𑁧𑁧. 𑀓𑁂𑀯𑀝𑁆𑀝𑀲𑀼𑀢𑁆𑀢𑀯𑀡𑁆𑀡𑀦𑀸

𑀓𑁂𑀯𑀝𑁆𑀝𑀕𑀳𑀧𑀢𑀺𑀧𑀼𑀢𑁆𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑁪𑁮𑁧. 𑀏𑀯𑀁 𑀲𑀼𑀪𑀲𑀼𑀢𑁆𑀢𑀁 𑀲𑀁𑀯𑀡𑁆𑀡𑁂𑀢𑁆𑀯𑀸 𑀇𑀤𑀸𑀦𑀺 𑀓𑁂𑀯𑀝𑁆𑀝𑀲𑀼𑀢𑁆𑀢𑀁 𑀲𑀁𑀯𑀡𑁆𑀡𑁂𑀦𑁆𑀢𑁄 𑀬𑀣𑀸𑀦𑀼𑀧𑀼𑀩𑁆𑀩𑀁 𑀲𑀁𑀯𑀡𑁆𑀡𑀦𑁄𑀓𑀸𑀲𑀲𑁆𑀲 𑀧𑀢𑁆𑀢𑀪𑀸𑀯𑀁 𑀯𑀺𑀪𑀸𑀯𑁂𑀢𑀼𑀁, 𑀲𑀼𑀪𑀲𑀼𑀢𑁆𑀢𑀲𑁆𑀲𑀸𑀦𑀦𑁆𑀢𑀭𑀁 𑀲𑀗𑁆𑀕𑀻𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀓𑁂𑀯𑀝𑁆𑀝𑀲𑀼𑀢𑁆𑀢𑀪𑀸𑀯𑀁 𑀯𑀸 𑀧𑀓𑀸𑀲𑁂𑀢𑀼𑀁 ‘‘𑀏𑀯𑀁 𑀫𑁂 𑀲𑀼𑀢𑀁…𑀧𑁂… 𑀦𑀸𑀴𑀦𑁆𑀤𑀸𑀬𑀦𑁆𑀢𑀺 𑀓𑁂𑀯𑀝𑁆𑀝𑀲𑀼𑀢𑁆𑀢’’𑀦𑁆𑀢𑀺 𑀆𑀳. 𑀧𑀸𑀯𑀸𑀭𑀺𑀓𑀲𑁆𑀲𑀸𑀢𑀺 𑀏𑀯𑀁𑀦𑀸𑀫𑀓𑀲𑁆𑀲 𑀲𑁂𑀝𑁆𑀞𑀺𑀦𑁄. 𑀅𑀫𑁆𑀩𑀯𑀦𑁂𑀢𑀺 𑀅𑀫𑁆𑀩𑀭𑀼𑀓𑁆𑀔𑀩𑀳𑀼𑀮𑁂 𑀉𑀧𑀯𑀦𑁂. 𑀢𑀁 𑀓𑀺𑀭 𑀲𑁄 𑀲𑁂𑀝𑁆𑀞𑀺 𑀪𑀕𑀯𑀢𑁄 𑀅𑀦𑀼𑀘𑁆𑀙𑀯𑀺𑀓𑀁 𑀕𑀦𑁆𑀥𑀓𑀼𑀝𑀺𑀁, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀓𑀼𑀝𑀺𑀫𑀡𑁆𑀟𑀧𑀸𑀤𑀻𑀦𑀺 𑀲𑀫𑁆𑀧𑀸𑀤𑁂𑀢𑁆𑀯𑀸 𑀧𑀸𑀓𑀸𑀭𑀧𑀭𑀺𑀓𑁆𑀔𑀺𑀢𑁆𑀢𑀁 𑀤𑁆𑀯𑀸𑀭𑀓𑁄𑀝𑁆𑀞𑀓𑀲𑀫𑁆𑀧𑀦𑁆𑀦𑀁 𑀓𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀦𑀺𑀬𑁆𑀬𑀸𑀢𑁂𑀲𑀺, 𑀧𑀼𑀭𑀺𑀫𑀯𑁄𑀳𑀸𑀭𑁂𑀦 𑀧𑀦𑁂𑀲 𑀯𑀺𑀳𑀸𑀭𑁄 ‘‘𑀧𑀸𑀯𑀸𑀭𑀺𑀓𑀫𑁆𑀩𑀯𑀦’’𑀦𑁆𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. ‘‘𑀓𑁂𑀯𑀝𑁆𑀝𑁄’’ 𑀢𑀺𑀤𑀁 𑀦𑀸𑀫𑀫𑀢𑁆𑀢𑀁. ‘‘𑀓𑁂𑀯𑀝𑁆𑀝𑁂𑀳𑀺 𑀲𑀁𑀭𑀓𑁆𑀔𑀺𑀢𑀢𑁆𑀢𑀸, 𑀢𑁂𑀲𑀁 𑀯𑀸 𑀲𑀦𑁆𑀢𑀺𑀓𑁂 𑀲𑀫𑁆𑀩𑀼𑀤𑁆𑀥𑀢𑁆𑀢𑀸’’𑀢𑀺 𑀓𑁂𑀘𑀺. 𑀕𑀳𑀧𑀢𑀺𑀧𑀼𑀢𑁆𑀢𑀲𑁆𑀲𑀸𑀢𑀺 𑀏𑀢𑁆𑀣 𑀓𑀸𑀫𑀜𑁆𑀘𑁂𑀲 𑀢𑀤𑀸 𑀕𑀳𑀧𑀢𑀺𑀝𑁆𑀞𑀸𑀦𑁂 𑀞𑀺𑀢𑁄, 𑀧𑀺𑀢𑀼 𑀧𑀦𑀲𑁆𑀲 𑀅𑀘𑀺𑀭𑀓𑀸𑀮𑀓𑀢𑀢𑀸𑀬 𑀧𑀼𑀭𑀺𑀫𑀲𑀫𑀜𑁆𑀜𑀸𑀬 ‘‘𑀕𑀳𑀧𑀢𑀺𑀧𑀼𑀢𑁆𑀢𑁄’’𑀢𑁆𑀯𑁂𑀯 𑀯𑁄𑀳𑀭𑀻𑀬𑀢𑀺. 𑀢𑁂𑀦𑀸𑀳 ‘‘𑀕𑀳𑀧𑀢𑀺𑀫𑀳𑀸𑀲𑀸𑀮𑁄’’𑀢𑀺, 𑀫𑀳𑀸𑀯𑀺𑀪𑀯𑀢𑀸𑀬 𑀫𑀳𑀸𑀲𑀸𑀭𑁄 𑀕𑀳𑀧𑀢𑀻𑀢𑀺 𑀅𑀢𑁆𑀣𑁄, 𑀭-𑀓𑀸𑀭𑀲𑁆𑀲 𑀧𑀦 𑀮-𑀓𑀸𑀭𑀁 𑀓𑀢𑁆𑀯𑀸 ‘‘𑀫𑀳𑀸𑀲𑀸𑀮𑁄’’𑀢𑀺 𑀯𑀼𑀢𑁆𑀢𑀁 𑀬𑀣𑀸 ‘‘𑀧𑀮𑀺𑀩𑀼𑀤𑁆𑀥𑁄’’𑀢𑀺 (𑀘𑀽𑀴𑀦𑀺. 𑁧𑁫; 𑀫𑀺. 𑀧. 𑁬.𑁩.𑁭; 𑀚𑀸. 𑀅𑀝𑁆𑀞. 𑁨.𑁩.𑁧𑁦𑁨) 𑀲𑀤𑁆𑀥𑁄 𑀧𑀲𑀦𑁆𑀦𑁄𑀢𑀺 𑀧𑁄𑀣𑀼𑀚𑁆𑀚𑀦𑀺𑀓𑀲𑀤𑁆𑀥𑀸𑀯𑀲𑁂𑀦 𑀭𑀢𑀦𑀢𑁆𑀢𑀬𑀲𑀤𑁆𑀥𑀸𑀬 𑀲𑀫𑀦𑁆𑀦𑀸𑀕𑀢𑁄, 𑀢𑀢𑁄𑀬𑁂𑀯 𑀭𑀢𑀦𑀢𑁆𑀢𑀬𑀧𑁆𑀧𑀲𑀦𑁆𑀦𑁄. 𑀓𑀫𑁆𑀫𑀓𑀫𑁆𑀫𑀨𑀮𑀲𑀤𑁆𑀥𑀸𑀬 𑀯𑀸 𑀲𑀤𑁆𑀥𑁄, 𑀭𑀢𑀦𑀢𑁆𑀢𑀬𑀧𑁆𑀧𑀲𑀸𑀤𑀩𑀳𑀼𑀮𑀢𑀸𑀬 𑀧𑀲𑀦𑁆𑀦𑁄. 𑀲𑀤𑁆𑀥𑀸𑀥𑀺𑀓𑀢𑁆𑀢𑀸𑀬𑁂𑀯𑀸𑀢𑀺 𑀢𑀣𑀸𑀘𑀺𑀦𑁆𑀢𑀸𑀬 𑀳𑁂𑀢𑀼𑀯𑀘𑀦𑀁, 𑀲𑀤𑁆𑀥𑀸𑀥𑀺𑀓𑁄 𑀳𑀺 𑀉𑀫𑁆𑀫𑀸𑀤𑀧𑁆𑀧𑀢𑁆𑀢𑁄 𑀯𑀺𑀬 𑀳𑁄𑀢𑀺.

𑀲𑀫𑀺𑀤𑁆𑀥𑀸𑀢𑀺 𑀲𑀫𑁆𑀫𑀤𑁂𑀯 𑀇𑀤𑁆𑀥𑀸, 𑀯𑀺𑀪𑀯𑀲𑀫𑁆𑀧𑀢𑁆𑀢𑀺𑀬𑀸 𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀸 𑀲𑀫𑁆𑀧𑀼𑀡𑁆𑀡𑀸, 𑀆𑀓𑀺𑀡𑁆𑀡𑀸 𑀩𑀳𑀽 𑀫𑀦𑀼𑀲𑁆𑀲𑀸 𑀏𑀢𑁆𑀣𑀸𑀢𑀺 𑀅𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀅𑀁𑀲𑀓𑀽𑀝𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀏𑀳𑀺 𑀢𑁆𑀯𑀁 𑀪𑀺𑀓𑁆𑀔𑀼 𑀅𑀦𑁆𑀯𑀤𑁆𑀥𑀫𑀸𑀲𑀁, 𑀅𑀦𑀼𑀫𑀸𑀲𑀁, 𑀅𑀦𑀼𑀲𑀁𑀯𑀘𑁆𑀙𑀭𑀁 𑀯𑀸 𑀫𑀦𑀼𑀲𑁆𑀲𑀸𑀦𑀁 𑀧𑀲𑀸𑀤𑀸𑀬 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑁄𑀳𑀻’’𑀢𑀺 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀡𑀸𑀧𑀦𑀫𑁂𑀯 𑀲𑀫𑀸𑀤𑀺𑀲𑀦𑀁, 𑀢𑀁 𑀧𑀦 𑀢𑀲𑁆𑀫𑀺𑀁 𑀞𑀸𑀦𑁂 𑀞𑀧𑀦𑀁 𑀦𑀸𑀫𑀸𑀢𑀺 𑀆𑀳 ‘‘𑀞𑀸𑀦𑀦𑁆𑀢𑀭𑁂 𑀞𑀧𑁂𑀢𑀽’’𑀢𑀺. 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀸𑀦𑀦𑁆𑀢𑀺 𑀧𑀓𑀢𑀺𑀫𑀦𑀼𑀲𑁆𑀲𑁂𑀳𑀺 𑀉𑀢𑁆𑀢𑀭𑀺𑀢𑀭𑀸𑀦𑀁 𑀉𑀢𑁆𑀢𑀫𑀧𑀼𑀭𑀺𑀲𑀸𑀦𑀁 𑀩𑀼𑀤𑁆𑀥𑀸𑀤𑀻𑀦𑀁 𑀛𑀸𑀬𑀻𑀦𑀁, 𑀅𑀭𑀺𑀬𑀸𑀦𑀜𑁆𑀘. 𑀥𑀫𑁆𑀫𑀢𑁄𑀢𑀺 𑀅𑀥𑀺𑀕𑀫𑀥𑀫𑁆𑀫𑀢𑁄, 𑀛𑀸𑀦𑀸𑀪𑀺𑀜𑁆𑀜𑀸𑀫𑀕𑁆𑀕𑀨𑀮𑀥𑀫𑁆𑀫𑀢𑁄𑀢𑀺 𑀅𑀢𑁆𑀣𑁄, 𑀦𑀺𑀤𑁆𑀥𑀸𑀭𑀡𑁂 𑀘𑁂𑀢𑀁 𑀦𑀺𑀲𑁆𑀲𑀓𑁆𑀓𑀯𑀘𑀦𑀁. 𑀢𑀢𑁄 𑀳𑀺 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀦𑀺𑀤𑁆𑀥𑀸𑀭𑁂𑀢𑀺. 𑀏𑀯𑀁 𑀉𑀢𑁆𑀢𑀭𑀺𑀲𑀤𑁆𑀤𑀁 𑀫𑀦𑀼𑀲𑁆𑀲𑀲𑀤𑁆𑀤𑁂𑀦 𑀏𑀓𑀧𑀤𑀁 𑀓𑀢𑁆𑀯𑀸 𑀇𑀤𑀸𑀦𑀺 𑀧𑀸𑀝𑀺𑀳𑀸𑀭𑀺𑀬𑀲𑀤𑁆𑀤𑁂𑀦 𑀲𑀫𑁆𑀩𑀚𑁆𑀛𑀺𑀢𑀩𑁆𑀩𑀁 𑀯𑀺𑀲𑀼𑀫𑁂𑀯 𑀧𑀤𑀁 𑀓𑀭𑁄𑀦𑁆𑀢𑁄 ‘‘𑀤𑀲𑀓𑀼𑀲𑀮𑀲𑀗𑁆𑀔𑀸𑀢𑀢𑁄 𑀯𑀸’’𑀢𑀺𑀆𑀤𑀺𑀫𑀸𑀳. 𑀫𑀦𑀼𑀲𑁆𑀲𑀥𑀫𑁆𑀫𑀢𑁄𑀢𑀺 𑀧𑀓𑀢𑀺𑀫𑀦𑀼𑀲𑁆𑀲𑀥𑀫𑁆𑀫𑀢𑁄. 𑀧𑀚𑁆𑀚𑀮𑀺𑀢𑀧𑀤𑀻𑀧𑁄𑀢𑀺 𑀧𑀚𑁆𑀚𑀮𑀦𑁆𑀢𑀧𑀤𑀻𑀧𑁄. 𑀢𑁂𑀮𑀲𑁆𑀦𑁂𑀳𑀦𑁆𑀢𑀺 𑀢𑁂𑀮𑀲𑁂𑀘𑀦𑀁. 𑀭𑀸𑀚𑀕𑀳𑀲𑁂𑀝𑁆𑀞𑀺𑀯𑀢𑁆𑀣𑀼𑀲𑁆𑀫𑀺𑀦𑁆𑀢𑀺 𑀭𑀸𑀚𑀕𑀳𑀲𑁂𑀝𑁆𑀞𑀺𑀦𑁄 𑀘𑀦𑁆𑀤𑀦𑀧𑀢𑁆𑀢𑀤𑀸𑀦𑀯𑀢𑁆𑀣𑀼𑀫𑁆𑀳𑀺 (𑀘𑀽𑀴𑀯. 𑁨𑁫𑁨). 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀸𑀧𑁂𑀲𑀻𑀢𑀺 ‘‘𑀦 𑀪𑀺𑀓𑁆𑀔𑀯𑁂 𑀕𑀺𑀳𑀻𑀦𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀢𑀩𑁆𑀩𑀁. 𑀬𑁄 𑀤𑀲𑁆𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁫𑁨) 𑀯𑀺𑀓𑀼𑀩𑁆𑀩𑀦𑀺𑀤𑁆𑀥𑀺𑀧𑀝𑀺𑀓𑁆𑀔𑁂𑀧𑀓𑀁 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑀺.

𑁪𑁮𑁨. 𑀕𑀼𑀡𑀲𑀫𑁆𑀧𑀢𑁆𑀢𑀺𑀢𑁄 𑀅𑀘𑀸𑀯𑀦𑀁 𑀲𑀦𑁆𑀥𑀸𑀬 𑀏𑀢𑀁 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀦 𑀕𑀼𑀡𑀯𑀺𑀦𑀸𑀲𑀦𑁂𑀦𑀸’’𑀢𑀺 𑀇𑀫𑀺𑀦𑀸. 𑀢𑁂𑀦𑀸𑀳 ‘‘𑀲𑀻𑀮𑀪𑁂𑀤’’𑀦𑁆𑀢𑀺𑀆𑀤𑀺. 𑀯𑀺𑀲𑀳𑀦𑁆𑀢𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀦𑀺𑀯𑀸𑀭𑀺𑀢𑀝𑁆𑀞𑀸𑀦𑁂 𑀉𑀲𑁆𑀲𑀳𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺. 𑀏𑀯𑀫𑁆𑀧𑀺 𑀇𑀫𑀺𑀦𑀸 𑀓𑀸𑀭𑀡𑀦𑁆𑀢𑀭𑁂𑀦𑀸𑀬𑀁 𑀉𑀲𑁆𑀲𑀳𑀦𑁆𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀬𑀁 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀯𑀺𑀲𑁆𑀲𑀸𑀲𑀺𑀓𑁄, 𑀢𑀲𑁆𑀫𑀸 𑀯𑀺𑀲𑁆𑀲𑀸𑀲𑀁 𑀯𑀟𑁆𑀠𑁂𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀯𑀟𑁆𑀠𑁂𑀢𑁆𑀯𑀸𑀢𑀺 𑀘 𑀩𑁆𑀭𑀽𑀳𑁂𑀢𑁆𑀯𑀸, 𑀯𑀺𑀪𑀽𑀢𑀁 𑀧𑀸𑀓𑀝𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀯𑀡𑁆𑀡𑀦𑀸

𑁪𑁮𑁩-𑁪. 𑀆𑀤𑀻𑀦𑀯𑀦𑁆𑀢𑀺 𑀤𑁄𑀲𑀁. 𑀓𑀣𑀁 𑀢𑁂𑀦 𑀓𑀢𑀸, 𑀓𑀢𑁆𑀣 𑀯𑀸 𑀉𑀧𑁆𑀧𑀦𑁆𑀦𑀸𑀢𑀺 𑀆𑀳 ‘‘𑀢𑀢𑁆𑀣 𑀓𑀺𑀭𑀸’’𑀢𑀺𑀆𑀤𑀺. 𑀏𑀓𑁂𑀦𑀸𑀢𑀺 𑀕𑀦𑁆𑀥𑀸𑀭𑁂𑀦 𑀦𑀸𑀫 𑀇𑀲𑀺𑀦𑀸𑀯. 𑀏𑀯𑀜𑁆𑀳𑀺 𑀧𑀼𑀩𑁆𑀩𑁂𑀦𑀸𑀧𑀭𑀁 𑀲𑀁𑀲𑀦𑁆𑀤𑀢𑀻𑀢𑀺. 𑀕𑀦𑁆𑀥𑀸𑀭𑀻 𑀦𑀸𑀫𑁂𑀲𑀸 𑀯𑀺𑀚𑁆𑀚𑀸 𑀘𑀽𑀴𑀕𑀦𑁆𑀥𑀸𑀭𑀻, 𑀫𑀳𑀸𑀕𑀦𑁆𑀥𑀸𑀭𑀻𑀢𑀺 𑀤𑀼𑀯𑀺𑀥𑀸 𑀳𑁄𑀢𑀺. 𑀢𑀢𑁆𑀣 𑀘𑀽𑀴𑀕𑀦𑁆𑀥𑀸𑀭𑀻 𑀦𑀸𑀫 𑀢𑀺𑀯𑀲𑁆𑀲𑀢𑁄 𑀑𑀭𑀁 𑀫𑀢𑀲𑀢𑁆𑀢𑀸𑀦𑀁 𑀉𑀧𑀧𑀦𑁆𑀦𑀝𑁆𑀞𑀸𑀦𑀚𑀸𑀦𑀦𑀸 𑀯𑀺𑀚𑁆𑀚𑀸. 𑀯𑀗𑁆𑀕𑀻𑀲𑀯𑀢𑁆𑀣𑀼 (𑀲𑀁. 𑀦𑀺. 𑀅𑀝𑁆𑀞. 𑁧.𑁧.𑁨𑁨𑁦; 𑀅. 𑀦𑀺. 𑀅𑀝𑁆𑀞. 𑁧.𑁧.𑁨𑁧𑁨) 𑀘𑁂𑀢𑁆𑀣 𑀲𑀸𑀥𑀓𑀁. 𑀫𑀳𑀸𑀕𑀦𑁆𑀥𑀸𑀭𑀻 𑀦𑀸𑀫 𑀢𑀲𑁆𑀲 𑀘𑁂𑀯 𑀚𑀸𑀦𑀦𑀸, 𑀢𑀤𑀼𑀢𑁆𑀢𑀭𑀺 𑀘 𑀇𑀤𑁆𑀥𑀺𑀯𑀺𑀥𑀜𑀸𑀡𑀓𑀫𑁆𑀫𑀲𑁆𑀲 𑀲𑀸𑀥𑀺𑀓𑀸 𑀯𑀺𑀚𑁆𑀚𑀸. 𑀬𑁂𑀪𑀼𑀬𑁆𑀬𑁂𑀦 𑀳𑁂𑀲𑀸 𑀇𑀤𑁆𑀥𑀺𑀯𑀺𑀥𑀜𑀸𑀡𑀓𑀺𑀘𑁆𑀘𑀁 𑀲𑀸𑀥𑁂𑀢𑀺. 𑀢𑀲𑁆𑀲𑀸 𑀓𑀺𑀭 𑀯𑀺𑀚𑁆𑀚𑀸𑀬 𑀲𑀸𑀥𑀓𑁄 𑀧𑀼𑀕𑁆𑀕𑀮𑁄 𑀢𑀸𑀤𑀺𑀲𑁂 𑀤𑁂𑀲𑁂, 𑀓𑀸𑀮𑁂 𑀘 𑀫𑀦𑁆𑀢𑀁 𑀧𑀭𑀺𑀚𑀧𑁆𑀧𑁂𑀢𑁆𑀯𑀸 𑀩𑀳𑀼𑀥𑀸𑀧𑀺 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑀺, 𑀳𑀢𑁆𑀣𑀺𑀆𑀤𑀻𑀦𑀺𑀧𑀺 𑀤𑀲𑁆𑀲𑁂𑀢𑀺, 𑀅𑀤𑀲𑁆𑀲𑀦𑀻𑀬𑁄𑀧𑀺 𑀳𑁄𑀢𑀺, 𑀅𑀕𑁆𑀕𑀺𑀣𑀫𑁆𑀪𑀫𑁆𑀧𑀺 𑀓𑀭𑁄𑀢𑀺, 𑀚𑀮𑀣𑀫𑁆𑀪𑀫𑁆𑀧𑀺 𑀓𑀭𑁄𑀢𑀺, 𑀆𑀓𑀸𑀲𑁂𑀧𑀺 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑀺, 𑀲𑀩𑁆𑀩𑀁 𑀇𑀦𑁆𑀤𑀚𑀸𑀮𑀲𑀤𑀺𑀲𑀁 𑀤𑀝𑁆𑀞𑀩𑁆𑀩𑀁. 𑀅𑀝𑁆𑀝𑁄𑀢𑀺 𑀤𑀼𑀓𑁆𑀔𑀺𑀢𑁄 𑀩𑀸𑀥𑀺𑀢𑁄. 𑀢𑁂𑀦𑀸𑀳 ‘‘𑀧𑀻𑀴𑀺𑀢𑁄’’𑀢𑀺.

𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀯𑀡𑁆𑀡𑀦𑀸

𑁪𑁮𑁫. 𑀓𑀸𑀫𑀁 ‘‘𑀘𑁂𑀢𑀲𑀺𑀓’’𑀦𑁆𑀢𑀺 𑀇𑀤𑀁 𑀬𑁂 𑀘𑁂𑀢𑀲𑀺 𑀦𑀺𑀬𑀼𑀢𑁆𑀢𑀸 𑀘𑀺𑀢𑁆𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀸, 𑀢𑁂𑀲𑀁 𑀲𑀸𑀥𑀸𑀭𑀡𑀯𑀘𑀦𑀁, 𑀲𑀸𑀥𑀸𑀭𑀡𑁂 𑀧𑀦 𑀕𑀳𑀺𑀢𑁂 𑀘𑀺𑀢𑁆𑀢𑀯𑀺𑀲𑁂𑀲𑁄 𑀤𑀲𑁆𑀲𑀺𑀢𑁄 𑀦𑀸𑀫 𑀳𑁄𑀢𑀺. 𑀲𑀸𑀫𑀜𑁆𑀜𑀚𑁄𑀢𑀦𑀸 𑀘 𑀯𑀺𑀲𑁂𑀲𑁂 𑀅𑀯𑀢𑀺𑀝𑁆𑀞𑀢𑀺, 𑀢𑀲𑁆𑀫𑀸 𑀘𑁂𑀢𑀲𑀺𑀓𑀧𑀤𑀲𑁆𑀲 𑀬𑀣𑀸𑀥𑀺𑀧𑁆𑀧𑁂𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀁 𑀅𑀥𑀺𑀧𑁆𑀧𑁂𑀢’’𑀦𑁆𑀢𑀺 𑀆𑀳. 𑀲𑁄𑀫𑀦𑀲𑁆𑀲𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀢𑀤𑁂𑀓𑀝𑁆𑀞𑀸 𑀭𑀸𑀕𑀸𑀤𑀬𑁄, 𑀲𑀤𑁆𑀥𑀸𑀤𑀬𑁄 𑀘 𑀥𑀫𑁆𑀫𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺, 𑀤𑁄𑀫𑀦𑀲𑁆𑀲𑀕𑁆𑀕𑀳𑀡𑁂𑀦 𑀤𑁄𑀲𑀸𑀤𑀬𑁄. 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀧𑀦 𑀲𑀭𑀽𑀧𑁂𑀦𑁂𑀯 𑀤𑀲𑁆𑀲𑀺𑀢𑀸. 𑀧𑀺-𑀲𑀤𑁆𑀤𑀲𑁆𑀲 𑀯𑀢𑁆𑀢𑀩𑁆𑀩𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄 𑀲𑀼𑀯𑀺𑀜𑁆𑀜𑁂𑀬𑁆𑀬𑁄𑀢𑀺 𑀆𑀳 ‘‘𑀏𑀯𑀁 𑀢𑀯 𑀫𑀦𑁄’’𑀢𑀺, 𑀇𑀫𑀺𑀦𑀸 𑀧𑀓𑀸𑀭𑁂𑀦 𑀢𑀯 𑀫𑀦𑁄 𑀧𑀯𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀓𑁂𑀦 𑀧𑀓𑀸𑀭𑁂𑀦𑀸𑀢𑀺 𑀯𑀼𑀢𑁆𑀢𑀁 ‘‘𑀲𑁄𑀫𑀦𑀲𑁆𑀲𑀺𑀢𑁄 𑀯𑀸’’𑀢𑀺𑀆𑀤𑀺. ‘‘𑀏𑀯𑀫𑁆𑀧𑀺 𑀢𑁂 𑀫𑀦𑁄’’𑀢𑀺 𑀇𑀤𑀁 𑀲𑁄𑀫𑀦𑀲𑁆𑀲𑀺𑀢𑀢𑀸𑀤𑀺𑀫𑀢𑁆𑀢𑀤𑀲𑁆𑀲𑀦𑀁, 𑀦 𑀧𑀦 𑀬𑁂𑀦 𑀲𑁄𑀫𑀦𑀲𑁆𑀲𑀺𑀢𑁄 𑀯𑀸 𑀤𑁄𑀫𑀦𑀲𑁆𑀲𑀺𑀢𑁄 𑀯𑀸, 𑀢𑀁 𑀤𑀲𑁆𑀲𑀦𑀦𑁆𑀢𑀺 𑀢𑀁 𑀘𑀺𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 𑀧𑀸𑀴𑀺𑀬𑀁 ‘‘𑀇𑀢𑀺𑀧𑀺 𑀢𑁂 𑀘𑀺𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀢𑀺𑀲𑀤𑁆𑀤𑁄 𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀢𑁆𑀣𑁄 ‘‘𑀅𑀢𑁆𑀣𑀻𑀢𑀺 𑀔𑁄 𑀓𑀘𑁆𑀘𑀸𑀦 𑀅𑀬𑀫𑁂𑀓𑁄 𑀅𑀦𑁆𑀢𑁄’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁨.𑁧𑁫; 𑁩.𑁯𑁦) 𑀯𑀺𑀬. 𑀢𑁂𑀦𑀸𑀳 ‘‘𑀇𑀤𑀜𑁆𑀘𑀺𑀤𑀜𑁆𑀘 𑀅𑀢𑁆𑀣’’𑀦𑁆𑀢𑀺. 𑀧𑀺-𑀲𑀤𑁆𑀤𑁄 𑀇𑀥𑀸𑀧𑀺 𑀯𑀼𑀢𑁆𑀢𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀧𑀭𑀲𑁆𑀲 𑀘𑀺𑀦𑁆𑀢𑀁 𑀫𑀦𑀢𑀺 𑀚𑀸𑀦𑀸𑀢𑀺 𑀏𑀢𑀸𑀬𑀸𑀢𑀺 𑀘𑀺𑀦𑁆𑀢𑀸𑀫𑀡𑀺 𑀦-𑀓𑀸𑀭𑀲𑁆𑀲 𑀡-𑀓𑀸𑀭𑀁 𑀓𑀢𑁆𑀯𑀸, 𑀲𑀸 𑀏𑀯 𑀧𑀼𑀩𑁆𑀩𑀧𑀤𑀫𑀦𑁆𑀢𑀭𑁂𑀦 𑀫𑀡𑀺𑀓𑀸. 𑀘𑀺𑀦𑁆𑀢𑀸 𑀦𑀸𑀫 𑀦 𑀘𑀺𑀢𑁆𑀢𑁂𑀦 𑀯𑀺𑀦𑀸 𑀪𑀯𑀢𑀻𑀢𑀺 𑀆𑀳 ‘‘𑀧𑀭𑁂𑀲𑀁 𑀘𑀺𑀢𑁆𑀢𑀁 𑀚𑀸𑀦𑀸𑀢𑀻’’𑀢𑀺. ‘‘𑀢𑀲𑁆𑀲𑀸 𑀓𑀺𑀭 𑀯𑀺𑀚𑁆𑀚𑀸𑀬 𑀲𑀸𑀥𑀓𑁄 𑀧𑀼𑀕𑁆𑀕𑀮𑁄 𑀢𑀸𑀤𑀺𑀲𑁂 𑀤𑁂𑀲𑁂, 𑀓𑀸𑀮𑁂 𑀘 𑀫𑀦𑁆𑀢𑀁 𑀧𑀭𑀺𑀚𑀧𑁆𑀧𑀺𑀢𑁆𑀯𑀸 𑀬𑀲𑁆𑀲 𑀘𑀺𑀢𑁆𑀢𑀁 𑀚𑀸𑀦𑀺𑀢𑀼𑀓𑀸𑀫𑁄, 𑀢𑀲𑁆𑀲 𑀤𑀺𑀝𑁆𑀞𑀲𑀼𑀢𑀸𑀤𑀺𑀯𑀺𑀲𑁂𑀲𑀲𑀜𑁆𑀚𑀸𑀦𑀦𑀫𑀼𑀔𑁂𑀦 𑀘𑀺𑀢𑁆𑀢𑀸𑀘𑀸𑀭𑀁 𑀅𑀦𑀼𑀫𑀺𑀦𑀦𑁆𑀢𑁄 𑀓𑀣𑁂𑀢𑀻’’𑀢𑀺 𑀓𑁂𑀘𑀺. ‘‘𑀯𑀸𑀘𑀁 𑀦𑀺𑀘𑁆𑀙𑀭𑀸𑀧𑁂𑀢𑁆𑀯𑀸 𑀢𑀢𑁆𑀣 𑀅𑀓𑁆𑀔𑀭𑀲𑀮𑁆𑀮𑀓𑁆𑀔𑀡𑀯𑀲𑁂𑀦 𑀓𑀣𑁂𑀢𑀻’’𑀢𑀺 𑀅𑀧𑀭𑁂. 𑀲𑀸 𑀧𑀦 𑀯𑀺𑀚𑁆𑀚𑀸 𑀧𑀤𑀓𑀼𑀲𑀮𑀚𑀸𑀢𑀓𑁂𑀦 (𑀚𑀸. 𑁧.𑁯.𑁪𑁯 𑀆𑀤𑀬𑁄) 𑀤𑀻𑀧𑁂𑀢𑀩𑁆𑀩𑀸.

𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀯𑀡𑁆𑀡𑀦𑀸

𑁪𑁮𑁬. 𑀧𑀯𑀢𑁆𑀢𑁂𑀦𑁆𑀢𑀸𑀢𑀺 𑀧𑀯𑀢𑁆𑀢𑀦𑀓𑀸 𑀳𑀼𑀢𑁆𑀯𑀸, 𑀧𑀯𑀢𑁆𑀢𑀦𑀯𑀲𑁂𑀦 𑀯𑀺𑀢𑀓𑁆𑀓𑁂𑀣𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀦𑁆𑀢𑀺 𑀳𑀺 𑀬𑀣𑀸𑀦𑀼𑀲𑀺𑀝𑁆𑀞𑀸𑀬 𑀅𑀦𑀼𑀲𑀸𑀲𑀦𑀺𑀬𑀸 𑀯𑀺𑀥𑀺𑀯𑀲𑁂𑀦, 𑀧𑀝𑀺𑀲𑁂𑀥𑀯𑀲𑁂𑀦 𑀘 𑀧𑀯𑀢𑁆𑀢𑀺𑀆𑀓𑀸𑀭𑀧𑀭𑀸𑀫𑀲𑀦𑀁, 𑀲𑀸 𑀘 𑀅𑀦𑀼𑀲𑀸𑀲𑀦𑀻 𑀲𑀫𑁆𑀫𑀸𑀯𑀺𑀢𑀓𑁆𑀓𑀸𑀦𑀁, 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀸𑀦𑀜𑁆𑀘 𑀧𑀯𑀢𑁆𑀢𑀺𑀆𑀓𑀸𑀭𑀤𑀲𑁆𑀲𑀦𑀯𑀲𑁂𑀦 𑀢𑀢𑁆𑀣 𑀆𑀦𑀺𑀲𑀁𑀲𑀲𑁆𑀲, 𑀆𑀤𑀻𑀦𑀯𑀲𑁆𑀲 𑀘 𑀯𑀺𑀪𑀸𑀯𑀦𑀢𑁆𑀣𑀁 𑀧𑀯𑀢𑁆𑀢𑀢𑀺. 𑀅𑀦𑀺𑀘𑁆𑀘𑀲𑀜𑁆𑀜𑀫𑁂𑀯, 𑀦 𑀦𑀺𑀘𑁆𑀘𑀲𑀜𑁆𑀜𑀁. 𑀧𑀝𑀺𑀬𑁄𑀕𑀻𑀦𑀺𑀯𑀢𑁆𑀢𑀦𑀢𑁆𑀣𑀜𑁆𑀳𑀺 𑀏𑀯-𑀓𑀸𑀭𑀕𑁆𑀕𑀳𑀡𑀁. 𑀇𑀥𑀸𑀧𑀺 𑀏𑀯𑀁-𑀲𑀤𑁆𑀤𑀲𑁆𑀲 𑀅𑀢𑁆𑀣𑁄, 𑀧𑀬𑁄𑀚𑀦𑀜𑁆𑀘 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀇𑀤𑀁-𑀕𑀳𑀡𑁂𑀧𑀺 𑀏𑀲𑁂𑀯 𑀦𑀬𑁄. 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑀦𑁆𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀢𑀤𑀜𑁆𑀜𑀭𑀸𑀕𑀲𑁆𑀲 𑀘𑁂𑀯 𑀤𑁄𑀲𑀸𑀤𑀻𑀦𑀜𑁆𑀘 𑀧𑀳𑀸𑀦𑀲𑁆𑀲 𑀇𑀘𑁆𑀙𑀺𑀢𑀢𑁆𑀢𑀸, 𑀢𑀧𑁆𑀧𑀳𑀸𑀦𑀲𑁆𑀲 𑀘 𑀢𑀤𑀜𑁆𑀜𑀭𑀸𑀕𑀸𑀤𑀺𑀔𑁂𑀧𑀦𑀲𑁆𑀲 𑀉𑀧𑀸𑀬𑀪𑀸𑀯𑀢𑁄 𑀤𑀼𑀝𑁆𑀞𑀮𑁄𑀳𑀺𑀢𑀯𑀺𑀫𑁄𑀘𑀦𑀲𑁆𑀲 𑀧𑀼𑀩𑁆𑀩𑀤𑀼𑀝𑁆𑀞𑀫𑀁𑀲𑀔𑁂𑀧𑀦𑀽𑀧𑀸𑀬𑀢𑀸 𑀯𑀺𑀬. 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀫𑁂𑀯𑀸𑀢𑀺 𑀅𑀯𑀥𑀸𑀭𑀡𑀁 𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀲𑀸𑀯𑀚𑁆𑀚𑀥𑀫𑁆𑀫𑀦𑀺𑀯𑀢𑁆𑀢𑀦𑀧𑀭𑀁 𑀤𑀝𑁆𑀞𑀩𑁆𑀩𑀁 𑀢𑀲𑁆𑀲𑀸𑀥𑀺𑀕𑀫𑀽𑀧𑀸𑀬𑀸𑀦𑀺𑀲𑀁𑀲𑀪𑀽𑀢𑀸𑀦𑀁 𑀢𑀤𑀜𑁆𑀜𑁂𑀲𑀁 𑀅𑀦𑀯𑀚𑁆𑀚𑀥𑀫𑁆𑀫𑀸𑀦𑀁 𑀦𑀸𑀦𑀦𑁆𑀢𑀭𑀺𑀓𑀪𑀸𑀯𑀢𑁄. 𑀇𑀤𑁆𑀥𑀺𑀯𑀺𑀥𑀁 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀤𑀲𑁆𑀲𑁂𑀢𑀺 𑀇𑀤𑁆𑀥𑀺𑀬𑁂𑀯 𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀓𑀢𑁆𑀯𑀸. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄.

𑀧𑀸𑀝𑀺𑀳𑀸𑀭𑀺𑀬𑀧𑀤𑀲𑁆𑀲 𑀧𑀦 𑀯𑀘𑀦𑀢𑁆𑀣𑀁 (𑀉𑀤𑀸. 𑀅𑀝𑁆𑀞. 𑀧𑀞𑀫𑀩𑁄𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸; 𑀇𑀢𑀺𑀯𑀼. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸) ‘‘𑀧𑀝𑀺𑀧𑀓𑁆𑀔𑀳𑀭𑀡𑀢𑁄, 𑀭𑀸𑀕𑀸𑀤𑀺𑀓𑀺𑀮𑁂𑀲𑀸𑀧𑀦𑀬𑀦𑀢𑁄 𑀧𑀸𑀝𑀺𑀳𑀸𑀭𑀺𑀬’’𑀦𑁆𑀢𑀺 𑀯𑀤𑀦𑁆𑀢𑀺, 𑀪𑀕𑀯𑀢𑁄 𑀧𑀦 𑀧𑀝𑀺𑀧𑀓𑁆𑀔𑀸 𑀭𑀸𑀕𑀸𑀤𑀬𑁄 𑀦 𑀲𑀦𑁆𑀢𑀺 𑀬𑁂 𑀳𑀭𑀺𑀢𑀩𑁆𑀩𑀸. 𑀧𑀼𑀣𑀼𑀚𑁆𑀚𑀦𑀸𑀦𑀫𑁆𑀧𑀺 𑀯𑀺𑀕𑀢𑀼𑀧𑀓𑁆𑀓𑀺𑀮𑁂𑀲𑁂 𑀅𑀝𑁆𑀞𑀗𑁆𑀕𑀕𑀼𑀡𑀲𑀫𑀦𑁆𑀦𑀸𑀕𑀢𑁂 𑀘𑀺𑀢𑁆𑀢𑁂 𑀳𑀢𑀧𑀝𑀺𑀧𑀓𑁆𑀔𑁂 𑀇𑀤𑁆𑀥𑀺𑀯𑀺𑀥𑀁 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀢𑀢𑁆𑀣 𑀧𑀯𑀢𑁆𑀢𑀯𑁄𑀳𑀸𑀭𑁂𑀦 𑀘 𑀦 𑀲𑀓𑁆𑀓𑀸 𑀇𑀥 ‘‘𑀧𑀸𑀝𑀺𑀳𑀸𑀭𑀺𑀬’’𑀦𑁆𑀢𑀺 𑀯𑀢𑁆𑀢𑀼𑀁. 𑀲𑀘𑁂 𑀧𑀦 𑀫𑀳𑀸𑀓𑀸𑀭𑀼𑀡𑀺𑀓𑀲𑁆𑀲 𑀪𑀕𑀯𑀢𑁄 𑀯𑁂𑀦𑁂𑀬𑁆𑀬𑀕𑀢𑀸 𑀘 𑀓𑀺𑀮𑁂𑀲𑀸 𑀧𑀝𑀺𑀧𑀓𑁆𑀔𑀸, 𑀢𑁂𑀲𑀁 𑀳𑀭𑀡𑀢𑁄 ‘‘𑀧𑀸𑀝𑀺𑀳𑀸𑀭𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀲𑀢𑀺 𑀬𑀼𑀢𑁆𑀢𑀫𑁂𑀢𑀁. 𑀅𑀣 𑀯𑀸 𑀪𑀕𑀯𑀢𑁄 𑀘𑁂𑀯 𑀲𑀸𑀲𑀦𑀲𑁆𑀲 𑀘 𑀧𑀝𑀺𑀧𑀓𑁆𑀔𑀸 𑀢𑀺𑀢𑁆𑀣𑀺𑀬𑀸, 𑀢𑁂𑀲𑀁 𑀳𑀭𑀡𑀢𑁄 𑀧𑀸𑀝𑀺𑀳𑀸𑀭𑀺𑀬𑀁. 𑀢𑁂 𑀳𑀺 𑀤𑀺𑀝𑁆𑀞𑀺𑀳𑀭𑀡𑀯𑀲𑁂𑀦, 𑀤𑀺𑀝𑁆𑀞𑀺𑀧𑁆𑀧𑀓𑀸𑀲𑀦𑁂 𑀅𑀲𑀫𑀢𑁆𑀣𑀪𑀸𑀯𑁂𑀦 𑀘 𑀇𑀤𑁆𑀥𑀺𑀆𑀤𑁂𑀲𑀦𑀸𑀦𑀼𑀲𑀸𑀲𑀦𑀻𑀳𑀺 𑀳𑀭𑀺𑀢𑀸 𑀅𑀧𑀦𑀻𑀢𑀸 𑀳𑁄𑀦𑁆𑀢𑀻𑀢𑀺. ‘‘𑀧𑀝𑀻’’𑀢𑀺 𑀯𑀸 𑀅𑀬𑀁 𑀲𑀤𑁆𑀤𑁄 ‘‘𑀧𑀘𑁆𑀙𑀸’’𑀢𑀺 𑀏𑀢𑀲𑁆𑀲 𑀅𑀢𑁆𑀣𑀁 𑀩𑁄𑀥𑁂𑀢𑀺 ‘‘𑀢𑀲𑁆𑀫𑀺𑀁 𑀧𑀝𑀺𑀧𑀯𑀺𑀝𑁆𑀞𑀫𑁆𑀳𑀺, 𑀅𑀜𑁆𑀜𑁄 𑀆𑀕𑀜𑁆𑀙𑀺 𑀩𑁆𑀭𑀸𑀳𑁆𑀫𑀡𑁄’’𑀢𑀺 (𑀲𑀼. 𑀦𑀺. 𑁯𑁮𑁫; 𑀘𑀽𑀴𑀦𑀺. 𑁪) 𑀧𑀸𑀭𑀸𑀬𑀦𑀲𑀼𑀢𑁆𑀢𑀧𑀤𑁂 𑀯𑀺𑀬, 𑀢𑀲𑁆𑀫𑀸 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀯𑀺𑀕𑀢𑀼𑀧𑀓𑁆𑀓𑀺𑀮𑁂𑀲𑁂 𑀘 𑀓𑀢𑀓𑀺𑀘𑁆𑀘𑁂𑀦 𑀧𑀘𑁆𑀙𑀸 𑀳𑀭𑀺𑀢𑀩𑁆𑀩𑀁 𑀧𑀯𑀢𑁆𑀢𑁂𑀢𑀩𑁆𑀩𑀦𑁆𑀢𑀺 𑀧𑀝𑀺𑀳𑀸𑀭𑀺𑀬𑀁, 𑀅𑀢𑁆𑀢𑀦𑁄 𑀯𑀸 𑀉𑀧𑀓𑁆𑀓𑀺𑀮𑁂𑀲𑁂𑀲𑀼 𑀘𑀢𑀼𑀢𑁆𑀣𑀚𑁆𑀛𑀸𑀦𑀫𑀕𑁆𑀕𑁂𑀳𑀺 𑀳𑀭𑀺𑀢𑁂𑀲𑀼 𑀧𑀘𑁆𑀙𑀸 𑀳𑀭𑀡𑀁 𑀧𑀝𑀺𑀳𑀸𑀭𑀺𑀬𑀁, 𑀇𑀤𑁆𑀥𑀺𑀆𑀤𑁂𑀲𑀦𑀸𑀦𑀼𑀲𑀸𑀲𑀦𑀺𑀬𑁄 𑀘 𑀯𑀺𑀕𑀢𑀼𑀧𑀓𑁆𑀓𑀺𑀮𑁂𑀲𑁂𑀦 𑀓𑀢𑀓𑀺𑀘𑁆𑀘𑁂𑀦 𑀘 𑀲𑀢𑁆𑀢𑀳𑀺𑀢𑀢𑁆𑀣𑀁 𑀧𑀼𑀦 𑀧𑀯𑀢𑁆𑀢𑁂𑀢𑀩𑁆𑀩𑀸, 𑀳𑀭𑀺𑀢𑁂𑀲𑀼 𑀘 𑀅𑀢𑁆𑀢𑀦𑁄 𑀉𑀧𑀓𑁆𑀓𑀺𑀮𑁂𑀲𑁂𑀲𑀼 𑀧𑀭𑀲𑀢𑁆𑀢𑀸𑀦𑀁 𑀉𑀧𑀓𑁆𑀓𑀺𑀮𑁂𑀲𑀳𑀭𑀡𑀸𑀦𑀺 𑀳𑁄𑀦𑁆𑀢𑀻𑀢𑀺 𑀧𑀝𑀺𑀳𑀸𑀭𑀺𑀬𑀸𑀦𑀺 𑀦𑀸𑀫 𑀪𑀯𑀦𑁆𑀢𑀺, 𑀧𑀝𑀺𑀳𑀸𑀭𑀺𑀬𑀫𑁂𑀯 𑀧𑀸𑀝𑀺𑀳𑀸𑀭𑀺𑀬𑀁. 𑀧𑀝𑀺𑀳𑀸𑀭𑀺𑀬𑁂 𑀯𑀸 𑀇𑀤𑁆𑀥𑀺𑀆𑀤𑁂𑀲𑀦𑀸𑀦𑀼𑀲𑀸𑀲𑀦𑀺𑀲𑀫𑀼𑀤𑀸𑀬𑁂 𑀪𑀯𑀁 𑀏𑀓𑁂𑀓𑀁 ‘‘𑀧𑀸𑀝𑀺𑀳𑀸𑀭𑀺𑀬’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀝𑀺𑀳𑀸𑀭𑀺𑀬𑀁 𑀯𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀁, 𑀫𑀕𑁆𑀕𑁄 𑀘 𑀧𑀝𑀺𑀧𑀓𑁆𑀔𑀳𑀭𑀡𑀢𑁄, 𑀢𑀢𑁆𑀣 𑀚𑀸𑀢𑀁, 𑀢𑀲𑁆𑀫𑀺𑀁 𑀯𑀸 𑀦𑀺𑀫𑀺𑀢𑁆𑀢𑀪𑀽𑀢𑁂, 𑀢𑀢𑁄 𑀯𑀸 𑀆𑀕𑀢𑀦𑁆𑀢𑀺 𑀧𑀸𑀝𑀺𑀳𑀸𑀭𑀺𑀬𑀁, 𑀇𑀤𑁆𑀥𑀺𑀆𑀤𑁂𑀲𑀦𑀸𑀦𑀼𑀲𑀸𑀲𑀦𑀻𑀳𑀺 𑀯𑀸 𑀧𑀭𑀲𑀦𑁆𑀢𑀸𑀦𑁂 𑀧𑀲𑀸𑀤𑀸𑀤𑀻𑀦𑀁 𑀧𑀝𑀺𑀧𑀓𑁆𑀔𑀲𑁆𑀲 𑀓𑀺𑀮𑁂𑀲𑀲𑁆𑀲 𑀳𑀭𑀡𑀢𑁄 𑀯𑀼𑀢𑁆𑀢𑀦𑀬𑁂𑀦 𑀧𑀸𑀝𑀺𑀳𑀸𑀭𑀺𑀬𑀁. 𑀲𑀢𑀢𑀁 𑀥𑀫𑁆𑀫𑀤𑁂𑀲𑀦𑀸𑀢𑀺 𑀲𑀩𑁆𑀩𑀓𑀸𑀮𑀁 𑀤𑁂𑀲𑁂𑀢𑀩𑁆𑀩𑀥𑀫𑁆𑀫𑀤𑁂𑀲𑀦𑀸.

𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑁂𑀦𑀸𑀢𑀺 𑀲𑀳𑀸𑀤𑀺𑀬𑁄𑀕𑁂 𑀓𑀭𑀡𑀯𑀘𑀦𑀁, 𑀢𑁂𑀦 𑀲𑀤𑁆𑀥𑀺𑀁 𑀆𑀘𑀺𑀡𑁆𑀡𑀦𑁆𑀢𑀺 𑀅𑀢𑁆𑀣𑁄. 𑀇𑀢𑀭𑀢𑁆𑀣𑀸𑀧𑀺 𑀏𑀲 𑀦𑀬𑁄. 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑁆𑀲 𑀆𑀘𑀺𑀡𑁆𑀡𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑀫𑀢𑁆𑀣𑀁 𑀔𑀦𑁆𑀥𑀓𑀯𑀢𑁆𑀣𑀼𑀦𑀸 𑀲𑀸𑀥𑁂𑀦𑁆𑀢𑁄 ‘‘𑀤𑁂𑀯𑀤𑀢𑁆𑀢𑁂’’𑀢𑀺𑀆𑀤𑀺𑀫𑀸𑀳. 𑀕𑀬𑀸𑀲𑀻𑀲𑁂𑀢𑀺 𑀕𑀬𑀸𑀕𑀸𑀫𑀲𑁆𑀲 𑀅𑀯𑀺𑀤𑀽𑀭𑁂 𑀕𑀬𑀸𑀲𑀻𑀲𑀦𑀸𑀫𑀓𑁄 𑀳𑀢𑁆𑀣𑀺𑀓𑀼𑀫𑁆𑀪𑀲𑀤𑀺𑀲𑁄 𑀧𑀺𑀝𑁆𑀞𑀺𑀧𑀸𑀲𑀸𑀡𑁄 𑀅𑀢𑁆𑀣𑀺, 𑀬𑀢𑁆𑀣 𑀪𑀺𑀓𑁆𑀔𑀼𑀲𑀳𑀲𑁆𑀲𑀲𑁆𑀲𑀧𑀺 𑀑𑀓𑀸𑀲𑁄 𑀳𑁄𑀢𑀺, 𑀢𑀲𑁆𑀫𑀺𑀁 𑀧𑀺𑀝𑁆𑀞𑀺𑀧𑀸𑀲𑀸𑀡𑁂. ‘‘𑀘𑀺𑀢𑁆𑀢𑀸𑀘𑀸𑀭𑀁 𑀜𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀢𑀺, ‘‘𑀥𑀫𑁆𑀫𑀁 𑀤𑁂𑀲𑁂𑀲𑀻’’𑀢𑀺 𑀇𑀫𑀺𑀦𑀸 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁, ‘‘𑀯𑀺𑀓𑀼𑀩𑁆𑀩𑀦𑀁 𑀤𑀲𑁆𑀲𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁. 𑀫𑀳𑀸𑀦𑀸𑀕𑀸𑀢𑀺 𑀫𑀳𑀸𑀔𑀻𑀡𑀸𑀲𑀯𑀸 𑀅𑀭𑀳𑀦𑁆𑀢𑁄. ‘‘𑀦𑀸𑀕𑁄’’𑀢𑀺 𑀳𑀺 𑀅𑀭𑀳𑀢𑁄 𑀅𑀥𑀺𑀯𑀘𑀦𑀁 𑀦𑀢𑁆𑀣𑀺 𑀆𑀕𑀼 𑀧𑀸𑀧𑀫𑁂𑀢𑀲𑁆𑀲𑀸𑀢𑀺 𑀓𑀢𑁆𑀯𑀸. 𑀬𑀣𑀸𑀳 𑀲𑀪𑀺𑀬𑀲𑀼𑀢𑁆𑀢𑁂 𑁋

‘‘𑀆𑀕𑀼𑀁 𑀦 𑀓𑀭𑁄𑀢𑀺 𑀓𑀺𑀜𑁆𑀘𑀺 𑀮𑁄𑀓𑁂,

𑀲𑀩𑁆𑀩𑀲𑀁𑀬𑁄𑀕𑁂 𑀯𑀺𑀲𑀚𑁆𑀚 𑀩𑀦𑁆𑀥𑀦𑀸𑀦𑀺;

𑀲𑀩𑁆𑀩𑀢𑁆𑀣 𑀦 𑀲𑀚𑁆𑀚𑀢𑀻 𑀯𑀺𑀫𑀼𑀢𑁆𑀢𑁄,

𑀦𑀸𑀕𑁄 𑀢𑀸𑀤𑀺 𑀧𑀯𑀼𑀘𑁆𑀘𑀢𑁂 𑀢𑀣𑀢𑁆𑀢𑀸’’𑀢𑀺. (𑀲𑀼. 𑀦𑀺. 𑁫𑁨𑁭; 𑀫𑀳𑀸𑀦𑀺. 𑁮𑁦; 𑀘𑀽𑀴𑀦𑀺. 𑁨𑁭, 𑁧𑁩𑁯);

𑀅𑀝𑁆𑀞𑀓𑀣𑀸𑀬𑀁 𑀧𑀦𑁂𑀢𑁆𑀣 ‘‘𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀅𑀭𑀳𑀢𑁆𑀢𑀨𑀮𑁂’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁪𑁮𑁬) 𑀯𑀼𑀢𑁆𑀢𑀁. 𑀲𑀗𑁆𑀖𑀪𑁂𑀤𑀓𑀓𑁆𑀔𑀦𑁆𑀥𑀓𑀧𑀸𑀴𑀺𑀬𑀁 𑀧𑀦 ‘‘𑀅𑀣 𑀔𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑁂𑀦 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀸𑀦𑀼𑀲𑀸𑀲𑀦𑀺𑀬𑀸, 𑀆𑀬𑀲𑁆𑀫𑀢𑀸 𑀘 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀸𑀦𑀼𑀲𑀸𑀲𑀦𑀺𑀬𑀸 𑀑𑀯𑀤𑀺𑀬𑀫𑀸𑀦𑀸𑀦𑀁 𑀅𑀦𑀼𑀲𑀸𑀲𑀺𑀬𑀫𑀸𑀦𑀸𑀦𑀁 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 ‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’𑀦𑁆𑀢𑀺’’ (𑀘𑀽𑀴𑀯. 𑁩𑁪𑁫) 𑀉𑀪𑀺𑀦𑁆𑀦𑀫𑁆𑀧𑀺 𑀣𑁂𑀭𑀸𑀦𑀁 𑀥𑀫𑁆𑀫𑀤𑁂𑀲𑀦𑀸𑀬 𑀢𑁂𑀲𑀁 𑀥𑀫𑁆𑀫𑀘𑀓𑁆𑀔𑀼𑀧𑀝𑀺𑀮𑀸𑀪𑁄𑀯 𑀤𑀲𑁆𑀲𑀺𑀢𑁄, 𑀢𑀬𑀺𑀤𑀁 𑀯𑀺𑀲𑀤𑀺𑀲𑀯𑀘𑀦𑀁 𑀤𑀻𑀖𑀪𑀸𑀡𑀓𑀸𑀦𑀁, 𑀔𑀦𑁆𑀥𑀓𑀪𑀸𑀡𑀓𑀸𑀦𑀜𑁆𑀘 𑀫𑀢𑀺𑀪𑁂𑀤𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀗𑁆𑀕𑀸𑀳𑀓𑀪𑀸𑀲𑀺𑀢𑀸 𑀳𑀺 𑀅𑀬𑀁 𑀧𑀸𑀴𑀺, 𑀅𑀝𑁆𑀞𑀓𑀣𑀸 𑀘 𑀢𑁂𑀳𑁂𑀯 𑀲𑀗𑁆𑀕𑀳𑀫𑀸𑀭𑁄𑀧𑀺𑀢𑀸, 𑀅𑀧𑀺𑀘 𑀧𑀸𑀴𑀺𑀬𑀁 𑀉𑀧𑀭𑀺𑀫𑀕𑁆𑀕𑀨𑀮𑀫𑁆𑀧𑀺 𑀲𑀗𑁆𑀕𑀳𑁂𑀢𑁆𑀯𑀸 ‘‘𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀻’’𑀢𑀺 𑀯𑀼𑀢𑁆𑀢𑀁 𑀬𑀣𑀸 𑀢𑀁 𑀩𑁆𑀭𑀳𑁆𑀫𑀸𑀬𑀼𑀲𑀼𑀢𑁆𑀢𑁂, (𑀫. 𑀦𑀺. 𑁨.𑁩𑁪𑁩) 𑀘𑀽𑀴𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑁂 (𑀫. 𑀦𑀺. 𑁩.𑁪𑁧𑁬) 𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

‘‘𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁 𑀧𑀦 𑀩𑀼𑀤𑁆𑀥𑀸𑀦𑀁 𑀲𑀢𑀢𑀁 𑀥𑀫𑁆𑀫𑀤𑁂𑀲𑀦𑀸’’𑀢𑀺 𑀲𑀸𑀢𑀺𑀲𑀬𑀢𑀸𑀬 𑀯𑀼𑀢𑁆𑀢𑀁. 𑀲𑀉𑀧𑀸𑀭𑀫𑁆𑀪𑀸𑀦𑀺 𑀬𑀣𑀸𑀯𑀼𑀢𑁆𑀢𑁂𑀦 𑀧𑀢𑀺𑀭𑀽𑀧𑀓𑁂𑀦 𑀉𑀧𑀸𑀭𑀫𑁆𑀪𑀺𑀢𑀩𑁆𑀩𑀢𑁄. 𑀲𑀤𑁄𑀲𑀸𑀦𑀺 𑀧𑀭𑀸𑀭𑁄𑀧𑀺𑀢𑀤𑁄𑀲𑀲𑀫𑀼𑀘𑁆𑀙𑀺𑀦𑁆𑀤𑀦𑀲𑁆𑀲 𑀅𑀦𑀼𑀧𑀸𑀬𑀪𑀸𑀯𑀢𑁄. 𑀲𑀤𑁄𑀲𑀢𑁆𑀢𑀸 𑀏𑀯 𑀅𑀤𑁆𑀥𑀸𑀦𑀁 𑀦 𑀢𑀺𑀝𑁆𑀞𑀦𑁆𑀢𑀺 𑀘𑀺𑀭𑀓𑀸𑀮𑀝𑁆𑀞𑀸𑀬𑀻𑀦𑀺 𑀦 𑀳𑁄𑀦𑁆𑀢𑀺. 𑀅𑀤𑁆𑀥𑀸𑀦𑀁 𑀅𑀢𑀺𑀝𑁆𑀞𑀦𑀢𑁄 𑀦 𑀦𑀺𑀬𑁆𑀬𑀦𑁆𑀢𑀻𑀢𑀺 𑀨𑀮𑁂𑀦 𑀳𑁂𑀢𑀼𑀦𑁄 𑀅𑀦𑀼𑀫𑀸𑀦𑀁. 𑀅𑀦𑀺𑀬𑁆𑀬𑀸𑀦𑀺𑀓𑀢𑀸𑀬 𑀳𑀺 𑀢𑀸𑀦𑀺 𑀅𑀦𑀤𑁆𑀥𑀦𑀺𑀬𑀸𑀦𑀺. 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁 𑀅𑀦𑀼𑀧𑀸𑀭𑀫𑁆𑀪𑀁 𑀯𑀺𑀲𑀼𑀤𑁆𑀥𑀺𑀧𑁆𑀧𑀪𑀯𑀢𑁄, 𑀯𑀺𑀲𑀼𑀤𑁆𑀥𑀺𑀦𑀺𑀲𑁆𑀲𑀬𑀢𑁄 𑀘. 𑀢𑀢𑁄𑀬𑁂𑀯 𑀦𑀺𑀤𑁆𑀤𑁄𑀲𑀁. 𑀦 𑀳𑀺 𑀢𑀢𑁆𑀣 𑀧𑀼𑀩𑁆𑀩𑀸𑀧𑀭𑀯𑀺𑀭𑁄𑀥𑀸𑀤𑀺𑀤𑁄𑀲𑀲𑀫𑁆𑀪𑀯𑁄 𑀅𑀢𑁆𑀣𑀺. 𑀦𑀺𑀤𑁆𑀤𑁄𑀲𑀢𑁆𑀢𑀸 𑀏𑀯 𑀅𑀤𑁆𑀥𑀸𑀦𑀁 𑀢𑀺𑀝𑁆𑀞𑀢𑀺 𑀧𑀭𑀧𑁆𑀧𑀯𑀸𑀤𑀯𑀸𑀢𑁂𑀳𑀺, 𑀓𑀺𑀮𑁂𑀲𑀯𑀸𑀢𑁂𑀳𑀺 𑀘 𑀅𑀦𑀼𑀧𑀳𑀦𑁆𑀢𑀩𑁆𑀩𑀢𑁄. 𑀅𑀤𑁆𑀥𑀸𑀦𑀁 𑀢𑀺𑀝𑁆𑀞𑀦𑀢𑁄 𑀦𑀺𑀬𑁆𑀬𑀸𑀢𑀻𑀢𑀺 𑀇𑀥𑀸𑀧𑀺 𑀨𑀮𑁂𑀦 𑀳𑁂𑀢𑀼𑀦𑁄 𑀅𑀦𑀼𑀫𑀸𑀦𑀁. 𑀦𑀺𑀬𑁆𑀬𑀸𑀦𑀺𑀓𑀢𑀸𑀬 𑀳𑀺 𑀢𑀁 𑀅𑀤𑁆𑀥𑀦𑀺𑀬𑀁. 𑀢𑀲𑁆𑀫𑀸𑀢𑀺 𑀬𑀣𑀸𑀯𑀼𑀢𑁆𑀢𑀓𑀸𑀭𑀡𑀢𑁄, 𑀢𑁂𑀦 𑀘 𑀉𑀧𑀸𑀭𑀫𑁆𑀪𑀸𑀤𑀺𑀁, 𑀅𑀦𑀼𑀧𑀸𑀭𑀫𑁆𑀪𑀸𑀤𑀺𑀜𑁆𑀘𑀸𑀢𑀺 𑀉𑀪𑀬𑀁 𑀬𑀣𑀸𑀓𑁆𑀓𑀫𑀁 𑀉𑀪𑀬𑀢𑁆𑀣 𑀕𑀸𑀭𑀬𑁆𑀳𑀧𑀸𑀲𑀁𑀲𑀪𑀸𑀯𑀸𑀦𑀁 𑀳𑁂𑀢𑀼𑀪𑀸𑀯𑁂𑀦 𑀧𑀘𑁆𑀘𑀸𑀫𑀲𑀢𑀺.

𑀪𑀽𑀢𑀦𑀺𑀭𑁄𑀥𑁂𑀲𑀓𑀯𑀢𑁆𑀣𑀼𑀯𑀡𑁆𑀡𑀦𑀸

𑁪𑁮𑁭. 𑀅𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀬𑀲𑁆𑀫𑀸 𑀫𑀳𑀸𑀪𑀽𑀢𑀧𑀭𑀺𑀬𑁂𑀲𑀓𑁄 𑀪𑀺𑀓𑁆𑀔𑀼 𑀧𑀼𑀭𑀺𑀫𑁂𑀲𑀼 𑀤𑁆𑀯𑀻𑀲𑀼 𑀧𑀸𑀝𑀺𑀳𑀸𑀭𑀺𑀬𑁂𑀲𑀼 𑀯𑀲𑀺𑀧𑁆𑀧𑀢𑁆𑀢𑁄 𑀲𑀼𑀓𑀼𑀲𑀮𑁄𑀧𑀺 𑀲𑀫𑀸𑀦𑁄 𑀫𑀳𑀸𑀪𑀽𑀢𑀸𑀦𑀁 𑀅𑀧𑀭𑀺𑀲𑁂𑀲𑀦𑀺𑀭𑁄𑀥𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀸𑀦𑀁 𑀦𑀸𑀯𑀩𑀼𑀚𑁆𑀛𑀺, 𑀢𑀲𑁆𑀫𑀸 𑀢𑀤𑀼𑀪𑀬𑀸𑀦𑀺 𑀦𑀺𑀬𑁆𑀬𑀸𑀦𑀸𑀯𑀳𑀢𑁆𑀢𑀸𑀪𑀸𑀯𑀢𑁄 𑀅𑀦𑀺𑀬𑁆𑀬𑀸𑀦𑀺𑀓𑀸𑀦𑀻𑀢𑀺 𑀢𑁂𑀲𑀁 𑀅𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁 𑀢𑀓𑁆𑀓𑀭𑀲𑁆𑀲 𑀏𑀓𑀦𑁆𑀢𑀢𑁄 𑀦𑀺𑀬𑁆𑀬𑀸𑀦𑀸𑀯𑀳𑀦𑁆𑀢𑀺 𑀢𑀲𑁆𑀲𑁂𑀯 𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀤𑀲𑁆𑀲𑀦𑀢𑁆𑀣𑀁.

𑀏𑀯𑀁 𑀏𑀢𑀺𑀲𑁆𑀲𑀸 𑀤𑁂𑀲𑀦𑀸𑀬 𑀫𑀼𑀔𑁆𑀬𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀦𑀼𑀲𑀗𑁆𑀕𑀺𑀓𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀦𑀺𑀬𑁆𑀬𑀸𑀦𑀫𑁂𑀯 𑀳𑀺 𑀏𑀢𑀺𑀲𑁆𑀲𑀸 𑀤𑁂𑀲𑀦𑀸𑀬 𑀫𑀼𑀔𑁆𑀬𑀧𑀬𑁄𑀚𑀦𑀁 𑀢𑀲𑁆𑀲 𑀢𑀤𑀢𑁆𑀣𑀪𑀸𑀯𑀢𑁄. 𑀩𑀼𑀤𑁆𑀥𑀸𑀦𑀁 𑀧𑀦 𑀫𑀳𑀦𑁆𑀢𑀪𑀸𑀯𑁄 𑀅𑀦𑀼𑀲𑀗𑁆𑀕𑀺𑀓𑀧𑀬𑁄𑀚𑀦𑀁 𑀅𑀢𑁆𑀣𑀸𑀧𑀢𑁆𑀢𑀺𑀬𑀸𑀯 𑀕𑀦𑁆𑀢𑀩𑁆𑀩𑀢𑁄. 𑀓𑀻𑀤𑀺𑀲𑁄 𑀦𑀸𑀫𑁂𑀲 𑀪𑀺𑀓𑁆𑀔𑀽𑀢𑀺 𑀆𑀳 ‘‘𑀬𑁄 𑀫𑀳𑀸𑀪𑀽𑀢𑁂’’𑀢𑀺𑀆𑀤𑀺. 𑀧𑀭𑀺𑀬𑁂𑀲𑀦𑁆𑀢𑁄𑀢𑀺 𑀅𑀧𑀭𑀺𑀬𑁂𑀲𑀁 𑀦𑀺𑀭𑀼𑀚𑁆𑀛𑀦𑀯𑀲𑁂𑀦 𑀫𑀳𑀸𑀪𑀽𑀢𑁂 𑀕𑀯𑁂𑀲𑀦𑁆𑀢𑁄, 𑀢𑁂𑀲𑀁 𑀅𑀦𑀯𑀲𑁂𑀲𑀦𑀺𑀭𑁄𑀥𑀁 𑀯𑀻𑀫𑀁𑀲𑀦𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀘𑀭𑀺𑀢𑁆𑀯𑀸𑀢𑀺 𑀥𑀫𑁆𑀫𑀢𑀸𑀬 𑀘𑁄𑀤𑀺𑀬𑀫𑀸𑀦𑁄 𑀧𑀭𑀺𑀘𑀭𑀺𑀢𑁆𑀯𑀸. 𑀥𑀫𑁆𑀫𑀢𑀸𑀲𑀺𑀤𑁆𑀥𑀁 𑀓𑀺𑀭𑁂𑀢𑀁, 𑀬𑀤𑀺𑀤𑀁 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀣𑀸 𑀯𑀺𑀘𑀭𑀡𑀁 𑀬𑀣𑀸 𑀅𑀪𑀺𑀚𑀸𑀢𑀺𑀬𑀁 𑀫𑀳𑀸𑀧𑀣𑀯𑀺𑀓𑀫𑁆𑀧𑀸𑀤𑀺. 𑀯𑀺𑀲𑁆𑀲𑀚𑁆𑀚𑁄𑀓𑀸𑀲𑀦𑁆𑀢𑀺 𑀯𑀺𑀲𑁆𑀲𑀚𑁆𑀚𑀝𑁆𑀞𑀸𑀦𑀁, ‘‘𑀯𑀺𑀲𑁆𑀲𑀚𑁆𑀚𑀓𑀭’’𑀦𑁆𑀢𑀺𑀧𑀺 𑀧𑀸𑀞𑁄, 𑀯𑀺𑀲𑁆𑀲𑀚𑁆𑀚𑀓𑀦𑁆𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸𑀢𑀺 𑀩𑀼𑀤𑁆𑀥𑀫𑁂𑀯 𑀧𑀼𑀘𑁆𑀙𑀺𑀢𑁆𑀯𑀸 𑀦𑀺𑀓𑁆𑀓𑀗𑁆𑀔𑀢𑁆𑀢𑀸, 𑀢𑀲𑁆𑀲𑁂𑀯 𑀯𑀺𑀲𑁆𑀲𑀚𑁆𑀚𑀺𑀢𑀼𑀁 𑀲𑀫𑀢𑁆𑀣𑀢𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀳𑀦𑁆𑀢𑀪𑀸𑀯𑀧𑁆𑀧𑀓𑀸𑀲𑀦𑀢𑁆𑀣𑀦𑁆𑀢𑀺 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀦𑀜𑁆𑀜𑀲𑀸𑀥𑀸𑀭𑀡𑀲𑁆𑀲 𑀩𑀼𑀤𑁆𑀥𑀸𑀦𑀁 𑀫𑀳𑀦𑁆𑀢𑀪𑀸𑀯𑀲𑁆𑀲 𑀫𑀳𑀸𑀦𑀼𑀪𑀸𑀯𑀢𑀸𑀬 𑀤𑀻𑀧𑀦𑀢𑁆𑀣𑀁. 𑀇𑀤𑀜𑁆𑀘 𑀓𑀸𑀭𑀡𑀦𑁆𑀢𑀺 ‘‘𑀲𑀩𑁆𑀩𑁂𑀲𑀫𑁆𑀧𑀺 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑁂 𑀏𑀤𑀺𑀲𑁄 𑀏𑀓𑁄 𑀪𑀺𑀓𑁆𑀔𑀼 𑀢𑀤𑀸𑀦𑀼𑀪𑀸𑀯𑀧𑁆𑀧𑀓𑀸𑀲𑀓𑁄 𑀳𑁄𑀢𑀻’’𑀢𑀺 𑀇𑀫𑀫𑁆𑀧𑀺 𑀓𑀸𑀭𑀡𑀁.

𑀓𑀢𑁆𑀣𑀸𑀢𑀺 𑀦𑀺𑀫𑀺𑀢𑁆𑀢𑁂 𑀪𑀼𑀫𑁆𑀫𑀁, 𑀓𑀲𑁆𑀫𑀺𑀁 𑀞𑀸𑀦𑁂 𑀓𑀸𑀭𑀡𑀪𑀽𑀢𑁂𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀺𑀁 𑀆𑀕𑀫𑁆𑀫𑀸’’𑀢𑀺 𑀯𑀼𑀢𑁆𑀢𑀁, 𑀓𑀺𑀁 𑀆𑀭𑀫𑁆𑀫𑀡𑀁 𑀧𑀘𑁆𑀘𑀬𑀪𑀽𑀢𑀁 𑀅𑀥𑀺𑀕𑀦𑁆𑀢𑁆𑀯𑀸 𑀅𑀥𑀺𑀕𑀫𑀦𑀳𑁂𑀢𑀽𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀓𑀺𑀁 𑀧𑀢𑁆𑀢𑀲𑁆𑀲𑀸’’𑀢𑀺. 𑀓𑀺𑀫𑀸𑀭𑀫𑁆𑀫𑀡𑀁 𑀧𑀢𑁆𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀳𑁂𑀢𑀼𑀕𑀩𑁆𑀪𑀯𑀺𑀲𑁂𑀲𑀦𑀫𑁂𑀢𑀁. 𑀢𑁂𑀢𑀺 𑀫𑀳𑀸𑀪𑀽𑀢𑀸. 𑀅𑀧𑁆𑀧𑀯𑀢𑁆𑀢𑀺𑀯𑀲𑁂𑀦𑀸𑀢𑀺 𑀧𑀼𑀦 𑀅𑀦𑀼𑀧𑁆𑀧𑀚𑁆𑀚𑀦𑀯𑀲𑁂𑀦. 𑀲𑀩𑁆𑀩𑀸𑀓𑀸𑀭𑁂𑀦𑀸𑀢𑀺 𑀯𑀘𑀦𑀢𑁆𑀣𑀮𑀓𑁆𑀔𑀡𑀭𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀧𑀤𑀝𑁆𑀞𑀸𑀦-𑀲𑀫𑀼𑀝𑁆𑀞𑀸𑀦𑀓𑀮𑀸𑀧𑀘𑀼𑀡𑁆𑀡𑀦𑀸𑀦𑀢𑁆𑀢𑁂𑀓𑀢𑁆𑀢𑀯𑀺𑀦𑀺𑀩𑁆𑀪𑁄𑀕𑀸- 𑀯𑀺𑀦𑀺𑀩𑁆𑀪𑁄𑀕𑀲𑀪𑀸𑀕-𑀯𑀺𑀲𑀪𑀸𑀕𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀲𑀗𑁆𑀕𑀳𑀧𑀘𑁆𑀘𑀬𑀲𑀫𑀦𑁆𑀦𑀸𑀳𑀸𑀭𑀧𑀘𑁆𑀘𑀬𑀯𑀺𑀪𑀸𑀕𑀸𑀓𑀸𑀭𑀢𑁄, 𑀲𑀲𑀫𑁆𑀪𑀸𑀭𑀲𑀗𑁆𑀔𑁂𑀧𑀲𑀲𑀫𑁆𑀪𑀸𑀭𑀯𑀺𑀪𑀢𑁆𑀢𑀺𑀲𑀮𑀓𑁆𑀔𑀡𑀲𑀗𑁆𑀔𑁂𑀧𑀲𑀮𑀓𑁆𑀔𑀡𑀯𑀺𑀪𑀢𑁆𑀢𑀺𑀆𑀓𑀸𑀭𑀢𑁄 𑀘𑀸𑀢𑀺 𑀲𑀩𑁆𑀩𑁂𑀦 𑀆𑀓𑀸𑀭𑁂𑀦.

𑁪𑁮𑁮. 𑀤𑀺𑀩𑁆𑀩𑀦𑁆𑀢𑀺 𑀏𑀢𑁆𑀣 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀗𑁆𑀕𑀻𑀪𑀽𑀢𑀸 𑀳𑀼𑀢𑁆𑀯𑀸 𑀯𑀺𑀘𑀭𑀦𑁆𑀢𑀺, 𑀓𑀻𑀴𑀦𑁆𑀢𑀺, 𑀚𑁄𑀢𑁂𑀦𑁆𑀢𑀺 𑀘𑀸𑀢𑀺 𑀤𑁂𑀯𑀸, 𑀤𑁂𑀯𑀮𑁄𑀓𑀸. 𑀢𑁂 𑀬𑀦𑁆𑀢𑀺 𑀉𑀧𑀕𑀘𑁆𑀙𑀦𑁆𑀢𑀺 𑀏𑀢𑁂𑀦𑀸𑀢𑀺 𑀤𑁂𑀯𑀬𑀸𑀦𑀺𑀬𑁄 𑀬𑀣𑀸 ‘‘𑀦𑀺𑀬𑁆𑀬𑀸𑀦𑀺𑀓𑀸’’𑀢𑀺 (𑀥. 𑀲. 𑀤𑀼𑀓𑀫𑀸𑀢𑀺𑀓𑀸 𑁯𑁭) 𑀏𑀢𑁆𑀣 𑀅𑀦𑀻𑀬𑀲𑀤𑁆𑀤𑁄 𑀓𑀢𑁆𑀯𑀢𑁆𑀣𑁂, 𑀢𑀣𑀸 𑀇𑀥 𑀓𑀭𑀡𑀢𑁆𑀣𑁂𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀢𑁂𑀦 𑀳𑁂𑀲𑀸’’𑀢𑀺𑀆𑀤𑀺. 𑀯𑀲𑀁 𑀯𑀢𑁆𑀢𑁂𑀦𑁆𑀢𑁄𑀢𑀺 𑀏𑀢𑁆𑀣 𑀯𑀲𑀯𑀢𑁆𑀢𑀦𑀁 𑀦𑀸𑀫 𑀬𑀣𑀺𑀘𑁆𑀙𑀺𑀢𑀝𑁆𑀞𑀸𑀦𑀕𑀫𑀦𑀁. 𑀢𑀦𑁆𑀢𑀺 𑀇𑀤𑁆𑀥𑀺𑀯𑀺𑀥𑀜𑀸𑀡𑀁. 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀏𑀢𑁂𑀲𑀁 𑀇𑀲𑁆𑀲𑀭𑀸𑀢𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸. 𑀓𑀲𑁆𑀫𑀸 𑀧𑀦𑁂𑀲 𑀲𑀫𑀻𑀧𑁂 𑀞𑀺𑀢𑀁 𑀲𑀤𑁂𑀯𑀓𑀮𑁄𑀓𑀧𑀚𑁆𑀚𑁄𑀢𑀁 𑀪𑀕𑀯𑀦𑁆𑀢𑀁 𑀅𑀧𑀼𑀘𑁆𑀙𑀺𑀢𑁆𑀯𑀸 𑀤𑀽𑀭𑁂 𑀤𑁂𑀯𑁂 𑀉𑀧𑀲𑀗𑁆𑀓𑀫𑀻𑀢𑀺 𑀘𑁄𑀤𑀦𑀫𑀧𑀦𑁂𑀢𑀺 ‘‘𑀲𑀫𑀻𑀧𑁂 𑀞𑀺𑀢’’𑀦𑁆𑀢𑀺𑀆𑀤𑀺𑀦𑀸. ‘‘𑀬𑁂 𑀤𑁂𑀯𑀸 𑀫𑀕𑁆𑀕𑀨𑀮𑀮𑀸𑀪𑀺𑀦𑁄, 𑀢𑁂𑀧𑀺 𑀢𑀫𑀢𑁆𑀣𑀁 𑀏𑀓𑀤𑁂𑀲𑁂𑀦 𑀚𑀸𑀦𑁂𑀬𑁆𑀬𑀼𑀁, 𑀩𑀼𑀤𑁆𑀥𑀯𑀺𑀲𑀬𑁄 𑀧𑀦𑀸𑀬𑀁 𑀧𑀜𑁆𑀳𑁄 𑀧𑀼𑀘𑁆𑀙𑀺𑀢𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀦 𑀚𑀸𑀦𑀸𑀫𑀸’’𑀢𑀺 𑀆𑀳𑀁𑀲𑀼. 𑀢𑁂𑀦𑀸𑀳 ‘‘𑀩𑀼𑀤𑁆𑀥𑀯𑀺𑀲𑀬𑁂’’𑀢𑀺𑀆𑀤𑀺. 𑀦 𑀮𑀩𑁆𑀪𑀸𑀢𑀺 𑀦 𑀲𑀓𑁆𑀓𑀸, 𑀅𑀚𑁆𑀛𑁄𑀢𑁆𑀣𑀭𑀡𑀁 𑀦𑀸𑀫𑁂𑀢𑁆𑀣 𑀧𑀼𑀘𑁆𑀙𑀸𑀬 𑀦𑀺𑀩𑁆𑀩𑀸𑀥𑀦𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀧𑀼𑀦𑀧𑁆𑀧𑀼𑀦𑀁 𑀧𑀼𑀘𑁆𑀙𑀢𑀻’’𑀢𑀺. ‘‘𑀳𑀢𑁆𑀣𑀢𑁄 𑀫𑁄𑀘𑁂𑀲𑁆𑀲𑀸𑀫𑀸’’𑀢𑀺 𑀯𑁄𑀳𑀸𑀭𑀯𑀲𑁂𑀦 𑀯𑀼𑀢𑁆𑀢𑀁, 𑀳𑀦𑁆𑀤 𑀦𑀁 𑀤𑀽𑀭𑀫𑀧𑀦𑁂𑀲𑁆𑀲𑀸𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀪𑀺𑀓𑁆𑀓𑀦𑁆𑀢𑀢𑀭𑀸𑀢𑀺 𑀏𑀢𑁆𑀣 𑀅𑀪𑀺𑀲𑀤𑁆𑀤𑁄 𑀅𑀢𑀺𑀲𑀤𑁆𑀤𑀢𑁆𑀣𑁄𑀢𑀺 𑀆𑀳 ‘‘𑀅𑀢𑀺𑀓𑁆𑀓𑀦𑁆𑀢𑀢𑀭𑀸’’𑀢𑀺, 𑀭𑀽𑀧𑀲𑀫𑁆𑀧𑀢𑁆𑀢𑀺𑀬𑀸 𑀘𑁂𑀯 𑀧𑀜𑁆𑀜𑀸𑀧𑀝𑀺𑀪𑀸𑀦𑀸𑀤𑀺𑀕𑀼𑀡𑁂𑀳𑀺 𑀘 𑀅𑀫𑁆𑀳𑁂 𑀅𑀪𑀺𑀪𑀼𑀬𑁆𑀬 𑀧𑀭𑁂𑀲𑀁 𑀓𑀸𑀫𑀦𑀻𑀬𑀢𑀭𑀸𑀢𑀺 𑀅𑀢𑁆𑀣𑁄. 𑀧𑀡𑀻𑀢𑀢𑀭𑀸𑀢𑀺 𑀉𑀴𑀸𑀭𑀢𑀭𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀉𑀢𑁆𑀢𑀫𑀢𑀭𑀸’’𑀢𑀺.

𑁪𑁯𑁧-𑁪𑁯𑁩. 𑀲𑀳𑀲𑁆𑀲𑀓𑁆𑀔𑁄 𑀧𑀦 𑀲𑀓𑁆𑀓𑁄 𑀅𑀪𑀺𑀲𑀫𑁂𑀢𑀸𑀯𑀻 𑀆𑀕𑀢𑀨𑀮𑁄 𑀯𑀺𑀜𑁆𑀜𑀸𑀢𑀲𑀸𑀲𑀦𑁄, 𑀲𑁄 𑀓𑀲𑁆𑀫𑀸 𑀢𑀁 𑀪𑀺𑀓𑁆𑀔𑀼𑀁 𑀉𑀧𑀸𑀬𑁂𑀦 𑀦𑀺𑀬𑁆𑀬𑁄𑀚𑁂𑀲𑀻𑀢𑀺 𑀅𑀦𑀼𑀬𑁄𑀕𑀫𑀧𑀦𑁂𑀢𑀺 ‘‘𑀅𑀬𑀁 𑀧𑀦 𑀯𑀺𑀲𑁂𑀲𑁄’’𑀢𑀺𑀆𑀤𑀺𑀦𑀸.

𑀔𑀚𑁆𑀚𑁄𑀧𑀦𑀓𑀦𑁆𑀢𑀺 𑀭𑀢𑁆𑀢𑀺𑀁 𑀚𑀮𑀦𑁆𑀢𑀁 𑀔𑀼𑀤𑁆𑀤𑀓𑀓𑀺𑀫𑀺𑀁. 𑀥𑀫𑀦𑁆𑀢𑁄 𑀯𑀺𑀬𑀸𑀢𑀺 𑀫𑀼𑀔𑀯𑀸𑀢𑀁 𑀤𑁂𑀦𑁆𑀢𑁄 𑀯𑀺𑀬. 𑀅𑀢𑁆𑀣𑀺 𑀘𑁂𑀯𑀸𑀢𑀺 𑀏𑀤𑀺𑀲𑁄 𑀫𑀳𑀸𑀪𑀽𑀢𑀧𑀭𑀺𑀬𑁂𑀲𑀓𑁄 𑀧𑀼𑀕𑁆𑀕𑀮𑁄 𑀦𑀸𑀫 𑀯𑀺𑀚𑁆𑀚𑀫𑀸𑀦𑁄 𑀏𑀯 𑀪𑀯𑁂𑀬𑁆𑀬, 𑀫𑀬𑀸 𑀅𑀧𑁂𑀲𑀺𑀢𑁄𑀬𑁂𑀯 𑀧𑀘𑁆𑀙𑀸 𑀚𑀸𑀦𑀺𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁄𑀢𑀺 𑀢𑀣𑀸 𑀘𑀺𑀦𑁆𑀢𑀦𑀢𑁄 𑀧𑀭𑀁. 𑀇𑀤𑁆𑀥𑀺𑀯𑀺𑀥𑀜𑀸𑀡𑀲𑁆𑀲𑁂𑀯 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀤𑁂𑀯𑀬𑀸𑀦𑀺𑀬𑀲𑀤𑀺𑀲𑁄𑀯. ‘‘𑀤𑁂𑀯𑀬𑀸𑀦𑀺𑀬𑀫𑀕𑁆𑀕𑁄𑀢𑀺 𑀯𑀸…𑀧𑁂… 𑀅𑀪𑀺𑀜𑁆𑀜𑀸𑀜𑀸𑀡𑀦𑁆𑀢𑀺 𑀯𑀸 𑀲𑀩𑁆𑀩𑀫𑁂𑀢𑀁 𑀇𑀤𑁆𑀥𑀺𑀯𑀺𑀥𑀜𑀸𑀡𑀲𑁆𑀲𑁂𑀯 𑀦𑀸𑀫’’𑀦𑁆𑀢𑀺 𑀇𑀤𑀁 𑀧𑀸𑀴𑀺𑀬𑀁, 𑀅𑀝𑁆𑀞𑀓𑀣𑀸𑀲𑀼 𑀘 𑀢𑀢𑁆𑀣 𑀢𑀢𑁆𑀣 𑀆𑀕𑀢𑀭𑀼𑀴𑁆𑀳𑀺𑀦𑀸𑀫𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀩𑁆𑀩𑀸𑀲𑀼𑀧𑀺 𑀳𑀺 𑀅𑀪𑀺𑀜𑁆𑀜𑀸𑀲𑀼 𑀤𑁂𑀯𑀬𑀸𑀦𑀺𑀬𑀫𑀕𑁆𑀕𑀸𑀤𑀺𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀅𑀧𑁆𑀧𑀦𑀸𑀤𑀺𑀦𑀸𑀫𑀁 𑀬𑀣𑀸𑀭𑀳𑀁 𑀲𑀫𑁆𑀪𑀯𑀢𑀺.

𑁪𑁯𑁪. 𑀆𑀕𑀫𑀦𑀧𑀼𑀩𑁆𑀩𑀪𑀸𑀕𑁂 𑀦𑀺𑀫𑀺𑀢𑁆𑀢𑀦𑁆𑀢𑀺 𑀩𑁆𑀭𑀳𑁆𑀫𑀼𑀦𑁄 𑀆𑀕𑀫𑀦𑀲𑁆𑀲 𑀧𑀼𑀩𑁆𑀩𑀪𑀸𑀕𑁂 𑀉𑀧𑁆𑀧𑀚𑁆𑀚𑀦𑀓𑀦𑀺𑀫𑀺𑀢𑁆𑀢𑀁. 𑀉𑀤𑀬𑀢𑁄 𑀧𑀼𑀩𑁆𑀩𑀪𑀸𑀕𑁂𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀇𑀫𑁂𑀢𑀺 𑀩𑁆𑀭𑀳𑁆𑀫𑀓𑀸𑀬𑀺𑀓𑀸. 𑀯𑁂𑀬𑁆𑀬𑀸𑀓𑀭𑀡𑁂𑀦𑀸𑀢𑀺 𑀩𑁆𑀬𑀸𑀓𑀭𑀡𑁂𑀦. 𑀅𑀦𑀸𑀭𑀤𑁆𑀥𑀘𑀺𑀢𑁆𑀢𑁄𑀢𑀺 𑀅𑀦𑀸𑀭𑀸𑀥𑀺𑀢𑀘𑀺𑀢𑁆𑀢𑁄 𑀅𑀢𑀼𑀝𑁆𑀞𑀘𑀺𑀢𑁆𑀢𑁄. 𑀯𑀸𑀤𑀦𑁆𑀢𑀺 𑀤𑁄𑀲𑀁. 𑀯𑀺𑀓𑁆𑀔𑁂𑀧𑀦𑁆𑀢𑀺 𑀯𑀸𑀘𑀸𑀬 𑀯𑀺𑀯𑀺𑀥𑀸 𑀔𑁂𑀧𑀦𑀁.

𑁪𑁯𑁫. 𑀓𑀼𑀳𑀓𑀢𑁆𑀢𑀸𑀢𑀺 𑀯𑀼𑀢𑁆𑀢𑀦𑀬𑁂𑀦 𑀅𑀪𑀽𑀢𑀢𑁄 𑀅𑀜𑁆𑀜𑁂𑀲𑀁 𑀯𑀺𑀫𑁆𑀳𑀸𑀧𑁂𑀢𑀼𑀓𑀸𑀫𑀢𑁆𑀢𑀸. ‘‘𑀕𑀼𑀳𑀓𑀢𑁆𑀢𑀸’’𑀢𑀺 𑀧𑀞𑀺𑀢𑁆𑀯𑀸 𑀕𑀼𑀬𑁆𑀳𑀺𑀢𑀼𑀓𑀸𑀫𑀢𑁆𑀢𑀸𑀢𑀺 𑀅𑀢𑁆𑀣𑀫𑁆𑀧𑀺 𑀯𑀤𑀦𑁆𑀢𑀺 𑀓𑁂𑀘𑀺.

𑀢𑀻𑀭𑀤𑀲𑁆𑀲𑀻𑀲𑀓𑀼𑀡𑀽𑀧𑀫𑀸𑀯𑀡𑁆𑀡𑀦𑀸

𑁪𑁯𑁭. 𑀧𑀤𑁂𑀲𑁂𑀦𑀸𑀢𑀺 𑀏𑀓𑀤𑁂𑀲𑁂𑀦, 𑀉𑀧𑀸𑀤𑀺𑀦𑁆𑀦𑀓𑁂𑀦 𑀲𑀢𑁆𑀢𑀲𑀦𑁆𑀢𑀸𑀦𑀧𑀭𑀺𑀬𑀸𑀧𑀦𑁆𑀦𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀦𑀼𑀧𑀸𑀤𑀺𑀦𑁆𑀦𑀓𑁂𑀧𑀻𑀢𑀺 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑁂𑀧𑀺. 𑀦𑀺𑀧𑁆𑀧𑀤𑁂𑀲𑀢𑁄𑀢𑀺 𑀅𑀦𑀯𑀲𑁂𑀲𑀢𑁄. 𑀢𑀲𑁆𑀫𑀸𑀢𑀺 𑀢𑀣𑀸 𑀧𑀼𑀘𑁆𑀙𑀺𑀢𑀢𑁆𑀢𑀸, 𑀧𑀼𑀘𑁆𑀙𑀸𑀬 𑀅𑀬𑀼𑀢𑁆𑀢𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀼𑀘𑁆𑀙𑀸𑀫𑀽𑀴𑁆𑀳𑀲𑁆𑀲𑀸𑀢𑀺 𑀧𑀼𑀘𑁆𑀙𑀺𑀢𑀼𑀫𑀚𑀸𑀦𑀦𑀢𑁄 𑀧𑀼𑀘𑁆𑀙𑀸𑀬 𑀲𑀫𑁆𑀫𑀽𑀴𑁆𑀳𑀲𑁆𑀲. 𑀯𑀺𑀢𑀣𑀧𑀜𑁆𑀳𑁄 𑀳𑀺 ‘‘𑀧𑀼𑀘𑁆𑀙𑀸𑀫𑀽𑀴𑁆𑀳𑁄’’𑀢𑀺 𑀯𑀼𑀘𑁆𑀘𑀢𑀺 𑀬𑀣𑀸 ‘‘𑀫𑀕𑁆𑀕𑀫𑀽𑀴𑁆𑀳𑁄’’𑀢𑀺. 𑀧𑀼𑀘𑁆𑀙𑀸𑀬 𑀤𑁄𑀲𑀁 𑀤𑀲𑁆𑀲𑁂𑀢𑁆𑀯𑀸𑀢𑀺 𑀢𑁂𑀦 𑀓𑀢𑀧𑀼𑀘𑁆𑀙𑀸𑀬 𑀧𑀼𑀘𑁆𑀙𑀺𑀢𑀸𑀓𑀸𑀭𑁂 𑀤𑁄𑀲𑀁 𑀯𑀺𑀪𑀸𑀯𑁂𑀢𑁆𑀯𑀸. 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺 𑀢𑀣𑀸 𑀲𑀺𑀓𑁆𑀔𑀸𑀧𑀺𑀢𑀸𑀬 𑀅𑀯𑀺𑀢𑀣𑀧𑀼𑀘𑁆𑀙𑀸𑀬 𑀯𑀺𑀲𑁆𑀲𑀚𑁆𑀚𑀦𑀁. 𑀬𑀲𑁆𑀫𑀸 𑀯𑀺𑀲𑁆𑀲𑀚𑁆𑀚𑀦𑀁 𑀦𑀸𑀫 𑀧𑀼𑀘𑁆𑀙𑀸𑀦𑀼𑀭𑀽𑀧𑀁, 𑀧𑀼𑀘𑁆𑀙𑀸𑀲𑀪𑀸𑀕𑁂𑀦 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀢𑁄, 𑀦 𑀘 𑀢𑀣𑀸𑀕𑀢𑀸 𑀯𑀺𑀭𑀚𑁆𑀛𑀺𑀢𑁆𑀯𑀸 𑀓𑀢𑀧𑀼𑀘𑁆𑀙𑀸𑀦𑀼𑀭𑀽𑀧𑀁 𑀯𑀺𑀭𑀚𑁆𑀛𑀺𑀢𑁆𑀯𑀸𑀯 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺, 𑀅𑀢𑁆𑀣𑀲𑀪𑀸𑀕𑀢𑀸𑀬 𑀘 𑀯𑀺𑀲𑁆𑀲𑀚𑁆𑀚𑀦𑀲𑁆𑀲 𑀧𑀼𑀘𑁆𑀙𑀓𑀸 𑀢𑀤𑀢𑁆𑀣𑀁 𑀅𑀦𑀯𑀩𑀼𑀚𑁆𑀛𑀦𑁆𑀢𑀸 𑀲𑀫𑁆𑀫𑀼𑀬𑁆𑀳𑀦𑁆𑀢𑀺, 𑀢𑀲𑁆𑀫𑀸 𑀧𑀼𑀘𑁆𑀙𑀁 𑀲𑀺𑀓𑁆𑀔𑀸𑀧𑁂𑀢𑁆𑀯𑀸 𑀅𑀯𑀺𑀢𑀣𑀧𑀼𑀘𑁆𑀙𑀸𑀬 𑀯𑀺𑀲𑁆𑀲𑀚𑁆𑀚𑀦𑀁 𑀩𑀼𑀤𑁆𑀥𑀸𑀦𑀫𑀸𑀘𑀺𑀡𑁆𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀓𑀲𑁆𑀫𑀸’’𑀢𑀺𑀆𑀤𑀺. 𑀤𑀼𑀯𑀺𑀜𑁆𑀜𑀸𑀧𑀬𑁄𑀢𑀺 𑀬𑀣𑀸𑀯𑀼𑀢𑁆𑀢𑀓𑀸𑀭𑀡𑁂𑀦 𑀤𑀼𑀯𑀺𑀜𑁆𑀜𑀸𑀧𑁂𑀢𑀩𑁆𑀩𑁄.

𑁪𑁯𑁮. 𑀦 𑀧𑀢𑀺𑀝𑁆𑀞𑀸𑀢𑀻𑀢𑀺 𑀧𑀘𑁆𑀘𑀬𑀁 𑀓𑀢𑁆𑀯𑀸 𑀦 𑀧𑀢𑀺𑀝𑁆𑀞𑀳𑀢𑀺. ‘‘𑀓𑀢𑁆𑀣𑀸’’𑀢𑀺 𑀇𑀤𑀁 𑀦𑀺𑀫𑀺𑀢𑁆𑀢𑁂 𑀪𑀼𑀫𑁆𑀫𑀦𑁆𑀢𑀺 𑀆𑀳 ‘‘𑀓𑀺𑀁 𑀆𑀕𑀫𑁆𑀫𑀸’’𑀢𑀺. 𑀅𑀧𑁆𑀧𑀢𑀺𑀝𑁆𑀞𑀸𑀢𑀺 𑀅𑀧𑁆𑀧𑀘𑁆𑀘𑀬𑀸, 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀫𑀼𑀘𑁆𑀙𑀺𑀦𑁆𑀦𑀓𑀸𑀭𑀡𑀸𑀢𑀺 𑀅𑀢𑁆𑀣𑁄. 𑀉𑀧𑀸𑀤𑀺𑀦𑁆𑀦𑀁𑀬𑁂𑀯𑀸𑀢𑀺 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀫𑁂𑀯. 𑀬𑀲𑁆𑀫𑀸 𑀏𑀓𑀤𑀺𑀲𑀸𑀪𑀺𑀫𑀼𑀔𑀁 𑀲𑀦𑁆𑀢𑀸𑀦𑀯𑀲𑁂𑀦 𑀩𑀳𑀼𑀥𑀸 𑀲𑀡𑁆𑀞𑀺𑀢𑁂 𑀭𑀽𑀧𑀧𑁆𑀧𑀩𑀦𑁆𑀥𑁂 𑀤𑀻𑀖𑀲𑀜𑁆𑀜𑀸, 𑀢𑀫𑀼𑀧𑀸𑀤𑀸𑀬 𑀢𑀢𑁄 𑀅𑀧𑁆𑀧𑀓𑀁 𑀲𑀡𑁆𑀞𑀺𑀢𑁂 𑀭𑀲𑁆𑀲𑀲𑀜𑁆𑀜𑀸, 𑀢𑀤𑀼𑀪𑀬𑀜𑁆𑀘 𑀯𑀺𑀲𑁂𑀲𑀢𑁄 𑀭𑀽𑀧𑀕𑁆𑀕𑀳𑀡𑀫𑀼𑀔𑁂𑀦 𑀕𑀬𑁆𑀳𑀢𑀺, 𑀢𑀲𑁆𑀫𑀸 ‘‘𑀲𑀡𑁆𑀞𑀸𑀦𑀯𑀲𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀧𑁆𑀧𑀧𑀭𑀺𑀫𑀸𑀡𑁂 𑀭𑀽𑀧𑀲𑀗𑁆𑀖𑀸𑀢𑁂 𑀅𑀡𑀼𑀲𑀜𑁆𑀜𑀸, 𑀢𑀤𑀼𑀧𑀸𑀤𑀸𑀬 𑀢𑀢𑁄 𑀫𑀳𑀢𑀺 𑀣𑀽𑀮𑀲𑀜𑁆𑀜𑀸, 𑀇𑀤𑀫𑁆𑀧𑀺 𑀤𑁆𑀯𑀬𑀁 𑀯𑀺𑀲𑁂𑀲𑀢𑁄 𑀭𑀽𑀧𑀕𑁆𑀕𑀳𑀡𑀫𑀼𑀔𑁂𑀦 𑀕𑀬𑁆𑀳𑀢𑀻𑀢𑀺 𑀆𑀳 ‘‘𑀇𑀫𑀺𑀦𑀸𑀧𑀻’’𑀢𑀺𑀆𑀤𑀺. ‘‘𑀧𑀺-𑀲𑀤𑁆𑀤𑁂𑀦 𑀘𑁂𑀢𑁆𑀣 ‘𑀲𑀡𑁆𑀞𑀸𑀦𑀯𑀲𑁂𑀦 𑀉𑀧𑀸𑀤𑀸𑀭𑀽𑀧𑀁 𑀯𑀼𑀢𑁆𑀢’’𑀦𑁆𑀢𑀺 𑀏𑀢𑁆𑀣𑀸𑀧𑀺 𑀯𑀡𑁆𑀡𑀫𑀢𑁆𑀢𑀫𑁂𑀯 𑀓𑀣𑀺𑀢𑀦𑁆𑀢𑀺 𑀇𑀫𑀫𑀢𑁆𑀣𑀁 𑀲𑀫𑀼𑀘𑁆𑀘𑀺𑀦𑀸𑀢𑀻’’𑀢𑀺 𑀯𑀤𑀦𑁆𑀢𑀺. 𑀯𑀡𑁆𑀡𑀲𑀤𑁆𑀤𑁄 𑀳𑁂𑀢𑁆𑀣 𑀭𑀽𑀧𑀸𑀬𑀢𑀦𑀧𑀭𑀺𑀬𑀸𑀬𑁄𑀯. 𑀲𑀼𑀪𑀦𑁆𑀢𑀺 𑀲𑀼𑀦𑁆𑀤𑀭𑀁, 𑀇𑀝𑁆𑀞𑀦𑁆𑀢𑀺 𑀅𑀢𑁆𑀣𑁄. 𑀅𑀲𑀼𑀪𑀦𑁆𑀢𑀺 𑀅𑀲𑀼𑀦𑁆𑀤𑀭𑀁, 𑀅𑀦𑀺𑀝𑁆𑀞𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀇𑀝𑁆𑀞𑀸𑀦𑀺𑀝𑁆𑀞𑀸𑀭𑀫𑁆𑀫𑀡𑀁 𑀧𑀦𑁂𑀯𑀁 𑀓𑀣𑀺𑀢’’𑀦𑁆𑀢𑀺. 𑀤𑀻𑀖𑀁 𑀭𑀲𑁆𑀲𑀁 𑀅𑀡𑀼𑀁 𑀣𑀽𑀮𑀁 𑀲𑀼𑀪𑀸𑀲𑀼𑀪𑀦𑁆𑀢𑀺 𑀢𑀻𑀲𑀼𑀧𑀺 𑀞𑀸𑀦𑁂𑀲𑀼 𑀭𑀽𑀧𑀸𑀬𑀢𑀦𑀫𑀼𑀔𑁂𑀦 𑀉𑀧𑀸𑀤𑀸𑀭𑀽𑀧𑀲𑁆𑀲𑁂𑀯 𑀕𑀳𑀡𑀁 𑀪𑀽𑀢𑀭𑀽𑀧𑀸𑀦𑀁 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀓𑀢𑁆𑀣 𑀆𑀧𑁄 𑀘 𑀧𑀣𑀯𑀻, 𑀢𑁂𑀚𑁄 𑀯𑀸𑀬𑁄 𑀦 𑀕𑀸𑀥𑀢𑀻’’𑀢𑀺 𑀳𑀺 𑀪𑀽𑀢𑀭𑀽𑀧𑀸𑀦𑀺 𑀯𑀺𑀲𑀼𑀁 𑀕𑀬𑁆𑀳𑀦𑁆𑀢𑀺. 𑀦𑀸𑀫𑀦𑁆𑀢𑀺 𑀯𑁂𑀤𑀦𑀸𑀤𑀺𑀓𑁆𑀔𑀦𑁆𑀥𑀘𑀢𑀼𑀓𑁆𑀓𑀁. 𑀢𑀜𑁆𑀳𑀺 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀁 𑀦𑀫𑀦𑀢𑁄, 𑀦𑀸𑀫𑀓𑀭𑀡𑀢𑁄 𑀘 ‘‘𑀦𑀸𑀫’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀳𑁂𑀝𑁆𑀞𑀸 ‘‘𑀤𑀻𑀖𑀁 𑀭𑀲𑁆𑀲’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯 𑀇𑀥 𑀭𑀼𑀧𑁆𑀧𑀦𑀝𑁆𑀞𑁂𑀦 𑀭𑀽𑀧𑀲𑀜𑁆𑀜𑀸𑀬 𑀕𑀳𑀺𑀢𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀤𑀻𑀖𑀸𑀤𑀺𑀪𑁂𑀤’’𑀦𑁆𑀢𑀺 𑀇𑀫𑀺𑀦𑀸. 𑀆𑀤𑀺𑀲𑀤𑁆𑀤𑁂𑀦 𑀆𑀧𑀸𑀤𑀻𑀦𑀜𑁆𑀘 𑀲𑀗𑁆𑀕𑀳𑁄. 𑀬𑀲𑁆𑀫𑀸 𑀯𑀸 𑀤𑀻𑀖𑀸𑀤𑀺𑀲𑀫𑀜𑁆𑀜𑀸 𑀦 𑀭𑀽𑀧𑀸𑀬𑀢𑀦𑀯𑀢𑁆𑀣𑀼𑀓𑀸𑀯, 𑀅𑀣 𑀔𑁄 𑀪𑀽𑀢𑀭𑀽𑀧𑀯𑀢𑁆𑀣𑀼𑀓𑀸𑀧𑀺. 𑀢𑀣𑀸 𑀳𑀺 𑀲𑀡𑁆𑀞𑀸𑀦𑀁 𑀨𑀼𑀲𑀦𑀫𑀼𑀔𑁂𑀦𑀧𑀺 𑀕𑀬𑁆𑀳𑀢𑀺, 𑀢𑀲𑁆𑀫𑀸 𑀤𑀻𑀖𑀭𑀲𑁆𑀲𑀸𑀤𑀺𑀕𑁆𑀕𑀳𑀡𑁂𑀦 𑀪𑀽𑀢𑀭𑀽𑀧𑀫𑁆𑀧𑀺 𑀕𑀬𑁆𑀳𑀢𑁂𑀯𑀸𑀢𑀺 𑀇𑀫𑀫𑀢𑁆𑀣𑀁 𑀯𑀺𑀜𑁆𑀜𑀸𑀧𑁂𑀢𑀼𑀁 ‘‘𑀤𑀻𑀖𑀸𑀤𑀺𑀪𑁂𑀤𑀁 𑀭𑀽𑀧’’ 𑀫𑀺𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀓𑀺𑀁 𑀆𑀕𑀫𑁆𑀫𑀸𑀢𑀺 𑀓𑀺𑀁 𑀅𑀥𑀺𑀕𑀦𑁆𑀢𑁆𑀯𑀸 𑀓𑀺𑀲𑁆𑀲 𑀅𑀥𑀺𑀕𑀫𑀦𑀳𑁂𑀢𑀼. ‘‘𑀉𑀧𑀭𑀼𑀚𑁆𑀛𑀢𑀻’’𑀢𑀺 𑀇𑀤𑀁 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀔𑀡𑀦𑀺𑀭𑁄𑀥𑀦𑁆𑀢𑀺 𑀆𑀳 ‘‘𑀅𑀲𑁂𑀲𑀫𑁂𑀢𑀁 𑀦𑀧𑁆𑀧𑀯𑀢𑁆𑀢𑀢𑀻’’𑀢𑀺.

𑁪𑁯𑁯. 𑀢𑀢𑁆𑀭 𑀯𑁂𑀬𑁆𑀬𑀸𑀓𑀭𑀡𑀁 𑀪𑀯𑀢𑀻𑀢𑀺 𑀅𑀦𑀼𑀲𑀦𑁆𑀥𑀺𑀯𑀘𑀦𑀫𑀢𑁆𑀢𑀁 𑀘𑀼𑀡𑁆𑀡𑀺𑀬𑀧𑀸𑀞𑀁 𑀯𑀢𑁆𑀯𑀸 𑀯𑁂𑀬𑁆𑀬𑀸𑀓𑀭𑀡𑀯𑀘𑀦𑀪𑀽𑀢𑀁 𑀯𑀺𑀜𑁆𑀜𑀸𑀡𑀦𑁆𑀢𑀺𑀆𑀤𑀺𑀁 𑀲𑀺𑀮𑁄𑀓𑀫𑀸𑀳𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀜𑁆𑀜𑀸𑀢𑀩𑁆𑀩𑀦𑁆𑀢𑀺 𑀯𑀺𑀲𑀺𑀝𑁆𑀞𑁂𑀦 𑀜𑀸𑀡𑁂𑀦 𑀜𑀸𑀢𑀩𑁆𑀩𑀁, 𑀲𑀩𑁆𑀩𑀜𑀸𑀡𑀼𑀢𑁆𑀢𑀫𑁂𑀦 𑀅𑀭𑀺𑀬𑀫𑀕𑁆𑀕𑀜𑀸𑀡𑁂𑀦 𑀧𑀘𑁆𑀘𑀓𑁆𑀔𑀢𑁄 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀦𑀺𑀩𑁆𑀩𑀸𑀦𑀲𑁆𑀲𑁂𑀢𑀁 𑀦𑀸𑀫’’𑀦𑁆𑀢𑀺. 𑀦𑀺𑀤𑀲𑁆𑀲𑀻𑀬𑀢𑁂𑀢𑀺 𑀦𑀺𑀤𑀲𑁆𑀲𑀦𑀁, 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀁, 𑀦 𑀦𑀺𑀤𑀲𑁆𑀲𑀦𑀁 𑀅𑀦𑀺𑀤𑀲𑁆𑀲𑀦𑀁, 𑀅𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀦𑀺𑀤𑀲𑁆𑀲𑀦𑀁 𑀯𑀸 𑀉𑀧𑀫𑀸, 𑀢𑀤𑁂𑀢𑀲𑁆𑀲 𑀦𑀢𑁆𑀣𑀻𑀢𑀺 𑀅𑀦𑀺𑀤𑀲𑁆𑀲𑀦𑀁. 𑀦 𑀳𑀺 𑀦𑀺𑀩𑁆𑀩𑀸𑀦𑀲𑁆𑀲 𑀦𑀺𑀘𑁆𑀘𑀲𑁆𑀲 𑀏𑀓𑀪𑀽𑀢𑀲𑁆𑀲 𑀅𑀘𑁆𑀘𑀦𑁆𑀢𑀧𑀡𑀻𑀢𑀲𑀪𑀸𑀯𑀲𑁆𑀲 𑀲𑀤𑀺𑀲𑀁 𑀦𑀺𑀤𑀲𑁆𑀲𑀦𑀁 𑀓𑀼𑀢𑁄𑀘𑀺 𑀮𑀩𑁆𑀪𑀢𑀻𑀢𑀺. 𑀬𑀁 𑀅𑀳𑀼𑀢𑁆𑀯𑀸 𑀲𑀫𑁆𑀪𑁄𑀢𑀺, 𑀳𑀼𑀢𑁆𑀯𑀸 𑀧𑀝𑀺𑀯𑁂𑀢𑀺, 𑀢𑀁 𑀲𑀗𑁆𑀔𑀢𑀁 𑀉𑀤𑀬𑀯𑀬𑀦𑁆𑀢𑁂𑀳𑀺 𑀲𑀅𑀦𑁆𑀢𑀁, 𑀅𑀲𑀗𑁆𑀔𑀢𑀲𑁆𑀲 𑀧𑀦 𑀦𑀺𑀩𑁆𑀩𑀸𑀦𑀲𑁆𑀲 𑀦𑀺𑀘𑁆𑀘𑀲𑁆𑀲 𑀢𑁂 𑀉𑀪𑁄𑀧𑀺 𑀅𑀦𑁆𑀢𑀸 𑀦 𑀲𑀦𑁆𑀢𑀺, 𑀢𑀢𑁄 𑀏𑀯 𑀦𑀯𑀪𑀸𑀯𑀸𑀧𑀕𑀫𑀲𑀗𑁆𑀔𑀸𑀢𑀸 𑀚𑀭𑀢𑀸𑀧𑀺 𑀢𑀲𑁆𑀲 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 ‘‘𑀉𑀧𑁆𑀧𑀸𑀤𑀦𑁆𑀢𑁄 𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀉𑀧𑁆𑀧𑀸𑀤𑀦𑁆𑀢𑁄𑀢𑀺 𑀉𑀧𑁆𑀧𑀸𑀤𑀸𑀯𑀢𑁆𑀣𑀸. 𑀯𑀬𑀦𑁆𑀢𑁄𑀢𑀺 𑀪𑀗𑁆𑀕𑀸𑀯𑀢𑁆𑀣𑀸. 𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀦𑁆𑀢𑁄𑀢𑀺 𑀚𑀭𑀢𑀸 𑀯𑀼𑀢𑁆𑀢𑀸. 𑀅𑀯𑀲𑁂𑀲𑀕𑁆𑀕𑀳𑀡𑁂𑀦 𑀞𑀺𑀢𑀸𑀯𑀢𑁆𑀣𑀸 𑀅𑀦𑀼𑀜𑁆𑀜𑀸𑀢𑀸 𑀳𑁄𑀢𑀺. 𑀢𑀺𑀢𑁆𑀣𑀲𑁆𑀲𑀸𑀢𑀺 𑀧𑀸𑀦𑀢𑀺𑀢𑁆𑀣𑀲𑁆𑀲. 𑀢𑀢𑁆𑀣 𑀦𑀺𑀩𑁆𑀩𑀘𑀦𑀁 𑀤𑀲𑁆𑀲𑁂𑀢𑀺 ‘‘𑀢𑀜𑁆𑀳𑀻’’𑀢𑀺𑀆𑀤𑀺𑀦𑀸. 𑀧𑀧𑀦𑁆𑀢𑀻𑀢𑀺 𑀧𑀓𑀸𑀭𑁂𑀦 𑀧𑀺𑀯𑀦𑁆𑀢𑀺. 𑀢𑀣𑀸 𑀳𑀺 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑀁 ‘‘𑀧𑀧𑀦𑁆𑀢𑀺 𑀏𑀢𑁆𑀣𑀸𑀢𑀺 𑀧𑀧𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀳𑀺 𑀧𑀧𑀦𑁆𑀢𑀺 𑀧𑀸𑀦𑀢𑀺𑀢𑁆𑀣’’𑀦𑁆𑀢𑀺 (𑀤𑀻. 𑀦𑀺. 𑀝𑀻. 𑁧.𑁪𑁯𑁯) 𑀦𑀺𑀭𑀼𑀢𑁆𑀢𑀺𑀦𑀬𑁂𑀦, 𑀬𑀣𑀸𑀭𑀼𑀢𑀮𑀓𑁆𑀔𑀡𑁂𑀦 𑀯𑀸 𑀧-𑀓𑀸𑀭𑀲𑁆𑀲 𑀪-𑀓𑀸𑀭𑁄 𑀓𑀢𑁄.𑀲𑀩𑁆𑀩𑀢𑁄𑀢𑀺 𑀲𑀩𑁆𑀩𑀓𑀫𑁆𑀫𑀝𑁆𑀞𑀸𑀦𑀫𑀼𑀔𑀢𑁄. 𑀢𑁂𑀦𑀸𑀳 ‘‘𑀅𑀝𑁆𑀞𑀢𑀺𑀁𑀲𑀸𑀬 𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀬𑁂𑀦 𑀬𑁂𑀦 𑀫𑀼𑀔𑁂𑀦𑀸’’𑀢𑀺. 𑀅𑀬𑀁 𑀅𑀝𑁆𑀞𑀓𑀣𑀸𑀢𑁄 𑀅𑀧𑀭𑁄 𑀦𑀬𑁄 𑁋 𑀧𑀓𑀸𑀭𑁂𑀦 𑀪𑀸𑀲𑀦𑀁 𑀚𑁄𑀢𑀦𑀁 𑀧𑀪𑀸, 𑀲𑀩𑁆𑀩𑀢𑁄 𑀧𑀪𑀸 𑀅𑀲𑁆𑀲𑀸𑀢𑀺 𑀲𑀩𑁆𑀩𑀢𑁄𑀧𑀪𑀁, 𑀓𑁂𑀦𑀘𑀺 𑀅𑀦𑀼𑀧𑀓𑁆𑀓𑀺𑀮𑀺𑀝𑁆𑀞𑀢𑀸𑀬 𑀲𑀫𑀦𑁆𑀢𑀢𑁄 𑀧𑀪𑀲𑁆𑀲𑀭𑀁 𑀯𑀺𑀲𑀼𑀤𑁆𑀥𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀦𑀺𑀩𑁆𑀩𑀸𑀦𑁂𑀢𑀺 𑀦𑀺𑀫𑀺𑀢𑁆𑀢𑁂 𑀪𑀼𑀫𑁆𑀫𑀁 𑀤𑀲𑁆𑀲𑁂𑀢𑀺 ‘‘𑀇𑀤𑀁 𑀦𑀺𑀩𑁆𑀩𑀸𑀦𑀁 𑀆𑀕𑀫𑁆𑀫𑀸’’𑀢𑀺 𑀇𑀫𑀺𑀦𑀸. 𑀬𑁂𑀦 𑀦𑀺𑀩𑁆𑀩𑀸𑀦𑀫𑀥𑀺𑀕𑀢𑀁, 𑀢𑀁 𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀸𑀦𑀁𑀬𑁂𑀯 𑀇𑀥 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀉𑀧𑀸𑀤𑀺𑀦𑁆𑀦𑀓𑀥𑀫𑁆𑀫𑀚𑀸𑀢𑀁 𑀦𑀺𑀭𑀼𑀚𑁆𑀛𑀢𑀺, 𑀅𑀧𑁆𑀧𑀯𑀢𑁆𑀢𑀁 𑀳𑁄𑀢𑀻’’𑀢𑀺.

𑀢𑀢𑁆𑀣𑀸𑀢𑀺 𑀬𑀤𑁂𑀢𑀁 ‘‘𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦𑀸’’𑀢𑀺 𑀧𑀤𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀺𑀁. 𑀯𑀺𑀜𑁆𑀜𑀸𑀡𑀁 𑀉𑀤𑁆𑀥𑀭𑀢𑀺 𑀢𑀲𑁆𑀲 𑀯𑀺𑀪𑀚𑁆𑀚𑀺𑀢𑀩𑁆𑀩𑀢𑁆𑀢𑀸. 𑀘𑀭𑀺𑀫𑀓𑀯𑀺𑀜𑁆𑀜𑀸𑀡𑀦𑁆𑀢𑀺 𑀅𑀭𑀳𑀢𑁄 𑀘𑀼𑀢𑀺𑀘𑀺𑀢𑁆𑀢𑀲𑀗𑁆𑀔𑀸𑀢𑀁 𑀧𑀭𑀺𑀦𑀺𑀩𑁆𑀩𑀸𑀦𑀘𑀺𑀢𑁆𑀢𑀁. 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀦𑁆𑀢𑀺 𑀧𑀼𑀜𑁆𑀜𑀸𑀤𑀺𑀅𑀪𑀺𑀲𑀗𑁆𑀔𑀸𑀭𑀘𑀺𑀢𑁆𑀢𑀁. 𑀏𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀻𑀢𑀺 𑀏𑀢𑀲𑁆𑀫𑀺𑀁 𑀦𑀺𑀩𑁆𑀩𑀸𑀦𑁂 𑀏𑀢𑀁 𑀦𑀸𑀫𑀭𑀽𑀧𑀁 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀦𑀺𑀭𑀼𑀚𑁆𑀛𑀢𑀺. 𑀢𑁂𑀦𑀸𑀳 ‘‘𑀯𑀺𑀚𑁆𑀛𑀸𑀢…𑀧𑁂… 𑀪𑀸𑀯𑀁 𑀬𑀸𑀢𑀻’’𑀢𑀺. 𑀯𑀺𑀚𑁆𑀛𑀸𑀢𑀤𑀻𑀧𑀲𑀺𑀔𑀸 𑀯𑀺𑀬𑀸𑀢𑀺 𑀦𑀺𑀩𑁆𑀩𑀼𑀢𑀤𑀻𑀧𑀲𑀺𑀔𑀸 𑀯𑀺𑀬. ‘‘𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀲𑁆𑀲𑀸𑀧𑀻’’𑀢𑀺𑀆𑀤𑀺𑀦𑀸 𑀲𑀉𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼𑀫𑀼𑀔𑁂𑀦 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼𑀫𑁂𑀯 𑀯𑀤𑀢𑀺 𑀦𑀸𑀫𑀭𑀽𑀧𑀲𑁆𑀲 𑀅𑀦𑀯𑀲𑁂𑀲𑀢𑁄 𑀉𑀧𑀭𑀼𑀚𑁆𑀛𑀦𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀦𑀼𑀧𑁆𑀧𑀸𑀤𑀯𑀲𑁂𑀦 𑀉𑀧𑀭𑀼𑀚𑁆𑀛𑀢𑀻’’𑀢𑀺. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀜𑀸𑀡𑁂𑀦𑀸𑀢𑀺 𑀓𑀢𑁆𑀢𑀭𑀺, 𑀓𑀭𑀡𑁂 𑀯𑀸 𑀓𑀭𑀡𑀯𑀘𑀦𑀁, 𑀦𑀺𑀭𑁄𑀥𑁂𑀦𑀸𑀢𑀺 𑀧𑀦 𑀳𑁂𑀢𑀼𑀫𑁆𑀳𑀺. 𑀏𑀢𑁆𑀣𑀸𑀢𑀺 𑀦𑀺𑀩𑁆𑀩𑀸𑀦𑁂. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀇𑀢𑀺 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬 𑀧𑀭𑀫𑀲𑀼𑀔𑀼𑀫𑀕𑀫𑁆𑀪𑀻𑀭𑀤𑀼𑀭𑀦𑀼𑀩𑁄𑀥𑀢𑁆𑀣𑀧𑀭𑀺𑀤𑀻𑀧𑀦𑀸𑀬 𑀲𑀼𑀯𑀺𑀫𑀮𑀯𑀺𑀧𑀼𑀮𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀚𑀦𑀦𑀸𑀬 𑀲𑀸𑀥𑀼𑀯𑀺𑀮𑀸𑀲𑀺𑀦𑀺𑀬𑀸 𑀦𑀸𑀫 𑀮𑀻𑀦𑀢𑁆𑀣𑀧𑀓𑀸𑀲𑀦𑀺𑀬𑀸 𑀓𑁂𑀯𑀝𑁆𑀝𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑀓𑀸𑀲𑀦𑀸.

𑀓𑁂𑀯𑀝𑁆𑀝𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.