𑁪. 𑀲𑁄𑀡𑀤𑀡𑁆𑀟𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁦𑁦. 𑀏𑀯𑀁 𑀅𑀫𑁆𑀩𑀝𑁆𑀞𑀲𑀼𑀢𑁆𑀢𑀁 𑀲𑀁𑀯𑀡𑁆𑀡𑁂𑀢𑁆𑀯𑀸 𑀇𑀤𑀸𑀦𑀺 𑀲𑁄𑀡𑀤𑀡𑁆𑀟𑀲𑀼𑀢𑁆𑀢𑀁 𑀲𑀁𑀯𑀡𑁆𑀡𑁂𑀦𑁆𑀢𑁄 𑀬𑀣𑀸𑀦𑀼𑀧𑀼𑀩𑁆𑀩𑀁 𑀲𑀁𑀯𑀡𑁆𑀡𑀦𑁄𑀓𑀸𑀲𑀲𑁆𑀲 𑀧𑀢𑁆𑀢𑀪𑀸𑀯𑀁 𑀯𑀺𑀪𑀸𑀯𑁂𑀢𑀼𑀁, 𑀅𑀫𑁆𑀩𑀝𑁆𑀞𑀲𑀼𑀢𑁆𑀢𑀲𑁆𑀲𑀸𑀦𑀦𑁆𑀢𑀭𑀁 𑀲𑀗𑁆𑀕𑀻𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀲𑁄𑀡𑀤𑀡𑁆𑀟𑀲𑀼𑀢𑁆𑀢𑀪𑀸𑀯𑀁 𑀯𑀸 𑀧𑀓𑀸𑀲𑁂𑀢𑀼𑀁 ‘‘𑀏𑀯𑀁 𑀫𑁂 𑀲𑀼𑀢𑀁…𑀧𑁂… 𑀅𑀗𑁆𑀕𑁂𑀲𑀽𑀢𑀺 𑀲𑁄𑀡𑀤𑀡𑁆𑀟𑀲𑀼𑀢𑁆𑀢’’𑀦𑁆𑀢𑀺 𑀆𑀳. 𑀲𑀼𑀦𑁆𑀤𑀭𑀪𑀸𑀯𑁂𑀦 𑀲𑀸𑀢𑀺𑀲𑀬𑀸𑀦𑀺 𑀅𑀗𑁆𑀕𑀸𑀦𑀺 𑀏𑀢𑁂𑀲𑀫𑀢𑁆𑀣𑀻𑀢𑀺 𑀅𑀗𑁆𑀕𑀸. 𑀢𑀤𑁆𑀥𑀺𑀢𑀧𑀘𑁆𑀘𑀬𑀲𑁆𑀲 𑀅𑀢𑀺𑀲𑀬𑀯𑀺𑀲𑀺𑀝𑁆𑀞𑁂 𑀅𑀢𑁆𑀣𑀺𑀢𑀸𑀅𑀢𑁆𑀣𑁂 𑀧𑀯𑀢𑁆𑀢𑀺𑀢𑁄, 𑀧𑀥𑀸𑀦𑀢𑁄 𑀭𑀸𑀚𑀓𑀼𑀫𑀸𑀭𑀸, 𑀭𑀼𑀴𑁆𑀳𑀺𑀯𑀲𑁂𑀦 𑀧𑀦 𑀚𑀦𑀧𑀤𑁄𑀢𑀺 𑀯𑀼𑀢𑁆𑀢𑀁 ‘‘𑀅𑀗𑁆𑀕𑀸 𑀦𑀸𑀫𑀸’’𑀢𑀺𑀆𑀤𑀺. 𑀇𑀥𑀸𑀧𑀺 𑀅𑀥𑀺𑀧𑁆𑀧𑁂𑀢𑀸, 𑀦 𑀅𑀫𑁆𑀩𑀝𑁆𑀞𑀲𑀼𑀢𑁆𑀢𑁂 𑀏𑀯. ‘‘𑀢𑀤𑀸 𑀓𑀺𑀭𑀸’’𑀢𑀺𑀆𑀤𑀺 𑀢𑀲𑁆𑀲𑀸 𑀘𑀸𑀭𑀺𑀓𑀸𑀬 𑀓𑀸𑀭𑀡𑀯𑀘𑀦𑀁. 𑀆𑀕𑀫𑀦𑁂 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑁆𑀯𑀸 𑀧𑀝𑀺𑀓𑁆𑀔𑀺𑀧𑀦𑀯𑀲𑁂𑀦 𑀆𑀕𑀦𑁆𑀢𑀼𑀁 𑀦 𑀤𑀲𑁆𑀲𑀦𑁆𑀢𑀺, 𑀦𑀸𑀦𑀼𑀚𑀸𑀦𑀺𑀲𑁆𑀲𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀦𑀻𑀮𑀸𑀲𑁄𑀓𑀓𑀡𑀺𑀓𑀸𑀭𑀓𑁄𑀯𑀺𑀴𑀸𑀭𑀓𑀼𑀦𑁆𑀤𑀭𑀸𑀚𑀭𑀼𑀓𑁆𑀔𑀸𑀤𑀺𑀲𑀫𑁆𑀫𑀺𑀲𑁆𑀲𑀢𑀸𑀬 𑀢𑀁 𑀘𑀫𑁆𑀧𑀓𑀯𑀦𑀁 𑀦𑀻𑀮𑀸𑀤𑀺𑀧𑀜𑁆𑀘𑀯𑀡𑁆𑀡𑀓𑀼𑀲𑀼𑀫𑀧𑀝𑀺𑀫𑀡𑁆𑀟𑀺𑀢𑀁, 𑀦 𑀘𑀫𑁆𑀧𑀓𑀭𑀼𑀓𑁆𑀔𑀸𑀦𑀜𑁆𑀜𑁂𑀯 𑀦𑀻𑀮𑀸𑀤𑀺𑀧𑀜𑁆𑀘𑀯𑀡𑁆𑀡𑀓𑀼𑀲𑀼𑀫𑀢𑀸𑀬𑀸𑀢𑀺 𑀯𑀤𑀦𑁆𑀢𑀺, 𑀢𑀣𑀸𑀭𑀽𑀧𑀸𑀬 𑀧𑀦 𑀥𑀸𑀢𑀼𑀬𑀸 𑀘𑀫𑁆𑀧𑀓𑀭𑀼𑀓𑁆𑀔𑀸𑀯 𑀦𑀻𑀮𑀸𑀤𑀺𑀧𑀜𑁆𑀘𑀯𑀡𑁆𑀡𑀫𑁆𑀧𑀺 𑀓𑀼𑀲𑀼𑀫𑀁 𑀧𑀼𑀧𑁆𑀨𑀦𑁆𑀢𑀺. 𑀇𑀤𑀸𑀦𑀺𑀧𑀺 𑀳𑀺 𑀓𑀢𑁆𑀣𑀘𑀺 𑀤𑁂𑀲𑁂 𑀤𑀺𑀲𑁆𑀲𑀦𑁆𑀢𑀺, 𑀏𑀯𑀜𑁆𑀘 𑀬𑀣𑀸𑀭𑀼𑀢𑀫𑁆𑀧𑀺 𑀅𑀝𑁆𑀞𑀓𑀣𑀸𑀯𑀘𑀦𑀁 𑀉𑀧𑀧𑀦𑁆𑀦𑀁 𑀳𑁄𑀢𑀺. 𑀓𑀼𑀲𑀼𑀫𑀕𑀦𑁆𑀥𑀲𑀼𑀕𑀦𑁆𑀥𑁂𑀢𑀺 𑀯𑀼𑀢𑁆𑀢𑀦𑀬𑁂𑀦 𑀲𑀫𑁆𑀫𑀺𑀲𑁆𑀲𑀓𑀸𑀦𑀁, 𑀲𑀼𑀤𑁆𑀥𑀘𑀫𑁆𑀧𑀓𑀸𑀦𑀁 𑀯𑀸 𑀓𑀼𑀲𑀼𑀫𑀸𑀦𑀁 𑀕𑀦𑁆𑀥𑁂𑀳𑀺 𑀲𑀼𑀕𑀦𑁆𑀥𑁂. 𑀏𑀯𑀁 𑀧𑀦 𑀯𑀤𑀦𑁆𑀢𑁄 𑀦 𑀫𑀸𑀧𑀦𑀓𑀸𑀮𑁂𑀬𑁂𑀯 𑀢𑀲𑁆𑀫𑀺𑀁 𑀦𑀕𑀭𑁂 𑀘𑀫𑁆𑀧𑀓𑀭𑀼𑀓𑁆𑀔𑀸 𑀉𑀲𑁆𑀲𑀦𑁆𑀦𑀸, 𑀅𑀣 𑀔𑁄 𑀅𑀧𑀭𑀪𑀸𑀕𑁂𑀧𑀻𑀢𑀺 𑀤𑀲𑁆𑀲𑁂𑀢𑀺. 𑀫𑀸𑀧𑀦𑀓𑀸𑀮𑁂 𑀳𑀺 𑀘𑀫𑁆𑀧𑀓𑀭𑀼𑀓𑁆𑀔𑀸𑀦𑀫𑀼𑀲𑁆𑀲𑀦𑁆𑀦𑀢𑀸𑀬 𑀢𑀁 𑀦𑀕𑀭𑀁 ‘‘𑀘𑀫𑁆𑀧𑀸’’𑀢𑀺 𑀦𑀸𑀫𑀁 𑀮𑀪𑀺. 𑀇𑀲𑁆𑀲𑀭𑀢𑁆𑀢𑀸𑀢𑀺 𑀅𑀥𑀺𑀧𑀢𑀺𑀪𑀸𑀯𑀢𑁄. 𑀲𑁂𑀦𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑁂𑀦𑀺𑀓𑁄, 𑀲𑁆𑀯𑁂𑀯 𑀲𑁂𑀦𑀺𑀬𑁄. 𑀩𑀳𑀼𑀪𑀸𑀯𑀯𑀺𑀲𑀺𑀝𑁆𑀞𑀸 𑀘𑁂𑀢𑁆𑀣 𑀅𑀢𑁆𑀣𑀺𑀢𑀸 𑀢𑀤𑁆𑀥𑀺𑀢𑀧𑀘𑁆𑀘𑀬𑁂𑀦 𑀚𑁄𑀢𑀺𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀫𑀳𑀢𑀺𑀬𑀸 𑀲𑁂𑀦𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸’’𑀢𑀺. 𑀲𑀸𑀭𑀲𑀼𑀯𑀡𑁆𑀡𑀲𑀤𑀺𑀲𑀢𑀸𑀬𑀸𑀢𑀺 𑀉𑀢𑁆𑀢𑀫𑀚𑀸𑀢𑀺𑀲𑀼𑀯𑀡𑁆𑀡𑀲𑀤𑀺𑀲𑀢𑀸𑀬. 𑀘𑀽𑀴𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑀼𑀢𑁆𑀢𑀝𑁆𑀞𑀓𑀣𑀸𑀬𑀁 𑀧𑀦 𑀏𑀯𑀁 𑀯𑀼𑀢𑁆𑀢𑀁 ‘‘𑀲𑁂𑀦𑀺𑀬𑁄’’𑀢𑀺 𑀢𑀲𑁆𑀲 𑀦𑀸𑀫𑀁, 𑀩𑀺𑀫𑁆𑀩𑀻𑀢𑀺 𑀅𑀢𑁆𑀢𑀪𑀸𑀯𑀲𑁆𑀲 𑀦𑀸𑀫𑀁 𑀯𑀼𑀘𑁆𑀘𑀢𑀺, 𑀲𑁄 𑀢𑀲𑁆𑀲 𑀲𑀸𑀭𑀪𑀽𑀢𑁄 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄 𑀅𑀢𑁆𑀢𑀪𑀸𑀯𑀲𑀫𑀺𑀤𑁆𑀥𑀺𑀬𑀸 𑀩𑀺𑀫𑁆𑀩𑀺𑀲𑀸𑀭𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀫. 𑀦𑀺. 𑀅𑀝𑁆𑀞. 𑁧.𑁧𑁮𑁦).

𑁩𑁦𑁧-𑁨. 𑀲𑀁𑀳𑀢𑀸𑀢𑀺 𑀲𑀦𑁆𑀦𑀺𑀧𑀢𑀦𑀯𑀲𑁂𑀦 𑀲𑀗𑁆𑀖𑀝𑀺𑀢𑀸, 𑀲𑀦𑁆𑀦𑀺𑀧𑀢𑀺𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀓𑁂𑀓𑀺𑀲𑁆𑀲𑀸𑀬 𑀤𑀺𑀲𑀸𑀬𑀸𑀢𑀺 𑀏𑀓𑁂𑀓𑀸𑀬 𑀧𑀤𑁂𑀲𑀪𑀽𑀢𑀸𑀬 𑀤𑀺𑀲𑀸𑀬. 𑀧𑀸𑀴𑀺𑀬𑀁 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀦𑀫𑀥𑀺𑀧𑁆𑀧𑁂𑀢𑀢𑁆𑀢𑀸 ‘‘𑀲𑀗𑁆𑀖𑀺𑀦𑁄’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀲𑀗𑁆𑀖𑀻’’𑀢𑀺 𑀧𑀼𑀣𑀼𑀢𑁆𑀢𑁂 𑀏𑀓𑀯𑀘𑀦𑀁 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀏𑀢𑁂𑀲’’𑀦𑁆𑀢𑀺 𑀇𑀫𑀺𑀦𑀸. 𑀏𑀯𑀁 𑀆𑀘𑀭𑀺𑀬𑁂𑀦 (𑀤𑀻. 𑀦𑀺. 𑀝𑀻. 𑁧.𑁩𑁦𑁧, 𑁩𑁦𑁨) 𑀯𑀼𑀢𑁆𑀢𑀁, 𑀲𑀗𑁆𑀖𑀻𑀢𑀺 𑀧𑀦 𑀤𑀻𑀖𑀯𑀲𑁂𑀦 𑀩𑀳𑀼𑀯𑀘𑀦𑀫𑁆𑀧𑀺 𑀤𑀺𑀲𑁆𑀲𑀢𑀺. 𑀅𑀕𑀡𑀸𑀢𑀺 𑀅𑀲𑀫𑀽𑀳𑀪𑀽𑀢𑀸 𑀅𑀕𑀡𑀩𑀦𑁆𑀥𑀸, ‘‘𑀅𑀕𑀡𑀦𑀸’’𑀢𑀺𑀧𑀺 𑀧𑀸𑀞𑁄, 𑀅𑀬𑀫𑁂𑀯𑀢𑁆𑀣𑁄, 𑀲𑀗𑁆𑀔𑁆𑀬𑀸𑀢𑁆𑀣𑀲𑁆𑀲 𑀅𑀬𑀼𑀢𑁆𑀢𑀢𑁆𑀢𑀸. 𑀦 𑀳𑀺 𑀢𑁂𑀲𑀁 𑀲𑀗𑁆𑀔𑁆𑀬𑀸 𑀅𑀢𑁆𑀣𑀻𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀧𑀼𑀩𑁆𑀩𑁂 𑀅𑀦𑁆𑀢𑁄𑀦𑀕𑀭𑁂 𑀅𑀕𑀡𑀸𑀧𑀺 𑀧𑀘𑁆𑀙𑀸 𑀩𑀳𑀺𑀦𑀕𑀭𑁂 𑀕𑀡𑀁 𑀪𑀽𑀢𑀸 𑀧𑀢𑁆𑀢𑀸𑀢𑀺 𑀕𑀡𑀻𑀪𑀽𑀢𑀸𑀢𑀺. 𑀅𑀪𑀽𑀢𑀢𑀩𑁆𑀪𑀸𑀯𑁂 𑀳𑀺 𑀓𑀭𑀸𑀲𑀪𑀽𑀬𑁄𑀕𑁂 𑀅-𑀓𑀸𑀭𑀲𑁆𑀲 𑀈-𑀓𑀸𑀭𑀸𑀤𑁂𑀲𑁄, 𑀈𑀧𑀘𑁆𑀘𑀬𑁄 𑀯𑀸. 𑀭𑀸𑀚𑀭𑀸𑀚𑀜𑁆𑀜𑀸𑀤𑀻𑀦𑀁 𑀤𑀡𑁆𑀟𑀥𑀭𑁄 𑀧𑀼𑀭𑀺𑀲𑁄𑀯 𑀢𑀢𑁄 𑀢𑀢𑁄 𑀔𑀢𑁆𑀢𑀺𑀬𑀸𑀦𑀁 𑀢𑀸𑀬𑀦𑀢𑁄 𑀭𑀓𑁆𑀔𑀡𑀢𑁄 𑀔𑀢𑁆𑀢𑀸 𑀦𑀺𑀭𑀼𑀢𑁆𑀢𑀺𑀦𑀬𑁂𑀦. 𑀲𑁄 𑀳𑀺 𑀬𑀢𑁆𑀣 𑀢𑁂𑀳𑀺 𑀧𑁂𑀲𑀺𑀢𑁄, 𑀢𑀢𑁆𑀣 𑀢𑁂𑀲𑀁 𑀤𑁄𑀲𑀁 𑀧𑀭𑀺𑀳𑀭𑀦𑁆𑀢𑁄 𑀬𑀼𑀢𑁆𑀢𑀧𑀢𑁆𑀢𑀯𑀲𑁂𑀦 𑀧𑀼𑀘𑁆𑀙𑀺𑀢𑀫𑀢𑁆𑀣𑀁 𑀓𑀣𑁂𑀢𑀺. 𑀢𑁂𑀦𑀸𑀳 ‘‘𑀧𑀼𑀘𑁆𑀙𑀺𑀢𑀧𑀜𑁆𑀳𑁂 𑀩𑁆𑀬𑀸𑀓𑀭𑀡𑀲𑀫𑀢𑁆𑀣𑁄’’𑀢𑀺. 𑀓𑀼𑀮𑀸𑀧𑀤𑁂𑀲𑀸𑀤𑀺𑀦𑀸 𑀫𑀳𑀢𑀻 𑀫𑀢𑁆𑀢𑀸 𑀧𑀫𑀸𑀡𑀫𑁂𑀢𑀲𑁆𑀲𑀸𑀢𑀺 𑀫𑀳𑀸𑀫𑀢𑁆𑀢𑁄.

𑀲𑁄𑀡𑀤𑀡𑁆𑀟𑀕𑀼𑀡𑀓𑀣𑀸𑀯𑀡𑁆𑀡𑀦𑀸

𑁩𑁦𑁩. 𑀏𑀓𑀲𑁆𑀲 𑀭𑀜𑁆𑀜𑁄 𑀆𑀡𑀸𑀧𑀯𑀢𑁆𑀢𑀺𑀝𑁆𑀞𑀸𑀦𑀸𑀦𑀺 𑀭𑀚𑁆𑀚𑀸𑀦𑀺 𑀦𑀸𑀫, 𑀯𑀺𑀲𑀺𑀝𑁆𑀞𑀸𑀦𑀺 𑀭𑀚𑁆𑀚𑀸𑀦𑀺 𑀯𑀺𑀭𑀚𑁆𑀚𑀸𑀦𑀺, 𑀢𑀸𑀦𑁂𑀯 𑀯𑁂𑀭𑀚𑁆𑀚𑀸𑀦𑀺, 𑀦𑀸𑀦𑀸𑀯𑀺𑀥𑀸𑀦𑀺 𑀯𑁂𑀭𑀚𑁆𑀚𑀸𑀦𑀺 𑀢𑀣𑀸, 𑀢𑁂𑀲𑀼 𑀚𑀸𑀢𑀸𑀢𑀺𑀆𑀤𑀺𑀦𑀸 𑀢𑀺𑀥𑀸 𑀢𑀤𑁆𑀥𑀺𑀢𑀦𑀺𑀩𑁆𑀩𑀘𑀦𑀁. 𑀯𑀺𑀘𑀺𑀢𑁆𑀭𑀸 𑀳𑀺 𑀢𑀤𑁆𑀥𑀺𑀢𑀯𑀼𑀢𑁆𑀢𑀻𑀢𑀺. 𑀬𑀜𑁆𑀜𑀸𑀦𑀼𑀪𑀯𑀦𑀢𑁆𑀣𑀦𑁆𑀢𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀬𑀜𑁆𑀜𑀲𑁆𑀲 𑀅𑀦𑀼𑀪𑀯𑀦𑀢𑁆𑀣𑀁. 𑀢𑁂𑀢𑀺 𑀦𑀸𑀦𑀸𑀯𑁂𑀭𑀚𑁆𑀚𑀓𑀸 𑀩𑁆𑀭𑀸𑀳𑁆𑀫𑀡𑀸. 𑀢𑀲𑁆𑀲𑀸𑀢𑀺 𑀲𑁄𑀡𑀤𑀡𑁆𑀟𑀩𑁆𑀭𑀸𑀳𑁆𑀫𑀡𑀲𑁆𑀲. 𑀉𑀢𑁆𑀢𑀫𑀩𑁆𑀭𑀸𑀳𑁆𑀫𑀡𑁄𑀢𑀺 𑀅𑀪𑀺𑀚𑀦𑀲𑀫𑁆𑀧𑀢𑁆𑀢𑀺𑀬𑀸, 𑀯𑀺𑀢𑁆𑀢𑀲𑀫𑁆𑀧𑀢𑁆𑀢𑀺𑀬𑀸, 𑀯𑀺𑀚𑁆𑀚𑀸𑀲𑀫𑁆𑀧𑀢𑁆𑀢𑀺𑀬𑀸 𑀘 𑀉𑀕𑁆𑀕𑀢𑀢𑀭𑁄, 𑀉𑀴𑀸𑀭𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄. 𑀆𑀯𑀝𑁆𑀝𑀦𑀻𑀫𑀸𑀬𑀸 𑀯𑀼𑀢𑁆𑀢𑀸𑀯. 𑀮𑀸𑀪𑀫𑀘𑁆𑀙𑁂𑀭𑁂𑀦 𑀦𑀺𑀧𑁆𑀧𑀻𑀴𑀺𑀢𑀢𑀸𑀬 𑀅𑀲𑀦𑁆𑀦𑀺𑀧𑀸𑀢𑁄 𑀪𑀯𑀺𑀲𑁆𑀲𑀢𑀺.

𑀅𑀗𑁆𑀕𑁂𑀢𑀺 𑀕𑀫𑁂𑀢𑀺 𑀅𑀢𑁆𑀢𑀦𑁄 𑀨𑀮𑀁 𑀜𑀸𑀧𑁂𑀢𑀺, 𑀲𑀬𑀁 𑀯𑀸 𑀅𑀗𑁆𑀕𑀻𑀬𑀢𑀺 𑀕𑀫𑀻𑀬𑀢𑀺 𑀜𑀸𑀬𑀢𑀻𑀢𑀺 𑀅𑀗𑁆𑀕𑀁, 𑀳𑁂𑀢𑀼. 𑀢𑁂𑀦𑀸𑀳 ‘‘𑀓𑀸𑀭𑀡𑁂𑀦𑀸’’𑀢𑀺. 𑀮𑁄𑀓𑀥𑀫𑁆𑀫𑀢𑀸𑀦𑀼𑀲𑁆𑀲𑀭𑀡𑁂𑀦 𑀅𑀧𑀭𑀸𑀦𑀺𑀧𑀺 𑀓𑀸𑀭𑀡𑀸𑀦𑀺 𑀆𑀳𑀁𑀲𑀽𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀯’’𑀦𑁆𑀢𑀺𑀆𑀤𑀺𑀫𑀸𑀳.

𑀤𑁆𑀯𑀻𑀳𑀺 𑀧𑀓𑁆𑀔𑁂𑀳𑀻𑀢𑀺 𑀫𑀸𑀢𑀼𑀧𑀓𑁆𑀔𑁂𑀦, 𑀧𑀺𑀢𑀼𑀧𑀓𑁆𑀔𑁂𑀦 𑀘𑀸𑀢𑀺 𑀤𑁆𑀯𑀻𑀳𑀺 𑀜𑀸𑀢𑀺𑀧𑀓𑁆𑀔𑁂𑀳𑀺. ‘‘𑀉𑀪𑀢𑁄 𑀲𑀼𑀚𑀸𑀢𑁄’’𑀢𑀺 𑀳𑀺 𑀏𑀢𑁆𑀣𑀓𑁂𑀬𑁂𑀯 𑀯𑀼𑀢𑁆𑀢𑁂 𑀬𑁂𑀳𑀺 𑀓𑁂𑀳𑀺𑀘𑀺 𑀤𑁆𑀯𑀻𑀳𑀺 𑀪𑀸𑀕𑁂𑀳𑀺 𑀲𑀼𑀚𑀸𑀢𑀢𑁆𑀢𑀁 𑀯𑀺𑀚𑀸𑀦𑁂𑀬𑁆𑀬, 𑀲𑀼𑀚𑀸𑀢𑀲𑀤𑁆𑀤𑁄 𑀘 ‘‘𑀲𑀼𑀚𑀸𑀢𑁄 𑀘𑀸𑀭𑀼𑀤𑀲𑁆𑀲𑀦𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁩𑁯𑁯) 𑀆𑀭𑁄𑀳𑀲𑀫𑁆𑀧𑀢𑁆𑀢𑀺𑀧𑀭𑀺𑀬𑀸𑀬𑁄𑀧𑀺 𑀳𑁄𑀢𑀻𑀢𑀺 𑀚𑀸𑀢𑀺𑀯𑀲𑁂𑀦𑁂𑀯 𑀲𑀼𑀚𑀸𑀢𑀢𑁆𑀢𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀪𑁄𑀢𑁄 𑀫𑀸𑀢𑀸 𑀩𑁆𑀭𑀸𑀳𑁆𑀫𑀡𑀻’’𑀢𑀺𑀆𑀤𑀺. 𑀏𑀯𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦, 𑀫𑀸𑀢𑀼𑀧𑀓𑁆𑀔𑀢𑁄 𑀘 𑀧𑀺𑀢𑀼𑀧𑀓𑁆𑀔𑀢𑁄 𑀘 𑀧𑀘𑁆𑀘𑁂𑀓𑀁 𑀢𑀺𑀯𑀺𑀥𑁂𑀦 𑀜𑀸𑀢𑀺𑀧𑀭𑀺𑀯𑀝𑁆𑀝𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄’’𑀢𑀺 𑀇𑀫𑀺𑀦𑀸𑀧𑀺 ‘‘𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘𑀸’’𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀲𑀫𑀢𑁆𑀣𑁂𑀢𑀻𑀢𑀺 𑀆𑀳 ‘‘𑀲𑀁𑀲𑀼𑀤𑁆𑀥𑀸 𑀢𑁂 𑀫𑀸𑀢𑀼𑀕𑀳𑀡𑀻’’𑀢𑀺, 𑀲𑀁𑀲𑀼𑀤𑁆𑀥𑀸𑀯 𑀅𑀦𑀜𑁆𑀜𑀧𑀼𑀭𑀺𑀲𑀲𑀸𑀥𑀸𑀭𑀡𑀸𑀢𑀺 𑀅𑀢𑁆𑀣𑁄. 𑀅𑀦𑁄𑀭𑀲𑀧𑀼𑀢𑁆𑀢𑀯𑀲𑁂𑀦𑀸𑀧𑀺 𑀳𑀺 𑀮𑁄𑀓𑁂 𑀫𑀸𑀢𑀸𑀧𑀺𑀢𑀼𑀲𑀫𑀜𑁆𑀜𑀸 𑀤𑀺𑀲𑁆𑀲𑀢𑀺, 𑀇𑀥 𑀧𑀦𑀲𑁆𑀲 𑀑𑀭𑀲𑀧𑀼𑀢𑁆𑀢𑀯𑀲𑁂𑀦𑁂𑀯 𑀇𑀘𑁆𑀙𑀺𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄’’𑀢𑀺 𑀯𑀼𑀢𑁆𑀢𑀁. 𑀕𑀩𑁆𑀪𑀁 𑀕𑀡𑁆𑀳𑀸𑀢𑀺 𑀥𑀸𑀭𑁂𑀢𑀻𑀢𑀺 𑀕𑀳𑀡𑀻, 𑀢𑀢𑀺𑀬𑀸𑀯𑀝𑁆𑀝𑀲𑀗𑁆𑀔𑀸𑀢𑁄 𑀕𑀩𑁆𑀪𑀸𑀲𑀬𑀲𑀜𑁆𑀜𑀺𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀧𑀤𑁂𑀲𑁄 𑀲𑀫𑀯𑁂𑀧𑀸𑀓𑀺𑀦𑀺𑀬𑀸𑀢𑀺 𑀲𑀫𑀯𑀺𑀧𑀸𑀘𑀦𑀺𑀬𑀸. 𑀏𑀢𑁆𑀣𑀸𑀢𑀺 𑀫𑀳𑀸𑀲𑀼𑀤𑀲𑁆𑀲𑀦𑀲𑀼𑀢𑁆𑀢𑁂. 𑀬𑀣𑀸𑀪𑀼𑀢𑁆𑀢𑀫𑀸𑀳𑀸𑀭𑀁 𑀯𑀺𑀧𑀸𑀘𑀦𑀯𑀲𑁂𑀦 𑀕𑀡𑁆𑀳𑀸𑀢𑀺 𑀦 𑀙𑀟𑁆𑀟𑁂𑀢𑀻𑀢𑀺 𑀕𑀳𑀡𑀻, 𑀓𑀫𑁆𑀫𑀚𑀢𑁂𑀚𑁄𑀥𑀸𑀢𑀼, 𑀬𑀸 ‘‘𑀉𑀤𑀭𑀕𑁆𑀕𑀻’’𑀢𑀺 𑀮𑁄𑀓𑁂 𑀧𑀜𑁆𑀜𑀸𑀬𑀢𑀺.

𑀧𑀺𑀢𑀼𑀧𑀺𑀢𑀸𑀢𑀺 𑀧𑀺𑀢𑀼𑀦𑁄 𑀧𑀺𑀢𑀸. 𑀧𑀺𑀢𑀸𑀫𑀳𑁄𑀢𑀺 𑀆𑀫𑀳-𑀧𑀘𑁆𑀘𑀬𑁂𑀦 𑀢𑀤𑁆𑀥𑀺𑀢𑀲𑀺𑀤𑁆𑀥𑀺. ‘‘𑀘𑀢𑀼𑀬𑀼𑀕’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀢𑀁 𑀢𑀤𑀢𑁆𑀣𑁂 𑀬𑀼𑀚𑁆𑀚𑀺𑀢𑀩𑁆𑀩𑀢𑁄 𑀓𑀸𑀮𑀯𑀺𑀲𑁂𑀲𑁄 𑀬𑀼𑀕𑀁 𑀦𑀸𑀫. 𑀏𑀢𑀁 𑀬𑀼𑀕𑀲𑀤𑁆𑀤𑁂𑀦 𑀆𑀬𑀼𑀧𑁆𑀧𑀫𑀸𑀡𑀯𑀘𑀦𑀁 𑀅𑀪𑀺𑀮𑀸𑀧𑀫𑀢𑁆𑀢𑀁 𑀮𑁄𑀓𑀯𑁄𑀳𑀸𑀭𑀯𑀘𑀦𑀫𑀢𑁆𑀢𑀫𑁂𑀯, 𑀅𑀥𑀺𑀧𑁆𑀧𑁂𑀢𑀢𑁆𑀣𑀢𑁄 𑀧𑀦 𑀧𑀺𑀢𑀸𑀫𑀳𑁄𑀬𑁂𑀯 𑀧𑀺𑀢𑀸𑀫𑀳𑀬𑀼𑀕𑀲𑀤𑁆𑀤𑁂𑀦 𑀯𑀼𑀢𑁆𑀢𑁄 𑀢𑀲𑁆𑀲𑁂𑀯 𑀧𑀥𑀸𑀦𑀪𑀸𑀯𑁂𑀦 𑀅𑀥𑀺𑀧𑁆𑀧𑁂𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁄 𑀉𑀤𑁆𑀥𑀦𑁆𑀢𑀺 𑀧𑀺𑀢𑀸𑀫𑀳𑀢𑁄 𑀉𑀧𑀭𑀺. 𑀢𑁂𑀦𑀸𑀳 ‘‘𑀧𑀼𑀩𑁆𑀩𑀧𑀼𑀭𑀺𑀲𑀸’’𑀢𑀺, 𑀢𑀤𑀯𑀲𑁂𑀲𑀸 𑀧𑀼𑀩𑁆𑀩𑀓𑀸 𑀙 𑀧𑀼𑀭𑀺𑀲𑀸𑀢𑀺 𑀅𑀢𑁆𑀣𑁄. 𑀧𑀼𑀭𑀺𑀲𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁂𑀦 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀜𑁆𑀳𑀺 ‘‘𑀫𑀸𑀢𑀺𑀢𑁄’’𑀢𑀺 𑀧𑀸𑀴𑀺𑀯𑀘𑀦𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺.

𑀢𑀢𑁆𑀭𑀸𑀬𑀫𑀝𑁆𑀞𑀓𑀣𑀸𑀫𑀼𑀢𑁆𑀢𑀓𑀦𑀬𑁄 𑁋 𑀫𑀸𑀢𑀸 𑀘 𑀧𑀺𑀢𑀸 𑀘 𑀧𑀺𑀢𑀭𑁄, 𑀧𑀺𑀢𑀽𑀦𑀁 𑀧𑀺𑀢𑀭𑁄 𑀧𑀺𑀢𑀸𑀫𑀳𑀸, 𑀢𑁂𑀲𑀁 𑀬𑀼𑀕𑁄 𑀤𑁆𑀯𑀦𑁆𑀤𑁄 𑀧𑀺𑀢𑀸𑀫𑀳𑀬𑀼𑀕𑁄, 𑀢𑀲𑁆𑀫𑀸, 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸 𑀧𑀺𑀢𑀸𑀫𑀳𑀤𑁆𑀯𑀦𑁆𑀤𑀸𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄, 𑀏𑀯𑀜𑁆𑀘 𑀧𑀺𑀢𑀸𑀫𑀳𑀕𑁆𑀕𑀳𑀡𑁂𑀦𑁂𑀯 𑀫𑀸𑀢𑀸𑀫𑀳𑁄𑀧𑀺 𑀕𑀳𑀺𑀢𑁄. 𑀬𑀼𑀕𑀲𑀤𑁆𑀤𑁄 𑀘𑁂𑀢𑁆𑀣 𑀏𑀓𑀲𑁂𑀲𑁄 ‘‘𑀬𑀼𑀕𑁄 𑀘 𑀬𑀼𑀕𑁄 𑀘 𑀬𑀼𑀕𑁄’’𑀢𑀺, 𑀅𑀢𑁄 𑀢𑀢𑁆𑀣 𑀢𑀢𑁆𑀣 𑀜𑀸𑀢𑀺𑀧𑀭𑀺𑀯𑀝𑁆𑀝𑁂 𑀧𑀺𑀢𑀸𑀫𑀳𑀤𑁆𑀯𑀦𑁆𑀤𑀁 𑀕𑀳𑀺𑀢𑀁 𑀳𑁄𑀢𑀻𑀢𑀺.

‘‘𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸’’𑀢𑀺 𑀇𑀤𑀁 𑀓𑀸𑀓𑀸𑀧𑁂𑀓𑁆𑀔𑀦𑀫𑀺𑀯 𑀉𑀪𑀬𑀢𑁆𑀣 𑀲𑀫𑁆𑀩𑀦𑁆𑀥𑀕𑀢𑀦𑁆𑀢𑀺 𑀆𑀳 ‘‘𑀏𑀯’’𑀦𑁆𑀢𑀺𑀆𑀤𑀺. 𑀬𑀸𑀯 𑀲𑀢𑁆𑀢𑀫𑁄 𑀧𑀼𑀭𑀺𑀲𑁄, 𑀢𑀸𑀯 𑀅𑀓𑁆𑀔𑀺𑀢𑁆𑀢𑁄 𑀅𑀦𑀼𑀧𑀓𑀼𑀝𑁆𑀞𑁄 𑀚𑀸𑀢𑀺𑀯𑀸𑀤𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀓𑁆𑀔𑀺𑀢𑁆𑀢𑁄𑀢𑀺 𑀅𑀧𑁆𑀧𑀢𑁆𑀢𑀔𑁂𑀧𑁄. 𑀅𑀦𑀯𑀓𑁆𑀔𑀺𑀢𑁆𑀢𑁄𑀢𑀺 𑀲𑀤𑁆𑀥𑀣𑀸𑀮𑀺𑀧𑀸𑀓𑀸𑀤𑀻𑀲𑀼 𑀦 𑀙𑀟𑁆𑀟𑀺𑀢𑁄. 𑀦 𑀉𑀧𑀓𑀼𑀝𑁆𑀞𑁄𑀢𑀺 𑀦 𑀉𑀧𑀓𑁆𑀓𑁄𑀲𑀺𑀢𑁄. ‘‘𑀚𑀸𑀢𑀺𑀯𑀸𑀤𑁂𑀦𑀸’’𑀢𑀺 𑀇𑀤𑀁 𑀳𑁂𑀢𑀼𑀫𑁆𑀳𑀺 𑀓𑀭𑀡𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀓𑁂𑀦 𑀓𑀸𑀭𑀡𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀢𑀺𑀧𑀻𑀢𑀺 𑀇𑀫𑀺𑀦𑀸𑀧𑀺 𑀓𑀸𑀭𑀡𑁂𑀦. 𑀏𑀢𑁆𑀣 𑀘 ‘‘𑀉𑀪𑀢𑁄…𑀧𑁂… 𑀬𑀼𑀕𑀸’’𑀢𑀺 𑀏𑀢𑁂𑀦 𑀩𑁆𑀭𑀸𑀳𑁆𑀫𑀡𑀲𑁆𑀲 𑀬𑁄𑀦𑀺𑀤𑁄𑀲𑀸𑀪𑀸𑀯𑁄 𑀤𑀲𑁆𑀲𑀺𑀢𑁄 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑀪𑀸𑀯𑀓𑀺𑀢𑁆𑀢𑀦𑀢𑁄, ‘‘𑀅𑀓𑁆𑀔𑀺𑀢𑁆𑀢𑁄’’𑀢𑀺 𑀏𑀢𑁂𑀦 𑀓𑀺𑀭𑀺𑀬𑀸𑀧𑀭𑀸𑀥𑀸𑀪𑀸𑀯𑁄. 𑀓𑀺𑀭𑀺𑀬𑀸𑀧𑀭𑀸𑀥𑁂𑀦 𑀳𑀺 𑀲𑀢𑁆𑀢𑀸 𑀔𑁂𑀧𑀁 𑀧𑀸𑀧𑀼𑀡𑀦𑁆𑀢𑀺. ‘‘𑀅𑀦𑀼𑀧𑀓𑀼𑀝𑁆𑀞𑁄’’𑀢𑀺 𑀏𑀢𑁂𑀦 𑀅𑀬𑀼𑀢𑁆𑀢𑀲𑀁𑀲𑀕𑁆𑀕𑀸𑀪𑀸𑀯𑁄. 𑀅𑀬𑀼𑀢𑁆𑀢𑀲𑀁𑀲𑀕𑁆𑀕𑀜𑁆𑀳𑀺 𑀧𑀝𑀺𑀘𑁆𑀘 𑀲𑀢𑁆𑀢𑀸 𑀅𑀓𑁆𑀓𑁄𑀲𑀁 𑀮𑀪𑀦𑁆𑀢𑀻𑀢𑀺.

𑀇𑀲𑁆𑀲𑀭𑁄𑀢𑀺 𑀆𑀥𑀺𑀧𑀢𑁂𑀬𑁆𑀬𑀲𑀁𑀯𑀢𑁆𑀢𑀦𑀺𑀬𑀓𑀫𑁆𑀫𑀩𑀮𑁂𑀦 𑀈𑀲𑀦𑀲𑀻𑀮𑁄, 𑀲𑀸 𑀧𑀦𑀲𑁆𑀲 𑀇𑀲𑁆𑀲𑀭𑀢𑀸 𑀯𑀺𑀪𑀯𑀲𑀫𑁆𑀧𑀢𑁆𑀢𑀺𑀧𑀘𑁆𑀘𑀬𑀸 𑀧𑀸𑀓𑀝𑀸 𑀚𑀸𑀢𑀸, 𑀢𑀲𑁆𑀫𑀸 𑀅𑀟𑁆𑀠𑀪𑀸𑀯𑀧𑀭𑀺𑀬𑀸𑀬𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀟𑁆𑀠𑁄𑀢𑀺 𑀇𑀲𑁆𑀲𑀭𑁄’’𑀢𑀺 𑀆𑀳. 𑀫𑀳𑀦𑁆𑀢𑀁 𑀥𑀦𑀫𑀲𑁆𑀲 𑀪𑀽𑀫𑀺𑀕𑀢𑀁, 𑀯𑁂𑀳𑀸𑀲𑀕𑀢𑀜𑁆𑀘𑀸𑀢𑀺 𑀫𑀳𑀤𑁆𑀥𑀦𑁄. 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀢𑀲𑁆𑀲 𑀕𑀼𑀡𑀲𑁆𑀲, 𑀅𑀬𑀫𑁂𑀯 𑀘 𑀧𑀸𑀞𑁄 𑀅𑀥𑀼𑀦𑀸 𑀤𑀺𑀲𑁆𑀲𑀢𑀺. 𑀅𑀕𑀼𑀡𑀁𑀬𑁂𑀯 𑀤𑀲𑁆𑀲𑁂𑀫𑀸𑀢𑀺 𑀅𑀦𑁆𑀯𑀬𑀢𑁄 𑀢𑀲𑁆𑀲 𑀕𑀼𑀡𑀁 𑀯𑀢𑁆𑀯𑀸 𑀩𑁆𑀬𑀢𑀺𑀭𑁂𑀓𑀢𑁄 𑀪𑀕𑀯𑀢𑁄 𑀅𑀦𑀼𑀧𑀲𑀗𑁆𑀓𑀫𑀦𑀓𑀸𑀭𑀡𑀁 𑀅𑀕𑀼𑀡𑀫𑁂𑀯 𑀤𑀲𑁆𑀲𑁂𑀫.

𑀅𑀥𑀺𑀓𑀭𑀽𑀧𑁄𑀢𑀺 𑀯𑀺𑀲𑀺𑀝𑁆𑀞𑀭𑀽𑀧𑁄 𑀉𑀢𑁆𑀢𑀫𑀲𑀭𑀻𑀭𑁄. 𑀤𑀲𑁆𑀲𑀦𑀁 𑀅𑀭𑀳𑀢𑀻𑀢𑀺 𑀤𑀲𑁆𑀲𑀦𑀻𑀬𑁄𑀢𑀺 𑀆𑀳 ‘‘𑀤𑀲𑁆𑀲𑀦𑀬𑁄𑀕𑁆𑀕𑁄’’𑀢𑀺. 𑀧𑀲𑀸𑀤𑀁 𑀆𑀯𑀳𑀢𑀻𑀢𑀺 𑀧𑀸𑀲𑀸𑀤𑀺𑀓𑁄. 𑀢𑁂𑀦𑀸𑀳 ‘‘𑀧𑀲𑀸𑀤𑀚𑀦𑀦𑀢𑁄’’𑀢𑀺. 𑀧𑁄𑀓𑁆𑀔𑀭𑀲𑀤𑁆𑀤𑁄 𑀇𑀥 𑀲𑀼𑀦𑁆𑀤𑀭𑀢𑁆𑀣𑁂, 𑀲𑀭𑀻𑀭𑀢𑁆𑀣𑁂 𑀘 𑀦𑀺𑀭𑀼𑀴𑁆𑀳𑁄. 𑀯𑀡𑁆𑀡𑀲𑁆𑀲𑀸𑀢𑀺 𑀯𑀡𑁆𑀡𑀥𑀸𑀢𑀼𑀬𑀸. 𑀧𑀓𑀸𑀲𑀦𑀺𑀬𑁂𑀦 𑀧𑀭𑀺𑀲𑀼𑀤𑁆𑀥𑀦𑀺𑀫𑀺𑀢𑁆𑀢𑁂𑀦 𑀯𑀡𑁆𑀡𑀲𑀤𑁆𑀤𑀲𑁆𑀲 𑀯𑀡𑁆𑀡𑀥𑀸𑀢𑀼𑀬𑀁 𑀧𑀯𑀢𑁆𑀢𑀦𑀢𑁄 𑀢𑀦𑁆𑀦𑀺𑀫𑀺𑀢𑁆𑀢𑀫𑁂𑀯 𑀯𑀡𑁆𑀡𑀢𑀸, 𑀲𑀸 𑀘 𑀯𑀡𑁆𑀡𑀦𑀺𑀲𑁆𑀲𑀺𑀢𑀸𑀢𑀺 𑀅𑀪𑁂𑀤𑀯𑀲𑁂𑀦 𑀯𑀼𑀢𑁆𑀢𑀁 ‘‘𑀉𑀢𑁆𑀢𑀫𑁂𑀦 𑀧𑀭𑀺𑀲𑀼𑀤𑁆𑀥𑁂𑀦 𑀯𑀡𑁆𑀡𑁂𑀦𑀸’’𑀢𑀺. 𑀲𑀭𑀻𑀭𑀁 𑀧𑀦 𑀲𑀦𑁆𑀦𑀺𑀯𑁂𑀲𑀯𑀺𑀲𑀺𑀝𑁆𑀞𑀁 𑀓𑀭𑀘𑀭𑀡𑀕𑀻𑀯𑀸𑀲𑀻𑀲𑀸𑀤𑀺𑀲𑀫𑀼𑀤𑀸𑀬𑀁, 𑀢𑀜𑁆𑀘 𑀅𑀯𑀬𑀯𑀪𑀽𑀢𑁂𑀦 𑀲𑀡𑁆𑀞𑀸𑀦𑀦𑀺𑀫𑀺𑀢𑁆𑀢𑁂𑀦 𑀕𑀬𑁆𑀳𑀢𑀺, 𑀢𑀲𑁆𑀫𑀸 𑀢𑀦𑁆𑀦𑀺𑀫𑀺𑀢𑁆𑀢𑀫𑁂𑀯 𑀧𑁄𑀓𑁆𑀔𑀭𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀲𑀭𑀻𑀭𑀲𑀡𑁆𑀞𑀸𑀦𑀲𑀫𑁆𑀧𑀢𑁆𑀢𑀺𑀬𑀸’’𑀢𑀺, 𑀉𑀢𑁆𑀢𑀫𑀸𑀬 𑀲𑀭𑀻𑀭𑀲𑀡𑁆𑀞𑀸𑀦𑀲𑀫𑁆𑀧𑀢𑁆𑀢𑀺𑀬𑀸𑀢𑀺𑀧𑀺 𑀬𑁄𑀚𑁂𑀢𑀩𑁆𑀩𑀁. 𑀅𑀢𑁆𑀣𑀯𑀲𑀸 𑀳𑀺 𑀮𑀺𑀗𑁆𑀕𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑁄. 𑀲𑀩𑁆𑀩𑁂𑀲𑀼 𑀯𑀡𑁆𑀡𑁂𑀲𑀼 𑀲𑀼𑀯𑀡𑁆𑀡𑀯𑀡𑁆𑀡𑁄𑀯 𑀉𑀢𑁆𑀢𑀫𑁄𑀢𑀺 𑀆𑀳 ‘‘𑀧𑀭𑀺𑀲𑀼𑀤𑁆𑀥𑀯𑀡𑁆𑀡𑁂𑀲𑀼𑀧𑀺 𑀲𑁂𑀝𑁆𑀞𑁂𑀦 𑀲𑀼𑀯𑀡𑁆𑀡𑀯𑀡𑁆𑀡𑁂𑀦 𑀲𑀫𑀦𑁆𑀦𑀸𑀕𑀢𑁄’’𑀢𑀺. 𑀢𑀣𑀸 𑀳𑀺 𑀩𑀼𑀤𑁆𑀥𑀸, 𑀘𑀓𑁆𑀓𑀯𑀢𑁆𑀢𑀺𑀦𑁄 𑀘 𑀲𑀼𑀯𑀡𑁆𑀡𑀯𑀡𑁆𑀡𑀸𑀯 𑀳𑁄𑀦𑁆𑀢𑀺. 𑀬𑀲𑁆𑀫𑀸 𑀧𑀦 𑀯𑀘𑁆𑀙𑀲𑀲𑀤𑁆𑀤𑁄 𑀲𑀭𑀻𑀭𑀸𑀪𑁂 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀩𑁆𑀭𑀳𑁆𑀫𑀯𑀘𑁆𑀙𑀲𑀻𑀢𑀺 𑀉𑀢𑁆𑀢𑀫𑀲𑀭𑀻𑀭𑀸𑀪𑁄, 𑀲𑀼𑀯𑀡𑁆𑀡𑀸𑀪𑁄 𑀇𑀘𑁆𑀘𑁂𑀯 𑀅𑀢𑁆𑀣𑁄. 𑀇𑀫𑀫𑁂𑀯 𑀳𑀺 𑀅𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀲𑀭𑀻𑀭𑀲𑀤𑀺𑀲𑁂𑀦𑁂𑀯 𑀲𑀭𑀻𑀭𑁂𑀦 𑀲𑀫𑀦𑁆𑀦𑀸𑀕𑀢𑁄’’𑀢𑀺 𑀯𑀼𑀢𑁆𑀢𑀁, 𑀦 𑀩𑁆𑀭𑀳𑁆𑀫𑀼𑀚𑀼𑀕𑀢𑁆𑀢𑀢𑀁. 𑀑𑀓𑀸𑀲𑁄𑀢𑀺 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀝𑁆𑀞𑀸𑀦𑀁. 𑀆𑀭𑁄𑀳𑀧𑀭𑀺𑀡𑀸𑀳𑀲𑀫𑁆𑀧𑀢𑁆𑀢𑀺𑀬𑀸, 𑀅𑀯𑀬𑀯𑀧𑀸𑀭𑀺𑀧𑀽𑀭𑀺𑀬𑀸 𑀘 𑀤𑀲𑁆𑀲𑀦𑀲𑁆𑀲 𑀑𑀓𑀸𑀲𑁄 𑀦 𑀔𑀼𑀤𑁆𑀤𑀓𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀲𑀩𑁆𑀩𑀸𑀦𑁂𑀯𑀸’’𑀢𑀺𑀆𑀤𑀺.

𑀲𑀻𑀮𑀦𑁆𑀢𑀺 𑀬𑀫𑀦𑀺𑀬𑀫𑀮𑀓𑁆𑀔𑀡𑀁 𑀲𑀻𑀮𑀁, 𑀢𑀁 𑀧𑀦𑀲𑁆𑀲 𑀭𑀢𑁆𑀢𑀜𑁆𑀜𑀼𑀢𑀸𑀬 𑀯𑀼𑀤𑁆𑀥𑀁 𑀯𑀤𑁆𑀥𑀺𑀢𑀦𑁆𑀢𑀺 𑀯𑀺𑀲𑁂𑀲𑀢𑁄 ‘‘𑀯𑀼𑀤𑁆𑀥𑀲𑀻𑀮𑀻’’𑀢𑀺 𑀯𑀼𑀢𑁆𑀢𑀁. 𑀯𑀼𑀤𑁆𑀥𑀲𑀻𑀮𑁂𑀦𑀸𑀢𑀺 𑀲𑀩𑁆𑀩𑀤𑀸 𑀲𑀫𑁆𑀫𑀸𑀬𑁄𑀕𑀢𑁄 𑀯𑀼𑀤𑁆𑀥𑁂𑀦 𑀥𑀼𑀯𑀲𑀻𑀮𑁂𑀦. 𑀏𑀯𑀜𑁆𑀘 𑀓𑀢𑁆𑀯𑀸 𑀧𑀤𑀢𑁆𑀢𑀬𑀫𑁆𑀧𑁂𑀢𑀁 𑀅𑀥𑀺𑀧𑁆𑀧𑁂𑀢𑀢𑁆𑀣𑀢𑁄 𑀯𑀺𑀲𑀺𑀝𑁆𑀞𑀁 𑀳𑁄𑀢𑀺, 𑀲𑀤𑁆𑀤𑀢𑁆𑀣𑀫𑀢𑁆𑀢𑀁 𑀧𑀦 𑀲𑀦𑁆𑀥𑀸𑀬 ‘‘𑀇𑀤𑀁 𑀯𑀼𑀤𑁆𑀥𑀲𑀻𑀮𑀻𑀧𑀤𑀲𑁆𑀲𑁂𑀯 𑀯𑁂𑀯𑀘𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀜𑁆𑀘𑀲𑀻𑀮𑀢𑁄 𑀧𑀭𑀁 𑀢𑀢𑁆𑀣 𑀲𑀻𑀮𑀲𑁆𑀲 𑀅𑀪𑀸𑀯𑀢𑁄, 𑀢𑁂𑀲𑀫𑀚𑀸𑀦𑀦𑀢𑁄 𑀘 ‘‘𑀧𑀜𑁆𑀘𑀲𑀻𑀮𑀫𑀢𑁆𑀢𑀫𑁂𑀯𑀸’’𑀢𑀺 𑀆𑀳.

𑀯𑀸𑀘𑀸𑀬 𑀧𑀭𑀺𑀫𑀡𑁆𑀟𑀮𑀧𑀤𑀩𑁆𑀬𑀜𑁆𑀚𑀦𑀢𑀸 𑀏𑀯 𑀲𑀼𑀦𑁆𑀤𑀭𑀪𑀸𑀯𑁄𑀢𑀺 𑀯𑀼𑀢𑁆𑀢𑀁 ‘‘𑀲𑀼𑀦𑁆𑀤𑀭𑀸 𑀧𑀭𑀺𑀫𑀡𑁆𑀟𑀮𑀧𑀤𑀩𑁆𑀬𑀜𑁆𑀚𑀦𑀸’’𑀢𑀺. 𑀞𑀸𑀦𑀓𑀭𑀡𑀲𑀫𑁆𑀧𑀢𑁆𑀢𑀺𑀬𑀸, 𑀲𑀺𑀓𑁆𑀔𑀸𑀲𑀫𑁆𑀧𑀢𑁆𑀢𑀺𑀬𑀸 𑀘 𑀓𑀲𑁆𑀲𑀘𑀺𑀧𑀺 𑀅𑀦𑀽𑀦𑀢𑀸𑀬 𑀧𑀭𑀺𑀫𑀡𑁆𑀟𑀮𑀧𑀤𑀸𑀦𑀺 𑀩𑁆𑀬𑀜𑁆𑀚𑀦𑀸𑀦𑀺 𑀅𑀓𑁆𑀔𑀭𑀸𑀦𑀺 𑀏𑀢𑀺𑀲𑁆𑀲𑀸𑀢𑀺 𑀧𑀭𑀺𑀫𑀡𑁆𑀟𑀮𑀧𑀤𑀩𑁆𑀬𑀜𑁆𑀚𑀦𑀸. 𑀅𑀓𑁆𑀔𑀭𑀫𑁂𑀯 𑀳𑀺 𑀢𑀁𑀢𑀤𑀢𑁆𑀣𑀯𑀸𑀘𑀓𑀪𑀸𑀯𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀁 𑀧𑀤𑀁. 𑀅𑀣 𑀯𑀸 𑀧𑀤𑀫𑁂𑀯 𑀅𑀢𑁆𑀣𑀲𑁆𑀲 𑀩𑁆𑀬𑀜𑁆𑀚𑀓𑀢𑁆𑀢𑀸 𑀩𑁆𑀬𑀜𑁆𑀚𑀦𑀁, 𑀲𑀺𑀣𑀺𑀮𑀥𑀦𑀺𑀢𑀸𑀤𑀺𑀅𑀓𑁆𑀔𑀭𑀧𑀸𑀭𑀺𑀧𑀽𑀭𑀺𑀬𑀸 𑀘 𑀧𑀤𑀩𑁆𑀬𑀜𑁆𑀚𑀦𑀲𑁆𑀲 𑀧𑀭𑀺𑀫𑀡𑁆𑀟𑀮𑀢𑀸, 𑀧𑀭𑀺𑀫𑀡𑁆𑀟𑀮𑀁 𑀧𑀤𑀩𑁆𑀬𑀜𑁆𑀚𑀦𑀫𑁂𑀢𑀺𑀲𑁆𑀲𑀸𑀢𑀺 𑀢𑀣𑀸. 𑀅𑀧𑀺𑀘 𑀧𑀚𑁆𑀚𑀢𑀺 𑀅𑀢𑁆𑀣𑁄 𑀏𑀢𑁂𑀦𑀸𑀢𑀺 𑀧𑀤𑀁, 𑀦𑀸𑀫𑀸𑀤𑀺, 𑀬𑀣𑀸𑀥𑀺𑀧𑁆𑀧𑁂𑀢𑀫𑀢𑁆𑀣𑀁 𑀩𑁆𑀬𑀜𑁆𑀚𑁂𑀢𑀻𑀢𑀺 𑀩𑁆𑀬𑀜𑁆𑀚𑀦𑀁, 𑀯𑀸𑀓𑁆𑀬𑀁, 𑀢𑁂𑀲𑀁 𑀧𑀭𑀺𑀧𑀼𑀡𑁆𑀡𑀢𑀸𑀬 𑀧𑀭𑀺𑀫𑀡𑁆𑀟𑀮𑀧𑀤𑀩𑁆𑀬𑀜𑁆𑀚𑀦𑀸. 𑀅𑀢𑁆𑀣𑀯𑀺𑀜𑁆𑀜𑀸𑀧𑀦𑁂 𑀲𑀸𑀥𑀦𑀢𑀸𑀬 𑀯𑀸𑀘𑀸𑀯 𑀓𑀭𑀡𑀁 𑀯𑀸𑀓𑁆𑀓𑀭𑀡𑀦𑁆𑀢𑀺 𑀢𑀼𑀮𑁆𑀬𑀸𑀥𑀺𑀓𑀭𑀡𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀉𑀤𑀸𑀳𑀭𑀡𑀖𑁄𑀲𑁄’’𑀢𑀺 𑀯𑀼𑀢𑁆𑀢𑀁, 𑀯𑀘𑀻𑀪𑁂𑀤𑀲𑀤𑁆𑀤𑁄𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲, 𑀢𑁂𑀦 𑀯𑀸 𑀪𑀸𑀲𑀺𑀢𑀩𑁆𑀩𑀲𑁆𑀲 𑀅𑀢𑁆𑀣𑀲𑁆𑀲 𑀕𑀼𑀡𑀧𑀭𑀺𑀧𑀼𑀡𑁆𑀡𑀪𑀸𑀯𑁂𑀦 𑀧𑀽𑀭𑁂 𑀕𑀼𑀡𑁂𑀳𑀺 𑀧𑀭𑀺𑀧𑀼𑀡𑁆𑀡𑀪𑀸𑀯𑁂 𑀪𑀯𑀸𑀢𑀺 𑀧𑁄𑀭𑀻. 𑀧𑀼𑀦 𑀧𑀼𑀭𑁂𑀢𑀺 𑀭𑀸𑀚𑀥𑀸𑀦𑀻𑀫𑀳𑀸𑀦𑀕𑀭𑁂. 𑀪𑀯𑀢𑁆𑀢𑀸𑀢𑀺 𑀲𑀁𑀯𑀟𑁆𑀠𑀢𑁆𑀢𑀸. 𑀲𑀼𑀔𑀼𑀫𑀸𑀮𑀢𑁆𑀢𑀦𑁂𑀦𑀸𑀢𑀺 𑀲𑀼𑀔𑀼𑀫𑀸𑀮𑀪𑀸𑀯𑁂𑀦, 𑀇𑀫𑀺𑀦𑀸 𑀢𑀲𑁆𑀲𑀸 𑀯𑀸𑀘𑀸𑀬 𑀫𑀼𑀤𑀼𑀲𑀡𑁆𑀳𑀢𑁆𑀢𑀫𑀸𑀳. 𑀅𑀧𑀮𑀺𑀩𑀼𑀤𑁆𑀥𑀸𑀬𑀸𑀢𑀺 𑀧𑀺𑀢𑁆𑀢𑀲𑁂𑀫𑁆𑀳𑀸𑀤𑀻𑀳𑀺 𑀅𑀧𑀭𑀺𑀬𑁄𑀦𑀤𑁆𑀥𑀸𑀬, 𑀳𑁂𑀢𑀼𑀕𑀩𑁆𑀪𑀧𑀤𑀫𑁂𑀢𑀁. 𑀢𑀢𑁄 𑀏𑀯 𑀳𑀺 𑀬𑀣𑀸𑀯𑀼𑀢𑁆𑀢𑀤𑁄𑀲𑀸𑀪𑀸𑀯𑁄𑀢𑀺. 𑀟𑀁𑀲𑁂𑀢𑁆𑀯𑀸 𑀯𑀺𑀬 𑀏𑀓𑀤𑁂𑀲𑀓𑀣𑀦𑀁 𑀲𑀦𑁆𑀤𑀺𑀝𑁆𑀞𑀁, 𑀲𑀡𑀺𑀓𑀁 𑀘𑀺𑀭𑀸𑀬𑀺𑀢𑁆𑀯𑀸 𑀓𑀣𑀦𑀁 𑀯𑀺𑀮𑀫𑁆𑀩𑀺𑀢𑀁, ‘‘𑀲𑀦𑁆𑀦𑀺𑀤𑁆𑀥𑀯𑀺𑀮𑀫𑁆𑀩𑀺𑀢𑀸𑀤𑀻’’𑀢𑀺𑀧𑀺 𑀧𑀸𑀞𑁄. 𑀲𑀤𑁆𑀤𑁂𑀦 𑀅𑀚𑀦𑀓𑀁 𑀯𑀘𑀺𑀦𑀁, 𑀫𑀫𑁆𑀫𑀓𑀲𑀗𑁆𑀔𑀸𑀢𑀁 𑀯𑀸 𑀏𑀓𑀓𑁆𑀔𑀭𑀫𑁂𑀯 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀫𑀼𑀘𑁆𑀘𑀸𑀭𑀡𑀁 𑀲𑀦𑁆𑀦𑀺𑀤𑁆𑀥𑀁. 𑀆𑀤𑀺𑀲𑀤𑁆𑀤𑁂𑀦 𑀤𑀼𑀓𑁆𑀔𑀮𑀺𑀢𑀸𑀦𑀼𑀓𑀟𑁆𑀠𑀺𑀢𑀸𑀤𑀻𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀏𑀴𑀸𑀕𑀴𑁂𑀦𑀸𑀢𑀺 𑀏𑀴𑀸𑀧𑀕𑁆𑀖𑀭𑀡𑁂𑀦. ‘‘𑀏𑀴𑀸 𑀕𑀴𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀲𑁆𑀲𑁂𑀯 𑀤𑁆𑀯𑀺𑀥𑀸 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀮𑀸𑀮𑀸 𑀯𑀸 𑀧𑀕𑁆𑀖𑀭𑀦𑁆𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀧𑀲𑁆𑀲𑁂’𑀴𑀫𑀽𑀕𑀁 𑀉𑀭𑀕𑀁 𑀤𑀼𑀚𑀺𑀯𑁆𑀳’’𑀦𑁆𑀢𑀺𑀆𑀤𑀻𑀲𑀼 (𑀚𑀸. 𑁧.𑁭.𑁪𑁯) 𑀯𑀺𑀬 𑀳𑀺 𑀏𑀴𑀸𑀲𑀤𑁆𑀤𑁄 𑀮𑀸𑀮𑀸𑀬, 𑀔𑁂𑀴𑁂 𑀘 𑀧𑀯𑀢𑁆𑀢𑀢𑀺. 𑀔𑁂𑀴𑀨𑀼𑀲𑀺𑀢𑀸𑀦𑀻𑀢𑀺 𑀔𑁂𑀴𑀩𑀺𑀦𑁆𑀤𑀽𑀦𑀺.

𑀢𑀢𑁆𑀭𑀸𑀬𑀫𑀝𑁆𑀞𑀓𑀣𑀸𑀫𑀼𑀢𑁆𑀢𑀓𑀦𑀬𑁄 𑁋 𑀏𑀮𑀦𑁆𑀢𑀺 𑀤𑁄𑀲𑁄 𑀯𑀼𑀘𑁆𑀘𑀢𑀺 ‘‘𑀬𑀸 𑀲𑀸 𑀯𑀸𑀘𑀸 𑀦𑁂𑀮𑀸 𑀓𑀡𑁆𑀡𑀲𑀼𑀔𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁮, 𑁧𑁯𑁪) 𑀯𑀺𑀬. 𑀤𑀼𑀧𑁆𑀧𑀜𑁆𑀜𑀸 𑀘 𑀲𑀤𑁄𑀲𑀫𑁂𑀯 𑀓𑀣𑀁 𑀓𑀣𑁂𑀦𑁆𑀢𑀸 𑀏𑀮𑀁 𑀧𑀕𑁆𑀖𑀭𑀸𑀧𑁂𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀯𑀸𑀘𑀸 𑀏𑀮𑀕𑀴𑀸 𑀦𑀸𑀫 𑀳𑁄𑀢𑀺, 𑀢𑀩𑁆𑀩𑀺𑀧𑀭𑀻𑀢𑀸𑀬𑀸𑀢𑀺 𑀅𑀢𑁆𑀣𑁄. ‘‘𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀧𑀸𑀓𑀝𑀁 𑀓𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀢𑀲𑁆𑀲𑀸 𑀯𑀸𑀘𑀸𑀬 𑀅𑀢𑁆𑀣𑀧𑀸𑀭𑀺𑀧𑀽𑀭𑀺𑀁 𑀯𑀤𑀢𑀺. 𑀯𑀺𑀜𑁆𑀜𑀸𑀧𑀦𑀲𑀤𑁆𑀤𑁂𑀦 𑀏𑀢𑀲𑁆𑀲 𑀲𑀫𑁆𑀩𑀦𑁆𑀥𑁄.

𑀚𑀭𑀸𑀚𑀺𑀡𑁆𑀡𑀢𑀸𑀬 𑀚𑀺𑀡𑁆𑀡𑁄𑀢𑀺 𑀔𑀡𑁆𑀟𑀺𑀘𑁆𑀘𑀧𑀸𑀮𑀺𑀘𑁆𑀘𑀸𑀤𑀺𑀪𑀸𑀯𑀫𑀸𑀧𑀸𑀤𑀺𑀢𑁄. 𑀯𑀼𑀤𑁆𑀥𑀺𑀫𑀭𑀺𑀬𑀸𑀤𑀧𑁆𑀧𑀢𑁆𑀢𑁄𑀢𑀺 𑀯𑀼𑀤𑁆𑀥𑀺𑀬𑀸 𑀧𑀭𑀺𑀘𑁆𑀙𑁂𑀤𑀁 𑀧𑀭𑀺𑀬𑀦𑁆𑀢𑀁 𑀧𑀢𑁆𑀢𑁄. 𑀚𑀸𑀢𑀺𑀫𑀳𑀮𑁆𑀮𑀓𑀢𑀸𑀬𑀸𑀢𑀺 𑀉𑀧𑀧𑀢𑁆𑀢𑀺𑀬𑀸 𑀫𑀳𑀮𑁆𑀮𑀓𑀪𑀸𑀯𑁂𑀦. 𑀢𑁂𑀦𑀸𑀳 ‘‘𑀘𑀺𑀭𑀓𑀸𑀮𑀧𑁆𑀧𑀲𑀼𑀢𑁄’’𑀢𑀺. 𑀅𑀤𑁆𑀥𑀲𑀤𑁆𑀤𑁄 𑀅𑀤𑁆𑀥𑀸𑀦𑀧𑀭𑀺𑀬𑀸𑀬𑁄 𑀤𑀻𑀖𑀓𑀸𑀮𑀯𑀸𑀘𑀓𑁄. 𑀓𑀺𑀢𑁆𑀢𑀓𑁄 𑀧𑀦 𑀲𑁄𑀢𑀺 𑀆𑀳 ‘‘𑀤𑁆𑀯𑁂 𑀢𑀬𑁄 𑀭𑀸𑀚𑀧𑀭𑀺𑀯𑀝𑁆𑀝𑁂’’𑀢𑀺, 𑀤𑁆𑀯𑀺𑀦𑁆𑀦𑀁 𑀢𑀺𑀡𑁆𑀡𑀁 𑀭𑀸𑀚𑀽𑀦𑀁 𑀭𑀚𑁆𑀚𑀧𑀲𑀸𑀲𑀦𑀧𑀝𑀺𑀧𑀸𑀝𑀺𑀬𑁄𑀢𑀺 𑀅𑀢𑁆𑀣𑁄. ‘‘𑀅𑀤𑁆𑀥𑀕𑀢𑁄’’𑀢𑀺 𑀯𑀢𑁆𑀯𑀸𑀧𑀺 𑀓𑀢𑀁 𑀯𑀬𑁄𑀕𑀳𑀡𑀁 𑀑𑀲𑀸𑀦𑀯𑀬𑀸𑀧𑁂𑀓𑁆𑀔𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀧𑀘𑁆𑀙𑀺𑀫𑀯𑀬𑀁 𑀲𑀫𑁆𑀧𑀢𑁆𑀢𑁄’’𑀢𑀺. 𑀧𑀘𑁆𑀙𑀺𑀫𑁄 𑀢𑀢𑀺𑀬𑀪𑀸𑀕𑁄𑀢𑀺 𑀯𑀲𑁆𑀲𑀲𑀢𑀲𑁆𑀲 𑀢𑀺𑀥𑀸 𑀓𑀢𑁂𑀲𑀼 𑀪𑀸𑀕𑁂𑀲𑀼 𑀢𑀢𑀺𑀬𑁄 𑀑𑀲𑀸𑀦𑀪𑀸𑀕𑁄. 𑀧𑀘𑁆𑀘𑁂𑀓𑀁 𑀢𑁂𑀢𑁆𑀢𑀺𑀁𑀲𑀯𑀲𑁆𑀲𑀢𑁄 𑀘 𑀅𑀥𑀺𑀓𑀫𑀸𑀲𑀧𑀓𑁆𑀔𑀸𑀤𑀺𑀧𑀺 𑀯𑀺𑀪𑀚𑀻𑀬𑀢𑀺, 𑀢𑀲𑁆𑀫𑀸 𑀲𑀢𑁆𑀢𑀲𑀝𑁆𑀞𑀺𑀫𑁂 𑀯𑀲𑁆𑀲𑁂 𑀬𑀣𑀸𑀭𑀳𑀁 𑀮𑀩𑁆𑀪𑀫𑀸𑀦𑀫𑀸𑀲𑀧𑀓𑁆𑀔𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀧𑀘𑁆𑀙𑀺𑀫𑀯𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀆𑀘𑀭𑀺𑀬𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦𑀧𑀺 𑀳𑀺 𑀇𑀫𑀫𑁂𑀯𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀲𑀢𑁆𑀢𑀲𑀝𑁆𑀞𑀺𑀯𑀲𑁆𑀲𑀢𑁄 𑀧𑀝𑁆𑀞𑀸𑀬 𑀧𑀘𑁆𑀙𑀺𑀫𑀯𑀬𑁄 𑀓𑁄𑀝𑁆𑀞𑀸𑀲𑁄’’𑀢𑀺 (𑀲𑀸𑀭𑀢𑁆𑀣. 𑀝𑀻. 𑁧.𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸) 𑀯𑀼𑀢𑁆𑀢𑀁. 𑀇𑀢𑀭𑀣𑀸 𑀳𑀺 ‘‘𑀧𑀘𑁆𑀙𑀺𑀫𑀯𑀬𑁄 𑀦𑀸𑀫 𑀯𑀲𑁆𑀲𑀲𑀢𑀲𑁆𑀲 𑀧𑀘𑁆𑀙𑀺𑀫𑁄 𑀢𑀢𑀺𑀬𑀪𑀸𑀕𑁄’’𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑁂𑀦 𑀯𑀺𑀭𑁄𑀥𑁄 𑀪𑀯𑁂𑀬𑁆𑀬𑀸𑀢𑀺.

𑀏𑀯𑀁 𑀓𑁂𑀯𑀮𑀚𑀸𑀢𑀺𑀯𑀲𑁂𑀦 𑀧𑀞𑀫𑀯𑀺𑀓𑀧𑁆𑀧𑀁 𑀯𑀢𑁆𑀯𑀸 𑀕𑀼𑀡𑀫𑀺𑀲𑁆𑀲𑀓𑀯𑀲𑁂𑀦𑀧𑀺 𑀤𑀼𑀢𑀺𑀬𑀯𑀺𑀓𑀧𑁆𑀧𑀁 𑀯𑀤𑀦𑁆𑀢𑁂𑀦 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀦𑀸𑀬𑀁 𑀚𑀺𑀡𑁆𑀡𑀢𑀸 𑀯𑀬𑁄𑀫𑀢𑁆𑀢𑁂𑀦, 𑀅𑀣 𑀔𑁄 𑀓𑀼𑀮𑀧𑀭𑀺𑀯𑀝𑁆𑀝𑁂𑀦 𑀧𑀼𑀭𑀸𑀡𑀢𑀸𑀢𑀺 𑀆𑀳 ‘‘𑀚𑀺𑀡𑁆𑀡𑁄𑀢𑀺 𑀧𑁄𑀭𑀸𑀡𑁄’’𑀢𑀺𑀆𑀤𑀺. 𑀘𑀺𑀭𑀓𑀸𑀮𑀧𑁆𑀧𑀯𑀢𑁆𑀢𑀓𑀼𑀮𑀦𑁆𑀯𑀬𑁄𑀢𑀺 𑀘𑀺𑀭𑀓𑀸𑀮𑀁 𑀧𑀯𑀢𑁆𑀢𑀓𑀼𑀮𑀧𑀭𑀺𑀯𑀝𑁆𑀝𑁄, 𑀢𑁂𑀦𑀸𑀲𑁆𑀲 𑀓𑀼𑀮𑀯𑀲𑁂𑀦 𑀉𑀤𑀺𑀢𑁄𑀤𑀺𑀢𑀪𑀸𑀯𑀫𑀸𑀳. ‘‘𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺 𑀇𑀫𑀺𑀦𑀸 𑀚𑀸𑀢𑀺𑀯𑀼𑀤𑁆𑀥𑀺𑀬𑀸 𑀯𑀓𑁆𑀔𑀫𑀸𑀦𑀢𑁆𑀢𑀸, 𑀕𑀼𑀡𑀯𑀼𑀤𑁆𑀥𑀺𑀬𑀸 𑀘 𑀢𑀢𑁄 𑀲𑀸𑀢𑀺𑀲𑀬𑀢𑁆𑀢𑀸 ‘‘𑀯𑀼𑀤𑁆𑀥𑁄𑀢𑀺 𑀲𑀻𑀮𑀸𑀘𑀸𑀭𑀸𑀤𑀺𑀕𑀼𑀡𑀯𑀼𑀤𑁆𑀥𑀺𑀬𑀸 𑀬𑀼𑀢𑁆𑀢𑁄’’𑀢𑀺 𑀯𑀼𑀢𑁆𑀢𑀁. 𑀯𑀓𑁆𑀔𑀫𑀸𑀦𑀁 𑀧𑀢𑀺 𑀧𑀸𑀭𑀺𑀲𑁂𑀲𑀕𑁆𑀕𑀳𑀡𑀜𑁆𑀳𑁂𑀢𑀁. 𑀢𑀣𑀸 𑀚𑀸𑀢𑀺𑀫𑀳𑀮𑁆𑀮𑀓𑀢𑀸𑀬𑀧𑀺 𑀢𑁂𑀦𑁂𑀯 𑀧𑀤𑁂𑀦 𑀯𑀓𑁆𑀔𑀫𑀸𑀦𑀢𑁆𑀢𑀸, 𑀯𑀺𑀪𑀯𑀫𑀳𑀢𑁆𑀢𑀢𑀸𑀬 𑀘 𑀅𑀦𑀯𑀲𑁂𑀲𑀺𑀢𑀢𑁆𑀢𑀸 ‘‘𑀫𑀳𑀮𑁆𑀮𑀓𑁄𑀢𑀺 𑀯𑀺𑀪𑀯𑀫𑀳𑀦𑁆𑀢𑀢𑀸𑀬 𑀲𑀫𑀦𑁆𑀦𑀸𑀕𑀢𑁄’’𑀢𑀺 𑀆𑀳. 𑀫𑀕𑁆𑀕𑀧𑀝𑀺𑀧𑀦𑁆𑀦𑁄𑀢𑀺 𑀩𑁆𑀭𑀸𑀳𑁆𑀫𑀡𑀸𑀦𑀁 𑀬𑀼𑀢𑁆𑀢𑀧𑀝𑀺𑀧𑀢𑁆𑀢𑀺𑀯𑀻𑀣𑀺𑀁 𑀅𑀯𑁄𑀓𑁆𑀓𑀫𑁆𑀫 𑀘𑀭𑀡𑀯𑀲𑁂𑀦 𑀉𑀧𑀕𑀢𑁄𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀩𑁆𑀭𑀸𑀳𑁆𑀫𑀡𑀸𑀦’’𑀦𑁆𑀢𑀺𑀆𑀤𑀺𑀦𑀸. 𑀚𑀸𑀢𑀺𑀯𑀼𑀤𑁆𑀥𑀪𑀸𑀯𑀫𑀦𑀼𑀧𑁆𑀧𑀢𑁆𑀢𑁄, 𑀢𑀫𑁆𑀧𑀺 𑀅𑀦𑁆𑀢𑀺𑀫𑀯𑀬𑀁 𑀧𑀘𑁆𑀙𑀺𑀫𑀯𑀬𑀫𑁂𑀯 𑀅𑀦𑀼𑀧𑁆𑀧𑀢𑁆𑀢𑁄𑀢𑀺 𑀲𑀸𑀥𑀺𑀧𑁆𑀧𑀸𑀬𑀬𑁄𑀚𑀦𑀸. 𑀇𑀫𑀺𑀦𑀸 𑀳𑀺 𑀧𑀘𑁆𑀙𑀺𑀫𑀯𑀬𑀯𑀲𑁂𑀦 𑀚𑀸𑀢𑀺𑀯𑀼𑀤𑁆𑀥𑀪𑀸𑀯𑀁 𑀤𑀲𑁆𑀲𑁂𑀢𑀻𑀢𑀺.

𑀩𑀼𑀤𑁆𑀥𑀕𑀼𑀡𑀓𑀣𑀸𑀯𑀡𑁆𑀡𑀦𑀸

𑁩𑁦𑁪. 𑀢𑀸𑀤𑀺𑀲𑁂𑀳𑀺 𑀫𑀳𑀸𑀦𑀼𑀪𑀸𑀯𑁂𑀳𑀺 𑀲𑀤𑁆𑀥𑀺𑀁 𑀬𑀼𑀕𑀕𑁆𑀕𑀸𑀳𑀯𑀲𑁂𑀦 𑀞𑀧𑀦𑀫𑁆𑀧𑀺 𑀦 𑀫𑀸𑀤𑀺𑀲𑀸𑀦𑀁 𑀧𑀡𑁆𑀟𑀺𑀢𑀚𑀸𑀢𑀻𑀦𑀫𑀦𑀼𑀘𑁆𑀙𑀯𑀺𑀓𑀁, 𑀓𑀼𑀢𑁄 𑀧𑀦 𑀉𑀓𑁆𑀓𑀁𑀲𑀯𑀲𑁂𑀦 𑀞𑀧𑀦𑀦𑁆𑀢𑀺 𑀇𑀤𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦 𑀬𑀼𑀢𑁆𑀢𑀭𑀽𑀧𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀔𑁄 𑀧𑀦 𑀫𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑁂𑀧𑀺 𑀕𑀼𑀡𑀸 𑀅𑀢𑁆𑀢𑀦𑁄 𑀕𑀼𑀡𑁂𑀳𑀺 𑀲𑀤𑀺𑀲𑀸, 𑀢𑁂𑀧𑀺 𑀕𑀼𑀡𑁂 𑀉𑀢𑁆𑀢𑀭𑀺𑀢𑀭𑁂𑀬𑁂𑀯 𑀫𑀜𑁆𑀜𑀫𑀸𑀦𑁄 𑀧𑀓𑀸𑀲𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀤𑀺𑀲𑀸𑀢𑀺 𑀘 𑀏𑀓𑀤𑁂𑀲𑁂𑀦 𑀲𑀤𑀺𑀲𑀸. 𑀦 𑀳𑀺 𑀩𑀼𑀤𑁆𑀥𑀸𑀦𑀁 𑀕𑀼𑀡𑁂𑀳𑀺 𑀲𑀩𑁆𑀩𑀣𑀸 𑀲𑀤𑀺𑀲𑀸 𑀓𑁂𑀘𑀺𑀧𑀺 𑀕𑀼𑀡𑀸 𑀅𑀜𑁆𑀜𑁂𑀲𑀼 𑀮𑀩𑁆𑀪𑀦𑁆𑀢𑀺. ‘‘𑀓𑁄 𑀘𑀸𑀳’’𑀦𑁆𑀢𑀺𑀆𑀤𑀺 𑀉𑀢𑁆𑀢𑀭𑀺𑀢𑀭𑀸𑀓𑀸𑀭𑀤𑀲𑁆𑀲𑀦𑀁. 𑀅𑀳𑀜𑁆𑀘 𑀓𑀻𑀤𑀺𑀲𑁄 𑀦𑀸𑀫 𑀳𑀼𑀢𑁆𑀯𑀸 𑀲𑀤𑀺𑀲𑁄 𑀪𑀯𑀺𑀲𑁆𑀲𑀸𑀫𑀺, 𑀲𑀫𑀡𑀲𑁆𑀲…𑀧𑁂… 𑀕𑀼𑀡𑀸 𑀘 𑀓𑀻𑀤𑀺𑀲𑀸 𑀦𑀸𑀫 𑀳𑀼𑀢𑁆𑀯𑀸 𑀲𑀤𑀺𑀲𑀸 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀲𑀸𑀥𑀺𑀧𑁆𑀧𑀸𑀬𑀬𑁄𑀚𑀦𑀸. 𑀓𑁂𑀘𑀺 𑀦𑀯𑀁 𑀧𑀸𑀞𑀁 𑀓𑀭𑁄𑀦𑁆𑀢𑀺, 𑀅𑀬𑀫𑁂𑀯 𑀫𑀽𑀮𑀧𑀸𑀞𑁄 𑀬𑀣𑀸 𑀢𑀁 𑀅𑀫𑁆𑀩𑀝𑁆𑀞𑀲𑀼𑀢𑁆𑀢𑁂 ‘‘𑀓𑁄 𑀘𑀸𑀳𑀁 𑀪𑁄 𑀕𑁄𑀢𑀫 𑀲𑀸𑀘𑀭𑀺𑀬𑀓𑁄, 𑀓𑀸 𑀘 𑀅𑀦𑀼𑀢𑁆𑀢𑀭𑀸 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀤𑀸’’𑀢𑀺. 𑀇𑀢𑀭𑁂𑀢𑀺 𑀅𑀢𑁆𑀢𑀦𑁄 𑀕𑀼𑀡𑁂𑀳𑀺 𑀅𑀲𑀤𑀺𑀲𑁂 𑀕𑀼𑀡𑁂, ‘‘𑀧𑀓𑀸𑀲𑁂𑀢𑀻’’𑀢𑀺 𑀇𑀫𑀺𑀦𑀸𑀯 𑀲𑀫𑁆𑀩𑀦𑁆𑀥𑁄. 𑀏𑀓𑀦𑁆𑀢𑁂𑀦𑁂𑀯𑀸𑀢𑀺 𑀲𑀤𑀺𑀲𑀕𑀼𑀡𑀸𑀦𑀁 𑀯𑀺𑀬 𑀧𑀲𑀗𑁆𑀕𑀸𑀪𑀸𑀯𑁂𑀦.

𑀏𑀯𑀁 𑀦𑀺𑀬𑀸𑀫𑁂𑀦𑁆𑀢𑁄 𑀲𑁄𑀡𑀤𑀡𑁆𑀟𑁄 𑀇𑀤𑀁 𑀅𑀢𑁆𑀣𑀚𑀸𑀢𑀁 𑀤𑀻𑀧𑁂𑀢𑀺. 𑀬𑀣𑀸 𑀳𑀻𑀢𑀺 𑀏𑀢𑁆𑀣 𑀳𑀺-𑀲𑀤𑁆𑀤𑁄 𑀓𑀸𑀭𑀡𑁂. 𑀢𑁂𑀦𑀸𑀳 ‘‘𑀢𑀲𑁆𑀫𑀸 𑀫𑀬𑀫𑁂𑀯 𑀅𑀭𑀳𑀸𑀫𑀸’’𑀢𑀺. 𑀕𑁄𑀧𑀤𑀓𑀦𑁆𑀢𑀺 𑀕𑀸𑀯𑀺𑀬𑀸 𑀔𑀼𑀭𑀝𑁆𑀞𑀸𑀦𑁂 𑀞𑀺𑀢𑀉𑀤𑀓𑀁. 𑀕𑀼𑀡𑁂𑀢𑀺 𑀲𑀤𑀺𑀲𑀕𑀼𑀡𑁂𑀧𑀺, 𑀧𑀕𑁂𑀯 𑀅𑀲𑀤𑀺𑀲𑀕𑀼𑀡𑁂.

𑀲𑀝𑁆𑀞𑀺𑀓𑀼𑀮𑀲𑀢𑀲𑀳𑀲𑁆𑀲𑀦𑁆𑀢𑀺 𑀲𑀝𑁆𑀞𑀺𑀲𑀳𑀲𑁆𑀲𑀸𑀥𑀺𑀓𑀁 𑀓𑀼𑀮𑀲𑀢𑀲𑀳𑀲𑁆𑀲𑀁. 𑀥𑀫𑁆𑀫𑀧𑀤𑀝𑁆𑀞𑀓𑀣𑀸𑀤𑀻𑀲𑀼 (𑀥. 𑀧. 𑀅𑀝𑁆𑀞. 𑁧𑁬) 𑀧𑀦 𑀓𑀢𑁆𑀣𑀘𑀺 𑀪𑀕𑀯𑀢𑁄 𑀅𑀲𑀻𑀢𑀺𑀓𑀼𑀮𑀲𑀳𑀲𑁆𑀲𑀢𑀸𑀯𑀘𑀦𑀁 𑀏𑀓𑁂𑀓𑀧𑀓𑁆𑀔𑀫𑁂𑀯 𑀲𑀦𑁆𑀥𑀸𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀼𑀥𑀸𑀫𑀝𑁆𑀞𑀧𑁄𑀓𑁆𑀔𑀭𑀡𑀺𑀬𑁄𑀢𑀺 𑀲𑀼𑀥𑀸𑀬 𑀧𑀭𑀺𑀓𑀫𑁆𑀫𑀓𑀢𑀸 𑀧𑁄𑀓𑁆𑀔𑀭𑀡𑀺𑀬𑁄. 𑀲𑀢𑁆𑀢𑀭𑀢𑀦𑀸𑀦𑀦𑁆𑀢𑀺 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺. 𑀧𑀽𑀭𑀬𑁄𑀕𑁂 𑀳𑀺 𑀓𑀭𑀡𑀢𑁆𑀣𑁂 𑀩𑀳𑀼𑀮𑀁 𑀙𑀝𑁆𑀞𑀻𑀯𑀘𑀦𑀁. 𑀧𑀸𑀲𑀸𑀤𑀦𑀺𑀬𑀽𑀳𑀸𑀤𑀬𑁄𑀢𑀺 𑀉𑀧𑀭𑀺𑀧𑀸𑀲𑀸𑀤𑁂 𑀞𑀺𑀢𑀢𑀼𑀮𑀸𑀲𑀻𑀲𑀸𑀤𑀬𑁄. ‘‘𑀲𑀢𑁆𑀢𑀭𑀢𑀦𑀸𑀦’’𑀦𑁆𑀢𑀺 𑀅𑀥𑀺𑀓𑀸𑀭𑁄, 𑀅𑀪𑁂𑀤𑁂𑀧𑀺 𑀪𑁂𑀤𑀯𑁄𑀳𑀸𑀭𑁄 𑀏𑀲. 𑀓𑀼𑀮𑀧𑀭𑀺𑀬𑀸𑀬𑁂𑀦𑀸𑀢𑀺 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀲𑁆𑀲 𑀅𑀲𑀫𑁆𑀪𑀺𑀦𑁆𑀦𑀔𑀢𑁆𑀢𑀺𑀬𑀓𑀼𑀮𑀸𑀦𑀼𑀓𑁆𑀓𑀫𑁂𑀦. 𑀢𑁂𑀲𑀼𑀧𑀻𑀢𑀺 𑀘𑀢𑀽𑀲𑀼 𑀦𑀺𑀥𑀻𑀲𑀼𑀧𑀺. 𑀕𑀳𑀺𑀢𑀁 𑀕𑀳𑀺𑀢𑀁 𑀞𑀸𑀦𑀁 𑀧𑀽𑀭𑀢𑀺𑀬𑁂𑀯 𑀥𑀦𑁂𑀦 𑀧𑀸𑀓𑀢𑀺𑀓𑀫𑁂𑀯 𑀳𑁄𑀢𑀺, 𑀦 𑀊𑀦𑀁.

𑀪𑀤𑁆𑀤𑀓𑁂𑀦𑀸𑀢𑀺 𑀲𑀼𑀦𑁆𑀤𑀭𑁂𑀦. 𑀧𑀘𑁆𑀙𑀺𑀫𑀯𑀬𑁂 𑀯𑀼𑀢𑁆𑀢𑀦𑀬𑁂𑀦 𑀧𑀞𑀫𑀯𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀫𑀸𑀢𑀸𑀧𑀺𑀢𑀽𑀦𑀁 𑀅𑀦𑀺𑀘𑁆𑀙𑀸𑀬 𑀧𑀩𑁆𑀩𑀚𑁆𑀚𑀸𑀯 𑀅𑀦𑀸𑀤𑀭𑁄 𑀢𑁂𑀦 𑀬𑀼𑀢𑁆𑀢𑁂 𑀅𑀢𑁆𑀣𑁂 𑀲𑀸𑀫𑀺𑀯𑀘𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁂𑀲𑀦𑁆𑀢𑀺 𑀫𑀸𑀢𑀸𑀧𑀺𑀢𑀽𑀦𑀁. 𑀓𑀦𑁆𑀤𑀺𑀢𑁆𑀯𑀸𑀢𑀺 ‘‘𑀓𑀳𑀁 𑀧𑀺𑀬𑀧𑀼𑀢𑁆𑀢𑀓𑀸’’𑀢𑀺𑀆𑀤𑀺𑀦𑀸 𑀧𑀭𑀺𑀤𑁂𑀯𑀺𑀢𑁆𑀯𑀸.

𑀅𑀧𑀭𑀺𑀫𑀸𑀡𑁄𑀬𑁂𑀯𑀸𑀢𑀺 ‘‘𑀏𑀢𑁆𑀢𑀓𑁄 𑀏𑀲𑁄’’𑀢𑀺 𑀓𑁂𑀦𑀘𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀅𑀧𑀭𑀺𑀘𑁆𑀙𑀺𑀦𑁆𑀦𑁄𑀬𑁂𑀯. 𑀤𑁆𑀯𑁂 𑀯𑁂𑀴𑀽 𑀅𑀥𑁄𑀓𑀝𑀺𑀫𑀢𑁆𑀢𑀓𑀫𑁂𑀯 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀤𑁆𑀯𑀺𑀦𑁆𑀦𑀁 𑀯𑁂𑀴𑀽𑀦𑀁 𑀉𑀧𑀭𑀺 𑀓𑀝𑀺𑀫𑀢𑁆𑀢𑀫𑁂𑀯𑀸’’𑀢𑀺. 𑀧𑀸𑀭𑀫𑀺𑀢𑀸𑀦𑀼𑀪𑀸𑀯𑁂𑀦 𑀩𑁆𑀭𑀸𑀳𑁆𑀫𑀡𑀲𑁆𑀲 𑀏𑀯 𑀧𑀜𑁆𑀜𑀸𑀬𑀢𑀺, 𑀪𑀕𑀯𑀸 𑀧𑀦 𑀢𑀤𑀸 𑀧𑀓𑀢𑀺𑀧𑁆𑀧𑀫𑀸𑀡𑁄𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀜𑁆𑀜𑀸𑀬𑀫𑀸𑀦𑁄’’𑀢𑀺 𑀯𑀼𑀢𑁆𑀢𑀫𑀺𑀯 𑀤𑀺𑀲𑁆𑀲𑀢𑀺, 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. ‘‘𑀦 𑀳𑀻’’𑀢𑀺𑀆𑀤𑀺𑀦𑀸 𑀧𑀸𑀭𑀫𑀺𑀢𑀸𑀩𑀮𑁂𑀦𑁂𑀯 𑀏𑀯𑀁 𑀅𑀧𑀭𑀺𑀫𑀸𑀡𑀢𑀸, 𑀦 𑀇𑀤𑁆𑀥𑀺𑀩𑀮𑁂𑀦𑀸𑀢𑀺 𑀤𑀲𑁆𑀲𑁂𑀢𑀻’’𑀢𑀺 𑀯𑀤𑀦𑁆𑀢𑀺. 𑀅𑀢𑀼𑀮𑁄𑀢𑀺 𑀅𑀲𑀤𑀺𑀲𑁄. ‘‘𑀥𑀫𑁆𑀫𑀧𑀤𑁂 𑀕𑀸𑀣𑀫𑀸𑀳𑀸’’𑀢𑀺 𑀓𑀢𑁆𑀣𑀘𑀺 𑀧𑀸𑀞𑁄 𑀅𑀬𑀼𑀢𑁆𑀢𑁄𑀯. 𑀦 𑀳𑀺 𑀥𑀫𑁆𑀫𑀧𑀤𑁂 𑀅𑀬𑀁 𑀕𑀸𑀣𑀸 𑀤𑀺𑀲𑁆𑀲𑀢𑀺. 𑀲𑀼𑀥𑀸𑀧𑀺𑀡𑁆𑀟𑀺𑀬𑀢𑁆𑀣𑁂𑀭𑀸𑀧𑀤𑀸𑀦𑀸𑀤𑀻𑀲𑀼 (𑀅𑀧. 𑁧.𑁧𑁦.𑀲𑀼𑀥𑀸𑀧𑀺𑀡𑁆𑀟𑀺𑀬𑀢𑁆𑀣𑁂𑀭𑀸𑀧𑀤𑀸𑀦) 𑀧𑀦𑀸𑀬𑀁 𑀕𑀸𑀣𑀸 𑀆𑀕𑀢𑀸, 𑀲𑀸 𑀘 𑀔𑁄 𑀅𑀜𑁆𑀜𑀯𑀢𑁆𑀣𑀼𑀲𑁆𑀫𑀺𑀁 𑀏𑀯, 𑀦 𑀇𑀫𑀲𑁆𑀫𑀺𑀁 𑀯𑀢𑁆𑀣𑀼𑀫𑁆𑀳𑀺, 𑀢𑀲𑁆𑀫𑀸 𑀧𑀸𑀴𑀺𑀯𑀲𑁂𑀦 𑀲𑀗𑁆𑀕𑀻𑀢𑀺𑀫𑀦𑀸𑀭𑀼𑀴𑁆𑀳𑀸 𑀧𑀓𑀺𑀡𑁆𑀡𑀓𑀤𑁂𑀲𑀦𑀸𑀬𑁂𑀯𑀸𑀬𑀁 𑀕𑀸𑀣𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀢𑀢𑁆𑀣 𑀢𑁂 𑀢𑀸𑀤𑀺𑀲𑁂𑀢𑀺 𑀧𑀭𑀺𑀬𑀸𑀬𑀯𑀘𑀦𑀫𑁂𑀢𑀁 ‘‘𑀅𑀧𑁆𑀧𑀁 𑀯𑀲𑁆𑀲𑀲𑀢𑀁 𑀆𑀬𑀼, 𑀇𑀤𑀸𑀦𑁂𑀢𑀭𑀳𑀺 𑀯𑀺𑀚𑁆𑀚𑀢𑀻’’𑀢𑀺𑀆𑀤𑀻𑀲𑀼 (𑀩𑀼. 𑀯𑀁. 𑁨𑁭.𑁨𑁧) 𑀯𑀺𑀬, ‘‘𑀏𑀢𑀸𑀤𑀺𑀲𑁂’’𑀢𑀺𑀧𑀺 𑀧𑀞𑀦𑁆𑀢𑀺, 𑀢𑀤𑀲𑀼𑀦𑁆𑀤𑀭𑀁 𑀅𑀧𑀤𑀸𑀦𑀸𑀤𑀻𑀲𑀼 𑀢𑀣𑀸 𑀅𑀤𑀺𑀲𑁆𑀲𑀦𑀢𑁄. 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑁂 𑀓𑀼𑀢𑁄𑀘𑀺𑀧𑀺 𑀅𑀪𑀬𑁂 𑀢𑁂 𑀢𑀸𑀤𑀺𑀲𑁂 𑀧𑀽𑀚𑀬𑀢𑁄 𑀏𑀢𑁆𑀣 𑀇𑀤𑀁 𑀧𑀼𑀜𑁆𑀜𑀁 𑀓𑁂𑀦𑀘𑀺 𑀫𑀳𑀸𑀦𑀼𑀪𑀸𑀯𑁂𑀦 𑀅𑀧𑀺 𑀲𑀗𑁆𑀔𑀸𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀅𑀢𑁆𑀣𑁄.

𑀩𑀸𑀳𑀦𑁆𑀢𑀭𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀩𑀸𑀳𑀽𑀦𑀫𑀦𑁆𑀢𑀭𑀁. 𑀤𑁆𑀯𑀸𑀤𑀲 𑀬𑁄𑀚𑀦𑀲𑀢𑀸𑀦𑀻𑀢𑀺 𑀤𑁆𑀯𑀸𑀤𑀲𑀸𑀥𑀺𑀓𑀸𑀦𑀺 𑀬𑁄𑀚𑀦𑀲𑀢𑀸𑀦𑀺. 𑀩𑀳𑀮𑀦𑁆𑀢𑀭𑁂𑀦𑀸𑀢𑀺 𑀲𑀫𑀦𑁆𑀢𑀸 𑀲𑀭𑀻𑀭𑀧𑀭𑀺𑀡𑀸𑀳𑀧𑁆𑀧𑀫𑀸𑀡𑁂𑀦. 𑀧𑀼𑀣𑀼𑀮𑀢𑁄𑀢𑀺 𑀯𑀺𑀢𑁆𑀣𑀸𑀭𑀢𑁄. 𑀅𑀗𑁆𑀕𑀼𑀮𑀺𑀧𑀩𑁆𑀩𑀸𑀦𑀻𑀢𑀺 𑀏𑀓𑁂𑀓𑀸𑀦𑀺 𑀅𑀗𑁆𑀕𑀼𑀮𑀺𑀧𑀩𑁆𑀩𑀸𑀦𑀺. 𑀪𑀫𑀼𑀓𑀦𑁆𑀢𑀭𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀪𑀫𑀼𑀓𑀸𑀦𑀫𑀦𑁆𑀢𑀭𑀁. 𑀫𑀼𑀔𑀁 𑀯𑀺𑀢𑁆𑀣𑀸𑀭𑀢𑁄 𑀤𑁆𑀯𑀺𑀬𑁄𑀚𑀦𑀲𑀢𑀁 𑀧𑀭𑀺𑀫𑀡𑁆𑀟𑀮𑀢𑁄 𑀯𑀺𑀲𑀼𑀁 𑀯𑀼𑀢𑁆𑀢𑀢𑁆𑀢𑀸. ‘‘𑀏𑀤𑀺𑀲𑁄 𑀪𑀕𑀯𑀸’’𑀢𑀺 𑀬𑀸 𑀧𑀭𑁂𑀳𑀺 𑀯𑀼𑀢𑁆𑀢𑀸 𑀓𑀣𑀸, 𑀢𑀲𑁆𑀲𑀸 𑀅𑀦𑀼𑀭𑀽𑀧𑀦𑁆𑀢𑀺 𑀬𑀣𑀸𑀓𑀣𑀁, 𑀇𑀫𑀺𑀦𑀸 𑀅𑀜𑁆𑀜𑁂𑀳𑀺 𑀯𑀼𑀢𑁆𑀢𑀁 𑀪𑀕𑀯𑀢𑁄 𑀯𑀡𑁆𑀡𑀓𑀣𑀁 𑀲𑀼𑀢𑁆𑀯𑀸 𑀑𑀮𑁄𑀓𑁂𑀢𑀼𑀓𑀸𑀫𑀢𑀸𑀬 𑀆𑀕𑀢𑁄𑀢𑀺 𑀤𑀲𑁆𑀲𑁂𑀢𑀺, 𑀬𑀣𑀸𑀓𑀣𑀦𑁆𑀢𑀺 𑀯𑀸 𑀓𑀻𑀤𑀺𑀲𑀁. ‘‘𑀬𑀣𑀸𑀓𑀣𑀁 𑀧𑀦 𑀢𑀼𑀫𑁆𑀳𑁂 𑀪𑀺𑀓𑁆𑀔𑀯𑁂 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀅𑀯𑀺𑀯𑀤𑀫𑀸𑀦𑀸 𑀨𑀸𑀲𑀼𑀓𑀁 𑀯𑀲𑁆𑀲𑀁 𑀯𑀲𑀺𑀢𑁆𑀣𑀸’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁧𑁯𑁪) 𑀯𑀺𑀬 𑀳𑀺 𑀧𑀼𑀘𑁆𑀙𑀸𑀬𑀁 𑀏𑀲 𑀦𑀺𑀧𑀸𑀢𑀲𑀫𑀼𑀤𑀸𑀬𑁄, 𑀏𑀓𑁄 𑀯𑀸 𑀦𑀺𑀧𑀸𑀢𑁄.

𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑁂𑀢𑀺 𑀕𑀦𑁆𑀥𑀓𑀼𑀝𑀺𑀬𑀸 𑀧𑀭𑀺𑀯𑁂𑀡𑁂, 𑀕𑀦𑁆𑀥𑀓𑀼𑀝𑀺𑀢𑁄 𑀩𑀳𑀺 𑀧𑀭𑀺𑀯𑁂𑀡𑀩𑁆𑀪𑀦𑁆𑀢𑀭𑁂𑀢𑀺 𑀅𑀢𑁆𑀣𑁄. 𑀢𑀢𑁆𑀣𑀸𑀢𑀺 𑀫𑀜𑁆𑀘𑀓𑁂. ‘‘𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑀻’’𑀢𑀺 𑀬𑀣𑀸 𑀭𑀸𑀳𑀼 𑀅𑀲𑀼𑀭𑀺𑀦𑁆𑀤𑁄 𑀆𑀬𑀸𑀫𑀢𑁄, 𑀯𑀺𑀢𑁆𑀣𑀸𑀭𑀢𑁄, 𑀉𑀩𑁆𑀩𑁂𑀥𑀢𑁄 𑀘 𑀪𑀕𑀯𑀢𑁄 𑀭𑀽𑀧𑀓𑀸𑀬𑀲𑁆𑀲 𑀧𑀭𑀺𑀘𑁆𑀙𑁂𑀤𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀣𑀸 𑀭𑀽𑀧𑀁 𑀇𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑁄 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑀻’’𑀢𑀺 (𑀤𑀻. 𑀦𑀺. 𑀝𑀻. 𑁧.𑁩𑁦𑁪) 𑀏𑀯𑀁 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑀁, ‘‘𑀢𑀤𑁂𑀢𑀁 ‘𑀦 𑀫𑀬𑀸 𑀅𑀲𑀼𑀭𑀺𑀦𑁆𑀤 𑀅𑀥𑁄𑀫𑀼𑀔𑁂𑀦 𑀧𑀸𑀭𑀫𑀺𑀬𑁄 𑀧𑀽𑀭𑀺𑀢𑀸, 𑀉𑀤𑁆𑀥𑀕𑁆𑀕𑀫𑁂𑀯 𑀓𑀢𑁆𑀯𑀸 𑀤𑀸𑀦𑀁 𑀤𑀺𑀦𑁆𑀦’’𑀦𑁆𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑁂𑀦 𑀅𑀘𑁆𑀘𑀦𑁆𑀢𑀫𑁂𑀯 𑀯𑀺𑀭𑀼𑀤𑁆𑀥𑀁 𑀳𑁄𑀢𑀺. 𑀏𑀢𑀜𑁆𑀳𑀺 𑀕𑀦𑁆𑀥𑀓𑀼𑀝𑀺𑀤𑁆𑀯𑀸𑀭𑀯𑀺𑀯𑀭𑀡𑀸𑀤𑀻𑀲𑀼 𑀯𑀺𑀬 𑀧𑀸𑀭𑀫𑀺𑀢𑀸𑀦𑀼𑀪𑀸𑀯𑀲𑀺𑀤𑁆𑀥𑀺𑀤𑀲𑁆𑀲𑀦𑀁, 𑀅𑀜𑁆𑀜𑀣𑀸 𑀢𑀤𑁂𑀯 𑀯𑀘𑀦𑀁 𑀯𑀢𑁆𑀢𑀩𑁆𑀩𑀁 𑀪𑀯𑁂𑀬𑁆𑀬𑀸’’𑀢𑀺 𑀯𑀤𑀦𑁆𑀢𑀺, 𑀯𑀻𑀫𑀁𑀲𑀺𑀢𑁆𑀯𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁. 𑀅𑀥𑁄𑀫𑀼𑀔𑁂𑀦𑀸𑀢𑀺 𑀑𑀲𑀓𑁆𑀓𑀺𑀢𑀯𑀻𑀭𑀺𑀬𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀉𑀤𑁆𑀥𑀕𑁆𑀕𑀫𑁂𑀯𑀸𑀢𑀺 𑀅𑀦𑁄𑀲𑀓𑁆𑀓𑀺𑀢𑀯𑀻𑀭𑀺𑀬𑀢𑀁, 𑀉𑀩𑁆𑀪𑀓𑁄𑀝𑀺𑀓𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀤𑀸 𑀭𑀸𑀳𑀼 𑀉𑀧𑀸𑀲𑀓𑀪𑀸𑀯𑀁 𑀧𑀝𑀺𑀯𑁂𑀤𑁂𑀲𑀻𑀢𑀺 𑀆𑀳 ‘‘𑀢𑀁 𑀤𑀺𑀯𑀲’’𑀦𑁆𑀢𑀺𑀆𑀤𑀺.

𑀓𑀺𑀮𑁂𑀲𑁂𑀳𑀺 𑀆𑀭𑀓𑀢𑁆𑀢𑀸 𑀅𑀭𑀺𑀬𑀁 𑀦𑀺𑀭𑀼𑀢𑁆𑀢𑀺𑀦𑀬𑁂𑀦, 𑀅𑀢𑁄𑀬𑁂𑀯 𑀉𑀢𑁆𑀢𑀫𑀢𑀸 𑀧𑀭𑀺𑀲𑀼𑀤𑁆𑀥𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀉𑀢𑁆𑀢𑀫𑀁 𑀧𑀭𑀺𑀲𑀼𑀤𑁆𑀥’’𑀦𑁆𑀢𑀺. 𑀅𑀦𑀯𑀚𑁆𑀚𑀝𑁆𑀞𑁂𑀦 𑀓𑀼𑀲𑀮𑀁, 𑀦 𑀲𑀼𑀔𑀯𑀺𑀧𑀸𑀓𑀝𑁆𑀞𑁂𑀦 𑀢𑀲𑁆𑀲 𑀅𑀭𑀳𑀢𑀫𑀲𑀫𑁆𑀪𑀯𑀢𑁄. 𑀓𑀼𑀲𑀮𑀲𑀻𑀮𑁂𑀦𑀸𑀢𑀺 𑀅𑀦𑀯𑀚𑁆𑀚𑁂𑀦𑁂𑀯 𑀯𑀺𑀤𑁆𑀥𑀲𑁆𑀢𑀲𑀯𑀸𑀲𑀦𑀓𑀺𑀮𑁂𑀲𑁂𑀦 𑀲𑀻𑀮𑁂𑀦. 𑀏𑀯𑀜𑁆𑀘 𑀓𑀢𑁆𑀯𑀸 𑀧𑀤𑀘𑀢𑀼𑀓𑁆𑀓𑀫𑁆𑀧𑁂𑀢𑀁 𑀅𑀥𑀺𑀧𑁆𑀧𑁂𑀢𑀢𑁆𑀣𑀢𑁄 𑀯𑀺𑀲𑀺𑀝𑁆𑀞𑀁 𑀳𑁄𑀢𑀺, 𑀲𑀤𑁆𑀤𑀢𑁆𑀣𑀫𑀢𑁆𑀢𑀁 𑀧𑀦 𑀲𑀦𑁆𑀥𑀸𑀬 ‘‘𑀇𑀤𑀫𑀲𑁆𑀲 𑀯𑁂𑀯𑀘𑀦’’𑀦𑁆𑀢𑀺 𑀯𑀼𑀢𑁆𑀢𑀁.

𑀓𑀢𑁆𑀣𑀘𑀺 𑀘𑀢𑀼𑀭𑀸𑀲𑀻𑀢𑀺𑀧𑀸𑀡𑀲𑀳𑀲𑁆𑀲𑀸𑀦𑀺, 𑀓𑀢𑁆𑀣𑀘𑀺 𑀅𑀧𑀭𑀺𑀫𑀸𑀡𑀸𑀧𑀺 𑀤𑁂𑀯𑀫𑀦𑀼𑀲𑁆𑀲𑀸𑀢𑀺 𑀅𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀪𑀕𑀯𑀢𑁄 𑀏𑀓𑁂𑀓𑀸𑀬 𑀥𑀫𑁆𑀫𑀤𑁂𑀲𑀦𑀸𑀬𑀸’’𑀢𑀺𑀆𑀤𑀺𑀫𑀸𑀳. 𑀫𑀳𑀸𑀲𑀫𑀬𑀲𑀼𑀢𑁆𑀢 (𑀤𑀻. 𑀦𑀺. 𑁨.𑁩𑁩𑁧 𑀆𑀤𑀬𑁄) 𑀫𑀗𑁆𑀕𑀮𑀲𑀼𑀢𑁆𑀢- (𑀔𑀼. 𑀧𑀸. 𑁫.𑁧 𑀆𑀤𑀬𑁄; 𑀲𑀼. 𑀦𑀺. 𑁨𑁬𑁧 𑀆𑀤𑀬𑁄) 𑀤𑁂𑀲𑀦𑀸𑀤𑀻𑀲𑀼 𑀳𑀺 𑀘𑀢𑀼𑀯𑀻𑀲𑀢𑀺𑀬𑀸 𑀞𑀸𑀦𑁂𑀲𑀼 𑀅𑀲𑀗𑁆𑀔𑁆𑀬𑁂𑀬𑁆𑀬𑀸 𑀅𑀧𑀭𑀺𑀫𑁂𑀬𑁆𑀬𑀸 𑀤𑁂𑀯𑀫𑀦𑀼𑀲𑁆𑀲𑀸 𑀫𑀕𑁆𑀕𑀨𑀮𑀸𑀫𑀢𑀁 𑀧𑀺𑀯𑀺𑀁𑀲𑀼. 𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀤𑀺𑀧𑀭𑀺𑀫𑀸𑀡𑁂𑀦𑀧𑀺 𑀩𑀳𑀽 𑀏𑀯, 𑀦𑀺𑀤𑀲𑁆𑀲𑀦𑀯𑀲𑁂𑀦 𑀧𑀦𑁂𑀯𑀁 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀅𑀦𑀼𑀢𑁆𑀢𑀭𑀲𑀺𑀓𑁆𑀔𑀸𑀧𑀓𑀪𑀸𑀯𑁂𑀦 𑀪𑀕𑀯𑀸 𑀩𑀳𑀽𑀦𑀁 𑀆𑀘𑀭𑀺𑀬𑁄, 𑀢𑁂𑀲𑀁 𑀆𑀘𑀭𑀺𑀬𑀪𑀽𑀢𑀸𑀦𑀁 𑀲𑀸𑀯𑀓𑀸𑀦𑀫𑀸𑀘𑀭𑀺𑀬𑀪𑀸𑀯𑁂𑀦 𑀲𑀸𑀯𑀓𑀯𑁂𑀦𑁂𑀬𑁆𑀬𑀸𑀦𑀁 𑀧𑀸𑀘𑀭𑀺𑀬𑁄. 𑀪𑀕𑀯𑀢𑀸 𑀳𑀺 𑀤𑀺𑀦𑁆𑀦𑀦𑀬𑁂 𑀞𑀢𑁆𑀯𑀸 𑀲𑀸𑀯𑀓𑀸 𑀯𑁂𑀦𑁂𑀬𑁆𑀬𑀁 𑀯𑀺𑀦𑁂𑀦𑁆𑀢𑀺, 𑀢𑀲𑁆𑀫𑀸 𑀪𑀕𑀯𑀸𑀯 𑀢𑁂𑀲𑀁 𑀧𑀥𑀸𑀦𑁄 𑀆𑀘𑀭𑀺𑀬𑁄𑀢𑀺.

𑀯𑀤𑀦𑁆𑀢𑀲𑁆𑀲𑀸𑀥𑀺𑀧𑁆𑀧𑁂𑀢𑁄𑀯 𑀅𑀢𑁆𑀣𑁄 𑀧𑀫𑀸𑀡𑀁, 𑀦 𑀮𑀓𑁆𑀔𑀡𑀳𑀸𑀭𑀸𑀤𑀺𑀯𑀺𑀲𑀬𑁄𑀢𑀺 𑀆𑀳 ‘‘𑀩𑁆𑀭𑀸𑀳𑁆𑀫𑀡𑁄 𑀧𑀦𑀸’’𑀢𑀺𑀆𑀤𑀺. ‘‘𑀇𑀫𑀲𑁆𑀲 𑀯𑀸 𑀧𑀽𑀢𑀺𑀓𑀸𑀬𑀲𑁆𑀲𑀸’’𑀢𑀺 𑀧𑀸𑀞𑀸𑀯𑀲𑀸𑀦𑁂 𑀧𑁂𑀬𑁆𑀬𑀸𑀮𑀁 𑀓𑀢𑁆𑀯𑀸 ‘‘𑀓𑁂𑀮𑀦𑀸 𑀧𑀝𑀺𑀓𑁂𑀮𑀦𑀸’’𑀢𑀺 𑀯𑀼𑀢𑁆𑀢𑀁. 𑀅𑀬𑀜𑁆𑀳𑀺 𑀔𑀼𑀤𑁆𑀤𑀓𑀯𑀢𑁆𑀣𑀼𑀯𑀺𑀪𑀗𑁆𑀕𑀧𑀸𑀴𑀺 (𑀯𑀺𑀪. 𑁮𑁫𑁪) ‘‘𑀩𑀸𑀳𑀺𑀭𑀸𑀦𑀁 𑀯𑀸 𑀧𑀭𑀺𑀓𑁆𑀔𑀸𑀭𑀸𑀦𑀁 𑀫𑀡𑁆𑀟𑀦𑀸’’𑀢𑀺𑀆𑀤𑀺 𑀧𑁂𑀬𑁆𑀬𑀸𑀮𑀯𑀲𑁂𑀦 𑀕𑀬𑁆𑀳𑀢𑀺. 𑀢𑀢𑁆𑀣 𑀇𑀫𑀲𑁆𑀲 𑀯𑀸 𑀧𑀽𑀢𑀺𑀓𑀸𑀬𑀲𑁆𑀲𑀸𑀢𑀺 𑀇𑀫𑀲𑁆𑀲 𑀯𑀸 𑀫𑀦𑀼𑀲𑁆𑀲𑀲𑀭𑀻𑀭𑀲𑁆𑀲. 𑀬𑀣𑀸 𑀳𑀺 𑀢𑀤𑀳𑀼𑀚𑀸𑀢𑁄𑀧𑀺 𑀲𑀺𑀗𑁆𑀕𑀸𑀮𑁄 ‘‘𑀚𑀭𑀲𑀺𑀗𑁆𑀕𑀸𑀮𑁄’’ 𑀢𑁆𑀯𑁂𑀯, 𑀊𑀭𑀼𑀧𑁆𑀧𑀫𑀸𑀡𑀸𑀧𑀺 𑀘 𑀕𑀮𑁄𑀘𑀺𑀮𑀢𑀸 ‘‘𑀧𑀽𑀢𑀺𑀮𑀢𑀸’’ 𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺, 𑀏𑀯𑀁 𑀲𑀼𑀯𑀡𑁆𑀡𑀯𑀡𑁆𑀡𑁄𑀧𑀺 𑀫𑀦𑀼𑀲𑁆𑀲𑀲𑀭𑀻𑀭𑁄 ‘‘𑀧𑀽𑀢𑀺𑀓𑀸𑀬𑁄’’ 𑀢𑁆𑀯𑁂𑀯, 𑀢𑀲𑁆𑀲 𑀫𑀡𑁆𑀟𑀦𑀸𑀢𑀺 𑀅𑀢𑁆𑀣𑁄. 𑀓𑁂𑀮𑀦𑀸𑀢𑀺 𑀓𑀻𑀴𑀦𑀸. ‘‘𑀓𑁂𑀮𑀸𑀬𑀦𑀸’’𑀢𑀺𑀧𑀺 𑀧𑀞𑀦𑁆𑀢𑀺. 𑀧𑀝𑀺𑀓𑁂𑀮𑀦𑀸𑀢𑀺 𑀧𑀝𑀺𑀓𑀻𑀴𑀦𑀸. 𑀘𑀧𑀮𑀲𑁆𑀲 𑀪𑀸𑀯𑁄 𑀘𑀸𑀧𑀮𑁆𑀬𑀁, 𑀘𑀸𑀧𑀮𑁆𑀮𑀁 𑀯𑀸, 𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀯𑀲𑁆𑀲𑀲𑀢𑀺𑀓𑁄𑀧𑀺 𑀲𑀫𑀸𑀦𑁄 𑀢𑀤𑀳𑀼𑀚𑀸𑀢𑀤𑀸𑀭𑀓𑁄 𑀯𑀺𑀬 𑀳𑁄𑀢𑀺, 𑀢𑀲𑁆𑀲𑁂𑀤𑀫𑀥𑀺𑀯𑀘𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀧𑀸𑀧𑁂 𑀧𑀼𑀭𑁂 𑀓𑀭𑁄𑀢𑀺, 𑀦 𑀯𑀸 𑀧𑀸𑀧𑀁 𑀧𑀼𑀭𑁂 𑀓𑀭𑁄𑀢𑀻𑀢𑀺 𑀅𑀧𑀸𑀧𑀧𑀼𑀭𑁂𑀓𑁆𑀔𑀸𑀭𑁄𑀢𑀺 𑀬𑀼𑀢𑁆𑀢𑀸𑀬𑀼𑀢𑁆𑀢𑀲𑀫𑀸𑀲𑁂𑀦 𑀤𑀼𑀯𑀺𑀥𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀸𑀧𑁂 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀧𑀸𑀧𑁂𑀢𑀺 𑀘 𑀧𑀸𑀧𑀧𑀝𑀺𑀧𑀓𑁆𑀔𑁂, 𑀧𑀸𑀧𑀯𑀺𑀭𑀳𑀺𑀢𑁂 𑀯𑀸. 𑀩𑁆𑀭𑀳𑁆𑀫𑀦𑀺 𑀲𑁂𑀝𑁆𑀞𑁂 𑀪𑀕𑀯𑀢𑀺 𑀪𑀯𑀸 𑀢𑀲𑁆𑀲 𑀥𑀫𑁆𑀫𑀤𑁂𑀲𑀦𑀸𑀯𑀲𑁂𑀦 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑀸𑀢𑀢𑁆𑀢𑀸, 𑀩𑁆𑀭𑀳𑁆𑀫𑀼𑀦𑁄 𑀯𑀸 𑀪𑀕𑀯𑀢𑁄 𑀅𑀧𑀘𑁆𑀘𑀁 𑀕𑀭𑀼𑀓𑀭𑀡𑀸𑀤𑀺𑀦𑀸, 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀢𑁆𑀢𑀺𑀬𑀸 𑀘, 𑀩𑁆𑀭𑀳𑁆𑀫𑀁 𑀯𑀸 𑀲𑁂𑀝𑁆𑀞𑀁 𑀅𑀭𑀺𑀬𑀫𑀕𑁆𑀕𑀁 𑀚𑀸𑀦𑀸𑀢𑀻𑀢𑀺 𑀩𑁆𑀭𑀳𑁆𑀫𑀜𑁆𑀜𑀸, 𑀅𑀭𑀺𑀬𑀲𑀸𑀯𑀓𑀲𑀗𑁆𑀔𑀸𑀢𑀸 𑀧𑀚𑀸. 𑀢𑁂𑀦𑀸𑀳 ‘‘𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸’’𑀢𑀺𑀆𑀤𑀺. 𑀩𑁆𑀭𑀸𑀳𑁆𑀫𑀡𑀧𑀚𑀸𑀬𑀸𑀢𑀺 𑀩𑀳𑀺𑀢𑀧𑀸𑀧𑀧𑀚𑀸𑀬. ‘‘𑀅𑀧𑀸𑀧𑀧𑀼𑀭𑁂𑀓𑁆𑀔𑀸𑀭𑁄’’𑀢𑀺 𑀏𑀢𑁆𑀣 ‘‘𑀧𑀼𑀭𑁂𑀓𑁆𑀔𑀸𑀭𑁄’’𑀢𑀺 𑀧𑀤𑀫𑀥𑀺𑀓𑀸𑀭𑁄𑀢𑀺 𑀤𑀲𑁆𑀲𑁂𑀢𑀺 ‘‘𑀏𑀢𑀺𑀲𑁆𑀲𑀸𑀬 𑀘 𑀧𑀚𑀸𑀬 𑀧𑀼𑀭𑁂𑀓𑁆𑀔𑀸𑀭𑁄’’𑀢𑀺 𑀇𑀫𑀺𑀦𑀸. 𑀘-𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀢𑁆𑀣𑁄 ‘‘𑀦 𑀓𑁂𑀯𑀮𑀁 𑀅𑀧𑀸𑀧𑀧𑀼𑀭𑁂𑀓𑁆𑀔𑀸𑀭𑁄 𑀏𑀯, 𑀅𑀣 𑀔𑁄 𑀩𑁆𑀭𑀳𑁆𑀫𑀜𑁆𑀜𑀸𑀬 𑀘 𑀧𑀚𑀸𑀬 𑀲𑀫𑁆𑀩𑀦𑁆𑀥𑀪𑀽𑀢𑀸𑀬 𑀧𑀼𑀭𑁂𑀓𑁆𑀔𑀸𑀭𑁄’’𑀢𑀺. ‘‘𑀅𑀬𑀜𑁆𑀳𑀻’’𑀢𑀺𑀆𑀤𑀺 𑀅𑀥𑀺𑀧𑁆𑀧𑀸𑀬𑀫𑀢𑁆𑀢𑀤𑀲𑁆𑀲𑀦𑀁. ‘‘𑀅𑀧𑀸𑀧𑀧𑀼𑀭𑁂𑀓𑁆𑀔𑀸𑀭𑁄’’𑀢𑀺 𑀇𑀤𑀁 ‘‘𑀩𑁆𑀭𑀳𑁆𑀫𑀜𑁆𑀜𑀸𑀬 𑀧𑀚𑀸𑀬𑀸’’𑀢𑀺 𑀇𑀫𑀺𑀦𑀸𑀯 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁, 𑀦 𑀘 𑀧𑀘𑁆𑀘𑁂𑀓𑀫𑀢𑁆𑀣𑀤𑀻𑀧𑀓𑀁, 𑀧𑀓𑀢𑀺𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀯𑀲𑁂𑀦𑀧𑀺 𑀘𑁂𑀢𑀲𑁆𑀲 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀫𑀸𑀳. 𑀅𑀬𑀼𑀢𑁆𑀢𑀲𑀫𑀸𑀲𑁄 𑀘𑀸𑀬𑀁. 𑀧𑀸𑀧𑀦𑁆𑀢𑀺 𑀧𑀸𑀧𑀓𑀫𑁆𑀫𑀁, 𑀅𑀳𑀺𑀢𑀁 𑀤𑀼𑀓𑁆𑀔𑀦𑁆𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀲𑀫𑁆𑀩𑀦𑁆𑀥𑀺𑀧𑁂𑀓𑁆𑀔𑀢𑁆𑀢𑀸 𑀓𑀲𑁆𑀲𑀸 𑀅𑀧𑀸𑀧𑀧𑀼𑀭𑁂𑀓𑁆𑀔𑀸𑀭𑁄𑀢𑀺 𑀧𑀼𑀘𑁆𑀙𑀸𑀬 𑀏𑀯𑀫𑀸𑀳𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀓𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀅𑀢𑁆𑀢𑀦𑀸’’𑀢𑀺𑀆𑀤𑀺 𑀢𑀤𑀢𑁆𑀣𑀯𑀺𑀯𑀭𑀡𑀁. 𑀩𑁆𑀭𑀸𑀳𑁆𑀫𑀡𑀧𑀚𑀸𑀬𑀸𑀢𑀺 𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀧𑀚𑀸𑀬.

𑀭𑀜𑁆𑀚𑀦𑁆𑀢𑀺 𑀅𑀝𑁆𑀝𑀁 𑀪𑀚𑀦𑁆𑀢𑀺 𑀭𑀸𑀚𑀸𑀦𑁄 𑀏𑀢𑁂𑀦𑀸𑀢𑀺 𑀭𑀝𑁆𑀞𑀁, 𑀏𑀓𑀲𑁆𑀲 𑀭𑀜𑁆𑀜𑁄 𑀭𑀚𑁆𑀚𑀪𑀽𑀢𑀓𑀸𑀲𑀺𑀓𑁄𑀲𑀮𑀸𑀤𑀺𑀫𑀳𑀸𑀚𑀦𑀧𑀤𑀸. 𑀚𑀦𑀸 𑀧𑀚𑁆𑀚𑀦𑁆𑀢𑀺 𑀲𑀼𑀔𑀚𑀻𑀯𑀺𑀓𑀁 𑀧𑀸𑀧𑀼𑀡𑀦𑁆𑀢𑀺 𑀏𑀢𑁆𑀣𑀸𑀢𑀺 𑀚𑀦𑀧𑀤𑁄, 𑀏𑀓𑀲𑁆𑀲 𑀭𑀜𑁆𑀜𑁄 𑀭𑀚𑁆𑀚𑁂 𑀏𑀓𑁂𑀓𑀓𑁄𑀝𑁆𑀞𑀸𑀲𑀪𑀽𑀢𑀸 𑀉𑀢𑁆𑀢𑀭𑀧𑀣𑀤𑀓𑁆𑀔𑀺𑀡𑀧𑀣𑀸𑀤𑀺𑀔𑀼𑀤𑁆𑀤𑀓𑀚𑀦𑀧𑀤𑀸. 𑀢𑀢𑁆𑀣𑀸𑀢𑀺 𑀢𑀣𑀸 𑀆𑀕𑀢𑁂𑀲𑀼. 𑀧𑀼𑀘𑁆𑀙𑀸𑀬𑀸𑀢𑀺 𑀅𑀢𑁆𑀢𑀦𑀸 𑀅𑀪𑀺𑀲𑀗𑁆𑀔𑀢𑀸𑀬 𑀧𑀼𑀘𑁆𑀙𑀸𑀬. 𑀯𑀺𑀲𑁆𑀲𑀚𑁆𑀚𑀦𑀸𑀲𑀫𑁆𑀧𑀝𑀺𑀘𑁆𑀙𑀦𑁂𑀢𑀺 𑀯𑀺𑀲𑁆𑀲𑀚𑁆𑀚𑀦𑀸𑀬 𑀅𑀢𑁆𑀢𑀦𑁄 𑀜𑀸𑀡𑁂𑀦 𑀲𑀫𑁆𑀧𑀝𑀺𑀕𑁆𑀕𑀳𑀡𑁂. 𑀓𑁂𑀲𑀜𑁆𑀘𑀺 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀁, 𑀜𑀸𑀡𑀧𑀭𑀺𑀧𑀸𑀓𑀁, 𑀘𑀺𑀢𑁆𑀢𑀸𑀘𑀸𑀭𑀜𑁆𑀘 𑀜𑀢𑁆𑀯𑀸 𑀪𑀕𑀯𑀸𑀯 𑀧𑀼𑀘𑁆𑀙𑀸𑀬 𑀉𑀲𑁆𑀲𑀸𑀳𑀁 𑀚𑀦𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

‘‘𑀢𑀢𑁆𑀣 𑀓𑀢𑀫𑀁 𑀲𑀸𑀔𑀮𑁆𑀬’’𑀦𑁆𑀢𑀺𑀆𑀤𑀺 𑀦𑀺𑀓𑁆𑀔𑁂𑀧𑀓𑀡𑁆𑀟𑀧𑀸𑀴𑀺 (𑀥. 𑀲. 𑁧𑁩𑁫𑁦). 𑀅𑀤𑁆𑀥𑀸𑀦𑀤𑀭𑀣𑀦𑁆𑀢𑀺 𑀤𑀻𑀖𑀫𑀕𑁆𑀕𑀸𑀕𑀫𑀦𑀧𑀭𑀺𑀲𑁆𑀲𑀫𑀁. 𑀅𑀲𑁆𑀲𑀸𑀢𑀺 𑀪𑀕𑀯𑀢𑁄, 𑀫𑀼𑀔𑀧𑀤𑀼𑀫𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀩𑀸𑀮𑀸𑀢𑀧𑀲𑀫𑁆𑀨𑀲𑁆𑀲𑀦𑁂𑀦𑁂𑀯𑀸𑀢𑀺 𑀅𑀪𑀺𑀦𑀯𑀼𑀕𑁆𑀕𑀢𑀲𑀽𑀭𑀺𑀬𑀭𑀁𑀲𑀺𑀲𑀫𑁆𑀨𑀲𑁆𑀲𑀦𑁂𑀦 𑀇𑀯. 𑀢𑀣𑀸 𑀳𑀺 𑀲𑀽𑀭𑀺𑀬𑁄 ‘‘𑀧𑀤𑁆𑀫𑀩𑀦𑁆𑀥𑀽’’𑀢𑀺 𑀮𑁄𑀓𑁂 𑀧𑀸𑀓𑀝𑁄, 𑀘𑀦𑁆𑀤𑁄 𑀧𑀦 ‘‘𑀓𑀼𑀫𑀼𑀤𑀩𑀦𑁆𑀥𑀽’’𑀢𑀺. 𑀧𑀼𑀡𑁆𑀡𑀘𑀦𑁆𑀤𑀲𑁆𑀲 𑀲𑀺𑀭𑀺𑀬𑀸 𑀲𑀫𑀸𑀦𑀸 𑀲𑀺𑀭𑀻 𑀏𑀢𑀲𑁆𑀲𑀸𑀢𑀺 𑀧𑀼𑀡𑁆𑀡𑀘𑀦𑁆𑀤𑀲𑀲𑁆𑀲𑀺𑀭𑀺𑀓𑀁. 𑀓𑀣𑀁 𑀦𑀺𑀓𑁆𑀓𑀼𑀚𑁆𑀚𑀺𑀢𑀲𑀤𑀺𑀲𑀢𑀸𑀢𑀺 𑀆𑀳 ‘‘𑀲𑀫𑁆𑀧𑀢𑁆𑀢𑀸𑀬𑀸’’𑀢𑀺𑀆𑀤𑀺. 𑀏𑀢𑁆𑀣 𑀧𑀦 ‘‘𑀏𑀳𑀺 𑀲𑁆𑀯𑀸𑀕𑀢𑀯𑀸𑀤𑀻’’𑀢𑀺 𑀇𑀫𑀺𑀦𑀸 𑀲𑀼𑀔𑀲𑀫𑁆𑀪𑀸𑀲𑀧𑀼𑀩𑁆𑀩𑀓𑀁 𑀧𑀺𑀬𑀯𑀸𑀤𑀺𑀢𑀁 𑀤𑀲𑁆𑀲𑁂𑀢𑀺, ‘‘𑀲𑀔𑀺𑀮𑁄’’𑀢𑀺 𑀇𑀫𑀺𑀦𑀸 𑀲𑀡𑁆𑀳𑀯𑀸𑀘𑀢𑀁, ‘‘𑀲𑀫𑁆𑀫𑁄𑀤𑀓𑁄’’𑀢𑀺 𑀇𑀫𑀺𑀦𑀸 𑀧𑀝𑀺𑀲𑀦𑁆𑀥𑀸𑀭𑀓𑀼𑀲𑀮𑀢𑀁, ‘‘𑀅𑀩𑁆𑀪𑀸𑀓𑀼𑀝𑀺𑀓𑁄’’𑀢𑀺 𑀇𑀫𑀺𑀦𑀸 𑀲𑀩𑁆𑀩𑀢𑁆𑀣𑁂𑀯 𑀯𑀺𑀧𑁆𑀧𑀲𑀦𑁆𑀦𑀫𑀼𑀔𑀢𑀁, ‘‘𑀉𑀢𑁆𑀢𑀸𑀦𑀫𑀼𑀔𑁄’’𑀢𑀺 𑀇𑀫𑀺𑀦𑀸 𑀲𑀼𑀔𑀲𑀮𑁆𑀮𑀸𑀧𑀢𑀁, ‘‘𑀧𑀼𑀩𑁆𑀩𑀪𑀸𑀲𑀻’’𑀢𑀺 𑀇𑀫𑀺𑀦𑀸 𑀥𑀫𑁆𑀫𑀸𑀦𑀼𑀕𑁆𑀕𑀳𑀲𑁆𑀲 𑀑𑀓𑀸𑀲𑀓𑀭𑀡𑁂𑀦 𑀳𑀺𑀢𑀚𑁆𑀛𑀸𑀲𑀬𑀢𑀁 𑀤𑀲𑁆𑀲𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀬𑀢𑁆𑀣 𑀓𑀺𑀭𑀸𑀢𑀺 𑀏𑀢𑁆𑀣 𑀓𑀺𑀭-𑀲𑀤𑁆𑀤𑁄 𑀅𑀭𑀼𑀘𑀺𑀲𑀽𑀘𑀦𑁂 𑁋

‘‘𑀔𑀡𑀯𑀢𑁆𑀣𑀼𑀧𑀭𑀺𑀢𑁆𑀢𑀢𑁆𑀢𑀸, 𑀆𑀧𑀸𑀣𑀁 𑀦 𑀯𑀚𑀦𑁆𑀢𑀺 𑀬𑁂;

𑀢𑁂 𑀥𑀫𑁆𑀫𑀸𑀭𑀫𑁆𑀫𑀡𑀸 𑀦𑀸𑀫, 𑀬𑁂’𑀲𑀁 𑀭𑀽𑀧𑀸𑀤𑀬𑁄 𑀓𑀺𑀭𑀸’’𑀢𑀺. 𑁋

𑀆𑀤𑀻𑀲𑀼 (𑀅𑀪𑀺𑀥𑀫𑁆𑀫𑀸𑀯𑀢𑀸𑀭-𑀅𑀝𑁆𑀞𑀓𑀣𑀸𑀬𑀁 𑀆𑀭𑀫𑁆𑀫𑀡𑀯𑀺𑀪𑀸𑀕𑁂 𑀙𑀝𑁆𑀞𑀅𑀦𑀼𑀘𑁆𑀙𑁂𑀤𑁂 𑁋 𑁭𑁭) 𑀯𑀺𑀬, 𑀢𑁂𑀦 𑀪𑀕𑀯𑀢𑀸 𑀅𑀥𑀺𑀯𑀼𑀢𑁆𑀣𑀧𑀤𑁂𑀲𑁂 𑀦 𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀫𑀦𑀼𑀲𑁆𑀲𑀸𑀦𑀁 𑀅𑀦𑀼𑀧𑀤𑁆𑀤𑀯𑀢𑀸, 𑀅𑀣 𑀔𑁄 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦𑁂𑀯 𑀳𑀺 𑀢𑀸 𑀆𑀭𑀓𑁆𑀔𑀁 𑀕𑀡𑁆𑀳𑀦𑁆𑀢𑀺. 𑀧𑀁𑀲𑀼𑀧𑀺𑀲𑀸𑀘𑀓𑀸𑀤𑀬𑁄𑀢𑀺 𑀧𑀁𑀲𑀼𑀦𑀺𑀲𑁆𑀲𑀺𑀢𑀧𑀺𑀲𑀸𑀘𑀓𑀸𑀤𑀬𑁄. 𑀆𑀤𑀺𑀲𑀤𑁆𑀤𑁂𑀦 𑀪𑀽𑀢𑀭𑀓𑁆𑀔𑀲𑀸𑀤𑀻𑀦𑀁 𑀕𑀳𑀡𑀁. 𑀇𑀤𑀸𑀦𑀺 𑀩𑀼𑀤𑁆𑀥𑀸𑀦𑀼𑀪𑀸𑀯𑀫𑁂𑀯 𑀧𑀸𑀓𑀝𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀅𑀦𑀼𑀲𑀸𑀲𑀺𑀢𑀩𑁆𑀩𑁄 𑀲𑀗𑁆𑀖𑁄 𑀦𑀸𑀫 𑀲𑀩𑁆𑀩𑁄𑀧𑀺 𑀯𑁂𑀦𑁂𑀬𑁆𑀬𑀚𑀦𑀲𑀫𑀽𑀳𑁄. 𑀲𑀬𑀁 𑀉𑀧𑁆𑀧𑀸𑀤𑀺𑀢𑁄 𑀲𑀗𑁆𑀖𑁄 𑀦𑀸𑀫 𑀦𑀺𑀩𑁆𑀩𑀢𑁆𑀢𑀺𑀢𑀅𑀭𑀺𑀬𑀧𑀼𑀕𑁆𑀕𑀮𑀲𑀫𑀽𑀳𑁄. ‘‘𑀢𑀸𑀤𑀺𑀲𑁄’’𑀢𑀺 𑀇𑀫𑀺𑀦𑀸 ‘‘𑀲𑀬𑀁 𑀯𑀸 𑀉𑀧𑁆𑀧𑀸𑀤𑀺𑀢𑁄’’𑀢𑀺 𑀯𑀼𑀢𑁆𑀢𑀯𑀺𑀓𑀧𑁆𑀧𑁄 𑀏𑀯 𑀧𑀘𑁆𑀘𑀸𑀫𑀝𑁆𑀞𑁄 𑀅𑀦𑀦𑁆𑀢𑀭𑀲𑁆𑀲 𑀯𑀺𑀥𑀺 𑀧𑀝𑀺𑀲𑁂𑀥𑁄𑀯𑀸𑀢𑀺 𑀓𑀢𑁆𑀯𑀸, 𑀢𑀲𑁆𑀫𑀸 ‘‘𑀧𑀼𑀭𑀺𑀫𑀧𑀤𑀲𑁆𑀲𑁂𑀯 𑀯𑀸’’𑀢𑀺 𑀯𑀺𑀓𑀧𑁆𑀧𑀦𑁆𑀢𑀭𑀕𑀳𑀡𑀦𑁆𑀢𑀺 𑀆𑀘𑀭𑀺𑀬𑁂𑀦 (𑀤𑀻. 𑀦𑀺. 𑀝𑀻. 𑁧.𑁩𑁦𑁪) 𑀯𑀼𑀢𑁆𑀢𑀁. 𑀢𑀢𑁆𑀭𑀸𑀬𑀫𑀥𑀺𑀧𑁆𑀧𑀸𑀬𑁄 𑁋 𑀓𑀸𑀫𑀁 ‘‘𑀕𑀡𑀻’’𑀢𑀺 𑀇𑀤𑀁 ‘‘𑀲𑀗𑁆𑀖𑀻’’𑀢𑀺 𑀧𑀤𑀲𑁆𑀲𑁂𑀯 𑀯𑁂𑀯𑀘𑀦𑀁, 𑀅𑀢𑁆𑀣𑀫𑀢𑁆𑀢𑀁 𑀧𑀦 𑀤𑀲𑁆𑀲𑁂𑀢𑀼𑀁 𑀬𑀣𑀸𑀯𑀼𑀢𑁆𑀢𑀯𑀺𑀓𑀧𑁆𑀧𑀤𑁆𑀯𑀬𑁂 𑀤𑀼𑀢𑀺𑀬𑀯𑀺𑀓𑀧𑁆𑀧𑀫𑁂𑀯 𑀧𑀘𑁆𑀘𑀸𑀫𑀲𑀺𑀢𑁆𑀯𑀸 ‘‘𑀢𑀸𑀤𑀺𑀲𑁄𑀯𑀲𑁆𑀲 𑀕𑀡𑁄 𑀅𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀯𑀲𑀺𑀝𑁆𑀞𑀲𑁆𑀲𑀧𑀺 𑀧𑀞𑀫𑀯𑀺𑀓𑀧𑁆𑀧𑀲𑁆𑀲 𑀲𑀗𑁆𑀕𑀳𑀡𑀢𑁆𑀣𑀁 ‘‘𑀧𑀼𑀭𑀺𑀫𑀧𑀤𑀲𑁆𑀲𑁂𑀯 𑀯𑀸 𑀯𑁂𑀯𑀘𑀦𑀫𑁂𑀢’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺. 𑀏𑀯𑀫𑁆𑀧𑀺 𑀯𑀤𑀦𑁆𑀢𑀺 𑁋 𑀥𑀫𑁆𑀫𑀲𑁂𑀦𑀸𑀧𑀢𑀺𑀢𑁆𑀣𑁂𑀭𑀸𑀤𑀻𑀦𑀁 𑀧𑀘𑁆𑀘𑁂𑀓𑀕𑀡𑀻𑀦𑀁 𑀕𑀡𑀁, 𑀲𑀼𑀢𑁆𑀢𑀦𑁆𑀢𑀺𑀓𑀸𑀤𑀺𑀕𑀡𑀁 𑀯𑀸 𑀲𑀦𑁆𑀥𑀸𑀬 ‘‘𑀢𑀸𑀤𑀺𑀲𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀧𑀺 𑀳𑀺 𑀲𑀩𑁆𑀩𑁄𑀯 𑀪𑀺𑀓𑁆𑀔𑀼𑀕𑀡𑁄 𑀅𑀦𑀼𑀲𑀸𑀲𑀺𑀢𑀩𑁆𑀩𑁄 𑀦𑀸𑀫, 𑀦𑀺𑀩𑁆𑀩𑀢𑁆𑀢𑀺𑀢𑀅𑀭𑀺𑀬𑀕𑀡𑁄 𑀧𑀦 𑀲𑀬𑀁 𑀉𑀧𑁆𑀧𑀸𑀤𑀺𑀢𑁄 𑀦𑀸𑀫, 𑀢𑀲𑁆𑀫𑀸 ‘‘𑀢𑀸𑀤𑀺𑀲𑁄’’𑀢𑀺 𑀇𑀫𑀺𑀦𑀸 𑀯𑀺𑀓𑀧𑁆𑀧𑀤𑁆𑀯𑀬𑀲𑁆𑀲𑀸𑀧𑀺 𑀧𑀘𑁆𑀘𑀸𑀫𑀲𑀦𑀁 𑀉𑀧𑀧𑀦𑁆𑀦𑀁 𑀳𑁄𑀢𑀺. 𑀏𑀯𑀁 𑀧𑀤𑀤𑁆𑀯𑀬𑀲𑁆𑀲 𑀯𑀺𑀲𑁂𑀲𑀢𑁆𑀣𑀢𑀁 𑀤𑀲𑁆𑀲𑁂𑀢𑁆𑀯𑀸 𑀲𑀩𑁆𑀩𑀣𑀸 𑀲𑀫𑀸𑀦𑀢𑁆𑀣𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀭𑀺𑀫𑀧𑀤𑀲𑁆𑀲𑁂𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺. 𑀧𑀽𑀭𑀡𑀫𑀓𑁆𑀔𑀮𑀺𑀆𑀤𑀻𑀦𑀁 𑀩𑀳𑀽𑀦𑀁 𑀢𑀺𑀢𑁆𑀣𑀓𑀭𑀸𑀦𑀁, 𑀦𑀺𑀤𑁆𑀥𑀸𑀭𑀡𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁. 𑀅𑀘𑁂𑀮𑀓𑀸𑀤𑀺𑀫𑀢𑁆𑀢𑀓𑁂𑀦𑀧𑀺 𑀓𑀸𑀭𑀡𑁂𑀦𑀸𑀢𑀺 𑀦𑀺𑀘𑁆𑀘𑁄𑀴𑀢𑀸𑀤𑀺𑀫𑀢𑁆𑀢𑀓𑁂𑀦𑀧𑀺 𑀅𑀧𑁆𑀧𑀺𑀘𑁆𑀙𑀲𑀦𑁆𑀢𑀼𑀝𑁆𑀞𑀢𑀸𑀤𑀺𑀲𑀫𑀸𑀭𑁄𑀧𑀦𑀮𑀓𑁆𑀔𑀡𑁂𑀦 𑀓𑀸𑀭𑀡𑁂𑀦.

𑀦𑀯𑀓𑀸𑀢𑀺 𑀅𑀪𑀺𑀦𑀯𑀸. 𑀧𑀸𑀳𑀼𑀦𑀓𑀸𑀢𑀺 𑀧𑀳𑁂𑀡𑀓𑀁 𑀧𑀝𑀺𑀕𑁆𑀕𑀡𑁆𑀳𑀺𑀢𑀼𑀫𑀦𑀼𑀘𑁆𑀙𑀯𑀺𑀓𑀸, 𑀏𑀢𑁂𑀦 𑀤𑀼𑀯𑀺𑀥𑁂𑀲𑀼 𑀆𑀕𑀦𑁆𑀢𑀼𑀓𑁂𑀲𑀼 𑀧𑀼𑀭𑁂𑀢𑀭𑀫𑀸𑀕𑀢𑀯𑀲𑁂𑀦 𑀇𑀥 𑀅𑀢𑀺𑀣𑀺𑀦𑁄, 𑀦 𑀪𑁄𑀚𑀦𑀯𑁂𑀮𑀸𑀬𑀫𑀸𑀕𑀢𑀯𑀲𑁂𑀦 𑀅𑀩𑁆𑀪𑀸𑀕𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀧𑀭𑀺𑀬𑀸𑀧𑀼𑀡𑀸𑀫𑀻𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀼𑀁 𑀚𑀸𑀦𑀸𑀫𑀺, 𑀥𑀸𑀢𑁆𑀯𑀢𑁆𑀣𑀫𑀢𑁆𑀢𑀁 𑀧𑀦 𑀤𑀲𑁆𑀲𑁂𑀢𑀼𑀁 ‘‘𑀚𑀸𑀦𑀸𑀫𑀻’’𑀢𑀺 𑀯𑀼𑀢𑁆𑀢𑀁.

𑀓𑀧𑁆𑀧𑀫𑁆𑀧𑀻𑀢𑀺 𑀆𑀬𑀼𑀓𑀧𑁆𑀧𑀫𑁆𑀧𑀺, 𑀪𑀡𑁂𑀬𑁆𑀬 𑀘𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀘𑀺𑀭𑀁 𑀘𑀺𑀭𑀓𑀸𑀮𑁂 𑀓𑀧𑁆𑀧𑁄 𑀔𑀻𑀬𑁂𑀣, 𑀤𑀻𑀖𑀫𑀦𑁆𑀢𑀭𑁂 𑀤𑀻𑀖𑀓𑀸𑀮𑀦𑁆𑀢𑀭𑁂𑀧𑀺 𑀢𑀣𑀸𑀕𑀢𑀲𑁆𑀲 𑀯𑀡𑁆𑀡𑁄 𑀦 𑀔𑀻𑀬𑁂𑀣𑀸𑀢𑀺 𑀬𑁄𑀚𑀦𑀸. ‘‘𑀘𑀺𑀭’’𑀦𑁆𑀢𑀺 𑀘𑁂𑀢𑁆𑀣 𑀯𑀢𑁆𑀢𑀩𑁆𑀩𑁂𑀧𑀺 𑀙𑀦𑁆𑀤𑀳𑀸𑀦𑀺𑀪𑀬𑀸 𑀭𑀲𑁆𑀲𑀢𑁆𑀣𑀁 𑀦𑀺𑀕𑁆𑀕𑀳𑀺𑀢𑀮𑁄𑀧𑁄, 𑀅𑀢𑀺𑀤𑀻𑀖𑀓𑀸𑀮𑀁 𑀯𑀸 𑀲𑀦𑁆𑀥𑀸𑀬 ‘‘𑀘𑀺𑀭𑀤𑀻𑀖𑀫𑀦𑁆𑀢𑀭𑁂’’𑀢𑀺 𑀯𑀼𑀢𑁆𑀢𑀁, 𑀉𑀪𑀬𑀢𑁆𑀣 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀫𑁂𑀢𑀁, 𑀓𑀺𑀭𑀺𑀬𑀸𑀭𑀳𑀸𑀤𑀺𑀬𑁄𑀕𑁂 𑀯𑀺𑀬 𑀘 𑀅𑀦𑁆𑀢𑀭𑀬𑁄𑀕𑁂 𑀅𑀥𑀺𑀓𑀓𑁆𑀔𑀭𑀧𑀸𑀤𑁄 𑀅𑀦𑀼𑀧𑀯𑀚𑁆𑀚𑁄, 𑀅𑀬𑀜𑁆𑀘 𑀕𑀸𑀣𑀸 𑀅𑀪𑀽𑀢𑀧𑀭𑀺𑀓𑀧𑁆𑀧𑀦𑀸𑀯𑀲𑁂𑀦 𑀅𑀝𑁆𑀞𑀓𑀣𑀸𑀲𑀼 (𑀤𑀻. 𑀦𑀺. 𑀅𑀝𑁆𑀞. 𑁧.𑁩𑁦𑁪; 𑁩.𑁧𑁪𑁧; 𑀫. 𑀦𑀺. 𑀅𑀝𑁆𑀞. 𑁨.𑁪𑁨𑁫; 𑀉𑀤𑀸. 𑀅𑀝𑁆𑀞. 𑁫𑁩; 𑀩𑀼. 𑀯𑀁. 𑀅𑀝𑁆𑀞. 𑁪.𑁪; 𑀘𑀭𑀺𑀬𑀸. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸, 𑀧𑀓𑀺𑀡𑁆𑀡𑀓𑀓𑀣𑀸; 𑀅𑀧. 𑀅𑀝𑁆𑀞. 𑁨.𑁭.𑁨𑁦) 𑀯𑀼𑀢𑁆𑀢𑀸 𑀢𑀣𑀸 𑀪𑀸𑀲𑀫𑀸𑀦𑀲𑁆𑀲 𑀅𑀪𑀸𑀯𑀢𑁄.

𑁩𑁦𑁫. 𑀦𑀦𑁆𑀢𑀺 𑀆𑀘𑀭𑀺𑀬𑀁. 𑀅𑀮𑀁-𑀲𑀤𑁆𑀤𑁄 𑀇𑀥 𑀅𑀭𑀳𑀢𑁆𑀣𑁄 ‘‘𑀅𑀮𑀫𑁂𑀯 𑀦𑀺𑀩𑁆𑀩𑀺𑀦𑁆𑀤𑀺𑀢𑀼’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁨𑁭𑁨; 𑀲𑀁. 𑀦𑀺. 𑁨.𑁧𑁩𑁪, 𑁧𑁪𑁩) 𑀯𑀺𑀬𑀸𑀢𑀺 𑀆𑀳 ‘‘𑀬𑀼𑀢𑁆𑀢𑀫𑁂𑀯𑀸’’𑀢𑀺. 𑀧𑀼𑀝𑁂𑀦 𑀦𑁂𑀢𑁆𑀯𑀸 𑀅𑀲𑀺𑀢𑀩𑁆𑀩𑀢𑁄 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑁄 𑀧𑀼𑀝𑁄𑀲𑀁 𑀯𑀼𑀘𑁆𑀘𑀢𑀺 𑀧𑀸𑀣𑁂𑀬𑁆𑀬𑀁. 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂 𑀓𑀭𑀡𑀯𑀘𑀦𑀁 𑀤𑀲𑁆𑀲𑁂𑀢𑀺 ‘‘𑀢𑀁 𑀕𑀳𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸. 𑀧𑀸𑀴𑀺𑀬𑀁 𑀧𑀼𑀝𑀁𑀲𑁂𑀦𑀧𑀺 𑀓𑀼𑀮𑀧𑀼𑀢𑁆𑀢𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑀁 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀦 𑀧𑀼𑀝𑀁𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁. ‘‘𑀅𑀁𑀲𑁂𑀦𑀸’’𑀢𑀺𑀆𑀤𑀺 𑀅𑀥𑀺𑀧𑁆𑀧𑀸𑀬𑀫𑀢𑁆𑀢𑀤𑀲𑁆𑀲𑀦𑀁, 𑀯𑀳𑀦𑁆𑀢𑁂𑀦 𑀓𑀼𑀮𑀧𑀼𑀢𑁆𑀢𑁂𑀦 𑀉𑀧𑀲𑀗𑁆𑀓𑀫𑀺𑀢𑀼𑀁 𑀅𑀮𑀫𑁂𑀯𑀸𑀢𑀺 𑀅𑀢𑁆𑀣𑁄.

𑀲𑁄𑀡𑀤𑀡𑁆𑀟𑀧𑀭𑀺𑀯𑀺𑀢𑀓𑁆𑀓𑀯𑀡𑁆𑀡𑀦𑀸

𑁩𑁦𑁬-𑁭. 𑀦 𑀇𑀥 𑀢𑀺𑀭𑁄-𑀲𑀤𑁆𑀤𑁄 ‘‘𑀢𑀺𑀭𑁄𑀓𑀼𑀟𑁆𑀟𑁂 𑀯𑀸 𑀢𑀺𑀭𑁄𑀧𑀸𑀓𑀸𑀭𑁂 𑀯𑀸 𑀙𑀟𑁆𑀟𑁂𑀬𑁆𑀬 𑀯𑀸 𑀙𑀟𑁆𑀟𑀸𑀧𑁂𑀬𑁆𑀬 𑀯𑀸’’𑀢𑀺𑀆𑀤𑀻𑀲𑀼 (𑀧𑀸𑀘𑀺. 𑁮𑁨𑁫) 𑀯𑀺𑀬 𑀩𑀳𑀺𑀅𑀢𑁆𑀣𑁄𑀢𑀺 𑀆𑀳 ‘‘𑀅𑀦𑁆𑀢𑁄𑀯𑀦𑀲𑀡𑁆𑀟𑁂 𑀕𑀢𑀲𑁆𑀲𑀸’’𑀢𑀺. 𑀢𑀢𑁆𑀣 𑀯𑀺𑀳𑀸𑀭𑁄𑀧𑀺 𑀯𑀦𑀲𑀡𑁆𑀟𑀧𑀭𑀺𑀬𑀸𑀧𑀦𑁆𑀦𑁄𑀢𑀺 𑀤𑀲𑁆𑀲𑁂𑀢𑀺 ‘‘𑀯𑀺𑀳𑀸𑀭𑀩𑁆𑀪𑀦𑁆𑀢𑀭𑀁 𑀧𑀯𑀺𑀝𑁆𑀞𑀲𑁆𑀲𑀸’’𑀢𑀺 𑀇𑀫𑀺𑀦𑀸. 𑀏𑀢𑁂 𑀅𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀲𑁂𑀦 𑀉𑀪𑀢𑁄𑀧𑀓𑁆𑀔𑀺𑀓𑀸, ‘‘𑀇𑀢𑀭𑁂 𑀧𑀦 𑀲𑀫𑁆𑀫𑀸𑀤𑀺𑀝𑁆𑀞𑀺𑀯𑀲𑁂𑀦 𑀏𑀓𑀢𑁄𑀧𑀓𑁆𑀔𑀺𑀓𑀸’’𑀢𑀺 𑀅𑀢𑁆𑀣𑀢𑁄 𑀆𑀧𑀦𑁆𑀦𑁄 𑀳𑁄𑀢𑀺. 𑀤𑀮𑀺𑀤𑁆𑀤𑀢𑁆𑀢𑀸, 𑀜𑀸𑀢𑀺𑀧𑀸𑀭𑀺𑀚𑀼𑀜𑁆𑀜𑀸𑀤𑀺𑀦𑀸 𑀚𑀺𑀡𑁆𑀡𑀢𑁆𑀢𑀸 𑀘 𑀦𑀸𑀫𑀕𑁄𑀢𑁆𑀢𑀯𑀲𑁂𑀦 𑀅𑀧𑀸𑀓𑀝𑀸 𑀳𑀼𑀢𑁆𑀯𑀸 𑀧𑀸𑀓𑀝𑀸 𑀪𑀯𑀺𑀢𑀼𑀓𑀸𑀫𑀸 𑀏𑀯𑀫𑀓𑀁𑀲𑀽𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑁂𑀭𑀸𑀝𑀺𑀓𑀸𑀢𑀺 𑀲𑀞𑀸. 𑀢𑀢𑁆𑀣𑀸𑀢𑀺 𑀤𑁆𑀯𑀻𑀲𑀼 𑀚𑀦𑁂𑀲𑀼. 𑀢𑀢𑁄𑀢𑀺 𑀯𑀺𑀲𑁆𑀲𑀸𑀲𑀢𑁄, 𑀤𑀸𑀦𑀢𑁄 𑀯𑀸.

𑀩𑁆𑀭𑀸𑀳𑁆𑀫𑀡𑀧𑀜𑁆𑀜𑀢𑁆𑀢𑀺𑀯𑀡𑁆𑀡𑀦𑀸

𑁩𑁦𑁯. 𑀅𑀦𑁄𑀦𑀢𑀓𑀸𑀬𑀯𑀲𑁂𑀦 𑀣𑀤𑁆𑀥𑀕𑀢𑁆𑀢𑁄, 𑀦 𑀫𑀸𑀦𑀯𑀲𑁂𑀦. 𑀢𑁂𑀦 𑀧𑀸𑀴𑀺𑀬𑀁 𑀯𑀓𑁆𑀔𑀢𑀺 ‘‘𑀅𑀩𑁆𑀪𑀼𑀦𑁆𑀦𑀸𑀫𑁂𑀢𑁆𑀯𑀸’’𑀢𑀺. 𑀘𑁂𑀢𑁄𑀯𑀺𑀢𑀓𑁆𑀓𑀁 𑀲𑀦𑁆𑀥𑀸𑀬 𑀘𑀺𑀢𑁆𑀢𑀲𑀻𑀲𑁂𑀦 ‘‘𑀘𑀺𑀢𑁆𑀢𑀁 𑀅𑀜𑁆𑀜𑀸𑀲𑀻’’𑀢𑀺 𑀯𑀼𑀢𑁆𑀢𑀁. 𑀯𑀺𑀖𑀸𑀢𑀦𑁆𑀢𑀺 𑀘𑀺𑀢𑁆𑀢𑀤𑀼𑀓𑁆𑀔𑀁.

𑁩𑁧𑁧. 𑀲𑀓𑀲𑀫𑀬𑁂𑀢𑀺 𑀩𑁆𑀭𑀸𑀳𑁆𑀫𑀡𑀮𑀤𑁆𑀥𑀺𑀬𑀁. 𑀫𑀻𑀬𑀫𑀸𑀦𑁄𑀢𑀺 𑀫𑀭𑀺𑀬𑀫𑀸𑀦𑁄. 𑀤𑀺𑀝𑁆𑀞𑀺𑀲𑀜𑁆𑀚𑀸𑀦𑀦𑁂𑀦𑁂𑀯𑀸𑀢𑀺 𑀅𑀢𑁆𑀢𑀦𑁄 𑀮𑀤𑁆𑀥𑀺𑀲𑀜𑁆𑀚𑀸𑀦𑀦𑁂𑀦𑁂𑀯. 𑀲𑀼𑀚𑀦𑁆𑀢𑀺 𑀳𑁄𑀫𑀤𑀩𑁆𑀩𑀺𑀁, 𑀦𑀺𑀩𑁆𑀩𑀘𑀦𑀁 𑀯𑀼𑀢𑁆𑀢𑀫𑁂𑀯. 𑀕𑀡𑁆𑀳𑀦𑁆𑀢𑁂𑀲𑀽𑀢𑀺 𑀚𑀼𑀳𑀦𑀢𑁆𑀣𑀁 𑀕𑀡𑁆𑀳𑀦𑀓𑁂𑀲𑀼, 𑀇𑀭𑀼𑀯𑀺𑀚𑁆𑀚𑁂𑀲𑀽𑀢𑀺 𑀅𑀢𑁆𑀣𑁄. 𑀇𑀭𑀼𑀯𑁂𑀤𑀯𑀲𑁂𑀦 𑀳𑁄𑀫𑀓𑀭𑀡𑀢𑁄 𑀳𑀺 𑀬𑀜𑁆𑀜𑀬𑀚𑀓𑀸 ‘‘𑀇𑀭𑀼𑀯𑀺𑀚𑁆𑀚𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀧𑀞𑀫𑁄 𑀯𑀸𑀢𑀺 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑁂𑀲𑀼 𑀲𑀼𑀚𑀸𑀓𑀺𑀭𑀺𑀬𑀸𑀬𑀁 𑀲𑀩𑁆𑀩𑀧𑀥𑀸𑀦𑁄 𑀯𑀸. 𑀤𑀼𑀢𑀺𑀬𑁄 𑀯𑀸𑀢𑀺 𑀢𑀤𑀦𑀦𑁆𑀢𑀭𑀺𑀓𑁄 𑀯𑀸. ‘‘𑀲𑀼𑀚’’𑀦𑁆𑀢𑀺 𑀇𑀤𑀁 𑀓𑀭𑀡𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀆𑀳 ‘‘𑀲𑀼𑀚𑀸𑀬𑀸’’𑀢𑀺. 𑀅𑀕𑁆𑀕𑀺𑀳𑀼𑀢𑁆𑀢𑀫𑀼𑀔𑀢𑀸𑀬 𑀬𑀜𑁆𑀜𑀲𑁆𑀲 𑀬𑀜𑁆𑀜𑁂 𑀤𑀺𑀬𑁆𑀬𑀫𑀸𑀦𑀁 𑀲𑀼𑀚𑀸𑀫𑀼𑀔𑁂𑀦 𑀤𑀺𑀬𑁆𑀬𑀢𑀺. 𑀯𑀼𑀢𑁆𑀢𑀜𑁆𑀘 ‘‘𑀅𑀕𑁆𑀕𑀺𑀳𑀼𑀢𑁆𑀢𑀫𑀼𑀔𑀸 𑀬𑀜𑁆𑀜𑀸, 𑀲𑀸𑀯𑀺𑀢𑁆𑀢𑀻 𑀙𑀦𑁆𑀤𑀲𑁄 𑀫𑀼𑀔’’𑀦𑁆𑀢𑀺 (𑀫. 𑀦𑀺. 𑁨.𑁪𑁦𑁦). 𑀢𑀲𑁆𑀫𑀸 ‘‘𑀤𑀺𑀬𑁆𑀬𑀫𑀸𑀦’’𑀦𑁆𑀢𑀺 𑀅𑀬𑀁 𑀧𑀸𑀞𑀲𑁂𑀲𑁄 𑀯𑀺𑀜𑁆𑀜𑀸𑀬𑀢𑀻𑀢𑀺 𑀆𑀘𑀭𑀺𑀬𑁂𑀦 (𑀤𑀻. 𑀦𑀺. 𑀝𑀻. 𑁧.𑁩𑁧𑁧) 𑀯𑀼𑀢𑁆𑀢𑀁. 𑀅𑀧𑀺𑀘 𑀲𑀼𑀚𑀸𑀬 𑀤𑀺𑀬𑁆𑀬𑀫𑀸𑀦𑀁 𑀲𑀼𑀚𑀦𑁆𑀢𑀺 𑀢𑀤𑁆𑀥𑀺𑀢𑀯𑀲𑁂𑀦 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀏𑀯𑀫𑀸𑀳. 𑀧𑁄𑀭𑀸𑀡𑀸𑀢𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀸. 𑀧𑀼𑀭𑀺𑀫𑀯𑀸𑀤𑁂 𑀘𑁂𑀢𑁆𑀣 𑀤𑀸𑀦𑀯𑀲𑁂𑀦 𑀧𑀞𑀫𑁄 𑀯𑀸 𑀤𑀼𑀢𑀺𑀬𑁄 𑀯𑀸, 𑀧𑀘𑁆𑀙𑀺𑀫𑀯𑀸𑀤𑁂 𑀆𑀤𑀸𑀦𑀯𑀲𑁂𑀦𑀸𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀯𑀺𑀲𑁂𑀲𑀢𑁄𑀢𑀺 𑀯𑀺𑀚𑁆𑀚𑀸𑀘𑀭𑀡𑀯𑀺𑀲𑁂𑀲𑀢𑁄, 𑀦 𑀩𑁆𑀭𑀸𑀳𑁆𑀫𑀡𑁂𑀳𑀺 𑀇𑀘𑁆𑀙𑀺𑀢𑀯𑀺𑀚𑁆𑀚𑀸𑀘𑀭𑀡𑀫𑀢𑁆𑀢𑀢𑁄. 𑀉𑀢𑁆𑀢𑀫𑀩𑁆𑀭𑀸𑀳𑁆𑀫𑀡𑀲𑁆𑀲𑀸𑀢𑀺 𑀅𑀦𑀼𑀢𑁆𑀢𑀭𑀤𑀓𑁆𑀔𑀺𑀡𑁂𑀬𑁆𑀬𑀢𑀸𑀬 𑀉𑀓𑁆𑀓𑀝𑁆𑀞𑀩𑁆𑀭𑀸𑀳𑁆𑀫𑀡𑀲𑁆𑀲. 𑀬𑀣𑀸𑀥𑀺𑀧𑁆𑀧𑁂𑀢𑀲𑁆𑀲 𑀳𑀺 𑀯𑀺𑀚𑁆𑀚𑀸𑀘𑀭𑀡𑀯𑀺𑀲𑁂𑀲𑀤𑀻𑀧𑀓𑀲𑁆𑀲 ‘‘𑀓𑀢𑀫𑀁 𑀧𑀦 𑀢𑀁 𑀩𑁆𑀭𑀸𑀳𑁆𑀫𑀡𑀲𑀻𑀮𑀁, 𑀓𑀢𑀫𑀸 𑀲𑀸 𑀧𑀜𑁆𑀜𑀸’’𑀢𑀺𑀆𑀤𑀺𑀯𑀘𑀦𑀲𑁆𑀲 𑀑𑀓𑀸𑀲𑀓𑀭𑀡𑀢𑁆𑀣𑀫𑁂𑀯 ‘‘𑀇𑀫𑁂𑀲𑀁 𑀧𑀦 𑀩𑁆𑀭𑀸𑀳𑁆𑀫𑀡 𑀧𑀜𑁆𑀘𑀦𑁆𑀦𑀁 𑀅𑀗𑁆𑀕𑀸𑀦’’𑀦𑁆𑀢𑀺𑀆𑀤𑀺𑀯𑀘𑀦𑀁 𑀪𑀕𑀯𑀸 𑀅𑀯𑁄𑀘, 𑀢𑀲𑁆𑀫𑀸 𑀧𑀥𑀸𑀦𑀯𑀘𑀦𑀸𑀦𑀼𑀭𑀽𑀧𑀫𑀦𑀼𑀲𑀦𑁆𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀪𑀕𑀯𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁩𑁧𑁩. 𑀅𑀧𑀯𑀤𑀢𑀻𑀢𑀺 𑀯𑀡𑁆𑀡𑀸𑀤𑀻𑀦𑀺 𑀅𑀧𑀦𑁂𑀢𑁆𑀯𑀸 𑀯𑀤𑀢𑀺, 𑀅𑀢𑁆𑀣𑀫𑀢𑁆𑀢𑀁 𑀧𑀦 𑀤𑀲𑁆𑀲𑁂𑀢𑀼𑀁 ‘‘𑀧𑀝𑀺𑀓𑁆𑀔𑀺𑀧𑀢𑀻’’𑀢𑀺 𑀯𑀼𑀢𑁆𑀢𑀁. 𑀇𑀤𑀦𑁆𑀢𑀺 ‘‘𑀫𑀸 𑀪𑀯𑀁 𑀲𑁄𑀡𑀤𑀡𑁆𑀟𑁄 𑀏𑀯𑀁 𑀅𑀯𑀘𑀸’’𑀢𑀺𑀆𑀤𑀺𑀯𑀘𑀦𑀁. 𑀩𑁆𑀭𑀸𑀳𑁆𑀫𑀡𑀲𑀫𑀬𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀲𑀺𑀤𑁆𑀥𑀦𑁆𑀢𑀁. 𑀫𑀸 𑀪𑀺𑀦𑁆𑀤𑀻𑀢𑀺 𑀫𑀸 𑀯𑀺𑀦𑀸𑀲𑁂𑀲𑀺.

𑁩𑁧𑁬. 𑀲𑀫𑁄𑀬𑁂𑀯 𑀳𑀼𑀢𑁆𑀯𑀸 𑀲𑀫𑁄𑀢𑀺 𑀲𑀫𑀲𑀫𑁄, 𑀲𑀩𑁆𑀩𑀣𑀸 𑀲𑀫𑁄𑀢𑀺 𑀅𑀢𑁆𑀣𑁄. 𑀧𑀭𑀺𑀬𑀸𑀬𑀤𑁆𑀯𑀬𑀜𑁆𑀳𑀺 𑀅𑀢𑀺𑀲𑀬𑀢𑁆𑀣𑀤𑀻𑀧𑀓𑀁 𑀬𑀣𑀸 ‘‘𑀤𑀼𑀓𑁆𑀔𑀤𑀼𑀓𑁆𑀔𑀁, 𑀭𑀽𑀧𑀭𑀽𑀧’’𑀦𑁆𑀢𑀺. 𑀏𑀓𑀤𑁂𑀲𑀫𑀢𑁆𑀢𑀢𑁄 𑀧𑀦 𑀅𑀗𑁆𑀕𑀓𑁂𑀦 𑀫𑀸𑀡𑀯𑁂𑀦 𑀢𑁂𑀲𑀁 𑀲𑀫𑀪𑀸𑀯𑀢𑁄 𑀢𑀁 𑀦𑀺𑀯𑀢𑁆𑀢𑁂𑀦𑁆𑀢𑁄 ‘‘𑀞𑀧𑁂𑀢𑁆𑀯𑀸 𑀏𑀓𑀤𑁂𑀲𑀫𑀢𑁆𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀓𑀼𑀮𑀓𑁄𑀝𑀺𑀧𑀭𑀺𑀤𑀻𑀧𑀦𑀦𑁆𑀢𑀺 𑀓𑀼𑀮𑀲𑁆𑀲 𑀆𑀤𑀺𑀧𑀭𑀺𑀤𑀻𑀧𑀦𑀁. 𑀬𑀲𑁆𑀫𑀸 𑀅𑀢𑁆𑀢𑀦𑁄 𑀪𑀕𑀺𑀦𑀺𑀬𑀸…𑀧𑁂… 𑀦 𑀚𑀸𑀦𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀦 𑀢𑀲𑁆𑀲 𑀫𑀸𑀢𑀸𑀧𑀺𑀢𑀼𑀫𑀢𑁆𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺, 𑀓𑀼𑀮𑀓𑁄𑀝𑀺𑀧𑀭𑀺𑀤𑀻𑀧𑀦𑀁 𑀧𑀦 𑀲𑀦𑁆𑀥𑀸𑀬 𑀯𑀤𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀅𑀢𑁆𑀣𑀪𑀜𑁆𑀚𑀦𑀓’’𑀦𑁆𑀢𑀺 𑀇𑀫𑀺𑀦𑀸 𑀓𑀫𑁆𑀫𑀧𑀣𑀧𑀢𑁆𑀢𑀁 𑀯𑀤𑀢𑀺. 𑀕𑀼𑀡𑁂𑀢𑀺 𑀬𑀣𑀸𑀯𑀼𑀢𑁆𑀢𑁂 𑀧𑀜𑁆𑀘𑀲𑀻𑀮𑁂. 𑀅𑀣𑀸𑀧𑀺 𑀲𑀺𑀬𑀸𑀢𑀺 𑀬𑀤𑀺𑀧𑀺 𑀢𑀼𑀫𑁆𑀳𑀸𑀓𑀁 𑀏𑀯𑀁 𑀧𑀭𑀺𑀯𑀺𑀢𑀓𑁆𑀓𑁄 𑀲𑀺𑀬𑀸, 𑀪𑀺𑀦𑁆𑀦𑀲𑀻𑀮𑀲𑁆𑀲𑀸𑀧𑀺 𑀧𑀼𑀦 𑀧𑀓𑀢𑀺𑀲𑀻𑀮𑁂 𑀞𑀺𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀪𑀸𑀯𑀁 𑀯𑀡𑁆𑀡𑀸𑀤𑀬𑁄 𑀲𑀸𑀥𑁂𑀦𑁆𑀢𑀻𑀢𑀺 𑀏𑀯𑀁 𑀲𑀺𑀬𑀸𑀢𑀺 𑀅𑀢𑁆𑀣𑁄. ‘‘𑀲𑀸𑀥𑁂𑀢𑀻’’𑀢𑀺 𑀧𑀸𑀞𑁂 ‘‘𑀯𑀡𑁆𑀡𑁄’’𑀢𑀺 𑀓𑀢𑁆𑀢𑀸 𑀆𑀘𑀭𑀺𑀬𑁂𑀦 (𑀤𑀻. 𑀦𑀺. 𑀝𑀻. 𑁧.𑁩𑁧𑁬) 𑀅𑀚𑁆𑀛𑀸𑀳𑀝𑁄, 𑀦𑀺𑀤𑀲𑁆𑀲𑀦𑀜𑁆𑀘𑁂𑀢𑀁. 𑀫𑀦𑁆𑀢𑀚𑀸𑀢𑀻𑀲𑀼𑀧𑀺 𑀳𑀺 𑀏𑀲𑁂𑀯 𑀦𑀬𑁄. 𑀲𑀻𑀮𑀫𑁂𑀯𑀸𑀢𑀺 𑀧𑀼𑀦 𑀧𑀓𑀢𑀺𑀪𑀽𑀢𑀁 𑀲𑀻𑀮𑀫𑁂𑀯 𑀩𑁆𑀭𑀸𑀳𑁆𑀫𑀡𑀪𑀸𑀯𑀁 𑀲𑀸𑀥𑁂𑀲𑁆𑀲𑀢𑀺, 𑀓𑀲𑁆𑀫𑀸𑀢𑀺 𑀘𑁂 ‘‘𑀢𑀲𑁆𑀫𑀺𑀁 𑀳𑀺…𑀧𑁂… 𑀯𑀡𑁆𑀡𑀸𑀤𑀬𑁄’’𑀢𑀺. 𑀢𑀢𑁆𑀣 𑀲𑀫𑁆𑀫𑁄𑀳𑀫𑀢𑁆𑀢𑀁 𑀯𑀡𑁆𑀡𑀸𑀤𑀬𑁄𑀢𑀺 𑀯𑀡𑁆𑀡𑀫𑀦𑁆𑀢𑀚𑀸𑀢𑀺𑀬𑁄 𑀩𑁆𑀭𑀸𑀳𑁆𑀫𑀡𑀪𑀸𑀯𑀲𑁆𑀲 𑀅𑀗𑁆𑀕𑀦𑁆𑀢𑀺 𑀲𑀫𑁆𑀫𑁄𑀳𑀫𑀢𑁆𑀢𑀫𑁂𑀢𑀁, 𑀅𑀲𑀫𑀯𑁂𑀓𑁆𑀔𑀺𑀢𑁆𑀯𑀸 𑀓𑀣𑀺𑀢𑀫𑀺𑀤𑀁.

𑀲𑀻𑀮𑀧𑀜𑁆𑀜𑀸𑀓𑀣𑀸𑀯𑀡𑁆𑀡𑀦𑀸

𑁩𑁧𑁭. 𑀓𑀣𑀺𑀢𑁄 𑀩𑁆𑀭𑀸𑀳𑁆𑀫𑀡𑁂𑀦 𑀧𑀜𑁆𑀳𑁄𑀢𑀺 ‘‘𑀲𑀻𑀮𑀯𑀸 𑀘 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀤𑁆𑀯𑀺𑀦𑁆𑀦𑀫𑁂𑀯 𑀅𑀗𑁆𑀕𑀸𑀦𑀁 𑀯𑀲𑁂𑀦 𑀬𑀣𑀸𑀧𑀼𑀘𑁆𑀙𑀺𑀢𑁄 𑀧𑀜𑁆𑀳𑁄 𑀬𑀸𑀣𑀸𑀯𑀢𑁄 𑀯𑀺𑀲𑁆𑀲𑀚𑁆𑀚𑀺𑀢𑁄. 𑀏𑀢𑁆𑀣𑀸𑀢𑀺 𑀬𑀣𑀸𑀯𑀺𑀲𑁆𑀲𑀚𑁆𑀚𑀺𑀢𑁂 𑀅𑀢𑁆𑀣𑁂, 𑀅𑀗𑁆𑀕𑀤𑁆𑀯𑀬𑁂 𑀯𑀸. 𑀢𑀲𑁆𑀲𑀸𑀢𑀺 𑀲𑁄𑀡𑀤𑀡𑁆𑀟𑀲𑁆𑀲. 𑀬𑀤𑀺 𑀏𑀓𑀫𑀗𑁆𑀕𑀁 𑀞𑀧𑁂𑀬𑁆𑀬, 𑀅𑀣 𑀧𑀢𑀺𑀝𑁆𑀞𑀸𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬. 𑀬𑀤𑀺 𑀧𑀦 𑀦 𑀞𑀧𑁂𑀬𑁆𑀬, 𑀅𑀣 𑀲𑀓𑁆𑀓𑀼𑀡𑁂𑀬𑁆𑀬, 𑀓𑀺𑀁 𑀧𑀦𑁂𑀲 𑀢𑀣𑀸 𑀲𑀓𑁆𑀔𑀺𑀲𑁆𑀲𑀢𑀺 𑀦𑀼 𑀔𑁄, 𑀦𑁄𑀢𑀺 𑀯𑀻𑀫𑀁𑀲𑀦𑀢𑁆𑀣𑀫𑁂𑀯 𑀏𑀯𑀫𑀸𑀳, 𑀦 𑀢𑀼 𑀏𑀓𑀲𑁆𑀲 𑀅𑀗𑁆𑀕𑀲𑁆𑀲 𑀞𑀧𑀦𑀻𑀬𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀣𑀸 𑀘𑀸𑀳 ‘‘𑀏𑀯𑀫𑁂𑀢𑀁 𑀩𑁆𑀭𑀸𑀳𑁆𑀫𑀡𑀸’’𑀢𑀺𑀆𑀤𑀺. 𑀥𑁄𑀯𑀺𑀢𑀢𑁆𑀢𑀸𑀯 𑀧𑀭𑀺𑀲𑀼𑀚𑁆𑀛𑀦𑀦𑁆𑀢𑀺 𑀆𑀳 ‘‘𑀲𑀻𑀮𑀧𑀭𑀺𑀲𑀼𑀤𑁆𑀥𑀸’’𑀢𑀺, 𑀲𑀻𑀮𑀲𑀫𑁆𑀧𑀢𑁆𑀢𑀺𑀬𑀸 𑀲𑀩𑁆𑀩𑀲𑁄 𑀲𑀼𑀤𑁆𑀥𑀸 𑀅𑀦𑀼𑀧𑀓𑁆𑀓𑀺𑀮𑀺𑀝𑁆𑀞𑀸𑀢𑀺 𑀅𑀢𑁆𑀣𑁄. 𑀓𑀼𑀢𑁄 𑀤𑀼𑀲𑁆𑀲𑀻𑀮𑁂 𑀧𑀜𑁆𑀜𑀸 𑀅𑀲𑀫𑀸𑀳𑀺𑀢𑀢𑁆𑀢𑀸 𑀢𑀲𑁆𑀲. 𑀓𑀼𑀢𑁄 𑀯𑀸 𑀧𑀜𑁆𑀜𑀸𑀭𑀳𑀺𑀢𑁂 𑀚𑀴𑁂 𑀏𑀴𑀫𑀽𑀕𑁂 𑀲𑀻𑀮𑀁 𑀲𑀻𑀮𑀯𑀺𑀪𑀸𑀕𑀲𑁆𑀲, 𑀲𑀻𑀮𑀧𑀭𑀺𑀲𑁄𑀥𑀦𑀽𑀧𑀸𑀬𑀲𑁆𑀲 𑀘 𑀅𑀚𑀸𑀦𑀦𑀢𑁄. 𑀏𑀴𑀸 𑀫𑀼𑀔𑁂 𑀕𑀴𑀢𑀺 𑀬𑀲𑁆𑀲𑀸𑀢𑀺 𑀏𑀴𑀫𑀽𑀕𑁄 𑀔-𑀓𑀸𑀭𑀲𑁆𑀲 𑀕-𑀓𑀸𑀭𑀁 𑀓𑀢𑁆𑀯𑀸, 𑀏𑀮𑀫𑀼𑀔𑁄, 𑀏𑀮𑀫𑀽𑀓𑁄 𑀯𑀸. 𑀇𑀢𑀺 𑀩𑀳𑀼𑀥𑀸 𑀧𑀸𑀞𑁄𑀢𑀺 𑀪𑀬𑀪𑁂𑀭𑀯𑀲𑀼𑀢𑁆𑀢𑀝𑁆𑀞𑀓𑀣𑀸𑀬𑀁 (𑀫. 𑀦𑀺. 𑀅𑀝𑁆𑀞. 𑁧.𑁪𑁮) 𑀯𑀼𑀢𑁆𑀢𑁄. 𑀧𑀓𑀝𑁆𑀞𑀁 𑀉𑀓𑁆𑀓𑀝𑁆𑀞𑀁 𑀜𑀸𑀡𑀁 𑀧𑀜𑁆𑀜𑀸𑀡𑀦𑁆𑀢𑀺 𑀓𑀢𑁆𑀯𑀸 𑀧𑀸𑀓𑀢𑀺𑀓𑀁 𑀜𑀸𑀡𑀁 𑀦𑀺𑀯𑀢𑁆𑀢𑁂𑀢𑀼𑀁 ‘‘𑀧𑀜𑁆𑀜𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀯𑀺𑀧𑀲𑁆𑀲𑀦𑀸𑀤𑀺𑀜𑀸𑀡𑀜𑁆𑀳𑀺 𑀇𑀥𑀸𑀥𑀺𑀧𑁆𑀧𑁂𑀢𑀁, 𑀢𑀤𑁂𑀢𑀁 𑀧𑀓𑀸𑀭𑁂𑀳𑀺 𑀚𑀸𑀦𑀦𑀢𑁄 𑀧𑀜𑁆𑀜𑀸𑀯𑀸𑀢𑀺 𑀆𑀳 ‘‘𑀧𑀜𑁆𑀜𑀸𑀬𑁂𑀯𑀸’’𑀢𑀺.

𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂𑀦 𑀥𑁄𑀢𑀸𑀢𑀺 𑀲𑀫𑀸𑀥𑀺𑀧𑀤𑀝𑁆𑀞𑀸𑀦𑁂𑀦 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂𑀦 𑀲𑀓𑀮𑀲𑀁𑀓𑀺𑀮𑁂𑀲𑀫𑀮𑀯𑀺𑀲𑀼𑀤𑁆𑀥𑀺𑀬𑀸 𑀥𑁄𑀯𑀺𑀢𑀸 𑀯𑀺𑀲𑀼𑀤𑁆𑀥𑀸. 𑀢𑁂𑀦𑀸𑀳 ‘‘𑀓𑀣𑀁 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀥𑁄𑀯𑀢𑀻𑀢𑀺 𑀲𑀼𑀚𑁆𑀛𑀢𑀺. 𑀲𑀝𑁆𑀞𑀺𑀅𑀲𑀻𑀢𑀺𑀯𑀲𑁆𑀲𑀸𑀦𑀻𑀢𑀺 𑀲𑀝𑁆𑀞𑀺𑀯𑀲𑁆𑀲𑀸𑀦𑀺 𑀯𑀸 𑀅𑀲𑀻𑀢𑀺𑀯𑀲𑁆𑀲𑀸𑀦𑀺 𑀯𑀸. 𑀫𑀭𑀡𑀓𑀸𑀮𑁂𑀧𑀺, 𑀧𑀕𑁂𑀯 𑀅𑀜𑁆𑀜𑀲𑁆𑀫𑀺𑀁 𑀓𑀸𑀮𑁂. 𑀫𑀳𑀸𑀲𑀝𑁆𑀞𑀺𑀯𑀲𑁆𑀲𑀢𑁆𑀣𑁂𑀭𑁄 𑀯𑀺𑀬𑀸𑀢𑀺 𑀲𑀝𑁆𑀞𑀺𑀯𑀲𑁆𑀲𑀫𑀳𑀸𑀣𑁂𑀭𑁄 𑀯𑀺𑀬. 𑀯𑁂𑀤𑀦𑀸𑀧𑀭𑀺𑀕𑁆𑀕𑀳𑀫𑀢𑁆𑀢𑀫𑁆𑀧𑀻𑀢𑀺 𑀏𑀢𑁆𑀣 𑀯𑁂𑀤𑀦𑀸𑀧𑀭𑀺𑀕𑁆𑀕𑀳𑁄 𑀦𑀸𑀫 𑀬𑀣𑀸𑀉𑀧𑁆𑀧𑀦𑁆𑀦𑀁 𑀯𑁂𑀤𑀦𑀁 𑀲𑀪𑀸𑀯𑀲𑀭𑀲𑀢𑁄 𑀉𑀧𑀥𑀸𑀭𑁂𑀢𑁆𑀯𑀸 𑀧𑀼𑀦 𑀧𑀤𑀝𑁆𑀞𑀸𑀦𑀢𑁄 ‘‘𑀅𑀬𑀁 𑀯𑁂𑀤𑀦𑀸 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺, 𑀲𑁄 𑀘 𑀨𑀲𑁆𑀲𑁄 𑀅𑀦𑀺𑀘𑁆𑀘𑁄 𑀤𑀼𑀓𑁆𑀔𑁄 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄’’𑀢𑀺 𑀮𑀓𑁆𑀔𑀡𑀢𑁆𑀢𑀬𑀁 𑀆𑀭𑁄𑀧𑁂𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀺𑀧𑀲𑁆𑀲𑀦𑀸. 𑀏𑀯𑀁 𑀧𑀲𑁆𑀲𑀦𑁆𑀢𑁂𑀦 𑀳𑀺 𑀲𑀼𑀔𑁂𑀦 𑀲𑀓𑁆𑀓𑀸 𑀲𑀸 𑀯𑁂𑀤𑀦𑀸 𑀅𑀥𑀺𑀯𑀸𑀲𑁂𑀢𑀼𑀁 ‘‘𑀯𑁂𑀤𑀦𑀸 𑀏𑀯 𑀯𑁂𑀤𑀬𑀢𑀻’’𑀢𑀺. 𑀯𑁂𑀤𑀦𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸𑀢𑀺 𑀬𑀣𑀸𑀉𑀧𑁆𑀧𑀦𑁆𑀦𑀁 𑀤𑀼𑀓𑁆𑀔𑀯𑁂𑀤𑀦𑀁 𑀅𑀦𑀼𑀯𑀢𑁆𑀢𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀯𑀻𑀣𑀺𑀧𑀝𑀺𑀧𑀦𑁆𑀦𑀸𑀬 𑀯𑀺𑀧𑀲𑁆𑀲𑀦𑀸𑀬 𑀢𑀁 𑀯𑀺𑀦𑁄𑀤𑁂𑀢𑁆𑀯𑀸. 𑀲𑀁𑀲𑀼𑀫𑀸𑀭𑀧𑀢𑀺𑀢𑁂𑀦𑀸𑀢𑀺 𑀓𑀼𑀫𑁆𑀪𑀻𑀮𑁂𑀦 𑀯𑀺𑀬 𑀪𑀽𑀫𑀺𑀬𑀁 𑀉𑀭𑁂𑀦 𑀦𑀺𑀧𑀚𑁆𑀚𑀫𑀸𑀦𑁂𑀦. ‘‘𑀦𑀸𑀳’’𑀦𑁆𑀢𑀺𑀆𑀤𑀺𑀁 𑀢𑀣𑀸 𑀲𑀻𑀮𑀭𑀓𑁆𑀔𑀡𑀫𑁂𑀯 𑀤𑀼𑀓𑁆𑀓𑀭𑀦𑁆𑀢𑀺 𑀓𑀢𑁆𑀯𑀸 𑀯𑀤𑀢𑀺. 𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑀲𑁆𑀲 𑀳𑀺 𑀅𑀭𑀳𑀢𑁆𑀢𑀁 𑀳𑀢𑁆𑀣𑀕𑀢𑀁𑀬𑁂𑀯. 𑀬𑀣𑀸𑀳 ‘‘𑀲𑀻𑀮𑁂 𑀧𑀢𑀺𑀝𑁆𑀞𑀸𑀬…𑀧𑁂… 𑀯𑀺𑀚𑀝𑀬𑁂 𑀚𑀝’’𑀦𑁆𑀢𑀺 (𑀲𑀁. 𑀦𑀺. 𑁧.𑁨𑁩, 𑁧𑁯𑁨; 𑀧𑁂𑀝𑀓𑁄. 𑁨𑁨; 𑀫𑀺. 𑀧. 𑁨.𑁯) 𑀘𑀢𑀽𑀲𑀼 𑀧𑀼𑀕𑁆𑀕𑀮𑁂𑀲𑀼 𑀉𑀕𑁆𑀖𑀸𑀝𑀺𑀢𑀜𑁆𑀜𑀼𑀦𑁄 𑀏𑀯𑀸𑀬𑀁 𑀯𑀺𑀲𑀬𑁄𑀢𑀺 𑀆𑀳 ‘‘𑀉𑀕𑁆𑀖𑀸𑀝𑀺𑀢𑀜𑁆𑀜𑀼𑀢𑀸𑀬𑀸’’𑀢𑀺. 𑀧𑀜𑁆𑀜𑀸𑀬 𑀲𑀻𑀮𑀁 𑀥𑁄𑀯𑀺𑀢𑁆𑀯𑀸𑀢𑀺 𑀲𑀻𑀮𑀁 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑁂𑀲𑀼 𑀅𑀔𑀡𑁆𑀟𑀸𑀤𑀺𑀪𑀸𑀯𑀸𑀧𑀸𑀤𑀦𑁂𑀦 𑀧𑀜𑁆𑀜𑀸𑀬 𑀲𑀼𑀯𑀺𑀲𑁄𑀥𑀺𑀢𑀁 𑀓𑀢𑁆𑀯𑀸. 𑀲𑀦𑁆𑀢𑀢𑀺𑀫𑀳𑀸𑀫𑀢𑁆𑀢𑀯𑀢𑁆𑀣𑀼 𑀥𑀫𑁆𑀫𑀧𑀤𑁂 (𑀥. 𑀧. 𑀅𑀝𑁆𑀞. 𑁨.𑀲𑀦𑁆𑀢𑀺𑀫𑀳𑀸𑀫𑀢𑁆𑀢𑀯𑀢𑁆𑀣𑀼).

𑁩𑁧𑁮. ‘‘𑀓𑀲𑁆𑀫𑀸 𑀆𑀳𑀸’’𑀢𑀺 𑀉𑀧𑀭𑀺𑀤𑁂𑀲𑀦𑀸𑀬 𑀓𑀸𑀭𑀡𑀁 𑀧𑀼𑀘𑁆𑀙𑀢𑀺. 𑀮𑀚𑁆𑀚𑀸 𑀦𑀸𑀫 ‘‘𑀲𑀻𑀮𑀲𑁆𑀲 𑀘 𑀚𑀸𑀢𑀺𑀬𑀸 𑀘 𑀕𑀼𑀡𑀤𑁄𑀲𑀧𑁆𑀧𑀓𑀸𑀲𑀦𑁂𑀦 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀧𑀼𑀘𑁆𑀙𑀺𑀢𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀲𑀻’’𑀢𑀺 𑀧𑀭𑀺𑀲𑀸𑀬 𑀧𑀜𑁆𑀜𑀸𑀢𑀢𑀸, 𑀲𑀸 𑀢𑀣𑀸 𑀯𑀺𑀲𑁆𑀲𑀚𑁆𑀚𑀺𑀢𑀼𑀫𑀲𑀫𑀢𑁆𑀣𑀢𑀸𑀬 𑀪𑀺𑀚𑁆𑀚𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄, 𑀧𑀞𑀫𑀁 𑀅𑀮𑀚𑁆𑀚𑀫𑀸𑀦𑁄𑀧𑀺 𑀇𑀤𑀸𑀦𑀺 𑀮𑀚𑁆𑀚𑀺𑀲𑁆𑀲𑀸𑀫𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀭𑀫𑀦𑁆𑀢𑀺 𑀧𑀫𑀸𑀡𑀁. ‘‘𑀏𑀢𑁆𑀢𑀓𑀧𑀭𑀫𑀸 𑀫𑀬’’𑀦𑁆𑀢𑀺 𑀧𑀤𑀸𑀦𑀁 𑀢𑀼𑀮𑁆𑀬𑀸𑀥𑀺𑀓𑀭𑀡𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑁂 𑀫𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀲𑀻𑀮𑀧𑀜𑁆𑀜𑀸𑀡’’𑀦𑁆𑀢𑀺 𑀯𑀘𑀦𑀫𑁂𑀯 𑀅𑀫𑁆𑀳𑀸𑀓𑀁 𑀧𑀭𑀫𑀁, 𑀢𑀤𑀢𑁆𑀣𑀪𑀽𑀢𑀸𑀦𑀺 𑀧𑀜𑁆𑀘𑀲𑀻𑀮𑀸𑀦𑀺, 𑀯𑁂𑀤𑀢𑁆𑀢𑀬𑀯𑀺𑀪𑀸𑀯𑀦𑀁 𑀧𑀜𑁆𑀜𑀜𑁆𑀘 𑀮𑀓𑁆𑀔𑀡𑀸𑀤𑀺𑀢𑁄 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀚𑀸𑀦𑀦𑀁 𑀦𑀢𑁆𑀣𑀺, 𑀓𑁂𑀯𑀮𑀁 𑀢𑀢𑁆𑀣 𑀯𑀘𑀻𑀧𑀭𑀫𑀸𑀯 𑀫𑀬𑀦𑁆𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀅𑀝𑁆𑀞𑀓𑀣𑀸𑀫𑀼𑀢𑁆𑀢𑀓𑀦𑀬𑁄 𑁋 𑀏𑀢𑁆𑀢𑀓𑀧𑀭𑀫𑀸𑀢𑀺 𑀏𑀢𑁆𑀢𑀓𑀉𑀓𑁆𑀓𑀁𑀲𑀓𑁄𑀝𑀺𑀓𑀸, 𑀧𑀞𑀫𑀁 𑀧𑀜𑁆𑀳𑀸𑀯𑀺𑀲𑁆𑀲𑀚𑁆𑀚𑀦𑀸𑀯 𑀅𑀫𑁆𑀳𑀸𑀓𑀁 𑀉𑀓𑁆𑀓𑀁𑀲𑀓𑁄𑀝𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀫𑀬𑀸 𑀲𑀓𑀲𑀫𑀬𑀯𑀲𑁂𑀦 𑀧𑀜𑁆𑀳𑁄 𑀯𑀺𑀲𑁆𑀲𑀚𑁆𑀚𑀺𑀢𑁄’’𑀢𑀺. 𑀧𑀭𑀦𑁆𑀢𑀺 𑀅𑀢𑀺𑀭𑁂𑀓𑀁. 𑀪𑀸𑀲𑀺𑀢𑀲𑁆𑀲𑀸𑀢𑀺 𑀯𑀘𑀦𑀲𑁆𑀲 𑀲𑀤𑁆𑀤𑀲𑁆𑀲.

𑀅𑀬𑀁 𑀧𑀦 𑀯𑀺𑀲𑁂𑀲𑁄𑀢𑀺 𑀲𑀻𑀮𑀦𑀺𑀤𑁆𑀤𑁂𑀲𑁂 𑀦𑀺𑀬𑁆𑀬𑀸𑀢𑀦𑀫𑀢𑁆𑀢𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀲𑀻𑀮𑀫𑀺𑀘𑁆𑀘𑁂𑀯 𑀦𑀺𑀬𑁆𑀬𑀸𑀢𑀺𑀢’’𑀦𑁆𑀢𑀺. 𑀲𑀸𑀫𑀜𑁆𑀜𑀨𑀮𑀲𑀼𑀢𑁆𑀢𑁂 (𑀤𑀻. 𑀦𑀺. 𑁧.𑁧𑁫𑁦) 𑀳𑀺 𑀲𑀻𑀮𑀁 𑀦𑀺𑀬𑁆𑀬𑀸𑀢𑁂𑀢𑁆𑀯𑀸𑀧𑀺 𑀧𑀼𑀦 𑀲𑀸𑀫𑀜𑁆𑀜𑀨𑀮𑀫𑀺𑀘𑁆𑀘𑁂𑀯 𑀦𑀺𑀬𑁆𑀬𑀸𑀢𑀺𑀢𑀁. 𑀲𑀩𑁆𑀩𑁂𑀲𑀫𑁆𑀧𑀺 𑀫𑀳𑀕𑁆𑀕𑀢𑀘𑀺𑀢𑁆𑀢𑀸𑀦𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀢𑁆𑀢𑀸, 𑀛𑀸𑀦𑀸𑀦𑀜𑁆𑀘 𑀢𑀁 𑀲𑀫𑁆𑀧𑀬𑁄𑀕𑀢𑁄 ‘‘𑀅𑀢𑁆𑀣𑀢𑁄 𑀧𑀜𑁆𑀜𑀸𑀲𑀫𑁆𑀧𑀤𑀸’’𑀢𑀺 𑀯𑀼𑀢𑁆𑀢𑀁. 𑀧𑀜𑁆𑀜𑀸𑀦𑀺𑀤𑁆𑀤𑁂𑀲𑁂 𑀳𑀺 𑀛𑀸𑀦𑀧𑀜𑁆𑀜𑀁 𑀅𑀥𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀧𑀞𑀫𑀁 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸 𑀦𑀺𑀬𑁆𑀬𑀸𑀢𑀺𑀢𑀸. 𑀢𑁂𑀦𑀸𑀳 ‘‘𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬𑀸’’𑀢𑀺𑀆𑀤𑀺.

𑀲𑁄𑀡𑀤𑀡𑁆𑀟𑀉𑀧𑀸𑀲𑀓𑀢𑁆𑀢𑀧𑀝𑀺𑀯𑁂𑀤𑀦𑀸𑀓𑀣𑀸𑀯𑀡𑁆𑀡𑀦𑀸

𑁩𑁨𑁧. 𑀤𑀳𑀭𑁄 𑀬𑀼𑀯𑀸𑀢𑀺 𑀏𑀢𑁆𑀣 𑀤𑀳𑀭𑀯𑀘𑀦𑁂𑀦 𑀧𑀞𑀫𑀬𑁄𑀩𑁆𑀩𑀦𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀧𑀞𑀫𑀬𑁄𑀩𑁆𑀩𑀦𑀓𑀸𑀮𑀕𑀢𑁄 𑀳𑀺 ‘‘𑀤𑀳𑀭𑁄’’𑀢𑀺 𑀯𑀼𑀘𑁆𑀘𑀢𑀺. 𑀧𑀼𑀢𑁆𑀢𑀲𑁆𑀲 𑀧𑀼𑀢𑁆𑀢𑁄 𑀦𑀢𑁆𑀢𑀸 𑀦𑀸𑀫. 𑀦𑀧𑁆𑀧𑀳𑁄𑀢𑀻𑀢𑀺 𑀦 𑀲𑀫𑁆𑀧𑀚𑁆𑀚𑀢𑀺, 𑀧𑀼𑀢𑁆𑀢𑀦𑀢𑁆𑀢𑀧𑁆𑀧𑀫𑀸𑀡𑁄𑀧𑀺 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. ‘‘𑀆𑀲𑀦𑀸 𑀫𑁂 𑀢𑀁 𑀯𑀼𑀝𑁆𑀞𑀸𑀦’’𑀦𑁆𑀢𑀺 𑀏𑀢𑀲𑁆𑀲 𑀅𑀢𑁆𑀣𑀸𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀫 𑀅𑀕𑀸𑀭𑀯𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑀦𑁆𑀢𑀺 𑀅𑀜𑁆𑀚𑀮𑀺𑀧𑀕𑁆𑀕𑀳𑀡𑀁. 𑀅𑀬𑀜𑁆𑀳𑀺 𑀬𑀣𑀸 𑀢𑀣𑀸 𑀅𑀢𑁆𑀢𑀦𑁄 𑀫𑀳𑀸𑀚𑀦𑀲𑁆𑀲 𑀲𑀫𑁆𑀪𑀸𑀯𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀓𑁄𑀳𑀜𑁆𑀜𑁂𑀦 𑀧𑀭𑁂 𑀯𑀺𑀫𑁆𑀳𑀸𑀧𑁂𑀢𑁆𑀯𑀸 𑀮𑀸𑀪𑀼𑀧𑁆𑀧𑀸𑀤𑀦𑀁 𑀦𑀺𑀚𑀺𑀕𑀻𑀲𑀦𑁆𑀢𑁄 𑀯𑀺𑀘𑀭𑀢𑀺, 𑀢𑀲𑁆𑀫𑀸𑀲𑁆𑀲 𑀅𑀢𑀺𑀯𑀺𑀬 𑀓𑀼𑀳𑀓𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀫𑀺𑀦𑀸 𑀓𑀺𑀭𑀸’’𑀢𑀺𑀆𑀤𑀺𑀁 𑀯𑀤𑀢𑀺. 𑀅𑀕𑀸𑀭𑀯𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀅𑀕𑀸𑀭𑀯𑀯𑀘𑀦𑀁 𑀦𑀸𑀫 𑀦𑀢𑁆𑀣𑀺, 𑀦𑀸𑀬𑀁 𑀪𑀕𑀯𑀢𑀺 𑀅𑀕𑀸𑀭𑀯𑁂𑀦 ‘‘𑀅𑀳𑀜𑁆𑀘𑁂𑀯 𑀔𑁄 𑀧𑀦𑀸’’𑀢𑀺𑀆𑀤𑀺𑀫𑀸𑀳, 𑀅𑀣 𑀔𑁄 𑀅𑀢𑁆𑀢𑀦𑁄 𑀮𑀸𑀪𑀧𑀭𑀺𑀳𑀸𑀦𑀺𑀪𑀬𑁂𑀦𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁩𑁨𑁨. 𑀢𑀗𑁆𑀔𑀡𑀸𑀦𑀼𑀭𑀽𑀧𑀸𑀬𑀸𑀢𑀺 𑀬𑀸𑀤𑀺𑀲𑀻 𑀢𑀤𑀸 𑀢𑀲𑁆𑀲 𑀅𑀚𑁆𑀛𑀸𑀲𑀬𑀧𑁆𑀧𑀯𑀢𑁆𑀢𑀺, 𑀢𑀤𑀦𑀼𑀭𑀽𑀧𑀸𑀬𑀸𑀢𑀺 𑀫𑀚𑁆𑀛𑁂𑀧𑀤𑀮𑁄𑀧𑁂𑀦 𑀅𑀢𑁆𑀣𑁄. 𑀢𑀤𑀸 𑀢𑀲𑁆𑀲 𑀯𑀺𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀺𑀢𑀲𑁆𑀲 𑀢𑀸𑀤𑀺𑀲𑀲𑁆𑀲 𑀜𑀸𑀡𑀧𑀭𑀺𑀧𑀸𑀓𑀲𑁆𑀲 𑀅𑀪𑀸𑀯𑀢𑁄 𑀓𑁂𑀯𑀮𑀁 𑀅𑀩𑁆𑀪𑀼𑀤𑀬𑀲𑀦𑁆𑀦𑀺𑀲𑁆𑀲𑀺𑀢𑁄 𑀏𑀯 𑀅𑀢𑁆𑀣𑁄 𑀤𑀲𑁆𑀲𑀺𑀢𑁄𑀢𑀺 𑀆𑀳 ‘‘𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀁 𑀅𑀢𑁆𑀣𑀁 𑀲𑀦𑁆𑀤𑀲𑁆𑀲𑁂𑀢𑁆𑀯𑀸’’𑀢𑀺, 𑀧𑀘𑁆𑀘𑀓𑁆𑀔𑀢𑁄 𑀯𑀺𑀪𑀸𑀯𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀓𑀼𑀲𑀮𑁂 𑀥𑀫𑁆𑀫𑁂𑀢𑀺 𑀢𑁂𑀪𑀽𑀫𑀓𑁂 𑀓𑀼𑀲𑀮𑀥𑀫𑁆𑀫𑁂, 𑀅𑀬𑀫𑁂𑀢𑁆𑀣 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀅𑀢𑁆𑀣𑁄. 𑀧𑀭𑀺𑀬𑀸𑀬𑀢𑁄 𑀧𑀦 ‘‘𑀘𑀢𑀼𑀪𑀽𑀫𑀓𑁂’’𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀲𑁆𑀲𑀧𑀺 𑀆𑀬𑀢𑀺𑀁 𑀮𑀩𑁆𑀪𑀫𑀸𑀦𑀢𑁆𑀢𑀸. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀆𑀬𑀢𑀺𑀁 𑀦𑀺𑀩𑁆𑀩𑀸𑀦𑀢𑁆𑀣𑀸𑀬, 𑀯𑀸𑀲𑀦𑀸𑀪𑀸𑀕𑀺𑀬𑀸𑀬 𑀯𑀸’’𑀢𑀺. 𑀢𑀢𑁆𑀣𑀸𑀢𑀺 𑀓𑀼𑀲𑀮𑁂 𑀥𑀫𑁆𑀫𑁂 𑀬𑀣𑀸𑀲𑀫𑀸𑀤𑀧𑀺𑀢𑁂. 𑀦𑀦𑁆𑀢𑀺 𑀲𑁄𑀡𑀤𑀡𑁆𑀟𑀩𑁆𑀭𑀸𑀳𑁆𑀫𑀡𑀁. 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸𑀢𑀺 𑀲𑀫𑁆𑀫𑀤𑁂𑀯 𑀉𑀧𑀭𑀽𑀧𑀭𑀺 𑀦𑀺𑀲𑀸𑀦𑁂𑀢𑁆𑀯𑀸 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀢𑀺𑀓𑁆𑀔𑀯𑀺𑀲𑀤𑀪𑀸𑀯𑀫𑀸𑀧𑀸𑀤𑁂𑀢𑁆𑀯𑀸. 𑀢𑀁 𑀧𑀦 𑀅𑀢𑁆𑀣𑀢𑁄 𑀢𑀢𑁆𑀣 𑀉𑀲𑁆𑀲𑀸𑀳𑀚𑀦𑀦𑀫𑁂𑀯 𑀳𑁄𑀢𑀻𑀢𑀺 𑀆𑀳 ‘‘𑀲𑀉𑀲𑁆𑀲𑀸𑀳𑀁 𑀓𑀢𑁆𑀯𑀸’’𑀢𑀺. 𑀢𑀸𑀬 𑀘 𑀲𑀉𑀲𑁆𑀲𑀸𑀳𑀢𑀸𑀬𑀸𑀢𑀺 𑀏𑀯𑀁 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀲𑀉𑀲𑁆𑀲𑀸𑀳𑀢𑀸 𑀦𑀺𑀬𑀫𑀢𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀅𑀢𑁆𑀣𑀲𑀫𑁆𑀧𑀸𑀤𑀦𑀻𑀢𑀺 𑀬𑀣𑀸𑀯𑀼𑀢𑁆𑀢𑀸𑀬 𑀲𑀉𑀲𑁆𑀲𑀸𑀳𑀢𑀸𑀬 𑀘 𑀲𑀫𑁆𑀧𑀳𑀁𑀲𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀜𑁆𑀜𑁂𑀳𑀺 𑀘 𑀯𑀺𑀚𑁆𑀚𑀫𑀸𑀦𑀕𑀼𑀡𑁂𑀳𑀻𑀢𑀺 𑀏𑀯𑀭𑀽𑀧𑀸 𑀢𑁂 𑀕𑀼𑀡𑀲𑀫𑀗𑁆𑀕𑀺𑀢𑀸 𑀘 𑀏𑀓𑀦𑁆𑀢𑁂𑀦 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀅𑀢𑁆𑀣𑀦𑀺𑀧𑁆𑀨𑀸𑀤𑀦𑀻𑀢𑀺 𑀢𑀲𑁆𑀫𑀺𑀁 𑀯𑀺𑀚𑁆𑀚𑀫𑀸𑀦𑁂𑀳𑀺, 𑀅𑀜𑁆𑀜𑁂𑀳𑀺 𑀘 𑀕𑀼𑀡𑁂𑀳𑀺 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀲𑀫𑁆𑀫𑀤𑁂𑀯 𑀳𑀝𑁆𑀞𑀢𑀼𑀝𑁆𑀞𑀪𑀸𑀯𑀫𑀸𑀧𑀸𑀤𑁂𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀬𑀤𑀺 𑀪𑀕𑀯𑀸 𑀥𑀫𑁆𑀫𑀭𑀢𑀦𑀯𑀲𑁆𑀲𑀁 𑀯𑀲𑁆𑀲𑀺, 𑀅𑀣 𑀓𑀲𑁆𑀫𑀸 𑀲𑁄 𑀯𑀺𑀲𑁂𑀲𑀁 𑀦𑀸𑀥𑀺𑀕𑀘𑁆𑀙𑀻𑀢𑀺 𑀘𑁄𑀤𑀦𑀁 𑀲𑁄𑀥𑁂𑀢𑀼𑀁 ‘‘𑀩𑁆𑀭𑀸𑀳𑁆𑀫𑀡𑁄 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀼𑀳𑀓𑀢𑀸𑀬𑀸𑀢𑀺 𑀯𑀼𑀢𑁆𑀢𑀦𑀬𑁂𑀦 𑀓𑁄𑀳𑀜𑁆𑀜𑀓𑀢𑁆𑀢𑀸, 𑀇𑀫𑀺𑀦𑀸 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀅𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀬𑀚𑁆𑀚𑁂𑀯𑀁 𑀓𑀲𑁆𑀫𑀸 𑀪𑀕𑀯𑀸 𑀢𑀲𑁆𑀲 𑀢𑀣𑀸 𑀥𑀫𑁆𑀫𑀭𑀢𑀦𑀯𑀲𑁆𑀲𑀁 𑀯𑀲𑁆𑀲𑀻𑀢𑀺 𑀧𑀝𑀺𑀘𑁄𑀤𑀦𑀫𑁆𑀧𑀺 𑀲𑁄𑀥𑁂𑀦𑁆𑀢𑁄 ‘‘𑀓𑁂𑀯𑀮𑀫𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑁂𑀯𑀮𑀦𑁆𑀢𑀺 𑀦𑀺𑀩𑁆𑀩𑁂𑀥𑀸𑀲𑁂𑀓𑁆𑀔𑀪𑀸𑀕𑀺𑀬𑁂𑀦 𑀅𑀲𑀫𑁆𑀫𑀺𑀲𑁆𑀲𑀁. 𑀦𑀺𑀩𑁆𑀩𑀸𑀦𑀢𑁆𑀣𑀸𑀬𑀸𑀢𑀺 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀢𑁆𑀣𑀸𑀬, 𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀸𑀬 𑀯𑀸. 𑀆𑀬𑀢𑀺𑀁 𑀯𑀺𑀲𑁂𑀲𑀸𑀥𑀺𑀕𑀫𑀦𑀽𑀧𑀸𑀬𑀪𑀽𑀢𑀸 𑀧𑀼𑀜𑁆𑀜𑀓𑀺𑀭𑀺𑀬𑀸𑀲𑀼 𑀧𑀭𑀺𑀘𑀬𑀲𑀗𑁆𑀔𑀸𑀢𑀸 𑀯𑀸𑀲𑀦𑀸 𑀏𑀯 𑀪𑀸𑀕𑁄, 𑀢𑀲𑁆𑀫𑀺𑀁 𑀉𑀧𑀸𑀬𑀪𑀸𑀯𑁂𑀦 𑀧𑀯𑀢𑁆𑀢𑀸𑀢𑀺 𑀯𑀸𑀲𑀦𑀸𑀪𑀸𑀕𑀺𑀬𑀸. 𑀦 𑀳𑀺 𑀪𑀕𑀯𑀢𑁄 𑀦𑀺𑀭𑀢𑁆𑀣𑀓𑀸 𑀘𑀢𑀼𑀧𑁆𑀧𑀤𑀺𑀓𑀕𑀸𑀣𑀸𑀫𑀢𑁆𑀢𑀸𑀧𑀺 𑀥𑀫𑁆𑀫𑀤𑁂𑀲𑀦𑀸 𑀅𑀢𑁆𑀣𑀺. 𑀢𑁂𑀦𑀸𑀳 ‘‘𑀲𑀩𑁆𑀩𑀸 𑀧𑀼𑀭𑀺𑀫𑀧𑀘𑁆𑀙𑀺𑀫𑀓𑀣𑀸’’𑀢𑀺. 𑀆𑀤𑀺𑀢𑁄 𑀘𑁂𑀢𑁆𑀣 𑀧𑀪𑀼𑀢𑀺 𑀬𑀸𑀯 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀸𑀧𑀭𑀺𑀬𑁄𑀲𑀸𑀦𑀁, 𑀢𑀸𑀯 𑀧𑀼𑀭𑀺𑀫𑀓𑀣𑀸, 𑀪𑀕𑀯𑀢𑁄 𑀧𑀦 𑀲𑀻𑀮𑀧𑀜𑁆𑀜𑀸𑀯𑀺𑀲𑁆𑀲𑀚𑁆𑀚𑀦𑀸 𑀧𑀘𑁆𑀙𑀺𑀫𑀓𑀣𑀸. 𑀩𑁆𑀭𑀸𑀳𑁆𑀫𑀡𑁂𑀦 𑀯𑀼𑀢𑁆𑀢𑀸𑀧𑀺 𑀳𑀺 𑀩𑀼𑀤𑁆𑀥𑀕𑀼𑀡𑀸𑀤𑀺𑀧𑀝𑀺𑀲𑀜𑁆𑀜𑀼𑀢𑁆𑀢𑀸 𑀓𑀣𑀸 𑀆𑀬𑀢𑀺𑀁 𑀦𑀺𑀩𑁆𑀩𑀸𑀦𑀢𑁆𑀣𑀸𑀬 𑀯𑀸𑀲𑀦𑀸𑀪𑀸𑀕𑀺𑀬𑀸 𑀏𑀯𑀸𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀇𑀢𑀺 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬 𑀧𑀭𑀫𑀲𑀼𑀔𑀼𑀫𑀕𑀫𑁆𑀪𑀻𑀭𑀤𑀼𑀭𑀦𑀼𑀩𑁄𑀥𑀢𑁆𑀣𑀧𑀭𑀺𑀤𑀻𑀧𑀦𑀸𑀬 𑀲𑀼𑀯𑀺𑀫𑀮𑀯𑀺𑀧𑀼𑀮𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀚𑀦𑀦𑀸𑀬 𑀲𑀸𑀥𑀼𑀯𑀺𑀮𑀸𑀲𑀺𑀦𑀺𑀬𑀸 𑀦𑀸𑀫 𑀮𑀻𑀦𑀢𑁆𑀣𑀧𑀓𑀸𑀲𑀦𑀺𑀬𑀸 𑀲𑁄𑀡𑀤𑀡𑁆𑀟𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑀓𑀸𑀲𑀦𑀸.

𑀲𑁄𑀡𑀤𑀡𑁆𑀟𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.