𑁭. 𑀚𑀸𑀮𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑀤𑁆𑀯𑁂𑀧𑀩𑁆𑀩𑀚𑀺𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑁩𑁭𑁮. 𑀏𑀯𑀁 𑀫𑀳𑀸𑀮𑀺𑀲𑀼𑀢𑁆𑀢𑀁 𑀲𑀁𑀯𑀡𑁆𑀡𑁂𑀢𑁆𑀯𑀸 𑀇𑀤𑀸𑀦𑀺 𑀚𑀸𑀮𑀺𑀬𑀲𑀼𑀢𑁆𑀢𑀁 𑀲𑀁𑀯𑀡𑁆𑀡𑁂𑀦𑁆𑀢𑁄 𑀬𑀣𑀸𑀦𑀼𑀧𑀼𑀩𑁆𑀩𑀁 𑀲𑀁𑀯𑀡𑁆𑀡𑀦𑁄𑀓𑀸𑀲𑀲𑁆𑀲 𑀧𑀢𑁆𑀢𑀪𑀸𑀯𑀁 𑀯𑀺𑀪𑀸𑀯𑁂𑀢𑀼𑀁, 𑀫𑀳𑀸𑀮𑀺𑀲𑀼𑀢𑁆𑀢𑀲𑁆𑀲𑀸𑀦𑀦𑁆𑀢𑀭𑀁 𑀲𑀗𑁆𑀕𑀻𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀚𑀸𑀮𑀺𑀬𑀲𑀼𑀢𑁆𑀢𑀪𑀸𑀯𑀁 𑀯𑀸 𑀧𑀓𑀸𑀲𑁂𑀢𑀼𑀁 ‘‘𑀏𑀯𑀁 𑀫𑁂 𑀲𑀼𑀢𑀁…𑀧𑁂… 𑀓𑁄𑀲𑀫𑁆𑀩𑀺𑀬𑀦𑁆𑀢𑀺 𑀚𑀸𑀮𑀺𑀬𑀲𑀼𑀢𑁆𑀢’’𑀦𑁆𑀢𑀺 𑀆𑀳. ‘‘𑀖𑁄𑀲𑀺𑀢𑁂𑀦𑀸’’𑀢𑀺𑀆𑀤𑀺𑀦𑀸 𑀫𑀚𑁆𑀛𑁂𑀮𑁄𑀧𑀲𑀫𑀸𑀲𑀁 𑀤𑀲𑁆𑀲𑁂𑀢𑀺, 𑀖𑁄𑀲𑀺𑀢𑀲𑁆𑀲 𑀆𑀭𑀸𑀫𑁄𑀢𑀺𑀧𑀺 𑀯𑀢𑁆𑀢𑀩𑁆𑀩𑀁. 𑀏𑀯𑀫𑁆𑀧𑀺 𑀳𑀺 ‘‘𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁨𑁩𑁪) 𑀯𑀺𑀬 𑀤𑀸𑀬𑀓𑀓𑀺𑀢𑁆𑀢𑀦𑀁 𑀳𑁄𑀢𑀺, 𑀏𑀯𑀁 𑀧𑀦 𑀓𑀺𑀢𑁆𑀢𑁂𑀦𑁆𑀢𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀅𑀜𑁆𑀜𑁂𑀧𑀺 𑀢𑀲𑁆𑀲 𑀤𑀺𑀝𑁆𑀞𑀸𑀦𑀼𑀕𑀢𑀺𑀆𑀧𑀚𑁆𑀚𑀦𑁂 𑀦𑀺𑀬𑁄𑀚𑁂𑀢𑀻𑀢𑀺 𑀅𑀜𑁆𑀜𑀢𑁆𑀣 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑁄𑀬𑀁 𑀖𑁄𑀲𑀺𑀢𑀲𑁂𑀝𑁆𑀞𑀺 𑀦𑀸𑀫, 𑀓𑀣𑀜𑁆𑀘𑀸𑀦𑁂𑀦 𑀆𑀭𑀸𑀫𑁄 𑀓𑀸𑀭𑀺𑀢𑁄, 𑀓𑀣𑀁 𑀧𑀦 𑀢𑀢𑁆𑀣 𑀪𑀕𑀯𑀸 𑀯𑀺𑀳𑀸𑀲𑀻𑀢𑀺 𑀧𑀼𑀘𑁆𑀙𑀸𑀬 𑀲𑀩𑁆𑀩𑀁 𑀢𑀁 𑀯𑀺𑀲𑁆𑀲𑀚𑁆𑀚𑀦𑀁 𑀲𑀫𑀼𑀤𑀸𑀕𑀫𑀢𑁄 𑀧𑀝𑁆𑀞𑀸𑀬 𑀲𑀗𑁆𑀔𑁂𑀧𑀢𑁄𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀼𑀩𑁆𑀩𑁂 𑀓𑀺𑀭𑀸’’𑀢𑀺𑀆𑀤𑀺𑀫𑀸𑀳. 𑀅𑀮𑁆𑀮𑀓𑀧𑁆𑀧𑀭𑀝𑁆𑀞𑀦𑁆𑀢𑀺 𑀩𑀳𑀽𑀲𑀼 𑀧𑁄𑀢𑁆𑀣𑀓𑁂𑀲𑀼 𑀤𑀺𑀲𑁆𑀲𑀢𑀺, 𑀓𑀢𑁆𑀣𑀘𑀺 𑀧𑀦 ‘‘𑀅𑀤𑁆𑀤𑀺𑀮𑀭𑀝𑁆𑀞’’𑀦𑁆𑀢𑀺 𑀘 ‘‘𑀤𑀫𑀺𑀴𑀭𑀝𑁆𑀞’’𑀦𑁆𑀢𑀺 𑀘 𑀮𑀺𑀔𑀺𑀢𑀁. 𑀢𑀢𑁄𑀢𑀺 𑀅𑀮𑁆𑀮𑀓𑀧𑁆𑀧𑀭𑀝𑁆𑀞𑀢𑁄. ‘‘𑀧𑀼𑀢𑁆𑀢𑀁…𑀧𑁂… 𑀅𑀕𑀫𑀸𑀲𑀻’’𑀢𑀺 𑀇𑀤𑀫𑁆𑀧𑀺 ‘‘𑀢𑀲𑁆𑀲𑁂𑀢𑀁 𑀓𑀫𑁆𑀫’’𑀦𑁆𑀢𑀺 𑀜𑀸𑀧𑁂𑀢𑀼𑀁 𑀯𑀼𑀢𑁆𑀢𑀁. 𑀢𑀤𑀸𑀢𑀺 𑀢𑁂𑀲𑀁 𑀕𑀸𑀫𑀁 𑀧𑀯𑀺𑀝𑁆𑀞𑀤𑀺𑀯𑀲𑁂. 𑀩𑀮𑀯𑀧𑀸𑀬𑀸𑀲𑀦𑁆𑀢𑀺 𑀕𑀭𑀼𑀢𑀭𑀁 𑀩𑀳𑀼𑀧𑀸𑀬𑀸𑀲𑀁. 𑀚𑀻𑀭𑀸𑀧𑁂𑀢𑀼𑀦𑁆𑀢𑀺 𑀲𑀫𑀯𑁂𑀧𑀸𑀓𑀺𑀦𑀺𑀬𑀸 𑀕𑀳𑀡𑀺𑀬𑀸 𑀧𑀓𑁆𑀓𑀸𑀧𑁂𑀢𑀼𑀁. 𑀅𑀲𑀦𑁆𑀦𑀺𑀳𑀺𑀢𑁂𑀢𑀺 𑀕𑁂𑀳𑀢𑁄 𑀩𑀳𑀺 𑀅𑀜𑁆𑀜𑀁 𑀕𑀢𑁂. 𑀪𑀼𑀲𑁆𑀲𑀢𑀻𑀢𑀺 𑀦𑀤𑀢𑀺, ‘‘𑀪𑀼𑀪𑀼’’𑀇𑀢𑀺 𑀲𑀼𑀦𑀔𑀲𑀤𑁆𑀤𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀫𑁆𑀧𑀺𑀲𑁆𑀲 𑀏𑀓𑀁 𑀓𑀫𑁆𑀫𑀁. 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀧𑀦 𑀘𑀻𑀯𑀭𑀓𑀫𑁆𑀫𑀢𑁆𑀣𑀸𑀬 𑀅𑀜𑁆𑀜𑀁 𑀞𑀸𑀦𑀁 𑀕𑀢𑁂 𑀲𑀼𑀦𑀔𑀲𑁆𑀲 𑀳𑀤𑀬𑀁 𑀨𑀸𑀮𑀺𑀢𑀁. 𑀢𑀺𑀭𑀘𑁆𑀙𑀸𑀦𑀸 𑀦𑀸𑀫𑁂𑀢𑁂 𑀉𑀚𑀼𑀚𑀸𑀢𑀺𑀓𑀸 𑀳𑁄𑀦𑁆𑀢𑀺 𑀅𑀓𑀼𑀝𑀺𑀮𑀸, 𑀫𑀦𑀼𑀲𑁆𑀲𑀸 𑀧𑀦 𑀅𑀜𑁆𑀜𑀁 𑀳𑀤𑀬𑁂𑀦 𑀘𑀺𑀦𑁆𑀢𑁂𑀢𑀺, 𑀅𑀜𑁆𑀜𑀁 𑀫𑀼𑀔𑁂𑀦 𑀓𑀣𑁂𑀦𑁆𑀢𑀺. 𑀢𑁂𑀦𑁂𑀯𑀸𑀳 ‘‘𑀕𑀳𑀦𑀜𑁆𑀳𑁂𑀢𑀁 𑀪𑀦𑁆𑀢𑁂 𑀬𑀤𑀺𑀤𑀁 𑀫𑀦𑀼𑀲𑁆𑀲𑀸, 𑀉𑀢𑁆𑀢𑀸𑀦𑀓𑀜𑁆𑀳𑁂𑀢𑀁 𑀪𑀦𑁆𑀢𑁂 𑀬𑀤𑀺𑀤𑀁 𑀧𑀲𑀯𑁄’’𑀢𑀺 (𑀫. 𑀦𑀺. 𑁨.𑁩).

𑀇𑀢𑀺 𑀲𑁄 𑀢𑀸𑀬 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀲𑀺𑀦𑁂𑀳𑀯𑀲𑁂𑀦 𑀉𑀚𑀼𑀤𑀺𑀝𑁆𑀞𑀺𑀢𑀸𑀬 𑀅𑀓𑀼𑀝𑀺𑀮𑀢𑀸𑀬 𑀓𑀸𑀮𑀗𑁆𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑁄. 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀲𑁄…𑀧𑁂… 𑀦𑀺𑀩𑁆𑀩𑀢𑁆𑀢𑀻’’𑀢𑀺. 𑀢𑀲𑁆𑀲 𑀧𑀦 𑀓𑀡𑁆𑀡𑀫𑀽𑀮𑁂 𑀓𑀣𑁂𑀦𑁆𑀢𑀲𑁆𑀲 𑀲𑀤𑁆𑀤𑁄 𑀲𑁄𑀴𑀲𑀬𑁄𑀚𑀦𑀝𑁆𑀞𑀸𑀦𑀁 𑀨𑀭𑀢𑀺, 𑀧𑀓𑀢𑀺𑀓𑀣𑀸𑀲𑀤𑁆𑀤𑁄 𑀧𑀦 𑀲𑀓𑀮𑀁 𑀤𑀲𑀬𑁄𑀚𑀦𑀲𑀳𑀲𑁆𑀲𑀁 𑀤𑁂𑀯𑀦𑀕𑀭𑀁, 𑀏𑀯𑀁 𑀲𑀭𑀖𑁄𑀲𑀲𑀫𑁆𑀧𑀢𑁆𑀢𑀺𑀬𑀸 ‘‘𑀖𑁄𑀲𑀓𑀤𑁂𑀯𑀧𑀼𑀢𑁆𑀢𑁄’’ 𑀢𑁆𑀯𑁂𑀯 𑀦𑀸𑀫𑀁 𑀅𑀳𑁄𑀲𑀺. 𑀅𑀬𑀫𑀲𑁆𑀲 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀲𑀺𑀦𑁂𑀳𑁂𑀦 𑀪𑀼𑀓𑁆𑀓𑀭𑀡𑀲𑁆𑀲 𑀦𑀺𑀲𑁆𑀲𑀦𑁆𑀤𑁄. 𑀘𑀯𑀺𑀢𑁆𑀯𑀸𑀢𑀺 𑀆𑀳𑀸𑀭𑀓𑁆𑀔𑀬𑁂𑀦 𑀘𑀯𑀺𑀢𑁆𑀯𑀸. 𑀤𑁂𑀯𑀮𑁄𑀓𑀢𑁄 𑀳𑀺 𑀤𑁂𑀯𑀧𑀼𑀢𑁆𑀢𑀸 𑀆𑀬𑀼𑀓𑁆𑀔𑀬𑁂𑀦, 𑀧𑀼𑀜𑁆𑀜𑀓𑁆𑀔𑀬𑁂𑀦, 𑀆𑀳𑀸𑀭𑀓𑁆𑀔𑀬𑁂𑀦, 𑀓𑁄𑀧𑁂𑀦𑀸𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀘𑀯𑀦𑁆𑀢𑀺. 𑀇𑀫𑀲𑁆𑀲 𑀧𑀦 𑀓𑀸𑀫𑀕𑀼𑀡𑁂 𑀧𑀭𑀺𑀪𑀼𑀜𑁆𑀚𑀢𑁄 𑀫𑀼𑀝𑁆𑀞𑀲𑁆𑀲𑀢𑀺𑀲𑁆𑀲 𑀆𑀳𑀸𑀭𑀓𑁆𑀔𑀬𑁂𑀦 𑀘𑀯𑀦𑀁 𑀳𑁄𑀢𑀺. 𑀲𑁄 𑀓𑁄𑀲𑀫𑁆𑀩𑀺𑀬𑀁 𑀦𑀕𑀭𑀲𑁄𑀪𑀺𑀦𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀦𑀕𑀭𑀲𑁄𑀪𑀺𑀦𑀺𑀬𑁄 𑀓𑀺𑀭 𑀥𑀻𑀢𑀭𑀁 𑀧𑀝𑀺𑀚𑀕𑁆𑀕𑀦𑁆𑀢𑀺, 𑀦 𑀧𑀼𑀢𑁆𑀢𑀁. 𑀥𑀻𑀢𑀭𑁄 𑀳𑀺 𑀢𑀸𑀲𑀁 𑀧𑀯𑁂𑀡𑀺𑀁 𑀖𑀝𑀬𑀦𑁆𑀢𑀺, 𑀢𑀲𑁆𑀫𑀸 𑀲𑀸𑀧𑀺 𑀢𑀁 𑀲𑀗𑁆𑀓𑀸𑀭𑀓𑀽𑀝𑁂 𑀙𑀟𑁆𑀟𑀸𑀧𑁂𑀢𑀺. 𑀅𑀬𑀫𑀲𑁆𑀲 𑀧𑀼𑀩𑁆𑀩𑁂 𑀧𑀼𑀢𑁆𑀢𑀙𑀟𑁆𑀟𑀦𑀓𑀫𑁆𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑁄. 𑀧𑀸𑀧𑀓𑀫𑁆𑀫𑀜𑁆𑀳𑀺 𑀦𑀸𑀫𑁂𑀢𑀁 ‘‘𑀅𑀧𑁆𑀧𑀓’’𑀦𑁆𑀢𑀺 𑀦𑀸𑀯𑀫𑀜𑁆𑀜𑀺𑀢𑀩𑁆𑀩𑀁. 𑀢𑀫𑁂𑀓𑁄 𑀫𑀦𑀼𑀲𑁆𑀲𑁄 𑀓𑀸𑀓𑀲𑀼𑀦𑀔𑀧𑀭𑀺𑀯𑀸𑀭𑀺𑀢𑀁 𑀤𑀺𑀲𑁆𑀯𑀸 ‘‘𑀧𑀼𑀢𑁆𑀢𑁄 𑀫𑁂 𑀮𑀤𑁆𑀥𑁄’’𑀢𑀺 𑀕𑁂𑀳𑀁 𑀦𑁂𑀲𑀺, 𑀢𑀲𑁆𑀲 𑀧𑀦 𑀳𑀢𑁆𑀣𑀢𑁄 𑀓𑁄𑀲𑀫𑁆𑀩𑀓𑀲𑁂𑀝𑁆𑀞𑀺 𑀓𑀳𑀸𑀧𑀡𑀲𑀳𑀲𑁆𑀲𑀁 𑀤𑀢𑁆𑀯𑀸 𑀅𑀕𑁆𑀕𑀳𑁂𑀲𑀺, 𑀢𑀫𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀓𑁄𑀲𑀫𑁆𑀩𑀺𑀬𑀁 𑀏𑀓𑀲𑁆𑀲 𑀓𑀼𑀮𑀲𑁆𑀲 𑀖𑀭𑁂 𑀦𑀺𑀩𑁆𑀩𑀢𑁆𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀖𑀸𑀢𑀸𑀧𑀦𑀢𑁆𑀣𑀁 𑀉𑀧𑀓𑁆𑀓𑀫𑀓𑀭𑀡𑀫𑁆𑀧𑀺 𑀧𑀼𑀢𑁆𑀢𑀙𑀟𑁆𑀟𑀦𑀓𑀫𑁆𑀫𑀲𑁆𑀲𑁂𑀯 𑀦𑀺𑀲𑁆𑀲𑀦𑁆𑀤𑁄. 𑀲𑁂𑀝𑁆𑀞𑀺𑀥𑀻𑀢𑀸𑀬𑀸𑀢𑀺 𑀚𑀦𑀧𑀤𑀲𑁂𑀝𑁆𑀞𑀺𑀦𑁄 𑀥𑀻𑀢𑀸𑀬. 𑀯𑁂𑀬𑁆𑀬𑀢𑁆𑀢𑀺𑀬𑁂𑀦𑀸𑀢𑀺 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑁂𑀦. 𑀲𑀸 𑀳𑀺 𑀢𑀲𑁆𑀲 𑀧𑀺𑀢𑀭𑀸 𑀧𑁂𑀲𑀺𑀢𑀁 𑀫𑀸𑀭𑀸𑀧𑀦𑀧𑀡𑁆𑀡𑀁 𑀨𑀸𑀮𑁂𑀢𑁆𑀯𑀸 𑀯𑀺𑀯𑀸𑀳𑀧𑀡𑁆𑀡𑀁 𑀩𑀦𑁆𑀥𑀺𑀢𑁆𑀯𑀸 𑀚𑀻𑀯𑀺𑀢𑀮𑀸𑀪𑀁 𑀓𑀭𑁄𑀢𑀺. 𑀢𑀸𑀬𑁂𑀯 𑀲𑀭𑀲𑀫𑁆𑀧𑀢𑁆𑀢𑀺𑀬𑀸 𑀖𑁄𑀲𑀺𑀢𑀲𑁂𑀝𑁆𑀞𑀺 𑀦𑀸𑀫 𑀚𑀸𑀢𑁄.

𑀲𑀭𑀻𑀭𑀲𑀦𑁆𑀢𑀧𑁆𑀧𑀦𑀢𑁆𑀣𑀦𑁆𑀢𑀺 𑀳𑀺𑀫𑀯𑀦𑁆𑀢𑁂𑀯 𑀫𑀽𑀮𑀨𑀮𑀸𑀳𑀸𑀭𑀢𑀸𑀬 𑀓𑀺𑀮𑀦𑁆𑀢𑀲𑀭𑀻𑀭𑀲𑁆𑀲 𑀮𑁄𑀡𑀫𑁆𑀩𑀺𑀮𑀲𑁂𑀯𑀦𑁂𑀦 𑀧𑀻𑀦𑀦𑀢𑁆𑀣𑀁. 𑀢𑀲𑀺𑀢𑀸𑀢𑀺 𑀧𑀺𑀧𑀸𑀲𑀺𑀢𑀸. 𑀓𑀺𑀮𑀦𑁆𑀢𑀸𑀢𑀺 𑀧𑀭𑀺𑀲𑁆𑀲𑀦𑁆𑀢𑀓𑀸𑀬𑀸. 𑀯𑀝𑀭𑀼𑀓𑁆𑀔𑀦𑁆𑀢𑀺 𑀫𑀳𑀸𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀁. 𑀢𑁂 𑀓𑀺𑀭 𑀢𑀁 𑀧𑀢𑁆𑀯𑀸 𑀢𑀲𑁆𑀲 𑀫𑀽𑀮𑁂 𑀦𑀺𑀲𑀻𑀤𑀺𑀁𑀲𑀼. 𑀅𑀣 𑀚𑁂𑀝𑁆𑀞𑀓𑀢𑀸𑀧𑀲𑁄 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀲𑁆𑀲 𑀲𑁄𑀪𑀸𑀲𑀫𑁆𑀧𑀢𑁆𑀢𑀺𑀁 𑀧𑀲𑁆𑀲𑀺𑀢𑁆𑀯𑀸 ‘‘𑀫𑀳𑀸𑀦𑀼𑀪𑀸𑀯𑁄 𑀫𑀜𑁆𑀜𑁂 𑀏𑀢𑁆𑀣 𑀅𑀥𑀺𑀯𑀼𑀢𑁆𑀣𑀸 𑀤𑁂𑀯𑀢𑀸. 𑀲𑀸𑀥𑀼 𑀯𑀢𑀸𑀬𑀁 𑀤𑁂𑀯𑀢𑀸 𑀇𑀲𑀺𑀕𑀡𑀲𑁆𑀲 𑀧𑀸𑀦𑀻𑀬𑀸𑀤𑀺𑀤𑀸𑀦𑁂𑀦 𑀅𑀤𑁆𑀥𑀸𑀦𑀧𑀭𑀺𑀲𑁆𑀲𑀫𑀁 𑀯𑀺𑀦𑁄𑀤𑁂𑀬𑁆𑀬𑀸’’𑀢𑀺 𑀘𑀺𑀦𑁆𑀢𑁂𑀲𑀺. 𑀤𑁂𑀯𑀢𑀸𑀧𑀺 𑀢𑀣𑀸 𑀘𑀺𑀦𑁆𑀢𑀺𑀢𑀁 𑀉𑀢𑁆𑀯𑀸 𑀇𑀲𑀺𑀕𑀡𑀲𑁆𑀲 𑀧𑀸𑀦𑀻𑀬𑀦𑁆𑀳𑀸𑀦𑀓𑀪𑁄𑀚𑀦𑀸𑀦𑀺 𑀅𑀤𑀸𑀲𑀺. 𑀢𑁂𑀦𑀸𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺. 𑀚𑁂𑀝𑁆𑀞𑀓𑀢𑀸𑀧𑀲𑀲𑁆𑀲 𑀧𑀦 𑀢𑀣𑀸 𑀘𑀺𑀦𑁆𑀢𑀦𑀁 𑀅𑀯𑀺𑀲𑁂𑀲𑀢𑁄 𑀲𑀩𑁆𑀩𑀢𑁆𑀣 𑀆𑀭𑁄𑀧𑁂𑀢𑁆𑀯𑀸 ‘‘𑀲𑀗𑁆𑀕𑀳𑀁 𑀧𑀘𑁆𑀘𑀸𑀲𑀺𑀲𑀦𑁆𑀢𑀸’’𑀢𑀺 𑀯𑀼𑀢𑁆𑀢𑀁. ‘‘𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀳𑀢𑁆𑀣𑀧𑁆𑀧𑀲𑀸𑀭𑀡𑀫𑀢𑁆𑀢𑁂𑀦 𑀢𑀲𑁆𑀲𑀸 𑀬𑀣𑀺𑀘𑁆𑀙𑀺𑀢𑀦𑀺𑀧𑁆𑀨𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀤𑁂𑀯𑀢𑀸 𑀆𑀳𑀸𑀢𑀺 𑀲𑀸 𑀅𑀢𑁆𑀢𑀦𑁄 𑀧𑀼𑀜𑁆𑀜𑀲𑁆𑀲 𑀧𑀭𑀺𑀢𑁆𑀢𑀓𑀢𑁆𑀢𑀸 𑀮𑀚𑁆𑀚𑀸𑀬 𑀓𑀣𑁂𑀢𑀼𑀁 𑀅𑀯𑀺𑀲𑀳𑀦𑁆𑀢𑀻𑀧𑀺 𑀧𑀼𑀦𑀧𑁆𑀧𑀼𑀦𑀁 𑀦𑀺𑀧𑁆𑀧𑀻𑀴𑀺𑀬𑀫𑀸𑀦𑀸 𑀏𑀯𑀫𑀸𑀳. 𑀲𑁄𑀢𑀺 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺. 𑀪𑀢𑀓𑀸𑀦𑀦𑁆𑀢𑀺 𑀪𑀢𑀺𑀬𑀸 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀭𑁄𑀦𑁆𑀢𑀸𑀦𑀁 𑀤𑀸𑀲𑀧𑁂𑀲𑀓𑀫𑁆𑀫𑀓𑀭𑀸𑀦𑀁. 𑀧𑀓𑀢𑀺𑀪𑀢𑁆𑀢𑀯𑁂𑀢𑀦𑀫𑁂𑀯𑀸𑀢𑀺 𑀧𑀓𑀢𑀺𑀬𑀸 𑀤𑀸𑀢𑀩𑁆𑀩𑀪𑀢𑁆𑀢𑀯𑁂𑀢𑀦𑀫𑁂𑀯. 𑀢𑀤𑀸 𑀉𑀧𑁄𑀲𑀣𑀺𑀓𑀢𑁆𑀢𑀸 𑀓𑀫𑁆𑀫𑀁 𑀅𑀓𑀭𑁄𑀦𑁆𑀢𑀸𑀦𑀫𑁆𑀧𑀺 𑀓𑀫𑁆𑀫𑀓𑀭𑀡𑀤𑀺𑀯𑀲𑁂 𑀤𑀸𑀢𑀩𑁆𑀩𑀪𑀢𑁆𑀢𑀯𑁂𑀢𑀦𑀫𑁂𑀯, 𑀦 𑀢𑀢𑁄 𑀊𑀦𑀦𑁆𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀧𑀤𑀝𑁆𑀞𑀓𑀣𑀸𑀬𑀁 𑀔𑀼𑀤𑁆𑀤𑀓𑀪𑀸𑀡𑀓𑀸𑀦𑀁 𑀫𑀢𑁂𑀦 ‘‘𑀲𑀸𑀬𑀫𑀸𑀲𑀢𑁆𑀣𑀸𑀬 𑀆𑀕𑀢𑁄’’𑀢𑀺 (𑀥. 𑀧. 𑀅𑀝𑁆𑀞. 𑁧.𑁨.𑀲𑀸𑀫𑀸𑀯𑀢𑀻𑀯𑀢𑁆𑀣𑀼) 𑀯𑀼𑀢𑁆𑀢𑀁, 𑀇𑀥 𑀧𑀦 𑀤𑀻𑀖𑀪𑀸𑀡𑀓𑀸𑀦𑀁 𑀫𑀢𑁂𑀦 ‘‘𑀫𑀚𑁆𑀛𑀦𑁆𑀳𑀺𑀓𑁂 𑀧𑀸𑀢𑀭𑀸𑀲𑀢𑁆𑀣𑀸𑀬 𑀆𑀕𑀢𑁄’’𑀢𑀺. 𑀓𑀜𑁆𑀘𑀻𑀢𑀺 𑀓𑀜𑁆𑀘𑀺𑀧𑀺 𑀪𑀢𑀓𑀁, 𑀓𑀺𑀜𑁆𑀘𑀺𑀧𑀺 𑀪𑀢𑀓𑀓𑀫𑁆𑀫𑀦𑁆𑀢𑀺 𑀯𑀸 𑀲𑀫𑁆𑀩𑀦𑁆𑀥𑁄. 𑀫𑀚𑁆𑀛𑀦𑁆𑀳𑀺𑀓𑀓𑀸𑀮𑀢𑁆𑀢𑀸 ‘‘𑀉𑀧𑀟𑁆𑀠𑀤𑀺𑀯𑀲𑁄 𑀕𑀢𑁄’’𑀢𑀺 𑀆𑀳, 𑀢𑁂𑀦 𑀉𑀧𑀟𑁆𑀠𑀤𑀺𑀯𑀲𑀫𑁂𑀯 𑀲𑀫𑀸𑀤𑀺𑀦𑁆𑀦𑀢𑁆𑀢𑀸 ‘‘𑀉𑀧𑀟𑁆𑀠𑀽𑀧𑁄𑀲𑀣𑁄’’𑀢𑀺 𑀢𑀁 𑀯𑁄𑀳𑀭𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀥𑀫𑁆𑀫𑀧𑀤𑀝𑁆𑀞𑀓𑀣𑀸𑀬𑀁 (𑀥. 𑀧. 𑀅𑀝𑁆𑀞. 𑁧.𑁨 𑀲𑀸𑀫𑀸𑀯𑀢𑀻𑀯𑀢𑁆𑀣𑀼) 𑀭𑀢𑁆𑀢𑀺𑀪𑀸𑀕𑁂𑀦 𑀉𑀧𑀟𑁆𑀠𑀽𑀧𑁄𑀲𑀣𑁄 𑀯𑀼𑀢𑁆𑀢𑁄, 𑀇𑀥 𑀧𑀦 𑀫𑀚𑁆𑀛𑀦𑁆𑀳𑀺𑀓𑀢𑁄 𑀧𑀝𑁆𑀞𑀸𑀬 𑀤𑀺𑀯𑀲𑀪𑀸𑀕𑁂𑀦𑁂𑀯, 𑀢𑀤𑀯𑀲𑁂𑀲𑀤𑀺𑀯𑀲𑀭𑀢𑁆𑀢𑀺𑀪𑀸𑀕𑁂𑀦 𑀯𑀸. 𑀅𑀲𑀫𑁂𑀧𑀺 𑀳𑀺 𑀪𑀸𑀕𑁂 𑀉𑀧𑀟𑁆𑀠𑀲𑀤𑁆𑀤𑁄 𑀧𑀯𑀢𑁆𑀢𑀢𑀺. 𑀢𑀤𑀳𑁂𑀯𑀸𑀢𑀺 𑀅𑀭𑀼𑀡𑀼𑀕𑁆𑀕𑀫𑀦𑀓𑀸𑀮𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

‘‘𑀖𑁄𑀲𑁄𑀧𑀺 𑀔𑁄 𑀤𑀼𑀮𑁆𑀮𑀪𑁄 𑀮𑁄𑀓𑀲𑁆𑀫𑀺𑀁 𑀬𑀤𑀺𑀤𑀁 𑀩𑀼𑀤𑁆𑀥𑁄’’𑀢𑀺 𑀲𑀜𑁆𑀚𑀸𑀢𑀧𑀻𑀢𑀺𑀧𑀸𑀫𑁄𑀚𑁆𑀚𑁄. 𑀢𑀤𑀳𑁂𑀯𑀸𑀢𑀺 𑀓𑁄𑀲𑀫𑁆𑀩𑀺𑀁 𑀧𑀢𑁆𑀢𑀤𑀺𑀯𑀲𑀢𑁄 𑀤𑀼𑀢𑀺𑀬𑀤𑀺𑀯𑀲𑁂𑀬𑁂𑀯. 𑀢𑀼𑀭𑀺𑀢𑀸𑀢𑁆𑀣𑀸𑀢𑀺 𑀢𑀼𑀭𑀺𑀢𑀸 𑀅𑀢𑁆𑀣, 𑀲𑀻𑀖𑀬𑀸𑀬𑀺𑀦𑁄 𑀪𑀯𑀣𑀸𑀢𑀺 𑀅𑀢𑁆𑀣𑁄. 𑀏𑀳𑀺𑀪𑀺𑀓𑁆𑀔𑀼𑀧𑀩𑁆𑀩𑀚𑁆𑀚𑀁 𑀲𑀦𑁆𑀥𑀸𑀬 ‘‘𑀧𑀩𑁆𑀩𑀚𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀅𑀭𑀳𑀢𑁆𑀢𑀦𑁆𑀢𑀺 𑀘𑀢𑀼𑀧𑀝𑀺𑀲𑀫𑁆𑀪𑀺𑀤𑀸𑀲𑀫𑀮𑀗𑁆𑀓𑀢𑀁 𑀅𑀭𑀳𑀦𑁆𑀢𑀪𑀸𑀯𑀁. 𑀢𑁂𑀧𑀺 𑀲𑁂𑀝𑁆𑀞𑀺𑀦𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀬 𑀅𑀟𑁆𑀠𑀫𑀸𑀲𑀫𑀢𑁆𑀢𑀁 𑀤𑀸𑀦𑀸𑀦𑀺 𑀤𑀢𑁆𑀯𑀸 𑀧𑀘𑁆𑀘𑀸𑀕𑀫𑁆𑀫 𑀢𑀬𑁄 𑀯𑀺𑀳𑀸𑀭𑁂 𑀓𑀸𑀭𑁂𑀲𑀼𑀁. 𑀪𑀕𑀯𑀸 𑀧𑀦 𑀤𑁂𑀯𑀲𑀺𑀓𑀁 𑀏𑀓𑁂𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀲𑀢𑀺. 𑀬𑀲𑁆𑀲 𑀘 𑀯𑀺𑀳𑀸𑀭𑁂 𑀯𑀼𑀢𑁆𑀣𑁄, 𑀢𑀲𑁆𑀲𑁂𑀯 𑀖𑀭𑁂 𑀧𑀺𑀡𑁆𑀟𑀸𑀬 𑀘𑀭𑀢𑀺, 𑀢𑀤𑀸 𑀧𑀦 𑀖𑁄𑀲𑀺𑀢𑀲𑁆𑀲 𑀯𑀺𑀳𑀸𑀭𑁂 𑀯𑀺𑀳𑀭𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀓𑁄𑀲𑀫𑁆𑀩𑀺𑀬𑀁 𑀯𑀺𑀳𑀭𑀢𑀺 𑀖𑁄𑀲𑀺𑀢𑀸𑀭𑀸𑀫𑁂’’𑀢𑀺.

𑀩𑀸𑀳𑀺𑀭𑀲𑀫𑀬𑀫𑀢𑁆𑀢𑁂𑀦 𑀉𑀧𑀚𑁆𑀛𑀸𑀬𑁄, 𑀦 𑀲𑀸𑀲𑀦𑁂 𑀯𑀺𑀬 𑀉𑀧𑀚𑁆𑀛𑀸𑀬𑀮𑀓𑁆𑀔𑀡𑁂𑀦. 𑀉𑀧𑁂𑀘𑁆𑀘 𑀧𑀭𑀲𑁆𑀲 𑀯𑀸𑀘𑀸𑀬 𑀆𑀭𑀫𑁆𑀪𑀦𑀁 𑀩𑀸𑀥𑀦𑀁 𑀉𑀧𑀸𑀭𑀫𑁆𑀪𑁄, 𑀤𑁄𑀲𑀤𑀲𑁆𑀲𑀦𑀯𑀲𑁂𑀦 𑀖𑀝𑁆𑀝𑀦𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀯𑀸𑀤𑀁 𑀆𑀭𑁄𑀧𑁂𑀢𑀼𑀓𑀸𑀫𑀸 𑀳𑀼𑀢𑁆𑀯𑀸’’𑀢𑀺. 𑀯𑀤𑀦𑁆𑀢𑀺 𑀦𑀺𑀦𑁆𑀤𑀸𑀯𑀲𑁂𑀦 𑀓𑀣𑁂𑀦𑁆𑀢𑀺 𑀏𑀢𑁂𑀦𑀸𑀢𑀺 𑀳𑀺 𑀯𑀸𑀤𑁄, 𑀤𑁄𑀲𑁄, 𑀢𑀫𑀸𑀭𑁄𑀧𑁂𑀢𑀼𑀓𑀸𑀫𑀸 𑀉𑀧𑀭𑀺 𑀧𑀢𑀺𑀝𑁆𑀞𑀧𑁂𑀢𑀼𑀓𑀸𑀫𑀸 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀓𑀣𑀫𑀸𑀭𑁄𑀧𑁂𑀢𑀼𑀓𑀸𑀫𑀸𑀢𑀺 𑀆𑀳 ‘‘𑀇𑀢𑀺 𑀓𑀺𑀭𑀸’’𑀢𑀺𑀆𑀤𑀺. 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀦𑁆𑀢𑀺 𑀬𑀁 𑀯𑀢𑁆𑀣𑀼 𑀚𑀻𑀯𑀲𑀜𑁆𑀜𑀺𑀢𑀁, 𑀢𑀤𑁂𑀯 𑀲𑀭𑀻𑀭𑀲𑀜𑁆𑀜𑀺𑀢𑀁. 𑀇𑀤𑀜𑁆𑀳𑀺 ‘‘𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀯𑀸𑀤𑀁 𑀕𑀳𑁂𑀢𑁆𑀯𑀸 𑀯𑀤𑀦𑁆𑀢𑀺. 𑀭𑀽𑀧𑀜𑁆𑀘 𑀅𑀢𑁆𑀢𑀸𑀦𑀜𑁆𑀘 𑀅𑀤𑁆𑀯𑀬𑀁 𑀏𑀓𑀻𑀪𑀸𑀯𑀁 𑀓𑀢𑁆𑀯𑀸 𑀲𑀫𑀦𑀼𑀧𑀲𑁆𑀲𑀦𑀯𑀲𑁂𑀦, ‘‘𑀲𑀢𑁆𑀢𑁄’’𑀢𑀺 𑀯𑀸 𑀩𑀸𑀳𑀺𑀭𑀓𑀧𑀭𑀺𑀓𑀧𑁆𑀧𑀺𑀢𑀁 𑀅𑀢𑁆𑀢𑀸𑀦𑀁 𑀲𑀦𑁆𑀥𑀸𑀬 𑀯𑀤𑀦𑁆𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀇𑀥𑁂𑀯 𑀲𑀢𑁆𑀢𑁄 𑀪𑀺𑀚𑁆𑀚𑀢𑀻’’𑀢𑀺. 𑀅𑀲𑁆𑀲𑀸𑀢𑀺 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲. 𑀪𑀺𑀚𑁆𑀚𑀢𑀻𑀢𑀺 𑀦𑀺𑀭𑀼𑀤𑀬𑀯𑀺𑀦𑀸𑀲𑀯𑀲𑁂𑀦 𑀯𑀺𑀦𑀲𑁆𑀲𑀢𑀺. 𑀢𑁂𑀦 𑀚𑀻𑀯𑀺𑀢𑀲𑀭𑀻𑀭𑀸𑀦𑀁 𑀅𑀦𑀜𑁆𑀜𑀢𑁆𑀢𑀸𑀦𑀼𑀚𑀸𑀦𑀦𑀢𑁄, 𑀲𑀭𑀻𑀭𑀲𑁆𑀲 𑀘 𑀪𑁂𑀤𑀤𑀲𑁆𑀲𑀦𑀢𑁄. 𑀦 𑀳𑁂𑀢𑁆𑀣 𑀬𑀣𑀸 𑀤𑀺𑀝𑁆𑀞𑀪𑁂𑀤𑀯𑀢𑀸 𑀲𑀭𑀻𑀭𑀢𑁄 𑀅𑀦𑀜𑁆𑀜𑀢𑁆𑀢𑀸 𑀅𑀤𑀺𑀝𑁆𑀞𑁄𑀧𑀺 𑀚𑀻𑀯𑀲𑁆𑀲 𑀪𑁂𑀤𑁄 𑀯𑀼𑀢𑁆𑀢𑁄, 𑀏𑀯𑀁 𑀅𑀤𑀺𑀝𑁆𑀞𑀪𑁂𑀤𑀯𑀢𑀸 𑀚𑀻𑀯𑀢𑁄 𑀅𑀦𑀜𑁆𑀜𑀢𑁆𑀢𑀸 𑀲𑀭𑀻𑀭𑀲𑁆𑀲𑀸𑀧𑀺 𑀅𑀪𑁂𑀤𑁄𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀢𑀲𑁆𑀲 𑀪𑁂𑀤𑀲𑁆𑀲 𑀧𑀘𑁆𑀘𑀓𑁆𑀔𑀲𑀺𑀤𑁆𑀥𑀢𑁆𑀢𑀸, 𑀪𑀽𑀢𑀼𑀧𑀸𑀤𑀸𑀬𑀭𑀽𑀧𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀘 𑀲𑀭𑀻𑀭𑀲𑁆𑀲 𑀅𑀪𑀸𑀯𑀢𑁄𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀉𑀘𑁆𑀙𑁂𑀤𑀯𑀸𑀤𑁄 𑀳𑁄𑀢𑀻’’𑀢𑀺.

𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀦𑁆𑀢𑀺 𑀅𑀜𑁆𑀜𑀤𑁂𑀯 𑀯𑀢𑁆𑀣𑀼 𑀚𑀻𑀯𑀲𑀜𑁆𑀜𑀺𑀢𑀁, 𑀅𑀜𑁆𑀜𑀁 𑀲𑀭𑀻𑀭𑀲𑀜𑁆𑀜𑀺𑀢𑀁. 𑀇𑀤𑀜𑁆𑀳𑀺 ‘‘𑀭𑀽𑀧𑀯𑀦𑁆𑀢𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀯𑀸𑀤𑀁 𑀕𑀳𑁂𑀢𑁆𑀯𑀸 𑀯𑀤𑀦𑁆𑀢𑀺. 𑀭𑀽𑀧𑀪𑁂𑀤𑀲𑁆𑀲𑁂𑀯 𑀤𑀺𑀝𑁆𑀞𑀢𑁆𑀢𑀸, 𑀅𑀢𑁆𑀢𑀦𑀺 𑀘 𑀢𑀤𑀪𑀸𑀯𑀢𑁄 ‘‘𑀅𑀢𑁆𑀢𑀸 𑀦𑀺𑀘𑁆𑀘𑁄’’𑀢𑀺 𑀅𑀬𑀫𑀢𑁆𑀣𑁄 𑀆𑀧𑀦𑁆𑀦𑁄 𑀯𑀸𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀲𑀢𑁆𑀢𑁄 𑀲𑀲𑁆𑀲𑀢𑁄 𑀆𑀧𑀚𑁆𑀚𑀢𑀻’’𑀢𑀺.

𑁩𑁭𑁯-𑁩𑁮𑁦. 𑀢𑀬𑀺𑀤𑀁 𑀦𑁂𑀲𑀁 𑀯𑀜𑁆𑀛𑀸𑀧𑀼𑀢𑁆𑀢𑀲𑁆𑀲 𑀤𑀻𑀖𑀭𑀲𑁆𑀲𑀢𑀸𑀤𑀺𑀧𑀭𑀺𑀓𑀧𑁆𑀧𑀦𑀲𑀤𑀺𑀲𑀁, 𑀢𑀲𑁆𑀫𑀸𑀬𑀁 𑀧𑀜𑁆𑀳𑁄 𑀞𑀧𑀦𑀻𑀬𑁄. 𑀦 𑀳𑁂𑀲 𑀅𑀢𑁆𑀣𑀦𑀺𑀲𑁆𑀲𑀺𑀢𑁄, 𑀦 𑀥𑀫𑁆𑀫𑀦𑀺𑀲𑁆𑀲𑀺𑀢𑁄, 𑀦𑀸𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑁄, 𑀦 𑀦𑀺𑀩𑁆𑀩𑀺𑀤𑀸𑀤𑀺𑀅𑀢𑁆𑀣𑀸𑀬 𑀲𑀁𑀯𑀢𑁆𑀢𑀢𑀺. 𑀧𑁄𑀝𑁆𑀞𑀧𑀸𑀤𑀲𑀼𑀢𑁆𑀢𑀜𑁆𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀁. 𑀢𑀁 𑀢𑀢𑁆𑀣 𑀭𑀸𑀚𑀦𑀺𑀫𑀻𑀮𑀦𑀁 𑀓𑀢𑁆𑀯𑀸 ‘‘𑀢𑁂𑀦 𑀳𑀸𑀯𑀼𑀲𑁄𑀲𑀼𑀡𑀸𑀣𑀸’’𑀢𑀺𑀆𑀤𑀺𑀦𑀸 𑀲𑀢𑁆𑀣𑀸 𑀦𑁂𑀲𑀁 𑀉𑀧𑀭𑀺 𑀥𑀫𑁆𑀫𑀤𑁂𑀲𑀦𑀫𑀸𑀭𑀪𑀻𑀢𑀺 𑀆𑀳 ‘‘𑀅𑀣 𑀪𑀕𑀯𑀸’’𑀢𑀺𑀆𑀤𑀺. 𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑁄 𑀤𑁆𑀯𑁂 𑀅𑀦𑁆𑀢𑀸. 𑀅𑀭𑀺𑀬𑀫𑀕𑁆𑀕𑁄 𑀫𑀚𑁆𑀛𑀺𑀫𑀸 𑀧𑀝𑀺𑀧𑀤𑀸. 𑀢𑀲𑁆𑀲𑀸𑀬𑁂𑀯 𑀧𑀝𑀺𑀧𑀤𑀸𑀬𑀸𑀢𑀺 𑀫𑀺𑀘𑁆𑀙𑀸𑀧𑀝𑀺𑀧𑀤𑀸𑀬 𑀏𑀯.

𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀲𑁆𑀲𑀸𑀢𑀺 𑀲𑀤𑁆𑀥𑀸𑀬 𑀧𑀩𑁆𑀩𑀚𑀺𑀢𑀲𑁆𑀲 ‘‘𑀏𑀯𑀫𑀳𑀁 𑀇𑀢𑁄 𑀯𑀝𑁆𑀝𑀤𑀼𑀓𑁆𑀔𑀢𑁄 𑀦𑀺𑀲𑁆𑀲𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀩𑁆𑀩𑀚𑁆𑀚𑀫𑀼𑀧𑀕𑀢𑀲𑁆𑀲, 𑀢𑀤𑀦𑀼𑀭𑀽𑀧𑀜𑁆𑀘 𑀲𑀻𑀮𑀁 𑀧𑀽𑀭𑁂𑀢𑁆𑀯𑀸 𑀧𑀞𑀫𑀚𑁆𑀛𑀸𑀦𑁂𑀦 𑀲𑀫𑀸𑀳𑀺𑀢𑀘𑀺𑀢𑁆𑀢𑀲𑁆𑀲. 𑀏𑀢𑀦𑁆𑀢𑀺 𑀓𑀺𑀮𑁂𑀲𑀯𑀝𑁆𑀝𑀧𑀭𑀺𑀯𑀼𑀤𑁆𑀥𑀺𑀤𑀻𑀧𑀦𑀁 ‘‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’’𑀦𑁆𑀢𑀺𑀆𑀤𑀺𑀓𑀁 𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑀦𑀺𑀲𑁆𑀲𑀺𑀢𑀯𑀘𑀦𑀁. 𑀦𑀺𑀩𑁆𑀩𑀺𑀘𑀺𑀓𑀺𑀘𑁆𑀙𑁄 𑀦 𑀳𑁄𑀢𑀻𑀢𑀺 𑀥𑀫𑁆𑀫𑁂𑀲𑀼 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄 𑀦 𑀳𑁄𑀢𑀺, 𑀢𑀢𑁆𑀣 𑀢𑀢𑁆𑀣 𑀆𑀲𑀧𑁆𑀧𑀦𑀧𑀭𑀺𑀲𑀧𑁆𑀧𑀦𑀯𑀲𑁂𑀦 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄.

𑀏𑀢𑀫𑁂𑀯𑀁 𑀚𑀸𑀦𑀸𑀫𑀻𑀢𑀺 𑀬𑁂𑀦 𑀲𑁄 𑀪𑀺𑀓𑁆𑀔𑀼 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀏𑀢𑀁 𑀲𑀲𑀫𑁆𑀧𑀬𑀼𑀢𑁆𑀢𑀁 𑀥𑀫𑁆𑀫𑀁 ‘‘𑀫𑀳𑀕𑁆𑀕𑀢𑀘𑀺𑀢𑁆𑀢’’𑀦𑁆𑀢𑀺 𑀏𑀯𑀁 𑀚𑀸𑀦𑀸𑀫𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀫𑀳𑀕𑁆𑀕𑀢𑀘𑀺𑀢𑁆𑀢𑀫𑁂𑀢𑀦𑁆𑀢𑀺 𑀲𑀜𑁆𑀜𑀁 𑀞𑀧𑁂𑀲𑀺’’𑀦𑁆𑀢𑀺. 𑀦𑁄 𑀘 𑀏𑀯𑀁 𑀯𑀤𑀸𑀫𑀻𑀢𑀺 𑀬𑀣𑀸 𑀤𑀺𑀝𑁆𑀞𑀺𑀕𑀢𑀺𑀓𑀸 𑀢𑀁 𑀥𑀫𑁆𑀫𑀚𑀸𑀢𑀁 𑀲𑀦𑀺𑀲𑁆𑀲𑀬𑀁 𑀅𑀪𑁂𑀤𑀢𑁄 𑀕𑀡𑁆𑀳𑀦𑁆𑀢𑀸 ‘‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’’𑀦𑁆𑀢𑀺, 𑀢𑀤𑀼𑀪𑀬𑀁 𑀯𑀸 𑀪𑁂𑀤𑀢𑁄 𑀕𑀡𑁆𑀳𑀦𑁆𑀢𑀸 ‘‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜 𑀲𑀭𑀻𑀭’’𑀦𑁆𑀢𑀺 𑀅𑀢𑁆𑀢𑀦𑁄 𑀫𑀺𑀘𑁆𑀙𑀸𑀕𑀸𑀳𑀁 𑀧𑀯𑁂𑀤𑁂𑀦𑁆𑀢𑀺, 𑀏𑀯𑀫𑀳𑀁 𑀦 𑀯𑀤𑀸𑀫𑀺 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀲𑀼𑀧𑀭𑀺𑀜𑁆𑀜𑀸𑀢𑀢𑁆𑀢𑀸. 𑀢𑁂𑀦𑀸𑀳 ‘‘𑀅𑀣 𑀔𑁄’’𑀢𑀺𑀆𑀤𑀺. 𑀩𑀸𑀳𑀺𑀭𑀓𑀸 𑀬𑁂𑀪𑀼𑀬𑁆𑀬𑁂𑀦 𑀓𑀲𑀺𑀡𑀚𑁆𑀛𑀸𑀦𑀸𑀦𑀺 𑀏𑀯 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀪𑀸𑀯𑁂𑀦𑁆𑀢𑀲𑁆𑀲𑀸’’𑀢𑀺. 𑀬𑀲𑁆𑀫𑀸 𑀪𑀸𑀯𑀦𑀸𑀦𑀼𑀪𑀸𑀯𑁂𑀦 𑀛𑀸𑀦𑀸𑀥𑀺𑀕𑀫𑁄, 𑀪𑀸𑀯𑀦𑀸 𑀘 𑀧𑀣𑀯𑀻𑀓𑀲𑀺𑀡𑀸𑀤𑀺𑀲𑀜𑁆𑀚𑀸𑀦𑀦𑀫𑀼𑀔𑁂𑀦 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀲𑀜𑁆𑀜𑀸𑀲𑀻𑀲𑁂𑀦 𑀦𑀺𑀤𑁆𑀤𑀺𑀲𑀻𑀬𑀢𑀺, 𑀢𑀲𑁆𑀫𑀸 ‘‘𑀲𑀜𑁆𑀜𑀸𑀩𑀮𑁂𑀦 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀆𑀳. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀣𑀯𑀻𑀓𑀲𑀺𑀡𑀫𑁂𑀓𑁄 𑀲𑀜𑁆𑀚𑀸𑀦𑀸𑀢𑀻’’𑀢𑀺𑀆𑀤𑀺. 𑀬𑀲𑁆𑀫𑀸 𑀧𑀦 𑀪𑀕𑀯𑀢𑀸 𑀢𑀢𑁆𑀣 𑀢𑀢𑁆𑀣 𑀯𑀸𑀭𑁂 ‘‘𑀅𑀣 𑀘 𑀧𑀦𑀸𑀳𑀁 𑀦 𑀯𑀤𑀸𑀫𑀻’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀪𑀕𑀯𑀢𑁄 𑀯𑀘𑀦𑀫𑀼𑀧𑀤𑁂𑀲𑀁 𑀓𑀢𑁆𑀯𑀸 𑀦 𑀯𑀢𑁆𑀢𑀩𑁆𑀩𑀁 𑀓𑀺𑀭𑁂𑀢𑀁 𑀓𑁂𑀯𑀮𑀺𑀦𑀸 𑀉𑀢𑁆𑀢𑀫𑀧𑀼𑀭𑀺𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀦 𑀓𑀮𑁆𑀮𑀁 𑀢𑀲𑁆𑀲𑁂𑀢’’𑀦𑁆𑀢𑀺 𑀆𑀳𑀁𑀲𑀼, 𑀦 𑀲𑀬𑀁 𑀧𑀝𑀺𑀪𑀸𑀦𑁂𑀦𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀫𑀜𑁆𑀜𑀫𑀸𑀦𑀸 𑀯𑀤𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀲𑁂𑀲𑀁 𑀅𑀦𑀦𑁆𑀢𑀭𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑀢𑁆𑀢𑀸, 𑀧𑀸𑀓𑀝𑀢𑁆𑀢𑀸 𑀘 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀇𑀢𑀺 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬 𑀧𑀭𑀫𑀲𑀼𑀔𑀼𑀫𑀕𑀫𑁆𑀪𑀻𑀭𑀤𑀼𑀭𑀦𑀼𑀩𑁄𑀥𑀢𑁆𑀣𑀧𑀭𑀺𑀤𑀻𑀧𑀦𑀸𑀬 𑀲𑀼𑀯𑀺𑀫𑀮𑀯𑀺𑀧𑀼𑀮𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀚𑀦𑀦𑀸𑀬 𑀲𑀸𑀥𑀼𑀯𑀺𑀮𑀸𑀲𑀺𑀦𑀺𑀬𑀸 𑀦𑀸𑀫 𑀮𑀻𑀦𑀢𑁆𑀣𑀧𑀓𑀸𑀲𑀦𑀺𑀬𑀸 𑀚𑀸𑀮𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑀓𑀸𑀲𑀦𑀸.

𑀚𑀸𑀮𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.