𑁬. 𑀫𑀳𑀸𑀮𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑀩𑁆𑀭𑀸𑀳𑁆𑀫𑀡𑀤𑀽𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑁩𑁫𑁯. 𑀏𑀯𑀁 𑀓𑀽𑀝𑀤𑀦𑁆𑀢𑀲𑀼𑀢𑁆𑀢𑀁 𑀲𑀁𑀯𑀡𑁆𑀡𑁂𑀢𑁆𑀯𑀸 𑀇𑀤𑀸𑀦𑀺 𑀫𑀳𑀸𑀮𑀺𑀲𑀼𑀢𑁆𑀢𑀁 𑀲𑀁𑀯𑀡𑁆𑀡𑁂𑀦𑁆𑀢𑁄 𑀬𑀣𑀸𑀦𑀼𑀧𑀼𑀩𑁆𑀩𑀁 𑀲𑀁𑀯𑀡𑁆𑀡𑀦𑁄𑀓𑀸𑀲𑀲𑁆𑀲 𑀧𑀢𑁆𑀢𑀪𑀸𑀯𑀁 𑀯𑀺𑀪𑀸𑀯𑁂𑀢𑀼𑀁, 𑀓𑀽𑀝𑀤𑀦𑁆𑀢𑀲𑀼𑀢𑁆𑀢𑀲𑁆𑀲𑀸𑀦𑀦𑁆𑀢𑀭𑀁 𑀲𑀗𑁆𑀕𑀻𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀫𑀳𑀸𑀮𑀺𑀲𑀼𑀢𑁆𑀢𑀪𑀸𑀯𑀁 𑀯𑀸 𑀧𑀓𑀸𑀲𑁂𑀢𑀼𑀁 ‘‘𑀏𑀯𑀁 𑀫𑁂 𑀲𑀼𑀢𑀁…𑀧𑁂… 𑀯𑁂𑀲𑀸𑀮𑀺𑀬𑀦𑁆𑀢𑀺 𑀫𑀳𑀸𑀮𑀺𑀲𑀼𑀢𑁆𑀢’’𑀦𑁆𑀢𑀺 𑀆𑀳. 𑀧𑀼𑀦𑀧𑁆𑀧𑀼𑀦𑀁 𑀯𑀺𑀲𑀸𑀮𑀪𑀸𑀯𑀽𑀧𑀕𑀫𑀦𑀢𑁄𑀢𑀺 𑀏𑀢𑁆𑀣𑀸𑀬𑀁 𑀲𑀗𑁆𑀔𑁂𑀧𑁄 𑁋 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀓𑀺𑀭 𑀅𑀕𑁆𑀕𑀫𑀳𑁂𑀲𑀺𑀬𑀸 𑀫𑀁𑀲𑀧𑁂𑀲𑀺𑀕𑀩𑁆𑀪𑁂𑀦 𑀤𑁆𑀯𑁂 𑀤𑀸𑀭𑀓𑀸 𑀦𑀺𑀩𑁆𑀩𑀢𑁆𑀢𑀸 𑀥𑀻𑀢𑀸 𑀘 𑀧𑀼𑀢𑁆𑀢𑁄 𑀘, 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑀁 𑀯𑀺𑀯𑀸𑀳𑁂𑀦 𑀲𑁄𑀴𑀲𑀓𑁆𑀔𑀢𑁆𑀢𑀼𑀁 𑀧𑀼𑀢𑁆𑀢𑀥𑀻𑀢𑀼𑀯𑀲𑁂𑀦 𑀤𑁆𑀯𑁂 𑀤𑁆𑀯𑁂 𑀤𑀸𑀭𑀓𑀸 𑀯𑀺𑀚𑀸𑀢𑀸. 𑀢𑀢𑁄 𑀢𑁂𑀲𑀁 𑀤𑀸𑀭𑀓𑀸𑀦𑀁 𑀬𑀣𑀸𑀓𑁆𑀓𑀫𑀁 𑀯𑀟𑁆𑀠𑁂𑀦𑁆𑀢𑀸𑀦𑀁 𑀧𑀘𑁆𑀘𑁂𑀓𑀁 𑀲𑀧𑀭𑀺𑀯𑀸𑀭𑀸𑀦𑀁 𑀆𑀭𑀸𑀫𑀼𑀬𑁆𑀬𑀸𑀦𑀦𑀺𑀯𑀸𑀲𑀝𑁆𑀞𑀸𑀦𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺𑀁 𑀕𑀳𑁂𑀢𑀼𑀁 𑀅𑀧𑁆𑀧𑀳𑁄𑀦𑀓𑀢𑀸𑀬 𑀦𑀕𑀭𑀁 𑀢𑀺𑀓𑁆𑀔𑀢𑁆𑀢𑀼𑀁 𑀕𑀸𑀯𑀼𑀢𑀦𑁆𑀢𑀭𑁂𑀦 𑀕𑀸𑀯𑀼𑀢𑀦𑁆𑀢𑀭𑁂𑀦 𑀧𑀭𑀺𑀓𑁆𑀔𑀺𑀧𑀺𑀁𑀲𑀼, 𑀏𑀯𑀁 𑀢𑀲𑁆𑀲 𑀧𑀼𑀦𑀧𑁆𑀧𑀼𑀦𑀁 𑀢𑀺𑀧𑀸𑀓𑀸𑀭𑀧𑀭𑀺𑀓𑁆𑀔𑁂𑀧𑁂𑀦 𑀯𑀺𑀲𑀸𑀮𑀪𑀸𑀯𑀫𑀼𑀧𑀕𑀢𑀢𑁆𑀢𑀸 ‘‘𑀯𑁂𑀲𑀸𑀮𑀻’’𑀢𑁆𑀯𑁂𑀯 𑀦𑀸𑀫𑀁 𑀚𑀸𑀢𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀼𑀦𑀧𑁆𑀧𑀼𑀦𑀁 𑀯𑀺𑀲𑀸𑀮𑀪𑀸𑀯𑀽𑀧𑀕𑀫𑀦𑀢𑁄 𑀯𑁂𑀲𑀸𑀮𑀻𑀢𑀺 𑀮𑀤𑁆𑀥𑀦𑀸𑀫𑀓𑁂 𑀦𑀕𑀭𑁂’’𑀢𑀺. 𑀯𑀺𑀢𑁆𑀣𑀸𑀭𑀓𑀣𑀸 𑀘𑁂𑀢𑁆𑀣 𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸𑀬, (𑀫. 𑀦𑀺. 𑀅𑀝𑁆𑀞. 𑁧.𑁧𑁪𑁬) 𑀭𑀢𑀦𑀲𑀼𑀢𑁆𑀢𑀯𑀡𑁆𑀡𑀦𑀸𑀬 (𑀔𑀼. 𑀧𑀸. 𑀅𑀝𑁆𑀞. 𑀯𑁂𑀲𑀸𑀮𑀺𑀯𑀢𑁆𑀣𑀼; 𑀲𑀼. 𑀦𑀺. 𑀅𑀝𑁆𑀞. 𑁧.𑀭𑀢𑀦𑀲𑀼𑀢𑁆𑀢𑀯𑀡𑁆𑀡𑀦𑀸) 𑀘 𑀕𑀳𑁂𑀢𑀩𑁆𑀩𑀸. 𑀩𑀳𑀺𑀦𑀕𑀭𑁂𑀢𑀺 𑀦𑀕𑀭𑀢𑁄 𑀩𑀳𑀺, 𑀦 𑀅𑀫𑁆𑀩𑀧𑀸𑀮𑀺𑀯𑀦𑀁 𑀯𑀺𑀬 𑀅𑀦𑁆𑀢𑁄𑀦𑀕𑀭𑀲𑁆𑀫𑀺𑀁. 𑀲𑀬𑀁𑀚𑀸𑀢𑀦𑁆𑀢𑀺 𑀲𑀬𑀫𑁂𑀯 𑀚𑀸𑀢𑀁 𑀅𑀭𑁄𑀧𑀺𑀫𑀁. 𑀫𑀳𑀦𑁆𑀢𑀪𑀸𑀯𑁂𑀦𑀸𑀢𑀺 𑀭𑀼𑀓𑁆𑀔𑀕𑀘𑁆𑀙𑀸𑀦𑀁, 𑀞𑀺𑀢𑁄𑀓𑀸𑀲𑀲𑁆𑀲 𑀘 𑀫𑀳𑀦𑁆𑀢𑀪𑀸𑀯𑁂𑀦. 𑀢𑁂𑀦𑁂𑀯𑀸𑀳 ‘‘𑀳𑀺𑀫𑀯𑀦𑁆𑀢𑁂𑀦 𑀲𑀤𑁆𑀥𑀺𑀁 𑀏𑀓𑀸𑀩𑀤𑁆𑀥𑀁 𑀳𑀼𑀢𑁆𑀯𑀸’’𑀢𑀺. 𑀬𑀁 𑀧𑀦 𑀯𑁂𑀦𑀬𑀺𑀓𑀸𑀦𑀁 𑀫𑀢𑁂𑀦 𑀯𑀺𑀦𑀬𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁 𑁋

‘‘𑀢𑀢𑁆𑀣 𑀫𑀳𑀸𑀯𑀦𑀁 𑀦𑀸𑀫 𑀲𑀬𑀁𑀚𑀸𑀢𑀁 𑀅𑀭𑁄𑀧𑀺𑀫𑀁 𑀲𑀧𑀭𑀺𑀘𑁆𑀙𑁂𑀤𑀁 𑀫𑀳𑀦𑁆𑀢𑀁 𑀯𑀦𑀁. 𑀓𑀧𑀺𑀮𑀯𑀢𑁆𑀣𑀼𑀲𑀸𑀫𑀦𑁆𑀢𑀸 𑀧𑀦 𑀫𑀳𑀸𑀯𑀦𑀁 𑀳𑀺𑀫𑀯𑀦𑁆𑀢𑁂𑀦 𑀲𑀳 𑀏𑀓𑀸𑀩𑀤𑁆𑀥𑀁 𑀅𑀧𑀭𑀺𑀘𑁆𑀙𑁂𑀤𑀁 𑀳𑀼𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑀁 𑀆𑀳𑀘𑁆𑀘 𑀞𑀺𑀢𑀁, 𑀇𑀤𑀁 𑀢𑀸𑀤𑀺𑀲𑀁 𑀦 𑀳𑁄𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁧𑁬𑁨).

𑀢𑀁 𑀫𑀚𑁆𑀛𑀺𑀫𑀪𑀸𑀡𑀓𑀲𑀁𑀬𑀼𑀢𑁆𑀢𑀪𑀸𑀡𑀓𑀸𑀦𑀫𑁆𑀧𑀺 𑀲𑀫𑀸𑀦𑀓𑀣𑀸. 𑀫𑀚𑁆𑀛𑀺𑀫𑀝𑁆𑀞𑀓𑀣𑀸𑀬𑀜𑁆𑀳𑀺 (𑀫. 𑀦𑀺. 𑀅𑀝𑁆𑀞. 𑁨.𑁩𑁫𑁨) 𑀲𑀁𑀬𑀼𑀢𑁆𑀢𑀝𑁆𑀞𑀓𑀣𑀸𑀬𑀜𑁆𑀘 (𑀲𑀁. 𑀦𑀺. 𑀅𑀝𑁆𑀞. 𑁧.𑁩𑁭) 𑀢𑀣𑁂𑀯 𑀯𑀼𑀢𑁆𑀢𑀁. 𑀇𑀥 𑀧𑀦 𑀤𑀻𑀖𑀪𑀸𑀡𑀓𑀸𑀦𑀁 𑀫𑀢𑁂𑀦 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀤𑀺 𑀘 ‘‘𑀅𑀳𑀼𑀢𑁆𑀯𑀸’’𑀢𑀺 𑀓𑀢𑁆𑀣𑀘𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀏𑀯𑀁 𑀲𑀢𑀺 𑀲𑀩𑁆𑀩𑁂𑀲𑀫𑁆𑀧𑀺 𑀲𑀫𑀸𑀦𑀯𑀸𑀤𑁄 𑀲𑀺𑀬𑀸𑀢𑀺. 𑀓𑀽𑀝𑀸𑀕𑀸𑀭𑀲𑀸𑀮𑀸𑀲𑀗𑁆𑀔𑁂𑀧𑁂𑀦𑀸𑀢𑀺 𑀳𑀁𑀲𑀫𑀡𑁆𑀟𑀮𑀸𑀓𑀸𑀭𑀲𑀗𑁆𑀔𑀸𑀢𑀳𑀁𑀲𑀯𑀝𑁆𑀝𑀓𑀘𑁆𑀙𑀦𑁆𑀦𑁂𑀦 𑀓𑀽𑀝𑀸𑀕𑀸𑀭𑀲𑀸𑀮𑀸𑀦𑀺𑀬𑀸𑀫𑁂𑀦, 𑀢𑀣𑀸 𑀓𑀢𑀢𑁆𑀢𑀸 𑀧𑀸𑀲𑀸𑀤𑁄𑀬𑁂𑀯 ‘‘𑀓𑀽𑀝𑀸𑀕𑀸𑀭𑀲𑀸𑀮𑀸’’𑀢𑀺 𑀯𑀼𑀢𑁆𑀢𑁄, 𑀢𑀩𑁆𑀩𑁄𑀳𑀸𑀭𑁂𑀦 𑀧𑀦 𑀲𑀓𑀮𑁄𑀧𑀺 𑀲𑀗𑁆𑀖𑀸𑀭𑀸𑀫𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀦𑀬𑀝𑁆𑀞𑀓𑀣𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁧𑁬𑁨) 𑀢𑀼 𑀏𑀯𑀁 𑀯𑀼𑀢𑁆𑀢𑀁 𑁋

‘‘𑀓𑀽𑀝𑀸𑀕𑀸𑀭𑀲𑀸𑀮𑀸 𑀧𑀦 𑀫𑀳𑀸𑀯𑀦𑀁 𑀦𑀺𑀲𑁆𑀲𑀸𑀬 𑀓𑀢𑁂 𑀆𑀭𑀸𑀫𑁂 𑀓𑀽𑀝𑀸𑀕𑀸𑀭𑀁 𑀅𑀦𑁆𑀢𑁄𑀓𑀢𑁆𑀯𑀸 𑀳𑀁𑀲𑀯𑀝𑁆𑀝𑀓𑀘𑁆𑀙𑀤𑀦𑁂𑀦 𑀓𑀢𑀸 𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀦𑁆𑀦𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀕𑀦𑁆𑀥𑀓𑀼𑀝𑀺 𑀯𑁂𑀤𑀺𑀢𑀩𑁆𑀩𑀸’’𑀢𑀺.

𑀓𑁄𑀲𑀮𑁂𑀲𑀼 𑀚𑀸𑀢𑀸, 𑀪𑀯𑀸, 𑀢𑁂 𑀯𑀸 𑀦𑀺𑀯𑀸𑀲𑁄 𑀏𑀢𑁂𑀲𑀦𑁆𑀢𑀺 𑀓𑁄𑀲𑀮𑀓𑀸. 𑀏𑀯𑀁 𑀫𑀸𑀕𑀥𑀓𑀸. 𑀚𑀦𑀧𑀤𑀯𑀸𑀘𑀺𑀦𑁄 𑀳𑀺 𑀧𑀸𑀬𑀢𑁄 𑀧𑀼𑀮𑁆𑀮𑀺𑀗𑁆𑀕𑀧𑀼𑀣𑀼𑀯𑀘𑀦𑀸. 𑀬𑀲𑁆𑀲 𑀅𑀓𑀭𑀡𑁂 𑀧𑀼𑀕𑁆𑀕𑀮𑁄 𑀫𑀳𑀸𑀚𑀸𑀦𑀺𑀬𑁄 𑀳𑁄𑀢𑀺, 𑀢𑀁 𑀓𑀭𑀡𑀁 𑀅𑀭𑀳𑀢𑀻𑀢𑀺 𑀓𑀭𑀡𑀻𑀬𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳 ‘‘𑀅𑀯𑀲𑁆𑀲𑀁 𑀓𑀢𑁆𑀢𑀩𑁆𑀩𑀓𑀫𑁆𑀫𑁂𑀦𑀸’’𑀢𑀺. 𑀅𑀓𑀸𑀢𑀼𑀫𑁆𑀧𑀺 𑀯𑀝𑁆𑀝𑀢𑀺 𑀅𑀲𑀢𑀺 𑀲𑀫𑀯𑀸𑀬𑁂, 𑀢𑀲𑁆𑀫𑀸 𑀲𑀫𑀯𑀸𑀬𑁂 𑀲𑀢𑀺 𑀓𑀢𑁆𑀢𑀩𑁆𑀩𑀢𑁄 𑀢𑀁 𑀓𑀺𑀘𑁆𑀘𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁩𑁬𑁦. 𑀬𑀸 𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀚𑁆𑀚𑀦𑀸𑀭𑀳𑀸 𑀦𑀸𑀦𑀢𑁆𑀢𑀲𑀜𑁆𑀜𑀸, 𑀢𑀸𑀲𑀁 𑀯𑀲𑁂𑀦 ‘‘𑀦𑀸𑀦𑀸𑀭𑀫𑁆𑀫𑀡𑀘𑀸𑀭𑀢𑁄’’𑀢𑀺 𑀯𑀼𑀢𑁆𑀢𑀁, 𑀦𑀸𑀦𑀸𑀭𑀫𑁆𑀫𑀡𑀧𑁆𑀧𑀯𑀢𑁆𑀢𑀺𑀢𑁄𑀢𑀺 𑀅𑀢𑁆𑀣𑁄. 𑀲𑀫𑁆𑀪𑀯𑀦𑁆𑀢𑀲𑁆𑀲𑁂𑀯 𑀳𑀺 𑀧𑀝𑀺𑀲𑁂𑀥𑁄, 𑀦 𑀅𑀲𑀫𑁆𑀪𑀯𑀦𑁆𑀢𑀲𑁆𑀲. 𑀧𑀝𑀺𑀓𑁆𑀓𑀫𑁆𑀫𑀸𑀢𑀺 𑀦𑀺𑀯𑀢𑁆𑀢𑁂𑀢𑁆𑀯𑀸 𑀢𑀣𑀸 𑀘𑀺𑀢𑁆𑀢𑀁 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸. 𑀲𑀮𑁆𑀮𑀻𑀦𑁄𑀢𑀺 𑀛𑀸𑀦𑀲𑀫𑀸𑀧𑀢𑁆𑀢𑀺𑀬𑀸 𑀏𑀓𑀢𑁆𑀢𑀸𑀭𑀫𑁆𑀫𑀡𑀁 𑀅𑀮𑁆𑀮𑀻𑀦𑁄. 𑀦𑀺𑀮𑀻𑀦𑁄𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀏𑀓𑀻𑀪𑀸𑀯’’𑀦𑁆𑀢𑀺𑀆𑀤𑀺. 𑀲𑀧𑀭𑀺𑀯𑀸𑀭𑀢𑁆𑀢𑀸 𑀅𑀦𑁂𑀓𑁄𑀧𑀺 𑀢𑀤𑀸 𑀏𑀓𑁄 𑀯𑀺𑀬 𑀪𑀯𑀢𑀻𑀢𑀺 𑀏𑀓𑀻𑀪𑀸𑀯𑁄, 𑀢𑀁 𑀏𑀓𑀻𑀪𑀸𑀯𑀁. 𑀬𑁂𑀦𑀸𑀬𑀲𑁆𑀫𑀸 𑀦𑀸𑀕𑀺𑀢𑁄, 𑀢𑀁 𑀲𑀦𑁆𑀥𑀸𑀬 ‘‘𑀢𑀲𑁆𑀫𑀸 𑀞𑀸𑀦𑀸’’𑀢𑀺 𑀯𑀼𑀢𑁆𑀢𑀁.

𑀑𑀝𑁆𑀞𑀤𑁆𑀥𑀮𑀺𑀘𑁆𑀙𑀯𑀺𑀯𑀢𑁆𑀣𑀼𑀯𑀡𑁆𑀡𑀦𑀸

𑁩𑁬𑁧. 𑀅𑀤𑁆𑀥𑁄𑀝𑁆𑀞𑀢𑀸𑀬𑀸𑀢𑀺 𑀉𑀧𑀟𑁆𑀠𑁄𑀝𑁆𑀞𑀢𑀸𑀬. 𑀢𑀲𑁆𑀲 𑀓𑀺𑀭 𑀉𑀢𑁆𑀢𑀭𑁄𑀝𑁆𑀞𑀲𑁆𑀲 𑀅𑀧𑁆𑀧𑀓𑀢𑀸𑀬 𑀢𑀺𑀭𑀺𑀬𑀁 𑀨𑀸𑀮𑁂𑀢𑁆𑀯𑀸 𑀅𑀤𑁆𑀥𑀫𑀧𑀦𑀻𑀢𑀁 𑀯𑀺𑀬 𑀔𑀸𑀬𑀢𑀺 𑀘𑀢𑁆𑀢𑀸𑀭𑁄 𑀤𑀦𑁆𑀢𑁂, 𑀤𑁆𑀯𑁂 𑀘 𑀤𑀸𑀞𑀸 𑀦 𑀙𑀸𑀤𑁂𑀢𑀺, 𑀢𑁂𑀦 𑀦𑀁 ‘‘𑀑𑀝𑁆𑀞𑀤𑁆𑀥𑁄’’𑀢𑀺 𑀯𑁄𑀳𑀭𑀢𑀺. 𑀓𑁂𑀘𑀺 𑀧𑀦 ‘‘𑀅𑀥𑁄-𑀲𑀤𑁆𑀤𑁂𑀦 𑀧𑀸𑀞𑀁 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀳𑁂𑀝𑁆𑀞𑀸 𑀑𑀝𑁆𑀞𑀲𑁆𑀲 𑀑𑀮𑀫𑁆𑀩𑀓𑀢𑀸𑀬 ‘‘𑀑𑀝𑁆𑀞𑀸𑀥𑁄’’𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺, 𑀢𑀤𑀬𑀼𑀢𑁆𑀢𑀫𑁂𑀯 𑀢𑀣𑀸 𑀧𑀸𑀞𑀲𑁆𑀲 𑀅𑀤𑀺𑀲𑁆𑀲𑀦𑀢𑁄, 𑀆𑀘𑀭𑀺𑀬𑁂𑀦 (𑀤𑀻. 𑀦𑀺. 𑀝𑀻. 𑁧.𑁩𑁬𑁧) 𑀘 𑀅𑀯𑀡𑁆𑀡𑀺𑀢𑀢𑁆𑀢𑀸. 𑀅𑀬𑀁 𑀓𑀺𑀭 𑀉𑀧𑁄𑀲𑀣𑀺𑀓𑁄 𑀤𑀸𑀬𑀓𑁄 𑀤𑀸𑀦𑀧𑀢𑀺 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀩𑀼𑀤𑁆𑀥𑀫𑀸𑀫𑀓𑁄 𑀥𑀫𑁆𑀫𑀲𑀗𑁆𑀖𑀫𑀸𑀫𑀓𑁄. 𑀢𑁂𑀦𑀸𑀳 ‘‘𑀧𑀼𑀭𑁂𑀪𑀢𑁆𑀢’’𑀦𑁆𑀢𑀺𑀆𑀤𑀺. 𑀔𑀦𑁆𑀥𑀓𑁂, (𑀫𑀳𑀸𑀯. 𑁨𑁮𑁯) 𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑀲𑀼𑀢𑁆𑀢𑁂 (𑀤𑀻. 𑀦𑀺. 𑁨.𑁧𑁬𑁧) 𑀘 𑀆𑀕𑀢𑀦𑀬𑁂𑀦 ‘‘𑀦𑀻𑀮𑀧𑀻𑀢𑀸𑀤𑀺…𑀧𑁂… 𑀢𑀸𑀯𑀢𑀺𑀁𑀲𑀧𑀭𑀺𑀲𑀲𑀧𑁆𑀧𑀝𑀺𑀪𑀸𑀕𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀅𑀬𑀁 𑀧𑀦 𑀯𑁂𑀲𑀸𑀮𑀻 𑀪𑀕𑀯𑀢𑁄 𑀓𑀸𑀮𑁂 𑀇𑀤𑁆𑀥𑀸 𑀘𑁂𑀯 𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀸 𑀘 𑀅𑀳𑁄𑀲𑀺. 𑀢𑀢𑁆𑀣 𑀳𑀺 𑀭𑀸𑀚𑀽𑀦𑀫𑁂𑀯 𑀲𑀢𑁆𑀢 𑀲𑀳𑀲𑁆𑀲𑀸𑀦𑀺, 𑀲𑀢𑁆𑀢 𑀲𑀢𑀸𑀦𑀺, 𑀲𑀢𑁆𑀢 𑀘 𑀭𑀸𑀚𑀸𑀦𑁄 𑀅𑀳𑁂𑀲𑀼𑀁, 𑀢𑀣𑀸 𑀬𑀼𑀯𑀭𑀸𑀚𑀲𑁂𑀦𑀸𑀧𑀢𑀺𑀪𑀡𑁆𑀟𑀸𑀕𑀸𑀭𑀺𑀓𑀧𑀪𑀼𑀢𑀻𑀦𑀫𑁆𑀧𑀺, 𑀧𑀸𑀲𑀸𑀤𑀓𑀽𑀝𑀸𑀕𑀸𑀭𑀆𑀭𑀸𑀫𑀧𑁄𑀓𑁆𑀔𑀭𑀡𑀺𑀆𑀤𑀬𑁄𑀧𑀺 𑀢𑀧𑁆𑀧𑀭𑀺𑀫𑀸𑀡𑀸𑀬𑁂𑀯, 𑀩𑀳𑀼𑀚𑀦𑀸, 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑀸, 𑀲𑀼𑀪𑀺𑀓𑁆𑀔𑀸 𑀘. 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑀳𑀢𑀺𑀬𑀸 𑀮𑀺𑀘𑁆𑀙𑀯𑀺𑀧𑀭𑀺𑀲𑀸𑀬𑀸’’𑀢𑀺. 𑀢𑀲𑁆𑀲 𑀧𑀦 𑀓𑀼𑀮𑀲𑁆𑀲 𑀆𑀤𑀺𑀪𑀽𑀢𑀸𑀦𑀁 𑀬𑀣𑀸𑀯𑀼𑀢𑁆𑀢𑀸𑀦𑀁 𑀫𑀁𑀲𑀧𑁂𑀲𑀺𑀬𑀸 𑀦𑀺𑀩𑁆𑀩𑀢𑁆𑀢𑀤𑀸𑀭𑀓𑀸𑀦𑀁 𑀢𑀸𑀧𑀲𑁂𑀦 𑀧𑀸𑀬𑀺𑀢𑀁 𑀬𑀁 𑀔𑀻𑀭𑀁 𑀉𑀤𑀭𑀁 𑀧𑀯𑀺𑀲𑀢𑀺, 𑀲𑀩𑁆𑀩𑀁 𑀢𑀁 𑀫𑀡𑀺𑀪𑀸𑀚𑀦𑀕𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺, 𑀘𑀭𑀺𑀫𑀓𑀪𑀯𑁂 𑀩𑁄𑀥𑀺𑀲𑀢𑁆𑀢𑁂 𑀓𑀼𑀘𑁆𑀙𑀺𑀕𑀢𑁂 𑀩𑁄𑀥𑀺𑀲𑀢𑁆𑀢𑀫𑀸𑀢𑀼 𑀯𑀺𑀬 𑀉𑀤𑀭𑀘𑁆𑀙𑀯𑀺𑀬𑀸 𑀅𑀢𑀺𑀯𑀺𑀧𑁆𑀧𑀲𑀦𑁆𑀦𑀢𑀸𑀬 𑀢𑁂 𑀦𑀺𑀘𑁆𑀙𑀯𑀻 𑀅𑀳𑁂𑀲𑀼𑀁. 𑀅𑀧𑀭𑁂 𑀧𑀦𑀸𑀳𑀼 ‘‘𑀲𑀺𑀩𑁆𑀩𑁂𑀢𑁆𑀯𑀸 𑀞𑀧𑀺𑀢𑀸 𑀯𑀺𑀬 𑀦𑁂𑀲𑀁 𑀅𑀜𑁆𑀜𑀫𑀜𑁆𑀜𑀁 𑀮𑀻𑀦𑀸 𑀙𑀯𑀺 𑀅𑀳𑁄𑀲𑀻’’𑀢𑀺. 𑀏𑀯𑀁 𑀢𑁂 𑀦𑀺𑀘𑁆𑀙𑀯𑀺𑀢𑀸𑀬 𑀯𑀸 𑀮𑀻𑀦𑀘𑁆𑀙𑀯𑀺𑀢𑀸𑀬 𑀯𑀸 𑀮𑀺𑀘𑁆𑀙𑀯𑀻𑀢𑀺 𑀧𑀜𑁆𑀜𑀸𑀬𑀺𑀁𑀲𑀼, 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀘𑁂𑀢𑁆𑀣 𑀧𑀤𑀲𑀺𑀤𑁆𑀥𑀺, 𑀢𑀩𑁆𑀩𑀁𑀲𑁂 𑀉𑀧𑁆𑀧𑀦𑁆𑀦𑀸 𑀲𑀩𑁆𑀩𑁂𑀧𑀺 𑀮𑀺𑀘𑁆𑀙𑀯𑀬𑁄 𑀦𑀸𑀫 𑀚𑀸𑀢𑀸. 𑀢𑁂𑀦𑀸𑀳 ‘‘𑀮𑀺𑀘𑁆𑀙𑀯𑀺𑀧𑀭𑀺𑀲𑀸𑀬𑀸’’𑀢𑀺, 𑀮𑀺𑀘𑁆𑀙𑀯𑀺𑀭𑀸𑀚𑀽𑀦𑀁, 𑀮𑀺𑀘𑁆𑀙𑀯𑀺𑀯𑀁𑀲𑀪𑀽𑀢𑀸𑀬 𑀯𑀸 𑀧𑀭𑀺𑀲𑀸𑀬𑀸𑀢𑀺 𑀅𑀢𑁆𑀣𑁄. 𑀫𑀳𑀦𑁆𑀢𑀁 𑀬𑀲𑀁 𑀮𑀸𑀢𑀺 𑀕𑀡𑁆𑀳𑀸𑀢𑀻𑀢𑀺 𑀫𑀳𑀸𑀮𑀺 𑀬𑀣𑀸 ‘‘𑀪𑀤𑁆𑀤𑀸𑀮𑀻’’𑀢𑀺. 𑀫𑀽𑀮𑀦𑀸𑀫𑀦𑁆𑀢𑀺 𑀫𑀸𑀢𑀸𑀧𑀺𑀢𑀽𑀳𑀺 𑀓𑀢𑀦𑀸𑀫𑀁.

𑁩𑁬𑁨. 𑀲𑀸𑀲𑀦𑁂 𑀬𑀼𑀢𑁆𑀢𑀧𑀬𑀼𑀢𑁆𑀢𑁄𑀢𑀺 𑀪𑀸𑀯𑀦𑀫𑀦𑀼𑀬𑀼𑀢𑁆𑀢𑁄. 𑀲𑀩𑁆𑀩𑀢𑁆𑀣 𑀲𑀻𑀳𑀲𑀫𑀸𑀦𑀯𑀼𑀢𑁆𑀢𑀺𑀦𑁄𑀧𑀺 𑀪𑀕𑀯𑀢𑁄 𑀧𑀭𑀺𑀲𑀸𑀬 𑀫𑀳𑀢𑁆𑀢𑁂 𑀲𑀢𑀺 𑀢𑀤𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀧𑀯𑀢𑁆𑀢𑀺𑀬𑀫𑀸𑀦𑀸𑀬 𑀥𑀫𑁆𑀫𑀤𑁂𑀲𑀦𑀸𑀬 𑀯𑀺𑀲𑁂𑀲𑁄 𑀳𑁄𑀢𑀻𑀢𑀺 𑀆𑀳 ‘‘𑀫𑀳𑀦𑁆𑀢𑁂𑀦 𑀉𑀲𑁆𑀲𑀸𑀳𑁂𑀦 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀢𑀻’’𑀢𑀺.

‘‘𑀯𑀺𑀲𑁆𑀲𑀸𑀲𑀺𑀓𑁄’’𑀢𑀺 𑀯𑀢𑁆𑀯𑀸 𑀢𑀫𑀲𑁆𑀲 𑀯𑀺𑀲𑁆𑀲𑀸𑀲𑀺𑀓𑀪𑀸𑀯𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀅𑀬𑀜𑁆𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀣𑀽𑀮𑀲𑀭𑀻𑀭𑁄𑀢𑀺 𑀯𑀞𑀭𑀲𑀭𑀻𑀭𑁄. 𑀣𑁂𑀭𑀲𑁆𑀲 𑀔𑀻𑀡𑀸𑀲𑀯𑀪𑀸𑀯𑀢𑁄 ‘‘𑀆𑀮𑀲𑀺𑀬𑀪𑀸𑀯𑁄 𑀅𑀧𑁆𑀧𑀳𑀻𑀦𑁄’’𑀢𑀺 𑀦 𑀯𑀢𑁆𑀢𑀩𑁆𑀩𑁄, 𑀯𑀸𑀲𑀦𑀸𑀮𑁂𑀲𑀁 𑀧𑀦 𑀉𑀧𑀸𑀤𑀸𑀬 ‘‘𑀈𑀲𑀓𑀁 𑀅𑀧𑁆𑀧𑀳𑀻𑀦𑁄 𑀯𑀺𑀬 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀦 𑀳𑀺 𑀲𑀸𑀯𑀓𑀸𑀦𑀁 𑀩𑀼𑀤𑁆𑀥𑀸𑀦𑀫𑀺𑀯 𑀲𑀯𑀸𑀲𑀦𑀸 𑀓𑀺𑀮𑁂𑀲𑀸 𑀧𑀳𑀻𑀬𑀦𑁆𑀢𑀺. 𑀬𑀣𑀸𑀯𑀼𑀢𑁆𑀢𑀁 𑀧𑀸𑀲𑀸𑀤𑀫𑁂𑀯 𑀲𑀦𑁆𑀥𑀸𑀬 ‘‘𑀓𑀽𑀝𑀸𑀕𑀸𑀭𑀫𑀳𑀸𑀕𑁂𑀳𑀸’’𑀢𑀺 𑀯𑀼𑀢𑁆𑀢𑀁. 𑀧𑀸𑀘𑀻𑀦𑀫𑀼𑀔𑀸𑀢𑀺 𑀧𑀸𑀘𑀻𑀦𑀧𑀫𑀼𑀔𑀸.

𑁩𑁬𑁩. 𑀯𑀺𑀦𑁂𑀬𑁆𑀬𑀚𑀦𑀸𑀦𑀼𑀧𑀭𑁄𑀥𑁂𑀦 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀧𑀝𑀺𑀳𑀸𑀭𑀺𑀬𑀯𑀺𑀚𑀫𑁆𑀪𑀦𑀁 𑀳𑁄𑀢𑀻𑀢𑀺 𑀆𑀳 ‘‘𑀅𑀣 𑀔𑁄’’𑀢𑀺𑀆𑀤𑀺. 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑀦𑀯𑁂𑀮𑀸𑀬𑀜𑁆𑀳𑀺 𑀙𑀩𑁆𑀩𑀡𑁆𑀡𑀸 𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀆𑀯𑁂𑀴𑀸𑀯𑁂𑀴𑀸 𑀬𑀫𑀮𑀸 𑀬𑀫𑀮𑀸 𑀳𑀼𑀢𑁆𑀯𑀸 𑀲𑀯𑀺𑀲𑁂𑀲𑀁 𑀧𑀪𑀲𑁆𑀲𑀭𑀸 𑀯𑀺𑀦𑀺𑀘𑁆𑀙𑀭𑀺𑀁𑀲𑀼. 𑀢𑀸𑀳𑀺 ‘‘𑀪𑀕𑀯𑀸 𑀦𑀺𑀓𑁆𑀔𑀫𑀢𑀻’’𑀢𑀺 𑀲𑀫𑀸𑀭𑁄𑀘𑀺𑀢𑀫𑀺𑀯 𑀦𑀺𑀓𑁆𑀔𑀫𑀦𑀁 𑀲𑀜𑁆𑀚𑀸𑀦𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀁𑀲𑀽𑀘𑀺𑀢𑀦𑀺𑀓𑁆𑀔𑀫𑀦𑁄’’𑀢𑀺.

𑁩𑁬𑁪. ‘‘𑀅𑀚𑁆𑀚𑀸’’𑀢𑀺 𑀯𑀼𑀢𑁆𑀢𑀤𑀺𑀯𑀲𑀢𑁄 𑀅𑀢𑀻𑀢𑀫𑀦𑀦𑁆𑀢𑀭𑀁 𑀳𑀺𑀬𑁆𑀬𑁄𑀤𑀺𑀯𑀲𑀁 𑀧𑀼𑀭𑀺𑀫𑀁 𑀦𑀸𑀫, 𑀢𑀣𑀸 ‘‘𑀳𑀺𑀬𑁆𑀬𑁄’’𑀢𑀺 𑀯𑀼𑀢𑁆𑀢𑀤𑀺𑀯𑀲𑀢𑁄 𑀧𑀭𑀁 𑀧𑀼𑀭𑀺𑀫𑀢𑀭𑀁 𑀅𑀢𑀺𑀲𑀬𑁂𑀦 𑀧𑀼𑀭𑀺𑀫𑀢𑁆𑀢𑀸. 𑀇𑀢𑀺 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀤𑀺𑀯𑀲𑁂𑀲𑀼 𑀯𑀯𑀢𑁆𑀣𑀺𑀢𑁄 𑀬𑀣𑀸𑀓𑁆𑀓𑀫𑀁 𑀧𑀼𑀭𑀺𑀫𑀧𑀼𑀭𑀺𑀫𑀢𑀭𑀪𑀸𑀯𑁄. 𑀏𑀯𑀁 𑀲𑀦𑁆𑀢𑁂𑀧𑀺 𑀬𑀤𑁂𑀢𑁆𑀣 ‘‘𑀧𑀼𑀭𑀺𑀫𑀢𑀭’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀢𑁄 𑀧𑀪𑀼𑀢𑀺 𑀬𑀁 𑀬𑀁 𑀑𑀭𑀁, 𑀢𑀁 𑀢𑀁 𑀧𑀼𑀭𑀺𑀫𑀁. 𑀬𑀁 𑀬𑀁 𑀧𑀭𑀁, 𑀢𑀁 𑀢𑀁 𑀧𑀼𑀭𑀺𑀫𑀢𑀭𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁄 𑀧𑀝𑁆𑀞𑀸𑀬𑀸’’𑀢𑀺𑀆𑀤𑀺𑀫𑀸𑀳. 𑀑𑀭𑀧𑀸𑀭𑀪𑀸𑀯𑀲𑁆𑀲 𑀯𑀺𑀬, 𑀳𑀺 𑀤𑀺𑀲𑀸𑀯𑀺𑀤𑀺𑀲𑀸𑀪𑀸𑀯𑀲𑁆𑀲 𑀯𑀺𑀬 𑀘 𑀧𑀼𑀭𑀺𑀫𑀧𑀼𑀭𑀺𑀫𑀢𑀭𑀪𑀸𑀯𑀲𑁆𑀲 𑀅𑀧𑁂𑀓𑁆𑀔𑀸𑀲𑀺𑀤𑁆𑀥𑀺. 𑀫𑀽𑀮𑀤𑀺𑀯𑀲𑀢𑁄𑀢𑀺𑀆𑀤𑀺𑀤𑀺𑀯𑀲𑀢𑁄. 𑀅𑀕𑁆𑀕𑁂𑀢𑀺 𑀉𑀧𑀬𑁄𑀕𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀁, 𑀉𑀧𑀬𑁄𑀕𑀯𑀘𑀦𑀲𑁆𑀲 𑀯𑀸 𑀏-𑀓𑀸𑀭𑀸𑀤𑁂𑀲𑁄𑀢𑀺 𑀤𑀲𑁆𑀲𑁂𑀢𑀺 ‘‘𑀅𑀕𑁆𑀕’’𑀦𑁆𑀢𑀺 𑀇𑀫𑀺𑀦𑀸, 𑀧𑀞𑀫𑀦𑁆𑀢𑀺 𑀅𑀢𑁆𑀣𑁄. 𑀢𑀁 𑀧𑀦𑁂𑀢𑁆𑀣 𑀧𑀭𑀸 𑀅𑀢𑀻𑀢𑀸 𑀓𑁄𑀝𑀺𑀬𑁂𑀯𑀸𑀢𑀺 𑀆𑀳 ‘‘𑀧𑀭𑀓𑁄𑀝𑀺𑀁 𑀓𑀢𑁆𑀯𑀸’’𑀢𑀺. 𑀬𑀁-𑀲𑀤𑁆𑀤𑁄 𑀧𑀭𑀺𑀘𑁆𑀙𑁂𑀤𑁂 𑀦𑀺𑀧𑀸𑀢𑁄, 𑀢𑀧𑁆𑀧𑀬𑁄𑀕𑁂𑀦 𑀘𑀸𑀬𑀁 ‘‘𑀯𑀺𑀳𑀭𑀸𑀫𑀻’’𑀢𑀺 𑀯𑀢𑁆𑀢𑀫𑀸𑀦𑀧𑀬𑁄𑀕𑁄, 𑀅𑀢𑁆𑀣𑁄 𑀧𑀦 𑀅𑀢𑀻𑀢𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀸𑀯 𑀯𑀺𑀳𑀸𑀲𑀺’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀸𑀢𑀺 𑀤𑀺𑀯𑀲𑀲𑁆𑀲. 𑀧𑀞𑀫𑀯𑀺𑀓𑀧𑁆𑀧𑁂 ‘‘𑀯𑀺𑀳𑀭𑀸𑀫𑀻’’𑀢𑀺 𑀇𑀫𑀲𑁆𑀲 ‘‘𑀬𑀤𑀕𑁆𑀕𑁂’’𑀢𑀺 𑀇𑀫𑀺𑀦𑀸 𑀉𑀚𑀼𑀓𑀁 𑀢𑀸𑀯 𑀲𑀫𑁆𑀩𑀦𑁆𑀥𑀺𑀢𑁆𑀯𑀸 𑀧𑀘𑁆𑀙𑀸 ‘‘𑀦𑀘𑀺𑀭𑀁 𑀢𑀻𑀡𑀺 𑀯𑀲𑁆𑀲𑀸𑀦𑀻’’𑀢𑀺 𑀧𑀫𑀸𑀡𑀯𑀘𑀦𑀁 𑀬𑁄𑀚𑁂𑀢𑀩𑁆𑀩𑀁. 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀧𑀦 ‘‘𑀦𑀘𑀺𑀭𑀁 𑀢𑀻𑀡𑀺 𑀯𑀲𑁆𑀲𑀸𑀦𑀻’’𑀢𑀺 𑀇𑀫𑁂𑀳𑀺𑀧𑀺 𑀓𑀼𑀝𑀺𑀮𑀁 𑀲𑀫𑁆𑀩𑀦𑁆𑀥𑁄 𑀓𑀢𑁆𑀢𑀩𑁆𑀩𑁄. 𑀦𑀘𑀺𑀭𑀦𑁆𑀢𑀺 𑀘𑁂𑀢𑀁 𑀪𑀸𑀯𑀦𑀧𑀼𑀁𑀲𑀓𑀁, 𑀅𑀘𑁆𑀘𑀦𑁆𑀢𑀲𑀜𑁆𑀜𑁄𑀕𑀁 𑀯𑀸. 𑀢𑀜𑁆𑀳𑀺 𑀧𑀫𑀸𑀡𑀢𑁄 𑀯𑀺𑀲𑁂𑀲𑁂𑀢𑀼𑀁 ‘‘𑀢𑀻𑀡𑀺 𑀯𑀲𑁆𑀲𑀸𑀦𑀻’’𑀢𑀺 𑀯𑀤𑀢𑀺. 𑀢𑁂𑀦𑀸𑀳 ‘‘𑀦𑀘𑀺𑀭𑀁 𑀯𑀺𑀳𑀸𑀲𑀺𑀁 𑀢𑀻𑀡𑀺𑀬𑁂𑀯 𑀯𑀲𑁆𑀲𑀸𑀦𑀻’’𑀢𑀺.

𑀅𑀬𑀦𑁆𑀢𑀺 𑀲𑀼𑀦𑀓𑁆𑀔𑀢𑁆𑀢𑁄. 𑀧𑀺𑀬𑀚𑀸𑀢𑀺𑀓𑀸𑀦𑀻𑀢𑀺 𑀇𑀝𑁆𑀞𑀲𑀪𑀸𑀯𑀸𑀦𑀺. 𑀲𑀸𑀢𑀚𑀸𑀢𑀺𑀓𑀸𑀦𑀻𑀢𑀺 𑀫𑀥𑀼𑀭𑀲𑀪𑀸𑀯𑀸𑀦𑀺. 𑀫𑀥𑀼𑀭𑀲𑀤𑀺𑀲𑀢𑀸𑀬 𑀳𑀺 ‘‘𑀫𑀥𑀼𑀭’’𑀦𑁆𑀢𑀺 𑀫𑀦𑁄𑀭𑀫𑀁 𑀯𑀼𑀘𑁆𑀘𑀢𑀺. 𑀆𑀭𑀫𑁆𑀫𑀡𑀁 𑀓𑀭𑁄𑀦𑁆𑀢𑁂𑀦 𑀓𑀸𑀫𑁂𑀦 𑀉𑀧𑀲𑀁𑀳𑀺𑀢𑀸𑀦𑀻𑀢𑀺 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀺, 𑀓𑀸𑀫𑀦𑀻𑀬𑀸𑀦𑀺. 𑀢𑁂𑀦𑀸𑀳 ‘‘𑀓𑀸𑀫𑀲𑁆𑀲𑀸𑀤𑀬𑀼𑀢𑁆𑀢𑀸𑀦𑀻’’𑀢𑀺, 𑀆𑀭𑀫𑁆𑀫𑀡𑀺𑀓𑁂𑀦 𑀓𑀸𑀫𑀲𑀗𑁆𑀔𑀸𑀢𑁂𑀦 𑀅𑀲𑁆𑀲𑀸𑀤𑁂𑀦 𑀲𑀜𑁆𑀜𑀼𑀢𑁆𑀢𑀸𑀦𑀺, 𑀓𑀸𑀫𑀲𑀗𑁆𑀔𑀸𑀢𑀲𑁆𑀲 𑀯𑀸 𑀅𑀲𑁆𑀲𑀸𑀤𑀲𑁆𑀲 𑀬𑁄𑀕𑁆𑀬𑀸𑀦𑀻𑀢𑀺 𑀅𑀢𑁆𑀣𑁄. 𑀲𑀭𑀻𑀭𑀲𑀡𑁆𑀞𑀸𑀦𑁂𑀢𑀺 𑀲𑀭𑀻𑀭𑀩𑀺𑀫𑁆𑀩𑁂, 𑀆𑀥𑀸𑀭𑁂 𑀘𑁂𑀢𑀁 𑀪𑀼𑀫𑁆𑀫𑀁. 𑀢𑀲𑁆𑀫𑀸 𑀲𑀤𑁆𑀤𑁂𑀦𑀸𑀢𑀺 𑀢𑀁 𑀦𑀺𑀲𑁆𑀲𑀸𑀬 𑀢𑀢𑁄 𑀉𑀧𑁆𑀧𑀦𑁆𑀦𑁂𑀦 𑀲𑀤𑁆𑀤𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀧𑀺𑀘 𑀯𑀺𑀦𑀸 𑀧𑀸𑀞𑀲𑁂𑀲𑀁 𑀪𑀯𑀺𑀢𑀩𑁆𑀩𑀧𑀤𑁂𑀦𑁂𑀯 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀫𑀥𑀼𑀭𑁂𑀦𑀸𑀢𑀺 𑀇𑀝𑁆𑀞𑁂𑀦 𑀲𑀸𑀢𑁂𑀦. 𑀓𑀡𑁆𑀡𑀲𑀓𑁆𑀔𑀮𑀺𑀬𑀦𑁆𑀢𑀺 𑀓𑀡𑁆𑀡𑀧𑀝𑁆𑀝𑀺𑀓𑀸𑀬𑀁.

𑀏𑀢𑁆𑀢𑀸𑀯𑀢𑀸𑀢𑀺 𑀤𑀺𑀩𑁆𑀩𑀲𑁄𑀢𑀜𑀸𑀡𑀧𑀭𑀺𑀓𑀫𑁆𑀫𑀲𑁆𑀲 𑀅𑀓𑀣𑀦𑀫𑀢𑁆𑀢𑁂𑀦. ‘‘𑀅𑀢𑁆𑀢𑀦𑀸 𑀜𑀸𑀢𑀫𑁆𑀧𑀺 𑀦 𑀓𑀣𑁂𑀢𑀺, 𑀓𑀺𑀁 𑀇𑀫𑀲𑁆𑀲 𑀲𑀸𑀲𑀦𑁂 𑀅𑀥𑀺𑀝𑁆𑀞𑀸𑀦𑁂𑀦𑀸’’𑀢𑀺 𑀓𑀼𑀚𑁆𑀛𑀦𑁆𑀢𑁄 𑀪𑀕𑀯𑀢𑀺 𑀆𑀖𑀸𑀢𑀁 𑀩𑀦𑁆𑀥𑀺𑀢𑁆𑀯𑀸, 𑀲𑀳 𑀓𑀼𑀚𑁆𑀛𑀦𑁂𑀦𑁂𑀯 𑀘𑁂𑀲 𑀛𑀸𑀦𑀸𑀪𑀺𑀜𑁆𑀜𑀸 𑀧𑀭𑀺𑀳𑀸𑀬𑀺. 𑀘𑀺𑀦𑁆𑀢𑁂𑀲𑀻𑀢𑀺 ‘‘𑀓𑀲𑁆𑀫𑀸 𑀦𑀼 𑀔𑁄 𑀲𑁄 𑀫𑀬𑁆𑀳𑀁 𑀢𑀁 𑀧𑀭𑀺𑀓𑀫𑁆𑀫𑀁 𑀦 𑀓𑀣𑁂𑀲𑀻’’𑀢𑀺 𑀧𑀭𑀺𑀯𑀺𑀘𑀸𑀭𑁂𑀦𑁆𑀢𑁄 𑀅𑀬𑁄𑀦𑀺𑀲𑁄 𑀉𑀫𑁆𑀫𑀼𑀚𑁆𑀚𑀦𑀯𑀲𑁂𑀦 𑀘𑀺𑀦𑁆𑀢𑁂𑀲𑀺. 𑀅𑀦𑀼𑀓𑁆𑀓𑀫𑁂𑀦𑀸𑀢𑀺 𑀧𑀸𑀣𑀺𑀓𑀲𑀼𑀢𑁆𑀢𑁂, (𑀤𑀻. 𑀦𑀺. 𑁩.𑁩 𑀆𑀤𑀬𑁄) 𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢𑁂 (𑀤𑀻. 𑀦𑀺. 𑁧.𑁩𑁮𑁧) 𑀘 𑀆𑀕𑀢𑀦𑀬𑁂𑀦 𑀢𑀁 𑀢𑀁 𑀅𑀬𑀼𑀢𑁆𑀢𑀫𑁂𑀯 𑀘𑀺𑀦𑁆𑀢𑁂𑀦𑁆𑀢𑁄, 𑀪𑀸𑀲𑀦𑁆𑀢𑁄, 𑀓𑀭𑁄𑀦𑁆𑀢𑁄 𑀘 𑀅𑀦𑀼𑀓𑁆𑀓𑀫𑁂𑀦 𑀪𑀕𑀯𑀢𑀺 𑀩𑀤𑁆𑀥𑀸𑀖𑀸𑀢𑀢𑀸𑀬 𑀲𑀸𑀲𑀦𑁂 𑀧𑀢𑀺𑀝𑁆𑀞𑀁 𑀅𑀮𑀪𑀦𑁆𑀢𑁄 𑀕𑀺𑀳𑀺𑀪𑀸𑀯𑀁 𑀧𑀢𑁆𑀯𑀸 𑀢𑀫𑀢𑁆𑀣𑀁 𑀓𑀣𑁂𑀢𑀺.

𑀏𑀓𑀁𑀲𑀪𑀸𑀯𑀺𑀢𑀲𑀫𑀸𑀥𑀺𑀯𑀡𑁆𑀡𑀦𑀸

𑁩𑁬𑁬-𑁩𑁭𑁧. 𑀏𑀓𑀁𑀲𑀸𑀬𑀸𑀢𑀺 𑀢𑀤𑀢𑁆𑀣𑁂 𑀘𑀢𑀼𑀢𑁆𑀣𑀻𑀯𑀘𑀦𑀁, 𑀏𑀓𑀁𑀲𑀢𑁆𑀣𑀦𑁆𑀢𑀺 𑀅𑀢𑁆𑀣𑁄. 𑀅𑀁𑀲𑀲𑀤𑁆𑀤𑁄 𑀘𑁂𑀢𑁆𑀣 𑀓𑁄𑀝𑁆𑀞𑀸𑀲𑀧𑀭𑀺𑀬𑀸𑀬𑁄, 𑀲𑁄 𑀘 𑀅𑀥𑀺𑀓𑀸𑀭𑀢𑁄 𑀤𑀺𑀩𑁆𑀩𑀭𑀽𑀧𑀤𑀲𑁆𑀲𑀦𑀤𑀺𑀩𑁆𑀩𑀲𑀤𑁆𑀤𑀲𑀯𑀦𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀏𑀓𑀓𑁄𑀝𑁆𑀞𑀸𑀲𑀸𑀬𑀸’’𑀢𑀺𑀆𑀤𑀺. 𑀯𑀸-𑀲𑀤𑁆𑀤𑁄 𑀘𑁂𑀢𑁆𑀣 𑀯𑀺𑀓𑀧𑁆𑀧𑀦𑁂 𑀏𑀓𑀁𑀲𑀲𑁆𑀲𑁂𑀯𑀸𑀥𑀺𑀧𑁆𑀧𑁂𑀢𑀢𑁆𑀢𑀸. 𑀅𑀦𑀼𑀤𑀺𑀲𑀸𑀬𑀸𑀢𑀺 𑀧𑀼𑀭𑀢𑁆𑀣𑀺𑀫𑀤𑀓𑁆𑀔𑀺𑀡𑀸𑀤𑀺𑀪𑁂𑀤𑀸𑀬 𑀘𑀢𑀼𑀩𑁆𑀩𑀺𑀥𑀸𑀬 𑀅𑀦𑀼𑀤𑀺𑀲𑀸𑀬. 𑀉𑀪𑀬𑀓𑁄𑀝𑁆𑀞𑀸𑀲𑀸𑀬𑀸𑀢𑀺 𑀤𑀺𑀩𑁆𑀩𑀭𑀽𑀧𑀤𑀲𑁆𑀲𑀦𑀢𑁆𑀣𑀁, 𑀤𑀺𑀩𑁆𑀩𑀲𑀤𑁆𑀤𑀲𑀯𑀦𑀢𑁆𑀣𑀜𑁆𑀘. 𑀪𑀸𑀯𑀺𑀢𑁄𑀢𑀺 𑀬𑀣𑀸 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁, 𑀤𑀺𑀩𑁆𑀩𑀲𑁄𑀢𑀜𑀸𑀡𑀜𑁆𑀘 𑀲𑀫𑀥𑀺𑀕𑀢𑀁 𑀳𑁄𑀢𑀺, 𑀏𑀯𑀁 𑀪𑀸𑀯𑀺𑀢𑁄. 𑀢𑀬𑀺𑀤𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀭𑀺𑀓𑀫𑁆𑀫𑀓𑀭𑀡𑁂𑀦 𑀇𑀚𑁆𑀛𑀦𑁆𑀢𑀻𑀲𑀼 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺, 𑀏𑀓𑀚𑁆𑀛𑀁 𑀇𑀚𑁆𑀛𑀦𑁆𑀢𑀻𑀲𑀼𑀧𑀺 𑀓𑀫𑁂𑀦𑁂𑀯 𑀓𑀺𑀘𑁆𑀘𑀲𑀺𑀤𑁆𑀥𑀺 𑀪𑀯𑀢𑀺 𑀏𑀓𑀚𑁆𑀛𑀁 𑀓𑀺𑀘𑁆𑀘𑀲𑀺𑀤𑁆𑀥𑀺𑀬𑀸 𑀅𑀲𑀫𑁆𑀪𑀯𑀢𑁄. 𑀧𑀸𑀴𑀺𑀬𑀫𑁆𑀧𑀺 𑀳𑀺 ‘‘𑀤𑀺𑀩𑁆𑀩𑀸𑀦𑀜𑁆𑀘 𑀭𑀽𑀧𑀸𑀦𑀁 𑀤𑀲𑁆𑀲𑀦𑀸𑀬, 𑀤𑀺𑀩𑁆𑀩𑀸𑀦𑀜𑁆𑀘 𑀲𑀤𑁆𑀤𑀸𑀦𑀁 𑀲𑀯𑀦𑀸𑀬𑀸’’𑀢𑀺 𑀇𑀤𑀁 𑀏𑀓𑀲𑁆𑀲 𑀉𑀪𑀬𑀲𑀫𑀢𑁆𑀣𑀢𑀸𑀲𑀦𑁆𑀤𑀲𑁆𑀲𑀦𑀫𑁂𑀯, 𑀦 𑀏𑀓𑀚𑁆𑀛𑀁 𑀓𑀺𑀘𑁆𑀘𑀲𑀺𑀤𑁆𑀥𑀺𑀲𑀫𑁆𑀪𑀯𑀲𑀦𑁆𑀤𑀲𑁆𑀲𑀦𑀁. ‘‘𑀏𑀓𑀁𑀲𑀪𑀸𑀯𑀺𑀢𑁄 𑀲𑀫𑀸𑀥𑀺 𑀳𑁂𑀢𑀽’’𑀢𑀺 𑀇𑀫𑀺𑀦𑀸 𑀲𑀼𑀦𑀓𑁆𑀔𑀢𑁆𑀢𑁄 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀸𑀬 𑀏𑀯 𑀧𑀭𑀺𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀤𑀺𑀩𑁆𑀩𑀲𑀤𑁆𑀤𑀁 𑀦𑀸𑀲𑁆𑀲𑁄𑀲𑀻𑀢𑀺 𑀤𑀲𑁆𑀲𑁂𑀢𑀺.

𑁩𑁭𑁨. 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀢𑁄 𑀤𑀺𑀩𑁆𑀩𑀲𑁄𑀢𑀜𑀸𑀡𑀫𑁂𑀯 𑀲𑁂𑀝𑁆𑀞𑀦𑁆𑀢𑀺 𑀫𑀜𑁆𑀜𑀫𑀸𑀦𑁄 𑀫𑀳𑀸𑀮𑀺 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑀢𑀻𑀢𑀺 𑀆𑀳 ‘‘𑀇𑀤𑀁 𑀤𑀺𑀩𑁆𑀩𑀲𑁄𑀢𑁂𑀦…𑀧𑁂… 𑀫𑀜𑁆𑀜𑁂’’𑀢𑀺. 𑀅𑀧𑀡𑁆𑀡𑀓𑀦𑁆𑀢𑀺 𑀅𑀯𑀺𑀭𑀚𑁆𑀛𑀦𑀓𑀁, 𑀅𑀦𑀯𑀚𑁆𑀚𑀁 𑀯𑀸. 𑀲𑀫𑀸𑀥𑀺𑀬𑁂𑀯 𑀪𑀸𑀯𑁂𑀢𑀩𑁆𑀩𑀝𑁆𑀞𑁂𑀦 𑀲𑀫𑀸𑀥𑀺𑀪𑀸𑀯𑀦𑀸. ‘‘𑀤𑀺𑀩𑁆𑀩𑀲𑁄𑀢𑀜𑀸𑀡𑀁 𑀲𑁂𑀝𑁆𑀞’’𑀦𑁆𑀢𑀺 𑀫𑀜𑁆𑀜𑀫𑀸𑀦𑁂𑀦 𑀘 𑀢𑁂𑀦 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀫𑁆𑀧𑀺 𑀤𑀺𑀩𑁆𑀩𑀲𑁄𑀢𑁂𑀦𑁂𑀯 𑀲𑀳 𑀕𑀳𑁂𑀢𑁆𑀯𑀸 ‘‘𑀏𑀢𑀸𑀲𑀁 𑀦𑀽𑀦 𑀪𑀦𑁆𑀢𑁂’’𑀢𑀺𑀆𑀤𑀺𑀦𑀸 𑀧𑀼𑀣𑀼𑀯𑀘𑀦𑁂𑀦 𑀧𑀼𑀘𑁆𑀙𑀺𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀉𑀪𑀬𑀁𑀲𑀪𑀸𑀯𑀺𑀢𑀸𑀦𑀁 𑀲𑀫𑀸𑀥𑀻𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀩𑀸𑀳𑀺𑀭𑀸 𑀏𑀢𑀸 𑀲𑀫𑀸𑀥𑀺𑀪𑀸𑀯𑀦𑀸 𑀅𑀦𑀺𑀬𑁆𑀬𑀸𑀦𑀺𑀓𑀢𑁆𑀢𑀸. 𑀢𑀸 𑀳𑀺 𑀇𑀢𑁄 𑀩𑀸𑀳𑀺𑀭𑀓𑀸𑀦𑀫𑁆𑀧𑀺 𑀇𑀚𑁆𑀛𑀦𑁆𑀢𑀺. 𑀦 𑀅𑀚𑁆𑀛𑀢𑁆𑀢𑀺𑀓𑀸 𑀪𑀕𑀯𑀢𑀸 𑀲𑀸𑀫𑀼𑀓𑁆𑀓𑀁𑀲𑀺𑀓𑀪𑀸𑀯𑁂𑀦 𑀅𑀧𑁆𑀧𑀯𑁂𑀤𑀺𑀢𑀢𑁆𑀢𑀸. 𑀦 𑀳𑀺 𑀢𑁂 𑀲𑀘𑁆𑀘𑀸𑀦𑀺 𑀯𑀺𑀬 𑀲𑀸𑀫𑀼𑀓𑁆𑀓𑀁𑀲𑀺𑀓𑀸. 𑀬𑀤𑀢𑁆𑀣𑀦𑁆𑀢𑀺 𑀬𑁂𑀲𑀁 𑀅𑀢𑁆𑀣𑀸𑀬, 𑀅𑀪𑁂𑀤𑁂𑀧𑀺 𑀪𑁂𑀤𑀯𑀘𑀦𑀫𑁂𑀢𑀁, 𑀬𑀲𑁆𑀲 𑀯𑀸 𑀯𑀺𑀲𑁂𑀲𑀦𑀪𑀽𑀢𑀲𑁆𑀲 𑀅𑀢𑁆𑀣𑀸𑀬. 𑀢𑁂𑀢𑀺 𑀅𑀭𑀺𑀬𑀨𑀮𑀥𑀫𑁆𑀫𑁂. ‘‘𑀢’’𑀦𑁆𑀢𑀺𑀧𑀺 𑀅𑀥𑀼𑀦𑀸 𑀧𑀸𑀞𑁄. 𑀢𑁂 𑀳𑀺 𑀲𑀘𑁆𑀙𑀺𑀓𑀸𑀢𑀩𑁆𑀩𑀸, ‘‘𑀅𑀢𑁆𑀣𑀺 𑀔𑁄 𑀫𑀳𑀸𑀮𑀺 𑀅𑀜𑁆𑀜𑁂𑀯 𑀥𑀫𑁆𑀫𑀸…𑀧𑁂… 𑀬𑁂𑀲𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀳𑁂𑀢𑀼 𑀪𑀺𑀓𑁆𑀔𑀽 𑀫𑀬𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀻’’𑀢𑀺 𑀲𑀘𑁆𑀙𑀺𑀓𑀸𑀢𑀩𑁆𑀩𑀥𑀫𑁆𑀫𑀸 𑀘 𑀇𑀥 𑀯𑀼𑀢𑁆𑀢𑀸.

𑀘𑀢𑀼𑀅𑀭𑀺𑀬𑀨𑀮𑀯𑀡𑁆𑀡𑀦𑀸

𑁩𑁭𑁩. 𑀲𑀁𑀬𑁄𑀚𑁂𑀦𑁆𑀢𑀻𑀢𑀺 𑀩𑀦𑁆𑀥𑁂𑀦𑁆𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀯𑀝𑁆𑀝𑀤𑀼𑀓𑁆𑀔𑀪𑀬𑁂 𑀲𑀁𑀬𑁄𑀚𑀦𑀢𑁄 𑀢𑀢𑁆𑀣 𑀲𑀢𑁆𑀢𑁂 𑀲𑀁𑀬𑁄𑀚𑁂𑀦𑁆𑀢𑀺 𑀦𑀸𑀫, 𑀢𑀲𑁆𑀫𑀸. 𑀓𑀢𑁆𑀣𑀘𑀺 ‘‘𑀯𑀝𑁆𑀝𑀤𑀼𑀓𑁆𑀔𑀫𑀬𑁂 𑀭𑀣𑁂’’𑀢𑀺 𑀧𑀸𑀞𑁄, 𑀦 𑀧𑁄𑀭𑀸𑀡𑁄 𑀢𑀣𑀸 𑀆𑀘𑀭𑀺𑀬𑁂𑀦 𑀅𑀯𑀡𑁆𑀡𑀺𑀢𑀢𑁆𑀢𑀸. 𑀫𑀕𑁆𑀕𑀲𑁄𑀢𑀁 𑀆𑀧𑀦𑁆𑀦𑁄, 𑀦 𑀧𑀲𑀸𑀤𑀸𑀤𑀺𑀲𑁄𑀢𑀁. ‘‘𑀲𑁄𑀢𑁄𑀢𑀺 𑀪𑀺𑀓𑁆𑀔𑀯𑁂 𑀅𑀭𑀺𑀬𑀫𑀕𑁆𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁. 𑀆𑀧𑀦𑁆𑀦𑁄𑀢𑀺 𑀘 𑀆𑀤𑀺𑀢𑁄 𑀧𑀢𑁆𑀢𑁄𑀢𑀺 𑀅𑀢𑁆𑀣𑁄 𑀆-𑀉𑀧𑀲𑀕𑁆𑀕𑀲𑁆𑀲 𑀆𑀤𑀺𑀓𑀫𑁆𑀫𑀦𑀺 𑀧𑀯𑀢𑁆𑀢𑀦𑀢𑁄, 𑀇𑀤𑀁 𑀧𑀦 𑀨𑀮𑀝𑁆𑀞𑀯𑀲𑁂𑀦 𑀯𑀤𑀢𑀺. 𑀅𑀢𑀻𑀢𑀓𑀸𑀮𑀯𑀘𑀦𑀜𑁆𑀳𑁂𑀢𑀁, 𑀫𑀕𑁆𑀕𑀓𑁆𑀔𑀡𑁂 𑀧𑀦 𑀫𑀕𑁆𑀕𑀲𑁄𑀢𑀁 𑀆𑀧𑀚𑁆𑀚𑀢𑀺 𑀦𑀸𑀫. 𑀢𑁂𑀦𑁂𑀯𑀸𑀳 𑀤𑀓𑁆𑀔𑀺𑀡𑀯𑀺𑀪𑀗𑁆𑀕𑁂 ‘‘𑀲𑁄𑀢𑀸𑀧𑀦𑁆𑀦𑁂 𑀤𑀸𑀦𑀁 𑀤𑁂𑀢𑀺, 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁂 𑀤𑀸𑀦𑀁 𑀤𑁂𑀢𑀻’’𑀢𑀺 (𑀫. 𑀦𑀺. 𑁩.𑁩𑁭𑁯) 𑀅𑀧𑀢𑀦𑀥𑀫𑁆𑀫𑁄𑀢𑀺 𑀅𑀦𑀼𑀧𑀧𑀚𑁆𑀚𑀦𑀲𑀪𑀸𑀯𑁄. 𑀥𑀫𑁆𑀫𑀦𑀺𑀬𑀸𑀫𑁂𑀦𑀸𑀢𑀺 𑀉𑀧𑀭𑀺𑀫𑀕𑁆𑀕𑀥𑀫𑁆𑀫𑀦𑀺𑀬𑀸𑀫𑁂𑀦. 𑀳𑁂𑀝𑁆𑀞𑀺𑀫𑀦𑁆𑀢𑁂𑀦 𑀲𑀢𑁆𑀢𑀫𑀪𑀯𑀢𑁄 𑀉𑀧𑀭𑀺 𑀅𑀦𑀼𑀧𑀧𑀚𑁆𑀚𑀦𑀥𑀫𑁆𑀫𑀢𑀸𑀬 𑀯𑀸 𑀦𑀺𑀬𑀢𑁄𑀢𑀺 𑀅𑀝𑁆𑀞𑀓𑀣𑀸𑀫𑀼𑀢𑁆𑀢𑀓𑀦𑀬𑁄. 𑀧𑀭𑀁 𑀅𑀬𑀦𑀁 𑀧𑀭𑀸𑀕𑀢𑀺 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀅𑀦𑁂𑀦𑀸𑀢𑀺 𑀧𑀼𑀦 𑀢𑀢𑀺𑀬𑀲𑀫𑀸𑀲𑀯𑀘𑀦𑀁, 𑀯𑀸-𑀲𑀤𑁆𑀤𑁄 𑀘𑁂𑀢𑁆𑀣 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄.

𑀢𑀦𑀼𑀢𑁆𑀢𑀁 𑀦𑀸𑀫 𑀧𑀯𑀢𑁆𑀢𑀺𑀬𑀸 𑀫𑀦𑁆𑀤𑀢𑀸, 𑀯𑀺𑀭𑀴𑀢𑀸 𑀘𑀸𑀢𑀺 𑀯𑀼𑀢𑁆𑀢𑀁 ‘‘𑀢𑀦𑀼𑀢𑁆𑀢𑀸’’𑀢𑀺𑀆𑀤𑀺. 𑀓𑀭𑀳𑀘𑀻𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀧𑀭𑀺𑀬𑀸𑀬𑀯𑀘𑀦𑀁 𑀯𑀸. ‘‘𑀑𑀭𑁂𑀦 𑀘𑁂 𑀫𑀸𑀲𑁄 𑀲𑁂𑀲𑁄 𑀕𑀺𑀫𑁆𑀳𑀸𑀦𑀦𑁆𑀢𑀺 𑀯𑀲𑁆𑀲𑀺𑀓𑀲𑀸𑀝𑀺𑀓𑀘𑀻𑀯𑀭𑀁 𑀧𑀭𑀺𑀬𑁂𑀲𑁂𑀬𑁆𑀬𑀸’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁬𑁨𑁭) 𑀯𑀺𑀬 𑀑𑀭-𑀲𑀤𑁆𑀤𑁄 𑀦 𑀅𑀢𑀺𑀭𑁂𑀓𑀢𑁆𑀣𑁄𑀢𑀺 𑀆𑀳 ‘‘𑀳𑁂𑀝𑁆𑀞𑀸𑀪𑀸𑀕𑀺𑀬𑀸𑀦’’𑀦𑁆𑀢𑀺, 𑀳𑁂𑀝𑁆𑀞𑀸𑀪𑀸𑀕𑀲𑁆𑀲 𑀓𑀸𑀫𑀪𑀯𑀲𑁆𑀲 𑀧𑀘𑁆𑀘𑀬𑀪𑀸𑀯𑁂𑀦 𑀳𑀺𑀢𑀸𑀦𑀦𑁆𑀢𑀺 𑀅𑀢𑁆𑀣𑁄. ‘‘𑀲𑀼𑀤𑁆𑀥𑀸𑀯𑀸𑀲𑀪𑀽𑀫𑀺𑀬’’𑀦𑁆𑀢𑀺 𑀢𑁂𑀲𑀁 𑀉𑀧𑀧𑀢𑁆𑀢𑀺𑀝𑁆𑀞𑀸𑀦𑀤𑀲𑁆𑀲𑀦𑀁. 𑀑𑀧𑀧𑀸𑀢𑀺𑀓𑁄𑀢𑀺 𑀉𑀧𑀧𑀸𑀢𑀺𑀓𑁄 𑀉𑀧𑀧𑀸𑀢𑀦𑁂 𑀲𑀸𑀥𑀼𑀓𑀸𑀭𑀻. 𑀢𑁂𑀦𑀸𑀳 ‘‘𑀲𑁂𑀲𑀬𑁄𑀦𑀺𑀧𑀝𑀺𑀓𑁆𑀔𑁂𑀧𑀯𑀘𑀦𑀫𑁂𑀢’’𑀦𑁆𑀢𑀺 𑀧𑀭𑀺𑀦𑀺𑀩𑁆𑀩𑀸𑀦𑀥𑀫𑁆𑀫𑁄𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀦𑀲𑀪𑀸𑀯𑁄. 𑀯𑀺𑀫𑀼𑀘𑁆𑀘𑀢𑀻𑀢𑀺 𑀯𑀺𑀫𑀼𑀢𑁆𑀢𑀺, 𑀘𑀺𑀢𑁆𑀢𑀫𑁂𑀯 𑀯𑀺𑀫𑀼𑀢𑁆𑀢𑀺 𑀘𑁂𑀢𑁄𑀯𑀺𑀫𑀼𑀢𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺’’𑀦𑁆𑀢𑀺𑀆𑀤𑀺. 𑀘𑀺𑀢𑁆𑀢𑀲𑀻𑀲𑁂𑀦 𑀘𑁂𑀢𑁆𑀣 𑀲𑀫𑀸𑀥𑀺 𑀕𑀳𑀺𑀢𑁄 ‘‘𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀦𑀭𑁄 𑀲𑀧𑀜𑁆𑀜𑁄, 𑀘𑀺𑀢𑁆𑀢𑀁 𑀧𑀜𑁆𑀜𑀜𑁆𑀘 𑀪𑀸𑀯𑀬’’𑀦𑁆𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁨𑁩, 𑁧𑁯𑁨; 𑀧𑁂𑀝𑀓𑁄. 𑁨𑁨; 𑀫𑀺. 𑀧. 𑁧.𑁧.𑁯) 𑀯𑀺𑀬. 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀢𑁂𑀦𑀸𑀳 ‘‘𑀅𑀭𑀳𑀢𑁆𑀢𑀨𑀮𑀧𑀜𑁆𑀜𑀸𑀯 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀻’’𑀢𑀺. 𑀲𑀸𑀫𑀦𑁆𑀢𑀺 𑀅𑀢𑁆𑀢𑀦𑀸𑀯, 𑀅𑀧𑀭𑀧𑁆𑀧𑀘𑁆𑀘𑀬𑁂𑀦𑀸𑀢𑀺 𑀅𑀢𑁆𑀣𑁄. ‘‘𑀅𑀪𑀺𑀚𑀸𑀦𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀢𑁆𑀯𑀸𑀤𑀺𑀧𑀘𑁆𑀘𑀬𑀓𑀸𑀭𑀺𑀬𑀲𑁆𑀲 𑀬-𑀓𑀸𑀭𑀲𑁆𑀲 𑀮𑁄𑀧𑁄 𑀤𑀲𑁆𑀲𑀺𑀢𑁄. ‘‘𑀅𑀪𑀺𑀜𑁆𑀜𑀸𑀬𑀸’’𑀢𑀺 𑀇𑀫𑀺𑀦𑀸 𑀧𑀦 𑀦𑀸-𑀯𑀘𑀦𑀓𑀸𑀭𑀺𑀬𑀲𑁆𑀲𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀘𑁆𑀙𑀻𑀢𑀺 𑀧𑀘𑁆𑀘𑀓𑁆𑀔𑀢𑁆𑀣𑁂 𑀦𑁂𑀧𑀸𑀢𑀺𑀓𑀁. 𑀧𑀘𑁆𑀘𑀓𑁆𑀔𑀓𑀭𑀡𑀁 𑀦𑀸𑀫 𑀅𑀦𑀼𑀲𑁆𑀲𑀯𑀸𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀸𑀤𑀺𑀓𑁂 𑀫𑀼𑀜𑁆𑀘𑀺𑀢𑁆𑀯𑀸 𑀲𑀭𑀽𑀧𑀢𑁄 𑀆𑀭𑀫𑁆𑀫𑀡𑀓𑀭𑀡𑀁.

𑀅𑀭𑀺𑀬𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀯𑀡𑁆𑀡𑀦𑀸

𑁩𑁭𑁪-𑁫. 𑀉𑀧𑁆𑀧𑀢𑀺𑀢𑁆𑀯𑀸𑀢𑀺 𑀆𑀓𑀸𑀲𑀫𑀕𑁆𑀕𑁂𑀦 𑀟𑁂𑀢𑁆𑀯𑀸. 𑀧𑀝𑀺𑀧𑀚𑁆𑀚𑀢𑀺 𑀅𑀭𑀺𑀬𑀸𑀲𑀸𑀯𑀓𑁄 𑀦𑀺𑀩𑁆𑀩𑀸𑀦𑀁, 𑀅𑀭𑀺𑀬𑀨𑀮𑀜𑁆𑀘 𑀏𑀢𑀸𑀬𑀸𑀢𑀺 𑀧𑀝𑀺𑀧𑀤𑀸, 𑀲𑀸 𑀘 𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑁄 𑀏𑀯𑀸𑀢𑀺 𑀅𑀭𑀺𑀬𑀫𑀕𑁆𑀕𑁄 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀦𑀸𑀫𑁂𑀦 𑀇𑀥 𑀯𑀼𑀢𑁆𑀢𑁄. 𑀆𑀢𑀢𑀯𑀺𑀢𑀢𑀸𑀤𑀺𑀯𑀲𑁂𑀦 𑀧𑀜𑁆𑀘𑀗𑁆𑀕𑀺𑀓𑀁. 𑀤𑀺𑀲𑀸𑀯𑀺𑀤𑀺𑀲𑀸𑀦𑀺𑀯𑀺𑀝𑁆𑀞𑀧𑀤𑁂𑀲𑁂𑀦 𑀅𑀝𑁆𑀞𑀗𑁆𑀕𑀺𑀓𑁄. 𑀅𑀝𑁆𑀞𑀗𑁆𑀕𑀢𑁄 𑀫𑀼𑀢𑁆𑀢𑁄 𑀅𑀜𑁆𑀜𑁄 𑀓𑁄𑀘𑀺 𑀅𑀝𑁆𑀞𑀗𑁆𑀕𑀺𑀓𑁄 𑀦𑀸𑀫 𑀫𑀕𑁆𑀕𑁄 𑀦𑀢𑁆𑀣𑀻𑀢𑀺 𑀆𑀳 ‘‘𑀅𑀝𑁆𑀞𑀗𑁆𑀕𑀫𑀢𑁆𑀢𑁄𑀬𑁂𑀯𑀸’’𑀢𑀺𑀆𑀤𑀺𑀦𑀸. 𑀦 𑀳𑀺 𑀅𑀯𑀬𑀯𑀯𑀺𑀦𑀺𑀫𑀼𑀢𑁆𑀢𑁄 𑀲𑀫𑀼𑀤𑀸𑀬𑁄 𑀦𑀸𑀫 𑀓𑁄𑀘𑀺 𑀅𑀢𑁆𑀣𑀻𑀢𑀺. 𑀢𑀲𑁆𑀫𑀸 ‘‘𑀅𑀝𑁆𑀞 𑀅𑀗𑁆𑀕𑀸𑀦𑀺 𑀅𑀲𑁆𑀲𑀸𑀢𑀺 𑀅𑀜𑁆𑀜𑀧𑀤𑀢𑁆𑀣𑀲𑀫𑀸𑀲𑀁 𑀅𑀓𑀢𑁆𑀯𑀸 ‘𑀅𑀝𑁆𑀞 𑀅𑀗𑁆𑀕𑀸𑀦𑀺 𑀅𑀝𑁆𑀞𑀗𑁆𑀕𑀸𑀦𑀺, 𑀢𑀸𑀦𑀺 𑀅𑀲𑁆𑀲 𑀲𑀦𑁆𑀢𑀻𑀢𑀺 𑀅𑀝𑁆𑀞𑀗𑁆𑀕𑀺𑀓𑁄’𑀢𑀺 𑀲𑀫𑀸𑀲𑀕𑀩𑁆𑀪𑀢𑀤𑁆𑀥𑀺𑀢𑀯𑀲𑁂𑀦 𑀧𑀤𑀲𑀺𑀤𑁆𑀥𑀺 𑀓𑀸𑀢𑀩𑁆𑀩𑀸’’𑀢𑀺 (𑀤𑀻. 𑀦𑀺. 𑀝𑀻. 𑁧.𑁩𑁭𑁪, 𑁩𑁭𑁫) 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑀁, 𑀅𑀥𑀺𑀧𑁆𑀧𑀸𑀬𑁄 𑀘𑁂𑀢𑁆𑀣 𑀘𑀺𑀦𑁆𑀢𑁂𑀢𑀩𑁆𑀩𑁄. 𑀅𑀜𑁆𑀜𑀧𑀤𑀢𑁆𑀣𑀲𑀫𑀸𑀲𑁂 𑀳𑀺 𑀓𑀢𑁂 𑀦 𑀲𑀓𑁆𑀓𑀸 𑀅𑀝𑁆𑀞𑀗𑁆𑀕𑀅𑀝𑁆𑀞𑀗𑁆𑀕𑀺𑀓𑀸𑀦𑀁 𑀪𑁂𑀤𑁄 𑀅𑀜𑁆𑀜𑀫𑀜𑁆𑀜𑀁 𑀯𑀺𑀧𑀭𑀺𑀬𑀸𑀬𑀁 𑀓𑀢𑁆𑀯𑀸𑀧𑀺 𑀦𑀺𑀬𑀫𑁂𑀢𑀼𑀁 𑀩𑁆𑀬𑀸𑀲𑁂 𑀉𑀪𑀬𑀧𑀤𑀢𑁆𑀣𑀧𑀭𑀪𑀸𑀯𑁂𑀦 𑀲𑀳𑁂𑀯 𑀲𑀗𑁆𑀔𑁆𑀬𑀸𑀧𑀭𑀺𑀘𑁆𑀙𑁂𑀤𑁂𑀦 𑀅𑀢𑁆𑀣𑀸𑀧𑀢𑁆𑀢𑀺𑀢𑁄. 𑀲𑀫𑀸𑀲𑀕𑀩𑁆𑀪𑁂 𑀧𑀦 𑀢𑀤𑁆𑀥𑀺𑀢𑁂 𑀓𑀢𑁂 𑀲𑀓𑁆𑀓𑀸 𑀏𑀯 𑀢𑁂𑀲𑀁 𑀪𑁂𑀤𑁄 𑀅𑀜𑁆𑀜𑀫𑀜𑁆𑀜𑀁 𑀯𑀺𑀧𑀭𑀺𑀬𑀸𑀬𑀁 𑀓𑀢𑁆𑀯𑀸 𑀦𑀺𑀬𑀫𑁂𑀢𑀼𑀁 𑀲𑀫𑀸𑀲𑁂 𑀉𑀢𑁆𑀢𑀭𑀧𑀤𑀢𑁆𑀣𑀧𑀭𑀪𑀸𑀯𑁂𑀦 𑀯𑀺𑀦𑀸𑀯 𑀲𑀗𑁆𑀔𑁆𑀬𑀸𑀧𑀭𑀺𑀘𑁆𑀙𑁂𑀤𑁂𑀦 𑀅𑀢𑁆𑀣𑀸𑀧𑀢𑁆𑀢𑀺𑀢𑁄. 𑀏𑀓𑀢𑁆𑀣𑀺𑀪𑀸𑀯𑀮𑀓𑁆𑀔𑀡𑁄 𑀳𑀺 𑀲𑀫𑀸𑀲𑁄𑀢𑀺. 𑀥𑀫𑁆𑀫𑀤𑀸𑀬𑀸𑀤𑀲𑀼𑀢𑁆𑀢𑀦𑁆𑀢𑀝𑀻𑀓𑀸𑀬𑀁 𑀧𑀦 𑀆𑀘𑀭𑀺𑀬𑁂𑀦𑁂𑀯 𑀏𑀯𑀁 𑀯𑀼𑀢𑁆𑀢𑀁 ‘‘𑀬𑀲𑁆𑀫𑀸 𑀫𑀕𑁆𑀕𑀗𑁆𑀕𑀲𑀫𑀼𑀤𑀸𑀬𑁂 𑀫𑀕𑁆𑀕𑀯𑁄𑀳𑀸𑀭𑁄 𑀳𑁄𑀢𑀺, 𑀲𑀫𑀼𑀤𑀸𑀬𑁄 𑀘 𑀲𑀫𑀼𑀤𑀸𑀬𑀻𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀅𑀯𑀬𑀯𑀪𑀽𑀢𑀸𑀦𑀺 𑀅𑀝𑁆𑀞 𑀅𑀗𑁆𑀕𑀸𑀦𑀺 𑀏𑀢𑀲𑁆𑀲 𑀲𑀦𑁆𑀢𑀻𑀢𑀺 𑀅𑀝𑁆𑀞𑀗𑁆𑀕𑀺𑀓𑁄’’𑀢𑀺. 𑀧𑀞𑀫𑀦𑀬𑁂 𑀘𑁂𑀢𑁆𑀣 𑀅𑀗𑁆𑀕𑀺𑀦𑀸 𑀅𑀗𑁆𑀕𑀲𑁆𑀲 𑀅𑀝𑁆𑀞𑀗𑁆𑀕𑀺𑀓𑀪𑀸𑀯𑁄 𑀯𑀼𑀢𑁆𑀢𑁄, 𑀤𑀼𑀢𑀺𑀬𑀦𑀬𑁂 𑀧𑀦 𑀅𑀗𑁆𑀕𑁂𑀦 𑀅𑀗𑁆𑀕𑀺𑀦𑁄𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄.

𑀇𑀤𑀸𑀦𑀺 𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑁂 𑀮𑀓𑁆𑀔𑀡𑀢𑁄, 𑀓𑀺𑀘𑁆𑀘𑀔𑀡𑀸𑀭𑀫𑁆𑀫𑀡𑀪𑁂𑀤𑀓𑀫𑀢𑁄 𑀘 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀲𑀫𑁆𑀫𑀸𑀤𑀲𑁆𑀲𑀦𑀮𑀓𑁆𑀔𑀡𑀸𑀢𑀺 𑀅𑀯𑀺𑀧𑀭𑀻𑀢𑀁 𑀬𑀸𑀣𑀸𑀯𑀢𑁄 𑀘𑀢𑀼𑀦𑁆𑀦𑀫𑀭𑀺𑀬𑀲𑀘𑁆𑀘𑀸𑀦𑀁 𑀧𑀘𑁆𑀘𑀓𑁆𑀔𑀫𑁂𑀯 𑀤𑀲𑁆𑀲𑀦𑀲𑀪𑀸𑀯𑀸. 𑀲𑀫𑁆𑀫𑀸 𑀅𑀪𑀺𑀦𑀺𑀭𑁄𑀧𑀦𑀮𑀓𑁆𑀔𑀡𑁄𑀢𑀺 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀅𑀯𑀺𑀧𑀭𑀻𑀢𑀫𑀪𑀺𑀦𑀺𑀭𑁄𑀧𑀦𑀲𑀪𑀸𑀯𑁄. 𑀲𑀫𑁆𑀫𑀸 𑀧𑀭𑀺𑀕𑁆𑀕𑀳𑀡𑀮𑀓𑁆𑀔𑀡𑀸𑀢𑀺 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀸 𑀯𑀸𑀘𑀸 𑀚𑀦𑁂 𑀲𑀗𑁆𑀕𑀡𑁆𑀳𑀸𑀢𑀻𑀢𑀺 𑀢𑀩𑁆𑀩𑀺𑀧𑀓𑁆𑀔𑀢𑁄 𑀯𑀺𑀭𑀢𑀺𑀲𑀪𑀸𑀯𑀸 𑀲𑀫𑁆𑀫𑀸𑀯𑀸𑀘𑀸 𑀪𑁂𑀤𑀓𑀭𑀫𑀺𑀘𑁆𑀙𑀸𑀯𑀸𑀘𑀧𑁆𑀧𑀳𑀸𑀦𑁂𑀦 𑀚𑀦𑁂, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀘 𑀧𑀭𑀺𑀕𑁆𑀕𑀡𑁆𑀳𑀦𑀓𑀺𑀘𑁆𑀘𑀯𑀢𑀻 𑀳𑁄𑀢𑀺, 𑀏𑀯𑀁 𑀅𑀯𑀺𑀧𑀭𑀻𑀢𑀁 𑀧𑀭𑀺𑀕𑁆𑀕𑀳𑀡𑀲𑀪𑀸𑀯𑀸. 𑀲𑀫𑁆𑀫𑀸 𑀲𑀫𑀼𑀝𑁆𑀞𑀸𑀧𑀦𑀮𑀓𑁆𑀔𑀡𑁄𑀢𑀺 𑀬𑀣𑀸 𑀘𑀻𑀯𑀭𑀓𑀫𑁆𑀫𑀸𑀤𑀺𑀓𑁄 𑀓𑀫𑁆𑀫𑀦𑁆𑀢𑁄 𑀏𑀓𑀁 𑀓𑀸𑀢𑀩𑁆𑀩𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀢𑀁𑀢𑀁𑀓𑀺𑀭𑀺𑀬𑀸𑀦𑀺𑀧𑁆𑀨𑀸𑀤𑀓𑁄 𑀯𑀸 𑀘𑁂𑀢𑀦𑀸𑀲𑀗𑁆𑀔𑀸𑀢𑁄 𑀓𑀫𑁆𑀫𑀦𑁆𑀢𑁄 𑀳𑀢𑁆𑀣𑀧𑀸𑀤𑀘𑀮𑀦𑀸𑀤𑀺𑀓𑀁 𑀓𑀺𑀭𑀺𑀬𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀏𑀯𑀁 𑀲𑀸𑀯𑀚𑁆𑀚𑀓𑀢𑁆𑀢𑀩𑁆𑀩𑀓𑀺𑀭𑀺𑀬𑀸𑀲𑀫𑀼𑀝𑁆𑀞𑀸𑀧𑀓𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑀧𑁆𑀧𑀳𑀸𑀦𑁂𑀦 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀦𑀺𑀭𑀯𑀚𑁆𑀚𑀲𑀫𑀼𑀝𑁆𑀞𑀸𑀧𑀦𑀓𑀺𑀘𑁆𑀘𑀯𑀸 𑀳𑁄𑀢𑀺, 𑀲𑀫𑁆𑀧𑀬𑀼𑀢𑁆𑀢𑁂 𑀘 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑁄 𑀏𑀯 𑀧𑀯𑀢𑁆𑀢𑀢𑀻𑀢𑀺 𑀅𑀯𑀺𑀧𑀭𑀻𑀢𑀁 𑀲𑀫𑀼𑀝𑁆𑀞𑀸𑀧𑀦𑀲𑀪𑀸𑀯𑁄. 𑀲𑀫𑁆𑀫𑀸 𑀯𑁄𑀤𑀸𑀧𑀦𑀮𑀓𑁆𑀔𑀡𑁄𑀢𑀺 𑀓𑀸𑀬𑀯𑀸𑀘𑀸𑀦𑀁, 𑀔𑀦𑁆𑀥𑀲𑀦𑁆𑀢𑀸𑀦𑀲𑁆𑀲 𑀘 𑀲𑀁𑀓𑀺𑀮𑁂𑀲𑀪𑀽𑀢𑀫𑀺𑀘𑁆𑀙𑀸𑀚𑀻𑀯𑀧𑁆𑀧𑀳𑀸𑀦𑁂𑀦 𑀅𑀯𑀺𑀧𑀭𑀻𑀢𑀁 𑀯𑁄𑀤𑀸𑀧𑀦𑀲𑀪𑀸𑀯𑁄. 𑀲𑀫𑁆𑀫𑀸 𑀧𑀕𑁆𑀕𑀳𑀮𑀓𑁆𑀔𑀡𑁄𑀢𑀺 𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀲𑁆𑀲 𑀘𑀺𑀢𑁆𑀢𑀲𑁆𑀲 𑀲𑀁𑀓𑀺𑀮𑁂𑀲𑀧𑀓𑁆𑀔𑁂 𑀧𑀢𑀺𑀢𑀼𑀫𑀤𑀢𑁆𑀯𑀸 𑀅𑀯𑀺𑀧𑀭𑀻𑀢𑀁 𑀧𑀕𑁆𑀕𑀳𑀡𑀲𑀪𑀸𑀯𑁄. 𑀲𑀫𑁆𑀫𑀸 𑀉𑀧𑀝𑁆𑀞𑀸𑀦𑀮𑀓𑁆𑀔𑀡𑀸𑀢𑀺 𑀢𑀸𑀤𑀺𑀪𑀸𑀯𑀮𑀓𑁆𑀔𑀡𑁂𑀦 𑀅𑀯𑀺𑀧𑀭𑀻𑀢𑀁 𑀢𑀢𑁆𑀣 𑀉𑀧𑀝𑁆𑀞𑀸𑀦𑀲𑀪𑀸𑀯𑁄. 𑀲𑀫𑁆𑀫𑀸 𑀲𑀫𑀸𑀥𑀸𑀦𑀮𑀓𑁆𑀔𑀡𑁄𑀢𑀺 𑀯𑀺𑀓𑁆𑀔𑁂𑀧𑀯𑀺𑀤𑁆𑀥𑀁𑀲𑀦𑁂𑀦 𑀅𑀯𑀺𑀧𑀭𑀻𑀢𑀁 𑀘𑀺𑀢𑁆𑀢𑀲𑁆𑀲 𑀲𑀫𑀸𑀤𑀳𑀦𑀲𑀪𑀸𑀯𑁄.

𑀲𑀳𑀚𑁂𑀓𑀝𑁆𑀞𑀢𑀸𑀬 𑀤𑀺𑀝𑁆𑀞𑁂𑀓𑀝𑁆𑀞𑀸 𑀅𑀯𑀺𑀚𑁆𑀚𑀸𑀤𑀬𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀢𑁄 𑀅𑀜𑁆𑀜𑁂 𑀅𑀢𑁆𑀢𑀦𑁄 𑀧𑀘𑁆𑀘𑀦𑀻𑀓𑀓𑀺𑀮𑁂𑀲𑀸 𑀦𑀸𑀫. 𑀧𑀲𑁆𑀲𑀢𑀻𑀢𑀺 𑀧𑀓𑀸𑀲𑁂𑀢𑀺 𑀓𑀺𑀘𑁆𑀘𑀧𑀝𑀺𑀯𑁂𑀥𑁂𑀦 𑀧𑀝𑀺𑀯𑀺𑀚𑁆𑀛𑀢𑀺. 𑀢𑁂𑀦𑀸𑀳 ‘‘𑀢𑀧𑁆𑀧𑀝𑀺…𑀧𑁂… 𑀅𑀲𑀫𑁆𑀫𑁄𑀳𑀢𑁄’’𑀢𑀺. 𑀇𑀤𑀜𑁆𑀳𑀺 𑀢𑀲𑁆𑀲𑀸 𑀧𑀲𑁆𑀲𑀦𑀸𑀓𑀸𑀭𑀤𑀲𑁆𑀲𑀦𑀁. 𑀢𑁂𑀦𑁂𑀯 𑀳𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑁂𑀦 𑀅𑀗𑁆𑀕𑁂𑀦 𑀢𑀢𑁆𑀣 𑀧𑀘𑁆𑀘𑀯𑁂𑀓𑁆𑀔𑀡𑀸 𑀧𑀯𑀢𑁆𑀢𑀢𑀺. 𑀧𑀼𑀭𑀺𑀫𑀸𑀦𑀺 𑀤𑁆𑀯𑁂 𑀓𑀺𑀘𑁆𑀘𑀸𑀦𑀺 𑀲𑀩𑁆𑀩𑁂𑀲𑀫𑁂𑀯 𑀲𑀸𑀥𑀸𑀭𑀡𑀸𑀦𑀻𑀢𑀺 𑀆𑀳 ‘‘𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀬𑁄𑀧𑀻’’𑀢𑀺𑀆𑀤𑀺. ‘‘𑀢𑀣𑁂𑀯𑀸’’𑀢𑀺 𑀇𑀫𑀺𑀦𑀸 ‘‘𑀅𑀢𑁆𑀢𑀦𑁄 𑀧𑀘𑁆𑀘𑀦𑀻𑀓𑀓𑀺𑀮𑁂𑀲𑁂𑀳𑀺 𑀲𑀤𑁆𑀥𑀺’’𑀦𑁆𑀢𑀺 𑀇𑀤𑀫𑀦𑀼𑀓𑀟𑁆𑀠𑀢𑀺.

𑀧𑀼𑀩𑁆𑀩𑀪𑀸𑀕𑁂𑀢𑀺 𑀉𑀧𑀘𑀸𑀭𑀓𑁆𑀔𑀡𑁂. 𑀉𑀧𑀘𑀸𑀭𑀪𑀸𑀯𑀦𑀸𑀯𑀲𑁂𑀦 𑀅𑀦𑁂𑀓𑀯𑀸𑀭𑀁 𑀧𑀯𑀢𑁆𑀢𑀘𑀺𑀢𑁆𑀢𑀓𑁆𑀔𑀡𑀺𑀓𑀢𑁆𑀢𑀸 𑀦𑀸𑀦𑀓𑁆𑀔𑀡𑀸. 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀯𑀺𑀲𑀬𑀢𑁆𑀢𑀸 𑀦𑀸𑀦𑀸𑀭𑀫𑁆𑀫𑀡𑀸. 𑀫𑀕𑁆𑀕𑀲𑁆𑀲 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀢𑁆𑀢𑀸 𑀏𑀓𑀓𑁆𑀔𑀡𑀸. 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑁆𑀢𑀸 𑀏𑀓𑀸𑀭𑀫𑁆𑀫𑀡𑀸. 𑀓𑀺𑀘𑁆𑀘𑀢𑁄𑀢𑀺 𑀧𑀼𑀩𑁆𑀩𑀪𑀸𑀕𑁂 𑀤𑀼𑀓𑁆𑀔𑀸𑀤𑀺𑀜𑀸𑀡𑁂𑀳𑀺 𑀓𑀢𑁆𑀢𑀩𑁆𑀩𑁂𑀦 𑀇𑀥 𑀲𑀸𑀢𑀺𑀲𑀬𑀁 𑀦𑀺𑀩𑁆𑀩𑀢𑁆𑀢𑁂𑀦 𑀓𑀺𑀘𑁆𑀘𑁂𑀦, 𑀇𑀫𑀲𑁆𑀲𑁂𑀯 𑀯𑀸 𑀜𑀸𑀡𑀲𑁆𑀲 𑀤𑀼𑀓𑁆𑀔𑀸𑀤𑀺𑀧𑁆𑀧𑀓𑀸𑀲𑀦𑀓𑀺𑀘𑁆𑀘𑁂𑀦. 𑀘𑀢𑁆𑀢𑀸𑀭𑀺 𑀦𑀸𑀫𑀸𑀦𑀺 𑀮𑀪𑀢𑀺 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀓𑀸𑀢𑀩𑁆𑀩𑀓𑀺𑀘𑁆𑀘 𑀦𑀺𑀩𑁆𑀩𑀢𑁆𑀢𑀺𑀢𑁄.𑀢𑀻𑀡𑀺 𑀦𑀸𑀫𑀸𑀦𑀺 𑀮𑀪𑀢𑀺 𑀓𑀸𑀫𑀲𑀗𑁆𑀓𑀧𑁆𑀧𑀸𑀤𑀺𑀧𑁆𑀧𑀳𑀸𑀦𑀦𑀺𑀩𑁆𑀩𑀢𑁆𑀢𑀺𑀢𑁄. 𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑁂 ‘‘𑀯𑀺𑀭𑀢𑀺𑀘𑁂𑀢𑀦𑀸, 𑀲𑀩𑁆𑀩𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀘 𑀲𑀺𑀓𑁆𑀔𑀸𑀧𑀤𑀸𑀦𑀻’’𑀢𑀺 (𑀯𑀺𑀪. 𑁭𑁦𑁪) 𑀯𑀼𑀘𑁆𑀘𑀦𑁆𑀢𑀺. 𑀢𑀢𑁆𑀣 𑀧𑀦 𑀧𑀥𑀸𑀦𑀸𑀦𑀁 𑀯𑀺𑀭𑀢𑀺𑀘𑁂𑀢𑀦𑀸𑀦𑀁 𑀯𑀲𑁂𑀦 ‘‘𑀯𑀺𑀭𑀢𑀺𑀬𑁄𑀧𑀺 𑀳𑁄𑀦𑁆𑀢𑀺 𑀘𑁂𑀢𑀦𑀸𑀬𑁄𑀧𑀻’’𑀢𑀺 𑀯𑀼𑀢𑁆𑀢𑀁, 𑀫𑀼𑀲𑀸𑀯𑀸𑀤𑀸𑀤𑀻𑀳𑀺 𑀯𑀺𑀭𑀫𑀡𑀓𑀸𑀮𑁂 𑀯𑀸 𑀯𑀺𑀭𑀢𑀺𑀬𑁄, 𑀲𑀼𑀪𑀸𑀲𑀺𑀢𑀸𑀤𑀺𑀯𑀸𑀘𑀸𑀪𑀸𑀲𑀦𑀸𑀤𑀺𑀓𑀸𑀮𑁂 𑀘𑁂𑀢𑀦𑀸𑀬𑁄 𑀳𑁄𑀦𑁆𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀸. 𑀘𑁂𑀢𑀦𑀸𑀦𑀁 𑀅𑀫𑀕𑁆𑀕𑀗𑁆𑀕𑀢𑁆𑀢𑀸 ‘‘𑀫𑀕𑁆𑀕𑀓𑁆𑀔𑀡𑁂 𑀧𑀦 𑀯𑀺𑀭𑀢𑀺𑀬𑁄𑀯𑀸’’𑀢𑀺 𑀆𑀳. 𑀏𑀓𑀲𑁆𑀲𑁂𑀯 𑀜𑀸𑀡𑀲𑁆𑀲 𑀤𑀼𑀓𑁆𑀔𑀸𑀤𑀺𑀜𑀸𑀡𑀢𑀸 𑀯𑀺𑀬, 𑀏𑀓𑀸𑀬𑁂𑀯 𑀯𑀺𑀭𑀢𑀺𑀬𑀸 𑀫𑀼𑀲𑀸𑀯𑀸𑀤𑀸𑀤𑀺𑀯𑀺𑀭𑀢𑀺𑀪𑀸𑀯𑁄 𑀯𑀺𑀬 𑀘 𑀏𑀓𑀸𑀬 𑀏𑀯 𑀘𑁂𑀢𑀦𑀸𑀬 𑀲𑀫𑁆𑀫𑀸𑀯𑀸𑀘𑀸𑀤𑀺𑀓𑀺𑀘𑁆𑀘𑀢𑁆𑀢𑀬𑀲𑀸𑀥𑀦𑀸𑀲𑀫𑁆𑀪𑀯𑁂𑀦 𑀲𑀫𑁆𑀫𑀸𑀯𑀸𑀘𑀸𑀤𑀺𑀪𑀸𑀯𑀸𑀲𑀺𑀤𑁆𑀥𑀺𑀢𑁄, 𑀢𑀁𑀲𑀺𑀤𑁆𑀥𑀺𑀬𑀜𑁆𑀘 𑀅𑀗𑁆𑀕𑀢𑁆𑀢𑀬𑀢𑁆𑀢𑀸𑀲𑀺𑀤𑁆𑀥𑀺𑀢𑁄 𑀘 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺𑀧𑀺 𑀤𑀝𑁆𑀞𑀩𑁆𑀩𑀁. 𑀇𑀫𑀺𑀦𑀸 𑀘𑁂𑀢𑀸𑀲𑀁 𑀤𑀼𑀯𑀺𑀥𑀢𑀁, 𑀅𑀪𑁂𑀤𑀢𑀜𑁆𑀘 𑀤𑀲𑁆𑀲𑁂𑀢𑀺. 𑀲𑀫𑁆𑀫𑀧𑁆𑀧𑀥𑀸𑀦𑀲𑀢𑀺𑀧𑀝𑁆𑀞𑀸𑀦𑀯𑀲𑁂𑀦𑀸𑀢𑀺 𑀘𑀢𑀼𑀲𑀫𑁆𑀫𑀧𑁆𑀧𑀥𑀸𑀦𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀯𑀲𑁂𑀦.

𑀬𑀤𑀺𑀧𑀺 𑀲𑀫𑀸𑀥𑀺𑀉𑀧𑀓𑀸𑀭𑀓𑀸𑀦𑀁 𑀅𑀪𑀺𑀦𑀺𑀭𑁄𑀧𑀦𑀸 𑀦𑀼𑀫𑀚𑁆𑀚𑀦𑀲𑀫𑁆𑀧𑀺𑀬𑀸𑀬𑀦𑀼 𑀧𑀩𑁆𑀭𑀽𑀳𑀦𑀲𑀦𑁆𑀢𑀸𑀦𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑁄𑀧𑁂𑀓𑁆𑀔𑀸𑀦𑀁 𑀯𑀲𑁂𑀦 𑀘𑀢𑀽𑀳𑀺 𑀛𑀸𑀦𑁂𑀳𑀺 𑀲𑀫𑁆𑀫𑀸𑀲𑀫𑀸𑀥𑀺 𑀯𑀺𑀪𑀢𑁆𑀢𑁄, 𑀢𑀣𑀸𑀧𑀺 𑀯𑀸𑀬𑀸𑀫𑁄 𑀯𑀺𑀬 𑀅𑀦𑀼𑀧𑁆𑀧𑀦𑁆𑀦𑀸𑀓𑀼𑀲𑀮𑀸𑀦𑀼𑀧𑁆𑀧𑀸𑀤𑀦𑀸𑀤𑀺𑀘𑀢𑀼𑀯𑀸𑀬𑀸𑀫𑀓𑀺𑀘𑁆𑀘𑀁, 𑀲𑀢𑀺 𑀯𑀺𑀬 𑀘 𑀅𑀲𑀼𑀪𑀸𑀲𑀼𑀔𑀸𑀦𑀺𑀘𑁆𑀘𑀸𑀦𑀢𑁆𑀢𑀪𑀽𑀢𑁂𑀲𑀼 𑀓𑀸𑀬𑀸𑀤𑀻𑀲𑀼 𑀲𑀼𑀪𑀸𑀤𑀺𑀲𑀜𑁆𑀜𑀸𑀧𑀳𑀸𑀦𑀘𑀢𑀼𑀲𑀢𑀺𑀓𑀺𑀘𑁆𑀘𑀁 𑀏𑀓𑁄𑀯 𑀲𑀫𑀸𑀥𑀺 𑀘𑀢𑀼𑀓𑁆𑀓𑀚𑁆𑀛𑀸𑀦𑀲𑀫𑀸𑀥𑀺𑀓𑀺𑀘𑁆𑀘𑀁 𑀦 𑀲𑀸𑀥𑁂𑀢𑀺. 𑀢𑀲𑁆𑀫𑀸 𑀧𑀼𑀩𑁆𑀩𑀪𑀸𑀕𑁂𑀧𑀺 𑀧𑀞𑀫𑀚𑁆𑀛𑀸𑀦𑀲𑀫𑀸𑀥𑀺 𑀧𑀞𑀫𑀚𑁆𑀛𑀸𑀦𑀲𑀫𑀸𑀥𑀺 𑀏𑀯. 𑀢𑀣𑀸 𑀫𑀕𑁆𑀕𑀓𑁆𑀔𑀡𑁂𑀧𑀺 𑀧𑀼𑀩𑁆𑀩𑀪𑀸𑀕𑁂𑀧𑀺 𑀤𑀼𑀢𑀺𑀬𑀚𑁆𑀛𑀸𑀦𑀲𑀫𑀸𑀥𑀺 𑀤𑀼𑀢𑀺𑀬𑀚𑁆𑀛𑀸𑀦𑀲𑀫𑀸𑀥𑀺 𑀏𑀯. 𑀢𑀣𑀸 𑀫𑀕𑁆𑀕𑀓𑁆𑀔𑀡𑁂𑀧𑀺 𑀧𑀼𑀩𑁆𑀩𑀪𑀸𑀕𑁂𑀧𑀺 𑀢𑀢𑀺𑀬𑀚𑁆𑀛𑀸𑀦𑀲𑀫𑀸𑀥𑀺 𑀢𑀢𑀺𑀬𑀚𑁆𑀛𑀸𑀦𑀲𑀫𑀸𑀥𑀺 𑀏𑀯. 𑀢𑀣𑀸 𑀫𑀕𑁆𑀕𑀓𑁆𑀔𑀡𑁂𑀧𑀺 𑀧𑀼𑀩𑁆𑀩𑀪𑀸𑀕𑁂𑀧𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀺 𑀏𑀯. 𑀢𑀣𑀸 𑀫𑀕𑁆𑀕𑀓𑁆𑀔𑀡𑁂𑀧𑀻𑀢𑀺 𑀆𑀳 ‘‘𑀧𑀼𑀩𑁆𑀩𑀪𑀸𑀕𑁂𑀧𑀺 𑀫𑀕𑁆𑀕𑀓𑁆𑀔𑀡𑁂𑀧𑀺 𑀲𑀫𑁆𑀫𑀸𑀲𑀫𑀸𑀥𑀺𑀬𑁂𑀯𑀸’’𑀢𑀺.

𑀢𑀲𑁆𑀫𑀸𑀢𑀺 𑀧𑀜𑁆𑀜𑀸𑀧𑀚𑁆𑀚𑁄𑀢𑀢𑁆𑀢𑀸 𑀅𑀯𑀺𑀚𑁆𑀚𑀸𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸 𑀧𑀜𑁆𑀜𑀸𑀲𑀢𑁆𑀣𑀢𑁆𑀢𑀸 𑀓𑀺𑀮𑁂𑀲𑀘𑁄𑀭𑁂 𑀖𑀸𑀢𑁂𑀦𑁆𑀢𑁄𑀢𑀺 𑀬𑀣𑀸𑀭𑀳𑀁 𑀬𑁄𑀚𑁂𑀢𑀩𑁆𑀩𑀁. 𑀬𑀲𑁆𑀫𑀸 𑀧𑀦 𑀅𑀦𑀸𑀤𑀺𑀫𑀢𑀺 𑀲𑀁𑀲𑀸𑀭𑁂 𑀇𑀫𑀺𑀦𑀸 𑀬𑁄𑀕𑀺𑀦𑀸 𑀓𑀤𑀸𑀘𑀺𑀧𑀺 𑀅𑀲𑀫𑀼𑀕𑁆𑀖𑀸𑀝𑀺𑀢𑀧𑀼𑀩𑁆𑀩𑁄 𑀓𑀺𑀮𑁂𑀲𑀕𑀡𑁄, 𑀢𑀲𑁆𑀲 𑀲𑀫𑀼𑀕𑁆𑀖𑀸𑀝𑀓𑁄 𑀘 𑀅𑀭𑀺𑀬𑀫𑀕𑁆𑀕𑁄. 𑀅𑀬𑀜𑁆𑀘𑁂𑀢𑁆𑀣 𑀲𑀫𑁆𑀫𑀸𑀤𑀺𑀝𑁆𑀞𑀺 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀧𑀼𑀩𑁆𑀩𑀗𑁆𑀕𑀫𑀸 𑀳𑁄𑀢𑀺 𑀩𑀳𑀽𑀧𑀓𑀸𑀭𑀸, 𑀢𑀲𑁆𑀫𑀸. 𑀢𑀤𑁂𑀯 𑀩𑀳𑀽𑀧𑀓𑀸𑀭𑀢𑀁 𑀓𑀸𑀭𑀡𑀪𑀸𑀯𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀬𑁄𑀕𑀺𑀦𑁄 𑀩𑀳𑀽𑀧𑀓𑀸𑀭𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁.

𑀢𑀲𑁆𑀲𑀸𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸. ‘‘𑀩𑀳𑀽𑀧𑀓𑀸𑀭𑁄’’𑀢𑀺 𑀯𑀢𑁆𑀯𑀸 𑀢𑀁 𑀩𑀳𑀽𑀧𑀓𑀸𑀭𑀢𑀁 𑀉𑀧𑀫𑀸𑀬 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀬𑀣𑀸 𑀳𑀻’’𑀢𑀺𑀆𑀤𑀺𑀫𑀸𑀳. 𑀅𑀬𑀁 𑀢𑀫𑁆𑀩𑀓𑀁𑀲𑀸𑀤𑀺𑀫𑀬𑀢𑁆𑀢𑀸 𑀓𑀽𑀝𑁄. 𑀢𑀁𑀧𑀭𑀺𑀳𑀭𑀡𑀢𑁄 𑀫𑀳𑀸𑀲𑀸𑀭𑀢𑀸𑀬 𑀙𑁂𑀓𑁄. 𑀏𑀯𑀦𑁆𑀢𑀺 𑀬𑀣𑀸 𑀳𑁂𑀭𑀜𑁆𑀜𑀺𑀓𑀲𑁆𑀲 𑀘𑀓𑁆𑀔𑀼𑀦𑀸 𑀤𑀺𑀲𑁆𑀯𑀸 𑀓𑀳𑀸𑀧𑀡𑀯𑀺𑀪𑀸𑀕𑀚𑀸𑀦𑀦𑁂 𑀓𑀺𑀭𑀺𑀬𑀸𑀲𑀸𑀥𑀓𑀢𑀫𑀪𑀸𑀯𑁂𑀦 𑀓𑀭𑀡𑀦𑁆𑀢𑀭𑀁 𑀩𑀳𑀼𑀓𑀸𑀭𑀁 𑀬𑀤𑀺𑀤𑀁 𑀳𑀢𑁆𑀣𑁄, 𑀏𑀯𑀁 𑀬𑁄𑀕𑀺𑀦𑁄 𑀧𑀜𑁆𑀜𑀸𑀬 𑀑𑀮𑁄𑀓𑁂𑀢𑁆𑀯𑀸 𑀥𑀫𑁆𑀫𑀯𑀺𑀪𑀸𑀕𑀚𑀸𑀦𑀦𑁂 𑀧𑀼𑀩𑁆𑀩𑀘𑀸𑀭𑀻𑀪𑀸𑀯𑁂𑀦 𑀥𑀫𑁆𑀫𑀦𑁆𑀢𑀭𑀁 𑀩𑀳𑀼𑀓𑀸𑀭𑀁 𑀬𑀤𑀺𑀤𑀁 𑀯𑀺𑀢𑀓𑁆𑀓𑁄 𑀯𑀺𑀢𑀓𑁆𑀓𑁂𑀢𑁆𑀯𑀸𑀯 𑀧𑀜𑁆𑀜𑀸𑀬 𑀢𑀤𑀯𑀩𑁄𑀥𑀢𑁄. 𑀢𑀲𑁆𑀫𑀸 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀩𑀳𑀼𑀓𑀸𑀭𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑀼𑀢𑀺𑀬𑀉𑀧𑀫𑀸𑀬𑀁 𑀏𑀯𑀦𑁆𑀢𑀺 𑀬𑀣𑀸 𑀢𑀘𑁆𑀙𑀓𑁄 𑀧𑀭𑁂𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀤𑀺𑀦𑁆𑀦𑀁 𑀤𑀩𑁆𑀩𑀲𑀫𑁆𑀪𑀸𑀭𑀁 𑀯𑀸𑀲𑀺𑀬𑀸 𑀢𑀘𑁆𑀙𑁂𑀢𑁆𑀯𑀸 𑀕𑁂𑀳𑀸𑀤𑀺𑀓𑀭𑀡𑀓𑀫𑁆𑀫𑁂 𑀉𑀧𑀦𑁂𑀢𑀺, 𑀏𑀯𑀁 𑀬𑁄𑀕𑀻 𑀯𑀺𑀢𑀓𑁆𑀓𑁂𑀦 𑀮𑀓𑁆𑀔𑀡𑀸𑀤𑀺𑀢𑁄 𑀯𑀺𑀢𑀓𑁆𑀓𑁂𑀢𑁆𑀯𑀸 𑀤𑀺𑀦𑁆𑀦𑀥𑀫𑁆𑀫𑁂 𑀬𑀸𑀣𑀸𑀯𑀢𑁄 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀸𑀤𑀺𑀓𑀫𑁆𑀫𑁂 𑀉𑀧𑀦𑁂𑀢𑀻𑀢𑀺 𑀬𑁄𑀚𑀦𑀸. 𑀯𑀘𑀻𑀪𑁂𑀤𑀲𑁆𑀲 𑀉𑀧𑀓𑀸𑀭𑀓𑁄 𑀯𑀺𑀢𑀓𑁆𑀓𑁄 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀯𑀘𑀻𑀪𑁂𑀤𑁂 𑀦𑀺𑀯𑀢𑁆𑀢𑀦𑀧𑀯𑀢𑁆𑀢𑀦𑀓𑀭𑀸𑀬 𑀲𑀫𑁆𑀫𑀸𑀯𑀸𑀘𑀸𑀬𑀧𑀺 𑀉𑀧𑀓𑀸𑀭𑀓𑁄𑀯𑀸𑀢𑀺 𑀆𑀳 ‘‘𑀲𑁆𑀯𑀸𑀬’’𑀦𑁆𑀢𑀺𑀆𑀤𑀺. ‘‘𑀬𑀣𑀸𑀳𑀸’’𑀢𑀺𑀆𑀤𑀺𑀦𑀸 𑀥𑀫𑁆𑀫𑀤𑀺𑀦𑁆𑀦𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀯𑀺𑀲𑀸𑀔𑀲𑁆𑀲 𑀦𑀸𑀫 𑀕𑀳𑀧𑀢𑀺𑀦𑁄 𑀯𑀼𑀢𑁆𑀢𑀁 𑀘𑀽𑀴𑀯𑁂𑀤𑀮𑁆𑀮𑀲𑀼𑀢𑁆𑀢𑀧𑀤𑀁 (𑀫. 𑀦𑀺. 𑁧.𑁪𑁬𑁪) 𑀲𑀸𑀥𑀓𑀪𑀸𑀯𑁂𑀦 𑀤𑀲𑁆𑀲𑁂𑀢𑀺. 𑀪𑀺𑀦𑁆𑀤𑀢𑀻𑀢𑀺 𑀦𑀺𑀘𑁆𑀙𑀸𑀭𑁂𑀢𑀺.

𑀯𑀘𑀻𑀪𑁂𑀤𑀦𑀺𑀬𑀸𑀫𑀺𑀓𑀸 𑀯𑀸𑀘𑀸 𑀓𑀸𑀬𑀺𑀓𑀓𑀺𑀭𑀺𑀬𑀸𑀦𑀺𑀬𑀸𑀫𑀓𑀲𑁆𑀲 𑀓𑀫𑁆𑀫𑀦𑁆𑀢𑀲𑁆𑀲 𑀉𑀧𑀓𑀸𑀭𑀺𑀓𑀸𑀢𑀺 𑀢𑀤𑀢𑁆𑀣𑀁 𑀮𑁄𑀓𑀢𑁄 𑀧𑀸𑀓𑀝𑀁 𑀓𑀸𑀢𑀼𑀁 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀉𑀪𑀬𑀁 𑀲𑀼𑀘𑀭𑀺𑀢𑀦𑁆𑀢𑀺 𑀓𑀸𑀬𑀲𑀼𑀘𑀭𑀺𑀢𑀁, 𑀯𑀘𑀻𑀲𑀼𑀘𑀭𑀺𑀢𑀜𑁆𑀘. 𑀆𑀚𑀻𑀯𑀝𑁆𑀞𑀫𑀓𑀲𑀻𑀮𑀁 𑀦𑀸𑀫 𑀘𑀢𑀼𑀩𑁆𑀩𑀺𑀥𑀯𑀘𑀻𑀲𑀼𑀘𑀭𑀺𑀢𑀢𑀺𑀯𑀺𑀥𑀓𑀸𑀬𑀲𑀼𑀘𑀭𑀺𑀢𑁂𑀳𑀺 𑀲𑀤𑁆𑀥𑀺𑀁 𑀲𑀫𑁆𑀫𑀸𑀆𑀚𑀻𑀯𑀁 𑀅𑀝𑁆𑀞𑀫𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀲𑀻𑀮𑀁. 𑀬𑀜𑁆𑀳𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀧𑀼𑀩𑁆𑀩𑁂𑀯 𑀔𑁄 𑀧𑀦𑀲𑁆𑀲 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀆𑀚𑀻𑀯𑁄 𑀲𑀼𑀧𑀭𑀺𑀲𑀼𑀤𑁆𑀥𑁄 𑀳𑁄𑀢𑀻’’𑀢𑀺. 𑀢𑀤𑀼𑀪𑀬𑀸𑀦𑀦𑁆𑀢𑀭𑀦𑁆𑀢𑀺 𑀤𑀼𑀘𑁆𑀘𑀭𑀺𑀢𑀤𑁆𑀯𑀬𑀧𑁆𑀧𑀳𑀸𑀬𑀓𑀲𑁆𑀲 𑀲𑀼𑀘𑀭𑀺𑀢𑀤𑁆𑀯𑀬𑀧𑀸𑀭𑀺𑀧𑀽𑀭𑀺𑀳𑁂𑀢𑀼𑀪𑀽𑀢𑀲𑁆𑀲 𑀲𑀫𑁆𑀫𑀸𑀯𑀸𑀘𑀸𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀤𑁆𑀯𑀬𑀲𑁆𑀲 𑀅𑀦𑀦𑁆𑀢𑀭𑀁. 𑀲𑀼𑀢𑁆𑀢𑀧𑀫𑀢𑁆𑀢𑁂𑀦𑀸𑀢𑀺 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀁 𑀲𑀼𑀢𑁆𑀢𑁂𑀦, 𑀧𑀫𑀢𑁆𑀢𑁂𑀦 𑀘. 𑀇𑀤𑀁 𑀯𑀻𑀭𑀺𑀬𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁 𑀲𑀫𑁆𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑀁. 𑀓𑀸𑀬𑀸𑀤𑀻𑀲𑀽𑀢𑀺 𑀓𑀸𑀬𑀯𑁂𑀤𑀦𑀸𑀘𑀺𑀢𑁆𑀢𑀥𑀫𑁆𑀫𑁂𑀲𑀼. 𑀇𑀦𑁆𑀤𑁆𑀭𑀺𑀬𑀲𑀫𑀢𑀸𑀤𑀬𑁄 𑀲𑀫𑀸𑀥𑀺𑀲𑁆𑀲 𑀉𑀧𑀓𑀸𑀭𑀓𑀸. 𑀢𑀩𑁆𑀩𑀺𑀥𑀼𑀭𑀸 𑀥𑀫𑁆𑀫𑀸 𑀅𑀦𑀼𑀧𑀓𑀸𑀭𑀓𑀸. 𑀕𑀢𑀺𑀬𑁄𑀢𑀺 𑀦𑀺𑀧𑁆𑀨𑀢𑁆𑀢𑀺𑀬𑁄, 𑀓𑀺𑀘𑁆𑀘𑀸𑀤𑀺𑀲𑀪𑀸𑀯𑁂 𑀯𑀸. 𑀲𑀫𑀦𑁆𑀯𑁂𑀲𑀺𑀢𑁆𑀯𑀸𑀢𑀺 𑀉𑀧𑀥𑀸𑀭𑁂𑀢𑁆𑀯𑀸, 𑀳𑁂𑀢𑀼𑀫𑁆𑀳𑀺 𑀘𑀸𑀬𑀁 𑀢𑁆𑀯𑀸𑀧𑀘𑁆𑀘𑀬𑁄.

𑀤𑁆𑀯𑁂𑀧𑀩𑁆𑀩𑀚𑀺𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑁩𑁭𑁬-𑁭. 𑀓𑀲𑁆𑀫𑀸 𑀆𑀭𑀤𑁆𑀥𑀦𑁆𑀢𑀺 𑀅𑀦𑀼𑀲𑀦𑁆𑀥𑀺𑀓𑀸𑀭𑀡𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑀁 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 ‘‘𑀅𑀬𑀁 𑀓𑀺𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁 𑀢𑁂𑀦 𑀅𑀚𑁆𑀛𑀸𑀲𑀬𑀸𑀦𑀼𑀲𑀦𑁆𑀥𑀺𑀯𑀲𑁂𑀦𑀸𑀬𑀁 𑀉𑀧𑀭𑀺 𑀤𑁂𑀲𑀦𑀸 𑀧𑀯𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀢𑀺 𑀢𑀣𑀸𑀮𑀤𑁆𑀥𑀺𑀓𑀢𑁆𑀢𑀸. 𑀅𑀲𑁆𑀲𑀸𑀢𑀺 𑀮𑀺𑀘𑁆𑀙𑀯𑀺𑀭𑀜𑁆𑀜𑁄. 𑀤𑁂𑀲𑀦𑀸𑀬𑀦𑁆𑀢𑀺 𑀲𑀡𑁆𑀳𑀲𑀼𑀔𑀼𑀫𑀸𑀬 𑀲𑀼𑀜𑁆𑀜𑀢𑀧𑀝𑀺𑀲𑀜𑁆𑀜𑀼𑀢𑁆𑀢𑀸𑀬 𑀬𑀣𑀸𑀤𑁂𑀲𑀺𑀢𑀤𑁂𑀲𑀦𑀸𑀬. 𑀦𑀸𑀥𑀺𑀫𑀼𑀘𑁆𑀘𑀢𑀻𑀢𑀺 𑀦 𑀲𑀤𑁆𑀤𑀳𑀢𑀺 𑀦 𑀧𑀲𑀻𑀤𑀢𑀺. 𑀢𑀦𑁆𑀢𑀺𑀥𑀫𑁆𑀫𑀁 𑀦𑀸𑀫 𑀓𑀣𑁂𑀦𑁆𑀢𑁄𑀢𑀺 𑀬𑁂𑀲𑀁 𑀅𑀢𑁆𑀣𑀸𑀬 𑀥𑀫𑁆𑀫𑁄 𑀓𑀣𑀻𑀬𑀢𑀺, 𑀢𑀢𑁆𑀣 𑀢𑁂𑀲𑀁 𑀅𑀲𑀢𑀺𑀧𑀺 𑀫𑀕𑁆𑀕𑀧𑀝𑀺𑀯𑁂𑀥𑁂 𑀓𑁂𑀯𑀮𑀁 𑀲𑀸𑀲𑀦𑁂 𑀧𑀯𑁂𑀡𑀻𑀪𑀽𑀢𑀁, 𑀧𑀭𑀺𑀬𑀢𑁆𑀢𑀺𑀪𑀽𑀢𑀁 𑀯𑀸 𑀢𑀦𑁆𑀢𑀺𑀥𑀫𑁆𑀫𑀁 𑀓𑀢𑁆𑀯𑀸 𑀓𑀣𑁂𑀦𑁆𑀢𑁄, 𑀢𑁂𑀦 𑀢𑀤𑀸 𑀢𑁂𑀲𑀁 𑀫𑀕𑁆𑀕𑀧𑀝𑀺𑀯𑁂𑀥𑀸𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀏𑀯𑀭𑀽𑀧𑀲𑁆𑀲𑀸𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑁆𑀢𑀸 𑀅𑀯𑀺𑀧𑀭𑀻𑀢𑀤𑁂𑀲𑀦𑀢𑀸𑀬 𑀏𑀯𑀁𑀧𑀸𑀓𑀝𑀥𑀫𑁆𑀫𑀓𑀸𑀬𑀲𑁆𑀲 𑀲𑀢𑁆𑀣𑀼𑀦𑁄. 𑀅𑀲𑁆𑀲𑀸𑀢𑀺 𑀧𑀞𑀫𑀚𑁆𑀛𑀸𑀦𑀸𑀤𑀺𑀲𑀫𑀥𑀺𑀕𑀫𑁂𑀦 𑀲𑀫𑀸𑀳𑀺𑀢𑀘𑀺𑀢𑁆𑀢𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀏𑀢𑀁 ‘‘𑀢𑀁 𑀚𑀻𑀯’’𑀦𑁆𑀢𑀺𑀆𑀤𑀺𑀦𑀸 𑀉𑀘𑁆𑀙𑁂𑀤𑀸𑀤𑀺𑀕𑀳𑀡𑀁 𑀅𑀧𑀺 𑀦𑀼 𑀬𑀼𑀢𑁆𑀢𑀦𑁆𑀢𑀺 𑀧𑀼𑀘𑁆𑀙𑀢𑀺, 𑀮𑀤𑁆𑀥𑀺𑀬𑀸 𑀧𑀦 𑀛𑀸𑀦𑀸𑀥𑀺𑀕𑀫𑀫𑀢𑁆𑀢𑁂𑀦 𑀦 𑀢𑀸𑀯 𑀯𑀺𑀯𑁂𑀘𑀺𑀢𑀢𑁆𑀢𑀸 ‘‘𑀬𑀼𑀢𑁆𑀢𑀫𑀲𑁆𑀲𑁂𑀢’’𑀦𑁆𑀢𑀺 𑀢𑁂𑀳𑀺 𑀯𑀼𑀢𑁆𑀢𑁂 𑀛𑀸𑀦𑀮𑀸𑀪𑀺𑀦𑁄𑀧𑁂𑀢𑀁 𑀕𑀳𑀡𑀁 𑀅𑀬𑀼𑀢𑁆𑀢𑀫𑁂𑀯𑀸𑀢𑀺 𑀢𑀁 𑀉𑀘𑁆𑀙𑁂𑀤𑀯𑀸𑀤𑀁, 𑀲𑀲𑁆𑀲𑀢𑀯𑀸𑀤𑀁 𑀯𑀸 ‘‘𑀅𑀳𑀁 𑀔𑁄…𑀧𑁂… 𑀦 𑀯𑀤𑀸𑀫𑀻’’𑀢𑀺𑀆𑀤𑀺𑀦𑀸 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀲𑀸𑀥𑀺𑀧𑁆𑀧𑀸𑀬𑀢𑁆𑀣𑁄. 𑀏𑀢𑀦𑁆𑀢𑀺 𑀧𑀞𑀫𑀚𑁆𑀛𑀸𑀦𑀸𑀤𑀺𑀓𑀁. 𑀏𑀯𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀦𑀬𑁂𑀦. 𑀅𑀣 𑀘 𑀧𑀦𑀸𑀢𑀺 𑀏𑀯𑀁 𑀚𑀸𑀦𑀦𑀢𑁄, 𑀧𑀲𑁆𑀲𑀦𑀢𑁄 𑀘. 𑀓𑀸𑀫𑀁 𑀯𑀺𑀧𑀲𑁆𑀲𑀓𑀸𑀤𑀺𑀤𑀲𑁆𑀲𑀦𑀫𑁆𑀧𑀺 𑀧𑀸𑀴𑀺𑀬𑀁 𑀓𑀢𑀁, 𑀅𑀭𑀳𑀢𑁆𑀢𑀓𑀽𑀝𑁂𑀦 𑀧𑀦 𑀤𑁂𑀲𑀦𑀸 𑀦𑀺𑀝𑁆𑀞𑀸𑀧𑀺𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀉𑀢𑁆𑀢𑀭𑀺 𑀔𑀻𑀡𑀸𑀲𑀯𑀁 𑀤𑀲𑁆𑀲𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀢𑁂 𑀳𑀺 𑀤𑁆𑀯𑁂 𑀧𑀩𑁆𑀩𑀚𑀺𑀢𑀸 𑀯𑀺𑀧𑀲𑁆𑀲𑀓𑀢𑁄 𑀧𑀝𑁆𑀞𑀸𑀬 ‘‘𑀦 𑀓𑀮𑁆𑀮𑀁 𑀢𑀲𑁆𑀲𑁂𑀢𑀁 𑀯𑀘𑀦𑀸𑀬𑀸’’𑀢𑀺 𑀅𑀯𑁄𑀘𑀼𑀁. 𑀇𑀫𑀲𑁆𑀲𑀸𑀢𑀺 𑀔𑀻𑀡𑀸𑀲𑀯𑀲𑁆𑀲. 𑀓𑀺𑀜𑁆𑀘𑀸𑀧𑀺 ‘‘𑀅𑀢𑁆𑀢𑀫𑀦𑀸 𑀅𑀳𑁂𑀲𑀼’’𑀦𑁆𑀢𑀺 𑀧𑀸𑀴𑀺𑀬𑀁 𑀦 𑀯𑀼𑀢𑁆𑀢𑀁, ‘‘𑀦 𑀓𑀮𑁆𑀮’’𑀦𑁆𑀢𑀺𑀆𑀤𑀺𑀦𑀸 𑀧𑀦 𑀯𑀺𑀲𑁆𑀲𑀚𑁆𑀚𑀦𑀸𑀯𑀘𑀦𑁂𑀦𑁂𑀯 𑀢𑁂𑀲𑀁 𑀅𑀢𑁆𑀢𑀫𑀦𑀢𑀸 𑀯𑁂𑀤𑀺𑀢𑀩𑁆𑀩𑀸𑀢𑀺 𑀆𑀳 ‘‘𑀢𑁂 𑀫𑀫𑀸’’𑀢𑀺𑀆𑀤𑀺. 𑀢𑀢𑁆𑀣 𑀬𑀲𑁆𑀫𑀸 𑀔𑀻𑀡𑀸𑀲𑀯𑁄 𑀯𑀺𑀕𑀢𑀲𑀫𑁆𑀫𑁄𑀳𑁄 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄, 𑀢𑀲𑁆𑀫𑀸 𑀢𑀲𑁆𑀲 𑀢𑀣𑀸 𑀯𑀢𑁆𑀢𑀼𑀫𑀬𑀼𑀢𑁆𑀢𑀦𑁆𑀢𑀺 𑀉𑀧𑁆𑀧𑀦𑁆𑀦𑀦𑀺𑀘𑁆𑀙𑀬𑀢𑀸𑀬 𑀢𑀁 𑀫𑀫 𑀯𑀘𑀦𑀁 𑀲𑀼𑀢𑁆𑀯𑀸 𑀅𑀢𑁆𑀢𑀫𑀦𑀸 𑀅𑀳𑁂𑀲𑀼𑀦𑁆𑀢𑀺 𑀅𑀢𑁆𑀣𑁄. 𑀲𑁄𑀧𑀺 𑀔𑁄 𑀮𑀺𑀘𑁆𑀙𑀯𑀺 𑀭𑀸𑀚𑀸 𑀢𑁂 𑀯𑀺𑀬 𑀢𑀣𑀸𑀲𑀜𑁆𑀚𑀸𑀢𑀦𑀺𑀘𑁆𑀙𑀬𑀢𑁆𑀢𑀸 𑀅𑀢𑁆𑀢𑀫𑀦𑁄 𑀅𑀳𑁄𑀲𑀺. 𑀢𑁂𑀦𑀸𑀳 ‘‘𑀏𑀯𑀁 𑀯𑀼𑀢𑁆𑀢𑁂 𑀲𑁄𑀧𑀺 𑀅𑀢𑁆𑀢𑀫𑀦𑁄 𑀅𑀳𑁄𑀲𑀻’’𑀢𑀺. 𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀢𑁄 𑀅𑀯𑀺𑀪𑀢𑁆𑀢𑀁, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀇𑀢𑀺 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬 𑀧𑀭𑀫𑀲𑀼𑀔𑀼𑀫𑀕𑀫𑁆𑀪𑀻𑀭𑀤𑀼𑀭𑀦𑀼𑀩𑁄𑀥𑀢𑁆𑀣𑀧𑀭𑀺𑀤𑀻𑀧𑀦𑀸𑀬 𑀲𑀼𑀯𑀺𑀫𑀮𑀯𑀺𑀧𑀼𑀮𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀚𑀦𑀦𑀸𑀬 𑀲𑀸𑀥𑀼𑀯𑀺𑀮𑀸𑀲𑀺𑀦𑀺𑀬𑀸 𑀦𑀸𑀫 𑀮𑀻𑀦𑀢𑁆𑀣𑀧𑀓𑀸𑀲𑀦𑀺𑀬𑀸 𑀫𑀳𑀸𑀮𑀺𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑀓𑀸𑀲𑀦𑀸.

𑀫𑀳𑀸𑀮𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.