𑁧𑁨. 𑀮𑁄𑀳𑀺𑀘𑁆𑀘𑀲𑀼𑀢𑁆𑀢𑀯𑀡𑁆𑀡𑀦𑀸

𑀮𑁄𑀳𑀺𑀘𑁆𑀘𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼𑀯𑀡𑁆𑀡𑀦𑀸

𑁫𑁦𑁧. 𑀏𑀯𑀁 𑀓𑁂𑀯𑀝𑁆𑀝𑀲𑀼𑀢𑁆𑀢𑀁 𑀲𑀁𑀯𑀡𑁆𑀡𑁂𑀢𑁆𑀯𑀸 𑀇𑀤𑀸𑀦𑀺 𑀮𑁄𑀳𑀺𑀘𑁆𑀘𑀲𑀼𑀢𑁆𑀢𑀁 𑀲𑀁𑀯𑀡𑁆𑀡𑁂𑀦𑁆𑀢𑁄 𑀬𑀣𑀸𑀦𑀼𑀧𑀼𑀩𑁆𑀩𑀁 𑀲𑀁𑀯𑀡𑁆𑀡𑀦𑁄𑀓𑀸𑀲𑀲𑁆𑀲 𑀧𑀢𑁆𑀢𑀪𑀸𑀯𑀁 𑀯𑀺𑀪𑀸𑀯𑁂𑀢𑀼𑀁, 𑀓𑁂𑀯𑀝𑁆𑀝𑀲𑀼𑀢𑁆𑀢𑀲𑁆𑀲𑀸𑀦𑀦𑁆𑀢𑀭𑀁 𑀲𑀗𑁆𑀕𑀻𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀮𑁄𑀳𑀺𑀘𑁆𑀘𑀲𑀼𑀢𑁆𑀢𑀪𑀸𑀯𑀁 𑀯𑀸 𑀧𑀓𑀸𑀲𑁂𑀢𑀼𑀁 ‘‘𑀏𑀯𑀁 𑀫𑁂 𑀲𑀼𑀢𑀁…𑀧𑁂… 𑀓𑁄𑀲𑀮𑁂𑀲𑀽𑀢𑀺 𑀮𑁄𑀳𑀺𑀘𑁆𑀘𑀲𑀼𑀢𑁆𑀢’’𑀦𑁆𑀢𑀺 𑀆𑀳. 𑀲𑀸𑀮𑀯𑀢𑀺𑀓𑀸𑀢𑀺 𑀓𑀸𑀭𑀡𑀫𑀦𑁆𑀢𑀭𑁂𑀦 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀢𑀲𑁆𑀲 𑀕𑀸𑀫𑀲𑁆𑀲 𑀦𑀸𑀫𑀁. 𑀕𑀸𑀫𑀡𑀺𑀓𑀸𑀪𑀸𑀯𑁂𑀦𑀸𑀢𑀺 𑀓𑁂𑀘𑀺. 𑀯𑀢𑀺𑀬𑀸𑀢𑀺 𑀓𑀡𑁆𑀝𑀓𑀲𑀸𑀔𑀸𑀤𑀺𑀯𑀢𑀺𑀬𑀸. 𑀮𑁄𑀳𑀺𑀢𑁄 𑀦𑀸𑀫 𑀢𑀲𑁆𑀲 𑀓𑀼𑀮𑁂 𑀧𑀼𑀩𑁆𑀩𑀧𑀼𑀭𑀺𑀲𑁄, 𑀢𑀩𑁆𑀩𑀁𑀲𑀯𑀲𑁂𑀦 𑀮𑁄𑀳𑀺𑀢𑀲𑁆𑀲 𑀅𑀧𑀘𑁆𑀘𑀁 𑀮𑁄𑀳𑀺𑀘𑁆𑀘𑁄𑀢𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀕𑁄𑀢𑁆𑀢𑀢𑁄 𑀆𑀕𑀢𑀦𑀸𑀫𑀁.

𑁫𑁦𑁨. ‘‘𑀓𑀺𑀜𑁆𑀳𑀺 𑀧𑀭𑁄 𑀧𑀭𑀲𑁆𑀲 𑀓𑀭𑀺𑀲𑁆𑀲𑀢𑀻’’𑀢𑀺 𑀧𑀭𑀸𑀦𑀼𑀓𑀫𑁆𑀧𑀸 𑀯𑀺𑀭𑀳𑀺𑀢𑀢𑁆𑀢𑀸 𑀮𑀸𑀫𑀓𑀁. 𑀦 𑀢𑀼 𑀉𑀘𑁆𑀙𑁂𑀤𑀲𑀲𑁆𑀲𑀢𑀸𑀦𑀁 𑀅𑀜𑁆𑀜𑀢𑀭𑀲𑁆𑀲𑀸𑀢𑀺 𑀆𑀳 ‘‘𑀦 𑀧𑀦𑀸’’𑀢𑀺𑀆𑀤𑀺. 𑀤𑀺𑀝𑁆𑀞𑀺𑀕𑀢𑀦𑁆𑀢𑀺 𑀳𑀺 𑀮𑀤𑁆𑀥𑀺𑀫𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀁, 𑀅𑀜𑁆𑀜𑀣𑀸 𑀉𑀘𑁆𑀙𑁂𑀤𑀲𑀲𑁆𑀲𑀢𑀕𑁆𑀕𑀸𑀳𑀯𑀺𑀦𑀺𑀫𑀼𑀢𑁆𑀢𑁄 𑀓𑁄𑀘𑀺 𑀤𑀺𑀝𑁆𑀞𑀺𑀕𑁆𑀕𑀸𑀳𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀢𑁂𑀲𑀫𑀜𑁆𑀜𑀢𑀭𑀁 𑀲𑀺𑀬𑀸. ‘‘𑀉𑀧𑁆𑀧𑀦𑁆𑀦𑀁 𑀳𑁄𑀢𑀻’’𑀢𑀺 𑀇𑀤𑀁 𑀫𑀦𑀲𑀺, 𑀯𑀘𑀲𑀺 𑀘 𑀉𑀧𑁆𑀧𑀦𑁆𑀦𑀢𑀸𑀲𑀸𑀥𑀸𑀭𑀡𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀦 𑀓𑁂𑀯𑀮𑀜𑁆𑀘𑀸’’𑀢𑀺𑀆𑀤𑀺𑀦𑀸. 𑀲𑁄 𑀓𑀺𑀭…𑀧𑁂… 𑀪𑀸𑀲𑀢𑀺𑀬𑁂𑀯𑀸𑀢𑀺 𑀘 𑀢𑀲𑁆𑀲𑀸 𑀮𑀤𑁆𑀥𑀺𑀬𑀸 𑀮𑁄𑀓𑁂 𑀧𑀸𑀓𑀝𑀪𑀸𑀯𑀁 𑀯𑀤𑀢𑀺. 𑀬𑀲𑁆𑀫𑀸 𑀧𑀦 𑀅𑀢𑁆𑀢𑀢𑁄 𑀅𑀜𑁆𑀜𑁄 𑀧𑀭𑁄 𑀳𑁄𑀢𑀺, 𑀢𑀲𑁆𑀫𑀸 𑀬𑀣𑀸 𑀅𑀦𑀼𑀲𑀸𑀲𑀓𑀢𑁄 𑀅𑀦𑀼𑀲𑀸𑀲𑀺𑀢𑀩𑁆𑀩𑁄 𑀧𑀭𑁄, 𑀏𑀯𑀁 𑀅𑀦𑀼𑀲𑀸𑀲𑀺𑀢𑀩𑁆𑀩𑀢𑁄𑀧𑀺 𑀅𑀦𑀼𑀲𑀸𑀲𑀓𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀭𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀺𑀁-𑀲𑀤𑁆𑀤𑀸𑀧𑁂𑀓𑁆𑀔𑀸𑀬 𑀘𑁂𑀢𑁆𑀣 ‘‘𑀓𑀭𑀺𑀲𑁆𑀲𑀢𑀻’’𑀢𑀺 𑀅𑀦𑀸𑀕𑀢𑀓𑀸𑀮𑀯𑀘𑀦𑀁, 𑀅𑀦𑀸𑀕𑀢𑁂𑀧𑀺 𑀯𑀸 𑀢𑁂𑀦 𑀢𑀲𑁆𑀲 𑀓𑀸𑀢𑀩𑁆𑀩𑀁 𑀦𑀢𑁆𑀣𑀻𑀢𑀺 𑀤𑀲𑁆𑀲𑀦𑀢𑁆𑀣𑀁. 𑀓𑀼𑀲𑀮𑀁 𑀥𑀫𑁆𑀫𑀦𑁆𑀢𑀺 𑀅𑀦𑀯𑀚𑁆𑀚𑀥𑀫𑁆𑀫𑀁 𑀦𑀺𑀓𑁆𑀓𑀺𑀮𑁂𑀲𑀥𑀫𑁆𑀫𑀁, 𑀯𑀺𑀫𑁄𑀓𑁆𑀔𑀥𑀫𑁆𑀫𑀦𑁆𑀢𑀺 𑀅𑀢𑁆𑀣𑁄. ‘‘𑀧𑀭𑁂𑀲𑀁 𑀥𑀫𑁆𑀫𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀢𑁂𑀳𑀺 𑀅𑀢𑁆𑀢𑀸𑀦𑀁 𑀧𑀭𑀺𑀯𑀸𑀭𑀸𑀧𑁂𑀢𑁆𑀯𑀸 𑀯𑀺𑀘𑀭𑀡𑀁 𑀓𑀺𑀫𑀢𑁆𑀣𑀺𑀬𑀁, 𑀆𑀲𑀬𑀯𑀼𑀤𑁆𑀥𑀲𑁆𑀲𑀧𑀺 𑀅𑀦𑀼𑀭𑁄𑀥𑁂𑀦 𑀯𑀺𑀦𑀸 𑀢𑀁 𑀦 𑀳𑁄𑀢𑀺, 𑀢𑀲𑁆𑀫𑀸 𑀅𑀢𑁆𑀢𑀦𑀸…𑀧𑁂… 𑀯𑀺𑀳𑀸𑀢𑀩𑁆𑀩𑀦𑁆𑀢𑀺 𑀯𑀤𑀢𑀺. 𑀢𑁂𑀦𑀸𑀳 ‘‘𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀧𑀸𑀧𑀓𑀁 𑀮𑁄𑀪𑀥𑀫𑁆𑀫𑀁 𑀯𑀤𑀸𑀫𑀻’’𑀢𑀺.

𑁫𑁦𑁪. ‘‘𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦𑀸’’𑀢𑀺 𑀇𑀫𑀺𑀦𑀸 𑀧𑀼𑀮𑁆𑀮𑀺𑀗𑁆𑀕𑀺𑀓𑀲𑁆𑀲𑀧𑀺 𑀅𑀢𑁆𑀣𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀲𑀫𑀜𑁆𑀜𑀸𑀢𑀺 𑀤𑀲𑁆𑀲𑁂𑀢𑀺. 𑀲𑁄𑀢𑀺 𑀮𑁄𑀳𑀺𑀘𑁆𑀘𑀩𑁆𑀭𑀸𑀳𑁆𑀫𑀡𑁄. 𑀪𑀸𑀭𑁄𑀢𑀺 𑀪𑀕𑀯𑀢𑁄 𑀧𑀭𑀺𑀲𑀩𑀸𑀳𑀼𑀮𑁆𑀮𑀢𑁆𑀢𑀸, 𑀅𑀢𑁆𑀢𑀦𑁄 𑀘 𑀩𑀳𑀼𑀓𑀺𑀘𑁆𑀘𑀓𑀭𑀡𑀻𑀬𑀢𑁆𑀢𑀸 𑀕𑀭𑀼 𑀤𑀼𑀓𑁆𑀓𑀭𑀁.

𑁫𑁦𑁮. 𑀓𑀣𑀸𑀨𑀸𑀲𑀼𑀓𑀢𑁆𑀣𑀦𑁆𑀢𑀺 𑀓𑀣𑀸𑀲𑀼𑀔𑀢𑁆𑀣𑀁, 𑀲𑀼𑀔𑁂𑀦 𑀓𑀣𑀁 𑀓𑀣𑁂𑀢𑀼𑀜𑁆𑀘𑁂𑀯 𑀲𑁄𑀢𑀼𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀅𑀬𑀁 𑀉𑀧𑀸𑀲𑀓𑁄𑀢𑀺 𑀭𑁄𑀲𑀺𑀓𑀦𑁆𑀳𑀸𑀧𑀺𑀢𑀁 𑀆𑀳. 𑀅𑀧𑁆𑀧𑁂𑀯 𑀦𑀸𑀫 𑀲𑀺𑀬𑀸𑀢𑀺 𑀏𑀢𑁆𑀣 𑀧𑀻𑀢𑀺𑀯𑀲𑁂𑀦 𑀆𑀫𑁂𑀟𑀺𑀢𑀁 𑀤𑀝𑁆𑀞𑀩𑁆𑀩𑀁. 𑀢𑀣𑀸 𑀳𑀺 𑀢𑀁 ‘‘𑀩𑀼𑀤𑁆𑀥𑀕𑀚𑁆𑀚𑀺𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀪𑀕𑀯𑀸 𑀳𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀯𑀺𑀲𑁂𑀲𑀢𑁄 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄 𑀳𑁄𑀢𑀺, 𑀢𑀲𑁆𑀫𑀸 𑀧𑀻𑀢𑀺𑀯𑀲𑁂𑀦 𑀧𑀞𑀫𑀁 𑀕𑀚𑁆𑀚𑀢𑀺, 𑀤𑀼𑀢𑀺𑀬𑀫𑁆𑀧𑀺 𑀅𑀦𑀼𑀕𑀚𑁆𑀚𑀢𑀺. 𑀓𑀺𑀁 𑀯𑀺𑀲𑁂𑀲𑀁 𑀕𑀚𑁆𑀚𑀦𑀫𑀦𑀼𑀕𑀚𑁆𑀚𑀦𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀅𑀬’’𑀦𑁆𑀢𑀺𑀆𑀤𑀺. 𑀆𑀤𑁄 𑀪𑀸𑀲𑀦𑀁 𑀅𑀮𑁆𑀮𑀸𑀧𑁄, 𑀲𑀜𑁆𑀜𑁄𑀕𑁂 𑀧𑀭𑁂 𑀭𑀲𑁆𑀲𑁄. 𑀢𑀤𑀼𑀢𑁆𑀢𑀭𑀺 𑀲𑀳 𑀪𑀸𑀲𑀦𑀁 𑀲𑀮𑁆𑀮𑀸𑀧𑁄.

𑀮𑁄𑀳𑀺𑀘𑁆𑀘𑀩𑁆𑀭𑀸𑀳𑁆𑀫𑀡𑀸𑀦𑀼𑀬𑁄𑀕𑀯𑀡𑁆𑀡𑀦𑀸

𑁫𑁦𑁯. 𑀲𑀫𑀼𑀤𑀬𑀲𑀜𑁆𑀚𑀸𑀢𑀻𑀢𑀺 𑀆𑀬𑀼𑀧𑁆𑀧𑀸𑀤𑁄𑀢𑀺 𑀆𑀳 ‘‘𑀪𑁄𑀕𑀼𑀧𑁆𑀧𑀸𑀤𑁄’’𑀢𑀺. 𑀢𑀢𑁄𑀢𑀺 𑀲𑀸𑀮𑀯𑀢𑀺𑀓𑀸𑀬. 𑀮𑀸𑀪𑀦𑁆𑀢𑀭𑀸𑀬𑀓𑀭𑁄𑀢𑀺 𑀥𑀦𑀥𑀜𑁆𑀜𑀮𑀸𑀪𑀲𑁆𑀲 𑀅𑀦𑁆𑀢𑀭𑀸𑀬𑀓𑀭𑁄. 𑀅𑀦𑀼𑀧𑀼𑀩𑁆𑀩𑁄 𑀓𑀧𑀺-𑀲𑀤𑁆𑀤𑁄 𑀆𑀓𑀗𑁆𑀔𑀦𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺 ‘‘𑀇𑀘𑁆𑀙𑀢𑀻’’𑀢𑀺 𑀇𑀫𑀺𑀦𑀸. 𑀅𑀬𑀁 𑀅𑀝𑁆𑀞𑀓𑀣𑀸𑀢𑁄 𑀅𑀧𑀭𑁄 𑀦𑀬𑁄 𑁋 𑀲𑀸𑀢𑀺𑀲𑀬𑁂𑀦 𑀳𑀺𑀢𑁂𑀦 𑀅𑀦𑀼𑀓𑀫𑁆𑀧𑀓𑁄 𑀅𑀦𑀼𑀕𑁆𑀕𑀡𑁆𑀳𑀦𑀓𑁄 𑀳𑀺𑀢𑀸𑀦𑀼𑀓𑀫𑁆𑀧𑀻𑀢𑀺. 𑀲𑀫𑁆𑀧𑀚𑁆𑀚𑀢𑀻𑀢𑀺 𑀆𑀲𑁂𑀯𑀦𑀮𑀸𑀪𑁂𑀦 𑀦𑀺𑀧𑁆𑀧𑀚𑁆𑀚𑀢𑀺, 𑀩𑀮𑀯𑀢𑀻 𑀳𑁄𑀢𑀺 𑀅𑀯𑀕𑁆𑀕𑀳𑀸𑀢𑀺 𑀅𑀢𑁆𑀣𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑀺𑀬𑀢𑀸 𑀳𑁄𑀢𑀻’’𑀢𑀺.

𑁫𑁧𑁦-𑁫𑁧𑁧. 𑀤𑀼𑀢𑀺𑀬𑀁 𑀉𑀧𑀧𑀢𑁆𑀢𑀺𑀦𑁆𑀢𑀺 ‘‘𑀦𑀦𑀼 𑀭𑀸𑀚𑀸 𑀧𑀲𑁂𑀦𑀤𑀺𑀓𑁄𑀲𑀮𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁 𑀤𑀼𑀢𑀺𑀬𑀁 𑀉𑀧𑀧𑀢𑁆𑀢𑀺𑀁 𑀞𑀸𑀦𑀁 𑀬𑀼𑀢𑁆𑀢𑀺𑀁. 𑀓𑀸𑀭𑀡𑀜𑁆𑀳𑀺 𑀪𑀕𑀯𑀸 𑀉𑀧𑀫𑀸𑀫𑀼𑀔𑁂𑀦 𑀤𑀲𑁆𑀲𑁂𑀢𑀺, 𑀇𑀫𑀸𑀬 𑀘 𑀉𑀧𑀧𑀢𑁆𑀢𑀺𑀬𑀸 𑀢𑀼𑀫𑁆𑀳𑁂 𑀘𑁂𑀯 𑀅𑀜𑁆𑀜𑁂 𑀘𑀸𑀢𑀺 𑀮𑁄𑀳𑀺𑀘𑁆𑀘𑀫𑁆𑀧𑀺 𑀅𑀦𑁆𑀢𑁄𑀓𑀢𑁆𑀯𑀸 𑀲𑀁𑀯𑁂𑀚𑀦𑀁 𑀓𑀢𑀁 𑀳𑁄𑀢𑀺. 𑀬𑁂 𑀘 𑀇𑀫𑁂 𑀓𑀼𑀮𑀧𑀼𑀢𑁆𑀢𑀸 𑀤𑀺𑀩𑁆𑀩𑀸 𑀕𑀩𑁆𑀪𑀸 𑀧𑀭𑀺𑀧𑀸𑀘𑁂𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀬𑀸, 𑀜𑀸𑀡𑀧𑀭𑀺𑀧𑀸𑀓𑀲𑁆𑀲 𑀯𑀸 𑀅𑀪𑀸𑀯𑁂𑀦 𑀅𑀲𑀓𑁆𑀓𑁄𑀦𑁆𑀢𑀸. 𑀓𑀫𑁆𑀫𑀧𑀤𑁂𑀦 𑀅𑀢𑀼𑀮𑁆𑀬𑀸𑀥𑀺𑀓𑀭𑀡𑀢𑁆𑀢𑀸 𑀧𑀭𑀺𑀧𑀸𑀘𑁂𑀦𑁆𑀢𑀺 𑀓𑀺𑀭𑀺𑀬𑀸𑀬 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑁂𑀦 𑀉𑀧𑀬𑁄𑀕𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀁. 𑀬𑁂 𑀧𑀦 ‘‘𑀧𑀭𑀺𑀧𑀘𑁆𑀘𑀦𑁆𑀢𑀻’’𑀢𑀺 𑀓𑀫𑁆𑀫𑀭𑀽𑀧𑁂𑀦 𑀧𑀞𑀦𑁆𑀢𑀺, 𑀢𑁂𑀲𑀁 𑀫𑀢𑁂 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑁂𑀦 𑀧𑀬𑁄𑀚𑀦𑀁 𑀦𑀢𑁆𑀣𑀺 𑀓𑀫𑁆𑀫𑀓𑀢𑁆𑀢𑀼𑀪𑀸𑀯𑀢𑁄, 𑀅𑀢𑁆𑀣𑁄 𑀧𑀦𑀲𑁆𑀲 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀯𑀼𑀢𑁆𑀢𑀦𑀬𑁂𑀦 𑀤𑀸𑀦𑀸𑀤𑀺𑀧𑀼𑀜𑁆𑀜𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀳𑀺𑀢𑀸𑀦𑀼𑀓𑀫𑁆𑀧𑀸𑀤𑀺𑀢𑀸 𑀘 𑀢𑀲𑁆𑀲 𑀢𑀁𑀲𑀫𑀗𑁆𑀕𑀻𑀲𑀢𑁆𑀢𑀯𑀲𑁂𑀦 𑀳𑁄𑀢𑀺. 𑀤𑀺𑀯𑀺 𑀪𑀯𑀸𑀢𑀺 𑀤𑀺𑀩𑁆𑀩𑀸. 𑀕𑀩𑁆𑀪𑁂𑀦𑁆𑀢𑀺 𑀧𑀭𑀺𑀧𑀘𑁆𑀘𑀦𑀯𑀲𑁂𑀦 𑀅𑀢𑁆𑀢𑀦𑀺 𑀧𑀩𑀦𑁆𑀥𑁂𑀦𑁆𑀢𑀻𑀢𑀺 𑀕𑀩𑁆𑀪𑀸, 𑀤𑁂𑀯𑀮𑁄𑀓𑀸. ‘‘𑀙𑀦𑁆𑀦𑀁 𑀤𑁂𑀯𑀮𑁄𑀓𑀸𑀦’’𑀦𑁆𑀢𑀺 𑀦𑀺𑀤𑀲𑁆𑀲𑀦𑀯𑀘𑀦𑀫𑁂𑀢𑀁. 𑀩𑁆𑀭𑀳𑁆𑀫𑀮𑁄𑀓𑀲𑁆𑀲𑀸𑀧𑀺 𑀳𑀺 𑀤𑀺𑀩𑁆𑀩𑀕𑀩𑁆𑀪𑀪𑀸𑀯𑁄 𑀮𑀩𑁆𑀪𑀢𑁂𑀯 𑀤𑀺𑀩𑁆𑀩𑀯𑀺𑀳𑀸𑀭𑀳𑁂𑀢𑀼𑀓𑀢𑁆𑀢𑀸. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀪𑀸𑀯𑀦𑀁 𑀪𑀸𑀯𑀬𑀫𑀸𑀦𑀸’’𑀢𑀺 𑀇𑀤𑀫𑁆𑀧𑀺 𑀯𑀘𑀦𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺. ‘‘𑀤𑁂𑀯𑀮𑁄𑀓𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀧𑀽𑀭𑀬𑀫𑀸𑀦𑀸’’𑀢𑀺 𑀯𑀢𑁆𑀯𑀸 𑀢𑀁 𑀧𑀝𑀺𑀧𑀤𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀤𑀸𑀦𑀁 𑀤𑀤𑀫𑀸𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀪𑀯𑀦𑁆𑀢𑀺 𑀏𑀢𑁆𑀣 𑀬𑀣𑀸𑀭𑀼𑀘𑀺 𑀲𑀼𑀔𑀲𑀫𑀧𑁆𑀧𑀺𑀢𑀸𑀢𑀺 𑀪𑀯𑀸, 𑀯𑀺𑀫𑀸𑀦𑀸𑀦𑀺. 𑀤𑁂𑀯𑀪𑀸𑀯𑀸𑀯𑀳𑀢𑁆𑀢𑀸 𑀤𑀺𑀩𑁆𑀩𑀸. 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀩𑁆𑀪𑀸.𑀤𑀸𑀦𑀸𑀤𑀬𑁄 𑀤𑁂𑀯𑀮𑁄𑀓𑀲𑀁𑀯𑀢𑁆𑀢𑀦𑀺𑀓 𑀧𑀼𑀜𑁆𑀜𑀯𑀺𑀲𑁂𑀲𑀸. 𑀤𑀺𑀩𑁆𑀩𑀸 𑀪𑀯𑀸𑀢𑀺 𑀇𑀥 𑀤𑁂𑀯𑀮𑁄𑀓𑀧𑀭𑀺𑀬𑀸𑀧𑀦𑁆𑀦𑀸 𑀉𑀧𑀧𑀢𑁆𑀢𑀺𑀪𑀯𑀸 𑀅𑀥𑀺𑀧𑁆𑀧𑁂𑀢𑀸. 𑀢𑀤𑀸𑀯𑀳𑁄 𑀳𑀺 𑀓𑀫𑁆𑀫𑀪𑀯𑁄 𑀧𑀼𑀩𑁆𑀩𑁂 𑀕𑀳𑀺𑀢𑁄𑀢𑀺 𑀆𑀳 ‘‘𑀤𑁂𑀯𑀮𑁄𑀓𑁂 𑀯𑀺𑀧𑀸𑀓𑀓𑁆𑀔𑀦𑁆𑀥𑀸’’𑀢𑀺.

𑀢𑀬𑁄𑀘𑁄𑀤𑀦𑀸𑀭𑀳𑀯𑀡𑁆𑀡𑀦𑀸

𑁫𑁧𑁩. 𑀅𑀦𑀺𑀬𑀸𑀫𑀺𑀢𑁂𑀦𑁂𑀯𑀸𑀢𑀺 𑀅𑀦𑀺𑀬𑀫𑀺𑀢𑁂𑀦𑁂𑀯, ‘‘𑀢𑁆𑀯𑀁 𑀏𑀯𑀁 𑀤𑀺𑀝𑁆𑀞𑀺𑀓𑁄, 𑀏𑀯𑀁 𑀲𑀢𑁆𑀢𑀸𑀦𑀁 𑀅𑀦𑀢𑁆𑀣𑀲𑁆𑀲 𑀓𑀸𑀭𑀓𑁄’’𑀢𑀺 𑀏𑀯𑀁 𑀅𑀦𑀼𑀤𑁆𑀤𑁂𑀲𑀺𑀓𑁂𑀦𑁂𑀯. 𑀲𑀩𑁆𑀩𑀮𑁄𑀓𑀧𑀢𑁆𑀣𑀝𑀸𑀬 𑀮𑀤𑁆𑀥𑀺𑀬𑀸 𑀲𑀫𑀼𑀧𑁆𑀧𑀚𑁆𑀚𑀦𑀢𑁄 𑀬𑀸𑀯 𑀪𑀯𑀕𑁆𑀕𑀸 𑀉𑀕𑁆𑀕𑀢𑀁. 𑀫𑀸𑀦𑀦𑁆𑀢𑀺 ‘‘𑀅𑀳𑀫𑁂𑀢𑀁 𑀚𑀸𑀦𑀸𑀫𑀺, 𑀅𑀳𑀫𑁂𑀢𑀁 𑀧𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀧𑀯𑀢𑁆𑀢𑀁 𑀧𑀡𑁆𑀟𑀺𑀢𑀫𑀸𑀦𑀁. 𑀪𑀺𑀦𑁆𑀤𑀺𑀢𑁆𑀯𑀸𑀢𑀺 𑀯𑀺𑀥𑀫𑁂𑀢𑁆𑀯𑀸, 𑀚𑀳𑀸𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀬𑁄 𑀲𑀢𑁆𑀣𑀸𑀭𑁂𑀢𑀺 𑀅𑀲𑀫𑁆𑀧𑀸𑀤𑀺𑀢𑀅𑀢𑁆𑀢𑀳𑀺𑀢𑁄 𑀅𑀦𑁄𑀯𑀸𑀤𑀓𑀭𑀲𑀸𑀯𑀓𑁄 𑀘 𑀅𑀲𑀫𑁆𑀧𑀸𑀤𑀺𑀢𑀅𑀢𑁆𑀢𑀳𑀺𑀢𑁄 𑀑𑀯𑀸𑀤𑀓𑀭𑀲𑀸𑀯𑀓𑁄 𑀘 𑀲𑀫𑁆𑀧𑀸𑀤𑀺𑀢𑀅𑀢𑁆𑀢𑀳𑀺𑀢𑁄 𑀅𑀦𑁄𑀯𑀸𑀤𑀓𑀭𑀲𑀸𑀯𑀓𑁄 𑀘𑁂𑀢𑀺 𑀇𑀫𑁂 𑀢𑀬𑁄 𑀲𑀢𑁆𑀣𑀸𑀭𑁂. 𑀘𑀢𑀼𑀢𑁆𑀣𑁄 𑀧𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀦 𑀘𑁄𑀤𑀦𑀸𑀭𑀳𑁄, 𑀢𑀲𑁆𑀫𑀸 ‘‘𑀢𑀁 𑀢𑁂𑀦 𑀧𑀼𑀘𑁆𑀙𑀺𑀢𑁄 𑀏𑀯 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀘𑁄𑀤𑀦𑀸𑀭𑀳𑁂𑀯 𑀢𑀬𑁄 𑀲𑀢𑁆𑀣𑀸𑀭𑁂 𑀧𑀞𑀫𑀁 𑀤𑀲𑁆𑀲𑁂𑀢𑀺, 𑀧𑀘𑁆𑀙𑀸 𑀘𑀢𑀼𑀢𑁆𑀣𑀁 𑀲𑀢𑁆𑀣𑀸𑀭𑀁. 𑀓𑀸𑀫𑀜𑁆𑀘𑁂𑀢𑁆𑀣 𑀘𑀢𑀼𑀢𑁆𑀣𑁄 𑀲𑀢𑁆𑀣𑀸 𑀏𑀓𑁄 𑀅𑀤𑀼𑀢𑀺𑀬𑁄 𑀅𑀦𑀜𑁆𑀜𑀲𑀸𑀥𑀸𑀭𑀡𑁄, 𑀢𑀣𑀸𑀧𑀺 𑀲𑁄 𑀬𑁂𑀲𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀦𑀁 𑀯𑀲𑁂𑀦 ‘‘𑀥𑀫𑁆𑀫𑀫𑀬𑁄 𑀓𑀸𑀬𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑁂𑀲𑀁 𑀲𑀫𑀼𑀤𑀸𑀬𑀪𑀽𑀢𑁄𑀧𑀺 𑀢𑁂 𑀕𑀼𑀡𑀸𑀯𑀬𑀯𑁂 𑀲𑀢𑁆𑀣𑀼𑀝𑁆𑀞𑀸𑀦𑀺𑀬𑁂 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀸 ‘‘𑀅𑀬𑀫𑁆𑀧𑀺 𑀔𑁄 𑀮𑁄𑀳𑀺𑀘𑁆𑀘 𑀲𑀢𑁆𑀣𑀸’’𑀢𑀺 𑀅𑀪𑀸𑀲𑀺.

𑀅𑀜𑁆𑀜𑀸𑀢𑀺 𑀬-𑀓𑀸𑀭𑀮𑁄𑀧𑀦𑀺𑀤𑁆𑀤𑁂𑀲𑁄 ‘‘𑀲𑀬𑀁 𑀅𑀪𑀺𑀜𑁆𑀜𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁮, 𑁩𑁭; 𑀫. 𑀦𑀺. 𑁧.𑁧𑁫𑁪, 𑁪𑁪𑁪) 𑀯𑀺𑀬, 𑀢𑀤𑀢𑁆𑀣𑁂 𑀘𑁂𑀢𑀁 𑀲𑀫𑁆𑀧𑀤𑀸𑀦𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀅𑀜𑁆𑀜𑀸𑀬𑀸’’𑀢𑀺𑀆𑀤𑀺𑀦𑀸. 𑀲𑀸𑀯𑀓𑀢𑁆𑀢𑀁 𑀧𑀝𑀺𑀚𑀸𑀦𑀺𑀢𑁆𑀯𑀸 𑀞𑀺𑀢𑀢𑁆𑀢𑀸 𑀏𑀓𑀤𑁂𑀲𑁂𑀦𑀲𑁆𑀲 𑀲𑀸𑀲𑀦𑀁 𑀓𑀭𑁄𑀦𑁆𑀢𑀻𑀢𑀺 𑀆𑀳 ‘‘𑀦𑀺𑀭𑀦𑁆𑀢𑀭𑀁 𑀢𑀲𑁆𑀲 𑀲𑀸𑀲𑀦𑀁 𑀅𑀓𑀢𑁆𑀯𑀸’’𑀢𑀺. 𑀉𑀓𑁆𑀓𑀫𑀺𑀢𑁆𑀯𑀸 𑀉𑀓𑁆𑀓𑀫𑀺𑀢𑁆𑀯𑀸𑀢𑀺 𑀓𑀤𑀸𑀘𑀺 𑀢𑀣𑀸 𑀓𑀭𑀡𑀁, 𑀓𑀤𑀸𑀘𑀺 𑀢𑀣𑀸 𑀅𑀓𑀭𑀡𑀜𑁆𑀘 𑀲𑀦𑁆𑀥𑀸𑀬 𑀯𑀺𑀘𑁆𑀙𑀸𑀯𑀘𑀦𑀁, 𑀬𑀤𑀺𑀘𑁆𑀙𑀺𑀢𑀁 𑀓𑀭𑁄𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀝𑀺𑀓𑁆𑀓𑀫𑀦𑁆𑀢𑀺𑀬𑀸𑀢𑀺 𑀅𑀦𑀪𑀺𑀭𑀢𑀺𑀬𑀸 𑀅𑀕𑀸𑀭𑀯𑁂𑀦 𑀅𑀧𑀕𑀘𑁆𑀙𑀦𑁆𑀢𑀺𑀬𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀦𑀺𑀘𑁆𑀙𑀦𑁆𑀢𑀺𑀬𑀸’’𑀢𑀺𑀆𑀤𑀺. 𑀏𑀓𑀸𑀬𑀸𑀢𑀺 𑀅𑀤𑀼𑀢𑀺𑀬𑀸𑀬 𑀇𑀢𑁆𑀣𑀺𑀬𑀸, 𑀲𑀫𑁆𑀧𑀬𑁄𑀕𑀦𑁆𑀢𑀺 𑀫𑁂𑀣𑀼𑀦𑀥𑀫𑁆𑀫𑀲𑀫𑀸𑀬𑁄𑀕𑀁. 𑀏𑀓𑁄 𑀇𑀘𑁆𑀙𑁂𑀬𑁆𑀬𑀸𑀢𑀺 𑀅𑀤𑀼𑀢𑀺𑀬𑁄 𑀧𑀼𑀭𑀺𑀲𑁄 𑀲𑀫𑁆𑀧𑀬𑁄𑀕𑀁 𑀇𑀘𑁆𑀙𑁂𑀬𑁆𑀬𑀸𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀑𑀲𑀓𑁆𑀓𑀦𑀸𑀤𑀺𑀫𑀼𑀔𑁂𑀦 𑀇𑀢𑁆𑀣𑀺𑀧𑀼𑀭𑀺𑀲𑀲𑀫𑁆𑀩𑀦𑁆𑀥𑀦𑀺𑀤𑀲𑁆𑀲𑀦𑀁 𑀕𑁂𑀳𑀲𑁆𑀲𑀺𑀢𑀸𑀕𑁂𑀳𑀲𑁆𑀲𑀺𑀢𑀅𑀧𑁂𑀓𑁆𑀔𑀯𑀲𑁂𑀦 𑀢𑀲𑁆𑀲 𑀲𑀢𑁆𑀣𑀼𑀦𑁄 𑀲𑀸𑀯𑀓𑁂𑀲𑀼 𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁. 𑀅𑀢𑀺𑀯𑀺𑀭𑀢𑁆𑀢𑀪𑀸𑀯𑀢𑁄 𑀤𑀝𑁆𑀞𑀼𑀫𑁆𑀧𑀺 𑀅𑀦𑀺𑀘𑁆𑀙𑀫𑀸𑀦𑀁 𑀧𑀭𑀫𑁆𑀫𑀼𑀔𑀺𑀁 𑀞𑀺𑀢𑀁 𑀇𑀢𑁆𑀣𑀺𑀁. 𑀮𑁄𑀪𑁂𑀦𑀸𑀢𑀺 𑀧𑀭𑀺𑀯𑀸𑀭𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑀓𑀮𑀸𑀪𑀲𑀓𑁆𑀓𑀸𑀭𑀮𑁄𑀪𑁂𑀦. 𑀈𑀤𑀺𑀲𑁄𑀢𑀺 𑀏𑀯𑀁𑀲𑀪𑀸𑀯𑁄 𑀲𑀢𑁆𑀣𑀸. 𑀬𑁂𑀦𑀸𑀢𑀺 𑀮𑁄𑀪𑀥𑀫𑁆𑀫𑁂𑀦. 𑀢𑀢𑁆𑀣 𑀲𑀫𑁆𑀧𑀸𑀤𑁂𑀳𑀻𑀢𑀺 𑀢𑀲𑁆𑀫𑀺𑀁 𑀧𑀝𑀺𑀧𑀢𑁆𑀢𑀺𑀥𑀫𑁆𑀫𑁂 𑀧𑀢𑀺𑀝𑁆𑀞𑀺𑀢𑀁 𑀓𑀢𑁆𑀯𑀸 𑀲𑀫𑁆𑀧𑀸𑀤𑁂𑀳𑀺. 𑀓𑀸𑀬𑀯𑀗𑁆𑀓𑀸𑀤𑀺𑀯𑀺𑀕𑀫𑁂𑀦 𑀉𑀚𑀼𑀁 𑀓𑀭𑁄𑀳𑀺.

𑁫𑁧𑁪. 𑀲𑀲𑁆𑀲𑀭𑀽𑀧𑀓𑀸𑀦𑀺 𑀢𑀺𑀡𑀸𑀦𑀻𑀢𑀺 𑀲𑀲𑁆𑀲𑀲𑀤𑀺𑀲𑀸𑀦𑀺 𑀦𑀻𑀯𑀸𑀭𑀸𑀤𑀺𑀢𑀺𑀡𑀸𑀦𑀺.

𑁫𑁧𑁫. 𑀏𑀯𑀁 𑀘𑁄𑀤𑀦𑀁 𑀅𑀭𑀳𑀢𑀻𑀢𑀺 𑀯𑀼𑀢𑁆𑀢𑀦𑀬𑁂𑀦 𑀲𑀸𑀯𑀓𑁂𑀲𑀼 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀪𑀸𑀯𑀸𑀧𑀸𑀤𑀦𑁂 𑀦𑀺𑀬𑁄𑀚𑀦𑀯𑀲𑁂𑀦 𑀘𑁄𑀤𑀦𑀁 𑀅𑀭𑀳𑀢𑀺, 𑀦 𑀧𑀞𑀫𑁄 𑀯𑀺𑀬 ‘‘𑀏𑀯𑀭𑀽𑀧𑁄 𑀢𑀯 𑀮𑁄𑀪𑀥𑀫𑁆𑀫𑁄’’𑀢𑀺𑀆𑀤𑀺𑀦𑀸, 𑀦 𑀘 𑀤𑀼𑀢𑀺𑀬𑁄 𑀯𑀺𑀬 ‘‘𑀅𑀢𑁆𑀢𑀸𑀦𑀫𑁂𑀯 𑀢𑀸𑀯 𑀢𑀢𑁆𑀣 𑀲𑀫𑁆𑀧𑀸𑀤𑁂𑀳𑀻’’𑀢𑀺𑀆𑀤𑀺𑀦𑀸. 𑀓𑀲𑁆𑀫𑀸? 𑀲𑀫𑁆𑀧𑀸𑀤𑀺𑀢𑀅𑀢𑁆𑀢𑀳𑀺𑀢𑀢𑀸𑀬 𑀢𑀢𑀺𑀬𑀲𑁆𑀲.

𑀦𑀘𑁄𑀤𑀦𑀸𑀭𑀳𑀲𑀢𑁆𑀣𑀼𑀯𑀡𑁆𑀡𑀦𑀸

𑁫𑁧𑁬. 𑀦 𑀘𑁄𑀤𑀦𑀸𑀭𑀳𑁄𑀢𑀺 𑀏𑀢𑁆𑀣 𑀬𑀲𑁆𑀫𑀸 𑀘𑁄𑀤𑀦𑀸𑀭𑀳𑀢𑀸 𑀦𑀸𑀫 𑀲𑀢𑁆𑀣𑀼𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀯𑀸 𑀲𑀸𑀯𑀓𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀯𑀸 𑀉𑀪𑀬𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀯𑀸 𑀳𑁄𑀢𑀺, 𑀢𑀬𑀺𑀤𑀁 𑀲𑀩𑁆𑀩𑀫𑁆𑀧𑀺 𑀇𑀫𑀲𑁆𑀫𑀺𑀁 𑀲𑀢𑁆𑀣𑀭𑀺 𑀦𑀢𑁆𑀣𑀺, 𑀢𑀲𑁆𑀫𑀸 𑀦 𑀘𑁄𑀤𑀦𑀸𑀭𑀳𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀬𑀜𑁆𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀲𑁆𑀲𑀯𑀸𑀢𑀺 𑀧𑀝𑀺𑀲𑁆𑀲𑀯𑀸.

𑁫𑁧𑁭. 𑀫𑀬𑀸 𑀕𑀳𑀺𑀢𑀸𑀬 𑀤𑀺𑀝𑁆𑀞𑀺𑀬𑀸𑀢𑀺 𑀲𑀩𑁆𑀩𑀲𑁄 𑀅𑀦𑀯𑀚𑁆𑀚𑁂 𑀅𑀦𑀼𑀧𑀯𑀚𑁆𑀚𑁂 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁂, 𑀧𑀭𑁂𑀲𑀜𑁆𑀘 𑀲𑀫𑁆𑀫𑀤𑁂𑀯 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁂 𑀲𑀢𑁆𑀣𑀭𑀺 𑀅𑀪𑀽𑀢𑀤𑁄𑀲𑀸𑀭𑁄𑀧𑀦𑀯𑀲𑁂𑀦 𑀫𑀺𑀘𑁆𑀙𑀸𑀕𑀳𑀺𑀢𑀸𑀬 𑀦𑀺𑀭𑀬𑀕𑀸𑀫𑀺𑀦𑀺𑀬𑀸 𑀧𑀸𑀧𑀤𑀺𑀝𑁆𑀞𑀺𑀬𑀸. 𑀦𑀭𑀓𑀧𑀧𑀸𑀢𑀦𑁆𑀢𑀺 𑀦𑀭𑀓𑀲𑀗𑁆𑀔𑀸𑀢𑀁 𑀫𑀳𑀸𑀧𑀧𑀸𑀢𑀁. 𑀧𑀧𑀢𑀦𑁆𑀢𑀺 𑀏𑀢𑁆𑀣𑀸𑀢𑀺 𑀳𑀺 𑀧𑀧𑀸𑀢𑁄. 𑀥𑀫𑁆𑀫𑀤𑁂𑀲𑀦𑀸𑀳𑀢𑁆𑀣𑁂𑀦𑀸𑀢𑀺 𑀥𑀫𑁆𑀫𑀤𑁂𑀲𑀦𑀸𑀲𑀗𑁆𑀔𑀸𑀢𑁂𑀦 𑀳𑀢𑁆𑀣𑁂𑀦. 𑀲𑀕𑁆𑀕𑀫𑀕𑁆𑀕𑀣𑀮𑁂𑀢𑀺 𑀲𑀕𑁆𑀕𑀕𑀸𑀫𑀺𑀫𑀕𑁆𑀕𑀪𑀽𑀢𑁂 𑀧𑀼𑀜𑁆𑀜𑀥𑀫𑁆𑀫𑀣𑀮𑁂, 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀤𑀺𑀲𑀕𑁆𑀕𑀲𑁄𑀢𑀸𑀧𑀢𑁆𑀢𑀺𑀆𑀤𑀺𑀫𑀕𑁆𑀕𑀲𑀗𑁆𑀔𑀸𑀢𑁂 𑀯𑀸 𑀣𑀮𑁂. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀇𑀢𑀺 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬 𑀧𑀭𑀫𑀲𑀼𑀔𑀼𑀫𑀕𑀫𑁆𑀪𑀻𑀭𑀤𑀼𑀭𑀦𑀼𑀩𑁄𑀥𑀢𑁆𑀣𑀧𑀭𑀺𑀤𑀻𑀧𑀦𑀸𑀬 𑀲𑀼𑀯𑀺𑀫𑀮𑀯𑀺𑀧𑀼𑀮𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀚𑀦𑀦𑀸𑀬 𑀲𑀸𑀥𑀼𑀯𑀺𑀮𑀸𑀲𑀺𑀦𑀺𑀬𑀸 𑀦𑀸𑀫 𑀮𑀻𑀦𑀢𑁆𑀣𑀧𑀓𑀸𑀲𑀦𑀺𑀬𑀸 𑀮𑁄𑀳𑀺𑀘𑁆𑀘𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑀓𑀸𑀲𑀦𑀸.

𑀮𑁄𑀳𑀺𑀘𑁆𑀘𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.