𑁧𑁩. 𑀢𑁂𑀯𑀺𑀚𑁆𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁧𑁮. 𑀏𑀯𑀁 𑀮𑁄𑀳𑀺𑀘𑁆𑀘𑀲𑀼𑀢𑁆𑀢𑀁 𑀲𑀁𑀯𑀡𑁆𑀡𑁂𑀢𑁆𑀯𑀸 𑀇𑀤𑀸𑀦𑀺 𑀢𑁂𑀯𑀺𑀚𑁆𑀚𑀲𑀼𑀢𑁆𑀢𑀁 𑀲𑀁𑀯𑀡𑁆𑀡𑁂𑀦𑁆𑀢𑁄 𑀬𑀣𑀸𑀦𑀼𑀧𑀼𑀩𑁆𑀩𑀁 𑀲𑀁𑀯𑀡𑁆𑀡𑀦𑁄𑀓𑀸𑀲𑀲𑁆𑀲 𑀧𑀢𑁆𑀢𑀪𑀸𑀯𑀁 𑀯𑀺𑀪𑀸𑀯𑁂𑀢𑀼𑀁, 𑀮𑁄𑀳𑀺𑀘𑁆𑀘𑀲𑀼𑀢𑁆𑀢𑀲𑁆𑀲𑀸𑀦𑀦𑁆𑀢𑀭𑀁 𑀲𑀗𑁆𑀕𑀻𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀢𑁂𑀯𑀺𑀚𑁆𑀚𑀲𑀼𑀢𑁆𑀢𑀪𑀸𑀯𑀁 𑀯𑀸 𑀧𑀓𑀸𑀲𑁂𑀢𑀼𑀁 ‘‘𑀏𑀯𑀁 𑀫𑁂 𑀲𑀼𑀢𑀁…𑀧𑁂… 𑀓𑁄𑀲𑀮𑁂𑀲𑀽𑀢𑀺 𑀢𑁂𑀯𑀺𑀚𑁆𑀚𑀲𑀼𑀢𑁆𑀢’’𑀦𑁆𑀢𑀺 𑀆𑀳. 𑀦𑀸𑀫𑀦𑁆𑀢𑀺 𑀦𑀸𑀫𑀫𑀢𑁆𑀢𑀁. 𑀤𑀺𑀲𑀸𑀯𑀸𑀘𑀻𑀲𑀤𑁆𑀤𑀢𑁄 𑀧𑀬𑀼𑀚𑁆𑀚𑀫𑀸𑀦𑁄 𑀏𑀦𑀲𑀤𑁆𑀤𑁄 𑀅𑀤𑀼𑀭𑀢𑁆𑀣𑁂 𑀇𑀘𑁆𑀙𑀺𑀢𑁄, 𑀢𑀧𑁆𑀧𑀬𑁄𑀕𑁂𑀦 𑀘 𑀧𑀜𑁆𑀘𑀫𑀺𑀬𑀢𑁆𑀣𑁂 𑀲𑀸𑀫𑀺𑀯𑀘𑀦𑀁, 𑀢𑀲𑁆𑀫𑀸 ‘‘𑀉𑀢𑁆𑀢𑀭𑁂𑀦𑀸’’𑀢𑀺 𑀧𑀤𑁂𑀦 𑀅𑀤𑀽𑀭𑀢𑁆𑀣𑀚𑁄𑀢𑀦𑀁, 𑀧𑀜𑁆𑀘𑀫𑀺𑀬𑀢𑁆𑀣𑁂 𑀘 𑀲𑀸𑀫𑀺𑀯𑀘𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀦𑀲𑀸𑀓𑀝𑀢𑁄 𑀅𑀯𑀺𑀤𑀽𑀭𑁂 𑀉𑀢𑁆𑀢𑀭𑀧𑀲𑁆𑀲𑁂’’𑀢𑀺 𑀯𑀼𑀢𑁆𑀢𑀁. ‘‘𑀤𑀺𑀲𑀸𑀯𑀸𑀘𑀻𑀲𑀤𑁆𑀤𑀢𑁄 𑀧𑀜𑁆𑀘𑀫𑀻𑀯𑀘𑀦𑀲𑁆𑀲 𑀅𑀤𑀽𑀭𑀢𑁆𑀣𑀚𑁄𑀢𑀦𑀢𑁄 𑀅𑀤𑀽𑀭𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀏𑀦𑀲𑀤𑁆𑀤𑁂𑀦 𑀏𑀯𑀁 𑀯𑀼𑀢𑁆𑀢’’𑀦𑁆𑀢𑀺 𑀓𑁂𑀘𑀺, 𑀲𑀢𑁆𑀢𑀫𑀺𑀬𑀢𑁆𑀣𑁂 𑀘𑁂𑀢𑀁 𑀢𑀢𑀺𑀬𑀸𑀯𑀘𑀦𑀁 ‘‘𑀧𑀼𑀩𑁆𑀩𑁂𑀦 𑀕𑀸𑀫𑀁 𑀭𑀫𑀡𑀻𑀬’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬. ‘‘𑀅𑀓𑁆𑀔𑀭𑀘𑀺𑀦𑁆𑀢𑀓𑀸 𑀧𑀦 𑀏𑀦-𑀲𑀤𑁆𑀤𑀬𑁄𑀕𑁂 𑀅𑀯𑀥𑀺𑀯𑀸𑀘𑀺𑀦𑀺 𑀧𑀤𑁂 𑀉𑀧𑀬𑁄𑀕𑀯𑀘𑀦𑀁 𑀇𑀘𑁆𑀙𑀦𑁆𑀢𑀺, 𑀅𑀢𑁆𑀣𑁄 𑀧𑀦 𑀲𑀸𑀫𑀺𑀯𑀲𑁂𑀦𑁂𑀯 𑀇𑀘𑁆𑀙𑀺𑀢𑁄, 𑀢𑀲𑁆𑀫𑀸 𑀇𑀥 𑀲𑀸𑀫𑀺𑀯𑀘𑀦𑀯𑀲𑁂𑀦𑁂𑀯 𑀯𑀼𑀢𑁆𑀢’’𑀦𑁆𑀢𑀺 (𑀤𑀻. 𑀦𑀺. 𑀝𑀻. 𑁧.𑁫𑁧𑁮) 𑀅𑀬𑀁 𑀆𑀘𑀭𑀺𑀬𑀫𑀢𑀺. 𑀢𑀭𑀼𑀡𑀅𑀫𑁆𑀩𑀭𑀼𑀓𑁆𑀔𑀲𑀡𑁆𑀟𑁂𑀢𑀺 𑀢𑀭𑀼𑀡𑀫𑁆𑀩𑀭𑀼𑀓𑁆𑀔𑀲𑀫𑀽𑀳𑁂. 𑀭𑀼𑀓𑁆𑀔𑀲𑀫𑀼𑀤𑀸𑀬𑀲𑁆𑀲 𑀳𑀺 𑀯𑀦𑀲𑀫𑀜𑁆𑀜𑀸.

𑁫𑁧𑁯. 𑀓𑀼𑀮𑀘𑀸𑀭𑀺𑀢𑁆𑀢𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 𑀫𑀦𑁆𑀢𑀚𑁆𑀛𑁂𑀦𑀸𑀪𑀺𑀭𑀽𑀧𑀢𑀸𑀤𑀺𑀲𑀫𑁆𑀧𑀢𑁆𑀢𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀤𑁂𑀲𑁂, 𑀓𑀼𑀮𑁂 𑀯𑀸. 𑀢𑁂 𑀦𑀺𑀯𑀸𑀲𑀝𑁆𑀞𑀸𑀦𑁂𑀦 𑀯𑀺𑀲𑁂𑀲𑁂𑀦𑁆𑀢𑁄 ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀫𑀦𑁆𑀢𑀲𑀚𑁆𑀛𑀸𑀬𑀓𑀭𑀡𑀢𑁆𑀣𑀦𑁆𑀢𑀺 𑀆𑀣𑀩𑁆𑀩𑀡𑀫𑀦𑁆𑀢𑀸𑀦𑀁 𑀲𑀚𑁆𑀛𑀸𑀬𑀓𑀭𑀡𑀢𑁆𑀣𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀜𑁆𑀜𑁂𑀲𑀁 𑀩𑀳𑀽𑀦𑀁 𑀧𑀯𑁂𑀲𑀦𑀁 𑀦𑀺𑀯𑀸𑀭𑁂𑀢𑁆𑀯𑀸’’𑀢𑀺. 𑀦𑀤𑀻𑀢𑀻𑀭𑁂𑀢𑀺 𑀅𑀘𑀺𑀭𑀯𑀢𑀺𑀬𑀸 𑀦𑀤𑀺𑀬𑀸 𑀢𑀻𑀭𑁂.

𑀫𑀕𑁆𑀕𑀸𑀫𑀕𑁆𑀕𑀓𑀣𑀸𑀯𑀡𑁆𑀡𑀦𑀸

𑁫𑁨𑁦. 𑀚𑀗𑁆𑀖𑀘𑀸𑀭𑀦𑁆𑀢𑀺 𑀘𑀗𑁆𑀓𑀫𑁂𑀦, 𑀇𑀢𑁄 𑀘𑀺𑀢𑁄 𑀘 𑀯𑀺𑀘𑀭𑀡𑀁. 𑀲𑁄 𑀳𑀺 𑀚𑀗𑁆𑀖𑀸𑀲𑀼 𑀓𑀺𑀮𑀫𑀣𑀯𑀺𑀦𑁄𑀤𑀦𑀢𑁆𑀣𑀁 𑀘𑀭𑀡𑀢𑁄 ‘‘𑀚𑀗𑁆𑀖𑀯𑀺𑀳𑀸𑀭𑁄, 𑀚𑀗𑁆𑀖𑀘𑀸𑀭𑁄’’𑀢𑀺 𑀘 𑀯𑀼𑀢𑁆𑀢𑁄. 𑀢𑁂𑀦𑀸𑀳 𑀧𑀸𑀴𑀺𑀬𑀁 ‘‘𑀅𑀦𑀼𑀘𑀗𑁆𑀓𑀫𑀦𑁆𑀢𑀸𑀦𑀁 𑀅𑀦𑀼𑀯𑀺𑀘𑀭𑀦𑁆𑀢𑀸𑀦’’𑀦𑁆𑀢𑀺. 𑀘𑀼𑀡𑁆𑀡𑀫𑀢𑁆𑀢𑀺𑀓𑀸𑀤𑀺 𑀦𑁆𑀳𑀸𑀦𑀻𑀬𑀲𑀫𑁆𑀪𑀸𑀭𑁄. 𑀢𑁂𑀦 𑀯𑀼𑀢𑁆𑀢𑀦𑁆𑀢𑀺 𑀉𑀪𑁄𑀲𑀼𑀧𑀺 𑀅𑀦𑀼𑀘𑀗𑁆𑀓𑀫𑀦𑀸𑀦𑀼𑀯𑀺𑀘𑀭𑀡𑀸𑀦𑀁 𑀮𑀩𑁆𑀪𑀦𑀢𑁄 𑀏𑀯𑀁 𑀯𑀼𑀢𑁆𑀢𑀁. 𑀫𑀕𑁆𑀕𑁄 𑀘𑁂𑀢𑁆𑀣 𑀩𑁆𑀭𑀳𑁆𑀫𑀮𑁄𑀓𑀕𑀫𑀦𑀽𑀧𑀸𑀬𑀧𑀝𑀺𑀧𑀤𑀸𑀪𑀽𑀢𑁄 𑀉𑀚𑀼𑀫𑀕𑁆𑀕𑁄. 𑀇𑀘𑁆𑀙𑀺𑀢𑀝𑁆𑀞𑀸𑀦𑀁 𑀉𑀚𑀼𑀓𑀁 𑀫𑀕𑁆𑀕𑀢𑀺 𑀉𑀧𑀕𑀘𑁆𑀙𑀢𑀺 𑀏𑀢𑁂𑀦𑀸𑀢𑀺 𑀳𑀺 𑀫𑀕𑁆𑀕𑁄, 𑀢𑀤𑀜𑁆𑀜𑁄 𑀅𑀫𑀕𑁆𑀕𑁄, 𑀅-𑀲𑀤𑁆𑀤𑁄 𑀯𑀸 𑀯𑀼𑀤𑁆𑀥𑀺𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑀣𑀸 𑀳𑀺 ‘‘𑀓𑀢𑀫𑀁 𑀦𑀼 𑀔𑁄’’𑀢𑀺𑀆𑀤𑀺𑀦𑀸 𑀫𑀕𑁆𑀕𑀫𑁂𑀯 𑀤𑀲𑁆𑀲𑁂𑀢𑀺. 𑀧𑀝𑀺𑀧𑀤𑀦𑁆𑀢𑀺 𑀩𑁆𑀭𑀳𑁆𑀫𑀮𑁄𑀓𑀕𑀸𑀫𑀺𑀫𑀕𑁆𑀕𑀲𑁆𑀲 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀁.

𑀅𑀜𑁆𑀚𑀲𑀸𑀬𑀦𑁄𑀢𑀺 𑀉𑀚𑀼𑀫𑀕𑁆𑀕𑀲𑁆𑀲 𑀯𑁂𑀯𑀘𑀦𑀁 𑀧𑀭𑀺𑀬𑀸𑀬𑀤𑁆𑀯𑀬𑀲𑁆𑀲 𑀅𑀢𑀺𑀭𑁂𑀓𑀢𑁆𑀣𑀤𑀻𑀧𑀦𑀢𑁄 𑀬𑀣𑀸 ‘‘𑀧𑀤𑀝𑁆𑀞𑀸𑀦’’𑀦𑁆𑀢𑀺. 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀅𑀜𑁆𑀚𑀲𑀲𑀤𑁆𑀤𑁄 𑀉𑀚𑀼𑀓𑀧𑀭𑀺𑀬𑀸𑀬𑁄. 𑀦𑀺𑀬𑁆𑀬𑀸𑀢𑀻𑀢𑀺 𑀦𑀺𑀬𑁆𑀬𑀸𑀦𑀺𑀬𑁄, 𑀲𑁄 𑀏𑀯 𑀦𑀺𑀬𑁆𑀬𑀸𑀦𑀺𑀓𑁄𑀢𑀺 𑀤𑀲𑁆𑀲𑁂𑀢𑀺 ‘‘𑀦𑀺𑀬𑁆𑀬𑀸𑀬𑀦𑁆𑀢𑁄’’𑀢𑀺 𑀇𑀫𑀺𑀦𑀸. 𑀦𑀺𑀬𑁆𑀬𑀸𑀦𑀺𑀓𑁄 𑀦𑀺𑀬𑁆𑀬𑀸𑀢𑀻𑀢𑀺 𑀘 𑀏𑀓𑀦𑁆𑀢𑀦𑀺𑀬𑁆𑀬𑀸𑀦𑀁 𑀯𑀼𑀢𑁆𑀢𑀁, 𑀕𑀘𑁆𑀙𑀦𑁆𑀢𑁄 𑀳𑀼𑀢𑁆𑀯𑀸 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀸 𑀫𑀕𑁆𑀕𑁄 ‘‘𑀦𑀺𑀬𑁆𑀬𑀸𑀢𑀻’’𑀢𑀺 𑀯𑀼𑀢𑁆𑀢𑁄, 𑀦𑀦𑁆𑀯𑁂𑀲 𑀕𑀫𑀦𑁂 𑀅𑀩𑁆𑀬𑀸𑀧𑀸𑀭𑁄𑀢𑀺? 𑀲𑀘𑁆𑀘𑀁. 𑀬𑀲𑁆𑀫𑀸 𑀧𑀦𑀲𑁆𑀲 𑀦𑀺𑀬𑁆𑀬𑀸𑀢𑀼-𑀧𑀼𑀕𑁆𑀕𑀮𑀯𑀲𑁂𑀦 𑀦𑀺𑀬𑁆𑀬𑀸𑀦𑀪𑀸𑀯𑁄 𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀦𑀺𑀬𑁆𑀬𑀸𑀬𑀦𑁆𑀢𑀧𑀼𑀕𑁆𑀕𑀮𑀲𑁆𑀲 𑀬𑁄𑀦𑀺𑀲𑁄 𑀧𑀝𑀺𑀧𑀚𑁆𑀚𑀦𑀯𑀲𑁂𑀦 𑀦𑀺𑀬𑁆𑀬𑀸𑀬𑀦𑁆𑀢𑁄 𑀫𑀕𑁆𑀕𑁄 ‘‘𑀦𑀺𑀬𑁆𑀬𑀸𑀢𑀻’’𑀢𑀺 𑀯𑀼𑀢𑁆𑀢𑁄. 𑀓𑀭𑁄𑀢𑀻𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀉𑀧𑁆𑀧𑀸𑀤𑁂𑀢𑀺. 𑀢𑀣𑀸 𑀉𑀧𑁆𑀧𑀸𑀤𑁂𑀦𑁆𑀢𑁄𑀬𑁂𑀯 𑀳𑀺 𑀢𑀁 𑀧𑀝𑀺𑀧𑀚𑁆𑀚𑀢𑀺 𑀦𑀸𑀫. 𑀲𑀳 𑀩𑁆𑀬𑁂𑀢𑀺 𑀯𑀢𑁆𑀢𑀢𑀻𑀢𑀺 𑀲𑀳𑀩𑁆𑀬𑁄, 𑀲𑀳𑀯𑀢𑁆𑀢𑀦𑀓𑁄, 𑀢𑀲𑁆𑀲 𑀪𑀸𑀯𑁄 𑀲𑀳𑀩𑁆𑀬𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀲𑀳𑀪𑀸𑀯𑀸𑀬𑀸’’𑀢𑀺. 𑀲𑀳𑀪𑀸𑀯𑁄𑀢𑀺 𑀘 𑀲𑀮𑁄𑀓𑀢𑀸, 𑀲𑀫𑀻𑀧𑀢𑀸 𑀯𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀘𑀸𑀳 ‘‘𑀏𑀓𑀝𑁆𑀞𑀸𑀦𑁂 𑀧𑀸𑀢𑀼𑀪𑀸𑀯𑀸𑀬𑀸’’𑀢𑀺. 𑀲𑀓𑀫𑁂𑀯𑀸𑀢𑀺 𑀅𑀢𑁆𑀢𑀦𑁄 𑀆𑀘𑀭𑀺𑀬𑁂𑀦 𑀧𑁄𑀓𑁆𑀔𑀭𑀲𑀸𑀢𑀺𑀦𑀸 𑀓𑀣𑀺𑀢𑀫𑁂𑀯. 𑀣𑁄𑀫𑁂𑀢𑁆𑀯𑀸𑀢𑀺 ‘‘𑀅𑀬𑀫𑁂𑀯 𑀉𑀚𑀼𑀫𑀕𑁆𑀕𑁄 𑀅𑀬𑀫𑀜𑁆𑀚𑀲𑀸𑀬𑀦𑁄’’𑀢𑀺𑀆𑀤𑀺𑀦𑀸 𑀧𑀲𑀁𑀲𑀺𑀢𑁆𑀯𑀸. 𑀢𑀣𑀸 𑀧𑀕𑁆𑀕𑀡𑁆𑀳𑀺𑀢𑁆𑀯𑀸. 𑀪𑀸𑀭𑀤𑁆𑀯𑀸𑀚𑁄𑀧𑀺 𑀲𑀓𑀫𑁂𑀯 𑀅𑀢𑁆𑀢𑀦𑁄 𑀆𑀘𑀭𑀺𑀬𑁂𑀦 𑀢𑀸𑀭𑀼𑀓𑁆𑀔𑁂𑀦 𑀓𑀣𑀺𑀢𑀫𑁂𑀯 𑀆𑀘𑀭𑀺𑀬𑀯𑀸𑀤𑀁 𑀣𑁄𑀫𑁂𑀢𑁆𑀯𑀸 𑀧𑀕𑁆𑀕𑀡𑁆𑀳𑀺𑀢𑁆𑀯𑀸 𑀯𑀺𑀘𑀭𑀢𑀻𑀢𑀺 𑀬𑁄𑀚𑀦𑀸. 𑀢𑁂𑀦 𑀯𑀼𑀢𑁆𑀢𑀦𑁆𑀢𑀺 𑀬𑀣𑀸 𑀢𑀣𑀸 𑀯𑀸 𑀅𑀪𑀺𑀦𑀺𑀯𑀺𑀝𑁆𑀞𑀪𑀸𑀯𑁂𑀦 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁.

𑁫𑁨𑁧-𑁫𑁨𑁨. 𑀅𑀦𑀺𑀬𑁆𑀬𑀸𑀦𑀺𑀓𑀸𑀯𑀸𑀢𑀺 𑀅𑀧𑁆𑀧𑀸𑀝𑀺𑀳𑀸𑀭𑀺𑀓𑀸𑀯, 𑀅𑀜𑁆𑀜𑀫𑀜𑁆𑀜𑀲𑁆𑀲 𑀯𑀸𑀤𑁂 𑀤𑁄𑀲𑀁 𑀤𑀲𑁆𑀲𑁂𑀢𑁆𑀯𑀸 𑀅𑀯𑀺𑀧𑀭𑀻𑀢𑀢𑁆𑀣𑀤𑀲𑁆𑀲𑀦𑀢𑁆𑀣𑀁 𑀉𑀢𑁆𑀢𑀭𑀭𑀳𑀺𑀢𑀸 𑀏𑀯𑀸𑀢𑀺 𑀅𑀢𑁆𑀣𑁄. 𑀢𑀼𑀮𑀦𑁆𑀢𑀺 𑀫𑀸𑀦𑀧𑀢𑁆𑀣𑀢𑀼𑀮𑀁. 𑀅𑀜𑁆𑀜𑀫𑀜𑁆𑀜𑀯𑀸𑀤𑀲𑁆𑀲 𑀆𑀤𑀺𑀢𑁄𑀯 𑀯𑀺𑀭𑀼𑀤𑁆𑀥𑀕𑁆𑀕𑀳𑀡𑀁 𑀯𑀺𑀕𑁆𑀕𑀳𑁄, 𑀲𑁆𑀯𑁂𑀯 𑀯𑀺𑀯𑀤𑀦𑀯𑀲𑁂𑀦 𑀅𑀧𑀭𑀸𑀧𑀭𑀁 𑀉𑀧𑁆𑀧𑀦𑁆𑀦𑁄 𑀯𑀺𑀯𑀸𑀤𑁄𑀢𑀺 𑀆𑀳 ‘‘𑀧𑀼𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑁄’’𑀢𑀺𑀆𑀤𑀺. 𑀤𑀼𑀯𑀺𑀥𑁄𑀧𑀺 𑀏𑀲𑁄𑀢𑀺 𑀯𑀺𑀕𑁆𑀕𑀳𑁄, 𑀯𑀺𑀯𑀸𑀤𑁄𑀢𑀺 𑀤𑁆𑀯𑀺𑀥𑀸 𑀯𑀼𑀢𑁆𑀢𑁄𑀧𑀺 𑀏𑀲𑁄 𑀯𑀺𑀭𑁄𑀥𑁄. 𑀦𑀸𑀦𑀸𑀆𑀘𑀭𑀺𑀬𑀸𑀦𑀁 𑀯𑀸𑀤𑀢𑁄𑀢𑀺 𑀦𑀸𑀦𑀸𑀭𑀼𑀘𑀺𑀓𑀸𑀦𑀁 𑀆𑀘𑀭𑀺𑀬𑀸𑀦𑀁 𑀯𑀸𑀤𑀪𑀸𑀯𑀢𑁄. 𑀦𑀸𑀦𑀸𑀯𑀸𑀤𑁄 𑀦𑀸𑀦𑀸𑀯𑀺𑀥𑁄 𑀯𑀸𑀤𑁄𑀢𑀺 𑀓𑀢𑁆𑀯𑀸, 𑀅𑀥𑀼𑀦𑀸 𑀧𑀦 ‘‘𑀦𑀸𑀦𑀸𑀆𑀘𑀭𑀺𑀬𑀸𑀦𑀁 𑀯𑀸𑀤𑁄 𑀦𑀸𑀦𑀸𑀯𑀸𑀤𑁄’’𑀢𑀺 𑀧𑀸𑀞𑁄.

𑁫𑁨𑁩. 𑀏𑀓𑀲𑁆𑀲𑀸𑀧𑀻𑀢𑀺 𑀢𑀼𑀫𑁆𑀳𑁂𑀲𑀼 𑀤𑁆𑀯𑀻𑀲𑀼 𑀏𑀓𑀲𑁆𑀲𑀸𑀧𑀺. 𑀏𑀓𑀲𑁆𑀫𑀺𑀦𑁆𑀢𑀺 𑀲𑀓𑀯𑀸𑀤𑀧𑀭𑀯𑀸𑀤𑁂𑀲𑀼 𑀏𑀓𑀲𑁆𑀫𑀺𑀫𑁆𑀧𑀺. 𑀲𑀁𑀲𑀬𑁄 𑀦𑀢𑁆𑀣𑀻𑀢𑀺 ‘‘𑀫𑀕𑁆𑀕𑁄 𑀦𑀼 𑀔𑁄, 𑀦 𑀫𑀕𑁆𑀕𑁄’’𑀢𑀺 𑀯𑀺𑀘𑀺𑀓𑀺𑀘𑁆𑀙𑀸 𑀦𑀢𑁆𑀣𑀺, 𑀅𑀜𑁆𑀚𑀲𑀸𑀦𑀜𑁆𑀚𑀲𑀸𑀪𑀸𑀯𑁂 𑀧𑀦 𑀲𑀁𑀲𑀬𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀏𑀲 𑀓𑀺𑀭𑀸’’𑀢𑀺𑀆𑀤𑀺 𑀏𑀯𑀁 𑀲𑀢𑀻𑀢𑀺 𑀬𑀤𑀺 𑀲𑀩𑁆𑀩𑀢𑁆𑀣 𑀫𑀕𑁆𑀕𑀲𑀜𑁆𑀜𑀺𑀦𑁄, 𑀏𑀯𑀁 𑀲𑀢𑀺 ‘‘𑀓𑀺𑀲𑁆𑀫𑀺𑀁 𑀯𑁄 𑀯𑀺𑀕𑁆𑀕𑀳𑁄’’𑀢𑀺 𑀪𑀕𑀯𑀸 𑀧𑀼𑀘𑁆𑀙𑀢𑀺. 𑀇𑀢𑀺𑀲𑀤𑁆𑀤𑁂𑀦 𑀘𑁂𑀢𑁆𑀣 𑀆𑀤𑁆𑀬𑀢𑁆𑀣𑁂𑀦 𑀯𑀺𑀯𑀸𑀤𑁄, 𑀦𑀸𑀦𑀸𑀯𑀸𑀤𑁄 𑀘 𑀲𑀗𑁆𑀕𑀳𑀺𑀢𑁄.

𑁫𑁨𑁪. ‘‘𑀇𑀘𑁆𑀙𑀺𑀢𑀝𑁆𑀞𑀸𑀦𑀁 𑀉𑀚𑀼𑀓𑀁 𑀫𑀕𑁆𑀕𑀢𑀺 𑀉𑀧𑀕𑀘𑁆𑀙𑀢𑀺 𑀏𑀢𑁂𑀦𑀸𑀢𑀺 𑀫𑀕𑁆𑀕𑁄, 𑀉𑀚𑀼𑀫𑀕𑁆𑀕𑁄. 𑀢𑀤𑀜𑁆𑀜𑁄 𑀅𑀫𑀕𑁆𑀕𑁄, 𑀅-𑀲𑀤𑁆𑀤𑁄 𑀯𑀸 𑀯𑀼𑀤𑁆𑀥𑀺𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄’’𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀅𑀦𑀼𑀚𑀼𑀫𑀕𑁆𑀕𑁂𑀢𑀺 𑀏𑀢𑁆𑀣𑀸𑀧𑀺 𑀅-𑀲𑀤𑁆𑀤𑁄 𑀯𑀼𑀤𑁆𑀥𑀺𑀅𑀢𑁆𑀣𑁄 𑀘 𑀬𑀼𑀚𑁆𑀚𑀢𑀺. 𑀢𑀫𑁂𑀯 𑀯𑀢𑁆𑀣𑀼𑀦𑁆𑀢𑀺 𑀲𑀩𑁆𑀩𑁂𑀲𑀫𑁆𑀧𑀺 𑀩𑁆𑀭𑀸𑀳𑁆𑀫𑀡𑀸𑀦𑀁 𑀫𑀕𑁆𑀕𑀲𑁆𑀲 𑀫𑀕𑁆𑀕𑀪𑀸𑀯𑀲𑀗𑁆𑀔𑀸𑀢𑀁, 𑀲𑀓𑀫𑀕𑁆𑀕𑀲𑁆𑀲 𑀉𑀚𑀼𑀫𑀕𑁆𑀕𑀪𑀸𑀯𑀲𑀗𑁆𑀔𑀸𑀢𑀜𑁆𑀘 𑀯𑀢𑁆𑀣𑀼𑀁. 𑀲𑀩𑁆𑀩𑁂 𑀢𑁂𑀢𑀺 𑀲𑀩𑁆𑀩𑁂 𑀢𑁂 𑀦𑀸𑀦𑀸𑀆𑀘𑀭𑀺𑀬𑁂𑀳𑀺 𑀯𑀼𑀢𑁆𑀢𑀫𑀕𑁆𑀕𑀸, 𑀬𑁂 𑀧𑀸𑀴𑀺𑀬𑀁 ‘‘𑀅𑀤𑁆𑀥𑀭𑀺𑀬𑀸 𑀩𑁆𑀭𑀸𑀳𑁆𑀫𑀡𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸. 𑀅𑀬𑀫𑁂𑀢𑁆𑀣 𑀧𑀸𑀴𑀺𑀅𑀢𑁆𑀣𑁄 𑁋 𑀅𑀤𑁆𑀥𑀭𑁄 𑀦𑀸𑀫 𑀬𑀜𑁆𑀜𑀯𑀺𑀲𑁂𑀲𑁄, 𑀢𑀤𑀼𑀧𑀬𑁄𑀕𑀺𑀪𑀸𑀯𑀢𑁄 𑀅𑀤𑁆𑀥𑀭𑀺𑀬𑀸𑀦𑀺 𑀯𑀼𑀘𑁆𑀘𑀦𑁆𑀢𑀺 𑀬𑀚𑀽𑀦𑀺, 𑀢𑀸𑀦𑀺 𑀲𑀚𑁆𑀛𑀸𑀬𑀦𑁆𑀢𑀻𑀢𑀺 𑀅𑀤𑁆𑀥𑀭𑀺𑀬𑀸, 𑀬𑀚𑀼𑀯𑁂𑀤𑀺𑀦𑁄. 𑀢𑀺𑀢𑁆𑀢𑀺𑀭𑀺𑀦𑀸 𑀦𑀸𑀫 𑀇𑀲𑀺𑀦𑀸 𑀓𑀢𑀸 𑀫𑀦𑁆𑀢𑀸𑀢𑀺 𑀢𑀺𑀢𑁆𑀢𑀺𑀭𑀸, 𑀢𑁂 𑀲𑀚𑁆𑀛𑀸𑀬𑀦𑁆𑀢𑀻𑀢𑀺 𑀢𑀺𑀢𑁆𑀢𑀺𑀭𑀺𑀬𑀸, 𑀬𑀚𑀼𑀯𑁂𑀤𑀺𑀦𑁄 𑀏𑀯. 𑀬𑀚𑀼𑀯𑁂𑀤𑀲𑀸𑀔𑀸 𑀳𑁂𑀲𑀸, 𑀬𑀤𑀺𑀤𑀁 𑀢𑀺𑀢𑁆𑀢𑀺𑀭𑀦𑁆𑀢𑀺. 𑀙𑀦𑁆𑀤𑁄 𑀯𑀼𑀘𑁆𑀘𑀢𑀺 𑀯𑀺𑀲𑁂𑀲𑀢𑁄 𑀲𑀸𑀫𑀯𑁂𑀤𑁄, 𑀢𑀁 𑀲𑀭𑁂𑀦 𑀓𑀸𑀬𑀦𑁆𑀢𑀻𑀢𑀺 𑀙𑀦𑁆𑀤𑁄𑀓𑀸, 𑀲𑀸𑀫𑀯𑁂𑀤𑀺𑀦𑁄. ‘‘𑀙𑀦𑁆𑀤𑁄𑀕𑀸’’𑀢𑀺𑀧𑀺 𑀢𑀢𑀺𑀬𑀓𑁆𑀔𑀭𑁂𑀦 𑀧𑀞𑀦𑁆𑀢𑀺, 𑀲𑁄 𑀏𑀯𑀢𑁆𑀣𑁄. 𑀩𑀳𑀯𑁄 𑀇𑀭𑀺𑀬𑁄 𑀣𑁄𑀫𑀦𑀸 𑀏𑀢𑁆𑀣𑀸𑀢𑀺 𑀩𑀯𑁆𑀳𑀸𑀭𑀺, 𑀇𑀭𑀼𑀯𑁂𑀤𑁄, 𑀢𑀁 𑀅𑀥𑀻𑀬𑀦𑁆𑀢𑀻𑀢𑀺 𑀩𑀯𑁆𑀳𑀸𑀭𑀺𑀚𑁆𑀛𑀸.

𑀩𑀳𑀽𑀦𑀻𑀢𑀺 𑀏𑀢𑁆𑀣𑀸𑀬𑀁 𑀉𑀧𑀫𑀸𑀲𑀁𑀲𑀦𑁆𑀤𑀦𑀸 𑁋 𑀬𑀣𑀸 𑀢𑁂 𑀦𑀸𑀦𑀸𑀫𑀕𑁆𑀕𑀸 𑀏𑀓𑀁𑀲𑀢𑁄 𑀢𑀲𑁆𑀲 𑀕𑀸𑀫𑀲𑁆𑀲 𑀯𑀸 𑀦𑀺𑀕𑀫𑀲𑁆𑀲 𑀯𑀸 𑀧𑀯𑁂𑀲𑀸𑀬 𑀳𑁄𑀦𑁆𑀢𑀺, 𑀏𑀯𑀁 𑀩𑁆𑀭𑀸𑀳𑁆𑀫𑀡𑁂𑀳𑀺 𑀧𑀜𑁆𑀜𑀸𑀧𑀺𑀬𑀫𑀸𑀦𑀸𑀧𑀺 𑀦𑀸𑀦𑀸𑀫𑀕𑁆𑀕𑀸 𑀏𑀓𑀁𑀲𑀢𑁄 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑀫𑀦𑀸𑀬 𑀩𑁆𑀭𑀳𑁆𑀫𑀼𑀦𑀸 𑀲𑀳𑀩𑁆𑀬𑀢𑀸𑀬 𑀳𑁄𑀦𑁆𑀢𑀻𑀢𑀺.

𑁫𑁨𑁫. 𑀧𑀝𑀺𑀚𑀸𑀦𑀺𑀢𑁆𑀯𑀸 𑀧𑀘𑁆𑀙𑀸 𑀦𑀺𑀕𑁆𑀕𑀬𑁆𑀳𑀫𑀸𑀦𑀸 𑀅𑀯𑀚𑀸𑀦𑀦𑁆𑀢𑀻𑀢𑀺 𑀧𑀼𑀩𑁆𑀩𑁂 𑀦𑀺𑀤𑁆𑀤𑁄𑀲𑀢𑀁 𑀲𑀮𑁆𑀮𑀓𑁆𑀔𑀫𑀸𑀦𑀸 𑀧𑀝𑀺𑀚𑀸𑀦𑀺𑀢𑁆𑀯𑀸 𑀧𑀘𑁆𑀙𑀸 𑀲𑀤𑁄𑀲𑀪𑀸𑀯𑁂𑀦 𑀦𑀺𑀕𑁆𑀕𑀬𑁆𑀳𑀫𑀸𑀦𑀸 ‘‘𑀦𑁂𑀢𑀁 𑀫𑀫 𑀯𑀘𑀦’’𑀦𑁆𑀢𑀺 𑀅𑀯𑀚𑀸𑀦𑀦𑁆𑀢𑀺, 𑀦 𑀧𑀝𑀺𑀚𑀸𑀦𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁫𑁨𑁭-𑁫𑁨𑁯. 𑀢𑁂 𑀢𑁂𑀯𑀺𑀚𑁆𑀚𑀸𑀢𑀺 𑀢𑁂𑀯𑀺𑀚𑁆𑀚𑀓𑀸 𑀢𑁂 𑀩𑁆𑀭𑀸𑀳𑁆𑀫𑀡𑀸. 𑀏𑀯𑀲𑀤𑁆𑀤𑁂𑀦 𑀜𑀸𑀧𑀺𑀢𑁄 𑀅𑀢𑁆𑀣𑁄 𑀇𑀥 𑀦𑀢𑁆𑀣𑀻𑀢𑀺 𑀯-𑀓𑀸𑀭𑁄 𑀕𑀳𑀺𑀢𑁄, 𑀲𑁄 𑀘 𑀅𑀦𑀢𑁆𑀣𑀓𑁄𑀯𑀸𑀢𑀺 𑀤𑀲𑁆𑀲𑁂𑀢𑀺 ‘‘𑀆𑀕𑀫𑀲𑀦𑁆𑀥𑀺𑀫𑀢𑁆𑀢’’𑀦𑁆𑀢𑀺 𑀇𑀫𑀺𑀦𑀸, 𑀯𑀡𑁆𑀡𑀸𑀕𑀫𑁂𑀦 𑀧𑀤𑀦𑁆𑀢𑀭𑀲𑀦𑁆𑀥𑀺𑀫𑀢𑁆𑀢𑀁 𑀓𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀦𑁆𑀥𑀧𑀯𑁂𑀡𑀻𑀢𑀺 𑀅𑀦𑁆𑀥𑀧𑀦𑁆𑀢𑀺. ‘‘𑀧𑀡𑁆𑀡𑀸𑀲𑀲𑀝𑁆𑀞𑀺 𑀅𑀦𑁆𑀥𑀸’’𑀢𑀺 𑀇𑀤𑀁 𑀢𑀲𑁆𑀲𑀸 𑀅𑀦𑁆𑀥𑀧𑀯𑁂𑀡𑀺𑀬𑀸 𑀫𑀳𑀢𑁄 𑀕𑀘𑁆𑀙𑀕𑀼𑀫𑁆𑀩𑀲𑁆𑀲 𑀅𑀦𑀼𑀧𑀭𑀺𑀕𑀫𑀦𑀬𑁄𑀕𑁆𑀬𑀢𑀸𑀤𑀲𑁆𑀲𑀦𑀁. 𑀏𑀯𑀜𑁆𑀳𑀺 𑀢𑁂 ‘‘𑀲𑀼𑀘𑀺𑀭𑀁 𑀯𑁂𑀮𑀁 𑀫𑀬𑀁 𑀫𑀕𑁆𑀕𑀁 𑀕𑀘𑁆𑀙𑀸𑀫𑀸’’𑀢𑀺 𑀲𑀜𑁆𑀜𑀺𑀦𑁄 𑀳𑁄𑀦𑁆𑀢𑀺. 𑀅𑀦𑁆𑀥𑀸𑀦𑀁 𑀧𑀭𑀫𑁆𑀧𑀭𑀲𑀁𑀲𑀢𑁆𑀢𑀯𑀘𑀦𑁂𑀦 𑀬𑀝𑁆𑀞𑀺𑀕𑀸𑀳𑀓𑀯𑀺𑀭𑀳𑀢𑀸 𑀤𑀲𑁆𑀲𑀺𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀬𑀝𑁆𑀞𑀺𑀕𑀸𑀳𑀓𑁂𑀦𑀸’’𑀢𑀺𑀆𑀤𑀺. 𑀢𑀤𑀼𑀤𑀸𑀳𑀭𑀡𑀁 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀏𑀓𑁄 𑀓𑀺𑀭𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀅𑀦𑀼𑀧𑀭𑀺𑀕𑀦𑁆𑀢𑁆𑀯𑀸𑀢𑀺 𑀓𑀜𑁆𑀘𑀺 𑀓𑀸𑀮𑀁 𑀅𑀦𑀼𑀓𑁆𑀓𑀫𑁂𑀦 𑀲𑀫𑀦𑁆𑀢𑀢𑁄 𑀕𑀦𑁆𑀢𑁆𑀯𑀸. 𑀓𑀘𑁆𑀙𑀦𑁆𑀢𑀺 𑀓𑀘𑁆𑀙𑀩𑀦𑁆𑀥𑀤𑀼𑀲𑁆𑀲𑀓𑀡𑁆𑀡𑀁. ‘‘𑀓𑀘𑁆𑀙𑀁 𑀩𑀦𑁆𑀥𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀘𑀽𑀴𑀯. 𑀅𑀝𑁆𑀞. 𑁨𑁮𑁦; 𑀯𑀺. 𑀲𑀗𑁆𑀕. 𑀅𑀝𑁆𑀞. 𑁩𑁪.𑁪𑁨) 𑀯𑀺𑀬 𑀳𑀺 𑀓𑀘𑁆𑀙𑀲𑀤𑁆𑀤𑁄 𑀦𑀺𑀩𑁆𑀩𑀲𑀦𑀯𑀺𑀲𑁂𑀲𑀧𑀭𑀺𑀬𑀸𑀬𑁄. 𑀅𑀧𑀺𑀘 𑀓𑀘𑁆𑀙𑀦𑁆𑀢𑀺 𑀉𑀧𑀓𑀘𑁆𑀙𑀓𑀝𑁆𑀞𑀸𑀦𑀁. ‘‘𑀲𑀫𑁆𑀩𑀸𑀥𑁄 𑀦𑀸𑀫 𑀉𑀪𑁄 𑀉𑀧𑀓𑀘𑁆𑀙𑀓𑀸 𑀫𑀼𑀢𑁆𑀢𑀓𑀭𑀡’’𑀦𑁆𑀢𑀺𑀆𑀤𑀻𑀲𑀼 (𑀧𑀸𑀘𑀺. 𑁮𑁦𑁦) 𑀯𑀺𑀬 𑀳𑀺 𑀓𑀸𑀬𑁂𑀓𑀤𑁂𑀲𑀯𑀸𑀘𑀓𑁄 𑀓𑀘𑁆𑀙𑀲𑀤𑁆𑀤𑁄. 𑀘𑀓𑁆𑀔𑀼𑀫𑀸𑀢𑀺 𑀬𑀝𑁆𑀞𑀺𑀕𑀸𑀳𑀓𑀁 𑀯𑀤𑀢𑀺. ‘‘𑀧𑀼𑀭𑀺𑀫𑁄’’𑀢𑀺𑀆𑀤𑀺 𑀬𑀣𑀸𑀯𑀼𑀢𑁆𑀢𑀓𑁆𑀓𑀫𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀦𑀸𑀫𑀓𑀜𑁆𑀜𑁂𑀯𑀸𑀢𑀺 𑀅𑀢𑁆𑀣𑀸𑀪𑀸𑀯𑀢𑁄 𑀦𑀸𑀫𑀫𑀢𑁆𑀢𑀫𑁂𑀯, 𑀢𑀁 𑀧𑀦 𑀪𑀸𑀲𑀺𑀢𑀁 𑀢𑁂𑀳𑀺 𑀲𑀸𑀭𑀲𑀜𑁆𑀜𑀺𑀢𑀫𑁆𑀧𑀺 𑀦𑀸𑀫𑀫𑀢𑁆𑀢𑀢𑀸𑀬 𑀅𑀲𑀸𑀭𑀪𑀸𑀯𑀢𑁄 𑀦𑀺𑀳𑀻𑀦𑀫𑁂𑀯𑀸𑀢𑀺 𑀅𑀢𑁆𑀣𑀫𑀢𑁆𑀢𑀁 𑀤𑀲𑁆𑀲𑁂𑀢𑀺 ‘‘𑀮𑀸𑀫𑀓𑀁𑀬𑁂𑀯𑀸’’𑀢𑀺 𑀇𑀫𑀺𑀦𑀸.

𑁫𑁩𑁦. 𑀬𑁄𑀢𑀺 𑀩𑁆𑀭𑀳𑁆𑀫𑀮𑁄𑀓𑁄. 𑀬𑀢𑁄𑀢𑀺 𑀪𑀼𑀫𑁆𑀫𑀢𑁆𑀣𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀁. 𑀲𑀸𑀫𑀜𑁆𑀜𑀚𑁄𑀢𑀦𑀸𑀬 𑀯𑀺𑀲𑁂𑀲𑁂 𑀅𑀯𑀢𑀺𑀝𑁆𑀞𑀦𑀢𑁄 𑀯𑀺𑀲𑁂𑀲𑀧𑀭𑀸𑀫𑀲𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀫𑀺𑀁 𑀓𑀸𑀮𑁂’’𑀢𑀺 𑀯𑀼𑀢𑁆𑀢𑀁. ‘‘𑀉𑀕𑁆𑀕𑀫𑀦𑀓𑀸𑀮𑁂’’𑀢𑀺𑀆𑀤𑀺𑀦𑀸 𑀧𑀓𑀭𑀡𑀸𑀥𑀺𑀕𑀢𑀫𑀸𑀳. 𑀆𑀬𑀸𑀘𑀦𑁆𑀢𑀻𑀢𑀺 𑀉𑀕𑁆𑀕𑀫𑀦𑀁 𑀧𑀢𑁆𑀣𑁂𑀦𑁆𑀢𑀺. 𑀓𑀲𑁆𑀫𑀸? 𑀮𑁄𑀓𑀲𑁆𑀲 𑀩𑀳𑀼𑀓𑀸𑀭𑀪𑀸𑀯𑀢𑁄. 𑀢𑀣𑀸 𑀣𑁄𑀫𑀦𑀸𑀤𑀻𑀲𑀼. 𑀲𑁄𑀫𑁆𑀫𑁄𑀢𑀺 𑀲𑀻𑀢𑀮𑁄. 𑀅𑀬𑀁 𑀓𑀺𑀭 𑀩𑁆𑀭𑀸𑀳𑁆𑀫𑀡𑀸𑀦𑀁 𑀮𑀤𑁆𑀥𑀺 ‘‘𑀧𑀼𑀩𑁆𑀩𑁂𑀩𑁆𑀭𑀸𑀳𑁆𑀫𑀡𑀸𑀦𑀫𑀸𑀬𑀸𑀘𑀦𑀸𑀬 𑀘𑀦𑁆𑀤𑀺𑀫𑀲𑀽𑀭𑀺𑀬𑀸’𑀕𑀦𑁆𑀢𑁆𑀯𑀸 𑀮𑁄𑀓𑁂 𑀑𑀪𑀸𑀲𑀁 𑀓𑀭𑁄𑀦𑁆𑀢𑀻’’𑀢𑀺.

𑁫𑁩𑁨. 𑀇𑀥 𑀧𑀦 𑀓𑀺𑀁 𑀯𑀢𑁆𑀢𑀩𑁆𑀩𑀦𑁆𑀢𑀺 𑀇𑀫𑀲𑁆𑀫𑀺𑀁 𑀧𑀦 𑀅𑀧𑁆𑀧𑀘𑁆𑀘𑀓𑁆𑀔𑀪𑀽𑀢𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀲𑀳𑀩𑁆𑀬𑀢𑀸𑀬 𑀫𑀕𑁆𑀕𑀤𑁂𑀲𑀦𑁂 𑀢𑁂𑀯𑀺𑀚𑁆𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀓𑀺𑀁 𑀯𑀢𑁆𑀢𑀩𑁆𑀩𑀁 𑀅𑀢𑁆𑀣𑀺, 𑀬𑁂 𑀧𑀘𑁆𑀘𑀓𑁆𑀔𑀪𑀽𑀢𑀸𑀦𑀫𑁆𑀧𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀲𑀳𑀩𑁆𑀬𑀢𑀸𑀬 𑀫𑀕𑁆𑀕𑀁 𑀤𑁂𑀲𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀬𑀢𑁆𑀣𑀸’’𑀢𑀺 𑀇𑀫𑀺𑀦𑀸 ‘‘𑀇𑀥𑀸’’𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀘𑁆𑀘𑀸𑀫𑀲𑀢𑀺.

𑀅𑀘𑀺𑀭𑀯𑀢𑀻𑀦𑀤𑀻𑀉𑀧𑀫𑀸𑀓𑀣𑀸𑀯𑀡𑁆𑀡𑀦𑀸

𑁫𑁪𑁨. 𑀲𑀫𑀪𑀭𑀺𑀢𑀸𑀢𑀺 𑀲𑀫𑁆𑀧𑀼𑀡𑁆𑀡𑀸. 𑀢𑀢𑁄 𑀏𑀯 𑀓𑀸𑀓𑀧𑁂𑀬𑁆𑀬𑀸. 𑀧𑀸𑀭𑀸𑀢𑀺 𑀧𑀸𑀭𑀺𑀫𑀢𑀻𑀭, 𑀆𑀮𑀧𑀦𑀫𑁂𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀫𑁆𑀪𑁄’’𑀢𑀺 𑀯𑀼𑀢𑁆𑀢𑀁. 𑀅𑀧𑀸𑀭𑀦𑁆𑀢𑀺 𑀑𑀭𑀺𑀫𑀢𑀻𑀭𑀁. 𑀏𑀳𑀻𑀢𑀺 𑀆𑀕𑀘𑁆𑀙𑀸𑀳𑀺. 𑀯𑀢𑀸𑀢𑀺 𑀏𑀓𑀁𑀲𑁂𑀦. 𑀅𑀣 𑀕𑀫𑀺𑀲𑁆𑀲𑀲𑀺, 𑀏𑀯𑀁 𑀲𑀢𑀺 𑀏𑀳𑀻𑀢𑀺 𑀬𑁄𑀚𑀦𑀸. ‘‘𑀅𑀢𑁆𑀣𑀺𑀫𑁂’’𑀢𑀺𑀆𑀤𑀺 𑀅𑀯𑁆𑀳𑀸𑀦𑀓𑀸𑀭𑀡𑀁.

𑁫𑁪𑁪. 𑀧𑀜𑁆𑀘𑀲𑀻𑀮…𑀧𑁂… 𑀯𑁂𑀤𑀺𑀢𑀩𑁆𑀩𑀸 𑀬𑀫𑀦𑀺𑀬𑀫𑀸𑀤𑀺𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑀸𑀦𑀁 𑀢𑀤𑀦𑁆𑀢𑁄𑀕𑀥𑀪𑀸𑀯𑀢𑁄. 𑀢𑀩𑁆𑀩𑀺𑀧𑀭𑀻𑀢𑀸𑀢𑀺 𑀧𑀜𑁆𑀘𑀲𑀻𑀮𑀸𑀤𑀺𑀯𑀺𑀧𑀭𑀻𑀢𑀸 𑀧𑀜𑁆𑀘𑀯𑁂𑀭𑀸𑀤𑀬𑁄. 𑀇𑀦𑁆𑀤𑀦𑁆𑀢𑀺 𑀇𑀦𑁆𑀤𑀦𑀸𑀫𑀓𑀁 𑀤𑁂𑀯𑀧𑀼𑀢𑁆𑀢𑀁, 𑀲𑀓𑁆𑀓𑀁 𑀯𑀸. ‘‘𑀅𑀘𑀺𑀭𑀯𑀢𑀺𑀬𑀸 𑀢𑀻𑀭𑁂 𑀦𑀺𑀲𑀺𑀦𑁆𑀦𑁄’’𑀢𑀺 𑀇𑀫𑀺𑀦𑀸 𑀬𑀲𑁆𑀲𑀸 𑀢𑀻𑀭𑁂 𑀦𑀺𑀲𑀺𑀦𑁆𑀦𑁄, 𑀢𑀤𑁂𑀯 𑀉𑀧𑀫𑀁 𑀓𑀢𑁆𑀯𑀸 𑀆𑀳𑀭𑀢𑀺 𑀥𑀫𑁆𑀫𑀭𑀸𑀚𑀸 𑀥𑀫𑁆𑀫𑀥𑀸𑀢𑀼𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀺. ‘‘𑀧𑀼𑀦𑀧𑀻’’𑀢𑀺 𑀯𑀢𑁆𑀯𑀸 ‘‘𑀅𑀧𑀭𑀫𑁆𑀧𑀻’’𑀢𑀺 𑀯𑀘𑀦𑀁 𑀇𑀢𑀭𑀸𑀬𑀧𑀺 𑀦𑀤𑀻𑀉𑀧𑀫𑀸𑀬 𑀲𑀗𑁆𑀕𑀡𑁆𑀳𑀦𑀢𑁆𑀣𑀁.

𑁫𑁪𑁬. 𑀓𑀸𑀫𑀬𑀺𑀢𑀩𑁆𑀩𑀝𑁆𑀞𑁂𑀦𑀸𑀢𑀺 𑀓𑀸𑀫𑀦𑀻𑀬𑀪𑀸𑀯𑁂𑀦. 𑀩𑀦𑁆𑀥𑀦𑀝𑁆𑀞𑁂𑀦𑀸𑀢𑀺 𑀓𑀸𑀫𑀬𑀺𑀢𑀩𑁆𑀩𑀢𑁄 𑀲𑀢𑁆𑀢𑀸𑀦𑀁 𑀘𑀺𑀢𑁆𑀢𑀲𑁆𑀲 𑀆𑀩𑀦𑁆𑀥𑀦𑀪𑀸𑀯𑁂𑀦. 𑀓𑀸𑀫𑀜𑁆𑀘𑀸𑀬𑀁 𑀕𑀼𑀡𑀲𑀤𑁆𑀤𑁄 𑀅𑀢𑁆𑀣𑀦𑁆𑀢𑀭𑁂𑀲𑀼𑀧𑀺 𑀤𑀺𑀝𑁆𑀞𑀧𑀬𑁄𑀕𑁄, 𑀢𑁂𑀲𑀁 𑀧𑀦𑁂𑀢𑁆𑀣 𑀅𑀲𑀫𑁆𑀪𑀯𑀢𑁄 𑀧𑀸𑀭𑀺𑀲𑁂𑀲𑀜𑀸𑀬𑁂𑀦 𑀩𑀦𑁆𑀥𑀦𑀝𑁆𑀞𑁄𑀬𑁂𑀯 𑀬𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 𑀅𑀬𑀫𑀢𑁆𑀣𑀼𑀤𑁆𑀥𑀸𑀭𑁄 𑀆𑀭𑀤𑁆𑀥𑁄. 𑀅𑀳𑀢𑀸𑀦𑀦𑁆𑀢𑀺 𑀅𑀥𑁄𑀢𑀸𑀦𑀁 𑀅𑀪𑀺𑀦𑀯𑀸𑀦𑀁. 𑀏𑀢𑁆𑀣𑀸𑀢𑀺 𑀔𑀦𑁆𑀥𑀓𑀧𑀸𑀴𑀺𑀧𑀤𑁂 𑀧𑀝𑀮𑀝𑁆𑀞𑁄𑀢𑀺 𑀧𑀝𑀮𑀲𑀤𑁆𑀤𑀲𑁆𑀲, 𑀧𑀝𑀮𑀲𑀗𑁆𑀔𑀸𑀢𑁄 𑀯𑀸 𑀅𑀢𑁆𑀣𑁄. 𑀕𑀼𑀡𑀝𑁆𑀞𑁄𑀢𑀺 𑀕𑀼𑀡𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀦𑀸𑀫. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀅𑀘𑁆𑀘𑁂𑀦𑁆𑀢𑀻𑀢𑀺 𑀅𑀢𑀺𑀓𑁆𑀓𑀫𑁆𑀫 𑀧𑀯𑀢𑁆𑀢𑀦𑁆𑀢𑀺. 𑀏𑀢𑁆𑀣𑀸𑀢𑀺 𑀲𑁄𑀫𑀦𑀲𑁆𑀲𑀚𑀸𑀢𑀓𑀧𑀸𑀴𑀺𑀧𑀤𑁂. 𑀤𑀓𑁆𑀔𑀺𑀡𑀸𑀢𑀺 𑀢𑀺𑀭𑀘𑁆𑀙𑀸𑀦𑀕𑀢𑁂 𑀤𑀸𑀦𑀘𑁂𑀢𑀦𑀸. 𑀏𑀢𑁆𑀣𑀸𑀢𑀺 𑀤𑀓𑁆𑀔𑀺𑀡𑀯𑀺𑀪𑀗𑁆𑀕𑀲𑀼𑀢𑁆𑀢𑀧𑀤𑁂 (𑀫. 𑀦𑀺. 𑁩.𑁩𑁭𑁯) 𑀫𑀸𑀮𑀸𑀕𑀼𑀡𑁂𑀢𑀺 𑀫𑀸𑀮𑀸𑀤𑀸𑀫𑁂. 𑀏𑀢𑁆𑀣𑀸𑀢𑀺 𑀲𑀢𑀺𑀧𑀝𑁆𑀞𑀸𑀦- (𑀤𑀻. 𑀦𑀺. 𑁨.𑁩𑁭𑁮; 𑀫. 𑀦𑀺. 𑁧.𑁧𑁦𑁯) 𑀥𑀫𑁆𑀫𑀧𑀤𑀧𑀸𑀴𑀺𑀧𑀤𑁂𑀲𑀼, (𑀥. 𑀧. 𑁫𑁩) 𑀦𑀺𑀤𑀲𑁆𑀲𑀦𑀫𑀢𑁆𑀢𑀜𑁆𑀘𑁂𑀢𑀁 𑀓𑁄𑀝𑁆𑀞𑀸𑀲𑀸𑀧𑀥𑀸𑀦𑀲𑀻𑀮𑀸𑀤𑀺𑀲𑀼𑀓𑁆𑀓𑀸𑀤𑀺𑀲𑀫𑁆𑀧𑀤𑀸𑀚𑀺𑀬𑀸𑀲𑀼𑀧𑀺 𑀧𑀯𑀢𑁆𑀢𑀦𑀢𑁄. 𑀳𑁄𑀢𑀺 𑀘𑁂𑀢𑁆𑀣 𑁋

‘‘𑀕𑀼𑀡𑁄 𑀧𑀝𑀮𑀭𑀸𑀲𑀸𑀦𑀺𑀲𑀁𑀲𑁂 𑀓𑁄𑀝𑁆𑀞𑀸𑀲𑀩𑀦𑁆𑀥𑀦𑁂;

𑀲𑀻𑀮𑀲𑀼𑀓𑁆𑀓𑀸𑀤𑁆𑀬𑀧𑀥𑀸𑀦𑁂, 𑀲𑀫𑁆𑀧𑀤𑀸𑀬 𑀚𑀺𑀬𑀸𑀬 𑀘𑀸’’𑀢𑀺.

𑀏𑀲𑁂𑀯𑀸𑀢𑀺 𑀩𑀦𑁆𑀥𑀦𑀝𑁆𑀞𑁄 𑀏𑀯. 𑀦 𑀳𑀺 𑀭𑀽𑀧𑀸𑀤𑀻𑀦𑀁 𑀓𑀸𑀫𑁂𑀢𑀩𑁆𑀩𑀪𑀸𑀯𑁂 𑀯𑀼𑀘𑁆𑀘𑀫𑀸𑀦𑁂 𑀧𑀝𑀮𑀝𑁆𑀞𑁄 𑀬𑀼𑀚𑁆𑀚𑀢𑀺 𑀢𑀣𑀸 𑀓𑀸𑀫𑁂𑀢𑀩𑁆𑀩𑀢𑀸𑀬 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸. 𑀭𑀸𑀲𑀝𑁆𑀞𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀸𑀭𑀺𑀲𑁂𑀲𑀢𑁄 𑀧𑀦 𑀩𑀦𑁆𑀥𑀦𑀝𑁆𑀞𑁄𑀯 𑀬𑀼𑀚𑁆𑀚𑀢𑀺. 𑀬𑀤𑀕𑁆𑀕𑁂𑀦 𑀳𑀺 𑀦𑁂𑀲𑀁 𑀓𑀸𑀫𑁂𑀢𑀩𑁆𑀩𑀢𑀸, 𑀢𑀤𑀕𑁆𑀕𑁂𑀦 𑀩𑀦𑁆𑀥𑀦𑀪𑀸𑀯𑁄𑀢𑀺.

𑀓𑁄𑀝𑁆𑀞𑀸𑀲𑀝𑁆𑀞𑁄𑀧𑀺 𑀘𑁂𑀢𑁆𑀣 𑀬𑀼𑀚𑁆𑀚𑀢𑁂𑀯 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸𑀤𑀺𑀓𑁄𑀝𑁆𑀞𑀸𑀲𑀪𑀸𑀯𑁂𑀦 𑀦𑁂𑀲𑀁 𑀓𑀸𑀫𑁂𑀢𑀩𑁆𑀩𑀢𑁄. 𑀓𑁄𑀝𑁆𑀞𑀸𑀲𑁂 𑀘 𑀕𑀼𑀡𑀲𑀤𑁆𑀤𑁄 𑀤𑀺𑀲𑁆𑀲𑀢𑀺 ‘‘𑀤𑀺𑀕𑀼𑀡𑀁 𑀯𑀟𑁆𑀠𑁂𑀢𑀩𑁆𑀩’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬.

‘‘𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀦𑀸𑀫𑀸𑀦𑀺, 𑀲𑀕𑀼𑀡𑁂𑀦 𑀫𑀳𑁂𑀲𑀺𑀦𑁄;

𑀕𑀼𑀡𑁂𑀦 𑀦𑀸𑀫𑀫𑀼𑀤𑁆𑀥𑁂𑀬𑁆𑀬𑀁, 𑀅𑀧𑀺 𑀦𑀸𑀫𑀲𑀳𑀲𑁆𑀲𑀢𑁄’’𑀢𑀺. (𑀥. 𑀲. 𑀅𑀝𑁆𑀞. 𑁧𑁩𑁧𑁩; 𑀉𑀤𑀸. 𑀅𑀝𑁆𑀞. 𑁫𑁩; 𑀧𑀝𑀺. 𑀫. 𑀅𑀝𑁆𑀞. 𑁧.𑁧.𑁭𑁬) 𑁋

𑀆𑀤𑀻𑀲𑀼 𑀧𑀦 𑀲𑀫𑁆𑀧𑀤𑀸𑀝𑁆𑀞𑁄 𑀕𑀼𑀡𑀲𑀤𑁆𑀤𑁄, 𑀲𑁄𑀧𑀺 𑀇𑀥 𑀦 𑀬𑀼𑀚𑁆𑀚𑀢𑀻𑀢𑀺 𑀅𑀦𑀼𑀤𑁆𑀥𑀝𑁄.

𑀤𑀲𑁆𑀲𑀦𑀫𑁂𑀯 𑀇𑀥 𑀯𑀺𑀚𑀸𑀦𑀦𑀦𑁆𑀢𑀺 𑀆𑀳 ‘‘𑀧𑀲𑁆𑀲𑀺𑀢𑀩𑁆𑀩𑀸’’𑀢𑀺. ‘‘𑀲𑁄𑀢𑀯𑀺𑀜𑁆𑀜𑀸𑀡𑁂𑀦 𑀲𑁄𑀢𑀩𑁆𑀩𑀸’’𑀢𑀺𑀆𑀤𑀺𑀅𑀢𑁆𑀣𑀁 ‘‘𑀏𑀢𑁂𑀦𑀼𑀧𑀸𑀬𑁂𑀦𑀸’’𑀢𑀺 𑀅𑀢𑀺𑀤𑀺𑀲𑀢𑀺. 𑀕𑀯𑁂𑀲𑀺𑀢𑀸𑀧𑀺 ‘‘𑀇𑀝𑁆𑀞𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑁂 𑀇𑀥 𑀦𑀸𑀥𑀺𑀧𑁆𑀧𑁂𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀭𑀺𑀬𑀺𑀝𑁆𑀞𑀸 𑀯𑀸 𑀳𑁄𑀦𑁆𑀢𑀼 𑀫𑀸 𑀯𑀸’’𑀢𑀺 𑀯𑀼𑀢𑁆𑀢𑀁. 𑀇𑀘𑁆𑀙𑀺𑀢𑀸 𑀏𑀯 𑀳𑀺 𑀇𑀥 𑀇𑀝𑁆𑀞𑀸, 𑀢𑁂𑀦𑀸𑀳 ‘‘𑀇𑀝𑁆𑀞𑀸𑀭𑀫𑁆𑀫𑀡𑀪𑀽𑀢𑀸’’𑀢𑀺, 𑀲𑀼𑀔𑀸𑀭𑀫𑁆𑀫𑀡𑀪𑀽𑀢𑀸𑀢𑀺 𑀅𑀢𑁆𑀣𑁄. 𑀓𑀸𑀫𑀦𑀻𑀬𑀸𑀢𑀺 𑀓𑀸𑀫𑁂𑀢𑀩𑁆𑀩𑀸. 𑀇𑀝𑁆𑀞𑀪𑀸𑀯𑁂𑀦 𑀫𑀦𑀁 𑀅𑀧𑁆𑀧𑀬𑀦𑁆𑀢𑀺 𑀯𑀟𑁆𑀠𑁂𑀦𑁆𑀢𑀻𑀢𑀺 𑀫𑀦𑀸𑀧𑀸. 𑀧𑀺𑀬𑀚𑀸𑀢𑀺𑀓𑀸𑀢𑀺 𑀧𑀺𑀬𑀲𑀪𑀸𑀯𑀸. 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸𑀢𑀺 𑀅𑀢𑁆𑀢𑀸𑀦𑀫𑀸𑀭𑀫𑁆𑀫𑀡𑀁 𑀓𑀢𑁆𑀯𑀸. 𑀓𑀫𑁆𑀫𑀪𑀽𑀢𑁂 𑀆𑀭𑀫𑁆𑀫𑀡𑁂 𑀲𑀢𑀺 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀢𑀁 𑀓𑀸𑀭𑀡𑀪𑀸𑀯𑁂𑀦 𑀦𑀺𑀤𑀲𑁆𑀲𑁂𑀦𑁆𑀢𑁄 ‘‘𑀭𑀸𑀕𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀪𑀽𑀢𑀸’’𑀢𑀺 𑀆𑀳.

𑀕𑁂𑀥𑁂𑀦𑀸𑀢𑀺 𑀮𑁄𑀪𑁂𑀦. 𑀅𑀪𑀺𑀪𑀽𑀢𑀸 𑀳𑀼𑀢𑁆𑀯𑀸 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀫𑀼𑀘𑁆𑀙𑀸𑀓𑀸𑀭𑀦𑁆𑀢𑀺 𑀫𑁄𑀳𑀦𑀸𑀓𑀸𑀭𑀁. 𑀅𑀥𑀺𑀑𑀲𑀦𑁆𑀦𑀸𑀢𑀺 𑀅𑀥𑀺𑀕𑀬𑁆𑀳 𑀅𑀚𑁆𑀛𑁄𑀲𑀸𑀬 𑀅𑀯𑀲𑀦𑁆𑀦𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀑𑀕𑀸𑀴𑁆𑀳𑀸’’𑀢𑀺. 𑀲𑀸𑀦𑀦𑁆𑀢𑀺 𑀅𑀯𑀲𑀸𑀦𑀁. 𑀧𑀭𑀺𑀦𑀺𑀝𑁆𑀞𑀸𑀦𑀧𑁆𑀧𑀢𑁆𑀢𑀸𑀢𑀺 𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀸𑀧𑀦𑀯𑀲𑁂𑀦 𑀧𑀭𑀺𑀦𑀺𑀝𑁆𑀞𑀸𑀦𑀁 𑀉𑀬𑁆𑀬𑀸𑀢𑀸. 𑀆𑀤𑀻𑀦𑀯𑀦𑁆𑀢𑀺 𑀓𑀸𑀫𑀧𑀭𑀺𑀪𑁄𑀕𑁂 𑀲𑀫𑁆𑀧𑀢𑀺, 𑀆𑀬𑀢𑀺𑀜𑁆𑀘 𑀤𑁄𑀲𑀁 𑀅𑀧𑀲𑁆𑀲𑀦𑁆𑀢𑀸. 𑀖𑀸𑀲𑀘𑁆𑀙𑀸𑀤𑀦𑀸𑀤𑀺𑀲𑀫𑁆𑀪𑁄𑀕𑀦𑀺𑀫𑀺𑀢𑁆𑀢𑀲𑀁𑀓𑀺𑀮𑁂𑀲𑀢𑁄 𑀦𑀺𑀲𑁆𑀲𑀭𑀦𑁆𑀢𑀺 𑀅𑀧𑀕𑀘𑁆𑀙𑀦𑁆𑀢𑀺 𑀏𑀢𑁂𑀦𑀸𑀢𑀺 𑀦𑀺𑀲𑁆𑀲𑀭𑀡𑀁, 𑀬𑁄𑀦𑀺𑀲𑁄 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀢𑁂𑀲𑀁 𑀧𑀭𑀺𑀪𑁄𑀕𑀧𑀜𑁆𑀜𑀸. 𑀢𑀤𑀪𑀸𑀯𑀢𑁄 𑀅𑀦𑀺𑀲𑁆𑀲𑀭𑀡𑀧𑀜𑁆𑀜𑀸𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀤𑀫𑁂𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀧𑀘𑁆𑀘𑀯𑁂𑀓𑁆𑀔𑀡𑀧𑀭𑀺𑀪𑁄𑀕𑀯𑀺𑀭𑀳𑀺𑀢𑀸𑀢𑀺 𑀬𑀣𑀸𑀯𑀼𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂𑀦 𑀧𑀭𑀺𑀪𑁄𑀕𑀢𑁄 𑀯𑀺𑀭𑀳𑀺𑀢𑀸.

𑁫𑁪𑁮-𑁯. 𑀆𑀯𑀭𑀦𑁆𑀢𑀻𑀢𑀺 𑀓𑀼𑀲𑀮𑀥𑀫𑁆𑀫𑀼𑀧𑁆𑀧𑀢𑁆𑀢𑀺𑀁 𑀆𑀤𑀺𑀢𑁄 𑀯𑀸𑀭𑁂𑀦𑁆𑀢𑀺. 𑀦𑀺𑀯𑀸𑀭𑁂𑀦𑁆𑀢𑀻𑀢𑀺 𑀦𑀺𑀭𑀯𑀲𑁂𑀲𑀢𑁄 𑀯𑀸𑀭𑀬𑀦𑁆𑀢𑀺. 𑀑𑀦𑀦𑁆𑀥𑀦𑁆𑀢𑀻𑀢𑀺 𑀑𑀕𑀸𑀳𑀦𑁆𑀢𑀸 𑀯𑀺𑀬 𑀙𑀸𑀤𑁂𑀦𑁆𑀢𑀺. 𑀧𑀭𑀺𑀬𑁄𑀦𑀦𑁆𑀥𑀦𑁆𑀢𑀻𑀢𑀺 𑀲𑀩𑁆𑀩𑀲𑁄 𑀙𑀸𑀤𑁂𑀦𑁆𑀢𑀺. 𑀆𑀯𑀭𑀡𑀸𑀤𑀻𑀦𑀁 𑀯𑀲𑁂𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑀸𑀦𑀁 𑀆𑀯𑀭𑀡𑀸𑀤𑀺𑀅𑀢𑁆𑀣𑀸𑀦𑀁 𑀯𑀲𑁂𑀦. 𑀢𑁂 𑀳𑀺 𑀆𑀲𑁂𑀯𑀦𑀩𑀮𑀯𑀢𑀸𑀬 𑀧𑀼𑀭𑀺𑀫𑀧𑀼𑀭𑀺𑀫𑁂𑀳𑀺 𑀧𑀘𑁆𑀙𑀺𑀫𑀧𑀘𑁆𑀙𑀺𑀫𑀸 𑀤𑀴𑁆𑀳𑀢𑀭𑀢𑀫𑀸𑀤𑀺𑀪𑀸𑀯𑀧𑁆𑀧𑀢𑁆𑀢𑀸.

𑀲𑀁𑀲𑀦𑁆𑀤𑀦𑀓𑀣𑀸𑀯𑀡𑁆𑀡𑀦𑀸

𑁫𑁫𑁦. 𑀇𑀢𑁆𑀣𑀺𑀧𑀭𑀺𑀕𑁆𑀕𑀳𑁂 𑀲𑀢𑀺 𑀧𑀼𑀭𑀺𑀲𑀲𑁆𑀲 𑀧𑀜𑁆𑀘𑀓𑀸𑀫𑀕𑀼𑀡𑀧𑀭𑀺𑀕𑁆𑀕𑀳𑁄 𑀧𑀭𑀺𑀧𑀼𑀡𑁆𑀡𑁄 𑀏𑀯 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀇𑀢𑁆𑀣𑀺𑀧𑀭𑀺𑀕𑁆𑀕𑀳𑁂𑀦 𑀲𑀧𑀭𑀺𑀕𑁆𑀕𑀳𑁄’’𑀢𑀺. ‘‘𑀇𑀢𑁆𑀣𑀺𑀧𑀭𑀺𑀕𑁆𑀕𑀳𑁂𑀦 𑀅𑀧𑀭𑀺𑀕𑁆𑀕𑀳𑁄’’𑀢𑀺 𑀘 𑀇𑀤𑀁 𑀢𑁂𑀯𑀺𑀚𑁆𑀚𑀩𑁆𑀭𑀸𑀳𑁆𑀫𑀡𑁂𑀲𑀼 𑀤𑀺𑀲𑁆𑀲𑀫𑀸𑀦𑀧𑀭𑀺𑀕𑁆𑀕𑀳𑀸𑀦𑀁 𑀤𑀼𑀝𑁆𑀞𑀼𑀮𑁆𑀮𑀢𑀫𑀧𑀭𑀺𑀕𑁆𑀕𑀳𑀸𑀪𑀸𑀯𑀤𑀲𑁆𑀲𑀦𑀁. 𑀏𑀯𑀁 𑀪𑀽𑀢𑀸𑀦𑀁 𑀢𑁂𑀯𑀺𑀚𑁆𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀓𑀸 𑀩𑁆𑀭𑀳𑁆𑀫𑀼𑀦𑀸 𑀲𑀁𑀲𑀦𑁆𑀤𑀦𑀸, 𑀩𑁆𑀭𑀳𑁆𑀫𑀸 𑀧𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀧𑀭𑀺𑀕𑁆𑀕𑀳𑁄𑀢𑀺. 𑀯𑁂𑀭𑀘𑀺𑀢𑁆𑀢𑁂𑀦 𑀅𑀯𑁂𑀭𑁄, 𑀓𑀼𑀢𑁄 𑀏𑀢𑀲𑁆𑀲 𑀯𑁂𑀭𑀧𑀬𑁄𑀕𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀘𑀺𑀢𑁆𑀢𑀕𑁂𑀮𑀜𑁆𑀜𑀲𑀗𑁆𑀔𑀸𑀢𑁂𑀦𑀸𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀕𑁂𑀮𑀜𑁆𑀜𑀲𑀜𑁆𑀜𑀺𑀢𑁂𑀦, 𑀇𑀫𑀺𑀦𑀸 𑀢𑀲𑁆𑀲 𑀭𑀽𑀧𑀓𑀸𑀬𑀕𑁂𑀮𑀜𑁆𑀜𑀪𑀸𑀯𑁄 𑀯𑀼𑀢𑁆𑀢𑁄 𑀳𑁄𑀢𑀺. 𑀩𑁆𑀬𑀸𑀧𑀚𑁆𑀛𑁂𑀦𑀸𑀢𑀺 𑀤𑀼𑀓𑁆𑀔𑁂𑀦. 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀸𑀤𑀻𑀳𑀻𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 𑀢𑀤𑁂𑀓𑀝𑁆𑀞𑀸 𑀲𑀁𑀓𑀺𑀮𑁂𑀲𑀥𑀫𑁆𑀫𑀸 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀅𑀢𑁄𑀬𑁂𑀯𑁂𑀢𑁆𑀣 ‘‘𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀸𑀪𑀸𑀯𑀢𑁄’’𑀢𑀺 𑀢𑀤𑀼𑀪𑀬𑀸𑀪𑀸𑀯𑀫𑀢𑁆𑀢𑀳𑁂𑀢𑀼𑀯𑀘𑀦𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺. 𑀅𑀧𑁆𑀧𑀝𑀺𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀸𑀬 𑀯𑀺𑀘𑀺𑀓𑀺𑀘𑁆𑀙𑀸𑀬 𑀲𑀢𑀺 𑀦 𑀓𑀤𑀸𑀘𑀺 𑀘𑀺𑀢𑁆𑀢𑀁 𑀧𑀼𑀭𑀺𑀲𑀲𑁆𑀲 𑀯𑀲𑁂 𑀯𑀢𑁆𑀢𑀢𑀺, 𑀧𑀳𑀻𑀦𑀸𑀬 𑀧𑀦 𑀢𑀸𑀬 𑀲𑀺𑀬𑀸 𑀘𑀺𑀢𑁆𑀢𑀲𑁆𑀲 𑀧𑀼𑀭𑀺𑀲𑀯𑀲𑁂 𑀯𑀢𑁆𑀢𑀦𑀦𑁆𑀢𑀺 𑀆𑀳 ‘‘𑀯𑀺𑀘𑀺𑀓𑀺𑀘𑁆𑀙𑀸𑀬𑀸’’𑀢𑀺𑀆𑀤𑀺. 𑀘𑀺𑀢𑁆𑀢𑀕𑀢𑀺𑀓𑀸𑀢𑀺 𑀘𑀺𑀢𑁆𑀢𑀯𑀲𑀺𑀓𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀘𑀺𑀢𑁆𑀢𑀲𑁆𑀲 𑀯𑀲𑁂 𑀯𑀢𑁆𑀢𑀦𑁆𑀢𑀻’’𑀢𑀺. 𑀦 𑀢𑀸𑀤𑀺𑀲𑁄𑀢𑀺 𑀩𑁆𑀭𑀸𑀳𑁆𑀫𑀡𑀸 𑀯𑀺𑀬 𑀦 𑀘𑀺𑀢𑁆𑀢𑀯𑀲𑀺𑀓𑁄 𑀳𑁄𑀢𑀺, 𑀅𑀣 𑀔𑁄 𑀯𑀲𑀻𑀪𑀽𑀢𑀛𑀸𑀦𑀸𑀪𑀺𑀜𑁆𑀜𑀢𑀸𑀬 𑀘𑀺𑀢𑁆𑀢𑀁 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑁂𑀢𑀻𑀢𑀺 𑀯𑀲𑀯𑀢𑁆𑀢𑀻.

𑁫𑁫𑁨. 𑀩𑁆𑀭𑀳𑁆𑀫𑀮𑁄𑀓𑀫𑀕𑁆𑀕𑁂𑀢𑀺 𑀩𑁆𑀭𑀳𑁆𑀫𑀮𑁄𑀓𑀕𑀸𑀫𑀺𑀫𑀕𑁆𑀕𑁂 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑁂, 𑀧𑀜𑁆𑀜𑀸𑀧𑁂𑀢𑀩𑁆𑀩𑁂 𑀯𑀸, 𑀢𑀁 𑀧𑀜𑁆𑀜𑀧𑁂𑀦𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀉𑀧𑀕𑀦𑁆𑀢𑁆𑀯𑀸𑀢𑀺 𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺𑀬𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, 𑀧𑀝𑀺𑀚𑀸𑀦𑀺𑀢𑁆𑀯𑀸 𑀯𑀸. 𑀲𑀫𑀢𑀮𑀦𑁆𑀢𑀺 𑀲𑀜𑁆𑀜𑀸𑀬𑀸𑀢𑀺 𑀫𑀢𑁆𑀣𑀓𑁂 𑀏𑀓𑀗𑁆𑀕𑀼𑀮𑀁 𑀯𑀸 𑀉𑀧𑀟𑁆𑀠𑀗𑁆𑀕𑀼𑀮𑀁 𑀯𑀸 𑀲𑀼𑀓𑁆𑀔𑀢𑀸𑀬 𑀲𑀫𑀢𑀮𑀦𑁆𑀢𑀺 𑀲𑀜𑁆𑀜𑀸𑀬. 𑀧𑀗𑁆𑀓𑀁 𑀑𑀢𑀺𑀡𑁆𑀡𑀸 𑀯𑀺𑀬𑀸𑀢𑀺 𑀅𑀦𑁂𑀓𑀧𑁄𑀭𑀺𑀲𑀁 𑀫𑀳𑀸𑀧𑀗𑁆𑀓𑀁 𑀑𑀢𑀺𑀡𑁆𑀡𑀸 𑀯𑀺𑀬. 𑀅𑀦𑀼𑀧𑁆𑀧𑀯𑀺𑀲𑀦𑁆𑀢𑀻𑀢𑀺 𑀅𑀧𑀸𑀬𑀫𑀕𑁆𑀕𑀁 𑀩𑁆𑀭𑀳𑁆𑀫𑀮𑁄𑀓𑀫𑀕𑁆𑀕𑀲𑀜𑁆𑀜𑀸𑀬 𑀑𑀕𑀸𑀳𑀦𑁆𑀢𑀺. 𑀢𑀢𑁄 𑀏𑀯 𑀲𑀁𑀲𑀻𑀤𑀺𑀢𑁆𑀯𑀸 𑀯𑀺𑀲𑀸𑀤𑀁 𑀧𑀸𑀧𑀼𑀡𑀦𑁆𑀢𑀺. 𑀏𑀯𑀦𑁆𑀢𑀺 ‘‘𑀲𑀫𑀢𑀮’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁂𑀦. 𑀲𑀁𑀲𑀻𑀤𑀺𑀢𑁆𑀯𑀸𑀢𑀺 𑀦𑀺𑀫𑀼𑀚𑁆𑀚𑀺𑀢𑁆𑀯𑀸. 𑀫𑀭𑀻𑀘𑀺𑀓𑀸𑀬𑀸𑀢𑀺 𑀫𑀺𑀕𑀢𑀡𑁆𑀳𑀺𑀓𑀸𑀬 𑀓𑀢𑁆𑀢𑀼𑀪𑀽𑀢𑀸𑀬. 𑀯𑀜𑁆𑀘𑁂𑀢𑁆𑀯𑀸𑀢𑀺 𑀦𑀤𑀻𑀲𑀤𑀺𑀲𑀁 𑀧𑀓𑀸𑀲𑀦𑁂𑀦 𑀯𑀜𑁆𑀘𑁂𑀢𑁆𑀯𑀸. 𑀯𑀸𑀬𑀫𑀸𑀦𑀸𑀢𑀺 𑀯𑀸𑀬𑀫𑀫𑀸𑀦𑀸, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀲𑀼𑀓𑁆𑀔𑀢𑀭𑀡𑀁 𑀫𑀜𑁆𑀜𑁂 𑀢𑀭𑀦𑁆𑀢𑀻𑀢𑀺 𑀲𑀼𑀓𑁆𑀔𑀦𑀤𑀻𑀢𑀭𑀡𑀁 𑀢𑀭𑀦𑁆𑀢𑀺 𑀫𑀜𑁆𑀜𑁂. 𑀅𑀪𑀺𑀦𑁆𑀦𑁂𑀧𑀺 𑀪𑁂𑀤𑀯𑀘𑀦𑀫𑁂𑀢𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀢𑁂𑀯𑀺𑀚𑁆𑀚𑀸 𑀅𑀫𑀕𑁆𑀕𑀫𑁂𑀯 ‘‘𑀫𑀕𑁆𑀕𑁄’’𑀢𑀺 𑀉𑀧𑀕𑀦𑁆𑀢𑁆𑀯𑀸 𑀲𑀁𑀲𑀻𑀤𑀦𑁆𑀢𑀺, 𑀢𑀲𑁆𑀫𑀸. 𑀬𑀣𑀸 𑀢𑁂𑀢𑀺 𑀢𑁂 ‘‘𑀲𑀫𑀢𑀮’’𑀦𑁆𑀢𑀺 𑀲𑀜𑁆𑀜𑀸𑀬 𑀧𑀗𑁆𑀓𑀁 𑀑𑀢𑀺𑀡𑁆𑀡𑀸 𑀲𑀢𑁆𑀢𑀸 𑀳𑀢𑁆𑀣𑀧𑀸𑀤𑀸𑀤𑀻𑀦𑀁 𑀲𑀁𑀪𑀜𑁆𑀚𑀦𑀁 𑀧𑀭𑀺𑀪𑀜𑁆𑀚𑀦𑀁 𑀧𑀸𑀧𑀼𑀡𑀦𑁆𑀢𑀺 𑀬𑀣𑀸. 𑀇𑀥𑁂𑀯 𑀘𑀸𑀢𑀺 𑀇𑀫𑀲𑁆𑀫𑀺𑀜𑁆𑀘 𑀅𑀢𑁆𑀢𑀪𑀸𑀯𑁂. 𑀲𑀼𑀔𑀁 𑀯𑀸 𑀲𑀸𑀢𑀁 𑀯𑀸 𑀦 𑀮𑀪𑀦𑁆𑀢𑀻𑀢𑀺 𑀛𑀸𑀦𑀲𑀼𑀔𑀁 𑀯𑀸 𑀯𑀺𑀧𑀲𑁆𑀲𑀦𑀸𑀲𑀸𑀢𑀁 𑀯𑀸 𑀦 𑀮𑀪𑀦𑁆𑀢𑀺, 𑀓𑀼𑀢𑁄 𑀫𑀕𑁆𑀕𑀲𑀼𑀔𑀁 𑀯𑀸 𑀦𑀺𑀩𑁆𑀩𑀸𑀦𑀲𑀸𑀢𑀁 𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀕𑁆𑀕𑀤𑀻𑀧𑀓𑀦𑁆𑀢𑀺 ‘‘𑀫𑀕𑁆𑀕𑀤𑀻𑀧𑀓’’ 𑀫𑀺𑀘𑁆𑀘𑁂𑀯 𑀢𑁂𑀳𑀺 𑀅𑀪𑀺𑀫𑀢𑀁. 𑀢𑁂𑀯𑀺𑀚𑁆𑀚𑀓𑀦𑁆𑀢𑀺 𑀢𑁂𑀯𑀺𑀚𑁆𑀚𑀢𑁆𑀣𑀜𑀸𑀧𑀓𑀁. 𑀧𑀸𑀯𑀘𑀦𑀦𑁆𑀢𑀺 𑀧𑀓𑀝𑁆𑀞𑀯𑀘𑀦𑀲𑀫𑁆𑀫𑀢𑀁 𑀧𑀸𑀞𑀁. 𑀢𑁂𑀯𑀺𑀚𑁆𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁂 𑀲𑀸𑀫𑀺𑀯𑀘𑀦𑀁. 𑀇𑀭𑀺𑀡𑀦𑁆𑀢𑀺 𑀅𑀭𑀜𑁆𑀜𑀸𑀦𑀺𑀬𑀸 𑀇𑀤𑀁 𑀅𑀥𑀺𑀯𑀘𑀦𑀦𑁆𑀢𑀺 𑀆𑀳 ‘‘𑀅𑀕𑀸𑀫𑀓𑀁 𑀫𑀳𑀸𑀭𑀜𑁆𑀜’’𑀦𑁆𑀢𑀺. 𑀅𑀦𑀼𑀧𑀪𑁄𑀕𑀭𑀼𑀓𑁆𑀔𑁂𑀳𑀻𑀢𑀺 𑀫𑀺𑀕𑀭𑀼𑀭𑀼𑀆𑀤𑀻𑀦𑀫𑁆𑀧𑀺 𑀅𑀦𑀼𑀧𑀪𑁄𑀕𑀸𑀭𑀳𑁂𑀳𑀺 𑀓𑀺𑀁 𑀧𑀓𑁆𑀓𑀸𑀤𑀺𑀯𑀺𑀲𑀭𑀼𑀓𑁆𑀔𑁂𑀳𑀺. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀯𑀦𑁂. 𑀧𑀭𑀺𑀯𑀢𑁆𑀢𑀺𑀢𑀼𑀫𑁆𑀧𑀺 𑀦 𑀲𑀓𑁆𑀓𑀸 𑀳𑁄𑀦𑁆𑀢𑀺 𑀫𑀳𑀸𑀓𑀡𑁆𑀝𑀓𑀕𑀘𑁆𑀙𑀕𑀳𑀦𑀢𑀸𑀬. 𑀜𑀸𑀢𑀻𑀦𑀁 𑀩𑁆𑀬𑀲𑀦𑀁 𑀯𑀺𑀦𑀸𑀲𑁄 𑀜𑀸𑀢𑀺𑀩𑁆𑀬𑀲𑀦𑀁. 𑀏𑀯𑀁 𑀪𑁄𑀕𑀲𑀻𑀮𑀩𑁆𑀬𑀲𑀦𑁂𑀲𑀼𑀧𑀺. 𑀭𑁄𑀕𑁄 𑀏𑀯 𑀩𑁆𑀬𑀲𑀢𑀺 𑀯𑀺𑀩𑀸𑀥𑀢𑀻𑀢𑀺 𑀭𑁄𑀕𑀩𑁆𑀬𑀲𑀦𑀁. 𑀏𑀯𑀁 𑀤𑀺𑀝𑁆𑀞𑀺𑀩𑁆𑀬𑀲𑀦𑁂𑀧𑀺.

𑁫𑁫𑁪. 𑀦𑀦𑀼 𑀚𑀸𑀢𑀲𑀤𑁆𑀤𑁂𑀦𑁂𑀯 𑀅𑀬𑀫𑀢𑁆𑀣𑁄 𑀲𑀺𑀤𑁆𑀥𑁄𑀢𑀺 𑀘𑁄𑀤𑀦𑀫𑀧𑀦𑁂𑀢𑀺 ‘‘𑀬𑁄 𑀳𑀻’’𑀢𑀺𑀆𑀤𑀺𑀦𑀸. 𑀚𑀸𑀢𑁄 𑀳𑀼𑀢𑁆𑀯𑀸 𑀲𑀁𑀯𑀟𑁆𑀠𑀺𑀢𑁄 𑀚𑀸𑀢𑀲𑀁𑀯𑀟𑁆𑀠𑁄𑀢𑀺 𑀆𑀘𑀭𑀺𑀬𑁂𑀦 (𑀤𑀻. 𑀦𑀺. 𑀝𑀻. 𑁧.𑁫𑁫𑁪) 𑀯𑀼𑀢𑁆𑀢𑀁, 𑀚𑀸𑀢𑁄 𑀘 𑀲𑁄 𑀲𑀁𑀯𑀟𑁆𑀠𑁄 𑀘𑀸𑀢𑀺 𑀚𑀸𑀢𑀲𑀁𑀯𑀟𑁆𑀠𑁄𑀢𑀺 𑀧𑀦 𑀬𑀼𑀚𑁆𑀚𑀢𑀺 𑀯𑀺𑀲𑁂𑀲𑀦𑀧𑀭𑀦𑀺𑀧𑀸𑀢𑀢𑁆𑀢𑀸. 𑀦 𑀲𑀩𑁆𑀩𑀲𑁄 𑀧𑀘𑁆𑀘𑀓𑁆𑀔𑀸 𑀳𑁄𑀦𑁆𑀢𑀺 𑀧𑀭𑀺𑀘𑀬𑀸𑀪𑀸𑀯𑀢𑁄. 𑀘𑀺𑀭𑀦𑀺𑀓𑁆𑀔𑀦𑁆𑀢𑁄𑀢𑀺 𑀦𑀺𑀓𑁆𑀔𑀦𑁆𑀢𑁄 𑀳𑀼𑀢𑁆𑀯𑀸 𑀘𑀺𑀭𑀓𑀸𑀮𑁄. 𑀘𑀺𑀭𑀁 𑀦𑀺𑀓𑁆𑀔𑀦𑁆𑀢𑀲𑁆𑀲 𑀅𑀲𑁆𑀲𑀸𑀢𑀺 𑀳𑀺 𑀘𑀺𑀭𑀦𑀺𑀓𑁆𑀔𑀦𑁆𑀢𑁄. ‘‘𑀚𑀸𑀢𑀲𑀁𑀯𑀟𑁆𑀠𑁄’’𑀢𑀺 𑀧𑀤𑀤𑁆𑀯𑀬𑁂𑀦 𑀅𑀢𑁆𑀣𑀲𑁆𑀲 𑀧𑀭𑀺𑀧𑀼𑀡𑁆𑀡𑀸𑀪𑀸𑀯𑀢𑁄 ‘‘𑀢𑀫𑁂𑀦’’𑀦𑁆𑀢𑀺 𑀓𑀫𑁆𑀫𑀧𑀤𑀁 ‘‘𑀢𑀸𑀯𑀤𑁂𑀯 𑀅𑀯𑀲𑀝’’𑀦𑁆𑀢𑀺 𑀧𑀼𑀦 𑀯𑀺𑀲𑁂𑀲𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑀦𑁆𑀥𑀸𑀬𑀺𑀢𑀢𑁆𑀢𑀦𑁆𑀢𑀺 𑀯𑀺𑀲𑁆𑀲𑀚𑁆𑀚𑀦𑁂 𑀫𑀦𑁆𑀤𑀢𑁆𑀢𑀁 𑀲𑀡𑀺𑀓𑀯𑀼𑀢𑁆𑀢𑀺, 𑀢𑀁 𑀧𑀦 𑀲𑀁𑀲𑀬𑀯𑀲𑁂𑀦 𑀘𑀺𑀭𑀸𑀬𑀦𑀁 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀓𑀗𑁆𑀔𑀸𑀯𑀲𑁂𑀦 𑀘𑀺𑀭𑀸𑀬𑀺𑀢𑀢𑁆𑀢’’𑀦𑁆𑀢𑀺. 𑀯𑀺𑀢𑁆𑀣𑀸𑀬𑀺𑀢𑀢𑁆𑀢𑀦𑁆𑀢𑀺 𑀲𑀸𑀭𑀚𑁆𑀚𑀺𑀢𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀯𑀺𑀢𑁆𑀣𑀸𑀬𑀺𑀢𑀢𑁆𑀢𑀁 𑀦𑀸𑀫 𑀣𑀫𑁆𑀪𑀺𑀢𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀣𑀤𑁆𑀥𑀪𑀸𑀯𑀕𑁆𑀕𑀳𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀧𑁆𑀧𑀝𑀺𑀳𑀢𑀪𑀸𑀯𑀁 𑀤𑀲𑁆𑀲𑁂𑀢𑀺 𑀢𑀲𑁆𑀲𑁂𑀯 𑀅𑀦𑀸𑀯𑀭𑀡𑀜𑀸𑀡𑀪𑀸𑀯𑀢𑁄. 𑀦𑀦𑁆𑀯𑁂𑀢𑀫𑁆𑀧𑀺 𑀅𑀦𑁆𑀢𑀭𑀸𑀬𑀧𑀝𑀺𑀳𑀢𑀁 𑀲𑀺𑀬𑀸𑀢𑀺 𑀆𑀲𑀗𑁆𑀓𑀁 𑀧𑀭𑀺𑀳𑀭𑀢𑀺 ‘‘𑀢𑀲𑁆𑀲 𑀳𑀻’’𑀢𑀺𑀆𑀤𑀺𑀦𑀸. 𑀫𑀸𑀭𑀸𑀯𑀝𑁆𑀝𑀦𑀸𑀤𑀺𑀯𑀲𑁂𑀦𑀸𑀢𑀺 𑀏𑀢𑁆𑀣 𑀘𑀓𑁆𑀔𑀼𑀫𑁄𑀳𑀫𑀼𑀘𑁆𑀙𑀸𑀓𑀸𑀮𑀸𑀤𑀺 𑀲𑀗𑁆𑀕𑀬𑁆𑀳𑀢𑀺. 𑀦 𑀲𑀓𑁆𑀓𑀸 𑀢𑀲𑁆𑀲 𑀓𑁂𑀦𑀘𑀺 𑀅𑀦𑁆𑀢𑀭𑀸𑀬𑁄 𑀓𑀸𑀢𑀼𑀁 𑀘𑀢𑀽𑀲𑀼 𑀅𑀦𑀦𑁆𑀢𑀭𑀸𑀬𑀺𑀓𑀥𑀫𑁆𑀫𑁂𑀲𑀼 𑀧𑀭𑀺𑀬𑀸𑀧𑀦𑁆𑀦𑀪𑀸𑀯𑀢𑁄.

𑁫𑁫𑁫. 𑀉𑀇𑀘𑁆𑀘𑀼𑀧𑀲𑀕𑁆𑀕𑀬𑁄𑀕𑁂 𑀮𑀼𑀫𑁆𑀧𑀲𑀤𑁆𑀤𑁄, 𑀮𑀼𑀧𑀺𑀲𑀤𑁆𑀤𑁄 𑀯𑀸 𑀉𑀤𑁆𑀥𑀭𑀡𑀢𑁆𑀣𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀉𑀤𑁆𑀥𑀭𑀢𑀽’’𑀢𑀺. 𑀉𑀧𑀲𑀕𑁆𑀕𑀯𑀺𑀲𑁂𑀲𑁂𑀦 𑀳𑀺 𑀥𑀸𑀢𑀼𑀲𑀤𑁆𑀤𑀸 𑀅𑀢𑁆𑀣𑀯𑀺𑀲𑁂𑀲𑀯𑀼𑀢𑁆𑀢𑀺𑀦𑁄 𑀳𑁄𑀦𑁆𑀢𑀺 𑀬𑀣𑀸 ‘‘𑀆𑀤𑀸𑀦’’𑀦𑁆𑀢𑀺. 𑀧𑀚𑀸𑀲𑀤𑁆𑀤𑁄 𑀧𑀓𑀭𑀡𑀸𑀥𑀺𑀕𑀢𑀢𑁆𑀢𑀸 𑀤𑀸𑀭𑀓𑀯𑀺𑀲𑀬𑁄𑀢𑀺 𑀆𑀳 ‘‘𑀩𑁆𑀭𑀸𑀳𑁆𑀫𑀡𑀤𑀸𑀭𑀓’’𑀦𑁆𑀢𑀺.

𑀩𑁆𑀭𑀳𑁆𑀫𑀮𑁄𑀓𑀫𑀕𑁆𑀕𑀤𑁂𑀲𑀦𑀸𑀯𑀡𑁆𑀡𑀦𑀸

𑁫𑁫𑁬-𑁭. ‘‘𑀅𑀧𑀼𑀩𑁆𑀩𑀦𑁆𑀢𑀺 𑀇𑀫𑀺𑀦𑀸 𑀲𑀁𑀯𑀡𑁆𑀡𑁂𑀢𑀩𑁆𑀩𑀢𑀸𑀓𑀸𑀭𑀡𑀁 𑀤𑀻𑀧𑁂𑀢𑀺. 𑀬𑀲𑁆𑀲 𑀅𑀢𑀺𑀲𑀬𑁂𑀦 𑀩𑀮𑀁 𑀅𑀢𑁆𑀣𑀺, 𑀲𑁄 𑀩𑀮𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀩𑀮𑀲𑀫𑁆𑀧𑀦𑁆𑀦𑁄’’𑀢𑀺. 𑀲𑀗𑁆𑀔𑀁 𑀥𑀫𑁂𑀢𑀻𑀢𑀺 𑀲𑀗𑁆𑀔𑀥𑀫𑀓𑁄, 𑀲𑀗𑁆𑀔𑀁 𑀥𑀫𑀬𑀺𑀢𑁆𑀯𑀸 𑀢𑀢𑁄 𑀲𑀤𑁆𑀤𑀧𑀯𑀢𑁆𑀢𑀓𑁄. ‘‘𑀩𑀮𑀯𑀸’’𑀢𑀺𑀆𑀤𑀺𑀯𑀺𑀲𑁂𑀲𑀦𑀁 𑀓𑀺𑀫𑀢𑁆𑀣𑀺𑀬𑀦𑁆𑀢𑀺 𑀆𑀳 ‘‘𑀤𑀼𑀩𑁆𑀩𑀮𑁄 𑀳𑀻’’𑀢𑀺𑀆𑀤𑀺. 𑀩𑀮𑀯𑀢𑁄 𑀧𑀦 𑀲𑀗𑁆𑀔𑀲𑀤𑁆𑀤𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀧𑁆𑀧𑀦𑀸𑀯 𑀯𑀝𑁆𑀝𑀢𑀺 𑀧𑀝𑀺𑀧𑀓𑁆𑀔𑀢𑁄 𑀲𑀫𑁆𑀫𑀤𑁂𑀯 𑀘𑁂𑀢𑀲𑁄 𑀯𑀺𑀫𑀼𑀢𑁆𑀢𑀺𑀪𑀸𑀯𑀢𑁄, 𑀢𑀲𑁆𑀫𑀸 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀫𑀸𑀡𑀓𑀢𑀁 𑀓𑀫𑁆𑀫𑀁 𑀦𑀸𑀫 𑀓𑀸𑀫𑀸𑀯𑀘𑀭𑀁 𑀯𑀼𑀘𑁆𑀘𑀢𑀺 𑀧𑀫𑀸𑀡𑀓𑀭𑀸𑀦𑀁 𑀲𑀁𑀓𑀺𑀮𑁂𑀲𑀥𑀫𑁆𑀫𑀸𑀦𑀁 𑀅𑀯𑀺𑀓𑁆𑀔𑀫𑁆𑀪𑀦𑀢𑁄. 𑀢𑀣𑀸 𑀳𑀺 𑀢𑀁 𑀩𑁆𑀭𑀳𑁆𑀫𑀯𑀺𑀳𑀸𑀭𑀧𑀼𑀩𑁆𑀩𑀪𑀸𑀕𑀪𑀽𑀢𑀁 𑀧𑀫𑀸𑀡𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀑𑀤𑀺𑀲𑁆𑀲𑀓𑀸𑀦𑁄𑀤𑀺𑀲𑁆𑀲𑀓𑀤𑀺𑀲𑀸𑀨𑀭𑀡𑀯𑀲𑁂𑀦 𑀯𑀟𑁆𑀠𑁂𑀢𑀼𑀁 𑀦 𑀲𑀓𑁆𑀓𑀸. 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑀢𑁄 𑀧𑀦 𑀭𑀽𑀧𑀸𑀭𑀽𑀧𑀸𑀯𑀘𑀭𑀁 𑀅𑀧𑁆𑀧𑀫𑀸𑀡𑀓𑀢𑀁 𑀓𑀫𑁆𑀫𑀁 𑀦𑀸𑀫. 𑀢𑁂𑀦𑀸𑀳 ‘‘𑀢𑀜𑁆𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀅𑀭𑀽𑀧𑀸𑀯𑀘𑀭𑁂 𑀑𑀤𑀺𑀲𑁆𑀲𑀓𑀸𑀦𑁄𑀤𑀺𑀲𑁆𑀲𑀓𑀯𑀲𑁂𑀦 𑀨𑀭𑀡𑀁 𑀦 𑀮𑀩𑁆𑀪𑀢𑀺, 𑀢𑀣𑀸 𑀤𑀺𑀲𑀸𑀨𑀭𑀡𑀜𑁆𑀘. 𑀓𑁂𑀘𑀺 𑀧𑀦 ‘‘𑀢𑀁 𑀆𑀕𑀫𑀦𑀯𑀲𑁂𑀦 𑀮𑀩𑁆𑀪𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀤𑀬𑀼𑀢𑁆𑀢𑀁. 𑀦 𑀳𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑀦𑀺𑀲𑁆𑀲𑀦𑁆𑀤𑁄 𑀆𑀭𑀼𑀧𑁆𑀧𑀁, 𑀅𑀣 𑀔𑁄 𑀓𑀲𑀺𑀡𑀦𑀺𑀲𑁆𑀲𑀦𑁆𑀤𑁄, 𑀢𑀲𑁆𑀫𑀸 𑀬𑀁 𑀲𑀼𑀪𑀸𑀯𑀺𑀢𑀁 𑀯𑀲𑀻𑀪𑀸𑀯𑀁 𑀧𑀸𑀧𑀺𑀢𑀁 𑀆𑀭𑀼𑀧𑁆𑀧𑀁, 𑀢𑀁 𑀅𑀧𑁆𑀧𑀫𑀸𑀡𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀬𑀁 𑀯𑀸 𑀲𑀸𑀢𑀺𑀲𑀬𑀁 𑀩𑁆𑀭𑀳𑁆𑀫𑀯𑀺𑀳𑀸𑀭𑀪𑀸𑀯𑀦𑀸𑀬 𑀅𑀪𑀺𑀲𑀗𑁆𑀔𑀢𑁂𑀦 𑀲𑀦𑁆𑀢𑀸𑀦𑁂𑀦 𑀦𑀺𑀩𑁆𑀩𑀢𑁆𑀢𑀺𑀢𑀁, 𑀬𑀜𑁆𑀘 𑀩𑁆𑀭𑀳𑁆𑀫𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀲𑀫𑀸𑀧𑀦𑁆𑀦𑀁 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀁, 𑀢𑀁 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀨𑀭𑀡𑀧𑀫𑀸𑀡𑀯𑀲𑁂𑀦 𑀅𑀧𑁆𑀧𑀫𑀸𑀡𑀓𑀢’’𑀦𑁆𑀢𑀺 𑀅𑀧𑀭𑁂. 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀓𑀫𑁆𑀫𑁂𑀢𑀺 𑀭𑀽𑀧𑀸𑀯𑀘𑀭𑀓𑀫𑁆𑀫𑁂 𑀘 𑀅𑀭𑀽𑀧𑀸𑀯𑀘𑀭𑀓𑀫𑁆𑀫𑁂 𑀘 𑀲𑀢𑀺. 𑀦 𑀑𑀳𑀻𑀬𑀢𑀺 𑀦 𑀢𑀺𑀝𑁆𑀞𑀢𑀻𑀢𑀺 𑀓𑀢𑀽𑀧𑀘𑀺𑀢𑀫𑁆𑀧𑀺 𑀓𑀸𑀫𑀸𑀯𑀘𑀭𑀓𑀫𑁆𑀫𑀁 𑀬𑀣𑀸𑀥𑀺𑀕𑀢𑁂 𑀫𑀳𑀕𑁆𑀕𑀢𑀚𑁆𑀛𑀸𑀦𑁂 𑀅𑀧𑀭𑀺𑀳𑀻𑀦𑁂 𑀢𑀁 𑀅𑀪𑀺𑀪𑀯𑀺𑀢𑁆𑀯𑀸 𑀧𑀝𑀺𑀩𑀸𑀳𑀺𑀢𑁆𑀯𑀸 𑀲𑀬𑀁 𑀑𑀳𑀻𑀬𑀓𑀁 𑀳𑀼𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀁 𑀤𑀸𑀢𑀼𑀁 𑀲𑀫𑀢𑁆𑀣𑀪𑀸𑀯𑁂 𑀦 𑀢𑀺𑀝𑁆𑀞𑀢𑀺. ‘‘𑀦 𑀅𑀯𑀲𑀺𑀲𑁆𑀲𑀢𑀻’’𑀢𑀺 𑀏𑀢𑀲𑁆𑀲 𑀳𑀺 𑀅𑀢𑁆𑀣𑀯𑀘𑀦𑀁 ‘‘𑀦 𑀑𑀳𑀻𑀬𑀢𑀻’’𑀢𑀺, 𑀢𑀤𑁂𑀢𑀁 ‘‘𑀦 𑀅𑀯𑀢𑀺𑀝𑁆𑀞𑀢𑀻’’𑀢𑀺 𑀏𑀢𑀲𑁆𑀲 𑀯𑀺𑀲𑁂𑀲𑀯𑀘𑀦𑀁, 𑀧𑀭𑀺𑀬𑀸𑀬𑀯𑀘𑀦𑀁 𑀯𑀸. 𑀢𑁂𑀦𑀸𑀳 ‘‘𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺𑀆𑀤𑀺. 𑀮𑀕𑁆𑀕𑀺𑀢𑀼𑀦𑁆𑀢𑀺 𑀆𑀯𑀭𑀺𑀢𑀼𑀁 𑀦𑀺𑀲𑁂𑀥𑁂𑀢𑀼𑀁. 𑀞𑀸𑀢𑀼𑀦𑁆𑀢𑀺 𑀧𑀝𑀺𑀩𑀮𑀁 𑀳𑀼𑀢𑁆𑀯𑀸 𑀧𑀢𑀺𑀝𑁆𑀞𑀸𑀢𑀼𑀁. 𑀨𑀭𑀺𑀢𑁆𑀯𑀸𑀢𑀺 𑀧𑀝𑀺𑀨𑀭𑀺𑀢𑁆𑀯𑀸. 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸𑀢𑀺 𑀢𑀲𑁆𑀲 𑀲𑀸𑀫𑀢𑁆𑀣𑀺𑀬𑀁 𑀔𑁂𑀧𑁂𑀢𑁆𑀯𑀸. 𑀑𑀓𑀸𑀲𑀁 𑀕𑀳𑁂𑀢𑁆𑀯𑀸𑀢𑀺 𑀯𑀺𑀧𑀸𑀓𑀤𑀸𑀦𑁄𑀓𑀸𑀲𑀁 𑀕𑀳𑁂𑀢𑁆𑀯𑀸, 𑀇𑀫𑀺𑀦𑀸 ‘‘𑀮𑀕𑁆𑀕𑀺𑀢𑀼𑀁 𑀯𑀸 𑀞𑀸𑀢𑀼𑀁 𑀯𑀸’’𑀢𑀺 𑀯𑀘𑀦𑀫𑁂𑀯 𑀯𑀺𑀢𑁆𑀣𑀸𑀭𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀅𑀣 𑀔𑁄’’𑀢𑀺𑀆𑀤𑀺 𑀅𑀢𑁆𑀣𑀸𑀧𑀢𑁆𑀢𑀺𑀤𑀲𑁆𑀲𑀦𑀁. 𑀓𑀫𑁆𑀫𑀲𑁆𑀲 𑀧𑀭𑀺𑀬𑀸𑀤𑀺𑀬𑀦𑀁 𑀦𑀸𑀫 𑀢𑀲𑁆𑀲 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀁 𑀦𑀺𑀲𑁂𑀥𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀫𑁂𑀯𑀸𑀢𑀺 𑀆𑀳 ‘‘𑀢𑀲𑁆𑀲𑀸’’𑀢𑀺𑀆𑀤𑀺. 𑀢𑀲𑁆𑀲𑀸𑀢𑀺 𑀓𑀸𑀫𑀸𑀯𑀘𑀭𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀺𑀢𑁆𑀯𑀸. 𑀲𑀬𑀫𑁂𑀯𑀸𑀢𑀺 𑀭𑀽𑀧𑀸𑀭𑀽𑀧𑀸𑀯𑀘𑀭𑀓𑀫𑁆𑀫𑀫𑁂𑀯. 𑀩𑁆𑀭𑀳𑁆𑀫𑀲𑀳𑀩𑁆𑀬𑀢𑀁 𑀉𑀧𑀦𑁂𑀢𑀺 𑀅𑀲𑀢𑀺 𑀢𑀸𑀤𑀺𑀲𑀸𑀦𑀁 𑀘𑁂𑀢𑁄𑀧𑀡𑀺𑀥𑀺𑀯𑀺𑀲𑁂𑀲𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀺𑀲𑁆𑀲𑀩𑁆𑀭𑀳𑁆𑀫𑀸𑀤𑀻𑀦𑀁 𑀯𑀺𑀬 𑀳𑀺 𑀫𑀳𑀸𑀧𑀼𑀜𑁆𑀜𑀸𑀦𑀁 𑀘𑁂𑀢𑁄𑀧𑀡𑀺𑀥𑀺𑀯𑀺𑀲𑁂𑀲𑁂𑀦 𑀫𑀳𑀕𑁆𑀕𑀢𑀓𑀫𑁆𑀫𑀁 𑀧𑀭𑀺𑀢𑁆𑀢𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀁 𑀦 𑀧𑀝𑀺𑀩𑀸𑀳𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀣 𑀫𑀳𑀕𑁆𑀕𑀢𑀲𑁆𑀲 𑀕𑀭𑀼𑀓𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀧𑀭𑀺𑀢𑁆𑀢𑀁 𑀮𑀳𑀼𑀓𑀓𑀫𑁆𑀫𑀁 𑀓𑀣𑀫𑀢𑁆𑀢𑀦𑁄 𑀯𑀺𑀧𑀸𑀓𑀲𑁆𑀲 𑀑𑀓𑀸𑀲𑀁 𑀓𑀭𑁄𑀢𑀻𑀢𑀺? 𑀢𑀻𑀲𑀼𑀧𑀺 𑀓𑀺𑀭 𑀯𑀺𑀦𑀬𑀕𑀡𑁆𑀞𑀺𑀧𑀤𑁂𑀲𑀼 𑀏𑀯𑀁 𑀯𑀼𑀢𑁆𑀢𑀁 ‘‘𑀦𑀺𑀓𑀦𑁆𑀢𑀺𑀩𑀮𑁂𑀦𑁂𑀯 𑀛𑀸𑀦𑀁 𑀧𑀭𑀺𑀳𑀸𑀬𑀢𑀺, 𑀢𑀢𑁄 𑀧𑀭𑀺𑀳𑀻𑀦𑀛𑀸𑀦𑀢𑁆𑀢𑀸 𑀧𑀭𑀺𑀢𑁆𑀢𑀓𑀫𑁆𑀫𑀁 𑀮𑀤𑁆𑀥𑁄𑀓𑀸𑀲’’𑀦𑁆𑀢𑀺. 𑀓𑁂𑀘𑀺 𑀧𑀦 𑀯𑀤𑀦𑁆𑀢𑀺 ‘‘𑀅𑀦𑀻𑀯𑀭𑀡𑀸𑀯𑀢𑁆𑀣𑀸𑀬 𑀦𑀺𑀓𑀦𑁆𑀢𑀺𑀬𑀸 𑀛𑀸𑀦𑀲𑁆𑀲 𑀧𑀭𑀺𑀳𑀸𑀦𑀺 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀸’’𑀢𑀺. 𑀇𑀤𑀫𑁂𑀢𑁆𑀣 𑀬𑀼𑀢𑁆𑀢𑀢𑀭𑀓𑀸𑀭𑀡𑀁 𑁋 𑀅𑀲𑀢𑀺𑀧𑀺 𑀫𑀳𑀕𑁆𑀕𑀢𑀓𑀫𑁆𑀫𑀼𑀦𑁄 𑀯𑀺𑀧𑀸𑀓𑀧𑀝𑀺𑀩𑀸𑀳𑀦𑀲𑀫𑀢𑁆𑀣𑁂 𑀧𑀭𑀺𑀢𑁆𑀢𑀓𑀫𑁆𑀫𑁂 ‘‘𑀇𑀚𑁆𑀛𑀢𑀺 𑀪𑀺𑀓𑁆𑀔𑀯𑁂 𑀲𑀻𑀮𑀯𑀢𑁄 𑀘𑁂𑀢𑁄𑀧𑀡𑀺𑀥𑀺 𑀯𑀺𑀲𑀼𑀤𑁆𑀥𑀢𑁆𑀢𑀸 𑀲𑀻𑀮𑀲𑁆𑀲𑀸’’𑀢𑀺 (𑀤𑀻. 𑀦𑀺. 𑁧.𑁫𑁦𑁪; 𑀲𑀁. 𑀦𑀺. 𑁪.𑁩𑁫𑁨; 𑀅. 𑀦𑀺. 𑁮.𑁩𑁫) 𑀯𑀘𑀦𑀢𑁄 𑀓𑀸𑀫𑀪𑀯𑁂 𑀘𑁂𑀢𑁄𑀧𑀡𑀺𑀥𑀺 𑀫𑀳𑀕𑁆𑀕𑀢𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀧𑀭𑀺𑀢𑁆𑀢𑀓𑀫𑁆𑀫𑀼𑀦𑁄 𑀯𑀺𑀧𑀸𑀓𑁄𑀓𑀸𑀲𑀁 𑀓𑀭𑁄𑀢𑀻𑀢𑀺. 𑀏𑀯𑀁 𑀫𑁂𑀢𑁆𑀢𑀸𑀤𑀺𑀯𑀺𑀳𑀸𑀭𑀻𑀢𑀺 𑀯𑀼𑀢𑁆𑀢𑀦𑀬𑁂𑀦 𑀅𑀧𑁆𑀧𑀦𑀸𑀧𑀢𑁆𑀢𑀸𑀦𑀁 𑀫𑁂𑀢𑁆𑀢𑀸𑀤𑀻𑀦𑀁 𑀩𑁆𑀭𑀳𑁆𑀫𑀯𑀺𑀳𑀸𑀭𑀸𑀦𑀁 𑀯𑀲𑁂𑀦 𑀯𑀺𑀳𑀸𑀭𑀻.

𑁫𑁫𑁯. 𑀧𑀞𑀫𑀫𑀼𑀧𑀦𑀺𑀥𑀸𑀬 𑀤𑀼𑀢𑀺𑀬𑀁, 𑀓𑀺𑀫𑁂𑀢𑀁, 𑀬𑀫𑀼𑀧𑀦𑀺𑀥𑀻𑀬𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀧𑀞𑀫𑀫𑁂𑀯𑀸’’𑀢𑀺𑀆𑀤𑀺. 𑀫𑀚𑁆𑀛𑀺𑀫𑀧𑀡𑁆𑀡𑀸𑀲𑀓𑁂 𑀲𑀗𑁆𑀕𑀻𑀢𑀦𑁆𑀢𑀺 𑀅𑀚𑁆𑀛𑀸𑀳𑀭𑀺𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀧𑀼𑀦𑀧𑁆𑀧𑀼𑀦𑀁 𑀲𑀭𑀡𑀕𑀫𑀦𑀁 𑀤𑀴𑁆𑀳𑀢𑀭𑀁, 𑀫𑀳𑀧𑁆𑀨𑀮𑀢𑀭𑀜𑁆𑀘, 𑀢𑀲𑁆𑀫𑀸 𑀤𑀼𑀢𑀺𑀬𑀫𑁆𑀧𑀺 𑀲𑀭𑀡𑀕𑀫𑀦𑀁 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀢𑀺𑀧𑀸𑀳𑀘𑁆𑀘𑀬𑁂𑀦𑀸𑀢𑀺 𑀤𑁆𑀯𑀻𑀳𑀢𑀻𑀳𑀘𑁆𑀘𑀬𑁂𑀦. 𑀧𑀩𑁆𑀩𑀚𑀺𑀢𑁆𑀯𑀸𑀢𑀺 𑀲𑀸𑀫𑀡𑁂𑀭𑀧𑀩𑁆𑀩𑀚𑁆𑀚𑀁 𑀕𑀳𑁂𑀢𑁆𑀯𑀸. 𑀅𑀕𑁆𑀕𑀜𑁆𑀜𑀲𑀼𑀢𑁆𑀢𑀫𑁆𑀧𑀺 (𑀤𑀻. 𑀦𑀺. 𑁩.𑁧𑁧𑁨) 𑀅𑀫𑀼𑀁𑀬𑁂𑀯 𑀯𑀸𑀲𑁂𑀝𑁆𑀞𑀫𑀸𑀭𑀩𑁆𑀪 𑀓𑀣𑁂𑀲𑀺, 𑀦𑀸𑀜𑁆𑀜𑀦𑁆𑀢𑀺 𑀜𑀸𑀧𑁂𑀢𑀼𑀁 ‘‘𑀅𑀕𑁆𑀕𑀜𑁆𑀜𑀲𑀼𑀢𑁆𑀢𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀆𑀕𑀢𑀦𑀬𑁂𑀦 𑀉𑀧𑀲𑀫𑁆𑀧𑀤𑀜𑁆𑀘𑁂𑀯 𑀅𑀭𑀳𑀢𑁆𑀢𑀜𑁆𑀘 𑀅𑀮𑀢𑁆𑀣𑀼𑀁 𑀧𑀝𑀺𑀮𑀪𑀺𑀁𑀲𑀽𑀢𑀺 𑀅𑀢𑁆𑀣𑁄. 𑀬𑀫𑁂𑀢𑁆𑀣 𑀅𑀢𑁆𑀣𑀢𑁄 𑀦 𑀯𑀺𑀪𑀢𑁆𑀢𑀁, 𑀢𑀤𑁂𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀇𑀢𑀺 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬 𑀧𑀭𑀫𑀲𑀼𑀔𑀼𑀫𑀕𑀫𑁆𑀪𑀻𑀭𑀤𑀼𑀭𑀦𑀼𑀩𑁄𑀥𑀢𑁆𑀣𑀧𑀭𑀺𑀤𑀻𑀧𑀦𑀸𑀬 𑀲𑀼𑀯𑀺𑀫𑀮𑀯𑀺𑀧𑀼𑀮𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀚𑀦𑀦𑀸𑀬 𑀅𑀚𑁆𑀚𑀯𑀫𑀤𑁆𑀤𑀯𑀲𑁄𑀭𑀘𑁆𑀘𑀲𑀤𑁆𑀥𑀸𑀲𑀢𑀺𑀥𑀺𑀢𑀺𑀩𑀼𑀤𑁆𑀥𑀺𑀔𑀦𑁆𑀢𑀺𑀯𑀻𑀭𑀺𑀬𑀸𑀤𑀺𑀥𑀫𑁆𑀫𑀲𑀫𑀗𑁆𑀕𑀺𑀦𑀸 𑀲𑀸𑀝𑁆𑀞𑀓𑀣𑁂 𑀧𑀺𑀝𑀓𑀢𑁆𑀢𑀬𑁂 𑀅𑀲𑀗𑁆𑀕𑀸𑀲𑀁𑀳𑀻𑀭𑀯𑀺𑀲𑀸𑀭𑀤𑀜𑀸𑀡𑀘𑀸𑀭𑀺𑀦𑀸 𑀅𑀦𑁂𑀓𑀧𑁆𑀧𑀪𑁂𑀤𑀲𑀓𑀲𑀫𑀬𑀲𑀫𑀬𑀦𑁆𑀢𑀭𑀕𑀳𑀦𑀚𑁆𑀛𑁄𑀕𑀸𑀳𑀺𑀦𑀸 𑀫𑀳𑀸𑀕𑀡𑀺𑀦𑀸 𑀫𑀳𑀸𑀯𑁂𑀬𑁆𑀬𑀸𑀓𑀭𑀡𑁂𑀦 𑀜𑀸𑀡𑀸𑀪𑀺𑀯𑀁𑀲𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸𑀫𑀣𑁂𑀭𑁂𑀦 𑀫𑀳𑀸𑀥𑀫𑁆𑀫𑀭𑀸𑀚𑀸𑀥𑀺𑀭𑀸𑀚𑀕𑀭𑀼𑀦𑀸 𑀓𑀢𑀸𑀬 𑀲𑀸𑀥𑀼𑀯𑀺𑀮𑀸𑀲𑀺𑀦𑀺𑀬𑀸 𑀦𑀸𑀫 𑀮𑀻𑀦𑀢𑁆𑀣𑀧𑀓𑀸𑀲𑀦𑀺𑀬𑀸 𑀢𑁂𑀯𑀺𑀚𑁆𑀚𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑀓𑀸𑀲𑀦𑀸.

𑀢𑁂𑀯𑀺𑀚𑁆𑀚𑀲𑀼𑀢𑁆𑀢𑀲𑀁𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀢𑁆𑀭𑀺𑀤𑀁 𑀲𑀸𑀥𑀼𑀯𑀺𑀮𑀸𑀲𑀺𑀦𑀺𑀬𑀸 𑀲𑀸𑀥𑀼𑀯𑀺𑀮𑀸𑀲𑀺𑀦𑀺𑀢𑁆𑀢𑀲𑁆𑀫𑀺𑀁 𑀳𑁄𑀢𑀺 𑁋

𑀩𑁆𑀬𑀜𑁆𑀚𑀦𑀜𑁆𑀘𑁂𑀯 𑀅𑀢𑁆𑀣𑁄 𑀘, 𑀯𑀺𑀦𑀺𑀘𑁆𑀙𑀬𑁄 𑀘 𑀲𑀩𑁆𑀩𑀣𑀸;

𑀲𑀸𑀥𑀓𑁂𑀦 𑀯𑀺𑀦𑀸 𑀯𑀼𑀢𑁆𑀢𑁄, 𑀦𑀢𑁆𑀣𑀺 𑀘𑁂𑀢𑁆𑀣 𑀬𑀢𑁄 𑀢𑀢𑁄.

𑀲𑀫𑁆𑀧𑀲𑁆𑀲𑀢𑀁 𑀲𑀼𑀥𑀻𑀫𑀢𑀁, 𑀲𑀸𑀥𑀽𑀦𑀁 𑀘𑀺𑀢𑁆𑀢𑀢𑁄𑀲𑀦𑀁;

𑀓𑀭𑁄𑀢𑀺 𑀯𑀺𑀯𑀺𑀥𑀁 𑀲𑀸𑀬𑀁, 𑀢𑁂𑀦 𑀲𑀸𑀥𑀼𑀯𑀺𑀮𑀸𑀲𑀺𑀦𑀻𑀢𑀺.

𑀦𑀺𑀕𑀫𑀦𑀓𑀣𑀸

𑀏𑀢𑁆𑀢𑀸𑀯𑀢𑀸 𑀘 𑁋

𑀲𑀤𑁆𑀥𑀫𑁆𑀫𑁂 𑀧𑀸𑀝𑀯𑀢𑁆𑀣𑀸𑀬, 𑀲𑀸𑀲𑀦𑀲𑁆𑀲 𑀘 𑀯𑀼𑀤𑁆𑀥𑀺𑀬𑀸;

𑀯𑀡𑁆𑀡𑀦𑀸 𑀬𑀸 𑀲𑀫𑀸𑀭𑀤𑁆𑀥𑀸, 𑀲𑀻𑀮𑀓𑁆𑀔𑀦𑁆𑀥𑀓𑀣𑀸𑀬 𑀲𑀸.

𑀲𑀸𑀥𑀼𑀯𑀺𑀮𑀸𑀲𑀺𑀦𑀻 𑀦𑀸𑀫, 𑀲𑀩𑁆𑀩𑀲𑁄 𑀧𑀭𑀺𑀦𑀺𑀝𑁆𑀞𑀺𑀢𑀸;

𑀧𑀡𑁆𑀡𑀸𑀲𑀸𑀬 𑀲𑀸𑀥𑀺𑀓𑀸𑀬, 𑀪𑀸𑀡𑀯𑀸𑀭𑀧𑁆𑀧𑀫𑀸𑀡𑀢𑁄.

𑀅𑀦𑁂𑀓𑀲𑁂𑀢𑀺𑀪𑀺𑀦𑁆𑀤𑁄 𑀬𑁄, 𑀅𑀦𑀦𑁆𑀢𑀩𑀮𑀯𑀸𑀳𑀦𑁄;

𑀲𑀺𑀭𑀻𑀧𑀯𑀭𑀸𑀤𑀺𑀦𑀸𑀫𑁄, 𑀭𑀸𑀚𑀸 𑀦𑀸𑀦𑀸𑀭𑀝𑁆𑀞𑀺𑀲𑁆𑀲𑀭𑁄.

𑀚𑀫𑁆𑀩𑀼𑀤𑀻𑀧𑀢𑀮𑁂 𑀭𑀫𑁆𑀫𑁂, 𑀫𑀭𑀫𑁆𑀫𑀯𑀺𑀲𑀬𑁂 𑀅𑀓𑀸;

𑀢𑀫𑁆𑀩𑀤𑀻𑀧𑀭𑀝𑁆𑀞𑁂 𑀧𑀼𑀭𑀁, 𑀅𑀫𑀭𑀧𑀼𑀭𑀦𑀸𑀫𑀓𑀁.

𑀫𑀡𑁆𑀟𑀮𑀸𑀘𑀮𑀲𑀸𑀫𑀦𑁆𑀢𑀁, 𑀏𑀭𑀸𑀯𑀢𑀻𑀦𑀤𑀺𑀲𑁆𑀲𑀺𑀢𑀁;

𑀦𑀸𑀦𑀸𑀚𑀦𑀸𑀦𑀫𑀸𑀯𑀸𑀲𑀁, 𑀳𑁂𑀫𑀧𑀸𑀲𑀸𑀤𑀮𑀗𑁆𑀓𑀢𑀁.

𑀢𑀢𑁆𑀭𑀸𑀪𑀺𑀲𑁂𑀓𑀧𑀢𑁆𑀢𑁄 𑀲𑁄, 𑀭𑀚𑁆𑀚𑀁 𑀓𑀸𑀭𑁂𑀲𑀺 𑀥𑀫𑁆𑀫𑀢𑁄;

𑀭𑀸𑀚𑀸𑀕𑀸𑀭𑀫𑀳𑀸𑀣𑀽𑀧𑀁, 𑀅𑀓𑀸𑀲𑀺 𑀲𑀫𑁆𑀧𑀲𑀸𑀤𑀦𑀁.

𑀉𑀤𑁆𑀥𑀫𑁆𑀫𑀁 𑀉𑀩𑁆𑀩𑀺𑀦𑀬𑀜𑁆𑀘, 𑀧𑀳𑀸𑀬 𑀚𑀺𑀦𑀲𑀸𑀲𑀦𑀁;

𑀯𑀺𑀲𑁄𑀥𑁂𑀲𑀺 𑀬𑀣𑀸𑀪𑀽𑀢𑀁, 𑀲𑀢𑀢𑀁 𑀤𑀴𑁆𑀳𑀫𑀸𑀦𑀲𑁄.

𑀢𑁂𑀦𑁂𑀯 𑀓𑀸𑀭𑀺𑀢𑁂 𑀭𑀫𑁆𑀫𑁂, 𑀙𑀸𑀬𑀽𑀤𑀓𑀲𑀫𑀧𑁆𑀧𑀺𑀢𑁂;

𑀤𑁆𑀯𑀺𑀧𑀸𑀓𑀸𑀭𑀧𑀭𑀺𑀓𑁆𑀔𑀺𑀢𑁆𑀢𑁂, 𑀪𑀸𑀯𑀦𑀸𑀪𑀺𑀭𑀢𑀸𑀭𑀳𑁂.

𑀫𑀳𑀸𑀫𑀼𑀦𑀺𑀲𑀫𑀜𑁆𑀜𑀸 𑀬𑀸, 𑀲𑀫𑁆𑀩𑀼𑀤𑁆𑀥𑀲𑀫𑁆𑀫𑀼𑀔𑀸 𑀓𑀢𑀸;

𑀧𑀝𑀺𑀫𑀸 𑀢𑀁𑀧𑀸𑀲𑀸𑀤𑀫𑁆𑀳𑀸, 𑀉𑀚𑀼𑀆𑀲𑀦𑁆𑀦𑀤𑀓𑁆𑀔𑀺𑀡𑁂.

𑀅𑀲𑁄𑀓𑀸𑀭𑀸𑀫𑀆𑀭𑀸𑀫𑁂, 𑀧𑀜𑁆𑀘𑀪𑀽𑀫𑀺𑀫𑀳𑀸𑀮𑀬𑁂;

𑀭𑀢𑀦𑀪𑀽𑀫𑀺𑀓𑀺𑀢𑁆𑀢𑀺 𑀯𑁆𑀳𑀬𑁂, 𑀥𑀫𑁆𑀫𑀧𑀸𑀲𑀸𑀤𑀮𑀗𑁆𑀓𑀢𑁂.

𑀢𑀣𑀸 𑀤𑀓𑁆𑀔𑀺𑀡𑀤𑁂𑀯𑀺𑀬𑀸, 𑀦𑀕𑀭𑀲𑀫𑀻𑀧𑁂 𑀓𑀢𑁂;

𑀧𑀼𑀩𑁆𑀩𑀼𑀢𑁆𑀢𑀭𑁂 𑀚𑀬𑀪𑀽𑀫𑀺-𑀓𑀺𑀢𑁆𑀢𑀸𑀪𑀺𑀥𑀸𑀦𑀓𑁂𑀧𑀺 𑀘.

𑀢𑀣𑁂𑀯𑀼𑀢𑁆𑀢𑀭𑀤𑁂𑀯𑀺𑀬𑀸, 𑀦𑀕𑀭𑀩𑁆𑀪𑀦𑁆𑀢𑀭𑁂 𑀓𑀢𑁂;

𑀲𑁄𑀡𑁆𑀡𑀕𑀼𑀳𑀣𑀽𑀧𑀦𑁆𑀢𑀺𑀓𑁂, 𑀧𑀭𑀺𑀫𑀸𑀡𑀓𑀦𑀸𑀫𑀓𑁂.

𑀢𑀣𑀸 𑀘 𑀉𑀧𑀭𑀸𑀚𑁂𑀦, 𑀓𑀢𑁂 𑀦𑀕𑀭𑀧𑀘𑁆𑀙𑀺𑀫𑁂;

𑀫𑀳𑀸𑀕𑀼𑀳𑀣𑀽𑀧𑀦𑁆𑀢𑀺𑀓𑁂, 𑀫𑀗𑁆𑀕𑀮𑀸𑀯𑀸𑀲𑀦𑀸𑀫𑀓𑁂.

𑀇𑀢𑀺 𑀲𑁄𑀡𑁆𑀡𑀯𑀺𑀳𑀸𑀭𑁂𑀲𑀼, 𑀯𑀲𑀁𑀦𑁂𑀓𑁂𑀲𑀼 𑀯𑀸𑀭𑀢𑁄;

𑀲𑀓𑁆𑀓𑀢𑁄 𑀲𑀩𑁆𑀩𑀭𑀸𑀚𑀽𑀦𑀁, 𑀢𑀺𑀓𑁆𑀔𑀢𑁆𑀢𑀼𑀁 𑀮𑀤𑁆𑀥𑀮𑀜𑁆𑀙𑀦𑁄.

𑀜𑀸𑀡𑀸𑀪𑀺𑀯𑀁𑀲𑀥𑀫𑁆𑀫𑀲𑁂𑀦𑀸𑀧𑀢𑀻𑀢𑀺 𑀲𑀼𑀯𑀺𑀔𑁆𑀬𑀸𑀢𑁄;

𑀤𑁆𑀯𑁂𑀯𑀺𑀪𑀗𑁆𑀕𑀸𑀤𑀺𑀥𑀸𑀭𑀡𑀸, 𑀉𑀧𑀚𑁆𑀛𑀸𑀘𑀭𑀺𑀬𑀢𑀁 𑀧𑀢𑁆𑀢𑁄.

𑀮𑀗𑁆𑀓𑀸𑀤𑀻𑀧𑀸𑀕𑀢𑀸𑀦𑀫𑁆𑀧𑀺, 𑀧𑀭𑀤𑀻𑀧𑀦𑀺𑀯𑀸𑀲𑀺𑀦𑀁;

𑀪𑀺𑀓𑁆𑀔𑀽𑀦𑀁 𑀯𑀸𑀘𑀓𑁄 𑀥𑀫𑁆𑀫𑀁, 𑀧𑀝𑀺𑀧𑀢𑁆𑀢𑀺𑀁 𑀦𑀺𑀬𑁄𑀚𑀓𑁄.

𑀬𑀁 𑀦𑀺𑀲𑁆𑀲𑀸𑀬 𑀯𑀺𑀲𑁄𑀥𑁂𑀲𑀺, 𑀲𑀸𑀲𑀦𑀁 𑀏𑀲 𑀪𑀽𑀧𑀢𑀺;

𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑀁, 𑀲𑁄’𑀓𑀸𑀲𑀺 𑀯𑀡𑁆𑀡𑀦𑀁 𑀇𑀫𑀁.

𑀲𑀫𑁆𑀩𑀼𑀤𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑀸, 𑀧𑀜𑁆𑀘𑀢𑀸𑀮𑀻𑀲𑀓𑁂’𑀤𑁆𑀥𑀓𑁂;

𑀢𑀺𑀲𑀢𑁂 𑀤𑁆𑀯𑀺𑀲𑀳𑀲𑁆𑀲𑁂 𑀘, 𑀲𑀫𑁆𑀧𑀢𑁆𑀢𑁂 𑀲𑀸 𑀲𑀼𑀦𑀺𑀝𑁆𑀞𑀺𑀢𑀸.

𑀧𑁂𑀝𑀓𑀸𑀮𑀗𑁆𑀓𑀸𑀭𑀯𑁆𑀳𑀬𑀁, 𑀦𑁂𑀢𑁆𑀢𑀺𑀲𑀁𑀯𑀡𑁆𑀡𑀦𑀁 𑀲𑀼𑀪𑀁;

𑀇𑀫𑀜𑁆𑀘 𑀲𑀗𑁆𑀔𑀭𑁄𑀦𑁆𑀢𑁂𑀦, 𑀬𑀁 𑀧𑀼𑀜𑁆𑀜𑀁 𑀧𑀲𑀼𑀢𑀁 𑀫𑀬𑀸.

𑀅𑀜𑁆𑀜𑀫𑁆𑀧𑀺 𑀢𑁂𑀦 𑀧𑀼𑀜𑁆𑀜𑁂𑀦, 𑀧𑀢𑁆𑀯𑀸𑀦 𑀩𑁄𑀥𑀺𑀫𑀼𑀢𑁆𑀢𑀫𑀁;

𑀢𑀸𑀭𑀬𑀺𑀢𑁆𑀯𑀸 𑀩𑀳𑀽 𑀲𑀢𑁆𑀢𑁂, 𑀫𑁄𑀘𑁂𑀬𑁆𑀬𑀁 𑀪𑀯𑀩𑀦𑁆𑀥𑀦𑀸.

𑀲𑀤𑀸 𑀭𑀓𑁆𑀔𑀦𑁆𑀢𑀼 𑀭𑀸𑀚𑀸𑀦𑁄, 𑀥𑀫𑁆𑀫𑁂𑀦𑁂𑀯 𑀧𑀚𑀁 𑀇𑀫𑀁;

𑀦𑀺𑀭𑀢𑀸 𑀧𑀼𑀜𑁆𑀜𑀓𑀫𑁆𑀫𑁂𑀲𑀼, 𑀚𑁄𑀢𑁂𑀦𑁆𑀢𑀼 𑀚𑀺𑀦𑀲𑀸𑀲𑀦𑀁.

𑀇𑀫𑁂 𑀘 𑀧𑀸𑀡𑀺𑀦𑁄 𑀲𑀩𑁆𑀩𑁂, 𑀲𑀩𑁆𑀩𑀤𑀸 𑀦𑀺𑀭𑀼𑀧𑀤𑁆𑀤𑀯𑀸;

𑀦𑀺𑀘𑁆𑀘𑀁 𑀓𑀮𑁆𑀬𑀸𑀡𑀲𑀗𑁆𑀓𑀧𑁆𑀧𑀸, 𑀧𑀧𑁆𑀧𑁄𑀦𑁆𑀢𑀼 𑀅𑀫𑀢𑀁 𑀧𑀤𑀦𑁆𑀢𑀺.

𑀇𑀢𑀺 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬 𑀲𑀻𑀮𑀓𑁆𑀔𑀦𑁆𑀥𑀯𑀕𑁆𑀕𑀲𑀁𑀯𑀡𑁆𑀡𑀦𑀸𑀬

𑀲𑀸𑀥𑀼𑀯𑀺𑀮𑀸𑀲𑀺𑀦𑀻 𑀦𑀸𑀫 𑀅𑀪𑀺𑀦𑀯𑀝𑀻𑀓𑀸 𑀲𑀫𑀢𑁆𑀢𑀸.

𑀲𑀻𑀮𑀓𑁆𑀔𑀦𑁆𑀥𑀯𑀕𑁆𑀕𑀅𑀪𑀺𑀦𑀯𑀝𑀻𑀓𑀸 𑀦𑀺𑀝𑁆𑀞𑀺𑀢𑀸.