𑀧𑀝𑀺𑀘𑁆𑀘𑀯𑀸𑀭𑁄

𑀧𑀘𑁆𑀘𑀬𑀧𑀘𑁆𑀘𑀦𑀻𑀬𑀯𑀡𑁆𑀡𑀦𑀸

𑁮𑁬-𑁮𑁭. 𑀭𑀽𑀧𑀲𑀫𑀼𑀝𑁆𑀞𑀸𑀧𑀓𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀇𑀤𑀁 𑀅𑀝𑁆𑀞𑀓𑀣𑀸𑀯𑀘𑀦𑀁 𑀅𑀦𑀦𑁆𑀢𑀭𑀁 ‘‘𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀜𑁆𑀘 𑀭𑀽𑀧’’𑀦𑁆𑀢𑀺 𑀧𑀸𑀴𑀺𑀬𑀁 𑀆𑀕𑀢𑀢𑁆𑀢𑀸 𑀯𑀼𑀢𑁆𑀢𑀁, 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀁 𑀧𑀦 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀸𑀦𑀜𑁆𑀘 𑀯𑀲𑁂𑀦 𑀬𑁄𑀚𑀦𑀸 𑀲𑀫𑁆𑀪𑀯𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀲𑁂𑀦 𑀧𑀦𑁂𑀢𑀁 𑀦 𑀦 𑀲𑀓𑁆𑀓𑀸 𑀬𑁄𑀚𑁂𑀢𑀼’’𑀦𑁆𑀢𑀺.

𑁯𑁩. 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀸𑀢𑀺 𑀇𑀤𑀁 𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑀥𑀫𑁆𑀫𑁄𑀧𑀮𑀓𑁆𑀔𑀡𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀳𑀚𑀸𑀢𑀸 𑀘 𑀳𑁂𑀢𑀼𑀆𑀤𑀬𑁄…𑀧𑁂… 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄’’𑀢𑀺 𑀯𑀢𑁆𑀯𑀸 ‘‘𑀦 𑀳𑀻’’𑀢𑀺𑀆𑀤𑀺𑀦𑀸 𑀢𑀫𑁂𑀯𑀢𑁆𑀣𑀁 𑀲𑀫𑀢𑁆𑀣𑁂𑀢𑀺.

𑁯𑁪-𑁯𑁭. 𑀲𑁄 𑀧𑀘𑁆𑀘𑀬𑁄𑀢𑀺 𑀲𑁄 𑀧𑀝𑀺𑀘𑁆𑀘𑀝𑁆𑀞𑀨𑀭𑀡𑀓𑁄 𑀧𑀘𑁆𑀘𑀬𑁄.

𑁯𑁯-𑁧𑁦𑁨. 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀤𑀬𑁄𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀩𑀸𑀳𑀺𑀭𑀭𑀽𑀧𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀭𑀽𑀧𑀓𑁄𑀝𑁆𑀞𑀸𑀲𑀸 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀢𑀲𑁆𑀲𑀸𑀢𑀺 𑀫𑀕𑁆𑀕𑀧𑀘𑁆𑀘𑀬𑀁 𑀮𑀪𑀦𑁆𑀢𑀲𑁆𑀲 𑀭𑀽𑀧𑀲𑁆𑀲. 𑀏𑀯𑀫𑁂𑀯 𑀧𑀦𑀸𑀢𑀺 𑀇𑀫𑀺𑀦𑀸 𑀬𑀣𑀸 𑀦𑀫𑀕𑁆𑀕𑀧𑀘𑁆𑀘𑀬𑁂 𑀯𑀼𑀢𑁆𑀢𑀁, 𑀏𑀯𑀫𑁂𑀯 𑀦𑀳𑁂𑀢𑀼𑀧𑀘𑁆𑀘𑀬𑀸𑀤𑀻𑀲𑀼 𑀬𑀁 𑀳𑁂𑀢𑀼𑀧𑀘𑁆𑀘𑀬𑀁 𑀮𑀪𑀢𑀺, 𑀢𑀲𑁆𑀲 𑀧𑀭𑀺𑀳𑀻𑀦𑀢𑁆𑀢𑀸𑀢𑀺 𑀇𑀫𑀫𑀢𑁆𑀣𑀁 𑀉𑀧𑀲𑀁𑀳𑀭𑀢𑀺. 𑀢𑁂𑀦𑀸𑀳 ‘‘𑀏𑀓𑀘𑁆𑀘𑀭𑀽𑀧𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑀸 𑀤𑀝𑁆𑀞𑀩𑁆𑀩𑀸’’𑀢𑀺.

𑁧𑁦𑁭-𑁧𑁩𑁦. 𑀲𑀩𑁆𑀩𑀢𑁆𑀣𑀸𑀢𑀺 𑀧𑀦𑁆𑀦𑀭𑀲𑀫𑀽𑀮𑀓𑀸𑀤𑀻𑀲𑀼 𑀲𑀩𑁆𑀩𑁂𑀲𑀼 𑀦𑀬𑁂𑀲𑀼. 𑀓𑀸𑀫𑀁 𑀲𑀼𑀤𑁆𑀥𑀺𑀓𑀦𑀬𑀸𑀤𑀻𑀲𑀼 𑀯𑀺𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀸, 𑀇𑀥𑀸𑀥𑀺𑀧𑁆𑀧𑁂𑀢𑀢𑁆𑀣𑀁 𑀧𑀦 𑀤𑀲𑁆𑀲𑁂𑀢𑀼𑀁 ‘‘𑀏𑀓𑁂𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀥𑀸𑀢𑀺 𑀏𑀢𑁂𑀲𑀼 𑀦𑀸𑀳𑀸𑀭𑀫𑀽𑀮𑀓𑀸𑀤𑀺𑀦𑀬𑁂𑀲𑀼. 𑀕𑀡𑀦𑀸𑀬𑁂𑀯 𑀦 𑀲𑀭𑀽𑀧𑀤𑀲𑁆𑀲𑀦𑀦𑁆𑀢𑀺 𑀲𑀼𑀤𑁆𑀥𑀺𑀓𑀦𑀬𑁂 𑀯𑀺𑀬 𑀕𑀡𑀦𑀸𑀬 𑀏𑀯 𑀦 𑀲𑀭𑀽𑀧𑀤𑀲𑁆𑀲𑀦𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀅𑀢𑁆𑀣𑁄.

𑀧𑀘𑁆𑀘𑀬𑀧𑀘𑁆𑀘𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀘𑁆𑀘𑀬𑀸𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀯𑀡𑁆𑀡𑀦𑀸

𑁧𑁩𑁧-𑁧𑁮𑁯. 𑀢𑀺𑀡𑁆𑀡𑀦𑁆𑀢𑀺 𑀳𑁂𑀢𑀼 𑀅𑀥𑀺𑀧𑀢𑀺 𑀫𑀕𑁆𑀕𑁄𑀢𑀺 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀧𑀘𑁆𑀘𑀬𑀸𑀦𑀁. 𑀲𑀸𑀥𑀸𑀭𑀡𑀸𑀦𑀦𑁆𑀢𑀺 𑀬𑁂 𑀢𑁂𑀲𑀁 𑀢𑀺𑀡𑁆𑀡𑀁 𑀲𑀸𑀥𑀸𑀭𑀡𑀸 𑀧𑀘𑁆𑀘𑀬𑀸 𑀧𑀘𑁆𑀘𑀦𑀻𑀓𑀢𑁄 𑀦 𑀮𑀩𑁆𑀪𑀦𑁆𑀢𑀺, 𑀬𑀲𑁆𑀫𑀸 𑀢𑁂𑀲𑀁 𑀲𑀗𑁆𑀕𑀡𑁆𑀳𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀢𑀲𑁆𑀫𑀸. 𑀫𑀕𑁆𑀕𑀧𑀘𑁆𑀘𑀬𑁂𑀢𑀺 𑀫𑀕𑁆𑀕𑀧𑀘𑁆𑀘𑀬𑁂 𑀅𑀦𑀼𑀮𑁄𑀫𑀢𑁄 𑀞𑀺𑀢𑁂. 𑀇𑀢𑀭𑁂𑀳𑀻𑀢𑀺 𑀳𑁂𑀢𑀼𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀳𑀺. 𑀲𑀸𑀥𑀸𑀭𑀡𑀸 𑀲𑀢𑁆𑀢𑁂𑀯𑀸𑀢𑀺 𑀫𑀕𑁆𑀕𑀧𑀘𑁆𑀘𑀬𑀯𑀚𑁆𑀚𑁂 𑀲𑀢𑁆𑀢𑁂𑀯. 𑀳𑁂𑀢𑀼𑀧𑀘𑁆𑀘𑀬𑁄𑀧𑀺 𑀧𑀘𑁆𑀘𑀦𑀻𑀬𑀢𑁄 𑀦 𑀮𑀩𑁆𑀪𑀢𑀻𑀢𑀺 𑀳𑁂𑀢𑀼𑀭𑀳𑀺𑀢𑁂𑀲𑀼 𑀅𑀥𑀺𑀧𑀢𑀺𑀦𑁄 𑀅𑀪𑀸𑀯𑀸. 𑀲𑁄 𑀧𑀦𑀸𑀢𑀺 𑀳𑁂𑀢𑀼𑀧𑀘𑁆𑀘𑀬𑁄 𑀅𑀲𑀸𑀥𑀸𑀭𑀡𑁄𑀢𑀺 𑀓𑀢𑁆𑀯𑀸 𑀦 𑀯𑀼𑀢𑁆𑀢𑁄 𑀲𑀸𑀥𑀸𑀭𑀡𑀸𑀦𑀁 𑀅𑀮𑀩𑁆𑀪𑀫𑀸𑀦𑀸𑀦𑀁 𑀯𑀼𑀘𑁆𑀘𑀫𑀸𑀦𑀢𑁆𑀢𑀸. 𑀦 𑀳𑀺 𑀳𑁂𑀢𑀼𑀧𑀘𑁆𑀘𑀬𑁄 𑀫𑀕𑁆𑀕𑀧𑀘𑁆𑀘𑀬𑀲𑁆𑀲 𑀲𑀸𑀥𑀸𑀭𑀡𑁄. 𑀬𑁂𑀳𑀻𑀢𑀺 𑀬𑁂𑀳𑀺 𑀧𑀘𑁆𑀘𑀬𑁂𑀳𑀺. 𑀢𑁂𑀢𑀺 𑀅𑀦𑀦𑁆𑀢𑀭𑀧𑀘𑁆𑀘𑀬𑀸𑀤𑀬𑁄. 𑀏𑀓𑀦𑁆𑀢𑀺𑀓𑀢𑁆𑀢𑀸𑀢𑀺 𑀅𑀯𑀺𑀦𑀸𑀪𑀸𑀯𑀢𑁄. 𑀅𑀭𑀽𑀧𑀝𑁆𑀞𑀸𑀦𑀺𑀓𑀸𑀢𑀺 𑀅𑀭𑀽𑀧𑀧𑀘𑁆𑀘𑀬𑀸 𑀅𑀭𑀽𑀧𑀥𑀫𑁆𑀫𑀸𑀦𑀁𑀬𑁂𑀯 𑀧𑀘𑁆𑀘𑀬𑀪𑀽𑀢𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑀸𑀤𑀬𑁄. 𑀢𑁂𑀦𑀸𑀢𑀺 ‘‘𑀏𑀓𑀦𑁆𑀢𑀺𑀓𑀸𑀦𑀁 𑀅𑀭𑀽𑀧𑀝𑁆𑀞𑀸𑀦𑀺𑀓𑀸’’𑀢𑀺 𑀇𑀥𑀸𑀥𑀺𑀧𑁆𑀧𑁂𑀢𑀢𑁆𑀢𑀸. 𑀢𑁂𑀳𑀻𑀢𑀺 𑀧𑀼𑀭𑁂𑀚𑀸𑀢𑀸𑀲𑁂𑀯𑀦𑀧𑀘𑁆𑀘𑀬𑁂𑀳𑀺. 𑀢𑁂𑀲𑀁 𑀯𑀲𑁂𑀦𑀸𑀢𑀺 𑀢𑁂𑀲𑀁 𑀊𑀦𑀢𑀭𑀕𑀡𑀦𑀸𑀦𑀁 𑀏𑀓𑀓𑀸𑀤𑀻𑀦𑀁 𑀯𑀲𑁂𑀦. 𑀢𑀲𑁆𑀲 𑀢𑀲𑁆𑀲𑀸𑀢𑀺 𑀧𑀘𑁆𑀘𑀦𑀻𑀬𑀢𑁄 𑀬𑁄𑀚𑀺𑀢𑀲𑁆𑀲 𑀢𑀲𑁆𑀲 𑀢𑀲𑁆𑀲 𑀤𑀼𑀓𑀸𑀤𑀺𑀓𑀲𑁆𑀲 𑀩𑀳𑀼𑀕𑀡𑀦𑀲𑁆𑀲. 𑀕𑀡𑀦𑀸𑀢𑀺 𑀊𑀦𑀢𑀭𑀕𑀡𑀦𑀸. 𑀅𑀦𑀼𑀮𑁄𑀫𑀢𑁄 𑀞𑀺𑀢𑀲𑁆𑀲𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀅𑀦𑀼𑀮𑁄𑀫𑀢𑁄 𑀞𑀺𑀢𑁄 𑀯𑀸 𑀳𑁄𑀢𑀼 𑀧𑀘𑁆𑀘𑀦𑀻𑀬𑀢𑁄 𑀬𑁄𑀚𑀺𑀢𑁄 𑀯𑀸, 𑀊𑀦𑀢𑀭𑀕𑀡𑀦𑀸𑀬 𑀲𑀫𑀸𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀦𑀬𑀺𑀤𑀁 𑀮𑀓𑁆𑀔𑀡𑀁 𑀏𑀓𑀦𑁆𑀢𑀺𑀓𑀦𑁆𑀢𑀺 𑀇𑀫𑀺𑀦𑀸 𑀬𑀣𑀸𑀯𑀼𑀢𑁆𑀢𑀮𑀓𑁆𑀔𑀡𑀁 𑀬𑁂𑀪𑀼𑀬𑁆𑀬𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀧𑀘𑁆𑀘𑀬𑀸𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀘𑁆𑀘𑀬𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑀯𑀡𑁆𑀡𑀦𑀸

𑁧𑁯𑁦. 𑀲𑀩𑁆𑀩𑁂𑀲𑀼𑀧𑀻𑀢𑀺 𑀧𑀘𑁆𑀙𑀸𑀚𑀸𑀢𑀁 𑀞𑀧𑁂𑀢𑁆𑀯𑀸 𑀲𑀩𑁆𑀩𑁂𑀲𑀼𑀧𑀺 𑀧𑀘𑁆𑀘𑀬𑁂𑀲𑀼. 𑀲𑁄 𑀳𑀺 𑀅𑀦𑀼𑀮𑁄𑀫𑀢𑁄 𑀅𑀮𑀩𑁆𑀪𑀫𑀸𑀦𑀪𑀸𑀯𑁂𑀦 𑀕𑀳𑀺𑀢𑁄 ‘‘𑀲𑀩𑁆𑀩𑁂𑀲𑀽’’𑀢𑀺 𑀏𑀢𑁆𑀣 𑀲𑀗𑁆𑀕𑀳𑀁 𑀦 𑀮𑀪𑀢𑀺. 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀲𑁆𑀲 𑀆𑀭𑀼𑀧𑁆𑀧𑁂 𑀉𑀧𑁆𑀧𑀦𑁆𑀦𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀲𑁆𑀲 𑀘 𑀧𑀼𑀭𑁂𑀚𑀸𑀢𑀸𑀲𑁂𑀯𑀦𑀸𑀦𑀁 𑀅𑀮𑀩𑁆𑀪𑀦𑀢𑁄𑀢𑀺 ‘‘𑀓𑀺𑀜𑁆𑀘𑀺 𑀦𑀺𑀤𑀲𑁆𑀲𑀦𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄’’𑀢𑀺 𑀆𑀳.

𑀅𑀯𑀲𑁂𑀲𑀸𑀦𑀁 𑀮𑀸𑀪𑀫𑀢𑁆𑀢𑀦𑁆𑀢𑀺 𑀅𑀯𑀲𑁂𑀲𑀸𑀦𑀁 𑀏𑀓𑀘𑁆𑀘𑀸𑀦𑀁 𑀮𑀸𑀪𑀁. 𑀢𑁂𑀦𑀸𑀳 ‘‘𑀦 𑀲𑀩𑁆𑀩𑁂𑀲𑀁 𑀅𑀯𑀲𑁂𑀲𑀸𑀦𑀁 𑀮𑀸𑀪’’𑀦𑁆𑀢𑀺. 𑀧𑀘𑁆𑀙𑀸𑀚𑀸𑀢𑁂 𑀧𑀲𑀗𑁆𑀕𑁄 𑀦𑀢𑁆𑀣𑀻𑀢𑀺 𑀧𑀘𑁆𑀙𑀸𑀚𑀸𑀢𑁄 𑀅𑀦𑀼𑀮𑁄𑀫𑀢𑁄 𑀢𑀺𑀝𑁆𑀞𑀢𑀻𑀢𑀺 𑀅𑀬𑀁 𑀧𑀲𑀗𑁆𑀕𑁄 𑀏𑀯 𑀦𑀢𑁆𑀣𑀺. 𑀧𑀼𑀭𑁂𑀚𑀸…𑀧𑁂… 𑀮𑀩𑁆𑀪𑀢𑀻𑀢𑀺 𑀇𑀫𑀺𑀦𑀸 𑀯𑀺𑀧𑁆𑀧𑀬𑀼𑀢𑁆𑀢𑁂 𑀧𑀘𑁆𑀘𑀦𑀻𑀬𑀢𑁄 𑀞𑀺𑀢𑁂 𑀧𑀼𑀭𑁂𑀚𑀸𑀢𑁄 𑀮𑀩𑁆𑀪𑀢𑀻𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑀢𑁄 𑀆𑀧𑀦𑁆𑀦𑁄 𑀳𑁄𑀢𑀻𑀢𑀺 𑀢𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀢𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀭𑁂𑀚𑀸𑀢𑁄 𑀧𑀦 𑀯𑀺𑀧𑁆𑀧𑀬𑀼𑀢𑁆𑀢𑁂 𑀧𑀘𑁆𑀘𑀦𑀻𑀬𑀢𑁄 𑀞𑀺𑀢𑁂 𑀅𑀦𑀼𑀮𑁄𑀫𑀢𑁄 𑀮𑀩𑁆𑀪𑀢𑀻𑀢𑀺 𑀇𑀤𑀫𑁆𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀅𑀯𑀲𑁂𑀲𑀸 𑀲𑀩𑁆𑀩𑁂𑀧𑀻𑀢𑀺 𑀅𑀢𑁆𑀣𑁂 𑀕𑀬𑁆𑀳𑀫𑀸𑀦𑁂 𑀆𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀇𑀤𑀁 𑀢𑀲𑁆𑀲𑀸 𑀅𑀢𑁆𑀣𑀸𑀧𑀢𑁆𑀢𑀺𑀬𑀸 𑀲𑀩𑁆𑀪𑀸𑀯𑀤𑀲𑁆𑀲𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁, 𑀅𑀢𑁆𑀣𑁄 𑀧𑀦 𑀢𑀸𑀤𑀺𑀲𑁄 𑀦 𑀉𑀧𑀮𑀩𑁆𑀪𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀬𑀫𑁆𑀧𑀺 𑀓𑁂𑀘𑀻’’𑀢𑀺𑀆𑀤𑀺.

𑀢𑀢𑁆𑀣 𑀓𑁂𑀘𑀻𑀢𑀺 𑀧𑀤𑀓𑀸𑀭𑁂 𑀲𑀦𑁆𑀥𑀸𑀬𑀸𑀳. 𑀢𑁂 𑀳𑀺 ‘‘𑀅𑀭𑀽𑀧𑀥𑀸𑀢𑀼𑀬𑀸 𑀘𑀯𑀺𑀢𑁆𑀯𑀸 𑀓𑀸𑀫𑀥𑀸𑀢𑀼𑀁 𑀉𑀧𑀧𑀚𑁆𑀚𑀦𑁆𑀢𑀲𑁆𑀲 𑀕𑀢𑀺𑀦𑀺𑀫𑀺𑀢𑁆𑀢𑀁 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀁 𑀳𑁄𑀢𑀻𑀢𑀺 𑀜𑀸𑀧𑁂𑀢𑀼𑀁 ‘𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀧𑀼𑀭𑁂𑀚𑀸𑀢𑁂’𑀢𑀺 𑀅𑀬𑀫𑀢𑁆𑀣𑁄 𑀦𑀺𑀤𑁆𑀥𑀸𑀭𑀺𑀢𑁄’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀚𑁆𑀚𑀢𑀺 𑀆𑀭𑀼𑀧𑁆𑀧𑁂 𑀭𑀽𑀧𑀁 𑀆𑀭𑀩𑁆𑀪 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀅𑀲𑀫𑁆𑀪𑀯𑀢𑁄. 𑀢𑀣𑀸 𑀳𑁂𑀓𑁂 𑀅𑀲𑀜𑁆𑀜𑀪𑀯𑀸𑀦𑀦𑁆𑀢𑀭𑀲𑁆𑀲 𑀯𑀺𑀬 𑀆𑀭𑀼𑀧𑁆𑀧𑀸𑀦𑀦𑁆𑀢𑀭𑀲𑁆𑀲 𑀓𑀸𑀫𑀸𑀯𑀘𑀭𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑁆𑀲 𑀧𑀼𑀭𑀺𑀫𑀸𑀦𑀼𑀧𑀝𑁆𑀞𑀺𑀢𑀸𑀭𑀫𑁆𑀫𑀡𑀁 𑀇𑀘𑁆𑀙𑀦𑁆𑀢𑀺. 𑀢𑁂𑀦𑁂𑀯𑀸𑀳 ‘‘𑀢𑀫𑁆𑀧𑀺 𑀢𑁂𑀲𑀁 𑀭𑀼𑀘𑀺𑀫𑀢𑁆𑀢𑀫𑁂𑀯𑀸’’𑀢𑀺𑀆𑀤𑀺. 𑀬𑀼𑀚𑁆𑀚𑀫𑀸𑀦𑀓𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀯𑀲𑁂𑀦 𑀯𑀸𑀢𑀺 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀧𑀘𑁆𑀘𑀬𑁂 𑀅𑀦𑀼𑀮𑁄𑀫𑀢𑁄 𑀞𑀺𑀢𑁂 𑀬𑀁 𑀬𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁 𑀪𑀯𑀺𑀢𑀼𑀁 𑀬𑀼𑀚𑁆𑀚𑀢𑀺, 𑀢𑀲𑁆𑀲 𑀢𑀲𑁆𑀲 𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀦 𑀯𑀺𑀘𑀸𑀭𑀺𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀯𑀸𑀢𑀺 𑀆𑀭𑀫𑁆𑀫𑀡𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀧𑀼𑀭𑁂𑀚𑀸𑀢𑀸𑀲𑁂𑀯𑀦𑀲𑀫𑁆𑀧𑀬𑀼𑀢𑁆𑀢𑀦𑀢𑁆𑀣𑀺𑀯𑀺𑀕𑀢𑀧𑀘𑁆𑀘𑀬𑀸. 𑀢𑀫𑁆𑀧𑀺 𑀢𑁂𑀲𑀁 𑀦𑀯𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀅𑀦𑀼𑀮𑁄𑀫𑀢𑁄 𑀅𑀮𑀩𑁆𑀪𑀫𑀸𑀦𑀢𑀁.

𑁧𑁯𑁧-𑁧𑁯𑁫. 𑀦 𑀅𑀜𑁆𑀜𑀫𑀜𑁆𑀜𑁂𑀦 𑀖𑀝𑀺𑀢𑀲𑁆𑀲 𑀫𑀽𑀮𑀲𑁆𑀲𑀸𑀢𑀺 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂𑀦 𑀧𑀘𑁆𑀘𑀦𑀻𑀬𑀢𑁄 𑀞𑀺𑀢𑁂𑀦 𑀬𑁄𑀚𑀺𑀢𑀲𑁆𑀲 𑀲𑀢𑁆𑀢𑀫𑀲𑁆𑀲 𑀫𑀽𑀮𑀲𑁆𑀲 𑀯𑀺𑀢𑁆𑀣𑀸𑀭𑀺𑀢𑀢𑁆𑀢𑀸. 𑀲𑀩𑁆𑀩𑀁 𑀲𑀤𑀺𑀲𑀦𑁆𑀢𑀺 𑀲𑀩𑁆𑀩𑀧𑀸𑀴𑀺𑀕𑀫𑀦𑀁 𑀲𑀤𑀺𑀲𑀁.

𑀇𑀫𑀲𑁆𑀫𑀺𑀁…𑀧𑁂… 𑀯𑁂𑀤𑀺𑀢𑀩𑁆𑀩𑁄𑀢𑀺 𑀏𑀢𑁆𑀣 𑀇𑀫𑀲𑁆𑀫𑀺𑀁 𑀏𑀢𑁆𑀣𑀸𑀢𑀺 𑀤𑁆𑀯𑁂 𑀪𑀼𑀫𑁆𑀫𑀦𑀺𑀤𑁆𑀤𑁂𑀲𑀸. 𑀢𑁂𑀲𑀼 𑀧𑀞𑀫𑀲𑁆𑀲 𑀯𑀺𑀲𑀬𑁄 𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑁂𑀢𑀺 𑀅𑀝𑁆𑀞𑀓𑀣𑀸𑀬𑀫𑁂𑀯 𑀤𑀲𑁆𑀲𑀺𑀢𑁄𑀢𑀺 𑀅𑀤𑀲𑁆𑀲𑀺𑀢𑀲𑁆𑀲 𑀯𑀺𑀲𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀢𑁂𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀺-𑀲𑀤𑁆𑀤𑁂𑀦𑀸𑀢𑀺 ‘‘𑀇𑀫𑁂𑀲𑀫𑁆𑀧𑀻’’𑀢𑀺 𑀏𑀢𑁆𑀣 𑀧𑀺-𑀲𑀤𑁆𑀤𑁂𑀦. 𑀓𑀺𑀲𑁆𑀫𑀺𑀜𑁆𑀘𑀺 𑀧𑀘𑁆𑀘𑀬𑁂. 𑀓𑀫𑁆𑀫𑀧𑀘𑁆𑀘𑀬𑀁 𑀮𑀪𑀦𑁆𑀢𑀸𑀦𑀺𑀧𑀺 𑀘𑀓𑁆𑀔𑀸𑀤𑀻𑀦𑀺 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀘 𑀇𑀦𑁆𑀤𑁆𑀭𑀺𑀬𑀁 𑀦 𑀮𑀪𑀦𑁆𑀢𑀻𑀢𑀺 𑀓𑀢𑁆𑀯𑀸 ‘‘𑀬𑁂𑀪𑀼𑀬𑁆𑀬𑁂𑀦𑀸’’𑀢𑀺 𑀯𑀼𑀢𑁆𑀢𑀁, 𑀓𑀢𑀺𑀧𑀬𑀁 𑀦 𑀮𑀪𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀕𑁆𑀕𑀧𑀘𑁆𑀘𑀬𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑀣𑀸𑀯𑀼𑀢𑁆𑀢𑀸𑀦𑀻𑀢𑀺 𑀧𑀜𑁆𑀘𑀯𑁄𑀓𑀸𑀭𑀧𑀯𑀢𑁆𑀢𑀺𑀅𑀲𑀜𑁆𑀜𑀪𑀯𑀧𑀭𑀺𑀬𑀸𑀧𑀦𑁆𑀦𑀸𑀦𑀺 𑀓𑀝𑀢𑁆𑀢𑀸𑀭𑀽𑀧𑀸𑀦𑁂𑀯 𑀯𑀤𑀢𑀺, 𑀦 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑁂 𑀭𑀽𑀧𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺 𑀬𑁂 𑀳𑁂𑀢𑀼𑀅𑀥𑀺𑀧𑀢𑀺𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀸 𑀭𑀽𑀧𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀏𑀢𑁂𑀬𑁂𑀯 𑀳𑁂𑀢𑀼𑀅𑀥𑀺𑀧𑀢𑀺𑀆𑀤𑀺𑀓𑁂 𑀙 𑀧𑀘𑁆𑀘𑀬𑁂 𑀦 𑀮𑀪𑀦𑁆𑀢𑀺. 𑀏𑀢𑁂𑀬𑁂𑀯𑀸𑀢𑀺 𑀯𑀘𑀦𑁂𑀦 𑀅𑀜𑁆𑀜𑁂 𑀓𑀢𑀺𑀧𑀬𑁂 𑀮𑀪𑀦𑁆𑀢𑀻𑀢𑀺 𑀲𑀺𑀤𑁆𑀥𑀁 𑀳𑁄𑀢𑀻𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀘𑁆𑀙𑀸𑀚𑀸𑀢𑀸…𑀧𑁂… 𑀮𑀪𑀢𑀻’’𑀢𑀺 𑀆𑀳. 𑀅𑀬𑀜𑁆𑀘 𑀧𑀘𑁆𑀘𑀬𑀮𑀸𑀪𑁄 𑀦 𑀚𑀦𑀓𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀮𑀩𑁆𑀪𑀫𑀸𑀦𑀸…𑀧𑁂… 𑀤𑀲𑁆𑀲𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀥𑀫𑁆𑀫𑀯𑀲𑁂𑀦𑀸𑀢𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀯𑀲𑁂𑀦. 𑀇𑀦𑁆𑀤𑁆𑀭𑀺𑀬𑀦𑁆𑀢𑀺 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀁. 𑀬𑀤𑀺 𑀏𑀯𑀦𑁆𑀢𑀺 𑀓𑀝𑀢𑁆𑀢𑀸𑀭𑀽𑀧𑀁 𑀬𑀁 𑀬𑀁 𑀦 𑀮𑀪𑀢𑀺, 𑀢𑀁 𑀢𑀁 𑀬𑀤𑀺 𑀯𑀢𑁆𑀢𑀩𑁆𑀩𑀁, 𑀏𑀯𑀁 𑀲𑀦𑁆𑀢𑁂 𑀭𑀽𑀧𑀥𑀫𑁆𑀫𑁂𑀲𑀼 𑀪𑀽𑀢𑀭𑀽𑀧𑀸𑀦𑀺𑀬𑁂𑀯 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀁 𑀮𑀪𑀦𑁆𑀢𑀻𑀢𑀺 𑀆𑀳 ‘‘𑀉𑀧𑀸𑀤𑀸𑀭𑀽𑀧𑀸𑀦𑀺…𑀧𑁂… 𑀯𑀢𑁆𑀢𑀩𑁆𑀩’’𑀦𑁆𑀢𑀺. 𑀢𑀁 𑀧𑀦 𑀉𑀧𑀸𑀤𑀸𑀭𑀽𑀧𑀸𑀦𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸𑀮𑀸𑀪𑀯𑀘𑀦𑀁. 𑀅𑀭𑀽𑀧𑀺𑀦𑁆𑀤𑁆𑀭𑀺𑀬𑀸𑀮𑀸𑀪𑀦𑁆𑀢𑀺 𑀅𑀭𑀽𑀧𑀻𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀯𑀲𑁂𑀦 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀸𑀮𑀸𑀪𑀁.

𑁧𑁯𑁬-𑁧𑁯𑁭. 𑀩𑀳𑀼𑀕𑀡𑀦𑀫𑁆𑀧𑀺 𑀊𑀦𑀢𑀭𑀕𑀡𑀦𑁂𑀦 𑀬𑁄𑀚𑀺𑀢𑀁 𑀊𑀦𑀢𑀭𑀕𑀡𑀫𑁂𑀯 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀬𑀤𑀺𑀧𑀺 𑀢𑀺𑀓𑀸𑀤𑀻𑀲𑀼 ‘𑀳𑁂𑀢𑀼𑀬𑀸 𑀧𑀜𑁆𑀘𑀸’𑀢𑀺 𑀇𑀤𑀁 𑀦𑀢𑁆𑀣𑀻’’𑀢𑀺. 𑀅𑀦𑀼𑀢𑁆𑀢𑀸𑀦𑀁 𑀤𑀼𑀯𑀺𑀜𑁆𑀜𑁂𑀬𑁆𑀬𑀢𑀸𑀬 𑀕𑀫𑁆𑀪𑀻𑀭𑀁. 𑀬𑀣𑀸 𑀘 𑀪𑀽𑀢𑀭𑀽𑀧𑀸𑀦𑀺 𑀦𑀸𑀭𑀫𑁆𑀫𑀡𑀧𑀘𑁆𑀘𑀬𑀸 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀏𑀯𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀢𑁆𑀣𑀼𑀭𑀽𑀧𑀦𑁆𑀢𑀺 𑀆𑀳 ‘‘𑀯𑀢𑁆𑀣𑀼𑀧𑀺 𑀧𑀦 𑀮𑀪𑀢𑀻’’𑀢𑀺. 𑀬𑀣𑀸 𑀳𑁂𑀝𑁆𑀞𑀸 𑀏𑀓𑀫𑀽𑀮𑀓𑀁 ‘‘𑀤𑀼𑀫𑀽𑀮𑀓’’𑀦𑁆𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀇𑀥𑀸𑀧𑀺 𑀤𑀼𑀫𑀽𑀮𑀓𑀁 ‘‘𑀢𑀺𑀫𑀽𑀮𑀓’’𑀦𑁆𑀢𑀺 𑀯𑀤𑀦𑁆𑀢𑀺.

𑁨𑁦𑁩-𑁨𑁩𑁩. 𑀘𑁂𑀢𑀦𑀸𑀫𑀢𑁆𑀢𑀲𑀗𑁆𑀕𑀸𑀳𑀓𑁂𑀢𑀺 𑀘𑁂𑀢𑀦𑀸𑀫𑀢𑁆𑀢𑀁𑀬𑁂𑀯 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁 𑀕𑀳𑁂𑀢𑁆𑀯𑀸 𑀞𑀺𑀢𑁂 𑀧𑀜𑁆𑀳𑁂. 𑀢𑀢𑁆𑀣 𑀳𑀺 ‘‘𑀦𑀓𑀫𑁆𑀫𑀧𑀘𑁆𑀘𑀬𑀸 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺 𑀯𑀢𑁆𑀢𑀼𑀁 𑀲𑀓𑁆𑀓𑀸. 𑀏𑀯𑀁𑀧𑀓𑀸𑀭𑁂𑀢𑀺 𑀇𑀤𑀁 ‘‘𑀢𑀻𑀡𑀻𑀢𑀺𑀆𑀤𑀻𑀲𑀽’’𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑀲𑁆𑀲 𑀅𑀢𑁆𑀣𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀆𑀤𑀺-𑀲𑀤𑁆𑀤𑁄 𑀳𑀺 𑀧𑀓𑀸𑀭𑀢𑁆𑀣𑁄𑀯 𑀳𑁄𑀢𑀻’’𑀢𑀺 𑀆𑀳. 𑀭𑀽𑀧𑀫𑁆𑀧𑀺 𑀮𑀩𑁆𑀪𑀢𑀺 𑀘𑁂𑀢𑀦𑀸𑀫𑀢𑁆𑀢𑀫𑁂𑀯 𑀅𑀲𑀗𑁆𑀕𑀡𑁆𑀳𑀦𑀢𑁄.

𑀧𑀘𑁆𑀘𑀬𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀝𑀺𑀘𑁆𑀘𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀳𑀚𑀸𑀢𑀯𑀸𑀭𑀯𑀡𑁆𑀡𑀦𑀸

𑁨𑁩𑁪-𑁨𑁪𑁨. 𑀲𑀳𑀚𑀸𑀢𑀧𑀘𑁆𑀘𑀬𑀓𑀭𑀡𑀦𑁆𑀢𑀺 𑀲𑀳𑀚𑀸𑀢𑀁 𑀧𑀘𑁆𑀘𑀬𑀥𑀫𑁆𑀫𑀁 𑀧𑀘𑁆𑀘𑀬𑀁 𑀓𑀢𑁆𑀯𑀸 𑀧𑀯𑀢𑁆𑀢𑀺. 𑀲𑀳𑀚𑀸𑀢𑀸𑀬𑀢𑁆𑀢𑀪𑀸𑀯𑀕𑀫𑀦𑀦𑁆𑀢𑀺 𑀲𑀳𑀚𑀸𑀢𑁂 𑀧𑀘𑁆𑀘𑀬𑀥𑀫𑁆𑀫𑁂 𑀆𑀬𑀢𑁆𑀢𑀪𑀸𑀯𑀲𑁆𑀲 𑀕𑀫𑀦𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲 𑀅𑀢𑁆𑀢𑀦𑀸 𑀲𑀳𑀚𑀸𑀢𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸. 𑀏𑀢𑁆𑀣 𑀘 𑀲𑀳𑀚𑀸𑀢𑀧𑀘𑁆𑀘𑀬𑀲𑀗𑁆𑀔𑀸𑀢𑀁 𑀲𑀳𑀚𑀸𑀢𑀁 𑀓𑀭𑁄𑀢𑀻𑀢𑀺 𑀲𑀳𑀚𑀸𑀢𑁄, 𑀢𑀣𑀸𑀧𑀯𑀢𑁆𑀢𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑁄. 𑀢𑀢𑁆𑀣 𑀧𑀯𑀢𑁆𑀢𑀫𑀸𑀦𑁄 𑀲𑀳𑀚𑀸𑀢𑀲𑀤𑁆𑀤𑁄 𑀬𑀲𑁆𑀫𑀸 𑀢𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲 𑀅𑀢𑁆𑀢𑀦𑀸 𑀲𑀳𑀚𑀸𑀢𑀁 𑀧𑀘𑁆𑀘𑀬𑀥𑀫𑁆𑀫𑀁 𑀧𑀘𑁆𑀘𑀬𑀁 𑀓𑀢𑁆𑀯𑀸 𑀧𑀯𑀢𑁆𑀢𑀺𑀁 𑀢𑀤𑀸𑀬𑀢𑁆𑀢𑀪𑀸𑀯𑀽𑀧𑀕𑀫𑀦𑀜𑁆𑀘 𑀯𑀤𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑀳𑀚𑀸𑀢𑀲𑀤𑁆𑀤𑁂𑀦…𑀧𑁂… 𑀯𑀼𑀢𑁆𑀢’’𑀦𑁆𑀢𑀺. 𑀢𑀲𑁆𑀲 𑀓𑀭𑀡𑀲𑁆𑀲 𑀕𑀫𑀦𑀲𑁆𑀲 𑀯𑀸𑀢𑀺 𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀲𑁆𑀲 𑀲𑀳𑀚𑀸𑀢𑀧𑀘𑁆𑀘𑀬𑀓𑀭𑀡𑀲𑁆𑀲 𑀲𑀳𑀚𑀸𑀢𑀸𑀬𑀢𑁆𑀢𑀪𑀸𑀯𑀽𑀧𑀕𑀫𑀦𑀲𑁆𑀲 𑀯𑀸. ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀲𑀳𑀚𑀸𑀢𑁄’’𑀢𑀺 𑀇𑀫𑀲𑁆𑀲 𑀓𑀼𑀲𑀮𑀁 𑀥𑀫𑁆𑀫𑀁 𑀲𑀳𑀚𑀸𑀢𑀁 𑀢𑀁𑀲𑀳𑀪𑀸𑀯𑀺𑀢𑀜𑁆𑀘 𑀧𑀘𑁆𑀘𑀬𑀁 𑀓𑀢𑁆𑀯𑀸𑀢𑀺 𑀅𑀬𑀫𑀢𑁆𑀣𑁄𑀢𑀺 𑀆𑀳 ‘‘𑀓𑀼𑀲𑀮𑀸𑀤𑀻𑀦𑀁 𑀓𑀫𑁆𑀫𑀪𑀸𑀯𑀢𑁄’’𑀢𑀺. 𑀲𑀳𑀚𑀸𑀢𑀧𑀘𑁆𑀘𑀬𑀲𑀳𑀪𑀸𑀯𑀻𑀦𑀁 𑀧𑀘𑁆𑀘𑀬𑀸𑀦𑀁 𑀲𑀗𑁆𑀕𑀡𑁆𑀳𑀢𑁆𑀣𑀜𑁆𑀳𑁂𑀢𑁆𑀣 ‘‘𑀲𑀳𑀚𑀸𑀢𑀸𑀬𑀢𑁆𑀢𑀪𑀸𑀯𑀕𑀫𑀦𑀁 𑀯𑀸’’𑀢𑀺 𑀯𑀼𑀢𑁆𑀢𑀁.

𑀢𑀁𑀓𑀫𑁆𑀫𑀪𑀸𑀯𑀢𑁄𑀢𑀺 𑀢𑁂𑀲𑀁 𑀬𑀣𑀸𑀯𑀼𑀢𑁆𑀢𑀧𑀘𑁆𑀘𑀬𑀓𑀭𑀡𑀢𑀤𑀸𑀬𑀢𑁆𑀢𑀪𑀸𑀯𑀕𑀫𑀦𑀸𑀦𑀁 𑀓𑀫𑁆𑀫𑀪𑀸𑀯𑀢𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀲𑀳𑀚𑀸𑀢𑁄𑀢𑀺 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀢𑁂𑀦 𑀲𑀳𑀚𑀸𑀢𑁄 𑀳𑀼𑀢𑁆𑀯𑀸’’𑀢𑀺 𑀧𑀝𑀺𑀘𑁆𑀘𑀲𑀤𑁆𑀤𑀁 𑀆𑀳𑀭𑀺𑀢𑁆𑀯𑀸 𑀅𑀢𑁆𑀣𑁄 𑀯𑀼𑀢𑁆𑀢𑁄, 𑀢𑀁 ‘‘𑀧𑀝𑀺𑀘𑁆𑀘𑀢𑁆𑀣𑁄 𑀲𑀳𑀚𑀸𑀢𑀢𑁆𑀣𑁄’’𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀲𑀳𑀚𑀸𑀢𑀲𑀤𑁆𑀤𑀬𑁄𑀕𑁂 𑀓𑀼𑀲𑀮𑀁 𑀥𑀫𑁆𑀫𑀦𑁆𑀢𑀺 𑀉𑀧𑀬𑁄𑀕𑀯𑀘𑀦𑀲𑁆𑀲 𑀬𑀼𑀢𑁆𑀢𑀺 𑀦 𑀯𑀼𑀢𑁆𑀢𑀸, ‘‘𑀢𑁂𑀦 𑀲𑀳𑀚𑀸𑀢𑁄 𑀳𑀼𑀢𑁆𑀯𑀸’’𑀢𑀺 𑀧𑀦 𑀯𑀼𑀢𑁆𑀢𑀢𑁆𑀢𑀸 𑀓𑀭𑀡𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀤𑀲𑁆𑀲𑀺𑀢𑀦𑁆𑀢𑀺 𑀓𑁂𑀘𑀺. 𑀦𑀺𑀲𑁆𑀲𑀬𑀯𑀸𑀭𑁂 𑀧𑀦 𑀓𑀼𑀲𑀮𑀁 𑀥𑀫𑁆𑀫𑀁 𑀦𑀺𑀲𑁆𑀲𑀬𑀢𑁆𑀣𑁂𑀦 𑀧𑀘𑁆𑀘𑀬𑀁 𑀓𑀢𑁆𑀯𑀸𑀢𑀺 𑀯𑀤𑀦𑁆𑀢𑁂𑀦 𑀇𑀥𑀸𑀧𑀺 ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀲𑀳𑀚𑀸𑀢𑀢𑁆𑀣𑁂𑀦 𑀧𑀘𑁆𑀘𑀬𑀁 𑀓𑀢𑁆𑀯𑀸’’𑀢𑀺 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄𑀬𑁂𑀯 𑀳𑁄𑀢𑀺, 𑀧𑀝𑀺𑀘𑁆𑀘𑀲𑀤𑁆𑀤𑀸𑀳𑀭𑀡𑀫𑁆𑀧𑀺 𑀇𑀫𑀫𑁂𑀯𑀢𑁆𑀣𑀁 𑀜𑀸𑀧𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀉𑀧𑀸𑀤𑀸𑀭𑀽𑀧𑀁 𑀓𑀺𑀜𑁆𑀘𑀺 𑀪𑀽𑀢𑀭𑀽𑀧𑀲𑁆𑀲 𑀅𑀦𑀼𑀧𑀸𑀮𑀓𑀁 𑀉𑀧𑀢𑁆𑀣𑀫𑁆𑀪𑀓𑀜𑁆𑀘 𑀳𑁄𑀦𑁆𑀢𑀫𑁆𑀧𑀺 𑀲𑀳𑀚𑀸𑀢𑀮𑀓𑁆𑀔𑀡𑁂𑀦 𑀦 𑀳𑁄𑀢𑀺, 𑀢𑀲𑁆𑀫𑀸 𑀧𑀝𑀺𑀘𑁆𑀘𑀢𑁆𑀣𑀁 𑀦 𑀨𑀭𑀢𑀻𑀢𑀺 𑀆𑀳 ‘‘𑀧𑀝𑀺𑀘𑁆𑀘𑀸𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀤𑀻𑀧𑀺𑀢𑁄 𑀧𑀘𑁆𑀘𑀬𑁄 𑀦 𑀳𑁄𑀢𑀻’’𑀢𑀺. 𑀦𑀺𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀉𑀤𑀸𑀳𑀭𑀡𑀯𑀲𑁂𑀦 𑀯𑀼𑀢𑁆𑀢𑀁, 𑀦 𑀅𑀦𑀯𑀲𑁂𑀲𑀢𑁄𑀢𑀺 𑀅𑀢𑁆𑀣𑁄. 𑀬𑀣𑀸𑀯𑀼𑀢𑁆𑀢𑁄𑀢𑀺 𑀧𑀝𑀺𑀘𑁆𑀘𑀢𑁆𑀣𑀨𑀭𑀡𑀯𑀲𑁂𑀦 𑀯𑀼𑀢𑁆𑀢𑁄. 𑀬𑀣𑀸 𑀘 𑀉𑀧𑀸𑀤𑀸𑀭𑀽𑀧𑀁 𑀪𑀽𑀢𑀭𑀽𑀧𑀲𑁆𑀲 𑀉𑀧𑀸𑀤𑀸𑀭𑀽𑀧𑀲𑁆𑀲 𑀘 𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀏𑀯𑀁 𑀞𑀧𑁂𑀢𑁆𑀯𑀸 𑀙 𑀯𑀢𑁆𑀣𑀽𑀦𑀺 𑀲𑁂𑀲𑀭𑀽𑀧𑀸𑀦𑀺 𑀅𑀭𑀽𑀧𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑁄 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀢𑁆𑀣𑀼𑀯𑀚𑁆𑀚𑀸𑀦𑀺 𑀭𑀽𑀧𑀸𑀦𑀺 𑀘 𑀅𑀭𑀽𑀧𑀸𑀦’’𑀦𑁆𑀢𑀺 𑀆𑀳.

𑀲𑀳𑀚𑀸𑀢𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀘𑁆𑀘𑀬𑀯𑀸𑀭𑀯𑀡𑁆𑀡𑀦𑀸

𑁨𑁪𑁩. 𑀧𑀢𑀺-𑀲𑀤𑁆𑀤𑁄 𑀧𑀢𑀺𑀝𑁆𑀞𑀢𑁆𑀣𑀁 𑀤𑀻𑀧𑁂𑀢𑀺 ‘‘𑀲𑀸𑀭𑁂 𑀧𑀢𑀺𑀝𑁆𑀞𑀺𑀢𑁄’’𑀢𑀺𑀆𑀤𑀻𑀲𑀼, 𑀅𑀬-𑀲𑀤𑁆𑀤𑁄 𑀕𑀢𑀺𑀁 𑀤𑀻𑀧𑁂𑀢𑀺 ‘‘𑀏𑀢𑀺 𑀏𑀢𑁆𑀣𑀸𑀢𑀺 𑀅𑀬𑁄’’𑀢𑀺.

𑀪𑀽𑀢𑀼𑀧𑀸𑀤𑀸𑀭𑀽𑀧𑀸𑀦𑀺 𑀲𑀳 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀯𑀼𑀢𑁆𑀢𑀁 𑀉𑀧𑀸𑀤𑀸𑀭𑀽𑀧𑀸𑀦𑀁 𑀯𑀺𑀬 𑀪𑀽𑀢𑀭𑀽𑀧𑀸𑀦𑀺 𑀦𑀺𑀲𑁆𑀲𑀬𑁄 𑀳𑁄𑀢𑀻𑀢𑀺 𑀓𑀢𑁆𑀯𑀸. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀅𑀝𑁆𑀞𑀓𑀣𑀸𑀬𑀁 ‘‘𑀫𑀳𑀸𑀪𑀽𑀢𑁂 𑀦𑀺𑀲𑁆𑀲𑀸𑀬 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀉𑀧𑀸𑀤𑀸𑀭𑀽𑀧’’𑀦𑁆𑀢𑀺 𑀉𑀧𑀸𑀤𑀸𑀭𑀽𑀧𑀁𑀬𑁂𑀯 𑀤𑀲𑁆𑀲𑀺𑀢𑀦𑁆𑀢𑀺 𑀆𑀳 ‘‘𑀅𑀝𑁆𑀞𑀓𑀣𑀸𑀬𑀁 𑀧𑀦𑀸’’𑀢𑀺𑀆𑀤𑀺.

𑁨𑁫𑁫. 𑀧𑀝𑀺𑀘𑁆𑀘𑀯𑀸𑀭𑁂 𑀲𑀳𑀚𑀸𑀢𑁂𑀢𑀺 𑀧𑀝𑀺𑀘𑁆𑀘𑀯𑀸𑀭𑁂 𑀲𑀳𑀚𑀸𑀢𑀧𑀘𑁆𑀘𑀬𑀯𑀡𑁆𑀡𑀦𑀸𑀬𑀁, 𑀓𑀫𑁆𑀫𑀉𑀢𑀼𑀚𑀸𑀦𑀦𑁆𑀢𑀺 𑀓𑀫𑁆𑀫𑀚𑀸𑀦𑀁 𑀉𑀢𑀼𑀚𑀸𑀦𑀜𑁆𑀘 𑀯𑀲𑁂𑀦 𑀅𑀢𑁆𑀣𑁄 𑀯𑀼𑀢𑁆𑀢𑁄𑀢𑀺 𑀬𑁄𑀚𑀦𑀸. 𑀢𑀣𑀸 𑀳𑀺 𑀢𑀢𑁆𑀣 𑀯𑀼𑀢𑁆𑀢𑀁 ‘‘𑀤𑁆𑀯𑀺𑀲𑀦𑁆𑀢𑀢𑀺𑀲𑀫𑀼𑀝𑁆𑀞𑀸𑀦𑀪𑀽𑀢𑀯𑀲𑁂𑀦 𑀯𑀼𑀢𑁆𑀢’’𑀦𑁆𑀢𑀺 (𑀧𑀝𑁆𑀞𑀸. 𑀅𑀝𑁆𑀞. 𑁧.𑁫𑁭). 𑀓𑀫𑁆𑀫𑁂 𑀘𑀸𑀢𑀺 𑀓𑀫𑁆𑀫𑁂 𑀚𑀦𑀓𑀓𑀫𑁆𑀫𑀧𑀘𑁆𑀘𑀬𑁂 𑀕𑀳𑀺𑀢𑁂. 𑀏𑀓𑀦𑁆𑀢𑀸𑀦𑁂𑀓𑀦𑁆𑀢𑀓𑀫𑁆𑀫𑀚𑀸𑀦𑀦𑁆𑀢𑀺 𑀏𑀓𑀦𑁆𑀢𑁂𑀦 𑀓𑀫𑁆𑀫𑀚𑀸𑀦𑀁 𑀦 𑀏𑀓𑀦𑁆𑀢𑀓𑀫𑁆𑀫𑀚𑀸𑀦𑀜𑁆𑀘. 𑀢𑀢𑁆𑀣 𑀅𑀲𑀜𑁆𑀜𑀪𑀯𑁂 𑀏𑀓𑀦𑁆𑀢𑀓𑀫𑁆𑀫𑀚𑀁 𑀦𑀸𑀫 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀇𑀢𑀭𑀁 𑀉𑀧𑀸𑀤𑀸𑀭𑀽𑀧𑀁 𑀪𑀽𑀢𑀭𑀽𑀧𑀜𑁆𑀘 𑀦 𑀏𑀓𑀦𑁆𑀢𑀓𑀫𑁆𑀫𑀚𑀁, 𑀢𑀤𑀼𑀪𑀬𑀫𑁆𑀧𑀺 𑀢𑀢𑁆𑀣 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁, ‘‘𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘 𑀓𑀝𑀢𑁆𑀢𑀸𑀭𑀽𑀧’’𑀦𑁆𑀢𑀺 𑀇𑀤𑀁 𑀧𑀦 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀯𑀲𑁂𑀦𑁂𑀯 𑀯𑀼𑀢𑁆𑀢𑀦𑁆𑀢𑀺. 𑀲𑁄 𑀦𑀸𑀥𑀺𑀧𑁆𑀧𑁂𑀢𑁄𑀢𑀺 𑀬𑁄 𑀬𑀣𑀸𑀤𑀲𑁆𑀲𑀺𑀢𑁄 𑀧𑀝𑀺𑀘𑁆𑀘𑀯𑀸𑀭𑁂 𑀲𑀳𑀚𑀸𑀢𑀧𑀘𑁆𑀘𑀬𑁂 𑀅𑀢𑁆𑀣𑁄 𑀯𑀼𑀢𑁆𑀢𑁄, 𑀲𑁄 𑀇𑀥 𑀦 𑀅𑀥𑀺𑀧𑁆𑀧𑁂𑀢𑁄. 𑀓𑀲𑁆𑀫𑀸𑀢𑀺 𑀘𑁂, 𑀆𑀳 ‘‘𑀓𑀝𑀢𑁆𑀢𑀸…𑀧𑁂… 𑀕𑀳𑀺𑀢𑀢𑁆𑀢𑀸’’𑀢𑀺. 𑀢𑀁 𑀧𑀳𑀸𑀬𑀸𑀢𑀺 𑀢𑀁 𑀧𑀝𑀺𑀘𑁆𑀘𑀯𑀸𑀭𑁂 𑀯𑀼𑀢𑁆𑀢𑀫𑀢𑁆𑀣𑀁 𑀧𑀳𑀸𑀬 𑀅𑀕𑁆𑀕𑀳𑁂𑀢𑁆𑀯𑀸. 𑀬𑀣𑀸𑀕𑀳𑀺𑀢𑀲𑁆𑀲𑀸𑀢𑀺 ‘‘𑀅𑀲𑀜𑁆𑀜…𑀧𑁂… 𑀓𑀝𑀢𑁆𑀢𑀸𑀭𑀽𑀧𑀁 𑀉𑀧𑀸𑀤𑀸𑀭𑀽𑀧’’𑀦𑁆𑀢𑀺 𑀧𑀸𑀴𑀺𑀬𑀁 𑀏𑀯 𑀕𑀳𑀺𑀢𑀲𑁆𑀲. 𑀧𑀝𑀺𑀘𑁆𑀘 𑀧𑀘𑁆𑀘𑀬𑀸𑀢𑀺 𑀇𑀤𑀁 𑀤𑁆𑀯𑀺𑀦𑁆𑀦𑀁 𑀯𑀸𑀭𑀸𑀦𑀁 𑀉𑀧𑀮𑀓𑁆𑀔𑀡𑀁. 𑀧𑀝𑀺𑀘𑁆𑀘𑀯𑀸𑀭𑁂 𑀆𑀕𑀢𑀦𑀬𑁂𑀦 𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘, 𑀧𑀘𑁆𑀘𑀬𑀯𑀸𑀭𑁂 𑀆𑀕𑀢𑀦𑀬𑁂𑀦 𑀫𑀳𑀸𑀪𑀽𑀢𑁂 𑀧𑀘𑁆𑀘𑀬𑀸 𑀫𑀳𑀸𑀪𑀽𑀢𑀸𑀦𑀁 𑀉𑀧𑁆𑀧𑀢𑁆𑀢𑀺 𑀦 𑀦𑀺𑀯𑀸𑀭𑁂𑀢𑀩𑁆𑀩𑀸, 𑀢𑀲𑁆𑀫𑀸 ‘‘𑀉𑀧𑀸𑀤𑀸𑀭𑀽𑀧𑀲𑀗𑁆𑀔𑀸𑀢𑀁 𑀓𑀝𑀢𑁆𑀢𑀸𑀭𑀽𑀧’’𑀦𑁆𑀢𑀺 𑀏𑀯𑀁 𑀉𑀧𑀸𑀤𑀸𑀭𑀽𑀧𑀕𑁆𑀕𑀳𑀡𑁂𑀦 𑀓𑀝𑀢𑁆𑀢𑀸𑀭𑀽𑀧𑀁 𑀅𑀯𑀺𑀲𑁂𑀲𑁂𑀢𑁆𑀯𑀸 𑀉𑀧𑀸𑀤𑀸𑀭𑀽𑀧𑀸𑀦𑀁 𑀦𑀺𑀯𑀢𑁆𑀢𑁂𑀢𑀩𑁆𑀩𑀸𑀦𑀁 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑀲𑀫𑀼𑀝𑁆𑀞𑀸𑀦𑀸𑀦𑀁 𑀅𑀢𑁆𑀣𑀺𑀢𑀸𑀬 𑀓𑀝𑀢𑁆𑀢𑀸…𑀧𑁂… 𑀯𑀺𑀲𑁂𑀲𑀦𑀁 𑀤𑀝𑁆𑀞𑀩𑁆𑀩𑀦𑁆𑀢𑀺 𑀏𑀯𑀫𑁂𑀢𑁆𑀣 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑁨𑁮𑁬-𑁨𑁮𑁭. 𑀏𑀓𑀘𑁆𑀘𑀲𑁆𑀲 𑀭𑀽𑀧𑀲𑁆𑀲𑀸𑀢𑀺 𑀅𑀳𑁂𑀢𑀼𑀓𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀲𑁆𑀲. 𑀇𑀢𑁄 𑀧𑀭𑁂𑀲𑀼𑀧𑀺 𑀏𑀓𑀘𑁆𑀘𑀭𑀽𑀧𑀕𑁆𑀕𑀳𑀡𑁂 𑀏𑀲𑁂𑀯 𑀦𑀬𑁄. 𑀘𑀓𑁆𑀔𑀸𑀤𑀺𑀥𑀫𑁆𑀫𑀯𑀲𑁂𑀦𑀸𑀢𑀺 𑀘𑀓𑁆𑀔𑀸𑀬𑀢𑀦𑀸𑀤𑀺𑀭𑀽𑀧𑀥𑀫𑁆𑀫𑀯𑀲𑁂𑀦. 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀤𑀺𑀓𑁄𑀝𑁆𑀞𑀸𑀲𑀯𑀲𑁂𑀦𑀸𑀢𑀺 𑀘𑀺𑀢𑁆𑀢𑀚𑀸𑀤𑀺𑀭𑀽𑀧𑀥𑀫𑁆𑀫𑀪𑀸𑀕𑀯𑀲𑁂𑀦. 𑀲𑀩𑁆𑀩𑀁 𑀮𑀩𑁆𑀪𑀢𑀻𑀢𑀺 𑀲𑀢𑀺𑀧𑀺 𑀇𑀫𑀲𑁆𑀲 𑀦𑀬𑀲𑁆𑀲 𑀦𑀳𑁂𑀢𑀼𑀫𑀽𑀮𑀓𑀢𑁆𑀢𑁂 𑀦𑁄𑀦𑀢𑁆𑀣𑀺𑀦𑁄𑀯𑀺𑀕𑀢𑁂𑀲𑀼 𑀏𑀓𑀦𑁆𑀢𑀺 𑀕𑀡𑀦𑀁 𑀲𑀩𑁆𑀩𑀁 𑀭𑀽𑀧𑀁 𑀲𑀩𑁆𑀩𑀲𑁆𑀲 𑀭𑀽𑀧𑀲𑁆𑀲 𑀯𑀲𑁂𑀦 𑀕𑀡𑀦𑀸 𑀮𑀩𑁆𑀪𑀢𑀺 𑀘𑀢𑀼𑀲𑀦𑁆𑀢𑀢𑀺𑀯𑀲𑁂𑀦 𑀯𑀢𑁆𑀢𑀫𑀸𑀦𑁂𑀲𑀼 𑀧𑀜𑁆𑀘𑀯𑀻𑀲𑀢𑀺𑀬𑀸 𑀭𑀽𑀧𑀥𑀫𑁆𑀫𑁂𑀲𑀼 𑀯𑀚𑁆𑀚𑀺𑀢𑀩𑁆𑀩𑀲𑁆𑀲 𑀅𑀪𑀸𑀯𑀸.

𑀧𑀘𑁆𑀘𑀬𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀦𑀺𑀲𑁆𑀲𑀬𑀯𑀸𑀭𑀯𑀡𑁆𑀡𑀦𑀸

𑁩𑁨𑁯-𑁩𑁩𑁭. 𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀸𑀯𑀦𑁆𑀢𑀺 𑀦𑀺𑀲𑁆𑀲𑀬𑀯𑀸𑀭𑁂 𑀯𑀼𑀢𑁆𑀢𑀲𑁆𑀲 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀲𑁆𑀲 𑀘 𑀦𑀺𑀲𑁆𑀲𑀬𑀝𑁆𑀞𑀲𑁆𑀲 𑀥𑀫𑁆𑀫𑀲𑁆𑀲 𑀧𑀘𑁆𑀘𑀬𑀪𑀸𑀯𑀁 𑀧𑀘𑁆𑀘𑀬𑀯𑀸𑀭𑁂𑀦 𑀦𑀺𑀬𑀫𑁂𑀢𑀼𑀦𑁆𑀢𑀺 𑀬𑁄𑀚𑀦𑀸. 𑀢𑀣𑀸 𑀧𑀘𑁆𑀘𑀬𑀯𑀸𑀭𑁂 ‘‘𑀧𑀘𑁆𑀘𑀬𑀸’’𑀢𑀺 𑀯𑀼𑀢𑁆𑀢𑀲𑁆𑀲 𑀧𑀘𑁆𑀘𑀬𑀥𑀫𑁆𑀫𑀲𑁆𑀲 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀪𑀸𑀯𑀁 𑀦𑀺𑀲𑁆𑀲𑀬𑀯𑀸𑀭𑁂𑀦 𑀦𑀺𑀬𑀫𑁂𑀢𑀼𑀦𑁆𑀢𑀺 𑀬𑁄𑀚𑀦𑀸. 𑀦𑀺𑀬𑀫𑀦𑀜𑁆𑀘𑁂𑀢𑁆𑀣 𑀧𑀘𑁆𑀘𑀬𑀝𑁆𑀞𑀦𑀺𑀲𑁆𑀲𑀬𑀝𑁆𑀞𑀸𑀦𑀁 𑀧𑀭𑀺𑀬𑀸𑀬𑀦𑁆𑀢𑀭𑁂𑀦 𑀧𑀓𑀸𑀲𑀺𑀢𑀢𑁆𑀢𑀸 𑀅𑀢𑁆𑀣𑀢𑁄 𑀪𑁂𑀤𑀸𑀪𑀸𑀯𑀤𑀲𑁆𑀲𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀘𑁆𑀘𑀬𑀢𑁆𑀢𑀁 𑀦𑀸𑀫 𑀦𑀺𑀲𑁆𑀲𑀬𑀢𑁆𑀢𑀁, 𑀦𑀺𑀲𑁆𑀲𑀬𑀢𑁆𑀢𑀁 𑀦𑀸𑀫 𑀧𑀘𑁆𑀘𑀬𑀢𑁆𑀢’’𑀦𑁆𑀢𑀺.

𑀦𑀺𑀲𑁆𑀲𑀬𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀁𑀲𑀝𑁆𑀞𑀯𑀸𑀭𑀯𑀡𑁆𑀡𑀦𑀸

𑁩𑁫𑁧-𑁩𑁬𑁮. 𑀲𑀸𑀢𑀺 𑀲𑀯𑀢𑁆𑀣𑀼𑀓𑀸 𑀧𑀝𑀺𑀲𑀦𑁆𑀥𑀺. 𑀇𑀥𑀸𑀧𑀻𑀢𑀺 𑀇𑀫𑀲𑁆𑀫𑀺𑀁 𑀲𑀁𑀲𑀝𑁆𑀞𑀯𑀸𑀭𑁂𑀧𑀺. 𑀅𑀥𑀺𑀧𑀢𑀺𑀧𑀼𑀭𑁂𑀚𑀸𑀢𑀸𑀲𑁂𑀯𑀦𑁂𑀲𑀼 𑀅𑀦𑀼𑀮𑁄𑀫𑀢𑁄 𑀦𑀓𑀫𑁆𑀫𑀦𑀯𑀺𑀧𑀸𑀓𑀦𑀛𑀸𑀦𑀦𑀯𑀺𑀧𑁆𑀧𑀬𑀼𑀢𑁆𑀢𑁂𑀲𑀼 𑀧𑀘𑁆𑀘𑀦𑀻𑀬𑀢𑁄 𑀞𑀺𑀢𑁂𑀲𑀼 𑀦 𑀮𑀩𑁆𑀪𑀢𑀺, 𑀅𑀜𑁆𑀜𑁂𑀲𑀼 𑀲𑀳𑀚𑀸𑀢𑀸𑀤𑀻𑀲𑀼 𑀅𑀦𑀼𑀮𑁄𑀫𑀢𑁄 𑀳𑁂𑀢𑀼𑀆𑀤𑀻𑀲𑀼 𑀧𑀘𑁆𑀘𑀦𑀻𑀬𑀢𑁄 𑀘 𑀅𑀦𑀼𑀮𑁄𑀫𑀢𑁄 𑀘 𑀞𑀺𑀢𑁂𑀲𑀼 𑀮𑀩𑁆𑀪𑀢𑀻𑀢𑀺. 𑀢𑁂𑀦𑀸𑀳 ‘‘𑀮𑀩𑁆𑀪𑀫𑀸𑀦𑀧𑀘𑁆𑀘𑀬𑁂𑀲𑀽’’𑀢𑀺. 𑀇𑀫𑀲𑁆𑀲 𑀯𑀺𑀲𑁂𑀲𑀲𑁆𑀲𑀸𑀢𑀺 𑀇𑀫𑀲𑁆𑀲 𑀬𑀣𑀸𑀯𑀼𑀢𑁆𑀢𑀲𑁆𑀲 𑀯𑀺𑀲𑁂𑀲𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀉𑀤𑁆𑀥𑀝𑀸, 𑀢𑀲𑁆𑀫𑀸 𑀢𑀸𑀤𑀺𑀲𑀲𑁆𑀲 𑀯𑀺𑀲𑁂𑀲𑀲𑁆𑀲 𑀤𑀲𑁆𑀲𑁂𑀢𑀩𑁆𑀩𑀲𑁆𑀲 𑀅𑀪𑀸𑀯𑀢𑁄 𑀯𑀢𑁆𑀣𑀼𑀯𑀺𑀭𑀳𑀺𑀢𑀸 𑀧𑀝𑀺𑀲𑀦𑁆𑀥𑀺 𑀅𑀦𑀼𑀤𑁆𑀥𑀝𑀸, 𑀦 𑀯𑀺𑀧𑁆𑀧𑀬𑀼𑀢𑁆𑀢𑁂 𑀧𑀘𑁆𑀘𑀦𑀻𑀬𑀢𑁄 𑀞𑀺𑀢𑁂 𑀅𑀪𑀸𑀯𑀢𑁄𑀢𑀺 𑀅𑀢𑁆𑀣𑁄. 𑀳𑁂𑀢𑀼𑀧𑀘𑁆𑀘𑀬𑀯𑀺𑀭𑀳𑀺𑀢𑀫𑀢𑁆𑀢𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀇𑀫𑀺𑀦𑀸 𑀪𑀽𑀢𑀓𑀣𑀦𑀁 𑀅𑀳𑁂𑀢𑀼𑀓𑀕𑁆𑀕𑀳𑀡𑀁 𑀦 𑀩𑁆𑀬𑀪𑀺𑀘𑀸𑀭𑀦𑀺𑀯𑀢𑁆𑀢𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. ‘‘𑀅𑀳𑁂𑀢𑀼𑀓𑀯𑀺𑀧𑀸𑀓𑀓𑀺𑀭𑀺𑀬𑀯𑀲𑁂𑀦𑀸’’𑀢𑀺 𑀪𑀯𑀺𑀢𑀩𑁆𑀩𑀁 𑀳𑁂𑀢𑀼𑀧𑀭𑀺𑀬𑀦𑁆𑀢𑀢𑁆𑀢𑀸 𑀫𑀕𑁆𑀕𑀲𑁆𑀲.

𑁩𑁬𑁯-𑁩𑁯𑁧. ‘‘𑀳𑁂𑀢𑀼𑀫𑁆𑀳𑀺 𑀅𑀦𑀼𑀮𑁄𑀫𑀢𑁄 𑀞𑀺𑀢𑁂 𑀛𑀸𑀦𑀫𑀕𑁆𑀕𑀸 𑀧𑀘𑁆𑀘𑀦𑀻𑀬𑀢𑁄 𑀦 𑀮𑀩𑁆𑀪𑀦𑁆𑀢𑀻’’𑀢𑀺𑀆𑀤𑀺 𑀬𑀁 𑀇𑀥 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁, 𑀢𑀁 𑀳𑁂𑀢𑀼𑀧𑀘𑁆𑀘𑀬𑀸𑀤𑀺𑀯𑀲𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑁄 𑀥𑀫𑁆𑀫𑁄 𑀘𑀢𑁆𑀢𑀸𑀭𑁄 𑀲𑀩𑁆𑀩𑀝𑁆𑀞𑀸𑀦𑀺𑀓𑀸 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀛𑀸𑀦𑀫𑀕𑁆𑀕𑀸 𑀘𑀸𑀢𑀺 𑀇𑀫𑁂 𑀅𑀝𑁆𑀞 𑀧𑀘𑁆𑀘𑀬𑁂 𑀅𑀮𑀪𑀦𑁆𑀢𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀇𑀫𑀺𑀦𑀸 𑀧𑀝𑀺𑀘𑁆𑀘𑀯𑀸𑀭𑁂 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑁂𑀦 𑀦𑀬𑁂𑀦 𑀯𑁂𑀤𑀺𑀢𑀼𑀁 𑀲𑀓𑁆𑀓𑀸𑀢𑀺 𑀆𑀳 ‘‘𑀧𑀝𑀺𑀘𑁆𑀘𑀯𑀸𑀭𑁂…𑀧𑁂… 𑀦𑀬𑁂𑀦𑀸’’𑀢𑀺. 𑀲𑁂𑀲𑁂𑀲𑀽𑀢𑀺 𑀅𑀳𑁂𑀢𑀼𑀓𑀫𑁄𑀳𑀯𑀚𑁆𑀚𑀸𑀳𑁂𑀢𑀼𑀓𑁂𑀲𑀼 𑀧𑀜𑁆𑀘𑀯𑀺𑀜𑁆𑀜𑀸𑀡𑀸…𑀧𑁂… 𑀛𑀸𑀦𑀧𑀘𑁆𑀘𑀬𑀁 𑀮𑀪𑀦𑁆𑀢𑀺, 𑀢𑀲𑁆𑀫𑀸 ‘‘𑀅𑀳𑁂𑀢𑀼𑀓𑀫𑁄𑀳𑁄𑀯 𑀛𑀸𑀦𑀫𑀕𑁆𑀕𑀧𑀘𑁆𑀘𑀬𑀁 𑀮𑀪𑀢𑀻’’𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀓𑀺𑀜𑁆𑀘 𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑁂 𑀤𑁆𑀯𑀺𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀅𑀦𑀼𑀮𑁄𑀫𑁂𑀦 𑀅𑀦𑀼𑀮𑁄𑀫𑀯𑀲𑁂𑀦 𑀲𑀳 𑀬𑁄𑀚𑀦𑀸 𑀦𑀢𑁆𑀣𑀺 𑀏𑀓𑁂𑀓𑀲𑁆𑀲𑁂𑀯 𑀬𑁄𑀚𑀦𑀸𑀬 𑀆𑀕𑀢𑀢𑁆𑀢𑀸, 𑀢𑀲𑁆𑀫𑀸 𑀅𑀳𑁂𑀢𑀼𑀓𑀫𑁄𑀳𑁄𑀯 𑀫𑀕𑁆𑀕𑀧𑀘𑁆𑀘𑀬𑀁 𑀮𑀪𑀢𑀻𑀢𑀺 𑀏𑀯𑀫𑁂𑀢𑁆𑀣 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀲𑀁𑀲𑀝𑁆𑀞𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑀫𑁆𑀧𑀬𑀼𑀢𑁆𑀢𑀯𑀸𑀭𑀯𑀡𑁆𑀡𑀦𑀸

𑁩𑁯𑁨-𑁪𑁦𑁦. 𑀲𑀤𑀺𑀲𑀁 𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺 ‘‘𑀬𑀁 𑀲𑀤𑀺𑀲𑀁, 𑀢𑀁 𑀲𑀁𑀲𑀝𑁆𑀞’’𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑀁 𑀲𑀫𑁆𑀧𑀬𑀼𑀢𑁆𑀢𑀁 𑀦 𑀳𑁄𑀢𑀺 ‘‘𑀲𑀁𑀲𑀝𑁆𑀞𑀸 𑀬𑁄𑀚𑀺𑀢𑀸 𑀳𑀬𑀸’’𑀢𑀺𑀆𑀤𑀻𑀲𑀼. 𑀅𑀲𑀁𑀲𑀝𑁆𑀞𑀁 𑀯𑁄𑀓𑀺𑀡𑁆𑀡𑀦𑁆𑀢𑀺 𑀬𑀁 𑀦 𑀲𑀁𑀲𑀝𑁆𑀞𑀁 𑀅𑀦𑁆𑀢𑀭𑀦𑁆𑀢𑀭𑀸 𑀉𑀧𑁆𑀧𑀚𑁆𑀚𑀫𑀸𑀦𑁂𑀦 𑀯𑁄𑀓𑀺𑀡𑁆𑀡𑀫𑁆𑀧𑀺 𑀯𑀺𑀫𑀺𑀲𑁆𑀲𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑀁, 𑀢𑀁 𑀲𑀁𑀲𑀝𑁆𑀞𑀁 𑀦 𑀳𑁄𑀢𑀺 ‘‘𑀬𑀸 𑀲𑀸 𑀯𑀻𑀫𑀁𑀲𑀸…𑀧𑁂… 𑀓𑁄𑀲𑀚𑁆𑀚𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺𑀆𑀤𑀻𑀲𑀼. 𑀏𑀯𑀁 𑀅𑀲𑀫𑁆𑀧𑀬𑀼𑀢𑁆𑀢𑀲𑁆𑀲𑀧𑀺 𑀲𑀁𑀲𑀝𑁆𑀞𑀧𑀭𑀺𑀬𑀸𑀬𑁄 𑀅𑀲𑀁𑀲𑀝𑁆𑀞𑀲𑁆𑀲 𑀘 𑀲𑀫𑁆𑀧𑀬𑀼𑀢𑁆𑀢𑀧𑀭𑀺𑀬𑀸𑀬𑁄 𑀅𑀢𑁆𑀣𑀻𑀢𑀺 𑀢𑀤𑀼𑀪𑀬𑀁 𑀇𑀢𑀭𑁂𑀢𑀭𑀁 𑀦𑀺𑀬𑀫𑁂𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀸𑀭𑀤𑁆𑀯𑀬𑀤𑁂𑀲𑀦𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀉𑀪𑀬𑀁…𑀧𑁂… 𑀦𑀺𑀬𑀸𑀫𑀓𑀁 𑀳𑁄𑀢𑀻’’𑀢𑀺, 𑀲𑀁𑀲𑀝𑁆𑀞𑀲𑀤𑁆𑀤𑁄 𑀳𑀺 𑀯𑁄𑀓𑀺𑀡𑁆𑀡𑀝𑁆𑀞𑁄 𑀦𑀢𑁆𑀣𑀺, 𑀲𑀫𑁆𑀧𑀬𑀼𑀢𑁆𑀢𑀲𑀤𑁆𑀤𑁄 𑀘 𑀲𑀤𑀺𑀲𑀢𑁆𑀣𑁄, 𑀢𑀲𑁆𑀫𑀸 𑀬𑀣𑀸 𑀲𑀁𑀲𑀝𑁆𑀞𑀲𑀤𑁆𑀤𑁄 𑀲𑀫𑁆𑀧𑀬𑀼𑀢𑁆𑀢𑀲𑀤𑁆𑀤𑀸𑀧𑁂𑀓𑁆𑀔𑁄 𑀲𑀤𑀺𑀲𑀢𑁆𑀣𑀢𑁄 𑀯𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀏𑀓𑀼𑀧𑁆𑀧𑀸𑀤𑀸𑀤𑀺𑀲𑀪𑀸𑀯𑀫𑁂𑀯 𑀅𑀢𑁆𑀣𑀁 𑀩𑁄𑀥𑁂𑀢𑀺, 𑀏𑀯𑀁 𑀲𑀫𑁆𑀧𑀬𑀼𑀢𑁆𑀢𑀲𑀤𑁆𑀤𑁄𑀧𑀺 𑀲𑀁𑀲𑀝𑁆𑀞𑀲𑀤𑁆𑀤𑀸𑀧𑁂𑀓𑁆𑀔𑁄 𑀯𑁄𑀓𑀺𑀡𑁆𑀡𑀝𑁆𑀞𑀢𑁄 𑀯𑀺𑀦𑀺𑀯𑀢𑁆𑀢𑀺𑀢𑁆𑀯𑀸𑀢𑀺 𑀅𑀜𑁆𑀜𑀫𑀜𑁆𑀜𑀸𑀧𑁂𑀓𑁆𑀔𑀲𑁆𑀲 𑀲𑀤𑁆𑀤𑀤𑁆𑀯𑀬𑀲𑁆𑀲 𑀅𑀜𑁆𑀜𑀫𑀜𑁆𑀜𑀦𑀺𑀬𑀸𑀫𑀓𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀲𑀫𑁆𑀧𑀬𑀼𑀢𑁆𑀢𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀧𑀜𑁆𑀳𑀸𑀯𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸

𑁪𑁦𑁧-𑁪𑁦𑁩. 𑀢𑁂 𑀧𑀘𑁆𑀘𑀬𑁂𑀢𑀺 𑀢𑁂 𑀳𑁂𑀢𑀼𑀆𑀤𑀺𑀓𑁂 𑀧𑀘𑁆𑀘𑀬𑁂. 𑀧𑀝𑀺𑀧𑀸𑀝𑀺𑀬𑀸𑀢𑀺 𑀏𑀢𑁆𑀣 𑀧𑀘𑁆𑀘𑀬𑀧𑀝𑀺𑀧𑀸𑀝𑀺𑀬𑀸 𑀓𑀼𑀲𑀮𑀸𑀤𑀺𑀧𑀤𑀧𑀝𑀺𑀧𑀸𑀝𑀺𑀬𑀸 𑀯𑀸𑀢𑀺 𑀆𑀲𑀗𑁆𑀓𑀸𑀬𑀁 𑀉𑀪𑀬𑀯𑀲𑁂𑀦𑀧𑀺 𑀅𑀢𑁆𑀣𑁄 𑀬𑀼𑀚𑁆𑀚𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀧𑀞𑀫𑀁 𑀢𑀸𑀯 𑀲𑀦𑁆𑀥𑀸𑀬𑀸𑀳 ‘‘𑀬𑀣𑀸𑀓𑁆𑀓𑀫𑁂𑀦𑀸’’𑀢𑀺𑀆𑀤𑀺. 𑀢𑀲𑁆𑀲𑀢𑁆𑀣𑁄 𑁋 ‘‘𑀳𑁂𑀢𑀼𑀧𑀘𑁆𑀘𑀬𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀤𑁂𑀲𑀦𑀸𑀓𑁆𑀓𑀫𑁂𑀦 𑀬𑀸𑀬 𑀧𑀝𑀺𑀧𑀸𑀝𑀺𑀬𑀸 𑀧𑀝𑀺𑀘𑁆𑀘𑀯𑀸𑀭𑁂 𑀧𑀘𑁆𑀘𑀬𑀸 𑀆𑀕𑀢𑀸, 𑀢𑀤𑀦𑀼𑀭𑀽𑀧𑀁 𑀢𑁂 𑀤𑀲𑁆𑀲𑁂𑀢𑀼𑀦𑁆𑀢𑀺. 𑀤𑀼𑀢𑀺𑀬𑀁 𑀧𑀦 𑀤𑀲𑁆𑀲𑁂𑀢𑀼𑀁 ‘‘𑀓𑀼𑀲𑀮𑁄 𑀓𑀼𑀲𑀮𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀸 𑀧𑀦𑀸𑀬𑀁 𑀧𑀤𑀧𑀝𑀺𑀧𑀸𑀝𑀺 𑀬𑀲𑁆𑀫𑀸 𑀦 𑀓𑀼𑀲𑀮𑀧𑀤𑀤𑀲𑁆𑀲𑀦𑀫𑀢𑁆𑀢𑁂𑀦 𑀤𑀲𑁆𑀲𑀺𑀢𑀸 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀏𑀓𑀤𑁂𑀲𑁂𑀦 𑀲𑀓𑀮𑀁 𑀦𑀬𑀢𑁄 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀼𑀲𑀮𑁄 𑀓𑀼𑀲𑀮𑀲𑁆𑀲𑀸𑀢𑀺…𑀧𑁂… 𑀳𑁄𑀢𑀻’’𑀢𑀺. 𑀢𑁂𑀦𑀸𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑁂𑀦 ‘‘𑀓𑀼𑀲𑀮𑁄 𑀓𑀼𑀲𑀮𑀲𑁆𑀲𑀸’’𑀢𑀺 𑀧𑀤𑁂𑀦. 𑀲𑀩𑁆𑀩𑁄 𑀧𑀪𑁂𑀤𑁄𑀢𑀺 𑀬𑀁 𑀢𑀢𑁆𑀣 𑀢𑀢𑁆𑀣 𑀧𑀘𑁆𑀘𑀬𑁂 ‘‘𑀓𑀼𑀲𑀮𑁄 𑀓𑀼𑀲𑀮𑀲𑁆𑀲𑀸’’𑀢𑀺𑀆𑀤𑀺𑀓𑁄 𑀬𑀢𑁆𑀢𑀓𑁄 𑀧𑀪𑁂𑀤𑁄 𑀯𑀺𑀲𑁆𑀲𑀚𑁆𑀚𑀦𑀁 𑀮𑀪𑀢𑀺, 𑀲𑁄 𑀲𑀩𑁆𑀩𑁄 𑀧𑀪𑁂𑀤𑁄𑀢𑀺 𑀅𑀢𑁆𑀣𑁄. 𑀢𑁂 𑀧𑀘𑁆𑀘𑀬𑁂 𑀧𑀝𑀺𑀧𑀸𑀝𑀺𑀬𑀸 𑀤𑀲𑁆𑀲𑁂𑀢𑀼𑀦𑁆𑀢𑀺 𑀢𑁂 𑀳𑁂𑀢𑀼𑀆𑀤𑀺𑀧𑀘𑁆𑀘𑀬𑁂 𑀓𑀼𑀲𑀮𑀸𑀤𑀺𑀧𑀤𑀧𑀝𑀺𑀧𑀸𑀝𑀺𑀬𑀸 𑀤𑀲𑁆𑀲𑁂𑀢𑀼𑀁.

𑁪𑁦𑁪. 𑀨𑀮𑀯𑀺𑀲𑁂𑀲𑀁 𑀆𑀓𑀗𑁆𑀔𑀦𑁆𑀢𑀸 𑀧𑀝𑀺𑀕𑁆𑀕𑀸𑀳𑀓𑀢𑁄 𑀯𑀺𑀬 𑀤𑀸𑀬𑀓𑀢𑁄𑀧𑀺 𑀬𑀣𑀸 𑀤𑀓𑁆𑀔𑀺𑀡𑀸 𑀯𑀺𑀲𑀼𑀚𑁆𑀛𑀢𑀺, 𑀏𑀯𑀁 𑀤𑀸𑀦𑀁 𑀤𑁂𑀦𑁆𑀢𑀻𑀢𑀺 𑀆𑀳 ‘‘𑀯𑀺𑀲𑀼𑀤𑁆𑀥𑀁 𑀓𑀢𑁆𑀯𑀸’’𑀢𑀺. 𑀢𑁂𑀲𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀸𑀭𑀳𑀦𑁆𑀢𑀺 𑀇𑀫𑀺𑀦𑀸 𑀯𑁄𑀤𑀸𑀦𑀲𑁆𑀲 𑀲𑀓𑀤𑀸𑀕𑀸𑀫𑀺𑀆𑀤𑀻𑀦𑀁 𑀆𑀯𑁂𑀡𑀺𑀓𑀢𑀁 𑀤𑀲𑁆𑀲𑁂𑀢𑀺. 𑀓𑀸𑀫𑀁 𑀅𑀕𑁆𑀕𑀫𑀕𑁆𑀕𑀧𑀼𑀭𑁂𑀘𑀸𑀭𑀺𑀓𑀫𑁆𑀧𑀺 𑀯𑁄𑀤𑀸𑀦𑀫𑁂𑀯, 𑀅𑀲𑁂𑀓𑁆𑀔𑁄 𑀧𑀦 𑀳𑀼𑀢𑁆𑀯𑀸 𑀢𑀁 𑀧𑀘𑁆𑀘𑀯𑁂𑀓𑁆𑀔𑀢𑀻𑀢𑀺 𑀦 𑀢𑀁 𑀇𑀥 𑀕𑀳𑀺𑀢𑀁. 𑀢𑀦𑁆𑀢𑀺 𑀯𑁄𑀤𑀸𑀦𑀁. 𑀕𑁄𑀢𑁆𑀭𑀪𑀼𑀘𑀺𑀢𑁆𑀢𑀦𑁆𑀢𑀺 𑀅𑀝𑁆𑀞𑀫𑀓𑀲𑁆𑀲 𑀉𑀧𑁆𑀧𑀚𑁆𑀚𑀦𑀓𑀸𑀮𑁂 ‘‘𑀕𑁄𑀢𑁆𑀭𑀪𑀽’’𑀢𑀺 𑀯𑀢𑁆𑀢𑀩𑁆𑀩𑀢𑀸𑀭𑀳𑀁 𑀘𑀺𑀢𑁆𑀢𑀁. 𑀕𑁄𑀢𑁆𑀭𑀪𑀼𑀲𑀤𑀺𑀲𑀦𑁆𑀢𑀺 𑀯𑀸 𑀲𑁄𑀢𑀸𑀧𑀦𑁆𑀦𑀸𑀤𑀺𑀕𑁄𑀢𑁆𑀭𑀸𑀪𑀺𑀪𑀸𑀯𑀻𑀢𑀺 𑀯𑀸 𑀕𑁄𑀢𑁆𑀭𑀪𑀼𑀘𑀺𑀢𑁆𑀢𑀦𑁆𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁 𑀪𑀽𑀫𑀺𑀢𑁄 𑀯𑀯𑀢𑁆𑀣𑀧𑁂𑀢𑀺, ‘‘𑀢𑁂𑀪𑀽𑀫𑀓𑀓𑀼𑀲𑀮𑀫𑁂𑀯𑀸’’𑀢𑀺 𑀏𑀢𑁆𑀣 𑀯𑀺𑀬 𑀦 𑀧𑀘𑁆𑀘𑀬𑀥𑀫𑁆𑀫𑀦𑁆𑀢𑀺 𑀅𑀢𑁆𑀣𑁄. 𑀤𑁂𑀲𑀦𑀦𑁆𑀢𑀭𑀢𑁆𑀢𑀸𑀢𑀺 ‘‘𑀓𑀼𑀲𑀮𑀘𑀺𑀢𑁆𑀢𑀲𑀫𑀗𑁆𑀕𑀺𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀧𑀼𑀕𑁆𑀕𑀮𑀸𑀫𑀲𑀦𑀤𑁂𑀲𑀦𑀢𑁄 𑀅𑀜𑁆𑀜𑀢𑁆𑀢𑀸, 𑀅𑀜𑁆𑀜𑀣𑀸 𑀕𑀳𑀺𑀢𑀁 𑀧𑀼𑀦 𑀦 𑀕𑀡𑁆𑀳𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁪𑁦𑁫. 𑀭𑀸𑀕𑀭𑀳𑀺𑀢𑀲𑁆𑀲 𑀯𑀺𑀬 𑀲𑁄𑀫𑀦𑀲𑁆𑀲𑀭𑀳𑀺𑀢𑀲𑁆𑀲 𑀘 𑀭𑀸𑀕𑀲𑁆𑀲 𑀦 𑀆𑀭𑀫𑁆𑀫𑀡𑁂 𑀅𑀲𑁆𑀲𑀸𑀤𑀦𑀯𑀲𑁂𑀦 𑀧𑀯𑀢𑁆𑀢𑀺 𑀅𑀚𑁆𑀛𑀼𑀧𑁂𑀓𑁆𑀔𑀦𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀅𑀲𑁆𑀲𑀸𑀤𑀦𑀁…𑀧𑁂… 𑀓𑀺𑀘𑁆𑀘’’𑀦𑁆𑀢𑀺. 𑀲𑀳𑀲𑀸𑀓𑀸𑀭𑀧𑁆𑀧𑀯𑀢𑁆𑀢𑀸𑀬 𑀉𑀧𑁆𑀧𑀺𑀮𑀸𑀯𑀺𑀢𑀲𑀪𑀸𑀯𑀸𑀬 𑀧𑀻𑀢𑀺𑀬𑀸 𑀆𑀳𑀺𑀢𑀯𑀺𑀲𑁂𑀲𑀸𑀬 𑀢𑀡𑁆𑀳𑀸𑀬 𑀢𑀁 𑀢𑀡𑁆𑀳𑀸𑀪𑀺𑀦𑀦𑁆𑀤𑀦𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀧𑀻𑀢𑀺𑀓𑀺𑀘𑁆𑀘𑀲𑀳𑀺𑀢𑀸𑀬 𑀢𑀡𑁆𑀳𑀸𑀬 𑀓𑀺𑀘𑁆𑀘’’𑀦𑁆𑀢𑀺. 𑀬𑀣𑀸 𑀘 𑀬𑀣𑀸𑀯𑀼𑀢𑁆𑀢𑀓𑀺𑀘𑁆𑀘𑀯𑀺𑀲𑁂𑀲𑀸𑀬 𑀧𑀻𑀢𑀺𑀬𑀸 𑀆𑀳𑀺𑀢𑀯𑀺𑀲𑁂𑀲𑀸 𑀢𑀡𑁆𑀳𑀸 𑀢𑀡𑁆𑀳𑀸𑀪𑀺𑀦𑀦𑁆𑀤𑀦𑀸, 𑀏𑀯𑀁 𑀤𑀺𑀝𑁆𑀞𑀸𑀪𑀺𑀦𑀦𑁆𑀤𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀲𑁆𑀫𑀸 𑀧𑀦 𑀲𑀸 𑀅𑀢𑁆𑀣𑀢𑁄 𑀧𑀘𑁆𑀘𑀬𑀯𑀺𑀲𑁂𑀲𑀯𑀺𑀲𑀺𑀝𑁆𑀞𑀸 𑀤𑀺𑀝𑁆𑀞𑀺𑀬𑁂𑀯, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀤𑀺𑀝𑁆𑀞𑀸𑀪𑀺𑀦𑀦𑁆𑀤𑀦𑀸 𑀤𑀺𑀝𑁆𑀞𑀺𑀬𑁂𑀯𑀸’’𑀢𑀺. 𑀏𑀢𑁆𑀣 𑀧𑀦𑀸𑀢𑀺 ‘‘𑀅𑀪𑀺𑀦𑀦𑁆𑀤𑀢𑀻’’𑀢𑀺 𑀧𑀤𑀲𑁆𑀲 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀯𑀼𑀢𑁆𑀢𑁂𑀲𑀼 𑀏𑀢𑁂𑀲𑀼 𑀧𑀦 𑀤𑁆𑀯𑀻𑀲𑀼 𑀅𑀢𑁆𑀣𑁂𑀲𑀼. 𑀅𑀪𑀺𑀦𑀦𑁆𑀤𑀦𑁆𑀢𑀲𑁆𑀲𑀸𑀢𑀺 𑀇𑀤𑀁 𑀤𑀺𑀝𑁆𑀞𑀸𑀪𑀺𑀦𑀦𑁆𑀤𑀦𑀁𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀧𑀘𑁆𑀙𑀺𑀫𑀢𑁆𑀣𑀫𑁂𑀯 𑀕𑀳𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀅𑀪𑀺𑀦𑀦𑁆𑀤𑀦𑁆𑀢𑀲𑁆𑀲𑀸𑀢𑀺 𑀧𑀦 𑀅𑀯𑀺𑀲𑁂𑀲𑀢𑁄 𑀯𑀼𑀢𑁆𑀢𑀢𑁆𑀢𑀸 𑀢𑀡𑁆𑀳𑀸𑀯𑀲𑁂𑀦 𑀤𑀺𑀝𑁆𑀞𑀺𑀯𑀲𑁂𑀦 𑀅𑀪𑀺𑀦𑀦𑁆𑀤𑀦𑁆𑀢𑀲𑁆𑀲𑀸𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄, 𑀢𑀲𑁆𑀫𑀸 ‘‘𑀅𑀪𑀺𑀦𑀦𑁆𑀤𑀦𑀸…𑀧𑁂… 𑀦 𑀲𑀓𑁆𑀓𑀸 𑀯𑀢𑁆𑀢𑀼’’𑀦𑁆𑀢𑀺 𑀇𑀤𑀫𑀺𑀥 𑀯𑀘𑀦𑀫𑀦𑁄𑀓𑀸𑀲𑀁. 𑀓𑀲𑁆𑀫𑀸? 𑀤𑀺𑀝𑁆𑀞𑀺𑀭𑀳𑀺𑀢𑁂𑀧𑀺 𑀲𑀦𑁆𑀢𑀸𑀦𑁂 𑀅𑀪𑀺𑀦𑀦𑁆𑀤𑀦𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. 𑀢𑀡𑁆𑀳𑀸𑀯𑀲𑁂𑀦 𑀦𑀦𑁆𑀤𑀢𑀻𑀢𑀺 𑀢𑀡𑁆𑀳𑀸𑀪𑀺𑀦𑀦𑁆𑀤𑀦𑀯𑀲𑁂𑀦𑁂𑀯 𑀯𑀼𑀢𑁆𑀢𑁄 𑀅𑀢𑁆𑀣𑁄 𑀧𑀼𑀭𑀺𑀫𑁄 𑀅𑀢𑁆𑀣𑁄. 𑀤𑁆𑀯𑀻𑀲𑀼 𑀧𑀦 𑀲𑁄𑀫𑀦𑀲𑁆𑀲𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀽𑀢𑀺 𑀤𑀺𑀝𑁆𑀞𑀺𑀭𑀳𑀺𑀢𑀸𑀦𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀘𑀺𑀢𑁆𑀢𑀸𑀦𑀺 𑀲𑀦𑁆𑀥𑀸𑀬𑀸𑀳. 𑀬𑀣𑀸𑀯𑀼𑀢𑁆𑀢𑁂𑀦𑀸𑀢𑀺 ‘‘𑀲𑀭𑀸𑀕𑀲𑁆𑀲 𑀲𑁄𑀫𑀦𑀲𑁆𑀲𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀦 𑀲𑁄𑀫𑀦𑀲𑁆𑀲𑁂𑀦 𑀅𑀲𑁆𑀲𑀸𑀤𑁂𑀦𑁆𑀢𑀲𑁆𑀲, 𑀭𑀸𑀕𑁂𑀦 𑀘 𑀢𑁂𑀲𑀼𑀬𑁂𑀯 𑀬𑀣𑀸𑀯𑀼𑀢𑁆𑀢𑁂𑀲𑀼 𑀤𑁆𑀯𑀻𑀲𑀼 𑀘𑀺𑀢𑁆𑀢𑁂𑀲𑀼 𑀅𑀲𑁆𑀲𑀸𑀤𑁂𑀦𑁆𑀢𑀲𑁆𑀲, 𑀘𑀢𑀽𑀲𑀼𑀧𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀘𑀺𑀢𑁆𑀢𑁂𑀲𑀼 𑀲𑀧𑁆𑀧𑀻𑀢𑀺𑀓𑀢𑀡𑁆𑀳𑀸𑀬 𑀅𑀪𑀺𑀦𑀦𑁆𑀤𑀦𑁆𑀢𑀲𑁆𑀲, 𑀘𑀢𑀽𑀲𑀼𑀧𑀺 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀤𑀺𑀝𑁆𑀞𑀸𑀪𑀺𑀦𑀦𑁆𑀤𑀦𑀸𑀬 𑀅𑀪𑀺𑀦𑀦𑁆𑀤𑀦𑁆𑀢𑀲𑁆𑀲 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀻𑀢𑀺 𑀏𑀯𑀫𑁂𑀢𑁆𑀣 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀇𑀢𑀺𑀧𑀺 𑀲𑀓𑁆𑀓𑀸 𑀬𑁄𑀚𑁂𑀢𑀼’’𑀦𑁆𑀢𑀺. 𑀬𑀣𑀸 𑀤𑀺𑀝𑁆𑀞𑀽𑀧𑀦𑀺𑀲𑁆𑀲𑀬𑀢𑁄 𑀤𑀺𑀝𑁆𑀞𑀸𑀪𑀺𑀦𑀦𑁆𑀤𑀦𑀸 𑀲𑀫𑁆𑀪𑀯𑀢𑀺, 𑀏𑀯𑀁 𑀢𑀡𑁆𑀳𑀽𑀧𑀦𑀺𑀲𑁆𑀲𑀬𑀢𑁄 𑀢𑀡𑁆𑀳𑀸𑀪𑀺𑀦𑀦𑁆𑀤𑀦𑀸𑀧𑀺 𑀲𑀫𑁆𑀪𑀯𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀅𑀪𑀺𑀦𑀦𑁆𑀤𑀢𑀺 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀘𑀦𑀢𑁄 𑀲𑀧𑁆𑀧𑀻𑀢𑀺𑀓𑀢𑀡𑁆𑀳𑀸𑀬 𑀅𑀪𑀺𑀦𑀦𑁆𑀤𑀦𑁆𑀢𑀲𑁆𑀲 𑀭𑀸𑀕𑀼𑀧𑁆𑀧𑀢𑁆𑀢𑀺𑀧𑀺 𑀯𑀢𑁆𑀢𑀩𑁆𑀩𑀸, 𑀦 𑀯𑀸 𑀯𑀢𑁆𑀢𑀩𑁆𑀩𑀸 𑀢𑀡𑁆𑀳𑀸𑀪𑀺𑀦𑀦𑁆𑀤𑀦𑀸𑀬 𑀏𑀯 𑀭𑀸𑀕𑀼𑀧𑁆𑀧𑀢𑁆𑀢𑀺𑀬𑀸 𑀯𑀼𑀢𑁆𑀢𑀢𑁆𑀢𑀸.

𑁪𑁦𑁬. ‘‘𑀢𑀤𑀸𑀭𑀫𑁆𑀫𑀡𑀢𑀸𑀬𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀢𑀤𑀸𑀭𑀫𑁆𑀫𑀡𑀢𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀯𑀺𑀪𑀢𑁆𑀢𑀺𑀮𑁄𑀧𑁄 𑀳𑁂𑀢𑁆𑀣 𑀓𑀢𑁄’’𑀢𑀺. 𑀢𑀤𑀸𑀭𑀫𑁆𑀫𑀡𑀢𑀸𑀢𑀺 𑀏𑀢𑁆𑀣 𑀢𑀸-𑀲𑀤𑁆𑀤𑀸𑀪𑀺𑀥𑁂𑀬𑁆𑀬𑁄 𑀅𑀢𑁆𑀣𑁄 𑀪𑀸𑀯𑁄 𑀦𑀸𑀫, 𑀲𑁄 𑀧𑀦 𑀢𑀤𑀸𑀭𑀫𑁆𑀫𑀡𑀲𑀤𑁆𑀤𑀸𑀪𑀺𑀥𑁂𑀬𑁆𑀬𑀢𑁄 𑀅𑀜𑁆𑀜𑁄 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀪𑀸𑀯𑀯𑀦𑁆𑀢𑀢𑁄 𑀯𑀸 𑀅𑀜𑁆𑀜𑁄 𑀪𑀸𑀯𑁄 𑀦𑀸𑀫 𑀦𑀢𑁆𑀣𑀻’’𑀢𑀺. 𑀏𑀢𑁂𑀦 𑀲𑀓𑀢𑁆𑀣𑁂 𑀅𑀬𑀁 𑀢𑀸-𑀲𑀤𑁆𑀤𑁄𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀯𑀺𑀧𑀸𑀓𑁄 𑀢𑀤𑀸𑀭𑀫𑁆𑀫𑀡𑀪𑀸𑀯𑀪𑀽𑀢𑁄𑀢𑀺 𑀅𑀢𑁆𑀣𑁄’’𑀢𑀺. 𑀏𑀢𑀲𑁆𑀫𑀺𑀜𑁆𑀘𑀢𑁆𑀣𑁂 ‘‘𑀢𑀤𑀸𑀭𑀫𑁆𑀫𑀡𑀢𑀸’’𑀢𑀺 𑀧𑀘𑁆𑀘𑀢𑁆𑀢𑁂𑀓𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦…𑀧𑁂… 𑀦 𑀯𑀼𑀢𑁆𑀢𑀦𑁆𑀢𑀺 𑀬𑀤𑀺𑀧𑀺 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀸𑀦𑀫𑁆𑀧𑀺 𑀓𑀫𑁆𑀫𑀁 𑀆𑀭𑀫𑁆𑀫𑀡𑀁 𑀮𑀩𑁆𑀪𑀢𑀺, 𑀢𑀁 𑀧𑀦 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀯𑀺𑀧𑀸𑀓𑀸𑀦𑀁 𑀯𑀺𑀬 𑀦 𑀏𑀓𑀦𑁆𑀢𑁂𑀦 𑀇𑀫𑀲𑁆𑀲 𑀯𑀺𑀧𑀸𑀓𑀘𑀺𑀢𑁆𑀢𑀲𑁆𑀲 𑀇𑀤𑀁 𑀓𑀫𑁆𑀫𑀁 𑀆𑀭𑀫𑁆𑀫𑀡𑀦𑁆𑀢𑀺 𑀯𑀯𑀢𑁆𑀣𑀺𑀢𑀁 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀁 𑀩𑀳𑀼𑀪𑁂𑀤𑀢𑁆𑀢𑀸, 𑀢𑀲𑁆𑀫𑀸 𑀢𑀁 𑀮𑀩𑁆𑀪𑀫𑀸𑀦𑀫𑁆𑀧𑀺 𑀦 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀬𑀤𑀺 𑀏𑀯𑀁 𑀓𑀺𑀁 𑀢𑀁 𑀮𑀩𑁆𑀪𑀫𑀸𑀦𑀫𑁆𑀧𑀺 𑀦 𑀤𑀲𑁆𑀲𑀺𑀢𑀫𑁂𑀯𑀸𑀢𑀺 𑀆𑀲𑀗𑁆𑀓𑀸𑀬𑀁 𑀆𑀳 ‘‘𑀢𑀤𑀸𑀭𑀫𑁆𑀫𑀡𑁂𑀦 𑀧𑀦𑀸’’𑀢𑀺𑀆𑀤𑀺. 𑀅𑀦𑀼𑀮𑁄𑀫𑀢𑁄 𑀲𑀫𑀸𑀧𑀚𑁆𑀚𑀦𑁂 𑀬𑁂𑀪𑀼𑀬𑁆𑀬𑁂𑀦 𑀆𑀲𑀦𑁆𑀦𑀲𑀫𑀸𑀧𑀢𑁆𑀢𑀺𑀬𑀸 𑀆𑀭𑀫𑁆𑀫𑀡𑀪𑀸𑀯𑁄 𑀤𑀲𑁆𑀲𑀺𑀢𑁄, 𑀅𑀜𑁆𑀜𑀣𑀸 ‘‘𑀧𑀝𑀺𑀮𑁄𑀫𑀢𑁄 𑀯𑀸 𑀏𑀓𑀦𑁆𑀢𑀭𑀺𑀓𑀯𑀲𑁂𑀦 𑀯𑀸’’𑀢𑀺 𑀯𑀘𑀦𑀁 𑀦𑀺𑀭𑀢𑁆𑀣𑀓𑀁 𑀲𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀪𑀯𑁂𑀬𑁆𑀬𑀸𑀢𑀺 𑀅𑀦𑀸𑀲𑀦𑁆𑀦𑀸𑀧𑀺 𑀲𑀫𑀸𑀧𑀢𑁆𑀢𑀺 𑀆𑀭𑀫𑁆𑀫𑀡𑀁 𑀪𑀯𑁂𑀬𑁆𑀬, 𑀦 𑀲𑀓𑁆𑀓𑀸 𑀧𑀝𑀺𑀓𑁆𑀔𑀺𑀧𑀺𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯 𑀳𑀺 ‘‘𑀬𑁂𑀪𑀼𑀬𑁆𑀬𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀲𑀢𑀻𑀢𑀺 𑀬𑀤𑀺 𑀆𑀯𑀚𑁆𑀚𑀦𑀸𑀬 𑀏𑀯 𑀆𑀭𑀫𑁆𑀫𑀡𑀪𑀸𑀯𑁂𑀦 𑀓𑀼𑀲𑀮𑀸𑀦𑀁 𑀔𑀦𑁆𑀥𑀸𑀦𑀁 𑀅𑀩𑁆𑀬𑀸𑀓𑀢𑀸𑀭𑀫𑁆𑀫𑀡𑀢𑀸 𑀅𑀥𑀺𑀧𑁆𑀧𑁂𑀢𑀸, 𑀏𑀯𑀁 𑀲𑀦𑁆𑀢𑁂. 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺 ‘‘𑀇𑀤𑁆𑀥𑀺𑀯𑀺𑀥𑀜𑀸𑀡𑀲𑁆𑀲𑀸’’𑀢𑀺 𑀘 𑀧𑀸𑀴𑀺𑀬𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸 𑀢𑀲𑁆𑀲𑀸𑀧𑀺 𑀆𑀯𑀚𑁆𑀚𑀦𑀸𑀬 𑀆𑀭𑀫𑁆𑀫𑀡𑀪𑀸𑀯𑀢𑁄. 𑀢𑀁 𑀦 𑀯𑀼𑀢𑁆𑀢𑀦𑁆𑀢𑀺 𑀢𑀁 𑀅𑀩𑁆𑀬𑀸𑀓𑀢𑀁 𑀇𑀤𑁆𑀥𑀺𑀯𑀺𑀥𑀜𑀸𑀡𑀁 ‘‘𑀓𑀼𑀲𑀮𑀸 𑀔𑀦𑁆𑀥𑀸 𑀇𑀤𑁆𑀥𑀺𑀯𑀺𑀥𑀜𑀸𑀡𑀲𑁆𑀲𑀸’’𑀢𑀺 𑀦 𑀯𑀼𑀢𑁆𑀢𑀁. 𑀳𑁄𑀦𑁆𑀢𑀻𑀢𑀺 𑀆𑀭𑀫𑁆𑀫𑀡𑀁 𑀳𑁄𑀦𑁆𑀢𑀺. 𑀢𑀸𑀦𑀻𑀢𑀺 𑀘𑁂𑀢𑁄𑀧𑀭𑀺𑀬𑀜𑀸𑀡𑀸𑀤𑀻𑀦𑀺. 𑀬𑀸𑀬 𑀓𑀸𑀬𑀘𑀻𑀢𑀺 𑀘𑁂𑀢𑁄𑀧𑀭𑀺𑀬𑀜𑀸𑀡𑀸𑀤𑀻𑀦𑀁 𑀅𑀜𑁆𑀜𑁂𑀲𑀜𑁆𑀘 𑀓𑀼𑀲𑀮𑀸𑀦𑀁 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀆𑀯𑀚𑁆𑀚𑀦𑁆𑀢𑀺𑀬𑀸.

𑁪𑁦𑁭-𑁪𑁦𑁯. 𑀆𑀤𑀻𑀦𑀯𑀤𑀲𑁆𑀲𑀦𑁂𑀦 𑀲𑀪𑀸𑀯𑀢𑁄 𑀘 𑀅𑀦𑀺𑀝𑁆𑀞𑀢𑀸𑀫𑀢𑁆𑀢𑀯𑀲𑁂𑀦 𑀘 𑀤𑁄𑀫𑀦𑀲𑁆𑀲𑀲𑁆𑀲 𑀉𑀧𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀆𑀖𑀸𑀢𑀯𑀢𑁆𑀣𑀼𑀆𑀤𑀺𑀪𑁂𑀤𑁂𑀦 𑀅𑀓𑁆𑀔𑀦𑁆𑀢𑀺𑀪𑁂𑀤𑀸 𑀯𑁂𑀤𑀺𑀢𑀩𑁆𑀩𑀸.

𑁪𑁧𑁦. 𑀲𑀩𑁆𑀩𑀲𑁆𑀲𑀸𑀢𑀺 𑀧𑀓𑀭𑀡𑀧𑀭𑀺𑀘𑁆𑀙𑀺𑀦𑁆𑀦𑁂 𑀕𑀬𑁆𑀳𑀫𑀸𑀦𑁂 𑀲𑀩𑁆𑀩𑀲𑁆𑀲 𑀅𑀩𑁆𑀬𑀸𑀓𑀢𑀲𑁆𑀲, 𑀅𑀢𑁆𑀣𑀦𑁆𑀢𑀭𑀯𑀲𑁂𑀦 𑀧𑀦 𑀕𑀬𑁆𑀳𑀫𑀸𑀦𑁂 𑀲𑀩𑁆𑀩𑀲𑁆𑀲 𑀜𑁂𑀬𑁆𑀬𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸𑀢𑀺 𑀇𑀤𑀁 𑀯𑀢𑁆𑀢𑀩𑁆𑀩𑀲𑁆𑀲 𑀅𑀦𑀦𑁆𑀢𑀸𑀧𑀭𑀺𑀫𑁂𑀬𑁆𑀬𑀢𑀸𑀬 𑀯𑀼𑀢𑁆𑀢𑀁, 𑀦 𑀅𑀜𑁆𑀜𑀸𑀡𑀧𑀝𑀺𑀖𑀸𑀢𑀢𑁄.

𑁪𑁧𑁭. 𑀯𑁄𑀤𑀸𑀦𑀲𑀗𑁆𑀔𑀸𑀢𑀁 𑀯𑀼𑀝𑁆𑀞𑀸𑀦𑀁 𑀅𑀧𑀼𑀩𑁆𑀩𑀢𑁄 𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀧𑀼𑀩𑁆𑀩𑀢𑁄 𑀘𑀺𑀢𑁆𑀢𑀲𑀦𑁆𑀢𑀸𑀦𑀢𑁄 𑀯𑀼𑀝𑁆𑀞𑀸𑀦𑀁 𑀪𑀯𑀗𑁆𑀕𑀫𑁂𑀯𑀸’’𑀢𑀺. 𑀢𑀜𑁆𑀳𑀺 𑀬𑀣𑀸𑀮𑀤𑁆𑀥𑀲𑁆𑀲 𑀯𑀺𑀲𑁂𑀲𑀲𑁆𑀲 𑀯𑁄𑀤𑀸𑀧𑀦𑀁 𑀧𑀕𑀼𑀡𑀪𑀸𑀯𑀸𑀧𑀸𑀤𑀦𑀁 𑀅𑀧𑀼𑀩𑁆𑀩𑀁 𑀦𑀸𑀫 𑀦 𑀳𑁄𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀳𑁂𑀝𑁆𑀞𑀺𑀫𑀁 𑀳𑁂𑀝𑁆𑀞𑀺𑀫𑀜𑁆𑀳𑀺 𑀧𑀕𑀼𑀡𑀚𑁆𑀛𑀸𑀦𑀁 𑀉𑀧𑀭𑀺𑀫𑀲𑁆𑀲 𑀉𑀧𑀭𑀺𑀫𑀲𑁆𑀲 𑀧𑀤𑀝𑁆𑀞𑀸𑀦𑀁 𑀳𑁄𑀢𑀺, 𑀢𑀲𑁆𑀫𑀸 𑀯𑁄𑀤𑀸𑀦𑀫𑁆𑀧𑀺 𑀯𑀼𑀝𑁆𑀞𑀸𑀦𑀦𑁆𑀢𑀺 𑀯𑀼𑀢𑁆𑀢’’𑀦𑁆𑀢𑀺. 𑀅𑀯𑀚𑁆𑀚𑁂𑀢𑀩𑁆𑀩𑀢𑁆𑀢𑀸 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀻𑀢𑀺 𑀓𑀼𑀲𑀮𑀪𑀸𑀯𑁂𑀦 𑀲𑀫𑀸𑀦𑀢𑁆𑀢𑀸 𑀯𑀚𑁆𑀚𑁂𑀢𑀩𑁆𑀩𑀢𑀸𑀬 𑀅𑀪𑀸𑀯𑀢𑁄 𑀯𑀺𑀪𑀚𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀬𑀤𑁂𑀢𑁆𑀣 𑀯𑀺𑀲𑁂𑀲𑀦𑀁 𑀮𑀩𑁆𑀪𑀢𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁…𑀧𑁂… 𑀲𑀫𑀸𑀧𑀢𑁆𑀢𑀺𑀬𑀸’’𑀢𑀺 𑀆𑀳. 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑁂 𑀯𑀼𑀢𑁆𑀢𑀫𑁂𑀯𑀸𑀢𑀺 𑀧𑀝𑁆𑀞𑀸𑀦𑁂 𑀧𑀦 ‘‘𑀓𑀼𑀲𑀮𑁂 𑀦𑀺𑀭𑀼𑀤𑁆𑀥𑁂 𑀯𑀺𑀧𑀸𑀓𑁄 𑀢𑀤𑀸𑀭𑀫𑁆𑀫𑀡𑀢𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 ‘‘𑀓𑀺𑀭𑀺𑀬𑀸𑀦𑀦𑁆𑀢𑀭𑀁 𑀢𑀤𑀸𑀭𑀫𑁆𑀫𑀡𑀪𑀸𑀯𑁂’’𑀢𑀺 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀫𑁂𑀯.

𑀢𑀸 𑀉𑀪𑁄𑀧𑀻𑀢𑀺 𑀬𑀸 ‘‘𑀓𑀼𑀲𑀮𑀯𑀺𑀧𑀸𑀓𑀸𑀳𑁂𑀢𑀼𑀓𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀘𑀸’’𑀢𑀺 𑀤𑁆𑀯𑁂 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄 𑀯𑀼𑀢𑁆𑀢𑀸, 𑀢𑀸 𑀉𑀪𑁄𑀧𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀯𑀲𑁂𑀦 𑀯𑀼𑀢𑁆𑀢𑀸. 𑀓𑀲𑁆𑀫𑀸? 𑀤𑀲𑀦𑁆𑀦𑀁 𑀓𑀸𑀫𑀸𑀯𑀘𑀭𑀪𑀯𑀗𑁆𑀕𑀸𑀦𑀁 𑀅𑀢𑁆𑀢𑀦𑁄 𑀢𑀤𑀸𑀭𑀫𑁆𑀫𑀡𑀓𑀸𑀮𑁂 𑀲𑀦𑁆𑀢𑀻𑀭𑀡𑀓𑀸𑀮𑁂 𑀘 𑀯𑁄𑀝𑁆𑀞𑀩𑁆𑀩𑀦𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀸𑀯𑀢𑁄. 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀧𑀦 𑀬𑀣𑀸𑀯𑀼𑀢𑁆𑀢𑀸𑀦𑀁 𑀤𑀲𑀦𑁆𑀦𑀁 𑀯𑀺𑀧𑀸𑀓𑀸𑀦𑀁 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀅𑀢𑁆𑀢𑀦𑁄 𑀢𑀤𑀸𑀭𑀫𑁆𑀫𑀡𑀸𑀤𑀺𑀓𑀸𑀮𑁂 𑀯𑁄𑀝𑁆𑀞𑀩𑁆𑀩𑀦𑀓𑀺𑀭𑀺𑀬𑀲𑁆𑀲 𑀲𑀦𑁆𑀢𑀻𑀭𑀡𑀓𑀸𑀮𑁂 𑀫𑀦𑁄𑀥𑀸𑀢𑀼𑀓𑀺𑀭𑀺𑀬𑀲𑁆𑀲 𑀪𑀯𑀗𑁆𑀕𑀓𑀸𑀮𑁂𑀢𑀺 𑀬𑁄𑀚𑁂𑀢𑀩𑁆𑀩𑀁.

𑁪𑁨𑁩. 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸𑀢𑀺 𑀚𑀸𑀦𑀺𑀢𑁆𑀯𑀸. 𑀤𑀴𑁆𑀳𑀁 𑀦 𑀕𑀳𑁂𑀢𑀩𑁆𑀩𑀦𑁆𑀢𑀺 𑀤𑀴𑁆𑀳𑀕𑁆𑀕𑀸𑀳𑀁 𑀦 𑀕𑀳𑁂𑀢𑀩𑁆𑀩𑀁. 𑀩𑀮𑀯𑀢𑁄…𑀧𑁂… 𑀯𑀺𑀧𑀘𑁆𑀘𑀦𑀢𑁄𑀢𑀺 𑀏𑀢𑁂𑀦 𑀩𑀮𑀯𑀢𑀸 𑀤𑀼𑀩𑁆𑀩𑀮𑀢𑀸 𑀘 𑀅𑀧𑁆𑀧𑀫𑀸𑀡𑀁, 𑀓𑀢𑁄𑀓𑀸𑀲𑀢𑀸 𑀧𑀫𑀸𑀡𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀓𑀢𑁄𑀓𑀸𑀲𑀢𑀸 𑀘 𑀅𑀯𑀲𑁂𑀲𑀧𑀘𑁆𑀘𑀬𑀲𑀫𑀯𑀸𑀬𑁂 𑀯𑀺𑀧𑀸𑀓𑀸𑀪𑀺𑀫𑀼𑀔𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀁 𑀓𑀺𑀜𑁆𑀘𑀻𑀢𑀺 𑀘 𑀩𑀮𑀯𑀁 𑀤𑀼𑀩𑁆𑀩𑀮𑀁 𑀯𑀸𑀢𑀺 𑀅𑀢𑁆𑀣𑁄. 𑀯𑀺𑀧𑀸𑀓𑀚𑀦𑀓𑀫𑁆𑀧𑀺 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀦 𑀳𑁄𑀢𑀻𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀲𑀢𑀺 𑀳𑀺 𑀓𑀫𑁆𑀫𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀸𑀦𑀁 𑀅𑀯𑀺𑀦𑀸𑀪𑀸𑀯𑁂 𑀯𑀺𑀧𑀸𑀓𑀢𑁆𑀢𑀺𑀓𑁂 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂 𑀕𑀳𑀺𑀢𑁂 𑀓𑀫𑁆𑀫𑀧𑀘𑁆𑀘𑀬𑁄 𑀯𑀺𑀲𑀼𑀁 𑀦 𑀉𑀤𑁆𑀥𑀭𑀺𑀢𑀩𑁆𑀩𑁄 𑀲𑀺𑀬𑀸, 𑀯𑁂𑀤𑀦𑀸𑀢𑁆𑀢𑀺𑀓𑁂 𑀘 𑀉𑀧𑀦𑀺𑀲𑁆𑀲𑀬𑁂 𑀧𑀘𑁆𑀘𑀦𑀻𑀬𑀢𑁄 𑀞𑀺𑀢𑁂 𑀓𑀫𑁆𑀫𑀧𑀘𑁆𑀘𑀬𑁂𑀦 𑀲𑀤𑁆𑀥𑀺𑀁 𑀅𑀝𑁆𑀞𑀸𑀢𑀺 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀘𑁆𑀘𑀬𑀤𑁆𑀯𑀬𑀲𑁆𑀲 𑀧𑀦 𑀮𑀩𑁆𑀪𑀫𑀸𑀦𑀢𑀧𑁆𑀧𑀭𑀸𑀬 𑀤𑁂𑀲𑀦𑀸𑀬 𑀉𑀧𑀦𑀺𑀲𑁆𑀲𑀬𑁂 𑀕𑀳𑀺𑀢𑁂𑀧𑀺 𑀓𑀫𑁆𑀫𑀧𑀘𑁆𑀘𑀬𑁄 𑀉𑀤𑁆𑀥𑀭𑀺𑀢𑀩𑁆𑀩𑁄𑀬𑁂𑀯𑀸𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀮𑀩𑁆𑀪𑀫𑀸𑀦𑀲𑁆𑀲 𑀳𑀺 𑀉𑀤𑁆𑀥𑀭𑀡𑀁 𑀜𑀸𑀬𑀸𑀕𑀢𑀁, 𑀢𑀣𑀸 𑀉𑀧𑀦𑀺𑀲𑁆𑀲𑀬𑁂 𑀧𑀘𑁆𑀘𑀦𑀻𑀬𑀢𑁄 𑀞𑀺𑀢𑁂𑀧𑀺 𑀓𑀫𑁆𑀫𑀧𑀘𑁆𑀘𑀬𑁄 𑀯𑀢𑁆𑀢𑀩𑁆𑀩𑁄𑀯 𑀉𑀧𑀦𑀺𑀲𑁆𑀲𑀬𑀲𑁆𑀲 𑀅𑀦𑁂𑀓𑀪𑁂𑀤𑀢𑁆𑀢𑀸, 𑀯𑀺𑀧𑀸𑀓𑀁 𑀚𑀦𑁂𑀦𑁆𑀢𑀁 𑀓𑀫𑁆𑀫𑀁 𑀯𑀺𑀧𑀸𑀓𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀦 𑀳𑁄𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀭𑀲𑁆𑀲 𑀧𑀯𑀢𑁆𑀢𑀁 𑀑𑀫𑀸𑀦𑀦𑁆𑀢𑀺 𑀧𑀭𑀲𑀦𑁆𑀢𑀸𑀦𑁂 𑀅𑀢𑁆𑀢𑀸𑀦𑀁 𑀉𑀤𑁆𑀤𑀺𑀲𑁆𑀲 𑀧𑀯𑀢𑁆𑀢𑀁 𑀅𑀯𑀫𑀸𑀦𑀁. 𑀢𑁂𑀲𑀽𑀢𑀺 𑀬𑁄 𑀅𑀦𑁂𑀦 𑀧𑀼𑀩𑁆𑀩𑁂 𑀳𑀢𑁄, 𑀢𑀲𑁆𑀲 𑀜𑀸𑀢𑀺𑀫𑀺𑀢𑁆𑀢𑁂𑀲𑀼. 𑀫𑀸𑀢𑀼𑀖𑀸𑀢𑀦𑀢𑁆𑀣𑀁 𑀧𑀯𑀢𑁆𑀢𑀺𑀢𑀢𑀸𑀬 𑀧𑀼𑀭𑀺𑀫𑀘𑁂𑀢𑀦𑀸𑀬 𑀫𑀸𑀢𑀼𑀖𑀸𑀢𑀓𑀫𑁆𑀫𑁂𑀦 𑀲𑀤𑀺𑀲𑀢𑀸, 𑀬𑀣𑀸 𑀘 𑀆𑀡𑀢𑁆𑀢𑀺𑀬𑀁 𑀧𑀳𑀸𑀭𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀏𑀲 𑀦𑀬𑁄 𑀤𑁆𑀯𑀻𑀳𑀺 𑀧𑀓𑀸𑀭𑁂𑀳𑀻𑀢𑀺 𑀏𑀢𑁆𑀣𑀸𑀧𑀻’’𑀢𑀺.

𑀯𑀝𑁆𑀝𑀦𑀺𑀲𑁆𑀲𑀺𑀢𑁄 𑀤𑀸𑀦𑀸𑀤𑀺𑀯𑀲𑁂𑀦 𑀲𑀤𑁆𑀥𑀁 𑀉𑀧𑁆𑀧𑀸𑀤𑁂𑀦𑁆𑀢𑁄 𑀭𑀸𑀕𑀁 𑀉𑀧𑀦𑀺𑀲𑁆𑀲𑀸𑀬 𑀤𑀸𑀦𑀸𑀤𑀺𑀯𑀲𑁂𑀦 𑀲𑀤𑁆𑀥𑀁 𑀉𑀧𑁆𑀧𑀸𑀤𑁂𑀢𑀺 𑀦𑀸𑀫, 𑀦 𑀯𑀺𑀯𑀝𑁆𑀝𑀦𑀺𑀲𑁆𑀲𑀺𑀢𑁄 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀢𑁆𑀢𑀸𑀢𑀺 𑀆𑀳 ‘‘𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀯𑀤𑀢𑀻’’𑀢𑀺. 𑀏𑀢𑁂𑀲𑀦𑁆𑀢𑀺 𑀓𑀸𑀬𑀺𑀓𑀲𑀼𑀔𑀤𑀼𑀓𑁆𑀔𑀸𑀦𑀁. 𑀏𑀓𑀢𑁄𑀧𑀻𑀢𑀺 𑀇𑀤𑀁 𑀬𑀤𑀺𑀧𑀺 𑀏𑀓𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀲𑀼𑀔𑀤𑀼𑀓𑁆𑀔𑀸𑀦𑀁 𑀏𑀓𑀲𑁆𑀫𑀺𑀁 𑀔𑀡𑁂 𑀉𑀧𑁆𑀧𑀢𑁆𑀢𑀺 𑀦𑀢𑁆𑀣𑀺, 𑀧𑀘𑁆𑀘𑀬𑀲𑀫𑀸𑀬𑁄𑀕𑁄 𑀧𑀦 𑀢𑁂𑀲𑀁 𑀏𑀓𑀚𑁆𑀛𑀫𑁆𑀧𑀺 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁.

𑁪𑁨𑁫. 𑀧𑀼𑀭𑀺𑀫𑀯𑀸𑀭𑁂𑀲𑀼 𑀯𑀺𑀬𑀸𑀢𑀺 𑀧𑀝𑀺𑀘𑁆𑀘𑀯𑀸𑀭𑀸𑀤𑀻𑀲𑀼 𑀧𑀼𑀭𑀺𑀫𑁂𑀲𑀼 𑀯𑀺𑀬. 𑀇𑀫𑀲𑁆𑀫𑀺𑀦𑁆𑀢𑀺 𑀧𑀜𑁆𑀳𑀸𑀯𑀸𑀭𑁂. 𑀧𑀘𑁆𑀘𑀬𑁂𑀦 𑀉𑀧𑁆𑀧𑀢𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀳𑁂𑀢𑀼𑀆𑀤𑀺𑀦𑀸 𑀢𑁂𑀦 𑀢𑁂𑀦 𑀧𑀘𑁆𑀘𑀬𑁂𑀦 𑀢𑀁𑀢𑀁𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲 𑀉𑀧𑁆𑀧𑀢𑁆𑀢𑀺 𑀦 𑀯𑀼𑀘𑁆𑀘𑀢𑀺. 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀦𑁆𑀢𑀺 𑀳𑁂𑀢𑀼𑀆𑀤𑀻𑀦𑀁 𑀢𑁂𑀲𑀁 𑀢𑁂𑀲𑀁 𑀧𑀘𑁆𑀘𑀬𑀥𑀫𑁆𑀫𑀸𑀦𑀁. 𑀢𑀁𑀢𑀁𑀧𑀘𑁆𑀘𑀬𑀪𑀸𑀯𑁄𑀢𑀺 𑀳𑁂𑀢𑀼𑀆𑀤𑀻𑀦𑀁 𑀢𑀁𑀢𑀁𑀧𑀘𑁆𑀘𑀬𑀪𑀸𑀯𑁄 𑀯𑀼𑀘𑁆𑀘𑀢𑀺. 𑀢𑁂𑀦𑁂𑀯 𑀧𑀼𑀭𑀺𑀫𑁂𑀲𑀼 𑀙𑀲𑀼 𑀯𑀸𑀭𑁂𑀲𑀼 ‘‘𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 𑀢𑀢𑁆𑀣 𑀢𑀢𑁆𑀣 𑀉𑀧𑁆𑀧𑀸𑀤𑀕𑁆𑀕𑀳𑀡𑀁 𑀓𑀢𑀁, 𑀇𑀥 𑀧𑀦 ‘‘𑀓𑀼𑀲𑀮𑀲𑁆𑀲 𑀥𑀫𑁆𑀫𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺𑀦𑀸 𑀧𑀘𑁆𑀘𑀬𑀪𑀸𑀯𑁄 𑀕𑀳𑀺𑀢𑁄. 𑀢𑁂𑀦𑀸𑀢𑀺 𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑁂𑀦 𑀧𑀘𑁆𑀘𑀬𑀪𑀸𑀯𑁂𑀦. 𑀇𑀥𑀸𑀢𑀺 𑀧𑀜𑁆𑀳𑀸𑀯𑀸𑀭𑁂.

𑁪𑁨𑁭. 𑀧𑀢𑀺𑀝𑁆𑀞𑀸𑀪𑀽𑀢𑀲𑁆𑀲𑀸𑀢𑀺 𑀦𑀺𑀲𑁆𑀲𑀬𑀪𑀽𑀢𑀲𑁆𑀲. 𑀓𑀫𑁆𑀫𑀧𑀘𑁆𑀘𑀬𑁄𑀢𑀺 𑀲𑀳𑀚𑀸𑀢𑀓𑀫𑁆𑀫𑀧𑀘𑁆𑀘𑀬𑁄. 𑀤𑀼𑀓𑀫𑀽𑀮𑀓𑀤𑀼𑀓𑀸𑀯𑀲𑀸𑀦𑀸𑀢𑀺 ‘‘𑀓𑀼𑀲𑀮𑁄 𑀘 𑀅𑀩𑁆𑀬𑀸𑀓𑀢𑁄 𑀘 𑀥𑀫𑁆𑀫𑀸 𑀓𑀼𑀲𑀮𑀲𑁆𑀲 𑀘 𑀅𑀩𑁆𑀬𑀸𑀓𑀢𑀲𑁆𑀲 𑀘 𑀥𑀫𑁆𑀫𑀲𑁆𑀲𑀸’’𑀢𑀺 𑀏𑀯𑀁 𑀤𑀼𑀓𑀫𑀽𑀮𑀓𑀤𑀼𑀓𑀸𑀯𑀲𑀸𑀦𑀸 𑀓𑀢𑁆𑀯𑀸 𑀯𑀼𑀢𑁆𑀢𑀧𑀜𑁆𑀳𑀸. 𑀢𑀢𑁆𑀣𑀸𑀢𑀺 𑀧𑀘𑁆𑀘𑀬𑀯𑀸𑀭𑁂. 𑀓𑀼𑀲𑀮𑁄 𑀘 𑀅𑀩𑁆𑀬𑀸𑀓𑀢𑁄 𑀘 𑀥𑀫𑁆𑀫𑀸𑀢𑀺 𑀓𑀼𑀲𑀮𑀸𑀩𑁆𑀬𑀸𑀓𑀢𑀧𑁆𑀧𑀪𑁂𑀤𑀸 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸 𑀥𑀫𑁆𑀫𑀸. 𑀬𑀢𑁄 𑀢𑀢𑁄 𑀯𑀸𑀢𑀺 𑀧𑀘𑁆𑀘𑀬𑀥𑀫𑁆𑀫𑀦𑀺𑀬𑀫𑀁 𑀅𑀓𑀢𑁆𑀯𑀸 𑀬𑀢𑁄 𑀢𑀢𑁄 𑀯𑀸 𑀓𑀼𑀲𑀮𑀸𑀩𑁆𑀬𑀸𑀓𑀢𑀯𑀲𑁂𑀦 𑀉𑀪𑀬𑀧𑀘𑁆𑀘𑀬𑀢𑁄 𑀉𑀧𑁆𑀧𑀢𑁆𑀢𑀺𑀫𑀢𑁆𑀢𑀫𑁂𑀯 𑀢𑀢𑁆𑀣 𑀧𑀘𑁆𑀘𑀬𑀯𑀸𑀭𑁂 𑀅𑀥𑀺𑀧𑁆𑀧𑁂𑀢𑀁, 𑀉𑀪𑀬𑀲𑁆𑀲 𑀬𑀣𑀸𑀯𑀼𑀢𑁆𑀢𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲 𑀉𑀪𑀺𑀦𑁆𑀦𑀁 𑀬𑀣𑀸𑀯𑀼𑀢𑁆𑀢𑀸𑀦𑀁𑀬𑁂𑀯 𑀧𑀘𑁆𑀘𑀬𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀪𑀸𑀯𑁄 𑀦 𑀅𑀥𑀺𑀧𑁆𑀧𑁂𑀢𑁄 𑀉𑀧𑁆𑀧𑀸𑀤𑀧𑀥𑀸𑀦𑀢𑁆𑀢𑀸 𑀢𑀲𑁆𑀲𑀸 𑀤𑁂𑀲𑀦𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀺𑀲𑁆𑀲𑀬𑀸𑀤𑀺𑀪𑀽𑀢𑀸𑀢𑀺 𑀦𑀺𑀲𑁆𑀲𑀬𑀅𑀢𑁆𑀣𑀺𑀅𑀯𑀺𑀕𑀢𑀪𑀽𑀢𑀸 𑀧𑀘𑁆𑀘𑀬𑀥𑀫𑁆𑀫𑀸 𑀦 𑀮𑀩𑁆𑀪𑀦𑁆𑀢𑀺, 𑀢𑀲𑁆𑀫𑀸 𑀓𑀼𑀲𑀮𑁄 𑀘…𑀧𑁂… 𑀦 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸.

𑀧𑀜𑁆𑀳𑀸𑀯𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀜𑁆𑀳𑀸𑀯𑀸𑀭𑀲𑁆𑀲 𑀖𑀝𑀦𑁂 𑀅𑀦𑀼𑀮𑁄𑀫𑀕𑀡𑀦𑀸

𑁪𑁩𑁯. 𑀏𑀢𑁆𑀣𑀸𑀢𑀺 𑀅𑀩𑁆𑀬𑀸𑀓𑀢𑀫𑀽𑀮𑀓𑁂. 𑀬𑀤𑀺 𑀏𑀯𑀦𑁆𑀢𑀺 𑀬𑀤𑀺 𑀓𑀼𑀲𑀮𑀸𑀓𑀼𑀲𑀮𑀫𑀽𑀮𑁂𑀳𑀺 𑀅𑀮𑀩𑁆𑀪𑀫𑀸𑀦𑀫𑁆𑀧𑀺 𑀮𑀩𑁆𑀪𑀢𑀺, 𑀏𑀯𑀁 𑀲𑀦𑁆𑀢𑁂. 𑀕𑀡𑀦𑀫𑀢𑁆𑀢𑀲𑀸𑀫𑀜𑁆𑀜𑀢𑁄, 𑀦 𑀧𑀘𑁆𑀘𑀬𑀲𑀸𑀫𑀜𑁆𑀜𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁪𑁪𑁦. 𑀦𑀺𑀤𑀲𑁆𑀲𑀦𑀯𑀲𑁂𑀦 𑀤𑀝𑁆𑀞𑀩𑁆𑀩𑁄 𑀬𑁂𑀪𑀼𑀬𑁆𑀬𑁂𑀦 𑀇𑀦𑁆𑀤𑁆𑀭𑀺𑀬𑀫𑀕𑁆𑀕𑀧𑀘𑁆𑀘𑀬𑀸𑀦𑀜𑁆𑀘 𑀳𑁂𑀢𑀼𑀧𑀘𑁆𑀘𑀬𑀲𑁆𑀲 𑀯𑀺𑀲𑀪𑀸𑀕𑀢𑁆𑀢𑀸. 𑀇𑀦𑁆𑀤𑁆𑀭𑀺𑀬𑀫𑀕𑁆𑀕𑀧𑀘𑁆𑀘𑀬𑀸 𑀘 𑀯𑀺𑀲𑀪𑀸𑀕𑀸𑀢𑀺 𑀯𑀺𑀲𑁂𑀲𑀦𑁂𑀦 𑀬𑁄 𑀢𑀢𑁆𑀣 𑀲𑀪𑀸𑀕𑀪𑀸𑀯𑁄, 𑀢𑀁 𑀦𑀺𑀯𑀢𑁆𑀢𑁂𑀢𑀺. 𑀢𑀣𑀸 𑀪𑀸𑀯𑀸𑀪𑀸𑀯𑀢𑁄𑀢𑀺 𑀢𑀲𑁆𑀫𑀺𑀁 𑀳𑁂𑀢𑀼𑀧𑀘𑁆𑀘𑀬𑀸𑀓𑀸𑀭𑁂 𑀲𑀢𑀺 𑀪𑀸𑀯𑀢𑁄, 𑀳𑁂𑀢𑀼𑀥𑀫𑁆𑀫𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑀪𑀸𑀯𑁂 𑀲𑀢𑀺 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀪𑀸𑀯𑀢𑁄𑀢𑀺 𑀅𑀢𑁆𑀣𑁄. 𑀅𑀥𑀺𑀧𑀢𑀺𑀧𑀘𑁆𑀘𑀬𑀸𑀤𑀻𑀦𑀦𑁆𑀢𑀺 𑀅𑀥𑀺𑀧𑀢𑀺𑀦𑁆𑀤𑁆𑀭𑀺𑀬𑀫𑀕𑁆𑀕𑀧𑀘𑁆𑀘𑀬𑀸𑀦𑀁. 𑀯𑀺𑀲𑀪𑀸𑀕𑀢𑀸 𑀳𑁂𑀢𑀼𑀧𑀘𑁆𑀘𑀬𑀲𑁆𑀲. 𑀓𑀼𑀲𑀮𑀸𑀤𑀺𑀳𑁂𑀢𑀽𑀦𑀦𑁆𑀢𑀺 𑀓𑀼𑀲𑀮𑀸𑀓𑀼𑀲𑀮𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀳𑁂𑀢𑀽𑀦𑀁. 𑀳𑁂𑀢𑀼𑀧𑀘𑁆𑀘𑀬𑀪𑀸𑀯𑁂𑀢𑀺 𑀳𑁂𑀢𑀼𑀧𑀘𑁆𑀘𑀬𑀢𑁆𑀢𑁂 𑀳𑁂𑀢𑀼𑀪𑀸𑀯𑁂𑀦 𑀉𑀧𑀓𑀸𑀭𑀓𑀢𑁆𑀢𑁂. 𑀯𑀺𑀧𑀸𑀓𑀧𑀘𑁆𑀘𑀬𑀪𑀸𑀯𑀸𑀪𑀸𑀯𑀢𑁄𑀢𑀺 𑀯𑀺𑀧𑀸𑀓𑀧𑀘𑁆𑀘𑀬𑀪𑀸𑀯𑀲𑁆𑀲 𑀅𑀪𑀸𑀯𑀢𑁄. 𑀦 𑀳𑀺 𑀯𑀺𑀧𑀸𑀓𑀸𑀦𑀁 𑀯𑀺𑀧𑀸𑀓𑀧𑀘𑁆𑀘𑀬𑀢𑀸 𑀅𑀢𑁆𑀣𑀺. 𑀯𑀺𑀧𑀸𑀓𑀳𑁂𑀢𑀽𑀦𑀁 𑀇𑀢𑀭𑀳𑁂𑀢𑀽𑀳𑀺 𑀳𑁂𑀢𑀼𑀧𑀘𑁆𑀘𑀬𑀢𑀸𑀬 𑀅𑀢𑁆𑀣𑀺 𑀲𑀪𑀸𑀕𑀢𑀸𑀢𑀺 𑀆𑀳 ‘‘𑀳𑁂𑀢𑀼𑀯𑀚𑁆𑀚𑀸𑀦’’𑀦𑁆𑀢𑀺. 𑀯𑀺𑀧𑀸𑀓𑀸𑀦𑀁 𑀯𑀺𑀲𑀪𑀸𑀕𑀢𑀸𑀬 𑀪𑀯𑀺𑀢𑀩𑁆𑀩𑀁, 𑀦 𑀳𑀺 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸𑀦𑀁 𑀯𑀺𑀧𑀸𑀓𑁂𑀳𑀺 𑀲𑀪𑀸𑀕𑀢𑀸 𑀅𑀢𑁆𑀣𑀺 𑀭𑀸𑀲𑀦𑁆𑀢𑀭𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀉𑀪𑀬𑀧𑀘𑁆𑀘𑀬𑀲𑀳𑀺𑀢𑁂𑀢𑀺 𑀳𑁂𑀢𑀼𑀯𑀺𑀧𑀸𑀓𑀧𑀘𑁆𑀘𑀬𑀲𑀳𑀺𑀢𑁂. 𑀳𑁂𑀢𑀼𑀧𑀘𑁆𑀘𑀬𑀪𑀸𑀯𑁂 𑀯𑀺𑀧𑀸𑀓𑀫𑁆𑀳𑀻𑀢𑀺 𑀳𑁂𑀢𑀼𑀧𑀘𑁆𑀘𑀬𑀪𑀸𑀯𑁂𑀦 𑀯𑀢𑁆𑀢𑀫𑀸𑀦𑁂 𑀯𑀺𑀧𑀸𑀓𑀥𑀫𑁆𑀫𑁂. 𑀯𑀺𑀧𑀸𑀓𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑀸𑀪𑀸𑀯𑀢𑁄𑀢𑀺 𑀯𑀺𑀧𑀸𑀓𑀧𑀘𑁆𑀘𑀬𑀪𑀸𑀯𑀸𑀪𑀸𑀯𑀲𑁆𑀲 𑀅𑀪𑀸𑀯𑀢𑁄. 𑀦 𑀳𑀺 𑀯𑀺𑀧𑀸𑀓𑁄 𑀯𑀺𑀧𑀸𑀓𑀲𑁆𑀲 𑀯𑀺𑀧𑀸𑀓𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀢𑀲𑁆𑀫𑀸 𑀦𑀢𑁆𑀣𑀺 𑀳𑁂𑀢𑀼𑀯𑀺𑀧𑀸𑀓𑀧𑀘𑁆𑀘𑀬𑀸𑀦𑀁 𑀯𑀺𑀲𑀪𑀸𑀕𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀇𑀤𑀸𑀦𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀉𑀤𑀸𑀳𑀭𑀡𑁂𑀦 𑀲𑀫𑀢𑁆𑀣𑁂𑀦𑁆𑀢𑁄 ‘‘𑀬𑀣𑀸 𑀳𑀻’’𑀢𑀺𑀆𑀤𑀺𑀫𑀸𑀳. 𑀳𑁂𑀢𑀼𑀲𑀳𑀚𑀸𑀢𑀧𑀘𑁆𑀘𑀬𑀲𑀳𑀺𑀢𑁂𑀢𑀺 𑀳𑁂𑀢𑀼𑀧𑀘𑁆𑀘𑀬𑀲𑀳𑀚𑀸𑀢𑀧𑀘𑁆𑀘𑀬𑀲𑀳𑀺𑀢𑁂, 𑀉𑀪𑀬𑀧𑀘𑁆𑀘𑀬𑀬𑀼𑀢𑁆𑀢𑁂𑀢𑀺 𑀅𑀢𑁆𑀣𑁄. 𑀳𑁂𑀢𑀽𑀦𑀦𑁆𑀢𑀺 𑀇𑀤𑀁 ‘‘𑀲𑀳𑀚𑀸𑀢𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑁄’’𑀢𑀺 𑀇𑀫𑀺𑀦𑀸𑀧𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀳𑁂𑀢𑀽𑀦𑀜𑁆𑀳𑀺 𑀳𑁂𑀢𑀼𑀧𑀘𑁆𑀘𑀬𑀲𑀳𑀺𑀢𑁂 𑀭𑀸𑀲𑀺𑀫𑁆𑀳𑀺 𑀳𑁂𑀢𑀼𑀧𑀘𑁆𑀘𑀬𑀪𑀸𑀯𑁄 𑀯𑀺𑀬 𑀲𑀳𑀚𑀸𑀢𑀧𑀘𑁆𑀘𑀬𑀪𑀸𑀯𑁄𑀧𑀺 𑀅𑀢𑁆𑀣𑀻𑀢𑀺. 𑀢𑀢𑁆𑀣 𑀳𑁂𑀢𑀼𑀯𑀚𑁆𑀚𑀸𑀦𑀁 𑀲𑀳𑀚𑀸𑀢𑀥𑀫𑁆𑀫𑀸𑀦𑀁 𑀳𑁂𑀢𑀼𑀥𑀫𑁆𑀫𑀲𑁆𑀲 𑀘 𑀦 𑀲𑀪𑀸𑀕𑀢𑀸 𑀯𑀼𑀘𑁆𑀘𑀢𑀺 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀲𑀪𑀸𑀕𑀪𑀸𑀯𑀢𑁄. 𑀏𑀯𑀫𑀺𑀥𑀸𑀧𑀻𑀢𑀺 𑀬𑀣𑀸 𑀳𑁂𑀢𑀼𑀲𑀳𑀚𑀸𑀢𑀧𑀘𑁆𑀘𑀬𑁂𑀲𑀼 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀦𑀢𑁆𑀣𑀺 𑀯𑀺𑀲𑀪𑀸𑀕𑀢𑀸, 𑀏𑀯𑀫𑀺𑀥𑀸𑀧𑀺 𑀳𑁂𑀢𑀼𑀯𑀺𑀧𑀸𑀓𑀧𑀘𑁆𑀘𑀬𑁂𑀲𑀼 𑀦𑀢𑁆𑀣𑀺 𑀯𑀺𑀲𑀪𑀸𑀕𑀢𑀸𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀧𑀻𑀢𑀺 𑀬𑁆𑀯𑀸𑀬𑀁 𑀦𑀬𑁄 𑀳𑁂𑀢𑀼𑀲𑀳𑀚𑀸𑀢𑀧𑀘𑁆𑀘𑀬𑁂𑀲𑀼 𑀯𑀺𑀲𑀪𑀸𑀕𑀢𑀸𑀪𑀸𑀯𑁄 𑀯𑀼𑀢𑁆𑀢𑁄, 𑀏𑀲 𑀦𑀬𑁄 𑀳𑁂𑀢𑀼𑀲𑀳𑀺𑀢𑁂 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀧𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣𑀸𑀧𑀺 𑀳𑀺 ‘‘𑀳𑁂𑀢𑀼𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀲𑀳𑀺𑀢𑁂 𑀭𑀸𑀲𑀺𑀫𑁆𑀳𑀻’’𑀢𑀺𑀆𑀤𑀺 𑀲𑀓𑁆𑀓𑀸 𑀬𑁄𑀚𑁂𑀢𑀼𑀦𑁆𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀏𑀯 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁄, 𑀧𑀘𑁆𑀘𑀬𑁄 𑀧𑀦 𑀅𑀢𑀻𑀢𑁄𑀧𑀺 𑀅𑀦𑀸𑀕𑀢𑁄𑀧𑀺 𑀓𑀸𑀮𑀯𑀺𑀦𑀺𑀫𑀼𑀢𑁆𑀢𑁄𑀧𑀺 𑀳𑁄𑀢𑀻𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑁆𑀔𑀡𑁂 𑀳𑁂𑀢𑀼𑀧𑀘𑁆𑀘𑀬𑀪𑀸𑀯𑁂 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀪𑀸𑀯𑀁 𑀲𑀦𑁆𑀥𑀸𑀬 𑀢𑀣𑀸𑀪𑀸𑀯𑀸𑀪𑀸𑀯𑀯𑀲𑁂𑀦 𑀲𑀪𑀸𑀕𑀢𑀸𑀬 𑀯𑀼𑀘𑁆𑀘𑀫𑀸𑀦𑀸𑀬 𑀦𑀸𑀦𑀸𑀓𑁆𑀔𑀡𑀺𑀓𑀸𑀦𑀁 𑀓𑀼𑀲𑀮𑀸𑀤𑀻𑀦𑀁 𑀳𑁂𑀢𑀽𑀦𑀁 𑀯𑀺𑀧𑀸𑀓𑀸𑀦𑀜𑁆𑀘 𑀯𑀲𑁂𑀦 𑀯𑀺𑀲𑀪𑀸𑀕𑀢𑀸 𑀢𑀲𑁆𑀲𑁂𑀯 𑀳𑁂𑀢𑀼𑀲𑁆𑀲 𑀦 𑀯𑀢𑁆𑀢𑀩𑁆𑀩𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀦𑀸.

𑀅𑀕𑁆𑀕𑀳𑀺𑀢𑀯𑀺𑀲𑁂𑀲𑀢𑁄 𑀲𑀸𑀫𑀜𑁆𑀜𑀢𑁄 𑀯𑀺𑀲𑁂𑀲𑁄 𑀦 𑀲𑀼𑀯𑀺𑀜𑁆𑀜𑁂𑀬𑁆𑀬𑁄 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀓𑀼𑀲𑀮𑀸 𑀯𑀻𑀫𑀁𑀲𑀸𑀥𑀺𑀧𑀢𑀻𑀢𑀺 𑀏𑀯𑀁 𑀯𑀢𑁆𑀢𑀩𑁆𑀩’’𑀦𑁆𑀢𑀺.

𑁪𑁪𑁧-𑁪𑁪𑁩. ‘‘𑀇𑀢𑀭𑀸𑀦𑀺 𑀤𑁆𑀯𑁂 𑀮𑀪𑀢𑀻’’𑀢𑀺 𑀏𑀯𑀁 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸, 𑀳𑁂𑀢𑀸𑀥𑀺𑀧𑀢𑀺𑀤𑀼𑀓𑁂𑀳𑀺 𑀤𑀲𑁆𑀲𑀺𑀢𑀸𑀦𑀺 𑀬𑀸𑀦𑀺 ‘‘𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲 𑀥𑀫𑁆𑀫𑀲𑁆𑀲, 𑀓𑀼𑀲𑀮𑁄 𑀥𑀫𑁆𑀫𑁄 𑀅𑀩𑁆𑀬𑀸𑀓𑀢𑀲𑁆𑀲, 𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲 𑀘 𑀅𑀩𑁆𑀬𑀸𑀓𑀢𑀲𑁆𑀲 𑀘, 𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀅𑀩𑁆𑀬𑀸𑀓𑀢𑀲𑁆𑀲𑀸’’𑀢𑀺 𑀘𑀢𑁆𑀢𑀸𑀭𑀺 𑀯𑀺𑀲𑁆𑀲𑀚𑁆𑀚𑀦𑀸𑀦𑀺, 𑀢𑁂𑀲𑀼 𑀳𑁂𑀢𑀼𑀲𑀳𑀚𑀸𑀢𑀦𑀺𑀲𑁆𑀲𑀬𑀅𑀢𑁆𑀣𑀺𑀅𑀯𑀺𑀕𑀢𑀇𑀦𑁆𑀤𑁆𑀭𑀺𑀬𑀫𑀕𑁆𑀕𑀧𑀘𑁆𑀘𑀬𑁂𑀲𑀼 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂 𑀧𑀯𑀺𑀝𑁆𑀞𑁂 ‘‘𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲, 𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀅𑀩𑁆𑀬𑀸𑀓𑀢𑀲𑁆𑀲𑀸’’𑀢𑀺 𑀇𑀫𑀸𑀦𑀺 𑀤𑁆𑀯𑁂 𑀮𑀪𑀢𑀺. 𑀬𑀁 𑀲𑀦𑁆𑀥𑀸𑀬 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁 ‘‘𑀲𑀘𑁂 𑀢𑁂𑀳𑀺 𑀲𑀤𑁆𑀥𑀺𑀁…𑀧𑁂… 𑀢𑀸𑀦𑁂𑀯 𑀤𑁆𑀯𑁂 𑀮𑀪𑀢𑀻’’𑀢𑀺, 𑀢𑁂𑀳𑀺 𑀧𑀦 𑀇𑀢𑀭𑀸𑀦𑀺 𑀦𑀸𑀫 ‘‘𑀓𑀼𑀲𑀮𑁄 𑀥𑀫𑁆𑀫𑁄 𑀅𑀩𑁆𑀬𑀸𑀓𑀢𑀲𑁆𑀲, 𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲 𑀘 𑀅𑀩𑁆𑀬𑀸𑀓𑀢𑀲𑁆𑀲 𑀘𑀸’’𑀢𑀺 𑀇𑀫𑀸𑀦𑀺 𑀤𑁆𑀯𑁂𑀧𑀺 𑀲𑀺𑀬𑀼𑀁. 𑀦 𑀳𑀺 𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀇𑀢𑀭𑀸𑀦𑀺 𑀤𑁆𑀯𑁂 𑀮𑀪𑀢𑀻𑀢𑀺 𑀧𑀼𑀭𑀺𑀫𑀧𑀸𑀞𑁄’’𑀢𑀺𑀆𑀤𑀺. 𑀇𑀢𑀭𑀸𑀦𑀺 𑀤𑁆𑀯𑁂𑀢𑀺 𑀯𑀸 𑀅𑀜𑁆𑀜𑀸𑀦𑀺 𑀤𑁆𑀯𑁂, 𑀬𑀸𑀦𑀺 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀯𑀲𑁂𑀦 𑀤𑁆𑀯𑁂 𑀯𑀺𑀲𑁆𑀲𑀚𑁆𑀚𑀦𑀸𑀦𑀺, 𑀯𑀺𑀧𑁆𑀧𑀬𑀼𑀢𑁆𑀢𑀧𑀯𑁂𑀲𑁂 𑀧𑀦 𑀢𑀢𑁄 𑀅𑀜𑁆𑀜𑀸𑀦𑀺 𑀅𑀜𑁆𑀜𑀣𑀸𑀪𑀽𑀢𑀸𑀦𑀺 𑀤𑁆𑀯𑁂 𑀯𑀺𑀲𑁆𑀲𑀚𑁆𑀚𑀦𑀸𑀦𑀺. 𑀬𑀸𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀓𑀼𑀲𑀮𑁄 𑀅𑀩𑁆𑀬𑀸𑀓𑀢𑀲𑁆𑀲, 𑀅𑀩𑁆𑀬𑀸𑀓𑀢𑁄 𑀅𑀩𑁆𑀬𑀸𑀓𑀢𑀲𑁆𑀲𑀸𑀢𑀺 𑀤𑁆𑀯𑁂 𑀮𑀪𑀢𑀻𑀢𑀺 𑀧𑀞𑀦𑁆𑀢𑀻’’𑀢𑀺. 𑀢𑁂𑀲𑀽𑀢𑀺 𑀊𑀦𑀢𑀭𑀕𑀡𑀦𑀸𑀳𑁂𑀢𑀽𑀲𑀼 𑀯𑀺𑀧𑀸𑀓𑀅𑀜𑁆𑀜𑀫𑀜𑁆𑀜𑀸𑀤𑀻𑀲𑀼.

𑀅𑀦𑀸𑀫𑀝𑁆𑀞𑀯𑀺𑀧𑀸𑀓𑀸𑀦𑀻𑀢𑀺 𑀅𑀕𑁆𑀕𑀳𑀺𑀢𑀯𑀺𑀧𑀸𑀓𑀧𑀘𑁆𑀘𑀬𑀸𑀦𑀺, 𑀖𑀝𑀦𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀅𑀬𑀁 𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄. 𑀦 𑀯𑀺𑀧𑀸𑀓𑀳𑁂𑀢𑀼𑀭𑀳𑀺𑀢𑀸𑀦𑀺 𑀲𑀸𑀥𑀸𑀭𑀡𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸. 𑀢𑁂𑀦 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀸𑀫𑀜𑁆𑀜𑀢𑁄 𑀦𑀯𑀦𑁆𑀦𑀫𑁆𑀧𑀺 𑀳𑁂𑀢𑀽𑀦𑀁 𑀯𑀲𑁂𑀦 𑀯𑀼𑀢𑁆𑀢𑀸𑀦𑀻’’𑀢𑀺, ‘‘𑀯𑀺𑀧𑀸𑀓𑀳𑁂𑀢𑀼𑀧𑀺 𑀮𑀩𑁆𑀪𑀢𑀻’’𑀢𑀺 𑀘.

𑀢𑀢𑁆𑀣𑀸𑀢𑀺 𑀧𑀜𑁆𑀘𑀫𑀖𑀝𑀦𑀢𑁄 𑀧𑀝𑁆𑀞𑀸𑀬 𑀧𑀜𑁆𑀘𑀲𑀼 𑀖𑀝𑀦𑁂𑀲𑀼. 𑀢𑁂𑀦 𑀯𑀺𑀧𑀸𑀓𑁂𑀦 𑀲𑀳, 𑀲𑀫𑀁 𑀯𑀸 𑀉𑀝𑁆𑀞𑀸𑀦𑀁 𑀏𑀢𑀲𑁆𑀲𑀸𑀢𑀺 𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀲𑀫𑁆𑀪𑀯𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀧𑀝𑀺𑀲𑀦𑁆𑀥𑀺𑀬𑀁 𑀓𑀝𑀢𑁆𑀢𑀸𑀭𑀽𑀧𑀫𑁆𑀧𑀺 𑀢𑀁𑀲𑀫𑀼𑀝𑁆𑀞𑀸𑀦𑀕𑁆𑀕𑀳𑀡𑁂𑀦𑁂𑀯 𑀲𑀗𑁆𑀕𑀡𑁆𑀳𑀸𑀢𑀻’’𑀢𑀺. 𑀏𑀲𑁂𑀯 𑀦𑀬𑁄𑀢𑀺 𑀇𑀫𑀺𑀦𑀸 𑀓𑀝𑀢𑁆𑀢𑀸𑀭𑀽𑀧𑀫𑁆𑀧𑀺 𑀢𑀁𑀲𑀫𑀼𑀝𑁆𑀞𑀸𑀦𑀕𑁆𑀕𑀳𑀡𑁂𑀦𑁂𑀯 𑀲𑀗𑁆𑀕𑀡𑁆𑀳𑀸𑀢𑀻𑀢𑀺 𑀇𑀫𑀫𑁂𑀯𑀢𑁆𑀣𑀁 𑀅𑀢𑀺𑀤𑀺𑀲𑀢𑀺.

𑀏𑀯𑀫𑁆𑀧𑀻𑀢𑀺 ‘‘𑀏𑀢𑁂𑀲𑀼 𑀧𑀦𑀸’’𑀢𑀺𑀆𑀤𑀺𑀦𑀸 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀧𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀏𑀢𑁂𑀲𑀼 𑀧𑀦…𑀧𑁂… 𑀯𑀼𑀢𑁆𑀢𑀦𑀬𑁂𑀦𑀧𑀻’’𑀢𑀺. 𑀬𑁄 𑀬𑁄 𑀧𑀘𑁆𑀘𑀬𑁄𑀢𑀺 𑀬𑁄 𑀬𑁄 𑀳𑁂𑀢𑀼𑀆𑀤𑀺𑀧𑀘𑁆𑀘𑀬𑁄 𑀫𑀽𑀮𑀪𑀸𑀯𑁂𑀦 𑀞𑀺𑀢𑁄 𑀧𑀭𑁂𑀲𑀁 𑀧𑀘𑁆𑀘𑀬𑀸𑀦𑀁. 𑀢𑀧𑁆𑀧𑀘𑁆𑀘𑀬𑀥𑀫𑁆𑀫𑀸𑀦𑀦𑁆𑀢𑀺 𑀢𑁂𑀳𑀺 𑀳𑁂𑀢𑀼𑀆𑀤𑀺𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑀪𑀽𑀢𑀸𑀦𑀁 𑀳𑁂𑀢𑀼𑀆𑀤𑀺𑀥𑀫𑁆𑀫𑀸𑀦𑀁. 𑀦𑀺𑀭𑀯𑀲𑁂𑀲𑀊𑀦𑀊𑀦𑀢𑀭𑀊𑀦𑀢𑀫𑀮𑀸𑀪𑀓𑁆𑀓𑀫𑁂𑀦𑀸𑀢𑀺 𑀢𑁂 𑀥𑀫𑁆𑀫𑀸 𑀬𑁂𑀲𑀼 𑀯𑀺𑀲𑁆𑀲𑀚𑁆𑀚𑀦𑁂𑀲𑀼 𑀬𑀣𑀸𑀭𑀳𑀁 𑀦𑀺𑀭𑀯𑀲𑁂𑀲𑀸 𑀮𑀩𑁆𑀪𑀦𑁆𑀢𑀺, 𑀬𑁂𑀲𑀼 𑀊𑀦𑀸 𑀊𑀦𑀢𑀭𑀸 𑀊𑀦𑀢𑀫𑀸 𑀘 𑀮𑀩𑁆𑀪𑀦𑁆𑀢𑀺, 𑀢𑁂𑀦 𑀓𑀫𑁂𑀦 𑀖𑀝𑀦𑀸𑀯𑀘𑀦𑀢𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀧𑀺 𑀬𑀣𑀸𑀓𑁆𑀓𑀫𑀁 𑀦𑀺𑀭𑀯𑀲𑁂𑀲𑀸𑀤𑀺𑀓𑁆𑀓𑀫𑁂𑀦𑁂𑀯 𑀮𑀩𑁆𑀪𑀦𑁆𑀢𑀺. 𑀢𑁂𑀦𑀸𑀳 ‘‘𑀦𑀺𑀭𑀯𑀲𑁂𑀲𑀮𑀸𑀪𑁂 𑀘…𑀧𑁂… 𑀯𑁂𑀤𑀺𑀢𑀩𑁆𑀩𑁄’’𑀢𑀺.

𑀳𑁂𑀢𑀼𑀫𑀽𑀮𑀓𑀁 𑀦𑀺𑀝𑁆𑀞𑀺𑀢𑀁.

𑁪𑁪𑁫. 𑀧𑀜𑁆𑀘𑀫𑁂 𑀏𑀓𑀦𑁆𑀢𑀺 𑀲𑀦𑀺𑀲𑁆𑀲𑀬𑀢𑁄 𑀅𑀩𑁆𑀬𑀸𑀓𑀢𑀫𑀽𑀮𑀁 𑀅𑀓𑀼𑀲𑀮𑀦𑁆𑀢𑀺 𑀇𑀤𑀁 𑀲𑀦𑁆𑀥𑀸𑀬𑀸𑀳 ‘‘𑀯𑀢𑁆𑀣𑀼𑀯𑀲𑁂𑀦 𑀲𑀦𑀺𑀲𑁆𑀲𑀬𑀁 𑀯𑀓𑁆𑀔𑀢𑀻’’𑀢𑀺. 𑀦 𑀇𑀤𑀦𑁆𑀢𑀺 𑀇𑀤𑀁 𑀘𑀢𑀼𑀢𑁆𑀣𑀁 𑀖𑀝𑀦𑀁 𑀮𑀩𑁆𑀪𑀫𑀸𑀦𑀲𑁆𑀲𑀧𑀺 𑀯𑀢𑁆𑀣𑀼𑀲𑁆𑀲 𑀯𑀲𑁂𑀦 𑀖𑀝𑀦𑀁 𑀦 𑀳𑁄𑀢𑀺 𑀢𑀲𑁆𑀲 𑀯𑀓𑁆𑀔𑀫𑀸𑀦𑀢𑁆𑀢𑀸, 𑀢𑀲𑁆𑀫𑀸 ‘‘𑀆𑀭𑀫𑁆𑀫𑀡𑀯𑀲𑁂𑀦𑁂𑀯𑀸’’𑀢𑀺 𑀏𑀓𑀁𑀲𑁄 𑀕𑀳𑀺𑀢𑁄𑀢𑀺 𑀅𑀢𑁆𑀣𑀬𑁄𑀚𑀦𑀸.

𑁪𑁪𑁬. 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀸 𑀏𑀓𑁄 𑀦𑀺𑀲𑁆𑀲𑀬𑀧𑀘𑁆𑀘𑀬𑁄𑀢𑀺 𑀇𑀫𑀺𑀦𑀸 𑀲𑀢𑀺𑀧𑀺 𑀧𑀘𑁆𑀘𑀬𑀥𑀫𑁆𑀫𑀪𑁂𑀤𑁂 𑀧𑀘𑁆𑀘𑀬𑀪𑀸𑀯𑀪𑁂𑀤𑁄 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺, 𑀢𑀣𑀸 ‘‘𑀅𑀢𑁆𑀣𑀺𑀧𑀘𑁆𑀘𑀬𑁄’’𑀢𑀺 𑀇𑀫𑀺𑀦𑀸𑀧𑀺. 𑀅𑀯𑀺𑀕𑀢𑀧𑀘𑁆𑀘𑀬𑁄𑀧𑁂𑀢𑁆𑀣 𑀅𑀢𑁆𑀣𑀺𑀧𑀘𑁆𑀘𑀬𑁂𑀦𑁂𑀯 𑀲𑀗𑁆𑀕𑀳𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. ‘‘𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁄’’𑀢𑀺 𑀧𑀸𑀞𑁄. 𑀲𑀳𑀚𑀸𑀢𑀸𑀭𑀫𑁆𑀫𑀡𑀸𑀥𑀺𑀧𑀢𑀺 𑀧𑀦 𑀦 𑀓𑁂𑀯𑀮𑀁 𑀧𑀘𑁆𑀘𑀬𑀥𑀫𑁆𑀫𑀧𑁆𑀧𑀪𑁂𑀤𑁄𑀯, 𑀅𑀣 𑀔𑁄 𑀧𑀘𑁆𑀘𑀬𑀪𑀸𑀯𑀪𑁂𑀤𑁄𑀧𑀺 𑀅𑀢𑁆𑀣𑁂𑀯𑀸𑀢𑀺 𑀆𑀳 ‘‘𑀏𑀯𑀁…𑀧𑁂… 𑀅𑀪𑀸𑀯𑀢𑁄’’𑀢𑀺. 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 ‘‘𑀦𑀺𑀲𑁆𑀲𑀬𑀪𑀸𑀯𑁄 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀦𑀺𑀲𑁆𑀲𑀬𑀸𑀤𑀻𑀦𑀦𑁆𑀢𑀺 𑀲𑀳𑀚𑀸𑀢𑀦𑀺𑀲𑁆𑀲𑀬𑀧𑀼𑀭𑁂𑀚𑀸𑀢𑀦𑀺𑀲𑁆𑀲𑀬𑀸𑀤𑀻𑀦𑀁. 𑀆𑀤𑀺-𑀲𑀤𑁆𑀤𑁂𑀦 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀅𑀢𑁆𑀣𑀺𑀅𑀯𑀺𑀕𑀢𑀪𑀸𑀯𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀦 𑀧𑀦𑁂𑀯𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 ‘‘𑀲𑀳𑀚𑀸𑀢𑁄 𑀳𑀻’’𑀢𑀺𑀆𑀤𑀺𑀫𑀸𑀳. 𑀪𑀺𑀦𑁆𑀦𑀲𑀪𑀸𑀯𑀸𑀢𑀺 𑀲𑀫𑀸𑀦𑁂𑀧𑀺 𑀅𑀥𑀺𑀧𑀢𑀺𑀲𑀤𑁆𑀤𑀯𑀘𑀦𑀻𑀬𑀪𑀸𑀯𑁂 𑀧𑀘𑁆𑀘𑀬𑀪𑀸𑀯𑀯𑀺𑀲𑀺𑀝𑁆𑀞𑁂𑀦 𑀲𑀪𑀸𑀯𑁂𑀦 𑀪𑀺𑀦𑁆𑀦𑀲𑀪𑀸𑀯𑀸, 𑀦 𑀳𑁂𑀢𑀼𑀧𑀘𑁆𑀘𑀬𑀸𑀤𑀬𑁄 𑀯𑀺𑀬 𑀲𑀪𑀸𑀯𑀫𑀢𑁆𑀢𑁂𑀦. 𑀢𑁂𑀦𑁂𑀯𑀸𑀢𑀺 𑀪𑀺𑀦𑁆𑀦𑀲𑀪𑀸𑀯𑀢𑁆𑀢𑀸 𑀏𑀯. 𑀅𑀜𑁆𑀜𑀣𑀸 ‘‘𑀓𑀼𑀲𑀮𑁄 𑀓𑀼𑀲𑀮𑀲𑁆𑀲 𑀲𑀳𑀚𑀸𑀢𑀯𑀲𑁂𑀦, 𑀅𑀩𑁆𑀬𑀸𑀓𑀢𑁄 𑀆𑀭𑀫𑁆𑀫𑀡𑀯𑀲𑁂𑀦 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀢𑀻’’𑀢𑀺 𑀢𑀤𑀼𑀪𑀬𑀁 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀦 𑀘 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀜𑁆𑀳𑀸𑀯𑀸𑀭𑀯𑀺𑀪𑀗𑁆𑀕𑁂…𑀧𑁂… 𑀦 𑀯𑀼𑀢𑁆𑀢’’𑀦𑁆𑀢𑀺.

𑁪𑁪𑁭-𑁪𑁫𑁨. 𑀲𑀸𑀥𑀸𑀭𑀡𑀯𑀲𑁂𑀦𑀸𑀢𑀺 𑀅𑀥𑀺𑀧𑀢𑀺𑀦𑁆𑀤𑁆𑀭𑀺𑀬𑀪𑀸𑀯𑀲𑀸𑀫𑀜𑁆𑀜𑁂𑀦. 𑀢𑀣𑀸 𑀘𑁂𑀯 𑀙 𑀖𑀝𑀦𑀸𑀦𑀺 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀺 ‘‘𑀅𑀥𑀺𑀧𑀢𑀻’’𑀢𑀺𑀆𑀤𑀺𑀦𑀸. 𑀤𑁆𑀯𑁂 𑀧𑀘𑁆𑀘𑀬𑀥𑀫𑁆𑀫𑀸𑀢𑀺 𑀯𑀻𑀭𑀺𑀬𑀯𑀻𑀫𑀁𑀲𑀸𑀦𑀁 𑀯𑀲𑁂𑀦 𑀤𑁆𑀯𑁂 𑀧𑀘𑁆𑀘𑀬𑀥𑀫𑁆𑀫𑀸, 𑀏𑀓𑁄𑀬𑁂𑀯 𑀘𑀺𑀢𑁆𑀢𑀸𑀥𑀺𑀧𑀢𑀺𑀯𑀲𑁂𑀦. 𑀲𑀫𑀕𑁆𑀕𑀓𑀸𑀦𑀺 𑀧𑀼𑀩𑁆𑀩𑁂 𑀯𑀢𑁆𑀢𑀩𑁆𑀩𑀸𑀦𑀺 𑀲𑀺𑀬𑀼𑀁 𑀅𑀥𑀺𑀧𑀢𑀺𑀧𑀝𑀺𑀧𑀸𑀝𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀞𑀫𑀜𑁆𑀳𑀺 𑀯𑀻𑀭𑀺𑀬𑀸𑀥𑀺𑀧𑀢𑀺 𑀧𑀘𑁆𑀙𑀸 𑀘𑀺𑀢𑁆𑀢𑀸𑀥𑀺𑀧𑀢𑀻𑀢𑀺. 𑀢𑁂𑀲𑀁 𑀆𑀳𑀸𑀭𑀫𑀕𑁆𑀕𑀧𑀘𑁆𑀘𑀬𑀸𑀦𑀁 𑀧𑀘𑁆𑀙𑀸 𑀯𑀼𑀢𑁆𑀢𑀸𑀦𑀺 𑀲𑀫𑀕𑁆𑀕𑀓𑀸𑀦𑀺. 𑀲𑀤𑀺𑀲𑀢𑁆𑀢𑀸𑀢𑀺 𑀇𑀤𑀁 𑀧𑀭𑀢𑁄 ‘‘𑀳𑁂𑀢𑀼𑀯𑀲𑁂𑀦 𑀯𑀼𑀢𑁆𑀢𑀖𑀝𑀦𑁂𑀳𑀺 𑀲𑀤𑀺𑀲𑀢𑁆𑀢𑀸’’𑀢𑀺𑀆𑀤𑀺𑀯𑀘𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁪𑁫𑁭-𑁪𑁬𑁦. 𑀤𑀼𑀫𑀽𑀮𑀓𑀦𑁆𑀢𑀺 𑀓𑀼𑀲𑀮𑀸𑀩𑁆𑀬𑀸𑀓𑀢𑀫𑀽𑀮𑀓𑀁. 𑀢𑀁 𑀓𑀼𑀲𑀮𑀫𑀽𑀮𑀓𑁂𑀲𑀼 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀘𑁄𑀤𑀦𑀸𑀬𑀁 𑀆𑀳 ‘‘𑀅𑀩𑁆𑀬𑀸𑀓𑀢𑀲𑀳𑀺𑀢𑀲𑁆𑀲 𑀓𑀼𑀲𑀮𑀲𑁆𑀲 𑀧𑀘𑁆𑀘𑀬𑀪𑀸𑀯𑀤𑀲𑁆𑀲𑀦𑀯𑀲𑁂𑀦𑀸’’𑀢𑀺. 𑀏𑀢𑁆𑀣𑀸𑀢𑀺 𑀅𑀦𑀼𑀮𑁄𑀫𑀕𑀡𑀦𑁂. 𑀬𑀣𑀸𑀯𑀼𑀢𑁆𑀢𑁂𑀲𑀽𑀢𑀺 ‘‘𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀯𑀺𑀧𑀸𑀓𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀫𑀽𑀮𑀓𑁂𑀲𑀽’’𑀢𑀺 𑀏𑀯𑀁 𑀯𑀼𑀢𑁆𑀢𑁂𑀲𑀼 𑀲𑀳𑀚𑀸𑀢𑀸𑀤𑀺𑀫𑀽𑀮𑀓𑁂𑀲𑀼. 𑀅𑀢𑁆𑀣𑀺𑀅𑀯𑀺𑀕𑀢𑀫𑀽𑀮𑀓𑀯𑀚𑁆𑀚𑁂𑀲𑀽𑀢𑀺 𑀅𑀢𑁆𑀣𑀺𑀅𑀯𑀺𑀕𑀢𑀫𑀽𑀮𑀓𑀸𑀦𑀺 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑁂𑀲𑀼 𑀆𑀳𑀸𑀭𑁂𑀦 𑀆𑀳𑀸𑀭𑀧𑀘𑁆𑀘𑀬𑁂𑀦 𑀖𑀝𑀦𑀸𑀦𑀺 𑀦 𑀬𑁄𑀚𑀺𑀢𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀥𑀺𑀧𑀢𑀺𑀦𑁆𑀤𑁆𑀭𑀺𑀬𑁂𑀳𑀺 𑀘 𑀦𑀺𑀲𑁆𑀲𑀬𑀸𑀤𑀺𑀯𑀚𑁆𑀚𑁂𑀲𑀼 𑀲𑀳𑀚𑀸𑀢𑀸𑀤𑀻𑀲𑀼 𑀖𑀝𑀦𑀸𑀦𑀺 𑀦 𑀬𑁄𑀚𑀺𑀢𑀸𑀦𑀻𑀢𑀺 𑀬𑁄𑀚𑀦𑀸. 𑀢𑁂𑀲𑀽𑀢𑀺 𑀳𑁂𑀢𑀼𑀓𑀫𑁆𑀫𑀛𑀸𑀦𑀫𑀕𑁆𑀕𑁂𑀲𑀼 𑀆𑀳𑀸𑀭𑁂 𑀅𑀥𑀺𑀧𑀢𑀺𑀦𑁆𑀤𑁆𑀭𑀺𑀬𑁂𑀲𑀼 𑀘 𑀢𑀁𑀢𑀁𑀖𑀝𑀦𑀯𑀲𑁂𑀦 𑀬𑀣𑀸𑀯𑀼𑀢𑁆𑀢𑁂𑀲𑀼 𑀬𑁄𑀚𑀺𑀬𑀫𑀸𑀦𑁂𑀲𑀼. 𑀢𑁂𑀦𑀸𑀢𑀺 𑀳𑁂𑀢𑀼𑀆𑀤𑀺𑀅𑀭𑀽𑀧𑀥𑀫𑁆𑀫𑀸𑀦𑀁𑀬𑁂𑀯 𑀮𑀩𑁆𑀪𑀦𑀢𑁄. 𑀢𑁂𑀳𑀺 𑀖𑀝𑀦𑀸𑀦𑀻𑀢𑀺 𑀳𑁂𑀢𑀼𑀆𑀤𑀻𑀳𑀺 𑀬𑁄𑀚𑀺𑀬𑀫𑀸𑀦𑀸𑀦𑀺 𑀖𑀝𑀦𑀸𑀦𑀺. 𑀭𑀽𑀧𑀫𑀺𑀲𑁆𑀲𑀓𑀢𑁆𑀢𑀸𑀪𑀸𑀯𑁂𑀦𑀸𑀢𑀺 𑀇𑀤𑀁 𑀯𑀼𑀢𑁆𑀢𑀲𑀤𑀺𑀲𑀢𑀸𑀬 𑀓𑀸𑀭𑀡𑀯𑀘𑀦𑀁. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀅𑀢𑁆𑀣𑀺𑀅𑀯𑀺𑀕𑀢𑀫𑀽𑀮𑀓𑀸𑀦𑀺 𑀦𑀺𑀲𑁆𑀲𑀬𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀸𑀦𑀺 𑀢𑁂𑀳𑀺 𑀯𑀚𑁆𑀚𑀺𑀢𑀸𑀦𑀻𑀢𑀺 𑀆𑀳 ‘‘𑀅𑀢𑁆𑀣𑀺𑀅𑀯𑀺𑀕𑀢𑁂𑀳𑀺 𑀧𑀦𑀸’’𑀢𑀺𑀆𑀤𑀺. 𑀦𑀺𑀲𑁆𑀲𑀬𑀸𑀤𑀻𑀳𑀺 𑀬𑁄𑀚𑀺𑀬𑀫𑀸𑀦𑀸𑀦𑀺 𑀅𑀥𑀺𑀧𑀢𑀺𑀦𑁆𑀤𑁆𑀭𑀺𑀬𑀸𑀦𑀺 𑀭𑀽𑀧𑀫𑀺𑀲𑁆𑀲𑀓𑀸𑀦𑀺 𑀳𑁄𑀦𑁆𑀢𑀻𑀢𑀺 𑀦 𑀯𑀼𑀢𑁆𑀢𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀅𑀢𑁆𑀣𑀺𑀅𑀯𑀺𑀕𑀢𑀫𑀽𑀮𑀓𑁂𑀲𑀼 𑀆𑀳𑀸𑀭𑁂𑀦, 𑀦𑀺𑀲𑁆𑀲𑀬𑀸𑀤𑀺𑀫𑀽𑀮𑀓𑁂𑀲𑀼 𑀘 𑀅𑀥𑀺𑀧𑀢𑀺𑀦𑁆𑀤𑁆𑀭𑀺𑀬𑁂𑀳𑀺 𑀬𑁄𑀚𑀦𑀸 𑀓𑀢𑀸𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀥𑀺𑀧𑀢𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀫𑀽𑀮𑀓𑁂𑀲𑀽’’𑀢𑀺𑀆𑀤𑀺.

𑁪𑁭𑁩-𑁪𑁭𑁭. 𑀏𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀔𑀦𑁆𑀥-𑀲𑀤𑁆𑀤𑁄 𑀅𑀭𑀽𑀧𑁂𑀲𑁆𑀯𑁂𑀯 𑀦𑀺𑀭𑀼𑀴𑁆𑀳𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀦 𑀧𑀯𑀢𑁆𑀢𑁂 𑀯𑀺𑀬 𑀔𑀦𑁆𑀥𑀸𑀬𑁂𑀯 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑁂𑀦 𑀕𑀳𑁂𑀢𑀩𑁆𑀩𑀸’’𑀢𑀺. 𑀓𑀝𑀢𑁆𑀢𑀸𑀭𑀽𑀧𑀫𑁆𑀧𑀺 𑀧𑀦 𑀮𑀩𑁆𑀪𑀢𑀻𑀢𑀺 𑀇𑀫𑀺𑀦𑀸 ‘‘𑀏𑀓𑀓𑁆𑀔𑀡𑀺𑀓𑀓𑀫𑁆𑀫𑀯𑀲𑁂𑀦 𑀯𑀼𑀢𑁆𑀢𑀸𑀦𑀻’’𑀢𑀺 𑀯𑀘𑀦𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀬𑀫𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀓𑀲𑁆𑀫𑀸 𑀦 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀧𑀸𑀓𑀝𑀢𑀭𑀁 𑀓𑀭𑁄𑀦𑁆𑀢𑁄 ‘‘𑀦𑀦𑀽’’𑀢𑀺𑀆𑀤𑀺𑀁 𑀯𑀢𑁆𑀯𑀸 𑀧𑀼𑀦 𑀢𑀁 𑀉𑀤𑀸𑀳𑀭𑀡𑁂𑀦 𑀯𑀺𑀪𑀸𑀯𑁂𑀢𑀼𑀁 ‘‘𑀬𑀣𑀸𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀆𑀭𑀫𑁆𑀫𑀡𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀸𑀯𑁂𑀦𑀸𑀢𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑁂𑀦 𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀸𑀯𑁂𑀦 𑀘. 𑀓𑀫𑁆𑀫𑀲𑁆𑀲 𑀘 𑀧𑀘𑁆𑀘𑀬𑀪𑀸𑀯𑁄 𑀧𑀸𑀓𑀝𑁄𑀬𑁂𑀯𑀸𑀢𑀺 𑀆𑀳 ‘‘𑀓𑀫𑁆𑀫𑀫𑁆𑀧𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑁂𑀦 𑀯𑀢𑁆𑀢𑀩𑁆𑀩’’𑀦𑁆𑀢𑀺. 𑀤𑁆𑀯𑀺𑀦𑁆𑀦𑀁 𑀧𑀘𑁆𑀘𑀬𑀪𑀸𑀯𑀸𑀦𑀦𑁆𑀢𑀺 𑀓𑀫𑁆𑀫𑀸𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑀸𑀦𑀁. 𑀅𑀜𑁆𑀜𑀫𑀜𑁆𑀜𑀧𑀝𑀺𑀓𑁆𑀔𑁂𑀧𑀢𑁄𑀢𑀺 𑀇𑀫𑀺𑀦𑀸 𑀤𑁆𑀯𑀺𑀦𑁆𑀦𑀁 𑀧𑀘𑁆𑀘𑀬𑀪𑀸𑀯𑀸𑀦𑀁 𑀪𑀺𑀦𑁆𑀦𑀢𑁆𑀢𑀸 𑀧𑀯𑀢𑁆𑀢𑀺𑀆𑀓𑀸𑀭𑀲𑁆𑀲 𑀏𑀓𑀓𑁆𑀔𑀡𑁂 𑀏𑀓𑀲𑁆𑀫𑀺𑀁 𑀧𑀘𑁆𑀘𑀬𑀥𑀫𑁆𑀫𑁂 𑀅𑀬𑀼𑀚𑁆𑀚𑀫𑀸𑀦𑀢𑀁 𑀤𑀲𑁆𑀲𑁂𑀢𑀺. 𑀬𑀣𑀸𑀤𑀲𑁆𑀲𑀺𑀢𑀲𑁆𑀲 𑀦𑀺𑀤𑀲𑁆𑀲𑀺𑀢𑀩𑁆𑀩𑁂𑀦 𑀅𑀲𑀫𑀸𑀦𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀜𑁆𑀳𑀺…𑀧𑁂… 𑀬𑀼𑀢𑁆𑀢𑀁 𑀯𑀢𑁆𑀢𑀼’’𑀦𑁆𑀢𑀺 𑀆𑀳. 𑀓𑀫𑁆𑀫𑀁 𑀧𑀦𑀸𑀢𑀺𑀆𑀤𑀺𑀦𑀸 𑀓𑀫𑁆𑀫𑀸𑀭𑀫𑁆𑀫𑀡𑀧𑀘𑁆𑀘𑀬𑀸𑀦𑀁 𑀧𑀯𑀢𑁆𑀢𑀺𑀆𑀓𑀸𑀭𑀲𑁆𑀲 𑀪𑀺𑀦𑁆𑀦𑀢𑁆𑀢𑀸 𑀏𑀓𑀚𑁆𑀛𑀁 𑀳𑀼𑀢𑁆𑀯𑀸 𑀅𑀧𑁆𑀧𑀯𑀢𑁆𑀢𑀺𑀫𑁂𑀯 𑀯𑀺𑀪𑀸𑀯𑁂𑀢𑀺. 𑀬𑀢𑁄 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀧𑀝𑀺𑀓𑁆𑀔𑁂𑀧𑀓𑀸 𑀯𑀼𑀢𑁆𑀢𑀸, 𑀓𑀲𑁆𑀫𑀸 𑀧𑀦 𑀢𑀁𑀬𑁂𑀯 𑀯𑀢𑁆𑀣𑀼 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀺 𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀘, 𑀦 𑀢𑀁𑀬𑁂𑀯 𑀓𑀫𑁆𑀫𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀘 𑀓𑀫𑁆𑀫𑀧𑀘𑁆𑀘𑀬𑁄 𑀘𑀸𑀢𑀺? 𑀦 𑀘𑁄𑀤𑁂𑀢𑀩𑁆𑀩𑀫𑁂𑀢𑀁, 𑀥𑀫𑁆𑀫𑀲𑀪𑀸𑀯𑁄 𑀏𑀲𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀲 𑀘 𑀲𑀪𑀸𑀯𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀢𑁆𑀢𑀫𑀸𑀦𑀸𑀦𑀦𑁆𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁. 𑀬𑀦𑁆𑀢𑀺 𑀇𑀤𑀁 ‘‘𑀯𑀢𑁆𑀢𑀩𑁆𑀩𑀢𑀸’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑀺𑀬𑀫𑀸𑀦𑀁 ‘‘𑀬𑀸’’𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀯𑀺𑀧𑀭𑀺𑀡𑀸𑀫𑁂𑀢𑀩𑁆𑀩𑀁. 𑀬𑀣𑀸𑀢𑀺𑀆𑀤𑀺𑀦𑀸 𑀢𑀫𑁂𑀯𑀢𑁆𑀣𑀁 𑀉𑀤𑀸𑀳𑀭𑀡𑀤𑀲𑁆𑀲𑀦𑁂𑀦 𑀯𑀺𑀪𑀸𑀯𑁂𑀢𑀺.

𑁪𑁭𑁮-𑁪𑁮𑁩. 𑀬𑀁 𑀯𑀺𑀜𑁆𑀜𑀸𑀡𑀁 𑀅𑀥𑀺𑀧𑀢𑀺𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀢𑀁 𑀅𑀦𑀸𑀫𑀝𑁆𑀞𑀸𑀥𑀺𑀧𑀢𑀺𑀪𑀸𑀯𑀁 𑀤𑀝𑁆𑀞𑀩𑁆𑀩𑀁. 𑀯𑀢𑁆𑀣𑀼𑀲𑁆𑀲 𑀯𑀲𑁂𑀦𑀸𑀢𑀺 𑀳𑀸𑀧𑁂𑀢𑀩𑁆𑀩𑀲𑁆𑀲 𑀯𑀢𑁆𑀣𑀼𑀲𑁆𑀲 𑀯𑀲𑁂𑀦.

𑁪𑁮𑁪-𑁪𑁯𑁫. 𑀅𑀭𑀽𑀧𑀺𑀦𑁆𑀤𑁆𑀭𑀺𑀬𑀸𑀦𑀺 𑀭𑀽𑀧𑀸𑀦𑀁 𑀧𑀘𑁆𑀘𑀬𑀢𑁆𑀢𑁂𑀦 𑀮𑀩𑁆𑀪𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀬𑀤𑀺𑀧𑀺 𑀏𑀯𑀁 𑀯𑀼𑀢𑁆𑀢𑀁 𑀭𑀽𑀧𑀺𑀦𑁆𑀤𑁆𑀭𑀺𑀬𑀸𑀦𑀁 𑀅𑀭𑀽𑀧𑀸𑀦𑀁 𑀧𑀘𑁆𑀘𑀬𑀢𑁆𑀢𑀜𑁆𑀘 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀘𑀓𑁆𑀔𑀸𑀤𑀻𑀦𑀺 𑀘 𑀧𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀮𑀩𑁆𑀪𑀦𑁆𑀢𑀻’’𑀢𑀺. 𑀢𑀁𑀲𑀫𑀸𑀦𑀕𑀢𑀺𑀓𑀸𑀢𑀺 𑀯𑀻𑀭𑀺𑀬𑁂𑀦 𑀲𑀫𑀸𑀦𑀕𑀢𑀺𑀓𑀸 𑀫𑀕𑁆𑀕𑀧𑀘𑁆𑀘𑀬𑀢𑀸𑀬.

𑁫𑁧𑁧-𑁫𑁧𑁪. 𑀯𑀺𑀧𑁆𑀧𑀬𑀼𑀢𑁆𑀢𑀫𑀽𑀮𑀓𑁂 ‘‘𑀤𑀲𑀫𑁂 𑀓𑀼𑀲𑀮𑀸𑀤𑀬𑁄 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦’’𑀦𑁆𑀢𑀺 𑀇𑀤𑀁 𑀧𑀯𑀢𑁆𑀢𑀺𑀯𑀲𑁂𑀦 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀧𑀝𑀺𑀲𑀦𑁆𑀥𑀺𑀬𑀁 𑀧𑀦 ‘𑀔𑀦𑁆𑀥𑀸 𑀓𑀝𑀢𑁆𑀢𑀸𑀭𑀽𑀧𑀸𑀦𑀁 𑀯𑀢𑁆𑀣𑀼 𑀘 𑀔𑀦𑁆𑀥𑀸𑀦’𑀦𑁆𑀢𑀺 𑀇𑀤𑀫𑁆𑀧𑀺 𑀮𑀩𑁆𑀪𑀢𑀻’’𑀢𑀺. 𑀢𑀲𑁆𑀲 𑀤𑀲𑁆𑀲𑀦𑀯𑀲𑁂𑀦𑀸𑀢𑀺 𑀢𑀲𑁆𑀲 𑀯𑀢𑁆𑀣𑀼𑀲𑁆𑀲 𑀤𑀲𑁆𑀲𑀦𑀯𑀲𑁂𑀦, 𑀦 𑀅𑀦𑀯𑀲𑁂𑀲𑀢𑁄 𑀧𑀘𑁆𑀘𑀬𑀥𑀫𑁆𑀫𑀲𑁆𑀲 𑀤𑀲𑁆𑀲𑀦𑀯𑀲𑁂𑀦. 𑀢𑁂𑀦𑀸𑀳 ‘‘𑀔𑀦𑁆𑀥𑀸 𑀘 𑀯𑀢𑁆𑀣𑀼𑀲𑁆𑀲𑀸𑀢𑀺 𑀇𑀤𑀫𑁆𑀧𑀺 𑀧𑀦 𑀮𑀩𑁆𑀪𑀢𑁂𑀯𑀸’’𑀢𑀺. 𑀦 𑀯𑀚𑁆𑀚𑁂𑀢𑀩𑁆𑀩𑀸𑀦𑀻𑀢𑀺 𑀢𑁂𑀲𑀫𑁆𑀧𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑁂𑀦 𑀬𑁄𑀚𑁂𑀢𑀩𑁆𑀩𑀢𑁆𑀢𑀸.

𑁫𑁧𑁫-𑁫𑁧𑁮. 𑀅𑀭𑀽𑀧𑀯𑀢𑁆𑀣𑀸𑀭𑀫𑁆𑀫𑀡𑀫𑀳𑀸𑀪𑀽𑀢𑀇𑀦𑁆𑀤𑁆𑀭𑀺𑀬𑀸𑀳𑀸𑀭𑀸𑀦𑀁 𑀧𑀘𑁆𑀘𑀬𑀥𑀫𑁆𑀫𑀸𑀦𑀦𑁆𑀢𑀺 𑀅𑀢𑁆𑀣𑁄. ‘‘𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀸 𑀘𑀸’’𑀢𑀺𑀧𑀺 𑀧𑀦 𑀯𑀢𑁆𑀢𑀩𑁆𑀩𑀁. 𑀓𑀲𑁆𑀫𑀸? 𑀦 𑀳𑀺 𑀇𑀦𑁆𑀤𑁆𑀭𑀺𑀬𑀸𑀳𑀸𑀭𑀸𑀦𑀁 𑀯𑀲𑁂𑀦 𑀲𑀳𑀚𑀸𑀢𑀸𑀤𑀬𑁄 𑀮𑀩𑁆𑀪𑀦𑁆𑀢𑀺, 𑀇𑀦𑁆𑀤𑁆𑀭𑀺𑀬𑀸𑀳𑀸𑀭𑀸𑀦𑀁 𑀧𑀦 𑀯𑀲𑁂𑀦 𑀇𑀦𑁆𑀤𑁆𑀭𑀺𑀬𑀸𑀳𑀸𑀭𑀧𑀘𑁆𑀘𑀬𑀸𑀯 𑀮𑀩𑁆𑀪𑀦𑁆𑀢𑀺. ‘‘𑀲𑀳𑀚𑀸𑀢𑀁 𑀧𑀼𑀭𑁂𑀚𑀸𑀢𑀁 𑀧𑀘𑁆𑀙𑀸𑀚𑀸𑀢𑀁 𑀆𑀳𑀸𑀭𑀁 𑀇𑀦𑁆𑀤𑁆𑀭𑀺𑀬’’𑀦𑁆𑀢𑀺 𑀳𑀺 𑀉𑀤𑁆𑀤𑀺𑀲𑀺𑀢𑁆𑀯𑀸 𑀅𑀢𑁆𑀣𑀺𑀧𑀘𑁆𑀘𑀬𑁄 𑀯𑀺𑀪𑀢𑁆𑀢𑁄𑀢𑀺. 𑀓𑁂𑀘𑀺 𑀧𑀦𑁂𑀢𑁆𑀣 ‘‘𑀆𑀳𑀸𑀭𑀕𑁆𑀕𑀳𑀡𑁂𑀦 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄𑀯 𑀕𑀳𑀺𑀢𑁄, 𑀇𑀦𑁆𑀤𑁆𑀭𑀺𑀬𑀕𑁆𑀕𑀳𑀡𑁂𑀦 𑀘 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀫𑁂𑀯, 𑀲𑁂𑀲𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀸𑀦𑀺 𑀲𑀳𑀚𑀸𑀢𑀸𑀤𑀻𑀲𑁆𑀯𑁂𑀯 𑀅𑀦𑁆𑀢𑁄𑀕𑀥𑀸𑀦𑀺 𑀓𑀢𑀸𑀦𑀺. 𑀬𑀸𑀦𑀺 𑀢𑀤𑀦𑁆𑀢𑁄𑀕𑀥𑀸𑀦𑀺, 𑀢𑁂 𑀲𑀦𑁆𑀥𑀸𑀬 𑀅𑀝𑁆𑀞𑀓𑀣𑀸𑀬𑀁 ‘𑀅𑀭𑀽𑀧𑀯𑀢𑁆𑀣𑀸𑀭𑀫𑁆𑀫𑀡𑀫𑀳𑀸𑀪𑀽𑀢𑀇𑀦𑁆𑀤𑁆𑀭𑀺𑀬𑀸𑀳𑀸𑀭𑀸𑀦𑀁 𑀯𑀲𑁂𑀦𑀸’𑀢𑀺 𑀏𑀢𑁆𑀣 𑀇𑀦𑁆𑀤𑁆𑀭𑀺𑀬𑀸𑀳𑀸𑀭𑀕𑁆𑀕𑀳𑀡𑀁 𑀓𑀢𑀦𑁆𑀢𑀺 ‘𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀸 𑀮𑀩𑁆𑀪𑀦𑁆𑀢𑀻’𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺.

𑀢𑀢𑁆𑀣 𑀅𑀭𑀽𑀧𑀸𑀦𑀁 𑀲𑀳𑀚𑀸𑀢𑀧𑀘𑁆𑀙𑀸𑀚𑀸𑀢𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀪𑀸𑀯𑁄 𑀬𑀣𑀸𑀭𑀳𑀁 𑀯𑁂𑀤𑀺𑀢𑀩𑁆𑀩𑁄. 𑀯𑀢𑁆𑀣𑀼 𑀲𑀳𑀚𑀸𑀢𑀁 𑀧𑀼𑀭𑁂𑀚𑀸𑀢𑀜𑁆𑀘, 𑀆𑀭𑀫𑁆𑀫𑀡𑀁 𑀧𑀼𑀭𑁂𑀚𑀸𑀢𑀫𑁂𑀯, 𑀅𑀪𑀺𑀜𑁆𑀜𑀸𑀜𑀸𑀡𑀲𑁆𑀲 𑀧𑀦 𑀓𑀤𑀸𑀘𑀺 𑀲𑀳𑀚𑀸𑀢𑀫𑁆𑀧𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀺𑀬𑁂𑀯. 𑀲𑀳𑀚𑀸𑀢𑀕𑁆𑀕𑀳𑀡𑁂𑀦 𑀧𑀦𑁂𑀢𑁆𑀣 𑀲𑀳𑀚𑀸𑀢𑀧𑀘𑁆𑀘𑀬𑀪𑀽𑀢𑁄𑀯 𑀕𑀬𑁆𑀳𑀢𑀺, 𑀲𑁄 𑀘 𑀏𑀓𑀼𑀧𑁆𑀧𑀸𑀤𑀸𑀤𑀺𑀮𑀓𑁆𑀔𑀡𑀬𑀼𑀢𑁆𑀢𑁄𑀯𑀸𑀢𑀺 𑀬𑁄 𑀥𑀫𑁆𑀫𑁄 𑀲𑀳𑀚𑀸𑀢𑁄 𑀳𑀼𑀢𑁆𑀯𑀸 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀦 𑀲𑁄 𑀇𑀥 𑀅𑀥𑀺𑀧𑁆𑀧𑁂𑀢𑁄. 𑀬𑀤𑀺 𑀲𑀳𑀚𑀸𑀢𑁄𑀧𑀺 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀓𑀲𑁆𑀫𑀸 𑀧𑀸𑀴𑀺𑀬𑀁 𑀢𑀣𑀸 𑀦 𑀯𑀺𑀪𑀢𑁆𑀢𑀦𑁆𑀢𑀺? 𑀏𑀓𑀓𑀮𑀸𑀧𑀧𑀭𑀺𑀬𑀸𑀧𑀦𑁆𑀦𑀲𑁆𑀲 𑀏𑀓𑀼𑀧𑁆𑀧𑀸𑀤𑀸𑀤𑀺𑀮𑀓𑁆𑀔𑀡𑀬𑀼𑀢𑁆𑀢𑀲𑁆𑀲 𑀪𑀺𑀦𑁆𑀦𑀓𑀮𑀸𑀧𑀧𑀭𑀺𑀬𑀸𑀧𑀦𑁆𑀦𑀢𑁄 𑀲𑀗𑁆𑀓𑀭𑀫𑁄𑀘𑀦𑀢𑁆𑀣𑀁. 𑀅𑀧𑀺𑀘 𑀅𑀧𑁆𑀧𑀘𑀼𑀭𑀪𑀸𑀯𑀢𑁄 𑀅𑀧𑀸𑀓𑀝𑀪𑀸𑀯𑀢𑁄 𑀘 𑀢𑀁 𑀦 𑀕𑀳𑀺𑀢𑀁. 𑀢𑀢𑁄𑀢𑀺 𑀦𑀯𑀫𑀢𑁄𑀢𑀺 𑀅𑀢𑁆𑀣𑁄, 𑀦 𑀤𑀲𑀫𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀳𑀺 𑀏𑀓𑀸𑀤𑀲𑀫𑁂 𑀅𑀥𑀺𑀧𑀢𑀺 𑀅𑀢𑁆𑀣𑀻𑀢𑀺. 𑀢𑀣𑀸 𑀘𑀼𑀤𑁆𑀤𑀲𑀫𑁂𑀢𑀺 𑀏𑀢𑁆𑀣 𑀢𑀣𑀸-𑀲𑀤𑁆𑀤𑁂𑀦 𑀯𑀢𑁆𑀣𑀼𑀕𑁆𑀕𑀳𑀡𑁂𑀦 𑀘𑀓𑁆𑀔𑀸𑀤𑀺𑀯𑀢𑁆𑀣𑀽𑀦𑀺𑀧𑀺 𑀕𑀳𑀺𑀢𑀸𑀦𑀻𑀢𑀺 𑀇𑀫𑀫𑀢𑁆𑀣𑀁 𑀉𑀧𑀲𑀁𑀳𑀭𑀢𑀺. 𑀢𑀤𑁂𑀯𑀸𑀢𑀺 𑀆𑀭𑀫𑁆𑀫𑀡𑀫𑁂𑀯.

𑁫𑁧𑁯. 𑀲𑀳𑀚𑀸𑀢𑀸𑀦𑀺 𑀯𑀺𑀬𑀸𑀢𑀺 𑀲𑀳𑀚𑀸𑀢𑀧𑀘𑁆𑀘𑀬𑀲𑀳𑀺𑀢𑀸𑀦𑀺 𑀯𑀺𑀬 𑀖𑀝𑀦𑀸𑀦𑀺. 𑀲𑀳𑀚𑀸𑀢𑁂𑀦𑀸𑀢𑀺 𑀲𑀳𑀚𑀸𑀢𑀧𑀘𑁆𑀘𑀬𑁂𑀦. 𑀢𑀸𑀦𑀻𑀢𑀺 ‘‘𑀧𑀓𑀺𑀡𑁆𑀡𑀓𑀖𑀝𑀦𑀸𑀦𑀻’’𑀢𑀺 𑀯𑀼𑀢𑁆𑀢𑀖𑀝𑀦𑀸𑀦𑀺. 𑀬𑀸𑀦𑀺 𑀳𑀺 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀦 𑀬𑁄𑀚𑀺𑀢𑀸𑀦𑀺, 𑀢𑀸𑀦𑁂𑀢𑁆𑀣 𑀧𑀓𑀺𑀡𑁆𑀡𑀓𑀖𑀝𑀦𑀸𑀦𑀻𑀢𑀺 𑀯𑀼𑀢𑁆𑀢𑀸𑀦𑀺. 𑀧𑀼𑀭𑁂𑀚𑀸𑀢…𑀧𑁂… 𑀯𑀲𑁂𑀦𑀸𑀢𑀺 𑀏𑀢𑁆𑀣 𑀅𑀬𑀁 𑀬𑁄𑀚𑀦𑀸 𑁋 𑀧𑀼𑀭𑁂𑀚𑀸𑀢𑀲𑁆𑀲 𑀧𑀘𑁆𑀙𑀸𑀚𑀸𑀢𑀲𑁆𑀲 𑀆𑀳𑀸𑀭𑀲𑁆𑀲 𑀇𑀦𑁆𑀤𑁆𑀭𑀺𑀬𑀲𑁆𑀲 𑀘 𑀲𑀳𑀚𑀸𑀢𑁂𑀦 𑀅𑀜𑁆𑀜𑀫𑀜𑁆𑀜𑀜𑁆𑀘 𑀲𑀸𑀫𑀜𑁆𑀜𑀯𑀲𑁂𑀦, 𑀢𑁂𑀲𑀁𑀬𑁂𑀯 𑀲𑀳𑀚𑀸𑀢𑁂𑀦 𑀅𑀜𑁆𑀜𑀫𑀜𑁆𑀜𑀜𑁆𑀘 𑀅𑀲𑀸𑀫𑀜𑁆𑀜𑀯𑀲𑁂𑀦 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀣𑀸 𑀧𑀼𑀭𑁂𑀚𑀸𑀢𑀲𑁆𑀲 𑀧𑀘𑁆𑀙𑀸𑀚𑀸𑀢𑀲𑁆𑀲 𑀘 𑀲𑀳𑀚𑀸𑀢𑁂𑀦 𑀅𑀲𑀸𑀫𑀜𑁆𑀜𑀁 𑀪𑀺𑀦𑁆𑀦𑀲𑀪𑀸𑀯𑀢𑁆𑀢𑀸, 𑀢𑀢𑁄 𑀏𑀯 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀸𑀦𑀫𑁆𑀧𑀺 𑀢𑁂𑀦 𑀅𑀲𑀸𑀫𑀜𑁆𑀜𑀁, 𑀏𑀯𑀁 𑀧𑀼𑀭𑁂𑀚𑀸𑀢𑀸𑀤𑀻𑀦𑀁 𑀘𑀢𑀼𑀦𑁆𑀦𑀫𑁆𑀧𑀺 𑀅𑀜𑁆𑀜𑀫𑀜𑁆𑀜𑀁 𑀅𑀲𑀸𑀫𑀜𑁆𑀜𑀁 𑀪𑀺𑀦𑁆𑀦𑀲𑀪𑀸𑀯𑀢𑁆𑀢𑀸. 𑀏𑀯𑀁 𑀅𑀲𑀸𑀫𑀜𑁆𑀜𑀯𑀲𑁂𑀦 𑀅𑀲𑀫𑀸𑀦𑀢𑀸𑀯𑀲𑁂𑀦 𑀬𑀣𑀸𑀯𑀼𑀢𑁆𑀢𑀸𑀦𑀺 𑀖𑀝𑀦𑀸𑀦𑀺 𑀯𑀺𑀧𑁆𑀧𑀓𑀺𑀡𑁆𑀡𑀸𑀦𑀺. 𑀬𑀣𑀸 𑀧𑀦 𑀲𑀳𑀚𑀸𑀢𑀧𑀘𑁆𑀘𑀬𑀥𑀫𑁆𑀫𑀸 𑀅𑀭𑀽𑀧𑀓𑁆𑀔𑀦𑁆𑀥𑀸𑀤𑀬𑁄 𑀢𑁂𑀦𑁂𑀯 𑀲𑀳𑀚𑀸𑀢𑀧𑀘𑁆𑀘𑀬𑀢𑀸𑀲𑀗𑁆𑀔𑀸𑀢𑁂𑀦 𑀫𑀺𑀣𑀽𑀦𑀁 𑀲𑀫𑀸𑀦𑀪𑀸𑀯𑁂𑀦 𑀅𑀜𑁆𑀜𑁂𑀳𑀺 𑀅𑀲𑀁𑀓𑀺𑀡𑁆𑀡𑀸 𑀅𑀢𑁆𑀢𑀦𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀧𑀘𑁆𑀘𑀬𑁄 𑀳𑁄𑀦𑁆𑀢𑀻𑀢𑀺 𑀅𑀲𑀸𑀫𑀜𑁆𑀜𑀯𑀲𑁂𑀦 𑀢𑁂𑀲𑀁 𑀧𑀯𑀢𑁆𑀢𑀺, 𑀏𑀯𑀁 𑀧𑀼𑀭𑁂𑀚𑀸𑀢𑀸𑀤𑀺𑀧𑀘𑁆𑀘𑀬𑀥𑀫𑁆𑀫𑀸𑀧𑀻𑀢𑀺 𑀢𑁂𑀲𑀁 𑀲𑀳𑀚𑀸𑀢𑁂𑀦 𑀅𑀜𑁆𑀜𑀫𑀜𑁆𑀜𑀜𑁆𑀘 𑀬𑀣𑀸𑀯𑀼𑀢𑁆𑀢𑀲𑁆𑀲 𑀲𑀸𑀫𑀜𑁆𑀜𑀲𑁆𑀲 𑀅𑀲𑀸𑀫𑀜𑁆𑀜𑀲𑁆𑀲 𑀘 𑀯𑀲𑁂𑀦 𑀢𑀸𑀦𑀺 𑀖𑀝𑀦𑀸𑀦𑀺 𑀯𑀺𑀧𑁆𑀧𑀓𑀺𑀡𑁆𑀡𑀸𑀦𑀻𑀢𑀺 𑀧𑀓𑀺𑀡𑁆𑀡𑀓𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀏𑀯𑀁 𑀲𑀦𑁆𑀢𑁂 𑀲𑀳𑀚𑀸𑀢𑀸𑀦𑀫𑁆𑀧𑀺 𑀖𑀝𑀦𑀸𑀦𑀁 𑀧𑀓𑀺𑀡𑁆𑀡𑀓𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺, 𑀢𑁂𑀲𑀁 𑀲𑀳𑀚𑀸𑀢𑀢𑀸𑀬 𑀏𑀯 𑀅𑀯𑀺𑀧𑁆𑀧𑀓𑀺𑀡𑁆𑀡𑀪𑀸𑀯𑀲𑀺𑀤𑁆𑀥𑀺𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀳𑀚𑀸𑀢𑀁 𑀅𑀕𑁆𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀸𑀦𑀺 𑀧𑀓𑀺𑀡𑁆𑀡𑀓𑀸𑀦𑀺 𑀦𑀸𑀫𑀸’’𑀢𑀺.

𑀢𑀸𑀦𑀻𑀢𑀺 𑀧𑀓𑀺𑀡𑁆𑀡𑀓𑀖𑀝𑀦𑀸𑀦𑀺. 𑀓𑀼𑀲𑀮𑀯𑀺𑀧𑀸𑀓𑀸𑀢𑀺 𑀓𑀼𑀲𑀮𑀸 𑀘 𑀯𑀺𑀧𑀸𑀓𑀸 𑀘, 𑀬𑁂 𑀅𑀪𑀺𑀦𑁆𑀦𑀮𑀓𑁆𑀔𑀡𑀸 𑀳𑀼𑀢𑁆𑀯𑀸 𑀓𑀼𑀲𑀮𑀲𑀪𑀸𑀯𑀸 𑀯𑀺𑀧𑀸𑀓𑀲𑀪𑀸𑀯𑀸 𑀘𑀸𑀢𑀺 𑀅𑀢𑁆𑀣𑁄. 𑀏𑀯𑀁𑀲𑀪𑀸𑀯𑀜𑁆𑀘 𑀏𑀓𑀁 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀫𑁂𑀯𑀸𑀢𑀺 𑀆𑀳 ‘‘𑀇𑀤𑀁…𑀧𑁂… 𑀮𑀩𑁆𑀪𑀢𑀻’’𑀢𑀺. 𑀦𑀦𑀼 𑀘 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀺𑀯𑀲𑁂𑀦𑀧𑀺 𑀅𑀬𑀫𑀢𑁆𑀣𑁄 𑀮𑀩𑁆𑀪𑀢𑀻𑀢𑀺? 𑀢𑁂𑀲𑀁 𑀓𑀺𑀭𑀺𑀬𑀲𑀪𑀸𑀯𑀢𑀸𑀧𑀺 𑀅𑀢𑁆𑀣𑁂𑀯𑀸𑀢𑀺. 𑀤𑀼𑀓𑁆𑀔𑀦𑁆𑀢𑀺 𑀘𑁂𑀢𑀲𑀺𑀓𑀤𑀼𑀓𑁆𑀔𑀁. 𑀢𑁂𑀦𑀸𑀳 ‘‘𑀅𑀓𑀼𑀲𑀮𑀫𑁂𑀯𑀸’’𑀢𑀺. 𑀯𑀺𑀧𑀸𑀓𑀲𑁆𑀲 𑀤𑀼𑀓𑁆𑀔𑀲𑁆𑀲𑀸𑀢𑀺 𑀬𑁄𑀚𑀦𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀛𑀸𑀦𑀗𑁆𑀕𑀢𑁆𑀢𑀸’’𑀢𑀺. 𑀅𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀸𑀢𑀺 𑀯𑀺𑀘𑀺𑀓𑀺𑀘𑁆𑀙𑀸𑀘𑀺𑀢𑁆𑀢𑀧𑀜𑁆𑀘𑀯𑀺𑀜𑁆𑀜𑀸𑀡𑀓𑀺𑀭𑀺𑀬𑀸𑀫𑀦𑁄𑀥𑀸𑀢𑀽𑀲𑀼 𑀧𑀯𑀢𑁆𑀢𑀦𑀢𑁄 𑀅𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀸𑀯 𑀳𑁄𑀢𑀺 𑀘𑀺𑀢𑁆𑀢𑀝𑁆𑀞𑀺𑀢𑀻𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀅𑀓𑀼𑀲𑀮𑀯𑀺𑀧𑀸𑀓𑀸𑀢𑀺 𑀏𑀯𑀫𑀢𑁆𑀣𑁂 𑀕𑀬𑁆𑀳𑀫𑀸𑀦𑁂 𑀤𑀼𑀓𑁆𑀔𑀲𑁆𑀲 𑀘𑀺𑀢𑁆𑀢𑀝𑁆𑀞𑀺𑀢𑀺𑀬𑀸 𑀘 𑀯𑀲𑁂𑀦 𑀬𑀣𑀸 𑀛𑀸𑀦𑁂𑀲𑀼, 𑀏𑀯𑀁 𑀅𑀜𑁆𑀜𑁂𑀲𑀁 𑀯𑀲𑁂𑀦 𑀅𑀜𑁆𑀜𑁂𑀲𑀼 𑀘 𑀦 𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀅𑀓𑀼𑀲𑀮𑀲𑁆𑀲 𑀯𑀺𑀧𑀸𑀓𑀸𑀢𑀺 𑀏𑀯𑀫𑀢𑁆𑀣𑁂 𑀕𑀬𑁆𑀳𑀫𑀸𑀦𑁂 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀇𑀦𑁆𑀤𑁆𑀭𑀺𑀬𑁂𑀲𑀼 𑀮𑀩𑁆𑀪𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀓𑀼𑀲𑀮𑀲𑁆𑀲…𑀧𑁂… 𑀮𑀩𑁆𑀪𑁂𑀬𑁆𑀬𑀸’’𑀢𑀺. 𑀇𑀫𑀲𑁆𑀫𑀺𑀁 𑀓𑀼𑀲𑀮𑀢𑁆𑀢𑀺𑀓𑁂 𑀯𑀺𑀧𑀸𑀓𑁄 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀫𑀺𑀘𑁆𑀘𑁂𑀯 𑀕𑀬𑁆𑀳𑀢𑀺, 𑀦 𑀅𑀓𑀼𑀲𑀮𑀸𑀤𑀺𑀧𑀤𑁂𑀳𑀺 𑀯𑀺𑀲𑁂𑀲𑁂𑀢𑁆𑀯𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀼𑀲𑀮𑀯𑀺𑀧𑀸𑀓𑀸…𑀧𑁂… 𑀦𑀢𑁆𑀣𑀻’’𑀢𑀺 𑀆𑀳.

𑀧𑀜𑁆𑀳𑀸𑀯𑀸𑀭𑀲𑁆𑀲 𑀖𑀝𑀦𑁂 𑀅𑀦𑀼𑀮𑁄𑀫𑀕𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀘𑁆𑀘𑀦𑀻𑀬𑀼𑀤𑁆𑀥𑀸𑀭𑀯𑀡𑁆𑀡𑀦𑀸

𑁫𑁨𑁭. 𑀦𑀳𑁂𑀢𑀼𑀧𑀘𑁆𑀘𑀬𑁂𑀦𑀸𑀢𑀺 𑀏𑀢𑁆𑀣 𑀦-𑀓𑀸𑀭𑁄 𑀅𑀜𑁆𑀜𑀢𑁆𑀣𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀳𑁂𑀢𑀼𑀧𑀘𑁆𑀘𑀬𑀢𑁄 𑀅𑀜𑁆𑀜𑁂𑀦 𑀧𑀘𑁆𑀘𑀬𑁂𑀦𑀸’’𑀢𑀺 𑀆𑀳. 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦𑀸𑀳𑀺 𑀲𑀳𑀚𑀸𑀢𑀸𑀤𑀺𑀲𑀗𑁆𑀕𑀳𑀯𑀲𑁂𑀦 𑀅𑀕𑁆𑀕𑀳𑀺𑀢𑀸𑀦𑀁 𑀕𑀳𑀡𑁂𑀦. 𑀅𑀝𑁆𑀞 𑀳𑁄𑀦𑁆𑀢𑀻𑀢𑀺 𑀇𑀫𑀺𑀲𑁆𑀲𑀸 𑀧𑀸𑀴𑀺𑀬𑀸 𑀆𑀕𑀢𑀸 𑀆𑀭𑀫𑁆𑀫𑀡𑀸𑀤𑀬𑁄 𑀅𑀝𑁆𑀞 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀢𑁂𑀲𑀽𑀢𑀺 𑀅𑀝𑁆𑀞𑀲𑀼 𑀧𑀘𑁆𑀘𑀬𑁂𑀲𑀼. 𑀢𑀻𑀳𑀻𑀢𑀺 𑀆𑀭𑀫𑁆𑀫𑀡𑀲𑀳𑀚𑀸𑀢𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀳𑀺. 𑀤𑁆𑀯𑀻𑀳𑀻𑀢𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀳𑀺. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀧𑀘𑁆𑀘𑀬𑁂𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀳𑁂𑀢𑀼𑀆𑀤𑀺𑀓𑁂 𑀧𑀘𑁆𑀘𑀬𑁂. 𑀢𑀢𑁄 𑀳𑁂𑀢𑀼𑀆𑀤𑀺𑀧𑀘𑁆𑀘𑀬𑀢𑁄. 𑀬𑀣𑀸𑀬𑁄𑀕𑀁 𑀬𑁄𑀚𑁂𑀢𑀩𑁆𑀩𑀸𑀢𑀺 𑀬𑀲𑁆𑀫𑀺𑀁 𑀧𑀘𑁆𑀘𑀬𑁂 𑀧𑀘𑁆𑀘𑀦𑀻𑀬𑀢𑁄 𑀞𑀺𑀢𑁂 𑀬𑁂 𑀧𑀘𑁆𑀘𑀬𑀸 𑀅𑀦𑀼𑀮𑁄𑀫𑀢𑁄 𑀬𑁄𑀚𑀦𑀁 𑀮𑀪𑀦𑁆𑀢𑀺, 𑀢𑁂 𑀬𑁄𑀚𑁂𑀢𑀩𑁆𑀩𑀸𑀢𑀺 𑀅𑀢𑁆𑀣𑁄.

𑀤𑁆𑀯𑀺𑀦𑁆𑀦𑀦𑁆𑀢𑀺 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀲𑁆𑀲 𑀧𑀓𑀢𑀽𑀧𑀦𑀺𑀲𑁆𑀲𑀬𑀲𑁆𑀲𑀸𑀢𑀺 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁. 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑀲𑁆𑀲 𑀯𑀲𑁂𑀦 𑀧𑀼𑀭𑁂𑀚𑀸𑀢𑀁 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀲𑁆𑀲 𑀆𑀭𑀫𑁆𑀫𑀡𑁂𑀦 𑀲𑀗𑁆𑀕𑀳𑀺𑀢𑀢𑁆𑀢𑀸. 𑀅𑀜𑁆𑀜𑀺𑀲𑁆𑀲𑀸 𑀘𑁂𑀢𑀦𑀸𑀬𑀸𑀢𑀺 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀪𑀸𑀯𑁂𑀦𑁂𑀯 𑀧𑀯𑀢𑁆𑀢𑀸𑀬 𑀘𑁂𑀢𑀦𑀸𑀬. 𑀅𑀭𑀽𑀧𑀸𑀳𑀸𑀭𑀸 𑀅𑀧𑀭𑀺𑀘𑁆𑀘𑀢𑁆𑀢𑀲𑀳𑀚𑀸𑀢𑀪𑀸𑀯𑀸 𑀏𑀯 𑀆𑀳𑀸𑀭𑀧𑀘𑁆𑀘𑀬𑁄 𑀳𑁄𑀦𑁆𑀢𑀺, 𑀭𑀽𑀧𑀸𑀳𑀸𑀭𑁄 𑀞𑀺𑀢𑀺𑀧𑁆𑀧𑀢𑁆𑀢𑁄𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀲𑀳𑀚𑀸𑀢𑀢𑁄 𑀅𑀜𑁆𑀜𑀲𑁆𑀲 𑀓𑀩𑀴𑀻𑀓𑀸𑀭𑀸𑀳𑀸𑀭𑀲𑁆𑀲 𑀯𑀲𑁂𑀦 𑀆𑀳𑀸𑀭𑁄’’𑀢𑀺. 𑀲𑀳𑀚𑀸𑀢𑀢𑁄 𑀅𑀜𑁆𑀜𑀲𑁆𑀲𑀸𑀢𑀺 𑀘 𑀇𑀤𑀁 𑀅𑀭𑀽𑀧𑀸𑀳𑀸𑀭𑀦𑀺𑀯𑀢𑁆𑀢𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀦 𑀓𑀩𑀴𑀻𑀓𑀸𑀭𑀸𑀳𑀸𑀭𑀯𑀺𑀲𑁂𑀲𑀦𑀺𑀯𑀢𑁆𑀢𑀦𑀢𑁆𑀣𑀁 𑀢𑀸𑀤𑀺𑀲𑀲𑁆𑀲𑁂𑀯 𑀢𑀲𑁆𑀲 𑀅𑀪𑀸𑀯𑀢𑁄. 𑀦 𑀳𑀺 𑀭𑀽𑀧𑀸𑀳𑀸𑀭𑁄 𑀲𑀳𑀚𑀸𑀢𑀧𑀘𑁆𑀘𑀬𑁄 𑀳𑁄𑀢𑀺, 𑀦𑀸𑀧𑀺 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀳𑁄𑀢𑀺. 𑀬𑀣𑀸 𑀲𑀳𑀚𑀸𑀢𑀸𑀦𑀁 𑀲𑀳𑀚𑀸𑀢𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀏𑀯𑀁 𑀧𑀼𑀭𑁂𑀚𑀸𑀢𑀸𑀦𑀁 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀧𑀘𑁆𑀙𑀸𑀚𑀸𑀢𑀸𑀦𑀜𑁆𑀘 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀦 𑀳𑁄𑀢𑀺. 𑀓𑀲𑁆𑀫𑀸? 𑀢𑀸𑀤𑀺𑀲𑀲𑁆𑀲 𑀧𑀘𑁆𑀘𑀬𑀮𑀓𑁆𑀔𑀡𑀲𑁆𑀲 𑀅𑀪𑀸𑀯𑀢𑁄. 𑀬𑁂𑀲𑀜𑁆𑀳𑀺 𑀬𑁄 𑀚𑀦𑀓𑁄, 𑀦 𑀢𑁂𑀳𑀺 𑀢𑀲𑁆𑀲 𑀲𑀳𑀚𑀸𑀢𑀢𑀸 𑀅𑀢𑁆𑀣𑀺, 𑀦𑀸𑀧𑀺 𑀧𑀼𑀭𑁂𑀚𑀸𑀢𑀢𑀸 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀮𑀓𑁆𑀔𑀡𑀬𑀼𑀢𑁆𑀢𑀸, 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀢𑀸𑀬 𑀧𑀦 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺 𑀭𑀽𑀧𑀥𑀫𑁆𑀫𑀢𑁆𑀢𑀸. 𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄, 𑀢𑀲𑁆𑀫𑀸 𑀲𑀳𑀚𑀸𑀢𑀸𑀤𑀺𑀯𑀺𑀥𑀼𑀭𑁄 𑀏𑀯 𑀢𑀲𑁆𑀲 𑀧𑀘𑁆𑀘𑀬𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑁂𑀯 𑀳𑀺 ‘‘𑀲𑀳𑀚𑀸𑀢𑀁 𑀧𑀼𑀭𑁂𑀚𑀸𑀢𑀁 𑀧𑀘𑁆𑀙𑀸𑀚𑀸𑀢𑀁 𑀆𑀳𑀸𑀭𑀁 𑀇𑀦𑁆𑀤𑁆𑀭𑀺𑀬’’𑀦𑁆𑀢𑀺 𑀏𑀢𑁆𑀣 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀯𑀺𑀬 𑀭𑀽𑀧𑀸𑀳𑀸𑀭𑁄 𑀯𑀺𑀲𑀼𑀁 𑀕𑀳𑀺𑀢𑁄. 𑀢𑀣𑀸 𑀘𑀸𑀳 ‘‘𑀭𑀽𑀧𑀸𑀳𑀸𑀭𑁄…𑀧𑁂… 𑀆𑀳𑀸𑀭𑀧𑀘𑁆𑀘𑀬𑁄𑀯 𑀳𑁄𑀢𑀻’’𑀢𑀺. 𑀲𑀳𑀚𑀸𑀢𑀢𑁄 𑀧𑀼𑀭𑁂𑀚𑀸𑀢𑀢𑁄 𑀘 𑀅𑀜𑁆𑀜𑀲𑁆𑀲 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲𑀸𑀢𑀺 𑀏𑀢𑁆𑀣 𑀭𑀽𑀧𑀸𑀳𑀸𑀭𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀜𑁆𑀘 𑀓𑀢𑁆𑀯𑀸𑀢𑀺 𑀧𑀼𑀭𑀺𑀫𑀧𑀼𑀭𑀺𑀫𑁂𑀳𑀺 𑀅𑀲𑀗𑁆𑀕𑀳𑀺𑀢𑀲𑀗𑁆𑀕𑀡𑁆𑀳𑀦𑀯𑀲𑁂𑀦 𑀧𑀘𑁆𑀙𑀺𑀫𑀧𑀘𑁆𑀙𑀺𑀫𑀸𑀦𑀁 𑀕𑀳𑀺𑀢𑀢𑁆𑀢𑀸 𑀢𑀣𑀸 𑀭𑀽𑀧𑀸𑀳𑀸𑀭𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀘 𑀯𑀲𑁂𑀦 𑀇𑀥 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀸𑀦𑀁 𑀕𑀳𑀺𑀢𑀢𑁆𑀢𑀸𑀢𑀺 𑀅𑀢𑁆𑀣𑁄, 𑀅𑀜𑁆𑀜𑀣𑀸 ‘‘𑀆𑀳𑀸𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑁂𑀯𑀸𑀳 ‘‘𑀆𑀭𑀫𑁆𑀫𑀡…𑀧𑁂… 𑀇𑀘𑁆𑀘𑁂𑀯 𑀯𑀼𑀢𑁆𑀢’’𑀦𑁆𑀢𑀺. 𑀢𑀤𑀜𑁆𑀜𑀸𑀪𑀸𑀯𑀸𑀢𑀺 𑀢𑀢𑁄 𑀆𑀭𑀫𑁆𑀫𑀡𑀸𑀤𑀺𑀧𑀘𑁆𑀘𑀬𑀢𑁄 𑀅𑀜𑁆𑀜𑀲𑁆𑀲 𑀇𑀥𑀸𑀥𑀺𑀧𑁆𑀧𑁂𑀢𑀓𑀫𑁆𑀫𑀸𑀤𑀺𑀧𑀘𑁆𑀘𑀬𑀲𑁆𑀲 𑀓𑀼𑀲𑀮𑁂 𑀅𑀪𑀸𑀯𑀸. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀆𑀭𑀫𑁆𑀫𑀡𑀢𑁄 𑀅𑀜𑁆𑀜𑁂𑀲𑀁 𑀤𑁆𑀯𑀺𑀦𑁆𑀦𑀁 𑀯𑀲𑁂𑀦 𑀉𑀧𑀦𑀺𑀲𑁆𑀲𑀬𑁄 𑀯𑀼𑀢𑁆𑀢𑁄, 𑀢𑀲𑁆𑀫𑀸 ‘‘𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑁂 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀁, 𑀦 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀧𑀭𑀺𑀢𑁆𑀢𑀢𑁆𑀢𑀺𑀓𑀧𑀜𑁆𑀳𑀸𑀯𑀸𑀭𑀧𑀘𑁆𑀘𑀦𑀻𑀬𑁂 𑀆𑀭𑀫𑁆𑀫𑀡𑀁 𑀦 𑀯𑀼𑀢𑁆𑀢𑀁. 𑀉𑀧𑀦𑀺𑀲𑁆𑀲𑀬𑁂𑀦 𑀳𑀺 𑀅𑀲𑀗𑁆𑀕𑀳𑀺𑀢𑀢𑁆𑀢𑁂 𑀢𑀁 𑀯𑀢𑁆𑀢𑀩𑁆𑀩𑀫𑁂𑀯 𑀲𑀺𑀬𑀸𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀬𑀁 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀧𑀼𑀭𑀺𑀫𑁂𑀳𑀺 𑀅𑀲𑀗𑁆𑀕𑀳𑀺𑀢𑀯𑀲𑁂𑀦 𑀯𑀼𑀢𑁆𑀢𑀸𑀦𑀦𑁆𑀢𑀺 𑀧𑀼𑀭𑀺𑀫𑁂𑀳𑀺 𑀧𑀘𑁆𑀘𑀬𑁂𑀳𑀺 𑀅𑀲𑀗𑁆𑀕𑀳𑀺𑀢𑀯𑀲𑁂𑀦 𑀯𑀼𑀢𑁆𑀢𑀸𑀦𑀁 𑀧𑀘𑁆𑀙𑀺𑀫𑀸𑀦𑀁 𑀧𑀘𑁆𑀘𑀬𑀸𑀦𑀁. 𑀲𑀗𑁆𑀕𑀳𑀺𑀢𑀯𑀺𑀯𑀚𑁆𑀚𑀦𑀸𑀪𑀸𑀯𑀢𑁄𑀢𑀺 𑀅𑀢𑁆𑀢𑀦𑀸 𑀲𑀫𑀸𑀦𑀮𑀓𑁆𑀔𑀡𑀢𑀸𑀬 𑀲𑀗𑁆𑀕𑀳𑀺𑀢𑀲𑁆𑀲 𑀧𑀘𑁆𑀘𑀬𑀲𑁆𑀲 𑀯𑀺𑀯𑀚𑁆𑀚𑀦𑀸𑀪𑀸𑀯𑀢𑁄, 𑀯𑀺𑀯𑀚𑁆𑀚𑀦𑁂 𑀓𑀸𑀭𑀡𑀁 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀉𑀧𑀦𑀺𑀲𑁆𑀲𑀬𑀢𑁄 𑀅𑀜𑁆𑀜𑀸𑀭𑀫𑁆𑀫𑀡𑀸𑀪𑀸𑀯𑀢𑁄𑀢𑀺 𑀅𑀧𑁆𑀧𑀫𑀸𑀡𑁄 𑀥𑀫𑁆𑀫𑁄 𑀅𑀧𑁆𑀧𑀫𑀸𑀡𑀲𑁆𑀲 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀁 𑀳𑁄𑀦𑁆𑀢𑁄 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁄𑀯 𑀳𑁄𑀢𑀺 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀪𑀸𑀯𑀢𑁄𑀢𑀺 𑀅𑀢𑁆𑀣𑁄. 𑀬𑀣𑀸 𑀆𑀭𑀫𑁆𑀫𑀡𑁂 𑀕𑀳𑀺𑀢𑁂 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁄 𑀕𑀳𑀺𑀢𑁄𑀯 𑀳𑁄𑀢𑀺 𑀩𑀮𑀯𑀸𑀭𑀫𑁆𑀫𑀡𑀪𑀸𑀯𑀢𑁄, 𑀏𑀯𑀁 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁂 𑀕𑀳𑀺𑀢𑁂 𑀆𑀭𑀫𑁆𑀫𑀡𑀁 𑀕𑀳𑀺𑀢𑀫𑁂𑀯 𑀳𑁄𑀢𑀺 𑀢𑀁𑀲𑀪𑀸𑀯𑀢𑁆𑀢𑀸𑀢𑀺 𑀢𑀢𑁆𑀣 𑀢𑀁 𑀯𑀺𑀲𑀼𑀁 𑀦 𑀉𑀤𑁆𑀥𑀝𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑀸𑀳 ‘‘𑀦 𑀧𑀦 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀲𑁆𑀲 𑀆𑀭𑀫𑁆𑀫𑀡𑁂 𑀅𑀲𑀗𑁆𑀕𑀳𑀺𑀢𑀢𑁆𑀢𑀸’’𑀢𑀺.

𑀧𑀘𑁆𑀙𑀸𑀚𑀸𑀢𑀆𑀳𑀸𑀭𑀸𑀦𑀦𑁆𑀢𑀺 𑀅𑀢𑁆𑀢𑀦𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁄 𑀧𑀼𑀭𑁂𑀚𑀸𑀢𑀓𑀸𑀬𑀢𑁄 𑀧𑀘𑁆𑀙𑀸𑀚𑀸𑀢𑀸𑀦𑀁 𑀅𑀭𑀽𑀧𑀸𑀳𑀸𑀭𑀸𑀦𑀁. 𑀢𑁂 𑀳𑀺 𑀅𑀢𑁆𑀢𑀦𑀸 𑀲𑀳𑀚𑀸𑀢𑀅𑀭𑀽𑀧𑀥𑀫𑁆𑀫𑀸𑀦𑀁 𑀢𑀁𑀲𑀫𑀼𑀝𑁆𑀞𑀸𑀦𑀭𑀽𑀧𑀥𑀫𑁆𑀫𑀸𑀦𑀫𑁆𑀧𑀺 𑀲𑀳𑀚𑀸𑀢𑀅𑀢𑁆𑀣𑀺𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀧𑀼𑀭𑁂𑀚𑀸𑀢𑀸𑀦𑀁 𑀧𑀦 𑀯𑀢𑁆𑀣𑀽𑀦𑀁 𑀧𑀘𑁆𑀙𑀸𑀚𑀸𑀢𑀅𑀢𑁆𑀣𑀺𑀧𑀘𑁆𑀘𑀬𑁄. 𑀧𑀘𑁆𑀙𑀸𑀚𑀸𑀢𑀺𑀦𑁆𑀤𑁆𑀭𑀺𑀬𑀸𑀦𑀦𑁆𑀢𑀺 𑀧𑀘𑁆𑀙𑀸𑀚𑀸𑀢𑀸𑀦𑀁 𑀅𑀭𑀽𑀧𑀺𑀦𑁆𑀤𑁆𑀭𑀺𑀬𑀸𑀦𑀁. 𑀲𑁂𑀲𑀁 𑀆𑀳𑀸𑀭𑁂 𑀯𑀼𑀢𑁆𑀢𑀦𑀬𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀬𑀲𑁆𑀫𑀸 𑀏𑀢𑁂 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀸 𑀬𑀲𑁆𑀫𑀺𑀁 𑀔𑀡𑁂 𑀧𑀼𑀭𑁂𑀚𑀸𑀢𑀅𑀢𑁆𑀣𑀺𑀧𑀘𑁆𑀘𑀬𑀁 𑀮𑀪𑀦𑁆𑀢𑀺, 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀢𑀁𑀢𑀁𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀲𑀳𑀚𑀸𑀢𑀅𑀢𑁆𑀣𑀺𑀧𑀘𑁆𑀘𑀬𑁄 𑀧𑀘𑁆𑀙𑀸𑀚𑀸𑀢𑀅𑀢𑁆𑀣𑀺𑀧𑀘𑁆𑀘𑀬𑁄 𑀘 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑀳𑀸𑀧𑀺 𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑀪𑀸𑀯𑁄 𑀳𑁄𑀢𑀻’’𑀢𑀺. 𑀢𑀺𑀡𑁆𑀡𑀦𑁆𑀢𑀺 𑀲𑀳𑀚𑀸𑀢𑀸𑀤𑀻𑀦𑀁 𑀢𑀺𑀡𑁆𑀡𑀁. 𑀙𑀳𑀺 𑀪𑁂𑀤𑁂𑀳𑀻𑀢𑀺 𑀯𑀺𑀲𑀼𑀁 𑀕𑀳𑀺𑀢𑁂𑀳𑀺 𑀲𑀳𑀚𑀸𑀢𑀸𑀤𑀻𑀳𑀺 𑀧𑀜𑁆𑀘𑀳𑀺 𑀬𑀣𑀸𑀭𑀳𑀁 𑀏𑀓𑀚𑁆𑀛𑀁 𑀕𑀳𑀺𑀢𑀪𑁂𑀤𑁂𑀦 𑀘𑀸𑀢𑀺 𑀙𑀳𑀺 𑀅𑀢𑁆𑀣𑀺𑀧𑀘𑁆𑀘𑀬𑀪𑁂𑀤𑁂𑀳𑀺. 𑀏𑀓𑁂𑀓𑀁 𑀲𑀗𑁆𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑀺𑀧𑀘𑁆𑀘𑀬𑀮𑀓𑁆𑀔𑀡𑀁 𑀅𑀯𑀺𑀕𑀢𑀧𑀘𑁆𑀘𑀬𑀮𑀓𑁆𑀔𑀡𑀜𑁆𑀘 𑀯𑀺𑀲𑀼𑀁 𑀯𑀺𑀲𑀼𑀁 𑀙𑀳𑀺 𑀪𑁂𑀤𑁂𑀳𑀺 𑀲𑀗𑁆𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁.

𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀪𑁂𑀤𑀢𑁄𑀢𑀺 𑀯𑀢𑁆𑀢𑀩𑁆𑀩𑀁 𑀘𑀓𑁆𑀔𑀸𑀤𑀻𑀦𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀘 𑀅𑀥𑀺𑀧𑁆𑀧𑁂𑀢𑀢𑁆𑀢𑀸, 𑀲𑀧𑀭𑀲𑀦𑁆𑀢𑀸𑀦𑀺𑀓𑀸𑀦𑀜𑁆𑀘 𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸. 𑀦𑀺𑀲𑁆𑀲𑀬𑀧𑀼𑀭𑁂𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀸𑀦𑀁 𑀧𑀼𑀭𑁂𑀚𑀸𑀢𑀪𑀽𑀢𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀲𑀜𑁆𑀳𑀺 𑀧𑀼𑀭𑁂𑀚𑀸𑀢𑁂 𑀲𑀗𑁆𑀕𑀳𑁄. 𑀢𑀤𑁂𑀓𑀤𑁂𑀲𑀲𑁆𑀲𑀸𑀢𑀺 𑀆𑀭𑀫𑁆𑀫𑀡𑁂𑀓𑀤𑁂𑀲𑀲𑁆𑀲, 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀲𑀦𑁆𑀢𑀺 𑀦𑀺𑀲𑁆𑀲𑀬𑀸𑀤𑀻𑀦𑀁. 𑀉𑀧𑀦𑀺𑀲𑁆𑀲𑀬𑀸𑀤𑀻𑀲𑀽𑀢𑀺 𑀉𑀧𑀦𑀺𑀲𑁆𑀲𑀬𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀸𑀤𑀻𑀲𑀼. 𑀢𑀁 𑀧𑀦 𑀧𑀼𑀭𑁂𑀚𑀸𑀢𑀪𑀽𑀢𑀁 𑀆𑀭𑀫𑁆𑀫𑀡𑀁. 𑀢𑀢𑁆𑀣𑀸𑀢𑀺 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀲𑀗𑁆𑀕𑀳𑁂. 𑀬𑀣𑀸𑀯𑀼𑀢𑁆𑀢𑀦𑀬𑁄 𑀘𑁂𑀢𑁆𑀣 𑀏𑀓𑀦𑁆𑀢𑁂𑀦 𑀕𑀳𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀏𑀯-𑀲𑀤𑁆𑀤𑁄 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑁄, 𑀅𑀜𑁆𑀜𑀣𑀸 𑀢𑁂𑀲𑀼 𑀧𑀜𑁆𑀳𑁂𑀲𑀼 𑀏𑀓𑀲𑀪𑀸𑀯𑀢𑁄𑀯 𑀧𑀘𑁆𑀘𑀬𑀲𑁆𑀲 𑀆𑀕𑀫𑀦𑀁 𑀯𑀼𑀢𑁆𑀢𑀁 𑀲𑀺𑀬𑀸. 𑀢𑁂𑀦𑀸𑀢𑀺 ‘‘𑀏𑀓𑁄𑀯𑀸’’𑀢𑀺 𑀅𑀯𑀥𑀸𑀭𑀡𑁂𑀦 𑀅𑀕𑁆𑀕𑀳𑀺𑀢𑁂𑀦. 𑀢𑁂𑀲𑀽𑀢𑀺 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀲𑀼. 𑀉𑀓𑁆𑀓𑀝𑁆𑀞𑀯𑀲𑁂𑀦𑀸𑀢𑀺 ‘‘𑀏𑀓𑁄 𑀤𑁆𑀯𑁂’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀉𑀓𑁆𑀓𑀁𑀲𑀯𑀲𑁂𑀦. 𑀢𑁂 𑀢𑁂 𑀧𑀘𑁆𑀘𑀬𑁂 𑀲𑀗𑁆𑀕𑀳𑁂𑀢𑁆𑀯𑀸𑀢𑀺 𑀢𑁂 𑀳𑁂𑀢𑀼𑀆𑀤𑀺𑀧𑀘𑁆𑀘𑀬𑁂 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑁂𑀳𑀺 𑀲𑀗𑁆𑀕𑀳𑁂𑀢𑁆𑀯𑀸. 𑀤𑀲𑁆𑀲𑀺𑀢𑀧𑀘𑁆𑀘𑀬𑀧𑀭𑀺𑀘𑁆𑀙𑁂𑀤𑁄𑀢𑀺 𑀲𑁄𑀴𑀲𑀸𑀤𑀺𑀪𑁂𑀤𑁂𑀦 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑀺𑀢𑀧𑀘𑁆𑀘𑀬𑀧𑀭𑀺𑀘𑁆𑀙𑁂𑀤𑁄.

𑀧𑀪𑁂𑀤𑀧𑀭𑀺𑀳𑀸𑀦𑀻𑀲𑀽𑀢𑀺 𑀲𑀳𑀚𑀸𑀢𑀧𑀘𑁆𑀘𑀬𑀸𑀤𑀻𑀳𑀺 𑀲𑀗𑁆𑀕𑀳𑀺𑀢𑀧𑀘𑁆𑀘𑀬𑀧𑁆𑀧𑀪𑁂𑀤𑁂 𑀢𑀁𑀢𑀁𑀧𑀘𑁆𑀘𑀬𑀧𑀝𑀺𑀓𑁆𑀔𑁂𑀧𑁂 𑀧𑀜𑁆𑀳𑀸𑀧𑀭𑀺𑀳𑀸𑀦𑀺𑀬𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀦𑀳𑁂𑀢𑀼𑀧𑀘𑁆𑀘𑀬𑀸𑀢𑀺 𑀇𑀫𑀺𑀦𑀸 𑀳𑁂𑀢𑀼𑀧𑀘𑁆𑀘𑀬𑀢𑁄 𑀅𑀜𑁆𑀜𑁂 𑀧𑀘𑁆𑀘𑀬𑀸 𑀕𑀳𑀺𑀢𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀦𑀳𑁂𑀢𑀼𑀧𑀘𑁆𑀘𑀬𑀸𑀢𑀺 𑀏𑀢𑁆𑀣 𑀮𑀩𑁆𑀪𑀫𑀸𑀦𑀧𑀘𑁆𑀘𑀬𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸𑀢𑀺 𑀲𑀩𑁆𑀩𑀧𑀘𑁆𑀘𑀦𑀻𑀬𑀲𑀸𑀥𑀸𑀭𑀡𑀮𑀓𑁆𑀔𑀡𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀏𑀯 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀦 𑀳𑀺 𑀳𑁂𑀢𑀼𑀧𑀘𑁆𑀘𑀬𑁂 𑀧𑀘𑁆𑀘𑀦𑀻𑀬𑀢𑁄 𑀞𑀺𑀢𑁂 𑀳𑁂𑀢𑀼𑀥𑀫𑁆𑀫𑁄 𑀳𑁂𑀢𑀼𑀲𑁆𑀲 𑀥𑀫𑁆𑀫𑀲𑁆𑀲 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀯𑀻𑀲𑀢𑀺 𑀧𑀘𑁆𑀘𑀬𑀸𑀢𑀺 𑀳𑁂𑀢𑀼𑀧𑀘𑁆𑀘𑀬𑁂𑀦 𑀲𑀤𑁆𑀥𑀺𑀁 𑀯𑀻𑀲𑀢𑀺 𑀧𑀘𑁆𑀘𑀬𑀸. 𑀧𑀭𑀺𑀳𑀸𑀦𑀻𑀬𑀁 𑀯𑀺𑀢𑁆𑀣𑀸𑀭𑀓𑀣𑀁 𑀤𑀲𑁆𑀲𑁂𑀦𑁆𑀢𑁄𑀢𑀺 𑀬𑁄𑀚𑀦𑀸.

𑁫𑁨𑁮. 𑀢𑁂𑀳𑀺 𑀢𑁂𑀳𑀺 𑀧𑀘𑁆𑀘𑀬𑁂𑀳𑀻𑀢𑀺 𑀲𑀳𑀚𑀸𑀢𑀧𑀘𑁆𑀘𑀬𑀸𑀤𑀻𑀳𑀺 𑀢𑁂𑀳𑀺 𑀢𑁂𑀳𑀺 𑀲𑀗𑁆𑀕𑀸𑀳𑀓𑀪𑀽𑀢𑁂𑀳𑀺 𑀧𑀘𑁆𑀘𑀬𑁂𑀳𑀺. 𑀢𑁂 𑀢𑁂 𑀧𑀘𑁆𑀘𑀬𑀸𑀢𑀺 𑀲𑀗𑁆𑀕𑀳𑁂𑀢𑀩𑁆𑀩𑀸 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸𑀤𑀬𑁄 𑀳𑁂𑀢𑀼𑀧𑀘𑁆𑀘𑀬𑀸𑀤𑀬𑁄 𑀯𑀸 𑀢𑁂 𑀢𑁂 𑀧𑀘𑁆𑀘𑀬𑀸. 𑀅𑀜𑁆𑀜𑁂𑀲𑀁 𑀅𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀢𑁂𑀲𑀁 𑀲𑀩𑁆𑀩𑁂𑀲𑀁 𑀲𑀫𑁆𑀪𑀯𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀦 𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀤𑁆𑀯𑁂𑀬𑁂𑀯𑀸𑀢𑀺 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀁 𑀅𑀧𑀦𑁂𑀢𑁆𑀯𑀸 𑀆𑀳. 𑀅𑀩𑁆𑀬𑀸𑀓𑀢𑀲𑁆𑀲𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀦 𑀓𑁂𑀯𑀮𑀁 𑀓𑀼𑀲𑀮𑀲𑁆𑀲𑁂𑀯, 𑀅𑀣 𑀔𑁄 𑀅𑀩𑁆𑀬𑀸𑀓𑀢𑀲𑁆𑀲𑀧𑀻𑀢𑀺 𑀓𑀼𑀲𑀮𑀁 𑀲𑀫𑁆𑀧𑀺𑀡𑁆𑀟𑁂𑀢𑀺.

𑁫𑁩𑁦. 𑀢𑁂𑀦 𑀲𑀤𑁆𑀥𑀺𑀦𑁆𑀢𑀺 𑀯𑀢𑁆𑀣𑀼𑀦𑀸 𑀲𑀤𑁆𑀥𑀺𑀁. 𑀲𑀼𑀤𑁆𑀥𑀸𑀦𑀦𑁆𑀢𑀺 𑀓𑁂𑀯𑀮𑀸𑀦𑀁 𑀯𑀢𑁆𑀣𑀼𑀦𑀸 𑀯𑀺𑀦𑀸 𑀘 𑀕𑀳𑀺𑀢𑀸𑀦𑀁 𑀓𑀼𑀲𑀮𑀓𑁆𑀔𑀦𑁆𑀥𑀸𑀦𑀁. 𑀬𑀤𑀺𑀧𑀺 𑀯𑀢𑁆𑀣𑀼𑀦𑀸 𑀲𑀤𑁆𑀥𑀺𑀁 𑀲𑀳𑀚𑀸𑀢𑀝𑁆𑀞𑁄 𑀦𑀢𑁆𑀣𑀺, 𑀦𑀺𑀲𑁆𑀲𑀬𑀸𑀤𑀺𑀪𑀸𑀯𑁄 𑀧𑀦 𑀅𑀢𑁆𑀣𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀢𑁆𑀣𑀼𑀦𑀸 𑀧𑀦𑀸’’𑀢𑀺𑀆𑀤𑀺𑀫𑀸𑀳.

𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀸𑀦𑀁 𑀅𑀢𑁆𑀣𑀺𑀧𑀘𑁆𑀘𑀬𑁂𑀦 𑀲𑀗𑁆𑀕𑀳𑁂𑀢𑀩𑁆𑀩𑀢𑁆𑀢𑀸 𑀲𑀳𑀚𑀸𑀢𑀸𑀤𑀻𑀳𑀺 𑀲𑀗𑁆𑀕𑀳𑁂𑀢𑀩𑁆𑀩𑀸𑀦𑀁 𑀢𑀁𑀲𑀗𑁆𑀕𑀳𑁄 𑀲𑀼𑀓𑀭𑁄𑀢𑀺 𑀤𑀲𑁆𑀲𑁂𑀢𑀼𑀁 𑀉𑀧𑀦𑀺𑀲𑁆𑀲𑀬𑁂𑀦 𑀲𑀗𑁆𑀕𑀳𑁂𑀢𑀩𑁆𑀩𑀸𑀦𑀁 𑀲𑀗𑁆𑀕𑀳𑁄 𑀯𑀼𑀢𑁆𑀢𑀦𑀬𑁄 𑀏𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀘𑀢𑀽𑀲𑀼 𑀲𑀩𑁆𑀩𑀧𑀘𑁆𑀘𑀬𑁂 𑀲𑀗𑁆𑀕𑀡𑁆𑀳𑀺𑀢𑁆𑀯𑀸’’𑀢𑀺. 𑀓𑀫𑁆𑀫𑀁 𑀧𑀦 𑀲𑀳𑀚𑀸𑀢𑀽𑀧𑀦𑀺𑀲𑁆𑀲𑀬𑁂𑀳𑀺 𑀅𑀲𑀗𑁆𑀕𑀳𑁂𑀢𑀩𑁆𑀩𑀢𑀸𑀧𑀺 𑀅𑀢𑁆𑀣𑀻𑀢𑀺 𑀲𑀭𑀽𑀧𑀢𑁄 𑀕𑀳𑀺𑀢𑀁, 𑀅𑀜𑁆𑀜𑀣𑀸 ‘‘𑀢𑀻𑀲𑀼 𑀧𑀘𑁆𑀘𑀬𑁂𑀲𑀽’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀫𑀺𑀲𑁆𑀲𑀓𑀸𑀫𑀺𑀲𑁆𑀲𑀓𑀲𑁆𑀲𑀸𑀢𑀺 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀸𑀤𑀺𑀪𑀸𑀯𑁂𑀳𑀺 𑀫𑀺𑀲𑁆𑀲𑀓𑀲𑁆𑀲 𑀢𑀣𑀸 𑀅𑀫𑀺𑀲𑁆𑀲𑀓𑀲𑁆𑀲 𑀘. 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀦 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀢𑀺 𑀅𑀢𑁆𑀣𑀺𑀧𑀘𑁆𑀘𑀬𑀯𑀺𑀪𑀸𑀕𑀲𑀗𑁆𑀕𑀸𑀳𑀓𑀸𑀦𑀁 𑀲𑀳𑀚𑀸𑀢𑀸𑀤𑀻𑀦𑀁 𑀕𑀳𑀡𑁂𑀦. 𑀲𑀩𑁆𑀩𑀧𑀘𑁆𑀘𑀬𑀸𑀦𑀁…𑀧𑁂… 𑀳𑁄𑀢𑀻𑀢𑀺 𑀇𑀫𑀺𑀦𑀸 ‘‘𑀇𑀫𑀲𑁆𑀫𑀺𑀁 𑀧𑀦 𑀧𑀘𑁆𑀘𑀬𑀼𑀤𑁆𑀥𑀸𑀭𑁂’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁄𑀧𑀺 𑀧𑀘𑁆𑀘𑀬𑀲𑀗𑁆𑀕𑀳𑁄 𑀇𑀥 𑀅𑀢𑁆𑀣𑀢𑁄 𑀤𑀲𑁆𑀲𑀺𑀢𑁄𑀬𑁂𑀯𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺.

𑀦𑀺𑀲𑁆𑀲𑀬𑁄 𑀓𑀲𑁆𑀫𑀸 𑀦 𑀯𑀼𑀢𑁆𑀢𑁄? 𑀲𑀳𑀚𑀸𑀢𑀦𑀺𑀲𑁆𑀲𑀬𑁄 𑀧𑀼𑀭𑁂𑀚𑀸𑀢𑀦𑀺𑀲𑁆𑀲𑀬𑁄𑀢𑀺 𑀳𑀺 𑀲𑀓𑁆𑀓𑀸 𑀯𑀺𑀪𑀚𑀺𑀢𑀼𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀧𑁆𑀧𑀬𑀼𑀢𑁆𑀢𑁄 𑀯𑀸 𑀓𑀲𑁆𑀫𑀸 𑀦 𑀯𑀼𑀢𑁆𑀢𑁄? 𑀧𑀼𑀭𑁂𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑁄 𑀧𑀘𑁆𑀙𑀸𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑁄𑀢𑀺 𑀯𑀺𑀪𑀚𑀺𑀢𑀼𑀁 𑀲𑀓𑁆𑀓𑀸𑀢𑀺 𑀅𑀢𑁆𑀣𑁄. 𑀬𑀁 𑀫𑀺𑀲𑁆𑀲𑀓𑀸𑀫𑀺𑀲𑁆𑀲𑀓𑀪𑀸𑀯𑀁 𑀫𑀦𑀲𑀺 𑀓𑀢𑁆𑀯𑀸 ‘‘𑀅𑀯𑀢𑁆𑀢𑀩𑁆𑀩𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀺𑀲𑁆𑀲𑀬𑁄 𑀢𑀸𑀯𑀸’’𑀢𑀺𑀆𑀤𑀺𑀫𑀸𑀳. 𑀯𑀺𑀲𑁂𑀲𑀺𑀢𑀩𑁆𑀩𑁄 ‘‘𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀅𑀯𑀺𑀲𑁂𑀲𑁂𑀦 𑀧𑀸𑀴𑀺𑀬𑀁 𑀯𑀼𑀢𑁆𑀢𑀢𑁆𑀢𑀸. 𑀲𑁄 𑀯𑀺𑀬𑀸𑀢𑀺 𑀅𑀢𑁆𑀣𑀺𑀧𑀘𑁆𑀘𑀬𑁄 𑀯𑀺𑀬, 𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀯𑀺𑀬 𑀯𑀸 𑀅𑀢𑁆𑀣𑀺𑀧𑀘𑁆𑀘𑀬𑀯𑀺𑀲𑁂𑀲𑀸𑀪𑀸𑀯𑁂𑀦 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀦 𑀯𑀢𑁆𑀢𑀩𑁆𑀩𑁄𑀯. 𑀤𑁆𑀯𑀺𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀯𑀺𑀬 𑀧𑀪𑁂𑀤𑀲𑀩𑁆𑀪𑀸𑀯𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀸𑀦𑀜𑁆𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀣𑀸𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑀢𑁆𑀣𑀁 𑀧𑀸𑀴𑀺𑀬𑀸 𑀲𑀫𑀢𑁆𑀣𑁂𑀢𑀼𑀁 ‘‘𑀯𑀓𑁆𑀔𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀫𑀕𑁆𑀕𑀨𑀮𑀥𑀫𑁆𑀫𑀸𑀦𑀁 𑀫𑀕𑁆𑀕𑀨𑀮𑀢𑀁𑀲𑀫𑀼𑀝𑁆𑀞𑀸𑀦𑀭𑀽𑀧𑀯𑀲𑁂𑀦 𑀲𑀳𑀚𑀸𑀢𑀅𑀢𑁆𑀣𑀺𑀧𑀘𑁆𑀘𑀬𑁄 𑀢𑁂𑀲𑀁𑀬𑁂𑀯 𑀧𑀼𑀭𑁂𑀚𑀸𑀢𑀘𑀢𑀼𑀲𑀦𑁆𑀢𑀢𑀺𑀭𑀽𑀧𑀯𑀲𑁂𑀦 𑀧𑀘𑁆𑀙𑀸𑀚𑀸𑀢𑀅𑀢𑁆𑀣𑀺𑀧𑀘𑁆𑀘𑀬𑁄 𑀯𑀼𑀢𑁆𑀢𑁄, 𑀦 𑀧𑀦 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀪𑀸𑀯𑁄 𑀯𑀓𑁆𑀔𑀢𑀻𑀢𑀺 𑀬𑁄𑀚𑀦𑀸. 𑀲𑁄𑀢𑀺 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄.

𑀳𑁂𑀢𑀼𑀆𑀤𑀻𑀦𑀁 𑀲𑀳𑀚𑀸𑀢𑀦𑁆𑀢𑁄𑀕𑀥𑀢𑁆𑀢𑀸 𑀳𑁂𑀢𑀼𑀆𑀤𑀬𑁄 𑀢𑀩𑁆𑀩𑀺𑀲𑁂𑀲𑀸 𑀳𑁄𑀦𑁆𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀲𑀳𑀚𑀸𑀢𑀧𑀘𑁆𑀘𑀬𑁄 𑀘 𑀳𑁂𑀢𑀼𑀆𑀤𑀻𑀳𑀺 𑀯𑀺𑀲𑁂𑀲𑁂𑀢𑀩𑁆𑀩𑁄’’𑀢𑀺. 𑀲𑁄𑀢𑀺 𑀲𑀳𑀚𑀸𑀢𑀧𑀘𑁆𑀘𑀬𑁄. 𑀯𑀺𑀭𑀼𑀤𑁆𑀥𑀧𑀘𑁆𑀘𑀬𑁂𑀳𑀻𑀢𑀺 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀲𑁆𑀲 𑀲𑀳𑀚𑀸𑀢𑀸𑀤𑀺𑀪𑀸𑀯𑁂𑀦 𑀯𑀺𑀭𑀼𑀤𑁆𑀥𑁂𑀳𑀺 𑀧𑀘𑁆𑀘𑀬𑁂𑀳𑀺. 𑀢𑁂𑀦𑀸𑀳 ‘‘𑀉𑀧𑁆𑀧𑀢𑁆𑀢𑀺𑀓𑀸𑀮𑀯𑀺𑀭𑀼𑀤𑁆𑀥𑁂𑀳𑀺 𑀧𑀘𑁆𑀘𑀬𑁂𑀳𑀻’’𑀢𑀺.

𑀧𑀘𑁆𑀘𑀦𑀻𑀬𑀼𑀤𑁆𑀥𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀘𑁆𑀘𑀦𑀻𑀬𑀕𑀡𑀦𑀯𑀡𑁆𑀡𑀦𑀸

𑀦𑀳𑁂𑀢𑀼𑀫𑀽𑀮𑀓𑀯𑀡𑁆𑀡𑀦𑀸

𑁫𑁩𑁨. 𑀅𑀥𑀺𑀧𑀢𑀺𑀧𑀘𑁆𑀘𑀬𑀸𑀤𑀺𑀪𑀽𑀢𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑁄𑀢𑀺 𑀆𑀭𑀫𑁆𑀫𑀡𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁂 𑀯𑀤𑀢𑀺. 𑀢𑁂 𑀘 𑀬𑀲𑁆𑀫𑀸 𑀆𑀭𑀫𑁆𑀫𑀡𑀲𑀪𑀸𑀯𑀸 𑀏𑀯, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀧𑀭𑀺𑀳𑀸𑀬𑀢𑀺𑀬𑁂𑀯𑀸’’𑀢𑀺. 𑀧𑀦𑁆𑀦𑀭𑀲𑀲𑀽𑀢𑀺 𑀤𑀼𑀢𑀺𑀬𑁂 𑀲𑀳𑀚𑀸𑀢𑀧𑀘𑁆𑀘𑀬𑁂 ‘‘𑀳𑁂𑀢𑀼𑀧𑀘𑁆𑀘𑀬𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀲𑀼 𑀧𑀦𑁆𑀦𑀭𑀲𑀲𑀼. 𑀏𑀓𑀸𑀤𑀲𑀦𑁆𑀦𑀁 𑀯𑀲𑁂𑀦𑀸𑀢𑀺 𑀲𑀳𑀚𑀸𑀢𑀧𑀘𑁆𑀘𑀬𑁄, 𑀲𑀳𑀚𑀸𑀢𑀢𑀸𑀯𑀺𑀲𑀺𑀝𑁆𑀞𑀸 𑀅𑀥𑀺𑀧𑀢𑀺𑀦𑀺𑀲𑁆𑀲𑀬𑀓𑀫𑁆𑀫𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀢𑁆𑀣𑀺𑀅𑀯𑀺𑀕𑀢𑀳𑁂𑀢𑀼𑀛𑀸𑀦𑀫𑀕𑁆𑀕𑀸 𑀘𑀸𑀢𑀺 𑀇𑀫𑁂𑀲𑀁 𑀏𑀓𑀸𑀤𑀲𑀦𑁆𑀦𑀁 𑀯𑀲𑁂𑀦. 𑀲𑀳𑀚𑀸𑀢𑁂 𑀅𑀦𑁆𑀢𑁄𑀕𑀥𑀸 𑀳𑁂𑀢𑀼𑀆𑀤𑀬𑁄. 𑀢𑀲𑁆𑀫𑀺𑀁 𑀧𑀝𑀺𑀓𑁆𑀔𑀺𑀢𑁆𑀢𑁂𑀢𑀺 𑀢𑀲𑁆𑀫𑀺𑀁 𑀲𑀳𑀚𑀸𑀢𑁂 𑀧𑀝𑀺𑀓𑁆𑀔𑀺𑀢𑁆𑀢𑁂 𑀧𑀘𑁆𑀘𑀦𑀻𑀬𑀢𑁄 𑀞𑀺𑀢𑁂. 𑀅𑀦𑀦𑁆𑀢𑁄𑀕𑀥𑀸 𑀲𑀳𑀚𑀸𑀢𑁂, 𑀓𑁂 𑀧𑀦 𑀢𑁂𑀢𑀺 𑀆𑀳 ‘‘𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀼𑀭𑁂𑀚𑀸𑀢𑀦𑀺𑀲𑁆𑀲𑀬𑀸𑀤𑀬𑁄’’𑀢𑀺. 𑀆𑀭𑀫𑁆𑀫𑀡𑀸𑀤𑀺𑀆𑀓𑀸𑀭𑁂𑀦𑀸𑀢𑀺 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀦𑀺𑀲𑁆𑀲𑀬𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀸𑀤𑀺𑀆𑀓𑀸𑀭𑁂𑀦.

𑀢𑀲𑁆𑀫𑀺𑀁 𑀧𑀝𑀺𑀓𑁆𑀔𑀺𑀢𑁆𑀢𑁂𑀢𑀺 𑀢𑀲𑁆𑀫𑀺𑀁 𑀲𑀳𑀚𑀸𑀢𑀧𑀘𑁆𑀘𑀬𑁂 𑀧𑀝𑀺𑀓𑁆𑀔𑀺𑀢𑁆𑀢𑁂. 𑀇𑀫𑁂 𑀯𑀸𑀭𑀸𑀢𑀺 𑀲𑀳𑀚𑀸𑀢𑀁 𑀧𑀼𑀭𑁂𑀚𑀸𑀢𑀦𑁆𑀢𑀺 𑀯𑀺𑀲𑁆𑀲𑀚𑁆𑀚𑀺𑀢𑀯𑀸𑀭𑀸. 𑀏𑀢𑁂 𑀦𑀺𑀲𑁆𑀲𑀬𑀸𑀤𑀬𑁄𑀢𑀺 𑀲𑀳𑀚𑀸𑀢𑀢𑀸𑀯𑀺𑀲𑀺𑀝𑁆𑀞𑁂 𑀦𑀺𑀲𑁆𑀲𑀬𑀸𑀤𑀺𑀓𑁂 𑀯𑀤𑀢𑀺, 𑀦 𑀇𑀢𑀭𑁂. 𑀢𑁂𑀦𑀸𑀳 ‘‘𑀬𑀲𑁆𑀫𑀸 𑀘…𑀧𑁂… 𑀧𑀝𑀺𑀓𑁆𑀔𑁂𑀧𑁂𑀦 𑀧𑀝𑀺𑀓𑁆𑀔𑀺𑀢𑁆𑀢𑀸’’𑀢𑀺.

𑀦𑀺𑀲𑁆𑀲𑀬𑀸𑀤𑀺𑀪𑀽𑀢𑀜𑁆𑀘 𑀲𑀳𑀚𑀸𑀢𑀧𑀘𑁆𑀘𑀬𑀁 𑀞𑀧𑁂𑀢𑁆𑀯𑀸𑀢𑀺 𑀏𑀢𑁂𑀦 ‘‘𑀞𑀧𑁂𑀢𑁆𑀯𑀸 𑀲𑀳𑀚𑀸𑀢𑀧𑀘𑁆𑀘𑀬’’𑀦𑁆𑀢𑀺 𑀏𑀢𑁆𑀣 𑀅𑀦𑁆𑀢𑁄𑀕𑀥𑀦𑀺𑀲𑁆𑀲𑀬𑀸𑀤𑀺𑀪𑀸𑀯𑁄𑀬𑁂𑀯 𑀲𑀳𑀚𑀸𑀢𑀧𑀘𑁆𑀘𑀬𑁄 𑀕𑀳𑀺𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀦𑀺𑀲𑁆𑀲𑀬𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀳𑁂𑀢𑀼𑀆𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀥𑀫𑁆𑀫𑀯𑀲𑁂𑀦 𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀢𑁄𑀢𑀺 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀥𑀫𑁆𑀫𑀯𑀲𑁂𑀦 𑀲𑀳𑀚𑀸𑀢𑀸𑀤𑀻𑀳𑀺 𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀢𑁄 𑀅𑀜𑁆𑀜𑀫𑀜𑁆𑀜𑁂 𑀧𑀝𑀺𑀓𑁆𑀔𑀺𑀢𑁆𑀢𑁂 ‘‘𑀓𑀼𑀲𑀮𑁄 𑀓𑀼𑀲𑀮𑀸𑀩𑁆𑀬𑀸𑀓𑀢𑀲𑁆𑀲𑀸’’𑀢𑀺 𑀯𑀸𑀭𑁄 𑀧𑀭𑀺𑀳𑀸𑀬𑀢𑀺. 𑀢𑁂𑀲𑀁 𑀢𑁂𑀲𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀦𑁆𑀢𑀺 𑀇𑀤𑀁 𑀲𑀸𑀫𑀜𑁆𑀜𑀯𑀘𑀦𑀫𑁆𑀧𑀺 ‘‘𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀲𑀗𑁆𑀕𑀳𑀁 𑀕𑀢𑀸’’𑀢𑀺 𑀯𑀘𑀦𑀢𑁄 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀮𑀸𑀪𑀻𑀦𑀁𑀬𑁂𑀯 𑀕𑀳𑀡𑀁 𑀲𑀺𑀬𑀸𑀢𑀺 𑀆𑀲𑀗𑁆𑀓𑀁 𑀦𑀺𑀯𑀢𑁆𑀢𑁂𑀢𑀼𑀁 ‘‘𑀓𑀼𑀲𑀮𑁄 𑀘 𑀓𑀼𑀲𑀮𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀫𑀼𑀤𑀸𑀬𑀪𑀽𑀢𑁄𑀢𑀺 𑀘𑀢𑀼𑀓𑁆𑀔𑀦𑁆𑀥𑀲𑀫𑀼𑀤𑀸𑀬𑀪𑀽𑀢𑁄. 𑀏𑀓𑀤𑁂𑀲𑀪𑀽𑀢𑁂𑀳𑀻𑀢𑀺 𑀢𑀲𑁆𑀲𑁂𑀯 𑀏𑀓𑀤𑁂𑀲𑀪𑀽𑀢𑁂𑀳𑀺. ‘‘𑀓𑀼𑀲𑀮𑁄 𑀧𑀦𑀸’’𑀢𑀺𑀆𑀤𑀺 ‘‘𑀦𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂𑀦…𑀧𑁂… 𑀧𑀭𑀺𑀳𑀸𑀬𑀢𑀻’’𑀢𑀺 𑀇𑀫𑀲𑁆𑀲 𑀅𑀝𑁆𑀞𑀓𑀣𑀸𑀯𑀘𑀦𑀲𑁆𑀲 𑀲𑀫𑀸𑀥𑀸𑀦𑀯𑀘𑀦𑀁.

𑀭𑀽𑀧𑀓𑁆𑀔𑀦𑁆𑀥𑁂𑀓𑀤𑁂𑀲𑁄𑀯 𑀳𑁄𑀦𑁆𑀢𑀺 𑀭𑀽𑀧𑀸𑀳𑀸𑀭𑀭𑀽𑀧𑀺𑀦𑁆𑀤𑁆𑀭𑀺𑀬𑀯𑀲𑁂𑀦, ‘‘𑀏𑀓𑀦𑁆𑀢𑁂𑀦 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀥𑀫𑁆𑀫𑁂𑀳𑀻’’𑀢𑀺 𑀯𑀼𑀢𑁆𑀢𑀥𑀫𑁆𑀫𑀸 ‘‘𑀢𑁂’’𑀢𑀺 𑀧𑀘𑁆𑀘𑀸𑀫𑀝𑁆𑀞𑀸𑀢𑀺 𑀆𑀳 ‘‘𑀢𑁂𑀢𑀺 𑀢𑁂 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀥𑀫𑁆𑀫𑀸’’𑀢𑀺.

𑁫𑁩𑁩. 𑀧𑀘𑁆𑀘𑀦𑀻𑀬𑀕𑀡𑀦𑀁 𑀤𑀲𑁆𑀲𑁂𑀢𑀼𑀦𑁆𑀢𑀺 𑀯𑀼𑀢𑁆𑀢𑁂𑀧𑀺 𑀦𑀦𑀼 𑀧𑀘𑁆𑀘𑀬𑀕𑀡𑀦𑀫𑁂𑀯 𑀤𑀲𑁆𑀲𑀺𑀢𑀁 𑀳𑁄𑀢𑀻𑀢𑀺 𑀓𑀲𑁆𑀲𑀘𑀺 𑀆𑀲𑀗𑁆𑀓𑀸 𑀲𑀺𑀬𑀸𑀢𑀺 𑀢𑀁 𑀦𑀺𑀯𑀢𑁆𑀢𑁂𑀦𑁆𑀢𑁄 𑀆𑀳 ‘‘𑀧𑀘𑁆𑀘𑀦𑀻𑀬𑀯𑀸𑀭𑀕𑀡𑀦𑀸 𑀳𑀺 𑀤𑀲𑁆𑀲𑀺𑀢𑀸’’𑀢𑀺. 𑀩𑀮𑀯𑀓𑀫𑁆𑀫𑀁 𑀯𑀺𑀧𑀸𑀓𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀺, 𑀇𑀢𑀭𑀁 𑀓𑀫𑁆𑀫𑀧𑀘𑁆𑀘𑀬𑁄 𑀏𑀯𑀸𑀢𑀺 𑀆𑀳 ‘‘𑀯𑀺𑀧𑀸𑀓𑀲𑁆𑀲𑀧𑀺 𑀧𑀦…𑀧𑁂… 𑀓𑀫𑁆𑀫𑀧𑀘𑁆𑀘𑀬𑁄 𑀳𑁄𑀢𑀻’’𑀢𑀺.

𑀦𑀳𑁂𑀢𑀼𑀫𑀽𑀮𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫𑁩𑁪. 𑀧𑀭𑀺𑀘𑁆𑀙𑀺𑀦𑁆𑀦𑀕𑀡𑀦𑀸𑀦𑀻𑀢𑀺 𑀇𑀤𑀁 𑀦 𑀕𑀡𑀦𑀸𑀧𑁂𑀓𑁆𑀔𑀁, 𑀅𑀣 𑀔𑁄 𑀯𑀺𑀲𑁆𑀲𑀚𑁆𑀚𑀦𑀸𑀧𑁂𑀓𑁆𑀔𑀦𑁆𑀢𑀺 𑀆𑀳 ‘‘𑀧𑀭𑀺𑀘𑁆𑀙𑀺𑀦𑁆𑀦𑀕𑀡𑀦𑀸𑀦𑀺 𑀯𑀺𑀲𑁆𑀲𑀚𑁆𑀚𑀦𑀸𑀦𑀻’’𑀢𑀺. 𑀧𑀘𑁆𑀘𑀦𑀻𑀬𑀢𑁄 𑀞𑀺𑀢𑁄𑀧𑀺 𑀳𑁂𑀢𑀼 𑀦𑀬𑀸𑀦𑀁 𑀫𑀽𑀮𑀪𑀸𑀯𑁂𑀦𑁂𑀯 𑀞𑀺𑀢𑁄𑀢𑀺 𑀆𑀳 ‘‘𑀳𑁂𑀢𑀼𑀫𑀽𑀮𑀓𑁂’’𑀢𑀺, 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀦𑀳𑁂𑀢𑀼𑀫𑀽𑀮𑀓’’𑀫𑀺𑀘𑁆𑀘𑁂𑀯 𑀯𑀼𑀢𑁆𑀢𑀁.

𑁫𑁩𑁮. 𑀫𑀽𑀮𑀁 𑀲𑀗𑁆𑀔𑀺𑀧𑀺𑀢𑁆𑀯𑀸𑀢𑀺 𑀲𑀢𑁆𑀢𑀫𑀽𑀮𑀓𑀁 𑀅𑀝𑁆𑀞𑀫𑀽𑀮𑀓𑀁 𑀦𑀯𑀫𑀽𑀮𑀓𑀜𑁆𑀘 𑀲𑀗𑁆𑀔𑀺𑀧𑀺𑀢𑁆𑀯𑀸. 𑀤𑁆𑀯𑀻𑀲𑀽𑀢𑀺 ‘‘𑀢𑀻𑀡𑀻’’𑀢𑀺 𑀯𑀼𑀢𑁆𑀢𑁂𑀲𑀼 𑀢𑀻𑀲𑀼 𑀯𑀺𑀲𑁆𑀲𑀚𑁆𑀚𑀦𑁂𑀲𑀼 𑀧𑀼𑀭𑀺𑀫𑁂𑀲𑀼 𑀤𑁆𑀯𑀻𑀲𑀼 ‘‘𑀓𑀼𑀲𑀮𑁄 𑀥𑀫𑁆𑀫𑁄 𑀅𑀩𑁆𑀬𑀸𑀓𑀢𑀲𑁆𑀲, 𑀅𑀓𑀼𑀲𑀮𑁄 𑀥𑀫𑁆𑀫𑁄 𑀅𑀩𑁆𑀬𑀸𑀓𑀢𑀲𑁆𑀲𑀸’’𑀢𑀺 𑀇𑀫𑁂𑀲𑀼. 𑀢𑁂𑀦𑀸𑀳 ‘‘𑀯𑀺𑀧𑀸𑀓𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁄 𑀳𑁄𑀢𑀻’’𑀢𑀺. 𑀢𑀢𑀺𑀬𑁂𑀢𑀺 ‘‘𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀅𑀩𑁆𑀬𑀸𑀓𑀢𑀲𑁆𑀲𑀸’’𑀢𑀺 𑀇𑀫𑀲𑁆𑀫𑀺𑀁. 𑀢𑁂𑀲𑀫𑀼𑀝𑁆𑀞𑀸𑀦𑀺𑀓𑀓𑀸𑀬𑁄𑀢𑀺 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑀸𑀦𑀁 𑀯𑀲𑁂𑀦 𑀢𑁂𑀲𑀫𑀼𑀝𑁆𑀞𑀸𑀦𑀺𑀓𑀓𑀸𑀬𑁄.

𑁫𑁪𑁫. 𑀏𑀢𑀁 𑀤𑁆𑀯𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀬𑀣𑀸 𑀅𑀭𑀽𑀧𑀁 𑀅𑀭𑀽𑀧𑀲𑁆𑀲, 𑀏𑀯𑀁 𑀭𑀽𑀧𑀫𑁆𑀧𑀺 𑀭𑀽𑀧𑀲𑁆𑀲 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀦 𑀳𑁄𑀢𑀻𑀢𑀺. 𑀭𑀽𑀧𑀸𑀩𑁆𑀬𑀸𑀓𑀢𑁄 𑀅𑀭𑀽𑀧𑀸𑀩𑁆𑀬𑀸𑀓𑀢𑀲𑁆𑀲𑀸𑀢𑀺 𑀇𑀤𑀁 𑀯𑀢𑁆𑀣𑀼𑀔𑀦𑁆𑀥𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀭𑀽𑀧𑀸𑀩𑁆𑀬𑀸𑀓𑀢𑁄 𑀭𑀽𑀧𑀸𑀩𑁆𑀬𑀸𑀓𑀢𑀲𑁆𑀲𑀸𑀢𑀺 𑀇𑀤𑀁 𑀧𑀦 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀜𑁆𑀘𑀸𑀢𑀺 𑀢𑁂𑀲𑀁 𑀏𑀓𑀦𑁆𑀢𑀺𑀓𑁄 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀪𑀸𑀯𑁄𑀢𑀺 𑀆𑀳 ‘‘𑀲𑀳𑀚𑀸𑀢…𑀧𑁂… 𑀳𑁄𑀢𑀺𑀬𑁂𑀯𑀸’’𑀢𑀺. 𑀲𑀳𑀚𑀸𑀢𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀯𑀲𑁂𑀦𑀸𑀢𑀺 𑀲𑀳𑀚𑀸𑀢𑀅𑀭𑀽𑀧𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀯𑀲𑁂𑀦.

𑁫𑁪𑁬. 𑀏𑀓𑀫𑀽𑀮𑀓𑁂𑀓𑀸𑀯𑀲𑀸𑀦𑀸 𑀅𑀦𑀦𑁆𑀢𑀭𑀧𑀓𑀢𑀽𑀧𑀦𑀺𑀲𑁆𑀲𑀬𑀯𑀲𑁂𑀦 𑀮𑀩𑁆𑀪𑀦𑁆𑀢𑀻𑀢𑀺 𑀇𑀤𑀁 𑀬𑀣𑀸𑀭𑀳𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀢𑀁 𑀬𑀣𑀸𑀭𑀳𑀁 𑀧𑀝𑀺𑀓𑁆𑀔𑁂𑀧𑀸𑀧𑀝𑀺𑀓𑁆𑀔𑁂𑀧𑀯𑀲𑁂𑀦𑀧𑀺 𑀤𑀲𑁆𑀲𑁂𑀢𑀩𑁆𑀩𑀦𑁆𑀢𑀺 ‘‘𑀅𑀢𑁆𑀣𑀺𑀧𑀘𑁆𑀘𑀬𑁂 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀼𑀭𑀺𑀫𑁂𑀲𑀽𑀢𑀺 𑀦𑀸𑀭𑀫𑁆𑀫𑀡𑀸𑀤𑀻𑀲𑀼. 𑀦𑀯𑀸𑀢𑀺 𑀏𑀓𑀫𑀽𑀮𑀓𑀸𑀯𑀲𑀸𑀦𑀸 𑀦𑀯. 𑀤𑁆𑀯𑁂𑀬𑁂𑀯𑀸𑀢𑀺 ‘‘𑀓𑀼𑀲𑀮𑁄 𑀥𑀫𑁆𑀫𑁄 𑀅𑀩𑁆𑀬𑀸𑀓𑀢𑀲𑁆𑀲, 𑀅𑀓𑀼𑀲𑀮𑁄 𑀥𑀫𑁆𑀫𑁄 𑀅𑀩𑁆𑀬𑀸𑀓𑀢𑀲𑁆𑀲𑀸’’𑀢𑀺 𑀇𑀫𑁂 𑀤𑁆𑀯𑁂𑀬𑁂𑀯.

𑀧𑀘𑁆𑀘𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀯𑀡𑁆𑀡𑀦𑀸

𑁫𑁫𑁦. 𑀇𑀫𑁂𑀳𑁂𑀯𑀸𑀢𑀺 ‘‘𑀓𑀼𑀲𑀮𑁄 𑀓𑀼𑀲𑀮𑀲𑁆𑀲, 𑀅𑀓𑀼𑀲𑀮𑁄 𑀅𑀓𑀼𑀲𑀮𑀲𑁆𑀲𑀸’’𑀢𑀺 𑀇𑀫𑁂𑀳𑀺 𑀏𑀯 𑀲𑀫𑀸𑀦𑀸 𑀳𑁄𑀦𑁆𑀢𑀺 𑀓𑀼𑀲𑀮𑀸𑀤𑀺𑀢𑀸𑀲𑀸𑀫𑀜𑁆𑀜𑁂𑀦. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀢𑁆𑀣𑀸𑀪𑀸𑀯𑀢𑁄 𑀧𑀦 𑀦 𑀅𑀦𑀼𑀭𑀽𑀧𑀸’’𑀢𑀺. ‘‘𑀓𑀼𑀲𑀮𑁄 𑀓𑀼𑀲𑀮𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀲𑀢𑀺𑀧𑀺 𑀉𑀤𑁆𑀤𑁂𑀲𑀢𑁄 𑀲𑀸𑀫𑀜𑁆𑀜𑁂 𑀬𑁂𑀪𑀼𑀬𑁆𑀬𑁂𑀦 𑀲𑀺𑀬𑀸 𑀯𑀺𑀪𑀗𑁆𑀕𑁂 𑀯𑀺𑀲𑁂𑀲𑁄𑀢𑀺 𑀆𑀳 ‘‘𑀬𑀣𑀸𑀬𑁄𑀕𑀁 𑀦𑀺𑀤𑁆𑀤𑁂𑀲𑀢𑁄 𑀘𑀸’’𑀢𑀺.

𑁫𑁫𑁧. 𑀳𑁂𑀢𑀼𑀦𑀸𑀫𑀦𑁆𑀢𑀺 𑀳𑁂𑀢𑀼 𑀘 𑀢𑀁 𑀦𑀸𑀫𑀜𑁆𑀘𑀸𑀢𑀺 𑀳𑁂𑀢𑀼𑀦𑀸𑀫𑀁. 𑀧𑀘𑁆𑀘𑀬𑀦𑁆𑀢𑀺 𑀢𑀫𑁂𑀯 𑀧𑀘𑁆𑀘𑀬𑀪𑀽𑀢𑀁 𑀲𑀦𑁆𑀥𑀸𑀬𑀸𑀢𑀺 𑀬𑁄𑀚𑀦𑀸.

𑁫𑁫𑁨. 𑀤𑁆𑀯𑀺𑀦𑁆𑀦𑀫𑁆𑀧𑀺 𑀅𑀥𑀺𑀧𑀢𑀻𑀦𑀦𑁆𑀢𑀺 𑀲𑀳𑀚𑀸𑀢𑀸𑀭𑀫𑁆𑀫𑀡𑀸𑀥𑀺𑀧𑀢𑀻𑀦𑀁 𑀯𑀲𑁂𑀦, 𑀢𑀁 ‘‘𑀓𑀼𑀲𑀮𑀁 𑀓𑀼𑀲𑀮𑀲𑁆𑀲 𑀲𑀳𑀚𑀸𑀢𑀢𑁄 𑀘𑁂𑀯 𑀆𑀭𑀫𑁆𑀫𑀡𑀢𑁄 𑀘𑀸’’𑀢𑀺𑀆𑀤𑀺𑀦𑀸 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀦𑀸𑀭𑀫𑁆𑀫𑀡𑁂 𑀲𑀢𑁆𑀢𑀸𑀢𑀺 𑀲𑀳𑀚𑀸𑀢𑀸𑀥𑀺𑀧𑀢𑀺𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁, 𑀦 𑀲𑀳𑀚𑀸𑀢𑁂 𑀲𑀢𑁆𑀢𑀸𑀢𑀺 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸. 𑀏𑀯𑀦𑁆𑀢𑀺 𑀬𑀣𑀸 𑀅𑀥𑀺𑀧𑀢𑀺𑀫𑁆𑀳𑀺 𑀯𑀼𑀢𑁆𑀢𑀁, 𑀏𑀯𑀁 𑀲𑀩𑁆𑀩𑀢𑁆𑀣 𑀲𑀩𑁆𑀩𑀧𑀘𑁆𑀘𑀬𑁂𑀲𑀼. ‘‘𑀢𑀲𑁆𑀫𑀺𑀁 𑀢𑀲𑁆𑀫𑀺𑀁…𑀧𑁂… 𑀉𑀤𑁆𑀥𑀭𑀺𑀢𑀩𑁆𑀩𑀸’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀕𑀡𑀦𑀼𑀤𑁆𑀥𑀸𑀭𑀲𑁆𑀲 𑀲𑀼𑀓𑀭𑀢𑀁 𑀉𑀧𑀸𑀬𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀦𑀼𑀮𑁄𑀫𑁂…𑀧𑁂… 𑀯𑀺𑀜𑁆𑀜𑀸𑀢𑀼’’𑀦𑁆𑀢𑀺 𑀆𑀳.

𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑀯𑀡𑁆𑀡𑀦𑀸

𑁬𑁩𑁧. 𑀧𑀭𑀺𑀳𑀸𑀧𑀦𑀕𑀡𑀦𑀸𑀬𑀸𑀢𑀺 𑀧𑀭𑀺𑀳𑀸𑀧𑁂𑀢𑀩𑁆𑀩𑀕𑀡𑀦𑀸𑀬 𑀲𑀫𑀸𑀦𑀢𑁆𑀢𑀜𑁆𑀘 𑀦 𑀏𑀓𑀦𑁆𑀢𑀺𑀓𑀁 𑀊𑀦𑀢𑀫𑀪𑀸𑀯𑀲𑁆𑀲𑀧𑀺 𑀲𑀫𑁆𑀪𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀦𑀳𑁂𑀢𑀼𑀦𑀸𑀭𑀫𑁆𑀫𑀡𑀤𑀼𑀓𑀲𑁆𑀲𑀸’’𑀢𑀺𑀆𑀤𑀺. 𑀢𑀢𑁆𑀣 𑀲𑀤𑁆𑀥𑀺𑀁 𑀬𑁄𑀚𑀺𑀬𑀫𑀸𑀦𑁂𑀦 𑀊𑀦𑀢𑀭𑀕𑀡𑀦𑁂𑀦 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦 𑀧𑀭𑀺𑀳𑀻𑀦𑀸𑀧𑀻𑀢𑀺 𑀬𑁄𑀚𑀦𑀸. 𑀲𑀤𑁆𑀥𑀺𑀁 𑀧𑀭𑀺𑀳𑀻𑀦𑀸𑀧𑀻𑀢𑀺 𑀯𑀸 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 ‘‘𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦𑀸’’𑀢𑀺 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂 𑀓𑀭𑀡𑀯𑀘𑀦𑀁. 𑀏𑀢𑀦𑁆𑀢𑀺 𑀮𑀓𑁆𑀔𑀡𑀁.

𑀅𑀝𑁆𑀞𑀸𑀦𑀦𑁆𑀢𑀺 𑀅𑀦𑀼𑀮𑁄𑀫𑀢𑁄 𑀅𑀝𑁆𑀞𑀸𑀦𑀁 𑀅𑀢𑀺𑀝𑁆𑀞𑀦𑀁. 𑀢𑀺𑀝𑁆𑀞𑀦𑁆𑀢𑀻𑀢𑀺 𑀅𑀦𑀼𑀮𑁄𑀫𑀢𑁄𑀢𑀺 𑀬𑁄𑀚𑀦𑀸. 𑀢𑁂𑀲𑀦𑁆𑀢𑀺 𑀳𑁂𑀢𑀼𑀆𑀤𑀻𑀦𑀁. 𑀇𑀢𑀭𑁂𑀲𑀽𑀢𑀺 𑀬𑀸𑀤𑀺𑀲𑀸 𑀅𑀥𑀺𑀧𑁆𑀧𑁂𑀢𑀸, 𑀢𑁂 𑀤𑀲𑁆𑀲𑁂𑀢𑀼𑀁 ‘‘𑀅𑀥𑀺𑀧𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀫𑀸𑀦𑀺 𑀤𑁆𑀯𑁂𑀢𑀺 ‘‘𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀅𑀩𑁆𑀬𑀸𑀓𑀢𑀲𑁆𑀲, 𑀅𑀓𑀼𑀲𑀮𑀸𑀅𑀩𑁆𑀬𑀸𑀓𑀢𑀸 𑀅𑀩𑁆𑀬𑀸𑀓𑀢𑀲𑁆𑀲𑀸’’𑀢𑀺 𑀇𑀫𑀸𑀦𑀺 𑀘 𑀤𑁆𑀯𑁂.

𑀦𑀳𑁂𑀢𑀼𑀫𑀽𑀮𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬𑁩𑁬. 𑀳𑁂𑀢𑀼𑀬𑀸 𑀯𑀼𑀢𑁆𑀢𑁂𑀳𑀺 𑀢𑀻𑀳𑀻𑀢𑀺 𑀳𑁂𑀢𑀼𑀧𑀘𑁆𑀘𑀬𑀸 𑀯𑀼𑀢𑁆𑀢𑁂𑀳𑀺 𑀢𑀻𑀳𑀺 𑀯𑀺𑀲𑁆𑀲𑀚𑁆𑀚𑀦𑁂𑀳𑀺 𑀲𑀤𑁆𑀥𑀺𑀁. 𑀯𑀸𑀭𑀲𑀸𑀫𑀜𑁆𑀜𑀫𑁂𑀯 𑀯𑀤𑀢𑀺, 𑀦 𑀅𑀢𑁆𑀣𑀲𑀸𑀫𑀜𑁆𑀜𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀣𑀸 𑀓𑀫𑁆𑀫𑁂 𑀢𑀻𑀡𑀻𑀢𑀺 𑀳𑁂𑀢𑀼𑀬𑀸 𑀯𑀼𑀢𑁆𑀢𑀸𑀦𑁂𑀯𑀸𑀢𑀺 𑀘𑀸𑀢𑀺 ‘‘𑀓𑀫𑁆𑀫𑁂 𑀢𑀻𑀡𑀻’’𑀢𑀺 𑀏𑀢𑁆𑀣 ‘‘𑀳𑁂𑀢𑀼𑀬𑀸 𑀯𑀼𑀢𑁆𑀢𑀸𑀦𑁂𑀯𑀸’’𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀣𑀯𑀘𑀦𑁂𑀧𑀺 𑀢𑀣𑀸 𑀯𑀸𑀭𑀲𑀸𑀫𑀜𑁆𑀜𑀫𑁂𑀯 𑀲𑀦𑁆𑀥𑀸𑀬 𑀯𑀤𑀢𑀻𑀢𑀺 𑀅𑀢𑁆𑀣𑁄.

𑁬𑁪𑁪. 𑀏𑀓𑁂𑀓𑀫𑁂𑀯𑀸𑀢𑀺 𑀏𑀓𑁂𑀓𑀫𑁂𑀯 𑀯𑀺𑀲𑁆𑀲𑀚𑁆𑀚𑀦𑀁.

𑁬𑁫𑁦. 𑀲𑀓𑀝𑁆𑀞𑀸𑀦𑁂𑀢𑀺 𑀅𑀢𑁆𑀢𑀦𑀸 𑀞𑀺𑀢𑀝𑁆𑀞𑀸𑀦𑁂. 𑀢𑀢𑁄 𑀧𑀭𑁂𑀢𑀭𑀸𑀢𑀺 𑀢𑀢𑁄 𑀅𑀕𑁆𑀕𑀳𑀺𑀢𑀧𑀘𑁆𑀘𑀬𑀢𑁄 𑀧𑀭𑁂𑀢𑀭𑀸 𑀧𑀘𑁆𑀘𑀦𑀻𑀬𑀢𑁄. 𑀦𑀸𑀳𑀸𑀭𑁂…𑀧𑁂… 𑀮𑀸𑀪𑁄 𑀳𑁄𑀢𑀻𑀢𑀺 𑀆𑀳𑀸𑀭𑀧𑀘𑁆𑀘𑀬𑁂 𑀧𑀘𑁆𑀘𑀦𑀻𑀬𑀢𑁄 𑀞𑀺𑀢𑁂 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀁, 𑀅𑀦𑀼𑀮𑁄𑀫𑀢𑁄 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂 𑀘 𑀧𑀘𑁆𑀘𑀦𑀻𑀬𑀢𑁄 𑀞𑀺𑀢𑁂 𑀆𑀳𑀸𑀭𑀧𑀘𑁆𑀘𑀬𑀁 𑀅𑀦𑀼𑀮𑁄𑀫𑀢𑁄 𑀬𑁄𑀚𑁂𑀢𑁆𑀯𑀸 𑀬𑀣𑀸 𑀧𑀜𑁆𑀳𑁄 𑀮𑀩𑁆𑀪𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀲𑀽𑀢𑀺 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑁂𑀲𑀼. 𑀤𑁆𑀯𑀺𑀥𑀸 𑀪𑀺𑀦𑁆𑀦𑀸𑀦𑀺 𑀧𑀘𑁆𑀘𑀦𑀻𑀬𑀢𑁄 𑀅𑀦𑀼𑀮𑁄𑀫𑀢𑁄 𑀘 𑀬𑁄𑀚𑁂𑀢𑀩𑁆𑀩𑀪𑀸𑀯𑁂𑀦.

𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀼𑀲𑀮𑀢𑁆𑀢𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀯𑁂𑀤𑀦𑀸𑀢𑁆𑀢𑀺𑀓𑀯𑀡𑁆𑀡𑀦𑀸

𑁧. 𑀯𑁂𑀤𑀦𑀸𑀢𑁆𑀢𑀺𑀓𑁂 𑀧𑀝𑀺𑀘𑁆𑀘𑀸𑀤𑀺𑀦𑀺𑀬𑀫𑀦𑁆𑀢𑀺 𑀢𑀺𑀓𑀧𑀤𑀲𑀫𑁆𑀩𑀦𑁆𑀥𑀯𑀲𑁂𑀦 𑀧𑀝𑀺𑀘𑁆𑀘𑀯𑀸𑀭𑀸𑀤𑀻𑀲𑀼 𑀯𑀢𑁆𑀢𑀩𑁆𑀩𑀁 𑀧𑀝𑀺𑀘𑁆𑀘𑀲𑀳𑀚𑀸𑀢𑀝𑁆𑀞𑀸𑀤𑀺𑀦𑀺𑀬𑀫𑀦𑀁 𑀦 𑀮𑀪𑀦𑁆𑀢𑀺 𑀯𑁂𑀤𑀦𑀸𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺. 𑀓𑀲𑁆𑀫𑀸? 𑀢𑀺𑀓𑀫𑀼𑀢𑁆𑀢𑀓𑀢𑁆𑀢𑀸. 𑀢𑀣𑀸 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀯𑀘𑀦𑀁. 𑀦 𑀳𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀯𑁂𑀤𑀦𑀁 𑀭𑀽𑀧𑀁 𑀦𑀺𑀩𑁆𑀩𑀸𑀦𑀜𑁆𑀘 𑀲𑀦𑁆𑀥𑀸𑀬 ‘‘𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺. 𑀢𑀺𑀓𑀥𑀫𑁆𑀫𑀸𑀦𑀦𑁆𑀢𑀺 𑀯𑁂𑀤𑀦𑀸𑀢𑁆𑀢𑀺𑀓𑀥𑀫𑁆𑀫𑀸𑀦𑀁. 𑀢𑀢𑁆𑀣𑀸𑀢𑀺 𑀳𑁂𑀢𑀼𑀧𑀘𑁆𑀘𑀬𑀸𑀤𑀻𑀲𑀼. 𑀬𑀣𑀸𑀦𑀼𑀭𑀽𑀧𑀢𑁄𑀢𑀺 𑀯𑁂𑀤𑀦𑀸𑀤𑀻𑀲𑀼 𑀬𑁄 𑀬𑀲𑁆𑀲 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀸𑀤𑀺𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀬𑀼𑀢𑁆𑀢𑁄, 𑀢𑀤𑀦𑀼𑀭𑀽𑀧𑀢𑁄. 𑀆𑀭𑀫𑁆𑀫𑀡𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀸𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺.

𑁧𑁦. 𑀓𑀼𑀲𑀮𑀢𑁆𑀢𑀺𑀓𑁂𑀧𑀺 𑀧𑀭𑀺𑀳𑀻𑀦𑀦𑁆𑀢𑀺 𑀇𑀤𑀁 𑀧𑀘𑁆𑀘𑀦𑀻𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀭𑀽𑀧𑀸𑀭𑀽𑀧𑀥𑀫𑁆𑀫𑀧𑀭𑀺𑀕𑁆𑀕𑀸𑀳𑀓𑀢𑁆𑀢𑀸𑀢𑀺 𑀇𑀤𑀁 𑀅𑀦𑀸𑀤𑀺𑀪𑀽𑀢𑀲𑁆𑀲𑀧𑀺 𑀲𑀳𑀚𑀸𑀢𑀲𑁆𑀲 𑀆𑀤𑀺𑀫𑁆𑀳𑀺 𑀞𑀧𑀦𑁂 𑀓𑀸𑀭𑀡𑀯𑀘𑀦𑀁. 𑀆𑀤𑀺-𑀲𑀤𑁆𑀤𑁂𑀦𑀸𑀢𑀺 ‘‘𑀲𑀳𑀚𑀸𑀢𑀸𑀤𑀬𑁄’’𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦. 𑀬𑀣𑀸𑀭𑀳𑀁 𑀆𑀭𑀩𑁆𑀪 𑀉𑀧𑁆𑀧𑀢𑁆𑀢𑀺𑀯𑀲𑁂𑀦 𑀲𑀩𑁆𑀩𑁂 𑀅𑀭𑀽𑀧𑀥𑀫𑁆𑀫𑀸 𑀆𑀭𑀫𑁆𑀫𑀡𑀸𑀤𑀻𑀦𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀯𑀲𑁂𑀦 𑀲𑀩𑁆𑀩𑀸𑀭𑀽𑀧𑀥𑀫𑁆𑀫𑀧𑀭𑀺𑀕𑁆𑀕𑀸𑀳𑀓𑀸𑀦𑀁 𑀆𑀭𑀫𑁆𑀫𑀡𑀸𑀤𑀻𑀦’’𑀦𑁆𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀸𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀢𑁂𑀦𑀸𑀢𑀺 ‘‘𑀲𑀩𑁆𑀩𑀸𑀭𑀽𑀧𑀥𑀫𑁆𑀫𑀧𑀭𑀺𑀕𑁆𑀕𑀸𑀳𑀓𑀸 𑀧𑀦𑀸’’𑀢𑀺𑀆𑀤𑀺𑀯𑀘𑀦𑁂𑀦. 𑀲𑀩𑁆𑀩𑀝𑁆𑀞𑀸𑀦𑀺𑀓𑀸𑀦𑀁…𑀧𑁂… 𑀤𑀲𑁆𑀲𑀺𑀢𑀸 𑀳𑁄𑀢𑀺 𑀲𑀳𑀚𑀸𑀢𑀤𑀲𑁆𑀲𑀦𑁂𑀦𑀸𑀢𑀺 𑀅𑀢𑁆𑀣𑁄. 𑀏𑀓𑀤𑁂𑀲𑀧𑀭𑀺𑀳𑀸𑀦𑀺𑀤𑀲𑁆𑀲𑀦𑁂𑀦𑁂𑀯 𑀳𑀺 𑀲𑀫𑀼𑀤𑀸𑀬𑀧𑀭𑀺𑀳𑀸𑀦𑀺 𑀤𑀲𑁆𑀲𑀺𑀢𑀸 𑀳𑁄𑀢𑀻𑀢𑀺. 𑀲𑀳𑀚𑀸𑀢𑀸𑀤𑀬𑁄𑀢𑀺 𑀯𑀸 𑀆𑀤𑀺-𑀲𑀤𑁆𑀤𑁂𑀦 𑀲𑀩𑁆𑀩𑀝𑁆𑀞𑀸𑀦𑀺𑀓𑀸 𑀘𑀢𑁆𑀢𑀸𑀭𑁄𑀧𑀺 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀻𑀢𑀺. 𑀲𑀳𑀚𑀸𑀢𑀫𑀽𑀮𑀓𑀸𑀢𑀺 𑀲𑀳𑀚𑀸𑀢𑀧𑀘𑁆𑀘𑀬𑁂 𑀲𑀢𑀺 𑀪𑀯𑀦𑁆𑀢𑀸 𑀦 𑀲𑀳𑀚𑀸𑀢𑀁 𑀧𑀼𑀭𑀢𑁄 𑀓𑀢𑁆𑀯𑀸 𑀧𑀸𑀴𑀺𑀬𑀁 𑀆𑀕𑀢𑀸. 𑀢𑁂𑀦𑀸𑀳 ‘‘𑀲𑀳𑀚𑀸𑀢𑀦𑀺𑀩𑀦𑁆𑀥𑀦𑀸…𑀧𑁂… 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺. 𑀲𑁄 𑀧𑀘𑁆𑀙𑀸𑀚𑀸𑀢𑁄 𑀓𑀲𑁆𑀫𑀸 𑀧𑀦 𑀦 𑀧𑀭𑀺𑀳𑀸𑀬𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 𑀬𑀣𑀸𑀯𑀼𑀢𑁆𑀢𑀸𑀬 𑀧𑀭𑀺𑀳𑀸𑀦𑀺𑀬𑀁 𑀅𑀧𑀭𑀺𑀳𑀸𑀦𑀺𑀬𑀜𑁆𑀘. 𑀲𑀳𑀚𑀸𑀢𑀦𑀺𑀩𑀦𑁆𑀥𑀦𑁂𑀳𑀻𑀢𑀺 𑀲𑀳𑀚𑀸𑀢𑀥𑀫𑁆𑀫𑀦𑀺𑀫𑀺𑀢𑁆𑀢𑁂𑀳𑀺 𑀧𑀘𑁆𑀘𑀬𑀪𑀸𑀯𑁂𑀳𑀺 𑀇𑀥 𑀧𑀘𑁆𑀘𑀬𑀥𑀫𑁆𑀫𑀳𑁂𑀢𑀼𑀓𑁄 𑀯𑀼𑀢𑁆𑀢𑁄. 𑀏𑀢𑁆𑀣𑁂𑀯𑀸𑀢𑀺 𑀧𑀭𑀺𑀳𑀸𑀦𑀺𑀬𑀁𑀬𑁂𑀯. 𑀲𑀸 𑀳𑀺 𑀇𑀥 𑀅𑀥𑀺𑀓𑀢𑀸. 𑀲𑀳𑀚𑀸𑀢𑀦𑀺𑀩𑀦𑁆𑀥𑀦𑀸𑀦𑀫𑁂𑀯 𑀧𑀭𑀺𑀳𑀸𑀦𑀻𑀢𑀺 𑀯𑀼𑀢𑁆𑀢𑁂 ‘‘𑀓𑀺𑀁 𑀲𑀩𑁆𑀩𑁂𑀲𑀁𑀬𑁂𑀯 𑀦𑁂𑀲𑀁 𑀧𑀭𑀺𑀳𑀸𑀦𑀻’’𑀢𑀺 𑀆𑀲𑀗𑁆𑀓𑀸𑀬 𑀆𑀳 ‘‘𑀲𑀳𑀚𑀸𑀢…𑀧𑁂… 𑀤𑀲𑁆𑀲𑀺𑀢𑀫𑁂𑀢’’𑀦𑁆𑀢𑀺.

𑁧𑁭. 𑀦𑀬𑀤𑀲𑁆𑀲𑀦𑀫𑁂𑀯 𑀓𑀭𑁄𑀢𑀻𑀢𑀺 𑀬𑀣𑀸 𑀅𑀳𑁂𑀢𑀼𑀓𑀓𑀺𑀭𑀺𑀬𑀘𑁂𑀢𑀦𑀁 𑀲𑀦𑁆𑀥𑀸𑀬 ‘‘𑀦𑀳𑁂𑀢𑀼𑀧𑀘𑁆𑀘𑀬𑀸 𑀦𑀓𑀫𑁆𑀫𑀧𑀘𑁆𑀘𑀬𑀸’’𑀢𑀺 𑀯𑀢𑁆𑀢𑀼𑀁 𑀮𑀩𑁆𑀪𑀸, 𑀏𑀯𑀁 𑀦𑀯𑀺𑀧𑀸𑀓𑀧𑀘𑁆𑀘𑀬𑀸𑀢𑀺𑀧𑀺 𑀮𑀩𑁆𑀪𑀸. 𑀅𑀳𑁂𑀢𑀼𑀓𑀫𑁄𑀳𑀁 𑀧𑀦 𑀲𑀦𑁆𑀥𑀸𑀬 ‘‘𑀦𑀳𑁂𑀢𑀼𑀧𑀘𑁆𑀘𑀬𑀸 𑀦𑀯𑀺𑀧𑀸𑀓𑀧𑀘𑁆𑀘𑀬𑀸’’𑀢𑀺 𑀮𑀩𑁆𑀪𑀸, 𑀦 ‘‘𑀦𑀓𑀫𑁆𑀫𑀧𑀘𑁆𑀘𑀬𑀸’’𑀢𑀺. 𑀢𑁂𑀦𑀸𑀳 ‘‘𑀦 𑀘 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀲𑀸𑀫𑀜𑁆𑀜𑀤𑀲𑁆𑀲𑀦’’𑀦𑁆𑀢𑀺𑀆𑀤𑀺.

𑁨𑁫-𑁩𑁭. 𑀬𑀣𑀸 𑀓𑀼𑀲𑀮𑀢𑁆𑀢𑀺𑀓𑀁, 𑀏𑀯𑀁 𑀕𑀡𑁂𑀢𑀩𑁆𑀩𑀦𑁆𑀢𑀺 𑀇𑀤𑀁 𑀬𑀁 𑀲𑀦𑁆𑀥𑀸𑀬 𑀧𑀸𑀴𑀺𑀬𑀁 𑀦𑀺𑀓𑁆𑀔𑀺𑀢𑁆𑀢𑀁, 𑀢𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀳𑁂𑀢𑀼𑀫𑀽𑀮𑀓𑀸𑀦𑀁…𑀧𑁂… 𑀦𑀕𑀡𑀦𑀲𑀸𑀫𑀜𑁆𑀜’’𑀦𑁆𑀢𑀺. 𑀦 𑀳𑀺 𑀓𑀼𑀲𑀮𑀢𑁆𑀢𑀺𑀓𑁂 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑁂 𑀕𑀡𑀦𑀸𑀳𑀺 𑀯𑁂𑀤𑀦𑀸𑀢𑁆𑀢𑀺𑀓𑁂 𑀢𑀸 𑀲𑀫𑀸𑀦𑀸. 𑀧𑀭𑀺𑀯𑀢𑁆𑀢𑁂𑀢𑁆𑀯𑀸𑀧𑀺 𑀬𑁄𑀚𑀺𑀢𑀸𑀢𑀺 𑀏𑀢𑁆𑀣 ‘‘𑀦𑀳𑁂𑀢𑀼𑀧𑀘𑁆𑀘𑀬𑀸 𑀦𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀸 𑀆𑀭𑀫𑁆𑀫𑀡𑁂 𑀏𑀓’’𑀦𑁆𑀢𑀺 𑀆𑀭𑀫𑁆𑀫𑀡𑀁 𑀧𑀞𑀫𑀁 𑀯𑀢𑁆𑀯𑀸 𑀯𑀢𑁆𑀢𑀩𑁆𑀩𑀫𑁆𑀧𑀺 𑀧𑀼𑀭𑁂𑀚𑀸𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀞𑀫𑀁 𑀯𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀢𑀣𑀸 𑀦𑀳𑁂𑀢𑀼𑀧𑀘𑁆𑀘𑀬𑀸 𑀓𑀫𑁆𑀫𑁂 𑀢𑀻𑀡𑀻𑀢𑀺 𑀇𑀤𑀫𑁂𑀯 𑀧𑀤𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 ‘‘𑀦𑀓𑀫𑁆𑀫𑀧𑀘𑁆𑀘𑀬𑀸 𑀳𑁂𑀢𑀼𑀬𑀸 𑀢𑀻𑀡𑀻𑀢𑀺 𑀯𑀼𑀢𑁆𑀢’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺.

𑁩𑁯. 𑀢𑀁𑀲𑀫𑁆𑀧𑀬𑀼𑀢𑁆𑀢𑁂𑀢𑀺 𑀢𑁂𑀦 𑀤𑁄𑀫𑀦𑀲𑁆𑀲𑁂𑀦 𑀲𑀫𑁆𑀧𑀬𑀼𑀢𑁆𑀢𑁂. 𑀤𑁄𑀫𑀦𑀲𑁆𑀲𑀲𑀻𑀲𑁂𑀦 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀯𑀼𑀢𑁆𑀢𑀸. 𑀲𑀤𑁆𑀥𑀸𑀧𑀜𑁆𑀘𑀓𑁂𑀲𑀽𑀢𑀺 𑀲𑀤𑁆𑀥𑀸𑀲𑀻𑀮𑀲𑀼𑀢𑀘𑀸𑀕𑀧𑀜𑁆𑀜𑀸𑀲𑀼. 𑀓𑀢𑁆𑀢𑀩𑁆𑀩𑀦𑁆𑀢𑀺 𑀯𑀸 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀅𑀯𑀲𑁂𑀲𑁂𑀲𑀽𑀢𑀺 𑀭𑀸𑀕𑀸𑀤𑀻𑀲𑀼. 𑀧𑀸𑀴𑀺𑀕𑀢𑀺𑀤𑀲𑁆𑀲𑀦𑀢𑁆𑀣𑀦𑁆𑀢𑀺 ‘‘𑀏𑀯𑀁 𑀧𑀸𑀴𑀺 𑀧𑀯𑀢𑁆𑀢𑀸’’𑀢𑀺 𑀧𑀸𑀴𑀺𑀬𑀸 𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁. 𑀭𑀸𑀕𑀸𑀤𑀻𑀳𑀺 𑀉𑀧𑀦𑀺𑀲𑁆𑀲𑀬𑀪𑀽𑀢𑁂𑀳𑀺. 𑀅𑀦𑀼𑀧𑁆𑀧𑀢𑁆𑀢𑀺𑀢𑁄𑀢𑀺 𑀦 𑀉𑀧𑁆𑀧𑀚𑁆𑀚𑀦𑀢𑁄. 𑀢𑀁 𑀧𑀸𑀴𑀺𑀕𑀢𑀺𑀁 𑀢𑀺𑀓𑀦𑁆𑀢𑀭𑀧𑀸𑀴𑀺𑀬𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀼𑀲𑀮𑀢𑁆𑀢𑀺𑀓𑁂𑀧𑀺𑀳𑀻’’𑀢𑀺𑀆𑀤𑀺𑀫𑀸𑀳. 𑀇𑀥𑀸𑀧𑀻𑀢𑀺 𑀇𑀫𑀲𑁆𑀫𑀺𑀁 𑀯𑁂𑀤𑀦𑀸𑀢𑁆𑀢𑀺𑀓𑁂𑀧𑀺.

𑁬𑁨. 𑀅𑀦𑀜𑁆𑀜𑀢𑁆𑀢𑀦𑁆𑀢𑀺 𑀅𑀪𑁂𑀤𑀁. 𑀲𑀼𑀔𑀯𑁂𑀤𑀦𑀸𑀲𑀫𑁆𑀧𑀬𑀼𑀢𑁆𑀢𑁄 𑀳𑀺 𑀥𑀫𑁆𑀫𑁄 𑀲𑀼𑀔𑀯𑁂𑀤𑀦𑀸𑀲𑀫𑁆𑀧𑀬𑀼𑀢𑁆𑀢𑀲𑁆𑀲𑁂𑀯 𑀥𑀫𑁆𑀫𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀦 𑀇𑀢𑀭𑁂𑀲𑀁. 𑀏𑀲 𑀦𑀬𑁄 𑀲𑁂𑀲𑀧𑀤𑁂𑀲𑀼 𑀲𑁂𑀲𑁂𑀲𑀼 𑀘 ‘‘𑀢𑀻𑀡𑀻’’𑀢𑀺 𑀆𑀕𑀢𑀝𑁆𑀞𑀸𑀦𑁂𑀲𑀼. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀸𑀦𑀺 𑀢𑀻𑀡𑀺 𑀲𑀼𑀤𑁆𑀥𑀸𑀦𑀁 𑀢𑀺𑀡𑁆𑀡𑀁 𑀧𑀤𑀸𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀻’’𑀢𑀺. ‘‘𑀧𑀘𑁆𑀙𑀸𑀚𑀸𑀢𑀸 𑀅𑀭𑀽𑀧𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑁄 𑀦 𑀳𑁄𑀦𑁆𑀢𑀻’’𑀢𑀺 𑀬𑀼𑀢𑁆𑀢𑀫𑁂𑀢𑀁, 𑀧𑀼𑀭𑁂𑀚𑀸𑀢𑀸 𑀧𑀦 𑀅𑀭𑀽𑀧𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀻𑀢𑀺 𑀓𑀣𑀫𑀺𑀤𑀁 𑀕𑀳𑁂𑀢𑀩𑁆𑀩𑀦𑁆𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀧𑀼𑀭𑁂𑀚𑀸𑀢𑀸’’𑀢𑀺𑀆𑀤𑀺, 𑀧𑀼𑀭𑁂𑀚𑀸𑀢𑀸 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄 𑀦 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀼𑀭𑀺𑀫𑀢𑀭𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀞𑀺𑀢𑀸 𑀳𑀺 𑀭𑀽𑀧𑀥𑀫𑁆𑀫𑀸 𑀧𑀘𑁆𑀙𑀸 𑀉𑀧𑁆𑀧𑀦𑁆𑀦𑀸𑀦𑀁 𑀅𑀭𑀽𑀧𑀥𑀫𑁆𑀫𑀸𑀦𑀁 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀳𑁄𑀦𑁆𑀢𑀺, 𑀦 𑀘𑀸𑀬𑀁 𑀦𑀬𑁄 𑀅𑀭𑀽𑀧𑀥𑀫𑁆𑀫𑁂𑀲𑀼 𑀮𑀩𑁆𑀪𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀼𑀭𑁂𑀚𑀸𑀢𑀢𑁆𑀢𑀸𑀪𑀸𑀯𑀢𑁄’’𑀢𑀺. 𑀢𑀣𑀸 𑀧𑀘𑁆𑀙𑀸𑀚𑀸𑀢𑀢𑁆𑀢𑀸𑀪𑀸𑀯𑀢𑁄𑀢𑀺 𑀬𑀣𑀸 𑀇𑀫𑀲𑁆𑀫𑀺𑀁 𑀢𑀺𑀓𑁂 𑀓𑀲𑁆𑀲𑀘𑀺 𑀥𑀫𑁆𑀫𑀲𑁆𑀲 𑀧𑀼𑀭𑁂𑀚𑀸𑀢𑀢𑁆𑀢𑀸𑀪𑀸𑀯𑀢𑁄 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀦 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁, 𑀢𑀣𑀸 𑀧𑀘𑁆𑀙𑀸𑀚𑀸𑀢𑀢𑁆𑀢𑀸𑀪𑀸𑀯𑀢𑁄 𑀧𑀘𑁆𑀙𑀸𑀚𑀸𑀢𑀸 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄 𑀦 𑀳𑁄𑀦𑁆𑀢𑀺, 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄 𑀦 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀦 𑀳𑀺 𑀏𑀓𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀓𑁂𑀲𑀼𑀘𑀺 𑀅𑀭𑀽𑀧𑀥𑀫𑁆𑀫𑁂𑀲𑀼 𑀧𑀞𑀫𑀢𑀭𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀞𑀺𑀢𑁂𑀲𑀼 𑀧𑀘𑁆𑀙𑀸 𑀓𑁂𑀘𑀺 𑀅𑀭𑀽𑀧𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀬𑀢𑁄 𑀢𑁂 𑀢𑁂𑀲𑀁 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄 𑀪𑀯𑁂𑀬𑁆𑀬𑀼𑀁.

𑁮𑁩-𑁮𑁭. 𑀅𑀯𑀲𑁂𑀲𑁂𑀲𑀼 𑀅𑀝𑁆𑀞𑀲𑀽𑀢𑀺 ‘‘𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑁄 𑀥𑀫𑁆𑀫𑁄’’𑀢𑀺𑀆𑀤𑀺𑀦𑀸 𑀏𑀓𑀫𑀽𑀮𑀓𑁂𑀓𑀸𑀯𑀲𑀸𑀦𑀸 𑀬𑁂 𑀦𑀯 𑀦𑀯 𑀯𑀸𑀭𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀸𑀤𑀻𑀲𑀼 𑀮𑀩𑁆𑀪𑀦𑁆𑀢𑀺, 𑀢𑁂𑀲𑀼 𑀬𑀣𑀸𑀯𑀼𑀢𑁆𑀢𑀫𑁂𑀓𑀁 𑀯𑀚𑁆𑀚𑁂𑀢𑁆𑀯𑀸 𑀲𑁂𑀲𑁂𑀲𑀼 𑀅𑀝𑁆𑀞𑀲𑀼. 𑀢𑀻𑀲𑁆𑀯𑁂𑀯𑀸𑀢𑀺 𑀲𑀼𑀤𑁆𑀥𑁂𑀲𑀼 𑀢𑀻𑀲𑁆𑀯𑁂𑀯 𑀲𑀳𑀚𑀸𑀢𑀓𑀫𑁆𑀫𑀧𑀘𑁆𑀘𑀬𑁄 𑀮𑀩𑁆𑀪𑀢𑀺.

𑀯𑁂𑀤𑀦𑀸𑀢𑁆𑀢𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀯𑀺𑀧𑀸𑀓𑀢𑁆𑀢𑀺𑀓𑀯𑀡𑁆𑀡𑀦𑀸

𑁧-𑁨𑁩. 𑀲𑁄𑀬𑁂𑀯𑀸𑀢𑀺 𑀅𑀓𑀢𑀲𑀫𑀸𑀲𑁂𑀳𑀺 𑀧𑀤𑁂𑀳𑀺 𑀬𑁄 𑀅𑀢𑁆𑀣𑁄 𑀯𑀼𑀘𑁆𑀘𑀢𑀺, 𑀲𑁄𑀬𑁂𑀯 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀳𑁄𑀢𑀺.

𑁨𑁪-𑁫𑁨. 𑀢𑀦𑁆𑀢𑀺 𑀢𑀁 𑀯𑀘𑀦𑀁, 𑀢𑀁 𑀯𑀸 𑀓𑀝𑀢𑁆𑀢𑀸𑀭𑀽𑀧𑀁. 𑀬𑀲𑁆𑀫𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀲𑁆𑀲 𑀉𑀧𑀸𑀤𑀸𑀭𑀽𑀧𑀲𑁆𑀲 𑀬𑀣𑀸 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀉𑀧𑁆𑀧𑀢𑁆𑀢𑀺, 𑀢𑀣𑀸 𑀫𑀳𑀸𑀪𑀽𑀢𑁂 𑀘 𑀧𑀝𑀺𑀘𑁆𑀘 𑀉𑀧𑁆𑀧𑀢𑁆𑀢𑀺. 𑀦 𑀳𑀺 𑀢𑀲𑁆𑀲 𑀢𑀤𑀼𑀪𑀬𑀁 𑀯𑀺𑀦𑀸 𑀉𑀧𑁆𑀧𑀢𑁆𑀢𑀺 𑀅𑀢𑁆𑀣𑀺, 𑀦 𑀏𑀯𑀁 𑀓𑀝𑀢𑁆𑀢𑀸𑀭𑀽𑀧𑀲𑁆𑀲. 𑀢𑀜𑁆𑀳𑀺 𑀓𑀫𑁆𑀫𑀲𑁆𑀲 𑀓𑀝𑀢𑁆𑀢𑀸 𑀉𑀧𑁆𑀧𑀚𑁆𑀚𑀫𑀸𑀦𑀁 𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁 𑀉𑀧𑀸𑀤𑀸𑀭𑀽𑀧𑀲𑁆𑀲 𑀢𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 𑀢𑀤𑁂𑀯 𑀯𑀼𑀢𑁆𑀢𑀁, 𑀦 𑀓𑀝𑀢𑁆𑀢𑀸𑀭𑀽𑀧𑀁 𑀯𑀼𑀢𑁆𑀢𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀔𑀦𑁆𑀥𑁂 𑀧𑀝𑀺𑀘𑁆𑀘𑀸’’𑀢𑀺𑀆𑀤𑀺𑀫𑀸𑀳. 𑀬𑀤𑀺𑀧𑀺 𑀓𑀝𑀢𑁆𑀢𑀸𑀭𑀽𑀧𑀁 ‘‘𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁 𑀉𑀧𑀸𑀤𑀸𑀭𑀽𑀧’’𑀦𑁆𑀢𑀺 𑀏𑀢𑁆𑀣 𑀦 𑀕𑀳𑀺𑀢𑀁, 𑀯𑀘𑀦𑀦𑁆𑀢𑀭𑁂𑀦 𑀧𑀦 𑀕𑀳𑀺𑀢𑀫𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀯𑀢𑁆𑀢𑀺𑀬𑀁 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀏𑀯𑀜𑁆𑀘 𑀓𑀢𑁆𑀯𑀸𑀢𑀺 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀉𑀧𑁆𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄𑀬𑁂𑀯. 𑀦𑀸𑀳𑀸𑀭𑀧𑀘𑁆𑀘𑀬𑁂𑀢𑀺 𑀆𑀳𑀸𑀭𑀧𑀘𑁆𑀘𑀬𑁂 𑀧𑀘𑁆𑀘𑀦𑀻𑀬𑀢𑁄 𑀞𑀺𑀢𑁂. 𑀢𑀫𑁆𑀧𑀻𑀢𑀺 𑀓𑀝𑀢𑁆𑀢𑀸𑀭𑀽𑀧𑀫𑁆𑀧𑀺. 𑀞𑀺𑀢𑀺𑀓𑁆𑀔𑀡𑁂 𑀓𑀝𑀢𑁆𑀢𑀸𑀭𑀽𑀧𑀲𑁆𑀲 𑀆𑀳𑀸𑀭𑁄 𑀉𑀧𑀢𑁆𑀣𑀫𑁆𑀪𑀓𑁄 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀉𑀧𑁆𑀧𑀸𑀤𑀓𑁆𑀔𑀡𑁂’’𑀢𑀺.

𑀯𑀺𑀧𑀸𑀓𑀢𑁆𑀢𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀉𑀧𑀸𑀤𑀺𑀦𑁆𑀦𑀢𑁆𑀢𑀺𑀓𑀯𑀡𑁆𑀡𑀦𑀸

𑁫𑁧. 𑀅𑀥𑀺𑀧𑀢𑀺𑀥𑀫𑁆𑀫𑁄𑀬𑁂𑀯 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂𑀲𑀼 𑀦𑀸𑀥𑀺𑀧𑀢𑀺𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀆𑀳 ‘‘𑀦𑀸𑀥𑀺𑀧𑀢𑀺𑀧𑀘𑁆𑀘𑀬𑀸𑀢𑀺 𑀲𑀬𑀁 𑀅𑀥𑀺𑀧𑀢𑀺𑀪𑀽𑀢𑀢𑁆𑀢𑀸’’𑀢𑀺. 𑀦𑀦𑀼 𑀅𑀥𑀺𑀧𑀢𑀺𑀥𑀫𑁆𑀫𑁄𑀧𑀺 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀯𑀲𑁂𑀦 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦 𑀉𑀧𑁆𑀧𑀚𑁆𑀚𑀢𑀻𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀯𑀺𑀭𑀳𑀺𑀢𑀸…𑀧𑁂… 𑀤𑀲𑁆𑀲𑁂𑀢𑀻’’𑀢𑀺. 𑀅𑀯𑀺𑀭𑀳𑀺𑀢𑀸𑀭𑀫𑁆𑀫𑀡𑀸𑀥𑀺𑀧𑀢𑀻𑀲𑀽𑀢𑀺 𑀮𑁄𑀓𑀼𑀢𑁆𑀢𑀭𑁂 𑀲𑀦𑁆𑀥𑀸𑀬𑀸𑀳. 𑀢𑁂 𑀳𑀺 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑁆𑀢𑀸 𑀏𑀯𑀁 𑀯𑀼𑀘𑁆𑀘𑀢𑀺. 𑀧𑀺-𑀲𑀤𑁆𑀤𑁂𑀦 𑀓𑁄 𑀧𑀦 𑀯𑀸𑀤𑁄 𑀯𑀺𑀭𑀳𑀺𑀢𑀸𑀭𑀫𑁆𑀫𑀡𑀸𑀥𑀺𑀧𑀢𑀺𑀅𑀦𑁂𑀓𑀦𑁆𑀢𑀸𑀭𑀫𑁆𑀫𑀡𑀸𑀥𑀺𑀧𑀢𑀻𑀲𑀽𑀢𑀺 𑀤𑀲𑁆𑀲𑁂𑀢𑀺.

𑁭𑁨. 𑀅𑀦𑀼𑀧𑀸𑀮𑀦𑀼𑀧𑀢𑁆𑀣𑀫𑁆𑀪𑀦𑀯𑀲𑁂𑀦𑀸𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀯𑀺𑀬 𑀓𑀝𑀢𑁆𑀢𑀸𑀭𑀽𑀧𑀸𑀦𑀁 𑀅𑀦𑀼𑀧𑀸𑀮𑀦𑀯𑀲𑁂𑀦 𑀑𑀚𑀸 𑀢𑀲𑁆𑀲𑁂𑀯 𑀓𑀫𑁆𑀫𑀚𑀓𑀸𑀬𑀲𑁆𑀲 𑀉𑀧𑀢𑁆𑀣𑀫𑁆𑀪𑀦𑀯𑀲𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺, 𑀦 𑀚𑀦𑀓𑀯𑀲𑁂𑀦𑀸𑀢𑀺 𑀬𑁄𑀚𑀦𑀸. 𑀏𑀢𑀲𑁆𑀫𑀺𑀁 𑀧𑀦 𑀅𑀢𑁆𑀣𑁂 𑀲𑀢𑀻𑀢𑀺 𑀓𑀫𑁆𑀫𑀚𑀓𑀮𑀸𑀧𑁂 𑀑𑀚𑀸 𑀢𑀲𑁆𑀲𑁂𑀯 𑀓𑀫𑁆𑀫𑀚𑀓𑀸𑀬𑀲𑁆𑀲 𑀉𑀧𑀢𑁆𑀣𑀫𑁆𑀪𑀓𑀯𑀲𑁂𑀦 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀮𑀩𑁆𑀪𑀫𑀸𑀦𑁂. 𑀆𑀳𑀸𑀭𑀦𑁆𑀢𑀺𑀧𑀺 𑀯𑀢𑁆𑀢𑀩𑁆𑀩𑀦𑁆𑀢𑀺 𑀬𑀣𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀯𑀲𑁂𑀦 ‘‘𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑁄 𑀥𑀫𑁆𑀫𑁄 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀲𑁆𑀲 𑀥𑀫𑁆𑀫𑀲𑁆𑀲 𑀅𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀬𑀣𑀸𑀯𑀼𑀢𑁆𑀢𑀆𑀳𑀸𑀭𑀲𑁆𑀲𑀧𑀺 𑀯𑀲𑁂𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀬𑀲𑁆𑀫𑀺𑀁 𑀓𑀮𑀸𑀧𑁂 𑀓𑀫𑁆𑀫𑀚𑀸 𑀑𑀚𑀸 𑀓𑀤𑀸𑀘𑀺 𑀢𑀲𑁆𑀲𑁂𑀯 𑀉𑀧𑀢𑁆𑀣𑀫𑁆𑀪𑀦𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀅𑀬𑀫𑀢𑁆𑀣𑁄 𑀅𑀝𑁆𑀞𑀓𑀣𑀸𑀬𑀁 𑀤𑀲𑁆𑀲𑀺𑀢𑁄. 𑀬𑀤𑀺 𑀓𑀫𑁆𑀫𑀚𑀸 𑀑𑀚𑀸 𑀏𑀓𑀁𑀲𑀢𑁄 𑀲𑀓𑀮𑀸𑀧𑀭𑀽𑀧𑀽𑀧𑀢𑁆𑀣𑀫𑁆𑀪𑀦𑀯𑀲𑁂𑀦𑁂𑀯 𑀧𑀯𑀢𑁆𑀢𑀢𑀺, 𑀢𑀣𑀸 𑀲𑀢𑀺 𑀇𑀫𑀸𑀬 𑀧𑀸𑀴𑀺𑀬𑀸 𑀯𑀺𑀭𑁄𑀥𑁄 𑀲𑀺𑀬𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀤𑀺 𑀘…𑀧𑁂… 𑀳𑁄𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀁 𑀉𑀤𑁆𑀥𑀭𑀺𑀢𑁆𑀯𑀸 𑀢𑀢𑁆𑀣 𑀤𑁄𑀲𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀏𑀯𑀁 𑀲𑀢𑀻’’𑀢𑀺 𑀆𑀳. 𑀢𑀢𑁆𑀣 𑀢𑀦𑁆𑀢𑀺 𑀢𑀁 𑀯𑀘𑀦𑀁. 𑀅𑀦𑀚𑁆𑀛𑁄𑀳𑀝𑀸𑀬 𑀅𑀢𑁆𑀢𑀦𑁄 𑀧𑀘𑁆𑀘𑀬𑀢𑁄 𑀦𑀺𑀩𑁆𑀩𑀢𑁆𑀢𑀸𑀬, 𑀧𑀘𑁆𑀘𑀬𑁄 𑀘𑁂𑀢𑁆𑀣 𑀓𑀫𑁆𑀫𑀁𑀬𑁂𑀯. 𑀢𑁂𑀦𑀸𑀳 ‘‘𑀲𑀲𑀦𑁆𑀢𑀸𑀦𑀕𑀢𑀸𑀬 𑀉𑀧𑀸𑀤𑀺𑀦𑁆𑀦𑁄𑀚𑀸𑀬𑀸’’𑀢𑀺.

𑀅𑀬𑀫𑁆𑀧𑀺 𑀧𑀜𑁆𑀳𑁄, 𑀦 𑀓𑁂𑀯𑀮𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀆𑀳𑀸𑀭𑁄𑀬𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀉𑀤𑁆𑀥𑀭𑀺𑀢𑀩𑁆𑀩𑁄 𑀲𑀺𑀬𑀸, 𑀦 𑀘 𑀉𑀤𑁆𑀥𑀝𑁄. 𑀢𑀲𑁆𑀫𑀸𑀢𑀺 𑀏𑀢𑀲𑁆𑀲 ‘‘𑀯𑀸𑀤𑁄 𑀩𑀮𑀯𑀢𑀭𑁄’’𑀢𑀺 𑀏𑀢𑁂𑀦 𑀲𑀫𑁆𑀩𑀦𑁆𑀥𑁄. 𑀓𑀲𑁆𑀫𑀸 𑀧𑀦 𑀬𑀣𑀸𑀯𑀼𑀢𑁆𑀢𑁂𑀲𑀼 𑀤𑁆𑀯𑀻𑀲𑀼 𑀧𑀜𑁆𑀳𑁂𑀲𑀼 𑀆𑀳𑀸𑀭𑁄 𑀦 𑀉𑀤𑁆𑀥𑀝𑁄𑀢𑀺 𑀆𑀳 ‘‘𑀅𑀚𑁆𑀛𑁄𑀳𑀝𑀲𑁆𑀲𑀸’’𑀢𑀺𑀆𑀤𑀺. 𑀢𑀢𑁆𑀣 𑀤𑀼𑀢𑀺𑀬𑀧𑀜𑁆𑀳𑁄𑀢𑀺 𑀤𑀼𑀓𑀫𑀽𑀮𑀓𑁂 𑀤𑀼𑀢𑀺𑀬𑀧𑀜𑁆𑀳𑁄𑀢𑀺 𑀬𑁄𑀚𑀦𑀸. 𑀤𑀼𑀢𑀺𑀬𑀧𑀜𑁆𑀳𑁄 𑀘 𑀦 𑀉𑀤𑁆𑀥𑀝𑁄𑀢𑀺 𑀏𑀢𑁆𑀣𑀸𑀧𑀺 ‘‘𑀅𑀚𑁆𑀛𑁄𑀳𑀝𑀲𑁆𑀲…𑀧𑁂… 𑀅𑀪𑀸𑀯𑀢𑁄’’𑀢𑀺 𑀇𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀇𑀢𑀭𑀲𑁆𑀲𑀸𑀢𑀺 𑀅𑀦𑀚𑁆𑀛𑁄𑀳𑀝𑀲𑁆𑀲. 𑀅𑀚𑁆𑀛𑁄𑀳𑀝𑀫𑁂𑀯 𑀦 𑀅𑀦𑀚𑁆𑀛𑁄𑀳𑀝𑀁, 𑀬𑀣𑀸𑀯𑀼𑀢𑁆𑀢𑁄𑀚𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀩𑀮𑀯𑀢𑀭𑁄’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀩𑀮𑀯𑀢𑀭𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀳𑀻’’𑀢𑀺𑀆𑀤𑀺𑀫𑀸𑀳. 𑀓𑀢𑀺𑀧𑀬𑀸𑀮𑁄𑀧𑁂 𑀅𑀚𑁆𑀛𑁄𑀳𑀭𑀺𑀢𑁆𑀯𑀸 𑀯𑀲𑀺𑀢𑁆𑀯𑀸 𑀞𑀺𑀢𑀲𑁆𑀲 𑀯𑀺𑀬 𑀅𑀚𑁆𑀛𑁄𑀳𑀝𑀫𑀢𑁆𑀢𑀸𑀳𑀺 𑀫𑀡𑁆𑀟𑀽𑀓𑀸𑀤𑀻𑀳𑀺 𑀅𑀚𑁆𑀛𑁄𑀳𑀸𑀭𑀓𑀲𑁆𑀲 𑀲𑀭𑀻𑀭𑁂 𑀯𑀺𑀲𑁂𑀲𑀸𑀥𑀸𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀇𑀥 𑀯𑀼𑀢𑁆𑀢𑁂𑀳𑀻𑀢𑀺 𑀇𑀫𑀲𑁆𑀫𑀺𑀁 𑀉𑀧𑀸𑀤𑀺𑀦𑁆𑀦𑀢𑁆𑀢𑀺𑀓𑁂 𑀯𑀼𑀢𑁆𑀢𑁂𑀳𑀺. 𑀏𑀓𑀫𑀽𑀮𑀓𑀤𑀼𑀓𑀢𑀺𑀓𑀸𑀯𑀲𑀸𑀦𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑁂𑀳𑀻𑀢𑀺 𑀏𑀓𑀧𑀤𑀫𑀽𑀮𑀓𑁂𑀳𑀺 𑀤𑀼𑀓𑀸𑀯𑀲𑀸𑀦𑁂𑀳𑀺 𑀢𑀺𑀓𑀸𑀯𑀲𑀸𑀦𑁂𑀳𑀺 𑀘 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑁂𑀳𑀺. 𑀢𑁂 𑀧𑀦 ‘‘𑀅𑀦𑀼𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑁄 𑀥𑀫𑁆𑀫𑁄 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀲𑁆𑀲 𑀅𑀦𑀼𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀲𑁆𑀲 𑀘 𑀥𑀫𑁆𑀫𑀲𑁆𑀲 𑀅𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀅𑀦𑀼𑀧𑀸𑀤𑀺𑀦𑁆𑀦𑀅𑀦𑀼𑀧𑀸𑀤𑀸𑀦𑀺𑀬𑁄 𑀥𑀫𑁆𑀫𑁄 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀲𑁆𑀲 𑀅𑀦𑀼𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀲𑁆𑀲 𑀅𑀦𑀼𑀧𑀸𑀤𑀺𑀦𑁆𑀦𑀅𑀦𑀼𑀧𑀸𑀤𑀸𑀦𑀺𑀬𑀲𑁆𑀲 𑀘 𑀥𑀫𑁆𑀫𑀲𑁆𑀲 𑀅𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀉𑀧𑀸𑀤𑀺𑀦𑁆𑀦𑀢𑁆𑀢𑀺𑀓𑁂. 𑀤𑀼𑀢𑀺𑀬𑀤𑀼𑀓𑀸𑀯𑀲𑀸𑀦𑁂 𑀯𑀺𑀬𑀸𑀢𑀺 𑀤𑀼𑀢𑀺𑀬𑀤𑀼𑀓𑀸𑀯𑀲𑀸𑀦𑁂 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑁂 𑀯𑀺𑀬, ‘‘𑀅𑀦𑀼𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑁄 𑀥𑀫𑁆𑀫𑁄 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀲𑁆𑀲 𑀅𑀦𑀼𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀲𑁆𑀲 𑀘 𑀥𑀫𑁆𑀫𑀲𑁆𑀲 𑀅𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀲𑀳𑀚𑀸𑀢𑀁 𑀧𑀘𑁆𑀙𑀸𑀚𑀸𑀢’’𑀦𑁆𑀢𑀺 𑀏𑀢𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑁂 𑀯𑀺𑀬𑀸𑀢𑀺 𑀅𑀢𑁆𑀣𑁄. 𑀅𑀬𑀜𑁆𑀘 𑀅𑀢𑁆𑀣𑁄 𑀢𑀢𑀺𑀬𑀧𑀤𑀫𑀽𑀮𑀓𑁂𑀲𑀼 𑀤𑀼𑀓𑀢𑀺𑀓𑀸𑀯𑀲𑀸𑀦𑀧𑀜𑁆𑀳𑁂𑀲𑀼𑀧𑀺 𑀮𑀩𑁆𑀪𑀢𑁂𑀯. 𑀬𑀤𑀺 𑀧𑀦 𑀢𑁂 𑀧𑀜𑁆𑀳𑀸 𑀓𑀼𑀲𑀮𑀢𑁆𑀢𑀺𑀓𑁂𑀧𑀺 𑀮𑀩𑁆𑀪𑀦𑁆𑀢𑀺, 𑀅𑀣 𑀓𑀲𑁆𑀫𑀸 𑀢𑀢𑁆𑀣 𑀦 𑀉𑀤𑁆𑀥𑀝𑀸𑀢𑀺 𑀆𑀳 ‘‘𑀲𑀼𑀔𑀸𑀯𑀩𑁄𑀥𑀦𑀢𑁆𑀣𑀁 𑀧𑀦 𑀢𑀢𑁆𑀣 𑀲𑀳𑀚𑀸𑀢𑀯𑀲𑁂𑀦𑁂𑀯 𑀯𑀺𑀲𑁆𑀲𑀚𑁆𑀚𑀦𑀁 𑀓𑀢’’𑀦𑁆𑀢𑀺. 𑀲𑀳𑀚𑀸𑀢𑀯𑀲𑁂𑀦𑁂𑀯𑀸𑀢𑀺 𑀲𑀳𑀚𑀸𑀢𑀅𑀢𑁆𑀣𑀺𑀧𑀘𑁆𑀘𑀬𑀯𑀲𑁂𑀦𑁂𑀯. 𑀏𑀓𑀫𑀽𑀮𑀓𑀤𑀼𑀓𑀸𑀯𑀲𑀸𑀦𑀸𑀢𑀺 ‘‘𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲 𑀘 𑀅𑀩𑁆𑀬𑀸𑀓𑀢𑀲𑁆𑀲 𑀘𑀸’’𑀢𑀺 𑀏𑀯𑀁𑀧𑀓𑀸𑀭𑀸 𑀧𑀜𑁆𑀳𑀸. 𑀢𑀢𑁆𑀣 𑀓𑀼𑀲𑀮𑀢𑁆𑀢𑀺𑀓𑁂 𑀉𑀤𑁆𑀥𑀝𑀸. 𑀇𑀥 𑀧𑀦 𑀇𑀫𑀲𑁆𑀫𑀺𑀁 𑀉𑀧𑀸𑀤𑀺𑀦𑁆𑀦𑀢𑁆𑀢𑀺𑀓𑁂. 𑀏𑀢𑁂𑀳𑀺 𑀬𑀣𑀸𑀯𑀼𑀢𑁆𑀢𑁂𑀳𑀺 𑀯𑀺𑀲𑁆𑀲𑀚𑁆𑀚𑀦𑁂𑀳𑀺. 𑀏𑀓𑁄 𑀥𑀫𑁆𑀫𑁄𑀢𑀺 𑀏𑀓𑁄 𑀯𑁂𑀤𑀦𑀸𑀤𑀺𑀓𑁄 𑀧𑀘𑁆𑀘𑀬𑀥𑀫𑁆𑀫𑁄. 𑀅𑀦𑁂𑀓𑁂𑀳𑀻𑀢𑀺 𑀲𑀳𑀚𑀸𑀢𑀧𑀘𑁆𑀙𑀸𑀚𑀸𑀢𑀸𑀤𑀻𑀳𑀺 𑀅𑀦𑁂𑀓𑁂𑀳𑀺 𑀅𑀢𑁆𑀣𑀺𑀧𑀘𑁆𑀘𑀬𑀯𑀺𑀲𑁂𑀲𑁂𑀳𑀺. 𑀅𑀦𑁂𑀓𑁂𑀲𑀁 𑀥𑀫𑁆𑀫𑀸𑀦𑀦𑁆𑀢𑀺 𑀅𑀦𑁂𑀓𑁂𑀲𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀸𑀦𑀁. 𑀏𑀓𑁄 𑀅𑀢𑁆𑀣𑀺𑀧𑀘𑁆𑀘𑀬𑁄𑀢𑀺 𑀇𑀤𑀁 𑀅𑀢𑁆𑀣𑀺𑀧𑀘𑁆𑀘𑀬𑀢𑀸𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀁.

𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀁 𑀅𑀯𑀼𑀢𑁆𑀢𑀜𑁆𑀘 𑀅𑀢𑁆𑀣𑀺𑀧𑀘𑁆𑀘𑀬𑁂 𑀮𑀩𑁆𑀪𑀫𑀸𑀦𑀁 𑀯𑀺𑀲𑁂𑀲𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀓𑁄 𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀏𑀓𑁄𑀢𑀺 𑀅𑀢𑁆𑀣𑀺𑀧𑀘𑁆𑀘𑀬𑀯𑀺𑀲𑁂𑀲𑁂𑀲𑀼 𑀏𑀓𑁄. 𑀏𑀓𑀲𑁆𑀲𑀸𑀢𑀺 𑀢𑀸𑀤𑀺𑀲𑀲𑁆𑀲𑁂𑀯 𑀏𑀓𑀲𑁆𑀲. 𑀅𑀜𑁆𑀜𑀣𑀸 𑀳𑀺 𑀏𑀓𑁄 𑀥𑀫𑁆𑀫𑁄 𑀏𑀓𑀲𑁆𑀲 𑀥𑀫𑁆𑀫𑀲𑁆𑀲 𑀧𑀘𑁆𑀘𑀬𑁄 𑀦𑀸𑀫 𑀦𑀢𑁆𑀣𑀺. 𑀏𑀓𑁂𑀦𑁂𑀯𑀸𑀢𑀺 𑀲𑀳𑀚𑀸𑀢𑀅𑀢𑁆𑀣𑀺𑀧𑀘𑁆𑀘𑀬𑁂𑀦𑁂𑀯 𑀬𑀣𑀸 𑀑𑀓𑁆𑀓𑀦𑁆𑀢𑀺𑀓𑁆𑀔𑀡𑁂 𑀯𑀢𑁆𑀣𑀼. 𑀢𑀜𑁆𑀳𑀺 𑀅𑀢𑁆𑀢𑀦𑀸 𑀲𑀳𑀚𑀸𑀢𑀲𑁆𑀲 𑀦𑀸𑀫𑀲𑁆𑀲 𑀲𑀳𑀚𑀸𑀢𑀅𑀢𑁆𑀣𑀺𑀧𑀘𑁆𑀘𑀬𑁂𑀦𑁂𑀯 𑀧𑀘𑁆𑀘𑀬𑁄 𑀳𑁄𑀢𑀺, 𑀦 𑀧𑀼𑀭𑁂𑀚𑀸𑀢𑀸𑀤𑀺𑀦𑀸. 𑀏𑀓𑁄 𑀲𑀳𑀚𑀸𑀢𑀅𑀭𑀽𑀧𑀓𑁆𑀔𑀦𑁆𑀥𑁄 𑀅𑀦𑁂𑀓𑁂𑀲𑀁 𑀅𑀢𑁆𑀢𑀦𑀸 𑀲𑀳𑀚𑀸𑀢𑀸𑀦𑀁 𑀅𑀭𑀽𑀧𑀓𑁆𑀔𑀦𑁆𑀥𑀸𑀦𑀁 𑀏𑀓𑁂𑀦 𑀲𑀳𑀚𑀸𑀢𑀅𑀢𑁆𑀣𑀺𑀧𑀘𑁆𑀘𑀬𑁂𑀦, 𑀅𑀦𑁂𑀓𑁂𑀳𑀺 𑀲𑀳𑀚𑀸𑀢𑀧𑀘𑁆𑀙𑀸𑀚𑀸𑀢𑀅𑀢𑁆𑀣𑀺𑀧𑀘𑁆𑀘𑀬𑁂𑀳𑀺 𑀬𑀣𑀸𑀓𑁆𑀓𑀫𑀁 𑀅𑀢𑁆𑀢𑀦𑀸 𑀲𑀳𑀚𑀸𑀢𑀸𑀦𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀁 𑀧𑀼𑀭𑁂𑀚𑀸𑀢𑀸𑀦𑀁 𑀢𑁂𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀸𑀦𑀁. 𑀅𑀦𑁂𑀓𑁄 𑀧𑀼𑀭𑁂𑀚𑀸𑀢𑀯𑀢𑁆𑀣𑀼𑀭𑀽𑀧𑀜𑁆𑀘𑁂𑀯 𑀲𑀳𑀚𑀸𑀢𑀅𑀭𑀽𑀧𑀓𑁆𑀔𑀦𑁆𑀥𑀸 𑀘 𑀏𑀓𑀲𑁆𑀲 𑀅𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀬𑀣𑀸𑀓𑁆𑀓𑀫𑀁 𑀧𑀼𑀭𑁂𑀚𑀸𑀢𑀲𑀳𑀚𑀸𑀢𑀅𑀢𑁆𑀣𑀺𑀧𑀘𑁆𑀘𑀬𑁂𑀳𑀺. 𑀅𑀦𑁂𑀓𑁄 𑀅𑀭𑀽𑀧𑀥𑀫𑁆𑀫𑁄 𑀅𑀦𑁂𑀓𑁂𑀲𑀁 𑀲𑀳𑀚𑀸𑀢𑀅𑀭𑀽𑀧𑀥𑀫𑁆𑀫𑀸𑀦𑀁 𑀧𑀼𑀭𑁂𑀚𑀸𑀢𑀭𑀽𑀧𑀥𑀫𑁆𑀫𑀸𑀦𑀜𑁆𑀘 𑀲𑀳𑀚𑀸𑀢𑀧𑀘𑁆𑀙𑀸𑀚𑀸𑀢𑀅𑀢𑁆𑀣𑀺𑀧𑀘𑁆𑀘𑀬𑁂𑀳𑀺. 𑀅𑀦𑁂𑀓𑁄 𑀯𑀸 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀧𑁆𑀧𑀓𑀸𑀭𑁄 𑀅𑀦𑁂𑀓𑁂𑀲𑀁 𑀭𑀽𑀧𑀥𑀫𑁆𑀫𑀸𑀦𑀁 𑀬𑀣𑀸𑀭𑀳𑀁 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀯𑀲𑁂𑀦 𑀅𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀏𑀯𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀅𑀲𑀫𑀸𑀦𑀢𑁆𑀢𑁂𑀧𑀺 𑀅𑀬𑀫𑀢𑁆𑀣𑁄 𑀲𑀫𑁆𑀪𑀯𑀢𑀺, 𑀲𑀫𑀸𑀦𑀢𑁆𑀢𑁂 𑀧𑀦 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀢𑁂𑀦𑀸𑀳 ‘‘𑀲𑀫𑀸𑀦𑀢𑁆𑀢𑁂 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀸𑀦’’𑀦𑁆𑀢𑀺. 𑀲𑀳𑀚𑀸𑀢𑀁 𑀧𑀼𑀭𑁂𑀚𑀸𑀢𑁂𑀦𑁂𑀯 𑀲𑀳 𑀅𑀢𑁆𑀣𑀺𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀲𑀳𑀚𑀸𑀢𑀅𑀢𑁆𑀣𑀺𑀧𑀘𑁆𑀘𑀬𑀥𑀫𑁆𑀫𑁄 𑀧𑀼𑀭𑁂𑀚𑀸𑀢𑀅𑀢𑁆𑀣𑀺𑀧𑀘𑁆𑀘𑀬𑀥𑀫𑁆𑀫𑁂𑀦 𑀲𑀳𑁂𑀯 𑀅𑀢𑁆𑀣𑀺𑀧𑀘𑁆𑀘𑀬𑁄 𑀳𑁄𑀢𑀺. 𑀬𑀣𑀸 𑀯𑀢𑁆𑀣𑀼𑀦𑀸 𑀧𑀼𑀭𑁂𑀚𑀸𑀢𑀅𑀢𑁆𑀣𑀺𑀧𑀘𑁆𑀘𑀬𑀁 𑀮𑀪𑀦𑁆𑀢𑀸 𑀏𑀯 𑀓𑀼𑀲𑀮𑀸𑀤𑀺𑀥𑀫𑁆𑀫𑀸 𑀲𑀳𑀚𑀸𑀢𑀸𑀦𑀁 𑀔𑀦𑁆𑀥𑀸𑀦𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀲𑀳𑀚𑀸𑀢𑀅𑀢𑁆𑀣𑀺𑀧𑀘𑁆𑀘𑀬𑁄 𑀳𑁄𑀦𑁆𑀢𑀺, 𑀢𑀣𑀸 𑀢𑁂 𑀧𑀼𑀭𑁂𑀚𑀸𑀢𑀲𑁆𑀲 𑀓𑀸𑀬𑀲𑁆𑀲 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄𑀧𑀺 𑀳𑁄𑀦𑁆𑀢𑀺𑀬𑁂𑀯. 𑀢𑁂𑀦𑀸𑀳 ‘‘𑀧𑀘𑁆𑀙𑀸𑀚𑀸𑀢𑁂𑀦 𑀘𑀸’’𑀢𑀺. 𑀅𑀢𑁆𑀣𑀺𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀬𑀁 𑀲𑀳𑀚𑀸𑀢𑀧𑀘𑁆𑀙𑀸𑀚𑀸𑀢𑀸𑀦𑀁 𑀅𑀢𑁆𑀣𑀺𑀧𑀘𑁆𑀘𑀬𑀪𑀸𑀯𑁄 𑀧𑀘𑁆𑀘𑀬𑀥𑀫𑁆𑀫𑀸𑀦𑀁 𑀅𑀪𑁂𑀤𑁂 𑀏𑀯 𑀇𑀘𑁆𑀙𑀺𑀢𑁄, 𑀦 𑀪𑁂𑀤𑁂. 𑀢𑁂𑀦𑀸𑀳 ‘‘𑀅𑀦𑀜𑁆𑀜𑀥𑀫𑁆𑀫𑀢𑁆𑀢𑁂𑀦…𑀧𑁂… 𑀦𑀸𑀦𑀸𑀥𑀫𑁆𑀫𑀢𑁆𑀢𑁂’’𑀢𑀺.

𑀇𑀤𑀸𑀦𑀺 𑀢𑀲𑁆𑀲 𑀦𑀸𑀦𑀸𑀥𑀫𑁆𑀫𑀢𑁆𑀢𑁂 𑀅𑀪𑀸𑀯𑀁 𑀧𑀸𑀴𑀺𑀬𑀸 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀬𑀤𑀺 𑀲𑀺𑀬𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀏𑀓𑁄 𑀅𑀢𑁆𑀣𑀺𑀧𑀘𑁆𑀘𑀬𑀪𑀸𑀯𑁄 𑀦𑀢𑁆𑀣𑀻𑀢𑀺 𑀏𑀓𑀲𑁆𑀲𑁂𑀯 𑀧𑀘𑁆𑀘𑀬𑀥𑀫𑁆𑀫𑀲𑁆𑀲 𑀯𑀲𑁂𑀦 𑀮𑀩𑁆𑀪𑀫𑀸𑀦𑁄 𑀏𑀓𑁄 𑀅𑀢𑁆𑀣𑀺𑀧𑀘𑁆𑀘𑀬𑀪𑀸𑀯𑁄 𑀦𑀢𑁆𑀣𑀺. 𑀓𑀲𑁆𑀫𑀸? 𑀯𑀺𑀭𑁄𑀥𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀳𑀚𑀸𑀢…𑀧𑁂… 𑀦 𑀯𑀼𑀢𑁆𑀢’’𑀦𑁆𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸𑀢𑀺 𑀲𑀳𑀚𑀸𑀢𑀧𑀘𑁆𑀙𑀸𑀚𑀸𑀢𑀸𑀦𑀁 𑀏𑀓𑀥𑀫𑁆𑀫𑀯𑀲𑁂𑀦 𑀲𑀳 𑀅𑀮𑀸𑀪𑀢𑁄 𑀏𑀯. 𑀏𑀓𑀥𑀫𑁆𑀫𑀯𑀲𑁂𑀦𑀸𑀢𑀺 𑀏𑀓𑀲𑁆𑀲𑁂𑀯 𑀧𑀘𑁆𑀘𑀬𑀥𑀫𑁆𑀫𑀲𑁆𑀲 𑀯𑀲𑁂𑀦. 𑀢𑁂𑀦𑀸𑀳 ‘‘𑀦𑀸𑀦𑀸𑀥𑀫𑁆𑀫𑀸𑀦𑀁 𑀯𑀺𑀭𑀼𑀤𑁆𑀥𑀲𑀪𑀸𑀯𑀢𑁆𑀢𑀸’’𑀢𑀺. 𑀯𑀺𑀭𑀼𑀤𑁆𑀥𑀲𑀪𑀸𑀯𑀢𑀸 𑀘 𑀲𑀳𑀚𑀸𑀢𑀧𑀘𑁆𑀙𑀸𑀚𑀸𑀢𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸, 𑀇𑀥 𑀧𑀦 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀤𑀺𑀪𑀸𑀯𑀢𑁄𑀢𑀺. 𑀅𑀜𑁆𑀜𑀣𑀸𑀢𑀺 𑀢𑁂𑀲𑀁 𑀲𑀳𑀚𑀸𑀢𑀧𑀘𑁆𑀙𑀸𑀚𑀸𑀢𑀸𑀦𑀁 𑀏𑀓𑀚𑁆𑀛𑀁 𑀮𑀸𑀪𑁂. 𑀇𑀦𑁆𑀤𑁆𑀭𑀺𑀬𑀧𑀝𑀺𑀓𑁆𑀔𑁂𑀧𑁂𑀧𑀻𑀢𑀺 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂 𑀧𑀘𑁆𑀘𑀦𑀻𑀓𑀢𑁄 𑀞𑀺𑀢𑁂𑀧𑀺. 𑀢𑀲𑁆𑀲 𑀧𑀜𑁆𑀳𑀲𑁆𑀲 𑀮𑀸𑀪𑀢𑁄𑀢𑀺 ‘‘𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑁄 𑀘 𑀅𑀦𑀼𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑁄 𑀘 𑀥𑀫𑁆𑀫𑀸 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀲𑁆𑀲 𑀥𑀫𑁆𑀫𑀲𑁆𑀲 𑀅𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀏𑀢𑀲𑁆𑀲 𑀧𑀜𑁆𑀳𑀲𑁆𑀲 𑀮𑀸𑀪𑀢𑁄. 𑀩𑀸𑀯𑀻𑀲𑀸𑀢𑀺 𑀏𑀓𑀫𑀽𑀮𑀓𑀸𑀯𑀲𑀸𑀦𑀸 𑀦𑀯, 𑀏𑀓𑀫𑀽𑀮𑀓𑀤𑀼𑀓𑀸𑀯𑀲𑀸𑀦𑀸 𑀧𑀜𑁆𑀘, 𑀏𑀓𑀫𑀽𑀮𑀓𑀢𑀺𑀓𑀸𑀯𑀲𑀸𑀦𑀫𑁂𑀓𑀁, 𑀤𑀼𑀓𑀫𑀽𑀮𑀓𑁂𑀓𑀸𑀯𑀲𑀸𑀦𑀸 𑀘𑀢𑁆𑀢𑀸𑀭𑁄, 𑀤𑀼𑀓𑀫𑀽𑀮𑀓𑀸𑀯𑀲𑀸𑀦𑀸 𑀤𑁆𑀯𑁂, 𑀤𑀼𑀓𑀫𑀽𑀮𑀓𑀢𑀺𑀓𑀸𑀯𑀲𑀸𑀦𑀫𑁂𑀓𑀦𑁆𑀢𑀺 𑀏𑀯𑀁 𑀩𑀸𑀯𑀻𑀲𑀢𑀺. 𑀬𑀣𑀸 𑀧𑀼𑀩𑁆𑀩𑁂 𑀲𑀳𑀚𑀸𑀢𑀁 𑀧𑀼𑀭𑁂𑀚𑀸𑀢𑁂𑀦 𑀲𑀳𑁂𑀯 𑀅𑀢𑁆𑀣𑀺𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀧𑀼𑀭𑁂𑀚𑀸𑀢𑀫𑁆𑀧𑀺 𑀢𑁂𑀦𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀼𑀭𑁂𑀚𑀸𑀢𑀁 𑀲𑀳𑀚𑀸𑀢𑁂𑀦𑁂𑀯 𑀲𑀳 𑀅𑀢𑁆𑀣𑀺𑀧𑀘𑁆𑀘𑀬𑁄 𑀳𑁄𑀢𑀻’’𑀢𑀺. 𑀢𑀢𑁆𑀣 𑀲𑀳𑀚𑀸𑀢𑁂𑀦𑁂𑀯 𑀲𑀳𑀸𑀢𑀺 𑀲𑀳𑀚𑀸𑀢𑁂𑀦 𑀲𑀳𑁂𑀯. 𑀅𑀝𑁆𑀞𑀸𑀦𑀧𑁆𑀧𑀬𑀼𑀢𑁆𑀢𑁄 𑀳𑀺 𑀅𑀬𑀁 𑀏𑀯-𑀲𑀤𑁆𑀤𑁄, 𑀲𑀳𑀚𑀸𑀢𑁂𑀦 𑀦 𑀯𑀺𑀦𑀸 𑀧𑀼𑀭𑁂𑀚𑀸𑀢𑀅𑀢𑁆𑀣𑀺𑀧𑀘𑁆𑀘𑀬𑁄𑀢𑀺 𑀅𑀢𑁆𑀣𑁄. 𑀇𑀢𑀭𑁂𑀲𑀼 𑀧𑀦 𑀅𑀢𑁆𑀣𑀺𑀧𑀘𑁆𑀘𑀬𑀥𑀫𑁆𑀫𑁂𑀲𑀼 𑀦𑀺𑀬𑀫𑁄 𑀦𑀢𑁆𑀣𑀺 𑀢𑁂𑀳𑀺 𑀲𑀳𑀸𑀧𑀺 𑀯𑀺𑀦𑀸𑀧𑀺 𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀦 𑀇𑀢𑀭𑁂𑀳𑀻’’𑀢𑀺. 𑀢𑀫𑁆𑀧𑀺 𑀯𑀢𑁆𑀣𑀼 𑀢𑀁𑀲𑀳𑀺𑀢𑀧𑀼𑀭𑁂𑀚𑀸𑀢𑀫𑁂𑀯𑀸𑀢𑀺 𑀬𑀁 ‘‘𑀧𑀼𑀭𑁂𑀚𑀸𑀢𑀁 𑀲𑀳𑀚𑀸𑀢𑁂𑀦𑁂𑀯 𑀲𑀳 𑀅𑀢𑁆𑀣𑀺𑀧𑀘𑁆𑀘𑀬𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑀜𑁆𑀘𑁂𑀯 𑀢𑀁𑀲𑀳𑀺𑀢𑀸𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀫𑁂𑀯 𑀘, 𑀦 𑀓𑁂𑀯𑀮𑀁 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀁. 𑀢𑁂𑀦𑀸𑀳 ‘‘𑀦 𑀇𑀢𑀭’’𑀦𑁆𑀢𑀺.

𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀧𑀸𑀞𑀦𑁆𑀢𑀭𑁂𑀦 𑀯𑀺𑀪𑀸𑀯𑁂𑀢𑀼𑀁 ‘‘𑀓𑀼𑀲𑀮𑀢𑁆𑀢𑀺𑀓𑁂 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀤𑀺 𑀧𑀼𑀭𑁂𑀚𑀸𑀢𑀁 𑀢𑀁𑀲𑀳𑀚𑀸𑀢𑁂𑀦 𑀯𑀺𑀦𑀸𑀧𑀺 𑀅𑀢𑁆𑀣𑀺𑀧𑀘𑁆𑀘𑀬𑁄 𑀲𑀺𑀬𑀸, ‘‘𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀅𑀢𑁆𑀣𑀺𑀬𑀸 𑀧𑀜𑁆𑀘𑀸’’𑀢𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸, 𑀯𑀼𑀢𑁆𑀢𑀜𑁆𑀘𑁂𑀢𑀁, 𑀢𑀲𑁆𑀫𑀸 𑀯𑀺𑀜𑁆𑀜𑀸𑀬𑀢𑀺 ‘‘𑀧𑀼𑀭𑁂𑀚𑀸𑀢𑀁 𑀲𑀳𑀚𑀸𑀢𑁂𑀦 𑀲𑀳𑁂𑀯 𑀅𑀢𑁆𑀣𑀺𑀧𑀘𑁆𑀘𑀬𑁄 𑀳𑁄𑀢𑀻’’𑀢𑀺. 𑀦𑀯𑀺𑀧𑁆𑀧𑀬𑀼𑀢𑁆𑀢𑁂 𑀩𑀸𑀯𑀻𑀲𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣𑀸𑀢𑀺 𑀲𑀦𑀺𑀤𑀲𑁆𑀲𑀦𑀢𑁆𑀢𑀺𑀓𑁂. 𑀅𑀢𑁆𑀣𑀺𑀯𑀺𑀪𑀗𑁆𑀕𑁂𑀢𑀺 𑀅𑀢𑁆𑀣𑀺𑀧𑀘𑁆𑀘𑀬𑀲𑁆𑀲 𑀯𑀺𑀪𑀚𑀦𑁂. 𑀢𑀺𑀓𑀫𑀽𑀮𑀓𑁂𑀓𑀸𑀯𑀲𑀸𑀦𑀦𑁆𑀢𑀺 ‘‘𑀲𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑁄 𑀘 𑀅𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑁄 𑀘 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑁄 𑀘 𑀥𑀫𑁆𑀫𑀸 𑀅𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀲𑁆𑀲 𑀥𑀫𑁆𑀫𑀲𑁆𑀲 𑀅𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀏𑀯𑀁 𑀢𑀺𑀓𑀫𑀽𑀮𑀓𑁄 𑀏𑀓𑀸𑀯𑀲𑀸𑀦𑁄 𑀧𑀜𑁆𑀳𑁄 𑀉𑀤𑁆𑀥𑀝𑁄. 𑀧𑀘𑁆𑀘𑀬𑀼𑀤𑁆𑀥𑀸𑀭𑁂𑀢𑀺 𑀘 𑀢𑀢𑁆𑀣𑁂𑀯 𑀧𑀘𑁆𑀘𑀬𑀼𑀤𑁆𑀥𑀸𑀭𑁂. 𑀢𑀣𑀸 𑀘 𑀲𑁄 𑀧𑀜𑁆𑀳𑁄 𑀉𑀤𑁆𑀥𑀝𑁄. 𑀢𑀬𑀺𑀤𑀁 𑀓𑀣𑀁, 𑀬𑀤𑀺 𑀧𑀼𑀭𑁂𑀚𑀸𑀢𑀁 𑀲𑀳𑀚𑀸𑀢𑁂𑀦𑁂𑀯 𑀲𑀳 𑀅𑀢𑁆𑀣𑀺𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀘𑁄𑀤𑀦𑀸𑀬𑀁 𑀆𑀳 ‘‘𑀢𑀁 𑀯𑀢𑁆𑀣𑀼𑀲𑀳𑀺𑀢𑀲𑁆𑀲…𑀧𑁂… 𑀧𑀘𑁆𑀘𑀬𑀪𑀸𑀯𑀢𑁄’’𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀬𑀤𑀺𑀧𑀺 𑀢𑀢𑁆𑀣 𑀲𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀕𑁆𑀕𑀳𑀡𑁂𑀦 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀲𑁆𑀲 𑀅𑀢𑁆𑀣𑀺𑀧𑀘𑁆𑀘𑀬𑀪𑀸𑀯𑁄 𑀯𑀼𑀢𑁆𑀢𑁄, 𑀢𑀣𑀸𑀧𑀺 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑀕𑁆𑀕𑀳𑀡𑀢𑁄 𑀯𑀢𑁆𑀣𑀼𑀫𑁆𑀧𑀺 𑀕𑀳𑀺𑀢𑀦𑁆𑀢𑀺 𑀯𑀢𑁆𑀣𑀼𑀲𑀳𑀺𑀢𑀲𑁆𑀲 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀲𑁆𑀲 𑀲𑀳𑀚𑀸𑀢𑁂𑀦 𑀲𑀳𑁂𑀯 𑀅𑀢𑁆𑀣𑀺𑀧𑀘𑁆𑀘𑀬𑀪𑀸𑀯𑁄 𑀯𑀼𑀢𑁆𑀢𑁄𑀢𑀺. 𑀧𑀘𑁆𑀙𑀸𑀚𑀸𑀢𑀁 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑁂𑀳𑁂𑀯 𑀲𑀳 𑀅𑀢𑁆𑀣𑀺𑀧𑀘𑁆𑀘𑀬𑁄 𑀳𑁄𑀢𑀺, 𑀦 𑀧𑀼𑀭𑁂𑀚𑀸𑀢𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀦𑀜𑁆𑀜𑀥𑀫𑁆𑀫𑀢𑁆𑀢𑁂𑀢𑀺 𑀧𑀘𑁆𑀘𑀬𑀥𑀫𑁆𑀫𑀲𑁆𑀲 𑀅𑀦𑀜𑁆𑀜𑀢𑁆𑀢𑁂. 𑀲𑀳𑀚𑀸𑀢𑁂𑀦 𑀲𑀳 𑀅𑀢𑁆𑀣𑀺𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣𑀸𑀧𑀺 𑀧𑀝𑀺𑀬𑁄𑀕𑀺𑀧𑀼𑀭𑁂𑀚𑀸𑀢𑀁𑀬𑁂𑀯 𑀤𑀝𑁆𑀞𑀩𑁆𑀩𑀁. ‘‘𑀅𑀢𑁆𑀣𑀺𑀧𑀘𑁆𑀘𑀬𑀯𑀺𑀲𑁂𑀲𑁂𑀲𑀼 𑀧𑀦𑀸’’𑀢𑀺𑀆𑀤𑀺𑀦𑀸 𑀅𑀢𑁆𑀢𑀦𑀸 𑀤𑀲𑁆𑀲𑀺𑀢𑀁 𑀯𑀺𑀘𑀸𑀭𑀁 ‘‘𑀏𑀯𑀫𑁂𑀢’’𑀦𑁆𑀢𑀺 𑀦𑀺𑀕𑀫𑀦𑀯𑀲𑁂𑀦 𑀧𑀘𑁆𑀘𑀸𑀫𑀲𑀢𑀺.

𑀉𑀧𑀸𑀤𑀺𑀦𑁆𑀦𑀢𑁆𑀢𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀯𑀺𑀢𑀓𑁆𑀓𑀢𑁆𑀢𑀺𑀓𑀯𑀡𑁆𑀡𑀦𑀸

𑁨𑁨. 𑀯𑀺𑀢𑀓𑁆𑀓𑀢𑁆𑀢𑀺𑀓𑁂 𑀲𑀢𑁆𑀢𑀲𑀼 𑀫𑀽𑀮𑀓𑁂𑀲𑀽𑀢𑀺 ‘‘𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘𑀸’’𑀢𑀺𑀆𑀤𑀺𑀦𑀸 𑀆𑀕𑀢𑀸𑀦𑀺 𑀢𑀻𑀡𑀺 𑀏𑀓𑀓𑀸𑀦𑀺, 𑀢𑀻𑀡𑀺 𑀤𑀼𑀓𑀸𑀦𑀺, 𑀏𑀓𑀁 𑀢𑀺𑀓𑀦𑁆𑀢𑀺 𑀏𑀯𑀁 𑀏𑀓𑀫𑀽𑀮𑀓𑀸𑀦𑀺 𑀬𑀸𑀦𑀺 𑀲𑀢𑁆𑀢𑀫𑀽𑀮𑀓𑀸𑀦𑀺, 𑀢𑁂𑀲𑀼. 𑀬𑀣𑀸𑀓𑁆𑀓𑀫𑀦𑁆𑀢𑀺 𑀧𑀸𑀴𑀺𑀬𑀁 𑀆𑀕𑀢𑀸𑀦𑀼𑀓𑁆𑀓𑀫𑁂𑀦. 𑀲𑀢𑁆𑀢𑀸𑀢𑀺 𑀧𑀞𑀫𑁂 𑀏𑀓𑀓𑁂 𑀲𑀢𑁆𑀢. 𑀧𑀜𑁆𑀘𑀸𑀢𑀺 𑀤𑀼𑀢𑀺𑀬𑁂 𑀧𑀜𑁆𑀘. 𑀢𑀸𑀦𑀺𑀫𑀸𑀦𑀺 𑀳𑁂𑀢𑀼𑀧𑀘𑁆𑀘𑀬𑁂 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀇𑀥 𑀧𑀦 𑀧𑀯𑀢𑁆𑀢𑀺𑀯𑀲𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁. 𑀢𑀻𑀡𑀻𑀢𑀺𑀆𑀤𑀻𑀲𑀼 𑀢𑀢𑀺𑀬𑁂 𑀢𑀻𑀡𑀺, 𑀘𑀢𑀼𑀢𑁆𑀣𑁂 𑀏𑀓𑀁, 𑀧𑀜𑁆𑀘𑀫𑁂 𑀢𑀻𑀡𑀺, 𑀙𑀝𑁆𑀞𑁂𑀧𑀺 𑀢𑀻𑀡𑀺, 𑀲𑀢𑁆𑀢𑀫𑁂 𑀏𑀓𑀁. 𑀢𑀸𑀦𑀺 𑀧𑀦 𑀬𑀣𑀸𑀓𑁆𑀓𑀫𑀁 𑀢𑀢𑀺𑀬𑀧𑀤𑀁 𑀧𑀝𑀺𑀘𑁆𑀘 𑀢𑀢𑀺𑀬𑀧𑀤𑀤𑀼𑀢𑀺𑀬𑀧𑀤𑀢𑀤𑀼𑀪𑀬𑀯𑀲𑁂𑀦, 𑀧𑀞𑀫𑀧𑀤𑀢𑀢𑀺𑀬𑀧𑀤𑀸𑀦𑀺 𑀧𑀝𑀺𑀘𑁆𑀘 𑀢𑀢𑀺𑀬𑀧𑀤𑀯𑀲𑁂𑀦, 𑀧𑀞𑀫𑀧𑀤𑀤𑀼𑀢𑀺𑀬𑀧𑀤𑀸𑀦𑀺 𑀧𑀝𑀺𑀘𑁆𑀘 𑀧𑀞𑀫𑀧𑀤𑀢𑀢𑀺𑀬𑀧𑀤𑀢𑀤𑀼𑀪𑀬𑀯𑀲𑁂𑀦, 𑀤𑀼𑀢𑀺𑀬𑀧𑀤𑀢𑀢𑀺𑀬𑀧𑀤𑀸𑀦𑀺 𑀧𑀝𑀺𑀘𑁆𑀘 𑀧𑀞𑀫𑀧𑀤𑀢𑀢𑀺𑀬𑀧𑀤𑀢𑀤𑀼𑀪𑀬𑀯𑀲𑁂𑀦, 𑀧𑀞𑀫𑀤𑀼𑀢𑀺𑀬𑀢𑀢𑀺𑀬𑀧𑀤𑀸𑀦𑀺 𑀧𑀝𑀺𑀘𑁆𑀘 𑀢𑀢𑀺𑀬𑀧𑀤𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀜𑁆𑀜𑀫𑀜𑁆𑀜𑁂 𑀅𑀝𑁆𑀞𑀯𑀻𑀲𑀸𑀢𑀺𑀆𑀤𑀻𑀲𑀼𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀁 𑀕𑀡𑀦𑀁 𑀧𑀘𑁆𑀘𑀸𑀫𑀲𑀢𑀺. 𑀤𑀼𑀢𑀺𑀬𑀢𑀢𑀺𑀬𑀫𑀽𑀮𑀓𑁂𑀲𑀼 𑀏𑀓𑀁 𑀏𑀓𑀦𑁆𑀢𑀺 𑀤𑀼𑀢𑀺𑀬𑀫𑀽𑀮𑀓𑁂 𑀏𑀓𑀁, 𑀢𑀢𑀺𑀬𑀫𑀽𑀮𑀓𑁂 𑀏𑀓𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑀣𑀸 𑀆𑀲𑁂𑀯𑀦𑁂𑀢𑀺 𑀬𑀣𑀸 𑀧𑀼𑀭𑁂𑀚𑀸𑀢𑁂 𑀏𑀓𑀸𑀤𑀲, 𑀢𑀣𑀸 𑀆𑀲𑁂𑀯𑀦𑁂𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀸𑀦𑀻𑀢𑀺 𑀅𑀥𑀺𑀧𑀢𑀺𑀅𑀜𑁆𑀜𑀫𑀜𑁆𑀜𑀧𑀼𑀭𑁂𑀚𑀸𑀢𑀸𑀲𑁂𑀯𑀦𑀢𑁄 𑀅𑀜𑁆𑀜𑁂𑀲𑀼 𑀧𑀘𑁆𑀘𑀬𑁂𑀲𑀼 𑀕𑀡𑀦𑀸𑀦𑀺. 𑀳𑁂𑀢𑀼𑀆𑀭𑀫𑁆𑀫𑀡𑀲𑀤𑀺𑀲𑀸𑀦𑀻𑀢𑀺 𑀳𑁂𑀢𑀼𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀲𑀼 𑀕𑀡𑀦𑀸𑀲𑀤𑀺𑀲𑀸𑀦𑀺.

𑁩𑁧. 𑀅𑀯𑀺𑀲𑁂𑀲𑁂𑀦𑀸𑀢𑀺 ‘‘𑀯𑀺𑀧𑀸𑀓’’𑀦𑁆𑀢𑀺 𑀯𑀺𑀲𑁂𑀲𑀦𑀁 𑀅𑀓𑀢𑁆𑀯𑀸 𑀦 𑀧𑀦 𑀯𑀺𑀲𑁆𑀲𑀚𑁆𑀚𑀦𑀁 𑀓𑀢𑀦𑁆𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀓𑀸𑀭𑀡𑀁 𑀯𑀢𑁆𑀢𑀼𑀁 ‘‘𑀓𑀲𑁆𑀫𑀸’’𑀢𑀺𑀆𑀤𑀺𑀫𑀸𑀳. 𑀇𑀢𑀭𑁂𑀲𑀦𑁆𑀢𑀺 𑀮𑁄𑀓𑀺𑀬𑀯𑀺𑀧𑀸𑀓𑀸𑀦𑀁. 𑀢𑁂 𑀯𑀺𑀲𑀼𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀯𑀼𑀢𑁆𑀢𑀸𑀢𑀺 𑀢𑁂 𑀬𑀣𑀸𑀯𑀼𑀢𑁆𑀢𑀮𑁄𑀓𑀺𑀬𑀯𑀺𑀧𑀸𑀓𑀸 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀲𑀸𑀫𑀜𑁆𑀜𑀢𑁄 𑀯𑀺𑀲𑀼𑀁 𑀦𑀻𑀳𑀭𑀺𑀢𑁆𑀯𑀸 𑀯𑀼𑀢𑁆𑀢𑀸. ‘‘𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑁂 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸 𑀅𑀥𑀺𑀧𑀢𑀻’’𑀢𑀺 𑀯𑀼𑀢𑁆𑀢𑀭𑀸𑀲𑀺 𑀧𑀼𑀭𑀺𑀫𑀓𑁄𑀝𑁆𑀞𑀸𑀲𑁄.

𑁩𑁮. 𑀏𑀢𑀦𑁆𑀢𑀺 ‘‘𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀁 𑀅𑀯𑀺𑀢𑀓𑁆𑀓…𑀧𑁂… 𑀲𑀳 𑀕𑀘𑁆𑀙𑀦𑁆𑀢𑁂𑀦𑀸’’𑀢𑀺 𑀆𑀕𑀢𑀧𑀸𑀴𑀺𑀧𑀤𑀁. 𑀢𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀽𑀮𑀁…𑀧𑁂… 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺 𑀆𑀳. 𑀢𑀢𑁆𑀣 𑀅𑀯𑀺𑀢𑀓𑁆𑀓…𑀧𑁂… 𑀬𑁄𑀚𑁂𑀦𑁆𑀢𑁂𑀦𑀸𑀢𑀺 𑀅𑀯𑀺𑀢𑀓𑁆𑀓𑁂𑀳𑀺 𑀅𑀯𑀺𑀢𑀓𑁆𑀓𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑁂𑀳𑀺 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀧𑀤𑁂𑀳𑀺 𑀲𑀳 𑀫𑀽𑀮𑀧𑀤𑀁, 𑀆𑀲𑁂𑀯𑀦𑀫𑀽𑀮𑀓𑀫𑁂𑀯 𑀯𑀸 𑀕𑀘𑁆𑀙𑀦𑁆𑀢𑁂𑀦 𑀬𑁄𑀚𑁂𑀦𑁆𑀢𑁂𑀦 𑀦𑀧𑀼𑀭𑁂𑀚𑀸𑀢𑀲𑀤𑀺𑀲𑀁 𑀦𑀸𑀲𑁂𑀯𑀦𑁂 𑀧𑀸𑀴𑀺𑀕𑀫𑀦𑀁 𑀓𑀸𑀢𑀩𑁆𑀩𑀁, 𑀧𑀞𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀧𑁄𑀢𑁆𑀣𑀓𑁂𑀲𑀼 𑀧𑀦 ‘‘𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀁 𑀯𑀺𑀧𑀸𑀓𑁂𑀦 𑀲𑀳 𑀕𑀘𑁆𑀙𑀦𑁆𑀢𑁂𑀦𑀸’’𑀢𑀺 𑀤𑀺𑀲𑁆𑀲𑀢𑀺, 𑀯𑀺𑀧𑀸𑀓𑁂𑀦 𑀯𑀺𑀲𑁂𑀲𑀦𑀪𑀽𑀢𑁂𑀦 𑀲𑀳 𑀬𑁄𑀚𑁂𑀦𑁆𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑀸𑀳 ‘‘𑀯𑀺𑀧𑀸𑀓𑀁 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀦𑁆𑀢𑀺𑀆𑀤𑀺 𑀬𑁄𑀚𑁂𑀢𑀩𑁆𑀩’’𑀦𑁆𑀢𑀺.

𑀏𑀓𑀫𑀽𑀮𑀓𑁂 𑀧𑀸𑀴𑀺𑀬𑀁 𑀬𑁄𑀚𑀺𑀢𑀫𑁂𑀯𑀸𑀢𑀺 ‘‘𑀤𑀼𑀫𑀽𑀮𑀓𑁂𑀲𑀼 𑀧𑀞𑀫𑁂’’𑀢𑀺 𑀯𑀼𑀢𑁆𑀢𑀁.

𑁪𑁯. 𑀫𑀽𑀮𑀧𑀤𑀫𑁂𑀯 𑀅𑀯𑀲𑀸𑀦𑀪𑀸𑀯𑁂𑀦𑀸𑀢𑀺 ‘‘𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀁 𑀥𑀫𑁆𑀫𑀁 𑀧𑀘𑁆𑀘𑀬𑀸 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀦𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺𑀆𑀤𑀺𑀦𑀸 𑀫𑀽𑀮𑀧𑀤𑀫𑁂𑀯 𑀅𑀯𑀲𑀸𑀦𑀪𑀸𑀯𑁂𑀦 𑀬𑁄𑀚𑀺𑀢𑀁. 𑀲𑀢𑁆𑀢 𑀫𑁄𑀳𑀸 𑀉𑀤𑁆𑀥𑀭𑀺𑀢𑀩𑁆𑀩𑀸𑀢𑀺 𑀇𑀤𑀁 𑀦𑀳𑁂𑀢𑀼𑀧𑀘𑁆𑀘𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀝𑀺𑀘𑁆𑀘𑀯𑀸𑀭𑁂 𑀳𑀺 𑀅𑀳𑁂𑀢𑀼𑀓𑀫𑁄𑀳𑁄 𑀢𑀺𑀓𑁆𑀔𑀢𑁆𑀢𑀼𑀫𑁂𑀯 𑀆𑀕𑀢𑁄. 𑀇𑀥 𑀧𑀦 ‘‘𑀯𑀢𑁆𑀣𑀼𑀁 𑀧𑀘𑁆𑀘𑀬𑀸’’𑀢𑀺𑀆𑀤𑀺𑀦𑀸 𑀘𑀢𑀽𑀲𑀼𑀧𑀺 𑀫𑀽𑀮𑀓𑁂𑀲𑀼 𑀆𑀕𑀢𑁄, 𑀢𑀲𑁆𑀫𑀸 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀆𑀕𑀫𑀦𑀁 𑀲𑀦𑁆𑀥𑀸𑀬 ‘‘𑀲𑀢𑁆𑀢 𑀫𑁄𑀳𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀉𑀧𑀦𑀺𑀲𑁆𑀲𑀬𑁂𑀦 𑀲𑀗𑁆𑀕𑀳𑀺𑀢𑀢𑁆𑀢𑀸𑀢𑀺 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦𑁂𑀯 𑀓𑀫𑁆𑀫𑀧𑀘𑁆𑀘𑀬𑀲𑁆𑀲 𑀲𑀗𑁆𑀕𑀳𑀺𑀢𑀢𑁆𑀢𑀸. 𑀲𑀩𑁆𑀩𑀲𑁆𑀲𑀧𑀺 𑀭𑀽𑀧𑀸𑀭𑀽𑀧𑀸𑀯𑀘𑀭𑀓𑀫𑁆𑀫𑀲𑁆𑀲 𑀩𑀮𑀯𑀪𑀸𑀯𑀢𑁄 𑀉𑀧𑀦𑀺𑀲𑁆𑀲𑀬𑀢𑁆𑀢𑀸𑀪𑀸𑀯𑁄 𑀦𑀢𑁆𑀣𑀺, 𑀬𑀢𑁄 𑀢𑀁 ‘‘𑀕𑀭𑀽’’𑀢𑀺 𑀯𑀼𑀘𑁆𑀘𑀢𑀺, 𑀓𑀫𑁆𑀫𑀓𑁆𑀔𑀬𑀓𑀭𑀲𑁆𑀲 𑀧𑀦 𑀓𑀫𑁆𑀫𑀲𑁆𑀲 𑀩𑀮𑀯𑀪𑀸𑀯𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀇𑀫𑀫𑀢𑁆𑀣𑀁 𑀧𑀸𑀴𑀺𑀬𑀸 𑀏𑀯 𑀯𑀺𑀪𑀸𑀯𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀉𑀧𑀸𑀤𑀺𑀦𑁆𑀦𑀢𑁆𑀢𑀺𑀓𑀧𑀜𑁆𑀳𑀸𑀯𑀸𑀭𑀧𑀘𑁆𑀘𑀦𑀻𑀬𑁂 𑀳𑀺…𑀧𑁂… 𑀯𑀺𑀜𑁆𑀜𑀸𑀬𑀢𑀻’’𑀢𑀺.

𑀯𑀺𑀢𑀓𑁆𑀓𑀢𑁆𑀢𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.