𑁧. 𑀩𑁆𑀭𑀳𑁆𑀫𑀚𑀸𑀮𑀲𑀼𑀢𑁆𑀢𑀁

𑀧𑀭𑀺𑀩𑁆𑀩𑀸𑀚𑀓𑀓𑀣𑀸𑀯𑀡𑁆𑀡𑀦𑀸

𑁧. 𑀏𑀢𑁆𑀢𑀸𑀯𑀢𑀸 𑀘 𑀧𑀭𑀫𑀲𑀡𑁆𑀳𑀲𑀼𑀔𑀼𑀫𑀕𑀫𑁆𑀪𑀻𑀭𑀤𑀼𑀤𑁆𑀤𑀲𑀸𑀦𑁂𑀓𑀯𑀺𑀥𑀦𑀬𑀲𑀫𑀮𑀗𑁆𑀓𑀢𑀁 𑀩𑁆𑀭𑀳𑁆𑀫𑀚𑀸𑀮𑀲𑁆𑀲 𑀲𑀸𑀥𑀸𑀭𑀡𑀢𑁄 𑀩𑀸𑀳𑀺𑀭𑀦𑀺𑀤𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀩𑁆𑀪𑀦𑁆𑀢𑀭𑀦𑀺𑀤𑀸𑀦𑀁 𑀲𑀁𑀯𑀡𑁆𑀡𑁂𑀦𑁆𑀢𑁄 𑀅𑀢𑁆𑀣𑀸𑀥𑀺𑀕𑀫𑀲𑁆𑀲 𑀲𑀼𑀦𑀺𑀓𑁆𑀔𑀺𑀢𑁆𑀢𑀧𑀤𑀫𑀽𑀮𑀓𑀢𑁆𑀢𑀸, 𑀲𑀼𑀦𑀺𑀓𑁆𑀔𑀺𑀢𑁆𑀢𑀧𑀤𑀪𑀸𑀯𑀲𑁆𑀲 𑀘 ‘‘𑀇𑀤𑀫𑁂𑀯’’𑀦𑁆𑀢𑀺 𑀲𑀪𑀸𑀯𑀯𑀺𑀪𑀸𑀯𑀦𑁂𑀦 𑀧𑀤𑀯𑀺𑀪𑀸𑀕𑁂𑀦 𑀲𑀸𑀥𑁂𑀢𑀩𑁆𑀩𑀢𑁆𑀢𑀸 𑀧𑀞𑀫𑀁 𑀢𑀸𑀯 𑀧𑀤𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀏𑀯’’𑀦𑁆𑀢𑀺𑀆𑀤𑀺𑀫𑀸𑀳. 𑀧𑀤𑀯𑀺𑀪𑀸𑀕𑁂𑀦 𑀳𑀺 ‘‘𑀇𑀤𑀁 𑀦𑀸𑀫 𑀏𑀢𑀁 𑀧𑀤’’𑀦𑁆𑀢𑀺 𑀯𑀺𑀚𑀸𑀦𑀦𑁂𑀦 𑀢𑀁𑀢𑀁𑀧𑀤𑀸𑀦𑀼𑀭𑀽𑀧𑀁 𑀮𑀺𑀗𑁆𑀕𑀯𑀺𑀪𑀢𑁆𑀢𑀺 𑀯𑀘𑀦 𑀓𑀸𑀮𑀧𑀬𑁄𑀕𑀸𑀤𑀺𑀓𑀁 𑀲𑀫𑁆𑀫𑀸𑀧𑀢𑀺𑀝𑁆𑀞𑀸𑀧𑀦𑀢𑁄 𑀬𑀣𑀸𑀯𑀼𑀢𑁆𑀢𑀲𑁆𑀲 𑀧𑀤𑀲𑁆𑀲 𑀲𑀼𑀦𑀺𑀓𑁆𑀔𑀺𑀢𑁆𑀢𑀢𑀸 𑀳𑁄𑀢𑀺, 𑀢𑀸𑀬 𑀘 𑀅𑀢𑁆𑀣𑀲𑁆𑀲 𑀲𑀫𑀥𑀺𑀕𑀫𑀺𑀬𑀢𑀸. 𑀬𑀣𑀸𑀳 ‘‘𑀲𑀼𑀦𑀺𑀓𑁆𑀔𑀺𑀢𑁆𑀢𑀲𑁆𑀲 𑀪𑀺𑀓𑁆𑀔𑀯𑁂 𑁋 𑀧𑀤𑀩𑁆𑀬𑀜𑁆𑀚𑀦𑀲𑁆𑀲 𑀅𑀢𑁆𑀣𑁄𑀧𑀺 𑀲𑀼𑀦𑀬𑁄𑀳𑁄𑀢𑀻’’𑀢𑀺𑀆𑀤𑀺. 𑀅𑀧𑀺𑀘 𑀲𑀫𑁆𑀩𑀦𑁆𑀥𑀢𑁄, 𑀧𑀤𑀢𑁄, 𑀧𑀤𑀯𑀺𑀪𑀸𑀕𑀢𑁄, 𑀧𑀤𑀢𑁆𑀣𑀢𑁄 𑀅𑀦𑀼𑀬𑁄𑀕𑀢𑁄, 𑀧𑀭𑀺𑀳𑀸𑀭𑀢𑁄 𑀘𑀸𑀢𑀺 𑀙𑀳𑀸𑀓𑀸𑀭𑁂𑀳𑀺 𑀅𑀢𑁆𑀣𑀯𑀡𑁆𑀡𑀦𑀸 𑀓𑀸𑀢𑀩𑁆𑀩𑀸. 𑀢𑀢𑁆𑀣 𑀲𑀫𑁆𑀩𑀦𑁆𑀥𑁄 𑀦𑀸𑀫 𑀤𑁂𑀲𑀦𑀸𑀲𑀫𑁆𑀩𑀦𑁆𑀥𑁄, 𑀬𑀁 𑀮𑁄𑀓𑀺𑀬𑀸 ‘‘𑀉𑀫𑁆𑀫𑀼𑀕𑁆𑀖𑀸𑀢𑁄’’𑀢𑀺𑀧𑀺 𑀯𑀤𑀦𑁆𑀢𑀺, 𑀲𑁄 𑀧𑀦 𑀧𑀸𑀴𑀺𑀬𑀸 𑀦𑀺𑀤𑀸𑀦𑀧𑀸𑀴𑀺𑀯𑀲𑁂𑀦, 𑀦𑀺𑀤𑀸𑀦𑀧𑀸𑀴𑀺𑀬𑀸 𑀘 𑀲𑀗𑁆𑀕𑀻𑀢𑀺𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀁 𑀤𑀲𑁆𑀲𑁂𑀦𑁆𑀢𑁂𑀦 𑀳𑀺 𑀦𑀺𑀤𑀸𑀦𑀧𑀸𑀴𑀺𑀬𑀸 𑀲𑀫𑁆𑀩𑀦𑁆𑀥𑁄 𑀤𑀲𑁆𑀲𑀺𑀢𑁄, 𑀢𑀲𑁆𑀫𑀸 𑀧𑀤𑀸𑀤𑀺𑀯𑀲𑁂𑀦𑁂𑀯 𑀲𑀁𑀯𑀡𑁆𑀡𑀦𑀁 𑀓𑀭𑁄𑀦𑁆𑀢𑁄 ‘‘𑀏𑀯’’𑀦𑁆𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣 𑀘 ‘‘𑀏𑀯𑀦𑁆𑀢𑀺 𑀦𑀺𑀧𑀸𑀢𑀧𑀤𑀦𑁆𑀢𑀺𑀆𑀤𑀺𑀦𑀸 𑀧𑀤𑀢𑁄, 𑀧𑀤𑀯𑀺𑀪𑀸𑀕𑀢𑁄 𑀘 𑀲𑀁𑀯𑀡𑁆𑀡𑀦𑀁 𑀓𑀭𑁄𑀢𑀺 𑀧𑀤𑀸𑀦𑀁 𑀢𑀩𑁆𑀩𑀺𑀲𑁂𑀲𑀸𑀦𑀜𑁆𑀘 𑀤𑀲𑁆𑀲𑀺𑀢𑀢𑁆𑀢𑀸. 𑀧𑀤𑀯𑀺𑀪𑀸𑀕𑁄𑀢𑀺 𑀳𑀺 𑀧𑀤𑀸𑀦𑀁 𑀯𑀺𑀲𑁂𑀲𑁄𑀬𑁂𑀯 𑀅𑀥𑀺𑀧𑁆𑀧𑁂𑀢𑁄, 𑀦 𑀧𑀤𑀯𑀺𑀕𑁆𑀕𑀳𑁄. 𑀧𑀤𑀸𑀦𑀺 𑀘 𑀧𑀤𑀯𑀺𑀪𑀸𑀕𑁄 𑀘 𑀧𑀤𑀯𑀺𑀪𑀸𑀕𑁄. 𑀅𑀣 𑀯𑀸 𑀧𑀤𑀯𑀺𑀪𑀸𑀕𑁄 𑀘 𑀧𑀤𑀯𑀺𑀕𑁆𑀕𑀳𑁄 𑀘 𑀧𑀤𑀯𑀺𑀪𑀸𑀕𑁄𑀢𑀺 𑀏𑀓𑀲𑁂𑀲𑀯𑀲𑁂𑀦 𑀧𑀤𑀧𑀤𑀯𑀺𑀕𑁆𑀕𑀳𑀸𑀧𑀺 𑀧𑀤𑀯𑀺𑀪𑀸𑀕𑀲𑀤𑁆𑀤𑁂𑀦 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀤𑀯𑀺𑀕𑁆𑀕𑀳𑀢𑁄 𑀧𑀦 ‘‘𑀪𑀺𑀓𑁆𑀔𑀽𑀦𑀁 𑀲𑀗𑁆𑀖𑁄’’𑀢𑀺𑀆𑀤𑀺𑀦𑀸 𑀉𑀧𑀭𑀺 𑀲𑀁𑀯𑀡𑁆𑀡𑀦𑀁 𑀓𑀭𑀺𑀲𑁆𑀲𑀢𑀺, 𑀢𑀣𑀸 𑀧𑀤𑀢𑁆𑀣𑀸𑀦𑀼𑀬𑁄𑀕𑀧𑀭𑀺𑀳𑀸𑀭𑁂𑀳𑀺𑀧𑀺. 𑀏𑀯𑀦𑁆𑀢𑀺 𑀏𑀢𑁆𑀣 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄 𑀅𑀦𑁆𑀢𑀭𑀸𑀲𑀤𑁆𑀤 𑀘 𑀲𑀤𑁆𑀤𑀸𑀤𑀻𑀦𑀫𑁆𑀧𑀺 𑀲𑀗𑁆𑀕𑀳𑀺𑀢𑀢𑁆𑀢𑀸, 𑀦𑀬𑀕𑁆𑀕𑀳𑀡𑁂𑀦 𑀯𑀸 𑀢𑁂 𑀕𑀳𑀺𑀢𑀸. 𑀢𑁂𑀦𑀸𑀳 ‘‘𑀫𑁂𑀢𑀺𑀆𑀤𑀻𑀦𑀺 𑀦𑀸𑀫𑀧𑀤𑀸𑀦𑀻’’𑀢𑀺. 𑀇𑀢𑀭𑀣𑀸 𑀳𑀺 𑀅𑀦𑁆𑀢𑀭𑀸𑀲𑀤𑁆𑀤𑀁 𑀘 𑀲𑀤𑁆𑀤𑀸𑀤𑀻𑀦𑀫𑁆𑀧𑀺 𑀦𑀺𑀧𑀸𑀢𑀪𑀸𑀯𑁄 𑀯𑀢𑁆𑀢𑀩𑁆𑀩𑁄 𑀲𑀺𑀬𑀸. 𑀫𑁂𑀢𑀺𑀆𑀤𑀻𑀦𑀻𑀢𑀺 𑀏𑀢𑁆𑀣 𑀧𑀦 𑀆𑀤𑀺-𑀲𑀤𑁆𑀤𑁂𑀦 𑀬𑀸𑀯 𑀧𑀝𑀺𑀲𑀤𑁆𑀤𑁄, 𑀢𑀸𑀯 𑀢𑀤𑀯𑀲𑀺𑀝𑁆𑀞𑀸𑀬𑁂𑀯 𑀲𑀤𑁆𑀤𑀸 𑀲𑀗𑁆𑀕𑀳𑀺𑀢𑀸. 𑀧𑀝𑀻𑀢𑀺 𑀉𑀧𑀲𑀕𑁆𑀕𑀧𑀤𑀁 𑀧𑀢𑀺𑀲𑀤𑁆𑀤𑀲𑁆𑀲 𑀓𑀸𑀭𑀺𑀬𑀪𑀸𑀯𑀢𑁄.

𑀇𑀤𑀸𑀦𑀺 𑀅𑀢𑁆𑀣𑀼𑀤𑁆𑀥𑀸𑀭𑀓𑁆𑀓𑀫𑁂𑀦 𑀧𑀤𑀢𑁆𑀣𑀢𑁄 𑀲𑀁𑀯𑀡𑁆𑀡𑀦𑀁 𑀓𑀭𑁄𑀦𑁆𑀢𑁄 ‘‘𑀅𑀢𑁆𑀣𑀢𑁄 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀲𑁄𑀢𑀽𑀦𑀁 𑀲𑀁𑀯𑀡𑁆𑀡𑀦𑀸𑀦𑀬𑀓𑁄𑀲𑀮𑁆𑀮𑀢𑁆𑀣𑀁 𑀲𑀁𑀯𑀡𑁆𑀡𑀦𑀸𑀧𑁆𑀧𑀓𑀸𑀭𑀸 𑀯𑀢𑁆𑀢𑀩𑁆𑀩𑀸. 𑀓𑀣𑀁?

𑀏𑀓𑀦𑀸𑀴𑀺𑀓𑀸 𑀓𑀣𑀸 𑀘, 𑀘𑀢𑀼𑀭𑀲𑁆𑀲𑀸 𑀢𑀣𑀸𑀧𑀺 𑀘;

𑀦𑀺𑀲𑀺𑀦𑁆𑀦𑀯𑀢𑁆𑀢𑀺𑀓𑀸 𑀘𑁂𑀯, 𑀢𑀺𑀥𑀸 𑀲𑀁𑀯𑀡𑁆𑀡𑀦𑀁 𑀯𑀤𑁂.

𑀢𑀢𑁆𑀣 𑀧𑀸𑀴𑀺𑀁 𑀯𑀢𑁆𑀯𑀸 𑀏𑀓𑁂𑀓𑀧𑀤𑀲𑁆𑀲 𑀅𑀢𑁆𑀣𑀓𑀣𑀦𑀁 𑀏𑀓𑀸𑀬 𑀦𑀸𑀴𑀺𑀬𑀸 𑀫𑀺𑀦𑀺𑀢𑀲𑀤𑀺𑀲𑀢𑁆𑀢𑀸, 𑀏𑀓𑁂𑀓𑀁 𑀯𑀸 𑀧𑀤𑀁 𑀦𑀸𑀴𑀁 𑀫𑀽𑀮𑀁, 𑀏𑀓𑀫𑁂𑀓𑀁 𑀧𑀤𑀁 𑀯𑀸 𑀦𑀸𑀴𑀺𑀓𑀸 𑀅𑀢𑁆𑀣𑀦𑀺𑀕𑁆𑀕𑀫𑀦𑀫𑀕𑁆𑀕𑁄 𑀏𑀢𑀺𑀲𑁆𑀲𑀸𑀢𑀺 𑀓𑀢𑁆𑀯𑀸 𑀏𑀓𑀦𑀸𑀴𑀺𑀓𑀸 𑀦𑀸𑀫. 𑀧𑀝𑀺𑀧𑀓𑁆𑀔𑀁 𑀤𑀲𑁆𑀲𑁂𑀢𑁆𑀯𑀸, 𑀧𑀝𑀺𑀧𑀓𑁆𑀔𑀲𑁆𑀲 𑀘 𑀉𑀧𑀫𑀁 𑀤𑀲𑁆𑀲𑁂𑀢𑁆𑀯𑀸, 𑀲𑀧𑀓𑁆𑀔𑀁 𑀤𑀲𑁆𑀲𑁂𑀢𑁆𑀯𑀸, 𑀲𑀧𑀓𑁆𑀔𑀲𑁆𑀲 𑀘 𑀉𑀧𑀫𑀁 𑀤𑀲𑁆𑀲𑁂𑀢𑁆𑀯𑀸, 𑀓𑀣𑀦𑀁 𑀘𑀢𑀽𑀳𑀺 𑀪𑀸𑀕𑁂𑀳𑀺 𑀯𑀼𑀢𑁆𑀢𑀢𑁆𑀢𑀸, 𑀘𑀢𑁆𑀢𑀸𑀭𑁄 𑀯𑀸 𑀭𑀲𑁆𑀲𑀸 𑀲𑀮𑁆𑀮𑀓𑁆𑀔𑀡𑀽𑀧𑀸𑀬𑀸 𑀏𑀢𑀺𑀲𑁆𑀲𑀸𑀢𑀺 𑀓𑀢𑁆𑀯𑀸 𑀘𑀢𑀼𑀭𑀲𑁆𑀲𑀸 𑀦𑀸𑀫, 𑀯𑀺𑀲𑀪𑀸𑀕𑀥𑀫𑁆𑀫𑀯𑀲𑁂𑀦𑁂𑀯 𑀧𑀭𑀺𑀬𑁄𑀲𑀸𑀦𑀁 𑀕𑀦𑁆𑀢𑁆𑀯𑀸 𑀧𑀼𑀦 𑀲𑀪𑀸𑀕𑀥𑀫𑁆𑀫𑀯𑀲𑁂𑀦𑁂𑀯 𑀧𑀭𑀺𑀬𑁄𑀲𑀸𑀦𑀕𑀫𑀦𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀆𑀯𑀢𑁆𑀢𑀦𑀬𑀼𑀢𑁆𑀢𑀢𑁆𑀢𑀸, 𑀦𑀺𑀬𑀫𑀢𑁄 𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀆𑀭𑀤𑁆𑀥𑀲𑁆𑀲 𑀯𑀢𑁆𑀢𑁄 𑀲𑀁𑀯𑀢𑁆𑀢𑁄 𑀏𑀢𑀺𑀲𑁆𑀲𑀸𑀢𑀺 𑀓𑀢𑁆𑀯𑀸 𑀦𑀺𑀲𑀺𑀦𑁆𑀦𑀯𑀢𑁆𑀢𑀺𑀓𑀸 𑀦𑀸𑀫, 𑀬𑀣𑀸𑀭𑀤𑁆𑀥𑀲𑁆𑀲 𑀅𑀢𑁆𑀣𑀲𑁆𑀲 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀭𑀺𑀬𑁄𑀲𑀸𑀦𑀸𑀧𑀺 𑀦𑀺𑀬𑀼𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀲𑁄𑀤𑀸𑀳𑀭𑀡𑀸 𑀧𑀦 𑀓𑀣𑀸 𑀅𑀗𑁆𑀕𑀼𑀢𑁆𑀢𑀭𑀝𑁆𑀞𑀓𑀣𑀸𑀬 𑀢𑀝𑁆𑀝𑀻𑀓𑀸𑀬𑀁 𑀏𑀓𑀸𑀤𑀲𑀦𑀺𑀧𑀸𑀢𑁂 𑀕𑁄𑀧𑀸𑀮𑀓𑀲𑀼𑀢𑁆𑀢𑀯𑀡𑁆𑀡𑀦𑀸𑀢𑁄 𑀕𑀳𑁂𑀢𑀩𑁆𑀩𑀸.

𑀪𑁂𑀤𑀓𑀣𑀸 𑀢𑀢𑁆𑀯𑀓𑀣𑀸, 𑀧𑀭𑀺𑀬𑀸𑀬𑀓𑀣𑀸𑀧𑀺 𑀘;

𑀇𑀢𑀺 𑀅𑀢𑁆𑀣𑀓𑁆𑀓𑀫𑁂 𑀯𑀺𑀤𑁆𑀯𑀸, 𑀢𑀺𑀥𑀸 𑀲𑀁𑀯𑀡𑁆𑀡𑀦𑀁 𑀯𑀤𑁂.

𑀢𑀢𑁆𑀣 𑀧𑀓𑀢𑀺𑀆𑀤𑀺𑀯𑀺𑀘𑀸𑀭𑀡𑀸 𑀪𑁂𑀤𑀓𑀣𑀸 𑀬𑀣𑀸 ‘‘𑀩𑀼𑀚𑁆𑀛𑀢𑀻𑀢𑀺 𑀩𑀼𑀤𑁆𑀥𑁄’’𑀢𑀺𑀆𑀤𑀺. 𑀲𑀭𑀽𑀧𑀯𑀺𑀘𑀸𑀭𑀡𑀸 𑀢𑀢𑁆𑀯𑀓𑀣𑀸 𑀬𑀣𑀸 ‘‘𑀩𑀼𑀤𑁆𑀥𑁄𑀢𑀺 𑀬𑁄 𑀲𑁄 𑀪𑀕𑀯𑀸 𑀲𑀬𑀫𑁆𑀪𑀽 𑀅𑀦𑀸𑀘𑀭𑀺𑀬𑀓𑁄’’𑀢𑀺𑀆𑀤𑀺 (𑀫𑀳𑀸𑀦𑀺. 𑁧𑁯𑁨; 𑀘𑀽𑀴𑀦𑀺. 𑁯𑁭; 𑀧𑀝𑀺. 𑀫. 𑁧.𑁧𑁬𑁧). 𑀯𑁂𑀯𑀘𑀦𑀯𑀺𑀘𑀸𑀭𑀡𑀸 𑀧𑀭𑀺𑀬𑀸𑀬𑀓𑀣𑀸 𑀬𑀣𑀸 ‘‘𑀩𑀼𑀤𑁆𑀥𑁄 𑀪𑀕𑀯𑀸 𑀲𑀩𑁆𑀩𑀜𑁆𑀜𑀽 𑀮𑁄𑀓𑀦𑀸𑀬𑀓𑁄’’𑀢𑀺𑀆𑀤𑀺 (𑀦𑁂𑀢𑁆𑀢𑀺. 𑁩𑁮 𑀯𑁂𑀯𑀘𑀦𑀸𑀳𑀸𑀭𑀯𑀺𑀪𑀗𑁆𑀕𑀦𑀺𑀲𑁆𑀲𑀺𑀢𑁄 𑀧𑀸𑀴𑀺).

𑀧𑀬𑁄𑀚𑀦𑀜𑁆𑀘 𑀧𑀺𑀡𑁆𑀟𑀢𑁆𑀣𑁄, 𑀅𑀦𑀼𑀲𑀦𑁆𑀥𑀺 𑀘 𑀘𑁄𑀤𑀦𑀸;

𑀧𑀭𑀺𑀳𑀸𑀭𑁄 𑀘 𑀲𑀩𑁆𑀩𑀢𑁆𑀣, 𑀧𑀜𑁆𑀘𑀥𑀸 𑀯𑀡𑁆𑀡𑀦𑀁 𑀯𑀤𑁂.

𑀢𑀢𑁆𑀣 𑀧𑀬𑁄𑀚𑀦𑀁 𑀦𑀸𑀫 𑀤𑁂𑀲𑀦𑀸𑀨𑀮𑀁, 𑀢𑀁 𑀧𑀦 𑀲𑀼𑀢𑀫𑀬𑀜𑀸𑀡𑀸𑀤𑀺. 𑀧𑀺𑀡𑁆𑀟𑀢𑁆𑀣𑁄 𑀦𑀸𑀫 𑀯𑀺𑀧𑁆𑀧𑀓𑀺𑀡𑁆𑀡𑀲𑁆𑀲 𑀅𑀢𑁆𑀣𑀲𑁆𑀲 𑀲𑀼𑀯𑀺𑀚𑀸𑀦𑀦𑀢𑁆𑀣𑀁 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀓𑀣𑀦𑀁. 𑀅𑀦𑀼𑀲𑀦𑁆𑀥𑀺 𑀦𑀸𑀫 𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀸𑀤𑀺. 𑀘𑁄𑀤𑀦𑀸 𑀦𑀸𑀫 𑀬𑀣𑀸𑀯𑀼𑀢𑁆𑀢𑀲𑁆𑀲 𑀯𑀘𑀦𑀲𑁆𑀲 𑀯𑀺𑀭𑁄𑀥𑀺𑀓𑀣𑀦𑀁. 𑀧𑀭𑀺𑀳𑀸𑀭𑁄 𑀦𑀸𑀫 𑀢𑀲𑁆𑀲 𑀅𑀯𑀺𑀭𑁄𑀥𑀺𑀓𑀣𑀦𑀁.

𑀉𑀫𑁆𑀫𑀼𑀕𑁆𑀖𑀸𑀢𑁄 𑀧𑀤𑀜𑁆𑀘𑁂𑀯, 𑀧𑀤𑀢𑁆𑀣𑁄 𑀧𑀤𑀯𑀺𑀕𑁆𑀕𑀳𑁄;

𑀘𑀸𑀮𑀦𑀸 𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀙𑀥𑀸 𑀲𑀁𑀯𑀡𑁆𑀡𑀦𑀁 𑀯𑀤𑁂. (𑀯𑀚𑀺𑀭. 𑀝𑀻. 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀯𑀡𑁆𑀡𑀦𑀸);

𑀢𑀢𑁆𑀣 𑀅𑀚𑁆𑀛𑀢𑁆𑀢𑀺𑀓𑀸𑀤𑀺𑀦𑀺𑀤𑀸𑀦𑀁 𑀉𑀫𑁆𑀫𑀼𑀕𑁆𑀖𑀸𑀢𑁄. ‘‘𑀏𑀯𑀫𑀺𑀤’’𑀦𑁆𑀢𑀺 𑀦𑀸𑀦𑀸𑀯𑀺𑀥𑁂𑀦 𑀧𑀤𑀯𑀺𑀲𑁂𑀲𑀢𑀸𑀓𑀣𑀦𑀁 𑀧𑀤𑀁, 𑀲𑀤𑁆𑀤𑀢𑁆𑀣𑀸𑀥𑀺𑀧𑁆𑀧𑀸𑀬𑀢𑁆𑀣𑀸𑀤𑀺 𑀧𑀤𑀢𑁆𑀣𑁄. 𑀅𑀦𑁂𑀓𑀥𑀸 𑀦𑀺𑀩𑁆𑀩𑀘𑀦𑀁 𑀧𑀤𑀯𑀺𑀕𑁆𑀕𑀳𑁄.𑀘𑀸𑀮𑀦𑀸 𑀦𑀸𑀫 𑀘𑁄𑀤𑀦𑀸. 𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀧𑀭𑀺𑀳𑀸𑀭𑁄.

𑀲𑀫𑀼𑀝𑁆𑀞𑀸𑀦𑀁 𑀧𑀤𑀢𑁆𑀣𑁄 𑀘, 𑀪𑀸𑀯𑀸𑀦𑀼𑀯𑀸𑀤𑀯𑀺𑀥𑀬𑁄;

𑀯𑀺𑀭𑁄𑀥𑁄 𑀧𑀭𑀺𑀳𑀸𑀭𑁄 𑀘, 𑀦𑀺𑀕𑀫𑀦𑀦𑁆𑀢𑀺 𑀅𑀝𑁆𑀞𑀥𑀸.

𑀢𑀢𑁆𑀣 𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀅𑀚𑁆𑀛𑀢𑁆𑀢𑀺𑀓𑀸𑀤𑀺𑀦𑀺𑀤𑀸𑀦𑀁. 𑀧𑀤𑀢𑁆𑀣𑁄𑀢𑀺 𑀅𑀥𑀺𑀧𑁆𑀧𑁂𑀢𑀸𑀦𑀥𑀺𑀧𑁆𑀧𑁂𑀢𑀸𑀤𑀺𑀯𑀲𑁂𑀦 𑀅𑀦𑁂𑀓𑀥𑀸 𑀧𑀤𑀲𑁆𑀲 𑀅𑀢𑁆𑀣𑁄. 𑀪𑀸𑀯𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀦𑀼𑀯𑀸𑀤𑀯𑀺𑀥𑀬𑁄𑀢𑀺 𑀧𑀞𑀫𑀯𑀘𑀦𑀁 𑀯𑀺𑀥𑀺, 𑀢𑀤𑀸𑀯𑀺𑀓𑀭𑀡𑀯𑀲𑁂𑀦 𑀧𑀘𑁆𑀙𑀸 𑀯𑀘𑀦𑀁 𑀅𑀦𑀼𑀯𑀸𑀤𑁄, 𑀯𑀺𑀲𑁂𑀲𑀦𑀯𑀺𑀲𑁂𑀲𑁆𑀬𑀸𑀦𑀁 𑀯𑀸 𑀯𑀺𑀥𑀸𑀦𑀼𑀯𑀸𑀤 𑀲𑀫𑀜𑁆𑀜𑀸. 𑀯𑀺𑀭𑁄𑀥𑁄𑀢𑀺 𑀅𑀢𑁆𑀣𑀦𑀺𑀘𑁆𑀙𑀬𑀦𑀢𑁆𑀣𑀁 𑀘𑁄𑀤𑀦𑀸. 𑀧𑀭𑀺𑀳𑀸𑀭𑁄𑀢𑀺 𑀢𑀲𑁆𑀲𑀸 𑀲𑁄𑀥𑀦𑀸. 𑀦𑀺𑀕𑀫𑀦𑀦𑁆𑀢𑀺 𑀅𑀦𑀼𑀲𑀦𑁆𑀥𑀺𑀬𑀸 𑀅𑀦𑀼𑀭𑀽𑀧𑀁 𑀅𑀧𑁆𑀧𑀦𑀸.

𑀆𑀤𑀺𑀢𑁄 𑀢𑀲𑁆𑀲 𑀦𑀺𑀤𑀸𑀦𑀁, 𑀯𑀢𑁆𑀢𑀩𑁆𑀩𑀁 𑀢𑀧𑁆𑀧𑀬𑁄𑀚𑀦𑀁;

𑀧𑀺𑀡𑁆𑀟𑀢𑁆𑀣𑁄 𑀘𑁂𑀯 𑀧𑀤𑀢𑁆𑀣𑁄, 𑀲𑀫𑁆𑀩𑀦𑁆𑀥𑁄 𑀅𑀥𑀺𑀧𑁆𑀧𑀸𑀬𑀓𑁄;

𑀘𑁄𑀤𑀦𑀸 𑀲𑁄𑀥𑀦𑀸 𑀘𑁂𑀢𑀺, 𑀅𑀝𑁆𑀞𑀥𑀸 𑀯𑀡𑁆𑀡𑀦𑀁 𑀯𑀤𑁂.

𑀢𑀢𑁆𑀣 𑀲𑀫𑁆𑀩𑀦𑁆𑀥𑁄 𑀦𑀸𑀫 𑀧𑀼𑀩𑁆𑀩𑀸𑀧𑀭𑀲𑀫𑁆𑀩𑀦𑁆𑀥𑁄, 𑀬𑁄 ‘‘𑀅𑀦𑀼𑀲𑀦𑁆𑀥𑀻’’𑀢𑀺 𑀯𑀼𑀘𑁆𑀘𑀢𑀺. 𑀲𑁂𑀲𑀸 𑀯𑀼𑀢𑁆𑀢𑀢𑁆𑀣𑀸𑀯, 𑀏𑀯𑀫𑀸𑀤𑀺𑀦𑀸 𑀢𑀢𑁆𑀣 𑀢𑀢𑁆𑀣𑀸𑀕𑀢𑁂 𑀲𑀁𑀯𑀡𑁆𑀡𑀦𑀸𑀧𑁆𑀧𑀓𑀸𑀭𑁂 𑀜𑀢𑁆𑀯𑀸 𑀲𑀩𑁆𑀩𑀢𑁆𑀣 𑀬𑀣𑀸𑀭𑀳𑀁 𑀯𑀺𑀘𑁂𑀢𑀩𑁆𑀩𑀸𑀢𑀺.

𑀏𑀯𑀫𑀦𑁂𑀓𑀢𑁆𑀣𑀧𑁆𑀧𑀪𑁂𑀤𑀢𑀸 𑀧𑀬𑁄𑀕𑀢𑁄𑀯 𑀜𑀸𑀢𑀩𑁆𑀩𑀸𑀢𑀺 𑀢𑀩𑁆𑀩𑀲𑁂𑀦 𑀢𑀁 𑀲𑀫𑀢𑁆𑀣𑁂𑀢𑀼𑀁 ‘‘𑀢𑀣𑀸 𑀳𑁂𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀅𑀬𑀁 𑀲𑀤𑁆𑀤𑁄 𑀇𑀫𑀲𑁆𑀲𑀢𑁆𑀣𑀲𑁆𑀲 𑀯𑀸𑀘𑀓𑁄𑀢𑀺 𑀲𑀗𑁆𑀓𑁂𑀢𑀯𑀯𑀢𑁆𑀣𑀺𑀢𑀸𑀬𑁂𑀯 𑀲𑀤𑁆𑀤𑀸 𑀢𑀁 𑀢𑀤𑀢𑁆𑀣𑀲𑁆𑀲 𑀯𑀸𑀘𑀓𑀸, 𑀲𑀗𑁆𑀓𑁂𑀢𑁄 𑀘 𑀦𑀸𑀫 𑀧𑀬𑁄𑀕𑀯𑀲𑁂𑀦 𑀲𑀺𑀤𑁆𑀥𑁄𑀢𑀺 𑀤𑀲𑁆𑀲𑁂𑀢𑀼𑀫𑁆𑀧𑀺 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀫𑀻𑀤𑀺𑀲𑁂𑀲𑀼. 𑀦𑀦𑀼 𑀘 𑁋

‘‘𑀬𑀣𑀸𑀧𑀺 𑀧𑀼𑀧𑁆𑀨𑀭𑀸𑀲𑀺𑀫𑁆𑀳𑀸, 𑀓𑀬𑀺𑀭𑀸 𑀫𑀸𑀮𑀸𑀕𑀼𑀡𑁂 𑀩𑀳𑀽;

𑀏𑀯𑀁 𑀚𑀸𑀢𑁂𑀦 𑀫𑀘𑁆𑀘𑁂𑀦, 𑀓𑀢𑁆𑀢𑀩𑁆𑀩𑀁 𑀓𑀼𑀲𑀮𑀁 𑀩𑀳𑀼’’𑀦𑁆𑀢𑀺. (𑀥. 𑀧. 𑁫𑁩);

𑀏𑀢𑁆𑀣 𑀏𑀯𑀁-𑀲𑀤𑁆𑀤𑁂𑀦 𑀉𑀧𑀫𑀸𑀓𑀸𑀭𑀲𑁆𑀲𑁂𑀯 𑀯𑀼𑀢𑁆𑀢𑀢𑁆𑀢𑀸 𑀆𑀓𑀸𑀭𑀢𑁆𑀣𑁄𑀬𑁂𑀯 𑀏𑀯𑀁-𑀲𑀤𑁆𑀤𑁄 𑀲𑀺𑀬𑀸𑀢𑀺? 𑀦, 𑀯𑀺𑀲𑁂𑀲𑀲𑀩𑁆𑀪𑀸𑀯𑀢𑁄. ‘‘𑀏𑀯𑀁 𑀩𑁆𑀬𑀸 𑀔𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨𑁩𑁪, 𑁩𑁯𑁬) 𑀳𑀺 𑀆𑀓𑀸𑀭𑀫𑀢𑁆𑀢𑀯𑀸𑀘𑀓𑁄𑀬𑁂𑀯 𑀆𑀓𑀸𑀭𑀢𑁆𑀣𑁄𑀢𑀺 𑀅𑀥𑀺𑀧𑁆𑀧𑁂𑀢𑁄, 𑀦 𑀧𑀦 𑀆𑀓𑀸𑀭𑀯𑀺𑀲𑁂𑀲𑀯𑀸𑀘𑀓𑁄. 𑀏𑀢𑁆𑀣 𑀳𑀺 𑀓𑀺𑀜𑁆𑀘𑀸𑀧𑀺 𑀧𑀼𑀧𑁆𑀨𑀭𑀸𑀲𑀺𑀲𑀤𑀺𑀲𑀢𑁄 𑀫𑀦𑀼𑀲𑁆𑀲𑀽𑀧𑀧𑀢𑁆𑀢𑀺 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬 𑀲𑀤𑁆𑀥𑀫𑁆𑀫𑀲𑀯𑀦 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀪𑁄𑀕𑀲𑀫𑁆𑀧𑀢𑁆𑀢𑀺𑀆𑀤𑀺𑀤𑀸𑀦𑀸𑀤𑀺𑀧𑀼𑀜𑁆𑀜𑀓𑀺𑀭𑀺𑀬𑀸𑀳𑁂𑀢𑀼𑀲𑀫𑀼𑀤𑀸𑀬𑀢𑁄 𑀲𑁄𑀪𑀸𑀲𑀼𑀕𑀦𑁆𑀥𑀢𑀸𑀤𑀺𑀕𑀼𑀡𑀬𑁄𑀕𑁂𑀦 𑀫𑀸𑀮𑀸𑀕𑀼𑀡𑀲𑀤𑀺𑀲𑀺𑀬𑁄 𑀩𑀳𑀼𑀓𑀸 𑀧𑀼𑀜𑁆𑀜𑀓𑀺𑀭𑀺𑀬𑀸 𑀫𑀭𑀺𑀢𑀩𑁆𑀩𑀲𑀪𑀸𑀯𑀢𑀸𑀬 𑀫𑀘𑁆𑀘𑁂𑀦 𑀲𑀢𑁆𑀢𑁂𑀦 𑀓𑀢𑁆𑀢𑀩𑁆𑀩𑀸𑀢𑀺 𑀅𑀢𑁆𑀣𑀲𑁆𑀲 𑀚𑁄𑀢𑀺𑀢𑀢𑁆𑀢𑀸 𑀧𑀼𑀧𑁆𑀨𑀭𑀸𑀲𑀺𑀫𑀸𑀮𑀸𑀕𑀼𑀡𑀸𑀯 𑀉𑀧𑀫𑀸 𑀦𑀸𑀫 𑀉𑀧𑀫𑀻𑀬𑀢𑀺 𑀏𑀢𑀸𑀬𑀸𑀢𑀺 𑀓𑀢𑁆𑀯𑀸, 𑀢𑁂𑀲𑀁 𑀉𑀧𑀫𑀸𑀓𑀸𑀭𑁄 𑀘 𑀬𑀣𑀸𑀲𑀤𑁆𑀤𑁂𑀦 𑀅𑀦𑀺𑀬𑀫𑀢𑁄 𑀚𑁄𑀢𑀺𑀢𑁄, 𑀢𑀲𑁆𑀫𑀸 ‘‘𑀏𑀯𑀁-𑀲𑀤𑁆𑀤𑁄 𑀦𑀺𑀬𑀫𑀢𑁄 𑀉𑀧𑀫𑀸𑀓𑀸𑀭𑀦𑀺𑀕𑀫𑀦𑀢𑁆𑀣𑁄’’𑀢𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑀁, 𑀢𑀣𑀸𑀧𑀺 𑀲𑁄 𑀉𑀧𑀫𑀸𑀓𑀸𑀭𑁄 𑀦𑀺𑀬𑀫𑀺𑀬𑀫𑀸𑀦𑁄 𑀅𑀢𑁆𑀣𑀢𑁄 𑀉𑀧𑀫𑀸𑀯 𑀳𑁄𑀢𑀺 𑀦𑀺𑀲𑁆𑀲𑀬𑀪𑀽𑀢𑀁 𑀢𑀫𑀦𑁆𑀢𑀭𑁂𑀦 𑀦𑀺𑀲𑁆𑀲𑀺𑀢𑀪𑀽𑀢𑀲𑁆𑀲 𑀉𑀧𑀫𑀸𑀓𑀸𑀭𑀲𑁆𑀲 𑀅𑀮𑀩𑁆𑀪𑀫𑀸𑀦𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀉𑀧𑀫𑀸𑀬𑀁 𑀆𑀕𑀢𑁄’’𑀢𑀺. 𑀅𑀣 𑀯𑀸 𑀉𑀧𑀫𑀻𑀬𑀦𑀁 𑀲𑀤𑀺𑀲𑀻𑀓𑀭𑀡𑀦𑁆𑀢𑀺 𑀓𑀢𑁆𑀯𑀸 𑀧𑀼𑀧𑁆𑀨𑀭𑀸𑀲𑀺𑀫𑀸𑀮𑀸𑀕𑀼𑀡𑁂𑀳𑀺 𑀲𑀤𑀺𑀲𑀪𑀸𑀯𑀲𑀗𑁆𑀔𑀸𑀢𑁄 𑀉𑀧𑀫𑀸𑀓𑀸𑀭𑁄𑀬𑁂𑀯 𑀉𑀧𑀫𑀸 𑀦𑀸𑀫. ‘‘𑀲𑀤𑁆𑀥𑀫𑁆𑀫𑀢𑁆𑀢𑀁 𑀲𑀺𑀬𑁄𑀧𑀫𑀸’’𑀢𑀺 𑀳𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀆𑀓𑀸𑀭𑀫𑀢𑁆𑀢𑀯𑀸𑀘𑀓𑁄𑀯 𑀆𑀓𑀸𑀭𑀢𑁆𑀣𑁄 𑀏𑀯𑀁-𑀲𑀤𑁆𑀤𑁄. 𑀉𑀧𑀫𑀸𑀲𑀗𑁆𑀔𑀸𑀢𑀆𑀓𑀸𑀭𑀯𑀺𑀲𑁂𑀲𑀯𑀸𑀘𑀓𑁄 𑀧𑀦 𑀉𑀧𑀫𑀸𑀢𑁆𑀣𑁄𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀉𑀧𑀫𑀸𑀬𑀁 𑀆𑀕𑀢𑁄’’𑀢𑀺.

𑀢𑀣𑀸 ‘‘𑀏𑀯𑀁 𑀇𑀫𑀺𑀦𑀸 𑀆𑀓𑀸𑀭𑁂𑀦 𑀅𑀪𑀺𑀓𑁆𑀓𑀫𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 𑀉𑀧𑀤𑀺𑀲𑀺𑀬𑀫𑀸𑀦𑀸𑀬 𑀲𑀫𑀡𑀲𑀸𑀭𑀼𑀧𑁆𑀧𑀸𑀬 𑀆𑀓𑀧𑁆𑀧𑀲𑀫𑁆𑀧𑀢𑁆𑀢𑀺𑀬𑀸 𑀉𑀧𑀤𑀺𑀲𑀦𑀸𑀓𑀸𑀭𑁄𑀧𑀺 𑀅𑀢𑁆𑀣𑀢𑁄 𑀉𑀧𑀤𑁂𑀲𑁄𑀬𑁂𑀯𑀸𑀢𑀺 𑀆𑀳 ‘‘𑀏𑀯𑀁…𑀧𑁂… 𑀉𑀧𑀤𑁂𑀲𑁂’’𑀢𑀺. 𑀏𑀯𑀫𑁂𑀢𑀦𑁆𑀢𑀺 𑀏𑀢𑁆𑀣 𑀧𑀦 𑀪𑀕𑀯𑀢𑀸 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀅𑀯𑀺𑀧𑀭𑀻𑀢𑀢𑁄 𑀚𑀸𑀦𑀦𑁆𑀢𑁂𑀳𑀺 𑀓𑀢𑀁 𑀢𑀢𑁆𑀣 𑀲𑀁𑀯𑀺𑀚𑁆𑀚𑀫𑀸𑀦𑀕𑀼𑀡𑀸𑀦𑀁 𑀧𑀓𑀸𑀭𑁂𑀳𑀺 𑀳𑀁𑀲𑀦𑀁 𑀉𑀤𑀕𑁆𑀕𑀢𑀸𑀓𑀭𑀡𑀁 𑀲𑀫𑁆𑀧𑀳𑀁𑀲𑀦𑀁. 𑀢𑀢𑁆𑀣 𑀲𑀫𑁆𑀧𑀳𑀁𑀲𑀦𑀸𑀓𑀸𑀭𑁄𑀧𑀺 𑀅𑀢𑁆𑀣𑀢𑁄 𑀲𑀫𑁆𑀧𑀳𑀁𑀲𑀦𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀲𑀫𑁆𑀧𑀳𑀁𑀲𑀦𑁂𑀢𑀺. 𑀏𑀯𑀫𑁂𑀯 𑀧𑀦𑀸𑀬𑀦𑁆𑀢𑀺 𑀏𑀢𑁆𑀣 𑀘 𑀤𑁄𑀲𑀯𑀺𑀪𑀸𑀯𑀦𑁂𑀦 𑀕𑀸𑀭𑀬𑁆𑀳𑀯𑀘𑀦𑀁 𑀕𑀭𑀳𑀡𑀁, 𑀢𑀤𑀸𑀓𑀸𑀭𑁄𑀧𑀺 𑀅𑀢𑁆𑀣𑀢𑁄 𑀕𑀭𑀳𑀡𑀁 𑀦𑀸𑀫, 𑀢𑀲𑁆𑀫𑀸 ‘‘𑀕𑀭𑀳𑀡𑁂’’𑀢𑀺 𑀯𑀼𑀢𑁆𑀢𑀁. 𑀲𑁄 𑀘𑁂𑀢𑁆𑀣 𑀕𑀭𑀳𑀡𑀸𑀓𑀸𑀭𑁄 ‘‘𑀯𑀲𑀮𑀻’’𑀢𑀺𑀆𑀤𑀺𑀔𑀼𑀁𑀲𑀦𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑀢𑁄 𑀏𑀯𑀁-𑀲𑀤𑁆𑀤𑁂𑀦 𑀧𑀓𑀸𑀲𑀺𑀢𑁄𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀬𑀣𑀸 𑀘𑁂𑀢𑁆𑀣 𑀏𑀯𑀁 𑀉𑀧𑀫𑀸𑀓𑀸𑀭𑀸𑀤𑀬𑁄𑀧𑀺 𑀉𑀧𑀫𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑀸𑀦𑀁 𑀧𑀼𑀧𑁆𑀨𑀭𑀸𑀲𑀺𑀆𑀤𑀺𑀲𑀤𑁆𑀤𑀸𑀦𑀁 𑀲𑀦𑁆𑀦𑀺𑀥𑀸𑀦𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀚𑁄𑀢𑀓𑀫𑀢𑁆𑀢𑀸 𑀳𑀺 𑀦𑀺𑀧𑀸𑀢𑀸𑀢𑀺. 𑀏𑀯𑀫𑁂𑀯𑀸𑀢𑀺 𑀘 𑀅𑀥𑀼𑀦𑀸 𑀪𑀸𑀲𑀺𑀢𑀸𑀓𑀸𑀭𑁂𑀦𑁂𑀯. 𑀅𑀬𑀁 𑀯𑀲𑀮𑀕𑀼𑀡𑀬𑁄𑀕𑀢𑁄 𑀯𑀲𑀮𑀻 𑀓𑀸𑀴𑀓𑀡𑁆𑀡𑀻 𑀬𑀲𑁆𑀫𑀺𑀁 𑀯𑀸 𑀢𑀲𑁆𑀫𑀺𑀁 𑀯𑀸 𑀞𑀸𑀦𑁂 𑀪𑀸𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀁 𑀪𑀦𑁆𑀢𑁂𑀢𑀺 𑀲𑀸𑀥𑀼 𑀪𑀦𑁆𑀢𑁂, 𑀲𑀼𑀝𑁆𑀞𑀼 𑀪𑀦𑁆𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁆𑀣 𑀧𑀦 𑀥𑀫𑁆𑀫𑀲𑁆𑀲 𑀲𑀸𑀥𑀼𑀓𑀁 𑀲𑀯𑀦𑀫𑀦𑀲𑀺𑀓𑀸𑀭𑁂 𑀲𑀦𑁆𑀦𑀺𑀬𑁄𑀚𑀺𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀢𑀢𑁆𑀣 𑀅𑀢𑁆𑀢𑀦𑁄 𑀞𑀺𑀢𑀪𑀸𑀯𑀲𑁆𑀲 𑀧𑀝𑀺𑀚𑀸𑀦𑀦𑀫𑁂𑀯 𑀯𑀘𑀦𑀲𑀫𑁆𑀧𑀝𑀺𑀕𑁆𑀕𑀳𑁄, 𑀢𑀤𑀸𑀓𑀸𑀭𑁄𑀧𑀺 𑀅𑀢𑁆𑀣𑀢𑁄 𑀯𑀘𑀦𑀲𑀫𑁆𑀧𑀝𑀺𑀕𑁆𑀕𑀳𑁄𑀬𑁂𑀯 𑀦𑀸𑀫, 𑀢𑁂𑀦𑀸𑀳 ‘‘𑀯𑀘𑀦𑀲𑀫𑁆𑀧𑀝𑀺𑀕𑁆𑀕𑀳𑁂’’𑀢𑀺.

𑀏𑀯𑀁 𑀩𑁆𑀬𑀸 𑀔𑁄𑀢𑀺 𑀏𑀯𑀁 𑀯𑀺𑀬 𑀔𑁄. 𑀏𑀯𑀁 𑀔𑁄𑀢𑀺 𑀳𑀺 𑀇𑀫𑁂𑀲𑀁 𑀧𑀤𑀸𑀦𑀫𑀦𑁆𑀢𑀭𑁂 𑀯𑀺𑀬𑀲𑀤𑁆𑀤𑀲𑁆𑀲 𑀩𑁆𑀬𑀸𑀧𑀤𑁂𑀲𑁄𑀢𑀺 𑀦𑁂𑀭𑀼𑀢𑁆𑀢𑀺𑀓𑀸 ‘‘𑀯-𑀓𑀸𑀭𑀲𑁆𑀲, 𑀩-𑀓𑀸𑀭𑀁, 𑀬-𑀓𑀸𑀭𑀲𑀁𑀬𑁄𑀕𑀜𑁆𑀘 𑀓𑀢𑁆𑀯𑀸 𑀤𑀻𑀖𑀯𑀲𑁂𑀦 𑀧𑀤𑀲𑀺𑀤𑁆𑀥𑀻’’𑀢𑀺𑀧𑀺 𑀯𑀤𑀦𑁆𑀢𑀺. 𑀆𑀓𑀸𑀭𑁂𑀢𑀺 𑀆𑀓𑀸𑀭𑀫𑀢𑁆𑀢𑁂. 𑀅𑀧𑁆𑀧𑀸𑀩𑀸𑀥𑀦𑁆𑀢𑀺 𑀯𑀺𑀲𑀪𑀸𑀕𑀯𑁂𑀤𑀦𑀸𑀪𑀸𑀯𑀁. 𑀅𑀧𑁆𑀧𑀸𑀢𑀗𑁆𑀓𑀦𑁆𑀢𑀺𑀓𑀺𑀘𑁆𑀙𑀚𑀻𑀯𑀺𑀢𑀓𑀭𑀭𑁄𑀕𑀸𑀪𑀸𑀯𑀁. 𑀮𑀳𑀼𑀝𑁆𑀞𑀸𑀦𑀦𑁆𑀢𑀺 𑀦𑀺𑀕𑁆𑀕𑁂𑀮𑀜𑁆𑀜𑀢𑀸𑀬 𑀮𑀳𑀼𑀢𑀸𑀬𑀼𑀢𑁆𑀢𑀁 𑀉𑀝𑁆𑀞𑀸𑀦𑀁. 𑀩𑀮𑀦𑁆𑀢𑀺 𑀓𑀸𑀬𑀩𑀮𑀁. 𑀨𑀸𑀲𑀼𑀯𑀺𑀳𑀸𑀭𑀦𑁆𑀢𑀺 𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀲𑀼𑀔𑀯𑀺𑀳𑀸𑀭𑀁. 𑀯𑀺𑀢𑁆𑀣𑀸𑀭𑁄 𑀤𑀲𑀫 𑀲𑀼𑀪𑀲𑀼𑀢𑁆𑀢𑀝𑁆𑀞𑀓𑀣𑀸𑀬 𑀫𑁂𑀯 (𑀤𑀻. 𑀦𑀺. 𑀅𑀝𑁆𑀞. 𑁧.𑁪𑁪𑁫) 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀏𑀯𑀜𑁆𑀘 𑀯𑀤𑁂𑀳𑀻𑀢𑀺 𑀬𑀣𑀸𑀳𑀁 𑀯𑀤𑀸𑀫𑀺, 𑀏𑀯𑀫𑁆𑀧𑀺 𑀲𑀫𑀡𑀁 𑀆𑀦𑀦𑁆𑀤𑀁 𑀯𑀤𑁂𑀳𑀺. ‘‘𑀲𑀸𑀥𑀼 𑀓𑀺𑀭 𑀪𑀯’’𑀦𑁆𑀢𑀺𑀆𑀤𑀺𑀓𑀁 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀯𑀘𑀦𑀁, 𑀲𑁄 𑀘 𑀯𑀤𑀦𑀸𑀓𑀸𑀭𑁄 𑀇𑀥 𑀏𑀯𑀁-𑀲𑀤𑁆𑀤𑁂𑀦 𑀦𑀺𑀤𑀲𑁆𑀲𑀻𑀬𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀦𑀺𑀤𑀲𑁆𑀲𑀦𑁂’’𑀢𑀺. 𑀓𑀸𑀮𑀸𑀫𑀸𑀢𑀺 𑀓𑀸𑀮𑀸𑀫𑀕𑁄𑀢𑁆𑀢𑀲𑀫𑁆𑀩𑀦𑁆𑀥𑁂 𑀚𑀦𑁂 𑀆𑀮𑀧𑀢𑀺. ‘‘𑀇𑀫𑁂…𑀧𑁂… 𑀯𑀸’’𑀢𑀺 𑀬𑀁 𑀫𑀬𑀸 𑀯𑀼𑀢𑁆𑀢𑀁, 𑀢𑀁 𑀓𑀺𑀁 𑀫𑀜𑁆𑀜𑀣𑀸𑀢𑀺 𑀅𑀢𑁆𑀣𑁄. 𑀲𑀫𑀢𑁆𑀢𑀸𑀢𑀺 𑀧𑀭𑀺𑀧𑀽𑀭𑀺𑀢𑀸. 𑀲𑀫𑀸𑀤𑀺𑀦𑁆𑀦𑀸𑀢𑀺 𑀲𑀫𑀸𑀤𑀺𑀬𑀺𑀢𑀸. 𑀲𑀁𑀯𑀢𑁆𑀢𑀦𑁆𑀢𑀺 𑀯𑀸 𑀦𑁄 𑀯𑀸 𑀲𑀁𑀯𑀢𑁆𑀢𑀦𑁆𑀢𑀺 𑀏𑀢𑁆𑀣 𑀯𑀘𑀦𑀤𑁆𑀯𑀬𑁂 𑀓𑀣𑀁 𑀯𑁄 𑀢𑀼𑀫𑁆𑀳𑀸𑀓𑀁 𑀫𑀢𑀺 𑀳𑁄𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀏𑀯𑀁 𑀦𑁄𑀢𑀺 𑀏𑀯𑀫𑁂𑀯 𑀅𑀫𑁆𑀳𑀸𑀓𑀁 𑀫𑀢𑀺 𑀏𑀢𑁆𑀣 𑀳𑁄𑀢𑀺, 𑀅𑀫𑁆𑀳𑀸𑀓𑀫𑁂𑀢𑁆𑀣 𑀫𑀢𑀺 𑀳𑁄𑀢𑀺 𑀬𑁂𑀯𑀸𑀢𑀺𑀧𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀢𑁂𑀲𑀁 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀸𑀦𑀁 𑀅𑀳𑀺𑀢𑀤𑀼𑀓𑁆𑀔𑀸𑀯𑀳𑀪𑀸𑀯𑁂 𑀲𑀦𑁆𑀦𑀺𑀝𑁆𑀞𑀸𑀦𑀚𑀦𑀦𑀢𑁆𑀣𑀁 𑀅𑀦𑀼𑀫𑀢𑀺𑀕𑁆𑀕𑀳𑀡𑀯𑀲𑁂𑀦 ‘‘𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀯𑀸, 𑀓𑀣𑀁 𑀯𑁄 𑀏𑀢𑁆𑀣 𑀳𑁄𑀢𑀻’’𑀢𑀺 𑀧𑀼𑀘𑁆𑀙𑀸𑀬 𑀓𑀢𑀸𑀬 ‘‘𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑀤𑀸𑀓𑀸𑀭𑀲𑀦𑁆𑀦𑀺𑀝𑁆𑀞𑀸𑀦𑀁 𑀏𑀯𑀁-𑀲𑀤𑁆𑀤𑁂𑀦 𑀯𑀺𑀪𑀸𑀯𑀺𑀢𑀁, 𑀲𑁄 𑀘 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑀸𑀓𑀸𑀭𑁄 𑀦𑀺𑀬𑀫𑀺𑀬𑀫𑀸𑀦𑁄 𑀅𑀢𑁆𑀣𑀢𑁄 𑀅𑀯𑀥𑀸𑀭𑀡𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀅𑀯𑀥𑀸𑀭𑀡𑁂’’𑀢𑀺. 𑀆𑀓𑀸𑀭𑀢𑁆𑀣𑀫𑀜𑁆𑀜𑀢𑁆𑀭 𑀲𑀩𑁆𑀩𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀘𑁄𑀤𑀦𑀸, 𑀲𑁄𑀥𑀦𑀸 𑀘 𑀯𑁂𑀤𑀺𑀢𑀩𑁆𑀩𑀸.

𑀆𑀤𑀺𑀲𑀤𑁆𑀤𑁂𑀦 𑀘𑁂𑀢𑁆𑀣 𑀇𑀤𑀫𑀢𑁆𑀣𑀧𑀼𑀘𑁆𑀙𑀸𑀧𑀭𑀺𑀫𑀸𑀡𑀸𑀤𑀺𑀅𑀢𑁆𑀣𑀸𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀢𑀣𑀸 𑀳𑀺 ‘‘𑀏𑀯𑀁𑀕𑀢𑀸𑀦𑀺, 𑀏𑀯𑀁𑀯𑀺𑀥𑁄, 𑀏𑀯𑀫𑀸𑀓𑀸𑀭𑁄’’𑀢𑀺 𑀘 𑀆𑀤𑀻𑀲𑀼 𑀇𑀤𑀫𑀢𑁆𑀣𑁂, 𑀕𑀢𑀯𑀺𑀥𑀸𑀓𑀸𑀭𑀲𑀤𑁆𑀤𑀸 𑀧𑀦 𑀧𑀓𑀸𑀭𑀧𑀭𑀺𑀬𑀸𑀬𑀸. 𑀕𑀢𑀯𑀺𑀥𑀬𑀼𑀢𑁆𑀢𑀸𑀓𑀸𑀭𑀲𑀤𑁆𑀤𑁂 𑀳𑀺 𑀮𑁄𑀓𑀺𑀬𑀸 𑀧𑀓𑀸𑀭𑀢𑁆𑀣𑁂 𑀯𑀤𑀦𑁆𑀢𑀺. ‘‘𑀏𑀯𑀁 𑀲𑀼 𑀢𑁂 𑀲𑀼𑀦𑁆𑀳𑀸𑀢𑀸 𑀲𑀼𑀯𑀺𑀮𑀺𑀢𑁆𑀢𑀸 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀽 𑀆𑀫𑀼𑀢𑁆𑀢𑀫𑀡𑀺𑀓𑀼𑀡𑁆𑀟𑀮𑀸𑀪𑀭𑀡𑀸 𑀑𑀤𑀸𑀢𑀯𑀢𑁆𑀣𑀯𑀲𑀦𑀸 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑀸 𑀲𑀫𑀗𑁆𑀕𑀻𑀪𑀽𑀢𑀸 𑀧𑀭𑀺𑀘𑀸𑀭𑁂𑀦𑁆𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀢𑁆𑀯𑀁 𑀏𑀢𑀭𑀳𑀺 𑀲𑀸𑀘𑀭𑀺𑀬𑀓𑁄𑀢𑀺? 𑀦𑁄 𑀳𑀺𑀤𑀁 𑀪𑁄 𑀕𑁄𑀢𑀫𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁮𑁬) 𑀧𑀼𑀘𑁆𑀙𑀸𑀬𑀁. ‘‘𑀏𑀯𑀁 𑀮𑀳𑀼𑀧𑀭𑀺𑀯𑀢𑁆𑀢𑀁 (𑀅. 𑀦𑀺. 𑁧.𑁪𑁮), 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄’’𑀢𑀺 (𑀧𑀸𑀭𑀸. 𑁧𑁨) 𑀘 𑀆𑀤𑀻𑀲𑀼 𑀧𑀭𑀺𑀫𑀸𑀡𑁂. 𑀏𑀢𑁆𑀣𑀸𑀧𑀺 ‘‘𑀲𑀼𑀦𑁆𑀳𑀸𑀢𑀸 𑀲𑀼𑀯𑀺𑀮𑀺𑀢𑁆𑀢𑀸’’𑀢𑀺𑀆𑀤𑀺𑀯𑀘𑀦𑀁 𑀧𑀼𑀘𑁆𑀙𑀸, 𑀮𑀳𑀼𑀧𑀭𑀺𑀯𑀢𑁆𑀢𑀁, 𑀆𑀬𑀽𑀦𑀁 𑀧𑀫𑀸𑀡𑀜𑁆𑀘 𑀧𑀭𑀺𑀫𑀸𑀡𑀁, 𑀢𑀤𑀸𑀓𑀸𑀭𑁄𑀧𑀺 𑀅𑀢𑁆𑀣𑀢𑁄 𑀧𑀼𑀘𑁆𑀙𑀸 𑀘 𑀧𑀭𑀺𑀫𑀸𑀡𑀜𑁆𑀘 𑀦𑀸𑀫, 𑀢𑀲𑁆𑀫𑀸 𑀏𑀢𑁂𑀲𑀼 𑀧𑀼𑀘𑁆𑀙𑀢𑁆𑀣𑁄, 𑀧𑀭𑀺𑀫𑀸𑀡𑀢𑁆𑀣𑁄 𑀘 𑀏𑀯𑀁𑀲𑀤𑁆𑀤𑁄 𑀯𑁂𑀤𑀺𑀢𑀩𑁆𑀩𑁄𑀢𑀺. 𑀇𑀥 𑀧𑀦 𑀲𑁄 𑀓𑀢𑀫𑁂𑀲𑀼 𑀪𑀯𑀢𑀺, 𑀲𑀩𑁆𑀩𑀢𑁆𑀣 𑀯𑀸, 𑀅𑀦𑀺𑀬𑀫𑀢𑁄 𑀧𑀤𑁂𑀲𑁂 𑀯𑀸𑀢𑀺 𑀘𑁄𑀤𑀦𑀸𑀬 ‘‘𑀲𑁆𑀯𑀸𑀬𑀫𑀺𑀥𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀦𑀦𑀼 𑀏𑀓𑀲𑁆𑀫𑀺𑀁𑀬𑁂𑀯 𑀅𑀢𑁆𑀣𑁂 𑀲𑀺𑀬𑀸, 𑀓𑀲𑁆𑀫𑀸 𑀢𑀻𑀲𑀼𑀧𑀻𑀢𑀺 𑀘, 𑀳𑁄𑀢𑀼 𑀢𑀺𑀩𑁆𑀩𑀺𑀥𑁂𑀲𑀼 𑀅𑀢𑁆𑀣𑁂𑀲𑀼, 𑀓𑁂𑀦 𑀓𑀺𑀫𑀢𑁆𑀣𑀁 𑀤𑀻𑀧𑁂𑀢𑀻𑀢𑀺 𑀘 𑀅𑀦𑀼𑀬𑁄𑀕𑀁 𑀧𑀭𑀺𑀳𑀭𑀦𑁆𑀢𑁄 ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀢𑀻𑀲𑀼 𑀅𑀢𑁆𑀣𑁂𑀲𑀼. 𑀏𑀓𑀢𑁆𑀢𑀦𑀸𑀦𑀢𑁆𑀢𑀅𑀩𑁆𑀬𑀸𑀧𑀸𑀭𑀏𑀯𑀁𑀥𑀫𑁆𑀫𑀢𑀸𑀲𑀗𑁆𑀔𑀸𑀢𑀸, 𑀦𑀦𑁆𑀤𑀺𑀬𑀸𑀯𑀢𑁆𑀢𑀢𑀺𑀧𑀼𑀓𑁆𑀔𑀮𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀅𑀗𑁆𑀓𑀼𑀲𑀤𑀺𑀲𑀸𑀮𑁄𑀘𑀦𑀲𑀗𑁆𑀔𑀸𑀢𑀸 𑀯𑀸 𑀆𑀥𑀸𑀭𑀸𑀤𑀺𑀪𑁂𑀤𑀯𑀲𑁂𑀦 𑀦𑀸𑀦𑀸𑀯𑀺𑀥𑀸 𑀦𑀬𑀸 𑀦𑀸𑀦𑀸𑀦𑀬𑀸, 𑀧𑀸𑀴𑀺𑀕𑀢𑀺𑀬𑁄 𑀯𑀸 𑀦𑀬𑀸, 𑀢𑀸 𑀘 𑀧𑀜𑁆𑀜𑀢𑁆𑀢𑀺𑀅𑀦𑀼𑀧𑀜𑁆𑀜𑀢𑁆𑀢𑀺 𑀆𑀤𑀺𑀯𑀲𑁂𑀦, 𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀸𑀤𑀺𑀯𑀲𑁂𑀦, 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀤𑀺𑀮𑁄𑀓𑀺𑀬𑀸𑀤𑀺𑀢𑀤𑀼𑀪𑀬𑀯𑁄𑀫𑀺𑀲𑁆𑀲𑀓𑀸𑀤𑀺𑀯𑀲𑁂𑀦, 𑀓𑀼𑀲𑀮𑀸𑀤𑀺𑀯𑀲𑁂𑀦, 𑀔𑀦𑁆𑀥𑀸𑀤𑀺𑀯𑀲𑁂𑀦, 𑀲𑀗𑁆𑀕𑀳𑀸𑀤𑀺𑀯𑀲𑁂𑀦, 𑀲𑀫𑀬𑀯𑀺𑀫𑀼𑀢𑁆𑀢𑀸𑀤𑀺𑀯𑀲𑁂𑀦, 𑀞𑀧𑀦𑀸𑀤𑀺𑀯𑀲𑁂𑀦, 𑀓𑀼𑀲𑀮𑀫𑀽𑀮𑀸𑀤𑀺𑀯𑀲𑁂𑀦, 𑀢𑀺𑀓𑀧𑀝𑁆𑀞𑀸𑀦𑀸𑀤𑀺𑀯𑀲𑁂𑀦 𑀘 𑀧𑀺𑀝𑀓𑀢𑁆𑀢𑀬𑀸𑀦𑀼𑀭𑀽𑀧𑀁 𑀦𑀸𑀦𑀸𑀧𑁆𑀧𑀓𑀸𑀭𑀸𑀢𑀺 𑀦𑀸𑀦𑀸𑀦𑀬𑀸. 𑀢𑁂𑀳𑀺 𑀦𑀺𑀧𑀼𑀡𑀁 𑀲𑀡𑁆𑀳𑀁 𑀲𑀼𑀔𑀼𑀫𑀁 𑀢𑀣𑀸. 𑀆𑀲𑀬𑁄𑀯 𑀅𑀚𑁆𑀛𑀸𑀲𑀬𑁄, 𑀢𑁂 𑀘 𑀲𑀲𑁆𑀲𑀢𑀸𑀤𑀺𑀪𑁂𑀤𑁂𑀦, 𑀢𑀢𑁆𑀣 𑀘 𑀅𑀧𑁆𑀧𑀭𑀚𑀓𑁆𑀔𑀢𑀸𑀤𑀺𑀯𑀲𑁂𑀦 𑀅𑀦𑁂𑀓𑀸, 𑀅𑀢𑁆𑀢𑀚𑁆𑀛𑀸𑀲𑀬𑀸𑀤𑀬𑁄 𑀏𑀯 𑀯𑀸 𑀲𑀫𑀼𑀝𑁆𑀞𑀸𑀦𑀫𑀼𑀧𑁆𑀧𑀢𑁆𑀢𑀺𑀳𑁂𑀢𑀼 𑀏𑀢𑀲𑁆𑀲𑀸𑀢𑀺 𑀢𑀣𑀸, 𑀉𑀧𑀦𑁂𑀢𑀩𑁆𑀩𑀸𑀪𑀸𑀯𑀢𑁄 𑀅𑀢𑁆𑀣𑀩𑁆𑀬𑀜𑁆𑀚𑀦𑁂 𑀳𑀺 𑀲𑀫𑁆𑀧𑀦𑁆𑀦𑀁 𑀧𑀭𑀺𑀧𑀼𑀡𑁆𑀡𑀁 𑀢𑀣𑀸. 𑀅𑀧𑀺𑀘 𑀲𑀗𑁆𑀓𑀸𑀲𑀦𑀧𑀓𑀸𑀲𑀦𑀯𑀺𑀯𑀭𑀡𑀯𑀺𑀪𑀚𑀦𑀉𑀢𑁆𑀢𑀸𑀦𑀻𑀓𑀭𑀡𑀧𑀜𑁆𑀜𑀢𑁆𑀢𑀺𑀯𑀲𑁂𑀦 𑀙𑀳𑀺 𑀅𑀢𑁆𑀣𑀧𑀤𑁂𑀳𑀺, 𑀅𑀓𑁆𑀔𑀭𑀧𑀤𑀩𑁆𑀬𑀜𑁆𑀚𑀦𑀆𑀓𑀸𑀭𑀦𑀺𑀭𑀼𑀢𑁆𑀢𑀺𑀦𑀺𑀤𑁆𑀤𑁂𑀲𑀯𑀲𑁂𑀦 𑀙𑀳𑀺 𑀩𑁆𑀬𑀜𑁆𑀚𑀦𑀧𑀤𑁂𑀳𑀺 𑀘 𑀲𑀫𑁆𑀧𑀦𑁆𑀦𑀁 𑀲𑀫𑀦𑁆𑀦𑀸𑀕𑀢𑀁 𑀢𑀣𑀸. 𑀅𑀣 𑀯𑀸 𑀯𑀺𑀜𑁆𑀜𑀽𑀦𑀁 𑀳𑀤𑀬𑀗𑁆𑀕𑀫𑀢𑁄, 𑀲𑀯𑀦𑁂 𑀅𑀢𑀺𑀢𑁆𑀢𑀺𑀚𑀦𑀦𑀢𑁄, 𑀩𑁆𑀬𑀜𑁆𑀚𑀦𑀭𑀲𑀯𑀲𑁂𑀦 𑀧𑀭𑀫𑀕𑀫𑁆𑀪𑀻𑀭𑀪𑀸𑀯𑀢𑁄, 𑀯𑀺𑀘𑀸𑀭𑀡𑁂 𑀅𑀢𑀺𑀢𑁆𑀢𑀺𑀚𑀦𑀦𑀢𑁄, 𑀅𑀢𑁆𑀣𑀭𑀲𑀯𑀲𑁂𑀦 𑀘 𑀲𑀫𑁆𑀧𑀦𑁆𑀦𑀁 𑀲𑀸𑀤𑀼𑀭𑀲𑀁 𑀢𑀣𑀸.

𑀧𑀸𑀝𑀺𑀳𑀸𑀭𑀺𑀬𑀧𑀤𑀲𑁆𑀲 𑀯𑀘𑀦𑀢𑁆𑀣𑀁 ‘‘𑀧𑀝𑀺𑀧𑀓𑁆𑀔𑀳𑀭𑀡𑀢𑁄 𑀭𑀸𑀕𑀸𑀤𑀺𑀓𑀺𑀮𑁂𑀲𑀸𑀧𑀦𑀬𑀦𑀢𑁄 𑀧𑀸𑀝𑀺𑀳𑀸𑀭𑀺𑀬’’𑀦𑁆𑀢𑀺 𑀯𑀤𑀦𑁆𑀢𑀺. 𑀪𑀕𑀯𑀢𑁄 𑀧𑀦 𑀧𑀝𑀺𑀧𑀓𑁆𑀔𑀸 𑀭𑀸𑀕𑀸𑀤𑀬𑁄 𑀦 𑀲𑀦𑁆𑀢𑀺, 𑀬𑁂 𑀳𑀭𑀺𑀢𑀩𑁆𑀩𑀸 𑀩𑁄𑀥𑀺𑀫𑀽𑀮𑁂𑀬𑁂𑀯 𑀲𑀯𑀸𑀲𑀦𑀲𑀓𑀮𑀲𑀁𑀓𑀺𑀮𑁂𑀲𑀸𑀦𑀁 𑀧𑀳𑀻𑀦𑀢𑁆𑀢𑀸. 𑀧𑀼𑀣𑀼𑀚𑁆𑀚𑀦𑀸𑀦𑀫𑁆𑀧𑀺 𑀘 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀅𑀝𑁆𑀞𑀕𑀼𑀡𑀲𑀫𑀦𑁆𑀦𑀸𑀕𑀢𑁂 𑀘𑀺𑀢𑁆𑀢𑁂 𑀳𑀢𑀧𑀝𑀺𑀧𑀓𑁆𑀔𑁂 𑀲𑀢𑀺𑀬𑁂𑀯 𑀇𑀤𑁆𑀥𑀺𑀯𑀺𑀥𑀁 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀧𑀼𑀣𑀼𑀚𑁆𑀚𑀦𑁂𑀲𑀼 𑀧𑀯𑀢𑁆𑀢𑀯𑁄𑀳𑀸𑀭𑁂𑀦𑀧𑀺 𑀦 𑀲𑀓𑁆𑀓𑀸 𑀇𑀥 ‘‘𑀧𑀸𑀝𑀺𑀳𑀸𑀭𑀺𑀬’’𑀦𑁆𑀢𑀺 𑀯𑀢𑁆𑀢𑀼𑀁, 𑀲𑀘𑁂 𑀧𑀦 𑀫𑀳𑀸𑀓𑀸𑀭𑀼𑀡𑀺𑀓𑀲𑁆𑀲 𑀪𑀕𑀯𑀢𑁄 𑀯𑁂𑀦𑁂𑀬𑁆𑀬𑀕𑀢𑀸𑀯 𑀓𑀺𑀮𑁂𑀲𑀸 𑀧𑀝𑀺𑀧𑀓𑁆𑀔𑀸 𑀲𑀁𑀲𑀸𑀭𑀧𑀗𑁆𑀓𑀦𑀺𑀫𑀼𑀕𑁆𑀕𑀲𑁆𑀲 𑀲𑀢𑁆𑀢𑀦𑀺𑀓𑀸𑀬𑀲𑁆𑀲 𑀲𑀫𑀼𑀤𑁆𑀥𑀭𑀺𑀢𑀼𑀓𑀸𑀫𑀢𑁄, 𑀢𑀲𑁆𑀫𑀸 𑀢𑁂𑀲𑀁 𑀯𑁂𑀦𑁂𑀬𑁆𑀬𑀕𑀢𑀓𑀺𑀮𑁂𑀲𑀲𑀗𑁆𑀔𑀸𑀢𑀸𑀦𑀁 𑀧𑀝𑀺𑀧𑀓𑁆𑀔𑀸𑀦𑀁 𑀳𑀭𑀡𑀢𑁄 𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀯𑀼𑀢𑁆𑀢𑀁 𑀅𑀲𑁆𑀲, 𑀏𑀯𑀁 𑀲𑀢𑀺 𑀬𑀼𑀢𑁆𑀢𑀫𑁂𑀢𑀁.

𑀅𑀣 𑀯𑀸 𑀪𑀕𑀯𑀢𑁄 𑀲𑀸𑀲𑀦𑀲𑁆𑀲 𑀧𑀝𑀺𑀧𑀓𑁆𑀔𑀸 𑀢𑀺𑀢𑁆𑀣𑀺𑀬𑀸, 𑀢𑁂𑀲𑀁 𑀢𑀺𑀢𑁆𑀣𑀺𑀬𑀪𑀽𑀢𑀸𑀦𑀁 𑀧𑀝𑀺𑀧𑀓𑁆𑀔𑀸𑀦𑀁 𑀳𑀭𑀡𑀢𑁄 𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺𑀧𑀺 𑀬𑀼𑀚𑁆𑀚𑀢𑀺. 𑀓𑀸𑀫𑀜𑁆𑀘𑁂𑀢𑁆𑀣 𑀢𑀺𑀢𑁆𑀣𑀺𑀬𑀸 𑀳𑀭𑀺𑀢𑀩𑁆𑀩𑀸 𑀦𑀸𑀲𑁆𑀲𑀼, 𑀢𑁂𑀲𑀁 𑀧𑀦 𑀲𑀦𑁆𑀢𑀸𑀦𑀕𑀢𑀤𑀺𑀝𑁆𑀞𑀺𑀳𑀭𑀡𑀯𑀲𑁂𑀦 𑀤𑀺𑀝𑁆𑀞𑀺𑀧𑁆𑀧𑀓𑀸𑀲𑀦𑁂 𑀅𑀲𑀫𑀢𑁆𑀣𑀢𑀸𑀓𑀸𑀭𑀡𑁂𑀦 𑀘 𑀇𑀤𑁆𑀥𑀺𑀆𑀤𑁂𑀲𑀦𑀸𑀦𑀼𑀲𑀸𑀲𑀦𑀻𑀲𑀗𑁆𑀔𑀸𑀢𑁂𑀳𑀺 𑀢𑀻𑀳𑀺𑀧𑀺 𑀧𑀸𑀝𑀺𑀳𑀸𑀭𑀺𑀬𑁂𑀳𑀺 𑀢𑁂 𑀳𑀭𑀺𑀢𑀸 𑀅𑀧𑀦𑀻𑀢𑀸 𑀦𑀸𑀫 𑀳𑁄𑀦𑁆𑀢𑀺. 𑀧𑀝𑀻𑀢𑀺 𑀯𑀸 𑀅𑀬𑀁 𑀲𑀤𑁆𑀤𑁄 ‘‘𑀧𑀘𑁆𑀙𑀸’’𑀢𑀺 𑀏𑀢𑀲𑁆𑀲 𑀅𑀢𑁆𑀣𑀁 𑀩𑁄𑀥𑁂𑀢𑀺 ‘‘𑀢𑀲𑁆𑀫𑀺𑀁 𑀧𑀝𑀺𑀧𑀯𑀺𑀝𑁆𑀞𑀫𑁆𑀳𑀺, 𑀅𑀜𑁆𑀜𑁄 𑀆𑀕𑀜𑁆𑀙𑀺 𑀩𑁆𑀭𑀸𑀳𑁆𑀫𑀡𑁄’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁯𑁮𑁫; 𑀘𑀽𑀴𑀦𑀺. 𑁪) 𑀯𑀺𑀬, 𑀢𑀲𑁆𑀫𑀸 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀯𑀺𑀕𑀢𑀽𑀧𑀓𑁆𑀮𑁂𑀲𑁂 𑀓𑀢𑀓𑀺𑀘𑁆𑀘𑁂𑀦 𑀧𑀘𑁆𑀙𑀸 𑀳𑀭𑀺𑀢𑀩𑁆𑀩𑀁 𑀧𑀯𑀢𑁆𑀢𑁂𑀢𑀩𑁆𑀩𑀦𑁆𑀢𑀺 𑀧𑀝𑀺𑀳𑀸𑀭𑀺𑀬𑀁, 𑀢𑀤𑁂𑀯 𑀤𑀻𑀖𑀯𑀲𑁂𑀦, 𑀲𑀓𑀢𑁆𑀣𑀯𑀼𑀢𑁆𑀢𑀺𑀧𑀘𑁆𑀘𑀬𑀯𑀲𑁂𑀦 𑀯𑀸 𑀧𑀸𑀝𑀺𑀳𑀸𑀭𑀺𑀬𑀁, 𑀅𑀢𑁆𑀢𑀦𑁄 𑀯𑀸 𑀉𑀧𑀓𑁆𑀮𑁂𑀲𑁂𑀲𑀼 𑀘𑀢𑀼𑀢𑁆𑀣𑀚𑁆𑀛𑀸𑀦𑀫𑀕𑁆𑀕𑁂𑀳𑀺 𑀳𑀭𑀺𑀢𑁂𑀲𑀼 𑀧𑀘𑁆𑀙𑀸 𑀢𑀤𑀜𑁆𑀜𑁂𑀲𑀁 𑀳𑀭𑀡𑀁 𑀧𑀸𑀝𑀺𑀳𑀸𑀭𑀺𑀬𑀁 𑀯𑀼𑀢𑁆𑀢𑀦𑀬𑁂𑀦. 𑀇𑀤𑁆𑀥𑀺𑀆𑀤𑁂𑀲𑀦𑀸𑀦𑀼𑀲𑀸𑀲𑀦𑀺𑀬𑁄 𑀳𑀺 𑀯𑀺𑀕𑀢𑀽𑀧𑀓𑁆𑀮𑁂𑀲𑁂𑀦, 𑀓𑀢𑀓𑀺𑀘𑁆𑀘𑁂𑀦 𑀘 𑀲𑀢𑁆𑀢𑀳𑀺𑀢𑀢𑁆𑀣𑀁 𑀧𑀼𑀦 𑀧𑀯𑀢𑁆𑀢𑁂𑀢𑀩𑁆𑀩𑀸, 𑀳𑀢𑁂𑀲𑀼 𑀘 𑀅𑀢𑁆𑀢𑀦𑁄 𑀉𑀧𑀓𑁆𑀮𑁂𑀲𑁂𑀲𑀼 𑀧𑀭𑀲𑀢𑁆𑀢𑀸𑀦𑀁 𑀉𑀧𑀓𑁆𑀮𑁂𑀲𑀳𑀭𑀡𑀸𑀦𑀺 𑀘 𑀳𑁄𑀦𑁆𑀢𑀻𑀢𑀺 𑀢𑀤𑀼𑀪𑀬𑀫𑁆𑀧𑀺 𑀦𑀺𑀩𑁆𑀩𑀘𑀦𑀁 𑀬𑀼𑀚𑁆𑀚𑀢𑀺.

𑀅𑀧𑀺𑀘 𑀬𑀣𑀸𑀯𑀼𑀢𑁆𑀢𑁂𑀳𑀺 𑀦𑀺𑀩𑁆𑀩𑀘𑀦𑁂𑀳𑀺 𑀇𑀤𑁆𑀥𑀺𑀆𑀤𑁂𑀲𑀦𑀸𑀦𑀼𑀲𑀸𑀲𑀦𑀻𑀲𑀗𑁆𑀔𑀸𑀢𑁄 𑀲𑀫𑀼𑀤𑀸𑀬𑁄 𑀧𑀝𑀺𑀳𑀸𑀭𑀺𑀬𑀁 𑀦𑀸𑀫. 𑀏𑀓𑁂𑀓𑀁 𑀧𑀦 𑀢𑀲𑁆𑀫𑀺𑀁 𑀪𑀯𑀁 ‘‘𑀧𑀸𑀝𑀺𑀳𑀸𑀭𑀺𑀬’’𑀦𑁆𑀢𑀺 𑀯𑀼𑀘𑁆𑀘𑀢𑀺 𑀯𑀺𑀲𑁂𑀲𑀢𑁆𑀣𑀚𑁄𑀢𑀓𑀧𑀘𑁆𑀘𑀬𑀦𑁆𑀢𑀭𑁂𑀦 𑀲𑀤𑁆𑀤𑀭𑀘𑀦𑀸𑀯𑀺𑀲𑁂𑀲𑀲𑀫𑁆𑀪𑀯𑀢𑁄, 𑀧𑀝𑀺𑀳𑀸𑀭𑀺𑀬𑀁 𑀯𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀁, 𑀫𑀕𑁆𑀕𑁄 𑀘 𑀧𑀝𑀺𑀧𑀓𑁆𑀔𑀳𑀭𑀡𑀢𑁄, 𑀢𑀢𑁆𑀣 𑀚𑀸𑀢𑀁, 𑀢𑀲𑁆𑀫𑀺𑀁 𑀯𑀸 𑀦𑀺𑀫𑀺𑀢𑁆𑀢𑀪𑀽𑀢𑁂, 𑀢𑀢𑁄 𑀯𑀸 𑀆𑀕𑀢𑀦𑁆𑀢𑀺 𑀧𑀸𑀝𑀺𑀳𑀸𑀭𑀺𑀬𑀁. 𑀯𑀺𑀘𑀺𑀢𑁆𑀭𑀸 𑀳𑀺 𑀢𑀤𑁆𑀥𑀺𑀢𑀯𑀼𑀢𑁆𑀢𑀺. 𑀢𑀲𑁆𑀲 𑀧𑀦 𑀇𑀤𑁆𑀥𑀺𑀆𑀤𑁂𑀲𑀦𑀸𑀦𑀼𑀲𑀸𑀲𑀦𑀻𑀪𑁂𑀤𑁂𑀦, 𑀯𑀺𑀲𑀬𑀪𑁂𑀤𑁂𑀦 𑀘 𑀩𑀳𑀼𑀯𑀺𑀥𑀲𑁆𑀲 𑀪𑀕𑀯𑀢𑁄 𑀤𑁂𑀲𑀦𑀸𑀬 𑀮𑀩𑁆𑀪𑀫𑀸𑀦𑀢𑁆𑀢𑀸 ‘‘𑀯𑀺𑀯𑀺𑀥𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀯𑀼𑀢𑁆𑀢𑀁. 𑀪𑀕𑀯𑀸 𑀳𑀺 𑀓𑀤𑀸𑀘𑀺 𑀇𑀤𑁆𑀥𑀺𑀯𑀲𑁂𑀦𑀸𑀧𑀺 𑀤𑁂𑀲𑀦𑀁 𑀓𑀭𑁄𑀢𑀺 𑀦𑀺𑀫𑁆𑀫𑀺𑀢𑀩𑀼𑀤𑁆𑀥𑁂𑀦 𑀲𑀳 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀤𑀻𑀲𑀼, 𑀓𑀤𑀸𑀘𑀺 𑀆𑀤𑁂𑀲𑀦𑀸𑀯𑀲𑁂𑀦𑀸𑀧𑀺 𑀆𑀫𑀕𑀦𑁆𑀥𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀫𑁆𑀫𑀤𑁂𑀲𑀦𑀸𑀤𑀻𑀲𑀼 (𑀲𑀼. 𑀦𑀺. 𑀅𑀝𑁆𑀞. 𑁧.𑁨𑁪𑁧), 𑀬𑁂𑀪𑀼𑀬𑁆𑀬𑁂𑀦 𑀧𑀦 𑀅𑀦𑀼𑀲𑀸𑀲𑀦𑀺𑀬𑀸. 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀜𑁆𑀳𑀺 𑀩𑀼𑀤𑁆𑀥𑀸𑀦𑀁 𑀲𑀢𑀢𑀁 𑀥𑀫𑁆𑀫𑀤𑁂𑀲𑀦𑀸. 𑀇𑀢𑀺 𑀢𑀁𑀢𑀁𑀤𑁂𑀲𑀦𑀸𑀓𑀸𑀭𑁂𑀦 𑀅𑀦𑁂𑀓𑀯𑀺𑀥𑀧𑀸𑀝𑀺𑀳𑀸𑀭𑀺𑀬𑀢𑀸 𑀤𑁂𑀲𑀦𑀸𑀬 𑀮𑀩𑁆𑀪𑀢𑀺. 𑀅𑀬𑀫𑀢𑁆𑀣𑁄 𑀉𑀧𑀭𑀺 𑀏𑀓𑀸𑀤𑀲𑀫𑀲𑁆𑀲 𑀓𑁂𑀯𑀝𑁆𑀝𑀲𑀼𑀢𑁆𑀢𑀲𑁆𑀲 𑀯𑀡𑁆𑀡𑀦𑀸𑀬 (𑀤𑀻. 𑀦𑀺. 𑀅𑀝𑁆𑀞. 𑁧.𑁪𑁮𑁧) 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀅𑀣 𑀯𑀸 𑀢𑀲𑁆𑀲 𑀯𑀺𑀯𑀺𑀥𑀲𑁆𑀲𑀸𑀧𑀺 𑀧𑀸𑀝𑀺𑀳𑀸𑀭𑀺𑀬𑀲𑁆𑀲 𑀪𑀕𑀯𑀢𑁄 𑀤𑁂𑀲𑀦𑀸𑀬 𑀲𑀁𑀲𑀽𑀘𑀦𑀢𑁄 ‘‘𑀯𑀺𑀯𑀺𑀥𑀧𑀸𑀝𑀺𑀳𑀸𑀭𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁, 𑀅𑀦𑁂𑀓𑀯𑀺𑀥𑀧𑀸𑀝𑀺𑀳𑀸𑀭𑀺𑀬𑀤𑀲𑁆𑀲𑀦𑀦𑁆𑀢𑀺 𑀅𑀢𑁆𑀣𑁄.

𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀬𑀸𑀯 𑀪𑀕𑀯𑀢𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁂 𑀲𑀩𑁆𑀩𑁂𑀲𑀁 𑀲𑀼𑀡𑀦𑁆𑀢𑀸𑀦𑀁 𑀦𑀸𑀦𑀸𑀪𑀸𑀲𑀺𑀢𑀸𑀦𑀁 𑀢𑀁𑀢𑀁𑀪𑀸𑀲𑀸𑀦𑀼𑀭𑀽𑀧𑀢𑁄 𑀤𑁂𑀲𑀦𑀸 𑀲𑁄𑀢𑀧𑀣𑀫𑀸𑀕𑀘𑁆𑀙𑀢𑀻𑀢𑀺 𑀆𑀳 ‘‘𑀲𑀩𑁆𑀩…𑀧𑁂… 𑀫𑀸𑀕𑀘𑁆𑀙𑀦𑁆𑀢’’𑀦𑁆𑀢𑀺. 𑀲𑁄𑀢𑀫𑁂𑀯 𑀲𑁄𑀢𑀧𑀣𑁄, 𑀲𑀯𑀦𑀁 𑀯𑀸 𑀲𑁄𑀢𑀁, 𑀢𑀲𑁆𑀲 𑀧𑀣𑁄 𑀢𑀣𑀸, 𑀲𑁄𑀢𑀤𑁆𑀯𑀸𑀭𑀦𑁆𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀸𑀓𑀸𑀭𑁂𑀦𑀸𑀢𑀺 𑀬𑀣𑀸𑀤𑁂𑀲𑀺𑀢𑀸𑀓𑀸𑀭𑁂𑀦. 𑀓𑁄 𑀲𑀫𑀢𑁆𑀣𑁄 𑀯𑀺𑀜𑁆𑀜𑀸𑀢𑀼𑀁, 𑀅𑀲𑀫𑀢𑁆𑀣𑁄𑀬𑁂𑀯, 𑀢𑀲𑁆𑀫𑀸𑀢𑀺 𑀧𑀸𑀞𑀲𑁂𑀲𑁄. 𑀧𑀦𑀸𑀢𑀺 𑀏𑀓𑀁𑀲𑀢𑁆𑀣𑁂, 𑀢𑁂𑀦 𑀲𑀤𑁆𑀥𑀸𑀲𑀢𑀺𑀥𑀺𑀢𑀺𑀯𑀻𑀭𑀺𑀬𑀸𑀤𑀺𑀩𑀮𑀲𑀗𑁆𑀔𑀸𑀢𑁂𑀦 𑀲𑀩𑁆𑀩𑀣𑀸𑀫𑁂𑀦 𑀏𑀓𑀁𑀲𑁂𑀦𑁂𑀯 𑀲𑁄𑀢𑀼𑀓𑀸𑀫𑀢𑀸𑀲𑀗𑁆𑀔𑀸𑀢𑀓𑀼𑀲𑀮𑀘𑁆𑀙𑀦𑁆𑀤𑀲𑁆𑀲 𑀚𑀦𑀦𑀁 𑀤𑀲𑁆𑀲𑁂𑀢𑀺. 𑀚𑀦𑁂𑀢𑁆𑀯𑀸𑀧𑀻𑀢𑀺 𑀏𑀢𑁆𑀣 𑀧𑀺-𑀲𑀤𑁆𑀤𑁄, 𑀅𑀧𑀺-𑀲𑀤𑁆𑀤𑁄 𑀯𑀸 𑀲𑀫𑁆𑀪𑀸𑀯𑀦𑀢𑁆𑀣𑁄 ‘‘𑀩𑀼𑀤𑁆𑀥𑁄𑀧𑀺 𑀩𑀼𑀤𑁆𑀥𑀪𑀸𑀯𑀁 𑀪𑀸𑀯𑁂𑀢𑁆𑀯𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑀅𑀝𑁆𑀞 𑁧; 𑀫. 𑀦𑀺. 𑀅𑀝𑁆𑀞. 𑁧; 𑀲𑀁. 𑀦𑀺. 𑀅𑀝𑁆𑀞. 𑁧; 𑀅. 𑀦𑀺. 𑀅𑀝𑁆𑀞 𑁧.𑀧𑀞𑀫𑀕𑀦𑁆𑀣𑀸𑀭𑀫𑁆𑀪𑀓𑀣𑀸) 𑀯𑀺𑀬, 𑀢𑁂𑀦 ‘‘𑀲𑀩𑁆𑀩𑀣𑀸𑀫𑁂𑀦 𑀏𑀓𑀁𑀲𑁂𑀦𑁂𑀯 𑀲𑁄𑀢𑀼𑀓𑀸𑀫𑀢𑀁 𑀚𑀦𑁂𑀢𑁆𑀯𑀸𑀧𑀺 𑀦𑀸𑀫 𑀏𑀓𑁂𑀦𑀸𑀓𑀸𑀭𑁂𑀦 𑀲𑀼𑀢𑀁, 𑀓𑀺𑀫𑀗𑁆𑀕𑀁 𑀧𑀦 𑀅𑀜𑁆𑀜𑀣𑀸’’𑀢𑀺 𑀢𑀣𑀸𑀲𑀼𑀢𑁂 𑀥𑀫𑁆𑀫𑁂 𑀲𑀫𑁆𑀪𑀸𑀯𑀦𑀁 𑀓𑀭𑁄𑀢𑀺. 𑀓𑁂𑀘𑀺 𑀧𑀦 ‘‘𑀏𑀤𑀺𑀲𑁂𑀲𑀼 𑀕𑀭𑀳𑀢𑁆𑀣𑁄’’𑀢𑀺 𑀯𑀤𑀦𑁆𑀢𑀺, 𑀢𑀤𑀬𑀼𑀢𑁆𑀢𑀫𑁂𑀯 𑀕𑀭𑀳𑀢𑁆𑀣𑀲𑁆𑀲 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸, 𑀯𑀺𑀚𑁆𑀚𑀫𑀸𑀦𑀢𑁆𑀣𑀲𑁆𑀲𑁂𑀯 𑀘 𑀉𑀧𑀲𑀕𑁆𑀕𑀦𑀺𑀧𑀸𑀢𑀸𑀦𑀁 𑀚𑁄𑀢𑀓𑀢𑁆𑀢𑀸. ‘‘𑀦𑀸𑀦𑀸𑀦𑀬𑀦𑀺𑀧𑀼𑀡’’𑀦𑁆𑀢𑀺𑀆𑀤𑀺𑀦𑀸 𑀳𑀺 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀲𑁄𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀪𑀸𑀯𑁂𑀦 𑀥𑀫𑁆𑀫𑀲𑁆𑀲 𑀇𑀥 𑀲𑀫𑁆𑀪𑀸𑀯𑀦𑀫𑁂𑀯 𑀓𑀭𑁄𑀢𑀺, 𑀢𑀲𑁆𑀫𑀸 ‘‘𑀅𑀧𑀺 𑀤𑀺𑀩𑁆𑀩𑁂𑀲𑀼 𑀓𑀸𑀫𑁂𑀲𑀼, 𑀭𑀢𑀺𑀁 𑀲𑁄 𑀦𑀸𑀥𑀺𑀕𑀘𑁆𑀙𑀢𑀻’’𑀢𑀺𑀆𑀤𑀻𑀲𑀼𑀬𑁂𑀯 (𑀥. 𑀧. 𑁧𑁮𑁭) 𑀕𑀭𑀳𑀢𑁆𑀣𑀲𑀫𑁆𑀪𑀯𑁂𑀲𑀼 𑀕𑀭𑀳𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺. 𑀅𑀧𑀺-𑀲𑀤𑁆𑀤𑁄 𑀘 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀦𑀺𑀧𑀸𑀢𑁄𑀬𑁂𑀯, 𑀦 𑀉𑀧𑀲𑀕𑁆𑀕𑁄. 𑀢𑀣𑀸 𑀳𑀺 ‘‘𑀅𑀧𑀺-𑀲𑀤𑁆𑀤𑁄 𑀘 𑀦𑀺𑀧𑀸𑀢𑀧𑀓𑁆𑀔𑀺𑀓𑁄 𑀓𑀸𑀢𑀩𑁆𑀩𑁄, 𑀬𑀢𑁆𑀣 𑀓𑀺𑀭𑀺𑀬𑀸𑀯𑀸𑀘𑀓𑀢𑁄 𑀧𑀼𑀩𑁆𑀩𑁄 𑀦 𑀳𑁄𑀢𑀻’’𑀢𑀺 𑀅𑀓𑁆𑀔𑀭𑀘𑀺𑀦𑁆𑀢𑀓𑀸 𑀯𑀤𑀦𑁆𑀢𑀺. 𑀫𑀬𑀸𑀧𑀻𑀢𑀺 𑀏𑀢𑁆𑀣 𑀧𑀦 𑀦 𑀓𑁂𑀯𑀮𑀁 𑀫𑀬𑀸𑀯, 𑀅𑀣 𑀔𑁄 𑀅𑀜𑁆𑀜𑁂𑀳𑀺𑀧𑀺 𑀢𑀣𑀸𑀭𑀽𑀧𑁂𑀳𑀻𑀢𑀺 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄 𑀕𑀳𑁂𑀢𑀩𑁆𑀩𑁄.

𑀲𑀸𑀫𑀁 𑀪𑀯𑀢𑀻𑀢𑀺 𑀲𑀬𑀫𑁆𑀪𑀽, 𑀅𑀦𑀸𑀘𑀭𑀺𑀬𑀓𑁄. 𑀦 𑀫𑀬𑀁 𑀇𑀤𑀁 𑀲𑀘𑁆𑀙𑀺𑀓𑀢𑀦𑁆𑀢𑀺 𑀏𑀢𑁆𑀣 𑀧𑀦 ‘‘𑀦 𑀅𑀢𑁆𑀢𑀦𑁄 𑀜𑀸𑀡𑁂𑀦𑁂𑀯 𑀅𑀢𑁆𑀢𑀦𑀸 𑀲𑀘𑁆𑀙𑀺𑀓𑀢’’𑀦𑁆𑀢𑀺 𑀧𑀓𑀭𑀡𑀢𑁄 𑀅𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺. 𑀲𑀸𑀫𑀜𑁆𑀜𑀯𑀘𑀦𑀲𑁆𑀲𑀸𑀧𑀺 𑀳𑀺 𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀲𑀳𑀘𑀭𑀡𑀯𑀺𑀭𑁄𑀥𑀲𑀤𑁆𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑀮𑀺𑀗𑁆𑀕𑀑𑀘𑀺𑀢𑁆𑀬𑀓𑀸𑀮𑀤𑁂𑀲𑀧𑀓𑀭𑀡𑀸𑀤𑀺𑀯𑀲𑁂𑀦 𑀯𑀺𑀲𑁂𑀲𑀢𑁆𑀣𑀕𑁆𑀕𑀳𑀡𑀁 𑀲𑀫𑁆𑀪𑀯𑀢𑀺. 𑀏𑀯𑀁 𑀲𑀩𑁆𑀩𑀢𑁆𑀣. 𑀧𑀭𑀺𑀫𑁄𑀘𑁂𑀦𑁆𑀢𑁄𑀢𑀺 ‘‘𑀧𑀼𑀦 𑀘𑀧𑀭𑀁 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀧𑀸𑀧𑀪𑀺𑀓𑁆𑀔𑀼 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀁 𑀥𑀫𑁆𑀫𑀯𑀺𑀦𑀬𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸 𑀅𑀢𑁆𑀢𑀦𑁄 𑀤𑀳𑀢𑀻’’𑀢𑀺 (𑀧𑀸𑀭𑀸. 𑁧𑁯𑁫) 𑀯𑀼𑀢𑁆𑀢𑀤𑁄𑀲𑀢𑁄 𑀧𑀭𑀺𑀫𑁄𑀘𑀸𑀧𑀦𑀳𑁂𑀢𑀼. 𑀳𑁂𑀢𑁆𑀯𑀢𑁆𑀣𑁂 𑀳𑀺 𑀅𑀦𑁆𑀢-𑀲𑀤𑁆𑀤𑁄 ‘‘𑀅𑀲𑀫𑁆𑀩𑀼𑀥𑀁 𑀩𑀼𑀤𑁆𑀥𑀦𑀺𑀲𑁂𑀯𑀺𑀢’’𑀦𑁆𑀢𑀺𑀆𑀤𑀻𑀲𑀼 (𑀯𑀺. 𑀅𑀝𑁆𑀞. 𑁧.𑀕𑀦𑁆𑀣𑀸𑀭𑀫𑁆𑀪𑀓𑀣𑀸) 𑀯𑀺𑀬. 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀲𑀁𑀯𑀡𑁆𑀡𑀦𑀸𑀧𑁆𑀧𑀓𑀸𑀭𑀯𑀺𑀘𑀸𑀭𑀡𑁂𑀦 𑀅𑀢𑁆𑀢𑀦𑁄 𑀜𑀸𑀡𑀲𑁆𑀲 𑀧𑀘𑁆𑀘𑀓𑁆𑀔𑀢𑀁 𑀲𑀦𑁆𑀥𑀸𑀬 ‘‘𑀇𑀤𑀸𑀦𑀺 𑀯𑀢𑁆𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀲𑀸 𑀳𑀺 𑀲𑀁𑀯𑀡𑁆𑀡𑀦𑀸𑀓𑀸𑀭𑀸𑀦𑀁 𑀧𑀓𑀢𑀺, 𑀬𑀤𑀺𑀤𑀁 𑀲𑀁𑀯𑀡𑁆𑀡𑁂𑀢𑀩𑁆𑀩𑀥𑀫𑁆𑀫𑁂 𑀲𑀩𑁆𑀩𑀢𑁆𑀣 ‘‘𑀅𑀬𑀫𑀺𑀫𑀲𑁆𑀲 𑀅𑀢𑁆𑀣𑁄, 𑀏𑀯𑀫𑀺𑀥 𑀲𑀁𑀯𑀡𑁆𑀡𑀬𑀺𑀲𑁆𑀲𑀸𑀫𑀻’’𑀢𑀺 𑀧𑀼𑀭𑁂𑀢𑀭𑀫𑁂𑀯 𑀲𑀁𑀯𑀡𑁆𑀡𑀦𑀸𑀧𑁆𑀧𑀓𑀸𑀭𑀯𑀺𑀘𑀸𑀭𑀡𑀸.

𑀏𑀢𑀤𑀕𑁆𑀕𑀧𑀤𑀲𑁆𑀲𑀢𑁆𑀣𑁄 𑀯𑀼𑀢𑁆𑀢𑁄𑀯. ‘‘𑀩𑀳𑀼𑀲𑁆𑀲𑀼𑀢𑀸𑀦’’𑀦𑁆𑀢𑀺𑀆𑀤𑀻𑀲𑀼 𑀧𑀦 𑀅𑀜𑁆𑀜𑁂𑀧𑀺 𑀣𑁂𑀭𑀸 𑀩𑀳𑀼𑀲𑁆𑀲𑀼𑀢𑀸, 𑀲𑀢𑀺𑀫𑀦𑁆𑀢𑁄, 𑀕𑀢𑀺𑀫𑀦𑁆𑀢𑁄, 𑀥𑀺𑀢𑀺𑀫𑀦𑁆𑀢𑁄, 𑀉𑀧𑀝𑁆𑀞𑀸𑀓𑀸 𑀘 𑀅𑀢𑁆𑀣𑀺, 𑀅𑀬𑀁 𑀧𑀦𑀸𑀬𑀲𑁆𑀫𑀸 𑀩𑀼𑀤𑁆𑀥𑀯𑀘𑀦𑀁 𑀕𑀡𑁆𑀳𑀦𑁆𑀢𑁄 𑀤𑀲𑀩𑀮𑀲𑁆𑀲 𑀲𑀸𑀲𑀦𑁂 𑀪𑀡𑁆𑀟𑀸𑀕𑀸𑀭𑀺𑀓𑀧𑀭𑀺𑀬𑀢𑁆𑀢𑀺𑀬𑀁 𑀞𑀢𑁆𑀯𑀸 𑀕𑀡𑁆𑀳𑀺, 𑀢𑀲𑁆𑀫𑀸 𑀩𑀳𑀼𑀲𑁆𑀲𑀼𑀢𑀸𑀦𑀁 𑀅𑀕𑁆𑀕𑁄 𑀦𑀸𑀫 𑀚𑀸𑀢𑁄. 𑀇𑀫𑀲𑁆𑀲 𑀘 𑀣𑁂𑀭𑀲𑁆𑀲 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀳𑁂𑀢𑁆𑀯𑀸 𑀥𑀸𑀭𑀡𑀲𑀢𑀺 𑀅𑀜𑁆𑀜𑁂𑀳𑀺 𑀣𑁂𑀭𑁂𑀳𑀺 𑀩𑀮𑀯𑀢𑀭𑀸 𑀅𑀳𑁄𑀲𑀺, 𑀢𑀲𑁆𑀫𑀸 𑀲𑀢𑀺𑀫𑀦𑁆𑀢𑀸𑀦𑀁 𑀅𑀕𑁆𑀕𑁄 𑀦𑀸𑀫 𑀚𑀸𑀢𑁄. 𑀅𑀬𑀫𑁂𑀯𑀸𑀬𑀲𑁆𑀫𑀸 𑀏𑀓𑀧𑀤𑁂 𑀞𑀢𑁆𑀯𑀸 𑀲𑀝𑁆𑀞𑀺𑀧𑀤𑀲𑀳𑀲𑁆𑀲𑀸𑀦𑀺 𑀕𑀡𑁆𑀳𑀦𑁆𑀢𑁄 𑀲𑀢𑁆𑀣𑀸𑀭𑀸 𑀓𑀣𑀺𑀢𑀦𑀺𑀬𑀸𑀫𑁂𑀦 𑀲𑀩𑁆𑀩𑀧𑀤𑀸𑀦𑀺 𑀚𑀸𑀦𑀸𑀢𑀺, 𑀢𑀲𑁆𑀫𑀸 𑀕𑀢𑀺𑀫𑀦𑁆𑀢𑀸𑀦𑀁 𑀅𑀕𑁆𑀕𑁄 𑀦𑀸𑀫 𑀚𑀸𑀢𑁄. 𑀢𑀲𑁆𑀲𑁂𑀯 𑀘𑀸𑀬𑀲𑁆𑀫𑀢𑁄 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀦𑀯𑀻𑀭𑀺𑀬𑀁, 𑀲𑀚𑁆𑀛𑀸𑀬𑀦𑀯𑀻𑀭𑀺𑀬𑀜𑁆𑀘 𑀅𑀜𑁆𑀜𑁂𑀳𑀺 𑀅𑀲𑀤𑀺𑀲𑀁 𑀅𑀳𑁄𑀲𑀺, 𑀢𑀲𑁆𑀫𑀸 𑀥𑀺𑀢𑀺𑀫𑀦𑁆𑀢𑀸𑀦𑀁 𑀅𑀕𑁆𑀕𑁄 𑀦𑀸𑀫 𑀚𑀸𑀢𑁄. 𑀢𑀣𑀸𑀕𑀢𑀁 𑀉𑀧𑀝𑁆𑀞𑀳𑀦𑁆𑀢𑁄 𑀘𑁂𑀲 𑀦 𑀅𑀜𑁆𑀜𑁂𑀲𑀁 𑀉𑀧𑀝𑁆𑀞𑀸𑀓𑀪𑀺𑀓𑁆𑀔𑀽𑀦𑀁 𑀉𑀧𑀝𑁆𑀞𑀳𑀦𑀸𑀓𑀸𑀭𑁂𑀦 𑀉𑀧𑀝𑁆𑀞𑀳𑀢𑀺. 𑀅𑀜𑁆𑀜𑁂𑀧𑀺 𑀳𑀺 𑀢𑀣𑀸𑀕𑀢𑀁 𑀉𑀧𑀝𑁆𑀞𑀳𑀺𑀁𑀲𑀼, 𑀦 𑀘 𑀧𑀦 𑀩𑀼𑀤𑁆𑀥𑀸𑀦𑀁 𑀫𑀦𑀁 𑀕𑀳𑁂𑀢𑁆𑀯𑀸 𑀉𑀧𑀝𑁆𑀞𑀳𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀅𑀬𑀁 𑀧𑀦 𑀣𑁂𑀭𑁄 𑀉𑀧𑀝𑁆𑀞𑀸𑀓𑀝𑁆𑀞𑀸𑀦𑀁 𑀮𑀤𑁆𑀥𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀆𑀭𑀤𑁆𑀥𑀯𑀻𑀭𑀺𑀬𑁄 𑀳𑀼𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀫𑀦𑀁 𑀕𑀳𑁂𑀢𑁆𑀯𑀸 𑀉𑀧𑀝𑁆𑀞𑀳𑀺, 𑀢𑀲𑁆𑀫𑀸 𑀉𑀧𑀝𑁆𑀞𑀸𑀓𑀸𑀦𑀁 𑀅𑀕𑁆𑀕𑁄 𑀦𑀸𑀫 𑀚𑀸𑀢𑁄. 𑀅𑀢𑁆𑀣𑀓𑀼𑀲𑀮𑁄𑀢𑀺 𑀪𑀸𑀲𑀺𑀢𑀢𑁆𑀣𑁂, 𑀧𑀬𑁄𑀚𑀦𑀢𑁆𑀣𑁂 𑀘 𑀙𑁂𑀓𑁄. 𑀥𑀫𑁆𑀫𑁄𑀢𑀺 𑀧𑀸𑀴𑀺𑀥𑀫𑁆𑀫𑁄, 𑀦𑀸𑀦𑀸𑀯𑀺𑀥𑁄 𑀯𑀸 𑀳𑁂𑀢𑀼. 𑀩𑁆𑀬𑀜𑁆𑀚𑀦𑀦𑁆𑀢𑀺 𑀅𑀓𑁆𑀔𑀭𑀁 𑀅𑀢𑁆𑀣𑀲𑁆𑀲 𑀩𑁆𑀬𑀜𑁆𑀚𑀦𑀢𑁄. 𑀧𑀤𑁂𑀦 𑀳𑀺 𑀩𑁆𑀬𑀜𑁆𑀚𑀺𑀢𑁄𑀧𑀺 𑀅𑀢𑁆𑀣𑁄 𑀅𑀓𑁆𑀔𑀭𑀫𑀽𑀮𑀓𑀢𑁆𑀢𑀸 𑀧𑀤𑀲𑁆𑀲 ‘‘𑀅𑀓𑁆𑀔𑀭𑁂𑀦 𑀩𑁆𑀬𑀜𑁆𑀚𑀺𑀢𑁄’’𑀢𑀺 𑀯𑀼𑀘𑁆𑀘𑀢𑀺. 𑀅𑀢𑁆𑀣𑀲𑁆𑀲 𑀯𑀺𑀬𑀜𑁆𑀚𑀦𑀢𑁄 𑀯𑀸 𑀯𑀸𑀓𑁆𑀬𑀫𑁆𑀧𑀺 𑀇𑀥 𑀩𑁆𑀬𑀜𑁆𑀚𑀦𑀁 𑀦𑀸𑀫. 𑀯𑀸𑀓𑁆𑀬𑁂𑀦 𑀳𑀺 𑀅𑀢𑁆𑀣𑁄 𑀧𑀭𑀺𑀧𑀼𑀡𑁆𑀡𑀁 𑀩𑁆𑀬𑀜𑁆𑀚𑀻𑀬𑀢𑀺, 𑀬𑀢𑁄 ‘‘𑀩𑁆𑀬𑀜𑁆𑀚𑀦𑁂𑀳𑀺 𑀯𑀺𑀯𑀭𑀢𑀻’’𑀢𑀺 𑀆𑀬𑀲𑁆𑀫𑀢𑀸 𑀫𑀳𑀸𑀓𑀘𑁆𑀘𑀸𑀬𑀦𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁. 𑀦𑀺𑀭𑀼𑀢𑁆𑀢𑀻𑀢𑀺 𑀦𑀺𑀩𑁆𑀩𑀘𑀦𑀁, 𑀧𑀜𑁆𑀘𑀯𑀺𑀥𑀸 𑀯𑀸 𑀦𑀺𑀭𑀼𑀢𑁆𑀢𑀺𑀦𑀬𑀸. 𑀢𑁂𑀲𑀫𑁆𑀧𑀺 𑀳𑀺 𑀲𑀤𑁆𑀤𑀭𑀘𑀦𑀸𑀯𑀺𑀲𑁂𑀲𑁂𑀦 𑀅𑀢𑁆𑀣𑀸𑀥𑀺𑀕𑀫𑀳𑁂𑀢𑀼𑀢𑁄 𑀇𑀥 𑀕𑀳𑀡𑀁 𑀬𑀼𑀚𑁆𑀚𑀢𑀺. 𑀧𑀼𑀩𑁆𑀩𑀸𑀧𑀭𑀁 𑀦𑀸𑀫 𑀧𑀼𑀩𑁆𑀩𑀸𑀧𑀭𑀸𑀦𑀼𑀲𑀦𑁆𑀥𑀺, 𑀲𑀼𑀢𑁆𑀢𑀲𑁆𑀲 𑀯𑀸 𑀧𑀼𑀩𑁆𑀩𑀪𑀸𑀕𑁂𑀦 𑀅𑀧𑀭𑀪𑀸𑀕𑀲𑁆𑀲 𑀲𑀁𑀲𑀦𑁆𑀤𑀦𑀁. 𑀪𑀕𑀯𑀢𑀸 𑀘 𑀧𑀜𑁆𑀘𑀯𑀺𑀥𑀏𑀢𑀤𑀕𑁆𑀕𑀝𑁆𑀞𑀸𑀦𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀘 𑀧𑀜𑁆𑀘𑀯𑀺𑀥𑀓𑁄𑀲𑀮𑁆𑀮𑁂𑀦 𑀧𑀲𑀝𑁆𑀞𑀪𑀸𑀯𑀸𑀦𑀼𑀭𑀽𑀧𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀥𑀸𑀭𑀡𑀩𑀮𑀦𑁆𑀢𑀺 𑀥𑀸𑀭𑀡𑀲𑀗𑁆𑀔𑀸𑀢𑀁 𑀩𑀮𑀁, 𑀥𑀸𑀭𑀡𑁂 𑀯𑀸 𑀩𑀮𑀁, 𑀉𑀪𑀬𑀢𑁆𑀣𑀸𑀧𑀺 𑀥𑀸𑀭𑁂𑀢𑀼𑀁 𑀲𑀸𑀫𑀢𑁆𑀣𑀺𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑀲𑁆𑀲𑁂𑀦𑁆𑀢𑁄 𑀳𑀼𑀢𑁆𑀯𑀸, 𑀤𑀲𑁆𑀲𑀦𑀳𑁂𑀢𑀽𑀢𑀺𑀧𑀺 𑀅𑀢𑁆𑀣𑁄. 𑀢𑀜𑁆𑀘 𑀔𑁄 𑀅𑀢𑁆𑀣𑀢𑁄 𑀯𑀸 𑀩𑁆𑀬𑀜𑁆𑀚𑀦𑀢𑁄 𑀯𑀸 𑀅𑀦𑀽𑀦𑀫𑀦𑀥𑀺𑀓𑀦𑁆𑀢𑀺 𑀅𑀯𑀥𑀸𑀭𑀡𑀨𑀮𑀫𑀸𑀳. 𑀦 𑀅𑀜𑁆𑀜𑀣𑀸 𑀤𑀝𑁆𑀞𑀩𑁆𑀩𑀦𑁆𑀢𑀺 𑀧𑀦 𑀦𑀺𑀯𑀢𑁆𑀢𑁂𑀢𑀩𑁆𑀩𑀢𑁆𑀣𑀁. 𑀦 𑀅𑀜𑁆𑀜𑀣𑀸𑀢𑀺 𑀘 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀲𑀼𑀢𑀸𑀓𑀸𑀭𑀢𑁄 𑀦 𑀅𑀜𑁆𑀜𑀣𑀸, 𑀦 𑀧𑀦 𑀪𑀕𑀯𑀢𑀸 𑀤𑁂𑀲𑀺𑀢𑀸𑀓𑀸𑀭𑀢𑁄. 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀼𑀪𑀸𑀯𑀸 𑀳𑀺 𑀪𑀕𑀯𑀢𑁄 𑀤𑁂𑀲𑀦𑀸, 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀓𑁄 𑀲𑀫𑀢𑁆𑀣𑁄 𑀯𑀺𑀜𑁆𑀜𑀸𑀢𑀼’’𑀦𑁆𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀯𑀘𑀦𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺, 𑀇𑀢𑀭𑀣𑀸 𑀪𑀕𑀯𑀢𑀸 𑀤𑁂𑀲𑀺𑀢𑀸𑀓𑀸𑀭𑁂𑀦𑁂𑀯 𑀲𑁄𑀢𑀼𑀁 𑀲𑀫𑀢𑁆𑀣𑀢𑁆𑀢𑀸 𑀢𑀤𑁂𑀢𑀁 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀬𑀣𑀸𑀯𑀼𑀢𑁆𑀢𑁂𑀦 𑀧𑀦 𑀅𑀢𑁆𑀣𑁂𑀦 𑀥𑀸𑀭𑀡𑀩𑀮𑀤𑀲𑁆𑀲𑀦𑀜𑁆𑀘 𑀦 𑀯𑀺𑀭𑀼𑀚𑁆𑀛𑀢𑀺 𑀲𑀼𑀢𑀸𑀓𑀸𑀭𑀸𑀯𑀺𑀭𑀼𑀚𑁆𑀛𑀦𑀯𑀲𑁂𑀦 𑀥𑀸𑀭𑀡𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸, 𑀅𑀜𑁆𑀜𑀣𑀸 𑀪𑀕𑀯𑀢𑀸 𑀤𑁂𑀲𑀺𑀢𑀸𑀓𑀸𑀭𑁂𑀦𑁂𑀯 𑀥𑀸𑀭𑀺𑀢𑀼𑀁 𑀲𑀫𑀢𑁆𑀣𑀦𑀢𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀯𑀘𑀦𑁂𑀦 𑀯𑀺𑀭𑀼𑀚𑁆𑀛𑁂𑀬𑁆𑀬. 𑀦 𑀳𑁂𑀢𑁆𑀣 𑀤𑁆𑀯𑀺𑀦𑁆𑀦𑀁 𑀅𑀢𑁆𑀣𑀸𑀦𑀁 𑀅𑀢𑁆𑀣𑀦𑁆𑀢𑀭𑀢𑀸𑀧𑀭𑀺𑀳𑀸𑀭𑁄 𑀬𑀼𑀢𑁆𑀢𑁄 𑀢𑁂𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀅𑀢𑁆𑀣𑀸𑀦𑀁 𑀲𑀼𑀢𑀪𑀸𑀯𑀤𑀻𑀧𑀦𑁂𑀦 𑀏𑀓𑀯𑀺𑀲𑀬𑀢𑁆𑀢𑀸, 𑀇𑀢𑀭𑀣𑀸 𑀣𑁂𑀭𑁄 𑀪𑀕𑀯𑀢𑁄 𑀤𑁂𑀲𑀦𑀸𑀬 𑀲𑀩𑁆𑀩𑀣𑀸 𑀧𑀝𑀺𑀕𑁆𑀕𑀳𑀡𑁂 𑀧𑀘𑁆𑀙𑀺𑀫𑀢𑁆𑀣𑀯𑀲𑁂𑀦 𑀲𑀫𑀢𑁆𑀣𑁄, 𑀧𑀼𑀭𑀺𑀫𑀢𑁆𑀣𑀯𑀲𑁂𑀦 𑀘 𑀅𑀲𑀫𑀢𑁆𑀣𑁄𑀢𑀺 𑀆𑀧𑀚𑁆𑀚𑁂𑀬𑁆𑀬𑀸𑀢𑀺.

‘‘𑀬𑁄 𑀧𑀭𑁄 𑀦 𑀳𑁄𑀢𑀺, 𑀲𑁄 𑀅𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀸𑀬 𑀦𑀺𑀬𑀓𑀚𑁆𑀛𑀢𑁆𑀢𑀲𑀗𑁆𑀔𑀸𑀢𑀸𑀬 𑀲𑀦𑁆𑀢𑀢𑀺𑀬𑀸 𑀧𑀯𑀢𑁆𑀢𑀦𑀓𑁄 𑀢𑀺𑀯𑀺𑀥𑁄𑀧𑀺 𑀫𑁂-𑀲𑀤𑁆𑀤𑁄, 𑀢𑀲𑁆𑀫𑀸 𑀓𑀺𑀜𑁆𑀘𑀸𑀧𑀺 𑀦𑀺𑀬𑀓𑀚𑁆𑀛𑀢𑁆𑀢𑀲𑀦𑁆𑀢𑀢𑀺𑀯𑀲𑁂𑀦 𑀏𑀓𑀲𑁆𑀫𑀺𑀁 𑀬𑁂𑀯𑀢𑁆𑀣𑁂 𑀫𑁂-𑀲𑀤𑁆𑀤𑁄 𑀤𑀺𑀲𑁆𑀲𑀢𑀺, 𑀢𑀣𑀸𑀧𑀺 𑀓𑀭𑀡𑀲𑀫𑁆𑀧𑀤𑀸𑀦𑀲𑀸𑀫𑀺𑀦𑀺𑀤𑁆𑀤𑁂𑀲𑀯𑀲𑁂𑀦 𑀯𑀺𑀚𑁆𑀚𑀫𑀸𑀦𑀯𑀺𑀪𑀢𑁆𑀢𑀺𑀪𑁂𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀢𑀻𑀲𑀼 𑀅𑀢𑁆𑀣𑁂𑀲𑀼 𑀤𑀺𑀲𑁆𑀲𑀢𑀻’’𑀢𑀺, 𑀢𑀻𑀲𑀼 𑀯𑀺𑀪𑀢𑁆𑀢𑀺𑀬𑀢𑁆𑀣𑁂𑀲𑀼 𑀅𑀢𑁆𑀢𑀦𑀸 𑀲𑀜𑁆𑀜𑀼𑀢𑁆𑀢𑀯𑀺𑀪𑀢𑁆𑀢𑀺𑀢𑁄 𑀤𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀕𑀸𑀣𑀸𑀪𑀺𑀕𑀻𑀢𑀦𑁆𑀢𑀺 𑀕𑀸𑀣𑀸𑀬 𑀅𑀪𑀺𑀕𑀻𑀢𑀁 𑀅𑀪𑀺𑀫𑀼𑀔𑀁 𑀕𑀸𑀬𑀺𑀢𑀁. 𑀅𑀪𑁄𑀚𑀦𑁂𑀬𑁆𑀬𑀦𑁆𑀢𑀺 𑀪𑁄𑀚𑀦𑀁 𑀓𑀸𑀢𑀼𑀫𑀦𑀭𑀳𑀭𑀽𑀧𑀁. 𑀅𑀪𑀺𑀕𑀻𑀢𑀧𑀤𑀲𑁆𑀲 𑀓𑀢𑁆𑀢𑀼𑀧𑁂𑀓𑁆𑀔𑀢𑁆𑀢𑀸 𑀫𑀬𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀲𑁂𑀲𑁂𑀲𑀼𑀧𑀺 𑀬𑀣𑀸𑀭𑀳𑀁. 𑀲𑀼𑀢𑀲𑀤𑁆𑀤𑀲𑁆𑀲 𑀓𑀫𑁆𑀫𑀪𑀸𑀯𑀲𑀸𑀥𑀦𑀯𑀲𑁂𑀦 𑀤𑁆𑀯𑀸𑀥𑀺𑀧𑁆𑀧𑀸𑀬𑀺𑀓𑀧𑀤𑀢𑁆𑀢𑀸 𑀬𑀣𑀸𑀬𑁄𑀕𑀁 ‘‘𑀫𑀬𑀸 𑀲𑀼𑀢’’𑀦𑁆𑀢𑀺 𑀘 ‘‘𑀫𑀫 𑀲𑀼𑀢’’𑀦𑁆𑀢𑀺 𑀘 𑀅𑀢𑁆𑀣𑀤𑁆𑀯𑀬𑁂 𑀬𑀼𑀚𑁆𑀚𑀢𑀺.

𑀓𑀺𑀜𑁆𑀘𑀸𑀧𑀺 𑀉𑀧𑀲𑀕𑁆𑀕𑁄 𑀓𑀺𑀭𑀺𑀬𑀁 𑀯𑀺𑀲𑁂𑀲𑁂𑀢𑀺, 𑀚𑁄𑀢𑀓𑀫𑀢𑁆𑀢𑀪𑀸𑀯𑀢𑁄 𑀧𑀦 𑀲𑀢𑀺𑀧𑀺 𑀢𑀲𑁆𑀫𑀺𑀁 𑀲𑀼𑀢𑀲𑀤𑁆𑀤𑁄𑀬𑁂𑀯 𑀢𑀁 𑀢𑀁 𑀅𑀢𑁆𑀣𑀁 𑀯𑀤𑀢𑀻𑀢𑀺 𑀅𑀦𑀼𑀧𑀲𑀕𑁆𑀕𑀲𑁆𑀲 𑀲𑀼𑀢𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁂 𑀲𑀉𑀧𑀲𑀕𑁆𑀕𑀲𑁆𑀲 𑀕𑀳𑀡𑀁 𑀦 𑀯𑀺𑀭𑀼𑀚𑁆𑀛𑀢𑀻𑀢𑀺 𑀆𑀳 ‘‘𑀲𑀉𑀧𑀲𑀕𑁆𑀕𑁄 𑀘 𑀅𑀦𑀼𑀧𑀲𑀕𑁆𑀕𑁄 𑀘𑀸’’𑀢𑀺. 𑀅𑀲𑁆𑀲𑀸𑀢𑀺 𑀲𑀼𑀢𑀲𑀤𑁆𑀤𑀲𑁆𑀲. 𑀉𑀧𑀲𑀕𑁆𑀕𑀯𑀲𑁂𑀦𑀧𑀺 𑀥𑀸𑀢𑀼𑀲𑀤𑁆𑀤𑁄 𑀯𑀺𑀲𑁂𑀲𑀢𑁆𑀣𑀯𑀸𑀘𑀓𑁄 𑀬𑀣𑀸 ‘‘𑀅𑀦𑀼𑀪𑀯𑀢𑀺 𑀧𑀭𑀸𑀪𑀯𑀢𑀻’’𑀢𑀺 𑀯𑀼𑀢𑁆𑀢𑀁 ‘‘𑀕𑀘𑁆𑀙𑀦𑁆𑀢𑁄𑀢𑀺 𑀅𑀢𑁆𑀣𑁄’’𑀢𑀺. 𑀢𑀣𑀸 𑀅𑀦𑀼𑀧𑀲𑀕𑁆𑀕𑁄𑀧𑀺 𑀥𑀸𑀢𑀼𑀲𑀤𑁆𑀤𑁄 𑀲𑀉𑀧𑀲𑀕𑁆𑀕𑁄 𑀯𑀺𑀬 𑀯𑀺𑀲𑁂𑀲𑀢𑁆𑀣𑀯𑀸𑀘𑀓𑁄𑀢𑀺 𑀆𑀳 ‘‘𑀯𑀺𑀲𑁆𑀲𑀼𑀢𑀥𑀫𑁆𑀫𑀲𑁆𑀲𑀸𑀢𑀺 𑀅𑀢𑁆𑀣𑁄’’𑀢𑀺. 𑀏𑀯𑀫𑀻𑀤𑀺𑀲𑁂𑀲𑀼. 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀲𑁄𑀢𑀤𑁆𑀯𑀸𑀭𑀦𑀺𑀲𑁆𑀲𑀺𑀢𑁂𑀦 𑀯𑀺𑀜𑁆𑀜𑀸𑀡𑁂𑀦 𑀯𑀺𑀜𑁆𑀜𑀸𑀢𑀩𑁆𑀩𑀁, 𑀲𑀲𑀫𑁆𑀪𑀸𑀭𑀓𑀣𑀸 𑀯𑀸 𑀏𑀲𑀸, 𑀲𑁄𑀢𑀤𑁆𑀯𑀸𑀭𑁂𑀦 𑀯𑀺𑀜𑁆𑀜𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑀯𑀺𑀜𑁆𑀜𑀸𑀢𑀥𑀭𑁄𑀢𑀺 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦 𑀫𑀦𑁄𑀯𑀺𑀜𑁆𑀜𑀸𑀡𑁂𑀦 𑀯𑀺𑀜𑁆𑀜𑀸𑀢𑀥𑀫𑁆𑀫𑀥𑀭𑁄. 𑀦 𑀳𑀺 𑀲𑁄𑀢𑀤𑁆𑀯𑀸𑀭𑀦𑀺𑀲𑁆𑀲𑀺𑀢𑀯𑀺𑀜𑁆𑀜𑀸𑀡𑀫𑀢𑁆𑀢𑁂𑀦 𑀥𑀫𑁆𑀫𑁄 𑀯𑀺𑀜𑁆𑀜𑀸𑀬𑀢𑀺, 𑀅𑀣 𑀔𑁄 𑀢𑀤𑀦𑀼𑀲𑀸𑀭𑀫𑀦𑁄𑀯𑀺𑀜𑁆𑀜𑀸𑀡𑁂𑀦𑁂𑀯, 𑀲𑀼𑀢𑀥𑀭𑁄𑀢𑀺 𑀘 𑀢𑀣𑀸 𑀯𑀺𑀜𑁆𑀜𑀸𑀢𑀥𑀫𑁆𑀫𑀥𑀭𑁄 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀢𑀤𑀢𑁆𑀣𑁄𑀬𑁂𑀯 𑀲𑀫𑁆𑀪𑀯𑀢𑀻𑀢𑀺 𑀏𑀯𑀁 𑀯𑀼𑀢𑁆𑀢𑀁. 𑀓𑀫𑁆𑀫𑀪𑀸𑀯𑀲𑀸𑀥𑀦𑀸𑀦𑀺 𑀲𑀼𑀢𑀲𑀤𑁆𑀤𑁂 𑀲𑀫𑁆𑀪𑀯𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀇𑀥 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀧𑀼𑀩𑁆𑀩𑀸𑀧𑀭𑀧𑀤𑀲𑀫𑁆𑀩𑀦𑁆𑀥𑀯𑀲𑁂𑀦 𑀅𑀢𑁆𑀣𑀲𑁆𑀲 𑀉𑀧𑀧𑀦𑁆𑀦𑀢𑀸, 𑀅𑀦𑀼𑀧𑀧𑀦𑁆𑀦𑀢𑀸 𑀘 𑀯𑀺𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 𑀲𑀼𑀢𑀲𑀤𑁆𑀤𑀲𑁆𑀲𑁂𑀯 𑀯𑀲𑁂𑀦 𑀅𑀬𑀫𑀢𑁆𑀣𑁄 ‘‘𑀉𑀧𑀧𑀦𑁆𑀦𑁄, 𑀅𑀦𑀼𑀧𑀧𑀦𑁆𑀦𑁄’’𑀢𑀺 𑀯𑀸 𑀦 𑀯𑀺𑀜𑁆𑀜𑀸𑀢𑀩𑁆𑀩𑁄𑀢𑀺 𑀘𑁄𑀤𑀦𑀸𑀬 𑀧𑀼𑀩𑁆𑀩𑀸𑀧𑀭𑀧𑀤𑀲𑀫𑁆𑀩𑀦𑁆𑀥𑀯𑀲𑁂𑀦 𑀏𑀢𑀤𑀢𑁆𑀣𑀲𑁆𑀲 𑀉𑀧𑀧𑀦𑁆𑀦𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀫𑁂-𑀲𑀤𑁆𑀤𑀲𑁆𑀲 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀫𑀬𑀸𑀢𑀺 𑀅𑀢𑁆𑀣𑁂 𑀲𑀢𑀻𑀢𑀺 𑀓𑀢𑁆𑀢𑀼𑀢𑁆𑀣𑁂 𑀓𑀭𑀡𑀦𑀺𑀤𑁆𑀤𑁂𑀲𑀯𑀲𑁂𑀦 𑀫𑀬𑀸𑀢𑀺 𑀅𑀢𑁆𑀣𑁂 𑀯𑀢𑁆𑀢𑀩𑁆𑀩𑁂 𑀲𑀢𑀺, 𑀬𑀤𑀸 𑀫𑁂-𑀲𑀤𑁆𑀤𑀲𑁆𑀲 𑀓𑀢𑁆𑀢𑀼𑀯𑀲𑁂𑀦 𑀓𑀭𑀡𑀦𑀺𑀤𑁆𑀤𑁂𑀲𑁄, 𑀢𑀤𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀫𑀸𑀢𑀺 𑀅𑀢𑁆𑀣𑁂 𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑀻𑀬𑀢𑁆𑀣𑁂 𑀲𑀸𑀫𑀺𑀦𑀺𑀤𑁆𑀤𑁂𑀲𑀯𑀲𑁂𑀦 𑀫𑀫𑀸𑀢𑀺 𑀅𑀢𑁆𑀣𑁂 𑀯𑀢𑁆𑀢𑀩𑁆𑀩𑁂 𑀲𑀢𑀺, 𑀬𑀤𑀸 𑀲𑀫𑁆𑀩𑀦𑁆𑀥𑀯𑀲𑁂𑀦 𑀲𑀸𑀫𑀺 𑀦𑀺𑀤𑁆𑀤𑁂𑀲𑁄, 𑀢𑀤𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀏𑀯𑀁 𑀲𑀤𑁆𑀤𑀢𑁄 𑀜𑀸𑀢𑀩𑁆𑀩𑀫𑀢𑁆𑀣𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀇𑀤𑀸𑀦𑀺 𑀢𑁂𑀳𑀺 𑀤𑀲𑁆𑀲𑁂𑀢𑀩𑁆𑀩𑀫𑀢𑁆𑀣𑀁 𑀦𑀺𑀤𑀲𑁆𑀲𑁂𑀦𑁆𑀢𑁄 ‘‘𑀏𑀯𑀫𑁂𑀢𑁂𑀲𑀽’’𑀢𑀺𑀆𑀤𑀺𑀫𑀸𑀳. 𑀲𑀼𑀢𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑁂 𑀧𑀬𑀼𑀢𑁆𑀢𑁂𑀦 𑀏𑀯𑀁-𑀲𑀤𑁆𑀤𑁂𑀦 𑀲𑀯𑀦𑀓𑀺𑀭𑀺𑀬𑀸𑀚𑁄𑀢𑀓𑁂𑀦𑁂𑀯 𑀪𑀯𑀺𑀢𑀩𑁆𑀩𑀁 𑀯𑀺𑀚𑁆𑀚𑀫𑀸𑀦𑀢𑁆𑀣𑀲𑁆𑀲 𑀚𑁄𑀢𑀓𑀫𑀢𑁆𑀢𑀢𑁆𑀢𑀸 𑀦𑀺𑀧𑀸𑀢𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀏𑀯𑀦𑁆𑀢𑀺 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀺𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀦𑀺𑀤𑀲𑁆𑀲𑀦’’𑀦𑁆𑀢𑀺. 𑀲𑀯𑀦𑀸𑀬 𑀏𑀯 𑀳𑀺 𑀆𑀓𑀸𑀭𑁄, 𑀦𑀺𑀤𑀲𑁆𑀲𑀦𑀁, 𑀅𑀯𑀥𑀸𑀭𑀡𑀫𑁆𑀧𑀺, 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑁄 𑀏𑀯𑀁-𑀲𑀤𑁆𑀤𑀲𑁆𑀲 𑀢𑀺𑀯𑀺𑀥𑁄𑀧𑀺 𑀅𑀢𑁆𑀣𑁄 𑀲𑀯𑀦𑀓𑀺𑀭𑀺𑀬𑀸𑀚𑁄𑀢𑀓𑀪𑀸𑀯𑁂𑀦 𑀇𑀥𑀸𑀥𑀺𑀧𑁆𑀧𑁂𑀢𑁄𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀘𑁂𑀢𑁆𑀣 𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀻𑀦𑀁 𑀲𑁄𑀢𑀤𑁆𑀯𑀸𑀭𑀺𑀓𑀯𑀺𑀜𑁆𑀜𑀸𑀡𑀸𑀦𑀁, 𑀢𑀤𑀪𑀺𑀦𑀺𑀧𑀸𑀢𑀸𑀦𑀜𑁆𑀘 𑀫𑀦𑁄𑀤𑁆𑀯𑀸𑀭𑀺𑀓 𑀯𑀺𑀜𑁆𑀜𑀸𑀡𑀸𑀦𑀁 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁, 𑀬𑀢𑁄 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑀯𑀺𑀜𑁆𑀜𑀸𑀢𑀢𑁆𑀣𑁂 𑀇𑀥 𑀲𑀼𑀢𑀲𑀤𑁆𑀤𑁄𑀢𑀺 𑀯𑀼𑀢𑁆𑀢𑁄. 𑀅𑀯𑀥𑀸𑀭𑀡𑀨𑀮𑀢𑁆𑀢𑀸 𑀲𑀤𑁆𑀤𑀧𑀬𑁄𑀕𑀲𑁆𑀲 𑀲𑀩𑁆𑀩𑀫𑁆𑀧𑀺 𑀯𑀸𑀓𑁆𑀬𑀁 𑀅𑀦𑁆𑀢𑁄𑀕𑀥𑀸𑀯𑀥𑀸𑀭𑀡𑀁, 𑀢𑀲𑁆𑀫𑀸 ‘‘𑀲𑀼𑀢’’𑀦𑁆𑀢𑀺 𑀏𑀢𑀲𑁆𑀲 𑀲𑀼𑀢𑀫𑁂𑀯𑀸𑀢𑀺 𑀅𑀬𑀫𑀢𑁆𑀣𑁄 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀅𑀲𑁆𑀲𑀯𑀦𑀪𑀸𑀯𑀧𑀝𑀺𑀓𑁆𑀔𑁂𑀧𑀢𑁄’’𑀢𑀺. 𑀏𑀢𑁂𑀦 𑀳𑀺 𑀯𑀘𑀦𑁂𑀦 𑀅𑀯𑀥𑀸𑀭𑀡𑁂𑀦 𑀦𑀺𑀭𑀸𑀓𑀢𑀁 𑀤𑀲𑁆𑀲𑁂𑀢𑀺. 𑀬𑀣𑀸 𑀧𑀦 𑀬𑀁 𑀲𑀼𑀢𑀁 𑀲𑀼𑀢𑀫𑁂𑀯𑀸𑀢𑀺 𑀦𑀺𑀬𑀫𑁂𑀢𑀩𑁆𑀩𑀁, 𑀢𑀣𑀸 𑀘 𑀢𑀁 𑀲𑀼𑀢𑀁 𑀲𑀫𑁆𑀫𑀸 𑀲𑀼𑀢𑀁 𑀳𑁄𑀢𑀻𑀢𑀺 𑀅𑀯𑀥𑀸𑀭𑀡𑀨𑀮𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀅𑀦𑀽𑀦𑀸𑀥𑀺𑀓𑀸𑀯𑀺𑀧𑀭𑀻𑀢𑀕𑁆𑀕𑀳𑀡𑀦𑀺𑀤𑀲𑁆𑀲𑀦’’𑀦𑁆𑀢𑀺. 𑀅𑀣 𑀯𑀸 𑀲𑀤𑁆𑀤𑀦𑁆𑀢𑀭𑀢𑁆𑀣𑀸𑀧𑁄𑀳𑀦𑀯𑀲𑁂𑀦 𑀲𑀤𑁆𑀤𑁄 𑀅𑀢𑁆𑀣𑀁 𑀯𑀤𑀢𑀺, 𑀢𑀲𑁆𑀫𑀸 ‘‘𑀲𑀼𑀢’’𑀦𑁆𑀢𑀺 𑀏𑀢𑀲𑁆𑀲 𑀅𑀲𑀼𑀢𑀁 𑀦 𑀳𑁄𑀢𑀻𑀢𑀺 𑀅𑀬𑀫𑀢𑁆𑀣𑁄 𑀮𑀩𑁆𑀪𑀢𑀻𑀢𑀺 𑀲𑀦𑁆𑀥𑀸𑀬 ‘‘𑀅𑀲𑁆𑀲𑀯𑀦𑀪𑀸𑀯𑀧𑀝𑀺𑀓𑁆𑀔𑁂𑀧𑀢𑁄’’𑀢𑀺 𑀯𑀼𑀢𑁆𑀢𑀁, 𑀇𑀫𑀺𑀦𑀸 𑀤𑀺𑀝𑁆𑀞𑀸𑀤𑀺𑀦𑀺𑀯𑀢𑁆𑀢𑀦𑀁 𑀓𑀭𑁄𑀢𑀺 𑀤𑀺𑀝𑁆𑀞𑀸𑀤𑀻𑀦𑀁 ‘‘𑀅𑀲𑀼𑀢’’𑀦𑁆𑀢𑀺 𑀲𑀤𑁆𑀤𑀦𑁆𑀢𑀭𑀢𑁆𑀣𑀪𑀸𑀯𑁂𑀦 𑀦𑀺𑀯𑀢𑁆𑀢𑁂𑀢𑀩𑁆𑀩𑀢𑁆𑀢𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀦 𑀇𑀤𑀁 𑀫𑀬𑀸 𑀅𑀢𑁆𑀢𑀦𑁄 𑀜𑀸𑀡𑁂𑀦 𑀤𑀺𑀝𑁆𑀞𑀁, 𑀦 𑀘 𑀲𑀬𑀫𑁆𑀪𑀼𑀜𑀸𑀡𑁂𑀦 𑀲𑀘𑁆𑀙𑀺𑀓𑀢𑀁, 𑀅𑀣 𑀔𑁄 𑀲𑀼𑀢𑀁, 𑀢𑀜𑁆𑀘 𑀔𑁄 𑀲𑀼𑀢𑀁 𑀲𑀫𑁆𑀫𑀤𑁂𑀯𑀸𑀢𑀺. 𑀢𑀤𑁂𑀯 𑀲𑀫𑁆𑀫𑀸 𑀲𑀼𑀢𑀪𑀸𑀯𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀦𑀽𑀦𑀸…𑀧𑁂… 𑀤𑀲𑁆𑀲𑀦’’𑀦𑁆𑀢𑀺. 𑀳𑁄𑀢𑀺 𑀘𑁂𑀢𑁆𑀣 𑁋

‘‘𑀏𑀯𑀸𑀤𑀺𑀲𑀢𑁆𑀢𑀺𑀬𑀸 𑀘𑁂𑀯, 𑀅𑀜𑁆𑀜𑀢𑁆𑀣𑀸𑀧𑁄𑀳𑀦𑁂𑀦 𑀘;

𑀤𑁆𑀯𑀺𑀥𑀸 𑀲𑀤𑁆𑀤𑁄 𑀅𑀢𑁆𑀣𑀦𑁆𑀢𑀭𑀁, 𑀦𑀺𑀯𑀢𑁆𑀢𑁂𑀢𑀺 𑀬𑀣𑀸𑀭𑀳’’𑀦𑁆𑀢𑀺.

𑀅𑀧𑀺𑀘 𑀅𑀯𑀥𑀸𑀭𑀡𑀢𑁆𑀣𑁂 𑀏𑀯𑀁-𑀲𑀤𑁆𑀤𑁂 𑀅𑀬𑀫𑀢𑁆𑀣𑀬𑁄𑀚𑀦𑀸 𑀓𑀭𑀻𑀬𑀢𑀻𑀢𑀺 𑀢𑀤𑀧𑁂𑀓𑁆𑀔𑀲𑁆𑀲 𑀲𑀼𑀢𑀲𑀤𑁆𑀤𑀲𑁆𑀲 𑀲𑀸𑀯𑀥𑀸𑀭𑀡𑀢𑁆𑀣𑁄 𑀯𑀼𑀢𑁆𑀢𑁄 ‘‘𑀅𑀲𑁆𑀲𑀯𑀦𑀪𑀸𑀯𑀧𑀝𑀺𑀓𑁆𑀔𑁂𑀧𑀢𑁄’’𑀢𑀺, 𑀢𑀤𑀯𑀥𑀸𑀭𑀡𑀨𑀮𑀁 𑀤𑀲𑁆𑀲𑁂𑀢𑀺 ‘‘𑀅𑀦𑀽…𑀧𑁂… 𑀤𑀲𑁆𑀲𑀦’’𑀦𑁆𑀢𑀺 𑀇𑀫𑀺𑀦𑀸. 𑀲𑀯𑀦-𑀲𑀤𑁆𑀤𑁄 𑀘𑁂𑀢𑁆𑀣 𑀪𑀸𑀯𑀲𑀤𑁆𑀤𑁂𑀦 𑀬𑁄𑀕𑀢𑁄 𑀓𑀫𑁆𑀫𑀲𑀸𑀥𑀦𑁄 𑀯𑁂𑀤𑀺𑀢𑀩𑁆𑀩𑁄 ‘‘𑀲𑀼𑀬𑁆𑀬𑀢𑀻’’𑀢𑀺. 𑀅𑀦𑀽𑀦𑀸𑀥𑀺𑀓𑀢𑀸𑀬 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀲𑀼𑀢𑀸𑀓𑀸𑀭𑀢𑁄 𑀅𑀯𑀺𑀧𑀭𑀻𑀢𑀁, 𑀅𑀯𑀺𑀧𑀭𑀻𑀢𑀲𑁆𑀲 𑀯𑀸 𑀲𑀼𑀢𑁆𑀢𑀲𑁆𑀲 𑀕𑀳𑀡𑀁, 𑀢𑀲𑁆𑀲 𑀦𑀺𑀤𑀲𑁆𑀲𑀦𑀁 𑀢𑀣𑀸, 𑀇𑀢𑀺 𑀲𑀯𑀦𑀳𑁂𑀢𑀼 𑀲𑀼𑀡𑀦𑁆𑀢𑀧𑀼𑀕𑁆𑀕𑀮𑀲𑀯𑀦𑀯𑀺𑀲𑁂𑀲𑀯𑀲𑁂𑀦 𑀅𑀬𑀁 𑀬𑁄𑀚𑀦𑀸 𑀓𑀢𑀸.

𑀏𑀯𑀁 𑀧𑀤𑀢𑁆𑀢𑀬𑀲𑁆𑀲 𑀏𑀓𑁂𑀦 𑀧𑀓𑀸𑀭𑁂𑀦 𑀅𑀢𑁆𑀣𑀬𑁄𑀚𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀓𑀸𑀭𑀦𑁆𑀢𑀭𑁂𑀦𑀸𑀧𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀲𑁆𑀲𑀸𑀢𑀺 𑀬𑀸 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀥𑀫𑁆𑀫𑀲𑁆𑀲𑀯𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸 𑀫𑀦𑁄𑀤𑁆𑀯𑀸𑀭𑀺𑀓𑀯𑀺𑀜𑁆𑀜𑀸𑀡𑀯𑀻𑀣𑀺, 𑀢𑀲𑁆𑀲𑀸. 𑀲𑀸 𑀳𑀺 𑀦𑀸𑀦𑀸𑀧𑁆𑀧𑀓𑀸𑀭𑁂𑀦 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀺𑀢𑀼𑀁 𑀲𑀫𑀢𑁆𑀣𑀸, 𑀦 𑀲𑁄𑀢𑀤𑁆𑀯𑀸𑀭𑀺𑀓 𑀯𑀺𑀜𑁆𑀜𑀸𑀡𑀯𑀻𑀣𑀺 𑀏𑀓𑀸𑀭𑀫𑁆𑀫𑀡𑁂𑀬𑁂𑀯 𑀧𑀯𑀢𑁆𑀢𑀦𑀢𑁄, 𑀢𑀣𑀸 𑀘𑁂𑀯 𑀯𑀼𑀢𑁆𑀢𑀁 ‘‘𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦𑀸’’𑀢𑀺. 𑀢𑁂𑀦 𑀳𑀺 𑀲𑁄𑀢𑀤𑁆𑀯𑀸𑀭𑀺𑀓𑀯𑀺𑀜𑁆𑀜𑀸𑀡𑀯𑀻𑀣𑀺 𑀦𑀺𑀯𑀢𑁆𑀢𑀢𑀺. 𑀦𑀸𑀦𑀧𑁆𑀧𑀓𑀸𑀭𑁂𑀦𑀸𑀢𑀺 𑀯𑀓𑁆𑀔𑀫𑀸𑀦𑁂𑀦 𑀅𑀦𑁂𑀓𑀯𑀺𑀳𑀺𑀢𑁂𑀦 𑀩𑁆𑀬𑀜𑁆𑀚𑀦𑀢𑁆𑀣𑀕𑁆𑀕𑀳𑀡𑀸𑀓𑀸𑀭𑀲𑀗𑁆𑀔𑀸𑀢𑁂𑀦 𑀦𑀸𑀦𑀸𑀯𑀺𑀥𑁂𑀦 𑀆𑀓𑀸𑀭𑁂𑀦, 𑀏𑀢𑁂𑀦 𑀇𑀫𑀺𑀲𑁆𑀲𑀸 𑀬𑁄𑀚𑀦𑀸𑀬 𑀆𑀓𑀸𑀭𑀢𑁆𑀣𑁄 𑀏𑀯𑀁-𑀲𑀤𑁆𑀤𑁄 𑀕𑀳𑀺𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀧𑀯𑀢𑁆𑀢𑀺𑀪𑀸𑀯𑀧𑁆𑀧𑀓𑀸𑀲𑀦𑀦𑁆𑀢𑀺 𑀧𑀯𑀢𑁆𑀢𑀺𑀬𑀸 𑀅𑀢𑁆𑀣𑀺𑀪𑀸𑀯𑀧𑁆𑀧𑀓𑀸𑀲𑀦𑀁. 𑀬𑀲𑁆𑀫𑀺𑀁 𑀧𑀓𑀸𑀭𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀯𑀺𑀜𑁆𑀜𑀸𑀡𑀯𑀻𑀣𑀺 𑀦𑀸𑀦𑀧𑁆𑀧𑀓𑀸𑀭𑁂𑀦 𑀧𑀯𑀢𑁆𑀢𑀸, 𑀢𑀤𑁂𑀯 𑀆𑀭𑀫𑁆𑀫𑀡𑀁 𑀲𑀦𑁆𑀥𑀸𑀬 ‘‘𑀥𑀫𑁆𑀫𑀧𑁆𑀧𑀓𑀸𑀲𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀦 𑀧𑀦 𑀲𑀼𑀢𑀲𑀤𑁆𑀤𑀲𑁆𑀲 𑀥𑀫𑁆𑀫𑀢𑁆𑀣𑀁, 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀬𑀁 𑀥𑀫𑁆𑀫𑁄 𑀲𑀼𑀢𑁄’’𑀢𑀺. 𑀢𑀲𑁆𑀲𑀸 𑀳𑀺 𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀆𑀭𑀫𑁆𑀫𑀡𑀫𑁂𑀯 ‘‘𑀅𑀬𑀁 𑀥𑀫𑁆𑀫𑁄 𑀲𑀼𑀢𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀜𑁆𑀘 𑀦𑀺𑀬𑀫𑀺𑀬𑀫𑀸𑀦𑀁 𑀬𑀣𑀸𑀯𑀼𑀢𑁆𑀢𑀸𑀬 𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀆𑀭𑀫𑁆𑀫𑀡𑀪𑀽𑀢𑀁 𑀲𑀼𑀢𑁆𑀢𑀫𑁂𑀯. 𑀅𑀬𑀜𑁆𑀳𑁂𑀢𑁆𑀣𑀸𑀢𑀺𑀆𑀤𑀺 𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀧𑀸𑀓𑀝𑀻𑀓𑀭𑀡𑀁. 𑀢𑀧𑁆𑀧𑀸𑀓𑀝𑀻𑀓𑀭𑀡𑀢𑁆𑀣𑁄 𑀳𑁂𑀢𑁆𑀣 𑀳𑀺-𑀲𑀤𑁆𑀤𑁄. 𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀓𑀭𑀡𑀪𑀽𑀢𑀸𑀬 𑀫𑀬𑀸 𑀦 𑀅𑀜𑁆𑀜𑀁 𑀓𑀢𑀁, 𑀇𑀤𑀁 𑀧𑀦 𑀆𑀭𑀫𑁆𑀫𑀡𑀁 𑀓𑀢𑀁. 𑀓𑀺𑀁 𑀧𑀦 𑀢𑀦𑁆𑀢𑀺 𑀘𑁂? 𑀅𑀬𑀁 𑀥𑀫𑁆𑀫𑁄 𑀲𑀼𑀢𑁄𑀢𑀺. 𑀅𑀬𑀁 𑀧𑀦𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄 𑁋 𑀆𑀓𑀸𑀭𑀢𑁆𑀣𑁂 𑀏𑀯𑀁-𑀲𑀤𑁆𑀤𑁂 ‘‘𑀏𑀓𑁂𑀦𑀸𑀓𑀸𑀭𑁂𑀦𑀸’’𑀢𑀺 𑀬𑁄 𑀆𑀓𑀸𑀭𑁄 𑀯𑀼𑀢𑁆𑀢𑁄, 𑀲𑁄 𑀅𑀢𑁆𑀣𑀢𑁄 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀦𑀸𑀦𑀧𑁆𑀧𑀓𑀸𑀭𑁂𑀦 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀺𑀪𑀸𑀯𑁄𑀬𑁂𑀯, 𑀢𑁂𑀦 𑀘 𑀢𑀤𑀸𑀭𑀫𑁆𑀫𑀡𑀪𑀽𑀢𑀲𑁆𑀲 𑀥𑀫𑁆𑀫𑀲𑁆𑀲𑁂𑀯 𑀲𑀯𑀦𑀁 𑀓𑀢𑀁, 𑀦 𑀅𑀜𑁆𑀜𑀦𑁆𑀢𑀺. 𑀏𑀯𑀁 𑀲𑀯𑀦𑀓𑀺𑀭𑀺𑀬𑀸𑀬 𑀓𑀭𑀡𑀓𑀢𑁆𑀢𑀼𑀓𑀫𑁆𑀫𑀯𑀺𑀲𑁂𑀲𑁄 𑀇𑀫𑀺𑀲𑁆𑀲𑀸 𑀬𑁄𑀚𑀦𑀸𑀬 𑀤𑀲𑁆𑀲𑀺𑀢𑁄.

𑀅𑀜𑁆𑀜𑀫𑁆𑀧𑀺 𑀬𑁄𑀚𑀦𑀫𑀸𑀳 ‘‘𑀢𑀣𑀸’’𑀢𑀺𑀆𑀤𑀺𑀦𑀸. 𑀦𑀺𑀤𑀲𑁆𑀲𑀦𑀢𑁆𑀣𑀁 𑀏𑀯𑀁-𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀦𑀺𑀤𑀲𑁆𑀲𑀦𑁂𑀦 𑀘 𑀦𑀺𑀤𑀲𑁆𑀲𑀺𑀢𑀩𑁆𑀩𑀲𑁆𑀲𑀸𑀯𑀺𑀦𑀸𑀪𑀸𑀯𑀢𑁄 ‘‘𑀏𑀯𑀦𑁆𑀢𑀺 𑀦𑀺𑀤𑀲𑁆𑀲𑀺𑀢𑀩𑁆𑀩𑀧𑁆𑀧𑀓𑀸𑀲𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀳𑀺 𑀢𑀤𑀯𑀺𑀦𑀸𑀪𑀸𑀯𑀢𑁄 𑀏𑀯𑀁𑀲𑀤𑁆𑀤𑁂𑀦 𑀲𑀓𑀮𑀫𑁆𑀧𑀺 𑀲𑀼𑀢𑁆𑀢𑀁 𑀧𑀘𑁆𑀘𑀸𑀫𑀝𑁆𑀞𑀦𑁆𑀢𑀺 𑀤𑀲𑁆𑀲𑁂𑀢𑀺, 𑀲𑀼𑀢𑀲𑀤𑁆𑀤𑀲𑁆𑀲 𑀓𑀺𑀭𑀺𑀬𑀸𑀧𑀭𑀢𑁆𑀢𑀸, 𑀲𑀯𑀦𑀓𑀺𑀭𑀺𑀬𑀸𑀬 𑀘 𑀲𑀸𑀥𑀸𑀭𑀡𑀯𑀺𑀜𑁆𑀜𑀸𑀡𑀧𑁆𑀧𑀩𑀦𑁆𑀥𑀧𑀝𑀺𑀩𑀤𑁆𑀥𑀢𑁆𑀢𑀸 𑀢𑀲𑁆𑀫𑀺𑀜𑁆𑀘 𑀯𑀺𑀜𑁆𑀜𑀸𑀡𑀧𑁆𑀧𑀩𑀦𑁆𑀥𑁂 𑀧𑀼𑀕𑁆𑀕𑀮𑀯𑁄𑀳𑀸𑀭𑁄𑀢𑀺 𑀯𑀼𑀢𑁆𑀢𑀁 ‘‘𑀧𑀼𑀕𑁆𑀕𑀮𑀓𑀺𑀘𑁆𑀘𑀧𑁆𑀧𑀓𑀸𑀲𑀦’’𑀦𑁆𑀢𑀺. 𑀲𑀸𑀥𑀸𑀭𑀡𑀯𑀺𑀜𑁆𑀜𑀸𑀡𑀧𑁆𑀧𑀩𑀦𑁆𑀥𑁄 𑀳𑀺 𑀧𑀡𑁆𑀡𑀢𑁆𑀢𑀺𑀬𑀸 𑀇𑀥 𑀧𑀼𑀕𑁆𑀕𑀮𑁄 𑀦𑀸𑀫, 𑀲𑀯𑀦𑀓𑀺𑀭𑀺𑀬𑀸 𑀧𑀦 𑀢𑀲𑁆𑀲 𑀓𑀺𑀘𑁆𑀘𑀁 𑀦𑀸𑀫. 𑀦 𑀳𑀺 𑀧𑀼𑀕𑁆𑀕𑀮𑀯𑁄𑀳𑀸𑀭𑀭𑀳𑀺𑀢𑁂 𑀥𑀫𑁆𑀫𑀧𑁆𑀧𑀩𑀦𑁆𑀥𑁂 𑀲𑀯𑀦𑀓𑀺𑀭𑀺𑀬𑀸 𑀮𑀩𑁆𑀪𑀢𑀺 𑀯𑁄𑀳𑀸𑀭𑀯𑀺𑀲𑀬𑀢𑁆𑀢𑀸 𑀢𑀲𑁆𑀲𑀸 𑀓𑀺𑀭𑀺𑀬𑀸𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀇𑀤’’𑀦𑁆𑀢𑀺𑀆𑀤𑀺 𑀧𑀺𑀡𑁆𑀟𑀢𑁆𑀣𑀤𑀲𑁆𑀲𑀦𑀁 𑀫𑀬𑀸𑀢𑀺 𑀬𑀣𑀸𑀯𑀼𑀢𑁆𑀢𑀯𑀺𑀜𑁆𑀜𑀸𑀡𑀧𑁆𑀧𑀩𑀦𑁆𑀥𑀲𑀗𑁆𑀔𑀸𑀢𑀧𑀼𑀕𑁆𑀕𑀮𑀪𑀽𑀢𑁂𑀦 𑀫𑀬𑀸. 𑀲𑀼𑀢𑀦𑁆𑀢𑀺 𑀲𑀯𑀦𑀓𑀺𑀭𑀺𑀬𑀸𑀲𑀗𑁆𑀔𑀸𑀢𑁂𑀦 𑀧𑀼𑀕𑁆𑀕𑀮𑀓𑀺𑀘𑁆𑀘𑁂𑀦 𑀬𑁄𑀚𑀺𑀢𑀁, 𑀇𑀫𑀺𑀲𑁆𑀲𑀸 𑀧𑀦 𑀬𑁄𑀚𑀦𑀸𑀬 𑀧𑀼𑀕𑁆𑀕𑀮𑀩𑁆𑀬𑀸𑀧𑀸𑀭𑀯𑀺𑀲𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲, 𑀧𑀼𑀕𑁆𑀕𑀮𑀩𑁆𑀬𑀸𑀧𑀸𑀭𑀲𑁆𑀲 𑀘 𑀦𑀺𑀤𑀲𑁆𑀲𑀦𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀆𑀓𑀸𑀭𑀢𑁆𑀣𑀫𑁂𑀯 𑀏𑀯𑀁-𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀧𑀼𑀭𑀺𑀫𑀬𑁄𑀚𑀦𑀸𑀬 𑀅𑀜𑁆𑀜𑀣𑀸𑀧𑀺 𑀅𑀢𑁆𑀣𑀬𑁄𑀚𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀯𑀺𑀜𑁆𑀜𑀸𑀡𑀧𑁆𑀧𑀩𑀦𑁆𑀥𑀲𑁆𑀲. 𑀦𑀸𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀬𑀸𑀢𑀺 𑀦𑀸𑀦𑀧𑁆𑀧𑀓𑀸𑀭𑁂𑀦 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀺𑀬𑀸. 𑀦𑀸𑀦𑀧𑁆𑀧𑀓𑀸𑀭𑀁 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑁆𑀲 𑀕𑀳𑀡𑀁, 𑀦𑀸𑀦𑀧𑁆𑀧𑀓𑀸𑀭𑀲𑁆𑀲 𑀯𑀸 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑁆𑀲 𑀕𑀳𑀡𑀁 𑀢𑀣𑀸, 𑀢𑀢𑁄𑀬𑁂𑀯 𑀲𑀸 ‘‘𑀆𑀓𑀸𑀭𑀧𑀜𑁆𑀜𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀸𑀢𑀺 𑀢𑀤𑁂𑀯𑀢𑁆𑀣𑀁 𑀲𑀫𑀢𑁆𑀣𑁂𑀢𑀺 ‘‘𑀏𑀯𑀦𑁆𑀢𑀺 𑀳𑀻’’𑀢𑀺𑀆𑀤𑀺𑀦𑀸. 𑀆𑀓𑀸𑀭𑀧𑀜𑁆𑀜𑀢𑁆𑀢𑀻𑀢𑀺 𑀘 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺𑀬𑁂𑀯, 𑀥𑀫𑁆𑀫𑀸𑀦𑀁 𑀧𑀦 𑀧𑀯𑀢𑁆𑀢𑀺𑀆𑀓𑀸𑀭𑀫𑀼𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑀢𑁆𑀢𑀸 𑀢𑀤𑀜𑁆𑀜𑀸𑀬 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺𑀬𑀸 𑀯𑀺𑀲𑁂𑀲𑀦𑀢𑁆𑀣𑀁 ‘‘𑀆𑀓𑀸𑀭𑀧𑀜𑁆𑀜𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀸 𑀯𑀺𑀲𑀬𑀦𑀺𑀤𑁆𑀤𑁂𑀲𑁄𑀢𑀺 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀦𑀺𑀤𑁆𑀤𑁂𑀲𑁄. 𑀲𑁄𑀢𑀩𑁆𑀩𑀪𑀽𑀢𑁄 𑀳𑀺 𑀥𑀫𑁆𑀫𑁄 𑀲𑀯𑀦𑀓𑀺𑀭𑀺𑀬𑀸𑀓𑀢𑁆𑀢𑀼𑀪𑀽𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀯𑀦𑀓𑀺𑀭𑀺𑀬𑀸𑀯𑀲𑁂𑀦 𑀧𑀯𑀢𑁆𑀢𑀺𑀝𑁆𑀞𑀸𑀦𑀁 𑀓𑀺𑀭𑀺𑀬𑀸𑀬 𑀓𑀢𑁆𑀢𑀼𑀓𑀫𑁆𑀫𑀝𑁆𑀞𑀢𑁆𑀢𑀸 𑀢𑀩𑁆𑀩𑀲𑁂𑀦 𑀘 𑀢𑀤𑀸𑀥𑀸𑀭𑀲𑁆𑀲𑀸𑀧𑀺 𑀤𑀩𑁆𑀩𑀲𑁆𑀲 𑀆𑀥𑀸𑀭𑀪𑀸𑀯𑀲𑁆𑀲 𑀇𑀘𑁆𑀙𑀺𑀢𑀢𑁆𑀢𑀸, 𑀇𑀥 𑀧𑀦 𑀓𑀺𑀭𑀺𑀬𑀸𑀬 𑀓𑀢𑁆𑀢𑀼𑀧𑀯𑀢𑁆𑀢𑀺𑀝𑁆𑀞𑀸𑀦𑀪𑀸𑀯𑁄 𑀇𑀘𑁆𑀙𑀺𑀢𑁄𑀢𑀺 𑀓𑀫𑁆𑀫𑀫𑁂𑀯 𑀆𑀥𑀸𑀭𑀯𑀲𑁂𑀦 𑀯𑀼𑀢𑁆𑀢𑀁, 𑀢𑁂𑀦𑀸𑀳 ‘‘𑀓𑀢𑁆𑀢𑀼 𑀯𑀺𑀲𑀬𑀕𑁆𑀕𑀳𑀡𑀲𑀦𑁆𑀦𑀺𑀝𑁆𑀞𑀸𑀦’’𑀦𑁆𑀢𑀺, 𑀆𑀭𑀫𑁆𑀫𑀡𑀫𑁂𑀯 𑀯𑀸 𑀯𑀺𑀲𑀬𑁄. 𑀆𑀭𑀫𑁆𑀫𑀡𑀜𑁆𑀳𑀺 𑀢𑀤𑀸𑀭𑀫𑁆𑀫𑀡𑀺𑀓𑀲𑁆𑀲 𑀧𑀯𑀢𑁆𑀢𑀺𑀝𑁆𑀞𑀸𑀦𑀁. 𑀏𑀯𑀫𑁆𑀧𑀺 𑀳𑀺 𑀅𑀢𑁆𑀣𑁄 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑀭𑁄 𑀳𑁄𑀢𑀺. 𑀬𑀣𑀸𑀯𑀼𑀢𑁆𑀢𑀯𑀘𑀦𑁂 𑀧𑀺𑀡𑁆𑀟𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀢𑁆𑀢𑀸𑀯𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑁆𑀢𑀸𑀯𑀢𑀸 𑀏𑀢𑁆𑀢𑀓𑁂𑀦 𑀬𑀣𑀸𑀯𑀼𑀢𑁆𑀢𑀢𑁆𑀣𑁂𑀦 𑀧𑀤𑀢𑁆𑀢𑀬𑁂𑀦, 𑀓𑀢𑀁 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀸𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑁂𑀦𑀸𑀢𑀺 𑀦𑀸𑀦𑀧𑁆𑀧𑀓𑀸𑀭𑁂𑀦 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑁂𑀦. 𑀘𑀺𑀢𑁆𑀢𑀲𑀦𑁆𑀢𑀸𑀦𑁂𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑀯𑀺𑀜𑁆𑀜𑀸𑀡𑀯𑀻𑀣𑀺𑀲𑀗𑁆𑀔𑀸𑀢𑁂𑀦 𑀘𑀺𑀢𑁆𑀢𑀧𑁆𑀧𑀩𑀦𑁆𑀥𑁂𑀦. 𑀕𑀳𑀡𑀲𑀤𑁆𑀤𑁂 𑀘𑁂𑀢𑀁 𑀓𑀭𑀡𑀁. 𑀘𑀺𑀢𑁆𑀢𑀲𑀦𑁆𑀢𑀸𑀦𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀓𑀲𑁆𑀲𑀘𑀺 𑀓𑀢𑁆𑀢𑀼 𑀧𑀭𑀫𑀢𑁆𑀣𑀢𑁄 𑀅𑀪𑀸𑀯𑁂𑀧𑀺 𑀲𑀤𑁆𑀤𑀯𑁄𑀳𑀸𑀭𑁂𑀦 𑀩𑀼𑀤𑁆𑀥𑀺𑀧𑀭𑀺𑀓𑀧𑁆𑀧𑀺𑀢𑀪𑁂𑀤𑀯𑀘𑀦𑀺𑀘𑁆𑀙𑀸𑀬 𑀘𑀺𑀢𑁆𑀢𑀲𑀦𑁆𑀢𑀸𑀦𑀢𑁄 𑀅𑀜𑁆𑀜𑀫𑀺𑀯 𑀢𑀁𑀲𑀫𑀗𑁆𑀕𑀺𑀁 𑀓𑀢𑁆𑀯𑀸 𑀅𑀪𑁂𑀤𑁂𑀧𑀺 𑀪𑁂𑀤𑀯𑁄𑀳𑀸𑀭𑁂𑀦 ‘‘𑀘𑀺𑀢𑁆𑀢𑀲𑀦𑁆𑀢𑀸𑀦𑁂𑀦 𑀢𑀁𑀲𑀫𑀗𑁆𑀕𑀺𑀦𑁄’’𑀢𑀺 𑀯𑀼𑀢𑁆𑀢𑀁. 𑀯𑁄𑀳𑀸𑀭𑀯𑀺𑀲𑀬𑁄 𑀳𑀺 𑀲𑀤𑁆𑀤𑁄 𑀦𑁂𑀓𑀦𑁆𑀢𑀧𑀭𑀫𑀢𑁆𑀣𑀺𑀓𑁄𑀢𑀺 (𑀓𑀸𑀭𑀓𑀭𑀽𑀧𑀲𑀺𑀤𑁆𑀥𑀺𑀬𑀁 𑀬𑁄 𑀓𑀸𑀭𑁂𑀢𑀺 𑀲𑀳𑁂𑀢𑀼𑀲𑀼𑀢𑁆𑀢𑀁 𑀧𑀲𑁆𑀲𑀺𑀢𑀩𑁆𑀩𑀁) 𑀲𑀯𑀦𑀓𑀺𑀭𑀺𑀬𑀸𑀯𑀺𑀲𑀬𑁄𑀧𑀺 𑀲𑁄𑀢𑀩𑁆𑀩𑀥𑀫𑁆𑀫𑁄 𑀲𑀯𑀦𑀓𑀺𑀭𑀺𑀬𑀸𑀯𑀲𑁂𑀦 𑀧𑀯𑀢𑁆𑀢𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀇𑀥 𑀧𑀭𑀫𑀢𑁆𑀣𑀢𑁄 𑀓𑀢𑁆𑀢𑀼𑀪𑀸𑀯𑀢𑁄 𑀢𑀲𑁆𑀲 𑀯𑀺𑀲𑀬𑁄𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀓𑀢𑁆𑀢𑀼 𑀯𑀺𑀲𑀬𑀕𑁆𑀕𑀳𑀡𑀲𑀦𑁆𑀦𑀺𑀝𑁆𑀞𑀸𑀦’’𑀦𑁆𑀢𑀺.

𑀅𑀧𑀺𑀘 𑀲𑀯𑀦𑀯𑀲𑁂𑀦 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀬𑀸 𑀏𑀯 𑀲𑀯𑀦𑀓𑀺𑀭𑀺𑀬𑀸𑀪𑀸𑀯𑀢𑁄 𑀢𑀁𑀯𑀲𑁂𑀦 𑀢𑀤𑀜𑁆𑀜𑀦𑀸𑀫𑀭𑀽𑀧𑀥𑀫𑁆𑀫𑀲𑀫𑀼𑀤𑀸𑀬𑀪𑀽𑀢𑀲𑁆𑀲 𑀢𑀁𑀓𑀺𑀭𑀺𑀬𑀸𑀓𑀢𑁆𑀢𑀼 𑀘 𑀯𑀺𑀲𑀬𑁄 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀢𑀣𑀸 𑀯𑀼𑀢𑁆𑀢𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀧𑀼𑀭𑀺𑀫𑀦𑀬𑁂 𑀲𑀯𑀦𑀓𑀺𑀭𑀺𑀬𑀸, 𑀢𑀓𑁆𑀓𑀢𑁆𑀢𑀸 𑀘 𑀧𑀭𑀫𑀢𑁆𑀣𑀢𑁄 𑀢𑀣𑀸𑀧𑀯𑀢𑁆𑀢𑀘𑀺𑀢𑁆𑀢𑀲𑀦𑁆𑀢𑀸𑀦𑀫𑁂𑀯, 𑀢𑀲𑁆𑀫𑀸 𑀓𑀺𑀭𑀺𑀬𑀸𑀯𑀺𑀲𑀬𑁄𑀧𑀺 ‘‘𑀓𑀢𑁆𑀢𑀼 𑀯𑀺𑀲𑀬𑁄’’𑀢𑀺 𑀯𑀼𑀢𑁆𑀢𑁄. 𑀧𑀘𑁆𑀙𑀺𑀫𑀦𑀬𑁂 𑀧𑀦 𑀢𑀣𑀸𑀧𑀯𑀢𑁆𑀢𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀓𑀺𑀭𑀺𑀬𑀸, 𑀢𑀤𑀜𑁆𑀜𑀥𑀫𑁆𑀫𑀲𑀫𑀼𑀤𑀸𑀬𑁄 𑀧𑀦 𑀓𑀢𑁆𑀢𑀸, 𑀢𑀲𑁆𑀫𑀸 𑀓𑀸𑀫𑀁 𑀏𑀓𑀦𑁆𑀢𑀢𑁄 𑀓𑀺𑀭𑀺𑀬𑀸𑀯𑀺𑀲𑀬𑁄𑀬𑁂𑀯𑁂𑀲 𑀥𑀫𑁆𑀫𑁄, 𑀢𑀣𑀸𑀧𑀺 𑀓𑀺𑀭𑀺𑀬𑀸𑀯𑀲𑁂𑀦 ‘‘𑀢𑀩𑁆𑀩𑀦𑁆𑀢𑀓𑀢𑁆𑀢𑀼 𑀯𑀺𑀲𑀬𑁄’’𑀢𑀺 𑀯𑀼𑀢𑁆𑀢𑁄𑀢𑀺. 𑀢𑀁𑀲𑀫𑀗𑁆𑀕𑀺𑀦𑁄𑀢𑀺 𑀢𑁂𑀦 𑀘𑀺𑀢𑁆𑀢𑀲𑀦𑁆𑀢𑀸𑀦𑁂𑀦 𑀲𑀫𑀗𑁆𑀕𑀺𑀦𑁄. 𑀓𑀢𑁆𑀢𑀽𑀢𑀺 𑀓𑀢𑁆𑀢𑀸𑀭𑀲𑁆𑀲. 𑀯𑀺𑀲𑀬𑁄𑀢𑀺 𑀆𑀭𑀫𑁆𑀫𑀡𑀯𑀲𑁂𑀦 𑀧𑀯𑀢𑁆𑀢𑀺𑀝𑁆𑀞𑀸𑀦𑀁, 𑀆𑀭𑀫𑁆𑀫𑀡𑀫𑁂𑀯 𑀯𑀸. 𑀲𑀼𑀢𑀸𑀓𑀸𑀭𑀲𑁆𑀲 𑀘 𑀣𑁂𑀭𑀲𑁆𑀲 𑀲𑀫𑁆𑀫𑀸 𑀦𑀺𑀘𑁆𑀙𑀺𑀢𑀪𑀸𑀯𑀢𑁄 ‘‘𑀕𑀳𑀡𑀲𑀦𑁆𑀦𑀺𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁.

𑀅𑀧𑀭𑁄 𑀦𑀬𑁄 𑁋 𑀬𑀲𑁆𑀲…𑀧𑁂… 𑀆𑀓𑀸𑀭𑀧𑀜𑁆𑀜𑀢𑁆𑀢𑀻𑀢𑀺 𑀆𑀓𑀸𑀭𑀢𑁆𑀣𑁂𑀦 𑀏𑀯𑀁-𑀲𑀤𑁆𑀤𑁂𑀦 𑀬𑁄𑀚𑀦𑀁 𑀓𑀢𑁆𑀯𑀸 𑀢𑀤𑁂𑀯 𑀅𑀯𑀥𑀸𑀭𑀡𑀢𑁆𑀣𑀫𑁆𑀧𑀺 𑀕𑀳𑁂𑀢𑁆𑀯𑀸 𑀇𑀫𑀲𑁆𑀫𑀺𑀁𑀬𑁂𑀯 𑀦𑀬𑁂 𑀬𑁄𑀚𑁂𑀢𑀼𑀁 ‘‘𑀕𑀳𑀡𑀁 𑀓𑀢𑀁’’ 𑀇𑀘𑁆𑀘𑁂𑀯 𑀅𑀯𑀢𑁆𑀯𑀸 ‘‘𑀕𑀳𑀡𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀯𑀥𑀸𑀭𑀡𑁂𑀦 𑀳𑀺 𑀲𑀦𑁆𑀦𑀺𑀝𑁆𑀞𑀸𑀦𑀫𑀺𑀥𑀸𑀥𑀺𑀧𑁆𑀧𑁂𑀢𑀁, 𑀢𑀲𑁆𑀫𑀸 ‘‘𑀏𑀢𑁆𑀢𑀸𑀯𑀢𑀸’’𑀢𑀺𑀆𑀤𑀺𑀦𑀸 𑀅𑀯𑀥𑀸𑀭𑀡𑀢𑁆𑀣𑀫𑁆𑀧𑀺 𑀏𑀯𑀁-𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀅𑀬𑀫𑁂𑀯 𑀬𑁄𑀚𑀦𑀸 𑀓𑀢𑀸𑀢𑀺 𑀤𑀲𑁆𑀲𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀇𑀫𑀺𑀲𑁆𑀲𑀸 𑀧𑀦 𑀬𑁄𑀚𑀦𑀸𑀬 𑀕𑀳𑀡𑀸𑀓𑀸𑀭𑀕𑀸𑀳𑀓𑀢𑀩𑁆𑀩𑀺𑀲𑀬𑀯𑀺𑀲𑁂𑀲𑀦𑀺𑀤𑀲𑁆𑀲𑀦𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀜𑁆𑀜𑀫𑁆𑀧𑀺 𑀬𑁄𑀚𑀦𑀫𑀸𑀳 ‘‘𑀅𑀣 𑀯𑀸’’𑀢𑀺𑀆𑀤𑀺𑀦𑀸. 𑀧𑀼𑀩𑁆𑀩𑁂 𑀅𑀢𑁆𑀢𑀦𑀸 𑀲𑀼𑀢𑀸𑀦𑀁 𑀦𑀸𑀦𑀸𑀯𑀺𑀳𑀺𑀢𑀸𑀦𑀁 𑀲𑀼𑀢𑁆𑀢𑀲𑀗𑁆𑀔𑀸𑀢𑀸𑀦𑀁 𑀅𑀢𑁆𑀣𑀩𑁆𑀬𑀜𑁆𑀚𑀦𑀸𑀦𑀁 𑀉𑀧𑀥𑀸𑀭𑀺𑀢𑀭𑀽𑀧𑀲𑁆𑀲 𑀆𑀓𑀸𑀭𑀲𑁆𑀲 𑀦𑀺𑀤𑀲𑁆𑀲𑀦𑀲𑁆𑀲, 𑀅𑀯𑀥𑀸𑀭𑀡𑀲𑁆𑀲 𑀯𑀸 𑀧𑀓𑀸𑀲𑀦𑀲𑀪𑀸𑀯𑁄 𑀏𑀯𑀁-𑀲𑀤𑁆𑀤𑁄𑀢𑀺 𑀢𑀤𑀸𑀓𑀸𑀭𑀸𑀤𑀺𑀪𑀽𑀢𑀲𑁆𑀲 𑀉𑀧𑀥𑀸𑀭𑀡𑀲𑁆𑀲 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀬𑀸 𑀉𑀧𑀸𑀤𑀸𑀦𑀪𑀽𑀢𑀥𑀫𑁆𑀫𑀧𑁆𑀧𑀩𑀦𑁆𑀥𑀩𑁆𑀬𑀸𑀧𑀸𑀭𑀢𑀸𑀬 ‘‘𑀧𑀼𑀕𑁆𑀕𑀮𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑁄’’𑀢𑀺 𑀯𑀼𑀢𑁆𑀢𑀁 𑀅𑀢𑁆𑀢𑀦𑀸 𑀲𑀼𑀢𑀸𑀦𑀜𑁆𑀳𑀺 𑀅𑀢𑁆𑀣𑀩𑁆𑀬𑀜𑁆𑀚𑀦𑀸𑀦𑀁 𑀧𑀼𑀦 𑀉𑀧𑀥𑀸𑀭𑀡𑀁 𑀆𑀓𑀸𑀭𑀸𑀤𑀺𑀢𑁆𑀢𑀬𑀁, 𑀢𑀜𑁆𑀘 𑀏𑀯𑀁-𑀲𑀤𑁆𑀤𑀲𑁆𑀲 𑀅𑀢𑁆𑀣𑁄. 𑀲𑁄 𑀧𑀦 𑀬𑀁 𑀥𑀫𑁆𑀫𑀧𑁆𑀧𑀩𑀦𑁆𑀥𑀁 𑀉𑀧𑀸𑀤𑀸𑀬 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺 𑀧𑀯𑀢𑁆𑀢𑀸, 𑀢𑀲𑁆𑀲 𑀩𑁆𑀬𑀸𑀧𑀸𑀭𑀪𑀽𑀢𑀁 𑀓𑀺𑀘𑁆𑀘𑀫𑁂𑀯, 𑀢𑀲𑁆𑀫𑀸 𑀏𑀯𑀁-𑀲𑀤𑁆𑀤𑁂𑀦 𑀧𑀼𑀕𑁆𑀕𑀮𑀓𑀺𑀘𑁆𑀘𑀁 𑀦𑀺𑀤𑁆𑀤𑀺𑀲𑀻𑀬𑀢𑀻𑀢𑀺. 𑀓𑀸𑀫𑀁 𑀲𑀯𑀦𑀓𑀺𑀭𑀺𑀬𑀸 𑀧𑀼𑀕𑁆𑀕𑀮𑀩𑁆𑀬𑀸𑀧𑀸𑀭𑁄𑀧𑀺 𑀅𑀯𑀺𑀲𑁂𑀲𑁂𑀦, 𑀢𑀣𑀸𑀧𑀺 𑀯𑀺𑀲𑁂𑀲𑀢𑁄 𑀯𑀺𑀜𑁆𑀜𑀸𑀡𑀩𑁆𑀬𑀸𑀧𑀸𑀭𑁄𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑁄’’𑀢𑀺. 𑀢𑀣𑀸 𑀳𑀺 𑀧𑀼𑀕𑁆𑀕𑀮𑀯𑀸𑀤𑀻𑀦𑀫𑁆𑀧𑀺 𑀲𑀯𑀦𑀓𑀺𑀭𑀺𑀬𑀸 𑀯𑀺𑀜𑁆𑀜𑀸𑀡𑀦𑀺𑀭𑀧𑁂𑀓𑁆𑀔𑀸 𑀦𑀢𑁆𑀣𑀺 𑀲𑀯𑀦𑀸𑀤𑀻𑀦𑀁 𑀯𑀺𑀲𑁂𑀲𑀢𑁄 𑀯𑀺𑀜𑁆𑀜𑀸𑀡𑀩𑁆𑀬𑀸𑀧𑀸𑀭𑀪𑀸𑀯𑁂𑀦 𑀇𑀘𑁆𑀙𑀺𑀢𑀢𑁆𑀢𑀸. 𑀫𑁂𑀢𑀺 𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀬𑀸 𑀏𑀓𑀦𑁆𑀢𑁂𑀦𑁂𑀯 𑀲𑀢𑁆𑀢𑀯𑀺𑀲𑀬𑀢𑁆𑀢𑀸, 𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀲𑁆𑀲 𑀘 𑀲𑀢𑁆𑀢𑀯𑀺𑀜𑁆𑀜𑀸𑀡𑀸𑀦𑀫𑀪𑁂𑀤𑀓𑀭𑀡𑀯𑀲𑁂𑀦 𑀢𑀢𑁆𑀣𑁂𑀯 𑀲𑀫𑁄𑀤𑀳𑀺𑀢𑀩𑁆𑀩𑀢𑁄 ‘‘𑀉𑀪𑀬𑀓𑀺𑀘𑁆𑀘𑀬𑀼𑀢𑁆𑀢𑀧𑀼𑀕𑁆𑀕𑀮𑀦𑀺𑀤𑁆𑀤𑁂𑀲𑁄’’𑀢𑀺 𑀯𑀼𑀢𑁆𑀢𑀁. ‘‘𑀅𑀬’’𑀦𑁆𑀢𑀺𑀆𑀤𑀺 𑀢𑀧𑁆𑀧𑀸𑀓𑀝𑀻𑀓𑀭𑀡𑀁. 𑀏𑀢𑁆𑀣 𑀳𑀺 𑀲𑀯𑀦𑀓𑀺𑀘𑁆𑀘𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀦𑀸𑀢𑀺 𑀏𑀯𑀁-𑀲𑀤𑁆𑀤𑁂𑀦 𑀦𑀺𑀤𑁆𑀤𑀺𑀝𑁆𑀞𑀁 𑀧𑀼𑀕𑁆𑀕𑀮𑀓𑀺𑀘𑁆𑀘𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑀁 𑀧𑀦 𑀧𑀼𑀕𑁆𑀕𑀮𑀲𑁆𑀲 𑀲𑀯𑀦𑀓𑀺𑀘𑁆𑀘𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀻𑀪𑀸𑀯𑁂𑀦 𑀧𑀼𑀕𑁆𑀕𑀮𑀓𑀺𑀘𑁆𑀘𑀁 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀕𑁆𑀕𑀮𑀓𑀺𑀘𑁆𑀘𑀲𑀫𑀗𑁆𑀕𑀺𑀦𑀸’’𑀢𑀺 𑀅𑀯𑀢𑁆𑀯𑀸 ‘‘𑀲𑀯𑀦𑀓𑀺𑀘𑁆𑀘𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀦𑀸’’𑀢𑀺 𑀆𑀳, 𑀢𑀲𑁆𑀫𑀸 ‘‘𑀧𑀼𑀕𑁆𑀕𑀮𑀓𑀺𑀘𑁆𑀘’’𑀦𑁆𑀢𑀺 𑀦𑀺𑀤𑁆𑀤𑀺𑀝𑁆𑀞𑀲𑀯𑀦𑀓𑀺𑀘𑁆𑀘𑀯𑀢𑀸 𑀯𑀺𑀜𑁆𑀜𑀸𑀡𑁂𑀦 𑀲𑀫𑀗𑁆𑀕𑀺𑀦𑀸𑀢𑀺 𑀅𑀢𑁆𑀣𑁄. 𑀯𑀺𑀜𑁆𑀜𑀸𑀡𑀯𑀲𑁂𑀦, 𑀮𑀤𑁆𑀥𑀲𑀯𑀦𑀓𑀺𑀘𑁆𑀘𑀯𑁄𑀳𑀸𑀭𑁂𑀦𑀸𑀢𑀺 𑀘 𑀲𑀼𑀢𑀲𑀤𑁆𑀤𑁂𑀦 𑀦𑀺𑀤𑁆𑀤𑀺𑀝𑁆𑀞𑀁 𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀯𑀦𑀫𑁂𑀯 𑀓𑀺𑀘𑁆𑀘𑀁 𑀬𑀲𑁆𑀲𑀸𑀢𑀺 𑀢𑀣𑀸. 𑀲𑀯𑀦𑀓𑀺𑀘𑁆𑀘𑀦𑁆𑀢𑀺 𑀯𑁄𑀳𑀸𑀭𑁄 𑀲𑀯𑀦𑀓𑀺𑀘𑁆𑀘𑀯𑁄𑀳𑀸𑀭𑁄, 𑀮𑀤𑁆𑀥𑁄 𑀲𑁄 𑀬𑁂𑀦𑀸𑀢𑀺 𑀢𑀣𑀸. 𑀮𑀤𑁆𑀥𑀲𑀯𑀦𑀓𑀺𑀘𑁆𑀘𑀯𑁄𑀳𑀸𑀭𑁂𑀦 𑀯𑀺𑀜𑁆𑀜𑀸𑀡𑀲𑀗𑁆𑀔𑀸𑀢𑁂𑀦 𑀯𑀲𑁂𑀦 𑀲𑀸𑀫𑀢𑁆𑀣𑀺𑀬𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀬𑀁 𑀧𑀦 𑀲𑀫𑁆𑀩𑀦𑁆𑀥𑁄 𑁋 𑀲𑀯𑀦𑀓𑀺𑀘𑁆𑀘𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀦𑀸 𑀧𑀼𑀕𑁆𑀕𑀮𑁂𑀦 𑀫𑀬𑀸 𑀮𑀤𑁆𑀥𑀲𑀯𑀦𑀓𑀺𑀘𑁆𑀘𑀯𑁄𑀳𑀸𑀭𑁂𑀦 𑀯𑀺𑀜𑁆𑀜𑀸𑀡𑀯𑀲𑁂𑀦 𑀓𑀭𑀡𑀪𑀽𑀢𑁂𑀦 𑀲𑀼𑀢𑀦𑁆𑀢𑀺.

𑀅𑀧𑀺𑀘 ‘‘𑀏𑀯’’𑀦𑁆𑀢𑀺 𑀲𑀤𑁆𑀤𑀲𑁆𑀲𑀢𑁆𑀣𑁄 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺, ‘‘𑀲𑀼𑀢’’𑀦𑁆𑀢𑀺 𑀲𑀤𑁆𑀤𑀲𑁆𑀲𑀢𑁆𑀣𑁄 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺, 𑀢𑀲𑁆𑀫𑀸 𑀢𑁂 𑀢𑀣𑀸𑀭𑀽𑀧𑀧𑀜𑁆𑀜𑀢𑁆𑀢𑀺 𑀉𑀧𑀸𑀤𑀸𑀦𑀪𑀽𑀢𑀧𑀼𑀕𑁆𑀕𑀮𑀩𑁆𑀬𑀸𑀧𑀸𑀭𑀪𑀸𑀯𑁂𑀦𑁂𑀯 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀯𑀦𑁆𑀢𑀺 𑀧𑀼𑀕𑁆𑀕𑀮𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑁄. 𑀲𑀼𑀢𑀦𑁆𑀢𑀺 𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑁄’’𑀢𑀺. 𑀦 𑀳𑀺 𑀧𑀭𑀫𑀢𑁆𑀣𑀢𑁄𑀬𑁂𑀯 𑀦𑀺𑀬𑀫𑀺𑀬𑀫𑀸𑀦𑁂 𑀲𑀢𑀺 𑀧𑀼𑀕𑁆𑀕𑀮𑀓𑀺𑀘𑁆𑀘𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀯𑀲𑁂𑀦 𑀅𑀬𑀁 𑀯𑀺𑀪𑀸𑀕𑁄 𑀮𑀩𑁆𑀪𑀢𑀻𑀢𑀺. 𑀇𑀫𑀺𑀲𑁆𑀲𑀸 𑀧𑀦 𑀬𑁄𑀚𑀦𑀸𑀬 𑀓𑀢𑁆𑀢𑀼𑀩𑁆𑀬𑀸𑀧𑀸𑀭𑀓𑀭𑀡𑀩𑁆𑀬𑀸𑀧𑀸𑀭𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑁄 𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀲𑀩𑁆𑀩𑀲𑁆𑀲𑀸𑀧𑀺 𑀲𑀤𑁆𑀤𑀸𑀥𑀺𑀕𑀫𑀦𑀻𑀬𑀲𑁆𑀲 𑀅𑀢𑁆𑀣𑀲𑁆𑀲 𑀧𑀜𑁆𑀜𑀢𑁆𑀢𑀺𑀫𑀼𑀔𑁂𑀦𑁂𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀢𑁆𑀢𑀸, 𑀲𑀩𑁆𑀩𑀸𑀲𑀜𑁆𑀘 𑀧𑀜𑁆𑀜𑀢𑁆𑀢𑀻𑀦𑀁 𑀯𑀺𑀚𑁆𑀚𑀫𑀸𑀦𑀸𑀤𑀺𑀯𑀲𑁂𑀦 𑀙𑀲𑀼 𑀧𑀜𑁆𑀜𑀢𑁆𑀢𑀺𑀪𑁂𑀤𑁂𑀲𑀼 𑀅𑀦𑁆𑀢𑁄𑀕𑀥𑀢𑁆𑀢𑀸 𑀢𑀸𑀲𑀼 ‘‘𑀏𑀯’’𑀦𑁆𑀢𑀺𑀆𑀤𑀻𑀦𑀁 𑀧𑀜𑁆𑀜𑀢𑁆𑀢𑀻𑀦𑀁 𑀲𑀭𑀽𑀧𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀯𑀦𑁆𑀢𑀺 𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀏𑀯’’𑀦𑁆𑀢𑀺 𑀘 ‘‘𑀫𑁂’’𑀢𑀺 𑀘 𑀯𑀼𑀘𑁆𑀘𑀫𑀸𑀦𑀲𑁆𑀲 𑀅𑀢𑁆𑀣𑀲𑁆𑀲 𑀆𑀓𑀸𑀭𑀸𑀤𑀺𑀪𑀽𑀢𑀲𑁆𑀲 𑀥𑀫𑁆𑀫𑀸𑀦𑀁 𑀅𑀲𑀮𑁆𑀮𑀓𑁆𑀔𑀡𑀪𑀸𑀯𑀢𑁄 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀪𑀸𑀯𑁄𑀢𑀺 𑀆𑀳 ‘‘𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀯𑀲𑁂𑀦 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀻’’𑀢𑀺. 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀯𑀲𑁂𑀦𑀸𑀢𑀺 𑀘 𑀪𑀽𑀢𑀢𑁆𑀣𑀉𑀢𑁆𑀢𑀫𑀢𑁆𑀣𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁄 𑀫𑀸𑀬𑀸𑀫𑀭𑀻𑀘𑀺𑀆𑀤𑀬𑁄 𑀯𑀺𑀬 𑀅𑀪𑀽𑀢𑀢𑁆𑀣𑁄, 𑀅𑀦𑀼𑀲𑁆𑀲𑀯𑀸𑀤𑀻𑀳𑀺 𑀕𑀳𑁂𑀢𑀩𑁆𑀩𑁄 𑀯𑀺𑀬 𑀅𑀦𑀼𑀢𑁆𑀢𑀫𑀢𑁆𑀣𑁄 𑀘 𑀦 𑀳𑁄𑀢𑀺, 𑀲𑁄 𑀭𑀽𑀧𑀲𑀤𑁆𑀤𑀸𑀤𑀺𑀲𑀪𑀸𑀯𑁄, 𑀭𑀼𑀧𑁆𑀧𑀦𑀸𑀦𑀼𑀪𑀯𑀦𑀸𑀤𑀺𑀲𑀪𑀸𑀯𑁄 𑀯𑀸 𑀅𑀢𑁆𑀣𑁄 ‘‘𑀲𑀘𑁆𑀘𑀺𑀓𑀝𑁆𑀞𑁄, 𑀧𑀭𑀫𑀢𑁆𑀣𑁄’’𑀢𑀺 𑀘 𑀯𑀼𑀘𑁆𑀘𑀢𑀺, ‘‘𑀏𑀯𑀁 𑀫𑁂’’𑀢𑀺 𑀧𑀤𑀸𑀦𑀁 𑀧𑀦 𑀅𑀢𑁆𑀣𑁄 𑀅𑀪𑀽𑀢𑀢𑁆𑀢𑀸, 𑀅𑀦𑀼𑀢𑁆𑀢𑀫𑀢𑁆𑀢𑀸 𑀘 𑀦 𑀢𑀣𑀸 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀪𑀽𑀢𑀢𑁆𑀣𑀉𑀢𑁆𑀢𑀫𑀢𑁆𑀣𑀲𑀗𑁆𑀔𑀸𑀢𑁂𑀦 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀯𑀲𑁂𑀦 𑀯𑀺𑀲𑁂𑀲𑀦𑀪𑀽𑀢𑁂𑀦 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀬𑁂𑀯𑀸𑀢𑀺. 𑀏𑀢𑁂𑀦 𑀘 𑀯𑀺𑀲𑁂𑀲𑀦𑁂𑀦 𑀩𑀸𑀮𑀚𑀦𑁂𑀳𑀺 ‘‘𑀅𑀢𑁆𑀣𑀻’’𑀢𑀺 𑀧𑀭𑀺𑀓𑀧𑁆𑀧𑀺𑀢𑀁 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀁 𑀦𑀺𑀯𑀢𑁆𑀢𑁂𑀢𑀺. 𑀢𑀤𑁂𑀯𑀢𑁆𑀣𑀁 𑀧𑀸𑀓𑀝𑀁 𑀓𑀭𑁄𑀢𑀺, 𑀳𑁂𑀢𑀼𑀦𑀸 𑀯𑀸 𑀲𑀸𑀥𑁂𑀢𑀺 ‘‘𑀓𑀺𑀜𑁆𑀳𑁂𑀢𑁆𑀣 𑀢’’𑀦𑁆𑀢𑀺𑀆𑀤𑀺𑀦𑀸. 𑀬𑀁 𑀥𑀫𑁆𑀫𑀚𑀸𑀢𑀁, 𑀅𑀢𑁆𑀣𑀚𑀸𑀢𑀁 𑀯𑀸 ‘‘𑀏𑀯’’𑀦𑁆𑀢𑀺 𑀯𑀸 ‘‘𑀫𑁂’’𑀢𑀺 𑀯𑀸 𑀦𑀺𑀤𑁆𑀤𑁂𑀲𑀁 𑀮𑀪𑁂𑀣, 𑀢𑀁 𑀏𑀢𑁆𑀣 𑀭𑀽𑀧𑀨𑀲𑁆𑀲𑀸𑀤𑀺𑀥𑀫𑁆𑀫𑀲𑀫𑀼𑀤𑀸𑀬𑁂, ‘‘𑀏𑀯𑀁 𑀫𑁂’’𑀢𑀺 𑀧𑀤𑀸𑀦𑀁 𑀯𑀸 𑀅𑀢𑁆𑀣𑁂. 𑀧𑀭𑀫𑀢𑁆𑀣𑀢𑁄 𑀦 𑀅𑀢𑁆𑀣𑀻𑀢𑀺 𑀬𑁄𑀚𑀦𑀸. 𑀭𑀽𑀧𑀨𑀲𑁆𑀲𑀸𑀤𑀺𑀪𑀸𑀯𑁂𑀦 𑀦𑀺𑀤𑁆𑀤𑀺𑀝𑁆𑀞𑁄 𑀧𑀭𑀫𑀢𑁆𑀣𑀢𑁄 𑀏𑀢𑁆𑀣 𑀅𑀢𑁆𑀣𑁂𑀯, ‘‘𑀏𑀯𑀁 𑀫𑁂’’𑀢𑀺 𑀧𑀦 𑀦𑀺𑀤𑁆𑀤𑀺𑀝𑁆𑀞𑁄 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀼𑀢𑀦𑁆𑀢𑀺 𑀧𑀦 𑀲𑀤𑁆𑀤𑀸𑀬𑀢𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀻’’𑀢𑀺. ‘‘𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀯𑀲𑁂𑀦𑀸’’𑀢𑀺 𑀘𑁂𑀢𑁆𑀣 𑀅𑀥𑀺𑀓𑀸𑀭𑁄. ‘‘𑀬𑀜𑁆𑀳𑀻’’𑀢𑀺𑀆𑀤𑀺 𑀢𑀧𑁆𑀧𑀸𑀓𑀝𑀻𑀓𑀭𑀡𑀁, 𑀳𑁂𑀢𑀼𑀤𑀲𑁆𑀲𑀦𑀁 𑀯𑀸. 𑀬𑀁 𑀢𑀁 𑀲𑀤𑁆𑀤𑀸𑀬𑀢𑀦𑀁 𑀲𑁄𑀢𑁂𑀦 𑀲𑁄𑀢𑀤𑁆𑀯𑀸𑀭𑁂𑀦, 𑀢𑀦𑁆𑀦𑀺𑀲𑁆𑀲𑀺𑀢𑀯𑀺𑀜𑁆𑀜𑀸𑀡𑁂𑀦 𑀯𑀸 𑀉𑀧𑀮𑀤𑁆𑀥𑀁 𑀅𑀥𑀺𑀕𑀫𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦 𑀳𑀺 𑀲𑀤𑁆𑀤𑀸𑀬𑀢𑀦𑀫𑀺𑀥 𑀕𑀳𑀺𑀢𑀁 𑀓𑀫𑁆𑀫𑀲𑀸𑀥𑀦𑁂𑀦𑀸𑀢𑀺 𑀤𑀲𑁆𑀲𑁂𑀢𑀺.

𑀏𑀯𑀁 𑀅𑀝𑁆𑀞𑀓𑀣𑀸𑀦𑀬𑁂𑀦 𑀧𑀜𑁆𑀜𑀢𑁆𑀢𑀺𑀲𑀭𑀽𑀧𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀇𑀤𑀸𑀦𑀺 𑀅𑀝𑁆𑀞𑀓𑀣𑀸𑀫𑀼𑀢𑁆𑀢𑀓𑁂𑀦𑀸𑀧𑀺 𑀦𑀬𑁂𑀦 𑀯𑀼𑀢𑁆𑀢𑁂𑀲𑀼 𑀙𑀲𑀼 𑀧𑀜𑁆𑀜𑀢𑁆𑀢𑀺𑀪𑁂𑀤𑁂𑀲𑀼 ‘‘𑀏𑀯’’𑀦𑁆𑀢𑀺𑀆𑀤𑀻𑀦𑀁 𑀧𑀜𑁆𑀜𑀢𑁆𑀢𑀻𑀦𑀁 𑀲𑀭𑀽𑀧𑀁 𑀦𑀺𑀤𑁆𑀥𑀸𑀭𑁂𑀦𑁆𑀢𑁄 ‘‘𑀢𑀣𑀸’’𑀢𑀺𑀆𑀤𑀺𑀫𑀸𑀳. 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺 𑀆𑀤𑀬𑁄 𑀳𑀺 𑀧𑁄𑀭𑀸𑀡𑀝𑁆𑀞𑀓𑀣𑀸𑀢𑁄 𑀫𑀼𑀢𑁆𑀢𑀸 𑀲𑀗𑁆𑀕𑀳𑀓𑀸𑀭𑁂𑀦𑁂𑀯 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑀸. 𑀯𑀺𑀢𑁆𑀣𑀸𑀭𑁄 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀬 𑀕𑀳𑁂𑀢𑀩𑁆𑀩𑁄. 𑀢𑀁 𑀢𑀦𑁆𑀢𑀺 𑀢𑀁 𑀢𑀁 𑀥𑀫𑁆𑀫𑀚𑀸𑀢𑀁, 𑀲𑁄𑀢𑀧𑀣𑀫𑀸𑀕𑀢𑁂 𑀥𑀫𑁆𑀫𑁂 𑀉𑀧𑀸𑀤𑀸𑀬 𑀢𑁂𑀲𑀁 𑀉𑀧𑀥𑀸𑀭𑀺𑀢𑀸𑀓𑀸𑀭𑀦𑀺𑀤𑀲𑁆𑀲𑀦𑀸𑀯𑀥𑀸𑀭𑀡𑀲𑁆𑀲 𑀧𑀘𑁆𑀘𑀸𑀫𑀲𑀦𑀯𑀲𑁂𑀦 𑀏𑀯𑀦𑁆𑀢𑀺 𑀘 𑀲𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑁂 𑀔𑀦𑁆𑀥𑁂 𑀉𑀧𑀸𑀤𑀸𑀬 𑀫𑁂𑀢𑀺 𑀘 𑀯𑀢𑁆𑀢𑀩𑁆𑀩𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀭𑀽𑀧𑀯𑁂𑀤𑀦𑀸𑀤𑀺𑀪𑁂𑀤𑁂𑀳𑀺 𑀥𑀫𑁆𑀫𑁂 𑀉𑀧𑀸𑀤𑀸𑀬 𑀦𑀺𑀲𑁆𑀲𑀸𑀬 𑀓𑀸𑀭𑀡𑀁 𑀓𑀢𑁆𑀯𑀸 𑀧𑀜𑁆𑀜𑀢𑁆𑀢𑀺 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺 𑀬𑀣𑀸 ‘‘𑀢𑀸𑀦𑀺 𑀢𑀸𑀦𑀺 𑀅𑀗𑁆𑀕𑀸𑀦𑀺 𑀉𑀧𑀸𑀤𑀸𑀬 𑀭𑀣𑁄 𑀕𑁂𑀳𑀁, 𑀢𑁂 𑀢𑁂 𑀭𑀽𑀧𑀭𑀲𑀸𑀤𑀬𑁄 𑀉𑀧𑀸𑀤𑀸𑀬 𑀖𑀝𑁄 𑀧𑀝𑁄, 𑀘𑀦𑁆𑀤𑀺𑀫𑀲𑀽𑀭𑀺𑀬𑀧𑀭𑀺𑀯𑀢𑁆𑀢𑀸𑀤𑀬𑁄 𑀉𑀧𑀸𑀤𑀸𑀬 𑀓𑀸𑀮𑁄 𑀤𑀺𑀲𑀸’’𑀢𑀺𑀆𑀤𑀺. 𑀧𑀜𑁆𑀜𑀧𑁂𑀢𑀩𑁆𑀩𑀝𑁆𑀞𑁂𑀦 𑀘𑁂𑀲𑀸 𑀧𑀜𑁆𑀜𑀢𑁆𑀢𑀺 𑀦𑀸𑀫, 𑀦 𑀧𑀜𑁆𑀜𑀸𑀧𑀦𑀝𑁆𑀞𑁂𑀦. 𑀬𑀸 𑀧𑀦 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀧𑀜𑁆𑀜𑀸𑀧𑀦𑀸, 𑀅𑀬𑀁 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀬𑁂𑀯. 𑀤𑀺𑀝𑁆𑀞𑀸𑀤𑀻𑀦𑀺𑀉𑀧𑀦𑀺𑀥𑀸𑀬 𑀯𑀢𑁆𑀢𑀩𑁆𑀩𑀢𑁄𑀢𑀺 𑀤𑀺𑀝𑁆𑀞𑀫𑀼𑀢𑀯𑀺𑀜𑁆𑀜𑀸𑀢𑁂 𑀉𑀧𑀦𑀺𑀥𑀸𑀬 𑀉𑀧𑀢𑁆𑀣𑀫𑁆𑀪𑀁 𑀓𑀢𑁆𑀯𑀸 𑀅𑀧𑁂𑀓𑁆𑀔𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑀢𑁆𑀢𑀸. 𑀤𑀺𑀝𑁆𑀞𑀸𑀤𑀺𑀲𑀪𑀸𑀯𑀯𑀺𑀭𑀳𑀺𑀢𑁂 𑀲𑀤𑁆𑀤𑀸𑀬𑀢𑀦𑁂 𑀯𑀢𑁆𑀢𑀫𑀸𑀦𑁄𑀧𑀺 𑀳𑀺 𑀲𑀼𑀢𑀯𑁄𑀳𑀸𑀭𑁄 ‘‘𑀤𑀼𑀢𑀺𑀬𑀁 𑀢𑀢𑀺𑀬’’𑀦𑁆𑀢𑀺𑀆𑀤𑀺𑀓𑁄 𑀯𑀺𑀬 𑀧𑀞𑀫𑀸𑀤𑀻𑀦𑀺 𑀤𑀺𑀝𑁆𑀞𑀫𑀼𑀢𑀯𑀺𑀜𑁆𑀜𑀸𑀢𑁂 𑀅𑀧𑁂𑀓𑁆𑀔𑀺𑀢𑁆𑀯𑀸 𑀧𑀯𑀢𑁆𑀢𑁄 ‘‘𑀉𑀧𑀦𑀺𑀥𑀸𑀧𑀜𑁆𑀜𑀢𑀻’’𑀢𑀺 𑀯𑀼𑀘𑁆𑀘𑀢𑁂. 𑀲𑀸 𑀧𑀦𑁂𑀲𑀸 𑀅𑀦𑁂𑀓𑀯𑀺𑀥𑀸 𑀢𑀤𑀜𑁆𑀜𑀧𑁂𑀓𑁆𑀔𑀽𑀧𑀦𑀺𑀥𑀸 𑀳𑀢𑁆𑀣𑀕𑀢𑀽𑀧𑀦𑀺𑀥𑀸 𑀲𑀫𑁆𑀧𑀬𑀼𑀢𑁆𑀢𑀽𑀧𑀦𑀺𑀥𑀸𑀲𑀫𑀸𑀭𑁄𑀧𑀺𑀢𑀽𑀧𑀦𑀺𑀥𑀸 𑀅𑀯𑀺𑀤𑀽𑀭𑀕𑀢𑀽𑀧𑀦𑀺𑀥𑀸 𑀧𑀝𑀺𑀪𑀸𑀕𑀽𑀧𑀦𑀺𑀥𑀸 𑀢𑀩𑁆𑀩𑀳𑀼𑀮𑀽𑀧𑀦𑀺𑀥𑀸𑀢𑀩𑁆𑀩𑀺𑀲𑀺𑀝𑁆𑀞𑀽𑀧𑀦𑀺𑀥𑀸’’𑀢𑀺𑀆𑀤𑀺𑀦𑀸. 𑀢𑀸𑀲𑀼 𑀅𑀬𑀁 ‘‘𑀤𑀼𑀢𑀺𑀬𑀁 𑀢𑀢𑀺𑀬’’𑀦𑁆𑀢𑀺𑀆𑀤𑀺𑀓𑀸 𑀯𑀺𑀬 𑀧𑀞𑀫𑀸𑀤𑀻𑀦𑀁 𑀤𑀺𑀝𑁆𑀞𑀸𑀤𑀻𑀦𑀁 𑀅𑀜𑁆𑀜𑀫𑀜𑁆𑀜𑀫𑀧𑁂𑀓𑁆𑀔𑀺𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 𑀢𑀤𑀜𑁆𑀜𑀧𑁂𑀓𑁆𑀔𑀽𑀧𑀦𑀺𑀥𑀸𑀧𑀜𑁆𑀜𑀢𑁆𑀢𑀺 𑀦𑀸𑀫.

𑀏𑀯𑀁 𑀧𑀜𑁆𑀜𑀢𑁆𑀢𑀺𑀬𑀸𑀧𑀺 𑀅𑀢𑁆𑀣𑀸𑀥𑀺𑀕𑀫𑀦𑀻𑀬𑀢𑀸𑀲𑀗𑁆𑀔𑀸𑀢𑀁 𑀤𑀲𑁆𑀲𑁂𑀢𑀩𑁆𑀩𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀤𑁆𑀤𑀲𑀸𑀫𑀢𑁆𑀣𑀺𑀬𑁂𑀦 𑀤𑀻𑀧𑁂𑀢𑀩𑁆𑀩𑀫𑀢𑁆𑀣𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀤𑀻𑀧𑁂𑀦𑁆𑀢𑁄 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀯𑀘𑀦𑀢𑁆𑀢𑀬𑁂. 𑀘-𑀲𑀤𑁆𑀤𑁄 𑀉𑀧𑀦𑁆𑀬𑀸𑀲𑁄 𑀅𑀢𑁆𑀣𑀦𑁆𑀢𑀭𑀁 𑀆𑀭𑀪𑀺𑀢𑀼𑀓𑀸𑀫𑁂𑀦 𑀬𑁄𑀚𑀺𑀢𑀢𑁆𑀢𑀸. ‘‘𑀲𑀼𑀢’’𑀦𑁆𑀢𑀺 𑀯𑀼𑀢𑁆𑀢𑁂 𑀅𑀲𑀼𑀢𑀁 𑀦 𑀳𑁄𑀢𑀻𑀢𑀺 𑀧𑀓𑀸𑀲𑀺𑀢𑁄𑀬𑀫𑀢𑁆𑀣𑁄, 𑀢𑀲𑁆𑀫𑀸 𑀢𑀣𑀸 𑀲𑀼𑀢-𑀲𑀤𑁆𑀤𑁂𑀦 𑀧𑀓𑀸𑀲𑀺𑀢𑀸 𑀅𑀢𑁆𑀢𑀦𑀸 𑀧𑀝𑀺𑀯𑀺𑀤𑁆𑀥𑀲𑀼𑀢𑁆𑀢𑀲𑁆𑀲 𑀧𑀓𑀸𑀭𑀯𑀺𑀲𑁂𑀲𑀸 ‘‘𑀏𑀯’’𑀦𑁆𑀢𑀺 𑀣𑁂𑀭𑁂𑀦 𑀧𑀘𑁆𑀘𑀸𑀫𑀝𑁆𑀞𑀸𑀢𑀺 𑀢𑁂𑀦 𑀏𑀯𑀁-𑀲𑀤𑁆𑀤𑁂𑀦 𑀅𑀲𑀫𑁆𑀫𑁄𑀳𑁄 𑀤𑀻𑀧𑀺𑀢𑁄 𑀦𑀸𑀫, 𑀢𑁂𑀦𑀸𑀳 ‘‘𑀏𑀯𑀦𑁆𑀢𑀺 𑀯𑀘𑀦𑁂𑀦 𑀅𑀲𑀫𑁆𑀫𑁄𑀳𑀁 𑀤𑀻𑀧𑁂𑀢𑀻’’𑀢𑀺. 𑀅𑀲𑀫𑁆𑀫𑁄𑀳𑀦𑁆𑀢𑀺 𑀘 𑀬𑀣𑀸𑀲𑀼𑀢𑁂 𑀲𑀼𑀢𑁆𑀢𑁂 𑀅𑀲𑀫𑁆𑀫𑁄𑀳𑀁. 𑀢𑀤𑁂𑀯 𑀬𑀼𑀢𑁆𑀢𑀺𑀬𑀸, 𑀩𑁆𑀬𑀢𑀺𑀭𑁂𑀓𑁂𑀦 𑀘 𑀲𑀫𑀢𑁆𑀣𑁂𑀳𑀺 ‘‘𑀦 𑀳𑀻’’𑀢𑀺𑀆𑀤𑀺𑀦𑀸 𑀯𑀓𑁆𑀔𑀫𑀸𑀦𑀜𑁆𑀘 𑀲𑀼𑀢𑁆𑀢𑀁 𑀦𑀸𑀦𑀧𑁆𑀧𑀓𑀸𑀭𑀁 𑀤𑀼𑀧𑁆𑀧𑀝𑀺𑀯𑀺𑀤𑁆𑀥𑀜𑁆𑀘. 𑀏𑀯𑀁 𑀦𑀸𑀦𑀧𑁆𑀧𑀓𑀸𑀭𑁂 𑀤𑀼𑀧𑁆𑀧𑀝𑀺𑀯𑀺𑀤𑁆𑀥𑁂 𑀲𑀼𑀢𑁆𑀢𑁂 𑀓𑀣𑀁 𑀲𑀫𑁆𑀫𑀽𑀴𑁆𑀳𑁄 𑀦𑀸𑀦𑀧𑁆𑀧𑀓𑀸𑀭𑀧𑀝𑀺𑀯𑁂𑀥𑀲𑀫𑀢𑁆𑀣𑁄 𑀪𑀯𑀺𑀲𑁆𑀲𑀢𑀺. 𑀇𑀫𑀸𑀬 𑀬𑀼𑀢𑁆𑀢𑀺𑀬𑀸, 𑀇𑀫𑀺𑀦𑀸 𑀘 𑀩𑁆𑀬𑀢𑀺𑀭𑁂𑀓𑁂𑀦 𑀣𑁂𑀭𑀲𑁆𑀲 𑀢𑀢𑁆𑀣 𑀅𑀲𑀫𑁆𑀫𑀽𑀴𑁆𑀳𑀪𑀸𑀯𑀲𑀗𑁆𑀔𑀸𑀢𑁄 𑀤𑀻𑀧𑁂𑀢𑀩𑁆𑀩𑁄 𑀅𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀫𑀻𑀤𑀺𑀲𑁂𑀲𑀼 𑀬𑀣𑀸𑀭𑀳𑀁. 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀲𑀼𑀢𑀸𑀓𑀸𑀭𑀲𑁆𑀲 𑀬𑀸𑀣𑀸𑀯𑀢𑁄 𑀉𑀧𑀭𑀺 𑀣𑁂𑀭𑁂𑀦 𑀤𑀲𑁆𑀲𑀺𑀬𑀫𑀸𑀦𑀢𑁆𑀢𑀸 ‘‘𑀲𑀼𑀢𑁆𑀢𑀲𑁆𑀲 𑀅𑀲𑀫𑁆𑀫𑁄𑀲𑀁 𑀤𑀻𑀧𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀓𑀸𑀮𑀦𑁆𑀢𑀭𑁂𑀦𑀸𑀢𑀺 𑀲𑀼𑀢𑀓𑀸𑀮𑀢𑁄 𑀅𑀧𑀭𑁂𑀦 𑀓𑀸𑀮𑁂𑀦. 𑀬𑀲𑁆𑀲…𑀧𑁂… 𑀧𑀝𑀺𑀚𑀸𑀦𑀸𑀢𑀺, 𑀣𑁂𑀭𑀲𑁆𑀲 𑀧𑀦 𑀲𑀼𑀯𑀡𑁆𑀡𑀪𑀸𑀚𑀦𑁂 𑀧𑀓𑁆𑀔𑀺𑀢𑁆𑀢𑀲𑀻𑀳𑀯𑀲𑀸 𑀯𑀺𑀬 𑀅𑀦𑀲𑁆𑀲𑀫𑀸𑀦𑀁 𑀅𑀲𑀫𑁆𑀫𑀼𑀝𑁆𑀞𑀁 𑀢𑀺𑀝𑁆𑀞𑀢𑀺, 𑀢𑀲𑁆𑀫𑀸 𑀲𑁄 𑀏𑀯𑀁 𑀧𑀝𑀺𑀚𑀸𑀦𑀸𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀤𑀻𑀧𑀺𑀢𑁂𑀦 𑀧𑀦 𑀅𑀢𑁆𑀣𑁂𑀦 𑀓𑀺𑀁 𑀧𑀓𑀸𑀲𑀺𑀢𑀦𑁆𑀢𑀺 𑀆𑀳 ‘‘𑀇𑀘𑁆𑀘𑀲𑁆𑀲𑀸’’𑀢𑀺𑀆𑀤𑀺. 𑀢𑀢𑁆𑀣 𑀇𑀘𑁆𑀘𑀲𑁆𑀲𑀸𑀢𑀺 𑀇𑀢𑀺 𑀅𑀲𑁆𑀲, 𑀢𑀲𑁆𑀫𑀸 𑀅𑀲𑀫𑁆𑀫𑁄𑀳𑀲𑁆𑀲, 𑀅𑀲𑀫𑁆𑀫𑁄𑀲𑀲𑁆𑀲 𑀘 𑀤𑀻𑀧𑀺𑀢𑀢𑁆𑀢𑀸 𑀅𑀲𑁆𑀲 𑀣𑁂𑀭𑀲𑁆𑀲𑀧𑀜𑁆𑀜𑀸𑀲𑀺𑀤𑁆𑀥𑀻𑀢𑀺𑀆𑀤𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀅𑀲𑀫𑁆𑀫𑁄𑀳𑁂𑀦𑀸𑀢𑀺 𑀲𑀫𑁆𑀫𑁄𑀳𑀸𑀪𑀸𑀯𑁂𑀦. 𑀧𑀜𑁆𑀜𑀸𑀯𑀚𑁆𑀚𑀺𑀢𑀲𑀫𑀸𑀥𑀺𑀆𑀤𑀺𑀥𑀫𑁆𑀫𑀚𑀸𑀢𑁂𑀦 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀬 𑀧𑀜𑁆𑀜𑀸𑀬 𑀲𑀺𑀤𑁆𑀥𑀺 𑀲𑀳𑀚𑀸𑀢𑀸𑀤𑀺𑀲𑀢𑁆𑀢𑀺𑀬𑀸 𑀲𑀺𑀚𑁆𑀛𑀦𑀢𑁄. 𑀲𑀫𑁆𑀫𑁄𑀳𑀧𑀝𑀺𑀧𑀓𑁆𑀔𑁂𑀦 𑀯𑀸 𑀧𑀜𑁆𑀜𑀸𑀲𑀗𑁆𑀔𑀸𑀢𑁂𑀦 𑀥𑀫𑁆𑀫𑀚𑀸𑀢𑁂𑀦. 𑀲𑀯𑀦𑀓𑀸𑀮𑀲𑀫𑁆𑀪𑀽𑀢𑀸𑀬 𑀳𑀺 𑀧𑀜𑁆𑀜𑀸𑀬 𑀢𑀤𑀼𑀢𑁆𑀢𑀭𑀺𑀓𑀸𑀮𑀧𑀜𑁆𑀜𑀸𑀲𑀺𑀤𑁆𑀥𑀺 𑀉𑀧𑀦𑀺𑀲𑁆𑀲𑀬𑀸𑀤𑀺𑀓𑁄𑀝𑀺𑀬𑀸 𑀲𑀺𑀚𑁆𑀛𑀦𑀢𑁄. 𑀇𑀢𑀭𑀢𑁆𑀣𑀸𑀧𑀺 𑀬𑀣𑀸𑀭𑀳𑀁 𑀦𑀬𑁄 𑀦𑁂𑀢𑀩𑁆𑀩𑁄.

𑀏𑀯𑀁 𑀧𑀓𑀸𑀲𑀺𑀢𑁂𑀦 𑀧𑀦 𑀅𑀢𑁆𑀣𑁂𑀦 𑀓𑀺𑀁 𑀯𑀺𑀪𑀸𑀯𑀺𑀢𑀦𑁆𑀢𑀺 𑀆𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀤𑀼𑀩𑁆𑀩𑀺𑀥𑁂𑀲𑀼 𑀥𑀫𑁆𑀫𑁂𑀲𑀼. 𑀩𑁆𑀬𑀜𑁆𑀚𑀦𑀸𑀦𑀁 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑁄 𑀆𑀓𑀸𑀭𑁄 𑀦𑀸𑀢𑀺𑀕𑀫𑁆𑀪𑀻𑀭𑁄, 𑀬𑀣𑀸𑀲𑀼𑀢𑀥𑀸𑀭𑀡𑀫𑁂𑀯 𑀢𑀢𑁆𑀣 𑀓𑀭𑀡𑀻𑀬𑀁, 𑀢𑀲𑁆𑀫𑀸 𑀢𑀢𑁆𑀣 𑀲𑀢𑀺𑀬𑀸 𑀩𑁆𑀬𑀸𑀧𑀸𑀭𑁄 𑀅𑀥𑀺𑀓𑁄, 𑀧𑀜𑁆𑀜𑀸 𑀧𑀦 𑀕𑀼𑀡𑀻𑀪𑀽𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀧𑀜𑁆𑀜𑀸𑀧𑀼𑀩𑁆𑀩𑀗𑁆𑀕𑀫𑀸𑀬𑀸’’𑀢𑀺𑀆𑀤𑀺. 𑀧𑀜𑁆𑀜𑀸𑀬 𑀧𑀼𑀩𑁆𑀩𑀗𑁆𑀕𑀫𑀸 𑀧𑀜𑁆𑀜𑀸𑀧𑀼𑀩𑁆𑀩𑀗𑁆𑀕𑀫𑀸𑀢𑀺 𑀳𑀺 𑀦𑀺𑀩𑁆𑀩𑀘𑀦𑀁, 𑀧𑀼𑀩𑁆𑀩𑀗𑁆𑀕𑀫𑀢𑀸 𑀘𑁂𑀢𑁆𑀣 𑀧𑀥𑀸𑀦𑀪𑀸𑀯𑁄 ‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 (𑀥. 𑀧. 𑁧) 𑀯𑀺𑀬. 𑀅𑀧𑀺𑀘 𑀬𑀣𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀲𑀼 𑀆𑀯𑀚𑁆𑀚𑀦𑀸𑀤𑀬𑁄 𑀧𑀼𑀩𑁆𑀩𑀗𑁆𑀕𑀫𑀸 𑀲𑀫𑀸𑀦𑀸𑀧𑀺 𑀢𑀤𑀸𑀭𑀫𑁆𑀫𑀡𑀲𑁆𑀲 𑀅𑀯𑀺𑀚𑀸𑀦𑀦𑀢𑁄 𑀅𑀧𑁆𑀧𑀥𑀸𑀦𑀪𑀽𑀢𑀸, 𑀏𑀯𑀁 𑀧𑀼𑀩𑁆𑀩𑀗𑁆𑀕𑀫𑀸𑀬𑀧𑀺 𑀅𑀧𑁆𑀧𑀥𑀸𑀦𑀢𑁆𑀢𑁂 𑀲𑀢𑀺 𑀧𑀜𑁆𑀜𑀸𑀧𑀼𑀩𑁆𑀩𑀗𑁆𑀕𑀫𑀸 𑀏𑀢𑀺𑀲𑁆𑀲𑀸𑀢𑀺 𑀦𑀺𑀩𑁆𑀩𑀘𑀦𑀫𑁆𑀧𑀺 𑀬𑀼𑀚𑁆𑀚𑀢𑀺. 𑀧𑀼𑀩𑁆𑀩𑀗𑁆𑀕𑀫𑀢𑀸 𑀘𑁂𑀢𑁆𑀣 𑀧𑀼𑀭𑁂𑀘𑀸𑀭𑀺𑀪𑀸𑀯𑁄. 𑀇𑀢𑀺 𑀲𑀳𑀚𑀸𑀢𑀧𑀼𑀩𑁆𑀩𑀗𑁆𑀕𑀫𑁄 𑀧𑀼𑀭𑁂𑀚𑀸𑀢𑀧𑀼𑀩𑁆𑀩𑀗𑁆𑀕𑀫𑁄𑀢𑀺 𑀤𑀼𑀯𑀺𑀥𑁄𑀧𑀺 𑀧𑀼𑀩𑁆𑀩𑀗𑁆𑀕𑀫𑁄 𑀇𑀥 𑀲𑀫𑁆𑀪𑀯𑀢𑀺, 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀲𑀢𑀺 ‘‘𑀧𑀼𑀩𑁆𑀩𑀗𑁆𑀕𑀫𑀸𑀬𑀸’’𑀢𑀺 𑀏𑀢𑁆𑀣𑀸𑀧𑀺 𑀬𑀣𑀸𑀲𑀫𑁆𑀪𑀯𑀫𑁂𑀲 𑀦𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀯𑀺𑀪𑀸𑀯𑀺𑀢𑁂𑀦 𑀲𑀫𑀢𑁆𑀣𑀢𑀸𑀯𑀘𑀦𑁂𑀦 𑀓𑀺𑀫𑀦𑀼𑀪𑀸𑀯𑀺𑀢𑀦𑁆𑀢𑀺 𑀆𑀳 ‘‘𑀢𑀤𑀼𑀪𑀬𑀲𑀫𑀢𑁆𑀣𑀢𑀸𑀬𑁄𑀕𑁂𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑀲𑁆𑀲𑀸𑀢𑀺 𑀅𑀢𑁆𑀣𑀩𑁆𑀬𑀜𑁆𑀚𑀦𑁂𑀦 𑀧𑀭𑀺𑀧𑀼𑀡𑁆𑀡𑀲𑁆𑀲, 𑀲𑀗𑁆𑀓𑀸𑀲𑀦𑀸𑀤𑀻𑀳𑀺 𑀯𑀸 𑀙𑀳𑀺 𑀅𑀢𑁆𑀣𑀧𑀤𑁂𑀳𑀺, 𑀅𑀓𑁆𑀔𑀭𑀸𑀤𑀻𑀳𑀺 𑀘 𑀙𑀳𑀺 𑀩𑁆𑀬𑀜𑁆𑀚𑀦𑀧𑀤𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲, 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀗𑁆𑀔𑀸𑀢𑁂𑀦 𑀯𑀸 𑀭𑀲𑁂𑀦 𑀲𑀸𑀤𑀼𑀭𑀲𑀲𑁆𑀲. 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄𑀬𑁂𑀯 𑀦𑀯𑀮𑁄𑀓𑀼𑀢𑁆𑀢𑀭𑀭𑀢𑀦𑀲𑀦𑁆𑀦𑀺𑀥𑀸𑀦𑀢𑁄 𑀲𑀢𑁆𑀢𑀯𑀺𑀥𑀲𑁆𑀲, 𑀤𑀲𑀯𑀺𑀥𑀲𑁆𑀲 𑀯𑀸 𑀭𑀢𑀦𑀲𑁆𑀲 𑀲𑀦𑁆𑀦𑀺𑀥𑀸𑀦𑁄 𑀓𑁄𑀲𑁄 𑀯𑀺𑀬𑀸𑀢𑀺 𑀥𑀫𑁆𑀫𑀓𑁄𑀲𑁄, 𑀢𑀣𑀸 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑁄, 𑀢𑀢𑁆𑀣 𑀦𑀺𑀬𑀼𑀢𑁆𑀢𑁄𑀢𑀺 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁄. 𑀅𑀣 𑀯𑀸 𑀦𑀸𑀦𑀸𑀭𑀸𑀚𑀪𑀡𑁆𑀟𑀭𑀓𑁆𑀔𑀓𑁄 𑀪𑀡𑁆𑀟𑀸𑀕𑀸𑀭𑀺𑀓𑁄 𑀯𑀺𑀬𑀸𑀢𑀺 𑀪𑀡𑁆𑀟𑀸𑀕𑀸𑀭𑀺𑀓𑁄, 𑀥𑀫𑁆𑀫𑀲𑁆𑀲 𑀅𑀦𑀼𑀭𑀓𑁆𑀔𑀓𑁄 𑀪𑀡𑁆𑀟𑀸𑀕𑀸𑀭𑀺𑀓𑁄𑀢𑀺 𑀢𑀫𑁂𑀯 𑀲𑀤𑀺𑀲𑀢𑀸𑀓𑀸𑀭𑀡𑀤𑀲𑁆𑀲𑀦𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 ‘‘𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁄’’𑀢𑀺 𑀯𑀼𑀢𑁆𑀢𑁄. 𑀬𑀣𑀸𑀳 𑁋

‘‘𑀩𑀳𑀼𑀲𑁆𑀲𑀼𑀢𑁄 𑀥𑀫𑁆𑀫𑀥𑀭𑁄, 𑀲𑀩𑁆𑀩𑀧𑀸𑀞𑀻 𑀘 𑀲𑀸𑀲𑀦𑁂;

𑀆𑀦𑀦𑁆𑀤𑁄 𑀦𑀸𑀫 𑀦𑀸𑀫𑁂𑀦, 𑀥𑀫𑁆𑀫𑀸𑀭𑀓𑁆𑀔𑁄 𑀢𑀯𑀁 𑀫𑀼𑀦𑁂’’𑀢𑀺. (𑀅𑀧. 𑁧.𑁫𑁪𑁨);

𑀅𑀜𑁆𑀜𑀣𑀸𑀧𑀺 𑀤𑀻𑀧𑁂𑀢𑀩𑁆𑀩𑀫𑀢𑁆𑀣𑀁 𑀤𑀻𑀧𑁂𑀢𑀺 ‘‘𑀅𑀧𑀭𑁄 𑀦𑀬𑁄’’𑀢𑀺𑀆𑀤𑀺𑀦𑀸, 𑀏𑀯𑀁 𑀲𑀤𑁆𑀤𑁂𑀦 𑀯𑀼𑀘𑁆𑀘𑀫𑀸𑀦𑀸𑀦𑀁 𑀆𑀓𑀸𑀭𑀦𑀺𑀤𑀲𑁆𑀲𑀦𑀸𑀯𑀥𑀸𑀭𑀡𑀢𑁆𑀣𑀸𑀦𑀁 𑀅𑀯𑀺𑀧𑀭𑀻𑀢𑀲𑀤𑁆𑀥𑀫𑁆𑀫𑀯𑀺𑀲𑀬𑀢𑁆𑀢𑀸 𑀢𑀩𑁆𑀩𑀺𑀲𑀬𑁂𑀳𑀺 𑀢𑁂𑀳𑀺 𑀅𑀢𑁆𑀣𑁂𑀳𑀺 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀲𑁆𑀲 𑀤𑀻𑀧𑀦𑀁 𑀬𑀼𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀬𑁄𑀦𑀺…𑀧𑁂… 𑀤𑀻𑀧𑁂𑀢𑀻’’𑀢𑀺. ‘‘𑀅𑀬𑁄𑀦𑀺𑀲𑁄’’𑀢𑀺𑀆𑀤𑀺𑀦𑀸 𑀩𑁆𑀬𑀢𑀺𑀭𑁂𑀓𑁂𑀦 𑀜𑀸𑀧𑀓𑀳𑁂𑀢𑀼𑀤𑀲𑁆𑀲𑀦𑀁. 𑀢𑀢𑁆𑀣 𑀓𑀢𑁆𑀣𑀘𑀺 𑀳𑀺-𑀲𑀤𑁆𑀤𑁄 𑀤𑀺𑀲𑁆𑀲𑀢𑀺, 𑀲𑁄 𑀓𑀸𑀭𑀡𑁂, 𑀓𑀲𑁆𑀫𑀸𑀢𑀺 𑀅𑀢𑁆𑀣𑁄, 𑀇𑀫𑀺𑀦𑀸 𑀯𑀘𑀦𑁂𑀦𑁂𑀯 𑀬𑁄𑀦𑀺𑀲𑁄 𑀫𑀦𑀲𑀺𑀓𑀭𑁄𑀢𑁄 𑀦𑀸𑀦𑀧𑁆𑀧𑀓𑀸𑀭𑀧𑀝𑀺𑀯𑁂𑀥𑀲𑀫𑁆𑀪𑀯𑀢𑁄 𑀅𑀕𑁆𑀕𑀺 𑀯𑀺𑀬 𑀥𑀽𑀫𑁂𑀦 𑀓𑀸𑀭𑀺𑀬𑁂𑀦 𑀓𑀸𑀭𑀡𑀪𑀽𑀢𑁄 𑀲𑁄 𑀯𑀺𑀜𑁆𑀜𑀸𑀬𑀢𑀻𑀢𑀺 𑀢𑀤𑀦𑁆𑀯𑀬𑀫𑁆𑀧𑀺 𑀅𑀢𑁆𑀣𑀸𑀧𑀢𑁆𑀢𑀺𑀬𑀸 𑀤𑀲𑁆𑀲𑁂𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣 𑀬𑀣𑀸𑀭𑀳𑀁. ‘‘𑀩𑁆𑀭𑀳𑁆𑀫𑀚𑀸𑀮𑀁 𑀆𑀯𑀼𑀲𑁄 𑀓𑀢𑁆𑀣 𑀪𑀸𑀲𑀺𑀢’’𑀦𑁆𑀢𑀺𑀆𑀤𑀺 𑀧𑀼𑀘𑁆𑀙𑀸𑀯𑀲𑁂𑀦 𑀅𑀥𑀼𑀦𑀸 𑀧𑀓𑀭𑀡𑀧𑁆𑀧𑀢𑁆𑀢𑀲𑁆𑀲 𑀯𑀓𑁆𑀔𑀫𑀸𑀦𑀲𑁆𑀲 𑀲𑀼𑀢𑁆𑀢𑀲𑁆𑀲 ‘‘𑀲𑀼𑀢’’𑀦𑁆𑀢𑀺 𑀧𑀤𑁂𑀦 𑀯𑀼𑀘𑁆𑀘𑀫𑀸𑀦𑀁 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀲𑀯𑀦𑀁 𑀲𑀫𑀸𑀥𑀸𑀦𑀫𑀦𑁆𑀢𑀭𑁂𑀦 𑀦 𑀲𑀫𑁆𑀪𑀯𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀅𑀯𑀺𑀓𑁆𑀔𑁂𑀧𑀁 𑀤𑀻𑀧𑁂𑀢𑀻’’𑀢𑀺. ‘‘𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀩𑁆𑀬𑀢𑀺𑀭𑁂𑀓𑀓𑀸𑀭𑀡𑁂𑀦 𑀜𑀸𑀧𑀓𑀳𑁂𑀢𑀼𑀁 𑀤𑀲𑁆𑀲𑁂𑀢𑁆𑀯𑀸 𑀢𑀤𑁂𑀯 𑀲𑀫𑀢𑁆𑀣𑁂𑀢𑀺 ‘‘𑀢𑀣𑀸 𑀳𑀻’’𑀢𑀺𑀆𑀤𑀺𑀦𑀸. 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑀸𑀢𑀺 𑀲𑀩𑁆𑀩𑁂𑀦 𑀅𑀢𑁆𑀣𑀩𑁆𑀬𑀜𑁆𑀚𑀦𑀤𑁂𑀲𑀓𑀧𑀬𑁄𑀚𑀦𑀸𑀤𑀺𑀦𑀸 𑀲𑀫𑁆𑀧𑀢𑁆𑀢𑀺𑀬𑀸. 𑀓𑀺𑀁 𑀇𑀫𑀺𑀦𑀸 𑀧𑀓𑀸𑀲𑀺𑀢𑀦𑁆𑀢𑀺 𑀆𑀳 ‘‘𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁂𑀦 𑀘𑁂𑀢𑁆𑀣𑀸’’𑀢𑀺𑀆𑀤𑀺. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀥𑀫𑁆𑀫𑀤𑁆𑀯𑀬𑁂. ‘‘𑀦 𑀳𑀺 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄’’𑀢𑀺𑀆𑀤𑀺𑀦𑀸 𑀓𑀸𑀭𑀡𑀪𑀽𑀢𑁂𑀦 𑀅𑀯𑀺𑀓𑁆𑀔𑁂𑀧𑁂𑀦, 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑁂𑀦 𑀘 𑀨𑀮𑀪𑀽𑀢𑀲𑁆𑀲 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀲𑁆𑀲 𑀲𑀺𑀤𑁆𑀥𑀺𑀬𑀸 𑀏𑀯 𑀲𑀫𑀢𑁆𑀣𑀦𑀁 𑀯𑀼𑀢𑁆𑀢𑀁, 𑀅𑀯𑀺𑀓𑁆𑀔𑁂𑀧𑁂𑀦 𑀧𑀦 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀲𑁆𑀲 𑀲𑀺𑀤𑁆𑀥𑀺𑀬𑀸 𑀲𑀫𑀢𑁆𑀣𑀦𑀁 𑀦 𑀯𑀼𑀢𑁆𑀢𑀁. 𑀓𑀲𑁆𑀫𑀸𑀢𑀺 𑀘𑁂? 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀸𑀦𑀁 𑀲𑀧𑁆𑀧𑀼𑀭𑀺𑀲𑁂 𑀧𑀬𑀺𑀭𑀼𑀧𑀸𑀲𑀦𑀸𑀪𑀸𑀯𑀲𑁆𑀲 𑀅𑀢𑁆𑀣𑀢𑁄 𑀲𑀺𑀤𑁆𑀥𑀢𑁆𑀢𑀸. 𑀅𑀢𑁆𑀣𑀯𑀲𑁂𑀦𑁂𑀯 𑀳𑀺 𑀲𑁄 𑀧𑀸𑀓𑀝𑁄𑀢𑀺 𑀦 𑀯𑀼𑀢𑁆𑀢𑁄.

𑀏𑀢𑁆𑀣𑀸𑀳 𑁋 𑀬𑀣𑀸 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁂𑀦 𑀨𑀮𑀪𑀽𑀢𑁂𑀦 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀺𑀧𑀼𑀩𑁆𑀩𑁂𑀓𑀢𑀧𑀼𑀜𑁆𑀜𑀢𑀸𑀦𑀁 𑀓𑀸𑀭𑀡𑀪𑀽𑀢𑀸𑀦𑀁 𑀲𑀺𑀤𑁆𑀥𑀺 𑀯𑀼𑀢𑁆𑀢𑀸 𑀢𑀤𑀯𑀺𑀦𑀸𑀪𑀸𑀯𑀢𑁄, 𑀏𑀯𑀁 𑀅𑀯𑀺𑀓𑁆𑀔𑁂𑀧𑁂𑀦 𑀨𑀮𑀪𑀽𑀢𑁂𑀦 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀸𑀦𑀁 𑀓𑀸𑀭𑀡𑀪𑀽𑀢𑀸𑀦𑀁 𑀲𑀺𑀤𑁆𑀥𑀺 𑀯𑀢𑁆𑀢𑀩𑁆𑀩𑀸 𑀲𑀺𑀬𑀸 𑀅𑀲𑁆𑀲𑀼𑀢𑀯𑀢𑁄, 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀯𑀺𑀭𑀳𑀺𑀢𑀲𑁆𑀲 𑀘 𑀢𑀤𑀪𑀸𑀯𑀢𑁄. 𑀏𑀯𑀁 𑀲𑀦𑁆𑀢𑁂𑀧𑀺 ‘‘𑀦 𑀳𑀺 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄’’𑀢𑀺𑀆𑀤𑀺𑀲𑀫𑀢𑁆𑀣𑀦𑀯𑀘𑀦𑁂𑀦 𑀅𑀯𑀺𑀓𑁆𑀔𑁂𑀧𑁂𑀦, 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑁂𑀦 𑀘 𑀓𑀸𑀭𑀡𑀪𑀽𑀢𑁂𑀦 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀲𑁆𑀲𑁂𑀯 𑀨𑀮𑀪𑀽𑀢𑀲𑁆𑀲 𑀲𑀺𑀤𑁆𑀥𑀺 𑀯𑀼𑀢𑁆𑀢𑀸, 𑀓𑀲𑁆𑀫𑀸 𑀧𑀦𑁂𑀯𑀁 𑀯𑀼𑀢𑁆𑀢𑀸𑀢𑀺? 𑀯𑀼𑀘𑁆𑀘𑀢𑁂 𑁋 𑀅𑀥𑀺𑀧𑁆𑀧𑀸𑀬𑀦𑁆𑀢𑀭𑀲𑀫𑁆𑀪𑀯𑀢𑁄 𑀳𑀺 𑀢𑀣𑀸 𑀲𑀺𑀤𑁆𑀥𑀺 𑀯𑀼𑀢𑁆𑀢𑀸. 𑀅𑀬𑀁 𑀧𑀦𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄 𑁋 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀸 𑀦 𑀏𑀓𑀦𑁆𑀢𑁂𑀦 𑀅𑀯𑀺𑀓𑁆𑀔𑁂𑀧𑀲𑁆𑀲 𑀓𑀸𑀭𑀡𑀁 𑀩𑀸𑀳𑀺𑀭𑀓𑀸𑀭𑀡𑀢𑁆𑀢𑀸, 𑀅𑀯𑀺𑀓𑁆𑀔𑁂𑀧𑁄 𑀧𑀦 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑁄 𑀯𑀺𑀬 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀲𑁆𑀲 𑀏𑀓𑀦𑁆𑀢𑀓𑀸𑀭𑀡𑀁 𑀅𑀚𑁆𑀛𑀢𑁆𑀢𑀺𑀓𑀓𑀸𑀭𑀡𑀢𑁆𑀢𑀸, 𑀢𑀲𑁆𑀫𑀸 𑀏𑀓𑀦𑁆𑀢𑀓𑀸𑀭𑀡𑁂 𑀳𑁄𑀦𑁆𑀢𑁂 𑀓𑀺𑀫𑀢𑁆𑀣𑀺𑀬𑀸 𑀅𑀦𑁂𑀓𑀦𑁆𑀢𑀓𑀸𑀭𑀡𑀁 𑀧𑀢𑀺 𑀨𑀮𑀪𑀸𑀯𑀧𑀭𑀺𑀓𑀧𑁆𑀧𑀦𑀸𑀢𑀺 𑀢𑀣𑀸𑀬𑁂𑀯𑁂𑀢𑀲𑁆𑀲 𑀲𑀺𑀤𑁆𑀥𑀺 𑀯𑀼𑀢𑁆𑀢𑀸𑀢𑀺. 𑀏𑀢𑁆𑀣 𑀘 𑀧𑀞𑀫𑀁 𑀨𑀮𑁂𑀦 𑀓𑀸𑀭𑀡𑀲𑁆𑀲 𑀲𑀺𑀤𑁆𑀥𑀺𑀤𑀲𑁆𑀲𑀦𑀁 𑀦𑀤𑀻𑀧𑀽𑀭𑁂𑀦 𑀯𑀺𑀬 𑀉𑀧𑀭𑀺 𑀯𑀼𑀝𑁆𑀞𑀺𑀲𑀩𑁆𑀪𑀸𑀯𑀲𑁆𑀲, 𑀤𑀼𑀢𑀺𑀬𑀁 𑀓𑀸𑀭𑀡𑁂𑀦 𑀨𑀮𑀲𑁆𑀲 𑀲𑀺𑀤𑁆𑀥𑀺𑀤𑀲𑁆𑀲𑀦𑀁 𑀏𑀓𑀦𑁆𑀢𑀯𑀲𑁆𑀲𑀺𑀦𑀸 𑀯𑀺𑀬 𑀫𑁂𑀖𑀯𑀼𑀝𑁆𑀞𑀸𑀦𑁂𑀦 𑀯𑀼𑀝𑁆𑀞𑀺𑀧𑀯𑀢𑁆𑀢𑀺𑀬𑀸.

‘‘𑀅𑀧𑀭𑁄 𑀦𑀬𑁄’’𑀢𑀺𑀆𑀤𑀺𑀦𑀸 𑀅𑀜𑁆𑀜𑀣𑀸𑀧𑀺 𑀤𑀻𑀧𑁂𑀢𑀩𑁆𑀩𑀢𑁆𑀣𑀫𑀸𑀳, 𑀬𑀲𑁆𑀫𑀸 𑀦 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀦𑁆𑀢𑀺…𑀧𑁂… 𑀦𑀸𑀦𑀸𑀓𑀸𑀭𑀦𑀺𑀤𑁆𑀤𑁂𑀲𑁄𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁, 𑀲𑁄 𑀘 𑀆𑀓𑀸𑀭𑁄𑀢𑀺 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑀯𑀺𑀜𑁆𑀜𑀸𑀡𑀯𑀻𑀣𑀺𑀲𑀗𑁆𑀔𑀸𑀢𑀲𑁆𑀲 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀦𑀸𑀦𑀸𑀓𑀸𑀭𑁂𑀦 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀺𑀬𑀸 𑀦𑀸𑀦𑀢𑁆𑀣𑀩𑁆𑀬𑀜𑁆𑀚𑀦𑀕𑁆𑀕𑀳𑀡𑀲𑀗𑁆𑀔𑀸𑀢𑁄 𑀲𑁄 𑀪𑀕𑀯𑀢𑁄 𑀯𑀘𑀦𑀲𑁆𑀲 𑀅𑀢𑁆𑀣𑀩𑁆𑀬𑀜𑁆𑀚𑀦𑀧𑁆𑀧𑀪𑁂𑀤𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀲𑀓𑀮𑀲𑀸𑀲𑀦𑀲𑀫𑁆𑀧𑀢𑁆𑀢𑀺𑀑𑀕𑀸𑀳𑀦𑀸𑀓𑀸𑀭𑁄. 𑀏𑀯𑀁 𑀪𑀤𑁆𑀤𑀓𑁄𑀢𑀺 𑀦𑀺𑀭𑀯𑀲𑁂𑀲𑀧𑀭𑀳𑀺𑀢𑀧𑀸𑀭𑀺𑀧𑀽𑀭𑀺𑀪𑀸𑀯𑀓𑀸𑀭𑀡𑀢𑁆𑀢𑀸 𑀏𑀯𑀁 𑀬𑀣𑀸𑀯𑀼𑀢𑁆𑀢𑁂𑀦 𑀦𑀸𑀦𑀢𑁆𑀣𑀩𑁆𑀬𑀜𑁆𑀚𑀦𑀕𑁆𑀕𑀳𑀡𑁂𑀦 𑀲𑀼𑀦𑁆𑀤𑀭𑁄 𑀲𑁂𑀝𑁆𑀞𑁄, 𑀲𑀫𑀸𑀲𑀧𑀤𑀁 𑀯𑀸 𑀏𑀢𑀁 𑀏𑀯𑀁 𑀈𑀤𑀺𑀲𑁄 𑀪𑀤𑁆𑀤𑁄 𑀬𑀲𑁆𑀲𑀸𑀢𑀺 𑀓𑀢𑁆𑀯𑀸. 𑀦 𑀧𑀡𑀺𑀳𑀺𑀢𑁄 𑀅𑀧𑁆𑀧𑀡𑀺𑀳𑀺𑀢𑁄, 𑀲𑀫𑁆𑀫𑀸 𑀅𑀧𑁆𑀧𑀡𑀺 𑀳𑀺𑀢𑁄 𑀅𑀢𑁆𑀢𑀸 𑀬𑀲𑁆𑀲𑀸𑀢𑀺 𑀢𑀣𑀸, 𑀢𑀲𑁆𑀲. 𑀧𑀘𑁆𑀙𑀺𑀫𑀘𑀓𑁆𑀓𑀤𑁆𑀯𑀬𑀲𑀫𑁆𑀧𑀢𑁆𑀢𑀺𑀦𑁆𑀢𑀺 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀺𑀧𑀼𑀩𑁆𑀩𑁂𑀓𑀢𑀧𑀼𑀜𑁆𑀜𑀢𑀸𑀲𑀗𑁆𑀔𑀸𑀢𑀕𑀼𑀡𑀤𑁆𑀯𑀬𑀲𑀫𑁆𑀧𑀢𑁆𑀢𑀺𑀁. 𑀕𑀼𑀡𑀲𑁆𑀲𑁂𑀯 𑀳𑀺 𑀅𑀧𑀭𑀸𑀧𑀭𑀯𑀼𑀢𑁆𑀢𑀺𑀬𑀸 𑀧𑀯𑀢𑁆𑀢𑀦𑀝𑁆𑀞𑁂𑀦 𑀘𑀓𑁆𑀓𑀪𑀸𑀯𑁄. 𑀘𑀭𑀦𑁆𑀢𑀺 𑀯𑀸 𑀏𑀢𑁂𑀦 𑀲𑀢𑁆𑀢𑀸 𑀲𑀫𑁆𑀧𑀢𑁆𑀢𑀺𑀪𑀯𑀁, 𑀲𑀫𑁆𑀧𑀢𑁆𑀢𑀺𑀪𑀯𑁂𑀲𑀽𑀢𑀺 𑀯𑀸 𑀘𑀓𑁆𑀓𑀁. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀘𑀢𑁆𑀢𑀸𑀭𑀺𑀫𑀸𑀦𑀺 𑀪𑀺𑀓𑁆𑀔𑀯𑁂, 𑀘𑀓𑁆𑀓𑀸𑀦𑀺, 𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀘𑀢𑀼𑀘𑀓𑁆𑀓𑀁 𑀯𑀢𑁆𑀢𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁪.𑁩𑁧) 𑀧𑀘𑁆𑀙𑀺𑀫𑀪𑀸𑀯𑁄 𑀘𑁂𑀢𑁆𑀣 𑀤𑁂𑀲𑀦𑀸𑀓𑁆𑀓𑀫𑀯𑀲𑁂𑀦𑁂𑀯. 𑀧𑀼𑀭𑀺𑀫𑀘𑀓𑁆𑀓𑀤𑁆𑀯𑀬𑀲𑀫𑁆𑀧𑀢𑁆𑀢𑀺𑀦𑁆𑀢𑀺 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀲𑀗𑁆𑀔𑀸𑀢𑀕𑀼𑀡𑀤𑁆𑀯𑀬𑀲𑀫𑁆𑀧𑀢𑁆𑀢𑀺𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀢𑀲𑁆𑀫𑀸𑀢𑀺 𑀧𑀼𑀭𑀺𑀫𑀓𑀸𑀭𑀡𑀁 𑀧𑀼𑀭𑀺𑀫𑀲𑁆𑀲𑁂𑀯𑀸𑀢𑀺 𑀇𑀥 𑀓𑀸𑀭𑀡𑀫𑀸𑀳 ‘‘𑀦 𑀳𑀻’’𑀢𑀺𑀆𑀤𑀺𑀦𑀸.

𑀢𑁂𑀦 𑀓𑀺𑀁 𑀧𑀓𑀸𑀲𑀺𑀢𑀦𑁆𑀢𑀺 𑀆𑀳 ‘‘𑀇𑀘𑁆𑀘𑀲𑁆𑀲𑀸’’𑀢𑀺𑀆𑀤𑀺. 𑀇𑀢𑀺 𑀇𑀫𑀸𑀬 𑀘𑀢𑀼𑀘𑀓𑁆𑀓𑀲𑀫𑁆𑀧𑀢𑁆𑀢𑀺𑀬𑀸 𑀓𑀸𑀭𑀡𑀪𑀽𑀢𑀸𑀬. 𑀅𑀲𑁆𑀲 𑀣𑁂𑀭𑀲𑁆𑀲. 𑀧𑀘𑁆𑀙𑀺𑀫𑀘𑀓𑁆𑀓𑀤𑁆𑀯𑀬𑀲𑀺𑀤𑁆𑀥𑀺𑀬𑀸𑀢𑀺 𑀧𑀘𑁆𑀙𑀺𑀫𑀘𑀓𑁆𑀓𑀤𑁆𑀯𑀬𑀲𑁆𑀲 𑀅𑀢𑁆𑀣𑀺𑀪𑀸𑀯𑁂𑀦 𑀲𑀺𑀤𑁆𑀥𑀺𑀬𑀸. 𑀆𑀲𑀬𑀲𑀼𑀤𑁆𑀥𑀻𑀢𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑀗𑁆𑀔𑀸𑀢𑀸𑀬 𑀅𑀦𑀼𑀮𑁄𑀫𑀺𑀓𑀔𑀦𑁆𑀢𑀺𑀬𑀸, 𑀓𑀫𑁆𑀫𑀲𑁆𑀲𑀓𑀢𑀸𑀜𑀸𑀡-𑀫𑀕𑁆𑀕𑀜𑀸𑀡𑀲𑀗𑁆𑀔𑀸𑀢𑀲𑁆𑀲 𑀬𑀣𑀸𑀪𑀽𑀢𑀜𑀸𑀡𑀲𑁆𑀲 𑀘𑀸𑀢𑀺 𑀤𑀼𑀯𑀺𑀥𑀲𑁆𑀲𑀸𑀧𑀺 𑀆𑀲𑀬𑀲𑁆𑀲 𑀅𑀲𑀼𑀤𑁆𑀥𑀺𑀳𑁂𑀢𑀼𑀪𑀽𑀢𑀸𑀦𑀁 𑀓𑀺𑀮𑁂𑀲𑀸𑀦𑀁 𑀤𑀽𑀭𑀻𑀪𑀸𑀯𑁂𑀦 𑀲𑀼𑀤𑁆𑀥𑀺. 𑀢𑀤𑁂𑀯 𑀳𑀺 𑀤𑁆𑀯𑀬𑀁 𑀯𑀺𑀯𑀝𑁆𑀝𑀦𑀺𑀲𑁆𑀲𑀺𑀢𑀸𑀦𑀁 𑀲𑀼𑀤𑁆𑀥𑀲𑀢𑁆𑀢𑀸𑀦𑀁 𑀆𑀲𑀬𑁄. 𑀲𑀫𑁆𑀫𑀸𑀧𑀡𑀺𑀳𑀺𑀢𑀢𑁆𑀢𑁄 𑀳𑀺 𑀧𑀼𑀩𑁆𑀩𑁂 𑀘 𑀓𑀢𑀧𑀼𑀜𑁆𑀜𑁄 𑀲𑀼𑀤𑁆𑀥𑀸𑀲𑀬𑁄 𑀳𑁄𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀲𑀫𑁆𑀫𑀸𑀧𑀡𑀺𑀳𑀺𑀢𑀁 𑀘𑀺𑀢𑁆𑀢𑀁, 𑀲𑁂𑀬𑁆𑀬𑀲𑁄 𑀦𑀁 𑀢𑀢𑁄 𑀓𑀭𑁂’’𑀢𑀺, (𑀥. 𑀧. 𑁪𑁩) ‘‘𑀓𑀢𑀧𑀼𑀜𑁆𑀜𑁄𑀲𑀺 𑀢𑁆𑀯𑀁 𑀆𑀦𑀦𑁆𑀤, 𑀧𑀥𑀸𑀦𑀫𑀦𑀼𑀬𑀼𑀜𑁆𑀚 𑀔𑀺𑀧𑁆𑀧𑀁 𑀳𑁄𑀳𑀺𑀲𑀺 𑀅𑀦𑀸𑀲𑀯𑁄’’𑀢𑀺 (𑀤𑀻. 𑀦𑀺. 𑁨.𑁨𑁦𑁭) 𑀘. 𑀓𑁂𑀘𑀺 𑀧𑀦 ‘‘𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑁄 𑀆𑀲𑀬𑁄’’𑀢𑀺 𑀯𑀤𑀦𑁆𑀢𑀺, 𑀢𑀤𑀬𑀼𑀢𑁆𑀢𑀫𑁂𑀯 ‘‘𑀢𑀸𑀬 𑀘 𑀆𑀲𑀬𑀲𑀼𑀤𑁆𑀥𑀺𑀬𑀸 𑀅𑀥𑀺𑀕𑀫𑀩𑁆𑀬𑀢𑁆𑀢𑀺𑀲𑀺𑀤𑁆𑀥𑀻’’𑀢𑀺 𑀯𑀘𑀦𑁂𑀦 𑀯𑀺𑀭𑁄𑀥𑀢𑁄. 𑀏𑀯𑀫𑁆𑀧𑀺 𑀫𑀕𑁆𑀕𑀜𑀸𑀡𑀲𑀗𑁆𑀔𑀸𑀢𑀲𑁆𑀲 𑀆𑀲𑀬𑀲𑁆𑀲 𑀲𑀼𑀤𑁆𑀥𑀺 𑀦 𑀬𑀼𑀢𑁆𑀢𑀸 𑀢𑀸𑀬 𑀅𑀥𑀺𑀕𑀫𑀩𑁆𑀬𑀢𑁆𑀢𑀺𑀲𑀺𑀤𑁆𑀥𑀺𑀬𑀸 𑀅𑀯𑀢𑁆𑀢𑀩𑁆𑀩𑀢𑁄𑀢𑀺? 𑀦𑁄 𑀦 𑀬𑀼𑀢𑁆𑀢𑁄 𑀧𑀼𑀭𑀺𑀫𑀲𑁆𑀲 𑀫𑀕𑁆𑀕𑀲𑁆𑀲, 𑀧𑀘𑁆𑀙𑀺𑀫𑀸𑀦𑀁 𑀫𑀕𑁆𑀕𑀸𑀦𑀁, 𑀨𑀮𑀸𑀦𑀜𑁆𑀘 𑀓𑀸𑀭𑀡𑀪𑀸𑀯𑀢𑁄. 𑀧𑀬𑁄𑀕𑀲𑀼𑀤𑁆𑀥𑀻𑀢𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀼𑀩𑁆𑀩𑀗𑁆𑀕𑀫𑀲𑁆𑀲 𑀥𑀫𑁆𑀫𑀲𑁆𑀲𑀯𑀦𑀧𑀬𑁄𑀕𑀲𑁆𑀲 𑀯𑀺𑀲𑀤𑀪𑀸𑀯𑁂𑀦 𑀲𑀼𑀤𑁆𑀥𑀺, 𑀲𑀩𑁆𑀩𑀲𑁆𑀲 𑀯𑀸 𑀓𑀸𑀬𑀯𑀘𑀻𑀧𑀬𑁄𑀕𑀲𑁆𑀲 𑀦𑀺𑀤𑁆𑀤𑁄𑀲𑀪𑀸𑀯𑁂𑀦 𑀲𑀼𑀤𑁆𑀥𑀺. 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑀻, 𑀳𑀺 𑀲𑀧𑁆𑀧𑀼𑀭𑀺𑀲𑀲𑁂𑀯𑀻 𑀘 𑀬𑀣𑀸𑀯𑀼𑀢𑁆𑀢𑀯𑀺𑀲𑀼𑀤𑁆𑀥𑀧𑀬𑁄𑀕𑁄 𑀳𑁄𑀢𑀺. 𑀢𑀣𑀸𑀯𑀺𑀲𑀼𑀤𑁆𑀥𑁂𑀦 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀼𑀩𑁆𑀩𑀗𑁆𑀕𑀫𑁂𑀦 𑀥𑀫𑁆𑀫𑀲𑁆𑀲𑀯𑀦𑀧𑀬𑁄𑀕𑁂𑀦, 𑀯𑀺𑀧𑁆𑀧𑀝𑀺𑀲𑀸𑀭𑀸𑀪𑀸𑀯𑀸𑀯𑀳𑁂𑀦 𑀘 𑀓𑀸𑀬𑀯𑀘𑀻𑀧𑀬𑁄𑀕𑁂𑀦 𑀅𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀧𑀭𑀺𑀬𑀢𑁆𑀢𑀺𑀬𑀁 𑀯𑀺𑀲𑀸𑀭𑀤𑁄 𑀳𑁄𑀢𑀺, 𑀢𑀣𑀸𑀪𑀽𑀢𑁄 𑀘 𑀣𑁂𑀭𑁄, 𑀢𑁂𑀦 𑀯𑀺𑀜𑁆𑀜𑀸𑀬𑀢𑀺 𑀧𑀼𑀭𑀺𑀫𑀘𑀓𑁆𑀓𑀤𑁆𑀯𑀬𑀲𑀺𑀤𑁆𑀥𑀺𑀬𑀸 𑀣𑁂𑀭𑀲𑁆𑀲 𑀧𑀬𑁄𑀕𑀲𑀼𑀤𑁆𑀥𑀺 𑀲𑀺𑀤𑁆𑀥𑀸𑀯𑀸𑀢𑀺. 𑀢𑁂𑀦 𑀓𑀺𑀁 𑀯𑀺𑀪𑀸𑀯𑀺𑀢𑀦𑁆𑀢𑀺 𑀆𑀳 ‘‘𑀢𑀸𑀬 𑀘𑀸’’𑀢𑀺𑀆𑀤𑀺. 𑀅𑀥𑀺𑀕𑀫𑀩𑁆𑀬𑀢𑁆𑀢𑀺𑀲𑀺𑀤𑁆𑀥𑀻𑀢𑀺 𑀧𑀝𑀺𑀯𑁂𑀥𑀲𑀗𑁆𑀔𑀸𑀢𑁂 𑀅𑀥𑀺𑀕𑀫𑁂 𑀙𑁂𑀓𑀪𑀸𑀯𑀲𑀺𑀤𑁆𑀥𑀺. 𑀅𑀥𑀺𑀕𑀫𑁂𑀢𑀩𑁆𑀩𑀢𑁄 𑀳𑀺 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀢𑁄 𑀧𑀝𑀺𑀯𑁂𑀥𑁄 ‘‘𑀅𑀥𑀺𑀕𑀫𑁄’’𑀢𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑁄, 𑀆𑀕𑀫𑁄𑀢𑀺 𑀘 𑀧𑀭𑀺𑀬𑀢𑁆𑀢𑀺 𑀆𑀕𑀘𑁆𑀙𑀦𑁆𑀢𑀺 𑀅𑀢𑁆𑀢𑀢𑁆𑀣𑀧𑀭𑀢𑁆𑀣𑀸𑀤𑀬𑁄 𑀏𑀢𑁂𑀦, 𑀆𑀪𑀼𑀲𑁄 𑀯𑀸 𑀕𑀫𑀺𑀢𑀩𑁆𑀩𑁄 𑀜𑀸𑀢𑀩𑁆𑀩𑁄𑀢𑀺 𑀓𑀢𑁆𑀯𑀸.

𑀢𑁂𑀦 𑀓𑀺𑀫𑀦𑀼𑀪𑀸𑀯𑀺𑀢𑀦𑁆𑀢𑀺 𑀆𑀳 ‘‘𑀇𑀢𑀻’’𑀢𑀺𑀆𑀤𑀺. 𑀇𑀢𑀻𑀢𑀺 𑀏𑀯𑀁 𑀯𑀼𑀢𑁆𑀢𑀦𑀬𑁂𑀦, 𑀢𑀲𑁆𑀫𑀸 𑀲𑀺𑀤𑁆𑀥𑀢𑁆𑀢𑀸𑀢𑀺 𑀯𑀸 𑀓𑀸𑀭𑀡𑀦𑀺𑀤𑁆𑀤𑁂𑀲𑁄. 𑀯𑀘𑀦𑀦𑁆𑀢𑀺 𑀦𑀺𑀤𑀸𑀦𑀯𑀘𑀦𑀁 𑀮𑁄𑀓𑀢𑁄, 𑀥𑀫𑁆𑀫𑀢𑁄 𑀘 𑀲𑀺𑀤𑁆𑀥𑀸𑀬 𑀉𑀧𑀫𑀸𑀬 𑀢𑀫𑀢𑁆𑀣𑀁 𑀜𑀸𑀧𑁂𑀢𑀼𑀁 ‘‘𑀅𑀭𑀼𑀡𑀼𑀕𑁆𑀕𑀁 𑀯𑀺𑀬𑀸’’𑀢𑀺𑀆𑀤𑀺𑀫𑀸𑀳. ‘‘𑀉𑀧𑀫𑀸𑀬 𑀫𑀺𑀥𑁂𑀓𑀘𑁆𑀘𑁂, 𑀅𑀢𑁆𑀣𑀁 𑀚𑀸𑀦𑀦𑁆𑀢𑀺 𑀧𑀡𑁆𑀟𑀺𑀢𑀸’’𑀢𑀺 (𑀚𑀸. 𑁨.𑁧𑁯.𑁨𑁪) 𑀳𑀺 𑀯𑀼𑀢𑁆𑀢𑀁. 𑀅𑀭𑀼𑀡𑁄𑀢𑀺 𑀲𑀽𑀭𑀺𑀬𑀲𑁆𑀲 𑀉𑀤𑀬𑀢𑁄 𑀧𑀼𑀩𑁆𑀩𑀪𑀸𑀕𑁂 𑀉𑀝𑁆𑀞𑀺𑀢𑀭𑀁𑀲𑀺, 𑀢𑀲𑁆𑀲 𑀉𑀕𑁆𑀕𑀁 𑀉𑀕𑁆𑀕𑀫𑀦𑀁 𑀉𑀤𑀬𑀢𑁄 𑀉𑀤𑀬𑀦𑁆𑀢𑀲𑁆𑀲 𑀉𑀤𑀬𑀸𑀯𑀸𑀲𑀫𑀼𑀕𑁆𑀕𑀘𑁆𑀙𑀢𑁄 𑀲𑀽𑀭𑀺𑀬𑀲𑁆𑀲 𑀧𑀼𑀩𑁆𑀩𑀗𑁆𑀕𑀫𑀁 𑀧𑀼𑀭𑁂𑀘𑀭𑀁 𑀪𑀯𑀺𑀢𑀼𑀁 𑀅𑀭𑀳𑀢𑀺 𑀯𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀆𑀕𑀫𑀸𑀥𑀺𑀕𑀫𑀩𑁆𑀬𑀢𑁆𑀢𑀺𑀬𑀸 𑀈𑀤𑀺𑀲𑀲𑁆𑀲 𑀣𑁂𑀭𑀲𑁆𑀲 𑀯𑀼𑀢𑁆𑀢𑀦𑀺𑀤𑀸𑀦𑀯𑀘𑀦𑀁 𑀪𑀕𑀯𑀢𑁄 𑀯𑀘𑀦𑀲𑁆𑀲 𑀧𑀼𑀩𑁆𑀩𑀗𑁆𑀕𑀫𑀁 𑀪𑀯𑀺𑀢𑀼𑀫𑀭𑀳𑀢𑀺, 𑀦𑀺𑀤𑀸𑀦𑀪𑀸𑀯𑀁 𑀕𑀢𑀁 𑀳𑁄𑀢𑀻𑀢𑀺 𑀇𑀤𑀫𑀢𑁆𑀣𑀚𑀸𑀢𑀁 𑀅𑀦𑀼𑀪𑀸𑀯𑀺𑀢𑀦𑁆𑀢𑀺.

𑀇𑀤𑀸𑀦𑀺 𑀅𑀧𑀭𑀫𑁆𑀧𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀲𑁆𑀲 𑀅𑀲𑀫𑁆𑀫𑁄𑀳𑀸𑀲𑀫𑁆𑀫𑁄𑀲𑀲𑀗𑁆𑀔𑀸𑀢𑀲𑁆𑀲 𑀤𑀻𑀧𑁂𑀢𑀩𑁆𑀩𑀲𑁆𑀲𑀢𑁆𑀣𑀲𑁆𑀲 𑀤𑀻𑀧𑀓𑁂𑀳𑀺 𑀏𑀯𑀁-𑀲𑀤𑁆𑀤 𑀲𑀼𑀢-𑀲𑀤𑁆𑀤𑁂𑀳𑀺 𑀧𑀓𑀸𑀲𑁂𑀢𑀩𑁆𑀩𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 ‘‘𑀅𑀧𑀭𑁄 𑀦𑀬𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀳𑀺 ‘‘𑀦𑀸𑀦𑀧𑁆𑀧𑀓𑀸𑀭𑀧𑀝𑀺𑀯𑁂𑀥𑀤𑀻𑀧𑀓𑁂𑀦, 𑀲𑁄𑀢𑀩𑁆𑀩𑀧𑁆𑀧𑀪𑁂𑀤𑀧𑀝𑀺𑀯𑁂𑀥𑀤𑀻𑀧𑀓𑁂𑀦𑀸’’𑀢𑀺 𑀘 𑀇𑀫𑀺𑀦𑀸 𑀢𑁂𑀳𑀺 𑀲𑀤𑁆𑀤𑁂𑀳𑀺 𑀧𑀼𑀩𑁆𑀩𑁂 𑀤𑀻𑀧𑀺𑀢𑀁 𑀅𑀲𑀫𑁆𑀫𑁄𑀳𑀸𑀲𑀫𑁆𑀫𑁄𑀲𑀲𑀗𑁆𑀔𑀸𑀢𑀁 𑀤𑀻𑀧𑁂𑀢𑀩𑁆𑀩𑀢𑁆𑀣𑀫𑀸𑀳 𑀅𑀲𑀫𑁆𑀫𑁄𑀳𑁂𑀦 𑀦𑀸𑀦𑀧𑁆𑀧𑀓𑀸𑀭𑀧𑀝𑀺𑀯𑁂𑀥𑀲𑁆𑀲, 𑀅𑀲𑀫𑁆𑀫𑁄𑀲𑁂𑀦 𑀘 𑀲𑁄𑀢𑀩𑁆𑀩𑀧𑁆𑀧𑀪𑁂𑀤𑀧𑀝𑀺𑀯𑁂𑀥𑀲𑁆𑀲 𑀲𑀺𑀚𑁆𑀛𑀦𑀢𑁄. ‘‘𑀅𑀢𑁆𑀢𑀦𑁄’’𑀢𑀺𑀆𑀤𑀻𑀳𑀺 𑀧𑀦 𑀧𑀓𑀸𑀲𑁂𑀢𑀩𑁆𑀩𑀢𑁆𑀣𑀁. 𑀢𑁂𑀦 𑀯𑀼𑀢𑁆𑀢𑀁 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 ‘‘𑀦𑀸𑀦𑀧𑁆𑀧𑀓𑀸𑀭𑀧𑀝𑀺𑀯𑁂𑀥𑀤𑀻𑀧𑀓𑁂𑀦𑀸𑀢𑀺𑀆𑀤𑀺𑀦𑀸 𑀏𑀯𑀁-𑀲𑀤𑁆𑀤 𑀲𑀼𑀢-𑀲𑀤𑁆𑀤𑀸𑀦𑀁 𑀣𑁂𑀭𑀲𑁆𑀲 𑀅𑀢𑁆𑀣𑀩𑁆𑀬𑀜𑁆𑀚𑀦𑁂𑀲𑀼 𑀅𑀲𑀫𑁆𑀫𑁄𑀳𑀸𑀲𑀫𑁆𑀫𑁄𑀲𑀤𑀻𑀧𑀦𑀢𑁄 𑀘𑀢𑀼𑀧𑀝𑀺𑀲𑀫𑁆𑀪𑀺𑀤𑀸𑀯𑀲𑁂𑀦 𑀅𑀢𑁆𑀣𑀬𑁄𑀚𑀦𑀁 𑀤𑀲𑁆𑀲𑁂𑀢𑀻’’𑀢𑀺 (𑀤𑀻. 𑀦𑀺. 𑀝𑀻. 𑁧.𑁧). 𑀳𑁂𑀢𑀼𑀕𑀩𑁆𑀪𑀜𑁆𑀘𑁂𑀢𑀁 𑀧𑀤𑀤𑁆𑀯𑀬𑀁, 𑀦𑀸𑀦𑀧𑁆𑀧𑀓𑀸𑀭𑀧𑀝𑀺𑀯𑁂𑀥𑀲𑀗𑁆𑀔𑀸𑀢𑀲𑁆𑀲, 𑀲𑁄𑀢𑀩𑁆𑀩𑀧𑁆𑀧𑀪𑁂𑀤-𑀧𑀝𑀺𑀯𑁂𑀥𑀲𑀗𑁆𑀔𑀸𑀢𑀲𑁆𑀲 𑀘 𑀤𑀻𑀧𑁂𑀢𑀩𑁆𑀩𑀢𑁆𑀣𑀲𑁆𑀲 𑀤𑀻𑀧𑀓𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀦𑁆𑀢𑀲𑁆𑀲 𑀯𑀺𑀚𑁆𑀚𑀫𑀸𑀦𑀲𑁆𑀲 𑀪𑀸𑀯𑁄 𑀲𑀩𑁆𑀪𑀸𑀯𑁄, 𑀅𑀢𑁆𑀣𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀲𑀫𑁆𑀧𑀢𑁆𑀢𑀺𑀬𑀸 𑀲𑀩𑁆𑀪𑀸𑀯𑁄 𑀢𑀣𑀸. ‘‘𑀲𑀫𑁆𑀪𑀯’’𑀦𑁆𑀢𑀺𑀧𑀺 𑀧𑀸𑀞𑁄, 𑀲𑀫𑁆𑀪𑀯𑀦𑀁 𑀲𑀫𑁆𑀪𑀯𑁄, 𑀅𑀢𑁆𑀣𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀲𑀫𑁆𑀧𑀢𑁆𑀢𑀻𑀦𑀁 𑀲𑀫𑁆𑀪𑀯𑁄 𑀢𑀣𑀸. 𑀏𑀯𑀁 𑀇𑀢𑀭𑀢𑁆𑀣𑀸𑀧𑀺. ‘‘𑀲𑁄𑀢𑀩𑁆𑀩𑀧𑁆𑀧𑀪𑁂𑀤𑀧𑀝𑀺𑀯𑁂𑀥𑀤𑀻𑀧𑀓𑁂𑀦𑀸’’𑀢𑀺 𑀏𑀢𑁂𑀦 𑀧𑀦 𑀅𑀬𑀁 𑀲𑀼𑀢-𑀲𑀤𑁆𑀤𑁄 𑀏𑀯𑀁-𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑀢𑁄, 𑀯𑀓𑁆𑀔𑀫𑀸𑀦𑀸𑀧𑁂𑀓𑁆𑀔𑀸𑀬 𑀯𑀸 𑀲𑀸𑀫𑀜𑁆𑀜𑁂𑀦𑁂𑀯 𑀯𑀼𑀢𑁆𑀢𑁂𑀧𑀺 𑀲𑁄𑀢𑀩𑁆𑀩𑀥𑀫𑁆𑀫𑀯𑀺𑀲𑁂𑀲𑀁 𑀆𑀫𑀲𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀢𑁆𑀣 𑀘 𑀲𑁄𑀢𑀩𑁆𑀩𑀥𑀫𑁆𑀫𑀲𑀗𑁆𑀔𑀸𑀢𑀸𑀬 𑀧𑀸𑀴𑀺𑀬𑀸 𑀦𑀺𑀤𑀲𑁆𑀲𑁂𑀢𑀩𑁆𑀩𑀸𑀦𑀁 𑀪𑀸𑀲𑀺𑀢𑀢𑁆𑀣𑀧𑀬𑁄𑀚𑀦𑀢𑁆𑀣𑀸𑀦𑀁, 𑀢𑀻𑀲𑀼 𑀘 𑀜𑀸𑀡𑁂𑀲𑀼 𑀧𑀯𑀢𑁆𑀢𑀜𑀸𑀡𑀲𑁆𑀲 𑀦𑀸𑀦𑀧𑁆𑀧𑀓𑀸𑀭𑀪𑀸𑀯𑀢𑁄 𑀢𑀩𑁆𑀪𑀸𑀯𑀧𑀝𑀺𑀯𑁂𑀥𑀤𑀻𑀧𑀓𑁂𑀦 𑀏𑀯𑀁-𑀲𑀤𑁆𑀤𑁂𑀦 𑀅𑀢𑁆𑀣𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀲𑀫𑁆𑀧𑀢𑁆𑀢𑀺𑀲𑀩𑁆𑀪𑀸𑀯𑀤𑀻𑀧𑀦𑀁 𑀬𑀼𑀢𑁆𑀢𑀁, 𑀲𑁄𑀢𑀩𑁆𑀩𑀥𑀫𑁆𑀫𑀲𑁆𑀲 𑀧𑀦 𑀅𑀢𑁆𑀣𑀸𑀥𑀺𑀕𑀫𑀳𑁂𑀢𑀼𑀢𑁄, 𑀢𑀁𑀯𑀲𑁂𑀦 𑀘 𑀢𑀤𑀯𑀲𑁂𑀲𑀳𑁂𑀢𑀼𑀧𑁆𑀧𑀪𑁂𑀤𑀲𑁆𑀲 𑀕𑀳𑀺𑀢𑀢𑁆𑀢𑀸, 𑀦𑀺𑀭𑀼𑀢𑁆𑀢𑀺𑀪𑀸𑀯𑀢𑁄 𑀘 𑀲𑁄𑀢𑀩𑁆𑀩𑀧𑁆𑀧𑀪𑁂𑀤𑀤𑀻𑀧𑀓𑁂𑀦 𑀲𑀼𑀢-𑀲𑀤𑁆𑀤𑁂𑀦 𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀲𑀫𑁆𑀧𑀢𑁆𑀢𑀺𑀲𑀩𑁆𑀪𑀸𑀯𑀤𑀻𑀧𑀦𑀁 𑀬𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀤𑁂𑀯𑀢𑁆𑀣𑀜𑁆𑀳𑀺 𑀜𑀸𑀧𑁂𑀢𑀼𑀁 ‘‘𑀅𑀲𑀫𑁆𑀫𑁄𑀳𑀤𑀻𑀧𑀓𑁂𑀦, 𑀅𑀲𑀫𑁆𑀫𑁄𑀲𑀤𑀻𑀧𑀓𑁂𑀦𑀸’’𑀢𑀺 𑀘 𑀅𑀯𑀢𑁆𑀯𑀸 𑀢𑀣𑀸 𑀯𑀼𑀢𑁆𑀢𑀦𑁆𑀢𑀺.

𑀏𑀯𑀁 𑀅𑀲𑀫𑁆𑀫𑁄𑀳𑀸𑀲𑀫𑁆𑀫𑁄𑀲𑀲𑀗𑁆𑀔𑀸𑀢𑀲𑁆𑀲 𑀤𑀻𑀧𑁂𑀢𑀩𑁆𑀩𑀲𑁆𑀲𑀢𑁆𑀣𑀲𑁆𑀲 𑀤𑀻𑀧𑀓𑁂𑀳𑀺 𑀏𑀯𑀁-𑀲𑀤𑁆𑀤 𑀲𑀼𑀢-𑀲𑀤𑁆𑀤𑁂𑀳𑀺 𑀧𑀓𑀸𑀲𑁂𑀢𑀩𑁆𑀩𑀫𑀢𑁆𑀣𑀁 𑀧𑀓𑀸𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀯𑀺𑀓𑁆𑀔𑁂𑀧𑀲𑀗𑁆𑀔𑀸𑀢𑀲𑁆𑀲 𑀤𑀻𑀧𑁂𑀢𑀩𑁆𑀩𑀲𑁆𑀲𑀢𑁆𑀣𑀲𑁆𑀲 𑀤𑀻𑀧𑀓𑁂𑀳𑀺𑀧𑀺 𑀢𑁂𑀳𑀺 𑀧𑀓𑀸𑀲𑁂𑀢𑀩𑁆𑀩𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 ‘‘𑀏𑀯𑀦𑁆𑀢𑀺 𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀳𑀺 ‘‘𑀏𑀯𑀦𑁆𑀢𑀺…𑀧𑁂… 𑀪𑀸𑀲𑀫𑀸𑀦𑁄, 𑀲𑀼𑀢𑀦𑁆𑀢𑀺 𑀇𑀤𑀁…𑀧𑁂… 𑀪𑀸𑀲𑀫𑀸𑀦𑁄’’𑀢𑀺 𑀘 𑀇𑀫𑀺𑀦𑀸 𑀢𑁂𑀳𑀺 𑀲𑀤𑁆𑀤𑁂𑀳𑀺 𑀧𑀼𑀩𑁆𑀩𑁂 𑀤𑀻𑀧𑀺𑀢𑀁 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀯𑀺𑀓𑁆𑀔𑁂𑀧𑀲𑀗𑁆𑀔𑀸𑀢𑀁 𑀤𑀻𑀧𑁂𑀢𑀩𑁆𑀩𑀢𑁆𑀣𑀫𑀸𑀳, ‘‘𑀏𑀢𑁂 𑀫𑀬𑀸’’𑀢𑀺𑀆𑀤𑀻𑀳𑀺 𑀧𑀦 𑀧𑀓𑀸𑀲𑁂𑀢𑀩𑁆𑀩𑀢𑁆𑀣𑀁 𑀲𑀯𑀦𑀬𑁄𑀕𑀤𑀻𑀧𑀓𑀦𑁆𑀢𑀺 𑀘 𑀅𑀯𑀺𑀓𑁆𑀔𑁂𑀧𑀯𑀲𑁂𑀦 𑀲𑀯𑀦𑀬𑁄𑀕𑀲𑁆𑀲 𑀲𑀺𑀚𑁆𑀛𑀦𑀢𑁄 𑀢𑀤𑁂𑀯 𑀲𑀦𑁆𑀥𑀸𑀬𑀸𑀳. 𑀢𑀣𑀸 𑀳𑀺 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁 ‘‘𑀲𑀯𑀦𑀥𑀸𑀭𑀡𑀯𑀘𑀻𑀧𑀭𑀺𑀘𑀭𑀺𑀬𑀸 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀸𑀦𑀁 𑀯𑀺𑀲𑁂𑀲𑁂𑀦 𑀲𑁄𑀢𑀸𑀯𑀥𑀸𑀭𑀡𑀧𑀝𑀺𑀩𑀤𑁆𑀥𑀸𑀢𑀺 𑀢𑁂 𑀅𑀯𑀺𑀓𑁆𑀔𑁂𑀧𑀤𑀻𑀧𑀓𑁂𑀦 𑀲𑀼𑀢𑀲𑀤𑁆𑀤𑁂𑀦 𑀬𑁄𑀚𑁂𑀢𑁆𑀯𑀸’’𑀢𑀺 (𑀤𑀻. 𑀦𑀺. 𑀝𑀻. 𑁧.𑁧). 𑀫𑀦𑁄𑀤𑀺𑀝𑁆𑀞𑀻𑀳𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀸𑀦𑀁 𑀅𑀦𑀼𑀧𑁂𑀓𑁆𑀔𑀦𑀲𑀼𑀧𑁆𑀧𑀝𑀺𑀯𑁂𑀥𑀸 𑀯𑀺𑀲𑁂𑀲𑀢𑁄 𑀫𑀦𑀲𑀺𑀓𑀸𑀭𑀧𑀝𑀺𑀩𑀤𑁆𑀥𑀸, 𑀢𑀲𑁆𑀫𑀸 𑀢𑀤𑁆𑀤𑀻𑀧𑀓𑀯𑀘𑀦𑁂𑀦𑁂𑀯 𑀏𑀢𑁂 𑀫𑀬𑀸 𑀥𑀫𑁆𑀫𑀸 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸𑀢𑀺 𑀇𑀫𑀫𑀢𑁆𑀣𑀁 𑀧𑀓𑀸𑀲𑁂𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀏𑀯𑀦𑁆𑀢𑀺 𑀘…𑀧𑁂… 𑀤𑀻𑀧𑁂𑀢𑀻’’𑀢𑀺 𑀢𑀢𑁆𑀣 𑀥𑀫𑁆𑀫𑀸𑀢𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀸. 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸𑀢𑀺 ‘‘𑀇𑀥 𑀲𑀻𑀮𑀁 𑀓𑀣𑀺𑀢𑀁, 𑀇𑀥 𑀲𑀫𑀸𑀥𑀺, 𑀇𑀥 𑀧𑀜𑁆𑀜𑀸, 𑀏𑀢𑁆𑀢𑀓𑀸𑀯 𑀏𑀢𑁆𑀣 𑀅𑀦𑀼𑀲𑀦𑁆𑀥𑀬𑁄’’𑀢𑀺𑀆𑀤𑀺𑀪𑁂𑀤𑁂𑀦 𑀫𑀦𑀲𑀸 𑀅𑀦𑀼𑀧𑁂𑀓𑁆𑀔𑀺𑀢𑀸. 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸𑀢𑀺 𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀲𑀗𑁆𑀔𑀸𑀢𑀸𑀬, 𑀜𑀸𑀢𑀧𑀭𑀺𑀜𑁆𑀜𑀸𑀲𑀗𑁆𑀔𑀸𑀢𑀸𑀬 𑀯𑀸 𑀤𑀺𑀝𑁆𑀞𑀺𑀬𑀸 𑀢𑀢𑁆𑀣 𑀯𑀼𑀢𑁆𑀢𑀭𑀽𑀧𑀸𑀭𑀽𑀧𑀥𑀫𑁆𑀫𑁂 ‘‘𑀇𑀢𑀺 𑀭𑀽𑀧𑀁, 𑀏𑀢𑁆𑀢𑀓𑀁 𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 𑀲𑀼𑀝𑁆𑀞𑀼 𑀯𑀯𑀢𑁆𑀣𑀸𑀧𑁂𑀢𑁆𑀯𑀸 𑀧𑀝𑀺𑀯𑀺𑀤𑁆𑀥𑀸.

𑀲𑀯𑀦𑀥𑀸𑀭𑀡𑀯𑀘𑀻𑀧𑀭𑀺𑀘𑀭𑀺𑀬𑀸 𑀘 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀸𑀦𑀁 𑀯𑀺𑀲𑁂𑀲𑁂𑀦 𑀲𑁄𑀢𑀸𑀯𑀥𑀸𑀭𑀡𑀧𑀝𑀺𑀩𑀤𑁆𑀥𑀸, 𑀢𑀲𑁆𑀫𑀸 𑀢𑀤𑁆𑀤𑀻𑀧𑀓𑀯𑀘𑀦𑁂𑀦𑁂𑀯 𑀩𑀳𑀽 𑀫𑀬𑀸 𑀥𑀫𑁆𑀫𑀸 𑀲𑀼𑀢𑀸 𑀥𑀸𑀢𑀸 𑀯𑀘𑀲𑀸 𑀧𑀭𑀺𑀘𑀺𑀢𑀸𑀢𑀺 𑀇𑀫𑀫𑀢𑁆𑀣𑀁 𑀧𑀓𑀸𑀲𑁂𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀼𑀢𑀦𑁆𑀢𑀺 𑀇𑀤𑀁…𑀧𑁂… 𑀤𑀻𑀧𑁂𑀢𑀻’’𑀢𑀺. 𑀢𑀢𑁆𑀣 𑀲𑀼𑀢𑀸𑀢𑀺 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦 𑀯𑀺𑀜𑁆𑀜𑀸𑀢𑀸. 𑀥𑀸𑀢𑀸𑀢𑀺 𑀲𑀼𑀯𑀡𑁆𑀡𑀪𑀸𑀚𑀦𑁂 𑀧𑀓𑁆𑀔𑀺𑀢𑁆𑀢𑀲𑀻𑀳𑀯𑀲𑀸 𑀯𑀺𑀬 𑀫𑀦𑀲𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑀸𑀥𑀦𑁂𑀦 𑀉𑀧𑀥𑀸𑀭𑀺𑀢𑀸. 𑀯𑀘𑀲𑀸 𑀧𑀭𑀺𑀘𑀺𑀢𑀸𑀢𑀺 𑀧𑀕𑀼𑀡𑀢𑀸𑀲𑀫𑁆𑀧𑀸𑀤𑀦𑁂𑀦 𑀯𑀸𑀘𑀸𑀬 𑀧𑀭𑀺𑀘𑀺𑀢𑀸 𑀲𑀚𑁆𑀛𑀸𑀬𑀺𑀢𑀸. 𑀇𑀤𑀸𑀦𑀺 𑀧𑀓𑀸𑀲𑁂𑀢𑀩𑁆𑀩𑀢𑁆𑀣𑀤𑁆𑀯𑀬𑀤𑀻𑀧𑀓𑁂𑀦 𑀬𑀣𑀸𑀯𑀼𑀢𑁆𑀢𑀲𑀤𑁆𑀤𑀤𑁆𑀯𑀬𑁂𑀦 𑀯𑀺𑀪𑀸𑀯𑁂𑀢𑀩𑁆𑀩𑀫𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀢𑀤𑀼𑀪𑀬𑁂𑀦𑀧𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀤𑀼𑀪𑀬𑁂𑀦𑀸𑀢𑀺 𑀧𑀼𑀭𑀺𑀫𑀦𑀬𑁂, 𑀧𑀘𑁆𑀙𑀺𑀫𑀦𑀬𑁂 𑀘 𑀬𑀣𑀸𑀯𑀼𑀢𑁆𑀢𑀲𑁆𑀲 𑀧𑀓𑀸𑀲𑁂𑀢𑀩𑁆𑀩𑀲𑁆𑀲𑀢𑁆𑀣𑀲𑁆𑀲 𑀧𑀓𑀸𑀲𑀓𑁂𑀦 𑀢𑁂𑀦 𑀤𑀼𑀩𑁆𑀩𑀺𑀥𑁂𑀦 𑀲𑀤𑁆𑀤𑁂𑀦. 𑀅𑀢𑁆𑀣𑀩𑁆𑀬𑀜𑁆𑀚𑀦𑀧𑀸𑀭𑀺𑀧𑀽𑀭𑀺𑀁 𑀤𑀻𑀧𑁂𑀦𑁆𑀢𑁄𑀢𑀺 𑀆𑀤𑀭𑀚𑀦𑀦𑀲𑁆𑀲 𑀓𑀸𑀭𑀡𑀯𑀘𑀦𑀁. 𑀢𑀤𑁂𑀯 𑀓𑀸𑀭𑀡𑀁 𑀩𑁆𑀬𑀢𑀺𑀭𑁂𑀓𑁂𑀦 𑀯𑀺𑀯𑀭𑀢𑀺, 𑀬𑀼𑀢𑁆𑀢𑀺𑀬𑀸 𑀯𑀸 𑀤𑀴𑁆𑀳𑀁 𑀓𑀭𑁄𑀢𑀺 ‘‘𑀅𑀢𑁆𑀣𑀩𑁆𑀬𑀜𑁆𑀚𑀦𑀧𑀭𑀺𑀧𑀼𑀡𑁆𑀡𑀜𑁆𑀳𑀻’’𑀢𑀺𑀆𑀤𑀺𑀦𑀸. 𑀅𑀲𑀼𑀡𑀦𑁆𑀢𑁄𑀢𑀺 𑀘𑁂𑀢𑁆𑀣 𑀮𑀓𑁆𑀔𑀡𑁂, 𑀳𑁂𑀢𑀼𑀫𑁆𑀳𑀺 𑀯𑀸 𑀅𑀦𑁆𑀢-𑀲𑀤𑁆𑀤𑁄. 𑀫𑀳𑀢𑀸 𑀳𑀺𑀢𑀸𑀢𑀺 𑀫𑀳𑀦𑁆𑀢𑀢𑁄 𑀳𑀺𑀢𑀲𑁆𑀫𑀸. 𑀧𑀭𑀺𑀩𑀸𑀳𑀺𑀭𑁄𑀢𑀺 𑀲𑀩𑁆𑀩𑀢𑁄 𑀪𑀸𑀕𑁂𑀦 𑀩𑀸𑀳𑀺𑀭𑁄.

𑀏𑀢𑁂𑀦 𑀧𑀦 𑀯𑀺𑀪𑀸𑀯𑁂𑀢𑀩𑁆𑀩𑀢𑁆𑀣𑀤𑀻𑀧𑀓𑁂𑀦 𑀲𑀤𑁆𑀤𑀤𑁆𑀯𑀬𑁂𑀦 𑀅𑀦𑀼𑀪𑀸𑀯𑁂𑀢𑀩𑁆𑀩𑀢𑁆𑀣𑀫𑀦𑀼𑀪𑀸𑀯𑁂𑀦𑁆𑀢𑁄 ‘‘𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀇𑀫𑀺𑀦𑀸’’𑀢𑀺𑀆𑀤𑀺𑀫𑀸𑀳. 𑀧𑀼𑀩𑁆𑀩𑁂 𑀯𑀺𑀲𑀼𑀁 𑀯𑀺𑀲𑀼𑀁 𑀅𑀢𑁆𑀣𑁂 𑀬𑁄𑀚𑀺𑀢𑀸𑀬𑁂𑀯 𑀏𑀢𑁂 𑀲𑀤𑁆𑀤𑀸 𑀇𑀥 𑀏𑀓𑀲𑁆𑀲𑁂𑀯𑀸𑀦𑀼𑀪𑀸𑀯𑀢𑁆𑀣𑀲𑁆𑀲 𑀅𑀦𑀼𑀪𑀸𑀯𑀓𑀪𑀸𑀯𑁂𑀦 𑀕𑀳𑀺𑀢𑀸𑀢𑀺 𑀜𑀸𑀧𑁂𑀢𑀼𑀁 ‘‘𑀲𑀓𑀮𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀓𑀸𑀫𑀜𑁆𑀘 𑀫𑁂-𑀲𑀤𑁆𑀤𑁄 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀧𑀼𑀩𑁆𑀩𑁂𑀦 𑀬𑁄𑀚𑀺𑀢𑁄, 𑀢𑀤𑀧𑁂𑀓𑁆𑀔𑀸𑀦𑀁 𑀧𑀦 𑀏𑀯𑀁-𑀲𑀤𑁆𑀤 𑀲𑀼𑀢-𑀲𑀤𑁆𑀤𑀸𑀦𑀁 𑀲𑀳𑀘𑀭𑀡𑀢𑁄, 𑀅𑀯𑀺𑀦𑀸𑀪𑀸𑀯𑀢𑁄 𑀘 𑀢𑀣𑀸 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀦𑁆𑀢𑀺 𑀢𑀣𑀸𑀕𑀢𑁂𑀦 𑀧𑀓𑀸𑀭𑀢𑁄 𑀯𑀺𑀤𑀺𑀢𑀁, 𑀪𑀸𑀲𑀺𑀢𑀁 𑀯𑀸. 𑀅𑀢𑁆𑀢𑀦𑁄 𑀅𑀤𑀳𑀦𑁆𑀢𑁄𑀢𑀺 𑀅𑀢𑁆𑀢𑀦𑀺 ‘‘𑀫𑀫𑁂𑀤’’𑀦𑁆𑀢𑀺 𑀅𑀝𑁆𑀞𑀧𑁂𑀦𑁆𑀢𑁄. 𑀪𑀼𑀫𑁆𑀫𑀢𑁆𑀣𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁. 𑀅𑀲𑀧𑁆𑀧𑀼𑀭𑀺𑀲𑀪𑀽𑀫𑀺𑀦𑁆𑀢𑀺 𑀅𑀲𑀧𑁆𑀧𑀼𑀭𑀺𑀲𑀯𑀺𑀲𑀬𑀁, 𑀲𑁄 𑀘 𑀅𑀢𑁆𑀣𑀢𑁄 𑀅𑀧𑀓𑀢𑀜𑁆𑀜𑀼𑀢𑀸𑀲𑀗𑁆𑀔𑀸𑀢𑀸 ‘‘𑀇𑀥𑁂𑀓𑀘𑁆𑀘𑁄 𑀧𑀸𑀧𑀪𑀺𑀓𑁆𑀔𑀼 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀁 𑀥𑀫𑁆𑀫𑀯𑀺𑀦𑀬𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸 𑀅𑀢𑁆𑀢𑀦𑁄 𑀤𑀳𑀢𑀻’’𑀢𑀺 (𑀧𑀸𑀭𑀸. 𑁧𑁯𑁫) 𑀏𑀯𑀁 𑀫𑀳𑀸𑀘𑁄𑀭𑀤𑀻𑀧𑀓𑁂𑀦 𑀪𑀕𑀯𑀢𑀸 𑀯𑀼𑀢𑁆𑀢𑀸 𑀅𑀦𑀭𑀺𑀬𑀯𑁄𑀳𑀸𑀭𑀸𑀯𑀢𑁆𑀣𑀸, 𑀢𑀣𑀸 𑀘𑀸𑀳 ‘‘𑀢𑀣𑀸𑀕𑀢…𑀧𑁂… 𑀅𑀤𑀳𑀦𑁆𑀢𑁄’’𑀢𑀺. 𑀳𑀼𑀢𑁆𑀯𑀸𑀢𑀺 𑀘𑁂𑀢𑁆𑀣 𑀲𑁂𑀲𑁄. 𑀢𑀣𑀸 𑀲𑀸𑀯𑀓𑀢𑁆𑀢𑀁 𑀧𑀝𑀺𑀚𑀸𑀦𑀦𑁆𑀢𑁄𑀢𑀺 𑀲𑀧𑁆𑀧𑀼𑀭𑀺𑀲𑀪𑀽𑀫𑀺𑀑𑀓𑁆𑀓𑀫𑀦𑀲𑀭𑀽𑀧𑀓𑀣𑀦𑀁. 𑀦𑀦𑀼 𑀘 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 ‘‘𑀫𑀫𑁂𑀢𑀁 𑀯𑀘𑀦’’𑀦𑁆𑀢𑀺 𑀅𑀥𑀺𑀫𑀸𑀦𑀲𑁆𑀲, 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀸𑀤𑀻𑀦𑀜𑁆𑀘 𑀢𑀤𑀸𑀲𑀗𑁆𑀓𑀸𑀬 𑀅𑀪𑀸𑀯𑀢𑁄 𑀅𑀲𑀧𑁆𑀧𑀼𑀭𑀺𑀲𑀪𑀽𑀫𑀺𑀲𑀫𑀢𑀺𑀓𑁆𑀓𑀫𑀸𑀤𑀺𑀯𑀘𑀦𑀁 𑀦𑀺𑀭𑀢𑁆𑀣𑀓𑀁 𑀲𑀺𑀬𑀸𑀢𑀺? 𑀦𑀬𑀺𑀤𑀫𑁂𑀯𑀁 ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺 𑀯𑀤𑀦𑁆𑀢𑁂𑀦 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀅𑀦𑀼𑀪𑀸𑀯𑀺𑀢𑁄𑀢𑀺 𑀅𑀢𑁆𑀣𑀲𑁆𑀲𑁂𑀯 𑀤𑀲𑁆𑀲𑀦𑀢𑁄. 𑀢𑁂𑀦 𑀳𑀺 𑀅𑀦𑀼𑀪𑀸𑀯𑁂𑀢𑀩𑁆𑀩𑀫𑀢𑁆𑀣𑀁𑀬𑁂𑀯 𑀢𑀣𑀸 𑀤𑀲𑁆𑀲𑁂𑀢𑀺, 𑀦 𑀧𑀦 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀅𑀥𑀺𑀫𑀸𑀦𑀲𑁆𑀲, 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀸𑀤𑀻𑀦𑀜𑁆𑀘 𑀢𑀤𑀸𑀲𑀗𑁆𑀓𑀸𑀬 𑀲𑀫𑁆𑀪𑀯𑀦𑁆𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁. 𑀓𑁂𑀘𑀺 𑀧𑀦 ‘‘𑀤𑁂𑀯𑀢𑀸𑀦𑀁 𑀧𑀭𑀺𑀯𑀺𑀢𑀓𑁆𑀓𑀸𑀧𑁂𑀓𑁆𑀔𑀁 𑀢𑀣𑀸𑀯𑀘𑀦𑀁, 𑀢𑀲𑁆𑀫𑀸 𑀏𑀤𑀺𑀲𑀻 𑀘𑁄𑀤𑀦𑀸 𑀅𑀦𑀯𑀓𑀸𑀲𑀸’’𑀢𑀺 𑀯𑀤𑀦𑁆𑀢𑀺. 𑀢𑀲𑁆𑀫𑀺𑀁 𑀓𑀺𑀭 𑀲𑀫𑀬𑁂 𑀏𑀓𑀘𑁆𑀘𑀸𑀦𑀁 𑀤𑁂𑀯𑀢𑀸𑀦𑀁 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 ‘‘𑀪𑀕𑀯𑀸 𑀘 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀅𑀬𑀜𑁆𑀘𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀤𑁂𑀲𑀦𑀸𑀓𑀼𑀲𑀮𑁄, 𑀇𑀤𑀸𑀦𑀺 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀲𑀓𑁆𑀬𑀓𑀼𑀮𑀧𑁆𑀧𑀲𑀼𑀢𑁄 𑀢𑀣𑀸𑀕𑀢𑀲𑁆𑀲 𑀪𑀸𑀢𑀸, 𑀘𑀽𑀴𑀧𑀺𑀢𑀼𑀧𑀼𑀢𑁆𑀢𑁄 𑀘, 𑀓𑀺𑀁 𑀦𑀼 𑀔𑁄 𑀲𑁄 𑀲𑀬𑀁 𑀲𑀘𑁆𑀙𑀺𑀓𑀢𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀉𑀤𑀸𑀳𑀼 𑀪𑀕𑀯𑀢𑁄𑀬𑁂𑀯 𑀯𑀘𑀦𑀁 𑀬𑀣𑀸𑀲𑀼𑀢’’𑀦𑁆𑀢𑀺, 𑀢𑁂𑀲𑀫𑁂𑀯 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀢𑀤𑀪𑀺𑀧𑀭𑀺𑀳𑀭𑀡𑀢𑁆𑀣𑀁 𑀅𑀲𑀧𑁆𑀧𑀼𑀭𑀺𑀲𑀪𑀽𑀫𑀺𑀲𑀫𑀢𑀺𑀓𑁆𑀓𑀫𑀦𑀸𑀤𑀺𑀅𑀢𑁆𑀣𑁄 𑀅𑀦𑀼𑀪𑀸𑀯𑀺𑀢𑁄𑀢𑀺. 𑀲𑀸𑀬𑁂𑀯 𑀬𑀣𑀸𑀯𑀼𑀢𑁆𑀢𑀸 𑀅𑀦𑀭𑀺𑀬𑀯𑁄𑀳𑀸𑀭𑀸𑀯𑀢𑁆𑀣𑀸 𑀅𑀲𑀤𑁆𑀥𑀫𑁆𑀫𑁄, 𑀢𑀤𑀯𑀢𑁆𑀣𑀸𑀦𑁄𑀓𑁆𑀓𑀫𑀦𑀲𑀗𑁆𑀔𑀸𑀢𑀸 𑀘 𑀲𑀸𑀯𑀓𑀢𑁆𑀢𑀧𑀝𑀺𑀚𑀸𑀦𑀦𑀸 𑀲𑀤𑁆𑀥𑀫𑁆𑀫𑁄. 𑀏𑀯𑀁 𑀲𑀢𑀺 𑀧𑀭𑀺𑀬𑀸𑀬𑀦𑁆𑀢𑀭𑁂𑀦 𑀧𑀼𑀭𑀺𑀫𑀢𑁆𑀣𑀫𑁂𑀯 𑀤𑀲𑁆𑀲𑁂𑀢𑀻𑀢𑀺 𑀕𑀳𑁂𑀢𑀩𑁆𑀩𑀁. 𑀅𑀧𑀺𑀘 𑀓𑀼𑀳𑀦𑀮𑀧𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑁄 𑀅𑀓𑀼𑀲𑀮𑀭𑀸𑀲𑀺 𑀅𑀲𑀤𑁆𑀥𑀫𑁆𑀫𑁄, 𑀢𑀩𑁆𑀩𑀺𑀭𑀳𑀺𑀢𑀪𑀸𑀯𑁄 𑀘 𑀲𑀤𑁆𑀥𑀫𑁆𑀫𑁄.‘‘𑀓𑁂𑀯𑀮’’𑀦𑁆𑀢𑀺𑀆𑀤𑀺𑀦𑀸𑀧𑀺 𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀧𑀭𑀺𑀬𑀸𑀬𑀦𑁆𑀢𑀭𑁂𑀦 𑀤𑀲𑁆𑀲𑀦𑀁, 𑀬𑀣𑀸𑀯𑀼𑀢𑁆𑀢𑀸𑀬 𑀅𑀦𑀭𑀺𑀬𑀯𑁄𑀳𑀸𑀭𑀸𑀯𑀢𑁆𑀣𑀸𑀬 𑀧𑀭𑀺𑀫𑁄𑀘𑁂𑀢𑀺. 𑀲𑀸𑀯𑀓𑀢𑁆𑀢𑀁 𑀧𑀝𑀺𑀚𑀸𑀦𑀦𑁂𑀦 𑀲𑀢𑁆𑀣𑀸𑀭𑀁 𑀅𑀧𑀤𑀺𑀲𑀢𑀻𑀢𑀺 𑀅𑀢𑁆𑀣𑁄. 𑀅𑀧𑀺𑀘 𑀲𑀢𑁆𑀣𑀼𑀓𑀧𑁆𑀧𑀸𑀤𑀺𑀓𑀺𑀭𑀺𑀬𑀢𑁄 𑀅𑀢𑁆𑀢𑀸𑀦𑀁 𑀧𑀭𑀺𑀫𑁄𑀘𑁂𑀢𑀺 𑀢𑀓𑁆𑀓𑀺𑀭𑀺𑀬𑀸𑀲𑀗𑁆𑀓𑀸𑀬 𑀲𑀫𑁆𑀪𑀯𑀢𑁄. ‘‘𑀲𑀢𑁆𑀣𑀼 𑀪𑀕𑀯𑀢𑁄𑀬𑁂𑀯 𑀯𑀘𑀦𑀁 𑀫𑀬𑀸𑀲𑀼𑀢’’𑀦𑁆𑀢𑀺 𑀲𑀢𑁆𑀣𑀸𑀭𑀁 𑀅𑀧𑀤𑀺𑀲𑀢𑀻𑀢𑀺 𑀅𑀢𑁆𑀣𑀦𑁆𑀢𑀭𑀫𑀦𑀼𑀪𑀸𑀯𑀦𑀁 𑀳𑁄𑀢𑀺. ‘‘𑀚𑀺𑀦𑀯𑀘𑀦’’𑀦𑁆𑀢𑀺𑀆𑀤𑀺𑀧𑀺 𑀧𑀭𑀺𑀬𑀸𑀬𑀦𑁆𑀢𑀭𑀤𑀲𑁆𑀲𑀦𑀁, 𑀅𑀢𑁆𑀣𑀦𑁆𑀢𑀭𑀫𑀦𑀼𑀪𑀸𑀯𑀦𑀫𑁂𑀯 𑀯𑀸. 𑀅𑀧𑁆𑀧𑁂𑀢𑀻𑀢𑀺 𑀦𑀺𑀤𑀲𑁆𑀲𑁂𑀢𑀺. 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑁂𑀲𑀼 𑀬𑀣𑀸𑀭𑀳𑀁 𑀲𑀢𑁆𑀢𑁂 𑀦𑁂𑀢𑀻𑀢𑀺 𑀦𑁂𑀢𑁆𑀢𑀺, 𑀥𑀫𑁆𑀫𑁄𑀬𑁂𑀯 𑀦𑁂𑀢𑁆𑀢𑀺 𑀢𑀣𑀸. 𑀯𑀼𑀢𑁆𑀢𑀦𑀬𑁂𑀦 𑀘𑁂𑀢𑁆𑀣 𑀉𑀪𑀬𑀣𑀸 𑀅𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀧𑀭𑀫𑁆𑀧𑀺 𑀅𑀦𑀼𑀪𑀸𑀯𑁂𑀢𑀩𑁆𑀩𑀫𑀢𑁆𑀣𑀫𑀦𑀼𑀪𑀸𑀯𑁂𑀢𑀺 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀦𑀸. 𑀢𑀢𑁆𑀣 𑀉𑀧𑁆𑀧𑀸𑀤𑀺𑀢𑀪𑀸𑀯𑀢𑀦𑁆𑀢𑀺 𑀤𑁂𑀲𑀦𑀸𑀯𑀲𑁂𑀦 𑀧𑀯𑀢𑁆𑀢𑀺𑀢𑀪𑀸𑀯𑀁. 𑀧𑀼𑀭𑀺𑀫𑀯𑀘𑀦𑀁 𑀯𑀺𑀯𑀭𑀦𑁆𑀢𑁄𑀢𑀺 𑀪𑀕𑀯𑀢𑀸 𑀤𑁂𑀲𑀺𑀢𑀯𑀲𑁂𑀦 𑀧𑀼𑀭𑀺𑀫𑀢𑀭𑀁 𑀲𑀁𑀯𑀺𑀚𑁆𑀚𑀫𑀸𑀦𑀁 𑀪𑀕𑀯𑀢𑀸 𑀯𑀘𑀦𑀫𑁂𑀯 𑀉𑀢𑁆𑀢𑀸𑀦𑀺𑀁 𑀓𑀭𑁄𑀦𑁆𑀢𑁄, 𑀇𑀤𑀁 𑀯𑀘𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀘𑀢𑀽𑀳𑀺 𑀯𑁂𑀲𑀸𑀭𑀚𑁆𑀚𑀜𑀸𑀡𑁂𑀳𑀺 𑀯𑀺𑀲𑀸𑀭𑀤𑀲𑁆𑀲, 𑀯𑀺𑀲𑀸𑀭𑀤𑀳𑁂𑀢𑀼𑀪𑀽𑀢𑀘𑀢𑀼𑀯𑁂𑀲𑀸𑀭𑀚𑁆𑀚𑀜𑀸𑀡𑀲𑀫𑁆𑀧𑀦𑁆𑀦𑀲𑁆𑀲 𑀯𑀸. 𑀤𑀲𑀜𑀸𑀡𑀩𑀮𑀥𑀭𑀲𑁆𑀲. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀪𑀸𑀯𑀲𑀗𑁆𑀔𑀸𑀢𑁂 𑀉𑀢𑁆𑀢𑀫𑀝𑁆𑀞𑀸𑀦𑁂 𑀞𑀺𑀢𑀲𑁆𑀲, 𑀉𑀲𑀪𑀲𑁆𑀲 𑀇𑀤𑀦𑁆𑀢𑀺 𑀯𑀸 𑀅𑀢𑁆𑀣𑁂𑀦 𑀆𑀲𑀪𑀲𑀗𑁆𑀔𑀸𑀢𑁂 𑀅𑀓𑀫𑁆𑀧𑀦𑀲𑀪𑀸𑀯𑀪𑀽𑀢𑁂 𑀞𑀸𑀦𑁂 𑀞𑀺𑀢𑀲𑁆𑀲. ‘‘𑀏𑀯𑀫𑁂𑀯 𑀔𑁄 𑀪𑀺𑀓𑁆𑀔𑀯𑁂, 𑀬𑀤𑀸 𑀢𑀣𑀸𑀕𑀢𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺…𑀧𑁂… 𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀻’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁪.𑁩𑁩) 𑀲𑀻𑀳𑁄𑀧𑀫𑀲𑀼𑀢𑁆𑀢𑀸𑀤𑀻𑀲𑀼 𑀆𑀕𑀢𑁂𑀦 𑀅𑀦𑁂𑀓𑀦𑀬𑁂𑀦 𑀲𑀻𑀳𑀦𑀸𑀤𑀦𑀤𑀺𑀦𑁄. 𑀲𑀩𑁆𑀩𑀲𑀢𑁆𑀢𑁂𑀲𑀼, 𑀲𑀩𑁆𑀩𑀲𑀢𑁆𑀢𑀸𑀦𑀁 𑀯𑀸 𑀉𑀢𑁆𑀢𑀫𑀲𑁆𑀲. 𑀦 𑀘𑁂𑀢𑁆𑀣 𑀦𑀺𑀤𑁆𑀥𑀸𑀭𑀡𑀮𑀓𑁆𑀔𑀡𑀸𑀪𑀸𑀯𑀢𑁄 𑀦𑀺𑀤𑁆𑀥𑀸𑀭𑀡𑀯𑀲𑁂𑀦 𑀲𑀫𑀸𑀲𑁄. 𑀲𑀩𑁆𑀩𑀢𑁆𑀣 𑀳𑀺 𑀲𑀓𑁆𑀓𑀢𑀕𑀦𑁆𑀣𑁂𑀲𑀼, 𑀲𑀸𑀲𑀦𑀕𑀦𑁆𑀣𑁂𑀲𑀼 𑀘 𑀏𑀯𑀫𑁂𑀯 𑀯𑀼𑀢𑁆𑀢𑀁. 𑀥𑀫𑁆𑀫𑁂𑀦 𑀲𑀢𑁆𑀢𑀸𑀦𑀫𑀺𑀲𑁆𑀲𑀭𑀲𑁆𑀲. 𑀥𑀫𑁆𑀫𑀲𑁆𑀲𑁂𑀯 𑀇𑀲𑁆𑀲𑀭𑀲𑁆𑀲 𑀢𑀤𑀼𑀧𑁆𑀧𑀸𑀤𑀦𑀯𑀲𑁂𑀦𑀸𑀢𑀺𑀧𑀺 𑀯𑀤𑀦𑁆𑀢𑀺. 𑀲𑁂𑀲𑀧𑀤𑀤𑁆𑀯𑀬𑀁 𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀧𑀭𑀺𑀬𑀸𑀬𑀦𑁆𑀢𑀭𑀤𑀻𑀧𑀦𑀁. 𑀥𑀫𑁆𑀫𑁂𑀦 𑀮𑁄𑀓𑀲𑁆𑀲 𑀧𑀤𑀻𑀧𑀫𑀺𑀯 𑀪𑀽𑀢𑀲𑁆𑀲, 𑀢𑀤𑀼𑀧𑁆𑀧𑀸𑀤𑀓𑀪𑀸𑀯𑁂𑀦 𑀯𑀸 𑀥𑀫𑁆𑀫𑀲𑀗𑁆𑀔𑀸𑀢𑀧𑀤𑀻𑀧𑀲𑀫𑁆𑀧𑀦𑁆𑀦𑀲𑁆𑀲. ‘‘𑀥𑀫𑁆𑀫𑀓𑀸𑀬𑁄𑀢𑀺 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 (𑀤𑀻. 𑀦𑀺. 𑁩.𑁧𑁧𑁮) 𑀳𑀺 𑀯𑀼𑀢𑁆𑀢𑀁. 𑀥𑀫𑁆𑀫𑁂𑀦 𑀮𑁄𑀓𑀧𑀝𑀺𑀲𑀭𑀡𑀪𑀽𑀢𑀲𑁆𑀲, 𑀥𑀫𑁆𑀫𑀲𑀗𑁆𑀔𑀸𑀢𑁂𑀦 𑀯𑀸 𑀧𑀝𑀺𑀲𑀭𑀡𑁂𑀦 𑀲𑀫𑁆𑀧𑀦𑁆𑀦𑀲𑁆𑀲. ‘‘𑀬𑀁𑀦𑀽𑀦𑀸𑀳𑀁…𑀧𑁂… 𑀢𑀫𑁂𑀯 𑀥𑀫𑁆𑀫𑀁 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀫𑀸𑀦𑁂𑀢𑁆𑀯𑀸 𑀧𑀽𑀚𑁂𑀢𑁆𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺 (𑀅. 𑀦𑀺. 𑁪.𑁨𑁧; 𑀲𑀁. 𑀦𑀺. 𑁧.𑁧𑁭𑁩) 𑀳𑀺 𑀯𑀼𑀢𑁆𑀢𑀁. 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀺𑀲𑀤𑁆𑀥𑀫𑁆𑀫𑀲𑀗𑁆𑀔𑀸𑀢𑀲𑁆𑀲 𑀯𑀭𑀘𑀓𑁆𑀓𑀲𑁆𑀲 𑀧𑀯𑀢𑁆𑀢𑀺𑀦𑁄, 𑀲𑀤𑁆𑀥𑀫𑁆𑀫𑀸𑀦𑀫𑁂𑀢𑀲𑁆𑀲 𑀯𑀸 𑀆𑀡𑀸𑀘𑀓𑁆𑀓𑀯𑀭𑀲𑁆𑀲 𑀧𑀯𑀢𑁆𑀢𑀺𑀦𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑀲𑁆𑀲 𑀪𑀕𑀯𑀢𑁄 𑀇𑀤𑀁 𑀯𑀘𑀦𑀁 𑀲𑀫𑁆𑀫𑀼𑀔𑀸𑀯 𑀫𑀬𑀸 𑀧𑀝𑀺𑀕𑁆𑀕𑀳𑀺𑀢𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀩𑁆𑀬𑀜𑁆𑀚𑀦𑁂𑀢𑀺 𑀧𑀤𑀲𑀫𑀼𑀤𑀸𑀬𑀪𑀽𑀢𑁂 𑀯𑀸𑀓𑁆𑀬𑁂. 𑀓𑀗𑁆𑀔𑀸 𑀯𑀸 𑀯𑀺𑀫𑀢𑀺 𑀯𑀸𑀢𑀺 𑀏𑀢𑁆𑀣 𑀤𑀴𑁆𑀳𑀢𑀭𑀁 𑀦𑀺𑀯𑀺𑀝𑁆𑀞𑀸 𑀯𑀺𑀘𑀺𑀓𑀺𑀘𑁆𑀙𑀸 𑀓𑀗𑁆𑀔𑀸. 𑀦𑀸𑀢𑀺𑀲𑀁𑀲𑀧𑁆𑀧𑀦𑀁 𑀫𑀢𑀺𑀪𑁂𑀤𑀫𑀢𑁆𑀢𑀁 𑀯𑀺𑀫𑀢𑀺. 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀫𑀺𑀤𑀁 𑀫𑀬𑀸𑀢𑀺 𑀢𑀣𑀸 𑀅𑀓𑀢𑁆𑀢𑀩𑁆𑀩𑀪𑀸𑀯𑀓𑀸𑀭𑀡𑀯𑀘𑀦𑀁. 𑀅𑀢𑁆𑀢𑀦𑀸𑀉𑀧𑁆𑀧𑀸𑀤𑀺𑀢𑀪𑀸𑀯𑀁 𑀅𑀧𑁆𑀧𑀝𑀺𑀚𑀸𑀦𑀦𑁆𑀢𑁄 𑀧𑀼𑀭𑀺𑀫𑀯𑀘𑀦𑀁 𑀯𑀺𑀯𑀭𑀦𑁆𑀢𑁄𑀢𑀺 𑀧𑀦 𑀅𑀲𑁆𑀲𑀤𑁆𑀥𑀺𑀬𑀯𑀺𑀦𑀸𑀲𑀦𑀲𑁆𑀲, 𑀲𑀤𑁆𑀥𑀸𑀲𑀫𑁆𑀧𑀤𑀫𑀼𑀧𑁆𑀧𑀸𑀤𑀦𑀲𑁆𑀲 𑀘 𑀓𑀸𑀭𑀡𑀯𑀘𑀦𑀁. ‘‘𑀢𑁂𑀦𑁂𑀢’’𑀦𑁆𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀉𑀤𑀸𑀦𑀯𑀲𑁂𑀦 𑀤𑀲𑁆𑀲𑁂𑀢𑀺.

‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺 𑀏𑀯𑀁 𑀯𑀤𑀦𑁆𑀢𑁄 𑀕𑁄𑀢𑀫𑀕𑁄𑀢𑁆𑀢𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀸𑀯𑀓𑁄, 𑀕𑁄𑀢𑀫𑀕𑁄𑀢𑁆𑀢𑀲𑀫𑁆𑀩𑀦𑁆𑀥𑁄 𑀯𑀸 𑀲𑀸𑀯𑀓𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑀸 𑀪𑀸𑀲𑀺𑀢𑀪𑀸𑀯𑀲𑁆𑀲, 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀪𑀸𑀯𑀲𑁆𑀲 𑀘 𑀲𑀽𑀘𑀦𑀢𑁄, 𑀢𑀣𑀸𑀲𑀽𑀘𑀦𑁂𑀦𑁂𑀯 𑀘 𑀔𑀮𑀺𑀢𑀤𑀼𑀦𑁆𑀦𑀺𑀭𑀼𑀢𑁆𑀢𑀸𑀤𑀺𑀕𑀳𑀡𑀤𑁄𑀲𑀸𑀪𑀸𑀯𑀲𑁆𑀲 𑀲𑀺𑀚𑁆𑀛𑀦𑀢𑁄 𑀲𑀸𑀲𑀦𑁂 𑀅𑀲𑁆𑀲𑀤𑁆𑀥𑀁 𑀯𑀺𑀦𑀸𑀲𑀬𑀢𑀺, 𑀲𑀤𑁆𑀥𑀁 𑀯𑀟𑁆𑀠𑁂𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀧𑀜𑁆𑀘𑀫𑀸𑀤𑀬𑁄 𑀢𑀺𑀲𑁆𑀲𑁄 𑀅𑀢𑁆𑀣𑀬𑁄𑀚𑀦𑀸 𑀆𑀓𑀸𑀭𑀸𑀤𑀺𑀅𑀢𑁆𑀣𑁂𑀲𑀼 𑀅𑀕𑁆𑀕𑀳𑀺𑀢𑀯𑀺𑀲𑁂𑀲𑀫𑁂𑀯 𑀏𑀯𑀁-𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀤𑀲𑁆𑀲𑀺𑀢𑀸, 𑀢𑀢𑁄 𑀧𑀭𑀸 𑀢𑀺𑀲𑁆𑀲𑁄 𑀆𑀓𑀸𑀭𑀢𑁆𑀣𑀫𑁂𑀯 𑀏𑀯𑀁-𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀯𑀺𑀪𑀸𑀯𑀺𑀢𑀸, 𑀧𑀘𑁆𑀙𑀺𑀫𑀸 𑀧𑀦 𑀢𑀺𑀲𑁆𑀲𑁄 𑀬𑀣𑀸𑀓𑁆𑀓𑀫𑀁 𑀆𑀓𑀸𑀭𑀢𑁆𑀣𑀁, 𑀦𑀺𑀤𑀲𑁆𑀲𑀦𑀢𑁆𑀣𑀁, 𑀅𑀯𑀥𑀸𑀭𑀡𑀢𑁆𑀣𑀜𑁆𑀘 𑀏𑀯𑀁-𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀬𑁄𑀚𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀳𑁄𑀦𑁆𑀢𑀺 𑀘𑁂𑀢𑁆𑀣 𑁋

‘‘𑀤𑀲𑁆𑀲𑀦𑀁 𑀤𑀻𑀧𑀦𑀜𑁆𑀘𑀸𑀧𑀺, 𑀧𑀓𑀸𑀲𑀦𑀁 𑀯𑀺𑀪𑀸𑀯𑀦𑀁;

𑀅𑀦𑀼𑀪𑀸𑀯𑀦𑀫𑀺𑀘𑁆𑀘𑀢𑁆𑀣𑁄, 𑀓𑀺𑀭𑀺𑀬𑀸𑀬𑁄𑀕𑁂𑀦 𑀧𑀜𑁆𑀘𑀥𑀸.

𑀤𑀲𑁆𑀲𑀺𑀢𑁄 𑀧𑀭𑀫𑁆𑀧𑀭𑀸𑀬, 𑀲𑀺𑀤𑁆𑀥𑁄 𑀦𑁂𑀓𑀢𑁆𑀣𑀯𑀼𑀢𑁆𑀢𑀺𑀬𑀸;

𑀏𑀯𑀁 𑀫𑁂 𑀲𑀼𑀢𑀫𑀺𑀘𑁆𑀘𑁂𑀢𑁆𑀣, 𑀧𑀤𑀢𑁆𑀢𑀬𑁂 𑀦𑀬𑀜𑁆𑀜𑀼𑀦𑀸’’𑀢𑀺.

𑀏𑀓-𑀲𑀤𑁆𑀤𑁄 𑀧𑀦 𑀅𑀜𑁆𑀜𑀲𑁂𑀝𑁆𑀞𑀸𑀲𑀳𑀸𑀬𑀲𑀗𑁆𑀔𑁆𑀬𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑁂𑀲 ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜𑀦𑁆𑀢𑀺 𑀇𑀢𑁆𑀣𑁂𑀓𑁂 𑀅𑀪𑀺𑀯𑀤𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁨𑁭) 𑀅𑀜𑁆𑀜𑀢𑁆𑀣𑁂 𑀤𑀺𑀲𑁆𑀲𑀢𑀺, ‘‘𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁨𑁮; 𑀧𑀸𑀭𑀸. 𑁧𑁧) 𑀲𑁂𑀝𑁆𑀞𑁂, ‘‘𑀏𑀓𑁄𑀯𑀽𑀧𑀓𑀝𑁆𑀞𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁪𑁦𑁫; 𑀤𑀻. 𑀦𑀺. 𑁨.𑁨𑁧𑁫; 𑀫. 𑀦𑀺. 𑁧.𑁮𑁦; 𑀲𑀁. 𑀦𑀺. 𑁩.𑁬𑁩; 𑀯𑀺𑀪. 𑁪.𑁪𑁪𑁫) 𑀅𑀲𑀳𑀸𑀬𑁂, ‘‘𑀏𑀓𑁄𑀯 𑀔𑁄 𑀪𑀺𑀓𑁆𑀔𑀯𑁂, 𑀔𑀡𑁄 𑀘 𑀲𑀫𑀬𑁄 𑀘 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀸𑀬𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁮.𑁨𑁯) 𑀲𑀗𑁆𑀔𑁆𑀬𑀸𑀬𑀁, 𑀇𑀥𑀸𑀧𑀺 𑀲𑀗𑁆𑀔𑁆𑀬𑀸𑀬𑀫𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀓𑀦𑁆𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑀦𑀺𑀤𑁆𑀤𑁂𑀲𑁄’’𑀢𑀺 (𑀇𑀢𑀺𑀯𑀼. 𑀅𑀝𑁆𑀞. 𑁧; 𑀤𑀻. 𑀦𑀺. 𑀝𑀻. 𑁧.𑀧𑀭𑀺𑀩𑁆𑀩𑀸𑀚𑀓𑀓𑀣𑀸𑀯𑀡𑁆𑀡𑀦𑀸) 𑀏𑀓𑁄𑀬𑁂𑀯𑁂𑀲 𑀲𑀫𑀬𑁄, 𑀦 𑀤𑁆𑀯𑁂 𑀯𑀸 𑀢𑀬𑁄 𑀯𑀸𑀢𑀺 𑀊𑀦𑀸𑀥𑀺𑀓𑀸𑀪𑀸𑀯𑁂𑀦 𑀕𑀡𑀦𑀲𑁆𑀲 𑀧𑀭𑀺𑀘𑁆𑀙𑁂𑀤𑀦𑀺𑀤𑁆𑀤𑁂𑀲𑁄 𑀏𑀓𑀦𑁆𑀢𑀺 𑀅𑀬𑀁 𑀲𑀤𑁆𑀤𑁄𑀢𑀺 𑀅𑀢𑁆𑀣𑁄, 𑀢𑁂𑀦 𑀓𑀲𑁆𑀲 𑀧𑀭𑀺𑀘𑁆𑀙𑀺𑀦𑁆𑀤𑀦𑀦𑁆𑀢𑀺 𑀅𑀦𑀼𑀬𑁄𑀕𑁂 𑀲𑀢𑀺 ‘‘𑀲𑀫𑀬’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀫𑀬𑀦𑁆𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀦𑀺𑀤𑁆𑀤𑁂𑀲𑁄’’𑀢𑀺. 𑀏𑀯𑀁 𑀧𑀭𑀺𑀘𑁆𑀙𑁂𑀤𑀧𑀭𑀺𑀘𑁆𑀙𑀺𑀦𑁆𑀦𑀯𑀲𑁂𑀦 𑀯𑀼𑀢𑁆𑀢𑁂𑀧𑀺 ‘‘𑀅𑀬𑀁 𑀦𑀸𑀫 𑀲𑀫𑀬𑁄’’𑀢𑀺 𑀲𑀭𑀽𑀧𑀢𑁄 𑀅𑀦𑀺𑀬𑀫𑀺𑀢𑀢𑁆𑀢𑀸 𑀅𑀦𑀺𑀬𑀫𑀺𑀢𑀯𑀘𑀦𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀺 ‘‘𑀏𑀓𑀁…𑀧𑁂…. 𑀤𑀻𑀧𑀦’’𑀦𑁆𑀢𑀺 𑀇𑀫𑀺𑀦𑀸.

𑀇𑀤𑀸𑀦𑀺 𑀲𑀫𑀬𑀲𑀤𑁆𑀤𑀲𑁆𑀲 𑀅𑀦𑁂𑀓𑀢𑁆𑀣𑀯𑀼𑀢𑁆𑀢𑀺𑀢𑀁 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀤𑀲𑁆𑀲𑁂𑀢𑁆𑀯𑀸 𑀇𑀥𑀸𑀥𑀺𑀧𑁆𑀧𑁂𑀢𑀫𑀢𑁆𑀣𑀁 𑀦𑀺𑀬𑀫𑁂𑀦𑁆𑀢𑁄 ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 ‘‘𑀏𑀓𑀁 𑀲𑀫𑀬’’𑀦𑁆𑀢𑀺 𑀧𑀤𑀤𑁆𑀯𑀬𑁂, 𑀲𑀫𑀪𑀺𑀦𑀺𑀯𑀺𑀝𑁆𑀞𑁄 𑀲𑀫𑀬 𑀲𑀤𑁆𑀤𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀦 𑀧𑀦 𑀤𑀺𑀲𑁆𑀲𑀢𑀻𑀢𑀺 𑀢𑁂𑀲𑁆𑀯𑁂𑀓𑀲𑁆𑀫𑀺𑀁𑀬𑁂𑀯 𑀅𑀢𑁆𑀣𑁂 𑀇𑀥 𑀧𑀯𑀢𑁆𑀢𑀦𑀢𑁄. 𑀲𑀫𑀯𑀸𑀬𑁂𑀢𑀺 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀬𑀁, 𑀓𑀸𑀭𑀡𑀲𑀫𑀯𑀸𑀬𑁂𑀢𑀺 𑀅𑀢𑁆𑀣𑁄. 𑀔𑀡𑁂𑀢𑀺 𑀑𑀓𑀸𑀲𑁂. 𑀳𑁂𑀢𑀼𑀤𑀺𑀝𑁆𑀞𑀻𑀲𑀽𑀢𑀺 𑀳𑁂𑀢𑀼𑀫𑁆𑀳𑀺 𑀘𑁂𑀯 𑀮𑀤𑁆𑀥𑀺𑀬𑀜𑁆𑀘. 𑀅𑀲𑁆𑀲𑀸𑀢𑀺 𑀲𑀫𑀬𑀲𑀤𑁆𑀤𑀲𑁆𑀲. 𑀓𑀸𑀮𑀜𑁆𑀘 𑀲𑀫𑀬𑀜𑁆𑀘 𑀉𑀧𑀸𑀤𑀸𑀬𑀸𑀢𑀺 𑀏𑀢𑁆𑀣 𑀓𑀸𑀮𑁄 𑀦𑀸𑀫 𑀉𑀧𑀲𑀗𑁆𑀓𑀫𑀦𑀲𑁆𑀲 𑀬𑀼𑀢𑁆𑀢𑀓𑀸𑀮𑁄. 𑀲𑀫𑀬𑁄 𑀦𑀸𑀫 𑀢𑀲𑁆𑀲𑁂𑀯 𑀧𑀘𑁆𑀘𑀬𑀲𑀸𑀫𑀕𑁆𑀕𑀻, 𑀅𑀢𑁆𑀣𑀢𑁄 𑀧𑀦 𑀢𑀤𑀦𑀼𑀭𑀽𑀧𑀲𑀭𑀻𑀭𑀩𑀮𑀜𑁆𑀘𑁂𑀯 𑀢𑀧𑁆𑀧𑀘𑁆𑀘𑀬𑀧𑀭𑀺𑀲𑁆𑀲𑀬𑀸𑀪𑀸𑀯𑁄 𑀘. 𑀉𑀧𑀸𑀤𑀸𑀦𑀁 𑀦𑀸𑀫 𑀜𑀸𑀡𑁂𑀦 𑀢𑁂𑀲𑀁 𑀕𑀳𑀡𑀁, 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀁 𑀓𑀸𑀮𑀜𑁆𑀘 𑀲𑀫𑀬𑀜𑁆𑀘 𑀧𑀜𑁆𑀜𑀸𑀬 𑀕𑀳𑁂𑀢𑁆𑀯𑀸 𑀉𑀧𑀥𑀸𑀭𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀘𑁂 𑀅𑀫𑁆𑀳𑀸𑀓𑀁 𑀲𑁆𑀯𑁂 𑀕𑀫𑀦𑀲𑁆𑀲 𑀬𑀼𑀢𑁆𑀢𑀓𑀸𑀮𑁄 𑀪𑀯𑀺𑀲𑁆𑀲𑀢𑀺, 𑀓𑀸𑀬𑁂 𑀩𑀮𑀫𑀢𑁆𑀢𑀸 𑀘 𑀨𑀭𑀺𑀲𑁆𑀲𑀢𑀺, 𑀕𑀫𑀦𑀧𑀘𑁆𑀘𑀬𑀸 𑀘 𑀅𑀜𑁆𑀜𑁄 𑀅𑀨𑀸𑀲𑀼𑀯𑀺𑀳𑀸𑀭𑁄 𑀦 𑀪𑀯𑀺𑀲𑁆𑀲𑀢𑀺, 𑀅𑀣𑁂𑀢𑀁 𑀓𑀸𑀮𑀜𑁆𑀘 𑀕𑀫𑀦𑀓𑀸𑀭𑀡𑀲𑀫𑀯𑀸𑀬𑀲𑀗𑁆𑀔𑀸𑀢𑀁 𑀲𑀫𑀬𑀜𑁆𑀘 𑀉𑀧𑀥𑀸𑀭𑁂𑀢𑁆𑀯𑀸 𑀅𑀧𑁆𑀧𑁂𑀯 𑀦𑀸𑀫 𑀲𑁆𑀯𑁂𑀧𑀺 𑀆𑀕𑀘𑁆𑀙𑁂𑀬𑁆𑀬𑀸𑀫𑀸𑀢𑀺. 𑀔𑀡𑁄𑀢𑀺 𑀑𑀓𑀸𑀲𑁄. 𑀢𑀣𑀸𑀕𑀢𑀼𑀧𑁆𑀧𑀸𑀤𑀸𑀤𑀺𑀓𑁄 𑀳𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀑𑀓𑀸𑀲𑁄 𑀢𑀧𑁆𑀧𑀘𑁆𑀘𑀬𑀧𑀝𑀺𑀮𑀸𑀪𑀳𑁂𑀢𑀼𑀢𑁆𑀢𑀸. 𑀔𑀡𑁄 𑀏𑀯 𑀘 𑀲𑀫𑀬𑁄. 𑀬𑁄 ‘‘𑀔𑀡𑁄’’𑀢𑀺 𑀘 ‘‘𑀲𑀫𑀬𑁄’’𑀢𑀺 𑀘 𑀯𑀼𑀘𑁆𑀘𑀢𑀺, 𑀲𑁄 𑀏𑀓𑁄𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑀺𑀬𑀟𑁆𑀠𑁄 𑀫𑀸𑀲𑁄 𑀲𑁂𑀲𑁄 𑀕𑀺𑀫𑁆𑀳𑀸𑀦𑀁 𑀉𑀡𑁆𑀳𑀲𑀫𑀬𑁄. 𑀯𑀲𑁆𑀲𑀸𑀦𑀲𑁆𑀲 𑀧𑀞𑀫𑁄 𑀫𑀸𑀲𑁄 𑀧𑀭𑀺𑀴𑀸𑀳𑀲𑀫𑀬𑁄. 𑀫𑀳𑀸𑀲𑀫𑀬𑁄𑀢𑀺 𑀫𑀳𑀸𑀲𑀫𑀽𑀳𑁄. 𑀲𑀫𑀸𑀲𑁄 𑀯𑀸 𑀏𑀲, 𑀩𑁆𑀬𑀸𑀲𑁄 𑀯𑀸. 𑀧𑀯𑀼𑀝𑁆𑀞𑀁 𑀯𑀦𑀁 𑀧𑀯𑀦𑀁, 𑀢𑀲𑁆𑀫𑀺𑀁, 𑀓𑀧𑀺𑀮𑀯𑀢𑁆𑀣𑀼𑀲𑀸𑀫𑀦𑁆𑀢𑁂 𑀫𑀳𑀸𑀯𑀦𑀲𑀗𑁆𑀔𑀸𑀢𑁂 𑀯𑀦𑀲𑀡𑁆𑀟𑁂𑀢𑀺 𑀅𑀢𑁆𑀣𑁄. 𑀲𑀫𑀬𑁄𑀧𑀺 𑀔𑁄𑀢𑀺 𑀏𑀢𑁆𑀣 𑀲𑀫𑀬𑁄𑀢𑀺 𑀲𑀺𑀓𑁆𑀔𑀸𑀧𑀤𑀧𑀽𑀭𑀡𑀲𑁆𑀲 𑀳𑁂𑀢𑀼. 𑀪𑀤𑁆𑀤𑀸𑀮𑀻𑀢𑀺 𑀢𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀦𑀸𑀫𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀢𑀬𑀸 𑀪𑀤𑁆𑀤𑀸𑀮𑀺 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀬𑀼𑀢𑁆𑀢𑀓𑀁 𑀏𑀓𑀁 𑀓𑀸𑀭𑀡𑀁 𑀅𑀢𑁆𑀣𑀺, 𑀢𑀫𑁆𑀧𑀺 𑀢𑁂 𑀦 𑀧𑀝𑀺𑀯𑀺𑀤𑁆𑀥𑀁 𑀦 𑀲𑀮𑁆𑀮𑀓𑁆𑀔𑀺𑀢𑀦𑁆𑀢𑀺. 𑀓𑀺𑀁 𑀢𑀁 𑀓𑀸𑀭𑀡𑀦𑁆𑀢𑀺 𑀆𑀳 ‘‘𑀪𑀕𑀯𑀸𑀧𑀺 𑀔𑁄’’𑀢𑀺𑀆𑀤𑀺.

‘‘𑀉𑀕𑁆𑀕𑀳𑀫𑀸𑀦𑁄’’𑀢𑀺𑀆𑀤𑀻𑀲𑀼 𑀫𑀸𑀦𑁄𑀢𑀺 𑀢𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀧𑀓𑀢𑀺𑀦𑀸𑀫𑀁, 𑀓𑀺𑀜𑁆𑀘𑀺 𑀓𑀺𑀜𑁆𑀘𑀺 𑀧𑀦 𑀲𑀺𑀧𑁆𑀧𑀁 𑀉𑀕𑁆𑀕𑀳𑁂𑀢𑀼𑀁 𑀲𑀫𑀢𑁆𑀣𑀢𑀸𑀬 ‘‘𑀉𑀕𑁆𑀕𑀳𑀫𑀸𑀦𑁄’’𑀢𑀺 𑀦𑀁 𑀲𑀜𑁆𑀚𑀸𑀦𑀦𑁆𑀢𑀺, 𑀢𑀲𑁆𑀫𑀸 ‘‘𑀉𑀕𑁆𑀕𑀳𑀫𑀸𑀦𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑀫𑀡𑀫𑀼𑀡𑁆𑀟𑀺𑀓𑀲𑁆𑀲 𑀧𑀼𑀢𑁆𑀢𑁄 𑀲𑀫𑀡𑀫𑀼𑀡𑁆𑀟𑀺𑀓𑀸𑀧𑀼𑀢𑁆𑀢𑁄. 𑀲𑁄 𑀓𑀺𑀭 𑀤𑁂𑀯𑀤𑀢𑁆𑀢𑀲𑁆𑀲 𑀉𑀧𑀝𑁆𑀞𑀸𑀓𑁄. 𑀲𑀫𑀬𑀁 𑀤𑀺𑀝𑁆𑀞𑀺𑀁 𑀧𑀓𑀸𑀭𑁂𑀦 𑀯𑀤𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀫𑀬𑀧𑁆𑀧𑀯𑀸𑀤𑀓𑁄, 𑀢𑀲𑁆𑀫𑀺𑀁, 𑀤𑀺𑀝𑁆𑀞𑀺𑀧𑁆𑀧𑀯𑀸𑀤𑀓𑁂𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀺𑀁 𑀓𑀺𑀭 𑀞𑀸𑀦𑁂 𑀘𑀗𑁆𑀓𑀻𑀢𑀸𑀭𑀼𑀓𑁆𑀔𑀧𑁄𑀓𑁆𑀔𑀭𑀲𑀸𑀢𑀺𑀧𑁆𑀧𑀪𑀽𑀢𑀬𑁄 𑀩𑁆𑀭𑀸𑀳𑁆𑀫𑀡𑀸, 𑀦𑀺𑀕𑀡𑁆𑀞𑀸𑀘𑁂𑀮𑀓𑀧𑀭𑀺𑀩𑁆𑀩𑀸𑀚𑀓𑀸𑀤𑀬𑁄 𑀘 𑀧𑀩𑁆𑀩𑀚𑀺𑀢𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀫𑀬𑀁 𑀧𑀓𑀸𑀭𑁂𑀦 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀤𑀻𑀧𑁂𑀦𑁆𑀢𑀺, 𑀢𑀲𑁆𑀫𑀸 𑀲𑁄 𑀆𑀭𑀸𑀫𑁄 ‘‘𑀲𑀫𑀬𑀧𑁆𑀧𑀯𑀸𑀤𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑁆𑀯𑁂𑀯 𑀢𑀺𑀦𑁆𑀤𑀼𑀓𑀸𑀘𑀻𑀭𑀲𑀗𑁆𑀔𑀸𑀢𑀸𑀬 𑀢𑀺𑀫𑁆𑀩𑀭𑀽𑀲𑀓𑀭𑀼𑀓𑁆𑀔𑀧𑀦𑁆𑀢𑀺𑀬𑀸 𑀧𑀭𑀺𑀓𑁆𑀔𑀺𑀢𑁆𑀢𑀢𑁆𑀢𑀸 ‘‘𑀢𑀺𑀦𑁆𑀤𑀼𑀓𑀸𑀘𑀻𑀭𑁄’’𑀢𑀺 𑀯𑀼𑀘𑁆𑀘𑀢𑀺. 𑀏𑀓𑀸 𑀲𑀸𑀮𑀸 𑀏𑀢𑁆𑀣𑀸𑀢𑀺 𑀏𑀓𑀲𑀸𑀮𑀓𑁄. 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀧𑀞𑀫𑀁 𑀏𑀓𑀸 𑀲𑀸𑀮𑀸 𑀅𑀳𑁄𑀲𑀺, 𑀧𑀘𑁆𑀙𑀸 𑀧𑀦 𑀫𑀳𑀸𑀧𑀼𑀜𑁆𑀜𑀁 𑀧𑁄𑀝𑁆𑀞𑀧𑀸𑀤𑀧𑀭𑀺𑀩𑁆𑀩𑀸𑀚𑀓𑀁 𑀦𑀺𑀲𑁆𑀲𑀸𑀬 𑀩𑀳𑀽 𑀲𑀸𑀮𑀸 𑀓𑀢𑀸, 𑀢𑀲𑁆𑀫𑀸 𑀢𑀫𑁂𑀯 𑀧𑀞𑀫𑀁 𑀓𑀢𑀁 𑀏𑀓𑀁 𑀲𑀸𑀮𑀁 𑀉𑀧𑀸𑀤𑀸𑀬 𑀮𑀤𑁆𑀥𑀧𑀼𑀩𑁆𑀩𑀦𑀸𑀫𑀯𑀲𑁂𑀦 ‘‘𑀏𑀓𑀲𑀸𑀮𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀫𑀮𑁆𑀮𑀺𑀓𑀸𑀬 𑀦𑀸𑀫 𑀧𑀲𑁂𑀦𑀤𑀺𑀭𑀜𑁆𑀜𑁄 𑀤𑁂𑀯𑀺𑀬𑀸 𑀉𑀬𑁆𑀬𑀸𑀦𑀪𑀽𑀢𑁄 𑀲𑁄 𑀧𑀼𑀧𑁆𑀨𑀨𑀮𑀲𑀘𑁆𑀙𑀦𑁆𑀦𑁄 𑀆𑀭𑀸𑀫𑁄, 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑀮𑁆𑀮𑀺𑀓𑀸𑀬 𑀆𑀭𑀸𑀫𑁂’’𑀢𑀺. 𑀧𑀝𑀺𑀯𑀲𑀢𑀻𑀢𑀺 𑀢𑀲𑁆𑀫𑀺𑀁 𑀨𑀸𑀲𑀼𑀢𑀸𑀬 𑀯𑀲𑀢𑀺.

𑀤𑀺𑀝𑁆𑀞𑁂 𑀥𑀫𑁆𑀫𑁂𑀢𑀺 𑀧𑀘𑁆𑀘𑀓𑁆𑀔𑁂 𑀅𑀢𑁆𑀢𑀪𑀸𑀯𑁂. 𑀅𑀢𑁆𑀣𑁄𑀢𑀺 𑀯𑀼𑀟𑁆𑀠𑀺. 𑀓𑀫𑁆𑀫𑀓𑀺𑀮𑁂𑀲𑀯𑀲𑁂𑀦 𑀲𑀫𑁆𑀧𑀭𑁂𑀢𑀩𑁆𑀩𑀢𑁄 𑀲𑀫𑁆𑀫𑀸 𑀧𑀸𑀧𑀼𑀡𑀺𑀢𑀩𑁆𑀩𑀢𑁄 𑀲𑀫𑁆𑀧𑀭𑀸𑀬𑁄, 𑀧𑀭𑀮𑁄𑀓𑁄, 𑀢𑀢𑁆𑀣 𑀦𑀺𑀬𑀼𑀢𑁆𑀢𑁄 𑀲𑀫𑁆𑀧𑀭𑀸𑀬𑀺𑀓𑁄, 𑀧𑀭𑀮𑁄𑀓𑀢𑁆𑀣𑁄. 𑀅𑀢𑁆𑀣𑀸𑀪𑀺𑀲𑀫𑀬𑀸𑀢𑀺 𑀬𑀣𑀸𑀯𑀼𑀢𑁆𑀢𑀉𑀪𑀬𑀢𑁆𑀣𑀲𑀗𑁆𑀔𑀸𑀢𑀳𑀺𑀢𑀧𑀝𑀺𑀮𑀸𑀪𑀸. 𑀲𑀫𑁆𑀧𑀭𑀸𑀬𑀺𑀓𑁄𑀧𑀺 𑀳𑀺 𑀅𑀢𑁆𑀣𑁄 𑀓𑀸𑀭𑀡𑀲𑁆𑀲 𑀦𑀺𑀧𑁆𑀨𑀦𑁆𑀦𑀢𑁆𑀢𑀸 𑀧𑀝𑀺𑀮𑀤𑁆𑀥𑁄 𑀦𑀸𑀫 𑀳𑁄𑀢𑀻𑀢𑀺 𑀢𑀁 𑀅𑀢𑁆𑀣𑀤𑁆𑀯𑀬𑀫𑁂𑀓𑀢𑁄 𑀓𑀢𑁆𑀯𑀸 ‘‘𑀅𑀢𑁆𑀣𑀸𑀪𑀺𑀲𑀫𑀬𑀸’’𑀢𑀺 𑀯𑀼𑀢𑁆𑀢𑀁. 𑀥𑀺𑀬𑀸 𑀧𑀜𑁆𑀜𑀸𑀬 𑀢𑀁𑀢𑀤𑀢𑁆𑀣𑁂 𑀭𑀸𑀢𑀺 𑀕𑀡𑁆𑀳𑀸𑀢𑀺, 𑀥𑀻 𑀯𑀸 𑀧𑀜𑁆𑀜𑀸 𑀏𑀢𑀲𑁆𑀲𑀢𑁆𑀣𑀻𑀢𑀺 𑀥𑀻𑀭𑁄. 𑀧𑀡𑁆𑀟𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸. 𑀲𑀸 𑀳𑀺 𑀲𑀼𑀔𑀼𑀫𑁂𑀲𑀼𑀧𑀺 𑀅𑀢𑁆𑀣𑁂𑀲𑀼 𑀧𑀟𑀢𑀺 𑀕𑀘𑁆𑀙𑀢𑀺, 𑀤𑀼𑀓𑁆𑀔𑀸𑀤𑀻𑀦𑀁 𑀯𑀸 𑀧𑀻𑀴𑀦𑀸𑀤𑀺𑀆𑀓𑀸𑀭𑀁 𑀚𑀸𑀦𑀸𑀢𑀻𑀢𑀺 𑀧𑀡𑁆𑀟𑀸. 𑀢𑀸𑀬 𑀇𑀢𑁄 𑀕𑀢𑁄𑀢𑀺 𑀧𑀡𑁆𑀟𑀺𑀢𑁄. 𑀅𑀣 𑀯𑀸 𑀇𑀢𑀸 𑀲𑀜𑁆𑀚𑀸𑀢𑀸 𑀧𑀡𑁆𑀟𑀸 𑀏𑀢𑀲𑁆𑀲, 𑀧𑀟𑀢𑀺 𑀯𑀸 𑀜𑀸𑀡𑀕𑀢𑀺𑀬𑀸 𑀕𑀘𑁆𑀙𑀢𑀻𑀢𑀺 𑀧𑀡𑁆𑀟𑀺𑀢𑁄. 𑀲𑀫𑁆𑀫𑀸 𑀫𑀸𑀦𑀸𑀪𑀺𑀲𑀫𑀬𑀸𑀢𑀺 𑀫𑀸𑀦𑀲𑁆𑀲 𑀲𑀫𑁆𑀫𑀸 𑀧𑀳𑀸𑀦𑁂𑀦. 𑀲𑀫𑁆𑀫𑀸𑀢𑀺 𑀘𑁂𑀢𑁆𑀣 𑀅𑀕𑁆𑀕𑀫𑀕𑁆𑀕𑀜𑀸𑀡𑁂𑀦 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀁 𑀯𑀼𑀢𑁆𑀢𑀁. 𑀅𑀦𑁆𑀢𑀦𑁆𑀢𑀺 𑀅𑀯𑀲𑀸𑀦𑀁. 𑀧𑀻𑀴𑀦𑀁 𑀢𑀁𑀲𑀫𑀗𑁆𑀕𑀺𑀦𑁄 𑀳𑀺𑀁𑀲𑀦𑀁 𑀅𑀯𑀺𑀧𑁆𑀨𑀸𑀭𑀺𑀢𑀸𑀓𑀭𑀡𑀁. 𑀢𑀤𑁂𑀯 𑀅𑀢𑁆𑀣𑁄 𑀢𑀣𑀸 𑀢𑁆𑀣-𑀓𑀸𑀭𑀲𑁆𑀲 𑀝𑁆𑀞-𑀓𑀸𑀭𑀁 𑀓𑀢𑁆𑀯𑀸. 𑀲𑀫𑁂𑀘𑁆𑀘 𑀧𑀘𑁆𑀘𑀬𑁂𑀳𑀺 𑀓𑀢𑀪𑀸𑀯𑁄 𑀲𑀗𑁆𑀔𑀢𑀝𑁆𑀞𑁄. 𑀤𑀼𑀓𑁆𑀔𑀤𑀼𑀓𑁆𑀔𑀢𑀸𑀤𑀺𑀯𑀲𑁂𑀦 𑀲𑀦𑁆𑀢𑀸𑀧𑀦𑀁 𑀧𑀭𑀺𑀤𑀳𑀦𑀁 𑀲𑀦𑁆𑀢𑀸𑀧𑀝𑁆𑀞𑁄. 𑀚𑀭𑀸𑀬, 𑀫𑀭𑀡𑁂𑀦 𑀘𑀸𑀢𑀺 𑀤𑁆𑀯𑀺𑀥𑀸 𑀯𑀺𑀧𑀭𑀺𑀡𑀸𑀫𑁂𑀢𑀩𑁆𑀩𑁄 𑀯𑀺𑀧𑀭𑀺𑀡𑀸𑀫𑀝𑁆𑀞𑁄. 𑀅𑀪𑀺𑀲𑀫𑁂𑀢𑀩𑁆𑀩𑁄 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑁄 𑀅𑀪𑀺𑀲𑀫𑀬𑀝𑁆𑀞𑁄, 𑀧𑀻𑀴𑀦𑀸𑀤𑀻𑀦𑀺𑀬𑁂𑀯. 𑀢𑀸𑀦𑀺 𑀳𑀺 𑀅𑀪𑀺𑀲𑀫𑁂𑀢𑀩𑁆𑀩𑀪𑀸𑀯𑁂𑀦 𑀏𑀓𑀻𑀪𑀸𑀯𑀫𑀼𑀧𑀦𑁂𑀢𑁆𑀯𑀸 ‘‘𑀅𑀪𑀺𑀲𑀫𑀬𑀝𑁆𑀞𑁄’’𑀢𑀺 𑀯𑀼𑀢𑁆𑀢𑀸𑀦𑀺. 𑀅𑀪𑀺𑀲𑀫𑀬𑀲𑁆𑀲 𑀯𑀸 𑀧𑀝𑀺𑀯𑁂𑀥𑀲𑁆𑀲 𑀅𑀢𑁆𑀣𑁄 𑀕𑁄𑀘𑀭𑁄 𑀅𑀪𑀺𑀲𑀫𑀬𑀝𑁆𑀞𑁄𑀢𑀺 𑀢𑀸𑀦𑀺𑀬𑁂𑀯 𑀢𑀩𑁆𑀩𑀺𑀲𑀬-𑀪𑀸𑀯𑀽𑀧𑀕𑀫𑀦-𑀲𑀸𑀫𑀜𑁆𑀜𑀢𑁄 𑀏𑀓𑀢𑁆𑀢𑁂𑀦 𑀯𑀼𑀢𑁆𑀢𑀸𑀦𑀺. 𑀏𑀢𑁆𑀣 𑀘 𑀉𑀧𑀲𑀕𑁆𑀕𑀸𑀦𑀁 𑀚𑁄𑀢𑀓𑀫𑀢𑁆𑀢𑀢𑁆𑀢𑀸 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑀸𑀘𑀓𑁄 𑀲𑀫𑀬𑀲𑀤𑁆𑀤𑁄 𑀏𑀯𑀸𑀢𑀺 𑀲𑀫𑀬𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁂𑀧𑀺 𑀲𑀉𑀧𑀲𑀕𑁆𑀕𑁄 𑀅𑀪𑀺𑀲𑀫𑀬𑁄 𑀯𑀼𑀢𑁆𑀢𑁄.

𑀢𑁂𑀲𑀼 𑀧𑀦 𑀅𑀢𑁆𑀣𑁂𑀲𑀼 𑀅𑀬𑀁 𑀯𑀘𑀦𑀢𑁆𑀣𑁄 𑁋 𑀲𑀳𑀓𑀸𑀭𑀻𑀓𑀸𑀭𑀡𑀯𑀲𑁂𑀦 𑀲𑀦𑁆𑀦𑀺𑀚𑁆𑀛𑀁 𑀲𑀫𑁂𑀢𑀺 𑀲𑀫𑀯𑁂𑀢𑀻𑀢𑀺 𑀲𑀫𑀬𑁄, 𑀲𑀫𑀯𑀸𑀬𑁄. 𑀲𑀫𑁂𑀢𑀺 𑀲𑀫𑀸𑀕𑀘𑁆𑀙𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀫𑁂𑀢𑁆𑀣 𑀢𑀤𑀸𑀥𑀸𑀭𑀧𑀼𑀕𑁆𑀕𑀮𑀯𑀲𑁂𑀦𑀸𑀢𑀺 𑀲𑀫𑀬𑁄, 𑀔𑀡𑁄. 𑀲𑀫𑁂𑀦𑁆𑀢𑀺 𑀏𑀢𑁆𑀣, 𑀏𑀢𑁂𑀦 𑀯𑀸 𑀲𑀁𑀕𑀘𑁆𑀙𑀦𑁆𑀢𑀺 𑀥𑀫𑁆𑀫𑀸, 𑀲𑀢𑁆𑀢𑀸 𑀯𑀸 𑀲𑀳𑀚𑀸𑀢𑀸𑀤𑀻𑀳𑀺, 𑀉𑀧𑁆𑀧𑀸𑀤𑀸𑀤𑀻𑀳𑀺 𑀘𑀸𑀢𑀺 𑀲𑀫𑀬𑁄, 𑀓𑀸𑀮𑁄. 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀫𑀢𑁆𑀢𑀢𑀸𑀬 𑀳𑀺 𑀅𑀢𑁆𑀣𑀢𑁄 𑀅𑀪𑀽𑀢𑁄𑀧𑀺 𑀓𑀸𑀮𑁄 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀬𑀸 𑀅𑀥𑀺𑀓𑀭𑀡𑀁, 𑀓𑀭𑀡𑀁 𑀯𑀺𑀬 𑀘 𑀧𑀭𑀺𑀓𑀧𑁆𑀧𑀦𑀸𑀫𑀢𑁆𑀢𑀲𑀺𑀤𑁆𑀥𑁂𑀦 𑀭𑀽𑀧𑁂𑀦 𑀯𑁄𑀳𑀭𑀻𑀬𑀢𑀺. 𑀲𑀫𑀁, 𑀲𑀫𑁆𑀫𑀸 𑀯𑀸 𑀅𑀯𑀬𑀯𑀸𑀦𑀁 𑀅𑀬𑀦𑀁 𑀧𑀯𑀢𑁆𑀢𑀺 𑀅𑀯𑀝𑁆𑀞𑀸𑀦𑀦𑁆𑀢𑀺 𑀲𑀫𑀬𑁄, 𑀲𑀫𑀽𑀳𑁄 𑀬𑀣𑀸 ‘‘𑀲𑀫𑀼𑀤𑀸𑀬𑁄’’𑀢𑀺. 𑀅𑀯𑀬𑀯𑀸𑀦𑀁 𑀲𑀳𑀸𑀯𑀝𑁆𑀞𑀸𑀦𑀫𑁂𑀯 𑀳𑀺 𑀲𑀫𑀽𑀳𑁄, 𑀦 𑀧𑀦 𑀅𑀯𑀬𑀯𑀯𑀺𑀦𑀺𑀫𑀼𑀢𑁆𑀢𑁄 𑀲𑀫𑀽𑀳𑁄 𑀦𑀸𑀫 𑀓𑁄𑀘𑀺 𑀧𑀭𑀫𑀢𑁆𑀣𑀢𑁄 𑀅𑀢𑁆𑀣𑀺. 𑀧𑀘𑁆𑀘𑀬𑀦𑁆𑀢𑀭𑀲𑀫𑀸𑀕𑀫𑁂 𑀏𑀢𑀺 𑀨𑀮𑀁 𑀉𑀧𑁆𑀧𑀚𑁆𑀚𑀢𑀺, 𑀧𑀯𑀢𑁆𑀢𑀢𑀺 𑀯𑀸 𑀏𑀢𑀲𑁆𑀫𑀸𑀢𑀺 𑀲𑀫𑀬𑁄, 𑀳𑁂𑀢𑀼 𑀬𑀣𑀸 ‘‘𑀲𑀫𑀼𑀤𑀬𑁄’’𑀢𑀺. 𑀲𑁄 𑀳𑀺 𑀧𑀘𑁆𑀘𑀬𑀦𑁆𑀢𑀭𑀲𑀫𑀸𑀕𑀫𑀦𑁂𑀦𑁂𑀯 𑀅𑀢𑁆𑀢𑀦𑁄 𑀨𑀮𑀁 𑀉𑀧𑁆𑀧𑀸𑀤𑀝𑁆𑀞𑀺𑀢𑀺𑀲𑀫𑀗𑁆𑀕𑀻𑀪𑀸𑀯𑀁 𑀓𑀭𑁄𑀢𑀺. 𑀲𑀫𑁂𑀢𑀺 𑀲𑀁𑀬𑁄𑀚𑀦𑀪𑀸𑀯𑀢𑁄 𑀲𑀫𑁆𑀩𑀦𑁆𑀥𑁄 𑀳𑀼𑀢𑁆𑀯𑀸 𑀏𑀢𑀺 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀧𑀯𑀢𑁆𑀢𑀢𑀺, 𑀤𑀴𑁆𑀳𑀕𑁆𑀕𑀡𑀪𑀸𑀯𑀢𑁄 𑀯𑀸 𑀢𑀁𑀲𑀜𑁆𑀜𑀼𑀢𑁆𑀢𑀸 𑀲𑀢𑁆𑀢𑀸 𑀅𑀬𑀦𑁆𑀢𑀺 𑀏𑀢𑁂𑀦 𑀬𑀣𑀸𑀪𑀺𑀦𑀺𑀯𑁂𑀲𑀁 𑀧𑀯𑀢𑁆𑀢𑀦𑁆𑀢𑀻𑀢𑀺 𑀲𑀫𑀬𑁄, 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑁂𑀦 𑀳𑀺 𑀲𑀢𑁆𑀢𑀸 𑀅𑀢𑀺𑀯𑀺𑀬 𑀩𑀚𑁆𑀛𑀦𑁆𑀢𑀺. 𑀲𑀫𑀺𑀢𑀺 𑀲𑀗𑁆𑀕𑀢𑀺 𑀲𑀫𑁄𑀥𑀸𑀦𑀁 𑀲𑀫𑀬𑁄, 𑀧𑀝𑀺𑀮𑀸𑀪𑁄. 𑀲𑀫𑀲𑁆𑀲 𑀦𑀺𑀭𑁄𑀥𑀲𑁆𑀲 𑀬𑀸𑀦𑀁 𑀧𑀸𑀧𑀼𑀡𑀦𑀁, 𑀲𑀫𑁆𑀫𑀸 𑀯𑀸 𑀬𑀸𑀦𑀁 𑀅𑀧𑀕𑀫𑁄 𑀅𑀧𑁆𑀧𑀯𑀢𑁆𑀢𑀺 𑀲𑀫𑀬𑁄, 𑀧𑀳𑀸𑀦𑀁. 𑀅𑀪𑀺𑀫𑀼𑀔𑀁 𑀜𑀸𑀡𑁂𑀦 𑀲𑀫𑁆𑀫𑀸 𑀏𑀢𑀩𑁆𑀩𑁄 𑀅𑀪𑀺𑀕𑀦𑁆𑀢𑀩𑁆𑀩𑁄𑀢𑀺 𑀅𑀪𑀺𑀲𑀫𑀬𑁄, 𑀥𑀫𑁆𑀫𑀸𑀦𑀁 𑀅𑀯𑀺𑀧𑀭𑀻𑀢𑁄 𑀲𑀪𑀸𑀯𑁄. 𑀅𑀪𑀺𑀫𑀼𑀔𑀪𑀸𑀯𑁂𑀦 𑀢𑀁 𑀢𑀁 𑀲𑀪𑀸𑀯𑀁 𑀲𑀫𑁆𑀫𑀸 𑀏𑀢𑀺 𑀕𑀘𑁆𑀙𑀢𑀺 𑀩𑀼𑀚𑁆𑀛𑀢𑀻𑀢𑀺 𑀅𑀪𑀺𑀲𑀫𑀬𑁄, 𑀥𑀫𑁆𑀫𑀸𑀦𑀁 𑀬𑀣𑀸𑀪𑀽𑀢𑀲𑀪𑀸𑀯𑀸𑀯𑀩𑁄𑀥𑁄.

𑀦𑀦𑀼 𑀘 𑀅𑀢𑁆𑀣𑀫𑀢𑁆𑀢𑀁 𑀬𑀣𑀸𑀥𑀺𑀧𑁆𑀧𑁂𑀢𑀁 𑀧𑀢𑀺 𑀲𑀤𑁆𑀤𑀸 𑀅𑀪𑀺𑀦𑀺𑀯𑀺𑀲𑀦𑁆𑀢𑀻𑀢𑀺 𑀦 𑀏𑀓𑁂𑀦 𑀲𑀤𑁆𑀤𑁂𑀦 𑀅𑀦𑁂𑀓𑁂 𑀅𑀢𑁆𑀣𑀸 𑀅𑀪𑀺𑀥𑀻𑀬𑀦𑁆𑀢𑀺, 𑀅𑀣 𑀓𑀲𑁆𑀫𑀸 𑀇𑀥 𑀲𑀫𑀬𑀲𑀤𑁆𑀤𑀲𑁆𑀲 𑀅𑀦𑁂𑀓𑀥𑀸 𑀅𑀢𑁆𑀣𑁄 𑀯𑀼𑀢𑁆𑀢𑁄𑀢𑀺? 𑀲𑀘𑁆𑀘𑀫𑁂𑀢𑀁 𑀲𑀤𑁆𑀤𑀯𑀺𑀲𑁂𑀲𑁂 𑀅𑀧𑁂𑀓𑁆𑀔𑀺𑀢𑁂 𑀲𑀤𑁆𑀤𑀯𑀺𑀲𑁂𑀲𑁂 𑀳𑀺 𑀅𑀧𑁂𑀓𑁆𑀔𑀺𑀢𑁂 𑀦 𑀏𑀓𑁂𑀦 𑀲𑀤𑁆𑀤𑁂𑀦 𑀅𑀦𑁂𑀓𑀢𑁆𑀣𑀸𑀪𑀺𑀥𑀸𑀦𑀁 𑀲𑀫𑁆𑀪𑀯𑀢𑀺. 𑀦 𑀳𑀺 𑀬𑁄 𑀓𑀸𑀮𑀸𑀤𑀺𑀅𑀢𑁆𑀣𑁄 𑀲𑀫𑀬-𑀲𑀤𑁆𑀤𑁄, 𑀲𑁄𑀬𑁂𑀯 𑀲𑀫𑀽𑀳𑀸𑀤𑀺𑀅𑀢𑁆𑀣𑀁 𑀯𑀤𑀢𑀺. 𑀏𑀢𑁆𑀣 𑀧𑀦 𑀢𑁂𑀲𑀁 𑀢𑁂𑀲𑀫𑀢𑁆𑀣𑀸𑀦𑀁 𑀲𑀫𑀬𑀲𑀤𑁆𑀤𑀯𑀘𑀦𑀻𑀬𑀢𑀸𑀲𑀸𑀫𑀜𑁆𑀜𑀫𑀼𑀧𑀸𑀤𑀸𑀬 𑀅𑀦𑁂𑀓𑀢𑁆𑀣𑀢𑀸 𑀲𑀫𑀬-𑀲𑀤𑁆𑀤𑀲𑁆𑀲 𑀯𑀼𑀢𑁆𑀢𑀸𑀢𑀺. 𑀏𑀯𑀁 𑀲𑀩𑁆𑀩𑀢𑁆𑀣 𑀅𑀢𑁆𑀣𑀼𑀤𑁆𑀥𑀸𑀭𑁂. 𑀳𑁄𑀢𑀺 𑀘𑁂𑀢𑁆𑀣 𑁋

‘‘𑀲𑀸𑀫𑀜𑁆𑀜𑀯𑀘𑀦𑀻𑀬𑀢𑀁, 𑀉𑀧𑀸𑀤𑀸𑀬 𑀅𑀦𑁂𑀓𑀥𑀸;

𑀅𑀢𑁆𑀣𑀁 𑀯𑀤𑁂 𑀦 𑀳𑀺 𑀲𑀤𑁆𑀤𑁄, 𑀏𑀓𑁄 𑀦𑁂𑀓𑀢𑁆𑀣𑀓𑁄 𑀲𑀺𑀬𑀸’’𑀢𑀺.

𑀲𑀫𑀯𑀸𑀬𑀸𑀤𑀺𑀅𑀢𑁆𑀣𑀸𑀦𑀁 𑀇𑀥 𑀅𑀲𑀫𑁆𑀪𑀯𑀢𑁄, 𑀓𑀸𑀮𑀲𑁆𑀲𑁂𑀯 𑀘 𑀅𑀧𑀤𑀺𑀲𑀺𑀢𑀩𑁆𑀩𑀢𑁆𑀢𑀸 ‘‘𑀇𑀥 𑀧𑀦𑀲𑁆𑀲 𑀓𑀸𑀮𑁄 𑀅𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁. 𑀤𑁂𑀲𑀤𑁂𑀲𑀓𑀸𑀤𑀻𑀦𑀁 𑀯𑀺𑀬 𑀳𑀺 𑀓𑀸𑀮𑀲𑁆𑀲 𑀦𑀺𑀤𑀸𑀦𑀪𑀸𑀯𑁂𑀦 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀲𑁄𑀧𑀺 𑀇𑀥 𑀅𑀧𑀤𑀺𑀲𑀻𑀬𑀢𑀺. ‘𑀇𑀫𑀺𑀦𑀸 𑀓𑀻𑀤𑀺𑀲𑀁 𑀓𑀸𑀮𑀁 𑀤𑀻𑀧𑁂𑀢𑀻𑀢𑀺 𑀆𑀳 ‘‘𑀢𑁂𑀦𑀸’’𑀢𑀺𑀆𑀤𑀺. 𑀢𑁂𑀦𑀸𑀢𑀺 𑀓𑀸𑀮𑀢𑁆𑀣𑁂𑀦 𑀲𑀫𑀬-𑀲𑀤𑁆𑀤𑁂𑀦. 𑀅𑀟𑁆𑀠𑀫𑀸𑀲𑁄 𑀧𑀓𑁆𑀔𑀯𑀲𑁂𑀦 𑀯𑀼𑀢𑁆𑀢𑁄, 𑀧𑀼𑀩𑁆𑀩𑀡𑁆𑀳𑀸𑀤𑀺𑀓𑁄 𑀤𑀺𑀯𑀲𑀪𑀸𑀕𑀯𑀲𑁂𑀦, 𑀧𑀞𑀫𑀬𑀸𑀫𑀸𑀤𑀺𑀓𑁄 𑀧𑀳𑀸𑀭𑀯𑀲𑁂𑀦. 𑀆𑀤𑀺-𑀲𑀤𑁆𑀤𑁂𑀦 𑀔𑀡𑀮𑀬𑀸𑀤𑀬𑁄 𑀲𑀗𑁆𑀕𑀳𑀺𑀢𑀸, 𑀅𑀦𑀺𑀬𑀫𑀺𑀢𑀯𑀲𑁂𑀦 𑀏𑀓𑀁 𑀓𑀸𑀮𑀁 𑀤𑀻𑀧𑁂𑀢𑀻𑀢𑀺 𑀅𑀢𑁆𑀣𑁄.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀅𑀦𑀺𑀬𑀫𑀺𑀢𑀯𑀲𑁂𑀦 𑀓𑀸𑀮𑁄 𑀦𑀺𑀤𑁆𑀤𑀺𑀝𑁆𑀞𑁄, 𑀦 𑀉𑀢𑀼𑀲𑀁𑀯𑀘𑁆𑀙𑀭𑀸𑀤𑀺𑀦𑀸 𑀦𑀺𑀬𑀫𑀺𑀢𑀯𑀲𑁂𑀦𑀸𑀢𑀺 𑀆𑀳 ‘‘𑀢𑀢𑁆𑀣 𑀓𑀺𑀜𑁆𑀘𑀸𑀧𑀻’’𑀢𑀺𑀆𑀤𑀺. 𑀓𑀺𑀜𑁆𑀘𑀸𑀧𑀺 𑀧𑀜𑁆𑀜𑀸𑀬 𑀯𑀺𑀤𑀺𑀢𑀁 𑀲𑀼𑀯𑀯𑀢𑁆𑀣𑀸𑀧𑀺𑀢𑀁, 𑀢𑀣𑀸𑀧𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀘𑀲𑀸 𑀥𑀸𑀭𑁂𑀢𑀼𑀁 𑀯𑀸 𑀲𑀬𑀁 𑀉𑀤𑁆𑀤𑀺𑀲𑀺𑀢𑀼𑀁 𑀯𑀸 𑀧𑀭𑁂𑀦 𑀉𑀤𑁆𑀤𑀺𑀲𑀸𑀧𑁂𑀢𑀼𑀁 𑀯𑀸 𑀦 𑀲𑀓𑁆𑀓𑀸 𑀦𑀸𑀦𑀧𑁆𑀧𑀓𑀸𑀭𑀪𑀸𑀯𑀢𑁄 𑀩𑀳𑀼 𑀘 𑀯𑀢𑁆𑀢𑀩𑁆𑀩𑀁 𑀳𑁄𑀢𑀺 𑀬𑀸𑀯 𑀓𑀸𑀮𑀧𑁆𑀧𑀪𑁂𑀤𑁄, 𑀢𑀸𑀯 𑀯𑀢𑁆𑀢𑀩𑁆𑀩𑀢𑁆𑀢𑀸. ‘‘𑀏𑀓𑀁 𑀲𑀫𑀬’’𑀦𑁆𑀢𑀺 𑀯𑀼𑀢𑁆𑀢𑁂 𑀧𑀦 𑀦 𑀲𑁄 𑀓𑀸𑀮𑀧𑁆𑀧𑀪𑁂𑀤𑁄 𑀅𑀢𑁆𑀣𑀺, 𑀬𑁄 𑀏𑀢𑁆𑀣𑀸𑀦𑀦𑁆𑀢𑁄𑀕𑀥𑁄 𑀲𑀺𑀬𑀸𑀢𑀺 𑀤𑀲𑁆𑀲𑁂𑀢𑀺 ‘‘𑀏𑀓𑁂𑀦𑁂𑀯 𑀧𑀤𑁂𑀦 𑀢𑀫𑀢𑁆𑀣𑀁 𑀲𑀫𑁄𑀥𑀸𑀦𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸. 𑀏𑀯𑀁 𑀮𑁄𑀓𑀺𑀬𑀲𑀫𑁆𑀫𑀢𑀓𑀸𑀮𑀯𑀲𑁂𑀦 𑀲𑀫𑀬𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀸𑀲𑀦𑁂 𑀧𑀸𑀓𑀝𑀓𑀸𑀮𑀯𑀲𑁂𑀦 𑀲𑀫𑀬𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀬𑁂 𑀯𑀸 𑀇𑀫𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀧𑀺𑀘 𑀉𑀢𑀼𑀲𑀁𑀯𑀘𑁆𑀙𑀭𑀸𑀤𑀺𑀯𑀲𑁂𑀦 𑀦𑀺𑀬𑀫𑀁 𑀅𑀓𑀢𑁆𑀯𑀸 𑀲𑀫𑀬𑀲𑀤𑁆𑀤𑀲𑁆𑀲 𑀯𑀘𑀦𑁂 𑀅𑀬𑀫𑁆𑀧𑀺 𑀕𑀼𑀡𑁄 𑀮𑀤𑁆𑀥𑁄𑀬𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁂 𑀯𑀸 𑀇𑀫𑁂’’𑀢𑀺𑀆𑀤𑀺𑀫𑀸𑀳. 𑀲𑀸𑀫𑀜𑁆𑀜𑀚𑁄𑀢𑀦𑀸 𑀳𑀺 𑀯𑀺𑀲𑁂𑀲𑁂 𑀅𑀯𑀢𑀺𑀝𑁆𑀞𑀢𑀺 𑀢𑀲𑁆𑀲𑀸 𑀯𑀺𑀲𑁂𑀲𑀧𑀭𑀺𑀳𑀸𑀭𑀯𑀺𑀲𑀬𑀢𑁆𑀢𑀸. 𑀢𑀢𑁆𑀣 𑀬𑁂 𑀇𑀫𑁂 𑀲𑀫𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀪𑀕𑀯𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀑𑀓𑁆𑀓𑀫𑀦𑀓𑀸𑀮𑁄 𑀘𑁂𑀢𑁆𑀣 𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀲𑀫𑀬𑁄. 𑀘𑀢𑁆𑀢𑀸𑀭𑀺 𑀦𑀺𑀫𑀺𑀢𑁆𑀢𑀸𑀦𑀺 𑀧𑀲𑁆𑀲𑀺𑀢𑁆𑀯𑀸 𑀲𑀁𑀯𑁂𑀚𑀦𑀓𑀸𑀮𑁄 𑀲𑀁𑀯𑁂𑀕𑀲𑀫𑀬𑁄. 𑀙𑀩𑁆𑀩𑀲𑁆𑀲𑀸𑀦𑀺 𑀲𑀫𑁆𑀩𑁄𑀥𑀺𑀲𑀫𑀥𑀺𑀕𑀫𑀸𑀬 𑀘𑀭𑀺𑀬𑀓𑀸𑀮𑁄 𑀤𑀼𑀓𑁆𑀓𑀭𑀓𑀸𑀭𑀺𑀓𑀲𑀫𑀬𑁄. 𑀤𑁂𑀯𑀲𑀺𑀓𑀁 𑀛𑀸𑀦𑀨𑀮𑀲𑀫𑀸𑀧𑀢𑁆𑀢𑀻𑀳𑀺 𑀯𑀻𑀢𑀺𑀦𑀸𑀫𑀦𑀓𑀸𑀮𑁄 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀲𑀫𑀬𑁄, 𑀯𑀺𑀲𑁂𑀲𑀢𑁄 𑀧𑀦 𑀲𑀢𑁆𑀢𑀲𑀢𑁆𑀢𑀸𑀳𑀸𑀦𑀺 𑀛𑀸𑀦𑀲𑀫𑀸𑀧𑀢𑁆𑀢𑀺𑀯𑀴𑀜𑁆𑀚𑀦𑀓𑀸𑀮𑁄. 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀯𑀲𑁆𑀲𑀸𑀦𑀺 𑀢𑀁𑀢𑀁𑀥𑀫𑁆𑀫𑀤𑁂𑀲𑀦𑀸𑀓𑀸𑀮𑁄 𑀤𑁂𑀲𑀦𑀸𑀲𑀫𑀬𑁄. 𑀆𑀤𑀺-𑀲𑀤𑁆𑀤𑁂𑀦 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀲𑀫𑀬𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀓𑀸𑀲𑀸𑀢𑀺 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀧𑀓𑀫𑁆𑀧𑀦𑀑𑀪𑀸𑀲𑀧𑀸𑀢𑀼𑀪𑀸𑀯𑀸𑀤𑀻𑀳𑀺 𑀧𑀸𑀓𑀝𑀸. ‘‘𑀏𑀓𑀁 𑀲𑀫𑀬’’𑀦𑁆𑀢𑀺 𑀯𑀼𑀢𑁆𑀢𑁂 𑀢𑀤𑀜𑁆𑀜𑁂𑀧𑀺 𑀲𑀫𑀬𑀸 𑀲𑀦𑁆𑀢𑀻𑀢𑀺 𑀅𑀢𑁆𑀣𑀸𑀧𑀢𑁆𑀢𑀺𑀢𑁄 𑀢𑁂𑀲𑀼 𑀲𑀫𑀬𑁂𑀲𑀼 𑀇𑀥 𑀤𑁂𑀲𑀦𑀸𑀲𑀫𑀬𑀲𑀗𑁆𑀔𑀸𑀢𑁄 𑀲𑀫𑀬𑀯𑀺𑀲𑁂𑀲𑁄 ‘‘𑀏𑀓𑀁 𑀲𑀫𑀬’’𑀦𑁆𑀢𑀺 𑀯𑀼𑀢𑁆𑀢𑁄𑀢𑀺 𑀤𑀻𑀧𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀬𑀣𑀸𑀯𑀼𑀢𑁆𑀢𑀧𑁆𑀧𑀪𑁂𑀤𑁂𑀲𑀼𑀬𑁂𑀯 𑀲𑀫𑀬𑁂𑀲𑀼 𑀏𑀓𑀤𑁂𑀲𑀁 𑀧𑀓𑀸𑀭𑀦𑁆𑀢𑀭𑁂𑀳𑀺 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀬𑁄 𑀘𑀸𑀬’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑀺 𑀜𑀸𑀡𑀓𑀺𑀘𑁆𑀘𑀲𑀫𑀬𑁄, 𑀅𑀢𑁆𑀢𑀳𑀺𑀢𑀧𑀝𑀺𑀧𑀢𑁆𑀢𑀺𑀲𑀫𑀬𑁄 𑀘 𑀅𑀪𑀺𑀲𑀫𑁆𑀩𑁄𑀥𑀺𑀲𑀫𑀬𑁄𑀬𑁂𑀯. 𑀅𑀭𑀺𑀬𑀢𑀼𑀡𑁆𑀳𑀻𑀪𑀸𑀯𑀲𑀫𑀬𑁄 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀲𑀫𑀬𑁄. 𑀓𑀭𑀼𑀡𑀸𑀓𑀺𑀘𑁆𑀘𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀥𑀫𑁆𑀫𑀺𑀓𑀣𑀸𑀲𑀫𑀬𑁄 𑀤𑁂𑀲𑀦𑀸𑀲𑀫𑀬𑁄, 𑀢𑀲𑁆𑀫𑀸 𑀢𑁂𑀲𑀼 𑀯𑀼𑀢𑁆𑀢𑀧𑁆𑀧𑀪𑁂𑀤𑁂𑀲𑀼 𑀲𑀫𑀬𑁂𑀲𑀼 𑀏𑀓𑀤𑁂𑀲𑁄𑀯 𑀧𑀓𑀸𑀭𑀦𑁆𑀢𑀭𑁂𑀦 𑀤𑀲𑁆𑀲𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀯𑁄 𑀪𑀺𑀓𑁆𑀔𑀯𑁂 𑀤𑁆𑀯𑀬𑀁 𑀓𑀭𑀡𑀻𑀬𑀁 𑀥𑀫𑁆𑀫𑀻 𑀓𑀣𑀸 𑀯𑀸 𑀅𑀭𑀺𑀬𑁄 𑀯𑀸 𑀢𑀼𑀡𑁆𑀳𑀻𑀪𑀸𑀯𑁄’’𑀢𑀺 (𑀉𑀤𑀸. 𑁧𑁨) 𑀯𑀼𑀢𑁆𑀢𑀲𑀫𑀬𑁂 𑀲𑀦𑁆𑀥𑀸𑀬 ‘‘𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀓𑀭𑀡𑀻𑀬𑀤𑁆𑀯𑀬𑀲𑀫𑀬𑁂𑀲𑀽’’𑀢𑀺 𑀯𑀼𑀢𑁆𑀢𑀁. 𑀢𑁂𑀲𑀼𑀧𑀺 𑀲𑀫𑀬𑁂𑀲𑀽𑀢𑀺 𑀓𑀭𑀼𑀡𑀸𑀓𑀺𑀘𑁆𑀘𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀥𑀫𑁆𑀫𑀺𑀓𑀣𑀸𑀤𑁂𑀲𑀦𑀸𑀲𑀫𑀬𑁂𑀲𑀼𑀧𑀺. 𑀅𑀜𑁆𑀜𑀢𑀭𑀁 𑀲𑀫𑀬𑀁 𑀲𑀦𑁆𑀥𑀸𑀬 ‘‘𑀏𑀓𑀁 𑀲𑀫𑀬’’𑀦𑁆𑀢𑀺 𑀯𑀼𑀢𑁆𑀢𑀁 𑀅𑀢𑁆𑀣𑀢𑁄 𑀅𑀪𑁂𑀤𑀢𑁆𑀢𑀸.

𑀅𑀜𑁆𑀜𑀢𑁆𑀣 𑀯𑀺𑀬 𑀪𑀼𑀫𑁆𑀫𑀯𑀘𑀦𑁂𑀦 𑀘 𑀓𑀭𑀡𑀯𑀘𑀦𑁂𑀦 𑀘 𑀦𑀺𑀤𑁆𑀤𑁂𑀲𑀫𑀓𑀢𑁆𑀯𑀸 𑀇𑀥 𑀉𑀧𑀬𑁄𑀕𑀯𑀘𑀦𑁂𑀦 𑀦𑀺𑀤𑁆𑀤𑁂𑀲𑀧𑀬𑁄𑀚𑀦𑀁 𑀦𑀺𑀤𑁆𑀥𑀸𑀭𑁂𑀢𑀼𑀓𑀸𑀫𑁄 𑀧𑀭𑀫𑁆𑀫𑀼𑀔𑁂𑀦 𑀘𑁄𑀤𑀦𑀁 𑀲𑀫𑀼𑀝𑁆𑀞𑀧𑁂𑀢𑀺 ‘‘𑀓𑀲𑁆𑀫𑀸 𑀧𑀦𑁂𑀢𑁆𑀣𑀸’’𑀢𑀺𑀆𑀤𑀺𑀦𑀸. 𑀏𑀢𑁆𑀣𑀸𑀢𑀺 ‘‘𑀏𑀓𑀁 𑀲𑀫𑀬’’𑀦𑁆𑀢𑀺 𑀇𑀫𑀲𑁆𑀫𑀺𑀁 𑀧𑀤𑁂, 𑀓𑀭𑀡𑀯𑀘𑀦𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄 𑀬𑀣𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀪𑀯𑀦𑁆𑀢𑀺 𑀏𑀢𑁆𑀣𑀸𑀢𑀺 𑀪𑀼𑀫𑁆𑀫𑀁, 𑀑𑀓𑀸𑀲𑁄, 𑀢𑀢𑁆𑀣 𑀧𑀯𑀢𑁆𑀢𑀁 𑀯𑀘𑀦𑀁 𑀯𑀺𑀪𑀢𑁆𑀢𑀺 𑀪𑀼𑀫𑁆𑀫𑀯𑀘𑀦𑀁. 𑀓𑀭𑁄𑀢𑀺 𑀓𑀺𑀭𑀺𑀬𑀫𑀪𑀺𑀦𑀺𑀧𑁆𑀨𑀸𑀤𑁂𑀪𑀺 𑀏𑀢𑁂𑀦𑀸𑀢𑀺 𑀓𑀭𑀡𑀁, 𑀓𑀺𑀭𑀺𑀬𑀸𑀦𑀺𑀧𑁆𑀨𑀢𑁆𑀢𑀺𑀓𑀸𑀭𑀡𑀁. 𑀉𑀧𑀬𑀼𑀚𑁆𑀚𑀺𑀢𑀩𑁆𑀩𑁄 𑀓𑀺𑀭𑀺𑀬𑀸𑀬𑀸𑀢𑀺 𑀉𑀧𑀬𑁄𑀕𑁄, 𑀓𑀫𑁆𑀫𑀁, 𑀢𑀢𑁆𑀣 𑀯𑀘𑀦𑀁 𑀢𑀣𑀸. ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀘𑁄𑀤𑀦𑀁 𑀧𑀭𑀺𑀳𑀭𑀢𑀺. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀅𑀪𑀺𑀥𑀫𑁆𑀫𑀢𑀤𑀜𑁆𑀜𑀲𑀼𑀢𑁆𑀢𑀧𑀤𑀯𑀺𑀦𑀬𑁂𑀲𑀼. 𑀢𑀣𑀸𑀢𑀺 𑀪𑀼𑀫𑁆𑀫𑀯𑀘𑀦𑀓𑀭𑀡𑀯𑀘𑀦𑁂𑀳𑀺 𑀅𑀢𑁆𑀣𑀲𑀫𑁆𑀪𑀯𑀢𑁄 𑀘𑀸𑀢𑀺 𑀬𑁄𑀚𑁂𑀢𑀩𑁆𑀩𑀁, 𑀅𑀥𑀺𑀓𑀭𑀡𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑀢𑁆𑀣𑀸𑀦𑀁, 𑀳𑁂𑀢𑀼𑀓𑀭𑀡𑀢𑁆𑀣𑀸𑀦𑀜𑁆𑀘 𑀲𑀫𑁆𑀪𑀯𑀢𑁄𑀢𑀺 𑀅𑀢𑁆𑀣𑁄. 𑀇𑀥𑀸𑀢𑀺 𑀇𑀥𑀲𑁆𑀫𑀺𑀁 𑀲𑀼𑀢𑁆𑀢𑀧𑀤𑁂. 𑀅𑀜𑁆𑀜𑀣𑀸𑀢𑀺 𑀉𑀧𑀬𑁄𑀕𑀯𑀘𑀦𑁂𑀦. 𑀅𑀢𑁆𑀣𑀲𑀫𑁆𑀪𑀯𑀢𑁄𑀢𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀢𑁆𑀣𑀲𑁆𑀲 𑀲𑀫𑁆𑀪𑀯𑀢𑁄.

‘‘𑀢𑀢𑁆𑀣 𑀳𑀻’’𑀢𑀺𑀆𑀤𑀺 𑀢𑀩𑁆𑀩𑀺𑀯𑀭𑀡𑀁. 𑀇𑀢𑁄𑀢𑀺 ‘‘𑀏𑀓𑀁 𑀲𑀫𑀬’’𑀦𑁆𑀢𑀺 𑀲𑀼𑀢𑁆𑀢𑀧𑀤𑀢𑁄. 𑀅𑀥𑀺𑀓𑀭𑀡𑀢𑁆𑀣𑁄𑀢𑀺 𑀆𑀥𑀸𑀭𑀢𑁆𑀣𑁄. 𑀪𑀯𑀦𑀁 𑀪𑀸𑀯𑁄, 𑀓𑀺𑀭𑀺𑀬𑀸, 𑀓𑀺𑀭𑀺𑀬𑀸𑀬 𑀓𑀺𑀭𑀺𑀬𑀦𑁆𑀢𑀭𑀮𑀓𑁆𑀔𑀡𑀁 𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑀁, 𑀢𑀤𑁂𑀯𑀢𑁆𑀣𑁄 𑀢𑀣𑀸. 𑀓𑁂𑀦 𑀲𑀫𑀬𑀢𑁆𑀣𑁂𑀦 𑀇𑀤𑀁 𑀅𑀢𑁆𑀣𑀤𑁆𑀯𑀬𑀁 𑀲𑀫𑁆𑀪𑀯𑀢𑀻𑀢𑀺 𑀅𑀦𑀼𑀬𑁄𑀕𑁂 𑀲𑀢𑀺 𑀢𑀤𑀢𑁆𑀣𑀤𑁆𑀯𑀬𑀲𑀫𑁆𑀪𑀯𑀸𑀦𑀼𑀭𑀽𑀧𑁂𑀦 𑀲𑀫𑀬𑀢𑁆𑀣𑁂𑀦, 𑀢𑀁 𑀤𑀴𑁆𑀳𑀁 𑀓𑀭𑁄𑀦𑁆𑀢𑁄 ‘‘𑀅𑀥𑀺𑀓𑀭𑀡𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀧𑀤𑀢𑁆𑀣𑀢𑁄𑀬𑁂𑀯 𑀳𑀺 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀤𑁆𑀯𑀬𑀁 𑀲𑀺𑀤𑁆𑀥𑀁, 𑀯𑀺𑀪𑀢𑁆𑀢𑀺 𑀧𑀦 𑀚𑁄𑀢𑀓𑀫𑀢𑁆𑀢𑀸. 𑀢𑀢𑁆𑀣 𑀓𑀸𑀮𑀲𑀗𑁆𑀔𑀸𑀢𑁄, 𑀓𑀸𑀮𑀲𑀤𑁆𑀤𑀲𑁆𑀲 𑀯𑀸 𑀅𑀢𑁆𑀣𑁄 𑀬𑀲𑁆𑀲𑀸𑀢𑀺 𑀓𑀸𑀮𑀢𑁆𑀣𑁄. 𑀲𑀫𑀽𑀳𑀲𑀗𑁆𑀔𑀸𑀢𑁄, ‘𑀲𑀫𑀽𑀳𑀲𑀤𑁆𑀤𑀲𑁆𑀲 𑀯𑀸 𑀅𑀢𑁆𑀣𑁄 𑀬𑀲𑁆𑀲𑀸𑀢𑀺 𑀲𑀫𑀽𑀳𑀢𑁆𑀣𑁄, 𑀓𑁄 𑀲𑁄? 𑀲𑀫𑀬𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀓𑀸𑀮𑀢𑁆𑀣𑁄, 𑀲𑀫𑀽𑀳𑀢𑁆𑀣𑁄 𑀘 𑀲𑀫𑀬𑁄 𑀢𑀢𑁆𑀣 𑀅𑀪𑀺𑀥𑀫𑁆𑀫𑁂 𑀯𑀼𑀢𑁆𑀢𑀸𑀦𑀁 𑀨𑀲𑁆𑀲𑀸𑀤𑀺𑀥𑀫𑁆𑀫𑀸𑀦𑀁 𑀅𑀥𑀺𑀓𑀭𑀡𑀁 𑀆𑀥𑀸𑀭𑁄𑀢𑀺, 𑀬𑀲𑁆𑀫𑀺𑀁 𑀓𑀸𑀮𑁂, 𑀥𑀫𑁆𑀫𑀧𑀼𑀜𑁆𑀚𑁂 𑀯𑀸 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀢𑀲𑁆𑀫𑀺𑀁𑀬𑁂𑀯 𑀓𑀸𑀮𑁂, 𑀥𑀫𑁆𑀫𑀧𑀼𑀜𑁆𑀚𑁂 𑀯𑀸 𑀨𑀲𑁆𑀲𑀸𑀤𑀬𑁄𑀧𑀺 𑀳𑁄𑀦𑁆𑀢𑀻𑀢𑀺 𑀅𑀬𑀜𑁆𑀳𑀺 𑀢𑀢𑁆𑀣 𑀅𑀢𑁆𑀣𑁄. 𑀦𑀦𑀼 𑀘𑀸𑀬𑀁 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑁄 𑀓𑀸𑀮𑁄, 𑀯𑁄𑀳𑀸𑀭𑀫𑀢𑁆𑀢𑁄 𑀘 𑀲𑀫𑀽𑀳𑁄, 𑀲𑁄 𑀓𑀣𑀁 𑀅𑀥𑀺𑀓𑀭𑀡𑀁 𑀲𑀺𑀬𑀸 𑀢𑀢𑁆𑀣 𑀯𑀼𑀢𑁆𑀢𑀥𑀫𑁆𑀫𑀸𑀦𑀦𑁆𑀢𑀺? 𑀦𑀸𑀬𑀁 𑀤𑁄𑀲𑁄. 𑀬𑀣𑀸 𑀳𑀺 𑀓𑀸𑀮𑁄 𑀲𑀬𑀁 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑁄𑀧𑀺 𑀲𑀪𑀸𑀯𑀥𑀫𑁆𑀫𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸 𑀆𑀥𑀸𑀭𑀪𑀸𑀯𑁂𑀦 𑀧𑀜𑁆𑀜𑀸𑀢𑁄, 𑀲𑀪𑀸𑀯𑀥𑀫𑁆𑀫𑀧𑀭𑀺𑀘𑁆𑀙𑀺𑀦𑁆𑀦𑁄 𑀘 𑀢𑀗𑁆𑀔𑀡𑀧𑁆𑀧𑀯𑀢𑁆𑀢𑀸𑀦𑀁 𑀢𑀢𑁄 𑀧𑀼𑀩𑁆𑀩𑁂, 𑀧𑀭𑀢𑁄 𑀘 𑀅𑀪𑀸𑀯𑀢𑁄 ‘‘𑀧𑀼𑀩𑁆𑀩𑀡𑁆𑀳𑁂𑀚𑀸𑀢𑁄, 𑀲𑀸𑀬𑀦𑁆𑀳𑁂 𑀆𑀕𑀘𑁆𑀙𑀢𑀻’’𑀢𑀺𑀆𑀤𑀻𑀲𑀼, 𑀲𑀫𑀽𑀳𑁄 𑀘 𑀅𑀯𑀬𑀯𑀯𑀺𑀦𑀺𑀫𑀼𑀢𑁆𑀢𑁄 𑀯𑀺𑀲𑀼𑀁 𑀅𑀯𑀺𑀚𑁆𑀚𑀫𑀸𑀦𑁄𑀧𑀺 𑀓𑀧𑁆𑀧𑀦𑀸𑀫𑀢𑁆𑀢𑀲𑀺𑀤𑁆𑀥𑀢𑁆𑀢𑀸 𑀅𑀯𑀬𑀯𑀸𑀦𑀁 𑀆𑀥𑀸𑀭𑀪𑀸𑀯𑁂𑀦 𑀧𑀜𑁆𑀜𑀸𑀧𑀻𑀬𑀢𑀺 ‘‘𑀭𑀼𑀓𑁆𑀔𑁂 𑀲𑀸𑀔𑀸, 𑀬𑀯𑀭𑀸𑀲𑀺𑀬𑀁 𑀧𑀢𑁆𑀢𑀲𑀫𑁆𑀪𑀽𑀢𑁄’’𑀢𑀺𑀆𑀤𑀻𑀲𑀼, 𑀏𑀯𑀫𑀺𑀥𑀸𑀧𑀺 𑀲𑀪𑀸𑀯𑀥𑀫𑁆𑀫𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸, 𑀓𑀧𑁆𑀧𑀦𑀸𑀫𑀢𑁆𑀢𑀲𑀺𑀤𑁆𑀥𑀢𑁆𑀢𑀸 𑀘 𑀢𑀤𑀼𑀪𑀬𑀁 𑀢𑀢𑁆𑀣 𑀯𑀼𑀢𑁆𑀢𑀥𑀫𑁆𑀫𑀸𑀦𑀁 𑀅𑀥𑀺𑀓𑀭𑀡𑀪𑀸𑀯𑁂𑀦 𑀧𑀜𑁆𑀜𑀸𑀧𑀻𑀬𑀢𑀻𑀢𑀺.

‘‘𑀔𑀡𑀲𑀫𑀯𑀸𑀬𑀳𑁂𑀢𑀼𑀲𑀗𑁆𑀔𑀸𑀢𑀲𑁆𑀲𑀸’’𑀢𑀺𑀆𑀤𑀺 𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑀢𑁆𑀣𑀲𑀫𑁆𑀪𑀯𑀤𑀲𑁆𑀲𑀦𑀁. 𑀢𑀢𑁆𑀣 𑀔𑀡𑁄 𑀦𑀸𑀫 𑀅𑀝𑁆𑀞𑀓𑁆𑀔𑀡𑀯𑀺𑀦𑀺𑀫𑀼𑀢𑁆𑀢𑁄 𑀦𑀯𑀫𑁄 𑀩𑀼𑀤𑁆𑀥𑀼𑀧𑁆𑀧𑀸𑀤𑀓𑁆𑀔𑀡𑁄, 𑀬𑀸𑀦𑀺 𑀯𑀸 𑀧𑀦𑁂𑀢𑀸𑀦𑀺 ‘‘𑀘𑀢𑁆𑀢𑀸𑀭𑀺𑀫𑀸𑀦𑀺 𑀪𑀺𑀓𑁆𑀔𑀯𑁂, 𑀘𑀓𑁆𑀓𑀸𑀦𑀺, 𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀦𑀁 𑀤𑁂𑀯𑀫𑀼𑀲𑁆𑀲𑀸𑀦𑀁 𑀘𑀢𑀼𑀘𑀓𑁆𑀓𑀁 𑀧𑀯𑀢𑁆𑀢𑀢𑀻’’𑀢𑀺 (𑀅. 𑀦𑀺. 𑁪.𑁩𑁧) 𑀏𑀢𑁆𑀣 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑁄 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑁄 𑀅𑀢𑁆𑀢𑀲𑀫𑁆𑀫𑀸𑀧𑀡𑀻𑀥𑀺 𑀧𑀼𑀩𑁆𑀩𑁂𑀓𑀢𑀧𑀼𑀜𑁆𑀜𑀢𑀸𑀢𑀺 𑀘𑀢𑁆𑀢𑀸𑀭𑀺 𑀘𑀓𑁆𑀓𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀢𑀸𑀦𑀺 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀑𑀓𑀸𑀲𑀝𑁆𑀞𑁂𑀦 ‘‘𑀔𑀡𑁄’’𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑀸𑀦𑀺 𑀳𑀺 𑀓𑀼𑀲𑀮𑀼𑀧𑁆𑀧𑀢𑁆𑀢𑀺𑀬𑀸 𑀑𑀓𑀸𑀲𑀪𑀽𑀢𑀸𑀦𑀺. 𑀲𑀫𑀯𑀸𑀬𑁄 𑀦𑀸𑀫 ‘‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡’’𑀦𑁆𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁦𑁪; 𑁩.𑁪𑁨𑁧, 𑁪𑁨𑁫, 𑁪𑁨𑁬; 𑀲𑀁. 𑀦𑀺. 𑁨.𑁪𑁩, 𑁪𑁪; 𑀲𑀁. 𑀦𑀺. 𑁩.𑁬𑁦; 𑀓𑀣𑀸. 𑁪𑁬𑁫, 𑁪𑁬𑁭) 𑀦𑀺𑀤𑁆𑀤𑀺𑀝𑁆𑀞𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀲𑀸𑀥𑀸𑀭𑀡𑀨𑀮𑀦𑀺𑀧𑁆𑀨𑀸𑀤𑀓𑀢𑁆𑀢𑁂𑀦 𑀲𑀡𑁆𑀞𑀺𑀢𑀸 𑀘𑀓𑁆𑀔𑀼𑀭𑀽𑀧𑀸𑀤𑀺𑀧𑀘𑁆𑀘𑀬𑀲𑀸𑀫𑀕𑁆𑀕𑀻. 𑀘𑀓𑁆𑀔𑀼𑀭𑀽𑀧𑀸𑀤𑀻𑀦𑀜𑁆𑀳𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺 𑀲𑀸𑀥𑀸𑀭𑀡𑀨𑀮𑀁. 𑀳𑁂𑀢𑀼 𑀦𑀸𑀫 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀺𑀚𑀦𑀓𑀳𑁂𑀢𑀼. 𑀬𑀣𑀸𑀯𑀼𑀢𑁆𑀢𑀲𑁆𑀲 𑀔𑀡𑀲𑀗𑁆𑀔𑀸𑀢𑀲𑁆𑀲, 𑀲𑀫𑀯𑀸𑀬𑀲𑀗𑁆𑀔𑀸𑀢𑀲𑁆𑀲, 𑀳𑁂𑀢𑀼𑀲𑀗𑁆𑀔𑀸𑀢𑀲𑁆𑀲 𑀘 𑀲𑀫𑀬𑀲𑁆𑀲 𑀲𑀢𑁆𑀢𑀸𑀲𑀗𑁆𑀔𑀸𑀢𑁂𑀦 𑀪𑀸𑀯𑁂𑀦 𑀢𑁂𑀲𑀁 𑀨𑀲𑁆𑀲𑀸𑀤𑀻𑀦𑀁 𑀥𑀫𑁆𑀫𑀸𑀦𑀁 𑀲𑀢𑁆𑀢𑀸𑀲𑀗𑁆𑀔𑀸𑀢𑁄 𑀪𑀸𑀯𑁄 𑀮𑀓𑁆𑀔𑀻𑀬𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 ‘‘𑀕𑀸𑀯𑀻𑀲𑀼 𑀤𑀼𑀬𑁆𑀳𑀫𑀸𑀦𑀸𑀲𑀼 𑀕𑀢𑁄, 𑀤𑀼𑀤𑁆𑀥𑀸𑀲𑀼 𑀆𑀕𑀢𑁄’’𑀢𑀺 𑀏𑀢𑁆𑀣 𑀤𑁄𑀳𑀦𑀓𑀺𑀭𑀺𑀬𑀸𑀬 𑀕𑀫𑀦𑀓𑀺𑀭𑀺𑀬𑀸 𑀮𑀓𑁆𑀔𑀻𑀬𑀢𑀺, 𑀏𑀯𑀫𑀺𑀥𑀸𑀧𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀲𑀫𑀬𑀲𑁆𑀲 𑀲𑀢𑁆𑀢𑀸𑀓𑀺𑀭𑀺𑀬𑀸𑀬 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑀺𑀭𑀺𑀬𑀸, 𑀨𑀲𑁆𑀲𑀸𑀤𑀻𑀦𑀁 𑀪𑀯𑀦𑀓𑀺𑀭𑀺𑀬𑀸 𑀘 𑀮𑀓𑁆𑀔𑀻𑀬𑀢𑀻𑀢𑀺. 𑀦𑀦𑀼 𑀘𑁂𑀢𑁆𑀣 𑀲𑀢𑁆𑀢𑀸𑀓𑀺𑀭𑀺𑀬𑀸 𑀅𑀯𑀺𑀚𑁆𑀚𑀫𑀸𑀦𑀸𑀯, 𑀓𑀣𑀁 𑀢𑀸𑀬 𑀮𑀓𑁆𑀔𑀻𑀬𑀢𑀻𑀢𑀺? 𑀲𑀘𑁆𑀘𑀁, 𑀢𑀣𑀸𑀧𑀺 ‘‘𑀬𑀲𑁆𑀫𑀺𑀁 𑀲𑀫𑀬𑁂’’𑀢𑀺 𑀘 𑀯𑀼𑀢𑁆𑀢𑁂 𑀲𑀢𑀻𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀫𑀸𑀦𑁄 𑀏𑀯𑀳𑁄𑀢𑀺 𑀅𑀜𑁆𑀜𑀓𑀺𑀭𑀺𑀬𑀸𑀲𑀫𑁆𑀩𑀦𑁆𑀥𑀸𑀪𑀸𑀯𑁂 𑀧𑀤𑀢𑁆𑀣𑀲𑁆𑀲 𑀲𑀢𑁆𑀢𑀸𑀯𑀺𑀭𑀳𑀸𑀪𑀸𑀯𑀢𑁄, 𑀢𑀲𑁆𑀫𑀸 𑀅𑀢𑁆𑀣𑀢𑁄 𑀕𑀫𑁆𑀬𑀫𑀸𑀦𑀸𑀬 𑀢𑀸𑀬 𑀲𑀢𑁆𑀢𑀸𑀓𑀺𑀭𑀺𑀬𑀸𑀬 𑀮𑀓𑁆𑀔𑀻𑀬𑀢𑀻𑀢𑀺. 𑀅𑀬𑀜𑁆𑀳𑀺 𑀢𑀢𑁆𑀣 𑀅𑀢𑁆𑀣𑁄 𑁋 𑀬𑀲𑁆𑀫𑀺𑀁 𑀬𑀣𑀸𑀯𑀼𑀢𑁆𑀢𑁂 𑀔𑀡𑁂, 𑀧𑀘𑁆𑀘𑀬𑀲𑀫𑀯𑀸𑀬𑁂, 𑀳𑁂𑀢𑀼𑀫𑁆𑀳𑀺 𑀯𑀸 𑀲𑀢𑀺 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂, 𑀧𑀘𑁆𑀘𑀬𑀲𑀫𑀯𑀸𑀬𑁂, 𑀳𑁂𑀢𑀼𑀫𑁆𑀳𑀺 𑀯𑀸 𑀲𑀢𑀺 𑀨𑀲𑁆𑀲𑀸𑀤𑀬𑁄𑀧𑀺 𑀳𑁄𑀦𑁆𑀢𑀻𑀢𑀺. 𑀅𑀬𑀁 𑀧𑀦 𑀅𑀢𑁆𑀣𑁄 𑀅𑀪𑀺𑀥𑀫𑁆𑀫𑁂𑀬𑁂𑀯 (𑀅𑀝𑁆𑀞𑀲𑀸. 𑀓𑀸𑀫𑀸𑀯𑀘𑀭𑀓𑀼𑀲𑀮𑀧𑀤𑀪𑀸𑀚𑀦𑀻𑀬𑁂) 𑀦𑀺𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑁄, 𑀬𑀣𑀸𑀭𑀳𑀫𑁂𑀲 𑀦𑀬𑁄 𑀅𑀜𑁆𑀜𑁂𑀲𑀼𑀧𑀺 𑀲𑀼𑀢𑁆𑀢𑀧𑀤𑁂𑀲𑀽𑀢𑀺. 𑀢𑀲𑁆𑀫𑀸𑀢𑀺 𑀅𑀥𑀺𑀓𑀭𑀡𑀢𑁆𑀣𑀲𑁆𑀲, 𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑀢𑁆𑀣𑀲𑁆𑀲 𑀘 𑀲𑀫𑁆𑀪𑀯𑀢𑁄. 𑀢𑀤𑀢𑁆𑀣𑀚𑁄𑀢𑀦𑀢𑁆𑀣𑀦𑁆𑀢𑀺 𑀢𑀤𑀼𑀪𑀬𑀢𑁆𑀣𑀲𑁆𑀲 𑀲𑀫𑀬𑀲𑀤𑁆𑀤𑀢𑁆𑀣𑀪𑀸𑀯𑁂𑀦 𑀯𑀺𑀚𑁆𑀚𑀫𑀸𑀦𑀲𑁆𑀲𑁂𑀯 𑀪𑀼𑀫𑁆𑀫𑀯𑀘𑀦𑀯𑀲𑁂𑀦 𑀤𑀻𑀧𑀦𑀢𑁆𑀣𑀁. 𑀯𑀺𑀪𑀢𑁆𑀢𑀺𑀬𑁄 𑀳𑀺 𑀧𑀤𑀻𑀧𑁄 𑀯𑀺𑀬 𑀯𑀢𑁆𑀣𑀼𑀦𑁄 𑀯𑀺𑀚𑁆𑀚𑀫𑀸𑀦𑀲𑁆𑀲𑁂𑀯 𑀅𑀢𑁆𑀣𑀲𑁆𑀲 𑀚𑁄𑀢𑀓𑀸𑀢𑀺, 𑀅𑀬𑀫𑀢𑁆𑀣𑁄 𑀲𑀤𑁆𑀤𑀲𑀢𑁆𑀣𑁂𑀲𑀼 𑀧𑀸𑀓𑀝𑁄𑀬𑁂𑀯.

𑀳𑁂𑀢𑀼𑀅𑀢𑁆𑀣𑁄, 𑀓𑀭𑀡𑀢𑁆𑀣𑁄 𑀘 𑀲𑀫𑁆𑀪𑀯𑀢𑀻𑀢𑀺 ‘‘𑀅𑀦𑁆𑀦𑁂𑀦 𑀯𑀲𑀢𑀺, 𑀯𑀺𑀚𑁆𑀚𑀸𑀬 𑀯𑀲𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀳𑁂𑀢𑀼𑀅𑀢𑁆𑀣𑁄, ‘‘𑀨𑀭𑀲𑀼𑀦𑀸 𑀙𑀺𑀦𑁆𑀤𑀢𑀺, 𑀓𑀼𑀤𑀸𑀮𑁂𑀦 𑀔𑀡𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀓𑀭𑀡𑀢𑁆𑀣𑁄 𑀘 𑀲𑀫𑁆𑀪𑀯𑀢𑀺. 𑀓𑀣𑀁 𑀧𑀦 𑀲𑀫𑁆𑀪𑀯𑀢𑀻𑀢𑀺 𑀆𑀳 ‘‘𑀬𑁄 𑀳𑀺 𑀲𑁄’’𑀢𑀺𑀆𑀤𑀺. 𑀯𑀺𑀦𑀬𑁂 (𑀧𑀸𑀭𑀸. 𑁨𑁦) 𑀆𑀕𑀢𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸𑀘𑀦𑀯𑀢𑁆𑀣𑀼𑀯𑀲𑁂𑀦 𑀣𑁂𑀭𑀁 𑀫𑀭𑀺𑀬𑀸𑀤𑀁 𑀓𑀢𑁆𑀯𑀸 ‘‘𑀲𑀸𑀭𑀺𑀧𑀼𑀢𑁆𑀢𑀸𑀤𑀻𑀳𑀺𑀧𑀺 𑀤𑀼𑀯𑀺𑀜𑁆𑀜𑁂𑀬𑁆𑀬𑁄’’𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀲𑀫𑀬𑁂𑀦 𑀳𑁂𑀢𑀼𑀪𑀽𑀢𑁂𑀦 𑀓𑀭𑀡𑀪𑀽𑀢𑁂𑀦𑀸𑀢𑀺 𑀏𑀢𑁆𑀣 𑀧𑀦 𑀢𑀁𑀢𑀁𑀯𑀢𑁆𑀣𑀼𑀯𑀻𑀢𑀺𑀓𑁆𑀓𑀫𑁄𑀯 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀳𑁂𑀢𑀼 𑀘𑁂𑀯 𑀓𑀭𑀡𑀜𑁆𑀘. 𑀢𑀣𑀸 𑀳𑀺 𑀬𑀤𑀸 𑀪𑀕𑀯𑀸 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀧𑀞𑀫𑀫𑁂𑀯 𑀢𑁂𑀲𑀁 𑀢𑁂𑀲𑀁 𑀢𑀢𑁆𑀣 𑀢𑀢𑁆𑀣 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀳𑁂𑀢𑀼𑀪𑀽𑀢𑀁 𑀢𑀁 𑀢𑀁 𑀯𑀻𑀢𑀺𑀓𑁆𑀓𑀫𑀁 𑀅𑀧𑁂𑀓𑁆𑀔𑀫𑀸𑀦𑁄 𑀯𑀺𑀳𑀭𑀢𑀺, 𑀢𑀤𑀸 𑀢𑀁 𑀢𑀁 𑀯𑀻𑀢𑀺𑀓𑁆𑀓𑀫𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀢𑀤𑀢𑁆𑀣𑀁 𑀯𑀲𑀢𑀻𑀢𑀺 𑀲𑀺𑀤𑁆𑀥𑁄 𑀯𑀢𑁆𑀣𑀼𑀯𑀻𑀢𑀺𑀓𑁆𑀓𑀫𑀲𑁆𑀲 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀳𑁂𑀢𑀼𑀪𑀸𑀯𑁄 ‘‘𑀅𑀦𑁆𑀦𑁂𑀦𑀯𑀲𑀢𑀻’’𑀢𑀺𑀆𑀤𑀻𑀲𑀼 𑀅𑀦𑁆𑀦𑀫𑀧𑁂𑀓𑁆𑀔𑀺𑀢𑁆𑀯𑀸 𑀢𑀤𑀢𑁆𑀣𑀁 𑀯𑀲𑀢𑀻𑀢𑀺𑀆𑀤𑀺𑀦𑀸 𑀓𑀸𑀭𑀡𑁂𑀦 𑀅𑀦𑁆𑀦𑀸𑀤𑀻𑀦𑀁 𑀳𑁂𑀢𑀼𑀪𑀸𑀯𑁄 𑀯𑀺𑀬. 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀓𑀸𑀮𑁂 𑀧𑀦 𑀢𑁂𑀦𑁂𑀯 𑀧𑀼𑀩𑁆𑀩𑀲𑀺𑀤𑁆𑀥𑁂𑀦 𑀯𑀻𑀢𑀺𑀓𑁆𑀓𑀫𑁂𑀦 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑀺, 𑀢𑀲𑁆𑀫𑀸 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀲𑀸𑀥𑀓𑀢𑀫𑀢𑁆𑀢𑀸 𑀓𑀭𑀡𑀪𑀸𑀯𑁄𑀧𑀺 𑀯𑀻𑀢𑀺𑀓𑁆𑀓𑀫𑀲𑁆𑀲𑁂𑀯 𑀲𑀺𑀤𑁆𑀥𑁄 ‘‘𑀅𑀲𑀺𑀦𑀸 𑀙𑀺𑀦𑁆𑀤𑀢𑀻’’𑀢𑀺𑀆𑀤𑀻𑀲𑀼 𑀅𑀲𑀺𑀦𑀸 𑀙𑀺𑀦𑁆𑀤𑀦𑀓𑀺𑀭𑀺𑀬𑀁 𑀲𑀸𑀥𑁂𑀢𑀻𑀢𑀺𑀆𑀤𑀺𑀦𑀸 𑀓𑀸𑀭𑀡𑁂𑀦 𑀅𑀲𑀺𑀆𑀤𑀻𑀦𑀁 𑀓𑀭𑀡𑀪𑀸𑀯𑁄 𑀯𑀺𑀬. 𑀏𑀯𑀁 𑀲𑀦𑁆𑀢𑁂𑀧𑀺 𑀯𑀻𑀢𑀺𑀓𑁆𑀓𑀫𑀁 𑀅𑀧𑁂𑀓𑁆𑀔𑀫𑀸𑀦𑁄 𑀢𑁂𑀦𑁂𑀯 𑀲𑀤𑁆𑀥𑀺𑀁 𑀢𑀦𑁆𑀦𑀺𑀲𑁆𑀲𑀺𑀢𑀫𑁆𑀧𑀺 𑀓𑀸𑀮𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀯𑀺𑀳𑀭𑀢𑀻𑀢𑀺 𑀓𑀸𑀮𑀲𑁆𑀲𑀸𑀧𑀺 𑀇𑀥 𑀳𑁂𑀢𑀼𑀪𑀸𑀯𑁄 𑀯𑀼𑀢𑁆𑀢𑁄, 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀦𑁆𑀢𑁄 𑀘 𑀢𑀁 𑀢𑀁 𑀯𑀻𑀢𑀺𑀓𑁆𑀓𑀫𑀓𑀸𑀮𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑁂𑀦𑁂𑀯 𑀓𑀸𑀮𑁂𑀦 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑀻𑀢𑀺 𑀯𑀻𑀢𑀺𑀓𑁆𑀓𑀫𑀦𑀺𑀲𑁆𑀲𑀬𑀲𑁆𑀲 𑀓𑀸𑀮𑀲𑁆𑀲𑀸𑀧𑀺 𑀓𑀭𑀡𑀪𑀸𑀯𑁄 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀓𑀸𑀮𑀲𑁆𑀲𑀸𑀧𑀺 𑀳𑁂𑀢𑀼𑀪𑀸𑀯𑁄, 𑀓𑀭𑀡𑀪𑀸𑀯𑁄 𑀘 𑀮𑀩𑁆𑀪𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀢𑁂𑀦 𑀲𑀫𑀬𑁂𑀦 𑀳𑁂𑀢𑀼𑀪𑀽𑀢𑁂𑀦 𑀓𑀭𑀡𑀪𑀽𑀢𑁂𑀦𑀸’’𑀢𑀺, 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀧𑀦 𑀯𑀻𑀢𑀺𑀓𑁆𑀓𑀫𑁄𑀬𑁂𑀯 𑀳𑁂𑀢𑀼𑀪𑀽𑀢𑁄, 𑀓𑀭𑀡𑀪𑀽𑀢𑁄 𑀘. 𑀲𑁄 𑀳𑀺 𑀯𑀻𑀢𑀺𑀓𑁆𑀓𑀫𑀓𑁆𑀔𑀡𑁂 𑀳𑁂𑀢𑀼 𑀳𑀼𑀢𑁆𑀯𑀸 𑀧𑀘𑁆𑀙𑀸 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀸𑀧𑀦𑀓𑁆𑀔𑀡𑁂 𑀓𑀭𑀡𑀫𑁆𑀧𑀺 𑀳𑁄𑀢𑀻𑀢𑀺. 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀜𑁆𑀜𑀸𑀧𑀬𑀦𑁆𑀢𑁄𑀢𑀺 𑀯𑀻𑀢𑀺𑀓𑁆𑀓𑀫𑀁 𑀧𑀼𑀘𑁆𑀙𑀺𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀑𑀢𑀺𑀡𑁆𑀡𑀯𑀢𑁆𑀣𑀼𑀁 𑀢𑀁 𑀧𑀼𑀕𑁆𑀕𑀮𑀁 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸, 𑀯𑀺𑀕𑀭𑀳𑀺𑀢𑁆𑀯𑀸 𑀘 𑀢𑀁 𑀢𑀁 𑀯𑀢𑁆𑀣𑀼𑀑𑀢𑀺𑀡𑁆𑀡𑀓𑀸𑀮𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑁂𑀦𑁂𑀯 𑀓𑀸𑀮𑁂𑀦 𑀓𑀭𑀡𑀪𑀽𑀢𑁂𑀦 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀜𑁆𑀜𑀧𑁂𑀦𑁆𑀢𑁄. 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀳𑁂𑀢𑀼𑀜𑁆𑀘 𑀅𑀧𑁂𑀓𑁆𑀔𑀫𑀸𑀦𑁄𑀢𑀺 𑀢𑀢𑀺𑀬𑀧𑀸𑀭𑀸𑀚𑀺𑀓𑀸𑀤𑀻𑀲𑀼 (𑀧𑀸𑀭𑀸. 𑁧𑁬𑁨) 𑀯𑀺𑀬 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀳𑁂𑀢𑀼𑀪𑀽𑀢𑀁 𑀢𑀁 𑀢𑀁 𑀯𑀢𑁆𑀣𑀼𑀯𑀻𑀢𑀺𑀓𑁆𑀓𑀫𑀲𑀫𑀬𑀁 𑀅𑀧𑁂𑀓𑁆𑀔𑀫𑀸𑀦𑁄 𑀢𑁂𑀦 𑀲𑀫𑀬𑁂𑀦 𑀳𑁂𑀢𑀼𑀪𑀽𑀢𑁂𑀦 𑀪𑀕𑀯𑀸 𑀢𑀢𑁆𑀣 𑀢𑀢𑁆𑀣 𑀯𑀺𑀳𑀸𑀲𑀻𑀢𑀺 𑀅𑀢𑁆𑀣𑁄.

‘‘𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀜𑁆𑀜𑀸𑀧𑀬𑀦𑁆𑀢𑁄, 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀳𑁂𑀢𑀼𑀜𑁆𑀘 𑀅𑀧𑁂𑀓𑁆𑀔𑀫𑀸𑀦𑁄’’𑀢𑀺 𑀇𑀤𑀁 𑀬𑀣𑀸𑀓𑁆𑀓𑀫𑀁 𑀓𑀭𑀡𑀪𑀸𑀯𑀲𑁆𑀲, 𑀳𑁂𑀢𑀼𑀪𑀸𑀯𑀲𑁆𑀲 𑀘 𑀲𑀫𑀢𑁆𑀣𑀦𑀯𑀘𑀦𑀁, 𑀢𑀲𑁆𑀫𑀸 𑀢𑀤𑀦𑀼𑀭𑀽𑀧𑀁 ‘‘𑀢𑁂𑀦𑀲𑀫𑀬𑁂𑀦 𑀓𑀭𑀡𑀪𑀽𑀢𑁂𑀦 𑀳𑁂𑀢𑀼𑀪𑀽𑀢𑁂𑀦𑀸’’𑀢𑀺 𑀏𑀯𑀁 𑀯𑀢𑁆𑀢𑀩𑁆𑀩𑁂𑀧𑀺 𑀧𑀞𑀫𑀁 ‘‘𑀳𑁂𑀢𑀼𑀪𑀽𑀢𑁂𑀦𑀸’’𑀢𑀺 𑀉𑀧𑁆𑀧𑀝𑀺𑀧𑀸𑀝𑀺𑀯𑀘𑀦𑀁 𑀢𑀢𑁆𑀣 𑀳𑁂𑀢𑀼𑀪𑀸𑀯𑀲𑁆𑀲 𑀲𑀸𑀢𑀺𑀲𑀬𑀫𑀥𑀺𑀧𑁆𑀧𑁂𑀢𑀢𑁆𑀢𑀸 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀪𑀕𑀯𑀸 𑀳𑀺 𑀯𑁂𑀭𑀜𑁆𑀚𑀸𑀬𑀁 𑀯𑀺𑀳𑀭𑀦𑁆𑀢𑁄 𑀥𑀫𑁆𑀫𑀲𑁂𑀦𑀸𑀧𑀢𑀺𑀢𑁆𑀣𑁂𑀭𑀲𑁆𑀲 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸𑀘𑀦𑀳𑁂𑀢𑀼𑀪𑀽𑀢𑀁 𑀧𑀭𑀺𑀯𑀺𑀢𑀓𑁆𑀓𑀲𑀫𑀬𑀁 𑀅𑀧𑁂𑀓𑁆𑀔𑀫𑀸𑀦𑁄 𑀢𑁂𑀦 𑀲𑀫𑀬𑁂𑀦 𑀳𑁂𑀢𑀼𑀪𑀽𑀢𑁂𑀦 𑀯𑀺𑀳𑀸𑀲𑀻’’𑀢𑀺 𑀢𑀻𑀲𑀼𑀧𑀺 𑀓𑀺𑀭 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. ‘‘𑀓𑀺𑀁 𑀧𑀦𑁂𑀢𑁆𑀣 𑀬𑀼𑀢𑁆𑀢𑀺𑀘𑀺𑀦𑁆𑀢𑀸𑀬, 𑀆𑀘𑀭𑀺𑀬𑀲𑁆𑀲 𑀇𑀥 𑀓𑀫𑀯𑀘𑀦𑀺𑀘𑁆𑀙𑀸 𑀦𑀢𑁆𑀣𑀻𑀢𑀺 𑀏𑀯𑀫𑁂𑀢𑀁 𑀕𑀳𑁂𑀢𑀩𑁆𑀩𑀁 𑁋 𑀅𑀜𑁆𑀜𑀸𑀲𑀼𑀧𑀺 𑀳𑀺 𑀅𑀝𑁆𑀞𑀓𑀣𑀸𑀲𑀼 𑀅𑀬𑀫𑁂𑀯 𑀅𑀦𑀼𑀓𑁆𑀓𑀫𑁄 𑀯𑀼𑀢𑁆𑀢𑁄, 𑀦 𑀘 𑀢𑀸𑀲𑀼 ‘𑀢𑁂𑀦 𑀲𑀫𑀬𑁂𑀦 𑀯𑁂𑀭𑀜𑁆𑀚𑀸𑀬𑀁 𑀯𑀺𑀳𑀭𑀢𑀻’𑀢𑀺 𑀯𑀺𑀦𑀬𑀧𑀸𑀴𑀺𑀧𑀤𑁂 𑀳𑁂𑀢𑀼𑀅𑀢𑁆𑀣𑀲𑁆𑀲𑁂𑀯 𑀲𑀸𑀢𑀺𑀲𑀬𑀁 𑀅𑀥𑀺𑀧𑁆𑀧𑁂𑀢𑀪𑀸𑀯𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑁄 𑀅𑀯𑀺𑀲𑀬𑀢𑁆𑀢𑀸, 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀜𑁆𑀜𑀸𑀧𑀬𑀦𑁆𑀢𑁄 𑀳𑁂𑀢𑀼𑀪𑀽𑀢𑁂𑀦, 𑀓𑀭𑀡𑀪𑀽𑀢𑁂𑀦 𑀘 𑀲𑀫𑀬𑁂𑀦 𑀯𑀺𑀳𑀸𑀲𑀺, 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀳𑁂𑀢𑀼𑀜𑁆𑀘 𑀅𑀧𑁂𑀓𑁆𑀔𑀫𑀸𑀦𑁄 𑀳𑁂𑀢𑀼𑀪𑀽𑀢𑁂𑀦 𑀲𑀫𑀬𑁂𑀦 𑀯𑀺𑀳𑀸𑀲𑀻𑀢𑀺 𑀏𑀯𑀫𑁂𑀢𑁆𑀣 𑀬𑀣𑀸𑀮𑀸𑀪𑀁 𑀲𑀫𑁆𑀩𑀦𑁆𑀥𑀪𑀸𑀯𑀢𑁄 𑀏𑀯𑀁 𑀯𑀼𑀢𑁆𑀢𑁄’’𑀢𑀺𑀧𑀺 𑀯𑀤𑀦𑁆𑀢𑀺. 𑀢𑀲𑁆𑀫𑀸𑀢𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀤𑀼𑀯𑀺𑀥𑀲𑁆𑀲𑀸𑀧𑀺 𑀅𑀢𑁆𑀣𑀲𑁆𑀲 𑀲𑀫𑁆𑀪𑀯𑀢𑁄. 𑀢𑀤𑀢𑁆𑀣𑀚𑁄𑀢𑀦𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀦𑀬𑁂𑀦 𑀓𑀭𑀡𑀯𑀘𑀦𑁂𑀦 𑀢𑀤𑀼𑀪𑀬𑀢𑁆𑀣𑀲𑁆𑀲 𑀚𑁄𑀢𑀦𑀢𑁆𑀣𑀁. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀯𑀺𑀦𑀬𑁂. 𑀏𑀢𑁆𑀣 𑀘 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀏𑀯 𑀯𑀻𑀢𑀺𑀓𑁆𑀓𑀫𑀲𑀫𑀬𑀲𑁆𑀲 𑀲𑀸𑀥𑀓𑀢𑀫𑀢𑁆𑀢𑀸 𑀢𑀲𑁆𑀲 𑀓𑀭𑀡𑀪𑀸𑀯𑁂 ‘‘𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀜𑁆𑀜𑀸𑀧𑀬𑀦𑁆𑀢𑁄’’𑀢𑀺 𑀅𑀚𑁆𑀛𑀸𑀳𑀭𑀺𑀢𑀧𑀤𑁂𑀦 𑀲𑀫𑁆𑀩𑀦𑁆𑀥𑁄, 𑀳𑁂𑀢𑀼𑀪𑀸𑀯𑁂 𑀧𑀦 𑀢𑀤𑀧𑁂𑀓𑁆𑀔𑀦𑀫𑀢𑁆𑀢𑀢𑁆𑀢𑀸 ‘‘𑀯𑀺𑀳𑀭𑀢𑀻’’𑀢𑀺 𑀧𑀤𑁂𑀦𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀣𑀸𑀬𑁂𑀯 𑀳𑀺 𑀯𑀼𑀢𑁆𑀢𑀁 ‘‘𑀢𑁂𑀦 𑀲𑀫𑀬𑁂𑀦 𑀳𑁂𑀢𑀼𑀪𑀽𑀢𑁂𑀦, 𑀓𑀭𑀡𑀪𑀽𑀢𑁂𑀦 𑀘 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀜𑁆𑀜𑀸𑀧𑀬𑀦𑁆𑀢𑁄, 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀳𑁂𑀢𑀼𑀜𑁆𑀘 𑀅𑀧𑁂𑀓𑁆𑀔𑀫𑀸𑀦𑁄 𑀪𑀕𑀯𑀸 𑀢𑀢𑁆𑀣 𑀢𑀢𑁆𑀣 𑀯𑀺𑀳𑀸𑀲𑀻’’𑀢𑀺. 𑀓𑀭𑀡𑀜𑁆𑀳𑀺 𑀓𑀺𑀭𑀺𑀬𑀢𑁆𑀣𑀁, 𑀦 𑀳𑁂𑀢𑀼 𑀯𑀺𑀬 𑀓𑀺𑀭𑀺𑀬𑀸𑀓𑀸𑀭𑀡𑀁. 𑀳𑁂𑀢𑀼 𑀧𑀦 𑀓𑀺𑀭𑀺𑀬𑀸𑀓𑀸𑀭𑀡𑀁, 𑀦 𑀓𑀭𑀡𑀁 𑀯𑀺𑀬 𑀓𑀺𑀭𑀺𑀬𑀢𑁆𑀣𑁄𑀢𑀺.

‘‘𑀇𑀥 𑀧𑀦𑀸’’𑀢𑀺𑀆𑀤𑀺𑀦𑀸 𑀉𑀧𑀬𑁄𑀕𑀯𑀘𑀦𑀲𑁆𑀲 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀢𑁆𑀣𑀲𑀫𑁆𑀪𑀯𑀤𑀲𑁆𑀲𑀦𑀁, 𑀅𑀘𑁆𑀘𑀦𑁆𑀢𑀫𑁂𑀯 𑀤𑀩𑁆𑀩𑀕𑀼𑀡𑀓𑀺𑀭𑀺𑀬𑀸𑀳𑀺 𑀲𑀁𑀬𑁄𑀕𑁄 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁄, 𑀦𑀺𑀭𑀦𑁆𑀢𑀭𑀫𑁂𑀯 𑀢𑁂𑀳𑀺 𑀲𑀁𑀬𑀼𑀢𑁆𑀢𑀪𑀸𑀯𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁄𑀬𑁂𑀯𑀢𑁆𑀣𑁄 𑀢𑀣𑀸. 𑀏𑀯𑀁𑀚𑀸𑀢𑀺𑀓𑁂𑀢𑀺 𑀏𑀯𑀁𑀲𑀪𑀸𑀯𑁂. 𑀓𑀣𑀁 𑀲𑀫𑁆𑀪𑀯𑀢𑀻𑀢𑀺 𑀆𑀳 ‘‘𑀬𑀜𑁆𑀳𑀻’’𑀢𑀺𑀆𑀤𑀺. 𑀅𑀘𑁆𑀘𑀦𑁆𑀢𑀫𑁂𑀯𑀸𑀢𑀺 𑀆𑀭𑀩𑁆𑀪𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀤𑁂𑀲𑀦𑀸𑀦𑀺𑀝𑁆𑀞𑀸𑀦𑀁, 𑀢𑀸𑀯 𑀏𑀓𑀁𑀲𑀫𑁂𑀯, 𑀦𑀺𑀭𑀦𑁆𑀢𑀭𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀓𑀭𑀼𑀡𑀸𑀯𑀺𑀳𑀸𑀭𑁂𑀦𑀸𑀢𑀺 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀲𑀗𑁆𑀔𑀸𑀢𑁂𑀦 𑀓𑀭𑀼𑀡𑀸𑀯𑀺𑀳𑀸𑀭𑁂𑀦. 𑀢𑀣𑀸 𑀳𑀺 𑀓𑀭𑀼𑀡𑀸𑀦𑀺𑀤𑀸𑀦𑀢𑁆𑀢𑀸 𑀤𑁂𑀲𑀦𑀸𑀬 𑀇𑀥 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺 ‘‘𑀓𑀭𑀼𑀡𑀸𑀯𑀺𑀳𑀸𑀭𑁄’’𑀢𑀺 𑀯𑀼𑀢𑁆𑀢𑀸, 𑀦 𑀧𑀦 𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑁄. 𑀦 𑀳𑀺 𑀤𑁂𑀲𑀦𑀸𑀓𑀸𑀮𑁂 𑀤𑁂𑀲𑁂𑀢𑀩𑁆𑀩𑀥𑀫𑁆𑀫𑀯𑀺𑀲𑀬𑀲𑁆𑀲 𑀤𑁂𑀲𑀦𑀸𑀜𑀸𑀡𑀲𑁆𑀲 𑀲𑀢𑁆𑀢𑀯𑀺𑀲𑀬𑀸𑀬 𑀫𑀳𑀸𑀓𑀭𑀼𑀡𑀸𑀬 𑀲𑀳𑀼𑀧𑁆𑀧𑀢𑁆𑀢𑀺 𑀲𑀫𑁆𑀪𑀯𑀢𑀺 𑀪𑀺𑀦𑁆𑀦𑀯𑀺𑀲𑀬𑀢𑁆𑀢𑀸, 𑀢𑀲𑁆𑀫𑀸 𑀓𑀭𑀼𑀡𑀸𑀬 𑀧𑀯𑀢𑁆𑀢𑁄 𑀯𑀺𑀳𑀸𑀭𑁄𑀢𑀺 𑀓𑀢𑁆𑀯𑀸 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀯𑀺𑀳𑀸𑀭𑁄 𑀇𑀥 ‘‘𑀓𑀭𑀼𑀡𑀸𑀯𑀺𑀳𑀸𑀭𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀲𑁆𑀫𑀸𑀢𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀢𑁆𑀣𑀲𑀫𑁆𑀪𑀯𑀢𑁄. 𑀢𑀤𑀢𑁆𑀣𑀚𑁄𑀢𑀦𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀦𑀬𑁂𑀦 𑀉𑀧𑀬𑁄𑀕𑀯𑀺𑀪𑀢𑁆𑀢𑀺𑀬𑀸 𑀢𑀤𑀢𑁆𑀣𑀲𑁆𑀲 𑀚𑁄𑀢𑀦𑀢𑁆𑀣𑀁 𑀉𑀧𑀬𑁄𑀕𑀦𑀺𑀤𑁆𑀤𑁂𑀲𑁄 𑀓𑀢𑁄 𑀬𑀣𑀸 ‘‘𑀫𑀸𑀲𑀁 𑀲𑀚𑁆𑀛𑀸𑀬𑀢𑀺, 𑀤𑀺𑀯𑀲𑀁 𑀪𑀼𑀜𑁆𑀚𑀢𑀻’’𑀢𑀺. 𑀢𑁂𑀦𑀸𑀢𑀺 𑀬𑁂𑀦 𑀓𑀸𑀭𑀡𑁂𑀦 𑀅𑀪𑀺𑀥𑀫𑁆𑀫𑁂, 𑀇𑀢𑁄 𑀅𑀜𑁆𑀜𑁂𑀲𑀼 𑀘 𑀲𑀼𑀢𑁆𑀢𑀧𑀤𑁂𑀲𑀼 𑀪𑀼𑀫𑁆𑀫𑀯𑀘𑀦𑀲𑁆𑀲 𑀅𑀥𑀺𑀓𑀭𑀡𑀢𑁆𑀣𑁄, 𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑀢𑁆𑀣𑁄 𑀘, 𑀯𑀺𑀦𑀬𑁂 𑀓𑀭𑀡𑀯𑀘𑀦𑀲𑁆𑀲 𑀳𑁂𑀢𑀼𑀅𑀢𑁆𑀣𑁄, 𑀓𑀭𑀡𑀢𑁆𑀣𑁄 𑀘 𑀇𑀥 𑀉𑀧𑀬𑁄𑀕𑀯𑀘𑀦𑀲𑁆𑀲 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀢𑁆𑀣𑁄 𑀲𑀫𑁆𑀪𑀯𑀢𑀺, 𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀏𑀢𑀦𑁆𑀢𑀺 𑀬𑀣𑀸 𑀯𑀼𑀢𑁆𑀢𑀲𑁆𑀲𑀢𑁆𑀣𑀲𑁆𑀲 𑀲𑀗𑁆𑀕𑀳𑀕𑀸𑀣𑀸𑀧𑀤𑀁 𑀅𑀜𑁆𑀜𑀢𑁆𑀭𑀸𑀢𑀺 𑀅𑀪𑀺𑀥𑀫𑁆𑀫𑁂 𑀇𑀢𑁄 𑀅𑀜𑁆𑀜𑁂𑀲𑀼 𑀲𑀼𑀢𑁆𑀢𑀧𑀤𑁂𑀲𑀼, 𑀯𑀺𑀦𑀬𑁂 𑀘. 𑀲𑀫𑀬𑁄𑀢𑀺 𑀲𑀫𑀬𑀲𑀤𑁆𑀤𑁄. 𑀲𑀤𑁆𑀤𑁂𑀬𑁂𑀯 𑀳𑀺 𑀯𑀺𑀪𑀢𑁆𑀢𑀺𑀧𑀭𑀸 𑀪𑀯𑀢𑀺𑀅𑀢𑁆𑀣𑁂 𑀅𑀲𑀫𑁆𑀪𑀯𑀢𑁄. 𑀲𑁄𑀢𑀺 𑀲𑁆𑀯𑁂𑀯 𑀲𑀫𑀬𑀲𑀤𑁆𑀤𑁄.

𑀏𑀯𑀁 𑀅𑀢𑁆𑀢𑀦𑁄 𑀫𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑁄𑀭𑀸𑀡𑀸𑀘𑀭𑀺𑀬𑀫𑀢𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀧𑁄𑀭𑀸𑀡𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑁄𑀭𑀸𑀡𑀸𑀢𑀺 𑀘 𑀧𑀼𑀭𑀺𑀫𑀸 𑀅𑀝𑁆𑀞𑀓𑀣𑀸𑀘𑀭𑀺𑀬𑀸. ‘‘𑀢𑀲𑁆𑀫𑀺𑀁 𑀲𑀫𑀬𑁂’’𑀢𑀺 𑀯𑀸…𑀧𑁂… ‘‘𑀏𑀓𑀁 𑀲𑀫𑀬’’𑀦𑁆𑀢𑀺 𑀯𑀸 𑀏𑀲 𑀪𑁂𑀤𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀪𑀺𑀮𑀸𑀧𑀫𑀢𑁆𑀢𑀪𑁂𑀤𑁄𑀢𑀺 𑀯𑀘𑀦𑀫𑀢𑁆𑀢𑁂𑀦 𑀪𑁂𑀤𑁄 𑀯𑀺𑀲𑁂𑀲𑁄, 𑀦 𑀧𑀦 𑀅𑀢𑁆𑀣𑁂𑀦, 𑀢𑁂𑀦𑀸𑀳 ‘‘𑀲𑀩𑁆𑀩𑀢𑁆𑀣 𑀪𑀼𑀫𑁆𑀫𑀫𑁂𑀯𑀢𑁆𑀣𑁄’’𑀢𑀺, 𑀲𑀩𑁆𑀩𑁂𑀲𑀼𑀧𑀺 𑀅𑀢𑁆𑀣𑀢𑁄 𑀆𑀥𑀸𑀭𑁄 𑀏𑀯 𑀅𑀢𑁆𑀣𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀫𑀺𑀦𑀸 𑀘 𑀯𑀘𑀦𑁂𑀦 𑀲𑀼𑀢𑁆𑀢𑀯𑀺𑀦𑀬𑁂𑀲𑀼 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑁄 𑀓𑀢𑁄, 𑀪𑀼𑀫𑁆𑀫𑀢𑁆𑀣𑁂 𑀯𑀸 𑀉𑀧𑀬𑁄𑀕𑀓𑀭𑀡𑀯𑀺𑀪𑀢𑁆𑀢𑀺𑀬𑁄 𑀲𑀺𑀤𑁆𑀥𑀸𑀢𑀺 𑀤𑀲𑁆𑀲𑁂𑀢𑀺. ‘‘𑀢𑀲𑁆𑀫𑀸’’𑀢𑀺𑀆𑀤𑀺𑀦𑀸 𑀢𑁂𑀲𑀁 𑀫𑀢𑀺𑀤𑀲𑁆𑀲𑀦𑁂 𑀕𑀼𑀡𑀫𑀸𑀳.

𑀪𑀸𑀭𑀺𑀬𑀝𑁆𑀞𑁂𑀦 𑀕𑀭𑀼. 𑀢𑀤𑁂𑀯𑀢𑁆𑀣𑀁 𑀲𑀗𑁆𑀓𑁂𑀢𑀢𑁄 𑀲𑀫𑀢𑁆𑀣𑁂𑀢𑀺 ‘‘𑀕𑀭𑀼𑀁 𑀳𑀻’’𑀢𑀺𑀆𑀤𑀺𑀦𑀸 𑀲𑀗𑁆𑀓𑁂𑀢𑀯𑀺𑀲𑀬𑁄 𑀳𑀺 𑀲𑀤𑁆𑀤𑁄 𑀢𑀁𑀯𑀯𑀢𑁆𑀣𑀺𑀢𑁄𑀬𑁂𑀯 𑀘𑁂𑀲 𑀅𑀢𑁆𑀣𑀩𑁄𑀥𑀓𑁄𑀢𑀺. 𑀕𑀭𑀼𑀦𑁆𑀢𑀺 𑀕𑀭𑀼𑀓𑀸𑀢𑀩𑁆𑀩𑀁 𑀚𑀦𑀁. ‘‘𑀮𑁄𑀓𑁂’’𑀢𑀺 𑀇𑀫𑀺𑀦𑀸 𑀦 𑀓𑁂𑀯𑀮𑀁 𑀲𑀸𑀲𑀦𑁂𑀬𑁂𑀯, 𑀮𑁄𑀓𑁂𑀧𑀺 𑀕𑀭𑀼𑀓𑀸𑀢𑀩𑁆𑀩𑀝𑁆𑀞𑁂𑀦 𑀪𑀕𑀯𑀸𑀢𑀺 𑀲𑀗𑁆𑀓𑁂𑀢𑀲𑀺𑀤𑁆𑀥𑀻𑀢𑀺 𑀤𑀲𑁆𑀲𑁂𑀢𑀺. 𑀬𑀤𑀺 𑀕𑀭𑀼𑀓𑀸𑀢𑀩𑁆𑀩𑀝𑁆𑀞𑁂𑀦 𑀪𑀕𑀯𑀸, 𑀅𑀣 𑀅𑀬𑀫𑁂𑀯 𑀲𑀸𑀢𑀺𑀲𑀬𑀁 𑀪𑀕𑀯𑀸 𑀦𑀸𑀫𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀬𑀜𑁆𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀣𑀸 𑀳𑀺 𑀮𑁄𑀓𑀦𑀸𑀣𑁄 𑀅𑀧𑀭𑀺𑀫𑀺𑀢𑀦𑀺𑀭𑀼𑀧𑀫𑀧𑁆𑀧𑀪𑀸𑀯𑀲𑀻𑀮𑀸𑀤𑀺𑀕𑀼𑀡𑀯𑀺𑀲𑁂𑀲𑀲𑀫𑀗𑁆𑀕𑀺𑀢𑀸𑀬, 𑀲𑀩𑁆𑀩𑀸𑀦𑀢𑁆𑀣𑀧𑀭𑀺𑀳𑀸𑀭𑀧𑀼𑀩𑁆𑀩𑀗𑁆𑀕𑀫𑀸𑀬 𑀦𑀺𑀭𑀯𑀲𑁂𑀲𑀳𑀺𑀢𑀲𑀼𑀔𑀯𑀺𑀥𑀸𑀦𑀢𑀧𑁆𑀧𑀭𑀸𑀬 𑀦𑀺𑀭𑀢𑀺𑀲𑀬𑀸𑀬 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀧𑀚𑀸𑀬 𑀅𑀘𑁆𑀘𑀦𑁆𑀢𑀼𑀧𑀓𑀸𑀭𑀺𑀢𑀸𑀬 𑀘 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀅𑀧𑀭𑀺𑀫𑀸𑀡𑀸𑀦𑀁 𑀲𑀢𑁆𑀢𑀸𑀦𑀁 𑀉𑀢𑁆𑀢𑀫𑀁 𑀕𑀸𑀭𑀯𑀝𑁆𑀞𑀸𑀦𑀦𑁆𑀢𑀺. 𑀦 𑀓𑁂𑀯𑀮𑀁 𑀮𑁄𑀓𑁂𑀬𑁂𑀯, 𑀅𑀣 𑀔𑁄 𑀲𑀸𑀲𑀦𑁂𑀧𑀻𑀢𑀺 𑀤𑀲𑁆𑀲𑁂𑀢𑀺 ‘‘𑀧𑁄𑀭𑀸𑀡𑁂𑀳𑀻’’𑀢𑀺𑀆𑀤𑀺𑀦𑀸, 𑀧𑁄𑀭𑀸𑀡𑁂𑀳𑀻𑀢𑀺 𑀘 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀻𑀢𑀺 𑀅𑀢𑁆𑀣𑁄. 𑀲𑁂𑀝𑁆𑀞𑀯𑀸𑀘𑀓𑀯𑀘𑀦𑀫𑁆𑀧𑀺 𑀲𑁂𑀝𑁆𑀞𑀕𑀼𑀡𑀲𑀳𑀘𑀭𑀡𑀢𑁄 𑀲𑁂𑀝𑁆𑀞𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀪𑀕𑀯𑀸𑀢𑀺 𑀯𑀘𑀦𑀁 𑀲𑁂𑀝𑁆𑀞’’𑀦𑁆𑀢𑀺. 𑀯𑀼𑀘𑁆𑀘𑀢𑀺 𑀅𑀢𑁆𑀣𑁄, 𑀏𑀢𑁂𑀦𑀸𑀢𑀺 𑀳𑀺 𑀯𑀘𑀦𑀁, 𑀲𑀤𑁆𑀤𑁄. 𑀅𑀣 𑀯𑀸 𑀯𑀼𑀘𑁆𑀘𑀢𑀻𑀢𑀺 𑀯𑀘𑀦𑀁, 𑀅𑀢𑁆𑀣𑁄, 𑀢𑀲𑁆𑀫𑀸 𑀬𑁄 ‘‘𑀪𑀕𑀯𑀸’’𑀢𑀺 𑀯𑀘𑀦𑁂𑀦 𑀯𑀘𑀦𑀻𑀬𑁄 𑀅𑀢𑁆𑀣𑁄, 𑀲𑁄 𑀲𑁂𑀝𑁆𑀞𑁄𑀢𑀺 𑀅𑀢𑁆𑀣𑁄. 𑀪𑀕𑀯𑀸𑀢𑀺 𑀯𑀘𑀦𑀫𑀼𑀢𑁆𑀢𑀫𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀕𑀸𑀭𑀯𑀬𑀼𑀢𑁆𑀢𑁄𑀢𑀺 𑀕𑀭𑀼𑀪𑀸𑀯𑀬𑀼𑀢𑁆𑀢𑁄 𑀕𑀭𑀼𑀕𑀼𑀡𑀬𑁄𑀕𑀢𑁆𑀢𑀸, 𑀲𑀸𑀢𑀺𑀲𑀬𑀁 𑀯𑀸 𑀕𑀭𑀼𑀓𑀭𑀡𑀸𑀭𑀳𑀢𑀸𑀬 𑀕𑀸𑀭𑀯𑀬𑀼𑀢𑁆𑀢𑁄, 𑀕𑀸𑀭𑀯𑀸𑀭𑀳𑁄𑀢𑀺 𑀅𑀢𑁆𑀣𑁄. 𑀬𑁂𑀦 𑀓𑀸𑀭𑀡𑀢𑁆𑀢𑀬𑁂𑀦 𑀲𑁄 𑀢𑀣𑀸𑀕𑀢𑁄 𑀕𑀭𑀼 𑀪𑀸𑀭𑀺𑀬𑀝𑁆𑀞𑁂𑀦, 𑀢𑁂𑀦 ‘‘𑀪𑀕𑀯𑀸’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀕𑀭𑀼𑀢𑀸𑀓𑀸𑀭𑀡𑀤𑀲𑁆𑀲𑀦𑀜𑁆𑀳𑁂𑀢𑀁 𑀧𑀤𑀢𑁆𑀢𑀬𑀁. ‘‘𑀲𑀺𑀧𑁆𑀧𑀸𑀤𑀺𑀲𑀺𑀓𑁆𑀔𑀸𑀧𑀓𑀸𑀧𑀺 𑀕𑀭𑀽𑀬𑁂𑀯 𑀦𑀸𑀫 𑀳𑁄𑀦𑁆𑀢𑀺, 𑀦 𑀘 𑀕𑀸𑀭𑀯𑀬𑀼𑀢𑁆𑀢𑀸, 𑀅𑀬𑀁 𑀧𑀦 𑀢𑀸𑀤𑀺𑀲𑁄 𑀦 𑀳𑁄𑀢𑀺, 𑀢𑀲𑁆𑀫𑀸 𑀕𑀭𑀽𑀢𑀺 𑀓𑀢𑁆𑀯𑀸 ‘𑀕𑀸𑀭𑀯𑀬𑀼𑀢𑁆𑀢𑁄’𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀓𑁂𑀘𑀺. 𑀏𑀯𑀁 𑀲𑀢𑀺 𑀢𑀤𑁂𑀢𑀁 𑀯𑀺𑀲𑁂𑀲𑀦𑀧𑀤𑀫𑀢𑁆𑀢𑀁, 𑀧𑀼𑀭𑀺𑀫𑀧𑀤𑀤𑁆𑀯𑀬𑀫𑁂𑀯 𑀓𑀸𑀭𑀡𑀤𑀲𑁆𑀲𑀦𑀁 𑀲𑀺𑀬𑀸.

𑀅𑀧𑀺𑀘𑀸𑀢𑀺 𑀅𑀢𑁆𑀣𑀦𑁆𑀢𑀭𑀯𑀺𑀓𑀧𑁆𑀧𑀢𑁆𑀣𑁂 𑀦𑀺𑀧𑀸𑀢𑁄, 𑀅𑀧𑀭𑁄 𑀦𑀬𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑁋

‘‘𑀯𑀡𑁆𑀡𑀕𑀫𑁄 𑀯𑀡𑁆𑀡𑀯𑀺𑀧𑀭𑀺𑀬𑀸𑀬𑁄,

𑀤𑁆𑀯𑁂 𑀘𑀸𑀧𑀭𑁂 𑀯𑀡𑁆𑀡𑀯𑀺𑀓𑀸𑀭𑀦𑀸𑀲𑀸;

𑀥𑀸𑀢𑀽𑀦𑀫𑀢𑁆𑀣𑀸𑀢𑀺𑀲𑀬𑁂𑀦 𑀬𑁄𑀕𑁄,

𑀢𑀤𑀼𑀘𑁆𑀘𑀢𑁂 𑀧𑀜𑁆𑀘𑀯𑀺𑀥𑀸 𑀦𑀺𑀭𑀼𑀢𑁆𑀢𑀻’’𑀢𑀺. 𑁋

𑀯𑀼𑀢𑁆𑀢𑀁 𑀦𑀺𑀭𑀼𑀢𑁆𑀢𑀺𑀮𑀓𑁆𑀔𑀡𑀁 𑀕𑀳𑁂𑀢𑁆𑀯𑀸, ‘‘𑀧𑀺𑀲𑁄𑀤𑀭𑀸𑀤𑀻𑀦𑀺 𑀬𑀣𑁄𑀧𑀤𑀺𑀝𑁆𑀞’’𑀦𑁆𑀢𑀺 𑀯𑀼𑀢𑁆𑀢𑀲𑀤𑁆𑀤𑀦𑀬𑁂𑀦 𑀯𑀸 𑀧𑀺𑀲𑁄𑀤𑀭𑀸𑀤𑀺𑀆𑀓𑀢𑀺𑀕𑀡𑀧𑀓𑁆𑀔𑁂𑀧𑀮𑀓𑁆𑀔𑀡𑀁 𑀕𑀳𑁂𑀢𑁆𑀯𑀸 𑀮𑁄𑀓𑀺𑀬 𑀮𑁄𑀓𑀼𑀢𑁆𑀢𑀭𑀲𑀼𑀔𑀸𑀪𑀺𑀦𑀺𑀩𑁆𑀩𑀢𑁆𑀢𑀓𑀁 𑀲𑀻𑀮𑀸𑀤𑀺𑀧𑀸𑀭𑀧𑁆𑀧𑀢𑁆𑀢𑀁 𑀪𑀸𑀕𑁆𑀬𑀫𑀲𑁆𑀲 𑀅𑀢𑁆𑀣𑀻𑀢𑀺 ‘‘𑀪𑀸𑀕𑁆𑀬𑀯𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀪𑀕𑀯𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀪𑀸𑀕𑁆𑀬𑀯𑀸’’𑀢𑀺. 𑀢𑀣𑀸 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑀓𑀺𑀮𑁂𑀲𑀲𑀢𑀲𑀳𑀲𑁆𑀲𑀸𑀦𑀺, 𑀲𑀗𑁆𑀔𑁂𑀧𑀢𑁄 𑀯𑀸 𑀧𑀜𑁆𑀘𑀫𑀸𑀭𑁂 𑀅𑀪𑀜𑁆𑀚𑀻𑀢𑀺 ‘‘𑀪𑀕𑁆𑀕𑀯𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀪𑀕𑀯𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀪𑀕𑁆𑀕𑀯𑀸’’𑀢𑀺 𑀇𑀫𑀺𑀦𑀸. 𑀮𑁄𑀓𑁂 𑀘 𑀪𑀕-𑀲𑀤𑁆𑀤𑁄 𑀇𑀲𑁆𑀲𑀭𑀺𑀬𑀥𑀫𑁆𑀫𑀬𑀲𑀲𑀺𑀭𑀻𑀓𑀸𑀫𑀧𑀬𑀢𑁆𑀢𑁂𑀲𑀼 𑀙𑀲𑀼 𑀥𑀫𑁆𑀫𑁂𑀲𑀼 𑀧𑀯𑀢𑁆𑀢𑀢𑀺, 𑀢𑁂 𑀘 𑀪𑀕𑀲𑀗𑁆𑀔𑀸𑀢𑀸 𑀥𑀫𑁆𑀫𑀸 𑀅𑀲𑁆𑀲 𑀲𑀦𑁆𑀢𑀻𑀢𑀺 𑀪𑀕𑀯𑀸𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀼𑀢𑁆𑀢𑁄 𑀪𑀕𑁂𑀳𑀺 𑀘𑀸’’𑀢𑀺 𑀯𑀼𑀢𑁆𑀢𑀁. 𑀓𑀼𑀲𑀮𑀸𑀤𑀻𑀳𑀺 𑀅𑀦𑁂𑀓𑀪𑁂𑀤𑁂𑀳𑀺 𑀲𑀩𑁆𑀩𑀥𑀫𑁆𑀫𑁂 𑀯𑀺𑀪𑀚𑀺 𑀯𑀺𑀪𑀚𑀺𑀢𑁆𑀯𑀸 𑀯𑀺𑀯𑀭𑀺𑀢𑁆𑀯𑀸 𑀤𑁂𑀲𑁂𑀲𑀻𑀢𑀺 ‘‘𑀯𑀺𑀪𑀢𑁆𑀢𑀯𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀪𑀕𑀯𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀯𑀺𑀪𑀢𑁆𑀢𑀯𑀸’’𑀢𑀺. 𑀤𑀺𑀩𑁆𑀩𑀩𑁆𑀭𑀳𑁆𑀫𑀅𑀭𑀺𑀬𑀯𑀺𑀳𑀸𑀭𑁂, 𑀓𑀸𑀬𑀘𑀺𑀢𑁆𑀢𑀉𑀧𑀥𑀺𑀯𑀺𑀯𑁂𑀓𑁂, 𑀲𑀼𑀜𑁆𑀜𑀢𑀸𑀦𑀺𑀫𑀺𑀢𑁆𑀢𑀸𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑁂, 𑀅𑀜𑁆𑀜𑁂 𑀘 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁂 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂 𑀪𑀚𑀺 𑀲𑁂𑀯𑀺 𑀩𑀳𑀼𑀮𑀫𑀓𑀸𑀲𑀻𑀢𑀺 ‘‘𑀪𑀢𑁆𑀢𑀯𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀪𑀕𑀯𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀪𑀢𑁆𑀢𑀯𑀸’’𑀢𑀺 𑀇𑀫𑀺𑀦𑀸. 𑀢𑀻𑀲𑀼 𑀪𑀯𑁂𑀲𑀼 𑀢𑀡𑁆𑀳𑀸𑀲𑀗𑁆𑀔𑀸𑀢𑀁 𑀕𑀫𑀦𑀫𑀦𑁂𑀦 𑀯𑀦𑁆𑀢𑀁 𑀯𑀫𑀺𑀢𑀦𑁆𑀢𑀺 ‘‘𑀪𑀯𑁂𑀲𑀼 𑀯𑀦𑁆𑀢𑀕𑀫𑀦𑁄’’𑀢𑀺 𑀯𑀢𑁆𑀢𑀩𑁆𑀩𑁂 𑀪𑀯𑀲𑀤𑁆𑀤𑀢𑁄 𑀪-𑀓𑀸𑀭𑀁 𑀕𑀫𑀦𑀲𑀤𑁆𑀤𑀢𑁄 𑀕-𑀓𑀸𑀭𑀁 𑀯𑀦𑁆𑀢𑀲𑀤𑁆𑀤𑀢𑁄 𑀯-𑀓𑀸𑀭𑀁 𑀆𑀤𑀸𑀬, 𑀢𑀲𑁆𑀲 𑀘 𑀤𑀻𑀖𑀁 𑀓𑀢𑁆𑀯𑀸 𑀯𑀡𑁆𑀡𑀯𑀺𑀧𑀭𑀺𑀬𑀸𑀬𑁂𑀦 ‘‘𑀪𑀕𑀯𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀯𑀦𑁆𑀢𑀕𑀫𑀦𑁄 𑀪𑀯𑁂𑀲𑀽’’𑀢𑀺 𑀯𑀼𑀢𑁆𑀢𑀁. ‘‘𑀬𑀢𑁄 𑀪𑀸𑀕𑁆𑀬𑀯𑀸, 𑀢𑀢𑁄 𑀪𑀕𑀯𑀸’’𑀢𑀺𑀆𑀤𑀺𑀦𑀸 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀁. 𑀅𑀲𑁆𑀲 𑀧𑀤𑀲𑁆𑀲𑀸𑀢𑀺 ‘‘𑀪𑀕𑀯𑀸’’𑀢𑀺 𑀧𑀤𑀲𑁆𑀲. 𑀯𑀺𑀢𑁆𑀣𑀸𑀭𑀢𑁆𑀣𑁄𑀢𑀺 𑀯𑀺𑀢𑁆𑀣𑀸𑀭𑀪𑀽𑀢𑁄 𑀅𑀢𑁆𑀣𑁄. ‘‘𑀲𑁄 𑀘𑀸’’𑀢𑀺𑀆𑀤𑀺𑀦𑀸 𑀕𑀦𑁆𑀣𑀫𑀳𑀢𑁆𑀢𑀁 𑀧𑀭𑀺𑀳𑀭𑀢𑀺. 𑀯𑀼𑀢𑁆𑀢𑁄𑀬𑁂𑀯, 𑀦 𑀧𑀦 𑀇𑀥 𑀧𑀦 𑀯𑀢𑁆𑀢𑀩𑁆𑀩𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑁆𑀲 𑀇𑀫𑀺𑀲𑁆𑀲𑀸 𑀅𑀝𑁆𑀞𑀓𑀣𑀸𑀬 𑀏𑀓𑀤𑁂𑀲𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀧𑀺𑀘 𑀪𑀕𑁂 𑀯𑀦𑀺, 𑀯𑀫𑀻𑀢𑀺 𑀯𑀸 𑀪𑀕𑀯𑀸. 𑀲𑁄 𑀳𑀺 𑀪𑀕𑁂 𑀲𑀻𑀮𑀸𑀤𑀺𑀕𑀼𑀡𑁂 𑀯𑀦𑀺 𑀪𑀚𑀺 𑀲𑁂𑀯𑀺, 𑀢𑁂 𑀯𑀸 𑀪𑀕𑀲𑀗𑁆𑀔𑀸𑀢𑁂 𑀲𑀻𑀮𑀸𑀤𑀺𑀕𑀼𑀡𑁂 𑀯𑀺𑀦𑁂𑀬𑁆𑀬𑀲𑀦𑁆𑀢𑀸𑀦𑁂𑀲𑀼 ‘‘𑀓𑀣𑀁 𑀦𑀼 𑀔𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀼’’𑀦𑁆𑀢𑀺 𑀯𑀦𑀺 𑀬𑀸𑀘𑀺 𑀧𑀢𑁆𑀣𑀬𑀺, 𑀏𑀯𑀁 𑀪𑀕𑁂 𑀯𑀦𑀻𑀢𑀺 𑀪𑀕𑀯𑀸, 𑀪𑀕𑁂 𑀯𑀸 𑀲𑀺𑀭𑀺𑀁, 𑀇𑀲𑁆𑀲𑀭𑀺𑀬𑀁, 𑀬𑀲𑀜𑁆𑀘 𑀯𑀫𑀺 𑀔𑁂𑀴𑀧𑀺𑀡𑁆𑀟𑀁 𑀯𑀺𑀬 𑀙𑀟𑁆𑀟𑀬𑀺. 𑀢𑀣𑀸 𑀳𑀺 𑀪𑀕𑀯𑀸 𑀳𑀢𑁆𑀣𑀕𑀢𑀁 𑀘𑀓𑁆𑀓𑀯𑀢𑁆𑀢𑀺𑀲𑀺𑀭𑀺𑀁, 𑀘𑀢𑀼𑀤𑀻𑀧𑀺𑀲𑁆𑀲𑀭𑀺𑀬𑀁, 𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀲𑀦𑁆𑀦𑀺𑀲𑁆𑀲𑀬𑀜𑁆𑀘 𑀲𑀢𑁆𑀢𑀭𑀢𑀦𑀲𑀫𑀼𑀚𑁆𑀚𑀮𑀁 𑀬𑀲𑀁 𑀅𑀦𑀧𑁂𑀓𑁆𑀔𑁄 𑀙𑀟𑁆𑀟𑀬𑀺. 𑀅𑀣 𑀯𑀸 𑀪𑀸𑀦𑀺 𑀦𑀸𑀫 𑀦𑀓𑁆𑀔𑀢𑁆𑀢𑀸𑀦𑀺, 𑀢𑁂𑀳𑀺 𑀲𑀫𑀁 𑀕𑀘𑁆𑀙𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀪𑀕𑀸 𑀆𑀓𑀸𑀭𑀲𑁆𑀲 𑀭𑀲𑁆𑀲𑀁 𑀓𑀢𑁆𑀯𑀸, 𑀲𑀺𑀦𑁂𑀭𑀼𑀬𑀼𑀕𑀦𑁆𑀥𑀭𑀸𑀤𑀺𑀕𑀢𑀸 𑀪𑀸𑀚𑀦𑀮𑁄𑀓𑀲𑁄𑀪𑀸. 𑀢𑀸 𑀪𑀕𑀸 𑀯𑀫𑀺 𑀢𑀧𑁆𑀧𑀝𑀺𑀩𑀤𑁆𑀥𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑁂𑀦 𑀧𑀚𑀳𑀺, 𑀏𑀯𑀁 𑀪𑀕𑁂 𑀯𑀫𑀻𑀢𑀺 𑀪𑀕𑀯𑀸𑀢𑀺 𑀏𑀯𑀫𑀸𑀤𑀻𑀳𑀺 𑀢𑀢𑁆𑀣 𑀢𑀢𑁆𑀣𑀸𑀕𑀢𑀦𑀬𑁂𑀳𑀺 𑀘𑀲𑁆𑀲 𑀅𑀢𑁆𑀣𑁄 𑀯𑀢𑁆𑀢𑀩𑁆𑀩𑁄, 𑀅𑀫𑁆𑀳𑁂𑀳𑀺 𑀧𑀦 𑀲𑁄 𑀕𑀦𑁆𑀣𑀪𑀻𑀭𑀼𑀚𑀦𑀸𑀦𑀼𑀕𑁆𑀕𑀳𑀡𑀢𑁆𑀣𑀁, 𑀕𑀦𑁆𑀣𑀕𑀭𑀼𑀢𑀸𑀧𑀭𑀺𑀳𑀭𑀡𑀢𑁆𑀣𑀜𑁆𑀘 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑁄𑀢𑀺.

𑀏𑀯𑀫𑁂𑀢𑁂𑀲𑀁 𑀅𑀯𑀬𑀯𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀫𑀼𑀤𑀸𑀬𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀧𑀼𑀭𑀺𑀫𑀧𑀤𑀢𑁆𑀢𑀬𑀲𑁆𑀲 𑀲𑀫𑀼𑀤𑀸𑀬𑀢𑁆𑀣𑁂𑀦 𑀯𑀼𑀢𑁆𑀢𑀸𑀯𑀲𑁂𑀲𑁂𑀦 𑀢𑁂𑀲𑀫𑀢𑁆𑀣𑀸𑀦𑀁 𑀧𑀝𑀺𑀬𑁄𑀕𑀺𑀢𑀸𑀬 𑀢𑁂𑀦𑀸𑀧𑀺 𑀲𑀳 𑀤𑀲𑁆𑀲𑁂𑀢𑀼𑀁 ‘‘𑀏𑀢𑁆𑀢𑀸𑀯𑀢𑀸’’𑀢𑀺𑀆𑀤𑀺𑀫𑀸𑀳. 𑀏𑀢𑁆𑀢𑀸𑀯𑀢𑀸𑀢𑀺 𑀏𑀢𑀲𑁆𑀲 ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺 𑀯𑀘𑀦𑁂𑀦 ‘‘𑀏𑀓𑀁 𑀲𑀫𑀬𑀁 𑀪𑀕𑀯𑀸’’ 𑀢𑀺𑀯𑀘𑀦𑁂𑀦𑀸𑀢𑀺 𑀇𑀫𑁂𑀳𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑀯𑀘𑀦𑁂. 𑀬𑀣𑀸𑀲𑀼𑀢𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄𑀢𑀺 𑀏𑀢𑁆𑀣 𑀅𑀦𑁆𑀢-𑀲𑀤𑁆𑀤𑁄 𑀳𑁂𑀢𑀼𑀅𑀢𑁆𑀣𑁄. 𑀢𑀣𑀸𑀤𑁂𑀲𑀺𑀢𑀢𑁆𑀢𑀸 𑀳𑀺 𑀧𑀘𑁆𑀘𑀓𑁆𑀔𑀁 𑀓𑀭𑁄𑀢𑀺 𑀦𑀸𑀫. 𑀏𑀲 𑀦𑀬𑁄 𑀅𑀧𑀭𑀢𑁆𑀣𑀸𑀧𑀺. ‘‘𑀬𑁄 𑀔𑁄 𑀆𑀦𑀦𑁆𑀤, 𑀫𑀬𑀸 𑀥𑀫𑁆𑀫𑁄 𑀘…𑀧𑁂… 𑀲𑀢𑁆𑀣𑀸’’𑀢𑀺 𑀯𑀘𑀦𑀢𑁄 𑀥𑀫𑁆𑀫𑀲𑁆𑀲 𑀲𑀢𑁆𑀣𑀼𑀪𑀸𑀯𑀧𑀭𑀺𑀬𑀸𑀬𑁄 𑀯𑀺𑀚𑁆𑀚𑀢𑁂𑀯𑀸𑀢𑀺 𑀓𑀢𑁆𑀯𑀸 ‘‘𑀥𑀫𑁆𑀫𑀲𑀭𑀻𑀭𑀁 𑀧𑀘𑁆𑀘𑀓𑁆𑀔𑀁 𑀓𑀭𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀥𑀫𑁆𑀫𑀓𑀸𑀬𑀦𑁆𑀢𑀺 𑀳𑀺 𑀪𑀕𑀯𑀢𑁄 𑀲𑀫𑁆𑀩𑀦𑁆𑀥𑀻𑀪𑀽𑀢𑀁 𑀥𑀫𑁆𑀫𑀲𑀗𑁆𑀔𑀸𑀢𑀁 𑀓𑀸𑀬𑀦𑁆𑀢𑀺 𑀅𑀢𑁆𑀣𑁄. 𑀢𑀣𑀸 𑀘 𑀯𑀼𑀢𑁆𑀢𑀁 ‘‘𑀥𑀫𑁆𑀫𑀓𑀸𑀬𑁄𑀢𑀺 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺. 𑀢𑀁 𑀧𑀦 𑀓𑀺𑀫𑀢𑁆𑀣𑀺𑀬𑀦𑁆𑀢𑀺 𑀆𑀳 ‘‘𑀢𑁂𑀦𑀸’’𑀢𑀺𑀆𑀤𑀺. 𑀢𑁂𑀦𑀸𑀢𑀺 𑀘 𑀢𑀸𑀤𑀺𑀲𑁂𑀦 𑀧𑀘𑁆𑀘𑀓𑁆𑀔𑀓𑀭𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀇𑀤𑀁 𑀅𑀥𑀼𑀦𑀸 𑀯𑀓𑁆𑀔𑀫𑀸𑀦𑀲𑀼𑀢𑁆𑀢𑀁 𑀧𑀸𑀯𑀘𑀦𑀁 𑀧𑀓𑀝𑁆𑀞𑀁 𑀉𑀢𑁆𑀢𑀫𑀁 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑀘𑀦𑀁 𑀦𑀸𑀫. 𑀢𑀲𑁆𑀫𑀸 𑀢𑀼𑀫𑁆𑀳𑀸𑀓𑀁 𑀅𑀢𑀺𑀓𑁆𑀓𑀦𑁆𑀢𑀲𑀢𑁆𑀣𑀼𑀓𑀁 𑀅𑀢𑀻𑀢𑀲𑀢𑁆𑀣𑀼𑀓𑀪𑀸𑀯𑁄 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀪𑀸𑀯𑀧𑁆𑀧𑀥𑀸𑀦𑁄 𑀳𑀺 𑀅𑀬𑀁 𑀦𑀺𑀤𑁆𑀤𑁂𑀲𑁄, 𑀪𑀸𑀯𑀮𑁄𑀧𑁄 𑀯𑀸, 𑀇𑀢𑀭𑀣𑀸 𑀧𑀸𑀯𑀘𑀦𑀫𑁂𑀯 𑀅𑀦𑀢𑀺𑀓𑁆𑀓𑀦𑁆𑀢𑀲𑀢𑁆𑀣𑀼𑀓𑀁, 𑀲𑀢𑁆𑀣𑀼𑀅𑀤𑀲𑁆𑀲𑀦𑁂𑀦 𑀧𑀦 𑀉𑀓𑁆𑀓𑀡𑁆𑀞𑀺𑀢𑀲𑁆𑀲 𑀚𑀦𑀲𑁆𑀲 𑀅𑀢𑀺𑀓𑁆𑀓𑀦𑁆𑀢𑀲𑀢𑁆𑀣𑀼𑀓𑀪𑀸𑀯𑁄𑀢𑀺 𑀅𑀢𑁆𑀣𑁄 𑀆𑀧𑀚𑁆𑀚𑁂𑀬𑁆𑀬, 𑀏𑀯𑀜𑁆𑀘 𑀲𑀢𑀺 ‘‘𑀅𑀬𑀁 𑀯𑁄 𑀲𑀢𑁆𑀣𑀸𑀢𑀺 𑀲𑀢𑁆𑀣𑀼𑀅𑀤𑀲𑁆𑀲𑀦𑁂𑀦 𑀉𑀓𑁆𑀓𑀡𑁆𑀞𑀺𑀢𑀁 𑀚𑀦𑀁 𑀲𑀫𑀲𑁆𑀲𑀸𑀲𑁂𑀢𑀻’’ 𑀢𑀺𑀯𑀘𑀦𑁂𑀦 𑀲𑀳 𑀯𑀺𑀭𑁄𑀥𑁄 𑀪𑀯𑁂𑀬𑁆𑀬𑀸𑀢𑀺 𑀯𑀤𑀦𑁆𑀢𑀺. 𑀇𑀤𑀁 𑀧𑀸𑀯𑀘𑀦𑀁 𑀲𑀢𑁆𑀣𑀼𑀓𑀺𑀘𑁆𑀘𑀦𑀺𑀧𑁆𑀨𑀸𑀤𑀦𑁂𑀦 𑀦 𑀅𑀢𑀻𑀢𑀲𑀢𑁆𑀣𑀼𑀓𑀦𑁆𑀢𑀺 𑀧𑀦 𑀅𑀢𑁆𑀣𑁄. 𑀲𑀢𑁆𑀣𑀽𑀢𑀺 𑀓𑀫𑁆𑀫𑀢𑁆𑀣𑁂 𑀙𑀝𑁆𑀞𑀻, 𑀲𑀫𑀸𑀲𑀧𑀤𑀁 𑀯𑀸 𑀏𑀢𑀁 𑀲𑀢𑁆𑀣𑀼𑀅𑀤𑀲𑁆𑀲𑀦𑁂𑀦𑀸𑀢𑀺. 𑀉𑀓𑁆𑀓𑀡𑁆𑀞𑀦𑀁 𑀉𑀓𑁆𑀓𑀡𑁆𑀞𑁄, 𑀓𑀺𑀘𑁆𑀙𑀚𑀻𑀯𑀺𑀢𑀸. ‘‘𑀓𑀞 𑀓𑀺𑀘𑁆𑀙𑀚𑀻𑀯𑀦𑁂’’𑀢𑀺 𑀳𑀺 𑀯𑀤𑀦𑁆𑀢𑀺. 𑀢𑀫𑀺𑀢𑁄 𑀧𑀢𑁆𑀢𑁄𑀢𑀺 𑀉𑀓𑁆𑀓𑀡𑁆𑀞𑀺𑀢𑁄, 𑀅𑀦𑀪𑀺𑀭𑀢𑀺𑀬𑀸 𑀯𑀸 𑀧𑀻𑀴𑀺𑀢𑁄 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀉𑀤𑁆𑀥𑀁 𑀓𑀡𑁆𑀞𑀁 𑀓𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀑𑀮𑁄𑀓𑁂𑀦𑁆𑀢𑁄 𑀆𑀳𑀺𑀡𑁆𑀟𑀢𑀺, 𑀯𑀺𑀳𑀭𑀢𑀺 𑀘𑀸𑀢𑀺 𑀉𑀓𑁆𑀓𑀡𑁆𑀞𑀺𑀢𑁄 𑀦𑀺𑀭𑀼𑀢𑁆𑀢𑀺𑀦𑀬𑁂𑀦, 𑀢𑀁 𑀉𑀓𑁆𑀓𑀡𑁆𑀞𑀺𑀢𑀁. 𑀲𑀤𑁆𑀤𑀲𑀸𑀫𑀢𑁆𑀣𑀺𑀬𑀸𑀥𑀺𑀕𑀢𑀫𑀢𑁆𑀢𑁄 𑀘𑁂𑀲, 𑀯𑁄𑀳𑀸𑀭𑀢𑁄 𑀧𑀦 𑀅𑀦𑀪𑀺𑀭𑀢𑀺𑀬𑀸 𑀧𑀻𑀴𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀲𑀫𑀲𑁆𑀲𑀸𑀲𑁂𑀢𑀻𑀢𑀺 𑀅𑀲𑁆𑀲𑀸𑀲𑀁 𑀚𑀦𑁂𑀢𑀺.

𑀢𑀲𑁆𑀫𑀺𑀁 𑀲𑀫𑀬𑁂𑀢𑀺 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀲𑀗𑁆𑀕𑀻𑀢𑀺𑀲𑀫𑀬𑁂. 𑀓𑀸𑀫𑀁 𑀯𑀺𑀚𑁆𑀚𑀫𑀸𑀦𑁂𑀧𑀺 𑀪𑀕𑀯𑀢𑀺 𑀏𑀯𑀁 𑀯𑀢𑁆𑀢𑀼𑀫𑀭𑀳𑀢𑀺, 𑀇𑀥 𑀧𑀦 𑀅𑀯𑀺𑀚𑁆𑀚𑀫𑀸𑀦𑁂𑀬𑁂𑀯 𑀢𑀲𑁆𑀫𑀺𑀁 𑀏𑀯𑀁 𑀯𑀤𑀢𑀺, 𑀢𑀲𑁆𑀫𑀸 𑀲𑀦𑁆𑀥𑀸𑀬𑀪𑀸𑀲𑀺𑀢𑀯𑀲𑁂𑀦 𑀢𑀤𑀢𑁆𑀣𑀁 𑀤𑀲𑁆𑀲𑁂𑀢𑀻𑀢𑀺 𑀆𑀳 ‘‘𑀅𑀯𑀺𑀚𑁆𑀚𑀫𑀸𑀦𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄’’𑀢𑀺. 𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼𑀯𑀲𑁂𑀦 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑀁. 𑀢𑁂𑀦𑀸𑀢𑀺 𑀢𑀣𑀸𑀲𑀸𑀥𑀦𑁂𑀦. 𑀏𑀯𑀁𑀯𑀺𑀥𑀲𑁆𑀲𑀸𑀢𑀺 𑀏𑀯𑀁𑀧𑀓𑀸𑀭𑀲𑁆𑀲, 𑀏𑀯𑀁𑀲𑀪𑀸𑀯𑀲𑁆𑀲𑀸𑀢𑀺𑀧𑀺 𑀅𑀢𑁆𑀣𑁄. 𑀦𑀸𑀫-𑀲𑀤𑁆𑀤𑁄 𑀕𑀭𑀳𑀸𑀬𑀁 𑀦𑀺𑀧𑀸𑀢𑁄 ‘‘𑀅𑀢𑁆𑀣𑀺 𑀦𑀸𑀫 𑀆𑀦𑀦𑁆𑀤 𑀣𑁂𑀭𑀁 𑀪𑀺𑀓𑁆𑀔𑀼𑀁 𑀯𑀺𑀳𑁂𑀲𑀺𑀬𑀫𑀸𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀺𑀲𑁆𑀲𑀣𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁫.𑁧𑁬𑁬) 𑀯𑀺𑀬, 𑀢𑁂𑀦 𑀏𑀤𑀺𑀲𑁄 𑀅𑀧𑀺 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀓𑀸 𑀦𑀸𑀫 𑀓𑀣𑀸 𑀅𑀜𑁆𑀜𑁂𑀲𑀦𑁆𑀢𑀺 𑀕𑀭𑀳𑀢𑁆𑀣𑀁 𑀚𑁄𑀢𑁂𑀢𑀺. 𑀅𑀭𑀺𑀬𑀥𑀫𑁆𑀫𑀲𑁆𑀲𑀸𑀢𑀺 𑀅𑀭𑀺𑀬𑀸𑀦𑀁 𑀥𑀫𑁆𑀫𑀲𑁆𑀲, 𑀅𑀭𑀺𑀬𑀪𑀽𑀢𑀲𑁆𑀲 𑀯𑀸 𑀥𑀫𑁆𑀫𑀲𑁆𑀲. 𑀤𑀲𑀯𑀺𑀥𑀲𑁆𑀲 𑀓𑀸𑀬𑀩𑀮𑀲𑁆𑀲, 𑀜𑀸𑀡𑀩𑀮𑀲𑁆𑀲 𑀘 𑀯𑀲𑁂𑀦 𑀤𑀲𑀩𑀮𑀥𑀭𑁄. 𑀯𑀚𑀺𑀭𑀲𑁆𑀲 𑀦𑀸𑀫 𑀫𑀡𑀺𑀯𑀺𑀲𑁂𑀲𑀲𑁆𑀲 𑀲𑀗𑁆𑀖𑀸𑀢𑁄 𑀲𑀫𑀽𑀳𑁄 𑀏𑀓𑀕𑁆𑀖𑀦𑁄, 𑀢𑁂𑀦 𑀲𑀫𑀸𑀦𑁄 𑀓𑀸𑀬𑁄 𑀬𑀲𑁆𑀲𑀸𑀢𑀺 𑀢𑀣𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀯𑀚𑀺𑀭𑀲𑀗𑁆𑀖𑀸𑀢𑁄 𑀦𑀸𑀫 𑀦 𑀅𑀜𑁆𑀜𑁂𑀦 𑀫𑀡𑀺𑀦𑀸 𑀯𑀸 𑀧𑀸𑀲𑀸𑀡𑁂𑀦 𑀯𑀸 𑀪𑁂𑀚𑁆𑀚𑁄, 𑀅𑀧𑀺 𑀢𑀼 𑀲𑁄𑀬𑁂𑀯 𑀅𑀜𑁆𑀜𑀁 𑀫𑀡𑀺𑀁 𑀯𑀸 𑀧𑀸𑀲𑀸𑀡𑀁 𑀯𑀸 𑀪𑀺𑀦𑁆𑀤𑀢𑀺. 𑀢𑁂𑀦𑁂𑀯 𑀯𑀼𑀢𑁆𑀢𑀁 ‘‘𑀯𑀚𑀺𑀭𑀲𑁆𑀲 𑀦𑀢𑁆𑀣𑀺 𑀓𑁄𑀘𑀺 𑀅𑀪𑁂𑀚𑁆𑀚𑁄 𑀫𑀡𑀺 𑀯𑀸 𑀧𑀸𑀲𑀸𑀡𑁄 𑀯𑀸’’𑀢𑀺, 𑀏𑀯𑀁 𑀪𑀕𑀯𑀸𑀧𑀺 𑀓𑁂𑀦𑀘𑀺 𑀅𑀪𑁂𑀚𑁆𑀚𑀲𑀭𑀻𑀭𑁄. 𑀦 𑀳𑀺 𑀪𑀕𑀯𑀢𑁄 𑀭𑀽𑀧𑀓𑀸𑀬𑁂 𑀓𑁂𑀦𑀘𑀺 𑀅𑀦𑁆𑀢𑀭𑀸𑀬𑁄 𑀓𑀸𑀢𑀼𑀁 𑀲𑀓𑁆𑀓𑀸𑀢𑀺. 𑀦𑀸𑀫𑀲𑀤𑁆𑀤𑀲𑁆𑀲 𑀕𑀭𑀳𑀸𑀚𑁄𑀢𑀓𑀢𑁆𑀢𑀸 𑀧𑀺-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀚𑁄𑀢𑀓𑁄 ‘‘𑀦 𑀓𑁂𑀯𑀮𑀁 𑀪𑀕𑀯𑀸𑀬𑁂𑀯, 𑀅𑀣 𑀔𑁄 𑀅𑀜𑁆𑀜𑁂𑀧𑀻’’𑀢𑀺. 𑀏𑀢𑁆𑀣 𑀘 𑀏𑀯𑀁𑀕𑀼𑀡𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀅𑀧𑀭𑀺𑀦𑀺𑀩𑁆𑀩𑀼𑀢𑀲𑀪𑀸𑀯𑁂𑀦 𑀪𑀯𑀺𑀢𑀼𑀁 𑀬𑀼𑀢𑁆𑀢𑁄𑀧𑀺 𑀏𑀲 𑀧𑀭𑀺𑀦𑀺𑀩𑁆𑀩𑀼𑀢𑁄 𑀏𑀯𑀸𑀢𑀺 𑀧𑀓𑀭𑀡𑀸𑀦𑀼𑀭𑀽𑀧𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀯’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀆𑀲𑀸 𑀧𑀢𑁆𑀣𑀦𑀸 𑀓𑁂𑀦 𑀚𑀦𑁂𑀢𑀩𑁆𑀩𑀸, 𑀦 𑀚𑀦𑁂𑀢𑀩𑁆𑀩𑀸 𑀏𑀯𑀸𑀢𑀺 𑀅𑀢𑁆𑀣𑁄. ‘‘𑀅𑀳𑀁 𑀘𑀺𑀭𑀁 𑀚𑀻𑀯𑀺𑀁, 𑀘𑀺𑀭𑀁 𑀚𑀻𑀯𑀸𑀫𑀺, 𑀘𑀺𑀭𑀁 𑀚𑀻𑀯𑀺𑀲𑁆𑀲𑀸𑀫𑀺, 𑀲𑀼𑀔𑀁 𑀚𑀻𑀯𑀺𑀁, 𑀲𑀼𑀔𑀁 𑀚𑀻𑀯𑀸𑀫𑀺, 𑀲𑀼𑀔𑀁 𑀚𑀻𑀯𑀺𑀲𑁆𑀲𑀸𑀫𑀻’’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀚𑀻𑀯𑀺𑀢𑀫𑀤𑁄 𑀦𑀸𑀫, 𑀢𑁂𑀦 𑀫𑀢𑁆𑀢𑁄 𑀧𑀫𑀢𑁆𑀢𑁄 𑀢𑀣𑀸. 𑀲𑀁𑀯𑁂𑀚𑁂𑀢𑀻𑀢𑀺 𑀲𑀁𑀯𑁂𑀕𑀁 𑀚𑀦𑁂𑀢𑀺, 𑀢𑀢𑁄𑀬𑁂𑀯 𑀅𑀲𑁆𑀲 𑀚𑀦𑀲𑁆𑀲 𑀲𑀤𑁆𑀥𑀫𑁆𑀫𑁂 𑀉𑀲𑁆𑀲𑀸𑀳𑀁 𑀚𑀦𑁂𑀢𑀺. 𑀲𑀁𑀯𑁂𑀚𑀦𑀜𑁆𑀳𑀺 𑀉𑀲𑁆𑀲𑀸𑀳𑀳𑁂𑀢𑀼 ‘‘𑀲𑀁𑀯𑀺𑀕𑁆𑀕𑁄 𑀬𑁄𑀦𑀺𑀲𑁄 𑀧𑀤𑀳𑀢𑀻’’𑀢𑀺 𑀯𑀘𑀦𑀢𑁄.

𑀤𑁂𑀲𑀦𑀸𑀲𑀫𑁆𑀧𑀢𑁆𑀢𑀺𑀁 𑀦𑀺𑀤𑁆𑀤𑀺𑀲𑀢𑀺 𑀯𑀓𑁆𑀔𑀫𑀸𑀦𑀲𑁆𑀲 𑀲𑀓𑀮𑀲𑀼𑀢𑁆𑀢𑀲𑁆𑀲 ‘‘𑀏𑀯’’𑀦𑁆𑀢𑀺 𑀦𑀺𑀤𑀲𑁆𑀲𑀦𑀢𑁄. 𑀲𑀸𑀯𑀓𑀲𑀫𑁆𑀧𑀢𑁆𑀢𑀺𑀦𑁆𑀢𑀺 𑀲𑀼𑀡𑀦𑁆𑀢𑀧𑀼𑀕𑁆𑀕𑀮𑀲𑀫𑁆𑀧𑀢𑁆𑀢𑀺𑀁 𑀦𑀺𑀤𑁆𑀤𑀺𑀲𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑁂𑀦 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀪𑀕𑀯𑀢𑀸 𑀏𑀢𑀤𑀕𑁆𑀕𑁂 𑀞𑀧𑀺𑀢𑁂𑀦, 𑀧𑀜𑁆𑀘𑀲𑀼 𑀘 𑀓𑁄𑀲𑀮𑁆𑀮𑁂𑀲𑀼 𑀆𑀬𑀲𑁆𑀫𑀢𑀸 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀧𑀲𑀁𑀲𑀺𑀢𑁂𑀦 𑀫𑀬𑀸 𑀫𑀳𑀸𑀲𑀸𑀯𑀓𑁂𑀦 𑀲𑀼𑀢𑀁, 𑀢𑀜𑁆𑀘 𑀔𑁄 𑀲𑀬𑀫𑁂𑀯 𑀲𑀼𑀢𑀁 𑀦 𑀅𑀦𑀼𑀲𑁆𑀲𑀼𑀢𑀁, 𑀦 𑀘 𑀧𑀭𑀫𑁆𑀧𑀭𑀸𑀪𑀢𑀦𑁆𑀢𑀺 𑀅𑀢𑁆𑀣𑀲𑁆𑀲 𑀤𑀻𑀧𑀦𑀢𑁄. 𑀓𑀸𑀮𑀲𑀫𑁆𑀧𑀢𑁆𑀢𑀺𑀁 𑀦𑀺𑀤𑁆𑀤𑀺𑀲𑀢𑀺 𑀪𑀕𑀯𑀸𑀢𑀺𑀲𑀤𑀲𑀦𑁆𑀦𑀺𑀥𑀸𑀦𑁂 𑀧𑀬𑀼𑀢𑁆𑀢𑀲𑁆𑀲 𑀲𑀫𑀬𑀲𑀤𑁆𑀤𑀲𑁆𑀲 𑀩𑀼𑀤𑁆𑀥𑀼𑀧𑁆𑀧𑀸𑀤-𑀧𑀝𑀺𑀫𑀡𑁆𑀟𑀺𑀢-𑀲𑀫𑀬-𑀪𑀸𑀯-𑀤𑀻𑀧𑀦𑀢𑁄. 𑀩𑀼𑀤𑁆𑀥𑀼𑀧𑁆𑀧𑀸𑀤𑀧𑀭𑀫𑀸 𑀳𑀺 𑀓𑀸𑀮𑀲𑀫𑁆𑀧𑀤𑀸. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀓𑀧𑁆𑀧𑀓𑀲𑀸𑀬𑀓𑀮𑀺𑀬𑀼𑀕𑁂, 𑀩𑀼𑀤𑁆𑀥𑀼𑀧𑁆𑀧𑀸𑀤𑁄 𑀅𑀳𑁄 𑀫𑀳𑀘𑁆𑀙𑀭𑀺𑀬𑀁;

𑀳𑀼𑀢𑀯𑀳𑀫𑀚𑁆𑀛𑁂 𑀚𑀸𑀢𑀁, 𑀲𑀫𑀼𑀤𑀺𑀢𑀫𑀓𑀭𑀦𑁆𑀤𑀫𑀭𑀯𑀺𑀦𑁆𑀤’’𑀦𑁆𑀢𑀺. (𑀤𑀻. 𑀦𑀺. 𑀝𑀻. 𑁧.𑁧; 𑀲𑀁. 𑀦𑀺. 𑀝𑀻. 𑁧.𑁧);

𑀢𑀲𑁆𑀲𑀸𑀬𑀫𑀢𑁆𑀣𑁄 𑁋 𑀓𑀧𑁆𑀧𑀲𑀗𑁆𑀔𑀸𑀢𑀓𑀸𑀮𑀲𑀜𑁆𑀘𑀬𑀲𑁆𑀲 𑀮𑁂𑀔𑀦𑀯𑀲𑁂𑀦 𑀧𑀯𑀢𑁆𑀢𑁂 𑀓𑀮𑀺𑀬𑀼𑀕𑀲𑀗𑁆𑀔𑀸𑀢𑁂 𑀲𑀓𑀭𑀸𑀚𑀲𑀫𑁆𑀫𑀢𑁂 𑀯𑀲𑁆𑀲𑀸𑀤𑀺𑀲𑀫𑀽𑀳𑁂 𑀚𑀸𑀢𑁄 𑀩𑀼𑀤𑁆𑀥𑀼𑀧𑁆𑀧𑀸𑀤𑀔𑀡𑀲𑀗𑁆𑀔𑀸𑀢𑁄 𑀤𑀺𑀦𑀲𑀫𑀽𑀳𑁄 𑀅𑀦𑁆𑀥𑀲𑁆𑀲 𑀧𑀩𑁆𑀩𑀢𑀸𑀭𑁄𑀳𑀦𑀫𑀺𑀯 𑀓𑀤𑀸𑀘𑀺 𑀧𑀯𑀢𑁆𑀢𑀦𑀝𑁆𑀞𑁂𑀦, 𑀅𑀘𑁆𑀙𑀭𑀁 𑀧𑀳𑀭𑀺𑀢𑀼𑀁 𑀬𑀼𑀢𑁆𑀢𑀝𑁆𑀞𑁂𑀦 𑀘 𑀫𑀳𑀘𑁆𑀙𑀭𑀺𑀬𑀁 𑀳𑁄𑀢𑀺. 𑀓𑀺𑀫𑀺𑀯 𑀚𑀸𑀢𑀦𑁆𑀢𑀺 𑀘𑁂? 𑀳𑀼𑀢𑀯𑀳𑀲𑀗𑁆𑀔𑀸𑀢𑀲𑁆𑀲 𑀧𑀸𑀯𑀓𑀲𑁆𑀲 𑀫𑀚𑁆𑀛𑁂 𑀲𑀫𑁆𑀫𑀸 𑀉𑀤𑀺𑀢𑀫𑀥𑀼𑀫𑀦𑁆𑀢𑀁 𑀅𑀭𑀯𑀺𑀦𑁆𑀤𑀲𑀗𑁆𑀔𑀸𑀢𑀁 𑀯𑀸𑀭𑀺𑀚𑀫𑀺𑀯 𑀚𑀸𑀢𑀦𑁆𑀢𑀺. 𑀤𑁂𑀲𑀓𑀲𑀫𑁆𑀧𑀢𑁆𑀢𑀺𑀁 𑀦𑀺𑀤𑁆𑀤𑀺𑀲𑀢𑀺 𑀕𑀼𑀡𑀯𑀺𑀲𑀺𑀝𑁆𑀞𑀲𑀢𑁆𑀢𑀼𑀢𑁆𑀢𑀫𑀕𑀸𑀭𑀯𑀸𑀥𑀺𑀯𑀘𑀦𑀢𑁄.

𑀏𑀯𑀁 𑀧𑀤𑀙𑀓𑁆𑀓𑀲𑁆𑀲 𑀧𑀤𑀸𑀦𑀼𑀓𑁆𑀓𑀫𑁂𑀦 𑀦𑀸𑀦𑀧𑁆𑀧𑀓𑀸𑀭𑀢𑁄 𑀅𑀢𑁆𑀣𑀯𑀡𑁆𑀡𑀦𑀁 𑀓𑀢𑁆𑀯𑀸 𑀇𑀤𑀸𑀦𑀺 ‘‘𑀅𑀦𑁆𑀢𑀭𑀸 𑀘 𑀭𑀸𑀚𑀕𑀳’’𑀦𑁆𑀢𑀺𑀆𑀤𑀻𑀦𑀁 𑀧𑀤𑀸𑀦𑀫𑀢𑁆𑀣𑀯𑀡𑁆𑀡𑀦𑀁 𑀓𑀭𑁄𑀦𑁆𑀢𑁄 ‘‘𑀅𑀦𑁆𑀢𑀭𑀸 𑀘𑀸’’𑀢𑀺𑀆𑀤𑀺𑀫𑀸𑀳. 𑀅𑀦𑁆𑀢𑀭𑀸 𑀘 𑀭𑀸𑀚𑀕𑀳𑀁 𑀅𑀦𑁆𑀢𑀭𑀸 𑀘 𑀦𑀸𑀴𑀦𑁆𑀤𑀦𑁆𑀢𑀺 𑀏𑀢𑁆𑀣 𑀲𑀫𑀪𑀺𑀦𑀺𑀯𑀺𑀝𑁆𑀞𑁄 𑀅𑀦𑁆𑀢𑀭𑀸-𑀲𑀤𑁆𑀤𑁄 𑀤𑀺𑀲𑁆𑀲𑀢𑀺 𑀲𑀸𑀫𑀜𑁆𑀜𑀯𑀘𑀦𑀻𑀬𑀢𑁆𑀣𑀫𑀧𑁂𑀓𑁆𑀔𑀺𑀢𑁆𑀯𑀸 𑀧𑀓𑀭𑀡𑀸𑀤𑀺𑀲𑀸𑀫𑀢𑁆𑀣𑀺𑀬𑀸𑀤𑀺𑀕𑀢𑀢𑁆𑀣𑀫𑀦𑁆𑀢𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀧𑀦𑀲𑁆𑀲 𑀦𑀸𑀦𑀢𑁆𑀣𑀪𑀸𑀯𑁄 𑀧𑀬𑁄𑀕𑀢𑁄 𑀅𑀯𑀕𑀫𑀻𑀬𑀢𑀻𑀢𑀺 𑀤𑀲𑁆𑀲𑁂𑀢𑀺 ‘‘𑀢𑀤𑀦𑁆𑀢𑀭’’𑀦𑁆𑀢𑀺𑀆𑀤𑀺𑀦𑀸. 𑀢𑀢𑁆𑀣 𑀢𑀤𑀦𑁆𑀢𑀭𑀦𑁆𑀢𑀺 𑀢𑀁 𑀓𑀸𑀭𑀡𑀁. 𑀫𑀜𑁆𑀘 𑀢𑀜𑁆𑀘 𑀫𑀦𑁆𑀢𑁂𑀦𑁆𑀢𑀺, 𑀓𑀺𑀫𑀦𑁆𑀢𑀭𑀁 𑀓𑀺𑀁 𑀓𑀸𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀚𑁆𑀚𑀦𑁆𑀢𑀭𑀺𑀓𑀸𑀬𑀸𑀢𑀺 𑀯𑀺𑀚𑁆𑀚𑀼𑀦𑀺𑀘𑁆𑀙𑀭𑀡𑀓𑁆𑀔𑀡𑁂. 𑀥𑁄𑀯𑀦𑁆𑀢𑀻 𑀇𑀢𑁆𑀣𑀻 𑀅𑀤𑁆𑀤𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑁆𑀢𑀭𑀢𑁄𑀢𑀺 𑀳𑀤𑀬𑁂. 𑀓𑁄𑀧𑀸𑀢𑀺 𑀘𑀺𑀢𑁆𑀢𑀓𑀸𑀮𑀼𑀲𑁆𑀲𑀺𑀬𑀓𑀭𑀡𑀢𑁄 𑀘𑀺𑀢𑁆𑀢𑀧𑀓𑁄𑀧𑀸 𑀭𑀸𑀕𑀸𑀤𑀬𑁄. 𑀅𑀦𑁆𑀢𑀭𑀸 𑀯𑁄𑀲𑀸𑀦𑀦𑁆𑀢𑀺 𑀆𑀭𑀫𑁆𑀪𑀦𑀺𑀧𑁆𑀨𑀢𑁆𑀢𑀻𑀦𑀁 𑀯𑁂𑀫𑀚𑁆𑀛𑁂 𑀧𑀭𑀺𑀬𑁄𑀲𑀸𑀦𑀁 𑀆𑀧𑀸𑀤𑀺. 𑀅𑀧𑀺𑀘𑀸𑀢𑀺 𑀢𑀣𑀸𑀧𑀺, 𑀏𑀯𑀁 𑀧𑀪𑀯𑀲𑀫𑁆𑀧𑀦𑁆𑀦𑁂𑀧𑀻𑀢𑀺 𑀅𑀢𑁆𑀣𑁄. 𑀤𑁆𑀯𑀺𑀦𑁆𑀦𑀁 𑀫𑀳𑀸𑀦𑀺𑀭𑀬𑀸𑀦𑀦𑁆𑀢𑀺 𑀮𑁄𑀳𑀓𑀼𑀫𑁆𑀪𑀻𑀦𑀺𑀭𑀬𑁂 𑀲𑀦𑁆𑀥𑀸𑀬𑀸𑀳. 𑀅𑀦𑁆𑀢𑀭𑀺𑀓𑀸𑀬𑀸𑀢𑀺 𑀅𑀦𑁆𑀢𑀭𑁂𑀦. 𑀭𑀸𑀚𑀕𑀳𑀦𑀕𑀭𑀁 𑀓𑀺𑀭 𑀆𑀯𑀺𑀚𑁆𑀛𑀺𑀢𑁆𑀯𑀸 𑀫𑀳𑀸𑀧𑁂𑀢𑀮𑁄𑀓𑁄. 𑀢𑀢𑁆𑀣 𑀤𑁆𑀯𑀺𑀦𑁆𑀦𑀁 𑀫𑀳𑀸𑀮𑁄𑀳𑀓𑀼𑀫𑁆𑀪𑀻𑀦𑀺𑀭𑀬𑀸𑀦𑀁 𑀅𑀦𑁆𑀢𑀭𑁂𑀦 𑀅𑀬𑀁 𑀢𑀧𑁄𑀤𑀸 𑀦𑀤𑀻 𑀆𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀲𑀸 𑀓𑀼𑀣𑀺𑀢𑀸 𑀲𑀦𑁆𑀤𑀢𑀻𑀢𑀺. 𑀲𑁆𑀯𑀸𑀬𑀫𑀺𑀥 𑀯𑀺𑀯𑀭𑁂 𑀧𑀯𑀢𑁆𑀢𑀢𑀺 𑀢𑀤𑀜𑁆𑀜𑁂𑀲𑀫𑀲𑀫𑁆𑀪𑀯𑀢𑁄. 𑀏𑀢𑁆𑀣 𑀘 ‘‘𑀢𑀤𑀦𑁆𑀢𑀭𑀁 𑀓𑁄 𑀚𑀸𑀦𑁂𑀬𑁆𑀬, (𑀅. 𑀦𑀺. 𑁬.𑁪𑁪; 𑁧𑁦.𑁭𑁫) 𑀏𑀢𑁂𑀲𑀁 𑀅𑀦𑁆𑀢𑀭𑀸 𑀓𑀧𑁆𑀧𑀸, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀸, (𑀩𑀼. 𑀯𑀁. 𑁨𑁮.𑁯) 𑀅𑀦𑁆𑀢𑀭𑀦𑁆𑀢𑀭𑀸 𑀓𑀣𑀁 𑀑𑀧𑀸𑀢𑁂𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁪𑁨𑁬; 𑀧𑀳𑀸. 𑀯. 𑁬𑁬; 𑀘𑀽𑀴𑀯. 𑁩𑁭𑁬) 𑀯𑀺𑀬 𑀓𑀸𑀭𑀡𑀯𑁂𑀫𑀚𑁆𑀛𑁂𑀲𑀼 𑀯𑀢𑁆𑀢𑀫𑀸𑀦𑀸 𑀅𑀦𑁆𑀢𑀭𑀸𑀲𑀤𑁆𑀤𑀸𑀬𑁂𑀯 𑀉𑀤𑀸𑀳𑀭𑀺𑀢𑀩𑁆𑀩𑀸 𑀲𑀺𑀬𑀼𑀁, 𑀦 𑀧𑀦 𑀘𑀺𑀢𑁆𑀢𑀔𑀡𑀯𑀺𑀯𑀭𑁂𑀲𑀼 𑀯𑀢𑁆𑀢𑀫𑀸𑀦𑀸 𑀅𑀦𑁆𑀢𑀭𑀺𑀓𑀅𑀦𑁆𑀢𑀭𑀲𑀤𑁆𑀤𑀸. 𑀅𑀦𑁆𑀢𑀭𑀸𑀲𑀤𑁆𑀤𑀲𑁆𑀲 𑀳𑀺 𑀅𑀬𑀫𑀢𑁆𑀣𑀼𑀤𑁆𑀥𑀸𑀭𑁄𑀢𑀺. 𑀅𑀬𑀁 𑀧𑀦𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄 𑀲𑀺𑀬𑀸 𑁋 𑀬𑁂𑀲𑀼 𑀅𑀢𑁆𑀣𑁂𑀲𑀼 𑀅𑀦𑁆𑀢𑀭𑀺𑀓𑀲𑀤𑁆𑀤𑁄, 𑀅𑀦𑁆𑀢𑀭𑀲𑀤𑁆𑀤𑁄 𑀘 𑀧𑀯𑀢𑁆𑀢𑀢𑀺, 𑀢𑁂𑀲𑀼 𑀅𑀦𑁆𑀢𑀭𑀸𑀲𑀤𑁆𑀤𑁄𑀧𑀻𑀢𑀺 𑀲𑀫𑀸𑀦𑀢𑁆𑀣𑀢𑁆𑀢𑀸 𑀅𑀦𑁆𑀢𑀭𑀸𑀲𑀤𑁆𑀤𑀢𑁆𑀣𑁂 𑀯𑀢𑁆𑀢𑀫𑀸𑀦𑁄 𑀅𑀦𑁆𑀢𑀭𑀺𑀓𑀲𑀤𑁆𑀤𑁄, 𑀅𑀦𑁆𑀢𑀭𑀲𑀤𑁆𑀤𑁄, 𑀘 𑀉𑀤𑀸𑀳𑀝𑁄𑀢𑀺. 𑀅𑀣 𑀯𑀸 𑀅𑀦𑁆𑀢𑀭𑀸𑀲𑀤𑁆𑀤𑁄𑀬𑁂𑀯 ‘‘𑀬𑀲𑁆𑀲𑀦𑁆𑀢𑀭𑀢𑁄’’𑀢𑀺 (𑀉𑀤𑀸. 𑁨𑁦) 𑀏𑀢𑁆𑀣 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀁 𑀭𑀲𑁆𑀲𑀁 𑀓𑀢𑁆𑀯𑀸 𑀯𑀼𑀢𑁆𑀢𑁄 𑁋

‘‘𑀬𑀲𑁆𑀲𑀦𑁆𑀢𑀭𑀢𑁄 𑀦 𑀲𑀦𑁆𑀢𑀺 𑀓𑁄𑀧𑀸,

𑀇𑀢𑀺𑀪𑀯𑀸𑀪𑀯𑀢𑀜𑁆𑀘 𑀯𑀻𑀢𑀺𑀯𑀢𑁆𑀢𑁄;

𑀢𑀁 𑀯𑀺𑀕𑀢𑀪𑀬𑀁 𑀲𑀼𑀔𑀺𑀁 𑀅𑀲𑁄𑀓𑀁,

𑀤𑁂𑀯𑀸 𑀦𑀸𑀦𑀼𑀪𑀯𑀦𑁆𑀢𑀺 𑀤𑀲𑁆𑀲𑀦𑀸𑀬𑀸’’𑀢𑀺. (𑀉𑀤𑀸. 𑁨𑁦); 𑁋

𑀳𑀺 𑀅𑀬𑀁 𑀉𑀤𑀸𑀦𑁂 𑀪𑀤𑁆𑀤𑀺𑀬𑀲𑀼𑀢𑁆𑀢𑁂 𑀕𑀸𑀣𑀸. 𑀲𑁄𑀬𑁂𑀯 𑀇𑀓-𑀲𑀤𑁆𑀤𑁂𑀦 𑀲𑀓𑀢𑁆𑀣𑀧𑀯𑀢𑁆𑀢𑁂𑀦 𑀧𑀤𑀁 𑀯𑀟𑁆𑀠𑁂𑀢𑁆𑀯𑀸 ‘‘𑀅𑀦𑁆𑀢𑀭𑀺𑀓𑀸𑀬𑀸’’𑀢𑀺 𑀘 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀉𑀤𑀸𑀳𑀭𑀡𑁄𑀤𑀸𑀳𑀭𑀺𑀢𑀩𑁆𑀩𑀸𑀦𑀫𑁂𑀢𑁆𑀣 𑀯𑀺𑀭𑁄𑀥𑀸𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄𑀢𑀺. 𑀓𑀺𑀫𑀢𑁆𑀣𑀁 𑀅𑀢𑁆𑀣𑀯𑀺𑀲𑁂𑀲𑀦𑀺𑀬𑀫𑁄 𑀓𑀢𑁄𑀢𑀺 𑀆𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺. 𑀦𑀦𑀼 𑀘𑁂𑀢𑁆𑀣 𑀉𑀧𑀬𑁄𑀕𑀯𑀘𑀦𑀫𑁂𑀯, 𑀅𑀣 𑀓𑀲𑁆𑀫𑀸 𑀲𑀫𑁆𑀩𑀦𑁆𑀥𑀻𑀬𑀢𑁆𑀣𑁄 𑀯𑀼𑀢𑁆𑀢𑁄, 𑀲𑀫𑁆𑀩𑀦𑁆𑀥𑀻𑀬𑀢𑁆𑀣𑁂 𑀯𑀸 𑀓𑀲𑁆𑀫𑀸 𑀉𑀧𑀬𑁄𑀕𑀯𑀘𑀦𑀁 𑀓𑀢𑀦𑁆𑀢𑀺 𑀅𑀦𑀼𑀬𑁄𑀕𑀲𑀫𑁆𑀪𑀯𑀢𑁄 𑀢𑀁 𑀧𑀭𑀺𑀳𑀭𑀺𑀢𑀼𑀁 ‘‘𑀅𑀦𑁆𑀢𑀭𑀸𑀲𑀤𑁆𑀤𑁂𑀦 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑁂𑀦 𑀲𑀫𑁆𑀩𑀦𑁆𑀥𑀻𑀬𑀢𑁆𑀣𑁂 𑀲𑀸𑀫𑀺𑀯𑀘𑀦𑀧𑁆𑀧𑀲𑀗𑁆𑀕𑁂 𑀲𑀤𑁆𑀤𑀦𑁆𑀢𑀭𑀬𑁄𑀕𑁂𑀦 𑀮𑀤𑁆𑀥𑀫𑀺𑀤𑀁 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀺, 𑀦 𑀓𑁂𑀯𑀮𑀁 𑀲𑀸𑀲𑀦𑁂𑀯, 𑀮𑁄𑀓𑁂𑀧𑀺 𑀏𑀯𑀫𑁂𑀯𑀺𑀤𑀁 𑀮𑀤𑁆𑀥𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀈𑀤𑀺𑀲𑁂𑀲𑀼 𑀘𑀸’’𑀢𑀺𑀆𑀤𑀺𑀫𑀸𑀳. 𑀯𑀺𑀲𑁂𑀲𑀬𑁄𑀕𑀢𑀸𑀤𑀲𑁆𑀲𑀦𑀫𑀼𑀔𑁂𑀦 𑀳𑀺 𑀅𑀬𑀫𑀢𑁆𑀣𑁄𑀧𑀺 𑀤𑀲𑁆𑀲𑀺𑀢𑁄. 𑀏𑀓𑁂𑀦𑀧𑀺 𑀅𑀦𑁆𑀢𑀭𑀸-𑀲𑀤𑁆𑀤𑁂𑀦 𑀬𑀼𑀢𑁆𑀢𑀢𑁆𑀢𑀸 𑀤𑁆𑀯𑁂 𑀉𑀧𑀬𑁄𑀕𑀯𑀘𑀦𑀸𑀦𑀺 𑀓𑀸𑀢𑀩𑁆𑀩𑀸𑀦𑀺. 𑀤𑁆𑀯𑀻𑀳𑀺 𑀧𑀦 𑀬𑁄𑀕𑁂 𑀓𑀸 𑀓𑀣𑀸𑀢𑀺 𑀅𑀢𑁆𑀣𑀲𑁆𑀲 𑀲𑀺𑀚𑁆𑀛𑀦𑀢𑁄. 𑀅𑀓𑁆𑀔𑀭𑀁 𑀘𑀺𑀦𑁆𑀢𑁂𑀦𑁆𑀢𑀺 𑀮𑀺𑀗𑁆𑀕𑀯𑀺𑀪𑀢𑁆𑀢𑀺𑀬𑀸𑀤𑀻𑀳𑀻𑀢𑀺 𑀅𑀓𑁆𑀔𑀭𑀘𑀺𑀦𑁆𑀢𑀓𑀸, 𑀲𑀤𑁆𑀤𑀯𑀺𑀤𑀽. 𑀅𑀓𑁆𑀔𑀭-𑀲𑀤𑁆𑀤𑁂𑀦 𑀘𑁂𑀢𑁆𑀣 𑀢𑀫𑁆𑀫𑀽𑀮𑀓𑀸𑀦𑀺 𑀧𑀤𑀸𑀤𑀻𑀦𑀺𑀧𑀺 𑀕𑀳𑁂𑀢𑀩𑁆𑀩𑀸𑀦𑀺. 𑀬𑀤𑀺𑀧𑀺 𑀲𑀤𑁆𑀤𑀢𑁄 𑀏𑀓𑀫𑁂𑀯 𑀬𑀼𑀚𑁆𑀚𑀦𑁆𑀢𑀺, 𑀅𑀢𑁆𑀣𑀢𑁄 𑀧𑀦 𑀲𑁄 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀬𑁄𑀚𑁂𑀢𑀩𑁆𑀩𑁄 𑀏𑀓𑀲𑁆𑀲𑀸𑀧𑀺 𑀧𑀤𑀲𑁆𑀲 𑀆𑀯𑀼𑀢𑁆𑀢𑀺𑀬𑀸𑀤𑀺𑀦𑀬𑁂𑀦 𑀅𑀦𑁂𑀓𑀥𑀸 𑀲𑀫𑁆𑀧𑀚𑁆𑀚𑀦𑀢𑁄𑀢𑀺 𑀤𑀲𑁆𑀲𑁂𑀢𑀺 ‘‘𑀤𑀼𑀢𑀺𑀬𑀧𑀤𑁂𑀦𑀧𑀻’’𑀢𑀺𑀆𑀤𑀺𑀦𑀸. 𑀓𑁄 𑀧𑀦 𑀤𑁄𑀲𑁄 𑀅𑀬𑁄𑀚𑀺𑀢𑁂𑀢𑀺 𑀆𑀳 ‘‘𑀅𑀬𑁄𑀚𑀺𑀬𑀫𑀸𑀦𑁂 𑀉𑀧𑀬𑁄𑀕𑀯𑀘𑀦𑀁 𑀦 𑀧𑀸𑀧𑀼𑀡𑀸𑀢𑀻’’𑀢𑀺. 𑀤𑀼𑀢𑀺𑀬𑀧𑀤𑀁 𑀦 𑀧𑀸𑀧𑀼𑀡𑀸𑀢𑀻𑀢𑀺 𑀅𑀢𑁆𑀣𑁄 𑀲𑀤𑁆𑀤𑀦𑁆𑀢𑀭𑀬𑁄𑀕𑀯𑀲𑀸 𑀲𑀤𑁆𑀤𑁂𑀬𑁂𑀯 𑀲𑀸𑀫𑀺𑀯𑀘𑀦𑀧𑁆𑀧𑀲𑀗𑁆𑀕𑁂 𑀉𑀧𑀬𑁄𑀕𑀯𑀺𑀪𑀢𑁆𑀢𑀺𑀬𑀸 𑀇𑀘𑁆𑀙𑀺𑀢𑀢𑁆𑀢𑀸. 𑀲𑀤𑁆𑀤𑀸𑀥𑀺𑀓𑀸𑀭𑁄 𑀳𑀺 𑀯𑀺𑀪𑀢𑁆𑀢𑀺𑀧𑀬𑁄𑀕𑁄.

𑀅𑀤𑁆𑀥𑀸𑀦-𑀲𑀤𑁆𑀤𑁄 𑀤𑀻𑀖𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀤𑀻𑀖𑀫𑀕𑁆𑀕’’𑀦𑁆𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀧𑀦 𑀲𑁄 𑀤𑀻𑀖𑁄 𑀦𑀸𑀫 𑀢𑀤𑀢𑁆𑀣𑀪𑀽𑀢𑁄𑀢𑀺 𑀘𑁄𑀤𑀦𑀫𑀧𑀦𑁂𑀢𑀺 ‘‘𑀅𑀤𑁆𑀥𑀸𑀦𑀕𑀫𑀦𑀲𑀫𑀬𑀲𑁆𑀲 𑀳𑀻’’𑀢𑀺𑀆𑀤𑀺𑀦𑀸. 𑀅𑀤𑁆𑀥𑀸𑀦𑀕𑀫𑀦𑀲𑀫𑀬𑀲𑁆𑀲 𑀯𑀺𑀪𑀗𑁆𑀕𑁂𑀢𑀺 𑀕𑀡𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀸𑀤𑀻𑀲𑀼 𑀅𑀤𑁆𑀥𑀸𑀦𑀕𑀫𑀦𑀲𑀫𑀬𑀲𑀤𑁆𑀤𑀲𑁆𑀲 𑀧𑀤𑀪𑀸𑀚𑀦𑀻𑀬𑀪𑀽𑀢𑁂 𑀯𑀺𑀪𑀗𑁆𑀕𑁂 (𑀧𑀸𑀘𑀺. 𑁨𑁧𑁭). 𑀅𑀟𑁆𑀠𑀬𑁄𑀚𑀦𑀫𑁆𑀧𑀺 𑀅𑀤𑁆𑀥𑀸𑀦𑀫𑀕𑁆𑀕𑁄, 𑀧𑀕𑁂𑀯 𑀢𑀤𑀼𑀢𑁆𑀢𑀭𑀺. 𑀅𑀟𑁆𑀠𑀫𑁂𑀯 𑀬𑁄𑀚𑀦𑀲𑁆𑀲 𑀅𑀟𑁆𑀠𑀬𑁄𑀚𑀦𑀁, 𑀤𑁆𑀯𑀺𑀕𑀸𑀯𑀼𑀢𑀫𑀢𑁆𑀢𑀁. 𑀇𑀥 𑀧𑀦 𑀘𑀢𑀼𑀕𑀸𑀯𑀼𑀢𑀧𑁆𑀧𑀫𑀸𑀡𑀁 𑀬𑁄𑀚𑀦𑀫𑁂𑀯, 𑀢𑀲𑁆𑀫𑀸 ‘‘𑀅𑀤𑁆𑀥𑀸𑀦𑀫𑀕𑁆𑀕𑀧𑀝𑀺𑀧𑀦𑁆𑀦𑁄’’𑀢𑀺 𑀯𑀤𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀫𑀳𑀦𑁆𑀢𑀲𑀤𑁆𑀤𑁄 𑀉𑀢𑁆𑀢𑀫𑀢𑁆𑀣𑁄, 𑀩𑀳𑁆𑀯𑀢𑁆𑀣𑁄 𑀘 𑀇𑀥𑀸𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀫𑀳𑀢𑀸’’𑀢𑀺𑀆𑀤𑀺. 𑀕𑀼𑀡𑀫𑀳𑀢𑁆𑀢𑁂𑀦𑀸𑀢𑀺 𑀅𑀧𑁆𑀧𑀺𑀘𑁆𑀙𑀢𑀸𑀤𑀺𑀕𑀼𑀡𑀫𑀳𑀦𑁆𑀢𑀪𑀸𑀯𑁂𑀦. 𑀲𑀗𑁆𑀔𑁆𑀬𑀸𑀫𑀳𑀢𑁆𑀢𑁂𑀦𑀸𑀢𑀺 𑀕𑀡𑀦𑀫𑀳𑀦𑁆𑀢𑀪𑀸𑀯𑁂𑀦. 𑀢𑀤𑁂𑀯𑀢𑁆𑀣𑀁 𑀲𑀫𑀢𑁆𑀣𑁂𑀢𑀺 ‘‘𑀲𑁄 𑀳𑀻’’𑀢𑀺𑀆𑀤𑀺𑀦𑀸. 𑀲𑁄 𑀪𑀺𑀓𑁆𑀔𑀼𑀲𑀗𑁆𑀖𑁄𑀢𑀺 𑀇𑀥 𑀆𑀕𑀢𑁄 𑀢𑀤𑀸 𑀧𑀭𑀺𑀯𑀸𑀭𑀪𑀽𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑁄. 𑀫𑀳𑀸𑀢𑀺 𑀉𑀢𑁆𑀢𑀫𑁄. 𑀯𑀸𑀓𑁆𑀬𑁂𑀧𑀺 𑀳𑀺 𑀢𑀫𑀺𑀘𑁆𑀙𑀦𑁆𑀢𑀺 𑀧𑀬𑁄𑀕𑀯𑀲𑀸. 𑀅𑀧𑁆𑀧𑀺𑀘𑁆𑀙𑀢𑀸𑀢𑀺 𑀦𑀺𑀮𑁆𑀮𑁄𑀪𑀢𑀸 𑀲𑀤𑁆𑀤𑁄 𑀘𑁂𑀢𑁆𑀣 𑀲𑀸𑀯𑀲𑁂𑀲𑁄, 𑀅𑀢𑁆𑀣𑁄 𑀧𑀦 𑀦𑀺𑀭𑀯𑀲𑁂𑀲𑁄. 𑀦 𑀳𑀺 ‘‘𑀅𑀧𑁆𑀧𑀮𑁄𑀪𑀢𑀸𑀢𑀺 𑀅𑀪𑀺𑀢𑁆𑀣𑀯𑀺𑀢𑀼𑀫𑀭𑀳𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁. 𑀫𑀚𑁆𑀛𑀺𑀫𑀸𑀕𑀫𑀝𑀻𑀓𑀸𑀓𑀸𑀭𑁄 𑀧𑀦 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁄 𑀏𑀯𑀫𑀸𑀳 ‘‘𑀅𑀧𑁆𑀧𑀲𑀤𑁆𑀤𑀲𑁆𑀲 𑀧𑀭𑀺𑀢𑁆𑀢𑀧𑀭𑀺𑀬𑀸𑀬𑀁 𑀫𑀦𑀲𑀺 𑀓𑀢𑁆𑀯𑀸 ‘𑀩𑁆𑀬𑀜𑁆𑀚𑀦𑀁 𑀲𑀸𑀯𑀲𑁂𑀲𑀁 𑀯𑀺𑀬𑀸’𑀢𑀺 (𑀫𑀳𑀸𑀦𑀺. 𑀅𑀝𑁆𑀞. 𑁮𑁫) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀅𑀧𑁆𑀧𑀲𑀤𑁆𑀤𑁄 𑀧𑀦𑁂𑀢𑁆𑀣 ‘𑀅𑀪𑀸𑀯𑀢𑁆𑀣𑁄’ 𑀢𑀺𑀧𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁 ‘𑀅𑀧𑁆𑀧𑀸𑀩𑀸𑀥𑀢𑀜𑁆𑀘𑀲𑀜𑁆𑀚𑀸𑀦𑀸𑀫𑀻’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁨𑁫) 𑀯𑀺𑀬𑀸’’𑀢𑀺. 𑀲𑀗𑁆𑀔𑁆𑀬𑀸𑀬𑀧𑀺 𑀫𑀳𑀸𑀢𑀺 𑀕𑀡𑀦𑀸𑀬𑀧𑀺 𑀩𑀳𑀼 𑀅𑀳𑁄𑀲𑀺, ‘‘𑀪𑀺𑀓𑁆𑀔𑀼𑀲𑀗𑁆𑀖𑁄’’𑀢𑀺 𑀧𑀤𑀸𑀯𑀢𑁆𑀣𑀺𑀓𑀦𑁆𑀢𑀯𑀘𑀦𑀯𑀲𑁂𑀦 𑀲𑀁𑀯𑀡𑁆𑀡𑁂𑀢𑀩𑁆𑀩𑀧𑀤𑀲𑁆𑀲 𑀙𑁂𑀤𑀦𑀫𑀺𑀯 𑀳𑁄𑀢𑀻𑀢𑀺 𑀢𑀤𑀧𑀭𑀸𑀫𑀲𑀺𑀢𑁆𑀯𑀸 ‘‘𑀢𑁂𑀦 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺 𑀧𑀼𑀦 𑀯𑀸𑀓𑁆𑀬𑀸𑀯𑀢𑁆𑀣𑀺𑀓𑀦𑁆𑀢𑀯𑀘𑀦𑀯𑀲𑁂𑀦 𑀲𑀁𑀯𑀡𑁆𑀡𑁂𑀢𑀩𑁆𑀩𑀧𑀤𑁂𑀦 𑀲𑀤𑀺𑀲𑀻𑀓𑀭𑀡𑀁. 𑀏𑀲𑀸 𑀳𑀺 𑀲𑀁𑀯𑀡𑁆𑀡𑀦𑀓𑀸𑀦𑀁 𑀧𑀓𑀢𑀺, 𑀬𑀤𑀺𑀤𑀁 𑀯𑀺𑀪𑀢𑁆𑀢𑀺𑀬𑀸𑀦𑀧𑁂𑀓𑁆𑀔𑀸𑀯𑀲𑁂𑀦 𑀬𑀣𑀸𑀭𑀳𑀁 𑀲𑀁𑀯𑀡𑁆𑀡𑁂𑀢𑀩𑁆𑀩𑀧𑀤𑀢𑁆𑀣𑀁 𑀲𑀁𑀯𑀡𑁆𑀡𑁂𑀢𑁆𑀯𑀸 𑀧𑀼𑀦 𑀢𑀢𑁆𑀣 𑀯𑀺𑀚𑁆𑀚𑀫𑀸𑀦𑀯𑀺𑀪𑀢𑁆𑀢𑀺𑀯𑀲𑁂𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀦𑀺𑀓𑁆𑀔𑀺𑀧𑀦𑀦𑁆𑀢𑀺. 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑁂𑀦 𑀲𑀁𑀳𑀢𑀢𑁆𑀢𑀸 𑀲𑀗𑁆𑀖𑁄𑀢𑀺 𑀇𑀫𑀫𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑁄 𑀆𑀳 ‘‘𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑀲𑀗𑁆𑀖𑀸𑀢𑁂𑀦 𑀲𑀫𑀡𑀕𑀡𑁂𑀦𑀸’’𑀢𑀺. 𑀏𑀢𑁆𑀣 𑀧𑀦 ‘‘𑀬𑀸𑀬𑀁 𑀤𑀺𑀝𑁆𑀞𑀺 𑀅𑀭𑀺𑀬𑀸 𑀦𑀺𑀬𑁆𑀬𑀸𑀦𑀺𑀓𑀸 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬, 𑀢𑀣𑀸𑀭𑀽𑀧𑀸𑀬 𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀲𑀸𑀫𑀜𑁆𑀜𑀕𑀢𑁄 𑀯𑀺𑀳𑀭𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁨𑁪, 𑁩𑁫𑁬; 𑀫. 𑀦𑀺. 𑁧.𑁪𑁯𑁨; 𑁩.𑁫𑁪; 𑀧𑀭𑀺. 𑁨𑁭𑁪) 𑀏𑀯𑀁 𑀯𑀼𑀢𑁆𑀢𑀸𑀬 𑀤𑀺𑀝𑁆𑀞𑀺𑀬𑀸. ‘‘𑀬𑀸𑀦𑀺 𑀢𑀸𑀦𑀺 𑀲𑀻𑀮𑀸𑀦𑀺 𑀅𑀔𑀡𑁆𑀟𑀸𑀦𑀺 𑀅𑀘𑁆𑀙𑀺𑀤𑁆𑀤𑀸𑀦𑀺 𑀅𑀲𑀩𑀮𑀸𑀦𑀺 𑀅𑀓𑀫𑁆𑀫𑀸𑀲𑀸𑀦𑀺 𑀪𑀼𑀚𑀺𑀲𑁆𑀲𑀸𑀦𑀺 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸𑀦𑀺 𑀅𑀧𑀭𑀸𑀫𑀝𑁆𑀞𑀸𑀦𑀺 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸𑀦𑀺, 𑀢𑀣𑀸𑀭𑀽𑀧𑁂𑀲𑀼 𑀲𑀻𑀮𑁂𑀲𑀼 𑀲𑀻𑀮𑀲𑀸𑀫𑀜𑁆𑀜𑀕𑀢𑁄 𑀯𑀺𑀳𑀭𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁨𑁩; 𑀫. 𑀦𑀺. 𑁧.𑁪𑁯𑁨; 𑁩.𑁫𑁪; 𑀅. 𑀦𑀺. 𑁬.𑁧𑁧; 𑀧𑀭𑀺. 𑁨𑁭𑁪) 𑀏𑀯𑀁 𑀯𑀼𑀢𑁆𑀢𑀸𑀦𑀜𑁆𑀘 𑀲𑀻𑀮𑀸𑀦𑀁 𑀲𑀸𑀫𑀜𑁆𑀜𑁂𑀦 𑀲𑀗𑁆𑀖𑀸𑀢𑁄 𑀲𑀗𑁆𑀖𑀝𑀺𑀢𑁄 𑀲𑀫𑁂𑀢𑁄𑀢𑀺 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑀲𑀗𑁆𑀖𑀸𑀢𑁄, 𑀲𑀫𑀡𑀕𑀡𑁄, 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑁂𑀦 𑀲𑀁𑀳𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑀲𑀗𑁆𑀖𑀸𑀝𑀲𑀗𑁆𑀔𑀸𑀢𑁂𑀦𑀸’’ 𑀢𑀺𑀧𑀺 𑀧𑀸𑀞𑁄. 𑀢𑀣𑀸 𑀲𑀗𑁆𑀔𑀸𑀢𑁂𑀦 𑀓𑀢𑀺𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀢𑀣𑀸 𑀳𑀺 𑀤𑀺𑀝𑁆𑀞𑀺𑀲𑀻𑀮𑀸𑀤𑀻𑀦𑀁 𑀦𑀺𑀬𑀢𑀲𑀪𑀸𑀯𑀢𑁆𑀢𑀸 𑀲𑁄𑀢𑀸𑀧𑀦𑁆𑀦𑀸𑀧𑀺 𑀅𑀜𑁆𑀜𑀫𑀜𑁆𑀜𑀁 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑁂𑀦 𑀲𑀁𑀳𑀢𑀸, 𑀧𑀕𑁂𑀯 𑀲𑀓𑀤𑀸𑀕𑀸𑀫𑀺𑀆𑀤𑀬𑁄, 𑀢𑀣𑀸 𑀘 𑀯𑀼𑀢𑁆𑀢𑀁 ‘‘𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄’’𑀢𑀺, (𑀲𑀁. 𑀦𑀺. 𑁨.𑁪𑁧; 𑁫.𑁧𑁯𑁮, 𑁧𑁦𑁦𑁪) ‘‘𑀅𑀝𑁆𑀞𑀸𑀦𑀫𑁂𑀢𑀁 𑀪𑀺𑀓𑁆𑀔𑀯𑁂, 𑀅𑀦𑀯𑀓𑀸𑀲𑁄, 𑀬𑀁 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀲𑀜𑁆𑀘𑀺𑀘𑁆𑀘𑀧𑀸𑀡𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺 𑀘 𑀆𑀤𑀺. 𑀅𑀭𑀺𑀬𑀧𑀼𑀕𑁆𑀕𑀮𑀲𑁆𑀲 𑀳𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀤𑀽𑀭𑁂 𑀞𑀺𑀢𑀸𑀧𑀺 𑀅𑀢𑁆𑀢𑀦𑁄 𑀕𑀼𑀡𑀲𑀸𑀫𑀕𑁆𑀕𑀺𑀬𑀸 𑀲𑀁𑀳𑀢𑀢𑀸𑀬𑁂𑀯, ‘‘𑀢𑀣𑀸𑀭𑀽𑀧𑀸𑀬 𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀲𑀸𑀫𑀜𑁆𑀜𑀕𑀢𑁄 𑀯𑀺𑀳𑀭𑀢𑀺, (𑀫. 𑀦𑀺. 𑁧.𑁪𑁯𑁨) 𑀢𑀣𑀸𑀭𑀽𑀧𑁂𑀲𑀼 𑀲𑀻𑀮𑁂𑀲𑀼 𑀲𑀻𑀮𑀲𑀸𑀫𑀜𑁆𑀜𑀕𑀢𑁄 𑀯𑀺𑀳𑀭𑀢𑀻’’𑀢𑀺 (𑀫. 𑀦𑀺. 𑁧.𑁪𑁯𑁨) 𑀯𑀘𑀦𑀢𑁄 𑀧𑀦 𑀧𑀼𑀣𑀼𑀚𑁆𑀚𑀦𑀸𑀦𑀫𑁆𑀧𑀺 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑁂𑀦 𑀲𑀁𑀳𑀢𑀪𑀸𑀯𑁄 𑀮𑀩𑁆𑀪𑀢𑀺𑀬𑁂𑀯. 𑀲𑀤𑁆𑀥𑀺𑀁-𑀲𑀤𑁆𑀤𑁄 𑀏𑀓𑀢𑁄𑀢𑀺 𑀅𑀢𑁆𑀣𑁂 𑀦𑀺𑀧𑀸𑀢𑁄. 𑀧𑀜𑁆𑀘…𑀧𑁂… 𑀫𑀢𑁆𑀢𑀸𑀦𑀻𑀢𑀺 𑀧𑀜𑁆𑀘-𑀲𑀤𑁆𑀤𑁂𑀦 𑀫𑀢𑁆𑀢𑀲𑀤𑁆𑀤𑀁 𑀲𑀗𑁆𑀔𑀺𑀧𑀺𑀢𑁆𑀯𑀸 𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑁄 𑀯𑀼𑀢𑁆𑀢𑁄. 𑀏𑀢𑁂𑀲𑀦𑁆𑀢𑀺 𑀪𑀺𑀓𑁆𑀔𑀼𑀲𑀢𑀸𑀦𑀁. 𑀧𑀼𑀦 𑀧𑀜𑁆𑀘 𑀫𑀢𑁆𑀢𑀸 𑀧𑀫𑀸𑀡𑀸𑀢𑀺 𑀩𑁆𑀬𑀸𑀲𑁄, 𑀦𑀺𑀓𑀸𑀭𑀮𑁄𑀧𑁄 𑀘𑁂𑀢𑁆𑀣 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑀸.

𑀲𑀼𑀧𑁆𑀧𑀺𑀬𑁄𑀢𑀺 𑀢𑀲𑁆𑀲 𑀦𑀸𑀫𑀫𑁂𑀯, 𑀦 𑀕𑀼𑀡𑀸𑀤𑀺. 𑀦 𑀓𑁂𑀯𑀮𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀪𑀕𑀯𑀸𑀬𑁂𑀯, 𑀅𑀣 𑀔𑁄 𑀲𑀼𑀧𑁆𑀧𑀺𑀬𑁄𑀧𑀺 𑀧𑀭𑀺𑀩𑁆𑀩𑀸𑀚𑀓𑁄 𑀩𑁆𑀭𑀳𑁆𑀫𑀤𑀢𑁆𑀢𑁂𑀦 𑀫𑀸𑀡𑀯𑁂𑀦 𑀲𑀤𑁆𑀥𑀺𑀦𑁆𑀢𑀺 𑀧𑀼𑀕𑁆𑀕𑀮𑀁 𑀲𑀫𑁆𑀧𑀺𑀡𑁆𑀟𑁂𑀢𑀺, 𑀢𑀜𑁆𑀘 𑀔𑁄 𑀫𑀕𑁆𑀕𑀧𑀝𑀺𑀧𑀦𑁆𑀦𑀲𑀪𑀸𑀕𑀢𑀸𑀬 𑀏𑀯, 𑀦 𑀲𑀻𑀮𑀸𑀘𑀸𑀭𑀸𑀤𑀺𑀲𑀪𑀸𑀕𑀢𑀸𑀬𑀸𑀢𑀺 𑀯𑀼𑀢𑁆𑀢𑀁 ‘‘𑀧𑀺-𑀓𑀸𑀭𑁄’’𑀢𑀺𑀆𑀤𑀺. 𑀲𑀼𑀔𑀼𑀘𑁆𑀘𑀸𑀭𑀡𑀯𑀲𑁂𑀦 𑀧𑀼𑀩𑁆𑀩𑀸𑀧𑀭𑀧𑀤𑀸𑀦𑀁 𑀲𑀫𑁆𑀩𑀦𑁆𑀥𑀫𑀢𑁆𑀢𑀓𑀭𑀪𑀸𑀯𑀁 𑀲𑀦𑁆𑀥𑀸𑀬 ‘‘𑀧𑀤𑀲𑀦𑁆𑀥𑀺𑀓𑀭𑁄’’𑀢𑀺 𑀯𑀼𑀢𑁆𑀢𑀁, 𑀦 𑀧𑀦 𑀲𑀭𑀩𑁆𑀬𑀜𑁆𑀚𑀦𑀸𑀤𑀺𑀲𑀦𑁆𑀥𑀺𑀪𑀸𑀯𑀁, 𑀢𑁂𑀦𑀸𑀳 ‘‘𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸𑀯𑀲𑁂𑀦 𑀯𑀼𑀢𑁆𑀢𑁄’’𑀢𑀺, 𑀏𑀢𑁂𑀦 𑀧𑀤𑀧𑀽𑀭𑀡𑀫𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀅𑀧𑀺𑀘 𑀅𑀯𑀥𑀸𑀭𑀡𑀢𑁆𑀣𑁄𑀧𑀺 𑀔𑁄-𑀲𑀤𑁆𑀤𑁄 𑀬𑀼𑀢𑁆𑀢𑁄 ‘‘𑀅𑀲𑁆𑀲𑁄𑀲𑀺 𑀔𑁄 𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁧) 𑀯𑀺𑀬, 𑀢𑁂𑀦 𑀅𑀤𑁆𑀥𑀸𑀦𑀫𑀕𑁆𑀕𑀧𑀝𑀺𑀧𑀦𑁆𑀦𑁄 𑀅𑀳𑁄𑀲𑀺𑀬𑁂𑀯, 𑀦𑀸𑀲𑁆𑀲 𑀫𑀕𑁆𑀕𑀧𑀝𑀺𑀧𑀢𑁆𑀢𑀺𑀬𑀸 𑀓𑁄𑀘𑀺 𑀅𑀦𑁆𑀢𑀭𑀸𑀬𑁄 𑀅𑀳𑁄𑀲𑀻𑀢𑀺 𑀅𑀬𑀫𑀢𑁆𑀣𑁄 𑀤𑀻𑀧𑀺𑀢𑁄 𑀳𑁄𑀢𑀺. 𑀲𑀜𑁆𑀚𑀬𑀲𑁆𑀲𑀸𑀢𑀺 𑀭𑀸𑀚𑀕𑀳𑀯𑀸𑀲𑀺𑀦𑁄 𑀲𑀜𑁆𑀚𑀬𑀦𑀸𑀫𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲, 𑀬𑀲𑁆𑀲 𑀲𑀦𑁆𑀢𑀺𑀓𑁂 𑀧𑀞𑀫𑀁 𑀉𑀧𑀢𑀺𑀲𑁆𑀲𑀓𑁄𑀮𑀺𑀢𑀸𑀧𑀺 𑀧𑀩𑁆𑀩𑀚𑀺𑀁𑀲𑀼 𑀙𑀦𑁆𑀦𑀧𑀭𑀺𑀩𑁆𑀩𑀸𑀚𑀓𑁄𑀯, 𑀦 𑀅𑀘𑁂𑀮𑀓𑀧𑀭𑀺𑀩𑁆𑀩𑀸𑀚𑀓𑁄. ‘‘𑀬𑀤𑀸, 𑀢𑀤𑀸’’𑀢𑀺 𑀘 𑀏𑀢𑁂𑀦 𑀲𑀫𑀓𑀸𑀮𑀫𑁂𑀯 𑀅𑀤𑁆𑀥𑀸𑀦𑀫𑀕𑁆𑀕𑀧𑀝𑀺𑀧𑀦𑁆𑀦𑀢𑀁 𑀤𑀲𑁆𑀲𑁂𑀢𑀺. 𑀅𑀢𑀻𑀢𑀓𑀸𑀮𑀢𑁆𑀣𑁄 𑀧𑀸𑀴𑀺𑀬𑀁 𑀳𑁄𑀢𑀺𑀲𑀤𑁆𑀤𑁄 𑀬𑁄𑀕𑀯𑀺𑀪𑀸𑀕𑁂𑀦, 𑀢𑀁𑀓𑀸𑀮𑀸𑀧𑁂𑀓𑁆𑀔𑀸𑀬 𑀯𑀸 𑀏𑀯𑀁 𑀯𑀼𑀢𑁆𑀢𑀁, 𑀢𑀤𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀅𑀦𑁆𑀢𑁂𑀢𑀺 𑀲𑀫𑀻𑀧𑁂. 𑀯𑀲𑀢𑀻𑀢𑀺 𑀯𑀢𑁆𑀢𑀧𑀝𑀺𑀯𑀢𑁆𑀢𑀸𑀤𑀺𑀓𑀭𑀡𑀯𑀲𑁂𑀦 𑀲𑀩𑁆𑀩𑀺𑀭𑀺𑀬𑀸𑀧𑀣𑀲𑀸𑀥𑀸𑀭𑀡𑀯𑀘𑀦𑀁, 𑀅𑀯𑀘𑀭𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀢𑁂𑀦𑁂𑀯𑀸𑀳 ‘‘𑀲𑀫𑀻𑀧𑀘𑀸𑀭𑁄 𑀲𑀦𑁆𑀢𑀺𑀓𑀸𑀯𑀘𑀭𑁄 𑀲𑀺𑀲𑁆𑀲𑁄’’𑀢𑀺. 𑀘𑁄𑀤𑀺𑀢𑀸 𑀤𑁂𑀯𑀤𑀽𑀢𑁂𑀳𑀻𑀢𑀺 𑀤𑀳𑀭𑀓𑀼𑀫𑀸𑀭𑁄 𑀚𑀭𑀸𑀚𑀺𑀡𑁆𑀡𑀲𑀢𑁆𑀢𑁄 𑀕𑀺𑀮𑀸𑀦𑁄 𑀓𑀫𑁆𑀫𑀓𑀸𑀭𑀡𑀸, 𑀓𑀫𑁆𑀫𑀓𑀸𑀭𑀡𑀺𑀓𑀸 𑀯𑀸 𑀫𑀢𑀲𑀢𑁆𑀢𑁄𑀢𑀺 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀤𑁂𑀯𑀤𑀽𑀢𑁂𑀳𑀺 𑀘𑁄𑀤𑀺𑀢𑀸 𑀑𑀯𑀤𑀺𑀢𑀸 𑀲𑀁𑀯𑁂𑀕𑀁 𑀉𑀧𑁆𑀧𑀸𑀤𑀺𑀢𑀸 𑀲𑀫𑀸𑀦𑀸𑀧𑀺. 𑀢𑁂 𑀳𑀺 𑀤𑁂𑀯𑀸 𑀯𑀺𑀬 𑀤𑀽𑀢𑀸, 𑀯𑀺𑀲𑀼𑀤𑁆𑀥𑀺𑀤𑁂𑀯𑀸𑀦𑀁 𑀯𑀸 𑀤𑀽𑀢𑀸𑀢𑀺 𑀤𑁂𑀯𑀤𑀽𑀢𑀸. 𑀳𑀻𑀦𑀓𑀸𑀬𑀽𑀧𑀕𑀸𑀢𑀺 𑀅𑀧𑀸𑀬𑀓𑀸𑀬𑀫𑀼𑀧𑀕𑀢𑀸. 𑀦𑀭𑀲𑀗𑁆𑀔𑀸𑀢𑀸 𑀢𑁂 𑀫𑀸𑀡𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀸𑀫𑀜𑁆𑀜𑀯𑀲𑁂𑀦 𑀘𑁂𑀢𑁆𑀣 𑀲𑀢𑁆𑀢𑁄 ‘‘𑀫𑀸𑀡𑀯𑁄’’𑀢𑀺 𑀯𑀼𑀢𑁆𑀢𑁄, 𑀇𑀢𑀭𑁂 𑀧𑀦 𑀯𑀺𑀲𑁂𑀲𑀯𑀲𑁂𑀦. 𑀧𑀓𑀭𑀡𑀸𑀥𑀺𑀕𑀢𑁄 𑀳𑁂𑀲 𑀅𑀢𑁆𑀣𑀼𑀤𑁆𑀥𑀸𑀭𑁄𑀢𑀺. 𑀓𑀢𑀓𑀫𑁆𑀫𑁂𑀳𑀻𑀢𑀺 𑀓𑀢𑀘𑁄𑀭𑀓𑀫𑁆𑀫𑁂𑀳𑀺. 𑀢𑀭𑀼𑀡𑁄𑀢𑀺 𑀲𑁄𑀴𑀲𑀯𑀲𑁆𑀲𑀢𑁄 𑀧𑀝𑁆𑀞𑀸𑀬 𑀧𑀢𑁆𑀢𑀯𑀻𑀲𑀢𑀺𑀯𑀲𑁆𑀲𑁄, 𑀉𑀤𑀸𑀦𑀝𑁆𑀞𑀓𑀣𑀸𑀬𑀜𑁆𑀳𑀺 ‘‘𑀲𑀢𑁆𑀢𑀸 𑀚𑀸𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀜𑁆𑀘𑀤𑀲𑀯𑀲𑁆𑀲𑀓𑀸, 𑀢𑀸𑀯 ‘𑀓𑀼𑀫𑀸𑀭𑀓𑀸, 𑀩𑀸𑀮𑀸’𑀢𑀺 𑀘 𑀯𑀼𑀘𑁆𑀘𑀦𑁆𑀢𑀺. 𑀢𑀢𑁄 𑀧𑀭𑀁 𑀯𑀻𑀲𑀢𑀺𑀯𑀲𑁆𑀲𑀸𑀦𑀺 ‘𑀬𑀼𑀯𑀸𑀦𑁄’’’𑀢𑀺 (𑀉𑀤𑀸. 𑀅𑀝𑁆𑀞. 𑁪𑁪) 𑀯𑀼𑀢𑁆𑀢𑀁. 𑀢𑀭𑀼𑀡𑁄, 𑀫𑀸𑀡𑀯𑁄, 𑀬𑀼𑀯𑀸𑀢𑀺 𑀘 𑀅𑀢𑁆𑀣𑀢𑁄 𑀏𑀓𑀁, 𑀮𑁄𑀓𑀺𑀬𑀸 𑀧𑀦 ‘‘𑀤𑁆𑀯𑀸𑀤𑀲𑀯𑀲𑁆𑀲𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀚𑀭𑀫𑀧𑁆𑀧𑀢𑁆𑀢𑁄, 𑀢𑀸𑀯 𑀢𑀭𑀼𑀡𑁄’’𑀢𑀺𑀧𑀺 𑀯𑀤𑀦𑁆𑀢𑀺.

𑀢𑁂𑀲𑀼 𑀯𑀸 𑀤𑁆𑀯𑀻𑀲𑀼 𑀚𑀦𑁂𑀲𑀽𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁. 𑀬𑁄 𑀯𑀸 ‘‘𑀏𑀓𑀁 𑀲𑀫𑀬’’𑀦𑁆𑀢𑀺 𑀧𑀼𑀩𑁆𑀩𑁂 𑀅𑀥𑀺𑀕𑀢𑁄 𑀓𑀸𑀮𑁄, 𑀢𑀲𑁆𑀲 𑀧𑀝𑀺𑀦𑀺𑀤𑁆𑀤𑁂𑀲𑁄 𑀢𑀢𑁆𑀭𑀸𑀢𑀺 𑀬𑀜𑁆𑀳𑀺 𑀲𑀫𑀬𑀁 𑀪𑀕𑀯𑀸 𑀅𑀦𑁆𑀢𑀭𑀸 𑀭𑀸𑀚𑀕𑀳𑀜𑁆𑀘 𑀦𑀸𑀴𑀦𑁆𑀤𑀜𑁆𑀘 𑀅𑀤𑁆𑀥𑀸𑀦𑀫𑀕𑁆𑀕𑀧𑀝𑀺𑀧𑀦𑁆𑀦𑁄, 𑀢𑀲𑁆𑀫𑀺𑀁𑀬𑁂𑀯 𑀲𑀫𑀬𑁂 𑀲𑀼𑀧𑁆𑀧𑀺𑀬𑁄𑀧𑀺 𑀢𑀁 𑀅𑀤𑁆𑀥𑀸𑀦𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀘 𑀯𑀡𑁆𑀡𑀁 𑀪𑀸𑀲𑀢𑀻𑀢𑀺. 𑀦𑀺𑀧𑀸𑀢𑀫𑀢𑁆𑀢𑀦𑁆𑀢𑀺 𑀏𑀢𑁆𑀣 𑀫𑀢𑁆𑀢𑀲𑀤𑁆𑀤𑁂𑀦 𑀯𑀺𑀲𑁂𑀲𑀢𑁆𑀣𑀸𑀪𑀸𑀯𑀢𑁄 𑀧𑀤𑀧𑀽𑀭𑀡𑀢𑁆𑀢𑀁 𑀤𑀲𑁆𑀲𑁂𑀢𑀺. 𑀫𑀥𑀼𑀧𑀺𑀡𑁆𑀟𑀺𑀓𑀧𑀭𑀺𑀬𑀸𑀬𑁄𑀢𑀺 𑀫𑀥𑀼𑀧𑀺𑀡𑁆𑀟𑀺𑀓𑀤𑁂𑀲𑀦𑀸 𑀦𑀸𑀫 𑀇𑀢𑀺 𑀦𑀁 𑀲𑀼𑀢𑁆𑀢𑀦𑁆𑀢𑀁 𑀥𑀸𑀭𑁂𑀳𑀺, 𑀭𑀸𑀚𑀜𑁆𑀜𑀸𑀢𑀺 𑀧𑀸𑀬𑀸𑀲𑀺𑀭𑀸𑀚𑀜𑁆𑀜𑀦𑀸𑀫𑀓𑀁 𑀭𑀸𑀚𑀸𑀦𑀫𑀸𑀮𑀧𑀢𑀺. 𑀧𑀭𑀺𑀬𑀸𑀬𑀢𑀺 𑀧𑀭𑀺𑀯𑀢𑁆𑀢𑀢𑀻𑀢𑀺 𑀧𑀭𑀺𑀬𑀸𑀬𑁄, 𑀯𑀸𑀭𑁄. 𑀧𑀭𑀺𑀬𑀸𑀬𑁂𑀢𑀺 𑀤𑁂𑀲𑁂𑀢𑀩𑁆𑀩𑀫𑀢𑁆𑀣𑀁 𑀧𑀝𑀺𑀧𑀸𑀤𑁂𑀢𑀻𑀢𑀺 𑀧𑀭𑀺𑀬𑀸𑀬𑁄, 𑀤𑁂𑀲𑀦𑀸. 𑀧𑀭𑀺𑀬𑀸𑀬𑀢𑀺 𑀅𑀢𑁆𑀢𑀦𑁄 𑀨𑀮𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀧𑀭𑀺𑀬𑀸𑀬𑁄, 𑀓𑀸𑀭𑀡𑀁. 𑀅𑀦𑁂𑀓𑀲𑀤𑁆𑀤𑁂𑀦𑁂𑀯 𑀅𑀦𑁂𑀓𑀯𑀺𑀥𑁂𑀦𑀸𑀢𑀺 𑀅𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺 𑀅𑀥𑀺𑀧𑁆𑀧𑀸𑀬𑀫𑀢𑁆𑀢𑁂𑀦𑀸𑀢𑀺 𑀆𑀳 ‘‘𑀅𑀦𑁂𑀓𑀯𑀺𑀥𑁂𑀦𑀸’’𑀢𑀺. 𑀓𑀸𑀭𑀡𑀜𑁆𑀘𑁂𑀢𑁆𑀣 𑀓𑀸𑀭𑀡𑀧𑀢𑀺𑀭𑀽𑀧𑀓𑀫𑁂𑀯, 𑀦 𑀏𑀓𑀁𑀲𑀓𑀸𑀭𑀡𑀁 𑀅𑀯𑀡𑁆𑀡𑀓𑀸𑀭𑀡𑀲𑁆𑀲 𑀅𑀪𑀽𑀢𑀢𑁆𑀢𑀸, 𑀢𑀲𑁆𑀫𑀸 𑀓𑀸𑀭𑀡𑁂𑀦𑀸𑀢𑀺 𑀓𑀸𑀭𑀡𑀧𑀢𑀺𑀭𑀽𑀧𑀓𑁂𑀦𑀸𑀢𑀺 𑀅𑀢𑁆𑀣𑁄. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀅𑀓𑀸𑀭𑀡𑀫𑁂𑀯 ‘𑀓𑀸𑀭𑀡’𑀦𑁆𑀢𑀺 𑀯𑀢𑁆𑀯𑀸’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁧). 𑀚𑀸𑀢𑀺𑀯𑀲𑁂𑀦𑀺𑀤𑀁 𑀩𑀳𑁆𑀯𑀢𑁆𑀣𑁂 𑀏𑀓𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀩𑀳𑀽𑀳𑀻’’𑀢𑀺𑀆𑀤𑀺𑀦𑀸.

‘‘𑀅𑀯𑀡𑁆𑀡𑀯𑀺𑀭𑀳𑀺𑀢𑀲𑁆𑀲 𑀅𑀲𑀫𑀸𑀦𑀯𑀡𑁆𑀡𑀲𑀫𑀦𑁆𑀦𑀸𑀕𑀢𑀲𑁆𑀲𑀧𑀻’’𑀢𑀺 𑀯𑀓𑁆𑀔𑀫𑀸𑀦𑀓𑀸𑀭𑀡𑀲𑁆𑀲 𑀅𑀓𑀸𑀭𑀡𑀪𑀸𑀯𑀳𑁂𑀢𑀼𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀤𑁄𑀲𑀯𑀺𑀭𑀳𑀺𑀢𑀲𑁆𑀲𑀧𑀺 𑀅𑀲𑀤𑀺𑀲𑀕𑀼𑀡𑀲𑀫𑀦𑁆𑀦𑀸𑀕𑀢𑀲𑁆𑀲𑀸𑀧𑀻𑀢𑀺 𑀅𑀢𑁆𑀣𑁄. 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀅𑀯𑀡𑁆𑀡𑀁 𑀤𑁄𑀲𑀁 𑀦𑀺𑀦𑁆𑀤𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀬𑀁 𑀮𑁄𑀓𑁂’’𑀢𑀺𑀆𑀤𑀺𑀦𑀸 𑀅𑀭𑀲𑀭𑀽𑀧𑀦𑀺𑀩𑁆𑀪𑁄𑀕𑀅𑀓𑀺𑀭𑀺𑀬𑀯𑀸𑀤𑀉𑀘𑁆𑀙𑁂𑀤𑀯𑀸𑀤𑀚𑁂𑀕𑀼𑀘𑁆𑀙𑀻𑀯𑁂𑀦𑀬𑀺𑀓𑀢𑀧𑀲𑁆𑀲𑀻𑀅𑀧𑀕𑀩𑁆𑀪𑀪𑀸𑀯𑀸𑀦𑀁 𑀓𑀸𑀭𑀡𑀧𑀢𑀺𑀭𑀽𑀧𑀓𑀁 𑀤𑀲𑁆𑀲𑁂𑀢𑀺. 𑀢𑀲𑁆𑀫𑀸𑀢𑀺 𑀳𑀺 𑀏𑀢𑀁 ‘‘𑀅𑀭𑀲𑀭𑀽𑀧𑁄…𑀧𑁂… 𑀅𑀧𑀕𑀩𑁆𑀪𑁄’’𑀢𑀺 𑀇𑀫𑁂𑀳𑀺 𑀧𑀤𑁂𑀳𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀮𑁄𑀓𑀲𑀫𑁆𑀫𑀢𑁄 𑀅𑀪𑀺𑀯𑀸𑀤𑀦𑀧𑀘𑁆𑀘𑀼𑀝𑁆𑀞𑀸𑀦𑀅𑀜𑁆𑀚𑀮𑀻𑀓𑀫𑁆𑀫𑀲𑀸𑀫𑀻𑀘𑀺𑀓𑀫𑁆𑀫𑀆𑀲𑀦𑀸𑀪𑀺𑀦𑀺𑀫𑀦𑁆𑀢𑀦𑀲𑀗𑁆𑀔𑀸𑀢𑁄 𑀲𑀸𑀫𑀕𑁆𑀕𑀻𑀭𑀲𑁄 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑁄 𑀲𑀸𑀫𑀕𑁆𑀕𑀻𑀭𑀲𑀲𑀗𑁆𑀔𑀸𑀢𑁂𑀦 𑀭𑀲𑁂𑀦 𑀅𑀲𑀫𑁆𑀧𑀦𑁆𑀦𑀲𑀪𑀸𑀯𑁄, 𑀢𑁂𑀦 𑀲𑀸𑀫𑀕𑁆𑀕𑀻𑀭𑀲𑀲𑀗𑁆𑀔𑀸𑀢𑁂𑀦 𑀧𑀭𑀺𑀪𑁄𑀕𑁂𑀦 𑀅𑀲𑀫𑀦𑁆𑀦𑀸𑀕𑀢𑁄. 𑀢𑀲𑁆𑀲 𑀅𑀓𑀢𑁆𑀢𑀩𑁆𑀩𑀢𑀸𑀯𑀸𑀤𑁄, 𑀉𑀘𑁆𑀙𑀺𑀚𑁆𑀚𑀺𑀢𑀩𑁆𑀩𑀢𑀸𑀯𑀸𑀤𑁄 𑀘, 𑀢𑀁 𑀲𑀩𑁆𑀩𑀁 𑀕𑀽𑀣𑀁 𑀯𑀺𑀬 𑀫𑀡𑁆𑀟𑀦𑀚𑀸𑀢𑀺𑀬𑁄 𑀧𑀼𑀭𑀺𑀲𑁄 𑀚𑁂𑀕𑀼𑀘𑁆𑀙𑀻. 𑀢𑀲𑁆𑀲 𑀯𑀺𑀦𑀸𑀲𑀓𑁄 𑀲𑁄𑀯 𑀢𑀤𑀓𑀭𑀡𑀢𑁄 𑀯𑀺𑀦𑁂𑀢𑀩𑁆𑀩𑁄. 𑀢𑀤𑀓𑀭𑀡𑁂𑀦 𑀯𑀬𑁄𑀯𑀼𑀟𑁆𑀠𑁂 𑀢𑀸𑀧𑁂𑀢𑀺 𑀢𑀤𑀸𑀘𑀸𑀭𑀯𑀺𑀭𑀳𑀺𑀢𑀢𑀸𑀬 𑀯𑀸 𑀓𑀧𑀡𑀧𑀼𑀭𑀺𑀲𑁄. 𑀢𑀤𑀓𑀭𑀡𑁂𑀦 𑀤𑁂𑀯𑀮𑁄𑀓𑀕𑀩𑁆𑀪𑀢𑁄 𑀅𑀧𑀕𑀢𑁄, 𑀢𑀤𑀓𑀭𑀡𑀢𑁄 𑀯𑀸 𑀲𑁄 𑀳𑀻𑀦𑀕𑀩𑁆𑀪𑁄 𑀘𑀸𑀢𑀺 𑀏𑀯𑀁 𑀢𑀤𑁂𑀯 𑀅𑀪𑀺𑀯𑀸𑀤𑀦𑀸𑀤𑀺𑀅𑀓𑀭𑀡𑀁 𑀅𑀭𑀲𑀭𑀽𑀧𑀢𑀸𑀤𑀻𑀦𑀁 𑀓𑀸𑀭𑀡𑀧𑀢𑀺𑀭𑀽𑀧𑀓𑀁 𑀤𑀝𑁆𑀞𑀩𑁆𑀩𑀁. ‘‘𑀦𑀢𑁆𑀣𑀺…𑀧𑁂… 𑀯𑀺𑀲𑁂𑀲𑁄’’𑀢𑀺 𑀏𑀢𑀲𑁆𑀲 𑀧𑀦 ‘‘𑀲𑀼𑀦𑁆𑀤𑀭𑀺𑀓𑀸𑀬 𑀦𑀸𑀫 𑀧𑀭𑀺𑀩𑁆𑀩𑀸𑀚𑀺𑀓𑀸𑀬 𑀫𑀭𑀡𑀸𑀦𑀯𑀩𑁄𑀥𑁄, 𑀲𑀁𑀲𑀸𑀭𑀲𑁆𑀲 𑀆𑀤𑀺𑀓𑁄𑀝𑀺𑀬𑀸 𑀅𑀧𑀜𑁆𑀜𑀸𑀬𑀦𑀧𑀝𑀺𑀜𑁆𑀜𑀸, 𑀞𑀧𑀦𑀻𑀬𑀧𑀼𑀘𑁆𑀙𑀸𑀬 𑀅𑀩𑁆𑀬𑀸𑀓𑀢𑀯𑀢𑁆𑀣𑀼𑀩𑁆𑀬𑀸𑀓𑀭𑀡’’𑀦𑁆𑀢𑀺 𑀏𑀯𑀫𑀸𑀤𑀻𑀦𑀺 𑀓𑀸𑀭𑀡𑀧𑀢𑀺𑀭𑀽𑀧𑀓𑀸𑀦𑀺 𑀦𑀺𑀤𑁆𑀥𑀸𑀭𑀺𑀢𑀩𑁆𑀩𑀸𑀦𑀺, 𑀢𑀣𑀸 ‘‘𑀢𑀓𑁆𑀓𑀧𑀭𑀺𑀬𑀸𑀳𑀢𑀁 𑀲𑀫𑀡𑁄…𑀧𑁂… 𑀲𑀬𑀫𑁆𑀧𑀝𑀺𑀪𑀸𑀦’’𑀦𑁆𑀢𑀺 𑀏𑀢𑀲𑁆𑀲 ‘‘𑀅𑀦𑀸𑀘𑀭𑀺𑀬𑀓𑁂𑀦 𑀲𑀸𑀫𑀁 𑀧𑀝𑀺𑀯𑁂𑀥𑁂𑀦 𑀢𑀢𑁆𑀣 𑀢𑀢𑁆𑀣 𑀢𑀣𑀸 𑀢𑀣𑀸 𑀥𑀫𑁆𑀫𑀤𑁂𑀲𑀦𑀸, 𑀓𑀢𑁆𑀣𑀘𑀺 𑀧𑀭𑁂𑀲𑀁 𑀧𑀝𑀺𑀧𑀼𑀘𑁆𑀙𑀸𑀓𑀣𑀦𑀁, 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀸𑀤𑀻𑀳𑀺 𑀆𑀭𑁄𑀘𑀺𑀢𑀦𑀬𑁂𑀦𑁂𑀯 𑀩𑁆𑀬𑀸𑀓𑀭𑀡’’𑀦𑁆𑀢𑀺 𑀏𑀯𑀫𑀸𑀤𑀻𑀦𑀺, ‘‘𑀲𑀫𑀡𑁄…𑀧𑁂… 𑀦 𑀅𑀕𑁆𑀕𑀧𑀼𑀕𑁆𑀕𑀮𑁄’’𑀢𑀺 𑀏𑀢𑁂𑀲𑀁 𑀧𑀦 ‘‘𑀲𑀩𑁆𑀩𑀥𑀫𑁆𑀫𑀸𑀦𑀁 𑀓𑀫𑁂𑀦𑁂𑀯 𑀅𑀦𑀯𑀩𑁄𑀥𑁄, 𑀮𑁄𑀓𑀦𑁆𑀢𑀲𑁆𑀲 𑀅𑀚𑀸𑀦𑀦𑀁, 𑀅𑀢𑁆𑀢𑀦𑀸 𑀇𑀘𑁆𑀙𑀺𑀢𑀢𑀧𑀘𑀸𑀭𑀸𑀪𑀸𑀯𑁄’’𑀢𑀺 𑀏𑀯𑀫𑀸𑀤𑀻𑀦𑀺. 𑀛𑀸𑀦𑀯𑀺𑀫𑁄𑀓𑁆𑀔𑀸𑀤𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄. 𑀅𑀭𑀺𑀬𑀁 𑀯𑀺𑀲𑀼𑀤𑁆𑀥𑀁, 𑀉𑀢𑁆𑀢𑀫𑀁 𑀯𑀸 𑀜𑀸𑀡𑀲𑀗𑁆𑀔𑀸𑀢𑀁 𑀤𑀲𑁆𑀲𑀦𑀁, 𑀅𑀮𑀁 𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀲𑀫𑀢𑁆𑀣𑀁 𑀅𑀭𑀺𑀬𑀜𑀸𑀡𑀤𑀲𑁆𑀲𑀦𑀁 𑀏𑀢𑁆𑀣, 𑀏𑀢𑀲𑁆𑀲𑀸𑀢𑀺 𑀯𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑁄. 𑀲𑁆𑀯𑁂𑀯 𑀯𑀺𑀲𑁂𑀲𑁄 𑀢𑀣𑀸. 𑀅𑀭𑀺𑀬𑀜𑀸𑀡𑀤𑀲𑁆𑀲𑀦𑀫𑁂𑀯 𑀯𑀸 𑀯𑀺𑀲𑁂𑀲𑀁 𑀯𑀼𑀢𑁆𑀢𑀦𑀬𑁂𑀦 𑀅𑀮𑀁 𑀧𑀭𑀺𑀬𑀢𑁆𑀢𑀁 𑀬𑀲𑁆𑀲, 𑀬𑀲𑁆𑀫𑀺𑀦𑁆𑀢𑀺 𑀯𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄, 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄𑀯. 𑀢𑀓𑁆𑀓𑀧𑀭𑀺𑀬𑀸𑀳𑀢𑀦𑁆𑀢𑀺 𑀓𑀧𑁆𑀧𑀦𑀸𑀫𑀢𑁆𑀢𑁂𑀦 𑀲𑀫𑀦𑁆𑀢𑀢𑁄 𑀆𑀳𑀭𑀺𑀢𑀁, 𑀯𑀺𑀢𑀓𑁆𑀓𑁂𑀦 𑀯𑀸 𑀧𑀭𑀺𑀖𑀝𑀺𑀢𑀁. 𑀯𑀻𑀫𑀁𑀲𑀸𑀦𑀼𑀘𑀭𑀺𑀢𑀦𑁆𑀢𑀺 𑀯𑀻𑀫𑀁𑀲𑀦𑀸𑀬 𑀧𑀼𑀦𑀧𑁆𑀧𑀼𑀦𑀁 𑀧𑀭𑀺𑀫𑀚𑁆𑀚𑀺𑀢𑀁. 𑀲𑀬𑀫𑁆𑀧𑀝𑀺𑀪𑀸𑀦𑀦𑁆𑀢𑀺 𑀲𑀬𑀫𑁂𑀯 𑀅𑀢𑁆𑀢𑀦𑁄 𑀯𑀺𑀪𑀽𑀢𑀁, 𑀢𑀸𑀤𑀺𑀲𑀁 𑀥𑀫𑁆𑀫𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀓𑀸𑀭𑀡𑀦𑁆𑀢𑀺 𑀅𑀬𑀼𑀢𑁆𑀢𑀁 𑀅𑀦𑀼𑀧𑀧𑀢𑁆𑀢𑀺𑀁. 𑀓𑀸𑀭𑀡𑀧𑀤𑁂 𑀘𑁂𑀢𑀁 𑀯𑀺𑀲𑁂𑀲𑀦𑀁. 𑀦 𑀳𑀺 𑀅𑀭𑀲𑀭𑀽𑀧𑀢𑀸𑀤𑀬𑁄 𑀤𑁄𑀲𑀸 𑀪𑀕𑀯𑀢𑀺 𑀲𑀁𑀯𑀺𑀚𑁆𑀚𑀦𑁆𑀢𑀺, 𑀥𑀫𑁆𑀫𑀲𑀗𑁆𑀖𑁂𑀲𑀼 𑀘 𑀤𑀼𑀭𑀓𑁆𑀔𑀸𑀢𑀤𑀼𑀧𑁆𑀧𑀝𑀺𑀧𑀦𑁆𑀦𑀸𑀤𑀬𑁄 𑀅𑀓𑀸𑀭𑀡𑀦𑁆𑀢𑀺 𑀯𑀸 𑀬𑀼𑀢𑁆𑀢𑀺𑀓𑀸𑀭𑀡𑀭𑀳𑀺𑀢𑀁 𑀅𑀢𑁆𑀢𑀦𑀸 𑀧𑀝𑀺𑀜𑁆𑀜𑀸𑀫𑀢𑁆𑀢𑀁. 𑀧𑀓𑀢𑀺𑀓𑀫𑁆𑀫𑀧𑀤𑀜𑁆𑀘𑁂𑀢𑀁. 𑀇𑀫𑀲𑁆𑀫𑀺𑀜𑁆𑀘 𑀅𑀢𑁆𑀣𑁂 𑀓𑀸𑀭𑀡𑀁 𑀯𑀢𑁆𑀯𑀸𑀢𑀺 𑀏𑀢𑁆𑀣 𑀓𑀸𑀭𑀡𑀁 𑀇𑀯𑀸𑀢𑀺 𑀇𑀯-𑀲𑀤𑁆𑀤𑀢𑁆𑀣𑁄 𑀭𑀽𑀧𑀓𑀦𑀬𑁂𑀦 𑀬𑁄𑀚𑁂𑀢𑀩𑁆𑀩𑁄 𑀧𑀢𑀺𑀭𑀽𑀧𑀓𑀓𑀸𑀭𑀡𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀢𑀣𑀸 𑀢𑀣𑀸𑀢𑀺 𑀚𑀸𑀢𑀺𑀯𑀼𑀟𑁆𑀠𑀸𑀦𑀫𑀦𑀪𑀺𑀯𑀸𑀤𑀦𑀸𑀤𑀺𑀦𑀸 𑀢𑁂𑀦 𑀢𑁂𑀦 𑀆𑀓𑀸𑀭𑁂𑀦. 𑀯𑀡𑁆𑀡𑀲𑀤𑁆𑀤𑀲𑁆𑀲 𑀕𑀼𑀡𑀧𑀲𑀁𑀲𑀸𑀲𑀼 𑀧𑀯𑀢𑁆𑀢𑀦𑀢𑁄 𑀬𑀣𑀸𑀓𑁆𑀓𑀫𑀁 ‘‘𑀅𑀯𑀡𑁆𑀡𑀁 𑀤𑁄𑀲𑀁 𑀦𑀺𑀦𑁆𑀤’’𑀦𑁆𑀢𑀺 𑀯𑀼𑀢𑁆𑀢𑀁.

𑀤𑀼𑀭𑀓𑁆𑀔𑀸𑀢𑁄𑀢𑀺 𑀤𑀼𑀝𑁆𑀞𑀼𑀫𑀸𑀓𑁆𑀔𑀸𑀢𑁄, 𑀢𑀣𑀸 𑀤𑀼𑀧𑁆𑀧𑀝𑀺𑀯𑁂𑀤𑀺𑀢𑁄. 𑀯𑀝𑁆𑀝𑀢𑁄 𑀦𑀺𑀬𑁆𑀬𑀸𑀢𑀻𑀢𑀺 𑀦𑀺𑀬𑁆𑀬𑀸𑀦𑀁, 𑀢𑀤𑁂𑀯 𑀦𑀺𑀬𑁆𑀬𑀸𑀦𑀺𑀓𑁄, 𑀢𑀢𑁄 𑀯𑀸 𑀦𑀺𑀬𑁆𑀬𑀸𑀦𑀁 𑀦𑀺𑀲𑁆𑀲𑀭𑀡𑀁, 𑀢𑀢𑁆𑀣 𑀦𑀺𑀬𑀼𑀢𑁆𑀢𑁄𑀢𑀺 𑀦𑀺𑀬𑁆𑀬𑀸𑀦𑀺𑀓𑁄. 𑀯𑀝𑁆𑀝𑀢𑁄 𑀯𑀸 𑀦𑀺𑀬𑁆𑀬𑀸𑀢𑀻𑀢𑀺 𑀦𑀺𑀬𑁆𑀬𑀸𑀦𑀺𑀓𑁄 𑀬-𑀓𑀸𑀭𑀲𑁆𑀲 𑀓-𑀓𑀸𑀭𑀁, 𑀈-𑀓𑀸𑀭𑀲𑁆𑀲 𑀘 𑀭𑀲𑁆𑀲𑀁 𑀓𑀢𑁆𑀯𑀸. ‘‘𑀅𑀦𑀻𑀬-𑀲𑀤𑁆𑀤𑁄 𑀳𑀺 𑀩𑀳𑀼𑀮𑀸 𑀓𑀢𑁆𑀢𑀼𑀅𑀪𑀺𑀥𑀸𑀬𑀓𑁄’’𑀢𑀺 𑀲𑀤𑁆𑀤𑀯𑀺𑀤𑀽 𑀯𑀤𑀦𑁆𑀢𑀺, 𑀦 𑀦𑀺𑀬𑁆𑀬𑀸𑀦𑀺𑀓𑁄 𑀢𑀣𑀸. 𑀲𑀁𑀲𑀸𑀭𑀤𑀼𑀓𑁆𑀔𑀲𑁆𑀲 𑀅𑀦𑀼𑀧𑀲𑀫𑀲𑀁𑀯𑀢𑁆𑀢𑀦𑀺𑀓𑁄 𑀯𑀼𑀢𑁆𑀢𑀦𑀬𑁂𑀦. 𑀧𑀘𑁆𑀘𑀦𑀻𑀓𑀧𑀝𑀺𑀧𑀤𑀦𑁆𑀢𑀺 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀯𑀺𑀭𑀼𑀤𑁆𑀥𑀧𑀝𑀺𑀧𑀤𑀁. 𑀅𑀦𑀦𑀼𑀮𑁄𑀫𑀧𑀝𑀺𑀧𑀤𑀦𑁆𑀢𑀺 𑀲𑀧𑁆𑀧𑀼𑀭𑀺𑀲𑀸𑀦𑀁 𑀅𑀦𑀦𑀼𑀮𑁄𑀫𑀧𑀝𑀺𑀧𑀤𑀁. 𑀅𑀥𑀫𑁆𑀫𑀸𑀦𑀼𑀮𑁄𑀫𑀧𑀝𑀺𑀧𑀤𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑁆𑀲 𑀅𑀦𑀦𑀼𑀮𑁄𑀫𑀧𑀝𑀺𑀧𑀤𑀁. 𑀓𑀲𑁆𑀫𑀸 𑀧𑀦𑁂𑀢𑁆𑀣 ‘‘𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀯𑀡𑁆𑀡𑀁 𑀪𑀸𑀲𑀢𑀻’’𑀢𑀺 𑀘 𑀯𑀢𑁆𑀢𑀫𑀸𑀦𑀓𑀸𑀮𑀦𑀺𑀤𑁆𑀤𑁂𑀲𑁄 𑀓𑀢𑁄, 𑀦𑀦𑀼 𑀲𑀗𑁆𑀕𑀻𑀢𑀺𑀓𑀸𑀮𑀢𑁄 𑀲𑁄 𑀅𑀯𑀡𑁆𑀡𑀯𑀡𑁆𑀡𑀸𑀦𑀁 𑀪𑀸𑀲𑀦𑀓𑀸𑀮𑁄 𑀅𑀢𑀻𑀢𑁄𑀢𑀺? 𑀲𑀘𑁆𑀘𑀫𑁂𑀢𑀁, ‘‘𑀅𑀤𑁆𑀥𑀸𑀦𑀫𑀕𑁆𑀕𑀧𑀝𑀺𑀧𑀦𑁆𑀦𑁄 𑀳𑁄𑀢𑀻’’𑀢𑀺 𑀏𑀢𑁆𑀣 𑀳𑁄𑀢𑀺-𑀲𑀤𑁆𑀤𑁄 𑀯𑀺𑀬 𑀅𑀢𑀻𑀢𑀓𑀸𑀮𑀢𑁆𑀣𑀢𑁆𑀢𑀸 𑀧𑀦 𑀪𑀸𑀲𑀢𑀺-𑀲𑀤𑁆𑀤𑀲𑁆𑀲 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑀬𑀲𑁆𑀫𑀺𑀁 𑀓𑀸𑀮𑁂 𑀢𑁂𑀳𑀺 𑀅𑀯𑀡𑁆𑀡𑁄 𑀯𑀡𑁆𑀡𑁄 𑀘 𑀪𑀸𑀲𑀻𑀬𑀢𑀺, 𑀢𑀫𑀧𑁂𑀓𑁆𑀔𑀺𑀢𑁆𑀯𑀸 𑀏𑀯𑀁 𑀯𑀼𑀢𑁆𑀢𑀁, 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀢𑀢𑁆𑀭𑀸’’𑀢𑀺 𑀧𑀤𑀲𑁆𑀲 𑀓𑀸𑀮𑀧𑀝𑀺𑀦𑀺𑀤𑁆𑀤𑁂𑀲𑀯𑀺𑀓𑀧𑁆𑀧𑀦𑀁 𑀅𑀝𑁆𑀞𑀓𑀣𑀸𑀬𑀁 𑀅𑀯𑀼𑀢𑁆𑀢𑀫𑁆𑀧𑀺 𑀲𑀼𑀧𑀧𑀦𑁆𑀦𑀁 𑀳𑁄𑀢𑀺.

‘‘𑀲𑀼𑀧𑁆𑀧𑀺𑀬𑀲𑁆𑀲 𑀧𑀦…𑀧𑁂… 𑀪𑀸𑀲𑀢𑀻’’𑀢𑀺 𑀧𑀸𑀴𑀺𑀬𑀸 𑀲𑀫𑁆𑀩𑀦𑁆𑀥𑀤𑀲𑁆𑀲𑀦𑀁 ‘‘𑀅𑀦𑁆𑀢𑁂𑀯𑀸𑀲𑀻 𑀧𑀦𑀲𑁆𑀲𑀸’’𑀢𑀺𑀆𑀤𑀺𑀯𑀘𑀦𑀁. 𑀅𑀧𑀭𑀸𑀫𑀲𑀺𑀢𑀩𑁆𑀩𑀁 𑀅𑀭𑀺𑀬𑀽𑀧𑀯𑀸𑀤𑀓𑀫𑁆𑀫𑀁, 𑀢𑀣𑀸 𑀅𑀦𑀓𑁆𑀓𑀫𑀺𑀢𑀩𑁆𑀩𑀁.𑀲𑁆𑀯𑀸𑀬𑀦𑁆𑀢𑀺 𑀲𑁄 𑀆𑀘𑀭𑀺𑀬𑁄. 𑀅𑀲𑀺𑀥𑀸𑀭𑀦𑁆𑀢𑀺 𑀅𑀲𑀺𑀦𑀸 𑀢𑀺𑀔𑀺𑀡𑀪𑀸𑀕𑀁. 𑀓𑀓𑀘𑀤𑀦𑁆𑀢 𑀧𑀦𑁆𑀢𑀺𑀬𑀦𑁆𑀢𑀺 𑀔𑀦𑁆𑀥𑀓𑀓𑀘𑀲𑁆𑀲 𑀤𑀦𑁆𑀢𑀲𑀗𑁆𑀔𑀸𑀢𑀸𑀬 𑀯𑀺𑀲𑀫𑀧𑀦𑁆𑀢𑀺𑀬𑀸. 𑀳𑀢𑁆𑀣𑁂𑀦 𑀯𑀸 𑀧𑀸𑀤𑁂𑀦 𑀯𑀸 𑀬𑁂𑀦 𑀓𑁂𑀦𑀘𑀺 𑀯𑀸 𑀅𑀗𑁆𑀕𑀧𑀘𑁆𑀘𑀗𑁆𑀕𑁂𑀦 𑀧𑀳𑀭𑀺𑀢𑁆𑀯𑀸 𑀓𑀻𑀴𑀫𑀸𑀦𑁄 𑀯𑀺𑀬. 𑀅𑀓𑁆𑀔𑀺𑀓𑀡𑁆𑀡𑀓𑁄𑀲𑀲𑀗𑁆𑀔𑀸𑀢𑀝𑁆𑀞𑀸𑀦𑀯𑀲𑁂𑀦 𑀢𑀻𑀳𑀺 𑀧𑀓𑀸𑀭𑁂𑀳𑀺 𑀪𑀺𑀦𑁆𑀦𑁄 𑀫𑀤𑁄 𑀬𑀲𑁆𑀲𑀸𑀢𑀺 𑀧𑀪𑀺𑀦𑁆𑀦𑀫𑀤𑁄, 𑀢𑀁. 𑀅𑀯𑀡𑁆𑀡𑀁 𑀪𑀸𑀲𑀫𑀸𑀦𑁄𑀢𑀺 𑀅𑀯𑀡𑁆𑀡𑀁 𑀪𑀸𑀲𑀦𑀳𑁂𑀢𑀼. 𑀳𑁂𑀢𑀼𑀅𑀢𑁆𑀣𑁄 𑀳𑀺 𑀅𑀬𑀁 𑀫𑀸𑀦-𑀲𑀤𑁆𑀤𑁄. 𑀦 𑀅𑀬𑁄 𑀯𑀼𑀟𑁆𑀠𑀺 𑀅𑀦𑀬𑁄. 𑀲𑁄𑀬𑁂𑀯 𑀩𑁆𑀬𑀲𑀦𑀁, 𑀅𑀢𑀺𑀭𑁂𑀓𑀩𑁆𑀬𑀲𑀦𑀦𑁆𑀢𑀺 𑀅𑀢𑁆𑀣𑁄, 𑀢𑀁 𑀧𑀸𑀧𑀼𑀡𑀺𑀲𑁆𑀲𑀢𑀺 𑀏𑀓𑀦𑁆𑀢𑀫𑀳𑀸𑀲𑀸𑀯𑀚𑁆𑀚𑀢𑁆𑀢𑀸 𑀭𑀢𑀦𑀢𑁆𑀢𑀬𑁄𑀧𑀯𑀸𑀤𑀲𑁆𑀲. 𑀢𑁂𑀦𑁂𑀯𑀸𑀳 𑁋

‘‘𑀬𑁄 𑀦𑀺𑀦𑁆𑀤𑀺𑀬𑀁 𑀧𑀲𑀁𑀲𑀢𑀺,

𑀢𑀁 𑀯𑀸 𑀦𑀺𑀦𑁆𑀤𑀢𑀺 𑀬𑁄 𑀧𑀲𑀁𑀲𑀺𑀬𑁄;

𑀯𑀺𑀘𑀺𑀦𑀸𑀢𑀺 𑀫𑀼𑀔𑁂𑀦 𑀲𑁄 𑀓𑀮𑀺𑀁,

𑀓𑀮𑀺𑀦𑀸 𑀢𑁂𑀦 𑀲𑀼𑀔𑀁 𑀦 𑀯𑀺𑀦𑁆𑀤𑀢𑀻’’𑀢𑀺. (𑀲𑀼. 𑀦𑀺. 𑁬𑁬𑁩; 𑀲𑀁 𑀦𑀺. 𑁧.𑁧𑁮𑁦-𑁧𑁮𑁧; 𑀦𑁂𑀢𑁆𑀢𑀺. 𑁯𑁨);

‘‘𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑁄’’𑀢𑀺𑀆𑀤𑀺𑀦𑀸 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀲𑀁𑀯𑁂𑀕𑀼𑀧𑁆𑀧𑀢𑁆𑀢𑀺𑀁, 𑀅𑀢𑁆𑀢𑀦𑁄 𑀆𑀘𑀭𑀺𑀬𑁂 𑀘 𑀓𑀸𑀭𑀼𑀜𑁆𑀜𑀧𑁆𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀓𑀺𑀜𑁆𑀘𑀸𑀧𑀺 𑀅𑀦𑁆𑀢𑁂𑀯𑀸𑀲𑀺𑀦𑀸 𑀆𑀘𑀭𑀺𑀬𑀲𑁆𑀲 𑀅𑀦𑀼𑀓𑀽𑀮𑁂𑀦 𑀪𑀯𑀺𑀢𑀩𑁆𑀩𑀁, 𑀅𑀬𑀁 𑀧𑀦 𑀧𑀡𑁆𑀟𑀺𑀢𑀚𑀸𑀢𑀺𑀓𑀢𑁆𑀢𑀸 𑀦 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀢𑀫𑀦𑀼𑀯𑀢𑁆𑀢𑀢𑀻𑀢𑀺 𑀇𑀤𑀸𑀦𑀺𑀲𑁆𑀲 𑀓𑀫𑁆𑀫𑀲𑁆𑀲𑀓𑀢𑀸𑀜𑀸𑀡𑀧𑁆𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀆𑀘𑀭𑀺𑀬𑁂 𑀔𑁄 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀳𑀮𑀸𑀳𑀮𑀦𑁆𑀢𑀺 𑀢𑀗𑁆𑀔𑀡𑀜𑁆𑀜𑁂𑀯 𑀫𑀸𑀭𑀡𑀓𑀁 𑀯𑀺𑀲𑀁. 𑀳𑀦𑀢𑀻𑀢𑀺 𑀳𑀺 𑀳𑀮𑁄 𑀦-𑀓𑀸𑀭𑀲𑁆𑀲 𑀮-𑀓𑀸𑀭𑀁 𑀓𑀢𑁆𑀯𑀸, 𑀳𑀮𑀸𑀦𑀫𑁆𑀧𑀺 𑀯𑀺𑀲𑁂𑀲𑁄 𑀳𑀮𑁄 𑀳𑀮𑀸𑀳𑀮𑁄 𑀫𑀚𑁆𑀛𑁂𑀤𑀻𑀖𑀯𑀲𑁂𑀦, 𑀏𑀢𑁂𑀦 𑀘 𑀅𑀜𑁆𑀜𑁂 𑀅𑀝𑁆𑀞𑀯𑀺𑀥𑁂 𑀯𑀺𑀲𑁂 𑀦𑀺𑀯𑀢𑁆𑀢𑁂𑀢𑀺. 𑀯𑀼𑀢𑁆𑀢𑀜𑁆𑀘 𑁋

‘‘𑀧𑀼𑀫𑁂 𑀧𑀡𑁆𑀟𑁂 𑀘 𑀓𑀸𑀓𑁄𑀮, 𑀓𑀸𑀴𑀓𑀽𑀝𑀳𑀮𑀸𑀳𑀮𑀸;

𑀲𑀭𑁄𑀢𑁆𑀣𑀺𑀓𑁄𑀲𑀼𑀗𑁆𑀓𑀺𑀓𑁂 𑀬𑁄, 𑀩𑁆𑀭𑀳𑁆𑀫𑀧𑀼𑀢𑁆𑀢𑁄 𑀧𑀤𑀻𑀧𑀦𑁄;

𑀤𑀸𑀭𑀤𑁄 𑀯𑀘𑁆𑀙𑀦𑀸𑀪𑁄 𑀘, 𑀯𑀺𑀲𑀪𑁂𑀤𑀸 𑀇𑀫𑁂 𑀦𑀯𑀸’’𑀢𑀺.

𑀔𑀭𑁄𑀤𑀓𑀦𑁆𑀢𑀺 𑀘𑀡𑁆𑀟𑀲𑁄𑀢𑁄𑀤𑀓𑀁. ‘‘𑀔𑀸𑀭𑁄𑀤𑀓’’𑀦𑁆𑀢𑀺𑀧𑀺 𑀧𑀸𑀞𑁄, 𑀅𑀢𑀺𑀮𑁄𑀡𑀢𑀸𑀬 𑀢𑀺𑀢𑁆𑀢𑁄𑀤𑀓𑀦𑁆𑀢𑀺 𑀅𑀢𑁆𑀣𑁄. 𑀦𑀭𑀓𑀧𑀧𑀸𑀢𑀦𑁆𑀢𑀺 𑀘𑁄𑀭𑀧𑀧𑀸𑀢𑀁. 𑀫𑀸𑀡𑀯𑀓𑀸𑀢𑀺 𑀅𑀢𑁆𑀢𑀸𑀦𑀫𑁂𑀯 𑀑𑀯𑀤𑀺𑀢𑀼𑀁 𑀆𑀮𑀧𑀢𑀺 ‘‘𑀲𑀫𑀬𑁄𑀧𑀺 𑀔𑁄 𑀢𑁂 𑀪𑀤𑁆𑀤𑀸𑀮𑀺 𑀅𑀧𑁆𑀧𑀝𑀺𑀯𑀺𑀤𑁆𑀥𑁄𑀅𑀳𑁄𑀲𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁧𑁩𑁫) 𑀯𑀺𑀬. ‘‘𑀓𑀫𑁆𑀫𑀲𑁆𑀲𑀓𑀸’’𑀢𑀺 𑀓𑀫𑁆𑀫𑀫𑁂𑀯 𑀅𑀢𑁆𑀢𑀲𑀦𑁆𑀢𑀓𑀪𑀸𑀯𑀁 𑀯𑀢𑁆𑀯𑀸 𑀢𑀤𑁂𑀯 𑀯𑀺𑀯𑀭𑀢𑀺 ‘‘𑀅𑀢𑁆𑀢𑀦𑁄 𑀓𑀫𑁆𑀫𑀸𑀦𑀼𑀭𑀽𑀧𑀫𑁂𑀯 𑀕𑀢𑀺𑀁 𑀕𑀘𑁆𑀙𑀦𑁆𑀢𑀻’’𑀢𑀺𑀆𑀤𑀺𑀦𑀸. 𑀬𑁄𑀦𑀺𑀲𑁄𑀢𑀺 𑀉𑀧𑀸𑀬𑁂𑀦 𑀜𑀸𑀬𑁂𑀦. 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸𑀢𑀺 𑀆𑀘𑀭𑀺𑀬𑁄 𑀯𑀺𑀬 𑀅𑀬𑁄𑀦𑀺𑀲𑁄 𑀅𑀭𑀺𑀬𑀽𑀧𑀯𑀸𑀤𑁂 𑀅𑀦𑀺𑀫𑁆𑀫𑀼𑀚𑁆𑀚𑀦𑁆𑀢𑁄 𑀬𑁄𑀦𑀺𑀲𑁄 𑀅𑀭𑀺𑀬𑀽𑀧𑀯𑀸𑀤𑀢𑁄 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸, 𑀉𑀤𑁆𑀥𑀁 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀫𑀤𑁆𑀤𑀫𑀸𑀦𑁄𑀢𑀺 𑀫𑀤𑁆𑀤𑀦𑁆𑀢𑁄 𑀪𑀺𑀦𑁆𑀤𑀦𑁆𑀢𑁄. 𑀏𑀓𑀁𑀲𑀓𑀸𑀭𑀡𑀫𑁂𑀯 𑀇𑀥 𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑁂𑀢𑀼𑀓𑀸𑀫𑁂𑀦 ‘‘𑀲𑀫𑁆𑀫𑀸’’𑀢𑀺 𑀯𑀼𑀢𑁆𑀢𑀁. ‘‘𑀬𑀣𑀸 𑀢’’𑀦𑁆𑀢𑀺𑀆𑀤𑀺𑀦𑀸 𑀢𑀲𑁆𑀲 𑀲𑀫𑀸𑀭𑀤𑁆𑀥𑀪𑀸𑀯𑀁 𑀤𑀲𑁆𑀲𑁂𑀢𑀺, 𑀦𑁆𑀢𑀺 𑀘 𑀦𑀺𑀧𑀸𑀢𑀫𑀢𑁆𑀢𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀅𑀜𑁆𑀜𑁄 𑀧𑀡𑁆𑀟𑀺𑀢𑀲𑀪𑀸𑀯𑁄 𑀚𑀸𑀢𑀺 𑀆𑀘𑀸𑀭𑀯𑀲𑁂𑀦 𑀓𑀼𑀮𑀧𑀼𑀢𑁆𑀢𑁄 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀯𑀡𑁆𑀡𑀁 𑀪𑀸𑀲𑀺𑀢𑀼𑀫𑀸𑀭𑀪𑀢𑀺, 𑀢𑀣𑀸 𑀅𑀬𑀫𑁆𑀧𑀺 𑀆𑀭𑀤𑁆𑀥𑁄, 𑀢𑀜𑁆𑀘 𑀔𑁄 𑀅𑀧𑀺 𑀦𑀸𑀫𑀸𑀬𑀫𑀸𑀘𑀭𑀺𑀬𑁄 𑀏𑀢𑁆𑀢𑀓𑁂𑀦𑀸𑀧𑀺 𑀭𑀢𑀦𑀢𑁆𑀢𑀬𑀸𑀯𑀡𑁆𑀡𑀪𑀸𑀲𑀢𑁄 𑀑𑀭𑀫𑁂𑀬𑁆𑀬𑀸𑀢𑀺.

𑀲𑀧𑁆𑀧𑀭𑀸𑀚𑀯𑀡𑁆𑀡𑀦𑁆𑀢𑀺 𑀅𑀳𑀺𑀭𑀸𑀚𑀯𑀡𑁆𑀡𑀁. 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬𑀸𑀢𑀺 𑀯𑀡𑁆𑀡𑀲𑀼𑀦𑁆𑀤𑀭𑀢𑀸𑀬, 𑀯𑀡𑁆𑀡𑀲𑀭𑀻𑀭𑁂𑀦 𑀯𑀸. 𑀯𑀸𑀭𑀺𑀚𑀁 𑀓𑀫𑀮𑀁 𑀦 𑀧𑀳𑀭𑀸𑀫𑀺 𑀦 𑀪𑀜𑁆𑀚𑀸𑀫𑀺, 𑀆𑀭𑀸 𑀤𑀽𑀭𑀢𑁄𑀯 𑀉𑀧𑀲𑀺𑀗𑁆𑀖𑀸𑀫𑀻𑀢𑀺 𑀅𑀢𑁆𑀣𑁄. 𑀅𑀣𑀸𑀢𑀺 𑀏𑀯𑀁 𑀲𑀦𑁆𑀢𑁂𑀧𑀺. 𑀕𑀦𑁆𑀥𑀢𑁆𑀣𑁂𑀦𑁄𑀢𑀺 𑀕𑀦𑁆𑀥𑀘𑁄𑀭𑁄. 𑀲𑀜𑁆𑀜𑀽𑀴𑁆𑀳𑀸𑀢𑀺 𑀕𑀦𑁆𑀣𑀺𑀢𑀸 𑀩𑀦𑁆𑀥𑀺𑀢𑀸. 𑀕𑀳𑀧𑀢𑀻𑀢𑀺 𑀉𑀧𑀸𑀮𑀺𑀕𑀳𑀧𑀢𑀺𑀁 𑀦𑀸𑀝𑀧𑀼𑀢𑁆𑀢𑀲𑁆𑀲 𑀆𑀮𑀧𑀦𑀁. 𑀏𑀢𑁆𑀣 𑀘 𑀯𑀡𑁆𑀡𑀺𑀢𑀩𑁆𑀩𑁄 ‘‘𑀅𑀬𑀫𑀻𑀤𑀺𑀲𑁄’’𑀢𑀺 𑀧𑀓𑀸𑀲𑁂𑀢𑀩𑁆𑀩𑁄𑀢𑀺 𑀯𑀡𑁆𑀡𑁄, 𑀲𑀡𑁆𑀞𑀸𑀦𑀁. 𑀯𑀡𑁆𑀡𑀻𑀬𑀢𑀺 𑀅𑀲𑀗𑁆𑀓𑀭𑀢𑁄 𑀯𑀯𑀢𑁆𑀣𑀸𑀧𑀻𑀬𑀢𑀻𑀢𑀺 𑀯𑀡𑁆𑀡𑁄, 𑀚𑀸𑀢𑀺. 𑀯𑀡𑁆𑀡𑁂𑀢𑀺 𑀯𑀺𑀓𑀸𑀭𑀫𑀸𑀧𑀚𑁆𑀚𑀫𑀸𑀦𑀁 𑀳𑀤𑀬𑀗𑁆𑀕𑀢𑀪𑀸𑀯𑀁 𑀧𑀓𑀸𑀲𑁂𑀢𑀻𑀢𑀺 𑀯𑀡𑁆𑀡𑁄, 𑀭𑀽𑀧𑀸𑀬𑀢𑀦𑀁. 𑀯𑀡𑁆𑀡𑀻𑀬𑀢𑀺 𑀨𑀮𑀫𑁂𑀢𑁂𑀦 𑀬𑀣𑀸𑀲𑀪𑀸𑀯𑀢𑁄 𑀯𑀺𑀪𑀸𑀯𑀻𑀬𑀢𑀻𑀢𑀺 𑀯𑀡𑁆𑀡𑁄, 𑀓𑀸𑀭𑀡𑀁. 𑀯𑀡𑁆𑀡𑀻𑀬𑀢𑀺 𑀅𑀧𑁆𑀧𑀫𑀳𑀦𑁆𑀢𑀸𑀤𑀺𑀯𑀲𑁂𑀦 𑀧𑀫𑀻𑀬𑀢𑀻𑀢𑀺 𑀯𑀡𑁆𑀡𑁄, 𑀧𑀫𑀸𑀡𑀁. 𑀯𑀡𑁆𑀡𑀻𑀬𑀢𑀺 𑀧𑀲𑀁𑀲𑀻𑀬𑀢𑀻𑀢𑀺 𑀯𑀡𑁆𑀡𑁄, 𑀕𑀼𑀡𑁄. 𑀯𑀡𑁆𑀡𑀦𑀁 𑀕𑀼𑀡𑀲𑀁𑀓𑀺𑀢𑁆𑀢𑀦𑀁 𑀯𑀡𑁆𑀡𑁄, 𑀧𑀲𑀁𑀲𑀸. 𑀏𑀯𑀁 𑀢𑀢𑁆𑀣 𑀢𑀢𑁆𑀣 𑀯𑀡𑁆𑀡𑀲𑀤𑁆𑀤𑀲𑁆𑀲𑀼𑀧𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀆𑀤𑀺𑀲𑀤𑁆𑀤𑁂𑀦 𑀚𑀸𑀢𑀭𑀽𑀧𑀧𑀼𑀴𑀺𑀦𑀓𑁆𑀔𑀭𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. ‘‘𑀇𑀥 𑀕𑀼𑀡𑁄𑀧𑀺 𑀧𑀲𑀁𑀲𑀸𑀧𑀻’’𑀢𑀺 𑀯𑀼𑀢𑁆𑀢𑀫𑁂𑀯 𑀲𑀫𑀢𑁆𑀣𑁂𑀢𑀺 ‘‘𑀅𑀬𑀁 𑀓𑀺𑀭𑀸’’𑀢𑀺𑀆𑀤𑀺𑀦𑀸. 𑀓𑀺𑀭𑀸𑀢𑀺 𑀘𑁂𑀢𑁆𑀣 𑀅𑀦𑀼𑀲𑁆𑀲𑀯𑀦𑀢𑁆𑀣𑁂, 𑀧𑀤𑀧𑀽𑀭𑀡𑀫𑀢𑁆𑀢𑁂 𑀯𑀸. 𑀕𑀼𑀡𑀽𑀧𑀲𑀜𑁆𑀳𑀺𑀢𑀦𑁆𑀢𑀺 𑀕𑀼𑀡𑁄𑀧𑀲𑀜𑁆𑀜𑀼𑀢𑀁. ‘‘𑀕𑀼𑀡𑀽𑀧𑀲𑀜𑁆𑀳𑀺𑀢𑀁 𑀧𑀲𑀁𑀲’’𑀦𑁆𑀢𑀺 𑀧𑀦 𑀯𑀤𑀦𑁆𑀢𑁄 𑀧𑀲𑀁𑀲𑀸𑀬 𑀏𑀯 𑀕𑀼𑀡𑀪𑀸𑀲𑀦𑀁 𑀲𑀺𑀤𑁆𑀥𑀁 𑀢𑀲𑁆𑀲𑀸 𑀢𑀤𑀯𑀺𑀦𑀸𑀪𑀸𑀯𑀢𑁄, 𑀢𑀲𑁆𑀫𑀸 𑀇𑀤𑀫𑀢𑁆𑀣𑀤𑁆𑀯𑀬𑀁 𑀬𑀼𑀚𑁆𑀚𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀓𑀣𑀁 𑀪𑀸𑀲𑀢𑀻𑀢𑀺 𑀆𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺. 𑀏𑀓𑁄 𑀘 𑀲𑁄 𑀧𑀼𑀕𑁆𑀕𑀮𑁄 𑀘𑀸𑀢𑀺 𑀏𑀓𑀧𑀼𑀕𑁆𑀕𑀮𑁄. 𑀓𑁂𑀦𑀝𑁆𑀞𑁂𑀦 𑀏𑀓𑀧𑀼𑀕𑁆𑀕𑀮𑁄? 𑀅𑀲𑀤𑀺𑀲𑀝𑁆𑀞𑁂𑀦, 𑀕𑀼𑀡𑀯𑀺𑀲𑀺𑀝𑁆𑀞𑀝𑁆𑀞𑁂𑀦, 𑀅𑀲𑀫𑀲𑀫𑀝𑁆𑀞𑁂𑀦 𑀘. 𑀲𑁄 𑀳𑀺 𑀧𑀞𑀫𑀸𑀪𑀺𑀦𑀻𑀳𑀸𑀭𑀓𑀸𑀮𑁂 𑀤𑀲𑀦𑁆𑀦𑀁 𑀧𑀸𑀭𑀫𑀻𑀦𑀁 𑀧𑀝𑀺𑀧𑀸𑀝𑀺𑀬𑀸 𑀆𑀯𑀚𑁆𑀚𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀩𑁄𑀥𑀺𑀲𑀫𑁆𑀪𑀸𑀭𑀲𑀫𑁆𑀪𑀭𑀡𑀕𑀼𑀡𑁂𑀳𑀺 𑀘𑁂𑀯 𑀩𑀼𑀤𑁆𑀥𑀕𑀼𑀡𑁂𑀳𑀺 𑀘 𑀲𑁂𑀲𑀫𑀳𑀸𑀚𑀦𑁂𑀦 𑀅𑀲𑀤𑀺𑀲𑁄. 𑀬𑁂 𑀘𑀲𑁆𑀲 𑀕𑀼𑀡𑀸, 𑀢𑁂𑀧𑀺 𑀅𑀜𑁆𑀜𑀲𑀢𑁆𑀢𑀸𑀦𑀁 𑀕𑀼𑀡𑁂𑀳𑀺 𑀯𑀺𑀲𑀺𑀝𑁆𑀞𑀸, 𑀧𑀼𑀭𑀺𑀫𑀓𑀸 𑀘 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀲𑀩𑁆𑀩𑀲𑀢𑁆𑀢𑁂𑀳𑀺 𑀅𑀲𑀫𑀸, 𑀢𑁂𑀳𑀺 𑀧𑀦 𑀅𑀬𑀫𑁂𑀯𑁂𑀓𑁄 𑀭𑀽𑀧𑀓𑀸𑀬𑀦𑀸𑀫𑀓𑀸𑀬𑁂𑀳𑀺 𑀲𑀫𑁄.𑀮𑁄𑀓𑁂𑀢𑀺 𑀲𑀢𑁆𑀢𑀮𑁄𑀓𑁂. ‘‘𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀧𑀦 𑀇𑀤𑀁 𑀉𑀪𑀬𑀫𑁆𑀧𑀺 𑀯𑀺𑀧𑁆𑀧𑀓𑀢𑀯𑀘𑀦𑀫𑁂𑀯 𑀉𑀧𑁆𑀧𑀸𑀤𑀓𑀺𑀭𑀺𑀬𑀸𑀬 𑀯𑀢𑁆𑀢𑀫𑀸𑀦𑀓𑀸𑀮𑀺𑀓𑀢𑁆𑀢𑀸. 𑀉𑀧𑁆𑀧𑀚𑁆𑀚𑀫𑀸𑀦𑁄 𑀩𑀳𑀼𑀚𑀦𑀳𑀺𑀢𑀸𑀬 𑀉𑀧𑁆𑀧𑀚𑁆𑀚𑀢𑀺, 𑀦 𑀅𑀜𑁆𑀜𑁂𑀦 𑀓𑀸𑀭𑀡𑁂𑀦𑀸𑀢𑀺 𑀏𑀯𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀮𑀓𑁆𑀔𑀡𑁂 𑀳𑁂𑀲 𑀫𑀸𑀦-𑀲𑀤𑁆𑀤𑁄, 𑀏𑀯𑀭𑀽𑀧𑀜𑁆𑀘𑁂𑀢𑁆𑀣 𑀮𑀓𑁆𑀔𑀡𑀁 𑀦 𑀲𑀓𑁆𑀓𑀸 𑀅𑀜𑁆𑀜𑁂𑀦 𑀲𑀤𑁆𑀤𑀮𑀓𑁆𑀔𑀡𑁂𑀦 𑀧𑀝𑀺𑀩𑀸𑀳𑀺𑀢𑀼𑀁. 𑀅𑀧𑀺𑀘 𑀉𑀧𑁆𑀧𑀚𑁆𑀚𑀫𑀸𑀦𑁄 𑀦𑀸𑀫, 𑀉𑀧𑁆𑀧𑀚𑁆𑀚𑀢𑀺 𑀦𑀸𑀫, 𑀉𑀧𑁆𑀧𑀦𑁆𑀦𑁄 𑀦𑀸𑀫𑀸𑀢𑀺 𑀅𑀬𑀫𑁂𑀢𑁆𑀣 𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀲 𑀳𑀺 𑀤𑀻𑀧𑀗𑁆𑀓𑀭𑀧𑀸𑀤𑀫𑀽𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀦𑀸𑀕𑀸𑀫𑀺𑀨𑀮𑀁, 𑀢𑀸𑀯 𑀉𑀧𑁆𑀧𑀚𑁆𑀚𑀫𑀸𑀦𑁄 𑀦𑀸𑀫, 𑀅𑀭𑀳𑀢𑁆𑀢𑀫𑀕𑁆𑀕𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀢𑀺 𑀦𑀸𑀫, 𑀅𑀭𑀳𑀢𑁆𑀢𑀨𑀮𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑁄 𑀦𑀸𑀫. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀲𑀸𑀯𑀓𑀸𑀦𑀁 𑀯𑀺𑀬 𑀦 𑀧𑀝𑀺𑀧𑀸𑀝𑀺𑀬𑀸 𑀇𑀤𑁆𑀥𑀺𑀯𑀺𑀥𑀜𑀸𑀡𑀸𑀤𑀻𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑀳𑁂𑀯 𑀧𑀦 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀓𑀮𑁄𑀧𑀺 𑀲𑀩𑁆𑀩𑀜𑁆𑀜𑀼𑀕𑀼𑀡𑀭𑀸𑀲𑀺 𑀆𑀕𑀢𑁄𑀯 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀦𑀺𑀩𑁆𑀩𑀢𑁆𑀢𑀲𑀩𑁆𑀩𑀓𑀺𑀘𑁆𑀘𑀢𑁆𑀢𑀸 𑀅𑀭𑀳𑀢𑁆𑀢𑀨𑀮𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑁄 𑀦𑀸𑀫, 𑀢𑀤𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀢𑀤𑀜𑁆𑀜𑀓𑁆𑀔𑀡𑁂 𑀬𑀣𑀸𑀭𑀳𑀁 ‘‘𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺’’ 𑀘𑁆𑀘𑁂𑀯 𑀯𑀼𑀘𑁆𑀘𑀢𑀺. 𑀇𑀫𑀲𑁆𑀫𑀺𑀫𑁆𑀧𑀺 𑀲𑀼𑀢𑁆𑀢𑁂 𑀅𑀭𑀳𑀢𑁆𑀢𑀨𑀮𑀓𑁆𑀔𑀡𑀁𑀬𑁂𑀯 𑀲𑀦𑁆𑀥𑀸𑀬 ‘‘𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀢𑀻𑀢𑀓𑀸𑀮𑀺𑀓𑀲𑁆𑀲𑀸𑀧𑀺 𑀯𑀢𑁆𑀢𑀫𑀸𑀦𑀧𑀬𑁄𑀕𑀲𑁆𑀲 𑀓𑀢𑁆𑀣𑀘𑀺 𑀤𑀺𑀝𑁆𑀞𑀢𑁆𑀢𑀸 𑀉𑀧𑁆𑀧𑀦𑁆𑀦𑁄 𑀳𑁄𑀢𑀻𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄. 𑀏𑀯𑀁 𑀲𑀢𑀺 ‘‘𑀉𑀧𑁆𑀧𑀚𑁆𑀚𑀫𑀸𑀦𑁄’’𑀢𑀺 𑀘𑁂𑀢𑁆𑀣 𑀫𑀸𑀦-𑀲𑀤𑁆𑀤𑁄 𑀲𑀸𑀫𑀢𑁆𑀣𑀺𑀬𑀢𑁆𑀣𑁄. 𑀬𑀸𑀯𑀢𑀸 𑀲𑀸𑀫𑀢𑁆𑀣𑀺𑀬𑁂𑀦 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁 𑀘𑀭𑀺𑀫𑀪𑀯𑁂 𑀉𑀧𑁆𑀧𑀢𑁆𑀢𑀺 𑀇𑀘𑁆𑀙𑀺𑀢𑀩𑁆𑀩𑀸, 𑀢𑀸𑀯𑀢𑀸 𑀲𑀸𑀫𑀢𑁆𑀣𑀺𑀬𑁂𑀦 𑀩𑁄𑀥𑀺𑀲𑀫𑁆𑀪𑀸𑀭𑀪𑀽𑀢𑁂𑀦 𑀧𑀭𑀺𑀧𑀼𑀡𑁆𑀡𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀣𑀸𑀲𑀸𑀫𑀢𑁆𑀣𑀺𑀬𑀬𑁄𑀕𑁂𑀦 𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑁄 𑀦𑀸𑀫𑀸𑀢𑀺. 𑀲𑀩𑁆𑀩𑀲𑀢𑁆𑀢𑁂𑀳𑀺 𑀅𑀲𑀫𑁄, 𑀅𑀲𑀫𑁂𑀳𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀳𑁂𑀯 𑀲𑀫𑁄 𑀫𑀚𑁆𑀛𑁂 𑀪𑀺𑀦𑁆𑀦𑀲𑀼𑀯𑀡𑁆𑀡 𑀦𑀺𑀓𑁆𑀔𑀁 𑀯𑀺𑀬 𑀦𑀺𑀩𑁆𑀩𑀺𑀲𑀺𑀝𑁆𑀞𑁄, ‘‘𑀏𑀓𑀧𑀼𑀕𑁆𑀕𑀮𑁄’’𑀢𑀺 𑀘𑁂𑀢𑀲𑁆𑀲 𑀯𑀺𑀲𑁂𑀲𑀦𑀁. 𑀆𑀮𑀬𑀲𑀗𑁆𑀔𑀸𑀢𑀁 𑀢𑀡𑁆𑀳𑀁 𑀲𑀫𑀼𑀕𑁆𑀖𑀸𑀢𑁂𑀢𑀺 𑀲𑀫𑀼𑀘𑁆𑀙𑀺𑀦𑁆𑀤𑀢𑀻𑀢𑀺 𑀆𑀮𑀬𑀲𑀫𑀼𑀕𑁆𑀖𑀸𑀢𑁄. 𑀯𑀝𑁆𑀝𑀁 𑀉𑀧𑀘𑁆𑀙𑀺𑀦𑁆𑀤𑀢𑀻𑀢𑀺 𑀯𑀝𑁆𑀝𑀼𑀧𑀘𑁆𑀙𑁂𑀤𑁄.

𑀧𑀳𑁄𑀦𑁆𑀢𑁂𑀦𑀸𑀢𑀺 𑀲𑀓𑁆𑀓𑁄𑀦𑁆𑀢𑁂𑀦. ‘‘𑀧𑀜𑁆𑀘𑀦𑀺𑀓𑀸𑀬𑁂’’𑀢𑀺 𑀯𑀢𑁆𑀯𑀸𑀧𑀺 𑀅𑀦𑁂𑀓𑀸𑀯𑀬𑀯𑀢𑁆𑀢𑀸 𑀢𑁂𑀲𑀁 𑀦 𑀏𑀢𑁆𑀢𑀓𑁂𑀦 𑀲𑀩𑁆𑀩𑀣𑀸 𑀧𑀭𑀺𑀬𑀸𑀤𑀸𑀦𑀦𑁆𑀢𑀺 ‘‘𑀦𑀯𑀗𑁆𑀕𑀁 𑀲𑀢𑁆𑀣𑀼𑀲𑀸𑀲𑀦𑀁𑀘𑀢𑀼𑀭𑀸𑀲𑀻𑀢𑀺 𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀅𑀢𑀺𑀢𑁆𑀣𑁂𑀦𑀸𑀢𑀺 𑀅𑀦𑁄𑀢𑀭𑀡𑀝𑁆𑀞𑀸𑀦𑁂𑀦. 𑀦 𑀯𑀢𑁆𑀢𑀩𑁆𑀩𑁄 𑀅𑀧𑀭𑀺𑀫𑀸𑀡𑀯𑀡𑁆𑀡𑀢𑁆𑀢𑀸 𑀩𑀼𑀤𑁆𑀥𑀸𑀤𑀻𑀦𑀁, 𑀦𑀺𑀭𑀯𑀲𑁂𑀲𑀸𑀦𑀜𑁆𑀘 𑀢𑁂𑀲𑀁 𑀇𑀥 𑀧𑀓𑀸𑀲𑀦𑁂𑀦 𑀧𑀸𑀴𑀺𑀲𑀁𑀯𑀡𑁆𑀡𑀦𑀸𑀬 𑀏𑀯 𑀲𑀫𑁆𑀧𑀚𑁆𑀚𑀦𑀢𑁄, 𑀘𑀺𑀢𑁆𑀢𑀲𑀫𑁆𑀧𑀳𑀁𑀲𑀦𑀓𑀫𑁆𑀫𑀝𑁆𑀞𑀸𑀦𑀲𑀫𑁆𑀧𑀚𑁆𑀚𑀦𑀯𑀲𑁂𑀦 𑀘 𑀲𑀨𑀮𑀢𑁆𑀢𑀸. 𑀣𑀸𑀫𑁄 𑀯𑁂𑀤𑀺𑀢𑀩𑁆𑀩𑁄 𑀲𑀩𑁆𑀩𑀣𑀸𑀫𑁂𑀦 𑀧𑀓𑀸𑀲𑀺𑀢𑀢𑁆𑀢𑀸. 𑀓𑀺𑀁 𑀧𑀦 𑀲𑁄 𑀢𑀣𑀸 𑀑𑀕𑀸𑀳𑁂𑀢𑁆𑀯𑀸 𑀪𑀸𑀲𑀢𑀻𑀢𑀺 𑀆𑀳. ‘‘𑀩𑁆𑀭𑀳𑁆𑀫𑀤𑀢𑁆𑀢𑁄 𑀧𑀦𑀸’’𑀢𑀺𑀆𑀤𑀺. 𑀅𑀦𑀼𑀓𑁆𑀓𑀫𑁂𑀦 𑀧𑀼𑀦𑀧𑁆𑀧𑀼𑀦𑀁 𑀯𑀸 𑀲𑀯𑀦𑀁 𑀅𑀦𑀼𑀲𑁆𑀲𑀯𑁄, 𑀧𑀭𑀫𑁆𑀧𑀭𑀲𑀯𑀦𑀁. 𑀆𑀤𑀺-𑀲𑀤𑁆𑀤𑁂𑀦 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀢𑁆𑀣 ‘‘𑀲𑀼𑀦𑁆𑀤𑀭𑀫𑀺𑀤𑀁 𑀓𑀸𑀭𑀡’’𑀦𑁆𑀢𑀺 𑀏𑀯𑀁 𑀲𑀬𑀫𑁂𑀯 𑀓𑀸𑀭𑀡𑀧𑀭𑀺𑀯𑀺𑀢𑀓𑁆𑀓𑀦𑀁 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑁄. 𑀅𑀢𑁆𑀢𑀦𑁄 𑀤𑀺𑀝𑁆𑀞𑀺𑀬𑀸 𑀦𑀺𑀚𑁆𑀛𑀸𑀬𑀺𑀢𑁆𑀯𑀸 𑀔𑀫𑀦𑀁 𑀭𑀼𑀘𑁆𑀘𑀦𑀁 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀻𑀢𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁, 𑀢𑁂𑀳𑀺𑀬𑁂𑀯 𑀲𑀫𑁆𑀩𑀦𑁆𑀥𑀺𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀫𑀢𑁆𑀢-𑀲𑀤𑁆𑀤𑁄 𑀳𑁂𑀢𑁆𑀣 𑀯𑀺𑀲𑁂𑀲𑀦𑀺𑀯𑀢𑁆𑀢𑀺𑀅𑀢𑁆𑀣𑁄, 𑀢𑁂𑀦 𑀬𑀣𑀸𑀯𑀼𑀢𑁆𑀢𑀁 𑀓𑀸𑀭𑀡𑀁 𑀦𑀺𑀯𑀢𑁆𑀢𑁂𑀢𑀺. 𑀅𑀢𑁆𑀢𑀦𑁄 𑀣𑀸𑀫𑁂𑀦𑀸𑀢𑀺 𑀅𑀢𑁆𑀢𑀦𑁄 𑀜𑀸𑀡𑀩𑀮𑁂𑀦𑁂𑀯, 𑀦 𑀧𑀦 𑀩𑀼𑀤𑁆𑀥𑀸𑀤𑀻𑀦𑀁 𑀕𑀼𑀡𑀸𑀦𑀼𑀭𑀽𑀧𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀧𑀭𑀺𑀫𑁂𑀬𑁆𑀬𑀧𑁆𑀧𑀪𑁂𑀤𑀸 𑀳𑀺 𑀩𑀼𑀤𑁆𑀥𑀸𑀤𑀻𑀦𑀁 𑀕𑀼𑀡𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀩𑀼𑀤𑁆𑀥𑁄𑀧𑀺 𑀩𑀼𑀤𑁆𑀥𑀲𑁆𑀲 𑀪𑀡𑁂𑀬𑁆𑀬 𑀯𑀡𑁆𑀡𑀁,

𑀓𑀧𑁆𑀧𑀫𑁆𑀧𑀺 𑀘𑁂 𑀅𑀜𑁆𑀜𑀫𑀪𑀸𑀲𑀫𑀸𑀦𑁄;

𑀔𑀻𑀬𑁂𑀣 𑀓𑀧𑁆𑀧𑁄 𑀘𑀺𑀭𑀤𑀻𑀖𑀫𑀦𑁆𑀢𑀭𑁂,

𑀯𑀡𑁆𑀡𑁄 𑀦 𑀔𑀻𑀬𑁂𑀣 𑀢𑀣𑀸𑀕𑀢𑀲𑁆𑀲𑀸’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁧.𑁩𑁦𑁪; 𑁩.𑁧𑁪𑁧; 𑀫. 𑀦𑀺. 𑀅𑀝𑁆𑀞. 𑁨.𑁪𑁨𑁫; 𑀉𑀤𑀸. 𑀅𑀝𑁆𑀞. 𑁫𑁩; 𑀩𑀼. 𑀯𑀁. 𑀅𑀝𑁆𑀞. 𑁪.𑁧; 𑀅𑀧. 𑀅𑀝𑁆𑀞. 𑁨.𑁯𑁧; 𑀘𑀭𑀺𑀬𑀸. 𑀅𑀝𑁆𑀞. 𑁯, 𑁩𑁨𑁯);

𑀇𑀥𑀸𑀧𑀺 𑀯𑀓𑁆𑀔𑀢𑀺 ‘‘𑀅𑀧𑁆𑀧𑀫𑀢𑁆𑀢𑀓𑀁 𑀔𑁄 𑀧𑀦𑁂𑀢’’𑀦𑁆𑀢𑀺𑀆𑀤𑀺.

𑀇𑀢𑀺-𑀲𑀤𑁆𑀤𑁄 𑀦𑀺𑀤𑀲𑁆𑀲𑀦𑀢𑁆𑀣𑁄 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀦𑀺𑀤𑀲𑁆𑀲𑁂𑀢𑀺. 𑀳-𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑀦𑁆𑀢𑀺 𑀆𑀳 ‘‘𑀏𑀯𑀁 𑀢𑁂’’𑀢𑀺. 𑀅𑀜𑁆𑀜𑀫𑀜𑁆𑀜𑀲𑁆𑀲𑀸’’𑀢𑀺 𑀇𑀤𑀁 𑀭𑀼𑀴𑁆𑀳𑀺𑀧𑀤𑀁 ‘‘𑀏𑀓𑁄 𑀏𑀓𑀸𑀬𑀸’’𑀢𑀺 (𑀧𑀸𑀭𑀸. 𑁪𑁪𑁪, 𑁪𑁫𑁨) 𑀧𑀤𑀁 𑀯𑀺𑀬𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀜𑁆𑀜𑁄𑀅𑀜𑁆𑀜𑀲𑁆𑀲𑀸’’𑀢𑀺 𑀭𑀼𑀴𑁆𑀳𑀺𑀧𑀤𑁂𑀦𑁂𑀯 𑀯𑀺𑀯𑀭𑀢𑀺. ‘‘𑀉𑀚𑀼𑀫𑁂𑀯𑀸’’𑀢𑀺 𑀲𑀸𑀯𑀥𑀸𑀭𑀡𑀲𑀫𑀸𑀲𑀢𑀁 𑀯𑀢𑁆𑀯𑀸 𑀢𑁂𑀦 𑀦𑀺𑀯𑀢𑁆𑀢𑁂𑀢𑀩𑁆𑀩𑀢𑁆𑀣𑀁 𑀆𑀳 ‘‘𑀈𑀲𑀓𑀫𑁆𑀧𑀺 𑀅𑀧𑀭𑀺𑀳𑀭𑀺𑀢𑁆𑀯𑀸’’𑀢𑀺, 𑀣𑁄𑀓𑀢𑀭𑀫𑁆𑀧𑀺 𑀅𑀯𑀺𑀭𑀚𑁆𑀛𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀓𑀣𑀦𑁆𑀢𑀺 𑀆𑀳 ‘‘𑀆𑀘𑀭𑀺𑀬𑁂𑀦 𑀳𑀻’’𑀢𑀺𑀆𑀤𑀺. 𑀧𑀼𑀩𑁆𑀩𑁂 𑀏𑀓𑀯𑀸𑀭𑀫𑀺𑀯 𑀅𑀯𑀡𑁆𑀡𑀯𑀡𑁆𑀡𑀪𑀸𑀲𑀦𑁂 𑀦𑀺𑀤𑁆𑀤𑀺𑀝𑁆𑀞𑁂𑀧𑀺 ‘‘𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀯𑀸𑀤𑀸’’𑀢𑀺 (𑀤𑀻. 𑀦𑀺. 𑁧.𑁧) 𑀯𑀼𑀢𑁆𑀢𑀢𑁆𑀢𑀸 𑀅𑀦𑁂𑀓𑀯𑀸𑀭𑀫𑁂𑀯 𑀢𑁂 𑀏𑀯𑀁 𑀪𑀸𑀲𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀦 𑀇𑀢𑀭𑁄 𑀅𑀯𑀡𑁆𑀡𑀁 𑀇𑀢𑀭𑁄 𑀯𑀡𑁆𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀳𑀺 𑀯𑀺𑀲𑀤𑁆𑀤𑀲𑁆𑀲 𑀯𑀺𑀯𑀺𑀥𑀢𑁆𑀣𑀢𑀁 𑀲𑀫𑀢𑁆𑀣𑁂𑀢𑀺. 𑀲𑀸𑀭𑀨𑀮𑀓𑁂𑀢𑀺 𑀲𑀸𑀭𑀤𑀸𑀭𑀼𑀨𑀮𑀓𑁂, 𑀉𑀢𑁆𑀢𑀫𑀨𑀮𑀓𑁂 𑀯𑀸. 𑀯𑀺𑀲𑀭𑀼𑀓𑁆𑀔𑀆𑀡𑀺𑀦𑁆𑀢𑀺 𑀯𑀺𑀲𑀤𑀸𑀭𑀼𑀫𑀬𑀧𑀝𑀸𑀡𑀺𑀁. 𑀇𑀭𑀺𑀬𑀸𑀧𑀣𑀸𑀦𑀼𑀩𑀦𑁆𑀥𑀦𑁂𑀦 𑀅𑀦𑀼𑀩𑀦𑁆𑀥𑀸 𑀳𑁄𑀦𑁆𑀢𑀺, 𑀦 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀅𑀦𑀼𑀩𑀦𑁆𑀥𑀦𑁂𑀦.

𑀲𑀻𑀲𑀸𑀦𑀼𑀮𑁄𑀓𑀺𑀦𑁄𑀢𑀺 𑀲𑀻𑀲𑁂𑀦 𑀅𑀦𑀼𑀮𑁄𑀓𑀺𑀦𑁄, 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀫𑀕𑁆𑀕𑀸𑀦𑀼𑀓𑁆𑀓𑀫𑁂𑀦 𑀑𑀮𑁄𑀓𑀬𑀫𑀸𑀦𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀺𑀁 𑀓𑀸𑀮𑁂𑀢𑀺 𑀬𑀫𑁆𑀳𑀺 𑀲𑀁𑀯𑀘𑁆𑀙𑀭𑁂, 𑀉𑀢𑀼𑀫𑁆𑀳𑀺, 𑀫𑀸𑀲𑁂, 𑀧𑀓𑁆𑀔𑁂 𑀯𑀸 𑀪𑀕𑀯𑀸 𑀢𑀁 𑀅𑀤𑁆𑀥𑀸𑀦𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄, 𑀢𑀲𑁆𑀫𑀺𑀁 𑀓𑀸𑀮𑁂. 𑀢𑁂𑀦 𑀳𑀺 𑀅𑀦𑀺𑀬𑀫𑀢𑁄 𑀲𑀁𑀯𑀘𑁆𑀙𑀭𑀉𑀢𑀼𑀫𑀸𑀲𑀟𑁆𑀠𑀫𑀸𑀲𑀸𑀯 𑀦𑀺𑀤𑁆𑀤𑀺𑀲𑀺𑀢𑀸 ‘‘𑀢𑀁 𑀤𑀺𑀯𑀲’’𑀦𑁆𑀢𑀺 𑀤𑀺𑀯𑀲𑀲𑁆𑀲 𑀯𑀺𑀲𑀼𑀁 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸, 𑀫𑀼𑀳𑀼𑀢𑁆𑀢𑀸𑀤𑀻𑀦𑀜𑁆𑀘 𑀤𑀺𑀯𑀲𑀧𑀭𑀺𑀬𑀸𑀧𑀦𑁆𑀦𑀢𑁄. ‘‘𑀢𑀁 𑀅𑀤𑁆𑀥𑀸𑀦𑀁 𑀧𑀝𑀺𑀧𑀦𑁆𑀦𑁄’’𑀢𑀺 𑀘𑁂𑀢𑁆𑀣 𑀆𑀥𑀸𑀭𑀯𑀘𑀦𑀫𑁂𑀢𑀁. 𑀢𑁂𑀦𑁂𑀯 𑀳𑀺 𑀓𑀺𑀭𑀺𑀬𑀸𑀯𑀺𑀘𑁆𑀙𑁂𑀤𑀤𑀲𑁆𑀲𑀦𑀯𑀲𑁂𑀦 ‘‘𑀭𑀸𑀚𑀕𑀳𑁂 𑀧𑀺𑀡𑁆𑀟𑀸𑀬 𑀘𑀭𑀢𑀻’’𑀢𑀺 𑀲𑀳 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸𑀳𑀺 𑀯𑀢𑁆𑀢𑀫𑀸𑀦𑀦𑀺𑀤𑁆𑀤𑁂𑀲𑁄 𑀓𑀢𑁄, 𑀇𑀢𑀭𑀣𑀸 𑀢𑀲𑁆𑀫𑀺𑀁 𑀓𑀸𑀮𑁂 𑀭𑀸𑀚𑀕𑀳𑁂 𑀧𑀺𑀡𑁆𑀟𑀸𑀬 𑀘𑀭𑀢𑀺, 𑀢𑀁 𑀅𑀤𑁆𑀥𑀸𑀦𑀫𑀕𑁆𑀕𑀜𑁆𑀘 𑀧𑀝𑀺𑀧𑀦𑁆𑀦𑁄𑀢𑀺 𑀅𑀦𑀥𑀺𑀧𑁆𑀧𑁂𑀢𑀢𑁆𑀣𑁄 𑀆𑀧𑀚𑁆𑀚𑁂𑀬𑁆𑀬. 𑀦 𑀳𑀺 𑀅𑀲𑀫𑀸𑀦𑀯𑀺𑀲𑀬𑀸 𑀓𑀺𑀭𑀺𑀬𑀸 𑀏𑀓𑀸𑀥𑀸𑀭𑀸 𑀲𑀫𑁆𑀪𑀯𑀦𑁆𑀢𑀺, 𑀬𑀸 𑀘𑁂𑀢𑁆𑀣 𑀅𑀥𑀺𑀧𑁆𑀧𑁂𑀢𑀸 𑀅𑀤𑁆𑀥𑀸𑀦𑀧𑀝𑀺𑀧𑀚𑁆𑀚𑀦𑀓𑀺𑀭𑀺𑀬𑀸, 𑀲𑀸 𑀘 𑀅𑀦𑀺𑀬𑀫𑀺𑀢𑀸 𑀦 𑀬𑀼𑀢𑁆𑀢𑀸𑀢𑀺. 𑀭𑀸𑀚𑀕𑀳𑀧𑀭𑀺𑀯𑀢𑁆𑀢𑀓𑁂𑀲𑀽𑀢𑀺 𑀭𑀸𑀚𑀕𑀳𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀞𑀺𑀢𑁂𑀲𑀼. ‘‘𑀅𑀜𑁆𑀜𑀢𑀭𑀲𑁆𑀫𑀺’’𑀦𑁆𑀢𑀺 𑀇𑀫𑀺𑀦𑀸 𑀢𑁂𑀲𑀼 𑀪𑀕𑀯𑀢𑁄 𑀅𑀦𑀺𑀩𑀤𑁆𑀥𑀯𑀸𑀲𑀁 𑀤𑀲𑁆𑀲𑁂𑀢𑀺. 𑀲𑁄𑀢𑀺 𑀏𑀯𑀁 𑀭𑀸𑀚𑀕𑀳𑁂 𑀯𑀲𑀫𑀸𑀦𑁄 𑀲𑁄 𑀪𑀕𑀯𑀸. 𑀧𑀺𑀡𑁆𑀟𑀸𑀬 𑀘𑀭𑀡𑁂𑀦𑀧𑀺 𑀳𑀺 𑀢𑀢𑁆𑀣 𑀧𑀝𑀺𑀩𑀤𑁆𑀥𑀪𑀸𑀯𑀯𑀘𑀦𑀢𑁄 𑀲𑀦𑁆𑀦𑀺𑀯𑀸𑀲𑀢𑁆𑀢𑀫𑁂𑀯 𑀤𑀲𑁆𑀲𑁂𑀢𑀺. 𑀬𑀤𑀺 𑀧𑀦 ‘‘𑀧𑀺𑀡𑁆𑀟𑀸𑀬 𑀘𑀭𑀫𑀸𑀦𑁄 𑀲𑁄 𑀪𑀕𑀯𑀸’’𑀢𑀺 𑀧𑀘𑁆𑀘𑀸𑀫𑀲𑁂𑀬𑁆𑀬, 𑀬𑀣𑀸𑀯𑀼𑀢𑁆𑀢𑁄𑀯 𑀅𑀦𑀥𑀺𑀧𑁆𑀧𑁂𑀢𑀢𑁆𑀣𑁄 𑀆𑀧𑀚𑁆𑀚𑁂𑀬𑁆𑀬𑀸𑀢𑀺. 𑀢𑀁 𑀤𑀺𑀯𑀲𑀦𑁆𑀢𑀺 𑀬𑀁 𑀤𑀺𑀯𑀲𑀁 𑀅𑀤𑁆𑀥𑀸𑀦𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄, 𑀢𑀁 𑀤𑀺𑀯𑀲. 𑀢𑀁 𑀅𑀤𑁆𑀥𑀸𑀦𑀁 𑀧𑀝𑀺𑀧𑀦𑁆𑀦𑁄𑀢𑀺 𑀏𑀢𑁆𑀣 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀯𑀘𑀦𑀫𑁂𑀢𑀁. 𑀪𑀢𑁆𑀢𑀪𑀼𑀜𑁆𑀚𑀦𑀢𑁄 𑀧𑀘𑁆𑀙𑀸 𑀧𑀘𑁆𑀙𑀸𑀪𑀢𑁆𑀢𑀁, 𑀢𑀲𑁆𑀫𑀺𑀁 𑀧𑀘𑁆𑀙𑀸𑀪𑀢𑁆𑀢𑀲𑀫𑀬𑁂. 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄𑀢𑀺 𑀬𑀢𑁆𑀣 𑀧𑀺𑀡𑁆𑀟𑀧𑀸𑀢𑀢𑁆𑀣𑀸𑀬 𑀘𑀭𑀺𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀺, 𑀢𑀢𑁄 𑀅𑀧𑀓𑁆𑀓𑀦𑁆𑀢𑁄. 𑀢𑀁 𑀅𑀤𑁆𑀥𑀸𑀦𑀁 𑀧𑀝𑀺𑀧𑀦𑁆𑀦𑁄𑀢𑀺 ‘‘𑀦𑀸𑀴𑀦𑁆𑀤𑀸𑀬𑀁 𑀯𑁂𑀦𑁂𑀬𑁆𑀬𑀸𑀦𑀁 𑀯𑀺𑀯𑀺𑀥𑀳𑀺𑀢𑀲𑀼𑀔𑀦𑀺𑀧𑁆𑀨𑀢𑁆𑀢𑀺𑀁 𑀆𑀓𑀗𑁆𑀔𑀫𑀸𑀦𑁄 𑀇𑀫𑀺𑀲𑁆𑀲𑀸 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀢𑀺𑀯𑀺𑀥𑀲𑀻𑀮𑀸𑀮𑀗𑁆𑀓𑀢𑀁 𑀦𑀸𑀦𑀸𑀯𑀺𑀥𑀓𑀼𑀳𑀦𑀮𑀧𑀦𑀸𑀤𑀺𑀫𑀺𑀘𑁆𑀙𑀸𑀚𑀻𑀯𑀯𑀺𑀤𑁆𑀥𑀁𑀲𑀦𑀁 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀚𑀸𑀮𑀯𑀺𑀦𑀺𑀯𑁂𑀞𑀦𑀁 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀧𑀓𑀫𑁆𑀧𑀦𑀁 𑀩𑁆𑀭𑀳𑁆𑀫𑀚𑀸𑀮𑀲𑀼𑀢𑁆𑀢𑀁 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀢𑀁 𑀬𑀣𑀸𑀯𑀼𑀢𑁆𑀢𑀁 𑀤𑀻𑀖𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄, 𑀇𑀤𑀁 𑀧𑀦 𑀓𑀸𑀭𑀡𑀁 𑀧𑀓𑀭𑀡𑀢𑁄𑀯 𑀧𑀸𑀓𑀝𑀦𑁆𑀢𑀺 𑀦 𑀯𑀼𑀢𑁆𑀢𑀁. 𑀏𑀢𑁆𑀢𑀸𑀯𑀢𑀸 ‘‘𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀢𑀁 𑀅𑀤𑁆𑀥𑀸𑀦𑀁 𑀧𑀝𑀺𑀧𑀦𑁆𑀦𑁄’’𑀢𑀺 𑀘𑁄𑀤𑀦𑀸 𑀯𑀺𑀲𑁄𑀥𑀺𑀢𑀸 𑀳𑁄𑀢𑀺.

𑀇𑀤𑀸𑀦𑀺 𑀇𑀢𑀭𑀫𑁆𑀧𑀺 𑀘𑁄𑀤𑀦𑀁 𑀯𑀺𑀲𑁄𑀥𑀺𑀢𑀼𑀁 ‘‘𑀲𑀼𑀧𑁆𑀧𑀺𑀬𑁄𑀧𑀻’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀺𑀁 𑀓𑀸𑀮𑁂, 𑀢𑀁 𑀤𑀺𑀯𑀲𑀁 𑀅𑀦𑀼𑀩𑀦𑁆𑀥𑁄𑀢𑀺 𑀘 𑀯𑀼𑀢𑁆𑀢𑀦𑀬𑁂𑀦 𑀲𑀫𑁆𑀩𑀦𑁆𑀥𑁄. 𑀧𑀸𑀢𑁄 𑀅𑀲𑀺𑀢𑀩𑁆𑀩𑁄𑀢𑀺 𑀧𑀸𑀢𑀭𑀸𑀲𑁄, 𑀲𑁄 𑀪𑀼𑀢𑁆𑀢𑁄 𑀬𑁂𑀦𑀸𑀢𑀺 𑀪𑀼𑀢𑁆𑀢𑀧𑀸𑀢𑀭𑀸𑀲𑁄. 𑀇𑀘𑁆𑀘𑁂𑀯𑀸𑀢𑀺 𑀏𑀯𑀫𑁂𑀯 𑀫𑀦𑀲𑀺 𑀲𑀦𑁆𑀦𑀺𑀥𑀸𑀬, 𑀦 𑀧𑀦 ‘‘𑀪𑀕𑀯𑀦𑁆𑀢𑀁, 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀺𑀲𑁆𑀲𑀸𑀫𑀻’’𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀪𑀕𑀯𑀢𑁄 𑀢𑀁 𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑀪𑀸𑀯𑀁 𑀅𑀚𑀸𑀦𑀦𑁆𑀢𑁄𑀯𑀸’’𑀢𑀺, 𑀢𑀣𑀸 𑀅𑀚𑀸𑀦𑀦𑁆𑀢𑁄 𑀏𑀯 𑀳𑀼𑀢𑁆𑀯𑀸 𑀅𑀦𑀼𑀩𑀦𑁆𑀥𑁄𑀢𑀺 𑀅𑀢𑁆𑀣𑁄. 𑀦 𑀳𑀺 𑀲𑁄 𑀪𑀕𑀯𑀦𑁆𑀢𑀁 𑀤𑀝𑁆𑀞𑀼𑀫𑁂𑀯 𑀇𑀘𑁆𑀙𑀢𑀺, 𑀢𑁂𑀦𑀸𑀳 ‘‘𑀲𑀘𑁂 𑀧𑀦 𑀚𑀸𑀦𑁂𑀬𑁆𑀬, 𑀦𑀸𑀦𑀼𑀩𑀦𑁆𑀥𑁂𑀬𑁆𑀬𑀸’’𑀢𑀺. 𑀏𑀢𑁆𑀢𑀸𑀯𑀢𑀸 ‘‘𑀓𑀲𑁆𑀫𑀸 𑀘 𑀲𑀼𑀧𑁆𑀧𑀺𑀬𑁄 𑀅𑀦𑀼𑀩𑀦𑁆𑀥𑁄’’𑀢𑀺 𑀘𑁄𑀤𑀦𑀸 𑀯𑀺𑀲𑁄𑀥𑀺𑀢𑀸 𑀳𑁄𑀢𑀺. ‘‘𑀲𑁄’’𑀢𑀺𑀆𑀤𑀺𑀦𑀸 𑀅𑀧𑀭𑀫𑁆𑀧𑀺 𑀘𑁄𑀤𑀦𑀁 𑀯𑀺𑀲𑁄𑀥𑁂𑀢𑀺. 𑀓𑀤𑀸𑀘𑀺 𑀧𑀦 𑀪𑀕𑀯𑀸 𑀅𑀜𑁆𑀜𑀢𑀭𑀯𑁂𑀲𑁂𑀦𑁂𑀯 𑀕𑀘𑁆𑀙𑀢𑀺 𑀅𑀗𑁆𑀕𑀼𑀮𑀺𑀫𑀸𑀮𑀤𑀫𑀦𑀧𑀓𑁆𑀓𑀼𑀲𑀸𑀢𑀺𑀅𑀪𑀺𑀕𑁆𑀕𑀫𑀦𑀸𑀤𑀻𑀲𑀼, 𑀓𑀤𑀸𑀘𑀺 𑀩𑀼𑀤𑁆𑀥𑀲𑀺𑀭𑀺𑀬𑀸, 𑀇𑀥𑀸𑀧𑀺 𑀈𑀤𑀺𑀲𑀸𑀬 𑀩𑀼𑀤𑁆𑀥𑀲𑀺𑀭𑀺𑀬𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀩𑀼𑀤𑁆𑀥𑀲𑀺𑀭𑀺𑀬𑀸 𑀲𑁄𑀪𑀫𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀺𑀭𑀻𑀢𑀺 𑀘𑁂𑀢𑁆𑀣 𑀲𑀭𑀻𑀭𑀲𑁄𑀪𑀕𑁆𑀕𑀸𑀤𑀺𑀲𑀫𑁆𑀧𑀢𑁆𑀢𑀺, 𑀢𑀤𑁂𑀯 𑀉𑀧𑀫𑀸𑀯𑀲𑁂𑀦 𑀤𑀲𑁆𑀲𑁂𑀢𑀺 ‘‘𑀭𑀢𑁆𑀢𑀓𑀫𑁆𑀩𑀮𑀧𑀭𑀺𑀓𑁆𑀔𑀺𑀢𑁆𑀢𑀫𑀺𑀯𑀸’’𑀢𑀺𑀆𑀤𑀺𑀦𑀸. 𑀕𑀘𑁆𑀙𑀢𑀻𑀢𑀺 𑀚𑀗𑁆𑀕𑀫𑁄 𑀬𑀣𑀸 ‘‘𑀘𑀗𑁆𑀓𑀫𑁄’’𑀢𑀺. 𑀘𑀜𑁆𑀘𑀮𑀫𑀸𑀦𑁄 𑀕𑀘𑁆𑀙𑀦𑁆𑀢𑁄 𑀕𑀺𑀭𑀺, 𑀢𑀸𑀤𑀺𑀲𑀲𑁆𑀲 𑀓𑀦𑀓𑀕𑀺𑀭𑀺𑀦𑁄 𑀲𑀺𑀔𑀭𑀫𑀺𑀯𑀸𑀢𑀺 𑀅𑀢𑁆𑀣𑁄.

‘‘𑀢𑀲𑁆𑀫𑀺𑀁 𑀓𑀺𑀭𑀸’’𑀢𑀺𑀆𑀤𑀺 𑀢𑀩𑁆𑀩𑀺𑀯𑀭𑀡𑀁, 𑀧𑀸𑀴𑀺𑀬𑀁 𑀅𑀤𑀲𑁆𑀲𑀺𑀢𑀢𑁆𑀢𑀸, 𑀧𑁄𑀭𑀸𑀡𑀝𑁆𑀞𑀓𑀣𑀸𑀬𑀜𑁆𑀘 𑀅𑀦𑀸𑀕𑀢𑀢𑁆𑀢𑀸 𑀅𑀦𑀼𑀲𑁆𑀲𑀯𑀲𑀺𑀤𑁆𑀥𑀸 𑀅𑀬𑀁 𑀓𑀣𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀓𑀺𑀭𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀣𑀸 𑀯𑀸 𑀳𑁄𑀢𑀼 𑀅𑀜𑁆𑀜𑀣𑀸 𑀯𑀸, 𑀅𑀢𑁆𑀢𑀦𑀸 𑀅𑀤𑀺𑀝𑁆𑀞𑀁, 𑀅𑀲𑀼𑀢𑀁, 𑀅𑀫𑀼𑀢𑀜𑁆𑀘 𑀅𑀦𑀼𑀲𑁆𑀲𑀯𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀦𑀻𑀮𑀧𑀻𑀢𑀮𑁄𑀳𑀺𑀢𑁄𑀤𑀸𑀢𑀫𑀜𑁆𑀚𑀺𑀝𑁆𑀞𑀧𑀪𑀲𑁆𑀲𑀭𑀯𑀲𑁂𑀦 𑀙𑀩𑁆𑀩𑀡𑁆𑀡𑀸. 𑀲𑀫𑀦𑁆𑀢𑀸𑀢𑀺 𑀲𑀫𑀦𑁆𑀢𑀢𑁄 𑀤𑀲𑀳𑀺 𑀤𑀺𑀲𑀸𑀳𑀺. 𑀅𑀲𑀻𑀢𑀺𑀳𑀢𑁆𑀣𑀧𑁆𑀧𑀫𑀸𑀡𑁂𑀢𑀺 𑀢𑁂𑀲𑀁 𑀭𑀲𑁆𑀫𑀻𑀦𑀁 𑀧𑀓𑀢𑀺𑀬𑀸 𑀧𑀯𑀢𑁆𑀢𑀺𑀝𑁆𑀞𑀸𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀲𑀫𑀦𑁆𑀢𑀢𑁄, 𑀉𑀧𑀭𑀺 𑀘 𑀧𑀘𑁆𑀘𑁂𑀓𑀁 𑀅𑀲𑀻𑀢𑀺𑀳𑀢𑁆𑀣𑀫𑀢𑁆𑀢𑁂 𑀧𑀤𑁂𑀲𑁂 𑀧𑀓𑀢𑀺𑀬𑀸𑀯 𑀖𑀦𑀻𑀪𑀽𑀢𑀸 𑀭𑀲𑁆𑀫𑀺𑀬𑁄 𑀢𑀺𑀝𑁆𑀞𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀁, 𑀯𑀺𑀦𑀬𑀝𑀻𑀓𑀸𑀬𑀁 𑀧𑀦 ‘‘𑀢𑀸𑀬𑁂𑀯 𑀩𑁆𑀬𑀸𑀫𑀧𑁆𑀧𑀪𑀸 𑀦𑀸𑀫. 𑀬𑀢𑁄 𑀙𑀩𑁆𑀩𑀡𑁆𑀡𑀸 𑀭𑀲𑁆𑀫𑀺𑀬𑁄 𑀢𑀴𑀸𑀓𑀢𑁄 𑀫𑀸𑀢𑀺𑀓𑀸 𑀯𑀺𑀬 𑀤𑀲𑀲𑀼 𑀤𑀺𑀲𑀸𑀲𑀼 𑀥𑀸𑀯𑀦𑁆𑀢𑀺, 𑀲𑀸 𑀬𑀲𑁆𑀫𑀸 𑀩𑁆𑀬𑀸𑀫𑀫𑀢𑁆𑀢𑀸 𑀯𑀺𑀬 𑀔𑀸𑀬𑀢𑀺, 𑀢𑀲𑁆𑀫𑀸 𑀩𑁆𑀬𑀸𑀫𑀧𑁆𑀧𑀪𑀸𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀯𑀼𑀢𑁆𑀢𑀁, (𑀯𑀺. 𑀯𑀺. 𑀝𑀻. 𑁧.𑁧𑁬) 𑀲𑀗𑁆𑀕𑀻𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀧𑀦 𑀯𑀓𑁆𑀔𑀢𑀺 ‘‘𑀧𑀼𑀭𑀢𑁆𑀣𑀺𑀫𑀓𑀸𑀬𑀢𑁄 𑀲𑀼𑀯𑀡𑁆𑀡𑀯𑀡𑁆𑀡𑀸 𑀭𑀲𑁆𑀫𑀺 𑀉𑀝𑁆𑀞𑀳𑀺𑀢𑁆𑀯𑀸 𑀅𑀲𑀻𑀢𑀺𑀳𑀢𑁆𑀣𑀁 𑀞𑀸𑀦𑀁 𑀕𑀡𑁆𑀳𑀸𑀢𑀺. 𑀧𑀘𑁆𑀙𑀺𑀫𑀓𑀸𑀬𑀢𑁄. 𑀤𑀓𑁆𑀔𑀺𑀡𑀳𑀢𑁆𑀣𑀢𑁄. 𑀯𑀸𑀫𑀳𑀢𑁆𑀣𑀢𑁄 𑀲𑀼𑀯𑀡𑁆𑀡𑀯𑀡𑁆𑀡𑀸 𑀭𑀲𑁆𑀫𑀺 𑀉𑀝𑁆𑀞𑀳𑀺𑀢𑁆𑀯𑀸 𑀅𑀲𑀻𑀢𑀺𑀳𑀢𑁆𑀣𑀁 𑀞𑀸𑀦𑀁 𑀕𑀡𑁆𑀳𑀸𑀢𑀺. 𑀉𑀧𑀭𑀺 𑀓𑁂𑀲𑀦𑁆𑀢𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀓𑁂𑀲𑀸𑀯𑀝𑁆𑀝𑁂𑀳𑀺 𑀫𑁄𑀭𑀕𑀻𑀯𑀯𑀡𑁆𑀡𑀸 𑀭𑀲𑁆𑀫𑀺 𑀉𑀝𑁆𑀞𑀳𑀺𑀢𑁆𑀯𑀸 𑀕𑀕𑀦𑀢𑀮𑁂 𑀅𑀲𑀻𑀢𑀺𑀳𑀢𑁆𑀣𑀁 𑀞𑀸𑀦𑀁 𑀕𑀡𑁆𑀳𑀸𑀢𑀺. 𑀳𑁂𑀝𑁆𑀞𑀸 𑀧𑀸𑀤𑀢𑀮𑁂𑀳𑀺 𑀧𑀯𑀸𑀴𑀯𑀡𑁆𑀡𑀸 𑀭𑀲𑁆𑀫𑀺 𑀉𑀝𑁆𑀞𑀳𑀺𑀢𑁆𑀯𑀸 𑀖𑀦𑀧𑀣𑀯𑀺𑀬𑀁 𑀅𑀲𑀻𑀢𑀺𑀳𑀢𑁆𑀣𑀁 𑀞𑀸𑀦𑀁 𑀕𑀡𑁆𑀳𑀸𑀢𑀺. 𑀏𑀯𑀁 𑀲𑀫𑀦𑁆𑀢𑀸 𑀅𑀲𑀻𑀢𑀺𑀳𑀢𑁆𑀣𑀫𑀢𑁆𑀢𑀁 𑀞𑀸𑀦𑀁 𑀙𑀩𑁆𑀩𑀡𑁆𑀡𑀸 𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀯𑀺𑀚𑁆𑀚𑁄𑀢𑀫𑀸𑀦𑀸 𑀯𑀺𑀧𑁆𑀨𑀦𑁆𑀤𑀫𑀸𑀦𑀸 𑀯𑀺𑀥𑀸𑀯𑀦𑁆𑀢𑀻’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁩.𑁨𑁯𑁯) 𑀓𑁂𑀘𑀺 𑀧𑀦 𑀅𑀜𑁆𑀜𑀣𑀸𑀧𑀺 𑀧𑀭𑀺𑀓𑀧𑁆𑀧𑀦𑀸𑀫𑀢𑁆𑀢𑁂𑀦 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁 𑀢𑀣𑀸 𑀅𑀜𑁆𑀜𑀢𑁆𑀣 𑀅𑀦𑀸𑀕𑀢𑀢𑁆𑀢𑀸, 𑀅𑀬𑀼𑀢𑁆𑀢𑀢𑁆𑀢𑀸 𑀘. 𑀢𑀸𑀲𑀁 𑀧𑀦 𑀩𑀼𑀤𑁆𑀥𑀭𑀲𑁆𑀫𑀻𑀦𑀁 𑀢𑀤𑀸 𑀅𑀦𑀺𑀕𑁆𑀕𑀽𑀳𑀺𑀢𑀪𑀸𑀯𑀤𑀲𑁆𑀲𑀦𑀢𑁆𑀣𑀁 ‘‘𑀢𑀲𑁆𑀫𑀺𑀁 𑀓𑀺𑀭 𑀲𑀫𑀬𑁂’’𑀢𑀺 𑀯𑀼𑀢𑁆𑀢𑀁. 𑀧𑀓𑁆𑀓𑀼𑀲𑀸𑀢𑀺𑀅𑀪𑀺𑀕𑁆𑀕𑀫𑀦𑀸𑀤𑀻𑀲𑀼 𑀯𑀺𑀬 𑀳𑀺 𑀢𑀤𑀸 𑀢𑀸𑀲𑀁 𑀦𑀺𑀕𑁆𑀕𑀽𑀳𑀦𑁂 𑀓𑀺𑀜𑁆𑀘𑀺 𑀓𑀸𑀭𑀡𑀁 𑀦𑀢𑁆𑀣𑀺. 𑀆𑀥𑀸𑀯𑀦𑁆𑀢𑀻𑀢𑀺 𑀅𑀪𑀺𑀫𑀼𑀔𑀁 𑀤𑀺𑀲𑀁 𑀥𑀸𑀯𑀦𑁆𑀢𑀺. 𑀯𑀺𑀥𑀸𑀯𑀦𑁆𑀢𑀻𑀢𑀺 𑀯𑀺𑀯𑀺𑀥𑀸 𑀳𑀼𑀢𑁆𑀯𑀸 𑀯𑀺𑀤𑀺𑀲𑀁 𑀥𑀸𑀯𑀦𑁆𑀢𑀺.

𑀢𑀲𑁆𑀫𑀺𑀁 𑀯𑀦𑀦𑁆𑀢𑀭𑁂 𑀤𑀺𑀲𑁆𑀲𑀫𑀸𑀦𑀸𑀓𑀸𑀭𑁂𑀦 𑀢𑀸𑀲𑀁 𑀭𑀲𑁆𑀫𑀻𑀦𑀁 𑀲𑁄𑀪𑀸 𑀯𑀺𑀜𑁆𑀜𑀸𑀬𑀢𑀻𑀢𑀺 𑀆𑀳 ‘‘𑀭𑀢𑀦𑀸𑀯𑁂𑀴𑀸’’𑀢𑀺𑀆𑀤𑀺. 𑀭𑀢𑀦𑀸𑀯𑁂𑀴𑀸 𑀦𑀸𑀫 𑀭𑀢𑀦𑀫𑀬𑀯𑀝𑀁𑀲𑀓𑀁 𑀫𑀼𑀤𑁆𑀥𑀁 𑀅𑀯𑀢𑀺 𑀭𑀓𑁆𑀔𑀢𑀻𑀢𑀺 𑀳𑀺 𑀅𑀯𑁂𑀴𑀸,𑀆𑀯𑁂𑀴𑀸 𑀯𑀸, 𑀫𑀼𑀤𑁆𑀥𑀫𑀸𑀮𑀸. 𑀉𑀓𑁆𑀓𑀸 𑀦𑀸𑀫 𑀬𑀸 𑀲𑀚𑁄𑀢𑀺𑀪𑀽𑀢𑀸, 𑀢𑀸𑀲𑀁 𑀲𑀢𑀁, 𑀦𑀺𑀧𑀢𑀦𑀁 𑀦𑀺𑀧𑀸𑀢𑁄, 𑀢𑀲𑁆𑀲 𑀦𑀺𑀧𑀸𑀢𑁄, 𑀢𑁂𑀦 𑀲𑀫𑀸𑀓𑀼𑀮𑀁 𑀢𑀣𑀸. 𑀧𑀺𑀲𑀺𑀢𑀩𑁆𑀩𑀢𑁆𑀢𑀸 𑀧𑀺𑀝𑁆𑀞𑀁, 𑀘𑀻𑀦𑀤𑁂𑀲𑁂 𑀚𑀸𑀢𑀁 𑀧𑀺𑀝𑁆𑀞𑀁 𑀘𑀻𑀦𑀧𑀺𑀝𑁆𑀞𑀁, 𑀭𑀢𑁆𑀢𑀘𑀼𑀡𑁆𑀡𑀁, 𑀬𑀁 ‘‘𑀲𑀺𑀦𑁆𑀤𑀽𑀭𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺, 𑀘𑀻𑀦𑀧𑀺𑀝𑁆𑀞𑀫𑁂𑀯 𑀘𑀼𑀡𑁆𑀡𑀁. 𑀯𑀸𑀬𑀼𑀦𑁄 𑀯𑁂𑀕𑁂𑀦 𑀇𑀢𑁄 𑀘𑀺𑀢𑁄 𑀘 𑀔𑀺𑀢𑁆𑀢𑀁 𑀢𑀦𑁆𑀢𑀺 𑀢𑀣𑀸. 𑀇𑀦𑁆𑀤𑀲𑁆𑀲 𑀥𑀦𑀼 𑀮𑁄𑀓𑀲𑀗𑁆𑀓𑁂𑀢𑀯𑀲𑁂𑀦𑀸𑀢𑀺 𑀇𑀦𑁆𑀤𑀥𑀦𑀼, 𑀲𑀽𑀭𑀺𑀬𑀭𑀲𑁆𑀫𑀺𑀯𑀲𑁂𑀦 𑀕𑀕𑀦𑁂 𑀧𑀜𑁆𑀜𑀸𑀬𑀫𑀸𑀦𑀸𑀓𑀸𑀭𑀯𑀺𑀲𑁂𑀲𑁄. 𑀓𑀼𑀝𑀺𑀮𑀁 𑀅𑀘𑀺𑀭𑀝𑁆𑀞𑀸𑀬𑀺𑀢𑁆𑀢𑀸 𑀯𑀺𑀭𑀽𑀧𑀁 𑀳𑀼𑀢𑁆𑀯𑀸 𑀚𑀯𑀢𑀺 𑀥𑀸𑀯𑀢𑀻𑀢𑀺 𑀯𑀺𑀚𑁆𑀚𑀼, 𑀲𑀸𑀬𑁂𑀯 𑀮𑀢𑀸 𑀢𑀁𑀲𑀤𑀺𑀲𑀪𑀸𑀯𑁂𑀦𑀸𑀢𑀺 𑀢𑀣𑀸, 𑀯𑀸𑀬𑀼𑀯𑁂𑀕𑀢𑁄 𑀯𑀮𑀸𑀳𑀓𑀖𑀝𑁆𑀝𑀦𑁂𑀦𑁂𑀯 𑀚𑀸𑀢𑀭𑀲𑁆𑀫𑀺. 𑀢𑀸𑀬𑀢𑀺 𑀅𑀯𑀺𑀚𑀳𑀦𑀯𑀲𑁂𑀦 𑀆𑀓𑀸𑀲𑀁 𑀧𑀸𑀮𑁂𑀢𑀻𑀢𑀺 𑀢𑀸𑀭𑀸, 𑀕𑀡𑀲𑀤𑁆𑀤𑁄 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄. 𑀢𑀲𑁆𑀲 𑀧𑀪𑀸 𑀢𑀣𑀸. 𑀯𑀺𑀧𑁆𑀨𑀼𑀭𑀺𑀢𑀯𑀺𑀘𑁆𑀙𑀭𑀺𑀢𑀫𑀺𑀯𑀸𑀢𑀺 𑀆𑀪𑀸𑀬 𑀯𑀺𑀯𑀺𑀥𑀁 𑀨𑀭𑀫𑀸𑀦𑀁, 𑀯𑀺𑀚𑁆𑀚𑁄𑀢𑀬𑀫𑀸𑀦𑀁 𑀯𑀺𑀬 𑀘. 𑀯𑀦𑀲𑁆𑀲 𑀅𑀦𑁆𑀢𑀭𑀁 𑀯𑀺𑀯𑀭𑀁 𑀯𑀦𑀦𑁆𑀢𑀭𑀁, 𑀪𑀕𑀯𑀢𑀸 𑀧𑀢𑁆𑀢𑀧𑀢𑁆𑀢𑀯𑀦𑀧𑁆𑀧𑀤𑁂𑀲𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀲𑀻𑀢𑀺𑀬𑀸 𑀅𑀦𑀼𑀩𑁆𑀬𑀜𑁆𑀚𑀦𑁂𑀳𑀺 𑀢𑀫𑁆𑀩𑀦𑀔𑀢𑀸𑀤𑀻𑀳𑀺 𑀅𑀦𑀼𑀭𑀜𑁆𑀚𑀺𑀢𑀁 𑀢𑀣𑀸. 𑀓𑀫𑀮𑀁 𑀧𑀤𑀼𑀫𑀧𑀼𑀡𑁆𑀟𑀭𑀻𑀓𑀸𑀦𑀺, 𑀅𑀯𑀲𑁂𑀲𑀁 𑀦𑀻𑀮𑀭𑀢𑁆𑀢𑀲𑁂𑀢𑀪𑁂𑀤𑀁 𑀲𑀭𑁄𑀭𑀼𑀳𑀁 𑀉𑀧𑁆𑀧𑀮𑀁, 𑀇𑀢𑀺 𑀧𑀜𑁆𑀘𑀯𑀺𑀥𑀸 𑀧𑀗𑁆𑀓𑀚𑀚𑀸𑀢𑀺 𑀧𑀭𑀺𑀕𑁆𑀕𑀳𑀺𑀢𑀸 𑀳𑁄𑀢𑀺. 𑀯𑀺𑀓𑀲𑀺𑀢𑀁 𑀨𑀼𑀮𑁆𑀮𑀺𑀢𑀁 𑀢𑀤𑀼𑀪𑀬𑀁 𑀬𑀲𑁆𑀲 𑀲𑀭𑀲𑁆𑀲 𑀢𑀣𑀸. 𑀲𑀩𑁆𑀩𑁂𑀦 𑀧𑀓𑀸𑀭𑁂𑀦 𑀧𑀭𑀺𑀢𑁄 𑀲𑀫𑀦𑁆𑀢𑀢𑁄 𑀨𑀼𑀮𑁆𑀮𑀢𑀺 𑀯𑀺𑀓𑀲𑀢𑀻𑀢𑀺 𑀲𑀩𑁆𑀩𑀧𑀸𑀮𑀺𑀨𑀼𑀮𑁆𑀮𑀁 𑀅-𑀓𑀸𑀭𑀲𑁆𑀲 𑀆-𑀓𑀸𑀭𑀁, 𑀭-𑀓𑀸𑀭𑀲𑁆𑀲 𑀘 𑀮-𑀓𑀸𑀭𑀁 𑀓𑀢𑁆𑀯𑀸 𑀬𑀣𑀸 ‘‘𑀧𑀸𑀮𑀺𑀪𑀤𑁆𑀤𑁄’’𑀢𑀺, 𑀢𑀸𑀭𑀸𑀦𑀁 𑀫𑀭𑀻𑀘𑀺 𑀧𑀪𑀸, 𑀢𑀸𑀬 𑀯𑀺𑀓𑀲𑀺𑀢𑀁 𑀯𑀺𑀚𑁆𑀚𑁄𑀢𑀺𑀢𑀁 𑀢𑀣𑀸. 𑀩𑁆𑀬𑀸𑀫𑀧𑁆𑀧𑀪𑀸𑀬 𑀧𑀭𑀺𑀓𑁆𑀔𑁂𑀧𑁄 𑀧𑀭𑀺𑀫𑀡𑁆𑀟𑀮𑁄, 𑀢𑁂𑀦 𑀯𑀺𑀮𑀸𑀲𑀺𑀦𑀻 𑀲𑁄𑀪𑀺𑀦𑀻 𑀢𑀣𑀸. 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺 𑀅𑀜𑁆𑀜𑀫𑀜𑁆𑀜𑀧𑀝𑀺𑀩𑀤𑁆𑀥𑀢𑁆𑀢𑀸 𑀫𑀸𑀮𑀸𑀓𑀸𑀭𑁂𑀦𑁂𑀯 𑀞𑀺𑀢𑀸𑀦𑀻𑀢𑀺 𑀯𑀼𑀢𑁆𑀢𑀁 ‘‘𑀤𑁆𑀯𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑀫𑀸𑀮𑀸’’𑀢𑀺. 𑀤𑁆𑀯𑀢𑁆𑀢𑀺𑀁𑀲𑀘𑀦𑁆𑀤𑀸𑀤𑀻𑀦𑀁 𑀫𑀸𑀮𑀸 𑀓𑁂𑀦𑀘𑀺 𑀕𑀦𑁆𑀣𑁂𑀢𑁆𑀯𑀸 𑀧𑀝𑀺𑀧𑀸𑀝𑀺𑀬𑀸 𑀘 𑀞𑀧𑀺𑀢𑀸𑀢𑀺 𑀦 𑀯𑀢𑁆𑀢𑀩𑁆𑀩𑀸 ‘‘𑀬𑀤𑀺 𑀲𑀺𑀬𑀸’’𑀢𑀺 𑀧𑀭𑀺𑀓𑀧𑁆𑀧𑀦𑀸𑀫𑀢𑁆𑀢𑁂𑀦 𑀳𑀺 ‘‘𑀕𑀦𑁆𑀣𑁂𑀢𑁆𑀯𑀸 𑀞𑀧𑀺𑀢𑀤𑁆𑀯𑀢𑁆𑀢𑀺𑀁𑀲𑀘𑀦𑁆𑀤𑀫𑀸𑀮𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀭𑀺𑀓𑀧𑁆𑀧𑁄𑀧𑀫𑀸 𑀳𑁂𑀲𑀸, 𑀮𑁄𑀓𑁂𑀧𑀺 𑀘 𑀤𑀺𑀲𑁆𑀲𑀢𑀺.

‘‘𑀫𑀬𑁂𑀯 𑀫𑀼𑀔𑀲𑁄𑀪𑀸𑀲𑁆𑀲𑁂, 𑀢𑁆𑀬𑀮𑀫𑀺𑀦𑁆𑀤𑀼𑀯𑀺𑀓𑀢𑁆𑀣𑀦𑀸;

𑀬𑀢𑁄𑀫𑁆𑀩𑀼𑀚𑁂𑀧𑀺 𑀲𑀸𑀢𑁆𑀣𑀻𑀢𑀺, 𑀧𑀭𑀺𑀓𑀧𑁆𑀧𑁄𑀧𑀫𑀸 𑀅𑀬’’𑀦𑁆𑀢𑀺.

𑀤𑁆𑀯𑀢𑁆𑀢𑀺𑀁𑀲𑀘𑀦𑁆𑀤𑀫𑀸𑀮𑀸𑀬 𑀲𑀺𑀭𑀺𑀁 𑀅𑀢𑁆𑀢𑀦𑁄 𑀲𑀺𑀭𑀺𑀬𑀸 𑀅𑀪𑀺𑀪𑀯𑀦𑁆𑀢𑀻 𑀇𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺.

𑀏𑀯𑀁 𑀪𑀕𑀯𑀢𑁄 𑀢𑀤𑀸 𑀲𑁄𑀪𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑀸𑀧𑀺 𑀲𑁄𑀪𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀜𑁆𑀘 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀘𑀢𑀼𑀩𑁆𑀩𑀺𑀥𑀸𑀬 𑀅𑀧𑁆𑀧𑀺𑀘𑁆𑀙𑀢𑀸𑀬 𑀅𑀧𑁆𑀧𑀺𑀘𑁆𑀙𑀸. 𑀤𑁆𑀯𑀸𑀤𑀲𑀳𑀺 𑀲𑀦𑁆𑀢𑁄𑀲𑁂𑀳𑀺 𑀲𑀦𑁆𑀢𑀼𑀝𑁆𑀞𑀸. 𑀢𑀺𑀯𑀺𑀥𑁂𑀦 𑀯𑀺𑀯𑁂𑀓𑁂𑀦 𑀧𑀯𑀺𑀯𑀺𑀢𑁆𑀢𑀸. 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀻𑀳𑀺 𑀅𑀲𑀁𑀲𑀝𑁆𑀞𑀸. 𑀤𑀼𑀧𑁆𑀧𑀝𑀺𑀧𑀢𑁆𑀢𑀺𑀓𑀸𑀦𑀁 𑀘𑁄𑀤𑀓𑀸. 𑀧𑀸𑀧𑁂 𑀅𑀓𑀼𑀲𑀮𑁂 𑀕𑀭𑀳𑀺𑀦𑁄 𑀧𑀭𑁂𑀲𑀁 𑀳𑀺𑀢𑀧𑀝𑀺𑀧𑀢𑁆𑀢𑀺𑀬𑀸 𑀯𑀢𑁆𑀢𑀸𑀭𑁄. 𑀧𑀭𑁂𑀲𑀜𑁆𑀘 𑀯𑀘𑀦𑀓𑁆𑀔𑀫𑀸. 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀦𑀸𑀫 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁. ‘‘𑀢𑁂𑀲’’𑀦𑁆𑀢𑀺𑀆𑀤𑀺𑀦𑀸 𑀢𑀤𑀪𑀺𑀲𑀫𑁆𑀩𑀦𑁆𑀥𑁂𑀦 𑀪𑀕𑀯𑀢𑁄 𑀲𑁄𑀪𑀁 𑀤𑀲𑁆𑀲𑁂𑀢𑀺. 𑀭𑀢𑁆𑀢𑀧𑀤𑀼𑀫𑀸𑀦𑀁 𑀲𑀡𑁆𑀟𑁄 𑀲𑀫𑀽𑀳𑁄 𑀯𑀦𑀁, 𑀢𑀲𑁆𑀲 𑀫𑀚𑁆𑀛𑁂 𑀕𑀢𑀸 𑀢𑀣𑀸. ‘‘𑀭𑀢𑁆𑀢𑀁 𑀧𑀤𑀼𑀫𑀁, 𑀲𑁂𑀢𑀁 𑀧𑀼𑀡𑁆𑀟𑀭𑀻𑀓’’𑀦𑁆𑀢𑀺 𑀧𑀢𑁆𑀢𑀦𑀺𑀬𑀫𑀫𑀦𑁆𑀢𑀭𑁂𑀦 𑀢𑀣𑀸 𑀯𑀼𑀢𑁆𑀢𑀁, 𑀧𑀢𑁆𑀢𑀦𑀺𑀬𑀫𑁂𑀦 𑀧𑀦 𑀲𑀢𑀧𑀢𑁆𑀢𑀁 𑀧𑀤𑀼𑀫𑀁, 𑀊𑀦𑀓𑀲𑀢𑀧𑀢𑁆𑀢𑀁 𑀧𑀼𑀡𑁆𑀟𑀭𑀻𑀓𑀁. 𑀧𑀯𑀸𑀴𑀁 𑀯𑀺𑀤𑁆𑀤𑀼𑀫𑁄, 𑀢𑁂𑀦 𑀓𑀢𑀸𑀬 𑀯𑁂𑀤𑀺𑀓𑀸𑀬 𑀧𑀭𑀺𑀓𑁆𑀔𑀺𑀢𑁆𑀢𑁄 𑀯𑀺𑀬. 𑀫𑀺𑀕𑀧𑀓𑁆𑀔𑀻𑀦𑀫𑁆𑀧𑀻𑀢𑀺 𑀧𑀺-𑀲𑀤𑁆𑀤𑁄, 𑀅𑀧𑀺-𑀲𑀤𑁆𑀤𑁄 𑀯𑀸 𑀲𑀫𑁆𑀪𑀸𑀯𑀦𑀸𑀬𑀁, 𑀢𑁂𑀦𑀸𑀳 ‘‘𑀧𑀕𑁂𑀯 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺. 𑀫𑀳𑀸𑀣𑁂𑀭𑀸𑀢𑀺 𑀫𑀳𑀸𑀲𑀸𑀯𑀓𑁂 𑀲𑀦𑁆𑀥𑀸𑀬𑀸𑀳. 𑀲𑀼𑀭𑀜𑁆𑀚𑀺𑀢𑀪𑀸𑀯𑁂𑀦 𑀈𑀲𑀓𑀁 𑀓𑀡𑁆𑀳𑀯𑀡𑁆𑀡𑀢𑀸𑀬 𑀫𑁂𑀖𑀯𑀡𑁆𑀡𑀁. 𑀏𑀓𑀁𑀲𑀁 𑀓𑀭𑀺𑀢𑁆𑀯𑀸𑀢𑀺 𑀏𑀓𑀁𑀲𑀧𑀸𑀭𑀼𑀧𑀦𑀯𑀲𑁂𑀦 𑀯𑀸𑀫𑀁𑀲𑁂 𑀓𑀭𑀺𑀢𑁆𑀯𑀸. 𑀓𑀢𑁆𑀢𑀭𑀲𑁆𑀲 𑀚𑀺𑀡𑁆𑀡𑀲𑁆𑀲 𑀆𑀮𑀫𑁆𑀩𑀦𑁄 𑀤𑀡𑁆𑀟𑁄 𑀓𑀢𑁆𑀢𑀭𑀤𑀡𑁆𑀟𑁄, 𑀩𑀸𑀳𑀼𑀮𑁆𑀮𑀯𑀲𑁂𑀦𑀸𑀬𑀁 𑀲𑀫𑀜𑁆𑀜𑀸. 𑀲𑀼𑀯𑀫𑁆𑀫𑀁 𑀦𑀸𑀫 𑀲𑁄𑀪𑀡𑀼𑀭𑀘𑁆𑀙𑀤𑁄, 𑀢𑁂𑀦 𑀯𑀫𑁆𑀫𑀺𑀢𑀸 𑀲𑀦𑁆𑀦𑀤𑁆𑀥𑀸𑀢𑀺 𑀲𑀼𑀯𑀫𑁆𑀫𑀯𑀫𑁆𑀫𑀺𑀢𑀸, 𑀇𑀤𑀁 𑀢𑁂𑀲𑀁 𑀧𑀁𑀲𑀼𑀓𑀽𑀮𑀥𑀸𑀭𑀡𑀦𑀺𑀤𑀲𑁆𑀲𑀦𑀁. 𑀬𑁂𑀲𑀁 𑀓𑀼𑀘𑁆𑀙𑀺𑀕𑀢𑀁 𑀲𑀩𑁆𑀩𑀫𑁆𑀧𑀺 𑀢𑀺𑀡𑀧𑀮𑀸𑀲𑀸𑀤𑀺 𑀕𑀦𑁆𑀥𑀚𑀸𑀢𑀫𑁂𑀯 𑀳𑁄𑀢𑀺, 𑀢𑁂 𑀕𑀦𑁆𑀥𑀳𑀢𑁆𑀣𑀺𑀦𑁄 𑀦𑀸𑀫, 𑀬𑁂 ‘‘𑀳𑁂𑀫𑀯𑀢𑀸’’𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀣𑁂𑀭𑀸𑀦𑀁 𑀲𑀻𑀮𑀸𑀤𑀺𑀕𑀼𑀡𑀕𑀦𑁆𑀥𑀢𑀸𑀬 𑀢𑀁𑀲𑀤𑀺𑀲𑀢𑀸. 𑀅𑀦𑁆𑀢𑁄𑀚𑀝𑀸𑀩𑀳𑀺𑀚𑀝𑀸𑀲𑀗𑁆𑀔𑀸𑀢𑀸𑀬 𑀢𑀡𑁆𑀳𑀸𑀚𑀝𑀸𑀬 𑀯𑀺𑀚𑀝𑀺𑀢𑀪𑀸𑀯𑀢𑁄 𑀯𑀺𑀚𑀝𑀺𑀢𑀚𑀝𑀸. 𑀢𑀡𑁆𑀳𑀸𑀩𑀦𑁆𑀥𑀦𑀸𑀬 𑀙𑀺𑀦𑁆𑀦𑀢𑁆𑀢𑀸 𑀙𑀺𑀦𑁆𑀦𑀩𑀦𑁆𑀥𑀦𑀸. ‘‘𑀲𑁄’’𑀢𑀺𑀆𑀤𑀺 𑀬𑀣𑀸𑀯𑀼𑀢𑁆𑀢𑀯𑀘𑀦𑀲𑁆𑀲 𑀕𑀼𑀡𑀤𑀲𑁆𑀲𑀦𑀁. 𑀅𑀦𑀼𑀩𑀼𑀤𑁆𑀥𑁂𑀳𑀻𑀢𑀺 𑀩𑀼𑀤𑁆𑀥𑀸𑀦𑀫𑀦𑀼𑀩𑀼𑀤𑁆𑀥𑁂𑀳𑀺. 𑀢𑁂𑀧𑀺 𑀳𑀺 𑀏𑀓𑀤𑁂𑀲𑁂𑀦 𑀪𑀕𑀯𑀢𑀸 𑀧𑀝𑀺𑀯𑀺𑀤𑁆𑀥𑀧𑀝𑀺𑀪𑀸𑀕𑁂𑀦𑁂𑀯 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀩𑀼𑀚𑁆𑀛𑀦𑁆𑀢𑀺. 𑀧𑀢𑁆𑀢𑀧𑀭𑀺𑀯𑀸𑀭𑀺𑀢𑀦𑁆𑀢𑀺 𑀧𑀼𑀧𑁆𑀨𑀤𑀮𑁂𑀦 𑀧𑀭𑀺𑀯𑀸𑀭𑀺𑀢𑀁. 𑀓𑀁 𑀯𑀼𑀘𑁆𑀘𑀢𑀺 𑀓𑀫𑀮𑀸𑀤𑀺, 𑀢𑀲𑁆𑀫𑀺𑀁 𑀲𑀭𑀢𑀺 𑀯𑀺𑀭𑀸𑀚𑀢𑀻𑀢𑀺 𑀓𑁂𑀲𑀭𑀁, 𑀓𑀺𑀜𑁆𑀚𑀓𑁆𑀔𑁄. 𑀓𑀡𑁆𑀡𑁂 𑀓𑀭𑀻𑀬𑀢𑀻𑀢𑀺 𑀓𑀡𑁆𑀡𑀺𑀓𑀸. 𑀓𑀡𑁆𑀡𑀸𑀮𑀗𑁆𑀓𑀸𑀭𑁄, 𑀢𑀁𑀲𑀤𑀺𑀲𑀡𑁆𑀞𑀸𑀦𑀢𑀸𑀬 𑀓𑀡𑁆𑀡𑀺𑀓𑀸, 𑀩𑀻𑀚𑀓𑁄𑀲𑁄. 𑀙𑀦𑁆𑀦𑀁 𑀳𑀁𑀲𑀓𑀼𑀮𑀸𑀦𑀁 𑀲𑁂𑀝𑁆𑀞𑁄 𑀥𑀢𑀭𑀝𑁆𑀞𑁄 𑀳𑀁𑀲𑀭𑀸𑀚𑀸 𑀯𑀺𑀬, 𑀳𑀸𑀭𑀺𑀢𑁄 𑀦𑀸𑀫 𑀫𑀳𑀸𑀩𑁆𑀭𑀳𑁆𑀫𑀸 𑀯𑀺𑀬.

𑀏𑀯𑀁 𑀕𑀘𑁆𑀙𑀦𑁆𑀢𑀁 𑀪𑀕𑀯𑀦𑁆𑀢𑀁, 𑀪𑀺𑀓𑁆𑀔𑀽 𑀘 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀧𑀭𑀺𑀲𑀁 𑀑𑀮𑁄𑀓𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀸𑀚𑀤𑀡𑁆𑀟𑀓𑁂𑀢𑀺 𑀓𑀸𑀚𑀲𑀗𑁆𑀔𑀸𑀢𑁂 𑀪𑀸𑀭𑀸𑀯𑀳𑀤𑀡𑁆𑀟𑀓𑁂, 𑀓𑀸𑀚𑀲𑁆𑀫𑀺𑀁 𑀯𑀸 𑀪𑀸𑀭𑀮𑀕𑁆𑀕𑀺𑀢𑀤𑀡𑁆𑀟𑀓𑁂. 𑀔𑀼𑀤𑁆𑀤𑀓𑀁 𑀧𑀻𑀞𑀁 𑀧𑀻𑀞𑀓𑀁. 𑀫𑀽𑀮𑁂, 𑀅𑀕𑁆𑀕𑁂 𑀘 𑀢𑀺𑀥𑀸 𑀓𑀢𑁄 𑀤𑀡𑁆𑀟𑁄 𑀢𑀺𑀤𑀡𑁆𑀟𑁄. 𑀫𑁄𑀭𑀳𑀢𑁆𑀣𑀓𑁄 𑀫𑁄𑀭𑀧𑀺𑀜𑁆𑀙𑀁. 𑀔𑀼𑀤𑁆𑀤𑀓𑀁 𑀧𑀲𑀺𑀩𑁆𑀩𑀁 𑀧𑀲𑀺𑀩𑁆𑀩𑀓𑀁. 𑀓𑀼𑀡𑁆𑀟𑀺𑀓𑀸 𑀓𑀫𑀡𑁆𑀟𑀮𑀼. 𑀲𑀸 𑀳𑀺 𑀓𑀁 𑀉𑀤𑀓𑀁 𑀉𑀤𑁂𑀢𑀺 𑀧𑀲𑀯𑁂𑀢𑀺, 𑀭𑀓𑁆𑀔𑀢𑀻𑀢𑀺 𑀯𑀸 𑀓𑀼𑀡𑁆𑀟𑀺𑀓𑀸 𑀦𑀺𑀭𑀼𑀢𑁆𑀢𑀺𑀦𑀬𑁂𑀦. 𑀕𑀳𑀺𑀢𑀁 𑀑𑀫𑀓𑀢𑁄 𑀮𑀼𑀚𑁆𑀚𑀺𑀢𑀁, 𑀯𑀺𑀯𑀺𑀥𑀁 𑀮𑀼𑀚𑁆𑀚𑀺𑀢𑀜𑁆𑀘 𑀧𑀻𑀞𑀓…𑀧𑁂… 𑀓𑀼𑀡𑁆𑀟𑀺𑀓𑀸𑀤𑀺𑀅𑀦𑁂𑀓𑀧𑀭𑀺𑀓𑁆𑀔𑀸𑀭𑀲𑀗𑁆𑀔𑀸𑀢𑀁 𑀪𑀸𑀭𑀁 𑀪𑀭𑀢𑀺 𑀯𑀳𑀢𑀻𑀢𑀺 𑀕𑀳𑀺𑀢…𑀧𑁂… 𑀪𑀸𑀭𑀪𑀭𑀺𑀢𑀸. 𑀇𑀢𑀻𑀢𑀺 𑀦𑀺𑀤𑀲𑁆𑀲𑀦𑀢𑁆𑀣𑁄. 𑀏𑀯𑀦𑁆𑀢𑀺 𑀇𑀤𑀫𑀢𑁆𑀣𑁄. 𑀏𑀯𑀁 𑀇𑀤𑀁 𑀯𑀘𑀦𑀫𑀸𑀤𑀺 𑀬𑀲𑁆𑀲 𑀯𑀘𑀦𑀲𑁆𑀲 𑀢𑀣𑀸, 𑀢𑀤𑁂𑀯 𑀦𑀺𑀭𑀢𑁆𑀣𑀓𑀁 𑀯𑀘𑀦𑀁 𑀬𑀲𑁆𑀲𑀸𑀢𑀺 𑀏𑀯𑀫𑀸𑀤𑀺𑀦𑀺𑀭𑀢𑁆𑀣𑀓𑀯𑀘𑀦𑀸. 𑀫𑀼𑀔𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀫𑀼𑀔𑀭𑀸, 𑀲𑀩𑁆𑀩𑁂𑀧𑀺 𑀫𑀼𑀔𑀯𑀦𑁆𑀢𑀸 𑀏𑀯, 𑀅𑀬𑀁 𑀧𑀦 𑀨𑀭𑀼𑀲𑀸𑀪𑀺𑀮𑀸𑀧𑀫𑀼𑀔𑀯𑀢𑀻, 𑀢𑀲𑁆𑀫𑀸 𑀏𑀯𑀁 𑀯𑀼𑀢𑁆𑀢𑀁. 𑀦𑀺𑀦𑁆𑀤𑀸𑀬𑀜𑁆𑀳𑀺 𑀅𑀬𑀁 𑀭𑀧𑀘𑁆𑀘𑀬𑁄. 𑀫𑀼𑀔𑁂𑀦 𑀯𑀸 𑀅𑀫𑀦𑀸𑀧𑀁 𑀓𑀫𑁆𑀫𑀁 𑀭𑀸𑀢𑀺 𑀕𑀡𑁆𑀳𑀸𑀢𑀻𑀢𑀺 𑀫𑀼𑀔𑀭𑀸. 𑀯𑀺𑀯𑀺𑀥𑀸 𑀓𑀺𑀡𑁆𑀡𑀸 𑀯𑀸𑀘𑀸 𑀬𑀲𑁆𑀲𑀸𑀢𑀺 𑀯𑀺𑀓𑀺𑀡𑁆𑀡𑀯𑀸𑀘𑀸. 𑀢𑀲𑁆𑀲𑀸𑀢𑀺 𑀲𑀼𑀧𑁆𑀧𑀺𑀬𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲. 𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀧𑀭𑀺𑀲𑀁.

𑀇𑀤𑀸𑀦𑀻𑀢𑀺 𑀢𑀲𑁆𑀲 𑀢𑀣𑀸𑀭𑀽𑀧𑀸𑀬 𑀧𑀭𑀺𑀲𑀸𑀬 𑀤𑀲𑁆𑀲𑀦𑀓𑁆𑀔𑀡𑁂. 𑀧𑀦𑀸𑀢𑀺 𑀅𑀭𑀼𑀘𑀺𑀲𑀁𑀲𑀽𑀘𑀦𑀢𑁆𑀣𑁄, 𑀢𑀣𑀸𑀧𑀻𑀢𑀺 𑀅𑀢𑁆𑀣𑁄. 𑀮𑀸𑀪…𑀧𑁂… 𑀳𑀸𑀦𑀺𑀬𑀸 𑀘𑁂𑀯 𑀳𑁂𑀢𑀼𑀪𑀽𑀢𑀸𑀬. 𑀓𑀣𑀁 𑀳𑀸𑀦𑀻𑀢𑀺 𑀆𑀳 ‘‘𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀜𑁆𑀳𑀻’’𑀢𑀺𑀆𑀤𑀺. 𑀦𑀺𑀲𑁆𑀲𑀺𑀭𑀻𑀓𑀢𑀦𑁆𑀢𑀺 𑀦𑀺𑀲𑁄𑀪𑀢𑀁, 𑀅𑀬𑀫𑀢𑁆𑀣𑁄 𑀫𑁄𑀭𑀚𑀸𑀢𑀓𑀸𑀤𑀻𑀳𑀺𑀧𑀺 𑀤𑀻𑀧𑁂𑀢𑀩𑁆𑀩𑁄. ‘‘𑀉𑀧𑀢𑀺𑀲𑁆𑀲𑀓𑁄𑀮𑀺𑀢𑀸𑀦𑀜𑁆𑀘𑀸’’𑀢𑀺𑀆𑀤𑀺𑀦𑀸 𑀧𑀓𑁆𑀔𑀳𑀸𑀦𑀺𑀢𑀸𑀬 𑀯𑀺𑀢𑁆𑀣𑀸𑀭𑁄. 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲, 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀘 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁 𑀲𑀦𑁆𑀥𑀸𑀬 ‘‘𑀢𑁂𑀲𑀼 𑀧𑀦 𑀧𑀓𑁆𑀓𑀦𑁆𑀢𑁂𑀲𑀽’’𑀢𑀺 𑀯𑀼𑀢𑁆𑀢𑀁. 𑀢𑁂𑀲𑀁 𑀧𑀩𑁆𑀩𑀚𑀺𑀢𑀓𑀸𑀮𑁂𑀬𑁂𑀯 𑀅𑀟𑁆𑀠𑀢𑁂𑀬𑁆𑀬𑀲𑀢𑀁 𑀧𑀭𑀺𑀩𑁆𑀩𑀸𑀚𑀓𑀧𑀭𑀺𑀲𑀸 𑀧𑀩𑁆𑀩𑀚𑀺, 𑀢𑀢𑁄 𑀧𑀭𑀫𑁆𑀧𑀺 𑀢𑀤𑀦𑀼𑀧𑀩𑁆𑀩𑀚𑀺𑀢𑀸 𑀧𑀭𑀺𑀩𑁆𑀩𑀸𑀚𑀓𑀧𑀭𑀺𑀲𑀸 𑀅𑀧𑀭𑀺𑀫𑀸𑀡𑀸𑀢𑀺 𑀤𑀲𑁆𑀲𑁂𑀢𑀺 ‘‘𑀲𑀸𑀧𑀺 𑀢𑁂𑀲𑀁 𑀧𑀭𑀺𑀲𑀸 𑀪𑀺𑀦𑁆𑀦𑀸’’𑀢𑀺 𑀇𑀫𑀺𑀦𑀸. 𑀬𑀸𑀬 𑀓𑀸𑀬𑀘𑀺 𑀳𑀺 𑀧𑀭𑀺𑀩𑁆𑀩𑀸𑀚𑀓𑀧𑀭𑀺𑀲𑀸𑀬 𑀧𑀩𑁆𑀩𑀚𑀺𑀢𑀸𑀬 𑀢𑀲𑁆𑀲 𑀧𑀭𑀺𑀲𑀸 𑀪𑀺𑀦𑁆𑀦𑀸𑀬𑁂𑀯 𑀦𑀸𑀫 𑀲𑀫𑀸𑀦𑀕𑀡𑀢𑁆𑀢𑀸𑀢𑀺 𑀢𑀣𑀸 𑀯𑀼𑀢𑁆𑀢𑀁. ‘‘𑀇𑀫𑁂𑀳𑀻’’𑀢𑀺𑀆𑀤𑀺𑀦𑀸 𑀮𑀸𑀪𑀧𑀓𑁆𑀔𑀳𑀸𑀦𑀺𑀁 𑀦𑀺𑀕𑀫𑀦𑀯𑀲𑁂𑀦 𑀤𑀲𑁆𑀲𑁂𑀢𑀺. 𑀉𑀲𑀽𑀬𑀲𑀗𑁆𑀔𑀸𑀢𑀲𑁆𑀲 𑀯𑀺𑀲𑀲𑁆𑀲 𑀉𑀕𑁆𑀕𑀸𑀭𑁄 𑀉𑀕𑁆𑀕𑀺𑀮𑀦𑀁 𑀉𑀲𑀽𑀬𑀯𑀺𑀲𑀼𑀕𑁆𑀕𑀸𑀭𑁄, 𑀢𑀁. 𑀏𑀢𑁆𑀣 𑀘 ‘‘𑀬𑀲𑁆𑀫𑀸 𑀧𑀦𑁂𑀲𑀸’’𑀢𑀺𑀆𑀤𑀺𑀦𑀸𑀯 ‘‘𑀓𑀲𑁆𑀫𑀸 𑀘 𑀲𑁄 𑀭𑀢𑀦𑀢𑁆𑀢𑀬𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀻’’𑀢𑀺 𑀘𑁄𑀤𑀦𑀁 𑀯𑀺𑀲𑁄𑀥𑁂𑀢𑀺, ‘‘𑀲𑀘𑁂’’𑀢𑀺𑀆𑀤𑀺𑀓𑀁 𑀧𑀦 𑀲𑀩𑁆𑀩𑀫𑁆𑀧𑀺 𑀢𑀧𑁆𑀧𑀭𑀺𑀯𑀸𑀭𑀯𑀘𑀦𑀫𑁂𑀯𑀸𑀢𑀺 𑀢𑁂𑀳𑀺𑀧𑀺 𑀲𑀸 𑀯𑀺𑀲𑁄𑀥𑀺𑀢𑀸𑀬𑁂𑀯 𑀦𑀸𑀫. 𑀪𑀕𑀯𑀢𑁄 𑀯𑀺𑀭𑁄𑀥𑀸𑀦𑀼𑀦𑀬𑀸𑀪𑀸𑀯𑀯𑀻𑀫𑀁𑀲𑀦𑀢𑁆𑀣𑀁 𑀏𑀢𑁂 𑀅𑀯𑀡𑁆𑀡𑀁 𑀯𑀡𑁆𑀡𑀁 𑀪𑀸𑀲𑀦𑁆𑀢𑀺. ‘‘𑀫𑀸𑀭𑁂𑀦 𑀅𑀦𑁆𑀯𑀸𑀯𑀺𑀝𑁆𑀞𑀸 𑀏𑀯𑀁 𑀪𑀸𑀲𑀦𑁆𑀢𑀻’’𑀢𑀺 𑀘 𑀓𑁂𑀘𑀺 𑀯𑀤𑀦𑁆𑀢𑀺, 𑀢𑀤𑀬𑀼𑀢𑁆𑀢𑀫𑁂𑀯 𑀅𑀝𑁆𑀞𑀓𑀣𑀸𑀬 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀢𑁆𑀢𑀸. 𑀧𑀸𑀓𑀝𑁄𑀬𑁂𑀯𑀸𑀬𑀫𑀢𑁆𑀣𑁄𑀢𑀺.

𑁨. 𑀬𑀲𑁆𑀫𑀸 𑀅𑀢𑁆𑀣𑀗𑁆𑀕𑀢𑁄 𑀲𑀽𑀭𑀺𑀬𑁄, 𑀢𑀲𑁆𑀫𑀸 𑀅𑀓𑀸𑀮𑁄 𑀤𑀸𑀦𑀺 𑀕𑀦𑁆𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀅𑀫𑁆𑀩𑀮𑀝𑁆𑀞𑀺𑀓𑀸𑀢𑀺 𑀲𑀸𑀫𑀻𑀧𑀺𑀓𑀯𑁄𑀳𑀸𑀭𑁄 𑀬𑀣𑀸 ‘‘𑀯𑀭𑀼𑀡𑀦𑀕𑀭𑀁, 𑀕𑁄𑀤𑀸𑀕𑀸𑀫𑁄’’𑀢𑀺 𑀆𑀳 ‘‘𑀢𑀲𑁆𑀲 𑀓𑀺𑀭𑀸’’𑀢𑀺𑀆𑀤𑀺. 𑀢𑀭𑀼𑀡𑀧𑀭𑀺𑀬𑀸𑀬𑁄 𑀮𑀝𑁆𑀞𑀺𑀓𑀸-𑀲𑀤𑁆𑀤𑁄 𑀭𑀼𑀓𑁆𑀔𑀯𑀺𑀲𑀬𑁂 𑀬𑀣𑀸 ‘‘𑀫𑀳𑀸𑀯𑀦𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀩𑁂𑀮𑀼𑀯𑀮𑀝𑁆𑀞𑀺𑀓𑀸𑀬 𑀫𑀽𑀮𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀻𑀤𑀻’’𑀢𑀺𑀆𑀤𑀻𑀲𑀽𑀢𑀺 𑀤𑀲𑁆𑀲𑁂𑀢𑀺’’ ‘‘𑀢𑀭𑀼𑀡𑀫𑁆𑀩𑀭𑀼𑀓𑁆𑀔𑁄’’𑀢𑀺 𑀇𑀫𑀺𑀦𑀸. 𑀓𑁂𑀘𑀺 𑀧𑀦 ‘‘𑀅𑀫𑁆𑀩𑀮𑀝𑁆𑀞𑀺𑀓𑀸 𑀦𑀸𑀫 𑀯𑀼𑀢𑁆𑀢𑀦𑀬𑁂𑀦 𑀏𑀓𑁄 𑀕𑀸𑀫𑁄’’𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀁 𑀫𑀢𑁂 𑀅𑀫𑁆𑀩𑀮𑀝𑁆𑀞𑀺𑀓𑀸𑀬𑀦𑁆𑀢𑀺 𑀲𑀫𑀻𑀧𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀁. 𑀙𑀸𑀬𑀽𑀤𑀓𑀲𑀫𑁆𑀧𑀦𑁆𑀦𑀦𑁆𑀢𑀺 𑀙𑀸𑀬𑀸𑀬 𑀘𑁂𑀯 𑀉𑀤𑀓𑁂𑀦 𑀘 𑀲𑀫𑁆𑀧𑀦𑁆𑀦𑀁. 𑀫𑀜𑁆𑀚𑀼𑀲𑀸𑀢𑀺 𑀧𑁂𑀴𑀸. 𑀧𑀝𑀺𑀪𑀸𑀦𑀘𑀺𑀢𑁆𑀢𑀯𑀺𑀘𑀺𑀢𑁆𑀢𑀦𑁆𑀢𑀺 𑀇𑀢𑁆𑀣𑀺𑀧𑀼𑀭𑀺𑀲𑀲𑀜𑁆𑀜𑁄𑀕𑀸𑀤𑀺𑀦𑀸 𑀧𑀝𑀺𑀪𑀸𑀦𑀘𑀺𑀢𑁆𑀢𑁂𑀦 𑀯𑀺𑀘𑀺𑀢𑁆𑀢𑀁, 𑀏𑀢𑁂𑀦 𑀭𑀜𑁆𑀜𑁄 𑀅𑀕𑀸𑀭𑀁, 𑀢𑀤𑁂𑀯 𑀭𑀸𑀚𑀸𑀕𑀸𑀭𑀓𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀭𑀸𑀚𑀸𑀕𑀸𑀭𑀓𑀁 𑀦𑀸𑀫 𑀯𑁂𑀲𑁆𑀲𑀯𑀡𑀫𑀳𑀸𑀭𑀸𑀚𑀲𑁆𑀲 𑀤𑁂𑀯𑀸𑀬𑀢𑀦𑀦𑁆𑀢𑀺 𑀏𑀓𑁂.

𑀩𑀳𑀼𑀧𑀭𑀺𑀲𑁆𑀲𑀬𑁄𑀢𑀺 𑀩𑀳𑀼𑀧𑀤𑁆𑀤𑀯𑁄. 𑀓𑁂𑀳𑀻𑀢𑀺 𑀯𑀼𑀢𑁆𑀢𑀁 ‘‘𑀘𑁄𑀭𑁂’𑀳𑀺𑀧𑀻’’𑀢𑀺𑀆𑀤𑀺. 𑀳𑀦𑁆𑀤𑀸𑀢𑀺 𑀯𑀘𑀦𑀯𑁄𑀲𑁆𑀲𑀕𑁆𑀕𑀢𑁆𑀣𑁂 𑀦𑀺𑀧𑀸𑀢𑁄, 𑀢𑀤𑀸𑀦𑀼𑀪𑀸𑀯𑀢𑁄 𑀦𑀺𑀧𑁆𑀧𑀭𑀺𑀲𑁆𑀲𑀬𑀢𑁆𑀣𑀸𑀬 𑀇𑀤𑀸𑀦𑀺 𑀉𑀧𑀕𑀦𑁆𑀢𑁆𑀯𑀸 𑀲𑁆𑀯𑁂 𑀕𑀫𑀺𑀲𑁆𑀲𑀸𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀲𑀤𑁆𑀥𑀺𑀁 𑀅𑀦𑁆𑀢𑁂𑀯𑀸𑀲𑀺𑀦𑀸 𑀩𑁆𑀭𑀳𑁆𑀫𑀤𑀢𑁆𑀢𑁂𑀦 𑀫𑀸𑀡𑀯𑁂𑀦𑀸’’ 𑀢𑀺𑀘𑁆𑀘𑁂𑀯 𑀲𑀻𑀳𑀴𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁, 𑀢𑀜𑁆𑀘 𑀔𑁄 𑀧𑀸𑀴𑀺𑀆𑀭𑀼𑀴𑁆𑀳𑀯𑀲𑁂𑀦𑁂𑀯, 𑀦 𑀧𑀦 𑀢𑀤𑀸 𑀲𑀼𑀧𑁆𑀧𑀺𑀬𑀲𑁆𑀲 𑀧𑀭𑀺𑀲𑀸𑀬 𑀅𑀪𑀸𑀯𑀢𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀤𑁆𑀥𑀺𑀁 𑀅𑀢𑁆𑀢𑀦𑁄 𑀧𑀭𑀺𑀲𑀸𑀬𑀸’’𑀢𑀺 𑀇𑀥 𑀯𑀼𑀢𑁆𑀢𑀁. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀩𑁆𑀭𑀳𑁆𑀫𑀤𑀢𑁆𑀢𑁄𑀬𑁂𑀯 𑀧𑀸𑀴𑀺𑀬𑀫𑀸𑀭𑀼𑀴𑁆𑀳𑁄, 𑀦 𑀧𑀦 𑀢𑀤𑀯𑀲𑁂𑀲𑀸 𑀲𑀼𑀧𑁆𑀧𑀺𑀬𑀲𑁆𑀲 𑀧𑀭𑀺𑀲𑀸𑀢𑀺? 𑀤𑁂𑀲𑀦𑀸𑀦𑀥𑀻𑀦𑀪𑀸𑀯𑁂𑀦 𑀧𑀬𑁄𑀚𑀦𑀸𑀪𑀸𑀯𑀢𑁄. 𑀬𑀣𑀸 𑀘𑁂𑀢𑀁, 𑀏𑀯𑀁 𑀅𑀜𑁆𑀜𑀫𑁆𑀧𑀺 𑀏𑀤𑀺𑀲𑀁 𑀧𑀬𑁄𑀚𑀦𑀸𑀪𑀸𑀯𑀢𑁄 𑀲𑀗𑁆𑀕𑀻𑀢𑀺𑀓𑀸𑀭𑀓𑁂𑀳𑀺 𑀦 𑀲𑀗𑁆𑀕𑀻𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀓𑁂𑀘𑀺 𑀧𑀦 ‘‘𑀧𑀸𑀴𑀺𑀬𑀁 𑀯𑀼𑀢𑁆𑀢’’𑀦𑁆𑀢𑀺 𑀆𑀥𑀸𑀭𑀁 𑀯𑀢𑁆𑀯𑀸 ‘𑀢𑀤𑁂𑀢𑀁 𑀦 𑀲𑀻𑀳𑀴𑀝𑁆𑀞𑀓𑀣𑀸𑀦𑀬𑀤𑀲𑁆𑀲𑀦𑀁, 𑀧𑀸𑀴𑀺𑀬𑀁 𑀯𑀼𑀢𑁆𑀢𑀪𑀸𑀯𑀤𑀲𑁆𑀲𑀦𑀫𑁂𑀯𑀸’𑀢𑀺’’ 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀚𑁆𑀚𑀢𑀺. 𑀧𑀸𑀴𑀺𑀆𑀭𑀼𑀴𑁆𑀳𑀯𑀲𑁂𑀦𑁂𑀯 𑀧𑀸𑀴𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀢𑁆𑀣𑀲𑁆𑀲 𑀆𑀧𑀚𑁆𑀚𑀦𑀢𑁄. 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄𑀢𑀺. ‘‘𑀯𑀼𑀢𑁆𑀢𑀦𑁆𑀢𑀺 𑀯𑀸 𑀅𑀫𑁆𑀳𑁂𑀳𑀺𑀧𑀺 𑀇𑀥 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀜𑁆𑀳𑀺 𑀢𑀤𑀸 𑀅𑀜𑁆𑀜𑀸𑀬𑀧𑀺 𑀧𑀭𑀺𑀲𑀸𑀬 𑀯𑀺𑀚𑁆𑀚𑀫𑀸𑀦𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀏𑀯𑀁 𑀯𑀼𑀢𑁆𑀢𑀁, 𑀧𑀸𑀴𑀺𑀬𑀫𑀸𑀭𑀼𑀴𑁆𑀳𑀯𑀲𑁂𑀦 𑀧𑀦 𑀅𑀜𑁆𑀜𑀣𑀸𑀧𑀺 𑀇𑀥 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄 𑀬𑀼𑀢𑁆𑀢𑁄’’𑀢𑀺 𑀯𑀤𑀦𑁆𑀢𑀺.

𑀇𑀤𑀸𑀦𑀺 ‘‘𑀢𑀢𑁆𑀭𑀸𑀧𑀺 𑀲𑀼𑀤’’𑀦𑁆𑀢𑀺𑀆𑀤𑀺𑀧𑀸𑀴𑀺𑀬𑀸 𑀲𑀫𑁆𑀩𑀦𑁆𑀥𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀁 𑀯𑀸𑀲𑀁 𑀉𑀧𑀕𑀢𑁄 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀼𑀘𑁆𑀙𑀺𑀢𑀁 𑀓𑀢𑁆𑀢𑀩𑁆𑀩𑀦𑁆𑀢𑀺 𑀓𑀼𑀓𑀢𑀁, 𑀢𑀲𑁆𑀲 𑀪𑀸𑀯𑁄 𑀓𑀼𑀓𑁆𑀓𑀼𑀘𑁆𑀘𑀁, 𑀓𑀼𑀘𑁆𑀙𑀺𑀢𑀓𑀺𑀭𑀺𑀬𑀸, 𑀇𑀢𑁄 𑀘𑀺𑀢𑁄 𑀘 𑀘𑀜𑁆𑀘𑀮𑀦𑀦𑁆𑀢𑀺 𑀅𑀢𑁆𑀣𑁄, 𑀳𑀢𑁆𑀣𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀢𑀣𑀸. ‘‘𑀲𑀸 𑀳𑀻’’𑀢𑀺𑀆𑀤𑀺𑀦𑀸 𑀢𑀣𑀸𑀪𑀽𑀢𑀢𑀸𑀬 𑀓𑀸𑀭𑀡𑀁 𑀤𑀲𑁆𑀲𑁂𑀢𑀺. 𑀦𑀺𑀯𑀸𑀢𑁂𑀢𑀺 𑀯𑀸𑀢𑀯𑀺𑀭𑀳𑀺𑀢𑀝𑁆𑀞𑀸𑀦𑁂. 𑀬𑀣𑀸𑀯𑀼𑀢𑁆𑀢𑀤𑁄𑀲𑀸𑀪𑀸𑀯𑁂𑀦 𑀦𑀺𑀘𑁆𑀘𑀮𑀸. 𑀢𑀁 𑀯𑀺𑀪𑀽𑀢𑀺𑀦𑁆𑀢𑀺 𑀢𑀸𑀤𑀺𑀲𑀁 𑀲𑁄𑀪𑀁. 𑀯𑀺𑀧𑁆𑀧𑀮𑀧𑀦𑁆𑀢𑀻𑀢𑀺 𑀲𑀢𑀺𑀯𑁄𑀲𑁆𑀲𑀕𑁆𑀕𑀯𑀲𑁂𑀦 𑀯𑀺𑀯𑀺𑀥𑀸 𑀮𑀧𑀦𑁆𑀢𑀺. 𑀦𑀺𑀮𑁆𑀮𑀸𑀮𑀺𑀢𑀚𑀺𑀯𑁆𑀳𑀸𑀢𑀺 𑀇𑀢𑁄 𑀘𑀺𑀢𑁄 𑀘 𑀦𑀺𑀓𑁆𑀔𑀦𑁆𑀢𑀚𑀺𑀯𑁆𑀳𑀸. 𑀓𑀸𑀓𑀘𑁆𑀙𑀫𑀸𑀦𑀸𑀢𑀺 𑀓𑀸𑀓𑀸𑀦𑀁 𑀲𑀤𑁆𑀤𑀲𑀤𑀺𑀲𑀁 𑀲𑀤𑁆𑀤𑀁 𑀓𑀼𑀭𑀼𑀫𑀸𑀦𑀸. 𑀖𑀭𑀼𑀖𑀭𑀼𑀧𑀲𑁆𑀲𑀸𑀲𑀺𑀦𑁄𑀢𑀺 𑀖𑀭𑀼𑀖𑀭𑀼𑀇𑀢𑀺 𑀲𑀤𑁆𑀤𑀁 𑀚𑀦𑁂𑀢𑁆𑀯𑀸 𑀧𑀲𑁆𑀲𑀲𑀦𑁆𑀢𑀸. 𑀇𑀲𑁆𑀲𑀸𑀯𑀲𑁂𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑁂𑀳𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀉𑀲𑀽𑀬𑀦𑀯𑀲𑁂𑀦. ‘‘𑀲𑀩𑁆𑀩𑀁 𑀯𑀢𑁆𑀢𑀩𑁆𑀩’’𑀦𑁆𑀢𑀺 𑀇𑀫𑀺𑀦𑀸 ‘‘𑀆𑀤𑀺𑀧𑁂𑀬𑁆𑀬𑀸𑀮𑀦𑀬𑁄𑀬’’𑀦𑁆𑀢𑀺 𑀤𑀲𑁆𑀲𑁂𑀢𑀺.