𑁨. 𑀲𑀸𑀫𑀜𑁆𑀜𑀨𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑀭𑀸𑀚𑀸𑀫𑀘𑁆𑀘𑀓𑀣𑀸𑀯𑀡𑁆𑀡𑀦𑀸

𑁧𑁫𑁦. 𑀇𑀤𑀸𑀦𑀺 𑀲𑀸𑀫𑀜𑁆𑀜𑀨𑀮𑀲𑀼𑀢𑁆𑀢𑀲𑁆𑀲 𑀲𑀁𑀯𑀡𑁆𑀡𑀦𑀸𑀓𑁆𑀓𑀫𑁄 𑀅𑀦𑀼𑀧𑁆𑀧𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀁…𑀧𑁂… 𑀲𑀼𑀢𑁆𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀦𑀼𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸𑀢𑀺 𑀅𑀦𑀼𑀓𑁆𑀓𑀫𑁂𑀦 𑀧𑀤𑀯𑀡𑁆𑀡𑀦𑀸, 𑀧𑀤𑀁 𑀧𑀤𑀁 𑀧𑀢𑀺 𑀅𑀦𑀼𑀓𑁆𑀓𑀫𑁂𑀦 𑀯𑀡𑁆𑀡𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀜𑁆𑀳𑀺, 𑀉𑀢𑁆𑀢𑀸𑀦𑀁 𑀯𑀸 𑀧𑀤𑀫𑀜𑁆𑀜𑀢𑁆𑀭 𑀯𑀡𑁆𑀡𑀦𑀸𑀧𑀺 ‘‘𑀅𑀦𑀼𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸’’ 𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀅𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸’’𑀢𑀺𑀧𑀺 𑀧𑀞𑀦𑁆𑀢𑀺, 𑀧𑀼𑀩𑁆𑀩𑁂 𑀅𑀯𑀡𑁆𑀡𑀺𑀢𑀧𑀤𑀯𑀡𑁆𑀡𑀦𑀸𑀢𑀺 𑀅𑀢𑁆𑀣𑁄. 𑀤𑀼𑀕𑁆𑀕𑀚𑀦𑀧𑀤𑀝𑁆𑀞𑀸𑀦𑀯𑀺𑀲𑁂𑀲𑀲𑀫𑁆𑀧𑀤𑀸𑀤𑀺𑀬𑁄𑀕𑀢𑁄 𑀧𑀥𑀸𑀦𑀪𑀸𑀯𑁂𑀦 𑀭𑀸𑀚𑀽𑀳𑀺 𑀕𑀳𑀺𑀢𑀝𑁆𑀞𑁂𑀦 𑀏𑀯𑀁𑀦𑀸𑀫𑀓𑀁, 𑀦 𑀧𑀦 𑀦𑀸𑀫𑀫𑀢𑁆𑀢𑁂𑀦𑀸𑀢𑀺 𑀆𑀳 ‘‘𑀢𑀜𑁆𑀳𑀻’’𑀢𑀺𑀆𑀤𑀺. 𑀦𑀦𑀼 𑀫𑀳𑀸𑀯𑀕𑁆𑀕𑁂 𑀫𑀳𑀸𑀕𑁄𑀯𑀺𑀦𑁆𑀤𑀲𑀼𑀢𑁆𑀢𑁂 𑀆𑀕𑀢𑁄 𑀏𑀲 𑀧𑀼𑀭𑁄𑀳𑀺𑀢𑁄 𑀏𑀯, 𑀦 𑀭𑀸𑀚𑀸, 𑀓𑀲𑁆𑀫𑀸 𑀲𑁄 𑀭𑀸𑀚𑀲𑀤𑁆𑀤𑀯𑀘𑀦𑀻𑀬𑀪𑀸𑀯𑁂𑀦 𑀕𑀳𑀺𑀢𑁄𑀢𑀺? 𑀫𑀳𑀸𑀕𑁄𑀯𑀺𑀦𑁆𑀤𑁂𑀦 𑀧𑀼𑀭𑁄𑀳𑀺𑀢𑁂𑀦 𑀧𑀭𑀺𑀕𑁆𑀕𑀳𑀺𑀢𑀫𑁆𑀧𑀺 𑀘𑁂𑀢𑀁 𑀭𑁂𑀡𑀼𑀦𑀸 𑀦𑀸𑀫 𑀫𑀕𑀥𑀭𑀸𑀚𑁂𑀦 𑀧𑀭𑀺𑀕𑁆𑀕𑀳𑀺𑀢𑀫𑁂𑀯𑀸𑀢𑀺 𑀅𑀢𑁆𑀣𑀲𑀫𑁆𑀪𑀯𑀢𑁄 𑀏𑀯𑀁 𑀯𑀼𑀢𑁆𑀢𑀁, 𑀦 𑀧𑀦 𑀲𑁄 𑀭𑀸𑀚𑀲𑀤𑁆𑀤𑀯𑀘𑀦𑀻𑀬𑀪𑀸𑀯𑁂𑀦 𑀕𑀳𑀺𑀢𑁄 𑀢𑀲𑁆𑀲 𑀭𑀸𑀚𑀸𑀪𑀸𑀯𑀢𑁄. 𑀫𑀳𑀸𑀕𑁄𑀯𑀺𑀦𑁆𑀤𑀧𑀭𑀺𑀕𑁆𑀕𑀳𑀺𑀢𑀪𑀸𑀯𑀓𑀺𑀢𑁆𑀢𑀦𑀜𑁆𑀳𑀺 𑀢𑀤𑀸 𑀭𑁂𑀡𑀼𑀭𑀜𑁆𑀜𑀸 𑀧𑀭𑀺𑀕𑁆𑀕𑀳𑀺𑀢𑀪𑀸𑀯𑀽𑀧𑀮𑀓𑁆𑀔𑀡𑀁. 𑀲𑁄 𑀳𑀺 𑀢𑀲𑁆𑀲 𑀲𑀩𑁆𑀩𑀓𑀺𑀘𑁆𑀘𑀓𑀸𑀭𑀓𑁄 𑀧𑀼𑀭𑁄𑀳𑀺𑀢𑁄, 𑀇𑀤𑀫𑁆𑀧𑀺 𑀘 𑀮𑁄𑀓𑁂 𑀲𑀫𑀼𑀤𑀸𑀘𑀺𑀡𑁆𑀡𑀁 ‘‘𑀭𑀸𑀚𑀓𑀫𑁆𑀫𑀧𑀲𑀼𑀢𑁂𑀦 𑀓𑀢𑀫𑁆𑀧𑀺 𑀭𑀜𑁆𑀜𑀸 𑀓𑀢’’𑀦𑁆𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀫𑀦𑁆𑀥𑀸𑀢𑀼𑀭𑀜𑁆𑀜𑀸 𑀘𑁂𑀯 𑀫𑀳𑀸𑀕𑁄𑀯𑀺𑀦𑁆𑀤𑀁 𑀩𑁄𑀥𑀺𑀲𑀢𑁆𑀢𑀁 𑀧𑀼𑀭𑁄𑀳𑀺𑀢𑀫𑀸𑀡𑀸𑀧𑁂𑀢𑁆𑀯𑀸 𑀭𑁂𑀡𑀼𑀭𑀜𑁆𑀜𑀸 𑀘 𑀅𑀜𑁆𑀜𑁂𑀳𑀺 𑀘 𑀭𑀸𑀚𑀽𑀳𑀺 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 𑀭𑀸𑀚𑀕𑀳𑀦𑁆𑀢𑀺. 𑀓𑁂𑀘𑀺 𑀧𑀦 ‘‘𑀫𑀳𑀸𑀕𑁄𑀯𑀺𑀦𑁆𑀤𑁄’’𑀢𑀺 𑀫𑀳𑀸𑀦𑀼𑀪𑀸𑀯𑁄 𑀏𑀓𑁄 𑀧𑀼𑀭𑀸𑀢𑀦𑁄 𑀭𑀸𑀚𑀸𑀢𑀺 𑀯𑀤𑀦𑁆𑀢𑀺. 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸𑀢𑀺 𑀭𑀸𑀚𑀥𑀸𑀦𑀻𑀪𑀸𑀯𑁂𑀦 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸. 𑀕𑀬𑁆𑀳𑀢𑀻𑀢𑀺 𑀳𑀺 𑀕𑀳𑀁, 𑀭𑀸𑀚𑀽𑀦𑀁, 𑀭𑀸𑀚𑀽𑀳𑀺 𑀯𑀸 𑀕𑀳𑀦𑁆𑀢𑀺 𑀭𑀸𑀚𑀕𑀳𑀁. 𑀦𑀕𑀭𑀲𑀤𑁆𑀤𑀸𑀧𑁂𑀓𑁆𑀔𑀸𑀬 𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄.

𑀅𑀜𑁆𑀜𑁂𑀧𑁂𑀢𑁆𑀣 𑀧𑀓𑀸𑀭𑁂𑀢𑀺 𑀦𑀕𑀭𑀫𑀸𑀧𑀦𑁂𑀦 𑀭𑀜𑁆𑀜𑀸 𑀓𑀸𑀭𑀺𑀢𑀲𑀩𑁆𑀩𑀕𑁂𑀳𑀢𑁆𑀢𑀸 𑀭𑀸𑀚𑀕𑀳𑀁, 𑀕𑀺𑀚𑁆𑀛𑀓𑀽𑀝𑀸𑀤𑀻𑀳𑀺 𑀧𑀜𑁆𑀘𑀳𑀺 𑀧𑀩𑁆𑀩𑀢𑁂𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀧𑀩𑁆𑀩𑀢𑀭𑀸𑀚𑁂𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑀕𑁂𑀳𑀲𑀤𑀺𑀲𑀦𑁆𑀢𑀺𑀧𑀺 𑀭𑀸𑀚𑀕𑀳𑀁, 𑀲𑀫𑁆𑀧𑀦𑁆𑀦𑀪𑀯𑀦𑀢𑀸𑀬 𑀭𑀸𑀚𑀫𑀸𑀦𑀁 𑀕𑁂𑀳𑀦𑁆𑀢𑀺𑀧𑀺 𑀭𑀸𑀚𑀕𑀳𑀁, 𑀲𑀼𑀲𑀁𑀯𑀺𑀳𑀺𑀢𑀸𑀭𑀓𑁆𑀔𑀢𑀸𑀬 𑀅𑀦𑀢𑁆𑀣𑀸𑀯𑀳𑀺𑀢𑀼𑀓𑀸𑀫𑁂𑀦 𑀉𑀧𑀕𑀢𑀸𑀦𑀁 𑀧𑀝𑀺𑀭𑀸𑀚𑀽𑀦𑀁 𑀕𑀳𑀁 𑀕𑀳𑀡𑀪𑀽𑀢𑀦𑁆𑀢𑀺𑀧𑀺 𑀭𑀸𑀚𑀕𑀳𑀁, 𑀭𑀸𑀚𑀽𑀳𑀺 𑀤𑀺𑀲𑁆𑀯𑀸 𑀲𑀫𑁆𑀫𑀸 𑀧𑀢𑀺𑀝𑁆𑀞𑀸𑀧𑀺𑀢𑀢𑁆𑀢𑀸 𑀢𑁂𑀲𑀁 𑀕𑀳𑀁 𑀕𑁂𑀳𑀪𑀽𑀢𑀦𑁆𑀢𑀺𑀧𑀺 𑀭𑀸𑀚𑀕𑀳𑀁, 𑀆𑀭𑀸𑀫𑀭𑀸𑀫𑀡𑁂𑀬𑁆𑀬𑀢𑀸𑀤𑀻𑀳𑀺 𑀭𑀸𑀚𑀢𑀺, 𑀦𑀺𑀯𑀸𑀲𑀲𑀼𑀔𑀢𑀸𑀤𑀺𑀦𑀸 𑀘 𑀲𑀢𑁆𑀢𑁂𑀳𑀺 𑀫𑀫𑀢𑁆𑀢𑀯𑀲𑁂𑀦 𑀕𑀬𑁆𑀳𑀢𑀺 𑀧𑀭𑀺𑀕𑁆𑀕𑀬𑁆𑀳𑀢𑀻𑀢𑀺𑀧𑀺 𑀭𑀸𑀚𑀕𑀳𑀦𑁆𑀢𑀺 𑀏𑀤𑀺𑀲𑁂 𑀧𑀓𑀸𑀭𑁂. 𑀦𑀸𑀫𑀫𑀢𑁆𑀢𑀫𑁂𑀯 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀅𑀢𑁆𑀣𑁄. 𑀲𑁄 𑀧𑀦 𑀧𑀤𑁂𑀲𑁄 𑀯𑀺𑀲𑁂𑀲𑀝𑁆𑀞𑀸𑀦𑀪𑀸𑀯𑁂𑀦 𑀉𑀴𑀸𑀭𑀲𑀢𑁆𑀢𑀧𑀭𑀺𑀪𑁄𑀕𑁄𑀢𑀺 𑀆𑀳 ‘‘𑀢𑀁 𑀧𑀦𑁂𑀢’’𑀦𑁆𑀢𑀺𑀆𑀤𑀺. 𑀢𑀢𑁆𑀣 ‘‘𑀩𑀼𑀤𑁆𑀥𑀓𑀸𑀮𑁂, 𑀘𑀓𑁆𑀓𑀯𑀢𑁆𑀢𑀺𑀓𑀸𑀮𑁂 𑀘𑀸’’𑀢𑀺 𑀇𑀤𑀁 𑀬𑁂𑀪𑀼𑀬𑁆𑀬𑀯𑀲𑁂𑀦 𑀯𑀼𑀢𑁆𑀢𑀁 𑀅𑀜𑁆𑀜𑀤𑀸𑀧𑀺 𑀓𑀤𑀸𑀘𑀺 𑀲𑀫𑁆𑀪𑀯𑀢𑁄, ‘‘𑀦𑀕𑀭𑀁 𑀳𑁄𑀢𑀻’’𑀢𑀺 𑀘 𑀇𑀤𑀁 𑀉𑀧𑀮𑀓𑁆𑀔𑀡𑀫𑁂𑀯 𑀫𑀦𑀼𑀲𑁆𑀲𑀸𑀯𑀸𑀲𑀲𑁆𑀲𑁂𑀯 𑀅𑀲𑀫𑁆𑀪𑀯𑀢𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀲𑁂𑀲𑀓𑀸𑀮𑁂 𑀲𑀼𑀜𑁆𑀜𑀁 𑀳𑁄𑀢𑀻’’𑀢𑀺𑀆𑀤𑀺. 𑀢𑁂𑀲𑀦𑁆𑀢𑀺 𑀬𑀓𑁆𑀔𑀸𑀦𑀁. 𑀯𑀲𑀦𑀯𑀦𑀦𑁆𑀢𑀺 𑀆𑀧𑀸𑀦𑀪𑀽𑀫𑀺𑀪𑀽𑀢𑀁 𑀉𑀧𑀯𑀦𑀁.

𑀅𑀯𑀺𑀲𑁂𑀲𑁂𑀦𑀸𑀢𑀺 𑀯𑀺𑀳𑀸𑀭𑀪𑀸𑀯𑀲𑀸𑀫𑀜𑁆𑀜𑁂𑀦, 𑀲𑀤𑁆𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑀲𑀺𑀤𑁆𑀥𑀁 𑀯𑀺𑀲𑁂𑀲𑀧𑀭𑀸𑀫𑀲𑀦𑀫𑀦𑁆𑀢𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀺, (𑀅. 𑀦𑀺. 𑁫.𑁧𑁦𑁧; 𑀧𑀸𑀘𑀺. 𑁧𑁪𑁭; 𑀧𑀭𑀺. 𑁪𑁪𑁧) 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, (𑀥. 𑀲. 𑁧𑁬𑁦) 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺, (𑀤𑀻. 𑀦𑀺. 𑁩.𑁭𑁧, 𑁩𑁦𑁮; 𑀫. 𑀦𑀺. 𑁧.𑁭𑁭, 𑁪𑁫𑁯, 𑁫𑁦𑁯; 𑁨.𑁩𑁦𑁯, 𑁩𑁧𑁫; 𑁩.𑁨𑁩𑁦; 𑀯𑀺𑀪. 𑁬𑁪𑁨) 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 𑀅𑀦𑀺𑀫𑀺𑀢𑁆𑀢𑀁 𑀘𑁂𑀢𑁄𑀲𑀫𑀸𑀥𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁪𑁫𑁯) 𑀲𑀤𑁆𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑀲𑀺𑀤𑁆𑀥𑁂𑀦 𑀯𑀺𑀲𑁂𑀲𑀧𑀭𑀸𑀫𑀲𑀦𑁂𑀦 𑀬𑀣𑀸𑀓𑁆𑀓𑀫𑀁 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑀸𑀤𑀺𑀯𑀺𑀲𑁂𑀲𑀯𑀺𑀳𑀸𑀭𑀲𑀫𑀗𑁆𑀕𑀻𑀧𑀭𑀺𑀤𑀻𑀧𑀦𑀁, 𑀦 𑀏𑀯𑀫𑀺𑀤𑀁, 𑀇𑀤𑀁 𑀧𑀦 𑀢𑀣𑀸 𑀯𑀺𑀲𑁂𑀲𑀧𑀭𑀸𑀫𑀲𑀦𑀫𑀦𑁆𑀢𑀭𑁂𑀦 𑀅𑀜𑁆𑀜𑀢𑀭𑀯𑀺𑀳𑀸𑀭𑀲𑀫𑀗𑁆𑀕𑀻𑀧𑀭𑀺𑀤𑀻𑀧𑀦𑀦𑁆𑀢𑀺.

𑀲𑀢𑀺𑀧𑀺 𑀘 𑀯𑀼𑀢𑁆𑀢𑀦𑀬𑁂𑀦 𑀅𑀜𑁆𑀜𑀢𑀭𑀯𑀺𑀳𑀸𑀭𑀲𑀫𑀗𑁆𑀕𑀻𑀧𑀭𑀺𑀤𑀻𑀧𑀦𑁂 𑀇𑀥 𑀇𑀭𑀺𑀬𑀸𑀧𑀣𑀲𑀗𑁆𑀔𑀸𑀢𑀯𑀺𑀲𑁂𑀲𑀯𑀺𑀳𑀸𑀭𑀲𑀫𑀗𑁆𑀕𑀻𑀧𑀭𑀺𑀤𑀻𑀧𑀦𑀫𑁂𑀯 𑀲𑀫𑁆𑀪𑀯𑀢𑀻𑀢𑀺 𑀤𑀲𑁆𑀲𑁂𑀢𑀺 ‘‘𑀇𑀥 𑀧𑀦𑀸’’𑀢𑀺𑀆𑀤𑀺𑀦𑀸. 𑀓𑀲𑁆𑀫𑀸 𑀧𑀦 𑀲𑀤𑁆𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑀲𑀺𑀤𑁆𑀥𑀲𑁆𑀲 𑀯𑀺𑀲𑁂𑀲𑀧𑀭𑀸𑀫𑀲𑀦𑀲𑁆𑀲𑀸𑀪𑀸𑀯𑁂𑀧𑀺 𑀇𑀥 𑀯𑀺𑀲𑁂𑀲𑀯𑀺𑀳𑀸𑀭𑀲𑀫𑀗𑁆𑀕𑀻𑀧𑀭𑀺𑀤𑀻𑀧𑀦𑀁 𑀲𑀫𑁆𑀪𑀯𑀢𑀻𑀢𑀺? 𑀯𑀺𑀲𑁂𑀲𑀯𑀺𑀳𑀸𑀭𑀲𑀫𑀗𑁆𑀕𑀻𑀧𑀭𑀺𑀤𑀻𑀧𑀦𑀲𑁆𑀲 𑀲𑀤𑁆𑀤𑀦𑁆𑀢𑀭𑀲𑀗𑁆𑀔𑀸𑀢𑀯𑀺𑀲𑁂𑀲𑀯𑀘𑀦𑀲𑁆𑀲 𑀅𑀪𑀸𑀯𑀢𑁄 𑀏𑀯. 𑀯𑀺𑀲𑁂𑀲𑀯𑀘𑀦𑁂 𑀳𑀺 𑀅𑀲𑀢𑀺 𑀯𑀺𑀲𑁂𑀲𑀫𑀺𑀘𑁆𑀙𑀢𑀸 𑀯𑀺𑀲𑁂𑀲𑁄 𑀧𑀬𑁄𑀚𑀺𑀢𑀩𑁆𑀩𑁄𑀢𑀺. 𑀅𑀧𑀺𑀘 𑀇𑀭𑀺𑀬𑀸𑀧𑀣𑀲𑀫𑀸𑀬𑁄𑀕𑀧𑀭𑀺𑀤𑀻𑀧𑀦𑀲𑁆𑀲 𑀅𑀢𑁆𑀣𑀢𑁄 𑀲𑀺𑀤𑁆𑀥𑀢𑁆𑀢𑀸 𑀢𑀣𑀸𑀤𑀻𑀧𑀦𑀫𑁂𑀯 𑀲𑀫𑁆𑀪𑀯𑀢𑀻𑀢𑀺. 𑀓𑀲𑁆𑀫𑀸 𑀘𑀸𑀬𑀫𑀢𑁆𑀣𑁄 𑀲𑀺𑀤𑁆𑀥𑁄𑀢𑀺? 𑀤𑀺𑀩𑁆𑀩𑀯𑀺𑀳𑀸𑀭𑀸𑀤𑀻𑀦𑀫𑁆𑀧𑀺 𑀲𑀸𑀥𑀸𑀭𑀡𑀢𑁄. 𑀓𑀤𑀸𑀘𑀺𑀧𑀺 𑀳𑀺 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁂𑀦 𑀯𑀺𑀦𑀸 𑀦 𑀪𑀯𑀢𑀺 𑀢𑀫𑀦𑁆𑀢𑀭𑁂𑀦 𑀅𑀢𑁆𑀢𑀪𑀸𑀯𑀧𑀭𑀺𑀳𑀭𑀡𑀸𑀪𑀸𑀯𑀢𑁄𑀢𑀺.

𑀇𑀭𑀺𑀬𑀦𑀁 𑀧𑀯𑀢𑁆𑀢𑀦𑀁 𑀇𑀭𑀺𑀬𑀸, 𑀓𑀸𑀬𑀺𑀓𑀓𑀺𑀭𑀺𑀬𑀸, 𑀢𑀲𑁆𑀲𑀸 𑀧𑀯𑀢𑁆𑀢𑀦𑀼𑀧𑀸𑀬𑀪𑀸𑀯𑀢𑁄 𑀧𑀣𑁄𑀢𑀺 𑀇𑀭𑀺𑀬𑀸𑀧𑀣𑁄, 𑀞𑀸𑀦𑀦𑀺𑀲𑀚𑁆𑀚𑀸𑀤𑀬𑁄. 𑀦 𑀳𑀺 𑀞𑀸𑀦𑀦𑀺𑀲𑀚𑁆𑀚𑀸𑀤𑀺𑀅𑀯𑀢𑁆𑀣𑀸𑀳𑀺 𑀯𑀺𑀦𑀸 𑀓𑀜𑁆𑀘𑀺 𑀓𑀸𑀬𑀺𑀓𑀁 𑀓𑀺𑀭𑀺𑀬𑀁 𑀧𑀯𑀢𑁆𑀢𑁂𑀢𑀼𑀁 𑀲𑀓𑁆𑀓𑀸, 𑀢𑀲𑁆𑀫𑀸 𑀲𑁄 𑀢𑀸𑀬 𑀧𑀯𑀢𑁆𑀢𑀦𑀼𑀧𑀸𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀳𑀭𑀢𑀺 𑀧𑀯𑀢𑁆𑀢𑀢𑀺 𑀏𑀢𑁂𑀦, 𑀯𑀺𑀳𑀭𑀡𑀫𑀢𑁆𑀢𑀁 𑀯𑀸 𑀢𑀦𑁆𑀢𑀺 𑀯𑀺𑀳𑀸𑀭𑁄, 𑀲𑁄 𑀏𑀯 𑀯𑀺𑀳𑀸𑀭𑁄 𑀢𑀣𑀸, 𑀅𑀢𑁆𑀣𑀢𑁄 𑀧𑀦𑁂𑀲 𑀞𑀸𑀦𑀦𑀺𑀲𑀚𑁆𑀚𑀸𑀤𑀺𑀆𑀓𑀸𑀭𑀧𑁆𑀧𑀯𑀢𑁆𑀢𑁄 𑀘𑀢𑀼𑀲𑀦𑁆𑀢𑀢𑀺𑀭𑀽𑀧𑀧𑁆𑀧𑀩𑀦𑁆𑀥𑁄𑀯. 𑀤𑀺𑀯𑀺 𑀪𑀯𑁄 𑀤𑀺𑀩𑁆𑀩𑁄, 𑀢𑀢𑁆𑀣 𑀩𑀳𑀼𑀮𑀁 𑀧𑀯𑀢𑁆𑀢𑀺𑀬𑀸 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸𑀤𑀺𑀤𑁂𑀯𑀮𑁄𑀓𑁂 𑀪𑀯𑁄𑀢𑀺 𑀅𑀢𑁆𑀣𑁄, 𑀬𑁄 𑀯𑀸 𑀢𑀢𑁆𑀣 𑀤𑀺𑀩𑁆𑀩𑀸𑀦𑀼𑀪𑀸𑀯𑁄, 𑀢𑀤𑀢𑁆𑀣𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀤𑀺𑀩𑁆𑀩𑁄, 𑀅𑀪𑀺𑀜𑁆𑀜𑀸𑀪𑀺𑀦𑀻𑀳𑀸𑀭𑀸𑀤𑀺𑀯𑀲𑁂𑀦 𑀯𑀸 𑀫𑀳𑀸𑀕𑀢𑀺𑀓𑀢𑁆𑀢𑀸 𑀤𑀺𑀩𑁆𑀩𑁄, 𑀲𑁄𑀯 𑀯𑀺𑀳𑀸𑀭𑁄, 𑀤𑀺𑀩𑁆𑀩𑀪𑀸𑀯𑀸𑀯𑀳𑁄 𑀯𑀸 𑀯𑀺𑀳𑀸𑀭𑁄 𑀤𑀺𑀩𑁆𑀩𑀯𑀺𑀳𑀸𑀭𑁄, 𑀫𑀳𑀕𑁆𑀕𑀢𑀚𑁆𑀛𑀸𑀦𑀸𑀦𑀺. 𑀦𑁂𑀢𑁆𑀢𑀺𑀬𑀁 [𑀦𑁂𑀢𑁆𑀢𑀺. 𑁮𑁬 (𑀅𑀢𑁆𑀣𑀢𑁄 𑀲𑀫𑀸𑀦𑀁)] 𑀧𑀦 𑀘𑀢𑀲𑁆𑀲𑁄 𑀆𑀭𑀼𑀧𑁆𑀧𑀲𑀫𑀸𑀧𑀢𑁆𑀢𑀺𑀬𑁄 𑀆𑀦𑁂𑀜𑁆𑀚𑀯𑀺𑀳𑀸𑀭𑀸𑀢𑀺 𑀯𑀺𑀲𑀼𑀁 𑀯𑀼𑀢𑁆𑀢𑀁, 𑀢𑀁 𑀧𑀦 𑀫𑁂𑀢𑁆𑀢𑀸𑀚𑁆𑀛𑀸𑀦𑀸𑀤𑀻𑀦𑀁 𑀩𑁆𑀭𑀳𑁆𑀫𑀯𑀺𑀳𑀸𑀭𑀢𑀸 𑀯𑀺𑀬 𑀢𑀸𑀲𑀁 𑀪𑀸𑀯𑀦𑀸𑀯𑀺𑀲𑁂𑀲𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀲𑀼 𑀧𑀦 𑀤𑀺𑀩𑁆𑀩𑀪𑀸𑀯𑀸𑀯𑀳𑀲𑀸𑀫𑀜𑁆𑀜𑀢𑁄 𑀢𑀸𑀧𑀺 ‘‘𑀤𑀺𑀩𑁆𑀩𑀯𑀺𑀳𑀸𑀭𑀸’’ 𑀢𑁆𑀯𑁂𑀯 𑀯𑀼𑀢𑁆𑀢𑀸. 𑀩𑁆𑀭𑀳𑁆𑀫𑀸𑀦𑀁, 𑀩𑁆𑀭𑀳𑁆𑀫𑀪𑀽𑀢𑀸 𑀯𑀸 𑀳𑀺𑀢𑀽𑀧𑀲𑀁𑀳𑀸𑀭𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀲𑁂𑀝𑁆𑀞𑀪𑀽𑀢𑀸 𑀯𑀺𑀳𑀸𑀭𑀸𑀢𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑀸, 𑀫𑁂𑀢𑁆𑀢𑀸𑀚𑁆𑀛𑀸𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀸 𑀘𑀢𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸𑀬𑁄. 𑀅𑀭𑀺𑀬𑀸 𑀉𑀢𑁆𑀢𑀫𑀸, 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑁆𑀢𑀸 𑀯𑀸 𑀅𑀭𑀺𑀬𑀸𑀦𑀁 𑀯𑀺𑀳𑀸𑀭𑀸𑀢𑀺 𑀅𑀭𑀺𑀬𑀯𑀺𑀳𑀸𑀭𑀸, 𑀘𑀢𑀲𑁆𑀲𑁄𑀧𑀺 𑀨𑀮𑀲𑀫𑀸𑀧𑀢𑁆𑀢𑀺𑀬𑁄. 𑀇𑀥 𑀧𑀦 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀁, 𑀢𑀩𑁆𑀩𑀲𑁂𑀦 𑀧𑀯𑀢𑁆𑀢𑀸 𑀅𑀧𑁆𑀧𑀫𑀜𑁆𑀜𑀸𑀬𑁄, 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀅𑀕𑁆𑀕𑀨𑀮𑀲𑀫𑀸𑀧𑀢𑁆𑀢𑀺 𑀘 𑀪𑀕𑀯𑀢𑁄 𑀤𑀺𑀩𑁆𑀩𑀩𑁆𑀭𑀳𑁆𑀫𑀅𑀭𑀺𑀬𑀯𑀺𑀳𑀸𑀭𑀸.

𑀅𑀜𑁆𑀜𑀢𑀭𑀯𑀺𑀳𑀸𑀭𑀲𑀫𑀗𑁆𑀕𑀻𑀧𑀭𑀺𑀤𑀻𑀧𑀦𑀦𑁆𑀢𑀺 𑀢𑀸𑀲𑀫𑁂𑀓𑀢𑁄 𑀅𑀧𑁆𑀧𑀯𑀢𑁆𑀢𑀢𑁆𑀢𑀸 𑀏𑀓𑁂𑀦 𑀯𑀸 𑀤𑁆𑀯𑀻𑀳𑀺 𑀯𑀸 𑀲𑀫𑀗𑁆𑀕𑀻𑀪𑀸𑀯𑀧𑀭𑀺𑀤𑀻𑀧𑀦𑀁, 𑀪𑀸𑀯𑀮𑁄𑀧𑁂𑀦𑀸𑀬𑀁 𑀪𑀸𑀯𑀧𑁆𑀧𑀥𑀸𑀦𑁂𑀦 𑀯𑀸 𑀦𑀺𑀤𑁆𑀤𑁂𑀲𑁄. 𑀪𑀕𑀯𑀸 𑀳𑀺 𑀮𑁄𑀪𑀤𑁄𑀲𑀫𑁄𑀳𑀼𑀲𑁆𑀲𑀦𑁆𑀦𑁂 𑀮𑁄𑀓𑁂 𑀲𑀓𑀧𑀝𑀺𑀧𑀢𑁆𑀢𑀺𑀬𑀸 𑀯𑁂𑀦𑁂𑀬𑁆𑀬𑀸𑀦𑀁 𑀯𑀺𑀦𑀬𑀦𑀢𑁆𑀣𑀁 𑀢𑀁 𑀢𑀁 𑀯𑀺𑀳𑀸𑀭𑁂 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀢𑀣𑀸 𑀳𑀺 𑀬𑀤𑀸 𑀲𑀢𑁆𑀢𑀸 𑀓𑀸𑀫𑁂𑀲𑀼 𑀯𑀺𑀧𑁆𑀧𑀝𑀺𑀧𑀚𑁆𑀚𑀦𑁆𑀢𑀺, 𑀢𑀤𑀸 𑀓𑀺𑀭 𑀪𑀕𑀯𑀸 𑀤𑀺𑀩𑁆𑀩𑁂𑀦 𑀯𑀺𑀳𑀸𑀭𑁂𑀦 𑀯𑀺𑀳𑀭𑀢𑀺 𑀢𑁂𑀲𑀁 𑀅𑀮𑁄𑀪𑀓𑀼𑀲𑀮𑀫𑀽𑀮𑀼𑀧𑁆𑀧𑀸𑀤𑀦𑀢𑁆𑀣𑀁 ‘‘𑀅𑀧𑁆𑀧𑁂𑀯 𑀦𑀸𑀫 𑀇𑀫𑀁 𑀧𑀝𑀺𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀏𑀢𑁆𑀣 𑀭𑀼𑀘𑀺𑀫𑀼𑀧𑁆𑀧𑀸𑀤𑁂𑀢𑁆𑀯𑀸 𑀓𑀸𑀫𑁂𑀲𑀼 𑀯𑀺𑀭𑀚𑁆𑀚𑁂𑀬𑁆𑀬𑀼’’𑀦𑁆𑀢𑀺. 𑀬𑀤𑀸 𑀧𑀦 𑀇𑀲𑁆𑀲𑀭𑀺𑀬𑀢𑁆𑀣𑀁 𑀲𑀢𑁆𑀢𑁂𑀲𑀼 𑀯𑀺𑀧𑁆𑀧𑀝𑀺𑀧𑀚𑁆𑀚𑀦𑁆𑀢𑀺, 𑀢𑀤𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑁂𑀦 𑀯𑀺𑀳𑀭𑀢𑀺 𑀢𑁂𑀲𑀁 𑀅𑀤𑁄𑀲𑀓𑀼𑀲𑀮𑀫𑀽𑀮𑀼𑀧𑁆𑀧𑀸𑀤𑀦𑀢𑁆𑀣𑀁 ‘‘𑀅𑀧𑁆𑀧𑁂𑀯 𑀦𑀸𑀫 𑀇𑀫𑀁 𑀧𑀝𑀺𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀏𑀢𑁆𑀣 𑀭𑀼𑀘𑀺𑀫𑀼𑀧𑁆𑀧𑀸𑀤𑁂𑀢𑁆𑀯𑀸 𑀅𑀤𑁄𑀲𑁂𑀦 𑀤𑁄𑀲𑀁 𑀯𑀽𑀧𑀲𑀫𑁂𑀬𑁆𑀬𑀼’’𑀦𑁆𑀢𑀺. 𑀬𑀤𑀸 𑀧𑀦 𑀧𑀩𑁆𑀩𑀚𑀺𑀢𑀸 𑀥𑀫𑁆𑀫𑀸𑀥𑀺𑀓𑀭𑀡𑀁 𑀯𑀺𑀯𑀤𑀦𑁆𑀢𑀺, 𑀢𑀤𑀸 𑀅𑀭𑀺𑀬𑀯𑀺𑀳𑀸𑀭𑁂𑀦 𑀯𑀺𑀳𑀭𑀢𑀺 𑀢𑁂𑀲𑀁 𑀅𑀫𑁄𑀳𑀓𑀼𑀲𑀮𑀫𑀽𑀮𑀼𑀧𑁆𑀧𑀸𑀤𑀦𑀢𑁆𑀣𑀁 ‘‘𑀅𑀧𑁆𑀧𑁂𑀯 𑀦𑀸𑀫 𑀇𑀫𑀁 𑀧𑀝𑀺𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀏𑀢𑁆𑀣 𑀭𑀼𑀘𑀺𑀫𑀼𑀧𑁆𑀧𑀸𑀤𑁂𑀢𑁆𑀯𑀸 𑀅𑀫𑁄𑀳𑁂𑀦 𑀫𑁄𑀳𑀁 𑀯𑀽𑀧𑀲𑀫𑁂𑀬𑁆𑀬𑀼’’𑀦𑁆𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀇𑀫𑁂𑀳𑀺 𑀤𑀺𑀩𑁆𑀩𑀩𑁆𑀭𑀳𑁆𑀫𑀅𑀭𑀺𑀬𑀯𑀺𑀳𑀸𑀭𑁂𑀳𑀺 𑀲𑀢𑁆𑀢𑀸𑀦𑀁 𑀯𑀺𑀯𑀺𑀥𑀁 𑀳𑀺𑀢𑀲𑀼𑀔𑀁 𑀳𑀭𑀢𑀺, 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁂𑀦 𑀘 𑀏𑀓𑀁 𑀇𑀭𑀺𑀬𑀸𑀧𑀣𑀩𑀸𑀥𑀦𑀁 𑀅𑀜𑁆𑀜𑁂𑀦 𑀇𑀭𑀺𑀬𑀸𑀧𑀣𑁂𑀦 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀧𑀭𑀺𑀧𑀢𑀦𑁆𑀢𑀁 𑀅𑀢𑁆𑀢𑀪𑀸𑀯𑀁 𑀳𑀭𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀜𑁆𑀜𑀢𑀭𑀯𑀺𑀳𑀸𑀭𑀲𑀫𑀗𑁆𑀕𑀻𑀧𑀭𑀺𑀤𑀻𑀧𑀦’’𑀦𑁆𑀢𑀺.

‘‘𑀢𑁂𑀦𑀸’’𑀢𑀺𑀆𑀤𑀺 𑀬𑀣𑀸𑀯𑀼𑀢𑁆𑀢𑀲𑀁𑀯𑀡𑁆𑀡𑀦𑀸𑀬 𑀕𑀼𑀡𑀤𑀲𑁆𑀲𑀦𑀁, 𑀢𑀲𑁆𑀫𑀸𑀢𑀺 𑀅𑀢𑁆𑀣𑁄, 𑀬𑀣𑀸𑀯𑀼𑀢𑁆𑀢𑀢𑁆𑀣𑀲𑀫𑀢𑁆𑀣𑀦𑀁 𑀯𑀸. 𑀢𑁂𑀦 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁂𑀦 𑀯𑀺𑀳𑀭𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀣𑀸 𑀯𑀤𑀫𑀸𑀦𑁄 𑀧𑀦 𑀯𑀺𑀳𑀭𑀢𑀻𑀢𑀺 𑀏𑀢𑁆𑀣 𑀯𑀺-𑀲𑀤𑁆𑀤𑁄 𑀯𑀺𑀘𑁆𑀙𑁂𑀤𑀦𑀢𑁆𑀣𑀚𑁄𑀢𑀓𑁄, ‘‘𑀳𑀭𑀢𑀻’’𑀢𑀺 𑀏𑀢𑀲𑁆𑀲 𑀘 𑀦𑁂𑀢𑀺 𑀧𑀯𑀢𑁆𑀢𑁂𑀢𑀻𑀢𑀺 𑀅𑀢𑁆𑀣𑁄𑀢𑀺 𑀜𑀸𑀧𑁂𑀢𑀺 ‘‘𑀞𑀺𑀢𑁄𑀧𑀻’’𑀢𑀺𑀆𑀤𑀺𑀦𑀸 𑀯𑀺𑀘𑁆𑀙𑁂𑀤𑀦𑀬𑀦𑀸𑀓𑀸𑀭𑁂𑀦 𑀯𑀼𑀢𑁆𑀢𑀢𑁆𑀢𑀸. 𑀏𑀯𑀜𑁆𑀳𑀺 𑀲𑀢𑀺 𑀢𑀢𑁆𑀣 𑀓𑀲𑁆𑀲 𑀓𑁂𑀦 𑀯𑀺𑀘𑁆𑀙𑀺𑀦𑁆𑀤𑀦𑀁, 𑀓𑀣𑀁 𑀓𑀲𑁆𑀲 𑀦𑀬𑀦𑀦𑁆𑀢𑀺 𑀅𑀦𑁆𑀢𑁄𑀮𑀻𑀦𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳. ‘‘𑀲𑁄 𑀳𑀻’’𑀢𑀺𑀆𑀤𑀻𑀢𑀺 𑀅𑀬𑀫𑁆𑀧𑀺 𑀲𑀫𑁆𑀩𑀦𑁆𑀥𑁄 𑀉𑀧𑀧𑀦𑁆𑀦𑁄 𑀳𑁄𑀢𑀺. 𑀬𑀤𑀺𑀧𑀺 𑀪𑀕𑀯𑀸 𑀏𑀓𑁂𑀦𑁂𑀯 𑀇𑀭𑀺𑀬𑀸𑀧𑀣𑁂𑀦 𑀘𑀺𑀭𑀢𑀭𑀁 𑀓𑀸𑀮𑀁 𑀧𑀯𑀢𑁆𑀢𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀣𑀸𑀧𑀺 𑀉𑀧𑀸𑀤𑀺𑀦𑁆𑀦𑀓𑀲𑁆𑀲 𑀦𑀸𑀫 𑀲𑀭𑀻𑀭𑀲𑁆𑀲 𑀅𑀬𑀁 𑀲𑀪𑀸𑀯𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀏𑀓𑀁 𑀇𑀭𑀺𑀬𑀸𑀧𑀣𑀩𑀸𑀥𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀧𑀭𑀺𑀧𑀢𑀦𑁆𑀢𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄, 𑀅𑀧𑀢𑀫𑀸𑀦𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀧𑀦 𑀪𑀕𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀲𑀦𑁆𑀢𑁄 𑀯𑁂𑀦𑁂𑀬𑁆𑀬𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄, 𑀦𑀸𑀦𑀸𑀲𑀫𑀸𑀧𑀢𑁆𑀢𑀻𑀳𑀺 𑀘 𑀓𑀸𑀮𑀁 𑀯𑀻𑀢𑀺𑀦𑀸𑀫𑁂𑀦𑁆𑀢𑁄 𑀯𑀲𑀢𑀺, 𑀲𑀢𑁆𑀢𑀸𑀦𑀁, 𑀅𑀢𑁆𑀢𑀦𑁄 𑀘 𑀯𑀺𑀯𑀺𑀥𑀁 𑀲𑀼𑀔𑀁 𑀳𑀭𑀢𑀺, 𑀢𑀲𑁆𑀫𑀸 𑀯𑀺𑀯𑀺𑀥𑀁 𑀳𑀭𑀢𑀻𑀢𑀺 𑀯𑀺𑀳𑀭𑀢𑀻𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀕𑁄𑀘𑀭𑀕𑀸𑀫𑀦𑀺𑀤𑀲𑁆𑀲𑀦𑀢𑁆𑀣𑀁 ‘‘𑀭𑀸𑀚𑀕𑀳𑁂’’𑀢𑀺 𑀯𑀢𑁆𑀯𑀸 𑀩𑀼𑀤𑁆𑀥𑀸𑀦𑀫𑀦𑀼𑀭𑀽𑀧𑀦𑀺𑀯𑀸𑀲𑀝𑁆𑀞𑀸𑀦𑀤𑀲𑁆𑀲𑀦𑀢𑁆𑀣𑀁 𑀧𑀼𑀦 ‘‘𑀅𑀫𑁆𑀩𑀯𑀦𑁂’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀤𑀫𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀅𑀲𑁆𑀲𑀸𑀢𑀺 𑀪𑀕𑀯𑀢𑁄. 𑀢𑀲𑁆𑀲𑀸𑀢𑀺 𑀭𑀸𑀚𑀕𑀳𑀲𑀗𑁆𑀔𑀸𑀢𑀲𑁆𑀲 𑀕𑁄𑀘𑀭𑀕𑀸𑀫𑀲𑁆𑀲. 𑀬𑀲𑁆𑀲 𑀲𑀫𑀻𑀧𑀯𑀲𑁂𑀦 ‘‘𑀭𑀸𑀚𑀕𑀳𑁂’’𑀢𑀺 𑀪𑀼𑀫𑁆𑀫𑀯𑀘𑀦𑀁 𑀧𑀯𑀢𑁆𑀢𑀢𑀺, 𑀲𑁄𑀧𑀺 𑀢𑀲𑁆𑀲 𑀲𑀫𑀻𑀧𑀯𑀲𑁂𑀦 𑀯𑀢𑁆𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺 ‘‘𑀭𑀸𑀚𑀕𑀳𑀲𑀫𑀻𑀧𑁂 𑀅𑀫𑁆𑀩𑀯𑀦𑁂’’𑀢𑀺 𑀇𑀫𑀺𑀦𑀸. 𑀲𑀫𑀻𑀧𑀢𑁆𑀣𑁂𑀢𑀺 𑀅𑀫𑁆𑀩𑀯𑀦𑀲𑁆𑀲 𑀲𑀫𑀻𑀧𑀢𑁆𑀣𑁂. 𑀏𑀢𑀦𑁆𑀢𑀺 ‘‘𑀭𑀸𑀚𑀕𑀳𑁂’’𑀢𑀺 𑀯𑀘𑀦𑀁. 𑀪𑀼𑀫𑁆𑀫𑀯𑀘𑀦𑀦𑁆𑀢𑀺 𑀆𑀥𑀸𑀭𑀯𑀘𑀦𑀁. 𑀪𑀯𑀦𑁆𑀢𑀺 𑀏𑀢𑁆𑀣𑀸𑀢𑀺 𑀳𑀺 𑀪𑀼𑀫𑁆𑀫𑀁, 𑀆𑀥𑀸𑀭𑁄, 𑀢𑀤𑁂𑀯 𑀯𑀘𑀦𑀁 𑀢𑀣𑀸, 𑀪𑀼𑀫𑁆𑀫𑁂 𑀧𑀯𑀢𑁆𑀢𑀁 𑀯𑀸 𑀯𑀘𑀦𑀁 𑀯𑀺𑀪𑀢𑁆𑀢𑀺 𑀪𑀼𑀫𑁆𑀫𑀯𑀘𑀦𑀁, 𑀢𑁂𑀦 𑀬𑀼𑀢𑁆𑀢𑀁 𑀢𑀣𑀸, 𑀲𑀢𑁆𑀢𑀫𑀻𑀯𑀺𑀪𑀢𑁆𑀢𑀺𑀬𑀼𑀢𑁆𑀢𑀧𑀤𑀦𑁆𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀓𑀸𑀫𑀁 𑀪𑀕𑀯𑀸 𑀅𑀫𑁆𑀩𑀯𑀦𑁂𑀬𑁂𑀯 𑀯𑀺𑀳𑀭𑀢𑀺. 𑀢𑀲𑁆𑀲𑀫𑀻𑀧𑀢𑁆𑀢𑀸 𑀧𑀦 𑀕𑁄𑀘𑀭𑀕𑀸𑀫𑀤𑀲𑁆𑀲𑀦𑀢𑁆𑀣𑀁 𑀪𑀼𑀫𑁆𑀫𑀯𑀘𑀦𑀯𑀲𑁂𑀦 ‘‘𑀭𑀸𑀚𑀕𑀳𑁂’’𑀢𑀺𑀧𑀺 𑀯𑀼𑀢𑁆𑀢𑀁 𑀬𑀣𑀸 𑀢𑀁 ‘‘𑀕𑀗𑁆𑀕𑀸𑀬𑀁 𑀕𑀸𑀯𑁄 𑀘𑀭𑀦𑁆𑀢𑀺, 𑀓𑀽𑀧𑁂 𑀕𑀕𑁆𑀕𑀓𑀼𑀮’’𑀦𑁆𑀢𑀺 𑀘𑀸𑀢𑀺. 𑀅𑀦𑁂𑀦𑁂𑀯 𑀬𑀤𑀺 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺, 𑀅𑀣 𑀦 𑀯𑀢𑁆𑀢𑀩𑁆𑀩𑀁 ‘‘𑀅𑀫𑁆𑀩𑀯𑀦𑁂’’𑀢𑀺. 𑀬𑀤𑀺 𑀘 𑀅𑀫𑁆𑀩𑀯𑀦𑁂, 𑀏𑀯𑀫𑁆𑀧𑀺 𑀦 𑀯𑀢𑁆𑀢𑀩𑁆𑀩𑀁 ‘‘𑀭𑀸𑀚𑀕𑀳𑁂’’𑀢𑀺. 𑀦 𑀳𑀺 ‘‘𑀧𑀸𑀝𑀮𑀺𑀧𑀼𑀢𑁆𑀢𑁂 𑀧𑀸𑀲𑀸𑀤𑁂 𑀯𑀲𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀇𑀥 𑀅𑀥𑀺𑀓𑀭𑀡𑀸𑀥𑀺𑀓𑀭𑀡𑀲𑁆𑀲 𑀅𑀪𑀸𑀯𑀢𑁄 𑀅𑀥𑀺𑀓𑀭𑀡𑀲𑁆𑀲 𑀤𑁆𑀯𑀬𑀦𑀺𑀤𑁆𑀤𑁂𑀲𑁄 𑀬𑀼𑀢𑁆𑀢𑁄 𑀲𑀺𑀬𑀸𑀢𑀺 𑀘𑁄𑀤𑀦𑀸 𑀅𑀦𑀯𑀓𑀸𑀲𑀸 𑀓𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀼𑀫𑀸𑀭𑀪𑀢𑁄 𑀏𑀯 𑀓𑁄𑀫𑀸𑀭𑀪𑀘𑁆𑀘𑁄 𑀲𑀓𑀢𑁆𑀣𑀯𑀼𑀢𑁆𑀢𑀺𑀧𑀘𑁆𑀘𑀬𑁂𑀦, 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀯𑀸 𑀬𑀣𑀸 ‘‘𑀪𑀺𑀲𑀕𑁆𑀕𑀫𑁂𑀯 𑀪𑁂𑀲𑀚𑁆𑀚’’𑀦𑁆𑀢𑀺. ‘‘𑀬𑀣𑀸𑀳𑀸’’𑀢𑀺𑀆𑀤𑀺𑀦𑀸 𑀔𑀦𑁆𑀥𑀓𑀧𑀸𑀴𑀺𑀯𑀲𑁂𑀦 𑀢𑀤𑀢𑁆𑀣𑀁 𑀲𑀸𑀥𑁂𑀢𑀺. 𑀓𑀲𑁆𑀫𑀸 𑀘 𑀅𑀫𑁆𑀩𑀯𑀦𑀁 𑀚𑀻𑀯𑀓𑀲𑀫𑁆𑀩𑀦𑁆𑀥𑀁 𑀓𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀅𑀦𑀼𑀬𑁄𑀕𑁂𑀦 𑀫𑀽𑀮𑀢𑁄 𑀧𑀝𑁆𑀞𑀸𑀬 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀬𑀁 𑀧𑀦𑀸’’𑀢𑀺𑀆𑀤𑀺𑀫𑀸𑀳.

𑀤𑁄𑀲𑀸𑀪𑀺𑀲𑀦𑁆𑀦𑀦𑁆𑀢𑀺 𑀯𑀸𑀢𑀧𑀺𑀢𑁆𑀢𑀸𑀤𑀺𑀯𑀲𑁂𑀦 𑀉𑀲𑁆𑀲𑀦𑁆𑀦𑀤𑁄𑀲𑀁. 𑀯𑀺𑀭𑁂𑀘𑁂𑀢𑁆𑀯𑀸𑀢𑀺 𑀤𑁄𑀲𑀧𑁆𑀧𑀓𑁄𑀧𑀢𑁄 𑀯𑀺𑀯𑁂𑀘𑁂𑀢𑁆𑀯𑀸. 𑀲𑀺𑀯𑁂𑀬𑁆𑀬𑀓𑀁 𑀤𑀼𑀲𑁆𑀲𑀬𑀼𑀕𑀦𑁆𑀢𑀺 𑀲𑀺𑀯𑀺𑀭𑀝𑁆𑀞𑁂 𑀚𑀸𑀢𑀁 𑀫𑀳𑀕𑁆𑀖𑀁 𑀤𑀼𑀲𑁆𑀲𑀬𑀼𑀕𑀁. 𑀤𑀺𑀯𑀲𑀲𑁆𑀲 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀦𑁆𑀢𑀺 𑀏𑀓𑀲𑁆𑀲𑁂𑀯 𑀤𑀺𑀯𑀲𑀲𑁆𑀲 𑀤𑁆𑀯𑀺𑀯𑀸𑀭𑁂 𑀯𑀸 𑀢𑀺𑀯𑀸𑀭𑁂 𑀯𑀸 𑀪𑀸𑀕𑁂, 𑀪𑀼𑀫𑁆𑀫𑀢𑁆𑀣𑁂 𑀯𑀸 𑀏𑀢𑀁 𑀲𑀸𑀫𑀺𑀯𑀘𑀦𑀁, 𑀏𑀓𑀲𑁆𑀫𑀺𑀁𑀬𑁂𑀯 𑀤𑀺𑀯𑀲𑁂 𑀤𑁆𑀯𑀺𑀯𑀸𑀭𑀁 𑀯𑀸 𑀢𑀺𑀯𑀸𑀭𑀁 𑀯𑀸𑀢𑀺 𑀅𑀢𑁆𑀣𑁄. 𑀢𑀫𑁆𑀩𑀧𑀝𑁆𑀝𑀯𑀡𑁆𑀡𑁂𑀦𑀸𑀢𑀺 𑀢𑀫𑁆𑀩𑀮𑁄𑀳𑀧𑀝𑁆𑀝𑀯𑀡𑁆𑀡𑁂𑀦. 𑀲𑀘𑀻𑀯𑀭𑀪𑀢𑁆𑀢𑁂𑀦𑀸𑀢𑀺 𑀘𑀻𑀯𑀭𑁂𑀦, 𑀪𑀢𑁆𑀢𑁂𑀦 𑀘. ‘‘𑀢𑀁 𑀲𑀦𑁆𑀥𑀸𑀬𑀸’’𑀢𑀺 𑀇𑀫𑀺𑀦𑀸 𑀦 𑀪𑀕𑀯𑀸 𑀅𑀫𑁆𑀩𑀯𑀦𑀫𑀢𑁆𑀢𑁂𑀬𑁂𑀯 𑀯𑀺𑀳𑀭𑀢𑀺, 𑀅𑀣 𑀔𑁄 𑀏𑀯𑀁 𑀓𑀢𑁂 𑀯𑀺𑀳𑀸𑀭𑁂. 𑀲𑁄 𑀧𑀦 𑀢𑀤𑀥𑀺𑀓𑀭𑀡𑀢𑀸𑀬 𑀯𑀺𑀲𑀼𑀁 𑀅𑀥𑀺𑀓𑀭𑀡𑀪𑀸𑀯𑁂𑀦 𑀦 𑀯𑀼𑀢𑁆𑀢𑁄𑀢𑀺 𑀲𑀦𑁆𑀥𑀸𑀬𑀪𑀸𑀲𑀺𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀲𑀸𑀫𑀜𑁆𑀜𑁂 𑀳𑀺 𑀲𑀢𑀺 𑀲𑀦𑁆𑀥𑀸𑀬𑀪𑀸𑀲𑀺𑀢𑀦𑀺𑀤𑁆𑀥𑀸𑀭𑀡𑀁.

𑀅𑀟𑁆𑀠𑁂𑀦 𑀢𑁂𑀴𑀲 𑀅𑀟𑁆𑀠𑀢𑁂𑀴𑀲. 𑀢𑀸𑀤𑀺𑀲𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺. 𑀅𑀟𑁆𑀠𑁄 𑀧𑀦𑁂𑀢𑁆𑀣 𑀲𑀢𑀲𑁆𑀲𑁂𑀯. 𑀬𑁂𑀦 𑀳𑀺 𑀧𑀬𑀼𑀢𑁆𑀢𑁄 𑀢𑀩𑁆𑀪𑀸𑀕𑀯𑀸𑀘𑀓𑁄 𑀅𑀟𑁆𑀠𑀲𑀤𑁆𑀤𑁄, 𑀲𑁄 𑀘 𑀔𑁄 𑀧𑀡𑁆𑀡𑀸𑀲𑀸𑀯, 𑀢𑀲𑁆𑀫𑀸 𑀧𑀜𑁆𑀜𑀸𑀲𑀸𑀬 𑀊𑀦𑀸𑀦𑀺 𑀢𑁂𑀴𑀲 𑀪𑀺𑀓𑁆𑀔𑀼𑀲𑀢𑀸𑀦𑀻𑀢𑀺 𑀅𑀢𑁆𑀣𑀁 𑀯𑀺𑀜𑁆𑀜𑀸𑀧𑁂𑀢𑀼𑀁 ‘‘𑀅𑀟𑁆𑀠𑀲𑀢𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀟𑁆𑀠𑀫𑁂𑀯 𑀲𑀢𑀁 𑀲𑀢𑀲𑁆𑀲 𑀯𑀸 𑀅𑀟𑁆𑀠𑀁 𑀢𑀣𑀸.

𑀭𑀸𑀚𑀢𑀻𑀢𑀺 𑀅𑀢𑁆𑀢𑀦𑁄 𑀇𑀲𑁆𑀲𑀭𑀺𑀬𑀲𑀫𑁆𑀧𑀢𑁆𑀢𑀺𑀬𑀸 𑀤𑀺𑀩𑁆𑀩𑀢𑀺 𑀲𑁄𑀪𑀢𑀺 𑀘. 𑀭𑀜𑁆𑀚𑁂𑀢𑀻𑀢𑀺 𑀤𑀸𑀦𑀸𑀤𑀺𑀦𑀸, 𑀲𑀲𑁆𑀲𑀫𑁂𑀥𑀸𑀤𑀺𑀦𑀸 𑀘 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀭𑀫𑁂𑀢𑀺, 𑀅𑀢𑁆𑀢𑀦𑀺 𑀯𑀸 𑀭𑀸𑀕𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀘-𑀲𑀤𑁆𑀤𑁄 𑀘𑁂𑀢𑁆𑀣 𑀯𑀺𑀓𑀧𑁆𑀧𑀦𑀢𑁆𑀣𑁄. 𑀚𑀦𑀧𑀤𑀯𑀸𑀘𑀺𑀦𑁄 𑀧𑀼𑀣𑀼𑀯𑀘𑀦𑀧𑀭𑀢𑁆𑀢𑀸 ‘‘𑀫𑀕𑀥𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀚𑀦𑀧𑁆𑀧𑀤𑀸𑀧𑀤𑁂𑀲𑁂𑀦 𑀯𑀸 𑀢𑀩𑁆𑀩𑀸𑀲𑀺𑀓𑀸𑀦𑀁 𑀕𑀳𑀺𑀢𑀢𑁆𑀢𑀸. 𑀭𑀜𑁆𑀜𑁄𑀢𑀺 𑀧𑀺𑀢𑀼 𑀩𑀺𑀫𑁆𑀩𑀺𑀲𑀸𑀭𑀭𑀜𑁆𑀜𑁄. 𑀲𑀲𑀢𑀺 𑀳𑀺𑀁𑀲𑀢𑀻𑀢𑀺 𑀲𑀢𑁆𑀢𑀼, 𑀯𑁂𑀭𑀻, 𑀅𑀚𑀸𑀢𑁄𑀬𑁂𑀯 𑀲𑀢𑁆𑀢𑀼 𑀅𑀚𑀸𑀢𑀲𑀢𑁆𑀢𑀼. ‘‘𑀦𑁂𑀫𑀺𑀢𑁆𑀢𑀓𑁂𑀳𑀺 𑀦𑀺𑀤𑁆𑀤𑀺𑀝𑁆𑀞𑁄’’𑀢𑀺 𑀯𑀘𑀦𑁂𑀦 𑀘 𑀅𑀚𑀸𑀢𑀲𑁆𑀲 𑀢𑀲𑁆𑀲 𑀲𑀢𑁆𑀢𑀼𑀪𑀸𑀯𑁄 𑀦 𑀢𑀸𑀯 𑀳𑁄𑀢𑀺, 𑀲𑀢𑁆𑀢𑀼𑀪𑀸𑀯𑀲𑁆𑀲 𑀧𑀦 𑀢𑀣𑀸 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀏𑀯𑀁 𑀯𑁄𑀳𑀭𑀻𑀬𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀚𑀸𑀢𑀲𑁆𑀲𑁂𑀯 𑀧𑀦 𑀢𑀲𑁆𑀲 ‘‘𑀭𑀜𑁆𑀜𑁄 𑀮𑁄𑀳𑀺𑀢𑀁 𑀧𑀺𑀯𑁂𑀬𑁆𑀬’’𑀦𑁆𑀢𑀺 𑀤𑁂𑀯𑀺𑀬𑀸 𑀤𑁄𑀳𑀴𑀲𑁆𑀲 𑀧𑀯𑀢𑁆𑀢𑀢𑁆𑀢𑀸 𑀅𑀚𑀸𑀢𑁄𑀬𑁂𑀯𑁂𑀲 𑀭𑀜𑁆𑀜𑁄 𑀲𑀢𑁆𑀢𑀽𑀢𑀺𑀧𑀺 𑀯𑀤𑀦𑁆𑀢𑀺.

‘‘𑀢𑀲𑁆𑀫𑀺’’𑀦𑁆𑀢𑀺𑀆𑀤𑀺𑀦𑀸 𑀢𑀤𑀢𑁆𑀣𑀁 𑀯𑀺𑀯𑀭𑀢𑀺, 𑀲𑀫𑀢𑁆𑀣𑁂𑀢𑀺 𑀘. 𑀤𑁄𑀳𑀴𑁄𑀢𑀺 𑀅𑀪𑀺𑀮𑀸𑀲𑁄. 𑀪𑀸𑀭𑀺𑀬𑁂𑀢𑀺 𑀕𑀭𑀼𑀓𑁂, 𑀅𑀜𑁆𑀜𑁂𑀲𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁂 𑀯𑀸. 𑀅𑀲𑀓𑁆𑀓𑁄𑀦𑁆𑀢𑀻𑀢𑀺 𑀅𑀲𑀓𑁆𑀓𑀼𑀡𑀫𑀸𑀦𑀸. 𑀅𑀓𑀣𑁂𑀦𑁆𑀢𑀻𑀢𑀺 𑀅𑀓𑀣𑀬𑀫𑀸𑀦𑀸 𑀲𑀫𑀸𑀦𑀸. 𑀦𑀺𑀩𑀦𑁆𑀥𑀺𑀢𑁆𑀯𑀸𑀢𑀺 𑀯𑀘𑀲𑀸 𑀩𑀦𑁆𑀥𑀺𑀢𑁆𑀯𑀸. 𑀲𑀼𑀯𑀡𑁆𑀡𑀲𑀢𑁆𑀣𑀓𑁂𑀦𑀸𑀢𑀺 𑀲𑀼𑀯𑀡𑁆𑀡𑀫𑀬𑁂𑀦 𑀲𑀢𑁆𑀣𑀓𑁂𑀦, 𑀖𑀦𑀲𑀼𑀯𑀡𑁆𑀡𑀓𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀬𑁄𑀫𑀬𑀜𑁆𑀳𑀺 𑀭𑀜𑁆𑀜𑁄 𑀲𑀭𑀻𑀭𑀁 𑀉𑀧𑀦𑁂𑀢𑀼𑀁 𑀅𑀬𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀲𑀼𑀯𑀡𑁆𑀡𑀧𑀭𑀺𑀓𑁆𑀔𑀢𑁂𑀦 𑀯𑀸 𑀅𑀬𑁄𑀫𑀬𑀲𑀢𑁆𑀣𑁂𑀦𑀸𑀢𑀺 𑀅𑀢𑁆𑀣𑁂𑀧𑀺 𑀅𑀬𑀫𑁂𑀯𑀸𑀥𑀺𑀧𑁆𑀧𑀸𑀬𑁄. 𑀩𑀸𑀳𑀼𑀁 𑀨𑀸𑀮𑀸𑀧𑁂𑀢𑁆𑀯𑀸𑀢𑀺 𑀮𑁄𑀳𑀺𑀢𑀲𑀺𑀭𑀸𑀯𑁂𑀥𑀯𑀲𑁂𑀦 𑀩𑀸𑀳𑀼𑀁 𑀨𑀸𑀮𑀸𑀧𑁂𑀢𑁆𑀯𑀸. 𑀓𑁂𑀯𑀮𑀲𑁆𑀲 𑀮𑁄𑀳𑀺𑀢𑀲𑁆𑀲 𑀕𑀩𑁆𑀪𑀺𑀦𑀺𑀬𑀸 𑀤𑀼𑀚𑁆𑀚𑀻𑀭𑀪𑀸𑀯𑀢𑁄 𑀉𑀤𑀓𑁂𑀦 𑀲𑀫𑁆𑀪𑀺𑀦𑁆𑀤𑀺𑀢𑁆𑀯𑀸 𑀧𑀸𑀬𑁂𑀲𑀺. 𑀳𑀜𑁆𑀜𑀺𑀲𑁆𑀲𑀢𑀻𑀢𑀺 𑀳𑀜𑁆𑀜𑀺𑀲𑁆𑀲𑀢𑁂, 𑀆𑀬𑀢𑀺𑀁 𑀳𑀦𑀻𑀬𑀢𑁂𑀢𑀺 𑀅𑀢𑁆𑀣𑁄. 𑀦𑁂𑀫𑀺𑀢𑁆𑀢𑀓𑀸𑀦𑀁 𑀯𑀘𑀦𑀁 𑀢𑀣𑀁 𑀯𑀸 𑀲𑀺𑀬𑀸, 𑀯𑀺𑀢𑀣𑀁 𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀧𑀼𑀢𑁆𑀢𑁄𑀢𑀺 𑀯𑀸 𑀥𑀻𑀢𑀸𑀢𑀺 𑀯𑀸 𑀦 𑀧𑀜𑁆𑀜𑀸𑀬𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀅𑀢𑁆𑀢𑀦𑁄’’𑀢𑀺𑀆𑀤𑀺𑀦𑀸 𑀅𑀜𑁆𑀜𑀫𑁆𑀧𑀺 𑀓𑀸𑀭𑀡𑀁 𑀤𑀲𑁆𑀲𑁂𑀢𑁆𑀯𑀸 𑀦𑀺𑀯𑀸𑀭𑁂𑀲𑀺. 𑀭𑀜𑁆𑀜𑁄 𑀪𑀸𑀯𑁄 𑀭𑀚𑁆𑀚𑀁, 𑀭𑀚𑁆𑀚𑀲𑁆𑀲 𑀲𑀫𑀻𑀧𑁂 𑀧𑀯𑀢𑁆𑀢𑀢𑀻𑀢𑀺 𑀑𑀧𑀭𑀚𑁆𑀚𑀁, 𑀞𑀸𑀦𑀦𑁆𑀢𑀭𑀁.

𑀫𑀳𑀸𑀢𑀺 𑀫𑀳𑀢𑀻. 𑀲𑀫𑀸𑀲𑁂 𑀯𑀺𑀬 𑀳𑀺 𑀯𑀸𑀓𑁆𑀬𑁂𑀧𑀺 𑀫𑀳𑀦𑁆𑀢𑀲𑀤𑁆𑀤𑀲𑁆𑀲 𑀫𑀳𑀸𑀤𑁂𑀲𑁄. 𑀥𑀼𑀭𑀸𑀢𑀺 𑀕𑀡𑀲𑁆𑀲 𑀥𑀼𑀭𑀪𑀽𑀢𑀸, 𑀥𑁄𑀭𑀬𑁆𑀳𑀸 𑀚𑁂𑀝𑁆𑀞𑀓𑀸𑀢𑀺 𑀅𑀢𑁆𑀣𑁄. 𑀥𑀼𑀭𑀁 𑀦𑀻𑀳𑀭𑀸𑀫𑀻𑀢𑀺 𑀕𑀡𑀥𑀼𑀭𑀫𑀸𑀯𑀳𑀸𑀫𑀺, 𑀕𑀡𑀩𑀦𑁆𑀥𑀺𑀬𑀁 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀸𑀫𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀲𑁄 𑀦 𑀲𑀓𑁆𑀓𑀸’’𑀢𑀺𑀆𑀤𑀺𑀦𑀸 𑀧𑀼𑀦 𑀘𑀺𑀦𑁆𑀢𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀺. 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑁂𑀦𑀸𑀢𑀺 𑀅𑀳𑀺𑀫𑁂𑀔𑀮𑀺𑀓𑀓𑀼𑀫𑀸𑀭𑀯𑀡𑁆𑀡𑀯𑀺𑀓𑀼𑀩𑁆𑀩𑀦𑀺𑀤𑁆𑀥𑀺𑀦𑀸. 𑀢𑁂𑀦𑀸𑀢𑀺 𑀅𑀧𑁆𑀧𑀸𑀬𑀼𑀓𑀪𑀸𑀯𑁂𑀦. 𑀳𑀻𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀢𑁂𑀦 𑀳𑀻𑀢𑀺 𑀯𑀸 𑀉𑀬𑁆𑀬𑁄𑀚𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀓𑀼𑀫𑀸𑀭𑀁…𑀧𑁂… 𑀉𑀬𑁆𑀬𑁄𑀚𑁂𑀲𑀻’’𑀢𑀺. 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀸𑀫𑀻𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀇𑀤𑀫𑀢𑁆𑀣𑁄, 𑀇𑀫𑀺𑀦𑀸 𑀔𑀦𑁆𑀥𑀓𑁂 𑀆𑀕𑀢𑀦𑀬𑁂𑀦𑀸𑀢𑀺 𑀅𑀢𑁆𑀣𑁄. 𑀧𑀼𑀩𑁆𑀩𑁂 𑀔𑁄𑀢𑀺𑀆𑀤𑀻𑀳𑀺𑀧𑀺 𑀔𑀦𑁆𑀥𑀓𑀧𑀸𑀴𑀺𑀬𑁂𑀯 (𑀘𑀽𑀴𑀯. 𑁩𑁩𑁯).

𑀧𑁄𑀢𑁆𑀣𑀦𑀺𑀬𑀦𑁆𑀢𑀺 𑀙𑀼𑀭𑀺𑀓𑀁. 𑀬𑀁 ‘‘𑀦𑀔𑀭’’𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺, 𑀤𑀺𑀯𑀸 𑀤𑀺𑀯𑀲𑁂𑀢𑀺 (𑀤𑀻. 𑀦𑀺. 𑀝𑀻. 𑁧.𑁧𑁫𑁦) 𑀤𑀺𑀯𑀲𑀲𑁆𑀲𑀧𑀺 𑀤𑀺𑀯𑀸. 𑀲𑀸𑀫𑁆𑀬𑀢𑁆𑀣𑁂 𑀳𑁂𑀢𑀁 𑀪𑀼𑀫𑁆𑀫𑀯𑀘𑀦𑀁 ‘‘𑀤𑀺𑀯𑀸 𑀤𑀺𑀯𑀲𑀲𑁆𑀲𑀸’’𑀢𑀺 𑀅𑀜𑁆𑀜𑀢𑁆𑀣 𑀤𑀲𑁆𑀲𑀦𑀢𑁄. 𑀤𑀺𑀯𑀲𑁆𑀲 𑀤𑀺𑀯𑀲𑁂𑀢𑀺𑀧𑀺 𑀯𑀝𑁆𑀝𑀢𑀺 𑀅𑀓𑀸𑀭𑀦𑁆𑀢𑀲𑁆𑀲𑀧𑀺 𑀤𑀺𑀯𑀲𑀤𑁆𑀤𑀲𑁆𑀲 𑀯𑀺𑀚𑁆𑀚𑀫𑀸𑀦𑀢𑁆𑀢𑀸. 𑀦𑁂𑀧𑀸𑀢𑀺𑀓𑀫𑁆𑀧𑀺 𑀤𑀺𑀯𑀸𑀲𑀤𑁆𑀤𑀫𑀺𑀘𑁆𑀙𑀦𑁆𑀢𑀺 𑀲𑀤𑁆𑀤𑀯𑀺𑀤𑀽, 𑀫𑀚𑁆𑀛𑀦𑁆𑀳𑀺𑀓𑀯𑁂𑀮𑀸𑀬𑀦𑁆𑀢𑀺 𑀅𑀢𑁆𑀣𑁄. 𑀲𑀸 𑀳𑀺 𑀤𑀺𑀯𑀲𑀲𑁆𑀲 𑀯𑀺𑀲𑁂𑀲𑁄 𑀤𑀺𑀯𑀲𑁄𑀢𑀺. ‘‘𑀪𑀻𑀢𑁄’’𑀢𑀺𑀆𑀤𑀺 𑀧𑀭𑀺𑀬𑀸𑀬𑁄, 𑀓𑀸𑀬𑀣𑀫𑁆𑀪𑀦𑁂𑀦 𑀯𑀸 𑀪𑀻𑀢𑁄. 𑀳𑀤𑀬𑀫𑀁𑀲𑀘𑀮𑀦𑁂𑀦 𑀉𑀩𑁆𑀩𑀺𑀕𑁆𑀕𑁄. ‘‘𑀚𑀸𑀦𑁂𑀬𑁆𑀬𑀼𑀁 𑀯𑀸, 𑀫𑀸 𑀯𑀸’’𑀢𑀺 𑀧𑀭𑀺𑀲𑀗𑁆𑀓𑀸𑀬 𑀉𑀲𑁆𑀲𑀗𑁆𑀓𑀻. 𑀜𑀸𑀢𑁂 𑀲𑀢𑀺 𑀅𑀢𑁆𑀢𑀦𑁄 𑀆𑀕𑀘𑁆𑀙𑀫𑀸𑀦𑀪𑀬𑀯𑀲𑁂𑀦 𑀉𑀢𑁆𑀭𑀲𑁆𑀢𑁄. 𑀯𑀼𑀢𑁆𑀢𑀧𑁆𑀧𑀓𑀸𑀭𑀦𑁆𑀢𑀺 𑀤𑁂𑀯𑀤𑀢𑁆𑀢𑁂𑀦 𑀯𑀼𑀢𑁆𑀢𑀸𑀓𑀸𑀭𑀁 𑀯𑀺𑀧𑁆𑀧𑀓𑀸𑀭𑀦𑁆𑀢𑀺 𑀅𑀧𑀓𑀸𑀭𑀁 𑀅𑀦𑀼𑀧𑀓𑀸𑀭𑀁, 𑀯𑀺𑀧𑀭𑀻𑀢𑀓𑀺𑀘𑁆𑀘𑀁 𑀯𑀸. 𑀲𑀩𑁆𑀩𑁂 𑀪𑀺𑀓𑁆𑀔𑀽𑀢𑀺 𑀤𑁂𑀯𑀤𑀢𑁆𑀢𑀧𑀭𑀺𑀲𑀁 𑀲𑀦𑁆𑀥𑀸𑀬𑀸𑀳.

𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀅𑀧𑀦𑀬𑀦𑀯𑀲𑁂𑀦 𑀯𑀺𑀮𑀼𑀫𑁆𑀧𑀺𑀢𑁆𑀯𑀸. 𑀭𑀚𑁆𑀚𑁂𑀦𑀸𑀢𑀺 𑀯𑀺𑀚𑀺𑀢𑁂𑀦. 𑀏𑀓𑀲𑁆𑀲 𑀭𑀜𑁆𑀜𑁄 𑀆𑀡𑀸𑀧𑀯𑀢𑁆𑀢𑀺𑀝𑁆𑀞𑀸𑀦𑀁 ‘‘𑀭𑀚𑁆𑀚’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁, 𑀭𑀸𑀚𑀪𑀸𑀯𑁂𑀦 𑀯𑀸.

𑀫𑀦𑀲𑁄 𑀅𑀢𑁆𑀣𑁄 𑀇𑀘𑁆𑀙𑀸 𑀫𑀦𑁄𑀭𑀣𑁄 𑀭-𑀓𑀸𑀭𑀸𑀕𑀫𑀁, 𑀢-𑀓𑀸𑀭𑀮𑁄𑀧𑀜𑁆𑀘 𑀓𑀢𑁆𑀯𑀸, 𑀘𑀺𑀢𑁆𑀢𑀲𑁆𑀲 𑀯𑀸 𑀦𑀸𑀦𑀸𑀭𑀫𑁆𑀫𑀡𑁂𑀲𑀼 𑀯𑀺𑀩𑁆𑀪𑀫𑀓𑀭𑀡𑀢𑁄 𑀫𑀦𑀲𑁄 𑀭𑀣𑁄 𑀇𑀯 𑀫𑀦𑁄𑀭𑀣𑁄, 𑀫𑀦𑁄 𑀏𑀯 𑀭𑀣𑁄 𑀯𑀺𑀬𑀸𑀢𑀺 𑀯𑀸 𑀫𑀦𑁄𑀭𑀣𑁄𑀢𑀺𑀧𑀺 𑀦𑁂𑀭𑀼𑀢𑁆𑀢𑀺𑀓𑀸 𑀯𑀤𑀦𑁆𑀢𑀺. 𑀲𑀼𑀓𑀺𑀘𑁆𑀘𑀓𑀸𑀭𑀺𑀫𑁆𑀳𑀻𑀢𑀺 𑀲𑀼𑀓𑀺𑀘𑁆𑀘𑀓𑀸𑀭𑀻 𑀅𑀫𑁆𑀳𑀺. 𑀅𑀯𑀫𑀸𑀦𑀦𑁆𑀢𑀺 𑀅𑀯𑀫𑀜𑁆𑀜𑀦𑀁 𑀅𑀦𑀸𑀤𑀭𑀁. 𑀫𑀽𑀮𑀖𑀘𑁆𑀘𑀦𑁆𑀢𑀺 𑀚𑀻𑀯𑀺𑀢𑀸 𑀯𑁄𑀭𑁄𑀧𑀦𑀁 𑀲𑀦𑁆𑀥𑀸𑀬𑀸𑀳, 𑀪𑀸𑀯𑀦𑀧𑀼𑀁𑀲𑀓𑀫𑁂𑀢𑀁. 𑀭𑀸𑀚𑀓𑀼𑀮𑀸𑀦𑀁 𑀓𑀺𑀭 𑀲𑀢𑁆𑀣𑁂𑀦 𑀖𑀸𑀢𑀦𑀁 𑀭𑀸𑀚𑀽𑀦𑀫𑀦𑀸𑀘𑀺𑀡𑁆𑀡𑀁, 𑀢𑀲𑁆𑀫𑀸 𑀲𑁄 ‘‘𑀦𑀦𑀼 𑀪𑀦𑁆𑀢𑁂’’𑀢𑀺𑀆𑀤𑀺𑀫𑀸𑀳. 𑀢𑀸𑀧𑀦𑀕𑁂𑀳𑀁 𑀦𑀸𑀫 𑀉𑀡𑁆𑀳𑀕𑀳𑀸𑀧𑀦𑀕𑁂𑀳𑀁, 𑀢𑀁 𑀧𑀦 𑀥𑀽𑀫𑁂𑀦𑁂𑀯 𑀅𑀘𑁆𑀙𑀺𑀦𑁆𑀦𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀥𑀽𑀫𑀖𑀭’’𑀦𑁆𑀢𑀺. 𑀓𑀫𑁆𑀫𑀓𑀭𑀡𑀢𑁆𑀣𑀸𑀬𑀸𑀢𑀺 𑀢𑀸𑀧𑀦 𑀓𑀫𑁆𑀫𑀓𑀭𑀡𑀢𑁆𑀣𑀫𑁂𑀯. 𑀓𑁂𑀦𑀘𑀺 𑀙𑀸𑀤𑀺𑀢𑀢𑁆𑀢𑀸 𑀉𑀘𑁆𑀘𑁄 𑀅𑀗𑁆𑀕𑁄𑀢𑀺 𑀉𑀘𑁆𑀘𑀗𑁆𑀕𑁄, 𑀬𑀲𑁆𑀲 𑀓𑀲𑁆𑀲𑀘𑀺 𑀕𑀳𑀡𑀢𑁆𑀣𑀁 𑀧𑀝𑀺𑀘𑁆𑀙𑀦𑁆𑀦𑁄 𑀉𑀦𑁆𑀦𑀢𑀗𑁆𑀕𑁄𑀢𑀺 𑀇𑀥 𑀅𑀥𑀺𑀧𑁆𑀧𑁂𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀉𑀘𑁆𑀘𑀗𑁆𑀕𑀁 𑀓𑀢𑁆𑀯𑀸 𑀧𑀯𑀺𑀲𑀺𑀢𑀼𑀁 𑀫𑀸 𑀤𑁂𑀣𑀸’’𑀢𑀺. ‘‘𑀉𑀘𑁆𑀙𑀗𑁆𑀕𑁂 𑀓𑀢𑁆𑀯𑀸’’𑀢𑀺𑀧𑀺 𑀧𑀸𑀞𑁄, 𑀏𑀯𑀁 𑀲𑀢𑀺 𑀫𑀚𑁆𑀛𑀺𑀫𑀗𑁆𑀕𑁄𑀯, 𑀉𑀘𑁆𑀙𑀗𑁆𑀕𑁂 𑀓𑀺𑀜𑁆𑀘𑀺 𑀕𑀳𑁂𑀢𑀩𑁆𑀩𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀫𑁄𑀴𑀺𑀬𑀦𑁆𑀢𑀺 𑀘𑀽𑀴𑀸𑀬𑀁 ‘‘𑀙𑁂𑀢𑁆𑀯𑀸𑀦 𑀫𑁄𑀴𑀺𑀁 𑀯𑀭𑀕𑀦𑁆𑀥𑀯𑀸𑀲𑀺𑀢’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑀅𑀝𑁆𑀞. 𑁨.𑁧; 𑀲𑀁. 𑀦𑀺. 𑀅𑀝𑁆𑀞. 𑁨.𑁨.𑁫𑁫; 𑀅𑀧. 𑀅𑀝𑁆𑀞. 𑁧.𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀓𑀣𑀸; 𑀩𑀼. 𑀯𑀁. 𑀅𑀝𑁆𑀞. 𑁨𑁭.𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀓𑀣𑀸; 𑀚𑀸. 𑀅𑀝𑁆𑀞. 𑁧.𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀓𑀣𑀸) 𑀯𑀺𑀬. 𑀢𑁂𑀦𑀸𑀳 ‘‘𑀫𑁄𑀴𑀺𑀁 𑀩𑀦𑁆𑀥𑀺𑀢𑁆𑀯𑀸’’𑀢𑀺. 𑀘𑀢𑀼𑀫𑀥𑀼𑀭𑁂𑀦𑀸𑀢𑀺 𑀲𑀧𑁆𑀧𑀺𑀲𑀓𑁆𑀓𑀭𑀫𑀥𑀼𑀦𑀸𑀴𑀺𑀓𑁂𑀭𑀲𑁆𑀦𑁂𑀳𑀲𑀗𑁆𑀔𑀸𑀢𑁂𑀳𑀺 𑀘𑀢𑀽𑀳𑀺 𑀫𑀥𑀼𑀭𑁂𑀳𑀺 𑀅𑀪𑀺𑀲𑀗𑁆𑀔𑀢𑀧𑀸𑀦𑀯𑀺𑀲𑁂𑀲𑁂𑀦𑀸𑀢𑀺 𑀯𑀤𑀦𑁆𑀢𑀺, 𑀢𑀁 𑀫𑀳𑀸𑀥𑀫𑁆𑀫𑀲𑀫𑀸𑀤𑀸𑀦𑀲𑀼𑀢𑁆𑀢𑀧𑀸𑀴𑀺𑀬𑀸 (𑀫. 𑀦𑀺. 𑁧.𑁪𑁭𑁩) 𑀦 𑀲𑀫𑁂𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 ‘‘𑀤𑀥𑀺 𑀘 𑀫𑀥𑀼 𑀘 𑀲𑀧𑁆𑀧𑀺 𑀘 𑀨𑀸𑀡𑀺𑀢𑀜𑁆𑀘 𑀏𑀓𑀚𑁆𑀛𑀁 𑀲𑀁𑀲𑀝𑁆𑀞’’𑀦𑁆𑀢𑀺, (𑀫. 𑀦𑀺. 𑁧.𑁪𑁮𑁫) 𑀢𑀤𑀝𑁆𑀞𑀓𑀣𑀸𑀬𑀜𑁆𑀘 𑀯𑀼𑀢𑁆𑀢𑀁 ‘‘𑀤𑀥𑀺 𑀘 𑀫𑀥𑀼 𑀘𑀸𑀢𑀺 𑀲𑀼𑀧𑀭𑀺𑀲𑀼𑀤𑁆𑀥𑀁 𑀤𑀥𑀺 𑀘 𑀲𑀼𑀫𑀥𑀼𑀭𑀁 𑀫𑀥𑀼 𑀘. 𑀏𑀓𑀚𑁆𑀛𑀁 𑀲𑀁𑀲𑀝𑁆𑀞𑀦𑁆𑀢𑀺 𑀏𑀓𑀢𑁄 𑀓𑀢𑁆𑀯𑀸 𑀫𑀺𑀲𑁆𑀲𑀺𑀢𑀁 𑀆𑀮𑀼𑀴𑀺𑀢𑀁. 𑀢𑀲𑁆𑀲 𑀢𑀦𑁆𑀢𑀺 𑀢𑀲𑁆𑀲 𑀢𑀁 𑀘𑀢𑀼𑀫𑀥𑀼𑀭𑀪𑁂𑀲𑀚𑁆𑀚𑀁 𑀧𑀺𑀯𑀢𑁄’’𑀢𑀺 ‘‘𑀅𑀢𑁆𑀢𑀼𑀧𑀓𑁆𑀓𑀫𑁂𑀦 𑀫𑀭𑀡𑀁 𑀦 𑀬𑀼𑀢𑁆𑀢’’𑀦𑁆𑀢𑀺 𑀫𑀦𑀲𑀺 𑀓𑀢𑁆𑀯𑀸 𑀭𑀸𑀚𑀸 𑀢𑀲𑁆𑀲𑀸 𑀲𑀭𑀻𑀭𑀁 𑀮𑁂𑀳𑀺𑀢𑁆𑀯𑀸 𑀬𑀸𑀧𑁂𑀢𑀺. 𑀦 𑀳𑀺 𑀅𑀭𑀺𑀬𑀸 𑀅𑀢𑁆𑀢𑀸𑀦𑀁 𑀯𑀺𑀦𑀺𑀧𑀸𑀢𑁂𑀦𑁆𑀢𑀺.

𑀫𑀕𑁆𑀕𑀨𑀮𑀲𑀼𑀔𑁂𑀦𑀸𑀢𑀺 𑀫𑀕𑁆𑀕𑀨𑀮𑀲𑀼𑀔𑀯𑀢𑀸, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀨𑀮𑀲𑀼𑀔𑀽𑀧𑀲𑀜𑁆𑀳𑀺𑀢𑁂𑀦 𑀘𑀗𑁆𑀓𑀫𑁂𑀦 𑀬𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀳𑀸𑀭𑁂𑀲𑁆𑀲𑀸𑀫𑀻𑀢𑀺 𑀅𑀧𑀦𑁂𑀲𑁆𑀲𑀸𑀫𑀺. 𑀯𑀻𑀢𑀘𑁆𑀘𑀺𑀢𑁂𑀳𑀻𑀢𑀺 𑀯𑀺𑀕𑀢𑀅𑀘𑁆𑀘𑀺𑀢𑁂𑀳𑀺 𑀚𑀸𑀮𑀯𑀺𑀕𑀢𑁂𑀳𑀺 𑀲𑀼𑀤𑁆𑀥𑀗𑁆𑀕𑀸𑀭𑁂𑀳𑀺. 𑀓𑁂𑀦𑀘𑀺 𑀲𑀜𑁆𑀜𑀢𑁆𑀢𑁄𑀢𑀺 𑀓𑁂𑀦𑀘𑀺 𑀲𑀫𑁆𑀫𑀸 𑀜𑀸𑀧𑀺𑀢𑁄, 𑀑𑀯𑀤𑀺𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀲𑁆𑀲𑀼𑀓𑀭𑀡𑀢𑁆𑀣𑀸𑀬𑀸𑀢𑀺 𑀫𑀲𑁆𑀲𑀼𑀯𑀺𑀲𑁄𑀥𑀦𑀢𑁆𑀣𑀸𑀬. 𑀫𑀦𑀁 𑀓𑀭𑁄𑀣𑀸𑀢𑀺 𑀬𑀣𑀸 𑀭𑀜𑁆𑀜𑁄 𑀫𑀦𑀁 𑀳𑁄𑀢𑀺, 𑀢𑀣𑀸 𑀓𑀭𑁄𑀣. 𑀧𑀼𑀩𑁆𑀩𑁂𑀢𑀺 𑀧𑀼𑀭𑀺𑀫𑀪𑀯𑁂. 𑀘𑁂𑀢𑀺𑀬𑀗𑁆𑀕𑀡𑁂𑀢𑀺 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀳𑀺 𑀧𑀽𑀚𑀦𑀝𑁆𑀞𑀸𑀦𑀪𑀽𑀢𑁂 𑀘𑁂𑀢𑀺𑀬𑀲𑁆𑀲 𑀪𑀽𑀫𑀺𑀢𑀮𑁂. 𑀦𑀺𑀲𑀚𑁆𑀚𑀦𑀢𑁆𑀣𑀸𑀬𑀸𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀦𑀺𑀲𑀻𑀤𑀦𑀢𑁆𑀣𑀸𑀬. 𑀧𑀜𑁆𑀜𑀢𑁆𑀢𑀓𑀝𑀲𑀸𑀭𑀓𑀦𑁆𑀢𑀺 𑀧𑀜𑁆𑀜𑀧𑁂𑀢𑀩𑁆𑀩𑀉𑀢𑁆𑀢𑀫𑀓𑀺𑀮𑀜𑁆𑀚𑀁. 𑀢𑀣𑀸𑀯𑀺𑀥𑁄 𑀓𑀺𑀮𑀜𑁆𑀚𑁄 𑀳𑀺 ‘‘𑀓𑀝𑀲𑀸𑀭𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀓𑀫𑁆𑀫𑀤𑁆𑀯𑀬𑀲𑁆𑀲. 𑀢𑀁 𑀧𑀦 𑀫𑀦𑁄𑀧𑀤𑁄𑀲𑀯𑀲𑁂𑀦𑁂𑀯 𑀢𑁂𑀦 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀣𑀸𑀳 𑁋

‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸, 𑀫𑀦𑁄𑀲𑁂𑀝𑁆𑀞𑀸 𑀫𑀦𑁄𑀫𑀬𑀸;

𑀫𑀦𑀲𑀸 𑀘𑁂 𑀧𑀤𑀼𑀝𑁆𑀞𑁂𑀦, 𑀪𑀸𑀲𑀢𑀺 𑀯𑀸 𑀓𑀭𑁄𑀢𑀺 𑀯𑀸;

𑀢𑀢𑁄 𑀦𑀁 𑀤𑀼𑀓𑁆𑀔𑀫𑀦𑁆𑀯𑁂𑀢𑀺, 𑀘𑀓𑁆𑀓𑀁𑀯 𑀯𑀳𑀢𑁄 𑀧𑀤’’𑀦𑁆𑀢𑀺. (𑀥. 𑀧. 𑁧; 𑀦𑁂𑀢𑁆𑀢𑀺. 𑁯𑁦);

𑀧𑀭𑀺𑀘𑀸𑀭𑀓𑁄𑀢𑀺 𑀲𑀳𑀸𑀬𑀓𑁄. 𑀅𑀪𑁂𑀤𑁂𑀧𑀺 𑀪𑁂𑀤𑀫𑀺𑀯 𑀯𑁄𑀳𑀸𑀭𑁄 𑀮𑁄𑀓𑁂 𑀧𑀸𑀓𑀝𑁄𑀢𑀺 𑀯𑀼𑀢𑁆𑀢𑀁 ‘‘𑀬𑀓𑁆𑀔𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀻’’𑀢𑀺. 𑀏𑀓𑀸𑀬𑀧𑀺 𑀳𑀺 𑀉𑀧𑁆𑀧𑀸𑀤𑀓𑀺𑀭𑀺𑀬𑀸𑀬 𑀇𑀥 𑀪𑁂𑀤𑀯𑁄𑀳𑀸𑀭𑁄, 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀳𑀼𑀢𑁆𑀯𑀸, 𑀧𑀯𑀢𑁆𑀢𑀺𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑀻𑀢𑀺 𑀯𑀸 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀁, 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀸 𑀧𑀯𑀢𑁆𑀢𑀦𑀲𑀗𑁆𑀔𑀸𑀢𑀁 𑀲𑀸𑀢𑀺𑀲𑀬𑀦𑀺𑀩𑁆𑀩𑀢𑁆𑀢𑀦𑀁 𑀜𑀸𑀧𑁂𑀢𑀼𑀁 𑀏𑀓𑀸𑀬𑁂𑀯 𑀓𑀺𑀭𑀺𑀬𑀸 𑀧𑀤𑀤𑁆𑀯𑀬𑁂𑀦 𑀯𑀼𑀢𑁆𑀢𑀸. 𑀢𑀣𑀸𑀯𑀘𑀦𑀜𑁆𑀳𑀺 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑀦𑁂𑀬𑁂𑀯 𑀤𑀺𑀲𑁆𑀲𑀢𑀺 ‘‘𑀫𑀓𑁆𑀓𑀝𑀓𑁄 𑀦𑀸𑀫 𑀤𑁂𑀯𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺 (𑀥. 𑀧. 𑀅𑀝𑁆𑀞. 𑁧.𑁫) 𑀓𑀡𑁆𑀝𑀓𑁄 𑀦𑀸𑀫…𑀧𑁂… 𑀦𑀺𑀩𑁆𑀩𑀢𑁆𑀢𑀺, (𑀚𑀸. 𑀅𑀝𑁆𑀞. 𑁧.𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀓𑀣𑀸) 𑀫𑀡𑁆𑀟𑀽𑀓𑁄 𑀦𑀸𑀫…𑀧𑁂… 𑀦𑀺𑀩𑁆𑀩𑀢𑁆𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬. 𑀤𑁆𑀯𑀺𑀦𑁆𑀦𑀁 𑀯𑀸 𑀧𑀤𑀸𑀦𑀁 𑀪𑀸𑀯𑀢𑁆𑀣𑀫𑀧𑁂𑀓𑁆𑀔𑀺𑀢𑁆𑀯𑀸 ‘‘𑀬𑀓𑁆𑀔𑁄’’𑀢𑀺𑀆𑀤𑀻𑀲𑀼 𑀲𑀸𑀫𑀺𑀅𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀁 𑀓𑀢𑀁 𑀧𑀼𑀭𑀺𑀫𑀸𑀬 𑀧𑀘𑁆𑀙𑀺𑀫𑀯𑀺𑀲𑁂𑀲𑀦𑀢𑁄, 𑀧𑀭𑀺𑀘𑀸𑀭𑀓𑀲𑁆𑀲…𑀧𑁂… 𑀬𑀓𑁆𑀔𑀲𑁆𑀲 𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑀻𑀢𑀺 𑀅𑀢𑁆𑀣𑁄, 𑀳𑁂𑀢𑁆𑀯𑀢𑁆𑀣𑁂 𑀯𑀸 𑀏𑀢𑁆𑀣 𑀢𑁆𑀯𑀸-𑀲𑀤𑁆𑀤𑁄 𑀬𑀓𑁆𑀔𑀲𑁆𑀲 𑀪𑀸𑀯𑀢𑁄 𑀧𑀯𑀢𑁆𑀢𑀦𑀳𑁂𑀢𑀽𑀢𑀺. 𑀅𑀲𑁆𑀲 𑀧𑀦 𑀭𑀜𑁆𑀜𑁄 𑀫𑀳𑀸𑀧𑀼𑀜𑁆𑀜𑀲𑁆𑀲𑀧𑀺 𑀲𑀫𑀸𑀦𑀲𑁆𑀲 𑀢𑀢𑁆𑀣 𑀩𑀳𑀼𑀮𑀁 𑀦𑀺𑀩𑁆𑀩𑀢𑁆𑀢𑀧𑀼𑀩𑁆𑀩𑀢𑀸𑀬 𑀘𑀺𑀭𑀧𑀭𑀺𑀘𑀺𑀢𑀦𑀺𑀓𑀦𑁆𑀢𑀺 𑀯𑀲𑁂𑀦 𑀢𑀢𑁆𑀣𑁂𑀯 𑀦𑀺𑀩𑁆𑀩𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀢𑀁 𑀤𑀺𑀯𑀲𑀫𑁂𑀯𑀸𑀢𑀺 𑀭𑀜𑁆𑀜𑁄 𑀫𑀭𑀡𑀤𑀺𑀯𑀲𑁂𑀬𑁂𑀯. 𑀔𑁄𑀪𑁂𑀢𑁆𑀯𑀸𑀢𑀺 𑀧𑀼𑀢𑁆𑀢𑀲𑁆𑀦𑁂𑀳𑀲𑁆𑀲 𑀩𑀮𑀯𑀪𑀸𑀯𑀢𑁄, 𑀢𑀁𑀲𑀳𑀚𑀸𑀢𑀧𑀻𑀢𑀺 𑀯𑁂𑀕𑀲𑁆𑀲 𑀘 𑀲𑀯𑀺𑀧𑁆𑀨𑀸𑀭𑀢𑀸𑀬 𑀢𑀁 𑀲𑀫𑀼𑀝𑁆𑀞𑀸𑀦𑀭𑀽𑀧𑀥𑀫𑁆𑀫𑁂𑀳𑀺 𑀨𑀭𑀡𑀯𑀲𑁂𑀦 𑀲𑀓𑀮𑀲𑀭𑀻𑀭𑀁 𑀆𑀮𑁄𑀴𑁂𑀢𑁆𑀯𑀸. 𑀢𑁂𑀦𑀸𑀳 ‘‘𑀅𑀝𑁆𑀞𑀺𑀫𑀺𑀜𑁆𑀚𑀁 𑀆𑀳𑀘𑁆𑀘 𑀅𑀝𑁆𑀞𑀸𑀲𑀻’’𑀢𑀺. 𑀧𑀺𑀢𑀼𑀕𑀼𑀡𑀦𑁆𑀢𑀺 𑀧𑀺𑀢𑀼𑀦𑁄 𑀅𑀢𑁆𑀢𑀦𑀺 𑀲𑀺𑀦𑁂𑀳𑀕𑀼𑀡𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑀬𑀺 𑀚𑀸𑀢𑁂𑀧𑀻’’𑀢𑀺𑀆𑀤𑀺. 𑀯𑀺𑀲𑁆𑀲𑀚𑁆𑀚𑁂𑀣 𑀯𑀺𑀲𑁆𑀲𑀚𑁆𑀚𑁂𑀣𑀸𑀢𑀺 𑀢𑀼𑀭𑀺𑀢𑀯𑀲𑁂𑀦, 𑀲𑁄𑀓𑀯𑀲𑁂𑀦 𑀘 𑀯𑀼𑀢𑁆𑀢𑀁.

𑀅𑀦𑀼𑀝𑁆𑀞𑀼𑀪𑀺𑀢𑁆𑀯𑀸𑀢𑀺 𑀅𑀙𑀟𑁆𑀟𑁂𑀢𑁆𑀯𑀸.

𑀦𑀸𑀴𑀸𑀕𑀺𑀭𑀺𑀳𑀢𑁆𑀣𑀺𑀁 𑀫𑀼𑀜𑁆𑀘𑀸𑀧𑁂𑀢𑁆𑀯𑀸𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀧𑀓𑀸𑀭𑀢𑁆𑀣𑁄, 𑀢𑁂𑀦 ‘‘𑀅𑀪𑀺𑀫𑀸𑀭𑀓𑀧𑀼𑀭𑀺𑀲𑀧𑁂𑀲𑁂𑀦𑀸𑀤𑀺𑀧𑁆𑀧𑀓𑀸𑀭𑁂𑀦𑀸’’𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀢𑁆𑀢𑀬𑀁 𑀧𑀘𑁆𑀘𑀸𑀫𑀲𑀢𑀺, 𑀓𑀢𑁆𑀣𑀘𑀺 𑀧𑀦 𑀲𑁄 𑀦 𑀤𑀺𑀝𑁆𑀞𑁄. 𑀧𑀜𑁆𑀘 𑀯𑀢𑁆𑀣𑀽𑀦𑀻𑀢𑀺 ‘‘𑀲𑀸𑀥𑀼 𑀪𑀦𑁆𑀢𑁂 𑀪𑀺𑀓𑁆𑀔𑀽 𑀬𑀸𑀯𑀚𑀻𑀯𑀁 𑀆𑀭𑀜𑁆𑀜𑀺𑀓𑀸 𑀅𑀲𑁆𑀲𑀽’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁪𑁦𑁯; 𑀘𑀽𑀴𑀯. 𑁩𑁪𑁩) 𑀯𑀺𑀦𑀬𑁂 𑀯𑀼𑀢𑁆𑀢𑀸𑀦𑀺 𑀧𑀜𑁆𑀘 𑀯𑀢𑁆𑀣𑀽𑀦𑀺. 𑀬𑀸𑀘𑀺𑀢𑁆𑀯𑀸𑀢𑀺 𑀏𑀢𑁆𑀣 𑀬𑀸𑀘𑀦𑀁 𑀯𑀺𑀬 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀦 𑀳𑀺 𑀲𑁄 𑀧𑀝𑀺𑀧𑀚𑁆𑀚𑀺𑀢𑀼𑀓𑀸𑀫𑁄 𑀬𑀸𑀘𑀢𑀻𑀢𑀺 𑀅𑀬𑀫𑀢𑁆𑀣𑁄 𑀯𑀺𑀦𑀬𑁂 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁧𑁦) 𑀯𑀼𑀢𑁆𑀢𑁄𑀬𑁂𑀯. 𑀲𑀜𑁆𑀜𑀸𑀧𑁂𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀗𑁆𑀖𑀪𑁂𑀤𑀁 𑀓𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀤𑀜𑁆𑀘 𑀢𑀲𑁆𑀲 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀢𑀸𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀲𑁄 𑀧𑀦 𑀅𑀓𑀢𑁂𑀧𑀺 𑀲𑀗𑁆𑀖𑀪𑁂𑀤𑁂 𑀢𑁂𑀳𑀺 𑀲𑀜𑁆𑀜𑀸𑀧𑁂𑀢𑀺𑀬𑁂𑀯. 𑀉𑀡𑁆𑀳𑀮𑁄𑀳𑀺𑀢𑀦𑁆𑀢𑀺 𑀩𑀮𑀯𑀲𑁄𑀓𑀲𑀫𑀼𑀝𑁆𑀞𑀺𑀢𑀁 𑀉𑀡𑁆𑀳𑀪𑀽𑀢𑀁 𑀮𑁄𑀳𑀺𑀢𑀁. 𑀫𑀳𑀸𑀦𑀺𑀭𑀬𑁂𑀢𑀺 𑀅𑀯𑀻𑀘𑀺𑀦𑀺𑀭𑀬𑁂. 𑀯𑀺𑀢𑁆𑀣𑀸𑀭𑀓𑀣𑀸𑀦𑀬𑁄𑀢𑀺 𑀅𑀚𑀸𑀢𑀲𑀢𑁆𑀢𑀼𑀧𑀲𑀸𑀤𑀦𑀸𑀤𑀺𑀯𑀲𑁂𑀦 𑀯𑀺𑀢𑁆𑀣𑀸𑀭𑀢𑁄 𑀯𑀢𑁆𑀢𑀩𑁆𑀩𑀸𑀬 𑀓𑀣𑀸𑀬 𑀦𑀬𑀫𑀢𑁆𑀢𑀁. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀲𑀸 𑀦 𑀯𑀼𑀢𑁆𑀢𑀸, 𑀦𑀦𑀼 𑀲𑀗𑁆𑀕𑀻𑀢𑀺𑀓𑀣𑀸 𑀯𑀺𑀬 𑀔𑀦𑁆𑀥𑀓𑁂 (𑀘𑀽𑀴𑀯. 𑁩𑁪𑁩) 𑀆𑀕𑀢𑀸𑀧𑀺 𑀲𑀸 𑀯𑀢𑁆𑀢𑀩𑁆𑀩𑀸𑀢𑀺 𑀘𑁄𑀤𑀦𑀸𑀬 𑀆𑀳 ‘‘𑀆𑀕𑀢𑀢𑁆𑀢𑀸 𑀧𑀦 𑀲𑀩𑁆𑀩𑀁 𑀦 𑀯𑀼𑀢𑁆𑀢’’𑀦𑁆𑀢𑀺, 𑀔𑀦𑁆𑀥𑀓𑁂 𑀆𑀕𑀢𑀢𑁆𑀢𑀸, 𑀓𑀺𑀜𑁆𑀘𑀺𑀫𑀢𑁆𑀢𑀲𑁆𑀲 𑀘 𑀯𑀘𑀦𑀓𑁆𑀓𑀫𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀦 𑀏𑀢𑁆𑀣 𑀓𑁄𑀘𑀺 𑀯𑀺𑀭𑁄𑀥𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀏𑀯’’𑀦𑁆𑀢𑀺𑀆𑀤𑀺 𑀬𑀣𑀸𑀦𑀼𑀲𑀦𑁆𑀥𑀺𑀦𑀸 𑀦𑀺𑀕𑀫𑀦𑀁.

𑀓𑁄𑀲𑀮𑀭𑀜𑁆𑀜𑁄𑀢𑀺 𑀧𑀲𑁂𑀦𑀤𑀺𑀓𑁄𑀲𑀮𑀲𑁆𑀲 𑀧𑀺𑀢𑀼 𑀫𑀳𑀸𑀓𑁄𑀲𑀮𑀭𑀜𑁆𑀜𑁄. 𑀦𑀦𑀼 𑀯𑀺𑀤𑁂𑀳𑀲𑁆𑀲 𑀭𑀜𑁆𑀜𑁄 𑀥𑀻𑀢𑀸 𑀯𑁂𑀤𑁂𑀳𑀻𑀢𑀺 𑀅𑀢𑁆𑀣𑁄 𑀲𑀫𑁆𑀪𑀯𑀢𑀻𑀢𑀺 𑀘𑁄𑀤𑀦𑀫𑀧𑀦𑁂𑀢𑀺 ‘‘𑀦 𑀯𑀺𑀤𑁂𑀳𑀭𑀜𑁆𑀜𑁄’’𑀢𑀺 𑀇𑀫𑀺𑀦𑀸. 𑀅𑀣 𑀓𑁂𑀦𑀝𑁆𑀞𑁂𑀦𑀸𑀢𑀺 𑀆𑀳 ‘‘𑀧𑀡𑁆𑀟𑀺𑀢𑀸𑀥𑀺𑀯𑀘𑀦𑀫𑁂𑀢’’𑀦𑁆𑀢𑀺, 𑀧𑀡𑁆𑀟𑀺𑀢𑀯𑁂𑀯𑀘𑀦𑀁, 𑀧𑀡𑁆𑀟𑀺𑀢𑀦𑀸𑀫𑀦𑁆𑀢𑀺 𑀯𑀸 𑀅𑀢𑁆𑀣𑁄. 𑀅𑀬𑀁 𑀧𑀦 𑀧𑀤𑀢𑁆𑀣𑁄 𑀓𑁂𑀦 𑀦𑀺𑀩𑁆𑀩𑀘𑀦𑁂𑀦𑀸𑀢𑀺 𑀯𑀼𑀢𑁆𑀢𑀁 ‘‘𑀢𑀢𑁆𑀭𑀸𑀬’’𑀦𑁆𑀢𑀺𑀆𑀤𑀺. 𑀯𑀺𑀤𑀦𑁆𑀢𑀻𑀢𑀺 𑀚𑀸𑀦𑀦𑁆𑀢𑀺. 𑀯𑁂𑀤𑁂𑀦𑀸𑀢𑀺 𑀓𑀭𑀡𑀪𑀽𑀢𑁂𑀦 𑀜𑀸𑀡𑁂𑀦. ‘‘𑀈𑀳𑀢𑀻’’𑀢𑀺 𑀏𑀢𑀲𑁆𑀲 𑀧𑀯𑀢𑁆𑀢𑀢𑀻𑀢𑀺𑀧𑀺 𑀅𑀢𑁆𑀣𑁄 𑀝𑀻𑀓𑀸𑀬𑀁 𑀯𑀼𑀢𑁆𑀢𑁄. 𑀯𑁂𑀤𑁂𑀳𑀻𑀢𑀺 𑀇𑀥 𑀦𑀤𑀸𑀤𑀺𑀕𑀡𑁄𑀢𑀺 𑀆𑀳 ‘‘𑀯𑁂𑀤𑁂𑀳𑀺𑀬𑀸’’𑀢𑀺.

𑀲𑁄𑀬𑁂𑀯 𑀅𑀳𑁄 𑀢𑀤𑀳𑁄, 𑀲𑀢𑁆𑀢𑀫𑀻𑀯𑀘𑀦𑁂𑀦 𑀧𑀦 ‘‘𑀢𑀤𑀳𑀽’’𑀢𑀺 𑀧𑀤𑀲𑀺𑀤𑁆𑀥𑀺. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀤𑀺𑀯𑀲𑁂. 𑀉𑀧𑀲𑀤𑁆𑀤𑁂𑀦 𑀯𑀺𑀲𑀺𑀝𑁆𑀞𑁄 𑀯𑀲𑀲𑀤𑁆𑀤𑁄 𑀉𑀧𑀯𑀲𑀦𑁂𑀬𑁂𑀯, 𑀦 𑀯𑀲𑀦𑀫𑀢𑁆𑀢𑁂, 𑀉𑀧𑀯𑀲𑀦𑀜𑁆𑀘 𑀲𑀫𑀸𑀤𑀸𑀦𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀻𑀮𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀲𑀻𑀮𑁂𑀦𑀸𑀢𑀺 𑀲𑀸𑀲𑀦𑁂 𑀅𑀭𑀺𑀬𑀼𑀧𑁄𑀲𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀦𑀲𑀦𑁂𑀦𑀸𑀢𑀺 𑀅𑀪𑀼𑀜𑁆𑀚𑀦𑀫𑀢𑁆𑀢𑀲𑀗𑁆𑀔𑀸𑀢𑀁 𑀩𑀸𑀳𑀺𑀭𑀼𑀧𑁄𑀲𑀣𑀁. 𑀯𑀸-𑀲𑀤𑁆𑀤𑁄 𑀘𑁂𑀢𑁆𑀣 𑀅𑀦𑀺𑀬𑀫𑀢𑁆𑀣𑁄, 𑀢𑁂𑀦 𑀏𑀓𑀘𑁆𑀘𑀁 𑀫𑀦𑁄𑀤𑀼𑀘𑁆𑀘𑀭𑀺𑀢𑀁, 𑀤𑀼𑀲𑁆𑀲𑀻𑀮𑁆𑀬𑀸𑀤𑀺𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀣𑀸 𑀳𑀺 𑀕𑁄𑀧𑀸𑀮𑀓𑀼𑀧𑁄𑀲𑀣𑁄 𑀅𑀪𑀺𑀚𑁆𑀛𑀸𑀲𑀳𑀕𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑁄, 𑀦𑀺𑀕𑀡𑁆𑀞𑀼𑀧𑁄𑀲𑀣𑁄 𑀫𑁄𑀲𑀯𑀚𑁆𑀚𑀸𑀤𑀺𑀯𑀲𑁂𑀦. 𑀬𑀣𑀸𑀳 𑀯𑀺𑀲𑀸𑀔𑀼𑀧𑁄𑀲𑀣𑁂 ‘‘𑀲𑁄 𑀢𑁂𑀦 𑀅𑀪𑀺𑀚𑁆𑀛𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀤𑀺𑀯𑀲𑀁 𑀅𑀢𑀺𑀦𑀸𑀫𑁂𑀢𑀻’’𑀢𑀺, (𑀅. 𑀦𑀺. 𑁩.𑁭𑁧) ‘‘𑀇𑀢𑀺 𑀬𑀲𑁆𑀫𑀺𑀁 𑀲𑀫𑀬𑁂 𑀲𑀘𑁆𑀘𑁂 𑀲𑀫𑀸𑀤𑀧𑁂𑀢𑀩𑁆𑀩𑀸, 𑀫𑀼𑀲𑀸𑀯𑀸𑀤𑁂 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀫𑀸𑀤𑀧𑁂𑀢𑀻’’𑀢𑀺 (𑀅. 𑀦𑀺. 𑁩.𑁭𑁧) 𑀘 𑀆𑀤𑀺.

𑀏𑀯𑀁 𑀅𑀥𑀺𑀧𑁆𑀧𑁂𑀢𑀢𑁆𑀣𑀸𑀦𑀼𑀭𑀽𑀧𑀁 𑀦𑀺𑀩𑁆𑀩𑀘𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀦𑀺𑀩𑁆𑀩𑀘𑀦𑀸𑀦𑀼𑀭𑀽𑀧𑀁 𑀅𑀥𑀺𑀧𑁆𑀧𑁂𑀢𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀬𑀁 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣𑀸𑀢𑀺 𑀉𑀧𑁄𑀲𑀣𑀲𑀤𑁆𑀤𑁂. 𑀲𑀫𑀸𑀦𑀲𑀤𑁆𑀤𑀯𑀘𑀦𑀻𑀬𑀸𑀦𑀁 𑀅𑀦𑁂𑀓𑀧𑁆𑀧𑀪𑁂𑀤𑀸𑀦𑀁 𑀅𑀢𑁆𑀣𑀸𑀦𑀫𑀼𑀤𑁆𑀥𑀭𑀡𑀁 𑀅𑀢𑁆𑀣𑀼𑀤𑁆𑀥𑀸𑀭𑁄 𑀲𑀫𑀸𑀦𑀲𑀤𑁆𑀤𑀯𑀘𑀦𑀻𑀬𑁂𑀲𑀼 𑀯𑀸 𑀅𑀢𑁆𑀣𑁂𑀲𑀼 𑀅𑀥𑀺𑀧𑁆𑀧𑁂𑀢𑀲𑁆𑀲𑁂𑀯 𑀅𑀢𑁆𑀣𑀲𑁆𑀲 𑀉𑀤𑁆𑀥𑀭𑀡𑀁 𑀅𑀢𑁆𑀣𑀼𑀤𑁆𑀥𑀸𑀭𑁄𑀢𑀺𑀧𑀺 𑀯𑀝𑁆𑀝𑀢𑀺. 𑀅𑀦𑁂𑀓𑀢𑁆𑀣𑀤𑀲𑁆𑀲𑀦𑀜𑁆𑀳𑀺 𑀅𑀥𑀺𑀧𑁆𑀧𑁂𑀢𑀢𑁆𑀣𑀲𑁆𑀲 𑀉𑀤𑁆𑀥𑀭𑀡𑀢𑁆𑀣𑀫𑁂𑀯. 𑀦𑀦𑀼 𑀘 ‘‘𑀅𑀢𑁆𑀣𑀫𑀢𑁆𑀢𑀁 𑀧𑀢𑀺 𑀲𑀤𑁆𑀤𑀸 𑀅𑀪𑀺𑀦𑀺𑀯𑀺𑀲𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀅𑀢𑁆𑀣𑀼𑀤𑁆𑀥𑀸𑀭𑁂 𑀘𑁄𑀤𑀦𑀸, 𑀲𑁄𑀥𑀦𑀸 𑀘 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀬𑁂𑀯. 𑀅𑀧𑀺𑀘 𑀯𑀺𑀲𑁂𑀲𑀲𑀤𑁆𑀤𑀲𑁆𑀲 𑀅𑀯𑀸𑀘𑀓𑀪𑀸𑀯𑀢𑁄 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸𑀤𑀺𑀯𑀺𑀲𑀬𑁄𑀧𑀺 𑀉𑀧𑁄𑀲𑀣𑀲𑀤𑁆𑀤𑁄 𑀲𑀸𑀫𑀜𑁆𑀜𑀭𑀽𑀧𑁄 𑀏𑀯, 𑀅𑀣 𑀓𑀲𑁆𑀫𑀸 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸𑀤𑀺𑀯𑀺𑀲𑁂𑀲𑀯𑀺𑀲𑀬𑁄 𑀯𑀼𑀢𑁆𑀢𑁄𑀢𑀺? 𑀲𑀘𑁆𑀘𑀫𑁂𑀢𑀁, 𑀅𑀬𑀁 𑀧𑀦𑀢𑁆𑀣𑁄 𑀢𑀸𑀤𑀺𑀲𑀁 𑀲𑀤𑁆𑀤𑀲𑀸𑀫𑀜𑁆𑀜𑀫𑀦𑀸𑀤𑀺𑀬𑀺𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀲𑀫𑁆𑀪𑀯𑀢𑁆𑀣𑀤𑀲𑁆𑀲𑀦𑀯𑀲𑁂𑀦𑁂𑀯 𑀯𑀼𑀢𑁆𑀢𑁄𑀢𑀺, 𑀏𑀯𑀁 𑀲𑀩𑁆𑀩𑀢𑁆𑀣. 𑀲𑀻𑀮𑀤𑀺𑀝𑁆𑀞𑀺𑀯𑀲𑁂𑀦 (𑀲𑀻𑀮𑀲𑀼𑀤𑁆𑀥𑀺𑀯𑀲𑁂𑀦 𑀤𑀻. 𑀦𑀺. 𑀝𑀻. 𑁧.𑁧𑁫𑁦) 𑀉𑀧𑁂𑀢𑁂𑀳𑀺 𑀲𑀫𑀕𑁆𑀕𑁂𑀳𑀺 𑀯𑀲𑀻𑀬𑀢𑀺 𑀦 𑀉𑀝𑁆𑀞𑀻𑀬𑀢𑀻𑀢𑀺 𑀉𑀧𑁄𑀲𑀣𑁄, 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄. 𑀲𑀫𑀸𑀤𑀸𑀦𑀯𑀲𑁂𑀦, 𑀅𑀥𑀺𑀝𑁆𑀞𑀸𑀦𑀯𑀲𑁂𑀦 𑀯𑀸 𑀉𑀧𑁂𑀘𑁆𑀘 𑀅𑀭𑀺𑀬𑀯𑀸𑀲𑀸𑀤𑀺𑀅𑀢𑁆𑀣𑀸𑀬 𑀯𑀲𑀺𑀢𑀩𑁆𑀩𑁄 𑀆𑀯𑀲𑀺𑀢𑀩𑁆𑀩𑁄𑀢𑀺 𑀉𑀧𑁄𑀲𑀣𑁄, 𑀲𑀻𑀮𑀁. 𑀅𑀦𑀲𑀦𑀸𑀤𑀺𑀯𑀲𑁂𑀦 𑀉𑀧𑁂𑀘𑁆𑀘 𑀯𑀲𑀺𑀢𑀩𑁆𑀩𑁄 𑀅𑀦𑀼𑀯𑀲𑀺𑀢𑀩𑁆𑀩𑁄𑀢𑀺 𑀉𑀧𑁄𑀲𑀣𑁄, 𑀯𑀢𑀲𑀫𑀸𑀤𑀸𑀦𑀲𑀗𑁆𑀔𑀸𑀢𑁄 𑀉𑀧𑀯𑀸𑀲𑁄. 𑀦𑀯𑀫𑀳𑀢𑁆𑀣𑀺𑀓𑀼𑀮𑀧𑀭𑀺𑀬𑀸𑀧𑀦𑁆𑀦𑁂 𑀳𑀢𑁆𑀣𑀺𑀦𑀸𑀕𑁂 𑀓𑀺𑀜𑁆𑀘𑀺 𑀓𑀺𑀭𑀺𑀬𑀫𑀦𑀧𑁂𑀓𑁆𑀔𑀺𑀢𑁆𑀯𑀸 𑀢𑀁𑀓𑀼𑀮𑀲𑀫𑁆𑀪𑀽𑀢𑀢𑀸𑀫𑀢𑁆𑀢𑀁 𑀧𑀢𑀺 𑀭𑀼𑀴𑁆𑀳𑀺𑀯𑀲𑁂𑀦𑁂𑀯 𑀉𑀧𑁄𑀲𑀣𑁄𑀢𑀺 𑀲𑀫𑀜𑁆𑀜𑀸, 𑀢𑀲𑁆𑀫𑀸 𑀢𑀢𑁆𑀣 𑀦𑀸𑀫𑀧𑀜𑁆𑀜𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀭𑀬𑁄 𑀉𑀧𑀕𑀦𑁆𑀢𑁆𑀯𑀸 𑀉𑀲𑁂𑀢𑀺 𑀤𑀸𑀳𑁂𑀢𑀻𑀢𑀺 𑀉𑀧𑁄𑀲𑀣𑁄, 𑀉𑀲𑀲𑀤𑁆𑀤𑁄 𑀤𑀸𑀳𑁂𑀢𑀺𑀧𑀺 𑀲𑀤𑁆𑀤𑀯𑀺𑀤𑀽 𑀯𑀤𑀦𑁆𑀢𑀺. 𑀤𑀺𑀯𑀲𑁂 𑀧𑀦 𑀉𑀧𑁄𑀲𑀣 𑀲𑀤𑁆𑀤𑀧𑀯𑀢𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀸𑀬𑁂𑀯. ‘‘𑀲𑀼𑀤𑁆𑀥𑀲𑁆𑀲 𑀯𑁂 𑀲𑀤𑀸𑀨𑀕𑁆𑀕𑀽’’𑀢𑀺𑀆𑀤𑀻𑀲𑀼 𑀲𑀼𑀤𑁆𑀥𑀲𑁆𑀲𑀸𑀢𑀺 𑀲𑀩𑁆𑀩𑀲𑁄 𑀓𑀺𑀮𑁂𑀲𑀫𑀮𑀸𑀪𑀸𑀯𑁂𑀦 𑀧𑀭𑀺𑀲𑀼𑀤𑁆𑀥𑀲𑁆𑀲. 𑀯𑁂𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀩𑁆𑀬𑀢𑁆𑀢𑀦𑁆𑀢𑀺 𑀯𑀸 𑀅𑀢𑁆𑀣𑁄. 𑀲𑀤𑀸𑀢𑀺 𑀦𑀺𑀘𑁆𑀘𑀓𑀸𑀮𑀫𑁆𑀧𑀺. 𑀨𑀕𑁆𑀕𑀽𑀢𑀺 𑀨𑀕𑁆𑀕𑀼𑀡𑀻𑀦𑀓𑁆𑀔𑀢𑁆𑀢𑀫𑁂𑀯 𑀬𑀼𑀢𑁆𑀢𑀁 𑀪𑀯𑀢𑀺, 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀘𑁂𑀢𑀲𑁆𑀲 𑀲𑀺𑀤𑁆𑀥𑀺. 𑀬𑀲𑁆𑀲 𑀳𑀺 𑀲𑀼𑀦𑁆𑀤𑀭𑀺𑀓𑀪𑀸𑀭𑀤𑁆𑀯𑀸𑀚𑀲𑁆𑀲 𑀦𑀸𑀫 𑀩𑁆𑀭𑀸𑀳𑁆𑀫𑀡𑀲𑁆𑀲 𑀨𑀕𑁆𑀕𑀼𑀡𑀫𑀸𑀲𑁂 𑀉𑀢𑁆𑀢𑀭𑀨𑀕𑁆𑀕𑀼𑀡𑀻𑀬𑀼𑀢𑁆𑀢𑀤𑀺𑀯𑀲𑁂 𑀢𑀺𑀢𑁆𑀣𑀦𑁆𑀳𑀸𑀦𑀁 𑀓𑀭𑁄𑀦𑁆𑀢𑀲𑁆𑀲 𑀲𑀁𑀯𑀘𑁆𑀙𑀭𑀫𑁆𑀧𑀺 𑀓𑀢𑀧𑀸𑀧𑀧𑀯𑀸𑀳𑀦𑀁 𑀳𑁄𑀢𑀻𑀢𑀺 𑀮𑀤𑁆𑀥𑀺. 𑀢𑀢𑁄 𑀢𑀁 𑀯𑀺𑀯𑁂𑀘𑁂𑀢𑀼𑀁 𑀇𑀤𑀁 𑀫𑀚𑁆𑀛𑀺𑀫𑀸𑀕𑀫𑀸𑀯𑀭𑁂 𑀫𑀽𑀮𑀧𑀡𑁆𑀡𑀸𑀲𑀓𑁂 𑀯𑀢𑁆𑀣𑀲𑀼𑀢𑁆𑀢𑁂 𑀪𑀕𑀯𑀢𑀸 𑀯𑀼𑀢𑁆𑀢𑀁. 𑀲𑀼𑀤𑁆𑀥𑀲𑁆𑀲𑀼𑀧𑁄𑀲𑀣𑁄 𑀲𑀤𑀸𑀢𑀺 𑀬𑀣𑀸𑀯𑀼𑀢𑁆𑀢𑀓𑀺𑀮𑁂𑀲𑀫𑀮𑀲𑀼𑀤𑁆𑀥𑀺𑀬𑀸 𑀧𑀭𑀺𑀲𑀼𑀤𑁆𑀥𑀲𑁆𑀲 𑀉𑀧𑁄𑀲𑀣𑀗𑁆𑀕𑀸𑀦𑀺, 𑀯𑀢𑀲𑀫𑀸𑀤𑀸𑀦𑀸𑀦𑀺 𑀘 𑀅𑀲𑀫𑀸𑀤𑀺𑀬𑀢𑁄𑀧𑀺 𑀦𑀺𑀘𑁆𑀘𑀓𑀸𑀮𑀁 𑀉𑀧𑁄𑀲𑀣𑀯𑀸𑀲𑁄 𑀏𑀯 𑀪𑀯𑀢𑀻𑀢𑀺 𑀅𑀢𑁆𑀣𑁄. ‘‘𑀦 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀻𑀲𑀼 ‘‘𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀦 𑀕𑀦𑁆𑀢𑀩𑁆𑀩𑁄’’𑀢𑀺 𑀦𑀻𑀳𑀭𑀺𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀉𑀧𑀯𑀲𑀺𑀢𑀩𑁆𑀩𑀤𑀺𑀯𑀲𑁄𑀢𑀺 𑀉𑀧𑀯𑀲𑀦𑀓𑀭𑀡𑀤𑀺𑀯𑀲𑁄, 𑀅𑀥𑀺𑀓𑀭𑀡𑁂 𑀯𑀸 𑀢𑀩𑁆𑀩𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄. 𑀏𑀯𑀜𑁆𑀳𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀺𑀩𑁆𑀩𑀘𑀦𑁂𑀦 𑀲𑀫𑁂𑀢𑀺. 𑀅𑀦𑁆𑀢𑁄𑀕𑀥𑀸𑀯𑀥𑀸𑀭𑀡𑁂𑀦, 𑀅𑀜𑁆𑀜𑀢𑁆𑀣𑀸𑀧𑁄𑀳𑀦𑁂𑀦 𑀘 𑀦𑀺𑀯𑀸𑀭𑀡𑀁 𑀲𑀦𑁆𑀥𑀸𑀬 ‘‘𑀲𑁂𑀲𑀤𑁆𑀯𑀬𑀦𑀺𑀯𑀸𑀭𑀡𑀢𑁆𑀣’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀧𑀦𑁆𑀦𑀭𑀲𑁂’’𑀢𑀺 𑀧𑀤𑀫𑀸𑀭𑀩𑁆𑀪 𑀤𑀺𑀯𑀲𑀯𑀲𑁂𑀦 𑀬𑀣𑀸𑀯𑀼𑀢𑁆𑀢𑀦𑀺𑀩𑁆𑀩𑀘𑀦𑀁 𑀓𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑁂𑀦𑁂𑀯 𑀯𑀼𑀢𑁆𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀧𑀜𑁆𑀘𑀤𑀲𑀦𑁆𑀦𑀁 𑀢𑀺𑀣𑀻𑀦𑀁 𑀧𑀽𑀭𑀡𑀯𑀲𑁂𑀦 ‘‘𑀧𑀦𑁆𑀦𑀭𑀲𑁄’’𑀢𑀺 𑀳𑀺 𑀤𑀺𑀯𑀲𑁄 𑀯𑀼𑀢𑁆𑀢𑁄.

‘‘𑀢𑀸𑀦𑀺 𑀏𑀢𑁆𑀣 𑀲𑀦𑁆𑀢𑀻’’𑀢𑀺 𑀏𑀢𑁆𑀢𑀓𑁂𑀬𑁂𑀯 𑀯𑀼𑀢𑁆𑀢𑁂 𑀦𑀦𑁆𑀯𑁂𑀢𑀸𑀦𑀺 𑀅𑀜𑁆𑀜𑀢𑁆𑀣𑀸𑀧𑀺 𑀲𑀦𑁆𑀢𑀻𑀢𑀺 𑀘𑁄𑀤𑀦𑀸 𑀲𑀺𑀬𑀸𑀢𑀺 𑀢𑀁 𑀦𑀺𑀯𑀸𑀭𑁂𑀢𑀼𑀁 ‘‘𑀢𑀤𑀸 𑀓𑀺𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀦𑁂𑀦 𑀩𑀳𑀼𑀲𑁄, 𑀅𑀢𑀺𑀲𑀬𑀢𑁄 𑀯𑀸 𑀏𑀢𑁆𑀣 𑀢𑀤𑁆𑀥𑀺𑀢𑀯𑀺𑀲𑀬𑁄 𑀧𑀬𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀘𑀸𑀢𑀼𑀫𑀸𑀲𑀻, 𑀘𑀸𑀢𑀼𑀫𑀸𑀲𑀺𑀦𑀻𑀢𑀺 𑀘 𑀧𑀘𑁆𑀘𑀬𑀯𑀺𑀲𑁂𑀲𑁂𑀦 𑀇𑀢𑁆𑀣𑀺𑀮𑀺𑀗𑁆𑀕𑁂𑀬𑁂𑀯 𑀧𑀭𑀺𑀬𑀸𑀬𑀯𑀘𑀦𑀁. 𑀧𑀭𑀺𑀬𑁄𑀲𑀸𑀦𑀪𑀽𑀢𑀸𑀢𑀺 𑀘 𑀧𑀽𑀭𑀡𑀪𑀸𑀯𑀫𑁂𑀯 𑀲𑀦𑁆𑀥𑀸𑀬 𑀯𑀤𑀢𑀺 𑀢𑀸𑀬 𑀲𑀳𑁂𑀯 𑀘𑀢𑀼𑀫𑀸𑀲𑀧𑀭𑀺𑀧𑀼𑀡𑁆𑀡𑀪𑀸𑀯𑀢𑁄. 𑀇𑀥𑀸𑀢𑀺 𑀧𑀸𑀴𑀺𑀬𑀁. 𑀢𑀻𑀳𑀺 𑀆𑀓𑀸𑀭𑁂𑀳𑀺 𑀧𑀽𑀭𑁂𑀢𑀻𑀢𑀺 𑀧𑀼𑀡𑁆𑀡𑀸𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀫𑀸𑀲𑀧𑀼𑀡𑁆𑀡𑀢𑀸𑀬𑀸’’𑀢𑀺𑀆𑀤𑀺𑀦𑀸. 𑀢𑀢𑁆𑀣 𑀢𑀤𑀸 𑀓𑀢𑁆𑀢𑀺𑀓𑀫𑀸𑀲𑀲𑁆𑀲 𑀧𑀼𑀡𑁆𑀡𑀢𑀸𑀬 𑀫𑀸𑀲𑀧𑀼𑀡𑁆𑀡𑀢𑀸. 𑀧𑀼𑀭𑀺𑀫𑀧𑀼𑀡𑁆𑀡𑀫𑀺𑀢𑁄 𑀳𑀺 𑀧𑀝𑁆𑀞𑀸𑀬 𑀬𑀸𑀯 𑀅𑀧𑀭𑀸 𑀧𑀼𑀡𑁆𑀡𑀫𑀻, 𑀢𑀸𑀯 𑀏𑀓𑁄 𑀫𑀸𑀲𑁄𑀢𑀺 𑀢𑀢𑁆𑀣 𑀯𑁄𑀳𑀸𑀭𑁄. 𑀯𑀲𑁆𑀲𑀸𑀦𑀲𑁆𑀲 𑀉𑀢𑀼𑀦𑁄 𑀧𑀼𑀡𑁆𑀡𑀢𑀸𑀬 𑀉𑀢𑀼𑀧𑀼𑀡𑁆𑀡𑀢𑀸. 𑀓𑀢𑁆𑀢𑀺𑀓𑀫𑀸𑀲𑀮𑀓𑁆𑀔𑀺𑀢𑀲𑁆𑀲 𑀲𑀁𑀯𑀘𑁆𑀙𑀭𑀲𑁆𑀲 𑀧𑀼𑀡𑁆𑀡𑀢𑀸𑀬 𑀲𑀁𑀯𑀘𑁆𑀙𑀭𑀧𑀼𑀡𑁆𑀡𑀢𑀸. 𑀧𑀼𑀭𑀺𑀫𑀓𑀢𑁆𑀢𑀺𑀓𑀫𑀸𑀲𑀢𑁄 𑀧𑀪𑀼𑀢𑀺 𑀬𑀸𑀯 𑀅𑀧𑀭𑀓𑀢𑁆𑀢𑀺𑀓𑀫𑀸𑀲𑁄, 𑀢𑀸𑀯 𑀏𑀓𑁄 𑀓𑀢𑁆𑀢𑀺𑀓𑀲𑀁𑀯𑀘𑁆𑀙𑀭𑁄𑀢𑀺 𑀏𑀯𑀁 𑀲𑀁𑀯𑀘𑁆𑀙𑀭𑀧𑀼𑀡𑁆𑀡𑀢𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀮𑁄𑀓𑀺𑀓𑀸𑀦𑀁 𑀫𑀢𑁂𑀦 𑀧𑀦 𑀫𑀸𑀲𑀯𑀲𑁂𑀦 𑀲𑀁𑀯𑀘𑁆𑀙𑀭𑀲𑀫𑀜𑁆𑀜𑀸 𑀮𑀓𑁆𑀔𑀺𑀢𑀸. 𑀢𑀣𑀸 𑀘 𑀮𑀓𑁆𑀔𑀡𑀁 𑀕𑀭𑀼𑀲𑀗𑁆𑀓𑀦𑁆𑀢𑀺𑀯𑀲𑁂𑀦. 𑀯𑀼𑀢𑁆𑀢𑀜𑁆𑀳𑀺 𑀚𑁄𑀢𑀺𑀲𑀢𑁆𑀣𑁂 𑁋

‘‘𑀦𑀓𑁆𑀔𑀢𑁆𑀢𑁂𑀦 𑀲𑀳𑁄𑀤𑀬-𑀫𑀢𑁆𑀣𑀁 𑀬𑀸𑀢𑀺 𑀲𑀽𑀭𑀫𑀦𑁆𑀢𑀺;

𑀢𑀲𑁆𑀲 𑀲𑀗𑁆𑀓𑀁 𑀢𑀢𑁆𑀭 𑀯𑀢𑁆𑀢𑀩𑁆𑀩𑀁, 𑀯𑀲𑁆𑀲𑀁 𑀫𑀸𑀲𑀓𑀫𑁂𑀦𑁂𑀯𑀸’’𑀢𑀺.

𑀫𑀺𑀦𑀻𑀬𑀢𑀺 𑀤𑀺𑀯𑀲𑁄 𑀏𑀢𑁂𑀦𑀸𑀢𑀺 𑀫𑀸. 𑀢𑀲𑁆𑀲 𑀳𑀺 𑀕𑀢𑀺𑀬𑀸 𑀤𑀺𑀯𑀲𑁄 𑀫𑀺𑀦𑀺𑀢𑀩𑁆𑀩𑁄 ‘‘𑀧𑀸𑀝𑀺𑀧𑀤𑁄 𑀤𑀼𑀢𑀺𑀬𑀸, 𑀢𑀢𑀺𑀬𑀸’’𑀢𑀺𑀆𑀤𑀺𑀦𑀸. 𑀏𑀢𑁆𑀣 𑀧𑀼𑀡𑁆𑀡𑁄𑀢𑀺 𑀏𑀢𑀺𑀲𑁆𑀲𑀸 𑀭𑀢𑁆𑀢𑀺𑀬𑀸 𑀲𑀩𑁆𑀩𑀓𑀮𑀸𑀧𑀸𑀭𑀺𑀧𑀽𑀭𑀺𑀬𑀸 𑀧𑀼𑀡𑁆𑀡𑁄. 𑀘𑀦𑁆𑀤𑀲𑁆𑀲 𑀳𑀺 𑀲𑁄𑀴𑀲𑀫𑁄 𑀪𑀸𑀕𑁄 ‘‘𑀓𑀮𑀸’’𑀢𑀺 𑀯𑀼𑀘𑁆𑀘𑀢𑀺, 𑀢𑀤𑀸 𑀘 𑀘𑀦𑁆𑀤𑁄 𑀲𑀩𑁆𑀩𑀸𑀲𑀫𑁆𑀧𑀺 𑀲𑁄𑀴𑀲𑀦𑁆𑀦𑀁 𑀓𑀮𑀸𑀦𑀁 𑀯𑀲𑁂𑀦 𑀧𑀭𑀺𑀧𑀼𑀡𑁆𑀡𑁄 𑀳𑀼𑀢𑁆𑀯𑀸 𑀤𑀺𑀲𑁆𑀲𑀢𑀺. 𑀏𑀢𑁆𑀣 𑀘 ‘‘𑀢𑀤𑀳𑀼𑀧𑁄𑀲𑀣𑁂 𑀧𑀦𑁆𑀦𑀭𑀲𑁂’’𑀢𑀺 𑀧𑀤𑀸𑀦𑀺 𑀤𑀺𑀯𑀲𑀯𑀲𑁂𑀦 𑀯𑀼𑀢𑁆𑀢𑀸𑀦𑀺, ‘‘𑀓𑁄𑀫𑀼𑀤𑀺𑀬𑀸’’𑀢𑀺𑀆𑀤𑀻𑀦𑀺 𑀢𑀤𑁂𑀓𑀤𑁂𑀲𑀭𑀢𑁆𑀢𑀺𑀯𑀲𑁂𑀦.

𑀓𑀲𑁆𑀫𑀸 𑀧𑀦 𑀭𑀸𑀚𑀸 𑀅𑀫𑀘𑁆𑀘𑀧𑀭𑀺𑀯𑀼𑀢𑁄 𑀦𑀺𑀲𑀺𑀦𑁆𑀦𑁄, 𑀦 𑀏𑀓𑀓𑁄𑀯𑀸𑀢𑀺 𑀘𑁄𑀤𑀦𑀸𑀬 𑀲𑁄𑀥𑀦𑀸𑀮𑁂𑀲𑀁 𑀤𑀲𑁆𑀲𑁂𑀢𑀼𑀁 𑀧𑀸𑀴𑀺𑀧𑀤𑀢𑁆𑀣𑀫𑁂𑀯 𑀅𑀯𑀢𑁆𑀯𑀸 ‘‘𑀏𑀯𑀭𑀽𑀧𑀸𑀬𑀸’’𑀢𑀺𑀆𑀤𑀻𑀦𑀺𑀧𑀺 𑀯𑀤𑀢𑀺. 𑀏𑀢𑁂𑀳𑀺 𑀘𑀸𑀬𑀁 𑀲𑁄𑀥𑀦𑀸𑀮𑁂𑀲𑁄 𑀤𑀲𑁆𑀲𑀺𑀢𑁄 ‘‘𑀏𑀯𑀁 𑀭𑀼𑀘𑀺𑀬𑀫𑀸𑀦𑀸𑀬 𑀭𑀢𑁆𑀢𑀺𑀬𑀸 𑀢𑀤𑀸 𑀧𑀯𑀢𑁆𑀢𑀢𑁆𑀢𑀸 𑀢𑀣𑀸 𑀧𑀭𑀺𑀯𑀼𑀢𑁄 𑀦𑀺𑀲𑀺𑀦𑁆𑀦𑁄’’𑀢𑀺. 𑀥𑁄𑀯𑀺𑀬𑀫𑀸𑀦𑀤𑀺𑀲𑀸𑀪𑀸𑀕𑀸𑀬𑀸𑀢𑀺 𑀏𑀢𑁆𑀣𑀸𑀧𑀺 𑀯𑀺𑀬𑀲𑀤𑁆𑀤𑁄 𑀬𑁄𑀚𑁂𑀢𑀩𑁆𑀩𑁄. 𑀭𑀚𑀢𑀯𑀺𑀫𑀸𑀦𑀦𑀺𑀘𑁆𑀙𑀭𑀺𑀢𑁂𑀳𑀻𑀢𑀺 𑀭𑀚𑀢𑀯𑀺𑀫𑀸𑀦𑀢𑁄 𑀦𑀺𑀓𑁆𑀔𑀦𑁆𑀢𑁂𑀳𑀺, 𑀭𑀚𑀢𑀯𑀺𑀫𑀸𑀦𑀧𑁆𑀧𑀪𑀸𑀬 𑀯𑀸 𑀯𑀺𑀧𑁆𑀨𑀼𑀭𑀺𑀢𑁂𑀳𑀺. ‘‘𑀯𑀺𑀲𑀭𑁄’’𑀢𑀺 𑀇𑀤𑀁 𑀫𑀼𑀢𑁆𑀢𑀸𑀯𑀴𑀺𑀆𑀤𑀻𑀦𑀫𑁆𑀧𑀺 𑀯𑀺𑀲𑁂𑀲𑀦𑀧𑀤𑀁. 𑀅𑀩𑁆𑀪𑀁 𑀥𑀽𑀫𑁄 𑀭𑀚𑁄 𑀭𑀸𑀳𑀽𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀉𑀧𑀓𑁆𑀓𑀺𑀮𑁂𑀲𑀸 𑀧𑀸𑀴𑀺𑀦𑀬𑁂𑀦 (𑀅. 𑀦𑀺. 𑁪.𑁫𑁦; 𑀧𑀸𑀘𑀺. 𑁪𑁪𑁭). 𑀭𑀸𑀚𑀸𑀫𑀘𑁆𑀘𑁂𑀳𑀻𑀢𑀺 𑀭𑀸𑀚𑀓𑀼𑀮𑀲𑀫𑀼𑀤𑀸𑀕𑀢𑁂𑀳𑀺 𑀅𑀫𑀘𑁆𑀘𑁂𑀳𑀺. 𑀅𑀣 𑀯𑀸 𑀅𑀦𑀼𑀬𑀼𑀢𑁆𑀢𑀓𑀭𑀸𑀚𑀽𑀳𑀺 𑀘𑁂𑀯 𑀅𑀫𑀘𑁆𑀘𑁂𑀳𑀺 𑀘𑀸𑀢𑀺 𑀅𑀢𑁆𑀣𑁄. 𑀓𑀜𑁆𑀘𑀦𑀸𑀲𑀦𑁂𑀢𑀺 𑀲𑀻𑀳𑀸𑀲𑀦𑁂. ‘‘𑀭𑀜𑁆𑀜𑀁 𑀢𑀼 𑀳𑁂𑀫𑀫𑀸𑀲𑀦𑀁, 𑀲𑀻𑀳𑀸𑀲𑀦𑀫𑀣𑁄 𑀯𑀸𑀴𑀩𑀻𑀚𑀦𑀺𑀢𑁆𑀣𑀻 𑀘 𑀘𑀸𑀫𑀭’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁. 𑀓𑀲𑁆𑀫𑀸 𑀦𑀺𑀲𑀺𑀦𑁆𑀦𑁄𑀢𑀺 𑀦𑀺𑀲𑀻𑀤𑀦𑀫𑀢𑁆𑀢𑁂 𑀘𑁄𑀤𑀦𑀸. 𑀏𑀢 𑀦𑁆𑀢𑀺 𑀓𑀦𑁆𑀤𑀦𑀁, 𑀧𑀩𑁄𑀥𑀦𑀁 𑀯𑀸. 𑀇𑀢𑀻𑀢𑀺 𑀇𑀫𑀺𑀦𑀸 𑀳𑁂𑀢𑀼𑀦𑀸. 𑀦𑀓𑁆𑀔𑀢𑁆𑀢 𑀦𑁆𑀢𑀺 𑀓𑀢𑁆𑀢𑀺𑀓𑀸𑀦𑀓𑁆𑀔𑀢𑁆𑀢𑀙𑀡𑀁. 𑀲𑀫𑁆𑀫𑀸 𑀖𑁄𑀲𑀺𑀢𑀩𑁆𑀩𑀁 𑀏𑀢𑀭𑀳𑀺 𑀦𑀓𑁆𑀔𑀢𑁆𑀢𑀦𑁆𑀢𑀺 𑀲𑀗𑁆𑀖𑀼𑀝𑁆𑀞𑀁. 𑀧𑀜𑁆𑀘𑀯𑀡𑁆𑀡𑀓𑀼𑀲𑀼𑀫𑁂𑀳𑀺 𑀮𑀸𑀚𑁂𑀦, 𑀧𑀼𑀡𑁆𑀡𑀖𑀝𑁂𑀳𑀺 𑀘 𑀧𑀝𑀺𑀫𑀡𑁆𑀟𑀺𑀢𑀁 𑀖𑀭𑁂𑀲𑀼 𑀤𑁆𑀯𑀸𑀭𑀁 𑀬𑀲𑁆𑀲 𑀢𑀤𑁂𑀢𑀁 𑀦𑀕𑀭𑀁 𑀧𑀜𑁆𑀘…𑀧𑁂… 𑀤𑁆𑀯𑀸𑀭𑀁.𑀥𑀚𑁄 𑀯𑀝𑁄. 𑀧𑀝𑀸𑀓𑁄 𑀧𑀝𑁆𑀝𑁄𑀢𑀺 𑀲𑀻𑀳𑀴𑀺𑀬𑀸 𑀯𑀤𑀦𑁆𑀢𑀺. 𑀢𑀤𑀸 𑀓𑀺𑀭 𑀧𑀤𑀻𑀧𑀼𑀚𑁆𑀚𑀮𑀦𑀲𑀻𑀲𑁂𑀦 𑀓𑀢𑀦𑀓𑁆𑀔𑀢𑁆𑀢𑀁. 𑀢𑀣𑀸 𑀳𑀺 𑀉𑀫𑁆𑀫𑀸𑀤𑀦𑁆𑀢𑀺𑀚𑀸𑀢𑀓𑀸𑀤𑀻𑀲𑀼𑀧𑀺 (𑀚𑀸. 𑁨.𑁧𑁮.𑁫𑁭) 𑀓𑀢𑁆𑀢𑀺𑀓𑀫𑀸𑀲𑁂 𑀏𑀯𑀫𑁂𑀯 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀲𑀫𑀼𑀚𑁆𑀚𑀮𑀺𑀢𑀤𑀻𑀧𑀫𑀸𑀮𑀸𑀮𑀗𑁆𑀓𑀢𑀲𑀩𑁆𑀩𑀤𑀺𑀲𑀸𑀪𑀸𑀕’’𑀦𑁆𑀢𑀺. 𑀯𑀻𑀣𑀺 𑀦𑀸𑀫 𑀭𑀣𑀺𑀓𑀸 𑀫𑀳𑀸𑀫𑀕𑁆𑀕𑁄. 𑀭𑀘𑁆𑀙𑀸 𑀦𑀸𑀫 𑀅𑀦𑀺𑀩𑁆𑀩𑀺𑀤𑁆𑀥𑀸 𑀔𑀼𑀤𑁆𑀤𑀓𑀫𑀕𑁆𑀕𑁄. 𑀢𑀢𑁆𑀣 𑀢𑀢𑁆𑀣 𑀦𑀺𑀲𑀺𑀦𑁆𑀦𑀯𑀲𑁂𑀦 𑀲𑀫𑀸𑀦𑀪𑀸𑀕𑁂𑀦 𑀧𑀸𑀝𑀺𑀬𑁂𑀓𑁆𑀓𑀁 𑀦𑀓𑁆𑀔𑀢𑁆𑀢𑀓𑀻𑀴𑀁 𑀅𑀦𑀼𑀪𑀯𑀫𑀸𑀦𑁂𑀦 𑀲𑀫𑀪𑀺𑀓𑀺𑀡𑁆𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀏𑀯𑀁 𑀯𑀢𑁆𑀯𑀸𑀧𑀺 𑀢𑀢𑁆𑀣𑁂𑀯 𑀇𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑀦𑁆𑀢𑀺 𑀅𑀢𑁆𑀣𑁄.

𑀉𑀤𑀸𑀦𑀁 𑀉𑀤𑀸𑀳𑀸𑀭𑁄𑀢𑀺 𑀅𑀢𑁆𑀣𑀢𑁄 𑀏𑀓𑀁. 𑀫𑀸𑀦𑀦𑁆𑀢𑀺 𑀫𑀸𑀦𑀧𑀢𑁆𑀢𑀁 𑀓𑀢𑁆𑀢𑀼𑀪𑀽𑀢𑀁. 𑀙𑀟𑁆𑀟𑀦𑀯𑀲𑁂𑀦 𑀅𑀯𑀲𑁂𑀓𑁄. 𑀲𑁄𑀢𑀯𑀲𑁂𑀦 𑀑𑀖𑁄. 𑀧𑀻𑀢𑀺𑀯𑀘𑀦𑀦𑁆𑀢𑀺 𑀧𑀻𑀢𑀺𑀲𑀫𑀼𑀝𑁆𑀞𑀸𑀦𑀯𑀘𑀦𑀁 𑀓𑀫𑁆𑀫𑀪𑀽𑀢𑀁. 𑀳𑀤𑀬𑀦𑁆𑀢𑀺 𑀘𑀺𑀢𑁆𑀢𑀁 𑀓𑀢𑁆𑀢𑀼𑀪𑀽𑀢𑀁. 𑀕𑀳𑁂𑀢𑀼𑀦𑁆𑀢𑀺 𑀩𑀳𑀺 𑀅𑀦𑀺𑀘𑁆𑀙𑀭𑀡𑀯𑀲𑁂𑀦 𑀕𑀡𑁆𑀳𑀺𑀢𑀼𑀁, 𑀳𑀤𑀬𑀦𑁆𑀢𑁄𑀬𑁂𑀯 𑀞𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀥𑀺𑀓𑀁 𑀳𑀼𑀢𑁆𑀯𑀸’’𑀢𑀺𑀆𑀤𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀁 𑀯𑀘𑀦𑀁 𑀧𑀝𑀺𑀕𑁆𑀕𑀸𑀳𑀓 𑀦𑀺𑀭𑀧𑁂𑀓𑁆𑀔𑀁 𑀓𑁂𑀯𑀮𑀁 𑀉𑀴𑀸𑀭𑀸𑀬 𑀧𑀻𑀢𑀺𑀬𑀸 𑀯𑀲𑁂𑀦 𑀲𑀭𑀲𑀢𑁄 𑀲𑀳𑀲𑀸𑀯 𑀫𑀼𑀔𑀢𑁄 𑀦𑀺𑀘𑁆𑀙𑀭𑀢𑀺, 𑀢𑀤𑁂𑀯𑀺𑀥 ‘‘𑀉𑀤𑀸𑀦’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀦𑁆𑀢𑀺.

𑀤𑁄𑀲𑁂𑀳𑀺 𑀇𑀢𑀸 𑀕𑀢𑀸 𑀅𑀧𑀕𑀢𑀸𑀢𑀺 𑀤𑁄𑀲𑀺𑀦𑀸 𑀢-𑀓𑀸𑀭𑀲𑁆𑀲 𑀦-𑀓𑀸𑀭𑀁 𑀓𑀢𑁆𑀯𑀸 𑀬𑀣𑀸 ‘‘𑀓𑀺𑀮𑁂𑀲𑁂 𑀚𑀺𑀢𑁄 𑀯𑀺𑀚𑀺𑀢𑀸𑀯𑀻𑀢𑀺 𑀚𑀺𑀦𑁄’’𑀢𑀺 𑀆𑀳 ‘‘𑀤𑁄𑀲𑀸𑀧𑀕𑀢𑀸’’𑀢𑀺. 𑀬𑀤𑀺𑀧𑀺 𑀲𑀼𑀢𑁆𑀢𑁂 𑀯𑀼𑀢𑁆𑀢𑀁 ‘‘𑀘𑀢𑁆𑀢𑀸𑀭𑁄𑀫𑁂 𑀪𑀺𑀓𑁆𑀔𑀯𑁂 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀉𑀧𑀓𑁆𑀓𑀺𑀮𑁂𑀲𑀸, 𑀬𑁂𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀉𑀧𑀓𑁆𑀓𑀺𑀮𑀺𑀝𑁆𑀞𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀦 𑀢𑀧𑀦𑁆𑀢𑀺 𑀦 𑀪𑀸𑀲𑀦𑁆𑀢𑀺 𑀦 𑀯𑀺𑀭𑁄𑀘𑀦𑁆𑀢𑀺. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀅𑀩𑁆𑀪𑀸 𑀪𑀺𑀓𑁆𑀔𑀯𑁂…𑀧𑁂… 𑀫𑀳𑀺𑀓𑀸. 𑀥𑀽𑀫𑁄 𑀭𑀚𑁄. 𑀭𑀸𑀳𑀼 𑀪𑀺𑀓𑁆𑀔𑀯𑁂 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀉𑀧𑀓𑁆𑀓𑀺𑀮𑁂𑀲𑁄’’𑀢𑀺, (𑀘𑀽𑀴𑀯. 𑁪𑁪𑁭) 𑀢𑀣𑀸𑀧𑀺 𑀢𑀢𑀺𑀬𑀼𑀧𑀓𑁆𑀓𑀺𑀮𑁂𑀲𑀲𑁆𑀲 𑀧𑀪𑁂𑀤𑀤𑀲𑁆𑀲𑀦 𑀯𑀲𑁂𑀦 𑀅𑀝𑁆𑀞𑀓𑀣𑀸𑀦𑀬𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀧𑀜𑁆𑀘𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀻’’𑀢𑀺 𑀯𑀼𑀢𑁆𑀢𑀁. 𑀅𑀬𑀫𑀢𑁆𑀣𑁄 𑀘 𑀭𑀫𑀡𑀻𑀬𑀸𑀤𑀺𑀲𑀤𑁆𑀤𑀬𑁄𑀕𑀢𑁄 𑀜𑀸𑀬𑀢𑀻𑀢𑀺 𑀆𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺. 𑀅𑀦𑀻𑀬-𑀲𑀤𑁆𑀤𑁄𑀧𑀺 𑀩𑀳𑀼𑀮𑀸 𑀓𑀢𑁆𑀯𑀢𑁆𑀣𑀸𑀪𑀺𑀥𑀸𑀬𑀓𑁄 𑀬𑀣𑀸 ‘‘𑀦𑀺𑀬𑁆𑀬𑀸𑀦𑀺𑀓𑀸 𑀥𑀫𑁆𑀫𑀸’’𑀢𑀺 (𑀥. 𑀲. 𑀤𑀼𑀓𑀫𑀸𑀢𑀺𑀓𑀸 𑁯𑁬) 𑀤𑀲𑁆𑀲𑁂𑀢𑀺 ‘‘𑀭𑀫𑀬𑀢𑀻’’𑀢𑀺 𑀇𑀫𑀺𑀦𑀸. 𑀚𑀼𑀡𑁆𑀳𑀸𑀯𑀲𑁂𑀦 𑀭𑀢𑁆𑀢𑀺𑀬𑀸 𑀲𑀼𑀭𑀽𑀧𑀢𑁆𑀢𑀫𑀸𑀳 ‘‘𑀯𑀼𑀢𑁆𑀢𑀤𑁄𑀲𑀯𑀺𑀫𑀼𑀢𑁆𑀢𑀸𑀬𑀸’’𑀢𑀺𑀆𑀤𑀺𑀦𑀸. 𑀅𑀩𑁆𑀪𑀸𑀤𑀬𑁄 𑀘𑁂𑀢𑁆𑀣 𑀯𑀼𑀢𑁆𑀢𑀤𑁄𑀲𑀸. 𑀅𑀬𑀜𑁆𑀘 𑀳𑁂𑀢𑀼 ‘‘𑀤𑀲𑁆𑀲𑀺𑀢𑀼𑀁 𑀬𑀼𑀢𑁆𑀢𑀸’’𑀢𑀺 𑀏𑀢𑁆𑀣𑀸𑀧𑀺 𑀲𑀫𑁆𑀩𑀚𑁆𑀛𑀺𑀢𑀩𑁆𑀩𑁄. 𑀢𑁂𑀦 𑀓𑀸𑀭𑀡𑁂𑀦, 𑀉𑀢𑀼𑀲𑀫𑁆𑀧𑀢𑁆𑀢𑀺𑀬𑀸 𑀘 𑀧𑀸𑀲𑀸𑀤𑀺𑀓𑀢𑀸 𑀤𑀝𑁆𑀞𑀩𑁆𑀩𑀸. 𑀈𑀤𑀺𑀲𑀸𑀬 𑀭𑀢𑁆𑀢𑀺𑀬𑀸 𑀬𑀼𑀢𑁆𑀢𑁄 𑀤𑀺𑀯𑀲𑁄 𑀫𑀸𑀲𑁄 𑀉𑀢𑀼 𑀲𑀁𑀯𑀘𑁆𑀙𑀭𑁄𑀢𑀺 𑀏𑀯𑀁 𑀤𑀺𑀯𑀲𑀫𑀸𑀲𑀸𑀤𑀻𑀦𑀁 𑀮𑀓𑁆𑀔𑀡𑀸 𑀲𑀮𑁆𑀮𑀓𑁆𑀔𑀡𑀼𑀧𑀸𑀬𑀸 𑀪𑀯𑀺𑀢𑀼𑀁 𑀬𑀼𑀢𑁆𑀢𑀸, 𑀢𑀲𑁆𑀫𑀸 𑀮𑀓𑁆𑀔𑀺𑀢𑀩𑁆𑀩𑀸𑀢𑀺 𑀮𑀓𑁆𑀔𑀡𑀺𑀬𑀸, 𑀲𑀸 𑀏𑀯 𑀮𑀓𑁆𑀔𑀜𑁆𑀜𑀸 𑀬-𑀯𑀢𑁄 𑀡-𑀓𑀸𑀭𑀲𑁆𑀲 𑀜-𑀓𑀸𑀭𑀸𑀤𑁂𑀲𑀯𑀲𑁂𑀦 𑀬𑀣𑀸 ‘‘𑀧𑁄𑀓𑁆𑀔𑀭𑀜𑁆𑀜𑁄 𑀲𑀼𑀫𑀸𑀧𑀺𑀢𑀸’’𑀢𑀺 𑀆𑀳 ‘‘𑀤𑀺𑀯𑀲𑀫𑀸𑀲𑀸𑀤𑀻𑀦’’𑀦𑁆𑀢𑀺𑀆𑀤𑀺.

‘‘𑀬𑀁 𑀦𑁄 𑀧𑀬𑀺𑀭𑀼𑀧𑀸𑀲𑀢𑁄 𑀘𑀺𑀢𑁆𑀢𑀁 𑀧𑀲𑀻𑀤𑁂𑀬𑁆𑀬𑀸’’𑀢𑀺 𑀯𑀘𑀦𑀢𑁄 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸𑀢𑀺 𑀏𑀢𑁆𑀣 𑀧𑀭𑀫𑀢𑁆𑀣𑀲𑀫𑀡𑁄, 𑀧𑀭𑀫𑀢𑁆𑀣𑀩𑁆𑀭𑀸𑀳𑁆𑀫𑀡𑁄 𑀘 𑀅𑀥𑀺𑀧𑁆𑀧𑁂𑀢𑁄, 𑀦 𑀧𑀦 𑀧𑀩𑁆𑀩𑀚𑁆𑀚𑀸𑀫𑀢𑁆𑀢𑀲𑀫𑀡𑁄, 𑀦 𑀘 𑀚𑀸𑀢𑀺𑀫𑀢𑁆𑀢𑀩𑁆𑀭𑀸𑀳𑁆𑀫𑀡𑁄𑀢𑀺 𑀯𑀼𑀢𑁆𑀢𑀁 ‘‘𑀲𑀫𑀺𑀢𑀧𑀸𑀧𑀢𑀸𑀬𑀸’’𑀢𑀺𑀆𑀤𑀺. 𑀩𑀳𑀢𑀺 𑀧𑀸𑀧𑁂 𑀩𑀳𑀺 𑀓𑀭𑁄𑀢𑀻𑀢𑀺 𑀩𑁆𑀭𑀸𑀳𑁆𑀫𑀡𑁄 𑀦𑀺𑀭𑀼𑀢𑁆𑀢𑀺𑀦𑀬𑁂𑀦. 𑀩𑀳𑀼𑀯𑀘𑀦𑁂 𑀯𑀢𑁆𑀢𑀩𑁆𑀩𑁂 𑀏𑀓𑀯𑀘𑀦𑀁, 𑀏𑀓𑀯𑀘𑀦𑁂 𑀯𑀸 𑀯𑀢𑁆𑀢𑀩𑁆𑀩𑁂 𑀩𑀳𑀼𑀯𑀘𑀦𑀁 𑀯𑀘𑀦𑀩𑁆𑀬𑀢𑁆𑀢𑀬𑁄 𑀯𑀘𑀦𑀯𑀺𑀧𑀮𑁆𑀮𑀸𑀲𑁄𑀢𑀺 𑀅𑀢𑁆𑀣𑁄. 𑀇𑀥 𑀧𑀦 ‘‘𑀧𑀬𑀺𑀭𑀼𑀧𑀸𑀲𑀢’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀧𑀬𑀺𑀭𑀼𑀧𑀸𑀲𑀢𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀩𑀳𑀼𑀯𑀘𑀦𑁂 𑀯𑀢𑁆𑀢𑀩𑁆𑀩𑁂 𑀏𑀓𑀯𑀘𑀦𑀯𑀲𑁂𑀦 𑀯𑀘𑀦𑀩𑁆𑀬𑀢𑁆𑀢𑀬𑁄 𑀤𑀲𑁆𑀲𑀺𑀢𑁄. 𑀅𑀢𑁆𑀢𑀦𑀺, 𑀕𑀭𑀼𑀝𑁆𑀞𑀸𑀦𑀺𑀬𑁂 𑀘 𑀳𑀺 𑀏𑀓𑀲𑁆𑀫𑀺𑀫𑁆𑀧𑀺 𑀩𑀳𑀼𑀯𑀘𑀦𑀧𑁆𑀧𑀬𑁄𑀕𑁄 𑀦𑀺𑀭𑀼𑀴𑁆𑀳𑁄. 𑀧𑀬𑀺𑀭𑀼𑀧𑀸𑀲𑀢𑁄𑀢𑀺 𑀘 𑀯𑀡𑁆𑀡𑀯𑀺𑀧𑀭𑀺𑀬𑀸𑀬𑀦𑀺𑀤𑁆𑀤𑁂𑀲𑁄 𑀏𑀲 𑀬𑀣𑀸 ‘‘𑀧𑀬𑀺𑀭𑀼𑀤𑀸𑀳𑀸𑀲𑀻’’𑀢𑀺. 𑀅𑀬𑀜𑁆𑀳𑀺 𑀩𑀳𑀼𑀮𑀁 𑀤𑀺𑀝𑁆𑀞𑀧𑀬𑁄𑀕𑁄, 𑀬𑀤𑀺𑀤𑀁 𑀧𑀭𑀺𑀲𑀤𑁆𑀤𑁂 𑀬-𑀓𑀸𑀭𑀧𑀭𑁂 𑀯𑀡𑁆𑀡𑀯𑀺𑀧𑀭𑀺𑀬𑀸𑀬𑁄. 𑀢𑀣𑀸 𑀳𑀺 𑀅𑀓𑁆𑀔𑀭𑀘𑀺𑀦𑁆𑀢𑀓𑀸 𑀯𑀤𑀦𑁆𑀢𑀺 ‘‘𑀧𑀭𑀺𑀬𑀸𑀤𑀻𑀦𑀁 𑀭𑀬𑀸𑀤𑀺𑀯𑀡𑁆𑀡𑀲𑁆𑀲 𑀬𑀭𑀸𑀤𑀻𑀳𑀺 𑀯𑀺𑀧𑀭𑀺𑀬𑀸𑀬𑁄’’𑀢𑀺. 𑀬𑀦𑁆𑀢𑀺 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸. 𑀇𑀫𑀺𑀦𑀸 𑀲𑀩𑁆𑀩𑁂𑀦𑀧𑀺 𑀯𑀘𑀦𑁂𑀦𑀸𑀢𑀺 ‘‘𑀭𑀫𑀡𑀻𑀬𑀸 𑀯𑀢𑀸’’𑀢𑀺𑀆𑀤𑀺𑀯𑀘𑀦𑁂𑀦. 𑀑𑀪𑀸𑀲𑀦𑀺𑀫𑀺𑀢𑁆𑀢𑀓𑀫𑁆𑀫𑀦𑁆𑀢𑀺 𑀑𑀪𑀸𑀲𑀪𑀽𑀢𑀁 𑀦𑀺𑀫𑀺𑀢𑁆𑀢𑀓𑀫𑁆𑀫𑀁, 𑀧𑀭𑀺𑀩𑁆𑀬𑀢𑁆𑀢𑀁 𑀦𑀺𑀫𑀺𑀢𑁆𑀢𑀓𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀫𑀳𑀸𑀧𑀭𑀸𑀥𑀢𑀸𑀬𑀸𑀢𑀺 𑀫𑀳𑀸𑀤𑁄𑀲𑀢𑀸𑀬.

‘‘𑀢𑁂𑀦 𑀳𑀻’’𑀢𑀺𑀆𑀤𑀺 𑀢𑀤𑀢𑁆𑀣𑀯𑀺𑀯𑀭𑀡𑀁. 𑀤𑁂𑀯𑀤𑀢𑁆𑀢𑁄 𑀘𑀸𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀯𑀲𑁂𑀦 𑀅𑀢𑁆𑀣𑀼𑀧𑀦𑀬𑀦𑁂, 𑀢𑁂𑀦 𑀬𑀣𑀸 𑀭𑀸𑀚𑀸 𑀅𑀚𑀸𑀢𑀲𑀢𑁆𑀢𑀼 𑀅𑀢𑁆𑀢𑀦𑁄 𑀧𑀺𑀢𑀼 𑀅𑀭𑀺𑀬𑀲𑀸𑀯𑀓𑀲𑁆𑀲 𑀲𑀢𑁆𑀣𑀼 𑀉𑀧𑀝𑁆𑀞𑀸𑀓𑀲𑁆𑀲 𑀖𑀸𑀢𑀦𑁂𑀦 𑀫𑀳𑀸𑀧𑀭𑀸𑀥𑁄, 𑀏𑀯𑀁 𑀪𑀕𑀯𑀢𑁄 𑀫𑀳𑀸𑀦𑀢𑁆𑀣𑀓𑀭𑀲𑁆𑀲 𑀤𑁂𑀯𑀤𑀢𑁆𑀢𑀲𑁆𑀲 𑀅𑀧𑀲𑁆𑀲𑀬𑀪𑀸𑀯𑁂𑀦𑀸𑀧𑀻𑀢𑀺 𑀇𑀫𑀫𑀢𑁆𑀣𑀁 𑀉𑀧𑀦𑁂𑀢𑀺. 𑀢𑀲𑁆𑀲 𑀧𑀺𑀝𑁆𑀞𑀺𑀙𑀸𑀬𑀸𑀬𑀸𑀢𑀺 𑀯𑁄𑀳𑀸𑀭𑀫𑀢𑁆𑀢𑀁, 𑀢𑀲𑁆𑀲 𑀚𑀻𑀯𑀓𑀲𑁆𑀲 𑀧𑀺𑀝𑁆𑀞𑀺𑀅𑀧𑀲𑁆𑀲𑀬𑁂𑀦, 𑀢𑀁 𑀧𑀫𑀼𑀔𑀁 𑀓𑀢𑁆𑀯𑀸 𑀅𑀧𑀲𑁆𑀲𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀓𑁆𑀔𑁂𑀧𑀧𑀘𑁆𑀙𑁂𑀤𑀦𑀢𑁆𑀣𑀦𑁆𑀢𑀺 𑀯𑀓𑁆𑀔𑀫𑀸𑀦𑀸𑀬 𑀅𑀢𑁆𑀢𑀦𑁄 𑀓𑀣𑀸𑀬 𑀉𑀧𑁆𑀧𑀚𑁆𑀚𑀦𑀓𑀯𑀺𑀓𑁆𑀔𑁂𑀧𑀲𑁆𑀲 𑀧𑀘𑁆𑀙𑀺𑀦𑁆𑀤𑀦𑀢𑁆𑀣𑀁, 𑀅𑀦𑀼𑀧𑁆𑀧𑀚𑁆𑀚𑀦𑀢𑁆𑀣𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀢𑀲𑁆𑀲𑀁 𑀳𑀻’’𑀢𑀺𑀆𑀤𑀺. 𑀅𑀲𑀺𑀓𑁆𑀔𑀺𑀢𑀸𑀦𑀦𑁆𑀢𑀺 𑀓𑀸𑀬𑀯𑀘𑀻𑀲𑀁𑀬𑀫𑀦𑁂 𑀯𑀺𑀕𑀢𑀲𑀺𑀓𑁆𑀔𑀸𑀦𑀁. 𑀓𑀼𑀮𑀽𑀧𑀓𑁂𑀢𑀺 𑀓𑀼𑀮𑀫𑀼𑀧𑀕𑀢𑁂 𑀲𑀢𑁆𑀣𑀸𑀭𑁂. 𑀕𑀳𑀺𑀢𑀸𑀲𑀸𑀭𑀢𑀸𑀬𑀸𑀢𑀺 𑀕𑀳𑁂𑀢𑀩𑁆𑀩𑀕𑀼𑀡𑀲𑀸𑀭𑀯𑀺𑀕𑀢𑀢𑀸𑀬. 𑀦𑀺𑀩𑁆𑀩𑀺𑀓𑁆𑀔𑁂𑀧𑀦𑁆𑀢𑀺 𑀅𑀜𑁆𑀜𑁂𑀲𑀫𑀧𑀦𑀬𑀦𑀯𑀺𑀭𑀳𑀺𑀢𑀁.

𑀪𑀤𑁆𑀤𑀦𑁆𑀢𑀺 𑀅𑀯𑀲𑁆𑀲𑀬𑀲𑀫𑁆𑀧𑀦𑁆𑀦𑀢𑀸𑀬 𑀲𑀼𑀦𑁆𑀤𑀭𑀁.

𑁧𑁫𑁧. 𑀅𑀬𑀜𑁆𑀘𑀢𑁆𑀣𑁄 𑀇𑀫𑀸𑀬 𑀧𑀸𑀴𑀺𑀘𑁆𑀙𑀸𑀬𑀸𑀬 𑀅𑀥𑀺𑀕𑀢𑁄, 𑀇𑀫𑀫𑀢𑁆𑀣𑀫𑁂𑀯 𑀯𑀸 𑀅𑀦𑁆𑀢𑁄𑀕𑀥𑀁 𑀓𑀢𑁆𑀯𑀸 𑀧𑀸𑀴𑀺𑀬𑀫𑁂𑀯𑀁 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀢𑁂𑀦𑀸𑀳𑀸’’𑀢𑀺𑀆𑀤𑀺𑀦𑀸. 𑀅𑀲𑀢𑁆𑀣𑀸𑀧𑀺 𑀲𑀫𑀸𑀦𑁄 𑀲𑀢𑁆𑀣𑀸 𑀧𑀝𑀺𑀜𑁆𑀜𑀸𑀢𑁄 𑀬𑁂𑀦𑀸𑀢𑀺 𑀲𑀢𑁆𑀣𑀼𑀧𑀝𑀺𑀜𑁆𑀜𑀸𑀢𑁄, 𑀢𑀲𑁆𑀲 𑀅𑀩𑀼𑀤𑁆𑀥𑀲𑁆𑀲𑀸𑀧𑀺 𑀲𑀫𑀸𑀦𑀲𑁆𑀲 𑀩𑀼𑀤𑁆𑀥𑀧𑀝𑀺𑀜𑁆𑀜𑀸𑀢𑀲𑁆𑀲 ‘‘𑀅𑀳𑀫𑁂𑀓𑁄 𑀮𑁄𑀓𑁂 𑀅𑀢𑁆𑀣𑀥𑀫𑁆𑀫𑀸𑀦𑀼𑀲𑀸𑀲𑀓𑁄’’𑀢𑀺 𑀆𑀘𑀭𑀺𑀬𑀧𑀝𑀺𑀜𑁆𑀜𑀸𑀢𑀪𑀸𑀯𑀁 𑀯𑀸 𑀲𑀦𑁆𑀥𑀸𑀬 𑀏𑀯𑀁 𑀯𑀼𑀢𑁆𑀢𑀁. ‘‘𑀲𑁄 𑀓𑀺𑀭𑀸’’𑀢𑀺𑀆𑀤𑀺𑀦𑀸 𑀅𑀦𑀼𑀲𑁆𑀲𑀼𑀢𑀺𑀫𑀢𑁆𑀢𑀁 𑀧𑀢𑀺 𑀧𑁄𑀭𑀸𑀡𑀝𑁆𑀞𑀓𑀣𑀸𑀦𑀬𑁄𑀯 𑀓𑀺𑀭𑀲𑀤𑁆𑀤𑁂𑀦 𑀯𑀼𑀢𑁆𑀢𑁄. 𑀏𑀲 𑀦𑀬𑁄 𑀧𑀭𑀢𑁄 𑀫𑀓𑁆𑀔𑀮𑀺𑀧𑀤𑀦𑀺𑀩𑁆𑀩𑀘𑀦𑁂𑀧𑀺. 𑀏𑀓𑀽𑀦𑀤𑀸𑀲𑀲𑀢𑀁 𑀧𑀽𑀭𑀬𑀫𑀸𑀦𑁄𑀢𑀺 𑀏𑀓𑁂𑀦𑀽𑀦𑀤𑀸𑀲𑀲𑀢𑀁 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀅𑀦𑀽𑀦𑀤𑀸𑀲𑀲𑀢𑀁 𑀓𑀢𑁆𑀯𑀸 𑀧𑀽𑀭𑀬𑀫𑀸𑀦𑁄. 𑀏𑀯𑀁 𑀚𑀸𑀬𑀫𑀸𑀦𑁄 𑀘𑁂𑀲 𑀫𑀗𑁆𑀕𑀮𑀤𑀸𑀲𑁄 𑀚𑀸𑀢𑁄. 𑀚𑀸𑀢𑀭𑀽𑀧𑁂𑀦𑁂𑀯𑀸𑀢𑀺 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀯𑀺𑀚𑀸𑀢𑀯𑁂𑀲𑁂𑀦𑁂𑀯, 𑀬𑀣𑀸 𑀯𑀸 𑀲𑀢𑁆𑀢𑀸 𑀅𑀦𑀺𑀯𑀢𑁆𑀣𑀸 𑀅𑀧𑀸𑀭𑀼𑀢𑀸 𑀚𑀸𑀬𑀦𑁆𑀢𑀺, 𑀢𑀣𑀸 𑀚𑀸𑀢𑀭𑀽𑀧𑁂𑀦𑁂𑀯. 𑀉𑀧𑀲𑀗𑁆𑀓𑀫𑀦𑁆𑀢𑀻𑀢𑀺 𑀉𑀧𑀕𑀢𑀸 𑀪𑀚𑀦𑁆𑀢𑀸 𑀳𑁄𑀦𑁆𑀢𑀺. 𑀢𑀤𑁂𑀯 𑀧𑀩𑁆𑀩𑀚𑁆𑀚𑀁 𑀅𑀕𑁆𑀕𑀳𑁂𑀲𑀻𑀢𑀺 𑀢𑀤𑁂𑀯 𑀦𑀕𑁆𑀕𑀭𑀽𑀧𑀁 ‘‘𑀅𑀬𑀫𑁂𑀯 𑀧𑀩𑁆𑀩𑀚𑁆𑀚𑀸 𑀦𑀸𑀫 𑀲𑀺𑀬𑀸’’𑀢𑀺 𑀧𑀩𑁆𑀩𑀚𑁆𑀚𑀁 𑀓𑀢𑁆𑀯𑀸 𑀅𑀕𑁆𑀕𑀳𑁂𑀲𑀺. 𑀧𑀩𑁆𑀩𑀚𑀺𑀁𑀲𑀽𑀢𑀺 𑀢𑀁 𑀧𑀩𑁆𑀩𑀚𑀺𑀢𑀫𑀦𑀼𑀧𑀩𑁆𑀩𑀚𑀺𑀁𑀲𑀼.

‘‘𑀧𑀩𑁆𑀩𑀚𑀺𑀢𑀲𑀫𑀽𑀳𑀲𑀗𑁆𑀔𑀸𑀢𑁄’’𑀢𑀺 𑀏𑀢𑁂𑀦 𑀧𑀩𑁆𑀩𑀚𑀺𑀢𑀲𑀫𑀽𑀳𑀢𑀸𑀫𑀢𑁆𑀢𑁂𑀦 𑀲𑀗𑁆𑀖𑁄, 𑀦 𑀦𑀺𑀬𑁆𑀬𑀸𑀦𑀺𑀓𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀲𑀻𑀮𑀲𑀸𑀫𑀜𑁆𑀜𑀯𑀲𑁂𑀦 𑀲𑀁𑀳𑀢𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀅𑀲𑁆𑀲 𑀲𑀢𑁆𑀣𑀼𑀧𑀝𑀺𑀜𑁆𑀜𑀸𑀢𑀲𑁆𑀲 𑀧𑀭𑀺𑀯𑀸𑀭𑀪𑀸𑀯𑁂𑀦 𑀅𑀢𑁆𑀣𑀺. ‘‘𑀲𑀗𑁆𑀖𑀻 𑀕𑀡𑀻’’𑀢𑀺 𑀘𑁂𑀤𑀁 𑀧𑀭𑀺𑀬𑀸𑀬𑀯𑀘𑀦𑀁, 𑀲𑀗𑁆𑀓𑁂𑀢𑀫𑀢𑁆𑀢𑀢𑁄 𑀦𑀸𑀦𑀦𑁆𑀢𑀺 𑀆𑀳 ‘‘𑀲𑁆𑀯𑁂𑀯𑀸’’𑀢𑀺𑀆𑀤𑀺. 𑀲𑁆𑀯𑁂𑀯𑀸𑀢𑀺 𑀘 𑀧𑀩𑁆𑀩𑀚𑀺𑀢𑀲𑀫𑀽𑀳𑀲𑀗𑁆𑀔𑀸𑀢𑁄 𑀏𑀯. 𑀓𑁂𑀘𑀺 𑀧𑀦 ‘‘𑀧𑀩𑁆𑀩𑀚𑀺𑀢𑀲𑀫𑀽𑀳𑀯𑀲𑁂𑀦 𑀲𑀗𑁆𑀖𑀻, 𑀕𑀳𑀝𑁆𑀞𑀲𑀫𑀽𑀳𑀯𑀲𑁂𑀦 𑀕𑀡𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁 𑀕𑀡𑁂 𑀏𑀯 𑀮𑁄𑀓𑁂 𑀲𑀗𑁆𑀖-𑀲𑀤𑁆𑀤𑀲𑁆𑀲 𑀦𑀺𑀭𑀼𑀴𑁆𑀳𑀢𑁆𑀢𑀸. 𑀅𑀘𑁂𑀮𑀓𑀯𑀢𑀘𑀭𑀺𑀬𑀸𑀤𑀺 𑀅𑀢𑁆𑀢𑀦𑀸 𑀧𑀭𑀺𑀓𑀧𑁆𑀧𑀺𑀢𑀫𑀢𑁆𑀢𑀁 𑀆𑀘𑀸𑀭𑁄.𑀧𑀜𑁆𑀜𑀸𑀢𑁄 𑀧𑀸𑀓𑀝𑁄 𑀲𑀗𑁆𑀖𑀻𑀆𑀤𑀺𑀪𑀸𑀯𑁂𑀦. 𑀅𑀧𑁆𑀧𑀺𑀘𑁆𑀙𑁄 𑀲𑀦𑁆𑀢𑀼𑀝𑁆𑀞𑁄𑀢𑀺 𑀅𑀢𑁆𑀣𑀢𑁄 𑀏𑀓𑀁. 𑀢𑀢𑁆𑀣 𑀮𑀩𑁆𑀪𑀫𑀸𑀦𑀸𑀧𑁆𑀧𑀺𑀘𑁆𑀙𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑁆𑀧𑀺𑀘𑁆𑀙𑀢𑀸𑀬 𑀯𑀢𑁆𑀣𑀫𑁆𑀧𑀺 𑀦 𑀦𑀺𑀯𑀸𑀲𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀦 𑀳𑀺 𑀢𑀲𑁆𑀫𑀺𑀁 𑀲𑀸𑀲𑀦𑀺𑀓𑁂 𑀯𑀺𑀬 𑀲𑀦𑁆𑀢𑀕𑀼𑀡𑀦𑀺𑀕𑁆𑀕𑀽𑀳𑀡𑀮𑀓𑁆𑀔𑀡𑀸 𑀅𑀧𑁆𑀧𑀺𑀘𑁆𑀙𑀢𑀸 𑀮𑀩𑁆𑀪𑀢𑀺. 𑀬𑀲𑁄𑀢𑀺 𑀓𑀺𑀢𑁆𑀢𑀺𑀲𑀤𑁆𑀤𑁄. 𑀢𑀭𑀦𑁆𑀢𑀺 𑀏𑀢𑁂𑀦 𑀲𑀁𑀲𑀸𑀭𑁄𑀖𑀦𑁆𑀢𑀺 𑀏𑀯𑀁 𑀲𑀫𑁆𑀫𑀢𑀢𑀸𑀬 𑀮𑀤𑁆𑀥𑀺 𑀢𑀺𑀢𑁆𑀣𑀁 𑀦𑀸𑀫 ‘‘𑀲𑀸𑀥𑀽’’𑀢𑀺 𑀲𑀫𑁆𑀫𑀢𑁄, 𑀦 𑀘 𑀲𑀸𑀥𑀽𑀳𑀺 𑀲𑀫𑁆𑀫𑀢𑁄𑀢𑀺 𑀅𑀢𑁆𑀣𑀫𑀸𑀳 ‘‘𑀅𑀬’’𑀦𑁆𑀢𑀺𑀆𑀤𑀺𑀦𑀸. 𑀦 𑀳𑀺 𑀢𑀲𑁆𑀲 𑀲𑀸𑀥𑀽𑀳𑀺 𑀲𑀫𑁆𑀫𑀢𑀢𑀸 𑀮𑀩𑁆𑀪𑀢𑀺. 𑀲𑀼𑀦𑁆𑀤𑀭𑁄 𑀲𑀧𑁆𑀧𑀼𑀭𑀺𑀲𑁄𑀢𑀺 𑀤𑁆𑀯𑀺𑀥𑀸 𑀅𑀢𑁆𑀣𑁄. 𑀅𑀲𑁆𑀲𑀼𑀢𑀯𑀢𑁄𑀢𑀺 𑀅𑀲𑁆𑀲𑀼𑀢𑀸𑀭𑀺𑀬𑀥𑀫𑁆𑀫𑀲𑁆𑀲, 𑀓𑀢𑁆𑀢𑀼𑀢𑁆𑀣𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁. ‘‘𑀇𑀫𑀸𑀦𑀺 𑀫𑁂 𑀯𑀢𑀲𑀫𑀸𑀤𑀸𑀦𑀸𑀦𑀺 𑀏𑀢𑁆𑀢𑀓𑀁 𑀓𑀸𑀮𑀁 𑀲𑀼𑀘𑀺𑀡𑁆𑀡𑀸𑀦𑀻’’𑀢𑀺 𑀩𑀳𑀽 𑀭𑀢𑁆𑀢𑀺𑀬𑁄 𑀚𑀸𑀦𑀸𑀢𑀺. 𑀢𑀸 𑀧𑀦𑀲𑁆𑀲 𑀭𑀢𑁆𑀢𑀺𑀬𑁄 𑀘𑀺𑀭𑀓𑀸𑀮𑀪𑀽𑀢𑀸𑀢𑀺 𑀓𑀢𑁆𑀯𑀸 ‘‘𑀘𑀺𑀭𑀁 𑀧𑀩𑁆𑀩𑀚𑀺𑀢𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀅𑀦𑁆𑀢𑀢𑁆𑀣𑀅𑀜𑁆𑀜𑀧𑀤𑀢𑁆𑀣𑀲𑀫𑀸𑀲𑁄 𑀘𑁂𑀲 𑀬𑀣𑀸 ‘‘𑀫𑀸𑀲𑀚𑀸𑀢𑁄’’𑀢𑀺. 𑀅𑀣 𑀢𑀲𑁆𑀲 𑀧𑀤𑀤𑁆𑀯𑀬𑀲𑁆𑀲 𑀓𑁄 𑀯𑀺𑀲𑁂𑀲𑁄𑀢𑀺 𑀘𑁂? 𑀘𑀺𑀭𑀧𑀩𑁆𑀩𑀚𑀺𑀢𑀕𑁆𑀕𑀳𑀡𑁂𑀦𑀲𑁆𑀲 𑀩𑀼𑀤𑁆𑀥𑀺𑀲𑀻𑀮𑀢𑀸, 𑀭𑀢𑁆𑀢𑀜𑁆𑀜𑀽𑀕𑀳𑀡𑁂𑀦 𑀢𑀢𑁆𑀣 𑀲𑀫𑁆𑀧𑀚𑀸𑀦𑀢𑀸 𑀤𑀲𑁆𑀲𑀺𑀢𑀸, 𑀅𑀬𑀫𑁂𑀢𑀲𑁆𑀲 𑀯𑀺𑀲𑁂𑀲𑁄𑀢𑀺. 𑀓𑀺𑀁 𑀧𑀦 𑀅𑀢𑁆𑀣𑀁 𑀲𑀦𑁆𑀥𑀸𑀬 𑀲𑁄 𑀅𑀫𑀘𑁆𑀘𑁄 𑀆𑀳𑀸𑀢𑀺 𑀯𑀼𑀢𑁆𑀢𑀁 ‘‘𑀅𑀘𑀺𑀭𑀧𑀩𑁆𑀩𑀚𑀺𑀢𑀲𑁆𑀲𑀸’’𑀢𑀺𑀆𑀤𑀺. 𑀑𑀓𑀧𑁆𑀧𑀦𑀻𑀬𑀸𑀢𑀺 𑀲𑀤𑁆𑀤𑀳𑀦𑀻𑀬𑀸. 𑀅𑀤𑁆𑀥𑀸𑀦𑀦𑁆𑀢𑀺 𑀤𑀻𑀖𑀓𑀸𑀮𑀁. 𑀓𑀺𑀢𑁆𑀢𑀓𑁄 𑀧𑀦 𑀲𑁄𑀢𑀺 𑀆𑀳 ‘‘𑀤𑁆𑀯𑁂 𑀢𑀬𑁄 𑀭𑀸𑀚𑀧𑀭𑀺𑀯𑀝𑁆𑀝𑁂’’𑀢𑀺, 𑀤𑁆𑀯𑀺𑀦𑁆𑀦𑀁, 𑀢𑀺𑀡𑁆𑀡𑀁 𑀯𑀸 𑀭𑀸𑀚𑀽𑀦𑀁 𑀭𑀚𑁆𑀚𑀸𑀦𑀼𑀲𑀸𑀲𑀦𑀧𑀝𑀺𑀧𑀸𑀝𑀺𑀬𑁄𑀢𑀺 𑀅𑀢𑁆𑀣𑁄. ‘‘𑀅𑀤𑁆𑀥𑀕𑀢𑁄’’𑀢𑀺 𑀯𑀢𑁆𑀯𑀸𑀧𑀺 𑀧𑀼𑀦 𑀓𑀢𑀁 𑀯𑀬𑀕𑁆𑀕𑀳𑀡𑀁 𑀑𑀲𑀸𑀦𑀯𑀬𑀸𑀧𑁂𑀓𑁆𑀔𑀁 𑀧𑀤𑀤𑁆𑀯𑀬𑀲𑁆𑀲 𑀅𑀢𑁆𑀣𑀯𑀺𑀲𑁂𑀲𑀲𑀫𑁆𑀪𑀯𑀢𑁄𑀢𑀺 𑀤𑀲𑁆𑀲𑁂𑀢𑀺 ‘‘𑀧𑀘𑁆𑀙𑀺𑀫𑀯𑀬’’𑀦𑁆𑀢𑀺 𑀇𑀫𑀺𑀦𑀸. 𑀉𑀪𑀬𑀦𑁆𑀢𑀺 ‘‘𑀅𑀤𑁆𑀥𑀕𑀢𑁄, 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺 𑀧𑀤𑀤𑁆𑀯𑀬𑀁.

𑀓𑀸𑀚𑀭𑁄 𑀦𑀸𑀫 𑀏𑀓𑁄 𑀭𑀼𑀓𑁆𑀔𑀯𑀺𑀲𑁂𑀲𑁄, 𑀬𑁄 ‘‘𑀧𑀡𑁆𑀡𑀓𑀭𑀼𑀓𑁆𑀔𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀤𑀺𑀲𑁆𑀯𑀸 𑀯𑀺𑀬 𑀅𑀦𑀢𑁆𑀢𑀫𑀦𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀼𑀩𑁆𑀩𑁂 𑀧𑀺𑀢𑀭𑀸 𑀲𑀤𑁆𑀥𑀺𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀤𑁂𑀲𑀦𑀸𑀬 𑀲𑀼𑀢𑀧𑀼𑀩𑁆𑀩𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀛𑀸𑀦𑀸…𑀧𑁂… 𑀓𑀸𑀫𑁄’’𑀢𑀺. 𑀢𑀺𑀮𑀓𑁆𑀔𑀡𑀩𑁆𑀪𑀸𑀳𑀢𑀦𑁆𑀢𑀺 𑀢𑀻𑀳𑀺 𑀮𑀓𑁆𑀔𑀡𑁂𑀳𑀺 𑀅𑀪𑀺𑀖𑀝𑀺𑀢𑀁. 𑀤𑀲𑁆𑀲𑀦𑁂𑀦𑀸𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀁. 𑀲𑁄 𑀳𑀺 𑀤𑀺𑀲𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀅𑀮𑁆𑀮𑀸𑀧𑀲𑀮𑁆𑀮𑀸𑀧𑀁 𑀓𑀢𑁆𑀯𑀸, 𑀢𑀢𑁄 𑀅𑀓𑀺𑀭𑀺𑀬𑀯𑀸𑀤𑀁 𑀲𑀼𑀢𑁆𑀯𑀸 𑀘 𑀅𑀦𑀢𑁆𑀢𑀫𑀦𑁄 𑀅𑀳𑁄𑀲𑀺. 𑀕𑀼𑀡𑀓𑀣𑀸𑀬𑀸𑀢𑀺 𑀅𑀪𑀽𑀢𑀕𑀼𑀡𑀓𑀣𑀸𑀬. 𑀢𑁂𑀦𑀸𑀳 ‘‘𑀲𑀼𑀝𑁆𑀞𑀼𑀢𑀭𑀁 𑀅𑀦𑀢𑁆𑀢𑀫𑀦𑁄’’𑀢𑀺. 𑀬𑀤𑀺 𑀅𑀦𑀢𑁆𑀢𑀫𑀦𑁄, 𑀓𑀲𑁆𑀫𑀸 𑀢𑀼𑀡𑁆𑀳𑀻 𑀅𑀳𑁄𑀲𑀻𑀢𑀺 𑀘𑁄𑀤𑀦𑀁 𑀯𑀺𑀲𑁄𑀥𑁂𑀢𑀺 ‘‘𑀅𑀦𑀢𑁆𑀢𑀫𑀦𑁄 𑀲𑀫𑀸𑀦𑁄𑀧𑀻’’𑀢𑀺𑀆𑀤𑀺𑀦𑀸.

𑁧𑁫𑁨. 𑀕𑁄𑀲𑀸𑀮𑀸𑀬𑀸𑀢𑀺 𑀏𑀯𑀁𑀦𑀸𑀫𑀓𑁂 𑀕𑀸𑀫𑁂𑀢𑀺 𑀯𑀼𑀢𑁆𑀢𑀁. 𑀯𑀲𑁆𑀲𑀸𑀦𑀓𑀸𑀮𑁂 𑀕𑀼𑀦𑁆𑀦𑀁 𑀧𑀢𑀺𑀝𑁆𑀞𑀺𑀢𑀲𑀸𑀮𑀸𑀬𑀸𑀢𑀺 𑀧𑀦 𑀅𑀢𑁆𑀣𑁂 𑀢𑀩𑁆𑀩𑀲𑁂𑀦 𑀢𑀲𑁆𑀲 𑀦𑀸𑀫𑀁 𑀲𑀸𑀢𑀺𑀲𑀬𑀫𑀼𑀧𑀧𑀦𑁆𑀦𑀁 𑀳𑁄𑀢𑀺 𑀩𑀳𑀼𑀮𑀫𑀦𑀜𑁆𑀜𑀲𑀸𑀥𑀸𑀭𑀡𑀢𑁆𑀢𑀸, 𑀢𑀣𑀸𑀧𑀺 𑀲𑁄 𑀧𑁄𑀭𑀸𑀡𑁂𑀳𑀺 𑀅𑀦𑀦𑀼𑀲𑁆𑀲𑀼𑀢𑁄𑀢𑀺 𑀏𑀓𑀘𑁆𑀘𑀯𑀸𑀤𑁄 𑀦𑀸𑀫 𑀓𑀢𑁄. ‘‘𑀫𑀸 𑀔𑀮𑀻𑀢𑀺 𑀲𑀸𑀫𑀺𑀓𑁄 𑀆𑀳𑀸’’𑀢𑀺 𑀇𑀫𑀺𑀦𑀸 𑀢𑀣𑀸𑀯𑀘𑀦𑀫𑀼𑀧𑀸𑀤𑀸𑀬 𑀢𑀲𑁆𑀲 𑀆𑀔𑁆𑀬𑀸𑀢𑀧𑀤𑁂𑀦 𑀲𑀫𑀜𑁆𑀜𑀸𑀢𑀺 𑀤𑀲𑁆𑀲𑁂𑀢𑀺. 𑀲𑀜𑁆𑀜𑀸𑀬 𑀳𑀺 𑀯𑀢𑁆𑀢𑀼𑀫𑀺𑀘𑁆𑀙𑀸𑀬 𑀆𑀔𑁆𑀬𑀸𑀢𑀧𑀤𑀫𑁆𑀧𑀺 𑀦𑀸𑀫𑀺𑀓𑀁 𑀪𑀯𑀢𑀺 𑀬𑀣𑀸 ‘‘𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑁄’’𑀢𑀺 (𑀫𑀳𑀸𑀯. 𑁧𑁭). 𑀲𑁂𑀲𑀦𑁆𑀢𑀺 ‘‘𑀲𑁄 𑀧𑀡𑁆𑀡𑁂𑀦 𑀯𑀸’’𑀢𑀺𑀆𑀤𑀺𑀯𑀘𑀦𑀁.

𑁧𑁫𑁩. 𑀤𑀸𑀲𑀸𑀤𑀻𑀲𑀼 𑀲𑀺𑀭𑀺𑀯𑀟𑁆𑀠𑀓𑀸𑀤𑀺𑀦𑀸𑀫𑀫𑀺𑀯 𑀅𑀚𑀺𑀢𑁄𑀢𑀺 𑀢𑀲𑁆𑀲 𑀦𑀸𑀫𑀫𑀢𑁆𑀢𑀁. 𑀓𑁂𑀲𑁂𑀳𑀺 𑀯𑀸𑀬𑀺𑀢𑁄 𑀓𑀫𑁆𑀩𑀮𑁄 𑀬𑀲𑁆𑀲𑀸𑀢𑀺𑀧𑀺 𑀬𑀼𑀚𑁆𑀚𑀢𑀺. 𑀧𑀝𑀺𑀓𑀺𑀝𑁆𑀞𑀢𑀭𑀦𑁆𑀢𑀺 𑀦𑀺𑀳𑀻𑀦𑀢𑀭𑀁. ‘‘𑀬𑀣𑀸𑀳𑀸’’𑀢𑀺𑀆𑀤𑀺𑀦𑀸 𑀅𑀗𑁆𑀕𑀼𑀢𑁆𑀢𑀭𑀸𑀕𑀫𑁂 𑀢𑀺𑀓𑀦𑀺𑀧𑀸𑀢𑁂 𑀫𑀓𑁆𑀔𑀮𑀺𑀲𑀼𑀢𑁆𑀢 (𑀅. 𑀦𑀺. 𑁩.𑁧𑁩𑁮) 𑀫𑀸𑀳𑀭𑀺. 𑀢𑀦𑁆𑀢𑀸𑀯𑀼𑀢𑀸𑀦𑀻𑀢𑀺 𑀢𑀦𑁆𑀢𑁂 𑀯𑀻𑀢𑀸𑀦𑀺. ‘‘𑀲𑀻𑀢𑁂 𑀲𑀻𑀢𑁄’’𑀢𑀺𑀆𑀤𑀺𑀦𑀸 𑀙𑀳𑀸𑀓𑀸𑀭𑁂𑀳𑀺 𑀢𑀲𑁆𑀲 𑀧𑀝𑀺𑀓𑀺𑀝𑁆𑀞𑀢𑀭𑀁 𑀤𑀲𑁆𑀲𑁂𑀢𑀺.

𑁧𑁫𑁪. 𑀧𑀓𑀼𑀚𑁆𑀛𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁂𑀲𑀼 𑀩𑁆𑀬𑀸𑀧𑀚𑁆𑀚𑀢𑀻𑀢𑀺 𑀧𑀓𑀼𑀥𑁄. 𑀯𑀘𑁆𑀘𑀁 𑀓𑀢𑁆𑀯𑀸𑀧𑀻𑀢𑀺 𑀏𑀢𑁆𑀣 𑀧𑀺-𑀲𑀤𑁆𑀤𑁂𑀦 𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸𑀧𑀺 𑀓𑁂𑀦𑀘𑀺 𑀅𑀲𑀼𑀘𑀺𑀦𑀸 𑀫𑀓𑁆𑀔𑀺𑀢𑁆𑀯𑀸𑀧𑀻𑀢𑀺 𑀇𑀫𑀫𑀢𑁆𑀣𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀯𑀸𑀮𑀺𑀓𑀸𑀣𑀽𑀧𑀁 𑀓𑀢𑁆𑀯𑀸𑀢𑀺 𑀯𑀢𑀲𑀫𑀸𑀤𑀸𑀦𑀲𑀻𑀲𑁂𑀦 𑀯𑀸𑀮𑀺𑀓𑀸𑀲𑀜𑁆𑀘𑀬𑀁 𑀓𑀢𑁆𑀯𑀸, 𑀢𑀣𑀸𑀭𑀽𑀧𑁂 𑀅𑀦𑀼𑀧𑀕𑀫𑀦𑀻𑀬𑀝𑁆𑀞𑀸𑀦𑁂 𑀧𑀼𑀦 𑀯𑀢𑀁 𑀲𑀫𑀸𑀤𑀸𑀬 𑀕𑀘𑁆𑀙𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁧𑁫𑁬. ‘‘𑀕𑀡𑁆𑀞𑀦𑀓𑀺𑀮𑁂𑀲𑁄’’𑀢𑀺 𑀏𑀢𑀲𑁆𑀲 ‘‘𑀧𑀮𑀺𑀩𑀼𑀦𑁆𑀥𑀦𑀓𑀺𑀮𑁂𑀲𑁄’’𑀢𑀺 𑀅𑀢𑁆𑀣𑀯𑀘𑀦𑀁, 𑀲𑀁𑀲𑀸𑀭𑁂 𑀧𑀭𑀺𑀩𑀼𑀦𑁆𑀥𑀦𑀓𑀺𑀘𑁆𑀘𑁄 𑀔𑁂𑀢𑁆𑀢𑀯𑀢𑁆𑀣𑀼𑀧𑀼𑀢𑁆𑀢𑀤𑀸𑀭𑀸𑀤𑀺𑀯𑀺𑀲𑀬𑁄 𑀭𑀸𑀕𑀸𑀤𑀺𑀓𑀺𑀮𑁂𑀲𑁄𑀢𑀺 𑀅𑀢𑁆𑀣𑁄. ‘‘𑀏𑀯𑀁𑀯𑀸𑀤𑀺𑀢𑀸𑀬𑀸’’𑀢𑀺 𑀇𑀫𑀺𑀦𑀸 𑀮𑀤𑁆𑀥𑀺𑀯𑀲𑁂𑀦𑀲𑁆𑀲 𑀦𑀸𑀫𑀁, 𑀦 𑀧𑀦𑀢𑁆𑀣𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀬𑀸𑀯 𑀳𑀺 𑀲𑁄 𑀫𑀕𑁆𑀕𑁂𑀦 𑀲𑀫𑀼𑀕𑁆𑀖𑀸𑀝𑀺𑀢𑁄, 𑀢𑀸𑀯 𑀅𑀢𑁆𑀣𑀺𑀬𑁂𑀯. 𑀅𑀬𑀁 𑀧𑀦 𑀯𑀘𑀦𑀢𑁆𑀣𑁄 𑁋 ‘‘𑀦𑀢𑁆𑀣𑀺 𑀫𑀬𑁆𑀳𑀁 𑀕𑀡𑁆𑀞𑁄’’𑀢𑀺 𑀕𑀡𑁆𑀳𑀸𑀢𑀻𑀢𑀺 𑀦𑀺𑀕𑀡𑁆𑀞𑁄𑀢𑀺. 𑀦𑀸𑀝𑀲𑁆𑀲𑀸𑀢𑀺 𑀏𑀯𑀁𑀦𑀸𑀫𑀓𑀲𑁆𑀲.

𑀓𑁄𑀫𑀸𑀭𑀪𑀘𑁆𑀘𑀚𑀻𑀯𑀓𑀓𑀣𑀸𑀯𑀡𑁆𑀡𑀦𑀸

𑁧𑁫𑁭. 𑀲𑀩𑁆𑀩𑀣𑀸 𑀢𑀼𑀡𑁆𑀳𑀻𑀪𑀽𑀢𑀪𑀸𑀯𑀁 𑀲𑀦𑁆𑀥𑀸𑀬 ‘‘𑀏𑀲 𑀦𑀸𑀕…𑀧𑁂… 𑀯𑀺𑀬𑀸’’𑀢𑀺 𑀯𑀼𑀢𑁆𑀢𑀁. 𑀲𑀼𑀧𑀡𑁆𑀡𑁄𑀢𑀺 𑀕𑀭𑀼𑀴𑁄, 𑀕𑀭𑀼𑀟𑁄 𑀯𑀸 𑀲𑀓𑁆𑀓𑀝𑀫𑀢𑁂𑀦. ‘‘𑀟-𑀴𑀸𑀦’𑀫𑀯𑀺𑀲𑁂𑀲𑁄’’𑀢𑀺 𑀳𑀺 𑀢𑀢𑁆𑀣 𑀯𑀤𑀦𑁆𑀢𑀺. 𑀬𑀣𑀸𑀥𑀺𑀧𑁆𑀧𑀸𑀬𑀁 𑀦 𑀯𑀢𑁆𑀢𑀢𑀻𑀢𑀺 𑀓𑀢𑁆𑀯𑀸 ‘‘𑀅𑀦𑀢𑁆𑀣𑁄 𑀯𑀢 𑀫𑁂’’𑀢𑀺 𑀯𑀼𑀢𑁆𑀢𑀁. 𑀉𑀧𑀲𑀦𑁆𑀢𑀲𑁆𑀲𑀸𑀢𑀺 𑀲𑀩𑁆𑀩𑀣𑀸 𑀲𑀜𑁆𑀜𑀫𑁂𑀦 𑀉𑀧𑀲𑀫𑀁 𑀕𑀢𑀲𑁆𑀲. 𑀚𑀻𑀯𑀓𑀲𑁆𑀲 𑀢𑀼𑀡𑁆𑀳𑀻𑀪𑀸𑀯𑁄 𑀫𑀫 𑀅𑀥𑀺𑀧𑁆𑀧𑀸𑀬𑀲𑁆𑀲 𑀫𑀤𑁆𑀤𑀦𑀲𑀤𑀺𑀲𑁄, 𑀢𑀲𑁆𑀫𑀸 𑀢𑀤𑁂𑀯 𑀢𑀼𑀡𑁆𑀳𑀻𑀪𑀸𑀯𑀁 𑀧𑀼𑀘𑁆𑀙𑀺𑀢𑁆𑀯𑀸 𑀓𑀣𑀸𑀧𑀦𑁂𑀦 𑀫𑀫 𑀅𑀥𑀺𑀧𑁆𑀧𑀸𑀬𑁄 𑀲𑀫𑁆𑀧𑀸𑀤𑁂𑀢𑀩𑁆𑀩𑁄𑀢𑀺 𑀅𑀬𑀫𑁂𑀢𑁆𑀣 𑀭𑀜𑁆𑀜𑁄 𑀅𑀥𑀺𑀧𑁆𑀧𑀸𑀬𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀳𑀢𑁆𑀣𑀺𑀫𑁆𑀳𑀺 𑀔𑁄 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀓𑀺𑀦𑁆𑀢𑀺 𑀓𑀸𑀭𑀡𑀧𑀼𑀘𑁆𑀙𑀸𑀬𑀁 𑀦𑀺𑀧𑀸𑀢𑁄𑀢𑀺 𑀤𑀲𑁆𑀲𑁂𑀢𑀺 ‘‘𑀓𑁂𑀦 𑀓𑀸𑀭𑀡𑁂𑀦𑀸’’𑀢𑀺 𑀇𑀫𑀺𑀦𑀸, 𑀬𑁂𑀦 𑀢𑀼𑀯𑀁 𑀢𑀼𑀡𑁆𑀳𑀻, 𑀓𑀺𑀁 𑀢𑀁 𑀓𑀸𑀭𑀡𑀦𑁆𑀢𑀺 𑀯𑀸 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀬𑀣𑀸𑀲𑀫𑁆𑀪𑀯𑀁 𑀓𑀸𑀭𑀡𑀁 𑀉𑀤𑁆𑀥𑀭𑀺𑀢𑁆𑀯𑀸 𑀅𑀥𑀺𑀧𑁆𑀧𑀸𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀫𑁂𑀲’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀣𑀸 𑀏𑀢𑁂𑀲𑀦𑁆𑀢𑀺 𑀏𑀢𑁂𑀲𑀁 𑀓𑀼𑀮𑀽𑀧𑀓𑁄 𑀅𑀢𑁆𑀣𑀺 𑀬𑀣𑀸, 𑀇𑀫𑁂𑀲𑀁 𑀦𑀼 𑀔𑁄 𑀢𑀺𑀡𑁆𑀡𑀁 𑀓𑀸𑀭𑀡𑀸𑀦𑀁 𑀅𑀜𑁆𑀜𑀢𑀭𑁂𑀦 𑀓𑀸𑀭𑀡𑁂𑀦 𑀢𑀼𑀡𑁆𑀳𑀻 𑀪𑀯𑀲𑀻𑀢𑀺 𑀧𑀼𑀘𑁆𑀙𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀓𑀣𑀸𑀧𑁂𑀢𑀻𑀢𑀺 𑀓𑀣𑀸𑀧𑁂𑀢𑀼𑀓𑀸𑀫𑁄 𑀳𑁄𑀢𑀺. 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦𑀸𑀢𑀺 𑀏𑀢𑁆𑀣 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀅𑀪𑀺𑀫𑀼𑀔𑀁 𑀞𑀺𑀢𑁂𑀦𑀸𑀢𑀺 𑀅𑀢𑁆𑀣𑁄, 𑀧𑀸𑀤𑀚𑀸𑀡𑀼 𑀓𑀧𑁆𑀧𑀭 𑀳𑀢𑁆𑀣 𑀲𑀻𑀲𑀲𑀗𑁆𑀔𑀸𑀢𑀸𑀦𑀺 𑀧𑀜𑁆𑀘 𑀅𑀗𑁆𑀕𑀸𑀦𑀺 𑀲𑀫𑀁 𑀓𑀢𑁆𑀯𑀸 𑀑𑀦𑀸𑀫𑁂𑀢𑁆𑀯𑀸 𑀅𑀪𑀺𑀫𑀼𑀔𑀁 𑀞𑀺𑀢𑁂𑀦 𑀧𑀞𑀫𑀁 𑀯𑀦𑁆𑀤𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀫𑁆𑀧𑀺 𑀯𑀤𑀦𑁆𑀢𑀺 ‘‘𑀦𑀯𑀓𑀢𑀭𑁂𑀦𑀼𑀧𑀸𑀮𑀺 𑀪𑀺𑀓𑁆𑀔𑀼𑀦𑀸 𑀯𑀼𑀟𑁆𑀠𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀸𑀤𑁂 𑀯𑀦𑁆𑀤𑀦𑁆𑀢𑁂𑀦 𑀇𑀫𑁂 𑀧𑀜𑁆𑀘 𑀥𑀫𑁆𑀫𑁂 𑀅𑀚𑁆𑀛𑀢𑁆𑀢𑀁 𑀉𑀧𑀝𑁆𑀞𑀸𑀧𑁂𑀢𑁆𑀯𑀸 𑀧𑀸𑀤𑀸 𑀯𑀦𑁆𑀤𑀺𑀢𑀩𑁆𑀩𑀸’𑀢𑀺𑀆𑀤𑀺𑀓𑀁 (𑀧𑀭𑀺. 𑁪𑁬𑁯) 𑀯𑀺𑀦𑀬𑀧𑀸𑀴𑀺𑀫𑀸𑀳𑀭𑀺𑀢𑁆𑀯𑀸 𑀏𑀓𑀁𑀲𑀓𑀭𑀡𑀅𑀜𑁆𑀚𑀮𑀺𑀧𑀕𑁆𑀕𑀳𑀡𑀧𑀸𑀤𑀲𑀫𑁆𑀩𑀸𑀳𑀦𑀧𑁂𑀫𑀕𑀸𑀭𑀯𑀼𑀧𑀝𑁆𑀞𑀸𑀧𑀦𑀯𑀲𑁂𑀦 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑀯𑀦𑁆𑀤𑀦𑀸’’𑀢𑀺, 𑀢𑀫𑁂𑀢𑁆𑀣𑀸𑀦𑀥𑀺𑀧𑁆𑀧𑁂𑀢𑀁 𑀤𑀽𑀭𑀢𑁄 𑀯𑀦𑁆𑀤𑀦𑁂 𑀬𑀣𑀸𑀯𑀼𑀢𑁆𑀢𑀧𑀜𑁆𑀘𑀗𑁆𑀕𑀲𑁆𑀲 𑀅𑀧𑀭𑀺𑀧𑀼𑀡𑁆𑀡𑀢𑁆𑀢𑀸. 𑀯𑀦𑁆𑀤𑀦𑀸 𑀘𑁂𑀢𑁆𑀣 𑀧𑀡𑀫𑀦𑀸 𑀅𑀜𑁆𑀚𑀮𑀺𑀧𑀕𑁆𑀕𑀳𑀡𑀓𑀭𑀧𑀼𑀝𑀲𑀫𑀸𑀬𑁄𑀕𑁄. ‘‘𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸’’𑀢𑀺 𑀘 𑀓𑀸𑀬𑀧𑀡𑀸𑀫𑁄 𑀯𑀼𑀢𑁆𑀢𑁄, ‘‘𑀫𑀫 𑀲𑀢𑁆𑀣𑀼𑀦𑁄’’𑀢𑀺𑀆𑀤𑀺𑀦𑀸 𑀧𑀦 𑀯𑀘𑀻𑀧𑀡𑀸𑀫𑁄, 𑀢𑀤𑀼𑀪𑀬𑀧𑀼𑀭𑁂𑀘𑀭𑀸𑀦𑀼𑀘𑀭𑀯𑀲𑁂𑀦 𑀫𑀦𑁄𑀧𑀡𑀸𑀫𑁄𑀢𑀺. 𑀓𑀸𑀫𑀁 𑀲𑀩𑁆𑀩𑀸𑀧𑀺 𑀢𑀣𑀸𑀕𑀢𑀲𑁆𑀲 𑀧𑀝𑀺𑀧𑀢𑁆𑀢𑀺 𑀅𑀦𑀜𑁆𑀜𑀲𑀸𑀥𑀸𑀭𑀡𑀸 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀭𑀽𑀧𑀸𑀯, 𑀢𑀣𑀸𑀧𑀺 𑀕𑀩𑁆𑀪𑁄𑀓𑁆𑀓𑀦𑁆𑀢𑀺 𑀅𑀪𑀺𑀚𑀸𑀢𑀺 𑀅𑀪𑀺𑀦𑀺𑀓𑁆𑀔𑀫𑀦 𑀅𑀪𑀺𑀲𑀫𑁆𑀩𑁄𑀥𑀺 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦 (𑀲𑀁. 𑀦𑀺. 𑁫.𑁧𑁦𑁮𑁧; 𑀧𑀝𑀺. 𑀫. 𑁩.𑁩𑁦) 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀤𑁂𑀯𑁄𑀭𑁄𑀳𑀦𑀸𑀦𑀺 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀢𑀺𑀯𑀺𑀬 𑀲𑀼𑀧𑀸𑀓𑀝𑀸𑀦𑀺, 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀧𑀝𑀺𑀩𑀸𑀳𑀺𑀢𑀼𑀦𑁆𑀢𑀺 𑀢𑀸𑀦𑀺𑀬𑁂𑀯𑁂𑀢𑁆𑀣 𑀉𑀤𑁆𑀥𑀝𑀸𑀦𑀺.

𑀇𑀢𑁆𑀣𑀁 𑀇𑀫𑀁 𑀧𑀓𑀸𑀭𑀁 𑀪𑀽𑀢𑁄 𑀧𑀢𑁆𑀢𑁄𑀢𑀺 𑀇𑀢𑁆𑀣𑀫𑁆𑀪𑀽𑀢𑁄, 𑀢𑀲𑁆𑀲 𑀆𑀔𑁆𑀬𑀸𑀦𑀁 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀁, 𑀲𑁄𑀬𑁂𑀯𑀢𑁆𑀣𑁄 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀢𑁆𑀣𑁄. 𑀅𑀣 𑀯𑀸 𑀇𑀢𑁆𑀣𑀁 𑀏𑀯𑀁𑀧𑀓𑀸𑀭𑁄 𑀪𑀽𑀢𑁄 𑀚𑀸𑀢𑁄𑀢𑀺 𑀇𑀢𑁆𑀣𑀫𑁆𑀪𑀽𑀢𑁄, 𑀢𑀸𑀤𑀺𑀲𑁄𑀢𑀺 𑀆𑀔𑁆𑀬𑀸𑀦𑀁 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀁, 𑀢𑀤𑁂𑀯𑀢𑁆𑀣𑁄 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀢𑁆𑀣𑁄, 𑀢𑀲𑁆𑀫𑀺𑀁 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀩𑁆𑀪𑀼𑀕𑁆𑀕𑀢𑁄𑀢𑀺 𑀏𑀢𑁆𑀣 𑀳𑀺 𑀅𑀪𑀺𑀲𑀤𑁆𑀤𑁄 𑀧𑀥𑀸𑀦𑀯𑀲𑁂𑀦 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀢𑁆𑀣𑀚𑁄𑀢𑀓𑁄 𑀓𑀫𑁆𑀫𑀧𑁆𑀧𑀯𑀘𑀦𑀻𑀬𑁄 𑀅𑀪𑀺𑀪𑀯𑀺𑀢𑁆𑀯𑀸 𑀉𑀕𑁆𑀕𑀫𑀦𑀓𑀺𑀭𑀺𑀬𑀸𑀧𑀓𑀸𑀭𑀲𑁆𑀲 𑀤𑀻𑀧𑀦𑀢𑁄, 𑀢𑁂𑀦 𑀧𑀬𑁄𑀕𑀢𑁄 ‘‘𑀢𑀁 𑀔𑁄 𑀧𑀦 𑀪𑀕𑀯𑀦𑁆𑀢’’𑀦𑁆𑀢𑀺 𑀇𑀤𑀁 𑀉𑀧𑀬𑁄𑀕𑀯𑀘𑀦𑀁 𑀲𑀸𑀫𑀺𑀅𑀢𑁆𑀣𑁂 𑀲𑀫𑀸𑀦𑀫𑁆𑀧𑀺 𑀅𑀧𑁆𑀧𑀥𑀸𑀦𑀯𑀲𑁂𑀦 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀢𑁆𑀣𑀤𑀻𑀧𑀦𑀢𑁄 ‘‘𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀢𑁆𑀣𑁂’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 ‘‘𑀢𑀲𑁆𑀲 𑀔𑁄 𑀧𑀦 𑀪𑀕𑀯𑀢𑁄𑀢𑀺 𑀅𑀢𑁆𑀣𑁄’’𑀢𑀺. 𑀦𑀦𑀼 𑀘 ‘‘𑀲𑀸𑀥𑀼 𑀤𑁂𑀯𑀤𑀢𑁆𑀢𑁄 𑀫𑀸𑀢𑀭𑀫𑀪𑀻’’𑀢𑀺 𑀏𑀢𑁆𑀣 𑀯𑀺𑀬 ‘‘𑀢𑀁 𑀔𑁄 𑀧𑀦 𑀪𑀕𑀯𑀦𑁆𑀢’’𑀦𑁆𑀢𑀺 𑀏𑀢𑁆𑀣 𑀅𑀪𑀺𑀲𑀤𑁆𑀤𑁄 𑀅𑀧𑁆𑀧𑀬𑀼𑀢𑁆𑀢𑁄, 𑀓𑀣𑀫𑁂𑀢𑁆𑀣 𑀢𑀁𑀧𑀬𑁄𑀕𑀢𑁄 𑀉𑀧𑀬𑁄𑀕𑀯𑀘𑀦𑀁 𑀲𑀺𑀬𑀸𑀢𑀺? 𑀅𑀢𑁆𑀣𑀢𑁄 𑀧𑀬𑀼𑀢𑁆𑀢𑀢𑁆𑀢𑀸. 𑀅𑀢𑁆𑀣𑀲𑀤𑁆𑀤𑀧𑀬𑁄𑀕𑁂𑀲𑀼 𑀳𑀺 𑀅𑀢𑁆𑀣𑀧𑀬𑁄𑀕𑁄𑀬𑁂𑀯 𑀧𑀥𑀸𑀦𑁄𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 ‘‘𑀲𑀸𑀥𑀼 𑀤𑁂𑀯𑀤𑀢𑁆𑀢𑁄 𑀫𑀸𑀢𑀭𑀫𑀪𑀻’’𑀢𑀺 𑀏𑀢𑁆𑀣 𑀅𑀪𑀺𑀲𑀤𑁆𑀤𑀧𑀬𑁄𑀕𑀢𑁄 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑁂 𑀉𑀧𑀬𑁄𑀕𑀯𑀘𑀦𑀁 𑀓𑀢𑀁, 𑀏𑀯𑀫𑀺𑀥𑀸𑀧𑀺 ‘‘𑀢𑀁 𑀔𑁄 𑀧𑀦 𑀪𑀕𑀯𑀦𑁆𑀢𑀁 𑀅𑀪𑀺 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀉𑀕𑁆𑀕𑀢𑁄’’𑀢𑀺 𑀅𑀪𑀺𑀲𑀤𑁆𑀤𑀧𑀬𑁄𑀕𑀢𑁄 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑁂 𑀉𑀧𑀬𑁄𑀕𑀯𑀘𑀦𑀁 𑀓𑀢𑀦𑁆𑀢𑀺. 𑀬𑀣𑀸 𑀳𑀺 ‘‘𑀲𑀸𑀥𑀼 𑀤𑁂𑀯𑀤𑀢𑁆𑀢𑁄 𑀫𑀸𑀢𑀭𑀫𑀪𑀻’’𑀢𑀺 𑀏𑀢𑁆𑀣 ‘‘𑀤𑁂𑀯𑀤𑀢𑁆𑀢𑁄 𑀫𑀸𑀢𑀭𑀫𑀪𑀺 𑀫𑀸𑀢𑀼𑀯𑀺𑀲𑀬𑁂, 𑀫𑀸𑀢𑀼𑀬𑀸 𑀯𑀸 𑀲𑀸𑀥𑀽’’𑀢𑀺 𑀏𑀯𑀁 𑀅𑀥𑀺𑀓𑀭𑀡𑀢𑁆𑀣𑁂, 𑀲𑀸𑀫𑀺𑀅𑀢𑁆𑀣𑁂 𑀯𑀸 𑀪𑀼𑀫𑁆𑀫𑀯𑀘𑀦𑀲𑁆𑀲, 𑀲𑀸𑀫𑀺𑀯𑀘𑀦𑀲𑁆𑀲 𑀯𑀸 𑀧𑀲𑀗𑁆𑀕𑁂 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀚𑁄𑀢𑀓𑁂𑀦 𑀓𑀫𑁆𑀫𑀧𑁆𑀧𑀯𑀘𑀦𑀻𑀬𑁂𑀦 𑀅𑀪𑀺𑀲𑀤𑁆𑀤𑁂𑀦 𑀧𑀬𑁄𑀕𑀢𑁄 𑀉𑀧𑀬𑁄𑀕𑀯𑀘𑀦𑀁 𑀓𑀢𑀁, 𑀏𑀯𑀫𑀺𑀥𑀸𑀧𑀺 𑀲𑀸𑀫𑀺𑀅𑀢𑁆𑀣𑁂 𑀲𑀸𑀫𑀺𑀯𑀘𑀦𑀧𑁆𑀧𑀲𑀗𑁆𑀕𑁂 𑀬𑀣𑀸 𑀘 𑀢𑀢𑁆𑀣 ‘‘𑀤𑁂𑀯𑀤𑀢𑁆𑀢𑁄 𑀫𑀸𑀢𑀼𑀯𑀺𑀲𑀬𑁂, 𑀫𑀸𑀢𑀼 𑀲𑀫𑁆𑀩𑀦𑁆𑀥𑀻 𑀯𑀸 𑀲𑀸𑀥𑀼𑀢𑁆𑀢𑀧𑁆𑀧𑀓𑀸𑀭𑀧𑁆𑀧𑀢𑁆𑀢𑁄’’𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺, 𑀏𑀯𑀫𑀺𑀥𑀸𑀧𑀺 ‘‘𑀪𑀕𑀯𑀢𑁄 𑀲𑀫𑁆𑀩𑀦𑁆𑀥𑀻 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑀅𑀪𑀺𑀪𑀯𑀺𑀢𑁆𑀯𑀸 𑀉𑀕𑁆𑀕𑀫𑀦𑀧𑁆𑀧𑀓𑀸𑀭𑀧𑁆𑀧𑀢𑁆𑀢𑁄’’𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺. 𑀢𑀢𑁆𑀣 𑀳𑀺 𑀤𑁂𑀯𑀤𑀢𑁆𑀢𑀕𑁆𑀕𑀳𑀡𑀁 𑀯𑀺𑀬 𑀇𑀥 𑀓𑀺𑀢𑁆𑀢𑀺𑀲𑀤𑁆𑀤𑀕𑁆𑀕𑀳𑀡𑀁, ‘‘𑀫𑀸𑀢𑀭’’𑀦𑁆𑀢𑀺 𑀯𑀘𑀦𑀁 𑀯𑀺𑀬 ‘‘𑀪𑀕𑀯𑀦𑁆𑀢’’𑀦𑁆𑀢𑀺 𑀯𑀘𑀦𑀁, 𑀲𑀸𑀥𑀼𑀲𑀤𑁆𑀤𑁄 𑀯𑀺𑀬 𑀉𑀕𑁆𑀕𑀢𑀲𑀤𑁆𑀤𑁄 𑀯𑁂𑀤𑀺𑀢𑀩𑁆𑀩𑁄.

𑀓𑀮𑁆𑀬𑀸𑀡𑁄𑀢𑀺 𑀪𑀤𑁆𑀤𑀓𑁄. 𑀓𑀮𑁆𑀬𑀸𑀡𑀪𑀸𑀯𑁄 𑀘𑀲𑁆𑀲 𑀓𑀮𑁆𑀬𑀸𑀡𑀕𑀼𑀡𑀯𑀺𑀲𑀬𑀢𑀸𑀬𑀸𑀢𑀺 𑀆𑀳 ‘‘𑀓𑀮𑁆𑀬𑀸𑀡𑀕𑀼𑀡𑀲𑀫𑀦𑁆𑀦𑀸𑀕𑀢𑁄’’𑀢𑀺, 𑀓𑀮𑁆𑀬𑀸𑀡𑁂𑀳𑀺 𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀢𑀩𑁆𑀩𑀺𑀲𑀬𑀢𑀸𑀬 𑀬𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀢𑀁 𑀯𑀺𑀲𑀬𑀢𑀸 𑀳𑁂𑀢𑁆𑀣 𑀲𑀫𑀦𑁆𑀦𑀸𑀕𑀫𑁄, 𑀓𑀮𑁆𑀬𑀸𑀡𑀕𑀼𑀡𑀯𑀺𑀲𑀬𑀢𑀸𑀬 𑀢𑀦𑁆𑀦𑀺𑀲𑁆𑀲𑀺𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁂𑀝𑁆𑀞𑁄𑀢𑀺 𑀧𑀭𑀺𑀬𑀸𑀬𑀯𑀘𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑁂𑀝𑁆𑀞𑀕𑀼𑀡𑀯𑀺𑀲𑀬𑀢𑀸 𑀏𑀯 𑀳𑀺 𑀓𑀺𑀢𑁆𑀢𑀺𑀲𑀤𑁆𑀤𑀲𑁆𑀲 𑀲𑁂𑀝𑁆𑀞𑀢𑀸 ‘‘𑀪𑀕𑀯𑀸𑀢𑀺 𑀯𑀘𑀦𑀁 𑀲𑁂𑀝𑁆𑀞𑀁, 𑀪𑀕𑀯𑀸𑀢𑀺 𑀯𑀘𑀦𑀫𑀼𑀢𑁆𑀢𑀫’’𑀦𑁆𑀢𑀺𑀆𑀤𑀻𑀲𑀼 (𑀯𑀺𑀲𑀼𑀤𑁆𑀥𑀺. 𑁧.𑁧𑁪𑁨; 𑀧𑀸𑀭𑀸. 𑀅𑀝𑁆𑀞. 𑁧.𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸; 𑀉𑀤𑀸. 𑀅𑀝𑁆𑀞. 𑁧; 𑀇𑀢𑀺𑀯𑀼. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸; 𑀫𑀳𑀸𑀦𑀺. 𑀅𑀝𑁆𑀞. 𑁪𑁯) 𑀯𑀺𑀬. ‘‘𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺𑀆𑀤𑀺𑀦𑀸 𑀕𑀼𑀡𑀸𑀦𑀁 𑀲𑀁𑀓𑀺𑀢𑁆𑀢𑀦𑀢𑁄, 𑀲𑀤𑁆𑀤𑀦𑀻𑀬𑀢𑁄 𑀘 𑀯𑀡𑁆𑀡𑁄𑀬𑁂𑀯 𑀓𑀺𑀢𑁆𑀢𑀺𑀲𑀤𑁆𑀤𑁄 𑀦𑀸𑀫𑀸𑀢𑀺 𑀆𑀳 ‘‘𑀓𑀺𑀢𑁆𑀢𑀺𑀬𑁂𑀯𑀸’’𑀢𑀺. 𑀯𑀡𑁆𑀡𑁄 𑀏𑀯 𑀳𑀺 𑀓𑀺𑀢𑁆𑀢𑁂𑀢𑀩𑁆𑀩𑀢𑁄 𑀓𑀺𑀢𑁆𑀢𑀺, 𑀲𑀤𑁆𑀤𑀦𑀻𑀬𑀢𑁄 𑀲𑀤𑁆𑀤𑁄𑀢𑀺 𑀘 𑀯𑀼𑀘𑁆𑀘𑀢𑀺. 𑀓𑀺𑀢𑁆𑀢𑀺𑀧𑀭𑀺𑀬𑀸𑀬𑁄 𑀳𑀺 𑀲𑀤𑁆𑀤𑀲𑀤𑁆𑀤𑁄 𑀬𑀣𑀸 ‘‘𑀉𑀴𑀸𑀭𑀲𑀤𑁆𑀤𑀸 𑀇𑀲𑀬𑁄, 𑀕𑀼𑀡𑀯𑀦𑁆𑀢𑁄 𑀢𑀧𑀲𑁆𑀲𑀺𑀦𑁄’’𑀢𑀺. 𑀓𑀺𑀢𑁆𑀢𑀺𑀯𑀲𑁂𑀦 𑀧𑀯𑀢𑁆𑀢𑁄 𑀲𑀤𑁆𑀤𑁄 𑀓𑀺𑀢𑁆𑀢𑀺𑀲𑀤𑁆𑀤𑁄𑀢𑀺 𑀪𑀺𑀦𑁆𑀦𑀸𑀥𑀺𑀓𑀭𑀡𑀢𑀁 𑀤𑀲𑁆𑀲𑁂𑀢𑀺 ‘‘𑀣𑀼𑀢𑀺𑀖𑁄𑀲𑁄’’𑀢𑀺 𑀇𑀫𑀺𑀦𑀸. 𑀓𑀺𑀢𑁆𑀢𑀺𑀲𑀤𑁆𑀤𑁄 𑀳𑁂𑀢𑁆𑀣 𑀣𑀼𑀢𑀺𑀧𑀭𑀺𑀬𑀸𑀬𑁄 𑀓𑀺𑀢𑁆𑀢𑀦𑀫𑀪𑀺𑀢𑁆𑀣𑀯𑀦𑀁 𑀓𑀺𑀢𑁆𑀢𑀻𑀢𑀺. 𑀣𑀼𑀢𑀺𑀯𑀲𑁂𑀦 𑀧𑀯𑀢𑁆𑀢𑁄 𑀖𑁄𑀲𑁄 𑀣𑀼𑀢𑀺𑀖𑁄𑀲𑁄, 𑀅𑀪𑀺𑀢𑁆𑀣𑀯𑀼𑀤𑀸𑀳𑀸𑀭𑁄𑀢𑀺 𑀅𑀢𑁆𑀣𑁄. 𑀅𑀪𑀺𑀲𑀤𑁆𑀤𑁄 𑀅𑀪𑀺𑀪𑀯𑀦𑁂, 𑀅𑀪𑀺𑀪𑀯𑀦𑀜𑁆𑀘𑁂𑀢𑁆𑀣 𑀅𑀚𑁆𑀛𑁄𑀢𑁆𑀣𑀭𑀡𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸’’𑀢𑀺, 𑀅𑀦𑀜𑁆𑀜𑀲𑀸𑀥𑀸𑀭𑀡𑁂 𑀕𑀼𑀡𑁂 𑀆𑀭𑀩𑁆𑀪 𑀧𑀯𑀢𑁆𑀢𑀢𑁆𑀢𑀸 𑀅𑀪𑀺𑀩𑁆𑀬𑀸𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀓𑀺𑀦𑁆𑀢𑀺-𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄𑀢𑀺 𑀘𑁄𑀤𑀦𑀸𑀬 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸’’𑀢𑀺𑀆𑀤𑀺𑀫𑀸𑀳𑀸𑀢𑀺 𑀅𑀦𑀼𑀲𑀦𑁆𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀺𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁.

𑀧𑀤𑀸𑀦𑀁 𑀲𑀫𑁆𑀩𑀚𑁆𑀛𑀦𑀁 𑀧𑀤𑀲𑀫𑁆𑀩𑀦𑁆𑀥𑁄. 𑀲𑁄 𑀪𑀕𑀯𑀸𑀢𑀺 𑀬𑁄 𑀲𑁄 𑀲𑀫𑀢𑀺𑀁𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀩𑁆𑀩𑀓𑀺𑀮𑁂𑀲𑁂 𑀪𑀜𑁆𑀚𑀺𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀤𑁂𑀯𑀸𑀦𑀫𑀢𑀺𑀤𑁂𑀯𑁄 𑀲𑀓𑁆𑀓𑀸𑀦𑀫𑀢𑀺𑀲𑀓𑁆𑀓𑁄 𑀩𑁆𑀭𑀳𑁆𑀫𑀸𑀦𑀫𑀢𑀺𑀩𑁆𑀭𑀳𑁆𑀫𑀸 𑀮𑁄𑀓𑀦𑀸𑀣𑁄 𑀪𑀸𑀕𑁆𑀬𑀯𑀦𑁆𑀢𑀢𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀲𑀤𑁂𑀯𑀓𑁂 𑀮𑁄𑀓𑁂 ‘‘𑀪𑀕𑀯𑀸’’𑀢𑀺 𑀧𑀢𑁆𑀣𑀝𑀓𑀺𑀢𑁆𑀢𑀺𑀲𑀤𑁆𑀤𑁄, 𑀲𑁄 𑀪𑀕𑀯𑀸. 𑀬𑀁 𑀢𑀁-𑀲𑀤𑁆𑀤𑀸 𑀳𑀺 𑀦𑀺𑀘𑁆𑀘𑀲𑀫𑁆𑀩𑀦𑁆𑀥𑀸. ‘‘𑀪𑀕𑀯𑀸’’𑀢𑀺 𑀘 𑀇𑀤𑀫𑀸𑀤𑀺𑀧𑀤𑀁 𑀲𑀢𑁆𑀣𑀼 𑀦𑀸𑀫𑀓𑀺𑀢𑁆𑀢𑀦𑀁. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀥𑀫𑁆𑀫𑀲𑁂𑀦𑀸𑀧𑀢𑀺 ‘‘𑀪𑀕𑀯𑀸𑀢𑀺 𑀦𑁂𑀢𑀁 𑀦𑀸𑀫𑀁 𑀫𑀸𑀢𑀭𑀸 𑀓𑀢𑀁, 𑀦 𑀧𑀺𑀢𑀭𑀸 𑀓𑀢’’𑀦𑁆𑀢𑀺𑀆𑀤𑀺 (𑀫𑀳𑀸𑀦𑀺. 𑁬; 𑀘𑀽𑀴𑀦𑀺. 𑁨). 𑀧𑀭𑀢𑁄 𑀧𑀦 ‘‘𑀪𑀕𑀯𑀸’’𑀢𑀺 𑀧𑀤𑀁 𑀕𑀼𑀡𑀓𑀺𑀢𑁆𑀢𑀦𑀁. 𑀬𑀣𑀸 𑀓𑀫𑁆𑀫𑀝𑁆𑀞𑀸𑀦𑀺𑀓𑁂𑀦‘‘𑀅𑀭𑀳’’𑀦𑁆𑀢𑀺𑀆𑀤𑀻𑀲𑀼 𑀦𑀯𑀲𑀼 𑀞𑀸𑀦𑁂𑀲𑀼 𑀧𑀘𑁆𑀘𑁂𑀓𑀁 𑀇𑀢𑀺𑀧𑀺𑀲𑀤𑁆𑀤𑀁 𑀬𑁄𑀚𑁂𑀢𑁆𑀯𑀸 𑀩𑀼𑀤𑁆𑀥𑀕𑀼𑀡𑀸 𑀅𑀦𑀼𑀲𑁆𑀲𑀭𑀻𑀬𑀦𑁆𑀢𑀺, 𑀏𑀯𑀫𑀺𑀥 𑀩𑀼𑀤𑁆𑀥𑀕𑀼𑀡𑀲𑀁𑀓𑀺𑀢𑁆𑀢𑀓𑁂𑀦𑀸𑀧𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀢𑀺𑀧𑀺 𑀅𑀭𑀳𑀁…𑀧𑁂… 𑀇𑀢𑀺𑀧𑀺 𑀪𑀕𑀯𑀸’’𑀢𑀺 𑀆𑀳. 𑀏𑀯𑀜𑁆𑀳𑀺 𑀲𑀢𑀺‘‘𑀅𑀭𑀳’’𑀦𑁆𑀢𑀺𑀆𑀤𑀻𑀳𑀺 𑀦𑀯𑀳𑀺 𑀧𑀤𑁂𑀳𑀺 𑀬𑁂 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀢𑀺𑀯𑀺𑀬 𑀧𑀸𑀓𑀝𑀸 𑀧𑀜𑁆𑀜𑀸𑀢𑀸 𑀩𑀼𑀤𑁆𑀥𑀕𑀼𑀡𑀸, 𑀢𑁂 𑀦𑀸𑀦𑀧𑁆𑀧𑀓𑀸𑀭𑀢𑁄 𑀯𑀺𑀪𑀸𑀯𑀺𑀢𑀸 𑀳𑁄𑀦𑁆𑀢𑀺 ‘‘𑀇𑀢𑀺𑀧𑀻’’𑀢𑀺 𑀧𑀤𑀤𑁆𑀯𑀬𑁂𑀦 𑀢𑁂𑀲𑀁 𑀦𑀸𑀦𑀧𑁆𑀧𑀓𑀸𑀭𑀢𑀸𑀤𑀻𑀧𑀦𑀢𑁄. ‘‘𑀇𑀢𑀺𑀧𑁂𑀢𑀁 𑀪𑀽𑀢𑀁, 𑀇𑀢𑀺𑀧𑁂𑀢𑀁 𑀢𑀘𑁆𑀙’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁬) 𑀯𑀺𑀬 𑀳𑀺 𑀇𑀢𑀺-𑀲𑀤𑁆𑀤𑁄 𑀇𑀥 𑀆𑀲𑀦𑁆𑀦𑀧𑀘𑁆𑀘𑀓𑁆𑀔𑀓𑀭𑀡𑀢𑁆𑀣𑁄, 𑀧𑀺-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄, 𑀢𑁂𑀦 𑀘 𑀦𑁂𑀲𑀁 𑀦𑀸𑀦𑀧𑁆𑀧𑀓𑀸𑀭𑀪𑀸𑀯𑁄 𑀤𑀻𑀧𑀺𑀢𑁄, 𑀢𑀸𑀦𑀺 𑀘 𑀕𑀼𑀡𑀲𑀮𑁆𑀮𑀓𑁆𑀔𑀡𑀓𑀸𑀭𑀡𑀸𑀦𑀺 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀸𑀦𑀁 𑀯𑀺𑀜𑁆𑀜𑀼𑀚𑀸𑀢𑀺𑀓𑀸𑀦𑀁 𑀧𑀘𑁆𑀘𑀓𑁆𑀔𑀸𑀦𑀺 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀢𑀸𑀦𑀺 𑀲𑀁𑀓𑀺𑀢𑁆𑀢𑁂𑀦𑁆𑀢𑁂𑀦 𑀯𑀺𑀜𑁆𑀜𑀼𑀦𑀸 𑀘𑀺𑀢𑁆𑀢𑀲𑁆𑀲 𑀲𑀫𑁆𑀫𑀼𑀔𑀻𑀪𑀽𑀢𑀸𑀦𑁂𑀯 𑀓𑀢𑁆𑀯𑀸 𑀲𑀁𑀓𑀺𑀢𑁆𑀢𑁂𑀢𑀩𑁆𑀩𑀸𑀦𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀫𑀺𑀦𑀸 𑀘 𑀇𑀫𑀺𑀦𑀸 𑀘 𑀓𑀸𑀭𑀡𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺 𑀆𑀳. 𑀏𑀯𑀜𑁆𑀳𑀺 𑀦𑀺𑀭𑀽𑀧𑁂𑀢𑁆𑀯𑀸 𑀓𑀺𑀢𑁆𑀢𑁂𑀦𑁆𑀢𑁂 𑀬𑀲𑁆𑀲 𑀲𑀁𑀓𑀺𑀢𑁆𑀢𑁂𑀢𑀺, 𑀢𑀲𑁆𑀲 𑀪𑀕𑀯𑀢𑀺 𑀅𑀢𑀺𑀯𑀺𑀬 𑀧𑀲𑀸𑀤𑁄 𑀳𑁄𑀢𑀺.

𑀆𑀭𑀓𑀢𑁆𑀢𑀸𑀢𑀺 𑀓𑀺𑀮𑁂𑀲𑁂𑀳𑀺 𑀲𑀼𑀯𑀺𑀤𑀽𑀭𑀢𑁆𑀢𑀸. 𑀅𑀭𑀻𑀦𑀦𑁆𑀢𑀺 𑀓𑀺𑀮𑁂𑀲𑀸𑀭𑀻𑀦𑀁. 𑀅𑀭𑀸𑀦𑀦𑁆𑀢𑀺 𑀲𑀁𑀲𑀸𑀭𑀘𑀓𑁆𑀓𑀲𑁆𑀲 𑀅𑀭𑀸𑀦𑀁. 𑀳𑀢𑀢𑁆𑀢𑀸𑀢𑀺 𑀯𑀺𑀤𑁆𑀥𑀁𑀲𑀺𑀢𑀢𑁆𑀢𑀸. 𑀧𑀘𑁆𑀘𑀬𑀸𑀤𑀻𑀦𑀦𑁆𑀢𑀺 𑀘𑀻𑀯𑀭𑀸𑀤𑀺𑀧𑀘𑁆𑀘𑀬𑀸𑀦𑀜𑁆𑀘𑁂𑀯 𑀧𑀽𑀚𑀸 𑀯𑀺𑀲𑁂𑀲𑀸𑀦𑀜𑁆𑀘. 𑀭𑀳𑀸𑀪𑀸𑀯𑀸𑀢𑀺 𑀘𑀓𑁆𑀔𑀼𑀭𑀳𑀸𑀤𑀻𑀦𑀫𑀪𑀸𑀯𑀢𑁄. 𑀭𑀳𑁄𑀧𑀸𑀧𑀓𑀭𑀡𑀸𑀪𑀸𑀯𑁄 𑀳𑀺 𑀧𑀤𑀫𑀦𑀢𑀺𑀓𑁆𑀓𑀫𑁆𑀫 𑀭𑀳𑀸𑀪𑀸𑀯𑁄𑀢𑀺 𑀯𑀼𑀢𑁆𑀢𑀁. 𑀏𑀯𑀫𑁆𑀧𑀺 𑀳𑀺 𑀬𑀣𑀸𑀥𑀺𑀧𑁆𑀧𑁂𑀢𑀫𑀢𑁆𑀣𑁄 𑀮𑀩𑁆𑀪𑀢𑀻𑀢𑀺. 𑀢𑀢𑁄𑀢𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀢𑁄 (𑀯𑀺𑀲𑀼𑀤𑁆𑀥𑀺. 𑁧.𑁧𑁨𑁩). 𑀬𑀣𑀸 𑀘 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀢𑁄, 𑀏𑀯𑀁 𑀢𑀁𑀲𑀁𑀯𑀡𑁆𑀡𑀦𑀸𑀬 𑀧𑀭𑀫𑀢𑁆𑀣𑀫𑀜𑁆𑀚𑀽𑀲𑀸𑀬𑀁 (𑀯𑀺𑀲𑀼𑀤𑁆𑀥𑀺. 𑀝𑀻. 𑁧.𑁧𑁨𑁪) 𑀦𑁂𑀲𑀁 𑀯𑀺𑀢𑁆𑀣𑀸𑀭𑁄 𑀕𑀳𑁂𑀢𑀩𑁆𑀩𑁄.

𑀬𑀲𑁆𑀫𑀸 𑀚𑀻𑀯𑀓𑁄 𑀩𑀳𑀼𑀲𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀩𑀼𑀤𑁆𑀥𑀕𑀼𑀡𑁂 𑀲𑀼𑀢𑁆𑀯𑀸 𑀞𑀺𑀢𑁄, 𑀤𑀺𑀝𑁆𑀞𑀲𑀘𑁆𑀘𑀢𑀸𑀬 𑀘 𑀲𑀢𑁆𑀣𑀼𑀲𑀸𑀲𑀦𑁂 𑀯𑀺𑀕𑀢𑀓𑀣𑀁𑀓𑀣𑁄, 𑀲𑀢𑁆𑀣𑀼𑀕𑀼𑀡𑀓𑀣𑀦𑁂 𑀘 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄, 𑀢𑀲𑁆𑀫𑀸 𑀲𑁄 𑀏𑀯𑀁 𑀯𑀺𑀢𑁆𑀣𑀸𑀭𑀢𑁄 𑀏𑀯 𑀆𑀳𑀸𑀢𑀺 𑀯𑀼𑀢𑁆𑀢𑀁 ‘‘𑀚𑀻𑀯𑀓𑁄 𑀧𑀦𑀸’’𑀢𑀺𑀆𑀤𑀺. ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺𑀦𑀸 𑀲𑀸𑀫𑀢𑁆𑀣𑀺𑀬𑀢𑁆𑀣𑀫𑀸𑀳. 𑀣𑀸𑀫𑁄 𑀤𑁂𑀲𑀦𑀸𑀜𑀸𑀡𑀫𑁂𑀯, 𑀩𑀮𑀁 𑀧𑀦 𑀤𑀲𑀩𑀮𑀜𑀸𑀡𑀁. 𑀯𑀺𑀲𑁆𑀲𑀢𑁆𑀣𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀧𑀤𑀁, 𑀅𑀦𑀸𑀲𑀗𑁆𑀓𑀦𑁆𑀢𑀺 𑀅𑀢𑁆𑀣𑁄.

𑀧𑀜𑁆𑀘𑀯𑀡𑁆𑀡𑀸𑀬𑀸𑀢𑀺 𑀔𑀼𑀤𑁆𑀤𑀺𑀓𑀸𑀤𑀺𑀯𑀲𑁂𑀦 𑀧𑀜𑁆𑀘𑀧𑀓𑀸𑀭𑀸𑀬. 𑀦𑀺𑀭𑀦𑁆𑀢𑀭𑀁 𑀨𑀼𑀝𑀁 𑀅𑀳𑁄𑀲𑀺 𑀓𑀢𑀸𑀥𑀺𑀓𑀸𑀭𑀪𑀸𑀯𑀢𑁄. 𑀓𑀫𑁆𑀫𑀦𑁆𑀢𑀭𑀸𑀬𑀯𑀲𑁂𑀦 𑀳𑀺𑀲𑁆𑀲 𑀭𑀜𑁆𑀜𑁄 𑀕𑀼𑀡𑀲𑀭𑀻𑀭𑀁 𑀔𑀢𑀽𑀧𑀳𑀢𑀁 𑀳𑁄𑀢𑀺. 𑀓𑀲𑁆𑀫𑀸 𑀧𑀦𑁂𑀲 𑀚𑀻𑀯𑀓𑀫𑁂𑀯 𑀕𑀫𑀦𑀲𑀚𑁆𑀚𑀸𑀬 𑀆𑀡𑀸𑀧𑁂𑀢𑀻𑀢𑀺 𑀆𑀳 ‘‘𑀇𑀫𑀸𑀬𑀸’’𑀢𑀺𑀆𑀤𑀺.

𑁧𑁫𑁮. ‘‘𑀉𑀢𑁆𑀢𑀫’’𑀦𑁆𑀢𑀺 𑀯𑀢𑁆𑀯𑀸 𑀦 𑀓𑁂𑀯𑀮𑀁 𑀉𑀢𑁆𑀢𑀫𑀪𑀸𑀯𑁄𑀬𑁂𑀯𑁂𑀢𑁆𑀣 𑀓𑀸𑀭𑀡𑀁, 𑀅𑀣 𑀔𑁄 𑀅𑀧𑁆𑀧𑀲𑀤𑁆𑀤𑀢𑀸𑀧𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀲𑁆𑀲𑀬𑀸𑀦𑀭𑀣𑀬𑀸𑀦𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀳𑀢𑁆𑀣𑀺𑀬𑀸𑀦𑁂𑀲𑀼 𑀘 𑀦𑀺𑀩𑁆𑀩𑀺𑀲𑁂𑀯𑀦𑀫𑁂𑀯 𑀕𑀡𑁆𑀳𑀦𑁆𑀢𑁄 𑀳𑀢𑁆𑀣𑀺𑀦𑀺𑀬𑁄𑀧𑀺 𑀓𑀧𑁆𑀧𑀸𑀧𑁂𑀲𑀺. 𑀧𑀤𑀸𑀦𑀼𑀧𑀤𑀦𑁆𑀢𑀺 𑀧𑀤𑀫𑀦𑀼𑀕𑀢𑀁 𑀧𑀤𑀁 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑀲𑁆𑀲 𑀳𑀢𑁆𑀣𑀺𑀬𑀸𑀦𑀲𑁆𑀲 𑀧𑀤𑁂 𑀢𑁂𑀲𑀁 𑀧𑀤𑀁 𑀓𑀢𑁆𑀯𑀸, 𑀧𑀤𑀲𑀤𑁆𑀤𑁄 𑀘𑁂𑀢𑁆𑀣 𑀧𑀤𑀯𑀴𑀜𑁆𑀚𑁂. 𑀦𑀺𑀩𑁆𑀩𑀼𑀢𑀲𑁆𑀲𑀸𑀢𑀺 𑀲𑀩𑁆𑀩𑀓𑀺𑀮𑁂𑀲𑀤𑀭𑀣𑀯𑀽𑀧𑀲𑀫𑀲𑁆𑀲. 𑀦𑀺𑀩𑁆𑀩𑀼𑀢𑁂𑀳𑁂𑀯𑀸𑀢𑀺 𑀅𑀧𑁆𑀧𑀲𑀤𑁆𑀤𑀢𑀸𑀬 𑀲𑀤𑁆𑀤𑀲𑀗𑁆𑀔𑁄𑀪𑀦𑀯𑀽𑀧𑀲𑀫𑁂𑀳𑁂𑀯.

𑀓𑀭𑁂𑀡𑀽𑀢𑀺 𑀳𑀢𑁆𑀣𑀺𑀦𑀺𑀧𑀭𑀺𑀬𑀸𑀬𑀯𑀘𑀦𑀁. 𑀓𑀡𑀢𑀺 𑀲𑀤𑁆𑀤𑀁 𑀓𑀭𑁄𑀢𑀻𑀢𑀺 𑀳𑀺 𑀓𑀭𑁂𑀡𑀼, 𑀓𑀭𑁄𑀯 𑀬𑀲𑁆𑀲𑀸, 𑀦 𑀤𑀻𑀖𑁄 𑀤𑀦𑁆𑀢𑁄𑀢𑀺 𑀯𑀸 𑀓𑀭𑁂𑀡𑀼,‘‘𑀓𑀭𑁂𑀡𑀼𑀓𑀸’’𑀢𑀺𑀧𑀺 𑀧𑀸𑀞𑁄, 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀧𑀤𑀲𑀺𑀤𑁆𑀥𑀺. 𑀆𑀭𑁄𑀳𑀦𑀲𑀚𑁆𑀚𑀦𑀁 𑀓𑀼𑀣𑀸𑀤𑀻𑀦𑀁 𑀩𑀦𑁆𑀥𑀦𑀫𑁂𑀯. 𑀑𑀧𑀯𑀬𑁆𑀳𑀦𑁆𑀢𑀺 𑀭𑀸𑀚𑀸𑀦𑀫𑀼𑀧𑀯𑀳𑀺𑀢𑀼𑀁 𑀲𑀫𑀢𑁆𑀣𑀁. ‘‘𑀑𑀧𑀕𑀼𑀬𑁆𑀳’’𑀦𑁆𑀢𑀺𑀧𑀺 𑀧𑀞𑀦𑁆𑀢𑀺, 𑀭𑀸𑀚𑀸𑀦𑀫𑀼𑀧𑀕𑀽𑀳𑀺𑀢𑀼𑀁 𑀕𑁄𑀧𑀺𑀢𑀼𑀁 𑀲𑀫𑀢𑁆𑀣𑀦𑁆𑀢𑀺 𑀅𑀢𑁆𑀣𑁄. ‘‘𑀏𑀯𑀁 𑀓𑀺𑀭𑀲𑁆𑀲𑀸’’𑀢𑀺𑀆𑀤𑀺 𑀧𑀡𑁆𑀟𑀺𑀢𑀪𑀸𑀯𑀯𑀺𑀪𑀸𑀯𑀦𑀁. 𑀓𑀣𑀸 𑀯𑀢𑁆𑀢𑀢𑀻𑀢𑀺 𑀮𑀤𑁆𑀥𑁄𑀓𑀸𑀲𑀪𑀸𑀯𑁂𑀦 𑀥𑀫𑁆𑀫𑀓𑀣𑀸 𑀧𑀯𑀢𑁆𑀢𑀢𑀺. ‘‘𑀭𑀜𑁆𑀜𑁄 𑀆𑀲𑀗𑁆𑀓𑀸𑀦𑀺𑀯𑀢𑁆𑀢𑀦𑀢𑁆𑀣𑀁 𑀆𑀲𑀦𑁆𑀦𑀘𑀸𑀭𑀻𑀪𑀸𑀯𑁂𑀦 𑀳𑀢𑁆𑀣𑀺𑀦𑀻𑀲𑀼 𑀇𑀢𑁆𑀣𑀺𑀬𑁄 𑀦𑀺𑀲𑀚𑁆𑀚𑀸𑀧𑀺𑀢𑀸’’𑀢𑀺 (𑀤𑀻. 𑀦𑀺. 𑀝𑀻. 𑁧.𑁧𑁫𑁮) 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀇𑀢𑁆𑀣𑀺𑀬𑁄 𑀦𑀺𑀲𑁆𑀲𑀸𑀬 𑀧𑀼𑀭𑀺𑀲𑀸𑀦𑀁 𑀪𑀬𑀁 𑀦𑀸𑀫 𑀦𑀢𑁆𑀣𑀺, 𑀲𑀼𑀔𑀁 𑀇𑀢𑁆𑀣𑀺𑀧𑀭𑀺𑀯𑀼𑀢𑁄 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀢𑀢𑁆𑀣 𑀓𑀸𑀭𑀡𑀁 𑀯𑀼𑀢𑁆𑀢𑀫𑁂𑀯. 𑀇𑀫𑀺𑀦𑀸𑀧𑀺 𑀓𑀸𑀭𑀡𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀧𑀦 𑀆𑀘𑀭𑀺𑀬𑁂𑀦 𑀏𑀯𑀁 𑀯𑀼𑀢𑁆𑀢𑀁 𑀲𑀺𑀬𑀸. 𑀭𑀜𑁆𑀜𑁄 𑀧𑀭𑁂𑀲𑀁 𑀤𑀽𑀭𑀼𑀧𑀲𑀗𑁆𑀓𑀫𑀦𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀢𑀸 𑀧𑀼𑀭𑀺𑀲𑀯𑁂𑀲𑀁 𑀕𑀸𑀳𑀸𑀧𑁂𑀢𑁆𑀯𑀸 𑀆𑀯𑀼𑀥𑀳𑀢𑁆𑀣𑀸 𑀓𑀸𑀭𑀺𑀢𑀸. 𑀳𑀢𑁆𑀣𑀺𑀦𑀺𑀓𑀸𑀲𑀢𑀸𑀦𑀻𑀢𑀺 𑀏𑀢𑁆𑀣 𑀳𑀢𑁆𑀣𑀺𑀦𑀺𑀬𑁄 𑀏𑀯 𑀳𑀢𑁆𑀣𑀺𑀦𑀺𑀓𑀸. ‘‘𑀧𑀜𑁆𑀘 𑀳𑀢𑁆𑀣𑀺𑀦𑀺𑀬𑀸 𑀲𑀢𑀸𑀦𑀻’’𑀢𑀺𑀧𑀺 𑀓𑀢𑁆𑀣𑀘𑀺 𑀧𑀸𑀞𑁄, 𑀲𑁄 𑀅𑀬𑀼𑀢𑁆𑀢𑁄𑀯 ‘‘𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀻’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁧) 𑀯𑀺𑀬 𑀈𑀤𑀺𑀲𑁂𑀲𑀼 𑀧𑀘𑁆𑀙𑀺𑀫𑀧𑀤𑀲𑁆𑀲 𑀲𑀫𑀸𑀲𑀲𑁆𑀲𑁂𑀯 𑀤𑀲𑁆𑀲𑀦𑀢𑁄. 𑀓𑀲𑁆𑀲𑀘𑀺𑀤𑁂𑀯𑀸𑀢𑀺 𑀲𑀦𑁆𑀦𑀺𑀧𑀢𑀺𑀢𑁂 𑀫𑀳𑀸𑀚𑀦𑁂 𑀬𑀲𑁆𑀲 𑀓𑀲𑁆𑀲𑀘𑀺 𑀏𑀯, 𑀢𑀤𑀜𑁆𑀜𑁂𑀲𑀫𑁆𑀧𑀺 𑀆𑀬𑀢𑀺𑀁 𑀫𑀕𑁆𑀕𑀨𑀮𑀸𑀦𑀫𑀼𑀧𑀦𑀺𑀲𑁆𑀲𑀬𑁄𑀢𑀺 𑀆𑀳 ‘‘𑀲𑀸 𑀫𑀳𑀸𑀚𑀦𑀲𑁆𑀲 𑀉𑀧𑀓𑀸𑀭𑀸𑀬 𑀪𑀯𑀺𑀲𑁆𑀲𑀢𑀻’’𑀢𑀺.

𑀧𑀝𑀺𑀯𑁂𑀤𑁂𑀲𑀻𑀢𑀺 𑀜𑀸𑀧𑁂𑀲𑀺. 𑀉𑀧𑀘𑀸𑀭𑀯𑀘𑀦𑀦𑁆𑀢𑀺 𑀯𑁄𑀳𑀸𑀭𑀯𑀘𑀦𑀫𑀢𑁆𑀢𑀁 𑀢𑁂𑀦𑁂𑀯 𑀅𑀥𑀺𑀧𑁆𑀧𑁂𑀢𑀢𑁆𑀣𑀲𑁆𑀲 𑀅𑀧𑀭𑀺𑀬𑁄𑀲𑀸𑀦𑀢𑁄. 𑀢𑁂𑀦𑀸𑀳 ‘‘𑀢𑀤𑁂𑀯 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀓𑀭𑁄𑀳𑀻’’𑀢𑀺. 𑀇𑀫𑀺𑀦𑀸𑀬𑁂𑀯 𑀳𑀺 𑀢𑀤𑀢𑁆𑀣𑀧𑀭𑀺𑀬𑁄𑀲𑀸𑀦𑀁. 𑀫𑀜𑁆𑀜𑀲𑀻𑀢𑀺 𑀧𑀓𑀢𑀺𑀬𑀸𑀯 𑀚𑀸𑀦𑀸𑀲𑀺. 𑀢𑀤𑁂𑀯𑀸𑀢𑀺 𑀕𑀫𑀦𑀸𑀕𑀫𑀦𑀫𑁂𑀯. 𑀬𑀤𑀺 𑀕𑀦𑁆𑀢𑀼𑀓𑀸𑀫𑁄, 𑀕𑀘𑁆𑀙, 𑀅𑀣 𑀦 𑀕𑀦𑁆𑀢𑀼𑀓𑀸𑀫𑁄, 𑀫𑀸 𑀕𑀘𑁆𑀙, 𑀅𑀢𑁆𑀢𑀦𑁄 𑀭𑀼𑀘𑀺𑀬𑁂𑀯𑁂𑀢𑁆𑀣 𑀧𑀫𑀸𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁧𑁫𑁯. 𑀧𑀸𑀝𑀺𑀏𑀓𑁆𑀓𑀸𑀬𑁂𑀯 𑀲𑀦𑁆𑀥𑀺𑀯𑀲𑁂𑀦 𑀧𑀘𑁆𑀘𑁂𑀓𑀸. ‘‘𑀫𑀳𑀜𑁆𑀘’’𑀦𑁆𑀢𑀺 𑀧𑀤𑁂 𑀓𑀭𑀡𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀦𑁆𑀢𑀺 𑀆𑀳 ‘‘𑀫𑀳𑀢𑀸’’𑀢𑀺. 𑀫𑀳𑀦𑁆𑀢𑀲𑁆𑀲 𑀪𑀸𑀯𑁄 𑀫𑀳𑀜𑁆𑀘𑀁. 𑀦 𑀓𑁂𑀯𑀮𑀁 𑀦𑀺𑀕𑁆𑀕𑀳𑀻𑀢𑀦𑁆𑀢𑀯𑀲𑁂𑀦𑁂𑀯 𑀧𑀸𑀞𑁄, 𑀅𑀣 𑀔𑁄 𑀆𑀓𑀸𑀭𑀦𑁆𑀢𑀯𑀲𑁂𑀦𑀸𑀧𑀻𑀢𑀺 𑀆𑀳 ‘‘𑀫𑀳𑀘𑁆𑀘𑀸𑀢𑀺𑀧𑀺 𑀧𑀸𑀴𑀻’’𑀢𑀺. 𑀬𑀣𑀸 ‘‘𑀔𑀢𑁆𑀢𑀺𑀬𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀔𑀢𑁆𑀬𑀸’’𑀢𑀺, 𑀏𑀯𑀁 ‘‘𑀫𑀳𑀢𑀺𑀬𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀫𑀳𑀢𑁆𑀬𑀸. 𑀧𑀼𑀦 𑀘-𑀓𑀸𑀭𑀁 𑀓𑀢𑁆𑀯𑀸 𑀫𑀳𑀘𑁆𑀘𑀸𑀢𑀺 𑀲𑀦𑁆𑀥𑀺𑀯𑀲𑁂𑀦 𑀧𑀤𑀲𑀺𑀤𑁆𑀥𑀺. 𑀧𑀼𑀮𑁆𑀮𑀺𑀗𑁆𑀕𑀯𑀲𑁂𑀦 𑀯𑀢𑁆𑀢𑀩𑁆𑀩𑁂 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀯𑀺𑀧𑀮𑁆𑀮𑀸𑀲𑁄 𑀮𑀺𑀗𑁆𑀕𑀯𑀺𑀧𑀭𑀺𑀬𑀸𑀬𑁄. 𑀯𑀺𑀲𑁂𑀲𑀦𑀜𑁆𑀳𑀺 𑀪𑀺𑀬𑁆𑀬𑁄 𑀯𑀺𑀲𑁂𑀲𑁆𑀬𑀮𑀺𑀗𑁆𑀕𑀸𑀤𑀺𑀕𑀸𑀳𑀓𑀁. 𑀢𑀺𑀬𑁄𑀚𑀦𑀲𑀢𑀸𑀦𑀦𑁆𑀢𑀺 𑀧𑀘𑁆𑀘𑁂𑀓𑀁 𑀢𑀺𑀬𑁄𑀚𑀦𑀲𑀢𑀧𑀭𑀺𑀫𑀡𑁆𑀟𑀮𑀸𑀦𑀁. 𑀤𑁆𑀯𑀺𑀦𑁆𑀦𑀁 𑀫𑀳𑀸𑀭𑀝𑁆𑀞𑀸𑀦𑀁 𑀇𑀲𑁆𑀲𑀭𑀺𑀬𑀲𑀺𑀭𑀻𑀢𑀺 𑀅𑀗𑁆𑀕𑀫𑀕𑀥𑀭𑀝𑁆𑀞𑀸𑀦𑀫𑀸𑀥𑀺𑀧𑀘𑁆𑀘𑀫𑀸𑀳. 𑀢𑀤𑀢𑁆𑀣𑀁 𑀯𑀺𑀯𑀭𑀢𑀺 ‘‘𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸. 𑀧𑀝𑀺𑀫𑀼𑀓𑁆𑀓𑀯𑁂𑀞𑀦𑀸𑀦𑀻𑀢𑀺 𑀆𑀩𑀦𑁆𑀥𑀲𑀺𑀭𑁄𑀯𑁂𑀞𑀦𑀸𑀦𑀺. 𑀆𑀲𑀢𑁆𑀢𑀔𑀕𑁆𑀕𑀸𑀦𑀻𑀢𑀺 𑀅𑀁𑀲𑁂 𑀑𑀮𑀫𑁆𑀩𑀦𑀯𑀲𑁂𑀦 𑀲𑀦𑁆𑀦𑀤𑁆𑀥𑀸𑀲𑀻𑀦𑀺. 𑀫𑀡𑀺𑀤𑀡𑁆𑀟𑀢𑁄𑀫𑀭𑁂𑀢𑀺 𑀫𑀡𑀺𑀤𑀡𑁆𑀟𑀗𑁆𑀓𑀼𑀲𑁂.

‘‘𑀅𑀧𑀭𑀸𑀧𑀻’’𑀢𑀺𑀆𑀤𑀺𑀦𑀸 𑀧𑀤𑀲𑀸 𑀧𑀭𑀺𑀯𑀸𑀭𑀸 𑀯𑀼𑀢𑁆𑀢𑀸. 𑀔𑀼𑀚𑁆𑀚𑀯𑀸𑀫𑀦𑀓𑀸 𑀯𑁂𑀲𑀯𑀲𑁂𑀦, 𑀓𑀺𑀭𑀸𑀢𑀲𑀯𑀭𑀅𑀦𑁆𑀥𑀓𑀸𑀤𑀬𑁄 𑀚𑀸𑀢𑀺𑀯𑀲𑁂𑀦 𑀢𑀸𑀲𑀁 𑀧𑀭𑀺𑀘𑀸𑀭𑀓𑀺𑀦𑀺𑀬𑁄 𑀤𑀲𑁆𑀲𑀺𑀢𑀸. 𑀯𑀺𑀲𑁆𑀲𑀸𑀲𑀺𑀓𑀧𑀼𑀭𑀺𑀲𑀸𑀢𑀺 𑀯𑀲𑁆𑀲𑀯𑀭𑁂 𑀲𑀦𑁆𑀥𑀸𑀬𑀸𑀳. 𑀓𑀼𑀮𑀪𑁄𑀕𑀇𑀲𑁆𑀲𑀭𑀺𑀬𑀸𑀤𑀺𑀯𑀲𑁂𑀦 𑀫𑀳𑀢𑀻 𑀫𑀢𑁆𑀢𑀸 𑀧𑀫𑀸𑀡𑀫𑁂𑀢𑁂𑀲𑀦𑁆𑀢𑀺 𑀫𑀳𑀸𑀫𑀢𑁆𑀢𑀸, 𑀫𑀳𑀸𑀦𑀼𑀪𑀸𑀯𑀸 𑀭𑀸𑀚𑀸𑀫𑀘𑁆𑀘𑀸. 𑀯𑀺𑀚𑁆𑀚𑀸𑀥𑀭𑀢𑀭𑀼𑀡𑀸 𑀯𑀺𑀬𑀸𑀢𑀺 𑀫𑀦𑁆𑀢𑀸𑀦𑀼𑀪𑀸𑀯𑁂𑀦 𑀯𑀺𑀚𑁆𑀚𑀸𑀫𑀬𑀺𑀤𑁆𑀥𑀺𑀲𑀫𑁆𑀧𑀦𑁆𑀦𑀸 𑀯𑀺𑀚𑁆𑀚𑀸𑀥𑀭𑀓𑀼𑀫𑀸𑀭𑀓𑀸 𑀯𑀺𑀬. 𑀭𑀝𑁆𑀞𑀺𑀬𑀧𑀼𑀢𑁆𑀢𑀸𑀢𑀺 𑀪𑁄𑀚𑀧𑀼𑀢𑁆𑀢𑀸. 𑀭𑀝𑁆𑀞𑁂 𑀧𑀭𑀺𑀘𑀭𑀦𑁆𑀢𑀻𑀢𑀺 𑀳𑀺 𑀮𑀼𑀤𑁆𑀤𑀓𑀸 𑀭𑀝𑁆𑀞𑀺𑀬𑀸, 𑀢𑁂𑀲𑀁 𑀦𑀸𑀦𑀸𑀯𑀼𑀥𑀧𑀭𑀺𑀘𑀬𑀢𑀸𑀬 𑀭𑀸𑀚𑀪𑀝𑀪𑀽𑀢𑀸 𑀧𑀼𑀢𑁆𑀢𑀸𑀢𑀺 𑀅𑀢𑁆𑀣𑁄, 𑀅𑀦𑁆𑀢𑀭𑀭𑀝𑁆𑀞𑀪𑁄𑀚𑀓𑀸𑀦𑀁 𑀯𑀸 𑀧𑀼𑀢𑁆𑀢𑀸 𑀭𑀝𑁆𑀞𑀺𑀬𑀧𑀼𑀢𑁆𑀢𑀸, 𑀔𑀢𑁆𑀢𑀺𑀬𑀸 𑀪𑁄𑀚𑀭𑀸𑀚𑀸𑀦𑁄. ‘‘𑀅𑀦𑀼𑀬𑀼𑀢𑁆𑀢𑀸 𑀪𑀯𑀦𑁆𑀢𑀼 𑀢𑁂’’𑀢𑀺𑀆𑀤𑀻𑀲𑀼 𑀯𑀺𑀬 𑀳𑀺 𑀝𑀻𑀓𑀸𑀬𑀁 (𑀤𑀻. 𑀦𑀺. 𑀝𑀻. 𑁧.𑁧𑁫𑁯) 𑀯𑀼𑀢𑁆𑀢𑁄 𑀪𑁄𑀚𑀲𑀤𑁆𑀤𑁄 𑀪𑁄𑀚𑀓𑀯𑀸𑀘𑀓𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀉𑀲𑁆𑀲𑀸𑀧𑁂𑀢𑁆𑀯𑀸𑀢𑀺 𑀉𑀤𑁆𑀥𑀁 𑀧𑀲𑀸𑀭𑁂𑀢𑁆𑀯𑀸. 𑀚𑀬𑀲𑀤𑁆𑀤𑀦𑁆𑀢𑀺 ‘‘𑀚𑀬𑀢𑀼 𑀫𑀳𑀸𑀭𑀸𑀚𑀸’’𑀢𑀺𑀆𑀤𑀺𑀚𑀬𑀧𑀝𑀺𑀩𑀤𑁆𑀥𑀁 𑀲𑀤𑁆𑀤𑀁. 𑀥𑀦𑀼𑀧𑀦𑁆𑀢𑀺𑀧𑀭𑀺𑀓𑁆𑀔𑁂𑀧𑁄𑀢𑀺 𑀥𑀦𑀼𑀧𑀦𑁆𑀢𑀺𑀧𑀭𑀺𑀯𑀸𑀭𑁄. 𑀲𑀩𑁆𑀩𑀢𑁆𑀣 𑀢𑀁𑀕𑀸𑀳𑀓𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀳𑀢𑁆𑀣𑀺𑀖𑀝𑀸𑀢𑀺 𑀳𑀢𑁆𑀣𑀺𑀲𑀫𑀽𑀳𑀸. 𑀧𑀳𑀭𑀫𑀸𑀦𑀸𑀢𑀺 𑀨𑀼𑀲𑀫𑀸𑀦𑀸. 𑀅𑀜𑁆𑀜𑀫𑀜𑁆𑀜𑀲𑀗𑁆𑀖𑀝𑁆𑀝𑀦𑀸𑀢𑀺 𑀅𑀯𑀺𑀘𑁆𑀙𑁂𑀤𑀕𑀫𑀦𑁂𑀦 𑀅𑀜𑁆𑀜𑀫𑀜𑁆𑀜𑀲𑀫𑁆𑀩𑀦𑁆𑀥𑀸. 𑀲𑁂𑀡𑀺𑀬𑁄𑀢𑀺 𑀕𑀦𑁆𑀥𑀺𑀓𑀲𑁂𑀡𑀻𑀤𑀼𑀲𑁆𑀲𑀺𑀓𑀲𑁂𑀡𑀻𑀆𑀤𑀬𑁄 ‘‘𑀅𑀦𑀧𑀮𑁄𑀓𑁂𑀢𑁆𑀯𑀸 𑀭𑀸𑀚𑀸𑀦𑀁 𑀯𑀸 𑀲𑀗𑁆𑀖𑀁 𑀯𑀸 𑀕𑀡𑀁 𑀯𑀸 𑀧𑀽𑀕𑀁 𑀯𑀸 𑀲𑁂𑀡𑀺𑀁 𑀯𑀸 𑀅𑀜𑁆𑀜𑀢𑁆𑀭 𑀓𑀧𑁆𑀧𑀸 𑀯𑀼𑀝𑁆𑀞𑀸𑀧𑁂𑀬𑁆𑀬𑀸’’𑀢𑀺𑀆𑀤𑀻𑀲𑀼 (𑀧𑀸𑀘𑀺. 𑁬𑁮𑁨) 𑀯𑀺𑀬. ‘‘𑀅𑀝𑁆𑀞𑀸𑀭𑀲 𑀅𑀓𑁆𑀔𑁄𑀪𑀺𑀡𑀻 𑀲𑁂𑀦𑀺𑀬𑁄’’𑀢𑀺 𑀓𑀢𑁆𑀣𑀘𑀺 𑀮𑀺𑀔𑀦𑁆𑀢𑀺, 𑀲𑁄 𑀅𑀦𑁂𑀓𑁂𑀲𑀼𑀧𑀺 𑀧𑁄𑀢𑁆𑀣𑀓𑁂𑀲𑀼 𑀦 𑀤𑀺𑀝𑁆𑀞𑁄. 𑀅𑀦𑁂𑀓𑀲𑀗𑁆𑀔𑁆𑀬𑀸 𑀘 𑀲𑁂𑀦𑀸 𑀳𑁂𑀝𑁆𑀞𑀸 𑀕𑀡𑀺𑀢𑀸𑀢𑀺 𑀅𑀬𑀼𑀢𑁆𑀢𑁄𑀬𑁂𑀯. 𑀢𑀤𑀸 𑀲𑀩𑁆𑀩𑀸𑀯𑀼𑀥𑀢𑁄 𑀲𑀭𑁄𑀯 𑀤𑀽𑀭𑀕𑀸𑀫𑀻𑀢𑀺 𑀓𑀢𑁆𑀯𑀸 𑀲𑀭𑀧𑀢𑀦𑀸𑀢𑀺𑀓𑁆𑀓𑀫𑀧𑁆𑀧𑀫𑀸𑀡𑁂𑀦 𑀭𑀜𑁆𑀜𑁄 𑀧𑀭𑀺𑀲𑀁 𑀲𑀁𑀯𑀺𑀤𑀳𑀢𑀺. 𑀓𑀺𑀫𑀢𑁆𑀣𑀦𑁆𑀢𑀺 𑀆𑀳 ‘‘𑀲𑀘𑁂’’𑀢𑀺𑀆𑀤𑀺.

𑀲𑀬𑀁 𑀪𑀸𑀬𑀦𑀝𑁆𑀞𑁂𑀦 𑀘𑀺𑀢𑁆𑀢𑀼𑀢𑁆𑀭𑀸𑀲𑁄 𑀪𑀬𑀁 𑀬𑀣𑀸 𑀢𑀣𑀸 𑀪𑀸𑀬𑀢𑀻𑀢𑀺 𑀓𑀢𑁆𑀯𑀸. 𑀪𑀸𑀬𑀺𑀢𑀩𑁆𑀩𑁂 𑀏𑀯 𑀯𑀢𑁆𑀣𑀼𑀲𑁆𑀫𑀺𑀁 𑀪𑀬𑀢𑁄 𑀉𑀧𑀝𑁆𑀞𑀺𑀢𑁂 ‘‘𑀪𑀸𑀬𑀺𑀢𑀩𑁆𑀩𑀫𑀺𑀤’’𑀦𑁆𑀢𑀺 𑀪𑀸𑀬𑀺𑀢𑀩𑁆𑀩𑀸𑀓𑀸𑀭𑁂𑀦 𑀢𑀻𑀭𑀡𑀢𑁄 𑀜𑀸𑀡𑀁 𑀪𑀬𑀁 𑀪𑀬𑀢𑁄 𑀢𑀻𑀭𑁂𑀢𑀻𑀢𑀺 𑀓𑀢𑁆𑀯𑀸. 𑀢𑁂𑀦𑁂𑀯𑀸𑀳 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁨.𑁭𑁫𑁧) ‘‘𑀪𑀬𑀢𑀼𑀧𑀝𑁆𑀞𑀸𑀦𑀜𑀸𑀡𑀁 𑀧𑀦 𑀪𑀸𑀬𑀢𑀺, 𑀦 𑀪𑀸𑀬𑀢𑀻𑀢𑀺? 𑀦 𑀪𑀸𑀬𑀢𑀺. 𑀢𑀜𑁆𑀳𑀺 ‘𑀅𑀢𑀻𑀢𑀸 𑀲𑀗𑁆𑀔𑀸𑀭𑀸 𑀦𑀺𑀭𑀼𑀤𑁆𑀥𑀸, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀅𑀦𑀸𑀕𑀢𑀸 𑀦𑀺𑀭𑀼𑀚𑁆𑀛𑀺𑀲𑁆𑀲𑀦𑁆𑀢𑀻’𑀢𑀺 𑀢𑀻𑀭𑀡𑀫𑀢𑁆𑀢𑀫𑁂𑀯 𑀳𑁄𑀢𑀻’’𑀢𑀺. 𑀪𑀸𑀬𑀦𑀝𑁆𑀞𑀸𑀦𑀝𑁆𑀞𑁂𑀦 𑀆𑀭𑀫𑁆𑀫𑀡𑀁 𑀪𑀬𑀁 𑀪𑀸𑀬𑀢𑀺 𑀏𑀢𑀲𑁆𑀫𑀸𑀢𑀺 𑀓𑀢𑁆𑀯𑀸. 𑀪𑀸𑀬𑀦𑀳𑁂𑀢𑀼𑀝𑁆𑀞𑁂𑀦 𑀑𑀢𑁆𑀢𑀧𑁆𑀧𑀁 𑀪𑀬𑀁 𑀧𑀸𑀧𑀢𑁄 𑀪𑀸𑀬𑀢𑀺 𑀏𑀢𑁂𑀦𑀸𑀢𑀺 𑀓𑀢𑁆𑀯𑀸. 𑀪𑀬𑀸𑀦𑀓𑀦𑁆𑀢𑀺 𑀪𑀸𑀬𑀦𑀸𑀓𑀸𑀭𑁄. 𑀢𑁂𑀧𑀻𑀢𑀺 𑀤𑀻𑀖𑀸𑀬𑀼𑀓𑀸 𑀤𑁂𑀯𑀸𑀧𑀺. 𑀥𑀫𑁆𑀫𑀤𑁂𑀲𑀦𑀦𑁆𑀢𑀺 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀧𑀦𑁆𑀦𑀭𑀲𑀮𑀓𑁆𑀔𑀡𑀧𑀝𑀺𑀫𑀡𑁆𑀟𑀺𑀢𑀁 𑀥𑀫𑁆𑀫𑀤𑁂𑀲𑀦𑀁. 𑀬𑁂𑀪𑀼𑀬𑁆𑀬𑁂𑀦𑀸𑀢𑀺 𑀞𑀧𑁂𑀢𑁆𑀯𑀸 𑀔𑀻𑀡𑀸𑀲𑀯𑀤𑁂𑀯𑁂 𑀢𑀤𑀜𑁆𑀜𑁂𑀲𑀁 𑀯𑀲𑁂𑀦 𑀩𑀸𑀳𑀼𑀮𑁆𑀮𑀢𑁄. 𑀔𑀻𑀡𑀸𑀲𑀯𑀢𑁆𑀢𑀸 𑀳𑀺 𑀢𑁂𑀲𑀁 𑀘𑀺𑀢𑁆𑀢𑀼𑀢𑁆𑀭𑀸𑀲𑀪𑀬𑀫𑁆𑀧𑀺 𑀦 𑀉𑀧𑁆𑀧𑀚𑁆𑀚𑀢𑀺. 𑀓𑀸𑀫𑀁 𑀲𑀻𑀳𑁄𑀧𑀫𑀲𑀼𑀢𑁆𑀢𑀝𑁆𑀞𑀓𑀣𑀸𑀬𑀁 (𑀅. 𑀦𑀺. 𑀅𑀝𑁆𑀞. 𑁨.𑁪.𑁩𑁩) 𑀘𑀺𑀢𑁆𑀢𑀼𑀢𑁆𑀭𑀸𑀲𑀪𑀬𑀫𑁆𑀧𑀺 𑀢𑀤𑀢𑁆𑀣𑀪𑀸𑀯𑁂𑀦 𑀯𑀼𑀢𑁆𑀢𑀁, 𑀇𑀥 𑀧𑀦 𑀧𑀓𑀭𑀡𑀸𑀦𑀼𑀭𑀽𑀧𑀢𑁄 𑀜𑀸𑀡𑀪𑀬𑀫𑁂𑀯 𑀕𑀳𑀺𑀢𑀁. 𑀲𑀁𑀯𑁂𑀕𑀦𑁆𑀢𑀺 𑀲𑀳𑁄𑀢𑁆𑀢𑀧𑁆𑀧𑀜𑀸𑀡𑀁. 𑀲𑀦𑁆𑀢𑀸𑀲𑀦𑁆𑀢𑀺 𑀲𑀩𑁆𑀩𑀲𑁄 𑀉𑀩𑁆𑀩𑀺𑀚𑁆𑀚𑀦𑀁. 𑀪𑀸𑀬𑀺𑀢𑀩𑁆𑀩𑀝𑁆𑀞𑁂𑀦 𑀪𑀬𑀫𑁂𑀯 𑀪𑀻𑀫𑀪𑀸𑀯𑁂𑀦 𑀪𑁂𑀭𑀯𑀦𑁆𑀢𑀺 𑀪𑀬𑀪𑁂𑀭𑀯𑀁, 𑀪𑀻𑀢𑀩𑁆𑀩𑀯𑀢𑁆𑀣𑀼. 𑀢𑁂𑀦𑀸𑀳 ‘‘𑀆𑀕𑀘𑁆𑀙𑀢𑀻’’𑀢𑀺, 𑀏𑀢𑀁 𑀦𑀭𑀁 𑀢𑀁 𑀪𑀬𑀪𑁂𑀭𑀯𑀁 𑀆𑀕𑀘𑁆𑀙𑀢𑀺 𑀦𑀽𑀦𑀸𑀢𑀺 𑀅𑀢𑁆𑀣𑁄.

𑀪𑀻𑀭𑀼𑀁 𑀧𑀲𑀁𑀲𑀦𑁆𑀢𑀻𑀢𑀺 𑀧𑀸𑀧𑀢𑁄 𑀪𑀸𑀬𑀦𑀢𑁄 𑀉𑀢𑁆𑀭𑀸𑀲𑀦𑀢𑁄 𑀪𑀻𑀭𑀼𑀁 𑀧𑀲𑀁𑀲𑀦𑁆𑀢𑀺 𑀧𑀡𑁆𑀟𑀺𑀢𑀸. 𑀦 𑀳𑀺 𑀢𑀢𑁆𑀣 𑀲𑀽𑀭𑀦𑁆𑀢𑀺 𑀢𑀲𑁆𑀫𑀺𑀁 𑀧𑀸𑀧𑀓𑀭𑀡𑁂 𑀲𑀽𑀭𑀁 𑀧𑀕𑀩𑁆𑀪𑀥𑀁𑀲𑀺𑀦𑀁 𑀦 𑀳𑀺 𑀧𑀲𑀁𑀲𑀦𑁆𑀢𑀺. 𑀢𑁂𑀦𑀸𑀳 ‘‘𑀪𑀬𑀸 𑀳𑀺 𑀲𑀦𑁆𑀢𑁄 𑀦 𑀓𑀭𑁄𑀦𑁆𑀢𑀺 𑀧𑀸𑀧’’𑀦𑁆𑀢𑀺. 𑀢𑀢𑁆𑀣 𑀪𑀬𑀸𑀢𑀺 𑀧𑀸𑀧𑀼𑀢𑁆𑀭𑀸𑀲𑀢𑁄, 𑀑𑀢𑁆𑀢𑀧𑁆𑀧𑀳𑁂𑀢𑀽𑀢𑀺 𑀅𑀢𑁆𑀣𑁄.

𑀙𑀫𑁆𑀪𑀺𑀢𑀲𑁆𑀲𑀸𑀢𑀺 𑀣𑀫𑁆𑀪𑀺𑀢𑀲𑁆𑀲, 𑀣-𑀓𑀸𑀭𑀲𑁆𑀲 𑀙-𑀓𑀸𑀭𑀸𑀤𑁂𑀲𑁄. 𑀢𑀤𑀢𑁆𑀣𑀫𑀸𑀳 ‘‘𑀲𑀓𑀮𑀲𑀭𑀻𑀭𑀘𑀮𑀦’’𑀦𑁆𑀢𑀺, 𑀪𑀬𑀯𑀲𑁂𑀦 𑀲𑀓𑀮𑀓𑀸𑀬𑀧𑀓𑀫𑁆𑀧𑀦𑀦𑁆𑀢𑀺 𑀅𑀢𑁆𑀣𑁄. 𑀉𑀬𑁆𑀬𑁄𑀥𑀦𑀁 𑀲𑀫𑁆𑀧𑀳𑀸𑀭𑁄.

𑀏𑀓𑁂𑀢𑀺 𑀉𑀢𑁆𑀢𑀭𑀯𑀺𑀳𑀸𑀭𑀯𑀸𑀲𑀺𑀦𑁄. ‘‘𑀭𑀸𑀚𑀕𑀳𑁂’’𑀢𑀺𑀆𑀤𑀺 𑀢𑁂𑀲𑀫𑀥𑀺𑀧𑁆𑀧𑀸𑀬𑀯𑀺𑀯𑀭𑀡𑀁. 𑀏𑀓𑁂𑀓𑀲𑁆𑀫𑀺𑀁 𑀫𑀳𑀸𑀤𑁆𑀯𑀸𑀭𑁂 𑀤𑁆𑀯𑁂 𑀤𑁆𑀯𑁂 𑀓𑀢𑁆𑀯𑀸 𑀘𑀢𑀼𑀲𑀝𑁆𑀞𑀺 𑀔𑀼𑀤𑁆𑀤𑀓𑀤𑁆𑀯𑀸𑀭𑀸𑀦𑀺. ‘‘𑀢𑀤𑀸’’𑀢𑀺𑀆𑀤𑀺𑀦𑀸 𑀅𑀓𑀸𑀭𑀡𑀪𑀸𑀯𑁂 𑀳𑁂𑀢𑀼𑀁 𑀤𑀲𑁆𑀲𑁂𑀢𑀺.

𑀇𑀤𑀸𑀦𑀺 𑀲𑀓𑀯𑀸𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀬𑀁 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀚𑀻𑀯𑀓𑁄 𑀓𑀺𑀭𑀸’’𑀢𑀺𑀆𑀤𑀺 𑀆𑀲𑀗𑁆𑀓𑀦𑀸𑀓𑀸𑀭𑀤𑀲𑁆𑀲𑀦𑀁. 𑀅𑀲𑁆𑀲𑀸𑀢𑀺 𑀅𑀚𑀸𑀢𑀲𑀢𑁆𑀢𑀼𑀭𑀜𑁆𑀜𑁄. 𑀉𑀓𑁆𑀓𑀡𑁆𑀞𑀺𑀢𑁄𑀢𑀺 𑀅𑀦𑀪𑀺𑀭𑀢𑁄. 𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑀼𑀓𑀸𑀫𑁄 𑀫𑀜𑁆𑀜𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀪𑀸𑀬𑀺𑀢𑁆𑀯𑀸𑀢𑀺 𑀪𑀸𑀬𑀦𑀳𑁂𑀢𑀼. 𑀢𑀲𑁆𑀲𑀸𑀢𑀺 𑀚𑀻𑀯𑀓𑀲𑁆𑀲. 𑀲𑀫𑁆𑀫𑀲𑀤𑁆𑀤𑁄 𑀲𑀫𑀸𑀦𑀢𑁆𑀣𑁄, 𑀲𑀫𑀸𑀦𑀪𑀸𑀯𑁄 𑀘 𑀯𑀬𑁂𑀦𑀸𑀢𑀺 𑀆𑀳 ‘‘𑀯𑀬𑀲𑁆𑀲𑀸𑀪𑀺𑀮𑀸𑀧𑁄’’𑀢𑀺. 𑀯𑀬𑁂𑀦 𑀲𑀫𑀸𑀦𑁄 𑀯𑀬𑀲𑁆𑀲𑁄 𑀬𑀣𑀸 ‘‘𑀏𑀓𑀭𑀸𑀚𑀸 𑀳𑀭𑀺𑀲𑁆𑀲𑀯𑀡𑁆𑀡𑁄’’𑀢𑀺 (𑀚𑀸. 𑁧.𑁨.𑁧𑁭). 𑀲𑀫𑀸𑀦𑀲𑀤𑁆𑀤𑀲𑁆𑀲 𑀳𑀺 𑀲𑀸𑀤𑁂𑀲𑀫𑀺𑀘𑁆𑀙𑀦𑁆𑀢𑀺 𑀲𑀤𑁆𑀤𑀯𑀺𑀤𑀽, 𑀢𑁂𑀦 𑀅𑀪𑀺𑀮𑀸𑀧𑁄 𑀆𑀮𑀧𑀦𑀁 𑀢𑀣𑀸, 𑀭𑀼𑀴𑁆𑀳𑀻𑀦𑀺𑀤𑁆𑀤𑁂𑀲𑁄 𑀏𑀲, ‘‘𑀫𑀸𑀭𑀺𑀲𑀸’’𑀢𑀺 𑀆𑀮𑀧𑀦𑀫𑀺𑀯. 𑀬𑀣𑀸 𑀳𑀺 𑀫𑀸𑀭𑀺𑀲𑀸𑀢𑀺 𑀦𑀺𑀤𑁆𑀤𑀼𑀓𑁆𑀔𑀢𑀸𑀪𑀺𑀮𑀸𑀧𑁄 𑀲𑀤𑀼𑀓𑁆𑀔𑁂𑀧𑀺 𑀦𑁂𑀭𑀬𑀺𑀓𑁂 𑀯𑀼𑀘𑁆𑀘𑀢𑀺 ‘‘𑀬𑀤𑀸 𑀔𑁄 𑀢𑁂 𑀫𑀸𑀭𑀺𑀲 𑀲𑀗𑁆𑀓𑀼𑀦𑀸 𑀲𑀗𑁆𑀓𑀼 𑀳𑀤𑀬𑁂 𑀲𑀫𑀸𑀕𑀘𑁆𑀙𑁂𑀬𑁆𑀬𑀸’’𑀢𑀺𑀆𑀤𑀻𑀲𑀼, (𑀫. 𑀦𑀺. 𑁧.𑁫𑁧𑁨) 𑀏𑀯𑀁 𑀬𑁄 𑀓𑁄𑀘𑀺 𑀲𑀳𑀸𑀬𑁄 𑀅𑀲𑀫𑀸𑀦𑀯𑀬𑁄𑀧𑀺 ‘‘𑀲𑀫𑁆𑀫𑀸’’𑀢𑀺 𑀯𑀼𑀘𑁆𑀘𑀢𑀻𑀢𑀺, 𑀢𑀲𑁆𑀫𑀸 𑀲𑀳𑀸𑀬𑀸𑀪𑀺𑀮𑀸𑀧𑁄 𑀇𑀘𑁆𑀘𑁂𑀯 𑀅𑀢𑁆𑀣𑁄. 𑀓𑀘𑁆𑀘𑀺 𑀦 𑀯𑀜𑁆𑀘𑁂𑀲𑀻𑀢𑀺 𑀧𑀸𑀴𑀺𑀬𑀸 𑀲𑀫𑁆𑀩𑀦𑁆𑀥𑁄. ‘‘𑀦 𑀧𑀮𑀫𑁆𑀪𑁂𑀲𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀇𑀥 𑀧𑀭𑀺𑀓𑀧𑁆𑀧𑀢𑁆𑀣𑁄𑀯 𑀲𑀫𑁆𑀪𑀯𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀦 𑀯𑀺𑀧𑁆𑀧𑀮𑀫𑁆𑀪𑁂𑀬𑁆𑀬𑀸𑀲𑀻’’𑀢𑀺, 𑀦 𑀧𑀮𑁄𑀪𑁂𑀬𑁆𑀬𑀸𑀲𑀻𑀢𑀺 𑀅𑀢𑁆𑀣𑁄. 𑀓𑀣𑀸𑀬 𑀲𑀮𑁆𑀮𑀸𑀧𑁄, 𑀲𑁄 𑀏𑀯 𑀦𑀺𑀕𑁆𑀖𑁄𑀲𑁄 𑀢𑀣𑀸.

𑀯𑀺𑀦𑀲𑁆𑀲𑁂𑀬𑁆𑀬𑀸𑀢𑀺 𑀘𑀺𑀢𑁆𑀢𑀯𑀺𑀖𑀸𑀢𑁂𑀦 𑀯𑀺𑀳𑀜𑁆𑀜𑁂𑀬𑁆𑀬. ‘‘𑀦 𑀢𑀁 𑀤𑁂𑀯𑀸’’𑀢𑀺𑀆𑀤𑀺𑀯𑀘𑀦𑀁 𑀲𑀦𑁆𑀥𑀸𑀬 ‘‘𑀤𑀴𑁆𑀳𑀁 𑀓𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀢𑀼𑀭𑀺𑀢𑀯𑀲𑁂𑀦𑀺𑀤𑀫𑀸𑀫𑁂𑀟𑀺𑀢𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀢𑀭𑀫𑀸𑀦𑁄𑀯𑀸’’𑀢𑀺 𑀇𑀫𑀺𑀦𑀸. ‘‘𑀅𑀪𑀺𑀓𑁆𑀓𑀫 𑀫𑀳𑀸𑀭𑀸𑀚𑀸’’𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀢𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀲𑀲𑀫𑁆𑀩𑀦𑁆𑀥𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀳𑀸𑀭𑀸𑀚 𑀘𑁄𑀭𑀩𑀮𑀁 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳.

𑀲𑀸𑀫𑀜𑁆𑀜𑀨𑀮𑀧𑀼𑀘𑁆𑀙𑀸𑀯𑀡𑁆𑀡𑀦𑀸

𑁧𑁬𑁦. 𑀅𑀬𑀁 𑀩𑀳𑀺𑀤𑁆𑀯𑀸𑀭𑀓𑁄𑀝𑁆𑀞𑀓𑁄𑀓𑀸𑀲𑁄 𑀦𑀸𑀕𑀲𑁆𑀲 𑀪𑀽𑀫𑀺 𑀦𑀸𑀫. 𑀢𑁂𑀦𑀸𑀳 ‘‘𑀯𑀺𑀳𑀸𑀭𑀲𑁆𑀲𑀸’’𑀢𑀺𑀆𑀤𑀺. 𑀪𑀕𑀯𑀢𑁄 𑀢𑁂𑀚𑁄𑀢𑀺 𑀩𑀼𑀤𑁆𑀥𑀸𑀦𑀼𑀪𑀸𑀯𑁄. 𑀭𑀜𑁆𑀜𑁄 𑀲𑀭𑀻𑀭𑀁 𑀨𑀭𑀺 𑀬𑀣𑀸 𑀢𑀁 𑀲𑁄𑀡𑀤𑀡𑁆𑀟𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀦𑁆𑀢𑀲𑁆𑀲 𑀅𑀦𑁆𑀢𑁄𑀯𑀦𑀲𑀡𑁆𑀟𑀕𑀢𑀲𑁆𑀲. ‘‘𑀅𑀢𑁆𑀢𑀦𑁄 𑀅𑀧𑀭𑀸𑀥𑀁 𑀲𑀭𑀺𑀢𑁆𑀯𑀸 𑀫𑀳𑀸𑀪𑀬𑀁 𑀉𑀧𑁆𑀧𑀚𑁆𑀚𑀻’’𑀢𑀺 𑀇𑀤𑀁 𑀲𑁂𑀤𑀫𑀼𑀜𑁆𑀘𑀦𑀲𑁆𑀲 𑀓𑀸𑀭𑀡𑀤𑀲𑁆𑀲𑀦𑀁. 𑀦 𑀳𑀺 𑀩𑀼𑀤𑁆𑀥𑀸𑀦𑀼𑀪𑀸𑀯𑀢𑁄 𑀲𑁂𑀤𑀫𑀼𑀜𑁆𑀘𑀦𑀁 𑀲𑀫𑁆𑀪𑀯𑀢𑀺 𑀓𑀸𑀬𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀺𑀳𑁂𑀢𑀼𑀪𑀸𑀯𑀢𑁄.

𑀏𑀓𑁂𑀢𑀺 𑀉𑀢𑁆𑀢𑀭𑀯𑀺𑀳𑀸𑀭𑀯𑀸𑀲𑀺𑀦𑁄𑀬𑁂𑀯. 𑀢𑀤𑀬𑀼𑀢𑁆𑀢𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀺 ‘‘𑀇𑀫𑀺𑀦𑀸’’𑀢𑀺𑀆𑀤𑀺𑀦𑀸. 𑀅𑀪𑀺𑀫𑀸𑀭𑁂𑀢𑀺 𑀥𑀦𑀼𑀕𑁆𑀕𑀳𑁂. 𑀥𑀦𑀧𑀸𑀮𑀦𑁆𑀢𑀺 𑀦𑀸𑀴𑀸𑀕𑀺𑀭𑀺𑀁. 𑀲𑁄 𑀳𑀺 𑀢𑀤𑀸 𑀦𑀸𑀕𑀭𑁂𑀳𑀺 𑀧𑀽𑀚𑀺𑀢𑀥𑀦𑀭𑀸𑀲𑀺𑀦𑁄 𑀮𑀩𑁆𑀪𑀦𑀢𑁄 ‘‘𑀥𑀦𑀧𑀸𑀮𑁄’’𑀢𑀺 𑀯𑁄𑀳𑀭𑀻𑀬𑀢𑀺. 𑀦 𑀓𑁂𑀯𑀮𑀁 𑀤𑀺𑀝𑁆𑀞𑀧𑀼𑀩𑁆𑀩𑀢𑁄𑀬𑁂𑀯, 𑀅𑀣 𑀔𑁄 𑀧𑀓𑀢𑀺𑀬𑀸𑀧𑀺 𑀪𑀕𑀯𑀸 𑀲𑀜𑁆𑀜𑀸𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀪𑀕𑀯𑀸 𑀳𑀻’’𑀢𑀺𑀆𑀤𑀺𑀫𑀸𑀳. 𑀆𑀓𑀺𑀡𑁆𑀡𑀯𑀭𑀮𑀓𑁆𑀔𑀡𑁄𑀢𑀺 𑀩𑀢𑁆𑀢𑀺𑀁𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂 𑀲𑀦𑁆𑀥𑀸𑀬𑀸𑀳. 𑀅𑀦𑀼𑀩𑁆𑀬𑀜𑁆𑀚𑀦𑀧𑀝𑀺𑀫𑀡𑁆𑀟𑀺𑀢𑁄𑀢𑀺 𑀅𑀲𑀻𑀢𑀸𑀦𑀼𑀩𑁆𑀬𑀜𑁆𑀚𑀦𑁂 (𑀚𑀺𑀦𑀸𑀮𑀗𑁆𑀓𑀸𑀭𑀝𑀻𑀓𑀸𑀬 𑀯𑀺𑀚𑀸𑀢𑀫𑀗𑁆𑀕𑀮𑀯𑀡𑁆𑀡𑀦𑀸𑀬𑀁 𑀯𑀺𑀢𑁆𑀣𑀸𑀭𑁄). 𑀙𑀩𑁆𑀩𑀡𑁆𑀡𑀸𑀳𑀺 𑀭𑀲𑁆𑀫𑀻𑀳𑀻𑀢𑀺 𑀢𑀤𑀸 𑀯𑀢𑁆𑀢𑀫𑀸𑀦𑀸 𑀭𑀲𑁆𑀫𑀺𑀬𑁄. 𑀇𑀲𑁆𑀲𑀭𑀺𑀬𑀮𑀻𑀴𑀸𑀬𑀸𑀢𑀺 𑀇𑀲𑁆𑀲𑀭𑀺𑀬𑀯𑀺𑀮𑀸𑀲𑁂𑀦. 𑀦𑀦𑀼 𑀘 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀲𑁆𑀲𑀭𑀺𑀬𑀮𑀻𑀮𑀸𑀬 𑀧𑀼𑀘𑁆𑀙𑀸 𑀅𑀕𑀸𑀭𑀯𑁄𑀬𑁂𑀯 𑀲𑀺𑀬𑀸𑀢𑀺 𑀘𑁄𑀤𑀦𑀸𑀬 ‘‘𑀧𑀓𑀢𑀺 𑀳𑁂𑀲𑀸’’𑀢𑀺𑀆𑀤𑀺𑀫𑀸𑀳, 𑀧𑀓𑀢𑀺𑀬𑀸 𑀧𑀼𑀘𑁆𑀙𑀦𑀢𑁄 𑀦 𑀅𑀕𑀸𑀭𑀯𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁂𑀦 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀧𑀼𑀭𑁂 𑀓𑀢𑁂𑀧𑀺 𑀅𑀢𑁆𑀣𑀢𑁄 𑀢𑀲𑁆𑀲 𑀧𑀼𑀭𑀢𑁄 𑀦𑀺𑀲𑀺𑀦𑁆𑀦𑁄 𑀦𑀸𑀫. 𑀢𑁂𑀦𑀸𑀳 ‘‘𑀧𑀭𑀺𑀯𑀸𑀭𑁂𑀢𑁆𑀯𑀸’’𑀢𑀺𑀆𑀤𑀺.

𑁧𑁬𑁧. 𑀬𑁂𑀦, 𑀢𑁂𑀦𑀸𑀢𑀺 𑀘 𑀪𑀼𑀫𑁆𑀫𑀢𑁆𑀣𑁂 𑀓𑀭𑀡𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀬𑀢𑁆𑀣, 𑀢𑀢𑁆𑀣𑀸’’𑀢𑀺 𑀇𑀫𑀺𑀦𑀸. 𑀬𑁂𑀦 𑀫𑀡𑁆𑀟𑀮𑀲𑁆𑀲 𑀤𑁆𑀯𑀸𑀭𑀁, 𑀢𑁂𑀦𑀽𑀧𑀲𑀗𑁆𑀓𑀫𑀻𑀢𑀺 𑀲𑀫𑁆𑀧𑀢𑁆𑀢𑀪𑀸𑀯𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀇𑀥 𑀉𑀧𑀕𑀫𑀦𑀫𑁂𑀯 𑀬𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀉𑀧𑀕𑀢𑁄’’𑀢𑀺. 𑀅𑀦𑀼𑀘𑁆𑀙𑀯𑀺𑀓𑁂 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂𑀢𑀺 𑀬𑀢𑁆𑀣 𑀯𑀺𑀜𑁆𑀜𑀼𑀚𑀸𑀢𑀺𑀓𑀸 𑀅𑀝𑁆𑀞𑀁𑀲𑀼, 𑀢𑀲𑁆𑀫𑀺𑀁. 𑀓𑁄 𑀧𑀦𑁂𑀲 𑀅𑀦𑀼𑀘𑁆𑀙𑀯𑀺𑀓𑀧𑀤𑁂𑀲𑁄 𑀦𑀸𑀫? 𑀅𑀢𑀺𑀤𑀽𑀭𑀢𑀸𑀤𑀺𑀙𑀦𑀺𑀲𑀚𑁆𑀚𑀤𑁄𑀲𑀯𑀺𑀭𑀳𑀺𑀢𑁄 𑀧𑀤𑁂𑀲𑁄, 𑀦𑀧𑀘𑁆𑀙𑀢𑀸𑀤𑀺𑀅𑀝𑁆𑀞𑀦𑀺𑀲𑀚𑁆𑀚𑀤𑁄𑀲𑀯𑀺𑀭𑀳𑀺𑀢𑁄 𑀯𑀸. 𑀬𑀣𑀸𑀳𑀼 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑁋

‘‘𑀦 𑀧𑀘𑁆𑀙𑀢𑁄 𑀦 𑀧𑀼𑀭𑀢𑁄, 𑀦𑀸𑀧𑀺 𑀆𑀲𑀦𑁆𑀦𑀤𑀽𑀭𑀢𑁄;

𑀦 𑀓𑀘𑁆𑀙𑁂 𑀦𑁄 𑀧𑀝𑀺𑀯𑀸𑀢𑁂, 𑀦 𑀘𑀸𑀧𑀺 𑀑𑀦𑀢𑀼𑀦𑁆𑀦𑀢𑁂;

𑀇𑀫𑁂 𑀤𑁄𑀲𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸, 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀅𑀳𑀽’’𑀢𑀺. (𑀔𑀼. 𑀧𑀸. 𑀅𑀝𑁆𑀞. 𑀏𑀯𑀫𑀺𑀘𑁆𑀘𑀸𑀤𑀺𑀧𑀸𑀞𑀯𑀡𑁆𑀡𑀦𑀸; 𑀲𑀼. 𑀦𑀺. 𑀅𑀝𑁆𑀞. 𑁨.𑁨𑁬𑁧);

𑀢𑀤𑀸 𑀪𑀺𑀓𑁆𑀔𑀼𑀲𑀗𑁆𑀖𑁂 𑀢𑀼𑀡𑁆𑀳𑀻𑀪𑀸𑀯𑀲𑁆𑀲 𑀅𑀦𑀯𑀲𑁂𑀲𑀢𑁄 𑀩𑁆𑀬𑀸𑀧𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀼𑀡𑁆𑀳𑀻𑀪𑀽𑀢𑀁 𑀢𑀼𑀡𑁆𑀳𑀻𑀪𑀽𑀢’’𑀦𑁆𑀢𑀺 𑀯𑀺𑀘𑁆𑀙𑀸𑀯𑀘𑀦𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀬𑀢𑁄…𑀧𑁂… 𑀫𑁂𑀯𑀸’’𑀢𑀺, 𑀬𑀢𑁄 𑀬𑀢𑁄 𑀪𑀺𑀓𑁆𑀔𑀼𑀢𑁄𑀢𑀺 𑀅𑀢𑁆𑀣𑁄. 𑀳𑀢𑁆𑀣𑁂𑀦, 𑀳𑀢𑁆𑀣𑀲𑁆𑀲 𑀯𑀸 𑀓𑀼𑀓𑀢𑀪𑀸𑀯𑁄 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑀁, 𑀅𑀲𑀜𑁆𑀜𑀫𑁄, 𑀅𑀲𑀫𑁆𑀧𑀚𑀜𑁆𑀜𑀓𑀺𑀭𑀺𑀬𑀸 𑀘. 𑀢𑀣𑀸 𑀧𑀸𑀤𑀓𑀼𑀓𑁆𑀓𑀼𑀘𑁆𑀘𑀦𑁆𑀢𑀺 𑀏𑀢𑁆𑀣𑀸𑀧𑀺. 𑀯𑀸-𑀲𑀤𑁆𑀤𑁄 𑀅𑀯𑀼𑀢𑁆𑀢𑀯𑀺𑀓𑀧𑁆𑀧𑀦𑁂, 𑀢𑁂𑀦 𑀢𑀤𑀜𑁆𑀜𑁄𑀧𑀺 𑀘𑀓𑁆𑀔𑀼𑀲𑁄𑀢𑀸𑀤𑀺𑀅𑀲𑀜𑁆𑀜𑀫𑁄 𑀦𑀢𑁆𑀣𑀻𑀢𑀺 𑀯𑀺𑀪𑀸𑀯𑀺𑀢𑁄. 𑀢𑀢𑁆𑀣 𑀧𑀦 𑀘𑀓𑁆𑀔𑀼𑀅𑀲𑀁𑀬𑀫𑁄 𑀲𑀩𑁆𑀩𑀧𑀞𑀫𑁄 𑀤𑀼𑀦𑁆𑀦𑀺𑀯𑀸𑀭𑀺𑀢𑁄 𑀘𑀸𑀢𑀺 𑀢𑀤𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀯𑀺𑀧𑁆𑀧𑀲𑀦𑁆𑀦𑀭𑀳𑀤𑀫𑀺𑀯𑀸𑀢𑀺 𑀅𑀦𑀸𑀯𑀺𑀮𑁄𑀤𑀓𑀲𑀭𑀫𑀺𑀯. 𑀬𑁂𑀦𑁂𑀢𑀭𑀳𑀺…𑀧𑁂… 𑀇𑀫𑀺𑀦𑀸 𑀫𑁂…𑀧𑁂… 𑀳𑁄𑀢𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀜𑁆𑀜𑁄 𑀳𑀺 𑀅𑀢𑁆𑀣𑀓𑁆𑀓𑀫𑁄, 𑀅𑀜𑁆𑀜𑁄 𑀲𑀤𑁆𑀤𑀓𑁆𑀓𑀫𑁄𑀢𑀺 𑀆𑀳 ‘‘𑀬𑁂𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀓𑀸𑀬𑀺𑀓-𑀯𑀸𑀘𑀲𑀺𑀓𑁂𑀦 𑀉𑀧𑀲𑀫𑁂𑀦 𑀮𑀤𑁆𑀥𑁂𑀦 𑀫𑀸𑀦𑀲𑀺𑀓𑁄𑀧𑀺 𑀉𑀧𑀲𑀫𑁄 𑀅𑀦𑀼𑀫𑀸𑀦𑀢𑁄 𑀮𑀤𑁆𑀥𑁄 𑀏𑀯𑀸𑀢𑀺 𑀓𑀢𑁆𑀯𑀸 ‘‘𑀫𑀸𑀦𑀲𑀺𑀓𑁂𑀦 𑀘𑀸’’𑀢𑀺 𑀯𑀼𑀢𑁆𑀢𑀁. 𑀲𑀻𑀮𑀽𑀧𑀲𑀫𑁂𑀦𑀸𑀢𑀺 𑀲𑀻𑀮𑀲𑀜𑁆𑀜𑀫𑁂𑀦. 𑀯𑀼𑀢𑁆𑀢𑀫𑀢𑁆𑀣𑀁 𑀮𑁄𑀓𑀧𑀓𑀢𑀺𑀬𑀸 𑀲𑀸𑀥𑁂𑀦𑁆𑀢𑁄 ‘‘𑀤𑀼𑀮𑁆𑀮𑀪𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀮𑀤𑁆𑀥𑀸𑀢𑀺 𑀮𑀪𑀺𑀢𑁆𑀯𑀸.

𑀉𑀧𑀲𑀫𑀦𑁆𑀢𑀺 𑀆𑀘𑀸𑀭𑀲𑀫𑁆𑀧𑀢𑁆𑀢𑀺𑀲𑀗𑁆𑀔𑀸𑀢𑀁 𑀲𑀁𑀬𑀫𑀁. ‘‘𑀏𑀯’’𑀦𑁆𑀢𑀺𑀆𑀤𑀺𑀦𑀸 𑀢𑀣𑀸 𑀇𑀘𑁆𑀙𑀸𑀬 𑀓𑀸𑀭𑀡𑀁 𑀤𑀲𑁆𑀲𑁂𑀢𑀺. 𑀲𑁄𑀢𑀺 𑀅𑀬𑁆𑀬𑀓𑁄, 𑀉𑀤𑀬𑀪𑀤𑁆𑀤𑁄 𑀯𑀸. ‘‘𑀓𑀺𑀜𑁆𑀘𑀸𑀧𑀻’’𑀢𑀺𑀆𑀤𑀺 𑀢𑀤𑀢𑁆𑀣-𑀲𑀫𑀢𑁆𑀣𑀦𑀁. 𑀖𑀸𑀢𑁂𑀲𑁆𑀲𑀢𑀺𑀬𑁂𑀯𑀸𑀢𑀺 𑀢𑀁𑀓𑀸𑀮𑀸𑀧𑁂𑀓𑁆𑀔𑀸𑀬 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀖𑀸𑀢𑁂𑀲𑀻’’𑀢𑀺. 𑀇𑀤𑀜𑁆𑀳𑀺 𑀲𑀫𑁆𑀧𑀢𑀺𑀧𑁂𑀓𑁆𑀔𑀯𑀘𑀦𑀁. 𑀧𑀜𑁆𑀘𑀧𑀭𑀺𑀯𑀝𑁆𑀝𑁄𑀢𑀺 𑀧𑀜𑁆𑀘𑀭𑀸𑀚𑀧𑀭𑀺𑀯𑀝𑁆𑀝𑁄.

𑀓𑀲𑁆𑀫𑀸 𑀏𑀯𑀫𑀸𑀳, 𑀦𑀦𑀼 𑀪𑀕𑀯𑀦𑁆𑀢𑀫𑀼𑀤𑁆𑀤𑀺𑀲𑁆𑀲 𑀭𑀸𑀚𑀸 𑀦 𑀓𑀺𑀜𑁆𑀘𑀺 𑀯𑀤𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀘𑀻𑀪𑁂𑀤𑁂𑀢𑀺 𑀬𑀣𑀸𑀯𑀼𑀢𑁆𑀢𑀉𑀤𑀸𑀦𑀯𑀘𑀻𑀪𑁂𑀤𑁂. 𑀢𑀼𑀡𑁆𑀳𑀻 𑀦𑀺𑀭𑀯𑁄𑀢𑀺 𑀧𑀭𑀺𑀬𑀸𑀬𑀯𑀘𑀦𑀫𑁂𑀢𑀁. ‘‘𑀅𑀬’’𑀦𑁆𑀢𑀺𑀆𑀤𑀺 𑀘𑀺𑀢𑁆𑀢𑀚𑀸𑀦𑀦𑀸𑀓𑀸𑀭𑀤𑀲𑁆𑀲𑀦𑀁. 𑀅𑀬𑀁…𑀧𑁂… 𑀦 𑀲𑀓𑁆𑀔𑀺𑀲𑁆𑀲𑀢𑀻𑀢𑀺 𑀜𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀘𑀦𑀸𑀦𑀦𑁆𑀢𑀭𑀦𑁆𑀢𑀺 𑀉𑀤𑀸𑀦𑀯𑀘𑀦𑀸𑀦𑀦𑁆𑀢𑀭𑀁. 𑀬𑁂𑀦𑀸𑀢𑀺 𑀬𑀢𑁆𑀣 𑀧𑀤𑁂𑀲𑁂, 𑀬𑁂𑀦 𑀯𑀸 𑀲𑁄𑀢𑀧𑀣𑁂𑀦. 𑀬𑁂𑀦 𑀧𑁂𑀫𑀦𑁆𑀢𑀺 𑀏𑀢𑁆𑀣𑀸𑀧𑀺 𑀬𑀣𑀸𑀭𑀳𑀫𑁂𑀲 𑀦𑀬𑁄.

𑀓𑀢𑀸𑀧𑀭𑀸𑀥𑀲𑁆𑀲 𑀆𑀮𑀧𑀦𑀁 𑀦𑀸𑀫 𑀤𑀼𑀓𑁆𑀓𑀭𑀦𑁆𑀢𑀺 𑀲𑀦𑁆𑀥𑀸𑀬 ‘‘𑀫𑀼𑀔𑀁 𑀦𑀧𑁆𑀧𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀆𑀕𑀫𑀸 𑀔𑁄 𑀢𑁆𑀯𑀁 𑀫𑀳𑀸𑀭𑀸𑀚 𑀬𑀣𑀸𑀧𑁂𑀫’’𑀦𑁆𑀢𑀺 𑀯𑀘𑀦𑀦𑀺𑀤𑁆𑀤𑀺𑀝𑁆𑀞𑀁 𑀯𑀸 𑀢𑀤𑀸 𑀢𑀤𑀢𑁆𑀣𑀤𑀻𑀧𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀁 𑀦𑀸𑀦𑀸𑀦𑀬𑀯𑀺𑀘𑀺𑀢𑁆𑀢𑀁 𑀪𑀕𑀯𑀢𑁄 𑀫𑀥𑀼𑀭𑀯𑀘𑀦𑀫𑁆𑀧𑀺 𑀲𑀦𑁆𑀥𑀸𑀬 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀓𑀫𑁆𑀧𑀺 𑀳𑀺 𑀅𑀢𑁆𑀣𑀁 𑀪𑀕𑀯𑀸 𑀬𑀣𑀸 𑀲𑁄𑀢𑀽𑀦𑀁 𑀜𑀸𑀡𑀁 𑀧𑀯𑀢𑁆𑀢𑀢𑀺, 𑀢𑀣𑀸 𑀤𑁂𑀲𑁂𑀢𑀺. 𑀬𑀁 𑀲𑀦𑁆𑀥𑀸𑀬 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁 ‘‘𑀪𑀕𑀯𑀢𑀸 𑀅𑀩𑁆𑀬𑀸𑀓𑀢𑀁 𑀢𑀦𑁆𑀢𑀺𑀧𑀤𑀁 𑀦𑀸𑀫 𑀦𑀢𑁆𑀣𑀺, 𑀲𑀩𑁆𑀩𑁂𑀲𑀜𑁆𑀜𑁂𑀯 𑀅𑀢𑁆𑀣𑁄𑀧𑀺 𑀪𑀸𑀲𑀺𑀢𑁄’’𑀢𑀺. 𑀧𑀜𑁆𑀘𑀳𑀸𑀓𑀸𑀭𑁂𑀳𑀻𑀢𑀺 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀲𑀫𑀪𑀸𑀯𑀸𑀤𑀺𑀲𑀗𑁆𑀔𑀸𑀢𑁂𑀳𑀺 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀫𑀳𑀸𑀦𑀺𑀤𑁆𑀤𑁂𑀲𑁂 (𑀫𑀳𑀸𑀦𑀺. 𑁩𑁮, 𑁧𑁬𑁨) 𑁋

‘‘𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀢𑀸𑀤𑀻 𑀇𑀝𑁆𑀞𑀸𑀦𑀺𑀝𑁆𑀞𑁂 𑀢𑀸𑀤𑀻, 𑀘𑀢𑁆𑀢𑀸𑀯𑀻𑀢𑀺 𑀢𑀸𑀤𑀻, 𑀢𑀺𑀡𑁆𑀡𑀸𑀯𑀻𑀢𑀺 𑀢𑀸𑀤𑀻, 𑀫𑀼𑀢𑁆𑀢𑀸𑀯𑀻𑀢𑀺 𑀢𑀸𑀤𑀻, 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻.

𑀓𑀣𑀁 𑀅𑀭𑀳𑀸 𑀇𑀝𑁆𑀞𑀸𑀦𑀺𑀝𑁆𑀞𑁂 𑀢𑀸𑀤𑀻? 𑀅𑀭𑀳𑀸 𑀮𑀸𑀪𑁂𑀧𑀺 𑀢𑀸𑀤𑀻, 𑀅𑀮𑀸𑀪𑁂𑀧𑀺, 𑀬𑀲𑁂𑀧𑀺, 𑀅𑀬𑀲𑁂𑀧𑀺, 𑀧𑀲𑀁𑀲𑀸𑀬𑀧𑀺, 𑀦𑀺𑀦𑁆𑀤𑀸𑀬𑀧𑀺, 𑀲𑀼𑀔𑁂𑀧𑀺, 𑀤𑀼𑀓𑁆𑀔𑁂𑀧𑀺 𑀢𑀸𑀤𑀻, 𑀏𑀓𑀁 𑀘𑁂 𑀩𑀸𑀳𑀁 𑀕𑀦𑁆𑀥𑁂𑀦 𑀮𑀺𑀫𑁆𑀧𑁂𑀬𑁆𑀬𑀼𑀁, 𑀏𑀓𑀁 𑀘𑁂 𑀩𑀸𑀳𑀁 𑀯𑀸𑀲𑀺𑀬𑀸 𑀢𑀘𑁆𑀙𑁂𑀬𑁆𑀬𑀼𑀁, 𑀅𑀫𑀼𑀲𑁆𑀫𑀺𑀁 𑀦𑀢𑁆𑀣𑀺 𑀭𑀸𑀕𑁄, 𑀅𑀫𑀼𑀲𑁆𑀫𑀺𑀁 𑀦𑀢𑁆𑀣𑀺 𑀧𑀝𑀺𑀖𑀁, 𑀅𑀦𑀼𑀦𑀬𑀧𑀝𑀺𑀖𑀯𑀺𑀧𑁆𑀧𑀳𑀻𑀦𑁄, 𑀉𑀕𑁆𑀖𑀸𑀢𑀺𑀦𑀺𑀖𑀸𑀢𑀺𑀯𑀻𑀢𑀺𑀯𑀢𑁆𑀢𑁄, 𑀅𑀦𑀼𑀭𑁄𑀥𑀯𑀺𑀭𑁄𑀥𑀲𑀫𑀢𑀺𑀓𑁆𑀓𑀦𑁆𑀢𑁄, 𑀏𑀯𑀁 𑀅𑀭𑀳𑀸 𑀇𑀝𑁆𑀞𑀸𑀦𑀺𑀝𑁆𑀞𑁂 𑀢𑀸𑀤𑀻.

𑀓𑀣𑀁 𑀅𑀭𑀳𑀸 𑀘𑀢𑁆𑀢𑀸𑀯𑀻𑀢𑀺 𑀢𑀸𑀤𑀻? 𑀅𑀭𑀳𑀢𑁄…𑀧𑁂… 𑀣𑀫𑁆𑀪𑁄, 𑀲𑀸𑀭𑀫𑁆𑀪𑁄, 𑀫𑀸𑀦𑁄, 𑀅𑀢𑀺𑀫𑀸𑀦𑁄, 𑀫𑀤𑁄, 𑀧𑀫𑀸𑀤𑁄, 𑀲𑀩𑁆𑀩𑁂 𑀓𑀺𑀮𑁂𑀲𑀸, 𑀲𑀩𑁆𑀩𑁂 𑀤𑀼𑀘𑁆𑀘𑀭𑀺𑀢𑀸, 𑀲𑀩𑁆𑀩𑁂 𑀤𑀭𑀣𑀸, 𑀲𑀩𑁆𑀩𑁂 𑀧𑀭𑀺𑀴𑀸𑀳𑀸, 𑀲𑀩𑁆𑀩𑁂 𑀲𑀦𑁆𑀢𑀸𑀧𑀸, 𑀲𑀩𑁆𑀩𑀸 𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸 𑀘𑀢𑁆𑀢𑀸 𑀯𑀦𑁆𑀢𑀸 𑀫𑀼𑀢𑁆𑀢𑀸 𑀧𑀳𑀻𑀦𑀸 𑀧𑀝𑀺𑀦𑀺𑀲𑁆𑀲𑀝𑁆𑀞𑀸, 𑀏𑀯𑀁 𑀅𑀭𑀳𑀸 𑀘𑀢𑁆𑀢𑀸𑀯𑀻𑀢𑀺 𑀢𑀸𑀤𑀻.

𑀓𑀣𑀁 𑀅𑀭𑀳𑀸 𑀢𑀺𑀡𑁆𑀡𑀸𑀯𑀻𑀢𑀺 𑀢𑀸𑀤𑀻? 𑀅𑀭𑀳𑀸 𑀓𑀸𑀫𑁄𑀖𑀁 𑀢𑀺𑀡𑁆𑀡𑁄, 𑀪𑀯𑁄𑀖𑀁 𑀢𑀺𑀡𑁆𑀡𑁄, 𑀤𑀺𑀝𑁆𑀞𑁄𑀖𑀁 𑀢𑀺𑀡𑁆𑀡𑁄, 𑀅𑀯𑀺𑀚𑁆𑀚𑁄𑀖𑀁 𑀢𑀺𑀡𑁆𑀡𑁄, 𑀲𑀩𑁆𑀩𑀁 𑀲𑀁𑀲𑀸𑀭𑀧𑀣𑀁 𑀢𑀺𑀡𑁆𑀡𑁄 𑀉𑀢𑁆𑀢𑀺𑀡𑁆𑀡𑁄 𑀦𑀺𑀢𑁆𑀢𑀺𑀡𑁆𑀡𑁄 𑀅𑀢𑀺𑀓𑁆𑀓𑀦𑁆𑀢𑁄 𑀲𑀫𑀢𑀺𑀓𑁆𑀓𑀦𑁆𑀢𑁄 𑀯𑀻𑀢𑀺𑀯𑀢𑁆𑀢𑁄, 𑀲𑁄 𑀯𑀼𑀝𑁆𑀞𑀯𑀸𑀲𑁄 𑀘𑀺𑀡𑁆𑀡𑀘𑀭𑀡𑁄 𑀚𑀸𑀢𑀺𑀫𑀭𑀡𑀲𑀗𑁆𑀔𑀬𑁄, 𑀚𑀸𑀢𑀺𑀫𑀭𑀡𑀲𑀁𑀲𑀸𑀭𑁄 (𑀫𑀳𑀸𑀦𑀺. 𑁩𑁮) 𑀦𑀢𑁆𑀣𑀺 𑀢𑀲𑁆𑀲 𑀧𑀼𑀦𑀩𑁆𑀪𑀯𑁄𑀢𑀺, 𑀏𑀯𑀁 𑀅𑀭𑀳𑀸 𑀢𑀺𑀡𑁆𑀡𑀸𑀯𑀻𑀢𑀺 𑀢𑀸𑀤𑀻.

𑀓𑀣𑀁 𑀅𑀭𑀳𑀸 𑀫𑀼𑀢𑁆𑀢𑀸𑀯𑀻𑀢𑀺 𑀢𑀸𑀤𑀻? 𑀅𑀭𑀳𑀢𑁄 𑀭𑀸𑀕𑀸 𑀘𑀺𑀢𑁆𑀢𑀁 𑀫𑀼𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀲𑀼𑀯𑀺𑀫𑀼𑀢𑁆𑀢𑀁, 𑀤𑁄𑀲𑀸, 𑀫𑁄𑀳𑀸, 𑀓𑁄𑀥𑀸, 𑀉𑀧𑀦𑀸𑀳𑀸, 𑀫𑀓𑁆𑀔𑀸, 𑀧𑀴𑀸𑀲𑀸, 𑀇𑀲𑁆𑀲𑀸𑀬, 𑀫𑀘𑁆𑀙𑀭𑀺𑀬𑀸, 𑀫𑀸𑀬𑀸𑀬, 𑀲𑀸𑀞𑁂𑀬𑁆𑀬𑀸, 𑀣𑀫𑁆𑀪𑀸, 𑀲𑀸𑀭𑀫𑁆𑀪𑀸, 𑀫𑀸𑀦𑀸, 𑀅𑀢𑀺𑀫𑀸𑀦𑀸, 𑀫𑀤𑀸, 𑀧𑀫𑀸𑀤𑀸, 𑀲𑀩𑁆𑀩𑀓𑀺𑀮𑁂𑀲𑁂𑀳𑀺, 𑀲𑀩𑁆𑀩𑀤𑀼𑀘𑁆𑀘𑀭𑀺𑀢𑁂𑀳𑀺, 𑀲𑀩𑁆𑀩𑀤𑀭𑀣𑁂𑀳𑀺, 𑀲𑀩𑁆𑀩𑀧𑀭𑀺𑀴𑀸𑀳𑁂𑀳𑀺, 𑀲𑀩𑁆𑀩𑀲𑀦𑁆𑀢𑀸𑀧𑁂𑀳𑀺, 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑁂𑀳𑀺 𑀘𑀺𑀢𑁆𑀢𑀁 𑀫𑀼𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀲𑀼𑀯𑀺𑀫𑀼𑀢𑁆𑀢𑀁; 𑀏𑀯𑀁 𑀅𑀭𑀳𑀸 𑀫𑀼𑀢𑁆𑀢𑀸𑀯𑀻𑀢𑀺 𑀢𑀸𑀤𑀻.

𑀓𑀣𑀁 𑀅𑀭𑀳𑀸 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻? 𑀅𑀭𑀳𑀸 ‘𑀲𑀻𑀮𑁂 𑀲𑀢𑀺 𑀲𑀻𑀮𑀯𑀸’𑀢𑀺 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻, ‘𑀲𑀤𑁆𑀥𑀸𑀬 𑀲𑀢𑀺 𑀲𑀤𑁆𑀥𑁄’𑀢𑀺, ‘𑀯𑀻𑀭𑀺𑀬𑁂 𑀲𑀢𑀺 𑀯𑀻𑀭𑀺𑀬𑀯𑀸’𑀢𑀺, ‘𑀲𑀢𑀺𑀬𑀸 𑀲𑀢𑀺 𑀲𑀢𑀺𑀫𑀸’𑀢𑀺, ‘𑀲𑀫𑀸𑀥𑀺𑀫𑁆𑀳𑀺 𑀲𑀢𑀺 𑀲𑀫𑀸𑀳𑀺𑀢𑁄’𑀢𑀺, ‘𑀧𑀜𑁆𑀜𑀸𑀬 𑀲𑀢𑀺 𑀧𑀜𑁆𑀜𑀯𑀸’𑀢𑀺, ‘𑀯𑀺𑀚𑁆𑀚𑀸𑀬 𑀲𑀢𑀺 𑀢𑁂𑀯𑀺𑀚𑁆𑀚𑁄’𑀢𑀺, ‘𑀅𑀪𑀺𑀜𑁆𑀜𑀸𑀬 𑀲𑀢𑀺 𑀙𑀴𑀪𑀺𑀜𑁆𑀜𑁄’𑀢𑀺 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻, 𑀏𑀯𑀁 𑀅𑀭𑀳𑀸 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻’’𑀢𑀺.

𑀪𑀕𑀯𑀸 𑀧𑀦 𑀲𑀩𑁆𑀩𑁂𑀲𑀫𑁆𑀧𑀺 𑀢𑀸𑀤𑀻𑀦𑀫𑀢𑀺𑀲𑀬𑁄 𑀢𑀸𑀤𑀻. 𑀢𑁂𑀦𑀸𑀳 ‘‘𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄’’𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀪𑀕𑀯𑀢𑀸 𑀓𑀸𑀴𑀓𑀸𑀭𑀸𑀫𑀲𑀼𑀢𑁆𑀢𑀦𑁆𑀢𑁂 ‘‘𑀇𑀢𑀺 𑀔𑁄 𑀪𑀺𑀓𑁆𑀔𑀯𑁂 𑀢𑀣𑀸𑀕𑀢𑁄 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀢𑀸𑀤𑀻𑀬𑁂𑀯 𑀢𑀸𑀤𑀻, 𑀢𑀫𑁆𑀳𑀸 𑀘 𑀧𑀦 𑀢𑀸𑀤𑀺𑀫𑁆𑀳𑀸 𑀅𑀜𑁆𑀜𑁄 𑀢𑀸𑀤𑀻 𑀉𑀢𑁆𑀢𑀭𑀺𑀢𑀭𑁄 𑀯𑀸 𑀧𑀡𑀻𑀢𑀢𑀭𑁄 𑀯𑀸 𑀦𑀢𑁆𑀣𑀻𑀢𑀺 𑀯𑀤𑀸𑀫𑀻’’𑀢𑀺 (𑀅. 𑀦𑀺. 𑁪.𑁨𑁪). 𑀅𑀣 𑀯𑀸 𑀧𑀜𑁆𑀘𑀯𑀺𑀥𑀸𑀭𑀺𑀬𑀺𑀤𑁆𑀥𑀺𑀲𑀺𑀤𑁆𑀥𑁂𑀳𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀢𑀸𑀤𑀺𑀮𑀓𑁆𑀔𑀡𑁂 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀆𑀬𑀲𑁆𑀫𑀢𑀸 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 𑁋

‘‘𑀓𑀢𑀫𑀸 𑀅𑀭𑀺𑀬𑀸 𑀇𑀤𑁆𑀥𑀺? 𑀇𑀥 𑀪𑀺𑀓𑁆𑀔𑀼 𑀲𑀘𑁂 𑀆𑀓𑀗𑁆𑀔𑀢𑀺 ‘𑀧𑀝𑀺𑀓𑀽𑀮𑁂 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬’𑀦𑁆𑀢𑀺, 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀢𑀢𑁆𑀣 𑀯𑀺𑀳𑀭𑀢𑀺, 𑀲𑀘𑁂 𑀆𑀓𑀗𑁆𑀔𑀢𑀺 ‘𑀅𑀧𑁆𑀧𑀝𑀺𑀓𑀽𑀮𑁂 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬’𑀦𑁆𑀢𑀺, 𑀧𑀝𑀺𑀓𑀽𑀮𑀲𑀜𑁆𑀜𑀻 𑀢𑀢𑁆𑀣 𑀯𑀺𑀳𑀭𑀢𑀺, 𑀲𑀘𑁂 𑀆𑀓𑀗𑁆𑀔𑀢𑀺 ‘𑀧𑀝𑀺𑀓𑀽𑀮𑁂 𑀘 𑀅𑀧𑁆𑀧𑀝𑀺𑀓𑀽𑀮𑁂 𑀘 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬’𑀦𑁆𑀢𑀺, 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀢𑀢𑁆𑀣 𑀯𑀺𑀳𑀭𑀢𑀺, 𑀲𑀘𑁂 𑀆𑀓𑀗𑁆𑀔𑀢𑀺 ‘𑀅𑀧𑁆𑀧𑀝𑀺𑀓𑀽𑀮𑁂 𑀘 𑀧𑀝𑀺𑀓𑀽𑀮𑁂 𑀘 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬’𑀦𑁆𑀢𑀺, 𑀧𑀝𑀺𑀓𑀽𑀮𑀲𑀜𑁆𑀜𑀻 𑀢𑀢𑁆𑀣 𑀯𑀺𑀳𑀭𑀢𑀺, 𑀲𑀘𑁂 𑀆𑀓𑀗𑁆𑀔𑀢𑀺 ‘𑀧𑀝𑀺𑀓𑀽𑀮𑁂 𑀘 𑀅𑀧𑁆𑀧𑀝𑀺𑀓𑀽𑀮𑁂 𑀘 𑀢𑀤𑀼𑀪𑀬𑀁 𑀅𑀪𑀺𑀦𑀺𑀯𑀚𑁆𑀚𑁂𑀢𑁆𑀯𑀸 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑁂𑀬𑁆𑀬𑀁 𑀲𑀢𑁄 𑀲𑀫𑁆𑀧𑀚𑀸𑀦𑁄’𑀢𑀺, 𑀉𑀧𑁂𑀓𑁆𑀔𑀓𑁄 𑀢𑀢𑁆𑀣 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄’’𑀢𑀺 (𑀧𑀝𑀺. 𑀫. 𑁩.𑁧𑁭).

𑀩𑀳𑀺𑀤𑁆𑀥𑀸𑀢𑀺 𑀲𑀸𑀲𑀦𑀢𑁄 𑀩𑀳𑀺𑀲𑀫𑀬𑁂.

𑁧𑁬𑁨. 𑀏𑀲𑀸𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀯𑀦𑁆𑀤𑀦𑀸𑀓𑀸𑀭𑁄. 𑀢𑀫𑀢𑁆𑀣𑀁 𑀮𑁄𑀓𑀲𑀺𑀤𑁆𑀥𑀸𑀬 𑀉𑀧𑀫𑀸𑀬 𑀲𑀸𑀥𑁂𑀢𑀼𑀁 ‘‘𑀭𑀸𑀚𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀑𑀓𑀸𑀲𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀝𑁆𑀞𑀸𑀦𑀁.

𑀦 𑀫𑁂 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑁂 𑀪𑀸𑀭𑁄 𑀅𑀢𑁆𑀣𑀻𑀢𑀺 𑀲𑀢𑁆𑀣𑀼 𑀲𑀩𑁆𑀩𑀢𑁆𑀣 𑀅𑀧𑁆𑀧𑀝𑀺𑀳𑀢𑀜𑀸𑀡𑀘𑀸𑀭𑀢𑀸𑀬 𑀅𑀢𑁆𑀣𑀢𑁄 𑀆𑀧𑀦𑁆𑀦𑀸𑀬 𑀤𑀲𑁆𑀲𑀦𑀁. ‘‘𑀬𑀤𑀺 𑀆𑀓𑀗𑁆𑀔𑀲𑀻’’𑀢𑀺 𑀯𑀼𑀢𑁆𑀢𑁂𑀬𑁂𑀯 𑀳𑀺 𑀏𑀲 𑀅𑀢𑁆𑀣𑁄 𑀆𑀧𑀦𑁆𑀦𑁄 𑀳𑁄𑀢𑀺. 𑀲𑀩𑁆𑀩𑀁 𑀢𑁂 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀸𑀫𑀻𑀢𑀺 𑀏𑀢𑁆𑀣𑀸𑀧𑀺 𑀅𑀬𑀁 𑀦𑀬𑁄. ‘‘𑀬𑀁 𑀆𑀓𑀗𑁆𑀔𑀲𑀺, 𑀢𑀁 𑀧𑀼𑀘𑁆𑀙𑀸’’𑀢𑀺 𑀯𑀘𑀦𑁂𑀦𑁂𑀯 𑀳𑀺 𑀅𑀬𑀫𑀢𑁆𑀣𑁄 𑀲𑀺𑀚𑁆𑀛𑀢𑀺. 𑀅𑀲𑀸𑀥𑀸𑀭𑀡𑀁 𑀲𑀩𑁆𑀩𑀜𑁆𑀜𑀼𑀧𑀯𑀸𑀭𑀡𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀤𑀺 ‘‘𑀬𑀤𑀸𑀓𑀗𑁆𑀔𑀲𑀻’’𑀢𑀺 𑀦 𑀯𑀤𑀦𑁆𑀢𑀺, 𑀅𑀣 𑀓𑀣𑀁 𑀯𑀤𑀦𑁆𑀢𑀻𑀢𑀺 𑀆𑀳 ‘‘𑀲𑀼𑀢𑁆𑀯𑀸’’𑀢𑀺𑀆𑀤𑀺. 𑀧𑀤𑁂𑀲𑀜𑀸𑀡𑁂𑀬𑁂𑀯 𑀞𑀺𑀢𑀢𑁆𑀢𑀸 𑀢𑀣𑀸 𑀯𑀤𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀩𑀼𑀤𑁆𑀥𑀸 𑀧𑀦 𑀲𑀩𑁆𑀩𑀜𑁆𑀜𑀼𑀧𑀯𑀸𑀭𑀡𑀁 𑀧𑀯𑀸𑀭𑁂𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

‘‘𑀧𑀼𑀘𑁆𑀙𑀸𑀯𑀼𑀲𑁄 𑀬𑀤𑀸𑀓𑀗𑁆𑀔𑀲𑀻’’𑀢𑀺𑀆𑀤𑀻𑀦𑀺 𑀲𑀼𑀢𑁆𑀢𑀧𑀤𑀸𑀦𑀺 𑀬𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 𑀯𑀲𑁂𑀦 𑀆𑀕𑀢𑀸𑀦𑀺, 𑀢𑀁 𑀤𑀲𑁆𑀲𑀦𑀢𑁆𑀣𑀁 ‘‘𑀬𑀓𑁆𑀔𑀦𑀭𑀺𑀦𑁆𑀤𑀤𑁂𑀯𑀲𑀫𑀡𑀩𑁆𑀭𑀸𑀳𑁆𑀫𑀡𑀧𑀭𑀺𑀩𑁆𑀩𑀸𑀚𑀓𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑀺 ‘‘𑀧𑀼𑀘𑁆𑀙𑀸𑀯𑀼𑀲𑁄 𑀬𑀤𑀸𑀓𑀗𑁆𑀔𑀲𑀻’’𑀢𑀺 𑀆𑀴𑀯𑀓𑀲𑁆𑀲 𑀬𑀓𑁆𑀔𑀲𑁆𑀲 𑀑𑀓𑀸𑀲𑀓𑀭𑀡𑀁, ‘‘𑀧𑀼𑀘𑁆𑀙 𑀫𑀳𑀸𑀭𑀸𑀚𑀸’’𑀢𑀺 𑀦𑀭𑀺𑀦𑁆𑀤𑀸𑀦𑀁, ‘‘𑀧𑀼𑀘𑁆𑀙 𑀯𑀸𑀲𑀯𑀸’’𑀢𑀺𑀆𑀤𑀺 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲, ‘‘𑀢𑁂𑀦 𑀳𑀻’’𑀢𑀺𑀆𑀤𑀺 𑀲𑀫𑀡𑀸𑀦𑀁, ‘‘𑀩𑀸𑀯𑀭𑀺𑀲𑁆𑀲 𑀘𑀸’’𑀢𑀺𑀆𑀤𑀺 𑀩𑁆𑀭𑀸𑀳𑁆𑀫𑀡𑀸𑀦𑀁, ‘‘𑀧𑀼𑀘𑁆𑀙 𑀫𑀁 𑀲𑀪𑀺𑀬𑀸’’𑀢𑀺𑀆𑀤𑀺 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀑𑀓𑀸𑀲𑀓𑀭𑀡𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀸𑀲𑀯𑀸𑀢𑀺 𑀤𑁂𑀯𑀸𑀦𑀫𑀺𑀦𑁆𑀤𑀸𑀮𑀧𑀦𑀁. 𑀢𑀤𑁂𑀢𑀜𑁆𑀳𑀺 𑀲𑀓𑁆𑀓𑀧𑀜𑁆𑀳𑀲𑀼𑀢𑁆𑀢𑁂. 𑀫𑀦𑀲𑀺𑀘𑁆𑀙𑀲𑀻𑀢𑀺 𑀫𑀦𑀲𑀸 𑀇𑀘𑁆𑀙𑀲𑀺.

𑀓𑀢𑀸𑀯𑀓𑀸𑀲𑀸𑀢𑀺 𑀬𑀲𑁆𑀫𑀸 𑀢𑀼𑀫𑁆𑀳𑁂 𑀫𑀬𑀸 𑀓𑀢𑁄𑀓𑀸𑀲𑀸, 𑀢𑀲𑁆𑀫𑀸 𑀩𑀸𑀯𑀭𑀺𑀲𑁆𑀲 𑀘 𑀢𑀼𑀬𑁆𑀳𑀁 𑀅𑀚𑀺𑀢𑀲𑁆𑀲 𑀘 𑀲𑀩𑁆𑀩𑁂𑀲𑀜𑁆𑀘 𑀲𑁂𑀲𑀸𑀦𑀁 𑀬𑀁 𑀓𑀺𑀜𑁆𑀘𑀺 𑀲𑀩𑁆𑀩𑀁 𑀲𑀁𑀲𑀬𑀁 𑀬𑀣𑀸 𑀫𑀦𑀲𑀸 𑀇𑀘𑁆𑀙𑀣, 𑀢𑀣𑀸 𑀧𑀼𑀘𑁆𑀙𑀯𑁆𑀳𑁄 𑀧𑀼𑀘𑁆𑀙𑀣𑀸𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀘 𑀩𑀸𑀯𑀭𑀺𑀲𑁆𑀲 𑀲𑀁𑀲𑀬𑀁 𑀫𑀦𑀲𑀸 𑀧𑀼𑀘𑁆𑀙𑀯𑁆𑀳𑁄, 𑀢𑀼𑀫𑁆𑀳𑀸𑀓𑀁 𑀧𑀦 𑀲𑀩𑁆𑀩𑁂𑀲𑀁 𑀲𑀁𑀲𑀬𑀁 𑀫𑀦𑀲𑀸 𑀘 𑀅𑀜𑁆𑀜𑀣𑀸 𑀘 𑀬𑀣𑀸 𑀇𑀘𑁆𑀙𑀣, 𑀢𑀣𑀸 𑀧𑀼𑀘𑁆𑀙𑀯𑁆𑀳𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀩𑀸𑀯𑀭𑀻 𑀳𑀺 ‘‘𑀅𑀢𑁆𑀢𑀦𑁄 𑀲𑀁𑀲𑀬𑀁 𑀫𑀦𑀲𑀸𑀯 𑀧𑀼𑀘𑁆𑀙𑀣𑀸’’𑀢𑀺 𑀅𑀦𑁆𑀢𑁂𑀯𑀸𑀲𑀺𑀓𑁂 𑀆𑀡𑀸𑀧𑁂𑀲𑀺. 𑀯𑀼𑀢𑁆𑀢𑀜𑁆𑀳𑀺 𑁋

‘‘𑀅𑀦𑀸𑀯𑀭𑀡𑀤𑀲𑁆𑀲𑀸𑀯𑀻, 𑀬𑀤𑀺 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺;

𑀫𑀦𑀲𑀸 𑀧𑀼𑀘𑁆𑀙𑀺𑀢𑁂 𑀧𑀜𑁆𑀳𑁂, 𑀯𑀸𑀘𑀸𑀬 𑀯𑀺𑀲𑁆𑀲𑀚𑁂𑀲𑁆𑀲𑀢𑀻’’𑀢𑀺. (𑀲𑀼. 𑀦𑀺. 𑁧𑁦𑁧𑁧);

𑀢𑀤𑁂𑀢𑀁 𑀧𑀸𑀭𑀸𑀬𑀦𑀯𑀕𑁆𑀕𑁂. 𑀢𑀣𑀸 ‘‘𑀧𑀼𑀘𑁆𑀙 𑀫𑀁 𑀲𑀪𑀺𑀬𑀸’’𑀢𑀺𑀆𑀤𑀺𑀧𑀺.

𑀩𑀼𑀤𑁆𑀥𑀪𑀽𑀫𑀺𑀦𑁆𑀢𑀺 𑀩𑀼𑀤𑁆𑀥𑀝𑁆𑀞𑀸𑀦𑀁, 𑀆𑀲𑀯𑀓𑁆𑀔𑀬𑀜𑀸𑀡𑀁, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀜𑁆𑀘. 𑀩𑁄𑀥𑀺𑀲𑀢𑁆𑀢𑀪𑀽𑀫𑀺 𑀦𑀸𑀫 𑀩𑁄𑀥𑀺𑀲𑀢𑁆𑀢𑀝𑁆𑀞𑀸𑀦𑀁 𑀧𑀸𑀭𑀫𑀻𑀲𑀫𑁆𑀪𑀭𑀡𑀜𑀸𑀡𑀁, 𑀪𑀽𑀫𑀺𑀲𑀤𑁆𑀤𑁄 𑀯𑀸 𑀅𑀯𑀢𑁆𑀣𑀸𑀯𑀸𑀘𑀓𑁄, 𑀩𑀼𑀤𑁆𑀥𑀸𑀯𑀢𑁆𑀣𑀁, 𑀩𑁄𑀥𑀺𑀲𑀢𑁆𑀢𑀸𑀯𑀢𑁆𑀣𑀸𑀬𑀦𑁆𑀢𑀺 𑀘 𑀅𑀢𑁆𑀣𑁄. 𑀏𑀓𑀢𑁆𑀢𑀦𑀬𑁂𑀦 𑀳𑀺 𑀧𑀯𑀢𑁆𑀢𑁂𑀲𑀼 𑀔𑀦𑁆𑀥𑁂𑀲𑀼 𑀅𑀯𑀢𑁆𑀣𑀸𑀬𑁂𑀯 𑀢𑀁 𑀢𑀤𑀸𑀓𑀸𑀭𑀦𑀺𑀲𑁆𑀲𑀺𑀢𑀸.

𑀬𑁄 𑀪𑀕𑀯𑀸 𑀩𑁄𑀥𑀺𑀲𑀢𑁆𑀢𑀪𑀽𑀫𑀺𑀬𑀁 𑀧𑀤𑁂𑀲𑀜𑀸𑀡𑁂 𑀞𑀺𑀢𑁄 𑀲𑀩𑁆𑀩𑀜𑁆𑀜𑀼𑀧𑀯𑀸𑀭𑀡𑀁 𑀧𑀯𑀸𑀭𑁂𑀲𑀺, 𑀢𑀲𑁆𑀲 𑀢𑀤𑁂𑀯 𑀅𑀘𑁆𑀙𑀭𑀺𑀬𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀣𑀦𑁆𑀢𑀺 𑀆𑀳 ‘‘𑀓𑁄𑀡𑁆𑀟𑀜𑁆𑀜 𑀧𑀜𑁆𑀳𑀸𑀦𑀻’’𑀢𑀺𑀆𑀤𑀺. 𑀢𑀢𑁆𑀣 𑀓𑁄𑀡𑁆𑀟𑀜𑁆𑀜𑀸𑀢𑀺 𑀕𑁄𑀢𑁆𑀢𑀯𑀲𑁂𑀦 𑀲𑀭𑀪𑀗𑁆𑀕𑀫𑀸𑀮𑀧𑀦𑁆𑀢𑀺. 𑀯𑀺𑀬𑀸𑀓𑀭𑁄𑀳𑀻𑀢𑀺 𑀩𑁆𑀬𑀸𑀓𑀭𑁄𑀳𑀺. 𑀲𑀸𑀥𑀼𑀭𑀽𑀧𑀸𑀢𑀺 𑀲𑀸𑀥𑀼𑀲𑀪𑀸𑀯𑀸. 𑀥𑀫𑁆𑀫𑁄𑀢𑀺 𑀲𑀦𑀦𑁆𑀢𑀦𑁄 𑀧𑀯𑁂𑀡𑀻𑀥𑀫𑁆𑀫𑁄. 𑀬𑀦𑁆𑀢𑀺 𑀆𑀕𑀫𑀦𑀓𑀺𑀭𑀺𑀬𑀸𑀧𑀭𑀸𑀫𑀲𑀦𑀁, 𑀬𑁂𑀦 𑀯𑀸 𑀓𑀸𑀭𑀡𑁂𑀦 𑀆𑀕𑀘𑁆𑀙𑀢𑀺, 𑀢𑁂𑀦 𑀯𑀺𑀬𑀸𑀓𑀭𑁄𑀳𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀼𑀤𑁆𑀥𑀦𑁆𑀢𑀺 𑀲𑀻𑀮𑀧𑀜𑁆𑀜𑀸𑀤𑀻𑀳𑀺 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑀁, 𑀕𑀭𑀼𑀦𑁆𑀢𑀺 𑀅𑀢𑁆𑀣𑁄. 𑀏𑀲 𑀪𑀸𑀭𑁄𑀢𑀺 𑀲𑀁𑀲𑀬𑀼𑀧𑀘𑁆𑀙𑁂𑀤𑀦𑀲𑀗𑁆𑀔𑀸𑀢𑁄 𑀏𑀲𑁄 𑀪𑀸𑀭𑁄, 𑀆𑀕𑀢𑁄 𑀪𑀸𑀭𑁄 𑀢𑀬𑀸 𑀅𑀯𑀲𑁆𑀲𑀁 𑀯𑀳𑀺𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀫𑀬𑀸 𑀓𑀢𑀸𑀯𑀓𑀸𑀲𑀸 𑀪𑁄𑀦𑁆𑀢𑁄 𑀧𑀼𑀘𑁆𑀙𑀦𑁆𑀢𑀼. 𑀓𑀲𑁆𑀫𑀸𑀢𑀺 𑀘𑁂? 𑀅𑀳𑀜𑁆𑀳𑀺 𑀢𑀁 𑀢𑀁 𑀯𑁄 𑀩𑁆𑀬𑀸𑀓𑀭𑀺𑀲𑁆𑀲𑀁 𑀜𑀢𑁆𑀯𑀸 𑀲𑀬𑀁 𑀮𑁄𑀓𑀫𑀺𑀫𑀁, 𑀧𑀭𑀜𑁆𑀘𑀸𑀢𑀺. 𑀲𑀬𑀦𑁆𑀢𑀺 𑀘 𑀲𑀬𑀫𑁂𑀯 𑀧𑀭𑀽𑀧𑀤𑁂𑀲𑁂𑀦 𑀯𑀺𑀦𑀸. 𑀏𑀯𑀁 𑀲𑀭𑀪𑀗𑁆𑀕𑀓𑀸𑀮𑁂 𑀲𑀩𑁆𑀩𑀜𑁆𑀜𑀼𑀧𑀯𑀸𑀭𑀡𑀁 𑀧𑀯𑀸𑀭𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀧𑀜𑁆𑀳𑀸𑀦𑀦𑁆𑀢𑀺 𑀥𑀫𑁆𑀫𑀬𑀸𑀕𑀧𑀜𑁆𑀳𑀸𑀦𑀁. 𑀅𑀦𑁆𑀢𑀓𑀭𑀦𑁆𑀢𑀺 𑀦𑀺𑀝𑁆𑀞𑀸𑀦𑀓𑀭𑀁. 𑀲𑀼𑀘𑀺𑀭𑀢𑁂𑀦𑀸𑀢𑀺 𑀏𑀯𑀁 𑀦𑀸𑀫𑀓𑁂𑀦 𑀩𑁆𑀭𑀸𑀳𑁆𑀫𑀡𑁂𑀦. 𑀧𑀼𑀝𑁆𑀞𑀼𑀦𑁆𑀢𑀺 𑀧𑀼𑀘𑁆𑀙𑀺𑀢𑀼𑀁. 𑀚𑀸𑀢𑀺𑀬𑀸𑀢𑀺 𑀧𑀝𑀺𑀲𑀦𑁆𑀥𑀺𑀬𑀸, ‘‘𑀯𑀺𑀚𑀸𑀢𑀺𑀬𑀸’’𑀢𑀺𑀧𑀺 𑀯𑀤𑀦𑁆𑀢𑀺. 𑀧𑀁𑀲𑀼𑀁 𑀓𑀻𑀴𑀦𑁆𑀢𑁄 𑀲𑀫𑁆𑀪𑀯𑀓𑀼𑀫𑀸𑀭𑁄 𑀦𑀺𑀲𑀺𑀦𑁆𑀦𑁄𑀯 𑀳𑀼𑀢𑁆𑀯𑀸 𑀧𑀯𑀸𑀭𑁂𑀲𑀻𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀢𑀕𑁆𑀖𑀸𑀢𑀺 𑀏𑀓𑀁𑀲𑀢𑁆𑀣𑁂 𑀦𑀺𑀧𑀸𑀢𑁄. 𑀬𑀣𑀸𑀧𑀺 𑀓𑀼𑀲𑀮𑁄 𑀢𑀣𑀸𑀢𑀺 𑀬𑀣𑀸 𑀲𑀩𑁆𑀩𑀥𑀫𑁆𑀫𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀯𑀺𑀤𑀽 𑀩𑀼𑀤𑁆𑀥𑁄 𑀚𑀸𑀦𑀸𑀢𑀺 𑀓𑀣𑁂𑀢𑀺, 𑀢𑀣𑀸 𑀢𑁂 𑀅𑀳𑀫𑀓𑁆𑀔𑀺𑀲𑁆𑀲𑀦𑁆𑀢𑀺 𑀅𑀢𑁆𑀣𑁄. 𑀚𑀸𑀦𑀸𑀢𑀺-𑀲𑀤𑁆𑀤𑁄 𑀳𑀺 𑀇𑀥 𑀲𑀫𑁆𑀩𑀦𑁆𑀥𑀫𑀼𑀧𑀕𑀘𑁆𑀙𑀢𑀺. 𑀬𑀣𑀸𑀳 ‘‘𑀬𑁂𑀦 𑀬𑀲𑁆𑀲 𑀳𑀺 𑀲𑀫𑁆𑀩𑀦𑁆𑀥𑁄, 𑀤𑀽𑀭𑀝𑁆𑀞𑀫𑁆𑀧𑀺 𑀘 𑀢𑀲𑁆𑀲 𑀢’’𑀦𑁆𑀢𑀺 (𑀲𑀸𑀭𑀢𑁆𑀣. 𑀝𑀻. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸). 𑀚𑀸𑀦𑀦𑀸 𑀘𑁂𑀢𑁆𑀣 𑀓𑀣𑀦𑀸. 𑀬𑀣𑀸 ‘‘𑀇𑀫𑀺𑀦𑀸 𑀇𑀫𑀁 𑀚𑀸𑀦𑀸𑀢𑀻’’𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄 𑀆𑀘𑀭𑀺𑀬𑁂𑀦. 𑀭𑀸𑀚𑀸 𑀘 𑀔𑁄 𑀢𑀁 𑀬𑀤𑀺 𑀓𑀸𑀳𑀢𑀺 𑀯𑀸,𑀦 𑀯𑀸𑀢𑀺 𑀬𑁄 𑀢𑀁 𑀇𑀥 𑀧𑀼𑀘𑁆𑀙𑀺𑀢𑀼𑀁 𑀧𑁂𑀲𑁂𑀲𑀺, 𑀲𑁄 𑀓𑁄𑀭𑀩𑁆𑀬𑀭𑀸𑀚𑀸 𑀢𑀁 𑀢𑀬𑀸 𑀧𑀼𑀘𑁆𑀙𑀺𑀢𑀫𑀢𑁆𑀣𑀁, 𑀢𑀬𑀸 𑀯𑀸 𑀧𑀼𑀝𑁆𑀞𑁂𑀦 𑀫𑀬𑀸 𑀅𑀓𑁆𑀔𑀸𑀢𑀫𑀢𑁆𑀣𑀁 𑀬𑀤𑀺 𑀓𑀭𑁄𑀢𑀼 𑀯𑀸, 𑀦 𑀯𑀸 𑀓𑀭𑁄𑀢𑀼, 𑀅𑀳𑀁 𑀧𑀦 𑀬𑀣𑀸𑀥𑀫𑁆𑀫𑀁 𑀢𑁂 𑀅𑀓𑁆𑀔𑀺𑀲𑁆𑀲𑀁 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀚𑀸𑀢𑀓𑀝𑁆𑀞𑀓𑀣𑀸𑀬𑀁 𑀧𑀦 𑁋

‘‘𑀭𑀸𑀚𑀸 𑀘 𑀔𑁄 𑀢𑀦𑁆𑀢𑀺 𑀅𑀳𑀁 𑀢𑀁 𑀧𑀜𑁆𑀳𑀁 𑀬𑀣𑀸 𑀢𑀼𑀫𑁆𑀳𑀸𑀓𑀁 𑀭𑀸𑀚𑀸 𑀚𑀸𑀦𑀸𑀢𑀺 𑀚𑀸𑀦𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀣𑀸 𑀅𑀓𑁆𑀔𑀺𑀲𑁆𑀲𑀁. 𑀢𑀢𑁄 𑀉𑀢𑁆𑀢𑀭𑀺 𑀭𑀸𑀚𑀸 𑀬𑀣𑀸 𑀚𑀸𑀦𑀸𑀢𑀺, 𑀢𑀣𑀸 𑀬𑀤𑀺 𑀓𑀭𑀺𑀲𑁆𑀲𑀢𑀺 𑀯𑀸, 𑀦 𑀯𑀸 𑀓𑀭𑀺𑀲𑁆𑀲𑀢𑀺, 𑀓𑀭𑁄𑀦𑁆𑀢𑀲𑁆𑀲 𑀯𑀸 𑀅𑀓𑀭𑁄𑀦𑁆𑀢𑀲𑁆𑀲 𑀯𑀸 𑀢𑀲𑁆𑀲𑁂𑀯𑁂𑀢𑀁 𑀪𑀯𑀺𑀲𑁆𑀲𑀢𑀺, 𑀫𑀬𑁆𑀳𑀁 𑀧𑀦 𑀤𑁄𑀲𑁄 𑀦𑀢𑁆𑀣𑀻𑀢𑀺 𑀤𑀻𑀧𑁂𑀢𑀻’’𑀢𑀺 (𑀚𑀸. 𑀅𑀝𑁆𑀞. 𑁫.𑁧𑁬.𑁧𑁭𑁨) 𑁋

𑀚𑀸𑀦𑀸𑀢𑀺-𑀲𑀤𑁆𑀤𑁄 𑀯𑀸𑀓𑁆𑀬𑀤𑁆𑀯𑀬𑀲𑀸𑀥𑀸𑀭𑀡𑀯𑀲𑁂𑀦 𑀯𑀼𑀢𑁆𑀢𑁄.

𑁧𑁬𑁩. 𑀲𑀺𑀧𑁆𑀧𑀫𑁂𑀯 𑀲𑀺𑀧𑁆𑀧𑀸𑀬𑀢𑀦𑀁 𑀆𑀬𑀢𑀦𑀲𑀤𑁆𑀤𑀲𑁆𑀲 𑀢𑀩𑁆𑀪𑀸𑀯𑀯𑀼𑀢𑁆𑀢𑀺𑀢𑁆𑀢𑀸. 𑀅𑀧𑀺𑀘 𑀲𑀺𑀓𑁆𑀔𑀺𑀢𑀩𑁆𑀩𑀢𑀸𑀬 𑀲𑀺𑀧𑁆𑀧𑀜𑁆𑀘 𑀢𑀁 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀯𑀼𑀢𑁆𑀢𑀺𑀬𑀸 𑀓𑀸𑀭𑀡𑀪𑀸𑀯𑀢𑁄, 𑀦𑀺𑀲𑁆𑀲𑀬𑀪𑀸𑀯𑀢𑁄 𑀯𑀸 𑀆𑀬𑀢𑀦𑀜𑁆𑀘𑀸𑀢𑀺 𑀲𑀺𑀧𑁆𑀧𑀸𑀬𑀢𑀦𑀁. 𑀲𑁂𑀬𑁆𑀬𑀣𑀺𑀤𑀦𑁆𑀢𑀺 𑀏𑀓𑁄𑀯 𑀦𑀺𑀧𑀸𑀢𑁄, 𑀦𑀺𑀧𑀸𑀢𑀲𑀫𑀼𑀤𑀸𑀬𑁄 𑀯𑀸. 𑀢𑀲𑁆𑀲 𑀢𑁂 𑀓𑀢𑀫𑁂𑀢𑀺 𑀇𑀥 𑀅𑀢𑁆𑀣𑁄𑀢𑀺 𑀆𑀳 ‘‘𑀓𑀢𑀫𑁂 𑀧𑀦 𑀢𑁂’’𑀢𑀺. 𑀇𑀫𑁂 𑀓𑀢𑀫𑁂𑀢𑀺𑀧𑀺 𑀧𑀘𑁆𑀘𑁂𑀓𑀫𑀢𑁆𑀣𑁄 𑀬𑀼𑀚𑁆𑀚𑀢𑀺. 𑀏𑀯𑀁 𑀲𑀩𑁆𑀩𑀢𑁆𑀣. 𑀇𑀤𑀜𑁆𑀘 𑀯𑀢𑁆𑀢𑀩𑁆𑀩𑀸𑀧𑁂𑀓𑁆𑀔𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑁂 𑀲𑀺𑀧𑁆𑀧𑀸𑀬𑀢𑀦𑀺𑀓𑀸 𑀓𑀢𑀫𑁂𑀢𑀺 𑀅𑀢𑁆𑀣𑁄. ‘‘𑀧𑀼𑀣𑀼𑀲𑀺𑀧𑁆𑀧𑀸𑀬𑀢𑀦𑀸𑀦𑀻’’𑀢𑀺 𑀳𑀺 𑀲𑀸𑀥𑀸𑀭𑀡𑀢𑁄 𑀲𑀺𑀧𑁆𑀧𑀸𑀦𑀺 𑀉𑀤𑁆𑀤𑀺𑀲𑀺𑀢𑁆𑀯𑀸 𑀉𑀧𑀭𑀺 𑀢𑀁𑀢𑀁𑀲𑀺𑀧𑁆𑀧𑀽𑀧𑀚𑀻𑀯𑀺𑀦𑁄𑀯 𑀦𑀺𑀤𑁆𑀤𑀺𑀝𑁆𑀞𑀸 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀓𑀣𑀸𑀬. 𑀓𑀲𑁆𑀫𑀸𑀢𑀺 𑀘𑁂? 𑀧𑀧𑀜𑁆𑀘𑀁 𑀧𑀭𑀺𑀳𑀭𑀺𑀢𑀼𑀓𑀸𑀫𑀢𑁆𑀢𑀸. 𑀅𑀜𑁆𑀜𑀣𑀸 𑀳𑀺 𑀬𑀣𑀸𑀥𑀺𑀧𑁆𑀧𑁂𑀢𑀸𑀦𑀺 𑀢𑀸𑀯 𑀲𑀺𑀧𑁆𑀧𑀸𑀬𑀢𑀦𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀢𑀁𑀢𑀁𑀲𑀺𑀧𑁆𑀧𑀽𑀧𑀚𑀻𑀯𑀺𑀦𑁄𑀧𑀺 𑀤𑀲𑁆𑀲𑁂𑀢𑀩𑁆𑀩𑀸 𑀲𑀺𑀬𑀼𑀁 𑀢𑁂𑀲𑀫𑁂𑀯𑁂𑀢𑁆𑀣 𑀧𑀥𑀸𑀦𑀢𑁄 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀏𑀯𑀜𑁆𑀘 𑀲𑀢𑀺 𑀓𑀣𑀸𑀧𑀧𑀜𑁆𑀘𑁄 𑀪𑀯𑁂𑀬𑁆𑀬, 𑀢𑀲𑁆𑀫𑀸 𑀢𑀁 𑀧𑀧𑀜𑁆𑀘𑀁 𑀧𑀭𑀺𑀳𑀭𑀺𑀢𑀼𑀁 𑀲𑀺𑀧𑁆𑀧𑀽𑀧𑀚𑀻𑀯𑀻𑀳𑀺 𑀢𑀁𑀢𑀁𑀲𑀺𑀧𑁆𑀧𑀸𑀬𑀢𑀦𑀸𑀦𑀺 𑀲𑀗𑁆𑀕𑀳𑁂𑀢𑁆𑀯𑀸 𑀏𑀯𑀫𑀸𑀳𑀸𑀢𑀺 𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀳𑀢𑁆𑀣𑀸𑀭𑁄𑀳𑀸𑀢𑀺𑀆𑀤𑀻𑀳𑀺 𑀬𑁂 𑀢𑀁 𑀢𑀁 𑀲𑀺𑀧𑁆𑀧𑀁 𑀦𑀺𑀲𑁆𑀲𑀸𑀬 𑀚𑀻𑀯𑀦𑁆𑀢𑀺, 𑀢𑁂 𑀤𑀲𑁆𑀲𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀓𑀲𑁆𑀫𑀸𑀢𑀺 𑀆𑀳 ‘‘𑀅𑀬𑀜𑁆𑀳𑀻’’𑀢𑀺𑀆𑀤𑀺. 𑀲𑀺𑀧𑁆𑀧𑀁 𑀉𑀧𑀦𑀺𑀲𑁆𑀲𑀸𑀬 𑀚𑀻𑀯𑀦𑁆𑀢𑀻𑀢𑀺 𑀲𑀺𑀧𑁆𑀧𑀽𑀧𑀚𑀻𑀯𑀺𑀦𑁄.

𑀳𑀢𑁆𑀣𑀺𑀫𑀸𑀭𑁄𑀳𑀦𑁆𑀢𑀻𑀢𑀺 𑀳𑀢𑁆𑀣𑀸𑀭𑁄𑀳𑀸, 𑀳𑀢𑁆𑀣𑀸𑀭𑀼𑀴𑁆𑀳𑀬𑁄𑀥𑀸. 𑀳𑀢𑁆𑀣𑀺𑀁 𑀆𑀭𑁄𑀳𑀸𑀧𑀬𑀦𑁆𑀢𑀻𑀢𑀺 𑀳𑀢𑁆𑀣𑀸𑀭𑁄𑀳𑀸, 𑀳𑀢𑁆𑀣𑀸𑀘𑀭𑀺𑀬 𑀳𑀢𑁆𑀣𑀺𑀯𑁂𑀚𑁆𑀚 𑀳𑀢𑁆𑀣𑀺𑀫𑁂𑀡𑁆𑀟𑀸𑀤𑀬𑁄. 𑀬𑁂𑀦 𑀳𑀺 𑀧𑀬𑁄𑀕𑁂𑀦 𑀧𑀼𑀭𑀺𑀲𑁄 𑀳𑀢𑁆𑀣𑀺𑀦𑁄 𑀆𑀭𑁄𑀳𑀦𑀬𑁄𑀕𑁆𑀕𑁄 𑀳𑁄𑀢𑀺, 𑀢𑀁 𑀳𑀢𑁆𑀣𑀺𑀲𑁆𑀲 𑀧𑀬𑁄𑀕𑀁 𑀯𑀺𑀥𑀸𑀬𑀦𑁆𑀢𑀸𑀦𑀁 𑀲𑀩𑁆𑀩𑁂𑀲𑀫𑁆𑀧𑁂𑀢𑁂𑀲𑀁 𑀕𑀳𑀡𑀁. 𑀢𑁂𑀦𑀸𑀳 ‘‘𑀲𑀩𑁆𑀩𑁂𑀧𑀻’’𑀢𑀺𑀆𑀤𑀺. 𑀢𑀢𑁆𑀣 𑀳𑀢𑁆𑀣𑀸𑀘𑀭𑀺𑀬𑀸 𑀦𑀸𑀫 𑀬𑁂 𑀳𑀢𑁆𑀣𑀺𑀦𑁄, 𑀳𑀢𑁆𑀣𑀸𑀭𑁄𑀳𑀓𑀸𑀦𑀜𑁆𑀘 𑀲𑀺𑀓𑁆𑀔𑀸𑀧𑀓𑀸. 𑀳𑀢𑁆𑀣𑀺𑀯𑁂𑀚𑁆𑀚𑀸 𑀦𑀸𑀫 𑀳𑀢𑁆𑀣𑀺𑀪𑀺𑀲𑀓𑁆𑀓𑀸. 𑀳𑀢𑁆𑀣𑀺𑀫𑁂𑀡𑁆𑀟𑀸 𑀦𑀸𑀫 𑀳𑀢𑁆𑀣𑀻𑀦𑀁 𑀧𑀸𑀤𑀭𑀓𑁆𑀔𑀓𑀸. 𑀳𑀢𑁆𑀣𑀺𑀁 𑀫𑀡𑁆𑀟𑀬𑀦𑁆𑀢𑀺 𑀭𑀓𑁆𑀔𑀦𑁆𑀢𑀻𑀢𑀺 𑀳𑀢𑁆𑀣𑀺𑀫𑀡𑁆𑀟𑀸, 𑀢𑁂𑀬𑁂𑀯 𑀳𑀢𑁆𑀣𑀺𑀫𑁂𑀡𑁆𑀟𑀸, 𑀳𑀢𑁆𑀣𑀺𑀁 𑀫𑀺𑀦𑁂𑀦𑁆𑀢𑀺 𑀲𑀫𑁆𑀫𑀸 𑀯𑀺𑀤𑀳𑀦𑁂𑀦 𑀳𑀺𑀁𑀲𑀦𑁆𑀢𑀻𑀢𑀺 𑀯𑀸 𑀳𑀢𑁆𑀣𑀺𑀫𑁂𑀡𑁆𑀟𑀸.𑀆𑀤𑀺-𑀲𑀤𑁆𑀤𑁂𑀦 𑀳𑀢𑁆𑀣𑀻𑀦𑀁 𑀬𑀯𑀧𑀤𑀸𑀬𑀓𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀲𑁆𑀲𑀸𑀭𑁄𑀳𑀸𑀢𑀺 𑀏𑀢𑁆𑀣𑀸𑀧𑀺 𑀲𑀼𑀤𑁆𑀥𑀳𑁂𑀢𑀼𑀓𑀢𑁆𑀢𑀼𑀯𑀲𑁂𑀦 𑀬𑀣𑀸𑀯𑀼𑀢𑁆𑀢𑁄𑀯 𑀅𑀢𑁆𑀣𑁄. 𑀭𑀣𑁂 𑀦𑀺𑀬𑀼𑀢𑁆𑀢𑀸 𑀭𑀣𑀺𑀓𑀸. 𑀭𑀣𑀭𑀓𑁆𑀔𑀸 𑀦𑀸𑀫 𑀭𑀣𑀲𑁆𑀲 𑀆𑀡𑀺𑀭𑀓𑁆𑀔𑀓𑀸. 𑀥𑀦𑀼𑀁 𑀕𑀡𑁆𑀳𑀦𑁆𑀢𑀻𑀢𑀺 𑀥𑀦𑀼𑀕𑁆𑀕𑀳𑀸, 𑀇𑀲𑁆𑀲𑀸𑀲𑀸, 𑀥𑀦𑀼𑀁 𑀕𑀡𑁆𑀳𑀸𑀧𑁂𑀦𑁆𑀢𑀻𑀢𑀺 𑀥𑀦𑀼𑀕𑁆𑀕𑀳𑀸, 𑀥𑀦𑀼𑀲𑀺𑀧𑁆𑀧𑀲𑀺𑀓𑁆𑀔𑀸𑀧𑀓𑀸 𑀥𑀦𑁆𑀯𑀸𑀘𑀭𑀺𑀬𑀸.

𑀘𑁂𑀮𑁂𑀦 𑀘𑁂𑀮𑀧𑀝𑀸𑀓𑀸𑀬 𑀬𑀼𑀤𑁆𑀥𑁂 𑀅𑀓𑀦𑁆𑀢𑀺 𑀕𑀘𑁆𑀙𑀦𑁆𑀢𑀻𑀢𑀺 𑀘𑁂𑀮𑀓𑀸, 𑀚𑀬𑀤𑁆𑀥𑀚𑀕𑀸𑀳𑀓𑀸𑀢𑀺 𑀆𑀳 ‘‘𑀬𑁂 𑀬𑀼𑀤𑁆𑀥𑁂’’𑀢𑀺𑀆𑀤𑀺. 𑀚𑀬𑀥𑀚𑀦𑁆𑀢𑀺 𑀚𑀬𑀦𑀢𑁆𑀣𑀁, 𑀚𑀬𑀓𑀸𑀮𑁂 𑀯𑀸 𑀧𑀕𑁆𑀕𑀳𑀺𑀢𑀥𑀚𑀁. 𑀧𑀼𑀭𑀢𑁄𑀢𑀺 𑀲𑁂𑀦𑀸𑀬 𑀧𑀼𑀩𑁆𑀩𑁂. 𑀬𑀣𑀸 𑀢𑀣𑀸 𑀞𑀺𑀢𑁂 𑀲𑁂𑀦𑀺𑀓𑁂 𑀩𑁆𑀬𑀽𑀳𑀯𑀺𑀘𑀸𑀭𑀡𑀯𑀲𑁂𑀦 𑀢𑀢𑁄 𑀢𑀢𑁄 𑀘𑀮𑀬𑀦𑁆𑀢𑀺 𑀉𑀘𑁆𑀘𑀸𑀮𑁂𑀦𑁆𑀢𑀻𑀢𑀺 𑀘𑀮𑀓𑀸𑀢𑀺 𑀯𑀼𑀢𑁆𑀢𑀁 ‘‘𑀇𑀥 𑀭𑀜𑁆𑀜𑁄’’𑀢𑀺𑀆𑀤𑀺. 𑀲𑀓𑀼𑀡𑀕𑁆𑀖𑀺𑀆𑀤𑀬𑁄 𑀯𑀺𑀬 𑀫𑀁𑀲𑀧𑀺𑀡𑁆𑀟𑀁 𑀧𑀭𑀲𑁂𑀦𑀸𑀲𑀫𑀽𑀳𑀲𑀗𑁆𑀔𑀸𑀢𑀁 𑀧𑀺𑀡𑁆𑀟𑀁 𑀲𑀸𑀳𑀲𑀺𑀓𑀢𑀸𑀬 𑀙𑁂𑀢𑁆𑀯𑀸 𑀙𑁂𑀢𑁆𑀯𑀸 𑀤𑀬𑀦𑁆𑀢𑀺 𑀉𑀧𑁆𑀧𑀢𑀺𑀢𑁆𑀯𑀸 𑀉𑀧𑁆𑀧𑀢𑀺𑀢𑁆𑀯𑀸 𑀦𑀺𑀕𑁆𑀕𑀘𑁆𑀙𑀦𑁆𑀢𑀻𑀢𑀺 𑀧𑀺𑀡𑁆𑀟𑀤𑀸𑀬𑀓𑀸. 𑀢𑁂𑀦𑀸𑀳 ‘‘𑀢𑁂 𑀓𑀺𑀭𑀸’’𑀢𑀺𑀆𑀤𑀺. 𑀲𑀸𑀳𑀲𑀁 𑀓𑀭𑁄𑀦𑁆𑀢𑀻𑀢𑀺 𑀲𑀸𑀳𑀲𑀺𑀓𑀸, 𑀢𑁂𑀬𑁂𑀯 𑀫𑀳𑀸𑀬𑁄𑀥𑀸. 𑀧𑀺𑀡𑁆𑀟𑀫𑀺𑀯𑀸𑀢𑀺 𑀢𑀸𑀮𑀨𑀮𑀧𑀺𑀡𑁆𑀟𑀫𑀺𑀯𑀸𑀢𑀺 𑀯𑀤𑀦𑁆𑀢𑀺, ‘‘𑀫𑀁𑀲𑀧𑀺𑀡𑁆𑀟𑀫𑀺𑀯𑀸’’𑀢𑀺 (𑀤𑀻. 𑀦𑀺. 𑀝𑀻. 𑁧.𑁧𑁬𑁩) 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑀁. 𑀲𑀩𑁆𑀩𑀢𑁆𑀣 ‘‘𑀆𑀘𑀭𑀺𑀬𑁂𑀦𑀸’’𑀢𑀺 𑀯𑀼𑀢𑁆𑀢𑁂 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁄𑀯 𑀕𑀳𑁂𑀢𑀩𑁆𑀩𑁄. 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀧𑀺𑀡𑁆𑀟𑁂 𑀚𑀦𑀲𑀫𑀽𑀳𑀲𑀗𑁆𑀔𑀸𑀢𑁂 𑀲𑀫𑁆𑀫𑀤𑁆𑀤𑁂 𑀤𑀬𑀦𑁆𑀢𑀺 𑀉𑀧𑁆𑀧𑀢𑀦𑁆𑀢𑀸 𑀯𑀺𑀬 𑀕𑀘𑁆𑀙𑀦𑁆𑀢𑀻𑀢𑀺 𑀧𑀺𑀡𑁆𑀟𑀤𑀸𑀬𑀓𑀸, 𑀤𑀬-𑀲𑀤𑁆𑀤𑁄 𑀕𑀢𑀺𑀬𑀁, 𑀅𑀬-𑀲𑀤𑁆𑀤𑀲𑁆𑀲 𑀯𑀸 𑀤-𑀓𑀸𑀭𑀸𑀕𑀫𑁂𑀦 𑀦𑀺𑀧𑁆𑀨𑀢𑁆𑀢𑀺.

𑀉𑀕𑁆𑀕𑀢𑀼𑀕𑁆𑀕𑀢𑀸𑀢𑀺 𑀲𑀗𑁆𑀕𑀸𑀫𑀁 𑀧𑀢𑁆𑀯𑀸 𑀚𑀯𑀧𑀭𑀓𑁆𑀓𑀫𑀸𑀤𑀺𑀯𑀲𑁂𑀦 𑀅𑀢𑀺𑀯𑀺𑀬 𑀉𑀕𑁆𑀕𑀢𑀸. 𑀢𑀤𑁂𑀯𑀸𑀢𑀺 𑀧𑀭𑁂𑀳𑀺 𑀯𑀼𑀢𑁆𑀢𑀁 𑀢𑀫𑁂𑀯 𑀲𑀻𑀲𑀁 𑀯𑀸 𑀆𑀯𑀼𑀥𑀁 𑀯𑀸. 𑀧𑀓𑁆𑀔𑀦𑁆𑀤𑀦𑁆𑀢𑀻𑀢𑀺 𑀯𑀻𑀭𑀲𑀽𑀭𑀪𑀸𑀯𑁂𑀦 𑀅𑀲𑀚𑁆𑀚𑀫𑀸𑀦𑀸 𑀧𑀭𑀲𑁂𑀦𑀫𑀦𑀼𑀧𑀯𑀺𑀲𑀦𑁆𑀢𑀺. 𑀣𑀸𑀫𑀚𑀯𑀩𑀮𑀧𑀭𑀓𑁆𑀓𑀫𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸 𑀫𑀳𑀸𑀦𑀸𑀕𑀲𑀤𑀺𑀲𑀢𑀸. 𑀢𑁂𑀦𑀸𑀳 ‘‘𑀳𑀢𑁆𑀣𑀺𑀆𑀤𑀻𑀲𑀼𑀧𑀻’’𑀢𑀺𑀆𑀤𑀺. 𑀏𑀓𑀦𑁆𑀢𑀲𑀽𑀭𑀸𑀢𑀺 𑀏𑀓𑀘𑀭𑀲𑀽𑀭𑀸 𑀅𑀦𑁆𑀢𑀲𑀤𑁆𑀤𑀲𑁆𑀲 𑀢𑀩𑁆𑀪𑀸𑀯𑀯𑀼𑀢𑁆𑀢𑀺𑀢𑁄, 𑀲𑀽𑀭𑀪𑀸𑀯𑁂𑀦 𑀏𑀓𑀸𑀓𑀺𑀦𑁄 𑀳𑀼𑀢𑁆𑀯𑀸 𑀬𑀼𑀚𑁆𑀛𑀦𑀓𑀸𑀢𑀺 𑀅𑀢𑁆𑀣𑁄. 𑀲𑀚𑀸𑀮𑀺𑀓𑀸𑀢𑀺 𑀲𑀯𑀫𑁆𑀫𑀺𑀓𑀸. 𑀲𑀦𑁆𑀦𑀸𑀳𑁄 𑀓𑀗𑁆𑀓𑀝𑁄 𑀯𑀫𑁆𑀫𑀁 𑀓𑀯𑀘𑁄 𑀉𑀭𑀘𑁆𑀙𑀤𑁄 𑀚𑀸𑀮𑀺𑀓𑀸𑀢𑀺 𑀳𑀺 𑀅𑀢𑁆𑀣𑀢𑁄 𑀏𑀓𑀁. 𑀲𑀘𑀫𑁆𑀫𑀺𑀓𑀸𑀢𑀺 𑀚𑀸𑀮𑀺𑀓𑀸 𑀯𑀺𑀬 𑀲𑀭𑀻𑀭𑀧𑀭𑀺𑀢𑁆𑀢𑀸𑀡𑁂𑀦 𑀘𑀫𑁆𑀫𑁂𑀦 𑀲𑀘𑀫𑁆𑀫𑀺𑀓𑀸. 𑀘𑀫𑁆𑀫𑀓𑀜𑁆𑀘𑀼𑀓𑀦𑁆𑀢𑀺 𑀘𑀫𑁆𑀫𑀫𑀬𑀓𑀜𑁆𑀘𑀼𑀓𑀁. 𑀧𑀯𑀺𑀲𑀺𑀢𑁆𑀯𑀸𑀢𑀺 𑀢𑀲𑁆𑀲 𑀅𑀦𑁆𑀢𑁄 𑀳𑀼𑀢𑁆𑀯𑀸, 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀭𑀧𑀭𑀺𑀢𑁆𑀢𑀸𑀡𑀁 𑀘𑀫𑁆𑀫𑀦𑁆𑀢𑀺 𑀘𑀫𑁆𑀫𑀧𑀝𑀺𑀲𑀺𑀩𑁆𑀩𑀺𑀢𑀁 𑀘𑁂𑀮𑀓𑀁, 𑀘𑀫𑁆𑀫𑀫𑀬𑀁 𑀯𑀸 𑀨𑀮𑀓𑀁. 𑀩𑀮𑀯𑀲𑀺𑀦𑁂𑀳𑀸𑀢𑀺 𑀲𑀸𑀫𑀺𑀦𑀺 𑀅𑀢𑀺𑀲𑀬𑀧𑁂𑀫𑀸. 𑀖𑀭𑀤𑀸𑀲𑀬𑁄𑀥𑀸𑀢𑀺 𑀅𑀦𑁆𑀢𑁄𑀚𑀸𑀢𑀤𑀸𑀲𑀧𑀭𑀺𑀬𑀸𑀧𑀦𑁆𑀦𑀸 𑀬𑁄𑀥𑀸, ‘‘𑀖𑀭𑀤𑀸𑀲𑀺𑀓𑀧𑀼𑀢𑁆𑀢𑀸’’𑀢𑀺𑀧𑀺 𑀧𑀸𑀞𑁄, 𑀅𑀦𑁆𑀢𑁄𑀚𑀸𑀢𑀤𑀸𑀲𑀻𑀦𑀁 𑀧𑀼𑀢𑁆𑀢𑀸𑀢𑀺 𑀅𑀢𑁆𑀣𑁄.

𑀆𑀴𑀸𑀭𑀁 𑀯𑀼𑀘𑁆𑀘𑀢𑀺 𑀫𑀳𑀸𑀦𑀲𑀁, 𑀢𑀢𑁆𑀣 𑀦𑀺𑀬𑀼𑀢𑁆𑀢𑀸 𑀆𑀴𑀸𑀭𑀺𑀓𑀸.𑀧𑀽𑀯𑀺𑀓𑀸𑀢𑀺 𑀧𑀽𑀯𑀲𑀫𑁆𑀧𑀸𑀤𑀓𑀸, 𑀬𑁂 𑀧𑀽𑀯𑀫𑁂𑀯 𑀦𑀸𑀦𑀧𑁆𑀧𑀓𑀸𑀭𑀢𑁄 𑀲𑀫𑁆𑀧𑀸𑀤𑁂𑀢𑁆𑀯𑀸 𑀯𑀺𑀓𑁆𑀓𑀺𑀡𑀦𑁆𑀢𑀸 𑀚𑀻𑀯𑀦𑁆𑀢𑀺. 𑀓𑁂𑀲𑀦𑀔𑀲𑀡𑁆𑀞𑀧𑀦𑀸𑀤𑀺𑀯𑀲𑁂𑀦 𑀫𑀦𑀼𑀲𑁆𑀲𑀸𑀦𑀁 𑀅𑀮𑀗𑁆𑀓𑀸𑀭𑀯𑀺𑀥𑀺𑀁 𑀓𑀧𑁆𑀧𑁂𑀦𑁆𑀢𑀺 𑀲𑀁𑀯𑀺𑀤𑀳𑀦𑁆𑀢𑀻𑀢𑀺 𑀓𑀧𑁆𑀧𑀓𑀸. 𑀘𑀼𑀡𑁆𑀡𑀯𑀺𑀮𑁂𑀧𑀦𑀸𑀤𑀻𑀳𑀺 𑀫𑀮𑀳𑀭𑀡𑀯𑀡𑁆𑀡𑀲𑀫𑁆𑀧𑀸𑀤𑀦𑀯𑀺𑀥𑀺𑀦𑀸 𑀦𑁆𑀳𑀸𑀧𑁂𑀦𑁆𑀢𑀺 𑀦𑀳𑀸𑀦𑀁 𑀓𑀭𑁄𑀦𑁆𑀢𑀻𑀢𑀺 𑀦𑁆𑀳𑀸𑀧𑀺𑀓𑀸. 𑀦𑀯𑀦𑁆𑀢𑀸𑀤𑀺𑀯𑀺𑀥𑀺𑀦𑀸 𑀧𑀯𑀢𑁆𑀢𑁄 𑀕𑀡𑀦𑀕𑀦𑁆𑀣𑁄 𑀅𑀦𑁆𑀢𑀭𑀸 𑀙𑀺𑀤𑁆𑀤𑀸𑀪𑀸𑀯𑁂𑀦 𑀅𑀘𑁆𑀙𑀺𑀤𑁆𑀤𑀓𑁄𑀢𑀺 𑀯𑀼𑀘𑁆𑀘𑀢𑀺, 𑀢𑀤𑁂𑀯 𑀧𑀞𑁂𑀦𑁆𑀢𑀻𑀢𑀺 𑀅𑀘𑁆𑀙𑀺𑀤𑁆𑀤𑀓𑀧𑀸𑀞𑀓𑀸. 𑀳𑀢𑁆𑀣𑁂𑀦 𑀅𑀥𑀺𑀧𑁆𑀧𑀸𑀬𑀯𑀺𑀜𑁆𑀜𑀸𑀧𑀦𑀁, 𑀕𑀡𑀦𑀁 𑀯𑀸 𑀳𑀢𑁆𑀣𑀫𑀼𑀤𑁆𑀤𑀸. 𑀅𑀗𑁆𑀕𑀼𑀮𑀺𑀲𑀗𑁆𑀓𑁄𑀘𑀦𑀜𑁆𑀳𑀺 𑀫𑀼𑀤𑁆𑀤𑀸𑀢𑀺 𑀯𑀼𑀘𑁆𑀘𑀢𑀺, 𑀢𑁂𑀦 𑀘 𑀯𑀺𑀜𑁆𑀜𑀸𑀧𑀦𑀁, 𑀕𑀡𑀦𑀁 𑀯𑀸 𑀳𑁄𑀢𑀺. 𑀳𑀢𑁆𑀣𑀲𑀤𑁆𑀤𑁄 𑀘𑁂𑀢𑁆𑀣 𑀢𑀤𑁂𑀓𑀤𑁂𑀲𑁂𑀲𑀼 𑀅𑀗𑁆𑀕𑀼𑀮𑀻𑀲𑀼 𑀤𑀝𑁆𑀞𑀩𑁆𑀩𑁄 ‘‘𑀦 𑀪𑀼𑀜𑁆𑀚𑀫𑀸𑀦𑁄 𑀲𑀩𑁆𑀩𑀁 𑀳𑀢𑁆𑀣𑀁 𑀫𑀼𑀔𑁂 𑀧𑀓𑁆𑀔𑀺𑀧𑀺𑀲𑁆𑀲𑀸𑀫𑀻’’𑀢𑀺𑀆𑀤𑀻𑀲𑀼 (𑀧𑀸𑀘𑀺. 𑁬𑁧𑁮) 𑀯𑀺𑀬, 𑀢𑀫𑀼𑀧𑀦𑀺𑀲𑁆𑀲𑀸𑀬 𑀚𑀻𑀯𑀦𑁆𑀢𑀻𑀢𑀺 𑀫𑀼𑀤𑁆𑀤𑀺𑀓𑀸. 𑀢𑁂𑀦𑀸𑀳 ‘‘𑀳𑀢𑁆𑀣𑀫𑀼𑀤𑁆𑀤𑀸𑀬𑀸’’𑀢𑀺𑀆𑀤𑀺.

𑀅𑀬𑀓𑀸𑀭𑁄 𑀓𑀫𑁆𑀫𑀸𑀭𑀓𑀸𑀭𑀓𑁄. 𑀤𑀦𑁆𑀢𑀓𑀸𑀭𑁄 𑀪𑀫𑀓𑀸𑀭𑁄. 𑀘𑀺𑀢𑁆𑀢𑀓𑀸𑀭𑁄 𑀮𑁂𑀧𑀘𑀺𑀢𑁆𑀢𑀓𑀸𑀭𑁄. 𑀆𑀤𑀺-𑀲𑀤𑁆𑀤𑁂𑀦 𑀓𑁄𑀝𑁆𑀝𑀓𑀮𑁂𑀔𑀓𑀯𑀺𑀮𑀻𑀯𑀓𑀸𑀭𑀇𑀝𑁆𑀞𑀓𑀓𑀸𑀭𑀤𑀸𑀭𑀼𑀓𑀸𑀭𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂. 𑀓𑀭𑀡𑀦𑀺𑀧𑁆𑀨𑀸𑀤𑀦𑀯𑀲𑁂𑀦 𑀤𑀲𑁆𑀲𑁂𑀢𑁆𑀯𑀸. 𑀲𑀦𑁆𑀤𑀺𑀝𑁆𑀞𑀺𑀓𑀫𑁂𑀯𑀸𑀢𑀺 𑀅𑀲𑀫𑁆𑀧𑀭𑀸𑀬𑀺𑀓𑀢𑀸𑀬 𑀲𑀸𑀫𑀁 𑀤𑀝𑁆𑀞𑀩𑁆𑀩𑀁, 𑀲𑀬𑀫𑀦𑀼𑀪𑀯𑀺𑀢𑀩𑁆𑀩𑀁 𑀅𑀢𑁆𑀢𑀧𑀘𑁆𑀘𑀓𑁆𑀔𑀦𑁆𑀢𑀺 𑀅𑀢𑁆𑀣𑁄. 𑀉𑀧𑀚𑀻𑀯𑀦𑁆𑀢𑀻𑀢𑀺 𑀉𑀧𑀦𑀺𑀲𑁆𑀲𑀸𑀬 𑀚𑀻𑀯𑀦𑁆𑀢𑀺. 𑀲𑀼𑀔𑀺𑀢𑀦𑁆𑀢𑀺 𑀲𑀼𑀔𑀧𑁆𑀧𑀢𑁆𑀢𑀁. 𑀣𑀸𑀫𑀩𑀮𑀽𑀧𑁂𑀢𑀪𑀸𑀯𑁄𑀯 𑀧𑀻𑀡𑀦𑀦𑁆𑀢𑀺 𑀆𑀳 ‘‘𑀧𑀻𑀡𑀺𑀢𑀁 𑀣𑀸𑀫𑀩𑀮𑀽𑀧𑁂𑀢’’𑀦𑁆𑀢𑀺. 𑀉𑀧𑀭𑀻𑀢𑀺 𑀤𑁂𑀯𑀮𑁄𑀓𑁂. 𑀢𑀣𑀸 𑀉𑀤𑁆𑀥𑀦𑁆𑀢𑀺𑀧𑀺. 𑀲𑁄 𑀳𑀺 𑀫𑀦𑀼𑀲𑁆𑀲𑀮𑁄𑀓𑀢𑁄 𑀉𑀧𑀭𑀺𑀫𑁄. 𑀅𑀕𑁆𑀕𑀁 𑀯𑀺𑀬𑀸𑀢𑀺 𑀅𑀕𑁆𑀕𑀁, 𑀨𑀮𑀁. ‘‘𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀨𑀮𑀲𑁆𑀲 𑀦𑀺𑀩𑁆𑀩𑀢𑁆𑀢𑀦𑀢𑁄 𑀢𑀁 𑀓𑀫𑁆𑀫𑀲𑁆𑀲 𑀅𑀕𑁆𑀕𑀺𑀲𑀺𑀔𑀸 𑀯𑀺𑀬 𑀳𑁄𑀢𑀻’’𑀢𑀺 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑀁. 𑀅𑀧𑀺𑀘 𑀲𑀕𑁆𑀕𑀦𑁆𑀢𑀺 𑀉𑀢𑁆𑀢𑀫𑀁, 𑀨𑀮𑀁. 𑀲𑀕𑁆𑀕𑀦𑁆𑀢𑀺 𑀲𑀼𑀝𑁆𑀞𑀼 𑀅𑀕𑁆𑀕𑀁, 𑀭𑀽𑀧𑀲𑀤𑁆𑀤𑀸𑀤𑀺𑀤𑀲𑀯𑀺𑀥𑀁 𑀅𑀢𑁆𑀢𑀦𑁄 𑀨𑀮𑀁 𑀦𑀺𑀧𑁆𑀨𑀸𑀤𑁂𑀢𑀼𑀁 𑀅𑀭𑀳𑀢𑀻𑀢𑀺 𑀅𑀢𑁆𑀣𑁄. 𑀲𑀼𑀅𑀕𑁆𑀕𑀺𑀓𑀸𑀯 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀲𑁄𑀯𑀕𑁆𑀕𑀺𑀓𑀸, 𑀤𑀓𑁆𑀔𑀺𑀡𑀸𑀲𑀤𑁆𑀤𑀸𑀧𑁂𑀓𑁆𑀔𑀸𑀬 𑀘 𑀲𑀩𑁆𑀩𑀢𑁆𑀣 𑀇𑀢𑁆𑀣𑀺𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄. 𑀲𑀼𑀔𑁄𑀢𑀺 𑀲𑀼𑀔𑀽𑀧𑀸𑀬𑁄 𑀇𑀝𑁆𑀞𑁄 𑀓𑀦𑁆𑀢𑁄. 𑀅𑀕𑁆𑀕𑁂𑀢𑀺 𑀉𑀴𑀸𑀭𑁂. 𑀅𑀢𑁆𑀢𑀦𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁 𑀩𑀸𑀳𑀺𑀭𑀁 𑀭𑀽𑀧𑀁, 𑀅𑀢𑁆𑀢𑀦𑁄 𑀯𑀡𑁆𑀡𑀧𑁄𑀓𑁆𑀔𑀭𑀢𑀸 𑀯𑀡𑁆𑀡𑁄𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀤𑀓𑁆𑀔𑀦𑁆𑀢𑀺 𑀯𑀟𑁆𑀠𑀦𑁆𑀢𑀺 𑀏𑀢𑀸𑀬𑀸𑀢𑀺 𑀤𑀓𑁆𑀔𑀺𑀡𑀸, 𑀧𑀭𑀺𑀘𑁆𑀘𑀸𑀕𑀫𑀬𑀁 𑀧𑀼𑀜𑁆𑀜𑀦𑁆𑀢𑀺 𑀆𑀳 ‘‘𑀤𑀓𑁆𑀔𑀺𑀡𑀁 𑀤𑀸𑀦’’𑀦𑁆𑀢𑀺.

𑀫𑀕𑁆𑀕𑁄 𑀲𑀸𑀫𑀜𑁆𑀜𑀁 𑀲𑀫𑀺𑀢𑀧𑀸𑀧𑀲𑀗𑁆𑀔𑀸𑀢𑀲𑁆𑀲 𑀲𑀫𑀡𑀲𑁆𑀲 𑀪𑀸𑀯𑁄𑀢𑀺 𑀓𑀢𑁆𑀯𑀸, 𑀢𑀲𑁆𑀲 𑀯𑀺𑀧𑀸𑀓𑀢𑁆𑀢𑀸 𑀅𑀭𑀺𑀬𑀨𑀮𑀁 𑀲𑀸𑀫𑀜𑁆𑀜𑀨𑀮𑀁.‘‘𑀬𑀣𑀸𑀳𑀸’’𑀢𑀺𑀆𑀤𑀺𑀦𑀸 𑀫𑀳𑀸𑀯𑀕𑁆𑀕𑀲𑀁𑀬𑀼𑀢𑁆𑀢𑀧𑀸𑀴𑀺𑀯𑀲𑁂𑀦 𑀢𑀤𑀢𑁆𑀣𑀁 𑀲𑀸𑀥𑁂𑀢𑀺. 𑀢𑀁 𑀏𑀲 𑀭𑀸𑀚𑀸 𑀦 𑀚𑀸𑀦𑀸𑀢𑀺 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑀢𑀸𑀬. 𑀬𑀲𑁆𑀫𑀸 𑀧𑀦𑁂𑀲 ‘‘𑀤𑀸𑀲𑀓𑀲𑁆𑀲𑀓𑀸𑀤𑀺𑀪𑀽𑀢𑀸𑀦𑀁 𑀧𑀩𑁆𑀩𑀚𑀺𑀢𑀸𑀦𑀁 𑀮𑁄𑀓𑀢𑁄 𑀅𑀪𑀺𑀯𑀸𑀤𑀦𑀸𑀤𑀺𑀮𑀸𑀪𑁄 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀦𑀸𑀫𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀅𑀢𑁆𑀣𑀺 𑀦𑀼 𑀔𑁄 𑀓𑁄𑀘𑀺 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀈𑀤𑀺𑀲𑀫𑀢𑁆𑀣𑀁 𑀚𑀸𑀦𑀦𑁆𑀢𑁄’’𑀢𑀺 𑀯𑀻𑀫𑀁𑀲𑀦𑁆𑀢𑁄 𑀧𑀽𑀭𑀡𑀸𑀤𑀺𑀓𑁂 𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀲𑀁 𑀓𑀣𑀸𑀬 𑀅𑀦𑀥𑀺𑀕𑀢𑀯𑀺𑀢𑁆𑀢𑁄 𑀪𑀕𑀯𑀦𑁆𑀢𑀫𑁆𑀧𑀺 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑀺. 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀤𑀸𑀲𑀓𑀲𑁆𑀲𑀓𑁄𑀧𑀫𑀁 𑀲𑀦𑁆𑀥𑀸𑀬 𑀧𑀼𑀘𑁆𑀙𑀢𑀻’’𑀢𑀺.

𑀭𑀸𑀚𑀸𑀫𑀘𑁆𑀘𑀸𑀢𑀺 𑀭𑀸𑀚𑀓𑀼𑀮𑀲𑀫𑀼𑀤𑀸𑀕𑀢𑀸 𑀅𑀫𑀘𑁆𑀘𑀸, 𑀅𑀦𑀼𑀬𑀼𑀢𑁆𑀢𑀓𑀭𑀸𑀚𑀸𑀦𑁄 𑀘𑁂𑀯 𑀅𑀫𑀘𑁆𑀘𑀸 𑀘𑀸𑀢𑀺𑀧𑀺 𑀅𑀢𑁆𑀣𑁄. 𑀓𑀡𑁆𑀳𑀧𑀓𑁆𑀔𑀦𑁆𑀢𑀺 𑀬𑀣𑀸𑀧𑀼𑀘𑁆𑀙𑀺𑀢𑁂 𑀅𑀢𑁆𑀣𑁂 𑀮𑀩𑁆𑀪𑀫𑀸𑀦𑀤𑀺𑀝𑁆𑀞𑀺𑀕𑀢𑀽𑀧𑀲𑀁𑀳𑀺𑀢𑀁 𑀲𑀁𑀓𑀺𑀮𑁂𑀲𑀧𑀓𑁆𑀔𑀁. 𑀲𑀼𑀓𑁆𑀓𑀧𑀓𑁆𑀔𑀦𑁆𑀢𑀺 𑀢𑀩𑁆𑀩𑀺𑀥𑀼𑀭𑀁 𑀉𑀧𑀭𑀺 𑀲𑀼𑀢𑁆𑀢𑀸𑀕𑀢𑀁 𑀯𑁄𑀤𑀸𑀦𑀧𑀓𑁆𑀔𑀁. 𑀲𑀫𑀡𑀓𑁄𑀮𑀸𑀳𑀮𑀦𑁆𑀢𑀺 𑀲𑀫𑀡𑀓𑁄𑀢𑀽𑀳𑀮𑀁 𑀢𑀁 𑀢𑀁 𑀲𑀫𑀡𑀯𑀸𑀤𑀸𑀦𑀁 𑀅𑀜𑁆𑀜𑀫𑀜𑁆𑀜𑀯𑀺𑀭𑁄𑀥𑀁. 𑀲𑀫𑀡𑀪𑀡𑁆𑀟𑀦𑀦𑁆𑀢𑀺 𑀢𑁂𑀦𑁂𑀯 𑀯𑀺𑀭𑁄𑀥𑁂𑀦 ‘‘𑀏𑀯𑀁𑀯𑀸𑀤𑀻𑀦𑀁 𑀢𑁂𑀲𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀬𑀁 𑀤𑁄𑀲𑁄, 𑀏𑀯𑀁𑀯𑀸𑀤𑀻𑀦𑀁 𑀢𑁂𑀲𑀁 𑀅𑀬𑀁 𑀤𑁄𑀲𑁄’’𑀢𑀺 𑀏𑀯𑀁 𑀢𑀁 𑀢𑀁 𑀯𑀸𑀤𑀲𑁆𑀲 𑀧𑀭𑀺𑀪𑀸𑀲𑀦𑀁. 𑀇𑀲𑁆𑀲𑀭𑀸𑀦𑀼𑀯𑀢𑁆𑀢𑀓𑁄 𑀳𑀺 𑀮𑁄𑀓𑁄𑀢𑀺 𑀥𑀫𑁆𑀫𑀢𑀸𑀤𑀲𑁆𑀲𑀦𑁂𑀦 𑀢𑀤𑀢𑁆𑀣𑀲𑀫𑀢𑁆𑀣𑀦𑀁. 𑀅𑀢𑁆𑀢𑀦𑁄 𑀤𑁂𑀲𑀦𑀸𑀓𑁄𑀲𑀮𑁆𑀮𑁂𑀦 𑀭𑀜𑁆𑀜𑁄 𑀪𑀸𑀭𑀁 𑀓𑀭𑁄𑀦𑁆𑀢𑁄, 𑀦 𑀢𑀤𑀜𑁆𑀜𑁂𑀦 𑀧𑀭𑀯𑀫𑁆𑀪𑀦𑀸𑀤𑀺𑀓𑀸𑀭𑀡𑁂𑀦.

𑁧𑁬𑁪. 𑀦𑀼-𑀲𑀤𑁆𑀤𑁄 𑀯𑀺𑀬 𑀦𑁄-𑀲𑀤𑁆𑀤𑁄𑀧𑀺 𑀧𑀼𑀘𑁆𑀙𑀸𑀬𑀁 𑀦𑀺𑀧𑀸𑀢𑁄𑀢𑀺 𑀆𑀳 ‘‘𑀅𑀪𑀺𑀚𑀸𑀦𑀸𑀲𑀺 𑀦𑀽’’𑀢𑀺. 𑀅𑀬𑀜𑁆𑀘𑀸𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁄 𑀦 𑀓𑁂𑀯𑀮𑀁 𑀅𑀪𑀺𑀚𑀸𑀦𑀸𑀲𑀺𑀧𑀤𑁂𑀦𑁂𑀯, 𑀅𑀣 𑀔𑁄 ‘‘𑀧𑀼𑀘𑁆𑀙𑀺𑀢𑀸’’𑀢𑀺 𑀧𑀤𑁂𑀦 𑀘𑀸𑀢𑀺 𑀲𑀫𑀼𑀘𑁆𑀘𑀬𑀢𑁆𑀣𑁄. 𑀓𑀣𑀁 𑀬𑁄𑀚𑁂𑀢𑀩𑁆𑀩𑁄𑀢𑀺 𑀅𑀦𑀼𑀬𑁄𑀕𑀫𑀧𑀦𑁂𑀢𑀺 ‘‘𑀇𑀤𑀜𑁆𑀳𑀻’’𑀢𑀺𑀆𑀤𑀺𑀦𑀸. 𑀧𑀼𑀘𑁆𑀙𑀺𑀢𑀸 𑀦𑀽𑀢𑀺 𑀧𑀼𑀩𑁆𑀩𑁂 𑀧𑀼𑀘𑁆𑀙𑀁 𑀓𑀢𑁆𑀢𑀸 𑀦𑀼. 𑀦𑀁 𑀧𑀼𑀝𑁆𑀞𑀪𑀸𑀯𑀦𑁆𑀢𑀺 𑀢𑀸𑀤𑀺𑀲𑀁 𑀧𑀼𑀘𑁆𑀙𑀺𑀢𑀪𑀸𑀯𑀁 𑀅𑀪𑀺𑀚𑀸𑀦𑀸𑀲𑀺 𑀦𑀼. 𑀦 𑀢𑁂 𑀲𑀫𑁆𑀫𑀼𑀝𑁆𑀞𑀦𑁆𑀢𑀺 𑀢𑀯 𑀦 𑀧𑀫𑀼𑀝𑁆𑀞𑀁 𑀯𑀢𑀸𑀢𑀺 𑀅𑀢𑁆𑀣𑁄. 𑀅𑀨𑀸𑀲𑀼𑀓𑀪𑀸𑀯𑁄𑀢𑀺 𑀢𑀣𑀸 𑀪𑀸𑀲𑀦𑁂𑀦 𑀅𑀲𑀼𑀔𑀪𑀸𑀯𑁄. 𑀧𑀡𑁆𑀟𑀺𑀢𑀧𑀢𑀺𑀭𑀽𑀧𑀓𑀸𑀦𑀦𑁆𑀢𑀺 (𑀲𑀸𑀫𑀁 𑀯𑀺𑀬 𑀅𑀢𑁆𑀢𑀦𑁄 𑀲𑀓𑁆𑀓𑀸𑀭𑀸𑀦𑀁 𑀧𑀡𑁆𑀟𑀺𑀢𑀪𑀸𑀲𑀸𑀦𑀁) 𑀆𑀫𑀁 𑀯𑀺𑀬 𑀧𑀓𑁆𑀓𑀸𑀦𑀁 𑀧𑀡𑁆𑀟𑀺𑀢𑀸 𑀪𑀸𑀲𑀸𑀦𑀁. (𑀤𑀻. 𑀦𑀺. 𑀝𑀻. 𑁧.𑁧𑁬𑁩) 𑀧𑀸𑀴𑀺𑀧𑀤𑀅𑀢𑁆𑀣𑀩𑁆𑀬𑀜𑁆𑀚𑀦𑁂𑀲𑀽𑀢𑀺 𑀧𑀸𑀴𑀺𑀲𑀗𑁆𑀔𑀸𑀢𑁂 𑀧𑀤𑁂, 𑀢𑀤𑀢𑁆𑀣𑁂 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀓𑁆𑀔𑀭𑁂 𑀘, 𑀯𑀸𑀓𑁆𑀬𑀧𑀭𑀺𑀬𑀸𑀬𑁄 𑀯𑀸 𑀩𑁆𑀬𑀜𑁆𑀚𑀦𑀲𑀤𑁆𑀤𑁄 ‘‘𑀅𑀓𑁆𑀔𑀭𑀁 𑀧𑀤𑀁 𑀩𑁆𑀬𑀜𑁆𑀚𑀦’’𑀦𑁆𑀢𑀺𑀆𑀤𑀻𑀲𑀼 (𑀦𑁂𑀢𑁆𑀢𑀺. 𑁨𑁮) 𑀯𑀺𑀬. 𑀪𑀕𑀯𑀢𑁄 𑀭𑀽𑀧𑀁 𑀲𑀪𑀸𑀯𑁄 𑀯𑀺𑀬 𑀭𑀽𑀧𑀫𑀲𑁆𑀲𑀸𑀢𑀺 𑀪𑀕𑀯𑀦𑁆𑀢𑀭𑀽𑀧𑁄, 𑀪𑀕𑀯𑀸 𑀯𑀺𑀬 𑀏𑀓𑀦𑁆𑀢𑀧𑀡𑁆𑀟𑀺𑀢𑁄𑀢𑀺 𑀅𑀢𑁆𑀣𑁄.

𑀧𑀽𑀭𑀡𑀓𑀲𑁆𑀲𑀧𑀯𑀸𑀤𑀯𑀡𑁆𑀡𑀦𑀸

𑁧𑁬𑁫. 𑀏𑀓𑀫𑀺𑀤𑀸𑀳𑀦𑁆𑀢𑀺 𑀏𑀢𑁆𑀣 𑀇𑀤𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀏𑀓𑀁 𑀲𑀫𑀬𑀫𑀺𑀘𑁆𑀘𑁂𑀯 𑀅𑀢𑁆𑀣𑁄. 𑀲𑀫𑁆𑀫𑁄𑀤𑁂𑀢𑀺 𑀲𑀫𑁆𑀫𑁄𑀤𑀦𑀁 𑀓𑀭𑁄𑀢𑀻𑀢𑀺 𑀲𑀫𑁆𑀫𑁄𑀤𑀦𑀻𑀬𑀁. 𑀅𑀦𑀻𑀬𑀲𑀤𑁆𑀤𑁄 𑀳𑀺 𑀩𑀳𑀼𑀮𑀸 𑀓𑀢𑁆𑀯𑀢𑁆𑀣𑀸𑀪𑀺𑀥𑀸𑀬𑀓𑁄 𑀬𑀣𑀸 ‘‘𑀦𑀺𑀬𑁆𑀬𑀸𑀦𑀺𑀓𑀸’’𑀢𑀺, (𑀥. 𑀲. 𑀲𑀼𑀢𑁆𑀢𑀦𑁆𑀢𑀤𑀼𑀓𑀫𑀸𑀢𑀺𑀓𑀸 𑁯𑁭) 𑀲𑀫𑁆𑀫𑁄𑀤𑀦𑀁 𑀯𑀸 𑀚𑀦𑁂𑀢𑀻𑀢𑀺 𑀲𑀫𑁆𑀫𑁄𑀤𑀦𑀺𑀬𑀁 𑀢𑀤𑁆𑀥𑀺𑀢𑀯𑀲𑁂𑀦. 𑀲𑀭𑀺𑀢𑀩𑁆𑀩𑀦𑁆𑀢𑀺 𑀲𑀸𑀭𑀡𑀻𑀬𑀁, 𑀲𑀭𑀡𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀦𑁆𑀢𑀺 𑀯𑀸 𑀲𑀸𑀭𑀡𑀺𑀬𑀁, 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀫𑁆𑀫𑁄𑀤𑀚𑀦𑀓𑀁 𑀲𑀭𑀺𑀢𑀩𑁆𑀩𑀬𑀼𑀢𑁆𑀢𑀓’’𑀦𑁆𑀢𑀺 𑀯𑀼𑀢𑁆𑀢𑀁, 𑀲𑀭𑀺𑀢𑀩𑁆𑀩𑀬𑀼𑀢𑁆𑀢𑀓𑀦𑁆𑀢𑀺 𑀘 𑀲𑀭𑀡𑀸𑀦𑀼𑀘𑁆𑀙𑀯𑀺𑀓𑀦𑁆𑀢𑀺 𑀅𑀢𑁆𑀣𑁄.

𑁧𑁬𑁬. 𑀲𑀳𑀢𑁆𑀣𑀸𑀢𑀺 𑀲𑀳𑀢𑁆𑀣𑁂𑀦𑁂𑀯, 𑀢𑁂𑀦 𑀲𑀼𑀤𑁆𑀥𑀓𑀢𑁆𑀢𑀸𑀭𑀁 𑀤𑀲𑁆𑀲𑁂𑀢𑀺, 𑀆𑀡𑀢𑁆𑀢𑀺𑀬𑀸𑀢𑀺 𑀧𑀦 𑀳𑁂𑀢𑀼𑀓𑀢𑁆𑀢𑀸𑀭𑀁, 𑀦𑀺𑀲𑁆𑀲𑀕𑁆𑀕𑀺𑀬𑀣𑀸𑀯𑀭𑀸𑀤𑀬𑁄𑀧𑀺 𑀇𑀥 𑀲𑀳𑀢𑁆𑀣 𑀓𑀭𑀡𑁂𑀦𑁂𑀯 𑀲𑀗𑁆𑀕𑀳𑀺𑀢𑀸. 𑀳𑀢𑁆𑀣𑀸𑀤𑀻𑀦𑀻𑀢𑀺 𑀳𑀢𑁆𑀣𑀧𑀸𑀤𑀓𑀡𑁆𑀡𑀦𑀸𑀲𑀸𑀤𑀻𑀦𑀺. 𑀧𑀘𑀦𑀁 𑀤𑀳𑀦𑀁 𑀯𑀺𑀩𑀸𑀥𑀦𑀦𑁆𑀢𑀺 𑀆𑀳 ‘‘𑀤𑀡𑁆𑀟𑁂𑀦 𑀉𑀧𑁆𑀧𑀻𑀴𑁂𑀦𑁆𑀢𑀲𑁆𑀲𑀸’’𑀢𑀺. 𑀧𑀧𑀜𑁆𑀘𑀲𑀽𑀤𑀦𑀺𑀬𑀁 𑀦𑀸𑀫 𑀫𑀚𑁆𑀛𑀺𑀫𑀸𑀕𑀫𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀧𑀘𑀢𑁄’’𑀢𑀺 𑀏𑀢𑀲𑁆𑀲 ‘‘𑀢𑀚𑁆𑀚𑁂𑀦𑁆𑀢𑀲𑁆𑀲 𑀯𑀸’’𑀢𑀺 (𑀫. 𑀦𑀺. 𑀅𑀝𑁆𑀞. 𑁩.𑁯𑁭) 𑀤𑀼𑀢𑀺𑀬𑁄𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄, 𑀇𑀥 𑀧𑀦 𑀢𑀚𑁆𑀚𑀦𑀁, 𑀧𑀭𑀺𑀪𑀸𑀲𑀦𑀜𑁆𑀘 𑀤𑀡𑁆𑀟𑁂𑀦 𑀲𑀗𑁆𑀕𑀳𑁂𑀢𑁆𑀯𑀸 ‘‘𑀤𑀡𑁆𑀟𑁂𑀦 𑀉𑀧𑁆𑀧𑀻𑀴𑁂𑀦𑁆𑀢𑀲𑁆𑀲 𑀇𑀘𑁆𑀘𑁂𑀯 𑀯𑀼𑀢𑁆𑀢’’𑀦𑁆𑀢𑀺 (𑀤𑀻. 𑀦𑀺. 𑀝𑀻. 𑁧.𑁧𑁬𑁬) 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑀁, 𑀅𑀥𑀼𑀦𑀸 𑀧𑀦 𑀧𑁄𑀢𑁆𑀣𑀓𑁂𑀲𑀼 ‘‘𑀢𑀚𑁆𑀚𑁂𑀦𑁆𑀢𑀲𑁆𑀲 𑀯𑀸’’𑀢𑀺 𑀧𑀸𑀞𑁄𑀧𑀺 𑀩𑀳𑀼𑀲𑁄 𑀤𑀺𑀲𑁆𑀲𑀢𑀺. 𑀲𑁄𑀓𑀦𑁆𑀢𑀺 𑀲𑁄𑀓𑀓𑀸𑀭𑀡𑀁, 𑀲𑁄𑀘𑀦𑀦𑁆𑀢𑀺𑀧𑀺 𑀬𑀼𑀚𑁆𑀚𑀢𑀺 𑀓𑀸𑀭𑀡𑀲𑀫𑁆𑀧𑀸𑀤𑀦𑁂𑀦 𑀨𑀮𑀲𑁆𑀲𑀧𑀺 𑀓𑀢𑁆𑀢𑀩𑁆𑀩𑀢𑁄. 𑀧𑀭𑁂𑀳𑀻𑀢𑀺 𑀅𑀢𑁆𑀢𑀦𑁄 𑀯𑀘𑀦𑀓𑀭𑁂𑀳𑀺 𑀓𑀫𑁆𑀫𑀪𑀽𑀢𑁂𑀳𑀺. 𑀨𑀦𑁆𑀤𑀢𑁄𑀢𑀺 𑀏𑀢𑁆𑀣 𑀧𑀭𑀲𑁆𑀲 𑀨𑀦𑁆𑀤𑀦𑀯𑀲𑁂𑀦 𑀲𑀼𑀤𑁆𑀥𑀓𑀢𑁆𑀢𑀼𑀢𑁆𑀣𑁄 𑀦 𑀮𑀩𑁆𑀪𑀢𑀺, 𑀅𑀣 𑀔𑁄 𑀅𑀢𑁆𑀢𑀦𑁄 𑀨𑀦𑁆𑀤𑀦𑀯𑀲𑁂𑀦𑁂𑀯𑀸𑀢𑀺 𑀆𑀳 ‘‘𑀧𑀭𑀁 𑀨𑀦𑁆𑀤𑀦𑁆𑀢𑀁 𑀨𑀦𑁆𑀤𑀦𑀓𑀸𑀮𑁂 𑀲𑀬𑀫𑁆𑀧𑀺 𑀨𑀦𑁆𑀤𑀢𑁄’’𑀢𑀺, 𑀅𑀢𑁆𑀢𑀦𑀸 𑀓𑀢𑁂𑀦 𑀧𑀭𑀲𑁆𑀲 𑀯𑀺𑀩𑀸𑀥𑀦𑀧𑀬𑁄𑀕𑁂𑀦 𑀲𑀬𑀫𑁆𑀧𑀺 𑀨𑀦𑁆𑀤𑀢𑁄𑀢𑀺 𑀅𑀢𑁆𑀣𑁄. ‘‘𑀅𑀢𑀺𑀧𑀸𑀢𑀸𑀧𑀬𑀢𑁄’’𑀢𑀺 𑀧𑀤𑀁 𑀲𑀼𑀤𑁆𑀥𑀓𑀢𑁆𑀢𑀭𑀺, 𑀳𑁂𑀢𑀼𑀓𑀢𑁆𑀢𑀭𑀺 𑀘 𑀧𑀯𑀢𑁆𑀢𑀢𑀻𑀢𑀺 𑀤𑀲𑁆𑀲𑁂𑀢𑀺 ‘‘𑀳𑀦𑀦𑁆𑀢𑀲𑁆𑀲𑀸𑀧𑀺 𑀳𑀦𑀸𑀧𑁂𑀦𑁆𑀢𑀲𑁆𑀲𑀸𑀧𑀻’’𑀢𑀺 𑀇𑀫𑀺𑀦𑀸. 𑀲𑀩𑁆𑀩𑀢𑁆𑀣𑀸𑀢𑀺 ‘‘𑀆𑀤𑀺𑀬𑀢𑁄’’𑀢𑀺𑀆𑀤𑀻𑀲𑀼. 𑀓𑀭𑀡𑀓𑀸𑀭𑀡𑀯𑀲𑁂𑀦𑀸𑀢𑀺 𑀲𑀬𑀁𑀓𑀸𑀭𑀧𑀭𑀁𑀓𑀸𑀭𑀯𑀲𑁂𑀦.

𑀖𑀭𑀪𑀺𑀢𑁆𑀢𑀺𑀬𑀸 𑀅𑀦𑁆𑀢𑁄 𑀘 𑀩𑀳𑀺 𑀘 𑀲𑀦𑁆𑀥𑀺 𑀖𑀭𑀲𑀦𑁆𑀥𑀺. 𑀓𑀺𑀜𑁆𑀘𑀺𑀧𑀺 𑀅𑀲𑁂𑀲𑁂𑀢𑁆𑀯𑀸 𑀦𑀺𑀭𑀯𑀲𑁂𑀲𑁄 𑀮𑁄𑀧𑁄 𑀯𑀺𑀮𑀼𑀫𑁆𑀧𑀦𑀁 𑀦𑀺𑀮𑁆𑀮𑁄𑀧𑁄𑀢𑀺 𑀆𑀳 ‘‘𑀫𑀳𑀸𑀯𑀺𑀮𑁄𑀧’’𑀦𑁆𑀢𑀺. 𑀏𑀓𑀸𑀕𑀸𑀭𑁂 𑀦𑀺𑀬𑀼𑀢𑁆𑀢𑁄 𑀯𑀺𑀮𑁄𑀧𑁄 𑀏𑀓𑀸𑀕𑀸𑀭𑀺𑀓𑁄. 𑀢𑁂𑀦𑀸𑀳 ‘‘𑀏𑀓𑀫𑁂𑀯𑀸’’𑀢𑀺𑀆𑀤𑀺. ‘‘𑀧𑀭𑀺𑀧𑀦𑁆𑀣𑁂 𑀢𑀺𑀝𑁆𑀞𑀢𑁄’’𑀢𑀺 𑀏𑀢𑁆𑀣 𑀅𑀘𑁆𑀙𑀺𑀦𑁆𑀤𑀦𑀢𑁆𑀣𑀫𑁂𑀯 𑀢𑀺𑀝𑁆𑀞𑀢𑀻𑀢𑀺 𑀅𑀬𑀫𑀢𑁆𑀣𑁄 𑀧𑀓𑀭𑀡𑀢𑁄 𑀲𑀺𑀤𑁆𑀥𑁄𑀢𑀺 𑀤𑀲𑁆𑀲𑁂𑀢𑀺 ‘‘𑀆𑀕𑀢𑀸𑀕𑀢𑀸𑀦’’𑀦𑁆𑀢𑀺𑀆𑀤𑀺𑀦𑀸. ‘‘𑀧𑀭𑀺𑀢𑁄 𑀲𑀩𑁆𑀩𑀲𑁄 𑀧𑀦𑁆𑀣𑁂 𑀳𑀦𑀦𑀁 𑀧𑀭𑀺𑀧𑀦𑁆𑀣𑁄’’𑀢𑀺 (𑀤𑀻. 𑀦𑀺. 𑀝𑀻. 𑁧.𑁧𑁬𑁬) 𑀅𑀬𑀫𑀢𑁆𑀣𑁄𑀧𑀺 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑁄. 𑀓𑀭𑁄𑀫𑀻𑀢𑀺 𑀲𑀜𑁆𑀜𑀸𑀬𑀸𑀢𑀺 𑀲𑀜𑁆𑀘𑁂𑀢𑀦𑀺𑀓𑀪𑀸𑀯𑀫𑀸𑀳, 𑀢𑁂𑀦𑁂𑀢𑀁 𑀤𑀲𑁆𑀲𑁂𑀢𑀺 ‘‘𑀲𑀜𑁆𑀘𑀺𑀘𑁆𑀘 𑀓𑀭𑁄𑀢𑁄𑀧𑀺 𑀦 𑀓𑀭𑀻𑀬𑀢𑀺 𑀦𑀸𑀫, 𑀧𑀕𑁂𑀯 𑀅𑀲𑀜𑁆𑀘𑀺𑀘𑁆𑀘𑀸’’𑀢𑀺. 𑀧𑀸𑀧𑀁 𑀦 𑀓𑀭𑀻𑀬𑀢𑀻𑀢𑀺 𑀧𑀼𑀩𑁆𑀩𑁂 𑀅𑀲𑀢𑁄 𑀉𑀧𑁆𑀧𑀸𑀤𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀧𑀸𑀧𑀁 𑀅𑀓𑀢𑀫𑁂𑀯 𑀦𑀸𑀫. 𑀢𑁂𑀦𑀸𑀳 ‘‘𑀦𑀢𑁆𑀣𑀺 𑀧𑀸𑀧’’𑀦𑁆𑀢𑀺.

𑀬𑀤𑀺 𑀏𑀯𑀁 𑀓𑀣𑀁 𑀲𑀢𑁆𑀢𑀸 𑀧𑀸𑀧𑁂 𑀧𑀯𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀯𑀸𑀤𑁂 𑀧𑀭𑁂𑀳𑀺 𑀆𑀭𑁄𑀧𑀺𑀢𑀁 𑀤𑁄𑀲𑀫𑀧𑀦𑁂𑀢𑀼𑀓𑀸𑀫𑁄 𑀧𑀽𑀭𑀡𑁄 𑀇𑀫𑀫𑀢𑁆𑀣𑀫𑁆𑀧𑀺 𑀤𑀲𑁆𑀲𑁂𑀢𑀻𑀢𑀺 𑀆𑀳 ‘‘𑀲𑀢𑁆𑀢𑀸 𑀧𑀦𑀸’’𑀢𑀺𑀆𑀤𑀺. 𑀲𑀜𑁆𑀜𑀸𑀫𑀢𑁆𑀢𑀫𑁂𑀢𑀁 ‘‘𑀧𑀸𑀧𑀁 𑀓𑀭𑁄𑀦𑁆𑀢𑀻’’𑀢𑀺, 𑀧𑀸𑀧𑀁 𑀧𑀦 𑀦𑀢𑁆𑀣𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀓𑀺𑀭𑀲𑁆𑀲 𑀳𑁄𑀢𑀺 𑁋 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀳𑀺𑀁𑀲𑀸𑀤𑀺𑀓𑀺𑀭𑀺𑀬𑀸 𑀅𑀢𑁆𑀢𑀸𑀦𑀁 𑀦 𑀧𑀸𑀧𑀼𑀡𑀸𑀢𑀺 𑀢𑀲𑁆𑀲 𑀦𑀺𑀘𑁆𑀘𑀢𑀸𑀬 𑀦𑀺𑀩𑁆𑀩𑀺𑀓𑀸𑀭𑀢𑁆𑀢𑀸, 𑀲𑀭𑀻𑀭𑀁 𑀧𑀦 𑀅𑀘𑁂𑀢𑀦𑀁 𑀓𑀝𑁆𑀞𑀓𑀮𑀺𑀗𑁆𑀕𑀭𑀽𑀧𑀫𑀁, 𑀢𑀲𑁆𑀫𑀺𑀁 𑀯𑀺𑀓𑁄𑀧𑀺𑀢𑁂𑀧𑀺 𑀦 𑀓𑀺𑀜𑁆𑀘𑀺 𑀧𑀸𑀧𑀦𑁆𑀢𑀺. 𑀧𑀭𑀺𑀬𑀦𑁆𑀢𑁄 𑀯𑀼𑀘𑁆𑀘𑀢𑀺 𑀦𑁂𑀫𑀺 𑀧𑀭𑀺𑀬𑁄𑀲𑀸𑀦𑁂 𑀞𑀺𑀢𑀢𑁆𑀢𑀸. 𑀢𑁂𑀦 𑀯𑀼𑀢𑁆𑀢𑀁 𑀆𑀘𑀭𑀺𑀬𑁂𑀦 ‘‘𑀦𑀺𑀲𑀺𑀢𑀔𑀼𑀭𑀫𑀬𑀦𑁂𑀫𑀺𑀦𑀸’’𑀢𑀺 (𑀤𑀻. 𑀦𑀺. 𑀝𑀻. 𑁧.𑁧𑁬𑁬). 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀘𑀓𑁆𑀓𑀧𑀭𑀺𑀬𑁄𑀲𑀸𑀦𑀫𑁂𑀯 𑀧𑀭𑀺𑀬𑀦𑁆𑀢𑁄, 𑀔𑀼𑀭𑁂𑀦 𑀲𑀤𑀺𑀲𑁄 𑀧𑀭𑀺𑀬𑀦𑁆𑀢𑁄 𑀬𑀲𑁆𑀲𑀸𑀢𑀺 𑀔𑀼𑀭𑀧𑀭𑀺𑀬𑀦𑁆𑀢𑁄. 𑀔𑀼𑀭𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀔𑀼𑀭𑀥𑀸𑀭𑀸 𑀕𑀳𑀺𑀢𑀸 𑀢𑀤𑀯𑀭𑁄𑀥𑀢𑁄. 𑀧𑀸𑀴𑀺𑀬𑀁 𑀘𑀓𑁆𑀓𑁂𑀦𑀸𑀢𑀺 𑀘𑀓𑁆𑀓𑀸𑀓𑀸𑀭𑀓𑀢𑁂𑀦 𑀆𑀯𑀼𑀥𑀯𑀺𑀲𑁂𑀲𑁂𑀦. 𑀢𑀁 𑀫𑀁𑀲𑀔𑀮𑀓𑀭𑀡𑀲𑀗𑁆𑀔𑀸𑀢𑀁 𑀦𑀺𑀤𑀸𑀦𑀁 𑀓𑀸𑀭𑀡𑀁 𑀬𑀲𑁆𑀲𑀸𑀢𑀺 𑀢𑀢𑁄𑀦𑀺𑀤𑀸𑀦𑀁, ‘‘𑀧𑀘𑁆𑀘𑀢𑁆𑀢𑀯𑀘𑀦𑀲𑁆𑀲 𑀢𑁄𑀆𑀤𑁂𑀲𑁄, 𑀲𑀫𑀸𑀲𑁂 𑀘𑀲𑁆𑀲 𑀮𑁄𑀧𑀸𑀪𑀸𑀯𑁄’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁨𑁧) 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑁄. ‘‘𑀧𑀘𑁆𑀘𑀢𑁆𑀢𑀢𑁆𑀣𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀫𑁆𑀧𑀺 𑀬𑀼𑀚𑁆𑀚𑀢𑀻’’𑀢𑀺 (𑀲𑀸𑀭𑀢𑁆𑀣. 𑀝𑀻. 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸) 𑀆𑀘𑀭𑀺𑀬𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄. ‘‘𑀓𑀸𑀭𑀡𑀢𑁆𑀣𑁂 𑀦𑀺𑀧𑀸𑀢𑀲𑀫𑀼𑀤𑀸𑀬𑁄’’𑀢𑀺𑀧𑀺 𑀅𑀓𑁆𑀔𑀭𑀘𑀺𑀦𑁆𑀢𑀓𑀸.

𑀕𑀗𑁆𑀕𑀸𑀬 𑀤𑀓𑁆𑀔𑀺𑀡𑀤𑀺𑀲𑀸 𑀅𑀧𑁆𑀧𑀢𑀺𑀭𑀽𑀧𑀤𑁂𑀲𑁄, 𑀉𑀢𑁆𑀢𑀭𑀤𑀺𑀲𑀸 𑀧𑀦 𑀧𑀢𑀺𑀭𑀽𑀧𑀤𑁂𑀲𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀤𑀓𑁆𑀔𑀺𑀡𑀜𑁆𑀘𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀜𑁆𑀘 𑀤𑁂𑀲𑀤𑀺𑀲𑀸𑀧𑀤𑁂𑀲𑁂𑀦 𑀢𑀦𑁆𑀦𑀺𑀯𑀸𑀲𑀺𑀦𑁄 𑀲𑀦𑁆𑀥𑀸𑀬𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀤𑀓𑁆𑀔𑀺𑀡𑀢𑀻𑀭𑁂’’𑀢𑀺𑀆𑀤𑀺𑀫𑀸𑀳. 𑀳𑀦𑀦𑀤𑀸𑀦𑀓𑀺𑀭𑀺𑀬𑀸 𑀳𑀺 𑀢𑀤𑀸𑀬𑀢𑁆𑀢𑀸. 𑀫𑀳𑀸𑀬𑀸𑀕𑀦𑁆𑀢𑀺 𑀫𑀳𑀸𑀯𑀺𑀚𑀺𑀢𑀭𑀜𑁆𑀜𑁄 𑀬𑀜𑁆𑀜𑀲𑀤𑀺𑀲𑀫𑁆𑀧𑀺 𑀫𑀳𑀸𑀬𑀸𑀕𑀁. 𑀤𑀫𑀲𑀤𑁆𑀤𑁄 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑁆𑀲, 𑀉𑀧𑁄𑀲𑀣𑀲𑀻𑀮𑀲𑁆𑀲 𑀘 𑀯𑀸𑀘𑀓𑁄𑀢𑀺 𑀆𑀳 ‘‘𑀇𑀦𑁆𑀤𑁆𑀭𑀺𑀬𑀤𑀫𑁂𑀦 𑀉𑀧𑁄𑀲𑀣𑀓𑀫𑁆𑀫𑁂𑀦𑀸’’𑀢𑀺. 𑀓𑁂𑀘𑀺 𑀧𑀦 𑀉𑀧𑁄𑀲𑀣𑀓𑀫𑁆𑀫𑁂𑀦𑀸’𑀢𑀺 𑀇𑀤𑀁 𑀇𑀦𑁆𑀤𑁆𑀭𑀺𑀬𑀤𑀫𑀲𑁆𑀲 𑀯𑀺𑀲𑁂𑀲𑀦𑀁, 𑀢𑀲𑁆𑀫𑀸 ‘𑀉𑀧𑁄𑀲𑀣𑀓𑀫𑁆𑀫𑀪𑀽𑀢𑁂𑀦 𑀇𑀦𑁆𑀤𑁆𑀭𑀺𑀬𑀤𑀫𑁂𑀦𑀸’𑀢𑀺’’ 𑀅𑀢𑁆𑀣𑀁 𑀯𑀤𑀦𑁆𑀢𑀺, 𑀢𑀤𑀬𑀼𑀢𑁆𑀢𑀫𑁂𑀯 𑀢𑀤𑀼𑀪𑀬𑀢𑁆𑀣𑀯𑀸𑀘𑀓𑀢𑁆𑀢𑀸 𑀤𑀫𑀲𑀤𑁆𑀤𑀲𑁆𑀲, 𑀅𑀢𑁆𑀣𑀤𑁆𑀯𑀬𑀲𑁆𑀲 𑀘 𑀯𑀺𑀲𑁂𑀲𑀯𑀼𑀢𑁆𑀢𑀺𑀢𑁄. 𑀅𑀥𑀼𑀦𑀸 𑀳𑀺 𑀓𑀢𑁆𑀣𑀘𑀺 𑀧𑁄𑀢𑁆𑀣𑀓𑁂 𑀯𑀸-𑀲𑀤𑁆𑀤𑁄, 𑀘-𑀲𑀤𑁆𑀤𑁄𑀧𑀺 𑀤𑀺𑀲𑁆𑀲𑀢𑀺. 𑀲𑀻𑀮𑀲𑀁𑀬𑀫𑁂𑀦𑀸𑀢𑀺 𑀢𑀤𑀜𑁆𑀜𑁂𑀦 𑀓𑀸𑀬𑀺𑀓𑀯𑀸𑀘𑀲𑀺𑀓𑀲𑀁𑀯𑀭𑁂𑀦. 𑀲𑀘𑁆𑀘𑀯𑀘𑀦𑁂𑀦𑀸𑀢𑀺 𑀅𑀫𑁄𑀲𑀯𑀚𑁆𑀚𑁂𑀦. 𑀢𑀲𑁆𑀲 𑀯𑀺𑀲𑀼𑀁 𑀯𑀘𑀦𑀁 𑀮𑁄𑀓𑁂 𑀕𑀭𑀼𑀢𑀭𑀧𑀼𑀜𑁆𑀜𑀲𑀫𑁆𑀫𑀢𑀪𑀸𑀯𑀢𑁄. 𑀬𑀣𑀸 𑀳𑀺 𑀧𑀸𑀧𑀥𑀫𑁆𑀫𑁂𑀲𑀼 𑀫𑀼𑀲𑀸𑀯𑀸𑀤𑁄 𑀕𑀭𑀼𑀢𑀭𑁄, 𑀏𑀯𑀁 𑀧𑀼𑀜𑁆𑀜𑀥𑀫𑁆𑀫𑁂𑀲𑀼 𑀅𑀫𑁄𑀲𑀯𑀚𑁆𑀚𑁄. 𑀢𑁂𑀦𑀸𑀳 𑀪𑀕𑀯𑀸 𑀇𑀢𑀺𑀯𑀼𑀢𑁆𑀢𑀓𑁂 𑁋

‘‘𑀏𑀓𑀥𑀫𑁆𑀫𑀁 𑀅𑀢𑀻𑀢𑀲𑁆𑀲, 𑀫𑀼𑀲𑀸𑀯𑀸𑀤𑀺𑀲𑁆𑀲 𑀚𑀦𑁆𑀢𑀼𑀦𑁄;

𑀯𑀺𑀢𑀺𑀡𑁆𑀡𑀧𑀭𑀮𑁄𑀓𑀲𑁆𑀲, 𑀦𑀢𑁆𑀣𑀺 𑀧𑀸𑀧𑀁 𑀅𑀓𑀸𑀭𑀺𑀬’’𑀦𑁆𑀢𑀺. (𑀇𑀢𑀺𑀯𑀼. 𑁨𑁭);

𑀧𑀯𑀢𑁆𑀢𑀻𑀢𑀺 𑀬𑁄 𑀓𑀭𑁄𑀢𑀺, 𑀢𑀲𑁆𑀲 𑀲𑀦𑁆𑀢𑀸𑀦𑁂 𑀨𑀮𑀼𑀧𑁆𑀧𑀸𑀤𑀧𑀘𑁆𑀘𑀬𑀪𑀸𑀯𑁂𑀦 𑀉𑀧𑁆𑀧𑀢𑁆𑀢𑀺. 𑀏𑀯𑀜𑁆𑀳𑀺 ‘‘𑀦𑀢𑁆𑀣𑀺 𑀓𑀫𑁆𑀫𑀁, 𑀦𑀢𑁆𑀣𑀺 𑀓𑀫𑁆𑀫𑀨𑀮’’𑀦𑁆𑀢𑀺 𑀅𑀓𑀺𑀭𑀺𑀬𑀯𑀸𑀤𑀲𑁆𑀲 𑀧𑀭𑀺𑀧𑀼𑀡𑁆𑀡𑀢𑀸. 𑀲𑀢𑀺 𑀳𑀺 𑀓𑀫𑁆𑀫𑀨𑀮𑁂 𑀓𑀫𑁆𑀫𑀸𑀦𑀫𑀓𑀺𑀭𑀺𑀬𑀪𑀸𑀯𑁄 𑀓𑀣𑀁 𑀪𑀯𑀺𑀲𑁆𑀲𑀢𑀺. 𑀲𑀩𑁆𑀩𑀣𑀸𑀧𑀻𑀢𑀺 ‘‘𑀓𑀭𑁄𑀢𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀦 𑀲𑀩𑁆𑀩𑀧𑁆𑀧𑀓𑀸𑀭𑁂𑀦𑀧𑀺.

𑀮𑀩𑀼𑀚𑀦𑁆𑀢𑀺 𑀮𑀺𑀓𑀼𑀘𑀁. 𑀧𑀸𑀧𑀧𑀼𑀜𑁆𑀜𑀸𑀦𑀁 𑀓𑀺𑀭𑀺𑀬𑀫𑁂𑀯 𑀧𑀝𑀺𑀓𑁆𑀔𑀺𑀧𑀢𑀺, 𑀦 𑀭𑀜𑁆𑀜𑀸 𑀧𑀼𑀝𑁆𑀞𑀁 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀩𑁆𑀬𑀸𑀓𑀭𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀤𑀜𑁆𑀳𑀺 𑀅𑀯𑀥𑀸𑀭𑀡𑀁 𑀯𑀺𑀧𑀸𑀓𑀧𑀝𑀺𑀓𑁆𑀔𑁂𑀧𑀦𑀺𑀯𑀢𑁆𑀢𑀦𑀢𑁆𑀣𑀁. 𑀬𑁄 𑀳𑀺 𑀓𑀫𑁆𑀫𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀢𑁂𑀦 𑀅𑀢𑁆𑀣𑀢𑁄 𑀯𑀺𑀧𑀸𑀓𑁄𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑁄𑀬𑁂𑀯 𑀦𑀸𑀫 𑀳𑁄𑀢𑀺. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀓𑀫𑁆𑀫𑀁 𑀧𑀝𑀺𑀩𑀸𑀳𑀦𑁆𑀢𑁂𑀦𑀸𑀧𑀻’’𑀢𑀺𑀆𑀤𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁧𑁭𑁦-𑁧𑁭𑁨).

𑀧𑀝𑀺𑀭𑀸𑀚𑀽𑀳𑀺 𑀅𑀦𑀪𑀺𑀪𑀯𑀦𑀻𑀬𑀪𑀸𑀯𑁂𑀦 𑀯𑀺𑀲𑁂𑀲𑀢𑁄 𑀚𑀺𑀢𑀦𑁆𑀢𑀺 𑀯𑀺𑀚𑀺𑀢𑀁, 𑀏𑀓𑀲𑁆𑀲 𑀭𑀜𑁆𑀜𑁄 𑀆𑀡𑀸𑀧𑀯𑀢𑁆𑀢𑀺𑀤𑁂𑀲𑁄. ‘‘𑀫𑀸 𑀫𑀬𑁆𑀳𑀁 𑀯𑀺𑀚𑀺𑀢𑁂 𑀯𑀲𑀣𑀸’’𑀢𑀺 𑀅𑀧𑀲𑀸𑀤𑀦𑀸 𑀧𑀩𑁆𑀩𑀚𑀺𑀢𑀲𑁆𑀲 𑀧𑀩𑁆𑀩𑀸𑀚𑀦𑀲𑀗𑁆𑀔𑀸𑀢𑀸 𑀯𑀺𑀳𑁂𑀞𑀦𑀸𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀯𑀺𑀳𑁂𑀞𑁂𑀢𑀩𑁆𑀩’’𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 ‘‘𑀏𑀯𑀫𑁂𑀢’’𑀦𑁆𑀢𑀺 𑀉𑀧𑀥𑀸𑀭𑀡𑀁 𑀲𑀮𑁆𑀮𑀓𑁆𑀔𑀡𑀁 𑀉𑀕𑁆𑀕𑀡𑁆𑀳𑀦𑀁, 𑀢𑀤𑀫𑀺𑀦𑀸 𑀧𑀝𑀺𑀓𑁆𑀔𑀺𑀧𑀢𑀻𑀢𑀺 𑀆𑀳 ‘‘𑀲𑀸𑀭𑀢𑁄 𑀅𑀕𑁆𑀕𑀡𑁆𑀳𑀦𑁆𑀢𑁄’’𑀢𑀺. 𑀢𑀲𑁆𑀲 𑀧𑀦 𑀅𑀢𑁆𑀣𑀲𑁆𑀲 𑀅𑀤𑁆𑀥𑀦𑀺𑀬𑀪𑀸𑀯𑀸𑀧𑀸𑀤𑀦𑀯𑀲𑁂𑀦 𑀘𑀺𑀢𑁆𑀢𑁂𑀦 𑀲𑀦𑁆𑀥𑀸𑀭𑀡𑀁 𑀦𑀺𑀓𑁆𑀓𑀼𑀚𑁆𑀚𑀦𑀁, 𑀢𑀤𑀫𑀺𑀦𑀸 𑀧𑀝𑀺𑀓𑁆𑀔𑀺𑀧𑀢𑀻𑀢𑀺 𑀤𑀲𑁆𑀲𑁂𑀢𑀺 ‘‘𑀲𑀸𑀭𑀯𑀲𑁂𑀦𑁂𑀯…𑀧𑁂… 𑀅𑀝𑁆𑀞𑀧𑁂𑀦𑁆𑀢𑁄’’𑀢𑀺 𑀇𑀫𑀺𑀦𑀸. 𑀲𑀸𑀭𑀯𑀲𑁂𑀦𑁂𑀯𑀸𑀢𑀺 𑀉𑀢𑁆𑀢𑀫𑀯𑀲𑁂𑀦𑁂𑀯, 𑀅𑀯𑀺𑀢𑀣𑀢𑁆𑀢𑀸 𑀯𑀸 𑀧𑀭𑁂𑀳𑀺 𑀅𑀦𑀼𑀘𑁆𑀘𑀸𑀮𑀺𑀢𑁄 𑀣𑀺𑀭𑀪𑀽𑀢𑁄 𑀅𑀢𑁆𑀣𑁄 𑀅𑀨𑁂𑀕𑁆𑀕𑀼𑀪𑀸𑀯𑁂𑀦 𑀲𑀸𑀭𑁄𑀢𑀺 𑀯𑀼𑀘𑁆𑀘𑀢𑀺, 𑀢𑀁𑀯𑀲𑁂𑀦𑁂𑀯𑀸𑀢𑀺 𑀅𑀢𑁆𑀣𑁄. 𑀦𑀺𑀲𑁆𑀲𑀭𑀡𑀦𑁆𑀢𑀺 𑀯𑀝𑁆𑀝𑀢𑁄 𑀦𑀺𑀬𑁆𑀬𑀸𑀦𑀁. 𑀧𑀭𑀫𑀢𑁆𑀣𑁄𑀢𑀺 𑀅𑀯𑀺𑀧𑀭𑀻𑀢𑀢𑁆𑀣𑁄, 𑀉𑀢𑁆𑀢𑀫𑀲𑁆𑀲 𑀯𑀸 𑀜𑀸𑀡𑀲𑁆𑀲𑀸𑀭𑀫𑁆𑀫𑀡𑀪𑀽𑀢𑁄 𑀅𑀢𑁆𑀣𑁄. 𑀩𑁆𑀬𑀜𑁆𑀚𑀦𑀁 𑀧𑀦 𑀢𑁂𑀦 𑀉𑀕𑁆𑀕𑀳𑀺𑀢𑀜𑁆𑀘𑁂𑀯 𑀦𑀺𑀓𑁆𑀓𑀼𑀚𑁆𑀚𑀺𑀢𑀜𑁆𑀘 𑀢𑀣𑀸𑀬𑁂𑀯 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀪𑀸𑀲𑀺𑀢𑀢𑁆𑀢𑀸.

𑀫𑀓𑁆𑀔𑀮𑀺𑀕𑁄𑀲𑀸𑀮𑀯𑀸𑀤𑀯𑀡𑁆𑀡𑀦𑀸

𑁧𑁬𑁮. 𑀉𑀪𑀬𑁂𑀦𑀸𑀢𑀺 𑀳𑁂𑀢𑀼𑀧𑀘𑁆𑀘𑀬𑀧𑀝𑀺𑀲𑁂𑀥𑀯𑀘𑀦𑁂𑀦. ‘‘𑀯𑀺𑀚𑁆𑀚𑀫𑀸𑀦𑀫𑁂𑀯𑀸’’𑀢𑀺 𑀇𑀫𑀺𑀦𑀸 𑀲𑀪𑀸𑀯𑀢𑁄 𑀯𑀺𑀚𑁆𑀚𑀫𑀸𑀦𑀲𑁆𑀲𑁂𑀯 𑀧𑀝𑀺𑀓𑁆𑀔𑀺𑀧𑀦𑁂 𑀢𑀲𑁆𑀲 𑀅𑀜𑁆𑀜𑀸𑀡𑀫𑁂𑀯 𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀲𑀁𑀓𑀺𑀮𑁂𑀲𑀧𑀘𑁆𑀘𑀬𑀦𑁆𑀢𑀺 𑀲𑀁𑀓𑀺𑀮𑀺𑀲𑁆𑀲𑀦𑀲𑁆𑀲 𑀫𑀮𑀻𑀦𑀲𑁆𑀲 𑀓𑀸𑀭𑀡𑀁. 𑀯𑀺𑀲𑀼𑀤𑁆𑀥𑀺𑀧𑀘𑁆𑀘𑀬𑀦𑁆𑀢𑀺 𑀲𑀁𑀓𑀺𑀮𑁂𑀲𑀢𑁄 𑀯𑀺𑀲𑀼𑀤𑁆𑀥𑀺𑀬𑀸 𑀯𑁄𑀤𑀸𑀦𑀲𑁆𑀲 𑀧𑀘𑁆𑀘𑀬𑀁. 𑀅𑀢𑁆𑀢𑀓𑀸𑀭𑁂𑀢𑀺 𑀧𑀘𑁆𑀘𑀢𑁆𑀢𑀯𑀘𑀦𑀲𑁆𑀲 𑀏-𑀓𑀸𑀭𑀯𑀲𑁂𑀦 𑀧𑀤𑀲𑀺𑀤𑁆𑀥𑀺 𑀬𑀣𑀸 ‘‘𑀯𑀦𑀧𑁆𑀧𑀕𑀼𑀫𑁆𑀩𑁂 𑀬𑀣𑀸 𑀨𑀼𑀲𑀺𑀢𑀕𑁆𑀕𑁂’’𑀢𑀺, (𑀔𑀼. 𑀧𑀸. 𑁧𑁩; 𑀲𑀼. 𑀦𑀺. 𑁨𑁩𑁬) 𑀧𑀘𑁆𑀘𑀢𑁆𑀢𑀢𑁆𑀣𑁂 𑀯𑀸 𑀪𑀼𑀫𑁆𑀫𑀯𑀘𑀦𑀁 𑀬𑀣𑀸 ‘‘𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀲𑀻𑀮𑀲𑁆𑀫𑀺’’𑀦𑁆𑀢𑀺 (𑀤𑀻. 𑀦𑀺. 𑁧.𑁧𑁯𑁪), 𑀢𑀤𑁂𑀯𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀅𑀢𑁆𑀢𑀓𑀸𑀭𑁄’’𑀢𑀺 𑀇𑀫𑀺𑀦𑀸. 𑀲𑁄 𑀘 𑀢𑁂𑀦 𑀢𑁂𑀦 𑀲𑀢𑁆𑀢𑁂𑀦 𑀅𑀢𑁆𑀢𑀦𑀸 𑀓𑀸𑀢𑀩𑁆𑀩𑀓𑀫𑁆𑀫𑀁, 𑀅𑀢𑁆𑀢𑀦𑀸 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀧𑀬𑁄𑀕𑁄 𑀯𑀸. 𑀢𑁂𑀦𑀸𑀳 ‘‘𑀬𑁂𑀦𑀸’’𑀢𑀺𑀆𑀤𑀺. 𑀲𑀩𑁆𑀩𑀜𑁆𑀜𑀼𑀢𑀦𑁆𑀢𑀺 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁. 𑀢𑀦𑁆𑀢𑀺 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀁. 𑀤𑀼𑀢𑀺𑀬𑀧𑀤𑁂𑀦𑀸𑀢𑀺 ‘‘𑀦𑀢𑁆𑀣𑀺 𑀧𑀭𑀓𑀸𑀭𑁂’’𑀢𑀺 𑀧𑀤𑁂𑀦. 𑀧𑀭𑀓𑀸𑀭𑁄 𑀘 𑀦𑀸𑀫 𑀧𑀭𑀲𑁆𑀲 𑀯𑀸𑀳𑀲𑀸 𑀇𑀚𑁆𑀛𑀦𑀓𑀧𑀬𑁄𑀕𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀁 𑀧𑀭𑀓𑀸𑀭’’𑀦𑁆𑀢𑀺𑀆𑀤𑀺. 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀦𑁆𑀢𑀺 𑀑𑀯𑀸𑀤𑀪𑀽𑀢𑀫𑀦𑀼𑀲𑀸𑀲𑀦𑀺𑀁, 𑀧𑀞𑀫𑀁 𑀯𑀸 𑀑𑀯𑀸𑀤𑁄, 𑀧𑀘𑁆𑀙𑀸 𑀅𑀦𑀼𑀲𑀸𑀲𑀦𑀻. ‘‘𑀧𑀭𑀓𑀸𑀭’’𑀦𑁆𑀢𑀺 𑀧𑀤𑀲𑁆𑀲 𑀉𑀧𑀮𑀓𑁆𑀔𑀡𑀯𑀲𑁂𑀦 𑀅𑀢𑁆𑀣𑀤𑀲𑁆𑀲𑀦𑀜𑁆𑀘𑁂𑀢𑀁, 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀧𑀭𑀓𑀸𑀭𑀸𑀯𑀲𑁆𑀲𑀬𑁄 𑀦𑀢𑁆𑀣𑀻𑀢𑀺 𑀆𑀳 ‘‘𑀞𑀧𑁂𑀢𑁆𑀯𑀸 𑀫𑀳𑀸𑀲𑀢𑁆𑀢’’𑀦𑁆𑀢𑀺. 𑀅𑀢𑁆𑀣𑁂𑀯𑁂𑀲 𑀮𑁄𑀓𑀺𑀬𑀥𑀫𑁆𑀫𑁂 𑀬𑀣𑀸 𑀢𑀁 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀆𑀴𑀸𑀭𑀼𑀤𑀓𑁂 𑀦𑀺𑀲𑁆𑀲𑀸𑀬 𑀧𑀜𑁆𑀘𑀸𑀪𑀺𑀜𑁆𑀜𑀸𑀮𑁄𑀓𑀺𑀬𑀲𑀫𑀸𑀧𑀢𑁆𑀢𑀺𑀮𑀸𑀪𑁄, 𑀢𑀜𑁆𑀘 𑀧𑀘𑁆𑀙𑀺𑀫𑀪𑀯𑀺𑀓𑀫𑀳𑀸𑀲𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑀲𑁆𑀲𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑁄 𑀢𑁂𑀲𑀫𑁆𑀧𑀺 𑀢𑀤𑀪𑀸𑀯𑀢𑁄. 𑀫𑀦𑀼𑀲𑁆𑀲𑀲𑁄𑀪𑀕𑁆𑀬𑀢𑀦𑁆𑀢𑀺 𑀫𑀦𑀼𑀲𑁆𑀲𑁂𑀲𑀼 𑀲𑀼𑀪𑀕𑀪𑀸𑀯𑀁. 𑀏𑀯𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀓𑀫𑁆𑀫𑀯𑀸𑀤𑀲𑁆𑀲, 𑀓𑀺𑀭𑀺𑀬𑀯𑀸𑀤𑀲𑁆𑀲 𑀘 𑀧𑀝𑀺𑀓𑁆𑀔𑀺𑀧𑀦𑁂𑀦. 𑀚𑀺𑀦𑀘𑀓𑁆𑀓𑁂𑀢𑀺 ‘‘𑀅𑀢𑁆𑀣𑀺 𑀪𑀺𑀓𑁆𑀔𑀯𑁂 𑀓𑀫𑁆𑀫𑀁 𑀓𑀡𑁆𑀳𑀁 𑀓𑀡𑁆𑀳𑀯𑀺𑀧𑀸𑀓’’𑀦𑁆𑀢𑀺𑀆𑀤𑀺 (𑀅. 𑀦𑀺. 𑁪.𑁨𑁩𑁨) 𑀦𑀬𑀧𑁆𑀧𑀯𑀢𑁆𑀢𑁂 𑀓𑀫𑁆𑀫𑀸𑀦𑀁, 𑀓𑀫𑁆𑀫𑀨𑀮𑀸𑀦𑀜𑁆𑀘 𑀅𑀢𑁆𑀣𑀺𑀢𑀸𑀧𑀭𑀺𑀤𑀻𑀧𑀦𑁂 𑀩𑀼𑀤𑁆𑀥𑀲𑀸𑀲𑀦𑁂. 𑀧𑀘𑁆𑀘𑀦𑀻𑀓𑀓𑀣𑀦𑀁 𑀧𑀳𑀸𑀭𑀤𑀸𑀦𑀲𑀤𑀺𑀲𑀦𑁆𑀢𑀺 ‘‘𑀧𑀳𑀸𑀭𑀁 𑀤𑁂𑀢𑀺 𑀦𑀸𑀫𑀸’’𑀢𑀺.

𑀬𑀣𑀸𑀯𑀼𑀢𑁆𑀢𑀅𑀢𑁆𑀢𑀓𑀸𑀭𑀧𑀭𑀓𑀸𑀭𑀸𑀪𑀸𑀯𑀢𑁄 𑀏𑀯 𑀲𑀢𑁆𑀢𑀸𑀦𑀁 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑁄 𑀦𑀸𑀫 𑀓𑁄𑀘𑀺 𑀦𑀢𑁆𑀣𑀻𑀢𑀺 𑀲𑀦𑁆𑀥𑀸𑀬 ‘‘𑀦𑀢𑁆𑀣𑀺𑀧𑀼𑀭𑀺𑀲𑀓𑀸𑀭𑁂’’𑀢𑀺 𑀢𑀲𑁆𑀲 𑀧𑀝𑀺𑀓𑁆𑀔𑀺𑀧𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀬𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀤𑁂𑀯𑀢𑁆𑀢𑀫𑁆𑀧𑀻’’𑀢𑀺𑀆𑀤𑀺𑀦𑀸, ‘‘𑀫𑀦𑀼𑀲𑁆𑀲𑀲𑁄𑀪𑀕𑁆𑀬𑀢’’𑀦𑁆𑀢𑀺𑀆𑀤𑀺𑀦𑀸 𑀘 𑀯𑀼𑀢𑁆𑀢𑀧𑁆𑀧𑀓𑀸𑀭𑀸. ‘‘𑀩𑀮𑁂 𑀧𑀢𑀺𑀝𑁆𑀞𑀺𑀢𑀸’’𑀢𑀺 𑀯𑀢𑁆𑀯𑀸 𑀯𑀻𑀭𑀺𑀬𑀫𑁂𑀯𑀺𑀥 𑀩𑀮𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀯𑀻𑀭𑀺𑀬𑀁 𑀓𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀲𑀢𑁆𑀢𑀸𑀦𑀜𑁆𑀳𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓 𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀺𑀆𑀯𑀳𑀁 𑀯𑀻𑀭𑀺𑀬𑀩𑀮𑀁 𑀦𑀢𑁆𑀣𑀻𑀢𑀺 𑀲𑁄 𑀧𑀝𑀺𑀓𑁆𑀔𑀺𑀧𑀢𑀺, 𑀦𑀺𑀤𑀲𑁆𑀲𑀦𑀫𑀢𑁆𑀢𑀜𑁆𑀘𑁂𑀢𑀁 𑀯𑁄𑀤𑀸𑀦𑀺𑀬𑀩𑀮𑀲𑁆𑀲 𑀧𑀝𑀺𑀓𑁆𑀔𑀺𑀧𑀦𑀁 𑀲𑀁𑀓𑀺𑀮𑁂𑀲𑀺𑀓𑀲𑁆𑀲𑀸𑀧𑀺 𑀩𑀮𑀲𑁆𑀲 𑀢𑁂𑀦 𑀧𑀝𑀺𑀓𑁆𑀔𑀺𑀧𑀦𑀢𑁄. 𑀬𑀤𑀺 𑀯𑀻𑀭𑀺𑀬𑀸𑀤𑀻𑀦𑀺 𑀧𑀼𑀭𑀺𑀲𑀓𑀸𑀭𑀯𑁂𑀯𑀘𑀦𑀸𑀦𑀺, 𑀅𑀣 𑀓𑀲𑁆𑀫𑀸 𑀢𑁂𑀲𑀁 𑀯𑀺𑀲𑀼𑀁 𑀕𑀳𑀡𑀦𑁆𑀢𑀺 𑀆𑀳 ‘‘𑀇𑀤𑀁 𑀦𑁄 𑀯𑀻𑀭𑀺𑀬𑁂𑀦𑀸’’𑀢𑀺𑀆𑀤𑀺. 𑀇𑀤𑀁 𑀦𑁄 𑀯𑀻𑀭𑀺𑀬𑁂𑀦𑀸𑀢𑀺 𑀇𑀤𑀁 𑀨𑀮𑀁 𑀅𑀫𑁆𑀳𑀸𑀓𑀁 𑀯𑀻𑀭𑀺𑀬𑁂𑀦 𑀧𑀯𑀢𑁆𑀢𑀁. 𑀧𑀯𑀢𑁆𑀢𑀯𑀘𑀦𑀧𑀝𑀺𑀓𑁆𑀔𑁂𑀧𑀓𑀭𑀡𑀯𑀲𑁂𑀦𑀸𑀢𑀺 𑀅𑀜𑁆𑀜𑁂𑀲𑀁 𑀧𑀯𑀢𑁆𑀢𑀯𑁄𑀳𑀸𑀭𑀯𑀘𑀦𑀲𑁆𑀲 𑀧𑀝𑀺𑀓𑁆𑀔𑁂𑀧𑀓𑀭𑀡𑀯𑀲𑁂𑀦. 𑀯𑀻𑀭𑀺𑀬𑀣𑀸𑀫𑀧𑀭𑀓𑁆𑀓𑀫𑀲𑀫𑁆𑀩𑀦𑁆𑀥𑀦𑁂𑀦 𑀧𑀯𑀢𑁆𑀢𑀩𑀮𑀯𑀸𑀤𑀻𑀦𑀁 𑀯𑀸𑀤𑀲𑁆𑀲 𑀧𑀝𑀺𑀓𑁆𑀔𑁂𑀧𑀓𑀭𑀡𑀯𑀲𑁂𑀦 ‘‘𑀦𑀢𑁆𑀣𑀺 𑀩𑀮’’𑀦𑁆𑀢𑀺 𑀧𑀤𑀫𑀺𑀯 𑀲𑀩𑁆𑀩𑀸𑀦𑀺𑀧𑁂𑀢𑀸𑀦𑀺 𑀢𑁂𑀦 𑀆𑀤𑀻𑀬𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀜𑁆𑀘 𑀯𑀘𑀦𑀻𑀬𑀢𑁆𑀣𑀢𑁄 𑀯𑀼𑀢𑁆𑀢𑀁, 𑀯𑀘𑀦𑀢𑁆𑀣𑀢𑁄 𑀧𑀦 𑀢𑀲𑁆𑀲𑀸 𑀢𑀲𑁆𑀲𑀸 𑀓𑀺𑀭𑀺𑀬𑀸𑀬 𑀉𑀲𑁆𑀲𑀦𑁆𑀦𑀝𑁆𑀞𑁂𑀦 𑀩𑀮𑀁. 𑀲𑀽𑀭𑀯𑀻𑀭𑀪𑀸𑀯𑀸𑀯𑀳𑀝𑁆𑀞𑁂𑀦 𑀯𑀻𑀭𑀺𑀬𑀁. 𑀢𑀤𑁂𑀯 𑀤𑀴𑁆𑀳𑀪𑀸𑀯𑀢𑁄, 𑀧𑁄𑀭𑀺𑀲𑀥𑀼𑀭𑀁 𑀯𑀳𑀦𑁆𑀢𑁂𑀦 𑀧𑀯𑀢𑁆𑀢𑁂𑀢𑀩𑁆𑀩𑀢𑁄 𑀘 𑀧𑀼𑀭𑀺𑀲𑀣𑀸𑀫𑁄. 𑀧𑀭𑀁 𑀧𑀭𑀁 𑀞𑀸𑀦𑀁 𑀅𑀓𑁆𑀓𑀫𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀧𑀼𑀭𑀺𑀲𑀧𑀭𑀓𑁆𑀓𑀫𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀭𑀽𑀧𑀸𑀤𑀻𑀲𑀼 𑀲𑀢𑁆𑀢𑀯𑀺𑀲𑀢𑁆𑀢𑀢𑀸𑀬 𑀲𑀢𑁆𑀢𑀸. 𑀅𑀲𑁆𑀲𑀲𑀦𑀧𑀲𑁆𑀲𑀲𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀧𑀸𑀡𑀦𑀢𑁄 𑀧𑀸𑀡𑀸𑀢𑀺 𑀇𑀫𑀺𑀦𑀸 𑀅𑀢𑁆𑀣𑁂𑀦 𑀲𑀫𑀸𑀦𑁂𑀧𑀺 𑀧𑀤𑀤𑁆𑀯𑀬𑁂 𑀏𑀓𑀺𑀦𑁆𑀤𑁆𑀭𑀺𑀬𑀸𑀤𑀺𑀯𑀲𑁂𑀦 𑀧𑀸𑀡𑁂 𑀯𑀺𑀪𑀚𑀺𑀢𑁆𑀯𑀸 𑀲𑀢𑁆𑀢𑀢𑁄 𑀯𑀺𑀲𑁂𑀲𑀁 𑀓𑀢𑁆𑀯𑀸 𑀏𑀲 𑀯𑀤𑀢𑀻𑀢𑀺 𑀆𑀳 ‘‘𑀏𑀓𑀺𑀦𑁆𑀤𑁆𑀭𑀺𑀬𑁄’’𑀢𑀺𑀆𑀤𑀺. 𑀪𑀯𑀦𑁆𑀢𑀻𑀢𑀺 𑀪𑀽𑀢𑀸𑀢𑀺 𑀲𑀢𑁆𑀢𑀧𑀸𑀡𑀧𑀭𑀺𑀬𑀸𑀬𑁂𑀧𑀺 𑀲𑀢𑀺 𑀅𑀡𑁆𑀟𑀓𑁄𑀲𑀸𑀤𑀻𑀲𑀼 𑀲𑀫𑁆𑀪𑀯𑀦𑀝𑁆𑀞𑁂𑀦 𑀢𑀢𑁄 𑀯𑀺𑀲𑁂𑀲𑀸𑀯, 𑀢𑁂𑀦 𑀯𑀼𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀺 ‘‘𑀅𑀡𑁆𑀟…𑀧𑁂… 𑀯𑀤𑀢𑀻’’𑀢𑀺 𑀇𑀫𑀺𑀦𑀸. 𑀯𑀢𑁆𑀣𑀺𑀓𑁄𑀲𑁄 𑀕𑀩𑁆𑀪𑀸𑀲𑀬𑁄. 𑀚𑀻𑀯𑀦𑀢𑁄 𑀧𑀸𑀡𑀁 𑀥𑀸𑀭𑁂𑀦𑁆𑀢𑁄 𑀯𑀺𑀬 𑀯𑀟𑁆𑀠𑀦𑀢𑁄 𑀚𑀻𑀯𑀸. 𑀢𑁂𑀦𑀸𑀳 ‘‘𑀲𑀸𑀮𑀺𑀬𑀯𑀸’’𑀢𑀺𑀆𑀤𑀺. 𑀆𑀤𑀺𑀲𑀤𑁆𑀤𑁂𑀦 𑀯𑀺𑀭𑀼𑀴𑁆𑀳𑀥𑀫𑁆𑀫𑀸 𑀢𑀺𑀡𑀭𑀼𑀓𑁆𑀔𑀸 𑀕𑀳𑀺𑀢𑀸. 𑀦𑀢𑁆𑀣𑀺 𑀏𑀢𑁂𑀲𑀁 𑀲𑀁𑀓𑀺𑀮𑁂𑀲𑀯𑀺𑀲𑀼𑀤𑁆𑀥𑀻𑀲𑀼 𑀯𑀲𑁄 𑀲𑀸𑀫𑀢𑁆𑀣𑀺𑀬𑀦𑁆𑀢𑀺 𑀅𑀯𑀲𑀸. 𑀢𑀣𑀸 𑀅𑀩𑀮𑀸 𑀅𑀯𑀻𑀭𑀺𑀬𑀸. 𑀢𑁂𑀦𑀸𑀳 ‘‘𑀢𑁂𑀲’’𑀦𑁆𑀢𑀺𑀆𑀤𑀺. 𑀦𑀺𑀬𑀢𑀸𑀢𑀺 𑀦𑀺𑀬𑀫𑀦𑀸, 𑀅𑀙𑁂𑀚𑁆𑀚𑀲𑀼𑀢𑁆𑀢𑀸𑀯𑀼𑀢𑀲𑁆𑀲 𑀅𑀪𑁂𑀚𑁆𑀚𑀫𑀡𑀺𑀦𑁄 𑀯𑀺𑀬 𑀦𑀺𑀬𑀢𑀧𑁆𑀧𑀯𑀢𑁆𑀢𑀺𑀢𑀸𑀬 𑀕𑀢𑀺𑀚𑀸𑀢𑀺𑀩𑀦𑁆𑀥𑀸𑀧𑀯𑀕𑁆𑀕𑀯𑀲𑁂𑀦 𑀦𑀺𑀬𑀸𑀫𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀸𑀲𑀼 𑀢𑀸𑀲𑀼 𑀚𑀸𑀢𑀻𑀲𑀼. 𑀙𑀦𑁆𑀦𑀁 𑀅𑀪𑀺𑀚𑀸𑀢𑀻𑀦𑀁 𑀲𑀫𑁆𑀩𑀦𑁆𑀥𑀻𑀪𑀽𑀢𑀸𑀦𑀁 𑀕𑀫𑀦𑀁 𑀲𑀫𑀯𑀸𑀬𑁂𑀦 𑀲𑀫𑀸𑀕𑀫𑁄. 𑀲𑀫𑁆𑀩𑀦𑁆𑀥𑀻𑀦𑀺𑀭𑀧𑁂𑀓𑁆𑀔𑁄𑀧𑀺 𑀪𑀸𑀯𑀲𑀤𑁆𑀤𑁄 𑀲𑀫𑁆𑀩𑀦𑁆𑀥𑀻𑀲𑀳𑀺𑀢𑁄 𑀯𑀺𑀬 𑀧𑀓𑀢𑀺𑀬𑀢𑁆𑀣𑀯𑀸𑀘𑀓𑁄𑀢𑀺 𑀆𑀳 ‘‘𑀲𑀪𑀸𑀯𑁄𑀬𑁂𑀯𑀸’’𑀢𑀺, 𑀬𑀣𑀸 𑀓𑀡𑁆𑀝𑀓𑀲𑁆𑀲 𑀢𑀺𑀓𑁆𑀔𑀢𑀸, 𑀓𑀧𑀺𑀢𑁆𑀣𑀨𑀮𑀸𑀤𑀻𑀦𑀁 𑀧𑀭𑀺𑀫𑀡𑁆𑀟𑀮𑀢𑀸, 𑀫𑀺𑀕𑀧𑀓𑁆𑀔𑀻𑀦𑀁 𑀯𑀺𑀘𑀺𑀢𑁆𑀢𑀸𑀓𑀸𑀭𑀢𑀸 𑀘, 𑀏𑀯𑀁 𑀲𑀩𑁆𑀩𑀲𑁆𑀲𑀸𑀧𑀺 𑀮𑁄𑀓𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑀫𑀦𑁆𑀢𑀭𑁂𑀦 𑀢𑀣𑀸 𑀢𑀣𑀸 𑀧𑀭𑀺𑀡𑀸𑀫𑁄 𑀅𑀓𑀼𑀢𑁆𑀢𑀺𑀫𑁄 𑀲𑀪𑀸𑀯𑁄𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑁂𑀦𑀸’’𑀢𑀺𑀆𑀤𑀺. 𑀧𑀭𑀺𑀡𑀫𑀦𑀁 𑀦𑀸𑀦𑀧𑁆𑀧𑀓𑀸𑀭𑀢𑀸𑀧𑀢𑁆𑀢𑀺. 𑀬𑁂𑀦𑀸𑀢𑀺 𑀲𑀢𑁆𑀢𑀧𑀸𑀡𑀸𑀤𑀺𑀦𑀸. 𑀬𑀣𑀸 𑀪𑀯𑀺𑀢𑀩𑁆𑀩𑀁, 𑀢𑀣𑁂𑀯𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀙𑀴𑀪𑀺𑀚𑀸𑀢𑀺𑀬𑁄 𑀧𑀭𑀢𑁄 𑀯𑀺𑀢𑁆𑀣𑀸𑀭𑀻𑀬𑀺𑀲𑁆𑀲𑀦𑁆𑀢𑀺. ‘‘𑀲𑀼𑀔𑀜𑁆𑀘 𑀤𑀼𑀓𑁆𑀔𑀜𑁆𑀘 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑀻’’𑀢𑀺 𑀯𑀤𑀦𑁆𑀢𑁄 𑀫𑀓𑁆𑀔𑀮𑀺 𑀅𑀤𑀼𑀓𑁆𑀔𑀫𑀲𑀼𑀔𑀪𑀽𑀫𑀺𑀁 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀦 𑀚𑀸𑀦𑀸𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀜𑁆𑀜𑀸 𑀅𑀤𑀼𑀓𑁆𑀔𑀫𑀲𑀼𑀔𑀪𑀽𑀫𑀺 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀻’’𑀢𑀺. 𑀅𑀬𑀁 ‘‘𑀲𑀼𑀔𑀜𑁆𑀘 𑀤𑀼𑀓𑁆𑀔𑀜𑁆𑀘 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑀻’’𑀢𑀺 𑀯𑀘𑀦𑀁 𑀓𑀭𑀡𑀪𑀸𑀯𑁂𑀦 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀸 𑀆𑀘𑀭𑀺𑀬𑀲𑁆𑀲 𑀫𑀢𑀺. 𑀧𑁄𑀢𑁆𑀣𑀓𑁂𑀲𑀼 𑀧𑀦 ‘‘𑀅𑀜𑁆𑀜𑀸 𑀲𑀼𑀔𑀤𑀼𑀓𑁆𑀔𑀪𑀽𑀫𑀺 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀻’’𑀢𑀺 𑀅𑀬𑀫𑁂𑀯 𑀧𑀸𑀞𑁄 𑀤𑀺𑀝𑁆𑀞𑁄, 𑀦 ‘‘𑀅𑀤𑀼𑀓𑁆𑀔𑀫𑀲𑀼𑀔𑀪𑀽𑀫𑀻’’𑀢𑀺. 𑀏𑀯𑀁 𑀲𑀢𑀺 ‘‘𑀙𑀲𑁆𑀯𑁂𑀯𑀸𑀪𑀺𑀚𑀸𑀢𑀻𑀲𑀽’’𑀢𑀺 𑀯𑀘𑀦𑀁 𑀅𑀥𑀺𑀓𑀭𑀡𑀪𑀸𑀯𑁂𑀦 𑀕𑀳𑁂𑀢𑁆𑀯𑀸 𑀙𑀲𑀼 𑀏𑀯 𑀅𑀪𑀺𑀚𑀸𑀢𑀻𑀲𑀼 𑀲𑀼𑀔𑀤𑀼𑀓𑁆𑀔𑀧𑀝𑀺𑀲𑀁𑀯𑁂𑀤𑀦𑀁, 𑀦 𑀢𑁂𑀳𑀺 𑀅𑀜𑁆𑀜𑀢𑁆𑀣, 𑀢𑀸𑀬𑁂𑀯 𑀲𑀼𑀔𑀤𑀼𑀓𑁆𑀔𑀪𑀽𑀫𑀺, 𑀦 𑀢𑀤𑀜𑁆𑀜𑀸𑀢𑀺 𑀤𑀲𑁆𑀲𑁂𑀢𑀻𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀫𑁂𑀯 𑀘 𑀬𑀼𑀢𑁆𑀢𑀢𑀭𑁄 𑀧𑀝𑀺𑀓𑁆𑀔𑁂𑀧𑀺𑀢𑀩𑁆𑀩𑀲𑁆𑀲 𑀅𑀢𑁆𑀣𑀲𑁆𑀲 𑀪𑀽𑀫𑀺𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸. 𑀬𑀤𑀺 𑀳𑀺 ‘‘𑀲𑀼𑀔𑀜𑁆𑀘 𑀤𑀼𑀓𑁆𑀔𑀜𑁆𑀘 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑀻’’𑀢𑀺 𑀯𑀘𑀦𑁂𑀦 𑀧𑀝𑀺𑀓𑁆𑀔𑁂𑀧𑀺𑀢𑀩𑁆𑀩𑀲𑁆𑀲 𑀤𑀲𑁆𑀲𑀦𑀁 𑀲𑀺𑀬𑀸, 𑀅𑀣 ‘‘𑀅𑀜𑁆𑀜𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀦𑀢𑁆𑀣𑀻’’𑀢𑀺 𑀤𑀲𑁆𑀲𑁂𑀬𑁆𑀬, 𑀦 ‘‘𑀅𑀤𑀼𑀓𑁆𑀔𑀫𑀲𑀼𑀔𑀪𑀽𑀫𑀻’’𑀢𑀺 𑀤𑀲𑁆𑀲𑀦𑀳𑁂𑀢𑀼𑀯𑀘𑀦𑀲𑁆𑀲 𑀪𑀽𑀫𑀺𑀅𑀢𑁆𑀣𑀸𑀪𑀸𑀯𑀢𑁄. 𑀤𑀲𑁆𑀲𑁂𑀢𑀺 𑀘𑁂𑀢𑀁 𑀢𑀸𑀲𑀁 𑀪𑀽𑀫𑀺𑀬𑀸 𑀅𑀪𑀸𑀯𑀫𑁂𑀯, 𑀢𑁂𑀦 𑀯𑀺𑀜𑁆𑀜𑀸𑀬𑀢𑀺 𑀅𑀬𑀁 𑀧𑀸𑀞𑁄, 𑀅𑀬𑀜𑁆𑀘𑀢𑁆𑀣𑁄 𑀬𑀼𑀢𑁆𑀢𑀢𑀭𑁄𑀢𑀺.

𑀧𑀫𑀼𑀔𑀬𑁄𑀦𑀻𑀦𑀦𑁆𑀢𑀺 𑀫𑀦𑀼𑀲𑁆𑀲𑁂𑀲𑀼 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀸𑀤𑀺𑀯𑀲𑁂𑀦, 𑀢𑀺𑀭𑀘𑁆𑀙𑀸𑀦𑀸𑀤𑀻𑀲𑀼 𑀲𑀻𑀳𑀩𑁆𑀬𑀕𑁆𑀖𑀸𑀤𑀺𑀯𑀲𑁂𑀦 𑀧𑀥𑀸𑀦𑀬𑁄𑀦𑀻𑀦𑀁, 𑀧𑀥𑀸𑀦𑀢𑀸 𑀘𑁂𑀢𑁆𑀣 𑀉𑀢𑁆𑀢𑀫𑀢𑀸. 𑀢𑁂𑀦𑀸𑀳 ‘‘𑀉𑀢𑁆𑀢𑀫𑀬𑁄𑀦𑀻𑀦’’𑀦𑁆𑀢𑀺. 𑀲𑀝𑁆𑀞𑀺 𑀲𑀢𑀸𑀦𑀻𑀢𑀺 𑀙 𑀲𑀳𑀲𑁆𑀲𑀸𑀦𑀺. ‘‘𑀧𑀜𑁆𑀘 𑀘 𑀓𑀫𑁆𑀫𑀼𑀦𑁄 𑀲𑀢𑀸𑀦𑀻’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀤𑀲𑁆𑀲𑀦𑀁 ‘‘𑀧𑀜𑁆𑀘 𑀓𑀫𑁆𑀫𑀲𑀢𑀸𑀦𑀺 𑀘𑀸’’𑀢𑀺. ‘‘𑀏𑀲𑁂𑀯 𑀦𑀬𑁄’’𑀢𑀺 𑀇𑀫𑀺𑀦𑀸 ‘‘𑀓𑁂𑀯𑀮𑀁 𑀢𑀓𑁆𑀓𑀫𑀢𑁆𑀢𑀓𑁂𑀦 𑀦𑀺𑀭𑀢𑁆𑀣𑀓𑀁 𑀤𑀺𑀝𑁆𑀞𑀺𑀁 𑀤𑀻𑀧𑁂𑀢𑀻’’𑀢𑀺 𑀇𑀫𑀫𑁂𑀯𑀢𑁆𑀣𑀫𑀢𑀺𑀤𑀺𑀲𑀢𑀺. 𑀏𑀢𑁆𑀣 𑀘 ‘‘𑀢𑀓𑁆𑀓𑀫𑀢𑁆𑀢𑀓𑁂𑀦𑀸’’𑀢𑀺 𑀯𑀤𑀦𑁆𑀢𑁄 𑀬𑀲𑁆𑀫𑀸 𑀢𑀓𑁆𑀓𑀺𑀓𑀸 𑀅𑀯𑀲𑁆𑀲𑀬𑀪𑀽𑀢𑀢𑀣𑀢𑁆𑀣𑀕𑁆𑀕𑀳𑀡𑀅𑀗𑁆𑀓𑀼𑀲𑀦𑀬𑀫𑀦𑁆𑀢𑀭𑁂𑀦 𑀦𑀺𑀭𑀗𑁆𑀓𑀼𑀲𑀢𑀸𑀬 𑀧𑀭𑀺𑀓𑀧𑁆𑀧𑀦𑀲𑁆𑀲 𑀬𑀁 𑀓𑀺𑀜𑁆𑀘𑀺 𑀅𑀢𑁆𑀢𑀦𑀸 𑀧𑀭𑀺𑀓𑀧𑁆𑀧𑀺𑀢𑀁 𑀲𑀸𑀭𑀢𑁄 𑀫𑀜𑁆𑀜𑀫𑀸𑀦𑀸 𑀢𑀣𑁂𑀯 𑀅𑀪𑀺𑀦𑀺𑀯𑀺𑀲𑁆𑀲 𑀢𑀢𑁆𑀣 𑀘 𑀤𑀺𑀝𑁆𑀞𑀺𑀕𑀸𑀳𑀁 𑀕𑀡𑁆𑀳𑀦𑁆𑀢𑀺, 𑀢𑀲𑁆𑀫𑀸 𑀦 𑀢𑁂𑀲𑀁 𑀤𑀺𑀝𑁆𑀞𑀺𑀯𑀢𑁆𑀣𑀼𑀲𑁆𑀫𑀺𑀁 𑀯𑀺𑀜𑁆𑀜𑀽𑀳𑀺 𑀯𑀺𑀘𑀸𑀭𑀡𑀸 𑀓𑀸𑀢𑀩𑁆𑀩𑀸𑀢𑀺 𑀇𑀫𑀫𑀥𑀺𑀧𑁆𑀧𑀸𑀬𑀁 𑀯𑀺𑀪𑀸𑀯𑁂𑀢𑀺. 𑀓𑁂𑀘𑀻𑀢𑀺 𑀉𑀢𑁆𑀢𑀭𑀯𑀺𑀳𑀸𑀭𑀯𑀸𑀲𑀺𑀦𑁄. 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀯𑀲𑁂𑀦𑀸𑀢𑀺 𑀘𑀓𑁆𑀔𑀸𑀤𑀺𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀯𑀲𑁂𑀦. 𑀢𑁂 𑀳𑀺 ‘‘𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀲𑀗𑁆𑀔𑀸𑀢𑀸𑀦𑀺 𑀇𑀫𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 ‘𑀧𑀜𑁆𑀘 𑀓𑀫𑁆𑀫𑀸𑀦𑀻’𑀢𑀺 𑀢𑀺𑀢𑁆𑀣𑀺𑀬𑀸 𑀧𑀜𑁆𑀜𑀧𑁂𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺 ‘‘𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑀸𑀦𑀺 𑀘 ‘𑀢𑀻𑀡𑀺 𑀓𑀫𑁆𑀫𑀸𑀦𑀻’𑀢𑀺’’. 𑀓𑀫𑁆𑀫𑀦𑁆𑀢𑀺 𑀮𑀤𑁆𑀥𑀻𑀢𑀺 𑀢𑀤𑀼𑀪𑀬𑀁 𑀑𑀴𑀸𑀭𑀺𑀓𑀢𑁆𑀢𑀸 𑀧𑀭𑀺𑀧𑀼𑀡𑁆𑀡𑀓𑀫𑁆𑀫𑀦𑁆𑀢𑀺 𑀮𑀤𑁆𑀥𑀺. 𑀫𑀦𑁄𑀓𑀫𑁆𑀫𑀁 𑀅𑀦𑁄𑀴𑀸𑀭𑀺𑀓𑀢𑁆𑀢𑀸 𑀉𑀧𑀟𑁆𑀠𑀓𑀫𑁆𑀫𑀦𑁆𑀢𑀺 𑀮𑀤𑁆𑀥𑀻𑀢𑀺 𑀬𑁄𑀚𑀦𑀸. ‘‘𑀤𑁆𑀯𑀸𑀲𑀝𑁆𑀞𑀺 𑀧𑀝𑀺𑀧𑀤𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀁 𑀅𑀚𑀸𑀦𑀦𑁆𑀢𑁄 ‘‘𑀤𑁆𑀯𑀝𑁆𑀞𑀺𑀧𑀝𑀺𑀧𑀤𑀸’’𑀢𑀺 𑀯𑀤𑀢𑀻𑀢𑀺 𑀆𑀳 ‘‘𑀤𑁆𑀯𑀸𑀲𑀝𑁆𑀞𑀺 𑀧𑀝𑀺𑀧𑀤𑀸’’𑀢𑀺. 𑀲𑀤𑁆𑀤𑀭𑀘𑀓𑀸 𑀧𑀦 ‘‘𑀤𑁆𑀯𑀸𑀲𑀝𑁆𑀞𑀺𑀬𑀸 𑀲𑀮𑁄𑀧𑁄, 𑀅𑀢𑁆𑀢𑀫𑀸’’𑀢𑀺 𑀯𑀤𑀦𑁆𑀢𑀺, 𑀢𑀤𑀬𑀼𑀢𑁆𑀢𑀫𑁂𑀯 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀬𑀸 𑀬𑁄𑀕𑀢𑁄 𑀅𑀲𑀺𑀤𑁆𑀥𑀢𑁆𑀢𑀸. 𑀬𑀤𑀺 𑀳𑀺 𑀲𑀸 𑀬𑁄𑀕𑁂𑀦 𑀲𑀺𑀤𑁆𑀥𑀸 𑀅𑀲𑁆𑀲, 𑀏𑀯𑀁 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀬𑁂𑀯 𑀲𑀺𑀬𑀸, 𑀢𑀣𑀸 𑀘 𑀲𑀢𑀺 𑀆𑀘𑀭𑀺𑀬𑀸𑀦𑀁 𑀫𑀢𑁂𑀦 𑀯𑀺𑀭𑀼𑀚𑁆𑀛𑀢𑀻𑀢𑀺 𑀯𑀤𑀦𑁆𑀢𑀺. ‘‘𑀘𑀼𑀮𑁆𑀮𑀸𑀲𑀻𑀢𑀺 𑀲𑀳𑀲𑁆𑀲𑀸𑀦𑀻’’𑀢𑀺𑀆𑀤𑀺𑀓𑀸 𑀧𑀦 𑀅𑀜𑁆𑀜𑀢𑁆𑀭 𑀤𑀺𑀝𑁆𑀞𑀧𑀬𑁄𑀕𑀸 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀬𑁂𑀯. 𑀤𑀺𑀲𑁆𑀲𑀢𑀺 𑀳𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀸𑀤𑀻𑀲𑀼 𑁋

‘‘𑀘𑀼𑀮𑁆𑀮𑀸𑀲𑀻𑀢𑀺 𑀲𑀳𑀲𑁆𑀲𑀸𑀦𑀺, 𑀓𑀧𑁆𑀧𑀸 𑀢𑀺𑀝𑁆𑀞𑀦𑁆𑀢𑀺 𑀬𑁂 𑀫𑀭𑀽;

𑀦 𑀢𑁆𑀯𑁂𑀯 𑀢𑁂𑀧𑀺 𑀢𑀺𑀝𑁆𑀞𑀦𑁆𑀢𑀺, 𑀤𑁆𑀯𑀻𑀳𑀺 𑀘𑀺𑀢𑁆𑀢𑁂𑀳𑀺 𑀲𑀫𑁄𑀳𑀺𑀢𑀸’’𑀢𑀺. (𑀯𑀺𑀲𑀼𑀤𑁆𑀥𑀺. 𑁨.𑁭𑁧𑁫; 𑀫𑀳𑀸𑀦𑀺. 𑁧𑁦, 𑁩𑁯);

𑀏𑀓𑀲𑁆𑀫𑀺𑀁 𑀓𑀧𑁆𑀧𑁂𑀢𑀺 𑀘𑀢𑀼𑀦𑁆𑀦𑀫𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀸𑀦𑀁 𑀅𑀜𑁆𑀜𑀢𑀭𑀪𑀽𑀢𑁂 𑀏𑀓𑀲𑁆𑀫𑀺𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑁂. 𑀢𑀢𑁆𑀣𑀸𑀧𑀺 𑀘 𑀯𑀺𑀯𑀝𑁆𑀝𑀝𑁆𑀞𑀸𑀬𑀻𑀲𑀜𑁆𑀜𑀺𑀢𑀁 𑀏𑀓𑀫𑁂𑀯 𑀲𑀦𑁆𑀥𑀸𑀬 ‘‘𑀤𑁆𑀯𑀝𑁆𑀞𑀦𑁆𑀢𑀭𑀓𑀧𑁆𑀧𑀸’’𑀢𑀺 𑀯𑀼𑀢𑁆𑀢𑀁. 𑀦 𑀳𑀺 𑀲𑁄 𑀅𑀲𑁆𑀲𑀼𑀢𑀲𑀸𑀲𑀦𑀥𑀫𑁆𑀫𑁄 𑀇𑀢𑀭𑁂 𑀚𑀸𑀦𑀸𑀢𑀺 𑀩𑀸𑀳𑀺𑀭𑀓𑀸𑀦𑀫𑀯𑀺𑀲𑀬𑀢𑁆𑀢𑀸, 𑀅𑀚𑀸𑀦𑀦𑁆𑀢𑁄 𑀏𑀯𑀫𑀸𑀳𑀸𑀢𑀺 𑀅𑀢𑁆𑀣𑁄.

𑀉𑀭𑀩𑁆𑀪𑁂 𑀳𑀦𑀦𑁆𑀢𑀺, 𑀳𑀦𑁆𑀢𑁆𑀯𑀸 𑀯𑀸 𑀚𑀻𑀯𑀺𑀢𑀁 𑀓𑀧𑁆𑀧𑁂𑀦𑁆𑀢𑀻𑀢𑀺 𑀑𑀭𑀩𑁆𑀪𑀺𑀓𑀸. 𑀏𑀲 𑀦𑀬𑁄 𑀲𑀸𑀓𑀼𑀡𑀺𑀓𑀸𑀤𑀻𑀲𑀼𑀧𑀺. 𑀮𑀼𑀤𑁆𑀤𑀸𑀢𑀺 𑀯𑀼𑀢𑁆𑀢𑀸𑀯𑀲𑁂𑀲𑀓𑀸 𑀬𑁂 𑀓𑁂𑀘𑀺 𑀘𑀸𑀢𑀼𑀧𑁆𑀧𑀤𑀚𑀻𑀯𑀺𑀓𑀸 𑀦𑁂𑀲𑀸𑀤𑀸. 𑀫𑀸𑀕𑀯𑀺𑀓𑀧𑀤𑀲𑁆𑀫𑀺𑀜𑁆𑀳𑀺 𑀭𑁄𑀳𑀺𑀢𑀸𑀤𑀺𑀫𑀺𑀕𑀚𑀸𑀢𑀺𑀬𑁂𑀯 𑀕𑀳𑀺𑀢𑀸. 𑀩𑀦𑁆𑀥𑀦𑀸𑀕𑀸𑀭𑁂 𑀦𑀺𑀬𑁄𑀚𑁂𑀦𑁆𑀢𑀻𑀢𑀺 𑀩𑀦𑁆𑀥𑀦𑀸𑀕𑀸𑀭𑀺𑀓𑀸. 𑀓𑀼𑀭𑀽𑀭𑀓𑀫𑁆𑀫𑀦𑁆𑀢𑀸𑀢𑀺 𑀤𑀸𑀭𑀼𑀡𑀓𑀫𑁆𑀫𑀦𑁆𑀢𑀸. 𑀅𑀬𑀁 𑀲𑀩𑁆𑀩𑁄𑀧𑀺 𑀓𑀡𑁆𑀳𑀓𑀫𑁆𑀫𑀧𑀲𑀼𑀢𑀢𑀸𑀬 𑀓𑀡𑁆𑀳𑀸𑀪𑀺𑀚𑀸𑀢𑀻𑀢𑀺 𑀯𑀤𑀢𑀺 𑀓𑀡𑁆𑀳𑀲𑁆𑀲 𑀥𑀫𑁆𑀫𑀲𑁆𑀲 𑀅𑀪𑀺𑀚𑀸𑀢𑀺 𑀅𑀩𑁆𑀪𑀼𑀧𑁆𑀧𑀢𑁆𑀢𑀺 𑀬𑀲𑁆𑀲𑀸𑀢𑀺 𑀓𑀢𑁆𑀯𑀸. 𑀪𑀺𑀓𑁆𑀔𑀽𑀢𑀺 𑀩𑀼𑀤𑁆𑀥𑀲𑀸𑀲𑀦𑁂 𑀪𑀺𑀓𑁆𑀔𑀽. 𑀓𑀡𑁆𑀝𑀓𑁂𑀢𑀺 𑀙𑀦𑁆𑀤𑀭𑀸𑀕𑁂. 𑀲𑀜𑁆𑀜𑁄𑀕𑀯𑀲𑁂𑀦 𑀢𑁂𑀲𑀁 𑀧𑀓𑁆𑀔𑀺𑀧𑀦𑀁. 𑀓𑀡𑁆𑀝𑀓𑀲𑀤𑀺𑀲𑀙𑀦𑁆𑀤𑀭𑀸𑀕𑁂𑀦 𑀲𑀜𑁆𑀜𑀼𑀢𑁆𑀢𑀸 𑀪𑀼𑀜𑁆𑀚𑀦𑁆𑀢𑀻𑀢𑀺 𑀳𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀓𑀡𑁆𑀝𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀓𑀲𑁆𑀫𑀸𑀢𑀺 𑀘𑁂? 𑀬𑀲𑁆𑀫𑀸 ‘‘𑀢𑁂 𑀧𑀡𑀻𑀢𑀧𑀡𑀻𑀢𑁂 𑀧𑀘𑁆𑀘𑀬𑁂 𑀧𑀝𑀺𑀲𑁂𑀯𑀦𑁆𑀢𑀻’’𑀢𑀺 𑀢𑀲𑁆𑀲 𑀫𑀺𑀘𑁆𑀙𑀸𑀕𑀸𑀳𑁄, 𑀢𑀲𑁆𑀫𑀸 𑀜𑀸𑀬𑀮𑀤𑁆𑀥𑁂𑀧𑀺 𑀧𑀘𑁆𑀘𑀬𑁂 𑀪𑀼𑀜𑁆𑀚𑀫𑀸𑀦𑀸 𑀆𑀚𑀻𑀯𑀓𑀲𑀫𑀬𑀲𑁆𑀲 𑀯𑀺𑀮𑁄𑀫𑀕𑀸𑀳𑀺𑀢𑀸𑀬 𑀧𑀘𑁆𑀘𑀬𑁂𑀲𑀼 𑀓𑀡𑁆𑀝𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀔𑀸𑀤𑀦𑁆𑀢𑀺 𑀦𑀸𑀫𑀸𑀢𑀺 𑀯𑀤𑀢𑀺 𑀓𑀡𑁆𑀝𑀓𑀯𑀼𑀢𑁆𑀢𑀺𑀓𑀸𑀢𑀺 𑀓𑀡𑁆𑀝𑀓𑁂𑀦 𑀬𑀣𑀸𑀯𑀼𑀢𑁆𑀢𑁂𑀦 𑀲𑀳 𑀚𑀻𑀯𑀺𑀓𑀸. 𑀅𑀬𑀜𑁆𑀳𑀺𑀲𑁆𑀲 𑀧𑀸𑀴𑀺𑀬𑁂𑀯𑀸𑀢𑀺 𑀅𑀬𑀁 𑀫𑀓𑁆𑀔𑀮𑀺𑀲𑁆𑀲 𑀯𑀸𑀤𑀤𑀻𑀧𑀦𑀸 𑀅𑀢𑁆𑀢𑀦𑀸 𑀭𑀘𑀺𑀢𑀸 𑀧𑀸𑀴𑀺𑀬𑁂𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀲𑀫𑀢𑁆𑀣𑁂𑀢𑀺. 𑀓𑀡𑁆𑀝𑀓𑀯𑀼𑀢𑁆𑀢𑀺𑀓𑀸 𑀏𑀯 𑀦𑀸𑀫 𑀏𑀓𑁂 𑀅𑀧𑀭𑁂 𑀧𑀩𑁆𑀩𑀚𑀺𑀢𑀸 𑀩𑀸𑀳𑀺𑀭𑀓𑀸 𑀲𑀦𑁆𑀢𑀺, 𑀢𑁂 𑀦𑀻𑀮𑀸𑀪𑀺𑀚𑀸𑀢𑀻𑀢𑀺 𑀯𑀤𑀢𑀻𑀢𑀺 𑀅𑀢𑁆𑀣𑁄. 𑀢𑁂 𑀳𑀺 𑀲𑀯𑀺𑀲𑁂𑀲𑀁 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸. 𑀢𑀣𑀸 𑀳𑀺 𑀢𑁂 𑀓𑀡𑁆𑀝𑀓𑁂 𑀯𑀢𑁆𑀢𑀦𑁆𑀢𑀸 𑀯𑀺𑀬 𑀪𑀯𑀦𑁆𑀢𑀻𑀢𑀺 𑀓𑀡𑁆𑀝𑀓𑀯𑀼𑀢𑁆𑀢𑀺𑀓𑀸𑀢𑀺 𑀯𑀼𑀢𑁆𑀢𑀸. 𑀦𑀻𑀮𑀲𑁆𑀲 𑀥𑀫𑁆𑀫𑀲𑁆𑀲 𑀅𑀪𑀺𑀚𑀸𑀢𑀺 𑀬𑀲𑁆𑀲𑀸𑀢𑀺 𑀦𑀻𑀮𑀸𑀪𑀺𑀚𑀸𑀢𑀺. 𑀏𑀯𑀫𑀺𑀢𑀭𑁂𑀲𑀼𑀧𑀺.

𑀅𑀫𑁆𑀳𑀸𑀓𑀁 𑀲𑀜𑁆𑀜𑁄𑀚𑀦𑀕𑀡𑁆𑀞𑁄 𑀦𑀢𑁆𑀣𑀻𑀢𑀺 𑀯𑀸𑀤𑀺𑀦𑁄 𑀩𑀸𑀳𑀺𑀭𑀓𑀧𑀩𑁆𑀩𑀚𑀺𑀢𑀸 𑀦𑀺𑀕𑀡𑁆𑀞𑀸. 𑀏𑀓𑀫𑁂𑀯 𑀲𑀸𑀝𑀓𑀁 𑀧𑀭𑀺𑀤𑀳𑀦𑁆𑀢𑀸 𑀏𑀓𑀲𑀸𑀝𑀓𑀸. 𑀓𑀡𑁆𑀳𑀢𑁄 𑀧𑀭𑀺𑀲𑀼𑀤𑁆𑀥𑁄 𑀦𑀻𑀮𑁄, 𑀢𑀢𑁄 𑀧𑀦 𑀮𑁄𑀳𑀺𑀢𑁄𑀢𑀺𑀆𑀤𑀺𑀦𑀸 𑀬𑀣𑀸𑀓𑁆𑀓𑀫𑀁 𑀢𑀲𑁆𑀲 𑀧𑀭𑀺𑀲𑀼𑀤𑁆𑀥𑀁 𑀯𑀸𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀫𑁂 𑀓𑀺𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀡𑁆𑀟𑀭𑀢𑀭𑀸𑀢𑀺 𑀪𑀼𑀜𑁆𑀚𑀦𑀦𑀳𑀸𑀦𑀧𑀝𑀺𑀓𑁆𑀔𑁂𑀧𑀸𑀤𑀺𑀯𑀢𑀲𑀫𑀸𑀬𑁄𑀕𑁂𑀦 𑀧𑀭𑀺𑀲𑀼𑀤𑁆𑀥𑀢𑀭𑀸 𑀓𑀡𑁆𑀳𑀦𑀻𑀮𑀫𑀼𑀧𑀸𑀤𑀸𑀬 𑀮𑁄𑀳𑀺𑀢𑀲𑁆𑀲𑀸𑀧𑀺 𑀧𑀭𑀺𑀲𑀼𑀤𑁆𑀥𑀪𑀸𑀯𑁂𑀦 𑀯𑀢𑁆𑀢𑀩𑁆𑀩𑀢𑁄. 𑀑𑀤𑀸𑀢𑀯𑀲𑀦𑀸𑀢𑀺 𑀑𑀤𑀸𑀢𑀯𑀢𑁆𑀣𑀧𑀭𑀺𑀤𑀳𑀦𑀸. 𑀅𑀘𑁂𑀮𑀓𑀲𑀸𑀯𑀓𑀸𑀢𑀺 𑀆𑀚𑀻𑀯𑀓𑀲𑀸𑀯𑀓𑀪𑀽𑀢𑀸. 𑀢𑁂 𑀓𑀺𑀭 𑀆𑀚𑀻𑀯𑀓𑀮𑀤𑁆𑀥𑀺𑀬𑀸 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑀢𑀸𑀬 𑀦𑀺𑀕𑀡𑁆𑀞𑁂𑀳𑀺𑀧𑀺 𑀧𑀡𑁆𑀟𑀭𑀢𑀭𑀸 𑀳𑀮𑀺𑀤𑁆𑀤𑀸𑀪𑀸𑀦𑀫𑁆𑀧𑀺 𑀧𑀼𑀭𑀺𑀫𑁂 𑀉𑀧𑀸𑀤𑀸𑀬 𑀧𑀭𑀺𑀲𑀼𑀤𑁆𑀥𑀪𑀸𑀯𑀧𑁆𑀧𑀢𑁆𑀢𑀺𑀢𑁄. ‘‘𑀏𑀯’’𑀦𑁆𑀢𑀺𑀆𑀤𑀺𑀦𑀸 𑀢𑀲𑁆𑀲 𑀙𑀦𑁆𑀤𑀸𑀕𑀫𑀦𑀁 𑀤𑀲𑁆𑀲𑁂𑀢𑀺. 𑀦𑀦𑁆𑀤𑀸𑀤𑀻𑀦𑀁 𑀲𑀸𑀯𑀓𑀪𑀽𑀢𑀸 𑀧𑀩𑁆𑀩𑀚𑀺𑀢𑀸 𑀆𑀚𑀻𑀯𑀓𑀸. 𑀢𑀣𑀸 𑀆𑀚𑀻𑀯𑀓𑀺𑀦𑀺𑀬𑁄. 𑀦𑀦𑁆𑀤𑀸𑀤𑀬𑁄 𑀓𑀺𑀭 𑀢𑀣𑀸𑀭𑀽𑀧𑀁 𑀆𑀚𑀻𑀯𑀓𑀧𑀝𑀺𑀧𑀢𑁆𑀢𑀺𑀁 𑀉𑀓𑁆𑀓𑀁𑀲𑀁 𑀧𑀸𑀧𑁂𑀢𑁆𑀯𑀸 𑀞𑀺𑀢𑀸, 𑀢𑀲𑁆𑀫𑀸 𑀦𑀺𑀕𑀡𑁆𑀞𑁂𑀳𑀺 𑀆𑀚𑀻𑀯𑀓𑀲𑀸𑀯𑀓𑁂𑀳𑀺 𑀧𑀩𑁆𑀩𑀚𑀺𑀢𑁂𑀳𑀺 𑀧𑀡𑁆𑀟𑀭𑀢𑀭𑀸 𑀯𑀼𑀢𑁆𑀢𑀸 𑀧𑀭𑀫𑀲𑀼𑀓𑁆𑀓𑀸𑀪𑀺𑀚𑀸𑀢𑀻𑀢𑀺 𑀅𑀬𑀁 𑀢𑀲𑁆𑀲 𑀮𑀤𑁆𑀥𑀺.

𑀧𑀼𑀭𑀺𑀲𑀪𑀽𑀫𑀺𑀬𑁄𑀢𑀺 𑀧𑀥𑀸𑀦𑀦𑀺𑀤𑁆𑀤𑁂𑀲𑁄. 𑀇𑀢𑁆𑀣𑀻𑀦𑀫𑁆𑀧𑀺 𑀳𑁂𑀢𑀸 𑀪𑀽𑀫𑀺𑀬𑁄 𑀏𑀲 𑀇𑀘𑁆𑀙𑀢𑁂𑀯. 𑀲𑀢𑁆𑀢 𑀤𑀺𑀯𑀲𑁂𑀢𑀺 𑀅𑀘𑁆𑀘𑀦𑁆𑀢𑀲𑀜𑁆𑀜𑁄𑀕𑀯𑀘𑀦𑀁, 𑀏𑀢𑁆𑀢𑀓𑀫𑁆𑀧𑀺 𑀫𑀦𑁆𑀤𑀸 𑀫𑁄𑀫𑀽𑀳𑀸𑀢𑀺. 𑀲𑀫𑁆𑀩𑀸𑀥𑀝𑁆𑀞𑀸𑀦𑀢𑁄𑀢𑀺 𑀫𑀸𑀢𑀼𑀓𑀼𑀘𑁆𑀙𑀺𑀁 𑀲𑀦𑁆𑀥𑀸𑀬𑀸𑀳. 𑀭𑁄𑀤𑀦𑁆𑀢𑀺 𑀘𑁂𑀯 𑀯𑀺𑀭𑀯𑀦𑁆𑀢𑀺 𑀘 𑀢𑀫𑀦𑀼𑀲𑁆𑀲𑀭𑀺𑀢𑁆𑀯𑀸. 𑀔𑁂𑀤𑀦𑀁, 𑀓𑀻𑀴𑀦𑀜𑁆𑀘 𑀔𑀺𑀟𑁆𑀟𑀸𑀲𑀤𑁆𑀤𑁂𑀦𑁂𑀯 𑀲𑀗𑁆𑀕𑀳𑁂𑀢𑁆𑀯𑀸 𑀔𑀺𑀟𑁆𑀟𑀸𑀪𑀽𑀫𑀺 𑀯𑀼𑀢𑁆𑀢𑀸. 𑀧𑀤𑀲𑁆𑀲 𑀦𑀺𑀓𑁆𑀔𑀺𑀧𑀦𑀁 𑀧𑀤𑀦𑀺𑀓𑁆𑀔𑀺𑀧𑀦𑀁. 𑀬𑀤𑀸 𑀢𑀣𑀸 𑀧𑀤𑀁 𑀦𑀺𑀓𑁆𑀔𑀺𑀧𑀺𑀢𑀼𑀁 𑀲𑀫𑀢𑁆𑀣𑁄, 𑀢𑀤𑀸 𑀧𑀤𑀯𑀻𑀫𑀁𑀲𑀪𑀽𑀫𑀺 𑀦𑀸𑀫𑀸𑀢𑀺 𑀪𑀸𑀯𑁄. 𑀯𑀢𑀸𑀯𑀢𑀲𑁆𑀲 𑀚𑀸𑀦𑀦𑀓𑀸𑀮𑁂. 𑀪𑀺𑀓𑁆𑀔𑀼 𑀘 𑀧𑀦𑁆𑀦𑀓𑁄𑀢𑀺𑀆𑀤𑀺𑀧𑀺 𑀢𑁂𑀲𑀁 𑀩𑀸𑀳𑀺𑀭𑀓𑀸𑀦𑀁 𑀧𑀸𑀴𑀺𑀬𑁂𑀯. 𑀢𑀢𑁆𑀣 𑀧𑀦𑁆𑀦𑀓𑁄𑀢𑀺 𑀪𑀺𑀓𑁆𑀔𑀸𑀬 𑀯𑀺𑀘𑀭𑀡𑀓𑁄, 𑀢𑁂𑀲𑀁 𑀯𑀸 𑀧𑀝𑀺𑀧𑀢𑁆𑀢𑀺𑀬𑀸 𑀧𑀝𑀺𑀧𑀦𑁆𑀦𑀓𑁄. 𑀚𑀺𑀦𑁄𑀢𑀺 𑀚𑀺𑀡𑁆𑀡𑁄 𑀚𑀭𑀸𑀯𑀲𑁂𑀦 𑀳𑀻𑀦𑀥𑀸𑀢𑀼𑀓𑁄, 𑀅𑀢𑁆𑀢𑀦𑁄 𑀯𑀸 𑀧𑀝𑀺𑀧𑀢𑁆𑀢𑀺𑀬𑀸 𑀧𑀝𑀺𑀧𑀓𑁆𑀔𑀁 𑀚𑀺𑀦𑀺𑀢𑁆𑀯𑀸 𑀞𑀺𑀢𑁄. 𑀲𑁄 𑀓𑀺𑀭 𑀢𑀣𑀸𑀪𑀽𑀢𑁄 𑀥𑀫𑁆𑀫𑀫𑁆𑀧𑀺 𑀓𑀲𑁆𑀲𑀘𑀺 𑀦 𑀓𑀣𑁂𑀲𑀺. 𑀢𑁂𑀦𑀸𑀳 ‘‘𑀦 𑀓𑀺𑀜𑁆𑀘𑀺 𑀆𑀳𑀸’’𑀢𑀺. 𑀑𑀝𑁆𑀞𑀯𑀤𑀦𑀸𑀤𑀺𑀯𑀺𑀧𑁆𑀧𑀓𑀸𑀭𑁂 𑀓𑀢𑁂𑀧𑀺 𑀔𑀫𑀦𑀯𑀲𑁂𑀦 𑀦 𑀓𑀺𑀜𑁆𑀘𑀺 𑀓𑀣𑁂𑀢𑀻𑀢𑀺𑀧𑀺 𑀯𑀤𑀦𑁆𑀢𑀺. 𑀅𑀮𑀸𑀪𑀺𑀦𑁆𑀢𑀺 ‘‘𑀲𑁄 𑀦 𑀓𑀼𑀫𑁆𑀪𑀺𑀫𑀼𑀔𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢𑁂 (𑀤𑀻. 𑀦𑀺. 𑁧.𑁩𑁯𑁪; 𑀫. 𑀦𑀺. 𑁧.𑁧𑁫𑁫) 𑀯𑀼𑀢𑁆𑀢𑀅𑀮𑀸𑀪𑀳𑁂𑀢𑀼𑀲𑀫𑀸𑀬𑁄𑀕𑁂𑀦 𑀅𑀮𑀸𑀪𑀺𑀁. 𑀢𑀢𑁄𑀬𑁂𑀯 𑀚𑀺𑀖𑀘𑁆𑀙𑀸𑀤𑀼𑀩𑁆𑀩𑀮𑀧𑀭𑁂𑀢𑀢𑀸𑀬 𑀲𑀬𑀦𑀧𑀭𑀸𑀬𑀦𑀝𑁆𑀞𑁂𑀦 𑀲𑀫𑀡𑀁 𑀧𑀦𑁆𑀦𑀪𑀽𑀫𑀻𑀢𑀺 𑀯𑀤𑀢𑀺.

𑀆𑀚𑀻𑀯𑀯𑀼𑀢𑁆𑀢𑀺𑀲𑀢𑀸𑀦𑀻𑀢𑀺 𑀲𑀢𑁆𑀢𑀸𑀦𑀫𑀸𑀚𑀻𑀯𑀪𑀽𑀢𑀸𑀦𑀺 𑀚𑀻𑀯𑀺𑀓𑀸𑀯𑀼𑀢𑁆𑀢𑀺𑀲𑀢𑀸𑀦𑀺. ‘‘𑀧𑀭𑀺𑀩𑁆𑀩𑀸𑀚𑀓𑀲𑀢𑀸𑀦𑀻’’𑀢𑀺 𑀯𑀼𑀘𑁆𑀘𑀫𑀸𑀦𑁂𑀧𑀺 𑀘𑁂𑀲 𑀲𑀪𑀸𑀯𑀮𑀺𑀗𑁆𑀕𑀫𑀚𑀸𑀦𑀦𑁆𑀢𑁄 ‘‘𑀧𑀭𑀺𑀩𑁆𑀩𑀸𑀚𑀓𑀲𑀢𑁂’’𑀢𑀺 𑀯𑀤𑀢𑀺. 𑀏𑀯𑀫𑀜𑁆𑀜𑁂𑀲𑀼𑀧𑀺. 𑀢𑁂𑀦𑀸𑀳 ‘‘𑀧𑀭𑀺𑀩𑁆𑀩𑀸𑀚𑀓𑀧𑀩𑁆𑀩𑀚𑁆𑀚𑀸𑀲𑀢𑀸𑀦𑀻’’𑀢𑀺. 𑀦𑀸𑀕𑀪𑀯𑀦𑀁 𑀦𑀸𑀕𑀫𑀡𑁆𑀟𑀮𑀁 𑀬𑀣𑀸 ‘‘𑀫𑀳𑀺𑀁𑀲𑀓𑀫𑀡𑁆𑀟𑀮’’𑀦𑁆𑀢𑀺. 𑀧𑀭𑀫𑀸𑀡𑀼𑀆𑀤𑀺 𑀭𑀚𑁄. 𑀧𑀲𑀼𑀕𑁆𑀕𑀳𑀡𑁂𑀦 𑀏𑀴𑀓𑀚𑀸𑀢𑀺 𑀕𑀳𑀺𑀢𑀸. 𑀫𑀺𑀕𑀕𑁆𑀕𑀳𑀡𑁂𑀦 𑀭𑀼𑀭𑀼𑀕𑀯𑀬𑀸𑀤𑀺 𑀫𑀺𑀕𑀚𑀸𑀢𑀺. 𑀕𑀡𑁆𑀞𑀺𑀫𑁆𑀳𑀻𑀢𑀺 𑀨𑀴𑀼𑀫𑁆𑀳𑀺, 𑀧𑀩𑁆𑀩𑁂𑀢𑀺 𑀅𑀢𑁆𑀣𑁄. 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀤𑀺𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀤𑀺𑀯𑀲𑁂𑀦, 𑀢𑁂𑀲𑀜𑁆𑀘 𑀅𑀦𑁆𑀢𑀭𑀪𑁂𑀤𑀯𑀲𑁂𑀦 𑀩𑀳𑀽 𑀤𑁂𑀯𑀸. 𑀢𑀢𑁆𑀣 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀏𑀓𑀘𑁆𑀘𑀅𑀦𑁆𑀢𑀭𑀪𑁂𑀤𑁄 𑀫𑀳𑀸𑀲𑀫𑀬𑀲𑀼𑀢𑁆𑀢𑁂𑀦 (𑀤𑀻. 𑀦𑀺. 𑁨.𑁩𑁩𑁧) 𑀤𑀻𑀧𑁂𑀢𑀩𑁆𑀩𑁄. ‘‘𑀲𑁄 𑀧𑀦𑀸’’𑀢𑀺𑀆𑀤𑀺𑀦𑀸 𑀅𑀚𑀸𑀦𑀦𑁆𑀢𑁄 𑀧𑀦𑁂𑀲 𑀩𑀳𑀽 𑀤𑁂𑀯𑁂𑀧𑀺 𑀲𑀢𑁆𑀢 𑀏𑀯 𑀯𑀤𑀢𑀻𑀢𑀺 𑀢𑀲𑁆𑀲 𑀅𑀧𑁆𑀧𑀫𑀸𑀡𑀢𑀁 𑀤𑀲𑁆𑀲𑁂𑀢𑀺. 𑀫𑀦𑀼𑀲𑁆𑀲𑀸𑀧𑀺 𑀅𑀦𑀦𑁆𑀢𑀸𑀢𑀺 𑀤𑀻𑀧𑀤𑁂𑀲𑀓𑀼𑀮𑀯𑀁𑀲𑀸𑀚𑀻𑀯𑀸𑀤𑀺𑀯𑀺𑀪𑀸𑀕𑀯𑀲𑁂𑀦. 𑀧𑀺𑀲𑀸𑀘𑀸 𑀏𑀯 𑀧𑁂𑀲𑀸𑀘𑀸, 𑀢𑁂 𑀅𑀧𑀭𑀧𑁂𑀢𑀸𑀤𑀺𑀯𑀲𑁂𑀦 𑀫𑀳𑀦𑁆𑀢𑀫𑀳𑀦𑁆𑀢𑀸, 𑀩𑀳𑀼𑀢𑀭𑀸𑀢𑀺 𑀅𑀢𑁆𑀣𑁄. 𑀩𑀸𑀳𑀺𑀭𑀓𑀲𑀫𑀬𑁂 𑀧𑀦 ‘‘𑀙𑀤𑁆𑀤𑀦𑁆𑀢𑀤𑀳𑀫𑀦𑁆𑀤𑀸𑀓𑀺𑀦𑀺𑀬𑁄 𑀓𑀼𑀯𑀸𑀴𑀺𑀬𑀫𑀼𑀘𑀮𑀺𑀦𑁆𑀤𑀦𑀸𑀫𑁂𑀦 𑀯𑁄𑀳𑀭𑀺𑀢𑀸’’𑀢𑀺 (𑀤𑀻. 𑀦𑀺. 𑀝𑀻. 𑁧.𑁧𑁬𑁮) 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑀁.

𑀕𑀡𑁆𑀞𑀺𑀓𑀸𑀢𑀺 𑀧𑀩𑁆𑀩𑀕𑀡𑁆𑀞𑀺𑀓𑀸. 𑀧𑀩𑁆𑀩𑀕𑀡𑁆𑀞𑀺𑀫𑁆𑀳𑀺 𑀳𑀺 𑀧𑀯𑀼𑀝𑀲𑀤𑁆𑀤𑁄. 𑀫𑀳𑀸𑀧𑀧𑀸𑀢𑀸𑀢𑀺 𑀫𑀳𑀸𑀢𑀝𑀸. 𑀧𑀸𑀭𑀺𑀲𑁂𑀲𑀦𑀬𑁂𑀦 𑀔𑀼𑀤𑁆𑀤𑀓𑀧𑀧𑀸𑀢𑀲𑀢𑀸𑀦𑀺. 𑀏𑀯𑀁 𑀲𑀼𑀧𑀺𑀦𑁂𑀲𑀼𑀧𑀺. ‘‘𑀫𑀳𑀸𑀓𑀧𑁆𑀧𑀺𑀦𑁄’’𑀢𑀺 𑀇𑀤𑀁 ‘‘𑀫𑀳𑀸𑀓𑀧𑁆𑀧𑀸𑀦’’𑀦𑁆𑀢𑀺 𑀅𑀢𑁆𑀣𑀢𑁄 𑀯𑁂𑀤𑀺𑀢𑀩𑁆𑀩𑀁. 𑀲𑀤𑁆𑀤𑀢𑁄 𑀧𑀦𑁂𑀲 𑀅𑀚𑀸𑀦𑀦𑁆𑀢𑁄 𑀏𑀯𑀁 𑀯𑀤𑀢𑀻𑀢𑀺 𑀦 𑀯𑀺𑀘𑀸𑀭𑀡𑀓𑁆𑀔𑀫𑀁. 𑀢𑀣𑀸 ‘‘𑀘𑀼𑀮𑁆𑀮𑀸𑀲𑀻𑀢𑀺 𑀲𑀢𑀲𑀳𑀲𑁆𑀲𑀸𑀦𑀻’’𑀢𑀺 𑀇𑀤𑀫𑁆𑀧𑀺. 𑀲𑁄 𑀳𑀺 ‘‘𑀘𑀢𑀼𑀭𑀸𑀲𑀻𑀢𑀺 𑀲𑀢𑀲𑀳𑀲𑁆𑀲𑀸𑀦𑀻’’𑀢𑀺 𑀯𑀢𑁆𑀢𑀼𑀫𑀲𑀓𑁆𑀓𑁄𑀦𑁆𑀢𑁄 𑀏𑀯𑀁 𑀯𑀤𑀢𑀺. 𑀲𑀤𑁆𑀤𑀭𑀘𑀓𑀸 𑀧𑀦 ‘‘𑀘𑀢𑀼𑀭𑀸𑀲𑀻𑀢𑀺𑀬𑀸 𑀢𑀼𑀮𑁄𑀧𑁄, 𑀘𑀲𑁆𑀲 𑀘𑀼, 𑀭𑀲𑁆𑀲 𑀮𑁄, 𑀤𑁆𑀯𑀺𑀢𑁆𑀢𑀜𑁆𑀘𑀸’’𑀢𑀺 𑀯𑀤𑀦𑁆𑀢𑀺. 𑀏𑀢𑁆𑀢𑀓𑀸 𑀫𑀳𑀸𑀲𑀭𑀸𑀢𑀺 𑀏𑀢𑀧𑁆𑀧𑀫𑀸𑀡𑀯𑀢𑀸 𑀫𑀳𑀸𑀲𑀭𑀢𑁄, 𑀲𑀢𑁆𑀢𑀫𑀳𑀸𑀲𑀭𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀺𑀭𑀸𑀢𑀺 𑀢𑀲𑁆𑀲 𑀯𑀸𑀤𑀸𑀦𑀼𑀲𑁆𑀲𑀯𑀦𑁂 𑀦𑀺𑀧𑀸𑀢𑁄. 𑀧𑀡𑁆𑀟𑀺𑀢𑁄𑀧𑀺…𑀧𑁂… 𑀦 𑀕𑀘𑁆𑀙𑀢𑀺, 𑀓𑀲𑁆𑀫𑀸? 𑀲𑀢𑁆𑀢𑀸𑀦𑀁 𑀲𑀁𑀲𑀭𑀡𑀓𑀸𑀮𑀲𑁆𑀲 𑀦𑀺𑀬𑀢𑀪𑀸𑀯𑀢𑁄.

‘‘𑀅𑀘𑁂𑀮𑀓𑀯𑀢𑁂𑀦 𑀯𑀸 𑀅𑀜𑁆𑀜𑁂𑀦 𑀯𑀸 𑀬𑁂𑀦 𑀓𑁂𑀦𑀘𑀻’’𑀢𑀺 𑀯𑀼𑀢𑁆𑀢𑀫𑀢𑀺𑀤𑀺𑀲𑀢𑀺 ‘‘𑀢𑀸𑀤𑀺𑀲𑁂𑀦𑁂𑀯𑀸’’𑀢𑀺 𑀇𑀫𑀺𑀦𑀸. 𑀢𑀧𑁄𑀓𑀫𑁆𑀫𑁂𑀦𑀸𑀢𑀺 𑀢𑀧𑀓𑀭𑀡𑁂𑀦. 𑀏𑀢𑁆𑀣𑀸𑀧𑀺 ‘‘𑀢𑀸𑀤𑀺𑀲𑁂𑀦𑁂𑀯𑀸’’𑀢𑀺 𑀅𑀥𑀺𑀓𑀸𑀭𑁄. 𑀬𑁄…𑀧𑁂… 𑀯𑀺𑀲𑀼𑀚𑁆𑀛𑀢𑀺, 𑀲𑁄 𑀅𑀧𑀭𑀺𑀧𑀓𑁆𑀓𑀁 𑀓𑀫𑁆𑀫𑀁 𑀧𑀭𑀺𑀧𑀸𑀘𑁂𑀢𑀺 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀅𑀦𑁆𑀢𑀭𑀸𑀢𑀺 𑀘𑀢𑀼𑀭𑀸𑀲𑀻𑀢𑀺𑀫𑀳𑀸𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀦𑀫𑀩𑁆𑀪𑀦𑁆𑀢𑀭𑁂. 𑀨𑀼𑀲𑁆𑀲 𑀨𑀼𑀲𑁆𑀲𑀸𑀢𑀺 𑀧𑀢𑁆𑀯𑀸 𑀧𑀢𑁆𑀯𑀸. 𑀯𑀼𑀢𑁆𑀢𑀧𑀭𑀺𑀫𑀸𑀡𑀁 𑀓𑀸𑀮𑀦𑁆𑀢𑀺 𑀘𑀢𑀼𑀭𑀸𑀲𑀻𑀢𑀺𑀫𑀳𑀸𑀓𑀧𑁆𑀧𑀲𑀢𑀲𑀳𑀲𑁆𑀲𑀧𑀫𑀸𑀡𑀁 𑀓𑀸𑀮𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀅𑀧𑀭𑀺𑀧𑀓𑁆𑀓𑀁 𑀲𑀁𑀲𑀭𑀡𑀦𑀺𑀫𑀺𑀢𑁆𑀢𑀁 𑀓𑀫𑁆𑀫𑀁 𑀲𑀻𑀮𑀸𑀤𑀺𑀦𑀸 𑀲𑀻𑀖𑀁𑀬𑁂𑀯 𑀯𑀺𑀲𑀼𑀤𑁆𑀥𑀧𑁆𑀧𑀢𑁆𑀢𑀺𑀬𑀸 𑀧𑀭𑀺𑀧𑀸𑀘𑁂𑀢𑀺 𑀦𑀸𑀫. 𑀧𑀭𑀺𑀧𑀓𑁆𑀓𑀁 𑀓𑀫𑁆𑀫𑀁 𑀨𑀼𑀲𑁆𑀲 𑀨𑀼𑀲𑁆𑀲 𑀓𑀸𑀮𑁂𑀦 𑀧𑀭𑀺𑀧𑀓𑁆𑀓𑀪𑀸𑀯𑀸𑀦𑀸𑀧𑀸𑀤𑀦𑁂𑀦 𑀩𑁆𑀬𑀦𑁆𑀢𑀺𑀁 𑀯𑀺𑀕𑀫𑀦𑀁 𑀓𑀭𑁄𑀢𑀺 𑀦𑀸𑀫𑀸𑀢𑀺. 𑀤𑁄𑀡𑁂𑀦𑀸𑀢𑀺 𑀧𑀭𑀺𑀫𑀺𑀦𑀦𑀤𑁄𑀡𑀢𑀼𑀫𑁆𑀩𑁂𑀦. 𑀭𑀽𑀧𑀓𑀯𑀲𑁂𑀦𑀢𑁆𑀣𑁄 𑀮𑀩𑁆𑀪𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀫𑀺𑀢𑀁 𑀯𑀺𑀬𑀸’’𑀢𑀺. 𑀦 𑀳𑀸𑀧𑀦𑀯𑀟𑁆𑀠𑀦𑀁 𑀧𑀡𑁆𑀟𑀺𑀢𑀩𑀸𑀮𑀯𑀲𑁂𑀦𑀸𑀢𑀺 𑀤𑀲𑁆𑀲𑁂𑀢𑀺 ‘‘𑀦 𑀲𑀁𑀲𑀸𑀭𑁄’’𑀢𑀺𑀆𑀤𑀺𑀦𑀸. 𑀯𑀟𑁆𑀠𑀦𑀁 𑀉𑀓𑁆𑀓𑀁𑀲𑁄. 𑀳𑀸𑀧𑀦𑀁 𑀅𑀯𑀓𑀁𑀲𑁄.

𑀓𑀢𑀲𑀼𑀢𑁆𑀢𑀕𑀼𑀴𑁂𑀢𑀺 𑀓𑀢𑀲𑀼𑀢𑁆𑀢𑀯𑀝𑁆𑀝𑀺𑀬𑀁. 𑀧𑀮𑁂𑀢𑀻𑀢𑀺 𑀧𑀭𑁂𑀢𑀺 𑀬𑀣𑀸 ‘‘𑀅𑀪𑀺𑀲𑀫𑁆𑀧𑀭𑀸𑀬𑁄’’𑀢𑀺, (𑀫𑀳𑀸𑀦𑀺. 𑁬𑁯; 𑀘𑀽𑀴𑀦𑀺. 𑁮𑁫; 𑀧𑀝𑀺. 𑀫. 𑁩.𑁪) 𑀭-𑀓𑀸𑀭𑀲𑁆𑀲 𑀧𑀦 𑀮-𑀓𑀸𑀭𑀁 𑀓𑀢𑁆𑀯𑀸 𑀏𑀯𑀁 𑀯𑀼𑀢𑁆𑀢𑀁 𑀬𑀣𑀸 ‘‘𑀧𑀮𑀺𑀩𑀼𑀤𑁆𑀥𑁄’’𑀢𑀺 (𑀘𑀽𑀴𑀦𑀺. 𑁧𑁫; 𑀫𑀺. 𑀧. 𑁩.𑁬). 𑀲𑁄 𑀘 𑀘𑀼𑀭𑀸𑀤𑀺𑀕𑀡𑀯𑀲𑁂𑀦 𑀕𑀢𑀺𑀬𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀕𑀘𑁆𑀙𑀢𑀻’’𑀢𑀺. 𑀇𑀫𑀸𑀬 𑀉𑀧𑀫𑀸𑀬 𑀘𑁂𑀲 𑀲𑀢𑁆𑀢𑀸𑀦𑀁 𑀲𑀁𑀲𑀸𑀭𑁄 𑀅𑀦𑀼𑀓𑁆𑀓𑀫𑁂𑀦 𑀔𑀻𑀬𑀢𑁂𑀯, 𑀦 𑀯𑀟𑁆𑀠𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀭𑀽𑀧𑀢𑁆𑀢𑀸𑀢𑀺 𑀇𑀫𑀫𑀢𑁆𑀣𑀁 𑀯𑀺𑀪𑀸𑀯𑁂𑀢𑀻𑀢𑀺 𑀆𑀳 ‘‘𑀲𑀼𑀢𑁆𑀢𑁂 𑀔𑀻𑀡𑁂’’𑀢𑀺𑀆𑀤𑀺. 𑀢𑀢𑁆𑀣𑁂𑀯𑀸𑀢𑀺 𑀔𑀻𑀬𑀦𑀝𑁆𑀞𑀸𑀦𑁂𑀬𑁂𑀯.

𑀅𑀚𑀺𑀢𑀓𑁂𑀲𑀓𑀫𑁆𑀩𑀮𑀯𑀸𑀤𑀯𑀡𑁆𑀡𑀦𑀸

𑁧𑁭𑁧. 𑀤𑀺𑀦𑁆𑀦𑀦𑁆𑀢𑀺 𑀤𑁂𑀬𑁆𑀬𑀥𑀫𑁆𑀫𑀲𑀻𑀲𑁂𑀦 𑀤𑀸𑀦𑀘𑁂𑀢𑀦𑀸𑀬𑁂𑀯 𑀯𑀼𑀢𑁆𑀢𑀸. 𑀢𑀁𑀫𑀼𑀔𑁂𑀦 𑀘 𑀨𑀮𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀤𑀺𑀦𑁆𑀦𑀲𑁆𑀲 𑀨𑀮𑀸𑀪𑀸𑀯’’𑀦𑁆𑀢𑀺 𑀇𑀫𑀺𑀦𑀸. 𑀤𑀺𑀦𑁆𑀦𑀜𑁆𑀳𑀺 𑀫𑀼𑀔𑁆𑀬𑀢𑁄 𑀅𑀦𑁆𑀦𑀸𑀤𑀺𑀯𑀢𑁆𑀣𑀼, 𑀢𑀁 𑀓𑀣𑀫𑁂𑀲 𑀧𑀝𑀺𑀓𑁆𑀔𑀺𑀧𑀺𑀲𑁆𑀲𑀢𑀺. 𑀏𑀲 𑀦𑀬𑁄 𑀬𑀺𑀝𑁆𑀞𑀁 𑀳𑀼𑀢𑀦𑁆𑀢𑀺 𑀏𑀢𑁆𑀣𑀸𑀧𑀺. 𑀲𑀩𑁆𑀩𑀲𑀸𑀥𑀸𑀭𑀡𑀁 𑀫𑀳𑀸𑀤𑀸𑀦𑀁 𑀫𑀳𑀸𑀬𑀸𑀕𑁄. 𑀧𑀸𑀳𑀼𑀦𑀪𑀸𑀯𑁂𑀦 𑀓𑀢𑁆𑀢𑀩𑁆𑀩𑀲𑀓𑁆𑀓𑀸𑀭𑁄 𑀧𑀸𑀳𑀼𑀦𑀓𑀲𑀓𑁆𑀓𑀸𑀭𑁄. 𑀨𑀮𑀦𑁆𑀢𑀺 𑀆𑀦𑀺𑀲𑀁𑀲𑀨𑀮𑀁, 𑀦𑀺𑀲𑁆𑀲𑀦𑁆𑀤𑀨𑀮𑀜𑁆𑀘. 𑀯𑀺𑀧𑀸𑀓𑁄𑀢𑀺 𑀲𑀤𑀺𑀲𑀨𑀮𑀁. 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁂 𑀤𑀸𑀦𑁂 𑀞𑀸𑀦𑀦𑁆𑀢𑀭𑀸𑀤𑀺𑀧𑀢𑁆𑀢𑀺 𑀯𑀺𑀬 𑀳𑀺 𑀆𑀦𑀺𑀲𑀁𑀲𑁄, 𑀲𑀗𑁆𑀔𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑀸𑀦𑁂 (𑀚𑀸. 𑁧.𑁧𑁦.𑁩𑁯) 𑀢𑀸𑀡𑀮𑀸𑀪𑀫𑀢𑁆𑀢𑀁 𑀯𑀺𑀬 𑀦𑀺𑀲𑁆𑀲𑀦𑁆𑀤𑁄, 𑀧𑀝𑀺𑀲𑀦𑁆𑀥𑀺𑀲𑀗𑁆𑀔𑀸𑀢𑀁 𑀲𑀤𑀺𑀲𑀨𑀮𑀁 𑀯𑀺𑀧𑀸𑀓𑁄. 𑀅𑀬𑀁 𑀮𑁄𑀓𑁄, 𑀧𑀭𑀮𑁄𑀓𑁄𑀢𑀺 𑀘 𑀓𑀫𑁆𑀫𑀼𑀦𑀸 𑀮𑀤𑁆𑀥𑀩𑁆𑀩𑁄 𑀯𑀼𑀢𑁆𑀢𑁄 𑀨𑀮𑀸𑀪𑀸𑀯𑀫𑁂𑀯 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀦𑀢𑁄. 𑀧𑀘𑁆𑀘𑀓𑁆𑀔𑀤𑀺𑀝𑁆𑀞𑁄 𑀳𑀺 𑀮𑁄𑀓𑁄 𑀓𑀣𑀁 𑀢𑁂𑀦 𑀧𑀝𑀺𑀓𑁆𑀔𑀺𑀢𑁆𑀢𑁄 𑀲𑀺𑀬𑀸. ‘‘𑀲𑀩𑁆𑀩𑁂 𑀢𑀢𑁆𑀣 𑀢𑀢𑁆𑀣𑁂𑀯 𑀉𑀘𑁆𑀙𑀺𑀚𑁆𑀚𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀓𑀸𑀭𑀡𑀫𑀸𑀳, 𑀬𑀢𑁆𑀣 𑀬𑀢𑁆𑀣 𑀪𑀯𑀬𑁄𑀦𑀺𑀆𑀤𑀻𑀲𑀼 𑀞𑀺𑀢𑀸 𑀇𑀫𑁂 𑀲𑀢𑁆𑀢𑀸, 𑀢𑀢𑁆𑀣 𑀢𑀢𑁆𑀣𑁂𑀯 𑀉𑀘𑁆𑀙𑀺𑀚𑁆𑀚𑀦𑁆𑀢𑀺, 𑀦𑀺𑀭𑀼𑀤𑀬𑀯𑀺𑀦𑀸𑀲𑀯𑀲𑁂𑀦 𑀯𑀺𑀦𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀲𑀽𑀢𑀺 𑀫𑀸𑀢𑀸𑀧𑀺𑀢𑀽𑀲𑀼. 𑀨𑀮𑀸𑀪𑀸𑀯𑀯𑀲𑁂𑀦𑁂𑀯 𑀯𑀤𑀢𑀺, 𑀦 𑀫𑀸𑀢𑀸𑀧𑀺𑀢𑀽𑀦𑀁, 𑀦𑀸𑀧𑀺 𑀢𑁂𑀲𑀼 𑀇𑀤𑀸𑀦𑀺 𑀓𑀭𑀺𑀬𑀫𑀸𑀦𑀲𑀓𑁆𑀓𑀸𑀭𑀸𑀲𑀓𑁆𑀓𑀸𑀭𑀸𑀦𑀫𑀪𑀸𑀯𑀯𑀲𑁂𑀦 𑀢𑁂𑀲𑀁 𑀮𑁄𑀓𑁂 𑀧𑀘𑁆𑀘𑀓𑁆𑀔𑀢𑁆𑀢𑀸. 𑀧𑀼𑀩𑁆𑀩𑀼𑀴𑀲𑁆𑀲 𑀯𑀺𑀬 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀉𑀧𑁆𑀧𑀸𑀤𑁄 𑀦𑀸𑀫 𑀓𑁂𑀯𑀮𑁄, 𑀦 𑀘𑀯𑀺𑀢𑁆𑀯𑀸 𑀆𑀕𑀫𑀦𑀧𑀼𑀩𑁆𑀩𑀓𑁄 𑀅𑀢𑁆𑀣𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀘𑀯𑀺𑀢𑁆𑀯𑀸 𑀉𑀧𑀧𑀚𑁆𑀚𑀦𑀓𑀸 𑀲𑀢𑁆𑀢𑀸 𑀦𑀸𑀫 𑀦𑀢𑁆𑀣𑀻’’𑀢𑀺. 𑀲𑀫𑀡𑁂𑀦 𑀦𑀸𑀫 𑀬𑀸𑀣𑀸𑀯𑀢𑁄 𑀚𑀸𑀦𑀦𑁆𑀢𑁂𑀦 𑀓𑀲𑁆𑀲𑀘𑀺 𑀅𑀓𑀣𑁂𑀢𑁆𑀯𑀸 𑀲𑀜𑁆𑀜𑀢𑁂𑀦 𑀪𑀯𑀺𑀢𑀩𑁆𑀩𑀁, 𑀅𑀜𑁆𑀜𑀣𑀸 𑀅𑀳𑁄𑀧𑀼𑀭𑀺𑀲𑀺𑀓𑀸 𑀦𑀸𑀫 𑀲𑀺𑀬𑀸. 𑀓𑀺𑀜𑁆𑀳𑀺 𑀧𑀭𑁄 𑀧𑀭𑀲𑁆𑀲 𑀓𑀭𑀺𑀲𑁆𑀲𑀢𑀺, 𑀢𑀣𑀸 𑀘 𑀅𑀢𑁆𑀢𑀦𑁄 𑀲𑀫𑁆𑀧𑀸𑀤𑀦𑀲𑁆𑀲 𑀓𑀲𑁆𑀲𑀘𑀺 𑀅𑀯𑀲𑁆𑀲𑀬𑁄 𑀏𑀯 𑀦 𑀲𑀺𑀬𑀸 𑀢𑀢𑁆𑀣 𑀢𑀢𑁆𑀣𑁂𑀯 𑀉𑀘𑁆𑀙𑀺𑀚𑁆𑀚𑀦𑀢𑁄𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀬𑁂 𑀇𑀫𑀜𑁆𑀘…𑀧𑁂… 𑀧𑀯𑁂𑀤𑁂𑀦𑁆𑀢𑀻’’𑀢𑀺 𑀆𑀳. 𑀅𑀬𑀁 𑀅𑀝𑁆𑀞𑀓𑀣𑀸𑀯𑀲𑁂𑀲𑀓𑁄 𑀅𑀢𑁆𑀣𑁄.

𑀘𑀢𑀽𑀲𑀼 𑀫𑀳𑀸𑀪𑀽𑀢𑁂𑀲𑀼 𑀦𑀺𑀬𑀼𑀢𑁆𑀢𑁄 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑁄, 𑀅𑀢𑁆𑀣𑀫𑀢𑁆𑀢𑀢𑁄 𑀧𑀦 𑀤𑀲𑁆𑀲𑁂𑀢𑀼𑀁 ‘‘𑀘𑀢𑀼𑀫𑀳𑀸𑀪𑀽𑀢𑀫𑀬𑁄’’𑀢𑀺 𑀯𑀼𑀢𑁆𑀢𑀁. 𑀬𑀣𑀸 𑀳𑀺 𑀫𑀢𑁆𑀢𑀺𑀓𑀸𑀬 𑀦𑀺𑀩𑁆𑀩𑀢𑁆𑀢𑀁 𑀪𑀸𑀚𑀦𑀁 𑀫𑀢𑁆𑀢𑀺𑀓𑀸𑀫𑀬𑀁, 𑀏𑀯𑀫𑀬𑀫𑁆𑀧𑀺 𑀘𑀢𑀽𑀳𑀺 𑀫𑀳𑀸𑀪𑀽𑀢𑁂𑀳𑀺 𑀦𑀺𑀩𑁆𑀩𑀢𑁆𑀢𑁄 𑀘𑀢𑀼𑀫𑀳𑀸𑀪𑀽𑀢𑀫𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀅𑀚𑁆𑀛𑀢𑁆𑀢𑀺𑀓𑀧𑀣𑀯𑀻𑀥𑀸𑀢𑀽𑀢𑀺 𑀲𑀢𑁆𑀢𑀲𑀦𑁆𑀢𑀸𑀦𑀕𑀢𑀸 𑀧𑀣𑀯𑀻𑀥𑀸𑀢𑀼. 𑀩𑀸𑀳𑀺𑀭𑀧𑀣𑀯𑀻𑀥𑀸𑀢𑀼𑀦𑁆𑀢𑀺 𑀩𑀳𑀺𑀤𑁆𑀥𑀸 𑀫𑀳𑀸𑀧𑀣𑀯𑀺𑀁, 𑀢𑁂𑀦 𑀧𑀣𑀯𑀻𑀬𑁂𑀯 𑀓𑀸𑀬𑁄𑀢𑀺 𑀤𑀲𑁆𑀲𑁂𑀢𑀺. 𑀅𑀦𑀼𑀕𑀘𑁆𑀙𑀢𑀻𑀢𑀺 𑀅𑀦𑀼𑀩𑀦𑁆𑀥𑀢𑀺. 𑀉𑀪𑀬𑁂𑀦𑀸𑀧𑀻𑀢𑀺 𑀧𑀤𑀤𑁆𑀯𑀬𑁂𑀦𑀧𑀺. 𑀉𑀧𑁂𑀢𑀺 𑀉𑀧𑀕𑀘𑁆𑀙𑀢𑀻𑀢𑀺 𑀩𑀸𑀳𑀺𑀭𑀧𑀣𑀯𑀺𑀓𑀸𑀬𑀢𑁄 𑀢𑀤𑁂𑀓𑀤𑁂𑀲𑀪𑀽𑀢𑀸 𑀧𑀣𑀯𑀻 𑀆𑀕𑀦𑁆𑀢𑁆𑀯𑀸 𑀅𑀚𑁆𑀛𑀢𑁆𑀢𑀺𑀓𑀪𑀸𑀯𑀧𑁆𑀧𑀢𑁆𑀢𑀺 𑀳𑀼𑀢𑁆𑀯𑀸 𑀲𑀢𑁆𑀢𑀪𑀸𑀯𑁂𑀦 𑀲𑀡𑁆𑀞𑀺𑀢𑀸, 𑀲𑀸 𑀘 𑀫𑀳𑀸𑀧𑀣𑀯𑀻 𑀖𑀝𑀸𑀤𑀺𑀕𑀢𑀧𑀣𑀯𑀻 𑀯𑀺𑀬 𑀇𑀤𑀸𑀦𑀺 𑀢𑀫𑁂𑀯 𑀩𑀸𑀳𑀺𑀭𑀁 𑀧𑀣𑀯𑀺𑀓𑀸𑀬𑀁 𑀲𑀫𑀼𑀤𑀸𑀬𑀪𑀽𑀢𑀁 𑀧𑀼𑀦 𑀉𑀧𑁂𑀢𑀺 𑀉𑀧𑀕𑀘𑁆𑀙𑀢𑀺, 𑀲𑀩𑁆𑀩𑀲𑁄 𑀢𑁂𑀦 𑀩𑀸𑀳𑀺𑀭𑀧𑀣𑀯𑀺𑀓𑀸𑀬𑁂𑀦 𑀦𑀺𑀩𑁆𑀩𑀺𑀲𑁂𑀲𑀢𑀁 𑀏𑀓𑀻𑀪𑀸𑀯𑀫𑁂𑀯 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀆𑀧𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄𑀢𑀺 𑀏𑀢𑁆𑀣 𑀧𑀚𑁆𑀚𑀼𑀦𑁆𑀦𑁂𑀦 𑀫𑀳𑀸𑀲𑀫𑀼𑀤𑁆𑀤𑀢𑁄 𑀕𑀳𑀺𑀢𑀆𑀧𑁄 𑀯𑀺𑀬 𑀯𑀲𑁆𑀲𑁄𑀤𑀓𑀪𑀸𑀯𑁂𑀦 𑀧𑀼𑀦𑀧𑀺 𑀫𑀳𑀸𑀲𑀫𑀼𑀤𑁆𑀤𑀁, 𑀲𑀽𑀭𑀺𑀬𑀭𑀁𑀲𑀺𑀢𑁄 𑀕𑀳𑀺𑀢𑀇𑀦𑁆𑀤𑀕𑁆𑀕𑀺𑀲𑀗𑁆𑀔𑀸𑀢𑀢𑁂𑀚𑁄 𑀯𑀺𑀬 𑀧𑀼𑀦𑀧𑀺 𑀲𑀽𑀭𑀺𑀬𑀭𑀁𑀲𑀺𑀁, 𑀫𑀳𑀸𑀯𑀸𑀬𑀼𑀓𑁆𑀔𑀦𑁆𑀥𑀢𑁄 𑀦𑀺𑀕𑁆𑀕𑀢𑀫𑀳𑀸𑀯𑀸𑀢𑁄 𑀯𑀺𑀬 𑀧𑀼𑀦𑀧𑀺 𑀫𑀳𑀸𑀯𑀸𑀬𑀼𑀓𑁆𑀔𑀦𑁆𑀥𑀁 𑀉𑀧𑁂𑀢𑀺 𑀉𑀧𑀕𑀘𑁆𑀙𑀢𑀻𑀢𑀺 𑀧𑀭𑀺𑀓𑀧𑁆𑀧𑀦𑀸𑀫𑀢𑁆𑀢𑁂𑀦 𑀤𑀺𑀝𑁆𑀞𑀺𑀕𑀢𑀺𑀓𑀲𑁆𑀲 𑀅𑀥𑀺𑀧𑁆𑀧𑀸𑀬𑁄.

𑀫𑀦𑀘𑁆𑀙𑀝𑁆𑀞𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀫𑀦𑀫𑁂𑀯 𑀙𑀝𑁆𑀞𑀁 𑀬𑁂𑀲𑀁 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀸𑀦𑀁, 𑀢𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀦𑁆𑀢𑀺 𑀢𑁂𑀲𑀁 𑀯𑀺𑀲𑀬𑀪𑀸𑀯𑀸𑀢𑀺 𑀯𑀤𑀦𑁆𑀢𑀺. 𑀯𑀺𑀲𑀬𑀻𑀕𑀳𑀡𑁂𑀦 𑀳𑀺 𑀯𑀺𑀲𑀬𑀸𑀧𑀺 𑀕𑀳𑀺𑀢𑀸 𑀏𑀯 𑀳𑁄𑀦𑁆𑀢𑀺. 𑀓𑀣𑀁 𑀕𑀡𑀺𑀢𑀸 𑀫𑀜𑁆𑀘𑀧𑀜𑁆𑀘𑀫𑀸𑀢𑀺 𑀆𑀳 ‘‘𑀫𑀜𑁆𑀘𑁄 𑀘𑁂𑀯…𑀧𑁂… 𑀅𑀢𑁆𑀣𑁄’’𑀢𑀺. 𑀆𑀴𑀸𑀳𑀦𑀁 𑀲𑀼𑀲𑀸𑀦𑀦𑁆𑀢𑀺 𑀅𑀢𑁆𑀣𑀢𑁄 𑀏𑀓𑀁. 𑀕𑀼𑀡𑀸𑀕𑀼𑀡𑀧𑀤𑀸𑀦𑀻𑀢𑀺 𑀕𑀼𑀡𑀤𑁄𑀲𑀓𑁄𑀝𑁆𑀞𑀸𑀲𑀸𑀦𑀺. 𑀲𑀭𑀻𑀭𑀫𑁂𑀯 𑀯𑀸 𑀧𑀤𑀸𑀦𑀺 𑀢𑀁𑀢𑀁𑀓𑀺𑀭𑀺𑀬𑀸𑀬 𑀧𑀚𑁆𑀚𑀺𑀢𑀩𑁆𑀩𑀢𑁄. 𑀧𑀸𑀭𑀸𑀯𑀢𑀧𑀓𑁆𑀔𑀺𑀯𑀡𑁆𑀡𑀸𑀦𑀻𑀢𑀺 𑀧𑀸𑀭𑀸𑀯𑀢𑀲𑁆𑀲 𑀦𑀸𑀫 𑀧𑀓𑁆𑀔𑀺𑀦𑁄 𑀯𑀡𑁆𑀡𑀸𑀦𑀺. ‘‘𑀧𑀸𑀭𑀸𑀯𑀢𑀧𑀓𑁆𑀔𑀯𑀡𑁆𑀡𑀸𑀦𑀻’’𑀢𑀺 𑀧𑀸𑀞𑁄, 𑀧𑀸𑀭𑀸𑀯𑀢𑀲𑀓𑀼𑀡𑀲𑁆𑀲 𑀧𑀢𑁆𑀢𑀯𑀡𑁆𑀡𑀸𑀦𑀻𑀢𑀺 𑀅𑀢𑁆𑀣𑁄. 𑀪𑀲𑁆𑀫𑀦𑁆𑀢𑀸𑀢𑀺 𑀙𑀸𑀭𑀺𑀓𑀸𑀧𑀭𑀺𑀬𑀦𑁆𑀢𑀸. 𑀢𑁂𑀦𑀸𑀳 ‘‘𑀙𑀸𑀭𑀺𑀓𑀸𑀯𑀲𑀸𑀦𑀫𑁂𑀯𑀸’’𑀢𑀺. 𑀆𑀳𑀼𑀢𑀺𑀲𑀤𑁆𑀤𑁂𑀦𑁂𑀢𑁆𑀣 ‘‘𑀤𑀺𑀦𑁆𑀦𑀁 𑀬𑀺𑀝𑁆𑀞𑀁 𑀳𑀼𑀢’’𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀤𑀸𑀦𑀁 𑀲𑀩𑁆𑀩𑀫𑁆𑀧𑀺 𑀕𑀳𑀺𑀢𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀧𑀸𑀳𑀼𑀦𑀓𑀲𑀓𑁆𑀓𑀸𑀭𑀸𑀤𑀺𑀪𑁂𑀤𑀁 𑀤𑀺𑀦𑁆𑀦𑀤𑀸𑀦’’𑀦𑁆𑀢𑀺 𑀇𑀫𑀺𑀦𑀸, 𑀯𑀺𑀭𑀽𑀧𑁂𑀓𑀲𑁂𑀲𑀦𑀺𑀤𑁆𑀤𑁂𑀲𑁄 𑀯𑀸 𑀏𑀲. 𑀅𑀢𑁆𑀣𑁄𑀢𑀺 𑀅𑀥𑀺𑀧𑁆𑀧𑀸𑀬𑀢𑁄 𑀅𑀢𑁆𑀣𑁄 𑀲𑀤𑁆𑀤𑀢𑁄 𑀢𑀲𑁆𑀲 𑀅𑀦𑀥𑀺𑀕𑀫𑀺𑀢𑀢𑁆𑀢𑀸. 𑀏𑀯𑀫𑀻𑀤𑀺𑀲𑁂𑀲𑀼. 𑀤𑀩𑁆𑀩𑀦𑁆𑀢𑀺 𑀫𑀼𑀬𑁆𑀳𑀦𑁆𑀢𑀻𑀢𑀺 𑀤𑀢𑁆𑀢𑀽, 𑀩𑀸𑀮𑀧𑀼𑀕𑁆𑀕𑀮𑀸, 𑀢𑁂𑀳𑀺 𑀤𑀢𑁆𑀢𑀽𑀳𑀺. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 𑀆𑀳 ‘‘𑀩𑀸𑀮𑀸 𑀤𑁂𑀦𑁆𑀢𑀻’’𑀢𑀺𑀆𑀤𑀺. 𑀧𑀸𑀴𑀺𑀬𑀁 ‘‘𑀮𑁄𑀓𑁄 𑀅𑀢𑁆𑀣𑀻’’𑀢𑀺 𑀫𑀢𑀺 𑀬𑁂𑀲𑀁 𑀢𑁂 𑀅𑀢𑁆𑀣𑀺𑀓𑀸, ‘‘𑀅𑀢𑁆𑀣𑀻’’𑀢𑀺 𑀘𑁂𑀤𑀁 𑀦𑁂𑀧𑀸𑀢𑀺𑀓𑀧𑀤𑀁, 𑀢𑁂𑀲𑀁 𑀯𑀸𑀤𑁄 𑀅𑀢𑁆𑀣𑀺𑀓𑀯𑀸𑀤𑁄, 𑀢𑀁 𑀅𑀢𑁆𑀣𑀺𑀓𑀯𑀸𑀤𑀁.

𑀢𑀢𑁆𑀣𑀸𑀢𑀺 𑀢𑁂𑀲𑀼 𑀬𑀣𑀸𑀯𑀼𑀢𑁆𑀢𑁂𑀲𑀼 𑀢𑀻𑀲𑀼 𑀫𑀺𑀘𑁆𑀙𑀸𑀯𑀸𑀤𑀻𑀲𑀼. 𑀓𑀫𑁆𑀫𑀁 𑀧𑀝𑀺𑀩𑀸𑀳𑀢𑀺 𑀅𑀓𑀺𑀭𑀺𑀬𑀯𑀸𑀤𑀺𑀪𑀸𑀯𑀢𑁄. 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀆𑀬𑀢𑀺𑀁 𑀉𑀧𑀧𑀢𑁆𑀢𑀺𑀬𑀸 𑀧𑀝𑀺𑀓𑁆𑀔𑀺𑀧𑀦𑀢𑁄. 𑀯𑀺𑀧𑀸𑀓𑀦𑁆𑀢𑀺 𑀘 𑀆𑀦𑀺𑀲𑀁𑀲𑀦𑀺𑀲𑁆𑀲𑀦𑁆𑀤𑀲𑀤𑀺𑀲𑀨𑀮𑀯𑀲𑁂𑀦 𑀢𑀺𑀯𑀺𑀥𑀫𑁆𑀧𑀺 𑀯𑀺𑀧𑀸𑀓𑀁. 𑀉𑀪𑀬𑀁 𑀧𑀝𑀺𑀩𑀸𑀳𑀢𑀺 𑀲𑀩𑁆𑀩𑀲𑁄 𑀳𑁂𑀢𑀼𑀧𑀝𑀺𑀲𑁂𑀥𑀦𑁂𑀦𑁂𑀯 𑀨𑀮𑀲𑁆𑀲𑀸𑀧𑀺 𑀧𑀝𑀺𑀲𑁂𑀥𑀺𑀢𑀢𑁆𑀢𑀸. 𑀉𑀪𑀬𑀦𑁆𑀢𑀺 𑀘 𑀓𑀫𑁆𑀫𑀁 𑀯𑀺𑀧𑀸𑀓𑀫𑁆𑀧𑀺. 𑀲𑁄 𑀳𑀺 ‘‘𑀅𑀳𑁂𑀢𑀽 𑀅𑀧𑁆𑀧𑀘𑁆𑀘𑀬𑀸 𑀲𑀢𑁆𑀢𑀸 𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀺, 𑀯𑀺𑀲𑀼𑀚𑁆𑀛𑀦𑁆𑀢𑀺 𑀘𑀸’’𑀢𑀺 𑀯𑀤𑀦𑁆𑀢𑁄 𑀓𑀫𑁆𑀫𑀲𑁆𑀲 𑀯𑀺𑀬 𑀯𑀺𑀧𑀸𑀓𑀲𑁆𑀲𑀸𑀧𑀺 𑀲𑀁𑀓𑀺𑀮𑁂𑀲𑀯𑀺𑀲𑀼𑀤𑁆𑀥𑀻𑀦𑀁 𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑀚𑁄𑀢𑀦𑀢𑁄 𑀢𑀤𑀼𑀪𑀬𑀁 𑀧𑀝𑀺𑀩𑀸𑀳𑀢𑀺 𑀦𑀸𑀫. 𑀯𑀺𑀧𑀸𑀓𑁄 𑀧𑀝𑀺𑀩𑀸𑀳𑀺𑀢𑁄 𑀳𑁄𑀢𑀺 𑀅𑀲𑀢𑀺 𑀓𑀫𑁆𑀫𑀲𑁆𑀫𑀺𑀁 𑀯𑀺𑀧𑀸𑀓𑀸𑀪𑀸𑀯𑀢𑁄. 𑀓𑀫𑁆𑀫𑀁 𑀧𑀝𑀺𑀩𑀸𑀳𑀺𑀢𑀁 𑀳𑁄𑀢𑀺 𑀅𑀲𑀢𑀺 𑀯𑀺𑀧𑀸𑀓𑁂 𑀓𑀫𑁆𑀫𑀲𑁆𑀲 𑀦𑀺𑀭𑀢𑁆𑀣𑀓𑀢𑀸𑀧𑀢𑁆𑀢𑀺𑀢𑁄. 𑀇𑀢𑀻𑀢𑀺 𑀯𑀼𑀢𑁆𑀢𑀢𑁆𑀣𑀦𑀺𑀤𑀲𑁆𑀲𑀦𑀁. 𑀅𑀢𑁆𑀣𑀢𑁄𑀢𑀺 𑀲𑀭𑀽𑀧𑀢𑁄, 𑀯𑀺𑀲𑀼𑀁 𑀯𑀺𑀲𑀼𑀁 𑀢𑀁𑀢𑀁𑀤𑀺𑀝𑁆𑀞𑀺𑀤𑀻𑀧𑀓𑀪𑀸𑀯𑁂𑀦 𑀧𑀸𑀴𑀺𑀬𑀁 𑀆𑀕𑀢𑀸𑀧𑀺 𑀢𑀤𑀼𑀪𑀬𑀧𑀝𑀺𑀩𑀸𑀳𑀓𑀸𑀯𑀸𑀢𑀺 𑀅𑀢𑁆𑀣𑁄. 𑀧𑀘𑁆𑀘𑁂𑀓𑀁 𑀢𑀺𑀯𑀺𑀥𑀤𑀺𑀝𑁆𑀞𑀺𑀓𑀸 𑀏𑀯 𑀢𑁂 𑀉𑀪𑀬𑀧𑀝𑀺𑀩𑀸𑀳𑀓𑀢𑁆𑀢𑀸. ‘‘𑀉𑀪𑀬𑀧𑁆𑀧𑀝𑀺𑀩𑀸𑀳𑀓𑀸’’𑀢𑀺 𑀳𑀺 𑀳𑁂𑀢𑀼𑀯𑀘𑀦𑀁 𑀳𑁂𑀢𑀼𑀕𑀩𑁆𑀪𑀢𑁆𑀢𑀸 𑀢𑀲𑁆𑀲 𑀯𑀺𑀲𑁂𑀲𑀦𑀲𑁆𑀲. 𑀅𑀳𑁂𑀢𑀼𑀓𑀯𑀸𑀤𑀸 𑀘𑁂𑀯𑀸𑀢𑀺𑀆𑀤𑀺 𑀧𑀝𑀺𑀜𑁆𑀜𑀸𑀯𑀘𑀦𑀁 𑀢𑀧𑁆𑀨𑀮𑀪𑀸𑀯𑁂𑀦 𑀦𑀺𑀘𑁆𑀙𑀺𑀢𑀢𑁆𑀢𑀸. 𑀢𑀲𑁆𑀫𑀸 𑀯𑀺𑀧𑀸𑀓𑀧𑀝𑀺𑀩𑀸𑀳𑀓𑀢𑁆𑀢𑀸 𑀦𑀢𑁆𑀣𑀺𑀓𑀯𑀸𑀤𑀸, 𑀓𑀫𑁆𑀫𑀧𑀝𑀺𑀩𑀸𑀳𑀓𑀢𑁆𑀢𑀸 𑀅𑀓𑀺𑀭𑀺𑀬𑀯𑀸𑀤𑀸, 𑀢𑀤𑀼𑀪𑀬𑀧𑀝𑀺𑀩𑀸𑀳𑀓𑀢𑁆𑀢𑀸 𑀅𑀳𑁂𑀢𑀼𑀓𑀯𑀸𑀤𑀸𑀢𑀺 𑀬𑀣𑀸𑀮𑀸𑀪𑀁 𑀳𑁂𑀢𑀼𑀨𑀮𑀢𑀸𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀬𑁄 𑀳𑀺 𑀯𑀺𑀧𑀸𑀓𑀧𑀝𑀺𑀩𑀸𑀳𑀦𑁂𑀦 𑀦𑀢𑁆𑀣𑀺𑀓𑀤𑀺𑀝𑁆𑀞𑀺𑀓𑁄 𑀉𑀘𑁆𑀙𑁂𑀤𑀯𑀸𑀤𑀻, 𑀲𑁄 𑀅𑀢𑁆𑀣𑀢𑁄 𑀓𑀫𑁆𑀫𑀧𑀝𑀺𑀩𑀸𑀳𑀦𑁂𑀦 𑀅𑀓𑀺𑀭𑀺𑀬𑀤𑀺𑀝𑁆𑀞𑀺𑀓𑁄, 𑀉𑀪𑀬𑀧𑀝𑀺𑀩𑀸𑀳𑀦𑁂𑀦 𑀅𑀳𑁂𑀢𑀼𑀓𑀤𑀺𑀝𑁆𑀞𑀺𑀓𑁄 𑀘 𑀳𑁄𑀢𑀺. 𑀲𑁂𑀲𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄.

‘‘𑀬𑁂 𑀯𑀸 𑀧𑀦𑀸’’𑀢𑀺𑀆𑀤𑀺𑀦𑀸 𑀢𑁂𑀲𑀫𑀦𑀼𑀤𑀺𑀝𑁆𑀞𑀺𑀓𑀸𑀦𑀁 𑀦𑀺𑀬𑀸𑀫𑁄𑀓𑁆𑀓𑀦𑁆𑀢𑀺𑀯𑀺𑀦𑀺𑀘𑁆𑀙𑀬𑁄 𑀯𑀼𑀢𑁆𑀢𑁄. 𑀢𑀢𑁆𑀣 𑀢𑁂𑀲𑀦𑁆𑀢𑀺 𑀧𑀽𑀭𑀡𑀸𑀤𑀻𑀦𑀁. 𑀲𑀚𑁆𑀛𑀸𑀬𑀦𑁆𑀢𑀻𑀢𑀺 𑀢𑀁 𑀤𑀺𑀝𑁆𑀞𑀺𑀤𑀻𑀧𑀓𑀁 𑀕𑀦𑁆𑀣𑀁 𑀬𑀣𑀸 𑀢𑀣𑀸 𑀢𑁂𑀳𑀺 𑀓𑀢𑀁 𑀉𑀕𑁆𑀕𑀳𑁂𑀢𑁆𑀯𑀸 𑀧𑀞𑀦𑁆𑀢𑀺. 𑀯𑀻𑀫𑀁𑀲𑀦𑁆𑀢𑀻𑀢𑀺 𑀢𑀲𑁆𑀲 𑀅𑀢𑁆𑀣𑀁 𑀯𑀺𑀘𑀸𑀭𑁂𑀦𑁆𑀢𑀺. ‘‘𑀢𑁂𑀲’’𑀦𑁆𑀢𑀺𑀆𑀤𑀺 𑀯𑀻𑀫𑀁𑀲𑀦𑀸𑀓𑀸𑀭𑀤𑀲𑁆𑀲𑀦𑀁. ‘‘𑀓𑀭𑁄𑀢𑁄…𑀧𑁂… 𑀉𑀘𑁆𑀙𑀺𑀚𑁆𑀚𑀢𑀻’’𑀢𑀺 𑀏𑀯𑀁 𑀯𑀻𑀫𑀁𑀲𑀦𑁆𑀢𑀸𑀦𑀁 𑀢𑁂𑀲𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂𑀢𑀺 𑀬𑀣𑀸𑀧𑀭𑀺𑀓𑀧𑁆𑀧𑀺𑀢𑁂 𑀓𑀫𑁆𑀫𑀨𑀮𑀸𑀪𑀸𑀯𑀸𑀤𑀺𑀓𑁂 ‘‘𑀓𑀭𑁄𑀢𑁄 𑀦 𑀓𑀭𑀻𑀬𑀢𑀺 𑀧𑀸𑀧’’𑀦𑁆𑀢𑀺𑀆𑀤𑀺 𑀦𑀬𑀧𑁆𑀧𑀯𑀢𑁆𑀢𑀸𑀬 𑀫𑀺𑀘𑁆𑀙𑀸𑀤𑀲𑁆𑀲𑀦𑀲𑀗𑁆𑀔𑀸𑀢𑀸𑀬 𑀮𑀤𑁆𑀥𑀺𑀬𑀸 𑀆𑀭𑀫𑁆𑀫𑀡𑁂. 𑀫𑀺𑀘𑁆𑀙𑀸𑀲𑀢𑀺 𑀲𑀦𑁆𑀢𑀺𑀝𑁆𑀞𑀢𑀻𑀢𑀺 𑀫𑀺𑀘𑁆𑀙𑀸𑀲𑀢𑀺𑀲𑀗𑁆𑀔𑀸𑀢𑀸 𑀮𑀤𑁆𑀥𑀺𑀲𑀳𑀕𑀢𑀸 𑀢𑀡𑁆𑀳𑀸 𑀲𑀦𑁆𑀢𑀺𑀝𑁆𑀞𑀢𑀺. ‘‘𑀓𑀭𑁄𑀢𑁄 𑀦 𑀓𑀭𑀻𑀬𑀢𑀺 𑀧𑀸𑀧’’𑀦𑁆𑀢𑀺𑀆𑀤𑀺𑀯𑀲𑁂𑀦 𑀳𑀺 𑀅𑀦𑀼𑀲𑁆𑀲𑀯𑀽𑀧𑀮𑀤𑁆𑀥𑁂 𑀅𑀢𑁆𑀣𑁂 𑀢𑀤𑀸𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀦𑁂𑀳𑀺 𑀲𑀯𑀺𑀕𑁆𑀕𑀳𑁂 𑀯𑀺𑀬 𑀲𑀭𑀽𑀧𑀢𑁄 𑀘𑀺𑀢𑁆𑀢𑀲𑁆𑀲 𑀧𑀘𑁆𑀘𑀼𑀧𑀝𑁆𑀞𑀺𑀢𑁂 𑀘𑀺𑀭𑀓𑀸𑀮𑀧𑀭𑀺𑀘𑀬𑁂𑀦 ‘‘𑀏𑀯𑀫𑁂𑀢’’𑀦𑁆𑀢𑀺 𑀦𑀺𑀚𑁆𑀛𑀸𑀦𑀓𑁆𑀔𑀫𑀪𑀸𑀯𑀽𑀧𑀕𑀫𑀦𑁂, 𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀘 𑀢𑀣𑀸 𑀢𑀣𑀸 𑀕𑀳𑀺𑀢𑁂 𑀧𑀼𑀦𑀧𑁆𑀧𑀼𑀦𑀁 𑀢𑀣𑁂𑀯 𑀆𑀲𑁂𑀯𑀦𑁆𑀢𑀲𑁆𑀲 𑀩𑀳𑀼𑀮𑀻𑀓𑀭𑁄𑀦𑁆𑀢𑀲𑁆𑀲 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑁂𑀦 𑀲𑀫𑀸𑀦𑀻𑀬𑀫𑀸𑀦𑀸 𑀫𑀺𑀘𑁆𑀙𑀸𑀯𑀸𑀬𑀸𑀫𑀼𑀧𑀢𑁆𑀣𑀫𑁆𑀪𑀺𑀢𑀸 𑀅𑀢𑀁𑀲𑀪𑀸𑀯𑀫𑁆𑀧𑀺 ‘‘𑀢𑀁𑀲𑀪𑀸𑀯’’𑀦𑁆𑀢𑀺 𑀕𑀡𑁆𑀳𑀦𑁆𑀢𑀻 𑀫𑀺𑀘𑁆𑀙𑀸𑀮𑀤𑁆𑀥𑀺𑀲𑀳𑀕𑀢𑀸 𑀢𑀡𑁆𑀳𑀸 𑀫𑀼𑀲𑀸 𑀯𑀺𑀢𑀣𑀁 𑀲𑀭𑀡𑀢𑁄 𑀧𑀯𑀢𑁆𑀢𑀦𑀢𑁄 𑀫𑀺𑀘𑁆𑀙𑀸𑀲𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀘𑀢𑀼𑀭𑀗𑁆𑀕𑀼𑀢𑁆𑀢𑀭𑀝𑀻𑀓𑀸𑀬𑀫𑁆𑀧𑀺 (𑀅. 𑀦𑀺. 𑀅𑀝𑁆𑀞. 𑁨.𑁪.𑁩𑁦) 𑀘𑁂𑀲 𑀅𑀢𑁆𑀣𑁄 𑀯𑀼𑀢𑁆𑀢𑁄𑀬𑁂𑀯. 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀸𑀤𑀬𑁄 𑀯𑀺𑀬 𑀳𑀺 𑀫𑀺𑀘𑁆𑀙𑀸𑀲𑀢𑀺 𑀦𑀸𑀫 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀘𑀺 𑀥𑀫𑁆𑀫𑁄 𑀦𑀢𑁆𑀣𑀺, 𑀢𑀡𑁆𑀳𑀸𑀲𑀻𑀲𑁂𑀦 𑀕𑀳𑀺𑀢𑀸𑀦𑀁 𑀘𑀢𑀼𑀦𑁆𑀦𑀫𑁆𑀧𑀺 𑀅𑀓𑀼𑀲𑀮𑀓𑁆𑀔𑀦𑁆𑀥𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀦𑁆𑀢𑀺 𑀫𑀚𑁆𑀛𑀺𑀫𑀸𑀕𑀫𑀝𑁆𑀞𑀓𑀣𑀸𑀬𑀫𑁆𑀧𑀺 𑀲𑀮𑁆𑀮𑁂𑀔𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 (𑀫. 𑀦𑀺. 𑀅𑀝𑁆𑀞. 𑁧.𑁮𑁩) 𑀯𑀼𑀢𑁆𑀢𑀁.

𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀻𑀢𑀺 𑀬𑀣𑀸𑀲𑀓𑀁 𑀯𑀺𑀢𑀓𑁆𑀓𑀸𑀤𑀺𑀧𑀘𑁆𑀘𑀬𑀮𑀸𑀪𑁂𑀦 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀅𑀯𑀝𑁆𑀞𑀺𑀢𑀢𑀸𑀬 𑀅𑀦𑁂𑀓𑀕𑁆𑀕𑀢𑀁 𑀧𑀳𑀸𑀬 𑀏𑀓𑀕𑁆𑀕𑀁 𑀅𑀧𑁆𑀧𑀺𑀢𑀁 𑀯𑀺𑀬 𑀳𑁄𑀢𑀺, 𑀘𑀺𑀢𑁆𑀢𑀲𑀻𑀲𑁂𑀦 𑀘𑁂𑀢𑁆𑀣 𑀫𑀺𑀘𑁆𑀙𑀸𑀲𑀫𑀸𑀥𑀺 𑀏𑀯 𑀯𑀼𑀢𑁆𑀢𑁄. 𑀲𑁄 𑀳𑀺 𑀧𑀘𑁆𑀘𑀬𑀯𑀺𑀲𑁂𑀲𑁂𑀳𑀺 𑀮𑀤𑁆𑀥𑀪𑀸𑀯𑀦𑀸𑀩𑀮𑁄 𑀈𑀤𑀺𑀲𑁂 𑀞𑀸𑀦𑁂 𑀲𑀫𑀸𑀥𑀸𑀦𑀧𑀢𑀺𑀭𑀽𑀧𑀓𑀓𑀺𑀘𑁆𑀘𑀓𑀭𑁄𑀬𑁂𑀯 𑀳𑁄𑀢𑀺 𑀯𑀸𑀮𑀯𑀺𑀚𑁆𑀛𑀦𑀸𑀤𑀻𑀲𑀼 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀚𑀯𑀦𑀸𑀦𑀺 𑀚𑀯𑀦𑁆𑀢𑀻𑀢𑀺 𑀅𑀦𑁂𑀓𑀓𑁆𑀔𑀢𑁆𑀢𑀼𑀁 𑀢𑁂𑀦𑀸𑀓𑀸𑀭𑁂𑀦 𑀧𑀼𑀩𑁆𑀩𑀪𑀸𑀕𑀺𑀬𑁂𑀲𑀼 𑀚𑀯𑀦𑀯𑀸𑀭𑁂𑀲𑀼 𑀧𑀯𑀢𑁆𑀢𑁂𑀲𑀼 𑀲𑀦𑁆𑀦𑀺𑀝𑁆𑀞𑀸𑀦𑀪𑀽𑀢𑁂 𑀲𑀩𑁆𑀩𑀧𑀘𑁆𑀙𑀺𑀫𑁂 𑀚𑀯𑀦𑀯𑀸𑀭𑁂 𑀲𑀢𑁆𑀢 𑀚𑀯𑀦𑀸𑀦𑀺 𑀚𑀯𑀦𑁆𑀢𑀺. ‘‘𑀧𑀞𑀫𑀚𑀯𑀦𑁂 𑀲𑀢𑁂𑀓𑀺𑀘𑁆𑀙𑀸 𑀳𑁄𑀦𑁆𑀢𑀺, 𑀢𑀣𑀸 𑀤𑀼𑀢𑀺𑀬𑀸𑀤𑀻𑀲𑀽’’𑀢𑀺 𑀇𑀤𑀁 𑀥𑀫𑁆𑀫𑀲𑀪𑀸𑀯𑀤𑀲𑁆𑀲𑀦𑀫𑁂𑀯, 𑀦 𑀧𑀦 𑀢𑀲𑁆𑀫𑀺𑀁 𑀔𑀡𑁂 𑀢𑁂𑀲𑀁 𑀢𑀺𑀓𑀺𑀘𑁆𑀙𑀸 𑀓𑁂𑀦𑀘𑀺 𑀲𑀓𑁆𑀓𑀸 𑀓𑀸𑀢𑀼𑀦𑁆𑀢𑀺 𑀤𑀲𑁆𑀲𑀦𑀁 𑀢𑁂𑀲𑁆𑀯𑁂𑀯 𑀞𑀢𑁆𑀯𑀸 𑀲𑀢𑁆𑀢𑀫𑀚𑀯𑀦𑀲𑁆𑀲 𑀅𑀯𑀲𑁆𑀲𑀫𑀼𑀧𑁆𑀧𑀚𑁆𑀚𑀫𑀸𑀦𑀲𑁆𑀲 𑀦𑀺𑀯𑀢𑁆𑀢𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸, 𑀏𑀯𑀁 𑀮𑀳𑀼𑀧𑀭𑀺𑀯𑀢𑁆𑀢𑁂 𑀘 𑀘𑀺𑀢𑁆𑀢𑀯𑀸𑀭𑁂 𑀑𑀯𑀸𑀤𑀸𑀦𑀼𑀲𑀸𑀲𑀦 𑀯𑀲𑁂𑀦 𑀢𑀺𑀓𑀺𑀘𑁆𑀙𑀸𑀬 𑀅𑀲𑀫𑁆𑀪𑀯𑀢𑁄. 𑀢𑁂𑀦𑀸𑀳 ‘‘𑀩𑀼𑀤𑁆𑀥𑀸𑀦𑀫𑁆𑀧𑀺 𑀅𑀢𑁂𑀓𑀺𑀘𑁆𑀙𑀸 𑀅𑀦𑀺𑀯𑀢𑁆𑀢𑀺𑀦𑁄’’𑀢𑀺. 𑀅𑀭𑀺𑀝𑁆𑀞𑀓𑀡𑁆𑀝𑀓𑀲𑀤𑀺𑀲𑀸𑀢𑀺 𑀅𑀭𑀺𑀝𑁆𑀞𑀪𑀺𑀓𑁆𑀔𑀼𑀓𑀡𑁆𑀝𑀓𑀲𑀸𑀫𑀡𑁂𑀭𑀲𑀤𑀺𑀲𑀸, 𑀢𑁂 𑀯𑀺𑀬 𑀅𑀢𑁂𑀓𑀺𑀘𑁆𑀙𑀸 𑀅𑀦𑀺𑀯𑀢𑁆𑀢𑀺𑀦𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀕𑀢𑀺𑀓𑀸𑀬𑁂𑀯 𑀚𑀸𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀢𑁆𑀣𑀸𑀢𑀺 𑀢𑁂𑀲𑀼 𑀢𑀻𑀲𑀼 𑀫𑀺𑀘𑁆𑀙𑀸𑀤𑀲𑁆𑀲𑀦𑁂𑀲𑀼. 𑀓𑁄𑀘𑀺 𑀏𑀓𑀁 𑀤𑀲𑁆𑀲𑀦𑀁 𑀑𑀓𑁆𑀓𑀫𑀢𑀻𑀢𑀺 𑀬𑀲𑁆𑀲 𑀏𑀓𑀲𑁆𑀫𑀺𑀁𑀬𑁂𑀯 𑀅𑀪𑀺𑀦𑀺𑀯𑁂𑀲𑁄, 𑀆𑀲𑁂𑀯𑀦𑀸 𑀘 𑀧𑀯𑀢𑁆𑀢𑀸, 𑀲𑁄 𑀏𑀓𑀫𑁂𑀯 𑀤𑀲𑁆𑀲𑀦𑀁 𑀑𑀓𑁆𑀓𑀫𑀢𑀺. 𑀓𑁄𑀘𑀺 𑀤𑁆𑀯𑁂, 𑀓𑁄𑀘𑀺 𑀢𑀻𑀡𑀺𑀧𑀻𑀢𑀺 𑀬𑀲𑁆𑀲 𑀤𑁆𑀯𑀻𑀲𑀼, 𑀢𑀻𑀲𑀼𑀧𑀺 𑀯𑀸 𑀅𑀪𑀺𑀦𑀺𑀯𑁂𑀲𑁄, 𑀆𑀲𑁂𑀯𑀦𑀸 𑀘 𑀧𑀯𑀢𑁆𑀢𑀸, 𑀲𑁄 𑀤𑁆𑀯𑁂, 𑀢𑀻𑀡𑀺𑀧𑀺 𑀑𑀓𑁆𑀓𑀫𑀢𑀺, 𑀏𑀢𑁂𑀦 𑀧𑀦 𑀯𑀘𑀦𑁂𑀦 𑀬𑀸 𑀧𑀼𑀩𑁆𑀩𑁂 ‘‘𑀇𑀢𑀺 𑀲𑀩𑁆𑀩𑁂𑀧𑁂𑀢𑁂 𑀅𑀢𑁆𑀣𑀢𑁄 𑀉𑀪𑀬𑀧𑁆𑀧𑀝𑀺𑀩𑀸𑀳𑀓𑀸’’𑀢𑀺𑀆𑀤𑀺𑀦𑀸 𑀉𑀪𑀬𑀧𑁆𑀧𑀝𑀺𑀩𑀸𑀳𑀓𑀢𑀸𑀫𑀼𑀔𑁂𑀦 𑀤𑀻𑀧𑀺𑀢𑀸 𑀅𑀢𑁆𑀣𑀢𑁄 𑀲𑀺𑀤𑁆𑀥𑀸 𑀲𑀩𑁆𑀩𑀤𑀺𑀝𑁆𑀞𑀺𑀓𑀢𑀸, 𑀲𑀸 𑀧𑀼𑀩𑁆𑀩𑀪𑀸𑀕𑀺𑀬𑀸. 𑀬𑀸 𑀧𑀦 𑀫𑀺𑀘𑁆𑀙𑀢𑁆𑀢𑀦𑀺𑀬𑀸𑀫𑁄𑀓𑁆𑀓𑀦𑁆𑀢𑀺𑀪𑀽𑀢𑀸, 𑀲𑀸 𑀬𑀣𑀸𑀲𑀓𑀁 𑀧𑀘𑁆𑀘𑀬𑀲𑀫𑀼𑀤𑀸𑀕𑀫𑀲𑀺𑀤𑁆𑀥𑀺𑀢𑁄 𑀪𑀺𑀦𑁆𑀦𑀸𑀭𑀫𑁆𑀫𑀡𑀸𑀦𑀁 𑀯𑀺𑀬 𑀯𑀺𑀲𑁂𑀲𑀸𑀥𑀺𑀕𑀫𑀸𑀦𑀁 𑀏𑀓𑀚𑁆𑀛𑀁 𑀅𑀦𑀼𑀧𑁆𑀧𑀢𑁆𑀢𑀺𑀬𑀸 𑀅𑀜𑁆𑀜𑀫𑀜𑁆𑀜𑀁 𑀅𑀩𑁆𑀩𑁄𑀓𑀺𑀡𑁆𑀡𑀸 𑀏𑀯𑀸𑀢𑀺 𑀤𑀲𑁆𑀲𑁂𑀢𑀺. ‘‘𑀏𑀓𑀲𑁆𑀫𑀺𑀁 𑀑𑀓𑁆𑀓𑀦𑁆𑀢𑁂𑀧𑀻’’𑀢𑀺𑀆𑀤𑀺𑀦𑀸 𑀢𑀺𑀲𑁆𑀲𑀦𑁆𑀦𑀫𑁆𑀧𑀺 𑀤𑀺𑀝𑁆𑀞𑀻𑀦𑀁 𑀲𑀫𑀸𑀦𑀲𑀸𑀫𑀢𑁆𑀣𑀺𑀬𑀢𑀁, 𑀲𑀫𑀸𑀦𑀨𑀮𑀢𑀜𑁆𑀘 𑀯𑀺𑀪𑀸𑀯𑁂𑀢𑀺. 𑀲𑀕𑁆𑀕𑀸𑀯𑀭𑀡𑀸𑀤𑀺𑀦𑀸 𑀳𑁂𑀢𑀸 𑀲𑀫𑀸𑀦𑀲𑀸𑀫𑀢𑁆𑀣𑀺𑀬𑀸 𑀘𑁂𑀯 𑀲𑀫𑀸𑀦𑀨𑀮𑀸 𑀘, 𑀢𑀲𑁆𑀫𑀸 𑀢𑀺𑀲𑁆𑀲𑁄𑀧𑀺 𑀘𑁂𑀢𑀸 𑀏𑀓𑀲𑁆𑀲 𑀉𑀧𑁆𑀧𑀦𑁆𑀦𑀸𑀧𑀺 𑀅𑀩𑁆𑀩𑁄𑀓𑀺𑀡𑁆𑀡𑀸 𑀏𑀯, 𑀏𑀓𑀸𑀬 𑀯𑀺𑀧𑀸𑀓𑁂 𑀤𑀺𑀦𑁆𑀦𑁂 𑀇𑀢𑀭𑀸 𑀢𑀲𑁆𑀲𑀸 𑀅𑀦𑀼𑀩𑀮𑀧𑁆𑀧𑀤𑀸𑀬𑀺𑀓𑀸𑀬𑁄𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀧𑀢𑁆𑀢𑁄 𑀲𑀕𑁆𑀕𑀫𑀕𑁆𑀕𑀸𑀯𑀭𑀡𑀜𑁆𑀘𑁂𑀯𑀸’’𑀢𑀺𑀆𑀤𑀺𑀁 𑀯𑀢𑁆𑀯𑀸 ‘‘𑀅𑀪𑀩𑁆𑀩𑁄’’𑀢𑀺𑀆𑀤𑀺𑀦𑀸 𑀢𑀤𑁂𑀯𑀢𑁆𑀣𑀁 𑀆𑀯𑀺𑀓𑀭𑁄𑀢𑀺. 𑀫𑁄𑀓𑁆𑀔𑀫𑀕𑁆𑀕𑀸𑀯𑀭𑀡𑀦𑁆𑀢𑀺 𑀦𑀺𑀩𑁆𑀩𑀸𑀦𑀧𑀣𑀪𑀽𑀢𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑁆𑀲 𑀦𑀺𑀯𑀸𑀭𑀡𑀁. 𑀧𑀕𑁂𑀯𑀸𑀢𑀺 𑀧𑀝𑀺𑀓𑁆𑀔𑁂𑀧𑀢𑁆𑀣𑁂 𑀦𑀺𑀧𑀸𑀢𑁄, 𑀫𑁄𑀓𑁆𑀔𑀲𑀗𑁆𑀔𑀸𑀢𑀁 𑀧𑀦 𑀦𑀺𑀩𑁆𑀩𑀸𑀦𑀁 𑀕𑀦𑁆𑀢𑀼𑀁 𑀓𑀸 𑀦𑀸𑀫 𑀓𑀣𑀸𑀢𑀺 𑀅𑀢𑁆𑀣𑁄. 𑀅𑀧𑀺𑀘 𑀧𑀕𑁂𑀯𑀸𑀢𑀺 𑀧𑀸 𑀏𑀯, 𑀧𑀞𑀫𑀢𑀭𑀫𑁂𑀯 𑀫𑁄𑀓𑁆𑀔𑀁 𑀕𑀦𑁆𑀢𑀼𑀫𑀪𑀩𑁆𑀩𑁄, 𑀫𑁄𑀓𑁆𑀔𑀕𑀫𑀦𑀢𑁄𑀧𑀺 𑀤𑀽𑀭𑀢𑀭𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀫𑀜𑁆𑀜𑀢𑁆𑀣𑀸𑀧𑀺 𑀬𑀣𑀸𑀭𑀳𑀁.

‘‘𑀯𑀝𑁆𑀝𑀔𑀸𑀡𑀼 𑀦𑀸𑀫𑁂𑀲 𑀲𑀢𑁆𑀢𑁄’’𑀢𑀺 𑀇𑀤𑀁 𑀯𑀘𑀦𑀁 𑀦𑁂𑀬𑁆𑀬𑀢𑁆𑀣𑀫𑁂𑀯, 𑀦 𑀦𑀻𑀢𑀢𑁆𑀣𑀁. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀧𑀧𑀜𑁆𑀘𑀲𑀽𑀤𑀦𑀺𑀬𑀁 𑀦𑀸𑀫 𑀫𑀚𑁆𑀛𑀺𑀫𑀸𑀕𑀫𑀝𑁆𑀞𑀓𑀣𑀸𑀬𑀁 ‘‘𑀓𑀺𑀁 𑀧𑀦𑁂𑀲 𑀏𑀓𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀦𑀺𑀬𑀢𑁄 𑀳𑁄𑀢𑀺, 𑀉𑀤𑀸𑀳𑀼 𑀅𑀜𑁆𑀜𑀲𑁆𑀫𑀺𑀫𑁆𑀧𑀻𑀢𑀺? 𑀏𑀓𑀲𑁆𑀫𑀺𑀁𑀬𑁂𑀯 𑀦𑀺𑀬𑀢𑁄, 𑀆𑀲𑁂𑀯𑀦𑀯𑀲𑁂𑀦 𑀧𑀦 𑀪𑀯𑀦𑁆𑀢𑀭𑁂𑀧𑀺 𑀢𑀁 𑀢𑀁 𑀤𑀺𑀝𑁆𑀞𑀺𑀁 𑀭𑁄𑀘𑁂𑀢𑀺𑀬𑁂𑀯𑀸’’𑀢𑀺 (𑀫. 𑀦𑀺. 𑀅𑀝𑁆𑀞. 𑁩.𑁧𑁦𑁩). 𑀅𑀓𑀼𑀲𑀮𑀜𑁆𑀳𑀺 𑀦𑀸𑀫𑁂𑀢𑀁 𑀅𑀩𑀮𑀁 𑀤𑀼𑀩𑁆𑀩𑀮𑀁, 𑀦 𑀓𑀼𑀲𑀮𑀁 𑀯𑀺𑀬 𑀲𑀩𑀮𑀁 𑀫𑀳𑀸𑀩𑀮𑀁, 𑀢𑀲𑁆𑀫𑀸 ‘‘𑀏𑀓𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀦𑀺𑀬𑀢𑁄’’𑀢𑀺 𑀢𑀢𑁆𑀣 𑀯𑀼𑀢𑁆𑀢𑀁. 𑀅𑀜𑁆𑀜𑀣𑀸 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑁄 𑀯𑀺𑀬 𑀫𑀺𑀘𑁆𑀙𑀢𑁆𑀢𑀦𑀺𑀬𑀸𑀫𑁄𑀧𑀺 𑀅𑀘𑁆𑀘𑀦𑁆𑀢𑀺𑀓𑁄 𑀲𑀺𑀬𑀸, 𑀦 𑀘 𑀅𑀘𑁆𑀘𑀦𑁆𑀢𑀺𑀓𑁄. 𑀬𑀤𑁂𑀯𑀁 𑀯𑀝𑁆𑀝𑀔𑀸𑀡𑀼𑀚𑁄𑀢𑀦𑀸 𑀓𑀣𑀁 𑀬𑀼𑀚𑁆𑀚𑁂𑀬𑁆𑀬𑀸𑀢𑀺 𑀆𑀳 ‘‘𑀆𑀲𑁂𑀯𑀦𑀯𑀲𑁂𑀦𑀸’’𑀢𑀺𑀆𑀤𑀺, 𑀢𑀲𑁆𑀫𑀸 𑀬𑀣𑀸 𑀲𑀢𑁆𑀢𑀗𑁆𑀕𑀼𑀢𑁆𑀢𑀭𑀧𑀸𑀴𑀺𑀬𑀁 ‘‘𑀲𑀓𑀺𑀁 𑀦𑀺𑀫𑀼𑀕𑁆𑀕𑁄𑀧𑀺 𑀦𑀺𑀫𑀼𑀕𑁆𑀕𑁄 𑀏𑀯 𑀩𑀸𑀮𑁄’’𑀢𑀺 [𑀅. 𑀦𑀺. 𑁭.𑁧𑁫 (𑀅𑀢𑁆𑀣𑀢𑁄 𑀲𑀫𑀸𑀦𑀁)] 𑀯𑀼𑀢𑁆𑀢𑀁, 𑀏𑀯𑀁 𑀯𑀝𑁆𑀝𑀔𑀸𑀡𑀼𑀚𑁄𑀢𑀦𑀸𑀧𑀺 𑀯𑀼𑀢𑁆𑀢𑀸. 𑀬𑀸𑀤𑀺𑀲𑁂 𑀳𑀺 𑀧𑀘𑁆𑀘𑀬𑁂 𑀧𑀝𑀺𑀘𑁆𑀘 𑀅𑀬𑀁 𑀢𑀁 𑀢𑀁 𑀤𑀲𑁆𑀲𑀦𑀁 𑀑𑀓𑁆𑀓𑀦𑁆𑀢𑁄, 𑀧𑀼𑀦 𑀓𑀤𑀸𑀘𑀺 𑀢𑀧𑁆𑀧𑀝𑀺𑀧𑀓𑁆𑀔𑁂 𑀧𑀘𑁆𑀘𑀬𑁂 𑀧𑀝𑀺𑀘𑁆𑀘 𑀢𑀢𑁄 𑀲𑀻𑀲𑀼𑀓𑁆𑀔𑀺𑀧𑀦𑀫𑀲𑁆𑀲 𑀦 𑀳𑁄𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀢𑀲𑁆𑀫𑀸 𑀢𑀢𑁆𑀣, (𑀫. 𑀦𑀺. 𑀅𑀝𑁆𑀞. 𑁩.𑁧𑁦𑁨) 𑀇𑀥 𑀘 𑀅𑀝𑁆𑀞𑀓𑀣𑀸𑀬𑀁 ‘‘𑀏𑀯𑀭𑀽𑀧𑀲𑁆𑀲 𑀳𑀺 𑀬𑁂𑀪𑀼𑀬𑁆𑀬𑁂𑀦 𑀪𑀯𑀢𑁄 𑀯𑀼𑀝𑁆𑀞𑀸𑀦𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀬𑁂𑀪𑀼𑀬𑁆𑀬𑀕𑁆𑀕𑀳𑀡𑀁 𑀓𑀢𑀁, 𑀇𑀢𑀺 𑀆𑀲𑁂𑀯𑀦𑀯𑀲𑁂𑀦 𑀪𑀯𑀦𑁆𑀢𑀭𑁂𑀧𑀺 𑀢𑀁𑀢𑀁𑀤𑀺𑀝𑁆𑀞𑀺𑀬𑀸 𑀭𑁄𑀘𑀦𑀢𑁄 𑀬𑁂𑀪𑀼𑀬𑁆𑀬𑁂𑀦𑀲𑁆𑀲 𑀪𑀯𑀢𑁄 𑀯𑀼𑀝𑁆𑀞𑀸𑀦𑀁 𑀦𑀢𑁆𑀣𑀻𑀢𑀺 𑀓𑀢𑁆𑀯𑀸 𑀯𑀝𑁆𑀝𑀔𑀸𑀡𑀼𑀓𑁄 𑀦𑀸𑀫𑁂𑀲 𑀚𑀸𑀢𑁄, 𑀦 𑀧𑀦 𑀫𑀺𑀘𑁆𑀙𑀢𑁆𑀢𑀦𑀺𑀬𑀸𑀫𑀲𑁆𑀲 𑀅𑀘𑁆𑀘𑀦𑁆𑀢𑀺𑀓𑀢𑀸𑀬𑀸𑀢𑀺 𑀦𑀻𑀳𑀭𑀺𑀢𑁆𑀯𑀸 𑀜𑀸𑀢𑀩𑁆𑀩𑀢𑁆𑀣𑀢𑀸𑀬 𑀦𑁂𑀬𑁆𑀬𑀢𑁆𑀣𑀫𑀺𑀤𑀁, 𑀦 𑀦𑀻𑀢𑀢𑁆𑀣𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀁 𑀲𑀦𑁆𑀥𑀸𑀬 𑀅𑀪𑀺𑀥𑀫𑁆𑀫𑁂𑀧𑀺 ‘‘𑀅𑀭𑀳𑀸, 𑀬𑁂 𑀘 𑀧𑀼𑀣𑀼𑀚𑁆𑀚𑀦𑀸 𑀫𑀕𑁆𑀕𑀁 𑀦 𑀧𑀝𑀺𑀮𑀪𑀺𑀲𑁆𑀲𑀦𑁆𑀢𑀺, 𑀢𑁂 𑀭𑀽𑀧𑀓𑁆𑀔𑀦𑁆𑀥𑀜𑁆𑀘 𑀦 𑀧𑀭𑀺𑀚𑀸𑀦𑀦𑁆𑀢𑀺, 𑀯𑁂𑀤𑀦𑀸𑀓𑁆𑀔𑀦𑁆𑀥𑀜𑁆𑀘 𑀦 𑀧𑀭𑀺𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺𑀆𑀤𑀺 (𑀬𑀫. 𑁧.𑀔𑀦𑁆𑀥𑀬𑀫𑀓 𑁨𑁧𑁦) 𑀯𑀼𑀢𑁆𑀢𑀁. 𑀧𑀣𑀯𑀺𑀕𑁄𑀧𑀓𑁄𑀢𑀺 𑀬𑀣𑀸𑀯𑀼𑀢𑁆𑀢𑀓𑀸𑀭𑀡𑁂𑀦 𑀧𑀣𑀯𑀺𑀧𑀸𑀮𑀓𑁄. 𑀢𑀤𑀢𑁆𑀣𑀁 𑀲𑀫𑀢𑁆𑀣𑁂𑀢𑀼𑀁 ‘‘𑀬𑁂𑀪𑀼𑀬𑁆𑀬𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀏𑀯𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀧𑀭𑀫𑀲𑀸𑀯𑀚𑁆𑀚𑀸𑀦𑀼𑀲𑀸𑀭𑁂𑀦 𑀲𑁄𑀢𑀽𑀦𑀁 𑀲𑀢𑀺𑀫𑀼𑀧𑁆𑀧𑀸𑀤𑁂𑀦𑁆𑀢𑁄 ‘‘𑀢𑀲𑁆𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀏𑀯𑀁 𑀲𑀁𑀲𑀸𑀭𑀔𑀸𑀡𑀼𑀪𑀸𑀯𑀲𑁆𑀲𑀸𑀧𑀺 𑀧𑀘𑁆𑀘𑀬𑁄 𑀅𑀧𑀡𑁆𑀡𑀓𑀚𑀸𑀢𑁄, 𑀢𑀲𑁆𑀫𑀸 𑀧𑀭𑀺𑀯𑀚𑁆𑀚𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀓𑀮𑁆𑀬𑀸𑀡𑀚𑀦𑀦𑁆𑀢𑀺 𑀓𑀮𑁆𑀬𑀸𑀡𑀥𑀫𑁆𑀫𑀯𑀺𑀭𑀳𑀺𑀢𑀚𑀦𑀁 𑀅𑀲𑀸𑀥𑀼𑀚𑀦𑀁. 𑀆𑀲𑀻𑀯𑀺𑀲𑀦𑁆𑀢𑀺 𑀆𑀲𑀼𑀫𑀸𑀕𑀢𑀳𑀮𑀸𑀳𑀮𑀁. 𑀪𑀽𑀢𑀺𑀓𑀸𑀫𑁄𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑀸𑀦𑀁 𑀯𑀲𑁂𑀦 𑀅𑀢𑁆𑀢𑀦𑁄 𑀕𑀼𑀡𑁂𑀳𑀺 𑀯𑀼𑀟𑁆𑀠𑀺𑀓𑀸𑀫𑁄. 𑀯𑀺𑀘𑀓𑁆𑀔𑀡𑁄𑀢𑀺 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀯𑀺𑀯𑀺𑀥𑀢𑁆𑀣𑀲𑁆𑀲 𑀧𑀲𑁆𑀲𑀓𑁄, 𑀥𑀻𑀭𑁄𑀢𑀺 𑀅𑀢𑁆𑀣𑁄.

𑀧𑀓𑀼𑀥𑀓𑀘𑁆𑀘𑀸𑀬𑀦𑀯𑀸𑀤𑀯𑀡𑁆𑀡𑀦𑀸

𑁧𑁭𑁪. ‘‘𑀅𑀓𑀝𑀸’’𑀢𑀺 𑀏𑀢𑁆𑀣 𑀢-𑀓𑀸𑀭𑀲𑁆𑀲 𑀝-𑀓𑀸𑀭𑀸𑀤𑁂𑀲𑁄𑀢𑀺 𑀆𑀳 ‘‘𑀅𑀓𑀢𑀸’’𑀢𑀺, 𑀲𑀫𑁂𑀦, 𑀯𑀺𑀲𑀫𑁂𑀦 𑀯𑀸 𑀓𑁂𑀦𑀘𑀺𑀧𑀺 𑀳𑁂𑀢𑀼𑀦𑀸 𑀅𑀓𑀢𑀸, 𑀦 𑀯𑀺𑀳𑀺𑀢𑀸𑀢𑀺 𑀅𑀢𑁆𑀣𑁄. 𑀢𑀣𑀸 𑀅𑀓𑀝𑀯𑀺𑀥𑀸𑀢𑀺 𑀏𑀢𑁆𑀣𑀸𑀧𑀺. 𑀦𑀢𑁆𑀣𑀺 𑀓𑀢𑀯𑀺𑀥𑁄 𑀓𑀭𑀡𑀯𑀺𑀥𑀺 𑀏𑀢𑁂𑀲𑀦𑁆𑀢𑀺 𑀅𑀓𑀝𑀯𑀺𑀥𑀸. 𑀧𑀤𑀤𑁆𑀯𑀬𑁂𑀦𑀸𑀧𑀺 𑀮𑁄𑀓𑁂 𑀓𑁂𑀦𑀘𑀺 𑀳𑁂𑀢𑀼𑀧𑀘𑁆𑀘𑀬𑁂𑀦 𑀦𑁂𑀲𑀁 𑀅𑀦𑀺𑀩𑁆𑀩𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀏𑀯𑀁 𑀓𑀭𑁄𑀳𑀻’’𑀢𑀺𑀆𑀤𑀺. 𑀇𑀤𑁆𑀥𑀺𑀬𑀸𑀧𑀺 𑀦 𑀦𑀺𑀫𑁆𑀫𑀺𑀢𑀸𑀢𑀺 𑀓𑀲𑁆𑀲𑀘𑀺 𑀇𑀤𑁆𑀥𑀺𑀫𑀢𑁄 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲, 𑀤𑁂𑀯𑀲𑁆𑀲, 𑀇𑀲𑁆𑀲𑀭𑀸𑀤𑀺𑀦𑁄 𑀘 𑀇𑀤𑁆𑀥𑀺𑀬𑀸𑀧𑀺 𑀦 𑀦𑀺𑀫𑁆𑀫𑀺𑀢𑀸. 𑀅𑀦𑀺𑀫𑁆𑀫𑀸𑀧𑀺𑀢𑀸𑀢𑀺 𑀓𑀲𑁆𑀲𑀘𑀺 𑀅𑀦𑀺𑀫𑁆𑀫𑀸𑀧𑀺𑀢𑀸. 𑀓𑀸𑀫𑀁 𑀲𑀤𑁆𑀤𑀢𑁄 𑀬𑀼𑀢𑁆𑀢𑀁, 𑀅𑀢𑁆𑀣𑀢𑁄 𑀘 𑀧𑀼𑀭𑀺𑀫𑁂𑀦 𑀲𑀫𑀸𑀦𑀁, 𑀢𑀣𑀸𑀧𑀺 𑀧𑀸𑀴𑀺𑀬𑀫𑀝𑁆𑀞𑀓𑀣𑀸𑀬𑀜𑁆𑀘 𑀅𑀦𑀸𑀕𑀢𑀫𑁂𑀯 𑀅𑀕𑀳𑁂𑀢𑀩𑁆𑀩𑀪𑀸𑀯𑁂 𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀢𑀁 𑀦𑁂𑀯 𑀧𑀸𑀴𑀺𑀬’’𑀦𑁆𑀢𑀺𑀆𑀤𑀺𑀦𑀸.

𑀩𑁆𑀭𑀳𑁆𑀫𑀚𑀸𑀮𑀲𑀼𑀢𑁆𑀢𑀲𑀁𑀯𑀡𑁆𑀡𑀦𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁧.𑁩𑁦) 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀇𑀤𑀫𑁂𑀢𑁆𑀣 𑀬𑁄𑀚𑀦𑀸𑀫𑀢𑁆𑀢𑀁 𑁋 𑀯𑀜𑁆𑀛𑀸𑀢𑀺 𑀳𑀺 𑀯𑀜𑁆𑀛𑀧𑀲𑀼𑀯𑀜𑁆𑀛𑀢𑀸𑀮𑀸𑀤𑀬𑁄 𑀯𑀺𑀬 𑀅𑀨𑀮𑀸 𑀓𑀲𑁆𑀲𑀘𑀺 𑀅𑀚𑀦𑀓𑀸, 𑀢𑁂𑀦 𑀧𑀣𑀯𑀺𑀓𑀸𑀬𑀸𑀤𑀻𑀦𑀁 𑀭𑀽𑀧𑀸𑀤𑀺𑀚𑀦𑀓𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀭𑀽𑀧𑀲𑀤𑁆𑀤𑀸𑀤𑀬𑁄 𑀳𑀺 𑀧𑀣𑀯𑀺𑀓𑀸𑀬𑀸𑀤𑀻𑀳𑀺 𑀅𑀧𑁆𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀓𑀸𑀢𑀺 𑀢𑀲𑁆𑀲 𑀮𑀤𑁆𑀥𑀺. 𑀧𑀩𑁆𑀩𑀢𑀲𑁆𑀲 𑀓𑀽𑀝𑀫𑀺𑀯 𑀞𑀺𑀢𑀸𑀢𑀺 𑀓𑀽𑀝𑀝𑁆𑀞𑀸, 𑀬𑀣𑀸 𑀧𑀩𑁆𑀩𑀢𑀓𑀽𑀝𑀁 𑀓𑁂𑀦𑀘𑀺 𑀅𑀦𑀺𑀩𑁆𑀩𑀢𑁆𑀢𑀺𑀢𑀁 𑀓𑀲𑁆𑀲𑀘𑀺 𑀘 𑀅𑀦𑀺𑀩𑁆𑀩𑀢𑁆𑀢𑀓𑀁, 𑀏𑀯𑀫𑁂𑀢𑁂𑀧𑀺 𑀲𑀢𑁆𑀢𑀓𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀫𑀺𑀤𑀁 ‘‘𑀩𑀻𑀚𑀢𑁄 𑀅𑀗𑁆𑀓𑀼𑀭𑀸𑀤𑀺 𑀚𑀸𑀬𑀢𑀻’’𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀯𑀺𑀚𑁆𑀚𑀫𑀸𑀦𑀫𑁂𑀯 𑀢𑀢𑁄 𑀦𑀺𑀓𑁆𑀔𑀫𑀢𑀺, 𑀦 𑀅𑀯𑀺𑀚𑁆𑀚𑀫𑀸𑀦𑀁, 𑀇𑀢𑀭𑀣𑀸 𑀅𑀜𑁆𑀜𑀢𑁄𑀧𑀺 𑀅𑀜𑁆𑀜𑀲𑁆𑀲 𑀉𑀧𑀮𑀤𑁆𑀥𑀺 𑀲𑀺𑀬𑀸, 𑀏𑀯𑀫𑁂𑀢𑁂𑀧𑀺 𑀲𑀢𑁆𑀢𑀓𑀸𑀬𑀸, 𑀢𑀲𑁆𑀫𑀸 𑀏𑀲𑀺𑀓𑀝𑁆𑀞𑀸𑀬𑀺𑀝𑁆𑀞𑀺𑀢𑀸𑀢𑀺. 𑀞𑀺𑀢𑀢𑁆𑀢𑀸𑀢𑀺 𑀦𑀺𑀩𑁆𑀩𑀺𑀓𑀸𑀭𑀪𑀸𑀯𑁂𑀦 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀢𑁆𑀢𑀸. 𑀦 𑀘𑀮𑀦𑁆𑀢𑀻𑀢𑀺 𑀦 𑀯𑀺𑀓𑀸𑀭𑀫𑀸𑀧𑀚𑁆𑀚𑀦𑁆𑀢𑀺. 𑀯𑀺𑀓𑀸𑀭𑀸𑀪𑀸𑀯𑀢𑁄 𑀳𑀺 𑀢𑁂𑀲𑀁 𑀲𑀢𑁆𑀢𑀦𑁆𑀦𑀁 𑀓𑀸𑀬𑀸𑀦𑀁 𑀏𑀲𑀺𑀓𑀝𑁆𑀞𑀸𑀬𑀺𑀝𑁆𑀞𑀺𑀢𑀢𑀸, 𑀅𑀦𑀺𑀜𑁆𑀚𑀦𑀜𑁆𑀘 𑀅𑀢𑁆𑀢𑀦𑁄 𑀧𑀓𑀢𑀺𑀬𑀸 𑀅𑀯𑀝𑁆𑀞𑀸𑀦𑀫𑁂𑀯. 𑀢𑁂𑀦𑀸𑀳 ‘‘𑀦 𑀯𑀺𑀧𑀭𑀺𑀡𑀫𑀦𑁆𑀢𑀻’’𑀢𑀺. 𑀧𑀓𑀢𑀺𑀦𑁆𑀢𑀺 𑀲𑀪𑀸𑀯𑀁. 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀢𑁆𑀢𑀸 𑀏𑀯 𑀦 𑀅𑀜𑁆𑀜𑀫𑀜𑁆𑀜𑀁 𑀉𑀧𑀳𑀦𑀦𑁆𑀢𑀺. 𑀲𑀢𑀺 𑀳𑀺 𑀯𑀺𑀓𑀸𑀭𑀫𑀸𑀧𑀸𑀤𑁂𑀢𑀩𑁆𑀩𑀪𑀸𑀯𑁂 𑀉𑀧𑀖𑀸𑀢𑀓𑀢𑀸 𑀲𑀺𑀬𑀸, 𑀢𑀣𑀸 𑀅𑀦𑀼𑀕𑁆𑀕𑀳𑁂𑀢𑀩𑁆𑀩𑀪𑀸𑀯𑁂 𑀲𑀢𑀺 𑀅𑀦𑀼𑀕𑁆𑀕𑀸𑀳𑀓𑀢𑀸𑀧𑀻𑀢𑀺 𑀢𑀤𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀧𑀸𑀴𑀺𑀬𑀁 ‘‘𑀦𑀸𑀮’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀣𑀯𑀻𑀬𑁂𑀯 𑀓𑀸𑀬𑁂𑀓𑀤𑁂𑀲𑀢𑁆𑀢𑀸 𑀧𑀣𑀯𑀺𑀓𑀸𑀬𑁄 𑀬𑀣𑀸 ‘‘𑀲𑀫𑀼𑀤𑁆𑀤𑁄 𑀤𑀺𑀝𑁆𑀞𑁄’’𑀢𑀺, 𑀧𑀣𑀯𑀺𑀲𑀫𑀽𑀳𑁄 𑀯𑀸 𑀓𑀸𑀬𑀲𑀤𑁆𑀤𑀲𑁆𑀲 𑀲𑀫𑀽𑀳𑀯𑀸𑀘𑀓𑀢𑁆𑀢𑀸 𑀬𑀣𑀸 ‘‘𑀳𑀢𑁆𑀣𑀺𑀓𑀸𑀬𑁄’’𑀢𑀺. 𑀚𑀻𑀯𑀲𑀢𑁆𑀢𑀫𑀸𑀦𑀁 𑀓𑀸𑀬𑀸𑀦𑀁 𑀦𑀺𑀘𑁆𑀘𑀢𑀸𑀬 𑀦𑀺𑀩𑁆𑀩𑀺𑀓𑀸𑀭𑀪𑀸𑀯𑀢𑁄 𑀦 𑀳𑀦𑁆𑀢𑀩𑁆𑀩𑀢𑀸, 𑀦 𑀖𑀸𑀢𑁂𑀢𑀩𑁆𑀩𑀢𑀸 𑀘, 𑀢𑀲𑁆𑀫𑀸 𑀦𑁂𑀯 𑀓𑁄𑀘𑀺 𑀳𑀦𑁆𑀢𑀸, 𑀖𑀸𑀢𑁂𑀢𑀸 𑀯𑀸 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀼𑀁 𑀧𑀸𑀴𑀺𑀬𑀁 ‘‘𑀲𑀢𑁆𑀢𑀦𑁆𑀦𑀁 𑀢𑁆𑀯𑁂𑀯 𑀓𑀸𑀬𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀤𑀺 𑀓𑁄𑀘𑀺 𑀳𑀦𑁆𑀢𑀸 𑀦𑀢𑁆𑀣𑀺, 𑀓𑀣𑀁 𑀢𑁂𑀲𑀁 𑀲𑀢𑁆𑀣𑀧𑁆𑀧𑀳𑀸𑀭𑁄𑀢𑀺 𑀢𑀢𑁆𑀣 𑀘𑁄𑀤𑀦𑀸𑀬𑀸𑀳 ‘‘𑀬𑀣𑀸’’𑀢𑀺𑀆𑀤𑀺. 𑀢𑀢𑁆𑀣 𑀲𑀢𑁆𑀢𑀦𑁆𑀦𑀁 𑀢𑁆𑀯𑁂𑀯𑀸𑀢𑀺 𑀲𑀢𑁆𑀢𑀦𑁆𑀦𑀫𑁂𑀯. 𑀇𑀢𑀺𑀲𑀤𑁆𑀤𑁄 𑀳𑁂𑀢𑁆𑀣 𑀦𑀺𑀧𑀸𑀢𑀫𑀢𑁆𑀢𑀁. 𑀧𑀳𑀢𑀦𑁆𑀢𑀺 𑀧𑀳𑀭𑀺𑀢𑀁. 𑀏𑀓𑀢𑁄𑀥𑀸𑀭𑀸𑀤𑀺𑀓𑀁 𑀲𑀢𑁆𑀣𑀁. 𑀅𑀦𑁆𑀢𑀭𑁂𑀦𑁂𑀯 𑀧𑀯𑀺𑀲𑀢𑀺, 𑀦 𑀢𑁂𑀲𑀼. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀓𑁂𑀯𑀮𑀁 ‘‘𑀅𑀳𑀁 𑀇𑀫𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀫𑀻’’𑀢𑀺 𑀢𑁂𑀲𑀁 𑀢𑀣𑀸 𑀲𑀜𑁆𑀜𑀸𑀫𑀢𑁆𑀢𑀫𑁂𑀯, 𑀳𑀦𑀦𑀖𑀸𑀢𑀦𑀸𑀤𑀺 𑀧𑀦 𑀧𑀭𑀫𑀢𑁆𑀣𑀢𑁄 𑀦𑀢𑁆𑀣𑁂𑀯 𑀓𑀸𑀬𑀸𑀦𑀁 𑀅𑀯𑀺𑀓𑁄𑀧𑀦𑀻𑀬𑀪𑀸𑀯𑀢𑁄𑀢𑀺.