𑁮. 𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑀅𑀘𑁂𑀮𑀓𑀲𑁆𑀲𑀧𑀯𑀢𑁆𑀣𑀼𑀯𑀡𑁆𑀡𑀦𑀸

𑁩𑁮𑁧. 𑀏𑀯𑀁 𑀚𑀸𑀮𑀺𑀬𑀲𑀼𑀢𑁆𑀢𑀁 𑀲𑀁𑀯𑀡𑁆𑀡𑁂𑀢𑁆𑀯𑀸 𑀇𑀤𑀸𑀦𑀺 𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢𑀁 𑀲𑀁𑀯𑀡𑁆𑀡𑁂𑀦𑁆𑀢𑁄 𑀬𑀣𑀸𑀦𑀼𑀧𑀼𑀩𑁆𑀩𑀁 𑀲𑀁𑀯𑀡𑁆𑀡𑀦𑁄𑀓𑀸𑀲𑀲𑁆𑀲 𑀧𑀢𑁆𑀢𑀪𑀸𑀯𑀁 𑀯𑀺𑀪𑀸𑀯𑁂𑀢𑀼𑀁, 𑀚𑀸𑀮𑀺𑀬𑀲𑀼𑀢𑁆𑀢𑀲𑁆𑀲𑀸𑀦𑀦𑁆𑀢𑀭𑀁 𑀲𑀗𑁆𑀕𑀻𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢𑀪𑀸𑀯𑀁 𑀯𑀸 𑀧𑀓𑀸𑀲𑁂𑀢𑀼𑀁 ‘‘𑀏𑀯𑀁 𑀫𑁂 𑀲𑀼𑀢𑀁…𑀧𑁂… 𑀉𑀭𑀼𑀜𑁆𑀜𑀸𑀬𑀁 𑀯𑀺𑀳𑀭𑀢𑀻𑀢𑀺 𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢’’𑀦𑁆𑀢𑀺 𑀆𑀳. 𑀏𑀢𑀤𑁂𑀯 𑀦𑀸𑀫𑀦𑁆𑀢𑀺 𑀬𑀲𑁆𑀫𑀺𑀁 𑀭𑀝𑁆𑀞𑁂 𑀢𑀁 𑀦𑀕𑀭𑀁, 𑀢𑀲𑁆𑀲 𑀭𑀝𑁆𑀞𑀲𑁆𑀲𑀧𑀺 𑀬𑀲𑁆𑀫𑀺𑀁 𑀦𑀕𑀭𑁂 𑀪𑀕𑀯𑀸 𑀯𑀺𑀳𑀸𑀲𑀺, 𑀢𑀲𑁆𑀲 𑀦𑀕𑀭𑀲𑁆𑀲𑀧𑀺 ‘‘𑀉𑀭𑀼𑀜𑁆𑀜𑀸’’𑀢𑁆𑀯𑁂𑀯 𑀦𑀸𑀫𑀁, 𑀢𑀲𑁆𑀫𑀸 𑀉𑀭𑀼𑀜𑁆𑀜𑀸𑀬𑀦𑁆𑀢𑀺 𑀉𑀭𑀼𑀜𑁆𑀜𑀸𑀦𑀸𑀫𑀚𑀦𑀧𑀤𑁂 𑀉𑀭𑀼𑀜𑁆𑀜𑀸𑀦𑀸𑀫𑀦𑀕𑀭𑁂𑀢𑀺 𑀆𑀯𑀼𑀢𑁆𑀢𑀺𑀆𑀤𑀺𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀺𑀦𑀸 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 𑁋 𑀦 𑀲𑀩𑁆𑀩𑀢𑁆𑀣 𑀦𑀺𑀬𑀢𑀧𑀼𑀮𑁆𑀮𑀺𑀗𑁆𑀕𑀧𑀼𑀣𑀼𑀯𑀘𑀦𑀸𑀯 𑀚𑀦𑀧𑀤𑀯𑀸𑀘𑀻 𑀲𑀤𑁆𑀤𑀸, 𑀓𑀢𑁆𑀣𑀘𑀺 𑀅𑀦𑀺𑀬𑀢𑀧𑀼𑀮𑁆𑀮𑀺𑀗𑁆𑀕𑀧𑀼𑀣𑀼𑀯𑀘𑀦𑀸𑀧𑀺 𑀬𑀣𑀸 ‘‘𑀆𑀴𑀯𑀺𑀬𑀁 𑀯𑀺𑀳𑀭𑀢𑀻’’𑀢𑀺 (𑀧𑀸𑀘𑀺. 𑁮𑁪, 𑁮𑁯) 𑀓𑁂𑀘𑀺 𑀚𑀦𑀧𑀤𑀫𑁂𑀯𑀢𑁆𑀣𑀁 𑀯𑀤𑀦𑁆𑀢𑀺, 𑀢𑀁 𑀅𑀧𑀦𑁂𑀢𑀼𑀁 ‘‘𑀪𑀕𑀯𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀭𑀫𑀡𑀻𑀬𑁄𑀢𑀺 𑀫𑀦𑁄𑀳𑀭𑀪𑀽𑀫𑀺𑀪𑀸𑀕𑀢𑀸𑀬, 𑀙𑀸𑀬𑀽𑀤𑀓𑀲𑀫𑁆𑀧𑀢𑁆𑀢𑀺𑀬𑀸, 𑀚𑀦𑀯𑀺𑀯𑀺𑀢𑁆𑀢𑀢𑀸𑀬 𑀘 𑀫𑀦𑁄𑀭𑀫𑁄. 𑀫𑀺𑀕𑀸𑀦𑀁 𑀅𑀪𑀬𑀁 𑀤𑁂𑀢𑀺 𑀏𑀢𑁆𑀣𑀸𑀢𑀺 𑀫𑀺𑀕𑀤𑀸𑀬𑁄. 𑀢𑁂𑀦𑀸𑀳 ‘‘𑀲𑁄’’𑀢𑀺𑀆𑀤𑀺. 𑀘𑁂𑀮𑀁 𑀯𑀢𑁆𑀣𑀁, 𑀢𑀁 𑀦𑀢𑁆𑀣𑀺 𑀅𑀲𑁆𑀲𑀸𑀢𑀺 𑀅𑀘𑁂𑀮𑁄𑀢𑀺 𑀯𑀼𑀢𑁆𑀢𑀁 ‘‘𑀦𑀕𑁆𑀕𑀧𑀭𑀺𑀩𑁆𑀩𑀸𑀚𑀓𑁄’’𑀢𑀺. 𑀦𑀸𑀫𑀦𑁆𑀢𑀺 𑀕𑁄𑀢𑁆𑀢𑀦𑀸𑀫𑀁. 𑀢𑀧𑀦𑀁 𑀲𑀦𑁆𑀢𑀧𑀦𑀁 𑀓𑀸𑀬𑀲𑁆𑀲 𑀔𑁂𑀤𑀦𑀁 𑀢𑀧𑁄, 𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀢𑀧𑀲𑁆𑀲𑀻. 𑀬𑀲𑁆𑀫𑀸 𑀢𑀣𑀸𑀪𑀽𑀢𑁄 𑀢𑀧𑀁 𑀦𑀺𑀲𑁆𑀲𑀺𑀢𑁄, 𑀢𑀧𑁄 𑀘 𑀢𑀁 𑀦𑀺𑀲𑁆𑀲𑀺𑀢𑁄 𑀳𑁄𑀢𑀺, 𑀢𑀲𑁆𑀫𑀸 ‘‘𑀢𑀧𑀦𑀺𑀲𑁆𑀲𑀺𑀢𑀓’’𑀦𑁆𑀢𑀺 𑀆𑀳. 𑀫𑀼𑀢𑁆𑀢𑀸𑀘𑀸𑀭𑀸𑀤𑀻𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 𑀧𑀭𑀢𑁄 𑀧𑀸𑀴𑀺𑀬 (𑀤𑀻. 𑀦𑀺. 𑁧.𑁩𑁯𑁭) 𑀫𑀸𑀕𑀢𑀸 𑀳𑀢𑁆𑀣𑀸𑀧𑀮𑁂𑀔𑀦𑀸𑀤𑀬𑁄 𑀲𑀗𑁆𑀕𑀳𑀺𑀢𑀸. 𑀮𑀽𑀔𑀁 𑀨𑀭𑀼𑀲𑀁 𑀲𑀸𑀥𑀼𑀲𑀫𑁆𑀫𑀢𑀸𑀘𑀸𑀭𑀯𑀺𑀭𑀳𑀢𑁄 𑀅𑀧𑀲𑀸𑀤𑀦𑀻𑀬𑀁 𑀆𑀚𑀻𑀯𑀢𑀺 𑀯𑀢𑁆𑀢𑀢𑀻𑀢𑀺 𑀮𑀽𑀔𑀸𑀚𑀻𑀯𑀻𑀢𑀺 𑀅𑀝𑁆𑀞𑀓𑀣𑀸𑀫𑀼𑀢𑁆𑀢𑀓𑀦𑀬𑁄. 𑀉𑀧𑁆𑀧𑀡𑁆𑀟𑁂𑀢𑀻𑀢𑀺 𑀉𑀳𑀲𑀦𑀯𑀲𑁂𑀦 𑀧𑀭𑀺𑀪𑀸𑀲𑀢𑀺. 𑀉𑀧𑀯𑀤𑀢𑀻𑀢𑀺 𑀅𑀯𑀜𑁆𑀜𑀸𑀧𑀼𑀩𑁆𑀩𑀓𑀁 𑀅𑀧𑀯𑀤𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀳𑀻𑀴𑁂𑀢𑀺 𑀯𑀫𑁆𑀪𑁂𑀢𑀻’’𑀢𑀺. ‘‘𑀳𑁂𑀢𑀼𑀫𑁆𑀳𑀺 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀥𑀫𑁆𑀫𑀲𑀤𑁆𑀤𑁄 𑀳𑁂𑀢𑀼𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀓𑀸𑀭𑀡𑀲𑁆𑀲 𑀅𑀦𑀼𑀓𑀸𑀭𑀡’’𑀦𑁆𑀢𑀺. 𑀢𑀣𑀸𑀯𑀼𑀢𑁆𑀢𑀲𑀤𑁆𑀤𑀢𑁆𑀣𑁄𑀬𑁂𑀯𑁂𑀢𑁆𑀣 𑀓𑀸𑀭𑀡𑀲𑀤𑁆𑀤𑀲𑁆𑀲 𑀳𑁂𑀢𑀼𑀪𑀸𑀯𑀢𑁄. 𑀅𑀢𑁆𑀣𑀯𑀲𑀸 𑀧𑀬𑀼𑀢𑁆𑀢𑁄 𑀳𑀺 𑀲𑀤𑁆𑀤𑀧𑀬𑁄𑀕𑁄. 𑀲𑁄𑀬𑁂𑀯 𑀘 𑀲𑀤𑁆𑀤𑀢𑁆𑀣𑁄 𑀧𑀭𑁂𑀳𑀺 𑀯𑀼𑀘𑁆𑀘𑀫𑀸𑀦𑁄 𑀅𑀦𑀼𑀓𑀸𑀭𑀡𑀁 𑀢𑀤𑀦𑀼𑀭𑀽𑀧𑀁 𑀢𑀲𑁆𑀲𑀤𑀺𑀲𑀁 𑀯𑀸 𑀢𑀢𑁄 𑀧𑀘𑁆𑀙𑀸 𑀯𑀸 𑀯𑀼𑀢𑁆𑀢𑀓𑀸𑀭𑀡𑀪𑀸𑀯𑀢𑁄. 𑀧𑀭𑁂𑀳𑀻𑀢𑀺 𑀬𑁂𑀲𑀁 𑀢𑀼𑀫𑁆𑀳𑁂𑀳𑀺 𑀇𑀤𑀁 𑀯𑀼𑀢𑁆𑀢𑀁, 𑀢𑁂𑀳𑀺 𑀧𑀭𑁂𑀳𑀺. 𑀯𑀼𑀢𑁆𑀢𑀓𑀸𑀭𑀡𑁂𑀦𑀸𑀢𑀺 𑀬𑀣𑀸 𑀢𑁂𑀳𑀺 𑀯𑀼𑀢𑁆𑀢𑀁, 𑀢𑀣𑀸 𑀘𑁂 𑀢𑀼𑀫𑁆𑀳𑁂𑀳𑀺 𑀦 𑀯𑀼𑀢𑁆𑀢𑀁, 𑀏𑀯𑀁 𑀲𑀢𑀺 𑀢𑁂𑀳𑀺 𑀯𑀼𑀢𑁆𑀢𑀓𑀸𑀭𑀡𑁂𑀦 𑀲𑀓𑀸𑀭𑀡𑁄 𑀳𑀼𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀯𑀸𑀤𑁄 𑀯𑀸 𑀢𑀢𑁄 𑀧𑀭𑀁 𑀢𑀲𑁆𑀲 𑀅𑀦𑀼𑀯𑀸𑀤𑁄 𑀯𑀸 𑀓𑁄𑀘𑀺 𑀅𑀧𑁆𑀧𑀫𑀢𑁆𑀢𑀓𑁄𑀧𑀺 𑀯𑀺𑀜𑁆𑀜𑀽𑀳𑀺 𑀕𑀭𑀳𑀺𑀢𑀩𑁆𑀩𑀁 𑀓𑀸𑀭𑀡𑀁 𑀞𑀸𑀦𑀁 𑀦𑀸𑀕𑀘𑁆𑀙𑁂𑀬𑁆𑀬, 𑀓𑀺𑀫𑁂𑀯𑀁 𑀦𑀸𑀕𑀘𑁆𑀙𑀢𑀻𑀢𑀺 𑀬𑁄𑀚𑀦𑀸. ‘‘𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀢𑀤𑁂𑀯𑀢𑁆𑀣𑀁 𑀲𑀗𑁆𑀔𑁂𑀧𑀢𑁄 𑀤𑀲𑁆𑀲𑁂𑀢𑀺.

𑁩𑁮𑁨. 𑀇𑀤𑀸𑀦𑀺 𑀬𑀁 𑀯𑀺𑀪𑀚𑁆𑀚𑀯𑀸𑀤𑀁 𑀲𑀦𑁆𑀥𑀸𑀬 𑀪𑀕𑀯𑀢𑀸 ‘‘𑀦 𑀫𑁂𑀢𑁂 𑀯𑀼𑀢𑁆𑀢𑀯𑀸𑀤𑀺𑀦𑁄’’𑀢𑀺 𑀲𑀗𑁆𑀔𑁂𑀧𑁂𑀦 𑀯𑀢𑁆𑀯𑀸 𑀢𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀇𑀥𑀸𑀳𑀁 𑀓𑀲𑁆𑀲𑀧𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀁 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀥𑁂𑀓𑀘𑁆𑀘𑁄’’𑀢𑀺𑀆𑀤𑀺𑀫𑀸𑀳. 𑀪𑀕𑀯𑀸 𑀳𑀺 𑀦𑀺𑀭𑀢𑁆𑀣𑀓𑀁 𑀅𑀦𑀼𑀧𑀲𑀫𑀲𑀁𑀯𑀢𑁆𑀢𑀦𑀺𑀓𑀁 𑀓𑀸𑀬𑀓𑀺𑀮𑀫𑀣𑀁 ‘‘𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑁄 𑀤𑀼𑀓𑁆𑀔𑁄 𑀅𑀦𑀭𑀺𑀬𑁄 𑀅𑀦𑀢𑁆𑀣𑀲𑀁𑀳𑀺𑀢𑁄’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁫.𑁧𑁦𑁮𑁧; 𑀫𑀳𑀸𑀯. 𑁧𑁩). 𑀕𑀭𑀳𑀢𑀺, 𑀲𑀸𑀢𑁆𑀣𑀓𑀁 𑀧𑀦 𑀉𑀧𑀲𑀫𑀲𑀁𑀯𑀢𑁆𑀢𑀦𑀺𑀓𑀁 𑀓𑀸𑀬𑀓𑀺𑀮𑀫𑀣𑀁 ‘‘𑀆𑀭𑀜𑁆𑀜𑀺𑀓𑁄 𑀳𑁄𑀢𑀺, 𑀧𑀁𑀲𑀼𑀓𑀽𑀮𑀺𑀓𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁫.𑁧𑁮𑁧, 𑁧𑁮𑁨; 𑀧𑀭𑀺. 𑁩𑁨𑁫) 𑀯𑀡𑁆𑀡𑁂𑀢𑀺. 𑀅𑀧𑁆𑀧𑀧𑀼𑀜𑁆𑀜𑀢𑀸𑀬𑀸𑀢𑀺 𑀅𑀧𑀼𑀜𑁆𑀜𑀢𑀸𑀬. 𑀅𑀧𑁆𑀧𑀲𑀤𑁆𑀤𑁄 𑀘𑁂𑀢𑁆𑀣 ‘‘𑀤𑁆𑀯𑀢𑁆𑀢𑀺𑀙𑀤𑀦𑀲𑁆𑀲 𑀧𑀭𑀺𑀬𑀸𑀬𑀁 𑀅𑀧𑁆𑀧𑀳𑀭𑀺𑀢𑁂 𑀞𑀺𑀢𑁂𑀦 𑀅𑀥𑀺𑀝𑁆𑀞𑀸𑀢𑀩𑁆𑀩’’𑀦𑁆𑀢𑀺𑀆𑀤𑀻𑀲𑀼 (𑀧𑀸𑀘𑀺. 𑁧𑁩𑁫) 𑀯𑀺𑀬 𑀅𑀪𑀸𑀯𑀢𑁆𑀣𑁄. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀪𑀸𑀯𑀢𑁄 𑀓𑀫𑁆𑀫𑀨𑀮𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁂𑀦 ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁧𑁭𑁧; 𑀫. 𑀦𑀺. 𑁧.𑁪𑁪𑁫; 𑁨.𑁯𑁪, 𑁨𑁨𑁫; 𑁩.𑁯𑁧, 𑁧𑁧𑁬, 𑁧𑁩𑁬; 𑀲𑀁. 𑀦𑀺. 𑁩.𑁨𑁧𑁦; 𑀅. 𑀦𑀺. 𑁩.𑁧𑁧𑁮; 𑁧𑁦.𑁧𑁭𑁬; 𑀥. 𑀲. 𑁧𑁨𑁨𑁧; 𑀯𑀺𑀪. 𑁯𑁦𑁭) 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀧𑀼𑀭𑀓𑁆𑀔𑀢𑁆𑀯𑀸 𑀚𑀻𑀯𑀺𑀢𑀯𑀼𑀢𑁆𑀢𑀺𑀳𑁂𑀢𑀼 𑀢𑀣𑀸 𑀢𑀣𑀸 𑀤𑀼𑀘𑁆𑀘𑀭𑀺𑀢𑀧𑀽𑀭𑀡𑀁 𑀲𑀦𑁆𑀥𑀸𑀬 ‘‘𑀢𑀻𑀡𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑀧𑀽𑀭𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁.

𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬𑀸𑀢𑀺 𑀫𑀢𑁆𑀢𑀢𑁄 𑀅𑀢𑀺𑀭𑁂𑀓𑀁. ‘‘𑀪𑀺𑀬𑁆𑀬𑁄𑀲𑁄’’𑀢𑀺 𑀳𑀺 𑀇𑀤𑀁 𑀪𑀺𑀬𑁆𑀬𑁄𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑀁 𑀦𑁂𑀧𑀸𑀢𑀺𑀓𑀁. 𑀅𑀦𑁂𑀲𑀦𑀯𑀲𑁂𑀦𑀸𑀢𑀺 𑀓𑁄𑀳𑀜𑁆𑀜𑁂 𑀞𑀢𑁆𑀯𑀸 𑀅𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀺𑀘𑁆𑀙𑀸𑀬 𑀬𑀣𑀸 𑀢𑀣𑀸 𑀢𑀧𑀁 𑀓𑀢𑁆𑀯𑀸 𑀅𑀦𑁂𑀲𑀺𑀢𑀩𑁆𑀩𑀫𑁂𑀲𑀦𑀸𑀯𑀲𑁂𑀦 𑀫𑀺𑀘𑁆𑀙𑀸𑀚𑀻𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀚𑀻𑀯𑀺𑀢𑀯𑀼𑀢𑁆𑀢𑀺𑀳𑁂𑀢𑀼 𑀢𑀻𑀡𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑀧𑀽𑀭𑁂𑀢𑁆𑀯𑀸.𑀇𑀫𑁂 𑀤𑁆𑀯𑁂𑀢𑀺 ‘‘𑀅𑀧𑁆𑀧𑀧𑀼𑀜𑁆𑀜𑁄, 𑀧𑀼𑀜𑁆𑀜𑀯𑀸’’𑀢𑀺 𑀘 𑀯𑀼𑀢𑁆𑀢𑁂 𑀤𑀼𑀘𑁆𑀘𑀭𑀺𑀢𑀓𑀸𑀭𑀺𑀦𑁄 𑀤𑁆𑀯𑁂 𑀧𑀼𑀕𑁆𑀕𑀮𑁂.

𑀤𑀼𑀢𑀺𑀬𑀦𑀬𑁂 𑀇𑀫𑁂 𑀤𑁆𑀯𑁂𑀢𑀺 ‘‘𑀅𑀧𑁆𑀧𑀧𑀼𑀜𑁆𑀜𑁄, 𑀧𑀼𑀜𑁆𑀜𑀯𑀸’’𑀢𑀺 𑀘 𑀯𑀼𑀢𑁆𑀢𑁂 𑀲𑀼𑀘𑀭𑀺𑀢𑀓𑀸𑀭𑀺𑀦𑁄 𑀤𑁆𑀯𑁂 𑀧𑀼𑀕𑁆𑀕𑀮𑁂.

𑀧𑀞𑀫𑀤𑀼𑀢𑀺𑀬𑀦𑀬𑁂𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑀢𑀺𑀬𑀘𑀢𑀼𑀢𑁆𑀣𑀦𑀬𑁂𑀲𑀼𑀧𑀺 𑀬𑀣𑀸𑀓𑁆𑀓𑀫𑀁 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀞𑀫𑀢𑀢𑀺𑀬𑀦𑀬𑁂𑀲𑀼 𑀘𑁂𑀢𑁆𑀣 𑀅𑀳𑁂𑀢𑀼𑀓𑀅𑀓𑀺𑀭𑀺𑀬𑀯𑀸𑀤𑀺𑀦𑁄. 𑀤𑀼𑀢𑀺𑀬𑀘𑀢𑀼𑀢𑁆𑀣𑀦𑀬𑁂𑀲𑀼 𑀧𑀦 𑀓𑀫𑁆𑀫𑀓𑀺𑀭𑀺𑀬𑀯𑀸𑀤𑀺𑀦𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀧𑁆𑀧𑀤𑀼𑀓𑁆𑀔𑀯𑀺𑀳𑀸𑀭𑀻𑀢𑀺 𑀅𑀧𑁆𑀧𑀓𑀁 𑀤𑀼𑀓𑁆𑀔𑁂𑀦 𑀯𑀺𑀳𑀸𑀭𑀻. 𑀩𑀸𑀳𑀺𑀭𑀓𑀸𑀘𑀸𑀭𑀬𑀼𑀢𑁆𑀢𑁄𑀢𑀺 𑀲𑀸𑀲𑀦𑀸𑀘𑀸𑀭𑀢𑁄 𑀩𑀸𑀳𑀺𑀭𑀓𑁂𑀦 𑀢𑀺𑀢𑁆𑀣𑀺𑀬𑀸𑀘𑀸𑀭𑁂𑀦 𑀬𑀼𑀢𑁆𑀢𑁄. 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑁆𑀯𑀸𑀢𑀺 𑀅𑀥𑀫𑁆𑀫𑀺𑀓𑁂𑀦 𑀅𑀦𑁂𑀲𑀦𑀸𑀬 𑀮𑀤𑁆𑀥𑀧𑀘𑁆𑀘𑀬𑀦𑀺𑀫𑀺𑀢𑁆𑀢𑁂𑀦 𑀲𑀼𑀔𑁂𑀦 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑁆𑀯𑀸 𑀲𑀼𑀔𑀁 𑀓𑀢𑁆𑀯𑀸, ‘‘𑀲𑀼𑀔𑁂 𑀞𑀧𑁂𑀢𑁆𑀯𑀸’’𑀢𑀺 𑀅𑀥𑀼𑀦𑀸 𑀧𑀸𑀞𑁄.

‘‘𑀦 𑀤𑀸𑀦𑀺 𑀫𑀬𑀸 𑀲𑀤𑀺𑀲𑁄 𑀅𑀢𑁆𑀣𑀻’’𑀢𑀺𑀆𑀤𑀺𑀦𑀸 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑀸𑀦𑀁 𑀢𑀺𑀲𑁆𑀲𑀦𑁆𑀦𑀁 𑀫𑀜𑁆𑀜𑀦𑀸𑀦𑀁 𑀯𑀲𑁂𑀦 𑀤𑀼𑀘𑁆𑀘𑀭𑀺𑀢𑀧𑀽𑀭𑀡𑀫𑀸𑀳. 𑀮𑀸𑀪𑀲𑀓𑁆𑀓𑀸𑀭𑀁 𑀯𑀸 𑀉𑀧𑁆𑀧𑀸𑀤𑁂𑀦𑁆𑀢𑁄 𑀢𑀻𑀡𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑀧𑀼𑀭𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀲𑁂𑀦𑀸𑀢𑀺 ‘‘𑀦𑀢𑁆𑀣𑀺 𑀓𑀸𑀫𑁂𑀲𑀼 𑀤𑁄𑀲𑁄’’𑀢𑀺 𑀏𑀯𑀁 𑀧𑀯𑀢𑁆𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀲𑁂𑀦. 𑀧𑀭𑀺𑀩𑁆𑀩𑀸𑀚𑀺𑀓𑀸𑀬𑀸𑀢𑀺 𑀩𑀸𑀳𑀺𑀭𑀧𑀩𑁆𑀩𑀚𑁆𑀚𑀫𑀼𑀧𑀕𑀢𑀸𑀬 𑀢𑀸𑀧𑀲𑀤𑀸𑀭𑀺𑀓𑀸𑀬, 𑀙𑀦𑁆𑀦𑀧𑀭𑀺𑀩𑁆𑀩𑀸𑀚𑀺𑀓𑀸𑀬 𑀘. ‘‘𑀅𑀧𑀭𑁄’’𑀢𑀺 𑀏𑀢𑁆𑀣𑀸𑀧𑀺 𑀳𑀺 ‘‘𑀢𑀸𑀧𑀲𑁄 𑀯𑀸 𑀙𑀦𑁆𑀦𑀧𑀭𑀺𑀩𑁆𑀩𑀸𑀚𑀓𑁄 𑀯𑀸’’𑀢𑀺 𑀅𑀥𑀺𑀓𑀸𑀭𑁄. 𑀤𑀳𑀭𑀸𑀬𑀸𑀢𑀺 𑀢𑀭𑀼𑀡𑀸𑀬. 𑀫𑀼𑀤𑀼𑀓𑀸𑀬𑀸𑀢𑀺 𑀲𑀼𑀔𑀼𑀫𑀸𑀮𑀸𑀬. 𑀮𑁄𑀫𑀲𑀸𑀬𑀸𑀢𑀺 𑀢𑀦𑀼𑀢𑀫𑁆𑀩𑀮𑁄𑀫𑀢𑀸𑀬 𑀅𑀧𑁆𑀧𑀮𑁄𑀫𑀯𑀢𑀺𑀬𑀸. 𑀮𑁄𑀫𑀁 𑀏𑀢𑀺𑀲𑁆𑀲𑀸 𑀅𑀢𑁆𑀣𑀻𑀢𑀺 𑀮𑁄𑀫𑀲𑀸. 𑀮𑀺𑀗𑁆𑀕𑀢𑁆𑀢𑀬𑁂𑀧𑀺 𑀳𑀺 𑀲-𑀧𑀘𑁆𑀘𑀬𑁂𑀦 𑀧𑀤𑀲𑀺𑀤𑁆𑀥𑀺𑀫𑀺𑀘𑁆𑀙𑀦𑁆𑀢𑀺 𑀲𑀤𑁆𑀤𑀯𑀺𑀤𑀽. 𑀓𑀸𑀫𑁂𑀲𑀽𑀢𑀺 𑀯𑀢𑁆𑀣𑀼𑀓𑀸𑀫𑁂𑀲𑀼. 𑀧𑀸𑀢𑀩𑁆𑀩𑀢𑀦𑁆𑀢𑀺 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀧𑀭𑀺𑀪𑁄𑀕𑀢𑁆𑀣𑁄 𑀳𑁂𑀢𑁆𑀣 𑀧𑀸-𑀲𑀤𑁆𑀤𑁄, 𑀢𑀩𑁆𑀩𑀲𑀤𑁆𑀤𑁄 𑀘 𑀪𑀸𑀯𑀲𑀸𑀥𑀦𑁄. 𑀢𑀸-𑀲𑀤𑁆𑀤𑁄 𑀧𑀦 𑀲𑀓𑀢𑁆𑀣𑁂 𑀬𑀣𑀸 ‘‘𑀤𑁂𑀯𑀢𑀸’’𑀢𑀺, 𑀧𑀸𑀢𑀩𑁆𑀩𑀢𑀦𑁆𑀢𑀺 𑀯𑀸 𑀧𑀭𑀺𑀪𑀼𑀜𑁆𑀚𑀦𑀓𑀢𑀁, 𑀓𑀢𑁆𑀢𑀼𑀲𑀸𑀥𑀦𑁄 𑀘𑁂𑀢𑁆𑀣 𑀢𑀩𑁆𑀩𑀲𑀤𑁆𑀤𑁄 𑀬𑀣𑀸 𑀉𑀧𑀭𑀺𑀧𑀡𑁆𑀡𑀸𑀲𑀓𑁂 𑀧𑀜𑁆𑀘𑀢𑁆𑀢𑀬𑀲𑀼𑀢𑁆𑀢𑁂 ‘‘𑀬𑁂 𑀳𑀺 𑀓𑁂𑀘𑀺 𑀪𑀺𑀓𑁆𑀔𑀯𑁂 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀩𑁆𑀩𑀲𑀗𑁆𑀔𑀸𑀭𑀫𑀢𑁆𑀢𑁂𑀦 𑀏𑀢𑀲𑁆𑀲 𑀆𑀬𑀢𑀦𑀲𑁆𑀲 𑀉𑀧𑀲𑀫𑁆𑀧𑀤𑀁 𑀧𑀜𑁆𑀜𑀧𑁂𑀦𑁆𑀢𑀻’’𑀢𑀺 (𑀫. 𑀦𑀺. 𑁩.𑁨𑁪) 𑀢𑀣𑀸 𑀳𑀺 𑀢𑀤𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁 ‘‘𑀯𑀺𑀚𑀸𑀦𑀸𑀢𑀻𑀢𑀺 𑀯𑀺𑀜𑁆𑀜𑀸𑀢𑀩𑁆𑀩𑀁, 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀫𑀢𑁆𑀢𑁂𑀦 𑀧𑀜𑁆𑀘𑀤𑁆𑀯𑀸𑀭𑀺𑀓𑀲𑀜𑁆𑀜𑀸𑀧𑀯𑀢𑁆𑀢𑀺𑀫𑀢𑁆𑀢𑁂𑀦𑀸𑀢𑀺 𑀅𑀬𑀜𑁆𑀳𑀺 𑀏𑀢𑁆𑀣 𑀅𑀢𑁆𑀣𑁄’’𑀢𑀺, (𑀫. 𑀦𑀺. 𑀅𑀝𑁆𑀞. 𑁩.𑁨𑁪) 𑀢𑀝𑁆𑀝𑀻𑀓𑀸𑀬𑀜𑁆𑀘 ‘‘𑀬𑀣𑀸 𑀦𑀺𑀬𑁆𑀬𑀦𑁆𑀢𑀻𑀢𑀺 𑀦𑀺𑀬𑁆𑀬𑀸𑀦𑀺𑀓𑀸𑀢𑀺 𑀩𑀳𑀼𑀮𑀁 𑀯𑀘𑀦𑀢𑁄 𑀓𑀢𑁆𑀢𑀼𑀲𑀸𑀥𑀦𑁄 𑀦𑀺𑀬𑁆𑀬𑀸𑀦𑀺𑀓𑀲𑀤𑁆𑀤𑁄, 𑀏𑀯𑀁 𑀇𑀥 𑀯𑀺𑀜𑁆𑀜𑀸𑀢𑀩𑁆𑀩𑀲𑀤𑁆𑀤𑁄𑀢𑀺 𑀆𑀳 ‘𑀯𑀺𑀚𑀸𑀦𑀸𑀢𑀻𑀢𑀺 𑀯𑀺𑀜𑁆𑀜𑀸𑀢𑀩𑁆𑀩’𑀦𑁆𑀢𑀺,’’ 𑀢𑀸-𑀲𑀤𑁆𑀤𑁄 𑀧𑀦 𑀪𑀸𑀯𑁂. 𑀅𑀲𑁆𑀲𑀸𑀤𑀺𑀬𑀫𑀸𑀦𑀧𑀓𑁆𑀔𑁂 𑀞𑀺𑀢𑁄 𑀓𑀺𑀮𑁂𑀲𑀓𑀸𑀫𑁄𑀧𑀺 𑀯𑀢𑁆𑀣𑀼𑀓𑀸𑀫𑀧𑀭𑀺𑀬𑀸𑀧𑀦𑁆𑀦𑁄𑀬𑁂𑀯, 𑀢𑀲𑁆𑀫𑀸 𑀢𑁂𑀲𑀼 𑀬𑀣𑀸𑀭𑀼𑀘𑀺 𑀧𑀭𑀺𑀪𑀼𑀜𑁆𑀚𑀦𑁆𑀢𑁄𑀢𑀺 𑀅𑀢𑁆𑀣𑁄.

𑀇𑀤𑀦𑁆𑀢𑀺 𑀦𑀬𑀘𑀢𑀼𑀓𑁆𑀓𑀯𑀲𑁂𑀦 𑀯𑀼𑀢𑁆𑀢𑀁 𑀅𑀢𑁆𑀣𑀧𑁆𑀧𑀪𑁂𑀤𑀯𑀺𑀪𑀚𑀦𑀁. ‘‘𑀢𑀺𑀢𑁆𑀣𑀺𑀬𑀯𑀲𑁂𑀦 𑀆𑀕𑀢𑀁 𑀅𑀝𑁆𑀞𑀓𑀣𑀸𑀬𑀁 𑀢𑀣𑀸 𑀯𑀺𑀪𑀢𑁆𑀢𑀢𑁆𑀢𑀸’’𑀢𑀺 (𑀤𑀻. 𑀦𑀺. 𑀝𑀻. 𑁧.𑁩𑁮𑁨) 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑀁, 𑀢𑀣𑀸𑀬𑁂𑀯 𑀧𑀦 𑀧𑀸𑀴𑀺𑀬𑀫𑁆𑀧𑀺 𑀯𑀺𑀪𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀸𑀲𑀦𑁂𑀧𑀻𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂𑀧𑀺.

𑀓𑀣𑀁 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀏𑀓𑀘𑁆𑀘𑁄 𑀳𑀻’’𑀢𑀺𑀆𑀤𑀺. 𑀬𑀲𑁆𑀫𑀸 𑀦 𑀮𑀪𑀢𑀺, 𑀢𑀲𑁆𑀫𑀸 𑀅𑀦𑁂𑀲𑀦𑀁 𑀓𑀢𑁆𑀯𑀸𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. 𑀅𑀭𑀳𑀢𑁆𑀢𑀁 𑀯𑀸 𑀅𑀢𑁆𑀢𑀦𑀺 𑀅𑀲𑀦𑁆𑀢𑀁 ‘‘𑀅𑀢𑁆𑀣𑀺 𑀫𑁂’’𑀢𑀺 𑀬𑀣𑀸𑀭𑀼𑀢𑀁 𑀧𑀝𑀺𑀚𑀸𑀦𑀺𑀢𑁆𑀯𑀸. 𑀲𑀸𑀫𑀦𑁆𑀢𑀚𑀧𑁆𑀧𑀦𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀇𑀭𑀺𑀬𑀸𑀧𑀣𑀲𑀦𑁆𑀦𑀺𑀲𑁆𑀲𑀺𑀢𑀲𑀗𑁆𑀔𑀸𑀢𑀸𑀦𑀺 𑀢𑀻𑀡𑀺 𑀯𑀸 𑀓𑀼𑀳𑀦𑀯𑀢𑁆𑀣𑀽𑀦𑀺 𑀧𑀝𑀺𑀲𑁂𑀯𑀺𑀢𑁆𑀯𑀸.

𑀢𑀸𑀤𑀺𑀲𑁄𑀯𑀸𑀢𑀺 𑀥𑀼𑀢𑀗𑁆𑀕 (𑀯𑀺𑀲𑀼𑀤𑁆𑀥𑀺. 𑁧.𑁨𑁨; 𑀣𑁂𑀭𑀕𑀸. 𑀅𑀝𑁆𑀞. 𑁨.𑁮𑁪𑁪 𑀆𑀤𑀬𑁄) 𑀲𑀫𑀸𑀤𑀸𑀦𑀯𑀲𑁂𑀦 𑀮𑀽𑀔𑀸𑀚𑀻𑀯𑀻 𑀏𑀯. 𑀅𑀦𑁂𑀲𑀦𑀯𑀲𑁂𑀦𑀸𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀁. ‘‘𑀅𑀭𑀳𑀢𑁆𑀢𑀧𑀝𑀺𑀚𑀸𑀦𑀦𑁂𑀦𑀸’’𑀢𑀺𑀆𑀤𑀺𑀧𑀺 𑀳𑀺 𑀯𑀢𑁆𑀢𑀩𑁆𑀩𑀁.

𑀤𑀼𑀮𑁆𑀮𑀪𑀲𑀼𑀔𑁄 𑀪𑀯𑀺𑀲𑁆𑀲𑀸𑀫𑀺 𑀤𑀼𑀕𑁆𑀕𑀢𑀻𑀲𑀼 𑀉𑀧𑀧𑀢𑁆𑀢𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀲𑀓𑁆𑀓𑁄𑀦𑁆𑀢𑁄𑀢𑀺 𑀏𑀢𑁆𑀣 𑀅𑀦𑁆𑀢𑀲𑀤𑁆𑀤𑁄 𑀪𑀸𑀯𑀮𑀓𑁆𑀔𑀡𑁂, 𑀅𑀲𑀓𑁆𑀓𑀼𑀡𑀫𑀸𑀦𑁂 𑀲𑀢𑀻𑀢𑀺 𑀅𑀢𑁆𑀣𑁄.

𑁩𑁮𑁩. 𑀅𑀲𑀼𑀓𑀝𑁆𑀞𑀸𑀦𑀢𑁄𑀢𑀺 𑀅𑀲𑀼𑀓𑀪𑀯𑀢𑁄. 𑀆𑀕𑀢𑀸𑀢𑀺 𑀉𑀧𑀧𑀢𑁆𑀢𑀺𑀯𑀲𑁂𑀦 𑀇𑀥𑀸𑀕𑀢𑀸. 𑀇𑀤𑀸𑀦𑀺 𑀕𑀦𑁆𑀢𑀩𑁆𑀩𑀝𑁆𑀞𑀸𑀦𑀜𑁆𑀘𑀸𑀢𑀺 𑀉𑀧𑀧𑀢𑁆𑀢𑀺𑀯𑀲𑁂𑀦𑁂𑀯 𑀆𑀬𑀢𑀺𑀁 𑀕𑀫𑀺𑀢𑀩𑁆𑀩𑀪𑀯𑀜𑁆𑀘. 𑀢𑀢𑁄𑀢𑀺 𑀅𑀢𑀻𑀢𑀪𑀯𑀢𑁄. 𑀧𑀼𑀦 𑀉𑀧𑀧𑀢𑁆𑀢𑀺𑀦𑁆𑀢𑀺 𑀆𑀬𑀢𑀺𑀁 𑀅𑀦𑀦𑁆𑀢𑀭𑀪𑀯𑁂 𑀧𑀼𑀦 𑀉𑀧𑀧𑀢𑁆𑀢𑀺𑀁, 𑀢𑀢𑁄 𑀅𑀦𑀦𑁆𑀢𑀭𑀪𑀯𑁂𑀧𑀺 𑀧𑀼𑀦 𑀉𑀧𑀧𑀢𑁆𑀢𑀺𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 𑀦𑀺𑀩𑁆𑀩𑀢𑁆𑀢𑀺𑀁. 𑀓𑁂𑀦 𑀓𑀸𑀭𑀡𑁂𑀦 𑀕𑀭𑀳𑀺𑀲𑁆𑀲𑀸𑀫𑀻𑀢𑀺 𑀏𑀢𑁆𑀣 𑀬𑀣𑀸𑀪𑀽𑀢𑀫𑀚𑀸𑀦𑀦𑁆𑀢𑁄 𑀇𑀘𑁆𑀙𑀸𑀤𑁄𑀲𑀯𑀲𑁂𑀦 𑀬𑀁 𑀓𑀺𑀜𑁆𑀘𑀺 𑀕𑀭𑀳𑁂𑀬𑁆𑀬, 𑀦 𑀢𑀣𑀸 𑀘𑀸𑀳𑀁, 𑀅𑀳𑀁 𑀧𑀦 𑀬𑀣𑀸𑀪𑀽𑀢𑀁 𑀚𑀸𑀦𑀦𑁆𑀢𑁄 𑀲𑀩𑁆𑀩𑀫𑁆𑀧𑁂𑀢𑀁 𑀓𑁂𑀦 𑀓𑀸𑀭𑀡𑁂𑀦 𑀕𑀭𑀳𑀺𑀲𑁆𑀲𑀸𑀫𑀺, 𑀲𑀩𑁆𑀩𑀲𑁆𑀲𑀧𑁂𑀢𑀲𑁆𑀲 𑀢𑀧𑀲𑁆𑀲 𑀕𑀭𑀳𑀸𑀬 𑀓𑀸𑀭𑀡𑀁 𑀦𑀢𑁆𑀣𑀻𑀢𑀺 𑀇𑀫𑀫𑀥𑀺𑀧𑁆𑀧𑀸𑀬𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀕𑀭𑀳𑀺𑀢𑀩𑁆𑀩𑀫𑁂𑀯𑀸’’𑀢𑀺𑀆𑀤𑀺𑀫𑀸𑀳. 𑀪𑀡𑁆𑀟𑀺𑀓𑀦𑁆𑀢𑀺 𑀧𑀼𑀝𑀪𑀡𑁆𑀟𑀺𑀓𑀁. 𑀉𑀧𑀫𑀸𑀧𑀓𑁆𑀔𑁂 𑀧𑀭𑀺𑀲𑀼𑀤𑁆𑀥𑀢𑀸𑀬 𑀥𑁄𑀢𑀁, 𑀢𑀣𑀸 𑀅𑀥𑁄𑀢𑀜𑁆𑀘, 𑀉𑀧𑀫𑁂𑀬𑁆𑀬𑀧𑀓𑁆𑀔𑁂 𑀧𑀦 𑀧𑀲𑀁𑀲𑀺𑀢𑀩𑁆𑀩𑀕𑀼𑀡𑀢𑀸𑀬 𑀥𑁄𑀢𑀁 𑀧𑀭𑀺𑀲𑀼𑀤𑁆𑀥𑀁, 𑀢𑀣𑀸 𑀅𑀥𑁄𑀢𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀢𑀫𑀢𑁆𑀣𑀦𑁆𑀢𑀺 𑀕𑀭𑀳𑀺𑀢𑀩𑁆𑀩𑀲𑁆𑀲 𑀘𑁂𑀯 𑀕𑀭𑀳𑀡𑀁, 𑀧𑀲𑀁𑀲𑀺𑀢𑀩𑁆𑀩𑀲𑁆𑀲 𑀘 𑀧𑀲𑀁𑀲𑀦𑀁.

𑁩𑁮𑁪. 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑁆𑀲, 𑀲𑀫𑁆𑀧𑀭𑀸𑀬𑀺𑀓𑀲𑁆𑀲 𑀘 𑀅𑀢𑁆𑀣𑀲𑁆𑀲 𑀲𑀸𑀥𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀕𑀭𑀼𑀓𑀢𑁆𑀢𑀸 𑀦 𑀓𑁄𑀘𑀺 𑀦 𑀲𑀸𑀥𑀽𑀢𑀺 𑀯𑀤𑀢𑀺. 𑀧𑀜𑁆𑀘𑀯𑀺𑀥𑀁 𑀯𑁂𑀭𑀦𑁆𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀧𑀜𑁆𑀘𑀯𑀺𑀥𑀯𑁂𑀭𑀁. 𑀢𑀜𑁆𑀳𑀺 𑀧𑀜𑁆𑀘𑀯𑀺𑀥𑀲𑁆𑀲 𑀲𑀻𑀮𑀲𑁆𑀲 𑀧𑀝𑀺𑀧𑀓𑁆𑀔𑀪𑀸𑀯𑀢𑁄, 𑀲𑀢𑁆𑀢𑀸𑀦𑀁 𑀯𑁂𑀭𑀳𑁂𑀢𑀼𑀢𑀸𑀬 𑀘 ‘‘𑀯𑁂𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀢𑁄 𑀏𑀯 𑀘 𑀢𑀁 𑀦 𑀓𑁄𑀘𑀺 ‘‘𑀲𑀸𑀥𑀽’’𑀢𑀺 𑀯𑀤𑀢𑀺 𑀢𑀣𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀅𑀢𑁆𑀣𑀸𑀦𑀫𑀲𑀸𑀥𑀦𑀢𑁄, 𑀲𑀢𑁆𑀢𑀸𑀦𑀁 𑀲𑀸𑀥𑀼𑀪𑀸𑀯𑀲𑁆𑀲 𑀤𑀽𑀲𑀦𑀢𑁄 𑀘. 𑀦 𑀦𑀺𑀭𑀼𑀦𑁆𑀥𑀺𑀢𑀩𑁆𑀩𑀦𑁆𑀢𑀺 𑀭𑀽𑀧𑀕𑁆𑀕𑀳𑀡𑁂 𑀦 𑀦𑀺𑀯𑀸𑀭𑁂𑀢𑀩𑁆𑀩𑀁. 𑀤𑀲𑁆𑀲𑀦𑀻𑀬𑀤𑀲𑁆𑀲𑀦𑀢𑁆𑀣𑁄 𑀳𑀺 𑀘𑀓𑁆𑀔𑀼𑀧𑀝𑀺𑀮𑀸𑀪𑁄𑀢𑀺 𑀢𑁂𑀲𑀫𑀥𑀺𑀧𑁆𑀧𑀸𑀬𑁄. 𑀅𑀬𑀫𑁂𑀯 𑀦𑀬𑁄 𑀲𑁄𑀢𑀸𑀤𑀻𑀲𑀼𑀧𑀺. 𑀬𑀤𑀕𑁆𑀕𑁂𑀦 𑀢𑁂𑀲𑀁 𑀧𑀜𑁆𑀘𑀤𑁆𑀯𑀸𑀭𑁂 𑀅𑀲𑀁𑀯𑀭𑁄 𑀲𑀸𑀥𑀼, 𑀢𑀤𑀕𑁆𑀕𑁂𑀦 𑀢𑀢𑁆𑀣 𑀲𑀁𑀯𑀭𑁄 𑀦 𑀲𑀸𑀥𑀽𑀢𑀺 𑀅𑀥𑀺𑀧𑁆𑀧𑀸𑀬𑁄 𑀳𑁄𑀢𑀻𑀢𑀺 𑀆𑀳 ‘‘𑀧𑀼𑀦…𑀧𑁂… 𑀅𑀲𑀁𑀯𑀭’’𑀦𑁆𑀢𑀺.

𑀅𑀬𑀫𑁂𑀢𑁆𑀣 𑀅𑀝𑁆𑀞𑀓𑀣𑀸𑀢𑁄 𑀅𑀧𑀭𑁄 𑀦𑀬𑁄 𑁋 𑀬𑀁 𑀢𑁂 𑀏𑀓𑀘𑁆𑀘𑀁 𑀯𑀤𑀦𑁆𑀢𑀺 ‘‘𑀲𑀸𑀥𑀽’’𑀢𑀺 𑀢𑁂 ‘‘𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀯𑀼𑀢𑁆𑀢𑀸 𑀢𑀺𑀢𑁆𑀣𑀺𑀬𑀸 𑀬𑀁 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀸𑀤𑀺𑀁 ‘‘𑀲𑀸𑀥𑀽’’𑀢𑀺 𑀯𑀤𑀦𑁆𑀢𑀺, 𑀢𑀁 𑀫𑀬𑀁 𑀦 ‘‘𑀲𑀸𑀥𑀽’’𑀢𑀺 𑀯𑀤𑀸𑀫. 𑀬𑀁 𑀢𑁂…𑀧𑁂… ‘‘𑀦 𑀲𑀸𑀥𑀽’’𑀢𑀺 𑀬𑀁 𑀧𑀦 𑀢𑁂 𑀅𑀦𑀯𑀚𑁆𑀚𑀧𑀘𑁆𑀘𑀬𑀧𑀭𑀺𑀪𑁄𑀕𑀁, 𑀲𑀼𑀦𑀺𑀯𑀢𑁆𑀣𑀲𑀼𑀧𑀸𑀭𑀼𑀢𑀸𑀤𑀺𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀜𑁆𑀘 ‘‘𑀦 𑀲𑀸𑀥𑀽’’𑀢𑀺 𑀯𑀤𑀦𑁆𑀢𑀺, 𑀢𑀁 𑀫𑀬𑀁 ‘‘𑀲𑀸𑀥𑀽’’𑀢𑀺 𑀯𑀤𑀸𑀫𑀸𑀢𑀺.

𑀇𑀢𑀺 𑀬𑀁 𑀧𑀭𑀯𑀸𑀤𑀫𑀽𑀮𑀓𑀁 𑀘𑀢𑀼𑀓𑁆𑀓𑀁 𑀤𑀲𑁆𑀲𑀺𑀢𑀁, 𑀢𑀤𑁂𑀯 𑀧𑀼𑀦 𑀲𑀓𑀯𑀸𑀤𑀫𑀽𑀮𑀓𑀁 𑀘𑀢𑀼𑀓𑁆𑀓𑀁 𑀓𑀢𑁆𑀯𑀸 𑀤𑀲𑁆𑀲𑀺𑀢𑀦𑁆𑀢𑀺 𑀯𑀺𑀜𑁆𑀜𑀸𑀧𑁂𑀢𑀼𑀁 ‘‘𑀏𑀯’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀜𑁆𑀳𑀺 𑀓𑀺𑀜𑁆𑀘𑀺 𑀓𑁂𑀦𑀘𑀺 𑀲𑀫𑀸𑀦𑀁, 𑀢𑁂𑀦𑀧𑀺 𑀢𑀁 𑀲𑀫𑀸𑀦𑀫𑁂𑀯. 𑀬𑀜𑁆𑀘 𑀓𑀺𑀜𑁆𑀘𑀺 𑀓𑁂𑀦𑀘𑀺 𑀅𑀲𑀫𑀸𑀦𑀁, 𑀢𑁂𑀦𑀧𑀺 𑀢𑀁 𑀅𑀲𑀫𑀸𑀦𑀫𑁂𑀯𑀸𑀢𑀺 𑀆𑀳 ‘‘𑀲𑀫𑀸𑀦𑀸𑀲𑀫𑀸𑀦𑀢’’𑀦𑁆𑀢𑀺. 𑀏𑀢𑁆𑀣 𑀘 𑀲𑀫𑀸𑀦𑀢𑀦𑁆𑀢𑀺 𑀲𑀫𑀸𑀦𑀢𑀸𑀫𑀢𑁆𑀢𑀁. 𑀅𑀦𑀯𑀲𑁂𑀲𑀢𑁄 𑀳𑀺 𑀧𑀳𑀸𑀢𑀩𑁆𑀩𑀥𑀫𑁆𑀫𑀸𑀦𑀁 𑀧𑀳𑀸𑀦𑀁, 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀥𑀫𑁆𑀫𑀸𑀦𑀁 𑀉𑀧𑀲𑀫𑁆𑀧𑀸𑀤𑀦𑀜𑁆𑀘 𑀲𑀓𑀯𑀸𑀤𑁂𑀯 𑀤𑀺𑀲𑁆𑀲𑀢𑀺, 𑀦 𑀧𑀭𑀯𑀸𑀤𑁂. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑁆𑀬𑀸𑀳𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑀸𑀫𑀻’’𑀢𑀺𑀆𑀤𑀺. 𑀲𑀓𑀯𑀸𑀤𑀧𑀭𑀯𑀸𑀤𑀸𑀦𑀼𑀭𑀽𑀧𑀁 𑀯𑀼𑀢𑁆𑀢𑀦𑀬𑁂𑀦 𑀧𑀜𑁆𑀘𑀲𑀻𑀮𑀸𑀤𑀺𑀯𑀲𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀫𑀦𑀼𑀬𑀼𑀜𑁆𑀚𑀸𑀧𑀦𑀓𑀣𑀸𑀯𑀡𑁆𑀡𑀦𑀸

𑁩𑁮𑁫. 𑀅𑀦𑁆𑀢𑀫𑀺𑀢𑀺 𑀆𑀡𑀢𑁆𑀢𑀺𑀬𑀁 𑀧𑀜𑁆𑀘𑀫𑀻𑀅𑀢𑁆𑀢𑀦𑁄𑀧𑀤𑀁. 𑀮𑀤𑁆𑀥𑀺𑀁 𑀧𑀼𑀘𑁆𑀙𑀦𑁆𑀢𑁄𑀢𑀺 ‘‘𑀓𑀺𑀁 𑀲𑀫𑀡𑁄 𑀕𑁄𑀢𑀫𑁄 𑀲𑀁𑀓𑀺𑀮𑁂𑀲𑀥𑀫𑁆𑀫𑁂 𑀅𑀦𑀯𑀲𑁂𑀲𑀁 𑀧𑀳𑀸𑀬 𑀯𑀢𑁆𑀢𑀢𑀺, 𑀉𑀤𑀸𑀳𑀼 𑀧𑀭𑁂 𑀕𑀡𑀸𑀘𑀭𑀺𑀬𑀸, 𑀏𑀢𑁆𑀣 𑀢𑀸𑀯 𑀅𑀢𑁆𑀢𑀦𑁄 𑀮𑀤𑁆𑀥𑀺𑀁 𑀯𑀤𑁂𑀳𑀻’’𑀢𑀺 𑀏𑀯𑀁 𑀧𑀝𑀺𑀜𑁆𑀜𑀸𑀢𑀁 𑀲𑀺𑀤𑁆𑀥𑀦𑁆𑀢𑀁 𑀧𑀼𑀘𑁆𑀙𑀦𑁆𑀢𑁄. 𑀓𑀸𑀭𑀡𑀁 𑀧𑀼𑀘𑁆𑀙𑀦𑁆𑀢𑁄𑀢𑀺 ‘‘𑀲𑀫𑀡𑁄𑀯 𑀕𑁄𑀢𑀫𑁄 𑀲𑀁𑀓𑀺𑀮𑁂𑀲𑀥𑀫𑁆𑀫𑁂 𑀅𑀦𑀯𑀲𑁂𑀲𑀁 𑀧𑀳𑀸𑀬 𑀯𑀢𑁆𑀢𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀓𑀸𑀭𑀡𑁂𑀦𑀧𑀺 𑀏𑀢𑀫𑀢𑁆𑀣𑀁 𑀕𑀸𑀳𑀬𑀸’’𑀢𑀺 𑀏𑀯𑀁 𑀳𑁂𑀢𑀼𑀁 𑀧𑀼𑀘𑁆𑀙𑀦𑁆𑀢𑁄. 𑀉𑀪𑀬𑀁 𑀧𑀼𑀘𑁆𑀙𑀦𑁆𑀢𑁄𑀢𑀺 ‘‘𑀇𑀤𑀁 𑀦𑀸𑀫𑁂𑀢𑁆𑀣 𑀓𑀸𑀭𑀡’’𑀦𑁆𑀢𑀺 𑀓𑀸𑀭𑀡𑀁 𑀯𑀢𑁆𑀯𑀸 𑀧𑀝𑀺𑀜𑁆𑀜𑀸𑀢𑁂 𑀅𑀢𑁆𑀣𑁂 𑀲𑀸𑀥𑀺𑀬𑀫𑀸𑀦𑁂 𑀅𑀦𑁆𑀯𑀬𑀢𑁄, 𑀩𑁆𑀬𑀢𑀺𑀭𑁂𑀓𑀢𑁄 𑀘 𑀓𑀸𑀭𑀡𑀁 𑀲𑀫𑀢𑁆𑀣𑁂𑀢𑀼𑀁 𑀲𑀤𑀺𑀲𑀸𑀲𑀤𑀺𑀲𑀧𑁆𑀧𑀪𑁂𑀤𑀁 𑀉𑀧𑀫𑁄𑀤𑀸𑀳𑀭𑀡𑀤𑁆𑀯𑀬𑀁 𑀧𑀼𑀘𑁆𑀙𑀦𑁆𑀢𑁄. 𑀅𑀧𑀺𑀘 𑀳𑁂𑀢𑀼𑀧𑀫𑁄𑀤𑀸𑀳𑀭𑀡𑀯𑀲𑁂𑀦 𑀢𑀺𑀮𑀓𑁆𑀔𑀡𑀲𑀫𑁆𑀧𑀢𑁆𑀢𑀺𑀬𑀸 𑀬𑀣𑀸𑀧𑀝𑀺𑀜𑁆𑀜𑀸𑀢𑁂 𑀅𑀢𑁆𑀣𑁂 𑀲𑀸𑀥𑀺𑀢𑁂 𑀲𑀫𑁆𑀫𑀤𑁂𑀯 𑀅𑀦𑀼 𑀧𑀘𑁆𑀙𑀸 𑀪𑀸𑀲𑀦𑁆𑀢𑁄 𑀦𑀺𑀕𑀫𑁂𑀦𑁆𑀢𑁄𑀧𑀺 𑀲𑀫𑀦𑀼𑀪𑀸𑀲𑀢𑀺 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀉𑀧𑀲𑀁𑀳𑀭𑀺𑀢𑁆𑀯𑀸’’𑀢𑀺 𑀧𑀸𑀞𑀲𑁂𑀲𑁄. ‘‘𑀓𑀺𑀁 𑀢𑁂’’𑀢𑀺𑀆𑀤𑀺 𑀉𑀧𑀲𑀁𑀳𑀭𑀡𑀸𑀓𑀸𑀭𑀤𑀲𑁆𑀲𑀦𑀁. 𑀤𑀼𑀢𑀺𑀬𑀧𑀤𑁂𑀧𑀻𑀢𑀺 ‘‘𑀲𑀗𑁆𑀖𑁂𑀦 𑀯𑀸 𑀲𑀗𑁆𑀖’’𑀦𑁆𑀢𑀺 𑀧𑀤𑁂𑀧𑀺. 𑀯𑀘𑀦𑀲𑁂𑀲𑀁, 𑀉𑀧𑀲𑀁𑀳𑀭𑀡𑀸𑀓𑀸𑀭𑀜𑁆𑀘 𑀲𑀦𑁆𑀥𑀸𑀬 ‘‘𑀏𑀲𑁂𑀯 𑀦𑀬𑁄’’𑀢𑀺 𑀯𑀼𑀢𑁆𑀢𑀁.

𑀢𑀫𑀢𑁆𑀣𑀦𑁆𑀢𑀺 𑀢𑀁 𑀧𑀳𑀸𑀢𑀩𑁆𑀩𑀥𑀫𑁆𑀫𑀸𑀦𑀁 𑀅𑀦𑀯𑀲𑁂𑀲𑀁 𑀧𑀳𑀸𑀬 𑀯𑀢𑁆𑀢𑀦𑀲𑀗𑁆𑀔𑀸𑀢𑀁, 𑀲𑀫𑀸𑀤𑀸𑀢𑀩𑁆𑀩𑀥𑀫𑁆𑀫𑀸𑀦𑀁 𑀅𑀦𑀯𑀲𑁂𑀲𑀁 𑀲𑀫𑀸𑀤𑀸𑀬 𑀯𑀢𑁆𑀢𑀦𑀲𑀗𑁆𑀔𑀸𑀢𑀜𑁆𑀘 𑀅𑀢𑁆𑀣𑀁. 𑀬𑁄𑀚𑁂𑀢𑁆𑀯𑀸𑀢𑀺 𑀅𑀓𑀼𑀲𑀮𑀸𑀤𑀺𑀧𑀤𑁂𑀳𑀺 𑀬𑁄𑀚𑁂𑀢𑁆𑀯𑀸. 𑀅𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀸𑀤𑀺𑀅𑀢𑁆𑀣𑁂𑀦 𑀅𑀓𑀼𑀲𑀮𑀸 𑀘𑁂𑀯 𑀢𑀢𑁄𑀬𑁂𑀯 𑀅𑀓𑀼𑀲𑀮𑀸𑀢𑀺 𑀘 𑀲𑀗𑁆𑀔𑀸𑀢𑀸,𑀲𑀗𑁆𑀔𑀸𑀢𑀲𑀤𑁆𑀤𑁄 𑀘𑁂𑀢𑁆𑀣 𑀜𑀸𑀢𑀢𑁆𑀣𑁄, 𑀓𑁄𑀝𑁆𑀞𑀸𑀲𑀢𑁆𑀣𑁄 𑀘 𑀬𑀼𑀚𑁆𑀚𑀢𑀻𑀢𑀺 𑀆𑀳 ‘‘𑀜𑀸𑀢𑀸, 𑀓𑁄𑀝𑁆𑀞𑀸𑀲𑀁 𑀯𑀸 𑀓𑀢𑁆𑀯𑀸 𑀞𑀧𑀺𑀢𑀸’’𑀢𑀺, 𑀧𑀼𑀭𑀺𑀫𑁂𑀦 𑀘𑁂𑀢𑁆𑀣 𑀧𑀤𑁂𑀦 𑀏𑀓𑀦𑁆𑀢𑀸𑀓𑀼𑀲𑀮𑁂 𑀯𑀤𑀢𑀺, 𑀧𑀘𑁆𑀙𑀺𑀫𑁂𑀦 𑀢𑀁 𑀲𑀳𑀕𑀢𑁂, 𑀢𑀧𑁆𑀧𑀝𑀺𑀧𑀓𑁆𑀔𑀺𑀬𑁂 𑀘. 𑀏𑀯𑀜𑁆𑀳𑀺 𑀓𑁄𑀝𑁆𑀞𑀸𑀲𑀓𑀭𑀡𑁂𑀦 𑀞𑀧𑀦𑀁 𑀉𑀧𑀧𑀦𑁆𑀦𑀁 𑀳𑁄𑀢𑀺. 𑀅𑀓𑀼𑀲𑀮𑀧𑀓𑁆𑀔𑀺𑀓𑀪𑀸𑀯𑁂𑀦 𑀳𑀺 𑀯𑀯𑀢𑁆𑀣𑀸𑀧𑀦𑀁 𑀓𑁄𑀝𑁆𑀞𑀸𑀲𑀓𑀭𑀡𑀁. 𑀅𑀯𑀚𑁆𑀚𑀲𑀤𑁆𑀤𑁄 𑀤𑁄𑀲𑀢𑁆𑀣𑁄 𑀕𑀸𑀭𑀬𑁆𑀳𑀧𑀭𑀺𑀬𑀸𑀬𑀢𑁆𑀢𑀸, 𑀅-𑀲𑀤𑁆𑀤𑀲𑁆𑀲 𑀘 𑀢𑀩𑁆𑀪𑀸𑀯𑀯𑀼𑀢𑁆𑀢𑀺𑀢𑁄𑀢𑀺 𑀆𑀳 ‘‘𑀲𑀤𑁄𑀲𑀸’’𑀢𑀺. 𑀅𑀭𑀺𑀬𑀸 𑀦𑀸𑀫 𑀦𑀺𑀤𑁆𑀤𑁄𑀲𑀸. 𑀇𑀫𑁂 𑀧𑀦 𑀅𑀓𑀼𑀲𑀮𑀸 𑀓𑀣𑀜𑁆𑀘𑀺𑀧𑀺 𑀦𑀺𑀤𑁆𑀤𑁄𑀲𑀸 𑀦 𑀳𑁄𑀦𑁆𑀢𑀻𑀢𑀺 𑀦𑀺𑀤𑁆𑀤𑁄𑀲𑀝𑁆𑀞𑁂𑀦 𑀅𑀭𑀺𑀬𑀸 𑀪𑀯𑀺𑀢𑀼𑀁 𑀦𑀸𑀮𑀁 𑀅𑀲𑀫𑀢𑁆𑀣𑀸.

𑁩𑁮𑁬-𑁩𑁯𑁨. ‘‘𑀬’’𑀦𑁆𑀢𑀺 𑀏𑀢𑀁 𑀓𑀸𑀭𑀡𑁂 𑀧𑀘𑁆𑀘𑀢𑁆𑀢𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀬𑁂𑀦𑀸’’𑀢𑀺 𑀇𑀫𑀺𑀦𑀸. 𑀬𑀁 𑀯𑀸 𑀧𑀦𑀸𑀢𑀺 𑀅𑀲𑀫𑁆𑀪𑀸𑀯𑀦𑀸𑀯𑀘𑀦𑀫𑁂𑀢𑀁, 𑀬𑀁 𑀯𑀸 𑀧𑀦 𑀓𑀺𑀜𑁆𑀘𑀻𑀢𑀺 𑀅𑀢𑁆𑀣𑁄. 𑀧𑀳𑀸𑀬 𑀯𑀢𑁆𑀢𑀦𑁆𑀢𑀻𑀢𑀺 𑀘 𑀅𑀢𑁆𑀣𑀯𑀲𑀸 𑀧𑀼𑀣𑀼𑀯𑀘𑀦𑀯𑀺𑀧𑀭𑀺𑀡𑀸𑀫𑁄𑀢𑀺 𑀯𑀼𑀢𑁆𑀢𑀁 ‘‘𑀬𑀁 𑀯𑀸 𑀢𑀁 𑀯𑀸 𑀅𑀧𑁆𑀧𑀫𑀢𑁆𑀢𑀓𑀁 𑀧𑀳𑀸𑀬 𑀯𑀢𑁆𑀢𑀦𑁆𑀢𑀻’’𑀢𑀺. 𑀕𑀡𑀸𑀘𑀭𑀺𑀬𑀸 𑀘𑁂𑀢𑁆𑀣 𑀧𑀽𑀭𑀡𑀫𑀓𑁆𑀔𑀮𑀺𑀆𑀤𑀬𑁄. 𑀲𑀢𑁆𑀣𑀼𑀧𑀪𑀯𑀢𑁆𑀢𑀸 𑀲𑀗𑁆𑀖𑀲𑁆𑀲 𑀲𑀗𑁆𑀖𑀲𑀫𑁆𑀧𑀢𑁆𑀢𑀺𑀬𑀸𑀧𑀺 𑀲𑀢𑁆𑀣𑀼𑀲𑀫𑁆𑀧𑀢𑁆𑀢𑀺 𑀯𑀺𑀪𑀸𑀯𑀻𑀬𑀢𑀻𑀢𑀺 𑀆𑀳 ‘‘𑀲𑀗𑁆𑀖…𑀧𑁂… 𑀲𑀺𑀤𑁆𑀥𑀺𑀢𑁄’’𑀢𑀺, 𑀲𑀸 𑀧𑀦 𑀧𑀲𑀁𑀲𑀸 𑀧𑀲𑀸𑀤𑀳𑁂𑀢𑀼𑀓𑀸𑀢𑀺 𑀧𑀲𑀸𑀤𑀫𑀼𑀔𑁂𑀦 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀲𑀻𑀤𑀫𑀸𑀦𑀸𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁂𑀦 𑀧𑀺-𑀲𑀤𑁆𑀤𑁂𑀦 𑀅𑀧𑁆𑀧𑀲𑀻𑀤𑀫𑀸𑀦𑀸𑀧𑀺 𑀏𑀯𑀫𑁂𑀯 𑀦 𑀧𑀲𑀻𑀤𑀦𑁆𑀢𑀻𑀢𑀺 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀬𑀣𑀸 𑀳𑀺 𑀅𑀦𑁆𑀯𑀬𑀢𑁄 𑀲𑀢𑁆𑀣𑀼𑀲𑀫𑁆𑀧𑀢𑁆𑀢𑀺𑀬𑀸 𑀲𑀸𑀯𑀓𑁂𑀲𑀼, 𑀲𑀸𑀯𑀓𑀲𑀫𑁆𑀧𑀢𑁆𑀢𑀺𑀬𑀸 𑀘 𑀲𑀢𑁆𑀣𑀭𑀺 𑀧𑀲𑀸𑀤𑁄 𑀲𑀫𑀼𑀘𑁆𑀘𑀻𑀬𑀢𑀺, 𑀏𑀯𑀁 𑀩𑁆𑀬𑀢𑀺𑀭𑁂𑀓𑀢𑁄 𑀲𑀢𑁆𑀣𑀼𑀯𑀺𑀧𑀢𑁆𑀢𑀺𑀬𑀸 𑀲𑀸𑀯𑀓𑁂𑀲𑀼, 𑀲𑀸𑀯𑀓𑀯𑀺𑀧𑀢𑁆𑀢𑀺𑀬𑀸 𑀘 𑀲𑀢𑁆𑀣𑀭𑀺𑀅𑀧𑁆𑀧𑀲𑀸𑀤𑁄𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀢𑀣𑀸 𑀳𑀻’’𑀢𑀺𑀆𑀤𑀺 𑀢𑀩𑁆𑀩𑀺𑀯𑀭𑀡𑀁. 𑀲𑀭𑀻𑀭𑀲𑀫𑁆𑀧𑀢𑁆𑀢𑀺𑀦𑁆𑀢𑀺 𑀭𑀽𑀧𑀲𑀫𑁆𑀧𑀢𑁆𑀢𑀺𑀁, 𑀭𑀽𑀧𑀓𑀸𑀬𑀧𑀸𑀭𑀺𑀧𑀽𑀭𑀺𑀦𑁆𑀢𑀺 𑀅𑀢𑁆𑀣𑁄. 𑀭𑀽𑀧𑀧𑁆𑀧𑀫𑀸𑀡𑁂 𑀲𑀢𑁆𑀢𑁂 𑀲𑀦𑁆𑀥𑀸𑀬 𑀇𑀤𑀁 𑀯𑀼𑀢𑁆𑀢𑀁, ‘‘𑀥𑀫𑁆𑀫𑀤𑁂𑀲𑀦𑀁 𑀯𑀸 𑀲𑀼𑀢𑁆𑀯𑀸’’𑀢𑀺 𑀇𑀤𑀦𑁆𑀢𑀼 𑀖𑁄𑀲𑀧𑁆𑀧𑀫𑀸𑀡𑁂, 𑀥𑀫𑁆𑀫𑀧𑁆𑀧𑀫𑀸𑀡𑁂 𑀘, ‘‘𑀪𑀺𑀓𑁆𑀔𑀽𑀦𑀁 𑀧𑀦𑀸𑀘𑀸𑀭𑀕𑁄𑀘𑀭’’𑀦𑁆𑀢𑀺𑀆𑀤𑀺𑀁 𑀧𑀦 𑀥𑀫𑁆𑀫𑀧𑁆𑀧𑀫𑀸𑀡𑁂, 𑀮𑀽𑀔𑀧𑁆𑀧𑀫𑀸𑀡𑁂 𑀘. 𑀆𑀘𑀸𑀭𑀕𑁄𑀘𑀭𑀸𑀤𑀻𑀳𑀺 𑀥𑀫𑁆𑀫𑁄, 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀮𑀽𑀔𑁄 𑀘 𑀳𑁄𑀢𑀺. 𑀢𑀲𑁆𑀫𑀸 ‘‘𑀪𑀯𑀦𑁆𑀢𑀺 𑀯𑀢𑁆𑀢𑀸𑀭𑁄’’𑀢𑀺 𑀧𑀞𑀫𑀧𑀤𑁂 𑀭𑀽𑀧𑀧𑁆𑀧𑀫𑀸𑀡𑀸, 𑀖𑁄𑀲𑀧𑁆𑀧𑀫𑀸𑀡𑀸, 𑀥𑀫𑁆𑀫𑀧𑁆𑀧𑀫𑀸𑀡𑀸 𑀘, 𑀤𑀼𑀢𑀺𑀬𑀧𑀤𑁂 𑀥𑀫𑁆𑀫𑀧𑁆𑀧𑀫𑀸𑀡𑀸𑀯 𑀬𑁄𑀚𑁂𑀢𑀩𑁆𑀩𑀸. 𑀓𑀻𑀯𑀭𑀽𑀧𑁄𑀢𑀺 𑀓𑀺𑀢𑁆𑀢𑀓𑀚𑀸𑀢𑀺𑀓𑁄. 𑀬𑀸 𑀲𑀗𑁆𑀖𑀲𑁆𑀲 𑀧𑀲𑀁𑀲𑀸𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄, 𑀅𑀬𑀫𑁂𑀯 𑀯𑀸 𑀧𑀸𑀞𑁄.

𑀢𑀢𑁆𑀣 𑀬𑀸 𑀩𑀼𑀤𑁆𑀥𑀸𑀦𑀁, 𑀩𑀼𑀤𑁆𑀥𑀲𑀸𑀯𑀓𑀸𑀦𑀫𑁂𑀯 𑀘 𑀧𑀸𑀲𑀁𑀲𑀢𑀸, 𑀅𑀜𑁆𑀜𑁂𑀲𑀜𑁆𑀘 𑀢𑀤𑀪𑀸𑀯𑁄 𑀚𑁄𑀢𑀺𑀢𑁄, 𑀢𑀁 𑀯𑀺𑀭𑀢𑀺𑀧𑁆𑀧𑀳𑀸𑀦𑀲𑀁𑀯𑀭𑀼𑀤𑁆𑀤𑁂𑀲𑀯𑀲𑁂𑀦 𑀦𑀻𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀬𑀫𑀥𑀺𑀧𑁆𑀧𑀸𑀬𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑁂𑀢𑀼𑀖𑀸𑀢𑀯𑀺𑀭𑀢𑀺𑀬𑀸 𑀅𑀭𑀺𑀬𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀢𑁆𑀢𑀸 ‘‘𑀲𑀩𑁆𑀩𑁂𑀦 𑀲𑀩𑁆𑀩𑀁 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀫𑀢𑁆𑀢𑀁, 𑀯𑀺𑀧𑀲𑁆𑀲𑀦𑀸𑀫𑀢𑁆𑀢𑀯𑀲𑁂𑀦 𑀢𑀤𑀗𑁆𑀕𑀧𑁆𑀧𑀳𑀸𑀦𑀫𑀢𑁆𑀢𑀦𑁆𑀢𑀺 𑀬𑀣𑀸𑀮𑀸𑀪𑀁 𑀬𑁄𑀚𑁂𑀢𑀩𑁆𑀩𑀁. 𑀯𑀺𑀧𑀲𑁆𑀲𑀦𑀸𑀫𑀢𑁆𑀢𑀯𑀲𑁂𑀦𑀸𑀢𑀺 𑀘 ‘‘𑀅𑀦𑀺𑀘𑁆𑀘’’𑀦𑁆𑀢𑀺 𑀯𑀸 ‘‘𑀤𑀼𑀓𑁆𑀔’’𑀦𑁆𑀢𑀺 𑀯𑀸 𑀯𑀺𑀯𑀺𑀥𑀁 𑀤𑀲𑁆𑀲𑀦𑀫𑀢𑁆𑀢𑀯𑀲𑁂𑀦, 𑀦 𑀧𑀦 𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀦𑀧𑀘𑁆𑀘𑀬𑀧𑀭𑀺𑀕𑁆𑀕𑀡𑁆𑀳𑀦𑀧𑀼𑀩𑁆𑀩𑀓𑀁 𑀮𑀓𑁆𑀔𑀡𑀢𑁆𑀢𑀬𑀁 𑀆𑀭𑁄𑀧𑁂𑀢𑁆𑀯𑀸 𑀲𑀗𑁆𑀔𑀸𑀭𑀸𑀦𑀁 𑀲𑀫𑁆𑀫𑀲𑀦𑀯𑀲𑁂𑀦. 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑁄, 𑀳𑀺 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀘 𑀩𑀸𑀳𑀺𑀭𑀓𑀸𑀦𑀁 𑀦𑀢𑁆𑀣𑀺. 𑀇𑀢𑀭𑀸𑀦𑀺 𑀲𑀫𑀼𑀘𑁆𑀙𑁂𑀤𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀦𑀺𑀲𑁆𑀲𑀭𑀡𑀧𑁆𑀧𑀳𑀸𑀦𑀸𑀦𑀺 𑀢𑀻𑀡𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀦𑀢𑁆𑀣𑀺 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀢𑁆𑀢𑀸. 𑀮𑁄𑀓𑀺𑀬𑀧𑀜𑁆𑀘𑀲𑀻𑀮𑀢𑁄 𑀅𑀜𑁆𑀜𑁄 𑀲𑀩𑁆𑀩𑁄𑀧𑀺 𑀲𑀻𑀮𑀲𑀁𑀯𑀭𑁄, ‘‘𑀔𑀫𑁄 𑀳𑁄𑀢𑀺 𑀲𑀻𑀢𑀲𑁆𑀲 𑀉𑀡𑁆𑀳𑀲𑁆𑀲𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁪; 𑁩.𑁧𑁫𑁯; 𑀅. 𑀦𑀺. 𑁪.𑁧𑁧𑁪) 𑀯𑀼𑀢𑁆𑀢𑁄 𑀲𑀼𑀧𑀭𑀺𑀲𑀼𑀤𑁆𑀥𑁄 𑀔𑀦𑁆𑀢𑀺𑀲𑀁𑀯𑀭𑁄, ‘‘𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀺𑀬𑁆𑀬𑀭𑁂’’𑀢𑀺𑀆𑀤𑀺𑀦𑀸 (𑀲𑀼. 𑀦𑀺. 𑁧𑁦𑁪𑁧; 𑀘𑀽𑀴𑀦𑀺. 𑁬𑁦) 𑀯𑀼𑀢𑁆𑀢𑁄 𑀓𑀺𑀮𑁂𑀲𑀸𑀦𑀁 𑀲𑀫𑀼𑀘𑁆𑀙𑁂𑀤𑀓𑁄 𑀫𑀕𑁆𑀕𑀜𑀸𑀡𑀲𑀗𑁆𑀔𑀸𑀢𑁄 𑀜𑀸𑀡𑀲𑀁𑀯𑀭𑁄, 𑀫𑀦𑀘𑁆𑀙𑀝𑁆𑀞𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀺𑀤𑀳𑀦𑀯𑀲𑁂𑀦 𑀧𑀯𑀢𑁆𑀢𑁄 𑀲𑀼𑀧𑀭𑀺𑀲𑀼𑀤𑁆𑀥𑁄 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄, ‘‘𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀸𑀤𑀸𑀬𑀸’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁨.𑁪𑁦𑁩; 𑀫. 𑀦𑀺. 𑁧.𑁧𑁩𑁫; 𑀲𑀁. 𑀦𑀺. 𑁫.𑁮; 𑀯𑀺𑀪. 𑁨𑁦𑁫) 𑀯𑀼𑀢𑁆𑀢𑁄 𑀲𑀫𑁆𑀫𑀧𑁆𑀧𑀥𑀸𑀦𑀲𑀗𑁆𑀔𑀸𑀢𑁄 𑀯𑀻𑀭𑀺𑀬𑀲𑀁𑀯𑀭𑁄𑀢𑀺 𑀇𑀫𑀁 𑀲𑀁𑀯𑀭𑀧𑀜𑁆𑀘𑀓𑀁 𑀲𑀦𑁆𑀥𑀸𑀬 ‘‘𑀲𑁂𑀲𑀁 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀁.

‘‘𑀧𑀜𑁆𑀘 𑀔𑁄 𑀧𑀦𑀺𑀫𑁂 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸’’𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀲𑀻𑀮𑀲𑁆𑀲𑁂𑀯 𑀧𑀼𑀦 𑀕𑀳𑀡𑀁 𑀲𑀸𑀲𑀦𑁂 𑀲𑀻𑀮𑀲𑁆𑀲 𑀩𑀳𑀼𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀢𑀤𑁂𑀓𑀤𑁂𑀲𑁂 𑀏𑀯 𑀧𑀭𑁂𑀲𑀁 𑀅𑀯𑀝𑁆𑀞𑀸𑀦𑀤𑀲𑁆𑀲𑀦𑀢𑁆𑀣𑀁. ‘‘𑀉𑀧𑁄𑀲𑀣𑀼𑀤𑁆𑀤𑁂𑀲𑀸’’𑀢𑀺 𑀅𑀥𑀼𑀦𑀸 𑀧𑀸𑀞𑁄. 𑀧𑀜𑁆𑀜𑀸𑀬𑀢𑀻𑀢𑀺 𑀧𑀢𑀺𑀝𑁆𑀞𑀺𑀢𑀪𑀸𑀯𑁂𑀦 𑀧𑀸𑀓𑀝𑁄 𑀳𑁄𑀢𑀺, 𑀢𑀲𑁆𑀫𑀸 𑀫𑀬𑀸 𑀳𑀺…𑀧𑁂… 𑀦𑀢𑁆𑀣𑀻𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀲𑀻𑀳𑀦𑀸𑀤𑀦𑁆𑀢𑀺 𑀲𑁂𑀝𑁆𑀞𑀦𑀸𑀤𑀁, 𑀅𑀪𑀻𑀢𑀦𑀸𑀤𑀁 𑀓𑁂𑀦𑀘𑀺 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀯𑀸𑀤𑀁. 𑀬𑀁 𑀧𑀦 𑀯𑀤𑀦𑁆𑀢𑀺 𑁋

‘‘𑀉𑀢𑁆𑀢𑀭𑀲𑁆𑀫𑀺𑀁 𑀧𑀤𑁂 𑀩𑁆𑀬𑀕𑁆𑀖-𑀧𑀼𑀗𑁆𑀕𑀯𑁄𑀲𑀪𑀓𑀼𑀜𑁆𑀚𑀭;

𑀲𑀻𑀳𑀲𑀤𑁆𑀤𑀽𑀮𑀦𑀸𑀕𑀸𑀤𑁆𑀬𑀸, 𑀧𑀼𑀫𑁂 𑀲𑁂𑀝𑁆𑀞𑀢𑁆𑀣𑀕𑁄𑀘𑀭𑀸’’𑀢𑀺.

𑀢𑀁 𑀬𑁂𑀪𑀼𑀬𑁆𑀬𑀯𑀲𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀭𑀺𑀬𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀯𑀡𑁆𑀡𑀦𑀸

𑁩𑁯𑁩. ‘‘𑀅𑀬𑀁 𑀧𑀦 𑀬𑀣𑀸𑀯𑀼𑀢𑁆𑀢𑁄 𑀫𑀫 𑀯𑀸𑀤𑁄 𑀅𑀯𑀺𑀧𑀭𑀻𑀢𑁄𑀯, 𑀢𑀲𑁆𑀲𑁂𑀯𑀁 𑀅𑀯𑀺𑀧𑀭𑀻𑀢𑀪𑀸𑀯𑁄 𑀇𑀫𑀁 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀅𑀧𑀭𑀧𑁆𑀧𑀘𑁆𑀘𑀬𑀢𑁄 𑀚𑀸𑀦𑀺𑀢𑀩𑁆𑀩𑁄’’𑀢𑀺 𑀏𑀯𑀁 𑀅𑀯𑀺𑀧𑀭𑀻𑀢𑀪𑀸𑀯𑀸𑀯𑀩𑁄𑀥𑀦𑀢𑁆𑀣𑀁. 𑀧𑀸𑀴𑀺𑀬𑀁 ‘‘𑀅𑀢𑁆𑀣𑀺 𑀓𑀲𑁆𑀲𑀧𑀸’’𑀢𑀺𑀆𑀤𑀻𑀲𑀼 𑀅𑀬𑀁 𑀬𑁄𑀚𑀦𑀸 𑁋 𑀬𑀁 𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄 𑀲𑀸𑀫𑀁𑀬𑁂𑀯 𑀅𑀢𑁆𑀢𑀧𑀘𑁆𑀘𑀓𑁆𑀔𑀢𑁄 𑀏𑀯𑀁 𑀜𑀲𑁆𑀲𑀢𑀺 𑀤𑀓𑁆𑀔𑀢𑀺 ‘‘𑀲𑀫𑀡𑁄 𑀕𑁄𑀢𑀫𑁄 𑀯𑀤𑀦𑁆𑀢𑁄 𑀬𑀼𑀢𑁆𑀢𑀧𑀢𑁆𑀢𑀓𑀸𑀮𑁂 𑀢𑀣𑀪𑀸𑀯𑀢𑁄 𑀪𑀽𑀢𑀁, 𑀏𑀓𑀁𑀲𑁂𑀦 𑀳𑀺𑀢𑀸𑀯𑀳𑀪𑀸𑀯𑀢𑁄 𑀅𑀢𑁆𑀣𑀁, 𑀥𑀫𑁆𑀫𑀢𑁄 𑀅𑀦𑀧𑁂𑀢𑀢𑁆𑀢𑀸 𑀥𑀫𑁆𑀫𑀁, 𑀯𑀺𑀦𑀬𑀬𑁄𑀕𑀢𑁄, 𑀧𑀭𑁂𑀲𑀜𑁆𑀘 𑀯𑀺𑀦𑀬𑀦𑀢𑁄 𑀯𑀺𑀦𑀬𑀁 𑀯𑀤𑀢𑀻’’𑀢𑀺, 𑀲𑁄 𑀫𑀬𑀸 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑀺𑀢𑁄 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑀦𑀺𑀲𑁆𑀲𑀭𑀡𑀪𑀽𑀢𑁄 𑀅𑀢𑁆𑀣𑀺 𑀓𑀲𑁆𑀲𑀧 𑀫𑀕𑁆𑀕𑁄, 𑀢𑀲𑁆𑀲 𑀘 𑀅𑀥𑀺𑀕𑀫𑀽𑀧𑀸𑀬𑀪𑀽𑀢𑀸 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀢𑀺, 𑀢𑁂𑀦 ‘‘𑀲𑀫𑀡𑁄 𑀕𑁄𑀢𑀫𑁄 𑀇𑀫𑁂 𑀥𑀫𑁆𑀫𑁂 𑀅𑀦𑀯𑀲𑁂𑀲𑀁 𑀧𑀳𑀸𑀬 𑀯𑀢𑁆𑀢𑀢𑀻’’𑀢𑀺𑀆𑀤𑀺 𑀦𑀬𑀧𑁆𑀧𑀯𑀢𑁆𑀢𑁄 𑀯𑀸𑀤𑁄 𑀓𑁂𑀦𑀘𑀺 𑀅𑀲𑀫𑁆𑀧𑀓𑀫𑁆𑀧𑀺𑀢𑁄 𑀬𑀣𑀸𑀪𑀽𑀢 𑀲𑀻𑀳𑀦𑀸𑀤𑁄𑀢𑀺 𑀤𑀲𑁆𑀲𑁂𑀢𑀺. 𑀤𑀓𑁆𑀔𑀢𑀻𑀢𑀺 𑀘𑁂𑀢𑁆𑀣 𑀲𑁆𑀲𑀢𑀺-𑀲𑀤𑁆𑀤𑁂𑀦 𑀧𑀤𑀲𑀺𑀤𑁆𑀥𑀺 ‘‘𑀬𑀢𑁆𑀭 𑀳𑀺 𑀦𑀸𑀫 𑀲𑀸𑀯𑀓𑁄 𑀏𑀯𑀭𑀽𑀧𑀁 𑀜𑀲𑁆𑀲𑀢𑀺 𑀯𑀸 𑀤𑀓𑁆𑀔𑀢𑀺 𑀯𑀸 𑀲𑀓𑁆𑀔𑀺𑀁 𑀓𑀭𑀺𑀲𑁆𑀲𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬.

‘‘𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀻’’𑀢𑀺𑀆𑀤𑀺 𑀲𑀼𑀢𑁆𑀢𑀧𑀤𑁂𑀲𑀼 (𑀅. 𑀦𑀺. 𑁩.𑁧𑁩𑁪) 𑀯𑀺𑀬 𑀘 𑀫𑀕𑁆𑀕𑀜𑁆𑀘 𑀧𑀝𑀺𑀧𑀤𑀜𑁆𑀘 𑀏𑀓𑀢𑁄 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄. ‘‘𑀅𑀬𑀫𑁂𑀯𑀸’’𑀢𑀺 𑀲𑀸𑀯𑀥𑀸𑀭𑀡𑀯𑀘𑀦𑀁 𑀫𑀕𑁆𑀕𑀲𑁆𑀲 𑀧𑀼𑀣𑀼𑀪𑀸𑀯𑀧𑀝𑀺𑀓𑁆𑀔𑁂𑀧𑀢𑁆𑀣𑀁, 𑀲𑀩𑁆𑀩𑀅𑀭𑀺𑀬𑀲𑀸𑀥𑀸𑀭𑀡𑀪𑀸𑀯𑀤𑀲𑁆𑀲𑀦𑀢𑁆𑀣𑀁, 𑀲𑀸𑀲𑀦𑁂 𑀧𑀸𑀓𑀝𑀪𑀸𑀯𑀤𑀲𑁆𑀲𑀦𑀢𑁆𑀣𑀜𑁆𑀘. 𑀢𑁂𑀦𑀸𑀳 ‘‘𑀏𑀓𑀸𑀬𑀦𑁄 𑀅𑀬𑀁 𑀪𑀺𑀓𑁆𑀔𑀯𑁂 𑀫𑀕𑁆𑀕𑁄 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸’’𑀢𑀺 (𑀤𑀻. 𑀦𑀺. 𑁨.𑁩𑁭𑁩; 𑀫. 𑀦𑀺. 𑁧.𑁧𑁦𑁬; 𑀲𑀁. 𑀦𑀺. 𑁫.𑁩𑁬𑁭, 𑁩𑁮𑁪).

‘‘𑀏𑀲𑁂𑀯 𑀫𑀕𑁆𑀕𑁄 𑀦𑀢𑁆𑀣𑀜𑁆𑀜𑁄, 𑀤𑀲𑁆𑀲𑀦𑀲𑁆𑀲 𑀯𑀺𑀲𑀼𑀤𑁆𑀥𑀺𑀬𑀸’’𑀢𑀺, (𑀥. 𑀧. 𑁨𑁭𑁪) 𑁋

‘‘𑀏𑀓𑀸𑀬𑀦𑀁 𑀚𑀸𑀢𑀺𑀔𑀬𑀦𑁆𑀢𑀤𑀲𑁆𑀲𑀻,

𑀫𑀕𑁆𑀕𑀁 𑀧𑀚𑀸𑀦𑀸𑀢𑀺 𑀳𑀺𑀢𑀸𑀦𑀼𑀓𑀫𑁆𑀧𑀻;

𑀏𑀢𑁂𑀦 𑀫𑀕𑁆𑀕𑁂𑀦 𑀅𑀢𑀭𑀺𑀁 𑀲𑀼 𑀧𑀼𑀩𑁆𑀩𑁂,

𑀢𑀭𑀺𑀲𑁆𑀲𑀦𑁆𑀢𑀺 𑀬𑁂 𑀘 𑀢𑀭𑀦𑁆𑀢𑀺 𑀑𑀖’’𑀦𑁆𑀢𑀺. (𑀲𑀁. 𑀦𑀺. 𑁫.𑁩𑁮𑁪, 𑁪𑁦𑁯; 𑀘𑀽𑀴𑀦𑀺. 𑁧𑁦𑁭, 𑁨𑁧𑁧; 𑀦𑁂𑀢𑁆𑀢𑀺. 𑁧𑁭𑁦) 𑀘 𑁋

𑀲𑀩𑁆𑀩𑁂𑀲𑀼 𑀘𑁂𑀯 𑀲𑀼𑀢𑁆𑀢𑀧𑀤𑁂𑀲𑁂𑀲𑀼, 𑀅𑀪𑀺𑀥𑀫𑁆𑀫𑀧𑀤𑁂𑀲𑁂𑀲𑀼 (𑀯𑀺𑀪. 𑁩𑁫𑁫) 𑀘 𑀏𑀓𑁄𑀯𑀸𑀬𑀁 𑀫𑀕𑁆𑀕𑁄 𑀧𑀸𑀓𑀝𑁄𑀢𑀺.

𑀢𑀧𑁄𑀧𑀓𑁆𑀓𑀫𑀓𑀣𑀸𑀯𑀡𑁆𑀡𑀦𑀸

𑁩𑁯𑁪. 𑀢𑀧𑁄𑀬𑁂𑀯 𑀉𑀧𑀓𑁆𑀓𑀫𑀺𑀢𑀩𑁆𑀩𑀢𑁄, 𑀆𑀭𑀪𑀺𑀢𑀩𑁆𑀩𑀢𑁄 𑀢𑀧𑁄𑀧𑀓𑁆𑀓𑀫𑀸𑀢𑀺 𑀆𑀳 ‘‘𑀢𑀧𑀸𑀭𑀫𑁆𑀪𑀸’’𑀢𑀺, 𑀆𑀭𑀫𑁆𑀪𑀦𑀜𑁆𑀘𑁂𑀢𑁆𑀣 𑀢𑀧𑀓𑀭𑀡𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀺 ‘‘𑀢𑀧𑁄𑀓𑀫𑁆𑀫𑀸𑀦𑀻’’𑀢𑀺 𑀇𑀫𑀺𑀦𑀸. 𑀲𑀫𑀡𑀓𑀫𑁆𑀫𑀲𑀗𑁆𑀔𑀸𑀢𑀸𑀢𑀺 𑀲𑀫𑀡𑁂𑀳𑀺 𑀓𑀢𑁆𑀢𑀩𑁆𑀩𑀓𑀫𑁆𑀫𑀲𑀜𑁆𑀜𑀺𑀢𑀸. 𑀩𑁆𑀭𑀸𑀳𑁆𑀫𑀡𑀓𑀫𑁆𑀫𑀲𑀗𑁆𑀔𑀸𑀢𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀦𑀺𑀘𑁆𑀘𑁄𑀮𑁄𑀢𑀺 𑀦𑀺𑀲𑁆𑀲𑀝𑁆𑀞𑀘𑁄𑀮𑁄 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀧𑀝𑀺𑀓𑁆𑀔𑀺𑀢𑁆𑀢𑀘𑁄𑀮𑁄. 𑀘𑁂𑀮𑀁, 𑀘𑁄𑀮𑁄𑀢𑀺 𑀘 𑀧𑀭𑀺𑀬𑀸𑀬𑀯𑀘𑀦𑀁. 𑀓𑁄𑀘𑀺 𑀙𑀺𑀦𑁆𑀦𑀪𑀺𑀦𑁆𑀦𑀧𑀝𑀧𑀺𑀮𑁄𑀢𑀺𑀓𑀥𑀭𑁄𑀧𑀺 𑀤𑀲𑀦𑁆𑀢𑀬𑀼𑀢𑁆𑀢𑀲𑁆𑀲 𑀯𑀢𑁆𑀣𑀲𑁆𑀲 𑀅𑀪𑀸𑀯𑀢𑁄 ‘‘𑀦𑀺𑀘𑁆𑀘𑁄𑀮𑁄’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑁂𑀬𑁆𑀬𑀸𑀢𑀺 𑀢𑀁 𑀦𑀺𑀯𑀢𑁆𑀢𑁂𑀢𑀼𑀁 ‘‘𑀦𑀕𑁆𑀕𑁄’’𑀢𑀺 𑀯𑀼𑀢𑁆𑀢𑀁, 𑀦𑀕𑁆𑀕𑀺𑀬𑀯𑀢𑀲𑀫𑀸𑀤𑀸𑀦𑁂𑀦 𑀲𑀩𑁆𑀩𑀣𑀸 𑀦𑀕𑁆𑀕𑁄𑀢𑀺 𑀅𑀢𑁆𑀣𑁄. 𑀮𑁄𑀓𑀺𑀬𑀓𑀼𑀮𑀧𑀼𑀢𑁆𑀢𑀸𑀘𑀸𑀭𑀯𑀺𑀭𑀳𑀺𑀢𑀢𑀸𑀯 𑀯𑀺𑀲𑁆𑀲𑀝𑁆𑀞𑀸𑀘𑀸𑀭𑀢𑀸𑀢𑀺 𑀤𑀲𑁆𑀲𑁂𑀢𑀺 ‘‘𑀉𑀘𑁆𑀘𑀸𑀭𑀓𑀫𑁆𑀫𑀸𑀤𑀻𑀲𑀽’’𑀢𑀺𑀆𑀤𑀺𑀦𑀸. 𑀓𑀣𑀁 𑀯𑀺𑀭𑀳𑀺𑀢𑁄𑀢𑀺 𑀆𑀳 ‘‘𑀞𑀺𑀢𑀓𑁄𑀯𑀸’’𑀢𑀺𑀆𑀤𑀺, 𑀇𑀤𑀜𑁆𑀘 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀯𑀫𑀺𑀢𑁆𑀯𑀸 𑀫𑀼𑀔𑀯𑀺𑀓𑁆𑀔𑀸𑀮𑀦𑀸𑀤𑀺𑀆𑀘𑀸𑀭𑀲𑁆𑀲𑀧𑀺 𑀢𑁂𑀦 𑀯𑀺𑀲𑁆𑀲𑀝𑁆𑀞𑀢𑁆𑀢𑀸. 𑀅𑀧𑀮𑀺𑀔𑀢𑀻𑀢𑀺 𑀉𑀤𑀓𑁂𑀦 𑀅𑀥𑁄𑀯𑀦𑀢𑁄 𑀅𑀧𑀮𑀺𑀳𑀢𑀺. 𑀲𑁄 𑀓𑀺𑀭 𑀤𑀡𑁆𑀟𑀓𑀁 ‘‘𑀲𑀢𑁆𑀢𑁄’’𑀢𑀺 𑀧𑀜𑁆𑀜𑀧𑁂𑀢𑀺, 𑀢𑀲𑁆𑀫𑀸 𑀢𑀁 𑀧𑀝𑀺𑀧𑀤𑀁 𑀧𑀽𑀭𑁂𑀦𑁆𑀢𑁄 𑀏𑀯𑀁 𑀓𑀭𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀉𑀘𑁆𑀘𑀸𑀭𑀁 𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀅𑀧𑀮𑀺𑀔𑀢𑀻𑀢𑀺 𑀅𑀧𑀓𑀲𑀢𑀺.

‘‘𑀏𑀳𑀺 𑀪𑀤𑀦𑁆𑀢𑁄’’𑀢𑀺 𑀯𑀼𑀢𑁆𑀢𑁂 𑀉𑀧𑀕𑀫𑀦𑀲𑀗𑁆𑀔𑀸𑀢𑁄 𑀯𑀺𑀥𑀺 𑀏𑀳𑀺𑀪𑀤𑁆𑀤𑀦𑁆𑀢𑁄, 𑀢𑀁 𑀘𑀭𑀢𑀻𑀢𑀺 𑀏𑀳𑀺𑀪𑀤𑁆𑀤𑀦𑁆𑀢𑀺𑀓𑁄, 𑀭𑀼𑀴𑁆𑀳𑀺𑀲𑀤𑁆𑀤𑁂𑀦 𑀘𑁂𑀢𑁆𑀣 𑀢𑀤𑁆𑀥𑀺𑀢𑀲𑀺𑀤𑁆𑀥𑀺 𑀬𑀣𑀸 ‘‘𑀏𑀳𑀺𑀧𑀲𑁆𑀲𑀺𑀓𑁄’’𑀢𑀺, (𑀫. 𑀦𑀺. 𑁧.𑁭𑁪) 𑀢𑀧𑁆𑀧𑀝𑀺𑀓𑁆𑀔𑁂𑀧𑁂𑀦 𑀦𑀏𑀳𑀺𑀪𑀤𑁆𑀤𑀦𑁆𑀢𑀺𑀓𑁄, 𑀢𑀤𑁂𑀯𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀪𑀺𑀓𑁆𑀔𑀸𑀕𑀳𑀡𑀢𑁆𑀣’’𑀦𑁆𑀢𑀺𑀆𑀤𑀺𑀦𑀸. 𑀦 𑀏𑀢𑀻𑀢𑀺 𑀦 𑀆𑀕𑀘𑁆𑀙𑀢𑀺. 𑀏𑀯𑀁 𑀦𑀢𑀺𑀝𑁆𑀞𑀪𑀤𑁆𑀤𑀦𑁆𑀢𑀺𑀓𑁄𑀢𑀺 𑀏𑀢𑁆𑀣𑀸𑀧𑀺. 𑀲𑀫𑀡𑁂𑀦 𑀦𑀸𑀫 𑀲𑀬𑀁𑀯𑀘𑀦𑀓𑀭𑁂𑀦𑁂𑀯 𑀪𑀯𑀺𑀢𑀩𑁆𑀩𑀁, 𑀦 𑀧𑀭𑀯𑀘𑀦𑀓𑀭𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀢𑀤𑀼𑀪𑀬𑀫𑁆𑀧𑀺…𑀧𑁂… 𑀦 𑀓𑀭𑁄𑀢𑀺. 𑀧𑀼𑀭𑁂𑀢𑀭𑀦𑁆𑀢𑀺 𑀢𑀁 𑀞𑀸𑀦𑀁 𑀅𑀢𑁆𑀢𑀦𑀸 𑀉𑀧𑀕𑀫𑀦𑀢𑁄 𑀧𑀞𑀫𑀢𑀭𑀁, 𑀢𑀁 𑀓𑀺𑀭 𑀲𑁄 ‘‘𑀪𑀺𑀓𑁆𑀔𑀼𑀦𑀸 𑀦𑀸𑀫 𑀬𑀸𑀤𑀺𑀘𑁆𑀙𑀓𑀻 𑀏𑀯 𑀪𑀺𑀓𑁆𑀔𑀸 𑀕𑀳𑁂𑀢𑀩𑁆𑀩𑀸’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀦 𑀕𑀡𑁆𑀳𑀸𑀢𑀺. 𑀉𑀤𑁆𑀤𑀺𑀲𑁆𑀲𑀓𑀢𑀁 𑀧𑀦 ‘‘𑀫𑀫 𑀦𑀺𑀫𑀺𑀢𑁆𑀢𑀪𑀸𑀯𑁂𑀦 𑀩𑀳𑀽 𑀔𑀼𑀤𑁆𑀤𑀓𑀸 𑀧𑀸𑀡𑀸 𑀲𑀗𑁆𑀖𑀸𑀝𑀫𑀸𑀧𑀸𑀤𑀺𑀢𑀸’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀦𑀸𑀥𑀺𑀯𑀸𑀲𑁂𑀢𑀺. 𑀦𑀺𑀫𑀦𑁆𑀢𑀦𑀫𑁆𑀧𑀺 ‘‘𑀏𑀯𑀁 𑀢𑁂𑀲𑀁 𑀯𑀘𑀦𑀁 𑀓𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀦 𑀲𑀸𑀤𑀺𑀬𑀢𑀺. 𑀓𑀼𑀫𑁆𑀪𑀻𑀢𑀺 𑀧𑀓𑁆𑀓𑀪𑀺𑀓𑁆𑀔𑀸𑀧𑀓𑁆𑀔𑀺𑀢𑁆𑀢𑀓𑀼𑀫𑁆𑀪𑁄. 𑀉𑀓𑁆𑀔𑀮𑀻𑀢𑀺 𑀪𑀺𑀓𑁆𑀔𑀸𑀧𑀘𑀦𑀓𑀼𑀫𑁆𑀪𑁄. 𑀧𑀘𑁆𑀙𑀻𑀢𑀺 𑀪𑀺𑀓𑁆𑀔𑀸𑀧𑀓𑁆𑀔𑀺𑀢𑁆𑀢𑀧𑀺𑀝𑀓𑀁. 𑀢𑀢𑁄𑀧𑀻𑀢𑀺 𑀓𑀼𑀫𑁆𑀪𑀻𑀓𑀴𑁄𑀧𑀺𑀢𑁄𑀧𑀺. 𑀓𑀼𑀫𑁆𑀪𑀻𑀆𑀤𑀻𑀲𑀼𑀧𑀺 𑀲𑁄 𑀲𑀢𑁆𑀢𑀲𑀜𑁆𑀜𑀻𑀢𑀺 𑀆𑀳 ‘‘𑀓𑀼𑀫𑁆𑀪𑀻𑀓𑀴𑁄𑀧𑀺𑀬𑁄’’𑀢𑀺𑀆𑀤𑀺. ‘‘𑀅𑀬𑀁 𑀫’’𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀦𑁆𑀢𑀭𑀦𑁆𑀢𑀺 𑀉𑀪𑀺𑀦𑁆𑀦𑀫𑀦𑁆𑀢𑀭𑀸𑀴𑀁.

𑀓𑀩𑀴𑀦𑁆𑀢𑀭𑀸𑀬𑁄𑀢𑀺 𑀆𑀮𑁄𑀧𑀲𑁆𑀲 𑀅𑀦𑁆𑀢𑀭𑀸𑀬𑁄. 𑀏𑀢𑁆𑀣𑀸𑀧𑀺 𑀲𑁄 𑀲𑀢𑁆𑀢𑀲𑀜𑁆𑀜𑀻. 𑀧𑀼𑀭𑀺𑀲𑀦𑁆𑀢𑀭𑀕𑀢𑀸𑀬𑀸𑀢𑀺 𑀧𑀼𑀭𑀺𑀲𑀲𑀫𑀻𑀧𑀕𑀢𑀸𑀬. 𑀭𑀢𑀺𑀅𑀦𑁆𑀢𑀭𑀸𑀬𑁄𑀢𑀺 𑀓𑀸𑀫𑀭𑀢𑀺𑀬𑀸 𑀅𑀦𑁆𑀢𑀭𑀸𑀬𑁄. 𑀕𑀸𑀫𑀲𑀪𑀸𑀕𑀸𑀤𑀺𑀯𑀲𑁂𑀦 𑀲𑀗𑁆𑀕𑀫𑁆𑀫 𑀓𑀺𑀢𑁆𑀢𑁂𑀦𑁆𑀢𑀺 𑀏𑀢𑀺𑀲𑁆𑀲𑀸𑀢𑀺 𑀲𑀁𑀓𑀺𑀢𑁆𑀢𑀺. 𑀢𑀣𑀸 𑀲𑀁𑀳𑀝𑀢𑀡𑁆𑀟𑀼𑀮𑀸𑀤𑀺𑀲𑀜𑁆𑀘𑀬𑁄 𑀢𑁂𑀦 𑀓𑀢𑀪𑀢𑁆𑀢𑀫𑀺𑀥𑀸𑀥𑀺𑀧𑁆𑀧𑁂𑀢𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀲𑀁𑀓𑀺𑀢𑁆𑀢𑁂𑀢𑁆𑀯𑀸 𑀓𑀢𑀪𑀢𑁆𑀢𑁂𑀲𑀽’’𑀢𑀺. 𑀫𑀚𑁆𑀛𑀺𑀫𑀦𑀺𑀓𑀸𑀬𑁂 𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢𑀦𑁆𑀢𑀝𑀻𑀓𑀸𑀬𑀁 𑀧𑀦 𑀆𑀘𑀭𑀺𑀬𑁂𑀦𑁂𑀯 𑀏𑀯𑀁 𑀯𑀼𑀢𑁆𑀢𑀁 ‘‘𑀲𑀁𑀓𑀺𑀢𑁆𑀢𑀬𑀦𑁆𑀢𑀺 𑀏𑀢𑀸𑀬𑀸𑀢𑀺 𑀲𑀁𑀓𑀺𑀢𑁆𑀢𑀺, 𑀕𑀸𑀫𑀯𑀸𑀲𑀻𑀳𑀺 𑀲𑀫𑀼𑀤𑀸𑀬𑀯𑀲𑁂𑀦 𑀓𑀺𑀭𑀺𑀬𑀫𑀸𑀦𑀓𑀺𑀭𑀺𑀬𑀸, 𑀏𑀢𑁆𑀣 𑀧𑀦 𑀪𑀢𑁆𑀢𑀲𑀁𑀓𑀺𑀢𑁆𑀢𑀺 𑀅𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘𑀲𑀁𑀓𑀺𑀢𑁆𑀢𑁂𑀢𑁆𑀯𑀸 𑀓𑀢𑀪𑀢𑁆𑀢𑁂𑀲𑀽’𑀢𑀺’’. 𑀇𑀤𑀁 𑀧𑀦 𑀢𑀲𑁆𑀲 𑀉𑀓𑁆𑀓𑀝𑁆𑀞𑀧𑀝𑀺𑀧𑀤𑀸𑀢𑀺 𑀤𑀲𑁆𑀲𑁂𑀢𑀺 ‘‘𑀉𑀓𑁆𑀓𑀝𑁆𑀞𑁄’’𑀢𑀺𑀆𑀤𑀺𑀦𑀸. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 ‘‘𑀦𑀏𑀳𑀺𑀪𑀤𑁆𑀤𑀦𑁆𑀢𑀺𑀓𑁄’’𑀢𑀺𑀆𑀤𑀻𑀲𑀼𑀧𑀺 𑀉𑀓𑁆𑀓𑀝𑁆𑀞𑀧𑀝𑀺𑀧𑀤𑀸𑀤𑀲𑁆𑀲𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀲𑀸𑀲𑀤𑁆𑀤𑁄 𑀲𑀼𑀦𑀔𑀧𑀭𑀺𑀬𑀸𑀬𑁄. 𑀢𑀲𑁆𑀲𑀸𑀢𑀺 𑀲𑀼𑀦𑀔𑀲𑁆𑀲. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀞𑀸𑀦𑁂. 𑀲𑀫𑀽𑀳𑀲𑀫𑀽𑀳𑀘𑀸𑀭𑀺𑀦𑀻𑀢𑀺 𑀲𑀗𑁆𑀖𑀲𑀗𑁆𑀖𑀘𑀸𑀭𑀺𑀦𑀻. 𑀫𑀦𑀼𑀲𑁆𑀲𑀸𑀢𑀺 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀫𑀦𑀼𑀲𑁆𑀲𑀸.

𑀲𑁄𑀯𑀻𑀭𑀓𑀦𑁆𑀢𑀺 𑀓𑀜𑁆𑀚𑀺𑀓𑀁. ‘‘𑀮𑁄𑀡𑀲𑁄𑀯𑀻𑀭𑀓’’𑀦𑁆𑀢𑀺 𑀓𑁂𑀘𑀺, 𑀢𑀤𑀬𑀼𑀢𑁆𑀢𑀫𑁂𑀯, ‘‘𑀲𑀩𑁆𑀩𑀲𑀲𑁆𑀲𑀲𑀫𑁆𑀪𑀸𑀭𑁂𑀳𑀺 𑀓𑀢’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀮𑁄𑀡𑀲𑁄𑀯𑀻𑀭𑀓𑀜𑁆𑀳𑀺 𑀲𑀩𑁆𑀩𑀫𑀘𑁆𑀙𑀫𑀁𑀲𑀧𑀼𑀧𑁆𑀨𑀨𑀮𑀸𑀤𑀺𑀲𑀫𑁆𑀪𑀸𑀭𑀓𑀢𑀁. 𑀲𑀼𑀭𑀸𑀧𑀸𑀦𑀫𑁂𑀯𑀸𑀢𑀺 𑀫𑀚𑁆𑀚𑀮𑀓𑁆𑀔𑀡𑀧𑁆𑀧𑀢𑁆𑀢𑀸𑀬 𑀲𑀼𑀭𑀸𑀬 𑀧𑀸𑀦𑀫𑁂𑀯. 𑀫𑁂𑀭𑀬𑀫𑁆𑀧𑁂𑀢𑁆𑀣 𑀲𑀗𑁆𑀕𑀳𑀺𑀢𑀁 𑀮𑀓𑁆𑀔𑀡𑀳𑀸𑀭𑁂𑀦, 𑀏𑀓𑀲𑁂𑀲𑀦𑀬𑁂𑀦 𑀯𑀸. 𑀲𑀩𑁆𑀩𑁂𑀲𑀼𑀧𑀻𑀢𑀺 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑁂𑀲𑀼𑀧𑀺 𑀓𑀜𑁆𑀚𑀺𑀓𑀲𑀼𑀭𑀸𑀤𑀻𑀲𑀼. 𑀏𑀓𑀸𑀕𑀸𑀭𑀫𑁂𑀯 𑀪𑀺𑀓𑁆𑀔𑀸𑀘𑀭𑀺𑀬𑀸𑀬 𑀉𑀧𑀕𑀘𑁆𑀙𑀢𑀻𑀢𑀺 𑀏𑀓𑀸𑀕𑀸𑀭𑀺𑀓𑁄. 𑀦𑀺𑀯𑀢𑁆𑀢𑀢𑀻𑀢𑀺 𑀧𑀘𑁆𑀘𑀸𑀕𑀘𑁆𑀙𑀢𑀺, 𑀲𑀢𑀺 𑀪𑀺𑀓𑁆𑀔𑀸𑀮𑀸𑀪𑁂 𑀢𑀤𑀼𑀢𑁆𑀢𑀭𑀺 𑀦 𑀕𑀘𑁆𑀙𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀓𑀸𑀮𑁄𑀧𑁂𑀦𑁂𑀯 𑀯𑀢𑁆𑀢𑀢𑀻𑀢𑀺 𑀏𑀓𑀸𑀮𑁄𑀧𑀺𑀓𑁄. 𑀤𑀻𑀬𑀢𑀺 𑀏𑀢𑀸𑀬𑀸𑀢𑀺 𑀤𑀢𑁆𑀢𑀺, 𑀤𑁆𑀯𑀢𑁆𑀢𑀺𑀆𑀮𑁄𑀧𑀫𑀢𑁆𑀢𑀕𑁆𑀕𑀸𑀳𑀺 𑀔𑀼𑀤𑁆𑀤𑀓𑀁 𑀪𑀺𑀓𑁆𑀔𑀸𑀤𑀸𑀦𑀪𑀸𑀚𑀦𑀁. 𑀢𑁂𑀦𑀸𑀳 ‘‘𑀔𑀼𑀤𑁆𑀤𑀓𑀧𑀸𑀢𑀻’’𑀢𑀺. 𑀅𑀕𑁆𑀕𑀪𑀺𑀓𑁆𑀔𑀦𑁆𑀢𑀺 𑀅𑀦𑀸𑀫𑀝𑁆𑀞𑀪𑀺𑀓𑁆𑀔𑀁, 𑀲𑀫𑀸𑀪𑀺𑀲𑀗𑁆𑀔𑀢𑀢𑀸𑀬 𑀯𑀸 𑀉𑀢𑁆𑀢𑀫𑀪𑀺𑀓𑁆𑀔𑀁. 𑀅𑀪𑀼𑀜𑁆𑀚𑀦𑀯𑀲𑁂𑀦 𑀏𑀓𑁄 𑀳𑁄 𑀏𑀢𑀲𑁆𑀲𑀸𑀢𑀺 𑀏𑀓𑀸𑀳𑀺𑀓𑁄, 𑀆𑀳𑀸𑀭𑁄, 𑀢𑀁 𑀆𑀳𑀸𑀭𑀁 𑀆𑀳𑀸𑀭𑁂𑀢𑀻𑀢𑀺 𑀅𑀢𑁆𑀣𑁄. 𑀲𑁄 𑀧𑀦 𑀅𑀢𑁆𑀣𑀢𑁄 𑀏𑀓𑀤𑀺𑀯𑀲𑀮𑀗𑁆𑀖𑀓𑁄𑀢𑀺 𑀯𑀼𑀢𑁆𑀢𑀁 ‘‘𑀏𑀓𑀤𑀺𑀯𑀲𑀦𑁆𑀢𑀭𑀺𑀓’’𑀦𑁆𑀢𑀺. 𑀏𑀲 𑀦𑀬𑁄 ‘‘𑀤𑁆𑀯𑀸𑀳𑀺𑀓’’𑀦𑁆𑀢𑀺𑀆𑀤𑀻𑀲𑀼𑀧𑀺. 𑀅𑀧𑀺𑀘 𑀏𑀓𑀸𑀳𑀁 𑀅𑀪𑀼𑀜𑁆𑀚𑀺𑀢𑁆𑀯𑀸 𑀏𑀓𑀸𑀳𑀁 𑀪𑀼𑀜𑁆𑀚𑀦𑀁, 𑀏𑀓𑀸𑀳𑀯𑀸𑀭𑁄 𑀯𑀸 𑀏𑀓𑀸𑀳𑀺𑀓𑀁. 𑀤𑁆𑀯𑀻𑀳𑀁 𑀅𑀪𑀼𑀜𑁆𑀚𑀺𑀢𑁆𑀯𑀸 𑀤𑁆𑀯𑀻𑀳𑀁 𑀪𑀼𑀜𑁆𑀚𑀦𑀁, 𑀤𑁆𑀯𑀻𑀳𑀯𑀸𑀭𑁄 𑀯𑀸 𑀤𑁆𑀯𑀸𑀳𑀺𑀓𑀁. 𑀲𑁂𑀲𑀤𑁆𑀯𑀬𑁂𑀧𑀺 𑀅𑀬𑀁 𑀦𑀬𑁄. 𑀉𑀓𑁆𑀓𑀝𑁆𑀞𑁄 𑀳𑀺 𑀧𑀭𑀺𑀬𑀸𑀬𑀪𑀢𑁆𑀢𑀪𑁄𑀚𑀦𑀺𑀓𑁄 𑀤𑁆𑀯𑀻𑀳𑀁 𑀅𑀪𑀼𑀜𑁆𑀚𑀺𑀢𑁆𑀯𑀸 𑀏𑀓𑀸𑀳𑀫𑁂𑀯 𑀪𑀼𑀜𑁆𑀚𑀢𑀺. 𑀏𑀯𑀁 𑀲𑁂𑀲𑀤𑁆𑀯𑀬𑁂𑀧𑀺. 𑀫𑀚𑁆𑀛𑀺𑀫𑀸𑀕𑀫𑀝𑀻𑀓𑀸𑀬𑀁 𑀧𑀦 ‘‘𑀏𑀓𑀸𑀳𑀁 𑀅𑀦𑁆𑀢𑀭𑀪𑀽𑀢𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀏𑀓𑀸𑀳𑀺𑀓𑀁. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲 𑀦𑀬𑁄’’𑀢𑀺 𑀯𑀼𑀢𑁆𑀢𑀁. ‘‘𑀣𑁂𑀭𑀸 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑀦𑁆𑀢𑀺 𑀧𑀭𑀺𑀬𑀸𑀬𑁂𑀦𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀯𑀸𑀭𑀢𑁆𑀣𑁄 𑀧𑀭𑀺𑀬𑀸𑀬 𑀲𑀤𑁆𑀤𑁄. 𑀏𑀓𑀸𑀳𑀯𑀸𑀭𑁂𑀦𑀸𑀢𑀺 𑀏𑀓𑀸𑀳𑀺𑀓𑀯𑀸𑀭𑁂𑀦. ‘‘𑀏𑀓𑀸𑀳𑀺𑀓’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀯𑀺𑀥𑀺𑀫𑁂𑀯 𑀧𑀝𑀺𑀧𑀸𑀝𑀺𑀬𑀸 𑀧𑀯𑀢𑁆𑀢𑀪𑀸𑀯𑁂𑀦 𑀤𑀲𑁆𑀲𑁂𑀢𑀼𑀁 𑀧𑀸𑀴𑀺𑀬𑀁 ‘‘𑀇𑀢𑀺 𑀏𑀯𑀭𑀽𑀧’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁩𑁯𑁫. 𑀲𑀸𑀫𑀸𑀓𑁄 𑀦𑀸𑀫 𑀕𑁄𑀥𑀼𑀫𑁄. 𑀲𑀬𑀁𑀚𑀸𑀢𑀸 𑀯𑀻𑀳𑀺𑀚𑀸𑀢𑀻𑀢𑀺 𑀅𑀭𑁄𑀧𑀺𑀫𑀯𑀻𑀳𑀺𑀚𑀸𑀢𑀺. 𑀬𑀤𑁂𑀯 ‘‘𑀯𑀻𑀳𑀻’’𑀢𑀺 𑀯𑀤𑀦𑁆𑀢𑀺. 𑀮𑀺𑀔𑀺𑀢𑁆𑀯𑀸𑀢𑀺 𑀓𑀲𑀺𑀢𑁆𑀯𑀸. 𑀲𑀺𑀮𑁂𑀲𑁄𑀧𑀻𑀢𑀺 𑀓𑀡𑀺𑀓𑀸𑀭𑀸𑀤𑀺𑀭𑀼𑀓𑁆𑀔𑀦𑀺𑀬𑁆𑀬𑀸𑀲𑁄𑀧𑀺. 𑀓𑀼𑀡𑁆𑀟𑀓𑀦𑁆𑀢𑀺 𑀢𑀦𑀼𑀢𑀭𑀁 𑀢𑀡𑁆𑀟𑀼𑀮𑀲𑀓𑀮𑀁, 𑀢𑀡𑁆𑀟𑀼𑀮𑀔𑀡𑁆𑀟𑀓𑀦𑁆𑀢𑀺 𑀅𑀢𑁆𑀣𑁄. 𑀑𑀤𑀦𑁂𑀦 𑀓𑀢𑀁 𑀓𑀜𑁆𑀚𑀺𑀬𑀁 𑀑𑀤𑀦𑀓𑀜𑁆𑀚𑀺𑀬𑀁. ‘‘𑀯𑀸𑀲𑀺𑀢𑀓𑁂𑀦 𑀧𑀺𑀜𑁆𑀜𑀸𑀓𑁂𑀦 𑀦𑀳𑀸𑀬𑁂𑀬𑁆𑀬𑀸’’𑀢𑀺𑀆𑀤𑀻𑀲𑀼 (𑀧𑀸𑀘𑀺. 𑁧𑁨𑁦𑁩) 𑀯𑀺𑀬 𑀧𑀺𑀜𑁆𑀜𑀸𑀓 𑀲𑀤𑁆𑀤𑁄 𑀢𑀺𑀮𑀧𑀺𑀝𑁆𑀞𑀧𑀭𑀺𑀬𑀸𑀬𑁄. 𑀬𑀣𑀸𑀳 ‘‘𑀧𑀺𑀜𑁆𑀜𑀸𑀓𑀁 𑀦𑀸𑀫 𑀢𑀺𑀮𑀧𑀺𑀝𑁆𑀞𑀁 𑀯𑀼𑀘𑁆𑀘𑀢𑀻’’𑀢𑀺. ‘‘𑀢𑀭𑀼𑀡𑀓𑀤𑀮𑀺𑀓𑁆𑀔𑀦𑁆𑀥𑀫𑁂𑀯 𑀧𑀺𑀜𑁆𑀜𑀸𑀓’’𑀦𑁆𑀢𑀺 𑀓𑁂𑀘𑀺, 𑀦 𑀕𑀳𑁂𑀢𑀩𑁆𑀩𑀫𑁂𑀢𑀁 𑀓𑀢𑁆𑀣𑀘𑀺𑀧𑀺 𑀢𑀣𑀸 𑀅𑀯𑀘𑀦𑀢𑁄.

𑁩𑁯𑁬. 𑀲𑀡𑁂𑀳𑀺 𑀲𑀡𑀯𑀸𑀓𑁂𑀳𑀺 𑀦𑀺𑀩𑁆𑀩𑀢𑁆𑀢𑀺𑀢𑀸𑀦𑀺 𑀲𑀸𑀡𑀸𑀦𑀺, 𑀅𑀜𑁆𑀜𑁂𑀳𑀺 𑀫𑀺𑀲𑁆𑀲𑀓𑀸𑀦𑀺 𑀲𑀸𑀡𑀸𑀦𑀺 𑀏𑀯 𑀫𑀲𑀸𑀡𑀸𑀦𑀺 𑀦𑀺𑀭𑀼𑀢𑁆𑀢𑀺𑀦𑀬𑁂𑀦, 𑀦 𑀙𑀘𑀻𑀯𑀭𑀧𑀭𑀺𑀬𑀸𑀧𑀦𑁆𑀦𑀸𑀦𑀺 𑀪𑀗𑁆𑀕𑀸𑀦𑀺. 𑀓𑁂𑀘𑀺 𑀧𑀦 ‘‘𑀫𑀲𑀸𑀡𑀸𑀦𑀺 𑀦𑀸𑀫 𑀘𑁄𑀴𑀯𑀺𑀲𑁂𑀲𑀸𑀦𑀻𑀢𑀺 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀫𑀲𑁆𑀲𑀓𑀘𑁄𑀴𑀸𑀦𑀻’’𑀢𑀺 𑀧𑀞𑀦𑁆𑀢𑀺, 𑀢𑀤𑀬𑀼𑀢𑁆𑀢𑀫𑁂𑀯 𑀧𑁄𑀭𑀸𑀡𑁂𑀳𑀺 𑀢𑀣𑀸 𑀅𑀯𑀼𑀢𑁆𑀢𑀢𑁆𑀢𑀸. 𑀏𑀭𑀓𑀢𑀺𑀡𑀸𑀤𑀻𑀦𑀻𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 𑀅𑀓𑁆𑀓𑀫𑀓𑀘𑀺𑀓𑀤𑀮𑀺𑀯𑀸𑀓𑀸𑀤𑀻𑀦𑀁 𑀲𑀗𑁆𑀕𑀳𑁄, 𑀏𑀭𑀓𑀸𑀤𑀻𑀳𑀺 𑀓𑀢𑀸𑀦𑀺 𑀳𑀺 𑀙𑀯𑀸𑀦𑀺 𑀮𑀸𑀫𑀓𑀸𑀦𑀺 𑀤𑀼𑀲𑁆𑀲𑀸𑀦𑀻𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑀦𑁆𑀢𑀺. 𑀙𑀯𑀲𑀤𑁆𑀤𑁄 𑀳𑁂𑀢𑁆𑀣 𑀳𑀻𑀦𑀯𑀸𑀘𑀓𑁄, 𑀧𑀼𑀭𑀺𑀫𑀯𑀺𑀓𑀧𑁆𑀧𑁂 𑀧𑀦 𑀫𑀢𑀲𑀭𑀻𑀭𑀯𑀸𑀘𑀓𑁄. 𑀙𑀟𑁆𑀟𑀺𑀢𑀦𑀦𑁆𑀢𑀓𑀸𑀦𑀻𑀢𑀺 𑀙𑀟𑁆𑀟𑀺𑀢𑀧𑀺𑀮𑁄𑀢𑀺𑀓𑀸𑀦𑀺. 𑀅𑀚𑀺𑀦𑀲𑁆𑀲𑁂𑀤𑀦𑁆𑀢𑀺 𑀅𑀚𑀺𑀦𑀁, 𑀧𑀓𑀢𑀺𑀅𑀚𑀺𑀦𑀫𑀺𑀕𑀘𑀫𑁆𑀫𑀁, 𑀢𑀤𑁂𑀯 𑀫𑀚𑁆𑀛𑁂 𑀨𑀸𑀮𑀺𑀢𑀓𑀜𑁆𑀘𑁂, 𑀅𑀚𑀺𑀦𑀲𑁆𑀲 𑀔𑀺𑀧𑀁 𑀨𑀸𑀮𑀺𑀢𑀫𑀼𑀧𑀟𑁆𑀠𑀦𑁆𑀢𑀺 𑀅𑀚𑀺𑀦𑀓𑁆𑀔𑀺𑀧𑀁. ‘‘𑀲𑀔𑀼𑀭𑀓𑀦𑁆𑀢𑀺𑀧𑀺 𑀯𑀤𑀦𑁆𑀢𑀻’’𑀢𑀺 (𑀫. 𑀦𑀺. 𑀅𑀝𑁆𑀞. 𑁧.𑁧𑁫𑁫) 𑀧𑀧𑀜𑁆𑀘𑀲𑀽𑀤𑀦𑀺𑀬𑀁 𑀯𑀼𑀢𑁆𑀢𑀁, 𑀤𑁆𑀯𑀺𑀦𑁆𑀦𑀁 𑀢𑀺𑀡𑁆𑀡𑀁 𑀯𑀸 𑀲𑀫𑀼𑀤𑀺𑀢𑀜𑁆𑀘𑁂, 𑀅𑀚𑀺𑀦𑀓𑁆𑀔𑀺𑀧𑀦𑁆𑀢𑀺 𑀢𑁂𑀲𑀫𑀥𑀺𑀧𑁆𑀧𑀸𑀬𑁄. 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀲𑀼 𑀧𑀦 ‘‘𑀅𑀚𑀺𑀦𑀫𑁂𑀯 𑀅𑀪𑁂𑀤𑀢𑁄 𑀅𑀚𑀺𑀦𑀓𑁆𑀔𑀺𑀧’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀦𑁆𑀤𑀺𑀢𑁆𑀯𑀸𑀢𑀺 𑀉𑀚𑁆𑀚𑀯𑀼𑀚𑁆𑀚𑀯𑁂𑀦 𑀓𑀦𑁆𑀤𑀺𑀢𑁆𑀯𑀸. ‘‘𑀕𑀦𑁆𑀣𑁂𑀢𑁆𑀯𑀸’’𑀢𑀺𑀧𑀺 𑀧𑀸𑀞𑁄, 𑀯𑀝𑁆𑀝𑁂𑀢𑁆𑀯𑀸 𑀩𑀦𑁆𑀥𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀯𑀜𑁆𑀳𑀺 𑀨𑀮𑀓𑀘𑀻𑀭𑁂 𑀦𑀺𑀤𑀲𑁆𑀲𑀦𑀁 𑀉𑀧𑀧𑀦𑁆𑀦𑀁 𑀳𑁄𑀢𑀺. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀅𑀚𑀺𑀢𑀯𑀸𑀤𑀲𑁆𑀲 𑀧𑀝𑀺𑀓𑀺𑀝𑁆𑀞𑀢𑀭𑀪𑀸𑀯𑁂 𑀉𑀧𑀫𑀸𑀤𑀲𑁆𑀲𑀦𑀢𑁆𑀣𑀁 𑀬𑀤𑁂𑀯 𑀓𑁂𑀲𑀓𑀫𑁆𑀩𑀮𑀁 𑀲𑀦𑁆𑀥𑀸𑀬 𑀅𑀗𑁆𑀕𑀼𑀢𑁆𑀢𑀭𑀸𑀕𑀫𑁂 (𑀅. 𑀦𑀺. 𑁩.𑁧𑁩𑁮) 𑀯𑀼𑀢𑁆𑀢𑀁.

𑀢𑀦𑁆𑀢𑀸𑀯𑀼𑀢𑀸𑀦𑀻𑀢𑀺 𑀢𑀦𑁆𑀢𑀁 𑀧𑀲𑀸𑀭𑁂𑀢𑁆𑀯𑀸 𑀯𑀻𑀢𑀸𑀦𑀺. 𑀧𑀝𑀺𑀓𑀺𑀝𑁆𑀞𑁄𑀢𑀺 𑀳𑀻𑀦𑁄. 𑀓𑀲𑁆𑀫𑀸𑀢𑀺 𑀯𑀼𑀢𑁆𑀢𑀁 ‘‘𑀓𑁂𑀲𑀓𑀫𑁆𑀩𑀮𑁄’’𑀢𑀺𑀆𑀤𑀺. 𑀧𑀸𑀴𑀺𑀬𑀁 𑀉𑀩𑁆𑀪𑀝𑁆𑀞𑀓𑁄’’𑀢𑀺 𑀏𑀢𑀲𑁆𑀲 ‘‘𑀉𑀤𑁆𑀥𑀁 𑀞𑀺𑀢𑀓𑁄’’𑀢𑀺 𑀅𑀢𑁆𑀣𑁄 𑀫𑀚𑁆𑀛𑀺𑀫𑀸𑀕𑀫𑀝𑁆𑀞𑀓𑀣𑀸𑀬𑀁 𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 (𑀫. 𑀦𑀺. 𑀅𑀝𑁆𑀞. 𑁧.𑁨𑁧𑁫) 𑀯𑀼𑀢𑁆𑀢𑁄. 𑀉𑀩𑁆𑀪𑀲𑀤𑁆𑀤𑁄 𑀳𑀺 𑀉𑀧𑀭𑀺𑀅𑀢𑁆𑀣𑁂 𑀦𑁂𑀧𑀸𑀢𑀺𑀓𑁄 𑀬𑀣𑀸 ‘‘𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮’’𑀦𑁆𑀢𑀺. 𑀅𑀦𑁂𑀓𑀧𑀭𑀺𑀫𑀸𑀡𑀸, 𑀳𑀺 𑀦𑀺𑀧𑀸𑀢𑀸, 𑀅𑀦𑁂𑀓𑀢𑁆𑀣𑀸 𑀘.

𑀫𑀺𑀘𑁆𑀙𑀸𑀯𑀸𑀬𑀸𑀫𑀯𑀲𑁂𑀦𑁂𑀯 𑀉𑀓𑁆𑀓𑀼𑀝𑀺𑀓𑀯𑀢𑀸𑀦𑀼𑀬𑁄𑀕𑁄𑀢𑀺 𑀆𑀳 ‘‘𑀉𑀓𑁆𑀓𑀼𑀝𑀺𑀓𑀯𑀻𑀭𑀺𑀬𑀁 𑀅𑀦𑀼𑀬𑀼𑀢𑁆𑀢𑁄’’𑀢𑀺. 𑀦 𑀓𑁂𑀯𑀮𑀁 𑀦𑀺𑀲𑀺𑀦𑁆𑀦𑁄𑀬𑁂𑀯 𑀉𑀓𑁆𑀓𑀼𑀝𑀺𑀓𑁄, 𑀅𑀣 𑀔𑁄 𑀕𑀘𑁆𑀙𑀦𑁆𑀢𑁄𑀧𑀺…𑀧𑁂… 𑀕𑀘𑁆𑀙𑀢𑀺. 𑀅𑀬𑀓𑀡𑁆𑀝𑀓𑁂𑀢𑀺 𑀅𑀬𑁄𑀫𑀬𑀓𑀡𑁆𑀝𑀓𑁂. 𑀧𑀓𑀢𑀺𑀓𑀡𑁆𑀝𑀓𑁂𑀢𑀺 𑀲𑀮𑀸𑀓𑀓𑀡𑁆𑀝𑀓𑁂. 𑀉𑀘𑁆𑀘𑀪𑀽𑀫𑀺𑀬𑀁 𑀣𑀡𑁆𑀟𑀺𑀮𑀲𑀤𑁆𑀤𑁄𑀢𑀺 𑀯𑀼𑀢𑁆𑀢𑀁 ‘‘𑀉𑀘𑁆𑀘𑁂 𑀪𑀽𑀫𑀺𑀝𑁆𑀞𑀸𑀦𑁂’’𑀢𑀺. 𑀅𑀬𑀁 𑀅𑀝𑁆𑀞𑀓𑀣𑀸𑀢𑁄 𑀅𑀧𑀭𑁄 𑀦𑀬𑁄 𑁋 𑀣𑀡𑁆𑀟𑀺𑀮𑀦𑁆𑀢𑀺 𑀲𑀫𑀸𑀧𑀓𑀢𑀺𑀪𑀽𑀫𑀺 𑀯𑀼𑀘𑁆𑀘𑀢𑀺 ‘‘𑀧𑀢𑁆𑀣𑀡𑁆𑀟𑀺𑀮𑁂 𑀧𑀸𑀢𑀼𑀭𑀳𑁄𑀲𑀻’’𑀢𑀺𑀆𑀤𑀻𑀲𑀼 𑀯𑀺𑀬. 𑀅𑀫𑀭𑀓𑁄𑀲𑁂𑀧𑀺 𑀳𑀺 𑀦𑀺𑀖𑀡𑁆𑀝𑀼𑀲𑀢𑁆𑀣𑁂 𑀯𑀼𑀢𑁆𑀢𑀁 ‘‘𑀯𑁂𑀤𑀻 𑀧𑀭𑀺𑀓𑁆𑀔𑀢𑀸 𑀪𑀽𑀫𑀺, 𑀲𑀫𑁂 𑀣𑀡𑁆𑀟𑀺𑀮𑀁 𑀘𑀸𑀢𑀼𑀭𑁂’’𑀢𑀺 (𑀲𑀢𑁆𑀢𑀭𑀲𑀫𑀯𑀕𑁆𑀕𑁂 𑁧𑁮 𑀕𑀸𑀣𑀸𑀬𑀁) 𑀢𑀲𑁆𑀫𑀸 𑀣𑀡𑁆𑀟𑀺𑀮𑁂 𑀅𑀦𑀦𑁆𑀢𑀭𑀳𑀺𑀢𑀸𑀬 𑀧𑀓𑀢𑀺𑀪𑀽𑀫𑀺𑀬𑀁 𑀲𑁂𑀬𑁆𑀬𑀫𑁆𑀧𑀺 𑀓𑀧𑁆𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀬𑀁 𑀲𑀦𑁆𑀥𑀸𑀬 𑀢𑀢𑁆𑀣𑁂𑀯 𑀦𑀺𑀖𑀡𑁆𑀝𑀼𑀲𑀢𑁆𑀣𑁂 𑀯𑀼𑀢𑁆𑀢𑀁 ‘‘𑀬𑁄 𑀣𑀡𑁆𑀟𑀺𑀮𑁂 𑀯𑀢 𑀯𑀲𑀸, 𑀲𑁂𑀢𑁂 𑀣𑀡𑁆𑀟𑀺𑀮𑀲𑀸𑀬𑀺 𑀲𑁄’’𑀢𑀺 (𑀲𑀢𑁆𑀢𑀭𑀲𑀫𑀯𑀕𑁆𑀕𑁂 𑁪𑁪 𑀕𑀸𑀣𑀸𑀬𑀁) 𑀭𑀚𑁄 𑀏𑀯 𑀚𑀮𑁆𑀮𑀁 𑀫𑀮𑀻𑀦𑀁 𑀭𑀚𑁄𑀚𑀮𑁆𑀮𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀭𑀻𑀭’’𑀦𑁆𑀢𑀺𑀆𑀤𑀺. 𑀮𑀤𑁆𑀥𑀁 𑀆𑀲𑀦𑀦𑁆𑀢𑀺 𑀦𑀺𑀲𑀻𑀤𑀺𑀢𑀼𑀁 𑀬𑀣𑀸𑀮𑀤𑁆𑀥𑀫𑀸𑀲𑀦𑀁. 𑀅𑀓𑁄𑀧𑁂𑀢𑁆𑀯𑀸𑀢𑀺 𑀅𑀜𑁆𑀜𑀢𑁆𑀣 𑀅𑀦𑀼𑀧𑀕𑀦𑁆𑀢𑁆𑀯𑀸. 𑀢𑀣𑀸 𑀘𑀸𑀳 ‘‘𑀢𑀢𑁆𑀣𑁂𑀯 𑀦𑀺𑀲𑀻𑀤𑀦𑀲𑀻𑀮𑁄’’𑀢𑀺. 𑀏𑀯𑀁 𑀦𑀺𑀲𑀻𑀤𑀦𑁆𑀢𑁄 𑀳𑀺 𑀢𑀁 𑀅𑀓𑁄𑀧𑁂𑀦𑁆𑀢𑁄 𑀦𑀸𑀫 𑀳𑁄𑀢𑀺. 𑀘𑀢𑀽𑀲𑀼 𑀫𑀳𑀸𑀯𑀺𑀓𑀝𑁂𑀲𑀼 𑀕𑀽𑀣𑀫𑁂𑀯𑀺𑀥𑀸𑀥𑀺𑀧𑁆𑀧𑁂𑀢𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀕𑀽𑀣𑀁 𑀯𑀼𑀘𑁆𑀘𑀢𑀻’’𑀢𑀺. 𑀢𑀜𑁆𑀳𑀺 𑀆𑀲𑀬𑀯𑀲𑁂𑀦 𑀯𑀺𑀭𑀽𑀧𑀁 𑀓𑀝𑀢𑁆𑀢𑀸 ‘‘𑀯𑀺𑀓𑀝’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑀸𑀬𑀁 𑀢𑀢𑀺𑀬𑀦𑁆𑀢𑀺 𑀲𑀸𑀬𑀦𑁆𑀳𑀲𑀫𑀬𑀲𑀗𑁆𑀔𑀸𑀢𑀁 𑀢𑀢𑀺𑀬𑀲𑀫𑀬𑀁. 𑀅𑀲𑁆𑀲𑀸𑀢𑀺 𑀉𑀤𑀓𑁄𑀭𑁄𑀳𑀦𑀸𑀦𑀼𑀬𑁄𑀕𑀲𑁆𑀲. 𑀧𑀸𑀢𑁄𑀧𑀤𑀫𑀺𑀯 𑀲𑀸𑀬𑀁𑀧𑀤𑀁 𑀦𑁂𑀧𑀸𑀢𑀺𑀓𑀁. 𑀅𑀦𑀼𑀲𑀸𑀭𑀮𑁄𑀧𑁂𑀦 𑀧𑀦 ‘‘𑀲𑀸𑀬𑀢𑀢𑀺𑀬𑀓’’𑀦𑁆𑀢𑀺𑀧𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺.

𑀏𑀢𑁆𑀣 𑀘 ‘‘𑀅𑀘𑁂𑀮𑀓𑁄 𑀳𑁄𑀢𑀻’’𑀢𑀺𑀆𑀤𑀻𑀦𑀺 𑀬𑀸𑀯 ‘‘𑀣𑀼𑀲𑁄𑀤𑀓𑀁 𑀧𑀺𑀯𑀢𑀻’’𑀢𑀺 𑀏𑀢𑀸𑀦𑀺 𑀯𑀢𑀧𑀤𑀸𑀦𑀺 𑀏𑀓𑀯𑀸𑀭𑀸𑀦𑀺, ‘‘𑀏𑀓𑀸𑀕𑀸𑀭𑀺𑀓𑁄 𑀯𑀸 𑀳𑁄𑀢𑀻’’𑀢𑀺𑀆𑀤𑀻𑀦𑀺 𑀧𑀦 𑀦𑀸𑀦𑀸𑀯𑀸𑀭𑀸𑀦𑀺, 𑀦𑀸𑀦𑀸𑀓𑀸𑀮𑀺𑀓𑀸𑀦𑀺 𑀯𑀸. 𑀢𑀣𑀸 ‘‘𑀲𑀸𑀓𑀪𑀓𑁆𑀔𑁄 𑀯𑀸 𑀳𑁄𑀢𑀻’’𑀢𑀺𑀆𑀤𑀻𑀦𑀺, ‘‘𑀲𑀸𑀡𑀸𑀦𑀺𑀧𑀺 𑀥𑀸𑀭𑁂𑀢𑀺, 𑀫𑀲𑀸𑀡𑀸𑀦𑀺𑀧𑀺 𑀥𑀸𑀭𑁂𑀢𑀻’’𑀢𑀺𑀆𑀤𑀻𑀦𑀺 𑀘. 𑀢𑀣𑀸 𑀳𑁂𑀢𑁆𑀣 𑀯𑀸-𑀲𑀤𑁆𑀤𑀕𑁆𑀕𑀳𑀡𑀁, 𑀧𑀺-𑀲𑀤𑁆𑀤𑀕𑁆𑀕𑀳𑀡𑀜𑁆𑀘 𑀓𑀢𑀁. 𑀧𑀺-𑀲𑀤𑁆𑀤𑁄𑀧𑀺 𑀇𑀥 𑀯𑀺𑀓𑀧𑁆𑀧𑀢𑁆𑀣𑁄 𑀏𑀯 𑀤𑀝𑁆𑀞𑀩𑁆𑀩𑁄. 𑀧𑀼𑀭𑀺𑀫𑁂𑀲𑀼 𑀧𑀦 𑀯𑀢𑀧𑀤𑁂𑀲𑀼 𑀢𑀤𑀼𑀪𑀬𑀫𑁆𑀧𑀺 𑀦 𑀓𑀢𑀁, 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀅𑀘𑁂𑀮𑀓𑁄 𑀳𑁄𑀢𑀻’’𑀢𑀺 𑀯𑀢𑁆𑀯𑀸 ‘‘𑀲𑀸𑀡𑀸𑀦𑀺𑀧𑀺 𑀥𑀸𑀭𑁂𑀢𑀻’’𑀢𑀺𑀆𑀤𑀺𑀯𑀘𑀦𑀲𑁆𑀲, ‘‘𑀭𑀚𑁄𑀚𑀮𑁆𑀮𑀥𑀭𑁄𑀧𑀺 𑀳𑁄𑀢𑀻’’𑀢𑀺 𑀯𑀢𑁆𑀯𑀸 ‘‘𑀉𑀤𑀓𑁄𑀭𑁄𑀳𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀻’’𑀢𑀺 𑀯𑀘𑀦𑀲𑁆𑀲 𑀘 𑀅𑀯𑀺𑀭𑁄𑀥𑁄 𑀲𑀺𑀤𑁆𑀥𑁄 𑀳𑁄𑀢𑀺. 𑀅𑀣 𑀯𑀸 𑀓𑀺𑀫𑁂𑀢𑁆𑀣 𑀅𑀯𑀺𑀭𑁄𑀥𑀘𑀺𑀦𑁆𑀢𑀸𑀬. 𑀉𑀫𑁆𑀫𑀢𑁆𑀢𑀓𑀧𑀘𑁆𑀙𑀺𑀲𑀤𑀺𑀲𑁄 𑀳𑀺 𑀢𑀺𑀢𑁆𑀣𑀺𑀬𑀯𑀸𑀤𑁄. 𑀅𑀧𑀺𑀘 ‘‘𑀅𑀘𑁂𑀮𑀓𑁄 𑀳𑁄𑀢𑀻’’𑀢𑀺 𑀆𑀭𑀪𑀺𑀢𑁆𑀯𑀸 𑀢𑀧𑁆𑀧𑀲𑀗𑁆𑀕𑁂𑀦 𑀲𑀩𑁆𑀩𑀫𑁆𑀧𑀺 𑀅𑀜𑁆𑀜𑀫𑀜𑁆𑀜𑀯𑀺𑀭𑁄𑀥𑀫𑁂𑀯 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀁 𑀤𑀲𑁆𑀲𑁂𑀦𑁆𑀢𑁂𑀦 𑀢𑁂𑀦 𑀅𑀘𑁂𑀮𑀓𑀲𑁆𑀲𑀧𑁂𑀦 ‘‘𑀲𑀸𑀡𑀸𑀦𑀺𑀧𑀺 𑀥𑀸𑀭𑁂𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀢𑀧𑁄𑀧𑀓𑁆𑀓𑀫𑀦𑀺𑀭𑀢𑁆𑀣𑀓𑀢𑀸𑀯𑀡𑁆𑀡𑀦𑀸

𑁩𑁯𑁭. 𑀲𑀻𑀮𑀲𑀫𑁆𑀧𑀤𑀸𑀤𑀻𑀳𑀻𑀢𑀺 𑀲𑀻𑀮𑀲𑀫𑁆𑀧𑀤𑀸, 𑀲𑀫𑀸𑀥𑀺𑀲𑀫𑁆𑀧𑀤𑀸, 𑀧𑀜𑁆𑀜𑀸𑀲𑀫𑁆𑀧𑀤𑀸𑀢𑀺 𑀇𑀫𑀸𑀳𑀺 𑀮𑁄𑀓𑀼𑀢𑁆𑀢𑀭𑀸𑀳𑀺 𑀲𑀫𑁆𑀧𑀤𑀸𑀳𑀺. 𑀯𑀺𑀦𑀸𑀢𑀺 𑀯𑀺𑀭𑀳𑀺𑀢𑀢𑁆𑀢𑀸, 𑀯𑀺𑀦𑀸 𑀯𑀸 𑀢𑀸𑀳𑀺 𑀦 𑀓𑀤𑀸𑀘𑀺𑀧𑀺 𑀲𑀸𑀫𑀜𑁆𑀜𑀁 𑀯𑀸 𑀩𑁆𑀭𑀳𑁆𑀫𑀜𑁆𑀜𑀁 𑀯𑀸 𑀲𑀫𑁆𑀪𑀯𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀢𑀧𑁄𑀧𑀓𑁆𑀓𑀫𑀸𑀦𑀁 𑀦𑀺𑀭𑀢𑁆𑀣𑀓𑀢𑀁 𑀤𑀲𑁆𑀲𑁂𑀦𑁆𑀢𑁄𑀢𑀺 𑀲𑀧𑀸𑀞𑀲𑁂𑀲𑀬𑁄𑀚𑀦𑀸. 𑀤𑁄𑀲𑀯𑁂𑀭𑀯𑀺𑀭𑀳𑀺𑀢𑀦𑁆𑀢𑀺 𑀤𑁄𑀲𑀲𑀗𑁆𑀔𑀸𑀢𑀯𑁂𑀭𑀢𑁄 𑀯𑀺𑀭𑀳𑀺𑀢𑀁. 𑀇𑀤𑀜𑁆𑀳𑀺 𑀤𑁄𑀲𑀲𑁆𑀲 𑀫𑁂𑀢𑁆𑀢𑀸𑀬 𑀉𑀚𑀼𑀧𑀝𑀺𑀧𑀓𑁆𑀔𑀢𑁄 𑀯𑀼𑀢𑁆𑀢𑀁. 𑀬𑀁 𑀧𑀦 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑀁 ‘‘𑀤𑁄𑀲𑀕𑁆𑀕𑀳𑀡𑁂𑀦 𑀯𑀸 𑀲𑀩𑁆𑀩𑁂𑀧𑀺 𑀛𑀸𑀦𑀧𑀝𑀺𑀧𑀓𑁆𑀔𑀸 𑀲𑀁𑀓𑀺𑀮𑁂𑀲𑀥𑀫𑁆𑀫𑀸 𑀕𑀳𑀺𑀢𑀸. 𑀯𑁂𑀭𑀕𑁆𑀕𑀳𑀡𑁂𑀦 𑀧𑀘𑁆𑀘𑀢𑁆𑀣𑀺𑀓𑀪𑀽𑀢𑀸 𑀲𑀢𑁆𑀢𑀸. 𑀬𑀤𑀕𑁆𑀕𑁂𑀦 𑀳𑀺 𑀤𑁄𑀲𑀭𑀳𑀺𑀢𑀁, 𑀢𑀤𑀕𑁆𑀕𑁂𑀦 𑀯𑁂𑀭𑀭𑀳𑀺𑀢’’𑀦𑁆𑀢𑀺 (𑀤𑀻. 𑀦𑀺. 𑀝𑀻. 𑁧.𑁩𑁯𑁭), 𑀢𑀤𑁂𑀢𑀁 𑀧𑀸𑀴𑀺𑀬𑀁 𑀯𑁂𑀭𑀲𑀤𑁆𑀤𑀲𑁆𑀲𑁂𑀯 𑀯𑀺𑀚𑁆𑀚𑀫𑀸𑀦𑀢𑁆𑀢𑀸, 𑀅𑀝𑁆𑀞𑀓𑀣𑀸𑀬𑀜𑁆𑀘 𑀢𑀤𑀢𑁆𑀣𑀫𑁂𑀯 𑀤𑀲𑁆𑀲𑁂𑀢𑀼𑀁 𑀤𑁄𑀲𑀲𑀤𑁆𑀤𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀯𑀺𑀘𑀸𑀭𑁂𑀢𑀩𑁆𑀩𑀁.

𑁩𑁯𑁮. 𑀏𑀢𑁆𑀢𑀓𑀫𑀢𑁆𑀢𑀦𑁆𑀢𑀺 𑀦𑀕𑁆𑀕𑀘𑀭𑀺𑀬𑀸𑀤𑀺𑀫𑀢𑁆𑀢𑀁. 𑀧𑀸𑀓𑀝𑀪𑀸𑀯𑁂𑀦 𑀓𑀸𑀬𑀢𑀺 𑀅𑀢𑁆𑀣𑀁 𑀕𑀫𑁂𑀢𑀻𑀢𑀺 𑀧𑀓𑀢𑀺, 𑀮𑁄𑀓𑀲𑀺𑀤𑁆𑀥𑀯𑀸𑀤𑁄. 𑀢𑁂𑀦𑀸𑀳 ‘‘𑀧𑀓𑀢𑀺𑀓𑀣𑀸 𑀏𑀲𑀸’’𑀢𑀺. ‘‘𑀫𑀢𑁆𑀢𑀸 𑀲𑀼𑀔𑀧𑀭𑀺𑀘𑁆𑀘𑀸𑀕𑀸’’𑀢𑀺𑀆𑀤𑀻𑀲𑀼 (𑀥. 𑀧. 𑁨𑁯𑁦) 𑀯𑀺𑀬 𑀫𑀢𑁆𑀢𑀸𑀲𑀤𑁆𑀤𑁄 𑀅𑀧𑁆𑀧𑀢𑁆𑀢𑀁 𑀅𑀦𑁆𑀢𑁄𑀦𑀻𑀢𑀁 𑀓𑀢𑁆𑀯𑀸 𑀧𑀫𑀸𑀡𑀯𑀸𑀘𑀓𑁄𑀢𑀺 𑀆𑀳 ‘‘𑀇𑀫𑀺𑀦𑀸’’𑀢𑀺𑀆𑀤𑀺. 𑀢𑁂𑀦 𑀧𑀦 𑀧𑀫𑀸𑀡𑁂𑀦 𑀧𑀳𑀸𑀢𑀩𑁆𑀩𑁄 𑀏𑀯 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁄 𑀧𑀓𑀭𑀡𑀧𑁆𑀧𑀢𑁆𑀢𑁄. 𑀇𑀫𑀺𑀦𑀸 ‘‘𑀢𑀧𑁄𑀧𑀓𑁆𑀓𑀫𑁂𑀦𑀸’’𑀢𑀺 𑀲𑀤𑁆𑀤𑀦𑁆𑀢𑀭𑁂𑀦 𑀯𑀸 𑀅𑀥𑀺𑀕𑀢𑁄𑀢𑀺 𑀤𑀲𑁆𑀲𑁂𑀢𑀺 ‘‘𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁂𑀦𑀸’’𑀢𑀺 𑀇𑀫𑀺𑀦𑀸. 𑀢𑀢𑁄𑀢𑀺 𑀢𑀲𑁆𑀫𑀸 𑀲𑀸𑀫𑀜𑁆𑀜𑀩𑁆𑀭𑀳𑁆𑀫𑀜𑁆𑀜𑀲𑁆𑀲 𑀅𑀧𑁆𑀧𑀫𑀢𑁆𑀢𑀓𑁂𑀦𑁂𑀯 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁂𑀦 𑀲𑀼𑀤𑀼𑀓𑁆𑀓𑀭𑀪𑀸𑀯𑀢𑁄. 𑀇𑀫𑀁 𑀳𑁂𑀢𑀼𑀲𑀫𑁆𑀩𑀦𑁆𑀥𑀁 𑀲𑀦𑁆𑀥𑀸𑀬 ‘‘𑀧𑀤𑀲𑀫𑁆𑀩𑀦𑁆𑀥𑁂𑀦 𑀲𑀤𑁆𑀥𑀺’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑀯𑀸𑀭𑁂𑀲𑀼.

𑁩𑁯𑁯. 𑀅𑀜𑁆𑀜𑀣𑀸𑀢𑀺 𑀬𑀤𑀺 𑀅𑀘𑁂𑀮𑀓𑀪𑀸𑀯𑀸𑀤𑀺𑀦𑀸 𑀲𑀸𑀫𑀜𑁆𑀜𑀁 𑀯𑀸 𑀩𑁆𑀭𑀳𑁆𑀫𑀜𑁆𑀜𑀁 𑀯𑀸 𑀅𑀪𑀯𑀺𑀲𑁆𑀲, 𑀏𑀯𑀁 𑀲𑀢𑀺 𑀲𑀼𑀯𑀺𑀚𑀸𑀦𑁄𑀯 𑀲𑀫𑀡𑁄, 𑀲𑀼𑀯𑀺𑀚𑀸𑀦𑁄 𑀩𑁆𑀭𑀸𑀳𑁆𑀫𑀡𑁄. 𑀬𑀲𑁆𑀫𑀸 𑀧𑀦 𑀢𑀼𑀫𑁆𑀳𑁂 𑀇𑀢𑁄 𑀅𑀜𑁆𑀜𑀣𑀸𑀯 𑀲𑀸𑀫𑀜𑁆𑀜𑀁, 𑀅𑀜𑁆𑀜𑀣𑀸 𑀩𑁆𑀭𑀳𑁆𑀫𑀜𑁆𑀜𑀁 𑀯𑀤𑀣, 𑀢𑀲𑁆𑀫𑀸 𑀤𑀼𑀚𑁆𑀚𑀸𑀦𑁄𑀯 𑀲𑀫𑀡𑁄 𑀤𑀼𑀚𑁆𑀚𑀸𑀦𑁄 𑀩𑁆𑀭𑀸𑀳𑁆𑀫𑀡𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀇𑀤𑀁 𑀲𑀦𑁆𑀥𑀸𑀬𑀸𑀳𑀸’’𑀢𑀺. 𑀢𑀁 𑀧𑀓𑀢𑀺𑀯𑀸𑀤𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀬𑀁 𑀧𑀼𑀩𑁆𑀩𑁂 𑀧𑀸𑀓𑀢𑀺𑀓𑀁 𑀲𑀸𑀫𑀜𑁆𑀜𑀁, 𑀩𑁆𑀭𑀳𑁆𑀫𑀜𑁆𑀜𑀜𑁆𑀘 𑀳𑀤𑀬𑁂 𑀞𑀧𑁂𑀢𑁆𑀯𑀸 𑀢𑁂𑀦 𑀅𑀘𑁂𑀮𑀓𑀲𑁆𑀲𑀧𑁂𑀦 ‘‘𑀤𑀼𑀓𑁆𑀓𑀭𑀁 𑀲𑀼𑀤𑀼𑀓𑁆𑀓𑀭’’𑀦𑁆𑀢𑀺 𑀯𑀼𑀢𑁆𑀢𑀁, 𑀪𑀕𑀯𑀢𑀸 𑀘 𑀢𑀫𑁂𑀯 𑀲𑀦𑁆𑀥𑀸𑀬 ‘‘𑀧𑀓𑀢𑀺 𑀔𑁄 𑀏𑀲𑀸’’𑀢𑀺𑀆𑀤𑀺 𑀪𑀸𑀲𑀺𑀢𑀁, 𑀢𑀫𑁂𑀯 𑀇𑀥 𑀧𑀸𑀓𑀢𑀺𑀓𑀲𑀸𑀫𑀜𑁆𑀜𑀩𑁆𑀭𑀳𑁆𑀫𑀜𑁆𑀜𑀯𑀺𑀲𑀬𑀁 𑀓𑀣𑀁 𑀧𑀝𑀺𑀲𑀁𑀳𑀭𑀺𑀢𑁆𑀯𑀸. 𑀲𑀪𑀸𑀯𑀢𑁄𑀯 𑀧𑀭𑀫𑀢𑁆𑀣𑀢𑁄 𑀏𑀯 𑀲𑀫𑀡𑀲𑁆𑀲, 𑀩𑁆𑀭𑀸𑀳𑁆𑀫𑀡𑀲𑁆𑀲 𑀘 𑀤𑀼𑀚𑁆𑀚𑀸𑀦𑀪𑀸𑀯𑀁 𑀆𑀯𑀺𑀓𑀭𑁄𑀦𑁆𑀢𑁄 𑀧𑀼𑀦𑀧𑀺 ‘‘𑀧𑀓𑀢𑀺 𑀔𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀭𑀸𑀧𑀻𑀢𑀺 𑀲𑀫𑀡𑀩𑁆𑀭𑀸𑀳𑁆𑀫𑀡𑀯𑀸𑀤𑁂𑀧𑀺. 𑀧𑀤𑀲𑀫𑁆𑀩𑀦𑁆𑀥𑀦𑁆𑀢𑀺 𑀳𑁂𑀢𑀼𑀧𑀤𑁂𑀦 𑀲𑀤𑁆𑀥𑀺𑀁 𑀧𑀼𑀩𑁆𑀩𑀸𑀧𑀭𑀯𑀸𑀓𑁆𑀬𑀲𑀫𑁆𑀩𑀦𑁆𑀥𑀁.

𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀲𑀫𑁆𑀧𑀤𑀸𑀯𑀡𑁆𑀡𑀦𑀸

𑁪𑁦𑁦-𑁧. 𑀧𑀡𑁆𑀟𑀺𑀢𑁄𑀢𑀺 𑀳𑁂𑀢𑀼𑀲𑀫𑁆𑀧𑀢𑁆𑀢𑀺𑀲𑀺𑀤𑁆𑀥𑁂𑀦 𑀧𑀡𑁆𑀟𑀺𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀓𑀣𑀁 𑀉𑀕𑁆𑀕𑀳𑁂𑀲𑀻𑀢𑀺 𑀧𑀭𑀺𑀧𑀓𑁆𑀓𑀜𑀸𑀡𑀢𑁆𑀢𑀸 𑀖𑀝𑁂 𑀧𑀤𑀻𑀧𑁂𑀦 𑀯𑀺𑀬 𑀅𑀩𑁆𑀪𑀦𑁆𑀢𑀭𑁂 𑀲𑀫𑀼𑀚𑁆𑀚𑀮𑀦𑁆𑀢𑁂𑀦 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑁂𑀦 𑀢𑀢𑁆𑀣 𑀢𑀢𑁆𑀣 𑀪𑀕𑀯𑀢𑀸 𑀤𑁂𑀲𑀺𑀢𑀫𑀢𑁆𑀣𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀢𑀁 𑀤𑁂𑀲𑀦𑀁 𑀉𑀧𑀥𑀸𑀭𑁂𑀲𑀺. 𑀬𑀲𑁆𑀫𑀸 𑀉𑀕𑁆𑀕𑀳𑁂𑀲𑀺, 𑀢𑀲𑁆𑀫𑀸…𑀧𑁂… 𑀯𑀺𑀤𑀺𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲 𑀘𑀸𑀢𑀺 𑀬𑁄 𑀅𑀘𑁂𑀮𑀓𑁄 𑀳𑁄𑀢𑀺, 𑀬𑀸𑀯 𑀉𑀤𑀓𑁄𑀭𑁄𑀳𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺, 𑀢𑀲𑁆𑀲 𑀘. 𑀢𑀲𑁆𑀲 𑀘𑁂𑀢𑀺 𑀯𑀸 𑀧𑀤𑀘𑁆𑀙𑁂𑀤𑁄, 𑀅𑀪𑀸𑀯𑀺𑀢𑀸 𑀅𑀲𑀘𑁆𑀙𑀺𑀓𑀢𑀸 𑀳𑁄𑀢𑀺 𑀘𑁂𑀢𑀺 𑀬𑁄𑀚𑀦𑀸. 𑀢𑀸 𑀲𑀫𑁆𑀧𑀢𑁆𑀢𑀺𑀬𑁄 𑀧𑀼𑀘𑁆𑀙𑀸𑀫𑀺, 𑀬𑀸𑀳𑀺 𑀲𑀫𑀡𑁄 𑀘 𑀩𑁆𑀭𑀸𑀳𑁆𑀫𑀡𑁄 𑀘 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀻𑀮𑀲𑀫𑁆𑀧𑀤𑀸𑀤𑀺𑀯𑀺𑀚𑀸𑀦𑀦𑀢𑁆𑀣𑀦𑁆𑀢𑀺 𑀲𑀻𑀮𑀲𑀫𑁆𑀧𑀤𑀸𑀤𑀺𑀯𑀺𑀚𑀸𑀦𑀦𑀳𑁂𑀢𑀼. ‘‘𑀓𑀲𑁆𑀫𑀸 𑀧𑀼𑀘𑁆𑀙𑀢𑀻’’𑀢𑀺 𑀳𑀺 𑀯𑀼𑀢𑁆𑀢𑀁. 𑀅𑀣-𑀲𑀤𑁆𑀤𑁄 𑀘𑁂𑀢𑁆𑀣 𑀓𑀸𑀭𑀡𑁂. 𑀏𑀯𑀫𑀻𑀤𑀺𑀲𑁂𑀲𑀼. 𑀲𑀻𑀮𑀲𑀫𑁆𑀧𑀤𑀸𑀬𑀸𑀢𑀺 𑀏𑀢𑁆𑀣 𑀇𑀢𑀺𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄, 𑀉𑀧𑀮𑀓𑁆𑀔𑀡𑀦𑀺𑀤𑁆𑀤𑁂𑀲𑁄 𑀯𑀸𑀬𑀁, 𑀢𑁂𑀦 ‘‘𑀘𑀺𑀢𑁆𑀢𑀲𑀫𑁆𑀧𑀤𑀸𑀬, 𑀧𑀜𑁆𑀜𑀸𑀲𑀫𑁆𑀧𑀤𑀸𑀬𑀸’’𑀢𑀺 𑀧𑀤𑀤𑁆𑀯𑀬𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑁂𑀦𑀸𑀳 ‘‘𑀲𑀻𑀮𑀘𑀺𑀢𑁆𑀢𑀧𑀜𑁆𑀜𑀸𑀲𑀫𑁆𑀧𑀤𑀸𑀳𑀺 𑀅𑀜𑁆𑀜𑀸’’𑀢𑀺. 𑀇𑀫𑁂𑀳𑀺 𑀘 𑀅𑀲𑁂𑀓𑁆𑀔𑀲𑀻𑀮𑀸𑀤𑀺𑀓𑁆𑀔𑀦𑁆𑀥𑀢𑁆𑀢𑀬𑀁 𑀲𑀗𑁆𑀕𑀳𑀺𑀢𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀅𑀭𑀳𑀢𑁆𑀢𑀨𑀮𑀫𑁂𑀯𑀸’’𑀢𑀺. 𑀢𑀢𑁆𑀣 𑀓𑀸𑀭𑀡𑀁 𑀤𑀲𑁆𑀲𑁂𑀢𑀺 ‘‘𑀅𑀭𑀳𑀢𑁆𑀢𑀨𑀮𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺𑀆𑀤𑀺𑀦𑀸. 𑀇𑀤𑀜𑁆𑀳𑀺 𑀓𑀸𑀓𑁄𑀮𑁄𑀓𑀦𑀫𑀺𑀯 𑀉𑀪𑀬𑀸𑀧𑁂𑀓𑁆𑀔𑀯𑀘𑀦𑀁.

𑀲𑀻𑀳𑀦𑀸𑀤𑀓𑀣𑀸𑀯𑀡𑁆𑀡𑀦𑀸

𑁪𑁦𑁨. 𑀅𑀦𑀼𑀢𑁆𑀢𑀭𑀦𑁆𑀢𑀺 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑀸𑀬, 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑁆𑀣𑀯𑀺𑀲𑀬𑀢𑀸𑀬 𑀘 𑀅𑀦𑀼𑀢𑁆𑀢𑀭𑀁. 𑀫𑀳𑀸𑀲𑀻𑀳𑀦𑀸𑀤𑀦𑁆𑀢𑀺 𑀫𑀳𑀦𑁆𑀢𑀁 𑀩𑀼𑀤𑁆𑀥𑀲𑀻𑀳𑀦𑀸𑀤𑀁. 𑀅𑀢𑀺𑀯𑀺𑀬 𑀅𑀘𑁆𑀘𑀦𑁆𑀢𑀯𑀺𑀲𑀼𑀤𑁆𑀥𑀢𑀸𑀬 𑀧𑀭𑀫𑀯𑀺𑀲𑀼𑀤𑁆𑀥𑀁. ‘‘𑀧𑀭𑀫𑀦𑁆𑀢𑀺 𑀉𑀓𑁆𑀓𑀝𑁆𑀞𑀁. 𑀢𑁂𑀦𑀸𑀳 ‘𑀉𑀢𑁆𑀢𑀫’𑀦𑁆𑀢𑀺’’ 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑀁, 𑀉𑀓𑁆𑀓𑀝𑁆𑀞𑀧𑀭𑀺𑀬𑀸𑀬𑁄 𑀘 𑀧𑀭𑀫𑀲𑀤𑁆𑀤𑁄 𑀅𑀢𑁆𑀣𑀻𑀢𑀺 𑀢𑀲𑁆𑀲𑀸𑀥𑀺𑀧𑁆𑀧𑀸𑀬𑁄. 𑀲𑀻𑀮𑀫𑁂𑀯𑀸𑀢𑀺 𑀮𑁄𑀓𑀺𑀬𑀲𑀻𑀮𑀫𑀢𑁆𑀢𑀢𑁆𑀢𑀸 𑀲𑀻𑀮𑀲𑀸𑀫𑀜𑁆𑀜𑀫𑁂𑀯. 𑀬𑀣𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 𑀪𑀕𑀯𑀢𑁄 𑀮𑁄𑀓𑀼𑀢𑁆𑀢𑀭𑀲𑀻𑀮𑀁 𑀲𑀯𑀸𑀲𑀦𑀧𑀝𑀺𑀧𑀓𑁆𑀔𑀥𑀫𑁆𑀫𑀯𑀺𑀤𑁆𑀥𑀁𑀲𑀦𑀢𑁄, 𑀏𑀯𑀁 𑀮𑁄𑀓𑀺𑀬𑀲𑀻𑀮𑀫𑁆𑀧𑀺 𑀅𑀦𑀜𑁆𑀜𑀲𑀸𑀥𑀸𑀭𑀡𑀫𑁂𑀯 𑀢𑀤𑀦𑀼𑀘𑁆𑀙𑀯𑀺𑀓𑀪𑀸𑀯𑁂𑀦 𑀧𑀯𑀢𑁆𑀢𑀢𑁆𑀢𑀸. 𑀏𑀯𑀜𑁆𑀳𑀺 ‘‘𑀦𑀸𑀳𑀁 𑀢𑀢𑁆𑀣𑀸’’𑀢𑀺 𑀧𑀸𑀴𑀺𑀯𑀘𑀦𑀁 𑀉𑀧𑀧𑀦𑁆𑀦𑀁 𑀳𑁄𑀢𑀺. ‘‘𑀬𑀸𑀯𑀢𑀸 𑀓𑀲𑁆𑀲𑀧 𑀅𑀭𑀺𑀬𑀁 𑀧𑀭𑀫𑀁 𑀲𑀻𑀮’’𑀦𑁆𑀢𑀺 𑀇𑀤𑀁 ‘‘𑀲𑀻𑀮𑀲𑁆𑀲 𑀯𑀡𑁆𑀡𑀁 𑀪𑀸𑀲𑀦𑁆𑀢𑀻’’𑀢𑀺 𑀏𑀢𑁆𑀣 𑀆𑀓𑀸𑀭𑀤𑀲𑁆𑀲𑀦𑀁. ‘‘𑀬𑀤𑀺𑀤𑀁 𑀅𑀥𑀺𑀲𑀻𑀮’’𑀦𑁆𑀢𑀺 𑀇𑀤𑀁 𑀧𑀦 ‘‘𑀢𑀢𑁆𑀣𑀸’’𑀢𑀺 𑀧𑀤𑀤𑁆𑀯𑀬𑁂 𑀅𑀦𑀺𑀬𑀫𑀯𑀘𑀦𑀁. ‘‘𑀬𑀤𑀺𑀤𑀁 𑀅𑀥𑀺𑀲𑀻𑀮’’𑀦𑁆𑀢𑀺 𑀘 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀯𑀲𑁂𑀦 𑀤𑀼𑀯𑀺𑀥𑀫𑁆𑀧𑀺 𑀩𑀼𑀤𑁆𑀥𑀲𑀻𑀮𑀁 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢-𑀲𑀤𑁆𑀤𑁂𑀦𑀧𑀺 𑀉𑀪𑀬𑀲𑁆𑀲𑁂𑀯 𑀧𑀭𑀸𑀫𑀲𑀦𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀲𑀻𑀮𑁂𑀧𑀺 𑀧𑀭𑀫𑀲𑀻𑀮𑁂𑀧𑀻’’𑀢𑀺𑀆𑀤𑀺𑀫𑀸𑀳. 𑀲𑀫𑀲𑀫𑀦𑁆𑀢𑀺 𑀲𑀫𑁂𑀦 𑀯𑀺𑀲𑁂𑀲𑀦𑀪𑀽𑀢𑁂𑀦 𑀲𑀻𑀮𑁂𑀦 𑀲𑀫𑀦𑁆𑀢𑀺 𑀅𑀢𑁆𑀣𑀁 𑀯𑀺𑀜𑁆𑀜𑀸𑀧𑁂𑀢𑀼𑀁 ‘‘𑀫𑀫 𑀲𑀻𑀮𑀲𑀫𑁂𑀦 𑀲𑀻𑀮𑁂𑀦 𑀫𑀬𑀸 𑀲𑀫’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀺𑀁 𑀲𑀻𑀮𑁂𑀢𑀺 𑀤𑀼𑀯𑀺𑀥𑁂𑀧𑀺 𑀲𑀻𑀮𑁂. 𑀇𑀢𑀺 𑀇𑀫𑀦𑁆𑀢𑀺 𑀏𑀯𑀁 𑀇𑀫𑀁 𑀲𑀻𑀮𑀯𑀺𑀲𑀬𑀁. 𑀧𑀞𑀫𑀦𑁆𑀢𑀺 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑀢𑁄 𑀧𑀞𑀫𑀁 𑀧𑀯𑀢𑁆𑀢𑀢𑁆𑀢𑀸 𑀧𑀞𑀫𑀪𑀽𑀢𑀁.

𑀢𑀧𑀢𑀻𑀢𑀺 𑀓𑀺𑀮𑁂𑀲𑁂 𑀲𑀦𑁆𑀢𑀧𑁆𑀧𑀢𑀺, 𑀯𑀺𑀥𑀫𑀢𑀻𑀢𑀺 𑀅𑀢𑁆𑀣𑁄. ‘‘𑀢𑀤𑁂𑀯𑀸’’𑀢𑀺 𑀇𑀫𑀺𑀦𑀸 𑀢𑀼𑀮𑁆𑀬𑀸𑀥𑀺𑀓𑀭𑀡𑀲𑀫𑀸𑀲𑀫𑀸𑀳. 𑀚𑀺𑀕𑀼𑀘𑁆𑀙𑀢𑀻𑀢𑀺 𑀳𑀻𑀴𑁂𑀢𑀺 𑀮𑀸𑀫𑀓𑀢𑁄 𑀞𑀧𑁂𑀢𑀺. 𑀆𑀭𑀓𑀸 𑀓𑀺𑀮𑁂𑀲𑁂𑀳𑀻𑀢𑀺 𑀓𑀢𑁆𑀯𑀸 𑀦𑀺𑀤𑁆𑀤𑁄𑀲𑀢𑁆𑀢𑀸 𑀅𑀭𑀺𑀬𑀸. 𑀆𑀭𑀫𑁆𑀪𑀯𑀢𑁆𑀣𑀼𑀯𑀲𑁂𑀦𑀸𑀢𑀺 𑀅𑀝𑁆𑀞𑀸𑀭𑀫𑁆𑀪𑀯𑀢𑁆𑀣𑀼𑀯𑀲𑁂𑀦. 𑀯𑀺𑀧𑀲𑁆𑀲𑀦𑀸𑀯𑀻𑀭𑀺𑀬𑀲𑀗𑁆𑀔𑀸𑀢𑀸𑀢𑀺 𑀯𑀺𑀧𑀲𑁆𑀲𑀦𑀸𑀲𑀫𑁆𑀧𑀬𑀼𑀢𑁆𑀢𑀯𑀻𑀭𑀺𑀬𑀲𑀗𑁆𑀔𑀸𑀢𑀸. 𑀮𑁄𑀓𑀺𑀬𑀫𑀢𑁆𑀢𑀢𑁆𑀢𑀸 𑀢𑀧𑁄𑀚𑀺𑀕𑀼𑀘𑁆𑀙𑀸𑀯. 𑀫𑀕𑁆𑀕𑀨𑀮𑀲𑀫𑁆𑀧𑀬𑀼𑀢𑁆𑀢𑀸 𑀯𑀻𑀭𑀺𑀬𑀲𑀗𑁆𑀔𑀸𑀢𑀸 𑀢𑀧𑁄𑀚𑀺𑀕𑀼𑀘𑁆𑀙𑀸𑀢𑀺 𑀅𑀥𑀺𑀓𑀸𑀭𑀯𑀲𑁂𑀦 𑀲𑀫𑁆𑀩𑀦𑁆𑀥𑁄. 𑀲𑀩𑁆𑀩𑀼𑀓𑁆𑀓𑀝𑁆𑀞𑀪𑀸𑀯𑀢𑁄 𑀧𑀭𑀫𑀸 𑀦𑀸𑀫. 𑀬𑀣𑀸 𑀬𑀼𑀯𑀺𑀦𑁄 𑀪𑀸𑀯𑁄 𑀬𑁄𑀩𑁆𑀩𑀦𑀁, 𑀏𑀯𑀁 𑀚𑀺𑀕𑀼𑀘𑁆𑀙𑀺𑀦𑁄 𑀪𑀸𑀯𑁄 𑀚𑁂𑀕𑀼𑀘𑁆𑀙𑀁. 𑀬𑀤𑀺𑀤𑀁 𑀅𑀥𑀺𑀚𑁂𑀕𑀼𑀘𑁆𑀙𑀦𑁆𑀢𑀺 𑀲𑀻𑀮𑁂 𑀯𑀺𑀬 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀯𑀲𑁂𑀦 𑀤𑀼𑀯𑀺𑀥𑀫𑁆𑀧𑀺 𑀩𑀼𑀤𑁆𑀥𑀚𑁂𑀕𑀼𑀘𑁆𑀙𑀁. 𑀢𑀢𑁆𑀣𑀸𑀢𑀺 𑀚𑁂𑀕𑀼𑀘𑁆𑀙𑁂𑀧𑀺 𑀅𑀥𑀺𑀚𑁂𑀕𑀼𑀘𑁆𑀙𑁂𑀧𑀺. 𑀓𑀫𑁆𑀫𑀲𑁆𑀲𑀓𑀢𑀸𑀧𑀜𑁆𑀜𑀸𑀢𑀺 ‘‘𑀅𑀢𑁆𑀣𑀺 𑀤𑀺𑀦𑁆𑀦𑀁, 𑀅𑀢𑁆𑀣𑀺 𑀬𑀺𑀝𑁆𑀞’’𑀦𑁆𑀢𑀺𑀆𑀤𑀺 (𑀫. 𑀦𑀺. 𑁧.𑁪𑁪𑁧; 𑀯𑀺𑀪. 𑁭𑁯𑁩) 𑀦𑀬𑀧𑁆𑀧𑀯𑀢𑁆𑀢𑀁 𑀜𑀸𑀡𑀁. 𑀬𑀣𑀸𑀳 𑀯𑀺𑀪𑀗𑁆𑀕𑁂 𑁋

‘‘𑀢𑀢𑁆𑀣 𑀓𑀢𑀭𑀁 𑀓𑀫𑁆𑀫𑀲𑁆𑀲𑀓𑀢𑀸𑀜𑀸𑀡𑀁, 𑀅𑀢𑁆𑀣𑀺 𑀤𑀺𑀦𑁆𑀦𑀁, 𑀅𑀢𑁆𑀣𑀺 𑀬𑀺𑀝𑁆𑀞𑀁, 𑀅𑀢𑁆𑀣𑀺 𑀳𑀼𑀢𑀁, 𑀅𑀢𑁆𑀣𑀺 𑀲𑀼𑀓𑀝𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄…𑀧𑁂… 𑀞𑀧𑁂𑀢𑁆𑀯𑀸 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀁 𑀜𑀸𑀡𑀁 𑀲𑀩𑁆𑀩𑀸𑀧𑀺 𑀲𑀸𑀲𑀯𑀸 𑀓𑀼𑀲𑀮𑀸 𑀧𑀜𑁆𑀜𑀸 𑀓𑀫𑁆𑀫𑀲𑁆𑀲𑀓𑀢𑀸𑀜𑀸𑀡’’𑀦𑁆𑀢𑀺 (𑀯𑀺𑀪. 𑁭𑁯𑁩).

𑀲𑀩𑁆𑀩𑀫𑁆𑀧𑀺 𑀳𑀺 𑀅𑀓𑀼𑀲𑀮𑀁 𑀅𑀢𑁆𑀢𑀦𑁄 𑀯𑀸 𑀳𑁄𑀢𑀼, 𑀧𑀭𑀲𑁆𑀲 𑀯𑀸, 𑀦 𑀲𑀓𑀁 𑀦𑀸𑀫. 𑀓𑀲𑁆𑀫𑀸? 𑀅𑀢𑁆𑀣𑀪𑀜𑁆𑀚𑀦𑀢𑁄, 𑀅𑀦𑀢𑁆𑀣𑀚𑀦𑀦𑀢𑁄 𑀘. 𑀢𑀣𑀸 𑀲𑀩𑁆𑀩𑀫𑁆𑀧𑀺 𑀓𑀼𑀲𑀮𑀁 𑀲𑀓𑀁 𑀦𑀸𑀫. 𑀓𑀲𑁆𑀫𑀸? 𑀅𑀦𑀢𑁆𑀣𑀪𑀜𑁆𑀚𑀦𑀢𑁄, 𑀅𑀢𑁆𑀣𑀚𑀦𑀦𑀢𑁄 𑀘. 𑀏𑀯𑀁 𑀓𑀫𑁆𑀫𑀲𑁆𑀲𑀓𑀪𑀸𑀯𑁂 𑀧𑀯𑀢𑁆𑀢𑀸 𑀧𑀜𑁆𑀜𑀸 𑀓𑀫𑁆𑀫𑀲𑁆𑀲𑀓𑀢𑀸𑀧𑀜𑁆𑀜𑀸 𑀦𑀸𑀫. 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀢𑀺 𑀫𑀕𑁆𑀕𑀲𑀘𑁆𑀘𑀲𑁆𑀲, 𑀧𑀭𑀫𑀢𑁆𑀣𑀲𑀘𑁆𑀘𑀲𑁆𑀲 𑀘 𑀅𑀦𑀼𑀮𑁄𑀫𑀦𑀢𑁄 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀲𑀜𑁆𑀜𑀺𑀢𑀸 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸, 𑀮𑁄𑀓𑀺𑀬𑀫𑀢𑁆𑀢𑀢𑁄 𑀧𑀜𑁆𑀜𑀸𑀯. 𑀇𑀢𑁆𑀣𑀺𑀮𑀺𑀗𑁆𑀕𑀲𑁆𑀲 𑀦𑀧𑀼𑀁𑀲𑀓𑀮𑀺𑀗𑁆𑀕𑀯𑀺𑀧𑀭𑀺𑀬𑀸𑀬𑁄 𑀇𑀥 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄. 𑀬𑀸𑀬𑀁 𑀅𑀥𑀺𑀧𑀜𑁆𑀜𑀸𑀢𑀺 𑀲𑀻𑀮𑁂 𑀯𑀺𑀬 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀯𑀲𑁂𑀦 𑀤𑀼𑀯𑀺𑀥𑀸𑀧𑀺 𑀩𑀼𑀤𑁆𑀥𑀧𑀜𑁆𑀜𑀸. 𑀢𑀢𑁆𑀣𑀸𑀢𑀺 𑀧𑀜𑁆𑀜𑀸𑀬𑀧𑀺 𑀅𑀥𑀺𑀧𑀜𑁆𑀜𑀸𑀬𑀧𑀺. 𑀬𑀣𑀸𑀭𑀳𑀁 𑀧𑀭𑀺𑀢𑁆𑀢𑀫𑀳𑀕𑁆𑀕𑀢𑀪𑀸𑀯𑀢𑁄 𑀯𑀺𑀫𑀼𑀢𑁆𑀢𑀺𑀬𑁂𑀯 𑀦𑀸𑀫. 𑀫𑀕𑁆𑀕𑀨𑀮𑀯𑀲𑁂𑀦 𑀓𑀺𑀮𑁂𑀲𑀸𑀦𑀁 𑀲𑀫𑀼𑀘𑁆𑀙𑀺𑀦𑁆𑀤𑀦𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀸𑀦𑀺 𑀲𑀫𑀼𑀘𑁆𑀙𑁂𑀤𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀫𑀼𑀢𑁆𑀢𑀺𑀬𑁄. 𑀅𑀣 𑀯𑀸 𑀲𑀫𑁆𑀫𑀸𑀯𑀸𑀘𑀸𑀤𑀺𑀯𑀺𑀭𑀢𑀻𑀦𑀁 𑀅𑀥𑀺𑀲𑀻𑀮𑀕𑁆𑀕𑀳𑀡𑁂𑀦, 𑀲𑀫𑁆𑀫𑀸𑀯𑀸𑀬𑀸𑀫𑀲𑁆𑀲 𑀅𑀥𑀺𑀚𑁂𑀕𑀼𑀘𑁆𑀙𑀕𑁆𑀕𑀳𑀡𑁂𑀦, 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀅𑀥𑀺𑀧𑀜𑁆𑀜𑀸𑀕𑁆𑀕𑀳𑀡𑁂𑀦 𑀕𑀳𑀺𑀢𑀢𑁆𑀢𑀸 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀲𑀢𑀺𑀲𑀫𑀸𑀥𑀬𑁄 𑀫𑀕𑁆𑀕𑀨𑀮𑀧𑀭𑀺𑀬𑀸𑀧𑀦𑁆𑀦𑀸 𑀲𑀫𑀼𑀘𑁆𑀙𑁂𑀤𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀫𑀼𑀢𑁆𑀢𑀺𑀬𑁄 𑀤𑀝𑁆𑀞𑀩𑁆𑀩𑀸. 𑀦𑀺𑀲𑁆𑀲𑀭𑀡𑀯𑀺𑀫𑀼𑀢𑁆𑀢𑀺 𑀧𑀦 𑀦𑀺𑀩𑁆𑀩𑀸𑀦𑀫𑁂𑀯. 𑀬𑀸 𑀅𑀬𑀁 𑀅𑀥𑀺𑀯𑀺𑀫𑀼𑀢𑁆𑀢𑀻𑀢𑀺 𑀲𑀻𑀮𑁂 𑀯𑀼𑀢𑁆𑀢𑀦𑀬𑁂𑀦 𑀤𑀼𑀯𑀺𑀥𑀸𑀧𑀺 𑀅𑀥𑀺𑀯𑀺𑀫𑀼𑀢𑁆𑀢𑀺. 𑀢𑀢𑁆𑀣𑀸𑀢𑀺 𑀯𑀺𑀫𑀼𑀢𑁆𑀢𑀺𑀬𑀸𑀧𑀺 𑀅𑀥𑀺𑀯𑀺𑀫𑀼𑀢𑁆𑀢𑀺𑀬𑀸𑀧𑀺.

𑁪𑁦𑁩. 𑀬𑀁 𑀓𑀺𑀜𑁆𑀘𑀺 𑀚𑀦𑀯𑀺𑀯𑀺𑀢𑁆𑀢𑀝𑁆𑀞𑀸𑀦𑀁 𑀲𑀼𑀜𑁆𑀜𑀸𑀕𑀸𑀭𑀫𑀺𑀥𑀸𑀥𑀺𑀧𑁆𑀧𑁂𑀢𑀁. 𑀢𑀢𑁆𑀣 𑀦𑀤𑀦𑁆𑀢𑁂𑀦 𑀯𑀺𑀦𑀸 𑀅𑀜𑁆𑀜𑁄 𑀚𑀦𑁄 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀏𑀓𑀓𑁄𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀽𑀢𑀺 𑀔𑀢𑁆𑀢𑀺𑀬𑀧𑀭𑀺𑀲𑀸, 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀲𑀫𑀡𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀢𑀸𑀯𑀢𑀺𑀁𑀲𑀫𑀸𑀭𑀩𑁆𑀭𑀳𑁆𑀫𑀧𑀭𑀺𑀲𑀸𑀢𑀺 𑀇𑀫𑀸𑀲𑀼 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼.

𑀢𑀤𑀢𑁆𑀣𑀁 𑀫𑀚𑁆𑀛𑀺𑀫𑀸𑀕𑀫𑀯𑀭𑁂 𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢𑀧𑀤𑁂𑀦 (𑀫. 𑀦𑀺. 𑁧.𑁧𑁫𑁦) 𑀲𑀸𑀥𑁂𑀦𑁆𑀢𑁄 ‘‘𑀘𑀢𑁆𑀢𑀸𑀭𑀺𑀫𑀸𑀦𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑁂𑀲𑀸𑀭𑀚𑁆𑀚𑀸𑀦𑀻𑀢𑀺 𑀯𑀺𑀲𑀸𑀭𑀤𑀪𑀸𑀯𑀸, 𑀜𑀸𑀡𑀧𑁆𑀧𑀳𑀸𑀦𑀅𑀦𑁆𑀢𑀭𑀸𑀬𑀺𑀓𑀦𑀺𑀬𑁆𑀬𑀸𑀦𑀺𑀓𑀥𑀫𑁆𑀫𑀤𑁂𑀲𑀦𑀸𑀦𑀺𑀫𑀺𑀢𑁆𑀢𑀁 𑀓𑀼𑀢𑁄𑀘𑀺𑀧𑀺 𑀅𑀲𑀦𑁆𑀢𑀲𑁆𑀲𑀦𑀪𑀸𑀯𑀸 𑀦𑀺𑀩𑁆𑀪𑀬𑀪𑀸𑀯𑀸𑀢𑀺 𑀅𑀢𑁆𑀣𑁄. ‘‘𑀯𑁂𑀲𑀸𑀭𑀚𑁆𑀚’’𑀦𑁆𑀢𑀺 𑀳𑀺 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀲𑀸𑀭𑀚𑁆𑀚𑀸𑀪𑀸𑀯𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀲𑁄𑀫𑀦𑀲𑁆𑀲𑀫𑀬𑀜𑀸𑀡𑀲𑁆𑀲𑁂𑀢𑀁 𑀦𑀸𑀫𑀁. 𑀅𑀜𑁆𑀜𑁂𑀳𑀺 𑀧𑀦 𑀅𑀲𑀸𑀥𑀸𑀭𑀡𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀯𑁂𑀲𑀸𑀭𑀚𑁆𑀚𑀸𑀦𑀻’’𑀢𑀺 𑀯𑀼𑀢𑁆𑀢𑀁. ‘‘𑀬𑀣𑀸 𑀯𑀸 𑀧𑀼𑀩𑁆𑀩𑀩𑀼𑀤𑁆𑀥𑀸𑀦𑀁 𑀯𑁂𑀲𑀸𑀭𑀚𑁆𑀚𑀸𑀦𑀺 𑀧𑀼𑀜𑁆𑀜𑀼𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀬𑀸 𑀆𑀕𑀢𑀸𑀦𑀺, 𑀢𑀣𑀸 𑀆𑀕𑀢𑀯𑁂𑀲𑀸𑀭𑀚𑁆𑀚𑀸𑀦𑀻’’𑀢𑀺 𑀯𑀸 𑀤𑀼𑀢𑀺𑀬𑀲𑁆𑀲 𑀢𑀣𑀸𑀕𑀢𑀲𑀤𑁆𑀤𑀲𑁆𑀲 𑀢𑀼𑀮𑁆𑀬𑀸𑀥𑀺𑀓𑀭𑀡𑀢𑁆𑀢𑀸 𑀏𑀯𑀁 𑀯𑀼𑀢𑁆𑀢𑀁. 𑀅𑀬𑀁 𑀅𑀝𑁆𑀞𑀓𑀣𑀸𑀦𑀬𑁄. 𑀦𑁂𑀭𑀼𑀢𑁆𑀢𑀺𑀓𑀸 𑀧𑀦 𑀯𑀤𑀦𑁆𑀢𑀺 ‘‘𑀲𑀫𑀸𑀲𑁂 𑀲𑀺𑀤𑁆𑀥𑁂 𑀲𑀸𑀫𑀜𑁆𑀜𑀢𑁆𑀢𑀸, 𑀲𑀜𑁆𑀜𑀸𑀲𑀤𑁆𑀤𑀢𑁆𑀢𑀸 𑀘 𑀢𑀣𑀸 𑀯𑀼𑀢𑁆𑀢’’𑀦𑁆𑀢𑀺. 𑀆𑀲𑀪𑀁 𑀞𑀸𑀦𑀦𑁆𑀢𑀺 𑀲𑁂𑀝𑁆𑀞𑀝𑁆𑀞𑀸𑀦𑀁 𑀉𑀢𑁆𑀢𑀫𑀝𑁆𑀞𑀸𑀦𑀁. 𑀲𑀩𑁆𑀩𑀜𑁆𑀜𑀼𑀢𑀁 𑀧𑀝𑀺𑀚𑀸𑀦𑀦𑀯𑀲𑁂𑀦 𑀅𑀪𑀺𑀫𑀼𑀔𑀁 𑀕𑀘𑁆𑀙𑀦𑁆𑀢𑀺, 𑀅𑀝𑁆𑀞𑀧𑀭𑀺𑀲𑀁 𑀉𑀧𑀲𑀗𑁆𑀓𑀫𑀦𑁆𑀢𑀻𑀢𑀺 𑀯𑀸 𑀆𑀲𑀪𑀸, 𑀩𑀼𑀤𑁆𑀥𑀸, 𑀢𑁂𑀲𑀁 𑀞𑀸𑀦𑀦𑁆𑀢𑀺𑀧𑀺 𑀅𑀢𑁆𑀣𑁄.

𑀅𑀧𑀺𑀘 𑀢𑀬𑁄 𑀧𑀼𑀗𑁆𑀕𑀯𑀸 𑁋 𑀕𑀯𑀲𑀢𑀚𑁂𑀝𑁆𑀞𑀓𑁄 𑀉𑀲𑀪𑁄, 𑀕𑀯𑀲𑀳𑀲𑁆𑀲𑀚𑁂𑀝𑁆𑀞𑀓𑁄 𑀯𑀲𑀪𑁄. 𑀯𑀚𑀲𑀢𑀚𑁂𑀝𑁆𑀞𑀓𑁄 𑀯𑀸 𑀉𑀲𑀪𑁄, 𑀯𑀚𑀲𑀳𑀲𑁆𑀲𑀚𑁂𑀝𑁆𑀞𑀓𑁄 𑀯𑀲𑀪𑁄. 𑀏𑀓𑀕𑀸𑀫𑀔𑁂𑀢𑁆𑀢𑁂 𑀯𑀸 𑀚𑁂𑀝𑁆𑀞𑁄 𑀉𑀲𑀪𑁄, 𑀤𑁆𑀯𑀻𑀲𑀼 𑀕𑀸𑀫𑀔𑁂𑀢𑁆𑀢𑁂𑀲𑀼 𑀚𑁂𑀝𑁆𑀞𑁄 𑀯𑀲𑀪𑁄, 𑀲𑀩𑁆𑀩𑀕𑀯𑀲𑁂𑀝𑁆𑀞𑁄 𑀲𑀩𑁆𑀩𑀢𑁆𑀣 𑀚𑁂𑀝𑁆𑀞𑁄 𑀲𑀩𑁆𑀩𑀧𑀭𑀺𑀲𑁆𑀲𑀬𑀲𑀳𑁄 𑀲𑁂𑀢𑁄 𑀧𑀸𑀲𑀸𑀤𑀺𑀓𑁄 𑀫𑀳𑀸𑀪𑀸𑀭𑀯𑀳𑁄 𑀅𑀲𑀦𑀺𑀲𑀢𑀲𑀤𑁆𑀤𑁂𑀳𑀺𑀧𑀺 𑀅𑀓𑀫𑁆𑀧𑀦𑀻𑀬𑁄 𑀦𑀺𑀲𑀪𑁄𑀢𑀺. 𑀦𑀺𑀲𑀪𑁄𑀯 𑀇𑀥 ‘‘𑀉𑀲𑀪𑁄’’𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀇𑀤𑀫𑁆𑀧𑀺 𑀳𑀺 𑀢𑀲𑁆𑀲 𑀧𑀭𑀺𑀬𑀸𑀬𑀯𑀘𑀦𑀁. 𑀉𑀲𑀪𑀲𑁆𑀲 𑀇𑀤𑀦𑁆𑀢𑀺 𑀆𑀲𑀪𑀁, 𑀇𑀤𑀁 𑀧𑀦 𑀆𑀲𑀪𑀁 𑀯𑀺𑀬𑀸𑀢𑀺 𑀆𑀲𑀪𑀁. 𑀬𑀣𑁂𑀯 𑀳𑀺 𑀦𑀺𑀲𑀪𑀲𑀗𑁆𑀔𑀸𑀢𑁄 𑀉𑀲𑀪𑁄 𑀉𑀲𑀪𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀘𑀢𑀽𑀳𑀺 𑀧𑀸𑀤𑁂𑀳𑀺 𑀧𑀣𑀯𑀺𑀁 𑀉𑀧𑁆𑀧𑀻𑀴𑁂𑀢𑁆𑀯𑀸 𑀅𑀘𑀮𑀝𑁆𑀞𑀸𑀦𑁂𑀦 𑀢𑀺𑀝𑁆𑀞𑀢𑀺, 𑀏𑀯𑀁 𑀢𑀣𑀸𑀕𑀢𑁄𑀧𑀺 𑀤𑀲𑀢𑀣𑀸𑀕𑀢𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀘𑀢𑀽𑀳𑀺 𑀯𑁂𑀲𑀸𑀭𑀚𑁆𑀚𑀧𑀸𑀤𑁂𑀳𑀺 𑀅𑀝𑁆𑀞𑀧𑀭𑀺𑀲𑀸𑀧𑀣𑀯𑀺𑀁 𑀉𑀧𑁆𑀧𑀻𑀴𑁂𑀢𑁆𑀯𑀸 𑀲𑀤𑁂𑀯𑀓𑁂 𑀮𑁄𑀓𑁂 𑀓𑁂𑀦𑀘𑀺 𑀧𑀘𑁆𑀘𑀢𑁆𑀣𑀺𑀓𑁂𑀦 𑀧𑀘𑁆𑀘𑀸𑀫𑀺𑀢𑁆𑀢𑁂𑀦 𑀅𑀓𑀫𑁆𑀧𑀺𑀬𑁄 𑀅𑀘𑀮𑀝𑁆𑀞𑀸𑀦𑁂𑀦 𑀢𑀺𑀝𑁆𑀞𑀢𑀺. 𑀏𑀯𑀁 𑀢𑀺𑀝𑁆𑀞𑀫𑀸𑀦𑁄𑀯 𑀢𑀁 𑀆𑀲𑀪𑀁 𑀞𑀸𑀦𑀁 𑀧𑀝𑀺𑀯𑀺𑀚𑀸𑀦𑀸𑀢𑀺 𑀉𑀧𑀕𑀘𑁆𑀙𑀢𑀺 𑀦 𑀧𑀘𑁆𑀘𑀓𑁆𑀔𑀸𑀢𑀺 𑀅𑀢𑁆𑀢𑀦𑀺 𑀆𑀭𑁄𑀧𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀻’’𑀢𑀺.

𑀲𑀻𑀳𑀦𑀸𑀤𑀁 𑀦𑀤𑀢𑀻𑀢𑀺 ‘‘𑀲𑁂𑀝𑁆𑀞𑀦𑀸𑀤𑀁 𑀅𑀪𑀻𑀢𑀦𑀸𑀤𑀁 𑀦𑀤𑀢𑀻’’𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀅𑀣 𑀯𑀸 𑀲𑀻𑀳𑀦𑀸𑀤𑀲𑀤𑀺𑀲𑀁 𑀦𑀸𑀤𑀁 𑀦𑀤𑀢𑀺. 𑀅𑀬𑀫𑀢𑁆𑀣𑁄 𑀔𑀦𑁆𑀥𑀯𑀕𑁆𑀕𑀲𑀁𑀬𑀼𑀢𑁆𑀢𑁂 𑀆𑀕𑀢𑁂𑀦 𑀲𑀻𑀳𑀦𑀸𑀤𑀲𑀼𑀢𑁆𑀢𑁂𑀦 (𑀲𑀁. 𑀦𑀺. 𑁩.𑁭𑁮) 𑀤𑀻𑀧𑁂𑀢𑀩𑁆𑀩𑁄. 𑀬𑀣𑀸 𑀯𑀸 𑀲𑀻𑀳𑁄 𑀫𑀺𑀕𑀭𑀸𑀚𑀸 𑀧𑀭𑀺𑀲𑁆𑀲𑀬𑀸𑀦𑀁 𑀲𑀳𑀦𑀢𑁄, 𑀕𑁄𑀡𑀫𑀳𑀺𑀁 𑀲𑀫𑀢𑁆𑀢𑀯𑀸𑀭𑀡𑀸𑀤𑀻𑀦𑀁 𑀳𑀦𑀦𑀢𑁄 𑀘 ‘‘𑀲𑀻𑀳𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀢𑀣𑀸𑀕𑀢𑁄 𑀫𑀼𑀦𑀺𑀭𑀸𑀚𑀸 𑀮𑁄𑀓𑀥𑀫𑁆𑀫𑀸𑀦𑀁 𑀲𑀳𑀦𑀢𑁄, 𑀧𑀭𑀧𑁆𑀧𑀯𑀸𑀤𑀸𑀦𑀁 𑀳𑀦𑀦𑀢𑁄 𑀘 ‘‘𑀲𑀻𑀳𑁄’’𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀯𑀼𑀢𑁆𑀢𑀲𑁆𑀲 𑀲𑀻𑀳𑀲𑁆𑀲 𑀦𑀸𑀤𑀁 𑀦𑀤𑀢𑀺. 𑀢𑀢𑁆𑀣 𑀬𑀣𑀸 𑀫𑀺𑀕𑀲𑀻𑀳𑁄 𑀲𑀻𑀳𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀩𑁆𑀩𑀢𑁆𑀣 𑀯𑀺𑀲𑀸𑀭𑀤𑁄 𑀯𑀺𑀕𑀢𑀮𑁄𑀫𑀳𑀁𑀲𑁄 𑀲𑀻𑀳𑀦𑀸𑀤𑀁 𑀦𑀤𑀢𑀺, 𑀏𑀯𑀁 𑀢𑀣𑀸𑀕𑀢𑀲𑀻𑀳𑁄 𑀤𑀲𑀢𑀣𑀸𑀕𑀢𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼 𑀯𑀺𑀲𑀸𑀭𑀤𑁄 𑀯𑀺𑀕𑀢𑀮𑁄𑀫𑀳𑀁𑀲𑁄 ‘‘𑀇𑀢𑀺 𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁩.𑁭𑁮; 𑀅. 𑀦𑀺. 𑁮.𑁨) 𑀦𑀬𑁂𑀦 𑀦𑀸𑀦𑀸𑀯𑀺𑀥𑀤𑁂𑀲𑀦𑀸𑀯𑀺𑀮𑀸𑀲𑀲𑀫𑁆𑀧𑀦𑁆𑀦𑀁 𑀲𑀻𑀳𑀦𑀸𑀤𑀁 𑀦𑀤𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀭𑀺𑀲𑀸𑀲𑀼 𑀲𑀻𑀳𑀦𑀸𑀤𑀁 𑀦𑀤𑀢𑀻’’𑀢𑀺.

𑀧𑀜𑁆𑀳𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸𑀢𑀺 𑀜𑀸𑀢𑀼𑀫𑀺𑀘𑁆𑀙𑀺𑀢𑀁 𑀅𑀢𑁆𑀣𑀁 𑀅𑀢𑁆𑀢𑀦𑁄 𑀜𑀸𑀡𑀩𑀮𑀸𑀦𑀼𑀭𑀽𑀧𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸. 𑀢𑀗𑁆𑀔𑀡𑀜𑁆𑀜𑁂𑀯𑀸𑀢𑀺 𑀧𑀼𑀘𑁆𑀙𑀺𑀢𑀓𑁆𑀔𑀡𑁂𑀬𑁂𑀯 𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑀧𑀝𑀺𑀪𑀸𑀦𑁂𑀦 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁, 𑀅𑀢𑁆𑀣𑀥𑀫𑁆𑀫𑀸𑀦𑀼𑀭𑀽𑀧𑀜𑁆𑀘 𑀯𑀺𑀲𑁆𑀲𑀚𑁆𑀚𑀦𑀢𑁄 𑀘𑀺𑀢𑁆𑀢𑀁 𑀧𑀭𑀺𑀢𑁄𑀲𑁂𑀢𑀺𑀬𑁂𑀯. 𑀅𑀲𑁆𑀲𑀸𑀢𑀺 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲. 𑀲𑁄𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀻𑀢𑀺 𑀅𑀝𑁆𑀞𑀓𑁆𑀔𑀡𑀯𑀚𑁆𑀚𑀺𑀢𑁂𑀦 𑀦𑀯𑀫𑁂𑀦 𑀔𑀡𑁂𑀦 𑀮𑀩𑁆𑀪𑀫𑀸𑀦𑀢𑁆𑀢𑀸 ‘‘𑀬𑀁 𑀦𑁄 𑀲𑀢𑁆𑀣𑀸 𑀲𑀸𑀲𑀢𑀺, 𑀢𑀁 𑀫𑀬𑀁 𑀲𑁄𑀲𑁆𑀲𑀸𑀫𑀸’’𑀢𑀺 𑀆𑀤𑀭𑀪𑀸𑀯𑀚𑀸𑀢𑀸 𑀫𑀳𑀦𑁆𑀢𑁂𑀦𑁂𑀯 𑀉𑀲𑁆𑀲𑀸𑀳𑁂𑀦 𑀲𑁄𑀢𑀩𑁆𑀩𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁 𑀫𑀜𑁆𑀜𑀢𑀺. 𑀓𑀮𑁆𑀮𑀘𑀺𑀢𑁆𑀢𑀸 𑀫𑀼𑀤𑀼𑀘𑀺𑀢𑁆𑀢𑀸𑀢𑀺 𑀧𑀲𑀸𑀤𑀸𑀪𑀺𑀯𑀼𑀤𑁆𑀥𑀺𑀬𑀸 𑀯𑀺𑀕𑀢𑀼𑀧𑀓𑁆𑀓𑀺𑀮𑁂𑀲𑀢𑀸𑀬 𑀓𑀮𑁆𑀮𑀘𑀺𑀢𑁆𑀢𑀸 𑀫𑀼𑀤𑀼𑀘𑀺𑀢𑁆𑀢𑀸 𑀳𑁄𑀦𑁆𑀢𑀺. 𑀫𑀼𑀤𑁆𑀥𑀧𑁆𑀧𑀲𑀦𑁆𑀦𑀸𑀢𑀺 𑀢𑀼𑀘𑁆𑀙𑀧𑁆𑀧𑀲𑀦𑁆𑀦𑀸 𑀦𑀺𑀭𑀢𑁆𑀣𑀓𑀧𑁆𑀧𑀲𑀦𑁆𑀦𑀸. 𑀧𑀲𑀦𑁆𑀦𑀸𑀓𑀸𑀭𑁄 𑀦𑀸𑀫 𑀧𑀲𑀦𑁆𑀦𑁂𑀳𑀺 𑀓𑀸𑀢𑀩𑁆𑀩𑀲𑀓𑁆𑀓𑀸𑀭𑁄, 𑀲𑁄 𑀤𑀼𑀯𑀺𑀥𑁄 𑀥𑀫𑁆𑀫𑀸𑀫𑀺𑀲𑀧𑀽𑀚𑀸𑀯𑀲𑁂𑀦, 𑀢𑀢𑁆𑀣 𑀆𑀫𑀺𑀲𑀧𑀽𑀚𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀡𑀻𑀢𑀸𑀦𑀻’’𑀢𑀺𑀆𑀤𑀺𑀫𑀸𑀳. 𑀥𑀫𑁆𑀫𑀧𑀽𑀚𑀸 𑀧𑀦 𑀧𑀸𑀴𑀺𑀬𑀫𑁂𑀯 ‘‘𑀢𑀣𑀢𑁆𑀢𑀸𑀬 𑀧𑀝𑀺𑀧𑀚𑁆𑀚𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀤𑀲𑁆𑀲𑀺𑀢𑀸. 𑀢𑀣𑀸𑀪𑀸𑀯𑀸𑀬𑀸𑀢𑀺 𑀬𑀣𑀸𑀪𑀸𑀯𑀸𑀬 𑀬𑀲𑁆𑀲 𑀯𑀝𑁆𑀝𑀤𑀼𑀓𑁆𑀔𑀦𑀺𑀲𑁆𑀲𑀭𑀡𑀲𑁆𑀲 𑀅𑀢𑁆𑀣𑀸𑀬 𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀢𑀣𑀸𑀪𑀸𑀯𑀸𑀬. 𑀢𑀤𑁂𑀯𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀢𑁆𑀢𑀺𑀧𑀽𑀭𑀡𑀢𑁆𑀣𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀢𑁆𑀢𑀺 𑀳𑀺 𑀯𑀝𑁆𑀝𑀤𑀼𑀓𑁆𑀔𑀦𑀺𑀲𑁆𑀲𑀭𑀡𑀧𑀭𑀺𑀬𑁄𑀲𑀸𑀦𑀸, 𑀲𑀸 𑀘 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀢𑁆𑀢𑀺 𑀬𑀸𑀬 𑀅𑀦𑀼𑀧𑀼𑀩𑁆𑀩𑀺𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀸, 𑀧𑀝𑀺𑀧𑀚𑁆𑀚𑀦𑁆𑀢𑀸𑀦𑀜𑁆𑀘 𑀲𑀢𑀺 𑀅𑀚𑁆𑀛𑀢𑁆𑀢𑀺𑀓𑀗𑁆𑀕𑀲𑀫𑀯𑀸𑀬𑁂 𑀏𑀓𑀁𑀲𑀺𑀓𑀸 𑀢𑀲𑁆𑀲𑀸 𑀧𑀸𑀭𑀺𑀧𑀽𑀭𑀻𑀢𑀺 𑀢𑀁 𑀅𑀦𑀼𑀧𑀼𑀩𑁆𑀩𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀓𑁂𑀘𑀺 𑀲𑀭𑀡𑁂𑀲𑀽’’𑀢𑀺𑀆𑀤𑀺𑀫𑀸𑀳. 𑀬𑀣𑀸 𑀧𑀽𑀭𑁂𑀦𑁆𑀢𑀸 𑀧𑀽𑀭𑁂𑀢𑀼𑀁 𑀲𑀓𑁆𑀓𑁄𑀢𑀺 𑀦𑀸𑀫, 𑀢𑀣𑀸 𑀧𑀽𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀩𑁆𑀩𑀸𑀓𑀸𑀭𑁂𑀦 𑀧𑀦 𑀧𑀽𑀭𑁂𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁.

𑀇𑀫𑀲𑁆𑀫𑀺𑀁 𑀧𑀦𑁄𑀓𑀸𑀲𑁂𑀢𑀺 ‘‘𑀧𑀝𑀺𑀧𑀦𑁆𑀦𑀸 𑀘 𑀆𑀭𑀸𑀥𑁂𑀦𑁆𑀢𑀻’’𑀢𑀺 𑀲𑀻𑀳𑀦𑀸𑀤𑀓𑀺𑀘𑁆𑀘𑀧𑀸𑀭𑀺𑀧𑀽𑀭𑀺𑀝𑁆𑀞𑀧𑀦𑁂 𑀧𑀸𑀴𑀺𑀧𑀤𑁂𑀲𑁂. 𑀲𑀫𑁄𑀥𑀸𑀦𑁂𑀢𑀩𑁆𑀩𑀸𑀢𑀺 𑀲𑀗𑁆𑀓𑀮𑀬𑀺𑀢𑀩𑁆𑀩𑀸. 𑀏𑀓𑀘𑁆𑀘𑀁…𑀧𑁂… 𑀧𑀲𑁆𑀲𑀸𑀫𑀻𑀢𑀺 𑀪𑀕𑀯𑀢𑁄 𑀏𑀓𑁄 𑀲𑀻𑀳𑀦𑀸𑀤𑁄 𑀅𑀲𑀸𑀥𑀸𑀭𑀡𑁄 𑀅𑀜𑁆𑀜𑁂𑀳𑀺 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑁄 𑀲𑁂𑀝𑁆𑀞𑀦𑀸𑀤𑁄 𑀅𑀪𑀻𑀢𑀦𑀸𑀤𑁄𑀢𑀺 𑀓𑀢𑁆𑀯𑀸. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀅𑀧𑀭𑀁 𑀢𑀧𑀲𑁆𑀲𑀺𑀦𑁆𑀢𑀺 𑀅𑀥𑀺𑀓𑀸𑀭𑁄. 𑀧𑀼𑀭𑀺𑀫𑀸𑀦𑀁 𑀤𑀲𑀦𑁆𑀦𑀦𑁆𑀢𑀺 ‘‘𑀏𑀓𑀘𑁆𑀘𑀁 𑀢𑀧𑀲𑁆𑀲𑀺𑀁 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀁 𑀧𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑀲𑀻𑀳𑀦𑀸𑀤𑀢𑁄 𑀧𑀝𑁆𑀞𑀸𑀬 𑀬𑀸𑀯 ‘‘𑀯𑀺𑀫𑀼𑀢𑁆𑀢𑀺𑀬𑀸 𑀫𑀬𑁆𑀳𑀁 𑀲𑀤𑀺𑀲𑁄 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀲𑀻𑀳𑀦𑀸𑀤𑀸 𑀧𑀼𑀭𑀺𑀫𑀓𑀸𑀦𑀁 𑀤𑀲𑀦𑁆𑀦𑀁 𑀲𑀻𑀳𑀦𑀸𑀤𑀸𑀦𑀁, 𑀦𑀺𑀤𑁆𑀥𑀸𑀭𑀡𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁. 𑀢𑁂𑀦𑀸𑀳 ‘‘𑀏𑀓𑁂𑀓𑀲𑁆𑀲𑀸’’𑀢𑀺. ‘‘𑀧𑀭𑀺𑀲𑀸𑀲𑀼 𑀘 𑀦𑀤𑀢𑀻’’𑀢𑀺 𑀆𑀤𑀬𑁄 ‘‘𑀧𑀝𑀺𑀧𑀦𑁆𑀦𑀸 𑀘 𑀫𑀁 𑀆𑀭𑀸𑀥𑁂𑀦𑁆𑀢𑀻’’𑀢𑀺 𑀧𑀭𑀺𑀬𑁄𑀲𑀸𑀦𑀸 𑀤𑀲 𑀤𑀲 𑀲𑀻𑀳𑀦𑀸𑀤𑀸 𑀧𑀭𑀺𑀯𑀸𑀭𑀸. ‘‘𑀏𑀓𑀘𑁆𑀘𑀁 𑀢𑀧𑀲𑁆𑀲𑀺𑀁 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀁 𑀧𑀲𑁆𑀲𑀸𑀫𑀻’’𑀢𑀺 𑀳𑀺 𑀲𑀻𑀳𑀦𑀸𑀤𑀁 𑀦𑀤𑀦𑁆𑀢𑁄 𑀪𑀕𑀯𑀸 𑀧𑀭𑀺𑀲𑀸𑀲𑀼 𑀦𑀤𑀢𑀺 𑀯𑀺𑀲𑀸𑀭𑀤𑁄 𑀳𑀼𑀢𑁆𑀯𑀸 𑀦𑀤𑀢𑀺, 𑀢𑀢𑁆𑀣 𑀘 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀺, 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀯𑀺𑀲𑁆𑀲𑀚𑁆𑀚𑀦𑁂𑀦 𑀧𑀭𑀲𑁆𑀲 𑀘𑀺𑀢𑁆𑀢𑀁 𑀆𑀭𑀸𑀥𑁂𑀢𑀺, 𑀲𑀼𑀢𑁆𑀯𑀸 𑀲𑁄𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀺, 𑀲𑀼𑀢𑁆𑀯𑀸 𑀘 𑀪𑀕𑀯𑀢𑁄 𑀧𑀲𑀻𑀤𑀦𑁆𑀢𑀺, 𑀧𑀲𑀦𑁆𑀦𑀸 𑀘 𑀧𑀲𑀦𑁆𑀦𑀸𑀓𑀸𑀭𑀁 𑀓𑀭𑁄𑀦𑁆𑀢𑀺, 𑀬𑀁 𑀧𑀝𑀺𑀧𑀢𑁆𑀢𑀺𑀁 𑀤𑁂𑀲𑁂𑀢𑀺, 𑀢𑀣𑀢𑁆𑀢𑀸𑀬 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀧𑀝𑀺𑀧𑀦𑁆𑀦𑀸 𑀘 𑀫𑀁 𑀆𑀭𑀸𑀥𑁂𑀦𑁆𑀢𑀻𑀢𑀺 𑀏𑀯𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀅𑀢𑁆𑀣𑀬𑁄𑀚𑀦𑀸 𑀲𑀫𑁆𑀪𑀯𑀢𑀺. 𑀅𑀬𑀫𑁂𑀯 𑀦𑀬𑁄 𑀲𑁂𑀲𑁂𑀲𑀼𑀧𑀺 𑀦𑀯𑀲𑀼.

‘‘𑀏𑀯’’𑀦𑁆𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀸𑀦𑀁 𑀲𑀻𑀳𑀦𑀸𑀤𑀸𑀦𑀁 𑀲𑀗𑁆𑀓𑀮𑀬𑀺𑀢𑁆𑀯𑀸 𑀤𑀲𑁆𑀲𑀦𑀁. 𑀢𑁂 𑀤𑀲𑀸𑀢𑀺 ‘‘𑀧𑀭𑀺𑀲𑀸𑀲𑀼 𑀘 𑀦𑀤𑀢𑀻’’𑀢𑀺 𑀆𑀤𑀬𑁄 𑀤𑀲 𑀲𑀻𑀳𑀦𑀸𑀤𑀸. 𑀧𑀼𑀭𑀺𑀫𑀸𑀦𑀁 𑀤𑀲𑀦𑁆𑀦𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀸𑀦𑀁 𑀫𑀽𑀮𑀪𑀽𑀢𑀸𑀦𑀁 𑀧𑀼𑀭𑀺𑀫𑀓𑀸𑀦𑀁 𑀤𑀲𑀲𑀻𑀳𑀦𑀸𑀤𑀸𑀦𑀁. 𑀧𑀭𑀺𑀯𑀸𑀭𑀯𑀲𑁂𑀦𑀸𑀢𑀺 𑀫𑀽𑀮𑀺𑀁 𑀓𑀢𑁆𑀯𑀸 𑀧𑀘𑁆𑀘𑁂𑀓𑀁 𑀧𑀭𑀺𑀯𑀸𑀭𑀯𑀲𑁂𑀦 𑀬𑁄𑀚𑀺𑀬𑀫𑀸𑀦𑀸 𑀲𑀢𑀁 𑀲𑀻𑀳𑀦𑀸𑀤𑀸. 𑀧𑀼𑀭𑀺𑀫𑀸 𑀘 𑀤𑀲𑀸𑀢𑀺 𑀫𑀽𑀮𑀫𑀽𑀮𑀺𑀬𑁄 𑀓𑀢𑁆𑀯𑀸 𑀧𑀭𑀺𑀯𑀸𑀭𑀯𑀲𑁂𑀦 𑀅𑀬𑁄𑀚𑀺𑀬𑀫𑀸𑀦𑀸 𑀧𑀼𑀭𑀺𑀫𑀓𑀸 𑀘 𑀤𑀲𑀸𑀢𑀺 𑀏𑀯𑀁 𑀤𑀲𑀸𑀥𑀺𑀓𑀁 𑀲𑀻𑀳𑀦𑀸𑀤𑀲𑀢𑀁 𑀳𑁄𑀢𑀺. 𑀅𑀜𑁆𑀜𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂𑀢𑀺 𑀫𑀚𑁆𑀛𑀺𑀫𑀸𑀕𑀫𑀘𑀽𑀴𑀲𑀻𑀳𑀦𑀸𑀤𑀲𑀼𑀢𑁆𑀢𑀸𑀤𑀺𑀫𑁆𑀳𑀺 (𑀫. 𑀦𑀺. 𑁧.𑁧𑁯𑁩) 𑀢𑁂𑀦𑀸𑀢𑀺 𑀲𑀗𑁆𑀔𑁆𑀬𑀸𑀫𑀳𑀢𑁆𑀢𑁂𑀦. 𑀫𑀳𑀸𑀲𑀻𑀳𑀦𑀸𑀤𑀢𑁆𑀢𑀸 𑀇𑀤𑀁 𑀲𑀼𑀢𑁆𑀢𑀁 ‘‘𑀫𑀳𑀸𑀲𑀻𑀳𑀦𑀸𑀤’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀦 𑀧𑀦 𑀫𑀚𑁆𑀛𑀺𑀫𑀦𑀺𑀓𑀸𑀬𑁂 𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢𑀫𑀺𑀯 𑀘𑀽𑀴𑀲𑀻𑀳𑀦𑀸𑀤𑀲𑀼𑀢𑁆𑀢𑀫𑀼𑀧𑀸𑀤𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀢𑀺𑀢𑁆𑀣𑀺𑀬𑀧𑀭𑀺𑀯𑀸𑀲𑀓𑀣𑀸𑀯𑀡𑁆𑀡𑀦𑀸

𑁪𑁦𑁪. 𑀧𑀝𑀺𑀲𑁂𑀥𑁂𑀢𑁆𑀯𑀸𑀢𑀺 𑀢𑀣𑀸 𑀪𑀸𑀯𑀸𑀪𑀸𑀯𑀤𑀲𑁆𑀲𑀦𑁂𑀦 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸. 𑀬𑀁 𑀪𑀕𑀯𑀸 𑀧𑀸𑀣𑀺𑀓𑀯𑀕𑁆𑀕𑁂 𑀉𑀤𑀼𑀫𑁆𑀩𑀭𑀺𑀓𑀲𑀼𑀢𑁆𑀢𑁂 (𑀤𑀻. 𑀦𑀺. 𑁩.𑁫𑁭) ‘‘𑀇𑀥 𑀦𑀺𑀕𑁆𑀭𑁄𑀥 𑀢𑀧𑀲𑁆𑀲𑀻’’𑀢𑀺𑀆𑀤𑀺𑀦𑀸 𑀉𑀧𑀓𑁆𑀓𑀺𑀮𑁂𑀲𑀯𑀺𑀪𑀸𑀕𑀁, 𑀧𑀸𑀭𑀺𑀲𑀼𑀤𑁆𑀥𑀺𑀯𑀺𑀪𑀸𑀕𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 𑀲𑀧𑀭𑀺𑀲𑀲𑁆𑀲 𑀦𑀺𑀕𑁆𑀭𑁄𑀥𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀧𑀼𑀭𑀢𑁄 𑀲𑀻𑀳𑀦𑀸𑀤𑀁 𑀦𑀤𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀤𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑀤𑀺𑀢𑀧𑀼𑀩𑁆𑀩𑀦𑁆𑀢𑀺 𑀉𑀤𑀼𑀫𑁆𑀩𑀭𑀺𑀓𑀲𑀼𑀢𑁆𑀢𑁂 𑀆𑀕𑀢𑀦𑀬𑁂𑀦 𑀧𑀼𑀩𑁆𑀩𑁂 𑀦𑀺𑀕𑁆𑀭𑁄𑀥𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀦𑀤𑀺𑀢𑀁. 𑀢𑀧𑀩𑁆𑀭𑀳𑁆𑀫𑀘𑀸𑀭𑀻𑀢𑀺 𑀉𑀢𑁆𑀢𑀫𑀢𑀧𑀘𑀸𑀭𑀻, 𑀢𑀧𑁂𑀦 𑀯𑀸 𑀯𑀻𑀭𑀺𑀬𑁂𑀦 𑀩𑁆𑀭𑀳𑁆𑀫𑀘𑀸𑀭𑀻. 𑀇𑀤𑀦𑁆𑀢𑀺 ‘‘𑀭𑀸𑀚𑀕𑀳𑁂…𑀧𑁂… 𑀧𑀜𑁆𑀳𑀁 𑀅𑀧𑀼𑀘𑁆𑀙𑀻’’𑀢𑀺 𑀧𑀸𑀴𑀺𑀬𑀁 𑀆𑀕𑀢𑀯𑀘𑀦𑀁. 𑀆𑀘𑀭𑀺𑀬𑁂𑀦 (𑀤𑀻. 𑀦𑀺. 𑀝𑀻. 𑁧.𑁪𑁦𑁩) 𑀧𑀦 𑀬𑀣𑀸𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀯𑀘𑀦𑀫𑁂𑀯 𑀧𑀘𑁆𑀘𑀸𑀫𑀝𑁆𑀞𑀁. 𑀏𑀢𑁆𑀣 𑀘 𑀓𑀸𑀫𑀁 𑀬𑀤𑀸 𑀦𑀺𑀕𑁆𑀭𑁄𑀥𑁄 𑀧𑀜𑁆𑀳𑀫𑀧𑀼𑀘𑁆𑀙𑀺, 𑀪𑀕𑀯𑀸 𑀘𑀲𑁆𑀲 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀦 𑀢𑀤𑀸 𑀪𑀕𑀯𑀸 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂 𑀯𑀺𑀳𑀭𑀢𑀺, 𑀭𑀸𑀚𑀕𑀳𑀲𑀫𑀻𑀧𑁂𑀬𑁂𑀯 𑀉𑀤𑀼𑀫𑁆𑀩𑀭𑀺𑀓𑀸𑀬 𑀤𑁂𑀯𑀺𑀬𑀸 𑀉𑀬𑁆𑀬𑀸𑀦𑁂 𑀯𑀺𑀳𑀭𑀢𑀺 𑀢𑀢𑁆𑀣𑁂𑀯 𑀢𑀣𑀸 𑀧𑀼𑀘𑁆𑀙𑀺𑀢𑀢𑁆𑀢𑀸, 𑀯𑀺𑀲𑁆𑀲𑀚𑁆𑀚𑀺𑀢𑀢𑁆𑀢𑀸 𑀘, 𑀢𑀣𑀸𑀧𑀺 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂 𑀪𑀕𑀯𑀢𑁄 𑀯𑀺𑀳𑀸𑀭𑁄 𑀦 𑀢𑀸𑀯 𑀯𑀺𑀘𑁆𑀙𑀺𑀦𑁆𑀦𑁄, 𑀢𑀲𑁆𑀫𑀸 𑀧𑀸𑀴𑀺𑀬𑀁 ‘‘𑀢𑀢𑁆𑀭 𑀫’’𑀦𑁆𑀢𑀺𑀆𑀤𑀺𑀯𑀘𑀦𑀁, 𑀅𑀝𑁆𑀞𑀓𑀣𑀸𑀬𑀜𑁆𑀘 ‘‘𑀢𑀢𑁆𑀭 𑀭𑀸𑀚𑀕𑀳𑁂 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂 𑀯𑀺𑀳𑀭𑀦𑁆𑀢𑀁 𑀫’’𑀦𑁆𑀢𑀺𑀆𑀤𑀺𑀯𑀘𑀦𑀁 𑀯𑀼𑀢𑁆𑀢𑀦𑁆𑀢𑀺 𑀇𑀫𑀫𑀢𑁆𑀣𑀫𑁆𑀧𑀺 ‘‘𑀬𑀁 𑀢𑀁 𑀪𑀕𑀯𑀸’’𑀢𑀺𑀆𑀤𑀺𑀦𑀸 𑀯𑀺𑀜𑁆𑀜𑀸𑀧𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂’’𑀢𑀺 𑀇𑀤𑀁 𑀢𑀢𑁆𑀣 𑀓𑀢𑀯𑀺𑀳𑀸𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀕𑀺𑀚𑁆𑀛𑀓𑀽𑀝𑁂 𑀫𑀳𑀸𑀯𑀺𑀳𑀸𑀭𑁂’’𑀢𑀺 𑀇𑀫𑀺𑀦𑀸. 𑀉𑀤𑀼𑀫𑁆𑀩𑀭𑀺𑀓𑀸𑀬𑀸𑀢𑀺 𑀢𑀦𑁆𑀦𑀸𑀫𑀺𑀓𑀸𑀬. 𑀉𑀬𑁆𑀬𑀸𑀦𑁂𑀢𑀺 𑀢𑀢𑁆𑀣 𑀓𑀢𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀦𑀺𑀕𑁆𑀭𑁄𑀥𑁄 𑀦𑀸𑀫 𑀙𑀦𑁆𑀦𑀧𑀭𑀺𑀩𑁆𑀩𑀸𑀚𑀓𑁄. 𑀲𑀦𑁆𑀥𑀸𑀦𑁄 𑀦𑀸𑀫 𑀧𑀜𑁆𑀘𑀉𑀧𑀸𑀲𑀓𑀲𑀢𑀧𑀭𑀺𑀯𑀸𑀭𑁄 𑀅𑀦𑀸𑀕𑀸𑀫𑀺𑀉𑀧𑀸𑀲𑀓𑁄. 𑀓𑀣𑀸𑀲𑀮𑁆𑀮𑀸𑀧𑀦𑁆𑀢𑀺 ‘‘𑀬𑀕𑁆𑀖𑁂 𑀕𑀳𑀧𑀢𑀺 𑀚𑀸𑀦𑁂𑀬𑁆𑀬𑀸𑀲𑀺, 𑀓𑁂𑀦 𑀲𑀫𑀡𑁄 𑀕𑁄𑀢𑀫𑁄 𑀲𑀤𑁆𑀥𑀺𑀁 𑀲𑀮𑁆𑀮𑀧𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁩.𑁫𑁩) 𑀲𑀮𑁆𑀮𑀸𑀧𑀓𑀣𑀁. 𑀧𑀭𑀦𑁆𑀢𑀺 𑀅𑀢𑀺𑀲𑀬𑀢𑁆𑀣𑁂 𑀦𑀺𑀧𑀸𑀢𑁄. 𑀯𑀺𑀬𑀸𑀢𑀺 𑀧𑀤𑀧𑀽𑀭𑀡𑀫𑀢𑁆𑀢𑁂 𑀬𑀣𑀸 𑀢𑀁 ‘‘𑀅𑀢𑀺𑀯𑀺𑀬𑀸’’𑀢𑀺. 𑀅𑀦𑁆𑀥𑀩𑀸𑀮𑀦𑁆𑀢𑀺 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀅𑀦𑁆𑀥𑀁 𑀩𑀸𑀮𑀚𑀦𑀁. 𑀬𑁄𑀕𑁂𑀢𑀺 𑀦𑀬𑁂, 𑀤𑀼𑀓𑁆𑀔𑀦𑀺𑀲𑁆𑀲𑀭𑀡𑀽𑀧𑀸𑀬𑁂𑀢𑀺 𑀅𑀢𑁆𑀣𑁄.

𑁪𑁦𑁫. 𑀅𑀦𑁂𑀦𑀸𑀢𑀺 𑀪𑀕𑀯𑀢𑀸. 𑀔𑀦𑁆𑀥𑀓𑁂𑀢𑀺 𑀫𑀳𑀸𑀯𑀕𑁆𑀕𑁂 𑀧𑀩𑁆𑀩𑀚𑁆𑀚𑀔𑀦𑁆𑀥𑀓𑁂 (𑀫𑀳𑀸𑀯. 𑁯𑁬) 𑀬𑀁 𑀧𑀭𑀺𑀯𑀸𑀲𑀁 𑀧𑀭𑀺𑀯𑀲𑀢𑀻𑀢𑀺 𑀬𑁄𑀚𑀦𑀸. ‘‘𑀧𑀼𑀩𑁆𑀩𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑁄 𑀪𑀽𑀢𑁄𑀢𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄’’𑀢𑀺 (𑀲𑀸𑀭𑀢𑁆𑀣. 𑀝𑀻. 𑁭𑁬) 𑀆𑀘𑀭𑀺𑀬𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁. 𑀧𑀞𑀫𑀁 𑀧𑀩𑁆𑀩𑀚𑁆𑀚𑀁 𑀕𑀳𑁂𑀢𑁆𑀯𑀸𑀯 𑀧𑀭𑀺𑀯𑀲𑀢𑀻𑀢𑀺 𑀆𑀳 ‘‘𑀲𑀸𑀫𑀡𑁂𑀭𑀪𑀽𑀫𑀺𑀬𑀁 𑀞𑀺𑀢𑁄’’𑀢𑀺. 𑀢𑀦𑁆𑀢𑀺 𑀤𑁆𑀯𑀻𑀳𑀺 𑀆𑀓𑀸𑀭𑁂𑀳𑀺 𑀯𑀼𑀢𑁆𑀢𑀁 𑀧𑀭𑀺𑀯𑀸𑀲𑀁. 𑀧𑀩𑁆𑀩𑀚𑁆𑀚𑀦𑁆𑀢𑀺 ‘‘𑀆𑀓𑀗𑁆𑀔𑀢𑀺 𑀧𑀩𑁆𑀩𑀚𑁆𑀚𑀁, 𑀆𑀓𑀗𑁆𑀔𑀢𑀺 𑀉𑀧𑀲𑀫𑁆𑀧𑀤’’𑀦𑁆𑀢𑀺 𑀏𑀢𑁆𑀣 𑀯𑀼𑀢𑁆𑀢𑀁 𑀧𑀩𑁆𑀩𑀚𑁆𑀚𑀕𑁆𑀕𑀳𑀡𑀁. ‘‘𑀉𑀢𑁆𑀢𑀭𑀺𑀤𑀺𑀭𑀢𑁆𑀢𑀢𑀺𑀭𑀢𑁆𑀢𑀁 𑀲𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁫𑁧) 𑀏𑀢𑁆𑀣 𑀤𑀺𑀭𑀢𑁆𑀢𑀕𑁆𑀕𑀳𑀡𑀁 𑀯𑀺𑀬 𑀯𑀘𑀦𑀲𑀺𑀮𑀺𑀝𑁆𑀞𑀢𑀸𑀯𑀲𑁂𑀦𑁂𑀯 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀲𑀸𑀫𑀡𑁂𑀭𑀪𑀽𑀫𑀺𑀬𑀁 𑀞𑀺𑀢𑁂𑀦𑁂𑀯 𑀧𑀭𑀺𑀯𑀲𑀺𑀢𑀩𑁆𑀩𑀁, 𑀦 𑀕𑀺𑀳𑀺𑀪𑀽𑀢𑁂𑀦, 𑀢𑀲𑁆𑀫𑀸 𑀅𑀧𑀭𑀺𑀯𑀲𑀺𑀢𑁆𑀯𑀸𑀬𑁂𑀯 𑀧𑀩𑁆𑀩𑀚𑁆𑀚𑀁 𑀮𑀪𑀢𑀺. 𑀦 𑀕𑀸𑀫𑀧𑁆𑀧𑀯𑁂𑀲𑀦𑀸𑀤𑀻𑀦𑀻𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 𑀦𑀯𑁂𑀲𑀺𑀬𑀸𑀯𑀺𑀥𑀯𑀸𑀣𑀼𑀮𑁆𑀮𑀓𑀼𑀫𑀸𑀭𑀺𑀓𑀧𑀡𑁆𑀟𑀓𑀪𑀺𑀓𑁆𑀔𑀼𑀦𑀺𑀕𑁄𑀘𑀭𑀢𑀸, 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀓𑀺𑀁 𑀓𑀭𑀡𑀻𑀬𑁂𑀲𑀼 𑀤𑀓𑁆𑀔𑀸𑀦𑀮𑀲𑀸𑀤𑀺𑀢𑀸, 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀤𑀻𑀲𑀼 𑀢𑀺𑀩𑁆𑀩𑀘𑁆𑀙𑀦𑁆𑀤𑀢𑀸, 𑀬𑀲𑁆𑀲 𑀢𑀺𑀢𑁆𑀣𑀸𑀬𑀢𑀦𑀢𑁄 𑀇𑀥𑀸𑀕𑀢𑁄, 𑀢𑀲𑁆𑀲 𑀅𑀯𑀡𑁆𑀡𑀪𑀡𑀦𑁂 𑀅𑀢𑁆𑀢𑀫𑀦𑀢𑀸, 𑀩𑀼𑀤𑁆𑀥𑀸𑀤𑀻𑀦𑀁 𑀅𑀯𑀡𑁆𑀡𑀪𑀡𑀦𑁂 𑀅𑀦𑀢𑁆𑀢𑀫𑀦𑀢𑀸, 𑀬𑀲𑁆𑀲 𑀢𑀺𑀢𑁆𑀣𑀸𑀬𑀢𑀦𑀢𑁄 𑀇𑀥𑀸𑀕𑀢𑁄, 𑀢𑀲𑁆𑀲 𑀯𑀡𑁆𑀡𑀪𑀡𑀦𑁂 𑀅𑀦𑀢𑁆𑀢𑀫𑀦𑀢𑀸, 𑀩𑀼𑀤𑁆𑀥𑀸𑀤𑀻𑀦𑀁 𑀯𑀡𑁆𑀡𑀪𑀡𑀦𑁂 𑀅𑀢𑁆𑀢𑀫𑀦𑀢𑀸𑀢𑀺 𑀇𑀫𑁂𑀲𑀁 𑀲𑀢𑁆𑀢𑀯𑀢𑁆𑀢𑀸𑀦𑀁 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀽𑀭𑁂𑀦𑁆𑀢𑁂𑀦 𑀧𑀭𑀺𑀯𑀲𑀺𑀢𑀩𑁆𑀩𑀦𑁆𑀢𑀺 𑀬𑀤𑀸 𑀧𑀭𑀺𑀯𑀲𑀢𑀺, 𑀢𑀤𑀸 𑀧𑀽𑀭𑀫𑀸𑀦𑁂𑀦 𑀧𑀭𑀺𑀯𑀲𑀺𑀢𑀩𑁆𑀩𑀁. 𑀅𑀝𑁆𑀞𑀯𑀢𑁆𑀢𑀧𑀽𑀭𑀡𑁂𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑀸𑀦𑀁 𑀅𑀝𑁆𑀞𑀦𑁆𑀦𑀁 𑀯𑀢𑁆𑀢𑀸𑀦𑀁 𑀧𑀽𑀭𑀡𑁂𑀦. 𑀏𑀢𑁆𑀣𑀸𑀢𑀺 𑀧𑀭𑀺𑀯𑀸𑀲𑁂, 𑀉𑀧𑀲𑀫𑁆𑀧𑀤𑀸𑀬 𑀯𑀸. 𑀖𑀁𑀲𑀺𑀢𑁆𑀯𑀸 𑀓𑁄𑀝𑁆𑀝𑁂𑀢𑁆𑀯𑀸𑀢𑀺 𑀅𑀚𑁆𑀛𑀸𑀲𑀬𑀯𑀻𑀫𑀁𑀲𑀦𑀯𑀲𑁂𑀦 𑀲𑀼𑀯𑀡𑁆𑀡𑀁 𑀯𑀺𑀬 𑀖𑀁𑀲𑀺𑀢𑁆𑀯𑀸 𑀓𑁄𑀝𑁆𑀝𑁂𑀢𑁆𑀯𑀸. 𑀧𑀩𑁆𑀩𑀚𑁆𑀚𑀸𑀬𑀸𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀁. 𑀉𑀧𑀲𑀫𑁆𑀧𑀤𑀸𑀧𑀺 𑀳𑀺 𑀢𑁂𑀦 𑀲𑀗𑁆𑀕𑀬𑁆𑀳𑀢𑀺.

‘‘𑀕𑀡𑀫𑀚𑁆𑀛𑁂 𑀦𑀺𑀲𑀻𑀤𑀺𑀢𑁆𑀯𑀸𑀢𑀺 𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀲𑁆𑀲 𑀕𑀡𑀧𑁆𑀧𑀳𑁄𑀦𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀫𑀚𑁆𑀛𑁂 𑀲𑀗𑁆𑀖𑀢𑁆𑀣𑁂𑀭𑁄 𑀯𑀺𑀬 𑀢𑀲𑁆𑀲 𑀅𑀦𑀼𑀕𑁆𑀕𑀳𑀢𑁆𑀣𑀁 𑀦𑀺𑀲𑀻𑀤𑀺𑀢𑁆𑀯𑀸’’𑀢𑀺 (𑀤𑀻. 𑀦𑀺. 𑀝𑀻. 𑁧.𑁪𑁦𑁫) 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑀁, 𑀇𑀤𑀸𑀦𑀺 𑀧𑀦 𑀩𑀳𑀽𑀲𑀼𑀧𑀺 𑀧𑁄𑀢𑁆𑀣𑀓𑁂𑀲𑀼 ‘‘𑀢𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸’’𑀢𑀺 𑀓𑀸𑀭𑀺𑀢𑀯𑀲𑁂𑀦 𑀧𑀸𑀞𑁄 𑀤𑀺𑀲𑁆𑀲𑀢𑀺. 𑀅𑀘𑀺𑀭𑀫𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀅𑀲𑁆𑀲𑀸𑀢𑀺 𑀅𑀘𑀺𑀭𑀽𑀧𑀲𑀫𑁆𑀧𑀦𑁆𑀦𑁄, 𑀅𑀢𑁆𑀣𑀫𑀢𑁆𑀢𑀁 𑀧𑀦 𑀤𑀲𑁆𑀲𑁂𑀢𑀼𑀁 ‘‘𑀉𑀧𑀲𑀫𑁆𑀧𑀦𑁆𑀦𑁄 𑀳𑀼𑀢𑁆𑀯𑀸 𑀦𑀘𑀺𑀭𑀫𑁂𑀯𑀸’’𑀢𑀺 𑀆𑀳. 𑀓𑀸𑀬𑀘𑀺𑀢𑁆𑀢𑀯𑀺𑀯𑁂𑀓𑀸𑀯 𑀇𑀥𑀸𑀥𑀺𑀧𑁆𑀧𑁂𑀢𑀸 𑀉𑀧𑀥𑀺𑀯𑀺𑀯𑁂𑀓𑀢𑁆𑀣𑀁 𑀧𑀝𑀺𑀧𑀚𑁆𑀚𑀦𑀸𑀥𑀺𑀓𑀸𑀭𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀓𑀸𑀬𑁂𑀦 𑀘𑁂𑀯 𑀘𑀺𑀢𑁆𑀢𑁂𑀦 𑀘𑀸’’𑀢𑀺. 𑀯𑀽𑀧𑀓𑀝𑁆𑀞𑁄𑀢𑀺 𑀯𑀺𑀯𑀺𑀢𑁆𑀢𑁄. 𑀢𑀸𑀤𑀺𑀲𑀲𑁆𑀲 𑀲𑀻𑀮𑀯𑀺𑀲𑁄𑀥𑀦𑁂 𑀅𑀧𑁆𑀧𑀫𑀸𑀤𑁄 𑀅𑀯𑀼𑀢𑁆𑀢𑀲𑀺𑀤𑁆𑀥𑁄𑀢𑀺 𑀓𑀫𑁆𑀫𑀝𑁆𑀞𑀸𑀦𑁂 𑀅𑀧𑁆𑀧𑀫𑀸𑀤𑀫𑁂𑀯 𑀤𑀲𑁆𑀲𑁂𑀢𑀺. 𑀧𑁂𑀲𑀺𑀢𑀘𑀺𑀢𑁆𑀢𑁄𑀢𑀺 𑀦𑀺𑀩𑁆𑀩𑀸𑀦𑀁 𑀧𑀢𑀺 𑀧𑁂𑀲𑀺𑀢𑀘𑀺𑀢𑁆𑀢𑁄, 𑀢𑀦𑁆𑀦𑀺𑀦𑁆𑀦𑁄 𑀢𑀧𑁆𑀧𑁄𑀡𑁄 𑀢𑀧𑁆𑀧𑀩𑁆𑀪𑀸𑀭𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀏𑀯𑀁𑀪𑀽𑀢𑁄 𑀘 𑀢𑀣𑀸 𑀅𑀦𑀧𑁂𑀓𑁆𑀔𑀢𑀸𑀬 𑀯𑀺𑀲𑁆𑀲𑀚𑁆𑀚𑀺𑀢𑀓𑀸𑀬𑁄 𑀦𑀸𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑀫𑀸𑀯𑀺𑀓𑀸𑀢𑀼𑀁 ‘‘𑀯𑀺𑀲𑁆𑀲𑀝𑁆𑀞𑀅𑀢𑁆𑀢𑀪𑀸𑀯𑁄’’𑀢𑀺 𑀯𑀼𑀢𑁆𑀢𑀁. 𑀅𑀢𑁆𑀢𑀸𑀢𑀺 𑀘𑁂𑀢𑁆𑀣 𑀘𑀺𑀢𑁆𑀢𑀁 𑀯𑀼𑀘𑁆𑀘𑀢𑀺 𑀭𑀽𑀧𑀓𑀸𑀬𑀲𑁆𑀲 𑀅𑀯𑀺𑀲𑀬𑀢𑁆𑀢𑀸. 𑀬𑀲𑁆𑀲𑀸𑀢𑀺 𑀅𑀭𑀳𑀢𑁆𑀢𑀨𑀮𑀲𑁆𑀲. 𑀚𑀸𑀢𑀺𑀓𑀼𑀮𑀧𑀼𑀢𑁆𑀢𑀸𑀧𑀺 𑀆𑀘𑀸𑀭𑀲𑀫𑁆𑀧𑀦𑁆𑀦𑀸 𑀏𑀯 𑀅𑀭𑀳𑀢𑁆𑀢𑀸𑀥𑀺𑀕𑀫𑀸𑀬 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑀸 𑀳𑁄𑀦𑁆𑀢𑀻𑀢𑀺 𑀢𑁂𑀧𑀺 𑀚𑀸𑀢𑀺𑀓𑀼𑀮𑀧𑀼𑀢𑁆𑀢𑁂 𑀢𑁂𑀳𑁂𑀯 𑀆𑀘𑀸𑀭𑀓𑀼𑀮𑀧𑀼𑀢𑁆𑀢𑁂𑀳𑀺 𑀏𑀓𑀲𑀗𑁆𑀕𑀳𑁂 𑀓𑀭𑁄𑀦𑁆𑀢𑁄 ‘‘𑀆𑀘𑀸𑀭𑀓𑀼𑀮𑀧𑀼𑀢𑁆𑀢𑀸’’𑀢𑀺 𑀆𑀳. 𑀇𑀫𑀺𑀦𑀸 𑀳𑀺 𑀆𑀘𑀸𑀭𑀲𑀫𑁆𑀧𑀦𑁆𑀦𑀸 𑀚𑀸𑀢𑀺𑀓𑀼𑀮𑀧𑀼𑀢𑁆𑀢𑀸𑀧𑀺 𑀲𑀗𑁆𑀕𑀳𑀺𑀢𑀸 𑀳𑁄𑀦𑁆𑀢𑀺. 𑀆𑀘𑀸𑀭𑀲𑀫𑁆𑀧𑀦𑁆𑀦𑀸𑀦𑀫𑁂𑀯𑀸𑀥𑀺𑀧𑁆𑀧𑁂𑀢𑀪𑀸𑀯𑁄 𑀘 ‘‘𑀲𑀫𑁆𑀫𑀤𑁂𑀯𑀸’’𑀢𑀺 𑀲𑀤𑁆𑀤𑀦𑁆𑀢𑀭𑁂𑀦 𑀯𑀺𑀜𑁆𑀜𑀸𑀬𑀢𑀺. ‘‘𑀑𑀢𑀺𑀡𑁆𑀡𑁄𑀫𑁆𑀳𑀺 𑀚𑀸𑀢𑀺𑀬𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀳𑀺 𑀲𑀁𑀯𑁂𑀕𑀧𑀼𑀩𑁆𑀩𑀺𑀓𑀁 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀩𑁆𑀩𑀚𑁆𑀚𑀁 𑀲𑀦𑁆𑀥𑀸𑀬 ‘‘𑀲𑀫𑁆𑀫𑀤𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀳𑁂𑀢𑀼𑀦𑀸𑀯 𑀓𑀸𑀭𑀡𑁂𑀦𑁂𑀯𑀸’’𑀢𑀺. 𑀢𑀢𑁆𑀣 𑀳𑁂𑀢𑀼𑀦𑀸𑀢𑀺 𑀦𑀬𑁂𑀦 𑀉𑀧𑀸𑀬𑁂𑀦. 𑀓𑀸𑀭𑀡𑁂𑀦𑁂𑀯𑀸𑀢𑀺 𑀢𑀩𑁆𑀩𑀺𑀯𑀭𑀡𑀯𑀘𑀦𑀁. 𑀢𑀦𑁆𑀢𑀺 𑀅𑀭𑀳𑀢𑁆𑀢𑀨𑀮𑀁. 𑀢𑀤𑁂𑀯 𑀳𑀺 ‘‘𑀅𑀦𑀼𑀢𑁆𑀢𑀭𑀁 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺 𑀯𑀢𑁆𑀢𑀼𑀫𑀭𑀳𑀢𑀺 𑀅𑀜𑁆𑀜𑁂𑀲𑀁 𑀢𑀣𑀸 𑀅𑀪𑀸𑀯𑀢𑁄. ‘‘𑀬𑀁𑀢𑀁𑀲𑀤𑁆𑀤𑀸 𑀦𑀺𑀘𑁆𑀘𑀲𑀫𑁆𑀩𑀦𑁆𑀥𑀸’’𑀢𑀺 𑀲𑀤𑁆𑀤𑀦𑀬𑁂𑀦𑀧𑀺 𑀢𑀤𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀢𑀲𑁆𑀲 𑀳𑀻’’𑀢𑀺𑀆𑀤𑀺𑀦𑀸. ‘‘𑀬𑀲𑁆𑀲𑀢𑁆𑀣𑀸𑀬…𑀧𑁂… 𑀧𑀩𑁆𑀩𑀚𑁆𑀚𑀦𑁆𑀢𑀻’’𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀲𑁆𑀲 𑀢𑀲𑁆𑀲 𑀅𑀭𑀳𑀢𑁆𑀢𑀨𑀮𑀲𑁆𑀲 𑀅𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀸 𑀧𑀩𑁆𑀩𑀚𑀦𑁆𑀢𑀺, 𑀢𑀲𑁆𑀫𑀸 𑀅𑀭𑀳𑀢𑁆𑀢𑀨𑀮𑀫𑀺𑀥𑀸𑀥𑀺𑀧𑁆𑀧𑁂𑀢𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀢𑁆𑀣𑀺 𑀧𑀭𑁄 𑀚𑀦𑁄 𑀢𑀣𑀸 𑀲𑀘𑁆𑀙𑀺𑀓𑀭𑀡𑁂 𑀧𑀘𑁆𑀘𑀬𑁄 𑀬𑀲𑁆𑀲𑀸𑀢𑀺 𑀅𑀧𑀭𑀧𑁆𑀧𑀘𑁆𑀘𑀬𑁄, 𑀢𑀁. 𑀉𑀧-𑀲𑀤𑁆𑀤𑁄 𑀯𑀺𑀬 𑀲𑀁-𑀲𑀤𑁆𑀤𑁄𑀧𑀺 𑀥𑀸𑀢𑀼𑀲𑀤𑁆𑀤𑀸𑀦𑀼𑀯𑀢𑁆𑀢𑀓𑁄𑀢𑀺 𑀯𑀼𑀢𑁆𑀢𑀁 ‘‘𑀧𑀸𑀧𑀼𑀡𑀺𑀢𑁆𑀯𑀸’’𑀢𑀺, 𑀧𑀢𑁆𑀯𑀸 𑀅𑀥𑀺𑀕𑀦𑁆𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀉𑀧-𑀲𑀤𑁆𑀤𑁄 𑀯𑀸 𑀥𑀸𑀢𑀼𑀲𑀤𑁆𑀤𑀸𑀦𑀼𑀯𑀢𑁆𑀢𑀓𑁄, 𑀲𑀁-𑀲𑀤𑁆𑀤𑁄 𑀧𑀦 𑀥𑀸𑀢𑀼𑀯𑀺𑀲𑁂𑀲𑀓𑁄𑀢𑀺 𑀆𑀳 ‘‘𑀲𑀫𑁆𑀧𑀸𑀤𑁂𑀢𑁆𑀯𑀸’’𑀢𑀺, 𑀅𑀲𑁂𑀓𑁆𑀔𑀸 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀬𑁄 𑀦𑀺𑀧𑁆𑀨𑀸𑀤𑁂𑀢𑁆𑀯𑀸, 𑀧𑀭𑀺𑀧𑀽𑀭𑁂𑀢𑁆𑀯𑀸𑀯𑀸𑀢𑀺 𑀅𑀢𑁆𑀣𑁄.

𑀦𑀺𑀝𑁆𑀞𑀸𑀧𑁂𑀢𑀼𑀦𑁆𑀢𑀺 𑀦𑀺𑀕𑀫𑀦𑀯𑀲𑁂𑀦 𑀧𑀭𑀺𑀬𑁄𑀲𑀸𑀧𑁂𑀢𑀼𑀁. ‘‘𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀁…𑀧𑁂… 𑀯𑀺𑀳𑀸𑀲𑀻’’𑀢𑀺 𑀇𑀫𑀺𑀦𑀸 𑀏𑀯 𑀳𑀺 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀸 𑀧𑀭𑀺𑀬𑁄𑀲𑀸𑀧𑀺𑀢𑀸, 𑀢𑀁 𑀧𑀦 𑀦𑀺𑀕𑀫𑁂𑀢𑀼𑀁 ‘‘𑀅𑀜𑁆𑀜𑀢𑀭𑁄…𑀧𑁂… 𑀅𑀳𑁄𑀲𑀻’’𑀢𑀺 𑀥𑀫𑁆𑀫𑀲𑀗𑁆𑀕𑀸𑀳𑀓𑁂𑀳𑀺 𑀯𑀼𑀢𑁆𑀢𑀁. 𑀏𑀓𑀢𑁄𑀯 𑀇𑀥 𑀅𑀜𑁆𑀜𑀢𑀭𑁄, 𑀦 𑀧𑀦 𑀦𑀸𑀫𑀕𑁄𑀢𑁆𑀢𑀸𑀤𑀻𑀳𑀺 𑀅𑀧𑀸𑀓𑀝𑀢𑁄. 𑀅𑀭𑀳𑀦𑁆𑀢𑀸𑀦𑀦𑁆𑀢𑀺 𑀉𑀩𑁆𑀩𑀸𑀳𑀦𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁. 𑀢𑀣𑀸 𑀉𑀩𑁆𑀩𑀸𑀳𑀺𑀢𑀢𑁆𑀢𑀸 𑀘 𑀢𑁂𑀲𑀫𑀩𑁆𑀪𑀦𑁆𑀢𑀭𑁄𑀢𑀺 𑀅𑀢𑁆𑀣𑁄 𑀆𑀧𑀦𑁆𑀦𑁄𑀢𑀺 𑀅𑀥𑀺𑀧𑁆𑀧𑀸𑀬𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀪𑀕𑀯𑀢𑁄’’𑀢𑀺𑀆𑀤𑀺𑀫𑀸𑀳. 𑀓𑁂𑀘𑀺 𑀧𑀦 𑀏𑀯𑀁 𑀯𑀤𑀦𑁆𑀢𑀺 𑁋 𑀅𑀭𑀳𑀦𑁆𑀢𑀸𑀦𑀦𑁆𑀢𑀺 𑀘𑁂𑀢𑀁 𑀲𑀫𑁆𑀩𑀦𑁆𑀥𑁂𑀬𑁂𑀯 𑀲𑀸𑀫𑀺𑀯𑀘𑀦𑀁, 𑀅𑀢𑁄 𑀘𑁂𑀢𑁆𑀣 𑀲𑀳 𑀧𑀸𑀞𑀲𑁂𑀲𑁂𑀦 𑀅𑀥𑀺𑀧𑁆𑀧𑀸𑀬𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀪𑀕𑀯𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺. 𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀢𑁄 𑀦 𑀯𑀺𑀪𑀢𑁆𑀢𑀁, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀇𑀢𑀺 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬 𑀧𑀭𑀫𑀲𑀼𑀔𑀼𑀫𑀕𑀫𑁆𑀪𑀻𑀭𑀤𑀼𑀭𑀦𑀼𑀩𑁄𑀥𑀢𑁆𑀣𑀧𑀭𑀺𑀤𑀻𑀧𑀦𑀸𑀬 𑀲𑀼𑀯𑀺𑀫𑀮𑀯𑀺𑀧𑀼𑀮𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀚𑀦𑀦𑀸𑀬 𑀲𑀸𑀥𑀼𑀯𑀺𑀮𑀸𑀲𑀺𑀦𑀺𑀬𑀸 𑀦𑀸𑀫 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀺𑀬𑀸 𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑀓𑀸𑀲𑀦𑀸.

𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.