𑁩. 𑀅𑀫𑁆𑀩𑀝𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸

𑀅𑀤𑁆𑀥𑀸𑀦𑀕𑀫𑀦𑀯𑀡𑁆𑀡𑀦𑀸

𑁨𑁫𑁪. 𑀏𑀯𑀁 𑀲𑀸𑀫𑀜𑁆𑀜𑀨𑀮𑀲𑀼𑀢𑁆𑀢𑀁 𑀲𑀁𑀯𑀡𑁆𑀡𑁂𑀢𑁆𑀯𑀸 𑀇𑀤𑀸𑀦𑀺 𑀅𑀫𑁆𑀩𑀝𑁆𑀞𑀲𑀼𑀢𑁆𑀢𑀁 𑀲𑀁𑀯𑀡𑁆𑀡𑁂𑀦𑁆𑀢𑁄 𑀬𑀣𑀸𑀦𑀼𑀧𑀼𑀩𑁆𑀩𑀁 𑀲𑀁𑀯𑀡𑁆𑀡𑁄𑀓𑀸𑀲𑀲𑁆𑀲 𑀧𑀢𑁆𑀢𑀪𑀸𑀯𑀁 𑀯𑀺𑀪𑀸𑀯𑁂𑀢𑀼𑀁, 𑀲𑀸𑀫𑀜𑁆𑀜𑀨𑀮𑀲𑀼𑀢𑁆𑀢𑀲𑁆𑀲𑀸𑀦𑀦𑁆𑀢𑀭𑀁 𑀲𑀗𑁆𑀕𑀻𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀅𑀫𑁆𑀩𑀝𑁆𑀞𑀲𑀼𑀢𑁆𑀢𑀪𑀸𑀯𑀁 𑀧𑀓𑀸𑀲𑁂𑀢𑀼𑀁 ‘‘𑀏𑀯𑀁 𑀫𑁂 𑀲𑀼𑀢𑀁…𑀧𑁂… 𑀓𑁄𑀲𑀮𑁂𑀲𑀽𑀢𑀺 𑀅𑀫𑁆𑀩𑀝𑁆𑀞𑀲𑀼𑀢𑁆𑀢’’𑀦𑁆𑀢𑀺 𑀆𑀳. 𑀏𑀯𑀫𑀻𑀤𑀺𑀲𑁂𑀲𑀼. 𑀇𑀢𑀺𑀲𑀤𑁆𑀤𑁄 𑀘𑁂𑀢𑁆𑀣 𑀆𑀤𑀺𑀅𑀢𑁆𑀣𑁄, 𑀧𑀤𑀢𑁆𑀣𑀯𑀺𑀧𑀮𑁆𑀮𑀸𑀲𑀚𑁄𑀢𑀓𑁄 𑀧𑀦 𑀇𑀢𑀺𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄, 𑀆𑀤𑀺𑀲𑀤𑁆𑀤𑀮𑁄𑀧𑁄 𑀯𑀸 𑀏𑀲, 𑀉𑀧𑀮𑀓𑁆𑀔𑀡𑀦𑀺𑀤𑁆𑀤𑁂𑀲𑁄 𑀯𑀸. 𑀅𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸 𑀦𑀸𑀫 𑀳𑁂𑀝𑁆𑀞𑀸 𑀅𑀕𑁆𑀕𑀳𑀺𑀢𑀢𑀸𑀬 𑀅𑀧𑀼𑀩𑁆𑀩𑀲𑁆𑀲 𑀧𑀤𑀲𑁆𑀲 𑀅𑀢𑁆𑀣𑀯𑀺𑀪𑀚𑀦𑀸. ‘‘𑀳𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀸𑀕𑀢-𑀫𑀢𑁆𑀣𑀁 𑀅𑀢𑁆𑀣𑀁 𑀧𑀓𑀸𑀲𑀬𑀺𑀲𑁆𑀲𑀸𑀫𑀻’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑀕𑀦𑁆𑀣𑀸𑀭𑀫𑁆𑀪𑀓𑀣𑀸) 𑀳𑀺 𑀯𑀼𑀢𑁆𑀢𑀁, ‘‘𑀅𑀦𑀼𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸’’𑀢𑀺 𑀓𑀢𑁆𑀣𑀘𑀺 𑀧𑀸𑀞𑁄, 𑀲𑁄 𑀅𑀬𑀼𑀢𑁆𑀢𑁄𑀯 𑀝𑀻𑀓𑀸𑀬 𑀅𑀦𑀼𑀤𑁆𑀥𑀝𑀢𑁆𑀢𑀸, 𑀢𑀣𑀸 𑀅𑀲𑀁𑀯𑀡𑁆𑀡𑀺𑀢𑀢𑁆𑀢𑀸 𑀘.

‘‘𑀭𑀸𑀚𑀓𑀼𑀫𑀸𑀭𑀸 𑀕𑁄𑀢𑁆𑀢𑀯𑀲𑁂𑀦 𑀓𑁄𑀲𑀮𑀸 𑀦𑀸𑀫𑀸’’𑀢𑀺 (𑀤𑀻. 𑀦𑀺. 𑀝𑀻. 𑁧.𑁨𑁫𑁪) 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑀁. 𑀅𑀓𑁆𑀔𑀭𑀘𑀺𑀦𑁆𑀢𑀓𑀸 𑀧𑀦 𑀯𑀤𑀦𑁆𑀢𑀺 ‘‘𑀓𑁄𑀲𑀁 𑀮𑀦𑁆𑀢𑀺 𑀕𑀡𑁆𑀳𑀦𑁆𑀢𑀺, 𑀓𑀼𑀲𑀮𑀁 𑀯𑀸 𑀧𑀼𑀘𑁆𑀙𑀦𑁆𑀢𑀻𑀢𑀺 𑀓𑁄𑀲𑀮𑀸’’𑀢𑀺. 𑀚𑀦𑀧𑀤𑀺𑀦𑁄𑀢𑀺 𑀚𑀦𑀧𑀤𑀯𑀦𑁆𑀢𑁄, 𑀚𑀦𑀧𑀤𑀲𑁆𑀲 𑀯𑀸 𑀇𑀲𑁆𑀲𑀭𑀸. ‘‘𑀓𑁄𑀲𑀮𑀸 𑀦𑀸𑀫 𑀭𑀸𑀚𑀓𑀼𑀫𑀸𑀭𑀸’’𑀢𑀺 𑀯𑀼𑀢𑁆𑀢𑁂𑀬𑁂𑀯 𑀲𑀺𑀤𑁆𑀥𑁂𑀧𑀺 ‘‘𑀚𑀦𑀧𑀤𑀺𑀦𑁄’’𑀢𑀺 𑀯𑀘𑀦𑀁 𑀲𑀦𑁆𑀢𑁂𑀲𑀼𑀧𑀺 𑀅𑀜𑁆𑀜𑁂𑀲𑀼 𑀢𑀁𑀢𑀁𑀦𑀸𑀫𑀧𑀜𑁆𑀜𑀸𑀢𑁂𑀲𑀼 𑀢𑀢𑁆𑀣 𑀦𑀺𑀯𑀲𑀦𑁆𑀢𑁂𑀲𑀼 𑀚𑀦𑀧𑀤𑀺𑀪𑀸𑀯𑀢𑁄 𑀢𑁂𑀲𑀫𑁂𑀯 𑀦𑀺𑀯𑀲𑀦𑀫𑀼𑀧𑀸𑀤𑀸𑀬 𑀚𑀦𑀧𑀤𑀲𑁆𑀲𑀸𑀬𑀁 𑀲𑀫𑀜𑁆𑀜𑀸𑀢𑀺 𑀤𑀲𑁆𑀲𑀦𑀢𑁆𑀣𑀁. ‘‘𑀢𑁂𑀲𑀁 𑀦𑀺𑀯𑀸𑀲𑁄’’𑀢𑀺 𑀇𑀫𑀺𑀦𑀸 ‘‘𑀓𑁄𑀲𑀮𑀸𑀦𑀁 𑀦𑀺𑀯𑀸𑀲𑀸 𑀓𑁄𑀲𑀮𑀸’’𑀢𑀺 𑀢𑀤𑁆𑀥𑀺𑀢𑀁 𑀤𑀲𑁆𑀲𑁂𑀢𑀺. ‘‘𑀏𑀓𑁄𑀧𑀺 𑀚𑀦𑀧𑀤𑁄’’𑀢𑀺 𑀇𑀫𑀺𑀦𑀸 𑀧𑀦 𑀲𑀤𑁆𑀤𑀢𑁄𑀬𑁂𑀯𑁂𑀢𑀁 𑀧𑀼𑀣𑀼𑀯𑀘𑀦𑀁, 𑀅𑀢𑁆𑀣𑀢𑁄 𑀧𑀦𑁂𑀲 𑀏𑀓𑁄 𑀏𑀯𑀸𑀢𑀺 𑀯𑀺𑀪𑀸𑀯𑁂𑀢𑀺. 𑀅𑀧𑀺-𑀲𑀤𑁆𑀤𑁄 𑀘𑁂𑀢𑁆𑀣 𑀅𑀦𑀼𑀕𑁆𑀕𑀳𑁂, 𑀢𑁂𑀦 𑀓𑀸𑀫𑀁 𑀏𑀓𑁄𑀬𑁂𑀯𑁂𑀲 𑀚𑀦𑀧𑀤𑁄, 𑀢𑀣𑀸𑀧𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀧𑀼𑀣𑀼𑀯𑀘𑀦𑀫𑀼𑀧𑀧𑀦𑁆𑀦𑀦𑁆𑀢𑀺 𑀅𑀦𑀼𑀕𑁆𑀕𑀡𑁆𑀳𑀸𑀢𑀺. 𑀬𑀤𑀺 𑀏𑀓𑁄𑀯 𑀚𑀦𑀧𑀤𑁄, 𑀓𑀣𑀁 𑀢𑀢𑁆𑀣 𑀩𑀳𑀼𑀯𑀘𑀦𑀦𑁆𑀢𑀺 𑀆𑀳 ‘‘𑀭𑀼𑀴𑁆𑀳𑀺𑀲𑀤𑁆𑀤𑁂𑀦𑀸’’𑀢𑀺𑀆𑀤𑀺, 𑀭𑀼𑀴𑁆𑀳𑀺𑀲𑀤𑁆𑀤𑀢𑁆𑀢𑀸 𑀩𑀳𑀼𑀯𑀘𑀦𑀫𑀼𑀧𑀧𑀦𑁆𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀺𑀲𑁆𑀲𑀺𑀢𑁂𑀲𑀼 𑀧𑀬𑀼𑀢𑁆𑀢𑀲𑁆𑀲 𑀧𑀼𑀣𑀼𑀯𑀘𑀦𑀲𑁆𑀲, 𑀧𑀼𑀣𑀼𑀪𑀸𑀯𑀲𑁆𑀲 𑀯𑀸 𑀦𑀺𑀲𑁆𑀲𑀬𑁂 𑀅𑀪𑀺𑀦𑀺𑀭𑁄𑀧𑀦𑀸 𑀇𑀥 𑀭𑀼𑀴𑁆𑀳𑀺, 𑀢𑁂𑀦 𑀯𑀼𑀢𑁆𑀢𑀁 𑀆𑀘𑀭𑀺𑀬𑁂𑀦 𑀇𑀥 𑀘𑁂𑀯 𑀅𑀜𑁆𑀜𑀢𑁆𑀣 𑀘 𑀫𑀚𑁆𑀛𑀺𑀫𑀸𑀕𑀫𑀝𑀻𑀓𑀸𑀤𑀻𑀲𑀼 ‘‘𑀅𑀓𑁆𑀔𑀭𑀘𑀺𑀦𑁆𑀢𑀓𑀸 𑀳𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀬𑀼𑀢𑁆𑀢𑁂 𑀯𑀺𑀬 𑀈𑀤𑀺𑀲𑀮𑀺𑀗𑁆𑀕𑀯𑀘𑀦𑀸𑀦𑀺 𑀇𑀘𑁆𑀙𑀦𑁆𑀢𑀺, 𑀅𑀬𑀫𑁂𑀢𑁆𑀣 𑀭𑀼𑀴𑁆𑀳𑀺 𑀬𑀣𑀸 ‘𑀅𑀜𑁆𑀜𑀢𑁆𑀣𑀸𑀧𑀺 𑀓𑀼𑀭𑀽𑀲𑀼 𑀯𑀺𑀳𑀭𑀢𑀺, 𑀅𑀗𑁆𑀕𑁂𑀲𑀼 𑀯𑀺𑀳𑀭𑀢𑀻’𑀢𑀺 𑀘𑀸’’𑀢𑀺. 𑀓𑁂𑀘𑀺 𑀧𑀦 𑀓𑁄𑀲𑀮𑀦𑀸𑀫𑀸𑀪𑀺𑀦𑀺𑀭𑁄𑀧𑀦𑀫𑀺𑀘𑁆𑀙𑀦𑁆𑀢𑀺, 𑀅𑀬𑀼𑀢𑁆𑀢𑀫𑁂𑀢𑀁 𑀧𑀼𑀣𑀼𑀯𑀘𑀦𑀲𑁆𑀲 𑀅𑀧𑁆𑀧𑀬𑀼𑀚𑁆𑀚𑀺𑀢𑀩𑁆𑀩𑀢𑁆𑀢𑀸. 𑀦𑀸𑀫𑀸𑀪𑀺𑀦𑀺𑀭𑁄𑀧𑀦𑀸𑀬 𑀳𑀺 𑀏𑀓𑀯𑀘𑀦𑀫𑁆𑀧𑀺 𑀪𑀯𑀢𑀺 𑀬𑀣𑀸 ‘‘𑀲𑀻𑀳𑁄 𑀕𑀸𑀬𑀢𑀻’’𑀢𑀺. 𑀢𑀩𑁆𑀩𑀺𑀲𑁂𑀲𑀺𑀢𑁂𑀧𑀺 𑀚𑀦𑀧𑀤𑀲𑀤𑁆𑀤𑁂 𑀚𑀸𑀢𑀺𑀲𑀤𑁆𑀤𑀢𑁆𑀢𑀸 𑀏𑀓𑀯𑀘𑀦𑀫𑁂𑀯. 𑀢𑁂𑀦𑀸𑀳 ‘‘𑀢𑀲𑁆𑀫𑀺𑀁 𑀓𑁄𑀲𑀮𑁂𑀲𑀼 𑀚𑀦𑀧𑀤𑁂’’𑀢𑀺, 𑀓𑁄𑀲𑀮𑀦𑀸𑀫𑀓𑁂 𑀢𑀲𑁆𑀫𑀺𑀁 𑀚𑀦𑀧𑀤𑁂𑀢𑀺 𑀅𑀢𑁆𑀣𑁄. 𑀅𑀪𑀽𑀢𑀢𑁄 𑀳𑀺 𑀯𑁄𑀳𑀸𑀭𑀫𑀢𑁆𑀢𑀁 𑀭𑀼𑀴𑁆𑀳𑀺, 𑀪𑀽𑀢𑀢𑁄𑀬𑁂𑀯 𑀅𑀢𑁆𑀣𑁄 𑀯𑀺𑀦𑀺𑀘𑁆𑀙𑀺𑀦𑀺𑀢𑀩𑁆𑀩𑁄. 𑀬𑀣𑀸 𑀳𑀺 𑁋

‘‘𑀲𑀦𑁆𑀢𑀺 𑀧𑀼𑀢𑁆𑀢𑀸 𑀯𑀺𑀤𑁂𑀳𑀸𑀦𑀁, 𑀤𑀻𑀖𑀸𑀯𑀼 𑀭𑀝𑁆𑀞𑀯𑀟𑁆𑀠𑀦𑁄;

𑀢𑁂 𑀭𑀚𑁆𑀚𑀁 𑀓𑀸𑀭𑀬𑀺𑀲𑁆𑀲𑀦𑁆𑀢𑀺, 𑀫𑀺𑀣𑀺𑀮𑀸𑀬𑀁 𑀧𑀚𑀸𑀧𑀢𑀻’’𑀢𑀺. (𑀚𑀸. 𑁨.𑁨𑁨.𑁨𑁭𑁬) 𑀆𑀤𑀻𑀲𑀼 𑁋

𑀢𑀁𑀧𑀼𑀢𑁆𑀢𑀲𑀗𑁆𑀔𑀸𑀢𑀲𑁆𑀲 𑀏𑀓𑀢𑁆𑀣𑀲𑁆𑀲 𑀭𑀼𑀴𑁆𑀳𑀺𑀯𑀲𑁂𑀦 ‘‘𑀧𑀼𑀢𑁆𑀢𑀸’’𑀢𑀺 𑀩𑀳𑀼𑀯𑀘𑀦𑀧𑀬𑁄𑀕𑁄, 𑀢𑀣𑀸 𑀇𑀥𑀸𑀧𑀺 𑀢𑀦𑁆𑀦𑀺𑀯𑀸𑀲𑀲𑀗𑁆𑀔𑀸𑀢𑀲𑁆𑀲 𑀏𑀓𑀢𑁆𑀣𑀲𑁆𑀲 𑀭𑀼𑀴𑁆𑀳𑀺𑀯𑀲𑁂𑀦 ‘‘𑀓𑁄𑀲𑀮𑁂𑀲𑀽’’𑀢𑀺 𑀩𑀳𑀼𑀯𑀘𑀦𑀧𑀬𑁄𑀕𑁄 𑀳𑁄𑀢𑀺. 𑀬𑀣𑀸 𑀘 ‘‘𑀧𑀸𑀡𑀁 𑀦 𑀳𑀜𑁆𑀜𑁂, 𑀦 𑀘’𑀤𑀺𑀦𑁆𑀦𑀫𑀸𑀤𑀺𑀬𑁂’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁮.𑁪𑁨, 𑁪𑁩, 𑁪𑁫) 𑀚𑀸𑀢𑀺𑀯𑀲𑁂𑀦 𑀩𑀳𑁆𑀯𑀢𑁆𑀣𑀸𑀦𑀫𑁂𑀓𑀯𑀘𑀦𑀧𑀬𑁄𑀕𑁄, 𑀢𑀣𑀸 𑀇𑀥𑀸𑀧𑀺 𑀚𑀸𑀢𑀺𑀯𑀲𑁂𑀦 𑀅𑀯𑀬𑀯𑀧𑁆𑀧𑀪𑁂𑀤𑁂𑀦 𑀩𑀳𑁆𑀯𑀢𑁆𑀣𑀲𑁆𑀲 ‘‘𑀚𑀦𑀧𑀤𑁂’’𑀢𑀺 𑀏𑀓𑀯𑀘𑀦𑀧𑀬𑁄𑀕𑁄 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀘 𑀆𑀘𑀭𑀺𑀬𑁂𑀦 𑀫𑀚𑁆𑀛𑀺𑀫𑀸𑀕𑀫𑀝𑀻𑀓𑀸𑀬𑀁 ‘‘𑀢𑀩𑁆𑀩𑀺𑀲𑁂𑀲𑀦𑁂𑀧𑀺 𑀚𑀦𑀧𑀤𑀲𑀤𑁆𑀤𑁂 𑀚𑀸𑀢𑀺𑀲𑀤𑁆𑀤𑁂 𑀏𑀓𑀯𑀘𑀦𑀫𑁂𑀯. 𑀢𑁂𑀦𑀸𑀳 ‘𑀢𑀲𑁆𑀫𑀺𑀁 𑀅𑀗𑁆𑀕𑁂𑀲𑀼 𑀚𑀦𑀧𑀤𑁂’𑀢𑀺’’.

𑀏𑀯𑀁 𑀭𑀼𑀴𑁆𑀳𑀺𑀯𑀲𑁂𑀦 𑀩𑀳𑀼𑀫𑁆𑀳𑀺 𑀯𑀺𑀬 𑀯𑀢𑁆𑀢𑀩𑁆𑀩𑁂 𑀩𑀳𑀼𑀯𑀘𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀩𑀳𑁆𑀯𑀢𑁆𑀣𑀯𑀲𑁂𑀦 𑀩𑀳𑀼𑀫𑁆𑀧𑀺 𑀏𑀯 𑀯𑀢𑁆𑀢𑀩𑁆𑀩𑁂 𑀩𑀳𑀼𑀯𑀘𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑁄𑀭𑀸𑀡𑀸 𑀧𑀦𑀸𑀳𑀽’’𑀢𑀺𑀆𑀤𑀺𑀫𑀸𑀳. 𑀧𑀦-𑀲𑀤𑁆𑀤𑁄 𑀘𑁂𑀢𑁆𑀣 𑀯𑀺𑀲𑁂𑀲𑀢𑁆𑀣𑀚𑁄𑀢𑀦𑁄, 𑀢𑁂𑀦 𑀧𑀼𑀣𑀼𑀅𑀢𑁆𑀣𑀯𑀺𑀲𑀬𑀢𑀸𑀬 𑀏𑀯𑁂𑀢𑀁 𑀧𑀼𑀣𑀼𑀯𑀘𑀦𑀁, 𑀦 𑀭𑀼𑀴𑁆𑀳𑀺𑀯𑀲𑁂𑀦𑀸𑀢𑀺 𑀯𑀓𑁆𑀔𑀫𑀸𑀦𑀁 𑀯𑀺𑀲𑁂𑀲𑀁 𑀚𑁄𑀢𑁂𑀢𑀺. 𑀲𑁄 𑀳𑀺 𑀧𑀤𑁂𑀲𑁄 𑀢𑀺𑀬𑁄𑀚𑀦𑀲𑀢𑀧𑀭𑀺𑀫𑀸𑀡𑀢𑀸𑀬 𑀩𑀳𑀼𑀧𑁆𑀧𑀪𑁂𑀤𑁄𑀢𑀺, 𑀇𑀫𑀲𑁆𑀫𑀺𑀁 𑀧𑀦 𑀦𑀬𑁂 𑀢𑁂𑀲𑀼 𑀓𑁄𑀲𑀮𑁂𑀲𑀼 𑀚𑀦𑀧𑀤𑁂𑀲𑀽𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀫𑀳𑀸𑀧𑀦𑀸𑀤𑀦𑁆𑀢𑀺 𑀫𑀳𑀸𑀧𑀦𑀸𑀤𑀚𑀸𑀢𑀓 (𑀚𑀸. 𑁧.𑁩.𑁪𑁦, 𑁪𑁧, 𑁪𑁨) 𑀲𑀼𑀭𑀼𑀘𑀺𑀚𑀸𑀢𑀓𑁂𑀲𑀼 (𑀚𑀸. 𑁧.𑁧𑁪.𑁧𑁦𑁨 𑀆𑀤𑀬𑁄) 𑀆𑀕𑀢𑀁 𑀲𑀼𑀭𑀼𑀘𑀺𑀦𑁄 𑀦𑀸𑀫 𑀯𑀺𑀤𑁂𑀳𑀭𑀜𑁆𑀜𑁄 𑀧𑀼𑀢𑁆𑀢𑀁 𑀫𑀳𑀸𑀧𑀦𑀸𑀤𑀦𑀸𑀫𑀓𑀁 𑀭𑀸𑀚𑀓𑀼𑀫𑀸𑀭𑀁. 𑀦𑀸𑀦𑀸𑀦𑀸𑀝𑀓𑀸𑀦𑀻𑀢𑀺 𑀪𑀡𑁆𑀟𑀼𑀓𑀡𑁆𑀟𑀧𑀡𑁆𑀟𑀼𑀓𑀡𑁆𑀟𑀧𑀫𑀼𑀔𑀸𑀦𑀺 𑀙𑀲𑀢𑀲𑀳𑀲𑁆𑀲𑀸𑀦𑀺 𑀦𑀸𑀦𑀸𑀯𑀺𑀥𑀦𑀸𑀝𑀓𑀸𑀦𑀺, 𑀓𑀢𑁆𑀣𑀘𑀺 𑀧𑀦 𑀆𑀤𑀺𑀲𑀤𑁆𑀤𑁄𑀧𑀺 𑀤𑀺𑀝𑁆𑀞𑁄, 𑀲𑁄 𑀚𑀸𑀢𑀓𑀝𑁆𑀞𑀓𑀣𑀸𑀬𑀁 𑀦 𑀤𑀺𑀲𑁆𑀲𑀢𑀺, 𑀬𑀤𑀺 𑀘 𑀤𑀺𑀲𑁆𑀲𑀢𑀺, 𑀢𑁂𑀦 𑀦𑀝𑀮𑀗𑁆𑀖𑀓𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀲𑀺𑀢𑀫𑀢𑁆𑀢𑀫𑁆𑀧𑀻𑀢𑀺 𑀫𑀺𑀳𑀺𑀢𑀫𑀢𑁆𑀢𑀫𑁆𑀧𑀺. 𑀢𑀲𑁆𑀲 𑀓𑀺𑀭 𑀤𑀺𑀩𑁆𑀩𑀦𑀸𑀝𑀓𑀸𑀦𑀁 𑀅𑀦𑀦𑁆𑀢𑀭𑀪𑀯𑁂𑀬𑁂𑀯 𑀤𑀺𑀝𑁆𑀞𑀢𑁆𑀢𑀸 𑀫𑀦𑀼𑀲𑁆𑀲𑀦𑀸𑀝𑀓𑀸𑀦𑀁 𑀦𑀘𑁆𑀘𑀁 𑀅𑀫𑀦𑀼𑀜𑁆𑀜𑀁 𑀅𑀳𑁄𑀲𑀺. 𑀦𑀗𑁆𑀕𑀮𑀸𑀦𑀺𑀧𑀺 𑀙𑀟𑁆𑀟𑁂𑀢𑁆𑀯𑀸𑀢𑀺 𑀓𑀲𑀺𑀓𑀫𑁆𑀫𑀧𑁆𑀧𑀳𑀸𑀦𑀯𑀲𑁂𑀦 𑀦𑀗𑁆𑀕𑀮𑀸𑀦𑀺 𑀧𑀳𑀸𑀬, 𑀦𑀺𑀤𑀲𑁆𑀲𑀦𑀫𑀢𑁆𑀢𑀜𑁆𑀘𑁂𑀢𑀁. 𑀦 𑀳𑀺 𑀓𑁂𑀯𑀮𑀁 𑀓𑀲𑁆𑀲𑀓𑀸 𑀏𑀯, 𑀅𑀣 𑀔𑁄 𑀅𑀜𑁆𑀜𑁂𑀧𑀺 𑀉𑀪𑀬𑀭𑀝𑁆𑀞𑀯𑀸𑀲𑀺𑀦𑁄 𑀫𑀦𑀼𑀲𑁆𑀲𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑀺𑀘𑁆𑀘𑀁 𑀧𑀳𑀸𑀬 𑀢𑀲𑁆𑀫𑀺𑀁 𑀫𑀗𑁆𑀕𑀮𑀝𑁆𑀞𑀸𑀦𑁂 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀢𑀤𑀸 𑀓𑀺𑀭 𑀫𑀳𑀸𑀧𑀦𑀸𑀤𑀓𑀼𑀫𑀸𑀭𑀲𑁆𑀲 𑀧𑀸𑀲𑀸𑀤𑀫𑀗𑁆𑀕𑀮𑀁, 𑀙𑀢𑁆𑀢𑀫𑀗𑁆𑀕𑀮𑀁, 𑀆𑀯𑀸𑀳𑀫𑀗𑁆𑀕𑀮𑀦𑁆𑀢𑀺 𑀢𑀻𑀡𑀺 𑀫𑀗𑁆𑀕𑀮𑀸𑀦𑀺 𑀏𑀓𑀢𑁄 𑀅𑀓𑀁𑀲𑀼, 𑀓𑀸𑀲𑀺𑀯𑀺𑀤𑁂𑀳𑀭𑀝𑁆𑀞𑀯𑀸𑀲𑀺𑀦𑁄𑀧𑀺 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀅𑀢𑀺𑀭𑁂𑀓𑀲𑀢𑁆𑀢𑀯𑀲𑁆𑀲𑀸𑀦𑀺 𑀙𑀡𑀫𑀦𑀼𑀪𑀯𑀺𑀁𑀲𑀽𑀢𑀺, 𑀅𑀥𑀼𑀦𑀸 𑀧𑀦 ‘‘𑀦𑀗𑁆𑀕𑀮𑀸𑀤𑀻𑀦𑀻’’𑀢𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀲𑁄 𑀦 𑀧𑁄𑀭𑀸𑀡𑀧𑀸𑀞𑁄 𑀝𑀻𑀓𑀸𑀬𑀫𑀦𑀼𑀤𑁆𑀥𑀝𑀢𑁆𑀢𑀸.

𑀫𑀳𑀸𑀚𑀦𑀓𑀸𑀬𑁂 𑀲𑀦𑁆𑀦𑀺𑀧𑀢𑀺𑀢𑁂𑀢𑀺 𑀓𑁂𑀘𑀺 ‘‘𑀧𑀳𑀁𑀲𑀦𑀯𑀺𑀥𑀺𑀁 𑀤𑀲𑁆𑀲𑁂𑀢𑁆𑀯𑀸 𑀭𑀸𑀚𑀓𑀼𑀫𑀸𑀭𑀁 𑀳𑀸𑀲𑀸𑀧𑁂𑀲𑁆𑀲𑀸𑀫𑀸’’𑀢𑀺, 𑀓𑁂𑀘𑀺 ‘‘𑀢𑀁 𑀓𑀻𑀴𑀦𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀏𑀯𑀁 𑀫𑀳𑀸𑀚𑀦𑀲𑀫𑀽𑀳𑁂 𑀲𑀦𑁆𑀦𑀺𑀧𑀢𑀺𑀢𑁂. 𑀅𑀢𑀼𑀮𑀫𑁆𑀩𑀸𑀪𑀺𑀭𑀼𑀳𑀦𑀤𑀸𑀭𑀼𑀘𑀺𑀢𑀓𑀧𑀯𑁂𑀲𑀦𑀸𑀤𑀺 𑀦𑀸𑀦𑀸𑀓𑀻𑀴𑀸𑀬𑁄 𑀤𑀲𑁆𑀲𑁂𑀢𑁆𑀯𑀸. 𑀲𑀓𑁆𑀓𑀧𑁂𑀲𑀺𑀢𑁄 𑀓𑀺𑀭 𑀤𑀺𑀩𑁆𑀩𑀦𑀸𑀝𑀓𑁄 𑀭𑀸𑀚𑀗𑁆𑀕𑀡𑁂 𑀆𑀓𑀸𑀲𑁂 𑀞𑀢𑁆𑀯𑀸 𑀉𑀧𑀟𑁆𑀠𑀪𑀸𑀕𑀁 𑀦𑀸𑀫 𑀤𑀲𑁆𑀲𑁂𑀢𑀺, 𑀏𑀓𑁄𑀯 𑀳𑀢𑁆𑀣𑁄, 𑀏𑀓𑁄 𑀧𑀸𑀤𑁄, 𑀏𑀓𑀁 𑀅𑀓𑁆𑀔𑀺, 𑀏𑀓𑀸 𑀤𑀸𑀞𑀸 𑀦𑀘𑁆𑀘𑀢𑀺 𑀘𑀮𑀢𑀺, 𑀉𑀧𑀟𑁆𑀠𑀁 𑀨𑀦𑁆𑀤𑀢𑀺, 𑀲𑁂𑀲𑀁 𑀦𑀺𑀘𑁆𑀘𑀮𑀫𑀳𑁄𑀲𑀺, 𑀢𑀁 𑀤𑀺𑀲𑁆𑀯𑀸 𑀫𑀳𑀸𑀧𑀦𑀸𑀤𑁄 𑀣𑁄𑀓𑀁 𑀳𑀲𑀺𑀢𑀫𑀓𑀸𑀲𑀺, 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀲𑁄 𑀤𑀺𑀩𑁆𑀩𑀦𑀸𑀝𑀓𑀁 𑀤𑀲𑁆𑀲𑁂𑀢𑁆𑀯𑀸 𑀳𑀲𑀸𑀧𑁂𑀲𑀻’’𑀢𑀺 𑀯𑀼𑀢𑁆𑀢𑀁. 𑀲𑀼𑀳𑀚𑁆𑀚𑀸 𑀦𑀸𑀫 𑀯𑀺𑀲𑁆𑀲𑀸𑀲𑀺𑀓𑀸 ‘‘𑀲𑀼𑀝𑁆𑀞𑀼 𑀳𑀤𑀬𑀫𑁂𑀢𑁂𑀲’’𑀦𑁆𑀢𑀺 𑀓𑀢𑁆𑀯𑀸. 𑀆𑀤𑀺𑀲𑀤𑁆𑀤𑁂𑀦 𑀜𑀸𑀢𑀓𑀧𑀭𑀺𑀚𑀦𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀢𑀲𑁆𑀫𑀸𑀢𑀺 𑀢𑀣𑀸 𑀯𑀘𑀦𑀢𑁄. 𑀢𑀁 𑀓𑀼𑀲𑀮𑀦𑁆𑀢𑀺 𑀯𑀘𑀦𑀁 𑀉𑀧𑀸𑀤𑀸𑀬𑀸𑀢𑀺 𑀏𑀢𑁆𑀣 ‘‘𑀓𑀘𑁆𑀘𑀺 𑀓𑀼𑀲𑀮𑀁? 𑀆𑀫 𑀓𑀼𑀲𑀮’’𑀦𑁆𑀢𑀺 𑀯𑀘𑀦𑀧𑀝𑀺𑀯𑀘𑀦𑀯𑀲𑁂𑀦 𑀧𑀯𑀢𑁆𑀢𑀓𑀼𑀲𑀮𑀯𑀸𑀤𑀺𑀢𑀸𑀬 𑀢𑁂 𑀫𑀦𑀼𑀲𑁆𑀲𑀸 𑀆𑀤𑀺𑀢𑁄 ‘‘𑀓𑀼𑀲𑀮𑀸’’𑀢𑀺 𑀲𑀫𑀜𑁆𑀜𑀁 𑀮𑀪𑀺𑀁𑀲𑀼, 𑀢𑁂𑀲𑀁 𑀓𑀼𑀲𑀮𑀸𑀦𑀁 𑀇𑀲𑁆𑀲𑀭𑀸𑀢𑀺 𑀭𑀸𑀚𑀓𑀼𑀫𑀸𑀭𑀸 𑀓𑁄𑀲𑀮𑀸 𑀦𑀸𑀫 𑀚𑀸𑀢𑀸, 𑀢𑁂𑀲𑀁 𑀦𑀺𑀯𑀸𑀲𑀝𑁆𑀞𑀸𑀦𑀢𑀸𑀬 𑀧𑀦 𑀧𑀤𑁂𑀲𑁄 𑀓𑁄𑀲𑀮𑀸𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀫𑁂𑀯. 𑀢𑁂𑀦𑀸𑀳 ‘‘𑀲𑁄 𑀧𑀤𑁂𑀲𑁄 𑀓𑁄𑀲𑀮𑀸𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀏𑀯𑀁 𑀫𑀚𑁆𑀛𑀺𑀫𑀸𑀕𑀫𑀝𑀻𑀓𑀸𑀬𑀁 𑀆𑀘𑀭𑀺𑀬𑁂𑀦𑁂𑀯 𑀯𑀼𑀢𑁆𑀢𑀁. 𑀢𑀢𑁆𑀭𑀸𑀬𑀫𑀥𑀺𑀧𑁆𑀧𑀸𑀬𑁄 𑀲𑀺𑀬𑀸 𑁋 ‘‘𑀲𑁄 𑀧𑀤𑁂𑀲𑁄 𑀓𑁄𑀲𑀮𑀸𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀲𑀜𑁆𑀜𑀻𑀲𑀜𑁆𑀜𑀸 𑀬𑀣𑀸𑀓𑁆𑀓𑀫𑀁 𑀏𑀓𑀯𑀘𑀦𑀩𑀳𑀼𑀯𑀘𑀦𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀧𑀼𑀭𑀺𑀫𑀦𑀬𑁂 𑀯𑀺𑀬 𑀇𑀥𑀸𑀧𑀺 𑀭𑀼𑀴𑁆𑀳𑀺𑀯𑀲𑁂𑀦𑁂𑀯 𑀩𑀳𑀼𑀯𑀘𑀦𑀁 𑀳𑁄𑀢𑀺. 𑀭𑀸𑀚𑀓𑀼𑀫𑀸𑀭𑀸𑀦𑀁 𑀦𑀸𑀫𑀮𑀸𑀪𑀳𑁂𑀢𑀼𑀫𑀢𑁆𑀢𑀜𑁆𑀳𑁂𑀢𑁆𑀣 𑀯𑀺𑀲𑁂𑀲𑁄𑀢𑀺. 𑀇𑀥 𑀧𑀦 𑀆𑀘𑀭𑀺𑀬𑁂𑀦 𑀏𑀯𑀁 𑀯𑀼𑀢𑁆𑀢𑀁 𑀲𑁄 𑀧𑀤𑁂𑀲𑁄𑀢𑀺 𑀧𑀤𑁂𑀲𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀁, 𑀯𑀘𑀦𑀯𑀺𑀧𑀮𑁆𑀮𑀸𑀲𑁂𑀦 𑀯𑀸, 𑀢𑁂 𑀧𑀤𑁂𑀲𑀸𑀢𑀺 𑀅𑀢𑁆𑀣𑁄. 𑀓𑁄𑀲𑀮𑀸𑀢𑀺 𑀯𑀼𑀘𑁆𑀘𑀢𑀺 𑀓𑀼𑀲𑀮𑀸 𑀏𑀯 𑀓𑁄𑀲𑀮𑀸𑀢𑀺 𑀓𑀢𑁆𑀯𑀸’’𑀢𑀺 (𑀤𑀻. 𑀦𑀺. 𑀝𑀻. 𑁧.𑁨𑁫𑁪) 𑀢𑀢𑁆𑀭𑀸𑀬𑀫𑀥𑀺𑀧𑁆𑀧𑀸𑀬𑁄 𑀲𑀺𑀬𑀸 𑁋 𑀲𑁄 𑀧𑀤𑁂𑀲𑁄𑀢𑀺 𑀚𑀸𑀢𑀺𑀲𑀤𑁆𑀤𑀯𑀲𑁂𑀦, 𑀯𑀘𑀦𑀯𑀺𑀧𑀮𑁆𑀮𑀸𑀲𑁂𑀦 𑀯𑀸 𑀯𑀼𑀢𑁆𑀢𑀢𑁆𑀢𑀸 𑀧𑀼𑀣𑀼𑀅𑀢𑁆𑀣𑀯𑀺𑀲𑀬𑀢𑀸𑀬 𑀏𑀯 𑀩𑀳𑀼𑀯𑀘𑀦𑀁 𑀳𑁄𑀢𑀺. 𑀧𑀤𑁂𑀲𑀲𑁆𑀲 𑀦𑀸𑀫𑀮𑀸𑀪𑀳𑁂𑀢𑀼 𑀳𑁂𑀢𑁆𑀣 𑀯𑀺𑀲𑁂𑀲𑁄𑀢𑀺. ‘‘𑀓𑀼𑀲𑀮’’𑀦𑁆𑀢𑀺 𑀳𑀺 𑀯𑀘𑀦𑀫𑀼𑀧𑀸𑀤𑀸𑀬 𑀭𑀼𑀴𑁆𑀳𑀺𑀦𑀸𑀫𑀯𑀲𑁂𑀦 𑀯𑀼𑀢𑁆𑀢𑀦𑀬𑁂𑀦 𑀓𑁄𑀲𑀮𑀸 𑀬𑀣𑀸 ‘‘𑀬𑁂𑀯𑀸𑀧𑀦𑀓𑀁, 𑀦𑀢𑀼𑀫𑁆𑀳𑀸𑀓𑀯𑀕𑁆𑀕𑁄’’𑀢𑀺. 𑀅𑀧𑀺𑀘 𑀯𑀘𑀦𑀧𑀝𑀺𑀯𑀘𑀦𑀯𑀲𑁂𑀦 ‘‘𑀓𑀼𑀲𑀮’’𑀦𑁆𑀢𑀺 𑀯𑀤𑀦𑁆𑀢𑀺 𑀏𑀢𑁆𑀣𑀸𑀢𑀺 𑀓𑁄𑀲𑀮𑀸. 𑀯𑀺𑀘𑀺𑀢𑁆𑀭𑀸 𑀳𑀺 𑀢𑀤𑁆𑀥𑀺𑀢𑀯𑀼𑀢𑁆𑀢𑀻𑀢𑀺. 𑀓𑀼𑀲𑀮𑀦𑁆𑀢𑀺 𑀘 𑀆𑀭𑁄𑀕𑁆𑀬𑀁 ‘‘𑀓𑀘𑁆𑀘𑀺 𑀦𑀼 𑀪𑁄𑀢𑁄 𑀓𑀼𑀲𑀮𑀁, 𑀓𑀘𑁆𑀘𑀺 𑀪𑁄𑀢𑁄 𑀅𑀦𑀸𑀫𑀬’’𑀦𑁆𑀢𑀺𑀆𑀤𑀻𑀲𑀼 (𑀚𑀸. 𑁧.𑁧𑁫.𑁧𑁪𑁫; 𑀚𑀸. 𑁨.𑁨𑁦.𑁧𑁨𑁯) 𑀯𑀺𑀬, 𑀓𑀘𑁆𑀘𑀺 𑀢𑀼𑀫𑁆𑀳𑀸𑀓𑀁 𑀆𑀭𑁄𑀕𑁆𑀬𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄, 𑀙𑁂𑀓𑀁 𑀯𑀸 ‘‘𑀓𑀼𑀲𑀮𑀸 𑀦𑀘𑁆𑀘𑀕𑀻𑀢𑀲𑁆𑀲, 𑀲𑀺𑀓𑁆𑀔𑀺𑀢𑀸 𑀘𑀸𑀢𑀼𑀭𑀺𑀢𑁆𑀣𑀺𑀬𑁄’’𑀢𑀺𑀆𑀤𑀻𑀲𑀼 (𑀚𑀸. 𑁨.𑁨𑁨.𑁯𑁪) 𑀯𑀺𑀬, 𑀓𑀘𑁆𑀘𑀺 𑀢𑁂𑀲𑀁 𑀦𑀸𑀝𑀓𑀸𑀦𑀁 𑀙𑁂𑀓𑀢𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀘𑀭𑀡𑀁 𑀘𑀸𑀭𑀺𑀓𑀸, 𑀘𑀭𑀡𑀁 𑀯𑀸 𑀘𑀸𑀭𑁄, 𑀲𑁄 𑀏𑀯 𑀘𑀸𑀭𑀺𑀓𑀸, 𑀢𑀬𑀺𑀤𑀁 𑀫𑀕𑁆𑀕𑀕𑀫𑀦𑀫𑁂𑀯 𑀇𑀥𑀸𑀥𑀺𑀧𑁆𑀧𑁂𑀢𑀁, 𑀦 𑀘𑀼𑀡𑁆𑀡𑀺𑀓𑀕𑀫𑀦𑀫𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀤𑁆𑀥𑀸𑀦𑀕𑀫𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀪𑀸𑀯𑀦𑀧𑀼𑀁𑀲𑀓𑀜𑁆𑀘𑁂𑀢𑀁, 𑀅𑀤𑁆𑀥𑀸𑀦𑀕𑀫𑀦𑀲𑀗𑁆𑀔𑀸𑀢𑀸𑀬 𑀘𑀸𑀭𑀺𑀓𑀸𑀬 𑀘𑀭𑀫𑀸𑀦𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀅𑀪𑁂𑀤𑁂𑀧𑀺 𑀯𑀸 𑀪𑁂𑀤𑀯𑁄𑀳𑀸𑀭𑁂𑀦 𑀯𑀼𑀢𑁆𑀢𑀁 𑀬𑀣𑀸 ‘‘𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀻𑀤𑀻’’𑀢𑀺, (𑀫. 𑀦𑀺. 𑁧.𑁨𑁫𑁬) 𑀅𑀤𑁆𑀥𑀸𑀦𑀕𑀫𑀦𑀲𑀗𑁆𑀔𑀸𑀢𑀁 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄, 𑀘𑀭𑀡𑀁 𑀓𑀭𑁄𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀢𑁆𑀣𑀓𑁄 𑀳𑀺 𑀓𑀭𑀪𑀽𑀥𑀸𑀢𑀽𑀦𑀫𑀢𑁆𑀣𑁄𑀢𑀺. ‘‘𑀅𑀤𑁆𑀥𑀸𑀦𑀫𑀕𑁆𑀕’’𑀦𑁆𑀢𑀺𑀧𑀺 𑀓𑀢𑁆𑀣𑀘𑀺 𑀧𑀸𑀞𑁄, 𑀲𑁄 𑀦 𑀲𑀼𑀦𑁆𑀤𑀭𑁄. 𑀦 𑀳𑀺 𑀘𑀸𑀭𑀺𑀓𑀸𑀲𑀤𑁆𑀤𑁄 𑀫𑀕𑁆𑀕𑀯𑀸𑀘𑀓𑁄𑀢𑀺. 𑀇𑀤𑀸𑀦𑀺 𑀢𑀁 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀢𑁆𑀯𑀸 𑀇𑀥𑀸𑀥𑀺𑀧𑁆𑀧𑁂𑀢𑀁 𑀦𑀺𑀬𑀫𑁂𑀦𑁆𑀢𑁄 ‘‘𑀘𑀸𑀭𑀺𑀓𑀸 𑀘 𑀦𑀸𑀫𑁂𑀲𑀸’’𑀢𑀺𑀆𑀤𑀺𑀫𑀸𑀳. 𑀲𑀸𑀯𑀓𑀸𑀦𑀫𑁆𑀧𑀺 𑀭𑀼𑀴𑁆𑀳𑀺𑀯𑀲𑁂𑀦 𑀘𑀸𑀭𑀺𑀓𑀸𑀬 𑀲𑀫𑁆𑀪𑀯𑀢𑁄 𑀢𑀢𑁄 𑀯𑀺𑀲𑁂𑀲𑁂𑀢𑀺 ‘‘𑀪𑀕𑀯𑀢𑁄’’𑀢𑀺 𑀇𑀫𑀺𑀦𑀸. 𑀢𑀣𑀸 𑀳𑀺 𑀫𑀚𑁆𑀛𑀺𑀫𑀸𑀕𑀫𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁 ‘‘𑀘𑀸𑀭𑀺𑀓𑀁 𑀘𑀭𑀫𑀸𑀦𑁄𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀅𑀬𑀁 𑀘𑀸𑀭𑀺𑀓𑀸 𑀦𑀸𑀫 𑀫𑀳𑀸𑀚𑀦𑀲𑀗𑁆𑀕𑀳𑀢𑁆𑀣𑀁 𑀩𑀼𑀤𑁆𑀥𑀸𑀦𑀁𑀬𑁂𑀯 𑀮𑀩𑁆𑀪𑀢𑀺, 𑀩𑀼𑀤𑁆𑀥𑁂 𑀉𑀧𑀸𑀤𑀸𑀬 𑀧𑀦 𑀭𑀼𑀴𑁆𑀳𑀺𑀲𑀤𑁆𑀤𑁂𑀦 𑀲𑀸𑀯𑀓𑀸𑀦𑀫𑁆𑀧𑀺 𑀯𑀼𑀘𑁆𑀘𑀢𑀺 𑀓𑀺𑀮𑀜𑁆𑀚𑀸𑀤𑀻𑀳𑀺 𑀓𑀢𑀩𑀻𑀚𑀦𑀻𑀧𑀺 𑀢𑀸𑀮𑀯𑀡𑁆𑀝𑀁 𑀯𑀺𑀬𑀸’’𑀢𑀺. 𑀤𑀽𑀭𑁂𑀧𑀻𑀢𑀺 𑀏𑀢𑁆𑀣 𑀧𑀺-𑀲𑀤𑁆𑀤𑁂𑀦, 𑀅𑀧𑀺-𑀲𑀤𑁆𑀤𑁂𑀦 𑀯𑀸 𑀦𑀸𑀢𑀺𑀤𑀽𑀭𑁂𑀧𑀻𑀢𑀺 𑀲𑀫𑁆𑀧𑀺𑀡𑁆𑀟𑀦𑀁 𑀢𑀢𑁆𑀣𑀸𑀧𑀺 𑀘𑀸𑀭𑀺𑀓𑀸𑀲𑀫𑁆𑀪𑀯𑀢𑁄. 𑀩𑁄𑀥𑀦𑁂𑀬𑁆𑀬𑀧𑀼𑀕𑁆𑀕𑀮𑀦𑁆𑀢𑀺 𑀘𑀢𑀼𑀲𑀘𑁆𑀘𑀧𑀝𑀺𑀯𑁂𑀥𑀯𑀲𑁂𑀦 𑀩𑁄𑀥𑀦𑀸𑀭𑀳𑀧𑀼𑀕𑁆𑀕𑀮𑀁. 𑀲𑀳𑀲𑀸 𑀕𑀫𑀦𑀦𑁆𑀢𑀺 𑀲𑀻𑀖𑀕𑀫𑀦𑀁. ‘‘𑀫𑀳𑀸𑀓𑀲𑁆𑀲𑀧𑀲𑁆𑀲 𑀧𑀘𑁆𑀘𑀼𑀕𑁆𑀕𑀫𑀦𑀸𑀤𑀻𑀲𑀽’’𑀢𑀺 𑀯𑀼𑀢𑁆𑀢𑀫𑁂𑀯 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀺 ‘‘𑀪𑀕𑀯𑀸 𑀳𑀻’’𑀢𑀺𑀆𑀤𑀺𑀦𑀸. 𑀧𑀘𑁆𑀘𑀼𑀕𑁆𑀕𑀘𑁆𑀙𑀦𑁆𑀢𑁄𑀢𑀺 𑀧𑀝𑀺𑀫𑀼𑀔𑀁 𑀕𑀘𑁆𑀙𑀦𑁆𑀢𑁄, 𑀧𑀘𑁆𑀘𑀼𑀝𑁆𑀞𑀳𑀦𑁆𑀢𑁄𑀢𑀺 𑀅𑀢𑁆𑀣𑁄. ‘‘𑀢𑀣𑀸’’𑀢𑀺 𑀇𑀫𑀺𑀦𑀸 ‘‘𑀢𑀺𑀁𑀲𑀬𑁄𑀚𑀦’’𑀦𑁆𑀢𑀺 𑀧𑀤𑀫𑀦𑀼𑀓𑀟𑁆𑀠𑀢𑀺. 𑀧𑀓𑁆𑀓𑀼𑀲𑀸𑀢𑀺 𑀦𑀸𑀫 𑀕𑀦𑁆𑀥𑀸𑀭𑀭𑀸𑀚𑀸. 𑀫𑀳𑀸𑀓𑀧𑁆𑀧𑀺𑀦𑁄 𑀦𑀸𑀫 𑀓𑀼𑀓𑁆𑀓𑀼𑀝𑀯𑀢𑀻𑀭𑀸𑀚𑀸. 𑀥𑀦𑀺𑀬𑁄 𑀦𑀸𑀫 𑀓𑁄𑀭𑀡𑁆𑀟𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀕𑁄𑀧𑁄.

𑀏𑀯𑀁 𑀥𑀫𑁆𑀫𑀕𑀭𑀼𑀢𑀸𑀓𑀺𑀢𑁆𑀢𑀦𑀫𑀼𑀔𑁂𑀦 𑀫𑀳𑀸𑀓𑀲𑁆𑀲𑀧𑀧𑀘𑁆𑀘𑀼𑀕𑁆𑀕𑀫𑀦𑀸𑀤𑀻𑀦𑀺 (𑀲𑀁. 𑀦𑀺. 𑀅𑀝𑁆𑀞. 𑁨.𑁧𑁫𑁪) 𑀏𑀓𑀤𑁂𑀲𑁂𑀦 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀯𑀦𑀯𑀸𑀲𑀺𑀢𑀺𑀲𑁆𑀲𑀲𑀸𑀫𑀡𑁂𑀭𑀲𑁆𑀲 𑀯𑀢𑁆𑀣𑀼𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀘𑀸𑀭𑀺𑀓𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀓𑀤𑀺𑀯𑀲’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀓𑁄 𑀧𑀦𑁂𑀲 𑀢𑀺𑀲𑁆𑀲𑀲𑀸𑀫𑀡𑁂𑀭𑁄 𑀦𑀸𑀫? 𑀲𑀸𑀯𑀢𑁆𑀣𑀺𑀬𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑁄 𑀉𑀧𑀝𑁆𑀞𑀸𑀓𑀓𑀼𑀮𑁂 𑀚𑀸𑀢𑁄 𑀫𑀳𑀸𑀧𑀼𑀜𑁆𑀜𑁄 ‘‘𑀧𑀺𑀡𑁆𑀟𑀧𑀸𑀢𑀤𑀸𑀬𑀓𑀢𑀺𑀲𑁆𑀲𑁄, 𑀓𑀫𑁆𑀩𑀮𑀤𑀸𑀬𑀓𑀢𑀺𑀲𑁆𑀲𑁄’’𑀢𑀺 𑀘 𑀧𑀼𑀩𑁆𑀩𑁂 𑀮𑀤𑁆𑀥𑀦𑀸𑀫𑁄 𑀧𑀘𑁆𑀙𑀸 ‘‘𑀯𑀦𑀯𑀸𑀲𑀺𑀢𑀺𑀲𑁆𑀲𑁄’’𑀢𑀺 𑀧𑀸𑀓𑀝𑁄 𑀔𑀻𑀡𑀸𑀲𑀯𑀲𑀸𑀫𑀡𑁂𑀭𑁄. 𑀯𑀺𑀢𑁆𑀣𑀸𑀭𑁄 𑀥𑀫𑁆𑀫𑀧𑀤𑁂 (𑀥. 𑀧. 𑀅𑀝𑁆𑀞. 𑁧.𑁭𑁪 𑀯𑀦𑀯𑀸𑀲𑀻𑀢𑀺𑀲𑁆𑀲𑀲𑀸𑀫𑀡𑁂𑀭𑀯𑀢𑁆𑀣𑀼). 𑀆𑀓𑀸𑀲𑀕𑀸𑀫𑀻𑀳𑀺 𑀲𑀤𑁆𑀥𑀺𑀁 𑀆𑀓𑀸𑀲𑁂𑀦𑁂𑀯 𑀕𑀦𑁆𑀢𑀼𑀓𑀸𑀫𑁄 𑀪𑀕𑀯𑀸 ‘‘𑀙𑀴𑀪𑀺𑀜𑁆𑀜𑀸𑀦𑀁 𑀆𑀭𑁄𑀘𑁂𑀳𑀻’’𑀢𑀺 𑀅𑀯𑁄𑀘. 𑀢𑀲𑁆𑀲𑀸𑀢𑀺 𑀢𑀺𑀲𑁆𑀲𑀲𑀸𑀫𑀡𑁂𑀭𑀲𑁆𑀲. 𑀢𑀦𑁆𑀢𑀺 𑀪𑀕𑀯𑀦𑁆𑀢𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀘𑀻𑀯𑀭𑀁 𑀧𑀸𑀭𑀼𑀧𑀦𑁆𑀢𑀁. 𑀦𑁄 𑀣𑁂𑀭𑁄 𑀦𑁄 𑀑𑀭𑀫𑀢𑁆𑀢𑀓𑁄 𑀯𑀢𑀸𑀢𑀺 𑀲𑀫𑁆𑀩𑀦𑁆𑀥𑁄, 𑀕𑀼𑀡𑁂𑀦 𑀮𑀸𑀫𑀓𑀧𑁆𑀧𑀫𑀸𑀡𑀺𑀓𑁄 𑀦𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀅𑀢𑁆𑀢𑀦𑁄 𑀧𑀢𑁆𑀢𑀸𑀲𑀦𑁂𑀢𑀺 𑀪𑀺𑀓𑁆𑀔𑀽𑀦𑀁 𑀆𑀲𑀦𑀧𑀭𑀺𑀬𑀦𑁆𑀢𑁂. 𑀢𑁂𑀲𑀁 𑀕𑀸𑀫𑀺𑀓𑀸𑀦𑀁 𑀤𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀁 𑀫𑀗𑁆𑀕𑀮𑀁 𑀯𑀢𑁆𑀯𑀸. 𑀓𑀲𑁆𑀫𑀸 𑀧𑀦 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀫𑀕𑁆𑀕𑀤𑁂𑀲𑀓𑁄𑀧𑀺 𑀲𑀫𑀸𑀦𑁄 𑀪𑀕𑀯𑀸 𑀏𑀯𑀫𑀸𑀳𑀸𑀢𑀺 𑀘𑁄𑀤𑀦𑀁 𑀲𑁄𑀥𑁂𑀢𑀼𑀁 ‘‘𑀪𑀕𑀯𑀸 𑀓𑀺𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀫𑀕𑁆𑀕𑀤𑁂𑀲𑀓𑁄𑀢𑀺 𑀦𑀺𑀩𑁆𑀩𑀸𑀦𑀫𑀕𑁆𑀕𑀲𑁆𑀲, 𑀲𑀼𑀕𑀢𑀺𑀫𑀕𑁆𑀕𑀲𑁆𑀲 𑀯𑀸 𑀤𑁂𑀲𑀓𑁄.

𑀢𑀸𑀬𑀸𑀢𑀺 𑀅𑀭𑀜𑁆𑀜𑀲𑀜𑁆𑀜𑀸𑀬. 𑀲𑀗𑁆𑀖𑀓𑀫𑁆𑀫𑀯𑀲𑁂𑀦 𑀲𑀺𑀚𑁆𑀛𑀫𑀸𑀦𑀸𑀧𑀺 𑀉𑀧𑀲𑀫𑁆𑀧𑀤𑀸 𑀲𑀢𑁆𑀣𑀼 𑀆𑀡𑀸𑀯𑀲𑁂𑀦 𑀲𑀺𑀚𑁆𑀛𑀦𑀢𑁄 ‘‘𑀩𑀼𑀤𑁆𑀥𑀤𑀸𑀬𑀚𑁆𑀚𑀁 𑀢𑁂 𑀤𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀅𑀧𑀭𑁂 𑀧𑀦 ‘‘𑀅𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀲𑁆𑀲𑁂𑀯 𑀢𑀲𑁆𑀲 𑀉𑀧𑀲𑀫𑁆𑀧𑀤𑀁 𑀅𑀦𑀼𑀚𑀸𑀦𑀦𑁆𑀢𑁄 𑀲𑀢𑁆𑀣𑀸 ‘𑀩𑀼𑀤𑁆𑀥𑀤𑀸𑀬𑀚𑁆𑀚𑀁 𑀢𑁂 𑀤𑀲𑁆𑀲𑀸𑀫𑀻’𑀢𑀺 𑀅𑀯𑁄𑀘𑀸’’𑀢𑀺 𑀯𑀤𑀦𑁆𑀢𑀺. 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀉𑀧𑀚𑁆𑀛𑀸𑀬𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑁆𑀯𑀸, 𑀢𑀢𑁄𑀬𑁂𑀯𑁂𑀲 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄𑀢𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑁄. 𑀥𑀫𑁆𑀫𑀧𑀤𑀝𑁆𑀞𑀓𑀣𑀸𑀬𑀁 𑀧𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀆𑀤𑀺𑀣𑁂𑀭𑀸𑀦𑀁 𑀘𑀢𑁆𑀢𑀸𑀮𑀻𑀲𑀪𑀺𑀓𑁆𑀔𑀼𑀲𑀳𑀲𑁆𑀲𑀧𑀭𑀺𑀯𑀸𑀭𑀸𑀦𑀁 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑁂𑀳𑀺 𑀲𑀤𑁆𑀥𑀺𑀁 𑀧𑀘𑁆𑀘𑁂𑀓𑀁 𑀕𑀫𑀦𑀁, 𑀪𑀕𑀯𑀢𑁄 𑀘 𑀏𑀓𑀓𑀲𑁆𑀲𑁂𑀯 𑀕𑀫𑀦𑀁 𑀔𑀼𑀤𑁆𑀤𑀓𑀪𑀸𑀡𑀓𑀸𑀦𑀁 𑀫𑀢𑁂𑀦 𑀯𑀼𑀢𑁆𑀢𑀁, 𑀇𑀥, 𑀧𑀦 𑀫𑀚𑁆𑀛𑀺𑀫𑀸𑀕𑀫𑀝𑁆𑀞𑀓𑀣𑀸𑀬𑀜𑁆𑀘 (𑀫. 𑀦𑀺. 𑀅𑀝𑁆𑀞. 𑁨.𑁬𑁫) 𑀅𑀜𑁆𑀜𑀣𑀸 𑀕𑀫𑀦𑀁 𑀤𑀻𑀖𑀪𑀸𑀡𑀓𑀫𑀚𑁆𑀛𑀺𑀫𑀪𑀸𑀡𑀓𑀸𑀦𑀁 𑀫𑀢𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀬𑀦𑁆𑀢𑀺 𑀫𑀳𑀸𑀓𑀲𑁆𑀲𑀧𑀸𑀤𑀻𑀦𑀫𑀢𑁆𑀣𑀸𑀬 𑀘𑀸𑀭𑀺𑀓𑀸. 𑀬𑀁 𑀧𑀦 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀪𑀕𑀯𑀢𑁄 𑀕𑀫𑀦𑀁, 𑀅𑀬𑀁 𑀅𑀢𑀼𑀭𑀺𑀢𑀘𑀸𑀭𑀺𑀓𑀸 𑀦𑀸𑀫𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀇𑀫𑀁 𑀧𑀦 𑀘𑀸𑀭𑀺𑀓𑀦𑁆𑀢𑀺 𑀅𑀢𑀼𑀭𑀺𑀢𑀘𑀸𑀭𑀺𑀓𑀁. 𑀫𑀳𑀸𑀫𑀡𑁆𑀟𑀮𑀦𑁆𑀢𑀺 𑀫𑀚𑁆𑀛𑀺𑀫𑀤𑁂𑀲𑀧𑀭𑀺𑀬𑀸𑀧𑀦𑁆𑀦𑁂𑀦𑁂𑀯 𑀩𑀸𑀳𑀺𑀭𑀺𑀫𑁂𑀦 𑀧𑀫𑀸𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸 𑀫𑀳𑀦𑁆𑀢𑀢𑀭𑀁 𑀫𑀡𑁆𑀟𑀮𑀁. 𑀫𑀚𑁆𑀛𑀺𑀫𑀫𑀡𑁆𑀟𑀮𑀦𑁆𑀢𑀺 𑀇𑀢𑀭𑁂𑀲𑀁 𑀉𑀪𑀺𑀦𑁆𑀦𑀁 𑀯𑁂𑀫𑀚𑁆𑀛𑁂 𑀧𑀯𑀢𑁆𑀢𑀁 𑀫𑀡𑁆𑀟𑀮𑀁. 𑀅𑀦𑁆𑀢𑁄𑀫𑀡𑁆𑀟𑀮𑀦𑁆𑀢𑀺 𑀇𑀢𑀭𑁂𑀳𑀺 𑀔𑀼𑀤𑁆𑀤𑀓𑀁 𑀫𑀡𑁆𑀟𑀮𑀁, 𑀇𑀢𑀭𑁂𑀲𑀁 𑀯𑀸 𑀅𑀦𑁆𑀢𑁄𑀕𑀥𑀢𑁆𑀢𑀸 𑀅𑀦𑁆𑀢𑀺𑀫𑀁 𑀫𑀡𑁆𑀟𑀮𑀁, 𑀅𑀩𑁆𑀪𑀦𑁆𑀢𑀭𑀺𑀫𑀁 𑀫𑀡𑁆𑀟𑀮𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀺𑀁 𑀧𑀦𑀺𑀫𑁂𑀲𑀁 𑀧𑀫𑀸𑀡𑀦𑁆𑀢𑀺 𑀆𑀳 ‘‘𑀓𑀢𑁆𑀣𑀸’’𑀢𑀺𑀆𑀤𑀺. 𑀢𑀢𑁆𑀣 𑀦𑀯𑀬𑁄𑀚𑀦𑀲𑀢𑀺𑀓𑀢𑀸 𑀫𑀚𑁆𑀛𑀺𑀫𑀤𑁂𑀲𑀧𑀭𑀺𑀬𑀸𑀧𑀦𑁆𑀦𑀯𑀲𑁂𑀦𑁂𑀯 𑀕𑀳𑁂𑀢𑀩𑁆𑀩𑀸 𑀢𑀢𑁄 𑀧𑀭𑀁 𑀅𑀢𑀼𑀭𑀺𑀢𑀘𑀸𑀭𑀺𑀓𑀸𑀬 𑀅𑀕𑀫𑀦𑀢𑁄. 𑀢𑀤𑀼𑀢𑁆𑀢𑀭𑀺 𑀳𑀺 𑀢𑀼𑀭𑀺𑀢𑀘𑀸𑀭𑀺𑀓𑀸𑀬 𑀏𑀯 𑀢𑀣𑀸𑀕𑀢𑁄 𑀕𑀘𑁆𑀙𑀢𑀺, 𑀦 𑀅𑀢𑀼𑀭𑀺𑀢𑀘𑀸𑀭𑀺𑀓𑀸𑀬. 𑀧𑀯𑀸𑀭𑁂𑀢𑁆𑀯𑀸𑀯 𑀘𑀸𑀭𑀺𑀓𑀸𑀘𑀭𑀡𑀁 𑀩𑀼𑀤𑁆𑀥𑀸𑀘𑀺𑀡𑁆𑀡𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀫𑀳𑀸𑀧𑀯𑀸𑀭𑀡𑀸𑀬 𑀧𑀯𑀸𑀭𑁂𑀢𑁆𑀯𑀸’’𑀢𑀺𑀆𑀤𑀺. 𑀧𑀸𑀝𑀺𑀧𑀤𑀤𑀺𑀯𑀲𑁂𑀢𑀺 𑀧𑀞𑀫𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀺𑀬𑀸 𑀅𑀦𑀦𑁆𑀢𑀭𑁂 𑀧𑀸𑀝𑀺𑀧𑀤𑀯𑀲𑁂. 𑀲𑀫𑀦𑁆𑀢𑀸𑀢𑀺 𑀕𑀢𑀕𑀢𑀝𑁆𑀞𑀸𑀦𑀲𑁆𑀲 𑀘𑀢𑀽𑀲𑀼 𑀧𑀲𑁆𑀲𑁂𑀲𑀼 𑀲𑀫𑀦𑁆𑀢𑀢𑁄. 𑀫𑀳𑀸𑀚𑀦𑀓𑀸𑀬𑀲𑁆𑀲 𑀲𑀦𑁆𑀦𑀺𑀧𑀢𑀦𑀢𑁄 𑀧𑀼𑀭𑀺𑀫𑀁 𑀧𑀼𑀭𑀺𑀫𑀁 𑀆𑀕𑀢𑀸 𑀦𑀺𑀫𑀦𑁆𑀢𑁂𑀢𑀼𑀁 𑀮𑀪𑀦𑁆𑀢𑀺. 𑀢𑀣𑀸 𑀲𑀦𑁆𑀦𑀺𑀧𑀢𑀦𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀇𑀢𑀭𑁂𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀫𑀣𑀯𑀺𑀧𑀲𑁆𑀲𑀦𑀸 𑀢𑀭𑀼𑀡𑀸 𑀳𑁄𑀦𑁆𑀢𑀻𑀢𑀺 𑀏𑀢𑁆𑀣 𑀲𑀫𑀣𑀲𑁆𑀲 𑀢𑀭𑀼𑀡𑀪𑀸𑀯𑁄 𑀉𑀧𑀘𑀸𑀭𑀲𑀫𑀸𑀥𑀺𑀯𑀲𑁂𑀦, 𑀯𑀺𑀧𑀲𑁆𑀲𑀦𑀸𑀬 𑀧𑀦 𑀲𑀗𑁆𑀔𑀸𑀭𑀧𑀭𑀺𑀘𑁆𑀙𑁂𑀤𑀜𑀸𑀡𑀁, 𑀓𑀗𑁆𑀔𑀸𑀯𑀺𑀢𑀭𑀡𑀜𑀸𑀡𑀁, 𑀲𑀫𑁆𑀫𑀲𑀦𑀜𑀸𑀡𑀁, 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀦𑁆𑀢𑀺 𑀘𑀢𑀼𑀦𑁆𑀦𑀁 𑀜𑀸𑀡𑀸𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀢𑀭𑀼𑀡𑀯𑀺𑀧𑀲𑁆𑀲𑀦𑀸𑀢𑀺 𑀳𑀺 𑀢𑁂𑀲𑀁 𑀘𑀢𑀼𑀦𑁆𑀦𑀁 𑀜𑀸𑀡𑀸𑀦𑀫𑀥𑀺𑀯𑀘𑀦𑀁. 𑀧𑀯𑀸𑀭𑀡𑀸𑀲𑀗𑁆𑀕𑀳𑀁 𑀤𑀢𑁆𑀯𑀸𑀢𑀺 𑀅𑀦𑀼𑀫𑀢𑀺𑀤𑀸𑀦𑀯𑀲𑁂𑀦 𑀤𑀢𑁆𑀯𑀸. 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸𑀬𑀦𑁆𑀢𑀺 𑀧𑀘𑁆𑀙𑀺𑀫𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀺𑀬𑀁. ‘‘𑀫𑀺𑀕𑀲𑀺𑀭𑀲𑁆𑀲 𑀧𑀞𑀫𑀧𑀸𑀝𑀺𑀧𑀤𑀤𑀺𑀯𑀲𑁂’’𑀢𑀺 𑀇𑀤𑀁 𑀫𑀚𑁆𑀛𑀺𑀫𑀤𑁂𑀲𑀯𑁄𑀳𑀸𑀭𑀯𑀲𑁂𑀦 𑀫𑀺𑀕𑀲𑀺𑀭𑀫𑀸𑀲𑀲𑁆𑀲 𑀧𑀞𑀫𑀁 𑀧𑀸𑀝𑀺𑀧𑀤𑀤𑀺𑀯𑀲𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀏𑀢𑀭𑀳𑀺 𑀧𑀯𑀢𑁆𑀢𑀯𑁄𑀳𑀸𑀭𑀯𑀲𑁂𑀦 𑀧𑀦 𑀧𑀘𑁆𑀙𑀺𑀫𑀓𑀢𑁆𑀢𑀺𑀓𑀫𑀸𑀲𑀲𑁆𑀲 𑀓𑀸𑀴𑀧𑀓𑁆𑀔𑀧𑀸𑀝𑀺𑀧𑀤𑀤𑀺𑀯𑀲𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀜𑁆𑀜𑁂𑀦𑀧𑀺 𑀓𑀸𑀭𑀡𑁂𑀦𑀸𑀢𑀺 𑀪𑀺𑀓𑁆𑀔𑀽𑀦𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀢𑀭𑀼𑀡𑀪𑀸𑀯𑀢𑁄 𑀅𑀜𑁆𑀜𑁂𑀦𑀧𑀺 𑀫𑀚𑁆𑀛𑀺𑀫𑀫𑀡𑁆𑀟𑀮𑁂 𑀯𑁂𑀦𑁂𑀬𑁆𑀬𑀸𑀦𑀁 𑀜𑀸𑀡𑀧𑀭𑀺𑀧𑀸𑀓𑀸𑀤𑀺𑀓𑀸𑀭𑀡𑁂𑀦. 𑀘𑀢𑀼𑀫𑀸𑀲𑀦𑁆𑀢𑀺 𑀆𑀲𑀴𑁆𑀳𑀻𑀧𑀼𑀡𑁆𑀡𑀫𑀺𑀬𑀸 𑀧𑀸𑀝𑀺𑀧𑀤𑀢𑁄 𑀬𑀸𑀯 𑀧𑀘𑁆𑀙𑀺𑀫𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀻, 𑀢𑀸𑀯 𑀘𑀢𑀼𑀫𑀸𑀲𑀁. ‘‘𑀲𑀫𑀦𑁆𑀢𑀸 𑀬𑁄𑀚𑀦𑀲𑀢’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁂𑀦𑁂𑀯. 𑀯𑀲𑀦𑀁 𑀯𑀲𑁆𑀲𑀁, 𑀯𑀲𑀦𑀓𑀺𑀭𑀺𑀬𑀸, 𑀯𑀼𑀢𑁆𑀣𑀁 𑀯𑀲𑀺𑀢𑀁 𑀯𑀲𑁆𑀲𑀫𑀲𑁆𑀲𑀸𑀢𑀺 𑀯𑀼𑀢𑁆𑀣𑀯𑀲𑁆𑀲𑁄, 𑀢𑀲𑁆𑀲. 𑀢𑀣𑀸𑀕𑀢𑁂𑀦 𑀯𑀺𑀦𑁂𑀢𑀩𑁆𑀩𑀢𑁆𑀢𑀸 ‘‘𑀪𑀕𑀯𑀢𑁄 𑀯𑁂𑀦𑁂𑀬𑁆𑀬𑀲𑀢𑁆𑀢𑀸’’𑀢𑀺 𑀲𑀸𑀫𑀺𑀦𑀺𑀤𑁆𑀤𑁂𑀲𑁄 𑀯𑀼𑀢𑁆𑀢𑁄, 𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑁄 𑀯𑀸 𑀏𑀲. 𑀯𑁂𑀦𑁂𑀬𑁆𑀬𑀲𑀢𑁆𑀢𑀸𑀢𑀺 𑀘 𑀘𑀭𑀺𑀢𑀸𑀦𑀼𑀭𑀽𑀧𑀁 𑀯𑀺𑀦𑁂𑀢𑀩𑁆𑀩𑀲𑀢𑁆𑀢𑀸. 𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀁 𑀆𑀕𑀫𑀬𑀫𑀸𑀦𑁄𑀢𑀺 𑀲𑀤𑁆𑀥𑀸𑀤𑀺𑀇𑀦𑁆𑀤𑁆𑀭𑀺𑀬𑀸𑀦𑀁 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀪𑀸𑀯𑁂𑀦 𑀧𑀭𑀺𑀧𑀓𑁆𑀓𑀁 𑀧𑀝𑀺𑀫𑀸𑀦𑁂𑀦𑁆𑀢𑁄. 𑀨𑀼𑀲𑁆𑀲𑀫𑀸𑀖𑀨𑀕𑁆𑀕𑀼𑀡𑀘𑀺𑀢𑁆𑀢𑀫𑀸𑀲𑀸𑀦𑀁 𑀅𑀜𑁆𑀜𑀢𑀭𑀫𑀸𑀲𑀲𑁆𑀲 𑀧𑀞𑀫𑀤𑀺𑀯𑀲𑁂 𑀦𑀺𑀓𑁆𑀔𑀫𑀦𑀢𑁄 𑀫𑀸𑀲𑀦𑀺𑀬𑀫𑁄 𑀏𑀢𑁆𑀣 𑀦 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑀸𑀳 ‘‘𑀏𑀓𑀫𑀸𑀲𑀁 𑀯𑀸 𑀤𑁆𑀯𑀺𑀢𑀺𑀘𑀢𑀼𑀫𑀸𑀲𑀁 𑀯𑀸 𑀢𑀢𑁆𑀣𑁂𑀯 𑀯𑀲𑀺𑀢𑁆𑀯𑀸’’𑀢𑀺. 𑀢𑀢𑁆𑀣𑁂𑀯𑀸𑀢𑀺 𑀯𑀲𑁆𑀲𑀽𑀧𑀕𑀫𑀦𑀝𑁆𑀞𑀸𑀦𑁂 𑀏𑀯. ‘‘𑀲𑀢𑁆𑀢𑀳𑀺 𑀯𑀸’’𑀢𑀺𑀆𑀤𑀺 ‘‘𑀏𑀓𑀫𑀸𑀲𑀁 𑀯𑀸’’𑀢𑀺𑀆𑀤𑀺𑀦𑀸 𑀬𑀣𑀸𑀓𑁆𑀓𑀫𑀁 𑀬𑁄𑀚𑁂𑀢𑀩𑁆𑀩𑀁 𑁋 𑀬𑀤𑀺 𑀅𑀧𑀭𑀫𑁆𑀧𑀺 𑀏𑀓𑀫𑀸𑀲𑀁 𑀢𑀢𑁆𑀣𑁂𑀯 𑀯𑀲𑀢𑀺, 𑀲𑀢𑁆𑀢𑀳𑀺 𑀫𑀸𑀲𑁂𑀳𑀺 𑀘𑀸𑀭𑀺𑀓𑀁 𑀧𑀭𑀺𑀬𑁄𑀲𑀸𑀧𑁂𑀢𑀺. 𑀬𑀤𑀺 𑀤𑁆𑀯𑀺𑀫𑀸𑀲𑀁 𑀙𑀳𑀺, 𑀬𑀤𑀺 𑀢𑀺𑀫𑀸𑀲𑀁 𑀧𑀜𑁆𑀘𑀳𑀺, 𑀬𑀤𑀺 𑀘𑀢𑀼𑀫𑀸𑀲𑀁 𑀢𑀢𑁆𑀣𑁂𑀯 𑀯𑀲𑀢𑀺, 𑀘𑀢𑀽𑀳𑀺 𑀫𑀸𑀲𑁂𑀳𑀺 𑀘𑀸𑀭𑀺𑀓𑀁 𑀧𑀭𑀺𑀬𑁄𑀲𑀸𑀧𑁂𑀢𑀻𑀢𑀺. 𑀓𑀲𑁆𑀫𑀸 𑀧𑀦 𑀘𑀸𑀭𑀺𑀓𑀸𑀕𑀫𑀦𑀦𑁆𑀢𑀺 𑀆𑀲𑀗𑁆𑀓𑀸𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀇𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀢𑀺𑀭𑁂𑀓𑀁 𑀚𑀭𑀸𑀤𑀼𑀩𑁆𑀩𑀮𑁄 𑀩𑀸𑀴𑁆𑀳𑀚𑀺𑀡𑁆𑀡𑁄. 𑀢𑁂 𑀓𑀤𑀸 𑀧𑀲𑁆𑀲𑀺𑀲𑁆𑀲𑀦𑁆𑀢𑀺, 𑀦 𑀧𑀲𑁆𑀲𑀺𑀲𑁆𑀲𑀦𑁆𑀢𑀺 𑀏𑀯. 𑀮𑁄𑀓𑀸𑀦𑀼𑀓𑀫𑁆𑀧𑀓𑀸𑀬𑀸𑀢𑀺 𑀮𑁄𑀓𑀸𑀦𑀼𑀓𑀫𑁆𑀧𑀓𑀸𑀬 𑀏𑀯. 𑀢𑁂𑀦 𑀯𑀼𑀢𑁆𑀢𑀁 ‘‘𑀦 𑀘𑀻𑀯𑀭𑀸𑀤𑀺𑀳𑁂𑀢𑀽’’𑀢𑀺.

𑀚𑀗𑁆𑀖𑀯𑀺𑀳𑀸𑀭𑀯𑀲𑁂𑀦𑀸𑀢𑀺 𑀚𑀗𑁆𑀖𑀸𑀳𑀺 𑀯𑀺𑀘𑀭𑀡𑀯𑀲𑁂𑀦, 𑀚𑀗𑁆𑀖𑀸𑀳𑀺 𑀯𑀺𑀘𑀭𑀺𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀓𑀢𑀺𑀧𑀸𑀳𑀁 𑀦𑀺𑀯𑀲𑀦𑀯𑀲𑁂𑀦 𑀯𑀸. 𑀲𑀩𑁆𑀩𑀺𑀭𑀺𑀬𑀸𑀧𑀣𑀲𑀸𑀥𑀸𑀭𑀡𑀜𑁆𑀳𑀺 𑀯𑀺𑀳𑀸𑀭𑀯𑀘𑀦𑀁. 𑀲𑀭𑀻𑀭𑀨𑀸𑀲𑀼𑀓𑀢𑁆𑀣𑀸𑀬𑀸𑀢𑀺 𑀏𑀓𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀦𑀺𑀩𑀤𑁆𑀥𑀯𑀸𑀲𑀯𑀲𑁂𑀦 𑀉𑀲𑁆𑀲𑀦𑁆𑀦𑀥𑀸𑀢𑀼𑀓𑀲𑁆𑀲 𑀲𑀭𑀻𑀭𑀲𑁆𑀲 𑀯𑀺𑀘𑀭𑀡𑁂𑀦 𑀨𑀸𑀲𑀼𑀪𑀸𑀯𑀢𑁆𑀣𑀸𑀬. 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑀸𑀮𑀸𑀪𑀺𑀓𑀗𑁆𑀔𑀦𑀢𑁆𑀣𑀸𑀬𑀸𑀢𑀺 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀧𑀫𑀲𑀼𑀢𑁆𑀢 (𑀅. 𑀦𑀺. 𑁭.𑁭𑁨) 𑀫𑀖𑀤𑁂𑀯𑀚𑀸𑀢𑀓𑀸𑀤𑀺 (𑀚𑀸. 𑁧.𑁧.𑁯) 𑀤𑁂𑀲𑀦𑀸𑀦𑀁 𑀯𑀺𑀬 𑀥𑀫𑁆𑀫𑀤𑁂𑀲𑀦𑀸𑀬 𑀅𑀪𑀺𑀓𑀗𑁆𑀔𑀺𑀢𑀩𑁆𑀩𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑀸𑀮𑀢𑁆𑀣𑀸𑀬, 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑀸𑀮𑀲𑁆𑀲 𑀯𑀸 𑀅𑀪𑀺𑀓𑀗𑁆𑀔𑀦𑀢𑁆𑀣𑀸𑀬, 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑀸𑀮𑁂 𑀥𑀫𑁆𑀫𑀤𑁂𑀲𑀦𑀢𑁆𑀣𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀸𑀧𑀦𑀢𑁆𑀣𑀸𑀬𑀸𑀢𑀺 𑀲𑀼𑀭𑀸𑀧𑀸𑀦𑀲𑀺𑀓𑁆𑀔𑀸𑀧𑀤𑀸𑀤𑀺 (𑀧𑀸𑀘𑀺. 𑁩𑁨𑁭, 𑁩𑁨𑁮, 𑁩𑁨𑁯) 𑀧𑀜𑁆𑀜𑀸𑀧𑀦𑁂 𑀯𑀺𑀬 𑀲𑀺𑀓𑁆𑀔𑀸𑀧𑀤𑀸𑀦𑀁 𑀧𑀜𑁆𑀜𑀸𑀧𑀦𑀢𑁆𑀣𑀸𑀬. 𑀩𑁄𑀥𑀦𑀢𑁆𑀣𑀸𑀬𑀸𑀢𑀺 𑀅𑀗𑁆𑀕𑀼𑀮𑀺𑀫𑀸𑀮𑀸𑀤𑀬𑁄 (𑀫. 𑀦𑀺. 𑁨.𑁩𑁪𑁭) 𑀯𑀺𑀬 𑀩𑁄𑀥𑀦𑁂𑀬𑁆𑀬𑀲𑀢𑁆𑀢𑁂 𑀘𑀢𑀼𑀲𑀘𑁆𑀘𑀩𑁄𑀥𑀦𑀢𑁆𑀣𑀸𑀬. 𑀫𑀳𑀢𑀸𑀢𑀺 𑀫𑀳𑀢𑀺𑀬𑀸. 𑀓𑀜𑁆𑀘𑀺, 𑀓𑀢𑀺𑀧𑀬𑁂 𑀯𑀸 𑀧𑀼𑀕𑁆𑀕𑀮𑁂 𑀉𑀤𑁆𑀤𑀺𑀲𑁆𑀲 𑀘𑀸𑀭𑀺𑀓𑀸 𑀦𑀺𑀩𑀤𑁆𑀥𑀘𑀸𑀭𑀺𑀓𑀸. 𑀢𑀤𑀜𑁆𑀜𑀸 𑀲𑀫𑁆𑀩𑀳𑀼𑀮𑁂 𑀉𑀤𑁆𑀤𑀺𑀲𑁆𑀲 𑀕𑀸𑀫𑀦𑀺𑀕𑀫𑀦𑀕𑀭𑀧𑀝𑀺𑀧𑀸𑀝𑀺𑀬𑀸 𑀘𑀸𑀭𑀺𑀓𑀸 𑀅𑀦𑀺𑀩𑀤𑁆𑀥𑀘𑀸𑀭𑀺𑀓𑀸. 𑀢𑁂𑀦𑀸𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺. 𑀬𑀁 𑀘𑀭𑀢𑀻𑀢𑀺 𑀓𑀺𑀭𑀺𑀬𑀸𑀧𑀭𑀸𑀫𑀲𑀦𑀁.

‘‘𑀏𑀲𑀸 𑀇𑀥 𑀅𑀥𑀺𑀧𑁆𑀧𑁂𑀢𑀸’’𑀢𑀺 𑀯𑀼𑀢𑁆𑀢𑀫𑁂𑀯 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀢𑀤𑀸 𑀓𑀺𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀬𑀸𑀢𑀺 𑀚𑀸𑀢𑀺𑀓𑁆𑀔𑁂𑀢𑁆𑀢𑀪𑀽𑀢𑀁 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑀲𑁆𑀫𑀸𑀢𑀺 𑀘𑁂? 𑀢𑀢𑁆𑀣𑁂𑀯 𑀪𑀩𑁆𑀩𑀲𑀢𑁆𑀢𑀸𑀦𑀁 𑀲𑀫𑁆𑀪𑀯𑀢𑁄. 𑀢𑀢𑁆𑀣 𑀳𑀺 𑀲𑀢𑁆𑀢𑁂 𑀪𑀩𑁆𑀩𑁂 𑀧𑀭𑀺𑀧𑀓𑁆𑀓𑀺𑀦𑁆𑀤𑁆𑀭𑀺𑀬𑁂 𑀧𑀲𑁆𑀲𑀺𑀢𑀼𑀁 𑀩𑀼𑀤𑁆𑀥𑀜𑀸𑀡𑀁 𑀅𑀪𑀺𑀦𑀻𑀳𑀭𑀺𑀢𑁆𑀯𑀸 𑀞𑀺𑀢𑁄 𑀪𑀕𑀯𑀸 𑀜𑀸𑀡𑀚𑀸𑀮𑀁 𑀧𑀢𑁆𑀣𑀭𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀇𑀤𑀜𑁆𑀘 𑀤𑁂𑀯𑀩𑁆𑀭𑀳𑁆𑀫𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀫𑀦𑀼𑀲𑁆𑀲𑀸 𑀧𑀦 𑀇𑀫𑀲𑁆𑀫𑀺𑀁𑀬𑁂𑀯 𑀘𑀓𑁆𑀓𑀯𑀸𑀴𑁂, 𑀇𑀫𑀲𑁆𑀫𑀺𑀁𑀬𑁂𑀯 𑀘 𑀲𑀧𑀭𑀺𑀯𑀸𑀭𑁂 𑀚𑀫𑁆𑀩𑀼𑀤𑀻𑀧𑁂 𑀩𑁄𑀥𑀦𑁂𑀬𑁆𑀬𑀸 𑀳𑁄𑀦𑁆𑀢𑀺. 𑀩𑁄𑀥𑀦𑁂𑀬𑁆𑀬𑀩𑀦𑁆𑀥𑀯𑁂𑀢𑀺 𑀩𑁄𑀥𑀦𑁂𑀬𑁆𑀬𑀲𑀢𑁆𑀢𑀲𑀗𑁆𑀔𑀸𑀢𑁂 𑀪𑀕𑀯𑀢𑁄 𑀩𑀦𑁆𑀥𑀯𑁂. 𑀕𑁄𑀢𑁆𑀢𑀸𑀤𑀺𑀲𑀫𑁆𑀩𑀦𑁆𑀥𑀸 𑀯𑀺𑀬 𑀳𑀺 𑀲𑀘𑁆𑀘𑀧𑀝𑀺𑀯𑁂𑀥𑀲𑀫𑁆𑀩𑀦𑁆𑀥𑀸 𑀯𑁂𑀦𑁂𑀬𑁆𑀬𑀸 𑀪𑀕𑀯𑀢𑁄 𑀩𑀦𑁆𑀥𑀯𑀸 𑀦𑀸𑀫𑀸𑀢𑀺. 𑀕𑁄𑀘𑀭𑀪𑀸𑀯𑀽𑀧𑀕𑀫𑀦𑀁 𑀲𑀦𑁆𑀥𑀸𑀬 ‘‘𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀚𑀸𑀮𑀲𑁆𑀲 𑀅𑀦𑁆𑀢𑁄 𑀧𑀯𑀺𑀝𑁆𑀞𑁄’’𑀢𑀺 𑀯𑀼𑀢𑁆𑀢𑀁. 𑀪𑀕𑀯𑀸 𑀓𑀺𑀭 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 ‘‘𑀬𑁂 𑀲𑀢𑁆𑀢𑀸 𑀪𑀩𑁆𑀩𑀸 𑀧𑀭𑀺𑀧𑀓𑁆𑀓𑀜𑀸𑀡𑀸, 𑀢𑁂 𑀫𑀬𑁆𑀳𑀁 𑀜𑀸𑀡𑀲𑁆𑀲 𑀉𑀧𑀝𑁆𑀞𑀳𑀦𑁆𑀢𑀽’’𑀢𑀺 𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀸𑀬 𑀲𑀫𑀦𑁆𑀦𑀸𑀳𑀭𑀢𑀺, 𑀢𑀲𑁆𑀲 𑀲𑀳𑀲𑀫𑀦𑁆𑀦𑀸𑀳𑀸𑀭𑀸 𑀏𑀓𑁄 𑀯𑀸 𑀤𑁆𑀯𑁂 𑀯𑀸 𑀲𑀫𑁆𑀩𑀳𑀼𑀮𑀸 𑀯𑀸 𑀢𑀤𑀸 𑀯𑀺𑀦𑀬𑀽𑀧𑀕𑀸 𑀯𑁂𑀦𑁂𑀬𑁆𑀬𑀸 𑀜𑀸𑀡𑀲𑁆𑀲 𑀆𑀧𑀸𑀣𑀫𑀸𑀕𑀘𑁆𑀙𑀦𑁆𑀢𑀺, 𑀅𑀬𑀫𑁂𑀢𑁆𑀣 𑀩𑀼𑀤𑁆𑀥𑀸𑀦𑀼𑀪𑀸𑀯𑁄. 𑀏𑀯𑀫𑀸𑀧𑀸𑀣𑀕𑀢𑀸𑀦𑀁 𑀧𑀦 𑀦𑁂𑀲𑀁 𑀉𑀧𑀦𑀺𑀲𑁆𑀲𑀬𑀁 𑀧𑀼𑀩𑁆𑀩𑀘𑀭𑀺𑀬𑀁, 𑀧𑀼𑀩𑁆𑀩𑀳𑁂𑀢𑀼𑀁, 𑀲𑀫𑁆𑀧𑀢𑀺 𑀯𑀢𑁆𑀢𑀫𑀸𑀦𑀜𑁆𑀘 𑀧𑀝𑀺𑀧𑀢𑁆𑀢𑀺𑀁 𑀑𑀮𑁄𑀓𑁂𑀢𑀺. 𑀯𑁂𑀦𑁂𑀬𑁆𑀬𑀲𑀢𑁆𑀢𑀧𑀭𑀺𑀕𑁆𑀕𑀡𑁆𑀳𑀦𑀢𑁆𑀣𑀜𑁆𑀳𑀺 𑀲𑀫𑀦𑁆𑀦𑀸𑀳𑀸𑀭𑁂 𑀓𑀢𑁂 𑀧𑀞𑀫𑀁 𑀦𑁂𑀲𑀁 𑀯𑁂𑀦𑁂𑀬𑁆𑀬𑀪𑀸𑀯𑁂𑀦 𑀉𑀧𑀝𑁆𑀞𑀸𑀦𑀁 𑀳𑁄𑀢𑀺, 𑀅𑀣 ‘‘𑀓𑀺𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀭𑀡𑀕𑀫𑀦𑀸𑀤𑀺𑀯𑀲𑁂𑀦 𑀓𑀜𑁆𑀘𑀺 𑀦𑀺𑀧𑁆𑀨𑀢𑁆𑀢𑀺𑀁 𑀯𑀻𑀫𑀁𑀲𑀫𑀸𑀦𑁄 𑀧𑀼𑀩𑁆𑀩𑀽𑀧𑀦𑀺𑀲𑁆𑀲𑀬𑀸𑀤𑀻𑀦𑀺 𑀑𑀮𑁄𑀓𑁂𑀢𑀺. 𑀢𑁂𑀦𑀸𑀳 ‘‘𑀅𑀣 𑀪𑀕𑀯𑀸’’𑀢𑀺𑀆𑀤𑀺. 𑀲𑁄𑀢𑀺 𑀅𑀫𑁆𑀩𑀝𑁆𑀞𑁄. 𑀯𑀸𑀤𑀧𑀝𑀺𑀯𑀸𑀤𑀁 𑀓𑀢𑁆𑀯𑀸𑀢𑀺 ‘‘𑀏𑀯𑀁 𑀦𑀼 𑀢𑁂 𑀅𑀫𑁆𑀩𑀝𑁆𑀞𑀸’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁨𑁬𑁨) 𑀫𑀬𑀸 𑀯𑀼𑀢𑁆𑀢𑀯𑀘𑀦𑀲𑁆𑀲 ‘‘𑀬𑁂 𑀘 𑀔𑁄 𑀢𑁂 𑀪𑁄 𑀕𑁄𑀢𑀫 𑀫𑀼𑀡𑁆𑀟𑀓𑀸 𑀲𑀫𑀡𑀓𑀸’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁨𑁬𑁩) 𑀧𑀝𑀺𑀯𑀘𑀦𑀁 𑀤𑀢𑁆𑀯𑀸, 𑀅𑀲𑀩𑁆𑀪𑀺𑀯𑀸𑀓𑁆𑀬𑀦𑁆𑀢𑀺 𑀅𑀲𑀧𑁆𑀧𑀼𑀭𑀺𑀲𑀯𑀸𑀘𑀁, 𑀢𑀺𑀓𑁆𑀔𑀢𑁆𑀢𑀼𑀁 𑀇𑀩𑁆𑀪𑀯𑀸𑀤𑀦𑀺𑀧𑀸𑀢𑀦𑀯𑀲𑁂𑀦 𑀦𑀸𑀦𑀧𑁆𑀧𑀓𑀸𑀭𑀁 𑀲𑀸𑀥𑀼𑀲𑀪𑀸𑀯𑀸𑀬 𑀯𑀸𑀘𑀸𑀬 𑀯𑀢𑁆𑀢𑀼𑀫𑀬𑀼𑀢𑁆𑀢𑀁 𑀯𑀸𑀓𑁆𑀬𑀁 𑀯𑀓𑁆𑀔𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀺𑀩𑁆𑀩𑀺𑀲𑁂𑀯𑀦𑀦𑁆𑀢𑀺 𑀯𑀺𑀕𑀢𑀢𑀼𑀤𑀦𑀁, 𑀫𑀸𑀦𑀤𑀧𑁆𑀧𑀯𑀲𑁂𑀦 𑀅𑀧𑀕𑀢𑀧𑀭𑀺𑀦𑀺𑀧𑁆𑀨𑀦𑁆𑀤𑀦𑀦𑁆𑀢𑀺 𑀅𑀢𑁆𑀣𑁄.

𑀅𑀯𑀲𑀭𑀺𑀢𑀩𑁆𑀩𑀦𑁆𑀢𑀺 𑀉𑀧𑀕𑀦𑁆𑀢𑀩𑁆𑀩𑀁. 𑀢𑀲𑁆𑀲 𑀕𑀸𑀫𑀲𑁆𑀲 𑀇𑀤𑀁 𑀦𑀸𑀫𑀫𑀢𑁆𑀢𑀁, 𑀓𑀺𑀫𑁂𑀢𑁆𑀣 𑀅𑀢𑁆𑀣𑀧𑀭𑀺𑀬𑁂𑀲𑀦𑀸𑀬𑀸𑀢𑀺 𑀯𑀼𑀢𑁆𑀢𑀁 ‘‘𑀇𑀚𑁆𑀛𑀸𑀦𑀗𑁆𑀕𑀮𑀦𑁆𑀢𑀺𑀧𑀺 𑀧𑀸𑀞𑁄’’𑀢𑀺. ‘‘𑀬𑁂𑀦 𑀤𑀺𑀲𑀸𑀪𑀸𑀕𑁂𑀦𑀸’’𑀢𑀺 𑀓𑀭𑀡𑀦𑀺𑀤𑁆𑀤𑁂𑀲𑀸𑀦𑀼𑀭𑀽𑀧𑀁 𑀓𑀭𑀡𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀢𑁂𑀦 𑀅𑀯𑀲𑀭𑀻’’𑀢𑀺 𑀇𑀫𑀺𑀦𑀸. ‘‘𑀬𑀲𑁆𑀫𑀺𑀁 𑀧𑀤𑁂𑀲𑁂’’𑀢𑀺 𑀧𑀦 𑀪𑀼𑀫𑁆𑀫𑀦𑀺𑀤𑁆𑀤𑁂𑀲𑀸𑀦𑀼𑀭𑀽𑀧𑀁 ‘‘𑀢𑀁 𑀯𑀸 𑀅𑀯𑀲𑀭𑀻’’𑀢𑀺 𑀯𑀼𑀢𑁆𑀢𑀁. 𑀢𑀤𑀼𑀪𑀬𑀫𑁂𑀯𑀢𑁆𑀣𑀁 𑀯𑀺𑀯𑀭𑀢𑀺 ‘‘𑀢𑁂𑀦 𑀤𑀺𑀲𑀸𑀪𑀸𑀕𑁂𑀦𑀸’’𑀢𑀺𑀆𑀤𑀺𑀦𑀸. 𑀕𑀢𑁄𑀢𑀺 𑀉𑀧𑀕𑀢𑁄, 𑀅𑀕𑀫𑀸𑀲𑀻𑀢𑀺 𑀅𑀢𑁆𑀣𑁄. 𑀧𑀼𑀦 𑀕𑀢𑁄𑀢𑀺 𑀲𑀫𑁆𑀧𑀢𑁆𑀢𑁄, 𑀲𑀫𑁆𑀧𑀸𑀧𑀼𑀡𑀻𑀢𑀺 𑀅𑀢𑁆𑀣𑁄. ‘‘𑀇𑀘𑁆𑀙𑀸𑀦𑀗𑁆𑀕𑀮𑁂’’𑀢𑀺 𑀇𑀤𑀁 𑀢𑀤𑀸 𑀪𑀕𑀯𑀢𑁄 𑀕𑁄𑀘𑀭𑀕𑀸𑀫𑀦𑀺𑀤𑀲𑁆𑀲𑀦𑀁, 𑀲𑀫𑀻𑀧𑀢𑁆𑀣𑁂 𑀘𑁂𑀢𑀁 𑀪𑀼𑀫𑁆𑀫𑀁. ‘‘𑀇𑀘𑁆𑀙𑀸𑀦𑀗𑁆𑀕𑀮𑀯𑀦𑀲𑀡𑁆𑀟𑁂’’𑀢𑀺 𑀇𑀤𑀁 𑀧𑀦 𑀦𑀺𑀯𑀸𑀲𑀝𑁆𑀞𑀸𑀦𑀤𑀲𑁆𑀲𑀦𑀁, 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀅𑀥𑀺𑀓𑀭𑀡𑁂 𑀘𑁂𑀢𑀁 𑀪𑀼𑀫𑁆𑀫𑀦𑁆𑀢𑀺 𑀢𑀤𑀼𑀪𑀬𑀫𑁆𑀧𑀺 𑀧𑀤𑀁 𑀯𑀺𑀲𑁂𑀲𑀢𑁆𑀣𑀤𑀲𑁆𑀲𑀦𑁂𑀦 𑀯𑀺𑀯𑀭𑀦𑁆𑀢𑁄 ‘‘𑀇𑀘𑁆𑀙𑀸𑀦𑀗𑁆𑀕𑀮𑀁 𑀉𑀧𑀦𑀺𑀲𑁆𑀲𑀸𑀬𑀸’’𑀢𑀺𑀆𑀤𑀺𑀫𑀸𑀳. ‘‘𑀲𑀻𑀮𑀔𑀦𑁆𑀥𑀸𑀯𑀸𑀭’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀦𑀬𑁂𑀦 𑀯𑁂𑀦𑁂𑀬𑁆𑀬𑀳𑀺𑀢𑀲𑀫𑀧𑁂𑀓𑁆𑀔𑀦𑀯𑀲𑁂𑀦𑁂𑀯 𑀪𑀕𑀯𑀢𑁄 𑀯𑀺𑀳𑀸𑀭𑀤𑀲𑁆𑀲𑀦𑀁. 𑀢𑀢𑁆𑀣 𑀥𑀫𑁆𑀫𑀭𑀸𑀚𑀲𑁆𑀲 𑀪𑀕𑀯𑀢𑁄 𑀲𑀩𑁆𑀩𑀲𑁄 𑀅𑀥𑀫𑁆𑀫𑀦𑀺𑀕𑁆𑀕𑀡𑁆𑀳𑀦𑀧𑀭𑀸 𑀏𑀯 𑀧𑀝𑀺𑀧𑀢𑁆𑀢𑀺, 𑀲𑀸 𑀘 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀯𑀲𑁂𑀦𑀸𑀢𑀺 𑀲𑀻𑀮𑀸𑀤𑀺𑀢𑁆𑀢𑀬𑀲𑁆𑀲𑁂𑀯 𑀕𑀳𑀡𑀁. 𑀲𑀻𑀮𑀔𑀦𑁆𑀥𑀸𑀯𑀸𑀭𑀦𑁆𑀢𑀺 𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑁄 𑀤𑀸𑀭𑀼𑀇𑀝𑁆𑀞𑀓𑀸𑀤𑀺𑀓𑀢𑀁 𑀔𑀦𑁆𑀥𑀸𑀯𑀸𑀭𑀲𑀤𑀺𑀲𑀁 𑀲𑀻𑀮𑀲𑀗𑁆𑀔𑀸𑀢𑀁 𑀔𑀦𑁆𑀥𑀸𑀯𑀸𑀭𑀁 𑀩𑀦𑁆𑀥𑀺𑀢𑁆𑀯𑀸 𑀯𑀺𑀳𑀭𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀤𑀸𑀭𑀼𑀓𑁆𑀔𑀦𑁆𑀥𑀸𑀤𑀻𑀳𑀺 𑀆𑀲𑀫𑀦𑁆𑀢𑀢𑁄 𑀯𑀭𑀦𑁆𑀢𑀺 𑀧𑀭𑀺𑀓𑁆𑀔𑀺𑀧𑀦𑁆𑀢𑀺 𑀏𑀢𑁆𑀣𑀸𑀢𑀺 𑀳𑀺 𑀔𑀦𑁆𑀥𑀸𑀯𑀸𑀭𑁄 𑀅-𑀓𑀸𑀭𑀲𑁆𑀲 𑀤𑀻𑀖𑀁 𑀓𑀢𑁆𑀯𑀸, 𑀭𑀸𑀚𑀽𑀦𑀁 𑀅𑀘𑀺𑀭𑀦𑀺𑀯𑀸𑀲𑀝𑁆𑀞𑀸𑀦𑀁. 𑀢𑀢𑁆𑀣 𑀧𑀦 𑀪𑀕𑀯𑀢𑁄 𑀅𑀘𑀺𑀭𑀦𑀺𑀯𑀲𑀦𑀓𑀺𑀭𑀺𑀬𑀸𑀲𑀫𑁆𑀩𑀦𑁆𑀥𑀫𑀢𑁆𑀢𑁂𑀦 𑀪𑀬𑀦𑀺𑀯𑀸𑀭𑀡𑀝𑁆𑀞𑁂𑀦 𑀢𑀁𑀲𑀤𑀺𑀲𑀢𑀸𑀬 𑀲𑀻𑀮𑀫𑁆𑀧𑀺 𑀢𑀣𑀸 𑀯𑀼𑀘𑁆𑀘𑀢𑀺. 𑀲𑀫𑀸𑀥𑀺𑀓𑁄𑀦𑁆𑀢𑀦𑁆𑀢𑀺 𑀲𑀫𑁆𑀫𑀸𑀲𑀫𑀸𑀥𑀺𑀲𑀗𑁆𑀔𑀸𑀢𑀁 𑀫𑀗𑁆𑀕𑀮𑀲𑀢𑁆𑀢𑀺𑀁. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀤𑀦𑁆𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑀗𑁆𑀔𑀸𑀢𑀁 𑀚𑀬𑀫𑀦𑁆𑀢𑀧𑀤𑀁. 𑀧𑀭𑀺𑀯𑀢𑁆𑀢𑀬𑀫𑀸𑀦𑁄𑀢𑀺 𑀧𑀭𑀺𑀚𑀧𑁆𑀧𑀫𑀸𑀦𑁄. ‘‘𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑀭’’𑀦𑁆𑀢𑀺𑀧𑀺 𑀧𑀸𑀞𑁄, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀯𑀚𑀺𑀭𑀕𑁆𑀕𑀲𑀭𑀁 𑀅𑀧𑀭𑀸𑀧𑀭𑀁 𑀲𑀫𑁆𑀧𑀭𑀺𑀯𑀢𑁆𑀢𑀫𑀸𑀦𑁄𑀢𑀺 𑀅𑀢𑁆𑀣𑁄. 𑀬𑀣𑀸𑀪𑀺𑀭𑀼𑀘𑀺𑀢𑁂𑀦 𑀯𑀺𑀳𑀸𑀭𑁂𑀦𑀸𑀢𑀺 𑀲𑀩𑁆𑀩𑀯𑀺𑀳𑀸𑀭𑀲𑀸𑀥𑀸𑀭𑀡𑀤𑀲𑁆𑀲𑀦𑀁, 𑀤𑀺𑀩𑁆𑀩𑀯𑀺𑀳𑀸𑀭𑀸𑀤𑀻𑀲𑀼 𑀬𑁂𑀦 𑀬𑁂𑀦 𑀅𑀢𑁆𑀢𑀦𑀸 𑀅𑀪𑀺𑀭𑀼𑀘𑀺𑀢𑁂𑀦 𑀯𑀺𑀳𑀸𑀭𑁂𑀦 𑀯𑀺𑀳𑀭𑀢𑀻𑀢𑀺 𑀅𑀢𑁆𑀣𑁄.

𑀧𑁄𑀓𑁆𑀔𑀭𑀲𑀸𑀢𑀺𑀯𑀢𑁆𑀣𑀼𑀯𑀡𑁆𑀡𑀦𑀸

𑁨𑁫𑁫. 𑀫𑀦𑁆𑀢𑁂𑀢𑀺 𑀇𑀭𑀼𑀯𑁂𑀤𑀸𑀤𑀺𑀫𑀦𑁆𑀢𑀲𑀢𑁆𑀣𑁂. 𑀇𑀭𑀼𑀯𑁂𑀤𑀸𑀤𑀬𑁄 𑀳𑀺 𑀕𑀼𑀢𑁆𑀢𑀪𑀸𑀲𑀺𑀢𑀩𑁆𑀩𑀝𑁆𑀞𑁂𑀦 ‘‘𑀫𑀦𑁆𑀢𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀡-𑀲𑀤𑁆𑀤𑁄 𑀲𑀤𑁆𑀤𑁂𑀢𑀺 𑀆𑀳 ‘‘𑀲𑀚𑁆𑀛𑀸𑀬𑀢𑀻’’𑀢𑀺. 𑀮𑁄𑀓𑀺𑀬𑀸 𑀧𑀦 𑀯𑀤𑀦𑁆𑀢𑀺 ‘‘𑀩𑁆𑀭𑀳𑁆𑀫𑀼𑀦𑁄 𑀅𑀧𑀘𑁆𑀘𑀁 𑀩𑁆𑀭𑀸𑀳𑁆𑀫𑀡𑁄, 𑀦𑀸𑀕𑀫𑁄, 𑀡𑀢𑁆𑀢𑀁, 𑀤𑀻𑀖𑀸𑀤𑀻’’𑀢𑀺. 𑀓𑀲𑁆𑀫𑀸 𑀅𑀬𑀫𑁂𑀯 𑀯𑀘𑀦𑀢𑁆𑀣𑁄 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀇𑀤𑀫𑁂𑀯𑀸’’𑀢𑀺𑀆𑀤𑀺. 𑀅𑀣 𑀓𑁂𑀲𑀁 𑀇𑀢𑀭𑁄 𑀯𑀘𑀦𑀢𑁆𑀣𑁄𑀢𑀺 𑀘𑁄𑀤𑀦𑀫𑀧𑀦𑁂𑀢𑀺 ‘‘𑀅𑀭𑀺𑀬𑀸 𑀧𑀦𑀸’’𑀢𑀺𑀆𑀤𑀺𑀦𑀸. 𑀅𑀣 𑀯𑀸 𑀬𑀁 𑀮𑁄𑀓𑀺𑀬𑀸 𑀯𑀤𑀦𑁆𑀢𑀺 ‘‘𑀩𑁆𑀭𑀳𑁆𑀫𑀼𑀦𑀸 𑀚𑀸𑀢𑁄 𑀩𑁆𑀭𑀸𑀳𑁆𑀫𑀡𑁄’’𑀢𑀺𑀆𑀤𑀺𑀦𑀺𑀭𑀼𑀢𑁆𑀢𑀺𑀁, 𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑀼𑀁 𑀏𑀯𑀁 𑀯𑀼𑀢𑁆𑀢𑀁. ‘‘𑀇𑀤𑀫𑁂𑀯𑀸’’𑀢𑀺 𑀳𑀺 𑀅𑀯𑀥𑀸𑀭𑀡𑁂𑀦 𑀢𑀁 𑀧𑀝𑀺𑀓𑁆𑀔𑀺𑀧𑀢𑀺. ‘‘𑀚𑀸𑀢𑀺𑀩𑁆𑀭𑀸𑀳𑁆𑀫𑀡𑀸𑀦’’𑀦𑁆𑀢𑀺 𑀧𑀦 𑀇𑀫𑀺𑀦𑀸 𑀲𑀤𑁆𑀤𑀦𑁆𑀢𑀭𑁂𑀦 𑀤𑀲𑁆𑀲𑀺𑀢𑁂𑀲𑀼 𑀚𑀸𑀢𑀺𑀩𑁆𑀭𑀸𑀳𑁆𑀫𑀡𑀯𑀺𑀲𑀼𑀤𑁆𑀥𑀺𑀩𑁆𑀭𑀸𑀳𑁆𑀫𑀡𑀯𑀲𑁂𑀦 𑀤𑀼𑀯𑀺𑀥𑁂𑀲𑀼 𑀩𑁆𑀭𑀸𑀳𑁆𑀫𑀡𑁂𑀲𑀼 𑀯𑀺𑀲𑀼𑀤𑁆𑀥𑀺𑀩𑁆𑀭𑀸𑀳𑁆𑀫𑀡𑀸𑀦𑀁 𑀦𑀺𑀭𑀼𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀭𑀺𑀬𑀸 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀩𑀳𑀦𑁆𑀢𑀺 𑀧𑀸𑀧𑁂 𑀩𑀳𑀺 𑀓𑀭𑁄𑀦𑁆𑀢𑀻𑀢𑀺 𑀳𑀺 𑀅𑀭𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀦𑀺𑀭𑀼𑀢𑁆𑀢𑀺𑀦𑀬𑁂𑀦. ‘‘𑀢𑀲𑁆𑀲 𑀓𑀺𑀭 𑀓𑀸𑀬𑁄 𑀲𑁂𑀢𑀧𑁄𑀓𑁆𑀔𑀭𑀲𑀤𑀺𑀲𑁄’’𑀢𑀺 𑀇𑀤𑀫𑁂𑀯𑀲𑁆𑀲 𑀦𑀸𑀫𑀮𑀸𑀪𑀳𑁂𑀢𑀼𑀤𑀲𑁆𑀲𑀦𑀁, 𑀲𑁂𑀲𑀁 𑀧𑀦 𑀢𑀧𑁆𑀧𑀲𑀗𑁆𑀕𑁂𑀦 𑀬𑀣𑀸𑀯𑀺𑀚𑁆𑀚𑀫𑀸𑀦𑀯𑀺𑀲𑁂𑀲𑀤𑀲𑁆𑀲𑀦𑀫𑁂𑀯. 𑀢𑁂𑀦𑀸𑀳 ‘‘𑀇𑀢𑀺 𑀦𑀁 𑀧𑁄𑀓𑁆𑀔𑀭𑀲𑀤𑀺𑀲𑀢𑁆𑀢𑀸 𑀧𑁄𑀓𑁆𑀔𑀭𑀲𑀸𑀢𑀻𑀢𑀺 𑀲𑀜𑁆𑀚𑀸𑀦𑀦𑁆𑀢𑀻’’𑀢𑀺. 𑀧𑁄𑀓𑁆𑀔𑀭𑁂𑀦 𑀲𑀤𑀺𑀲𑁄 𑀓𑀸𑀬𑁄 𑀬𑀲𑁆𑀲𑀸𑀢𑀺 𑀳𑀺 𑀧𑁄𑀓𑁆𑀔𑀭𑀲𑀸𑀢𑀻 𑀦𑀺𑀭𑀼𑀢𑁆𑀢𑀺𑀦𑀬𑁂𑀦. 𑀲𑀸𑀢𑀲𑀤𑁆𑀤𑁄 𑀯𑀸 𑀲𑀤𑀺𑀲𑀢𑁆𑀣𑁄, 𑀧𑁄𑀓𑁆𑀔𑀭𑁂𑀦 𑀲𑀸𑀢𑁄 𑀲𑀤𑀺𑀲𑁄 𑀓𑀸𑀬𑁄 𑀢𑀣𑀸, 𑀲𑁄 𑀬𑀲𑁆𑀲𑀸𑀢𑀺 𑀧𑁄𑀓𑁆𑀔𑀭𑀲𑀸𑀢𑀻. 𑀲𑁂𑀢𑀧𑁄𑀓𑁆𑀔𑀭𑀲𑀤𑀺𑀲𑁄𑀢𑀺 𑀲𑁂𑀢𑀧𑀤𑀼𑀫𑀯𑀡𑁆𑀡𑁄. 𑀤𑁂𑀯𑀦𑀕𑀭𑁂𑀢𑀺 𑀆𑀮𑀓𑀫𑀦𑁆𑀤𑀸𑀤𑀺𑀤𑁂𑀯𑀧𑀼𑀭𑁂. 𑀉𑀲𑁆𑀲𑀸𑀧𑀺𑀢𑀭𑀚𑀢𑀢𑁄𑀭𑀡𑀦𑁆𑀢𑀺 𑀕𑀫𑁆𑀪𑀻𑀭𑀦𑁂𑀫𑀦𑀺𑀔𑀸𑀢𑀁 𑀅𑀘𑁆𑀘𑀼𑀕𑁆𑀕𑀢𑀁 𑀭𑀚𑀢𑀫𑀬𑀁 𑀇𑀦𑁆𑀤𑀔𑀻𑀮𑀁. 𑀓𑀸𑀴𑀫𑁂𑀖𑀭𑀸𑀚𑀻𑀢𑀺 𑀓𑀤𑀸𑀘𑀺 𑀤𑀺𑀲𑁆𑀲𑀫𑀸𑀦𑀸 𑀓𑀸𑀴𑀅𑀩𑁆𑀪𑀮𑁂𑀔𑀸. 𑀭𑀚𑀢𑀧𑀦𑀸𑀴𑀺𑀓𑀸𑀢𑀺 𑀭𑀚𑀢𑀫𑀬𑀢𑀼𑀫𑁆𑀩𑀁. 𑀲𑀼𑀯𑀝𑁆𑀝𑀺𑀢𑀸𑀢𑀺 𑀯𑀝𑁆𑀝𑀪𑀸𑀯𑀲𑁆𑀲 𑀬𑀼𑀢𑁆𑀢𑀝𑁆𑀞𑀸𑀦𑁂 𑀲𑀼𑀝𑁆𑀞𑀼 𑀯𑀝𑁆𑀝𑀼𑀮𑀸. 𑀓𑀸𑀴𑀯𑀗𑁆𑀕𑀢𑀺𑀮𑀓𑀸𑀤𑀻𑀦𑀫𑀪𑀸𑀯𑁂𑀦 𑀲𑀼𑀧𑀭𑀺𑀲𑀼𑀤𑁆𑀥𑀸.‘‘𑀅𑀭𑀸𑀚𑀓𑁂’’𑀢𑀺𑀆𑀤𑀺𑀦𑀸𑀧𑀺 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀪𑀸𑀯𑀫𑁂𑀯 𑀦𑀺𑀤𑀲𑁆𑀲𑁂𑀢𑀺.

𑀇𑀤𑀸𑀦𑀺 𑀅𑀧𑀭𑀫𑁆𑀧𑀺 𑀢𑀲𑁆𑀲 𑀦𑀸𑀫𑀮𑀸𑀪𑀳𑁂𑀢𑀼𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀬𑀁 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀘 ‘‘𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀫𑀳𑀸𑀲𑀭𑁂 𑀧𑀤𑀼𑀫𑀕𑀩𑁆𑀪𑁂 𑀦𑀺𑀩𑁆𑀩𑀢𑁆𑀢𑀻’’𑀢𑀺 𑀇𑀤𑀫𑁂𑀯𑀲𑁆𑀲 𑀦𑀸𑀫𑀮𑀸𑀪𑀳𑁂𑀢𑀼𑀤𑀲𑁆𑀲𑀦𑀁. 𑀲𑁂𑀲𑀁 𑀧𑀦 𑀢𑀧𑁆𑀧𑀲𑀗𑁆𑀕𑁂𑀦 𑀢𑀣𑀸𑀧𑀯𑀢𑁆𑀢𑀸𑀓𑀸𑀭𑀤𑀲𑁆𑀲𑀦𑀫𑁂𑀯. 𑀢𑁂𑀦𑀸𑀳 ‘‘𑀇𑀢𑀺 𑀦𑀁 𑀧𑁄𑀓𑁆𑀔𑀭𑁂 𑀲𑀬𑀺𑀢𑀢𑁆𑀢𑀸 𑀧𑁄𑀓𑁆𑀔𑀭𑀲𑀸𑀢𑀻𑀢𑀺 𑀲𑀜𑁆𑀚𑀸𑀦𑀦𑁆𑀢𑀻’’𑀢𑀺. 𑀧𑁄𑀓𑁆𑀔𑀭𑁂 𑀓𑀫𑀮𑁂 𑀲𑀬𑀢𑀻𑀢𑀺 𑀳𑀺 𑀧𑁄𑀓𑁆𑀔𑀭𑀲𑀸𑀢𑀻, 𑀲𑀸𑀢𑀁 𑀯𑀸 𑀯𑀼𑀘𑁆𑀘𑀢𑀺 𑀲𑀫𑀲𑀡𑁆𑀞𑀸𑀦𑀁, 𑀧𑁄𑀓𑁆𑀔𑀭𑁂 𑀚𑀸𑀢𑀁 𑀲𑀫𑀲𑀡𑁆𑀞𑀸𑀦𑀁 𑀢𑀣𑀸, 𑀢𑀫𑀲𑁆𑀲𑀢𑁆𑀣𑀻𑀢𑀺𑀧𑀺 𑀧𑁄𑀓𑁆𑀔𑀭𑀲𑀸𑀢𑀻. 𑀬𑀁 𑀧𑀦 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑀁 ‘‘𑀇𑀫𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀓𑀻𑀤𑀺𑀲𑁄 𑀧𑀼𑀩𑁆𑀩𑀬𑁄𑀕𑁄, 𑀬𑁂𑀦 𑀦𑀁 𑀪𑀕𑀯𑀸 𑀅𑀦𑀼𑀕𑁆𑀕𑀡𑁆𑀳𑀺𑀢𑀼𑀁 𑀢𑀁 𑀞𑀸𑀦𑀁 𑀉𑀧𑀕𑀢𑁄𑀢𑀺 𑀆𑀳𑀸’’𑀢𑀺, (𑀤𑀻. 𑀦𑀺. 𑀝𑀻. 𑁧.𑁨𑁫𑁫) 𑀢𑀤𑁂𑀢𑀁 ‘‘𑀅𑀬𑀁 𑀧𑀦𑀸’’𑀢𑀺𑀆𑀤𑀺𑀯𑀘𑀦𑀁 𑀏𑀓𑀤𑁂𑀲𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀲𑁄 𑀢𑀢𑁄 𑀫𑀦𑀼𑀲𑁆𑀲𑀮𑁄𑀓’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀻𑀢𑀺 𑀏𑀢𑁆𑀣 𑀅𑀧𑀭𑀸𑀧𑀭𑀁 𑀦𑀺𑀩𑁆𑀩𑀢𑁆𑀢𑀺 𑀏𑀯 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀣𑀸𑀭𑀽𑀧𑁂𑀦 𑀓𑀫𑁆𑀫𑁂𑀦 𑀦𑀺𑀩𑁆𑀩𑀢𑁆𑀢𑀺𑀫𑁂𑀯 𑀲𑀦𑁆𑀥𑀸𑀬 ‘‘𑀫𑀸𑀢𑀼𑀓𑀼𑀘𑁆𑀙𑀺𑀯𑀸𑀲𑀁 𑀚𑀺𑀕𑀼𑀘𑁆𑀙𑀺𑀢𑁆𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀧𑀤𑀼𑀫𑀕𑀩𑁆𑀪𑁂 𑀦𑀺𑀩𑁆𑀩𑀢𑁆𑀢𑀻’’𑀢𑀺 𑀇𑀫𑀺𑀦𑀸 𑀲𑀁𑀲𑁂𑀤𑀚𑁄𑀬𑁂𑀯 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀦 𑀧𑀼𑀧𑁆𑀨𑀢𑀻𑀢𑀺 𑀦 𑀯𑀺𑀓𑀲𑀢𑀺. 𑀢𑁂𑀦𑀸𑀢𑀺 𑀢𑀸𑀧𑀲𑁂𑀦. 𑀦𑀸𑀴𑀢𑁄𑀢𑀺 𑀧𑀼𑀧𑁆𑀨𑀤𑀡𑁆𑀟𑀢𑁄. 𑀲𑀼𑀯𑀡𑁆𑀡𑀘𑀼𑀡𑁆𑀡𑁂𑀳𑀺 𑀧𑀺𑀜𑁆𑀚𑀭𑀁 𑀳𑁂𑀫𑀯𑀡𑁆𑀡𑁄 𑀬𑀲𑁆𑀲𑀸𑀢𑀺 𑀲𑀼𑀯𑀡𑁆𑀡𑀘𑀼𑀡𑁆𑀡𑀧𑀺𑀜𑁆𑀚𑀭𑁄, 𑀢𑀁, 𑀲𑀼𑀯𑀡𑁆𑀡𑀘𑀼𑀡𑁆𑀡𑁂𑀳𑀺 𑀯𑀺𑀓𑀺𑀡𑁆𑀡𑀪𑀸𑀯𑁂𑀦 𑀳𑁂𑀫𑀯𑀡𑁆𑀡𑀦𑁆𑀢𑀺 𑀅𑀢𑁆𑀣𑁄. 𑀧𑀺𑀜𑁆𑀚𑀭𑀲𑀤𑁆𑀤𑁄 𑀳𑀺 𑀳𑁂𑀫𑀯𑀡𑁆𑀡𑀧𑀭𑀺𑀬𑀸𑀬𑁄𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁧.𑁨𑁨) 𑀯𑀼𑀢𑁆𑀢𑀁. 𑀏𑀲 𑀦𑀬𑁄 𑀧𑀤𑀼𑀫𑀭𑁂𑀡𑀼𑀧𑀺𑀜𑁆𑀚𑀭𑀦𑁆𑀢𑀺 𑀏𑀢𑁆𑀣𑀸𑀧𑀺. 𑀭𑀚𑀢𑀩𑀺𑀫𑁆𑀩𑀓𑀦𑁆𑀢𑀺 𑀭𑀽𑀧𑀺𑀬𑀫𑀬𑀭𑀽𑀧𑀓𑀁. 𑀧𑀝𑀺𑀚𑀕𑁆𑀕𑀸𑀫𑀻𑀢𑀺 𑀧𑁄𑀲𑁂𑀫𑀺. 𑀧𑀸𑀭𑀦𑁆𑀢𑀺 𑀧𑀭𑀺𑀬𑁄𑀲𑀸𑀦𑀁, 𑀦𑀺𑀧𑁆𑀨𑀢𑁆𑀢𑀺 𑀯𑀸 𑀯𑀼𑀘𑁆𑀘𑀢𑀺 𑀦𑀤𑀻𑀲𑀫𑀼𑀤𑁆𑀤𑀸𑀤𑀻𑀦𑀁 𑀧𑀭𑀺𑀬𑁄𑀲𑀸𑀦𑀪𑀽𑀢𑀁 𑀧𑀸𑀭𑀁 𑀯𑀺𑀬𑀸𑀢𑀺 𑀓𑀢𑁆𑀯𑀸. 𑀧𑀝𑀺𑀲𑀦𑁆𑀥𑀺𑀧𑀜𑁆𑀜𑀸𑀲𑀗𑁆𑀔𑀸𑀢𑁂𑀦 𑀲𑀪𑀸𑀯𑀜𑀸𑀡𑁂𑀦 𑀧𑀡𑁆𑀟𑀺𑀢𑁄. 𑀇𑀢𑀺 𑀓𑀢𑁆𑀢𑀩𑁆𑀩𑁂𑀲𑀼, 𑀯𑁂𑀤𑁂𑀲𑀼 𑀯𑀸 𑀯𑀺𑀲𑀸𑀭𑀤𑀧𑀜𑁆𑀜𑀸𑀲𑀗𑁆𑀔𑀸𑀢𑁂𑀦 𑀯𑁂𑀬𑁆𑀬𑀢𑁆𑀢𑀺𑀬𑁂𑀦 𑀩𑁆𑀬𑀢𑁆𑀢𑁄. 𑀅𑀕𑁆𑀕𑀩𑁆𑀭𑀸𑀳𑁆𑀫𑀡𑁄𑀢𑀺 𑀤𑀺𑀲𑀸𑀧𑀸𑀫𑁄𑀓𑁆𑀔𑀩𑁆𑀭𑀸𑀳𑁆𑀫𑀡𑁄. 𑀲𑀺𑀧𑁆𑀧𑀦𑁆𑀢𑀺 𑀯𑁂𑀤𑀲𑀺𑀧𑁆𑀧𑀁 𑀢𑀲𑁆𑀲𑁂𑀯 𑀧𑀓𑀭𑀡𑀸𑀥𑀺𑀕𑀢𑀢𑁆𑀢𑀸. 𑀩𑁆𑀭𑀳𑁆𑀫𑀤𑁂𑀬𑁆𑀬𑀁 𑀅𑀤𑀸𑀲𑀻𑀢𑀺 𑀯𑀓𑁆𑀔𑀫𑀸𑀦𑀦𑀬𑁂𑀦 𑀩𑁆𑀭𑀳𑁆𑀫𑀤𑁂𑀬𑁆𑀬𑀁 𑀓𑀢𑁆𑀯𑀸 𑀅𑀤𑀸𑀲𑀺.

‘‘𑀅𑀚𑁆𑀛𑀸𑀯𑀲𑀢𑀻’’𑀢𑀺 𑀏𑀢𑁆𑀣 𑀅𑀥𑀺-𑀲𑀤𑁆𑀤𑁄, 𑀆-𑀲𑀤𑁆𑀤𑁄 𑀘 𑀉𑀧𑀲𑀕𑁆𑀕𑀫𑀢𑁆𑀢𑀁, 𑀢𑀢𑁄 ‘‘𑀉𑀓𑁆𑀓𑀝𑁆𑀞’’𑀦𑁆𑀢𑀺 𑀇𑀤𑀁 𑀅𑀚𑁆𑀛𑀸𑀧𑀼𑀩𑁆𑀩𑀯𑀲𑀬𑁄𑀕𑁂 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁. 𑀅𑀥𑀺-𑀲𑀤𑁆𑀤𑁄 𑀯𑀸 𑀇𑀲𑁆𑀲𑀭𑀺𑀬𑀢𑁆𑀣𑁄, 𑀆-𑀲𑀤𑁆𑀤𑁄 𑀫𑀭𑀺𑀬𑀸𑀤𑀢𑁆𑀣𑁄 𑀢𑀢𑁄 ‘‘𑀉𑀓𑁆𑀓𑀝𑁆𑀞’’𑀦𑁆𑀢𑀺 𑀇𑀤𑀁 𑀓𑀫𑁆𑀫𑀧𑁆𑀧𑀯𑀘𑀦𑀻𑀬𑀬𑁄𑀕𑁂 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀉𑀓𑁆𑀓𑀝𑁆𑀞𑀦𑀸𑀫𑀓𑁂’’𑀢𑀺𑀆𑀤𑀺𑀦𑀸. 𑀢𑀤𑁂𑀯𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀢𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀢𑀲𑁆𑀲 𑀦𑀕𑀭𑀲𑁆𑀲 𑀲𑀸𑀫𑀺𑀓𑁄 𑀳𑀼𑀢𑁆𑀯𑀸’’𑀢𑀺 𑀳𑀺 ‘‘𑀅𑀪𑀺𑀪𑀯𑀺𑀢𑁆𑀯𑀸’’𑀢𑀺 𑀏𑀢𑀲𑁆𑀲𑀢𑁆𑀣𑀯𑀺𑀯𑀭𑀡𑀁, 𑀢𑁂𑀦𑁂𑀢𑀁 𑀤𑀻𑀧𑁂𑀢𑀺 ‘‘𑀲𑀸𑀫𑀺𑀪𑀸𑀯𑁄 𑀅𑀪𑀺𑀪𑀯𑀦’’𑀦𑁆𑀢𑀺. ‘‘𑀬𑀸𑀬 𑀫𑀭𑀺𑀬𑀸𑀤𑀸𑀬𑀸’’𑀢𑀺𑀆𑀤𑀺 𑀧𑀦 𑀆-𑀲𑀤𑁆𑀤𑀲𑁆𑀲𑀢𑁆𑀣𑀯𑀺𑀯𑀭𑀡𑀁, 𑀢𑁂𑀦𑁂𑀢𑀁 𑀤𑀻𑀧𑁂𑀢𑀺 ‘‘𑀆𑀲𑀤𑁆𑀤𑁄 𑀫𑀭𑀺𑀬𑀸𑀤𑀢𑁆𑀣𑁄, 𑀫𑀭𑀺𑀬𑀸𑀤𑀸 𑀘 𑀦𑀸𑀫 𑀬𑀸𑀬 𑀢𑀢𑁆𑀣 𑀯𑀲𑀺𑀢𑀩𑁆𑀩𑀁, 𑀲𑀸𑀬𑁂𑀯 𑀅𑀧𑀭𑀸𑀥𑀻𑀦𑀢𑀸’’𑀢𑀺. 𑀬𑀸𑀬 𑀫𑀭𑀺𑀬𑀸𑀤𑀸𑀬𑀸𑀢𑀺 𑀳𑀺 𑀬𑀸𑀬 𑀅𑀧𑀭𑀸𑀥𑀻𑀦𑀢𑀸𑀲𑀗𑁆𑀔𑀸𑀢𑀸𑀬 𑀅𑀦𑀜𑁆𑀜𑀲𑀸𑀥𑀸𑀭𑀡𑀸𑀬 𑀅𑀯𑀢𑁆𑀣𑀸𑀬𑀸𑀢𑀺 𑀅𑀢𑁆𑀣𑁄. ‘‘𑀉𑀧𑀲𑀕𑁆𑀕𑀯𑀲𑁂𑀦𑀸’’𑀢𑀺𑀆𑀤𑀺 𑀧𑀦 ‘‘𑀉𑀓𑁆𑀓𑀝𑁆𑀞𑀦𑀸𑀫𑀓𑁂’’𑀢𑀺 𑀏𑀢𑀲𑁆𑀲𑀢𑁆𑀣𑀯𑀺𑀯𑀭𑀡𑀁, 𑀢𑁂𑀦𑁂𑀢𑀁 𑀤𑀻𑀧𑁂𑀢𑀺 ‘‘𑀲𑀢𑀺𑀧𑀺 𑀪𑀼𑀫𑁆𑀫𑀯𑀘𑀦𑀧𑁆𑀧𑀲𑀗𑁆𑀕𑁂 𑀥𑀸𑀢𑁆𑀯𑀢𑁆𑀣𑀸𑀦𑀼𑀯𑀢𑁆𑀢𑀓𑀯𑀺𑀲𑁂𑀲𑀓𑀪𑀽𑀢𑁂𑀳𑀺 𑀤𑀼𑀯𑀺𑀥𑁂𑀳𑀺𑀧𑀺 𑀉𑀧𑀲𑀕𑁆𑀕𑁂𑀳𑀺 𑀬𑀼𑀢𑁆𑀢𑀢𑁆𑀢𑀸 𑀉𑀧𑀬𑁄𑀕𑀯𑀘𑀦𑀫𑁂𑀯𑁂𑀢𑁆𑀣 𑀯𑀺𑀳𑀺𑀢’’𑀦𑁆𑀢𑀺. ‘‘𑀢𑀲𑁆𑀲 𑀓𑀺𑀭𑀸’’𑀢𑀺𑀆𑀤𑀺 𑀧𑀦 𑀅𑀢𑁆𑀣𑀸𑀦𑀼𑀕𑀢𑀲𑀫𑀜𑁆𑀜𑀸𑀧𑀭𑀺𑀤𑀻𑀧𑀦𑀁. 𑀯𑀢𑁆𑀣𑀼 𑀦𑀸𑀫 𑀦𑀕𑀭𑀫𑀸𑀧𑀦𑀸𑀭𑀳𑀪𑀽𑀫𑀺𑀧𑁆𑀧𑀤𑁂𑀲𑁄 ‘‘𑀆𑀭𑀸𑀫𑀯𑀢𑁆𑀣𑀼, 𑀯𑀺𑀳𑀸𑀭𑀯𑀢𑁆𑀣𑀽’’𑀢𑀺𑀆𑀤𑀻𑀲𑀼 𑀯𑀺𑀬.

𑀉𑀓𑁆𑀓𑀸𑀢𑀺 𑀤𑀡𑁆𑀟𑀤𑀻𑀧𑀺𑀓𑀸. 𑀅𑀕𑁆𑀕𑀳𑁂𑀲𑀼𑀦𑁆𑀢𑀺 ‘‘𑀅𑀚𑁆𑀚 𑀫𑀗𑁆𑀕𑀮𑀤𑀺𑀯𑀲𑁄, 𑀢𑀲𑁆𑀫𑀸 𑀲𑀼𑀦𑀓𑁆𑀔𑀢𑁆𑀢𑀁, 𑀢𑀢𑁆𑀣𑀸𑀧𑀺 𑀅𑀬𑀁 𑀲𑀼𑀔𑀡𑁄 𑀫𑀸 𑀅𑀢𑀺𑀓𑁆𑀓𑀫𑀻’’𑀢𑀺 𑀭𑀢𑁆𑀢𑀺𑀯𑀺𑀪𑀸𑀬𑀦𑀁 𑀅𑀦𑀼𑀭𑀓𑁆𑀔𑀦𑁆𑀢𑀸, 𑀭𑀢𑁆𑀢𑀺𑀬𑀁 𑀆𑀮𑁄𑀓𑀓𑀭𑀡𑀢𑁆𑀣𑀸𑀬 𑀉𑀓𑁆𑀓𑀸 𑀞𑀧𑁂𑀢𑁆𑀯𑀸 𑀉𑀓𑁆𑀓𑀸𑀲𑀼 𑀚𑀮𑀫𑀸𑀦𑀸𑀲𑀼 𑀦𑀕𑀭𑀲𑁆𑀲 𑀯𑀢𑁆𑀣𑀼𑀁 𑀅𑀕𑁆𑀕𑀳𑁂𑀲𑀼𑀁, 𑀢𑁂𑀦𑁂𑀢𑀁 𑀤𑀻𑀧𑁂𑀢𑀺 𑁋 𑀉𑀓𑁆𑀓𑀸𑀲𑀼 𑀞𑀺𑀢𑀸𑀢𑀺 𑀉𑀓𑁆𑀓𑀝𑁆𑀞𑀸. 𑀫𑀽𑀮𑀯𑀺𑀪𑀼𑀚𑀸𑀤𑀺 𑀆𑀓𑀢𑀺𑀕𑀡𑀧𑀓𑁆𑀔𑁂𑀧𑁂𑀦, 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀯𑀸 𑀉𑀓𑁆𑀓𑀸𑀲𑀼 𑀯𑀺𑀚𑁆𑀚𑁄𑀢𑀬𑀦𑁆𑀢𑀻𑀲𑀼 𑀞𑀺𑀢𑀸𑀢𑀺 𑀉𑀓𑁆𑀓𑀝𑁆𑀞𑀸, 𑀢𑀣𑀸 𑀉𑀓𑁆𑀓𑀸𑀲𑀼 𑀞𑀺𑀢𑀸𑀲𑀼 𑀞𑀺𑀢𑀸 𑀆𑀲𑀻𑀢𑀺𑀧𑀺 𑀉𑀓𑁆𑀓𑀝𑁆𑀞𑀸𑀢𑀺. 𑀫𑀚𑁆𑀛𑀺𑀫𑀸𑀕𑀫𑀝𑁆𑀞𑀓𑀣𑀸𑀬𑀁 𑀧𑀦 𑀏𑀯𑀁 𑀯𑀼𑀢𑁆𑀢𑀁 ‘‘𑀢𑀜𑁆𑀘 𑀦𑀕𑀭𑀁 ‘𑀫𑀗𑁆𑀕𑀮𑀤𑀺𑀯𑀲𑁄 𑀲𑀼𑀔𑀡𑁄, 𑀲𑀼𑀦𑀓𑁆𑀔𑀢𑁆𑀢𑀁 𑀫𑀸 𑀅𑀢𑀺𑀓𑁆𑀓𑀫𑀻’𑀢𑀺 𑀭𑀢𑁆𑀢𑀺𑀫𑁆𑀧𑀺 𑀉𑀓𑁆𑀓𑀸𑀲𑀼 𑀞𑀺𑀢𑀸𑀲𑀼 𑀫𑀸𑀧𑀺𑀢𑀢𑁆𑀢𑀸 𑀉𑀓𑁆𑀓𑀝𑁆𑀞𑀸𑀢𑀺𑀧𑀺 𑀯𑀼𑀘𑁆𑀘𑀢𑀺, 𑀤𑀡𑁆𑀟𑀤𑀻𑀧𑀺𑀓𑀸𑀲𑀼 𑀚𑀸𑀮𑁂𑀢𑁆𑀯𑀸 𑀥𑀸𑀭𑀺𑀬𑀫𑀸𑀦𑀸𑀲𑀼 𑀫𑀸𑀧𑀺𑀢𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺, (𑀫. 𑀦𑀺. 𑀅𑀝𑁆𑀞. 𑁧.𑀫𑀽𑀮𑀧𑀭𑀺𑀬𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸) 𑀢𑀤𑀧𑀺𑀫𑀺𑀦𑀸 𑀲𑀁𑀲𑀦𑁆𑀤𑀢𑀺 𑀘𑁂𑀯 𑀲𑀫𑁂𑀢𑀺 𑀘 𑀦𑀕𑀭𑀯𑀢𑁆𑀣𑀼𑀧𑀭𑀺𑀕𑁆𑀕𑀳𑀲𑁆𑀲𑀧𑀺 𑀦𑀕𑀭𑀫𑀸𑀧𑀦𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀧𑀭𑁂 𑀧𑀦 𑀪𑀡𑀦𑁆𑀢𑀺 ‘‘𑀪𑀽𑀫𑀺𑀪𑀸𑀕𑀲𑀫𑁆𑀧𑀢𑁆𑀢𑀺𑀬𑀸, 𑀉𑀧𑀓𑀭𑀡𑀲𑀫𑁆𑀧𑀢𑁆𑀢𑀺𑀬𑀸, 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀬𑀸 𑀘 𑀢𑀁 𑀦𑀕𑀭𑀁 𑀉𑀓𑁆𑀓𑀝𑁆𑀞𑀕𑀼𑀡𑀬𑁄𑀕𑀢𑁄 𑀉𑀓𑁆𑀓𑀝𑁆𑀞𑀸𑀢𑀺 𑀦𑀸𑀫𑀁 𑀮𑀪𑀢𑀻’’𑀢𑀺. 𑀮𑁄𑀓𑀺𑀬𑀸 𑀧𑀦 𑀯𑀤𑀦𑁆𑀢𑀺 ‘‘𑀉𑀓𑁆𑀓𑀸 𑀥𑀸𑀭𑀻𑀬𑀢𑀺 𑀏𑀢𑀲𑁆𑀲 𑀫𑀸𑀧𑀺𑀢𑀓𑀸𑀮𑁂𑀢𑀺 𑀉𑀓𑁆𑀓𑀝𑁆𑀞𑀸, 𑀯𑀡𑁆𑀡𑀯𑀺𑀓𑀸𑀭𑁄𑀬’’𑀦𑁆𑀢𑀺, 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀘𑀸𑀬𑀁 𑀲𑀫𑀜𑁆𑀜𑀸, 𑀢𑁂𑀦𑁂𑀯𑀺𑀥 𑀧𑀬𑁄𑀕𑁄 𑀤𑀺𑀲𑁆𑀲𑀢𑀺 ‘‘𑀬𑀣𑀸 𑀘 𑀪𑀯𑀁 𑀕𑁄𑀢𑀫𑁄 𑀉𑀓𑁆𑀓𑀝𑁆𑀞𑀸𑀬 𑀅𑀜𑁆𑀜𑀸𑀦𑀺 𑀉𑀧𑀸𑀲𑀓𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀢𑀻’’𑀢𑀺 (𑀤𑀻. 𑀦𑀺. 𑁧.𑁨𑁯𑁯) 𑀫𑀽𑀮𑀧𑀭𑀺𑀬𑀸𑀬𑀲𑀼𑀢𑁆𑀢𑀸𑀤𑀻𑀲𑀼 (𑀫. 𑀦𑀺. 𑁧.𑁧) 𑀘 ‘‘𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀉𑀓𑁆𑀓𑀝𑁆𑀞𑀸𑀬𑀁 𑀯𑀺𑀳𑀭𑀢𑀺 𑀲𑀼𑀪𑀕𑀯𑀦𑁂 𑀲𑀸𑀮𑀭𑀸𑀚𑀫𑀽𑀮𑁂’’𑀢𑀺𑀆𑀤𑀺. 𑀏𑀯𑀫𑁂𑀢𑁆𑀣 𑀳𑁄𑀢𑀼 𑀉𑀧𑀲𑀕𑁆𑀕𑀯𑀲𑁂𑀦 𑀉𑀧𑀬𑁄𑀕𑀯𑀘𑀦𑀁, 𑀓𑀣𑀁 𑀧𑀦𑁂𑀢𑀁 𑀲𑁂𑀲𑀧𑀤𑁂𑀲𑀼 𑀲𑀺𑀬𑀸𑀢𑀺 𑀅𑀦𑀼𑀬𑁄𑀕𑁂𑀦𑀸𑀳 ‘‘𑀢𑀲𑁆𑀲 𑀅𑀦𑀼𑀧𑀬𑁄𑀕𑀢𑁆𑀢𑀸 𑀲𑁂𑀲𑀧𑀤𑁂𑀲𑀽’’𑀢𑀺. 𑀢𑀢𑁆𑀣 𑀢𑀲𑁆𑀲𑀸𑀢𑀺 𑀉𑀧𑀲𑀕𑁆𑀕𑀯𑀲𑁂𑀦 𑀉𑀧𑀬𑁄𑀕𑀲𑀜𑁆𑀜𑀼𑀢𑁆𑀢𑀲𑁆𑀲 ‘‘𑀉𑀓𑁆𑀓𑀝𑁆𑀞’’𑀦𑁆𑀢𑀺 𑀧𑀤𑀲𑁆𑀲. 𑀅𑀦𑀼𑀧𑀬𑁄𑀕𑀢𑁆𑀢𑀸𑀢𑀺 𑀯𑀺𑀲𑁂𑀲𑀦𑀪𑀸𑀯𑁂𑀦 𑀅𑀦𑀼𑀧𑀬𑀼𑀢𑁆𑀢𑀢𑁆𑀢𑀸. 𑀲𑁂𑀲𑀧𑀤𑁂𑀲𑀽𑀢𑀺 ‘‘𑀲𑀢𑁆𑀢𑀼𑀲𑁆𑀲𑀤’’𑀦𑁆𑀢𑀺𑀆𑀤𑀻𑀲𑀼 𑀲𑀢𑁆𑀢𑀲𑀼 𑀧𑀤𑁂𑀲𑀼.

𑀓𑀺𑀁 𑀦𑀼 𑀔𑁆𑀯𑀸𑀬𑀁 𑀲𑀤𑁆𑀤𑀧𑀬𑁄𑀕𑁄 𑀲𑀤𑁆𑀤𑀮𑀓𑁆𑀔𑀡𑀸𑀦𑀼𑀕𑀢𑁄𑀢𑀺 𑀘𑁄𑀤𑀦𑀫𑀧𑀦𑁂𑀢𑀺 ‘‘𑀢𑀢𑁆𑀣…𑀧𑁂… 𑀧𑀭𑀺𑀬𑁂𑀲𑀺𑀢𑀩𑁆𑀩’’𑀦𑁆𑀢𑀺 𑀇𑀫𑀺𑀦𑀸. 𑀢𑀢𑁆𑀣𑀸𑀢𑀺 𑀉𑀧𑀲𑀕𑁆𑀕𑀯𑀲𑁂𑀦, 𑀅𑀦𑀼𑀧𑀬𑁄𑀕𑀯𑀲𑁂𑀦 𑀘 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀯𑀼𑀢𑁆𑀢𑁂 𑀤𑀼𑀩𑁆𑀩𑀺𑀥𑁂𑀧𑀺 𑀯𑀺𑀥𑀸𑀦𑁂. 𑀮𑀓𑁆𑀔𑀡𑀦𑁆𑀢𑀺 𑀕𑀳𑀡𑀽𑀧𑀸𑀬𑀜𑀸𑀬𑀪𑀽𑀢𑀁 𑀲𑀤𑁆𑀤𑀮𑀓𑁆𑀔𑀡𑀁, 𑀲𑀼𑀢𑁆𑀢𑀁 𑀯𑀸. 𑀧𑀭𑀺𑀬𑁂𑀲𑀺𑀢𑀩𑁆𑀩𑀦𑁆𑀢𑀺 𑀲𑀤𑁆𑀤𑀲𑀢𑁆𑀣𑁂𑀲𑀼 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀜𑀸𑀡𑁂𑀦 𑀕𑀯𑁂𑀲𑀺𑀢𑀩𑁆𑀩𑀁, 𑀕𑀳𑁂𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁂𑀦 𑀳𑀺 𑀲𑀤𑁆𑀤𑀮𑀓𑁆𑀔𑀡𑀸𑀦𑀼𑀕𑀢𑁄𑀯𑀸𑀬𑀁 𑀲𑀤𑁆𑀤𑀧𑀬𑁄𑀕𑁄𑀢𑀺 𑀤𑀲𑁆𑀲𑁂𑀢𑀺, 𑀲𑀤𑁆𑀤𑀯𑀺𑀤𑀽 𑀘 𑀇𑀘𑁆𑀙𑀦𑁆𑀢𑀺 ‘‘𑀉𑀧𑀅𑀦𑀼𑀅𑀥𑀺𑀆𑀇𑀘𑁆𑀘𑀸𑀤𑀺𑀧𑀼𑀩𑁆𑀩𑀯𑀲𑀬𑁄𑀕𑁂 𑀲𑀢𑁆𑀢𑀫𑀺𑀬𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁 𑀧𑀸𑀧𑀼𑀡𑀸𑀢𑀺, 𑀯𑀺𑀲𑁂𑀲𑀺𑀢𑀩𑁆𑀩𑀧𑀤𑁂 𑀘 𑀬𑀣𑀸𑀯𑀺𑀥𑀺𑀫𑀦𑀼𑀧𑀬𑁄𑀕𑁄 𑀯𑀺𑀲𑁂𑀲𑀦𑀧𑀤𑀸𑀦𑀁 𑀲𑀫𑀸𑀦𑀸𑀥𑀺𑀓𑀭𑀡𑀪𑀽𑀢𑀸𑀦’’𑀦𑁆𑀢𑀺. 𑀢𑀢𑁆𑀭 𑀬𑀤𑀸 𑀅𑀥𑀺-𑀲𑀤𑁆𑀤𑁄, 𑀆-𑀲𑀤𑁆𑀤𑁄 𑀘 𑀉𑀧𑀲𑀕𑁆𑀕𑀫𑀢𑁆𑀢𑀁, 𑀢𑀤𑀸 ‘‘𑀢𑀢𑀺𑀬𑀸𑀲𑀢𑁆𑀢𑀫𑀻𑀦𑀜𑁆𑀘𑀸’’𑀢𑀺 𑀮𑀓𑁆𑀔𑀡𑁂𑀦 𑀅𑀚𑁆𑀛𑀸𑀧𑀼𑀩𑁆𑀩𑀯𑀲𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁. 𑀢𑀣𑀸 𑀳𑀺 𑀯𑀤𑀦𑁆𑀢𑀺 ‘‘𑀲𑀢𑁆𑀢𑀫𑀺𑀬𑀢𑁆𑀣𑁂 𑀓𑀸𑀮𑀤𑀺𑀲𑀸𑀲𑀼 𑀉𑀧𑀸𑀦𑁆𑀯𑀚𑁆𑀛𑀸𑀯𑀲𑀬𑁄𑀕𑁂, 𑀅𑀥𑀺𑀧𑀼𑀩𑁆𑀩𑀲𑀺𑀞𑀸𑀯𑀲𑀸𑀦𑀁 𑀧𑀬𑁄𑀕𑁂, 𑀢𑀧𑁆𑀧𑀸𑀦𑀘𑀸𑀭𑁂𑀲𑀼 𑀘 𑀤𑀼𑀢𑀺𑀬𑀸. 𑀓𑀸𑀮𑁂 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸, 𑀏𑀓𑀁 𑀲𑀫𑀬𑀁 𑀪𑀕𑀯𑀸, 𑀓𑀜𑁆𑀘𑀺 𑀓𑀸𑀮𑀁 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀇𑀫𑀁 𑀭𑀢𑁆𑀢𑀺𑀁 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄. 𑀤𑀺𑀲𑀸𑀬𑀁 𑀧𑀼𑀭𑀺𑀫𑀁 𑀤𑀺𑀲𑀁 𑀥𑀢𑀭𑀝𑁆𑀞𑁄. 𑀉𑀧𑀸𑀤𑀺𑀧𑀼𑀩𑁆𑀩𑀯𑀲𑀬𑁄𑀕𑁂 𑀕𑀸𑀫𑀁 𑀉𑀧𑀯𑀲𑀢𑀺, 𑀕𑀸𑀫𑀁 𑀅𑀦𑀼𑀯𑀲𑀢𑀺, 𑀕𑀸𑀫𑀁 𑀆𑀯𑀲𑀢𑀺, 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺, 𑀅𑀥𑀺𑀧𑀼𑀩𑁆𑀩𑀲𑀺𑀞𑀸𑀯𑀲𑀸𑀦𑀁 𑀧𑀬𑁄𑀕𑁂 𑀧𑀣𑀯𑀺𑀁 𑀅𑀥𑀺𑀲𑁂𑀲𑁆𑀲𑀢𑀺, 𑀕𑀸𑀫𑀁 𑀅𑀥𑀺𑀢𑀺𑀝𑁆𑀞𑀢𑀺, 𑀕𑀸𑀫𑀁 𑀅𑀚𑁆𑀛𑀸𑀯𑀲𑀢𑀺. 𑀢𑀧𑁆𑀧𑀸𑀦𑀘𑀸𑀭𑁂𑀲𑀼 𑀦𑀤𑀺𑀁 𑀧𑀺𑀯𑀢𑀺, 𑀕𑀸𑀫𑀁 𑀘𑀭𑀢𑀺 𑀇𑀘𑁆𑀘𑀸𑀤𑀻𑀢𑀺.

𑀬𑀤𑀸 𑀧𑀦 𑀅𑀥𑀺-𑀲𑀤𑁆𑀤𑁄 𑀇𑀲𑁆𑀲𑀭𑀺𑀬𑀢𑁆𑀣𑁄, 𑀆-𑀲𑀤𑁆𑀤𑁄 𑀘 𑀫𑀭𑀺𑀬𑀸𑀤𑀢𑁆𑀣𑁄, 𑀢𑀤𑀸 ‘‘𑀓𑀫𑁆𑀫𑀧𑁆𑀧𑀯𑀘𑀦𑀻𑀬𑀬𑀼𑀢𑁆𑀢𑁂’’𑀢𑀺 𑀮𑀓𑁆𑀔𑀡𑁂𑀦 𑀓𑀫𑁆𑀫𑀧𑁆𑀧𑀯𑀘𑀦𑀻𑀬𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁. 𑀢𑀣𑀸 𑀳𑀺 𑀯𑀤𑀦𑁆𑀢𑀺 ‘‘𑀅𑀦𑀼𑀆𑀤𑀬𑁄 𑀉𑀧𑀲𑀕𑁆𑀕𑀸, 𑀥𑀻𑀆𑀤𑀬𑁄 𑀦𑀺𑀧𑀸𑀢𑀸 𑀘 𑀓𑀫𑁆𑀫𑀧𑁆𑀧𑀯𑀘𑀦𑀻𑀬𑀲𑀜𑁆𑀜𑀸 𑀳𑁄𑀦𑁆𑀢𑀺 𑀓𑀺𑀭𑀺𑀬𑀸𑀲𑀗𑁆𑀔𑀸𑀢𑀁 𑀓𑀫𑁆𑀫𑀁 𑀧𑀯𑀘𑀦𑀻𑀬𑀁 𑀬𑁂𑀲𑀁 𑀢𑁂 𑀓𑀫𑁆𑀫𑀧𑁆𑀧𑀯𑀘𑀦𑀻𑀬𑀸’’𑀢𑀺. 𑀲𑁂𑀲𑀧𑀤𑀸𑀦𑀁 𑀧𑀦 𑀬𑀣𑀸𑀯𑀺𑀥𑀺𑀫𑀦𑀼𑀧𑀬𑁄𑀕𑁂 𑀓𑀢𑀭𑁂𑀦 𑀮𑀓𑁆𑀔𑀡𑁂𑀦 𑀉𑀧𑀬𑁄𑀕𑀯𑀘𑀦𑀦𑁆𑀢𑀺? 𑀬𑀣𑀸𑀯𑀼𑀢𑁆𑀢𑀮𑀓𑁆𑀔𑀡𑁂𑀦𑁂𑀯. 𑀬𑀚𑁆𑀚𑁂𑀯𑀁 𑀢𑁂𑀲𑀫𑁆𑀧𑀺 𑀆𑀥𑀸𑀭𑀪𑀸𑀯𑀢𑁄 𑀦𑀸𑀦𑀸𑀥𑀸𑀭𑀢𑀸 𑀲𑀺𑀬𑀸𑀢𑀺? 𑀦, 𑀩𑀳𑀽𑀦𑀫𑁆𑀧𑀺 𑀧𑀤𑀸𑀦𑀁 𑀦𑀕𑀭𑀯𑀲𑁂𑀦 𑀏𑀓𑀢𑁆𑀣𑀪𑀸𑀯𑀢𑁄. 𑀲𑀓𑀢𑁆𑀣𑀫𑀢𑁆𑀢𑀜𑁆𑀳𑀺 𑀢𑁂𑀲𑀁 𑀦𑀸𑀦𑀸𑀓𑀭𑀡𑀦𑁆𑀢𑀺. 𑀅𑀜𑁆𑀜𑁂 𑀧𑀦 𑀲𑀤𑁆𑀤𑀯𑀺𑀤𑀽 𑀏𑀯𑀫𑀺𑀘𑁆𑀙𑀦𑁆𑀢𑀺 ‘‘𑀲𑀫𑀸𑀦𑀸𑀥𑀺𑀓𑀭𑀡𑀧𑀤𑀸𑀦𑀁 𑀧𑀘𑁆𑀘𑁂𑀓𑀁 𑀓𑀺𑀭𑀺𑀬𑀸𑀲𑀫𑁆𑀩𑀦𑁆𑀥𑀦𑁂𑀦 𑀯𑀺𑀲𑁂𑀲𑀺𑀢𑀩𑁆𑀩𑀧𑀤𑁂𑀦 𑀲𑀫𑀸𑀦𑀯𑀘𑀦𑀢𑀸 𑀬𑀣𑀸 ‘𑀓𑀝𑀁 𑀓𑀭𑁄𑀢𑀺, 𑀯𑀺𑀧𑀼𑀮𑀁, 𑀤𑀲𑁆𑀲𑀦𑀻𑀬’𑀦𑁆𑀢𑀺 𑀏𑀢𑁆𑀣 ‘𑀓𑀝𑀁 𑀓𑀭𑁄𑀢𑀺, 𑀯𑀺𑀧𑀼𑀮𑀁 𑀓𑀭𑁄𑀢𑀺, 𑀤𑀲𑁆𑀲𑀦𑀻𑀬𑀁 𑀓𑀭𑁄𑀢𑀻’𑀢𑀺 𑀧𑀘𑁆𑀘𑁂𑀓𑀁 𑀓𑀺𑀭𑀺𑀬𑀸𑀲𑀫𑁆𑀩𑀦𑁆𑀥𑀦𑁂𑀦 𑀓𑀫𑁆𑀫𑀢𑁆𑀣𑁂𑀬𑁂𑀯 𑀤𑀼𑀢𑀺𑀬𑀸’’𑀢𑀺, 𑀢𑀤𑁂𑀢𑀁 𑀯𑀺𑀘𑀸𑀭𑁂𑀢𑀩𑁆𑀩𑀁 𑀯𑀺𑀲𑁂𑀲𑀦𑀧𑀤𑀸𑀦𑀁 𑀲𑀫𑀸𑀦𑀸𑀥𑀺𑀓𑀭𑀡𑀸𑀦𑀁 𑀓𑀺𑀭𑀺𑀬𑀸𑀲𑀫𑁆𑀩𑀚𑁆𑀛𑀦𑀸𑀪𑀸𑀯𑀢𑁄. 𑀬𑀤𑀸 𑀳𑀺 𑀓𑀺𑀭𑀺𑀬𑀸𑀲𑀫𑁆𑀩𑀚𑁆𑀛𑀦𑀁, 𑀢𑀤𑀸 𑀯𑀺𑀲𑁂𑀲𑀦𑀫𑁂𑀯 𑀦 𑀳𑁄𑀢𑀻𑀢𑀺.

𑀉𑀲𑁆𑀲𑀤𑀢𑀸 𑀦𑀸𑀫𑁂𑀢𑁆𑀣 𑀩𑀳𑀼𑀮𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀩𑀳𑀼𑀚𑀦’’𑀦𑁆𑀢𑀺. 𑀢𑀁 𑀧𑀦 𑀩𑀳𑀼𑀮𑀢𑀁 𑀤𑀲𑁆𑀲𑁂𑀢𑀺 ‘‘𑀆𑀓𑀺𑀡𑁆𑀡𑀫𑀦𑀼𑀲𑁆𑀲’’𑀦𑁆𑀢𑀺𑀆𑀤𑀺𑀦𑀸. 𑀅𑀭𑀜𑁆𑀜𑀸𑀤𑀻𑀲𑀼 𑀕𑀳𑁂𑀢𑁆𑀯𑀸 𑀧𑁄𑀲𑁂𑀢𑀩𑁆𑀩𑀸 𑀧𑁄𑀲𑀸𑀯𑀦𑀺𑀬𑀸, 𑀏𑀢𑁂𑀦 𑀢𑁂𑀲𑀁 𑀥𑀫𑁆𑀫𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀆𑀯𑀺𑀚𑁆𑀛𑀺𑀢𑁆𑀯𑀸𑀢𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸. 𑀔𑀡𑀺𑀢𑁆𑀯𑀸 𑀓𑀢𑀸 𑀧𑁄𑀓𑁆𑀔𑀭𑀡𑀻, 𑀆𑀩𑀦𑁆𑀥𑀺𑀢𑁆𑀯𑀸 𑀓𑀢𑀁 𑀢𑀴𑀸𑀓𑀁. 𑀅𑀘𑁆𑀙𑀺𑀦𑁆𑀦𑀽𑀤𑀓𑀝𑁆𑀞𑀸𑀦𑁂𑀬𑁂𑀯 𑀚𑀮𑀚𑀓𑀼𑀲𑀼𑀫𑀸𑀦𑀺 𑀚𑀸𑀢𑀸𑀦𑀻𑀢𑀺 𑀯𑀼𑀢𑁆𑀢𑀁 ‘‘𑀉𑀤𑀓𑀲𑁆𑀲 𑀦𑀺𑀘𑁆𑀘𑀪𑀭𑀺𑀢𑀸𑀦𑁂𑀯𑀸’’𑀢𑀺. 𑀉𑀤𑀓𑀲𑁆𑀲𑀸𑀢𑀺 𑀘 𑀧𑀽𑀭𑀡𑀓𑀺𑀭𑀺𑀬𑀸𑀬𑁄𑀕𑁂 𑀓𑀭𑀡𑀢𑁆𑀣𑁂 𑀲𑀸𑀫𑀺𑀯𑀘𑀦𑀁 ‘‘𑀫𑀳𑀦𑁆𑀢𑁂 𑀫𑀳𑀦𑁆𑀢𑁂 𑀲𑀸𑀡𑀺𑀧𑀲𑀺𑀩𑁆𑀩𑀓𑁂 𑀓𑀸𑀭𑀸𑀧𑁂𑀢𑁆𑀯𑀸 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀲𑁆𑀲 𑀧𑀽𑀭𑀸𑀧𑁂𑀢𑁆𑀯𑀸’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁩𑁪) 𑀯𑀺𑀬. 𑀲𑀳 𑀥𑀜𑁆𑀜𑁂𑀦𑀸𑀢𑀺 𑀲𑀥𑀜𑁆𑀜𑀦𑁆𑀢𑀺 𑀦𑀕𑀭𑀲𑀤𑁆𑀤𑀸𑀧𑁂𑀓𑁆𑀔𑀸𑀬 𑀦𑀧𑀼𑀁𑀲𑀓𑀮𑀺𑀗𑁆𑀕𑁂𑀦 𑀯𑀼𑀢𑁆𑀢𑀁, 𑀬𑀣𑀸𑀯𑀸𑀓𑁆𑀬𑀁 𑀯𑀸 𑀉𑀧𑀬𑁄𑀕𑀯𑀘𑀦𑁂𑀦. 𑀏𑀯𑀁 𑀲𑀩𑁆𑀩𑀢𑁆𑀣. 𑀧𑀼𑀩𑁆𑀩𑀡𑁆𑀡𑀸𑀧𑀭𑀡𑁆𑀡𑀸𑀤𑀺𑀪𑁂𑀤𑀁 𑀩𑀳𑀼𑀥𑀜𑁆𑀜𑀲𑀦𑁆𑀦𑀺𑀘𑀬𑀦𑁆𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 𑀢𑀤𑀼𑀪𑀬𑀯𑀺𑀦𑀺𑀫𑀼𑀢𑁆𑀢𑀁 𑀅𑀮𑀸𑀩𑀼𑀓𑀼𑀫𑁆𑀪𑀡𑁆𑀟𑀸𑀤𑀺𑀲𑀽𑀧𑁂𑀬𑁆𑀬𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑁂𑀦𑀸𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺 𑁋 𑀦𑀬𑀺𑀥 𑀥𑀜𑁆𑀜𑀲𑀤𑁆𑀤𑁄 𑀲𑀸𑀮𑀺𑀆𑀤𑀺𑀥𑀜𑁆𑀜𑀯𑀺𑀲𑁂𑀲𑀯𑀸𑀘𑀓𑁄, 𑀧𑁄𑀲𑀦𑁂 𑀲𑀸𑀥𑀼𑀢𑁆𑀢𑀫𑀢𑁆𑀢𑁂𑀦 𑀧𑀦 𑀦𑀺𑀭𑀯𑀲𑁂𑀲𑀧𑀼𑀩𑁆𑀩𑀡𑁆𑀡𑀸𑀧𑀭𑀡𑁆𑀡𑀲𑀽𑀧𑁂𑀬𑁆𑀬𑀯𑀸𑀘𑀓𑁄, 𑀯𑀺𑀭𑀽𑀧𑁂𑀓𑀲𑁂𑀲𑀯𑀲𑁂𑀦 𑀯𑀸 𑀧𑀬𑀼𑀢𑁆𑀢𑁄𑀢𑀺. 𑀏𑀢𑁆𑀢𑀸𑀯𑀢𑀸𑀢𑀺 𑀬𑀣𑀸𑀯𑀼𑀢𑁆𑀢𑀧𑀤𑀢𑁆𑀢𑀬𑁂𑀦. 𑀭𑀸𑀚𑀮𑀻𑀮𑀸𑀬𑀸𑀢𑀺 𑀭𑀸𑀚𑀽𑀦𑀁 𑀯𑀺𑀮𑀸𑀲𑁂𑀦. 𑀲𑀫𑀺𑀤𑁆𑀥𑀺𑀬𑀸 𑀉𑀧𑀪𑁄𑀕𑀧𑀭𑀺𑀪𑁄𑀕𑀲𑀫𑁆𑀧𑀼𑀡𑁆𑀡𑀪𑀸𑀯𑁂𑀦 𑀲𑀫𑁆𑀧𑀢𑁆𑀢𑀺 𑀲𑀫𑀺𑀤𑁆𑀥𑀺𑀲𑀫𑁆𑀧𑀢𑁆𑀢𑀺.

‘‘𑀭𑀸𑀚𑀪𑁄𑀕𑁆𑀕’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀓𑁂𑀦 𑀤𑀺𑀦𑁆𑀦’’𑀦𑁆𑀢𑀺 𑀅𑀯𑀲𑁆𑀲𑀁 𑀧𑀼𑀘𑁆𑀙𑀺𑀢𑀩𑁆𑀩𑀢𑁄 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀓𑁂𑀦𑀸’’𑀢𑀺𑀆𑀤𑀺𑀦𑀸. 𑀭𑀜𑁆𑀜𑀸 𑀯𑀺𑀬 𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀯𑀸 𑀭𑀸𑀚𑀪𑁄𑀕𑁆𑀕𑀦𑁆𑀢𑀺 𑀅𑀝𑁆𑀞𑀓𑀣𑀸𑀢𑁄 𑀅𑀧𑀭𑁄 𑀦𑀬𑁄. 𑀬𑀸𑀯 𑀧𑀼𑀢𑁆𑀢𑀦𑀢𑁆𑀢𑀧𑀦𑀢𑁆𑀢𑀧𑀭𑀫𑁆𑀧𑀭𑀸 𑀓𑀼𑀮𑀲𑀦𑁆𑀢𑀓𑀪𑀸𑀯𑁂𑀦 𑀭𑀸𑀚𑀢𑁄 𑀮𑀤𑁆𑀥𑀢𑁆𑀢𑀸 ‘‘𑀭𑀜𑁆𑀜𑁄 𑀤𑀸𑀬𑀪𑀽𑀢’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀥𑀫𑁆𑀫𑀤𑀸𑀬𑀸𑀤𑀸 𑀫𑁂 𑀪𑀺𑀓𑁆𑀔𑀯𑁂 𑀪𑀯𑀣𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁯) 𑀯𑀺𑀬 𑀘 𑀤𑀸𑀬𑀲𑀤𑁆𑀤𑁄 𑀤𑀸𑀬𑀚𑁆𑀚𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀤𑀸𑀬𑀚𑁆𑀚𑀦𑁆𑀢𑀺 𑀅𑀢𑁆𑀣𑁄’’𑀢𑀺. 𑀓𑀣𑀁 𑀤𑀺𑀦𑁆𑀦𑀢𑁆𑀢𑀸 𑀩𑁆𑀭𑀳𑁆𑀫𑀤𑁂𑀬𑁆𑀬𑀁 𑀦𑀸𑀫𑀸𑀢𑀺 𑀘𑁄𑀤𑀦𑀁 𑀧𑀭𑀺𑀳𑀭𑀢𑀺 ‘‘𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑁆𑀯𑀸’’𑀢𑀺𑀆𑀤𑀺𑀦𑀸. 𑀭𑀸𑀚𑀦𑀻𑀳𑀸𑀭𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑁄 𑀳𑀺 𑀉𑀤𑁆𑀥𑀁 𑀧𑀭𑀺𑀪𑁄𑀕𑀮𑀸𑀪𑀲𑁆𑀲 𑀩𑁆𑀭𑀳𑁆𑀫𑀤𑁂𑀬𑁆𑀬𑀢𑀸 𑀦𑀸𑀫 𑀦𑀢𑁆𑀣𑀺, 𑀇𑀤𑀜𑁆𑀘 𑀢𑀣𑀸 𑀤𑀺𑀦𑁆𑀦𑀫𑁂𑀯, 𑀢𑀲𑁆𑀫𑀸 𑀩𑁆𑀭𑀳𑁆𑀫𑀤𑁂𑀬𑁆𑀬𑀁 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀙𑁂𑀚𑁆𑀚𑀪𑁂𑀚𑁆𑀚𑀦𑁆𑀢𑀺 𑀲𑀭𑀻𑀭𑀤𑀡𑁆𑀟𑀥𑀦𑀤𑀡𑁆𑀟𑀸𑀤𑀺𑀪𑁂𑀤𑀁 𑀤𑀡𑁆𑀟𑀫𑀸𑀳. 𑀦𑀤𑀻𑀢𑀺𑀢𑁆𑀣𑀧𑀩𑁆𑀩𑀢𑀸𑀤𑀻𑀲𑀽𑀢𑀺 𑀦𑀤𑀻𑀢𑀺𑀢𑁆𑀣𑀧𑀩𑁆𑀩𑀢𑀧𑀸𑀤𑀕𑀸𑀫𑀤𑁆𑀯𑀸𑀭𑀅𑀝𑀯𑀺𑀫𑀼𑀔𑀸𑀤𑀻𑀲𑀼. 𑀲𑁂𑀢𑀘𑁆𑀙𑀢𑁆𑀢𑀕𑁆𑀕𑀳𑀡𑁂𑀦 𑀲𑁂𑀲𑀭𑀸𑀚𑀓𑀓𑀼𑀥𑀪𑀡𑁆𑀟𑀫𑁆𑀧𑀺 𑀕𑀳𑀺𑀢𑀁 𑀢𑀧𑁆𑀧𑀫𑀼𑀔𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀭𑀜𑁆𑀜𑀸 𑀪𑀼𑀜𑁆𑀚𑀺𑀢𑀩𑁆𑀩’’𑀦𑁆𑀢𑁆𑀯𑁂𑀯 𑀯𑀼𑀢𑁆𑀢𑁂 𑀇𑀥𑀸𑀥𑀺𑀧𑁆𑀧𑁂𑀢𑀢𑁆𑀣𑁄 𑀦 𑀧𑀸𑀓𑀝𑁄𑀢𑀺 𑀳𑀼𑀢𑁆𑀯𑀸-𑀲𑀤𑁆𑀤𑀕𑁆𑀕𑀳𑀡𑀁 𑀓𑀢𑀁. 𑀢𑀜𑁆𑀳𑀺 𑀲𑁄 𑀭𑀸𑀚𑀓𑀼𑀮𑀢𑁄 𑀅𑀲𑀫𑀼𑀤𑀸𑀕𑀢𑁄𑀧𑀺 𑀭𑀸𑀚𑀸 𑀳𑀼𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀁 𑀮𑀪𑀢𑀻𑀢𑀺 𑀅𑀬𑀫𑀺𑀥𑀸𑀥𑀺𑀧𑁆𑀧𑁂𑀢𑁄 𑀅𑀢𑁆𑀣𑁄. 𑀤𑀸𑀢𑀩𑁆𑀩𑀦𑁆𑀢𑀺 𑀤𑀸𑀬𑀁, ‘‘𑀭𑀸𑀚𑀤𑀸𑀬’’𑀦𑁆𑀢𑀺 𑀇𑀫𑀺𑀦𑀸𑀯 𑀭𑀜𑁆𑀜𑀸 𑀤𑀺𑀦𑁆𑀦𑀪𑀸𑀯𑁂 𑀲𑀺𑀤𑁆𑀥𑁂 ‘‘𑀭𑀜𑁆𑀜𑀸 𑀧𑀲𑁂𑀦𑀤𑀺𑀦𑀸 𑀓𑁄𑀲𑀮𑁂𑀦 𑀤𑀺𑀦𑁆𑀦’’𑀦𑁆𑀢𑀺 𑀧𑀼𑀦 𑀘 𑀯𑀘𑀦𑀁 𑀓𑀺𑀫𑀢𑁆𑀣𑀺𑀬𑀦𑁆𑀢𑀺 𑀆𑀳 ‘‘𑀤𑀸𑀬𑀓𑀭𑀸𑀚𑀤𑀻𑀧𑀦𑀢𑁆𑀣’’𑀦𑁆𑀢𑀺𑀆𑀤𑀺. 𑀅𑀲𑀼𑀓𑁂𑀦 𑀭𑀜𑁆𑀜𑀸 𑀤𑀺𑀦𑁆𑀦𑀦𑁆𑀢𑀺 𑀤𑀸𑀬𑀓𑀭𑀸𑀚𑀲𑁆𑀲 𑀅𑀤𑀻𑀧𑀺𑀢𑀢𑁆𑀢𑀸 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁆𑀣 𑀘 𑀧𑀞𑀫𑀦𑀬𑁂 ‘‘𑀭𑀸𑀚𑀪𑁄𑀕𑁆𑀕’’𑀦𑁆𑀢𑀺 𑀧𑀤𑁂 𑀧𑀼𑀘𑁆𑀙𑀸𑀲𑀫𑁆𑀪𑀯𑀢𑁄 𑀇𑀤𑀁 𑀯𑀼𑀢𑁆𑀢𑀁, 𑀤𑀼𑀢𑀺𑀬𑀦𑀬𑁂 𑀧𑀦 ‘‘𑀭𑀸𑀚𑀤𑀸𑀬’’𑀦𑁆𑀢𑀺 𑀧𑀤𑁂𑀢𑀺 𑀅𑀬𑀫𑁆𑀧𑀺 𑀯𑀺𑀲𑁂𑀲𑁄 𑀤𑀝𑁆𑀞𑀩𑁆𑀩𑁄. 𑀢𑀢𑁆𑀣 𑀅𑀢𑀺𑀩𑀳𑀼𑀮𑀢𑀸𑀬 𑀧𑀼𑀭𑀢𑁄 𑀞𑀧𑀦𑁄𑀓𑀸𑀲𑀸𑀪𑀸𑀯𑀢𑁄 𑀧𑀲𑁆𑀲𑁂𑀦𑀧𑀺 𑀑𑀤𑀦𑀲𑀽𑀧𑀩𑁆𑀬𑀜𑁆𑀚𑀦𑀸𑀤𑀺 𑀤𑀻𑀬𑀢𑀺 𑀏𑀢𑀲𑁆𑀲𑀸𑀢𑀺 𑀧𑀲𑁂𑀦𑀤𑀺, 𑀅𑀮𑀼𑀢𑁆𑀢𑀲𑀫𑀸𑀲𑀯𑀲𑁂𑀦. 𑀲𑁄 𑀳𑀺 𑀭𑀸𑀚𑀸 𑀢𑀡𑁆𑀟𑀼𑀮𑀤𑁄𑀡𑀲𑁆𑀲 𑀑𑀤𑀦𑀫𑁆𑀧𑀺 𑀢𑀤𑀼𑀧𑀺𑀬𑁂𑀦 𑀲𑀽𑀧𑀩𑁆𑀬𑀜𑁆𑀚𑀦𑁂𑀦 𑀪𑀼𑀜𑁆𑀚𑀢𑀺. 𑀢𑀣𑀸 𑀳𑀺 𑀦𑀁 𑀪𑀼𑀢𑁆𑀢𑀧𑀸𑀢𑀭𑀸𑀲𑀓𑀸𑀮𑁂 𑀲𑀢𑁆𑀣𑀼 𑀲𑀦𑁆𑀢𑀺𑀓𑀫𑀸𑀕𑀦𑁆𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀲𑀫𑁆𑀧𑀭𑀺𑀯𑀢𑁆𑀢𑀦𑁆𑀢𑀁 𑀦𑀺𑀤𑁆𑀤𑀸𑀬 𑀅𑀪𑀺𑀪𑀼𑀬𑁆𑀬𑀫𑀸𑀦𑀁 𑀉𑀚𑀼𑀓𑀁 𑀦𑀺𑀲𑀻𑀤𑀺𑀢𑀼𑀫𑀲𑀓𑁆𑀓𑁄𑀦𑁆𑀢𑀁 𑀪𑀕𑀯𑀸 𑁋

‘‘𑀫𑀺𑀤𑁆𑀥𑀻 𑀬𑀤𑀸 𑀳𑁄𑀢𑀺 𑀫𑀳𑀕𑁆𑀖𑀲𑁄 𑀘,

𑀦𑀺𑀤𑁆𑀤𑀸𑀬𑀺𑀢𑀸 𑀲𑀫𑁆𑀧𑀭𑀺𑀯𑀢𑁆𑀢𑀲𑀸𑀬𑀻;

𑀫𑀳𑀸𑀯𑀭𑀸𑀳𑁄𑀯 𑀦𑀺𑀯𑀸𑀧𑀯𑀼𑀝𑁆𑀞𑁄,

𑀧𑀼𑀦𑀧𑁆𑀧𑀼𑀦𑀁 𑀕𑀩𑁆𑀪𑀫𑀼𑀧𑁂𑀢𑀺 𑀫𑀦𑁆𑀤𑁄’’𑀢𑀺. (𑀥. 𑀧. 𑁩𑁨𑁫; 𑀦𑁂𑀢𑁆𑀢𑀺. 𑁨𑁬, 𑁯𑁦);

𑀇𑀫𑀸𑀬 𑀕𑀸𑀣𑀸𑀬 𑀑𑀯𑀤𑀺. 𑀪𑀸𑀕𑀺𑀦𑁂𑀬𑁆𑀬𑀜𑁆𑀘 𑀲𑁄 𑀲𑀼𑀤𑀲𑁆𑀲𑀦𑀁 𑀦𑀸𑀫 𑀫𑀸𑀡𑀯𑀁 𑁋

‘‘𑀫𑀦𑀼𑀚𑀲𑁆𑀲 𑀲𑀤𑀸 𑀲𑀢𑀻𑀫𑀢𑁄,

𑀫𑀢𑁆𑀢𑀁 𑀚𑀸𑀦𑀢𑁄 𑀮𑀤𑁆𑀥𑀪𑁄𑀚𑀦𑁂;

𑀢𑀦𑀼𑀓𑀲𑁆𑀲 𑀪𑀯𑀦𑁆𑀢𑀺 𑀯𑁂𑀤𑀦𑀸,

𑀲𑀡𑀺𑀓𑀁 𑀚𑀻𑀭𑀢𑀺 𑀆𑀬𑀼𑀧𑀸𑀮𑀬’’𑀦𑁆𑀢𑀺. (𑀲𑀁. 𑀦𑀺. 𑁧.𑁨𑁪) 𑁋

𑀇𑀫𑀁 𑀕𑀸𑀣𑀁 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀉𑀕𑁆𑀕𑀳𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀪𑀼𑀜𑁆𑀚𑀦𑁆𑀢𑀲𑁆𑀲 𑀑𑀲𑀸𑀦𑀧𑀺𑀡𑁆𑀟𑀓𑀸𑀮𑁂 𑀤𑁂𑀯𑀲𑀺𑀓𑀁 𑀪𑀡𑀸𑀧𑁂𑀢𑀺, 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀢𑀲𑁆𑀲𑀸 𑀕𑀸𑀣𑀸𑀬 𑀅𑀢𑁆𑀣𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀑𑀲𑀸𑀦𑀧𑀺𑀡𑁆𑀟𑀧𑀭𑀺𑀳𑀭𑀡𑁂𑀦 𑀦𑀸𑀴𑀺𑀓𑁄𑀤𑀦𑀫𑀢𑁆𑀢𑀸𑀬 𑀲𑀡𑁆𑀞𑀳𑀺𑀢𑁆𑀯𑀸 𑀢𑀦𑀼𑀲𑀭𑀻𑀭𑁄 𑀩𑀮𑀯𑀸 𑀲𑀼𑀔𑀧𑁆𑀧𑀢𑁆𑀢𑁄 𑀅𑀳𑁄𑀲𑀻𑀢𑀺. 𑀉𑀤𑀸𑀦𑀝𑁆𑀞𑀓𑀣𑀸𑀬𑀁 (𑀉𑀤𑀸. 𑀅𑀝𑁆𑀞. 𑁧𑁨) 𑀧𑀦 𑀏𑀯𑀁 𑀯𑀼𑀢𑁆𑀢𑀁 ‘‘𑀧𑀘𑁆𑀘𑀸𑀫𑀺𑀢𑁆𑀢𑀁 𑀧𑀭𑀲𑁂𑀦𑀁 𑀚𑀺𑀦𑀸𑀢𑀻𑀢𑀺 𑀧𑀲𑁂𑀦𑀤𑀻’’𑀢𑀺. 𑀲𑀤𑁆𑀤𑀯𑀺𑀤𑀽𑀧𑀺 𑀳𑀺 𑀚-𑀓𑀸𑀭𑀲𑁆𑀲 𑀤-𑀓𑀸𑀭𑁂 𑀇𑀤𑀫𑀼𑀤𑀸𑀳𑀭𑀦𑁆𑀢𑀺. 𑀲𑁄 𑀳𑀺 𑀅𑀢𑁆𑀢𑀦𑁄 𑀪𑀸𑀕𑀺𑀦𑁂𑀬𑁆𑀬𑀁 𑀅𑀚𑀸𑀢𑀲𑀢𑁆𑀢𑀼𑀭𑀸𑀚𑀸𑀦𑀁, 𑀧𑀜𑁆𑀘𑀘𑁄𑀭𑀲𑀢𑀸𑀤𑀻𑀦𑀺 𑀘 𑀅𑀯𑀭𑀼𑀤𑁆𑀥𑀓𑀸𑀦𑀺 𑀚𑀺𑀦𑀸𑀢𑀻𑀢𑀺. 𑀓𑁄𑀲𑀮𑀭𑀝𑁆𑀞𑀲𑁆𑀲𑀸𑀥𑀺𑀧𑀢𑀺𑀪𑀸𑀯𑀢𑁄 𑀓𑁄𑀲𑀮𑁄, 𑀢𑀲𑁆𑀫𑀸 𑀓𑁄𑀲𑀮𑀸𑀥𑀺𑀧𑀢𑀺𑀦𑀸 𑀧𑀲𑁂𑀦𑀤𑀺 𑀦𑀸𑀫𑀓𑁂𑀦 𑀭𑀜𑁆𑀜𑀸 𑀤𑀺𑀦𑁆𑀦𑀦𑁆𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀦𑀺𑀲𑁆𑀲𑀝𑁆𑀞𑀧𑀭𑀺𑀘𑁆𑀘𑀢𑁆𑀢𑀢𑀸𑀲𑀗𑁆𑀔𑀸𑀢𑁂𑀦 𑀧𑀼𑀦 𑀅𑀕𑁆𑀕𑀳𑁂𑀢𑀩𑁆𑀩𑀪𑀸𑀯𑁂𑀦𑁂𑀯 𑀤𑀺𑀦𑁆𑀦𑀢𑁆𑀢𑀸 𑀇𑀥 𑀩𑁆𑀭𑀳𑁆𑀫𑀤𑁂𑀬𑁆𑀬𑀁 𑀦𑀸𑀫, 𑀦 𑀢𑀼 𑀧𑀼𑀭𑀺𑀫𑀦𑀬𑁂 𑀯𑀺𑀬 𑀭𑀸𑀚𑀲𑀗𑁆𑀔𑁂𑀧𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀪𑀸𑀯𑁂𑀦 𑀤𑀺𑀦𑁆𑀦𑀢𑁆𑀢𑀸𑀢𑀺 𑀆𑀳 ‘‘𑀬𑀣𑀸’’𑀢𑀺𑀆𑀤𑀺. 𑀦𑀺𑀲𑁆𑀲𑀝𑁆𑀞𑀁 𑀳𑀼𑀢𑁆𑀯𑀸, 𑀦𑀺𑀲𑁆𑀲𑀝𑁆𑀞𑀪𑀸𑀯𑁂𑀦 𑀯𑀸 𑀧𑀭𑀺𑀘𑁆𑀘𑀢𑁆𑀢𑀁 𑀦𑀺𑀲𑁆𑀲𑀝𑁆𑀞𑀧𑀭𑀺𑀘𑁆𑀘𑀢𑁆𑀢𑀁, 𑀫𑀼𑀢𑁆𑀢𑀘𑀸𑀕𑀯𑀲𑁂𑀦 𑀘𑀚𑀺𑀢𑀦𑁆𑀢𑀺 𑀅𑀢𑁆𑀣𑁄.

𑀲𑀯𑀦𑀁 𑀉𑀧𑀮𑀩𑁆𑀪𑁄𑀢𑀺 𑀤𑀲𑁆𑀲𑁂𑀢𑀺 ‘‘𑀉𑀧𑀮𑀪𑀻’’𑀢𑀺 𑀇𑀫𑀺𑀦𑀸, 𑀲𑁄 𑀘𑀸𑀬𑀫𑀼𑀧𑀮𑀩𑁆𑀪𑁄 𑀲𑀯𑀦𑀯𑀲𑁂𑀦𑁂𑀯 𑀚𑀸𑀦𑀦𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀲𑁄𑀢𑀤𑁆𑀯𑀸𑀭𑀲𑀫𑁆𑀧𑀢𑁆𑀢𑀯𑀘𑀦𑀦𑀺𑀕𑁆𑀖𑁄𑀲𑀸𑀦𑀼𑀲𑀸𑀭𑁂𑀦 𑀅𑀜𑁆𑀜𑀸𑀲𑀻’’𑀢𑀺. 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑀯𑀺𑀜𑁆𑀜𑀸𑀡𑀯𑀻𑀣𑀺𑀯𑀲𑁂𑀦 𑀚𑀸𑀦𑀦𑀫𑁂𑀯 𑀳𑀺 𑀇𑀥 𑀲𑀯𑀦𑀁 𑀢𑁂𑀦𑁂𑀯 ‘‘𑀲𑀫𑀡𑁄 𑀔𑀮𑀼 𑀪𑁄 𑀕𑁄𑀢𑀫𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀲𑁆𑀲𑀢𑁆𑀣𑀲𑁆𑀲 𑀅𑀥𑀺𑀕𑀢𑀢𑁆𑀢𑀸, 𑀦 𑀧𑀦 𑀲𑁄𑀢𑀤𑁆𑀯𑀸𑀭𑀯𑀻𑀣𑀺𑀯𑀲𑁂𑀦 𑀲𑀼𑀢𑀫𑀢𑁆𑀢𑀁 𑀢𑁂𑀦 𑀢𑀤𑀢𑁆𑀣𑀲𑁆𑀲 𑀅𑀦𑀥𑀺𑀕𑀢𑀢𑁆𑀢𑀸. 𑀅𑀯𑀥𑀸𑀭𑀡𑀨𑀮𑀢𑁆𑀢𑀸 𑀲𑀤𑁆𑀤𑀧𑀬𑁄𑀕𑀲𑁆𑀲 𑀲𑀩𑁆𑀩𑀫𑁆𑀧𑀺 𑀯𑀸𑀓𑁆𑀬𑀁 𑀅𑀦𑁆𑀢𑁄𑀕𑀥𑀸𑀯𑀥𑀸𑀭𑀡𑀁. 𑀢𑀲𑁆𑀫𑀸 𑀢𑀤𑀢𑁆𑀣𑀚𑁄𑀢𑀓𑀲𑀤𑁆𑀤𑁂𑀦 𑀯𑀺𑀦𑀸𑀧𑀺 𑀅𑀜𑁆𑀜𑀢𑁆𑀣𑀸𑀧𑁄𑀳𑀦𑀯𑀲𑁂𑀦 𑀅𑀲𑁆𑀲𑁄𑀲𑀺 𑀏𑀯, 𑀦𑀸𑀲𑁆𑀲 𑀓𑁄𑀘𑀺 𑀲𑀯𑀦𑀦𑁆𑀢𑀭𑀸𑀬𑁄 𑀅𑀳𑁄𑀲𑀻𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀻𑀢𑀺 𑀆𑀳 ‘‘𑀧𑀤𑀧𑀽𑀭𑀡𑀫𑀢𑁆𑀢𑁂 𑀦𑀺𑀧𑀸𑀢𑁄’’𑀢𑀺, 𑀅𑀦𑁆𑀢𑁄𑀕𑀥𑀸𑀯𑀥𑀸𑀭𑀡𑁂𑀧𑀺 𑀘 𑀲𑀩𑁆𑀩𑀲𑁆𑀫𑀺𑀁 𑀯𑀸𑀓𑁆𑀬𑁂 𑀦𑀻𑀢𑀢𑁆𑀣𑀢𑁄 𑀅𑀯𑀥𑀸𑀭𑀡𑀢𑁆𑀣𑀁 𑀔𑁄-𑀲𑀤𑁆𑀤𑀕𑁆𑀕𑀳𑀡𑀁 ‘‘𑀏𑀯𑀸’’𑀢𑀺 𑀲𑀸𑀫𑀢𑁆𑀣𑀺𑀬𑀸 𑀲𑀸𑀢𑀺𑀲𑀬𑀁 𑀏𑀢𑀤𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀬𑀫𑀸𑀦𑀢𑁆𑀢𑀸𑀢𑀺 𑀧𑀞𑀫𑀯𑀺𑀓𑀧𑁆𑀧𑁄 𑀯𑀼𑀢𑁆𑀢𑁄, 𑀦𑀻𑀢𑀢𑁆𑀣𑀢𑁄 𑀅𑀯𑀥𑀸𑀭𑀡𑁂𑀦 𑀓𑁄 𑀅𑀢𑁆𑀣𑁄 𑀏𑀓𑀦𑁆𑀢𑀺𑀓𑁄 𑀓𑀢𑁄, 𑀅𑀯𑀥𑀸𑀭𑀺𑀢𑁄 𑀘𑀸𑀢𑀺 𑀯𑀼𑀢𑁆𑀢𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺. 𑀅𑀣 𑀧𑀤𑀧𑀽𑀭𑀡𑀫𑀢𑁆𑀢𑁂𑀦 𑀔𑁄-𑀲𑀤𑁆𑀤𑁂𑀦 𑀓𑀺𑀁 𑀧𑀬𑁄𑀚𑀦𑀦𑁆𑀢𑀺 𑀘𑁄𑀤𑀦𑀫𑀧𑀦𑁂𑀢𑀺 ‘‘𑀧𑀤𑀧𑀽𑀭𑀡𑁂𑀦𑀸’’𑀢𑀺𑀆𑀤𑀺𑀦𑀸, 𑀅𑀓𑁆𑀔𑀭𑀲𑀫𑀽𑀳𑀧𑀤𑀲𑁆𑀲, 𑀧𑀤𑀲𑀫𑀽𑀳𑀯𑀸𑀓𑁆𑀬𑀲𑁆𑀲 𑀘 𑀲𑀺𑀮𑀺𑀝𑁆𑀞𑀢𑀸𑀧𑀬𑁄𑀚𑀦𑀫𑀢𑁆𑀢𑀫𑁂𑀯𑀸𑀢𑀺 𑀅𑀢𑁆𑀣𑁄. ‘‘𑀅𑀲𑁆𑀲𑁄𑀲𑀻’’𑀢𑀺 𑀳𑀺𑀤𑀁 𑀧𑀤𑀁 𑀔𑁄-𑀲𑀤𑁆𑀤𑁂 𑀕𑀳𑀺𑀢𑁂 𑀢𑁂𑀦 𑀨𑀼𑀮𑁆𑀮𑀺𑀢𑀁 𑀫𑀡𑁆𑀟𑀺𑀢𑀁 𑀯𑀺𑀪𑀽𑀲𑀺𑀢𑀁 𑀯𑀺𑀬 𑀳𑁄𑀦𑁆𑀢𑀁 𑀧𑀽𑀭𑀺𑀢𑀁 𑀦𑀸𑀫 𑀳𑁄𑀢𑀺, 𑀢𑁂𑀦 𑀘 𑀧𑀼𑀭𑀺𑀫𑀧𑀘𑁆𑀙𑀺𑀫𑀧𑀤𑀸𑀦𑀺 𑀲𑀼𑀔𑀼𑀘𑁆𑀘𑀸𑀭𑀡𑀯𑀲𑁂𑀦 𑀲𑀺𑀮𑀺𑀝𑁆𑀞𑀸𑀦𑀺 𑀳𑁄𑀦𑁆𑀢𑀺, 𑀦 𑀢𑀲𑁆𑀫𑀺𑀁 𑀅𑀕𑁆𑀕𑀳𑀺𑀢𑁂, 𑀢𑀲𑁆𑀫𑀸 𑀧𑀤𑀧𑀽𑀭𑀡𑀫𑀢𑁆𑀢𑀫𑁆𑀧𑀺 𑀧𑀤𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸𑀧𑀬𑁄𑀚𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀢𑁆𑀢𑀲𑀤𑁆𑀤𑁄 𑀘𑁂𑀢𑁆𑀣 𑀯𑀺𑀲𑁂𑀲𑀦𑀺𑀯𑀢𑁆𑀢𑀺𑀅𑀢𑁆𑀣𑁄, 𑀢𑁂𑀦𑀲𑁆𑀲 𑀅𑀦𑀢𑁆𑀣𑀦𑁆𑀢𑀭𑀤𑀻𑀧𑀦𑀢𑀸 𑀤𑀲𑁆𑀲𑀺𑀢𑀸, 𑀏𑀯-𑀲𑀤𑁆𑀤𑁂𑀦 𑀧𑀦 𑀧𑀤𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸𑀬 𑀏𑀓𑀦𑁆𑀢𑀺𑀓𑀢𑀸.

‘‘𑀲𑀫𑀡𑁄 𑀔𑀮𑀽’’𑀢𑀺𑀆𑀤𑀺 𑀬𑀣𑀸𑀲𑀼𑀢𑀢𑁆𑀣𑀦𑀺𑀤𑀲𑁆𑀲𑀦𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀇𑀤𑀸𑀦𑀻’’𑀢𑀺𑀆𑀤𑀺𑀦𑀸. 𑀲𑀫𑀺𑀢𑀧𑀸𑀧𑀢𑁆𑀢𑀸𑀢𑀺 𑀏𑀢𑁆𑀣 𑀅𑀘𑁆𑀘𑀦𑁆𑀢𑀁 𑀅𑀦𑀯𑀲𑁂𑀲𑀢𑁄 𑀲𑀯𑀸𑀲𑀦𑀁 𑀲𑀫𑀺𑀢𑀧𑀸𑀧𑀢𑁆𑀢𑀸𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀏𑀯𑀜𑁆𑀳𑀺 𑀩𑀸𑀳𑀺𑀭𑀓𑀯𑀻𑀢𑀭𑀸𑀕𑀲𑁂𑀓𑁆𑀔𑀸𑀲𑁂𑀓𑁆𑀔𑀧𑀸𑀧𑀲𑀫𑀦𑀢𑁄 𑀪𑀕𑀯𑀢𑁄 𑀧𑀸𑀧𑀲𑀫𑀦𑀁 𑀬𑀣𑀸𑀭𑀳𑀁 𑀯𑀺𑀲𑁂𑀲𑀺𑀢𑀁 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀪𑀕𑀯𑀸 𑀘 𑀅𑀦𑀼𑀢𑁆𑀢𑀭𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀲𑀫𑀺𑀢𑀧𑀸𑀧𑁄’’𑀢𑀺. 𑀢𑀤𑁂𑀯𑀢𑁆𑀣𑀁 𑀦𑀺𑀤𑁆𑀤𑁂𑀲𑀧𑀸𑀞𑁂𑀦 𑀲𑀸𑀥𑁂𑀢𑀼𑀁 ‘‘𑀯𑀼𑀢𑁆𑀢𑀜𑁆𑀳𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀅𑀲𑁆𑀲𑀸𑀢𑀺 𑀅𑀦𑁂𑀦 𑀪𑀺𑀓𑁆𑀔𑀼𑀦𑀸, 𑀪𑀕𑀯𑀢𑀸 𑀯𑀸. 𑀲𑀫𑀺𑀢𑀸𑀢𑀺 𑀲𑀫𑀸𑀧𑀺𑀢𑀸, 𑀲𑀫𑀪𑀸𑀯𑀁 𑀯𑀸 𑀆𑀧𑀸𑀤𑀬𑀺𑀢𑀸, 𑀅𑀲𑁆𑀲 𑀯𑀸 𑀲𑀫𑁆𑀧𑀤𑀸𑀦𑀪𑀽𑀢𑀲𑁆𑀲 𑀲𑀦𑁆𑀢𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀢𑁆𑀣𑀸𑀦𑀼𑀕𑀢𑀸 𑀘𑀸𑀬𑀁 𑀪𑀕𑀯𑀢𑀺 𑀲𑀫𑀜𑁆𑀜𑀸𑀢𑀺 𑀯𑀼𑀢𑁆𑀢𑀁 ‘‘𑀪𑀕𑀯𑀸 𑀘𑀸’’𑀢𑀺𑀆𑀤𑀺. 𑀢𑁂𑀦𑀸𑀢𑀺 𑀢𑀣𑀸 𑀲𑀫𑀺𑀢𑀧𑀸𑀧𑀢𑁆𑀢𑀸. 𑀬𑀣𑀸𑀪𑀽𑀢𑀁 𑀧𑀯𑀢𑁆𑀢𑁄 𑀬𑀣𑀸𑀪𑀼𑀘𑁆𑀘𑀁, 𑀢𑀤𑁂𑀯 𑀕𑀼𑀡𑁄, 𑀢𑁂𑀦 𑀅𑀥𑀺𑀕𑀢𑀁 𑀢𑀣𑀸. ‘‘𑀔𑀮𑀽’’𑀢𑀺 𑀇𑀤𑀁 𑀦𑁂𑀧𑀸𑀢𑀺𑀓𑀁 𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑀧𑀤𑁂 (𑀫𑀺. 𑀧. 𑁪.𑁧.𑁮) 𑀯𑀺𑀬, 𑀦 𑀦𑀸𑀫𑀁, 𑀅𑀦𑁂𑀓𑀢𑁆𑀣𑀢𑁆𑀢𑀸 𑀘 𑀦𑀺𑀧𑀸𑀢𑀸𑀦𑀁 𑀅𑀦𑀼𑀲𑁆𑀲𑀯𑀦𑀢𑁆𑀣𑁄𑀯 𑀇𑀥𑀸𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀅𑀦𑀼𑀲𑁆𑀲𑀯𑀦𑀢𑁆𑀣𑁂 𑀦𑀺𑀧𑀸𑀢𑁄’’𑀢𑀺, 𑀧𑀭𑀫𑁆𑀧𑀭𑀲𑀯𑀦𑀜𑁆𑀘𑁂𑀢𑁆𑀣 𑀅𑀦𑀼𑀲𑁆𑀲𑀯𑀦𑀁. 𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀲𑀫𑀼𑀤𑀸𑀕𑀢𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀬𑀸 𑀆𑀕𑀢𑀁, 𑀚𑀸𑀢𑀺𑀲𑀺𑀤𑁆𑀥𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀮𑀧𑀦𑀫𑀢𑁆𑀢𑀦𑁆𑀢𑀺 𑀧𑀺𑀬𑀸𑀮𑀧𑀦𑀯𑀘𑀦𑀫𑀢𑁆𑀢𑀁, 𑀦 𑀢𑀤𑀼𑀢𑁆𑀢𑀭𑀺 𑀅𑀢𑁆𑀣𑀧𑀭𑀺𑀤𑀻𑀧𑀦𑀁. 𑀧𑀺𑀬𑀲𑀫𑀼𑀤𑀸𑀳𑀸𑀭𑀸 𑀳𑁂𑀢𑁂 ‘‘𑀪𑁄’’𑀢𑀺 𑀯𑀸 ‘‘𑀆𑀯𑀼𑀲𑁄’’𑀢𑀺 𑀯𑀸 ‘‘𑀤𑁂𑀯𑀸𑀦𑀁 𑀧𑀺𑀬𑀸’’𑀢𑀺 𑀯𑀸. 𑀥𑀫𑁆𑀫𑀧𑀤𑁂 𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼𑀧𑀸𑀞𑁂𑀦, (𑀥. 𑀧. 𑁩𑁧𑁫 𑀆𑀤𑀬𑁄) 𑀲𑀼𑀢𑁆𑀢𑀦𑀺𑀧𑀸𑀢𑁂 𑀘 𑀯𑀸𑀲𑁂𑀝𑁆𑀞𑀲𑀼𑀢𑁆𑀢𑀧𑀤𑁂𑀦 𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀲𑀫𑀼𑀤𑀸𑀕𑀢𑀸𑀮𑀧𑀦𑀪𑀸𑀯𑀁 𑀲𑀫𑀢𑁆𑀣𑁂𑀢𑀼𑀁 ‘‘𑀯𑀼𑀢𑁆𑀢𑀫𑁆𑀧𑀺 𑀘𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳.

𑀢𑀢𑁆𑀭𑀸𑀬𑀫𑀢𑁆𑀣𑁄 𑁋 𑀲𑀘𑁂 𑀭𑀸𑀕𑀸𑀤𑀺𑀓𑀺𑀜𑁆𑀘𑀦𑁂𑀳𑀺 𑀲𑀓𑀺𑀜𑁆𑀘𑀦𑁄 𑀅𑀲𑁆𑀲, 𑀲𑁄 𑀆𑀫𑀦𑁆𑀢𑀦𑀸𑀤𑀻𑀲𑀼 ‘‘𑀪𑁄 𑀪𑁄’’𑀢𑀺 𑀯𑀤𑀦𑁆𑀢𑁄 𑀳𑀼𑀢𑁆𑀯𑀸 𑀯𑀺𑀘𑀭𑀡𑀢𑁄 𑀪𑁄𑀯𑀸𑀤𑀻𑀬𑁂𑀯 𑀦𑀸𑀫 𑀳𑁄𑀢𑀺, 𑀦 𑀩𑁆𑀭𑀸𑀳𑁆𑀫𑀡𑁄. ‘‘𑀅𑀓𑀺𑀜𑁆𑀘𑀦𑀁 𑀅𑀦𑀸𑀤𑀸𑀦𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺 (𑀥. 𑀧. 𑁩𑁯𑁬, 𑀲𑀼. 𑀦𑀺. 𑁬𑁨𑁫) 𑀲𑁂𑀲𑀕𑀸𑀣𑀸𑀧𑀤𑀁. 𑀢𑀢𑁆𑀣 𑀭𑀸𑀕𑀸𑀤𑀬𑁄 𑀲𑀢𑁆𑀢𑁂 𑀓𑀺𑀜𑁆𑀘𑀦𑁆𑀢𑀺 𑀫𑀤𑁆𑀤𑀦𑁆𑀢𑀺 𑀧𑀮𑀺𑀩𑀼𑀤𑁆𑀥𑀦𑁆𑀢𑀻𑀢𑀺 𑀓𑀺𑀜𑁆𑀘𑀦𑀸𑀦𑀺. 𑀫𑀦𑀼𑀲𑁆𑀲𑀸 𑀓𑀺𑀭 𑀕𑁄𑀡𑁂𑀳𑀺 𑀔𑀮𑀁 𑀫𑀤𑁆𑀤𑀸𑀧𑁂𑀦𑁆𑀢𑀸 ‘‘𑀓𑀺𑀜𑁆𑀘𑁂𑀳𑀺 𑀓𑀧𑀺𑀮, 𑀓𑀺𑀜𑁆𑀘𑁂𑀳𑀺 𑀓𑀸𑀴𑀓𑀸’’𑀢𑀺 𑀯𑀤𑀦𑁆𑀢𑀺, 𑀢𑀲𑁆𑀫𑀸 𑀓𑀺𑀜𑁆𑀘𑀦𑀲𑀤𑁆𑀤𑁄 𑀫𑀤𑁆𑀤𑀦𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸𑀳 𑀦𑀺𑀤𑁆𑀤𑁂𑀲𑁂 ‘‘𑀅𑀓𑀺𑀜𑁆𑀘𑀦𑀦𑁆𑀢𑀺 𑀭𑀸𑀕𑀓𑀺𑀜𑁆𑀘𑀦𑀁, 𑀤𑁄𑀲, 𑀫𑁄𑀳, 𑀫𑀸𑀦, 𑀤𑀺𑀝𑁆𑀞𑀺, 𑀓𑀺𑀮𑁂𑀲𑀓𑀺𑀜𑁆𑀘𑀦𑀁, 𑀤𑀼𑀘𑁆𑀘𑀭𑀺𑀢𑀓𑀺𑀜𑁆𑀘𑀦𑀁, 𑀬𑀲𑁆𑀲𑁂𑀢𑁂 𑀓𑀺𑀜𑁆𑀘𑀦𑀸 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸, 𑀲𑁄 𑀯𑀼𑀘𑁆𑀘𑀢𑀺 𑀅𑀓𑀺𑀜𑁆𑀘𑀦𑁄’’𑀢𑀺 (𑀘𑀽𑀴𑀦𑀺. 𑁨𑁮, 𑁩𑁨, 𑁬𑁦, 𑁬𑁩). 𑀕𑁄𑀢𑀫𑁄𑀢𑀺 𑀕𑁄𑀢𑁆𑀢𑀯𑀲𑁂𑀦 𑀧𑀭𑀺𑀓𑀺𑀢𑁆𑀢𑀦𑀁, 𑀬𑀁 ‘‘𑀆𑀤𑀺𑀘𑁆𑀘𑀕𑁄𑀢𑁆𑀢’’𑀦𑁆𑀢𑀺𑀧𑀺 𑀮𑁄𑀓𑁂 𑀯𑀤𑀦𑁆𑀢𑀺, 𑀲𑀓𑁆𑀬𑀧𑀼𑀢𑁆𑀢𑁄𑀢𑀺 𑀧𑀦 𑀚𑀸𑀢𑀺𑀯𑀲𑁂𑀦 𑀲𑀸𑀓𑀺𑀬𑁄𑀢𑀺 𑀘 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀩𑁆𑀩𑀚𑁆𑀚𑀸𑀲𑀼𑀢𑁆𑀢𑁂 𑁋

‘‘𑀆𑀤𑀺𑀘𑁆𑀘𑀸 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀸𑀓𑀺𑀬𑀸 𑀦𑀸𑀫 𑀚𑀸𑀢𑀺𑀬𑀸;

𑀢𑀫𑁆𑀳𑀸 𑀓𑀼𑀮𑀸 𑀧𑀩𑁆𑀩𑀚𑀺𑀢𑁄𑀫𑁆𑀳𑀺, 𑀦 𑀓𑀸𑀫𑁂 𑀅𑀪𑀺𑀧𑀢𑁆𑀣𑀬’’𑀦𑁆𑀢𑀺. (𑀲𑀼. 𑀦𑀺. 𑁪𑁨𑁫);

𑀢𑀣𑀸 𑀘𑀸𑀳 ‘‘𑀕𑁄𑀢𑀫𑁄𑀢𑀺 𑀪𑀕𑀯𑀦𑁆𑀢𑀁 𑀕𑁄𑀢𑁆𑀢𑀯𑀲𑁂𑀦 𑀧𑀭𑀺𑀓𑀺𑀢𑁆𑀢𑁂𑀢𑀻’’𑀢𑀺𑀆𑀤𑀺. 𑀢𑀢𑁆𑀣 𑀕𑀁 𑀢𑀸𑀬𑀢𑀻𑀢𑀺 𑀕𑁄𑀢𑁆𑀢𑀁, ‘‘𑀕𑁄𑀢𑀫𑁄’’𑀢𑀺 𑀧𑀯𑀢𑁆𑀢𑀫𑀸𑀦𑀁 𑀅𑀪𑀺𑀥𑀸𑀦𑀁, 𑀩𑀼𑀤𑁆𑀥𑀺𑀜𑁆𑀘 𑀏𑀓𑀁𑀲𑀺𑀓𑀯𑀺𑀲𑀬𑀢𑀸𑀬 𑀭𑀓𑁆𑀔𑀢𑀻𑀢𑀺 𑀅𑀢𑁆𑀣𑁄. 𑀬𑀣𑀸 𑀳𑀺 𑀩𑀼𑀤𑁆𑀥𑀺 𑀆𑀭𑀫𑁆𑀫𑀡𑀪𑀽𑀢𑁂𑀦 𑀅𑀢𑁆𑀣𑁂𑀦 𑀯𑀺𑀦𑀸 𑀦 𑀯𑀢𑁆𑀢𑀢𑀺, 𑀏𑀯𑀁 𑀅𑀪𑀺𑀥𑀸𑀦𑀁 𑀅𑀪𑀺𑀥𑁂𑀬𑁆𑀬𑀪𑀽𑀢𑁂𑀦, 𑀢𑀲𑁆𑀫𑀸 𑀲𑁄 𑀕𑁄𑀢𑁆𑀢𑀲𑀗𑁆𑀔𑀸𑀢𑁄 𑀅𑀢𑁆𑀣𑁄 𑀢𑀸𑀦𑀺 𑀭𑀓𑁆𑀔𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀕𑁄-𑀲𑀤𑁆𑀤𑁄 𑀘𑁂𑀢𑁆𑀣 𑀅𑀪𑀺𑀥𑀸𑀦𑁂, 𑀩𑀼𑀤𑁆𑀥𑀺𑀬𑀜𑁆𑀘 𑀯𑀢𑁆𑀢𑀢𑀺. 𑀢𑀣𑀸 𑀳𑀺 𑀯𑀤𑀦𑁆𑀢𑀺 𑁋

‘‘𑀕𑁄 𑀕𑁄𑀡𑁂 𑀘𑁂𑀦𑁆𑀤𑁆𑀭𑀺𑀬𑁂 𑀪𑀼𑀫𑁆𑀬𑀁, 𑀯𑀘𑀦𑁂 𑀘𑁂𑀯 𑀩𑀼𑀤𑁆𑀥𑀺𑀬𑀁;

𑀆𑀤𑀺𑀘𑁆𑀘𑁂 𑀭𑀲𑁆𑀫𑀺𑀬𑀜𑁆𑀘𑁂𑀯, 𑀧𑀸𑀦𑀻𑀬𑁂𑀧𑀺 𑀘 𑀯𑀢𑁆𑀢𑀢𑁂;

𑀢𑁂𑀲𑀼 𑀅𑀢𑁆𑀣𑁂𑀲𑀼 𑀕𑁄𑀡𑁂 𑀣𑀻, 𑀧𑀼𑀫𑀸 𑀘 𑀇𑀢𑀭𑁂 𑀧𑀼𑀫𑀸’’𑀢𑀺.

𑀢𑀢𑁆𑀣 ‘‘𑀕𑁄𑀲𑀼 𑀤𑀼𑀬𑁆𑀳𑀫𑀸𑀦𑀸𑀲𑀼 𑀕𑀢𑁄, 𑀕𑁄𑀧𑀜𑁆𑀘𑀫𑁄’’𑀢𑀺𑀆𑀤𑀻𑀲𑀼 𑀕𑁄𑀲𑀤𑁆𑀤𑁄 𑀕𑁄𑀡𑁂 𑀯𑀢𑁆𑀢𑀢𑀺. ‘‘𑀕𑁄𑀘𑀭𑁄’’𑀢𑀺𑀆𑀤𑀻𑀲𑀼 𑀇𑀦𑁆𑀤𑁆𑀭𑀺𑀬𑁂. ‘‘𑀕𑁄𑀭𑀓𑁆𑀔’’𑀦𑁆𑀢𑀺𑀆𑀤𑀻𑀲𑀼 𑀪𑀽𑀫𑀺𑀬𑀁. 𑀢𑀣𑀸 𑀳𑀺 𑀲𑀼𑀢𑁆𑀢𑀦𑀺𑀧𑀸𑀢𑀝𑁆𑀞𑀓𑀣𑀸𑀬 𑀯𑀸𑀲𑁂𑀝𑁆𑀞𑀲𑀼𑀢𑁆𑀢𑀲𑀁𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀁 ‘‘𑀕𑁄𑀭𑀓𑁆𑀔𑀦𑁆𑀢𑀺 𑀔𑁂𑀢𑁆𑀢𑀭𑀓𑁆𑀔𑀁, 𑀓𑀲𑀺𑀓𑀫𑁆𑀫𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀣𑀯𑀻 𑀳𑀺 ‘𑀕𑁄’𑀢𑀺 𑀯𑀼𑀘𑁆𑀘𑀢𑀺, 𑀢𑀧𑁆𑀧𑀪𑁂𑀤𑁄 𑀘 ‘‘𑀔𑁂𑀢𑁆𑀢’’𑀦𑁆𑀢𑀺 (𑀲𑀼. 𑀦𑀺. 𑀅𑀝𑁆𑀞. 𑁨.𑁬𑁧𑁯-𑁬𑁨𑁬). ‘‘𑀕𑁄𑀢𑁆𑀢𑀁 𑀦𑀸𑀫 𑀤𑁆𑀯𑁂 𑀕𑁄𑀢𑁆𑀢𑀸𑀦𑀺 𑀳𑀻𑀦𑀜𑁆𑀘 𑀕𑁄𑀢𑁆𑀢𑀁, 𑀉𑀓𑁆𑀓𑀝𑁆𑀞𑀜𑁆𑀘 𑀕𑁄𑀢𑁆𑀢’’𑀦𑁆𑀢𑀺𑀆𑀤𑀻𑀲𑀼 (𑀧𑀸𑀘𑀺. 𑁧𑁫) 𑀯𑀘𑀦𑁂, 𑀩𑀼𑀤𑁆𑀥𑀺𑀬𑀜𑁆𑀘 𑀯𑀢𑁆𑀢𑀢𑀺. ‘‘𑀕𑁄𑀕𑁄𑀢𑁆𑀢𑀁 𑀕𑁄𑀢𑀫𑀁 𑀦𑀫𑁂’’𑀢𑀺 𑀧𑁄𑀭𑀸𑀡𑀓𑀯𑀺𑀭𑀘𑀦𑀸𑀬 𑀆𑀤𑀺𑀘𑁆𑀘𑁂, 𑀆𑀤𑀺𑀘𑁆𑀘𑀩𑀦𑁆𑀥𑀼𑀁 𑀕𑁄𑀢𑀫𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀦𑀫𑀸𑀫𑀻𑀢𑀺 𑀳𑀺 𑀅𑀢𑁆𑀣𑁄, ‘‘𑀉𑀡𑁆𑀳𑀕𑀽’’𑀢𑀺𑀆𑀤𑀻𑀲𑀼 𑀭𑀲𑁆𑀫𑀺𑀬𑀁, 𑀉𑀡𑁆𑀳𑀸 𑀕𑀸𑀯𑁄 𑀭𑀲𑁆𑀫𑀺𑀬𑁄 𑀏𑀢𑀲𑁆𑀲𑀸𑀢𑀺 𑀳𑀺 𑀉𑀡𑁆𑀳𑀕𑀼, 𑀲𑀽𑀭𑀺𑀬𑁄. ‘‘𑀕𑁄𑀲𑀻𑀢𑀘𑀦𑁆𑀤𑀦’’𑀦𑁆𑀢𑀺𑀆𑀤𑀻𑀲𑀼 (𑀅. 𑀦𑀺. 𑀝𑀻. 𑁧.𑁪𑁯) 𑀧𑀸𑀦𑀻𑀬𑁂, 𑀕𑁄𑀲𑀗𑁆𑀔𑀸𑀢𑀁 𑀧𑀸𑀦𑀻𑀬𑀁 𑀯𑀺𑀬 𑀲𑀻𑀢𑀁, 𑀢𑀤𑁂𑀯 𑀘𑀦𑁆𑀤𑀦𑀁 𑀢𑀣𑀸. 𑀢𑀲𑁆𑀫𑀺𑀜𑁆𑀳𑀺 𑀉𑀤𑁆𑀥𑀦𑀢𑁄 𑀉𑀤𑁆𑀥𑀭𑀺𑀢𑀧𑀓𑁆𑀓𑀼𑀣𑀺𑀢𑀢𑁂𑀮𑀲𑁆𑀫𑀺𑀁 𑀧𑀓𑁆𑀔𑀺𑀢𑁆𑀢𑁂 𑀢𑀗𑁆𑀔𑀡𑀜𑁆𑀜𑁂𑀯 𑀢𑀁 𑀢𑁂𑀮𑀁 𑀲𑀻𑀢𑀮𑀁 𑀳𑁄𑀢𑀻𑀢𑀺. 𑀏𑀢𑁂𑀲𑀼 𑀧𑀦 𑀅𑀢𑁆𑀣𑁂𑀲𑀼 𑀕𑁄𑀡𑁂 𑀯𑀢𑁆𑀢𑀫𑀸𑀦𑁄 𑀕𑁄-𑀲𑀤𑁆𑀤𑁄 𑀬𑀣𑀸𑀭𑀳𑀁 𑀇𑀢𑁆𑀣𑀺𑀮𑀺𑀗𑁆𑀕𑁄 𑀘𑁂𑀯 𑀧𑀼𑀮𑁆𑀮𑀺𑀗𑁆𑀕𑁄 𑀘, 𑀲𑁂𑀲𑁂𑀲𑀼 𑀧𑀦 𑀧𑀼𑀮𑁆𑀮𑀺𑀗𑁆𑀕𑁄𑀬𑁂𑀯.

𑀓𑀺𑀁 𑀧𑀦𑁂𑀢𑀁 𑀕𑁄𑀢𑁆𑀢𑀁 𑀦𑀸𑀫𑀸𑀢𑀺? 𑀅𑀜𑁆𑀜𑀓𑀼𑀮𑀧𑀭𑀫𑁆𑀧𑀭𑀸𑀬 𑀅𑀲𑀸𑀥𑀸𑀭𑀡𑀁 𑀢𑀲𑁆𑀲 𑀓𑀼𑀮𑀲𑁆𑀲 𑀆𑀤𑀺𑀧𑀼𑀭𑀺𑀲𑀲𑀫𑀼𑀤𑀸𑀕𑀢𑀁 𑀢𑀁𑀓𑀼𑀮𑀧𑀭𑀺𑀬𑀸𑀧𑀦𑁆𑀦𑀲𑀸𑀥𑀸𑀭𑀡𑀁 𑀲𑀸𑀫𑀜𑁆𑀜𑀭𑀽𑀧𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀸𑀥𑀸𑀭𑀡𑀫𑁂𑀯 𑀳𑀺 𑀇𑀤𑀁 𑀢𑀁𑀓𑀼𑀮𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀲𑀸𑀥𑀸𑀭𑀡𑀢𑁄 𑀘 𑀲𑀸𑀫𑀜𑁆𑀜𑀭𑀽𑀧𑀁. 𑀢𑀣𑀸 𑀳𑀺 𑀢𑀁𑀓𑀼𑀮𑁂 𑀚𑀸𑀢𑀸 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸𑀤𑀬𑁄𑀧𑀺 ‘‘𑀕𑁄𑀢𑀫𑁄’’ 𑀢𑁆𑀯𑁂𑀯 𑀯𑀼𑀘𑁆𑀘𑀦𑁆𑀢𑀺, 𑀢𑁂𑀦𑁂𑀯 𑀪𑀕𑀯𑀸 𑀅𑀢𑁆𑀢𑀦𑁄 𑀧𑀺𑀢𑀭𑀁 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸𑀦𑀁 ‘‘𑀅𑀢𑀺𑀓𑁆𑀓𑀦𑁆𑀢𑀯𑀭𑀸 𑀔𑁄 𑀕𑁄𑀢𑀫 𑀢𑀣𑀸𑀕𑀢𑀸’’𑀢𑀺 (𑀫𑀳𑀸𑀯. 𑁧𑁦𑁫) 𑀅𑀯𑁄𑀘, 𑀯𑁂𑀲𑁆𑀲𑀯𑀡𑁄𑀧𑀺 𑀫𑀳𑀸𑀭𑀸𑀚𑀸 𑀪𑀕𑀯𑀦𑁆𑀢𑀁 ‘‘𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑀁, 𑀩𑀼𑀤𑁆𑀥𑀁 𑀯𑀦𑁆𑀤𑀸𑀫 𑀕𑁄𑀢𑀫’’𑀦𑁆𑀢𑀺, (𑀤𑀻. 𑀦𑀺. 𑁩.𑁨𑁮𑁮) 𑀆𑀬𑀲𑁆𑀫𑀸𑀧𑀺 𑀯𑀗𑁆𑀕𑀻𑀲𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 ‘‘𑀲𑀸𑀥𑀼 𑀦𑀺𑀩𑁆𑀩𑀸𑀧𑀦𑀁 𑀩𑁆𑀭𑀽𑀳𑀺, 𑀅𑀦𑀼𑀓𑀫𑁆𑀧𑀸𑀬 𑀕𑁄𑀢𑀫𑀸’’𑀢𑀺 (𑀲𑀁. 𑀦𑀺. 𑁧.𑁨𑁧𑁨). 𑀇𑀥 𑀧𑀦 𑀪𑀕𑀯𑀦𑁆𑀢𑀫𑁂𑀯. 𑀢𑁂𑀦𑀸𑀳 ‘‘𑀪𑀕𑀯𑀦𑁆𑀢𑀁 𑀕𑁄𑀢𑁆𑀢𑀯𑀲𑁂𑀦 𑀧𑀭𑀺𑀓𑀺𑀢𑁆𑀢𑁂𑀢𑀻’’𑀢𑀺. 𑀢𑀲𑁆𑀫𑀸𑀢𑀺 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀢𑁆𑀢𑀬𑀁 𑀧𑀘𑁆𑀘𑀸𑀫𑀲𑀢𑀺. 𑀏𑀢𑁆𑀣 𑀘 ‘‘𑀲𑀫𑀡𑁄’’𑀢𑀺 𑀇𑀫𑀺𑀦𑀸 𑀲𑀭𑀺𑀓𑁆𑀔𑀓𑀚𑀦𑁂𑀳𑀺 𑀪𑀕𑀯𑀢𑁄 𑀩𑀳𑀼𑀫𑀢𑀪𑀸𑀯𑁄 𑀤𑀲𑁆𑀲𑀺𑀢𑁄 𑀢𑀩𑁆𑀩𑀺𑀲𑀬𑀲𑀫𑀺𑀢𑀧𑀸𑀧𑀢𑀸𑀧𑀭𑀺𑀓𑀺𑀢𑁆𑀢𑀦𑀢𑁄, ‘‘𑀕𑁄𑀢𑀫𑁄’’𑀢𑀺 𑀇𑀫𑀺𑀦𑀸 𑀮𑁄𑀓𑀺𑀬𑀚𑀦𑁂𑀳𑀺 𑀢𑀩𑁆𑀩𑀺𑀲𑀬𑀉𑀴𑀸𑀭𑀕𑁄𑀢𑁆𑀢𑀲𑀫𑁆𑀪𑀽𑀢𑀢𑀸𑀧𑀭𑀺𑀓𑀺𑀢𑁆𑀢𑀦𑀢𑁄.

𑀲𑀓𑁆𑀬𑀲𑁆𑀲 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀲𑁆𑀲 𑀧𑀼𑀢𑁆𑀢𑁄 𑀲𑀓𑁆𑀬𑀧𑀼𑀢𑁆𑀢𑁄, 𑀇𑀫𑀺𑀦𑀸 𑀧𑀦 𑀉𑀘𑁆𑀘𑀸𑀓𑀼𑀮𑀧𑀭𑀺𑀤𑀻𑀧𑀦𑀁 𑀉𑀤𑀺𑀢𑁄𑀤𑀺𑀢𑀯𑀺𑀧𑀼𑀮𑀔𑀢𑁆𑀢𑀺𑀬𑀓𑀼𑀮𑀲𑀫𑁆𑀪𑀽𑀢𑀢𑀸𑀧𑀭𑀺𑀓𑀺𑀢𑁆𑀢𑀦𑀢𑁄. 𑀲𑀩𑁆𑀩𑀔𑀢𑁆𑀢𑀺𑀬𑀸𑀦𑀜𑁆𑀳𑀺 𑀆𑀤𑀺𑀪𑀽𑀢𑀫𑀳𑀸𑀲𑀫𑁆𑀫𑀢𑀫𑀳𑀸𑀭𑀸𑀚𑀢𑁄 𑀧𑀝𑁆𑀞𑀸𑀬 𑀅𑀲𑀫𑁆𑀪𑀺𑀦𑁆𑀦𑀁 𑀉𑀴𑀸𑀭𑀢𑀫𑀁 𑀲𑀓𑁆𑀬𑀭𑀸𑀚𑀓𑀼𑀮𑀁. 𑀬𑀣𑀸𑀳 𑁋

‘‘𑀫𑀳𑀸𑀲𑀫𑁆𑀫𑀢𑀭𑀸𑀚𑀲𑁆𑀲, 𑀯𑀁𑀲𑀚𑁄 𑀳𑀺 𑀫𑀳𑀸𑀫𑀼𑀦𑀺;

𑀓𑀧𑁆𑀧𑀸𑀤𑀺𑀲𑁆𑀫𑀺𑀜𑁆𑀳𑀺 𑀭𑀸𑀚𑀸𑀲𑀺, 𑀫𑀳𑀸𑀲𑀫𑁆𑀫𑀢𑀦𑀸𑀫𑀓𑁄’’𑀢𑀺. (𑀫𑀳𑀸𑀯𑀁𑀲𑁂 𑀤𑀼𑀢𑀺𑀬𑀧𑀭𑀺𑀘𑁆𑀙𑁂𑀤𑁂 𑀧𑀞𑀫𑀕𑀸𑀣𑀸);

𑀓𑀣𑀁 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀪𑀸𑀯𑀧𑀭𑀺𑀤𑀻𑀧𑀦𑀦𑁆𑀢𑀺 𑀆𑀳 ‘‘𑀓𑁂𑀦𑀘𑀻’’𑀢𑀺𑀆𑀤𑀺. 𑀧𑀭𑀺𑀚𑀺𑀬𑀦𑀁 𑀧𑀭𑀺𑀳𑀸𑀬𑀦𑀁 𑀧𑀸𑀭𑀺𑀚𑀼𑀜𑁆𑀜𑀁, 𑀧𑀭𑀺𑀚𑀺𑀭𑀢𑀻𑀢𑀺 𑀯𑀸 𑀧𑀭𑀺𑀚𑀺𑀡𑁆𑀡𑁄, 𑀢𑀲𑁆𑀲 𑀪𑀸𑀯𑁄 𑀧𑀸𑀭𑀺𑀚𑀼𑀜𑁆𑀜𑀁, 𑀢𑁂𑀦. 𑀜𑀸𑀢𑀺𑀧𑀸𑀭𑀺𑀚𑀼𑀜𑁆𑀜𑀪𑁄𑀕𑀧𑀸𑀭𑀺𑀚𑀼𑀜𑁆𑀜𑀸𑀤𑀺𑀦𑀸 𑀓𑁂𑀦𑀘𑀺 𑀧𑀸𑀭𑀺𑀚𑀼𑀜𑁆𑀜𑁂𑀦 𑀧𑀭𑀺𑀳𑀸𑀦𑀺𑀬𑀸 𑀅𑀦𑀪𑀺𑀪𑀽𑀢𑁄 𑀅𑀦𑀚𑁆𑀛𑁄𑀢𑁆𑀣𑀝𑁄 𑀳𑀼𑀢𑁆𑀯𑀸 𑀧𑀩𑁆𑀩𑀚𑀺𑀢𑁄𑀢𑀺 𑀅𑀢𑁆𑀣𑁄. 𑀢𑀤𑁂𑀯 𑀧𑀭𑀺𑀬𑀸𑀬𑀦𑁆𑀢𑀭𑁂𑀦 𑀯𑀺𑀪𑀸𑀯𑁂𑀢𑀼𑀁 ‘‘𑀅𑀧𑀭𑀺𑀓𑁆𑀔𑀻𑀡𑀁𑀬𑁂𑀯 𑀢𑀁 𑀓𑀼𑀮𑀁 𑀧𑀳𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀅𑀧𑀭𑀺𑀓𑁆𑀔𑀻𑀡𑀦𑁆𑀢𑀺 𑀳𑀺 𑀜𑀸𑀢𑀺𑀧𑀸𑀭𑀺𑀚𑀼𑀜𑁆𑀜𑀪𑁄𑀕𑀧𑀸𑀭𑀺𑀚𑀼𑀜𑁆𑀜𑀸𑀤𑀺𑀦𑀸 𑀓𑁂𑀦𑀘𑀺 𑀧𑀸𑀭𑀺𑀚𑀼𑀜𑁆𑀜𑁂𑀦 𑀅𑀧𑀭𑀺𑀓𑁆𑀔𑀬𑀁. 𑀲𑀤𑁆𑀥𑀸𑀬 𑀧𑀩𑁆𑀩𑀚𑀺𑀢𑁄𑀢𑀺 𑀲𑀤𑁆𑀥𑀸𑀬 𑀏𑀯 𑀧𑀩𑁆𑀩𑀚𑀺𑀢𑁄. 𑀏𑀯𑀜𑁆𑀳𑀺 ‘‘𑀓𑁂𑀦𑀘𑀻’’𑀢𑀺𑀆𑀤𑀺𑀦𑀸 𑀦𑀺𑀯𑀢𑁆𑀢𑀺𑀢𑀯𑀘𑀦𑀁 𑀲𑀽𑀧𑀧𑀦𑁆𑀦𑀁 𑀳𑁄𑀢𑀺. 𑀦𑀦𑀼 𑀘 ‘‘𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄’’𑀢𑀺 𑀇𑀤𑀁 𑀉𑀘𑁆𑀘𑀸𑀓𑀼𑀮𑀸 𑀧𑀩𑁆𑀩𑀚𑀺𑀢𑀪𑀸𑀯𑀧𑀭𑀺𑀤𑀻𑀧𑀦𑀫𑁂𑀯 𑀲𑀺𑀬𑀸 𑀢𑀤𑀢𑁆𑀣𑀲𑁆𑀲𑁂𑀯 𑀯𑀺𑀜𑁆𑀜𑀸𑀬𑀫𑀸𑀦𑀢𑁆𑀢𑀸, 𑀦 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀪𑀸𑀯𑀧𑀭𑀺𑀤𑀻𑀧𑀦𑀁 𑀢𑀤𑀢𑁆𑀣𑀲𑁆𑀲 𑀅𑀯𑀺𑀜𑁆𑀜𑀸𑀬𑀫𑀸𑀦𑀢𑁆𑀢𑀸𑀢𑀺? 𑀦 𑀔𑁄 𑀧𑀦𑁂𑀯𑀁 𑀤𑀝𑁆𑀞𑀩𑁆𑀩𑀁 𑀫𑀳𑀦𑁆𑀢𑀁 𑀜𑀸𑀢𑀺𑀧𑀭𑀺𑀯𑀝𑁆𑀝𑀁, 𑀫𑀳𑀦𑁆𑀢𑀜𑁆𑀘 𑀪𑁄𑀕𑀓𑁆𑀔𑀦𑁆𑀥𑀁 𑀧𑀳𑀸𑀬 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀪𑀸𑀯𑀲𑁆𑀲 𑀅𑀢𑁆𑀣𑀢𑁄 𑀲𑀺𑀤𑁆𑀥𑀢𑁆𑀢𑀸. 𑀢𑀣𑀸 𑀳𑀺 𑀮𑁄𑀓𑀦𑀸𑀣𑀲𑁆𑀲 𑀅𑀪𑀺𑀚𑀸𑀢𑀺𑀬𑀁 𑀢𑀲𑁆𑀲 𑀓𑀼𑀮𑀲𑁆𑀲 𑀦 𑀓𑀺𑀜𑁆𑀘𑀺 𑀧𑀸𑀭𑀺𑀚𑀼𑀜𑁆𑀜𑀁, 𑀅𑀣 𑀔𑁄 𑀯𑀼𑀟𑁆𑀠𑀺𑀬𑁂𑀯, 𑀢𑀢𑁄 𑀢𑀲𑁆𑀲 𑀲𑀫𑀺𑀤𑁆𑀥𑀢𑀫𑀪𑀸𑀯𑁄 𑀮𑁄𑀓𑁂 𑀧𑀸𑀓𑀝𑁄 𑀧𑀜𑁆𑀜𑀸𑀢𑁄 𑀳𑁄𑀢𑀺, 𑀢𑀲𑁆𑀫𑀸 ‘‘𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄’’𑀢𑀺 𑀏𑀢𑁆𑀢𑀓𑁂𑀬𑁂𑀯 𑀯𑀼𑀢𑁆𑀢𑁂 𑀢𑀣𑀸 𑀲𑀫𑀺𑀤𑁆𑀥𑀢𑀫𑀁 𑀓𑀼𑀮𑀁 𑀧𑀳𑀸𑀬 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀪𑀸𑀯𑁄 𑀲𑀺𑀤𑁆𑀥𑁄𑀬𑁂𑀯𑀸𑀢𑀺, 𑀇𑀫𑀁 𑀧𑀭𑀺𑀳𑀸𑀭𑀁 ‘‘𑀓𑁂𑀦𑀘𑀺 𑀧𑀸𑀭𑀺𑀚𑀼𑀜𑁆𑀜𑁂𑀦𑀸’’𑀢𑀺𑀆𑀤𑀺𑀦𑀸 𑀯𑀺𑀪𑀸𑀯𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀢𑁄 𑀧𑀭𑀦𑁆𑀢𑀺 ‘‘𑀓𑁄𑀲𑀮𑁂𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄’’𑀢𑀺𑀆𑀤𑀺𑀯𑀘𑀦𑀁.

‘‘𑀲𑀸𑀥𑀼 𑀥𑀫𑁆𑀫𑀭𑀼𑀘𑀺 𑀭𑀸𑀚𑀸, 𑀲𑀸𑀥𑀼 𑀧𑀜𑁆𑀜𑀸𑀡𑀯𑀸 𑀦𑀭𑁄;

𑀲𑀸𑀥𑀼 𑀫𑀺𑀢𑁆𑀢𑀸𑀦𑀫𑀤𑀼𑀩𑁆𑀪𑁄, 𑀧𑀸𑀧𑀲𑁆𑀲𑀸𑀓𑀭𑀡𑀁 𑀲𑀼𑀔’’𑀦𑁆𑀢𑀺. 𑀆𑀤𑀻𑀲𑀼 𑁋

𑀯𑀺𑀬 𑀲𑀸𑀥𑀼𑀲𑀤𑁆𑀤𑁄 𑀇𑀥 𑀲𑀼𑀦𑁆𑀤𑀭𑀢𑁆𑀣𑁄𑀢𑀺 𑀆𑀳 ‘‘𑀲𑀼𑀦𑁆𑀤𑀭𑀁 𑀔𑁄 𑀧𑀦𑀸’’𑀢𑀺. 𑀔𑁄𑀢𑀺 𑀅𑀯𑀥𑀸𑀭𑀡𑀢𑁆𑀣𑁂 𑀦𑀺𑀧𑀸𑀢𑁄, 𑀧𑀦𑀸𑀢𑀺 𑀧𑀓𑁆𑀔𑀦𑁆𑀢𑀭𑀢𑁆𑀣𑁂. 𑀏𑀯𑀁 𑀲𑀸𑀢𑁆𑀣𑀓𑀢𑀸𑀯𑀺𑀜𑁆𑀜𑀸𑀧𑀦𑀢𑁆𑀣𑀜𑁆𑀳𑀺 𑀲𑀁𑀯𑀡𑁆𑀡𑀦𑀸𑀬𑀫𑁂𑀢𑁂𑀲𑀁 𑀕𑀳𑀡𑀁. 𑀲𑀼𑀦𑁆𑀤𑀭𑀦𑁆𑀢𑀺 𑀘 𑀪𑀤𑁆𑀤𑀓𑀁, 𑀪𑀤𑁆𑀤𑀓𑀢𑀸 𑀘 𑀧𑀲𑁆𑀲𑀦𑁆𑀢𑀸𑀦𑀁 𑀳𑀺𑀢𑀲𑀼𑀔𑀸𑀯𑀳𑀪𑀸𑀯𑁂𑀦𑀸𑀢𑀺 𑀯𑀼𑀢𑁆𑀢𑀁 ‘‘𑀅𑀢𑁆𑀣𑀸𑀯𑀳𑀁 𑀲𑀼𑀔𑀸𑀯𑀳’’𑀦𑁆𑀢𑀺. 𑀅𑀢𑁆𑀣𑁄 𑀘𑁂𑀢𑁆𑀣 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑀯𑀲𑁂𑀦 𑀢𑀺𑀯𑀺𑀥𑀁 𑀳𑀺𑀢𑀁 𑀲𑀼𑀔𑀫𑁆𑀧𑀺 𑀢𑀣𑁂𑀯 𑀢𑀺𑀯𑀺𑀥𑀁 𑀲𑀼𑀔𑀁.

𑀢𑀣𑀸𑀭𑀽𑀧𑀸𑀦𑀦𑁆𑀢𑀺 𑀢𑀸𑀤𑀺𑀲𑀸𑀦𑀁, 𑀅𑀬𑀁 𑀲𑀤𑁆𑀤𑀢𑁄 𑀅𑀢𑁆𑀣𑁄. 𑀅𑀢𑁆𑀣𑀫𑀢𑁆𑀢𑀁 𑀧𑀦 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀭𑀽𑀧𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀸𑀤𑀺𑀲𑁂𑀳𑀺 𑀘 𑀕𑀼𑀡𑁂𑀳𑀺 𑀪𑀕𑀯𑀸 𑀲𑀫𑀦𑁆𑀦𑀸𑀕𑀢𑁄 𑀘𑀢𑀼𑀧𑁆𑀧𑀫𑀸𑀡𑀺𑀓𑀲𑁆𑀲 𑀮𑁄𑀓𑀲𑁆𑀲 𑀲𑀩𑁆𑀩𑀓𑀸𑀮𑀫𑁆𑀧𑀺-𑀅𑀘𑁆𑀘𑀦𑁆𑀢𑀸𑀬-𑀲𑀤𑁆𑀥𑀸𑀬-𑀧𑀲𑀸𑀤𑀦𑀻𑀬𑁄 𑀢𑁂𑀲𑀁 𑀬𑀣𑀸𑀪𑀽𑀢𑀲𑀪𑀸𑀯𑀢𑁆𑀢𑀸, 𑀢𑀸𑀤𑀺𑀲𑁂𑀳𑀺 𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀪𑀸𑀯𑀁 𑀲𑀦𑁆𑀥𑀸𑀬 ‘‘𑀢𑀣𑀸𑀭𑀽𑀧𑀸𑀦𑀁 𑀅𑀭𑀳𑀢’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸𑀭𑀽𑀧𑁄’’𑀢𑀺𑀆𑀤𑀺𑀫𑀸𑀳. 𑀮𑀤𑁆𑀥𑀲𑀤𑁆𑀥𑀸𑀦𑀦𑁆𑀢𑀺 𑀮𑀤𑁆𑀥𑀲𑀤𑁆𑀤𑀳𑀸𑀦𑀁, 𑀧𑀭𑀚𑀦𑀲𑁆𑀲 𑀲𑀤𑁆𑀥𑀁 𑀧𑀝𑀺𑀮𑀪𑀦𑁆𑀢𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀮𑀤𑁆𑀥𑀲𑀤𑁆𑀤𑀸𑀦𑀦𑁆𑀢𑀺 𑀯𑀸 𑀧𑀝𑀺𑀮𑀤𑁆𑀥𑀓𑀺𑀢𑁆𑀢𑀺𑀲𑀤𑁆𑀤𑀸𑀦𑀁, 𑀏𑀢𑁂𑀦 ‘‘𑀅𑀭𑀳𑀢’’𑀦𑁆𑀢𑀺 𑀧𑀤𑀲𑁆𑀲 𑀅𑀭𑀳𑀦𑁆𑀢𑀸𑀦𑀦𑁆𑀢𑀺 𑀅𑀢𑁆𑀣𑁄, 𑀅𑀭𑀳𑀦𑁆𑀢𑀲𑀫𑀜𑁆𑀜𑀸𑀬 𑀘 𑀧𑀸𑀓𑀝𑀪𑀸𑀯𑁄 𑀤𑀲𑁆𑀲𑀺𑀢𑁄, 𑀅𑀧𑀺𑀘 ‘‘𑀬𑀣𑀸𑀭𑀽𑀧𑁄 𑀲𑁄 𑀪𑀯𑀁 𑀕𑁄𑀢𑀫𑁄’’𑀢𑀺 𑀇𑀫𑀺𑀦𑀸 ‘‘𑀢𑀣𑀸𑀭𑀽𑀧𑀸𑀦’’𑀦𑁆𑀢𑀺 𑀧𑀤𑀲𑁆𑀲 𑀅𑀦𑀺𑀬𑀫𑀯𑀲𑁂𑀦 𑀅𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀲𑀭𑀽𑀧𑀦𑀺𑀬𑀫𑀯𑀲𑁂𑀦𑀧𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸𑀪𑀼𑀘𑁆𑀘𑀕𑀼𑀡𑀸𑀥𑀺𑀕𑀫𑁂𑀦 𑀮𑁄𑀓𑁂 𑀅𑀭𑀳𑀦𑁆𑀢𑁄𑀢𑀺 𑀮𑀤𑁆𑀥𑀲𑀤𑁆𑀥𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀇𑀤𑀫𑁆𑀧𑀺 𑀳𑀺 ‘‘𑀢𑀣𑀸𑀭𑀽𑀧𑀸𑀦’’𑀦𑁆𑀢𑀺 𑀧𑀤𑀲𑁆𑀲𑁂𑀯 𑀅𑀢𑁆𑀣𑀤𑀲𑁆𑀲𑀦𑀁, 𑀅𑀬𑀫𑁂𑀯 𑀘 𑀦𑀬𑁄 𑀆𑀘𑀭𑀺𑀬𑁂𑀳𑀺 𑀅𑀥𑀺𑀧𑁆𑀧𑁂𑀢𑁄 𑀇𑀥 𑀝𑀻𑀓𑀸𑀬𑀁, (𑀤𑀻. 𑀦𑀺. 𑀝𑀻. 𑁧.𑁨𑁫𑁫) 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀜𑁆𑀘 𑀢𑀣𑁂𑀯 𑀯𑀼𑀢𑁆𑀢𑀢𑁆𑀢𑀸. ‘‘𑀬𑀣𑀸𑀭𑀽𑀧𑀸 𑀢𑁂 𑀪𑀯𑀦𑁆𑀢𑁄 𑀅𑀭𑀳𑀦𑁆𑀢𑁄’’𑀢𑀺 𑀅𑀯𑀢𑁆𑀯𑀸 ‘‘𑀬𑀣𑀸𑀭𑀽𑀧𑁄 𑀲𑁄 𑀪𑀯𑀁 𑀕𑁄𑀢𑀫𑁄’’𑀢𑀺 𑀯𑀘𑀦𑀁 𑀪𑀕𑀯𑀢𑀺𑀬𑁂𑀯 𑀕𑀭𑀼𑀕𑀸𑀭𑀯𑀯𑀲𑁂𑀦 ‘‘𑀢𑀣𑀸𑀭𑀽𑀧𑀸𑀦𑀁 𑀅𑀭𑀳𑀢’’𑀦𑁆𑀢𑀺 𑀧𑀼𑀣𑀼𑀯𑀘𑀦𑀦𑀺𑀤𑁆𑀤𑀺𑀝𑁆𑀞𑀪𑀸𑀯𑀯𑀺𑀜𑁆𑀜𑀸𑀧𑀦𑀢𑁆𑀣𑀁. 𑀅𑀢𑁆𑀢𑀦𑀺, 𑀕𑀭𑀽𑀲𑀼 𑀘 𑀳𑀺 𑀩𑀳𑀼𑀯𑀘𑀦𑀁 𑀇𑀘𑁆𑀙𑀦𑁆𑀢𑀺 𑀲𑀤𑁆𑀤𑀯𑀺𑀤𑀽. ‘‘𑀬𑀣𑀸𑀪𑀼𑀘𑁆𑀘…𑀧𑁂… 𑀅𑀭𑀳𑀢’’𑀦𑁆𑀢𑀺 𑀇𑀫𑀺𑀦𑀸 𑀘 𑀥𑀫𑁆𑀫𑀧𑁆𑀧𑀫𑀸𑀡𑀸𑀦𑀁, 𑀮𑀽𑀔𑀧𑁆𑀧𑀫𑀸𑀡𑀸𑀦𑀜𑁆𑀘 𑀲𑀢𑁆𑀢𑀸𑀦𑀁 𑀪𑀕𑀯𑀢𑁄 𑀧𑀲𑀸𑀤𑀸𑀯𑀳𑀢𑀁 𑀬𑀣𑀸𑀭𑀼𑀢𑀢𑁄 𑀤𑀲𑁆𑀲𑁂𑀢𑀺 𑀅𑀭𑀳𑀦𑁆𑀢𑀪𑀸𑀯𑀲𑁆𑀲 𑀢𑁂𑀲𑀜𑁆𑀜𑁂𑀯 𑀬𑀣𑀸𑀭𑀳𑀁 𑀯𑀺𑀲𑀬𑀢𑁆𑀢𑀸, 𑀢𑀁𑀤𑀲𑁆𑀲𑀦𑁂𑀦 𑀧𑀦 𑀇𑀢𑀭𑁂𑀲𑀫𑁆𑀧𑀺 𑀭𑀽𑀧𑀧𑁆𑀧𑀫𑀸𑀡𑀖𑁄𑀲𑀧𑁆𑀧𑀫𑀸𑀡𑀸𑀦𑀁 𑀧𑀲𑀸𑀤𑀸𑀯𑀳𑀢𑀸 𑀤𑀲𑁆𑀲𑀺𑀢𑀸𑀬𑁂𑀯 𑀢𑀤𑀯𑀺𑀦𑀸𑀪𑀸𑀯𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀲𑀸𑀤𑀲𑁄𑀫𑁆𑀫𑀸𑀦𑀻𑀢𑀺 𑀧𑀲𑀦𑁆𑀦𑀸𑀦𑀺, 𑀲𑀻𑀢𑀮𑀸𑀦𑀺 𑀘, 𑀧𑀲𑀸𑀤𑀯𑀲𑁂𑀦 𑀯𑀸 𑀲𑀻𑀢𑀮𑀸𑀦𑀺, 𑀅𑀦𑁂𑀦 𑀧𑀲𑀦𑁆𑀦𑀫𑀦𑀢𑀁 𑀤𑀲𑁆𑀲𑁂𑀢𑀺. ‘‘𑀤𑀲𑁆𑀲𑀦’’𑀦𑁆𑀢𑀺 𑀯𑀼𑀢𑁆𑀢𑁂𑀧𑀺 𑀢𑀤𑀼𑀢𑁆𑀢𑀭𑀺 𑀓𑀢𑁆𑀢𑀩𑁆𑀩𑀢𑀸𑀲𑀫𑁆𑀪𑀯𑀢𑁄 𑀅𑀬𑀁 𑀲𑀫𑁆𑀪𑀸𑀯𑀦𑀢𑁆𑀣𑁄 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀤𑀲𑁆𑀲𑀦𑀫𑀢𑁆𑀢𑀫𑁆𑀧𑀺 𑀲𑀸𑀥𑀼 𑀳𑁄𑀢𑀻’’𑀢𑀺. 𑀇𑀢𑀭𑀣𑀸 𑀳𑀺 ‘‘𑀤𑀲𑁆𑀲𑀦𑀜𑁆𑀜𑁂𑀯 𑀲𑀸𑀥𑀼, 𑀦 𑀢𑀤𑀼𑀢𑁆𑀢𑀭𑀺 𑀓𑀭𑀡’’𑀦𑁆𑀢𑀺 𑀅𑀦𑀥𑀺𑀧𑁆𑀧𑁂𑀢𑀢𑁆𑀣𑁄 𑀆𑀧𑀚𑁆𑀚𑀢𑀺, 𑀲𑀫𑁆𑀪𑀸𑀯𑀦𑀢𑁆𑀣𑁄 𑀘𑁂𑀢𑁆𑀣 𑀧𑀺-𑀲𑀤𑁆𑀤𑁄, 𑀅𑀧𑀺-𑀲𑀤𑁆𑀤𑁄 𑀯𑀸 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄. ‘‘𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀻’’𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 ‘‘𑀅𑀩𑁆𑀪𑀼𑀕𑁆𑀕𑀢𑁄’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑀫𑀼𑀧𑀕𑀢𑁄, 𑀢𑀲𑁆𑀫𑀸 𑀅𑀬𑀁 ‘‘𑀲𑀸𑀥𑀼 𑀳𑁄𑀢𑀻’’𑀢𑀺 𑀇𑀥 𑀇𑀢𑀺-𑀲𑀤𑁆𑀤𑁄 ‘‘𑀩𑁆𑀭𑀸𑀳𑁆𑀫𑀡𑁄 𑀧𑁄𑀓𑁆𑀔𑀭𑀲𑀸𑀢𑀻 𑀅𑀫𑁆𑀩𑀝𑁆𑀞𑀁 𑀫𑀸𑀡𑀯𑀁 𑀆𑀫𑀦𑁆𑀢𑁂𑀲𑀻’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀚𑁆𑀛𑀺𑀢𑀩𑁆𑀩𑁄, ‘‘𑀅𑀚𑁆𑀛𑀸𑀲𑀬𑀁 𑀓𑀢𑁆𑀯𑀸’’𑀢𑀺 𑀘 𑀧𑀸𑀞𑀲𑁂𑀲𑁄 𑀢𑀤𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀬𑀫𑀸𑀦𑀢𑁆𑀢𑀸. 𑀬𑀲𑁆𑀲 𑀳𑀺 𑀅𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺, 𑀲𑀤𑁆𑀤𑁄 𑀦 𑀧𑀬𑀼𑀚𑁆𑀚𑀢𑀺, 𑀲𑁄 ‘‘𑀧𑀸𑀞𑀲𑁂𑀲𑁄’’𑀢𑀺 𑀯𑀼𑀘𑁆𑀘𑀢𑀺, 𑀇𑀫𑀫𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑁄 𑀆𑀳 ‘‘𑀤𑀲𑁆𑀲𑀦𑀫𑀢𑁆𑀢𑀫𑁆𑀧𑀺 𑀲𑀸𑀥𑀼 𑀳𑁄𑀢𑀻𑀢𑀺 𑀏𑀯𑀁 𑀅𑀚𑁆𑀛𑀸𑀲𑀬𑀁 𑀓𑀢𑁆𑀯𑀸’’𑀢𑀺. 𑀫𑀽𑀮𑀧𑀡𑁆𑀡𑀸𑀲𑀓𑁂 𑀘𑀽𑀴𑀲𑀻𑀳𑀦𑀸𑀤𑀲𑀼𑀢𑁆𑀢𑀝𑁆𑀞𑀓𑀣𑀸𑀬 (𑀫. 𑀦𑀺. 𑀅𑀝𑁆𑀞. 𑁧.𑁧𑁪𑁪) 𑀆𑀕𑀢𑀁 𑀓𑁄𑀲𑀺𑀬𑀲𑀓𑀼𑀡𑀯𑀢𑁆𑀣𑀼 𑀘𑁂𑀢𑁆𑀣 𑀓𑀣𑁂𑀢𑀩𑁆𑀩𑀁.

𑀅𑀫𑁆𑀩𑀝𑁆𑀞𑀫𑀸𑀡𑀯𑀓𑀣𑀸𑀯𑀡𑁆𑀡𑀦𑀸

𑁨𑁫𑁬. ‘‘𑀅𑀚𑁆𑀛𑀸𑀬𑀓𑁄’’𑀢𑀺 𑀇𑀤𑀁 𑀧𑀞𑀫𑀧𑀓𑀢𑀺𑀬𑀸 𑀕𑀭𑀳𑀸𑀯𑀘𑀦𑀫𑁂𑀯, 𑀤𑀼𑀢𑀺𑀬𑀧𑀓𑀢𑀺𑀬𑀸 𑀧𑀲𑀁𑀲𑀸𑀯𑀘𑀦𑀁 𑀓𑀢𑁆𑀯𑀸 𑀯𑁄𑀳𑀭𑀦𑁆𑀢𑀺 𑀬𑀣𑀸 𑀢𑀁 ‘‘𑀧𑀼𑀭𑀺𑀲𑁄 𑀦𑀭𑁄’’𑀢𑀺 𑀤𑀲𑁆𑀲𑁂𑀢𑀼𑀁 𑀅𑀕𑁆𑀕𑀜𑁆𑀜𑀲𑀼𑀢𑁆𑀢𑀧𑀤 (𑀤𑀻. 𑀦𑀺. 𑁩.𑁧𑁩𑁨) 𑀫𑀼𑀤𑀸𑀳𑀝𑀁. 𑀢𑀢𑁆𑀣 𑀇𑀫𑁂𑀢𑀺 𑀛𑀸𑀬𑀓𑀦𑀸𑀫𑁂𑀦 𑀲𑀫𑀜𑁆𑀜𑀺𑀢𑀸 𑀚𑀦𑀸. 𑀦 𑀛𑀸𑀬𑀦𑁆𑀢𑀻𑀢𑀺 𑀧𑀡𑁆𑀡𑀓𑀼𑀝𑀻𑀲𑀼 𑀛𑀸𑀦𑀁 𑀦 𑀅𑀧𑁆𑀧𑁂𑀦𑁆𑀢𑀺 𑀦 𑀦𑀺𑀧𑁆𑀨𑀸𑀤𑁂𑀦𑁆𑀢𑀺, 𑀕𑀸𑀫𑀦𑀺𑀕𑀫𑀲𑀸𑀫𑀦𑁆𑀢𑀁 𑀑𑀲𑀭𑀺𑀢𑁆𑀯𑀸 𑀯𑁂𑀤𑀕𑀦𑁆𑀣𑁂 𑀓𑀭𑁄𑀦𑁆𑀢𑀸𑀯 𑀅𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀁 𑀧𑀦𑁂𑀢𑁂𑀲𑀁 𑀩𑁆𑀭𑀸𑀳𑁆𑀫𑀡𑀛𑀸𑀬𑀓𑀲𑀗𑁆𑀔𑀸𑀢𑀁 𑀧𑀞𑀫𑀤𑀼𑀢𑀺𑀬𑀦𑀸𑀫𑀁 𑀉𑀧𑀸𑀤𑀸𑀬 𑀢𑀢𑀺𑀬𑀫𑁂𑀯 𑀚𑀸𑀢𑀦𑁆𑀢𑀺 𑀆𑀳 ‘‘𑀅𑀚𑁆𑀛𑀸𑀬𑀓𑀸𑀢𑁆𑀯𑁂𑀯 𑀢𑀢𑀺𑀬𑀁 𑀅𑀓𑁆𑀔𑀭𑀁 𑀉𑀧𑀦𑀺𑀩𑁆𑀩𑀢𑁆𑀢’’𑀦𑁆𑀢𑀺, 𑀅𑀓𑁆𑀔𑀭𑀦𑁆𑀢𑀺 𑀘 𑀦𑀺𑀭𑀼𑀢𑁆𑀢𑀺 𑀲𑀫𑀜𑁆𑀜𑀸. 𑀲𑀸 𑀳𑀺 𑀢𑀲𑁆𑀫𑀺𑀁𑀬𑁂𑀯 𑀦𑀺𑀭𑀼𑀴𑁆𑀳𑀪𑀸𑀯𑁂𑀦 𑀅𑀜𑁆𑀜𑀢𑁆𑀣 𑀅𑀲𑀜𑁆𑀘𑀭𑀡𑀢𑁄 ‘‘𑀅𑀓𑁆𑀔𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀫𑀦𑁆𑀢𑁂 𑀧𑀭𑀺𑀯𑀢𑁆𑀢𑁂𑀢𑀻𑀢𑀺 𑀯𑁂𑀤𑁂 𑀲𑀚𑁆𑀛𑀸𑀬𑀢𑀺, 𑀧𑀭𑀺𑀬𑀸𑀧𑀼𑀡𑀸𑀢𑀻𑀢𑀺 𑀅𑀢𑁆𑀣𑁄. 𑀇𑀥 𑀳𑀺 𑀅𑀥𑀺𑀆𑀧𑀼𑀩𑁆𑀩𑀇-𑀲𑀤𑁆𑀤𑀯𑀲𑁂𑀦 𑀧𑀤𑀲𑀦𑁆𑀥𑀺, 𑀇𑀢𑀭𑀢𑁆𑀣 𑀧𑀦 𑀛𑁂-𑀲𑀤𑁆𑀤𑀯𑀲𑁂𑀦. 𑀫𑀦𑁆𑀢𑁂 𑀥𑀸𑀭𑁂𑀢𑀻𑀢𑀺 𑀬𑀣𑀸𑀅𑀥𑀻𑀢𑁂 𑀫𑀦𑁆𑀢𑁂 𑀅𑀲𑀫𑁆𑀫𑀽𑀴𑁆𑀳𑁂 𑀓𑀢𑁆𑀯𑀸 𑀳𑀤𑀬𑁂 𑀞𑀧𑁂𑀢𑀺.

𑀆𑀣𑀩𑁆𑀩𑀡𑀯𑁂𑀤𑁄 𑀧𑀭𑀽𑀧𑀖𑀸𑀢𑀓𑀭𑀢𑁆𑀢𑀸 𑀲𑀸𑀥𑀽𑀦𑀫𑀧𑀭𑀺𑀪𑁄𑀕𑁄𑀢𑀺 𑀓𑀢𑁆𑀯𑀸 ‘‘𑀇𑀭𑀼𑀯𑁂𑀤𑀬𑀚𑀼𑀯𑁂𑀤𑀲𑀸𑀫𑀯𑁂𑀤𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀇𑀘𑁆𑀘𑀦𑁆𑀢𑁂 𑀣𑁄𑀫𑀻𑀬𑀦𑁆𑀢𑁂 𑀤𑁂𑀯𑀸 𑀏𑀢𑀸𑀬𑀸𑀢𑀺 𑀇𑀭𑀼 𑀇𑀘-𑀥𑀸𑀢𑀼𑀯𑀲𑁂𑀦 𑀘-𑀓𑀸𑀭𑀲𑁆𑀲 𑀭-𑀓𑀸𑀭𑀁 𑀓𑀢𑁆𑀯𑀸, 𑀇𑀢𑁆𑀣𑀺𑀮𑀺𑀗𑁆𑀕𑁄𑀬𑀁. 𑀬𑀚𑁆𑀚𑀦𑁆𑀢𑁂 𑀧𑀼𑀚𑁆𑀚𑀦𑁆𑀢𑁂 𑀤𑁂𑀯𑀸 𑀅𑀦𑁂𑀦𑀸𑀢𑀺 𑀬𑀚𑀼 𑀧𑀼𑀦𑁆𑀦𑀧𑀼𑀁𑀲𑀓𑀮𑀺𑀗𑁆𑀕𑀯𑀲𑁂𑀦. 𑀲𑁄𑀬𑀦𑁆𑀢𑀺 𑀅𑀦𑁆𑀢𑀁 𑀓𑀭𑁄𑀦𑁆𑀢𑀺, 𑀲𑀸𑀬𑀦𑁆𑀢𑀺 𑀯𑀸 𑀢𑀦𑀼𑀁 𑀓𑀭𑁄𑀦𑁆𑀢𑀺 𑀧𑀸𑀧𑀫𑀦𑁂𑀦𑀸𑀢𑀺 𑀲𑀸𑀫𑀁 𑀲𑁄-𑀥𑀸𑀢𑀼𑀧𑀓𑁆𑀔𑁂 𑀑-𑀓𑀸𑀭𑀲𑁆𑀲 𑀆-𑀓𑀸𑀭𑀁 𑀓𑀢𑁆𑀯𑀸. 𑀯𑀺𑀤𑀦𑁆𑀢𑀺 𑀥𑀫𑁆𑀫𑀁, 𑀓𑀫𑁆𑀫𑀁 𑀯𑀸 𑀏𑀢𑁂𑀳𑀻𑀢𑀺 𑀯𑁂𑀤𑀸, 𑀢𑁂 𑀏𑀯 𑀫𑀦𑁆𑀢𑀸 ‘‘𑀲𑀼𑀕𑀢𑀺𑀬𑁄𑀧𑀺 𑀫𑀼𑀦𑀦𑁆𑀢𑀺, 𑀲𑀼𑀬𑁆𑀬𑀦𑁆𑀢𑀺 𑀘 𑀏𑀢𑁂𑀳𑀻’’𑀢𑀺 𑀓𑀢𑁆𑀯𑀸. 𑀧𑀳𑀭𑀡𑀁 𑀲𑀗𑁆𑀖𑀝𑁆𑀝𑀦𑀁 𑀧𑀳𑀢𑀁, 𑀑𑀝𑁆𑀞𑀸𑀦𑀁 𑀧𑀳𑀢𑀁 𑀢𑀣𑀸, 𑀢𑀲𑁆𑀲 𑀓𑀭𑀡𑀯𑀲𑁂𑀦, 𑀑𑀝𑁆𑀞𑀸𑀦𑀺 𑀘𑀸𑀮𑁂𑀢𑁆𑀯𑀸 𑀧𑀕𑀼𑀡𑀪𑀸𑀯𑀓𑀭𑀡𑀯𑀲𑁂𑀦 𑀧𑀸𑀭𑀁 𑀕𑀢𑁄, 𑀦 𑀅𑀢𑁆𑀣𑀯𑀺𑀪𑀸𑀯𑀦𑀯𑀲𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀸𑀭𑀕𑀽𑀢𑀺 𑀘 𑀦𑀺𑀘𑁆𑀘𑀲𑀸𑀧𑁂𑀓𑁆𑀔𑀢𑀸𑀬 𑀓𑀺𑀢𑀦𑁆𑀢𑀲𑀫𑀸𑀲𑁄.

‘‘𑀲𑀳 𑀦𑀺𑀖𑀡𑁆𑀝𑀼𑀦𑀸’’𑀢𑀺𑀆𑀤𑀺𑀦𑀸 𑀬𑀣𑀸𑀯𑀸𑀓𑁆𑀬𑀁 𑀯𑀺𑀪𑀢𑁆𑀬𑀦𑁆𑀢𑀯𑀲𑁂𑀦 𑀦𑀺𑀩𑁆𑀩𑀘𑀦𑀤𑀲𑁆𑀲𑀦𑀁. 𑀦𑀺𑀖𑀡𑁆𑀝𑀼𑀭𑀼𑀓𑁆𑀔𑀸𑀤𑀻𑀦𑀦𑁆𑀢𑀺 𑀦𑀺𑀖𑀡𑁆𑀝𑀼 𑀦𑀸𑀫 𑀭𑀼𑀓𑁆𑀔𑀯𑀺𑀲𑁂𑀲𑁄, 𑀢𑀤𑀸𑀤𑀺𑀓𑀸𑀦𑀫𑀢𑁆𑀣𑀸𑀦𑀦𑁆𑀢𑀺 𑀅𑀢𑁆𑀣𑁄, 𑀏𑀢𑁂𑀦 𑀦𑀺𑀖𑀡𑁆𑀝𑀼𑀭𑀼𑀓𑁆𑀔𑀧𑀭𑀺𑀬𑀸𑀬𑀁 𑀆𑀤𑀺𑀁 𑀓𑀢𑁆𑀯𑀸 𑀢𑀧𑁆𑀧𑀫𑀼𑀔𑁂𑀦 𑀲𑁂𑀲𑀧𑀭𑀺𑀬𑀸𑀬𑀸𑀦𑀁 𑀢𑀢𑁆𑀣 𑀤𑀲𑁆𑀲𑀺𑀢𑀢𑁆𑀢𑀸 𑀲𑁄 𑀕𑀦𑁆𑀣𑁄 𑀦𑀺𑀖𑀡𑁆𑀝𑀼 𑀦𑀸𑀫 𑀬𑀣𑀸 𑀢𑀁 ‘‘𑀧𑀸𑀭𑀸𑀚𑀺𑀓𑀓𑀡𑁆𑀟𑁄, 𑀓𑀼𑀲𑀮𑀢𑁆𑀢𑀺𑀓𑁄’’𑀢𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄 𑀇𑀫𑀺𑀦𑀸 𑀬𑀣𑀸𑀭𑀼𑀢𑀫𑁂𑀯 𑀢𑀤𑀢𑁆𑀣𑀲𑁆𑀲 𑀅𑀥𑀺𑀕𑀢𑀢𑁆𑀢𑀸. 𑀆𑀘𑀭𑀺𑀬𑀸 𑀧𑀦 𑀏𑀯𑀁 𑀯𑀤𑀦𑁆𑀢𑀺 ‘‘𑀯𑀘𑀦𑀻𑀬𑀯𑀸𑀘𑀓𑀪𑀸𑀯𑁂𑀦 𑀅𑀢𑁆𑀣𑀁, 𑀲𑀤𑁆𑀤𑀜𑁆𑀘 𑀦𑀺𑀔𑀟𑀢𑀺 𑀪𑀺𑀦𑁆𑀤𑀢𑀺 𑀯𑀺𑀪𑀚𑁆𑀚 𑀤𑀲𑁆𑀲𑁂𑀢𑀻𑀢𑀺 𑀦𑀺𑀔𑀡𑁆𑀟𑀼, 𑀲𑁄 𑀏𑀯 𑀔-𑀓𑀸𑀭𑀲𑁆𑀲 𑀖-𑀓𑀸𑀭𑀁 𑀓𑀢𑁆𑀯𑀸 ‘𑀦𑀺𑀖𑀡𑁆𑀟𑀽’𑀢𑀺 𑀯𑀼𑀢𑁆𑀢𑁄’’𑀢𑀺 (𑀤𑀻. 𑀦𑀺. 𑀝𑀻. 𑁧.𑁨𑁫𑁬), 𑀢𑀤𑁂𑀢𑀁 𑀅𑀝𑁆𑀞𑀓𑀣𑀸𑀦𑀬𑀢𑁄 𑀅𑀜𑁆𑀜𑀦𑀬𑀤𑀲𑁆𑀲𑀦𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀇𑀢𑀭𑀣𑀸 𑀳𑀺 𑀲𑁄 𑀅𑀝𑁆𑀞𑀓𑀣𑀸𑀬 𑀯𑀺𑀭𑁄𑀥𑁄 𑀲𑀺𑀬𑀸, 𑀯𑀺𑀘𑀸𑀭𑁂𑀢𑀩𑁆𑀩𑀫𑁂𑀢𑀁. 𑀅𑀓𑁆𑀔𑀭𑀘𑀺𑀦𑁆𑀢𑀓𑀸 𑀧𑀦 𑀏𑀯𑀫𑀺𑀘𑁆𑀙𑀦𑁆𑀢𑀺 ‘‘𑀢𑀢𑁆𑀣 𑀢𑀢𑁆𑀣𑀸𑀕𑀢𑀸𑀦𑀺 𑀦𑀸𑀫𑀸𑀦𑀺 𑀦𑀺𑀲𑁆𑀲𑁂𑀲𑀢𑁄 𑀖𑀝𑁂𑀦𑁆𑀢𑀺 𑀭𑀸𑀲𑀺𑀁 𑀓𑀭𑁄𑀦𑁆𑀢𑀺 𑀏𑀢𑁆𑀣𑀸𑀢𑀺 𑀦𑀺𑀖𑀡𑁆𑀝𑀼 𑀦𑀺𑀕𑁆𑀕𑀳𑀺𑀢𑀸𑀕𑀫𑁂𑀦𑀸’’𑀢𑀺. 𑀯𑁂𑀯𑀘𑀦𑀧𑁆𑀧𑀓𑀸𑀲𑀓𑀦𑁆𑀢𑀺 𑀧𑀭𑀺𑀬𑀸𑀬𑀲𑀤𑁆𑀤𑀤𑀻𑀧𑀓𑀁, 𑀏𑀓𑁂𑀓𑀲𑁆𑀲 𑀅𑀢𑁆𑀣𑀲𑁆𑀲 𑀅𑀦𑁂𑀓𑀧𑀭𑀺𑀬𑀸𑀬𑀯𑀘𑀦𑀯𑀺𑀪𑀸𑀯𑀓𑀦𑁆𑀢𑀺 𑀅𑀢𑁆𑀣𑁄. 𑀦𑀺𑀤𑀲𑁆𑀲𑀦𑀫𑀢𑁆𑀢𑀜𑁆𑀘𑁂𑀢𑀁 𑀅𑀦𑁂𑀓𑁂𑀲𑀫𑁆𑀧𑀺 𑀅𑀢𑁆𑀣𑀸𑀦𑀁 𑀏𑀓𑀲𑀤𑁆𑀤𑀯𑀘𑀦𑀻𑀬𑀢𑀸𑀯𑀺𑀪𑀸𑀯𑀦𑀯𑀲𑁂𑀦𑀧𑀺 𑀢𑀲𑁆𑀲 𑀕𑀦𑁆𑀣𑀲𑁆𑀲 𑀧𑀯𑀢𑁆𑀢𑀢𑁆𑀢𑀸. 𑀓𑁄 𑀧𑀦𑁂𑀲𑁄𑀢𑀺? 𑀏𑀢𑀭𑀳𑀺 𑀦𑀸𑀫𑀮𑀺𑀗𑁆𑀕𑀸𑀦𑀼𑀲𑀸𑀲𑀦𑀭𑀢𑀦𑀫𑀸𑀮𑀸𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀤𑀺. 𑀯𑀘𑀻𑀪𑁂𑀤𑀸𑀤𑀺𑀮𑀓𑁆𑀔𑀡𑀸 𑀓𑀺𑀭𑀺𑀬𑀸 𑀓𑀧𑁆𑀧𑀻𑀬𑀢𑀺 𑀏𑀢𑁂𑀦𑀸𑀢𑀺 𑀓𑀺𑀭𑀺𑀬𑀸𑀓𑀧𑁆𑀧𑁄, 𑀢𑀣𑁂𑀯 𑀯𑀺𑀯𑀺𑀥𑀁 𑀓𑀧𑁆𑀧𑀻𑀬𑀢𑀺 𑀏𑀢𑁂𑀦𑀸𑀢𑀺 𑀯𑀺𑀓𑀧𑁆𑀧𑁄, 𑀓𑀺𑀭𑀺𑀬𑀸𑀓𑀧𑁆𑀧𑁄 𑀘 𑀲𑁄 𑀯𑀺𑀓𑀧𑁆𑀧𑁄 𑀘𑀸𑀢𑀺 𑀓𑀺𑀭𑀺𑀬𑀸𑀓𑀧𑁆𑀧𑀯𑀺𑀓𑀧𑁆𑀧𑁄. 𑀲𑁄 𑀳𑀺 𑀯𑀡𑁆𑀡𑀧𑀤𑀲𑀫𑁆𑀩𑀦𑁆𑀥𑀧𑀤𑀢𑁆𑀣𑀸𑀤𑀺𑀯𑀺𑀪𑀸𑀕𑀢𑁄 𑀩𑀳𑀼𑀯𑀺𑀓𑀧𑁆𑀧𑁄𑀢𑀺 𑀓𑀢𑁆𑀯𑀸 ‘‘𑀓𑀺𑀭𑀺𑀬𑀸𑀓𑀧𑁆𑀧𑀯𑀺𑀓𑀧𑁆𑀧𑁄’’𑀢𑀺 𑀯𑀼𑀘𑁆𑀘𑀢𑀺, 𑀲𑁄 𑀘 𑀕𑀦𑁆𑀣𑀯𑀺𑀲𑁂𑀲𑁄𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀓𑀯𑀻𑀦𑀁 𑀉𑀧𑀓𑀸𑀭𑀸𑀯𑀳𑀁 𑀲𑀢𑁆𑀣’’𑀦𑁆𑀢𑀺, 𑀘𑀢𑀼𑀦𑁆𑀦𑀫𑁆𑀧𑀺 𑀓𑀯𑀻𑀦𑀁 𑀓𑀯𑀺𑀪𑀸𑀯𑀲𑀫𑁆𑀧𑀤𑀸𑀪𑁄𑀕𑀲𑀫𑁆𑀧𑀤𑀸𑀤𑀺𑀧𑀬𑁄𑀚𑀦𑀯𑀲𑁂𑀦 𑀉𑀧𑀓𑀸𑀭𑀸𑀯𑀳𑁄 𑀕𑀦𑁆𑀣𑁄𑀢𑀺 𑀅𑀢𑁆𑀣𑁄. 𑀓𑁄 𑀧𑀦𑁂𑀲𑁄𑀢𑀺? 𑀓𑀩𑁆𑀬𑀩𑀦𑁆𑀥𑀦𑀯𑀺𑀥𑀺𑀯𑀺𑀥𑀸𑀬𑀓𑁄 𑀓𑀩𑁆𑀬𑀸𑀮𑀗𑁆𑀓𑀸𑀭𑀕𑀻𑀢𑀸𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑀸𑀤𑀺. 𑀇𑀤𑀁 𑀧𑀦 𑀫𑀽𑀮𑀓𑀺𑀭𑀺𑀬𑀸𑀓𑀧𑁆𑀧𑀕𑀦𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑁄 𑀳𑀺 𑀫𑀳𑀸𑀯𑀺𑀲𑀬𑁄 𑀲𑀢𑀲𑀳𑀲𑁆𑀲𑀕𑀸𑀣𑀸𑀧𑀭𑀺𑀫𑀸𑀡𑁄, 𑀬𑀁 ‘‘𑀦𑀬𑀘𑀭𑀺𑀬𑀸𑀤𑀺𑀧𑀓𑀭𑀡’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀯𑀘𑀦𑀢𑁆𑀣𑀢𑁄 𑀧𑀦 𑀓𑀺𑀝𑀬𑀢𑀺 𑀕𑀫𑁂𑀢𑀺 𑀜𑀸𑀧𑁂𑀢𑀺 𑀓𑀺𑀭𑀺𑀬𑀸𑀤𑀺𑀯𑀺𑀪𑀸𑀕𑀦𑁆𑀢𑀺 𑀓𑁂𑀝𑀼𑀪𑀁 𑀓𑀺𑀝-𑀥𑀸𑀢𑀼𑀢𑁄 𑀅𑀪𑀧𑀘𑁆𑀘𑀬𑀯𑀲𑁂𑀦, 𑀅-𑀓𑀸𑀭𑀲𑁆𑀲 𑀘 𑀉𑀓𑀸𑀭𑁄. 𑀅𑀣 𑀯𑀸 𑀓𑀺𑀭𑀺𑀬𑀸𑀤𑀺𑀯𑀺𑀪𑀸𑀕𑀁 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀢𑁄 𑀓𑀺𑀝𑁂𑀦𑁆𑀢𑁄 𑀕𑀫𑀦𑁆𑀢𑁄 𑀑𑀪𑁂𑀢𑀺 𑀧𑀽𑀭𑁂𑀢𑀻𑀢𑀺 𑀓𑁂𑀝𑀼𑀪𑀁 𑀓𑀺𑀝-𑀲𑀤𑁆𑀤𑀽𑀧𑀧𑀤𑀉𑀪𑀥𑀸𑀢𑀼𑀯𑀲𑁂𑀦. 𑀅𑀧𑀺𑀘 𑀓𑀺𑀝𑀦𑁆𑀢𑀺 𑀕𑀘𑁆𑀙𑀦𑁆𑀢𑀺 𑀓𑀯𑀬𑁄 𑀩𑀦𑁆𑀥𑁂𑀲𑀼 𑀓𑁄𑀲𑀮𑁆𑀮𑀫𑁂𑀢𑁂𑀦𑀸𑀢𑀺 𑀓𑁂𑀝𑀼𑀪𑀁, 𑀧𑀼𑀭𑀺𑀫𑀦𑀬𑁂𑀦𑁂𑀯𑁂𑀢𑁆𑀣 𑀧𑀤𑀲𑀺𑀤𑁆𑀥𑀺. 𑀞𑀸𑀦𑀓𑀭𑀡𑀸𑀤𑀺𑀯𑀺𑀪𑀸𑀕𑀢𑁄, 𑀦𑀺𑀩𑁆𑀩𑀘𑀦𑀯𑀺𑀪𑀸𑀕𑀢𑁄 𑀘 𑀅𑀓𑁆𑀔𑀭𑀸 𑀧𑀪𑁂𑀤𑀻𑀬𑀦𑁆𑀢𑀺 𑀏𑀢𑁂𑀦𑀸𑀢𑀺 𑀅𑀓𑁆𑀔𑀭𑀧𑁆𑀧𑀪𑁂𑀤𑁄, 𑀢𑀁 𑀧𑀦 𑀙𑀲𑀼 𑀯𑁂𑀤𑀗𑁆𑀕𑁂𑀲𑀼 𑀧𑀭𑀺𑀬𑀸𑀧𑀦𑁆𑀦𑀁 𑀧𑀓𑀭𑀡𑀤𑁆𑀯𑀬𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀲𑀺𑀓𑁆𑀔𑀸 𑀘 𑀦𑀺𑀭𑀼𑀢𑁆𑀢𑀺 𑀘𑀸’’𑀢𑀺. 𑀢𑀢𑁆𑀣 𑀲𑀺𑀓𑁆𑀔𑀦𑁆𑀢𑀺 𑀅𑀓𑁆𑀔𑀭𑀲𑀫𑀬𑀫𑁂𑀢𑀸𑀬𑀸𑀢𑀺 𑀲𑀺𑀓𑁆𑀔𑀸, 𑀅𑀓𑀸𑀭𑀸𑀤𑀺𑀯𑀡𑁆𑀡𑀸𑀦𑀁 𑀞𑀸𑀦𑀓𑀭𑀡𑀧𑀬𑀢𑀦𑀧𑀝𑀺𑀧𑀸𑀤𑀓𑀲𑀢𑁆𑀣𑀁. 𑀦𑀺𑀘𑁆𑀙𑀬𑁂𑀦, 𑀦𑀺𑀲𑁆𑀲𑁂𑀲𑀢𑁄 𑀯𑀸 𑀉𑀢𑁆𑀢𑀺 𑀦𑀺𑀭𑀼𑀢𑁆𑀢𑀺, 𑀯𑀡𑁆𑀡𑀸𑀕𑀫𑀯𑀡𑁆𑀡𑀯𑀺𑀧𑀭𑀺𑀬𑀸𑀬𑀸𑀤𑀺𑀮𑀓𑁆𑀔𑀡𑀁. 𑀯𑀼𑀢𑁆𑀢𑀜𑁆𑀘 𑁋

‘‘𑀯𑀡𑁆𑀡𑀸𑀕𑀫𑁄 𑀯𑀡𑁆𑀡𑀯𑀺𑀧𑀭𑀺𑀬𑀸𑀬𑁄,

𑀤𑁆𑀯𑁂 𑀘𑀸𑀧𑀭𑁂 𑀯𑀡𑁆𑀡𑀯𑀺𑀓𑀸𑀭𑀦𑀸𑀲𑀸;

𑀥𑀸𑀢𑀼𑀲𑁆𑀲 𑀅𑀢𑁆𑀣𑀸𑀢𑀺𑀲𑀬𑁂𑀦 𑀬𑁄𑀕𑁄,

𑀢𑀤𑀼𑀘𑁆𑀘𑀢𑁂 𑀧𑀜𑁆𑀘𑀯𑀺𑀥𑀸 𑀦𑀺𑀭𑀼𑀢𑁆𑀢𑀻’’𑀢𑀺. (𑀧𑀸𑀭𑀸. 𑀅𑀝𑁆𑀞. 𑁧.𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸; 𑀯𑀺𑀲𑀼𑀤𑁆𑀥𑀺. 𑁧.𑁧𑁪𑁪; 𑀫𑀳𑀸𑀦𑀺. 𑀅𑀝𑁆𑀞. 𑁧.𑁫𑁦);

𑀇𑀥 𑀧𑀦 𑀢𑀩𑁆𑀩𑀲𑁂𑀦 𑀅𑀦𑁂𑀓𑀥𑀸 𑀦𑀺𑀩𑁆𑀩𑀘𑀦𑀧𑀭𑀺𑀤𑀻𑀧𑀓𑀁 𑀲𑀢𑁆𑀣𑀁 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 ‘‘𑀦𑀺𑀭𑀼𑀢𑁆𑀢𑀻’’𑀢𑀺 𑀅𑀥𑀺𑀧𑁆𑀧𑁂𑀢𑀁 𑀦𑀺𑀩𑁆𑀩𑀘𑀦𑀯𑀺𑀪𑀸𑀕𑀢𑁄𑀧𑀺 𑀅𑀓𑁆𑀔𑀭𑀧𑀪𑁂𑀤𑀪𑀸𑀯𑀲𑁆𑀲 𑀆𑀘𑀭𑀺𑀬𑁂𑀳𑀺 (𑀤𑀻. 𑀦𑀺. 𑀝𑀻. 𑁧.𑁨𑁫𑁬) 𑀯𑀼𑀢𑁆𑀢𑀢𑁆𑀢𑀸, 𑀢𑀫𑀦𑁆𑀢𑀭𑁂𑀦 𑀦𑀺𑀩𑁆𑀩𑀘𑀦𑀯𑀺𑀪𑀸𑀕𑀲𑁆𑀲 𑀘 𑀩𑁆𑀬𑀸𑀓𑀭𑀡𑀗𑁆𑀕𑁂𑀦 𑀲𑀗𑁆𑀕𑀳𑀺𑀢𑀢𑁆𑀢𑀸. 𑀩𑁆𑀬𑀸𑀓𑀭𑀡𑀁, 𑀦𑀺𑀭𑀼𑀢𑁆𑀢𑀺 𑀘 𑀳𑀺 𑀧𑀘𑁆𑀘𑁂𑀓𑀫𑁂𑀯 𑀯𑁂𑀤𑀗𑁆𑀕𑀁 𑀬𑀣𑀸𑀳𑀼 𑁋

‘‘𑀓𑀧𑁆𑀧𑁄 𑀩𑁆𑀬𑀸𑀓𑀭𑀡𑀁 𑀚𑁄𑀢𑀺-𑀲𑀢𑁆𑀣𑀁 𑀲𑀺𑀓𑁆𑀔𑀸 𑀦𑀺𑀭𑀼𑀢𑁆𑀢𑀺 𑀘;

𑀙𑀦𑁆𑀤𑁄𑀯𑀺𑀘𑀺𑀢𑀺 𑀘𑁂𑀢𑀸𑀦𑀺, 𑀯𑁂𑀤𑀗𑁆𑀕𑀸𑀦𑀺 𑀯𑀤𑀦𑁆𑀢𑀺 𑀙𑀸’’𑀢𑀺.

𑀢𑀲𑁆𑀫𑀸 𑀩𑁆𑀬𑀸𑀓𑀭𑀡𑀗𑁆𑀕𑁂𑀦 𑀅𑀲𑀗𑁆𑀓𑀭𑀪𑀽𑀢𑀫𑁂𑀯 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀦𑀺𑀩𑁆𑀩𑀘𑀦𑀫𑀺𑀥𑀸𑀥𑀺𑀧𑁆𑀧𑁂𑀢𑀁, 𑀦 𑀙𑀲𑀼 𑀩𑁆𑀬𑀜𑁆𑀚𑀦𑀧𑀤𑁂𑀲𑀼 𑀯𑀺𑀬 𑀢𑀤𑀼𑀪𑀬𑀲𑀸𑀥𑀸𑀭𑀡𑀦𑀺𑀩𑁆𑀩𑀘𑀦𑀁 𑀯𑁂𑀤𑀗𑁆𑀕𑀯𑀺𑀲𑀬𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀁 𑀧𑀦𑁂𑀢𑁆𑀣 𑀫𑀳𑀸𑀦𑀺𑀤𑁆𑀤𑁂𑀲𑀝𑁆𑀞𑀓𑀣𑀸𑀬 (𑀫𑀳𑀸𑀦𑀺. 𑀅𑀝𑁆𑀞. 𑁫𑁦) 𑀆𑀕𑀢𑀦𑀺𑀭𑀼𑀢𑁆𑀢𑀺𑀦𑀬𑀯𑀺𑀦𑀺𑀘𑁆𑀙𑀬𑁄. 𑀢𑀢𑁆𑀣 𑀳𑀺 ‘‘𑀦𑀓𑁆𑀔𑀢𑁆𑀢𑀭𑀸𑀚𑀸𑀭𑀺𑀯 𑀢𑀸𑀭𑀓𑀸𑀦’’𑀦𑁆𑀢𑀺 (𑀚𑀸. 𑁧.𑁧.𑁧𑁧, 𑁨𑁫) 𑀏𑀢𑁆𑀣 𑀭-𑀓𑀸𑀭𑀸𑀕𑀫𑁄 𑀯𑀺𑀬 𑀅𑀯𑀺𑀚𑁆𑀚𑀫𑀸𑀦𑀲𑁆𑀲 𑀅𑀓𑁆𑀔𑀭𑀲𑁆𑀲 𑀆𑀕𑀫𑁄 𑀯𑀡𑁆𑀡𑀸𑀕𑀫𑁄 𑀦𑀸𑀫. 𑀳𑀺𑀁𑀲𑀦𑀢𑁆𑀢𑀸 ‘‘𑀳𑀺𑀁𑀲𑁄’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀲𑀻𑀳𑁄’’𑀢𑀺 𑀧𑀭𑀺𑀯𑀢𑁆𑀢𑀦𑀁 𑀯𑀺𑀬 𑀯𑀺𑀚𑁆𑀚𑀫𑀸𑀦𑀸𑀦𑀫𑀓𑁆𑀔𑀭𑀸𑀦𑀁 𑀳𑁂𑀝𑁆𑀞𑀼𑀧𑀭𑀺𑀬𑀯𑀲𑁂𑀦 𑀧𑀭𑀺𑀯𑀢𑁆𑀢𑀦𑀁 𑀯𑀡𑁆𑀡𑀯𑀺𑀧𑀭𑀺𑀬𑀸𑀬𑁄 𑀦𑀸𑀫. ‘‘𑀦𑀯𑀙𑀦𑁆𑀦𑀓𑁂𑀤𑀸𑀦𑀺 𑀤𑀺𑀬𑁆𑀬𑀢𑀻’’𑀢𑀺 (𑀚𑀸. 𑁧.𑁬.𑁮𑁮) 𑀏𑀢𑁆𑀣 𑀅-𑀓𑀸𑀭𑀲𑁆𑀲 𑀏-𑀓𑀸𑀭𑀸𑀧𑀚𑁆𑀚𑀦𑀁 𑀯𑀺𑀬 𑀅𑀜𑁆𑀜𑀓𑁆𑀔𑀭𑀲𑁆𑀲 𑀅𑀜𑁆𑀜𑀓𑁆𑀔𑀭𑀸𑀧𑀚𑁆𑀚𑀦𑀁 𑀯𑀡𑁆𑀡𑀯𑀺𑀓𑀸𑀭𑁄 𑀦𑀸𑀫. ‘‘𑀚𑀻𑀯𑀦𑀲𑁆𑀲 𑀫𑀽𑀢𑁄 𑀚𑀻𑀯𑀦𑀫𑀽𑀢𑁄’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀚𑀻𑀫𑀽𑀢𑁄’’𑀢𑀺 𑀯-𑀓𑀸𑀭 𑀦-𑀓𑀸𑀭𑀸𑀦𑀁 𑀯𑀺𑀦𑀸𑀲𑁄 𑀯𑀺𑀬 𑀯𑀺𑀚𑁆𑀚𑀫𑀸𑀦𑀓𑁆𑀔𑀭𑀸𑀦𑀁 𑀯𑀺𑀦𑀸𑀲𑁄 𑀯𑀡𑁆𑀡𑀯𑀺𑀦𑀸𑀲𑁄 𑀦𑀸𑀫. ‘‘𑀨𑀭𑀼𑀲𑀸𑀳𑀺 𑀯𑀸𑀘𑀸𑀳𑀺 𑀧𑀓𑀼𑀩𑁆𑀩𑀫𑀸𑀦𑁄, 𑀆𑀲𑀚𑁆𑀚 𑀫𑀁 𑀢𑁆𑀯𑀁 𑀯𑀤𑀲𑁂 𑀓𑀼𑀫𑀸𑀭𑀸’’𑀢𑀺 (𑀚𑀸. 𑁧.𑁧𑁦.𑁮𑁫) 𑀏𑀢𑁆𑀣 ‘‘𑀧𑀓𑀼𑀩𑁆𑀩𑀫𑀸𑀦𑁄’’𑀢𑀺 𑀧𑀤𑀲𑁆𑀲 𑀅𑀪𑀺𑀪𑀯𑀫𑀸𑀦𑁄𑀢𑀺 𑀅𑀢𑁆𑀣𑀧𑀝𑀺𑀧𑀸𑀤𑀦𑀁 𑀯𑀺𑀬 𑀢𑀢𑁆𑀣 𑀢𑀢𑁆𑀣 𑀬𑀣𑀸𑀬𑁄𑀕𑀁 𑀯𑀺𑀲𑁂𑀲𑀢𑁆𑀣𑀧𑀝𑀺𑀧𑀸𑀤𑀦𑀁 𑀥𑀸𑀢𑀽𑀦𑀫𑀢𑁆𑀣𑀸𑀢𑀺𑀲𑀬𑁂𑀦 𑀬𑁄𑀕𑁄 𑀦𑀸𑀫𑀸𑀢𑀺.

𑀬𑀣𑀸𑀯𑀼𑀢𑁆𑀢𑀧𑁆𑀧𑀪𑁂𑀤𑀸𑀦𑀁 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀅𑀬𑀁 𑀘𑀢𑀼𑀢𑁆𑀣𑁄𑀬𑁂𑀯 𑀲𑀺𑀬𑀸, 𑀅𑀣 𑀓𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑁄𑀢𑀺 𑀆𑀳 ‘‘𑀆𑀣𑀩𑁆𑀩𑀡𑀯𑁂𑀤𑀁 𑀘𑀢𑀼𑀢𑁆𑀣𑀁 𑀓𑀢𑁆𑀯𑀸’’𑀢𑀺. 𑀆𑀣𑀩𑁆𑀩𑀡𑀯𑁂𑀤𑁄 𑀦𑀸𑀫 𑀆𑀣𑀩𑁆𑀩𑀡𑀯𑁂𑀤𑀺𑀓𑁂𑀳𑀺 𑀯𑀺𑀳𑀺𑀢𑁄 𑀧𑀭𑀽𑀧𑀖𑀸𑀢𑀓𑀭𑁄 𑀫𑀦𑁆𑀢𑁄, 𑀲𑁄 𑀧𑀦 𑀇𑀢𑀺𑀳𑀸𑀲𑀧𑀜𑁆𑀘𑀫𑀪𑀸𑀯𑀧𑁆𑀧𑀓𑀸𑀲𑀦𑀢𑁆𑀣𑀁 𑀕𑀡𑀺𑀢𑀢𑀸𑀫𑀢𑁆𑀢𑁂𑀦 𑀕𑀳𑀺𑀢𑁄, 𑀦 𑀲𑀭𑀽𑀧𑀯𑀲𑁂𑀦, 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀏𑀢𑁂𑀲’’𑀦𑁆𑀢𑀺 𑀧𑀤𑀲𑁆𑀲 𑀢𑁂𑀲𑀁 𑀢𑀺𑀡𑁆𑀡𑀁 𑀯𑁂𑀤𑀸𑀦𑀦𑁆𑀢𑁆𑀯𑁂𑀯 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀢𑀜𑁆𑀳𑀺 ‘‘𑀢𑀺𑀡𑁆𑀡𑀁 𑀯𑁂𑀤𑀸𑀦’’𑀦𑁆𑀢𑀺 𑀏𑀢𑀲𑁆𑀲 𑀯𑀺𑀲𑁂𑀲𑀦𑀦𑁆𑀢𑀺. 𑀇𑀢𑀺𑀳 𑀅𑀲𑀸𑀢𑀺 𑀏𑀯𑀁 𑀇𑀥 𑀮𑁄𑀓𑁂 𑀅𑀳𑁄𑀲𑀺 ‘‘𑀆𑀲𑀸’’𑀢𑀺𑀧𑀺 𑀓𑀢𑁆𑀣𑀘𑀺 𑀧𑀸𑀞𑁄, 𑀲𑁄𑀬𑁂𑀯𑀢𑁆𑀣𑁄. 𑀇𑀳 𑀞𑀸𑀦𑁂 𑀇𑀢𑀺 𑀏𑀯𑀁, 𑀇𑀤𑀁 𑀯𑀸 𑀓𑀫𑁆𑀫𑀁, 𑀯𑀢𑁆𑀣𑀼𑀁 𑀯𑀸 𑀆𑀲 𑀇𑀘𑁆𑀙𑀸𑀳𑀻𑀢𑀺𑀧𑀺 𑀅𑀢𑁆𑀣𑁄. 𑀢𑀲𑁆𑀲 𑀕𑀦𑁆𑀣𑀲𑁆𑀲 𑀫𑀳𑀸𑀯𑀺𑀲𑀬𑀢𑀸𑀤𑀻𑀧𑀦𑀢𑁆𑀣𑀜𑁆𑀘𑁂𑀢𑁆𑀣 𑀯𑀺𑀘𑁆𑀙𑀸𑀯𑀘𑀦𑀁, 𑀇𑀫𑀺𑀦𑀸 ‘‘𑀇𑀢𑀺𑀳𑀸𑀲𑀸’’𑀢𑀺 𑀯𑀘𑀦𑁂𑀦 𑀧𑀝𑀺𑀲𑀁𑀬𑀼𑀢𑁆𑀢𑁄 𑀇𑀢𑀺𑀳𑀸𑀲𑁄 𑀢𑀤𑁆𑀥𑀺𑀢𑀯𑀲𑁂𑀦𑀸𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀇𑀢𑀺𑀳 𑀆𑀲, 𑀇𑀢𑀺𑀳 𑀆𑀲𑀸’’𑀢𑀺 𑀈𑀤𑀺𑀲𑀯𑀘𑀦𑀧𑀝𑀺𑀲𑀁𑀬𑀼𑀢𑁆𑀢𑁄 𑀇𑀢𑀺𑀳𑀸𑀲𑁄 𑀦𑀺𑀭𑀼𑀢𑁆𑀢𑀺𑀦𑀬𑁂𑀦𑀸𑀢𑀺 𑀅𑀢𑁆𑀣𑀤𑀲𑁆𑀲𑀦𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀅𑀓𑁆𑀔𑀭𑀘𑀺𑀦𑁆𑀢𑀓𑀸 𑀧𑀦 𑀏𑀯𑀫𑀺𑀘𑁆𑀙𑀦𑁆𑀢𑀺 ‘‘𑀇𑀢𑀺𑀳-𑀲𑀤𑁆𑀤𑁄 𑀧𑀸𑀭𑀫𑁆𑀧𑀭𑀺𑀬𑁄𑀧𑀤𑁂𑀲𑁂 𑀏𑀓𑁄𑀯 𑀦𑀺𑀧𑀸𑀢𑁄, 𑀅𑀲𑀢𑀺 𑀯𑀺𑀚𑁆𑀚𑀢𑀻𑀢𑀺 𑀅𑀲𑁄, 𑀇𑀢𑀺𑀳 𑀅𑀲𑁄 𑀏𑀢𑀲𑁆𑀫𑀺𑀦𑁆𑀢𑀺 𑀇𑀢𑀺𑀳𑀸𑀲𑁄 𑀲𑀫𑀸𑀲𑀯𑀲𑁂𑀦𑀸’’𑀢𑀺, 𑀢𑁂𑀲𑀁 𑀫𑀢𑁂 ‘‘𑀇𑀢𑀺𑀳 𑀅𑀲𑀸’’𑀢𑀺 𑀏𑀢𑁆𑀣 𑀏𑀯𑀁 𑀧𑀸𑀭𑀫𑁆𑀧𑀭𑀺𑀬𑁄𑀧𑀤𑁂𑀲𑁄 𑀅𑀲 𑀯𑀺𑀚𑁆𑀚𑀫𑀸𑀦𑁄 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄. ‘‘𑀧𑀼𑀭𑀸𑀡𑀓𑀣𑀸𑀲𑀗𑁆𑀔𑀸𑀢𑁄’’𑀢𑀺 𑀇𑀫𑀺𑀦𑀸 𑀢𑀲𑁆𑀲 𑀕𑀦𑁆𑀣𑀯𑀺𑀲𑁂𑀲𑀪𑀸𑀯𑀫𑀸𑀳, 𑀪𑀸𑀭𑀢𑀦𑀸𑀫𑀓𑀸𑀦𑀁 𑀤𑁆𑀯𑁂𑀪𑀸𑀢𑀺𑀓𑀭𑀸𑀚𑀽𑀦𑀁 𑀬𑀼𑀤𑁆𑀥𑀓𑀣𑀸, 𑀭𑀸𑀫𑀭𑀜𑁆𑀜𑁄 𑀲𑀻𑀢𑀸𑀳𑀭𑀡𑀓𑀣𑀸, 𑀦𑀭𑀲𑀻𑀳𑀭𑀸𑀚𑀼𑀧𑁆𑀧𑀢𑁆𑀢𑀺𑀓𑀣𑀸𑀢𑀺 𑀏𑀯𑀫𑀸𑀤𑀺𑀧𑀼𑀭𑀸𑀡𑀓𑀣𑀸𑀲𑀗𑁆𑀔𑀸𑀢𑁄 𑀪𑀸𑀭𑀢𑀧𑀼𑀭𑀸𑀡𑀭𑀸𑀫𑀧𑀼𑀭𑀸𑀡𑀦𑀭𑀲𑀻𑀳𑀧𑀼𑀭𑀸𑀡𑀸𑀤𑀺𑀕𑀦𑁆𑀣𑁄 𑀇𑀢𑀺𑀳𑀸𑀲𑁄 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀢𑁂𑀲𑀁 𑀇𑀢𑀺𑀳𑀸𑀲𑀧𑀜𑁆𑀘𑀫𑀸𑀦𑀁 𑀯𑁂𑀤𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀬𑀣𑀸𑀯𑀸𑀓𑁆𑀬𑀁 ‘‘𑀢𑀺𑀡𑁆𑀡𑀁 𑀯𑁂𑀤𑀸𑀦’’𑀦𑁆𑀢𑀺 𑀏𑀢𑁆𑀣 𑀯𑀺𑀲𑁂𑀲𑀦𑀪𑀸𑀯𑀁 𑀤𑀲𑁆𑀲𑁂𑀢𑀺.

𑀧𑀚𑁆𑀚𑀢𑀺 𑀅𑀢𑁆𑀣𑁄 𑀏𑀢𑁂𑀦𑀸𑀢𑀺 𑀧𑀤𑀁, 𑀦𑀸𑀫𑀸𑀔𑁆𑀬𑀸𑀢𑁄𑀧𑀲𑀕𑁆𑀕𑀦𑀺𑀧𑀸𑀢𑀸𑀤𑀺𑀯𑀲𑁂𑀦 𑀅𑀦𑁂𑀓𑀯𑀺𑀪𑀸𑀕𑀁 𑀯𑀺𑀪𑀢𑁆𑀢𑀺𑀬𑀦𑁆𑀢𑀧𑀤𑀁. 𑀢𑀤𑀧𑀺 𑀩𑁆𑀬𑀸𑀓𑀭𑀡𑁂 𑀆𑀕𑀢𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀢𑀤𑀯𑀲𑁂𑀲’’𑀦𑁆𑀢𑀺, 𑀧𑀤𑀢𑁄 𑀅𑀯𑀲𑁂𑀲𑀁 𑀧𑀓𑀢𑀺𑀧𑀘𑁆𑀘𑀬𑀸𑀤𑀺𑀲𑀤𑁆𑀤𑀮𑀓𑁆𑀔𑀡𑀪𑀽𑀢𑀦𑁆𑀢𑀺 𑀅𑀢𑁆𑀣𑁄. 𑀢𑀁 𑀢𑀁 𑀲𑀤𑁆𑀤𑀁, 𑀢𑀤𑀢𑁆𑀣𑀜𑁆𑀘 𑀩𑁆𑀬𑀸𑀓𑀭𑁄𑀢𑀺 𑀩𑁆𑀬𑀸𑀘𑀺𑀓𑁆𑀔𑀢𑀺 𑀏𑀢𑁂𑀦𑀸𑀢𑀺 𑀩𑁆𑀬𑀸𑀓𑀭𑀡𑀁, 𑀯𑀺𑀲𑁂𑀲𑁂𑀦 𑀯𑀸 𑀆𑀓𑀭𑀻𑀬𑀦𑁆𑀢𑁂 𑀧𑀓𑀢𑀺𑀧𑀘𑁆𑀘𑀬𑀸𑀤𑀬𑁄 𑀅𑀪𑀺𑀦𑀺𑀧𑁆𑀨𑀸𑀤𑀻𑀬𑀦𑁆𑀢𑁂 𑀏𑀢𑁆𑀣, 𑀅𑀦𑁂𑀦𑀸𑀢𑀺 𑀯𑀸 𑀩𑁆𑀬𑀸𑀓𑀭𑀡𑀁, 𑀲𑀸𑀥𑀼𑀲𑀤𑁆𑀤𑀸𑀦𑀫𑀦𑁆𑀯𑀸𑀔𑁆𑀬𑀸𑀬𑀓𑀁 𑀫𑀼𑀤𑁆𑀥𑀩𑁄𑀥𑀩𑁆𑀬𑀸𑀓𑀭𑀡 𑀲𑀸𑀭𑀲𑁆𑀲𑀢𑀩𑁆𑀬𑀸𑀓𑀭𑀡 𑀧𑀸𑀡𑀺𑀦𑀻𑀩𑁆𑀬𑀸𑀓𑀭𑀡𑀘𑀦𑁆𑀤𑁆𑀭𑀩𑁆𑀬𑀸𑀓𑀭𑀡𑀸𑀤𑀺 𑀅𑀥𑀼𑀦𑀸𑀧𑀺 𑀯𑀺𑀚𑁆𑀚𑀫𑀸𑀦𑀲𑀢𑁆𑀣𑀁. 𑀅𑀥𑀻𑀬𑀢𑀻𑀢𑀺 𑀅𑀚𑁆𑀛𑀸𑀬𑀢𑀺. 𑀯𑁂𑀤𑁂𑀢𑀻𑀢𑀺 𑀧𑀭𑁂𑀲𑀁 𑀯𑀸𑀘𑁂𑀢𑀺. 𑀘-𑀲𑀤𑁆𑀤𑁄 𑀅𑀢𑁆𑀣𑀤𑁆𑀯𑀬𑀲𑀫𑀼𑀘𑁆𑀘𑀺𑀦𑀦𑀢𑁆𑀣𑁄, 𑀯𑀺𑀓𑀧𑁆𑀧𑀦𑀢𑁆𑀣𑁄 𑀯𑀸 𑀅𑀢𑁆𑀣𑀦𑁆𑀢𑀭𑀲𑁆𑀲 𑀯𑀺𑀓𑀧𑁆𑀧𑀺𑀢𑀢𑁆𑀢𑀸. 𑀯𑀺𑀘𑀺𑀢𑁆𑀭𑀸 𑀳𑀺 𑀢𑀤𑁆𑀥𑀺𑀢𑀯𑀼𑀢𑁆𑀢𑀺. 𑀧𑀤𑀓𑁄𑀢𑀺 𑀩𑁆𑀬𑀸𑀓𑀭𑀡𑁂𑀲𑀼 𑀆𑀕𑀢𑀧𑀤𑀓𑁄𑀲𑀮𑁆𑀮𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀯𑁂𑀬𑁆𑀬𑀸𑀓𑀭𑀡𑁄𑀢𑀺 𑀢𑀤𑀯𑀲𑀺𑀝𑁆𑀞𑀧𑀓𑀢𑀺𑀧𑀘𑁆𑀘𑀬𑀸𑀤𑀺𑀲𑀤𑁆𑀤𑀯𑀺𑀥𑀺𑀓𑁄𑀲𑀮𑁆𑀮𑀦𑁆𑀢𑀺 𑀇𑀫𑀲𑁆𑀲𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀢𑁆𑀣𑀁 𑀧𑀤𑀤𑁆𑀯𑀬𑀲𑁆𑀲 𑀏𑀓𑀢𑁄 𑀅𑀢𑁆𑀣𑀯𑀘𑀦𑀁. 𑀏𑀲𑀸 𑀳𑀺 𑀆𑀘𑀭𑀺𑀬𑀸𑀦𑀁 𑀧𑀓𑀢𑀺, 𑀬𑀤𑀺𑀤𑀁 𑀬𑁂𑀦 𑀓𑁂𑀦𑀘𑀺 𑀧𑀓𑀸𑀭𑁂𑀦 𑀅𑀢𑁆𑀣𑀦𑁆𑀢𑀭𑀯𑀺𑀜𑁆𑀜𑀸𑀧𑀦𑀁. 𑀅𑀬𑀁 𑀅𑀝𑁆𑀞𑀓𑀣𑀸𑀢𑁄 𑀅𑀧𑀭𑁄 𑀦𑀬𑁄 𑁋 𑀢𑁂 𑀏𑀯 𑀯𑁂𑀤𑁂 𑀧𑀤𑀲𑁄 𑀓𑀸𑀬𑀢𑀻𑀢𑀺 𑀧𑀤𑀓𑁄𑀢𑀺. 𑀢𑀢𑁆𑀣 𑀧𑀤𑀲𑁄𑀢𑀺 𑀕𑀚𑁆𑀚𑀩𑀦𑁆𑀥𑀧𑀚𑁆𑀚𑀩𑀦𑁆𑀥𑀧𑀤𑁂𑀦. 𑀓𑀸𑀬𑀢𑀻𑀢𑀺 𑀓𑀣𑁂𑀢𑀺 𑀬𑀣𑀸 ‘‘𑀚𑀸𑀢𑀓’’𑀦𑁆𑀢𑀺, 𑀇𑀫𑀺𑀦𑀸 𑀯𑁂𑀤𑀓𑀸𑀭𑀓𑀲𑀫𑀢𑁆𑀣𑀢𑀁 𑀤𑀲𑁆𑀲𑁂𑀢𑀺. 𑀏𑀯𑀜𑁆𑀳𑀺 ‘‘𑀅𑀚𑁆𑀛𑀸𑀬𑀓𑁄’’𑀢𑀺𑀆𑀤𑀻𑀳𑀺 𑀇𑀫𑀲𑁆𑀲 𑀯𑀺𑀲𑁂𑀲𑁄 𑀧𑀸𑀓𑀝𑁄 𑀳𑁄𑀢𑀻𑀢𑀺.

𑀆𑀬𑀢𑀺𑀁 𑀳𑀺𑀢𑀁 𑀩𑀸𑀮𑀚𑀦𑀲𑀗𑁆𑀔𑀸𑀢𑁄 𑀮𑁄𑀓𑁄 𑀦 𑀬𑀢𑀢𑀺 𑀦 𑀈𑀳𑀢𑀺 𑀅𑀦𑁂𑀦𑀸𑀢𑀺 𑀮𑁄𑀓𑀸𑀬𑀢𑀁. 𑀢𑀜𑁆𑀳𑀺 𑀕𑀦𑁆𑀣𑀁 𑀦𑀺𑀲𑁆𑀲𑀸𑀬 𑀲𑀢𑁆𑀢𑀸 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀘𑀺𑀢𑁆𑀢𑀫𑁆𑀧𑀺 𑀦 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀮𑁄𑀓𑀸 𑀯𑀸 𑀩𑀸𑀮𑀚𑀦𑀸 𑀆𑀬𑀢𑀦𑁆𑀢𑀺 𑀉𑀲𑁆𑀲𑀳𑀦𑁆𑀢𑀺 𑀯𑀸𑀤𑀲𑁆𑀲𑀸𑀤𑁂𑀦 𑀏𑀢𑁆𑀣𑀸𑀢𑀺 𑀮𑁄𑀓𑀸𑀬𑀢𑀁. 𑀅𑀜𑁆𑀜𑀫𑀜𑁆𑀜𑀯𑀺𑀭𑀼𑀤𑁆𑀥𑀁, 𑀲𑀕𑁆𑀕𑀫𑁄𑀓𑁆𑀔𑀯𑀺𑀭𑀼𑀤𑁆𑀥𑀁 𑀯𑀸 𑀢𑀦𑁄𑀦𑁆𑀢𑀺 𑀏𑀢𑁆𑀣𑀸𑀢𑀺 𑀯𑀺𑀢𑀡𑁆𑀟𑁄 𑀟-𑀧𑀘𑁆𑀘𑀬𑀯𑀲𑁂𑀦, 𑀦-𑀓𑀸𑀭𑀲𑁆𑀲 𑀘 𑀡-𑀓𑀸𑀭𑀁 𑀓𑀢𑁆𑀯𑀸, 𑀯𑀺𑀭𑀼𑀤𑁆𑀥𑁂𑀦 𑀯𑀸𑀤𑀤𑀡𑁆𑀟𑁂𑀦 𑀢𑀸𑀴𑁂𑀦𑁆𑀢𑀺 𑀯𑀸𑀤𑀺𑀦𑁄 𑀏𑀢𑁆𑀣𑀸𑀢𑀺 𑀯𑀺𑀢𑀡𑁆𑀟𑁄 𑀢𑀟𑀺-𑀥𑀸𑀢𑀼𑀯𑀲𑁂𑀦, 𑀦𑀺𑀕𑁆𑀕𑀳𑀻𑀢𑀸𑀕𑀫𑀜𑁆𑀘 𑀓𑀢𑁆𑀯𑀸. 𑀅𑀤𑁂𑀲𑀫𑁆𑀧𑀺 𑀬𑀁 𑀦𑀺𑀲𑁆𑀲𑀸𑀬 𑀯𑀸𑀤𑀻𑀦𑀁 𑀯𑀸𑀤𑁄 𑀧𑀯𑀢𑁆𑀢𑁄, 𑀢𑀁 𑀢𑁂𑀲𑀁 𑀤𑁂𑀲𑀢𑁄𑀧𑀺 𑀉𑀧𑀘𑀸𑀭𑀯𑀲𑁂𑀦 𑀯𑀼𑀘𑁆𑀘𑀢𑀺 𑀬𑀣𑀸 ‘‘𑀘𑀓𑁆𑀔𑀼𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀻’’𑀢𑀺, (𑀤𑀻. 𑀦𑀺. 𑁨.𑁪𑁦𑁧; 𑀫. 𑀦𑀺. 𑁧.𑁧𑁩𑁩; 𑀯𑀺𑀪. 𑁨𑁦𑁪) 𑀯𑀺𑀲𑁂𑀲𑁂𑀦 𑀯𑀸 𑀧𑀡𑁆𑀟𑀺𑀢𑀸𑀦𑀁 𑀫𑀦𑀁 𑀢𑀟𑁂𑀦𑁆𑀢𑀺 𑀘𑀸𑀮𑁂𑀦𑁆𑀢𑀺 𑀏𑀢𑁂𑀦𑀸𑀢𑀺 𑀯𑀺𑀢𑀡𑁆𑀟𑁄, 𑀢𑀁 𑀯𑀤𑀦𑁆𑀢𑀺, 𑀲𑁄 𑀯𑀸𑀤𑁄 𑀯𑀸 𑀏𑀢𑁂𑀲𑀦𑁆𑀢𑀺 𑀯𑀺𑀢𑀡𑁆𑀟𑀯𑀸𑀤𑀸, 𑀢𑁂𑀲𑀁 𑀲𑀢𑁆𑀣𑀁 𑀢𑀣𑀸. 𑀮𑀓𑁆𑀔𑀡𑀤𑀻𑀧𑀓𑀲𑀢𑁆𑀣𑀁 𑀉𑀢𑁆𑀢𑀭𑀧𑀤𑀮𑁄𑀧𑁂𑀦, 𑀢𑀤𑁆𑀥𑀺𑀢𑀯𑀲𑁂𑀦 𑀯𑀸 𑀮𑀓𑁆𑀔𑀡𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀮𑀓𑁆𑀔𑀡𑀤𑀻𑀧𑀓’’𑀦𑁆𑀢𑀺𑀆𑀤𑀺𑀦𑀸. 𑀮𑀓𑁆𑀔𑀻𑀬𑀢𑀺 𑀩𑀼𑀤𑁆𑀥𑀪𑀸𑀯𑀸𑀤𑀺 𑀅𑀦𑁂𑀦𑀸𑀢𑀺 𑀮𑀓𑁆𑀔𑀡𑀁, 𑀦𑀺𑀕𑁆𑀭𑁄𑀥𑀩𑀺𑀫𑁆𑀩𑀢𑀸𑀤𑀺. 𑀢𑁂𑀦𑀸𑀳 ‘‘𑀬𑁂𑀲𑀁 𑀯𑀲𑁂𑀦𑀸’’𑀢𑀺𑀆𑀤𑀺. 𑀤𑁆𑀯𑀸𑀤𑀲𑀲𑀳𑀲𑁆𑀲𑀕𑀦𑁆𑀣𑀧𑀫𑀸𑀡𑀦𑁆𑀢𑀺 𑀏𑀢𑁆𑀣 𑀪𑀸𑀡𑀯𑀸𑀭𑀧𑁆𑀧𑀫𑀸𑀡𑀸𑀤𑀻𑀲𑀼 𑀯𑀺𑀬 𑀩𑀸𑀢𑁆𑀢𑀺𑀁𑀲𑀓𑁆𑀔𑀭𑀕𑀦𑁆𑀣𑁄𑀯 𑀅𑀥𑀺𑀧𑁆𑀧𑁂𑀢𑁄. 𑀯𑀼𑀢𑁆𑀢𑀜𑁆𑀳𑀺 𑁋

‘‘𑀅𑀝𑁆𑀞𑀓𑁆𑀔𑀭𑀸 𑀏𑀓𑀧𑀤𑀁, 𑀏𑀓𑀸 𑀕𑀸𑀣𑀸 𑀘𑀢𑀼𑀧𑁆𑀧𑀤𑀁;

𑀕𑀸𑀣𑀸 𑀘𑁂𑀓𑀸 𑀫𑀢𑁄 𑀕𑀦𑁆𑀣𑁄, 𑀕𑀦𑁆𑀣𑁄 𑀩𑀸𑀢𑁆𑀢𑀺𑀁𑀲𑀢𑀓𑁆𑀔𑀭𑁄’’𑀢𑀺.

𑀤𑁆𑀯𑀸𑀤𑀲𑀳𑀺 𑀕𑀼𑀡𑀺𑀢𑀲𑀳𑀲𑁆𑀲𑀩𑀸𑀢𑁆𑀢𑀺𑀁𑀲𑀓𑁆𑀔𑀭𑀕𑀦𑁆𑀣𑀧𑁆𑀧𑀫𑀸𑀡𑀦𑁆𑀢𑀺 𑀅𑀢𑁆𑀣𑁄. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀮𑀓𑁆𑀔𑀡𑀲𑀢𑁆𑀣𑁂, 𑀆𑀥𑀸𑀭𑁂 𑀘𑁂𑀢𑀁 𑀪𑀼𑀫𑁆𑀫𑀁 𑀬𑀣𑀸 ‘‘𑀭𑀼𑀓𑁆𑀔𑁂 𑀲𑀸𑀔𑀸’’𑀢𑀺. 𑀲𑁄𑀴𑀲 𑀘 𑀲𑀳𑀲𑁆𑀲𑀜𑁆𑀘 𑀲𑁄𑀴𑀲𑀲𑀳𑀲𑁆𑀲𑀁, 𑀲𑁄𑀴𑀲𑀸𑀥𑀺𑀓𑀲𑀳𑀲𑁆𑀲𑀕𑀸𑀣𑀸𑀧𑀭𑀺𑀫𑀸𑀡𑀸𑀢𑀺 𑀅𑀢𑁆𑀣𑁄. 𑀏𑀯𑀜𑁆𑀳𑀺 𑀆𑀥𑀸𑀭𑀸𑀥𑁂𑀬𑁆𑀬𑀯𑀘𑀦𑀁 𑀲𑀽𑀧𑀧𑀦𑁆𑀦𑀁 𑀳𑁄𑀢𑀻𑀢𑀺. 𑀧𑀥𑀸𑀦𑀯𑀲𑁂𑀦 𑀩𑀼𑀤𑁆𑀥𑀸𑀦𑀁 𑀮𑀓𑁆𑀔𑀡𑀤𑀻𑀧𑀦𑀢𑁄 𑀩𑀼𑀤𑁆𑀥𑀫𑀦𑁆𑀢𑀸 𑀦𑀸𑀫. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀤𑀻𑀦𑀫𑁆𑀧𑀺 𑀳𑀺 𑀮𑀓𑁆𑀔𑀡𑀁 𑀢𑀢𑁆𑀣 𑀤𑀻𑀧𑀺𑀢𑀫𑁂𑀯. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑁂𑀲𑀁 𑀯𑀲𑁂𑀦𑀸’’𑀢𑀺𑀆𑀤𑀺.

‘‘𑀅𑀦𑀽𑀦𑁄 𑀧𑀭𑀺𑀧𑀽𑀭𑀓𑀸𑀭𑀻’’𑀢𑀺 𑀅𑀢𑁆𑀣𑀫𑀢𑁆𑀢𑀤𑀲𑁆𑀲𑀦𑀁, 𑀲𑀤𑁆𑀤𑀢𑁄 𑀧𑀦 𑀅𑀥𑀺𑀕𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀯𑀬𑁄 𑀦 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀓𑁄 𑀧𑀦𑁂𑀲 𑀅𑀯𑀬𑁄𑀢𑀺 𑀅𑀦𑀼𑀬𑁄𑀕𑀫𑀧𑀦𑁂𑀢𑀺 ‘‘𑀅𑀯𑀬𑁄 𑀦𑀸𑀫𑀸’’𑀢𑀺𑀆𑀤𑀺𑀦𑀸. 𑀅𑀬𑀫𑁂𑀢𑁆𑀢𑀸𑀥𑀺𑀧𑁆𑀧𑀸𑀬𑁄 𑁋 𑀬𑁄 𑀢𑀸𑀦𑀺 𑀲𑀦𑁆𑀥𑀸𑀭𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀲𑁄 ‘‘𑀯𑀬𑁄’’𑀢𑀺 𑀯𑀼𑀘𑁆𑀘𑀢𑀺. 𑀬𑁄 𑀧𑀦 𑀦 𑀲𑀓𑁆𑀓𑁄𑀢𑀺, 𑀲𑁄 𑀅𑀯𑀬𑁄 𑀦𑀸𑀫. 𑀬𑁄 𑀘 𑀅𑀯𑀬𑁄 𑀦 𑀳𑁄𑀢𑀺, 𑀲𑁄 ‘‘𑀤𑁆𑀯𑁂 𑀧𑀝𑀺𑀲𑁂𑀥𑀸 𑀧𑀓𑀢𑀺𑀬𑀢𑁆𑀣𑀕𑀫𑀓𑀸’’𑀢𑀺 𑀜𑀸𑀬𑁂𑀦 𑀯𑀬𑁄 𑀏𑀯𑀸𑀢𑀺. 𑀯𑀬𑀢𑀻𑀢𑀺 𑀳𑀺 𑀯𑀬𑁄, 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑁂𑀲𑀼 𑀓𑀢𑁆𑀣𑀘𑀺𑀧𑀺 𑀅𑀧𑀭𑀺𑀓𑀺𑀮𑀫𑀦𑁆𑀢𑁄 𑀅𑀯𑀺𑀢𑁆𑀣𑀸𑀬𑀦𑁆𑀢𑁄 𑀢𑁂 𑀕𑀦𑁆𑀣𑁂 𑀲𑀦𑁆𑀢𑀸𑀦𑁂 𑀧𑀡𑁂𑀢𑀺 𑀩𑁆𑀬𑀯𑀳𑀭𑀢𑀻𑀢𑀺 𑀅𑀢𑁆𑀣𑁄. 𑀅𑀬𑀁 𑀧𑀦 𑀯𑀺𑀦𑀬𑀝𑁆𑀞𑀓𑀣𑀸𑀦𑀬𑁄 (𑀧𑀸𑀭𑀸. 𑁮𑁪) 𑁋 𑀅𑀦𑀯𑀬𑁄𑀢𑀺 𑀅𑀦𑀼 𑀅𑀯𑀬𑁄, 𑀲𑀦𑁆𑀥𑀺𑀯𑀲𑁂𑀦 𑀉-𑀓𑀸𑀭𑀮𑁄𑀧𑁄, 𑀅𑀦𑀼 𑀅𑀦𑀼 𑀅𑀯𑀬𑁄 𑀅𑀦𑀽𑀦𑁄, 𑀧𑀭𑀺𑀧𑀼𑀡𑁆𑀡𑀲𑀺𑀧𑁆𑀧𑁄𑀢𑀺 𑀅𑀢𑁆𑀣𑁄. 𑀯𑀬𑁄𑀢𑀺 𑀳𑀺 𑀳𑀸𑀦𑀺 ‘‘𑀆𑀬𑀯𑀬𑁄’’𑀢𑀺𑀆𑀤𑀻𑀲𑀼 𑀯𑀺𑀬, 𑀦𑀢𑁆𑀣𑀺 𑀏𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀕𑀦𑁆𑀣𑁂𑀲𑀼 𑀯𑀬𑁄 𑀊𑀦𑀢𑀸𑀢𑀺 𑀅𑀯𑀬𑁄, 𑀅𑀦𑀼 𑀅𑀦𑀼 𑀅𑀯𑀬𑁄 𑀅𑀦𑀯𑀬𑁄𑀢𑀺.

‘‘𑀅𑀦𑀼𑀜𑁆𑀜𑀸𑀢𑁄’’𑀢𑀺 𑀧𑀤𑀲𑁆𑀲 𑀓𑀫𑁆𑀫𑀲𑀸𑀥𑀦𑀯𑀲𑁂𑀦, ‘‘𑀧𑀝𑀺𑀜𑁆𑀜𑀸𑀢𑁄’’𑀢𑀺 𑀧𑀤𑀲𑁆𑀲 𑀘 𑀓𑀢𑁆𑀢𑀼𑀲𑀸𑀥𑀦𑀯𑀲𑁂𑀦 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀆𑀘𑀭𑀺𑀬𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀅𑀲𑁆𑀲𑀸𑀢𑀺 𑀅𑀫𑁆𑀩𑀝𑁆𑀞𑀲𑁆𑀲. 𑀧𑀸𑀴𑀺𑀬𑀁 ‘‘𑀬𑀫𑀳𑀁 𑀚𑀸𑀦𑀸𑀫𑀺, 𑀢𑀁 𑀢𑁆𑀯𑀁 𑀚𑀸𑀦𑀸𑀲𑀻’’𑀢𑀺 𑀇𑀤𑀁 𑀅𑀦𑀼𑀚𑀸𑀦𑀦𑀸𑀓𑀸𑀭𑀤𑀲𑁆𑀲𑀦𑀁, ‘‘𑀬𑀁 𑀢𑁆𑀯𑀁 𑀚𑀸𑀦𑀸𑀲𑀺, 𑀢𑀫𑀳𑀁 𑀚𑀸𑀦𑀸𑀫𑀻’’𑀢𑀺 𑀇𑀤𑀁 𑀧𑀦 𑀧𑀝𑀺𑀚𑀸𑀦𑀦𑀸𑀓𑀸𑀭𑀤𑀲𑁆𑀲𑀦𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀬𑀁 𑀅𑀳’’𑀦𑁆𑀢𑀺𑀆𑀤𑀺𑀦𑀸. ‘‘𑀆𑀫 𑀆𑀘𑀭𑀺𑀬𑀸’’𑀢𑀺 𑀳𑀺 𑀬𑀣𑀸𑀕𑀢𑀁 𑀧𑀝𑀺𑀚𑀸𑀦𑀦𑀯𑀘𑀦𑀫𑁂𑀯 𑀅𑀢𑁆𑀣𑀯𑀲𑁂𑀦 𑀯𑀼𑀢𑁆𑀢𑀁. 𑀬𑀦𑁆𑀢𑀺 𑀢𑁂𑀯𑀺𑀚𑁆𑀚𑀓𑀁 𑀧𑀸𑀯𑀘𑀦𑀁. 𑀢𑀲𑁆𑀲𑀸𑀢𑀺 𑀆𑀘𑀭𑀺𑀬𑀲𑁆𑀲. 𑀧𑀝𑀺𑀯𑀘𑀦𑀤𑀸𑀦𑀫𑁂𑀯 𑀧𑀝𑀺𑀜𑁆𑀜𑀸 𑀢𑀣𑀸, 𑀢𑀸𑀬 𑀲𑀬𑀫𑁂𑀯 𑀧𑀝𑀺𑀜𑁆𑀜𑀸𑀢𑁄𑀢𑀺 𑀅𑀢𑁆𑀣𑁄. ‘‘𑀲𑀓𑁂’’𑀢𑀺𑀆𑀤𑀺 𑀅𑀦𑀼𑀚𑀸𑀦𑀦𑀧𑀝𑀺𑀚𑀸𑀦𑀦𑀸𑀥𑀺𑀓𑀸𑀭𑀤𑀲𑁆𑀲𑀦𑀁. 𑀅𑀤𑁂𑀲𑀲𑁆𑀲𑀧𑀺 𑀤𑁂𑀲𑀫𑀺𑀯 𑀓𑀧𑁆𑀧𑀦𑀸𑀫𑀢𑁆𑀢𑁂𑀦𑀸𑀢𑀺 𑀯𑀼𑀢𑁆𑀢𑀁 ‘‘𑀓𑀢𑀭𑀲𑁆𑀫𑀺’’𑀦𑁆𑀢𑀺𑀆𑀤𑀺. 𑀲𑀲𑁆𑀲 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀲𑀓𑀁. 𑀆𑀘𑀭𑀺𑀬𑀸𑀦𑀁 𑀧𑀭𑀫𑁆𑀧𑀭𑀢𑁄, 𑀧𑀭𑀫𑁆𑀧𑀭𑀪𑀽𑀢𑁂𑀳𑀺 𑀯𑀸 𑀆𑀘𑀭𑀺𑀬𑁂𑀳𑀺 𑀆𑀕𑀢𑀁 𑀆𑀘𑀭𑀺𑀬𑀓𑀁. 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸, 𑀢𑀸𑀲𑀁 𑀲𑀫𑀽𑀳𑁄 𑀢𑁂𑀯𑀺𑀚𑁆𑀚𑀓𑀁, 𑀯𑁂𑀤𑀢𑁆𑀢𑀬𑀁. 𑀧𑀥𑀸𑀦𑀁 𑀯𑀘𑀦𑀁, 𑀧𑀓𑀝𑁆𑀞𑀸𑀦𑀁 𑀯𑀸 𑀅𑀝𑁆𑀞𑀓𑀸𑀤𑀻𑀦𑀁 𑀯𑀘𑀦𑀁 𑀧𑀸𑀯𑀘𑀦𑀁.

𑁨𑁫𑁭. 𑀇𑀤𑀸𑀦𑀺 𑀬𑁂𑀦𑀸𑀥𑀺𑀧𑁆𑀧𑀸𑀬𑁂𑀦 𑀩𑁆𑀭𑀸𑀳𑁆𑀫𑀡𑁄 𑀧𑁄𑀓𑁆𑀔𑀭𑀲𑀸𑀢𑀻 𑀅𑀫𑁆𑀩𑀝𑁆𑀞𑀁 𑀫𑀸𑀡𑀯𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀅𑀬𑀁 𑀢𑀸𑀢𑀸’’𑀢𑀺𑀆𑀤𑀺𑀯𑀘𑀦𑀫𑀩𑁆𑀭𑁆𑀯𑀺, 𑀢𑀤𑀥𑀺𑀧𑁆𑀧𑀸𑀬𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀏𑀲 𑀓𑀺𑀭𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀕𑁆𑀕𑀢𑀲𑁆𑀲𑀸𑀢𑀺 𑀧𑀼𑀩𑁆𑀩𑁂 𑀧𑀸𑀓𑀝𑀲𑁆𑀲 𑀓𑀺𑀢𑁆𑀢𑀺𑀫𑀢𑁄 𑀧𑁄𑀭𑀸𑀡𑀚𑀦𑀲𑁆𑀲. 𑀩𑀳𑀽 𑀚𑀦𑀸𑀢𑀺 𑀧𑀽𑀭𑀡𑀓𑀲𑁆𑀲𑀧𑀸𑀤𑀬𑁄 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀏𑀓𑀘𑁆𑀘𑀦𑁆𑀢𑀺 𑀔𑀢𑁆𑀢𑀺𑀬𑀸𑀤𑀺𑀚𑀸𑀢𑀺𑀫𑀦𑁆𑀢𑀁, 𑀮𑁄𑀓𑀲𑀫𑁆𑀫𑀢𑀁 𑀯𑀸 𑀚𑀦𑀁. 𑀕𑀭𑀽𑀢𑀺 𑀪𑀸𑀭𑀺𑀬𑀁, 𑀅𑀢𑁆𑀢𑀸𑀦𑀁 𑀢𑀢𑁄 𑀫𑁄𑀘𑁂𑀢𑁆𑀯𑀸 𑀅𑀧𑀕𑀫𑀦𑀫𑀢𑁆𑀢𑀫𑁆𑀧𑀺 𑀤𑀼𑀓𑁆𑀓𑀭𑀁 𑀳𑁄𑀢𑀺, 𑀧𑀕𑁂𑀯 𑀢𑀤𑀼𑀢𑁆𑀢𑀭𑀺 𑀓𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀦𑀢𑁆𑀣𑁄 𑀦𑀸𑀫 𑀢𑀣𑀸𑀧𑀕𑀫𑀦𑀸𑀤𑀺𑀦𑀸 𑀦𑀺𑀦𑁆𑀤𑀸𑀩𑁆𑀬𑀸𑀭𑁄𑀲𑀉𑀧𑀸𑀭𑀫𑁆𑀪𑀸𑀤𑀺.

‘‘𑀅𑀩𑁆𑀪𑀼𑀕𑁆𑀕𑀢𑁄’’𑀢𑀺 𑀏𑀢𑁆𑀣 𑀅𑀪𑀺𑀲𑀤𑁆𑀤𑀬𑁄𑀕𑁂𑀦 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀢𑁆𑀣𑀯𑀲𑁂𑀦𑁂𑀯 ‘‘𑀕𑁄𑀢𑀫’’𑀦𑁆𑀢𑀺 𑀉𑀧𑀬𑁄𑀕𑀯𑀘𑀦𑀁. ‘‘𑀢𑀁 𑀪𑀯𑀦𑁆𑀢𑀁, 𑀢𑀣𑀸 𑀲𑀦𑁆𑀢𑀁𑀬𑁂𑀯𑀸’’𑀢𑀺 𑀧𑀤𑁂𑀲𑀼𑀧𑀺 𑀢𑀲𑁆𑀲 𑀅𑀦𑀼𑀧𑀬𑁄𑀕𑀢𑁆𑀢𑀸 𑀢𑀤𑀢𑁆𑀣𑀯𑀲𑁂𑀦𑁂𑀯𑀸𑀢𑀺 𑀤𑀲𑁆𑀲𑁂𑀢𑀺 ‘‘𑀢𑀲𑁆𑀲 𑀪𑁄𑀢𑁄’’𑀢𑀺𑀆𑀤𑀺𑀦𑀸. 𑀢𑁂𑀦𑀸𑀳 ‘‘𑀇𑀥𑀸𑀧𑀻’’𑀢𑀺𑀆𑀤𑀺. 𑀢𑀣𑀸 𑀲𑀢𑁄𑀬𑁂𑀯𑀸𑀢𑀺 𑀬𑁂𑀦𑀸𑀓𑀸𑀭𑁂𑀦 𑀅𑀭𑀳𑀢𑀸𑀤𑀺𑀦𑀸 𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄, 𑀢𑁂𑀦𑀸𑀓𑀸𑀭𑁂𑀦 𑀲𑀦𑁆𑀢𑀲𑁆𑀲 𑀪𑀽𑀢𑀲𑁆𑀲 𑀏𑀯 𑀢𑀲𑁆𑀲 𑀪𑀯𑀢𑁄 𑀕𑁄𑀢𑀫𑀲𑁆𑀲 𑀲𑀤𑁆𑀤𑁄 𑀬𑀤𑀺 𑀯𑀸 𑀅𑀩𑁆𑀪𑀼𑀕𑁆𑀕𑀢𑁄𑀢𑀺 𑀅𑀢𑁆𑀣𑁄. 𑀅𑀧𑀺𑀘 𑀢𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀢𑀣𑀸 𑀲𑀦𑁆𑀢𑀁𑀬𑁂𑀯𑀸𑀢𑀺 𑀏𑀓𑀲𑁆𑀲𑀧𑀺 𑀅𑀢𑁆𑀣𑀲𑁆𑀲 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀲𑀫𑁆𑀩𑀦𑁆𑀥𑀪𑀸𑀯𑁂𑀦 𑀯𑀘𑀦𑀁 𑀲𑀸𑀫𑀜𑁆𑀜𑀯𑀺𑀲𑀺𑀝𑁆𑀞𑀢𑀸𑀧𑀭𑀺𑀓𑀧𑁆𑀧𑀦𑁂𑀦 𑀅𑀢𑁆𑀣𑀯𑀺𑀲𑁂𑀲𑀯𑀺𑀜𑁆𑀜𑀸𑀧𑀦𑀢𑁆𑀣𑀁, 𑀢𑀲𑁆𑀫𑀸 ‘‘𑀢𑀲𑁆𑀲 𑀪𑁄𑀢𑁄 𑀕𑁄𑀢𑀫𑀲𑁆𑀲𑀸’’𑀢𑀺 𑀲𑀸𑀫𑀜𑁆𑀜𑀲𑀫𑁆𑀩𑀦𑁆𑀥𑀪𑀸𑀯𑁂𑀦 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 ‘‘𑀢𑀣𑀸 𑀲𑀢𑁄𑀬𑁂𑀯𑀸’’𑀢𑀺 𑀯𑀺𑀲𑁂𑀲𑀲𑀫𑁆𑀩𑀦𑁆𑀥𑀪𑀸𑀯𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀬𑀤𑀺-𑀲𑀤𑁆𑀤𑁄 𑀘𑁂𑀢𑁆𑀣 𑀲𑀁𑀲𑀬𑀢𑁆𑀣𑁄 𑀤𑁆𑀯𑀺𑀦𑁆𑀦𑀫𑁆𑀧𑀺 𑀅𑀢𑁆𑀣𑀸𑀦𑀁 𑀲𑀁𑀲𑀬𑀺𑀢𑀩𑁆𑀩𑀢𑁆𑀢𑀸. 𑀯𑀸-𑀲𑀤𑁆𑀤𑁄 𑀘 𑀯𑀺𑀓𑀧𑁆𑀧𑀦𑀢𑁆𑀣𑁄 𑀢𑁂𑀲𑀼 𑀏𑀓𑀲𑁆𑀲 𑀯𑀺𑀓𑀧𑁆𑀧𑁂𑀢𑀩𑁆𑀩𑀢𑁆𑀢𑀸. 𑀲𑀤𑁆𑀤𑀯𑀺𑀤𑀽 𑀧𑀦 𑀏𑀯𑀁 𑀯𑀤𑀦𑁆𑀢𑀺 𑁋 ‘‘𑀇𑀫𑀲𑁆𑀲 𑀯𑀘𑀦𑀁 𑀲𑀘𑁆𑀘𑀁 𑀯𑀸 𑀬𑀤𑀺 𑀯𑀸 𑀫𑀼𑀲𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀬𑀤𑀺-𑀲𑀤𑁆𑀤𑁄 𑀯𑀸-𑀲𑀤𑁆𑀤𑁄 𑀘 𑀉𑀪𑁄𑀧𑀺 𑀯𑀺𑀓𑀧𑁆𑀧𑀢𑁆𑀣𑀸𑀬𑁂𑀯. 𑀬𑀤𑀺-𑀲𑀤𑁆𑀤𑁄𑀧𑀺 𑀳𑀺 ‘‘𑀬𑀁 𑀬𑀤𑁂𑀯 𑀧𑀭𑀺𑀲𑀁 𑀉𑀧𑀲𑀗𑁆𑀓𑀫𑀢𑀺 𑀬𑀤𑀺 𑀔𑀢𑁆𑀢𑀺𑀬𑀧𑀭𑀺𑀲𑀁 𑀬𑀤𑀺 𑀩𑁆𑀭𑀸𑀳𑁆𑀫𑀡𑀧𑀭𑀺𑀲’’𑀦𑁆𑀢𑀺𑀆𑀤𑀻𑀲𑀼 (𑀅. 𑀦𑀺. 𑁫.𑁩𑁪) 𑀯𑀸-𑀲𑀤𑁆𑀤𑀢𑁆𑀣𑁄 𑀤𑀺𑀲𑁆𑀲𑀢𑀺. ‘‘𑀅𑀧𑁆𑀧𑀁 𑀯𑀲𑁆𑀲𑀲𑀢𑀁 𑀆𑀬𑀼, 𑀇𑀤𑀸𑀦𑁂𑀢𑀭𑀳𑀺 𑀯𑀺𑀚𑁆𑀚𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀘 𑀇𑀥 𑀲𑀫𑀸𑀦𑀢𑁆𑀣𑀲𑀤𑁆𑀤𑀧𑀬𑁄𑀕𑁄𑀢𑀺. 𑀧𑀸𑀴𑀺𑀬𑀁 ‘‘𑀬𑀤𑀺 𑀯𑀸 𑀦𑁄 𑀢𑀣𑀸’’𑀢𑀺 𑀇𑀤𑀫𑁆𑀧𑀺 ‘‘𑀲𑀦𑁆𑀢𑀁𑀬𑁂𑀯 𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀚𑁆𑀛𑀺𑀢𑁆𑀯𑀸 𑀬𑀣𑀸𑀯𑀼𑀢𑁆𑀢𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁. 𑀦𑀦𑀼 ‘‘𑀕𑁄𑀢𑀫’’𑀦𑁆𑀢𑀺 𑀧𑀤𑁂𑀬𑁂𑀯 𑀉𑀧𑀬𑁄𑀕𑀯𑀘𑀦𑀁 𑀲𑀺𑀬𑀸, 𑀦 𑀏𑀢𑁆𑀣𑀸𑀢𑀺 𑀘𑁄𑀤𑀦𑀸𑀬 ‘‘𑀇𑀥𑀸𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀲𑁆𑀲 𑀅𑀦𑀼𑀧𑀬𑁄𑀕𑀢𑁆𑀢𑀸, 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀲𑀫𑁆𑀩𑀦𑁆𑀥𑀯𑀺𑀲𑁂𑀲𑀪𑀸𑀯𑁂𑀦 𑀬𑁄𑀚𑁂𑀢𑀩𑁆𑀩𑀢𑁆𑀢𑀸 𑀯𑀸 𑀇𑀥𑀸𑀧𑀺 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀢𑁆𑀣𑀯𑀲𑁂𑀦𑁂𑀯 𑀉𑀧𑀬𑁄𑀕𑀯𑀘𑀦𑀁 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀁 𑀅𑀢𑁆𑀣𑁄 𑀬𑀲𑁆𑀲 𑀢𑀣𑀸, 𑀅𑀪𑀺𑀲𑀤𑁆𑀤𑁄, 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀫𑁂𑀯 𑀯𑀸 𑀅𑀢𑁆𑀣𑁄 𑀢𑀣𑀸, 𑀲𑁄𑀬𑁂𑀯𑀢𑁆𑀣𑁄. 𑀬𑀤𑀕𑁆𑀕𑁂𑀦 𑀳𑀺 𑀲𑀤𑁆𑀤𑀬𑁄𑀕𑁄 𑀳𑁄𑀢𑀺, 𑀢𑀤𑀕𑁆𑀕𑁂𑀦 𑀅𑀢𑁆𑀣𑀬𑁄𑀕𑁄𑀧𑀻𑀢𑀺.

𑁨𑁫𑁮. 𑀪𑁄𑀢𑀺 𑀅𑀢𑁆𑀢𑀦𑁄 𑀆𑀘𑀭𑀺𑀬𑀁 𑀆𑀮𑀧𑀢𑀺. 𑀬𑀣𑀸-𑀲𑀤𑁆𑀤𑀁 𑀲𑀸𑀢𑁆𑀣𑀓𑀁 𑀓𑀢𑁆𑀯𑀸 𑀲𑀳 𑀧𑀸𑀞𑀲𑁂𑀲𑁂𑀦 𑀬𑁄𑀚𑁂𑀢𑀼𑀁 ‘‘𑀬𑀣𑀸 𑀲𑀓𑁆𑀓𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑁄𑀢𑀺 𑀪𑀕𑀯𑀸. 𑀧𑀼𑀭𑀺𑀫𑀦𑀬𑁂 𑀆𑀓𑀸𑀭𑀢𑁆𑀣𑀚𑁄𑀢𑀦𑀬𑀣𑀸-𑀲𑀤𑁆𑀤𑀬𑁄𑀕𑁆𑀬𑀢𑁄 𑀓𑀣𑀦𑁆𑀢𑀺 𑀧𑀼𑀘𑁆𑀙𑀸𑀫𑀢𑁆𑀢𑀁, 𑀇𑀥 𑀧𑀦 𑀢𑀤𑀬𑁄𑀕𑁆𑀬𑀢𑁄 ‘‘𑀆𑀓𑀸𑀭𑀧𑀼𑀘𑁆𑀙𑀸’’𑀢𑀺 𑀯𑀼𑀢𑁆𑀢𑀁. 𑀩𑀸𑀳𑀺𑀭𑀓𑀲𑀫𑀬𑁂 𑀆𑀘𑀭𑀺𑀬𑀫𑁆𑀳𑀺 𑀉𑀧𑀚𑁆𑀛𑀸𑀬𑀲𑀫𑀼𑀤𑀸𑀘𑀸𑀭𑁄𑀢𑀺 𑀆𑀳 ‘‘𑀅𑀣 𑀦𑀁 𑀉𑀧𑀚𑁆𑀛𑀸𑀬𑁄’’𑀢𑀺, 𑀉𑀧𑀚𑁆𑀛𑀸𑀬𑀲𑀜𑁆𑀜𑀺𑀢𑁄 𑀆𑀘𑀭𑀺𑀬𑀩𑁆𑀭𑀸𑀳𑁆𑀫𑀡𑁄𑀢𑀺 𑀅𑀢𑁆𑀣𑁄.

𑀓𑀸𑀫𑀜𑁆𑀘 𑀫𑀦𑁆𑀢𑁄, 𑀩𑁆𑀭𑀳𑁆𑀫𑀁, 𑀓𑀧𑁆𑀧𑁄𑀢𑀺 𑀢𑀺𑀩𑁆𑀩𑀺𑀥𑁄 𑀯𑁂𑀤𑁄, 𑀢𑀣𑀸𑀧𑀺 𑀅𑀝𑁆𑀞𑀓𑀸𑀤𑀺 𑀯𑀼𑀢𑁆𑀢𑀁 𑀧𑀥𑀸𑀦𑀪𑀽𑀢𑀁 𑀫𑀽𑀮𑀁 𑀫𑀦𑁆𑀢𑁄, 𑀢𑀤𑀢𑁆𑀣𑀯𑀺𑀯𑀭𑀡𑀫𑀢𑁆𑀣𑀁 𑀩𑁆𑀭𑀳𑁆𑀫𑀁, 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀬𑀜𑁆𑀜𑀓𑀺𑀭𑀺𑀬𑀸𑀯𑀺𑀥𑀸𑀦𑀁 𑀓𑀧𑁆𑀧𑁄𑀢𑀺 𑀫𑀦𑁆𑀢𑀲𑁆𑀲𑁂𑀯 𑀧𑀥𑀸𑀦𑀪𑀸𑀯𑀢𑁄, 𑀇𑀢𑀭𑁂𑀲𑀜𑁆𑀘 𑀢𑀦𑁆𑀦𑀺𑀲𑁆𑀲𑀬𑁂𑀦𑁂𑀯 𑀚𑀸𑀢𑀢𑁆𑀢𑀸 𑀫𑀦𑁆𑀢𑀕𑁆𑀕𑀳𑀡𑁂𑀦 𑀩𑁆𑀭𑀳𑁆𑀫𑀓𑀧𑁆𑀧𑀸𑀦𑀫𑁆𑀧𑀺 𑀕𑀳𑀡𑀁 𑀲𑀺𑀤𑁆𑀥𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀺 ‘‘𑀢𑀻𑀲𑀼 𑀯𑁂𑀤𑁂𑀲𑀽’’𑀢𑀺 𑀇𑀫𑀺𑀦𑀸. 𑀫𑀦𑁆𑀢𑁄𑀢𑀺 𑀳𑀺 𑀅𑀝𑁆𑀞𑀓𑀸𑀤𑀻𑀳𑀺 𑀇𑀲𑀻𑀳𑀺 𑀯𑀼𑀢𑁆𑀢𑀫𑀽𑀮𑀯𑁂𑀤𑀲𑁆𑀲𑁂𑀯 𑀦𑀸𑀫𑀁, 𑀯𑁂𑀤𑁄𑀢𑀺 𑀲𑀩𑁆𑀩𑀲𑁆𑀲, 𑀢𑀲𑁆𑀫𑀸 ‘‘𑀯𑁂𑀤𑁂𑀲𑀽’’𑀢𑀺 𑀯𑀼𑀢𑁆𑀢𑁂 𑀲𑀩𑁆𑀩𑁂𑀲𑀫𑁆𑀧𑀺 𑀕𑀳𑀡𑀁 𑀲𑀺𑀚𑁆𑀛𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀮𑀓𑁆𑀔𑀡𑀸𑀦𑀻𑀢𑀺 𑀮𑀓𑁆𑀔𑀡𑀤𑀻𑀧𑀓𑀸𑀦𑀺 𑀫𑀦𑁆𑀢𑀧𑀤𑀸𑀦𑀺. 𑀧𑀚𑁆𑀚𑀕𑀚𑁆𑀚𑀩𑀦𑁆𑀥𑀧𑀯𑁂𑀲𑀦𑀯𑀲𑁂𑀦 𑀧𑀓𑁆𑀔𑀺𑀧𑀺𑀢𑁆𑀯𑀸. 𑀩𑁆𑀭𑀸𑀳𑁆𑀫𑀡𑀯𑁂𑀲𑁂𑀦𑁂𑀯𑀸𑀢𑀺 𑀯𑁂𑀤𑀯𑀸𑀘𑀓𑀩𑁆𑀭𑀸𑀳𑁆𑀫𑀡𑀮𑀺𑀗𑁆𑀕𑁂𑀦𑁂𑀯. 𑀯𑁂𑀤𑁂𑀢𑀺 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀫𑀦𑁆𑀢𑁂. 𑀫𑀳𑁂𑀲𑀓𑁆𑀔𑀸 𑀲𑀢𑁆𑀢𑀸𑀢𑀺 𑀫𑀳𑀸𑀧𑀼𑀜𑁆𑀜𑀯𑀦𑁆𑀢𑁄 𑀧𑀡𑁆𑀟𑀺𑀢𑀲𑀢𑁆𑀢𑀸. 𑀚𑀸𑀦𑀺𑀲𑁆𑀲𑀦𑁆𑀢𑀺 𑀇𑀢𑀺 𑀫𑀦𑀲𑀺 𑀓𑀢𑁆𑀯𑀸 𑀯𑀸𑀘𑁂𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀦𑀸𑀢𑀺 𑀢𑀣𑀸 𑀯𑀸𑀘𑀦𑀢𑁄. 𑀧𑀼𑀩𑁆𑀩𑁂𑀢𑀺 ‘‘𑀢𑀣𑀸𑀕𑀢𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀓𑀸𑀮𑀢𑁄 𑀧𑀪𑀼𑀢𑀺 𑀢𑀣𑀸𑀕𑀢𑀲𑁆𑀲 𑀥𑀭𑀫𑀸𑀦𑀓𑀸𑀮𑁂. 𑀅𑀚𑁆𑀛𑀸𑀬𑀺𑀢𑀩𑁆𑀩𑀯𑀸𑀘𑁂𑀢𑀩𑁆𑀩𑀪𑀸𑀯𑁂𑀦 𑀆𑀕𑀘𑁆𑀙𑀦𑁆𑀢𑀺 𑀧𑀸𑀓𑀝𑀸 𑀪𑀯𑀦𑁆𑀢𑀺. 𑀏𑀓𑀕𑀸𑀣𑀸𑀤𑁆𑀯𑀺𑀕𑀸𑀣𑀸𑀤𑀺𑀯𑀲𑁂𑀦 𑀅𑀦𑀼𑀓𑁆𑀓𑀫𑁂𑀦 𑀅𑀦𑁆𑀢𑀭𑀥𑀸𑀬𑀦𑁆𑀢𑀺. 𑀦 𑀓𑁂𑀯𑀮𑀁 𑀮𑀓𑁆𑀔𑀡𑀫𑀦𑁆𑀢𑀸𑀬𑁂𑀯, 𑀅𑀣 𑀔𑁄 𑀅𑀜𑁆𑀜𑁂𑀧𑀺 𑀯𑁂𑀤𑀸 𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀜𑁆𑀜𑀸𑀡𑀪𑀸𑀯𑁂𑀦 𑀅𑀦𑀼𑀓𑁆𑀓𑀫𑁂𑀦 𑀅𑀦𑁆𑀢𑀭𑀥𑀸𑀬𑀦𑁆𑀢𑀺 𑀏𑀯𑀸𑀢𑀺 𑀆𑀘𑀭𑀺𑀬𑁂𑀦 (𑀤𑀻. 𑀦𑀺. 𑀝𑀻. 𑁧.𑁨𑁫𑁮) 𑀯𑀼𑀢𑁆𑀢𑀁.

𑀩𑀼𑀤𑁆𑀥𑀪𑀸𑀯𑀧𑀢𑁆𑀣𑀦𑀸 𑀧𑀡𑀺𑀥𑀺, 𑀧𑀸𑀭𑀫𑀻𑀲𑀫𑁆𑀪𑀭𑀡𑀁 𑀲𑀫𑀸𑀤𑀸𑀦𑀁, 𑀓𑀫𑁆𑀫𑀲𑁆𑀲𑀓𑀢𑀸𑀤𑀺𑀧𑀜𑁆𑀜𑀸 𑀜𑀸𑀡𑀁. ‘‘𑀧𑀡𑀺𑀥𑀺𑀫𑀳𑀢𑁄 𑀲𑀫𑀸𑀤𑀸𑀦𑀫𑀳𑀢𑁄𑀢𑀺𑀆𑀤𑀺𑀦𑀸 𑀧𑀘𑁆𑀘𑁂𑀓𑀁 𑀫𑀳𑀦𑁆𑀢𑀲𑀤𑁆𑀤𑁄 𑀬𑁄𑀚𑁂𑀢𑀩𑁆𑀩𑁄’’𑀢𑀺 (𑀤𑀻. 𑀦𑀺. 𑀝𑀻. 𑁧.𑁨𑁫𑁮) 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑀁. 𑀏𑀯𑀜𑁆𑀘 𑀲𑀢𑀺 𑀓𑀭𑀼𑀡𑀸 𑀆𑀤𑀺 𑀬𑁂𑀲𑀁 𑀲𑀤𑁆𑀥𑀸𑀲𑀻𑀮𑀸𑀤𑀻𑀦𑀁 𑀢𑁂 𑀓𑀭𑀼𑀡𑀸𑀤𑀬𑁄, 𑀢𑁂 𑀏𑀯 𑀕𑀼𑀡𑀸 𑀓𑀭𑀼𑀡𑀸𑀤𑀺𑀕𑀼𑀡𑀸, 𑀧𑀡𑀺𑀥𑀺 𑀘 𑀲𑀫𑀸𑀤𑀸𑀦𑀜𑁆𑀘 𑀜𑀸𑀡𑀜𑁆𑀘 𑀓𑀭𑀼𑀡𑀸𑀤𑀺𑀕𑀼𑀡𑀸 𑀘, 𑀢𑁂𑀳𑀺 𑀫𑀳𑀦𑁆𑀢𑁄 𑀧𑀡𑀺𑀥𑀺𑀲𑀫𑀸𑀤𑀸𑀦𑀜𑀸𑀡𑀓𑀭𑀼𑀡𑀸𑀤𑀺𑀕𑀼𑀡𑀫𑀳𑀦𑁆𑀢𑁄𑀢𑀺 𑀦𑀺𑀩𑁆𑀩𑀘𑀦𑀁 𑀓𑀸𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀤𑁆𑀯𑀦𑁆𑀤𑀢𑁄𑀧𑀭𑀢𑁆𑀢𑀸 𑀫𑀳𑀦𑁆𑀢𑀲𑀤𑁆𑀤𑁄 𑀧𑀘𑁆𑀘𑁂𑀓𑀁 𑀬𑁄𑀚𑀻𑀬𑀢𑀻𑀢𑀺. 𑀅𑀧𑀺𑀘 𑀧𑀡𑀺𑀥𑀺 𑀘 𑀲𑀫𑀸𑀤𑀸𑀦𑀜𑁆𑀘 𑀜𑀸𑀡𑀜𑁆𑀘 𑀓𑀭𑀼𑀡𑀸 𑀘, 𑀢𑀫𑀸𑀤𑀺 𑀬𑁂𑀲𑀁 𑀢𑁂 𑀢𑀣𑀸, 𑀢𑁂𑀬𑁂𑀯 𑀕𑀼𑀡𑀸, 𑀢𑁂𑀳𑀺 𑀫𑀳𑀦𑁆𑀢𑁄𑀢𑀺 𑀦𑀺𑀩𑁆𑀩𑀘𑀦𑁂𑀦𑀧𑀺 𑀅𑀢𑁆𑀣𑁄 𑀲𑀽𑀧𑀧𑀦𑁆𑀦𑁄 𑀳𑁄𑀢𑀺, 𑀧𑀡𑀺𑀥𑀺𑀫𑀳𑀦𑁆𑀢𑀢𑀸𑀤𑀺 𑀘𑀲𑁆𑀲 𑀩𑀼𑀤𑁆𑀥𑀯𑀁𑀲 (𑀩𑀼. 𑀯𑀁. 𑁯 𑀆𑀤𑀬𑁄) 𑀘𑀭𑀺𑀬𑀸𑀧𑀺𑀝𑀓𑀸𑀤𑀺 (𑀘𑀭𑀺𑀬𑀸. 𑁧 𑀆𑀤𑀬𑁄) 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀫𑀳𑀸𑀧𑀤𑀸𑀦𑀲𑀼𑀢𑁆𑀢𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀫𑀳𑀸𑀧𑀼𑀭𑀺𑀲𑀲𑁆𑀲𑀸𑀢𑀺 𑀚𑀸𑀢𑀺𑀕𑁄𑀢𑁆𑀢𑀓𑀼𑀮𑀧𑀤𑁂𑀲𑀸𑀤𑀺𑀯𑀲𑁂𑀦 𑀫𑀳𑀦𑁆𑀢𑀲𑁆𑀲 𑀧𑀼𑀭𑀺𑀲𑀲𑁆𑀲𑀸’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁩) 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀔𑀢𑁆𑀢𑀺𑀬𑁄, 𑀩𑁆𑀭𑀸𑀳𑁆𑀫𑀡𑁄’’𑀢𑀺 𑀏𑀯𑀫𑀸𑀤𑀺 𑀚𑀸𑀢𑀺. ‘‘𑀓𑁄𑀡𑁆𑀟𑀜𑁆𑀜𑁄, 𑀕𑁄𑀢𑀫𑁄’’𑀢𑀺 𑀏𑀯𑀫𑀸𑀤𑀺 𑀕𑁄𑀢𑁆𑀢𑀁. ‘‘𑀧𑁄𑀡𑀺𑀓𑀸, 𑀘𑀺𑀓𑁆𑀔𑀮𑁆𑀮𑀺𑀓𑀸, 𑀲𑀸𑀓𑀺𑀬𑀸, 𑀓𑁄𑀮𑀺𑀬𑀸’’𑀢𑀺 𑀏𑀯𑀫𑀸𑀤𑀺 𑀓𑀼𑀮𑀧𑀤𑁂𑀲𑁄, 𑀢𑀤𑁂𑀢𑀁 𑀲𑀩𑁆𑀩𑀫𑁆𑀧𑀺 𑀇𑀥 𑀆𑀤𑀺𑀲𑀤𑁆𑀤𑁂𑀦 𑀲𑀗𑁆𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀜𑁆𑀳𑀺 𑀲𑀢𑀺 ‘‘𑀤𑁆𑀯𑁂𑀬𑁂𑀯 𑀕𑀢𑀺𑀬𑁄 𑀪𑀯𑀦𑁆𑀢𑀻’’𑀢𑀺 𑀉𑀪𑀺𑀦𑁆𑀦𑀁 𑀲𑀸𑀥𑀸𑀭𑀡𑀯𑀘𑀦𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀻𑀢𑀺.

𑀦𑀺𑀝𑁆𑀞𑀸𑀢𑀺 𑀦𑀺𑀧𑁆𑀨𑀢𑁆𑀢𑀺𑀬𑁄 𑀲𑀺𑀤𑁆𑀥𑀺𑀬𑁄. 𑀦𑀦𑁆𑀯𑀸𑀬𑀁 𑀕𑀢𑀺-𑀲𑀤𑁆𑀤𑁄 𑀅𑀦𑁂𑀓𑀢𑁆𑀣𑁄, 𑀓𑀲𑁆𑀫𑀸 𑀦𑀺𑀝𑁆𑀞𑀸𑀬𑀫𑁂𑀯 𑀯𑀼𑀢𑁆𑀢𑁄𑀢𑀺 𑀆𑀳‘‘𑀓𑀸𑀫𑀜𑁆𑀘𑀸𑀬’’𑀦𑁆𑀢𑀺𑀆𑀤𑀺. 𑀪𑀯𑀪𑁂𑀤𑁂𑀢𑀺 𑀦𑀺𑀭𑀬𑀸𑀤𑀺𑀪𑀯𑀯𑀺𑀲𑁂𑀲𑁂. 𑀲𑁄 𑀳𑀺 𑀲𑀼𑀘𑀭𑀺𑀢𑀤𑀼𑀘𑁆𑀘𑀭𑀺𑀢𑀓𑀫𑁆𑀫𑁂𑀦 𑀲𑀢𑁆𑀢𑁂𑀳𑀺 𑀉𑀧𑀧𑀚𑁆𑀚𑀦𑀯𑀲𑁂𑀦 𑀕𑀦𑁆𑀢𑀩𑁆𑀩𑀸𑀢𑀺 𑀕𑀢𑀺. 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀺 𑀏𑀢𑁆𑀣𑀸𑀢𑀺 𑀕𑀢𑀺, 𑀦𑀺𑀯𑀸𑀲𑀝𑁆𑀞𑀸𑀦𑀁. 𑀕𑀫𑀢𑀺 𑀬𑀣𑀸𑀲𑀪𑀸𑀯𑀁 𑀚𑀸𑀦𑀸𑀢𑀻𑀢𑀺 𑀕𑀢𑀺. 𑀧𑀜𑁆𑀜𑀸, 𑀕𑀫𑀦𑀁 𑀩𑁆𑀬𑀸𑀧𑀦𑀁 𑀕𑀢𑀺, 𑀯𑀺𑀲𑁆𑀲𑀝𑀪𑀸𑀯𑁄, 𑀲𑁄 𑀧𑀦 𑀇𑀢𑁄 𑀘 𑀏𑀢𑁆𑀢𑁄 𑀘 𑀩𑁆𑀬𑀸𑀧𑁂𑀢𑁆𑀯𑀸 𑀞𑀺𑀢𑀢𑀸𑀯. 𑀕𑀫𑀦𑀁 𑀦𑀺𑀧𑁆𑀨𑀢𑁆𑀢𑀦𑀁 𑀕𑀢𑀺, 𑀦𑀺𑀝𑁆𑀞𑀸, 𑀅𑀚𑁆𑀛𑀸𑀲𑀬𑀧𑀝𑀺𑀲𑀭𑀡𑀢𑁆𑀣𑀸𑀧𑀺 𑀦𑀺𑀤𑀲𑁆𑀲𑀦𑀦𑀬𑁂𑀦 𑀕𑀳𑀺𑀢𑀸. 𑀢𑀣𑀸 𑀳𑁂𑀲 ‘‘𑀇𑀫𑁂𑀲𑀁 𑀔𑁄 𑀅𑀳𑀁 𑀪𑀺𑀓𑁆𑀔𑀽𑀦𑀁 𑀲𑀻𑀮𑀯𑀦𑁆𑀢𑀸𑀦𑀁 𑀓𑀮𑁆𑀬𑀸𑀡𑀥𑀫𑁆𑀫𑀸𑀦𑀁 𑀦𑁂𑀯 𑀚𑀸𑀦𑀸𑀫𑀺 𑀆𑀕𑀢𑀺𑀁 𑀯𑀸 𑀕𑀢𑀺𑀁 𑀯𑀸’’𑀢𑀺 (𑀫. 𑀦𑀺. 𑁧.𑁫𑁦𑁮) 𑀏𑀢𑁆𑀣 𑀅𑀚𑁆𑀛𑀸𑀲𑀬𑁂 𑀯𑀢𑁆𑀢𑀢𑀺, ‘‘𑀦𑀺𑀩𑁆𑀩𑀸𑀦𑀁 𑀅𑀭𑀳𑀢𑁄 𑀕𑀢𑀻’’𑀢𑀺 (𑀧𑀭𑀺. 𑁩𑁩𑁯) 𑀏𑀢𑁆𑀣 𑀧𑀝𑀺𑀲𑀭𑀡𑁂, 𑀧𑀭𑀸𑀬𑀡𑁂 𑀅𑀧𑀲𑁆𑀲𑀬𑁂𑀢𑀺 𑀅𑀢𑁆𑀣𑁄. 𑀕𑀘𑁆𑀙𑀢𑀺 𑀬𑀣𑀸𑀭𑀼𑀘𑀺 𑀧𑀯𑀢𑁆𑀢𑀢𑀻𑀢𑀺 𑀕𑀢𑀺, 𑀅𑀚𑁆𑀛𑀸𑀲𑀬𑁄. 𑀕𑀘𑁆𑀙𑀢𑀺 𑀅𑀯𑀘𑀭𑀢𑀺, 𑀅𑀯𑀘𑀭𑀡𑀯𑀲𑁂𑀦 𑀯𑀸 𑀧𑀯𑀢𑁆𑀢𑀢𑀺 𑀏𑀢𑁆𑀣𑀸𑀢𑀺 𑀕𑀢𑀺, 𑀧𑀝𑀺𑀲𑀭𑀡𑀁. 𑀲𑀩𑁆𑀩𑀲𑀗𑁆𑀔𑀢𑀯𑀺𑀲𑀜𑁆𑀜𑀼𑀢𑁆𑀢𑀲𑁆𑀲 𑀳𑀺 𑀅𑀭𑀳𑀢𑁄 𑀦𑀺𑀩𑁆𑀩𑀸𑀦𑀫𑁂𑀯 𑀧𑀝𑀺𑀲𑀭𑀡𑀁, 𑀇𑀥 𑀧𑀦 𑀦𑀺𑀝𑁆𑀞𑀸𑀬𑀁 𑀯𑀢𑁆𑀢𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄 𑀢𑀤𑀜𑁆𑀜𑁂𑀲𑀫𑀯𑀺𑀲𑀬𑀢𑁆𑀢𑀸.

𑀦𑀦𑀼 𑀤𑁆𑀯𑀺𑀦𑁆𑀦𑀁 𑀦𑀺𑀧𑁆𑀨𑀢𑁆𑀢𑀻𑀦𑀁 𑀦𑀺𑀫𑀺𑀢𑁆𑀢𑀪𑀽𑀢𑀸𑀦𑀺 𑀮𑀓𑁆𑀔𑀡𑀸𑀦𑀺 𑀯𑀺𑀲𑀤𑀺𑀲𑀸𑀦𑁂𑀯, 𑀅𑀣 𑀓𑀲𑁆𑀫𑀸 ‘‘𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀢𑁂𑀲𑀁 𑀲𑀤𑀺𑀲𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀘𑁄𑀤𑀦𑀸𑀮𑁂𑀲𑀁 𑀤𑀲𑁆𑀲𑁂𑀢𑁆𑀯𑀸 𑀲𑁄𑀥𑁂𑀦𑁆𑀢𑁄 ‘‘𑀢𑀢𑁆𑀣 𑀓𑀺𑀜𑁆𑀘𑀸𑀧𑀻’’𑀢𑀺𑀆𑀤𑀺𑀫𑀸𑀳. 𑀲𑀫𑀸𑀦𑁂𑀧𑀺 𑀦𑀺𑀕𑁆𑀭𑁄𑀥𑀩𑀺𑀫𑁆𑀩𑀢𑀸𑀤𑀺𑀮𑀓𑁆𑀔𑀡𑀪𑀸𑀯𑁂 𑀅𑀢𑁆𑀣𑁂𑀯 𑀓𑁄𑀘𑀺 𑀦𑁂𑀲𑀁 𑀯𑀺𑀲𑁂𑀲𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀦 𑀢𑁂𑀳𑁂𑀯 𑀩𑀼𑀤𑁆𑀥𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀬𑀣𑀸 𑀳𑀺 𑀩𑀼𑀤𑁆𑀥𑀸𑀦𑀁 𑀮𑀓𑁆𑀔𑀡𑀸𑀦𑀺 𑀲𑀼𑀯𑀺𑀲𑀤𑀸𑀦𑀺, 𑀲𑀼𑀧𑀭𑀺𑀩𑁆𑀬𑀢𑁆𑀢𑀸𑀦𑀺, 𑀧𑀭𑀺𑀧𑀼𑀡𑁆𑀡𑀸𑀦𑀺 𑀘 𑀳𑁄𑀦𑁆𑀢𑀺, 𑀦 𑀏𑀯𑀁 𑀘𑀓𑁆𑀓𑀯𑀢𑁆𑀢𑀻𑀦’’𑀦𑁆𑀢𑀺 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 (𑀤𑀻. 𑀦𑀺. 𑀝𑀻. 𑁧.𑁨𑁫𑁮) 𑀧𑀓𑀸𑀲𑀺𑀢𑁄. 𑀚𑀸𑀬𑀦𑁆𑀢𑀺 𑀪𑀺𑀦𑁆𑀦𑁂𑀲𑀼𑀧𑀺 𑀅𑀢𑁆𑀣𑁂𑀲𑀼 𑀅𑀪𑀺𑀦𑁆𑀦𑀥𑀻𑀲𑀤𑁆𑀤𑀸 𑀏𑀢𑀸𑀬𑀸𑀢𑀺 𑀚𑀸𑀢𑀺, 𑀮𑀓𑁆𑀔𑀡𑀪𑀸𑀯𑀫𑀢𑁆𑀢𑀁. 𑀯𑀼𑀢𑁆𑀢𑀜𑁆𑀳𑀺 𑁋

‘‘𑀲𑀩𑀮𑀸𑀤𑀻𑀲𑀼 𑀪𑀺𑀦𑁆𑀦𑁂𑀲𑀼, 𑀬𑀸𑀬 𑀯𑀢𑁆𑀢𑀦𑁆𑀢𑀼𑀪𑀺𑀦𑁆𑀦𑀥𑀻;

𑀲𑀤𑁆𑀤𑀸 𑀲𑀸 𑀚𑀸𑀢𑀺𑀭𑁂𑀲𑀸 𑀘, 𑀫𑀸𑀮𑀸𑀲𑀼𑀢𑁆𑀢𑀫𑀺𑀯𑀦𑁆𑀯𑀺𑀢𑀸’’𑀢𑀺.

𑀢𑀲𑁆𑀫𑀸 𑀮𑀓𑁆𑀔𑀡𑀢𑀸𑀫𑀢𑁆𑀢𑁂𑀦 𑀲𑀫𑀸𑀦𑀪𑀸𑀯𑀢𑁄 𑀯𑀺𑀲𑀤𑀺𑀲𑀸𑀦𑀺𑀧𑀺 𑀢𑀸𑀦𑀺𑀬𑁂𑀯 𑀘𑀓𑁆𑀓𑀯𑀢𑁆𑀢𑀺𑀦𑀺𑀧𑁆𑀨𑀢𑁆𑀢𑀺𑀦𑀺𑀫𑀺𑀢𑁆𑀢𑀪𑀽𑀢𑀸𑀦𑀺 𑀮𑀓𑁆𑀔𑀡𑀸𑀦𑀺 𑀲𑀤𑀺𑀲𑀸𑀦𑀺 𑀯𑀺𑀬 𑀓𑀢𑁆𑀯𑀸 𑀢𑀸𑀦𑀺 𑀩𑀼𑀤𑁆𑀥𑀦𑀺𑀧𑁆𑀨𑀢𑁆𑀢𑀺𑀦𑀺𑀫𑀺𑀢𑁆𑀢𑀪𑀽𑀢𑀸𑀦𑀺 𑀮𑀓𑁆𑀔𑀡𑀸𑀦𑀺 𑀦𑀸𑀫𑀸𑀢𑀺 𑀇𑀤𑀁 𑀯𑀘𑀦𑀁 𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄. 𑀅𑀥𑀺𑀆𑀧𑀼𑀩𑁆𑀩𑀯𑀲𑀬𑁄𑀕𑁂 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀆𑀳 ‘‘𑀅𑀕𑀸𑀭𑁂 𑀯𑀲𑀢𑀻’’𑀢𑀺 𑀘𑀢𑀽𑀳𑀺 𑀅𑀘𑁆𑀙𑀭𑀺𑀬𑀥𑀫𑁆𑀫𑁂𑀳𑀻𑀢𑀺 𑀅𑀪𑀺𑀭𑀽𑀧𑀢𑀸, 𑀤𑀻𑀖𑀸𑀬𑀼𑀓𑀢𑀸, 𑀅𑀧𑁆𑀧𑀸𑀩𑀸𑀥𑀢𑀸, 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀦𑀁 𑀧𑀺𑀬𑀫𑀦𑀸𑀧𑀢𑀸𑀢𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀅𑀘𑁆𑀙𑀭𑀺𑀬𑀲𑀪𑀸𑀯𑀪𑀽𑀢𑀸𑀳𑀺 𑀇𑀤𑁆𑀥𑀻𑀳𑀺. 𑀬𑀣𑀸𑀳 𑁋

‘‘𑀭𑀸𑀚𑀸 𑀆𑀦𑀦𑁆𑀤, 𑀫𑀳𑀸𑀲𑀼𑀤𑀲𑁆𑀲𑀦𑁄 𑀘𑀢𑀽𑀳𑀺 𑀇𑀤𑁆𑀥𑀻𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀳𑁄𑀲𑀺. 𑀓𑀢𑀫𑀸𑀳𑀺 𑀘𑀢𑀽𑀳𑀺 𑀇𑀤𑁆𑀥𑀻𑀳𑀺? 𑀇𑀥𑀸𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀅𑀪𑀺𑀭𑀽𑀧𑁄 𑀅𑀳𑁄𑀲𑀺 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄’’𑀢𑀺𑀆𑀤𑀺 (𑀤𑀻. 𑀦𑀺. 𑁨.𑁨𑁫𑁨).

𑀘𑁂𑀢𑀺𑀬𑀚𑀸𑀢𑀓𑁂 (𑀚𑀸. 𑀅𑀝𑁆𑀞. 𑁩.𑁮.𑁪𑁪) 𑀆𑀕𑀢𑀦𑀬𑀁 𑀕𑀳𑁂𑀢𑁆𑀯𑀸𑀧𑀺 𑀏𑀯𑀁 𑀯𑀤𑀦𑁆𑀢𑀺 ‘‘𑀲𑀭𑀻𑀭𑀢𑁄 𑀘𑀦𑁆𑀤𑀦𑀕𑀦𑁆𑀥𑁄 𑀯𑀸𑀬𑀢𑀺, 𑀅𑀬𑀁 𑀏𑀓𑀸 𑀇𑀤𑁆𑀥𑀺. 𑀫𑀼𑀔𑀢𑁄 𑀉𑀧𑁆𑀧𑀮𑀕𑀦𑁆𑀥𑁄 𑀯𑀸𑀬𑀢𑀺, 𑀅𑀬𑀁 𑀤𑀼𑀢𑀺𑀬𑀸. 𑀘𑀢𑁆𑀢𑀸𑀭𑁄 𑀤𑁂𑀯𑀧𑀼𑀢𑁆𑀢𑀸 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀲𑀩𑁆𑀩𑀓𑀸𑀮𑀁 𑀔𑀕𑁆𑀕𑀳𑀢𑁆𑀣𑀸 𑀆𑀭𑀓𑁆𑀔𑀁 𑀕𑀡𑁆𑀳𑀦𑁆𑀢𑀺, 𑀅𑀬𑀁 𑀢𑀢𑀺𑀬𑀸. 𑀆𑀓𑀸𑀲𑁂𑀦 𑀯𑀺𑀘𑀭𑀢𑀺, 𑀅𑀬𑀁 𑀘𑀢𑀼𑀢𑁆𑀣𑀻’’𑀢𑀺. 𑀅𑀦𑀸𑀕𑀢𑀯𑀁𑀲𑀲𑀁𑀯𑀡𑁆𑀡𑀦𑀸𑀬𑀁 𑀧𑀦 ‘‘𑀅𑀪𑀺𑀭𑀽𑀧𑀪𑀸𑀯𑁄 𑀏𑀓𑀸 𑀇𑀤𑁆𑀥𑀺, 𑀲𑀫𑀯𑁂𑀧𑀸𑀓𑀺𑀦𑀺𑀬𑀸 𑀕𑀳𑀡𑀺𑀬𑀸 𑀲𑀫𑀦𑁆𑀦𑀸𑀕𑀢𑀪𑀸𑀯𑁄 𑀤𑀼𑀢𑀺𑀬𑀸, 𑀬𑀸𑀯𑀢𑀸𑀬𑀼𑀓𑀫𑁆𑀧𑀺 𑀲𑀓𑀮𑀮𑁄𑀓𑀲𑁆𑀲 𑀤𑀲𑁆𑀲𑀦𑀸𑀢𑀺𑀢𑁆𑀢𑀺𑀓𑀪𑀸𑀯𑁄 𑀢𑀢𑀺𑀬𑀸, 𑀆𑀓𑀸𑀲𑀘𑀸𑀭𑀺𑀪𑀸𑀯𑁄 𑀘𑀢𑀼𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀫𑀯𑁂𑀧𑀸𑀓𑀺𑀦𑀺𑀬𑀸 𑀕𑀳𑀡𑀺𑀬𑀸 𑀲𑀫𑀦𑁆𑀦𑀸𑀕𑀢𑀪𑀸𑀯𑁄𑀢𑀺 𑀲𑀫𑀯𑀺𑀧𑀸𑀘𑀦𑀺𑀬𑀸 𑀓𑀫𑁆𑀫𑀚𑀢𑁂𑀚𑁄𑀥𑀸𑀢𑀼𑀬𑀸 𑀲𑀫𑁆𑀧𑀦𑁆𑀦𑀢𑀸. 𑀬𑀲𑁆𑀲 𑀳𑀺 𑀪𑀼𑀢𑁆𑀢𑀫𑀢𑁆𑀢𑁄𑀯 𑀆𑀳𑀸𑀭𑁄 𑀚𑀻𑀭𑀢𑀺, 𑀬𑀲𑁆𑀲 𑀯𑀸 𑀧𑀦 𑀧𑀼𑀝𑀪𑀢𑁆𑀢𑀁 𑀯𑀺𑀬 𑀢𑀣𑁂𑀯 𑀢𑀺𑀝𑁆𑀞𑀢𑀺, 𑀉𑀪𑁄𑀧𑁂𑀢𑁂 𑀦 𑀲𑀫𑀯𑁂𑀧𑀸𑀓𑀺𑀦𑀺𑀬𑀸 𑀲𑀫𑀦𑁆𑀦𑀸𑀕𑀢𑀸. 𑀬𑀲𑁆𑀲 𑀧𑀦 𑀧𑀼𑀦 𑀪𑀢𑁆𑀢𑀓𑀸𑀮𑁂 𑀪𑀢𑁆𑀢𑀘𑁆𑀙𑀦𑁆𑀤𑁄 𑀉𑀧𑁆𑀧𑀚𑁆𑀚𑀢𑁂𑀯, 𑀅𑀬𑀁 𑀲𑀫𑀯𑁂𑀧𑀸𑀓𑀺𑀦𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀦𑀸𑀫, 𑀢𑀣𑀸𑀭𑀽𑀧𑀢𑀸𑀢𑀺 𑀅𑀢𑁆𑀣𑁄. 𑀲𑀗𑁆𑀕𑀳𑀯𑀢𑁆𑀣𑀽𑀳𑀻𑀢𑀺 𑀤𑀸𑀦𑀁, 𑀧𑀺𑀬𑀯𑀘𑀦𑀁, 𑀅𑀢𑁆𑀣𑀘𑀭𑀺𑀬𑀸, 𑀲𑀫𑀸𑀦𑀢𑁆𑀢𑀢𑀸𑀢𑀺 𑀇𑀫𑁂𑀳𑀺 𑀲𑀗𑁆𑀕𑀳𑁄𑀧𑀸𑀬𑁂𑀳𑀺. 𑀬𑀣𑀸𑀳 𑁋

‘‘𑀤𑀸𑀦𑀜𑁆𑀘 𑀧𑁂𑀬𑁆𑀬𑀯𑀚𑁆𑀚𑀜𑁆𑀘, 𑀅𑀢𑁆𑀣𑀘𑀭𑀺𑀬𑀸 𑀘 𑀬𑀸 𑀇𑀥;

𑀲𑀫𑀸𑀦𑀢𑁆𑀢𑀢𑀸 𑀘 𑀥𑀫𑁆𑀫𑁂𑀲𑀼, 𑀢𑀢𑁆𑀣 𑀢𑀢𑁆𑀣 𑀬𑀣𑀸𑀭𑀳𑀁;

𑀏𑀢𑁂 𑀔𑁄 𑀲𑀗𑁆𑀕𑀳𑀸 𑀮𑁄𑀓𑁂, 𑀭𑀣𑀲𑁆𑀲𑀸𑀡𑀻𑀯 𑀬𑀸𑀬𑀢𑁄.

𑀏𑀢𑁂 𑀘 𑀲𑀗𑁆𑀕𑀳𑀸 𑀦𑀸𑀲𑁆𑀲𑀼, 𑀦 𑀫𑀸𑀢𑀸 𑀧𑀼𑀢𑁆𑀢𑀓𑀸𑀭𑀡𑀸;

𑀮𑀪𑁂𑀣 𑀫𑀸𑀦𑀁 𑀧𑀽𑀚𑀁 𑀯𑀸, 𑀧𑀺𑀢𑀸 𑀯𑀸 𑀧𑀼𑀢𑁆𑀢𑀓𑀸𑀭𑀡𑀸.

𑀬𑀲𑁆𑀫𑀸 𑀘 𑀲𑀗𑁆𑀕𑀳𑀸 𑀏𑀢𑁂, 𑀲𑀫𑀧𑁂𑀓𑁆𑀔𑀦𑁆𑀢𑀺 𑀧𑀡𑁆𑀟𑀺𑀢𑀸;

𑀢𑀲𑁆𑀫𑀸 𑀫𑀳𑀢𑁆𑀢𑀁 𑀧𑀧𑁆𑀧𑁄𑀦𑁆𑀢𑀺, 𑀧𑀸𑀲𑀁𑀲𑀸 𑀘 𑀪𑀯𑀦𑁆𑀢𑀺 𑀢𑁂’’𑀢𑀺. (𑀤𑀻. 𑀦𑀺. 𑁩.𑁨𑁭𑁩);

𑀭𑀜𑁆𑀚𑀦𑀢𑁄𑀢𑀺 𑀧𑀻𑀢𑀺𑀲𑁄𑀫𑀦𑀲𑁆𑀲𑀯𑀲𑁂𑀦 𑀭𑀜𑁆𑀚𑀦𑀢𑁄, 𑀦 𑀭𑀸𑀕𑀯𑀲𑁂𑀦, 𑀧𑀻𑀢𑀺𑀲𑁄𑀫𑀦𑀲𑁆𑀲𑀸𑀦𑀁 𑀚𑀦𑀦𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀭𑀜𑁆𑀚𑀦𑀝𑁆𑀞𑁂𑀦 𑀭𑀸𑀚𑀸𑀢𑀺 𑀧𑀦 𑀲𑀩𑁆𑀩𑁂𑀲𑀁 𑀭𑀸𑀚𑀽𑀦𑀁 𑀲𑀫𑀜𑁆𑀜𑀸 𑀢𑀣𑀸 𑀅𑀓𑀭𑁄𑀦𑁆𑀢𑀸𑀦𑀫𑁆𑀧𑀺 𑀯𑀺𑀮𑀻𑀯𑀩𑀻𑀚𑀦𑀸𑀤𑀻𑀲𑀼 𑀢𑀸𑀮𑀯𑀡𑁆𑀝𑀯𑁄𑀳𑀸𑀭𑁄 𑀯𑀺𑀬 𑀭𑀼𑀴𑁆𑀳𑀺𑀯𑀲𑁂𑀦 𑀧𑀯𑀢𑁆𑀢𑀺𑀢𑁄, 𑀢𑀲𑁆𑀫𑀸 ‘‘𑀅𑀘𑁆𑀙𑀭𑀺𑀬𑀥𑀫𑁆𑀫𑁂𑀳𑀻’’𑀢𑀺 𑀅𑀲𑀸𑀥𑀸𑀭𑀡𑀦𑀺𑀩𑁆𑀩𑀘𑀦𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀤𑁆𑀤𑀲𑀸𑀫𑀢𑁆𑀣𑀺𑀬𑀢𑁄 𑀅𑀦𑁂𑀓𑀥𑀸 𑀘𑀓𑁆𑀓𑀯𑀢𑁆𑀢𑀻𑀲𑀤𑁆𑀤𑀲𑁆𑀲 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀧𑀥𑀸𑀦𑀪𑀽𑀢𑀁 𑀯𑀘𑀦𑀢𑁆𑀣𑀁 𑀧𑀞𑀫𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀓𑁆𑀓𑀭𑀢𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀇𑀤𑀫𑁂𑀯 𑀳𑀺 𑀧𑀥𑀸𑀦𑀁 𑀘𑀓𑁆𑀓𑀭𑀢𑀦𑀲𑁆𑀲 𑀧𑀯𑀢𑁆𑀢𑀦𑀫𑀦𑁆𑀢𑀭𑁂𑀦 𑀘𑀓𑁆𑀓𑀯𑀢𑁆𑀢𑀺𑀪𑀸𑀯𑀸𑀦𑀸𑀧𑀢𑁆𑀢𑀺𑀢𑁄. 𑀢𑀣𑀸 𑀳𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁 ‘‘𑀓𑀺𑀢𑁆𑀢𑀸𑀯𑀢𑀸 𑀘𑀓𑁆𑀓𑀯𑀢𑁆𑀢𑀻 𑀳𑁄𑀢𑀻𑀢𑀺? 𑀏𑀓𑀗𑁆𑀕𑀼𑀮𑀤𑁆𑀯𑀗𑁆𑀕𑀼𑀮𑀫𑀢𑁆𑀢𑀫𑁆𑀧𑀺 𑀘𑀓𑁆𑀓𑀭𑀢𑀦𑁂 𑀆𑀓𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀧𑀯𑀢𑁆𑀢𑁂’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁨.𑁨𑁪𑁩; 𑀫. 𑀦𑀺. 𑀅𑀝𑁆𑀞. 𑁩.𑁨𑁫𑁬). 𑀬𑀲𑁆𑀫𑀸 𑀧𑀦 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀯𑀸𑀫𑀳𑀢𑁆𑀣𑁂𑀦 𑀳𑀢𑁆𑀣𑀺𑀲𑁄𑀡𑁆𑀟𑀲𑀤𑀺𑀲𑀧𑀦𑀸𑀴𑀺𑀁 𑀲𑀼𑀯𑀡𑁆𑀡𑀪𑀺𑀗𑁆𑀓𑀸𑀭𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀤𑀓𑁆𑀔𑀺𑀡𑀳𑀢𑁆𑀣𑁂𑀦 𑀘𑀓𑁆𑀓𑀭𑀢𑀦𑀁 𑀉𑀤𑀓𑁂𑀦 𑀅𑀩𑁆𑀪𑀼𑀓𑁆𑀓𑀺𑀭𑀺𑀢𑁆𑀯𑀸 ‘‘𑀧𑀯𑀢𑁆𑀢𑀢𑀼 𑀪𑀯𑀁 𑀘𑀓𑁆𑀓𑀭𑀢𑀦𑀁, 𑀅𑀪𑀺𑀯𑀺𑀚𑀺𑀦𑀸𑀢𑀼 𑀪𑀯𑀁 𑀘𑀓𑁆𑀓𑀭𑀢𑀦’’𑀦𑁆𑀢𑀺 (𑀤𑀻. 𑀦𑀺. 𑁨.𑁨𑁪𑁪) 𑀯𑀘𑀦𑁂𑀦 𑀘𑀓𑁆𑀓𑀭𑀢𑀦𑀁 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀧𑀯𑀢𑁆𑀢𑁂𑀲𑀺, 𑀢𑀲𑁆𑀫𑀸 𑀢𑀸𑀤𑀺𑀲𑀁 𑀧𑀯𑀢𑁆𑀢𑀸𑀧𑀦𑀁 𑀲𑀦𑁆𑀥𑀸𑀬 ‘‘𑀘𑀓𑁆𑀓𑀭𑀢𑀦𑀁 𑀯𑀢𑁆𑀢𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀬𑀣𑀸𑀳 ‘‘𑀅𑀣 𑀔𑁄 𑀆𑀦𑀦𑁆𑀤 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀉𑀝𑁆𑀞𑀸𑀬𑀸𑀲𑀦𑀸…𑀧𑁂… 𑀘𑀓𑁆𑀓𑀭𑀢𑀦𑀁 𑀅𑀩𑁆𑀪𑀼𑀓𑁆𑀓𑀺𑀭𑀺 ‘𑀧𑀯𑀢𑁆𑀢𑀢𑀼 𑀪𑀯𑀁 𑀘𑀓𑁆𑀓𑀭𑀢𑀦’𑀦𑁆𑀢𑀺’’𑀆𑀤𑀺 (𑀤𑀻. 𑀦𑀺. 𑁨.𑁨𑁪𑁪). 𑀦 𑀓𑁂𑀯𑀮𑀜𑁆𑀘 𑀘𑀓𑁆𑀓𑀲𑀤𑁆𑀤𑁄 𑀘𑀓𑁆𑀓𑀭𑀢𑀦𑁂𑀬𑁂𑀯 𑀯𑀢𑁆𑀢𑀢𑀺 𑀅𑀣 𑀔𑁄 𑀲𑀫𑁆𑀧𑀢𑁆𑀢𑀺𑀘𑀓𑁆𑀓𑀸𑀤𑀻𑀲𑀼𑀧𑀺, 𑀢𑀲𑁆𑀫𑀸 𑀢𑀁𑀢𑀤𑀢𑁆𑀣𑀯𑀸𑀘𑀓𑀲𑀤𑁆𑀤𑀲𑀸𑀫𑀢𑁆𑀣𑀺𑀬𑀢𑁄𑀧𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀲𑀫𑁆𑀧𑀢𑁆𑀢𑀺𑀘𑀓𑁆𑀓𑁂𑀳𑀻’’𑀢𑀺𑀆𑀤𑀺𑀦𑀸. 𑀢𑀢𑁆𑀣 𑀲𑀫𑁆𑀧𑀢𑁆𑀢𑀺𑀘𑀓𑁆𑀓𑁂𑀳𑀻𑀢𑀺 𑁋

‘‘𑀧𑀢𑀺𑀭𑀽𑀧𑁂 𑀯𑀲𑁂 𑀤𑁂𑀲𑁂, 𑀅𑀭𑀺𑀬𑀫𑀺𑀢𑁆𑀢𑀓𑀭𑁄 𑀲𑀺𑀬𑀸;

𑀲𑀫𑁆𑀫𑀸𑀧𑀡𑀺𑀥𑀺𑀲𑀫𑁆𑀧𑀦𑁆𑀦𑁄, 𑀧𑀼𑀩𑁆𑀩𑁂 𑀧𑀼𑀜𑁆𑀜𑀓𑀢𑁄 𑀦𑀭𑁄;

𑀥𑀜𑁆𑀜𑀁 𑀥𑀦𑀁 𑀬𑀲𑁄 𑀓𑀺𑀢𑁆𑀢𑀺, 𑀲𑀼𑀔𑀜𑁆𑀘𑁂𑀢𑀁𑀥𑀺𑀯𑀢𑁆𑀢𑀢𑀻’’𑀢𑀺. (𑀅. 𑀦𑀺. 𑁪.𑁩𑁧) 𑁋

𑀯𑀼𑀢𑁆𑀢𑁂𑀳𑀺 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑀸𑀤𑀺𑀲𑀫𑁆𑀧𑀢𑁆𑀢𑀺𑀘𑀓𑁆𑀓𑁂𑀳𑀺. 𑀯𑀢𑁆𑀢𑀢𑀻𑀢𑀺 𑀧𑀯𑀢𑁆𑀢𑀢𑀺 𑀲𑀫𑁆𑀧𑀚𑁆𑀚𑀢𑀺, 𑀉𑀧𑀭𑀽𑀧𑀭𑀺 𑀓𑀼𑀲𑀮𑀥𑀫𑁆𑀫𑀁 𑀯𑀸 𑀧𑀝𑀺𑀧𑀚𑁆𑀚𑀢𑀺. 𑀢𑁂𑀳𑀻𑀢𑀺 𑀲𑀫𑁆𑀧𑀢𑁆𑀢𑀺𑀘𑀓𑁆𑀓𑁂𑀳𑀺. 𑀧𑀭𑀦𑁆𑀢𑀺 𑀲𑀢𑁆𑀢𑀦𑀺𑀓𑀸𑀬𑀁, 𑀬𑀣𑀸 𑀲𑀬𑀁𑀲𑀤𑁆𑀤𑁄 𑀲𑀼𑀤𑁆𑀥𑀓𑀢𑁆𑀢𑀼𑀢𑁆𑀣𑀲𑁆𑀲 𑀚𑁄𑀢𑀓𑁄, 𑀢𑀣𑀸 𑀧𑀭𑀁𑀲𑀤𑁆𑀤𑁄𑀧𑀺 𑀳𑁂𑀢𑀼𑀓𑀢𑁆𑀢𑀼𑀢𑁆𑀣𑀲𑁆𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀢𑁆𑀢𑁂𑀢𑀻𑀢𑀺 𑀧𑀯𑀢𑁆𑀢𑁂𑀢𑀺 𑀲𑀫𑁆𑀧𑀸𑀤𑁂𑀢𑀺, 𑀉𑀧𑀭𑀽𑀧𑀭𑀺 𑀓𑀼𑀲𑀮𑀥𑀫𑁆𑀫𑀁 𑀯𑀸 𑀧𑀝𑀺𑀧𑀚𑁆𑀚𑀸𑀧𑁂𑀢𑀺. 𑀬𑀣𑀸𑀳 𑁋

‘‘𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀏𑀯𑀫𑀸𑀳 ‘𑀧𑀸𑀡𑁄 𑀦 𑀳𑀦𑁆𑀢𑀩𑁆𑀩𑁄, 𑀅𑀤𑀺𑀦𑁆𑀦𑀁 𑀦 𑀆𑀤𑀸𑀢𑀩𑁆𑀩𑀁, 𑀓𑀸𑀫𑁂𑀲𑀼 𑀫𑀺𑀘𑁆𑀙𑀸 𑀦 𑀘𑀭𑀺𑀢𑀩𑁆𑀩𑀸, 𑀫𑀼𑀲𑀸 𑀦 𑀪𑀡𑀺𑀢𑀩𑁆𑀩𑀸, 𑀫𑀚𑁆𑀚𑀁 𑀦 𑀧𑀸𑀢𑀩𑁆𑀩𑀁, 𑀬𑀣𑀸𑀪𑀼𑀢𑁆𑀢𑀜𑁆𑀘 𑀪𑀼𑀜𑁆𑀚𑀣𑀸’𑀢𑀺. 𑀬𑁂 𑀔𑁄 𑀧𑀦𑀸𑀦𑀦𑁆𑀤 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀧𑀝𑀺𑀭𑀸𑀚𑀸𑀦𑁄, 𑀢𑁂 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀅𑀦𑀼𑀬𑀦𑁆𑀢𑀸 𑀅𑀳𑁂𑀲𑀼’’𑀦𑁆𑀢𑀺𑀆𑀤𑀺 (𑀤𑀻. 𑀦𑀺. 𑁨.𑁨𑁪𑁪).

𑀇𑀭𑀺𑀬𑀸𑀧𑀣𑀘𑀓𑁆𑀓𑀸𑀦𑀦𑁆𑀢𑀺 𑀇𑀭𑀺𑀬𑀸𑀧𑀣𑀪𑀽𑀢𑀸𑀦𑀁 𑀘𑀓𑁆𑀓𑀸𑀦𑀁. 𑀇𑀭𑀺𑀬𑀸𑀧𑀣𑁄𑀧𑀺 𑀳𑀺 ‘‘𑀘𑀓𑁆𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺 ‘‘𑀘𑀢𑀼𑀘𑀓𑁆𑀓𑀁 𑀦𑀯𑀤𑁆𑀯𑀸𑀭’’𑀦𑁆𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁨𑁯, 𑁧𑁦𑁯). 𑀬𑀣𑀸𑀳 𑁋

‘‘𑀭𑀣𑀗𑁆𑀕𑁂 𑀮𑀓𑁆𑀔𑀡𑁂 𑀥𑀫𑁆𑀫𑁄-𑀭𑀘𑀓𑁆𑀓𑁂𑀲𑁆𑀯𑀺𑀭𑀺𑀬𑀸𑀧𑀣𑁂;

𑀘𑀓𑁆𑀓𑀁 𑀲𑀫𑁆𑀧𑀢𑁆𑀢𑀺𑀬𑀁 𑀘𑀓𑁆𑀓-𑀭𑀢𑀦𑁂 𑀫𑀡𑁆𑀟𑀮𑁂 𑀩𑀮𑁂;

𑀓𑀼𑀮𑀸𑀮𑀪𑀡𑁆𑀟𑁂 𑀆𑀡𑀸𑀬-𑀫𑀸𑀬𑀼𑀥𑁂 𑀤𑀸𑀦𑀭𑀸𑀲𑀺𑀲𑀽’’𑀢𑀺.

𑀯𑀢𑁆𑀢𑁄𑀢𑀺 𑀧𑀯𑀢𑁆𑀢𑀦𑀁 𑀉𑀧𑁆𑀧𑀚𑁆𑀚𑀦𑀁, 𑀇𑀫𑀺𑀦𑀸𑀯 𑀇𑀭𑀺𑀬𑀸𑀧𑀣𑀘𑀓𑁆𑀓𑀁 𑀯𑀢𑁆𑀢𑁂𑀢𑀺 𑀧𑀭𑀳𑀺𑀢𑀸𑀬 𑀉𑀧𑁆𑀧𑀸𑀤𑁂𑀢𑀻𑀢𑀺 𑀦𑀺𑀩𑁆𑀩𑀘𑀦𑀫𑁆𑀧𑀺 𑀤𑀲𑁆𑀲𑁂𑀢𑀺 𑀅𑀢𑁆𑀣𑀢𑁄 𑀲𑀫𑀸𑀦𑀢𑁆𑀢𑀸. 𑀢𑀣𑀸 𑀘𑀸𑀳 𑁋

‘‘𑀅𑀣 𑀔𑁄 𑀢𑀁 𑀆𑀦𑀦𑁆𑀤 𑀘𑀓𑁆𑀓𑀭𑀢𑀦𑀁 𑀧𑀼𑀭𑀢𑁆𑀣𑀺𑀫𑀁 𑀤𑀺𑀲𑀁 𑀧𑀯𑀢𑁆𑀢𑀺, 𑀅𑀦𑁆𑀯𑀤𑁂𑀯 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀲𑀤𑁆𑀥𑀺𑀁 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬. 𑀬𑀲𑁆𑀫𑀺𑀁 𑀔𑁄 𑀧𑀦𑀸𑀦𑀦𑁆𑀤, 𑀧𑀤𑁂𑀲𑁂 𑀘𑀓𑁆𑀓𑀭𑀢𑀦𑀁 𑀧𑀢𑀺𑀝𑁆𑀞𑀸𑀲𑀺, 𑀢𑀢𑁆𑀣 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀯𑀸𑀲𑀁 𑀉𑀧𑀕𑀘𑁆𑀙𑀺 𑀲𑀤𑁆𑀥𑀺𑀁 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬𑀸’’𑀢𑀺𑀆𑀤𑀺 (𑀤𑀻. 𑀦𑀺. 𑁨.𑁨𑁪𑁪).

𑀅𑀬𑀁 𑀅𑀝𑁆𑀞𑀓𑀣𑀸𑀢𑁄 𑀅𑀧𑀭𑁄 𑀦𑀬𑁄 𑁋 𑀅𑀧𑁆𑀧𑀝𑀺𑀳𑀢𑀁 𑀆𑀡𑀸𑀲𑀗𑁆𑀔𑀸𑀢𑀁 𑀘𑀓𑁆𑀓𑀁 𑀯𑀢𑁆𑀢𑁂𑀢𑀻𑀢𑀺 𑀘𑀓𑁆𑀓𑀯𑀢𑁆𑀢𑀻. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑁋

‘‘𑀧𑀜𑁆𑀘𑀳𑀺 𑀪𑀺𑀓𑁆𑀔𑀯𑁂 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀥𑀫𑁆𑀫𑁂𑀦𑁂𑀯 𑀘𑀓𑁆𑀓𑀁 𑀯𑀢𑁆𑀢𑁂𑀢𑀺, 𑀢𑀁 𑀳𑁄𑀢𑀺 𑀘𑀓𑁆𑀓𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 𑀓𑁂𑀦𑀘𑀺 𑀫𑀦𑀼𑀲𑁆𑀲𑀪𑀽𑀢𑁂𑀦 𑀧𑀘𑁆𑀘𑀢𑁆𑀣𑀺𑀓𑁂𑀦 𑀧𑀸𑀡𑀺𑀦𑀸. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀇𑀥 𑀪𑀺𑀓𑁆𑀔𑀯𑁂 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀅𑀢𑁆𑀣𑀜𑁆𑀜𑀽 𑀘 𑀳𑁄𑀢𑀺, 𑀥𑀫𑁆𑀫𑀜𑁆𑀜𑀽 𑀘 𑀫𑀢𑁆𑀢𑀜𑁆𑀜𑀽, 𑀘 𑀓𑀸𑀮𑀜𑁆𑀜𑀽 𑀘 𑀧𑀭𑀺𑀲𑀜𑁆𑀜𑀽 𑀘. 𑀇𑀫𑁂𑀳𑀺 𑀔𑁄…𑀧𑁂… 𑀧𑀸𑀡𑀺𑀦𑀸’’𑀢𑀺𑀆𑀤𑀺 (𑀅. 𑀦𑀺. 𑁫.𑁧𑁩𑁧).

𑀔𑀢𑁆𑀢𑀺𑀬𑀫𑀡𑁆𑀟𑀮𑀸𑀤𑀺𑀲𑀜𑁆𑀜𑀺𑀢𑀁 𑀘𑀓𑁆𑀓𑀁 𑀲𑀫𑀽𑀳𑀁 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑁂𑀢𑀺 𑀅𑀦𑀼𑀯𑀢𑁆𑀢𑁂𑀢𑀻𑀢𑀺𑀧𑀺 𑀘𑀓𑁆𑀓𑀯𑀢𑁆𑀢𑀻. 𑀯𑀼𑀢𑁆𑀢𑀜𑁆𑀳𑀺 ‘‘𑀬𑁂 𑀔𑁄 𑀧𑀦𑀸𑀦𑀦𑁆𑀤 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀧𑀝𑀺𑀭𑀸𑀚𑀸𑀦𑁄, 𑀢𑁂 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀅𑀦𑀼𑀬𑀦𑁆𑀢𑀸 𑀅𑀳𑁂𑀲𑀼’’𑀦𑁆𑀢𑀺𑀆𑀤𑀺 (𑀤𑀻. 𑀦𑀺. 𑁨.𑁨𑁪𑁪). 𑀘𑀓𑁆𑀓𑀮𑀓𑁆𑀔𑀡𑀁 𑀯𑀢𑁆𑀢𑀢𑀺 𑀏𑀢𑀲𑁆𑀲𑀸𑀢𑀺𑀧𑀺 𑀘𑀓𑁆𑀓𑀯𑀢𑁆𑀢𑀻. 𑀢𑁂𑀦𑀸𑀳 ‘‘𑀇𑀫𑀲𑁆𑀲 𑀤𑁂𑀯 𑀓𑀼𑀫𑀸𑀭𑀲𑁆𑀲 𑀳𑁂𑀝𑁆𑀞𑀸 𑀧𑀸𑀤𑀢𑀮𑁂𑀲𑀼 𑀘𑀓𑁆𑀓𑀸𑀦𑀺 𑀚𑀸𑀢𑀸𑀦𑀺 𑀲𑀳𑀲𑁆𑀲𑀸𑀭𑀸𑀦𑀺 𑀲𑀦𑁂𑀫𑀺𑀓𑀸𑀦𑀺 𑀲𑀦𑀸𑀪𑀺𑀓𑀸𑀦𑀺 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀸𑀦𑀻’’𑀢𑀺𑀆𑀤𑀺 (𑀤𑀻. 𑀦𑀺. 𑁨.𑁩𑁫). 𑀘𑀓𑁆𑀓𑀁 𑀫𑀳𑀦𑁆𑀢𑀁 𑀓𑀸𑀬𑀩𑀮𑀁 𑀯𑀢𑁆𑀢𑀢𑀺 𑀏𑀢𑀲𑁆𑀲𑀸𑀢𑀺𑀧𑀺 𑀘𑀓𑁆𑀓𑀯𑀢𑁆𑀢𑀻. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀅𑀬𑀜𑁆𑀳𑀺 𑀤𑁂𑀯 𑀓𑀼𑀫𑀸𑀭𑁄 𑀲𑀢𑁆𑀢𑀼𑀲𑁆𑀲𑀤𑁄…𑀧𑁂… 𑀅𑀬𑀜𑁆𑀳𑀺 𑀤𑁂𑀯 𑀓𑀼𑀫𑀸𑀭𑁄 𑀲𑀻𑀳𑀧𑀼𑀩𑁆𑀩𑀤𑁆𑀥𑀓𑀸𑀬𑁄’’𑀢𑀺𑀆𑀤𑀺 (𑀤𑀻. 𑀦𑀺. 𑁨.𑁩𑁫). 𑀢𑁂𑀦 𑀳𑀺𑀲𑁆𑀲 𑀮𑀓𑁆𑀔𑀡𑁂𑀦 𑀫𑀳𑀩𑁆𑀩𑀮𑀪𑀸𑀯𑁄 𑀯𑀺𑀜𑁆𑀜𑀸𑀬𑀢𑀺. 𑀘𑀓𑁆𑀓𑀁 𑀤𑀲𑀯𑀺𑀥𑀁, 𑀤𑁆𑀯𑀸𑀤𑀲𑀯𑀺𑀥𑀁 𑀯𑀸 𑀯𑀢𑁆𑀢𑀥𑀫𑁆𑀫𑀁 𑀯𑀢𑁆𑀢𑀢𑀺 𑀧𑀝𑀺𑀧𑀚𑁆𑀚𑀢𑀻𑀢𑀺 𑀘𑀓𑁆𑀓𑀯𑀢𑁆𑀢𑀻. 𑀢𑁂𑀦 𑀯𑀼𑀢𑁆𑀢𑀁 ‘‘𑀦 𑀳𑀺 𑀢𑁂 𑀢𑀸𑀢 𑀤𑀺𑀩𑁆𑀩𑀁 𑀘𑀓𑁆𑀓𑀭𑀢𑀦𑀁 𑀧𑁂𑀢𑁆𑀢𑀺𑀓𑀁 𑀤𑀸𑀬𑀚𑁆𑀚𑀁, 𑀇𑀗𑁆𑀖 𑀢𑁆𑀯𑀁 𑀢𑀸𑀢 𑀅𑀭𑀺𑀬𑁂 𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑁂 𑀯𑀢𑁆𑀢𑀸𑀳𑀻’’𑀢𑀺𑀆𑀤𑀺 (𑀤𑀻. 𑀦𑀺. 𑁩.𑁮𑁩). 𑀘𑀓𑁆𑀓𑀁 𑀫𑀳𑀦𑁆𑀢𑀁 𑀤𑀸𑀦𑀁 𑀯𑀢𑁆𑀢𑁂𑀢𑀺 𑀧𑀯𑀢𑁆𑀢𑁂𑀢𑀻𑀢𑀺𑀧𑀺 𑀘𑀓𑁆𑀓𑀯𑀢𑁆𑀢𑀻. 𑀯𑀼𑀢𑁆𑀢𑀜𑁆𑀘 𑁋

‘‘𑀧𑀝𑁆𑀞𑀧𑁂𑀲𑀺 𑀔𑁄 𑀆𑀦𑀦𑁆𑀤 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀢𑀸𑀲𑀁 𑀧𑁄𑀓𑁆𑀔𑀭𑀡𑀻𑀦𑀁 𑀢𑀻𑀭𑁂 𑀏𑀯𑀭𑀽𑀧𑀁 𑀤𑀸𑀦𑀁 𑀅𑀦𑁆𑀦𑀁 𑀅𑀦𑁆𑀦𑀢𑁆𑀣𑀺𑀓𑀲𑁆𑀲, 𑀧𑀸𑀦𑀁 𑀧𑀸𑀦𑀢𑁆𑀣𑀺𑀓𑀲𑁆𑀲, 𑀯𑀢𑁆𑀣𑀁 𑀯𑀢𑁆𑀣𑀢𑁆𑀣𑀺𑀓𑀲𑁆𑀲, 𑀬𑀸𑀦𑀁 𑀬𑀸𑀦𑀢𑁆𑀣𑀺𑀓𑀲𑁆𑀲, 𑀲𑀬𑀦𑀁 𑀲𑀬𑀦𑀢𑁆𑀣𑀺𑀓𑀲𑁆𑀲, 𑀇𑀢𑁆𑀣𑀺𑀁 𑀇𑀢𑁆𑀣𑀺𑀢𑁆𑀣𑀺𑀓𑀲𑁆𑀲, 𑀳𑀺𑀭𑀜𑁆𑀜𑀁 𑀳𑀺𑀭𑀜𑁆𑀜𑀢𑁆𑀣𑀺𑀓𑀲𑁆𑀲, 𑀲𑀼𑀯𑀡𑁆𑀡𑀁 𑀲𑀼𑀯𑀡𑁆𑀡𑀢𑁆𑀣𑀺𑀓𑀲𑁆𑀲𑀸’’𑀢𑀺𑀆𑀤𑀺 (𑀤𑀻. 𑀦𑀺. 𑁨.𑁨𑁫𑁪).

𑀭𑀸𑀚𑀸𑀢𑀺 𑀲𑀸𑀫𑀜𑁆𑀜𑀁 𑀢𑀤𑀜𑁆𑀜𑀲𑀸𑀥𑀸𑀭𑀡𑀢𑁄. 𑀘𑀓𑁆𑀓𑀯𑀢𑁆𑀢𑀻𑀢𑀺 𑀯𑀺𑀲𑁂𑀲𑀁 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑁄. 𑀥𑀫𑁆𑀫𑀲𑀤𑁆𑀤𑁄 𑀜𑀸𑀬𑁂, 𑀲𑀫𑁄 𑀏𑀯 𑀘 𑀜𑀸𑀬𑁄 𑀦𑀸𑀫𑀸𑀢𑀺 𑀆𑀳 ‘‘𑀜𑀸𑀬𑁂𑀦 𑀲𑀫𑁂𑀦𑀸’’𑀢𑀺. 𑀯𑀢𑁆𑀢𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀧𑀝𑀺𑀧𑀚𑁆𑀚𑀢𑀻𑀢𑀺 𑀯𑀸 𑀅𑀢𑁆𑀣𑁄. ‘‘𑀇𑀤𑀁 𑀦𑀸𑀫 𑀘𑀭𑀢𑀻’’𑀢𑀺 𑀅𑀯𑀼𑀢𑁆𑀢𑁂𑀧𑀺 𑀲𑀸𑀫𑀜𑁆𑀜𑀚𑁄𑀢𑀦𑀸𑀬 𑀯𑀺𑀲𑁂𑀲𑁂 𑀅𑀯𑀝𑁆𑀞𑀸𑀦𑀢𑁄, 𑀯𑀺𑀲𑁂𑀲𑀢𑁆𑀣𑀺𑀦𑀸 𑀘 𑀯𑀺𑀲𑁂𑀲𑀲𑁆𑀲 𑀧𑀬𑀼𑀚𑁆𑀚𑀺𑀢𑀩𑁆𑀩𑀢𑁆𑀢𑀸 ‘‘𑀲𑀤𑀢𑁆𑀣𑀧𑀭𑀢𑁆𑀣𑁂’’𑀢𑀺 𑀬𑁄𑀚𑀻𑀬𑀢𑀺. 𑀧𑀤𑁂𑀲𑀕𑁆𑀕𑀳𑀡𑁂 𑀳𑀺 𑀅𑀲𑀢𑀺 𑀕𑀳𑁂𑀢𑀩𑁆𑀩𑀲𑁆𑀲 𑀦𑀺𑀧𑁆𑀧𑀤𑁂𑀲𑀢𑀸 𑀯𑀺𑀜𑁆𑀜𑀸𑀬𑀢𑀺 𑀬𑀣𑀸 ‘‘𑀤𑀺𑀓𑁆𑀔𑀺𑀢𑁄 𑀦 𑀤𑀤𑀸𑀢𑀻’’𑀢𑀺. 𑀬𑀲𑁆𑀫𑀸 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 𑀥𑀫𑁆𑀫𑁂𑀦𑁂𑀯 𑀭𑀚𑁆𑀚𑀫𑀥𑀺𑀕𑀘𑁆𑀙𑀢𑀺, 𑀦 𑀅𑀥𑀫𑁆𑀫𑁂𑀦 𑀧𑀭𑀽𑀧𑀖𑀸𑀢𑀸𑀤𑀺𑀦𑀸. 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀥𑀫𑁆𑀫𑁂𑀦 𑀭𑀚𑁆𑀚𑀁 𑀮𑀪𑀺𑀢𑁆𑀯𑀸’’𑀢𑀺𑀆𑀤𑀺, 𑀥𑀫𑁆𑀫𑁂𑀦𑀸𑀢𑀺 𑀘 𑀜𑀸𑀬𑁂𑀦, 𑀓𑀼𑀲𑀮𑀥𑀫𑁆𑀫𑁂𑀦 𑀯𑀸. 𑀭𑀜𑁆𑀜𑁄 𑀪𑀸𑀯𑁄 𑀭𑀚𑁆𑀚𑀁, 𑀇𑀲𑁆𑀲𑀭𑀺𑀬𑀁.

𑀧𑀭𑁂𑀲𑀁 𑀳𑀺𑀢𑁄𑀧𑀸𑀬𑀪𑀽𑀢𑀁 𑀥𑀫𑁆𑀫𑀁 𑀓𑀭𑁄𑀢𑀺, 𑀘𑀭𑀢𑀻𑀢𑀺 𑀯𑀸 𑀥𑀫𑁆𑀫𑀺𑀓𑁄. 𑀅𑀢𑁆𑀢𑀦𑁄 𑀳𑀺𑀢𑁄𑀧𑀸𑀬𑀪𑀽𑀢𑀲𑁆𑀲 𑀥𑀫𑁆𑀫𑀲𑁆𑀲 𑀓𑀸𑀭𑀓𑁄, 𑀘𑀭𑀓𑁄 𑀯𑀸 𑀭𑀸𑀚𑀸𑀢𑀺 𑀥𑀫𑁆𑀫𑀭𑀸𑀚𑀸𑀢𑀺 𑀇𑀫𑀁 𑀲𑀯𑀺𑀲𑁂𑀲𑀁 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀧𑀭𑀳𑀺𑀢𑀥𑀫𑁆𑀫𑀓𑀭𑀡𑁂𑀦 𑀯𑀸’’𑀢𑀺𑀆𑀤𑀺𑀦𑀸. 𑀅𑀬𑀁 𑀧𑀦 𑀫𑀳𑀸𑀧𑀤𑀸𑀦𑀝𑁆𑀞𑀓𑀣𑀸𑀦𑀬𑁄 𑁋 𑀤𑀲𑀯𑀺𑀥𑁂 𑀓𑀼𑀲𑀮𑀥𑀫𑁆𑀫𑁂, 𑀅𑀕𑀢𑀺𑀭𑀳𑀺𑀢𑁂 𑀯𑀸 𑀭𑀸𑀚𑀥𑀫𑁆𑀫𑁂 𑀦𑀺𑀬𑀼𑀢𑁆𑀢𑁄𑀢𑀺 𑀥𑀫𑁆𑀫𑀺𑀓𑁄; 𑀢𑁂𑀦𑁂𑀯 𑀥𑀫𑁆𑀫𑁂𑀦 𑀮𑁄𑀓𑀁 𑀭𑀜𑁆𑀚𑁂𑀢𑀻𑀢𑀺 𑀥𑀫𑁆𑀫𑀭𑀸𑀚𑀸. 𑀧𑀭𑀺𑀬𑀸𑀬𑀯𑀘𑀦𑀫𑁂𑀯 𑀳𑀺 𑀇𑀤𑀁 𑀧𑀤𑀤𑁆𑀯𑀬𑀦𑁆𑀢𑀺. 𑀆𑀘𑀭𑀺𑀬𑁂𑀦 𑀧𑀦 𑀏𑀯𑀁 𑀯𑀼𑀢𑁆𑀢𑀁 ‘‘𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑀲𑀗𑁆𑀔𑀸𑀢𑀁 𑀥𑀫𑁆𑀫𑀁 𑀘𑀭𑀢𑀺, 𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑀲𑀗𑁆𑀔𑀸𑀢𑁄 𑀯𑀸 𑀥𑀫𑁆𑀫𑁄 𑀏𑀢𑀲𑁆𑀲, 𑀏𑀢𑀲𑁆𑀫𑀺𑀁 𑀯𑀸 𑀅𑀢𑁆𑀣𑀻𑀢𑀺 𑀥𑀫𑁆𑀫𑀺𑀓𑁄, 𑀥𑀫𑁆𑀫𑀢𑁄 𑀅𑀦𑀧𑁂𑀢𑀢𑁆𑀢𑀸 𑀥𑀫𑁆𑀫𑁄 𑀘 𑀲𑁄 𑀭𑀜𑁆𑀚𑀦𑀝𑁆𑀞𑁂𑀦 𑀭𑀸𑀚𑀸 𑀘𑀸𑀢𑀺 𑀥𑀫𑁆𑀫𑀭𑀸𑀚𑀸’’𑀢𑀺 (𑀤𑀻. 𑀦𑀺. 𑀝𑀻. 𑁧.𑁨𑁫𑁮). ‘‘𑀭𑀸𑀚𑀸 𑀳𑁄𑀢𑀺 𑀘𑀓𑁆𑀓𑀯𑀢𑁆𑀢𑀻’’𑀢𑀺 𑀯𑀘𑀦𑀢𑁄 ‘‘𑀘𑀸𑀢𑀼𑀭𑀦𑁆𑀢𑁄’’𑀢𑀺 𑀇𑀤𑀁 𑀘𑀢𑀼𑀤𑀻𑀧𑀺𑀲𑁆𑀲𑀭𑀢𑀁 𑀯𑀺𑀪𑀸𑀯𑁂𑀢𑀻𑀢𑀺 𑀆𑀳 ‘‘𑀘𑀸𑀢𑀼𑀭𑀦𑁆𑀢𑀸𑀬𑀸’’𑀢𑀺𑀆𑀤𑀺. 𑀘𑀢𑁆𑀢𑀸𑀭𑁄 𑀲𑀫𑀼𑀤𑁆𑀤𑀸 𑀅𑀦𑁆𑀢𑀸 𑀧𑀭𑀺𑀬𑁄𑀲𑀸𑀦𑀸 𑀏𑀢𑀺𑀲𑁆𑀲𑀸𑀢𑀺 𑀘𑀸𑀢𑀼𑀭𑀦𑁆𑀢𑀸, 𑀧𑀣𑀯𑀻. 𑀲𑀸 𑀳𑀺 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀧𑀼𑀭𑀢𑁆𑀣𑀺𑀫𑀲𑀫𑀼𑀤𑁆𑀤𑀸𑀤𑀺𑀘𑀢𑀼𑀲𑀫𑀼𑀤𑁆𑀤𑀧𑀭𑀺𑀬𑁄𑀲𑀸𑀦𑀢𑁆𑀢𑀸 𑀏𑀯𑀁 𑀯𑀼𑀘𑁆𑀘𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀘𑀢𑀼𑀲𑀫𑀼𑀤𑁆𑀤 𑀅𑀦𑁆𑀢𑀸𑀬𑀸’’𑀢𑀺, 𑀲𑀸 𑀧𑀦 𑀅𑀯𑀬𑀯𑀪𑀽𑀢𑁂𑀳𑀺 𑀘𑀢𑀼𑀩𑁆𑀩𑀺𑀥𑁂𑀳𑀺 𑀤𑀻𑀧𑁂𑀳𑀺 𑀯𑀺𑀪𑀽𑀲𑀺𑀢𑀸 𑀏𑀓𑀮𑁄𑀓𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀸 𑀧𑀣𑀯𑀻𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀺 ‘‘𑀘𑀢𑀼𑀩𑁆𑀩𑀺𑀥𑀤𑀻𑀧𑀯𑀺𑀪𑀽𑀲𑀺𑀢𑀸𑀬 𑀧𑀣𑀯𑀺𑀬𑀸’’𑀢𑀺 𑀇𑀫𑀺𑀦𑀸. 𑀬𑀣𑀸𑀳 𑁋

‘‘𑀬𑀸𑀯𑀢𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸, 𑀧𑀭𑀺𑀳𑀭𑀦𑁆𑀢𑀺 𑀤𑀺𑀲𑀸 𑀪𑀦𑁆𑀢𑀺 𑀯𑀺𑀭𑁄𑀘𑀦𑀸;

𑀲𑀩𑁆𑀩𑁂𑀯 𑀤𑀸𑀲𑀸 𑀫𑀦𑁆𑀥𑀸𑀢𑀼, 𑀬𑁂 𑀘 𑀧𑀸𑀡𑀸 𑀧𑀣𑀯𑀺𑀲𑁆𑀲𑀺𑀢𑀸’’𑀢𑀺.

𑀏𑀢𑁆𑀣 𑀘 ‘‘𑀘𑀢𑀼𑀤𑀻𑀧𑀯𑀺𑀪𑀽𑀲𑀺𑀢𑀸𑀬𑀸’’𑀢𑀺 𑀅𑀯𑀢𑁆𑀯𑀸 𑀘𑀢𑀼𑀩𑁆𑀩𑀺𑀥𑀤𑀻𑀧𑀯𑀺𑀪𑀽𑀲𑀺𑀢𑀸𑀬𑀸𑀢𑀺 𑀯𑀺𑀥𑀲𑀤𑁆𑀤𑀕𑁆𑀕𑀳𑀡𑀁 𑀧𑀘𑁆𑀘𑁂𑀓𑀁 𑀧𑀜𑁆𑀘𑀲𑀢𑀧𑀭𑀺𑀢𑁆𑀢𑀤𑀻𑀧𑀸𑀦𑀫𑁆𑀧𑀺 𑀫𑀳𑀸𑀤𑀻𑀧𑁂𑀬𑁂𑀯 𑀲𑀗𑁆𑀕𑀳𑀡𑀢𑁆𑀣𑀁 𑀲𑀤𑁆𑀤𑀸𑀢𑀺𑀭𑀺𑀢𑁆𑀢𑁂𑀦 𑀅𑀢𑁆𑀣𑀸𑀢𑀺𑀭𑀺𑀢𑁆𑀢𑀲𑁆𑀲 𑀯𑀺𑀜𑁆𑀜𑀸𑀬𑀫𑀸𑀦𑀢𑁆𑀢𑀸, 𑀓𑁄𑀝𑁆𑀞𑀸𑀲𑀯𑀸𑀘𑀓𑁂𑀦 𑀯𑀸 𑀯𑀺𑀥𑀲𑀤𑁆𑀤𑁂𑀦 𑀲𑀫𑀸𑀦𑀪𑀸𑀕𑀸𑀦𑀁 𑀕𑀳𑀺𑀢𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀓𑁄𑀧𑀸𑀤𑀺𑀧𑀘𑁆𑀘𑀢𑁆𑀣𑀺𑀓𑁂𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 𑀓𑀸𑀫𑀫𑁄𑀳𑀫𑀸𑀦𑀫𑀤𑀸𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀯𑀺𑀚𑁂𑀢𑀻𑀢𑀺 𑀢𑀁𑀓𑀸𑀮𑀸𑀧𑁂𑀓𑁆𑀔𑀸𑀬 𑀯𑀢𑁆𑀢𑀫𑀸𑀦𑀯𑀘𑀦𑀁, 𑀯𑀺𑀚𑀺𑀢𑀯𑀸𑀢𑀺 𑀅𑀢𑁆𑀣𑁄. 𑀲𑀤𑁆𑀤𑀯𑀺𑀤𑀽 𑀳𑀺 𑀅𑀢𑀻𑀢𑁂 𑀢𑀸𑀯𑀻𑀲𑀤𑁆𑀤𑀫𑀺𑀘𑁆𑀙𑀦𑁆𑀢𑀺. ‘‘𑀲𑀩𑁆𑀩𑀭𑀸𑀚𑀸𑀦𑁄 𑀯𑀺𑀚𑁂𑀢𑀻’’𑀢𑀺 𑀯𑀤𑀦𑁆𑀢𑁄 𑀓𑀸𑀫𑀁 𑀘𑀓𑁆𑀓𑀯𑀢𑁆𑀢𑀺𑀦𑁄 𑀓𑁂𑀦𑀘𑀺 𑀬𑀼𑀤𑁆𑀥𑀁 𑀦𑀸𑀫 𑀦𑀢𑁆𑀣𑀺, 𑀬𑀼𑀤𑁆𑀥𑁂𑀦 𑀧𑀦 𑀲𑀸𑀥𑁂𑀢𑀩𑁆𑀩𑀲𑁆𑀲 𑀯𑀺𑀚𑀬𑀲𑁆𑀲 𑀲𑀺𑀤𑁆𑀥𑀺𑀬𑀸 ‘‘𑀯𑀺𑀚𑀺𑀢𑀲𑀗𑁆𑀕𑀸𑀫𑁄’’ 𑀢𑁆𑀯𑁂𑀯 𑀯𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀺.

𑀣𑀸𑀯𑀭𑀲𑁆𑀲 𑀥𑀼𑀯𑀲𑁆𑀲 𑀪𑀸𑀯𑁄 𑀣𑀸𑀯𑀭𑀺𑀬𑀁, 𑀬𑀣𑀸 𑀚𑀦𑀧𑀤𑁂 𑀣𑀸𑀯𑀭𑀺𑀬𑀁 𑀧𑀢𑁆𑀢𑁄, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀦 𑀲𑀓𑁆𑀓𑀸 𑀓𑁂𑀦𑀘𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀇𑀫𑀺𑀦𑀸 𑀓𑁂𑀦𑀘𑀺 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀚𑀦𑀧𑀤𑁂 𑀣𑀸𑀯𑀭𑀺𑀬𑀧𑁆𑀧𑀢𑁆𑀢𑁄𑀢𑀺 𑀢𑀧𑁆𑀧𑀼𑀭𑀺𑀲𑀲𑀫𑀸𑀲𑀁 𑀤𑀲𑁆𑀲𑁂𑀢𑀺, 𑀇𑀢𑀭𑁂𑀦 𑀘 𑀤𑀴𑁆𑀳𑀪𑀢𑁆𑀢𑀺𑀪𑀸𑀯𑀢𑁄 𑀚𑀦𑀧𑀤𑁄 𑀣𑀸𑀯𑀭𑀺𑀬𑀧𑁆𑀧𑀢𑁆𑀢𑁄 𑀏𑀢𑀲𑁆𑀫𑀺𑀦𑁆𑀢𑀺 𑀅𑀜𑁆𑀜𑀧𑀤𑀢𑁆𑀣𑀲𑀫𑀸𑀲𑀁. 𑀢𑀫𑁆𑀳𑀻𑀢𑀺 𑀅𑀲𑁆𑀫𑀺𑀁 𑀭𑀸𑀚𑀺𑀦𑀺. 𑀬𑀣𑀸 𑀚𑀦𑀧𑀤𑁄 𑀢𑀲𑁆𑀫𑀺𑀁 𑀣𑀸𑀯𑀭𑀺𑀬𑀁 𑀧𑀢𑁆𑀢𑁄, 𑀢𑀤𑀸𑀯𑀺𑀓𑀭𑁄𑀦𑁆𑀢𑁄 ‘‘𑀅𑀦𑀼𑀬𑀼𑀢𑁆𑀢𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀦𑀼𑀬𑀼𑀢𑁆𑀢𑁄𑀢𑀺 𑀦𑀺𑀘𑁆𑀘𑀧𑀬𑀼𑀢𑁆𑀢𑁄. 𑀲𑀓𑀫𑁆𑀫𑀦𑀺𑀭𑀢𑁄𑀢𑀺 𑀘𑀓𑁆𑀓𑀯𑀢𑁆𑀢𑀺𑀦𑁄 𑀭𑀚𑁆𑀚𑀓𑀫𑁆𑀫𑁂 𑀲𑀤𑀸 𑀧𑀯𑀢𑁆𑀢𑁄. 𑀅𑀘𑀮𑁄 𑀅𑀲𑀫𑁆𑀧𑀯𑁂𑀥𑀻𑀢𑀺 𑀧𑀭𑀺𑀬𑀸𑀬𑀯𑀘𑀦𑀫𑁂𑀢𑀁, 𑀘𑁄𑀭𑀸𑀦𑀁 𑀯𑀸 𑀯𑀺𑀮𑁄𑀧𑀦𑀫𑀢𑁆𑀢𑁂𑀦 𑀅𑀘𑀮𑁄, 𑀤𑀸𑀫𑀭𑀺𑀓𑀢𑁆𑀢𑁂𑀦 𑀅𑀲𑀫𑁆𑀧𑀯𑁂𑀥𑀻. 𑀘𑁄𑀭𑁂𑀳𑀺 𑀯𑀸 𑀅𑀘𑀮𑁄, 𑀧𑀝𑀺𑀭𑀸𑀚𑀽𑀳𑀺 𑀅𑀲𑀫𑁆𑀧𑀯𑁂𑀥𑀻. 𑀅𑀦𑀢𑀺𑀫𑀼𑀤𑀼𑀪𑀸𑀯𑁂𑀦 𑀯𑀸 𑀅𑀘𑀮𑁄, 𑀅𑀦𑀢𑀺𑀘𑀡𑁆𑀟𑀪𑀸𑀯𑁂𑀦 𑀅𑀲𑀫𑁆𑀧𑀯𑁂𑀥𑀻. 𑀢𑀣𑀸 𑀳𑀺 𑀅𑀢𑀺𑀘𑀡𑁆𑀟𑀲𑁆𑀲 𑀭𑀜𑁆𑀜𑁄 𑀩𑀮𑀺𑀔𑀡𑁆𑀟𑀸𑀤𑀻𑀳𑀺 𑀮𑁄𑀓𑀁 𑀧𑀻𑀴𑀬𑀢𑁄 𑀫𑀦𑀼𑀲𑁆𑀲𑀸 𑀫𑀚𑁆𑀛𑀺𑀫𑀚𑀦𑀧𑀤𑀁 𑀙𑀟𑁆𑀟𑁂𑀢𑁆𑀯𑀸 𑀧𑀩𑁆𑀩𑀢𑀲𑀫𑀼𑀤𑁆𑀤𑀢𑀻𑀭𑀸𑀤𑀻𑀦𑀺 𑀦𑀺𑀲𑁆𑀲𑀸𑀬 𑀧𑀘𑁆𑀘𑀦𑁆𑀢𑁂 𑀯𑀸𑀲𑀁 𑀓𑀧𑁆𑀧𑁂𑀦𑁆𑀢𑀺, 𑀅𑀢𑀺𑀫𑀼𑀤𑀼𑀓𑀲𑁆𑀲 𑀘 𑀭𑀜𑁆𑀜𑁄 𑀘𑁄𑀭𑀲𑀸𑀳𑀲𑀺𑀓𑀚𑀦𑀯𑀺𑀮𑁄𑀧𑀧𑀻𑀴𑀺𑀢𑀸 𑀫𑀦𑀼𑀲𑁆𑀲𑀸 𑀧𑀘𑁆𑀘𑀦𑁆𑀢𑀁 𑀧𑀳𑀸𑀬 𑀚𑀦𑀧𑀤𑀫𑀚𑁆𑀛𑁂 𑀯𑀸𑀲𑀁 𑀓𑀧𑁆𑀧𑁂𑀦𑁆𑀢𑀺, 𑀇𑀢𑀺 𑀏𑀯𑀭𑀽𑀧𑁂 𑀭𑀸𑀚𑀺𑀦𑀺 𑀚𑀦𑀧𑀤𑁄 𑀣𑀸𑀯𑀭𑀪𑀸𑀯𑀁 𑀦 𑀧𑀸𑀧𑀼𑀡𑀸𑀢𑀺. 𑀏𑀢𑀲𑁆𑀫𑀺𑀁 𑀧𑀦 𑀢𑀤𑀼𑀪𑀬𑀯𑀺𑀭𑀳𑀺𑀢𑁂 𑀲𑀼𑀯𑀡𑁆𑀡𑀢𑀼𑀮𑀸 𑀯𑀺𑀬 𑀲𑀫𑀪𑀸𑀯𑀧𑁆𑀧𑀢𑁆𑀢𑁂 𑀭𑀸𑀚𑀺𑀦𑀺 𑀭𑀚𑁆𑀚𑀁 𑀓𑀸𑀭𑀬𑀫𑀸𑀦𑁂 𑀚𑀦𑀧𑀤𑁄 𑀧𑀸𑀲𑀸𑀡𑀧𑀺𑀝𑁆𑀞𑀺𑀬𑀁 𑀞𑀧𑁂𑀢𑁆𑀯𑀸 𑀅𑀬𑁄𑀧𑀝𑁆𑀝𑁂𑀦 𑀧𑀭𑀺𑀓𑁆𑀔𑀺𑀢𑁆𑀢𑁄 𑀯𑀺𑀬 𑀅𑀘𑀮𑁄 𑀅𑀲𑀫𑁆𑀧𑀯𑁂𑀥𑀻 𑀣𑀸𑀯𑀭𑀺𑀬𑀧𑁆𑀧𑀢𑁆𑀢𑁄𑀢𑀺.

𑀲𑁂𑀬𑁆𑀬𑀣𑀺𑀤𑀦𑁆𑀢𑀺 𑀏𑀓𑁄𑀯 𑀦𑀺𑀧𑀸𑀢𑁄, ‘‘𑀲𑁄 𑀓𑀢𑀫𑁄, 𑀢𑀁 𑀓𑀢𑀫𑀁, 𑀲𑀸 𑀓𑀢𑀫𑀸’’𑀢𑀺𑀆𑀤𑀺𑀦𑀸 𑀬𑀣𑀸𑀭𑀳𑀁 𑀮𑀺𑀗𑁆𑀕𑀯𑀺𑀪𑀢𑁆𑀢𑀺𑀯𑀘𑀦𑀯𑀲𑁂𑀦 𑀧𑀬𑁄𑀚𑀺𑀬𑀫𑀸𑀦𑁄𑀯 𑀳𑁄𑀢𑀺, 𑀇𑀥 𑀢𑀸𑀦𑀺 𑀓𑀢𑀫𑀸𑀦𑀻𑀢𑀺 𑀧𑀬𑀼𑀢𑁆𑀢𑁄𑀢𑀺 𑀆𑀳 ‘‘𑀢𑀲𑁆𑀲 𑀘𑁂𑀢𑀸𑀦𑀻’’𑀢𑀺𑀆𑀤𑀺. 𑀘𑀘𑀢𑀺 𑀘𑀓𑁆𑀓𑀯𑀢𑁆𑀢𑀺𑀦𑁄 𑀬𑀣𑀸𑀭𑀼𑀘𑀺 𑀆𑀓𑀸𑀲𑀸𑀤𑀺𑀕𑀫𑀦𑀸𑀬 𑀧𑀭𑀺𑀩𑁆𑀪𑀫𑀢𑀻𑀢𑀺 𑀘𑀓𑁆𑀓𑀁. 𑀘𑀓𑁆𑀓𑀭𑀢𑀦𑀜𑁆𑀳𑀺 𑀅𑀦𑁆𑀢𑁄𑀲𑀫𑀼𑀝𑁆𑀞𑀺𑀢𑀯𑀸𑀬𑁄𑀥𑀸𑀢𑀼𑀯𑀲𑁂𑀦 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀯𑀘𑀦𑀲𑀫𑀦𑀦𑁆𑀢𑀭𑀫𑁂𑀯 𑀧𑀯𑀢𑁆𑀢𑀢𑀺, 𑀦 𑀘𑀦𑁆𑀤𑀲𑀽𑀭𑀺𑀬𑀯𑀺𑀫𑀸𑀦𑀸𑀤𑀺 𑀯𑀺𑀬 𑀩𑀳𑀺𑀲𑀫𑀼𑀝𑁆𑀞𑀺𑀢𑀯𑀸𑀬𑁄𑀥𑀸𑀢𑀼𑀯𑀲𑁂𑀦𑀸𑀢𑀺 𑀯𑀺𑀫𑀸𑀦𑀝𑁆𑀞𑀓𑀣𑀸𑀬𑀁 (𑀯𑀺. 𑀯. 𑀅𑀝𑁆𑀞. 𑁧.𑀧𑀞𑀫𑀧𑀻𑀞𑀯𑀺𑀫𑀸𑀦𑀯𑀡𑁆𑀡𑀦𑀸) 𑀯𑀼𑀢𑁆𑀢𑀁. 𑀭𑀢𑀺𑀚𑀦𑀦𑀝𑁆𑀞𑁂𑀦𑀸𑀢𑀺 𑀧𑀻𑀢𑀺𑀲𑁄𑀫𑀦𑀲𑁆𑀲𑀼𑀧𑁆𑀧𑀸𑀤𑀦𑀝𑁆𑀞𑁂𑀦. 𑀢𑀜𑁆𑀳𑀺 𑀧𑀲𑁆𑀲𑀦𑁆𑀢𑀲𑁆𑀲, 𑀲𑀼𑀡𑀦𑁆𑀢𑀲𑁆𑀲 𑀘 𑀅𑀦𑀧𑁆𑀧𑀓𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺 𑀅𑀘𑁆𑀙𑀭𑀺𑀬𑀥𑀫𑁆𑀫𑀢𑁆𑀢𑀸. 𑀯𑀘𑀦𑀢𑁆𑀣𑀢𑁄 𑀧𑀦 𑀭𑀫𑁂𑀢𑀺 𑀭𑀢𑀺𑀁 𑀓𑀭𑁄𑀢𑀻𑀢𑀺 𑀭𑀢𑀦𑀁, 𑀭𑀫𑀦𑀁 𑀯𑀸 𑀭𑀢𑀁, 𑀢𑀁 𑀦𑁂𑀢𑀻𑀢𑀺 𑀭𑀢𑀦𑀁, 𑀭𑀢𑀁 𑀯𑀸 𑀚𑀦𑁂𑀢𑀻𑀢𑀺 𑀭𑀢𑀦𑀁 𑀚-𑀓𑀸𑀭𑀮𑁄𑀧𑀯𑀲𑁂𑀦𑀸𑀢𑀺𑀧𑀺 𑀦𑁂𑀭𑀼𑀢𑁆𑀢𑀺𑀓𑀸. 𑀲𑀩𑁆𑀩𑀢𑁆𑀣𑀸𑀢𑀺 𑀳𑀢𑁆𑀣𑀺𑀭𑀢𑀦𑀸𑀤𑀻𑀲𑀼.

𑀘𑀺𑀢𑁆𑀢𑀻𑀓𑀢𑀪𑀸𑀯𑀸𑀤𑀺𑀦𑀸𑀧𑀺 𑀘𑀓𑁆𑀓𑀲𑁆𑀲 𑀭𑀢𑀦𑀝𑁆𑀞𑁄 𑀯𑁂𑀤𑀺𑀢𑀩𑁆𑀩𑁄, 𑀲𑁄 𑀧𑀦 𑀭𑀢𑀺𑀚𑀦𑀦𑀝𑁆𑀞𑁂𑀦𑁂𑀯 𑀏𑀓𑀲𑀗𑁆𑀕𑀳𑀢𑀸𑀬 𑀯𑀺𑀲𑀼𑀁 𑀦 𑀕𑀳𑀺𑀢𑁄. 𑀓𑀲𑁆𑀫𑀸 𑀏𑀓𑀲𑀗𑁆𑀕𑀳𑁄𑀢𑀺 𑀘𑁂? 𑀘𑀺𑀢𑁆𑀢𑀻𑀓𑀢𑀸𑀤𑀺𑀪𑀸𑀯𑀲𑁆𑀲𑀧𑀺 𑀭𑀢𑀺𑀦𑀺𑀫𑀺𑀢𑁆𑀢𑀢𑁆𑀢𑀸. 𑀅𑀣 𑀯𑀸 𑀕𑀦𑁆𑀣𑀩𑁆𑀬𑀸𑀲𑀁 𑀧𑀭𑀺𑀳𑀭𑀺𑀢𑀼𑀓𑀸𑀫𑁂𑀦 𑀘𑀺𑀢𑁆𑀢𑀻𑀓𑀢𑀸𑀤𑀺𑀪𑀸𑀯𑁄 𑀦 𑀕𑀳𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀜𑁆𑀜𑀸𑀲𑀼 𑀧𑀦 𑀅𑀝𑁆𑀞𑀓𑀣𑀸𑀲𑀼 (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁩; 𑀲𑀁. 𑀦𑀺. 𑀅𑀝𑁆𑀞. 𑁩.𑁫.𑁨𑁨𑁩; 𑀔𑀼. 𑀧𑀸. 𑀅𑀝𑁆𑀞. 𑁬.𑁩.𑀬𑀸𑀦𑀻𑀥𑀸𑀢𑀺𑀕𑀸𑀣𑀸𑀯𑀡𑁆𑀡𑀦𑀸; 𑀲𑀼. 𑀦𑀺. 𑀅𑀝𑁆𑀞. 𑁧.𑁨𑁨𑁬; 𑀫𑀳𑀸𑀦𑀺. 𑀅𑀝𑁆𑀞. 𑁧𑁫𑁬) 𑀏𑀯𑀁 𑀯𑀼𑀢𑁆𑀢𑀁 𑁋

‘‘𑀭𑀢𑀺𑀚𑀦𑀦𑀝𑁆𑀞𑁂𑀦 𑀭𑀢𑀦𑀁. 𑀅𑀧𑀺𑀘 𑁋

𑀘𑀺𑀢𑁆𑀢𑀻𑀓𑀢𑀁 𑀫𑀳𑀕𑁆𑀖𑀜𑁆𑀘, 𑀅𑀢𑀼𑀮𑀁 𑀤𑀼𑀮𑁆𑀮𑀪𑀤𑀲𑁆𑀲𑀦𑀁;

𑀅𑀦𑁄𑀫𑀲𑀢𑁆𑀢𑀧𑀭𑀺𑀪𑁄𑀕𑀁, 𑀭𑀢𑀦𑀁 𑀢𑁂𑀦 𑀯𑀼𑀘𑁆𑀘𑀢𑀺.

‘‘𑀘𑀓𑁆𑀓𑀭𑀢𑀦𑀲𑁆𑀲 𑀘 𑀦𑀺𑀩𑁆𑀩𑀢𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀜𑁆𑀜𑀁 𑀤𑁂𑀯𑀝𑁆𑀞𑀸𑀦𑀁 𑀦𑀸𑀫 𑀦 𑀳𑁄𑀢𑀺, 𑀲𑀩𑁆𑀩𑁂𑀧𑀺 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀳𑀺 𑀢𑀲𑁆𑀲𑁂𑀯 𑀧𑀽𑀚𑀜𑁆𑀘 𑀅𑀪𑀺𑀯𑀸𑀤𑀦𑀸𑀤𑀻𑀦𑀺 𑀘 𑀓𑀭𑁄𑀦𑁆𑀢𑀻𑀢𑀺 𑀘𑀺𑀢𑁆𑀢𑀻𑀓𑀢𑀝𑁆𑀞𑁂𑀦 𑀭𑀢𑀦𑀁. 𑀘𑀓𑁆𑀓𑀭𑀢𑀦𑀲𑁆𑀲 𑀘 𑀏𑀢𑁆𑀢𑀓𑀁 𑀦𑀸𑀫 𑀥𑀦𑀁 𑀅𑀕𑁆𑀖𑀢𑀻𑀢𑀺 𑀅𑀕𑁆𑀖𑁄 𑀦𑀢𑁆𑀣𑀺, 𑀇𑀢𑀺 𑀫𑀳𑀕𑁆𑀖𑀝𑁆𑀞𑁂𑀦𑀧𑀺 𑀭𑀢𑀦𑀁. 𑀘𑀓𑁆𑀓𑀭𑀢𑀦𑀜𑁆𑀘 𑀅𑀜𑁆𑀜𑁂𑀳𑀺 𑀮𑁄𑀓𑁂 𑀯𑀺𑀚𑁆𑀚𑀫𑀸𑀦𑀭𑀢𑀦𑁂𑀳𑀺 𑀅𑀲𑀤𑀺𑀲𑀦𑁆𑀢𑀺 𑀅𑀢𑀼𑀮𑀝𑁆𑀞𑁂𑀦 𑀭𑀢𑀦𑀁. 𑀬𑀲𑁆𑀫𑀸 𑀧𑀦 𑀬𑀲𑁆𑀫𑀺𑀁 𑀓𑀧𑁆𑀧𑁂 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀫𑀺𑀁𑀬𑁂𑀯 𑀘𑀓𑁆𑀓𑀯𑀢𑁆𑀢𑀺𑀦𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀩𑀼𑀤𑁆𑀥𑀸 𑀘 𑀓𑀤𑀸𑀘𑀺 𑀓𑀭𑀳𑀘𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀫𑀸 𑀤𑀼𑀮𑁆𑀮𑀪𑀤𑀲𑁆𑀲𑀦𑀝𑁆𑀞𑁂𑀦𑀧𑀺 𑀭𑀢𑀦𑀁. 𑀢𑀤𑁂𑀢𑀁 𑀚𑀸𑀢𑀺𑀭𑀽𑀧𑀓𑀼𑀮𑀇𑀲𑁆𑀲𑀭𑀺𑀬𑀸𑀤𑀻𑀳𑀺 𑀅𑀦𑁄𑀫𑀲𑁆𑀲 𑀉𑀴𑀸𑀭𑀲𑀢𑁆𑀢𑀲𑁆𑀲𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀦 𑀅𑀜𑁆𑀜𑀲𑁆𑀲𑀸𑀢𑀺 𑀅𑀦𑁄𑀫𑀲𑀢𑁆𑀢𑀧𑀭𑀺𑀪𑁄𑀕𑀝𑁆𑀞𑁂𑀦𑀧𑀺 𑀭𑀢𑀦𑀁. 𑀬𑀣𑀸 𑀘 𑀘𑀓𑁆𑀓𑀭𑀢𑀦𑀁, 𑀏𑀯𑀁 𑀲𑁂𑀲𑀸𑀦𑀺𑀧𑀻’’𑀢𑀺.

𑀢𑀢𑁆𑀭𑀸𑀬𑀁 𑀢𑀝𑁆𑀝𑀻𑀓𑀸𑀬, 𑀅𑀜𑁆𑀜𑀢𑁆𑀣 𑀘 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑀯𑀺𑀪𑀸𑀯𑀦𑀸 𑁋 𑀇𑀤𑀜𑁆𑀳𑀺 ‘‘𑀘𑀺𑀢𑁆𑀢𑀻𑀓𑀢’’𑀦𑁆𑀢𑀺𑀆𑀤𑀺𑀯𑀘𑀦𑀁 𑀦𑀺𑀩𑁆𑀩𑀘𑀦𑀢𑁆𑀣𑀯𑀲𑁂𑀦 𑀯𑀼𑀢𑁆𑀢𑀁 𑀦 𑀳𑁄𑀢𑀺, 𑀅𑀣 𑀓𑀺𑀦𑁆𑀢𑀺 𑀘𑁂? 𑀮𑁄𑀓𑁂 ‘‘𑀭𑀢𑀦’’𑀦𑁆𑀢𑀺 𑀲𑀫𑁆𑀫𑀢𑀲𑁆𑀲 𑀯𑀢𑁆𑀣𑀼𑀦𑁄 𑀕𑀭𑀼𑀓𑀸𑀢𑀩𑁆𑀩𑀪𑀸𑀯𑁂𑀦 𑀯𑀼𑀢𑁆𑀢𑀁. 𑀲𑀭𑀽𑀧𑀢𑁄 𑀧𑀦𑁂𑀢𑀁 𑀮𑁄𑀓𑀺𑀬𑀫𑀳𑀸𑀚𑀦𑁂𑀦 𑀲𑀫𑁆𑀫𑀢𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀺𑀓𑀁, 𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑁄 𑀉𑀧𑁆𑀧𑀦𑁆𑀦𑀁 𑀘𑀓𑁆𑀓𑀭𑀢𑀦𑀸𑀤𑀺𑀓𑀁, 𑀓𑀢𑀜𑁆𑀜𑀼𑀓𑀢𑀯𑁂𑀤𑀺𑀧𑀼𑀕𑁆𑀕𑀮𑀸𑀤𑀺𑀓𑀁, 𑀲𑀩𑁆𑀩𑀼𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀩𑀼𑀤𑁆𑀥𑀸𑀤𑀺𑀲𑀭𑀡𑀢𑁆𑀢𑀬𑀜𑁆𑀘 𑀤𑀝𑁆𑀞𑀩𑁆𑀩𑀁. ‘‘𑀅𑀳𑁄 𑀫𑀦𑁄𑀳𑀭’’𑀦𑁆𑀢𑀺 𑀘𑀺𑀢𑁆𑀢𑁂 𑀓𑀢𑁆𑀢𑀩𑁆𑀩𑀢𑀸𑀬 𑀘𑀺𑀢𑁆𑀢𑀻𑀓𑀢𑀁, 𑀲𑁆𑀯𑀸𑀬𑀁 𑀘𑀺𑀢𑁆𑀢𑀻𑀓𑀸𑀭𑁄 𑀢𑀲𑁆𑀲 𑀧𑀽𑀚𑀦𑀻𑀬𑀢𑀸𑀬𑀸𑀢𑀺 𑀓𑀢𑁆𑀯𑀸 𑀧𑀽𑀚𑀦𑀻𑀬𑀦𑁆𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀓𑁂𑀘𑀺 𑀧𑀦 ‘‘𑀯𑀺𑀘𑀺𑀢𑁆𑀭𑀓𑀢𑀝𑁆𑀞𑁂𑀦 𑀘𑀺𑀢𑁆𑀢𑀻𑀓𑀢’’𑀦𑁆𑀢𑀺 𑀪𑀡𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁 𑀇𑀥 𑀘𑀺𑀢𑁆𑀢𑀲𑀤𑁆𑀤𑀲𑁆𑀲 𑀳𑀤𑀬𑀯𑀸𑀘𑀓𑀢𑁆𑀢𑀸 ‘‘𑀘𑀺𑀢𑁆𑀢𑀻𑀓𑀢𑁆𑀯𑀸 𑀲𑀼𑀡𑀸𑀣 𑀫𑁂’’𑀢𑀺 (𑀩𑀼. 𑀯𑀁. 𑁧.𑁮𑁦) 𑀆𑀳𑀘𑁆𑀘𑀪𑀸𑀲𑀺𑀢𑀧𑀸𑀴𑀺𑀬𑀁 𑀯𑀺𑀬. 𑀢𑀣𑀸 𑀘𑀸𑀳𑀼 ‘‘𑀬𑀣𑀸𑀭𑀳𑀫𑀺𑀯𑀡𑁆𑀡𑀸𑀕𑀫𑁄 𑀪𑀽𑀓𑀭𑁂𑀲𑀽’’𑀢𑀺. ‘‘𑀧𑀲𑁆𑀲 𑀘𑀺𑀢𑁆𑀢𑀻𑀓𑀢𑀁 𑀭𑀽𑀧𑀁, 𑀫𑀡𑀺𑀦𑀸 𑀓𑀼𑀡𑁆𑀟𑀮𑁂𑀦 𑀘𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁩𑁦𑁨) 𑀧𑀦 𑀧𑀼𑀩𑁆𑀩𑁂 𑀅𑀯𑀺𑀘𑀺𑀢𑁆𑀭𑀁 𑀇𑀤𑀸𑀦𑀺 𑀯𑀺𑀘𑀺𑀢𑁆𑀭𑀁 𑀓𑀢𑀦𑁆𑀢𑀺 𑀘𑀺𑀢𑁆𑀢𑀻𑀓𑀢𑀦𑁆𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄 𑀢𑀢𑁆𑀣 𑀘𑀺𑀢𑁆𑀢𑀲𑀤𑁆𑀤𑀲𑁆𑀲 𑀯𑀺𑀘𑀺𑀢𑁆𑀭𑀯𑀸𑀘𑀓𑀢𑁆𑀢𑀸. 𑀫𑀳𑀦𑁆𑀢𑀁 𑀯𑀺𑀧𑀼𑀮𑀁 𑀅𑀧𑀭𑀺𑀫𑀺𑀢𑀁 𑀅𑀕𑁆𑀖𑀢𑀻𑀢𑀺 𑀫𑀳𑀕𑁆𑀖𑀁. 𑀦𑀢𑁆𑀣𑀺 𑀏𑀢𑀲𑁆𑀲 𑀢𑀼𑀮𑀸 𑀉𑀧𑀫𑀸, 𑀢𑀼𑀮𑀁 𑀯𑀸 𑀲𑀤𑀺𑀲𑀦𑁆𑀢𑀺 𑀅𑀢𑀼𑀮𑀁. 𑀓𑀤𑀸𑀘𑀺𑀤𑁂𑀯 𑀉𑀧𑁆𑀧𑀚𑁆𑀚𑀦𑀢𑁄 𑀤𑀼𑀓𑁆𑀔𑁂𑀦 𑀮𑀤𑁆𑀥𑀩𑁆𑀩𑀤𑀲𑁆𑀲𑀦𑀢𑁆𑀢𑀸 𑀤𑀼𑀮𑁆𑀮𑀪𑀤𑀲𑁆𑀲𑀦𑀁. 𑀅𑀦𑁄𑀫𑁂𑀳𑀺 𑀉𑀴𑀸𑀭𑀕𑀼𑀡𑁂𑀳𑁂𑀯 𑀲𑀢𑁆𑀢𑁂𑀳𑀺 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑁄 𑀅𑀦𑁄𑀫𑀲𑀢𑁆𑀢𑀧𑀭𑀺𑀪𑁄𑀕𑀁.

𑀇𑀤𑀸𑀦𑀺 𑀦𑁂𑀲𑀁 𑀘𑀺𑀢𑁆𑀢𑀻𑀓𑀢𑀸𑀤𑀺𑀅𑀢𑁆𑀣𑀸𑀦𑀁 𑀲𑀯𑀺𑀲𑁂𑀲𑀁 𑀘𑀓𑁆𑀓𑀭𑀢𑀦𑁂 𑀮𑀩𑁆𑀪𑀫𑀸𑀦𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀢𑀭𑁂𑀲𑀼𑀧𑀺 𑀢𑁂 𑀅𑀢𑀺𑀤𑀺𑀲𑀺𑀢𑀼𑀁 ‘‘𑀬𑀣𑀸 𑀘 𑀘𑀓𑁆𑀓𑀭𑀢𑀦’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀅𑀜𑁆𑀜𑀁 𑀤𑁂𑀯𑀝𑁆𑀞𑀸𑀦𑀁 𑀦𑀸𑀫 𑀦 𑀳𑁄𑀢𑀺 𑀭𑀜𑁆𑀜𑁄 𑀅𑀦𑀜𑁆𑀜𑀲𑀸𑀥𑀸𑀭𑀡𑀺𑀲𑁆𑀲𑀭𑀺𑀬𑀸𑀤𑀺𑀲𑀫𑁆𑀧𑀢𑁆𑀢𑀺𑀧𑀝𑀺𑀮𑀸𑀪𑀳𑁂𑀢𑀼𑀢𑁄, 𑀅𑀜𑁆𑀜𑁂𑀲𑀁 𑀲𑀢𑁆𑀢𑀸𑀦𑀁 𑀬𑀣𑀺𑀘𑁆𑀙𑀺𑀢𑀢𑁆𑀣𑀧𑀝𑀺𑀮𑀸𑀪𑀳𑁂𑀢𑀼𑀢𑁄 𑀘. 𑀅𑀕𑁆𑀖𑁄 𑀦𑀢𑁆𑀣𑀺 𑀅𑀢𑀺𑀯𑀺𑀬 𑀉𑀴𑀸𑀭𑀲𑀫𑀼𑀚𑁆𑀚𑀮𑀭𑀢𑀦𑀢𑁆𑀢𑀸, 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀥𑀫𑁆𑀫𑀢𑀸𑀬 𑀘. 𑀬𑀤𑀕𑁆𑀕𑁂𑀦 𑀘 𑀫𑀳𑀕𑁆𑀖𑀁, 𑀢𑀤𑀕𑁆𑀕𑁂𑀦 𑀅𑀢𑀼𑀮𑀁. 𑀲𑀢𑁆𑀢𑀸𑀦𑀁 𑀧𑀸𑀧𑀚𑀺𑀕𑀼𑀘𑁆𑀙𑀦𑁂𑀦 𑀯𑀺𑀕𑀢𑀓𑀸𑀴𑀓𑁄 𑀧𑀼𑀜𑁆𑀜𑀧𑀲𑀼𑀢𑀢𑀸𑀬 𑀫𑀡𑁆𑀟𑀪𑀽𑀢𑁄 𑀬𑀸𑀤𑀺𑀲𑁄 𑀓𑀸𑀮𑁄 𑀩𑀼𑀤𑁆𑀥𑀼𑀧𑁆𑀧𑀸𑀤𑀸𑀭𑀳𑁄, 𑀢𑀸𑀤𑀺𑀲𑁂 𑀏𑀯 𑀘𑀓𑁆𑀓𑀯𑀢𑁆𑀢𑀻𑀦𑀫𑁆𑀧𑀺 𑀲𑀫𑁆𑀪𑀯𑁄𑀢𑀺 𑀆𑀳 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺. 𑀓𑀤𑀸𑀘𑀺 𑀓𑀭𑀳𑀘𑀻𑀢𑀺 𑀧𑀭𑀺𑀬𑀸𑀬𑀯𑀘𑀦𑀁, ‘‘𑀓𑀤𑀸𑀘𑀻’’𑀢𑀺 𑀯𑀸 𑀬𑀣𑀸𑀯𑀼𑀢𑁆𑀢𑀓𑀸𑀮𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, ‘‘𑀓𑀭𑀳𑀘𑀻’’𑀢𑀺 𑀚𑀫𑁆𑀩𑀼𑀲𑀺𑀭𑀺𑀤𑀻𑀧𑀲𑀗𑁆𑀔𑀸𑀢𑀁 𑀤𑁂𑀲𑀁. 𑀢𑁂𑀦𑀸𑀳 𑁋

‘‘𑀓𑀸𑀮𑀁 𑀤𑀻𑀧𑀜𑁆𑀘 𑀤𑁂𑀲𑀜𑁆𑀘, 𑀓𑀼𑀮𑀁 𑀫𑀸𑀢𑀭𑀫𑁂𑀯 𑀘;

𑀇𑀫𑁂 𑀧𑀜𑁆𑀘 𑀯𑀺𑀮𑁄𑀓𑁂𑀢𑁆𑀯𑀸, 𑀉𑀧𑁆𑀧𑀚𑁆𑀚𑀢𑀺 𑀫𑀳𑀸𑀬𑀲𑁄’’𑀢𑀺. (𑀥. 𑀧. 𑀅𑀝𑁆𑀞. 𑁧.𑁧.𑁧𑁦);

𑀉𑀧𑀫𑀸𑀯𑀲𑁂𑀦 𑀘𑁂𑀢𑀁 𑀯𑀼𑀢𑁆𑀢𑀁. 𑀉𑀧𑀫𑁄𑀧𑀫𑁂𑀬𑁆𑀬𑀸𑀦𑀜𑁆𑀘 𑀦 𑀅𑀘𑁆𑀘𑀦𑁆𑀢𑀫𑁂𑀯 𑀲𑀤𑀺𑀲𑀢𑀸, 𑀢𑀲𑁆𑀫𑀸 𑀬𑀣𑀸 𑀩𑀼𑀤𑁆𑀥𑀸 𑀓𑀤𑀸𑀘𑀺 𑀓𑀭𑀳𑀘𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀢𑀣𑀸 𑀘𑀓𑁆𑀓𑀯𑀢𑁆𑀢𑀺𑀦𑁄, 𑀘𑀓𑁆𑀓𑀯𑀢𑁆𑀢𑀺𑀦𑁄 𑀧𑀦 𑀅𑀦𑁂𑀓𑀤𑀸𑀧𑀺 𑀩𑀼𑀤𑁆𑀥𑀼𑀧𑁆𑀧𑀸𑀤𑀓𑀧𑁆𑀧𑁂 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀏𑀯𑀁 𑀲𑀦𑁆𑀢𑁂𑀧𑀺 𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑀧𑀽𑀭𑀡𑀲𑁆𑀲 𑀤𑀼𑀓𑁆𑀓𑀭𑀪𑀸𑀯𑀢𑁄 𑀤𑀼𑀮𑁆𑀮𑀪𑀼𑀧𑁆𑀧𑀸𑀤𑁄𑀬𑁂𑀯𑀸𑀢𑀺 𑀇𑀫𑀺𑀦𑀸 𑀤𑀼𑀮𑁆𑀮𑀪𑀼𑀧𑁆𑀧𑀸𑀤𑀢𑀸𑀲𑀸𑀫𑀜𑁆𑀜𑁂𑀦 𑀢𑁂𑀲𑀁 𑀤𑀼𑀮𑁆𑀮𑀪𑀤𑀲𑁆𑀲𑀦𑀢𑀸 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀸𑀫𑀁 𑀘𑀓𑁆𑀓𑀭𑀢𑀦𑀸𑀦𑀼𑀪𑀸𑀯𑁂𑀦 𑀲𑀫𑀺𑀚𑁆𑀛𑀫𑀸𑀦𑁄 𑀕𑀼𑀡𑁄 𑀘𑀓𑁆𑀓𑀯𑀢𑁆𑀢𑀺𑀧𑀭𑀺𑀯𑀸𑀭𑀚𑀦𑀲𑀸𑀥𑀸𑀭𑀡𑁄, 𑀢𑀣𑀸𑀧𑀺 𑀘𑀓𑁆𑀓𑀯𑀢𑁆𑀢𑀻 𑀏𑀯 𑀦𑀁 𑀲𑀸𑀫𑀺𑀪𑀸𑀯𑁂𑀦 𑀯𑀺𑀲𑀯𑀺𑀢𑀸𑀬 𑀧𑀭𑀺𑀪𑀼𑀜𑁆𑀚𑀢𑀻𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺 𑀢𑀤𑀢𑁆𑀣𑀫𑁂𑀯 𑀉𑀧𑁆𑀧𑀚𑁆𑀚𑀦𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀤𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀬𑀣𑀸𑀯𑀼𑀢𑁆𑀢𑀸𑀦𑀁 𑀧𑀜𑁆𑀘𑀦𑁆𑀦𑀁, 𑀙𑀦𑁆𑀦𑀫𑁆𑀧𑀺 𑀯𑀸 𑀅𑀢𑁆𑀣𑀸𑀦𑀁 𑀲𑁂𑀲𑀭𑀢𑀦𑁂𑀲𑀼𑀧𑀺 𑀮𑀩𑁆𑀪𑀦𑀢𑁄 ‘‘𑀏𑀯𑀁 𑀲𑁂𑀲𑀸𑀦𑀺𑀧𑀻’’𑀢𑀺 𑀯𑀼𑀢𑁆𑀢𑀁.

𑀇𑀫𑁂𑀳𑀺 𑀧𑀦 𑀭𑀢𑀦𑁂𑀳𑀺 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀓𑀺𑀫𑀢𑁆𑀣𑀁 𑀧𑀘𑁆𑀘𑀦𑀼𑀪𑁄𑀢𑀺, 𑀦𑀦𑀼 𑀯𑀺𑀦𑀸𑀧𑀺 𑀢𑁂𑀲𑀼 𑀓𑁂𑀦𑀘𑀺 𑀭𑀜𑁆𑀜𑀸 𑀘𑀓𑁆𑀓𑀯𑀢𑁆𑀢𑀺𑀦𑀸 𑀪𑀯𑀺𑀢𑀩𑁆𑀩𑀦𑁆𑀢𑀺 𑀘𑁄𑀤𑀦𑀸𑀬 𑀢𑀲𑁆𑀲 𑀢𑁂𑀳𑀺 𑀳𑀣𑀸𑀭𑀳𑀫𑀢𑁆𑀣𑀧𑀘𑁆𑀘𑀦𑀼𑀪𑀯𑀦𑀤𑀲𑁆𑀲𑀦𑁂𑀦 𑀓𑁂𑀦𑀘𑀺𑀧𑀺 𑀅𑀯𑀺𑀦𑀸𑀪𑀸𑀯𑀺𑀢𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀇𑀫𑁂𑀲𑀼 𑀧𑀦𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀅𑀚𑀺𑀢𑀁 𑀧𑀼𑀭𑀢𑁆𑀣𑀺𑀫𑀸𑀤𑀺𑀤𑀺𑀲𑀸𑀬 𑀔𑀢𑁆𑀢𑀺𑀬𑀫𑀡𑁆𑀟𑀮𑀁 𑀚𑀺𑀦𑀸𑀢𑀺 𑀫𑀳𑁂𑀲𑀓𑁆𑀔𑀢𑀸𑀲𑀁𑀯𑀢𑁆𑀢𑀦𑀺𑀬𑀓𑀫𑁆𑀫𑀦𑀺𑀲𑁆𑀲𑀦𑁆𑀤𑀪𑀸𑀯𑀢𑁄. 𑀬𑀣𑀸𑀲𑀼𑀔𑀁 𑀅𑀦𑀼𑀯𑀺𑀘𑀭𑀢𑀺 𑀳𑀢𑁆𑀣𑀺𑀭𑀢𑀦𑀁, 𑀅𑀲𑁆𑀲𑀭𑀢𑀦𑀜𑁆𑀘 𑀅𑀪𑀺𑀭𑀼𑀳𑀺𑀢𑁆𑀯𑀸 𑀢𑁂𑀲𑀁 𑀆𑀦𑀼𑀪𑀸𑀯𑁂𑀦 𑀅𑀦𑁆𑀢𑁄𑀧𑀸𑀢𑀭𑀸𑀲𑀁𑀬𑁂𑀯 𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑀁 𑀧𑀣𑀯𑀺𑀁 𑀅𑀦𑀼𑀧𑀭𑀺𑀬𑀸𑀬𑀺𑀢𑁆𑀯𑀸 𑀭𑀸𑀚𑀥𑀸𑀦𑀺𑀬𑀸 𑀏𑀯 𑀧𑀘𑁆𑀘𑀸𑀕𑀫𑀦𑀢𑁄. 𑀧𑀭𑀺𑀡𑀸𑀬𑀓𑀭𑀢𑀦𑁂𑀦 𑀯𑀺𑀚𑀺𑀢𑀫𑀦𑀼𑀭𑀓𑁆𑀔𑀢𑀺 𑀢𑀢𑁆𑀣 𑀢𑀢𑁆𑀣 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀲𑀁𑀯𑀺𑀤𑀳𑀦𑀢𑁄. 𑀅𑀯𑀲𑁂𑀲𑁂𑀳𑀺 𑀫𑀡𑀺𑀭𑀢𑀦𑀇𑀢𑁆𑀣𑀺𑀭𑀢𑀦𑀕𑀳𑀧𑀢𑀺𑀭𑀢𑀦𑁂𑀳𑀺 𑀉𑀧𑀪𑀼𑀜𑁆𑀚𑀦𑁂𑀦 𑀧𑀯𑀢𑁆𑀢𑀁 𑀉𑀧𑀪𑁄𑀕𑀲𑀼𑀔𑀁 𑀅𑀦𑀼𑀪𑀯𑀢𑀺 𑀬𑀣𑀸𑀭𑀳𑀁 𑀢𑁂𑀳𑀺 𑀢𑀣𑀸𑀦𑀼𑀪𑀯𑀦𑀲𑀺𑀤𑁆𑀥𑀺𑀢𑁄. 𑀲𑁄 𑀳𑀺 𑀫𑀡𑀺𑀭𑀢𑀦𑁂𑀦 𑀬𑁄𑀚𑀦𑀧𑁆𑀧𑀫𑀸𑀡𑁂 𑀧𑀤𑁂𑀲𑁂 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑁂𑀢𑁆𑀯𑀸 𑀆𑀮𑁄𑀓𑀤𑀲𑁆𑀲𑀦𑀸𑀤𑀺𑀦𑀸 𑀲𑀼𑀔𑀫𑀦𑀼𑀪𑀯𑀢𑀺, 𑀇𑀢𑁆𑀣𑀺𑀭𑀢𑀦𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑀭𑀽𑀧𑀤𑀲𑁆𑀲𑀦𑀸𑀤𑀺𑀯𑀲𑁂𑀦, 𑀕𑀳𑀧𑀢𑀺𑀭𑀢𑀦𑁂𑀦 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀫𑀡𑀺𑀓𑀦𑀓𑀭𑀚𑀢𑀸𑀤𑀺𑀥𑀦𑀧𑀝𑀺𑀮𑀸𑀪𑀯𑀲𑁂𑀦 𑀲𑀼𑀔𑀫𑀦𑀼𑀪𑀯𑀢𑀺.

𑀇𑀤𑀸𑀦𑀺 𑀲𑀢𑁆𑀢𑀺𑀬𑀸, 𑀲𑀢𑁆𑀢𑀺𑀨𑀮𑁂𑀦 𑀘 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀧𑀞𑀫𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀺𑀯𑀺𑀥𑀸 𑀳𑀺 𑀲𑀢𑁆𑀢𑀺𑀬𑁄 ‘‘𑀲𑀓𑁆𑀓𑁄𑀦𑁆𑀢𑀺 𑀲𑀫𑀢𑁆𑀣𑁂𑀦𑁆𑀢𑀺 𑀭𑀸𑀚𑀸𑀦𑁄 𑀏𑀢𑀸𑀬𑀸’’𑀢𑀺 𑀓𑀢𑁆𑀯𑀸. 𑀬𑀣𑀸𑀳𑀼 𑁋

‘‘𑀧𑀪𑀸𑀯𑀼𑀲𑁆𑀲𑀸𑀳𑀫𑀦𑁆𑀢𑀸𑀦𑀁, 𑀯𑀲𑀸 𑀢𑀺𑀲𑁆𑀲𑁄 𑀳𑀺 𑀲𑀢𑁆𑀢𑀺𑀬𑁄;

𑀧𑀪𑀸𑀯𑁄 𑀤𑀡𑁆𑀟𑀚𑁄 𑀢𑁂𑀚𑁄, 𑀧𑀢𑀸𑀧𑁄 𑀢𑀼 𑀘 𑀓𑁄𑀲𑀚𑁄.

𑀫𑀦𑁆𑀢𑁄 𑀘 𑀫𑀦𑁆𑀢𑀦𑀁 𑀲𑁄 𑀢𑀼, 𑀘𑀢𑀼𑀓𑁆𑀓𑀡𑁆𑀡𑁄 𑀤𑁆𑀯𑀺𑀕𑁄𑀘𑀭𑁄;

𑀢𑀺𑀕𑁄𑀘𑀭𑁄 𑀢𑀼 𑀙𑀓𑁆𑀓𑀡𑁆𑀡𑁄, 𑀭𑀳𑀲𑁆𑀲𑀁 𑀕𑀼𑀬𑁆𑀳𑀫𑀼𑀘𑁆𑀘𑀢𑁂’’𑀢𑀺.

𑀢𑀢𑁆𑀣 𑀯𑀻𑀭𑀺𑀬𑀩𑀮𑀁 𑀉𑀲𑁆𑀲𑀸𑀳𑀲𑀢𑁆𑀢𑀺. 𑀧𑀞𑀫𑁂𑀦 𑀘𑀲𑁆𑀲 𑀘𑀓𑁆𑀓𑀭𑀢𑀦𑁂𑀦 𑀢𑀤𑀦𑀼𑀬𑁄𑀕𑁄 𑀧𑀭𑀺𑀧𑀼𑀡𑁆𑀡𑁄 𑀳𑁄𑀢𑀺. 𑀓𑀲𑁆𑀫𑀸𑀢𑀺 𑀘𑁂? 𑀢𑁂𑀦 𑀉𑀲𑁆𑀲𑀸𑀳𑀲𑀢𑁆𑀢𑀺𑀬𑀸 𑀧𑀯𑀢𑁆𑀢𑁂𑀢𑀩𑁆𑀩𑀲𑁆𑀲 𑀅𑀧𑁆𑀧𑀝𑀺𑀳𑀢𑀸𑀡𑀸𑀘𑀓𑁆𑀓𑀪𑀸𑀯𑀲𑁆𑀲 𑀲𑀺𑀤𑁆𑀥𑀺𑀢𑁄. 𑀧𑀜𑁆𑀜𑀸𑀩𑀮𑀁 𑀫𑀦𑁆𑀢𑀲𑀢𑁆𑀢𑀺. 𑀧𑀘𑁆𑀙𑀺𑀫𑁂𑀦 𑀘𑀲𑁆𑀲 𑀧𑀭𑀺𑀡𑀸𑀬𑀓𑀭𑀢𑀦𑁂𑀦 𑀢𑀤𑀦𑀼𑀬𑁄𑀕𑁄. 𑀓𑀲𑁆𑀫𑀸𑀢𑀺 𑀘𑁂? 𑀢𑀲𑁆𑀲 𑀲𑀩𑁆𑀩𑀭𑀸𑀚𑀓𑀺𑀘𑁆𑀘𑁂𑀲𑀼 𑀓𑀼𑀲𑀮𑀪𑀸𑀯𑁂𑀦 𑀫𑀦𑁆𑀢𑀲𑀢𑁆𑀢𑀺𑀬𑀸 𑀯𑀺𑀬 𑀅𑀯𑀺𑀭𑀚𑁆𑀛𑀦𑀧𑀬𑁄𑀕𑀢𑁆𑀢𑀸. 𑀤𑀫𑀦𑁂𑀦, 𑀥𑀦𑁂𑀦 𑀘 𑀧𑀪𑀼𑀢𑁆𑀢𑀁 𑀧𑀪𑀽𑀲𑀢𑁆𑀢𑀺. 𑀳𑀢𑁆𑀣𑀺𑀅𑀲𑁆𑀲𑀕𑀳𑀧𑀢𑀺𑀭𑀢𑀦𑁂𑀳𑀺 𑀘𑀲𑁆𑀲 𑀢𑀤𑀦𑀼𑀬𑁄𑀕𑁄 𑀧𑀭𑀺𑀧𑀼𑀡𑁆𑀡𑁄 𑀳𑁄𑀢𑀺. 𑀓𑀲𑁆𑀫𑀸𑀢𑀺 𑀘𑁂? 𑀳𑀢𑁆𑀣𑀺𑀅𑀲𑁆𑀲𑀭𑀢𑀦𑀸𑀦𑀁 𑀫𑀳𑀸𑀦𑀼𑀪𑀸𑀯𑀢𑀸𑀬, 𑀕𑀳𑀧𑀢𑀺𑀭𑀢𑀦𑀢𑁄 𑀧𑀝𑀺𑀮𑀤𑁆𑀥𑀓𑁄𑀲𑀲𑀫𑁆𑀧𑀢𑁆𑀢𑀺𑀬𑀸 𑀘 𑀧𑀪𑀸𑀯𑀲𑀢𑁆𑀢𑀺𑀬𑀸 𑀯𑀺𑀬 𑀧𑀪𑀸𑀯𑀲𑀫𑀺𑀤𑁆𑀥𑀺𑀲𑀺𑀤𑁆𑀥𑀺𑀢𑁄. 𑀇𑀢𑁆𑀣𑀺𑀫𑀡𑀺𑀭𑀢𑀦𑁂𑀳𑀺 𑀢𑀺𑀯𑀺𑀥𑀲𑀢𑁆𑀢𑀺𑀬𑁄𑀕𑀨𑀮𑀁 𑀧𑀭𑀺𑀧𑀼𑀡𑁆𑀡𑀁 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀬𑀣𑀸𑀯𑀼𑀢𑁆𑀢𑀸𑀳𑀺 𑀢𑀺𑀯𑀺𑀥𑀸𑀳𑀺 𑀲𑀢𑁆𑀢𑀻𑀳𑀺 𑀧𑀬𑀼𑀚𑁆𑀚𑀦𑀢𑁄 𑀬𑀁 𑀨𑀮𑀁 𑀮𑀤𑁆𑀥𑀩𑁆𑀩𑀁. 𑀢𑀁 𑀲𑀩𑁆𑀩𑀁 𑀢𑁂𑀳𑀺 𑀧𑀭𑀺𑀧𑀼𑀡𑁆𑀡𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀸𑀢𑀺 𑀘𑁂? 𑀢𑁂𑀳𑁂𑀯 𑀉𑀧𑀪𑁄𑀕𑀲𑀼𑀔𑀲𑁆𑀲 𑀲𑀺𑀚𑁆𑀛𑀦𑀢𑁄.

𑀤𑀼𑀯𑀺𑀥𑀲𑀼𑀔𑀯𑀲𑁂𑀦𑀧𑀺 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀲𑁄 𑀇𑀢𑁆𑀣𑀺𑀫𑀡𑀺𑀭𑀢𑀦𑁂𑀳𑀻’’𑀢𑀺𑀆𑀤𑀺 𑀓𑀣𑀺𑀢𑀁. 𑀪𑁄𑀕𑀲𑀼𑀔𑀦𑁆𑀢𑀺 𑀲𑀫𑀻𑀧𑁂 𑀓𑀢𑁆𑀯𑀸 𑀧𑀭𑀺𑀪𑁄𑀕𑀯𑀲𑁂𑀦 𑀧𑀯𑀢𑁆𑀢𑀲𑀼𑀔𑀁. 𑀲𑁂𑀲𑁂𑀳𑀻𑀢𑀺 𑀢𑀤𑀯𑀲𑁂𑀲𑁂𑀳𑀺 𑀘𑀓𑁆𑀓𑀸𑀤𑀺𑀧𑀜𑁆𑀘𑀭𑀢𑀦𑁂𑀳𑀺. 𑀅𑀧𑀘𑁆𑀘𑀢𑁆𑀣𑀺𑀓𑀢𑀸𑀯𑀲𑁂𑀦 𑀧𑀯𑀢𑁆𑀢𑀲𑀼𑀔𑀁 𑀇𑀲𑁆𑀲𑀭𑀺𑀬𑀲𑀼𑀔𑀁. 𑀇𑀤𑀸𑀦𑀺 𑀢𑁂𑀲𑀁 𑀲𑀫𑁆𑀧𑀦𑁆𑀦𑀳𑁂𑀢𑀼𑀯𑀲𑁂𑀦𑀧𑀺 𑀓𑁂𑀦𑀘𑀺 𑀅𑀯𑀺𑀦𑀸𑀪𑀸𑀯𑀺𑀢𑀫𑁂𑀯 𑀯𑀺𑀪𑀸𑀯𑁂𑀢𑀼𑀁 ‘‘𑀯𑀺𑀲𑁂𑀲𑀢𑁄’’𑀢𑀺𑀆𑀤𑀺𑀫𑀸𑀳. 𑀅𑀤𑁄𑀲𑀓𑀼𑀲𑀮𑀫𑀽𑀮𑀚𑀦𑀺𑀢𑀓𑀫𑁆𑀫𑀸𑀦𑀼𑀪𑀸𑀯𑁂𑀦𑀸𑀢𑀺 𑀅𑀤𑁄𑀲𑀲𑀗𑁆𑀔𑀸𑀢𑁂𑀦 𑀓𑀼𑀲𑀮𑀫𑀽𑀮𑁂𑀦 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀯𑀲𑁂𑀦 𑀉𑀧𑁆𑀧𑀸𑀤𑀺𑀢𑀓𑀫𑁆𑀫𑀲𑁆𑀲 𑀆𑀦𑀼𑀪𑀸𑀯𑁂𑀦 𑀲𑀫𑁆𑀧𑀚𑁆𑀚𑀦𑁆𑀢𑀺 𑀲𑁄𑀫𑁆𑀫𑀢𑀭𑀭𑀢𑀦𑀚𑀸𑀢𑀺𑀓𑀢𑁆𑀢𑀸. 𑀓𑀫𑁆𑀫𑀨𑀮𑀜𑁆𑀳𑀺 𑀬𑁂𑀪𑀼𑀬𑁆𑀬𑁂𑀦 𑀓𑀫𑁆𑀫𑀲𑀭𑀺𑀓𑁆𑀔𑀓𑀁. 𑀫𑀚𑁆𑀛𑀺𑀫𑀸𑀦𑀺 𑀫𑀡𑀺𑀇𑀢𑁆𑀣𑀺𑀕𑀳𑀧𑀢𑀺𑀭𑀢𑀦𑀸𑀦𑀺 𑀅𑀮𑁄𑀪𑀓𑀼𑀲𑀮𑀫𑀽𑀮𑀚𑀦𑀺𑀢𑀓𑀫𑁆𑀫𑀸𑀦𑀼𑀪𑀸𑀯𑁂𑀦 𑀲𑀫𑁆𑀧𑀚𑁆𑀚𑀦𑁆𑀢𑀺 𑀉𑀴𑀸𑀭𑀥𑀦𑀲𑁆𑀲, 𑀉𑀴𑀸𑀭𑀥𑀦𑀧𑀝𑀺𑀮𑀸𑀪𑀓𑀸𑀭𑀡𑀲𑁆𑀲 𑀘 𑀧𑀭𑀺𑀘𑁆𑀘𑀸𑀕𑀲𑀫𑁆𑀧𑀤𑀸𑀳𑁂𑀢𑀼𑀓𑀢𑁆𑀢𑀸. 𑀧𑀘𑁆𑀙𑀺𑀫𑀁 𑀧𑀭𑀺𑀡𑀸𑀬𑀓𑀭𑀢𑀦𑀁 𑀅𑀫𑁄𑀳𑀓𑀼𑀲𑀮𑀫𑀽𑀮𑀚𑀦𑀺𑀢𑀓𑀫𑁆𑀫𑀸𑀦𑀼𑀪𑀸𑀯𑁂𑀦 𑀲𑀫𑁆𑀧𑀚𑁆𑀚𑀢𑀺 𑀫𑀳𑀸𑀧𑀜𑁆𑀜𑁂𑀦𑁂𑀯 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀓𑀺𑀘𑁆𑀘𑀲𑁆𑀲 𑀧𑀭𑀺𑀦𑁂𑀢𑀩𑁆𑀩𑀢𑁆𑀢𑀸, 𑀫𑀳𑀸𑀧𑀜𑁆𑀜𑀪𑀸𑀯𑀲𑁆𑀲 𑀘 𑀅𑀫𑁄𑀳𑀓𑀼𑀲𑀮𑀫𑀽𑀮𑀚𑀦𑀺𑀢𑀓𑀫𑁆𑀫𑀦𑀺𑀲𑁆𑀲𑀦𑁆𑀤𑀪𑀸𑀯𑀢𑁄. 𑀩𑁄𑀚𑁆𑀛𑀗𑁆𑀕𑀲𑀁𑀬𑀼𑀢𑁆𑀢𑁂𑀢𑀺 𑀫𑀳𑀸𑀯𑀕𑁆𑀕𑁂 𑀤𑀼𑀢𑀺𑀬𑁂 𑀩𑁄𑀚𑁆𑀛𑀗𑁆𑀕𑀲𑀁𑀬𑀼𑀢𑁆𑀢𑁂 (𑀲𑀁. 𑀦𑀺. 𑁫.𑁨𑁨𑁩). 𑀭𑀢𑀦𑀲𑀼𑀢𑁆𑀢𑀲𑁆𑀲𑀸𑀢𑀺 𑀢𑀢𑁆𑀣 𑀧𑀜𑁆𑀘𑀫𑀯𑀕𑁆𑀕𑁂 𑀲𑀗𑁆𑀕𑀻𑀢𑀲𑁆𑀲 𑀤𑀼𑀢𑀺𑀬𑀲𑁆𑀲 𑀭𑀢𑀦𑀲𑀼𑀢𑁆𑀢𑀲𑁆𑀲 (𑀲𑀁. 𑀦𑀺. 𑁫.𑁨𑁨𑁩). 𑀉𑀧𑀤𑁂𑀲𑁄 𑀦𑀸𑀫 𑀲𑀯𑀺𑀲𑁂𑀲𑀁 𑀲𑀢𑁆𑀢𑀦𑁆𑀦𑀁 𑀭𑀢𑀦𑀸𑀦𑀁 𑀯𑀺𑀘𑀸𑀭𑀡𑀯𑀲𑁂𑀦 𑀧𑀯𑀢𑁆𑀢𑁄 𑀦𑀬𑁄.

𑀲𑀭𑀡𑀢𑁄 𑀧𑀝𑀺𑀧𑀓𑁆𑀔𑀯𑀺𑀥𑀫𑀦𑀢𑁄 𑀲𑀽𑀭𑀸 𑀲𑀢𑁆𑀢𑀺𑀯𑀦𑁆𑀢𑁄, 𑀦𑀺𑀩𑁆𑀪𑀬𑀸𑀯𑀳𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀅𑀪𑀻𑀭𑀼𑀓𑀚𑀸𑀢𑀺𑀓𑀸’’𑀢𑀺. 𑀅𑀲𑀼𑀭𑁂 𑀯𑀺𑀚𑀺𑀦𑀺𑀢𑁆𑀯𑀸 𑀞𑀺𑀢𑀢𑁆𑀢𑀸 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀥𑀻𑀭𑁄 𑀦𑀸𑀫, 𑀢𑀲𑁆𑀲 𑀲𑁂𑀦𑀗𑁆𑀕𑀪𑀸𑀯𑀢𑁄 𑀤𑁂𑀯𑀧𑀼𑀢𑁆𑀢𑁄 ‘‘𑀅𑀗𑁆𑀕’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀥𑀻𑀭𑀲𑁆𑀲 𑀅𑀗𑁆𑀕𑀁, 𑀢𑀲𑁆𑀲 𑀭𑀽𑀧𑀫𑀺𑀯 𑀭𑀽𑀧𑀁 𑀬𑁂𑀲𑀁 𑀢𑁂 𑀥𑀻𑀭𑀗𑁆𑀕𑀭𑀽𑀧𑀸, 𑀢𑁂𑀦 𑀯𑀼𑀢𑁆𑀢𑀁 ‘‘𑀤𑁂𑀯𑀧𑀼𑀢𑁆𑀢𑀲𑀤𑀺𑀲𑀓𑀸𑀬𑀸’’𑀢𑀺. 𑀏𑀓𑁂𑀢𑀺 𑀲𑀸𑀭𑀲𑀫𑀸𑀲𑀦𑀸𑀫𑀓𑀸 𑀆𑀘𑀭𑀺𑀬𑀸, 𑀢𑀤𑀓𑁆𑀔𑀫𑀦𑁆𑀢𑁄 𑀆𑀳 ‘‘𑀅𑀬𑀁 𑀧𑀦𑁂𑀢𑁆𑀣𑀸’’𑀢𑀺𑀆𑀤𑀺. 𑀲𑀪𑀸𑀯𑁄𑀢𑀺 𑀲𑀪𑀸𑀯𑀪𑀽𑀢𑁄 𑀅𑀢𑁆𑀣𑁄. 𑀉𑀢𑁆𑀢𑀫𑀲𑀽𑀭𑀸𑀢𑀺 𑀉𑀢𑁆𑀢𑀫𑀬𑁄𑀥𑀸. 𑀲𑀽𑀭𑀲𑀤𑁆𑀤𑁄 𑀳𑀺 𑀇𑀥 𑀬𑁄𑀥𑀢𑁆𑀣𑁄. 𑀏𑀯𑀜𑁆𑀳𑀺 𑀧𑀼𑀭𑀺𑀫𑀦𑀬𑀢𑁄 𑀇𑀫𑀲𑁆𑀲 𑀯𑀺𑀲𑁂𑀲𑀢𑀸 𑀳𑁄𑀢𑀺, ‘‘𑀉𑀢𑁆𑀢𑀫𑀢𑁆𑀣𑁄 𑀲𑀽𑀭𑀲𑀤𑁆𑀤𑁄’’𑀢𑀺𑀧𑀺 𑀯𑀤𑀦𑁆𑀢𑀺, ‘‘𑀉𑀢𑁆𑀢𑀫𑀸 𑀲𑀽𑀭𑀸 𑀯𑀼𑀘𑁆𑀘𑀦𑁆𑀢𑀻’’𑀢𑀺𑀧𑀺 𑀳𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺. 𑀯𑀻𑀭𑀸𑀦𑀦𑁆𑀢𑀺 𑀯𑀻𑀭𑀺𑀬𑀯𑀦𑁆𑀢𑀸𑀦𑀁. 𑀅𑀗𑁆𑀕𑀦𑁆𑀢𑀺 𑀓𑀸𑀭𑀡𑀁 ‘‘𑀅𑀗𑁆𑀕𑀻𑀬𑀢𑀺 𑀜𑀸𑀬𑀢𑀺 𑀨𑀮𑀫𑁂𑀢𑁂𑀦𑀸’’𑀢𑀺 𑀓𑀢𑁆𑀯𑀸. 𑀬𑁂𑀦 𑀯𑀻𑀭𑀺𑀬𑁂𑀦 ‘‘𑀥𑀻𑀭𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑀤𑁂𑀯 𑀥𑀻𑀭𑀗𑁆𑀕𑀁 𑀦𑀸𑀫𑀸𑀢𑀺 𑀆𑀳 ‘‘𑀯𑀻𑀭𑀺𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺. 𑀭𑀽𑀧𑀦𑁆𑀢𑀺 𑀲𑀭𑀻𑀭𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀯𑀻𑀭𑀺𑀬𑀫𑀬𑀲𑀭𑀻𑀭𑀸 𑀯𑀺𑀬𑀸’’𑀢𑀺. 𑀯𑀻𑀭𑀺𑀬𑀫𑁂𑀯 𑀯𑀻𑀭𑀺𑀬𑀫𑀬𑀁 𑀬𑀣𑀸 ‘‘𑀤𑀸𑀦𑀫𑀬’’𑀦𑁆𑀢𑀺, (𑀤𑀻. 𑀦𑀺. 𑁩.𑁩𑁦𑁫; 𑀇𑀢𑀺𑀯𑀼. 𑁬𑁦; 𑀦𑁂𑀢𑁆𑀢𑀺. 𑁩𑁪) 𑀢𑀲𑁆𑀫𑀸 𑀯𑀻𑀭𑀺𑀬𑀲𑀗𑁆𑀔𑀸𑀢𑀲𑀭𑀻𑀭𑀸 𑀯𑀺𑀬𑀸𑀢𑀺 𑀅𑀢𑁆𑀣𑁄. 𑀯𑀻𑀭𑀺𑀬𑀁 𑀧𑀦 𑀦 𑀏𑀓𑀦𑁆𑀢𑀭𑀽𑀧𑀦𑁆𑀢𑀺 𑀯𑀺𑀬-𑀲𑀤𑁆𑀤𑀕𑁆𑀕𑀳𑀡𑀁 𑀓𑀢𑀁. 𑀅𑀧𑀺𑀘 𑀥𑀻𑀭𑀗𑁆𑀕𑁂𑀦 𑀦𑀺𑀩𑁆𑀩𑀢𑁆𑀢𑀁 𑀥𑀻𑀭𑀗𑁆𑀕𑀦𑁆𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀻𑀭𑀺𑀬𑀫𑀬𑀲𑀭𑀻𑀭𑀸 𑀯𑀺𑀬𑀸’’𑀢𑀺 𑀯𑀼𑀢𑁆𑀢𑀁, 𑀏𑀯𑀫𑁆𑀧𑀺 𑀯𑀻𑀭𑀺𑀬𑀢𑁄 𑀭𑀽𑀧𑀁 𑀦 𑀏𑀓𑀦𑁆𑀢𑀁 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀯𑀺𑀬-𑀲𑀤𑁆𑀤𑁂𑀦 𑀤𑀲𑁆𑀲𑁂𑀢𑀺. 𑀅𑀣 𑀯𑀸 𑀭𑀽𑀧𑀁 𑀲𑀭𑀻𑀭𑀪𑀽𑀢𑀁 𑀥𑀻𑀭𑀗𑁆𑀕𑀁 𑀯𑀻𑀭𑀺𑀬𑀫𑁂𑀢𑁂𑀲𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁, 𑀢𑀣𑀸𑀧𑀺 𑀯𑀻𑀭𑀺𑀬𑀁 𑀦𑀸𑀫 𑀓𑀺𑀜𑁆𑀘𑀺 𑀲𑀯𑀺𑀕𑁆𑀕𑀳𑀁 𑀦 𑀳𑁄𑀢𑀻𑀢𑀺 𑀤𑀻𑀧𑁂𑀢𑀺 ‘‘𑀯𑀻𑀭𑀺𑀬𑀫𑀬𑀲𑀭𑀻𑀭𑀸 𑀯𑀺𑀬𑀸’’𑀢𑀺 𑀇𑀫𑀺𑀦𑀸, 𑀇𑀥𑀸𑀧𑀺 𑀫𑀬𑀲𑀤𑁆𑀤𑁄 𑀲𑀓𑀢𑁆𑀣𑁂𑀬𑁂𑀯 𑀤𑀝𑁆𑀞𑀩𑁆𑀩𑁄, 𑀢𑀲𑁆𑀫𑀸 𑀲𑀯𑀺𑀕𑁆𑀕𑀳𑀯𑀻𑀭𑀺𑀬𑀲𑀤𑀺𑀲𑀸𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀯𑀺𑀕𑁆𑀕𑀳𑀁 𑀘𑁂 𑀯𑀻𑀭𑀺𑀬𑀁 𑀦𑀸𑀫 𑀲𑀺𑀬𑀸, 𑀢𑁂 𑀘𑀲𑁆𑀲 𑀧𑀼𑀢𑁆𑀢𑀸 𑀢𑀁𑀲𑀤𑀺𑀲𑀸𑀬𑁂𑀯 𑀪𑀯𑁂𑀬𑁆𑀬𑀼𑀦𑁆𑀢𑀺 𑀅𑀬𑀫𑁂𑀯 𑀘𑀢𑁆𑀣𑁄 𑀆𑀘𑀭𑀺𑀬𑁂𑀦 (𑀤𑀻. 𑀦𑀺. 𑀝𑀻. 𑁧.𑁨𑁫𑁮) 𑀅𑀦𑀼𑀫𑀢𑁄. 𑀫𑀳𑀸𑀧𑀤𑀸𑀦𑀝𑁆𑀞𑀓𑀣𑀸𑀬𑀁 𑀧𑀦 𑀏𑀯𑀁 𑀯𑀼𑀢𑁆𑀢𑀁 ‘‘𑀥𑀻𑀭𑀗𑁆𑀕𑀁 𑀭𑀽𑀧𑀫𑁂𑀢𑁂𑀲𑀦𑁆𑀢𑀺 𑀥𑀻𑀭𑀗𑁆𑀕𑀭𑀽𑀧𑀸, 𑀯𑀻𑀭𑀺𑀬𑀚𑀸𑀢𑀺𑀓𑀸 𑀯𑀻𑀭𑀺𑀬𑀲𑀪𑀸𑀯𑀸 𑀯𑀻𑀭𑀺𑀬𑀫𑀬𑀸 𑀅𑀓𑀺𑀮𑀸𑀲𑀼𑀦𑁄 𑀅𑀳𑁂𑀲𑀼𑀁, 𑀤𑀺𑀯𑀲𑀫𑁆𑀧𑀺 𑀬𑀼𑀚𑁆𑀛𑀦𑁆𑀢𑀸 𑀦 𑀓𑀺𑀮𑀫𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺, (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁪) 𑀢𑀤𑁂𑀢𑀁 𑀭𑀽𑀧𑀲𑀤𑁆𑀤𑀲𑁆𑀲 𑀲𑀪𑀸𑀯𑀢𑁆𑀣𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀥 𑀘𑁂𑀯 𑀅𑀜𑁆𑀜𑀢𑁆𑀣 𑀓𑀢𑁆𑀣𑀘𑀺 ‘‘𑀥𑀺𑀢𑀗𑁆𑀕𑀭𑀽𑀧𑀸’’𑀢𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺. 𑀯𑀻𑀭𑀺𑀬𑀢𑁆𑀣𑁄𑀧𑀺 𑀳𑀺 𑀥𑀺𑀢𑀺𑀲𑀤𑁆𑀤𑁄 𑀳𑁄𑀢𑀺 ‘‘𑀲𑀘𑁆𑀘𑀁 𑀥𑀫𑁆𑀫𑁄 𑀥𑀺𑀢𑀺 𑀘𑀸𑀕𑁄, 𑀤𑀺𑀝𑁆𑀞𑀁 𑀲𑁄 𑀅𑀢𑀺𑀯𑀢𑁆𑀢𑀢𑀻’’𑀢𑀺𑀆𑀤𑀻𑀲𑀼 (𑀚𑀸. 𑁧.𑁧.𑁫𑁭) 𑀥𑀺𑀢𑀺𑀲𑀤𑁆𑀤𑁄 𑀯𑀺𑀬. 𑀓𑀢𑁆𑀣𑀘𑀺 𑀧𑀦 ‘‘𑀯𑀻𑀭𑀗𑁆𑀕’’𑀦𑁆𑀢𑀺 𑀧𑀸𑀞𑁄𑀯 𑀤𑀺𑀝𑁆𑀞𑁄. 𑀬𑀣𑀸 𑀭𑀼𑀘𑁆𑀘𑀢𑀺, 𑀢𑀣𑀸 𑀕𑀳𑁂𑀢𑀩𑁆𑀩𑀁.

𑀦𑀦𑀼 𑀘 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀧𑀝𑀺𑀲𑁂𑀦𑀸 𑀦𑀸𑀫 𑀦𑀢𑁆𑀣𑀺, 𑀬’𑀫𑀲𑁆𑀲 𑀧𑀼𑀢𑁆𑀢𑀸 𑀧𑀫𑀤𑁆𑀤𑁂𑀬𑁆𑀬𑀼𑀁, 𑀅𑀣 𑀓𑀲𑁆𑀫𑀸 ‘‘𑀧𑀭𑀲𑁂𑀦𑀧𑁆𑀧𑀫𑀤𑁆𑀤𑀦𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀘𑁄𑀤𑀦𑀁 𑀲𑁄𑀥𑁂𑀦𑁆𑀢𑁄 ‘‘𑀲𑀘𑁂’’𑀢𑀺𑀆𑀤𑀺𑀫𑀸𑀳, 𑀧𑀭𑀲𑁂𑀦𑀸 𑀳𑁄𑀢𑀼 𑀯𑀸, 𑀫𑀸 𑀯𑀸, ‘‘𑀲𑀘𑁂 𑀧𑀦 𑀪𑀯𑁂𑀬𑁆𑀬𑀸’’𑀢𑀺 𑀧𑀭𑀺𑀓𑀧𑁆𑀧𑀦𑀸𑀫𑀢𑁆𑀢𑁂𑀦 𑀢𑁂𑀲𑀁 𑀏𑀯𑀫𑀸𑀦𑀼𑀪𑀸𑀯𑀢𑀁 𑀤𑀲𑁆𑀲𑁂𑀢𑀼𑀁 𑀢𑀣𑀸 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄, ‘‘𑀧𑀭𑀲𑁂𑀦𑀧𑁆𑀧𑀫𑀤𑁆𑀤𑀦𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀧𑀭𑀲𑁂𑀦𑀁 𑀧𑀫𑀤𑁆𑀤𑀺𑀢𑀼𑀁 𑀲𑀫𑀢𑁆𑀣𑀸𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄 𑀧𑀓𑀭𑀡𑀢𑁄𑀧𑀺 𑀅𑀢𑁆𑀣𑀦𑁆𑀢𑀭𑀲𑁆𑀲 𑀯𑀺𑀜𑁆𑀜𑀸𑀬𑀫𑀸𑀦𑀢𑁆𑀢𑀸, 𑀬𑀣𑀸 ‘‘𑀲𑀺𑀓𑁆𑀔𑀫𑀸𑀦𑁂𑀦 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼𑀦𑀸 𑀅𑀜𑁆𑀜𑀸𑀢𑀩𑁆𑀩𑀁 𑀧𑀭𑀺𑀧𑀼𑀘𑁆𑀙𑀺𑀢𑀩𑁆𑀩𑀁 𑀧𑀭𑀺𑀧𑀜𑁆𑀳𑀺𑀢𑀩𑁆𑀩’’𑀦𑁆𑀢𑀺 (𑀧𑀸𑀘𑀺. 𑁪𑁩𑁪) 𑀏𑀢𑀲𑁆𑀲 𑀧𑀤𑀪𑀸𑀚𑀦𑀻𑀬𑁂 (𑀧𑀸𑀘𑀺. 𑁪𑁩𑁬) ‘‘𑀲𑀺𑀓𑁆𑀔𑀺𑀢𑀼𑀓𑀸𑀫𑁂𑀦𑀸’’𑀢𑀺 𑀅𑀢𑁆𑀣𑀕𑁆𑀕𑀳𑀡𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀁 𑀧𑀭𑀺𑀫𑀤𑁆𑀤𑀺𑀢𑀼𑀁 𑀲𑀫𑀢𑁆𑀣𑀸’’𑀢𑀺 𑀯𑀼𑀢𑁆𑀢𑀁. 𑀦 𑀳𑀺 𑀢𑁂 𑀧𑀭𑀲𑁂𑀦𑀁 𑀧𑀫𑀤𑁆𑀤𑀦𑁆𑀢𑀸 𑀢𑀺𑀝𑁆𑀞𑀦𑁆𑀢𑀺, 𑀅𑀣 𑀔𑁄 𑀧𑀫𑀤𑁆𑀤𑀦𑀲𑀫𑀢𑁆𑀣𑀸 𑀏𑀯 𑀳𑁄𑀦𑁆𑀢𑀺. 𑀏𑀯𑀫𑀜𑁆𑀜𑀢𑁆𑀭𑀧𑀺 𑀬𑀣𑀸𑀭𑀳𑀁. 𑀧𑀭𑀲𑁂𑀦𑀁 𑀧𑀫𑀤𑁆𑀤𑀦𑀸𑀬 𑀲𑀫𑀢𑁆𑀣𑁂𑀦𑁆𑀢𑀻𑀢𑀺 𑀧𑀭𑀲𑁂𑀦𑀧𑁆𑀧𑀫𑀤𑁆𑀤𑀦𑀸𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀻𑀢𑀺𑀧𑀺 𑀯𑀤𑀦𑁆𑀢𑀺.

𑀧𑀼𑀩𑁆𑀩𑁂 𑀓𑀢𑀽𑀧𑀘𑀺𑀢𑀲𑁆𑀲 𑀏𑀢𑀭𑀳𑀺 𑀯𑀺𑀧𑀘𑁆𑀘𑀫𑀸𑀦𑀓𑀲𑁆𑀲 𑀧𑀼𑀜𑁆𑀜𑀥𑀫𑁆𑀫𑀲𑁆𑀲 𑀘𑀺𑀭𑀢𑀭𑀁 𑀯𑀺𑀧𑀘𑁆𑀘𑀺𑀢𑀼𑀁 𑀧𑀘𑁆𑀘𑀬𑀪𑀽𑀢𑀁 𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑀲𑀫𑀼𑀤𑀸𑀕𑀢𑀁 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀲𑀗𑁆𑀔𑀸𑀢𑀁 𑀥𑀫𑁆𑀫𑀁 𑀤𑀲𑁆𑀲𑁂𑀢𑀼𑀁 ‘‘𑀥𑀫𑁆𑀫𑁂𑀦𑀸’’𑀢𑀺 𑀧𑀤𑀲𑁆𑀲 ‘‘𑀧𑀸𑀡𑁄 𑀦 𑀳𑀦𑁆𑀢𑀩𑁆𑀩𑁄𑀢𑀺𑀆𑀤𑀺𑀦𑀸 𑀧𑀜𑁆𑀘𑀲𑀻𑀮𑀥𑀫𑁆𑀫𑁂𑀦𑀸’’𑀢𑀺 𑀅𑀢𑁆𑀣𑀫𑀸𑀳. 𑀅𑀬𑀜𑁆𑀳𑀺 𑀅𑀢𑁆𑀣𑁄 ‘‘𑀬𑁂 𑀔𑁄 𑀧𑀦𑀸𑀦𑀦𑁆𑀤 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀧𑀝𑀺𑀭𑀸𑀚𑀸𑀦𑁄, 𑀢𑁂 𑀭𑀸𑀚𑀸𑀦𑀁 𑀫𑀳𑀸𑀲𑀼𑀤𑀲𑁆𑀲𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳𑀁𑀲𑀼 ‘𑀏𑀳𑀺 𑀔𑁄 𑀫𑀳𑀸𑀭𑀸𑀚, 𑀲𑁆𑀯𑀸𑀕𑀢𑀁 𑀢𑁂 𑀫𑀳𑀸𑀭𑀸𑀚, 𑀲𑀓𑀁 𑀢𑁂 𑀫𑀳𑀸𑀭𑀸𑀚, 𑀅𑀦𑀼𑀲𑀸𑀲 𑀫𑀳𑀸𑀭𑀸𑀚𑀸’𑀢𑀺. 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀏𑀯𑀫𑀸𑀳 ‘𑀧𑀸𑀡𑁄 𑀦 𑀳𑀦𑁆𑀢𑀩𑁆𑀩𑁄, 𑀅𑀤𑀺𑀦𑁆𑀦𑀁 𑀦 𑀆𑀤𑀸𑀢𑀩𑁆𑀩𑀁, 𑀓𑀸𑀫𑁂𑀲𑀼 𑀫𑀺𑀘𑁆𑀙𑀸 𑀦 𑀘𑀭𑀺𑀢𑀩𑁆𑀩𑀸, 𑀫𑀼𑀲𑀸 𑀦 𑀪𑀡𑀺𑀢𑀩𑁆𑀩𑀸, 𑀫𑀚𑁆𑀚𑀁 𑀦 𑀧𑀸𑀢𑀩𑁆𑀩𑀁, 𑀬𑀣𑀸𑀪𑀼𑀢𑁆𑀢𑀜𑁆𑀘 𑀪𑀼𑀜𑁆𑀚𑀣𑀸’𑀢𑀺. 𑀬𑁂 𑀔𑁄 𑀧𑀦𑀸𑀦𑀦𑁆𑀤 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀧𑀝𑀺𑀭𑀸𑀚𑀸𑀦𑁄, 𑀢𑁂 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀅𑀦𑀼𑀬𑀦𑁆𑀢𑀸 𑀅𑀳𑁂𑀲𑀼’’𑀦𑁆𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁨.𑁨𑁪𑁪) 𑀆𑀕𑀢𑀁 𑀭𑀜𑁆𑀜𑁄 𑀑𑀯𑀸𑀤𑀥𑀫𑁆𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄. 𑀏𑀯𑀜𑁆𑀳𑀺 ‘‘𑀅𑀤𑀡𑁆𑀟𑁂𑀦 𑀅𑀲𑀢𑁆𑀣𑁂𑀦𑀸’’𑀢𑀺 𑀇𑀤𑀫𑁆𑀧𑀺 𑀯𑀺𑀲𑁂𑀲𑀦𑀯𑀘𑀦𑀁 𑀲𑀼𑀲𑀫𑀢𑁆𑀣𑀺𑀢𑀁 𑀳𑁄𑀢𑀺. 𑀅𑀜𑁆𑀜𑀸𑀲𑀼𑀧𑀺 𑀲𑀼𑀢𑁆𑀢𑀦𑀺𑀧𑀸𑀢𑀝𑁆𑀞𑀓𑀣𑀸𑀤𑀻𑀲𑀼 (𑀲𑀼. 𑀦𑀺. 𑀅𑀝𑁆𑀞. 𑁨𑁨𑁬; 𑀔𑀼. 𑀧𑀸. 𑀅𑀝𑁆𑀞. 𑁬.𑁩; 𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁩; 𑀲𑀁. 𑀦𑀺. 𑀅𑀝𑁆𑀞. 𑁩.𑁨𑁨𑁩) 𑀅𑀬𑀫𑁂𑀯𑀢𑁆𑀣𑁄 𑀯𑀼𑀢𑁆𑀢𑁄.

𑀫𑀳𑀸𑀧𑀤𑀸𑀦𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀅𑀤𑀡𑁆𑀟𑁂𑀦𑀸𑀢𑀺 𑀬𑁂 𑀓𑀢𑀸𑀧𑀭𑀸𑀥𑁂 𑀲𑀢𑁆𑀢𑁂 𑀲𑀢𑀫𑁆𑀧𑀺 𑀲𑀳𑀲𑁆𑀲𑀫𑁆𑀧𑀺 𑀕𑀡𑁆𑀳𑀦𑁆𑀢𑀺, 𑀢𑁂 𑀥𑀦𑀤𑀡𑁆𑀟𑁂𑀦 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑀺 𑀦𑀸𑀫, 𑀬𑁂 𑀙𑁂𑀚𑁆𑀚𑀪𑁂𑀚𑁆𑀚𑀁 𑀅𑀦𑀼𑀲𑀸𑀲𑀦𑁆𑀢𑀺, 𑀢𑁂 𑀲𑀢𑁆𑀣𑀤𑀡𑁆𑀟𑁂𑀦. 𑀅𑀬𑀁 𑀧𑀦 𑀤𑀼𑀯𑀺𑀥𑀫𑁆𑀧𑀺 𑀤𑀡𑁆𑀟𑀁 𑀧𑀳𑀸𑀬 𑀅𑀤𑀡𑁆𑀟𑁂𑀦 𑀅𑀚𑁆𑀛𑀸𑀯𑀲𑀢𑀺. 𑀅𑀲𑀢𑁆𑀣𑁂𑀦𑀸𑀢𑀺 𑀬𑁂 𑀏𑀓𑀢𑁄𑀥𑀸𑀭𑀸𑀤𑀺𑀦𑀸 𑀲𑀢𑁆𑀣𑁂𑀦 𑀧𑀭𑀁 𑀯𑀺𑀳𑁂𑀲𑀦𑁆𑀢𑀺, 𑀢𑁂 𑀲𑀢𑁆𑀣𑁂𑀦 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑀺 𑀦𑀸𑀫. 𑀅𑀬𑀁 𑀧𑀦 𑀲𑀢𑁆𑀣𑁂𑀦 𑀔𑀼𑀤𑁆𑀤𑀓𑀫𑀓𑁆𑀔𑀺𑀓𑀸𑀬𑀧𑀺 𑀧𑀺𑀯𑀦𑀫𑀢𑁆𑀢𑀁 𑀮𑁄𑀳𑀺𑀢𑀁 𑀓𑀲𑁆𑀲𑀘𑀺 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸 𑀥𑀫𑁆𑀫𑁂𑀦𑁂𑀯, ‘𑀏𑀳𑀺 𑀔𑁄 𑀫𑀳𑀸𑀭𑀸𑀚𑀸’𑀢𑀺 𑀏𑀯𑀁 𑀧𑀝𑀺𑀭𑀸𑀚𑀽𑀳𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀸𑀕𑀫𑀦𑁄 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀧𑀣𑀯𑀺𑀁 𑀅𑀪𑀺𑀯𑀺𑀚𑀺𑀦𑀺𑀢𑁆𑀯𑀸 𑀅𑀚𑁆𑀛𑀸𑀯𑀲𑀢𑀺 𑀅𑀪𑀺𑀪𑀯𑀺𑀢𑁆𑀯𑀸 𑀲𑀸𑀫𑀻 𑀳𑀼𑀢𑁆𑀯𑀸 𑀯𑀲𑀢𑀻𑀢𑀺 𑀅𑀢𑁆𑀣𑁄’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁪) 𑀯𑀼𑀢𑁆𑀢𑀁, 𑀢𑀤𑁂𑀢𑀁 ‘‘𑀥𑀫𑁆𑀫𑁂𑀦𑀸’’𑀢𑀺 𑀧𑀤𑀲𑁆𑀲 ‘‘𑀧𑀼𑀩𑁆𑀩𑁂 𑀓𑀢𑀽𑀧𑀘𑀺𑀢𑁂𑀦 𑀏𑀢𑀭𑀳𑀺 𑀯𑀺𑀧𑀘𑁆𑀘𑀫𑀸𑀦𑀓𑁂𑀦 𑀬𑁂𑀦 𑀓𑁂𑀦𑀘𑀺 𑀧𑀼𑀜𑁆𑀜𑀥𑀫𑁆𑀫𑁂𑀦𑀸’’𑀢𑀺 𑀅𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀦𑁂𑀯 𑀳𑀺 ‘‘𑀥𑀫𑁆𑀫𑁂𑀦 𑀧𑀝𑀺𑀭𑀸𑀚𑀽𑀳𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀸𑀕𑀫𑀦𑁄 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀧𑀣𑀯𑀺𑀁 𑀅𑀪𑀺𑀯𑀺𑀚𑀺𑀦𑀺𑀢𑁆𑀯𑀸 𑀅𑀚𑁆𑀛𑀸𑀯𑀲𑀢𑀻’’𑀢𑀺. 𑀆𑀘𑀭𑀺𑀬𑁂𑀦𑀧𑀺 (𑀤𑀻. 𑀦𑀺. 𑀝𑀻. 𑁧.𑁨𑁫𑁮) 𑀯𑀼𑀢𑁆𑀢𑀁 𑀥𑀫𑁆𑀫𑁂𑀦𑀸𑀢𑀺 𑀓𑀢𑀽𑀧𑀘𑀺𑀢𑁂𑀦 𑀅𑀢𑁆𑀢𑀦𑁄 𑀧𑀼𑀜𑁆𑀜𑀥𑀫𑁆𑀫𑁂𑀦. 𑀢𑁂𑀦 𑀳𑀺 𑀲𑀜𑁆𑀘𑁄𑀤𑀺𑀢𑀸 𑀧𑀣𑀯𑀺𑀬𑀁 𑀲𑀩𑁆𑀩𑀭𑀸𑀚𑀸𑀦𑁄 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 ‘‘𑀲𑁆𑀯𑀸𑀕𑀢𑀁 𑀢𑁂 𑀫𑀳𑀸𑀭𑀸𑀚𑀸’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀭𑀚𑁆𑀚𑀁 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀦𑀺𑀬𑁆𑀬𑀸𑀢𑁂𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑁄 𑀇𑀫𑀁 𑀧𑀣𑀯𑀺𑀁 𑀲𑀸𑀕𑀭𑀧𑀭𑀺𑀬𑀦𑁆𑀢𑀁 𑀅𑀤𑀡𑁆𑀟𑁂𑀦 𑀅𑀲𑀢𑁆𑀣𑁂𑀦 𑀥𑀫𑁆𑀫𑁂𑀦 𑀅𑀪𑀺𑀯𑀺𑀚𑀺𑀬 𑀅𑀚𑁆𑀛𑀸𑀯𑀲𑀢𑀻’’𑀢𑀺, 𑀢𑁂𑀦𑀧𑀺 𑀬𑀣𑀸𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀤𑀲𑁆𑀲𑁂𑀢𑀺, 𑀢𑀲𑁆𑀫𑀸 𑀉𑀪𑀬𑀣𑀸𑀧𑀺 𑀏𑀢𑁆𑀣 𑀅𑀢𑁆𑀣𑁄 𑀬𑀼𑀢𑁆𑀢𑁄 𑀏𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑀧𑀽𑀭𑀡𑀸𑀤𑀺𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀫𑀦𑁆𑀢𑀭𑁂𑀦 𑀳𑀺 𑀧𑀼𑀩𑁆𑀩𑁂 𑀓𑀢𑀽𑀧𑀘𑀺𑀢𑀓𑀫𑁆𑀫𑁂𑀦𑁂𑀯 𑀏𑀯𑀫𑀚𑁆𑀛𑀸𑀯𑀲𑀦𑀁 𑀦 𑀲𑀫𑁆𑀪𑀯𑀢𑀺, 𑀢𑀣𑀸 𑀧𑀼𑀩𑁆𑀩𑁂 𑀓𑀢𑀽𑀧𑀘𑀺𑀢𑀓𑀫𑁆𑀫𑀫𑀦𑁆𑀢𑀭𑁂𑀦 𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑀧𑀽𑀭𑀡𑀸𑀤𑀺𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀏𑀯𑀸𑀢𑀺.

𑀏𑀯𑀁 𑀏𑀓𑀁 𑀦𑀺𑀧𑁆𑀨𑀢𑁆𑀢𑀺𑀁 𑀓𑀣𑁂𑀢𑁆𑀯𑀸 𑀤𑀼𑀢𑀺𑀬𑀁 𑀦𑀺𑀧𑁆𑀨𑀢𑁆𑀢𑀺𑀁 𑀓𑀣𑁂𑀢𑀼𑀁 𑀬𑀤𑁂𑀢𑀁 ‘‘𑀲𑀘𑁂 𑀔𑁄 𑀧𑀦𑀸’’𑀢𑀺𑀆𑀤𑀺𑀯𑀘𑀦𑀁 𑀯𑀼𑀢𑁆𑀢𑀁, 𑀢𑀢𑁆𑀣 𑀅𑀦𑀼𑀢𑁆𑀢𑀸𑀦𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀭𑀳𑀁…𑀧𑁂… 𑀯𑀺𑀯𑀝𑁆𑀝𑀘𑁆𑀙𑀤𑁄𑀢𑀺 𑀏𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀬𑀲𑁆𑀫𑀸 𑀭𑀸𑀕𑀸𑀤𑀬𑁄 𑀲𑀢𑁆𑀢 𑀧𑀸𑀧𑀥𑀫𑁆𑀫𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀚𑁆𑀚𑀫𑀸𑀦𑀸 𑀘 𑀢𑁂 𑀲𑀢𑁆𑀢𑀲𑀦𑁆𑀢𑀸𑀦𑀁 𑀙𑀸𑀤𑁂𑀢𑁆𑀯𑀸 𑀧𑀭𑀺𑀬𑁄𑀦𑀦𑁆𑀥𑀺𑀢𑁆𑀯𑀸 𑀓𑀼𑀲𑀮𑀧𑁆𑀧𑀯𑀢𑁆𑀢𑀺𑀁 𑀦𑀺𑀯𑀸𑀭𑁂𑀦𑁆𑀢𑀺, 𑀢𑀲𑁆𑀫𑀸 𑀢𑁂 𑀇𑀥 𑀙𑀤𑀲𑀤𑁆𑀤𑁂𑀦 𑀯𑀼𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀺 ‘‘𑀭𑀸𑀕𑀤𑁄𑀲𑀸’’𑀢𑀺𑀆𑀤𑀺𑀦𑀸. 𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀢𑁄 𑀅𑀜𑁆𑀜𑁂𑀦 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦 𑀲𑀳 𑀢𑀻𑀡𑀺 𑀤𑀼𑀘𑁆𑀘𑀭𑀺𑀢𑀸𑀦𑀺, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀧𑀦 𑀯𑀺𑀲𑁂𑀲𑁂𑀦 𑀲𑀢𑁆𑀢𑀸𑀦𑀁 𑀙𑀤𑀦𑀢𑁄, 𑀧𑀭𑀫𑀲𑀸𑀯𑀚𑁆𑀚𑀢𑁆𑀢𑀸 𑀘 𑀯𑀺𑀲𑀼𑀁 𑀕𑀳𑀺𑀢𑀸. 𑀯𑀼𑀢𑁆𑀢𑀜𑁆𑀘 ‘‘𑀲𑀩𑁆𑀩𑁂 𑀢𑁂 𑀇𑀫𑁂𑀳𑁂𑀯 𑀤𑁆𑀯𑀸𑀲𑀝𑁆𑀞𑀺𑀬𑀸 𑀯𑀢𑁆𑀣𑀽𑀳𑀺 𑀅𑀦𑁆𑀢𑁄𑀚𑀸𑀮𑀻𑀓𑀢𑀸, 𑀏𑀢𑁆𑀣 𑀲𑀺𑀢𑀸𑀯 𑀉𑀫𑁆𑀫𑀼𑀚𑁆𑀚𑀫𑀸𑀦𑀸 𑀉𑀫𑁆𑀫𑀼𑀚𑁆𑀚𑀦𑁆𑀢𑀻’’𑀢𑀺𑀆𑀤𑀺 (𑀤𑀻. 𑀦𑀺. 𑁧.𑁧𑁪𑁬). 𑀢𑀣𑀸 𑀫𑀼𑀬𑁆𑀳𑀦𑀝𑁆𑀞𑁂𑀦 𑀫𑁄𑀳𑁄, 𑀅𑀯𑀺𑀤𑀺𑀢𑀓𑀭𑀡𑀝𑁆𑀞𑁂𑀦 𑀅𑀯𑀺𑀚𑁆𑀚𑀸𑀢𑀺 𑀧𑀯𑀢𑁆𑀢𑀺𑀆𑀓𑀸𑀭𑀪𑁂𑀤𑁂𑀦 𑀅𑀜𑁆𑀜𑀸𑀡𑀫𑁂𑀯 𑀤𑁆𑀯𑀺𑀥𑀸 𑀯𑀼𑀢𑁆𑀢𑀁. 𑀢𑀣𑀸 𑀳𑀺𑀲𑁆𑀲 𑀤𑁆𑀯𑀺𑀥𑀸𑀧𑀺 𑀙𑀤𑀦𑀢𑁆𑀣𑁄 𑀓𑀣𑀺𑀢𑁄 ‘‘𑀅𑀦𑁆𑀥𑀢𑀫𑀁 𑀢𑀤𑀸 𑀳𑁄𑀢𑀺, 𑀬𑀁 𑀫𑁄𑀳𑁄 𑀲𑀳𑀢𑁂 𑀦𑀭’’𑀦𑁆𑀢𑀺, (𑀫𑀳𑀸𑀦𑀺. 𑁫, 𑁧𑁫𑁬, 𑁧𑁯𑁫) ‘‘𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄 𑀮𑁄𑀓𑁄, 𑀯𑁂𑀯𑀺𑀘𑁆𑀙𑀸 𑀧𑀫𑀸𑀤𑀸 𑀦𑀧𑁆𑀧𑀓𑀸𑀲𑀢𑀻’’𑀢𑀺 (𑀲𑀼. 𑀦𑀺. 𑁧𑁦𑁩𑁯; 𑀘𑀽𑀴𑀦𑀺. 𑀧𑀸𑀭𑀸𑀬𑀦𑀯𑀕𑁆𑀕.𑁨) 𑀘. 𑀏𑀯𑀁 𑀭𑀸𑀕𑀤𑁄𑀲𑀸𑀤𑀻𑀦𑀫𑁆𑀧𑀺 𑀙𑀤𑀦𑀢𑁆𑀣𑁄 𑀯𑀢𑁆𑀢𑀩𑁆𑀩𑁄. 𑀫𑀳𑀸𑀧𑀤𑀸𑀦𑀝𑁆𑀞𑀓𑀣𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁩) 𑀧𑀦 𑀭𑀸𑀕𑀤𑁄𑀲𑀫𑁄𑀳𑀫𑀸𑀦𑀤𑀺𑀝𑁆𑀞𑀺𑀓𑀺𑀮𑁂𑀲𑀢𑀡𑁆𑀳𑀸𑀯𑀲𑁂𑀦 𑀲𑀢𑁆𑀢 𑀧𑀸𑀧𑀥𑀫𑁆𑀫𑀸 𑀕𑀳𑀺𑀢𑀸. 𑀢𑀢𑁆𑀭 𑀭𑀜𑁆𑀚𑀦𑀝𑁆𑀞𑁂𑀦 𑀭𑀸𑀕𑁄, 𑀢𑀡𑁆𑀳𑀸𑀬𑀦𑀝𑁆𑀞𑁂𑀦 𑀢𑀡𑁆𑀳𑀸𑀢𑀺 𑀧𑀯𑀢𑁆𑀢𑀺𑀆𑀓𑀸𑀭𑀪𑁂𑀤𑁂𑀦 𑀮𑁄𑀪𑁄 𑀏𑀯 𑀤𑁆𑀯𑀺𑀥𑀸 𑀯𑀼𑀢𑁆𑀢𑁄. 𑀢𑀣𑀸 𑀳𑀺𑀲𑁆𑀲 𑀤𑁆𑀯𑀺𑀥𑀸𑀧𑀺 𑀙𑀤𑀦𑀢𑁆𑀣𑁄 𑀏𑀓𑀦𑁆𑀢𑀺𑀓𑁄𑀯. 𑀬𑀣𑀸𑀳 ‘‘𑀅𑀦𑁆𑀥𑀢𑀫𑀁 𑀢𑀤𑀸 𑀳𑁄𑀢𑀺, 𑀬𑀁 𑀭𑀸𑀕𑁄 𑀲𑀳𑀢𑁂 𑀦𑀭’’𑀦𑁆𑀢𑀺, ‘‘𑀓𑀸𑀫𑀦𑁆𑀥𑀸 𑀚𑀸𑀮𑀲𑀜𑁆𑀙𑀦𑁆𑀦𑀸, 𑀢𑀡𑁆𑀳𑀸𑀙𑀤𑀦𑀙𑀸𑀤𑀺𑀢𑀸’’𑀢𑀺 (𑀉𑀤𑀸. 𑁯𑁪) 𑀘, 𑀓𑀺𑀮𑁂𑀲𑀕𑁆𑀕𑀳𑀡𑁂𑀦 𑀘 𑀯𑀼𑀢𑁆𑀢𑀸𑀯𑀲𑀺𑀝𑁆𑀞𑀸 𑀯𑀺𑀘𑀺𑀓𑀺𑀘𑁆𑀙𑀸𑀤𑀬𑁄 𑀯𑀼𑀢𑁆𑀢𑀸.

𑀲𑀢𑁆𑀢𑀳𑀺 𑀧𑀝𑀺𑀘𑁆𑀙𑀦𑁆𑀦𑁂𑀢𑀺 𑀳𑁂𑀢𑀼𑀕𑀩𑁆𑀪𑀯𑀘𑀦𑀁, 𑀲𑀢𑁆𑀢𑀳𑀺 𑀧𑀸𑀧𑀥𑀫𑁆𑀫𑁂𑀳𑀺 𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸 𑀓𑀺𑀮𑁂𑀲𑀯𑀲𑁂𑀦 𑀅𑀦𑁆𑀥𑀓𑀸𑀭𑁂 𑀮𑁄𑀓𑁂𑀢𑀺 𑀅𑀢𑁆𑀣𑁄. 𑀢𑀁 𑀙𑀤𑀦𑀦𑁆𑀢𑀺 𑀲𑀢𑁆𑀢𑀧𑀸𑀧𑀥𑀫𑁆𑀫𑀲𑀗𑁆𑀔𑀸𑀢𑀁 𑀙𑀤𑀦𑀁. 𑀯𑀺𑀯𑀝𑁆𑀝𑁂𑀢𑁆𑀯𑀸𑀢𑀺 𑀯𑀺𑀯𑀝𑁆𑀝𑀁 𑀓𑀢𑁆𑀯𑀸 𑀯𑀺𑀕𑀫𑁂𑀢𑁆𑀯𑀸. 𑀢𑀤𑁂𑀯 𑀧𑀭𑀺𑀬𑀸𑀬𑀦𑁆𑀢𑀭𑁂𑀦 𑀯𑀼𑀢𑁆𑀢𑀁 ‘‘𑀲𑀫𑀦𑁆𑀢𑀢𑁄 𑀲𑀜𑁆𑀚𑀸𑀢𑀸𑀮𑁄𑀓𑁄 𑀳𑀼𑀢𑁆𑀯𑀸’’𑀢𑀺. 𑀓𑀺𑀮𑁂𑀲𑀙𑀤𑀦𑀯𑀺𑀕𑀫𑁄 𑀏𑀯 𑀳𑀺 𑀆𑀮𑁄𑀓𑁄, 𑀏𑀢𑁂𑀦 𑀯𑀺𑀯𑀝𑁆𑀝𑀬𑀺𑀢𑀩𑁆𑀩𑁄 𑀯𑀺𑀕𑀫𑁂𑀢𑀩𑁆𑀩𑁄𑀢𑀺 𑀯𑀺𑀯𑀝𑁆𑀝𑁄, 𑀙𑀸𑀤𑁂𑀢𑀺 𑀧𑀝𑀺𑀘𑁆𑀙𑀸𑀤𑁂𑀢𑀻𑀢𑀺 𑀙𑀤𑁄, 𑀯𑀺𑀯𑀝𑁆𑀝𑁄 𑀙𑀤𑁄 𑀅𑀦𑁂𑀦𑀸𑀢𑀺 𑀯𑀺𑀯𑀝𑁆𑀝𑀘𑁆𑀙𑀤𑀸,𑀯𑀺𑀯𑀝𑁆𑀝𑀘𑁆𑀙𑀤𑁄 𑀯𑀸𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀅𑀬𑀜𑁆𑀳𑀺 𑀯𑀺𑀯𑀝𑁆𑀝𑀘𑁆𑀙𑀤𑀲𑀤𑁆𑀤𑁄 𑀤𑀴𑁆𑀳𑀥𑀫𑁆𑀫𑀧𑀘𑁆𑀘𑀓𑁆𑀔𑀥𑀫𑁆𑀫𑀲𑀤𑁆𑀤𑀸𑀤𑀬𑁄 𑀯𑀺𑀬 𑀧𑀼𑀮𑁆𑀮𑀺𑀗𑁆𑀕𑀯𑀲𑁂𑀦 𑀆𑀓𑀸𑀭𑀦𑁆𑀢𑁄, 𑀑𑀓𑀸𑀭𑀦𑁆𑀢𑁄 𑀘 𑀳𑁄𑀢𑀺. 𑀢𑀣𑀸 𑀳𑀺 𑀫𑀳𑀸𑀧𑀤𑀸𑀦𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁 ‘‘𑀭𑀸𑀕𑀤𑁄𑀲𑀫𑁄𑀳𑀫𑀸𑀦𑀤𑀺𑀝𑁆𑀞𑀺𑀓𑀺𑀮𑁂𑀲𑀢𑀡𑁆𑀳𑀸𑀲𑀗𑁆𑀔𑀸𑀢𑀁 𑀙𑀤𑀦𑀁 𑀆𑀯𑀭𑀡𑀁 𑀯𑀺𑀯𑀝𑀁 𑀯𑀺𑀤𑁆𑀥𑀁𑀲𑀺𑀢𑀁 𑀯𑀺𑀯𑀝𑀓𑀁 𑀏𑀢𑁂𑀦𑀸𑀢𑀺 𑀯𑀺𑀯𑀝𑀘𑁆𑀙𑀤𑁄, ‘𑀯𑀺𑀯𑀝𑁆𑀝𑀘𑁆𑀙𑀤𑀸’𑀢𑀺𑀧𑀺 𑀧𑀸𑀞𑁄, 𑀅𑀬𑀫𑁂𑀯𑀢𑁆𑀣𑁄’’𑀢𑀺, (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁩) 𑀢𑀲𑁆𑀲𑀸 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀺𑀬𑀫𑁆𑀧𑀺 𑀯𑀼𑀢𑁆𑀢𑀁 ‘‘𑀯𑀺𑀯𑀝𑁆𑀝𑀘𑁆𑀙𑀤𑀸𑀢𑀺 𑀑𑀓𑀸𑀭𑀲𑁆𑀲 𑀆𑀓𑀸𑀭𑀁 𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁄’’𑀢𑀺. 𑀲𑀤𑁆𑀤𑀯𑀺𑀤𑀽 𑀧𑀦 ‘‘𑀆𑀥𑀦𑁆𑀯𑀸𑀤𑀺𑀢𑁄𑀢𑀺 𑀮𑀓𑁆𑀔𑀡𑁂𑀦 𑀲𑀫𑀸𑀲𑀦𑁆𑀢𑀕𑀢𑁂𑀳𑀺 𑀥𑀦𑀼𑀲𑀤𑁆𑀤𑀸𑀤𑀻𑀳𑀺 𑀓𑁆𑀯𑀘𑀺 𑀆𑀧𑀘𑁆𑀘𑀬𑁄’’𑀢𑀺 𑀯𑀢𑁆𑀯𑀸 ‘‘𑀓𑀡𑁆𑀟𑀺𑀯𑀥𑀦𑁆𑀯𑀸, 𑀧𑀘𑁆𑀘𑀓𑁆𑀔𑀥𑀫𑁆𑀫𑀸, 𑀯𑀺𑀯𑀝𑁆𑀝𑀘𑁆𑀙𑀤𑀸’’𑀢𑀺 𑀧𑀬𑁄𑀕𑀫𑀼𑀤𑀸𑀳𑀭𑀦𑁆𑀢𑀺.

𑀓𑀲𑁆𑀫𑀸 𑀧𑀤𑀢𑁆𑀢𑀬𑀫𑁂𑀢𑀁 𑀯𑀼𑀢𑁆𑀢𑀦𑁆𑀢𑀺 𑀅𑀦𑀼𑀬𑁄𑀕𑀁 𑀳𑁂𑀢𑀸𑀮𑀗𑁆𑀓𑀸𑀭𑀦𑀬𑁂𑀦 𑀧𑀭𑀺𑀳𑀭𑀦𑁆𑀢𑁄 ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳, 𑀢𑀢𑁆𑀣𑀸𑀢𑀺 𑀘 𑀢𑀻𑀲𑀼 𑀧𑀤𑁂𑀲𑀽𑀢𑀺 𑀅𑀢𑁆𑀣𑁄. 𑀧𑀽𑀚𑀸𑀯𑀺𑀲𑁂𑀲𑀁 𑀧𑀝𑀺𑀕𑁆𑀕𑀡𑁆𑀳𑀺𑀢𑀼𑀁 𑀅𑀭𑀳𑀢𑀻𑀢𑀺 𑀅𑀭𑀳𑀦𑁆𑀢𑀺 𑀅𑀢𑁆𑀣𑁂𑀦 𑀧𑀽𑀚𑀸𑀭𑀳𑀢𑀸 𑀯𑀼𑀢𑁆𑀢𑀸. 𑀬𑀲𑁆𑀫𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀢𑀲𑁆𑀫𑀸 𑀧𑀽𑀚𑀸𑀭𑀳𑀢𑀸𑀢𑀺 𑀢𑀲𑁆𑀲𑀸 𑀧𑀽𑀚𑀸𑀭𑀳𑀢𑀸𑀬 𑀳𑁂𑀢𑀼 𑀯𑀼𑀢𑁆𑀢𑁄. 𑀲𑀯𑀸𑀲𑀦𑀲𑀩𑁆𑀩𑀓𑀺𑀮𑁂𑀲𑀧𑁆𑀧𑀳𑀸𑀦𑀧𑀼𑀩𑁆𑀩𑀓𑀢𑁆𑀢𑀸 𑀩𑀼𑀤𑁆𑀥𑀪𑀸𑀯𑀲𑁆𑀲 𑀩𑀼𑀤𑁆𑀥𑀢𑁆𑀢𑀳𑁂𑀢𑀼𑀪𑀽𑀢𑀸 𑀯𑀺𑀯𑀝𑁆𑀝𑀘𑁆𑀙𑀤𑀢𑀸 𑀯𑀼𑀢𑁆𑀢𑀸. 𑀓𑀫𑁆𑀫𑀸𑀤𑀺𑀯𑀲𑁂𑀦 𑀢𑀺𑀯𑀺𑀥𑀁 𑀯𑀝𑁆𑀝𑀜𑁆𑀘 𑀭𑀸𑀕𑀸𑀤𑀺𑀯𑀲𑁂𑀦 𑀲𑀢𑁆𑀢𑀯𑀺𑀥𑁄 𑀙𑀤𑁄 𑀘 𑀯𑀝𑁆𑀝𑀘𑁆𑀙𑀤𑀸, 𑀯𑀝𑁆𑀝𑀘𑁆𑀙𑀤𑁂𑀳𑀺 𑀯𑀺𑀕𑀢𑁄, 𑀯𑀺𑀕𑀢𑀸 𑀯𑀸 𑀯𑀝𑁆𑀝𑀘𑁆𑀙𑀤𑀸 𑀬𑀲𑁆𑀲𑀸𑀢𑀺 𑀯𑀺𑀯𑀝𑁆𑀝𑀘𑁆𑀙𑀤𑁄,𑀯𑀺𑀯𑀝𑁆𑀝𑀘𑁆𑀙𑀤𑀸 𑀯𑀸, 𑀤𑁆𑀯𑀦𑁆𑀤𑀧𑀼𑀩𑁆𑀩𑀕𑁄 𑀧𑀦 𑀯𑀺-𑀲𑀤𑁆𑀤𑁄 𑀉𑀪𑀬𑀢𑁆𑀣 𑀬𑁄𑀚𑁂𑀢𑀩𑁆𑀩𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀯𑀝𑁆𑀝𑁄 𑀘 𑀯𑀺𑀘𑁆𑀙𑀤𑁄 𑀘𑀸’’𑀢𑀺 𑀯𑀼𑀢𑁆𑀢𑀁. 𑀏𑀯𑀫𑁆𑀧𑀺 𑀯𑀤𑀦𑁆𑀢𑀺 ‘‘𑀯𑀺𑀯𑀝𑁆𑀝𑁄 𑀘 𑀲𑁄 𑀯𑀺𑀘𑁆𑀙𑀤𑁄 𑀘𑀸𑀢𑀺 𑀯𑀺𑀯𑀝𑁆𑀝𑀘𑁆𑀙𑀤𑁄, 𑀉𑀢𑁆𑀢𑀭𑀧𑀤𑁂 𑀧𑀼𑀩𑁆𑀩𑀧𑀤𑀮𑁄𑀧𑁄𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀻’’𑀢𑀺. ‘‘𑀅𑀭𑀳𑀁 𑀯𑀝𑁆𑀝𑀸𑀪𑀸𑀯𑁂𑀦𑀸’’𑀢𑀺 𑀇𑀤𑀁 𑀓𑀺𑀮𑁂𑀲𑁂𑀳𑀺 𑀆𑀭𑀓𑀢𑁆𑀢𑀸, 𑀓𑀺𑀮𑁂𑀲𑀸𑀭𑀻𑀦𑀁 𑀲𑀁𑀲𑀸𑀭𑀘𑀓𑁆𑀓𑀲𑁆𑀲𑀸𑀭𑀸𑀦𑀜𑁆𑀘 𑀳𑀢𑀢𑁆𑀢𑀸, 𑀧𑀸𑀧𑀓𑀭𑀡𑁂 𑀘 𑀭𑀳𑀸𑀪𑀸𑀯𑀸𑀢𑀺 𑀅𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀇𑀤𑀜𑁆𑀳𑀺 𑀨𑀮𑁂𑀦 𑀳𑁂𑀢𑀸𑀦𑀼𑀫𑀸𑀦𑀤𑀲𑁆𑀲𑀦𑀁 𑁋 𑀬𑀣𑀸 𑀢𑀁 𑀥𑀽𑀫𑁂𑀦 𑀅𑀕𑁆𑀕𑀺𑀲𑁆𑀲, 𑀉𑀤𑀓𑁄𑀖𑁂𑀦 𑀉𑀧𑀭𑀺 𑀯𑀼𑀝𑁆𑀞𑀺𑀬𑀸, 𑀏𑀢𑁂𑀦 𑀘 𑀅𑀢𑁆𑀣𑁂𑀦 𑀅𑀭𑀳𑀪𑀸𑀯𑁄 𑀳𑁂𑀢𑀼, 𑀯𑀝𑁆𑀝𑀸𑀪𑀸𑀯𑁄 𑀨𑀮𑀦𑁆𑀢𑀺 𑀅𑀬𑀁 𑀆𑀘𑀭𑀺𑀬𑀫𑀢𑀺. ‘‘𑀧𑀘𑁆𑀘𑀬𑀸𑀤𑀻𑀦𑀁, 𑀧𑀽𑀚𑀸𑀯𑀺𑀲𑁂𑀲𑀲𑁆𑀲 𑀘 𑀅𑀭𑀳𑀢𑁆𑀢𑀸’’𑀢𑀺 𑀧𑀦 𑀳𑁂𑀢𑀼𑀦𑀸 𑀨𑀮𑀸𑀦𑀼𑀫𑀸𑀦𑀤𑀲𑁆𑀲𑀦𑀫𑁆𑀧𑀺 𑀲𑀺𑀬𑀸 𑀬𑀣𑀸 𑀢𑀁 𑀅𑀕𑁆𑀕𑀺𑀦𑀸 𑀥𑀽𑀫𑀲𑁆𑀲, 𑀉𑀧𑀭𑀺 𑀯𑀼𑀝𑁆𑀞𑀺𑀬𑀸 𑀉𑀤𑀓𑁄𑀖𑀲𑁆𑀲. ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀙𑀤𑀦𑀸𑀪𑀸𑀯𑁂𑀦𑀸’’𑀢𑀺 𑀇𑀤𑀁 𑀧𑀦 𑀳𑁂𑀢𑀼𑀦𑀸 𑀨𑀮𑀸𑀦𑀼𑀫𑀸𑀦𑀤𑀲𑁆𑀲𑀦𑀁 𑀲𑀯𑀸𑀲𑀦𑀲𑀩𑁆𑀩𑀓𑀺𑀮𑁂𑀲𑀘𑁆𑀙𑀤𑀦𑀸𑀪𑀸𑀯𑀧𑀼𑀩𑁆𑀩𑀓𑀢𑁆𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀪𑀸𑀯𑀲𑁆𑀲. 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀳𑀺 𑀯𑀺𑀘𑁆𑀙𑀤𑀢𑀸, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀪𑀸𑀯𑁄. ‘‘𑀯𑀺𑀯𑀝𑁆𑀝𑁄 𑀘 𑀯𑀺𑀘𑁆𑀙𑀤𑁄 𑀘𑀸’’𑀢𑀺 𑀇𑀤𑀁 𑀳𑁂𑀢𑀼𑀤𑁆𑀯𑀬𑀁. 𑀓𑀸𑀫𑀜𑁆𑀘 𑀆𑀘𑀭𑀺𑀬𑀫𑀢𑀺𑀬𑀸 𑀨𑀮𑁂𑀦 𑀳𑁂𑀢𑀼𑀅𑀦𑀼𑀫𑀸𑀦𑀤𑀲𑁆𑀲𑀦𑁂 𑀯𑀺𑀯𑀝𑁆𑀝𑀢𑀸 𑀨𑀮𑀫𑁂𑀯 𑀳𑁄𑀢𑀺, 𑀳𑁂𑀢𑀼𑀅𑀦𑀼𑀫𑀸𑀦𑀤𑀲𑁆𑀲𑀦𑀲𑁆𑀲, 𑀧𑀦 𑀢𑀣𑀸𑀜𑀸𑀡𑀲𑁆𑀲 𑀘 𑀳𑁂𑀢𑀼𑀪𑀸𑀯𑀢𑁄 𑀳𑁂𑀢𑀼𑀬𑁂𑀯 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀏𑀯𑀁 𑀧𑀤𑀢𑁆𑀢𑀬𑀯𑀘𑀦𑁂 𑀳𑁂𑀢𑀸𑀮𑀗𑁆𑀓𑀸𑀭𑀦𑀬𑁂𑀦 𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀘𑀢𑀼𑀯𑁂𑀲𑀸𑀭𑀚𑁆𑀚𑀯𑀲𑁂𑀦𑀧𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀤𑀼𑀢𑀺𑀬𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀤𑀼𑀢𑀺𑀬𑁂𑀦 𑀯𑁂𑀲𑀸𑀭𑀚𑁆𑀚𑁂𑀦𑀸𑀢𑀺 ‘‘𑀘𑀢𑁆𑀢𑀸𑀭𑀺𑀫𑀸𑀦𑀺 𑀪𑀺𑀓𑁆𑀔𑀯𑁂 𑀢𑀣𑀸𑀕𑀢𑀲𑁆𑀲 𑀯𑁂𑀲𑀸𑀭𑀚𑁆𑀚𑀸𑀦𑀺, 𑀬𑁂𑀳𑀺 𑀯𑁂𑀲𑀸𑀭𑀚𑁆𑀚𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀢𑀣𑀸𑀕𑀢𑁄 𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀧𑀭𑀺𑀲𑀸𑀲𑀼 𑀲𑀻𑀳𑀦𑀸𑀤𑀁 𑀦𑀤𑀢𑀺, 𑀩𑁆𑀭𑀳𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀻’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁪.𑁮; 𑀫. 𑀦𑀺. 𑁧.𑁧𑁫𑁦) 𑀪𑀕𑀯𑀢𑀸 𑀯𑀼𑀢𑁆𑀢𑀓𑁆𑀓𑀫𑁂𑀦 𑀤𑀼𑀢𑀺𑀬𑀪𑀽𑀢𑁂𑀦 ‘‘𑀔𑀻𑀡𑀸𑀲𑀯𑀲𑁆𑀲 𑀢𑁂 𑀧𑀝𑀺𑀚𑀸𑀦𑀢𑁄 ‘𑀇𑀫𑁂 𑀆𑀲𑀯𑀸 𑀅𑀧𑀭𑀺𑀓𑁆𑀔𑀻𑀡𑀸’𑀢𑀺, 𑀢𑀢𑁆𑀭 𑀯𑀢 𑀫𑀁 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀤𑁂𑀯𑁄 𑀯𑀸 𑀫𑀸𑀭𑁄 𑀯𑀸 𑀩𑁆𑀭𑀳𑁆𑀫𑀸 𑀯𑀸 𑀓𑁄𑀘𑀺 𑀯𑀸 𑀮𑁄𑀓𑀲𑁆𑀫𑀺𑀁 𑀲𑀳 𑀥𑀫𑁆𑀫𑁂𑀦 𑀧𑀝𑀺𑀘𑁄𑀤𑁂𑀲𑁆𑀲𑀢𑀻𑀢𑀺 𑀦𑀺𑀫𑀺𑀢𑁆𑀢𑀫𑁂𑀢𑀁 𑀪𑀺𑀓𑁆𑀔𑀯𑁂 𑀦 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀏𑀢𑀫𑀳𑀁 𑀪𑀺𑀓𑁆𑀔𑀯𑁂 𑀦𑀺𑀫𑀺𑀢𑁆𑀢𑀁 𑀅𑀲𑀫𑀦𑀼𑀧𑀲𑁆𑀲𑀦𑁆𑀢𑁄 𑀔𑁂𑀫𑀧𑁆𑀧𑀢𑁆𑀢𑁄 𑀅𑀪𑀬𑀧𑁆𑀧𑀢𑁆𑀢𑁄 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄 𑀯𑀺𑀳𑀭𑀸𑀫𑀻’’𑀢𑀺 𑀧𑀭𑀺𑀤𑀻𑀧𑀺𑀢𑁂𑀦 𑀯𑁂𑀲𑀸𑀭𑀚𑁆𑀚𑁂𑀦. 𑀧𑀼𑀭𑀺𑀫𑀲𑀺𑀤𑁆𑀥𑀻𑀢𑀺 𑀧𑀼𑀭𑀺𑀫𑀲𑁆𑀲 ‘‘𑀅𑀭𑀳’’𑀦𑁆𑀢𑀺 𑀧𑀤𑀲𑁆𑀲 𑀅𑀢𑁆𑀣𑀲𑀺𑀤𑁆𑀥𑀺 𑀅𑀭𑀳𑀢𑁆𑀢𑀲𑀺𑀤𑁆𑀥𑀺, 𑀤𑀼𑀢𑀺𑀬𑀯𑁂𑀲𑀸𑀭𑀚𑁆𑀚𑀲𑁆𑀲 𑀢𑀤𑀢𑁆𑀣𑀪𑀸𑀯𑀢𑁄 𑀢𑁂𑀦 𑀯𑁂𑀲𑀸𑀭𑀚𑁆𑀚𑁂𑀦 𑀢𑀤𑀢𑁆𑀣𑀲𑀺𑀤𑁆𑀥𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀔𑀻𑀡𑀸𑀲𑀯𑀲𑁆𑀲 𑀢𑁂 𑀧𑀝𑀺𑀚𑀸𑀦𑀢𑁄 ‘𑀇𑀫𑁂 𑀆𑀲𑀯𑀸 𑀅𑀧𑀭𑀺𑀓𑁆𑀔𑀻𑀡𑀸’ 𑀢𑀺’’𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯 𑀳𑀺 𑀤𑀼𑀢𑀺𑀬𑀯𑁂𑀲𑀸𑀭𑀚𑁆𑀚𑀁 ‘‘𑀓𑀺𑀮𑁂𑀲𑁂𑀳𑀺 𑀆𑀭𑀓𑀢𑁆𑀢𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁄 ‘‘𑀅𑀭𑀳’’𑀦𑁆𑀢𑀺 𑀧𑀤𑀲𑁆𑀲 𑀅𑀢𑁆𑀣𑁄𑀢𑀺. 𑀢𑀢𑁄 𑀘 𑀯𑀺𑀜𑁆𑀜𑀸𑀬𑀢𑀺 ‘‘𑀬𑀣𑀸 𑀤𑀼𑀢𑀺𑀬𑁂𑀦 𑀯𑁂𑀲𑀸𑀭𑀚𑁆𑀚𑁂𑀦 𑀧𑀼𑀭𑀺𑀫𑀲𑀺𑀤𑁆𑀥𑀺, 𑀏𑀯𑀁 𑀧𑀼𑀭𑀺𑀫𑁂𑀦𑀧𑀺 𑀅𑀢𑁆𑀣𑁂𑀦 𑀤𑀼𑀢𑀺𑀬𑀯𑁂𑀲𑀸𑀭𑀚𑁆𑀚𑀲𑀺𑀤𑁆𑀥𑀻’’𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀇𑀫𑀺𑀦𑀸 𑀦𑀬𑁂𑀦 𑀘𑀢𑀼𑀯𑁂𑀲𑀸𑀭𑀚𑁆𑀚𑀯𑀲𑁂𑀦 𑀧𑀤𑀢𑁆𑀢𑀬𑀯𑀘𑀦𑁂 𑀧𑀬𑁄𑀚𑀦𑀤𑀲𑁆𑀲𑀦𑀁 𑀉𑀧𑀧𑀦𑁆𑀦𑀁 𑀳𑁄𑀢𑀺. 𑀇𑀢𑀭𑀣𑀸 𑀳𑀺 𑀓𑀺𑀜𑁆𑀘𑀺𑀧𑀬𑁄𑀚𑀦𑀸𑀪𑀸𑀯𑀢𑁄 𑀇𑀤𑀁𑀬𑁂𑀯 𑀯𑀘𑀦𑀁 𑀇𑀥 𑀅𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺.

𑀧𑀞𑀫𑁂𑀦𑀸𑀢𑀺 𑀯𑀼𑀢𑁆𑀢𑀦𑀬𑁂𑀦 𑀧𑀞𑀫𑀪𑀽𑀢𑁂𑀦 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑁂 𑀧𑀝𑀺𑀚𑀸𑀦𑀢𑁄 ‘𑀇𑀫𑁂 𑀥𑀫𑁆𑀫𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀸’𑀢𑀺, 𑀢𑀢𑁆𑀭…𑀧𑁂… 𑀯𑀺𑀳𑀭𑀸𑀫𑀻’’𑀢𑀺 𑀧𑀭𑀺𑀤𑀻𑀧𑀺𑀢𑁂𑀦 𑀯𑁂𑀲𑀸𑀭𑀚𑁆𑀚𑁂𑀦. 𑀤𑀼𑀢𑀺𑀬𑀲𑀺𑀤𑁆𑀥𑀻𑀢𑀺 𑀤𑀼𑀢𑀺𑀬𑀲𑁆𑀲 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀲𑀺𑀤𑁆𑀥𑀺 𑀩𑀼𑀤𑁆𑀥𑀢𑁆𑀢𑀲𑀺𑀤𑁆𑀥𑀺 𑀢𑀲𑁆𑀲 𑀢𑀤𑀢𑁆𑀣𑀪𑀸𑀯𑀢𑁄. 𑀢𑀢𑀺𑀬𑀘𑀢𑀼𑀢𑁆𑀣𑁂𑀳𑀻𑀢𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑀢𑀺𑀬𑀘𑀢𑀼𑀢𑁆𑀣𑀪𑀽𑀢𑁂𑀳𑀺 ‘‘𑀬𑁂 𑀔𑁄 𑀧𑀦 𑀢𑁂 𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸, 𑀢𑁂 𑀧𑀝𑀺𑀲𑁂𑀯𑀢𑁄 𑀦𑀸𑀮𑀁 𑀅𑀦𑁆𑀢𑀭𑀸𑀬𑀸𑀬𑀸𑀢𑀺, 𑀢𑀢𑁆𑀭…𑀧𑁂… 𑀯𑀺𑀳𑀭𑀸𑀫𑀻’’𑀢𑀺 𑀘 ‘‘𑀬𑀲𑁆𑀲 𑀔𑁄 𑀧𑀦 𑀢𑁂 𑀅𑀢𑁆𑀣𑀸𑀬 𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀲𑁄 𑀦 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬𑀸𑀢𑀺, 𑀢𑀢𑁆𑀭…𑀧𑁂… 𑀯𑀺𑀳𑀭𑀸𑀫𑀻’’𑀢𑀺 (𑀅. 𑀦𑀺. 𑁪.𑁮; 𑀫. 𑀦𑀺. 𑁧.𑁧𑁫𑁦) 𑀘 𑀧𑀭𑀺𑀤𑀻𑀧𑀺𑀢𑁂𑀳𑀺 𑀯𑁂𑀲𑀸𑀭𑀚𑁆𑀚𑁂𑀳𑀺. 𑀢𑀢𑀺𑀬𑀲𑀺𑀤𑁆𑀥𑀻𑀢𑀺 𑀢𑀢𑀺𑀬𑀲𑁆𑀲 ‘‘𑀯𑀺𑀯𑀝𑁆𑀝𑀘𑁆𑀙𑀤𑀸’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀲𑀺𑀤𑁆𑀥𑀺 𑀯𑀺𑀯𑀝𑁆𑀝𑀘𑁆𑀙𑀤𑀢𑁆𑀣𑀲𑀺𑀤𑁆𑀥𑀺 𑀢𑁂𑀳𑀺 𑀢𑀲𑁆𑀲 𑀧𑀸𑀓𑀝𑀪𑀸𑀯𑀢𑁄𑀢𑀺 𑀅𑀢𑁆𑀣𑁄. ‘‘𑀬𑀸𑀣𑀸𑀯𑀢𑁄 𑀅𑀦𑁆𑀢𑀭𑀸𑀬𑀺𑀓𑀦𑀺𑀬𑁆𑀬𑀸𑀦𑀺𑀓𑀥𑀫𑁆𑀫𑀸𑀧𑀤𑁂𑀲𑁂𑀦 𑀳𑀺 𑀲𑀢𑁆𑀣𑀼 𑀯𑀺𑀯𑀝𑁆𑀝𑀘𑁆𑀙𑀤𑀪𑀸𑀯𑁄 𑀮𑁄𑀓𑁂 𑀧𑀸𑀓𑀝𑁄 𑀅𑀳𑁄𑀲𑀻’’𑀢𑀺 (𑀤𑀻. 𑀦𑀺. 𑀝𑀻. 𑁧.𑁨𑁫𑁮) 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑀁, 𑀯𑀺𑀯𑀝𑁆𑀝𑀘𑁆𑀙𑀤𑀪𑀸𑀯𑁂𑀦𑁂𑀯 𑀅𑀦𑁆𑀢𑀭𑀸𑀬𑀺𑀓𑀦𑀺𑀬𑁆𑀬𑀸𑀦𑀺𑀓𑀥𑀫𑁆𑀫𑀤𑁂𑀲𑀦𑀸𑀲𑀺𑀤𑁆𑀥𑀺𑀢𑁄 ‘‘𑀢𑀢𑀺𑀬𑁂𑀦 𑀢𑀢𑀺𑀬𑀘𑀢𑀼𑀢𑁆𑀣𑀲𑀺𑀤𑁆𑀥𑀻’’𑀢𑀺𑀧𑀺 𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑀺.

𑀏𑀯𑀁 𑀧𑀤𑀢𑁆𑀢𑀬𑀯𑀘𑀦𑁂 𑀘𑀢𑀼𑀯𑁂𑀲𑀸𑀭𑀚𑁆𑀚𑀯𑀲𑁂𑀦 𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀘𑀓𑁆𑀔𑀼𑀢𑁆𑀢𑀬𑀯𑀲𑁂𑀦𑀧𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀼𑀭𑀺𑀫𑀜𑁆𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀘-𑀲𑀤𑁆𑀤𑁄 𑀉𑀧𑀦𑁆𑀬𑀸𑀲𑀢𑁆𑀣𑁄. 𑀧𑀼𑀭𑀺𑀫𑀁 ‘‘𑀅𑀭𑀳’’𑀦𑁆𑀢𑀺 𑀧𑀤𑀁 𑀪𑀕𑀯𑀢𑁄 𑀳𑁂𑀝𑁆𑀞𑀺𑀫𑀫𑀕𑁆𑀕𑀨𑀮𑀢𑁆𑀢𑀬𑀜𑀸𑀡𑀲𑀗𑁆𑀔𑀸𑀢𑀁 𑀥𑀫𑁆𑀫𑀘𑀓𑁆𑀔𑀼𑀁 𑀲𑀸𑀥𑁂𑀢𑀺 𑀓𑀺𑀮𑁂𑀲𑀸𑀭𑀻𑀦𑀁, 𑀲𑀁𑀲𑀸𑀭𑀘𑀓𑁆𑀓𑀲𑁆𑀲 𑀅𑀭𑀸𑀦𑀜𑁆𑀘 𑀳𑀢𑀪𑀸𑀯𑀤𑀻𑀧𑀦𑀢𑁄. 𑀤𑀼𑀢𑀺𑀬𑀁 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀧𑀤𑀁 𑀆𑀲𑀬𑀸𑀦𑀼𑀲𑀬𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀜𑀸𑀡𑀲𑀗𑁆𑀔𑀸𑀢𑀁 𑀩𑀼𑀤𑁆𑀥𑀘𑀓𑁆𑀔𑀼𑀁 𑀲𑀸𑀥𑁂𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑁂𑀯 𑀢𑀁𑀲𑀫𑁆𑀪𑀯𑀢𑁄. 𑀢𑀤𑁂𑀢𑀜𑁆𑀳𑀺 𑀜𑀸𑀡𑀤𑁆𑀯𑀬𑀁 𑀲𑀸𑀯𑀓𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀦 𑀲𑀫𑁆𑀪𑀯𑀢𑀺. 𑀢𑀢𑀺𑀬𑀁 ‘‘𑀯𑀺𑀯𑀝𑁆𑀝𑀘𑁆𑀙𑀤𑀸’’𑀢𑀺 𑀧𑀤𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑀗𑁆𑀔𑀸𑀢𑀁 𑀲𑀫𑀦𑁆𑀢𑀘𑀓𑁆𑀔𑀼𑀁 𑀲𑀸𑀥𑁂𑀢𑀺 𑀲𑀯𑀸𑀲𑀦𑀲𑀩𑁆𑀩𑀓𑀺𑀮𑁂𑀲𑀧𑁆𑀧𑀳𑀸𑀦𑀤𑀻𑀧𑀦𑀢𑁄. ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀳𑀺 𑀯𑀢𑁆𑀯𑀸 ‘‘𑀯𑀺𑀯𑀝𑁆𑀝𑀘𑁆𑀙𑀤𑀸’’𑀢𑀺 𑀯𑀘𑀦𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀪𑀸𑀯𑀸𑀬 𑀲𑀯𑀸𑀲𑀦𑀲𑀩𑁆𑀩𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀯𑀺𑀪𑀸𑀯𑁂𑀢𑀻𑀢𑀺. ‘‘𑀅𑀳𑀁 𑀔𑁄 𑀧𑀦 𑀢𑀸𑀢 𑀅𑀫𑁆𑀩𑀝𑁆𑀞 𑀫𑀦𑁆𑀢𑀸𑀦𑀁 𑀤𑀸𑀢𑀸’’𑀢𑀺 𑀇𑀤𑀁 𑀅𑀧𑁆𑀧𑀥𑀸𑀦𑀁, ‘‘𑀢𑁆𑀯𑀁 𑀫𑀦𑁆𑀢𑀸𑀦𑀁 𑀧𑀝𑀺𑀕𑁆𑀕𑀳𑁂𑀢𑀸’’𑀢𑀺 𑀇𑀤𑀫𑁂𑀯 𑀧𑀥𑀸𑀦𑀁 𑀲𑀫𑀼𑀢𑁆𑀢𑁂𑀚𑀦𑀸𑀯𑀘𑀦𑀦𑁆𑀢𑀺 𑀲𑀦𑁆𑀥𑀸𑀬 ‘‘𑀢𑁆𑀯𑀁 𑀫𑀦𑁆𑀢𑀸𑀦𑀁 𑀧𑀝𑀺𑀕𑁆𑀕𑀳𑁂𑀢𑀸𑀢𑀺 𑀇𑀫𑀺𑀦𑀸’𑀲𑁆𑀲 𑀫𑀦𑁆𑀢𑁂𑀲𑀼 𑀲𑀽𑀭𑀪𑀸𑀯𑀁 𑀚𑀦𑁂𑀢𑀻’’𑀢𑀺 𑀯𑀼𑀢𑁆𑀢𑀁, 𑀮𑀓𑁆𑀔𑀡𑀯𑀺𑀪𑀸𑀯𑀦𑁂 𑀯𑀺𑀲𑀤𑀜𑀸𑀡𑀢𑀸𑀲𑀗𑁆𑀔𑀸𑀢𑀁 𑀲𑀽𑀭𑀪𑀸𑀯𑀁 𑀚𑀦𑁂𑀢𑀻𑀢𑀺 𑀅𑀢𑁆𑀣𑁄.

𑁨𑁫𑁯. 𑀏𑀯𑀁 𑀪𑁄𑀢𑀺 𑀏𑀢𑁆𑀣 𑀏𑀯𑀁-𑀲𑀤𑁆𑀤𑁄 𑀯𑀘𑀦𑀲𑀫𑁆𑀧𑀝𑀺𑀘𑁆𑀙𑀦𑁂 𑀦𑀺𑀧𑀸𑀢𑁄, 𑀯𑀘𑀦𑀲𑀫𑁆𑀧𑀝𑀺𑀘𑁆𑀙𑀦𑀜𑁆𑀘𑁂𑀢𑁆𑀣 𑀢𑀣𑀸 𑀫𑀬𑀁 𑀢𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀯𑁂𑀤𑀺𑀲𑁆𑀲𑀸𑀫, 𑀢𑁆𑀯𑀁 𑀫𑀦𑁆𑀢𑀸𑀦𑀁 𑀧𑀝𑀺𑀕𑁆𑀕𑀳𑁂𑀢𑀸𑀢𑀺 𑀘 𑀏𑀯𑀁 𑀧𑀯𑀢𑁆𑀢𑀲𑁆𑀲 𑀧𑁄𑀓𑁆𑀔𑀭𑀲𑀸𑀢𑀺𑀦𑁄 𑀯𑀘𑀦𑀲𑁆𑀲 𑀲𑀫𑁆𑀧𑀝𑀺𑀕𑁆𑀕𑀳𑁄. ‘‘𑀢𑀲𑁆𑀲𑀢𑁆𑀣𑁄’’𑀢𑀺𑀆𑀤𑀺𑀦𑀸𑀧𑀺 𑀳𑀺 𑀢𑀤𑁂𑀯𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀢𑀣𑀸 𑀘 𑀯𑀼𑀢𑁆𑀢𑀁 ‘‘𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑁄𑀓𑁆𑀔𑀭𑀲𑀸𑀢𑀺𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸’’𑀢𑀺, 𑀢𑀁 𑀧𑀦𑁂𑀲 𑀆𑀘𑀭𑀺𑀬𑀲𑁆𑀲 𑀲𑀫𑀼𑀢𑁆𑀢𑁂𑀚𑀦𑀸𑀬 𑀮𑀓𑁆𑀔𑀡𑁂𑀲𑀼 𑀯𑀺𑀕𑀢𑀲𑀫𑁆𑀫𑁄𑀳𑀪𑀸𑀯𑁂𑀦 𑀩𑀼𑀤𑁆𑀥𑀫𑀦𑁆𑀢𑁂 𑀲𑀫𑁆𑀧𑀲𑁆𑀲𑀫𑀸𑀦𑀢𑁆𑀢𑀸 𑀯𑀤𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁄𑀧𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀢𑀸𑀬𑀸𑀢𑀺 𑀢𑀸𑀬 𑀬𑀣𑀸𑀯𑀼𑀢𑁆𑀢𑀸𑀬 𑀲𑀫𑀼𑀢𑁆𑀢𑁂𑀚𑀦𑀸𑀬𑀸’’𑀢𑀺 (𑀤𑀻. 𑀦𑀺. 𑀝𑀻. 𑁧.𑁨𑁫𑁯) 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑀁, 𑀅𑀥𑀼𑀦𑀸 𑀧𑀦 𑀧𑁄𑀢𑁆𑀣𑀓𑁂𑀲𑀼 ‘‘𑀢𑀸𑀬 𑀆𑀘𑀭𑀺𑀬𑀓𑀣𑀸𑀬𑀸’’𑀢𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺. 𑀅𑀢𑁆𑀣𑀢𑁄 𑀘𑁂𑀲 𑀅𑀯𑀺𑀭𑀼𑀤𑁆𑀥𑁄𑀬𑁂𑀯. 𑀫𑀦𑁆𑀢𑁂𑀲𑀼 𑀲𑀢𑀺𑀲𑀫𑀼𑀧𑁆𑀧𑀸𑀤𑀺𑀓𑀸 𑀳𑀺 𑀓𑀣𑀸 𑀲𑀫𑀼𑀢𑁆𑀢𑁂𑀚𑀦𑀸𑀢𑀺.

𑀅𑀬𑀸𑀦𑀪𑀽𑀫𑀺𑀦𑁆𑀢𑀺 𑀬𑀸𑀦𑀲𑁆𑀲 𑀅𑀪𑀽𑀫𑀺𑀁, 𑀬𑀸𑀦𑁂𑀦 𑀬𑀸𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀝𑁆𑀞𑀸𑀦𑀪𑀽𑀢𑀁, 𑀤𑁆𑀯𑀸𑀭𑀓𑁄𑀝𑁆𑀞𑀓𑀲𑀫𑀻𑀧𑀁 𑀕𑀦𑁆𑀢𑁆𑀯𑀸𑀢𑀺 𑀅𑀢𑁆𑀣𑁄.