𑁬. 𑀯𑀺𑀢𑀓𑁆𑀓𑀢𑁆𑀢𑀺𑀓𑀯𑀡𑁆𑀡𑀦𑀸

𑁨𑁨. 𑀯𑀺𑀢𑀓𑁆𑀓𑀢𑁆𑀢𑀺𑀓𑁂 𑀲𑀢𑁆𑀢𑀲𑀼 𑀫𑀽𑀮𑀓𑁂𑀲𑀽𑀢𑀺 ‘‘𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘𑀸’’𑀢𑀺𑀆𑀤𑀺𑀦𑀸 𑀆𑀕𑀢𑀸𑀦𑀺 𑀢𑀻𑀡𑀺 𑀏𑀓𑀓𑀸𑀦𑀺, 𑀢𑀻𑀡𑀺 𑀤𑀼𑀓𑀸𑀦𑀺, 𑀏𑀓𑀁 𑀢𑀺𑀓𑀦𑁆𑀢𑀺 𑀏𑀯𑀁 𑀏𑀓𑀫𑀽𑀮𑀓𑀸𑀦𑀺 𑀬𑀸𑀦𑀺 𑀲𑀢𑁆𑀢𑀫𑀽𑀮𑀓𑀸𑀦𑀺, 𑀢𑁂𑀲𑀼. 𑀬𑀣𑀸𑀓𑁆𑀓𑀫𑀦𑁆𑀢𑀺 𑀧𑀸𑀴𑀺𑀬𑀁 𑀆𑀕𑀢𑀸𑀦𑀼𑀓𑁆𑀓𑀫𑁂𑀦. 𑀲𑀢𑁆𑀢𑀸𑀢𑀺 𑀧𑀞𑀫𑁂 𑀏𑀓𑀓𑁂 𑀲𑀢𑁆𑀢. 𑀧𑀜𑁆𑀘𑀸𑀢𑀺 𑀤𑀼𑀢𑀺𑀬𑁂 𑀧𑀜𑁆𑀘. 𑀢𑀸𑀦𑀺𑀫𑀸𑀦𑀺 𑀳𑁂𑀢𑀼𑀧𑀘𑁆𑀘𑀬𑁂 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀇𑀥 𑀧𑀦 𑀧𑀯𑀢𑁆𑀢𑀺𑀯𑀲𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁. 𑀢𑀻𑀡𑀻𑀢𑀺𑀆𑀤𑀻𑀲𑀼 𑀢𑀢𑀺𑀬𑁂 𑀢𑀻𑀡𑀺, 𑀘𑀢𑀼𑀢𑁆𑀣𑁂 𑀏𑀓𑀁, 𑀧𑀜𑁆𑀘𑀫𑁂 𑀢𑀻𑀡𑀺, 𑀙𑀝𑁆𑀞𑁂𑀧𑀺 𑀢𑀻𑀡𑀺, 𑀲𑀢𑁆𑀢𑀫𑁂 𑀏𑀓𑀁. 𑀢𑀸𑀦𑀺 𑀧𑀦 𑀬𑀣𑀸𑀓𑁆𑀓𑀫𑀁 𑀢𑀢𑀺𑀬𑀧𑀤𑀁 𑀧𑀝𑀺𑀘𑁆𑀘 𑀢𑀢𑀺𑀬𑀧𑀤𑀤𑀼𑀢𑀺𑀬𑀧𑀤𑀢𑀤𑀼𑀪𑀬𑀯𑀲𑁂𑀦, 𑀧𑀞𑀫𑀧𑀤𑀢𑀢𑀺𑀬𑀧𑀤𑀸𑀦𑀺 𑀧𑀝𑀺𑀘𑁆𑀘 𑀢𑀢𑀺𑀬𑀧𑀤𑀯𑀲𑁂𑀦, 𑀧𑀞𑀫𑀧𑀤𑀤𑀼𑀢𑀺𑀬𑀧𑀤𑀸𑀦𑀺 𑀧𑀝𑀺𑀘𑁆𑀘 𑀧𑀞𑀫𑀧𑀤𑀢𑀢𑀺𑀬𑀧𑀤𑀢𑀤𑀼𑀪𑀬𑀯𑀲𑁂𑀦, 𑀤𑀼𑀢𑀺𑀬𑀧𑀤𑀢𑀢𑀺𑀬𑀧𑀤𑀸𑀦𑀺 𑀧𑀝𑀺𑀘𑁆𑀘 𑀧𑀞𑀫𑀧𑀤𑀢𑀢𑀺𑀬𑀧𑀤𑀢𑀤𑀼𑀪𑀬𑀯𑀲𑁂𑀦, 𑀧𑀞𑀫𑀤𑀼𑀢𑀺𑀬𑀢𑀢𑀺𑀬𑀧𑀤𑀸𑀦𑀺 𑀧𑀝𑀺𑀘𑁆𑀘 𑀢𑀢𑀺𑀬𑀧𑀤𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀜𑁆𑀜𑀫𑀜𑁆𑀜𑁂 𑀅𑀝𑁆𑀞𑀯𑀻𑀲𑀸𑀢𑀺𑀆𑀤𑀻𑀲𑀼𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀁 𑀕𑀡𑀦𑀁 𑀧𑀘𑁆𑀘𑀸𑀫𑀲𑀢𑀺. 𑀤𑀼𑀢𑀺𑀬𑀢𑀢𑀺𑀬𑀫𑀽𑀮𑀓𑁂𑀲𑀼 𑀏𑀓𑀁 𑀏𑀓𑀦𑁆𑀢𑀺 𑀤𑀼𑀢𑀺𑀬𑀫𑀽𑀮𑀓𑁂 𑀏𑀓𑀁, 𑀢𑀢𑀺𑀬𑀫𑀽𑀮𑀓𑁂 𑀏𑀓𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑀣𑀸 𑀆𑀲𑁂𑀯𑀦𑁂𑀢𑀺 𑀬𑀣𑀸 𑀧𑀼𑀭𑁂𑀚𑀸𑀢𑁂 𑀏𑀓𑀸𑀤𑀲, 𑀢𑀣𑀸 𑀆𑀲𑁂𑀯𑀦𑁂𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀸𑀦𑀻𑀢𑀺 𑀅𑀥𑀺𑀧𑀢𑀺𑀅𑀜𑁆𑀜𑀫𑀜𑁆𑀜𑀧𑀼𑀭𑁂𑀚𑀸𑀢𑀸𑀲𑁂𑀯𑀦𑀢𑁄 𑀅𑀜𑁆𑀜𑁂𑀲𑀼 𑀧𑀘𑁆𑀘𑀬𑁂𑀲𑀼 𑀕𑀡𑀦𑀸𑀦𑀺. 𑀳𑁂𑀢𑀼𑀆𑀭𑀫𑁆𑀫𑀡𑀲𑀤𑀺𑀲𑀸𑀦𑀻𑀢𑀺 𑀳𑁂𑀢𑀼𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀲𑀼 𑀕𑀡𑀦𑀸𑀲𑀤𑀺𑀲𑀸𑀦𑀺.

𑁩𑁧. 𑀅𑀯𑀺𑀲𑁂𑀲𑁂𑀦𑀸𑀢𑀺 ‘‘𑀯𑀺𑀧𑀸𑀓’’𑀦𑁆𑀢𑀺 𑀯𑀺𑀲𑁂𑀲𑀦𑀁 𑀅𑀓𑀢𑁆𑀯𑀸 𑀦 𑀧𑀦 𑀯𑀺𑀲𑁆𑀲𑀚𑁆𑀚𑀦𑀁 𑀓𑀢𑀦𑁆𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀓𑀸𑀭𑀡𑀁 𑀯𑀢𑁆𑀢𑀼𑀁 ‘‘𑀓𑀲𑁆𑀫𑀸’’𑀢𑀺𑀆𑀤𑀺𑀫𑀸𑀳. 𑀇𑀢𑀭𑁂𑀲𑀦𑁆𑀢𑀺 𑀮𑁄𑀓𑀺𑀬𑀯𑀺𑀧𑀸𑀓𑀸𑀦𑀁. 𑀢𑁂 𑀯𑀺𑀲𑀼𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀯𑀼𑀢𑁆𑀢𑀸𑀢𑀺 𑀢𑁂 𑀬𑀣𑀸𑀯𑀼𑀢𑁆𑀢𑀮𑁄𑀓𑀺𑀬𑀯𑀺𑀧𑀸𑀓𑀸 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀲𑀸𑀫𑀜𑁆𑀜𑀢𑁄 𑀯𑀺𑀲𑀼𑀁 𑀦𑀻𑀳𑀭𑀺𑀢𑁆𑀯𑀸 𑀯𑀼𑀢𑁆𑀢𑀸. ‘‘𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑁂 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸 𑀅𑀥𑀺𑀧𑀢𑀻’’𑀢𑀺 𑀯𑀼𑀢𑁆𑀢𑀭𑀸𑀲𑀺 𑀧𑀼𑀭𑀺𑀫𑀓𑁄𑀝𑁆𑀞𑀸𑀲𑁄.

𑁩𑁮. 𑀏𑀢𑀦𑁆𑀢𑀺 ‘‘𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀁 𑀅𑀯𑀺𑀢𑀓𑁆𑀓…𑀧𑁂… 𑀲𑀳 𑀕𑀘𑁆𑀙𑀦𑁆𑀢𑁂𑀦𑀸’’𑀢𑀺 𑀆𑀕𑀢𑀧𑀸𑀴𑀺𑀧𑀤𑀁. 𑀢𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀽𑀮𑀁…𑀧𑁂… 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺 𑀆𑀳. 𑀢𑀢𑁆𑀣 𑀅𑀯𑀺𑀢𑀓𑁆𑀓…𑀧𑁂… 𑀬𑁄𑀚𑁂𑀦𑁆𑀢𑁂𑀦𑀸𑀢𑀺 𑀅𑀯𑀺𑀢𑀓𑁆𑀓𑁂𑀳𑀺 𑀅𑀯𑀺𑀢𑀓𑁆𑀓𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑁂𑀳𑀺 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀧𑀤𑁂𑀳𑀺 𑀲𑀳 𑀫𑀽𑀮𑀧𑀤𑀁, 𑀆𑀲𑁂𑀯𑀦𑀫𑀽𑀮𑀓𑀫𑁂𑀯 𑀯𑀸 𑀕𑀘𑁆𑀙𑀦𑁆𑀢𑁂𑀦 𑀬𑁄𑀚𑁂𑀦𑁆𑀢𑁂𑀦 𑀦𑀧𑀼𑀭𑁂𑀚𑀸𑀢𑀲𑀤𑀺𑀲𑀁 𑀦𑀸𑀲𑁂𑀯𑀦𑁂 𑀧𑀸𑀴𑀺𑀕𑀫𑀦𑀁 𑀓𑀸𑀢𑀩𑁆𑀩𑀁, 𑀧𑀞𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀧𑁄𑀢𑁆𑀣𑀓𑁂𑀲𑀼 𑀧𑀦 ‘‘𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀁 𑀯𑀺𑀧𑀸𑀓𑁂𑀦 𑀲𑀳 𑀕𑀘𑁆𑀙𑀦𑁆𑀢𑁂𑀦𑀸’’𑀢𑀺 𑀤𑀺𑀲𑁆𑀲𑀢𑀺, 𑀯𑀺𑀧𑀸𑀓𑁂𑀦 𑀯𑀺𑀲𑁂𑀲𑀦𑀪𑀽𑀢𑁂𑀦 𑀲𑀳 𑀬𑁄𑀚𑁂𑀦𑁆𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑀸𑀳 ‘‘𑀯𑀺𑀧𑀸𑀓𑀁 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀦𑁆𑀢𑀺𑀆𑀤𑀺 𑀬𑁄𑀚𑁂𑀢𑀩𑁆𑀩’’𑀦𑁆𑀢𑀺.

𑀏𑀓𑀫𑀽𑀮𑀓𑁂 𑀧𑀸𑀴𑀺𑀬𑀁 𑀬𑁄𑀚𑀺𑀢𑀫𑁂𑀯𑀸𑀢𑀺 ‘‘𑀤𑀼𑀫𑀽𑀮𑀓𑁂𑀲𑀼 𑀧𑀞𑀫𑁂’’𑀢𑀺 𑀯𑀼𑀢𑁆𑀢𑀁.

𑁪𑁯. 𑀫𑀽𑀮𑀧𑀤𑀫𑁂𑀯 𑀅𑀯𑀲𑀸𑀦𑀪𑀸𑀯𑁂𑀦𑀸𑀢𑀺 ‘‘𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀁 𑀥𑀫𑁆𑀫𑀁 𑀧𑀘𑁆𑀘𑀬𑀸 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀦𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺𑀆𑀤𑀺𑀦𑀸 𑀫𑀽𑀮𑀧𑀤𑀫𑁂𑀯 𑀅𑀯𑀲𑀸𑀦𑀪𑀸𑀯𑁂𑀦 𑀬𑁄𑀚𑀺𑀢𑀁. 𑀲𑀢𑁆𑀢 𑀫𑁄𑀳𑀸 𑀉𑀤𑁆𑀥𑀭𑀺𑀢𑀩𑁆𑀩𑀸𑀢𑀺 𑀇𑀤𑀁 𑀦𑀳𑁂𑀢𑀼𑀧𑀘𑁆𑀘𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀝𑀺𑀘𑁆𑀘𑀯𑀸𑀭𑁂 𑀳𑀺 𑀅𑀳𑁂𑀢𑀼𑀓𑀫𑁄𑀳𑁄 𑀢𑀺𑀓𑁆𑀔𑀢𑁆𑀢𑀼𑀫𑁂𑀯 𑀆𑀕𑀢𑁄. 𑀇𑀥 𑀧𑀦 ‘‘𑀯𑀢𑁆𑀣𑀼𑀁 𑀧𑀘𑁆𑀘𑀬𑀸’’𑀢𑀺𑀆𑀤𑀺𑀦𑀸 𑀘𑀢𑀽𑀲𑀼𑀧𑀺 𑀫𑀽𑀮𑀓𑁂𑀲𑀼 𑀆𑀕𑀢𑁄, 𑀢𑀲𑁆𑀫𑀸 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀆𑀕𑀫𑀦𑀁 𑀲𑀦𑁆𑀥𑀸𑀬 ‘‘𑀲𑀢𑁆𑀢 𑀫𑁄𑀳𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀉𑀧𑀦𑀺𑀲𑁆𑀲𑀬𑁂𑀦 𑀲𑀗𑁆𑀕𑀳𑀺𑀢𑀢𑁆𑀢𑀸𑀢𑀺 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦𑁂𑀯 𑀓𑀫𑁆𑀫𑀧𑀘𑁆𑀘𑀬𑀲𑁆𑀲 𑀲𑀗𑁆𑀕𑀳𑀺𑀢𑀢𑁆𑀢𑀸. 𑀲𑀩𑁆𑀩𑀲𑁆𑀲𑀧𑀺 𑀭𑀽𑀧𑀸𑀭𑀽𑀧𑀸𑀯𑀘𑀭𑀓𑀫𑁆𑀫𑀲𑁆𑀲 𑀩𑀮𑀯𑀪𑀸𑀯𑀢𑁄 𑀉𑀧𑀦𑀺𑀲𑁆𑀲𑀬𑀢𑁆𑀢𑀸𑀪𑀸𑀯𑁄 𑀦𑀢𑁆𑀣𑀺, 𑀬𑀢𑁄 𑀢𑀁 ‘‘𑀕𑀭𑀽’’𑀢𑀺 𑀯𑀼𑀘𑁆𑀘𑀢𑀺, 𑀓𑀫𑁆𑀫𑀓𑁆𑀔𑀬𑀓𑀭𑀲𑁆𑀲 𑀧𑀦 𑀓𑀫𑁆𑀫𑀲𑁆𑀲 𑀩𑀮𑀯𑀪𑀸𑀯𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀇𑀫𑀫𑀢𑁆𑀣𑀁 𑀧𑀸𑀴𑀺𑀬𑀸 𑀏𑀯 𑀯𑀺𑀪𑀸𑀯𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀉𑀧𑀸𑀤𑀺𑀦𑁆𑀦𑀢𑁆𑀢𑀺𑀓𑀧𑀜𑁆𑀳𑀸𑀯𑀸𑀭𑀧𑀘𑁆𑀘𑀦𑀻𑀬𑁂 𑀳𑀺…𑀧𑁂… 𑀯𑀺𑀜𑁆𑀜𑀸𑀬𑀢𑀻’’𑀢𑀺.

𑀯𑀺𑀢𑀓𑁆𑀓𑀢𑁆𑀢𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.