𑁫. 𑀓𑀽𑀝𑀤𑀦𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁨𑁩. 𑀏𑀯𑀁 𑀲𑁄𑀡𑀤𑀡𑁆𑀟𑀲𑀼𑀢𑁆𑀢𑀁 𑀲𑀁𑀯𑀡𑁆𑀡𑁂𑀢𑁆𑀯𑀸 𑀇𑀤𑀸𑀦𑀺 𑀓𑀽𑀝𑀤𑀦𑁆𑀢𑀲𑀼𑀢𑁆𑀢𑀁 𑀲𑀁𑀯𑀡𑁆𑀡𑁂𑀦𑁆𑀢𑁄 𑀬𑀣𑀸𑀦𑀼𑀧𑀼𑀩𑁆𑀩𑀁 𑀲𑀁𑀯𑀡𑁆𑀡𑀦𑁄𑀓𑀸𑀲𑀲𑁆𑀲 𑀧𑀢𑁆𑀢𑀪𑀸𑀯𑀁 𑀯𑀺𑀪𑀸𑀯𑁂𑀢𑀼𑀁, 𑀲𑁄𑀡𑀤𑀡𑁆𑀟 𑀲𑀼𑀢𑁆𑀢𑀲𑁆𑀲𑀸𑀦𑀦𑁆𑀢𑀭𑀁 𑀲𑀗𑁆𑀕𑀻𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀓𑀽𑀝𑀤𑀦𑁆𑀢𑀲𑀼𑀢𑁆𑀢𑀪𑀸𑀯𑀁 𑀯𑀸 𑀧𑀓𑀸𑀲𑁂𑀢𑀼𑀁 ‘‘𑀏𑀯𑀁 𑀫𑁂 𑀲𑀼𑀢𑀁…𑀧𑁂… 𑀫𑀕𑀥𑁂𑀲𑀽𑀢𑀺 𑀓𑀽𑀝𑀤𑀦𑁆𑀢𑀲𑀼𑀢𑁆𑀢’’𑀦𑁆𑀢𑀺 𑀆𑀳. ‘‘𑀫𑀕𑀥𑀸 𑀦𑀸𑀫 𑀚𑀦𑀧𑀤𑀺𑀦𑁄 𑀭𑀸𑀚𑀓𑀼𑀫𑀸𑀭𑀸’’𑀢𑀺𑀆𑀤𑀻𑀲𑀼 𑀅𑀫𑁆𑀩𑀝𑁆𑀞𑀲𑀼𑀢𑁆𑀢𑁂 𑀓𑁄𑀲𑀮𑀚𑀦𑀧𑀤𑀯𑀡𑁆𑀡𑀦𑀸𑀬𑀁 𑀅𑀫𑁆𑀳𑁂𑀳𑀺 𑀯𑀼𑀢𑁆𑀢𑀦𑀬𑁄 𑀬𑀣𑀸𑀭𑀳𑀁 𑀦𑁂𑀢𑀩𑁆𑀩𑁄. 𑀅𑀬𑀁 𑀧𑀦𑁂𑀢𑁆𑀣 𑀯𑀺𑀲𑁂𑀲𑁄 𑁋 𑀫𑀕𑁂𑀦 𑀲𑀤𑁆𑀥𑀺𑀁 𑀥𑀸𑀯𑀦𑁆𑀢𑀻𑀢𑀺 𑀫𑀕𑀥𑀸, 𑀭𑀸𑀚𑀓𑀼𑀫𑀸𑀭𑀸, 𑀫𑀁𑀲𑁂𑀲𑀼 𑀯𑀸 𑀕𑀺𑀚𑁆𑀛𑀦𑁆𑀢𑀻𑀢𑀺 𑀫𑀕𑀥𑀸 𑀦𑀺𑀭𑀼𑀢𑁆𑀢𑀺𑀦𑀬𑁂𑀦. 𑀭𑀼𑀴𑁆𑀳𑀺𑀢𑁄, 𑀧𑀘𑁆𑀘𑀬𑀮𑁄𑀧𑀢𑁄 𑀘 𑀢𑁂𑀲𑀁 𑀦𑀺𑀯𑀸𑀲𑀪𑀽𑀢𑁂𑀧𑀺 𑀚𑀦𑀧𑀤𑁂 𑀯𑀼𑀤𑁆𑀥𑀺 𑀦 𑀳𑁄𑀢𑀻𑀢𑀺 𑀦𑁂𑀭𑀼𑀢𑁆𑀢𑀺𑀓𑀸. 𑀚𑀦𑀧𑀤𑀦𑀸𑀫𑁂𑀬𑁂𑀯 𑀩𑀳𑀼𑀯𑀘𑀦𑀁, 𑀦 𑀚𑀦𑀧𑀤𑀲𑀤𑁆𑀤𑁂 𑀚𑀸𑀢𑀺𑀲𑀤𑁆𑀤𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀢𑀲𑁆𑀫𑀺𑀁 𑀫𑀕𑀥𑁂𑀲𑀼 𑀚𑀦𑀧𑀤𑁂’’𑀢𑀺. 𑀇𑀢𑁄 𑀧𑀭𑀦𑁆𑀢𑀺 ‘‘𑀫𑀕𑀥𑁂𑀲𑀽’’𑀢𑀺 𑀧𑀤𑀢𑁄 𑀧𑀭𑀁 ‘‘𑀘𑀸𑀭𑀺𑀓𑀁 𑀘𑀭𑀫𑀸𑀦𑁄’’𑀢𑀺𑀆𑀤𑀺𑀯𑀘𑀦𑀁. 𑀧𑀼𑀭𑀺𑀫𑀲𑀼𑀢𑁆𑀢𑀤𑁆𑀯𑀬𑁂𑀢𑀺 𑀅𑀫𑁆𑀩𑀝𑁆𑀞𑀲𑁄𑀡𑀤𑀡𑁆𑀟𑀲𑀼𑀢𑁆𑀢𑀤𑁆𑀯𑀬𑁂. 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺 𑀬𑀁 𑀢𑀢𑁆𑀣 𑀆𑀕𑀢𑀲𑀤𑀺𑀲𑀁 𑀇𑀥𑀸𑀕𑀢𑀁, 𑀢𑀁 𑀅𑀢𑁆𑀣𑀯𑀡𑁆𑀡𑀦𑀸𑀢𑁄 𑀯𑀼𑀢𑁆𑀢𑀦𑀬𑀫𑁂𑀯, 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀢𑀭𑀼𑀡𑁄 𑀅𑀫𑁆𑀩𑀭𑀼𑀓𑁆𑀔𑁄 𑀅𑀫𑁆𑀩𑀮𑀝𑁆𑀞𑀺𑀓𑀸’’𑀢𑀺 𑀩𑁆𑀭𑀳𑁆𑀫𑀚𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁧.𑁨) 𑀯𑀼𑀢𑁆𑀢𑀢𑁆𑀢𑀸 ‘‘𑀅𑀫𑁆𑀩𑀮𑀝𑁆𑀞𑀺𑀓𑀸 𑀩𑁆𑀭𑀳𑁆𑀫𑀚𑀸𑀮𑁂 𑀯𑀼𑀢𑁆𑀢𑀲𑀤𑀺𑀲𑀸𑀯𑀸’’𑀢𑀺 𑀆𑀳.

𑀬𑀜𑁆𑀜𑀸𑀯𑀸𑀝𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀫𑀳𑀸𑀬𑀜𑁆𑀜𑀁 𑀉𑀤𑁆𑀤𑀺𑀲𑁆𑀲 𑀲𑀯𑀺𑀜𑁆𑀜𑀸𑀡𑀓𑀸𑀦𑀺, 𑀅𑀯𑀺𑀜𑁆𑀜𑀸𑀡𑀓𑀸𑀦𑀺 𑀘 𑀬𑀜𑁆𑀜𑀽𑀧𑀓𑀭𑀡𑀸𑀦𑀺 𑀉𑀧𑀝𑁆𑀞𑀧𑀺𑀢𑀸𑀦𑀻𑀢𑀺 𑀅𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀫𑀳𑀸𑀬𑀜𑁆𑀜𑁄 𑀉𑀧𑀓𑁆𑀔𑀝𑁄’’𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁, 𑀢𑀁 𑀧𑀦𑁂𑀢𑀁 𑀉𑀧𑀓𑀭𑀡𑀁 𑀢𑁂𑀲𑀁 𑀢𑀣𑀸 𑀲𑀚𑁆𑀚𑀦𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀺 ‘‘𑀲𑀚𑁆𑀚𑀺𑀢𑁄’’𑀢𑀺 𑀇𑀫𑀺𑀦𑀸. 𑀯𑀘𑁆𑀙𑀢𑀭𑀲𑀢𑀸𑀦𑀻𑀢𑀺 𑀬𑀼𑀯𑀪𑀸𑀯𑀧𑁆𑀧𑀢𑁆𑀢𑀸𑀦𑀺 𑀩𑀮𑀯𑀯𑀘𑁆𑀙𑀲𑀢𑀸𑀦𑀺. 𑀯𑀘𑁆𑀙𑀸𑀦𑀁 𑀯𑀺𑀲𑁂𑀲𑀸𑀢𑀺 𑀳𑀺 𑀯𑀘𑁆𑀙𑀢𑀭𑀸, 𑀢𑁂 𑀧𑀦 𑀯𑀘𑁆𑀙𑀸 𑀏𑀯 𑀳𑁄𑀦𑁆𑀢𑀺, 𑀦 𑀤𑀫𑁆𑀫𑀸, 𑀦 𑀘 𑀩𑀮𑀻𑀩𑀤𑁆𑀤𑀸𑀢𑀺 𑀆𑀳 ‘‘𑀯𑀘𑁆𑀙𑀲𑀢𑀸𑀦𑀻’’𑀢𑀺. 𑀅𑀬𑀁 𑀆𑀘𑀭𑀺𑀬𑀫𑀢𑀺 (𑀤𑀻. 𑀦𑀺. 𑀝𑀻. 𑁧.𑁩𑁨𑁩). 𑀢𑀭-𑀲𑀤𑁆𑀤𑁄 𑀯𑀸 𑀅𑀦𑀢𑁆𑀣𑀓𑁄𑀢𑀺 𑀯𑀼𑀢𑁆𑀢𑀁 ‘‘𑀯𑀘𑁆𑀙𑀲𑀢𑀸𑀦𑀻’’𑀢𑀺. 𑀏𑀯𑀜𑁆𑀳𑀺 𑀲𑀩𑁆𑀩𑁄𑀧𑀺 𑀯𑀘𑁆𑀙𑀧𑁆𑀧𑀪𑁂𑀤𑁄 𑀲𑀗𑁆𑀕𑀳𑀺𑀢𑁄 𑀳𑁄𑀢𑀺. 𑀏𑀢𑁂𑀢𑀺 𑀉𑀲𑀪𑀸𑀤𑀬𑁄 𑀉𑀭𑀩𑁆𑀪𑀧𑀭𑀺𑀬𑁄𑀲𑀸𑀦𑀸. 𑀅𑀦𑁂𑀓𑁂𑀲𑀦𑁆𑀢𑀺 𑀅𑀦𑁂𑀓𑀚𑀸𑀢𑀺𑀓𑀸𑀦𑀁. 𑀫𑀺𑀕𑀧𑀓𑁆𑀔𑀻𑀦𑀦𑁆𑀢𑀺 𑀫𑀳𑀺𑀁𑀲𑀭𑀼𑀭𑀼𑀧𑀲𑀤𑀓𑀼𑀭𑀼𑀗𑁆𑀕𑀕𑁄𑀓𑀡𑁆𑀡𑀫𑀺𑀕𑀸𑀦𑀜𑁆𑀘𑁂𑀯 𑀫𑁄𑀭𑀓𑀧𑀺𑀜𑁆𑀚𑀭𑀯𑀝𑁆𑀝𑀓𑀢𑀺𑀢𑁆𑀢𑀺𑀭 𑀮𑀸𑀧𑀸𑀤𑀺𑀧𑀓𑁆𑀔𑀻𑀦𑀜𑁆𑀘. 𑀲𑀗𑁆𑀔𑁆𑀬𑀸𑀯𑀲𑁂𑀦 𑀅𑀦𑁂𑀓𑀢𑀁 𑀲𑀢𑁆𑀢𑀲𑀢𑀕𑁆𑀕𑀳𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀼𑀁 ‘‘𑀲𑀢𑁆𑀢𑀲𑀢𑁆𑀢𑀲𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀁, 𑀲𑀢𑁆𑀢𑀲𑀢𑀸𑀦𑀺, 𑀲𑀢𑁆𑀢𑀲𑀢𑀸𑀦𑀺 𑀘𑀸𑀢𑀺 𑀅𑀢𑁆𑀣𑁄. 𑀣𑀽𑀡𑀦𑁆𑀢𑀺 𑀬𑀜𑁆𑀜𑁄𑀧𑀓𑀭𑀡𑀸𑀦𑀁 𑀫𑀺𑀕𑀧𑀓𑁆𑀔𑀻𑀦𑀁 𑀩𑀦𑁆𑀥𑀦𑀢𑁆𑀣𑀫𑁆𑀪𑀁. 𑀬𑀽𑀧𑁄𑀢𑀺𑀧𑀺 𑀢𑀲𑁆𑀲 𑀦𑀸𑀫𑀁. 𑀢𑁂𑀦𑀸𑀳 ‘‘𑀬𑀽𑀧𑀲𑀗𑁆𑀔𑀸𑀢’’𑀦𑁆𑀢𑀺.

𑁩𑁨𑁮. 𑀯𑀺𑀥𑀸𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑀯𑀺𑀦𑁄𑀤𑀦𑀸. 𑀬𑁄 𑀳𑀺 𑀬𑀜𑁆𑀜𑀲𑀗𑁆𑀔𑀸𑀢𑀲𑁆𑀲 𑀧𑀼𑀜𑁆𑀜𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄, 𑀢𑀲𑁆𑀲 𑀯𑀺𑀥𑀫𑀦𑀢𑁄 𑀦𑀺𑀯𑀸𑀭𑀡𑀢𑁄 𑀦𑀺𑀭𑁄𑀥𑀦𑀢𑁄 𑀯𑀺𑀥𑀸 𑀯𑀼𑀘𑁆𑀘𑀦𑁆𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑀯𑀺𑀦𑁄𑀤𑀦𑀸, 𑀢𑀸 𑀏𑀯 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀁 𑀅𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀞𑀧𑁂𑀦𑁆𑀢𑀻𑀢𑀺 ‘‘𑀞𑀧𑀦𑀸’’𑀢𑀺 𑀘 𑀯𑀼𑀢𑁆𑀢𑀸. 𑀅𑀯𑀺𑀧𑁆𑀧𑀝𑀺𑀲𑀸𑀭𑀢𑁄 𑀏𑀯 𑀳𑀺 𑀉𑀧𑀭𑀽𑀧𑀭𑀺 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀧𑁆𑀧𑀯𑀢𑁆𑀢𑀻𑀢𑀺. 𑀞𑀧𑀦𑀸 𑀘𑁂𑀢𑀸 𑀬𑀜𑁆𑀜𑀲𑁆𑀲 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀯𑀲𑁂𑀦 𑀢𑀻𑀲𑀼 𑀓𑀸𑀮𑁂𑀲𑀼 𑀧𑀯𑀢𑁆𑀢𑀺𑀬𑀸 𑀢𑀺𑀧𑁆𑀧𑀓𑀸𑀭𑀸𑀢𑀺 𑀆𑀳 ‘‘𑀢𑀺𑀝𑁆𑀞𑀧𑀦’’𑀦𑁆𑀢𑀺. 𑀧𑀭𑀺𑀓𑁆𑀔𑀸𑀭𑀲𑀤𑁆𑀤𑁄 𑀘𑁂𑀢𑁆𑀣 𑀧𑀭𑀺𑀯𑀸𑀭𑀧𑀭𑀺𑀬𑀸𑀬𑁄 ‘‘𑀧𑀭𑀺𑀓𑀭𑁄𑀦𑁆𑀢𑀺 𑀬𑀜𑁆𑀜𑀁 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀻’’𑀢𑀺 𑀓𑀢𑁆𑀯𑀸. 𑀢𑁂𑀦𑀸𑀳 ‘‘𑀲𑁄𑀴𑀲𑀧𑀭𑀺𑀯𑀸𑀭’’𑀦𑁆𑀢𑀺.

𑀫𑀳𑀸𑀯𑀺𑀚𑀺𑀢𑀭𑀸𑀚𑀬𑀜𑁆𑀜𑀓𑀣𑀸𑀯𑀡𑁆𑀡𑀦𑀸

𑁩𑁩𑁬. 𑀧𑀼𑀩𑁆𑀩𑁂 𑀪𑀽𑀢𑀁 𑀪𑀽𑀢𑀧𑀼𑀩𑁆𑀩𑀁 𑀬𑀣𑀸 ‘‘𑀤𑀺𑀝𑁆𑀞𑀧𑀼𑀩𑁆𑀩’’𑀦𑁆𑀢𑀺 𑀆𑀳 ‘‘𑀧𑀼𑀩𑁆𑀩𑀘𑀭𑀺𑀢’’𑀦𑁆𑀢𑀺, 𑀅𑀢𑁆𑀢𑀦𑁄 𑀧𑀼𑀭𑀺𑀫𑀚𑀸𑀢𑀺𑀲𑀫𑁆𑀪𑀽𑀢𑀁 𑀩𑁄𑀥𑀺𑀲𑀫𑁆𑀪𑀸𑀭𑀪𑀽𑀢𑀁 𑀧𑀼𑀜𑁆𑀜𑀘𑀭𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀢𑀣𑀸 𑀳𑀺 𑀢𑀲𑁆𑀲 𑀅𑀦𑀼𑀕𑀸𑀫𑀺𑀦𑀺𑀥𑀺𑀲𑁆𑀲 𑀣𑀸𑀯𑀭𑀦𑀺𑀥𑀺𑀦𑀸 𑀦𑀺𑀤𑀲𑁆𑀲𑀦𑀁 𑀉𑀧𑀧𑀦𑁆𑀦𑀁 𑀳𑁄𑀢𑀺. 𑀲𑀤𑁆𑀤𑀯𑀺𑀤𑀽 𑀧𑀦 𑀯𑀤𑀦𑁆𑀢𑀺 ‘‘𑀪𑀽𑀢𑀧𑀼𑀩𑁆𑀩𑀦𑁆𑀢𑀺 𑀇𑀤𑀁 𑀓𑀸𑀮𑀲𑀢𑁆𑀢𑀫𑀺𑀬𑀸 𑀦𑁂𑀧𑀸𑀢𑀺𑀓𑀧𑀤’’𑀦𑁆𑀢𑀺. 𑀅𑀢𑀻𑀢𑀓𑀸𑀮𑁂𑀢𑀺 𑀳𑀺 𑀢𑁂𑀲𑀁 𑀫𑀢𑁂𑀦 𑀅𑀢𑁆𑀣𑁄. 𑀅𑀲𑁆𑀲𑀸𑀢𑀺 𑀅𑀦𑁂𑀦. 𑀫𑀳𑀦𑁆𑀢𑀁 𑀧𑀣𑀯𑀻𑀫𑀡𑁆𑀟𑀮𑀁 𑀯𑀺𑀚𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀳𑀦𑁆𑀢𑀁 𑀯𑀸 𑀯𑀺𑀚𑀺𑀢𑀁 𑀧𑀣𑀯𑀻𑀫𑀡𑁆𑀟𑀮𑀫𑀲𑁆𑀲 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. ‘‘𑀅𑀦𑁆𑀢𑁄𑀭𑀝𑁆𑀞𑁂𑀢𑀺 𑀬𑀲𑁆𑀲 𑀯𑀺𑀚𑀺𑀢𑁂 𑀯𑀺𑀳𑀭𑀢𑀺, 𑀢𑀲𑁆𑀲 𑀭𑀝𑁆𑀞𑁂’’𑀢𑀺𑀆𑀤𑀻𑀲𑀼 𑀯𑀺𑀬 𑀳𑀺 𑀯𑀺𑀚𑀺𑀢𑀲𑀤𑁆𑀤𑁄 𑀭𑀚𑁆𑀚𑁂 𑀧𑀯𑀢𑁆𑀢𑀢𑀺, 𑀇𑀫𑀺𑀦𑀸 𑀢𑀲𑁆𑀲 𑀏𑀓𑀭𑀸𑀚𑀪𑀸𑀯𑀁 𑀤𑀻𑀧𑁂𑀢𑀺, 𑀦 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀪𑀸𑀯𑀁 𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀢𑀸𑀅𑀯𑀘𑀦𑀢𑁄. 𑀧𑀸𑀴𑀺𑀬𑀁 𑀦 𑀬𑁂𑀦 𑀓𑁂𑀦𑀘𑀺 𑀲𑀦𑁆𑀢𑀓𑀫𑀢𑁆𑀢𑁂𑀦 𑀅𑀟𑁆𑀠𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀟𑁆𑀠𑁄’’𑀢𑀺 𑀯𑀢𑁆𑀯𑀸 ‘‘𑀫𑀳𑀤𑁆𑀥𑀦𑁄’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀬𑁄 𑀓𑁄𑀘𑀻’’𑀢𑀺𑀆𑀤𑀺. 𑀅𑀟𑁆𑀠𑀢𑀸 𑀳𑀺 𑀦𑀸𑀫 𑀯𑀺𑀪𑀯𑀲𑀫𑁆𑀧𑀦𑁆𑀦𑀢𑁆𑀢𑀸 𑀲𑀸 𑀘 𑀢𑀁 𑀢𑀤𑀼𑀧𑀸𑀤𑀸𑀬 𑀯𑀼𑀘𑁆𑀘𑀢𑀺. 𑀢𑀣𑀸 𑀫𑀳𑀤𑁆𑀥𑀦𑀢𑀸𑀧𑀻𑀢𑀺 𑀢𑀁 𑀣𑀸𑀫𑀧𑁆𑀧𑀢𑁆𑀢𑀁 𑀉𑀓𑁆𑀓𑀁𑀲𑀕𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀭𑀺𑀫𑀸𑀡𑀲𑀗𑁆𑀔𑁆𑀬𑁂𑀦𑀸’’𑀢𑀺 𑀆𑀳. 𑀪𑀼𑀜𑁆𑀚𑀺𑀢𑀩𑁆𑀩𑀝𑁆𑀞𑁂𑀦 𑀯𑀺𑀲𑁂𑀲𑀢𑁄 𑀓𑀸𑀫𑀸 𑀇𑀥 𑀪𑁄𑀕𑀸 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. ‘‘𑀧𑀜𑁆𑀘𑀓𑀸𑀫𑀕𑀼𑀡𑀯𑀲𑁂𑀦𑀸’’𑀢𑀺 𑀇𑀫𑀺𑀦𑀸. 𑀧𑀺𑀡𑁆𑀟𑀧𑀺𑀡𑁆𑀟𑀯𑀲𑁂𑀦𑀸𑀢𑀺 𑀪𑀸𑀚𑀦𑀸𑀮𑀗𑁆𑀓𑀸𑀭𑀸𑀤𑀺𑀯𑀺𑀪𑀸𑀕𑀁 𑀅𑀳𑀼𑀢𑁆𑀯𑀸 𑀓𑁂𑀯𑀮𑀁 𑀔𑀡𑁆𑀟𑀔𑀡𑁆𑀟𑀯𑀲𑁂𑀦.

𑀭𑀽𑀧𑀁 𑀅𑀧𑁆𑀧𑁂𑀢𑁆𑀯𑀸, 𑀅𑀦𑀧𑁆𑀧𑁂𑀢𑁆𑀯𑀸 𑀯𑀸 𑀫𑀸𑀲𑀧𑁆𑀧𑀫𑀸𑀡𑁂𑀦 𑀓𑀢𑁄 𑀫𑀸𑀲𑀓𑁄. 𑀆𑀤𑀺𑀲𑀤𑁆𑀤𑁂𑀦 𑀣𑀸𑀮𑀓𑀸𑀤𑀻𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀦𑁂𑀓𑀓𑁄𑀝𑀺𑀲𑀗𑁆𑀔𑁆𑀬𑁂𑀦𑀸𑀢𑀺 𑀓𑀳𑀸𑀧𑀡𑀸𑀦𑀁 𑀓𑁄𑀝𑀺𑀲𑀢𑀸𑀤𑀺𑀧𑁆𑀧𑀫𑀸𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀳𑁂𑀝𑁆𑀞𑀺𑀫𑀦𑁆𑀢𑁂𑀦 𑀓𑁄𑀝𑀺𑀲𑀢𑀧𑁆𑀧𑀫𑀸𑀡𑁂𑀦𑁂𑀯 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀪𑀸𑀯𑀧𑁆𑀧𑀢𑁆𑀢𑀺𑀢𑁄.

𑀢𑀼𑀝𑁆𑀞𑀻𑀢𑀺 𑀲𑀼𑀫𑀦𑀢𑀸. 𑀉𑀧𑀓𑀭𑀡𑀲𑀤𑁆𑀤𑁄 𑀘𑁂𑀢𑁆𑀣 𑀓𑀸𑀭𑀡𑀧𑀭𑀺𑀬𑀸𑀬𑁄. 𑀓𑀺𑀁 𑀧𑀦 𑀢𑀦𑁆𑀢𑀺 𑀆𑀳 ‘‘𑀦𑀸𑀦𑀸𑀯𑀺𑀥𑀸𑀮𑀗𑁆𑀓𑀸𑀭𑀲𑀼𑀯𑀡𑁆𑀡𑀭𑀚𑀢𑀪𑀸𑀚𑀦𑀸𑀤𑀺𑀪𑁂𑀤’’𑀦𑁆𑀢𑀺. 𑀆𑀤𑀺𑀲𑀤𑁆𑀤𑁂𑀦 𑀯𑀢𑁆𑀣𑀲𑁂𑀬𑁆𑀬𑀸𑀯𑀲𑀣𑀸𑀤𑀻𑀦𑀺 𑀲𑀗𑁆𑀕𑀬𑁆𑀳𑀦𑁆𑀢𑀺, 𑀲𑀼𑀯𑀡𑁆𑀡𑀭𑀚𑀢𑀫𑀡𑀺𑀫𑀼𑀢𑁆𑀢𑀸𑀯𑁂𑀴𑀼𑀭𑀺𑀬𑀯𑀚𑀺𑀭𑀧𑀯𑀸𑀴𑀸𑀦𑀺 𑀲𑀢𑁆𑀢 𑀭𑀢𑀦𑀸𑀦𑀻𑀢𑀺 𑀯𑀤𑀦𑁆𑀢𑀺. 𑀬𑀣𑀸𑀳𑀼 𑁋

‘‘𑀲𑀼𑀯𑀡𑁆𑀡𑀁 𑀭𑀚𑀢𑀁 𑀫𑀼𑀢𑁆𑀢𑀸, 𑀫𑀡𑀺𑀯𑁂𑀴𑀼𑀭𑀺𑀬𑀸𑀦𑀺 𑀘;

𑀯𑀚𑀺𑀭𑀜𑁆𑀘 𑀧𑀯𑀸𑀴𑀦𑁆𑀢𑀺, 𑀲𑀢𑁆𑀢𑀸𑀳𑀼 𑀭𑀢𑀦𑀸𑀦𑀺𑀫𑁂’’𑀢𑀺.

𑀲𑀸𑀮𑀺𑀯𑀻𑀳𑀺𑀆𑀤𑀺 𑀲𑀢𑁆𑀢𑀥𑀜𑁆𑀜𑀁 𑀲𑀸𑀦𑀼𑀮𑁄𑀫𑀁 𑀧𑀼𑀩𑁆𑀩𑀦𑁆𑀦𑀁 𑀦𑀸𑀫 𑀧𑀼𑀭𑁂𑀓𑁆𑀔𑀢𑀁 𑀲𑀲𑁆𑀲𑀨𑀮𑀦𑁆𑀢𑀺 𑀓𑀢𑁆𑀯𑀸. 𑀢𑀩𑁆𑀩𑀺𑀧𑀭𑀺𑀬𑀸𑀬𑀢𑁄 𑀫𑀼𑀕𑁆𑀕𑀫𑀸𑀲𑀸𑀤𑀺 𑀢𑀤𑀯𑀲𑁂𑀲𑀁 𑀅𑀧𑀭𑀦𑁆𑀦𑀁 𑀦𑀸𑀫. 𑀅𑀧𑀭𑀦𑁆𑀦𑀢𑁄 𑀧𑀼𑀩𑁆𑀩𑁂 𑀧𑀯𑀢𑁆𑀢𑀫𑀦𑁆𑀦𑀁 𑀧𑀼𑀩𑁆𑀩𑀦𑁆𑀦𑀁, 𑀢𑀢𑁄 𑀅𑀧𑀭𑀲𑁆𑀫𑀺𑀁 𑀧𑀯𑀢𑁆𑀢𑀫𑀦𑁆𑀦𑀁 𑀅𑀧𑀭𑀦𑁆𑀦𑀁. 𑀦𑁆𑀦-𑀓𑀸𑀭𑀲𑁆𑀲 𑀧𑀦 𑀡𑁆𑀡-𑀓𑀸𑀭𑁂 𑀓𑀢𑁂 𑀧𑀼𑀩𑁆𑀩𑀡𑁆𑀡𑀁, 𑀅𑀧𑀭𑀡𑁆𑀡𑀜𑁆𑀘𑀸𑀢𑀺 𑀦𑁂𑀭𑀼𑀢𑁆𑀢𑀺𑀓𑀸. 𑀧𑀼𑀩𑁆𑀩𑀸𑀧𑀭𑀪𑀸𑀯𑁄 𑀧𑀦𑁂𑀢𑁂𑀲𑀁 𑀆𑀤𑀺𑀓𑀧𑁆𑀧𑁂 𑀲𑀫𑁆𑀪𑀯𑀸𑀲𑀫𑁆𑀪𑀯𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀧𑀼𑀭𑀺𑀫𑀁 ‘‘𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀧𑀳𑀽𑀢𑀚𑀸𑀢𑀭𑀽𑀧𑀭𑀚𑀢𑁄’’𑀢𑀺 𑀯𑀘𑀦𑀁 𑀤𑁂𑀯𑀲𑀺𑀓𑀁 𑀧𑀭𑀺𑀩𑁆𑀩𑀬𑀤𑀸𑀦𑀕𑀳𑀡𑀸𑀤𑀺𑀯𑀲𑁂𑀦, 𑀧𑀭𑀺𑀯𑀢𑁆𑀢𑀦𑀥𑀦𑀥𑀜𑁆𑀜𑀯𑀲𑁂𑀦 𑀘 𑀯𑀼𑀢𑁆𑀢𑀁, 𑀇𑀤𑀁 𑀧𑀦 ‘‘𑀧𑀳𑀽𑀢𑀥𑀦𑀥𑀜𑁆𑀜𑁄’’𑀢𑀺 𑀯𑀘𑀦𑀁 𑀦𑀺𑀥𑀸𑀦𑀕𑀢𑀥𑀦𑀯𑀲𑁂𑀦, 𑀲𑀗𑁆𑀕𑀳𑀺𑀢𑀥𑀜𑁆𑀜𑀯𑀲𑁂𑀦 𑀘𑀸𑀢𑀺 𑀇𑀫𑀁 𑀯𑀺𑀲𑁂𑀲𑀁 𑀲𑀦𑁆𑀥𑀸𑀬 𑀅𑀬𑀁 𑀦𑀬𑁄 𑀤𑀲𑁆𑀲𑀺𑀢𑁄. 𑀯𑀻𑀲𑀓𑀳𑀸𑀧𑀡𑀫𑁆𑀩𑀡𑀸𑀤𑀺𑀤𑁂𑀯𑀲𑀺𑀓𑀯𑀴𑀜𑁆𑀚𑀦𑀫𑁆𑀧𑀺 𑀳𑀺 𑀫𑀳𑀸𑀲𑀸𑀮𑀮𑀓𑁆𑀔𑀡𑀁.

𑀇𑀤𑀸𑀦𑀺 𑀢𑀩𑁆𑀩𑀺𑀧𑀭𑀻𑀢𑀯𑀲𑁂𑀦 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀯𑀸’’𑀢𑀺𑀆𑀤𑀺𑀦𑀸 𑀤𑀼𑀢𑀺𑀬𑀦𑀬𑁄 𑀆𑀭𑀤𑁆𑀥𑁄. 𑀇𑀫𑀺𑀦𑀸 𑀏𑀯 𑀳𑀺 𑀧𑀼𑀭𑀺𑀫𑀯𑀘𑀦𑀁 𑀦𑀺𑀥𑀸𑀦𑀕𑀢𑀥𑀦𑀯𑀲𑁂𑀦, 𑀲𑀗𑁆𑀕𑀳𑀺𑀢𑀥𑀜𑁆𑀜𑀯𑀲𑁂𑀦 𑀘 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑀢𑁄 𑀲𑀺𑀤𑁆𑀥𑀁 𑀳𑁄𑀢𑀺. 𑀢𑀢𑁆𑀣 𑀇𑀤𑀦𑁆𑀢𑀺 ‘‘𑀧𑀳𑀽𑀢𑀥𑀦𑀥𑀜𑁆𑀜𑁄’’𑀢𑀺 𑀯𑀘𑀦𑀁. 𑀅𑀲𑁆𑀲𑀸𑀢𑀺 𑀫𑀳𑀸𑀯𑀺𑀚𑀺𑀢𑀭𑀜𑁆𑀜𑁄. 𑀤𑀺𑀯𑀲𑁂 𑀤𑀺𑀯𑀲𑁂 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁 𑀤𑁂𑀯𑀲𑀺𑀓𑀁, 𑀪𑀸𑀯𑀦𑀧𑀼𑀁𑀲𑀓𑀫𑁂𑀢𑀁. 𑀤𑀸𑀲𑀓𑀫𑁆𑀫𑀓𑀭𑀧𑁄𑀭𑀺𑀲𑀸𑀤𑀻𑀦𑀁 𑀯𑁂𑀢𑁆𑀢𑀦𑀸𑀦𑀼𑀧𑁆𑀧𑀤𑀸𑀦𑀁 𑀧𑀭𑀺𑀩𑁆𑀩𑀬𑀤𑀸𑀦𑀁. 𑀇𑀡𑀲𑁄𑀥𑀦𑀸𑀤𑀺𑀯𑀲𑁂𑀦 𑀥𑀦𑀥𑀜𑁆𑀜𑀸𑀦𑀫𑀸𑀤𑀸𑀦𑀁 𑀕𑀳𑀡𑀁. 𑀆𑀤𑀺𑀲𑀤𑁆𑀤𑁂𑀦 𑀇𑀡𑀤𑀸𑀦𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀧𑀭𑀺𑀯𑀢𑁆𑀢𑀦𑀥𑀦𑀥𑀜𑁆𑀜𑀯𑀲𑁂𑀦𑀸𑀢𑀺 𑀓𑀬𑀯𑀺𑀓𑁆𑀓𑀬𑀓𑀭𑀡𑁂𑀦 𑀧𑀭𑀺𑀯𑀢𑁆𑀢𑀺𑀢𑀩𑁆𑀩𑀸𑀦𑀁 𑀥𑀦𑀥𑀜𑁆𑀜𑀸𑀦𑀁 𑀯𑀲𑁂𑀦. 𑀓𑀢𑁆𑀣𑀘𑀺 𑀧𑀦 𑀲𑀫𑀼𑀘𑁆𑀘𑀬𑀯𑀺𑀭𑀳𑀺𑀢𑀧𑀸𑀞𑁄 𑀤𑀺𑀲𑁆𑀲𑀢𑀺. 𑀢𑀢𑁆𑀣 ‘‘𑀧𑀭𑀺𑀩𑁆𑀩𑀬𑀤𑀸𑀦𑀕𑁆𑀕𑀳𑀡𑀸𑀤𑀺𑀯𑀲𑁂𑀦𑀸’’𑀢𑀺 𑀇𑀤𑀁 𑀧𑀭𑀺𑀯𑀢𑁆𑀢𑀦𑀧𑀤𑁂𑀦 𑀲𑀫𑁆𑀩𑀦𑁆𑀥𑀁 𑀓𑀢𑁆𑀯𑀸 𑀢𑀸𑀤𑀺𑀲𑁂𑀦 𑀯𑀺𑀥𑀺𑀦𑀸 𑀇𑀢𑁄 𑀘𑀺𑀢𑁄 𑀘 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑀸𑀦𑀁 𑀥𑀦𑀥𑀜𑁆𑀜𑀸𑀦𑀁 𑀯𑀲𑁂𑀦𑀸𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀓𑁄𑀝𑁆𑀞𑀁 𑀯𑀼𑀘𑁆𑀘𑀢𑀺 𑀥𑀜𑁆𑀜𑀝𑁆𑀞𑀧𑀦𑀝𑁆𑀞𑀸𑀦𑀁, 𑀢𑀤𑁂𑀯 𑀅𑀕𑀸𑀭𑀁 𑀢𑀣𑀸. 𑀢𑁂𑀦𑀸𑀳 ‘‘𑀥𑀜𑁆𑀜𑁂𑀦 𑀧𑀭𑀺𑀧𑀼𑀡𑁆𑀡𑀓𑁄𑀝𑁆𑀞𑀸𑀕𑀸𑀭𑁄’’𑀢𑀺. 𑀏𑀯𑀁 𑀲𑀸𑀭𑀕𑀩𑁆𑀪𑀁 𑀓𑁄𑀲𑁄, 𑀥𑀜𑁆𑀜𑀝𑁆𑀞𑀧𑀦𑀝𑁆𑀞𑀸𑀦𑀁 𑀓𑁄𑀝𑁆𑀞𑀸𑀕𑀸𑀭𑀦𑁆𑀢𑀺 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀢𑁄 𑀅𑀜𑁆𑀜𑀣𑀸𑀧𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀣𑀸 𑀅𑀲𑀺𑀦𑁄 𑀢𑀺𑀓𑁆𑀔𑀪𑀸𑀯𑀧𑀭𑀺𑀳𑀸𑀭𑀢𑁄 𑀧𑀭𑀺𑀘𑁆𑀙𑀤𑁄 ‘‘𑀓𑁄𑀲𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀭𑀜𑁆𑀜𑁄 𑀢𑀺𑀓𑁆𑀔𑀪𑀸𑀯𑀧𑀭𑀺𑀳𑀸𑀭𑀓𑀢𑁆𑀢𑀸 𑀘𑀢𑀼𑀭𑀗𑁆𑀕𑀺𑀦𑀻 𑀲𑁂𑀦𑀸 ‘‘𑀓𑁄𑀲𑁄’’𑀢𑀺 𑀆𑀳 ‘‘𑀘𑀢𑀼𑀩𑁆𑀩𑀺𑀥𑁄 𑀓𑁄𑀲𑁄’’𑀢𑀺𑀆𑀤𑀺. ‘‘𑀤𑁆𑀯𑀸𑀤𑀲𑀧𑀼𑀭𑀺𑀲𑁄 𑀳𑀢𑁆𑀣𑀻’’𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑁩𑁧𑁪) 𑀯𑀼𑀢𑁆𑀢𑀮𑀓𑁆𑀔𑀡𑁂𑀦 𑀘𑁂𑀢𑁆𑀣 𑀳𑀢𑁆𑀣𑀺𑀆𑀤𑀬𑁄 𑀕𑀳𑁂𑀢𑀩𑁆𑀩𑀸. 𑀯𑀢𑁆𑀣𑀓𑁄𑀝𑁆𑀞𑀸𑀕𑀸𑀭𑀕𑁆𑀕𑀳𑀡𑁂𑀦𑁂𑀯 𑀲𑀩𑁆𑀩𑀲𑁆𑀲𑀧𑀺 𑀓𑀼𑀧𑁆𑀧𑀪𑀡𑁆𑀟𑀝𑁆𑀞𑀧𑀦𑀝𑁆𑀞𑀸𑀦𑀲𑁆𑀲 𑀕𑀳𑀺𑀢𑀢𑁆𑀢𑀸 ‘‘𑀓𑁄𑀝𑁆𑀞𑀸𑀕𑀸𑀭𑀁 𑀢𑀺𑀯𑀺𑀥’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀚𑀸𑀢𑀭𑀽𑀧𑀭𑀚𑀢𑀢𑁄 𑀳𑀺 𑀅𑀜𑁆𑀜𑀁 𑀮𑁄𑀳𑀅𑀬𑀤𑀸𑀭𑀼𑀯𑀺𑀲𑀸𑀡𑀯𑀢𑁆𑀣𑀸𑀤𑀺𑀓𑀫𑀲𑀸𑀭𑀤𑀩𑁆𑀩𑀁 𑀕𑁄𑀧𑁂𑀢𑀩𑁆𑀩𑀢𑁄 𑀕-𑀓𑀸𑀭𑀲𑁆𑀲 𑀓-𑀓𑀸𑀭𑀁 𑀓𑀢𑁆𑀯𑀸 𑀓𑀼𑀧𑁆𑀧𑀁 𑀯𑀼𑀘𑁆𑀘𑀢𑀺. 𑀚𑀸𑀢𑀭𑀽𑀧𑀭𑀚𑀢𑀦𑀺𑀥𑀸𑀦𑀁 𑀥𑀦𑀓𑁄𑀝𑁆𑀞𑀸𑀕𑀸𑀭𑀁. 𑀢𑀢𑁆𑀣 𑀢𑀢𑁆𑀣 𑀭𑀢𑀦𑀁 𑀯𑀺𑀮𑁄𑀓𑁂𑀢𑁆𑀯𑀸 𑀘𑀭𑀡𑀁 𑀭𑀢𑀦𑀯𑀺𑀮𑁄𑀓𑀦𑀘𑀸𑀭𑀺𑀓𑀸. 𑀓𑀸𑀫𑀁 𑀢𑀫𑀢𑁆𑀣𑀁 𑀭𑀸𑀚𑀸 𑀚𑀸𑀦𑀸𑀢𑀺, 𑀪𑀡𑁆𑀟𑀸𑀕𑀸𑀭𑀺𑀓𑁂𑀦 𑀧𑀦 𑀓𑀣𑀸𑀧𑁂𑀢𑁆𑀯𑀸 𑀧𑀭𑀺𑀲𑀸𑀬 𑀦𑀺𑀲𑁆𑀲𑀤𑁆𑀤𑀪𑀸𑀯𑀸𑀧𑀸𑀤𑀦𑀢𑁆𑀣𑀫𑁂𑀯 𑀏𑀯𑀁 𑀧𑀼𑀘𑁆𑀙𑀢𑀺. 𑀢𑀣𑀸 𑀓𑀣𑀸𑀧𑀦𑁂 𑀳𑀺 𑀅𑀲𑀢𑀺 𑀧𑀭𑀺𑀲𑀸 𑀲𑀤𑁆𑀤𑀁 𑀓𑀭𑀺𑀲𑁆𑀲𑀢𑀺 ‘‘𑀓𑀲𑁆𑀫𑀸 𑀭𑀸𑀚𑀸 𑀧𑀭𑀫𑁆𑀧𑀭𑀸𑀕𑀢𑀁 𑀓𑀼𑀮𑀥𑀦𑀁 𑀯𑀺𑀦𑀸𑀲𑁂𑀢𑀻’’𑀢𑀺, 𑀢𑀢𑁄 𑀘 𑀧𑀓𑀢𑀺𑀓𑁆𑀔𑁄𑀪𑁄 𑀪𑀯𑀺𑀲𑁆𑀲𑀢𑀺, 𑀲𑀢𑀺 𑀧𑀦 𑀢𑀣𑀸 𑀓𑀣𑀸𑀧𑀦𑁂 ‘‘𑀏𑀢𑀁𑀓𑀸𑀭𑀡𑀸 𑀢𑀁 𑀙𑀟𑁆𑀟𑁂𑀢𑀻’’𑀢𑀺 𑀦𑀺𑀲𑁆𑀲𑀤𑁆𑀤𑀪𑀸𑀯𑀫𑀸𑀧𑀚𑁆𑀚𑀺𑀲𑁆𑀲𑀢𑀺. 𑀢𑀢𑁄 𑀘 𑀧𑀓𑀢𑀺𑀓𑁆𑀔𑁄𑀪𑁄 𑀦 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀢𑀣𑀸 𑀧𑀼𑀘𑁆𑀙𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀫𑀭𑀡𑀯𑀲𑀦𑁆𑀢𑀺 𑀫𑀭𑀡𑀲𑁆𑀲, 𑀫𑀭𑀡𑀲𑀗𑁆𑀔𑀸𑀢𑀁 𑀯𑀸 𑀯𑀺𑀲𑀬𑀁.

𑁩𑁩𑁭. 𑀧𑀸𑀴𑀺𑀬𑀁 ‘‘𑀆𑀫𑀦𑁆𑀢𑁂𑀢𑁆𑀯𑀸’’𑀢𑀺 𑀏𑀢𑀲𑁆𑀲 𑀫𑀦𑁆𑀢𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑀁 𑀯𑀺𑀜𑁆𑀜𑀸𑀧𑁂𑀢𑀼𑀁 ‘‘𑀏𑀓𑁂𑀦 𑀧𑀡𑁆𑀟𑀺𑀢𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀥𑀸𑀢𑁆𑀯𑀢𑁆𑀣𑀸𑀦𑀼𑀯𑀢𑁆𑀢𑀓𑁄 𑀳𑁂𑀢𑁆𑀣 𑀉𑀧𑀲𑀕𑁆𑀕𑁄, 𑀧𑀓𑀭𑀡𑀸𑀥𑀺𑀕𑀢𑁄 𑀘 𑀓𑀢𑁆𑀣𑀘𑀺 𑀅𑀢𑁆𑀣𑀯𑀺𑀲𑁂𑀲𑁄 𑀬𑀣𑀸 ‘‘𑀲𑀺𑀓𑁆𑀔𑀫𑀸𑀦𑁂𑀦 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼𑀦𑀸 𑀅𑀜𑁆𑀜𑀸𑀢𑀩𑁆𑀩𑀁 𑀧𑀭𑀺𑀧𑀼𑀘𑁆𑀙𑀺𑀢𑀩𑁆𑀩𑀁 𑀧𑀭𑀺𑀧𑀜𑁆𑀳𑀺𑀢𑀩𑁆𑀩’’𑀦𑁆𑀢𑀺 (𑀧𑀸𑀘𑀺. 𑁪𑁩𑁪). 𑀢𑀣𑀸 𑀳𑀺𑀲𑁆𑀲 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀁 ‘‘𑀲𑀺𑀓𑁆𑀔𑀫𑀸𑀦𑁂𑀦𑀸𑀢𑀺 𑀲𑀺𑀓𑁆𑀔𑀺𑀢𑀼𑀓𑀸𑀫𑁂𑀦. 𑀅𑀜𑁆𑀜𑀸𑀢𑀩𑁆𑀩𑀦𑁆𑀢𑀺 𑀚𑀸𑀦𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺 (𑀧𑀸𑀘𑀺. 𑁪𑁩𑁬). 𑀆𑀫𑀦𑁆𑀢𑁂𑀲𑀻𑀢𑀺 𑀫𑀦𑁆𑀢𑀺𑀢𑀼𑀓𑀸𑀫𑁄𑀲𑀺. 𑀚𑀦𑀧𑀤𑀲𑁆𑀲 𑀅𑀦𑀼𑀧𑀤𑁆𑀤𑀯𑀢𑁆𑀣𑀁, 𑀬𑀜𑁆𑀜𑀲𑁆𑀲 𑀘 𑀘𑀺𑀭𑀸𑀦𑀧𑁆𑀧𑀯𑀢𑁆𑀢𑀦𑀢𑁆𑀣𑀁 𑀩𑁆𑀭𑀸𑀳𑁆𑀫𑀡𑁄 𑀘𑀺𑀦𑁆𑀢𑁂𑀲𑀻𑀢𑀺 𑀆𑀳 ‘‘𑀅𑀬𑀁 𑀭𑀸𑀚𑀸’’𑀢𑀺𑀆𑀤𑀺. 𑀆𑀳𑀭𑀦𑁆𑀢𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀕𑁂𑀳𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀅𑀦𑀸𑀤𑀭𑁂 𑀯𑀸 𑀏𑀢𑀁 𑀲𑀸𑀫𑀺𑀯𑀘𑀦𑀁.

𑁩𑁩𑁮. 𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀲𑁆𑀲 𑀯𑀺𑀤𑀽𑀲𑀦𑀢𑁄, 𑀅𑀳𑀺𑀢𑀤𑀼𑀓𑁆𑀔𑀲𑁆𑀲 𑀘 𑀆𑀯𑀳𑀦𑀢𑁄 𑀓𑀡𑁆𑀝𑀓𑀲𑀤𑀺𑀲𑀢𑀸𑀬 𑀘𑁄𑀭𑀸 𑀏𑀯 𑀇𑀥 ‘‘𑀓𑀡𑁆𑀝𑀓𑀸’’𑀢𑀺 𑀯𑀼𑀢𑁆𑀢𑀁 ‘‘𑀘𑁄𑀭𑀓𑀡𑁆𑀝𑀓𑁂𑀳𑀺 𑀲𑀓𑀡𑁆𑀝𑀓𑁄’’𑀢𑀺. 𑀬𑀣𑀸 𑀕𑀸𑀫𑀯𑀸𑀲𑀻𑀦𑀁 𑀖𑀸𑀢𑀓𑀸 𑀕𑀸𑀫𑀖𑀸𑀢𑀓𑀸 𑀅𑀪𑁂𑀤𑀯𑀲𑁂𑀦, 𑀉𑀧𑀘𑀸𑀭𑁂𑀦 𑀘 𑀦𑀺𑀲𑁆𑀲𑀬𑀦𑀸𑀫𑀲𑁆𑀲 𑀦𑀺𑀲𑁆𑀲𑀺𑀢𑁂𑀧𑀺 𑀧𑀯𑀢𑁆𑀢𑀦𑀢𑁄, 𑀏𑀯𑀁 𑀧𑀦𑁆𑀣𑀺𑀓𑀸𑀦𑀁 𑀤𑀼𑀳𑀦𑀸 𑀩𑀸𑀥𑀦𑀸 𑀧𑀦𑁆𑀣𑀤𑀼𑀳𑀸. 𑀥𑀫𑁆𑀫𑀢𑁄 𑀅𑀧𑁂𑀢𑀲𑁆𑀲 𑀅𑀬𑀼𑀢𑁆𑀢𑀲𑁆𑀲 𑀓𑀭𑀡𑀲𑀻𑀮𑁄 𑀅𑀥𑀫𑁆𑀫𑀓𑀸𑀭𑀻, 𑀬𑁄 𑀯𑀸 𑀅𑀢𑁆𑀢𑀦𑁄 𑀯𑀺𑀚𑀺𑀢𑁂 𑀚𑀦𑀧𑀤𑀸𑀤𑀻𑀦𑀁 𑀢𑀢𑁄 𑀢𑀢𑁄 𑀅𑀦𑀢𑁆𑀣𑀢𑁄 𑀢𑀸𑀬𑀦𑁂𑀦 𑀔𑀢𑁆𑀢𑀺𑀬𑁂𑀦 𑀓𑀢𑁆𑀢𑀩𑁆𑀩𑀥𑀫𑁆𑀫𑁄, 𑀢𑀲𑁆𑀲 𑀅𑀓𑀭𑀡𑀲𑀻𑀮𑁄𑀢𑀺 𑀅𑀢𑁆𑀣𑁄. 𑀤𑀲𑁆𑀲𑀽𑀢𑀺 𑀘𑁄𑀭𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀤𑀁𑀲𑁂𑀦𑁆𑀢𑀺 𑀯𑀺𑀤𑁆𑀥𑀁𑀲𑁂𑀦𑁆𑀢𑀻𑀢𑀺 𑀳𑀺 𑀤𑀲𑁆𑀲𑀯𑁄 𑀦𑀺𑀕𑁆𑀕𑀳𑀻𑀢𑀮𑁄𑀧𑁂𑀦, 𑀢𑁂 𑀏𑀯 𑀔𑀻𑀮𑀲𑀤𑀺𑀲𑀢𑁆𑀢𑀸 𑀔𑀻𑀮𑀦𑁆𑀢𑀺 𑀤𑀲𑁆𑀲𑀼𑀔𑀻𑀮𑀁. 𑀬𑀣𑀸 𑀳𑀺 𑀔𑁂𑀢𑁆𑀢𑁂 𑀔𑀻𑀮𑀁 𑀓𑀲𑀦𑀸𑀤𑀻𑀦𑀁 𑀲𑀼𑀔𑀧𑁆𑀧𑀯𑀢𑁆𑀢𑀺𑀁, 𑀫𑀽𑀮𑀲𑀦𑁆𑀢𑀸𑀦𑁂𑀦 𑀲𑀲𑁆𑀲𑀧𑀭𑀺𑀩𑀼𑀤𑁆𑀥𑀺𑀜𑁆𑀘 𑀯𑀺𑀩𑀦𑁆𑀥𑀢𑀺, 𑀏𑀯𑀁 𑀤𑀲𑁆𑀲𑀯𑁄𑀧𑀺 𑀭𑀚𑁆𑀚𑁂 𑀭𑀸𑀚𑀸𑀡𑀸𑀬 𑀲𑀼𑀔𑀧𑁆𑀧𑀯𑀢𑁆𑀢𑀺𑀁, 𑀫𑀽𑀮𑀯𑀺𑀭𑀼𑀴𑁆𑀳𑀺𑀬𑀸 𑀚𑀦𑀧𑀤𑀧𑀭𑀺𑀩𑀼𑀤𑁆𑀥𑀺𑀜𑁆𑀘 𑀯𑀺𑀩𑀦𑁆𑀥𑀦𑁆𑀢𑀻. 𑀧𑀸𑀡𑀘𑀸𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀸𑀭𑀡𑁂𑀦𑀸’’𑀢𑀺 𑀯𑀼𑀢𑁆𑀢𑀁, 𑀳𑀺𑀁𑀲𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀓𑁄𑀝𑁆𑀝𑀦𑁂𑀦𑀸’’𑀢𑀺. 𑀯𑀥𑀲𑀤𑁆𑀤𑁄 𑀳𑀺 𑀳𑀺𑀁𑀲𑀦𑀢𑁆𑀣𑁄𑀧𑀺 𑀳𑁄𑀢𑀺 ‘‘𑀯𑀥𑀢𑀺 𑀦 𑀭𑁄𑀤𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺𑀆𑀤𑀻𑀲𑀼 (𑀧𑀸𑀘𑀺. 𑁮𑁮𑁦) 𑀯𑀺𑀬, 𑀓𑀧𑁆𑀧𑀭𑀸𑀤𑀻𑀳𑀺 𑀧𑁄𑀣𑀦𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀤𑁆𑀤𑀼 𑀦𑀸𑀫 𑀤𑀸𑀭𑀼𑀓𑁆𑀔𑀦𑁆𑀥𑁂𑀦 𑀓𑀢𑁄 𑀩𑀦𑁆𑀥𑀦𑁄𑀧𑀓𑀭𑀡𑀯𑀺𑀲𑁂𑀲𑁄, 𑀢𑁂𑀦 𑀩𑀦𑁆𑀥𑀦𑀁 𑀢𑀣𑀸. 𑀆𑀤𑀺𑀲𑀤𑁆𑀤𑁂𑀦 𑀭𑀚𑁆𑀚𑀼𑀩𑀦𑁆𑀥𑀦𑀲𑀗𑁆𑀔𑀮𑀺𑀓𑀩𑀦𑁆𑀥𑀦𑀖𑀭𑀩𑀦𑁆𑀥𑀦𑀸𑀤𑀻𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀳𑀸-𑀥𑀸𑀢𑀼𑀬𑀸 𑀚𑀸𑀦𑀺𑀧𑀤𑀦𑀺𑀧𑁆𑀨𑀢𑁆𑀢𑀺𑀁 𑀤𑀲𑁆𑀲𑁂𑀢𑀺 ‘‘𑀳𑀸𑀦𑀺𑀬𑀸’’𑀢𑀺 𑀇𑀫𑀺𑀦𑀸, 𑀲𑀸 𑀘 𑀥𑀦𑀳𑀸𑀬𑀦𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀲𑀢𑀁 𑀕𑀡𑁆𑀳𑀣𑀸’’𑀢𑀺𑀆𑀤𑀺.

𑀧𑀜𑁆𑀘𑀲𑀺𑀔𑀫𑀢𑁆𑀢𑀁 𑀞𑀧𑁂𑀢𑁆𑀯𑀸 𑀫𑀼𑀡𑁆𑀟𑀸𑀧𑀦𑀁 𑀧𑀜𑁆𑀘𑀲𑀺𑀔𑀫𑀼𑀡𑁆𑀟𑀓𑀭𑀡𑀁. 𑀢𑀁 ‘‘𑀓𑀸𑀓𑀧𑀓𑁆𑀔𑀓𑀭𑀡’’𑀦𑁆𑀢𑀺𑀧𑀺 𑀯𑁄𑀳𑀭𑀦𑁆𑀢𑀺. 𑀲𑀻𑀲𑁂 𑀙𑀓𑀡𑁄𑀤𑀓𑀸𑀯𑀲𑁂𑀘𑀦𑀁 𑀕𑁄𑀫𑀬𑀲𑀺𑀜𑁆𑀘𑀦𑀁. 𑀓𑀼𑀤𑀡𑁆𑀟𑀓𑁄 𑀦𑀸𑀫 𑀘𑀢𑀼𑀳𑀢𑁆𑀣𑀢𑁄 𑀊𑀦𑁄 𑀭𑀲𑁆𑀲𑀤𑀡𑁆𑀟𑀓𑁄, 𑀬𑁄 ‘‘𑀕𑀤𑁆𑀤𑀼𑀮𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺, 𑀢𑁂𑀦 𑀩𑀦𑁆𑀥𑀦𑀁 𑀓𑀼𑀤𑀡𑁆𑀟𑀓𑀩𑀦𑁆𑀥𑀦𑀁. 𑀆𑀤𑀺𑀲𑀤𑁆𑀤𑁂𑀦 𑀔𑀼𑀭𑀫𑀼𑀡𑁆𑀟𑀁 𑀓𑀭𑀺𑀢𑁆𑀯𑀸 𑀪𑀲𑁆𑀫𑀧𑀼𑀝𑀯𑀥𑀦𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀲𑀫𑁆𑀫𑀸𑀲𑀤𑁆𑀤𑁄 𑀜𑀸𑀬𑀢𑁆𑀣𑁄𑀢𑀺 𑀆𑀳 ‘‘𑀳𑁂𑀢𑀼𑀦𑀸’’𑀢𑀺𑀆𑀤𑀺, 𑀧𑀭𑀺𑀬𑀸𑀬𑀯𑀘𑀦𑀫𑁂𑀢𑀁. 𑀊𑀳𑀦𑀺𑀲𑁆𑀲𑀸𑀫𑀻𑀢𑀺 𑀉𑀤𑁆𑀥𑀭𑀺𑀲𑁆𑀲𑀸𑀫𑀺, 𑀅𑀧𑀦𑁂𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀧𑀼𑀩𑁆𑀩𑁂 𑀢𑀢𑁆𑀣 𑀓𑀢𑀧𑀭𑀺𑀘𑀬𑀢𑀸𑀬 𑀉𑀲𑁆𑀲𑀸𑀳𑀁 𑀓𑀭𑁄𑀦𑁆𑀢𑀺. ‘‘𑀅𑀦𑀼𑀧𑁆𑀧𑀤𑁂𑀢𑀽’’𑀢𑀺 𑀏𑀢𑀲𑁆𑀲 𑀅𑀦𑀼 𑀅𑀦𑀼 𑀧𑀤𑁂𑀢𑀽𑀢𑀺 𑀅𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀤𑀺𑀦𑁆𑀦𑁂 𑀅𑀧𑁆𑀧𑀳𑁄𑀦𑁆𑀢𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀲𑀺𑀉𑀧𑀓𑀭𑀡𑀪𑀡𑁆𑀟𑀁 𑀨𑀸𑀮𑀧𑀸𑀚𑀦𑀬𑀼𑀕𑀦𑀗𑁆𑀕𑀮𑀸𑀤𑀺, 𑀇𑀫𑀺𑀦𑀸 𑀧𑀸𑀴𑀺𑀬𑀁 𑀩𑀻𑀚𑀪𑀢𑁆𑀢𑀫𑁂𑀯 𑀦𑀺𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀲𑀓𑁆𑀔𑀺𑀓𑀭𑀡𑀧𑀡𑁆𑀡𑀸𑀭𑁄𑀧𑀦𑀦𑀺𑀩𑀦𑁆𑀥𑀦𑀁 𑀯𑀟𑁆𑀠𑀺𑀬𑀸 𑀲𑀳 𑀯𑀸 𑀯𑀺𑀦𑀸 𑀯𑀸 𑀧𑀼𑀦 𑀕𑀳𑁂𑀢𑀼𑀓𑀸𑀫𑀲𑁆𑀲 𑀤𑀸𑀦𑁂 𑀳𑁄𑀢𑀺, 𑀇𑀥 𑀧𑀦 𑀢𑀤𑀼𑀪𑀬𑀫𑁆𑀧𑀺 𑀦𑀢𑁆𑀣𑀺 𑀧𑀼𑀦 𑀅𑀕𑁆𑀕𑀳𑁂𑀢𑀼𑀓𑀸𑀫𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀲𑀓𑁆𑀔𑀺𑀁 𑀅𑀓𑀢𑁆𑀯𑀸’’𑀢𑀺𑀆𑀤𑀺. 𑀢𑁂𑀦𑀸𑀳 ‘‘𑀫𑀽𑀮𑀘𑁆𑀙𑁂𑀚𑁆𑀚𑀯𑀲𑁂𑀦𑀸’’𑀢𑀺. 𑀲𑀓𑁆𑀔𑀺𑀦𑁆𑀢𑀺 𑀢𑀤𑀸 𑀧𑀘𑁆𑀘𑀓𑁆𑀔𑀓𑀚𑀦𑀁. 𑀧𑀡𑁆𑀡𑁂 𑀅𑀦𑀸𑀭𑁄𑀧𑁂𑀢𑁆𑀯𑀸𑀢𑀺 𑀢𑀸𑀮𑀸𑀤𑀺𑀧𑀡𑁆𑀡𑁂 𑀬𑀣𑀸𑀘𑀺𑀡𑁆𑀡𑀁 𑀮𑀺𑀔𑀦𑀯𑀲𑁂𑀦 𑀅𑀦𑀸𑀭𑁄𑀧𑁂𑀢𑁆𑀯𑀸. 𑀅𑀜𑁆𑀜𑀢𑁆𑀣 𑀧𑀡𑁆𑀡𑀸𑀓𑀸𑀭𑁂𑀧𑀺 𑀧𑀸𑀪𑀢𑀲𑀤𑁆𑀤𑁄, 𑀇𑀥 𑀧𑀦 𑀪𑀡𑁆𑀟𑀫𑀽𑀮𑁂𑀬𑁂𑀯𑀸𑀢𑀺 𑀆𑀳 ‘‘𑀪𑀡𑁆𑀟𑀫𑀽𑀮𑀲𑁆𑀲𑀸’’𑀢𑀺𑀆𑀤𑀺. 𑀪𑀡𑁆𑀟𑀫𑀽𑀮𑀜𑁆𑀳𑀺 𑀧𑀓𑀸𑀭𑀢𑁄 𑀉𑀤𑀬𑀪𑀡𑁆𑀟𑀸𑀦𑀺 𑀆𑀪𑀭𑀢𑀺 𑀲𑀁𑀳𑀭𑀢𑀺 𑀏𑀢𑁂𑀦𑀸𑀢𑀺 𑀧𑀸𑀪𑀢𑀁. 𑀉𑀤𑀬𑀥𑀦𑀢𑁄 𑀧𑀕𑁂𑀯 𑀆𑀪𑀢𑀁 𑀧𑀸𑀪𑀢𑀦𑁆𑀢𑀺 𑀲𑀤𑁆𑀤𑀯𑀺𑀤𑀽, 𑀧𑀡𑁆𑀡𑀸𑀓𑀸𑀭𑁄 𑀧𑀦 𑀢𑀁 𑀢𑀤𑀢𑁆𑀣𑀁 𑀧𑀢𑁆𑀣𑁂𑀦𑁆𑀢𑁂𑀳𑀺 𑀆𑀪𑀭𑀻𑀬𑀢𑁂𑀢𑀺 𑀧𑀸𑀪𑀢𑀁. 𑀧𑀢𑁆𑀣𑀦𑀢𑁆𑀣𑀚𑁄𑀢𑀓𑁄 𑀳𑀺 𑀅𑀬𑀁 𑀧-𑀲𑀤𑁆𑀤𑁄.

‘‘𑀬𑀣𑀸𑀳𑀸’’𑀢𑀺𑀆𑀤𑀺𑀦𑀸 𑀧𑀸𑀪𑀢𑀲𑀤𑁆𑀤𑀲𑁆𑀲 𑀫𑀽𑀮𑀪𑀡𑁆𑀟𑀢𑁆𑀣𑀢𑀁 𑀘𑀽𑀴𑀲𑁂𑀝𑁆𑀞𑀺𑀚𑀸𑀢𑀓𑀧𑀸𑀞𑁂𑀦 (𑀚𑀸. 𑁧.𑁧.𑁪) 𑀲𑀸𑀥𑁂𑀢𑀺. 𑀢𑀢𑁆𑀭𑀸𑀬𑀫𑀝𑁆𑀞𑀓𑀣𑀸 (𑀚𑀸. 𑀅𑀝𑁆𑀞. 𑁧.𑁧.𑁪) ‘‘𑀅𑀧𑁆𑀧𑀓𑁂𑀦𑀧𑀻𑀢𑀺 𑀣𑁄𑀓𑁂𑀦𑀧𑀺 𑀧𑀭𑀺𑀢𑁆𑀢𑀓𑁂𑀦𑀧𑀺. 𑀫𑁂𑀥𑀸𑀯𑀻𑀢𑀺 𑀧𑀜𑁆𑀜𑀯𑀸. 𑀧𑀸𑀪𑀢𑁂𑀦𑀸𑀢𑀺 𑀪𑀡𑁆𑀟𑀫𑀽𑀮𑁂𑀦. 𑀯𑀺𑀘𑀓𑁆𑀔𑀡𑁄𑀢𑀺 𑀯𑁄𑀳𑀸𑀭𑀓𑀼𑀲𑀮𑁄. 𑀲𑀫𑀼𑀝𑁆𑀞𑀸𑀧𑁂𑀢𑀺 𑀅𑀢𑁆𑀢𑀸𑀦𑀦𑁆𑀢𑀺 𑀫𑀳𑀦𑁆𑀢𑀁 𑀥𑀦𑀜𑁆𑀘 𑀬𑀲𑀜𑁆𑀘 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀢𑁆𑀣 𑀅𑀢𑁆𑀢𑀸𑀦𑀁 𑀲𑀡𑁆𑀞𑀸𑀧𑁂𑀢𑀺 𑀧𑀢𑀺𑀝𑁆𑀞𑀸𑀧𑁂𑀢𑀺. 𑀬𑀣𑀸 𑀓𑀺𑀁? 𑀅𑀡𑀼𑀁 𑀅𑀕𑁆𑀕𑀺𑀁𑀯 𑀲𑀦𑁆𑀥𑀫𑀁, 𑀬𑀣𑀸 𑀧𑀡𑁆𑀟𑀺𑀢𑀧𑀼𑀭𑀺𑀲𑁄 𑀧𑀭𑀺𑀢𑁆𑀢𑀁 𑀅𑀕𑁆𑀕𑀺𑀁 𑀅𑀦𑀼𑀓𑁆𑀓𑀫𑁂𑀦 𑀕𑁄𑀫𑀬𑀘𑀼𑀡𑁆𑀡𑀸𑀤𑀻𑀦𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀫𑀼𑀔𑀯𑀸𑀢𑁂𑀦 𑀥𑀫𑀦𑁆𑀢𑁄 𑀲𑀫𑀼𑀝𑁆𑀞𑀸𑀧𑁂𑀢𑀺 𑀯𑀟𑁆𑀠𑁂𑀢𑀺 𑀫𑀳𑀦𑁆𑀢𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀓𑀭𑁄𑀢𑀺, 𑀏𑀯𑀫𑁂𑀯 𑀧𑀡𑁆𑀟𑀺𑀢𑁄 𑀣𑁄𑀓𑀫𑁆𑀧𑀺 𑀧𑀸𑀪𑀢𑀁 𑀮𑀪𑀺𑀢𑁆𑀯𑀸 𑀦𑀸𑀦𑀸𑀉𑀧𑀸𑀬𑁂𑀳𑀺 𑀧𑀬𑁄𑀚𑁂𑀢𑁆𑀯𑀸 𑀥𑀦𑀜𑁆𑀘 𑀬𑀲𑀜𑁆𑀘 𑀯𑀟𑁆𑀠𑁂𑀢𑀺, 𑀯𑀟𑁆𑀠𑁂𑀢𑁆𑀯𑀸 𑀘 𑀧𑀦 𑀢𑀢𑁆𑀣 𑀅𑀢𑁆𑀢𑀸𑀦𑀁 𑀧𑀢𑀺𑀝𑁆𑀞𑀸𑀧𑁂𑀢𑀺, 𑀢𑀸𑀬 𑀏𑀯 𑀯𑀸 𑀧𑀦 𑀥𑀦𑀬𑀲𑀫𑀳𑀦𑁆𑀢𑀢𑀸𑀬 𑀅𑀢𑁆𑀢𑀸𑀦𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀅𑀪𑀺𑀜𑁆𑀜𑀸𑀢𑀁 𑀧𑀸𑀓𑀝𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄’’𑀢𑀺.

𑀤𑀺𑀯𑀲𑁂 𑀤𑀺𑀯𑀲𑁂 𑀤𑀸𑀢𑀩𑁆𑀩𑀁 𑀤𑁂𑀯𑀲𑀺𑀓𑀁. 𑀫𑀸𑀲𑁂 𑀫𑀸𑀲𑁂 𑀤𑀸𑀢𑀩𑁆𑀩𑀁 𑀫𑀸𑀲𑀺𑀓𑀁. 𑀆𑀤𑀺𑀲𑀤𑁆𑀤𑁂𑀦 𑀅𑀦𑀼𑀧𑁄𑀲𑀣𑀺𑀓𑀸𑀤𑀻𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀲𑁆𑀲 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲. 𑀓𑀼𑀲𑀮𑀸𑀦𑀼𑀭𑀽𑀧𑁂𑀦, 𑀓𑀫𑁆𑀫𑀸𑀦𑀼𑀭𑀽𑀧𑁂𑀦 𑀲𑀽𑀭𑀪𑀸𑀯𑀸𑀦𑀼𑀭𑀽𑀧𑁂𑀦𑀸𑀢𑀺 𑀤𑁆𑀯𑀦𑁆𑀤𑀢𑁄 𑀧𑀭𑀁 𑀲𑀼𑀬𑁆𑀬𑀫𑀸𑀦𑁄 𑀅𑀦𑀼𑀭𑀽𑀧𑀲𑀤𑁆𑀤𑁄 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄. 𑀙𑁂𑀓𑀪𑀸𑀯𑀸𑀦𑀼𑀭𑀽𑀧𑀢𑀸 𑀘𑁂𑀢𑁆𑀣 𑀓𑀼𑀲𑀮𑀸𑀦𑀼𑀭𑀽𑀧𑀁. 𑀓𑀢𑁆𑀣𑀘𑀺 𑀓𑀼𑀮𑀲𑀤𑁆𑀤𑁄 𑀤𑀺𑀲𑁆𑀲𑀢𑀺, 𑀲𑁄 𑀘 𑀚𑀸𑀡𑀼𑀲𑁄𑀡𑀺𑀆𑀤𑀺𑀓𑀼𑀮𑀸𑀦𑀫𑀺𑀯 𑀓𑀼𑀮𑀸𑀦𑀼𑀭𑀽𑀧𑀫𑁆𑀧𑀺 𑀤𑀸𑀢𑀩𑁆𑀩𑀢𑁄 𑀬𑀼𑀚𑁆𑀚𑀢𑁂𑀯. 𑀲𑁂𑀦𑀸𑀧𑀘𑁆𑀘𑀸𑀤𑀺 𑀞𑀸𑀦𑀦𑁆𑀢𑀭𑀁, 𑀇𑀫𑀺𑀦𑀸 𑀪𑀢𑁆𑀢𑀯𑁂𑀢𑀦𑀁 𑀦𑀺𑀤𑁆𑀤𑀺𑀝𑁆𑀞𑀫𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀲𑀓𑀓𑀫𑁆𑀫𑀧𑀲𑀼𑀢𑀢𑁆𑀢𑀸, 𑀅𑀦𑀼𑀧𑀤𑁆𑀤𑀯𑀢𑁆𑀢𑀸 𑀘 𑀥𑀦𑀥𑀜𑁆𑀜𑀸𑀦𑀁 𑀭𑀸𑀲𑀺𑀓𑁄 𑀭𑀸𑀲𑀺𑀓𑀸𑀭𑀪𑀽𑀢𑁄. 𑀔𑁂𑀫𑁂𑀦 𑀞𑀺𑀢𑀸𑀢𑀺 𑀅𑀦𑀼𑀧𑀤𑁆𑀤𑀯𑁂𑀦 𑀧𑀯𑀢𑁆𑀢𑀸. 𑀢𑁂𑀦𑀸𑀳 ‘‘𑀅𑀪𑀬𑀸’’𑀢𑀺, 𑀓𑀼𑀢𑁄𑀘𑀺𑀧𑀺 𑀪𑀬𑀭𑀳𑀺𑀢𑀸𑀢𑀺 𑀅𑀢𑁆𑀣𑁄. 𑀫𑁄𑀤𑀸 𑀫𑁄𑀤𑀫𑀸𑀦𑀸𑀢𑀺 𑀫𑁄𑀤𑀸𑀬 𑀫𑁄𑀤𑀫𑀸𑀦𑀸, 𑀲𑁄𑀫𑀦𑀲𑁆𑀲𑁂𑀦𑁂𑀯 𑀫𑁄𑀤𑀫𑀸𑀦𑀸, 𑀦 𑀲𑀁𑀲𑀦𑁆𑀤𑀦𑀫𑀢𑁆𑀢𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀻’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁩𑁮𑁧) 𑀳𑀺 𑀫𑀼𑀤𑀲𑀤𑁆𑀤𑁄 𑀲𑀁𑀲𑀦𑁆𑀤𑀦𑁂𑀧𑀺 𑀧𑀯𑀢𑁆𑀢𑀢𑀺, 𑀅𑀜𑁆𑀜𑁂 𑀫𑁄𑀤𑀸 𑀳𑀼𑀢𑁆𑀯𑀸 𑀅𑀧𑀭𑁂𑀧𑀺 𑀫𑁄𑀤𑀫𑀸𑀦𑀸 𑀯𑀺𑀳𑀭𑀦𑁆𑀢𑀻𑀢𑀺 𑀯𑀸 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀅𑀜𑁆𑀜𑀫𑀜𑁆𑀜𑀁 𑀧𑀫𑀼𑀤𑀺𑀢𑀘𑀺𑀢𑁆𑀢𑀸𑀢𑀺, 𑀅𑀲𑀜𑁆𑀜𑁄𑀕𑁂𑀧𑀺 𑀯𑀢𑁆𑀢𑀺𑀘𑁆𑀙𑀸𑀬𑁂𑀯 𑀯𑀼𑀤𑁆𑀥𑀻𑀢𑀺 𑀤𑁆𑀯𑀺𑀥𑀸 𑀧𑀸𑀞𑁄 𑀯𑀼𑀢𑁆𑀢𑁄. 𑀇𑀤𑁆𑀥𑀨𑀻𑀢𑀪𑀸𑀯𑀦𑁆𑀢𑀺 𑀲𑀫𑀺𑀤𑁆𑀥𑀯𑁂𑀧𑀼𑀮𑁆𑀮𑀪𑀸𑀯𑀁.

𑀘𑀢𑀼𑀧𑀭𑀺𑀓𑁆𑀔𑀸𑀭𑀯𑀡𑁆𑀡𑀦𑀸

𑁩𑁩𑁯. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀺𑀘𑁆𑀘𑁂 𑀅𑀦𑀼𑀬𑀦𑁆𑀢𑀺 𑀅𑀦𑀼𑀯𑀢𑁆𑀢𑀦𑁆𑀢𑀻𑀢𑀺 𑀅𑀦𑀼𑀬𑀦𑁆𑀢𑀸. 𑀢𑁂𑀬𑁂𑀯 𑀆𑀦𑀼𑀬𑀦𑁆𑀢𑀸 𑀬𑀣𑀸 ‘‘𑀅𑀦𑀼𑀪𑀸𑀯𑁄 𑀏𑀯 𑀆𑀦𑀼𑀪𑀸𑀯𑁄’’𑀢𑀺, ‘‘𑀆𑀦𑀼𑀬𑀼𑀢𑁆𑀢𑀸’’𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀺𑀘𑁆𑀘𑁂 𑀅𑀦𑀼𑀬𑀼𑀚𑁆𑀚𑀦𑁆𑀢𑀻𑀢𑀺 𑀳𑀺 𑀆𑀦𑀼𑀬𑀼𑀢𑁆𑀢𑀸 𑀯𑀼𑀢𑁆𑀢𑀦𑀬𑁂𑀦. 𑀅𑀲𑁆𑀲𑀸𑀢𑀺 𑀭𑀜𑁆𑀜𑁄. 𑀢𑁂𑀢𑀺 𑀆𑀦𑀼𑀬𑀦𑁆𑀢𑀔𑀢𑁆𑀢𑀺𑀬𑀸𑀤𑀬𑁄. ‘‘𑀅𑀫𑁆𑀳𑁂 𑀏𑀢𑁆𑀣 𑀩𑀳𑀺 𑀓𑀭𑁄𑀢𑀻’’𑀢𑀺 𑀅𑀢𑁆𑀢𑀫𑀦𑀸 𑀦 𑀪𑀯𑀺𑀲𑁆𑀲𑀦𑁆𑀢𑀺. ‘‘𑀦𑀺𑀩𑀦𑁆𑀥𑀯𑀺𑀧𑀼𑀮𑀸𑀬𑀸𑀕𑀫𑁄 𑀕𑀸𑀫𑁄 𑀦𑀺𑀕𑀫𑁄. 𑀯𑀺𑀯𑀟𑁆𑀠𑀺𑀢𑀫𑀳𑀸𑀆𑀬𑁄 𑀫𑀳𑀸𑀕𑀸𑀫𑁄’’𑀢𑀺 (𑀤𑀻. 𑀦𑀺. 𑀝𑀻. 𑁧.𑁩𑁩𑁮) 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑀁. ‘‘𑀅𑀧𑀸𑀓𑀸𑀭𑀧𑀭𑀺𑀓𑁆𑀔𑁂𑀧𑁄 𑀲𑀸𑀧𑀡𑁄 𑀦𑀺𑀕𑀫𑁄, 𑀲𑀧𑀸𑀓𑀸𑀭𑀸𑀧𑀡𑀁 𑀦𑀕𑀭𑀁, 𑀢𑀁 𑀢𑀩𑁆𑀩𑀺𑀧𑀭𑀻𑀢𑁄 𑀕𑀸𑀫𑁄’’𑀢𑀺 (𑀓𑀗𑁆𑀔𑀸𑀯𑀺𑀢𑀭𑀡𑀻 𑀅𑀪𑀺𑀦𑀯𑀝𑀻𑀓𑀸𑀬𑀁 𑀲𑀗𑁆𑀖𑀸𑀤𑀺𑀲𑁂𑀲𑀓𑀡𑁆𑀟𑁂 𑀓𑀼𑀮𑀤𑀽𑀲𑀓𑀲𑀺𑀓𑁆𑀔𑀸𑀧𑀤𑁂 𑀧𑀲𑁆𑀲𑀺𑀢𑀩𑁆𑀩𑀁) 𑀯𑀺𑀦𑀬𑀝𑀻𑀓𑀸𑀲𑀼. 𑀕𑀲𑀦𑁆𑀢𑀺 𑀫𑀤𑀦𑁆𑀢𑀺 𑀏𑀢𑁆𑀣𑀸𑀢𑀺 𑀕𑀸𑀫𑁄, 𑀲𑁆𑀯𑁂𑀯 𑀧𑀸𑀓𑀝𑁄 𑀘𑁂, 𑀦𑀺𑀕𑀫𑁄 𑀦𑀸𑀫 𑀅𑀢𑀺𑀭𑁂𑀓𑁄 𑀕𑀸𑀫𑁄𑀢𑀺 𑀓𑀢𑁆𑀯𑀸. 𑀪𑀼𑀲𑀢𑁆𑀣𑁄 𑀳𑁂𑀢𑁆𑀣 𑀦𑀻-𑀲𑀤𑁆𑀤𑁄, 𑀲𑀜𑁆𑀜𑀸𑀲𑀤𑁆𑀤𑀢𑁆𑀢𑀸 𑀘 𑀭𑀲𑁆𑀲𑁄𑀢𑀺 𑀲𑀤𑁆𑀤𑀯𑀺𑀤𑀽. 𑀚𑀦𑀧𑀤𑀢𑁆𑀣𑁄 𑀯𑀼𑀢𑁆𑀢𑁄𑀯. ‘‘𑀲𑀸𑀫𑁆𑀬𑀸𑀫𑀘𑁆𑀘𑁄 𑀲𑀔𑀸 𑀓𑁄𑀲𑁄, 𑀤𑀼𑀕𑁆𑀕𑀜𑁆𑀘 𑀯𑀺𑀚𑀺𑀢𑀁 𑀩𑀮’’𑀦𑁆𑀢𑀺 𑀯𑀼𑀢𑁆𑀢𑀸𑀲𑀼 𑀲𑀢𑁆𑀢𑀲𑀼 𑀭𑀸𑀚𑀧𑀓𑀢𑀻𑀲𑀼 𑀭𑀜𑁆𑀜𑁄 𑀢𑀤𑀯𑀲𑁂𑀲𑀸𑀦𑀁 𑀙𑀦𑁆𑀦𑀁 𑀯𑀲𑁂𑀦 𑀳𑀺𑀢𑀲𑀼𑀔𑀸𑀢𑀺𑀯𑀼𑀤𑁆𑀥𑀺, 𑀢𑀤𑁂𑀓𑀤𑁂𑀲𑀸 𑀘 𑀆𑀦𑀼𑀬𑀦𑁆𑀢𑀸𑀤𑀬𑁄𑀢𑀺 𑀆𑀳 ‘‘𑀬𑀁 𑀢𑀼𑀫𑁆𑀳𑀸𑀓’’𑀦𑁆𑀢𑀺𑀆𑀤𑀺.

𑀢𑀁𑀢𑀁𑀓𑀺𑀘𑁆𑀘𑁂𑀲𑀼 𑀭𑀜𑁆𑀜𑀸 𑀅𑀫𑀸 𑀲𑀳 𑀪𑀯𑀦𑁆𑀢𑀻𑀢𑀺 𑀅𑀫𑀘𑁆𑀘𑀸. ‘‘𑀅𑀫𑀸𑀯𑀸𑀲𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀳𑀺 𑀲𑀫𑀓𑀺𑀭𑀺𑀬𑀸𑀬 𑀅𑀫𑀸𑀢𑀺 𑀅𑀩𑁆𑀬𑀬𑀧𑀤𑀁, 𑀘-𑀧𑀘𑁆𑀘𑀬𑁂𑀦 𑀢𑀤𑁆𑀥𑀺𑀢𑀲𑀺𑀤𑁆𑀥𑀻𑀢𑀺 𑀦𑁂𑀭𑀼𑀢𑁆𑀢𑀺𑀓𑀸. 𑀭𑀚𑁆𑀚𑀓𑀺𑀘𑁆𑀘𑀯𑁄𑀲𑀸𑀲𑀦𑀓𑀸𑀮𑁂 𑀧𑀦 𑀢𑁂 𑀭𑀜𑁆𑀜𑀸 𑀧𑀺𑀬𑀸, 𑀲𑀳𑀧𑀯𑀢𑁆𑀢𑀦𑀓𑀸 𑀘 𑀪𑀯𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺 ‘‘𑀧𑀺𑀬𑀲𑀳𑀸𑀬𑀓𑀸’’𑀢𑀺 𑀇𑀫𑀺𑀦𑀸. 𑀭𑀜𑁆𑀜𑁄 𑀧𑀭𑀺𑀲𑀢𑀺 𑀪𑀯𑀸 ‘‘𑀧𑀸𑀭𑀺𑀲𑀚𑁆𑀚𑀸. 𑀓𑁂 𑀧𑀦 𑀢𑁂𑀢𑀺 𑀯𑀼𑀢𑁆𑀢𑀁 ‘‘𑀲𑁂𑀲𑀸 𑀆𑀡𑀢𑁆𑀢𑀺𑀓𑀸𑀭𑀓𑀸’’𑀢𑀺, 𑀬𑀣𑀸𑀯𑀼𑀢𑁆𑀢𑀸𑀦𑀼𑀬𑀼𑀢𑁆𑀢𑀔𑀢𑁆𑀢𑀺𑀬𑀸𑀤𑀻𑀳𑀺 𑀅𑀯𑀲𑁂𑀲𑀸 𑀭𑀜𑁆𑀜𑁄 𑀆𑀡𑀸𑀓𑀭𑀸𑀢𑀺 𑀅𑀢𑁆𑀣𑁄. 𑀲𑀢𑀺𑀧𑀺 𑀤𑁂𑀬𑁆𑀬𑀥𑀫𑁆𑀫𑁂 𑀆𑀦𑀼𑀪𑀸𑀯𑀲𑀫𑁆𑀧𑀢𑁆𑀢𑀺𑀬𑀸, 𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀘 𑀅𑀪𑀸𑀯𑁂 𑀢𑀸𑀤𑀺𑀲𑀁 𑀤𑀸𑀢𑀼𑀁 𑀦 𑀲𑀓𑁆𑀓𑀸. 𑀯𑀼𑀤𑁆𑀥𑀓𑀸𑀮𑁂 𑀘 𑀢𑀸𑀤𑀺𑀲𑀸𑀦𑀫𑁆𑀧𑀺 𑀭𑀸𑀚𑀽𑀦𑀁 𑀢𑀤𑀼𑀪𑀬𑀁 𑀳𑀸𑀬𑀢𑁂𑀯, 𑀤𑁂𑀬𑁆𑀬𑀥𑀫𑁆𑀫𑁂 𑀧𑀦 𑀅𑀲𑀢𑀺 𑀧𑀕𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀤𑁂𑀬𑁆𑀬𑀥𑀫𑁆𑀫𑀲𑁆𑀫𑀺𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀤𑁂𑀬𑁆𑀬𑀥𑀫𑁆𑀫𑀲𑁆𑀫𑀺𑀁 𑀅𑀲𑀢𑀺 𑀘 𑀫𑀳𑀮𑁆𑀮𑀓𑀓𑀸𑀮𑁂 𑀘 𑀤𑀸𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀬𑁄𑀚𑀦𑀸. 𑀏𑀢𑁂𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑀓𑀸𑀭𑀡𑀤𑁆𑀯𑀬𑁂𑀦. 𑀅𑀦𑀼𑀫𑀢𑀺𑀬𑀸𑀢𑀺 𑀅𑀦𑀼𑀚𑀸𑀦𑀦𑁂𑀦. 𑀧𑀓𑁆𑀔𑀸𑀢𑀺 𑀲𑀧𑀓𑁆𑀔𑀸 𑀬𑀜𑁆𑀜𑀲𑁆𑀲 𑀅𑀗𑁆𑀕𑀪𑀽𑀢𑀸. 𑀬𑀜𑁆𑀜𑀁 𑀧𑀭𑀺𑀓𑀭𑁄𑀦𑁆𑀢𑀻𑀢𑀺 𑀧𑀭𑀺𑀓𑁆𑀔𑀸𑀭𑀸, 𑀲𑀫𑁆𑀪𑀸𑀭𑀸, 𑀢𑁂 𑀘 𑀢𑀲𑁆𑀲 𑀬𑀜𑁆𑀜𑀲𑁆𑀲 𑀅𑀗𑁆𑀕𑀪𑀽𑀢𑀢𑁆𑀢𑀸 𑀧𑀭𑀺𑀯𑀸𑀭𑀸 𑀯𑀺𑀬 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀧𑀭𑀺𑀯𑀸𑀭𑀸 𑀪𑀯𑀦𑁆𑀢𑀻’’𑀢𑀺. ‘‘𑀭𑀣𑁄’’𑀢𑀺𑀆𑀤𑀺𑀦𑀸 𑀇𑀥𑀸𑀦𑀥𑀺𑀧𑁆𑀧𑁂𑀢𑀫𑀢𑁆𑀣𑀁 𑀦𑀺𑀲𑁂𑀥𑁂𑀢𑀺.

‘‘𑀭𑀣𑁄 𑀲𑁂𑀢𑀧𑀭𑀺𑀓𑁆𑀔𑀸𑀭𑁄, 𑀛𑀸𑀦𑀓𑁆𑀔𑁄 𑀘𑀓𑁆𑀓𑀯𑀻𑀭𑀺𑀬𑁄;

𑀉𑀧𑁂𑀓𑁆𑀔𑀸 𑀥𑀼𑀭𑀲𑀫𑀸𑀥𑀺, 𑀅𑀦𑀺𑀘𑁆𑀙𑀸 𑀧𑀭𑀺𑀯𑀸𑀭𑀡’’𑀦𑁆𑀢𑀺. (𑀲𑀁. 𑀦𑀺. 𑁫.𑁪);

𑀳𑀺 𑀲𑀁𑀬𑀼𑀢𑁆𑀢𑀫𑀳𑀸𑀯𑀕𑁆𑀕𑀧𑀸𑀴𑀺. 𑀢𑀢𑁆𑀣 𑀭𑀣𑁄𑀢𑀺 𑀩𑁆𑀭𑀳𑁆𑀫𑀬𑀸𑀦𑀲𑀜𑁆𑀜𑀺𑀢𑁄 𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀭𑀣𑁄. 𑀲𑁂𑀢𑀧𑀭𑀺𑀓𑁆𑀔𑀸𑀭𑁄𑀢𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀸𑀮𑀗𑁆𑀓𑀸𑀭𑁄. ‘‘𑀲𑀻𑀮𑀧𑀭𑀺𑀓𑁆𑀔𑀸𑀭𑁄’’𑀢𑀺𑀧𑀺 𑀧𑀸𑀞𑁄. 𑀛𑀸𑀦𑀓𑁆𑀔𑁄𑀢𑀺 𑀯𑀺𑀧𑀲𑁆𑀲𑀦𑀸𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀧𑀜𑁆𑀘𑀦𑁆𑀦𑀁 𑀛𑀸𑀦𑀗𑁆𑀕𑀸𑀦𑀁 𑀯𑀲𑁂𑀦 𑀛𑀸𑀦𑀫𑀬𑀅𑀓𑁆𑀔𑁄. 𑀘𑀓𑁆𑀓𑀯𑀻𑀭𑀺𑀬𑁄𑀢𑀺 𑀯𑀻𑀭𑀺𑀬𑀘𑀓𑁆𑀓𑁄. 𑀉𑀧𑁂𑀓𑁆𑀔𑀸 𑀥𑀼𑀭𑀲𑀫𑀸𑀥𑀻𑀢𑀺 𑀉𑀧𑁂𑀓𑁆𑀔𑀸 𑀤𑁆𑀯𑀺𑀦𑁆𑀦𑀁 𑀥𑀼𑀭𑀸𑀦𑀁 𑀲𑀫𑀢𑀸. 𑀅𑀦𑀺𑀘𑁆𑀙𑀸 𑀧𑀭𑀺𑀯𑀸𑀭𑀡𑀦𑁆𑀢𑀺 𑀅𑀮𑁄𑀪𑁄 𑀲𑀻𑀳𑀥𑀫𑁆𑀫𑀸𑀤𑀻𑀦𑀺 𑀯𑀺𑀬 𑀧𑀭𑀺𑀯𑀸𑀭𑀡𑀁.

𑀅𑀝𑁆𑀞𑀧𑀭𑀺𑀓𑁆𑀔𑀸𑀭𑀯𑀡𑁆𑀡𑀦𑀸

𑁩𑁪𑁦. 𑀉𑀪𑀢𑁄 𑀲𑀼𑀚𑀸𑀢𑀸𑀤𑀻𑀳𑀺 𑀯𑀼𑀘𑁆𑀘𑀫𑀸𑀦𑁂𑀳𑀺. 𑀬𑀲𑀲𑀸𑀢𑀺 𑀧𑀜𑁆𑀘𑀯𑀺𑀥𑁂𑀦 𑀆𑀦𑀼𑀪𑀸𑀯𑁂𑀦. 𑀢𑁂𑀦𑀸𑀳 ‘‘𑀆𑀡𑀸𑀞𑀧𑀦𑀲𑀫𑀢𑁆𑀣𑀢𑀸𑀬𑀸’’𑀢𑀺. ‘‘𑀲𑀤𑁆𑀥𑁄’’𑀢𑀺 𑀏𑀢𑀲𑁆𑀲 ‘‘𑀤𑀸𑀢𑀸𑀤𑀸𑀦𑀲𑁆𑀲 𑀨𑀮𑀁 𑀧𑀘𑁆𑀘𑀦𑀼𑀪𑁄𑀢𑀺 𑀧𑀢𑁆𑀢𑀺𑀬𑀸𑀬𑀢𑀻’’𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀤𑀸𑀦𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑀸𑀦𑁂 𑀲𑀽𑀭𑁄𑀢𑀺 𑀤𑀸𑀦𑀲𑀽𑀭𑁄, 𑀤𑁂𑀬𑁆𑀬𑀥𑀫𑁆𑀫𑁂 𑀈𑀲𑀓𑀫𑁆𑀧𑀺 𑀲𑀗𑁆𑀕𑀁 𑀅𑀓𑀢𑁆𑀯𑀸 𑀫𑀼𑀢𑁆𑀢𑀘𑀸𑀕𑁄, 𑀢𑀩𑁆𑀪𑀸𑀯𑁄 𑀧𑀦 𑀓𑀫𑁆𑀫𑀲𑁆𑀲𑀓𑀢𑀸𑀜𑀸𑀡𑀲𑁆𑀲 𑀢𑀺𑀓𑁆𑀔𑀯𑀺𑀲𑀤𑀪𑀸𑀯𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀢𑀲𑁆𑀲 𑀳𑀺 𑀢𑀺𑀓𑁆𑀔𑀯𑀺𑀲𑀤𑀪𑀸𑀯𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀲𑀤𑁆𑀤𑁄’’𑀢𑀺 𑀯𑀢𑁆𑀯𑀸 ‘‘𑀤𑀸𑀦𑀲𑀽𑀭𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑀸𑀳 ‘‘𑀦 𑀲𑀤𑁆𑀥𑀸𑀫𑀢𑁆𑀢𑀓𑁂𑀦𑀸’’𑀢𑀺𑀆𑀤𑀺. 𑀬𑀲𑁆𑀲 𑀳𑀺 𑀓𑀫𑁆𑀫𑀲𑁆𑀲𑀓𑀢𑀸 𑀧𑀘𑁆𑀘𑀓𑁆𑀔𑀫𑀺𑀯 𑀉𑀧𑀝𑁆𑀞𑀸𑀢𑀺, 𑀲𑁄 𑀏𑀯𑀁 𑀯𑀼𑀢𑁆𑀢𑁄. 𑀬𑀁 𑀤𑀸𑀦𑀁 𑀤𑁂𑀢𑀻𑀢𑀺 𑀬𑀁 𑀤𑁂𑀬𑁆𑀬𑀥𑀫𑁆𑀫𑀁 𑀧𑀭𑀲𑁆𑀲 𑀤𑁂𑀢𑀺. 𑀢𑀲𑁆𑀲 𑀧𑀢𑀺 𑀳𑀼𑀢𑁆𑀯𑀸𑀢𑀺 𑀢𑀩𑁆𑀩𑀺𑀲𑀬𑀁 𑀮𑁄𑀪𑀁 𑀲𑀼𑀝𑁆𑀞𑀼𑀫𑀪𑀺𑀪𑀯𑀦𑁆𑀢𑁄 𑀢𑀲𑁆𑀲 𑀅𑀥𑀺𑀧𑀢𑀺 𑀳𑀼𑀢𑁆𑀯𑀸 𑀤𑁂𑀢𑀺. 𑀓𑀸𑀭𑀡𑁄𑀧𑀘𑀸𑀭𑀯𑀘𑀦𑀜𑁆𑀳𑁂𑀢𑀁. 𑀧𑀭𑀢𑁄𑀧𑀺 𑀏𑀲𑁂𑀯 𑀦𑀬𑁄. 𑀢𑀩𑁆𑀩𑀺𑀲𑀬𑁂𑀦 𑀮𑁄𑀪𑁂𑀦 𑀅𑀦𑀸𑀓𑀟𑁆𑀠𑀦𑀻𑀬𑀢𑁆𑀢𑀸 𑀦 𑀤𑀸𑀲𑁄, 𑀦 𑀲𑀳𑀸𑀬𑁄.

𑀢𑀤𑁂𑀯𑀢𑁆𑀣𑀁 𑀩𑁆𑀬𑀢𑀺𑀭𑁂𑀓𑀢𑁄, 𑀅𑀦𑁆𑀯𑀬𑀢𑁄 𑀘 𑀯𑀺𑀯𑀭𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁄 𑀳𑀻’’𑀢𑀺𑀆𑀤𑀺𑀫𑀸𑀳. 𑀇𑀥𑀸𑀦𑀥𑀺𑀧𑁆𑀧𑁂𑀢𑀲𑁆𑀲 𑀳𑀺 𑀤𑀸𑀲𑀸𑀤𑀺𑀤𑁆𑀯𑀬𑀲𑁆𑀲 𑀩𑁆𑀬𑀢𑀺𑀭𑁂𑀓𑀢𑁄 𑀤𑀲𑁆𑀲𑀦𑀁. 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀸𑀤𑀻𑀲𑀼 𑀫𑀥𑀼𑀭𑀲𑁆𑀲𑁂𑀯 𑀧𑀡𑀻𑀢𑀢𑁆𑀢𑀸 ‘‘𑀫𑀥𑀼𑀭𑀁 𑀪𑀼𑀜𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁, 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀯𑀸 𑀏𑀢𑀁, 𑀧𑀡𑀻𑀢𑀁 𑀧𑀭𑀺𑀪𑀼𑀜𑁆𑀚𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑀸𑀲𑁄 𑀳𑀼𑀢𑁆𑀯𑀸 𑀤𑁂𑀢𑀺 𑀢𑀡𑁆𑀳𑀸𑀬 𑀤𑀸𑀲𑀩𑁆𑀬𑀢𑀁 𑀉𑀧𑀕𑀢𑀢𑁆𑀢𑀸. 𑀲𑀳𑀸𑀬𑁄 𑀳𑀼𑀢𑁆𑀯𑀸 𑀤𑁂𑀢𑀺 𑀢𑀲𑁆𑀲 𑀧𑀺𑀬𑀪𑀸𑀯𑀸𑀦𑀺𑀲𑁆𑀲𑀚𑁆𑀚𑀦𑀢𑁄. 𑀲𑀸𑀫𑀻 𑀳𑀼𑀢𑁆𑀯𑀸 𑀤𑁂𑀢𑀺 𑀢𑀢𑁆𑀣 𑀢𑀡𑁆𑀳𑀸𑀤𑀸𑀲𑀩𑁆𑀬𑀢𑁄 𑀅𑀢𑁆𑀢𑀸𑀦𑀁 𑀫𑁄𑀘𑁂𑀢𑁆𑀯𑀸 𑀅𑀪𑀺𑀪𑀼𑀬𑁆𑀬 𑀧𑀯𑀢𑁆𑀢𑀦𑀢𑁄. 𑀬𑀁 𑀧𑀦𑁂𑀢𑀁 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑀁 ‘‘𑀲𑀸𑀫𑀺𑀧𑀭𑀺𑀪𑁄𑀕𑀲𑀤𑀺𑀲𑀸’’𑀢𑀺, (𑀤𑀻. 𑀦𑀺. 𑀝𑀻. 𑁧.𑁩𑁪𑁦) 𑀢𑀁 𑀢𑀡𑁆𑀳𑀸𑀤𑀸𑀲𑀩𑁆𑀬𑀫𑀢𑀺𑀓𑁆𑀓𑀦𑁆𑀢𑀢𑀸𑀲𑀸𑀫𑀜𑁆𑀜𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀦 𑀳𑀺 𑀔𑀻𑀡𑀸𑀲𑀯𑀲𑁆𑀲 𑀧𑀭𑀺𑀪𑁄𑀕𑁄 𑀲𑀸𑀫𑀺𑀧𑀭𑀺𑀪𑁄𑀕𑁄 𑀯𑀺𑀬 𑀔𑀻𑀡𑀸𑀲𑀯𑀲𑁆𑀲𑁂𑀯 𑀤𑀸𑀦𑀁 𑀤𑀸𑀦𑀲𑀸𑀫𑀻𑀢𑀺 𑀅𑀢𑁆𑀣𑁄 𑀉𑀧𑀧𑀦𑁆𑀦𑁄 𑀳𑁄𑀢𑀺, 𑀧𑀘𑁆𑀙𑀸 𑀯𑀸 𑀧𑀫𑀸𑀤𑀮𑀺𑀔𑀺𑀢𑀫𑁂𑀢𑀁. 𑀢𑀸𑀤𑀺𑀲𑁄𑀢𑀺 𑀤𑀸𑀦𑀲𑀸𑀫𑀺𑀲𑀪𑀸𑀯𑁄.

𑀲𑀫𑀺𑀢𑀧𑀸𑀧𑀲𑀫𑀡𑀩𑀸𑀳𑀺𑀢𑀧𑀸𑀧𑀩𑁆𑀭𑀸𑀳𑁆𑀫𑀡𑀸 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁂𑀦𑁂𑀢𑁆𑀣 𑀯𑀼𑀢𑁆𑀢𑀸, 𑀧𑀩𑁆𑀩𑀚𑁆𑀚𑀸𑀫𑀢𑁆𑀢𑀲𑀫𑀡𑀚𑀸𑀢𑀺𑀫𑀢𑁆𑀢𑀩𑁆𑀭𑀸𑀳𑁆𑀫𑀡𑀸 𑀯𑀸 𑀓𑀧𑀡𑀸𑀤𑀺𑀕𑁆𑀕𑀳𑀡𑁂𑀦 𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀤𑀼𑀕𑁆𑀕𑀢𑀸𑀢𑀺 𑀤𑀼𑀓𑁆𑀓𑀭𑀁 𑀚𑀻𑀯𑀺𑀓𑀫𑀼𑀧𑀕𑀢𑀸 𑀓𑀲𑀺𑀭𑀯𑀼𑀢𑁆𑀢𑀺𑀓𑀸. 𑀢𑁂𑀦𑀸𑀳 ‘‘𑀤𑀮𑀺𑀤𑁆𑀤𑀫𑀦𑀼𑀲𑁆𑀲𑀸’’𑀢𑀺. 𑀧𑀣𑀸𑀯𑀺𑀦𑁄𑀢𑀺 𑀫𑀕𑁆𑀕𑀕𑀸𑀫𑀺𑀦𑁄. 𑀯𑀡𑀺𑀩𑁆𑀩𑀓𑀸𑀢𑀺 𑀤𑀸𑀬𑀓𑀸𑀦𑀁 𑀕𑀼𑀡𑀓𑀺𑀢𑁆𑀢𑀦𑀯𑀲𑁂𑀦, 𑀓𑀫𑁆𑀫𑀨𑀮𑀓𑀺𑀢𑁆𑀢𑀦𑀫𑀼𑀔𑁂𑀦 𑀘 𑀬𑀸𑀘𑀦𑀓𑀸 𑀲𑁂𑀬𑁆𑀬𑀣𑀸𑀧𑀺 𑀦𑀕𑁆𑀕𑀘𑀭𑀺𑀬𑀸𑀤𑀬𑁄𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀬𑁂 𑀇𑀝𑁆𑀞𑀁 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀤𑀼𑀪𑀬𑁂𑀦𑁂𑀯 𑀳𑀺 𑀤𑀸𑀦𑀲𑁆𑀲 𑀯𑀡𑁆𑀡𑀣𑁄𑀫𑀦𑀸 𑀲𑀫𑁆𑀪𑀯𑀢𑀺. 𑀬𑁂 𑀯𑀺𑀘𑀭𑀦𑁆𑀢𑀺, 𑀢𑁂 𑀯𑀡𑀺𑀩𑁆𑀩𑀓𑀸 𑀦𑀸𑀫𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀧𑀲𑀢𑀫𑀢𑁆𑀢𑀦𑁆𑀢𑀺 𑀯𑀻𑀳𑀺𑀢𑀡𑁆𑀟𑀼𑀮𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑀁, 𑀲𑀭𑀸𑀯𑀫𑀢𑁆𑀢𑀦𑁆𑀢𑀺 𑀬𑀸𑀕𑀼𑀪𑀢𑁆𑀢𑀸𑀤𑀺𑀯𑀲𑁂𑀦. 𑀑𑀧𑀸𑀦𑀁 𑀯𑀼𑀘𑁆𑀘𑀢𑀺 𑀑𑀕𑀸𑀳𑁂𑀢𑁆𑀯𑀸 𑀧𑀸𑀢𑀩𑁆𑀩𑀢𑁄 𑀦𑀤𑀻𑀢𑀴𑀸𑀓𑀸𑀤𑀻𑀦𑀁 𑀲𑀩𑁆𑀩𑀲𑀸𑀥𑀸𑀭𑀡𑀁 𑀢𑀺𑀢𑁆𑀣𑀁, 𑀑𑀧𑀸𑀦𑀫𑀺𑀯𑀪𑀽𑀢𑁄𑀢𑀺 𑀑𑀧𑀸𑀦𑀪𑀽𑀢𑁄. 𑀢𑁂𑀦𑀸𑀳 ‘‘𑀉𑀤𑀧𑀸𑀦𑀪𑀽𑀢𑁄’’𑀢𑀺𑀆𑀤𑀺. 𑀳𑀼𑀢𑁆𑀯𑀸𑀢𑀺 𑀪𑀸𑀯𑀢𑁄. 𑀲𑀼𑀢𑀫𑁂𑀯 𑀲𑀼𑀢𑀚𑀸𑀢𑀦𑁆𑀢𑀺 𑀚𑀸𑀢𑀲𑀤𑁆𑀤𑀲𑁆𑀲 𑀅𑀦𑀢𑁆𑀣𑀦𑁆𑀢𑀭𑀯𑀸𑀘𑀓𑀢𑁆𑀢𑀫𑀸𑀳 𑀬𑀣𑀸 ‘‘𑀓𑁄𑀲𑀚𑀸𑀢’’𑀦𑁆𑀢𑀺.

𑀅𑀢𑀻𑀢𑀸𑀤𑀺𑀅𑀢𑁆𑀣𑀘𑀺𑀦𑁆𑀢𑀦𑀲𑀫𑀢𑁆𑀣𑀢𑀸 𑀦𑀸𑀫 𑀢𑀲𑁆𑀲 𑀭𑀜𑁆𑀜𑁄 𑀅𑀦𑀼𑀫𑀸𑀦𑀯𑀲𑁂𑀦, 𑀇𑀢𑀺𑀓𑀢𑁆𑀢𑀩𑁆𑀩𑀢𑀸𑀯𑀲𑁂𑀦 𑀘 𑀯𑁂𑀤𑀺𑀢𑀩𑁆𑀩𑀸, 𑀦 𑀩𑀼𑀤𑁆𑀥𑀸𑀦𑀁 𑀯𑀺𑀬 𑀢𑀢𑁆𑀣 𑀧𑀘𑁆𑀘𑀓𑁆𑀔𑀤𑀲𑁆𑀲𑀺𑀢𑀸𑀬𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀢𑀻𑀢𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀼𑀜𑁆𑀜𑀸𑀧𑀼𑀜𑁆𑀜𑀸𑀦𑀺𑀲𑀁𑀲𑀘𑀺𑀦𑁆𑀢𑀦𑀜𑁆𑀘𑁂𑀢𑁆𑀣 𑀧𑀓𑀭𑀡𑀸𑀥𑀺𑀕𑀢𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀧𑀼𑀜𑁆𑀜𑀲𑁆𑀲𑀸𑀢𑀺 𑀬𑀜𑁆𑀜𑀧𑀼𑀜𑁆𑀜𑀲𑁆𑀲. 𑀤𑀸𑀬𑀓𑀘𑀺𑀢𑁆𑀢𑀫𑁆𑀧𑀻𑀢𑀺 𑀤𑀸𑀬𑀓𑀸𑀦𑀁, 𑀤𑀸𑀬𑀓𑀁 𑀯𑀸 𑀘𑀺𑀢𑁆𑀢𑀫𑁆𑀧𑀺, 𑀤𑀸𑀢𑀼𑀓𑀫𑁆𑀬𑀢𑀸𑀘𑀺𑀢𑁆𑀢𑀫𑁆𑀧𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀫𑁂𑀲𑀼 𑀧𑀦 𑀅𑀝𑁆𑀞𑀲𑀼 𑀅𑀗𑁆𑀕𑁂𑀲𑀼 𑀅𑀟𑁆𑀠𑀢𑀸𑀤𑀬𑁄 𑀧𑀜𑁆𑀘 𑀬𑀜𑁆𑀜𑀲𑁆𑀲 𑀢𑀸𑀯 𑀧𑀭𑀺𑀓𑁆𑀔𑀸𑀭𑀸 𑀳𑁄𑀦𑁆𑀢𑀼 𑀢𑁂𑀳𑀺 𑀯𑀺𑀦𑀸 𑀢𑀲𑁆𑀲 𑀅𑀲𑀺𑀚𑁆𑀛𑀦𑀢𑁄, 𑀲𑀼𑀚𑀸𑀢𑀢𑀸, 𑀧𑀦 𑀲𑀽𑀭𑀽𑀧𑀢𑀸 𑀘 𑀓𑀣𑀁 𑀬𑀜𑁆𑀜𑀲𑁆𑀲 𑀧𑀭𑀺𑀓𑁆𑀔𑀸𑀭𑁄 𑀲𑀺𑀬𑀸 𑀢𑀤𑀼𑀪𑀬𑁂𑀦 𑀯𑀺𑀦𑀸𑀧𑀺 𑀢𑀲𑁆𑀲 𑀲𑀺𑀚𑁆𑀛𑀦𑀢𑁄𑀢𑀺 𑀘𑁄𑀤𑀦𑀸𑀬 𑀲𑀩𑁆𑀩𑁂𑀲𑀫𑁆𑀧𑀺 𑀅𑀝𑁆𑀞𑀦𑁆𑀦𑀫𑀗𑁆𑀕𑀸𑀦𑀁 𑀧𑀭𑀺𑀓𑁆𑀔𑀸𑀭𑀪𑀸𑀯𑀁 𑀅𑀦𑁆𑀯𑀬𑀢𑁄, 𑀩𑁆𑀬𑀢𑀺𑀭𑁂𑀓𑀢𑁄 𑀘 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀢𑁂 𑀳𑀺 𑀓𑀺𑀭𑀸’’𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣 𑀘 𑀓𑁂𑀘𑀺 𑀏𑀯𑀁 𑀯𑀤𑀦𑁆𑀢𑀺 ‘‘𑀬𑀣𑀸 𑀅𑀟𑁆𑀠𑀢𑀸𑀤𑀬𑁄 𑀧𑀜𑁆𑀘 𑀬𑀜𑁆𑀜𑀲𑁆𑀲 𑀏𑀓𑀁𑀲𑀢𑁄𑀯 𑀅𑀗𑁆𑀕𑀸𑀦𑀺, 𑀦 𑀏𑀯𑀁 𑀲𑀼𑀚𑀸𑀢𑀢𑀸, 𑀲𑀼𑀭𑀽𑀧𑀢𑀸 𑀘, 𑀢𑀤𑀼𑀪𑀬𑀁 𑀧𑀦 𑀅𑀦𑁂𑀓𑀁𑀲𑀢𑁄𑀯 𑀅𑀗𑁆𑀕𑀦𑁆𑀢𑀺 𑀤𑀻𑀧𑁂𑀢𑀼𑀁 𑀅𑀭𑀼𑀘𑀺𑀲𑀽𑀘𑀓𑀲𑁆𑀲 𑀓𑀺𑀭𑀲𑀤𑁆𑀤𑀲𑁆𑀲 𑀕𑀳𑀡𑀁 𑀓𑀢’’𑀦𑁆𑀢𑀺. 𑀢𑁂 𑀳𑀺 ‘‘𑀅𑀬𑀁 𑀤𑀼𑀚𑁆𑀚𑀸𑀢𑁄𑀢𑀺𑀆𑀤𑀺𑀯𑀘𑀦𑀲𑁆𑀲 𑀅𑀦𑁂𑀓𑀁𑀲𑀺𑀓𑀢𑀁 𑀫𑀜𑁆𑀜𑀫𑀸𑀦𑀸 𑀢𑀣𑀸 𑀯𑀤𑀦𑁆𑀢𑀺, 𑀢𑀬𑀺𑀤𑀁 𑀅𑀲𑀸𑀭𑀁. 𑀲𑀩𑁆𑀩𑀲𑀸𑀥𑀸𑀭𑀡𑀯𑀲𑁂𑀦 𑀳𑁂𑀢𑀁 𑀩𑁆𑀬𑀢𑀺𑀭𑁂𑀓𑀢𑁄 𑀬𑀜𑁆𑀜𑀲𑁆𑀲 𑀅𑀗𑁆𑀕𑀪𑀸𑀯𑀤𑀲𑁆𑀲𑀦𑀁 𑀢𑀢𑁆𑀣 𑀲𑀺𑀬𑀸 𑀓𑁂𑀲𑀜𑁆𑀘𑀺 𑀢𑀣𑀸 𑀧𑀭𑀺𑀯𑀺𑀢𑀓𑁆𑀓𑁄’’𑀢𑀺 𑀢𑀲𑁆𑀲𑀸𑀧𑀺 𑀅𑀯𑀓𑀸𑀲𑀸𑀪𑀸𑀯𑀤𑀲𑁆𑀲𑀦𑀢𑁆𑀣𑀫𑁂𑀯 𑀏𑀯𑀁 𑀯𑀼𑀢𑁆𑀢𑀢𑁆𑀢𑀸, 𑀢𑀤𑀼𑀪𑀬𑀲𑀸𑀥𑀸𑀭𑀡𑀯𑀲𑁂𑀦𑁂𑀯 𑀅𑀦𑁂𑀓𑀁𑀲𑀢𑁄 𑀅𑀗𑁆𑀕𑀪𑀸𑀯𑀲𑁆𑀲 𑀅𑀤𑀲𑁆𑀲𑀦𑀢𑁄 𑀘. 𑀓𑀺𑀭𑀲𑀤𑁆𑀤𑁄 𑀧𑀦𑁂𑀢𑁆𑀣 𑀢𑀤𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀘𑀺𑀦𑁆𑀢𑀺𑀢𑀸𑀓𑀸𑀭𑀲𑀽𑀘𑀦𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀏𑀯𑀫𑀦𑁂𑀦 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀇𑀫𑀸𑀦𑀺𑀧𑀺 𑀅𑀝𑁆𑀞𑀗𑁆𑀕𑀸𑀦𑀺 𑀢𑀲𑁆𑀲𑁂𑀯 𑀬𑀜𑁆𑀜𑀲𑁆𑀲 𑀧𑀭𑀺𑀓𑁆𑀔𑀸𑀭𑀸 𑀪𑀯𑀦𑁆𑀢𑀻𑀢𑀺 𑀯𑀼𑀢𑁆𑀢𑀸𑀦𑀻’’𑀢𑀺 𑀓𑀺𑀭𑀲𑀤𑁆𑀤𑁂𑀦 𑀢𑀲𑁆𑀲 𑀘𑀺𑀦𑁆𑀢𑀺𑀢𑀸𑀓𑀸𑀭𑁄 𑀲𑀽𑀘𑀺𑀢𑁄 𑀳𑁄𑀢𑀺. 𑀏𑀯𑀫𑀸𑀤𑀻𑀦𑀻𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 ‘‘𑀅𑀬𑀁 𑀯𑀺𑀭𑀽𑀧𑁄 𑀓𑀺𑀢𑁆𑀢𑀓𑀁…𑀧𑁂… 𑀉𑀧𑀘𑁆𑀙𑀺𑀦𑁆𑀤𑀺𑀲𑁆𑀲𑀢𑀺, 𑀅𑀬𑀁 𑀤𑀮𑀺𑀤𑁆𑀤𑁄, 𑀅𑀧𑁆𑀧𑁂𑀲𑀓𑁆𑀔𑁄, 𑀅𑀲𑁆𑀲𑀤𑁆𑀥𑁄, 𑀅𑀧𑁆𑀧𑀲𑁆𑀲𑀼𑀢𑁄, 𑀦 𑀅𑀢𑁆𑀣𑀜𑁆𑀜𑀽, 𑀦 𑀫𑁂𑀥𑀸𑀯𑀻 𑀓𑀺𑀢𑁆𑀢𑀓𑀁…𑀧𑁂… 𑀉𑀧𑀘𑁆𑀙𑀺𑀦𑁆𑀤𑀺𑀲𑁆𑀲𑀢𑀻’’𑀢𑀺 𑀏𑀢𑁂𑀲𑀁 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄.

𑀘𑀢𑀼𑀧𑀭𑀺𑀓𑁆𑀔𑀸𑀭𑀸𑀤𑀺𑀯𑀡𑁆𑀡𑀦𑀸

𑁩𑁪𑁧. ‘‘𑀲𑀼𑀚𑀁 𑀧𑀕𑁆𑀕𑀡𑁆𑀳𑀦𑁆𑀢𑀸𑀦’’𑀦𑁆𑀢𑀺 𑀏𑀢𑁆𑀣 𑀲𑁄𑀡𑀤𑀡𑁆𑀟𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁧.𑁩𑁧𑁧-𑁩𑁧𑁩) 𑀯𑀼𑀢𑁆𑀢𑁂𑀲𑀼 𑀤𑁆𑀯𑀻𑀲𑀼 𑀯𑀺𑀓𑀧𑁆𑀧𑁂𑀲𑀼 𑀤𑀼𑀢𑀺𑀬𑀯𑀺𑀓𑀧𑁆𑀧𑀁 𑀦𑀺𑀲𑁂𑀥𑁂𑀦𑁆𑀢𑁄 ‘‘𑀫𑀳𑀸𑀬𑀸𑀕’’𑀦𑁆𑀢𑀺𑀆𑀤𑀺𑀫𑀸𑀳, 𑀢𑁂𑀦 𑀘 𑀧𑀼𑀭𑁄𑀳𑀺𑀢𑀲𑁆𑀲 𑀲𑀬𑀫𑁂𑀯 𑀓𑀝𑀘𑁆𑀙𑀼𑀕𑁆𑀕𑀳𑀡𑀚𑁄𑀢𑀦𑁂𑀦 𑀏𑀯𑀁 𑀲𑀳𑀢𑁆𑀣𑀸 𑀲𑀓𑁆𑀓𑀘𑁆𑀘𑀁 𑀤𑀸𑀦𑁂 𑀬𑀼𑀢𑁆𑀢𑀧𑀬𑀼𑀢𑁆𑀢𑀢𑀸 𑀇𑀘𑁆𑀙𑀺𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀯𑀁 𑀤𑀼𑀚𑁆𑀚𑀸𑀢𑀲𑁆𑀲𑀸𑀢𑀺 𑀏𑀢𑁆𑀣𑀸𑀧𑀺 ‘‘𑀲𑀼𑀚𑀸𑀢𑀢𑀸𑀬 𑀅𑀦𑁂𑀓𑀁𑀲𑀢𑁄 𑀅𑀗𑁆𑀕𑀪𑀸𑀯𑀤𑀲𑁆𑀲𑀦𑀫𑁂𑀯𑀺𑀤’’𑀦𑁆𑀢𑀺 𑀅𑀕𑁆𑀕𑀳𑁂𑀢𑁆𑀯𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀲𑀩𑁆𑀩𑀲𑀸𑀥𑀸𑀭𑀡𑀯𑀲𑁂𑀦𑁂𑀯 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀆𑀤𑀺𑀲𑀤𑁆𑀤𑁂𑀦 𑀳𑀺 ‘‘𑀏𑀯𑀁 𑀅𑀦𑀚𑁆𑀛𑀸𑀬𑀓𑀲𑁆𑀲…𑀧𑁂… 𑀤𑀼𑀲𑁆𑀲𑀻𑀮𑀲𑁆𑀲…𑀧𑁂… 𑀤𑀼𑀧𑁆𑀧𑀜𑁆𑀜𑀲𑁆𑀲 𑀲𑀁𑀯𑀺𑀥𑀸𑀦𑁂𑀦 𑀧𑀯𑀢𑁆𑀢𑀤𑀸𑀦𑀁 𑀓𑀺𑀢𑁆𑀢𑀓𑀁 𑀓𑀸𑀮𑀁 𑀧𑀯𑀢𑁆𑀢𑀺𑀲𑁆𑀲𑀢𑀻’’𑀢𑀺 𑀏𑀢𑁂𑀲𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀢𑀲𑁆𑀫𑀸𑀢𑀺 𑀢𑀤𑀼𑀪𑀬𑀓𑀸𑀭𑀡𑀢𑁄.

𑀢𑀺𑀲𑁆𑀲𑁄𑀯𑀺𑀥𑀸𑀯𑀡𑁆𑀡𑀦𑀸

𑁩𑁪𑁨. 𑀢𑀺𑀡𑁆𑀡𑀁 𑀞𑀸𑀦𑀸𑀦𑀦𑁆𑀢𑀺 𑀤𑀸𑀦𑀲𑁆𑀲 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀲𑀗𑁆𑀔𑀸𑀢𑀸𑀦𑀁 𑀢𑀺𑀲𑁆𑀲𑀦𑁆𑀦𑀁 𑀪𑀽𑀫𑀻𑀦𑀁, 𑀅𑀯𑀢𑁆𑀣𑀸𑀦𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀘𑀮𑀦𑁆𑀢𑀻𑀢𑀺 𑀓𑀫𑁆𑀧𑀦𑁆𑀢𑀺 𑀧𑀼𑀭𑀺𑀫𑀸𑀓𑀸𑀭𑁂𑀦 𑀦 𑀢𑀺𑀝𑁆𑀞𑀦𑁆𑀢𑀺. 𑀓𑀭𑀡𑀢𑁆𑀣𑁂𑀢𑀺 𑀢𑀢𑀺𑀬𑀸𑀯𑀺𑀪𑀢𑁆𑀢𑀺𑀅𑀢𑁆𑀣𑁂. 𑀓𑀭𑀡𑀻𑀬𑀲𑀤𑁆𑀤𑀸𑀧𑁂𑀓𑁆𑀔𑀸𑀬 𑀳𑀺 𑀓𑀢𑁆𑀢𑀭𑀺 𑀏𑀯 𑀏𑀢𑀁 𑀲𑀸𑀫𑀺𑀯𑀘𑀦𑀁, 𑀦 𑀓𑀭𑀡𑁂. 𑀬𑁂𑀪𑀼𑀬𑁆𑀬𑁂𑀦 𑀳𑀺 𑀓𑀭𑀡𑀚𑁄𑀢𑀓𑀯𑀘𑀦𑀲𑁆𑀲 𑀅𑀢𑁆𑀣𑀪𑀸𑀯𑀢𑁄 𑀅𑀦𑀼𑀢𑁆𑀢𑀓𑀢𑁆𑀢𑀸𑀯 𑀓𑀭𑀡𑀢𑁆𑀣𑁄𑀢𑀺 𑀇𑀥𑀸𑀥𑀺𑀧𑁆𑀧𑁂𑀢𑁄. 𑀧𑀘𑁆𑀙𑀸𑀦𑀼𑀢𑀸𑀧𑀲𑁆𑀲 𑀅𑀓𑀭𑀡𑀽𑀧𑀸𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀩𑁆𑀩…𑀧𑁂… 𑀧𑀢𑀺𑀝𑁆𑀞𑀧𑁂𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀘𑀮𑀸𑀢𑀺 𑀤𑀴𑁆𑀳𑀸 𑀓𑁂𑀦𑀘𑀺 𑀅𑀲𑀁𑀳𑀻𑀭𑀸. 𑀧𑀢𑀺𑀝𑁆𑀞𑀧𑁂𑀢𑀩𑁆𑀩𑀸𑀢𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸 𑀓𑀸𑀢𑀩𑁆𑀩𑀸. 𑀢𑀣𑀸 𑀧𑀢𑀺𑀝𑁆𑀞𑀸𑀧𑀦𑀽𑀧𑀸𑀬𑀫𑁆𑀧𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀯𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀣𑀸 𑀧𑀢𑀺𑀝𑁆𑀞𑀸𑀧𑀦𑁂𑀦 𑀳𑀺 𑀬𑀣𑀸 𑀢𑀁 𑀤𑀸𑀦𑀁 𑀲𑀫𑁆𑀧𑀢𑀺 𑀬𑀣𑀸𑀥𑀺𑀧𑁆𑀧𑀸𑀬𑀁 𑀦𑀺𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀆𑀬𑀢𑀺𑀫𑁆𑀧𑀺 𑀯𑀺𑀧𑀼𑀮𑀨𑀮𑀢𑀸𑀬 𑀫𑀳𑀧𑁆𑀨𑀮𑀁 𑀳𑁄𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑁂𑀦 𑀅𑀦𑀼𑀧𑀓𑁆𑀓𑀺𑀮𑀺𑀝𑁆𑀞𑀪𑀸𑀯𑀢𑁄. 𑀤𑁆𑀯𑀻𑀲𑀼 𑀞𑀸𑀦𑁂𑀲𑀽𑀢𑀺 𑀬𑀚𑀫𑀸𑀦𑀬𑀺𑀝𑁆𑀞𑀝𑁆𑀞𑀸𑀦𑁂𑀲𑀼. 𑀯𑀺𑀧𑁆𑀧𑀝𑀺𑀲𑀸𑀭𑁄…𑀧𑁂… 𑀦 𑀓𑀢𑁆𑀢𑀩𑁆𑀩𑁄𑀢𑀺 𑀅𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀏𑀲𑁂𑀯 𑀦𑀬𑁄’’𑀢𑀺 𑀯𑀼𑀢𑁆𑀢𑀁. 𑀫𑀼𑀜𑁆𑀘𑀘𑁂𑀢𑀦𑀸𑀢𑀺 𑀧𑀭𑀺𑀘𑁆𑀘𑀸𑀕𑀘𑁂𑀢𑀦𑀸, 𑀢𑀲𑁆𑀲𑀸 𑀦𑀺𑀘𑁆𑀘𑀮𑀪𑀸𑀯𑁄 𑀦𑀸𑀫 𑀫𑀼𑀢𑁆𑀢𑀘𑀸𑀕𑀢𑀸 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀉𑀴𑀸𑀭𑀪𑀸𑀯𑁄. 𑀧𑀘𑁆𑀙𑀸𑀲𑀫𑀦𑀼𑀲𑁆𑀲𑀭𑀡𑀘𑁂𑀢𑀦𑀸𑀢𑀺 𑀧𑀭𑀘𑁂𑀢𑀦𑀸, 𑀢𑀲𑁆𑀲𑀸 𑀧𑀦 𑀦𑀺𑀘𑁆𑀘𑀮𑀪𑀸𑀯𑁄 ‘‘𑀅𑀳𑁄 𑀫𑀬𑀸 𑀤𑀸𑀦𑀁 𑀤𑀺𑀦𑁆𑀦𑀁 𑀲𑀸𑀥𑀼 𑀲𑀼𑀝𑁆𑀞𑀽’’𑀢𑀺 𑀤𑀸𑀦𑀲𑁆𑀲 𑀲𑀓𑁆𑀓𑀘𑁆𑀘𑀁 𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀢𑀤𑀼𑀪𑀬𑀘𑁂𑀢𑀦𑀸𑀦𑀁 𑀦𑀺𑀘𑁆𑀘𑀮𑀓𑀭𑀡𑀽𑀧𑀸𑀬𑀁 𑀩𑁆𑀬𑀢𑀺𑀭𑁂𑀓𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀢𑀣𑀸…𑀧𑁂… 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀣𑀸 𑀅𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀫𑀼𑀜𑁆𑀘𑀘𑁂𑀢𑀦𑀁, 𑀧𑀘𑁆𑀙𑀸𑀲𑀫𑀦𑀼𑀲𑁆𑀲𑀭𑀡𑀘𑁂𑀢𑀦𑀜𑁆𑀘 𑀦𑀺𑀘𑁆𑀘𑀮𑀫𑀓𑀭𑁄𑀦𑁆𑀢𑀲𑁆𑀲, 𑀯𑀺𑀧𑁆𑀧𑀝𑀺𑀲𑀸𑀭𑀁, 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀦𑀸𑀧𑀺 𑀉𑀴𑀸𑀭𑁂𑀲𑀼 𑀪𑁄𑀕𑁂𑀲𑀼 𑀘𑀺𑀢𑁆𑀢𑀁 𑀦𑀫𑀢𑀻’’𑀢𑀺 𑀇𑀤𑀁 𑀧𑀦 𑀧𑀘𑁆𑀙𑀸𑀲𑀫𑀦𑀼𑀲𑁆𑀲𑀭𑀡𑀘𑁂𑀢𑀦𑀸𑀬 𑀏𑀯 𑀩𑁆𑀬𑀢𑀺𑀭𑁂𑀓𑀢𑁄 𑀦𑀺𑀘𑁆𑀘𑀮𑀓𑀭𑀡𑀽𑀧𑀸𑀬𑀤𑀲𑁆𑀲𑀦𑀁. 𑀏𑀯𑀜𑁆𑀳𑀺 𑀬𑀣𑀸𑀦𑀺𑀤𑁆𑀤𑀺𑀝𑁆𑀞𑀦𑀺𑀤𑀲𑁆𑀲𑀦𑀁 𑀉𑀧𑀧𑀦𑁆𑀦𑀁 𑀳𑁄𑀢𑀺. 𑀢𑀢𑁆𑀣 𑀉𑀴𑀸𑀭𑁂𑀲𑀼 𑀪𑁄𑀕𑁂𑀲𑀽𑀢𑀺 𑀔𑁂𑀢𑁆𑀢𑀯𑀺𑀲𑁂𑀲𑁂 𑀧𑀭𑀺𑀘𑁆𑀘𑀸𑀕𑀲𑁆𑀲 𑀓𑀢𑀢𑁆𑀢𑀸 𑀮𑀤𑁆𑀥𑁂𑀲𑀼𑀧𑀺 𑀉𑀴𑀸𑀭𑁂𑀲𑀼 𑀪𑁄𑀕𑁂𑀲𑀼. 𑀦𑀸𑀧𑀺 𑀘𑀺𑀢𑁆𑀢𑀁 𑀦𑀫𑀢𑀺 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑁂𑀦 𑀉𑀧𑀓𑁆𑀓𑀺𑀮𑀺𑀝𑁆𑀞𑀪𑀸𑀯𑀢𑁄. 𑀬𑀣𑀸 𑀓𑀣𑀦𑁆𑀢𑀺 𑀆𑀳 ‘‘𑀫𑀳𑀸𑀭𑁄𑀭𑀼𑀯’’𑀦𑁆𑀢𑀺𑀆𑀤𑀺. 𑀢𑀲𑁆𑀲 𑀳𑀺 𑀲𑁂𑀝𑁆𑀞𑀺𑀲𑁆𑀲 𑀕𑀳𑀧𑀢𑀺𑀦𑁄 𑀯𑀢𑁆𑀣𑀼 𑀓𑁄𑀲𑀮𑀲𑀁𑀬𑀼𑀢𑁆𑀢𑁂, (𑀲𑀁. 𑀦𑀺. 𑁧.𑁧𑁩𑁧) 𑀫𑀬𑁆𑀳𑀓𑀚𑀸𑀢𑀓𑁂 (𑀚𑀸. 𑀅𑀝𑁆𑀞. 𑁩.𑁬.𑀫𑀬𑁆𑀳𑀓𑀚𑀸𑀢𑀓𑀯𑀡𑁆𑀡𑀦𑀸) 𑀘 𑀆𑀕𑀢𑀁. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑁋

‘‘𑀪𑀽𑀢𑀧𑀼𑀩𑁆𑀩𑀁 𑀲𑁄 𑀫𑀳𑀸𑀭𑀸𑀚 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀢𑀕𑀭𑀲𑀺𑀔𑀺𑀁 𑀦𑀸𑀫 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀁 𑀧𑀺𑀡𑁆𑀟𑀧𑀸𑀢𑁂𑀦 𑀧𑀝𑀺𑀧𑀸𑀤𑁂𑀲𑀺, ‘𑀤𑁂𑀣 𑀲𑀫𑀡𑀲𑁆𑀲 𑀧𑀺𑀡𑁆𑀟𑀧𑀸𑀢’𑀦𑁆𑀢𑀺 𑀯𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺, 𑀤𑀢𑁆𑀯𑀸 𑀘 𑀧𑀦 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀅𑀳𑁄𑀲𑀺 ‘‘𑀯𑀭𑀫𑁂𑀢𑀁 𑀧𑀺𑀡𑁆𑀟𑀧𑀸𑀢𑀁 𑀤𑀸𑀲𑀸 𑀯𑀸 𑀓𑀫𑁆𑀫𑀓𑀭𑀸 𑀯𑀸 𑀪𑀼𑀜𑁆𑀚𑁂𑀬𑁆𑀬𑀼’’’𑀦𑁆𑀢𑀺𑀆𑀤𑀺.

𑀲𑁄 𑀓𑀺𑀭 𑀅𑀜𑁆𑀜𑁂𑀲𑀼𑀧𑀺 𑀤𑀺𑀯𑀲𑁂𑀲𑀼 𑀢𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀧𑀲𑁆𑀲𑀢𑀺, 𑀤𑀸𑀢𑀼𑀁 𑀧𑀦𑀲𑁆𑀲 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀺𑀁 𑀧𑀦 𑀤𑀺𑀯𑀲𑁂 𑀅𑀬𑀁 𑀧𑀤𑀼𑀫𑀯𑀢𑀺𑀬𑀸 𑀤𑁂𑀯𑀺𑀬𑀸 𑀢𑀢𑀺𑀬𑀧𑀼𑀢𑁆𑀢𑁄 𑀢𑀕𑀭𑀲𑀺𑀔𑀻 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀕𑀦𑁆𑀥𑀫𑀸𑀤𑀦𑀧𑀩𑁆𑀩𑀢𑁂 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑁂 𑀯𑀼𑀝𑁆𑀞𑀸𑀬 𑀅𑀦𑁄𑀢𑀢𑁆𑀢𑀤𑀳𑁂 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀫𑀦𑁄𑀲𑀺𑀮𑀸𑀢𑀮𑁂 𑀦𑀺𑀯𑀸𑀲𑁂𑀢𑁆𑀯𑀸 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀅𑀪𑀺𑀜𑁆𑀜𑀸𑀧𑀸𑀤𑀓𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀇𑀤𑁆𑀥𑀺𑀬𑀸 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀦𑀕𑀭𑀤𑁆𑀯𑀸𑀭𑁂 𑀑𑀭𑀼𑀬𑁆𑀳 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀧𑀢𑁆𑀢𑀫𑀸𑀤𑀸𑀬 𑀦𑀕𑀭𑀯𑀸𑀲𑀻𑀦𑀁 𑀖𑀭𑀤𑁆𑀯𑀸𑀭𑁂𑀲𑀼 𑀲𑀳𑀲𑁆𑀲𑀪𑀡𑁆𑀟𑀺𑀓𑀁 𑀞𑀧𑁂𑀦𑁆𑀢𑁄 𑀯𑀺𑀬 𑀧𑀸𑀲𑀸𑀤𑀺𑀓𑁂𑀳𑀺 𑀅𑀪𑀺𑀓𑁆𑀓𑀫𑀦𑀸𑀤𑀻𑀳𑀺 𑀅𑀦𑀼𑀧𑀼𑀩𑁆𑀩𑁂𑀦 𑀲𑁂𑀝𑁆𑀞𑀺𑀦𑁄 𑀖𑀭𑀤𑁆𑀯𑀸𑀭𑀁 𑀲𑀫𑁆𑀧𑀢𑁆𑀢𑁄, 𑀢𑀁 𑀤𑀺𑀯𑀲𑀜𑁆𑀘 𑀲𑁂𑀝𑁆𑀞𑀺 𑀧𑀸𑀢𑁄𑀯 𑀉𑀝𑁆𑀞𑀸𑀬 𑀧𑀡𑀻𑀢𑀁 𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀖𑀭𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀆𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀤𑀦𑁆𑀢𑀦𑁆𑀢𑀭𑀸𑀦𑀺 𑀲𑁄𑀥𑁂𑀦𑁆𑀢𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀲𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀤𑀺𑀲𑁆𑀯𑀸 𑀢𑀁 𑀤𑀺𑀯𑀲𑀁 𑀧𑀸𑀢𑁄𑀯 𑀪𑀼𑀢𑁆𑀯𑀸 𑀦𑀺𑀲𑀺𑀦𑁆𑀦𑀢𑁆𑀢𑀸 𑀤𑀸𑀦𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀪𑀭𑀺𑀬𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀇𑀫𑀲𑁆𑀲 𑀲𑀫𑀡𑀲𑁆𑀲 𑀧𑀺𑀡𑁆𑀟𑀧𑀸𑀢𑀁 𑀤𑁂𑀳𑀻’’𑀢𑀺 𑀯𑀢𑁆𑀯𑀸 𑀭𑀸𑀚𑀼𑀧𑀝𑁆𑀞𑀸𑀦𑀢𑁆𑀣𑀁 𑀧𑀓𑁆𑀓𑀸𑀫𑀺. 𑀲𑁂𑀝𑁆𑀞𑀺𑀪𑀭𑀺𑀬𑀸 𑀲𑀫𑁆𑀧𑀚𑀜𑁆𑀜𑀚𑀸𑀢𑀺𑀓𑀸 𑀘𑀺𑀦𑁆𑀢𑁂𑀲𑀺 ‘‘𑀫𑀬𑀸 𑀏𑀢𑁆𑀢𑀓𑁂𑀦 𑀓𑀸𑀮𑁂𑀦 𑀇𑀫𑀲𑁆𑀲 ‘𑀤𑁂𑀣𑀸’𑀢𑀺 𑀯𑀘𑀦𑀁 𑀦 𑀲𑀼𑀢𑀧𑀼𑀩𑁆𑀩𑀁, 𑀤𑀸𑀧𑁂𑀦𑁆𑀢𑁄𑀧𑀺 𑀘 𑀅𑀚𑁆𑀚 𑀦 𑀬𑀲𑁆𑀲 𑀯𑀸 𑀢𑀲𑁆𑀲 𑀯𑀸 𑀤𑀸𑀧𑁂𑀢𑀺, 𑀯𑀻𑀢𑀭𑀸𑀕𑀤𑁄𑀲𑀫𑁄𑀳𑀲𑁆𑀲 𑀯𑀦𑁆𑀢𑀓𑀺𑀮𑁂𑀲𑀲𑁆𑀲 𑀑𑀳𑀺𑀢𑀪𑀸𑀭𑀲𑁆𑀲 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀤𑀸𑀧𑁂𑀢𑀺, 𑀬𑀁 𑀯𑀸 𑀢𑀁 𑀯𑀸 𑀅𑀤𑀢𑁆𑀯𑀸 𑀧𑀡𑀻𑀢𑀁 𑀧𑀺𑀡𑁆𑀟𑀧𑀸𑀢𑀁 𑀤𑀲𑁆𑀲𑀸𑀫𑀻’’𑀢𑀺 𑀖𑀭𑀸 𑀦𑀺𑀓𑁆𑀔𑀫𑁆𑀫 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀧𑀢𑁆𑀢𑀁 𑀆𑀤𑀸𑀬 𑀅𑀦𑁆𑀢𑁄𑀦𑀺𑀯𑁂𑀲𑀦𑁂 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀲𑀼𑀧𑀭𑀺𑀲𑀼𑀤𑁆𑀥𑁂𑀳𑀺 𑀲𑀸𑀮𑀺𑀢𑀡𑁆𑀟𑀼𑀮𑁂𑀳𑀺 𑀪𑀢𑁆𑀢𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀢𑀤𑀦𑀼𑀭𑀽𑀧𑀁 𑀔𑀸𑀤𑀦𑀻𑀬𑀁, 𑀩𑁆𑀬𑀜𑁆𑀚𑀦𑀁, 𑀲𑀽𑀧𑁂𑀬𑁆𑀬𑀜𑁆𑀘 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀧𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀩𑀳𑀺 𑀕𑀦𑁆𑀥𑁂𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀳𑀢𑁆𑀣𑁂𑀲𑀼 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀯𑀦𑁆𑀤𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 ‘‘𑀅𑀜𑁆𑀜𑁂𑀲𑀫𑁆𑀧𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀲𑀗𑁆𑀕𑀳𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸𑀯 𑀅𑀦𑀼𑀫𑁄𑀤𑀦𑀁 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑁄𑀧𑀺 𑀔𑁄 𑀲𑁂𑀝𑁆𑀞𑀺 𑀭𑀸𑀚𑀼𑀧𑀝𑁆𑀞𑀸𑀦𑀁 𑀓𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀤𑀺𑀲𑁆𑀯𑀸 𑀆𑀳 ‘‘𑀫𑀬𑀁 𑀢𑀼𑀫𑁆𑀳𑀸𑀓𑀁 𑀧𑀺𑀡𑁆𑀟𑀧𑀸𑀢𑀁 𑀤𑁂𑀣𑀸’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀦𑁆𑀢𑀸, 𑀅𑀧𑀺 𑀯𑁄 𑀮𑀤𑁆𑀥𑁄 𑀧𑀺𑀡𑁆𑀟𑀧𑀸𑀢𑁄’’𑀢𑀺? 𑀆𑀫, 𑀲𑁂𑀝𑁆𑀞𑀺 𑀮𑀤𑁆𑀥𑁄𑀢𑀺. ‘‘𑀧𑀲𑁆𑀲𑀸𑀫𑀸’’𑀢𑀺 𑀕𑀻𑀯𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀑𑀮𑁄𑀓𑁂𑀲𑀺, 𑀅𑀣𑀲𑁆𑀲 𑀧𑀺𑀡𑁆𑀟𑀧𑀸𑀢𑀕𑀦𑁆𑀥𑁄 𑀉𑀝𑁆𑀞𑀳𑀺𑀢𑁆𑀯𑀸 𑀦𑀸𑀲𑀧𑀼𑀝𑀁 𑀧𑀳𑀭𑀺. 𑀲𑁄 𑀘𑀺𑀢𑁆𑀢𑀁 𑀲𑀁𑀬𑀫𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀅𑀳𑁄𑀲𑀺, 𑀢𑀲𑁆𑀲 𑀧𑀦 𑀯𑀺𑀧𑁆𑀧𑀝𑀺𑀲𑀸𑀭𑀲𑁆𑀲 𑀉𑀧𑁆𑀧𑀦𑁆𑀦𑀸𑀓𑀸𑀭𑁄 ‘‘𑀯𑀭𑀫𑁂𑀢’’𑀦𑁆𑀢𑀺𑀆𑀤𑀺𑀦𑀸 𑀧𑀸𑀴𑀺𑀬𑀁 𑀯𑀼𑀢𑁆𑀢𑁄𑀬𑁂𑀯. 𑀧𑀺𑀡𑁆𑀟𑀧𑀸𑀢𑀤𑀸𑀦𑁂𑀦 𑀧𑀦𑁂𑀲 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀦𑁆𑀦𑁄, 𑀲𑀢𑁆𑀢𑀓𑁆𑀔𑀢𑁆𑀢𑀼𑀫𑁂𑀯 𑀘 𑀲𑀸𑀯𑀢𑁆𑀣𑀺𑀬𑀁 𑀲𑁂𑀝𑁆𑀞𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄, 𑀅𑀬𑀜𑁆𑀘𑀲𑁆𑀲 𑀲𑀢𑁆𑀢𑀫𑁄 𑀪𑀯𑁄, 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑁂𑀦 𑀧𑀦 𑀦𑀸𑀧𑀺 𑀉𑀴𑀸𑀭𑁂𑀲𑀼 𑀪𑁄𑀕𑁂𑀲𑀼 𑀘𑀺𑀢𑁆𑀢𑀁 𑀦𑀫𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀲𑀁𑀬𑀼𑀢𑁆𑀢𑀯𑀭𑀮𑀜𑁆𑀙𑀓𑁂 𑁋

‘‘𑀬𑀁 𑀔𑁄 𑀲𑁄 𑀫𑀳𑀸𑀭𑀸𑀚 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀤𑀢𑁆𑀯𑀸 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀅𑀳𑁄𑀲𑀺 ‘𑀯𑀭𑀫𑁂𑀢𑀁 𑀧𑀺𑀡𑁆𑀟𑀧𑀸𑀢𑀁 𑀤𑀸𑀲𑀸 𑀯𑀸 𑀓𑀫𑁆𑀫𑀓𑀭𑀸 𑀯𑀸 𑀪𑀼𑀜𑁆𑀚𑁂𑀬𑁆𑀬𑀼’𑀦𑁆𑀢𑀺, 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁂𑀦 𑀦𑀸𑀲𑁆𑀲𑀼𑀴𑀸𑀭𑀸𑀬 𑀪𑀢𑁆𑀢𑀪𑁄𑀕𑀸𑀬 𑀘𑀺𑀢𑁆𑀢𑀁 𑀦𑀫𑀢𑀺, 𑀦𑀸𑀲𑁆𑀲𑀼𑀴𑀸𑀭𑀸𑀬 𑀯𑀢𑁆𑀣𑀪𑁄𑀕𑀸𑀬, 𑀬𑀸𑀦𑀪𑁄𑀕𑀸𑀬, 𑀦𑀸𑀲𑁆𑀲𑀼𑀴𑀸𑀭𑀸𑀦𑀁 𑀧𑀜𑁆𑀘𑀦𑁆𑀦𑀁 𑀓𑀸𑀫𑀕𑀼𑀡𑀸𑀦𑀁 𑀪𑁄𑀕𑀸𑀬 𑀘𑀺𑀢𑁆𑀢𑀁 𑀦𑀫𑀢𑀻’’𑀢𑀺 (𑀲𑀁. 𑀦𑀺. 𑁧.𑁧𑁩𑁧).

𑀫𑀬𑁆𑀳𑀓𑀚𑀸𑀢𑀓𑁂𑀧𑀺 𑀯𑀼𑀢𑁆𑀢𑀁 𑁋

‘‘𑀇𑀢𑀺 𑀫𑀳𑀸𑀭𑀸𑀚 𑀆𑀕𑀦𑁆𑀢𑀼𑀓𑀲𑁂𑀝𑁆𑀞𑀺 𑀢𑀕𑀭𑀲𑀺𑀔𑀺𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀤𑀺𑀦𑁆𑀦𑀧𑀘𑁆𑀘𑀬𑁂𑀦 𑀩𑀳𑀼𑀁 𑀥𑀦𑀁 𑀮𑀪𑀺, 𑀤𑀢𑁆𑀯𑀸 𑀅𑀧𑀭𑀘𑁂𑀢𑀦𑀁 𑀧𑀡𑀻𑀢𑀁 𑀓𑀸𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀧𑀡𑀻𑀢𑁂 𑀪𑁄𑀕𑁂 𑀪𑀼𑀜𑁆𑀚𑀺𑀢𑀼𑀁 𑀦𑀸𑀲𑀓𑁆𑀔𑀻’’𑀢𑀺 (𑀚𑀸. 𑀅𑀝𑁆𑀞. 𑁩.𑁬.𑀫𑀬𑁆𑀳𑀓𑀚𑀸𑀢𑀓𑀯𑀡𑁆𑀡𑀦𑀸).

𑀪𑀸𑀢𑀼 𑀧𑀦𑁂𑀲 𑀏𑀓𑀁 𑀧𑀼𑀢𑁆𑀢𑀁 (𑀥. 𑀧. 𑀅𑀝𑁆𑀞. 𑁨.𑁩𑁫𑁪) 𑀲𑀸𑀧𑀢𑁂𑀬𑁆𑀬𑀲𑁆𑀲 𑀓𑀸𑀭𑀡𑀸 𑀚𑀻𑀯𑀺𑀢𑀁 𑀯𑁄𑀭𑁄𑀧𑁂𑀲𑀺, 𑀢𑁂𑀦 𑀓𑀫𑁆𑀫𑁂𑀦 𑀩𑀳𑀽𑀦𑀺 𑀯𑀲𑁆𑀲𑀸𑀦𑀺 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀣, 𑀲𑀢𑁆𑀢𑀓𑁆𑀔𑀢𑁆𑀢𑀼𑀜𑁆𑀘 𑀅𑀧𑀼𑀢𑁆𑀢𑀓𑁄 𑀚𑀸𑀢𑁄, 𑀇𑀤𑀸𑀦𑀺𑀧𑀺 𑀢𑁂𑀦𑁂𑀯 𑀓𑀫𑁆𑀫𑁂𑀦 𑀫𑀳𑀸𑀭𑁄𑀭𑀼𑀯𑀁 𑀉𑀧𑀧𑀦𑁆𑀦𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑀳𑀸𑀭𑁄𑀭𑀼𑀯𑀁 𑀉𑀧𑀧𑀦𑁆𑀦𑀲𑁆𑀲 𑀲𑁂𑀝𑁆𑀞𑀺𑀕𑀳𑀧𑀢𑀺𑀦𑁄 𑀯𑀺𑀬𑀸’’𑀢𑀺, 𑀧𑀼𑀭𑀺𑀫𑀧𑀘𑁆𑀙𑀺𑀫𑀘𑁂𑀢𑀦𑀸𑀯𑀲𑁂𑀦 𑀘𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀓𑀸 𑀳𑀺 𑀘𑁂𑀢𑀦𑀸 𑀤𑁆𑀯𑁂 𑀧𑀝𑀺𑀲𑀦𑁆𑀥𑀺𑀬𑁄 𑀦 𑀤𑁂𑀢𑀻𑀢𑀺.

𑀤𑀲𑀆𑀓𑀸𑀭𑀯𑀡𑁆𑀡𑀦𑀸

𑁩𑁪𑁩. 𑀆𑀓𑀭𑁄𑀢𑀺 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑀢𑀸𑀬 𑀲𑀫𑀭𑀺𑀬𑀸𑀤𑀧𑀭𑀺𑀘𑁆𑀙𑁂𑀤𑀁 𑀨𑀮𑀁 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀆𑀓𑀸𑀭𑁄, 𑀓𑀸𑀭𑀡𑀦𑁆𑀢𑀺 𑀆𑀳 ‘‘𑀤𑀲𑀳𑀺 𑀓𑀸𑀭𑀡𑁂𑀳𑀻’’𑀢𑀺. 𑀫𑀭𑀺𑀬𑀸𑀤𑀢𑁆𑀣𑁄 𑀳𑁂𑀢𑁆𑀣 𑀆-𑀲𑀤𑁆𑀤𑁄. 𑀦 𑀤𑀼𑀲𑁆𑀲𑀻𑀮𑁂𑀲𑁆𑀯𑁂𑀯, 𑀅𑀣 𑀔𑁄 𑀲𑀻𑀮𑀯𑀦𑁆𑀢𑁂𑀲𑀼𑀧𑀺 𑀯𑀺𑀧𑁆𑀧𑀝𑀺𑀲𑀸𑀭𑀁 𑀉𑀧𑁆𑀧𑀸𑀤𑁂𑀲𑁆𑀲𑀢𑀺. 𑀢𑀤𑀼𑀪𑀬𑁂𑀧𑀺 𑀦 𑀉𑀧𑁆𑀧𑀸𑀤𑁂𑀢𑀩𑁆𑀩𑁄𑀢𑀺 𑀳𑀺 𑀤𑀲𑁆𑀲𑁂𑀢𑀼𑀁 𑀅𑀧𑀺-𑀲𑀤𑁆𑀤𑁂𑀦, 𑀧𑀺-𑀲𑀤𑁆𑀤𑁂𑀦 𑀯𑀸 𑀲𑀫𑁆𑀧𑀺𑀡𑁆𑀟𑀦𑀁 𑀓𑀭𑁄𑀢𑀺. 𑀧𑀝𑀺𑀕𑁆𑀕𑀸𑀳𑀓𑀢𑁄𑀯 𑀉𑀧𑁆𑀧𑀚𑁆𑀚𑀢𑀻𑀢𑀺 𑀩𑀮𑀯𑀢𑀭𑀁 𑀯𑀺𑀧𑁆𑀧𑀝𑀺𑀲𑀸𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀤𑀼𑀩𑁆𑀩𑀮𑁄 𑀧𑀦 𑀤𑁂𑀬𑁆𑀬𑀥𑀫𑁆𑀫𑀢𑁄, 𑀧𑀭𑀺𑀯𑀸𑀭𑀚𑀦𑀢𑁄𑀧𑀺 𑀉𑀧𑁆𑀧𑀚𑁆𑀚𑀢𑁂𑀯. 𑀉𑀧𑁆𑀧𑀚𑁆𑀚𑀺𑀢𑀼𑀁 𑀬𑀼𑀢𑁆𑀢𑀦𑁆𑀢𑀺 𑀉𑀧𑁆𑀧𑀚𑁆𑀚𑀦𑀸𑀭𑀳𑀁. 𑀯𑀺𑀧𑁆𑀧𑀝𑀺𑀲𑀸𑀭𑀫𑁆𑀧𑀺 𑀯𑀺𑀦𑁄𑀤𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀲𑀁𑀬𑁂𑀯𑀸𑀢𑀺 𑀧𑀸𑀡𑀸𑀢𑀺𑀧𑀸𑀢𑀻𑀦𑀫𑁂𑀯. 𑀬𑀚𑀦𑀁 𑀦𑀸𑀫𑁂𑀢𑁆𑀣 𑀤𑀸𑀦𑀫𑁂𑀯𑀸𑀥𑀺𑀧𑁆𑀧𑁂𑀢𑀁, 𑀦 𑀅𑀕𑁆𑀕𑀺𑀚𑀼𑀳𑀦𑀦𑁆𑀢𑀺 𑀆𑀳 ‘‘𑀤𑁂𑀢𑀼 𑀪𑀯’’𑀦𑁆𑀢𑀺. 𑀯𑀺𑀲𑁆𑀲𑀚𑁆𑀚𑀢𑀽𑀢𑀺 𑀫𑀼𑀢𑁆𑀢𑀘𑀸𑀕𑀯𑀲𑁂𑀦 𑀘𑀚𑀢𑀼. 𑀅𑀩𑁆𑀪𑀦𑁆𑀢𑀭𑀦𑁆𑀢𑀺 𑀅𑀚𑁆𑀛𑀢𑁆𑀢𑀁 𑀲𑀓𑀲𑀦𑁆𑀢𑀸𑀦𑁂.

𑀲𑁄𑀴𑀲𑀸𑀓𑀸𑀭𑀯𑀡𑁆𑀡𑀦𑀸

𑁩𑁪𑁪. 𑀅𑀦𑀼𑀫𑀢𑀺𑀧𑀓𑁆𑀔𑀸𑀤𑀬𑁄 𑀏𑀯 𑀳𑁂𑀝𑁆𑀞𑀸 𑀬𑀜𑁆𑀜𑀲𑁆𑀲 𑀯𑀢𑁆𑀣𑀼𑀁 𑀓𑀢𑁆𑀯𑀸 ‘‘𑀲𑁄𑀴𑀲𑀧𑀭𑀺𑀓𑁆𑀔𑀸𑀭𑀸’’𑀢𑀺 𑀯𑀼𑀢𑁆𑀢𑀸, 𑀇𑀥 𑀧𑀦 𑀲𑀦𑁆𑀤𑀲𑁆𑀲𑀦𑀸𑀤𑀺𑀯𑀲𑁂𑀦 𑀅𑀦𑀼𑀫𑁄𑀤𑀦𑀸𑀬 𑀆𑀭𑀤𑁆𑀥𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀲𑁄𑀴𑀲𑀳𑀺 𑀆𑀓𑀸𑀭𑁂𑀳𑀻’’𑀢𑀺. 𑀤𑀲𑁆𑀲𑁂𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀤𑁂𑀲𑀦𑀸𑀦𑀼𑀪𑀸𑀯𑁂𑀦 𑀧𑀘𑁆𑀘𑀓𑁆𑀔𑀫𑀺𑀯 𑀨𑀮𑀁 𑀤𑀲𑁆𑀲𑁂𑀢𑁆𑀯𑀸, 𑀅𑀦𑁂𑀓𑀯𑀸𑀭𑀁 𑀧𑀦 𑀤𑀲𑁆𑀲𑀦𑀢𑁄 ‘‘𑀤𑀲𑁆𑀲𑁂𑀢𑁆𑀯𑀸 𑀤𑀲𑁆𑀲𑁂𑀢𑁆𑀯𑀸’’𑀢𑀺 𑀩𑁆𑀬𑀸𑀧𑀦𑀯𑀘𑀦𑀁, 𑀢𑀤𑁂𑀯 𑀆𑀪𑀼𑀲𑁄 𑀫𑁂𑀟𑀦𑀝𑁆𑀞𑁂𑀦 𑀆𑀫𑁂𑀟𑀺𑀢𑀯𑀘𑀦𑀦𑁆𑀢𑀺 𑀆𑀘𑀭𑀺𑀬𑁂𑀦 (𑀤𑀻. 𑀦𑀺. 𑀝𑀻. 𑁧.𑁩𑁪𑁪) 𑀯𑀼𑀢𑁆𑀢𑀁. ‘‘𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸’’𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀫𑀢𑁆𑀣𑀦𑁆𑀢𑀺 𑀤𑀸𑀦𑀨𑀮𑀯𑀲𑁂𑀦 𑀓𑀫𑁆𑀫𑀨𑀮𑀲𑀫𑁆𑀩𑀦𑁆𑀥𑀫𑀢𑁆𑀣𑀁. 𑀲𑀫𑀸𑀤𑀧𑁂𑀢𑁆𑀯𑀸𑀢𑀺 𑀲𑀼𑀢𑀫𑀢𑁆𑀢𑀁 𑀅𑀓𑀢𑁆𑀯𑀸 𑀬𑀣𑀸 𑀭𑀸𑀚𑀸 𑀢𑀫𑀢𑁆𑀣𑀁 𑀲𑀫𑁆𑀫𑀤𑁂𑀯 𑀆𑀤𑀺𑀬𑀢𑀺 𑀘𑀺𑀢𑁆𑀢𑁂 𑀓𑀭𑁄𑀦𑁆𑀢𑁄 𑀲𑀼𑀕𑁆𑀕𑀳𑀺𑀢𑀁 𑀓𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀢𑀣𑀸 𑀲𑀓𑁆𑀓𑀘𑁆𑀘𑀁 𑀆𑀤𑀸𑀧𑁂𑀢𑁆𑀯𑀸.

‘‘𑀯𑀺𑀧𑁆𑀧𑀝𑀺𑀲𑀸𑀭𑀯𑀺𑀦𑁄𑀤𑀦𑁂𑀦𑀸’’𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁. 𑀮𑁄𑀪𑀤𑁄𑀲𑀫𑁄𑀳𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀫𑀸𑀦𑀸𑀤𑀬𑁄𑀧𑀺 𑀳𑀺 𑀤𑀸𑀦𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸, 𑀢𑁂𑀲𑀁 𑀯𑀺𑀦𑁄𑀤𑀦𑁂𑀦𑀧𑀺 𑀢𑀁 𑀯𑁄𑀤𑀸𑀧𑀺𑀢𑀁 𑀲𑀫𑀼𑀢𑁆𑀢𑁂𑀚𑀺𑀢𑀁 𑀦𑀸𑀫 𑀳𑁄𑀢𑀺 𑀢𑀺𑀓𑁆𑀔𑀯𑀺𑀲𑀤𑀪𑀸𑀯𑀸𑀧𑀢𑁆𑀢𑀺𑀢𑁄, 𑀆𑀲𑀦𑁆𑀦𑀢𑀭𑀪𑀸𑀯𑀢𑁄 𑀧𑀦 𑀯𑀺𑀧𑁆𑀧𑀝𑀺𑀲𑀸𑀭𑀯𑀺𑀦𑁄𑀤𑀦𑀫𑁂𑀯 𑀕𑀳𑀺𑀢𑀁. 𑀧𑀯𑀢𑁆𑀢𑀺𑀢𑁂 𑀳𑀺 𑀤𑀸𑀦𑁂 𑀢𑀲𑁆𑀲 𑀲𑀫𑁆𑀪𑀯𑁄𑀢𑀺. 𑀬𑀸𑀣𑀸𑀯𑀢𑁄 𑀯𑀺𑀚𑁆𑀚𑀫𑀸𑀦𑁂𑀳𑀺 𑀕𑀼𑀡𑁂𑀳𑀺 𑀳𑀝𑁆𑀞𑀧𑀳𑀝𑁆𑀞𑀪𑀸𑀯𑀸𑀧𑀸𑀤𑀦𑀁 𑀲𑀫𑁆𑀧𑀳𑀁𑀲𑀦𑀦𑁆𑀢𑀺 𑀆𑀳 ‘‘𑀲𑀼𑀦𑁆𑀤𑀭’’𑀦𑁆𑀢𑀺𑀆𑀤𑀺. 𑀥𑀫𑁆𑀫𑀢𑁄𑀢𑀺 𑀲𑀘𑁆𑀘𑀢𑁄. 𑀢𑀤𑀢𑁆𑀣𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀥𑀫𑁆𑀫𑁂𑀦 𑀲𑀫𑁂𑀦 𑀓𑀸𑀭𑀡𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀲𑀘𑁆𑀘𑀜𑁆𑀳𑀺 𑀥𑀫𑁆𑀫𑀢𑁄 𑀅𑀦𑀧𑁂𑀢𑀢𑁆𑀢𑀸 𑀥𑀫𑁆𑀫𑀁, 𑀉𑀧𑀲𑀫𑀘𑀭𑀺𑀬𑀪𑀸𑀯𑀢𑁄 𑀲𑀫𑀁, 𑀬𑀼𑀢𑁆𑀢𑀪𑀸𑀯𑁂𑀦 𑀓𑀸𑀭𑀡𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺.

𑁩𑁪𑁫. 𑀢𑀲𑁆𑀫𑀺𑀁 𑀬𑀜𑁆𑀜𑁂 𑀭𑀼𑀓𑁆𑀔𑀢𑀺𑀡𑀘𑁆𑀙𑁂𑀤𑁄𑀧𑀺 𑀦𑀸𑀫 𑀦𑀸𑀳𑁄𑀲𑀺, 𑀓𑀼𑀢𑁄 𑀧𑀸𑀡𑀯𑀥𑁄𑀢𑀺 𑀧𑀸𑀡𑀯𑀥𑀸𑀪𑀸𑀯𑀲𑁆𑀲𑁂𑀯 𑀤𑀴𑁆𑀳𑀻𑀓𑀭𑀡𑀢𑁆𑀣𑀁, 𑀲𑀩𑁆𑀩𑀲𑁄 𑀯𑀺𑀧𑀭𑀻𑀢𑀕𑁆𑀕𑀸𑀳𑁂𑀳𑀺 𑀅𑀯𑀺𑀤𑀽𑀲𑀺𑀢𑀢𑀸𑀤𑀲𑁆𑀲𑀦𑀢𑁆𑀣𑀜𑁆𑀘 𑀧𑀸𑀴𑀺𑀬𑀁 ‘‘𑀦𑁂𑀯 𑀕𑀸𑀯𑁄 𑀳𑀜𑁆𑀜𑀺𑀁𑀲𑀽’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸𑀧𑀺 ‘‘𑀦 𑀭𑀼𑀓𑁆𑀔𑀸 𑀙𑀺𑀚𑁆𑀚𑀺𑀁𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁂 𑀬𑀽𑀧𑀦𑀸𑀫𑀓𑁂’’𑀢𑀺𑀆𑀤𑀺𑀫𑀸𑀳. 𑀩𑀭𑀺𑀳𑀺𑀲𑀢𑁆𑀣𑀸𑀬𑀸𑀢𑀺 𑀧𑀭𑀺𑀘𑁆𑀙𑁂𑀤𑀢𑁆𑀣𑀸𑀬. 𑀯𑀦𑀫𑀸𑀮𑀸𑀲𑀗𑁆𑀔𑁂𑀧𑁂𑀦𑀸𑀢𑀺 𑀯𑀦𑀧𑀼𑀧𑁆𑀨𑁂𑀳𑀺 𑀕𑀦𑁆𑀥𑀺𑀢𑀫𑀸𑀮𑀸𑀦𑀺𑀬𑀸𑀫𑁂𑀦. 𑀏𑀯𑀁 𑀆𑀘𑀭𑀺𑀬𑁂𑀦 (𑀤𑀻. 𑀦𑀺. 𑀝𑀻. 𑁧.𑁩𑁪𑁫) 𑀯𑀼𑀢𑁆𑀢𑀁, 𑀯𑀦𑀧𑀦𑁆𑀢𑀺𑀆𑀓𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀪𑀽𑀫𑀺𑀬𑀁 𑀯𑀸 𑀧𑀢𑁆𑀣𑀭𑀦𑁆𑀢𑀻𑀢𑀺 𑀯𑁂𑀤𑀺𑀪𑀽𑀫𑀺𑀁 𑀧𑀭𑀺𑀓𑁆𑀔𑀺𑀧𑀦𑁆𑀢𑀸 𑀢𑀢𑁆𑀣 𑀢𑀢𑁆𑀣 𑀧𑀢𑁆𑀣𑀭𑀦𑁆𑀢𑀺. 𑀫𑀦𑁆𑀢𑀸𑀤𑀺𑀦𑀸 𑀳𑀺 𑀧𑀭𑀺𑀲𑀗𑁆𑀔𑀢𑀸 𑀪𑀽𑀫𑀺 𑀯𑀺𑀦𑁆𑀤𑀢𑀺 𑀅𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑁂𑀢𑀺 𑀓𑀢𑁆𑀯𑀸 ‘‘𑀯𑁂𑀤𑀻’’𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀧𑀺 𑀭𑀼𑀓𑁆𑀔𑀸 𑀢𑁂𑀧𑀺 𑀤𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄, 𑀓𑀫𑁆𑀫𑀓𑀢𑁆𑀢𑀸 𑀘𑁂𑀢𑀁 𑀤𑁆𑀯𑀬𑀁, 𑀅𑀪𑀺𑀳𑀺𑀢𑀓𑀫𑁆𑀫𑀁 𑀯𑀸. 𑀯𑀢𑁆𑀢𑀺𑀘𑁆𑀙𑀸𑀬 𑀳𑀺 𑀬𑀣𑀸𑀲𑀢𑁆𑀢𑀺𑀁 𑀓𑀸𑀭𑀓𑀸 𑀪𑀯𑀦𑁆𑀢𑀺. 𑀯𑀼𑀢𑁆𑀢𑀦𑀬𑁂𑀦 𑀧𑀸𑀡𑀯𑀥𑀸𑀪𑀸𑀯𑀲𑁆𑀲 𑀤𑀴𑁆𑀳𑀻𑀓𑀭𑀡𑀢𑁆𑀣𑀁, 𑀯𑀺𑀧𑀭𑀻𑀢𑀕𑁆𑀕𑀸𑀳𑁂𑀦 𑀅𑀯𑀺𑀤𑀽𑀲𑀺𑀢𑀪𑀸𑀯𑀤𑀲𑁆𑀲𑀦𑀢𑁆𑀣𑀜𑁆𑀘𑁂𑀢𑀦𑁆𑀢𑀺 𑀤𑀲𑁆𑀲𑁂𑀢𑀺 𑀓𑀺𑀁 𑀧𑀦𑀸’’𑀢𑀺𑀆𑀤𑀺𑀦𑀸. 𑀅𑀦𑁆𑀢𑁄𑀕𑁂𑀳𑀤𑀸𑀲𑁄 𑀅𑀦𑁆𑀢𑁄𑀚𑀸𑀢𑁄. 𑀆𑀤𑀺𑀲𑀤𑁆𑀤𑁂𑀦 𑀥𑀦𑀓𑁆𑀓𑀻𑀢𑀓𑀭𑀫𑀭𑀸𑀦𑀻𑀢𑀲𑀸𑀫𑀁𑀤𑀸𑀲𑀩𑁆𑀬𑀽𑀧𑀕𑀢𑀸𑀦𑀁 𑀲𑀗𑁆𑀕𑀳𑁄. 𑀧𑀼𑀩𑁆𑀩𑀫𑁂𑀯𑀸𑀢𑀺 𑀪𑀢𑀺𑀓𑀭𑀡𑀢𑁄 𑀧𑀕𑁂𑀯. 𑀥𑀦𑀁 𑀕𑀳𑁂𑀢𑁆𑀯𑀸𑀢𑀺 𑀤𑀺𑀯𑀲𑁂 𑀤𑀺𑀯𑀲𑁂 𑀬𑀣𑀸𑀓𑀫𑁆𑀫𑀁 𑀕𑀳𑁂𑀢𑁆𑀯𑀸. 𑀪𑀢𑁆𑀢𑀯𑁂𑀢𑀦𑀦𑁆𑀢𑀺 𑀤𑁂𑀯𑀲𑀺𑀓𑀁 𑀪𑀢𑁆𑀢𑀜𑁆𑀘𑁂𑀯 𑀫𑀸𑀲𑀺𑀓𑀸𑀤𑀺𑀧𑀭𑀺𑀩𑁆𑀩𑀬𑀜𑁆𑀘. 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀢𑀚𑁆𑀚𑀺𑀢𑀸𑀢𑀺 𑀲𑀦𑁆𑀢𑀚𑁆𑀚𑀺𑀢𑀸. 𑀧𑀭𑀺𑀓𑀫𑁆𑀫𑀸𑀦𑀻𑀢𑀺 𑀲𑀩𑁆𑀩𑀪𑀸𑀕𑀺𑀬𑀸𑀦𑀺 𑀓𑀫𑁆𑀫𑀸𑀦𑀺, 𑀉𑀘𑁆𑀘𑀸𑀯𑀘𑀸𑀦𑀺 𑀓𑀫𑁆𑀫𑀸𑀦𑀻𑀢𑀺 𑀅𑀢𑁆𑀣𑁄. 𑀧𑀺𑀬𑀲𑀫𑀼𑀤𑀸𑀘𑀸𑀭𑁂𑀦𑁂𑀯𑀸𑀢𑀺 𑀇𑀝𑁆𑀞𑀯𑀘𑀦𑁂𑀦𑁂𑀯. 𑀬𑀣𑀸𑀦𑀸𑀫𑀯𑀲𑁂𑀦𑁂𑀯𑀸𑀢𑀺 𑀧𑀸𑀓𑀝𑀦𑀸𑀫𑀸𑀦𑀼𑀭𑀽𑀧𑁂𑀦𑁂𑀯. 𑀲𑀧𑁆𑀧𑀺𑀢𑁂𑀮𑀦𑀯𑀦𑀻𑀢𑀤𑀥𑀺𑀫𑀥𑀼𑀨𑀸𑀡𑀺𑀢𑁂𑀦 𑀘𑁂𑀯𑀸𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁄 𑀅𑀯𑀼𑀢𑁆𑀢𑀲𑀫𑀼𑀘𑁆𑀘𑀬𑀢𑁆𑀣𑁄, 𑀢𑁂𑀦 𑀧𑀡𑀻𑀢𑀧𑀡𑀻𑀢𑀸𑀦𑀁 𑀦𑀸𑀦𑀧𑁆𑀧𑀓𑀸𑀭𑀸𑀦𑀁 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀸𑀤𑀻𑀦𑀜𑁆𑀘𑁂𑀯 𑀯𑀢𑁆𑀣𑀬𑀸𑀦𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀲𑁂𑀬𑁆𑀬𑀸𑀯𑀲𑀣𑀸𑀤𑀻𑀦𑀜𑁆𑀘 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄, 𑀢𑁂𑀦𑀸𑀳 ‘‘𑀧𑀡𑀻𑀢𑁂𑀳𑀺 𑀲𑀧𑁆𑀧𑀺𑀢𑁂𑀮𑀸𑀤𑀺𑀲𑀫𑁆𑀫𑀺𑀲𑁆𑀲𑁂𑀳𑁂𑀯𑀸’’𑀢𑀺𑀆𑀤𑀺. 𑀢𑀲𑁆𑀲 𑀢𑀲𑁆𑀲 𑀓𑀸𑀮𑀲𑁆𑀲 𑀅𑀦𑀼𑀭𑀽𑀧𑁂𑀳𑀺 𑀬𑀸𑀕𑀼…𑀧𑁂… 𑀧𑀸𑀦𑀓𑀸𑀤𑀻𑀳𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀧𑁆𑀧𑀺𑀆𑀤𑀻𑀦𑀦𑁆𑀢𑀺 𑀲𑀧𑁆𑀧𑀺𑀆𑀤𑀻𑀳𑀺.

𑁩𑁪𑁬. 𑀧𑀝𑀺𑀲𑀸𑀫𑁂𑀢𑀩𑁆𑀩𑀢𑁄, 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀦𑁆𑀢𑀓𑀪𑀸𑀯𑀢𑁄 𑀘 𑀲𑀁 𑀦𑀸𑀫 𑀥𑀦𑀁 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀧𑀢𑀻𑀢𑀺 𑀲𑀧𑀢𑀺 𑀦𑀺𑀕𑁆𑀕𑀳𑀺𑀢𑀮𑁄𑀧𑁂𑀦, 𑀥𑀦𑀯𑀸, 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀳𑀺𑀢𑀸𑀯𑀳𑀢𑁆𑀢𑀸 𑀢𑀲𑁆𑀲 𑀳𑀺𑀢𑀦𑁆𑀢𑀺 𑀲𑀸𑀧𑀢𑁂𑀬𑁆𑀬𑀁, 𑀢𑀤𑁂𑀯 𑀥𑀦𑀁. 𑀢𑁂𑀦𑀸𑀳 ‘‘𑀧𑀳𑀽𑀢𑀁 𑀥𑀦’’𑀦𑁆𑀢𑀺. 𑀅𑀓𑁆𑀔𑀬𑀥𑀫𑁆𑀫𑀫𑁂𑀯𑀸𑀢𑀺 𑀅𑀔𑀬𑀲𑀪𑀸𑀯𑀫𑁂𑀯. 𑀕𑀸𑀫𑀪𑀸𑀕𑁂𑀦𑀸𑀢𑀺 𑀲𑀁𑀓𑀺𑀢𑁆𑀢𑀦𑀯𑀲𑁂𑀦 𑀕𑀸𑀫𑁂 𑀯𑀸 𑀕𑀳𑁂𑀢𑀩𑁆𑀩𑀪𑀸𑀕𑁂𑀦, 𑀏𑀯𑀁 𑀆𑀘𑀭𑀺𑀬𑁂𑀦 (𑀤𑀻. 𑀦𑀺. 𑀝𑀻. 𑁧.𑁩𑁪𑁬) 𑀯𑀼𑀢𑁆𑀢𑀁, 𑀧𑀘𑁆𑀘𑁂𑀓𑀁 𑀲𑀪𑀸𑀕𑀕𑀸𑀫𑀓𑁄𑀝𑁆𑀞𑀸𑀲𑁂𑀦𑀸𑀢𑀺𑀧𑀺 𑀅𑀢𑁆𑀣𑁄. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁩𑁪𑁭. 𑀬𑀜𑁆𑀜𑀸𑀯𑀸𑀝𑁄𑀢𑀺 𑀔𑀡𑀺𑀢𑀸𑀯𑀸𑀝𑀲𑁆𑀲 𑀅𑀲𑁆𑀲𑀫𑁂𑀥𑀸𑀤𑀺𑀬𑀜𑁆𑀜𑀬𑀚𑀦𑀝𑁆𑀞𑀸𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁, 𑀢𑀩𑁆𑀩𑁄𑀳𑀸𑀭𑁂𑀦 𑀧𑀦 𑀇𑀥 𑀤𑀸𑀦𑀲𑀸𑀮𑀸𑀬 𑀏𑀯, 𑀢𑀸𑀬 𑀘 𑀧𑀼𑀭𑀢𑁆𑀣𑀺𑀫𑀦𑀕𑀭𑀤𑁆𑀯𑀸𑀭𑁂 𑀓𑀢𑀸𑀬 𑀧𑀼𑀭𑀢𑁆𑀣𑀺𑀫𑀪𑀸𑀕𑁂 𑀏𑀯𑀸𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀧𑀼𑀭𑀢𑁆𑀣𑀺𑀫𑀢𑁄 𑀦𑀕𑀭𑀤𑁆𑀯𑀸𑀭𑁂’’𑀢𑀺𑀆𑀤𑀺𑀦𑀸. 𑀢𑀁 𑀧𑀦 𑀞𑀸𑀦𑀁 𑀭𑀜𑁆𑀜𑁄 𑀤𑀸𑀦𑀲𑀸𑀮𑀸𑀬 𑀦𑀸𑀢𑀺𑀤𑀽𑀭𑁂 𑀏𑀯𑀸𑀢𑀺 𑀆𑀳 ‘‘𑀬𑀣𑀸’’𑀢𑀺𑀆𑀤𑀺. 𑀬𑀢𑁄 𑀢𑀢𑁆𑀣 𑀧𑀸𑀢𑀭𑀸𑀲𑀁 𑀪𑀼𑀜𑁆𑀚𑀺𑀢𑁆𑀯𑀸 𑀅𑀓𑀺𑀮𑀦𑁆𑀢𑀭𑀽𑀧𑀸𑀬𑁂𑀯 𑀲𑀸𑀬𑀦𑁆𑀳𑁂 𑀭𑀜𑁆𑀜𑁄 𑀤𑀸𑀦𑀲𑀸𑀮𑀁 𑀲𑀫𑁆𑀧𑀸𑀧𑀼𑀡𑀦𑁆𑀢𑀺. ‘‘𑀤𑀓𑁆𑀔𑀺𑀡𑁂𑀦 𑀬𑀜𑁆𑀜𑀸𑀯𑀸𑀝𑀲𑁆𑀲𑀸’’𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑀸𑀕𑀼𑀁 𑀧𑀺𑀯𑀺𑀢𑁆𑀯𑀸𑀢𑀺 𑀳𑀺 𑀬𑀸𑀕𑀼𑀲𑀻𑀲𑁂𑀦 𑀧𑀸𑀢𑀭𑀸𑀲𑀪𑁄𑀚𑀦𑀫𑀸𑀳.

𑁩𑁪𑁮. 𑀫𑀥𑀼𑀭𑀦𑁆𑀢𑀺 𑀲𑀸𑀤𑀼𑀭𑀲𑀁. 𑀉𑀧𑀭𑀺 𑀯𑀢𑁆𑀢𑀩𑁆𑀩𑀫𑀢𑁆𑀣𑀦𑁆𑀢𑀺 ‘‘𑀅𑀧𑀺𑀘 𑀫𑁂 𑀪𑁄 𑀏𑀯𑀁 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀯𑀼𑀘𑁆𑀘𑀫𑀸𑀦𑀫𑀢𑁆𑀣𑀁. 𑀧𑀭𑀺𑀳𑀸𑀭𑁂𑀦𑀸𑀢𑀺 𑀪𑀕𑀯𑀦𑁆𑀢𑀁 𑀕𑀭𑀼𑀁 𑀓𑀢𑁆𑀯𑀸 𑀅𑀕𑀸𑀭𑀯𑀧𑀭𑀺𑀳𑀸𑀭𑁂𑀦, 𑀉𑀚𑀼𑀓𑀪𑀸𑀯𑀸𑀧𑀦𑀬𑀦𑁂𑀦 𑀯𑀸, 𑀉𑀚𑀼𑀓𑀯𑀼𑀢𑁆𑀢𑀺𑀁 𑀧𑀭𑀺𑀳𑀭𑀺𑀢𑁆𑀯𑀸 𑀯𑀗𑁆𑀓𑀯𑀼𑀢𑁆𑀢𑀺𑀬𑀸𑀯 𑀬𑀣𑀸𑀘𑀺𑀦𑁆𑀢𑀺𑀢𑀫𑀢𑁆𑀣𑀁 𑀧𑀼𑀘𑁆𑀙𑀦𑁆𑀢𑁄 𑀏𑀯𑀫𑀸𑀳𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀉𑀚𑀼𑀓𑀫𑁂𑀯 𑀧𑀼𑀘𑁆𑀙𑀬𑀫𑀸𑀦𑁄 𑀅𑀕𑀸𑀭𑀯𑁄 𑀯𑀺𑀬 𑀳𑁄𑀢𑀻’’𑀢𑀺.

𑀦𑀺𑀘𑁆𑀘𑀤𑀸𑀦𑀅𑀦𑀼𑀓𑀼𑀮𑀬𑀜𑁆𑀜𑀯𑀡𑁆𑀡𑀦𑀸

𑁩𑁪𑁯. 𑀉𑀝𑁆𑀞𑀸𑀬𑀸𑀢𑀺 𑀤𑀸𑀦𑁂 𑀉𑀝𑁆𑀞𑀸𑀦𑀯𑀻𑀭𑀺𑀬𑀫𑀸𑀳, 𑀲𑀫𑀼𑀝𑁆𑀞𑀸𑀬𑀸𑀢𑀺 𑀢𑀲𑁆𑀲 𑀲𑀸𑀢𑀘𑁆𑀘𑀓𑀺𑀭𑀺𑀬𑀁. 𑀓𑀲𑀺𑀯𑀸𑀡𑀺𑀚𑁆𑀚𑀸𑀤𑀺𑀓𑀫𑁆𑀫𑀸𑀦𑀺 𑀅𑀓𑀭𑁄𑀦𑁆𑀢𑁄 𑀤𑀮𑀺𑀤𑁆𑀤𑀺𑀬𑀸𑀤𑀺𑀅𑀦𑀢𑁆𑀣𑀸𑀧𑀢𑁆𑀢𑀺𑀬𑀸 𑀦𑀲𑁆𑀲𑀺𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀧𑁆𑀧𑀲𑀫𑁆𑀪𑀸𑀭𑀢𑀭𑁄 𑀘𑁂𑀯 𑀫𑀳𑀧𑁆𑀨𑀮𑀢𑀭𑁄 𑀘𑀸𑀢𑀺 𑀲𑀗𑁆𑀔𑁂𑀧𑀢𑁄 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁄 𑀧𑀸𑀴𑀺𑀬𑀁 𑀧𑀦 ‘‘𑀅𑀧𑁆𑀧𑀢𑁆𑀣𑀢𑀭𑁄 𑀘 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀭𑁄 𑀘 𑀫𑀳𑀧𑁆𑀨𑀮𑀢𑀭𑁄 𑀘 𑀫𑀳𑀸𑀦𑀺𑀲𑀁𑀲𑀢𑀭𑁄 𑀘𑀸’’𑀢𑀺 𑀧𑀸𑀞𑁄. 𑀢𑀢𑁆𑀣 𑀅𑀧𑁆𑀧𑀲𑀫𑁆𑀪𑀸𑀭𑀢𑀭𑁄𑀢𑀺 𑀅𑀢𑀺𑀯𑀺𑀬 𑀧𑀭𑀺𑀢𑁆𑀢𑀲𑀫𑁆𑀪𑀸𑀭𑁄, 𑀅𑀲𑀫𑀸𑀭𑀩𑁆𑀪𑀺𑀬𑀲𑀫𑁆𑀪𑀸𑀭𑁄. 𑀅𑀧𑁆𑀧𑀢𑁆𑀣𑀢𑀭𑁄𑀢𑀺 𑀧𑀦 𑀅𑀢𑀺𑀯𑀺𑀬 𑀅𑀧𑁆𑀧𑀓𑀺𑀘𑁆𑀘𑁄, 𑀅𑀢𑁆𑀣𑁄 𑀘𑁂𑀢𑁆𑀣 𑀓𑀺𑀘𑁆𑀘𑀁, 𑀢𑁆𑀣-𑀓𑀸𑀭𑀲𑁆𑀲 𑀝𑁆𑀞-𑀓𑀸𑀭𑀁 𑀓𑀢𑁆𑀯𑀸 ‘‘𑀅𑀧𑁆𑀧𑀝𑁆𑀞𑀢𑀭𑁄’’𑀢𑀺𑀧𑀺 𑀧𑀸𑀞𑁄. 𑀲𑀫𑁆𑀫𑀸 𑀆𑀭𑀪𑀻𑀬𑀢𑀺 𑀬𑀜𑁆𑀜𑁄 𑀏𑀢𑁂𑀦𑀸𑀢𑀺 𑀲𑀫𑀸𑀭𑀫𑁆𑀪𑁄, 𑀲𑀫𑁆𑀪𑀸𑀭𑀲𑀫𑁆𑀪𑀭𑀡𑀯𑀲𑁂𑀦 𑀧𑀯𑀢𑁆𑀢𑀲𑀢𑁆𑀢𑀧𑀻𑀴𑀸, 𑀅𑀧𑁆𑀧𑁄 𑀲𑀫𑀸𑀭𑀫𑁆𑀪𑁄 𑀏𑀢𑀲𑁆𑀲𑀸𑀢𑀺 𑀢𑀣𑀸, 𑀅𑀬𑀁 𑀧𑀦𑀸𑀢𑀺𑀲𑀬𑁂𑀦𑀸𑀢𑀺 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀭𑁄. 𑀯𑀺𑀧𑀸𑀓𑀲𑀜𑁆𑀜𑀺𑀢𑀁 𑀫𑀳𑀦𑁆𑀢𑀁 𑀲𑀤𑀺𑀲𑀁 𑀨𑀮𑀫𑁂𑀢𑀲𑁆𑀲𑀸𑀢𑀺 𑀫𑀳𑀧𑁆𑀨𑀮𑁄, 𑀅𑀬𑀁 𑀧𑀦𑀸𑀢𑀺𑀲𑀬𑁂𑀦𑀸𑀢𑀺 𑀫𑀳𑀧𑁆𑀨𑀮𑀢𑀭𑁄. 𑀉𑀤𑀬𑀲𑀜𑁆𑀜𑀺𑀢𑀁 𑀫𑀳𑀦𑁆𑀢𑀁 𑀦𑀺𑀲𑁆𑀲𑀦𑁆𑀤𑀸𑀤𑀺𑀨𑀮𑀫𑁂𑀢𑀲𑁆𑀲𑀸𑀢𑀺 𑀫𑀳𑀸𑀦𑀺𑀲𑀁𑀲𑁄, 𑀅𑀬𑀁 𑀧𑀦𑀸𑀢𑀺𑀲𑀬𑁂𑀦𑀸𑀢𑀺 𑀫𑀳𑀸𑀦𑀺𑀲𑀁𑀲𑀢𑀭𑁄.𑀥𑀼𑀯𑀤𑀸𑀦𑀸𑀦𑀻𑀢𑀺 𑀥𑀼𑀯𑀸𑀦𑀺 𑀣𑀺𑀭𑀸𑀦𑀺 𑀅𑀯𑀺𑀘𑁆𑀙𑀺𑀦𑁆𑀦𑀸𑀦𑀺 𑀓𑀢𑁆𑀯𑀸 𑀤𑀸𑀢𑀩𑁆𑀩𑀤𑀸𑀦𑀸𑀦𑀺. 𑀦𑀺𑀘𑁆𑀘𑀪𑀢𑁆𑀢𑀸𑀦𑀻𑀢𑀺 𑀏𑀢𑁆𑀣 𑀪𑀢𑁆𑀢𑀲𑀻𑀲𑁂𑀦 𑀘𑀢𑀼𑀧𑀘𑁆𑀘𑀬𑀕𑁆𑀕𑀳𑀡𑀁. 𑀅𑀦𑀼𑀓𑀼𑀮𑀬𑀜𑁆𑀜𑀸𑀦𑀻𑀢𑀺 𑀅𑀦𑀼𑀓𑀼𑀮𑀁 𑀓𑀼𑀮𑀸𑀦𑀼𑀓𑁆𑀓𑀫𑀁 𑀉𑀧𑀸𑀤𑀸𑀬 𑀤𑀸𑀢𑀩𑁆𑀩𑀤𑀸𑀦𑀸𑀦𑀺. 𑀢𑁂𑀦𑀸𑀳 ‘‘𑀅𑀫𑁆𑀳𑀸𑀓’’𑀦𑁆𑀢𑀺𑀆𑀤𑀺. 𑀬𑀸𑀦𑀺 𑀧𑀯𑀢𑁆𑀢𑁂𑀢𑀩𑁆𑀩𑀸𑀦𑀺, 𑀢𑀸𑀦𑀺 𑀅𑀦𑀼𑀓𑀼𑀮𑀬𑀜𑁆𑀜𑀸𑀦𑀺 𑀦𑀸𑀫𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀦𑀺𑀩𑀤𑁆𑀥𑀤𑀸𑀦𑀸𑀦𑀻𑀢𑀺 𑀦𑀺𑀩𑀦𑁆𑀥𑁂𑀢𑁆𑀯𑀸 𑀦𑀺𑀬𑀫𑁂𑀢𑁆𑀯𑀸 𑀧𑀯𑁂𑀡𑀻𑀯𑀲𑁂𑀦 𑀧𑀯𑀢𑁆𑀢𑀺𑀢𑀤𑀸𑀦𑀸𑀦𑀺.

𑀳𑀢𑁆𑀣𑀺𑀤𑀦𑁆𑀢𑁂𑀦 𑀓𑀢𑀸 𑀤𑀦𑁆𑀢𑀫𑀬𑀲𑀮𑀸𑀓𑀸, 𑀬𑀢𑁆𑀣 𑀤𑀸𑀬𑀓𑀸𑀦𑀁 𑀦𑀸𑀫𑀁 𑀅𑀗𑁆𑀓𑀦𑁆𑀢𑀺, 𑀇𑀫𑀺𑀦𑀸 𑀢𑀁 𑀦𑀺𑀘𑁆𑀘𑀪𑀢𑁆𑀢𑀁 𑀲𑀮𑀸𑀓𑀤𑀸𑀦𑀯𑀲𑁂𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀁 𑀓𑀼𑀮𑀦𑁆𑀢𑀺 𑀅𑀦𑀸𑀣𑀧𑀺𑀡𑁆𑀟𑀺𑀓𑀓𑀼𑀮𑀁. 𑀤𑀸𑀮𑀺𑀤𑁆𑀤𑀺𑀬𑁂𑀦𑀸𑀢𑀺 𑀤𑀮𑀺𑀤𑁆𑀤𑀪𑀸𑀯𑁂𑀦. ‘‘𑀏𑀓𑀲𑀮𑀸𑀓𑀢𑁄 𑀉𑀤𑁆𑀥𑀁 𑀤𑀸𑀢𑀼𑀁 𑀦𑀸𑀲𑀓𑁆𑀔𑀻’’𑀢𑀺 𑀇𑀫𑀺𑀦𑀸 𑀏𑀓𑁂𑀦𑀧𑀺 𑀲𑀮𑀸𑀓𑀤𑀸𑀦𑁂𑀦 𑀦𑀺𑀩𑀤𑁆𑀥𑀤𑀸𑀦𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑀼𑀫𑀤𑀢𑁆𑀯𑀸 𑀅𑀦𑀼𑀭𑀓𑁆𑀔𑀡𑀫𑀸𑀳. 𑀭𑀜𑁆𑀜𑁄𑀢𑀺 𑀲𑁂𑀢𑀯𑀸𑀳𑀦𑀭𑀜𑁆𑀜𑁄.

𑀆𑀤𑀻𑀦𑀺 𑀯𑀢𑁆𑀯𑀸𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 ‘‘𑀓𑀲𑁆𑀫𑀸 𑀲𑁂𑀦𑁄 𑀯𑀺𑀬 𑀫𑀁𑀲𑀧𑁂𑀲𑀺𑀁 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀕𑀡𑁆𑀳𑀸𑀲𑀻’’𑀢𑀺 𑀏𑀯𑀫𑀸𑀤𑀻𑀦𑀁 𑀲𑀫𑀲𑀫𑀤𑀸𑀦𑁂 𑀉𑀲𑁆𑀲𑀼𑀓𑁆𑀓𑀦𑀯𑀘𑀦𑀸𑀦𑀁 𑀲𑀗𑁆𑀕𑀳𑁄. 𑀕𑀮𑀕𑁆𑀕𑀸𑀳𑀸𑀢𑀺 𑀕𑀮𑀕𑁆𑀕𑀳𑀡𑀸. ‘‘𑀓𑀫𑁆𑀫𑀘𑁆𑀙𑁂𑀤𑀯𑀲𑁂𑀦𑀸’’𑀢𑀺 𑀇𑀫𑀺𑀦𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑀫𑁆𑀫𑁄𑀓𑀸𑀲𑀸𑀤𑀸𑀦𑀫𑁆𑀧𑀺 𑀧𑀻𑀴𑀸𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀲𑀫𑀸𑀭𑀫𑁆𑀪𑀲𑀤𑁆𑀤𑁄 𑀘𑁂𑀢𑁆𑀣 𑀧𑀻𑀴𑀦𑀢𑁆𑀣𑁄𑀢𑀺 𑀆𑀳 ‘‘𑀧𑀻𑀴𑀸𑀲𑀗𑁆𑀔𑀸𑀢𑁄 𑀲𑀫𑀸𑀭𑀫𑁆𑀪𑁄’’𑀢𑀺. 𑀧𑀼𑀩𑁆𑀩𑀘𑁂𑀢𑀦𑀸𑀫𑀼𑀜𑁆𑀘𑀘𑁂𑀢𑀦𑀸𑀅𑀧𑀭𑀘𑁂𑀢𑀦𑀸𑀲𑀫𑁆𑀧𑀢𑁆𑀢𑀺𑀬𑀸 𑀤𑀸𑀬𑀓𑀯𑀲𑁂𑀦 𑀢𑀻𑀡𑀺 𑀅𑀗𑁆𑀕𑀸𑀦𑀺, 𑀯𑀻𑀢𑀭𑀸𑀕𑀢𑀸𑀯𑀻𑀢𑀤𑁄𑀲𑀢𑀸𑀯𑀻𑀢𑀫𑁄𑀳𑀢𑀸𑀧𑀝𑀺𑀧𑀢𑁆𑀢𑀺𑀬𑀸 𑀤𑀓𑁆𑀔𑀺𑀡𑁂𑀬𑁆𑀬𑀯𑀲𑁂𑀦 𑀘 𑀢𑀻𑀡𑀻𑀢𑀺 𑀏𑀯𑀁 𑀙𑀴𑀗𑁆𑀕𑀲𑀫𑀦𑁆𑀦𑀸𑀕𑀢𑀸 𑀳𑁄𑀢𑀺 𑀤𑀓𑁆𑀔𑀺𑀡𑀸, 𑀙𑀴𑀗𑁆𑀕𑀼𑀢𑁆𑀢𑀭𑁂 𑀦𑀦𑁆𑀤𑀫𑀸𑀢𑀸𑀲𑀼𑀢𑁆𑀢𑀜𑁆𑀘 (𑀅. 𑀦𑀺. 𑁬.𑁩𑁭) 𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀁. 𑀅𑀧𑀭𑀸𑀧𑀭𑀁 𑀉𑀧𑁆𑀧𑀚𑁆𑀚𑀦𑀓𑀘𑁂𑀢𑀦𑀸𑀯𑀲𑁂𑀦 𑀫𑀳𑀸𑀦𑀤𑀻 𑀯𑀺𑀬, 𑀫𑀳𑁄𑀖𑁄 𑀯𑀺𑀬 𑀘 𑀇𑀢𑁄 𑀘𑀺𑀢𑁄 𑀘 𑀅𑀪𑀺𑀲𑀦𑁆𑀤𑀺𑀢𑁆𑀯𑀸 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀧𑀯𑀢𑁆𑀢𑀺𑀢𑁄 𑀧𑀼𑀜𑁆𑀜𑀫𑁂𑀯 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑁄. 𑀢𑀣𑀸𑀯𑀺𑀥𑀦𑁆𑀢𑀺 𑀧𑀫𑀸𑀡𑀲𑁆𑀲 𑀓𑀸𑀢𑀼𑀁 𑀅𑀲𑀼𑀓𑀭𑀢𑁆𑀢𑀫𑀸𑀳. 𑀓𑀸𑀭𑀡𑀫𑀳𑀢𑁆𑀢𑁂𑀦 𑀨𑀮𑀫𑀳𑀢𑁆𑀢𑀫𑁆𑀧𑀺 𑀯𑁂𑀤𑀺𑀢𑀩𑁆𑀩𑀁 𑀉𑀧𑀭𑀺 𑀦𑀚𑁆𑀚𑀸 𑀯𑀼𑀝𑁆𑀞𑀺𑀬𑀸 𑀫𑀳𑁄𑀖𑁄 𑀯𑀺𑀬𑀸𑀢𑀺 𑀯𑀼𑀢𑁆𑀢𑀁 ‘‘𑀢𑀲𑁆𑀫𑀸’’𑀢𑀺𑀆𑀤𑀺.

𑁩𑁫𑁦. 𑀦𑀯𑀦𑀯𑁄𑀢𑀺 𑀲𑀩𑁆𑀩𑀤𑀸 𑀅𑀪𑀺𑀦𑀯𑁄, 𑀤𑀺𑀯𑀲𑁂 𑀤𑀺𑀯𑀲𑁂 𑀤𑀸𑀬𑀓𑀲𑁆𑀲 𑀩𑁆𑀬𑀸𑀧𑀸𑀭𑀸𑀧𑀚𑁆𑀚𑀦𑀢𑁄 𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑀁 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 ‘‘𑀏𑀓𑁂𑀦𑀸’’𑀢𑀺𑀆𑀤𑀺. 𑀬𑀣𑀸𑀭𑀤𑁆𑀥𑀲𑁆𑀲 𑀆𑀯𑀸𑀲𑀲𑁆𑀲 𑀓𑀢𑀺𑀧𑀬𑁂𑀦𑀸𑀧𑀺 𑀓𑀸𑀮𑁂𑀦 𑀧𑀭𑀺𑀲𑀫𑀸𑀧𑁂𑀢𑀩𑁆𑀩𑀢𑁄 𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑀁 𑀅𑀢𑁆𑀣𑀻𑀢𑀺 𑀆𑀳 ‘‘𑀧𑀡𑁆𑀡𑀲𑀸𑀮’’𑀦𑁆𑀢𑀺𑀆𑀤𑀺. 𑀫𑀳𑀸𑀯𑀺𑀳𑀸𑀭𑁂𑀧𑀺 𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑀲𑁆𑀲 𑀅𑀢𑁆𑀣𑀺𑀢𑀸𑀉𑀧𑀸𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀓𑀯𑀸𑀭𑀁 𑀥𑀦𑀧𑀭𑀺𑀘𑁆𑀘𑀸𑀕𑀁 𑀓𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦𑀸𑀢𑀺 𑀲𑀩𑁆𑀩𑀸𑀲𑀯𑀲𑀼𑀢𑁆𑀢𑀦𑁆𑀢𑀸𑀤𑀺𑀧𑀸𑀴𑀺𑀦𑀬𑁂𑀦. 𑀦𑀯𑀸𑀦𑀺𑀲𑀁𑀲𑀸𑀢𑀺 𑀲𑀻𑀢𑀧𑀝𑀺𑀖𑀸𑀢𑀸𑀤𑀬𑁄 𑀧𑀝𑀺𑀲𑀮𑁆𑀮𑀸𑀦𑀸𑀭𑀸𑀫𑀧𑀭𑀺𑀬𑁄𑀲𑀸𑀦𑀸 𑀬𑀣𑀸𑀧𑀘𑁆𑀘𑀯𑁂𑀓𑁆𑀔𑀡𑀁 𑀕𑀡𑀺𑀢𑀸 𑀦𑀯 𑀉𑀤𑀬𑀸, 𑀅𑀧𑁆𑀧𑀫𑀢𑁆𑀢𑀢𑀸𑀬 𑀘𑁂𑀢𑁂 𑀯𑀼𑀢𑁆𑀢𑀸.

𑀬𑀲𑁆𑀫𑀸 𑀧𑀦 𑀆𑀯𑀸𑀲𑀁 𑀤𑁂𑀦𑁆𑀢𑁂𑀦 𑀦𑀸𑀫 𑀲𑀩𑁆𑀩𑀫𑁆𑀧𑀺 𑀧𑀘𑁆𑀘𑀬𑀚𑀸𑀢𑀁 𑀤𑀺𑀦𑁆𑀦𑀫𑁂𑀯 𑀳𑁄𑀢𑀺. 𑀬𑀣𑀸𑀳 𑀲𑀁𑀬𑀼𑀢𑁆𑀢𑀸𑀕𑀫𑀯𑀭𑀮𑀜𑁆𑀙𑀓𑁂 ‘‘𑀲𑁄 𑀘 𑀲𑀩𑁆𑀩𑀤𑀤𑁄 𑀳𑁄𑀢𑀺 𑀬𑁄 𑀤𑀤𑀸𑀢𑀺 𑀉𑀧𑀲𑁆𑀲𑀬’’𑀦𑁆𑀢𑀺 (𑀲𑀁. 𑀦𑀺. 𑁧.𑁪𑁨), 𑀲𑀤𑀸 𑀧𑀼𑀜𑁆𑀜𑀧𑀯𑀟𑁆𑀠𑀦𑀽𑀧𑀸𑀬𑀜𑁆𑀘 𑀏𑀢𑀁. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣𑁂𑀯 ‘‘𑀬𑁂 𑀤𑀤𑀦𑁆𑀢𑀺 𑀉𑀧𑀲𑁆𑀲𑀬𑀁, 𑀢𑁂𑀲𑀁 𑀤𑀺𑀯𑀸 𑀘 𑀭𑀢𑁆𑀢𑁄 𑀘, 𑀲𑀤𑀸 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻’’𑀢𑀺 (𑀲𑀁. 𑀦𑀺. 𑁧.𑁪𑁭) 𑀢𑀣𑀸 𑀳𑀺 𑀤𑁆𑀯𑁂 𑀢𑀬𑁄 𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀓𑀺𑀜𑁆𑀘𑀺 𑀅𑀮𑀤𑁆𑀥𑀸 𑀆𑀕𑀢𑀲𑁆𑀲𑀸𑀧𑀺 𑀙𑀸𑀬𑀽𑀤𑀓𑀲𑀫𑁆𑀧𑀦𑁆𑀦𑀁 𑀆𑀭𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀦𑀳𑀸𑀬𑀺𑀢𑁆𑀯𑀸 𑀧𑀢𑀺𑀲𑁆𑀲𑀬𑁂 𑀫𑀼𑀳𑀼𑀢𑁆𑀢𑀁 𑀦𑀺𑀧𑀚𑁆𑀚𑀺𑀢𑁆𑀯𑀸 𑀉𑀝𑁆𑀞𑀸𑀬 𑀦𑀺𑀲𑀺𑀦𑁆𑀦𑀲𑁆𑀲 𑀓𑀸𑀬𑁂 𑀩𑀮𑀁 𑀆𑀳𑀭𑀺𑀢𑁆𑀯𑀸 𑀧𑀓𑁆𑀔𑀺𑀢𑁆𑀢𑀁 𑀯𑀺𑀬 𑀳𑁄𑀢𑀺. 𑀩𑀳𑀺 𑀯𑀺𑀘𑀭𑀦𑁆𑀢𑀲𑁆𑀲 𑀘 𑀓𑀸𑀬𑁂 𑀯𑀡𑁆𑀡𑀥𑀸𑀢𑀼 𑀯𑀸𑀢𑀸𑀢𑀧𑁂𑀳𑀺 𑀓𑀺𑀮𑀫𑀢𑀺, 𑀧𑀢𑀺𑀲𑁆𑀲𑀬𑀁 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀥𑀸𑀬 𑀫𑀼𑀳𑀼𑀢𑁆𑀢𑀁 𑀦𑀺𑀧𑀦𑁆𑀦𑀲𑁆𑀲 𑀯𑀺𑀲𑀪𑀸𑀕𑀲𑀦𑁆𑀢𑀢𑀺 𑀯𑀽𑀧𑀲𑀫𑁆𑀫𑀢𑀺, 𑀲𑀪𑀸𑀕𑀲𑀦𑁆𑀢𑀢𑀺 𑀧𑀢𑀺𑀝𑁆𑀞𑀸𑀢𑀺, 𑀯𑀡𑁆𑀡𑀥𑀸𑀢𑀼 𑀆𑀳𑀭𑀺𑀢𑁆𑀯𑀸 𑀧𑀓𑁆𑀔𑀺𑀢𑁆𑀢𑀸 𑀯𑀺𑀬 𑀳𑁄𑀢𑀺. 𑀩𑀳𑀺 𑀯𑀺𑀘𑀭𑀦𑁆𑀢𑀲𑁆𑀲 𑀘 𑀧𑀸𑀤𑁂 𑀓𑀡𑁆𑀝𑀓𑁄 𑀯𑀺𑀚𑁆𑀛𑀢𑀺, 𑀔𑀸𑀡𑀼 𑀧𑀳𑀭𑀢𑀺, 𑀲𑀭𑀻𑀲𑀧𑀸𑀤𑀺𑀧𑀭𑀺𑀲𑁆𑀲𑀬𑀸 𑀘𑁂𑀯 𑀘𑁄𑀭𑀪𑀬𑀜𑁆𑀘 𑀉𑀧𑁆𑀧𑀚𑁆𑀚𑀢𑀺, 𑀧𑀢𑀺𑀲𑁆𑀲𑀬𑀁 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀥𑀸𑀬 𑀦𑀺𑀧𑀦𑁆𑀦𑀲𑁆𑀲 𑀲𑀩𑁆𑀩𑁂 𑀢𑁂 𑀧𑀭𑀺𑀲𑁆𑀲𑀬𑀸 𑀦 𑀳𑁄𑀦𑁆𑀢𑀺, 𑀲𑀚𑁆𑀛𑀸𑀬𑀦𑁆𑀢𑀲𑁆𑀲 𑀥𑀫𑁆𑀫𑀧𑀻𑀢𑀺𑀲𑀼𑀔𑀁, 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺 𑀓𑀭𑁄𑀦𑁆𑀢𑀲𑁆𑀲 𑀉𑀧𑀲𑀫𑀲𑀼𑀔𑀜𑁆𑀘 𑀉𑀧𑁆𑀧𑀚𑁆𑀚𑀢𑀺 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑁂𑀧𑀸𑀪𑀸𑀯𑀢𑁄. 𑀩𑀳𑀺 𑀯𑀺𑀘𑀭𑀦𑁆𑀢𑀲𑁆𑀲 𑀘 𑀓𑀸𑀬𑁂 𑀲𑁂𑀤𑀸 𑀫𑀼𑀘𑁆𑀘𑀦𑁆𑀢𑀺 𑀅𑀓𑁆𑀔𑀻𑀦𑀺 𑀨𑀦𑁆𑀤𑀦𑁆𑀢𑀺, 𑀲𑁂𑀦𑀸𑀲𑀦𑀁 𑀧𑀯𑀺𑀲𑀦𑀓𑁆𑀔𑀡𑁂 𑀫𑀜𑁆𑀘𑀧𑀻𑀞𑀸𑀤𑀻𑀦𑀺 𑀦 𑀧𑀜𑁆𑀜𑀸𑀬𑀦𑁆𑀢𑀺, 𑀫𑀼𑀳𑀼𑀢𑁆𑀢𑀁 𑀦𑀺𑀧𑀦𑁆𑀦𑀲𑁆𑀲 𑀧𑀦 𑀅𑀓𑁆𑀔𑀺𑀧𑀲𑀸𑀤𑁄 𑀆𑀳𑀭𑀺𑀢𑁆𑀯𑀸 𑀧𑀓𑁆𑀔𑀺𑀢𑁆𑀢𑁄 𑀯𑀺𑀬 𑀳𑁄𑀢𑀺, 𑀤𑁆𑀯𑀸𑀭𑀯𑀸𑀢𑀧𑀸𑀦𑀫𑀜𑁆𑀘𑀧𑀻𑀞𑀸𑀤𑀻𑀦𑀺 𑀧𑀜𑁆𑀜𑀸𑀬𑀦𑁆𑀢𑀺. 𑀏𑀢𑀲𑁆𑀫𑀺𑀜𑁆𑀘 𑀆𑀯𑀸𑀲𑁂 𑀯𑀲𑀦𑁆𑀢𑀁 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀸 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀳𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀆𑀯𑀸𑀲𑀁 𑀤𑁂𑀦𑁆𑀢𑁂𑀦…𑀧𑁂… 𑀳𑁄𑀢𑀻’’𑀢𑀺 ‘‘𑀲𑀤𑀸 𑀧𑀼𑀜𑁆𑀜𑀧𑀯𑀟𑁆𑀠𑀦𑀽𑀧𑀸𑀬𑀜𑁆𑀘 𑀏𑀢’’𑀦𑁆𑀢𑀺 𑀘, 𑀢𑀲𑁆𑀫𑀸 𑀏𑀢𑁂 𑀬𑀣𑀸𑀯𑀼𑀢𑁆𑀢𑀸 𑀲𑀩𑁆𑀩𑁂𑀧𑀺 𑀆𑀦𑀺𑀲𑀁𑀲𑀸 𑀯𑁂𑀤𑀺𑀢𑀩𑁆𑀩𑀸.

𑀔𑀦𑁆𑀥𑀓𑀧𑀭𑀺𑀬𑀸𑀬𑁂𑀦𑀸𑀢𑀺 𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑁂 (𑀘𑀽𑀴𑀯. 𑁨𑁯𑁪) 𑀆𑀕𑀢𑀯𑀺𑀦𑀬𑀧𑀸𑀴𑀺𑀦𑀬𑁂𑀦. 𑀢𑀢𑁆𑀣 𑀳𑀺 𑀆𑀕𑀢𑀸 𑁋

‘‘𑀲𑀻𑀢𑀁 𑀉𑀡𑁆𑀳𑀁 𑀧𑀝𑀺𑀳𑀦𑁆𑀢𑀺, 𑀢𑀢𑁄 𑀯𑀸𑀴𑀫𑀺𑀕𑀸𑀦𑀺 𑀘;

𑀲𑀭𑀻𑀲𑀧𑁂 𑀘 𑀫𑀓𑀲𑁂, 𑀲𑀺𑀲𑀺𑀭𑁂 𑀘𑀸𑀧𑀺 𑀯𑀼𑀝𑁆𑀞𑀺𑀬𑁄.

𑀢𑀢𑁄 𑀯𑀸𑀢𑀸𑀢𑀧𑁄 𑀖𑁄𑀭𑁄, 𑀲𑀜𑁆𑀚𑀸𑀢𑁄 𑀧𑀝𑀺𑀳𑀜𑁆𑀜𑀢𑀺;

𑀮𑁂𑀡𑀢𑁆𑀣𑀜𑁆𑀘 𑀲𑀼𑀔𑀢𑁆𑀣𑀜𑁆𑀘, 𑀛𑀸𑀬𑀺𑀢𑀼𑀜𑁆𑀘 𑀯𑀺𑀧𑀲𑁆𑀲𑀺𑀢𑀼𑀁.

𑀯𑀺𑀳𑀸𑀭𑀤𑀸𑀦𑀁 𑀲𑀗𑁆𑀖𑀲𑁆𑀲, 𑀅𑀕𑁆𑀕𑀁 𑀩𑀼𑀤𑁆𑀥𑁂𑀦 𑀯𑀡𑁆𑀡𑀺𑀢𑀁;

𑀢𑀲𑁆𑀫𑀸 𑀳𑀺 𑀧𑀡𑁆𑀟𑀺𑀢𑁄 𑀧𑁄𑀲𑁄, 𑀲𑀫𑁆𑀧𑀲𑁆𑀲𑀁 𑀅𑀢𑁆𑀣𑀫𑀢𑁆𑀢𑀦𑁄.

𑀯𑀺𑀳𑀸𑀭𑁂 𑀓𑀸𑀭𑀬𑁂 𑀭𑀫𑁆𑀫𑁂, 𑀯𑀸𑀲𑀬𑁂𑀢𑁆𑀣 𑀩𑀳𑀼𑀲𑁆𑀲𑀼𑀢𑁂;

𑀢𑁂𑀲𑀁 𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘, 𑀯𑀢𑁆𑀣𑀲𑁂𑀦𑀸𑀲𑀦𑀸𑀦𑀺 𑀘.

𑀤𑀤𑁂𑀬𑁆𑀬 𑀉𑀚𑀼𑀪𑀽𑀢𑁂𑀲𑀼, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸;

𑀢𑁂 𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺, 𑀲𑀩𑁆𑀩𑀤𑀼𑀓𑁆𑀔𑀧𑀦𑀽𑀤𑀦𑀁;

𑀬𑀁 𑀲𑁄 𑀥𑀫𑁆𑀫𑀁 𑀇𑀥𑀜𑁆𑀜𑀸𑀬, 𑀧𑀭𑀺𑀦𑀺𑀩𑁆𑀩𑀸𑀢𑀺 𑀅𑀦𑀸𑀲𑀯𑁄’’𑀢𑀺. 𑁋

𑀭𑀸𑀚𑀕𑀳𑀲𑁂𑀝𑁆𑀞𑀸𑀤𑀻𑀦𑀁 𑀯𑀺𑀳𑀸𑀭𑀤𑀸𑀦𑁂𑀦 𑀅𑀦𑀼𑀫𑁄𑀤𑀦𑀸𑀕𑀸𑀣𑀸𑀬𑁄 𑀧𑁂𑀬𑁆𑀬𑀸𑀮𑀯𑀲𑁂𑀦 𑀤𑀲𑁆𑀲𑀺𑀢𑀸. 𑀢𑀢𑁆𑀣 𑀲𑀻𑀢𑀁 𑀉𑀡𑁆𑀳𑀦𑁆𑀢𑀺 𑀉𑀢𑀼𑀯𑀺𑀲𑀪𑀸𑀕𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀺𑀲𑀺𑀭𑁂 𑀘𑀸𑀧𑀺 𑀯𑀼𑀝𑁆𑀞𑀺𑀬𑁄𑀢𑀺 𑀏𑀢𑁆𑀣 𑀲𑀺𑀲𑀺𑀭𑁄𑀢𑀺 𑀲𑀫𑁆𑀨𑀼𑀲𑀺𑀢𑀓𑀯𑀸𑀢𑁄 𑀯𑀼𑀘𑁆𑀘𑀢𑀺. 𑀯𑀼𑀝𑁆𑀞𑀺𑀬𑁄𑀢𑀺 𑀉𑀚𑀼𑀓𑀫𑁂𑀖𑀯𑀼𑀝𑁆𑀞𑀺𑀬𑁄 𑀏𑀯. 𑀏𑀢𑀸𑀦𑀺 𑀲𑀩𑁆𑀩𑀸𑀦𑀺 ‘‘𑀧𑀝𑀺𑀳𑀦𑁆𑀢𑀻’’𑀢𑀺 𑀇𑀫𑀺𑀦𑀸𑀯 𑀧𑀤𑁂𑀦 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀧𑀝𑀺𑀳𑀜𑁆𑀜𑀢𑀻𑀢𑀺 𑀯𑀺𑀳𑀸𑀭𑁂𑀦 𑀧𑀝𑀺𑀳𑀜𑁆𑀜𑀢𑀺. 𑀮𑁂𑀡𑀢𑁆𑀣𑀦𑁆𑀢𑀺 𑀦𑀺𑀮𑀻𑀬𑀦𑀢𑁆𑀣𑀁. 𑀲𑀼𑀔𑀢𑁆𑀣𑀦𑁆𑀢𑀺 𑀲𑀻𑀢𑀸𑀤𑀺𑀧𑀭𑀺𑀲𑁆𑀲𑀬𑀸𑀪𑀸𑀯𑁂𑀦 𑀲𑀼𑀔𑀯𑀺𑀳𑀸𑀭𑀢𑁆𑀣𑀁. ‘‘𑀛𑀸𑀬𑀺𑀢𑀼𑀜𑁆𑀘 𑀯𑀺𑀧𑀲𑁆𑀲𑀺𑀢𑀼’’𑀦𑁆𑀢𑀺 𑀇𑀤𑀫𑁆𑀧𑀺 𑀧𑀤𑀤𑁆𑀯𑀬𑀁 ‘‘𑀲𑀼𑀔𑀢𑁆𑀣𑀜𑁆𑀘𑀸’’𑀢𑀺 𑀇𑀫𑀺𑀦𑀸𑀯 𑀧𑀤𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀇𑀤𑀜𑁆𑀳𑀺 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀼𑀔𑀢𑁆𑀣𑀜𑁆𑀘 𑀯𑀺𑀳𑀸𑀭𑀤𑀸𑀦𑀁, 𑀓𑀢𑀫𑀲𑀼𑀔𑀢𑁆𑀣𑀁? 𑀛𑀸𑀬𑀺𑀢𑀼𑀁, 𑀯𑀺𑀧𑀲𑁆𑀲𑀺𑀢𑀼𑀜𑁆𑀘 𑀬𑀁 𑀲𑀼𑀔𑀁 𑀢𑀤𑀢𑁆𑀣𑀁. 𑀅𑀣 𑀯𑀸 𑀧𑀭𑀧𑀤𑁂𑀦𑀧𑀺 𑀬𑁄𑀚𑁂𑀢𑀩𑁆𑀩𑀁 𑁋 𑀛𑀸𑀬𑀺𑀢𑀼𑀜𑁆𑀘 𑀯𑀺𑀧𑀲𑁆𑀲𑀺𑀢𑀼𑀜𑁆𑀘 𑀯𑀺𑀳𑀸𑀭𑀤𑀸𑀦𑀁, ‘‘𑀇𑀥 𑀛𑀸𑀬𑀺𑀲𑁆𑀲𑀢𑀺 𑀯𑀺𑀧𑀲𑁆𑀲𑀺𑀲𑁆𑀲𑀢𑀻’’𑀢𑀺 𑀤𑀤𑀢𑁄 𑀯𑀺𑀳𑀸𑀭𑀤𑀸𑀦𑀁 𑀲𑀗𑁆𑀖𑀲𑁆𑀲 𑀅𑀕𑁆𑀕𑀁 𑀩𑀼𑀤𑁆𑀥𑁂𑀦 𑀯𑀡𑁆𑀡𑀺𑀢𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀲𑁄 𑀘 𑀲𑀩𑁆𑀩𑀤𑀤𑁄 𑀳𑁄𑀢𑀺, 𑀬𑁄 𑀤𑀤𑀸𑀢𑀺 𑀉𑀧𑀲𑁆𑀲𑀬’’𑀦𑁆𑀢𑀺 (𑀲𑀁. 𑀦𑀺. 𑁧.𑁪𑁨).

𑀬𑀲𑁆𑀫𑀸 𑀘 𑀅𑀕𑁆𑀕𑀁 𑀯𑀡𑁆𑀡𑀺𑀢𑀁, 𑀢𑀲𑁆𑀫𑀸 𑀳𑀺 𑀧𑀡𑁆𑀟𑀺𑀢𑁄 𑀧𑁄𑀲𑁄𑀢𑀺 𑀕𑀸𑀣𑀸. 𑀯𑀸𑀲𑀬𑁂𑀢𑁆𑀣 𑀩𑀳𑀼𑀲𑁆𑀲𑀼𑀢𑁂𑀢𑀺 𑀏𑀢𑁆𑀣 𑀯𑀺𑀳𑀸𑀭𑁂 𑀧𑀭𑀺𑀬𑀢𑁆𑀢𑀺𑀩𑀳𑀼𑀲𑁆𑀲𑀼𑀢𑁂 𑀘 𑀧𑀝𑀺𑀯𑁂𑀥𑀩𑀳𑀼𑀲𑁆𑀲𑀼𑀢𑁂 𑀘 𑀯𑀸𑀲𑁂𑀬𑁆𑀬. 𑀢𑁂𑀲𑀁 𑀅𑀦𑁆𑀦𑀜𑁆𑀘𑀸𑀢𑀺 𑀬𑀁 𑀢𑁂𑀲𑀁 𑀅𑀦𑀼𑀘𑁆𑀙𑀯𑀺𑀓𑀁 𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘 𑀯𑀢𑁆𑀣𑀸𑀦𑀺 𑀘 𑀫𑀜𑁆𑀘𑀧𑀻𑀞𑀸𑀤𑀺𑀲𑁂𑀦𑀸𑀲𑀦𑀸𑀦𑀺 𑀘, 𑀢𑀁 𑀲𑀩𑁆𑀩𑀁 𑀢𑁂𑀲𑀼 𑀉𑀚𑀼𑀪𑀽𑀢𑁂𑀲𑀼 𑀅𑀓𑀼𑀝𑀺𑀮𑀘𑀺𑀢𑁆𑀢𑁂𑀲𑀼. 𑀤𑀤𑁂𑀬𑁆𑀬𑀸𑀢𑀺 𑀦𑀺𑀤𑀳𑁂𑀬𑁆𑀬. 𑀢𑀜𑁆𑀘 𑀔𑁄 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸, 𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑀁 𑀯𑀺𑀭𑀸𑀥𑁂𑀢𑁆𑀯𑀸. 𑀏𑀯𑀁 𑀯𑀺𑀧𑁆𑀧𑀲𑀦𑁆𑀦𑀘𑀺𑀢𑁆𑀢𑀲𑁆𑀲 𑀳𑀺 𑀢𑁂 𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺…𑀧𑁂… 𑀧𑀭𑀺𑀦𑀺𑀩𑁆𑀩𑀸𑀢𑀺 𑀅𑀦𑀸𑀲𑀯𑁄𑀢𑀺 𑀅𑀬𑀫𑁂𑀢𑁆𑀣 𑀅𑀝𑁆𑀞𑀓𑀣𑀸𑀦𑀬𑁄.

𑀅𑀬𑀁 𑀧𑀦 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 (𑀤𑀻. 𑀦𑀺. 𑀝𑀻. 𑁧.𑁩𑁫𑁦) 𑀘𑁂𑀯 𑀆𑀘𑀭𑀺𑀬𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 (𑀲𑀸𑀭𑀢𑁆𑀣. 𑀝𑀻. 𑁩.𑁨𑁯𑁫) 𑀘 𑀲𑀁𑀯𑀡𑁆𑀡𑀺𑀢𑁄 𑀝𑀻𑀓𑀸𑀦𑀬𑁄 𑁋 𑀲𑀻𑀢𑀦𑁆𑀢𑀺 𑀅𑀚𑁆𑀛𑀢𑁆𑀢𑀁 𑀥𑀸𑀢𑀼𑀓𑁆𑀔𑁄𑀪𑀯𑀲𑁂𑀦 𑀯𑀸 𑀩𑀳𑀺𑀤𑁆𑀥𑀸 𑀉𑀢𑀼𑀯𑀺𑀧𑀭𑀺𑀡𑀸𑀫𑀯𑀲𑁂𑀦 𑀯𑀸 𑀉𑀧𑁆𑀧𑀚𑁆𑀚𑀦𑀓𑀲𑀻𑀢𑀁. 𑀉𑀡𑁆𑀳𑀦𑁆𑀢𑀺 𑀅𑀕𑁆𑀕𑀺𑀲𑀦𑁆𑀢𑀸𑀧𑀁, 𑀢𑀲𑁆𑀲 𑀯𑀦𑀟𑀸𑀳𑀸𑀤𑀻𑀲𑀼 𑀲𑀫𑁆𑀪𑀯𑁄 𑀤𑀝𑁆𑀞𑀩𑁆𑀩𑁄. 𑀧𑀝𑀺𑀳𑀦𑁆𑀢𑀻𑀢𑀺 𑀧𑀝𑀺𑀩𑀸𑀥𑀢𑀺 𑀬𑀣𑀸 𑀢𑀤𑀼𑀪𑀬𑀯𑀲𑁂𑀦 𑀓𑀸𑀬𑀘𑀺𑀢𑁆𑀢𑀸𑀦𑀁 𑀩𑀸𑀥𑀦𑀁 𑀦 𑀳𑁄𑀢𑀺, 𑀏𑀯𑀁 𑀓𑀭𑁄𑀢𑀺. 𑀲𑀻𑀢𑀼𑀡𑁆𑀳𑀩𑁆𑀪𑀸𑀳𑀢𑁂 𑀳𑀺 𑀲𑀭𑀻𑀭𑁂 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀪𑀺𑀓𑁆𑀔𑀼 𑀬𑁄𑀦𑀺𑀲𑁄 𑀧𑀤𑀳𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀯𑀸𑀴𑀫𑀺𑀕𑀸𑀦𑀻𑀢𑀺 𑀲𑀻𑀳𑀩𑁆𑀬𑀕𑁆𑀖𑀸𑀤𑀺𑀘𑀡𑁆𑀟𑀫𑀺𑀕𑁂. 𑀕𑀼𑀢𑁆𑀢𑀲𑁂𑀦𑀸𑀲𑀦𑀜𑁆𑀳𑀺 𑀆𑀭𑀜𑁆𑀜𑀓𑀫𑁆𑀧𑀺 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀥𑀸𑀬 𑀦𑀺𑀲𑀺𑀦𑁆𑀦𑀲𑁆𑀲 𑀢𑁂 𑀧𑀭𑀺𑀲𑁆𑀲𑀬𑀸 𑀦 𑀳𑁄𑀦𑁆𑀢𑀺. 𑀲𑀭𑀻𑀲𑀧𑁂𑀢𑀺 𑀬𑁂 𑀓𑁂𑀘𑀺 𑀲𑀭𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀤𑀻𑀖𑀚𑀸𑀢𑀺𑀓𑁂 𑀲𑀧𑁆𑀧𑀸𑀤𑀺𑀓𑁂. 𑀫𑀓𑀲𑁂𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁, 𑀝𑀁𑀲𑀸𑀤𑀻𑀦𑀫𑁆𑀧𑀺 𑀏𑀢𑁂𑀦𑁂𑀯 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀲𑀺𑀲𑀺𑀭𑁂𑀢𑀺 𑀲𑀺𑀲𑀺𑀭𑀓𑀸𑀮𑀯𑀲𑁂𑀦, 𑀲𑀢𑁆𑀢𑀸𑀳𑀯𑀤𑁆𑀤𑀮𑀺𑀓𑀸𑀤𑀺𑀯𑀲𑁂𑀦 𑀘 𑀉𑀧𑁆𑀧𑀦𑁆𑀦𑁂 𑀲𑀺𑀲𑀺𑀭𑀲𑀫𑁆𑀨𑀲𑁆𑀲𑁂. 𑀯𑀼𑀝𑁆𑀞𑀺𑀬𑁄𑀢𑀺 𑀬𑀤𑀸 𑀢𑀤𑀸 𑀉𑀧𑁆𑀧𑀦𑁆𑀦𑀸 𑀯𑀲𑁆𑀲𑀯𑀼𑀝𑁆𑀞𑀺𑀬𑁄 𑀧𑀝𑀺𑀳𑀦𑁆𑀢𑀻𑀢𑀺 𑀬𑁄𑀚𑀦𑀸.

𑀯𑀸𑀢𑀸𑀢𑀧𑁄 𑀖𑁄𑀭𑁄𑀢𑀺 𑀭𑀼𑀓𑁆𑀔𑀕𑀘𑁆𑀙𑀸𑀤𑀻𑀦𑀁 𑀉𑀫𑁆𑀫𑀽𑀮𑀪𑀜𑁆𑀚𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀖𑁄𑀭𑁄 𑀲𑀭𑀚𑀅𑀭𑀚𑀸𑀤𑀺𑀪𑁂𑀤𑁄 𑀯𑀸𑀢𑁄 𑀘𑁂𑀯 𑀕𑀺𑀫𑁆𑀳𑀧𑀭𑀺𑀴𑀸𑀳𑀲𑀫𑀬𑁂𑀲𑀼 𑀉𑀧𑁆𑀧𑀢𑁆𑀢𑀺𑀬𑀸 𑀖𑁄𑀭𑁄 𑀲𑀽𑀭𑀺𑀬𑀸𑀢𑀧𑁄 𑀘 𑀧𑀝𑀺𑀳𑀜𑁆𑀜𑀢𑀺 𑀧𑀝𑀺𑀩𑀸𑀳𑀻𑀬𑀢𑀺. 𑀮𑁂𑀡𑀢𑁆𑀣𑀦𑁆𑀢𑀺 𑀦𑀸𑀦𑀸𑀭𑀫𑁆𑀫𑀡𑀢𑁄 𑀘𑀺𑀢𑁆𑀢𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀧𑀝𑀺𑀲𑀮𑁆𑀮𑀸𑀦𑀸𑀭𑀸𑀫𑀢𑁆𑀣𑀁. 𑀲𑀼𑀔𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀧𑀭𑀺𑀲𑁆𑀲𑀬𑀸𑀪𑀸𑀯𑁂𑀦 𑀨𑀸𑀲𑀼𑀯𑀺𑀳𑀸𑀭𑀢𑁆𑀣𑀁. 𑀛𑀸𑀬𑀺𑀢𑀼𑀦𑁆𑀢𑀺 𑀅𑀝𑁆𑀞𑀢𑀺𑀁𑀲𑀸𑀬 𑀆𑀭𑀫𑁆𑀫𑀡𑁂𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀘𑀺𑀢𑁆𑀢𑀁 𑀉𑀧𑀦𑀺𑀩𑀦𑁆𑀥𑀺𑀢𑁆𑀯𑀸 𑀉𑀧𑀦𑀺𑀚𑁆𑀛𑀸𑀬𑀺𑀢𑀼𑀁. 𑀯𑀺𑀧𑀲𑁆𑀲𑀺𑀢𑀼𑀦𑁆𑀢𑀺 𑀅𑀦𑀺𑀘𑁆𑀘𑀸𑀤𑀺𑀢𑁄 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑀼𑀁.

𑀯𑀺𑀳𑀸𑀭𑁂𑀢𑀺 𑀧𑀢𑀺𑀲𑁆𑀲𑀬𑁂. 𑀓𑀸𑀭𑀬𑁂𑀢𑀺 𑀓𑀸𑀭𑀸𑀧𑁂𑀬𑁆𑀬. 𑀭𑀫𑁆𑀫𑁂𑀢𑀺 𑀫𑀦𑁄𑀭𑀫𑁂 𑀦𑀺𑀯𑀸𑀲𑀲𑀼𑀔𑁂. 𑀯𑀸𑀲𑀬𑁂𑀢𑁆𑀣 𑀩𑀳𑀼𑀲𑁆𑀲𑀼𑀢𑁂𑀢𑀺 𑀓𑀸𑀭𑁂𑀢𑁆𑀯𑀸 𑀧𑀦 𑀏𑀢𑁆𑀣 𑀯𑀺𑀳𑀸𑀭𑁂 𑀩𑀳𑀼𑀲𑁆𑀲𑀼𑀢𑁂 𑀲𑀻𑀮𑀯𑀦𑁆𑀢𑁂 𑀓𑀮𑁆𑀬𑀸𑀡𑀥𑀫𑁆𑀫𑁂 𑀦𑀺𑀯𑀸𑀲𑁂𑀬𑁆𑀬, 𑀢𑁂 𑀦𑀺𑀯𑀸𑀲𑁂𑀦𑁆𑀢𑁄 𑀧𑀦 𑀢𑁂𑀲𑀁 𑀩𑀳𑀼𑀲𑁆𑀲𑀼𑀢𑀸𑀦𑀁 𑀬𑀣𑀸 𑀧𑀘𑁆𑀘𑀬𑁂𑀳𑀺 𑀓𑀺𑀮𑀫𑀣𑁄 𑀦 𑀳𑁄𑀢𑀺, 𑀏𑀯𑀁 𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘 𑀯𑀢𑁆𑀣𑀲𑁂𑀦𑀸𑀲𑀦𑀸𑀦𑀺 𑀘 𑀤𑀤𑁂𑀬𑁆𑀬 𑀉𑀚𑀼𑀪𑀽𑀢𑁂𑀲𑀼 𑀅𑀚𑁆𑀛𑀸𑀲𑀬𑀲𑀫𑁆𑀧𑀦𑁆𑀦𑁂𑀲𑀼 𑀓𑀫𑁆𑀫𑀓𑀫𑁆𑀫𑀨𑀮𑀸𑀦𑀁, 𑀭𑀢𑀦𑀢𑁆𑀢𑀬𑀕𑀼𑀡𑀸𑀦𑀜𑁆𑀘 𑀲𑀤𑁆𑀤𑀳𑀦𑁂𑀦 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

𑀇𑀤𑀸𑀦𑀺 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀽𑀧𑀓𑀸𑀭𑀺𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑁂 𑀢𑀲𑁆𑀲𑀸’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀢𑁂𑀢𑀺 𑀩𑀳𑀼𑀲𑁆𑀲𑀼𑀢𑀸. 𑀢𑀲𑁆𑀲𑀸𑀢𑀺 𑀉𑀧𑀸𑀲𑀓𑀲𑁆𑀲. 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀻𑀢𑀺 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑀧𑀦𑀽𑀤𑀦𑀁 𑀲𑀤𑁆𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺. 𑀬𑀁 𑀲𑁄 𑀥𑀫𑁆𑀫𑀁 𑀇𑀥𑀜𑁆𑀜𑀸𑀬𑀸𑀢𑀺 𑀲𑁄 𑀉𑀧𑀸𑀲𑀓𑁄 𑀬𑀁 𑀲𑀤𑁆𑀥𑀫𑁆𑀫𑀁 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀲𑀫𑁆𑀫𑀸𑀧𑀝𑀺𑀧𑀚𑁆𑀚𑀦𑁂𑀦 𑀚𑀸𑀦𑀺𑀢𑁆𑀯𑀸 𑀅𑀕𑁆𑀕𑀫𑀕𑁆𑀕𑀸𑀥𑀺𑀕𑀫𑀦𑁂𑀦 𑀅𑀦𑀸𑀲𑀯𑁄 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀢𑀺 𑀏𑀓𑀸𑀤𑀲𑀕𑁆𑀕𑀺𑀯𑀽𑀧𑀲𑀫𑁂𑀦 𑀲𑀻𑀢𑀺 𑀪𑀯𑀢𑀻𑀢𑀺.

𑀲𑀻𑀢𑀧𑀝𑀺𑀖𑀸𑀢𑀸𑀤𑀺𑀓𑀸 𑀯𑀺𑀧𑀲𑁆𑀲𑀦𑀸𑀯𑀲𑀸𑀦𑀸 𑀢𑁂𑀭𑀲, 𑀅𑀦𑁆𑀦𑀸𑀤𑀺𑀮𑀸𑀪𑁄, 𑀥𑀫𑁆𑀫𑀲𑁆𑀲𑀯𑀦𑀁, 𑀥𑀫𑁆𑀫𑀸𑀯𑀩𑁄𑀥𑁄, 𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑀺 𑀏𑀯𑀫𑁂𑀢𑁆𑀣 𑀲𑀢𑁆𑀢𑀭𑀲 𑀆𑀦𑀺𑀲𑀁𑀲𑀸 𑀯𑀼𑀢𑁆𑀢𑀸.

𑀧𑀝𑀺𑀕𑁆𑀕𑀳𑀡𑀓𑀸𑀦𑀁 𑀯𑀺𑀳𑀸𑀭𑀯𑀲𑁂𑀦 𑀉𑀧𑁆𑀧𑀦𑁆𑀦𑀨𑀮𑀸𑀦𑀼𑀭𑀽𑀧𑀫𑁆𑀧𑀺 𑀤𑀸𑀬𑀓𑀸𑀦𑀁 𑀯𑀺𑀳𑀸𑀭𑀤𑀸𑀦𑀨𑀮𑀁 𑀯𑁂𑀤𑀺𑀢𑀩𑁆𑀩𑀁. 𑀬𑁂𑀪𑀼𑀬𑁆𑀬𑁂𑀦 𑀳𑀺 𑀓𑀫𑁆𑀫𑀲𑀭𑀺𑀓𑁆𑀔𑀓𑀨𑀮𑀁 𑀮𑀪𑀦𑁆𑀢𑀻𑀢𑀺 𑀆𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺. ‘‘𑀲𑀗𑁆𑀖𑀲𑁆𑀲 𑀧𑀦 𑀧𑀭𑀺𑀘𑁆𑀘𑀢𑁆𑀢𑀢𑁆𑀢𑀸’’𑀢𑀺 𑀇𑀫𑀺𑀦𑀸 𑀲𑀗𑁆𑀖𑀺𑀓𑀯𑀺𑀳𑀸𑀭𑀫𑁂𑀯 𑀧𑀥𑀸𑀦𑀯𑀲𑁂𑀦 𑀯𑀤𑀢𑀺, 𑀲𑀗𑁆𑀖𑀺𑀓𑀯𑀺𑀳𑀸𑀭𑁄 𑀦𑀸𑀫𑁂𑀲 𑀘𑀸𑀢𑀼𑀤𑁆𑀤𑀺𑀲𑀁 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀓𑀢𑀯𑀺𑀳𑀸𑀭𑁄, 𑀬𑀁 𑀲𑀦𑁆𑀥𑀸𑀬 𑀧𑀤𑀪𑀸𑀚𑀦𑀺𑀬𑀁 𑀯𑀼𑀢𑁆𑀢𑀁 ‘‘𑀲𑀗𑁆𑀖𑀺𑀓𑁄 𑀦𑀸𑀫 𑀯𑀺𑀳𑀸𑀭𑁄 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑁄 𑀳𑁄𑀢𑀺 𑀧𑀭𑀺𑀘𑁆𑀘𑀢𑁆𑀢𑁄’’𑀢𑀺. 𑀬𑀢𑁆𑀣 𑀳𑀺 𑀘𑁂𑀢𑀺𑀬𑀁 𑀧𑀢𑀺𑀝𑁆𑀞𑀺𑀢𑀁 𑀳𑁄𑀢𑀺, 𑀥𑀫𑁆𑀫𑀲𑁆𑀲𑀯𑀦𑀁 𑀓𑀭𑀻𑀬𑀢𑀺, 𑀘𑀢𑀽𑀳𑀺 𑀤𑀺𑀲𑀸𑀳𑀺 𑀪𑀺𑀓𑁆𑀔𑀽 𑀆𑀕𑀦𑁆𑀢𑁆𑀯𑀸 𑀅𑀧𑁆𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸𑀬𑁂𑀯 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀓𑀼𑀜𑁆𑀘𑀺𑀓𑀸𑀬 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀲𑁂𑀦𑀸𑀲𑀦𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀬𑀣𑀸𑀨𑀸𑀲𑀼𑀓𑀁 𑀕𑀘𑁆𑀙𑀦𑁆𑀢𑀺, 𑀲𑁄 𑀅𑀦𑁆𑀢𑀫𑀲𑁄 𑀘𑀢𑀼𑀭𑀢𑀦𑀺𑀓𑀸𑀧𑀺 𑀧𑀡𑁆𑀡𑀲𑀸𑀮𑀸 𑀳𑁄𑀢𑀼, 𑀘𑀸𑀢𑀼𑀤𑁆𑀤𑀺𑀲𑀁 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀓𑀢𑀯𑀺𑀳𑀸𑀭𑁄𑀢𑁆𑀯𑁂𑀯 𑀯𑀼𑀘𑁆𑀘𑀢𑀺.

𑁩𑁫𑁧. 𑀮𑁄𑀪𑀁 𑀦𑀺𑀕𑁆𑀕𑀡𑁆𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 𑀤𑀼𑀧𑁆𑀧𑀭𑀺𑀘𑁆𑀘𑀚𑀸. ‘‘𑀏𑀓𑀪𑀺𑀓𑁆𑀔𑀼𑀲𑁆𑀲 𑀯𑀸’𑀢𑀺𑀆𑀤𑀺 𑀉𑀧𑀸𑀲𑀓𑀸𑀦𑀁 𑀢𑀣𑀸 𑀲𑀫𑀸𑀤𑀸𑀦𑁂 𑀆𑀘𑀺𑀡𑁆𑀡𑀁, 𑀤𑀴𑁆𑀳𑀢𑀭𑀁 𑀲𑀫𑀸𑀤𑀸𑀦𑀜𑁆𑀘 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁, 𑀲𑀭𑀡𑀁 𑀧𑀦 𑀢𑁂𑀲𑀁 𑀲𑀸𑀫𑀁 𑀲𑀫𑀸𑀤𑀺𑀦𑁆𑀦𑀫𑁆𑀧𑀺 𑀲𑀫𑀸𑀤𑀺𑀦𑁆𑀦𑀫𑁂𑀯 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺. 𑀲𑀗𑁆𑀖𑀲𑁆𑀲 𑀯𑀸 𑀕𑀡𑀲𑁆𑀲 𑀯𑀸 𑀲𑀦𑁆𑀢𑀺𑀓𑁂𑀢𑀺 𑀬𑁄𑀚𑀦𑀸. 𑀢𑀢𑁆𑀣𑀸𑀢𑀺 𑀬𑀣𑀸𑀕𑀳𑀺𑀢𑁂 𑀲𑀭𑀡𑁂, ‘‘𑀢𑀲𑁆𑀲𑀸’’𑀢𑀺𑀧𑀺 𑀧𑀸𑀞𑁄, 𑀬𑀣𑀸𑀕𑀳𑀺𑀢𑀲𑀭𑀡𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀦𑀢𑁆𑀣𑀺 𑀧𑀼𑀦𑀧𑁆𑀧𑀼𑀦𑀁 𑀓𑀢𑁆𑀢𑀩𑁆𑀩𑀢𑀸𑀢𑀺 𑀯𑀺𑀜𑁆𑀜𑀽𑀚𑀸𑀢𑀺𑀓𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀯𑀺𑀜𑁆𑀜𑀽𑀚𑀸𑀢𑀺𑀓𑀸𑀦𑀫𑁂𑀯 𑀳𑀺 𑀲𑀭𑀡𑀸𑀤𑀺𑀅𑀢𑁆𑀣𑀓𑁄𑀲𑀮𑁆𑀮𑀸𑀦𑀁 𑀲𑀼𑀯𑀡𑁆𑀡𑀖𑀝𑁂 𑀲𑀻𑀳𑀯𑀲𑀸 𑀯𑀺𑀬 𑀅𑀓𑀼𑀧𑁆𑀧𑀁 𑀲𑀭𑀡𑀕𑀫𑀦𑀁 𑀢𑀺𑀝𑁆𑀞𑀢𑀺. ‘‘𑀚𑀻𑀯𑀺𑀢𑀧𑀭𑀺𑀘𑁆𑀘𑀸𑀕𑀫𑀬𑀁 𑀧𑀼𑀜𑁆𑀜’’𑀦𑁆𑀢𑀺 𑀘 𑀇𑀤𑀁 ‘‘𑀲𑀘𑁂 𑀢𑁆𑀯𑀁 𑀬𑀣𑀸𑀕𑀳𑀺𑀢𑀁 𑀲𑀭𑀡𑀁 𑀦 𑀪𑀺𑀦𑁆𑀤𑀺𑀲𑁆𑀲𑀢𑀺, 𑀏𑀯𑀸𑀳𑀁 𑀢𑀁 𑀫𑀸𑀭𑁂𑀫𑀻’’𑀢𑀺 𑀓𑀸𑀫𑀁 𑀓𑁄𑀘𑀺 𑀢𑀺𑀡𑁆𑀳𑁂𑀦 𑀲𑀢𑁆𑀣𑁂𑀦 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬, 𑀢𑀣𑀸𑀧𑀺 ‘‘𑀦𑁂𑀯𑀸𑀳𑀁 𑀩𑀼𑀤𑁆𑀥𑀁 ‘𑀦 𑀩𑀼𑀤𑁆𑀥𑁄’𑀢𑀺, 𑀥𑀫𑁆𑀫𑀁 ‘𑀦 𑀥𑀫𑁆𑀫𑁄’𑀢𑀺, 𑀲𑀗𑁆𑀖𑀁 ‘𑀦 𑀲𑀗𑁆𑀖𑁄’𑀢𑀺 𑀯𑀤𑀸𑀫𑀻’’𑀢𑀺 𑀤𑀴𑁆𑀳𑀢𑀭𑀁 𑀓𑀢𑁆𑀯𑀸 𑀕𑀳𑀺𑀢𑀲𑀭𑀡𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁. ‘‘𑀲𑀕𑁆𑀕𑀲𑀫𑁆𑀧𑀢𑁆𑀢𑀺𑀁 𑀤𑁂𑀢𑀻’’𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁. 𑀨𑀮𑀸𑀦𑀺𑀲𑀁𑀲𑀸𑀦𑀺 𑀧𑀦𑀲𑁆𑀲 𑀲𑀭𑀡𑀕𑀫𑀦𑀯𑀡𑁆𑀡𑀦𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁧.𑁨𑁫𑁦 𑀲𑀭𑀡𑀕𑀫𑀦𑀓𑀣𑀸) 𑀯𑀼𑀢𑁆𑀢𑀸𑀦𑁂𑀯.

𑁩𑁫𑁨. 𑀯𑀓𑁆𑀔𑀫𑀸𑀦𑀦𑀬𑁂𑀦 𑀯𑁂𑀭𑀳𑁂𑀢𑀼𑀢𑀸𑀬 𑀯𑁂𑀭𑀁 𑀯𑀼𑀘𑁆𑀘𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀧𑀸𑀧𑀥𑀫𑁆𑀫𑁄, 𑀢𑀁 𑀫𑀡𑀢𑀺 ‘‘𑀫𑀬𑀺 𑀇𑀥 𑀞𑀺𑀢𑀸𑀬 𑀓𑀣𑀫𑀸𑀕𑀘𑁆𑀙𑀲𑀻’’𑀢𑀺 𑀢𑀚𑁆𑀚𑁂𑀦𑁆𑀢𑀻 𑀯𑀺𑀬 𑀦𑀺𑀯𑀸𑀭𑁂𑀢𑀻𑀢𑀺 𑀯𑁂𑀭𑀫𑀡𑀻, 𑀢𑀢𑁄 𑀯𑀸 𑀧𑀸𑀧𑀥𑀫𑁆𑀫𑀢𑁄 𑀯𑀺𑀭𑀫𑀢𑀺 𑀏𑀢𑀸𑀬𑀸𑀢𑀺 ‘‘𑀯𑀺𑀭𑀫𑀡𑀻’’𑀢𑀺 𑀯𑀢𑁆𑀢𑀩𑁆𑀩𑁂 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀇-𑀓𑀸𑀭𑀲𑁆𑀲 𑀏-𑀓𑀸𑀭𑀁 𑀓𑀢𑁆𑀯𑀸 ‘‘𑀯𑁂𑀭𑀫𑀡𑀻’’𑀢𑀺 𑀯𑀼𑀢𑁆𑀢𑀁. 𑀔𑀼𑀤𑁆𑀤𑀓𑀧𑀸𑀞𑀝𑁆𑀞𑀓𑀣𑀸𑀬𑀁 𑀧𑀦𑀸𑀳 ‘‘𑀯𑁂𑀭𑀫𑀡𑀺𑀲𑀺𑀓𑁆𑀔𑀸𑀧𑀤𑀁, 𑀯𑀺𑀭𑀫𑀡𑀺𑀲𑀺𑀓𑁆𑀔𑀸𑀧𑀤𑀦𑁆𑀢𑀺 𑀤𑁆𑀯𑀺𑀥𑀸𑀲𑀚𑁆𑀛𑀸𑀬𑀁 𑀓𑀭𑁄𑀦𑁆𑀢𑀻’’𑀢𑀺 (𑀔𑀼. 𑀧𑀸. 𑀅𑀝𑁆𑀞. 𑀲𑀸𑀥𑀸𑀭𑀡𑀯𑀺𑀪𑀸𑀯𑀦𑀸) 𑀓𑀼𑀲𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸𑀯𑁂𑀢𑁆𑀣 𑀯𑀺𑀭𑀢𑀺 𑀅𑀥𑀺𑀧𑁆𑀧𑁂𑀢𑀸, 𑀦 𑀨𑀮𑀲𑀫𑁆𑀧𑀬𑀼𑀢𑁆𑀢𑀸 𑀬𑀜𑁆𑀜𑀸𑀥𑀺𑀓𑀭𑀡𑀢𑁄. 𑀅𑀲𑀫𑀸𑀤𑀺𑀦𑁆𑀦𑀲𑀻𑀮𑀲𑁆𑀲 𑀲𑀫𑁆𑀧𑀢𑁆𑀢𑀢𑁄 𑀬𑀣𑀽𑀧𑀝𑁆𑀞𑀺𑀢𑀯𑀻𑀢𑀺𑀓𑁆𑀓𑀫𑀺𑀢𑀩𑁆𑀩𑀯𑀢𑁆𑀣𑀼𑀢𑁄 𑀯𑀺𑀭𑀢𑀺 𑀲𑀫𑁆𑀧𑀢𑁆𑀢𑀯𑀺𑀭𑀢𑀺. 𑀲𑀫𑀸𑀤𑀸𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑀸 𑀯𑀺𑀭𑀢𑀺 𑀲𑀫𑀸𑀤𑀸𑀦𑀯𑀺𑀭𑀢𑀺. 𑀲𑁂𑀢𑀼 𑀯𑀼𑀘𑁆𑀘𑀢𑀺 𑀅𑀭𑀺𑀬𑀫𑀕𑁆𑀕𑁄, 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀸 𑀳𑀼𑀢𑁆𑀯𑀸 𑀧𑀸𑀧𑀥𑀫𑁆𑀫𑀸𑀦𑀁 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀖𑀸𑀢𑀦𑀧𑁆𑀧𑀯𑀢𑁆𑀢𑀸 𑀯𑀺𑀭𑀢𑀺 𑀲𑁂𑀢𑀼𑀖𑀸𑀢𑀯𑀺𑀭𑀢𑀺. 𑀅𑀜𑁆𑀜𑀢𑁆𑀭 ‘‘𑀲𑀫𑀼𑀘𑁆𑀙𑁂𑀤𑀯𑀺𑀭𑀢𑀻’’𑀢𑀺𑀧𑀺 𑀯𑀼𑀢𑁆𑀢𑀸. 𑀇𑀤𑀸𑀦𑀺 𑀢𑀸 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀚𑀸𑀢𑀺…𑀧𑁂… 𑀤𑀻𑀦𑀻𑀢𑀺 𑀅𑀧𑀤𑀺𑀲𑀺𑀢𑀩𑁆𑀩𑀚𑀸𑀢𑀺𑀕𑁄𑀢𑁆𑀢𑀓𑀼𑀮𑀸𑀤𑀻𑀦𑀺. 𑀆𑀤𑀺𑀲𑀤𑁆𑀤𑁂𑀦 𑀯𑀬𑀩𑀸𑀳𑀼𑀲𑀘𑁆𑀘𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀧𑀭𑀺𑀳𑀭𑀢𑀻𑀢𑀺 𑀅𑀯𑀻𑀢𑀺𑀓𑁆𑀓𑀫𑀯𑀲𑁂𑀦 𑀧𑀭𑀺𑀯𑀚𑁆𑀚𑁂𑀢𑀺, 𑀲𑀻𑀳𑀴𑀤𑀻𑀧𑁂 𑀘𑀓𑁆𑀓𑀦𑀉𑀧𑀸𑀲𑀓𑀲𑁆𑀲 𑀯𑀺𑀬 𑀲𑀫𑁆𑀧𑀢𑁆𑀢𑀯𑀺𑀭𑀢𑀺 𑀯𑁂𑀤𑀺𑀢𑀩𑁆𑀩𑀸.

‘‘𑀧𑀸𑀡𑀁 𑀦 𑀳𑀦𑀸𑀫𑀻’’𑀢𑀺𑀆𑀤𑀻𑀲𑀼 𑀆𑀤𑀬𑀢𑁆𑀣𑁂𑀦 𑀇𑀢𑀺-𑀲𑀤𑁆𑀤𑁂𑀦, 𑀯𑀺𑀓𑀧𑁆𑀧𑀢𑁆𑀣𑁂𑀦 𑀯𑀸-𑀲𑀤𑁆𑀤𑁂𑀦 𑀯𑀸 ‘‘𑀅𑀤𑀺𑀦𑁆𑀦𑀁 𑀦𑀸𑀤𑀺𑀬𑀸𑀫𑀺, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀯𑀺𑀭𑀫𑀸𑀫𑀺, 𑀯𑁂𑀭𑀫𑀡𑀺𑀁 𑀲𑀫𑀸𑀤𑀺𑀬𑀸𑀫𑀻’’𑀢𑀺 𑀏𑀯𑀫𑀸𑀤𑀻𑀦𑀁 𑀧𑀘𑁆𑀘𑁂𑀓𑀫𑀢𑁆𑀣𑀸𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀲𑀺𑀓𑁆𑀔𑀸𑀧𑀤’’ 𑀫𑀺𑀘𑁆𑀘𑁂𑀯 𑀅𑀯𑀢𑁆𑀯𑀸 ‘‘𑀲𑀺𑀓𑁆𑀔𑀸𑀧𑀤𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀫𑀸𑀤𑀺𑀬𑀸𑀫𑀻𑀢𑀺 𑀲𑀫𑁆𑀫𑀸 𑀆𑀤𑀺𑀬𑀸𑀫𑀺, 𑀅𑀯𑀻𑀢𑀺𑀓𑁆𑀓𑀫𑀸𑀥𑀺𑀧𑁆𑀧𑀸𑀬𑁂𑀦, 𑀅𑀔𑀡𑁆𑀟𑀸’ 𑀙𑀺𑀤𑁆𑀤𑀸’ 𑀓𑀫𑁆𑀫𑀸𑀲𑀸’ 𑀲𑀩𑀮𑀓𑀸𑀭𑀺𑀢𑀸𑀬 𑀘 𑀕𑀡𑁆𑀳𑀸𑀫𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀢𑁆𑀢𑀭𑀯𑀟𑁆𑀠𑀫𑀸𑀦𑀧𑀩𑁆𑀩𑀢𑀯𑀸𑀲𑀺𑀉𑀧𑀸𑀲𑀓𑀲𑁆𑀲 (𑀫. 𑀦𑀺. 𑀅𑀝𑁆𑀞. 𑁧.𑁮𑁯 𑀓𑀼𑀲𑀮𑀓𑀫𑁆𑀫𑀧𑀣𑀯𑀡𑁆𑀡𑀦𑀸; 𑀲𑀁. 𑀦𑀺. 𑀅𑀝𑁆𑀞. 𑁨.𑁨.𑁧𑁦𑁯-𑁧𑁧𑁧; 𑀥. 𑀲. 𑀅𑀝𑁆𑀞. 𑀓𑀼𑀲𑀮𑀓𑀫𑁆𑀫𑀧𑀣𑀯𑀡𑁆𑀡𑀦𑀸) 𑀯𑀺𑀬 𑀲𑀫𑀸𑀤𑀸𑀦𑀯𑀺𑀭𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸𑀤𑀺𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸. 𑀇𑀤𑀸𑀦𑀺 𑀢𑀢𑁆𑀣𑀸 𑀢𑀢𑁆𑀣𑀸𑀕𑀢𑁂𑀲𑀼 𑀥𑀫𑁆𑀫𑀢𑁄, 𑀓𑁄𑀝𑁆𑀞𑀸𑀲𑀢𑁄, 𑀆𑀭𑀫𑁆𑀫𑀡𑀢𑁄, 𑀯𑁂𑀤𑀦𑀸𑀢𑁄, 𑀫𑀽𑀮𑀢𑁄, 𑀆𑀤𑀸𑀦𑀢𑁄, 𑀪𑁂𑀤𑀢𑁄𑀢𑀺𑀆𑀤𑀺𑀦𑀸 𑀅𑀦𑁂𑀓𑀥𑀸 𑀯𑀺𑀦𑀺𑀘𑁆𑀙𑀬𑁂𑀲𑀼 𑀲𑀗𑁆𑀔𑁂𑀧𑁂𑀦𑁂𑀯 𑀆𑀭𑀫𑁆𑀫𑀡𑀢𑁄 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀼𑀭𑀺𑀫𑀸 𑀤𑁆𑀯𑁂𑀢𑀺 𑀲𑀫𑁆𑀧𑀢𑁆𑀢𑀲𑀫𑀸𑀤𑀸𑀦𑀯𑀺𑀭𑀢𑀺𑀬𑁄. ‘‘𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀤𑀺𑀯𑀢𑁆𑀣𑀽’’𑀢𑀺 𑀧𑀭𑀫𑀢𑁆𑀣𑀢𑁄 𑀧𑀸𑀡𑁄 𑀯𑀼𑀢𑁆𑀢𑁄, 𑀧𑀜𑁆𑀜𑀢𑁆𑀢𑀺𑀢𑁄 𑀧𑀦 ‘‘𑀲𑀢𑁆𑀢𑀸𑀤𑀺𑀯𑀢𑁆𑀣𑀽’’𑀢𑀺 𑀯𑀢𑁆𑀢𑀩𑁆𑀩𑀁, 𑀏𑀯𑀜𑁆𑀳𑀺 ‘‘𑀲𑀢𑁆𑀢𑁂𑀬𑁂𑀯 𑀆𑀭𑀪𑀺𑀢𑁆𑀯𑀸 𑀧𑀸𑀡𑀸𑀢𑀺𑀧𑀸𑀢𑀸, 𑀅𑀩𑁆𑀭𑀳𑁆𑀫𑀘𑀭𑀺𑀬𑀸 𑀘 𑀯𑀺𑀭𑀫𑀢𑀻’’𑀢𑀺 (𑀔𑀼. 𑀧𑀸. 𑀅𑀝𑁆𑀞. 𑀏𑀓𑀢𑀸𑀦𑀸𑀦𑀢𑀸𑀤𑀺𑀯𑀺𑀦𑀺𑀘𑁆𑀙𑀬) 𑀔𑀼𑀤𑁆𑀤𑀓𑀸𑀕𑀫𑀝𑁆𑀞𑀓𑀣𑀸𑀯𑀘𑀦𑁂𑀦 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀻𑀢𑀺. 𑀆𑀤𑀺𑀲𑀤𑁆𑀤𑁂𑀦 𑀘𑁂𑀢𑁆𑀣 𑀲𑀢𑁆𑀢𑀲𑀗𑁆𑀔𑀸𑀭𑀯𑀲𑁂𑀦 𑀅𑀤𑀺𑀦𑁆𑀦𑀯𑀢𑁆𑀣𑀼, 𑀢𑀣𑀸 𑀨𑁄𑀝𑁆𑀞𑀩𑁆𑀩𑀯𑀢𑁆𑀣𑀼, 𑀯𑀺𑀢𑀣𑀯𑀢𑁆𑀣𑀼, 𑀲𑀗𑁆𑀔𑀸𑀭𑀯𑀲𑁂𑀦𑁂𑀯 𑀲𑀼𑀭𑀸𑀫𑁂𑀭𑀬𑀯𑀢𑁆𑀣𑀽𑀢𑀺 𑀏𑀢𑁂𑀲𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀢𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀻𑀢𑀺 𑀬𑀣𑀸𑀯𑀼𑀢𑁆𑀢𑀁 𑀯𑀻𑀢𑀺𑀓𑁆𑀓𑀫𑀯𑀢𑁆𑀣𑀼𑀁 𑀆𑀮𑀫𑁆𑀩𑀺𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑀦𑀘𑁂𑀢𑀦𑀸𑀲𑀗𑁆𑀔𑀸𑀢𑀯𑀺𑀭𑀫𑀺𑀢𑀩𑁆𑀩𑀯𑀢𑁆𑀣𑀼𑀢𑁄 𑀯𑀺𑀭𑀫𑀡𑀯𑀲𑁂𑀦 𑀧𑀯𑀢𑁆𑀢𑀦𑁆𑀢𑀺. 𑀧𑀘𑁆𑀙𑀺𑀫𑀸𑀢𑀺 𑀲𑁂𑀢𑀼𑀖𑀸𑀢𑀯𑀺𑀭𑀢𑀺. 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀸𑀯 𑀢𑀣𑀸𑀧𑀺 𑀓𑀺𑀘𑁆𑀘𑀲𑀸𑀥𑀦𑀢𑁄. 𑀇𑀫𑀺𑀦𑀸 𑀧𑀦 𑀢𑀢𑁆𑀣𑁂𑀯 𑀆𑀕𑀢𑁂𑀲𑀼 𑀢𑀻𑀲𑀼 𑀆𑀘𑀭𑀺𑀬𑀯𑀸𑀤𑁂𑀲𑀼 𑀤𑁆𑀯𑁂 𑀧𑀝𑀺𑀩𑀸𑀳𑀺𑀢𑁆𑀯𑀸 𑀏𑀓𑀲𑁆𑀲𑁂𑀯𑀸𑀦𑀼𑀚𑀸𑀦𑀦𑀁 𑀯𑁂𑀤𑀺𑀢𑀩𑁆𑀩𑀁.

‘‘𑀲𑀫𑁆𑀧𑀢𑁆𑀢𑀯𑀺𑀭𑀢𑀺, 𑀳𑀺 𑀲𑀫𑀸𑀤𑀸𑀦𑀯𑀺𑀭𑀢𑀺 𑀘 𑀬𑀤𑁂𑀯 𑀧𑀚𑀳𑀢𑀺, 𑀢𑀁 𑀅𑀢𑁆𑀢𑀦𑁄 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀅𑀓𑀼𑀲𑀮𑀫𑁂𑀯𑀸𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀢𑀻’’𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺. ‘‘𑀲𑀫𑀸𑀤𑀸𑀦𑀯𑀺𑀭𑀢𑀺 𑀬𑀢𑁄 𑀯𑀺𑀭𑀫𑀢𑀺, 𑀢𑀁 𑀅𑀢𑁆𑀢𑀦𑁄 𑀯𑀸 𑀧𑀭𑁂𑀲𑀁 𑀯𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀅𑀓𑀼𑀲𑀮𑀫𑁂𑀯𑀸𑀮𑀫𑁆𑀩𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀢𑀺. 𑀲𑀫𑁆𑀧𑀢𑁆𑀢𑀯𑀺𑀭𑀢𑀺 𑀧𑀦 𑀬𑀢𑁄 𑀯𑀺𑀭𑀫𑀢𑀺, 𑀢𑁂𑀲𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁 𑀆𑀮𑀫𑁆𑀩𑀡𑀸𑀦𑁂𑀯 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀢𑀻’’𑀢𑀺 𑀅𑀧𑀭𑁂. ‘‘𑀤𑁆𑀯𑀬𑀫𑁆𑀧𑀺 𑀘𑁂𑀢𑀁 𑀬𑀢𑁄 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀅𑀓𑀼𑀲𑀮𑀢𑁄 𑀯𑀺𑀭𑀫𑀢𑀺, 𑀢𑁂𑀲𑀫𑀸𑀭𑀫𑁆𑀫𑀡𑀪𑀽𑀢𑀁 𑀯𑀻𑀢𑀺𑀓𑁆𑀓𑀫𑀺𑀢𑀩𑁆𑀩𑀯𑀢𑁆𑀣𑀼𑀫𑁂𑀯𑀸𑀮𑀫𑁆𑀩𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀢𑀺. 𑀧𑀼𑀭𑀺𑀫𑀧𑀼𑀭𑀺𑀫𑀧𑀤𑀢𑁆𑀣𑀜𑁆𑀳𑀺 𑀯𑀻𑀢𑀺𑀓𑁆𑀓𑀫𑀯𑀢𑁆𑀣𑀼𑀫𑀸𑀮𑀫𑁆𑀩𑀡𑀁 𑀓𑀢𑁆𑀯𑀸 𑀧𑀘𑁆𑀙𑀺𑀫𑀧𑀘𑁆𑀙𑀺𑀫𑀧𑀤𑀢𑁆𑀣𑀢𑁄 𑀯𑀺𑀭𑀫𑀺𑀢𑀩𑁆𑀩𑀯𑀢𑁆𑀣𑀼𑀢𑁄 𑀯𑀺𑀭𑀫𑀢𑀻’’𑀢𑀺 𑀅𑀜𑁆𑀜𑁂. 𑀧𑀞𑀫𑀯𑀸𑀤𑁄 𑀘𑁂𑀢𑁆𑀣 𑀅𑀬𑀼𑀢𑁆𑀢𑁄𑀬𑁂𑀯. 𑀓𑀲𑁆𑀫𑀸? 𑀢𑀲𑁆𑀲 𑀅𑀢𑁆𑀢𑀦𑁄 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀅𑀓𑀼𑀲𑀮𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀪𑀸𑀯𑀢𑁄, 𑀅𑀩𑀳𑀺𑀤𑁆𑀥𑀸𑀪𑀸𑀯𑀢𑁄 𑀘. 𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑁂 𑀳𑀺 𑀧𑀜𑁆𑀘𑀦𑁆𑀦𑀁 𑀲𑀺𑀓𑁆𑀔𑀸𑀧𑀤𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀢𑀸, 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀢𑀸 𑀘 𑀯𑀼𑀢𑁆𑀢𑀸. 𑀢𑀣𑀸 𑀤𑀼𑀢𑀺𑀬𑀯𑀸𑀤𑁄𑀧𑀺 𑀅𑀬𑀼𑀢𑁆𑀢𑁄𑀬𑁂𑀯. 𑀓𑀲𑁆𑀫𑀸? 𑀧𑀼𑀭𑀺𑀫𑀯𑀸𑀤𑁂𑀦 𑀲𑀫𑁆𑀫𑀺𑀲𑁆𑀲𑀢𑁆𑀢𑀸, 𑀧𑀭𑁂𑀲𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀅𑀓𑀼𑀲𑀮𑀸𑀭𑀫𑁆𑀫𑀡𑀪𑀸𑀯𑁂 𑀘 𑀅𑀦𑁂𑀓𑀦𑁆𑀢𑀺 𑀓𑀢𑁆𑀢𑀸, 𑀤𑁆𑀯𑀺𑀦𑁆𑀦𑀁 𑀆𑀮𑀫𑁆𑀩𑀡𑀧𑁆𑀧𑀪𑁂𑀤𑀯𑀘𑀦𑀢𑁄 𑀘. 𑀢𑀢𑀺𑀬𑀯𑀸𑀤𑁄 𑀧𑀦 𑀬𑀼𑀢𑁆𑀢𑁄 𑀲𑀩𑁆𑀩𑀪𑀸𑀡𑀓𑀸𑀦𑀫𑀪𑀺𑀫𑀢𑁄, 𑀢𑀲𑁆𑀫𑀸 𑀢𑀤𑁂𑀯 𑀅𑀦𑀼𑀚𑀸𑀦𑀸𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀻𑀲𑀼 𑀆𑀘𑀭𑀺𑀬𑀯𑀸𑀤𑁂𑀲𑀼 𑀤𑁆𑀯𑁂 𑀧𑀝𑀺𑀩𑀸𑀳𑀺𑀢𑁆𑀯𑀸 𑀏𑀓𑀲𑁆𑀲𑁂𑀯𑀸𑀦𑀼𑀚𑀸𑀦𑀦𑀁 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺.

𑀏𑀢𑁆𑀣𑀸𑀳 𑁋 𑀬𑀚𑁆𑀚𑁂𑀢𑀁 𑀯𑀺𑀭𑀢𑀺𑀤𑁆𑀯𑀬𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀤𑀺𑀯𑀻𑀢𑀺𑀓𑁆𑀓𑀫𑀺𑀢𑀩𑁆𑀩𑀯𑀢𑁆𑀣𑀼𑀫𑁂𑀯𑀸𑀮𑀫𑁆𑀩𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑁂𑀬𑁆𑀬, 𑀏𑀯𑀁 𑀲𑀢𑀺 𑀅𑀜𑁆𑀜𑀁 𑀘𑀺𑀦𑁆𑀢𑁂𑀦𑁆𑀢𑁄 𑀅𑀜𑁆𑀜𑀁 𑀓𑀭𑁂𑀬𑁆𑀬, 𑀬𑀜𑁆𑀘 𑀧𑀚𑀳𑀢𑀺, 𑀢𑀁 𑀦 𑀚𑀸𑀦𑁂𑀬𑁆𑀬𑀸𑀢𑀺 𑀅𑀬’𑀫𑀦𑀥𑀺𑀧𑁆𑀧𑁂𑀢𑁄 𑀅𑀢𑁆𑀣𑁄 𑀆𑀧𑀚𑁆𑀚𑀢𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀦 𑀳𑀺 𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦 𑀧𑀯𑀢𑁆𑀢𑁂𑀦𑁆𑀢𑁄 ‘‘𑀅𑀜𑁆𑀜𑀁 𑀘𑀺𑀦𑁆𑀢𑁂𑀦𑁆𑀢𑁄 𑀅𑀜𑁆𑀜𑀁 𑀓𑀭𑁄𑀢𑀻’’𑀢𑀺 𑀯𑀸 ‘‘𑀬𑀜𑁆𑀘 𑀧𑀚𑀳𑀢𑀺, 𑀢𑀁 𑀦 𑀚𑀸𑀦𑀸𑀢𑀻’’𑀢𑀺 𑀯𑀸 𑀯𑀼𑀘𑁆𑀘𑀢𑀺. 𑀬𑀣𑀸 𑀧𑀦 𑀅𑀭𑀺𑀬𑀫𑀕𑁆𑀕𑁄 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑁄𑀯 𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀏𑀯𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀤𑀺𑀯𑀢𑁆𑀣𑀸𑀭𑀫𑁆𑀫𑀡𑀫𑁆𑀧𑁂𑀢𑀁 𑀯𑀺𑀭𑀢𑀺𑀤𑁆𑀯𑀬𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀤𑀼𑀲𑁆𑀲𑀻𑀮𑁆𑀬𑀸𑀦𑀺 𑀧𑀚𑀳𑀢𑀺. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀆𑀭𑀪𑀺𑀢𑁆𑀯𑀸𑀦 𑀅𑀫𑀢𑀁, 𑀚𑀳𑀦𑁆𑀢𑁄 𑀲𑀩𑁆𑀩𑀧𑀸𑀧𑀓𑁂;

𑀦𑀺𑀤𑀲𑁆𑀲𑀦𑀜𑁆𑀘𑁂𑀢𑁆𑀣 𑀪𑀯𑁂, 𑀫𑀕𑁆𑀕𑀝𑁆𑀞𑁄𑀭𑀺𑀬𑀧𑀼𑀕𑁆𑀕𑀮𑁄’’𑀢𑀺. (𑀔𑀼. 𑀧𑀸. 𑀅𑀝𑁆𑀞. 𑀏𑀓𑀢𑀸𑀦𑀸𑀦𑀢𑀸𑀯𑀺𑀦𑀺𑀘𑁆𑀙𑀬);

𑀇𑀤𑀸𑀦𑀺 𑀲𑀗𑁆𑀔𑁂𑀧𑁂𑀦𑁂𑀯 𑀆𑀤𑀸𑀦𑀢𑁄, 𑀪𑁂𑀤𑀢𑁄 𑀯𑀸 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀲𑀻𑀮𑀁 𑀲𑀫𑀸𑀤𑀺𑀬𑀸𑀫𑀻’’𑀢𑀺𑀆𑀤𑀺𑀦𑀸 𑀏𑀓𑀢𑁄 𑀏𑀓𑀚𑁆𑀛𑀁 𑀕𑀡𑁆𑀳𑀸𑀢𑀺. 𑀏𑀯𑀫𑁆𑀧𑀺 𑀳𑀺 𑀓𑀺𑀘𑁆𑀘𑀯𑀲𑁂𑀦 𑀏𑀢𑀸𑀲𑀁 𑀧𑀜𑁆𑀘𑀯𑀺𑀥𑀢𑀸 𑀯𑀺𑀜𑁆𑀜𑀸𑀬𑀢𑀺. 𑀲𑀩𑁆𑀩𑀸𑀦𑀺𑀧𑀺 𑀪𑀺𑀦𑁆𑀦𑀸𑀦𑀺 𑀳𑁄𑀦𑁆𑀢𑀺 𑀏𑀓𑀚𑁆𑀛𑀁 𑀲𑀫𑀸𑀤𑀺𑀦𑁆𑀦𑀢𑁆𑀢𑀸. 𑀦 𑀳𑀺 𑀢𑀤𑀸 𑀧𑀜𑁆𑀘𑀗𑁆𑀕𑀺𑀓𑀢𑁆𑀢𑀁 𑀲𑀻𑀮𑀲𑁆𑀲 𑀲𑀫𑁆𑀧𑀚𑁆𑀚𑀢𑀺. 𑀬𑀁 𑀢𑀼 𑀯𑀻𑀢𑀺𑀓𑁆𑀓𑀦𑁆𑀢𑀁, 𑀢𑁂𑀦𑁂𑀯 𑀓𑀫𑁆𑀫𑀩𑀤𑁆𑀥𑁄. ‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺𑀲𑀺𑀓𑁆𑀔𑀸𑀧𑀤𑀁 𑀲𑀫𑀸𑀤𑀺𑀬𑀸𑀫𑀻’’𑀢𑀺𑀆𑀤𑀺𑀦𑀸 𑀏𑀓𑁂𑀓𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀕𑀡𑁆𑀳𑀸𑀢𑀺. ‘‘𑀯𑁂𑀭𑀫𑀡𑀺𑀲𑀺𑀓𑁆𑀔𑀸𑀧𑀤’’𑀦𑁆𑀢𑀺 𑀘 𑀇𑀤𑀁 𑀲𑀫𑀸𑀲𑀪𑀸𑀯𑁂𑀦 𑀔𑀼𑀤𑁆𑀤𑀓𑀧𑀸𑀞𑀝𑁆𑀞𑀓𑀣𑀸𑀬𑀁 (𑀔𑀼. 𑀧𑀸. 𑀅𑀝𑁆𑀞. 𑀲𑀸𑀥𑀸𑀭𑀡𑀯𑀺𑀪𑀸𑀯𑀦𑀸) 𑀯𑀼𑀢𑁆𑀢𑀁, 𑀧𑀸𑀴𑀺𑀧𑁄𑀢𑁆𑀣𑀓𑁂𑀲𑀼 𑀧𑀦 ‘‘𑀯𑁂𑀭𑀫𑀡𑀺’’𑀦𑁆𑀢𑀺 𑀦𑀺𑀕𑁆𑀕𑀳𑀺𑀢𑀦𑁆𑀢𑀫𑁂𑀯 𑀩𑁆𑀬𑀸𑀲𑀪𑀸𑀯𑁂𑀦 𑀤𑀺𑀲𑁆𑀲𑀢𑀺. 𑀕𑀳𑀝𑁆𑀞𑀯𑀲𑁂𑀦 𑀘𑁂𑀢𑀁 𑀯𑀼𑀢𑁆𑀢𑀁. 𑀲𑀸𑀫𑀡𑁂𑀭𑀸𑀦𑀁 𑀧𑀦 𑀬𑀣𑀸 𑀢𑀣𑀸 𑀯𑀸 𑀲𑀫𑀸𑀤𑀸𑀦𑁂 𑀏𑀓𑀲𑁆𑀫𑀺𑀁 𑀪𑀺𑀦𑁆𑀦𑁂 𑀲𑀩𑁆𑀩𑀸𑀦𑀺𑀧𑀺 𑀪𑀺𑀦𑁆𑀦𑀸𑀦𑀺 𑀳𑁄𑀦𑁆𑀢𑀺 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀢𑁄. 𑀇𑀢𑀺 𑀏𑀓𑀚𑁆𑀛𑀁, 𑀧𑀘𑁆𑀘𑁂𑀓𑀜𑁆𑀘 𑀲𑀫𑀸𑀤𑀸𑀦𑁂 𑀯𑀺𑀲𑁂𑀲𑁄 𑀇𑀥 𑀯𑀼𑀢𑁆𑀢𑁄, 𑀔𑀼𑀤𑁆𑀤𑀓𑀸𑀕𑀫𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀏𑀓𑀚𑁆𑀛𑀁 𑀲𑀫𑀸𑀤𑀺𑀬𑀢𑁄 𑀏𑀓𑀸𑀬𑁂𑀯 𑀯𑀺𑀭𑀢𑀺 𑀏𑀓𑀸𑀯 𑀘𑁂𑀢𑀦𑀸 𑀳𑁄𑀢𑀺, 𑀓𑀺𑀘𑁆𑀘𑀯𑀲𑁂𑀦 𑀧𑀦𑁂𑀢𑀸𑀲𑀁 𑀧𑀜𑁆𑀘𑀯𑀺𑀥𑀢𑁆𑀢𑀁 𑀯𑀺𑀜𑁆𑀜𑀸𑀬𑀢𑀺. 𑀧𑀘𑁆𑀘𑁂𑀓𑀁 𑀲𑀫𑀸𑀤𑀺𑀬𑀢𑁄 𑀧𑀦 𑀧𑀜𑁆𑀘𑁂𑀯 𑀯𑀺𑀭𑀢𑀺𑀬𑁄, 𑀧𑀜𑁆𑀘 𑀘 𑀘𑁂𑀢𑀦𑀸 𑀳𑁄𑀦𑁆𑀢𑀻’’𑀢𑀺 (𑀔𑀼. 𑀧𑀸. 𑀅𑀝𑁆𑀞. 𑀏𑀓𑀢𑀸𑀦𑀸𑀦𑀢𑀸𑀤𑀺𑀯𑀺𑀦𑀺𑀘𑁆𑀙𑀬) 𑀅𑀬𑀁 𑀯𑀺𑀲𑁂𑀲𑁄 𑀯𑀼𑀢𑁆𑀢𑁄. 𑀪𑁂𑀤𑁂𑀧𑀺 ‘‘𑀬𑀣𑀸 𑀢𑀣𑀸 𑀯𑀸 𑀲𑀫𑀸𑀤𑀺𑀬𑀦𑁆𑀢𑀼, 𑀲𑀸𑀫𑀡𑁂𑀭𑀸𑀦𑀁 𑀏𑀓𑀲𑁆𑀫𑀺𑀁 𑀪𑀺𑀦𑁆𑀦𑁂 𑀲𑀩𑁆𑀩𑀸𑀦𑀺𑀧𑀺 𑀪𑀺𑀦𑁆𑀦𑀸𑀦𑀺 𑀳𑁄𑀦𑁆𑀢𑀺. 𑀧𑀸𑀭𑀸𑀚𑀺𑀓𑀝𑁆𑀞𑀸𑀦𑀺𑀬𑀸𑀦𑀺 𑀳𑀺 𑀢𑀸𑀦𑀺 𑀢𑁂𑀲𑀁. 𑀬𑀁 𑀢𑀼 𑀯𑀻𑀢𑀺𑀓𑁆𑀓𑀦𑁆𑀢𑀁 𑀳𑁄𑀢𑀺, 𑀢𑁂𑀦𑁂𑀯 𑀓𑀫𑁆𑀫𑀩𑀤𑁆𑀥𑁄. 𑀕𑀳𑀝𑁆𑀞𑀸𑀦𑀁 𑀧𑀦 𑀏𑀓𑀲𑁆𑀫𑀺𑀁 𑀪𑀺𑀦𑁆𑀦𑁂 𑀏𑀓𑀫𑁂𑀯 𑀪𑀺𑀦𑁆𑀦𑀁 𑀳𑁄𑀢𑀺, 𑀬𑀢𑁄 𑀢𑁂𑀲𑀁 𑀢𑀁𑀲𑀫𑀸𑀤𑀸𑀦𑁂𑀦𑁂𑀯 𑀧𑀼𑀦 𑀧𑀜𑁆𑀘𑀗𑁆𑀕𑀺𑀓𑀢𑁆𑀢𑀁 𑀲𑀻𑀮𑀲𑁆𑀲 𑀲𑀫𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁. 𑀬𑀣𑀸𑀯𑀼𑀢𑁆𑀢𑁄𑀧𑀺 𑀤𑀻𑀖𑀪𑀸𑀡𑀓𑀸𑀦𑀁 𑀯𑀸𑀤𑁄 𑀅𑀧𑀭𑁂𑀯𑀸𑀤𑁄 𑀦𑀸𑀫 𑀢𑀢𑁆𑀣 𑀓𑀢𑁄.

𑀲𑁂𑀢𑀼𑀖𑀸𑀢𑀯𑀺𑀭𑀢𑀺𑀬𑀸 𑀧𑀦 𑀪𑁂𑀤𑁄 𑀦𑀸𑀫 𑀦𑀢𑁆𑀣𑀺 𑀧𑀝𑀺𑀧𑀓𑁆𑀔𑀲𑀫𑀼𑀘𑁆𑀙𑀺𑀦𑁆𑀤𑀦𑁂𑀦 𑀅𑀓𑀼𑀧𑁆𑀧𑀲𑀪𑀸𑀯𑀢𑁆𑀢𑀸. 𑀢𑀤𑁂𑀯𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀪𑀯𑀦𑁆𑀢𑀭𑁂𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀪𑀯𑀦𑁆𑀢𑀭𑁂𑀧𑀻’’𑀢𑀺 𑀇𑀫𑀺𑀦𑀸 𑀅𑀢𑁆𑀢𑀦𑁄 𑀅𑀭𑀺𑀬𑀪𑀸𑀯𑀁 𑀅𑀚𑀸𑀦𑀦𑁆𑀢𑁄𑀧𑀻𑀢𑀺 𑀅𑀢𑁆𑀣𑀁 𑀯𑀺𑀜𑁆𑀜𑀸𑀧𑁂𑀢𑀺. 𑀚𑀻𑀯𑀺𑀢𑀳𑁂𑀢𑀼𑀧𑀺, 𑀧𑀕𑁂𑀯 𑀅𑀜𑁆𑀜𑀳𑁂𑀢𑀼. ‘‘𑀦𑁂𑀯 𑀧𑀸𑀡𑀁 𑀳𑀦𑀢𑀺, 𑀦 𑀲𑀼𑀭𑀁 𑀧𑀺𑀯𑀢𑀻’’𑀢𑀺 𑀇𑀤𑀁 𑀫𑀚𑁆𑀛𑁂𑀧𑁂𑀬𑁆𑀬𑀸𑀮𑀦𑀺𑀤𑁆𑀤𑀺𑀝𑁆𑀞𑀁, 𑀫𑀺𑀕𑀧𑀤𑀯𑀴𑀜𑁆𑀚𑀦𑀦𑀬𑁂𑀦 𑀯𑀸 𑀯𑀼𑀢𑁆𑀢𑀁. 𑀲𑀼𑀭𑀦𑁆𑀢𑀺 𑀘 𑀦𑀺𑀤𑀲𑁆𑀲𑀦𑀫𑀢𑁆𑀢𑀁. 𑀲𑀩𑁆𑀩𑀫𑁆𑀧𑀺 𑀳𑀺 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸𑀦𑀼𑀬𑁄𑀕𑀁 𑀦 𑀓𑀭𑁄𑀢𑀺. ‘‘𑀫𑀚𑁆𑀚𑀦𑁆𑀢𑀺 𑀢𑀤𑁂𑀯 𑀉𑀪𑀬𑀁, 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀲𑀼𑀭𑀸𑀲𑀯𑀯𑀺𑀦𑀺𑀫𑀼𑀢𑁆𑀢𑀁 𑀫𑀤𑀦𑀻𑀬’’𑀦𑁆𑀢𑀺 (𑀲𑀁. 𑀦𑀺. 𑀅𑀝𑁆𑀞. 𑁩.𑁫.𑁧𑁧𑁩𑁪) 𑀲𑀁𑀬𑀼𑀢𑁆𑀢𑀫𑀳𑀸𑀯𑀕𑁆𑀕𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀔𑀼𑀤𑁆𑀤𑀓𑀧𑀸𑀞𑀝𑁆𑀞𑀓𑀣𑀸𑀬𑀜𑁆𑀘 ‘‘𑀢𑀤𑀼𑀪𑀬𑀫𑁂𑀯 𑀫𑀤𑀦𑀻𑀬𑀝𑁆𑀞𑁂𑀦 𑀫𑀚𑁆𑀚𑀁, 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀓𑀺𑀜𑁆𑀘𑀺 𑀅𑀢𑁆𑀣𑀺 𑀫𑀤𑀦𑀻𑀬𑀁, 𑀬𑁂𑀦 𑀧𑀻𑀢𑁂𑀦 𑀫𑀢𑁆𑀢𑁄 𑀳𑁄𑀢𑀺 𑀧𑀫𑀢𑁆𑀢𑁄, 𑀇𑀤𑀁 𑀯𑀼𑀘𑁆𑀘𑀢𑀺 𑀫𑀚𑁆𑀚’’𑀦𑁆𑀢𑀺 (𑀔𑀼. 𑀧𑀸. 𑀅𑀝𑁆𑀞. 𑀧𑀼𑀭𑀺𑀫𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) ‘‘𑀲𑀘𑁂 𑀧𑀺𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀢𑀢𑁆𑀣𑁂𑀯 𑀯𑀺𑀲𑁂𑀲𑀤𑀲𑁆𑀲𑀦𑀁, 𑀅𑀚𑀸𑀦𑀦𑁆𑀢𑀲𑁆𑀲𑀧𑀺 𑀔𑀻𑀭𑀫𑁂𑀯 𑀫𑀼𑀔𑀁 𑀧𑀯𑀺𑀲𑀢𑀺,𑀦 𑀲𑀼𑀭𑀸, 𑀧𑀕𑁂𑀯 𑀚𑀸𑀦𑀦𑁆𑀢𑀲𑁆𑀲. 𑀓𑁄𑀜𑁆𑀘𑀲𑀓𑀼𑀡𑀸𑀦𑀦𑁆𑀢𑀺 𑀓𑀼𑀦𑁆𑀢𑀲𑀓𑀼𑀡𑀸𑀦𑀁. 𑀲𑀘𑁂𑀧𑀺 𑀫𑀼𑀔𑁂 𑀔𑀻𑀭𑀫𑀺𑀲𑁆𑀲𑀓𑁂 𑀉𑀤𑀓𑁂 𑀧𑀓𑁆𑀔𑀺𑀧𑀦𑁆𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁. ‘‘𑀦 𑀘𑁂𑀢𑁆𑀣 𑀉𑀧𑀫𑁄𑀧𑀫𑁂𑀬𑁆𑀬𑀸𑀦𑀁 𑀲𑀫𑁆𑀩𑀤𑁆𑀥𑀢𑀸 𑀲𑀺𑀬𑀸 𑀓𑁄𑀜𑁆𑀘𑀲𑀓𑀼𑀡𑀸𑀦𑀁 𑀬𑁄𑀦𑀺𑀲𑀺𑀤𑁆𑀥𑀢𑁆𑀢𑀸’’𑀢𑀺 𑀓𑁄𑀘𑀺 𑀯𑀤𑁂𑀬𑁆𑀬𑀸𑀢𑀺 𑀆𑀳 ‘‘𑀇𑀤’’𑀦𑁆𑀢𑀺𑀆𑀤𑀺. 𑀬𑁄𑀦𑀺𑀲𑀺𑀤𑁆𑀥𑀦𑁆𑀢𑀺 𑀫𑀦𑀼𑀲𑁆𑀲𑀢𑀺𑀭𑀘𑁆𑀙𑀸𑀦𑀸𑀦𑀁 𑀉𑀤𑁆𑀥𑀁 𑀢𑀺𑀭𑀺𑀬𑀫𑁂𑀯 𑀤𑀻𑀖𑀢𑀸 𑀯𑀺𑀬, 𑀩𑀓𑀸𑀦𑀁 𑀫𑁂𑀖𑀲𑀤𑁆𑀤𑁂𑀦, 𑀓𑀼𑀓𑁆𑀓𑀼𑀝𑀻𑀦𑀁 𑀯𑀸𑀢𑁂𑀦 𑀕𑀩𑁆𑀪𑀕𑁆𑀕𑀳𑀡𑀁 𑀯𑀺𑀬 𑀘 𑀚𑀸𑀢𑀺𑀲𑀺𑀤𑁆𑀥𑀁, 𑀇𑀢𑀺 𑀓𑁄𑀘𑀺 𑀯𑀤𑁂𑀬𑁆𑀬 𑀘𑁂𑀢𑀺 𑀅𑀢𑁆𑀣𑁄. ‘‘𑀘𑁂𑀯𑀸’’𑀢𑀺𑀧𑀺 𑀧𑀸𑀞𑀁 𑀯𑀢𑁆𑀯𑀸 𑀲𑀫𑀼𑀘𑁆𑀘𑀬𑀢𑁆𑀣𑀫𑀺𑀘𑁆𑀙𑀦𑁆𑀢𑀺 𑀓𑁂𑀘𑀺. 𑀥𑀫𑁆𑀫𑀢𑀸𑀲𑀺𑀤𑁆𑀥𑀦𑁆𑀢𑀺 𑀩𑁄𑀥𑀺𑀲𑀢𑁆𑀢𑁂 𑀓𑀼𑀘𑁆𑀙𑀺𑀕𑀢𑁂 𑀩𑁄𑀥𑀺𑀲𑀢𑁆𑀢𑀫𑀸𑀢𑀼 𑀲𑀻𑀮𑀁 𑀯𑀺𑀬, 𑀯𑀺𑀚𑀸𑀢𑁂 𑀢𑀲𑁆𑀲𑀸 𑀤𑀺𑀯𑀗𑁆𑀕𑀫𑀦𑀁 𑀯𑀺𑀬 𑀘 𑀲𑀪𑀸𑀯𑁂𑀦 𑀲𑀺𑀤𑁆𑀥𑀁, 𑀫𑀕𑁆𑀕𑀥𑀫𑁆𑀫𑀢𑀸𑀬 𑀯𑀸 𑀅𑀭𑀺𑀬𑀫𑀕𑁆𑀕𑀸𑀦𑀼𑀪𑀸𑀯𑁂𑀦 𑀲𑀺𑀤𑁆𑀥𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀯𑀺𑀲𑁆𑀲𑀚𑁆𑀚𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀤𑀺𑀝𑁆𑀞𑀺𑀚𑀼𑀓𑀭𑀡𑀁 𑀦𑀸𑀫 𑀪𑀸𑀭𑀺𑀬𑀁 𑀤𑀼𑀓𑁆𑀓𑀭𑀁, 𑀢𑀲𑁆𑀫𑀸 𑀲𑀭𑀡𑀕𑀫𑀦𑀁 𑀲𑀺𑀓𑁆𑀔𑀸𑀧𑀤𑀲𑀫𑀸𑀤𑀸𑀦𑀢𑁄 𑀫𑀳𑀝𑁆𑀞𑀢𑀭𑀫𑁂𑀯, 𑀦 𑀅𑀧𑁆𑀧𑀝𑁆𑀞𑀢𑀭𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑀦𑁆𑀢𑀺 𑀲𑀺𑀓𑁆𑀔𑀸𑀧𑀤𑀁. 𑀬𑀣𑀸 𑀯𑀸 𑀢𑀣𑀸 𑀯𑀸 𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀻𑀢𑀺 𑀆𑀤𑀭𑀁 𑀕𑀸𑀭𑀯𑀫𑀓𑀢𑁆𑀯𑀸 𑀲𑀫𑀸𑀤𑀺𑀬𑀦𑁆𑀢𑀲𑁆𑀲𑀸𑀧𑀺. 𑀲𑀸𑀥𑀼𑀓𑀁 𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀻𑀢𑀺 𑀲𑀓𑁆𑀓𑀘𑁆𑀘𑀁 𑀲𑀻𑀮𑀸𑀦𑀺 𑀲𑀫𑀸𑀤𑀺𑀬𑀦𑁆𑀢𑀲𑁆𑀲𑀸𑀧𑀺 𑀅𑀧𑁆𑀧𑀝𑁆𑀞𑀢𑀭𑀫𑁂𑀯, 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀭𑀜𑁆𑀘, 𑀦 𑀤𑀺𑀕𑀼𑀡𑀁 𑀉𑀲𑁆𑀲𑀸𑀳𑁄 𑀓𑀭𑀡𑀻𑀬𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀻𑀮𑀁 𑀇𑀥 𑀅𑀪𑀬𑀤𑀸𑀦𑀢𑀸𑀬 𑀤𑀸𑀦𑀁, 𑀅𑀦𑀯𑀲𑁂𑀲𑀁 𑀯𑀸 𑀲𑀢𑁆𑀢𑀦𑀺𑀓𑀸𑀬𑀁 𑀤𑀬𑀢𑀺 𑀭𑀓𑁆𑀔𑀢𑀻𑀢𑀺 𑀤𑀸𑀦𑀁. 𑀅𑀬𑀫𑁂𑀢𑁆𑀣 𑀅𑀝𑁆𑀞𑀓𑀣𑀸𑀫𑀼𑀢𑁆𑀢𑀓𑀦𑀬𑁄 𑁋 𑀲𑀭𑀡𑀁 𑀉𑀧𑀕𑀢𑁂𑀦 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑁂𑀳𑀺 𑀲𑀓𑁆𑀓𑀘𑁆𑀘𑀁 𑀯𑀢𑁆𑀣𑀼𑀢𑁆𑀢𑀬𑀧𑀽𑀚𑀸 𑀓𑀸𑀢𑀩𑁆𑀩𑀸, 𑀢𑀢𑁆𑀣 𑀘 𑀲𑀁𑀓𑀺𑀮𑁂𑀲𑁄 𑀲𑀸𑀥𑀼𑀓𑀁 𑀧𑀭𑀺𑀳𑀭𑀺𑀢𑀩𑁆𑀩𑁄, 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀦 𑀲𑀫𑀸𑀤𑀸𑀦𑀫𑀢𑁆𑀢𑀁, 𑀲𑀫𑁆𑀧𑀢𑁆𑀢𑀯𑀢𑁆𑀣𑀼𑀢𑁄 𑀯𑀺𑀭𑀫𑀡𑀫𑀢𑁆𑀢𑀜𑁆𑀘𑀸𑀢𑀺 𑀲𑀭𑀡𑀕𑀫𑀦𑀢𑁄 𑀲𑀻𑀮𑀲𑁆𑀲 𑀅𑀧𑁆𑀧𑀝𑁆𑀞𑀢𑀭𑀢𑀸, 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀭𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀲𑀩𑁆𑀩𑁂𑀲𑀁 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀤𑀸𑀦𑀸𑀤𑀺𑀦𑀸 𑀤𑀡𑁆𑀟𑀦𑀺𑀥𑀸𑀦𑀢𑁄, 𑀲𑀓𑀮𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭 𑀕𑀼𑀡𑀸𑀥𑀺𑀝𑁆𑀞𑀸𑀦𑀢𑁄 𑀘𑀲𑁆𑀲 𑀫𑀳𑀧𑁆𑀨𑀮𑀢𑀭𑀢𑀸, 𑀫𑀳𑀸𑀦𑀺𑀲𑀁𑀲𑀢𑀭𑀢𑀸 𑀘 𑀤𑀝𑁆𑀞𑀩𑁆𑀩𑀸𑀢𑀺.

𑀢𑀫𑀢𑁆𑀣𑀁 𑀧𑀸𑀴𑀺𑀬𑀸 𑀲𑀸𑀥𑁂𑀦𑁆𑀢𑁄 ‘‘𑀯𑀼𑀢𑁆𑀢𑀜𑁆𑀳𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀅𑀕𑁆𑀕𑀸𑀦𑀻’’𑀢𑀺 𑀜𑀸𑀢𑀢𑁆𑀢𑀸 𑀅𑀕𑁆𑀕𑀜𑁆𑀜𑀸𑀦𑀺. 𑀘𑀺𑀭𑀭𑀢𑁆𑀢𑀢𑀸𑀬 𑀜𑀸𑀢𑀢𑁆𑀢𑀸 𑀭𑀢𑁆𑀢𑀜𑁆𑀜𑀸𑀦𑀺. ‘‘𑀅𑀭𑀺𑀬𑀸𑀦𑀁 𑀲𑀸𑀥𑀽𑀦𑀁 𑀯𑀁𑀲𑀸𑀦𑀻’’𑀢𑀺 𑀜𑀸𑀢𑀢𑁆𑀢𑀸 𑀯𑀁𑀲𑀜𑁆𑀜𑀸𑀦𑀺. 𑀧𑀼𑀭𑀺𑀫𑀓𑀸𑀦𑀁 𑀆𑀤𑀺𑀧𑀼𑀭𑀺𑀲𑀸𑀦𑀁 𑀏𑀢𑀸𑀦𑀻𑀢𑀺 𑀧𑁄𑀭𑀸𑀡𑀸𑀦𑀺. 𑀲𑀩𑁆𑀩𑀲𑁄 𑀓𑁂𑀦𑀘𑀺𑀧𑀺 𑀧𑀓𑀸𑀭𑁂𑀦 𑀲𑀸𑀥𑀽𑀳𑀺 𑀦 𑀓𑀺𑀡𑁆𑀡𑀸𑀦𑀺 𑀦 𑀙𑀟𑁆𑀟𑀺𑀢𑀸𑀦𑀻𑀢𑀺 𑀅𑀲𑀁𑀓𑀺𑀡𑁆𑀡𑀸𑀦𑀺. 𑀅𑀬𑀜𑁆𑀘 𑀦𑀬𑁄 𑀦𑁂𑀲𑀁 𑀬𑀣𑀸 𑀅𑀢𑀻𑀢𑁂, 𑀏𑀯𑀁 𑀏𑀢𑀭𑀳𑀺, 𑀅𑀦𑀸𑀕𑀢𑁂 𑀘𑀸𑀢𑀺 𑀆𑀳 ‘‘𑀅𑀲𑀁𑀓𑀺𑀡𑁆𑀡𑀧𑀼𑀩𑁆𑀩𑀸𑀦𑀻’’𑀢𑀺𑀆𑀤𑀺. 𑀅𑀢𑀻𑀢𑁂 𑀳𑀺 𑀓𑀸𑀮𑁂 𑀅𑀲𑀁𑀓𑀺𑀡𑁆𑀡𑀪𑀸𑀯𑀲𑁆𑀲 ‘‘𑀅𑀲𑀁𑀓𑀺𑀡𑁆𑀡𑀧𑀼𑀩𑁆𑀩𑀸𑀦𑀻’’𑀢𑀺 𑀦𑀺𑀤𑀲𑁆𑀲𑀦𑀁, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 ‘‘𑀦 𑀲𑀗𑁆𑀓𑀺𑀬𑀦𑁆𑀢𑀻’’𑀢𑀺, 𑀅𑀦𑀸𑀕𑀢𑁂 ‘‘𑀦 𑀲𑀗𑁆𑀓𑀺𑀬𑀺𑀲𑁆𑀲𑀦𑁆𑀢𑀻’’𑀢𑀺. 𑀅𑀢𑁄𑀬𑁂𑀯 𑀅𑀧𑁆𑀧𑀝𑀺𑀓𑀼𑀝𑁆𑀞𑀸𑀦𑀺 𑀦 𑀧𑀝𑀺𑀓𑁆𑀔𑀺𑀢𑁆𑀢𑀸𑀦𑀺. 𑀦 𑀳𑀺 𑀓𑀤𑀸𑀘𑀺𑀧𑀺 𑀯𑀺𑀜𑁆𑀜𑀽 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀳𑀺𑀁𑀲𑀸𑀤𑀺𑀧𑀸𑀧𑀥𑀫𑁆𑀫𑀁 𑀅𑀦𑀼𑀚𑀸𑀦𑀦𑁆𑀢𑀺. 𑀅𑀧𑀭𑀺𑀫𑀸𑀡𑀸𑀦𑀁 𑀲𑀢𑁆𑀢𑀸𑀦𑀁 𑀅𑀪𑀬𑀁 𑀤𑁂𑀢𑀻𑀢𑀺 𑀲𑀩𑁆𑀩𑁂𑀲𑀼 𑀪𑀽𑀢𑁂𑀲𑀼 𑀦𑀺𑀳𑀺𑀢𑀤𑀡𑁆𑀟𑀢𑁆𑀢𑀸 𑀲𑀓𑀮𑀲𑁆𑀲𑀧𑀺 𑀲𑀢𑁆𑀢𑀦𑀺𑀓𑀸𑀬𑀲𑁆𑀲 𑀪𑀬𑀸𑀪𑀸𑀯𑀁 𑀤𑁂𑀢𑀺. 𑀦 𑀳𑀺 𑀅𑀭𑀺𑀬𑀲𑀸𑀯𑀓𑀢𑁄 𑀓𑀲𑁆𑀲𑀘𑀺 𑀪𑀬𑀁 𑀳𑁄𑀢𑀺. 𑀅𑀯𑁂𑀭𑀦𑁆𑀢𑀺 𑀯𑁂𑀭𑀸𑀪𑀸𑀯𑀁. 𑀅𑀩𑁆𑀬𑀸𑀧𑀚𑁆𑀛𑀦𑁆𑀢𑀺 𑀦𑀺𑀤𑁆𑀤𑀼𑀓𑁆𑀔𑀢𑀁. ‘‘𑀅𑀧𑀭𑀺𑀫𑀸𑀡𑀸𑀦𑀁 𑀲𑀢𑁆𑀢𑀸𑀦𑀁 𑀅𑀪𑀬𑀁 𑀤𑀢𑁆𑀯𑀸’’𑀢𑀺𑀆𑀤𑀺 𑀆𑀦𑀺𑀲𑀁𑀲𑀤𑀲𑁆𑀲𑀦𑀁, 𑀳𑁂𑀢𑀼𑀫𑁆𑀧𑀺 𑀘𑁂𑀢𑁆𑀣 𑀢𑁆𑀯𑀸-𑀲𑀤𑁆𑀤𑁄 𑀬𑀣𑀸 ‘‘𑀫𑀸𑀢𑀭𑀁 𑀲𑀭𑀺𑀢𑁆𑀯𑀸 𑀭𑁄𑀤𑀢𑀻’’𑀢𑀺.

𑀬𑀁 𑀓𑀺𑀜𑁆𑀘𑀺 𑀘𑀚𑀦𑀮𑀓𑁆𑀔𑀡𑀁, 𑀲𑀩𑁆𑀩𑀁 𑀢𑀁 𑀬𑀜𑁆𑀜𑁄𑀢𑀺 𑀆𑀳 ‘‘𑀇𑀤𑀜𑁆𑀘 𑀧𑀦𑀸’’𑀢𑀺𑀆𑀤𑀺. 𑀦 𑀦𑀼 𑀘 𑀧𑀜𑁆𑀘𑀲𑀻𑀮𑀁 𑀲𑀩𑁆𑀩𑀓𑀸𑀮𑀺𑀓𑀁. 𑀅𑀩𑀼𑀤𑁆𑀥𑀼𑀧𑁆𑀧𑀸𑀤𑀓𑀸𑀮𑁂𑀧𑀺 𑀳𑀺 𑀯𑀺𑀜𑁆𑀜𑀽 𑀢𑀁 𑀲𑀫𑀸𑀤𑀺𑀬𑀦𑁆𑀢𑀺, 𑀦 𑀘 𑀏𑀓𑀦𑁆𑀢𑀢𑁄 𑀯𑀺𑀫𑀼𑀢𑁆𑀢𑀸𑀬𑀢𑀦𑀁 𑀩𑀸𑀳𑀺𑀭𑀓𑀸𑀦𑀫𑁆𑀧𑀺 𑀲𑀫𑀸𑀤𑀺𑀦𑁆𑀦𑀢𑁆𑀢𑀸. 𑀲𑀭𑀡𑀕𑀫𑀦𑀁 𑀧𑀦 𑀩𑀼𑀤𑁆𑀥𑀼𑀧𑁆𑀧𑀸𑀤𑀳𑁂𑀢𑀼𑀓𑀁, 𑀏𑀓𑀦𑁆𑀢𑀢𑁄 𑀘 𑀯𑀺𑀫𑀼𑀢𑁆𑀢𑀸𑀬𑀢𑀦𑀁, 𑀓𑀣𑀁 𑀢𑀢𑁆𑀣 𑀲𑀭𑀡𑀕𑀫𑀦𑀢𑁄 𑀧𑀜𑁆𑀘𑀲𑀻𑀮𑀲𑁆𑀲 𑀫𑀳𑀧𑁆𑀨𑀮𑀢𑀸𑀢𑀺 𑀆𑀳 ‘‘𑀓𑀺𑀜𑁆𑀘𑀸𑀧𑀻’’𑀢𑀺𑀆𑀤𑀺. 𑀚𑁂𑀝𑁆𑀞𑀓𑀦𑁆𑀢𑀺 𑀫𑀳𑀧𑁆𑀨𑀮𑀪𑀸𑀯𑁂𑀦 𑀉𑀢𑁆𑀢𑀫𑀁. ‘‘𑀲𑀭𑀡𑀕𑀫𑀦𑁂𑀬𑁂𑀯 𑀧𑀢𑀺𑀝𑁆𑀞𑀸𑀬𑀸’’𑀢𑀺 𑀇𑀫𑀺𑀦𑀸 𑀢𑀲𑁆𑀲 𑀲𑀻𑀮𑀲𑁆𑀲 𑀲𑀭𑀡𑀕𑀫𑀦𑁂𑀦 𑀅𑀪𑀺𑀲𑀗𑁆𑀔𑀢𑀢𑁆𑀢𑀸 𑀢𑀢𑁄 𑀫𑀳𑀧𑁆𑀨𑀮𑀢𑀁, 𑀢𑀣𑀸 𑀅𑀦𑀪𑀺𑀲𑀗𑁆𑀔𑀢𑀲𑁆𑀲 𑀘 𑀲𑀻𑀮𑀲𑁆𑀲 𑀅𑀧𑁆𑀧𑀨𑀮𑀢𑀁 𑀤𑀲𑁆𑀲𑁂𑀢𑀺.

𑁩𑁫𑁩. 𑀈𑀤𑀺𑀲𑀫𑁂𑀯𑀸𑀢𑀺 𑀏𑀯𑀁 𑀲𑀁𑀓𑀺𑀮𑁂𑀲𑀧𑀝𑀺𑀧𑀓𑁆𑀔𑀫𑁂𑀯 𑀳𑀼𑀢𑁆𑀯𑀸. 𑀦𑀦𑀼 𑀘 𑀧𑀞𑀫𑀚𑁆𑀛𑀸𑀦𑀸𑀤𑀺𑀬𑀜𑁆𑀜𑀸𑀬𑁂𑀯 𑀤𑁂𑀲𑁂𑀢𑀩𑁆𑀩𑀸, 𑀓𑀲𑁆𑀫𑀸 𑀩𑀼𑀤𑁆𑀥𑀼𑀧𑁆𑀧𑀸𑀤𑀢𑁄 𑀧𑀝𑁆𑀞𑀸𑀬 𑀤𑁂𑀲𑀦𑀫𑀸𑀭𑀪𑀢𑀻𑀢𑀺 𑀅𑀦𑀼𑀬𑁄𑀕𑀁 𑀧𑀭𑀺𑀳𑀭𑀺𑀢𑀼𑀁 ‘‘𑀢𑀺𑀯𑀺𑀥…𑀧𑁂… 𑀤𑀲𑁆𑀲𑁂𑀢𑀼𑀓𑀸𑀫𑁄’’𑀢𑀺 𑀯𑀼𑀢𑁆𑀢𑀁. 𑀢𑀺𑀯𑀺𑀥𑀲𑀻𑀮𑀧𑀸𑀭𑀺𑀧𑀽𑀭𑀺𑀬𑀁 𑀞𑀺𑀢𑀲𑁆𑀲 𑀳𑀺 𑀦𑁂𑀲𑀁 𑀬𑀜𑁆𑀜𑀸𑀦𑀁 𑀅𑀧𑁆𑀧𑀝𑁆𑀞𑀢𑀭𑀢𑀸, 𑀫𑀳𑀧𑁆𑀨𑀮𑀢𑀭𑀢𑀸 𑀘 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀤𑀲𑁆𑀲𑁂𑀢𑀼𑀓𑀸𑀫𑀢𑁆𑀢𑀸 𑀩𑀼𑀤𑁆𑀥𑀼𑀧𑁆𑀧𑀸𑀤𑀢𑁄 𑀧𑀝𑁆𑀞𑀸𑀬 𑀤𑁂𑀲𑀦𑀁 𑀆𑀭𑀪𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺. 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀳𑀺 𑀕𑀼𑀡𑁂𑀳𑀻𑀢𑀺 𑀏𑀢𑁆𑀣 ‘‘𑀲𑁄 𑀢𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀢𑀣𑀸𑀕𑀢𑁂 𑀲𑀤𑁆𑀥𑀁 𑀧𑀝𑀺𑀮𑀪𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁧𑁯𑁧) 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸 𑀲𑀭𑀡𑀕𑀫𑀦𑀁, 𑀲𑀻𑀮𑀲𑀫𑁆𑀧𑀤𑀸, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸𑀢𑀺 𑀏𑀯𑀫𑀸𑀤𑀬𑁄 𑀕𑀼𑀡𑀸 𑀯𑁂𑀤𑀺𑀢𑀩𑁆𑀩𑀸. 𑀧𑀞𑀫𑀁 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑁄 𑀦 𑀓𑀺𑀮𑀫𑀢𑀻𑀢𑀺 𑀬𑁄𑀚𑀦𑀸. 𑀢𑀸𑀦𑀻𑀢𑀺 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀺. ‘‘𑀧𑀞𑀫𑀁 𑀛𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀧𑀸𑀴𑀺𑀬𑀁 𑀧𑀡𑀻𑀢𑀸𑀦𑀫𑁂𑀯 𑀛𑀸𑀦𑀸𑀦𑀁 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁄 𑀓𑀢𑁄𑀢𑀺 𑀫𑀦𑁆𑀢𑀯𑀸 ‘‘𑀏𑀓𑀁 𑀓𑀧𑁆𑀧𑀁, 𑀅𑀝𑁆𑀞 𑀓𑀧𑁆𑀧𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀫𑀳𑀸𑀓𑀧𑁆𑀧𑀯𑀲𑁂𑀦 𑀘𑁂𑀢𑁆𑀣 𑀅𑀢𑁆𑀣𑁄. 𑀳𑀻𑀦𑀁 𑀧𑀦 𑀧𑀞𑀫𑀁 𑀛𑀸𑀦𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀲𑁆𑀲 𑀢𑀢𑀺𑀬𑀪𑀸𑀕𑀁 𑀆𑀬𑀼𑀁 𑀤𑁂𑀢𑀺. 𑀫𑀚𑁆𑀛𑀺𑀫𑀁 𑀉𑀧𑀟𑁆𑀠𑀓𑀧𑁆𑀧𑀁. 𑀳𑀻𑀦𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀤𑁆𑀯𑁂 𑀓𑀧𑁆𑀧𑀸𑀦𑀺, 𑀫𑀚𑁆𑀛𑀺𑀫𑀁 𑀘𑀢𑁆𑀢𑀸𑀭𑀻𑀢𑀺𑀆𑀤𑀺𑀦𑀸 𑀅𑀢𑁆𑀣𑁄 𑀦𑁂𑀢𑀩𑁆𑀩𑁄. 𑀅𑀧𑀺𑀘 𑀬𑀲𑁆𑀫𑀸 𑀧𑀡𑀻𑀢𑀸𑀦𑀺𑀬𑁂𑀯𑁂𑀢𑁆𑀣 𑀛𑀸𑀦𑀸𑀦𑀺 𑀅𑀥𑀺𑀧𑁆𑀧𑁂𑀢𑀸𑀦𑀺 𑀫𑀳𑀧𑁆𑀨𑀮𑀢𑀭𑀪𑀸𑀯𑀤𑀲𑁆𑀲𑀦𑀧𑀭𑀢𑁆𑀢𑀸 𑀤𑁂𑀲𑀦𑀸𑀬, 𑀢𑀲𑁆𑀫𑀸 ‘‘𑀧𑀞𑀫𑀁 𑀛𑀸𑀦𑀁 𑀏𑀓𑀁 𑀓𑀧𑁆𑀧’’𑀦𑁆𑀢𑀺𑀆𑀤𑀺𑀦𑀸 𑀧𑀡𑀻𑀢𑀸𑀦𑁂𑀯 𑀛𑀸𑀦𑀸𑀦𑀺 𑀦𑀺𑀤𑁆𑀤𑀺𑀝𑁆𑀞𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀢𑀤𑁂𑀯𑀸𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀫𑁂𑀯. 𑀘𑀢𑀼𑀓𑁆𑀓𑀦𑀬𑁂𑀦 𑀳𑀺 𑀤𑁂𑀲𑀦𑀸 𑀆𑀕𑀢𑀸. 𑀬𑀤𑀺 𑀏𑀯𑀁 𑀓𑀣𑀁 𑀆𑀭𑀼𑀧𑁆𑀧𑀢𑀸𑀢𑀺 𑀆𑀳 ‘‘𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀸𑀤𑀺𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀪𑀸𑀯𑀺𑀢’’𑀦𑁆𑀢𑀺, 𑀢𑀣𑀸 𑀪𑀸𑀯𑀺𑀢𑀢𑁆𑀢𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀫𑁂𑀯 𑀆𑀭𑀼𑀧𑁆𑀧𑀁 𑀳𑀼𑀢𑁆𑀯𑀸 𑀯𑀻𑀲𑀢𑀺𑀓𑀧𑁆𑀧𑀲𑀳𑀲𑁆𑀲𑀸𑀤𑀻𑀦𑀺 𑀆𑀬𑀼𑀁 𑀤𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀬𑀁 𑀆𑀘𑀭𑀺𑀬𑀲𑁆𑀲 𑀫𑀢𑀺. 𑀅𑀣 𑀯𑀸 𑀢𑀤𑁂𑀯𑀸𑀢𑀺 𑀆𑀭𑀼𑀧𑁆𑀧𑀲𑀗𑁆𑀔𑀸𑀢𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀫𑁂𑀯, 𑀢𑀁 𑀧𑀦 𑀓𑀲𑁆𑀫𑀸 𑀯𑀻𑀲𑀢𑀺𑀓𑀧𑁆𑀧𑀲𑀳𑀲𑁆𑀲𑀸𑀤𑀻𑀦𑀺 𑀆𑀬𑀼𑀁 𑀤𑁂𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀸𑀤𑀺𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀪𑀸𑀯𑀺𑀢’’𑀦𑁆𑀢𑀺, 𑀢𑀣𑀸 𑀪𑀸𑀯𑀺𑀢𑀢𑁆𑀢𑀸 𑀏𑀯𑀁 𑀤𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀧𑀭𑁄 𑀦𑀬𑁄 ‘‘𑀢𑀤𑁂𑀯𑀸’’𑀢𑀺 𑀯𑀼𑀢𑁆𑀢𑁂 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀫𑁂𑀯𑀸𑀢𑀺 𑀅𑀢𑁆𑀣𑁄 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀢𑀁 𑀦𑀺𑀯𑀢𑁆𑀢𑁂𑀢𑀼𑀁 ‘‘𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀸𑀤𑀺𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀪𑀸𑀯𑀺𑀢’’𑀦𑁆𑀢𑀺 𑀆𑀳, 𑀢𑀣𑀸 𑀪𑀸𑀯𑀺𑀢𑀁 𑀅𑀗𑁆𑀕𑀲𑀫𑀢𑀸𑀬 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀗𑁆𑀔𑀸𑀢𑀁 𑀆𑀭𑀼𑀧𑁆𑀧𑀚𑁆𑀛𑀸𑀦𑀫𑁂𑀯𑀸𑀥𑀺𑀧𑁆𑀧𑁂𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀲𑀫𑁆𑀫𑀤𑁂𑀯 𑀦𑀺𑀘𑁆𑀘𑀲𑀜𑁆𑀜𑀸𑀤𑀺𑀧𑀝𑀺𑀧𑀓𑁆𑀔𑀯𑀺𑀥𑀫𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸 𑀧𑀼𑀩𑁆𑀩𑀪𑀸𑀕𑀺𑀬𑁂 𑀏𑀯 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂 𑀲𑀫𑀸𑀦𑁂𑀦𑁆𑀢𑀻 𑀯𑀺𑀧𑀲𑁆𑀲𑀦𑀸 𑀯𑀺𑀧𑀲𑁆𑀲𑀓𑀧𑀼𑀕𑁆𑀕𑀮𑀲𑁆𑀲 𑀅𑀦𑀧𑁆𑀧𑀓𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀲𑀫𑀸𑀯𑀳𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀯𑀺𑀧𑀲𑁆𑀲𑀦𑀸𑀲𑀼𑀔𑀲𑀤𑀺𑀲𑀲𑁆𑀲 𑀧𑀦 𑀲𑀼𑀔𑀲𑁆𑀲 𑀅𑀪𑀸𑀯𑀸 𑀫𑀳𑀧𑁆𑀨𑀮’’𑀦𑁆𑀢𑀺. 𑀬𑀣𑀸𑀳 𑀥𑀫𑁆𑀫𑀭𑀸𑀚𑀸 𑀥𑀫𑁆𑀫𑀧𑀤𑁂 𑁋

‘‘𑀬𑀢𑁄 𑀬𑀢𑁄 𑀲𑀫𑁆𑀫𑀲𑀢𑀺, 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁;

𑀮𑀪𑀢𑀻 𑀧𑀻𑀢𑀺𑀧𑀸𑀫𑁄𑀚𑁆𑀚𑀁, 𑀅𑀫𑀢𑀁 𑀢𑀁 𑀯𑀺𑀚𑀸𑀦𑀢’’𑀦𑁆𑀢𑀺. (𑀥. 𑀧. 𑁩𑁭𑁪);

𑀬𑀲𑁆𑀫𑀸 𑀧𑀦𑀸𑀬𑀁 𑀤𑁂𑀲𑀦𑀸 𑀇𑀫𑀺𑀦𑀸 𑀅𑀦𑀼𑀓𑁆𑀓𑀫𑁂𑀦 𑀇𑀫𑀸𑀦𑀺 𑀜𑀸𑀡𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀲𑁆𑀲 𑀯𑀲𑁂𑀦 𑀧𑀯𑀢𑁆𑀢𑀺𑀢𑀸, 𑀢𑀲𑁆𑀫𑀸 ‘‘𑀯𑀺𑀧𑀲𑁆𑀲𑀦𑀸𑀜𑀸𑀡𑁂 𑀧𑀢𑀺𑀝𑁆𑀞𑀸𑀬𑀸’’𑀢𑀺𑀆𑀤𑀺𑀦𑀸 𑀳𑁂𑀝𑁆𑀞𑀺𑀫𑀁 𑀳𑁂𑀝𑁆𑀞𑀺𑀫𑀁 𑀉𑀧𑀭𑀺𑀫𑀲𑁆𑀲 𑀉𑀧𑀭𑀺𑀫𑀲𑁆𑀲 𑀧𑀢𑀺𑀝𑁆𑀞𑀸𑀪𑀽𑀢𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀲𑀫𑀸𑀦𑀭𑀽𑀧𑀦𑀺𑀫𑁆𑀫𑀸𑀦𑀁 𑀦𑀸𑀫 𑀫𑀦𑁄𑀫𑀬𑀺𑀤𑁆𑀥𑀺𑀬𑀸 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀓𑀺𑀘𑁆𑀘𑀦𑁆𑀢𑀺 𑀆𑀳 ‘‘𑀅𑀢𑁆𑀢𑀦𑁄…𑀧𑁂… 𑀫𑀳𑀧𑁆𑀨𑀮𑀸’’𑀢𑀺. 𑀳𑀢𑁆𑀣𑀺𑀅𑀲𑁆𑀲𑀸𑀤𑀺𑀯𑀺𑀯𑀺𑀥𑀭𑀽𑀧𑀓𑀭𑀡𑀁 𑀯𑀺𑀓𑀼𑀩𑁆𑀩𑀦𑀁, 𑀢𑀲𑁆𑀲 𑀤𑀲𑁆𑀲𑀦𑀲𑀫𑀢𑁆𑀣𑀢𑀸𑀬. 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀝𑁆𑀞𑀸𑀦𑀁 𑀦𑀸𑀫 𑀧𑀼𑀭𑀺𑀫𑀚𑀸𑀢𑀻𑀲𑀼 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑁄 𑀔𑀦𑁆𑀥𑀧𑀤𑁂𑀲𑁄. 𑀅𑀭𑀳𑀢𑁆𑀢𑀫𑀕𑁆𑀕𑁂𑀦𑁂𑀯 𑀫𑀕𑁆𑀕𑀲𑀼𑀔𑀁 𑀦𑀺𑀝𑁆𑀞𑀺𑀢𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀅𑀢𑀺…𑀧𑁂… 𑀫𑀳𑀧𑁆𑀨𑀮’’𑀦𑁆𑀢𑀺. 𑀲𑀫𑀸𑀧𑁂𑀦𑁆𑀢𑁄𑀢𑀺 𑀧𑀭𑀺𑀬𑁄𑀲𑀸𑀧𑁂𑀦𑁆𑀢𑁄.

𑀓𑀽𑀝𑀤𑀦𑁆𑀢𑀉𑀧𑀸𑀲𑀓𑀢𑁆𑀢𑀧𑀝𑀺𑀯𑁂𑀤𑀦𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁩𑁫𑁪-𑁮. ‘‘𑀅𑀪𑀺𑀓𑁆𑀓𑀦𑁆𑀢𑀁 𑀪𑁄 𑀕𑁄𑀢𑀫𑀸’’𑀢𑀺𑀆𑀤𑀺 𑀤𑁂𑀲𑀦𑀸𑀬 𑀧𑀲𑀸𑀤𑀯𑀘𑀦𑀁, ‘‘𑀏𑀲𑀸𑀳𑀁 𑀪𑀯𑀦𑁆𑀢’’𑀦𑁆𑀢𑀺𑀆𑀤𑀺 𑀧𑀦 𑀲𑀭𑀡𑀕𑀫𑀦𑀯𑀘𑀦𑀦𑁆𑀢𑀺 𑀢𑀤𑀼𑀪𑀬𑀲𑀫𑁆𑀩𑀦𑁆𑀥𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀤𑁂𑀲𑀦𑀸𑀬𑀸’’𑀢𑀺𑀆𑀤𑀺𑀫𑀸𑀳. 𑀢𑀦𑀽𑀢𑀺 𑀫𑀦𑁆𑀤𑁄 𑀓𑀸𑀬𑀺𑀓𑀘𑁂𑀢𑀲𑀺𑀓𑀲𑀼𑀔𑀲𑀫𑀼𑀧𑀩𑁆𑀬𑀽𑀳𑀢𑁄. 𑀲𑀩𑁆𑀩𑁂 𑀢𑁂 𑀧𑀸𑀡𑀬𑁄𑀢𑀺 ‘‘𑀲𑀢𑁆𑀢 𑀘 𑀉𑀲𑀪𑀲𑀢𑀸𑀦𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂 𑀲𑀩𑁆𑀩𑁂 𑀢𑁂 𑀧𑀸𑀡𑀺𑀦𑁄. 𑀢𑀁 𑀧𑀯𑀢𑁆𑀢𑀺𑀦𑁆𑀢𑀺 𑀢𑁂𑀲𑀁 𑀧𑀸𑀡𑀻𑀦𑀁 𑀫𑁄𑀘𑀦𑀸𑀓𑀸𑀭𑀁. 𑀆𑀓𑀼𑀮𑀪𑀸𑀯𑁄𑀢𑀺 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀥𑀫𑁆𑀫𑀲𑁆𑀲 𑀲𑀼𑀢𑀢𑁆𑀢𑀸 𑀧𑀸𑀡𑀻𑀲𑀼 𑀅𑀦𑀼𑀤𑁆𑀤𑀬𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀞𑀺𑀢𑀲𑁆𑀲 ‘‘𑀓𑀣𑀜𑁆𑀳𑀺 𑀦𑀸𑀫 𑀫𑀬𑀸 𑀢𑀸𑀯 𑀩𑀳𑀽 𑀧𑀸𑀡𑀺𑀦𑁄 𑀫𑀸𑀭𑀡𑀢𑁆𑀣𑀸𑀬 𑀩𑀦𑁆𑀥𑀸𑀧𑀺𑀢𑀸’’𑀢𑀺 𑀘𑀺𑀢𑁆𑀢𑁂 𑀧𑀭𑀺𑀩𑁆𑀬𑀸𑀓𑀼𑀮𑀪𑀸𑀯𑁄, 𑀬𑀲𑁆𑀫𑀸 𑀅𑀢𑁆𑀣𑀺, 𑀢𑀲𑁆𑀫𑀸 𑀦 𑀤𑁂𑀲𑁂𑀢𑀻𑀢𑀺 𑀬𑁄𑀚𑀦𑀸, ‘‘𑀉𑀤𑀧𑀸𑀤𑀻’’𑀢𑀺𑀧𑀺 𑀧𑀸𑀞𑁄. 𑀲𑀼𑀢𑁆𑀯𑀸𑀢𑀺 ‘‘𑀫𑀼𑀢𑁆𑀢𑀸 𑀪𑁄 𑀢𑁂 𑀧𑀸𑀡𑀬𑁄’’𑀢𑀺 𑀆𑀭𑁄𑀘𑀺𑀢𑀯𑀘𑀦𑀁 𑀲𑀼𑀢𑁆𑀯𑀸. 𑀘𑀺𑀢𑁆𑀢𑀘𑀸𑀭𑁄𑀢𑀺 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺. ‘‘𑀓𑀮𑁆𑀮𑀘𑀺𑀢𑁆𑀢𑀁 𑀫𑀼𑀤𑀼𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀘𑀺𑀢𑁆𑀢𑀁 𑀉𑀤𑀕𑁆𑀕𑀘𑀺𑀢𑁆𑀢𑀁 𑀧𑀲𑀦𑁆𑀦𑀘𑀺𑀢𑁆𑀢’’𑀦𑁆𑀢𑀺 𑀇𑀤𑀁 𑀧𑀤𑀧𑀜𑁆𑀘𑀓𑀁 𑀲𑀦𑁆𑀥𑀸𑀬‘‘𑀓𑀮𑁆𑀮𑀘𑀺𑀢𑁆𑀢𑀦𑁆𑀢𑀺𑀆𑀤𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀤𑀸𑀦𑀓𑀣𑀁 𑀲𑀻𑀮𑀓𑀣’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸𑀬 𑀅𑀦𑀼𑀧𑀼𑀩𑁆𑀩𑀺𑀓𑀣𑀸𑀬 𑀆𑀦𑀼𑀪𑀸𑀯𑁂𑀦. 𑀓𑀸𑀫𑀘𑁆𑀙𑀦𑁆𑀤𑀯𑀺𑀕𑀫𑁂𑀦 𑀓𑀮𑁆𑀮𑀘𑀺𑀢𑁆𑀢𑀢𑀸 𑀅𑀭𑁄𑀕𑀘𑀺𑀢𑁆𑀢𑀢𑀸, 𑀩𑁆𑀬𑀸𑀧𑀸𑀤𑀯𑀺𑀕𑀫𑁂𑀦 𑀫𑁂𑀢𑁆𑀢𑀸𑀯𑀲𑁂𑀦 𑀫𑀼𑀤𑀼𑀘𑀺𑀢𑁆𑀢𑀢𑀸 𑀅𑀓𑀣𑀺𑀦𑀘𑀺𑀢𑁆𑀢𑀢𑀸, 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀯𑀺𑀕𑀫𑁂𑀦 𑀯𑀺𑀓𑁆𑀔𑁂𑀧𑀸𑀪𑀸𑀯𑀢𑁄 𑀯𑀺𑀦𑀻𑀯𑀭𑀡𑀘𑀺𑀢𑁆𑀢𑀢𑀸 𑀢𑁂𑀳𑀺 𑀅𑀫𑀮𑀻𑀦𑀘𑀺𑀢𑁆𑀢𑀢𑀸, 𑀣𑀺𑀦𑀫𑀺𑀤𑁆𑀥𑀯𑀺𑀕𑀫𑁂𑀦 𑀲𑀫𑁆𑀧𑀕𑁆𑀕𑀳𑀡𑀯𑀲𑁂𑀦 𑀉𑀤𑀕𑁆𑀕𑀘𑀺𑀢𑁆𑀢𑀢𑀸 𑀅𑀫𑀮𑀻𑀦𑀘𑀺𑀢𑁆𑀢𑀢𑀸, 𑀯𑀺𑀘𑀺𑀓𑀺𑀘𑁆𑀙𑀸𑀯𑀺𑀕𑀫𑁂𑀦 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀅𑀯𑀺𑀫𑀼𑀢𑁆𑀢𑀢𑀸𑀬 𑀧𑀲𑀦𑁆𑀦𑀘𑀺𑀢𑁆𑀢𑀢𑀸 𑀅𑀦𑀸𑀯𑀺𑀮𑀘𑀺𑀢𑁆𑀢𑀢𑀸 𑀘 𑀳𑁄𑀢𑀻𑀢𑀺 𑀆𑀳 ‘‘𑀅𑀦𑀼𑀧𑀼𑀩𑁆𑀩𑀺𑀓𑀣𑀸𑀦𑀼𑀪𑀸𑀯𑁂𑀦 𑀯𑀺𑀓𑁆𑀔𑀫𑁆𑀪𑀺𑀢𑀦𑀻𑀯𑀭𑀡𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺. 𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀢𑁄 𑀅𑀯𑀺𑀪𑀢𑁆𑀢𑀁, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀇𑀢𑀺 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬 𑀧𑀭𑀫𑀲𑀼𑀔𑀼𑀫𑀕𑀫𑁆𑀪𑀻𑀭𑀤𑀼𑀭𑀦𑀼𑀩𑁄𑀥𑀢𑁆𑀣𑀧𑀭𑀺𑀤𑀻𑀧𑀦𑀸𑀬 𑀲𑀼𑀯𑀺𑀫𑀮𑀯𑀺𑀧𑀼𑀮𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀚𑀦𑀦𑀸𑀬 𑀲𑀸𑀥𑀼𑀯𑀺𑀮𑀸𑀲𑀺𑀦𑀺𑀬𑀸 𑀦𑀸𑀫 𑀮𑀻𑀦𑀢𑁆𑀣𑀧𑀓𑀸𑀲𑀦𑀺𑀬𑀸 𑀓𑀽𑀝𑀤𑀦𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑀓𑀸𑀲𑀦𑀸.

𑀓𑀽𑀝𑀤𑀦𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.