲𑀁𑀯𑀡𑁆𑀡𑀓𑁂𑀳𑀺 𑀧𑀓𑀸𑀲𑁂𑀢𑀩𑁆𑀩𑀸𑀦𑀻𑀢𑀺 𑀅𑀢𑁆𑀣𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺 𑀇𑀫𑀺𑀦𑀸𑀯 𑀅𑀭𑀽𑀧𑀚𑁆𑀛𑀸𑀦𑀫𑁆𑀧𑀺 𑀲𑀗𑁆𑀕𑀳𑀺𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀘𑀢𑀼𑀢𑁆𑀣𑀚𑁆𑀛𑀸𑀦𑁂𑀦 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀘𑀢𑀼𑀢𑁆𑀣𑀚𑁆𑀛𑀸𑀦𑀫𑁂𑀯 𑀳𑀺 𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸𑀯𑀲𑁂𑀦 𑀧𑀯𑀢𑁆𑀢𑀁 ‘‘𑀅𑀭𑀽𑀧𑀚𑁆𑀛𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑁪𑁭𑁧-𑁪𑁮𑁦. 𑀦 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀫𑀢𑁆𑀢𑀓𑁂𑀦𑁂𑀯𑀸𑀢𑀺 𑀏𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀞𑀸𑀦𑀸𑀞𑀸𑀦𑀧𑀬𑀼𑀢𑁆𑀢𑀲𑁆𑀲 𑀏𑀯𑀲𑀤𑁆𑀤𑀲𑁆𑀲𑀸𑀦𑀼𑀭𑀽𑀧𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀮𑁄𑀓𑀺𑀬𑀲𑀫𑀸𑀥𑀺𑀓𑁆𑀔𑀦𑁆𑀥𑀲𑁆𑀲 𑀧𑀦 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 ‘‘𑀦 𑀘𑀺𑀢𑁆𑀢𑁂𑀓𑀕𑁆𑀕𑀢𑀸…𑀧𑁂… 𑀅𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀁. 𑀅𑀭𑀺𑀬𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑁄𑀢𑀺 𑀏𑀢𑁆𑀣 𑀳𑀺 𑀅𑀭𑀺𑀬𑀲𑀤𑁆𑀤𑁄 𑀲𑀼𑀤𑁆𑀥𑀫𑀢𑁆𑀢𑀧𑀭𑀺𑀬𑀸𑀬𑁄𑀯, 𑀦 𑀮𑁄𑀓𑀼𑀢𑁆𑀢𑀭𑀧𑀭𑀺𑀬𑀸𑀬𑁄. 𑀬𑀣𑀸 𑀘𑁂𑀢𑁆𑀣, 𑀢𑀣𑀸 𑀅𑀭𑀺𑀬𑁄 𑀲𑀻𑀮𑀓𑁆𑀔𑀦𑁆𑀥𑁄𑀢𑀺 𑀏𑀢𑁆𑀣𑀸𑀧𑀺. 𑀇𑀢𑁄𑀢𑀺 𑀧𑀜𑁆𑀜𑀸𑀓𑁆𑀔𑀦𑁆𑀥𑀢𑁄, 𑀲𑁄 𑀘 𑀉𑀓𑁆𑀓𑀝𑁆𑀞𑀢𑁄 𑀅𑀭𑀳𑀢𑁆𑀢𑀨𑀮𑀧𑀭𑀺𑀬𑀸𑀧𑀦𑁆𑀦𑁄 𑀏𑀯𑀸𑀢𑀺 𑀆𑀳 ‘‘𑀅𑀭𑀳𑀢𑁆𑀢𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺𑀆𑀤𑀺. 𑀮𑁄𑀓𑀺𑀬𑀸𑀪𑀺𑀜𑁆𑀜𑀸𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀯𑀺𑀦𑀸𑀧𑀺 𑀳𑀺 𑀅𑀭𑀳𑀢𑁆𑀢𑁂 𑀅𑀥𑀺𑀕𑀢𑁂 ‘‘𑀦𑀢𑁆𑀣𑁂𑀯 𑀉𑀢𑁆𑀢𑀭𑀺𑀓𑀭𑀡𑀻𑀬’’𑀦𑁆𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀬𑀤𑀢𑁆𑀣𑀁 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺, 𑀢𑀲𑁆𑀲 𑀲𑀺𑀤𑁆𑀥𑀢𑁆𑀢𑀸. 𑀇𑀥 𑀧𑀦 𑀮𑁄𑀓𑀺𑀬𑀸𑀪𑀺𑀜𑁆𑀜𑀸𑀬𑁄𑀧𑀺 𑀆𑀕𑀢𑀸𑀬𑁂𑀯. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀁.

𑀇𑀢𑀺 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬 𑀧𑀭𑀫𑀲𑀼𑀔𑀼𑀫𑀕𑀫𑁆𑀪𑀻𑀭𑀤𑀼𑀭𑀦𑀼𑀩𑁄𑀥𑀢𑁆𑀣𑀧𑀭𑀺𑀤𑀻𑀧𑀦𑀸𑀬 𑀲𑀼𑀯𑀺𑀫𑀮𑀯𑀺𑀧𑀼𑀮𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀚𑀦𑀦𑀸𑀬 𑀲𑀸𑀥𑀼𑀯𑀺𑀮𑀸𑀲𑀺𑀦𑀺𑀬𑀸 𑀦𑀸𑀫 𑀮𑀻𑀦𑀢𑁆𑀣𑀧𑀓𑀸𑀲𑀦𑀺𑀬𑀸 𑀲𑀼𑀪𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑀓𑀸𑀲𑀦𑀸.

𑀲𑀼𑀪𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.