𑀧𑀝𑁆𑀞𑀸𑀦𑀧𑀓𑀭𑀡-𑀅𑀦𑀼𑀝𑀻𑀓𑀸

𑀕𑀦𑁆𑀣𑀸𑀭𑀫𑁆𑀪𑀯𑀡𑁆𑀡𑀦𑀸

𑀓𑀸𑀫𑀕𑀼𑀡𑀸𑀤𑀻𑀳𑀻𑀢𑀺 𑀓𑀸𑀫𑀕𑀼𑀡𑀛𑀸𑀦𑀸𑀪𑀺𑀜𑁆𑀜𑀸𑀘𑀺𑀢𑁆𑀢𑀺𑀲𑁆𑀲𑀭𑀺𑀬𑀸𑀤𑀻𑀳𑀺. 𑀮𑀴𑀦𑁆𑀢𑀻𑀢𑀺 𑀮𑀴𑀺𑀢𑀸𑀦𑀼𑀪𑀯𑀦𑀯𑀲𑁂𑀦 𑀭𑀫𑀦𑁆𑀢𑀺. 𑀢𑁂𑀲𑀽𑀢𑀺 𑀓𑀸𑀫𑀕𑀼𑀡𑀸𑀤𑀻𑀲𑀼. 𑀯𑀺𑀳𑀭𑀦𑁆𑀢𑀻𑀢𑀺 𑀇𑀭𑀺𑀬𑀸𑀧𑀣𑀧𑀭𑀺𑀯𑀢𑁆𑀢𑀦𑀸𑀤𑀺𑀦𑀸 𑀯𑀢𑁆𑀢𑀦𑁆𑀢𑀺. 𑀧𑀘𑁆𑀘𑀢𑁆𑀣𑀺𑀓𑁂𑀢𑀺 𑀩𑀸𑀳𑀺𑀭𑀩𑁆𑀪𑀦𑁆𑀢𑀭𑀪𑁂𑀤𑁂 𑀅𑀫𑀺𑀢𑁆𑀢𑁂. 𑀇𑀲𑁆𑀲𑀭𑀺𑀬𑀁 𑀢𑀢𑁆𑀣 𑀢𑀢𑁆𑀣 𑀆𑀥𑀺𑀧𑀢𑁂𑀬𑁆𑀬𑀁. 𑀞𑀸𑀦𑀁 𑀲𑁂𑀝𑁆𑀞𑀺𑀲𑁂𑀦𑀸𑀧𑀢𑀺𑀬𑀼𑀯𑀭𑀸𑀚𑀸𑀤𑀺𑀝𑁆𑀞𑀸𑀦𑀦𑁆𑀢𑀭𑀁. 𑀆𑀤𑀺-𑀲𑀤𑁆𑀤𑁂𑀦 𑀧𑀭𑀺𑀯𑀸𑀭𑀧𑀭𑀺𑀘𑁆𑀙𑁂𑀤𑀸𑀤𑀺 𑀲𑀗𑁆𑀕𑀬𑁆𑀳𑀢𑀺. 𑀧𑀼𑀜𑁆𑀜𑀬𑁄𑀕𑀸𑀦𑀼𑀪𑀸𑀯𑀧𑁆𑀧𑀢𑁆𑀢𑀸𑀬𑀸𑀢𑀺 𑀤𑀸𑀦𑀫𑀬𑀸𑀤𑀺𑀧𑀼𑀜𑁆𑀜𑀸𑀦𑀼𑀪𑀸𑀯𑀸𑀥𑀺𑀕𑀢𑀸𑀬 𑀲𑀫𑀣𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀲𑀗𑁆𑀔𑀸𑀢𑀬𑁄𑀕𑀸𑀦𑀼𑀪𑀸𑀯𑀸𑀥𑀺𑀕𑀢𑀸𑀬 𑀘. 𑀚𑀼𑀢𑀺𑀬𑀸𑀢𑀺 𑀲𑀭𑀻𑀭𑀧𑁆𑀧𑀪𑀸𑀬 𑀘𑁂𑀯 𑀜𑀸𑀡𑀧𑁆𑀧𑀪𑀸𑀬 𑀘. 𑀏𑀢𑁆𑀣 𑀘 𑀤𑁂𑀯-𑀲𑀤𑁆𑀤𑁄 𑀬𑀣𑀸 𑀓𑀻𑀴𑀸𑀯𑀺𑀚𑀺𑀕𑀺𑀲𑀸𑀯𑁄𑀳𑀸𑀭𑀚𑀼𑀢𑀺𑀕𑀢𑀺𑀅𑀢𑁆𑀣𑁄, 𑀏𑀯𑀁 𑀲𑀢𑁆𑀢𑀺𑀅𑀪𑀺𑀢𑁆𑀣𑀯𑀓𑀫𑀦𑀢𑁆𑀣𑁄𑀧𑀺 𑀳𑁄𑀢𑀺 𑀥𑀸𑀢𑀼𑀲𑀤𑁆𑀤𑀸𑀦𑀁 𑀅𑀦𑁂𑀓𑀢𑁆𑀣𑀪𑀸𑀯𑀢𑁄𑀢𑀺 ‘‘𑀬𑀤𑀺𑀘𑁆𑀙𑀺𑀢𑀦𑀺𑀧𑁆𑀨𑀸𑀤𑀦𑁂 𑀲𑀓𑁆𑀓𑁄𑀦𑁆𑀢𑀻𑀢𑀺 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀇𑀤𑁆𑀥𑀺𑀯𑀺𑀥𑀸𑀤𑀺𑀢𑀸𑀫𑀢𑁆𑀢𑁂𑀦 𑀪𑀕𑀯𑀢𑁄 𑀅𑀪𑀺𑀜𑁆𑀜𑀸𑀤𑀻𑀦𑀁 𑀲𑀸𑀯𑀓𑁂𑀳𑀺 𑀲𑀸𑀥𑀸𑀭𑀡𑀢𑀸𑀯𑀘𑀦𑀁, 𑀲𑀪𑀸𑀯𑀢𑁄 𑀧𑀦 𑀲𑀩𑁆𑀩𑁂𑀧𑀺 𑀩𑀼𑀤𑁆𑀥𑀕𑀼𑀡𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑀸𑀬𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀺𑀭𑀢𑀺𑀲𑀬𑀸𑀬 𑀅𑀪𑀺𑀜𑁆𑀜𑀸𑀓𑀻𑀴𑀸𑀬, 𑀉𑀢𑁆𑀢𑀫𑁂𑀳𑀺 𑀤𑀺𑀩𑁆𑀩𑀩𑁆𑀭𑀳𑁆𑀫𑀅𑀭𑀺𑀬𑀯𑀺𑀳𑀸𑀭𑁂𑀳𑀻’’𑀢𑀺 𑀆𑀳. 𑀘𑀺𑀢𑁆𑀢𑀺𑀲𑁆𑀲𑀭𑀺𑀬𑀲𑀢𑁆𑀢𑀥𑀦𑀸𑀤𑀻𑀦𑀁 𑀤𑀸𑀦𑀲𑀗𑁆𑀔𑀸𑀢𑁂𑀦 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑀲𑀓𑁆𑀓𑀸𑀭𑀸𑀦𑀁 𑀕𑀳𑀡𑀲𑀗𑁆𑀔𑀸𑀢𑁂𑀦𑀸𑀢𑀺 𑀬𑁄𑀚𑀦𑀸. 𑀕𑀳𑀡𑀜𑁆𑀘𑁂𑀢𑁆𑀣 𑀢𑁂𑀲𑀼 𑀉𑀧𑀮𑀩𑁆𑀪𑀫𑀸𑀦𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑀸𑀦𑀁 𑀢𑁂𑀳𑀺 𑀉𑀧𑀦𑀻𑀬𑀫𑀸𑀦𑀲𑀓𑁆𑀓𑀸𑀭𑀲𑁆𑀲 𑀘 𑀅𑀪𑀺𑀦𑀦𑁆𑀤𑀦𑀁 𑀅𑀦𑀼𑀫𑁄𑀤𑀦𑀁 𑀲𑀫𑁆𑀧𑀝𑀺𑀘𑁆𑀙𑀦𑀜𑁆𑀘 𑀯𑁂𑀤𑀺𑀢𑀩𑁆𑀩𑀁. 𑀥𑀫𑁆𑀫𑀲𑀪𑀸𑀯𑀸𑀦𑀼𑀭𑀽𑀧𑀸𑀦𑀼𑀲𑀸𑀲𑀦𑀻𑀯𑀘𑀦𑁂𑀦𑁂𑀯 𑀘 𑀧𑀦 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀧𑀺 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸 𑀯𑀻𑀢𑀺𑀓𑁆𑀓𑀫𑀥𑀫𑁆𑀫𑀸𑀦𑀼𑀭𑀽𑀧𑀸 𑀅𑀦𑀼𑀲𑀸𑀲𑀦𑀻𑀢𑀺 𑀓𑀢𑁆𑀯𑀸. 𑀜𑀸𑀡𑀕𑀢𑀺 𑀜𑀸𑀡𑁂𑀦 𑀕𑀦𑁆𑀢𑀩𑁆𑀩𑀲𑁆𑀲 𑀜𑁂𑀬𑁆𑀬𑀲𑁆𑀲 𑀅𑀯𑀩𑁄𑀥𑁄. 𑀲𑀫𑀦𑁆𑀦𑀸𑀕𑀢𑀢𑁆𑀢𑀸𑀢𑀺 𑀇𑀤𑀁 ‘‘𑀅𑀪𑀺𑀜𑁆𑀜𑀸𑀓𑀻𑀴𑀸𑀬𑀸’’𑀢𑀺𑀆𑀤𑀻𑀲𑀼 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀁, 𑀢𑀣𑀸 𑀲𑀤𑁂𑀯𑀓𑁂𑀦 𑀮𑁄𑀓𑁂𑀦𑀸𑀢𑀺 𑀇𑀤𑀁 ‘‘𑀕𑀫𑀦𑀻𑀬𑀢𑁄’’𑀢𑀺𑀆𑀤𑀻𑀲𑀼. 𑀢𑁂 𑀤𑁂𑀯𑁂𑀢𑀺 𑀲𑀫𑁆𑀫𑀼𑀢𑀺𑀤𑁂𑀯𑀸𑀤𑀺𑀓𑁂 𑀤𑁂𑀯𑁂. 𑀢𑁂𑀳𑀺 𑀕𑀼𑀡𑁂𑀳𑀻𑀢𑀺 𑀅𑀪𑀺𑀜𑁆𑀜𑀸𑀤𑀺𑀕𑀼𑀡𑁂𑀳𑀺. 𑀧𑀽𑀚𑀦𑀻𑀬𑀢𑀭𑁄 𑀤𑁂𑀯𑁄𑀢𑀺 𑀇𑀤𑀁 𑀧𑀽𑀚𑀦𑀻𑀬𑀧𑀭𑀺𑀬𑀸𑀬𑁄 𑀅𑀬𑀁 𑀅𑀢𑀺-𑀲𑀤𑁆𑀤𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀢𑀺𑀭𑁂𑀓𑀢𑀭𑁄𑀢𑀺 𑀅𑀥𑀺𑀓𑀢𑀭𑁄. 𑀉𑀧𑀧𑀢𑁆𑀢𑀺𑀤𑁂𑀯𑀸𑀦𑀦𑁆𑀢𑀺 𑀇𑀤𑀁 𑀢𑀩𑁆𑀩𑀳𑀼𑀮𑀢𑀸𑀬 𑀯𑀼𑀢𑁆𑀢𑀁. 𑀯𑀺𑀲𑀼𑀤𑁆𑀥𑀺𑀤𑁂𑀯𑀸𑀧𑀺 𑀳𑀺 𑀢𑀢𑁆𑀣 𑀯𑀺𑀚𑁆𑀚𑀦𑁆𑀢𑁂𑀯, 𑀢𑁂𑀲𑀼𑀧𑀺 𑀯𑀸 𑀮𑀩𑁆𑀪𑀫𑀸𑀦𑀁 𑀉𑀧𑀧𑀢𑁆𑀢𑀺𑀤𑁂𑀯𑀪𑀸𑀯𑀫𑀢𑁆𑀢𑀫𑁂𑀯 𑀕𑀳𑁂𑀢𑁆𑀯𑀸 𑀢𑀣𑀸 𑀯𑀼𑀢𑁆𑀢𑀁. 𑀧𑀝𑀺𑀧𑀓𑁆𑀔𑀸𑀦𑀁 𑀤𑀼𑀲𑁆𑀲𑀻𑀮𑁆𑀬𑀫𑀼𑀝𑁆𑀞𑀲𑁆𑀲𑀘𑁆𑀘𑀯𑀺𑀓𑁆𑀔𑁂𑀧𑀸𑀦𑀁, 𑀲𑀻𑀮𑀯𑀺𑀧𑀢𑁆𑀢𑀺𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀅𑀯𑀲𑀺𑀝𑁆𑀞𑀦𑀻𑀯𑀭𑀡𑀸𑀦𑀁 𑀯𑀸.

𑀇𑀲𑀻𑀦𑀁 𑀲𑀢𑁆𑀢𑀫𑁄, 𑀇𑀲𑀻𑀲𑀼 𑀲𑀢𑁆𑀢𑀫𑁄𑀢𑀺 𑀤𑀼𑀯𑀺𑀥𑀫𑁆𑀧𑀺 𑀅𑀢𑁆𑀣𑀁 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀢𑀼𑀲𑀘𑁆𑀘𑀸𑀯𑀩𑁄𑀥𑀕𑀢𑀺𑀬𑀸…𑀧𑁂… 𑀯𑀼𑀢𑁆𑀢𑁄’’𑀢𑀺 𑀆𑀳. 𑀲𑀧𑀭𑀲𑀦𑁆𑀢𑀸𑀦𑁂𑀲𑀼 𑀲𑀻𑀮𑀸𑀤𑀺𑀕𑀼𑀡𑀸𑀦𑀁 𑀏𑀲𑀦𑀝𑁆𑀞𑁂𑀦 𑀯𑀸 𑀇𑀲𑀬𑁄, 𑀩𑀼𑀤𑁆𑀥𑀸𑀤𑀬𑁄 𑀅𑀭𑀺𑀬𑀸. 𑀇𑀲𑀺 𑀘 𑀲𑁄 𑀲𑀢𑁆𑀢𑀫𑁄 𑀘𑀸𑀢𑀺 𑀇𑀲𑀺𑀲𑀢𑁆𑀢𑀫𑁄𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. ‘‘𑀦𑀸𑀫𑀭𑀽𑀧𑀦𑀺𑀭𑁄𑀥’’𑀦𑁆𑀢𑀺 𑀏𑀢𑁆𑀣 𑀬𑀁 𑀦𑀸𑀫𑀭𑀽𑀧𑀁 𑀦𑀺𑀭𑁄𑀥𑁂𑀢𑀩𑁆𑀩𑀁, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀢𑁄 𑀯𑀺𑀜𑁆𑀜𑀸𑀡𑀁 𑀧𑀘𑁆𑀘𑀼𑀤𑀸𑀯𑀢𑁆𑀢𑀢𑀻’’𑀢𑀺 𑀆𑀳. 𑀯𑀝𑁆𑀝𑀧𑀭𑀺𑀬𑀸𑀧𑀦𑁆𑀦𑀜𑁆𑀳𑀺 𑀦𑀸𑀫𑀭𑀽𑀧𑀁 𑀦𑀺𑀭𑁄𑀥𑁂𑀢𑀩𑁆𑀩𑀁. 𑀢𑀲𑁆𑀫𑀺𑀜𑁆𑀳𑀺 𑀦𑀺𑀭𑁄𑀥𑀺𑀢𑁂 𑀲𑀩𑁆𑀩𑀲𑁄 𑀦𑀸𑀫𑀭𑀽𑀧𑀁 𑀦𑀺𑀭𑁄𑀥𑀺𑀢𑀫𑁂𑀯 𑀳𑁄𑀢𑀺. 𑀬𑀣𑀸𑀳 ‘‘𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀜𑀸𑀡𑁂𑀦 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦 𑀲𑀢𑁆𑀢 𑀪𑀯𑁂 𑀞𑀧𑁂𑀢𑁆𑀯𑀸 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀬𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀏𑀢𑁆𑀣𑁂𑀢𑁂 𑀦𑀺𑀭𑀼𑀚𑁆𑀛𑀦𑁆𑀢𑀺…𑀧𑁂… 𑀅𑀭𑀳𑀢𑁄 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀲𑁆𑀲 𑀘𑀭𑀺𑀫𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦 𑀧𑀜𑁆𑀜𑀸 𑀘 𑀲𑀢𑀺 𑀘 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀏𑀢𑁆𑀣𑁂𑀢𑁂 𑀦𑀺𑀭𑀼𑀚𑁆𑀛𑀦𑁆𑀢𑀺 𑀯𑀽𑀧𑀲𑀫𑀦𑁆𑀢𑀺 𑀅𑀢𑁆𑀣𑀁 𑀕𑀘𑁆𑀙𑀦𑁆𑀢𑀺 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀻’’𑀢𑀺 (𑀘𑀽𑀴𑀦𑀺. 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁬). 𑀅𑀢𑀺𑀕𑀫𑁆𑀪𑀻𑀭𑀦𑀬𑀫𑀡𑁆𑀟𑀺𑀢𑀤𑁂𑀲𑀦𑀁 𑀲𑀸𑀢𑀺𑀲𑀬𑀁 𑀧𑀘𑁆𑀘𑀬𑀸𑀓𑀸𑀭𑀲𑁆𑀲 𑀯𑀺𑀪𑀸𑀯𑀦𑀢𑁄. 𑀲𑀪𑀸𑀯𑀢𑁄 𑀘 𑀧𑀘𑁆𑀘𑀬𑀸𑀓𑀸𑀭𑁄 𑀕𑀫𑁆𑀪𑀻𑀭𑁄. 𑀬𑀣𑀸𑀳 ‘‘𑀅𑀥𑀺𑀕𑀢𑁄 𑀔𑁄 𑀫𑁆𑀬𑀸𑀬𑀁 𑀥𑀫𑁆𑀫𑁄 𑀕𑀫𑁆𑀪𑀻𑀭𑁄’’𑀢𑀺𑀆𑀤𑀺 (𑀤𑀻. 𑀦𑀺. 𑁨.𑁬𑁭; 𑀫. 𑀦𑀺. 𑁧.𑁨𑁮𑁧; 𑁨.𑁩𑁩𑁭; 𑀲𑀁. 𑀦𑀺. 𑁧.𑁧𑁭𑁨; 𑀫𑀳𑀸𑀯. 𑁭, 𑁮), ‘‘𑀕𑀫𑁆𑀪𑀻𑀭𑁄 𑀘𑀸𑀬𑀁, 𑀆𑀦𑀦𑁆𑀤, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀕𑀫𑁆𑀪𑀻𑀭𑀸𑀯𑀪𑀸𑀲𑁄’’𑀢𑀺 (𑀤𑀻. 𑀦𑀺. 𑁨.𑁯𑁫; 𑀲𑀁. 𑀦𑀺. 𑁨.𑁬𑁦) 𑀘 𑀆𑀤𑀺. 𑀢𑀲𑁆𑀲 𑀘𑀸𑀬𑀁 𑀅𑀦𑀦𑁆𑀢𑀦𑀬𑀧𑀝𑁆𑀞𑀸𑀦𑀤𑁂𑀲𑀦𑀸 𑀅𑀢𑀺𑀕𑀫𑁆𑀪𑀻𑀭𑀸𑀯.

𑀕𑀦𑁆𑀣𑀸𑀭𑀫𑁆𑀪𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀘𑁆𑀘𑀬𑀼𑀤𑁆𑀤𑁂𑀲𑀯𑀡𑁆𑀡𑀦𑀸

𑀲𑀫𑀸𑀦𑀦𑁂𑀢𑀺 𑀲𑀫𑀸𑀦𑀦𑀬𑀦𑁂, 𑀲𑀫𑀸𑀳𑀭𑀡𑁂, 𑀲𑀫𑀸𑀦𑀓𑀭𑀡𑁂 𑀯𑀸 𑀅𑀝𑁆𑀞𑀓𑀣𑀸𑀥𑀺𑀧𑁆𑀧𑀸𑀬𑀁. 𑀢𑀢𑁆𑀣 ‘‘𑀤𑁆𑀯𑁂 𑀅𑀦𑀼𑀮𑁄𑀫𑀸𑀦𑀺 𑀥𑀫𑁆𑀫𑀸𑀦𑀼𑀮𑁄𑀫𑀜𑁆𑀘 𑀧𑀘𑁆𑀘𑀬𑀸𑀦𑀼𑀮𑁄𑀫𑀜𑁆𑀘𑀸’’𑀢𑀺𑀆𑀤𑀺𑀦𑀸 𑀧𑀭𑀢𑁄 𑀯𑀡𑁆𑀡𑀬𑀺𑀲𑁆𑀲𑀦𑁆𑀢𑀺.

𑀧𑀝𑁆𑀞𑀸𑀦𑀦𑀸𑀫𑀢𑁆𑀣𑁄𑀢𑀺 ‘‘𑀧𑀝𑁆𑀞𑀸𑀦’’𑀦𑁆𑀢𑀺 𑀇𑀫𑀲𑁆𑀲 𑀦𑀸𑀫𑀲𑁆𑀲 𑀅𑀢𑁆𑀣𑁄, 𑀢𑀁 𑀧𑀦 𑀬𑀲𑁆𑀫𑀸 𑀅𑀯𑀬𑀯𑀤𑁆𑀯𑀸𑀭𑁂𑀦 𑀲𑀫𑀼𑀤𑀸𑀬𑁂 𑀦𑀺𑀭𑀼𑀴𑁆𑀳𑀁, 𑀢𑀲𑁆𑀫𑀸 𑀬𑀣𑀸 𑀅𑀯𑀬𑀯𑁂𑀲𑀼 𑀧𑀢𑀺𑀝𑁆𑀞𑀺𑀢𑀁, 𑀢𑀫𑁂𑀯 𑀢𑀸𑀯 𑀤𑀲𑁆𑀲𑁂𑀢𑀼𑀁 ‘‘𑀢𑀺𑀓𑀧𑀝𑁆𑀞𑀸𑀦𑀸𑀤𑀻𑀦𑀁 𑀢𑀺𑀓𑀧𑀝𑁆𑀞𑀸𑀦𑀸𑀤𑀺𑀦𑀸𑀫𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀅𑀯𑀬𑀯𑀸𑀦𑀫𑁂𑀯 𑀧𑀝𑁆𑀞𑀸𑀦𑀦𑀸𑀫𑀢𑁆𑀣𑁄 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑁄 𑀢𑀁𑀲𑀫𑀼𑀤𑀸𑀬𑀫𑀢𑁆𑀢𑀢𑁆𑀢𑀸 𑀧𑀓𑀭𑀡𑀲𑁆𑀲. 𑀦 𑀳𑀺 𑀲𑀫𑀼𑀤𑀸𑀬𑁄 𑀦𑀸𑀫 𑀓𑁄𑀘𑀺 𑀅𑀢𑁆𑀣𑁄 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀝𑁆𑀞𑀸𑀦𑀁…𑀧𑁂… 𑀦𑀸𑀫𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 ‘‘𑀇𑀫𑀲𑁆𑀲 𑀧𑀓𑀭𑀡𑀲𑁆𑀲…𑀧𑁂… 𑀲𑀫𑁄𑀥𑀸𑀦𑀢𑀸 𑀘𑁂𑀢𑁆𑀣 𑀯𑀢𑁆𑀢𑀩𑁆𑀩𑀸’’𑀢𑀺. 𑀯𑀘𑀦𑀲𑀫𑀼𑀤𑀸𑀬𑀢𑁆𑀣𑀯𑀺𑀚𑀸𑀦𑀦𑁂𑀦 𑀯𑀺𑀤𑀺𑀢𑀧𑀝𑁆𑀞𑀸𑀦𑀲𑀸𑀫𑀜𑁆𑀜𑀢𑁆𑀣𑀲𑁆𑀲 𑀯𑀺𑀢𑁆𑀣𑀸𑀭𑀢𑁄 𑀧𑀝𑁆𑀞𑀸𑀦𑀓𑀣𑀸 𑀯𑀼𑀘𑁆𑀘𑀫𑀸𑀦𑀸 𑀲𑀼𑀔𑀕𑁆𑀕𑀳𑀡𑀸 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀯𑀜𑁆𑀳𑀺…𑀧𑁂… 𑀳𑁄𑀢𑀻’’𑀢𑀺. 𑀢𑀢𑁆𑀣𑀸𑀢𑀺 𑀢𑀸𑀲𑀼 𑀦𑀸𑀫𑀢𑁆𑀣𑀬𑀣𑀸𑀯𑀼𑀢𑁆𑀢𑀲𑀫𑁄𑀥𑀸𑀦𑀢𑀸𑀲𑀼. 𑀲𑀩𑁆𑀩𑀲𑀸𑀥𑀸𑀭𑀡𑀲𑁆𑀲𑀸𑀢𑀺 𑀲𑀩𑁆𑀩𑁂𑀲𑀁 𑀅𑀯𑀬𑀯𑀪𑀽𑀢𑀸𑀦𑀁 𑀢𑀺𑀓𑀧𑀝𑁆𑀞𑀸𑀦𑀸𑀤𑀻𑀦𑀁 𑀲𑀫𑀼𑀤𑀸𑀬𑀲𑁆𑀲 𑀘 𑀲𑀸𑀥𑀸𑀭𑀡𑀲𑁆𑀲. 𑀅𑀢𑁆𑀣𑀢𑁄 𑀆𑀧𑀦𑁆𑀦𑀁 𑀦𑀸𑀦𑀸𑀯𑀺𑀥𑀪𑀸𑀯𑀦𑁆𑀢𑀺 𑀧𑀓𑀸𑀭𑀕𑁆𑀕𑀳𑀡𑁂𑀦𑁂𑀯 𑀧𑀓𑀸𑀭𑀸𑀦𑀁 𑀅𑀦𑁂𑀓𑀯𑀺𑀥𑀢𑀸 𑀘 𑀕𑀳𑀺𑀢𑀸𑀯 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁. 𑀧𑀓𑀸𑀭𑁂𑀳𑀺 𑀞𑀸𑀦𑀦𑁆𑀢𑀺 𑀳𑀺 𑀧𑀝𑁆𑀞𑀸𑀦𑀁, 𑀦𑀸𑀦𑀸𑀯𑀺𑀥𑁄 𑀧𑀘𑁆𑀘𑀬𑁄, 𑀢𑀁 𑀏𑀢𑁆𑀣 𑀯𑀺𑀪𑀚𑀦𑀯𑀲𑁂𑀦 𑀅𑀢𑁆𑀣𑀻𑀢𑀺 𑀧𑀝𑁆𑀞𑀸𑀦𑀁, 𑀧𑀓𑀭𑀡𑀁, 𑀢𑀤𑀯𑀬𑀯𑁄 𑀘. 𑀏𑀢𑀲𑁆𑀫𑀺𑀜𑁆𑀘 𑀅𑀢𑁆𑀣𑀦𑀬𑁂 𑀲𑀤𑁆𑀤𑀢𑁄𑀧𑀺 𑀦𑀸𑀦𑀸𑀯𑀺𑀥𑀪𑀸𑀯𑀲𑀺𑀤𑁆𑀥𑀺 𑀤𑀲𑁆𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀦𑀸𑀦𑀧𑁆𑀧𑀓𑀸𑀭𑀸 𑀧𑀘𑁆𑀘𑀬𑀢𑀸, 𑀦𑀸𑀦𑀧𑁆𑀧𑀓𑀸𑀭𑀸𑀦𑀁 𑀧𑀘𑁆𑀘𑀬𑀢𑀸 𑀘 𑀦𑀸𑀦𑀧𑁆𑀧𑀓𑀸𑀭𑀧𑀘𑁆𑀘𑀬𑀢𑀸𑀢𑀺 𑀉𑀪𑀬𑀫𑁆𑀧𑀺 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁂𑀦 𑀏𑀓𑀲𑁂𑀲𑀦𑀬𑁂𑀦 𑀯𑀸 𑀏𑀓𑀚𑁆𑀛𑀁 𑀕𑀳𑀺𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀓𑀲𑁆𑀲𑀧𑀺…𑀧𑁂… 𑀯𑁂𑀤𑀺𑀢𑀩𑁆𑀩𑀸’’𑀢𑀺 𑀆𑀳. 𑀅𑀦𑁂𑀓𑀥𑀫𑁆𑀫𑀪𑀸𑀯𑀢𑁄𑀢𑀺 𑀅𑀦𑁂𑀓𑁂 𑀥𑀫𑁆𑀫𑀸 𑀏𑀢𑀲𑁆𑀲𑀸𑀢𑀺 𑀅𑀦𑁂𑀓𑀥𑀫𑁆𑀫𑁄, 𑀢𑀩𑁆𑀪𑀸𑀯𑀢𑁄𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀦𑀸𑀦𑀧𑁆𑀧𑀓𑀸𑀭𑀧𑀘𑁆𑀘𑀬𑀢𑀸𑀢𑀺 𑀦𑀸𑀦𑀧𑁆𑀧𑀓𑀸𑀭𑀧𑀘𑁆𑀘𑀬𑀪𑀸𑀯𑁄, 𑀬𑁄 𑀅𑀝𑁆𑀞𑀓𑀣𑀸𑀬𑀁 ‘‘𑀦𑀸𑀦𑀧𑁆𑀧𑀓𑀸𑀭𑀧𑀘𑁆𑀘𑀬𑀝𑁆𑀞𑁄’’𑀢𑀺 𑀯𑀼𑀢𑁆𑀢𑁄.

𑀓𑀸𑀫𑀁 𑀥𑀫𑁆𑀫𑀲𑀗𑁆𑀕𑀳𑀸𑀤𑀻𑀲𑀼𑀧𑀺 𑀅𑀢𑁆𑀣𑁂𑀯 𑀧𑀘𑁆𑀘𑀬𑀥𑀫𑁆𑀫𑀯𑀺𑀪𑀸𑀕𑁄, 𑀲𑁄 𑀧𑀦 𑀢𑀢𑁆𑀣 𑀧𑀘𑁆𑀘𑀬𑀪𑀸𑀯𑁄 𑀦 𑀢𑀣𑀸 𑀢𑀧𑁆𑀧𑀭𑀪𑀸𑀯𑁂𑀦 𑀯𑀺𑀪𑀢𑁆𑀢𑁄 𑀬𑀣𑀸 𑀧𑀝𑁆𑀞𑀸𑀦𑁂𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀢𑁂𑀦…𑀧𑁂… 𑀤𑀲𑁆𑀲𑁂𑀢𑀻’’𑀢𑀺 𑀆𑀳. 𑀲𑀸𑀢𑀺𑀲𑀬𑀯𑀺𑀪𑀸𑀕𑀢𑀁 𑀇𑀫𑀲𑁆𑀲 𑀧𑀓𑀭𑀡𑀲𑁆𑀲 𑀢𑀣𑀸 𑀢𑀤𑀯𑀬𑀯𑀸𑀦𑀁.

𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀬𑀣𑀸𑀯𑀼𑀢𑁆𑀢𑀕𑀫𑀦𑀁 𑀬𑀤𑀥𑀺𑀓𑀭𑀡𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀢𑁆𑀣𑀸𑀢𑀺 𑀯𑀘𑀦𑀲𑁂𑀲𑁄’’𑀢𑀺. 𑀕𑀫𑀦𑀤𑁂𑀲𑀪𑀸𑀯𑀢𑁄𑀢𑀺 𑀧𑀯𑀢𑁆𑀢𑀺𑀝𑁆𑀞𑀸𑀦𑀪𑀸𑀯𑀢𑁄. 𑀅𑀜𑁆𑀜𑁂𑀳𑀺 𑀕𑀢𑀺𑀫𑀦𑁆𑀢𑁂𑀳𑀻𑀢𑀺 𑀢𑀻𑀲𑀼 𑀓𑀸𑀮𑁂𑀲𑀼 𑀅𑀧𑁆𑀧𑀝𑀺𑀳𑀢𑀜𑀸𑀡𑀸𑀤𑀻𑀳𑀺. 𑀢𑀲𑁆𑀲 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲.

𑀢𑀺𑀯𑀺𑀥𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀤𑁂𑀲𑀺𑀢𑁂𑀲𑀼 𑀥𑀫𑁆𑀫𑁂𑀲𑀼 𑀢𑀺𑀓𑀯𑁄𑀳𑀸𑀭𑁄𑀢𑀺 𑀆𑀳 ‘‘𑀢𑀺𑀓𑀸𑀦𑀦𑁆𑀢𑀺 𑀢𑀺𑀓𑀯𑀲𑁂𑀦 𑀯𑀼𑀢𑁆𑀢𑀥𑀫𑁆𑀫𑀸𑀦’’𑀦𑁆𑀢𑀺. 𑀢𑀻𑀡𑀺 𑀧𑀭𑀺𑀫𑀸𑀡𑀸𑀦𑀺 𑀏𑀢𑁂𑀲𑀦𑁆𑀢𑀺 𑀳𑀺 𑀢𑀺𑀓𑀸. 𑀲𑀫𑀦𑁆𑀢𑀸𑀢𑀺 𑀲𑀫𑀦𑁆𑀢𑀢𑁄 𑀲𑀩𑁆𑀩𑀪𑀸𑀕𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 𑀆𑀳 ‘‘𑀅𑀦𑀼𑀮𑁄𑀫𑀸𑀤𑀻𑀳𑀺 𑀲𑀩𑁆𑀩𑀧𑁆𑀧𑀓𑀸𑀭𑁂𑀳𑀺𑀧𑀻’’𑀢𑀺. 𑀕𑀢𑀸𑀦𑀻𑀢𑀺 𑀧𑀯𑀢𑁆𑀢𑀸𑀦𑀺. 𑀲𑀫𑀦𑁆𑀢𑀘𑀢𑀼𑀯𑀻𑀲𑀢𑀺𑀧𑀝𑁆𑀞𑀸𑀦𑀸𑀦𑀻𑀢𑀺 𑀲𑀫𑀦𑁆𑀢𑀢𑁄 𑀅𑀦𑀼𑀮𑁄𑀫𑀸𑀤𑀺𑀲𑀩𑁆𑀩𑀪𑀸𑀕𑀢𑁄 𑀲𑀫𑁄𑀥𑀸𑀦𑀯𑀲𑁂𑀦 𑀘𑀢𑀼𑀯𑀻𑀲𑀢𑀺 𑀧𑀝𑁆𑀞𑀸𑀦𑀸𑀦𑀺. 𑀅𑀦𑀼𑀮𑁄𑀫𑀸𑀤𑀺𑀲𑀩𑁆𑀩𑀓𑁄𑀝𑁆𑀞𑀸𑀲𑀢𑁄𑀢𑀺 𑀅𑀦𑀼𑀮𑁄𑀫𑀸𑀤𑀺𑀘𑀢𑀼𑀓𑁄𑀝𑁆𑀞𑀸𑀲𑀢𑁄. 𑀢𑀺𑀓𑀸𑀤𑀺𑀙𑀙𑀪𑀸𑀯𑀦𑁆𑀢𑀺 𑀢𑀺𑀓𑀸𑀤𑀺𑀤𑀼𑀓𑀤𑀼𑀓𑀧𑀭𑀺𑀬𑁄𑀲𑀸𑀦𑁂𑀳𑀺 𑀙𑀙𑀪𑀸𑀯𑀁. 𑀢𑁂𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑀤𑀲𑁆𑀲𑀦𑁂𑀦. 𑀥𑀫𑁆𑀫𑀸𑀦𑀼𑀮𑁄𑀫𑀸𑀤𑀺𑀲𑀩𑁆𑀩𑀓𑁄𑀝𑁆𑀞𑀸𑀲𑀢𑁄𑀢𑀺 𑀧𑀘𑁆𑀘𑀦𑀻𑀓𑀸𑀤𑀺𑀤𑀼𑀓𑀸𑀤𑀺𑀲𑀳𑀚𑀸𑀢𑀯𑀸𑀭𑀸𑀤𑀺𑀧𑀘𑁆𑀘𑀬𑀧𑀘𑁆𑀘𑀦𑀻𑀬𑀸𑀤𑀺𑀆𑀭𑀫𑁆𑀫𑀡𑀫𑀽𑀮𑀸𑀤𑀻𑀦𑀁 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀬𑀣𑀸𑀯𑀼𑀢𑁆𑀢𑀢𑁄 𑀅𑀜𑁆𑀜𑀲𑁆𑀲 𑀧𑀓𑀸𑀭𑀲𑁆𑀲 𑀅𑀲𑀫𑁆𑀪𑀯𑀢𑁄 ‘‘𑀅𑀦𑀽𑀦𑁂𑀳𑀺 𑀦𑀬𑁂𑀳𑀺 𑀧𑀯𑀢𑁆𑀢𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺 𑀆𑀳. 𑀢𑀸𑀦𑀺 𑀧𑀦 𑀬𑀣𑀸𑀯𑀼𑀢𑁆𑀢𑀸𑀦𑀺 𑀲𑀫𑀦𑁆𑀢𑀧𑀝𑁆𑀞𑀸𑀦𑀸𑀦𑀺. 𑀅𑀬𑀜𑁆𑀘 𑀅𑀢𑁆𑀣𑀯𑀡𑁆𑀡𑀦𑀸 𑀅𑀝𑁆𑀞𑀓𑀣𑀸𑀯𑀘𑀦𑁂𑀦 𑀅𑀜𑁆𑀜𑀤𑀢𑁆𑀣𑀼 𑀲𑀁𑀲𑀦𑁆𑀤𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑁂𑀦𑁂𑀯𑀸𑀳…𑀧𑁂… 𑀯𑀲𑁂𑀦𑀸’’𑀢𑀺.

𑀳𑁂𑀢𑀼𑀦𑁄𑀢𑀺 𑀳𑁂𑀢𑀼𑀲𑀪𑀸𑀯𑀲𑁆𑀲 𑀥𑀫𑁆𑀫𑀲𑁆𑀲. 𑀲𑀢𑀺𑀧𑀺 𑀳𑁂𑀢𑀼𑀲𑀪𑀸𑀯𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑀸𑀤𑀺𑀪𑀸𑀯𑁂 𑀲𑀯𑀺𑀲𑁂𑀲𑁂 𑀢𑀸𑀯 𑀧𑀘𑁆𑀘𑀬𑁂 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀅𑀥𑀺𑀧𑀢𑀺𑀧𑀘𑁆𑀘𑀬𑀸𑀤𑀺𑀪𑀽𑀢𑀲𑁆𑀲 𑀘𑀸’’𑀢𑀺 𑀯𑀼𑀢𑁆𑀢𑀁. ‘‘𑀳𑁂𑀢𑀼 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄’’𑀢𑀺 𑀯𑀼𑀢𑁆𑀢𑁂 𑀥𑀫𑁆𑀫𑀲𑁆𑀲 𑀳𑁂𑀢𑀼𑀲𑀪𑀸𑀯𑀢𑀸 𑀦𑀺𑀤𑁆𑀥𑀸𑀭𑀺𑀢𑀸, 𑀦 𑀧𑀘𑁆𑀘𑀬𑀯𑀺𑀲𑁂𑀲𑁄𑀢𑀺 𑀢𑀲𑁆𑀲 𑀅𑀥𑀺𑀧𑀢𑀺𑀧𑀘𑁆𑀘𑀬𑀸𑀤𑀺𑀪𑀸𑀯𑁄 𑀦 𑀦𑀺𑀯𑀸𑀭𑀺𑀢𑁄𑀢𑀺 𑀆𑀳 ‘‘𑀏𑀢𑁂𑀦𑀧𑀺 𑀲𑁄 𑀏𑀯 𑀤𑁄𑀲𑁄 𑀆𑀧𑀚𑁆𑀚𑀢𑀻’’𑀢𑀺. 𑀢𑁂𑀦𑀸𑀢𑀺 𑀳𑁂𑀢𑀼𑀪𑀸𑀯𑀕𑁆𑀕𑀳𑀡𑁂𑀦. 𑀇𑀥𑀸𑀢𑀺 ‘‘𑀳𑁂𑀢𑀼𑀧𑀘𑁆𑀘𑀬𑁄’’𑀢𑀺 𑀏𑀢𑁆𑀣. 𑀥𑀫𑁆𑀫𑀕𑁆𑀕𑀳𑀡𑀦𑁆𑀢𑀺 𑀅𑀮𑁄𑀪𑀸𑀤𑀺𑀥𑀫𑁆𑀫𑀕𑁆𑀕𑀳𑀡𑀁. 𑀲𑀢𑁆𑀢𑀺𑀯𑀺𑀲𑁂𑀲𑁄 𑀅𑀢𑁆𑀢𑀦𑁄 𑀩𑀮𑀁 𑀲𑀢𑁆𑀢𑀺𑀓𑀸𑀭𑀡𑀪𑀸𑀯𑁄, 𑀬𑁄 𑀭𑀲𑁄𑀢𑀺𑀧𑀺 𑀯𑀼𑀘𑁆𑀘𑀢𑀺, 𑀲𑁆𑀯𑀸𑀬𑀁 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑀸𑀬 𑀥𑀫𑁆𑀫𑀢𑁄 𑀅𑀦𑀜𑁆𑀜𑁄𑀧𑀺 𑀧𑀘𑁆𑀘𑀬𑀦𑁆𑀢𑀭𑀲𑀫𑀯𑀸𑀬𑁂𑀬𑁂𑀯 𑀮𑀩𑁆𑀪𑀫𑀸𑀦𑀢𑁆𑀢𑀸 𑀅𑀜𑁆𑀜𑁄 𑀯𑀺𑀬 𑀓𑀢𑁆𑀯𑀸 𑀯𑀼𑀢𑁆𑀢𑁄. 𑀢𑀲𑁆𑀲𑀸𑀢𑀺 𑀳𑁂𑀢𑀼𑀪𑀸𑀯𑀲𑀗𑁆𑀔𑀸𑀢𑀲𑁆𑀲 𑀲𑀸𑀫𑀢𑁆𑀣𑀺𑀬𑀲𑁆𑀲. 𑀳𑁂𑀢𑀼 𑀳𑀼𑀢𑁆𑀯𑀸𑀢𑀺 𑀏𑀢𑁆𑀣𑀸𑀧𑀺 𑀳𑁂𑀢𑀼𑀪𑀸𑀯𑀯𑀸𑀘𑀓𑁄 𑀳𑁂𑀢𑀼𑀲𑀤𑁆𑀤𑁄, 𑀦 𑀳𑁂𑀢𑀼𑀲𑀪𑀸𑀯𑀥𑀫𑁆𑀫𑀯𑀸𑀘𑀓𑁄𑀢𑀺 𑀆𑀳 ‘‘𑀳𑁂𑀢𑀼 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄𑀢𑀺 𑀘 𑀯𑀼𑀢𑁆𑀢’’𑀦𑁆𑀢𑀺.

𑀏𑀯𑀜𑁆𑀘 𑀓𑀢𑁆𑀯𑀸𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀧𑀸𑀴𑀺𑀬𑀸 𑀲𑀫𑀢𑁆𑀣𑁂𑀢𑀺. 𑀬𑀤𑀺 𑀏𑀯𑀁 𑀅𑀝𑁆𑀞𑀓𑀣𑀸𑀬𑀁 𑀥𑀫𑁆𑀫𑀲𑁆𑀲𑁂𑀯 𑀧𑀘𑁆𑀘𑀬𑀢𑀸𑀯𑀘𑀦𑀁 𑀓𑀣𑀦𑁆𑀢𑀺 𑀆𑀳 ‘‘𑀅𑀝𑁆𑀞𑀓𑀣𑀸𑀬𑀁 𑀧𑀦𑀸’’𑀢𑀺𑀆𑀤𑀺. 𑀢𑁂𑀦𑁂𑀯 𑀘𑁂𑀢𑁆𑀣 𑀅𑀫𑁆𑀳𑁂𑀳𑀺𑀧𑀺 ‘‘𑀥𑀫𑁆𑀫𑀢𑁄 𑀅𑀦𑀜𑁆𑀜𑁄𑀧𑀺 𑀅𑀜𑁆𑀜𑁄 𑀯𑀺𑀬 𑀓𑀢𑁆𑀯𑀸’’𑀢𑀺 𑀘 𑀯𑀼𑀢𑁆𑀢𑀁. 𑀬𑀤𑀺 𑀅𑀝𑁆𑀞𑀓𑀣𑀸𑀬𑀁 ‘‘𑀬𑁄 𑀳𑀺 𑀥𑀫𑁆𑀫𑁄, 𑀫𑀽𑀮𑀝𑁆𑀞𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄’’𑀢𑀺 𑀘 𑀆𑀤𑀻𑀲𑀼 𑀥𑀫𑁆𑀫𑁂𑀦 𑀥𑀫𑁆𑀫𑀲𑀢𑁆𑀢𑀺𑀯𑀺𑀪𑀸𑀯𑀦𑀁 𑀓𑀢𑀁, 𑀅𑀣 𑀓𑀲𑁆𑀫𑀸 𑀇𑀥 𑀳𑁂𑀢𑀼𑀪𑀸𑀯𑁂𑀦 𑀧𑀘𑁆𑀘𑀬𑁄𑀢𑀺 𑀥𑀫𑁆𑀫𑀲𑀢𑁆𑀢𑀺𑀬𑁂𑀯 𑀯𑀺𑀪𑀸𑀯𑀺𑀢𑀸𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀇𑀥𑀸𑀧𑀺 𑀯𑀸…𑀧𑁂… 𑀤𑀲𑁆𑀲𑁂𑀢𑀻’’𑀢𑀺. 𑀥𑀫𑁆𑀫𑀲𑀢𑁆𑀢𑀺𑀯𑀺𑀪𑀸𑀯𑀦𑀁 𑀧𑀦𑁂𑀢𑁆𑀣 𑀦 𑀲𑀓𑁆𑀓𑀸 𑀧𑀝𑀺𑀓𑁆𑀔𑀺𑀧𑀺𑀢𑀼𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀳𑀻’’𑀢𑀺𑀆𑀤𑀺𑀫𑀸𑀳. 𑀅𑀢𑁆𑀣𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄, 𑀅𑀢𑁆𑀣𑀸𑀪𑀺𑀥𑀸𑀬𑀺𑀯𑀘𑀦𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀏𑀢𑀻𑀢𑀺 𑀏𑀢𑀲𑁆𑀲 𑀅𑀢𑁆𑀣𑁄 𑀯𑀢𑁆𑀢𑀢𑀻’’𑀢𑀺, 𑀢𑀲𑁆𑀫𑀸 𑀅𑀢𑁆𑀣𑁄𑀢𑀺 𑀅𑀢𑁆𑀣𑀯𑀘𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀢𑀜𑁆𑀘 𑀉𑀧𑁆𑀧𑀢𑁆𑀢𑀺𑀝𑁆𑀞𑀺𑀢𑀻𑀦𑀁 𑀲𑀸𑀥𑀸𑀭𑀡𑀯𑀘𑀦’’𑀦𑁆𑀢𑀺. 𑀢𑀜𑁆𑀘𑀸𑀢𑀺 𑀳𑀺 ‘‘𑀯𑀢𑁆𑀢𑀢𑀻’’𑀢𑀺 𑀯𑀘𑀦𑀁 𑀧𑀘𑁆𑀘𑀸𑀫𑀝𑁆𑀞𑀁. 𑀅𑀣 𑀯𑀸 𑀏𑀢𑀻𑀢𑀺 𑀏𑀢𑀲𑁆𑀲 𑀅𑀢𑁆𑀣𑁄𑀢𑀺 ‘‘𑀏𑀢𑀻’’𑀢𑀺 𑀏𑀢𑀲𑁆𑀲 𑀧𑀤𑀲𑁆𑀲 𑀅𑀢𑁆𑀣𑁄 ‘‘𑀯𑀢𑁆𑀢𑀢𑀻’’𑀢𑀺 𑀏𑀢𑁆𑀣 𑀯𑀢𑁆𑀢𑀦𑀓𑀺𑀭𑀺𑀬𑀸. 𑀢𑀜𑁆𑀘𑀸𑀢𑀺 𑀢𑀜𑁆𑀘 𑀯𑀢𑁆𑀢𑀦𑀁. 𑀏𑀢𑀲𑁆𑀫𑀺𑀁 𑀧𑀦𑀢𑁆𑀣𑁂 𑀲𑀸𑀥𑀸𑀭𑀡𑀯𑀘𑀦𑀦𑁆𑀢𑀺 𑀏𑀢𑁆𑀣 𑀯𑀘𑀦-𑀲𑀤𑁆𑀤𑁄 𑀅𑀢𑁆𑀣𑀧𑀭𑀺𑀬𑀸𑀬𑁄 𑀯𑁂𑀤𑀺𑀢𑀩𑁆𑀩𑁄 ‘‘𑀯𑀼𑀘𑁆𑀘𑀢𑀻’’𑀢𑀺 𑀓𑀢𑁆𑀯𑀸. 𑀬𑀤𑀕𑁆𑀕𑁂𑀦 𑀉𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑁄, 𑀢𑀤𑀕𑁆𑀕𑁂𑀦 𑀞𑀺𑀢𑀺𑀬𑀸𑀧𑀺 𑀧𑀘𑁆𑀘𑀬𑁄𑀢𑀺 𑀓𑁄𑀘𑀺 𑀆𑀲𑀗𑁆𑀓𑁂𑀬𑁆𑀬𑀸𑀢𑀺 𑀢𑀤𑀸𑀲𑀗𑁆𑀓𑀸𑀦𑀺𑀯𑀢𑁆𑀢𑀦𑀢𑁆𑀣𑀁 𑀯𑀼𑀢𑁆𑀢𑀁 ‘‘𑀓𑁄𑀘𑀺 𑀳𑀺…𑀧𑁂… 𑀳𑁂𑀢𑀼𑀆𑀤𑀬𑁄’’𑀢𑀺. 𑀏𑀢𑁆𑀣 𑀘 𑀬𑀣𑀸 𑀉𑀧𑁆𑀧𑀚𑁆𑀚𑀦𑀸𑀭𑀳𑀸𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑁂 𑀲𑀢𑀺𑀬𑁂𑀯 𑀉𑀧𑁆𑀧𑀸𑀤𑁄, 𑀦𑀸𑀲𑀢𑀺, 𑀏𑀯𑀁 𑀢𑀺𑀝𑁆𑀞𑀦𑁆𑀢𑀸𑀦𑀫𑁆𑀧𑀺 𑀞𑀺𑀢𑀺𑀧𑀘𑁆𑀘𑀬𑀯𑀲𑁂𑀦𑁂𑀯 𑀞𑀸𑀦𑀁 𑀬𑀣𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀯𑀲𑁂𑀦 𑀲𑀳𑀚𑀸𑀢𑀥𑀫𑁆𑀫𑀸𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀬𑁂 𑀧𑀦 𑀅𑀭𑀽𑀧𑀥𑀫𑁆𑀫𑀸𑀦𑀁 𑀞𑀺𑀢𑀺𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑀺, 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯.

𑀬𑀣𑀸 𑀅𑀥𑀺𑀓𑀭𑀡𑀲𑀸𑀥𑀦𑁄 𑀧𑀢𑀺𑀝𑁆𑀞𑀢𑁆𑀣𑁄 𑀳𑁂𑀢𑀼-𑀲𑀤𑁆𑀤𑁄, 𑀏𑀯𑀁 𑀓𑀭𑀡𑀲𑀸𑀥𑀦𑁄 𑀧𑀯𑀢𑁆𑀢𑀺𑀅𑀢𑁆𑀣𑁄𑀧𑀺 𑀬𑀼𑀚𑁆𑀚𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀳𑀺𑀦𑁄𑀢𑀻’’𑀢𑀺𑀆𑀤𑀺𑀫𑀸𑀳. ‘‘𑀮𑁄𑀪𑁄 𑀦𑀺𑀤𑀸𑀦𑀁 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬𑀸’’𑀢𑀺𑀆𑀤𑀺𑀯𑀘𑀦𑀢𑁄 𑀳𑁂𑀢𑀽𑀦𑀁 𑀓𑀫𑁆𑀫𑀦𑀺𑀤𑀸𑀦𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀢𑁂𑀦𑀸𑀢𑀺 𑀳𑁂𑀢𑀼𑀧𑀘𑁆𑀘𑀬𑀢𑁄 𑀅𑀜𑁆𑀜𑁂𑀦𑁂𑀯 𑀓𑀼𑀲𑀮𑀪𑀸𑀯𑀲𑀺𑀤𑁆𑀥𑀺𑀯𑀘𑀦𑁂𑀦. 𑀏𑀓𑁂 𑀆𑀘𑀭𑀺𑀬𑀸. 𑀲𑀪𑀸𑀯𑀢𑁄𑀯𑀸𑀢𑀺 𑀏𑀢𑁂𑀦 𑀬𑀣𑀸 𑀅𑀜𑁆𑀜𑁂𑀲𑀁 𑀭𑀽𑀧𑀕𑀢𑀁 𑀑𑀪𑀸𑀲𑁂𑀦𑁆𑀢𑀲𑁆𑀲 𑀧𑀤𑀻𑀧𑀲𑁆𑀲 𑀭𑀽𑀧𑀕𑀢𑁄𑀪𑀸𑀲𑀓𑁂𑀦 𑀅𑀜𑁆𑀜𑁂𑀦 𑀧𑀬𑁄𑀚𑀦𑀁 𑀦𑀢𑁆𑀣𑀺 𑀲𑀬𑀁 𑀑𑀪𑀸𑀲𑀦𑀲𑀪𑀸𑀯𑀢𑁆𑀢𑀸, 𑀏𑀯𑀁 𑀅𑀜𑁆𑀜𑁂𑀲𑀁 𑀓𑀼𑀲𑀮𑀸𑀤𑀺𑀪𑀸𑀯𑀲𑀸𑀥𑀓𑀸𑀦𑀁 𑀳𑁂𑀢𑀽𑀦𑀁 𑀅𑀜𑁆𑀜𑁂𑀦 𑀓𑀼𑀲𑀮𑀸𑀤𑀺𑀪𑀸𑀯𑀲𑀸𑀥𑀓𑁂𑀦 𑀧𑀬𑁄𑀚𑀦𑀁 𑀦𑀢𑁆𑀣𑀺 𑀲𑀬𑀫𑁂𑀯 𑀓𑀼𑀲𑀮𑀸𑀤𑀺𑀲𑀪𑀸𑀯𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀦 𑀲𑀪𑀸𑀯𑀲𑀺𑀤𑁆𑀥𑁄 𑀅𑀮𑁄𑀪𑀸𑀤𑀻𑀦𑀁 𑀓𑀼𑀲𑀮𑀸𑀤𑀺𑀪𑀸𑀯𑁄 𑀉𑀪𑀬𑀲𑀪𑀸𑀯𑀢𑁆𑀢𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀨𑀲𑁆𑀲𑀸𑀤𑀻𑀦𑀁 𑀯𑀺𑀬𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺𑀦𑀸. 𑀲𑀸 𑀧𑀦 𑀅𑀜𑁆𑀜𑀧𑀝𑀺𑀩𑀤𑁆𑀥𑀸 𑀓𑀼𑀲𑀮𑀸𑀤𑀺𑀢𑀸.

𑀦 𑀓𑁄𑀘𑀺 𑀥𑀫𑁆𑀫𑁄 𑀦 𑀳𑁄𑀢𑀻𑀢𑀺 𑀭𑀽𑀧𑀸𑀤𑀺𑀪𑁂𑀤𑁂𑀦 𑀙𑀩𑁆𑀩𑀺𑀥𑁂𑀲𑀼 𑀲𑀗𑁆𑀔𑀢𑀸𑀲𑀗𑁆𑀔𑀢𑀧𑀜𑁆𑀜𑀢𑁆𑀢𑀺𑀥𑀫𑁆𑀫𑁂𑀲𑀼 𑀓𑁄𑀘𑀺𑀧𑀺 𑀥𑀫𑁆𑀫𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀦 𑀦 𑀳𑁄𑀢𑀺, 𑀲𑁆𑀯𑀸𑀬𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑁄 𑀳𑁂𑀝𑁆𑀞𑀸 𑀥𑀸𑀢𑀼𑀯𑀺𑀪𑀗𑁆𑀕𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑁄𑀬𑁂𑀯.

𑀧𑀼𑀭𑀺𑀫𑀸𑀪𑀺𑀲𑀗𑁆𑀔𑀸𑀭𑀽𑀧𑀦𑀺𑀲𑁆𑀲𑀬𑀦𑁆𑀢𑀺 ‘‘𑀙𑀦𑁆𑀤𑀯𑀢𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸𑀓𑀸𑀭𑁂𑀦 𑀧𑀼𑀭𑀺𑀫𑀲𑀺𑀤𑁆𑀥𑀁 𑀘𑀺𑀢𑁆𑀢𑀸𑀪𑀺𑀲𑀗𑁆𑀔𑀸𑀭𑀓𑀲𑀗𑁆𑀔𑀸𑀢𑀁 𑀉𑀧𑀦𑀺𑀲𑁆𑀲𑀬𑀁. 𑀘𑀺𑀢𑁆𑀢𑁂𑀢𑀺 𑀘𑀺𑀢𑁆𑀢𑀲𑀻𑀲𑁂𑀦𑀸𑀬𑀁 𑀦𑀺𑀤𑁆𑀤𑁂𑀲𑁄 𑀤𑀝𑁆𑀞𑀩𑁆𑀩𑁄. 𑀦 𑀳𑀺 𑀘𑀺𑀢𑁆𑀢𑀫𑁂𑀯 𑀢𑀣𑀸𑀪𑀺𑀲𑀗𑁆𑀔𑀭𑀻𑀬𑀢𑀺, 𑀅𑀣 𑀔𑁄 𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀧𑀺. 𑀲𑀸𑀥𑀬𑀫𑀸𑀦𑀸𑀢𑀺 𑀯𑀲𑁂 𑀯𑀢𑁆𑀢𑀬𑀫𑀸𑀦𑀸. 𑀯𑀲𑀯𑀢𑁆𑀢𑀦𑀜𑁆𑀘𑁂𑀢𑁆𑀣 𑀢𑀤𑀸𑀓𑀸𑀭𑀸𑀦𑀼𑀯𑀺𑀥𑀸𑀦𑀁. 𑀙𑀦𑁆𑀤𑀸𑀤𑀻𑀲𑀼 𑀳𑀺 𑀳𑀻𑀦𑁂𑀲𑀼 𑀫𑀚𑁆𑀛𑀺𑀫𑁂𑀲𑀼 𑀧𑀡𑀻𑀢𑁂𑀲𑀼 𑀢𑀁𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀧𑀺 𑀢𑀣𑀸 𑀢𑀣𑀸 𑀧𑀯𑀢𑁆𑀢𑀦𑁆𑀢𑀺. 𑀢𑁂𑀦𑀸𑀳 ‘‘𑀳𑀻𑀦𑀸𑀤𑀺𑀪𑀸𑀯𑁂𑀦 𑀢𑀤𑀦𑀼𑀯𑀢𑁆𑀢𑀦𑀢𑁄’’𑀢𑀺. 𑀢𑁂𑀦𑀸𑀢𑀺 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑀸𑀧𑀦𑁂𑀦, 𑀢𑁂𑀲𑀁 𑀯𑀸 𑀯𑀲𑁂 𑀯𑀢𑁆𑀢𑀦𑁂𑀦. 𑀢𑁂𑀳𑀺 𑀙𑀦𑁆𑀤𑀸𑀤𑀬𑁄. 𑀅𑀥𑀺𑀧𑀢𑀺𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀅𑀢𑁆𑀢𑀸𑀥𑀻𑀦𑀸𑀦𑀁 𑀧𑀢𑀺𑀪𑀸𑀯𑁂𑀦 𑀧𑀯𑀢𑁆𑀢𑀦𑀢𑁄. 𑀕𑀭𑀼𑀓𑀸𑀢𑀩𑁆𑀩𑀁 𑀆𑀭𑀫𑁆𑀫𑀡𑀁 𑀫𑀳𑀕𑁆𑀕𑀢𑀥𑀫𑁆𑀫𑀮𑁄𑀪𑀦𑀻𑀬𑀥𑀫𑁆𑀫𑀸𑀤𑀺.

𑀢𑀤𑀦𑀦𑁆𑀢𑀭𑀼𑀧𑁆𑀧𑀸𑀤𑀦𑀺𑀬𑀫𑁄𑀢𑀺 𑀢𑀲𑁆𑀲 𑀢𑀲𑁆𑀲𑁂𑀯 𑀘𑀺𑀢𑁆𑀢𑀲𑁆𑀲 𑀅𑀦𑀦𑁆𑀢𑀭𑀁 𑀉𑀧𑁆𑀧𑀚𑁆𑀚𑀫𑀸𑀦𑀢𑀁. 𑀢𑀁𑀢𑀁𑀲𑀳𑀓𑀸𑀭𑀻𑀧𑀘𑁆𑀘𑀬𑀯𑀺𑀲𑀺𑀝𑁆𑀞𑀲𑁆𑀲𑀸𑀢𑀺 𑀢𑁂𑀦 𑀢𑁂𑀦 𑀆𑀭𑀫𑁆𑀫𑀡𑀸𑀤𑀺𑀦𑀸 𑀲𑀳𑀓𑀸𑀭𑀻𑀓𑀸𑀭𑀡𑁂𑀦 𑀢𑀤𑀼𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸𑀲𑀗𑁆𑀔𑀸𑀢𑀁 𑀯𑀺𑀲𑁂𑀲𑀁 𑀧𑀢𑁆𑀢𑀲𑁆𑀲. 𑀢𑀸𑀬𑀬𑁂𑀯𑀸𑀢𑀺 𑀬𑀸 𑀯𑁂𑀔𑀸𑀤𑀸𑀦𑁂 𑀧𑀼𑀧𑁆𑀨𑀦𑀲𑀫𑀢𑁆𑀣𑀢𑀸 𑀯𑁂𑀔𑀸𑀧𑀕𑀫𑁂 𑀮𑀤𑁆𑀥𑁄𑀓𑀸𑀲𑀸, 𑀢𑀸𑀬𑀫𑁂𑀯.

𑀉𑀧𑀲𑀕𑁆𑀕𑀯𑀲𑁂𑀦𑀧𑀺 𑀅𑀢𑁆𑀣𑀯𑀺𑀲𑁂𑀲𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀤𑁆𑀤𑀢𑁆𑀣𑀫𑀢𑁆𑀢𑀢𑁄 𑀦𑀸𑀦𑀸𑀓𑀭𑀡’’𑀦𑁆𑀢𑀺. 𑀯𑀘𑀦𑀻𑀬𑀢𑁆𑀣𑀢𑁄𑀢𑀺 𑀪𑀸𑀯𑀢𑁆𑀣𑀢𑁄. 𑀪𑀸𑀯𑀢𑁆𑀣𑁄𑀧𑀺 𑀳𑀺 𑀯𑀘𑀦𑀕𑁆𑀕𑀳𑀡𑀸𑀦𑀼𑀲𑀸𑀭𑁂𑀦 𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 ‘‘𑀯𑀘𑀦𑀻𑀬𑁄’’𑀢𑀺 𑀯𑀼𑀘𑁆𑀘𑀢𑀺. 𑀦𑀺𑀭𑁄𑀥𑀼𑀧𑁆𑀧𑀸𑀤𑀦𑁆𑀢𑀭𑀸𑀪𑀸𑀯𑀢𑁄𑀢𑀺 𑀧𑀼𑀭𑀺𑀫𑀦𑀺𑀭𑁄𑀥𑀲𑁆𑀲 𑀧𑀘𑁆𑀙𑀺𑀫𑀼𑀧𑁆𑀧𑀸𑀤𑀲𑁆𑀲 𑀘 𑀩𑁆𑀬𑀯𑀥𑀸𑀬𑀓𑀸𑀪𑀸𑀯𑀢𑁄. 𑀦𑀺𑀭𑀦𑁆𑀢𑀭𑀼𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸𑀢𑀺 𑀏𑀢𑁂𑀦 𑀦𑀺𑀭𑁄𑀥𑀸𑀦𑀁 𑀦𑀺𑀭𑁄𑀥𑀲𑀫𑀓𑀸𑀮𑀼𑀧𑁆𑀧𑀸𑀤𑀯𑀸𑀤𑀁 𑀦𑀺𑀯𑀸𑀭𑁂𑀢𑀺. 𑀲𑀢𑀺 𑀳𑀺 𑀲𑀫𑀓𑀸𑀮𑀢𑁆𑀢𑁂 𑀩𑁆𑀬𑀯𑀥𑀸𑀦𑀸𑀲𑀗𑁆𑀓𑀸 𑀏𑀯 𑀦 𑀲𑀺𑀬𑀸 𑀲𑀡𑁆𑀞𑀸𑀦𑀸𑀪𑀸𑀯𑀢𑁄. 𑀇𑀤𑀫𑀺𑀢𑁄 𑀳𑁂𑀝𑁆𑀞𑀸 𑀉𑀤𑁆𑀥𑀁 𑀢𑀺𑀭𑀺𑀬𑀦𑁆𑀢𑀺 𑀯𑀺𑀪𑀸𑀕𑀸𑀪𑀸𑀯𑀸 𑀅𑀢𑁆𑀢𑀦𑀸 𑀏𑀓𑀢𑁆𑀢𑀫𑀺𑀯 𑀉𑀧𑀦𑁂𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀲𑀡𑁆𑀞𑀸𑀦𑀸𑀪𑀸𑀯𑁂𑀦 𑀳𑀺 𑀅𑀧𑁆𑀧𑀝𑀺𑀖𑀪𑀸𑀯𑀽𑀧𑀮𑀓𑁆𑀔𑀡𑁂𑀦 𑀯𑀺𑀪𑀸𑀕𑀸𑀪𑀸𑀯𑀁, 𑀢𑁂𑀦 𑀏𑀓𑀢𑁆𑀢𑀫𑀺𑀯𑀽𑀧𑀦𑀬𑀦𑀁 𑀲𑀼𑀝𑁆𑀞𑀼 𑀅𑀦𑀦𑁆𑀢𑀭𑀪𑀸𑀯𑀁 𑀲𑀸𑀥𑁂𑀢𑀺, 𑀲𑀳𑀸𑀯𑀝𑁆𑀞𑀸𑀦𑀸𑀪𑀸𑀯𑁂𑀦 𑀧𑀦 𑀅𑀦𑀦𑁆𑀢𑀭𑀫𑁂𑀯 𑀉𑀧𑁆𑀧𑀸𑀤𑀦𑀁.

𑀯𑀺𑀪𑀸𑀕𑀢𑁄 𑀜𑀸𑀡𑁂𑀦 𑀆𑀓𑀭𑀻𑀬𑀢𑀻𑀢𑀺 𑀆𑀓𑀸𑀭𑁄, 𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑀺𑀪𑁂𑀤𑁄. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀨𑀮𑀲𑀫𑀸𑀧𑀢𑁆𑀢𑀻𑀦𑀁 𑀦𑀺𑀭𑁄𑀥𑀼𑀧𑁆𑀧𑀸𑀤𑀸𑀦𑀦𑁆𑀢𑀭𑀢𑀸𑀬𑀸𑀢𑀺 𑀬𑁄𑀚𑀦𑀸. 𑀧𑀼𑀭𑀺𑀫𑀘𑀼𑀢𑀻𑀢𑀺 𑀅𑀲𑀜𑁆𑀜𑀲𑀢𑁆𑀢𑀼𑀧𑁆𑀧𑀢𑁆𑀢𑀺𑀢𑁄 𑀧𑀼𑀭𑀺𑀫𑀘𑀼𑀢𑀺. 𑀬𑀤𑀺 𑀓𑀸𑀮𑀦𑁆𑀢𑀭𑀢𑀸 𑀦𑀢𑁆𑀣𑀺, 𑀓𑀣𑀫𑀺𑀤𑀁 ‘‘𑀲𑀢𑁆𑀢𑀸𑀳𑀁 𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀧𑀜𑁆𑀘 𑀓𑀧𑁆𑀧𑀲𑀢𑀸𑀦𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸’’𑀢𑀺 𑀯𑀘𑀦𑀦𑁆𑀢𑀺 𑀆𑀳 ‘‘𑀦 𑀳𑀺 𑀢𑁂𑀲𑀁…𑀧𑁂… 𑀯𑀼𑀘𑁆𑀘𑁂𑀬𑁆𑀬𑀸’’𑀢𑀺. 𑀦𑀦𑀼 𑀢𑁂𑀲𑀁 𑀅𑀦𑁆𑀢𑀭𑀸 𑀭𑀽𑀧𑀲𑀦𑁆𑀢𑀸𑀦𑁄 𑀧𑀯𑀢𑁆𑀢𑀢𑁂𑀯𑀸𑀢𑀺 𑀅𑀦𑀼𑀬𑁄𑀕𑀁 𑀲𑀦𑁆𑀥𑀸𑀬𑀸𑀳 ‘‘𑀦 𑀘…𑀧𑁂… 𑀅𑀜𑁆𑀜𑀲𑀦𑁆𑀢𑀸𑀦𑀢𑁆𑀢𑀸’’𑀢𑀺. 𑀬𑀤𑀺 𑀏𑀯𑀁 𑀢𑁂𑀲𑀁 𑀅𑀜𑁆𑀜𑀪𑀺𑀦𑁆𑀦𑀲𑀦𑁆𑀢𑀸𑀦𑀁 𑀯𑀺𑀬 𑀅𑀜𑁆𑀜𑀫𑀜𑁆𑀜𑀽𑀧𑀓𑀸𑀭𑁂𑀦𑀧𑀺 𑀪𑀯𑀺𑀢𑀩𑁆𑀩𑀦𑁆𑀢𑀺 𑀘𑁄𑀤𑀦𑀸𑀬 𑀯𑀼𑀢𑁆𑀢𑀁 ‘‘𑀭𑀽𑀧𑀸𑀭𑀽𑀧…𑀧𑁂… 𑀳𑁄𑀦𑁆𑀢𑀻’’𑀢𑀺. 𑀢𑁂𑀦𑁂𑀢𑀁 𑀤𑀲𑁆𑀲𑁂𑀢𑀺 𑁋 𑀬𑀤𑀺𑀧𑀺 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀏𑀓𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀯𑀢𑁆𑀢𑀫𑀸𑀦𑀸 𑀯𑀺𑀲𑁂𑀲𑀢𑁄 𑀅𑀜𑁆𑀜𑀫𑀜𑁆𑀜𑀽𑀧𑀓𑀸𑀭𑀓𑀪𑀸𑀯𑁂𑀦 𑀯𑀢𑁆𑀢𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀁 𑀧𑀦 𑀯𑀺𑀲𑀤𑀺𑀲𑀲𑀪𑀸𑀯𑀢𑀸𑀬 𑀯𑀺𑀲𑀼𑀁𑀬𑁂𑀯 𑀲𑀦𑁆𑀢𑀸𑀦𑀪𑀸𑀯𑁂𑀦 𑀧𑀯𑀢𑁆𑀢𑀦𑀢𑁄 𑀩𑁆𑀬𑀯𑀥𑀸𑀬𑀓𑀸 𑀦 𑀳𑁄𑀦𑁆𑀢𑀺 𑀲𑀦𑁆𑀢𑀢𑀺𑀯𑀲𑁂𑀦 𑀫𑀺𑀣𑀼 𑀅𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸, 𑀬𑀢𑁄 ‘‘𑀅𑀜𑁆𑀜𑀫𑀜𑁆𑀜𑀁 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀯𑀺𑀲𑀁𑀲𑀝𑁆𑀞𑀸’’𑀢𑀺 𑀘 𑀯𑀼𑀢𑁆𑀢𑀦𑁆𑀢𑀺. 𑀉𑀧𑀓𑀸𑀭𑀓𑁄 𑀘 𑀦𑀸𑀫 𑀅𑀘𑁆𑀘𑀦𑁆𑀢𑀁 𑀪𑀺𑀦𑁆𑀦𑀲𑀦𑁆𑀢𑀸𑀦𑀸𑀦𑀫𑁆𑀧𑀺 𑀳𑁄𑀢𑀺𑀬𑁂𑀯𑀸𑀢𑀺 𑀦 𑀢𑀸𑀯𑀢𑀸 𑀲𑀦𑁆𑀢𑀸𑀦𑀸𑀪𑁂𑀤𑁄𑀢𑀺 𑀪𑀺𑀬𑁆𑀬𑁄𑀧𑀺 𑀦𑁂𑀲𑀁 𑀩𑁆𑀬𑀯𑀥𑀸𑀬𑀓𑀢𑀸𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀲𑀫𑀸𑀦𑀚𑀸𑀢𑀺𑀓𑀸𑀦𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀦𑀺𑀭𑀦𑁆𑀢𑀭𑀢𑀸 𑀲𑀼𑀝𑁆𑀞𑀼 𑀅𑀦𑀦𑁆𑀢𑀭𑀪𑀸𑀯𑁂𑀦 𑀧𑀸𑀓𑀝𑀸, 𑀦 𑀢𑀣𑀸 𑀅𑀲𑀫𑀸𑀦𑀚𑀸𑀢𑀺𑀓𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀚𑀯𑀦𑀸𑀦𑀦𑁆𑀢𑀭𑀲𑁆𑀲 𑀚𑀯𑀦𑀲𑁆𑀲 𑀯𑀺𑀬 𑀪𑀯𑀗𑁆𑀕𑀸𑀦𑀦𑁆𑀢𑀭𑀲𑁆𑀲 𑀪𑀯𑀗𑁆𑀕𑀲𑁆𑀲 𑀯𑀺𑀬𑀸’’𑀢𑀺 𑀯𑀼𑀢𑁆𑀢𑀁.

𑀧𑀘𑁆𑀘𑀬𑀪𑀸𑀯𑁄 𑀘𑁂𑀢𑁆𑀣𑀸𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁄 𑀩𑁆𑀬𑀢𑀺𑀭𑁂𑀓𑁄. 𑀲𑁄 𑀬𑁂𑀦 𑀯𑀺𑀲𑁂𑀲𑁂𑀦𑁂𑀢𑁆𑀣 𑀉𑀧𑁆𑀧𑀸𑀤𑀓𑁆𑀔𑀡𑀁, 𑀢𑀁 𑀯𑀺𑀲𑁂𑀲𑀁 𑀚𑁄𑀢𑁂𑀢𑀺. 𑀅𑀦𑀦𑁆𑀢𑀭𑀧𑀘𑁆𑀘𑀬𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀼𑀭𑁂𑀧𑀘𑁆𑀙𑀸𑀪𑀸𑀯𑀸, 𑀢𑀤𑀼𑀧𑀸𑀤𑀺𑀓𑀸 𑀯𑀸 𑀉𑀧𑁆𑀧𑀸𑀤𑀦𑀺𑀭𑁄𑀥𑀸 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀧𑀭𑀺𑀘𑁆𑀙𑁂𑀤𑁄, 𑀢𑁂𑀦 𑀕𑀳𑀺𑀢𑀸𑀦𑀁 𑀔𑀡𑀢𑁆𑀢𑀬𑀧𑀭𑀺𑀬𑀸𑀧𑀦𑁆𑀦𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑀘𑀦𑀁 𑀅𑀮𑀪𑀦𑁆𑀢𑀸𑀦’’𑀦𑁆𑀢𑀺. 𑀉𑀧𑁆𑀧𑀸𑀤𑀓𑁆𑀔𑀡𑀲𑀫𑀗𑁆𑀕𑀻 𑀳𑀺 ‘‘𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀉𑀧𑁆𑀧𑀸𑀤𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀫𑀸𑀦𑀁, 𑀦𑁄 𑀘 𑀉𑀧𑁆𑀧𑀦𑁆𑀦𑀁, 𑀪𑀗𑁆𑀕𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀦𑁄 𑀘 𑀉𑀧𑁆𑀧𑀚𑁆𑀚𑀫𑀸𑀦’’𑀦𑁆𑀢𑀺 (𑀬𑀫. 𑁨.𑀘𑀺𑀢𑁆𑀢𑀬𑀫𑀓.𑁮𑁧). 𑀲𑁄𑀢𑀺 𑀅𑀦𑀦𑁆𑀢𑀭𑀸𑀤𑀺𑀧𑀘𑁆𑀘𑀬𑀪𑀸𑀯𑁄. 𑀅𑀧𑀭𑀺𑀘𑁆𑀙𑁂𑀤𑀦𑁆𑀢𑀺 𑀓𑀸𑀮𑀯𑀲𑁂𑀦 𑀧𑀭𑀺𑀘𑁆𑀙𑁂𑀤𑀭𑀳𑀺𑀢𑀁. 𑀬𑀢𑁄𑀢𑀺 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀯𑀲𑁂𑀦 𑀧𑀭𑀺𑀘𑁆𑀙𑁂𑀤𑀸𑀪𑀸𑀯𑀢𑁄. 𑀢𑁂𑀦𑁂𑀯𑀸𑀢𑀺 𑀓𑀸𑀮𑀯𑀲𑁂𑀦 𑀧𑀭𑀺𑀘𑁆𑀙𑀺𑀚𑁆𑀚 𑀏𑀯 𑀥𑀫𑁆𑀫𑀸𑀦𑀁 𑀕𑀳𑀡𑀢𑁄.

𑀉𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑀪𑀸𑀯𑁂𑀦 𑀧𑀸𑀓𑀝𑁂𑀦𑀸𑀢𑀺 𑀇𑀤𑀁 𑀢𑀲𑁆𑀲 𑀦𑀺𑀤𑀲𑁆𑀲𑀦𑀪𑀸𑀯𑀦𑀺𑀤𑀲𑁆𑀲𑀦𑀁. 𑀲𑀺𑀤𑁆𑀥𑀜𑁆𑀳𑀺 𑀦𑀺𑀤𑀲𑁆𑀲𑀦𑀁. 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀦𑁆𑀢𑀺 𑀧𑀘𑁆𑀘𑀬𑀦𑀺𑀩𑁆𑀩𑀢𑁆𑀢𑀸𑀦𑀁, 𑀅𑀢𑁆𑀢𑀦𑁄 𑀨𑀮𑀪𑀽𑀢𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀳𑀚𑀸𑀢𑀪𑀸𑀯𑁂𑀦𑀸𑀢𑀺 𑀲𑀳 𑀉𑀧𑁆𑀧𑀦𑁆𑀦𑀪𑀸𑀯𑁂𑀦. 𑀅𑀢𑁆𑀢𑀦𑀸 𑀲𑀳𑀼𑀧𑁆𑀧𑀦𑁆𑀦𑀥𑀫𑁆𑀫𑀸𑀦𑀜𑁆𑀳𑀺 𑀲𑀳𑀼𑀧𑁆𑀧𑀦𑁆𑀦𑀪𑀸𑀯𑁂𑀦 𑀉𑀧𑀓𑀸𑀭𑀓𑀢𑀸 𑀲𑀳𑀚𑀸𑀢𑀧𑀘𑁆𑀘𑀬𑀢𑀸. 𑀢𑁂𑀦 𑀞𑀺𑀢𑀺𑀓𑁆𑀔𑀡𑁂𑀧𑀺 𑀦𑁂𑀲𑀁 𑀉𑀧𑀓𑀸𑀭𑀓𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀜𑁆𑀳𑀺 ‘‘𑀧𑀓𑀸𑀲𑀲𑁆𑀲 𑀧𑀤𑀻𑀧𑁄 𑀯𑀺𑀬𑀸’’𑀢𑀺 𑀦𑀺𑀤𑀲𑁆𑀲𑀦𑀫𑁆𑀧𑀺 𑀲𑀼𑀝𑁆𑀞𑀼 𑀬𑀼𑀚𑁆𑀚𑀢𑀺. 𑀧𑀤𑀻𑀧𑁄 𑀳𑀺 𑀧𑀓𑀸𑀲𑀲𑁆𑀲 𑀞𑀺𑀢𑀺𑀬𑀸𑀧𑀺 𑀧𑀘𑁆𑀘𑀬𑁄𑀢𑀺.

𑀅𑀜𑁆𑀜𑀫𑀜𑁆𑀜𑀢𑀸𑀯𑀲𑁂𑀦𑁂𑀯𑀸𑀢𑀺 𑀇𑀫𑀺𑀦𑀸 𑀲𑀳𑀚𑀸𑀢𑀸𑀤𑀺𑀪𑀸𑀯𑁂𑀦 𑀅𑀢𑁆𑀢𑀦𑁄 𑀉𑀧𑀓𑀸𑀭𑀓𑀲𑁆𑀲 𑀉𑀧𑀓𑀸𑀭𑀓𑀢𑀸𑀫𑀢𑁆𑀢𑀁 𑀦 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀢𑀸, 𑀅𑀣 𑀔𑁄 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀪𑀸𑀯𑀯𑀲𑁂𑀦𑀸𑀢𑀺 𑀮𑀓𑁆𑀔𑀡𑀲𑀗𑁆𑀓𑀭𑀸𑀪𑀸𑀯𑀁 𑀤𑀲𑁆𑀲𑁂𑀢𑀺, 𑀦 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑁂𑀳𑀺 𑀯𑀺𑀦𑀸 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀲𑁆𑀲 𑀧𑀯𑀢𑁆𑀢𑀺. 𑀢𑁂𑀦𑁂𑀯𑀸𑀳 ‘‘𑀦 𑀲𑀳𑀚𑀸𑀢𑀢𑀸𑀤𑀺𑀯𑀲𑁂𑀦𑀸’’𑀢𑀺. 𑀬𑀤𑀺𑀧𑀺 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑁂𑀳𑀺 𑀯𑀺𑀦𑀸 𑀦 𑀳𑁄𑀢𑀺, 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀸 𑀧𑀦 𑀢𑁂𑀦 𑀯𑀺𑀦𑀸𑀧𑀺 𑀳𑁄𑀦𑁆𑀢𑀻𑀢𑀺 𑀲𑀳𑀚𑀸𑀢𑀢𑀸𑀤𑀺𑀯𑀺𑀥𑀼𑀭𑁂𑀦𑁂𑀯 𑀧𑀓𑀸𑀭𑁂𑀦 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀲𑁆𑀲 𑀧𑀯𑀢𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀳𑀚𑀸𑀢𑀸𑀤𑀺…𑀧𑁂… 𑀦 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 ‘‘𑀦 𑀘 𑀧𑀼𑀭𑁂𑀚𑀸𑀢…𑀧𑁂… 𑀳𑁄𑀦𑁆𑀢𑀻’’𑀢𑀺 𑀆𑀳. 𑀲𑀳𑀚𑀸𑀢𑀢𑀸𑀤𑀻𑀢𑀺 𑀘 𑀆𑀤𑀺-𑀲𑀤𑁆𑀤𑁂𑀦 𑀦𑀺𑀲𑁆𑀲𑀬𑀅𑀢𑁆𑀣𑀺𑀅𑀯𑀺𑀕𑀢𑀸𑀤𑀻𑀦𑀁 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁.

𑀧𑀣𑀯𑀻𑀥𑀸𑀢𑀼𑀬𑀁 𑀧𑀢𑀺𑀝𑁆𑀞𑀸𑀬 𑀏𑀯 𑀲𑁂𑀲𑀥𑀸𑀢𑀼𑀬𑁄 𑀉𑀧𑀸𑀤𑀸𑀭𑀽𑀧𑀸𑀦𑀺 𑀯𑀺𑀬 𑀬𑀣𑀸𑀲𑀓𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀥𑀺𑀝𑁆𑀞𑀸𑀦𑀸𑀓𑀸𑀭𑁂𑀦 𑀧𑀣𑀯𑀻𑀥𑀸𑀢𑀼 𑀲𑁂𑀲𑀥𑀸𑀢𑀽𑀦’’𑀦𑁆𑀢𑀺. 𑀏𑀢𑁆𑀣 𑀅𑀥𑀺𑀝𑁆𑀞𑀸𑀦𑀸𑀓𑀸𑀭𑁂𑀦𑀸𑀢𑀺 𑀆𑀥𑀸𑀭𑀸𑀓𑀸𑀭𑁂𑀦. 𑀆𑀥𑀸𑀭𑀸𑀓𑀸𑀭𑁄 𑀘𑁂𑀢𑁆𑀣 𑀦𑁂𑀲𑀁 𑀲𑀸𑀢𑀺𑀲𑀬𑀁 𑀢𑀤𑀥𑀻𑀦𑀯𑀼𑀢𑁆𑀢𑀺𑀢𑀸𑀬 𑀯𑁂𑀤𑀺𑀢𑀩𑁆𑀩𑁄, 𑀬𑀢𑁄 𑀪𑀽𑀢𑀸𑀦𑀺 𑀅𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀝𑁆𑀞𑀸𑀦𑀸𑀦𑀺 𑀯𑀼𑀘𑁆𑀘𑀦𑁆𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀘𑀓𑁆𑀔𑀸𑀤𑀻𑀦𑀫𑁆𑀧𑀺 𑀅𑀥𑀺𑀝𑁆𑀞𑀸𑀦𑀸𑀓𑀸𑀭𑁂𑀦 𑀉𑀧𑀓𑀸𑀭𑀓𑀢𑀸 𑀲𑀼𑀝𑁆𑀞𑀼 𑀬𑀼𑀚𑁆𑀚𑀢𑀺. 𑀦 𑀳𑀺 𑀬𑀣𑀸𑀯𑀼𑀢𑁆𑀢𑀁 𑀢𑀤𑀥𑀻𑀦𑀯𑀼𑀢𑁆𑀢𑀺𑀬𑀸 𑀯𑀺𑀲𑁂𑀲𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑁄 𑀘𑀓𑁆𑀔𑀸𑀤𑀻𑀲𑀼 𑀅𑀤𑁂𑀲𑀓𑀸𑀦𑀁 𑀅𑀭𑀽𑀧𑀥𑀫𑁆𑀫𑀸𑀦𑀁 𑀅𑀥𑀺𑀝𑁆𑀞𑀸𑀦𑀸𑀓𑀸𑀭𑁄 𑀲𑀫𑁆𑀪𑀯𑀢𑀺. 𑀬𑀤𑀺𑀧𑀺 𑀬𑀁 𑀬𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀬𑁂 𑀬𑁂 𑀥𑀫𑁆𑀫𑀸 𑀧𑀯𑀢𑁆𑀢𑀦𑁆𑀢𑀺, 𑀢𑁂𑀲𑀁 𑀲𑀩𑁆𑀩𑁂𑀲𑀁 𑀢𑀤𑀥𑀻𑀦𑀯𑀼𑀢𑁆𑀢𑀺𑀪𑀸𑀯𑁄, 𑀬𑁂𑀦 𑀧𑀦 𑀧𑀘𑁆𑀘𑀬𑀪𑀸𑀯𑀯𑀺𑀲𑁂𑀲𑁂𑀦 𑀘𑀓𑁆𑀔𑀸𑀤𑀻𑀦𑀁 𑀧𑀝𑀼𑀫𑀦𑁆𑀤𑀪𑀸𑀯𑁂𑀲𑀼 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀬𑁄 𑀢𑀤𑀦𑀼𑀯𑀺𑀥𑀸𑀦𑀸𑀓𑀸𑀭𑁂𑀦𑁂𑀯 𑀧𑀯𑀢𑁆𑀢𑀦𑁆𑀢𑀺, 𑀲𑁆𑀯𑀸𑀬𑀫𑀺𑀤𑀁 𑀢𑁂𑀲𑀁 𑀢𑀤𑀥𑀻𑀦𑀯𑀼𑀢𑁆𑀢𑀺𑀬𑀸 𑀲𑀺𑀤𑁆𑀥𑁄 𑀯𑀺𑀲𑁂𑀲𑁄𑀢𑀺 𑀯𑀼𑀢𑁆𑀢𑁄. 𑀏𑀯𑀜𑁆𑀳𑀺 𑀧𑀘𑁆𑀘𑀬𑀪𑀸𑀯𑀲𑀸𑀫𑀜𑁆𑀜𑁂 𑀲𑀢𑀺𑀧𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑀢𑁄 𑀦𑀺𑀲𑁆𑀲𑀬𑀧𑀘𑁆𑀘𑀬𑀲𑁆𑀲 𑀯𑀺𑀲𑁂𑀲𑁄 𑀲𑀺𑀤𑁆𑀥𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁆𑀯𑀸𑀬𑀁 𑀥𑀸𑀢𑀼𑀯𑀺𑀪𑀗𑁆𑀕𑁂 𑀯𑀺𑀪𑀸𑀯𑀺𑀢𑁄𑀬𑁂𑀯. 𑀔𑀦𑁆𑀥𑀸𑀤𑀬𑁄 𑀢𑀁𑀢𑀁𑀦𑀺𑀲𑁆𑀲𑀬𑀸𑀦𑀁 𑀔𑀦𑁆𑀥𑀸𑀤𑀻𑀦𑀦𑁆𑀢𑀺 ‘‘𑀉𑀧𑀓𑀸𑀭𑀓𑀸’’𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁.

𑀬𑀁 𑀓𑀺𑀜𑁆𑀘𑀺 𑀓𑀸𑀭𑀡𑀁 𑀦𑀺𑀲𑁆𑀲𑀬𑁄𑀢𑀺 𑀯𑀤𑀢𑀺, 𑀦 𑀯𑀼𑀢𑁆𑀢𑀮𑀓𑁆𑀔𑀡𑀽𑀧𑀧𑀦𑁆𑀦𑀫𑁂𑀯. 𑀏𑀢𑁂𑀦 𑀧𑀘𑁆𑀘𑀬𑀝𑁆𑀞𑁄 𑀇𑀥 𑀦𑀺𑀲𑁆𑀲𑀬𑀝𑁆𑀞𑁄𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀣𑀸𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑀺𑀤𑁆𑀥𑀸𑀭𑁂𑀢𑀻’’𑀢𑀺.

𑀲𑀼𑀝𑁆𑀞𑀼𑀓𑀢𑀢𑀁 𑀤𑀻𑀧𑁂𑀢𑀺, 𑀓𑀲𑁆𑀲? ‘‘𑀅𑀢𑁆𑀢𑀦𑁄’’𑀢𑀺 𑀯𑀼𑀢𑁆𑀢𑀲𑁆𑀲 𑀧𑀓𑀢𑀲𑀤𑁆𑀤𑁂𑀦 𑀯𑀺𑀲𑁂𑀲𑀺𑀬𑀫𑀸𑀦𑀲𑁆𑀲 𑀧𑀘𑁆𑀘𑀬𑀲𑁆𑀲. 𑀓𑁂𑀦 𑀓𑀢𑀦𑁆𑀢𑀺? 𑀅𑀢𑁆𑀢𑀦𑁄 𑀓𑀸𑀭𑀡𑁂𑀳𑀻𑀢𑀺 𑀲𑀺𑀤𑁆𑀥𑁄𑀯𑀸𑀬𑀫𑀢𑁆𑀣𑁄. 𑀢𑀣𑀸𑀢𑀺 𑀨𑀮𑀲𑁆𑀲 𑀉𑀧𑁆𑀧𑀸𑀤𑀦𑀲𑀫𑀢𑁆𑀣𑀪𑀸𑀯𑁂𑀦. 𑀅𑀣 𑀯𑀸 𑀢𑀣𑀸𑀢𑀺 𑀦𑀺𑀧𑁆𑀨𑀸𑀤𑀦𑀯𑀲𑁂𑀦 𑀉𑀧𑀲𑁂𑀯𑀦𑀯𑀲𑁂𑀦 𑀘. 𑀢𑀢𑁆𑀣 𑀦𑀺𑀧𑁆𑀨𑀸𑀤𑀦𑀁 𑀳𑁂𑀢𑀼𑀧𑀘𑁆𑀘𑀬𑀲𑀫𑁄𑀥𑀸𑀦𑁂𑀦 𑀨𑀮𑀲𑁆𑀲 𑀦𑀺𑀩𑁆𑀩𑀢𑁆𑀢𑀦𑀁, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀅𑀦𑀸𑀫𑀲𑀺𑀢𑁆𑀯𑀸 𑀉𑀧𑀲𑁂𑀯𑀦𑀫𑁂𑀯 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀉𑀧𑀲𑁂𑀯𑀺𑀢𑁄 𑀯𑀸’’𑀢𑀺 𑀆𑀳. 𑀢𑀢𑁆𑀣 𑀅𑀮𑁆𑀮𑀻𑀬𑀸𑀧𑀦𑀁 𑀧𑀭𑀺𑀪𑁄𑀕𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀉𑀧𑀪𑁄𑀕𑀽𑀧𑀲𑁂𑀯𑀦’’𑀦𑁆𑀢𑀺. 𑀯𑀺𑀚𑀸𑀦𑀦𑀸𑀤𑀺𑀯𑀲𑁂𑀦𑀸𑀢𑀺 𑀯𑀺𑀚𑀸𑀦𑀦𑀲𑀜𑁆𑀚𑀸𑀦𑀦𑀸𑀦𑀼𑀪𑀯𑀦𑀸𑀤𑀺𑀯𑀲𑁂𑀦. 𑀢𑁂𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑀉𑀧𑀲𑁂𑀯𑀺𑀢𑀲𑁆𑀲 𑀧𑀓𑀢𑀪𑀸𑀯𑁂𑀦. 𑀅𑀦𑀸𑀕𑀢𑀸𑀦𑀫𑁆𑀧𑀺…𑀧𑁂… 𑀯𑀼𑀢𑁆𑀢𑀸 𑀳𑁄𑀢𑀺, 𑀧𑀕𑁂𑀯 𑀅𑀢𑀻𑀢𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀜𑁆𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲𑀧𑀺 𑀳𑀺 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀉𑀢𑀼 𑀪𑁄𑀚𑀦𑀁 𑀲𑁂𑀦𑀸𑀲𑀦𑀁 𑀉𑀧𑀦𑀺𑀲𑁆𑀲𑀸𑀬 𑀛𑀸𑀦𑀁 𑀉𑀧𑁆𑀧𑀸𑀤𑁂𑀦𑁆𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄 (𑀧𑀝𑁆𑀞𑀸. 𑁨.𑁧𑁮.𑁮) 𑀧𑀓𑀢𑀽𑀧𑀦𑀺𑀲𑁆𑀲𑀬𑀪𑀸𑀯𑁂 𑀮𑀩𑁆𑀪𑀢𑀻𑀢𑀺.

𑀬𑀣𑀸 𑀬𑁂 𑀥𑀫𑁆𑀫𑀸 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑁂 𑀢𑁂𑀲𑀁 𑀏𑀓𑀁𑀲𑁂𑀦 𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑀸𑀧𑀺 𑀳𑁄𑀦𑁆𑀢𑀺, 𑀢𑀣𑀸 𑀬𑁂 𑀥𑀫𑁆𑀫𑀸 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑁂 𑀢𑁂𑀲𑀁 𑀦𑀺𑀲𑁆𑀲𑀬𑀸𑀭𑀫𑁆𑀫𑀡𑀧𑀘𑁆𑀘𑀬𑀸𑀧𑀺 𑀳𑁄𑀦𑁆𑀢𑀻𑀢𑀺 𑀉𑀪𑀬𑁂𑀲𑀼 𑀉𑀪𑀬𑁂𑀲𑀁 𑀧𑀘𑁆𑀘𑀬𑀸𑀓𑀸𑀭𑀸𑀦𑀁 𑀮𑀓𑁆𑀔𑀡𑀢𑁄 𑀲𑀗𑁆𑀓𑀭𑀸𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀧𑁆𑀧𑀬𑀼𑀢𑁆𑀢𑀸𑀓𑀸𑀭𑀸𑀤𑀻𑀳𑀺 𑀯𑀺𑀲𑀺𑀝𑁆𑀞𑀸, 𑀦𑀺𑀲𑁆𑀲𑀬𑀸𑀭𑀫𑁆𑀫𑀡𑀸𑀓𑀸𑀭𑀸𑀤𑀻𑀳𑀺 𑀯𑀺𑀲𑀺𑀝𑁆𑀞𑀸’’𑀢𑀺 𑀘 𑀯𑀼𑀢𑁆𑀢𑀁. 𑀬𑀣𑀸 𑀳𑀺 𑀧𑀘𑁆𑀙𑀸𑀚𑀸𑀢𑀧𑀼𑀭𑁂𑀚𑀸𑀢𑀸𑀓𑀸𑀭𑀸 𑀅𑀜𑁆𑀜𑀫𑀜𑁆𑀜𑀯𑀺𑀲𑀺𑀝𑁆𑀞𑀸, 𑀏𑀯𑀁 𑀧𑀘𑁆𑀙𑀸𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑀸𑀓𑀸𑀭𑀸𑀤𑀬𑁄 𑀧𑀼𑀭𑁂𑀚𑀸𑀢𑀦𑀺𑀲𑁆𑀲𑀬𑀸𑀓𑀸𑀭𑀸𑀤𑀬𑁄 𑀘 𑀅𑀜𑁆𑀜𑀫𑀜𑁆𑀜𑀯𑀺𑀪𑀢𑁆𑀢𑀲𑀪𑀸𑀯𑀸 𑀏𑀯𑀸𑀢𑀺.

𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑁂𑀳𑀻𑀢𑀺 𑀇𑀫𑀺𑀦𑀸 𑀘𑁂𑀢𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀫𑁆𑀧𑀺 𑀢𑀤𑀦𑀼𑀕𑀼𑀡𑀁 𑀅𑀢𑁆𑀢𑀦𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀲𑀼 𑀧𑀯𑀢𑁆𑀢𑀺𑀫𑀸𑀳. 𑀢𑁂𑀦𑁂𑀯𑀸𑀢𑀺 𑀘𑁂𑀢𑀦𑀸𑀳𑀸𑀭𑀯𑀲𑁂𑀦 𑀉𑀧𑀓𑀸𑀭𑀓𑀢𑁆𑀢𑀸 𑀏𑀯.

𑀧𑀬𑁄𑀕𑁂𑀦 𑀓𑀭𑀡𑀻𑀬𑀲𑁆𑀲𑀸𑀢𑀺 𑀏𑀢𑁂𑀦 𑀪𑀺𑀦𑁆𑀦𑀚𑀸𑀢𑀺 𑀬𑀁 𑀢𑀸𑀤𑀺𑀲𑀁 𑀧𑀬𑁄𑀕𑁂𑀦 𑀓𑀸𑀢𑀼𑀁 𑀦 𑀲𑀓𑁆𑀓𑀸, 𑀢𑀁 𑀦𑀺𑀯𑀢𑁆𑀢𑁂𑀢𑀺. 𑀅𑀦𑁂𑀓𑀯𑀸𑀭𑀁 𑀧𑀯𑀢𑁆𑀢𑀺𑀬𑀸 𑀆𑀲𑁂𑀯𑀦𑀝𑁆𑀞𑀲𑁆𑀲 𑀧𑀸𑀓𑀝𑀪𑀸𑀯𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀧𑀼𑀦𑀧𑁆𑀧𑀼𑀦𑀁 𑀓𑀭𑀡’’𑀦𑁆𑀢𑀺. 𑀏𑀓𑀲𑁆𑀲 𑀧𑀦 𑀧𑀘𑁆𑀘𑀬𑀥𑀫𑁆𑀫𑀲𑁆𑀲 𑀏𑀓𑀯𑀸𑀭𑀫𑁂𑀯 𑀧𑀯𑀢𑁆𑀢𑀺. 𑀅𑀢𑁆𑀢𑀲𑀤𑀺𑀲𑀲𑁆𑀲𑀸𑀢𑀺 𑀅𑀭𑀽𑀧𑀥𑀫𑁆𑀫𑀲𑀸𑀭𑀫𑁆𑀫𑀡𑀢𑀸𑀲𑀼𑀓𑁆𑀓𑀓𑀡𑁆𑀳𑀸𑀤𑀺𑀪𑀸𑀯𑁂𑀳𑀺 𑀅𑀢𑁆𑀢𑀦𑀸 𑀲𑀤𑀺𑀲𑀲𑁆𑀲. 𑀇𑀤𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀯𑀺𑀲𑁂𑀲𑀦𑀁, ‘‘𑀅𑀢𑁆𑀢𑀲𑀤𑀺𑀲𑀲𑀪𑀸𑀯𑀢𑀸𑀧𑀸𑀤𑀦’’𑀦𑁆𑀢𑀺 𑀇𑀤𑀁 𑀧𑀦 𑀧𑀘𑁆𑀘𑀬𑀪𑀸𑀯𑀯𑀺𑀲𑁂𑀲𑀦𑀁, 𑀢𑀜𑁆𑀘 𑀪𑀺𑀦𑁆𑀦𑀚𑀸𑀢𑀺𑀬𑀢𑀸𑀤𑀺𑀫𑁂𑀯 𑀯𑀺𑀲𑀤𑀺𑀲𑀲𑀪𑀸𑀯𑀢𑀁 𑀦𑀺𑀯𑀢𑁆𑀢𑁂𑀢𑀺, 𑀦 𑀪𑀽𑀫𑀦𑁆𑀢𑀭𑀢𑀸𑀤𑀺. 𑀦 𑀳𑀺 𑀧𑀭𑀺𑀢𑁆𑀢𑀸 𑀥𑀫𑁆𑀫𑀸 𑀫𑀳𑀕𑁆𑀕𑀢𑀅𑀧𑁆𑀧𑀫𑀸𑀡𑀸𑀦𑀁 𑀥𑀫𑁆𑀫𑀸𑀦𑀁 𑀆𑀲𑁂𑀯𑀦𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀻𑀢𑀺. 𑀯𑀸𑀲𑀦𑀁 𑀯𑀸𑀲𑀁 𑀕𑀸𑀳𑀸𑀧𑀦𑀁, 𑀇𑀥 𑀧𑀦 𑀯𑀸𑀲𑀦𑀁 𑀯𑀺𑀬 𑀯𑀸𑀲𑀦𑀁, 𑀪𑀸𑀯𑀦𑀦𑁆𑀢𑀺 𑀅𑀢𑁆𑀣𑁄. 𑀕𑀦𑁆𑀣𑀸𑀤𑀻𑀲𑀽𑀢𑀺 𑀕𑀦𑁆𑀣𑀲𑀺𑀧𑁆𑀧𑀸𑀤𑀻𑀲𑀼. 𑀯𑀺𑀲𑀬𑁂 𑀘𑁂𑀢𑀁 𑀪𑀼𑀫𑁆𑀫𑀁, 𑀦 𑀦𑀺𑀤𑁆𑀥𑀸𑀭𑀡𑁂. 𑀢𑁂𑀦 𑀕𑀦𑁆𑀣𑀲𑀺𑀧𑁆𑀧𑀸𑀤𑀺𑀯𑀺𑀲𑀬𑀸 𑀧𑀼𑀭𑀺𑀫𑀲𑀺𑀤𑁆𑀥𑀸 𑀅𑀚𑁆𑀛𑀬𑀦𑀸𑀤𑀺𑀓𑀺𑀭𑀺𑀬𑀸 ‘‘𑀕𑀦𑁆𑀣𑀸𑀤𑀻𑀲𑀼 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸’’𑀢𑀺 𑀯𑀼𑀢𑁆𑀢𑀸, 𑀲𑀸 𑀧𑀦 𑀆𑀲𑁂𑀯𑀦𑀸𑀓𑀸𑀭𑀸 𑀇𑀥 𑀉𑀤𑀸𑀳𑀭𑀡𑀪𑀸𑀯𑁂𑀦 𑀅𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀆𑀲𑁂𑀯𑀦𑀸 𑀯𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄’’𑀢𑀺. 𑀦𑀺𑀤𑁆𑀥𑀸𑀭𑀡𑁂 𑀏𑀯 𑀯𑀸 𑀏𑀢𑀁 𑀪𑀼𑀫𑁆𑀫𑀁. 𑀕𑀦𑁆𑀣𑀸𑀤𑀺𑀯𑀺𑀲𑀬𑀸 𑀳𑀺 𑀆𑀲𑁂𑀯𑀦𑀸 𑀕𑀦𑁆𑀣𑀸𑀤𑀻𑀢𑀺 𑀯𑀼𑀢𑁆𑀢𑀸 𑀬𑀣𑀸 𑀭𑀽𑀧𑀯𑀺𑀲𑀬𑀚𑁆𑀛𑀸𑀦𑀁 𑀭𑀽𑀧𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁨𑁪𑁮; 𑁩.𑁩𑁧𑁨; 𑀧𑀝𑀺. 𑀫. 𑁧.𑁨𑁦𑁯; 𑀥. 𑀲. 𑁨𑁪𑁮).

𑀅𑀢𑁆𑀢𑀦𑁄 𑀯𑀺𑀬 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀫𑁆𑀧𑀺 𑀓𑀺𑀘𑁆𑀘𑀲𑀸𑀥𑀺𑀓𑀸 𑀘𑁂𑀢𑀦𑀸 𑀘𑀺𑀢𑁆𑀢𑀲𑁆𑀲 𑀩𑁆𑀬𑀸𑀧𑀸𑀭𑀪𑀸𑀯𑁂𑀦 𑀮𑀓𑁆𑀔𑀻𑀬𑀢𑀻𑀢𑀺 𑀆𑀳 ‘‘𑀘𑀺𑀢𑁆𑀢𑀧𑀬𑁄𑀕𑁄 𑀘𑁂𑀢𑀦𑀸’’𑀢𑀺. 𑀢𑀸𑀬𑀸𑀢𑀺 𑀢𑀸𑀬 𑀘𑁂𑀢𑀦𑀸𑀬. 𑀉𑀧𑁆𑀧𑀦𑁆𑀦𑀓𑀺𑀭𑀺𑀬𑀢𑀸𑀯𑀺𑀲𑀺𑀝𑁆𑀞𑁂𑀢𑀺 𑀘𑀺𑀢𑁆𑀢𑀧𑀬𑁄𑀕𑀲𑀗𑁆𑀔𑀸𑀢𑀸𑀬 𑀘𑁂𑀢𑀦𑀸𑀓𑀺𑀭𑀺𑀬𑀸𑀬 𑀉𑀧𑁆𑀧𑀢𑁆𑀢𑀺𑀬𑀸 𑀯𑀺𑀲𑀺𑀝𑁆𑀞𑁂 𑀯𑀺𑀲𑁂𑀲𑀁 𑀆𑀧𑀦𑁆𑀦𑁂. 𑀬𑀲𑁆𑀫𑀺𑀜𑁆𑀳𑀺 𑀲𑀦𑁆𑀢𑀸𑀦𑁂 𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀬𑀣𑀸𑀩𑀮𑀁 𑀢𑀸𑀤𑀺𑀲𑀁 𑀯𑀺𑀲𑁂𑀲𑀸𑀥𑀸𑀦𑀁 𑀓𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺, 𑀬𑀢𑁄 𑀢𑀢𑁆𑀣𑁂𑀯 𑀅𑀯𑀲𑁂𑀲𑀧𑀘𑁆𑀘𑀬𑀲𑀫𑀯𑀸𑀬𑁂 𑀢𑀲𑁆𑀲𑀸 𑀨𑀮𑀪𑀽𑀢𑀸𑀦𑀺 𑀯𑀺𑀧𑀸𑀓𑀓𑀝𑀢𑁆𑀢𑀸𑀭𑀽𑀧𑀸𑀦𑀺 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀦𑁆𑀢𑀺. 𑀢𑁂𑀦𑀸𑀳 ‘‘𑀲𑁂𑀲𑀧𑀘𑁆𑀘𑀬…𑀧𑁂… 𑀦 𑀅𑀜𑁆𑀜𑀣𑀸’’𑀢𑀺. 𑀢𑁂𑀲𑀦𑁆𑀢𑀺 𑀯𑀺𑀧𑀸𑀓𑀓𑀝𑀢𑁆𑀢𑀸𑀭𑀽𑀧𑀸𑀦𑀁. 𑀢𑁂𑀦𑀸𑀢𑀺 𑀘𑀺𑀢𑁆𑀢𑀓𑀺𑀭𑀺𑀬𑀪𑀸𑀯𑁂𑀦. 𑀓𑀺𑀁 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀲𑀳𑀚𑀸𑀢𑀸𑀦𑀫𑁆𑀧𑀺 𑀪𑀸𑀯𑀻𑀦𑀁 𑀉𑀧𑀓𑀸𑀭𑀺𑀓𑀸 𑀘𑁂𑀢𑀦𑀸 𑀲𑀳𑀚𑀸𑀢𑀸𑀦𑀁 𑀉𑀧𑀓𑀸𑀭𑀺𑀓𑀸𑀢𑀺 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄.

𑀦𑀺𑀭𑀼𑀲𑁆𑀲𑀸𑀳𑀲𑀦𑁆𑀢𑀪𑀸𑀯𑁂𑀦𑀸𑀢𑀺 𑀉𑀲𑁆𑀲𑀸𑀳𑀦𑀁 𑀉𑀲𑁆𑀲𑀸𑀳𑁄, 𑀦𑀢𑁆𑀣𑀺 𑀏𑀢𑀲𑁆𑀲 𑀉𑀲𑁆𑀲𑀸𑀳𑁄𑀢𑀺 𑀦𑀺𑀭𑀼𑀲𑁆𑀲𑀸𑀳𑁄, 𑀲𑁄 𑀏𑀯 𑀲𑀦𑁆𑀢𑀪𑀸𑀯𑁄𑀢𑀺 𑀦𑀺𑀭𑀼𑀲𑁆𑀲𑀸𑀳𑀲𑀦𑁆𑀢𑀪𑀸𑀯𑁄, 𑀢𑁂𑀦. 𑀉𑀲𑁆𑀲𑀸𑀳𑁄𑀢𑀺 𑀘 𑀓𑀺𑀭𑀺𑀬𑀫𑀬𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀧𑀯𑀢𑁆𑀢𑀺𑀆𑀓𑀸𑀭𑁄 𑀯𑁂𑀤𑀺𑀢𑀩𑁆𑀩𑁄, 𑀬𑁄 𑀩𑁆𑀬𑀸𑀧𑀸𑀭𑁄𑀢𑀺 𑀘 𑀯𑀼𑀘𑁆𑀘𑀢𑀺, 𑀦 𑀯𑀻𑀭𑀺𑀬𑀼𑀲𑁆𑀲𑀸𑀳𑁄. 𑀲𑁆𑀯𑀸𑀬𑀁 𑀬𑀣𑀸 𑀅𑀲𑀫𑀼𑀕𑁆𑀖𑀸𑀢𑀺𑀢𑀸𑀦𑀼𑀲𑀬𑀸𑀦𑀁 𑀓𑀺𑀭𑀺𑀬𑀫𑀬𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀲𑀸𑀢𑀺𑀲𑀬𑁄 𑀮𑀩𑁆𑀪𑀢𑀺, 𑀦 𑀢𑀣𑀸 𑀦𑀺𑀭𑀦𑀼𑀲𑀬𑀸𑀦𑀁. 𑀢𑀢𑁄 𑀏𑀯 𑀢𑁂 𑀲𑀦𑁆𑀢𑀲𑀪𑀸𑀯𑀸 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀩𑁆𑀬𑀸𑀧𑀸𑀭𑀭𑀳𑀺𑀢𑀸𑀯 𑀳𑁄𑀦𑁆𑀢𑀺, 𑀓𑀺𑀭𑀺𑀬𑀫𑀬𑀘𑀺𑀢𑁆𑀢𑀼𑀧𑁆𑀧𑀸𑀤𑀢𑀸𑀬 𑀧𑀦 𑀲𑀉𑀲𑁆𑀲𑀸𑀳𑀸 𑀏𑀯𑀸𑀢𑀺 𑀢𑀢𑁄𑀧𑀺 𑀯𑀺𑀲𑁂𑀲𑀦𑀢𑁆𑀣𑀁 ‘‘𑀦𑀺𑀭𑀼𑀲𑁆𑀲𑀸𑀳𑀲𑀦𑁆𑀢𑀪𑀸𑀯𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀏𑀢𑁂𑀦𑀸𑀢𑀺 𑀦𑀺𑀭𑀼𑀲𑁆𑀲𑀸𑀳𑀲𑀦𑁆𑀢𑀪𑀸𑀯𑀕𑁆𑀕𑀳𑀡𑁂𑀦. 𑀲𑀸𑀭𑀫𑁆𑀫𑀡𑀸𑀤𑀺𑀪𑀸𑀯𑁂𑀦𑀸𑀢𑀺 𑀲𑀸𑀭𑀫𑁆𑀫𑀡𑀅𑀭𑀽𑀧𑀥𑀫𑁆𑀫𑀘𑀺𑀢𑁆𑀢𑀘𑁂𑀢𑀲𑀺𑀓𑀨𑀲𑁆𑀲𑀸𑀤𑀺𑀪𑀸𑀯𑁂𑀦. 𑀯𑀺𑀲𑀤𑀺𑀲𑀯𑀺𑀧𑀸𑀓𑀪𑀸𑀯𑀁 𑀤𑀲𑁆𑀲𑁂𑀢𑀺 𑀬𑀣𑀸𑀯𑀼𑀢𑁆𑀢𑀉𑀲𑁆𑀲𑀸𑀳𑀫𑀢𑁆𑀢𑀭𑀳𑀺𑀢𑀲𑀦𑁆𑀢𑀪𑀸𑀯𑀲𑁆𑀲 𑀯𑀺𑀧𑀓𑁆𑀓𑀪𑀸𑀯𑀫𑀸𑀧𑀦𑁆𑀦𑁂𑀲𑀼 𑀅𑀭𑀽𑀧𑀥𑀫𑁆𑀫𑁂𑀲𑀼 𑀏𑀯 𑀮𑀩𑁆𑀪𑀦𑀢𑁄. 𑀲𑁄𑀢𑀺 𑀯𑀺𑀧𑀸𑀓𑀪𑀸𑀯𑁄. 𑀯𑀺𑀧𑀸𑀓𑀸𑀦𑀁 𑀧𑀬𑁄𑀕𑁂𑀦 𑀅𑀲𑀸𑀥𑁂𑀢𑀩𑁆𑀩𑀢𑀸𑀬𑀸𑀢𑀺 ‘‘𑀙𑀦𑁆𑀤𑀯𑀢𑁄 𑀓𑀺𑀁 𑀦𑀸𑀫𑀦 𑀲𑀺𑀚𑁆𑀛𑀢𑀻’’𑀢𑀺𑀆𑀤𑀺𑀦𑀸 𑀘𑀺𑀢𑁆𑀢𑀸𑀪𑀺𑀲𑀗𑁆𑀔𑀸𑀭𑀧𑀬𑁄𑀕𑁂𑀦 𑀬𑀣𑀸 𑀓𑀼𑀲𑀮𑀸𑀓𑀼𑀲𑀮𑀸 𑀦𑀺𑀧𑁆𑀨𑀸𑀤𑀻𑀬𑀦𑁆𑀢𑀺, 𑀏𑀯𑀁 𑀯𑀺𑀧𑀸𑀓𑀸𑀦𑀁 𑀧𑀬𑁄𑀕𑁂𑀦 𑀅𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀢𑁆𑀢𑀸. 𑀧𑀬𑁄𑀕𑁂𑀦𑀸𑀢𑀺 𑀓𑀫𑁆𑀫𑀨𑀮𑀼𑀧𑁆𑀧𑀢𑁆𑀢𑀺𑀫𑀽𑀮𑀳𑁂𑀢𑀼𑀪𑀽𑀢𑁂𑀦 𑀧𑀼𑀭𑀺𑀫𑀧𑀬𑁄𑀕𑁂𑀦. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀁 𑀆𑀕𑀫𑁆𑀫 𑀯𑀺𑀧𑀘𑁆𑀘𑀦𑁆𑀢𑀻’’𑀢𑀺𑀆𑀤𑀺. 𑀅𑀜𑁆𑀜𑀣𑀸𑀢𑀺 𑀧𑀬𑁄𑀕𑁂𑀦 𑀯𑀺𑀦𑀸. 𑀲𑁂𑀲𑀧𑀘𑁆𑀘𑀬𑁂𑀲𑀽𑀢𑀺 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑁂 𑀲𑀳𑀓𑀸𑀭𑀻𑀓𑀸𑀭𑀡𑁂𑀲𑀼. 𑀓𑀫𑁆𑀫𑀲𑁆𑀲 𑀓𑀝𑀢𑁆𑀢𑀸𑀬𑁂𑀯 𑀧𑀬𑁄𑀕𑁂 𑀲𑀢𑀺 𑀅𑀲𑀢𑀺𑀧𑀻𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀅𑀯𑀥𑀸𑀭𑀡𑁂𑀦 𑀤𑀲𑁆𑀲𑁂𑀦𑁆𑀢𑁄 𑀯𑀺𑀧𑀸𑀓𑀸𑀦𑀁 𑀦𑀺𑀭𑀼𑀲𑁆𑀲𑀸𑀳𑀢𑀁 𑀧𑀸𑀓𑀝𑀁 𑀓𑀭𑁄𑀢𑀺. 𑀦 𑀓𑀺𑀮𑁂𑀲𑀯𑀽𑀧𑀲𑀫𑀲𑀦𑁆𑀢𑀪𑀸𑀯𑁄 𑀬𑀣𑀸 𑀢𑀁 𑀲𑀦𑁆𑀢𑀸𑀦𑁂𑀲𑀼 𑀛𑀸𑀦𑀲𑀫𑀸𑀧𑀢𑁆𑀢𑀻𑀲𑀽𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀬𑀜𑁆𑀘 𑀯𑀺𑀧𑀸𑀓𑀸𑀦𑀁 𑀲𑀦𑁆𑀢𑀪𑀸𑀯𑁄 𑀦𑀸𑀦𑀼𑀫𑀸𑀦𑀺𑀓𑁄, 𑀅𑀣 𑀔𑁄 𑀧𑀘𑁆𑀘𑀓𑁆𑀔𑀲𑀺𑀤𑁆𑀥𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀦𑁆𑀢𑀪𑀸𑀯𑀢𑁄𑀬𑁂𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀪𑀺𑀦𑀺𑀧𑀸𑀢𑀕𑁆𑀕𑀳𑀡𑁂𑀦 𑀓𑀺𑀘𑁆𑀘𑀢𑁄 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺 𑀤𑀲𑁆𑀲𑁂𑀢𑀺. 𑀢𑁂𑀦𑁂𑀯𑀸𑀳 ‘‘𑀧𑀜𑁆𑀘𑀳𑀺 𑀯𑀺𑀜𑁆𑀜𑀸𑀡𑁂𑀳𑀺 𑀦 𑀓𑀺𑀜𑁆𑀘𑀺 𑀥𑀫𑁆𑀫𑀁 𑀧𑀝𑀺𑀚𑀸𑀦𑀸𑀢𑀺 𑀅𑀜𑁆𑀜𑀢𑁆𑀭 𑀅𑀪𑀺𑀦𑀺𑀧𑀸𑀢𑀫𑀢𑁆𑀢𑀸’’𑀢𑀺. 𑀢𑀧𑁆𑀧𑀘𑁆𑀘𑀬𑀯𑀢𑀦𑁆𑀢𑀺 𑀯𑀺𑀧𑀸𑀓𑀧𑀘𑁆𑀘𑀬𑀯𑀦𑁆𑀢𑀸𑀦𑀁, 𑀯𑀺𑀧𑀸𑀓𑀧𑀘𑁆𑀘𑀬𑁂𑀦 𑀉𑀧𑀓𑀢𑁆𑀢𑀩𑁆𑀩𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀯𑀺𑀧𑀸𑀓𑀸𑀦𑀁 𑀭𑀽𑀧𑀥𑀫𑁆𑀫𑀸𑀦𑀁. 𑀯𑀺𑀧𑀸𑀓𑀸𑀦𑀼𑀓𑀼𑀮𑀁 𑀧𑀯𑀢𑁆𑀢𑀺𑀦𑁆𑀢𑀺 𑀲𑀦𑁆𑀢𑀲𑀪𑀸𑀯𑀁 𑀧𑀘𑁆𑀘𑀬𑀪𑀸𑀯𑀫𑀸𑀳.

𑀬𑀣𑀸𑀲𑀓𑀁 𑀧𑀘𑁆𑀘𑀬𑁂𑀳𑀺 𑀦𑀺𑀩𑁆𑀩𑀢𑁆𑀢𑀸𑀦𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀅𑀦𑀼𑀩𑀮𑀧𑁆𑀧𑀤𑀸𑀦𑀁 𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑀁, 𑀢𑀬𑀺𑀤𑀁 𑀆𑀳𑀸𑀭𑁂𑀲𑀼 𑀦 𑀦𑀺𑀬𑀢𑀁 𑀢𑀢𑁄 𑀅𑀜𑁆𑀜𑀣𑀸𑀧𑀺 𑀧𑀯𑀢𑁆𑀢𑀦𑀢𑁄. 𑀢𑀣𑀸 𑀲𑀢𑀺 𑀢𑀤𑁂𑀯 𑀢𑀢𑁆𑀣 𑀓𑀲𑁆𑀫𑀸 𑀕𑀳𑀺𑀢𑀦𑁆𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀲𑀢𑀺𑀧𑀺…𑀧𑁂… 𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑁂𑀦𑀸’’𑀢𑀺. 𑀢𑁂𑀦 𑀧𑀥𑀸𑀦𑀸𑀧𑁆𑀧𑀥𑀸𑀦𑁂𑀲𑀼 𑀧𑀥𑀸𑀦𑁂𑀦 𑀦𑀺𑀤𑁆𑀤𑁂𑀲𑁄 𑀜𑀸𑀬𑀕𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀓𑀸𑀫𑀜𑁆𑀘𑁂𑀢𑁆𑀣 ‘‘𑀭𑀽𑀧𑀸𑀭𑀽𑀧𑀸𑀦𑀁 𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑁂𑀦𑀸’’𑀢𑀺 𑀅𑀯𑀺𑀲𑁂𑀲𑀢𑁄 𑀯𑀼𑀢𑁆𑀢𑀁, 𑀲𑀸𑀫𑀜𑁆𑀜𑀚𑁄𑀢𑀦𑀸 𑀧𑀦 𑀯𑀺𑀲𑁂𑀲𑁂 𑀅𑀯𑀢𑀺𑀝𑁆𑀞𑀢𑀻𑀢𑀺 𑀬𑀣𑀸𑀭𑀳𑀁 𑀧𑀘𑁆𑀘𑀬𑀪𑀸𑀯𑁄 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑁄. 𑀲𑁆𑀯𑀸𑀬𑀁 𑀢𑁂𑀲𑀁 𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑀲𑁆𑀲 𑀧𑀥𑀸𑀦𑀪𑀸𑀯𑀯𑀺𑀪𑀸𑀯𑀦𑁂𑀦𑁂𑀯 𑀆𑀯𑀺 𑀪𑀯𑀢𑀻𑀢𑀺 𑀢𑀫𑁂𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀨𑀲𑁆𑀲𑀫𑀦𑁄𑀲𑀜𑁆𑀘𑁂𑀢𑀦𑀸𑀯𑀺𑀜𑁆𑀜𑀸𑀡𑀸𑀦𑀺 𑀅𑀢𑁆𑀢𑀦𑀸 𑀲𑀳𑀚𑀸𑀢𑀥𑀫𑁆𑀫𑀸𑀦𑀁 𑀲𑀳𑀼𑀧𑁆𑀧𑀸𑀤𑀦𑀪𑀸𑀯𑁂𑀦 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀲𑀢𑀺𑀧𑀺 𑀚𑀦𑀓𑀢𑁆𑀢𑁂 𑀅𑀭𑀽𑀧𑀻𑀦𑀁 𑀆𑀳𑀸𑀭𑀸𑀦’’𑀦𑁆𑀢𑀺. 𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑀁 𑀳𑁄𑀢𑀺 𑀉𑀧𑁆𑀧𑀸𑀤𑀢𑁄 𑀧𑀭𑀫𑁆𑀧𑀺 𑀦𑁂𑀲𑀁 𑀧𑀘𑁆𑀘𑀬𑀪𑀸𑀯𑀢𑁄. 𑀅𑀲𑀢𑀺𑀧𑀺 𑀚𑀦𑀓𑀢𑁆𑀢𑁂 𑀉𑀧𑀢𑁆𑀣𑀫𑁆𑀪𑀺𑀬𑀫𑀸𑀦𑀲𑁆𑀲 𑀭𑀽𑀧𑀲𑁆𑀲 𑀅𑀜𑁆𑀜𑁂𑀳𑀺 𑀬𑀣𑀸𑀲𑀓𑀁 𑀧𑀘𑁆𑀘𑀬𑁂𑀳𑀺 𑀚𑀦𑀺𑀢𑀢𑁆𑀢𑀸. 𑀢𑁂𑀦𑀸𑀳 ‘‘𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀽𑀧𑀢𑁆𑀣𑀫𑁆𑀪𑀓𑀭𑀽𑀧𑀸𑀳𑀸𑀭𑀲𑁆𑀲𑀸’’𑀢𑀺. 𑀬𑀤𑀕𑁆𑀕𑁂𑀦 𑀭𑀽𑀧𑀸𑀭𑀽𑀧𑀸𑀳𑀸𑀭𑀸 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀉𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑀤𑀕𑁆𑀕𑁂𑀦 𑀞𑀺𑀢𑀺𑀬𑀸𑀧𑀺 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺𑀬𑁂𑀯𑀸𑀢𑀺 𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑀁 𑀚𑀦𑀓𑀢𑁆𑀢𑀁 𑀦 𑀩𑁆𑀬𑀪𑀺𑀘𑀭𑀢𑀺, 𑀢𑀲𑁆𑀫𑀸 𑀅𑀦𑀼𑀧𑀢𑁆𑀣𑀫𑁆𑀪𑀓𑀲𑁆𑀲 𑀆𑀳𑀸𑀭𑀲𑁆𑀲 𑀓𑀼𑀢𑁄 𑀚𑀦𑀓𑀢𑀸. 𑀢𑁂𑀦𑀸𑀳 ‘‘𑀅𑀲𑀢𑀺 𑀧𑀦…𑀧𑁂… 𑀦𑀢𑁆𑀣𑀻𑀢𑀺 𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑀁 𑀧𑀥𑀸𑀦’’𑀦𑁆𑀢𑀺. 𑀬𑀲𑁆𑀫𑀸 𑀚𑀦𑀓𑁄 𑀅𑀚𑀦𑀓𑁄𑀧𑀺 𑀳𑀼𑀢𑁆𑀯𑀸 𑀆𑀳𑀸𑀭𑁄 𑀉𑀧𑀢𑁆𑀣𑀫𑁆𑀪𑀓𑁄 𑀳𑁄𑀢𑀺, 𑀅𑀦𑀼𑀧𑀢𑁆𑀣𑀫𑁆𑀪𑀓𑁄 𑀧𑀦 𑀳𑀼𑀢𑁆𑀯𑀸 𑀚𑀦𑀓𑁄 𑀦 𑀳𑁄𑀢𑀺𑀬𑁂𑀯, 𑀢𑀲𑁆𑀫𑀸𑀲𑁆𑀲 𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑀁 𑀧𑀥𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺 𑀚𑀦𑀓𑀢𑁆𑀢𑀫𑁆𑀧𑀺 𑀆𑀳𑀸𑀭𑀸𑀦𑀁 𑀉𑀧𑀢𑁆𑀣𑀫𑁆𑀪𑀦𑀯𑀲𑁂𑀦𑁂𑀯 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀚𑀦𑀬𑀫𑀸𑀦𑁄𑀧𑀺 𑀳𑀻’’𑀢𑀺𑀆𑀤𑀺𑀫𑀸𑀳. 𑀅𑀯𑀺𑀘𑁆𑀙𑁂𑀤𑀯𑀲𑁂𑀦𑀸𑀢𑀺 𑀲𑀦𑁆𑀢𑀢𑀺𑀬𑀸 𑀖𑀝𑁆𑀝𑀦𑀯𑀲𑁂𑀦.

𑀬𑀤𑀺 𑀅𑀥𑀺𑀧𑀢𑀺𑀬𑀝𑁆𑀞𑁄 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀢𑀸, 𑀏𑀯𑀁 𑀲𑀦𑁆𑀢𑁂 𑀅𑀥𑀺𑀧𑀢𑀺𑀧𑀘𑁆𑀘𑀬𑀢𑁄 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀲𑁆𑀲 𑀓𑀺𑀁 𑀦𑀸𑀦𑀸𑀓𑀭𑀡𑀦𑁆𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀢𑀁 𑀢𑁂𑀲𑀁 𑀦𑀸𑀦𑀸𑀓𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀅𑀥𑀺𑀧𑀢𑀺𑀧𑀘𑁆𑀘𑀬𑀥𑀫𑁆𑀫𑀸𑀦𑀁 𑀯𑀺𑀬𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀯𑀢𑁆𑀢𑀺𑀦𑀺𑀯𑀸𑀭𑀓𑁂𑀢𑀺 𑀅𑀢𑁆𑀢𑀦𑁄 𑀅𑀥𑀺𑀧𑀢𑀺𑀧𑀘𑁆𑀘𑀬𑀧𑀯𑀢𑁆𑀢𑀺𑀬𑀸 𑀦𑀺𑀯𑀸𑀭𑀓𑁂 𑀅𑀜𑁆𑀜𑁂 𑀅𑀥𑀺𑀧𑀢𑀺𑀧𑀘𑁆𑀘𑀬𑀥𑀫𑁆𑀫𑁂. 𑀅𑀪𑀺𑀪𑀯𑀺𑀢𑁆𑀯𑀸 𑀧𑀯𑀢𑁆𑀢𑀦𑁂𑀦𑀸𑀢𑀺 𑀧𑀼𑀭𑀺𑀫𑀸𑀪𑀺𑀲𑀗𑁆𑀔𑀸𑀭𑀲𑀺𑀤𑁆𑀥𑁂𑀦 𑀥𑁄𑀭𑁂𑀬𑁆𑀬𑀪𑀸𑀯𑁂𑀦 𑀅𑀪𑀺𑀪𑀼𑀬𑁆𑀬 𑀧𑀯𑀢𑁆𑀢𑀺𑀬𑀸. 𑀕𑀭𑀼𑀪𑀸𑀯𑁄𑀢𑀺 𑀚𑁂𑀝𑁆𑀞𑀓𑀪𑀸𑀯𑁄. 𑀅𑀬𑀜𑁆𑀳𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑁂𑀦 𑀚𑁂𑀝𑁆𑀞𑀓𑀪𑀸𑀯𑁂𑀦 𑀙𑀦𑁆𑀤𑀸𑀤𑀬𑁄 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀯𑀺𑀩𑀦𑁆𑀥𑀓𑁂 𑀢𑀼𑀮𑁆𑀬𑀬𑁄𑀕𑀻𑀥𑀫𑁆𑀫𑁂 𑀢𑀤𑀜𑁆𑀜𑀥𑀫𑁆𑀫𑁂 𑀯𑀺𑀬 𑀅𑀪𑀺𑀪𑀼𑀬𑁆𑀬 𑀧𑀯𑀢𑁆𑀢𑀦𑁆𑀢𑀺, 𑀦 𑀲𑁄 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀢𑀸𑀬 𑀅𑀥𑀺𑀧𑀢𑀺𑀬𑀝𑁆𑀞𑁄𑀢𑀺 𑀅𑀥𑀺𑀧𑁆𑀧𑁂𑀢𑁄𑀢𑀺. 𑀅𑀣 𑀓𑁄 𑀘𑀭𑀳𑀻𑀢𑀺 𑀆𑀳 ‘‘𑀅𑀣 𑀔𑁄’’𑀢𑀺𑀆𑀤𑀺. 𑀤𑀲𑁆𑀲𑀦𑀸𑀤𑀺𑀓𑀺𑀘𑁆𑀘𑁂𑀲𑀼 𑀦𑀺𑀫𑀺𑀢𑁆𑀢𑀪𑀽𑀢𑁂𑀲𑀼 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀳𑀺 𑀘𑀓𑁆𑀔𑀸𑀤𑀻𑀳𑀺 𑀧𑀘𑁆𑀘𑀬𑁂𑀳𑀺 𑀘𑀓𑁆𑀔𑀸𑀤𑀻𑀦𑀁 𑀅𑀦𑀼𑀯𑀢𑁆𑀢𑀦𑀻𑀬𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀚𑀻𑀯𑀦𑁂 𑀅𑀦𑀼𑀧𑀸𑀮𑀦𑁂 𑀚𑀻𑀯𑀦𑁆𑀢𑁂𑀳𑀺 𑀲𑀳𑀚𑀸𑀢𑀥𑀫𑁆𑀫𑁂𑀳𑀺 𑀚𑀻𑀯𑀺𑀢𑀲𑁆𑀲, 𑀲𑀼𑀔𑀺𑀢𑀸𑀤𑀻𑀳𑀺 𑀲𑀼𑀔𑀺𑀢𑀤𑀼𑀓𑁆𑀔𑀺𑀢𑀲𑁄𑀫𑀦𑀲𑁆𑀲𑀺𑀢𑀤𑁄𑀫𑀦𑀲𑁆𑀲𑀺𑀢𑀼𑀧𑁂𑀓𑁆𑀔𑀺𑀢𑁂𑀳𑀺 𑀲𑀳𑀚𑀸𑀢𑀥𑀫𑁆𑀫𑁂𑀳𑀺 𑀲𑀼𑀔𑀸𑀤𑀻𑀦𑀁 𑀅𑀦𑀼𑀯𑀢𑁆𑀢𑀦𑀻𑀬𑀢𑀸𑀢𑀺 𑀬𑁄𑀚𑀦𑀸. 𑀢𑀁𑀢𑀁𑀓𑀺𑀘𑁆𑀘𑁂𑀲𑀽𑀢𑀺 𑀯𑀼𑀢𑁆𑀢𑀫𑁂𑀯 𑀤𑀲𑁆𑀲𑀦𑀸𑀤𑀺𑀓𑀺𑀘𑁆𑀘𑀁 𑀧𑀘𑁆𑀘𑀸𑀫𑀲𑀢𑀺. 𑀘𑀓𑁆𑀔𑀸𑀤𑀬𑁄 𑀧𑀘𑁆𑀘𑀬𑀸 𑀏𑀢𑁂𑀲𑀦𑁆𑀢𑀺 𑀘𑀓𑁆𑀔𑀸𑀤𑀺𑀧𑀘𑁆𑀘𑀬𑀸, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀬𑁄. 𑀢𑁂𑀳𑀺 𑀘𑀓𑁆𑀔𑀸𑀤𑀺𑀧𑀘𑁆𑀘𑀬𑁂𑀳𑀺. 𑀘𑀓𑁆𑀔𑀸𑀤𑀻𑀦𑀦𑁆𑀢𑀺 𑀘𑀓𑁆𑀔𑀸𑀤𑀺𑀚𑀻𑀯𑀺𑀢𑀲𑀼𑀔𑀸𑀤𑀺𑀲𑀤𑁆𑀥𑀸𑀤𑀻𑀦𑀁.

𑀢𑁂𑀲𑀼 𑀓𑀺𑀘𑁆𑀘𑁂𑀲𑀽𑀢𑀺 𑀤𑀲𑁆𑀲𑀦𑀸𑀤𑀺𑀓𑀺𑀘𑁆𑀘𑁂𑀲𑀼. 𑀘𑀓𑁆𑀔𑀸𑀤𑀻𑀦𑀁 𑀇𑀲𑁆𑀲𑀭𑀺𑀬𑀁 𑀅𑀥𑀺𑀧𑀢𑀺𑀬𑀝𑁆𑀞𑁄, 𑀲𑀸 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀢𑀸𑀢𑀺 𑀅𑀢𑁆𑀣𑁄. 𑀢𑀧𑁆𑀧𑀘𑁆𑀘𑀬𑀸𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀢𑀤𑀦𑀼𑀯𑀢𑁆𑀢𑀦𑁂𑀦 𑀢𑁂𑀲𑀁 𑀘𑀓𑁆𑀔𑀸𑀤𑀻𑀦𑀁 𑀅𑀦𑀼𑀯𑀢𑁆𑀢𑀦𑁂𑀦. 𑀢𑀢𑁆𑀣 𑀤𑀲𑁆𑀲𑀦𑀸𑀤𑀺𑀓𑀺𑀘𑁆𑀘𑁂. 𑀧𑀯𑀢𑁆𑀢𑀻𑀢𑀺 𑀘 𑀇𑀤𑀁 𑀢𑀲𑁆𑀲 𑀅𑀥𑀺𑀧𑀢𑀺𑀬𑀝𑁆𑀞𑀲𑁆𑀲 𑀧𑀸𑀓𑀝𑀓𑀭𑀡𑀁. 𑀅𑀦𑀼𑀯𑀢𑁆𑀢𑀓𑁂𑀦 𑀳𑀺 𑀅𑀦𑀼𑀯𑀢𑁆𑀢𑀦𑀻𑀬𑁄 𑀅𑀥𑀺𑀧𑀢𑀺𑀬𑀝𑁆𑀞𑁄 𑀧𑀸𑀓𑀝𑁄 𑀳𑁄𑀢𑀺. 𑀬𑀣𑀸 𑀘𑀓𑁆𑀔𑀸𑀤𑀻𑀦𑀁 𑀓𑀺𑀘𑁆𑀘𑀯𑀲𑁂𑀦 𑀅𑀥𑀺𑀧𑀢𑀺𑀬𑀝𑁆𑀞𑁄, 𑀦 𑀏𑀯𑀁 𑀪𑀸𑀯𑀤𑁆𑀯𑀬𑀲𑁆𑀲. 𑀢𑀲𑁆𑀲 𑀧𑀦 𑀢𑀸𑀤𑀺𑀲𑁂𑀦 𑀓𑀸𑀭𑀡𑀢𑀸𑀫𑀢𑁆𑀢𑁂𑀦𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀢𑁆𑀣𑀺𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸𑀦𑀁 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀧𑀘𑁆𑀘𑀬𑁂𑀳𑀻𑀢𑀺 𑀓𑀫𑁆𑀫𑀸𑀤𑀺𑀧𑀘𑁆𑀘𑀬𑁂𑀳𑀺. 𑀢𑀢𑁄𑀢𑀺 𑀇𑀢𑁆𑀣𑀸𑀤𑀺𑀕𑁆𑀕𑀳𑀡𑀧𑀘𑁆𑀘𑀬𑀪𑀸𑀯𑀢𑁄. 𑀢𑀁𑀲𑀳𑀺𑀢𑀲𑀦𑁆𑀢𑀸𑀦𑁂𑀢𑀺 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀸𑀤𑀺𑀲𑀳𑀺𑀢𑀲𑀦𑁆𑀢𑀸𑀦𑁂. ‘‘𑀲𑀼𑀔𑀺𑀦𑁆𑀤𑁆𑀭𑀺𑀬𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀸𑀦𑀺𑀧𑀺 𑀘𑀓𑁆𑀔𑀸𑀤𑀺𑀕𑁆𑀕𑀳𑀡𑁂𑀦 𑀕𑀳𑀺𑀢𑀸𑀦𑀻’’𑀢𑀺 𑀇𑀤𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀧𑀘𑁆𑀙𑀸𑀚𑀸𑀢𑀸𑀤𑀻𑀳𑀺 𑀧𑀦 𑀢𑀸𑀦𑀺 𑀭𑀽𑀧𑀥𑀫𑁆𑀫𑀸𑀦𑀫𑁆𑀧𑀺 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺𑀬𑁂𑀯.

𑀮𑀓𑁆𑀔𑀡𑀸𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀪𑀽𑀢𑀸𑀦𑀦𑁆𑀢𑀺 𑀅𑀦𑀺𑀘𑁆𑀘𑀢𑀸𑀤𑀺𑀮𑀓𑁆𑀔𑀡𑀲𑁆𑀲 𑀧𑀣𑀯𑀻𑀓𑀲𑀺𑀡𑀸𑀤𑀺𑀆𑀭𑀫𑁆𑀫𑀡𑀲𑁆𑀲 𑀘 𑀉𑀧𑀦𑀺𑀚𑁆𑀛𑀸𑀦𑀯𑀲𑁂𑀦 𑀧𑀯𑀢𑁆𑀢𑀸𑀦𑀁. 𑀯𑀺𑀢𑀓𑁆𑀓𑀸𑀤𑀻𑀦𑀦𑁆𑀢𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀯𑁂𑀤𑀦𑀸𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀦𑀁. 𑀉𑀧𑀕𑀦𑁆𑀢𑁆𑀯𑀸 𑀦𑀺𑀚𑁆𑀛𑀸𑀦𑀦𑁆𑀢𑀺 𑀉𑀧𑀦𑀺𑀓𑀘𑁆𑀘 𑀦𑀺𑀚𑁆𑀛𑀸𑀦𑀚𑁆𑀛𑀸𑀦𑀸𑀭𑀫𑁆𑀫𑀡𑀲𑁆𑀲 𑀛𑀸𑀦𑀘𑀓𑁆𑀔𑀼𑀦𑀸 𑀩𑁆𑀬𑀢𑁆𑀢𑀢𑀭𑀁 𑀑𑀮𑁄𑀓𑀦𑀁 𑀅𑀢𑁆𑀣𑀢𑁄 𑀘𑀺𑀦𑁆𑀢𑀦𑀫𑁂𑀯 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀧𑁂𑀓𑁆𑀔𑀦𑀁 𑀘𑀺𑀦𑁆𑀢𑀦𑀜𑁆𑀘𑀸’’𑀢𑀺. 𑀢𑁂𑀦𑁂𑀯𑀸𑀳 ‘‘𑀯𑀺𑀢𑀓𑁆𑀓𑀦𑀸𑀤𑀺𑀯𑀲𑁂𑀦𑀸’’𑀢𑀺. 𑀯𑀺𑀢𑀓𑁆𑀓𑀸𑀤𑀻𑀦𑀁𑀬𑁂𑀯 𑀲𑀸𑀥𑀸𑀭𑀡𑁄, 𑀬𑁂𑀦 𑀢𑁂𑀬𑁂𑀯 ‘‘𑀛𑀸𑀦𑀗𑁆𑀕𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑀼𑀔𑀤𑀼𑀓𑁆𑀔𑀯𑁂𑀤𑀦𑀸𑀤𑁆𑀯𑀬𑀦𑁆𑀢𑀺 𑀲𑀸𑀫𑀜𑁆𑀜𑀯𑀘𑀦𑀫𑁆𑀧𑀺 𑀉𑀧𑀦𑀺𑀚𑁆𑀛𑀸𑀬𑀦𑀝𑁆𑀞𑀲𑁆𑀲 𑀅𑀥𑀺𑀓𑀢𑀢𑁆𑀢𑀸 𑀅𑀦𑀼𑀧𑀦𑀺𑀚𑁆𑀛𑀸𑀦𑀲𑀪𑀸𑀯𑀫𑁂𑀯 𑀢𑀁 𑀩𑁄𑀥𑁂𑀢𑀻𑀢𑀺 𑀆𑀳 ‘‘𑀲𑀼𑀔𑀺𑀦𑁆𑀤𑁆𑀭𑀺𑀬𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀤𑁆𑀯𑀬’’𑀦𑁆𑀢𑀺. 𑀢𑀜𑁆𑀳𑀺 𑀇𑀥𑀸𑀥𑀺𑀧𑁆𑀧𑁂𑀢𑀩𑁆𑀩𑀁, 𑀦 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀥𑀺𑀧𑁆𑀧𑀸𑀬𑁄’’𑀢𑀺. 𑀅𑀛𑀸𑀦𑀗𑁆𑀕𑀸 𑀉𑀧𑁂𑀓𑁆𑀔𑀸𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀳𑀕𑀢𑀸 𑀤𑀝𑁆𑀞𑀩𑁆𑀩𑀸 𑀯𑀺𑀢𑀓𑁆𑀓𑀧𑀘𑁆𑀙𑀺𑀫𑀓𑀢𑁆𑀢𑀸 𑀛𑀸𑀦𑀗𑁆𑀕𑀸𑀦𑀁. 𑀬𑀤𑀺 𑀏𑀯𑀦𑁆𑀢𑀺 𑀛𑀸𑀦𑀗𑁆𑀕𑀯𑀘𑀦𑁂𑀦𑁂𑀯 𑀅𑀛𑀸𑀦𑀗𑁆𑀕𑀸𑀦𑀁 𑀦𑀺𑀯𑀢𑁆𑀢𑀦𑀁 𑀓𑀢𑀁, 𑀏𑀯𑀁 𑀲𑀦𑁆𑀢𑁂. 𑀏𑀓𑀦𑁆𑀢𑁂𑀦 𑀦 𑀉𑀧𑁂𑀓𑁆𑀔𑀸𑀬 𑀯𑀺𑀬 𑀅𑀦𑁂𑀓𑀦𑁆𑀢𑁂𑀦. 𑀅𑀦𑁂𑀓𑀦𑁆𑀢𑀺𑀓𑀜𑁆𑀳𑀺 𑀉𑀧𑁂𑀓𑁆𑀔𑀸𑀬 𑀅𑀛𑀸𑀦𑀗𑁆𑀕𑀢𑁆𑀢𑀁. 𑀬𑀤𑀺 𑀏𑀓𑀦𑁆𑀢𑁂𑀦 𑀅𑀛𑀸𑀦𑀗𑁆𑀕𑀁 𑀲𑀼𑀔𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁, 𑀅𑀣 𑀓𑀣𑀁 𑀧𑀲𑀗𑁆𑀕𑁄𑀢𑀺 𑀆𑀳 ‘‘𑀛𑀸𑀦𑀗𑁆𑀕𑀝𑁆𑀞𑀸𑀦𑁂 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸’’𑀢𑀺. 𑀅𑀣 𑀯𑀸 𑀬𑀤𑀺 𑀏𑀓𑀦𑁆𑀢𑁂𑀦 𑀅𑀛𑀸𑀦𑀗𑁆𑀕𑀢𑀁 𑀯𑁂𑀤𑀦𑀸𑀤𑁆𑀯𑀬𑀁, 𑀓𑀣𑀁 𑀛𑀸𑀦𑀗𑁆𑀕𑀯𑁄𑀳𑀸𑀭𑁄𑀢𑀺 𑀆𑀳 ‘‘𑀛𑀸𑀦𑀗𑁆𑀕𑀝𑁆𑀞𑀸𑀦𑁂 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸’’𑀢𑀺. 𑀲𑀢𑀺𑀧𑀺…𑀧𑁂… 𑀤𑀲𑁆𑀲𑀦𑀢𑁆𑀣𑀁 ‘‘𑀞𑀧𑁂𑀢𑁆𑀯𑀸 𑀲𑀼𑀔𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀤𑁆𑀯𑀬’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸. 𑀬𑀤𑀺 𑀏𑀯𑀁 𑀬𑀣𑀸𑀯𑀼𑀢𑁆𑀢𑀯𑁂𑀤𑀦𑀸𑀤𑁆𑀯𑀬𑁂𑀦 𑀲𑀤𑁆𑀥𑀺𑀁 𑀢𑀸𑀤𑀺𑀲𑀸 𑀉𑀧𑁂𑀓𑁆𑀔𑀸𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀓𑀲𑁆𑀫𑀸 𑀦 𑀞𑀧𑀺𑀢𑀸𑀢𑀺 𑀆𑀳 ‘‘𑀉𑀧𑁂𑀓𑁆𑀔𑀸…𑀧𑁂… 𑀅𑀢𑁆𑀣𑀻’’𑀢𑀺, 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀳𑀕𑀢𑀸𑀦𑀁 𑀛𑀸𑀦𑀧𑀘𑁆𑀘𑀬𑀪𑀸𑀯𑁄 𑀧𑀦 𑀦𑀢𑁆𑀣𑀺, 𑀦 𑀇𑀢𑀭𑁂𑀲𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀕𑀳𑀡𑀁 𑀓𑀢𑀁 𑀉𑀧𑁂𑀓𑁆𑀔𑀸𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀦𑀦𑁆𑀢𑀺 𑀆𑀦𑁂𑀢𑁆𑀯𑀸 𑀬𑁄𑀚𑀦𑀸.

𑀬𑀢𑁄 𑀢𑀢𑁄 𑀯𑀸𑀢𑀺 𑀤𑀼𑀕𑁆𑀕𑀢𑀺𑀢𑁄 𑀯𑀸 𑀲𑀼𑀕𑀢𑀺𑀢𑁄 𑀯𑀸 𑀲𑀁𑀓𑀺𑀮𑁂𑀲𑀢𑁄 𑀯𑀸 𑀯𑁄𑀤𑀸𑀦𑀢𑁄 𑀯𑀸 𑀦𑀺𑀬𑁆𑀬𑀸𑀦𑀝𑁆𑀞𑁄, 𑀲𑁆𑀯𑀸𑀬𑀁 𑀬𑀣𑀸𑀓𑁆𑀓𑀫𑀁 𑀲𑀫𑁆𑀫𑀸 𑀫𑀺𑀘𑁆𑀙𑀸 𑀯𑀸 𑀳𑁄𑀢𑀻𑀢𑀺 𑀆𑀳 ‘‘𑀲𑀫𑁆𑀫𑀸 𑀯𑀸 𑀫𑀺𑀘𑁆𑀙𑀸 𑀯𑀸𑀢𑀺 𑀅𑀢𑁆𑀣𑁄’’𑀢𑀺. 𑀅𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀏𑀢𑁆𑀣 𑀅𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀏𑀯 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀏𑀯𑀫𑀯𑀥𑀸𑀭𑀡𑀁 𑀕𑀳𑁂𑀢𑀩𑁆𑀩𑀁, 𑀦 𑀅𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀦 𑀮𑀩𑁆𑀪𑀦𑁆𑀢𑀺 𑀏𑀯𑀸𑀢𑀺. 𑀢𑀲𑁆𑀫𑀸 𑀧𑀼𑀭𑀺𑀫𑀲𑁆𑀫𑀺𑀜𑁆𑀳𑀺 𑀅𑀯𑀥𑀸𑀭𑀡𑁂 𑀅𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀅𑀮𑀸𑀪𑁄 𑀦𑀺𑀬𑀢𑁄𑀢𑀺 𑀲𑁄 𑀧𑀢𑀺𑀬𑁄𑀕𑀻𑀲𑀼 𑀦𑀺𑀯𑀢𑁆𑀢𑀺𑀢𑁄 𑀳𑁄𑀢𑀺. 𑀢𑁂𑀦𑀸𑀳 ‘‘𑀲𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀅𑀮𑀸𑀪𑀸𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢’’𑀦𑁆𑀢𑀺. 𑀤𑀼𑀢𑀺𑀬𑁂 𑀧𑀦 𑀅𑀳𑁂𑀢𑀼𑀓𑀘𑀺𑀢𑁆𑀢𑀸𑀦𑀺 𑀅𑀮𑀸𑀪𑁂 𑀦𑀺𑀬𑀢𑀸𑀦𑀻𑀢𑀺 𑀢𑁂𑀲𑀼 𑀅𑀦𑀯𑀲𑁂𑀲𑀢𑁄 𑀅𑀮𑀸𑀪𑁂𑀦 𑀪𑀯𑀺𑀢𑀩𑁆𑀩𑀁. 𑀢𑀣𑀸 𑀲𑀢𑀺 𑀬𑁄 𑀓𑁂𑀲𑀼𑀘𑀺 𑀅𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀛𑀸𑀦𑀧𑀘𑁆𑀘𑀬𑁄 𑀮𑀩𑁆𑀪𑀢𑀺, 𑀲𑁄𑀧𑀺 𑀦𑀺𑀯𑀸𑀭𑀺𑀢𑁄 𑀲𑀺𑀬𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀦 𑀅𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀽’’𑀢𑀺𑀆𑀤𑀺. 𑀢𑀢𑁆𑀣 𑀮𑀸𑀪𑀸𑀪𑀸𑀯𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀮𑀸𑀪𑀸𑀪𑀸𑀯𑀲𑁆𑀲𑁂𑀯 𑀤𑀲𑁆𑀲𑀦𑀢𑁆𑀣𑀁 𑀦 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦 𑀏𑀓𑀘𑁆𑀘𑀸𑀮𑀸𑀪𑁄 𑀅𑀧𑀝𑀺𑀓𑁆𑀔𑀺𑀢𑁆𑀢𑁄 𑀳𑁄𑀢𑀺. 𑀢𑁂𑀦𑁂𑀯𑀸𑀳 ‘‘𑀓𑀢𑁆𑀣𑀘𑀺 𑀓𑀲𑁆𑀲𑀘𑀺 𑀮𑀸𑀪𑁄 𑀦 𑀦𑀺𑀯𑀸𑀭𑀺𑀢𑁄’’𑀢𑀺. 𑀏𑀯𑀁 𑀅𑀢𑁆𑀣𑁂 𑀕𑀬𑁆𑀳𑀫𑀸𑀦𑁂𑀢𑀺 𑀏𑀯𑀁 𑀯𑀼𑀢𑁆𑀢𑀦𑀬𑁂𑀦 𑀧𑀞𑀫𑀧𑀤𑀸𑀯𑀥𑀸𑀭𑀡𑀯𑀲𑁂𑀦 𑀅𑀢𑁆𑀣𑁂 𑀯𑀺𑀜𑁆𑀜𑀸𑀬𑀫𑀸𑀦𑁂. 𑀏𑀢𑁆𑀢𑀓𑀫𑁂𑀯 𑀯𑀺𑀜𑁆𑀜𑀸𑀬𑁂𑀬𑁆𑀬𑀸𑀢𑀺 𑀅𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀓𑁂𑀲𑀼𑀘𑀺 𑀘𑀺𑀢𑁆𑀢𑁂𑀲𑀼 𑀛𑀸𑀦𑀫𑀕𑁆𑀕𑀧𑀘𑁆𑀘𑀬𑁂𑀲𑀼 𑀓𑀲𑁆𑀲𑀘𑀺 𑀧𑀘𑁆𑀘𑀬𑀲𑁆𑀲 𑀮𑀸𑀪𑁄 𑀦 𑀦𑀺𑀯𑀸𑀭𑀺𑀢𑁄𑀢𑀺 𑀏𑀢𑁆𑀢𑀓𑀫𑁂𑀯 𑀯𑀺𑀜𑁆𑀜𑀸𑀬𑁂𑀬𑁆𑀬 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀢𑁆𑀢𑀸. 𑀓𑀺𑀁 𑀧𑀦𑁂𑀢𑁆𑀣 𑀉𑀧𑀭𑀺 𑀓𑀸𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀦 𑀲𑀯𑀺𑀢𑀓𑁆𑀓…𑀧𑁂… 𑀓𑀢’’𑀦𑁆𑀢𑀺. 𑀬𑀤𑀺𑀧𑀺 𑀦 𑀓𑀢𑀁, 𑀅𑀢𑁆𑀣𑀢𑁄 𑀧𑀦 𑀢𑀁 𑀓𑀢𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀯𑀸 𑀮𑀸𑀪𑀸𑀪𑀸𑀯𑀤𑀲𑁆𑀲𑀦𑀢𑁆𑀣𑁂𑀢𑀺𑀆𑀤𑀺 𑀧𑀘𑁆𑀙𑀺𑀫𑀧𑀤𑀸𑀯𑀥𑀸𑀭𑀡𑀯𑀲𑁂𑀦 𑀅𑀢𑁆𑀣𑀤𑀲𑁆𑀲𑀦𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀅𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀦 𑀮𑀩𑁆𑀪𑀦𑁆𑀢𑀺 𑀏𑀯𑀸𑀢𑀺 𑀏𑀯𑀁 𑀦𑀺𑀬𑀫𑁂 𑀓𑀭𑀺𑀬𑀫𑀸𑀦𑁂 𑀬𑀣𑀸𑀯𑀼𑀢𑁆𑀢𑁄 𑀅𑀢𑁆𑀣𑁄 𑀲𑀫𑁆𑀪𑀯𑀢𑀺, 𑀢𑀲𑁆𑀫𑀸. 𑀅𑀬𑀜𑁆𑀘 𑀅𑀢𑁆𑀣𑁄 𑀧𑀸𑀞𑀦𑁆𑀢𑀭𑁂𑀦𑀧𑀺 𑀲𑀁𑀲𑀦𑁆𑀤𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑁂𑀦 𑀅𑀮𑀸𑀪𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀁 𑀅𑀮𑀸𑀪𑀦𑁆𑀢𑀺 𑀢𑀁 𑀥𑀫𑁆𑀫𑀲𑀗𑁆𑀕𑀡𑀺𑀬𑀁 𑀧𑀓𑀸𑀲𑀺𑀢𑀁 𑀅𑀮𑀸𑀪𑀁. 𑀏𑀲𑀸𑀢𑀺 𑀏𑀲 𑀇𑀥 𑀧𑀝𑁆𑀞𑀸𑀦𑀯𑀡𑁆𑀡𑀦𑀸𑀬𑀁 ‘‘𑀅𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀦 𑀮𑀩𑁆𑀪𑀦𑁆𑀢𑀻’’𑀢𑀺 𑀅𑀮𑀸𑀪𑁄 𑀯𑀼𑀢𑁆𑀢𑁄. 𑀓𑀻𑀤𑀺𑀲𑁄 𑀧𑀦 𑀅𑀮𑀸𑀪𑁄𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸 𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀳𑁂𑀢𑀼𑀓𑁂𑀲𑀽𑀢𑀺 𑀲𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼. 𑀲𑀗𑁆𑀓𑀟𑁆𑀠𑀺𑀢𑁆𑀯𑀸𑀢𑀺 𑀅𑀯𑀺𑀲𑀝𑁂 𑀓𑀢𑁆𑀯𑀸. 𑀏𑀓𑀢𑁆𑀢𑀕𑀢𑀪𑀸𑀯𑀓𑀭𑀡𑀦𑁆𑀢𑀺 𑀏𑀓𑀪𑀸𑀯𑀸𑀧𑀸𑀤𑀦𑀁. 𑀇𑀫𑀲𑁆𑀫𑀺𑀁 𑀧𑀦 𑀧𑀓𑀭𑀡𑁂 𑀛𑀸𑀦𑀧𑀘𑁆𑀘𑀬𑁄 𑀯𑀼𑀢𑁆𑀢𑁄𑀯 𑀬𑀣𑀸𑀮𑀸𑀪𑀧𑀘𑁆𑀘𑀬𑀸𑀓𑀸𑀭𑀯𑀺𑀪𑀸𑀯𑀦𑁂 𑀤𑁂𑀲𑀦𑀸𑀬 𑀢𑀧𑁆𑀧𑀭𑀪𑀸𑀯𑀢𑁄.

𑀲𑀫𑀦𑁆𑀢𑀺 𑀅𑀯𑀺𑀲𑀫𑀁, 𑀲𑀫𑁆𑀫𑀸, 𑀲𑀳 𑀯𑀸. 𑀧𑀓𑀸𑀭𑁂𑀳𑀻𑀢𑀺 𑀏𑀓𑀯𑀢𑁆𑀣𑀼𑀓𑀢𑀸𑀤𑀺𑀧𑁆𑀧𑀓𑀸𑀭𑁂𑀳𑀺. 𑀬𑀼𑀢𑁆𑀢𑀢𑀸𑀬𑀸𑀢𑀺 𑀲𑀁𑀲𑀝𑁆𑀞𑀢𑀸𑀬. 𑀲𑀸 𑀧𑀦 𑀲𑀁𑀲𑀝𑁆𑀞𑀢𑀸 𑀬𑀲𑁆𑀫𑀸 𑀲𑀪𑀸𑀯𑀢𑁄 𑀅𑀦𑁂𑀓𑁂𑀲𑀫𑁆𑀧𑀺 𑀲𑀢𑀁 𑀏𑀓𑀢𑁆𑀢𑀕𑀫𑀦𑀁 𑀯𑀺𑀬 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀏𑀓𑀻𑀪𑀸𑀯𑁄𑀧𑀕𑀫𑀦𑁂𑀦 𑀯𑀺𑀬 𑀉𑀧𑀓𑀸𑀭𑀓𑀢𑀸’’𑀢𑀺. 𑀏𑀯𑀁 𑀉𑀧𑀓𑀸𑀭𑀓𑀢𑀸 𑀘 𑀢𑁂𑀲𑀁 𑀩𑀳𑀽𑀦𑀁 𑀲𑀳𑀘𑁆𑀘 𑀏𑀓𑀢𑁆𑀢𑀓𑀸𑀭𑀺𑀢𑀸𑀬 𑀦𑀺𑀤𑀲𑁆𑀲𑁂𑀢𑀩𑁆𑀩𑀸.

𑀬𑀼𑀢𑁆𑀢𑀸𑀦𑀫𑁆𑀧𑀺 𑀲𑀢𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀲𑀁𑀲𑀝𑁆𑀞𑀢𑀸𑀬 𑀅𑀜𑁆𑀜𑀫𑀜𑁆𑀜𑀲𑀫𑁆𑀩𑀦𑁆𑀥𑀢𑀸𑀬 𑀬𑀼𑀢𑁆𑀢𑀸𑀦𑀫𑁆𑀧𑀺 𑀲𑀫𑀸𑀦𑀸𑀦𑀁. 𑀅𑀬𑀜𑁆𑀘 𑀬𑀼𑀢𑁆𑀢𑀢𑀸 𑀦 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀢𑀸𑀬 𑀯𑀺𑀬 𑀧𑀘𑁆𑀘𑀬𑀥𑀫𑁆𑀫𑁂𑀲𑀼 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑁂𑀲𑀼 𑀘 𑀯𑁂𑀤𑀺𑀢𑀩𑁆𑀩𑀸, 𑀓𑁂𑀯𑀮𑀁 𑀢𑀢𑁆𑀣 𑀅𑀭𑀽𑀧𑀲𑀪𑀸𑀯𑀢𑁆𑀢𑀸 𑀉𑀪𑀬𑀁 𑀲𑀫𑀥𑀼𑀭𑀁, 𑀇𑀥 𑀭𑀽𑀧𑀸𑀭𑀽𑀧𑀲𑀪𑀸𑀯𑀢𑁆𑀢𑀸 𑀯𑀺𑀥𑀼𑀭𑀦𑁆𑀢𑀺 𑀅𑀬𑀁 𑀯𑀺𑀲𑁂𑀲𑁄. 𑀯𑀺𑀧𑁆𑀧𑀬𑀼𑀢𑁆𑀢𑀪𑀸𑀯𑁂𑀦𑀸𑀢𑀺 𑀯𑀺𑀲𑀁𑀲𑀝𑁆𑀞𑀪𑀸𑀯𑁂𑀦. 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑀸𑀦𑀢𑁆𑀢𑀽𑀧𑀕𑀫𑁂𑀦𑀸’’𑀢𑀺. 𑀇𑀤𑀜𑁆𑀳𑁂𑀢𑁆𑀣 𑀯𑀺𑀧𑁆𑀧𑀬𑀼𑀢𑁆𑀢𑀢𑀸𑀬 𑀯𑀺𑀲𑁂𑀲𑀦𑀁 𑀬𑀸 𑀦𑀸𑀦𑀢𑁆𑀢𑀽𑀧𑀕𑀫𑀦𑀲𑀗𑁆𑀔𑀸𑀢𑀸 𑀯𑀺𑀧𑁆𑀧𑀬𑀼𑀢𑁆𑀢𑀢𑀸, 𑀦 𑀲𑀸 ‘‘𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀅𑀪𑀸𑀯𑀫𑀢𑁆𑀢𑀦𑁆𑀢𑀺, 𑀅𑀬𑀜𑁆𑀘 𑀉𑀧𑀓𑀸𑀭𑀓𑀢𑀸 𑀯𑀺𑀦𑀸 𑀲𑀁𑀲𑀕𑁆𑀕𑁂𑀦 𑀲𑀳𑀸𑀯𑀝𑁆𑀞𑀸𑀬𑀺𑀢𑀸𑀬 𑀓𑀺𑀘𑁆𑀘𑀓𑀸𑀭𑀺𑀢𑀸𑀤𑀻𑀳𑀺 𑀦𑀺𑀤𑀲𑁆𑀲𑁂𑀢𑀩𑁆𑀩𑀸. 𑀦 𑀳𑀻𑀢𑀺𑀆𑀤𑀺 ‘‘𑀬𑀼𑀢𑁆𑀢𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀲𑀫𑀢𑁆𑀣𑀦𑀁 ‘‘𑀢𑀸𑀤𑀺𑀲𑁂 𑀬𑁄𑀕𑁂 𑀲𑀢𑀺𑀬𑁂𑀯 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀢𑀸’’𑀢𑀺. 𑀢𑁂𑀦𑀸𑀳 ‘‘𑀦 𑀳𑀻’’𑀢𑀺𑀆𑀤𑀺. 𑀢𑀲𑁆𑀲𑀢𑁆𑀣𑁄 𑁋 𑀬𑀣𑀸 ‘‘𑀯𑀢𑁆𑀣𑀼 𑀔𑀦𑁆𑀥𑀸𑀦𑀁, 𑀲𑀳𑀚𑀸𑀢𑀸 𑀓𑀼𑀲𑀮𑀸 𑀔𑀦𑁆𑀥𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀭𑀽𑀧𑀸𑀦𑀁, 𑀧𑀘𑁆𑀙𑀸𑀚𑀸𑀢𑀸 𑀓𑀼𑀲𑀮𑀸 𑀔𑀦𑁆𑀥𑀸 𑀧𑀼𑀭𑁂𑀚𑀸𑀢𑀲𑁆𑀲 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺𑀯𑀘𑀦𑀢𑁄 (𑀧𑀝𑁆𑀞𑀸. 𑁧.𑁧.𑁪𑁩𑁪) 𑀯𑀢𑁆𑀣𑀼𑀲𑀳𑀚𑀸𑀢𑀧𑀘𑁆𑀙𑀸𑀚𑀸𑀢𑀯𑀲𑁂𑀦 𑀬𑀼𑀢𑁆𑀢𑀸𑀦𑀁 𑀅𑀢𑁆𑀣𑀺 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀢𑀸, 𑀦 𑀏𑀯𑀁 𑀅𑀬𑀼𑀢𑁆𑀢𑀸𑀦𑀁 𑀯𑀢𑁆𑀣𑀼𑀲𑀳𑀚𑀸𑀢…𑀧𑁂… 𑀅𑀢𑁆𑀣𑀻𑀢𑀺. 𑀬𑀤𑀺 𑀏𑀯𑀁 𑀭𑀽𑀧𑀸𑀦𑀁 𑀭𑀽𑀧𑁂𑀳𑀺 𑀓𑀲𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀦 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀭𑀽𑀧𑀸𑀦𑀁 𑀧𑀦𑀸’’𑀢𑀺𑀆𑀤𑀺. 𑀯𑀺𑀧𑁆𑀧𑀬𑁄𑀕𑁄𑀬𑁂𑀯 𑀦𑀢𑁆𑀣𑀺 𑀲𑀫𑁆𑀧𑀬𑁄𑀕𑀸𑀲𑀗𑁆𑀓𑀸𑀬 𑀅𑀪𑀸𑀯𑀢𑁄. 𑀲𑀫𑁆𑀧𑀬𑀼𑀚𑁆𑀚𑀫𑀸𑀦𑀸𑀦𑀜𑁆𑀳𑀺 𑀅𑀭𑀽𑀧𑀸𑀦𑀁 𑀭𑀽𑀧𑁂𑀳𑀺, 𑀭𑀽𑀧𑀸𑀦𑀜𑁆𑀘 𑀢𑁂𑀳𑀺 𑀲𑀺𑀬𑀸 𑀲𑀫𑁆𑀧𑀬𑁄𑀕𑀸𑀲𑀗𑁆𑀓𑀸, 𑀲𑀫𑁆𑀧𑀬𑁄𑀕𑀮𑀓𑁆𑀔𑀡𑀁 𑀧𑀦 𑀦𑀢𑁆𑀣𑀻𑀢𑀺 𑀢𑁂𑀲𑀁 𑀯𑀺𑀧𑁆𑀧𑀬𑁄𑀕𑁄 𑀯𑀼𑀢𑁆𑀢𑁄. 𑀢𑁂𑀦𑀸𑀳 ‘‘𑀘𑀢𑀽𑀳𑀺 𑀲𑀫𑁆𑀧𑀬𑁄𑀕𑁄 𑀘𑀢𑀽𑀳𑀺 𑀯𑀺𑀧𑁆𑀧𑀬𑁄𑀕𑁄’’𑀢𑀺.

𑀅𑀢𑁆𑀣𑀺 𑀫𑁂 𑀧𑀸𑀧𑀓𑀫𑁆𑀫𑀁 𑀓𑀢𑀦𑁆𑀢𑀺 𑀓𑀢𑀪𑀸𑀯𑀯𑀺𑀲𑀺𑀝𑁆𑀞𑀸 𑀅𑀢𑁆𑀣𑀺𑀢𑀸 𑀯𑀼𑀘𑁆𑀘𑀫𑀸𑀦𑀸 𑀓𑀺𑀭𑀺𑀬𑀸𑀬 𑀲𑀺𑀤𑁆𑀥𑀪𑀸𑀯𑀫𑁂𑀯 𑀤𑀻𑀧𑁂𑀢𑀺, 𑀦 𑀲𑀺𑀚𑁆𑀛𑀫𑀸𑀦𑀢𑀦𑁆𑀢𑀺 𑀆𑀳 ‘‘𑀦𑀺𑀩𑁆𑀩𑀢𑁆𑀢𑀢𑀸𑀮𑀓𑁆𑀔𑀡𑀁 𑀅𑀢𑁆𑀣𑀺𑀪𑀸𑀯’’𑀦𑁆𑀢𑀺. 𑀅𑀢𑁆𑀣𑀢𑁄 𑀧𑀦 𑀓𑀫𑁆𑀫𑀲𑁆𑀲 𑀅𑀦𑀺𑀩𑁆𑀩𑀢𑁆𑀢𑀨𑀮𑀢𑀸𑀬 𑀏𑀯𑀫𑁂𑀢𑁆𑀣 𑀅𑀢𑁆𑀣𑀺𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀢𑁆𑀣𑀺 𑀧𑀼𑀕𑁆𑀕𑀮𑁄𑀢𑀺 𑀧𑀦𑁂𑀢𑁆𑀣 𑀢𑀲𑁆𑀲𑀸 𑀧𑀜𑁆𑀜𑀢𑁆𑀢𑀺𑀬𑀸 𑀕𑀳𑁂𑀢𑀩𑁆𑀩𑀢𑀸, 𑀢𑀤𑀼𑀧𑀸𑀤𑀸𑀦𑀲𑁆𑀲 𑀯𑀸 𑀧𑀩𑀦𑁆𑀥𑀸𑀯𑀺𑀘𑁆𑀙𑁂𑀤𑁄 𑀮𑀩𑁆𑀪𑀢𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀉𑀧𑀮𑀩𑁆𑀪𑀫𑀸𑀦𑀢𑀸𑀮𑀓𑁆𑀔𑀡𑀁 𑀅𑀢𑁆𑀣𑀺𑀪𑀸𑀯’’𑀦𑁆𑀢𑀺. 𑀧𑀘𑁆𑀘𑀬𑀥𑀫𑁆𑀫𑀲𑁆𑀲 𑀬𑀤𑀺𑀧𑀺 𑀉𑀧𑁆𑀧𑀸𑀤𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀪𑀗𑁆𑀕𑀸 𑀮𑀩𑁆𑀪𑀫𑀸𑀦𑀢𑀸 𑀅𑀢𑁆𑀣𑀺𑀪𑀸𑀯𑁄, 𑀢𑀣𑀸𑀧𑀺 𑀢𑀲𑁆𑀲 𑀬𑀣𑀸 𑀉𑀧𑁆𑀧𑀸𑀤𑀓𑁆𑀔𑀡𑀢𑁄 𑀞𑀺𑀢𑀺𑀓𑁆𑀔𑀡𑁂 𑀲𑀸𑀢𑀺𑀲𑀬𑁄 𑀩𑁆𑀬𑀸𑀧𑀸𑀭𑁄, 𑀏𑀯𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀧𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀢𑀺𑀧𑀺 𑀚𑀦𑀓𑀢𑁆𑀢𑁂 𑀉𑀧𑀢𑁆𑀣𑀫𑁆𑀪𑀓𑀧𑁆𑀧𑀝𑁆𑀞𑀸𑀦𑀸 𑀅𑀢𑁆𑀣𑀺𑀪𑀸𑀯𑁂𑀦 𑀉𑀧𑀓𑀸𑀭𑀓𑀢𑀸’’𑀢𑀺. 𑀯𑀢𑁆𑀣𑀸𑀭𑀫𑁆𑀫𑀡𑀲𑀳𑀚𑀸𑀢𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀸𑀤𑀻𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀢𑁆𑀣𑀺𑀪𑀸𑀯𑁂𑀦𑁂𑀯 𑀦 𑀦𑀺𑀲𑁆𑀲𑀬𑀸𑀤𑀺𑀪𑀸𑀯𑁂𑀦𑀸𑀢𑀺 ‘‘𑀲𑀸𑀥𑀸𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀁 𑀉𑀧𑀓𑀸𑀭𑀓𑀢𑁆𑀢𑀁 𑀯𑀺𑀪𑀸𑀯𑁂𑀢𑀺.

𑀨𑀲𑁆𑀲𑀸𑀤𑀻𑀦𑀁 𑀅𑀦𑁂𑀓𑁂𑀲𑀁 𑀲𑀳𑀪𑀸𑀯𑁄 𑀦𑀢𑁆𑀣𑀻𑀢𑀺 𑀇𑀤𑀁 𑀦 𑀏𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑀭𑀺𑀬𑀸𑀧𑀦𑁆𑀦𑁂 𑀲𑀦𑁆𑀥𑀸𑀬, 𑀅𑀣 𑀔𑁄 𑀦𑀸𑀦𑀸𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑀭𑀺𑀬𑀸𑀧𑀦𑁆𑀦𑁂𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀓𑀲𑁆𑀫𑀺𑀁 𑀨𑀲𑁆𑀲𑀸𑀤𑀺𑀲𑀫𑀼𑀤𑀸𑀬𑁂 𑀲𑀢𑀺 𑀤𑀼𑀢𑀺𑀬𑁄 𑀦 𑀳𑁄𑀢𑀻’’𑀢𑀺 𑀆𑀳. 𑀲𑁆𑀯𑀸𑀬𑀫𑀢𑁆𑀣𑁄 ‘‘𑀲𑀳𑀪𑀸𑀯𑁄 𑀦𑀢𑁆𑀣𑀻’’𑀢𑀺 𑀲𑀳𑀪𑀸𑀯𑀧𑀝𑀺𑀓𑁆𑀔𑁂𑀧𑁂𑀦𑁂𑀯 𑀯𑀺𑀜𑁆𑀜𑀸𑀬𑀢𑀺. 𑀏𑀢𑁆𑀢𑀸𑀯𑀢𑀸 𑀧𑀦 𑀅𑀦𑀯𑀩𑀼𑀚𑁆𑀛𑀦𑁆𑀢𑀸𑀦𑀁 𑀯𑀲𑁂𑀦 𑀯𑀺𑀯𑀭𑀺𑀢𑁆𑀯𑀸 𑀯𑀼𑀢𑁆𑀢𑁄. 𑀢𑁂𑀦𑀸𑀢𑀺 𑀅𑀦𑁂𑀓𑁂𑀲𑀁 𑀨𑀲𑁆𑀲𑀸𑀤𑀻𑀦𑀁 𑀲𑀳𑀪𑀸𑀯𑀸𑀪𑀸𑀯𑁂𑀦. 𑀬𑀤𑀺 𑀦𑀢𑁆𑀣𑀺𑀢𑀸𑀫𑀢𑁆𑀢𑁂𑀦 𑀉𑀧𑀓𑀸𑀭𑀓𑀢𑀸 𑀦𑀢𑁆𑀣𑀺𑀧𑀘𑁆𑀘𑀬𑀢𑀸, 𑀅𑀦𑀸𑀦𑀦𑁆𑀢𑀭𑀸𑀢𑀻𑀢𑀯𑀲𑁂𑀦𑀧𑀺 𑀲𑀺𑀬𑀸𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀲𑀢𑀺𑀧𑀻’’𑀢𑀺𑀆𑀤𑀺. 𑀢𑀸𑀦𑀻𑀢𑀺 𑀧𑀼𑀭𑀺𑀫𑀢𑀭𑀘𑀺𑀢𑁆𑀢𑀸𑀦𑀺. 𑀤𑀤𑀫𑀸𑀦𑀁 𑀯𑀺𑀬𑀸𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀑𑀓𑀸𑀲𑀁 𑀤𑁂𑀢𑀺𑀬𑁂𑀯. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀧𑀯𑀢𑁆𑀢𑀺𑀑𑀓𑀸𑀲𑀤𑀸𑀦𑁂𑀦 𑀉𑀧𑀓𑀸𑀭𑀓𑀢𑀸’’𑀢𑀺? 𑀲𑀘𑁆𑀘𑀫𑁂𑀢𑀁, 𑀏𑀯𑀫𑀚𑁆𑀛𑀸𑀲𑀬𑀸 𑀯𑀺𑀬 𑀧𑀘𑁆𑀘𑀬𑀥𑀫𑁆𑀫𑀸 𑀅𑀪𑀸𑀯𑀁 𑀕𑀘𑁆𑀙𑀦𑁆𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀺𑀬-𑀲𑀤𑁆𑀤𑀕𑁆𑀕𑀳𑀡𑀁.

𑀦𑀢𑁆𑀣𑀺𑀢𑀸𑀯𑀺𑀕𑀫𑀸𑀦𑀁 𑀲𑀢𑀺𑀧𑀺 𑀧𑀘𑁆𑀘𑀬𑀲𑁆𑀲 𑀥𑀫𑁆𑀫𑀲𑁆𑀲 𑀅𑀦𑀼𑀧𑀮𑀤𑁆𑀥𑀺𑀢𑀸𑀲𑀸𑀫𑀜𑁆𑀜𑁂 𑀦𑀢𑁆𑀣𑀺𑀯𑀺𑀕𑀢𑀧𑀘𑁆𑀘𑀬𑁂𑀲𑀼 𑀮𑀩𑁆𑀪𑀫𑀸𑀦𑀁 𑀯𑀺𑀲𑁂𑀲𑀫𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀪𑀸𑀯𑀫𑀢𑁆𑀢𑁂𑀦𑀸𑀢𑀺 𑀳𑀼𑀢𑁆𑀯𑀸 𑀅𑀪𑀸𑀯𑀫𑀢𑁆𑀢𑁂𑀦. 𑀢𑁂𑀦𑁂𑀢𑁆𑀣 𑀦𑀺𑀭𑁄𑀥𑀸𑀦𑀦𑁆𑀢𑀭𑀁 𑀧𑀘𑁆𑀘𑀬𑀥𑀫𑁆𑀫𑀲𑁆𑀲 𑀉𑀧𑀓𑀸𑀭𑀓𑀢𑁆𑀢𑀁 𑀆𑀳, 𑀬𑀣𑀸 𑀢𑀁 ‘‘𑀑𑀓𑀸𑀲𑀤𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀪𑀸𑀯𑀯𑀺𑀕𑀫𑁂𑀦𑀸𑀢𑀺 𑀏𑀢𑁂𑀦 𑀦𑀺𑀭𑁄𑀥𑀢𑁄 𑀧𑀭𑀫𑁆𑀧𑀺 𑀬𑀢𑁄 ‘‘𑀯𑀺𑀕𑀢𑀢𑀸 𑀦𑀺𑀭𑁄𑀥𑀧𑁆𑀧𑀢𑁆𑀢𑀢𑀸’’𑀢𑀺 𑀯𑀼𑀢𑁆𑀢𑀁. 𑀧𑀘𑁆𑀘𑀬𑀥𑀫𑁆𑀫𑁂 𑀬𑀸𑀲𑀁 𑀦𑀢𑁆𑀣𑀺𑀢𑀸𑀯𑀺𑀕𑀢𑀢𑀸𑀦𑀁 𑀯𑀲𑁂𑀦 𑀦𑀢𑁆𑀣𑀺𑀯𑀺𑀕𑀢𑀧𑀘𑁆𑀘𑀬𑀸 𑀯𑀼𑀢𑁆𑀢𑀸, 𑀢𑀸𑀲𑀁 𑀯𑀺𑀲𑁂𑀲𑁂 𑀤𑀲𑁆𑀲𑀺𑀢𑁂 𑀦𑀢𑁆𑀣𑀺𑀯𑀺𑀕𑀢𑀧𑀘𑁆𑀘𑀬𑀸𑀦𑀁 𑀯𑀺𑀲𑁂𑀲𑁄 𑀤𑀲𑁆𑀲𑀺𑀢𑁄 𑀳𑁄𑀢𑀻𑀢𑀺 ‘‘𑀦𑀢𑁆𑀣𑀺𑀢𑀸 𑀘 𑀦𑀺𑀭𑁄𑀥𑀸𑀦𑀦𑁆𑀢𑀭𑀲𑀼𑀜𑁆𑀜𑀢𑀸 𑀯𑀺𑀕𑀢𑀢𑀸 𑀦𑀺𑀭𑁄𑀥𑀧𑁆𑀧𑀢𑁆𑀢𑀢𑀸’’𑀢𑀺 𑀯𑀼𑀢𑁆𑀢𑀁, 𑀢𑀢𑁆𑀣 𑀦𑀺𑀭𑁄𑀥𑀸𑀦𑀦𑁆𑀢𑀭𑀸 𑀦 𑀦𑀺𑀭𑁄𑀥𑀲𑀫𑀓𑀸𑀮𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀣𑀸𑀢𑀺 𑀇𑀫𑀺𑀦𑀸 𑀬𑀣𑀸 𑀧𑀘𑁆𑀘𑀬𑀥𑀫𑁆𑀫𑀸𑀯𑀺𑀲𑁂𑀲𑁂𑀧𑀺 𑀦𑀢𑁆𑀣𑀺𑀯𑀺𑀕𑀢𑀧𑀘𑁆𑀘𑀬𑀪𑀸𑀯𑀯𑀺𑀲𑁂𑀲𑁄 𑀦𑀺𑀤𑁆𑀥𑀸𑀭𑀺𑀢𑁄, 𑀢𑀣𑀸 𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑀪𑀸𑀯𑀯𑀺𑀲𑁂𑀲𑁄𑀢𑀺 𑀇𑀫𑀫𑀢𑁆𑀣𑀁 𑀉𑀧𑀲𑀁𑀳𑀭𑀢𑀺. 𑀬𑀣𑀸 𑀳𑀺 𑀦𑀺𑀭𑁄𑀥𑀸𑀦𑀦𑁆𑀢𑀭𑀦𑀺𑀭𑁄𑀥𑀧𑁆𑀧𑀢𑁆𑀢𑀻𑀳𑀺 𑀦𑀢𑁆𑀣𑀺𑀯𑀺𑀕𑀢𑀢𑀸𑀦𑀁 𑀪𑁂𑀤𑁄 𑀮𑀓𑁆𑀔𑀺𑀢𑁄, 𑀏𑀯𑀁 𑀧𑀘𑁆𑀘𑀬𑀥𑀫𑁆𑀫𑀲𑁆𑀲 𑀥𑀭𑀫𑀸𑀦𑀢𑀸𑀦𑀺𑀭𑁄𑀥𑀸𑀦𑀼𑀧𑀕𑀫𑁂𑀳𑀺 𑀅𑀢𑁆𑀣𑀺𑀅𑀯𑀺𑀕𑀢𑀢𑀸𑀦𑀦𑁆𑀢𑀺. 𑀓𑀣𑀁 𑀧𑀦𑀸𑀬𑀁 𑀥𑀫𑁆𑀫𑀸𑀯𑀺𑀲𑁂𑀲𑁂 𑀧𑀘𑁆𑀘𑀬𑀪𑀸𑀯𑀯𑀺𑀲𑁂𑀲𑁄 𑀤𑀼𑀯𑀺𑀜𑁆𑀜𑁂𑀬𑁆𑀬𑀭𑀽𑀧𑁂𑀦 𑀞𑀺𑀢𑁄 𑀲𑀫𑁆𑀫𑀸 𑀯𑀺𑀪𑀸𑀯𑀺𑀲𑁆𑀲𑀢𑀻𑀢𑀺 𑀆𑀳 ‘‘𑀥𑀫𑁆𑀫𑀸𑀦𑀜𑁆𑀳𑀻’’𑀢𑀺𑀆𑀤𑀺. 𑀢𑀤𑀪𑀺𑀲𑀫𑀬𑀸𑀬 𑀢𑁂𑀲𑀁 𑀧𑀘𑁆𑀘𑀬𑀯𑀺𑀲𑁂𑀲𑀸𑀦𑀁 𑀅𑀥𑀺𑀕𑀫𑀢𑁆𑀣𑀁.

𑀘𑀢𑀽𑀲𑀼 𑀔𑀦𑁆𑀥𑁂𑀲𑀼 𑀏𑀓𑀲𑁆𑀲𑀧𑀺 𑀅𑀲𑀗𑁆𑀕𑀳𑀺𑀢𑀢𑁆𑀢𑀸𑀪𑀸𑀯𑀢𑁄 𑀅𑀦𑀦𑁆𑀢𑀭𑀸𑀤𑀻𑀳𑀻𑀢𑀺 𑀯𑀺𑀪𑀢𑁆𑀢𑀺𑀁 𑀧𑀭𑀺𑀡𑀸𑀫𑁂𑀢𑁆𑀯𑀸 𑀬𑁄𑀚𑀦𑀸. 𑀅𑀜𑁆𑀜𑀦𑁆𑀢𑀺 𑀲𑀼𑀔𑀼𑀫𑀭𑀽𑀧𑀁. 𑀦 𑀳𑀺 𑀢𑀁 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀳𑁄𑀢𑀺. 𑀦𑀦𑀼 𑀘 𑀭𑀽𑀧𑀭𑀽𑀧𑀫𑁆𑀧𑀺 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀪𑀸𑀯𑁂𑀦 𑀓𑀼𑀲𑀮𑀢𑁆𑀢𑀺𑀓𑁂 𑀦𑀸𑀕𑀢𑀦𑁆𑀢𑀺 𑀆𑀳 ‘‘𑀭𑀽𑀧𑀭𑀽𑀧𑀁 𑀧𑀦𑀸’’𑀢𑀺𑀆𑀤𑀺. 𑀅𑀜𑁆𑀜𑀢𑁆𑀣 𑀆𑀕𑀢𑀫𑁂𑀯𑀸𑀢𑀺 𑀬𑀤𑀺𑀧𑀺 𑀓𑀼𑀲𑀮𑀢𑁆𑀢𑀺𑀓𑁂 𑀦𑀸𑀕𑀢𑀁, 𑀲𑀦𑀺𑀤𑀲𑁆𑀲𑀦𑀢𑁆𑀢𑀺𑀓𑀸𑀤𑀻𑀲𑀼 𑀧𑀦 𑀆𑀕𑀢𑀢𑁆𑀢𑀸 𑀦 𑀲𑀓𑁆𑀓𑀸 𑀭𑀽𑀧𑀭𑀽𑀧𑀲𑁆𑀲 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑀼𑀦𑁆𑀢𑀺 𑀅𑀢𑁆𑀣𑁄.

𑀧𑀘𑁆𑀘𑀬𑀼𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁄

𑁧. 𑀳𑁂𑀢𑀼𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧. 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑀪𑀸𑀯𑁄 𑀳𑁂𑀢𑀼𑀧𑀘𑁆𑀘𑀬𑁄𑀢𑀺 𑀉𑀤𑁆𑀤𑀺𑀝𑁆𑀞𑁄, 𑀦 𑀳𑁂𑀢𑀼𑀧𑀘𑁆𑀘𑀬𑀥𑀫𑁆𑀫𑁄𑀢𑀺 𑀅𑀢𑁆𑀣𑁄. 𑀲𑁄𑀢𑀺 𑀳𑁂𑀢𑀼𑀪𑀸𑀯𑁂𑀦 𑀧𑀘𑁆𑀘𑀬𑁄. 𑀏𑀢𑁆𑀣 𑀘 𑀧𑀞𑀫𑀯𑀺𑀓𑀧𑁆𑀧𑁂 𑀬𑁄 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑀪𑀸𑀯𑁄 𑀯𑀼𑀢𑁆𑀢𑁄, 𑀬𑁄 𑀘 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀳𑁂𑀢𑀼𑀪𑀸𑀯𑁂𑀦 𑀧𑀘𑁆𑀘𑀬𑁄 𑀯𑀼𑀢𑁆𑀢𑁄, 𑀲𑁄 𑀬𑀲𑁆𑀫𑀸 𑀅𑀢𑁆𑀣𑀢𑁄 𑀬𑀣𑀸𑀯𑀼𑀢𑁆𑀢𑀲𑁆𑀲 𑀧𑀘𑁆𑀘𑀬𑀥𑀫𑁆𑀫𑀲𑁆𑀲 𑀬𑀣𑀸𑀯𑀼𑀢𑁆𑀢𑀸𑀦𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑀪𑀸𑀯𑁄𑀬𑁂𑀯, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀉𑀪𑀬𑀣𑀸𑀧𑀺 𑀳𑁂𑀢𑀼𑀪𑀸𑀯𑁂𑀦 𑀉𑀧𑀓𑀸𑀭𑀓𑀢𑀸 𑀳𑁂𑀢𑀼𑀧𑀘𑁆𑀘𑀬𑁄𑀢𑀺 𑀉𑀤𑁆𑀤𑀺𑀝𑁆𑀞𑁄𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀻’’𑀢𑀺. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 ‘‘𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑀪𑀸𑀯𑁄, 𑀆𑀭𑀫𑁆𑀫𑀡𑀪𑀸𑀯𑁂𑀦 𑀯𑀸 𑀧𑀘𑁆𑀘𑀬𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑁄’’𑀢𑀺𑀆𑀤𑀺𑀦𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀸𑀤𑀻𑀲𑀼 𑀅𑀢𑁆𑀣𑁄 𑀦𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀲 𑀦𑀬𑁄 𑀲𑁂𑀲𑀧𑀘𑁆𑀘𑀬𑁂𑀲𑀼𑀧𑀻’’𑀢𑀺 𑀆𑀳. 𑀥𑀫𑁆𑀫𑀲𑀪𑀸𑀯𑁄 𑀏𑀯, 𑀦 𑀥𑀫𑁆𑀫𑀢𑁄 𑀅𑀜𑁆𑀜𑀸 𑀥𑀫𑁆𑀫𑀲𑀢𑁆𑀢𑀺 𑀦𑀸𑀫 𑀅𑀢𑁆𑀣𑀻𑀢𑀺. 𑀉𑀧𑀓𑀸𑀭𑀓𑀁 𑀥𑀫𑁆𑀫𑀦𑁆𑀢𑀺 𑀧𑀘𑁆𑀘𑀬𑀥𑀫𑁆𑀫𑀁 𑀆𑀳. 𑀉𑀧𑀓𑀸𑀭𑀓𑀢𑀦𑁆𑀢𑀺 𑀧𑀘𑁆𑀘𑀬𑀢𑀁.

𑀧𑀘𑁆𑀘𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀧𑀘𑁆𑀘𑀢𑁆𑀢𑀯𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑁄, 𑀧𑀞𑀫𑀸𑀬 𑀯𑀺𑀪𑀢𑁆𑀢𑀺𑀬𑀸 𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀢𑀺 𑀧𑀘𑁆𑀘𑀬𑀥𑀫𑁆𑀫𑀦𑀺𑀤𑁆𑀤𑁂𑀲𑀪𑀽𑀢𑁂𑀦 𑀧𑀘𑁆𑀘𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁂𑀦 𑀧𑀞𑀫𑁂𑀦 𑀳𑁂𑀢𑀼𑀲𑀤𑁆𑀤𑁂𑀦. 𑀏𑀢𑀲𑁆𑀲𑀸𑀢𑀺 𑀳𑁂𑀢𑀼𑀲𑀤𑁆𑀤𑀸𑀪𑀺𑀥𑁂𑀬𑁆𑀬𑀫𑀢𑁆𑀣𑀫𑀸𑀳. 𑀲𑁄 𑀳𑀺 𑀙𑀩𑁆𑀩𑀺𑀥𑁄 𑀦𑀯𑀯𑀺𑀥𑁄 𑀤𑁆𑀯𑀸𑀤𑀲𑀯𑀺𑀥𑁄𑀢𑀺 𑀅𑀦𑁂𑀓𑀪𑁂𑀤𑁂𑀦 𑀪𑀺𑀦𑁆𑀦𑁄𑀧𑀺 𑀳𑁂𑀢𑀼𑀪𑀸𑀯𑀲𑀸𑀫𑀜𑁆𑀜𑁂𑀦 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀏𑀓𑀯𑀘𑀦𑁂𑀦 𑀯𑀼𑀢𑁆𑀢𑁄. 𑀤𑀼𑀢𑀺𑀬𑁄 𑀳𑁂𑀢𑀼𑀲𑀤𑁆𑀤𑁄𑀢𑀺 𑀆𑀦𑁂𑀢𑁆𑀯𑀸 𑀬𑁄𑀚𑀦𑀸. 𑀳𑁂𑀢𑀼𑀦𑀸 𑀲𑀫𑁆𑀧𑀬𑀼𑀢𑁆𑀢𑀸𑀦𑀦𑁆𑀢𑀺 𑀅𑀥𑀺𑀓𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀳𑁂𑀢𑀼 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀧𑀘𑁆𑀘𑀬𑁄 𑀳𑁄𑀦𑁆𑀢𑁄 𑀳𑁂𑀢𑀼𑀦𑀸 𑀲𑀫𑁆𑀧𑀬𑀼𑀢𑁆𑀢𑀸𑀦𑀫𑁂𑀯 𑀧𑀘𑁆𑀘𑀬𑁄 𑀳𑁄𑀢𑀺, 𑀦 𑀯𑀺𑀧𑁆𑀧𑀬𑀼𑀢𑁆𑀢𑀸𑀦’’𑀦𑁆𑀢𑀺 𑀏𑀯𑀁 𑀧𑀤𑀫𑁂𑀢𑀁. 𑀦 𑀳𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀳𑁂𑀢𑀼𑀯𑀺𑀧𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁄 𑀦 𑀳𑁄𑀢𑀻𑀢𑀺. 𑀲𑀫𑁆𑀧𑀬𑀼𑀢𑁆𑀢𑀲𑀤𑁆𑀤𑀲𑁆𑀲 𑀲𑀫𑁆𑀩𑀦𑁆𑀥𑀻𑀲𑀤𑁆𑀤𑀢𑁆𑀢𑀸 ‘‘𑀲𑀫𑁆𑀧𑀬𑀼𑀢𑁆𑀢𑀲𑀤𑁆𑀤𑀲𑁆𑀲 𑀲𑀸𑀧𑁂𑀓𑁆𑀔𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀲𑀫𑁆𑀧𑀬𑀼𑀢𑁆𑀢𑁄𑀢𑀺 𑀳𑀺 𑀯𑀼𑀢𑁆𑀢𑁂 𑀓𑁂𑀦 𑀲𑀫𑁆𑀧𑀬𑀼𑀢𑁆𑀢𑁄𑀢𑀺 𑀏𑀓𑀦𑁆𑀢𑀢𑁄 𑀲𑀫𑁆𑀩𑀦𑁆𑀥𑀺𑀅𑀦𑁆𑀢𑀭𑀁 𑀅𑀧𑁂𑀓𑁆𑀔𑀺𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀅𑀜𑁆𑀜𑀲𑁆𑀲…𑀧𑁂… 𑀯𑀺𑀜𑁆𑀜𑀸𑀬𑀢𑀻’’𑀢𑀺. 𑀦𑀸𑀬𑀁 𑀏𑀓𑀦𑁆𑀢𑁄𑀢𑀺 𑀬𑁆𑀯𑀸𑀬𑀁 ‘‘𑀤𑀼𑀢𑀺𑀬𑁂 𑀳𑁂𑀢𑀼𑀲𑀤𑁆𑀤𑁂 𑀅𑀯𑀺𑀚𑁆𑀚𑀫𑀸𑀦𑁂’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁄 𑀅𑀢𑁆𑀣𑁄, 𑀅𑀬𑀫𑁂𑀓𑀦𑁆𑀢𑁄 𑀦 𑀳𑁄𑀢𑀺, 𑀅𑀜𑁆𑀜𑀸𑀧𑁂𑀓𑁆𑀔𑁄𑀧𑀺 𑀲𑀤𑁆𑀤𑁄 𑀅𑀜𑁆𑀜𑀲𑁆𑀲 𑀯𑀺𑀲𑁂𑀲𑀦𑀁 𑀳𑁄𑀢𑀻𑀢𑀺 𑀇𑀤𑀁 𑀦 𑀲𑀩𑁆𑀩𑀢𑁆𑀣𑁂𑀯 𑀲𑀫𑁆𑀪𑀯𑀢𑀻𑀢𑀺 𑀅𑀢𑁆𑀣𑁄. ‘‘𑀧𑀘𑁆𑀘𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄’’𑀢𑀺 𑀇𑀫𑀺𑀦𑀸 𑀧𑀞𑀫𑀲𑁆𑀲 𑀳𑁂𑀢𑀼𑀲𑀤𑁆𑀤𑀲𑁆𑀲 𑀲𑀫𑁆𑀧𑀬𑀼𑀢𑁆𑀢𑀲𑀤𑁆𑀤𑀸𑀦𑀧𑁂𑀓𑁆𑀔𑀢𑀁 𑀆𑀳. 𑀢𑁂𑀦 𑀯𑀼𑀢𑁆𑀢𑀁 ‘‘𑀳𑁂𑀳𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀏𑀢𑁆𑀣𑁂𑀯 𑀩𑁆𑀬𑀸𑀯𑀝𑁄’’𑀢𑀺. 𑀅𑀯𑀺𑀲𑀺𑀝𑁆𑀞𑀸𑀢𑀺 𑀦 𑀯𑀺𑀲𑁂𑀲𑀺𑀢𑀸. 𑀏𑀯𑀦𑁆𑀢𑀺 𑀬𑀣𑀸 𑀳𑁂𑀢𑀼𑀲𑀤𑁆𑀤𑁂𑀦 𑀅𑀜𑁆𑀜𑀢𑁆𑀣 𑀩𑁆𑀬𑀸𑀯𑀝𑁂𑀦 𑀲𑀫𑁆𑀧𑀬𑀼𑀢𑁆𑀢𑀸 𑀦 𑀯𑀺𑀲𑁂𑀲𑀺𑀬𑀦𑁆𑀢𑀺 𑀓𑀺𑀘𑁆𑀘𑀦𑁆𑀢𑀭𑀧𑀲𑀼𑀢𑀢𑁆𑀢𑀸, 𑀏𑀯𑀁 𑀲𑀫𑁆𑀧𑀬𑀼𑀢𑁆𑀢𑀲𑀤𑁆𑀤𑁂𑀦 𑀳𑁂𑀢𑀼𑀲𑀤𑁆𑀤𑀯𑀺𑀲𑁂𑀲𑀦𑀭𑀳𑀺𑀢𑁂𑀦 𑀢𑀤𑀢𑁆𑀣𑀫𑀢𑁆𑀢𑀩𑁆𑀬𑀸𑀯𑀝𑀢𑁆𑀢𑀸 𑀅𑀯𑀺𑀲𑁂𑀲𑀢𑁄 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀕𑀳𑀡𑀁 𑀲𑀺𑀬𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀫𑁆𑀧𑀬𑀼𑀢𑁆𑀢𑀲𑀤𑁆𑀤𑁂𑀦𑀸’’𑀢𑀺𑀆𑀤𑀺. 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀸𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀅𑀪𑀸𑀯𑀢𑁄𑀢𑀺 𑀆𑀳𑀸𑀭𑁂𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀘 𑀦𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀥𑀫𑁆𑀫𑀲𑁆𑀲 𑀅𑀪𑀸𑀯𑀢𑁄. 𑀦 𑀳𑀺 𑀨𑀲𑁆𑀲𑀘𑁂𑀢𑀦𑀸𑀯𑀺𑀜𑁆𑀜𑀸𑀡𑀯𑁂𑀤𑀦𑀸𑀚𑀻𑀯𑀺𑀢𑀯𑀺𑀭𑀳𑀺𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀅𑀢𑁆𑀣𑀺. 𑀢𑁂𑀦𑀸𑀳 ‘‘𑀯𑀚𑁆𑀚𑁂𑀢𑀩𑁆𑀩𑀸…𑀧𑁂… 𑀢𑀁 𑀦 𑀓𑀢’’𑀦𑁆𑀢𑀺. 𑀯𑀚𑁆𑀚𑁂𑀢𑀩𑁆𑀩𑀁 𑀳𑁂𑀢𑀼𑀯𑀺𑀧𑁆𑀧𑀬𑀼𑀢𑁆𑀢𑀁.

𑀏𑀯𑀫𑁆𑀧𑀻𑀢𑀺 𑀤𑀼𑀢𑀺𑀬𑁂𑀦 𑀳𑁂𑀢𑀼𑀲𑀤𑁆𑀤𑁂𑀦 𑀕𑀬𑁆𑀳𑀫𑀸𑀦𑁂𑀧𑀺 𑀦𑀸𑀧𑀚𑁆𑀚𑀢𑀺. 𑀬𑀤𑀺𑀧𑀺 𑀳𑁂𑀢𑀯𑁄 𑀩𑀳𑀯𑁄, 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁄 𑀘𑀸𑀬𑀁, 𑀢𑀣𑀸𑀧𑀺 𑀲𑀸𑀫𑀜𑁆𑀜𑀚𑁄𑀢𑀦𑀸𑀬 𑀯𑀺𑀲𑁂𑀲𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀘𑁆𑀘𑀢𑁆𑀢…𑀧𑁂… 𑀯𑀼𑀢𑁆𑀢𑀢𑁆𑀢𑀸’’𑀢𑀺. 𑀯𑀺𑀦𑀸𑀧𑀺 𑀤𑀼𑀢𑀺𑀬𑁂𑀦 𑀳𑁂𑀢𑀼𑀲𑀤𑁆𑀤𑁂𑀦 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀪𑀸𑀯𑁂 𑀲𑀺𑀤𑁆𑀥𑁂𑀧𑀻𑀢𑀺 𑀇𑀫𑀺𑀦𑀸 𑀬𑀁 𑀯𑀼𑀢𑁆𑀢𑀁 ‘‘𑀦𑀸𑀬𑀫𑁂𑀓𑀦𑁆𑀢𑁄’’𑀢𑀺, 𑀢𑀫𑁂𑀯 𑀉𑀮𑁆𑀮𑀺𑀗𑁆𑀕𑁂𑀢𑀺. 𑀦 𑀧𑀦 𑀳𑁂𑀢𑀽𑀦𑀦𑁆𑀢𑀺 𑀇𑀤𑀁 𑀳𑁂𑀢𑀼𑀲𑁆𑀲 𑀧𑀘𑁆𑀘𑀬𑀪𑀸𑀯𑁂𑀦 𑀕𑀳𑀺𑀢𑀢𑁆𑀢𑀸 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑁂𑀦 𑀕𑀳𑀡𑀁 𑀦 𑀬𑀼𑀚𑁆𑀚𑁂𑀬𑁆𑀬𑀸𑀢𑀺 𑀆𑀲𑀗𑁆𑀓𑀫𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 ‘‘𑀏𑀯𑀫𑁆𑀧𑀺 𑀕𑀳𑀡𑀁 𑀲𑀺𑀬𑀸’’𑀢𑀺. 𑀲𑁄𑀢𑀺 𑀤𑀼𑀢𑀺𑀬𑁄 𑀳𑁂𑀢𑀼𑀲𑀤𑁆𑀤𑁄. 𑀅𑀧𑀭𑁂 𑀧𑀦 ‘‘𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦’’𑀦𑁆𑀢𑀺 𑀏𑀢𑁆𑀣 𑀳𑁂𑀢𑀽𑀦𑀜𑁆𑀘 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘𑀸𑀢𑀺 𑀲𑀫𑀸𑀲𑀁 𑀯𑀺𑀓𑀧𑁆𑀧𑁂𑀦𑁆𑀢𑀺. 𑀧𑀢𑀺𑀝𑁆𑀞𑀸𑀫𑀢𑁆𑀢𑀸𑀤𑀺𑀪𑀸𑀯𑁂𑀦 𑀦𑀺𑀭𑀧𑁂𑀓𑁆𑀔𑀸𑀢𑀺 𑀳𑁂𑀢𑀼𑀛𑀸𑀦𑀫𑀕𑁆𑀕𑀥𑀫𑁆𑀫𑀸 𑀧𑀢𑀺𑀝𑁆𑀞𑀸𑀦𑀉𑀧𑀦𑀺𑀚𑁆𑀛𑀸𑀦𑀦𑀺𑀬𑁆𑀬𑀸𑀦𑀫𑀢𑁆𑀢𑁂𑀦 𑀅𑀜𑁆𑀜𑀥𑀫𑁆𑀫𑀦𑀺𑀭𑀧𑁂𑀓𑁆𑀔𑀸 𑀳𑁂𑀢𑀼𑀛𑀸𑀦𑀫𑀕𑁆𑀕𑀧𑀘𑁆𑀘𑀬𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀺. 𑀲𑀸𑀧𑁂𑀓𑁆𑀔𑀸 𑀏𑀯𑀸𑀢𑀺 𑀅𑀜𑁆𑀜𑀲𑀸𑀧𑁂𑀓𑁆𑀔𑀸 𑀏𑀯. 𑀆𑀳𑀭𑀺𑀢𑀩𑁆𑀩𑀇𑀲𑀺𑀢𑀩𑁆𑀩𑀸 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂𑀳𑀺 𑀉𑀧𑀓𑀢𑁆𑀢𑀩𑁆𑀩𑀥𑀫𑁆𑀫𑀸. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀬𑁂𑀳𑀺 𑀲𑀸𑀧𑁂𑀓𑁆𑀔𑀸, 𑀢𑁂 𑀅𑀢𑁆𑀢𑀦𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑁂 𑀧𑀘𑁆𑀘𑀬𑀪𑀸𑀯𑁂𑀦𑁂𑀯 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺, 𑀢𑀲𑁆𑀫𑀸. 𑀢𑁂𑀦𑀸𑀳 ‘‘𑀢𑁂 𑀯𑀺𑀦𑀸𑀧𑀺…𑀧𑁂… 𑀦 𑀓𑀢’’𑀦𑁆𑀢𑀺. 𑀧𑀭𑀺𑀘𑁆𑀙𑀺𑀦𑁆𑀤𑀦𑁆𑀢𑀺 𑀯𑀺𑀲𑁂𑀲𑁂𑀦𑁆𑀢𑀺. 𑀢𑀦𑁆𑀢𑀺 𑀤𑀼𑀢𑀺𑀬𑀁 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀕𑁆𑀕𑀳𑀡𑀁. 𑀢𑀢𑁆𑀣𑀸𑀢𑀺 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂. 𑀦 𑀓𑁂𑀯𑀮𑀜𑁆𑀘 𑀢𑀢𑁆𑀣𑁂𑀯, 𑀇𑀥 𑀘 𑀳𑁂𑀢𑀼𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 𑀤𑀼𑀢𑀺𑀬𑁂𑀦 𑀳𑁂𑀢𑀼𑀕𑁆𑀕𑀳𑀡𑁂𑀦 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀧𑀼𑀦 𑀯𑀺𑀲𑁂𑀲𑀦𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀓𑀲𑁆𑀫𑀸? 𑀧𑀘𑁆𑀘𑀬𑀪𑀽𑀢𑁂𑀦𑁂𑀯 𑀳𑁂𑀢𑀼𑀦𑀸 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀅𑀜𑁆𑀜𑁂𑀲𑀜𑁆𑀘 𑀳𑁂𑀢𑀽𑀦𑀁 𑀅𑀯𑀺𑀘𑁆𑀙𑀺𑀦𑁆𑀦𑀢𑁆𑀢𑀸.

𑀧𑀼𑀭𑀺𑀫𑀯𑀘𑀦𑀸𑀧𑁂𑀓𑁆𑀔𑁄 𑀯𑀼𑀢𑁆𑀢𑀲𑁆𑀲𑁂𑀯 𑀦𑀺𑀤𑁆𑀤𑁂𑀲𑁄𑀢𑀺 𑀢𑀁-𑀲𑀤𑁆𑀤𑀲𑁆𑀲 𑀧𑀝𑀺𑀦𑀺𑀤𑁆𑀤𑁂𑀲𑀪𑀸𑀯𑀫𑀸𑀳. 𑀧𑀸𑀓𑀝𑀻𑀪𑀽𑀢𑁂 𑀏𑀯 𑀅𑀢𑁆𑀣𑁂 𑀧𑀯𑀢𑁆𑀢𑀢𑀺, 𑀧𑀸𑀓𑀝𑀻𑀪𑀸𑀯𑁄 𑀘 𑀅𑀜𑁆𑀜𑀸𑀦𑀧𑁂𑀓𑁆𑀔𑁂𑀦 𑀲𑀤𑁆𑀤𑁂𑀦 𑀧𑀓𑀸𑀲𑀺𑀢𑀢𑁆𑀢𑀸 𑀯𑁂𑀤𑀺𑀢𑀩𑁆𑀩𑁄. 𑀅𑀦𑀧𑁂𑀓𑁆𑀔𑀦𑀻𑀬𑁄 𑀅𑀢𑁆𑀣𑀦𑁆𑀢𑀭𑀩𑁆𑀬𑀸𑀯𑀝𑀢𑁆𑀢𑀸. 𑀅𑀜𑁆𑀜𑁄𑀢𑀺 𑀳𑁂𑀢𑀼𑀲𑀤𑁆𑀤𑀢𑁄 𑀅𑀜𑁆𑀜𑁄. 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀧𑀓𑀸𑀲𑀓𑁄 𑀯𑀼𑀢𑁆𑀢𑁄 𑀦𑀢𑁆𑀣𑀺, 𑀬𑁄 𑀢𑀁-𑀲𑀤𑁆𑀤𑁂𑀦 𑀧𑀝𑀺𑀦𑀺𑀤𑁆𑀤𑁂𑀲𑀁 𑀮𑀪𑁂𑀬𑁆𑀬.

𑀬𑀤𑀺 𑀏𑀯𑀁 ‘‘𑀢𑀁𑀲𑀫𑀼𑀝𑁆𑀞𑀸𑀦𑀸𑀦’’𑀦𑁆𑀢𑀺 𑀏𑀢𑁆𑀣 𑀓𑀣𑀦𑁆𑀢𑀺 𑀆𑀳 ‘‘𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀦𑁆𑀢𑀺 𑀇𑀫𑀺𑀦𑀸 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀧𑀦-𑀲𑀤𑁆𑀤𑁄 𑀲𑀢𑀺𑀧𑀺 𑀳𑁂𑀢𑀽 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀦𑀺𑀤𑁆𑀤𑁂𑀲𑀪𑀸𑀯𑁂 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀲𑀤𑁆𑀤𑁂 𑀮𑀩𑁆𑀪𑀫𑀸𑀦𑀸𑀦𑀁 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸𑀦𑀁 𑀧𑀸𑀓𑀝𑀻𑀓𑀭𑀡𑀲𑀗𑁆𑀔𑀸𑀢𑀁 𑀳𑁂𑀢𑀼𑀲𑀤𑁆𑀤𑀢𑁄 𑀯𑀺𑀲𑁂𑀲𑀁 𑀚𑁄𑀢𑁂𑀢𑀺. ‘‘𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦’’𑀦𑁆𑀢𑀺 𑀇𑀫𑀲𑁆𑀲 𑀲𑀫𑀸𑀲𑀧𑀤𑀲𑁆𑀲 𑀉𑀢𑁆𑀢𑀭𑀧𑀤𑀢𑁆𑀣𑀧𑁆𑀧𑀥𑀸𑀦𑀢𑁆𑀢𑀫𑀸𑀳 ‘‘𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀯𑀘𑀦𑁂𑀦𑀸’’𑀢𑀺. 𑀢𑁂𑀦 𑀘 𑀬𑀣𑀸𑀥𑀺𑀧𑁆𑀧𑁂𑀢𑀲𑁆𑀲 𑀅𑀢𑁆𑀣𑀲𑁆𑀲 𑀏𑀓𑀤𑁂𑀲𑁄𑀯 𑀯𑀼𑀘𑁆𑀘𑀢𑀺 𑀥𑀫𑁆𑀫𑀸𑀦𑀁 𑀯𑀺𑀲𑁂𑀲𑀦𑀪𑀸𑀯𑀢𑁄𑀢𑀺 𑀆𑀳 ‘‘𑀅𑀲𑀫𑀢𑁆𑀢𑁂𑀦𑀸’’𑀢𑀺. 𑀯𑀺𑀲𑁂𑀲𑀦𑀁 𑀦𑀸𑀫 𑀯𑀺𑀲𑁂𑀲𑀺𑀢𑀩𑁆𑀩𑀸𑀧𑁂𑀓𑁆𑀔𑀦𑁆𑀢𑀺 𑀆𑀳 ‘‘𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀯𑀘𑀦𑀦𑁆𑀢𑀭𑀸𑀧𑁂𑀓𑁆𑀔𑁂𑀦𑀸’’𑀢𑀺. 𑀯𑀼𑀢𑁆𑀢𑀢𑀸𑀬 𑀯𑀺𑀦𑀸 𑀧𑀝𑀺𑀦𑀺𑀤𑁆𑀤𑁂𑀲𑀢𑀸 𑀦𑀢𑁆𑀣𑀻𑀢𑀺 ‘‘𑀧𑀼𑀩𑁆𑀩𑁂 𑀯𑀼𑀢𑁆𑀢𑁂𑀦𑀸’’𑀢𑀺 𑀯𑀼𑀢𑁆𑀢𑀁.

𑀢𑀁-𑀲𑀤𑁆𑀤𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀦𑁆𑀢𑀺 ‘‘𑀢𑀁𑀲𑀫𑀼𑀝𑁆𑀞𑀸𑀦𑀸𑀦’’𑀦𑁆𑀢𑀺 𑀏𑀢𑁆𑀣 𑀢𑀁-𑀲𑀤𑁆𑀤𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀲𑀤𑁆𑀤𑁂 𑀧𑀸𑀓𑀝𑀻𑀪𑀽𑀢𑀁 𑀓𑀺𑀁 𑀧𑀦𑀸𑀢𑀺 𑀧𑀼𑀘𑁆𑀙𑀢𑀺. 𑀢𑁂 𑀳𑁂𑀢𑀽 𑀘𑁂𑀯…𑀧𑁂… 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸 𑀘 𑀢𑀁-𑀲𑀤𑁆𑀤𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀲𑀤𑁆𑀤𑁂 𑀧𑀸𑀓𑀝𑀻𑀪𑀽𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀜𑁆𑀜𑀣𑀸𑀢𑀺 ‘‘𑀬𑁂𑀳𑀺 𑀳𑁂𑀢𑀽𑀳𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀢𑁄 𑀅𑀜𑁆𑀜𑀣𑀸 𑀅𑀜𑁆𑀜𑁂𑀦 𑀧𑀓𑀸𑀭𑁂𑀦. 𑀢𑀁 𑀅𑀜𑁆𑀜𑀁 𑀧𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑁂 𑀳𑁂𑀢𑀽…𑀧𑁂… 𑀲𑀫𑁆𑀩𑀦𑁆𑀥𑁂 𑀲𑀢𑀻’’𑀢𑀺 𑀆𑀳. 𑀇𑀥𑀸𑀢𑀺 𑀅𑀦𑀦𑁆𑀢𑀭𑀁 𑀯𑀼𑀢𑁆𑀢𑀲𑀫𑁆𑀩𑀦𑁆𑀥𑀦𑀁 𑀪𑀼𑀫𑁆𑀫𑀦𑀺𑀤𑁆𑀤𑁂𑀲𑁂𑀦 𑀧𑀭𑀸𑀫𑀲𑀢𑀺. 𑀢𑁂𑀦𑁂𑀯𑀸𑀢𑀺 𑀧𑀞𑀫𑁂𑀦𑁂𑀯 𑀳𑁂𑀢𑀼𑀲𑀤𑁆𑀤𑁂𑀦. 𑀢𑀁-𑀲𑀤𑁆𑀤𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸𑀢𑀺 ‘‘𑀢𑀁𑀲𑀫𑀼𑀝𑁆𑀞𑀸𑀦𑀸𑀦’’𑀦𑁆𑀢𑀺 𑀏𑀢𑁆𑀣 𑀢𑀁-𑀲𑀤𑁆𑀤𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸 𑀬𑀣𑀸 𑀧𑀸𑀓𑀝𑀸, 𑀏𑀯𑀁 𑀧𑀼𑀩𑁆𑀩𑁂 ‘‘𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀘𑁄𑀤𑀦𑀸𑀬𑀫𑁆𑀧𑀺 𑀏𑀯𑀫𑁂𑀯 𑀢𑁂𑀦𑁂𑀯 𑀢𑀁-𑀲𑀤𑁆𑀤𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸 𑀧𑀸𑀓𑀝𑀸 𑀪𑀯𑀺𑀢𑀼𑀁 𑀅𑀭𑀳𑀦𑁆𑀢𑀺. 𑀢𑀣𑀸 𑀘 𑀲𑀢𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀲𑁆𑀲…𑀧𑁂… 𑀦 𑀬𑀼𑀚𑁆𑀚𑁂𑀬𑁆𑀬. 𑀤𑀼𑀯𑀺𑀥𑀫𑁆𑀧𑀺 𑀯𑀸 𑀳𑁂𑀢𑀼𑀕𑁆𑀕𑀳𑀡𑀁 𑀅𑀧𑀦𑁂𑀢𑁆𑀯𑀸𑀢𑀺 ‘‘𑀳𑁂𑀢𑀽 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦’’𑀦𑁆𑀢𑀺 𑀏𑀢𑁆𑀣 𑀓𑀢𑀁 𑀤𑁆𑀯𑀺𑀧𑁆𑀧𑀓𑀸𑀭𑀳𑁂𑀢𑀼𑀕𑁆𑀕𑀳𑀡𑀁 𑀅𑀯𑀺𑀘𑀸𑀭𑁂𑀢𑁆𑀯𑀸 ‘‘𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀦𑁆𑀢𑀺 𑀅𑀯𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀢𑀁-𑀲𑀤𑁆𑀤𑀯𑀘𑀦𑀻𑀬𑀢𑀁 𑀘𑁄𑀤𑁂𑀢𑀺, ‘‘𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀲𑁆𑀲 𑀅𑀧𑀸𑀓𑀝𑀢𑁆𑀢𑀸’’𑀢𑀺𑀆𑀤𑀺𑀦𑀸 𑀧𑀭𑀺𑀳𑀭𑀢𑀺 𑀘. 𑀳𑁂𑀢𑀽 𑀳𑀺 𑀧𑀘𑁆𑀘𑀬𑀸𑀢𑀺 𑀇𑀤𑀁 𑀅𑀬𑀁 𑀳𑁂𑀢𑀼𑀧𑀘𑁆𑀘𑀬𑀓𑀣𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁.

𑀢𑀁 𑀦 𑀯𑀼𑀢𑁆𑀢𑀦𑁆𑀢𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀯𑀘𑀦𑀁 𑀦 𑀯𑀼𑀢𑁆𑀢𑀁. 𑀢𑀲𑁆𑀲𑀸𑀢𑀺 𑀲𑀳𑀚𑀸𑀢𑀧𑀘𑁆𑀘𑀬𑀲𑁆𑀲. 𑀓𑀝𑀢𑁆𑀢𑀸𑀭𑀽𑀧𑀲𑁆𑀲 𑀧𑀘𑁆𑀘𑀬𑀪𑀸𑀯𑁄 𑀦 𑀯𑀼𑀢𑁆𑀢𑁄 𑀪𑀯𑁂𑀬𑁆𑀬, 𑀯𑀼𑀢𑁆𑀢𑁄𑀯 𑀲𑁄 ‘‘𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑁄 𑀏𑀓𑁄 𑀔𑀦𑁆𑀥𑁄 𑀢𑀺𑀡𑁆𑀡𑀦𑁆𑀦𑀁 𑀔𑀦𑁆𑀥𑀸𑀦𑀁 𑀓𑀝𑀢𑁆𑀢𑀸 𑀘 𑀭𑀽𑀧𑀸𑀦𑀁 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀢𑀬𑁄 𑀔𑀦𑁆𑀥𑀸 𑀏𑀓𑀲𑁆𑀲 𑀔𑀦𑁆𑀥𑀲𑁆𑀲 𑀓𑀝𑀢𑁆𑀢𑀸 𑀘 𑀭𑀽𑀧𑀸𑀦’’𑀦𑁆𑀢𑀺𑀆𑀤𑀺𑀦𑀸, 𑀢𑀲𑁆𑀫𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀓𑀝𑀢𑁆𑀢𑀸𑀭𑀽𑀧𑀧𑀘𑁆𑀘𑀬𑀪𑀸𑀯𑁄 𑀦 𑀲𑀓𑁆𑀓𑀸 𑀦𑀺𑀯𑀸𑀭𑁂𑀢𑀼𑀁. 𑀢𑀢𑁆𑀣𑀸𑀢𑀺 𑀲𑀳𑀚𑀸𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂. 𑀢𑀢𑁆𑀣 𑀳𑀺 ‘‘𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀭𑀽𑀧𑀸𑀦𑀁 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀺 𑀏𑀯 𑀦𑀺𑀤𑁆𑀤𑀺𑀝𑁆𑀞𑀸𑀦𑀺. 𑀇𑀥𑀸𑀧𑀻𑀢𑀺 𑀇𑀫𑀲𑁆𑀫𑀺𑀁 𑀳𑁂𑀢𑀼𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂𑀧𑀺. 𑀏𑀯𑀁 𑀪𑀯𑀺𑀢𑀩𑁆𑀩𑀦𑁆𑀢𑀺 ‘‘𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦’’𑀦𑁆𑀢𑀺 𑀦𑀺𑀤𑁆𑀤𑁂𑀲𑁂𑀦 𑀪𑀯𑀺𑀢𑀩𑁆𑀩𑀁. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀢𑀣𑀸 𑀦 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀦𑁆𑀢𑀺 𑀧𑀦𑀸’’𑀢𑀺𑀆𑀤𑀺. 𑀯𑀺𑀲𑁂𑀲𑀺𑀢𑀁 𑀳𑁄𑀢𑀺 𑀲𑀩𑁆𑀩𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀲𑀫𑀼𑀝𑁆𑀞𑀸𑀦𑀪𑀸𑀯𑁂𑀦. 𑀯𑀘𑀦𑁂𑀦𑀸𑀢𑀺 𑀬𑀣𑀸𑀤𑀲𑁆𑀲𑀺𑀢𑁂𑀦 𑀲𑀳𑀚𑀸𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀘𑀦𑁂𑀦. 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀧𑀘𑁆𑀘𑀬𑀪𑀸𑀯𑁄 𑀏𑀯 𑀳𑀺 𑀢𑀢𑁆𑀣 𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑁄, 𑀦 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀲𑀫𑀼𑀝𑁆𑀞𑀸𑀦𑀪𑀸𑀯𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀳𑁂𑀢𑀼𑀆𑀤𑀺𑀧𑀝𑀺𑀩𑀤𑁆𑀥𑀢𑀜𑁆𑀘 𑀤𑀲𑁆𑀲𑁂𑀢𑀺 𑀬𑀤𑀕𑁆𑀕𑁂𑀦 𑀢𑀸𑀦𑀺 𑀘𑀺𑀢𑁆𑀢𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀻𑀦𑀺, 𑀢𑀤𑀕𑁆𑀕𑁂𑀦 𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀻𑀦𑀺𑀧𑀺 𑀳𑁄𑀦𑁆𑀢𑀻𑀢𑀺. 𑀆𑀭𑀫𑁆𑀫𑀡𑀫𑁂𑀢𑀁 𑀳𑁄𑀢𑀻𑀢𑀺 𑀬𑀤𑁂𑀢𑀁 𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸𑀯𑀲𑁂𑀦 𑀫𑀦𑁄𑀤𑁆𑀯𑀸𑀭𑁂 𑀘𑁂𑀢𑀦𑀁 𑀲𑁂𑀲𑀤𑁆𑀯𑀸𑀭𑁂𑀲𑀼 𑀓𑀸𑀬𑀯𑀘𑀻𑀧𑀬𑁄𑀕𑀯𑀲𑁂𑀦 𑀲𑀗𑁆𑀓𑀧𑁆𑀧𑀦𑀁, 𑀬𑀜𑁆𑀘 𑀓𑀸𑀫𑀭𑀸𑀕𑀸𑀤𑀻𑀦𑀁 𑀲𑀦𑁆𑀢𑀸𑀦𑁂 𑀅𑀦𑀼𑀲𑀬𑀦𑀁, 𑀏𑀢𑀁 𑀆𑀭𑀫𑁆𑀫𑀡𑀁 𑀏𑀲𑁄 𑀧𑀘𑁆𑀘𑀬𑁄 𑀓𑀫𑁆𑀫𑀯𑀺𑀜𑁆𑀜𑀸𑀡𑀲𑁆𑀲 𑀞𑀺𑀢𑀺𑀬𑀸 𑀧𑀢𑀺𑀝𑁆𑀞𑀸𑀦𑀸𑀬. 𑀧𑀢𑀺𑀝𑁆𑀞𑀺𑀢𑁂𑀢𑀺 𑀓𑀫𑁆𑀫𑀁 𑀚𑀯𑀸𑀧𑁂𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀆𑀓𑀟𑁆𑀠𑀦𑀲𑀫𑀢𑁆𑀣𑀢𑀸𑀧𑀢𑀺𑀝𑁆𑀞𑀸𑀧𑀢𑁆𑀢𑁂 𑀓𑀫𑁆𑀫𑀯𑀺𑀜𑁆𑀜𑀸𑀡𑁂 𑀯𑀺𑀭𑀼𑀴𑁆𑀳𑁂𑀢𑀺 𑀢𑀢𑁄 𑀏𑀯 𑀓𑀫𑁆𑀫𑀯𑀺𑀜𑁆𑀜𑀸𑀡𑀢𑁄 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀩𑀻𑀚𑁂 𑀯𑀺𑀭𑀼𑀴𑁆𑀳𑁂 𑀯𑀺𑀭𑀼𑀳𑀦𑁆𑀢𑁂𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀧𑀢𑀺𑀝𑁆𑀞𑀸 𑀯𑀺𑀜𑁆𑀜𑀸𑀡𑀲𑁆𑀲 𑀳𑁄𑀢𑀻𑀢𑀺 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀲𑀗𑁆𑀔𑀸𑀢𑁂 𑀓𑀫𑁆𑀫𑀯𑀺𑀜𑁆𑀜𑀸𑀡𑀲𑁆𑀲 𑀞𑀺𑀢𑀺𑀬𑀸 𑀧𑀯𑀢𑁆𑀢𑀺𑀬𑀸 𑀆𑀭𑀫𑁆𑀫𑀡𑁂 𑀧𑀘𑁆𑀘𑀬𑁂 𑀧𑀝𑀺𑀲𑀺𑀤𑁆𑀥𑁂 𑀆𑀬𑀢𑀺𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑁆𑀲 𑀧𑀢𑀺𑀝𑁆𑀞𑀸 𑀳𑁄𑀢𑀺, 𑀢𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑁂 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀯𑀲𑁂𑀦 𑀧𑀢𑀺𑀝𑁆𑀞𑀺𑀢𑁂 𑀧𑀢𑀺𑀝𑁆𑀞𑀳𑀦𑁆𑀢𑁂 𑀯𑀺𑀭𑀼𑀴𑁆𑀳𑁂 𑀩𑀻𑀚𑀪𑀸𑀯𑁂𑀦 𑀯𑀺𑀭𑀼𑀳𑀦𑁆𑀢𑁂 𑀦𑀸𑀫𑀭𑀽𑀧𑀲𑁆𑀲 𑀅𑀯𑀓𑁆𑀓𑀦𑁆𑀢𑀺 𑀳𑁄𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑀸𑀳 ‘‘𑀧𑀝𑀺𑀲𑀦𑁆𑀥𑀺𑀦𑀸𑀫𑀭𑀽𑀧𑀲𑁆𑀲 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀢𑀸 𑀯𑀼𑀢𑁆𑀢𑀸’’𑀢𑀺.

𑀧𑀼𑀭𑀺𑀫𑀢𑀭𑀲𑀺𑀤𑁆𑀥𑀸𑀬𑀸𑀢𑀺 𑀔𑁂𑀢𑁆𑀢𑀪𑀸𑀯𑀦𑀺𑀩𑁆𑀩𑀢𑁆𑀢𑀺𑀬𑀸 𑀧𑀼𑀭𑁂𑀢𑀭𑀫𑁂𑀯 𑀲𑀺𑀤𑁆𑀥𑀸𑀬 𑀧𑀣𑀯𑀺𑀬𑀸. 𑀅𑀢𑁆𑀢𑀮𑀸𑀪𑁄𑀬𑁂𑀯 𑀘𑁂𑀢𑁆𑀣 𑀧𑀢𑀺𑀝𑁆𑀞𑀸𑀦𑀁, 𑀦 𑀧𑀝𑀺𑀮𑀤𑁆𑀥𑀢𑁆𑀢𑀪𑀸𑀯𑀸𑀦𑀁 𑀅𑀯𑀝𑁆𑀞𑀸𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀢𑀺𑀝𑁆𑀞𑀸𑀦𑀁 𑀓𑀫𑁆𑀫𑀲𑁆𑀲 𑀓𑀝𑀢𑁆𑀢𑀸 𑀉𑀧𑁆𑀧𑀢𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺 𑀆𑀳.

𑀲𑁂𑀲𑀭𑀽𑀧𑀸𑀦𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀧𑀣𑀯𑀻𑀥𑀸𑀢𑀼𑀆𑀤𑀻𑀦𑀁 𑀲𑁂𑀲𑀭𑀽𑀧𑀸𑀦𑀁, 𑀧𑀯𑀢𑁆𑀢𑁂 𑀧𑀦 𑀢𑀺𑀲𑀦𑁆𑀢𑀢𑀺𑀭𑀽𑀧𑀸𑀦𑀫𑁆𑀧𑀺. 𑀲𑀳𑀪𑀯𑀦𑀫𑀢𑁆𑀢𑀁 𑀯𑀸 𑀤𑀲𑁆𑀲𑁂𑀢𑀺. 𑀲𑀳𑀪𑀸𑀯𑁂𑀦𑀧𑀺 𑀳𑀺 𑀅𑀢𑁆𑀣𑀺 𑀓𑀸𑀘𑀺 𑀯𑀺𑀲𑁂𑀲𑀫𑀢𑁆𑀢𑀸. 𑀓𑀢𑁆𑀣𑀘𑀺 𑀓𑀢𑁆𑀣𑀘𑀻𑀢𑀺 𑀧𑀓𑀢𑀺𑀓𑀸𑀮𑀪𑀯𑀯𑀺𑀲𑁂𑀲𑀸𑀤𑀺𑀓𑁂. 𑀢𑀢𑀺𑀬𑀧𑀓𑀢𑀺𑀬𑀜𑁆𑀳𑀺 𑀧𑀞𑀫𑀓𑀧𑁆𑀧𑀺𑀓𑀓𑀸𑀮𑁂 𑀘 𑀪𑀸𑀯𑀓𑀮𑀸𑀧𑁄 𑀦𑀢𑁆𑀣𑀺, 𑀭𑀽𑀧𑀪𑀯𑁂 𑀓𑀸𑀬𑀓𑀮𑀸𑀧𑁄𑀧𑀺. 𑀆𑀤𑀺-𑀲𑀤𑁆𑀤𑁂𑀦 𑀢𑀢𑁆𑀣𑁂𑀯 𑀖𑀸𑀦𑀚𑀺𑀯𑁆𑀳𑀸𑀓𑀮𑀸𑀧𑀸, 𑀓𑀸𑀫𑀪𑀯𑁂 𑀘 𑀅𑀦𑁆𑀥𑀸𑀤𑀻𑀦𑀁 𑀘𑀓𑁆𑀔𑀸𑀤𑀺𑀓𑀮𑀸𑀧𑀸 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀓𑀢𑁆𑀣𑀘𑀺 𑀅𑀪𑀸𑀯𑀸𑀪𑀸𑀯𑀢𑁄𑀢𑀺 𑀦𑀸𑀫𑀭𑀽𑀧𑁄𑀓𑀸𑀲𑁂 𑀓𑀢𑁆𑀣𑀘𑀺𑀧𑀺 𑀅𑀪𑀸𑀯𑀸𑀪𑀸𑀯𑀢𑁄.

𑀢𑁂𑀲𑀦𑁆𑀢𑀺 𑀧𑀯𑀢𑁆𑀢𑀺𑀬𑀁 𑀓𑀝𑀢𑁆𑀢𑀸𑀭𑀽𑀧𑀸𑀤𑀻𑀦𑀁. 𑀦 𑀳𑀺 𑀳𑁂𑀢𑀼 𑀧𑀯𑀢𑁆𑀢𑀺𑀬𑀁 𑀓𑀝𑀢𑁆𑀢𑀸𑀭𑀽𑀧𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀉𑀢𑀼𑀆𑀳𑀸𑀭𑀚𑀸𑀦𑀁 𑀧𑀦 𑀲𑀫𑁆𑀪𑀯𑁄𑀬𑁂𑀯 𑀦𑀢𑁆𑀣𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀘𑁆𑀘𑀬𑀪𑀸𑀯𑀧𑁆𑀧𑀲𑀗𑁆𑀕𑁄𑀬𑁂𑀯 𑀦𑀢𑁆𑀣𑀻’’𑀢𑀺. 𑀦 𑀧𑀦 𑀮𑀩𑁆𑀪𑀢𑀺 𑀧𑀘𑁆𑀘𑀬𑀧𑀘𑁆𑀘𑀦𑀻𑀬𑁂 𑀢𑀸𑀤𑀺𑀲𑀲𑁆𑀲 𑀯𑀸𑀭𑀲𑁆𑀲 𑀅𑀦𑀼𑀤𑁆𑀥𑀝𑀢𑁆𑀢𑀸. 𑀇𑀤𑀦𑁆𑀢𑀺 ‘‘𑀧𑀯𑀢𑁆𑀢𑀺𑀬𑀁 𑀓𑀝𑀢𑁆𑀢𑀸𑀭𑀽𑀧𑀸𑀤𑀻𑀦𑀁 𑀧𑀘𑁆𑀘𑀬𑀪𑀸𑀯𑀧𑀝𑀺𑀩𑀸𑀳𑀦𑀢𑁄’’𑀢𑀺 𑀇𑀤𑀁 ‘‘𑀳𑁂𑀢𑀽 𑀲𑀳𑀚𑀸𑀢𑀸𑀦’’𑀦𑁆𑀢𑀺 𑀅𑀤𑁂𑀲𑀦𑀸𑀬 𑀧𑀭𑀺𑀳𑀸𑀭𑀯𑀘𑀦𑀁, 𑀈𑀤𑀺𑀲𑀻 𑀧𑀦 𑀘𑁄𑀤𑀦𑀸 𑀅𑀦𑁄𑀓𑀸𑀲𑀸 𑀏𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀪𑀕𑀯𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑁄 𑀳𑀺 𑀥𑀫𑁆𑀫𑁄 𑀬𑀣𑀸 𑀪𑀕𑀯𑀢𑀸 𑀤𑁂𑀲𑀺𑀢𑁄, 𑀲𑁄 𑀢𑀣𑁂𑀯 𑀕𑀳𑁂𑀢𑀩𑁆𑀩𑁄𑀢𑀺.

𑀳𑁂𑀢𑀼𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀆𑀭𑀫𑁆𑀫𑀡𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨. 𑀉𑀧𑁆𑀧𑀚𑁆𑀚𑀦𑀓𑁆𑀔𑀡𑁂𑀬𑁂𑀯𑀸𑀢𑀺 𑀏𑀢𑁆𑀣 𑀉𑀧𑁆𑀧𑀸𑀤𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀪𑀗𑁆𑀕𑀸 𑀉𑀤𑁆𑀥𑀁 𑀧𑀚𑁆𑀚𑀦𑀁 𑀕𑀫𑀦𑀁 𑀧𑀯𑀢𑁆𑀢𑀦𑀁 𑀉𑀧𑁆𑀧𑀚𑁆𑀚𑀦𑀁, 𑀢𑀲𑁆𑀲 𑀔𑀡𑁄, 𑀢𑀲𑁆𑀫𑀺𑀁 𑀉𑀧𑁆𑀧𑀚𑁆𑀚𑀦𑀓𑁆𑀔𑀡𑁂𑀢𑀺 𑀏𑀯𑀁 𑀯𑀸 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀏𑀯𑀜𑁆𑀳𑀺 𑀲𑀢𑀺 𑀉𑀧𑁆𑀧𑀚𑁆𑀚𑀦𑀲𑀤𑁆𑀤𑁂𑀦 𑀉𑀧𑁆𑀧𑀦𑁆𑀦𑀲𑀤𑁆𑀤𑁂𑀦 𑀯𑀺𑀬 𑀲𑀩𑁆𑀩𑁂 𑀧𑀯𑀢𑁆𑀢𑀫𑀸𑀦𑀪𑀸𑀯𑀸 𑀲𑀗𑁆𑀕𑀳𑀺𑀢𑀸 𑀳𑁄𑀦𑁆𑀢𑀺, 𑀦 𑀉𑀧𑁆𑀧𑀸𑀤𑀫𑀢𑁆𑀢𑀁. 𑀢𑁂𑀦𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀯𑀢𑁆𑀢𑀫𑀸𑀦𑀓𑁆𑀔𑀡𑁂𑀬𑁂𑀯 𑀭𑀽𑀧𑀸𑀤𑀻𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑀢𑁆𑀢𑁂𑀦. 𑀅𑀦𑀸𑀮𑀫𑁆𑀩𑀺𑀬𑀫𑀸𑀦𑀸𑀦𑀦𑁆𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀦𑀸𑀮𑀫𑁆𑀩𑀺𑀬𑀫𑀸𑀦𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀣𑀸 𑀳𑀺 𑀬𑀣𑀸𑀯𑀼𑀢𑁆𑀢𑀸𑀦𑀁 𑀭𑀽𑀧𑀸𑀤𑀻𑀦𑀁 𑀬𑀤𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑁄, 𑀢𑀤𑀸 𑀅𑀦𑀸𑀮𑀫𑁆𑀩𑀺𑀬𑀫𑀸𑀦𑀢𑀸𑀯𑀸𑀢𑀺. 𑀲𑀩𑁆𑀩𑀭𑀽𑀧𑀸𑀦𑀻𑀢𑀺 𑀲𑀩𑁆𑀩𑀸𑀦𑀺 𑀭𑀽𑀧𑀸𑀬𑀢𑀦𑀸𑀦𑀺, 𑀬𑀢𑁆𑀢𑀓𑀸𑀦𑀺 𑀢𑀸𑀦𑀺 𑀆𑀧𑀸𑀣𑀕𑀢𑀸𑀦𑀺 𑀬𑁄𑀕𑁆𑀬𑀤𑁂𑀲𑁂 𑀞𑀺𑀢𑀸𑀦𑀺, 𑀢𑀸𑀦𑀺 𑀲𑀩𑁆𑀩𑀸𑀦𑀻𑀢𑀺 𑀅𑀢𑁆𑀣𑁄. 𑀲𑀳 𑀦 𑀳𑁄𑀦𑁆𑀢𑀻𑀢𑀺 𑀏𑀓𑀚𑁆𑀛𑀁 𑀆𑀭𑀫𑁆𑀫𑀡𑀁 𑀦 𑀳𑁄𑀦𑁆𑀢𑀺. 𑀲𑀢𑀺𑀧𑀺 𑀳𑀺 𑀅𑀦𑁂𑀓𑁂𑀲𑀁 𑀏𑀓𑀚𑁆𑀛𑀁 𑀆𑀧𑀸𑀣𑀕𑀫𑀦𑁂 𑀬𑀢𑁆𑀣 𑀬𑀢𑁆𑀣 𑀧𑀼𑀩𑁆𑀩𑀸𑀪𑁄𑀕𑁄, 𑀢𑀁 𑀢𑀁𑀬𑁂𑀯 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀦 𑀲𑀩𑁆𑀩𑀁. 𑀦𑀻𑀮𑀸𑀤𑀺𑀲𑀗𑁆𑀖𑀸𑀢𑀯𑀲𑁂𑀦 𑀘𑁂𑀢𑀁 𑀯𑀼𑀢𑁆𑀢𑀁, 𑀦 𑀧𑀘𑁆𑀘𑁂𑀓𑀁 𑀦𑀻𑀮𑀸𑀤𑀺𑀭𑀽𑀧𑀸𑀬𑀢𑀦𑀫𑀢𑁆𑀢𑀯𑀲𑁂𑀦. 𑀲𑀫𑀼𑀤𑀺𑀢𑀸𑀦𑀺𑀬𑁂𑀯 𑀳𑀺 𑀭𑀽𑀧𑀸𑀬𑀢𑀦𑀸𑀦𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀁, 𑀦 𑀯𑀺𑀲𑀼𑀁 𑀯𑀺𑀲𑀼𑀦𑁆𑀢𑀺 𑀥𑀸𑀢𑀼𑀯𑀺𑀪𑀗𑁆𑀕𑀯𑀡𑁆𑀡𑀦𑀸𑀬𑀁 𑀤𑀲𑁆𑀲𑀺𑀢𑁄𑀬𑀁 𑀦𑀬𑁄. 𑀬𑀁 𑀧𑀦 𑀅𑀝𑁆𑀞𑀓𑀣𑀸𑀬𑀁 ‘‘𑀢𑁂 𑀢𑁂 𑀯𑀺𑀲𑀼𑀁 𑀯𑀺𑀲𑀼𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀦𑁆𑀢𑀻’’𑀢𑀺𑀧𑀺 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀬𑀣𑀸𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀜𑁆𑀜𑀣𑀸 𑀭𑀽𑀧𑀸𑀬𑀢𑀦𑀁 𑀫𑀦𑀺𑀦𑁆𑀤𑁆𑀭𑀺𑀬𑀕𑁄𑀘𑀭𑀁 𑀦𑀸𑀫 𑀦 𑀲𑀺𑀬𑀸. 𑀲𑀤𑁆𑀤𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑁂𑀦𑁂𑀯𑀸𑀳 ‘‘𑀢𑀣𑀸 𑀲𑀤𑁆𑀤𑀸𑀤𑀬𑁄𑀧𑀻’’𑀢𑀺. ‘‘𑀲𑀳 𑀦 𑀳𑁄𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀧𑀸𑀴𑀺𑀬𑀸 𑀯𑀺𑀪𑀸𑀯𑁂𑀢𑀼𑀁 ‘‘𑀬𑀁 𑀬𑀦𑁆𑀢𑀺 𑀳𑀺 𑀯𑀘𑀦𑀁 𑀭𑀽𑀧𑀸𑀤𑀻𑀦𑀺 𑀪𑀺𑀦𑁆𑀤𑀢𑀻’’𑀢𑀺 𑀆𑀳.

‘‘𑀬𑁂 𑀏𑀢𑁂’’𑀢𑀺𑀆𑀤𑀺𑀓𑁄 𑀧𑀼𑀭𑀺𑀫𑁄 𑀅𑀢𑁆𑀣𑁄, ‘‘𑀦 𑀏𑀓𑀢𑁄 𑀳𑁄𑀦𑁆𑀢𑀻’’𑀢𑀺𑀆𑀤𑀺𑀓𑁄 𑀧𑀦 𑀧𑀘𑁆𑀙𑀺𑀫𑁄, ‘‘𑀲𑀩𑁆𑀩𑀸𑀭𑀫𑁆𑀫𑀡𑀢𑀸𑀤𑀺𑀯𑀲𑁂𑀦 𑀯𑀸 𑀇𑀥𑀸𑀧𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁. 𑀦 𑀳𑀺 ‘‘𑀬𑀁 𑀬𑀁 𑀯𑀸 𑀧𑀦𑀸𑀭𑀩𑁆𑀪𑀸’’𑀢𑀺 𑀇𑀫𑀺𑀲𑁆𑀲𑀸 𑀧𑀸𑀴𑀺𑀬𑀸 𑀯𑀺𑀬 ‘‘𑀬𑀁 𑀬𑀁 𑀥𑀫𑁆𑀫𑀁 𑀆𑀭𑀩𑁆𑀪𑀸’’𑀢𑀺 𑀇𑀫𑀲𑁆𑀲 𑀧𑀸𑀞𑀲𑁆𑀲 𑀧𑀼𑀭𑀢𑁄 𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲 𑀲𑀩𑁆𑀩𑀸𑀭𑀫𑁆𑀫𑀡𑀢𑀸 𑀦𑀸𑀕𑀢𑀸. 𑀯𑀼𑀢𑁆𑀢𑀜𑁆𑀳𑀺 ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺. 𑀦 𑀳𑀺 𑀅𑀦𑀦𑁆𑀢𑀭𑀫𑁂𑀯 𑀧𑀸𑀴𑀺𑀬𑀁 𑀲𑀭𑀽𑀧𑀢𑁄 𑀆𑀕𑀢𑀫𑀢𑁆𑀣𑀁 𑀕𑀳𑁂𑀢𑁆𑀯𑀸 𑀧𑀤𑀦𑁆𑀢𑀭𑀁 𑀲𑀁𑀯𑀡𑁆𑀡𑁂𑀢𑀩𑁆𑀩𑀁. 𑀢𑀢𑁆𑀣 𑀳𑀺 ‘‘𑀭𑀽𑀧𑀸𑀭𑀫𑁆𑀫𑀡𑀁 𑀯𑀸’’𑀢𑀺𑀆𑀤𑀺𑀦𑀸 𑀦𑀺𑀬𑀫𑀯𑀲𑁂𑀦 𑀙 𑀆𑀭𑀫𑁆𑀫𑀡𑀸𑀦𑀺 𑀯𑀢𑁆𑀯𑀸 ‘‘𑀬𑀁 𑀬𑀁 𑀯𑀸 𑀧𑀦𑀸𑀭𑀩𑁆𑀪𑀸’’𑀢𑀺 𑀯𑀘𑀦𑀁 𑀲𑀩𑁆𑀩𑀸𑀭𑀫𑁆𑀫𑀡𑀢𑀸𑀤𑀺𑀤𑀲𑁆𑀲𑀦𑀦𑁆𑀢𑀺 𑀬𑀼𑀢𑁆𑀢𑀫𑁂𑀯𑁂𑀢𑀦𑁆𑀢𑀺, 𑀇𑀥 𑀧𑀦 𑀲𑀩𑁆𑀩𑀸𑀭𑀫𑁆𑀫𑀡𑀢𑀁 𑀯𑀢𑁆𑀯𑀸 𑀧𑀼𑀦 ‘‘𑀬𑀁 𑀬𑀁 𑀥𑀫𑁆𑀫𑀁 𑀆𑀭𑀩𑁆𑀪𑀸’’𑀢𑀺 𑀯𑀼𑀘𑁆𑀘𑀫𑀸𑀦𑀁 𑀲𑀩𑁆𑀩𑀸𑀭𑀫𑁆𑀫𑀡𑀢𑀸𑀤𑀲𑁆𑀲𑀦𑀦𑁆𑀢𑀺 𑀓𑀣𑀫𑀺𑀤𑀁 𑀬𑀼𑀚𑁆𑀚𑁂𑀬𑁆𑀬? 𑀓𑀫𑀸𑀪𑀸𑀯𑁄𑀧𑀺 ‘‘𑀲𑀩𑁆𑀩𑁂 𑀥𑀫𑁆𑀫𑀸’’𑀢𑀺 𑀅𑀯𑀺𑀲𑁂𑀲𑀯𑀘𑀦𑁂𑀦𑁂𑀯 𑀲𑀺𑀤𑁆𑀥𑁄 𑀆𑀭𑀫𑁆𑀫𑀡𑀸𑀦𑀼𑀧𑀼𑀩𑁆𑀩𑀺𑀬𑀸𑀯 𑀅𑀕𑁆𑀕𑀳𑀺𑀢𑀢𑁆𑀢𑀸. 𑀦 𑀳𑀺 𑀫𑀦𑁄𑀥𑀸𑀢𑀼𑀬𑀸 𑀯𑀺𑀬 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀇𑀥 𑀆𑀭𑀫𑁆𑀫𑀡𑀸𑀦𑀺 𑀅𑀦𑀼𑀧𑀼𑀩𑁆𑀩𑀢𑁄 𑀕𑀳𑀺𑀢𑀸𑀦𑀺, 𑀢𑀢𑁆𑀣 𑀯𑀺𑀬 𑀯𑀸 𑀏𑀢𑁂𑀦𑁂𑀯 𑀦𑀺𑀬𑀫𑀸𑀪𑀸𑀯𑁄𑀧𑀺 𑀲𑀁𑀯𑀡𑁆𑀡𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀲𑁆𑀫𑀸 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯𑁂𑀢𑁆𑀣 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄.

𑀧𑀯𑀢𑁆𑀢𑀦𑁆𑀢𑀺 𑀧𑀯𑀢𑁆𑀢𑀦𑀁. 𑀦𑀤𑀺𑀬𑀸 𑀲𑀦𑁆𑀤𑀦𑀁 𑀧𑀩𑁆𑀩𑀢𑀲𑁆𑀲 𑀞𑀸𑀦𑀦𑁆𑀢𑀺 𑀳𑀺 𑀯𑀼𑀢𑁆𑀢𑀸 𑀅𑀯𑀺𑀭𑀢𑀫𑀯𑀺𑀘𑁆𑀙𑁂𑀤𑀦𑀸𑀬𑀁 𑀢𑀣𑀸𑀧𑀯𑀢𑁆𑀢𑀺𑀓𑀺𑀭𑀺𑀬𑀸𑀯. 𑀢𑁂𑀦𑀸𑀳 ‘‘𑀅𑀯𑀺𑀭𑀢𑀁 𑀅𑀯𑀺𑀘𑁆𑀙𑀺𑀦𑁆𑀦𑀁 𑀲𑀦𑁆𑀤𑀦𑁆𑀢𑀻’’𑀢𑀺. 𑀏𑀯𑀦𑁆𑀢𑀺 𑀬𑀣𑀸 ‘‘𑀲𑀦𑁆𑀤𑀦𑁆𑀢𑀻’’𑀢𑀺 𑀯𑀢𑁆𑀢𑀫𑀸𑀦𑀯𑀘𑀦𑀁 𑀯𑀼𑀢𑁆𑀢𑀁, 𑀏𑀯𑀁 ‘‘𑀬𑁂 𑀬𑁂 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀲𑀩𑁆𑀩𑀲𑀗𑁆𑀕𑀳𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀲𑁆𑀲 𑀕𑀳𑀺𑀢𑀢𑁆𑀢𑀸 𑀆𑀭𑀫𑁆𑀫𑀡𑀧𑀯𑀕𑁆𑀕𑀢𑁄 ‘‘𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀯𑀢𑁆𑀢𑀫𑀸𑀦𑀯𑀘𑀦𑀁 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀩𑁆𑀩𑀓𑀸𑀮𑀲𑀗𑁆𑀕𑀳𑀯𑀲𑁂𑀦𑀸’’𑀢𑀺𑀆𑀤𑀺. 𑀢𑀣𑀸 𑀘 𑀯𑀼𑀢𑁆𑀢𑀁 ‘‘𑀅𑀢𑀻𑀢𑀸𑀦𑀸𑀕𑀢…𑀧𑁂… 𑀅𑀥𑀺𑀧𑁆𑀧𑀸𑀬𑁄’’𑀢𑀺, 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀲𑀫𑀼𑀤𑀸𑀬𑀯𑀲𑁂𑀦𑀸𑀢𑀺 𑀘𑀺𑀢𑁆𑀢𑁂𑀦 𑀭𑀸𑀲𑀻𑀓𑀭𑀡𑀯𑀲𑁂𑀦. 𑀅𑀥𑀺𑀧𑁆𑀧𑀸𑀬𑁄𑀢𑀺 𑀇𑀫𑀺𑀦𑀸 𑀯𑀢𑁆𑀢𑀫𑀸𑀦𑀼𑀧𑀘𑀸𑀭𑁂𑀦 𑀯𑀺𑀦𑀸𑀯 ‘‘𑀬𑁂 𑀬𑁂 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀏𑀢𑁆𑀣 𑀯𑀢𑁆𑀢𑀫𑀸𑀦𑀢𑁆𑀣𑀁 𑀲𑀓𑁆𑀓𑀸 𑀬𑁄𑀚𑁂𑀢𑀼𑀦𑁆𑀢𑀺 𑀇𑀫𑀫𑀢𑁆𑀣𑀁 𑀉𑀮𑁆𑀮𑀺𑀗𑁆𑀕𑁂𑀢𑀺. 𑀢𑁂𑀦𑀸𑀳 ‘‘𑀇𑀫𑁂 𑀧𑀦𑀸’’𑀢𑀺𑀆𑀤𑀺. 𑀬𑀤𑀺𑀧𑀺 𑀧𑀘𑁆𑀘𑀬𑀥𑀫𑁆𑀫𑀸 𑀓𑁂𑀘𑀺 𑀅𑀢𑀻𑀢𑀸 𑀅𑀦𑀸𑀕𑀢𑀸𑀧𑀺 𑀳𑁄𑀦𑁆𑀢𑀺, 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑁄 𑀧𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀏𑀯𑀸𑀢𑀺 𑀆𑀳 ‘‘𑀅𑀢𑀻𑀢𑀸𑀦𑀸𑀕𑀢𑀸𑀦𑀁 𑀦 𑀳𑁄𑀦𑁆𑀢𑀻’’𑀢𑀺. 𑀉𑀧𑁆𑀧𑀸𑀤𑁂 𑀯𑀸 𑀳𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲 𑀧𑀘𑁆𑀘𑀬𑁂𑀦 𑀪𑀯𑀺𑀢𑀩𑁆𑀩𑀁 𑀞𑀺𑀢𑀺𑀬𑀁 𑀯𑀸𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀅𑀢𑀻𑀢𑀸𑀦𑀸𑀕𑀢𑀸 𑀧𑀭𑀫𑀢𑁆𑀣𑀢𑁄 𑀦𑀢𑁆𑀣𑀺, 𑀢𑀲𑁆𑀫𑀸. 𑀢𑁂𑀲𑀽𑀢𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀲𑀼. 𑀢𑀁𑀢𑀁𑀧𑀘𑁆𑀘𑀬𑀸𑀢𑀺 𑀢𑀁 𑀢𑀁 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀁 𑀧𑀘𑁆𑀘𑀬𑁄 𑀏𑀢𑁂𑀲𑀦𑁆𑀢𑀺 𑀢𑀁𑀢𑀁𑀧𑀘𑁆𑀘𑀬𑀸. 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺 𑀲𑀫𑀸𑀦𑀲𑀪𑀸𑀯𑀢𑁆𑀢𑀸. 𑀦 𑀳𑀺 𑀅𑀢𑁆𑀣𑀸𑀪𑁂𑀤𑁂𑀦 𑀲𑀪𑀸𑀯𑀪𑁂𑀤𑁄 𑀅𑀢𑁆𑀣𑀺. 𑀦 𑀧𑀦 𑀢𑀁𑀢𑀁𑀧𑀘𑁆𑀘𑀬𑀯𑀦𑁆𑀢𑀢𑀸 𑀤𑀲𑁆𑀲𑀺𑀢𑀸 𑀳𑁄𑀢𑀺 𑀅𑀢𑀻𑀢𑀸𑀦𑀸𑀕𑀢𑁂𑀲𑀼 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀢𑀤𑀪𑀸𑀯𑀢𑁄. 𑀬𑀲𑁆𑀫𑀸 𑀧𑀘𑁆𑀘𑀬𑀯𑀦𑁆𑀢𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀬𑁂𑀯, 𑀢𑁂 𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀬𑁂𑀯𑀸𑀢𑀺.

𑀬𑀁 𑀬𑀁 𑀥𑀫𑁆𑀫𑀁 𑀢𑁂 𑀢𑁂 𑀥𑀫𑁆𑀫𑀸𑀢𑀺 𑀬𑀁𑀦𑀺𑀫𑀺𑀢𑁆𑀢𑀸𑀬𑀁𑀯𑀘𑀦𑀪𑁂𑀤𑁄, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀳𑀺 𑀓𑀮𑀸𑀧𑀢𑁄 𑀧𑀯𑀢𑁆𑀢𑀫𑀸𑀦𑀸𑀧𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀓𑀤𑀸𑀘𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀆𑀭𑀫𑁆𑀫𑀡𑀁 𑀳𑁄𑀦𑁆𑀢𑀺, 𑀓𑀤𑀸𑀘𑀺 𑀏𑀓𑀚𑁆𑀛𑀁, 𑀦 𑀏𑀢𑁆𑀣 𑀦𑀺𑀬𑀫𑁄 𑀅𑀢𑁆𑀣𑀺, 𑀧𑀼𑀭𑀺𑀫𑀸𑀪𑁄𑀕𑁄𑀬𑁂𑀯 𑀧𑀦 𑀢𑀣𑀸𑀕𑀳𑀡𑁂 𑀓𑀸𑀭𑀡𑀁. 𑀢𑀬𑀺𑀫𑀁 𑀤𑀻𑀧𑁂𑀢𑀼𑀁 𑀪𑀕𑀯𑀢𑀸 𑀬𑀁𑀯𑀘𑀦𑀪𑁂𑀤𑁄 𑀓𑀢𑁄𑀢𑀺 𑀘 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀬𑀲𑁆𑀫𑀸 𑀧𑀦 𑀏𑀓𑀓𑀮𑀸𑀧𑀧𑀭𑀺𑀬𑀸𑀧𑀦𑁆𑀦𑀸𑀦𑀫𑁆𑀧𑀺 𑀥𑀫𑁆𑀫𑀸𑀦𑀁 𑀏𑀓𑀚𑁆𑀛𑀁 𑀕𑀳𑀡𑁂 𑀦 𑀲𑀫𑀼𑀤𑀸𑀬𑁄 𑀕𑀬𑁆𑀳𑀢𑀺 𑀢𑀤𑀸𑀪𑁄𑀕𑀸𑀪𑀸𑀯𑀢𑁄, 𑀅𑀣 𑀔𑁄 𑀲𑀫𑀼𑀤𑀺𑀢𑀸 𑀥𑀫𑁆𑀫𑀸 𑀏𑀯𑀸𑀢𑀺 𑀲𑀳𑀕𑁆𑀕𑀳𑀡𑀫𑁆𑀧𑀺 𑀯𑀺𑀲𑀼𑀁𑀕𑀳𑀡𑀕𑀢𑀺𑀓𑀁, 𑀢𑀲𑁆𑀫𑀸 𑀯𑀺𑀲𑀼𑀁𑀕𑀳𑀡𑀲𑀩𑁆𑀪𑀸𑀯𑀤𑀻𑀧𑀦𑀢𑁆𑀣𑀁 ‘‘𑀬𑀁 𑀬’’𑀦𑁆𑀢𑀺 𑀯𑀢𑁆𑀯𑀸 𑀲𑀢𑀺𑀧𑀺 𑀯𑀺𑀲𑀼𑀁𑀕𑀳𑀡𑁂 𑀢𑁂 𑀲𑀩𑁆𑀩𑁂 𑀏𑀓𑀚𑁆𑀛𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀢𑁂 𑀢𑁂’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀢𑁆𑀢𑀸𑀭𑁄 𑀳𑀺 𑀔𑀦𑁆𑀥𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑁂𑀤𑀦𑀸𑀤𑀻𑀲𑀽𑀢𑀺 𑀯𑁂𑀤𑀦𑀸𑀤𑀻𑀲𑀼 𑀘𑀢𑀽𑀲𑀼 𑀔𑀦𑁆𑀥𑁂𑀲𑀼 𑀅𑀪𑀺𑀦𑁆𑀤𑀺𑀢𑁆𑀯𑀸 𑀕𑀳𑀡𑀯𑀲𑁂𑀦, 𑀪𑀺𑀦𑁆𑀤𑀺𑀢𑁆𑀯𑀸 𑀧𑀦 𑀕𑀳𑀡𑀯𑀲𑁂𑀦 𑀨𑀲𑁆𑀲𑀸𑀤𑀻𑀲𑀼. 𑀬𑁄 𑀘 𑀭𑀽𑀧𑀸𑀤𑀺𑀓𑁄𑀢𑀺 𑀇𑀤𑀁 𑀯𑀺𑀜𑁆𑀜𑀸𑀡𑀦𑁆𑀢𑀭𑀲𑁆𑀲 𑀲𑀸𑀥𑀸𑀭𑀡𑀸𑀭𑀫𑁆𑀫𑀡𑀯𑀲𑁂𑀦 𑀯𑀼𑀢𑁆𑀢𑀁, 𑀬𑁂 𑀘 𑀅𑀦𑁂𑀓𑁂 𑀨𑀲𑁆𑀲𑀸𑀤𑀬𑁄𑀢𑀺 𑀇𑀤𑀁 𑀅𑀲𑀸𑀥𑀸𑀭𑀡𑀸𑀭𑀫𑁆𑀫𑀡𑀯𑀲𑁂𑀦. 𑀢𑁂 𑀲𑀩𑁆𑀩𑁂𑀢𑀺 𑀢𑁂 𑀲𑀸𑀥𑀸𑀭𑀡𑀸𑀲𑀸𑀥𑀸𑀭𑀡𑀧𑁆𑀧𑀪𑁂𑀤𑁂 𑀲𑀩𑁆𑀩𑁂𑀧𑀺 𑀆𑀭𑀫𑁆𑀫𑀡𑀥𑀫𑁆𑀫𑁂. 𑀏𑀓𑁂𑀓𑀫𑁂𑀯 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀏𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀭𑀽𑀧𑀸𑀭𑀫𑁆𑀫𑀡𑀥𑀫𑁆𑀫𑀸 𑀘 𑀅𑀦𑁂𑀓𑁂 𑀦𑀻𑀮𑀸𑀤𑀺𑀪𑁂𑀤𑀢𑁄. 𑀢𑀣𑀸𑀢𑀺 𑀅𑀦𑁂𑀓𑁂. 𑀢𑁂𑀦 𑀪𑁂𑀭𑀺𑀲𑀤𑁆𑀤𑀸𑀤𑀺𑀓𑁂, 𑀫𑀽𑀮𑀕𑀦𑁆𑀥𑀸𑀤𑀺𑀓𑁂, 𑀫𑀽𑀮𑀭𑀲𑀸𑀤𑀺𑀓𑁂, 𑀓𑀣𑀺𑀦𑀲𑀫𑁆𑀨𑀲𑁆𑀲𑀸𑀤𑀺𑀓𑁂, 𑀯𑁂𑀤𑀦𑀸𑀤𑀺𑀓𑁂 𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀦𑁂𑀓𑁂𑀢𑀺 𑀳𑀺 𑀇𑀫𑀺𑀦𑀸 𑀅𑀦𑁂𑀓𑀓𑀮𑀸𑀧𑀕𑀢𑀸𑀦𑀁𑀬𑁂𑀯 𑀯𑀡𑁆𑀡𑀸𑀤𑀻𑀦𑀁 𑀇𑀦𑁆𑀤𑁆𑀭𑀺𑀬𑀯𑀺𑀜𑁆𑀜𑀸𑀡𑀸𑀭𑀫𑁆𑀫𑀡𑀪𑀸𑀯𑀫𑀸𑀳. 𑀲𑀸𑀫𑀜𑁆𑀜𑀢𑁄 𑀳𑀺 𑀯𑀼𑀢𑁆𑀢𑀁 𑀬𑀣𑀸𑀭𑀳𑀁 𑀪𑀺𑀦𑁆𑀤𑀺𑀢𑁆𑀯𑀸 𑀦𑀺𑀤𑀲𑁆𑀲𑀺𑀢𑀩𑁆𑀩𑀁 𑀳𑁄𑀢𑀻𑀢𑀺.

𑀓𑀼𑀲𑀮𑀯𑀺𑀧𑀸𑀓𑀲𑁆𑀲𑀸𑀢𑀺 𑀓𑀼𑀲𑀮𑀲𑁆𑀲 𑀯𑀺𑀧𑀸𑀓𑀲𑁆𑀲 𑀘. 𑀦 𑀳𑀺 𑀦𑀺𑀩𑁆𑀩𑀸𑀦𑀁 𑀧𑀼𑀩𑁆𑀩𑁂 𑀦𑀺𑀯𑀼𑀢𑁆𑀣𑀦𑁆𑀢𑀺 𑀇𑀤𑀁 ‘‘𑀤𑀺𑀝𑁆𑀞𑀦𑀺𑀩𑁆𑀩𑀸𑀦𑁄𑀬𑁂𑀯𑀸’’𑀢𑀺𑀆𑀤𑀺𑀦𑀸 𑀯𑀓𑁆𑀔𑀫𑀸𑀦𑀫𑁂𑀯 𑀅𑀢𑁆𑀣𑀁 𑀳𑀤𑀬𑁂 𑀞𑀧𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑁂𑀦 𑀳𑀺 𑀦𑀺𑀩𑁆𑀩𑀸𑀦𑀯𑀺𑀪𑀸𑀯𑀦𑀁 𑀅𑀤𑀺𑀝𑁆𑀞𑀲𑀘𑁆𑀘𑀲𑁆𑀲 𑀯𑀸 𑀲𑀺𑀬𑀸 𑀤𑀺𑀝𑁆𑀞𑀲𑀘𑁆𑀘𑀲𑁆𑀲𑀧𑀺 𑀯𑀸. 𑀢𑀢𑁆𑀣 𑀅𑀤𑀺𑀝𑁆𑀞𑀲𑀘𑁆𑀘𑁂𑀦 𑀢𑀸𑀯 𑀢𑀁 𑀯𑀺𑀪𑀸𑀯𑁂𑀢𑀼𑀫𑁂𑀯 𑀦 𑀲𑀓𑁆𑀓𑀸 𑀅𑀧𑁆𑀧𑀝𑀺𑀯𑀺𑀤𑁆𑀥𑀢𑁆𑀢𑀸, 𑀇𑀢𑀭𑀲𑁆𑀲 𑀧𑀦 𑀧𑀕𑁂𑀯 𑀯𑀺𑀪𑀽𑀢𑀫𑁂𑀯𑀸𑀢𑀺 𑀢𑀁 𑀢𑁂𑀦 𑀯𑀺𑀪𑀸𑀯𑀺𑀢𑀁 𑀦𑀸𑀫 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁆𑀣 𑀘 ‘‘𑀦 𑀘 𑀢𑀁 𑀯𑀼𑀢𑁆𑀢’’𑀦𑁆𑀢𑀺 𑀇𑀫𑀺𑀦𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀲𑁆𑀲 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀓𑀭𑀡𑀸𑀪𑀸𑀯𑀁 𑀆𑀕𑀫𑀢𑁄 𑀤𑀲𑁆𑀲𑁂𑀢𑁆𑀯𑀸 ‘‘𑀦 𑀳𑀺 𑀦𑀺𑀩𑁆𑀩𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀬𑀼𑀢𑁆𑀢𑀺𑀢𑁄 𑀤𑀲𑁆𑀲𑁂𑀢𑀺. 𑀢𑀢𑁆𑀣 ‘‘𑀦 𑀧𑀼𑀩𑁆𑀩𑁂 𑀦𑀺𑀯𑀼𑀢𑁆𑀣𑀁 𑀅𑀲𑀗𑁆𑀔𑀢𑀢𑁆𑀢𑀸’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁? 𑀕𑁄𑀘𑀭𑀸𑀲𑁂𑀯𑀦𑀸𑀬 𑀆𑀲𑁂𑀯𑀺𑀢𑀲𑁆𑀲𑀧𑀺 𑀦𑀺𑀯𑀼𑀢𑁆𑀣𑀦𑁆𑀢𑀺 𑀇𑀘𑁆𑀙𑀺𑀢𑀢𑁆𑀢𑀸. 𑀤𑀺𑀝𑁆𑀞𑀲𑀘𑁆𑀘𑁄𑀬𑁂𑀯 𑀳𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑁂𑀦 𑀦𑀺𑀩𑁆𑀩𑀸𑀦𑀁 𑀯𑀺𑀪𑀸𑀯𑁂𑀢𑀺, 𑀦 𑀅𑀤𑀺𑀝𑁆𑀞𑀲𑀘𑁆𑀘𑁄. 𑀢𑀁 𑀧𑀦 𑀜𑀸𑀡𑀁 𑀔𑀦𑁆𑀥𑁂 𑀯𑀺𑀬 𑀔𑀦𑁆𑀥𑀧𑀝𑀺𑀩𑀤𑁆𑀥𑁂𑀧𑀺 𑀯𑀺𑀪𑀸𑀯𑁂𑀢𑀻𑀢𑀺 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀔𑀦𑁆𑀥𑀯𑀺𑀪𑀸𑀯𑀦𑁂 𑀦𑀺𑀩𑁆𑀩𑀸𑀦𑀫𑁆𑀧𑀺 𑀯𑀺𑀪𑀸𑀯𑁂𑀢𑀻𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁. 𑀏𑀢𑁂𑀦 𑀧𑀬𑁄𑀚𑀦𑀸𑀪𑀸𑀯𑀘𑁄𑀤𑀦𑀸 𑀧𑀝𑀺𑀓𑁆𑀔𑀺𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀏𑀯𑀁 𑀅𑀦𑀸𑀕𑀢𑀁𑀲𑀜𑀸𑀡𑁂𑀧𑀺 𑀬𑁄𑀚𑁂𑀢𑀩𑁆𑀩𑀦𑁆𑀢𑀺 𑀬𑀣𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀲𑁆𑀲 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑀸 𑀤𑀲𑁆𑀲𑀺𑀢𑀸, 𑀏𑀯𑀁 𑀅𑀦𑀸𑀕𑀢𑀁𑀲𑀜𑀸𑀡𑁂𑀧𑀺 𑀬𑀣𑀸𑀭𑀳𑀁 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁆𑀣 𑀧𑀦 ‘‘𑀔𑀦𑁆𑀥𑀧𑀝𑀺𑀩𑀤𑁆𑀥𑀯𑀺𑀪𑀸𑀯𑀦𑀓𑀸𑀮𑁂’’𑀢𑀺𑀆𑀤𑀺𑀦𑀸 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀣𑀸𑀭𑀳’’𑀦𑁆𑀢𑀺. 𑀓𑀲𑁆𑀲𑀘𑀺 𑀅𑀪𑀺𑀜𑁆𑀜𑀸𑀧𑁆𑀧𑀢𑁆𑀢𑀲𑁆𑀲𑀧𑀺 𑀭𑀽𑀧𑀸𑀯𑀘𑀭𑀲𑁆𑀲, 𑀧𑀕𑁂𑀯 𑀇𑀢𑀭𑀲𑁆𑀲.

𑀆𑀭𑀫𑁆𑀫𑀡𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀅𑀥𑀺𑀧𑀢𑀺𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁩. 𑀥𑀼𑀭𑀲𑀳𑀘𑀭𑀺𑀬𑀢𑁄 𑀥𑁄𑀭𑁂𑀬𑁆𑀬𑁄 ‘‘𑀥𑀼𑀭’’𑀦𑁆𑀢𑀺 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀥𑀼𑀭𑀦𑁆𑀢𑀺 𑀥𑀼𑀭𑀕𑁆𑀕𑀸𑀳’’𑀦𑁆𑀢𑀺. 𑀙𑀦𑁆𑀤𑀲𑁆𑀲 𑀧𑀼𑀩𑁆𑀩𑀗𑁆𑀕𑀫𑀢𑀸𑀲𑀺𑀤𑁆𑀥𑀁 𑀧𑀸𑀲𑀁𑀲𑀪𑀸𑀯𑀁 𑀉𑀧𑀸𑀤𑀸𑀬 𑀅𑀝𑁆𑀞𑀓𑀣𑀸𑀬𑀁 ‘‘𑀚𑁂𑀝𑁆𑀞𑀓’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀢𑀫𑁂𑀯𑀢𑁆𑀣𑀁 𑀤𑀻𑀧𑁂𑀦𑁆𑀢𑁄 ‘‘𑀲𑁂𑀝𑁆𑀞’’𑀦𑁆𑀢𑀺 𑀆𑀳. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 ‘‘𑀙𑀦𑁆𑀤𑀁 𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸 𑀆𑀬𑀽𑀳𑀺𑀢’’𑀦𑁆𑀢𑀺. 𑀧𑀼𑀭𑀺𑀫𑀙𑀦𑁆𑀤𑀲𑁆𑀲𑀸𑀢𑀺 ‘‘𑀙𑀦𑁆𑀤𑀸𑀥𑀺𑀧𑀢𑀻’’𑀢𑀺 𑀧𑀼𑀭𑀺𑀫𑀲𑁆𑀫𑀺𑀁 𑀧𑀤𑁂 𑀦𑀺𑀤𑁆𑀤𑁂𑀲𑀯𑀲𑁂𑀦 𑀯𑀼𑀢𑁆𑀢𑀲𑁆𑀲 𑀙𑀦𑁆𑀤𑀲𑀤𑁆𑀤𑀲𑁆𑀲 𑀲𑀫𑀸𑀦𑀭𑀽𑀧𑁂𑀦 𑀲𑀤𑀺𑀲𑀸𑀓𑀸𑀭𑁂𑀦. 𑀢𑀤𑀦𑀦𑁆𑀢𑀭𑀁 𑀦𑀺𑀤𑁆𑀤𑀺𑀝𑁆𑀞𑁂𑀦𑀸𑀢𑀺 𑀢𑀲𑁆𑀲 𑀧𑀼𑀭𑀺𑀫𑀲𑁆𑀲 𑀙𑀦𑁆𑀤𑀲𑀤𑁆𑀤𑀲𑁆𑀲 𑀅𑀦𑀦𑁆𑀢𑀭𑀁 𑀦𑀺𑀤𑁆𑀤𑁂𑀲𑀯𑀲𑁂𑀦 𑀯𑀼𑀢𑁆𑀢𑁂𑀦. 𑀢𑀢𑁄 𑀏𑀯 𑀘 𑀢𑀁𑀲𑀫𑀸𑀦𑀢𑁆𑀣𑀢𑀸𑀬 𑀘 𑀢𑀁𑀲𑀫𑁆𑀩𑀦𑁆𑀥𑁂𑀦 ‘‘𑀙𑀦𑁆𑀤𑀲𑀫𑁆𑀧𑀬𑀼𑀢𑁆𑀢𑀓𑀸𑀦’’𑀦𑁆𑀢𑀺 𑀏𑀢𑁆𑀣 𑀙𑀦𑁆𑀤𑀲𑀤𑁆𑀤𑁂𑀦𑁂𑀯 𑀅𑀥𑀺𑀧𑀢𑀺𑀲𑀤𑁆𑀤𑀭𑀳𑀺𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀧𑀘𑁆𑀘𑀬𑀪𑀽𑀢𑀲𑁆𑀲𑀸𑀢𑀺 𑀅𑀥𑀺𑀧𑀢𑀺𑀧𑀘𑁆𑀘𑀬𑀪𑀽𑀢𑀲𑁆𑀲. 𑀲𑀫𑁆𑀧𑀬𑀼𑀢𑁆𑀢𑀓𑀯𑀺𑀲𑁂𑀲𑀦𑀪𑀸𑀯𑁄𑀢𑀺 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀲𑁄 𑀏𑀯 𑀅𑀥𑀺𑀧𑀢𑀺𑀧𑀘𑁆𑀘𑀬𑀢𑀸𑀲𑀗𑁆𑀔𑀸𑀢𑁄 𑀯𑀺𑀲𑁂𑀲𑀦𑀪𑀸𑀯𑁄. 𑀏𑀲 𑀦𑀬𑁄𑀢𑀺 𑀇𑀫𑀺𑀦𑀸 ‘‘𑀯𑀻𑀭𑀺𑀬𑀸𑀥𑀺𑀧𑀢𑀺 𑀯𑀻𑀭𑀺𑀬𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀦𑁆𑀢𑀺𑀆𑀤𑀻𑀲𑀼 𑀧𑀼𑀭𑀺𑀫𑀯𑀻𑀭𑀺𑀬𑀲𑁆𑀲 𑀲𑀫𑀸𑀦𑀭𑀽𑀧𑁂𑀦𑀸’’𑀢𑀺𑀆𑀤𑀺𑀦𑀸 𑀯𑀢𑁆𑀢𑀩𑁆𑀩𑀁 𑀅𑀢𑁆𑀣𑀯𑀘𑀦𑀁 𑀅𑀢𑀺𑀤𑀺𑀲𑀢𑀺.

𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀦𑀁 𑀧𑀯𑀢𑁆𑀢𑀺𑀦𑁆𑀢𑀺 𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀦𑀁 𑀅𑀥𑀺𑀧𑀢𑀻𑀦𑀁 𑀧𑀯𑀢𑁆𑀢𑀦𑀸𑀓𑀸𑀭𑀁. 𑀅𑀮𑀤𑁆𑀥𑀁 𑀆𑀭𑀫𑁆𑀫𑀡𑀁 𑀮𑀤𑁆𑀥𑀩𑁆𑀩𑀁 𑀮𑀩𑁆𑀪𑀦𑀻𑀬𑀁, 𑀮𑀤𑁆𑀥𑀼𑀁 𑀯𑀸 𑀲𑀓𑁆𑀓𑀼𑀡𑁂𑀬𑁆𑀬𑀁, 𑀤𑀼𑀢𑀺𑀬𑁂 𑀧𑀦 𑀅𑀢𑁆𑀣𑁂 𑀮𑀸𑀪𑀫𑀭𑀳𑀢𑀻𑀢𑀺 𑀮𑀤𑁆𑀥𑀩𑁆𑀩𑀁. 𑀅𑀯𑀜𑁆𑀜𑀸𑀢𑀦𑁆𑀢𑀺 𑀧𑀕𑁂𑀯 𑀅𑀦𑀯𑀜𑁆𑀜𑀸𑀢𑀦𑁆𑀢𑀺 𑀅𑀢𑁆𑀣𑁄.

𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀸 𑀓𑀼𑀲𑀮𑀓𑀺𑀭𑀺𑀬𑀥𑀫𑁆𑀫𑀸 𑀫𑀳𑀸𑀩𑀮𑀸 𑀲𑀸𑀥𑀺𑀧𑀢𑀺𑀓𑀸 𑀏𑀯 𑀳𑁄𑀦𑁆𑀢𑀺, 𑀢𑀣𑀸 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸𑀧𑀻𑀢𑀺 𑀆𑀳 ‘‘𑀅𑀧𑁆𑀧𑀦𑀸𑀲𑀤𑀺𑀲𑀸…𑀧𑁂… 𑀦𑀼𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺. 𑀅𑀧𑁆𑀧𑀦𑀸𑀲𑀤𑀺𑀲𑀸𑀢𑀺 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀲𑀤𑀺𑀲𑀸. 𑀓𑀫𑁆𑀫𑀓𑀺𑀮𑁂𑀲𑀸𑀯𑀭𑀡𑀪𑀽𑀢𑀸 𑀘 𑀢𑁂𑀢𑀺 𑀢𑁂 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀥𑀫𑁆𑀫𑀸 𑀓𑀫𑁆𑀫𑀸𑀯𑀭𑀡𑀪𑀽𑀢𑀸, 𑀬𑁂 𑀆𑀦𑀦𑁆𑀢𑀭𑀺𑀬𑀧𑁆𑀧𑀓𑀸𑀭𑀸 𑀓𑀺𑀮𑁂𑀲𑀸𑀯𑀭𑀡𑀪𑀽𑀢𑀸, 𑀬𑁂 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀥𑀫𑁆𑀫𑀸, 𑀲𑀫𑁆𑀧𑀬𑀼𑀢𑁆𑀢𑀘𑁂𑀢𑀦𑀸𑀬 𑀧𑀦𑁂𑀢𑁆𑀣 𑀓𑀺𑀮𑁂𑀲𑀸𑀯𑀭𑀡𑀧𑀓𑁆𑀔𑀺𑀓𑀢𑀸 𑀤𑀝𑁆𑀞𑀩𑁆𑀩𑀸 𑀆𑀦𑀦𑁆𑀢𑀭𑀺𑀬𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀧𑀝𑀺𑀖𑀲𑁆𑀲 𑀓𑀫𑁆𑀫𑀸𑀯𑀭𑀡𑀧𑀓𑁆𑀔𑀺𑀓𑀢𑀸 𑀯𑀺𑀬. 𑀧𑀘𑁆𑀘𑀓𑁆𑀔𑀕𑀢𑀺 𑀅𑀦𑀦𑁆𑀢𑀭𑀢𑀸𑀬 𑀯𑀺𑀦𑀸 𑀪𑀸𑀯𑀺𑀦𑀻𑀢𑀺 𑀯𑀼𑀢𑁆𑀢𑀁 ‘‘𑀧𑀘𑁆𑀘𑀓𑁆𑀔𑀲𑀕𑁆𑀕𑀸𑀦𑀁 𑀓𑀸𑀫𑀸𑀯𑀘𑀭𑀤𑁂𑀯𑀸𑀦𑀫𑁆𑀧𑀻’’𑀢𑀺. 𑀢𑁂𑀦 𑀢𑁂𑀲𑀼 𑀆𑀦𑀦𑁆𑀢𑀭𑀺𑀬𑀸 𑀯𑀺𑀬 𑀅𑀲𑀫𑁆𑀪𑀸𑀯𑀺𑀦𑁄 𑀅𑀳𑁂𑀢𑀼𑀓𑀸𑀪𑀺𑀦𑀺𑀯𑁂𑀲𑀸𑀤𑀬𑁄𑀧𑀻𑀢𑀺 𑀤𑀲𑁆𑀲𑁂𑀢𑀺.

𑀢𑀺𑀯𑀺𑀥𑁄𑀧𑀺 𑀓𑀺𑀭𑀺𑀬𑀸𑀭𑀫𑁆𑀫𑀡𑀸𑀥𑀺𑀧𑀢𑀻𑀢𑀺 𑀏𑀢𑁆𑀣 𑀅𑀬𑀁 𑀓𑀺𑀭𑀺𑀬𑀸𑀭𑀫𑁆𑀫𑀡𑀸𑀥𑀺𑀧𑀢𑀻𑀢𑀺 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑁄 𑀅𑀥𑀺𑀧𑁆𑀧𑁂𑀢𑁄, 𑀉𑀤𑀸𑀳𑀼 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑁄𑀢𑀺 𑀉𑀪𑀬𑀣𑀸𑀧𑀺 𑀦 𑀲𑀫𑁆𑀪𑀯𑁄 𑀏𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀸𑀫𑀸𑀯𑀘𑀭𑀸𑀤𑀺𑀪𑁂𑀤𑀢𑁄 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀭𑀲𑀦𑁆𑀢𑀸𑀦𑀕𑀢𑀸𑀦𑀁 𑀲𑀸𑀭𑀫𑁆𑀫𑀡𑀥𑀫𑁆𑀫𑀸𑀦𑀁 𑀅𑀥𑀺𑀧𑀢𑀺𑀧𑀘𑁆𑀘𑀬𑀢𑀸 𑀦𑀢𑁆𑀣𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀪𑀸𑀯𑀢𑁄𑀢𑀺 𑀅𑀯𑀘𑀦𑀢𑁄. 𑀅𑀯𑀘𑀦𑀜𑁆𑀳𑀺 𑀦𑀸𑀫 𑀬𑀣𑀸𑀥𑀫𑁆𑀫𑀲𑀸𑀲𑀦𑁂 𑀅𑀪𑀺𑀥𑀫𑁆𑀫𑁂 𑀅𑀪𑀸𑀯𑁄 𑀏𑀯𑀸𑀢𑀺 𑀏𑀢𑁂𑀦𑁂𑀯 𑀅𑀦𑀼𑀤𑁆𑀥𑀝𑀢𑀸𑀧𑀺 𑀅𑀯𑀼𑀢𑁆𑀢𑀢𑁄 𑀯𑁂𑀤𑀺𑀢𑀩𑁆𑀩𑀸. 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀤𑁆𑀯𑀬𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀲𑀸𑀭𑀫𑁆𑀫𑀡𑀥𑀫𑁆𑀫𑀲𑁆𑀲 𑀅𑀪𑀸𑀯𑀢𑁄 𑀦𑀢𑁆𑀣𑀻𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺 𑀯𑀢𑁆𑀢𑀩𑁆𑀩𑁂 𑀢𑀫𑁂𑀯 𑀯𑀺𑀜𑁆𑀜𑀸𑀬𑀫𑀸𑀦𑀢𑀁 𑀲𑀫𑁆𑀪𑀸𑀯𑁂𑀦𑁆𑀢𑁄 ‘‘𑀦𑀢𑁆𑀣𑀻𑀢𑀺 𑀯𑀺𑀜𑁆𑀜𑀸𑀬𑀫𑀸𑀦𑁂𑀧𑀻’’𑀢𑀺 𑀆𑀳. 𑀢𑁂𑀦 𑀯𑀼𑀢𑁆𑀢𑀁 ‘‘𑀩𑀳𑀺𑀤𑁆𑀥𑀸 𑀔𑀦𑁆𑀥𑁂’’𑀢𑀺𑀆𑀤𑀺. 𑀭𑀽𑀧𑁂 𑀏𑀯 𑀪𑀯𑀺𑀢𑀼𑀁 𑀅𑀭𑀳𑀢𑀺 𑀏𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀅𑀭𑀽𑀧𑁂 𑀅𑀲𑀫𑁆𑀪𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀲𑀫𑁆𑀪𑀯𑀢𑁄 𑀘 𑀬𑀣𑀸𑀯𑀼𑀢𑁆𑀢𑀧𑀸𑀴𑀺𑀅𑀦𑀼𑀲𑀸𑀭𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺. ‘‘𑀯𑀺𑀘𑀸𑀭𑀺𑀢’’𑀦𑁆𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 ‘‘𑀅𑀢𑀻𑀢𑀸𑀭𑀫𑁆𑀫𑀡𑁂 𑀅𑀦𑀸𑀕𑀢𑁂 𑀔𑀦𑁆𑀥𑁂 𑀕𑀭𑀼𑀁 𑀓𑀢𑁆𑀯𑀸 𑀅𑀲𑁆𑀲𑀸𑀤𑁂𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄 𑀅𑀭𑀽𑀧𑁂𑀧𑀺 𑀏𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀔𑀦𑁆𑀥𑀲𑀤𑁆𑀤𑁄 𑀧𑀯𑀢𑁆𑀢𑀢𑁂𑀯. 𑀆𑀯𑀚𑁆𑀚𑀦𑀓𑀺𑀭𑀺𑀬𑀲𑀩𑁆𑀪𑀸𑀯𑀢𑁄 𑀧𑀦𑀸𑀢𑀺 𑀇𑀤𑀁 𑀬𑀣𑀸𑀤𑀲𑁆𑀲𑀺𑀢𑀧𑀸𑀴𑀺𑀬𑀸 𑀯𑀺𑀭𑁄𑀥𑀧𑀭𑀺𑀳𑀭𑀡𑀸𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀁, 𑀅𑀯𑀘𑀦𑀁 𑀧𑀦 𑀓𑀢𑁆𑀣𑀘𑀺 𑀯𑀺𑀦𑁂𑀬𑁆𑀬𑀚𑁆𑀛𑀸𑀲𑀬𑁂𑀦, 𑀓𑀢𑁆𑀣𑀘𑀺 𑀦𑀬𑀤𑀲𑁆𑀲𑀦𑁂𑀦 𑀳𑁄𑀢𑀻𑀢𑀺 𑀓𑀼𑀢𑁄 𑀯𑀺𑀭𑁄𑀥𑀸𑀯𑀲𑀭𑁄.

𑀅𑀥𑀺𑀧𑀢𑀺𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀅𑀦𑀦𑁆𑀢𑀭𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁪. 𑀬𑀣𑀸𑀯𑀼𑀢𑁆𑀢𑀸 𑀦𑀺𑀭𑁄𑀥𑀸𑀦𑀦𑁆𑀢𑀭𑀲𑀼𑀜𑁆𑀜𑀢𑀸 𑀦𑀺𑀭𑁄𑀥𑀧𑁆𑀧𑀢𑁆𑀢𑀢𑀸 𑀑𑀓𑀸𑀲𑀤𑀸𑀦𑀯𑀺𑀲𑁂𑀲𑁄, 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑀘𑀺𑀢𑁆𑀢𑀼𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸 𑀘𑀺𑀢𑁆𑀢𑀦𑀺𑀬𑀫𑀳𑁂𑀢𑀼𑀢𑀸, 𑀢𑀢𑁆𑀣 𑀅𑀦𑀦𑁆𑀢𑀭𑀼𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸 𑀘 𑀲𑀡𑁆𑀞𑀸𑀦𑀸𑀪𑀸𑀯𑀢𑁄 𑀲𑀼𑀝𑁆𑀞𑀼𑀢𑀭𑀁 𑀦𑀺𑀭𑀦𑁆𑀢𑀭𑀼𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸 𑀘 𑀘𑀺𑀢𑁆𑀢𑀦𑀺𑀬𑀫𑀳𑁂𑀢𑀼𑀯𑀺𑀲𑁂𑀲𑁄 𑀤𑀝𑁆𑀞𑀩𑁆𑀩𑁄. 𑀥𑀸𑀢𑀼𑀯𑀲𑁂𑀦𑀸𑀢𑀺 𑀯𑀺𑀜𑁆𑀜𑀸𑀡𑀥𑀸𑀢𑀼𑀫𑀦𑁄𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀯𑀲𑁂𑀦. 𑀏𑀢𑁆𑀢𑀓𑀸 𑀏𑀯 𑀳𑀺 𑀥𑀸𑀢𑀼𑀬𑁄 𑀪𑀺𑀦𑁆𑀦𑀲𑀪𑀸𑀯𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑀢𑀸𑀬 𑀦𑀺𑀬𑀫𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑀸, 𑀅𑀪𑀺𑀦𑁆𑀦𑀲𑀪𑀸𑀯𑀸 𑀧𑀦 𑀯𑀺𑀲𑁂𑀲𑀸𑀪𑀸𑀯𑀢𑁄 𑀧𑀼𑀭𑀺𑀫𑀢𑀸𑀫𑀢𑁆𑀢𑀁𑀬𑁂𑀯 𑀯𑀺𑀲𑁂𑀲𑀁 𑀧𑀼𑀭𑀓𑁆𑀔𑀢𑁆𑀯𑀸 𑀯𑀢𑁆𑀢𑀩𑁆𑀩𑀸𑀢𑀺 𑀢𑀸 𑀓𑀼𑀲𑀮𑀸𑀤𑀺𑀪𑁂𑀤𑁂𑀦 𑀢𑀣𑀸 𑀯𑀼𑀢𑁆𑀢𑀸. 𑀢𑁂𑀦𑀸𑀳 ‘‘𑀓𑀼𑀲𑀮𑀸𑀤𑀺𑀯𑀲𑁂𑀦 𑀘𑀸’’𑀢𑀺. 𑀬𑀸 𑀧𑀦 𑀫𑀦𑁄𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀯𑀲𑁂𑀦 𑀅𑀦𑀦𑁆𑀢𑀭𑀧𑀘𑁆𑀘𑀬𑀢𑀸 𑀯𑀢𑁆𑀢𑀩𑁆𑀩𑀸, 𑀢𑀢𑁆𑀣 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀫𑀦𑁄𑀥𑀸𑀢𑀼𑀬𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀯𑀼𑀘𑁆𑀘𑀫𑀸𑀦𑁄 𑀲𑀫𑁆𑀫𑁄𑀳𑁄 𑀲𑀺𑀬𑀸, 𑀧𑀼𑀭𑁂 𑀫𑀦𑁄𑀥𑀸𑀢𑀼𑀬𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀸𑀯𑁂𑀦 𑀯𑀼𑀢𑁆𑀢𑀸, 𑀇𑀤𑀸𑀦𑀺 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀫𑀦𑁄𑀥𑀸𑀢𑀼𑀬𑀸𑀢𑀺 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀯𑀺𑀲𑁂𑀲𑀸 𑀦 𑀯𑀺𑀜𑁆𑀜𑀸𑀬𑁂𑀬𑁆𑀬, 𑀫𑀦𑁄𑀥𑀸𑀢𑀼𑀬𑀸 𑀧𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀥𑀸𑀢𑀽𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀸𑀯𑁂 𑀯𑀼𑀘𑁆𑀘𑀫𑀸𑀦𑁂 𑀦𑀺𑀬𑀫𑁄 𑀦𑀢𑁆𑀣𑀺. 𑀢𑁂𑀦𑀸𑀳 ‘‘𑀫𑀦𑁄𑀥𑀸𑀢𑀼 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸𑀢𑀺 𑀘𑀸’’𑀢𑀺. 𑀢𑀣𑁂𑀯𑀸𑀢𑀺 𑀦𑀺𑀬𑀫𑀸𑀪𑀸𑀯𑀢𑁄 𑀏𑀯𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀇𑀢𑁄 𑀅𑀜𑁆𑀜𑀣𑀸 𑀤𑁂𑀲𑀦𑀸𑀬 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀯𑀺𑀲𑁂𑀲𑀸𑀪𑀸𑀯𑁄 𑀘𑀺𑀢𑁆𑀢𑀯𑀺𑀲𑁂𑀲𑀤𑀲𑁆𑀲𑀦𑀯𑀺𑀘𑁆𑀙𑁂𑀤𑁄 𑀦𑀺𑀬𑀫𑀸𑀪𑀸𑀯𑁄 𑀘𑀸𑀢𑀺 𑀇𑀫𑁂 𑀤𑁄𑀲𑀸 𑀆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀫𑀸. 𑀦𑀺𑀤𑀲𑁆𑀲𑀦𑁂𑀦𑀸𑀢𑀺 𑀥𑀸𑀢𑀼𑀯𑀲𑁂𑀦 𑀦𑀺𑀤𑀲𑁆𑀲𑀦𑁂𑀦. 𑀦𑀬𑀁 𑀤𑀲𑁆𑀲𑁂𑀢𑁆𑀯𑀸𑀢𑀺 ‘‘𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸 𑀘 𑀥𑀫𑁆𑀫𑀸 𑀫𑀦𑁄𑀥𑀸𑀢𑀼𑀬𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀏𑀯𑀫𑀸𑀤𑀺𑀓𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑀢𑀸𑀕𑁆𑀕𑀳𑀡𑀲𑁆𑀲 𑀦𑀬𑀁 𑀤𑀲𑁆𑀲𑁂𑀢𑁆𑀯𑀸. 𑀦𑀺𑀭𑀯𑀲𑁂𑀲𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀦𑀺𑀭𑀯𑀲𑁂𑀲𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀸𑀯𑀺𑀦𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀤𑀲𑁆𑀲𑀦𑀢𑁆𑀣𑀁.

𑀲𑀤𑀺𑀲𑀓𑀼𑀲𑀮𑀸𑀦𑀦𑁆𑀢𑀺 𑀲𑀫𑀸𑀦𑀓𑀼𑀲𑀮𑀸𑀦𑀁, 𑀲𑀫𑀸𑀦𑀢𑀸 𑀘𑁂𑀢𑁆𑀣 𑀏𑀓𑀯𑀻𑀣𑀺𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦𑁂𑀯𑀸𑀳 ‘‘𑀪𑀽𑀫𑀺𑀪𑀺𑀦𑁆𑀦𑀸𑀦𑀫𑁆𑀧𑀺 𑀧𑀘𑁆𑀘𑀬𑀪𑀸𑀯𑁄 𑀯𑀼𑀢𑁆𑀢𑁄 𑀳𑁄𑀢𑀻’’𑀢𑀺. 𑀲𑀫𑀸𑀦𑀯𑀻𑀣𑀺𑀢𑀸 𑀘 𑀬𑀲𑁆𑀫𑀸 𑀲𑀫𑀸𑀦𑀯𑁂𑀤𑀦𑀸 𑀲𑀫𑀸𑀦𑀳𑁂𑀢𑀼𑀓𑀸 𑀘 𑀳𑁄𑀦𑁆𑀢𑀺, 𑀢𑀲𑁆𑀫𑀸 ‘‘𑀯𑁂𑀤𑀦𑀸𑀬 𑀯𑀸 𑀳𑁂𑀢𑀽𑀳𑀺 𑀯𑀸 𑀲𑀤𑀺𑀲𑀓𑀼𑀲𑀮𑀸𑀦’’𑀦𑁆𑀢𑀺 𑀆𑀳. 𑀯𑀸-𑀲𑀤𑁆𑀤𑁄 𑀘𑁂𑀢𑁆𑀣 𑀅𑀦𑀺𑀬𑀫𑀢𑁆𑀣𑁄. 𑀢𑁂𑀦 𑀜𑀸𑀡𑀲𑀗𑁆𑀔𑀸𑀭𑀸𑀤𑀺𑀪𑁂𑀤𑀲𑁆𑀲𑀧𑀺 𑀯𑀺𑀓𑀧𑁆𑀧𑀦𑀯𑀲𑁂𑀦 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀘𑀼𑀢𑀺𑀧𑀺 𑀕𑀳𑀺𑀢𑀸 𑀢𑀁𑀲𑀪𑀸𑀯𑀢𑁆𑀢𑀸. 𑀪𑀯𑀗𑁆𑀕𑀘𑀺𑀢𑁆𑀢𑀫𑁂𑀯 𑀳𑀺 𑀧𑀭𑀺𑀬𑁄𑀲𑀸𑀦𑁂 ‘‘𑀘𑀼𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀓𑀼𑀲𑀮𑀸𑀓𑀼𑀲𑀮𑀸𑀦𑀦𑁆𑀢𑀭𑀜𑁆𑀘 𑀓𑀤𑀸𑀘𑀺 𑀲𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀢𑀤𑀸𑀭𑀫𑁆𑀫𑀡𑀫𑁆𑀧𑀺 𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁, 𑀓𑀺𑀭𑀺𑀬𑀚𑀯𑀦𑀸𑀦𑀦𑁆𑀢𑀭𑀁 𑀢𑀤𑀸𑀭𑀫𑁆𑀫𑀡𑀼𑀧𑁆𑀧𑀢𑁆𑀢𑀺𑀬𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀸𑀬 𑀆𑀯𑀚𑁆𑀚𑀦𑀲𑁆𑀲𑀸𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀆𑀯𑀚𑁆𑀚𑀦𑀕𑁆𑀕𑀳𑀡𑁂𑀦 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀁 𑀯𑀺𑀲𑁂𑀲𑁂𑀢𑀻’’𑀢𑀺 𑀆𑀳. 𑀢𑀫𑁂𑀯 𑀳𑀺 𑀅𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 ‘‘𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑁄𑀝𑁆𑀞𑀩𑁆𑀩𑀦𑀫𑁆𑀧𑀺 𑀕𑀳𑀺𑀢𑀁 𑀲𑀦𑁆𑀢𑀻𑀭𑀡𑀸𑀦𑀦𑁆𑀢𑀭𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀦𑀦𑁆𑀢𑀭𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑀳𑀚𑀸𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁬. 𑀧𑁄𑀭𑀸𑀡𑀧𑀸𑀞𑁄𑀢𑀺 𑀧𑀼𑀭𑀸𑀢𑀦𑁄 𑀅𑀝𑁆𑀞𑀓𑀣𑀸𑀧𑀸𑀞𑁄. 𑀇𑀫𑀲𑁆𑀲𑀸𑀢𑀺 𑀇𑀫𑀲𑁆𑀲 𑀧𑀤𑀲𑁆𑀲. 𑀅𑀯𑀼𑀢𑁆𑀢𑀲𑁆𑀲𑀸𑀢𑀺 𑀧𑀸𑀴𑀺𑀬𑀁 𑀅𑀯𑀼𑀢𑁆𑀢𑀲𑁆𑀲. 𑀬𑀤𑀺𑀧𑀺 𑀲𑀳𑀕𑀢𑀲𑀤𑁆𑀤𑀲𑁆𑀲 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀬𑀁 𑀲𑀁𑀲𑀝𑁆𑀞𑀲𑀤𑁆𑀤𑀲𑁆𑀲 𑀯𑀺𑀬 𑀲𑀫𑀸𑀦𑀢𑁆𑀣𑀲𑁆𑀲𑀧𑀺 𑀓𑀢𑁆𑀣𑀘𑀺 𑀲𑀤𑁆𑀤𑀦𑁆𑀢𑀭𑀲𑁆𑀲 𑀅𑀢𑁆𑀣𑁄 𑀯𑀼𑀘𑁆𑀘𑀢𑀺 𑀧𑀭𑀺𑀬𑀸𑀬𑀯𑀺𑀲𑁂𑀲𑀩𑁄𑀥𑀦𑀢𑁆𑀣𑀁, 𑀢𑀣𑀸𑀧𑀺 𑀦 𑀫𑀽𑀮𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀯𑀺𑀪𑀸𑀯𑀺𑀢𑁄 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦 𑀘…𑀧𑁂… 𑀳𑁄𑀢𑀻’’𑀢𑀺. ‘‘𑀅𑀜𑁆𑀜𑀫𑀜𑁆𑀜’’𑀦𑁆𑀢𑀺 𑀘 ‘‘𑀅𑀜𑁆𑀜𑀅𑀜𑁆𑀜’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀫-𑀓𑀸𑀭𑀸𑀕𑀫𑀁 𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁄, 𑀓𑀫𑁆𑀫𑀩𑁆𑀬𑀢𑀺𑀳𑀸𑀭𑁂 𑀘𑁂𑀢𑀁 𑀧𑀤𑀁, 𑀢𑀲𑁆𑀫𑀸 𑀇𑀢𑀭𑁂𑀢𑀭𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀏𑀓𑀲𑁆𑀫𑀺𑀁𑀬𑁂𑀯 𑀔𑀡𑁂 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀧𑀘𑁆𑀘𑀬𑀪𑀸𑀯𑀲𑁆𑀲 𑀇𑀘𑁆𑀙𑀺𑀢𑀢𑁆𑀢𑀸 𑀬𑁄 𑀳𑀺 𑀬𑀲𑁆𑀲 𑀧𑀘𑁆𑀘𑀬𑁄 𑀬𑀲𑁆𑀫𑀺𑀁 𑀔𑀡𑁂, 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀲𑁄𑀧𑀺 𑀢𑀲𑁆𑀲 𑀧𑀘𑁆𑀘𑀬𑁄𑀢𑀺 𑀅𑀬𑀫𑁂𑀢𑁆𑀣 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀢𑀸. 𑀢𑀣𑀸 𑀳𑀺 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀜𑁆𑀜𑁄 𑀅𑀜𑁆𑀜𑀲𑁆𑀲𑀸’’𑀢𑀺 𑀯𑀢𑁆𑀯𑀸 ‘‘𑀇𑀫𑀺𑀦𑀸…𑀧𑁂… 𑀤𑀻𑀧𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀑𑀓𑁆𑀓𑀫𑀦𑀁 𑀧𑀯𑀺𑀲𑀦𑀦𑁆𑀢𑀺 𑀅𑀢𑁆𑀣𑁄. 𑀆𑀲𑀦𑀓𑁆𑀔𑀡𑁂 𑀳𑀺 𑀥𑀫𑁆𑀫𑀸 𑀧𑀼𑀭𑀺𑀫𑀪𑀯𑀢𑁄 𑀇𑀫𑀁 𑀪𑀯𑀁 𑀧𑀯𑀺𑀲𑀦𑁆𑀢𑀸 𑀯𑀺𑀬 𑀳𑁄𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀭𑀮𑁄𑀓𑀢𑁄 𑀇𑀫𑀁 𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀧𑀯𑀺𑀲𑀦𑁆𑀢𑀁 𑀯𑀺𑀬 𑀉𑀧𑁆𑀧𑀚𑁆𑀚𑀢𑀻’’𑀢𑀺. 𑀢𑀲𑁆𑀫𑀸 𑀅𑀯𑀺𑀲𑁂𑀲𑁂𑀦 𑀧𑀝𑀺𑀲𑀦𑁆𑀥𑀺 𑀑𑀓𑁆𑀓𑀦𑁆𑀢𑀺𑀲𑀤𑁆𑀤𑀸𑀪𑀺𑀥𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀁 ‘‘𑀑𑀓𑁆𑀓𑀦𑁆𑀢𑀺…𑀧𑁂… 𑀅𑀥𑀺𑀧𑁆𑀧𑀸𑀬𑁂𑀦𑀸𑀳𑀸’’𑀢𑀺. 𑀢𑀁𑀦𑀺𑀯𑀸𑀭𑀡𑀢𑁆𑀣𑀦𑁆𑀢𑀺 𑀢𑀲𑁆𑀲 𑀔𑀡𑀦𑁆𑀢𑀭𑁂 𑀭𑀽𑀧𑀻𑀦𑀁 𑀲𑀳𑀚𑀸𑀢𑀧𑀘𑁆𑀘𑀬𑀪𑀸𑀯𑀲𑁆𑀲 ‘‘𑀓𑀜𑁆𑀘𑀺 𑀓𑀸𑀮𑁂 𑀦 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀦𑀺𑀯𑀸𑀭𑀡𑀢𑁆𑀣𑀁. 𑀢𑁂𑀦 𑀧𑀤𑀤𑁆𑀯𑀬𑁂𑀦 𑀲𑀫𑀸𑀦𑁂𑀲𑀼 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑁂𑀲𑀼 𑀧𑀼𑀭𑀺𑀫𑀢𑁄 𑀧𑀘𑁆𑀙𑀺𑀫𑀲𑁆𑀲 𑀯𑀺𑀲𑁂𑀲𑀫𑀢𑁆𑀣𑀁 𑀤𑀲𑁆𑀲𑁂𑀢𑀺.

𑀏𑀯𑀜𑁆𑀘 ‘‘𑀓𑀜𑁆𑀘𑀺 𑀓𑀸𑀮𑁂’’𑀢𑀺 𑀧𑀤𑀲𑁆𑀲 ‘‘𑀓𑁂𑀘𑀺 𑀓𑀸𑀮𑁂𑀢𑀺 𑀯𑀸, 𑀓𑀺𑀲𑁆𑀫𑀺𑀜𑁆𑀘𑀺 𑀓𑀸𑀮𑁂’’𑀢𑀺 𑀯𑀸 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀧𑀞𑀫𑀯𑀺𑀓𑀧𑁆𑀧𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀓𑀸𑀭𑀦𑁆𑀢𑀭𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀓𑀜𑁆𑀘𑀺 𑀓𑀸𑀮𑁂𑀢𑀺 𑀓𑁂𑀘𑀺 𑀓𑀺𑀲𑁆𑀫𑀺𑀜𑁆𑀘𑀺 𑀓𑀸𑀮𑁂𑀢𑀺 𑀯𑀸 𑀅𑀢𑁆𑀣𑁄’’𑀢𑀺 𑀆𑀳. 𑀢𑁂𑀦 ‘‘𑀓𑀜𑁆𑀘𑀻’’𑀢𑀺 𑀅𑀬𑀁 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁄𑀢𑀺 𑀤𑀲𑁆𑀲𑁂𑀢𑀺. 𑀬𑁄 𑀳𑀺 𑀅𑀬𑀁 ‘‘𑀓𑁂𑀘𑀻’’𑀢𑀺 𑀧𑀘𑁆𑀘𑀢𑁆𑀢𑀩𑀳𑀼𑀯𑀘𑀦𑀸𑀪𑀺𑀥𑁂𑀬𑁆𑀬𑁄 𑀅𑀢𑁆𑀣𑁄, 𑀬𑁄 𑀘 ‘‘𑀓𑀺𑀲𑁆𑀫𑀺𑀜𑁆𑀘𑀻’’𑀢𑀺 𑀪𑀼𑀫𑁆𑀫𑁂𑀓𑀯𑀘𑀦𑀸𑀪𑀺𑀥𑁂𑀬𑁆𑀬𑁄, 𑀢𑀤𑀼𑀪𑀬𑀁 𑀲𑀢𑀺 𑀓𑀸𑀮𑀯𑀦𑁆𑀢𑀓𑀸𑀮𑀢𑀸𑀯𑀺𑀪𑀸𑀕𑁂 𑀓𑀺𑀁-𑀲𑀤𑁆𑀤𑀲𑁆𑀲 𑀯𑀘𑀦𑀻𑀬𑀢𑀸𑀲𑀸𑀫𑀜𑁆𑀜𑁂𑀦 𑀧𑀦 𑀏𑀓𑀚𑁆𑀛𑀁 𑀓𑀢𑁆𑀯𑀸 ‘‘𑀓𑀜𑁆𑀘𑀻’’𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀢𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀓𑁂𑀘𑀺 𑀓𑀺𑀲𑁆𑀫𑀺𑀜𑁆𑀘𑀻’’𑀢𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀓𑀺𑀲𑁆𑀫𑀺𑀜𑁆𑀘𑀻’’𑀢𑀺 𑀪𑀼𑀫𑁆𑀫𑀯𑀲𑁂𑀦𑁂𑀯 𑀯𑀼𑀢𑁆𑀢𑀁. 𑀢𑁂𑀦 𑀬𑀣𑀸𑀯𑀼𑀢𑁆𑀢𑀅𑀢𑁆𑀣𑀯𑀺𑀪𑀸𑀕𑁂𑀦 𑀧𑀤𑁂𑀦. 𑀯𑀢𑁆𑀣𑀼𑀪𑀽𑀢𑀸𑀢𑀺 𑀯𑀢𑁆𑀣𑀼𑀲𑀪𑀸𑀯𑀸. 𑀳𑀤𑀬𑀭𑀽𑀧𑀫𑁂𑀯 𑀲𑀦𑁆𑀥𑀸𑀬 𑀯𑀤𑀢𑀺. 𑀭𑀽𑀧𑀦𑁆𑀢𑀭𑀸𑀦𑀦𑁆𑀢𑀺 𑀳𑀤𑀬𑀯𑀢𑁆𑀣𑀼𑀢𑁄 𑀅𑀜𑁆𑀜𑀭𑀽𑀧𑀸𑀦𑀁. 𑀅𑀭𑀽𑀧𑀻𑀦𑀁 𑀲𑀳𑀚𑀸𑀢𑀧𑀘𑁆𑀘𑀬𑀢𑀁 𑀧𑀼𑀩𑁆𑀩𑁂 ‘‘𑀑𑀓𑁆𑀓𑀦𑁆𑀢𑀺𑀓𑁆𑀔𑀡𑁂 𑀦𑀸𑀫𑀭𑀽𑀧’’𑀦𑁆𑀢𑀺 𑀏𑀢𑁆𑀣 𑀅𑀦𑀺𑀯𑀸𑀭𑀺𑀢𑀁 𑀦𑀺𑀯𑀸𑀭𑁂𑀢𑀻𑀢𑀺 𑀬𑁄𑀚𑀦𑀸, 𑀢𑀣𑀸 𑀯𑀢𑁆𑀣𑀼𑀲𑁆𑀲 𑀘 𑀓𑀸𑀮𑀦𑁆𑀢𑀭𑁂 𑀧𑀝𑀺𑀲𑀦𑁆𑀥𑀺𑀓𑀸𑀮𑀢𑁄 𑀅𑀜𑁆𑀜𑀲𑁆𑀫𑀺𑀁 𑀓𑀸𑀮𑁂 𑀅𑀭𑀽𑀧𑀻𑀦𑀁 𑀦𑀺𑀯𑀸𑀭𑁂𑀢𑀻𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀅𑀢𑁆𑀣𑀯𑀡𑁆𑀡𑀦𑀸𑀬 𑀧𑀸𑀴𑀺𑀬𑀁 𑀯𑀺𑀪𑀢𑁆𑀢𑀺𑀦𑀺𑀤𑁆𑀤𑁂𑀲𑀲𑁆𑀲 𑀭𑀽𑀧𑀓𑀪𑀸𑀯𑀫𑀸𑀳. 𑀧𑀼𑀦𑀧𑀺 𑀧𑀼𑀭𑀺𑀫𑀢𑁄 𑀧𑀘𑁆𑀙𑀺𑀫𑀲𑁆𑀲 𑀉𑀧𑀘𑀬𑁂𑀦 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀭𑀺𑀫𑁂𑀦 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀼𑀭𑀺𑀫𑁂𑀦𑀸𑀢𑀺 ‘‘𑀑𑀓𑁆𑀓𑀦𑁆𑀢𑀺𑀓𑁆𑀔𑀡𑁂 𑀦𑀸𑀫𑀭𑀽𑀧’’𑀦𑁆𑀢𑀺 𑀇𑀫𑀺𑀦𑀸 𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀘𑀦𑁂𑀦. ‘‘𑀏𑀓𑁄 𑀔𑀦𑁆𑀥𑁄 𑀯𑀢𑁆𑀣𑀼 𑀘 𑀢𑀺𑀡𑁆𑀡𑀁 𑀔𑀦𑁆𑀥𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀧𑀝𑀺𑀘𑁆𑀘𑀯𑀸𑀭𑀸𑀤𑀺𑀧𑀸𑀞𑁂𑀦. 𑀅𑀢𑁆𑀣𑀯𑀺𑀯𑀭𑀡𑀜𑁆𑀳𑀺 𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀧𑀸𑀴𑀺𑀬𑀸 𑀲𑀩𑁆𑀩𑁂𑀧𑀺 𑀲𑀢𑁆𑀢 𑀫𑀳𑀸𑀯𑀸𑀭𑀸. 𑀯𑀢𑁆𑀣𑀼𑀲𑁆𑀲 𑀯𑀢𑁆𑀢𑀩𑁆𑀩𑀢𑁆𑀢𑁂 𑀆𑀧𑀦𑁆𑀦𑁂 𑀓𑀺𑀦𑁆𑀢𑀺 𑀧𑀘𑁆𑀘𑀬𑁄𑀢𑀺 𑀢𑀲𑁆𑀲 𑀦𑀸𑀫𑀲𑁆𑀲𑀸𑀢𑀺 𑀬𑁄𑀚𑀦𑀸. 𑀏𑀢𑁂𑀦𑀸𑀢𑀺 ‘‘𑀭𑀽𑀧𑀺𑀦𑁄 𑀥𑀫𑁆𑀫𑀸 𑀅𑀭𑀽𑀧𑀻𑀦𑀁 𑀥𑀫𑁆𑀫𑀸𑀦’’𑀦𑁆𑀢𑀺 𑀏𑀢𑁂𑀦 𑀯𑀘𑀦𑁂𑀦. 𑀓𑁂𑀯𑀮𑀲𑁆𑀲𑀸𑀢𑀺 𑀦𑀸𑀫𑀭𑀳𑀺𑀢𑀲𑁆𑀲 𑀯𑀢𑁆𑀣𑀼𑀲𑁆𑀲. 𑀢𑀣𑀸𑀢𑀺 𑀦𑀸𑀫𑀲𑁆𑀲 𑀧𑀘𑁆𑀘𑀬𑀪𑀸𑀯𑁂𑀦.

𑀓𑀢𑁆𑀣𑀘𑀻𑀢𑀺 ‘‘𑀭𑀽𑀧𑀺𑀦𑁄 𑀥𑀫𑁆𑀫𑀸 𑀅𑀭𑀽𑀧𑀻𑀦𑀁 𑀥𑀫𑁆𑀫𑀸𑀦𑀁 𑀓𑀜𑁆𑀘𑀺 𑀓𑀸𑀮𑀁 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀏𑀢𑀲𑁆𑀫𑀺𑀁 𑀦𑀺𑀤𑁆𑀤𑁂𑀲𑁂. 𑀏𑀢𑁆𑀣 𑀳𑀺 𑀅𑀜𑁆𑀜𑀫𑀜𑁆𑀜𑀲𑀳𑀚𑀸𑀢𑀧𑀘𑁆𑀘𑀬𑀪𑀸𑀯𑁄 𑀮𑀩𑁆𑀪𑀢𑀺. 𑀯𑀘𑀦𑁂𑀦𑀸𑀢𑀺 ‘‘𑀅𑀜𑁆𑀜𑀫𑀜𑁆𑀜’’𑀦𑁆𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀧𑀸𑀴𑀺𑀬𑀁 𑀲𑀳𑀚𑀸𑀢𑀧𑀘𑁆𑀘𑀬𑀪𑀸𑀯𑀲𑁆𑀲 𑀅𑀲𑀗𑁆𑀕𑀳𑀺𑀢𑀢𑁆𑀢𑀸, 𑀅𑀢𑁆𑀣𑀢𑁄 𑀧𑀦 𑀮𑀩𑁆𑀪𑀢𑁂𑀯𑀸𑀢𑀺. 𑀢𑁂𑀦𑀸𑀳 ‘‘𑀮𑀩𑁆𑀪𑀫𑀸𑀦𑁂𑀧𑀻’’𑀢𑀺. 𑀢𑀲𑁆𑀲𑀸𑀢𑀺 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀢𑁆𑀢𑀲𑁆𑀲. 𑀏𑀯𑀦𑁆𑀢𑀺 ‘‘𑀦 𑀅𑀜𑁆𑀜𑀫𑀜𑁆𑀜𑀯𑀲𑁂𑀦𑀸’’𑀢𑀺 𑀇𑀫𑀺𑀦𑀸 𑀧𑀓𑀸𑀭𑁂𑀦. 𑀲𑀫𑀼𑀤𑀸𑀬𑁂𑀓𑀤𑁂𑀲𑀯𑀲𑁂𑀦 𑀲𑀸𑀫𑀺𑀯𑀘𑀦𑀦𑁆𑀢𑀺 𑀅𑀯𑀬𑀯𑀸𑀯𑀬𑀯𑀺𑀲𑀫𑁆𑀩𑀦𑁆𑀥𑁂 𑀅𑀯𑀬𑀯𑀺𑀦𑀺 𑀲𑀸𑀫𑀺𑀯𑀘𑀦𑀦𑁆𑀢𑀺 𑀅𑀢𑁆𑀣𑁄, 𑀦𑀺𑀤𑁆𑀥𑀸𑀭𑀡𑁂 𑀯𑀸 ‘‘𑀓𑀡𑁆𑀳𑀸 𑀕𑀸𑀯𑀻𑀦’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬.

𑀲𑀳𑀚𑀸𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀦𑀺𑀲𑁆𑀲𑀬𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁮. 𑀓𑀺𑀲𑁆𑀫𑀺𑀜𑁆𑀘𑀺 𑀓𑀸𑀮𑁂𑀢𑀺 𑀇𑀤𑀁 𑀦 𑀮𑀩𑁆𑀪𑀢𑀺 𑀲𑀩𑁆𑀩𑀤𑀸𑀧𑀺 𑀦𑀺𑀲𑁆𑀲𑀬𑀧𑀘𑁆𑀘𑀬𑀢𑀸𑀬 𑀮𑀩𑁆𑀪𑀫𑀸𑀦𑀢𑁆𑀢𑀸. 𑀲𑀳𑀚𑀁 𑀧𑀼𑀭𑁂𑀚𑀦𑁆𑀢𑀺 𑀳𑀺 𑀯𑀺𑀪𑀸𑀕𑀁 𑀅𑀦𑀸𑀫𑀲𑀺𑀢𑁆𑀯𑀸 𑀦𑀺𑀲𑁆𑀲𑀬𑀢𑀸𑀫𑀢𑁆𑀢𑀫𑁂𑀯 𑀦𑀺𑀲𑁆𑀲𑀬𑀧𑀘𑁆𑀘𑀬𑀢𑀸. 𑀯𑀢𑁆𑀣𑀼𑀭𑀽𑀧𑀁 𑀧𑀜𑁆𑀘𑀯𑁄𑀓𑀸𑀭𑀪𑀯𑁂𑀢𑀺 𑀯𑀢𑁆𑀣𑀼𑀭𑀽𑀧𑀁 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀘𑀸𑀢𑀺 𑀘-𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄 𑀤𑀝𑁆𑀞𑀩𑁆𑀩𑁄. 𑀢𑀲𑁆𑀲𑀸𑀢𑀺 𑀆𑀭𑀼𑀧𑁆𑀧𑀯𑀺𑀧𑀸𑀓𑀝𑁆𑀞𑀧𑀦𑀲𑁆𑀲. 𑀧𑀓𑀸𑀲𑁂𑀢𑀩𑁆𑀩𑀢𑁆𑀢𑀸𑀢𑀺 𑀇𑀫𑀺𑀦𑀸 𑀅𑀧𑀸𑀓𑀝𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀯𑀘𑀦𑁂𑀦 𑀘𑁄𑀤𑀦𑀸 𑀅𑀦𑁄𑀓𑀸𑀲𑀸𑀢𑀺 𑀤𑀲𑁆𑀲𑁂𑀢𑀺.

𑀦𑀺𑀲𑁆𑀲𑀬𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯. 𑀉𑀧𑀦𑀺𑀲𑁆𑀲𑀬𑁂 𑀢𑀬𑁄𑀢𑀺 𑀅𑀦𑀦𑁆𑀢𑀭𑀸𑀭𑀫𑁆𑀫𑀡𑀧𑀓𑀢𑀽𑀧𑀦𑀺𑀲𑁆𑀲𑀬𑀧𑁆𑀧𑀪𑁂𑀤𑁂 𑀢𑀬𑁄 𑀉𑀧𑀦𑀺𑀲𑁆𑀲𑀬𑁂. 𑀅𑀦𑁂𑀓𑀲𑀗𑁆𑀕𑀸𑀳𑀓𑀢𑀸𑀬𑀸𑀢𑀺 𑀅𑀦𑁂𑀓𑁂𑀲𑀁 𑀧𑀘𑁆𑀘𑀬𑀥𑀫𑁆𑀫𑀸𑀦𑀁 𑀲𑀗𑁆𑀕𑀳𑀡𑀢𑁄. 𑀏𑀓𑀦𑁆𑀢𑁂𑀦𑁂𑀯 𑀳𑁄𑀦𑁆𑀢𑀺 𑀘𑀺𑀢𑁆𑀢𑀦𑀺𑀬𑀫𑀳𑁂𑀢𑀼𑀪𑀸𑀯𑁂𑀦 𑀧𑀯𑀢𑁆𑀢𑀺𑀦𑀺𑀬𑀫𑀢𑁄. 𑀬𑁂𑀲𑀼 𑀧𑀤𑁂𑀲𑀽𑀢𑀺 𑀬𑁂𑀲𑀼 𑀓𑀼𑀲𑀮𑀸𑀤𑀺𑀧𑀤𑁂𑀲𑀼. 𑀲𑀗𑁆𑀕𑀳𑀺𑀢𑁄𑀢𑀺 𑀲𑀗𑁆𑀕𑀳𑀁 𑀕𑀢𑁄, 𑀓𑀼𑀲𑀮𑀸𑀤𑀺𑀧𑀤𑁂𑀲𑀼 𑀬𑁂𑀲𑀁 𑀧𑀤𑀸𑀦𑀁𑀬𑁂𑀯 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁄 𑀮𑀩𑁆𑀪𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀲𑀼 ‘‘𑀓𑁂𑀲𑀜𑁆𑀘𑀻’’𑀢𑀺 𑀦 𑀯𑀼𑀢𑁆𑀢𑀁. 𑀓𑀲𑁆𑀫𑀸? 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀏𑀓𑀦𑁆𑀢𑁂𑀦𑁂𑀯 𑀉𑀧𑀮𑀩𑁆𑀪𑀦𑀢𑁄. 𑀢𑁂𑀲𑀽𑀢𑀺 𑀓𑀼𑀲𑀮𑀸𑀓𑀼𑀲𑀮𑀧𑀤𑁂𑀲𑀼. 𑀦 𑀳𑀺 𑀓𑀼𑀲𑀮𑁄 𑀅𑀓𑀼𑀲𑀮𑀲𑁆𑀲 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁄 𑀳𑁄𑀢𑀺, 𑀅𑀓𑀼𑀲𑀮𑁄 𑀯𑀸 𑀓𑀼𑀲𑀮𑀲𑁆𑀲, 𑀆𑀭𑀫𑁆𑀫𑀡𑀧𑀓𑀢𑀽𑀧𑀦𑀺𑀲𑁆𑀲𑀬𑀸 𑀧𑀦 𑀅𑀦𑁂𑀓𑀦𑁆𑀢𑀺𑀓𑀸, 𑀢𑀲𑁆𑀫𑀸 𑀢𑀢𑁆𑀣 ‘‘𑀓𑁂𑀲𑀜𑁆𑀘𑀻’’𑀢𑀺 𑀯𑀼𑀢𑁆𑀢𑀁. 𑀲𑀺𑀤𑁆𑀥𑀸𑀦𑀁 𑀧𑀘𑁆𑀘𑀬𑀥𑀫𑁆𑀫𑀸𑀦𑀦𑁆𑀢𑀺 𑀧𑀘𑁆𑀘𑀬𑀪𑀸𑀯𑁂𑀦 𑀧𑀼𑀭𑀺𑀫𑀦𑀺𑀧𑁆𑀨𑀦𑁆𑀦𑀸𑀦𑀁 𑀓𑀼𑀲𑀮𑀸𑀤𑀻𑀦𑀁 𑀓𑀼𑀲𑀮𑀲𑁆𑀲 𑀅𑀓𑀼𑀲𑀮𑀲𑁆𑀲 𑀯𑀸𑀢𑀺 𑀅𑀢𑁆𑀣𑁄. 𑀅𑀓𑀼𑀲𑀮𑀸𑀤𑀻𑀳𑀻𑀢𑀺 𑀬𑀣𑀸𑀲𑀗𑁆𑀔𑁆𑀬𑀁 𑀅𑀓𑀼𑀲𑀮𑁂𑀦 𑀓𑀼𑀲𑀮𑁂𑀦 𑀯𑀸. 𑀅𑀯𑀺𑀲𑁂𑀲𑁂𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑀯𑀺𑀲𑁂𑀲𑁂 𑀦𑀺𑀬𑀫𑀁 𑀅𑀕𑁆𑀕𑀳𑁂𑀢𑁆𑀯𑀸 𑀅𑀓𑀼𑀲𑀮𑀸𑀤𑀻𑀲𑀼 𑀅𑀓𑀼𑀲𑀮𑀓𑀼𑀲𑀮𑀸𑀦𑀁 ‘‘𑀓𑁂𑀲𑀜𑁆𑀘𑀻’’𑀢𑀺𑀆𑀤𑀺𑀦𑀸.

𑀅𑀦𑀸𑀭𑀫𑁆𑀫𑀡𑀢𑁆𑀢𑀸 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀁 𑀧𑀼𑀩𑁆𑀩𑀸𑀧𑀭𑀦𑀺𑀬𑀫𑁂𑀦 𑀅𑀧𑁆𑀧𑀯𑀢𑁆𑀢𑀺𑀢𑁄 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀁 𑀦 𑀮𑀪𑀢𑀻𑀢𑀺 𑀬𑁄𑀚𑀦𑀸. 𑀧𑀓𑀢𑀲𑁆𑀲𑀸𑀢𑀺 𑀦𑀺𑀧𑁆𑀨𑀸𑀤𑀺𑀢𑀲𑁆𑀲, 𑀉𑀧𑀲𑁂𑀯𑀺𑀢𑀲𑁆𑀲 𑀯𑀸. 𑀦 𑀳𑀺 𑀭𑀽𑀧𑀲𑀦𑁆𑀢𑀸𑀦𑀲𑁆𑀲 𑀲𑀤𑁆𑀥𑀸𑀤𑀺𑀦𑀺𑀧𑁆𑀨𑀸𑀤𑀦𑀁 𑀅𑀢𑁆𑀣𑀺, 𑀉𑀢𑀼𑀪𑁄𑀚𑀦𑀸𑀤𑀺𑀉𑀧𑀲𑁂𑀯𑀦𑀁 𑀯𑀸 𑀲𑀫𑁆𑀪𑀯𑀢𑀺. 𑀢𑁂𑀦𑀸𑀳 ‘‘𑀬𑀣𑀸 𑀳𑀺…𑀧𑁂… 𑀭𑀽𑀧𑀲𑀦𑁆𑀢𑀸𑀦𑁂𑀦𑀸’’𑀢𑀺. 𑀦𑀦𑀼 𑀘 𑀭𑀽𑀧𑀲𑀦𑁆𑀢𑀸𑀦𑁂 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑁄 𑀮𑀩𑁆𑀪𑀢𑀺, 𑀲𑁄 𑀘 𑀦 𑀯𑀺𑀦𑀸 𑀲𑀫𑀸𑀦𑀚𑀸𑀢𑀺𑀬𑁂𑀦 𑀓𑀸𑀭𑀡𑁂𑀦𑀸𑀢𑀺 𑀲𑁆𑀯𑀸𑀬𑀁 𑀧𑀓𑀢𑀽𑀧𑀦𑀺𑀲𑁆𑀲𑀬𑀮𑀸𑀪𑁄𑀢𑀺 𑀓𑀤𑀸𑀘𑀺 𑀆𑀲𑀗𑁆𑀓𑁂𑀬𑁆𑀬𑀸𑀢𑀺 𑀆𑀳 ‘‘𑀬𑀲𑁆𑀫𑀺𑀜𑁆𑀘𑀸’’𑀢𑀺𑀆𑀤𑀺. 𑀢𑀢𑁆𑀣 𑀢𑀦𑁆𑀢𑀺 𑀉𑀢𑀼𑀩𑀻𑀚𑀸𑀤𑀺𑀓𑀁 𑀓𑀫𑁆𑀫𑀸𑀤𑀺 𑀘 𑀢𑁂𑀦 𑀭𑀽𑀧𑁂𑀦 𑀧𑀼𑀭𑀺𑀫𑀦𑀺𑀧𑁆𑀨𑀦𑁆𑀦𑁂𑀦. 𑀉𑀧𑁆𑀧𑀸𑀤𑀦𑀁 𑀲𑀸𑀪𑀺𑀲𑀦𑁆𑀥𑀺𑀓𑀁 𑀤𑀝𑁆𑀞𑀩𑁆𑀩𑀁. 𑀅𑀥𑀺𑀧𑀢𑀻𑀲𑀼 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑁄 𑀯𑀺𑀬 𑀧𑀓𑀧𑁆𑀧𑀦𑀁 𑀲𑀁𑀯𑀺𑀤𑀳𑀦𑀁. 𑀧𑀓𑀭𑀡𑀁 𑀯𑀼𑀢𑁆𑀢𑀮𑀓𑁆𑀔𑀡𑁂𑀦 𑀓𑀸𑀭𑀡𑀪𑀸𑀯𑁂𑀦 𑀅𑀯𑀝𑁆𑀞𑀸𑀦𑀁, 𑀬𑀢𑁄 𑀓𑀸𑀭𑀡𑀯𑀺𑀲𑁂𑀲𑁄 ‘‘𑀧𑀓𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀭𑀽𑀧𑀲𑁆𑀲𑁂𑀯 𑀢𑀁 𑀧𑀝𑀺𑀓𑁆𑀔𑀺𑀧𑀻𑀬𑀢𑀻𑀢𑀺 𑀆𑀳 ‘‘𑀬𑀣𑀸 𑀘…𑀧𑁂… 𑀤𑀝𑁆𑀞𑀩𑁆𑀩𑀸’’𑀢𑀺. 𑀏𑀯𑀫𑁆𑀧𑀺 𑀉𑀢𑀼𑀩𑀻𑀚𑀸𑀤𑀻𑀦𑀁 𑀅𑀗𑁆𑀓𑀼𑀭𑀸𑀤𑀻𑀲𑀼 𑀓𑀣𑀁 𑀧𑀘𑁆𑀘𑀬𑀯𑀺𑀲𑁂𑀲𑀪𑀸𑀯𑁄𑀢𑀺 𑀆𑀳 ‘‘𑀉𑀢𑀼𑀩𑀻𑀚𑀸𑀤𑀬𑁄 𑀧𑀦…𑀧𑁂… 𑀪𑀸𑀯𑀢𑁄’’𑀢𑀺. 𑀉𑀧𑀦𑀺𑀲𑁆𑀲𑀬𑁄𑀢𑀺 𑀘 𑀬𑀲𑁆𑀫𑀸 𑀩𑀮𑀯𑀢𑀸𑀓𑀸𑀭𑀡𑀁 𑀅𑀥𑀺𑀧𑁆𑀧𑁂𑀢𑀁, 𑀢𑀲𑁆𑀫𑀸 𑀦 𑀏𑀢𑁆𑀣 𑀏𑀓𑀦𑁆𑀢𑁂𑀦 𑀧𑀼𑀭𑀺𑀫𑀦𑀺𑀧𑁆𑀨𑀢𑁆𑀢𑀺 𑀇𑀘𑁆𑀙𑀺𑀢𑀩𑁆𑀩𑀸. 𑀬𑀤𑀺 𑀏𑀯𑀁 𑀧𑀸𑀴𑀺𑀬𑀁 𑀓𑀣𑀁 𑀧𑀼𑀭𑀺𑀫𑀕𑁆𑀕𑀳𑀡𑀦𑁆𑀢𑀺 𑀆𑀳 ‘‘𑀧𑀼𑀭𑀺𑀫𑀧𑀼𑀭𑀺𑀫𑀸𑀦𑀁𑀬𑁂𑀯 𑀧𑀦𑀸’’𑀢𑀺𑀆𑀤𑀺. 𑀢𑁂𑀧𑀺 𑀯𑀸 𑀧𑀭𑀺𑀓𑀧𑁆𑀧𑀦𑀯𑀲𑁂𑀦 𑀧𑀼𑀭𑀺𑀫𑀦𑀺𑀧𑁆𑀨𑀦𑁆𑀦𑀸𑀬𑁂𑀯 𑀦𑀸𑀫 𑀳𑁄𑀦𑁆𑀢𑀺. 𑀦 𑀳𑀺 𑀅𑀲𑀁𑀯𑀺𑀤𑀺𑀢𑀸𑀓𑀸𑀭𑁂 𑀯𑀢𑁆𑀣𑀼𑀲𑁆𑀫𑀺𑀁 𑀧𑀢𑁆𑀣𑀦𑀸𑀧𑀯𑀢𑁆𑀢𑀻𑀢𑀺. 𑀢𑁂𑀦𑀸𑀳 ‘‘𑀢𑀁𑀲𑀫𑀸𑀦𑀮𑀓𑁆𑀔𑀡𑀢𑀸𑀬𑀸’’𑀢𑀺.

𑀥𑀫𑁆𑀫𑁂𑀢𑀺 𑀧𑀼𑀕𑁆𑀕𑀮𑀲𑁂𑀦𑀸𑀲𑀦𑀧𑀜𑁆𑀜𑀢𑁆𑀢𑀻𑀦𑀁 𑀉𑀧𑀸𑀤𑀸𑀦𑀪𑀽𑀢𑁂 𑀥𑀫𑁆𑀫𑁂. 𑀅𑀬𑀁 𑀦𑀬𑁄𑀢𑀺 𑀧𑀜𑁆𑀜𑀢𑁆𑀢𑀺𑀫𑀼𑀔𑁂𑀦 𑀧𑀜𑁆𑀜𑀧𑁂𑀢𑀩𑁆𑀩𑀸 𑀢𑀤𑀼𑀧𑀸𑀤𑀸𑀦𑀪𑀽𑀢𑀸 𑀥𑀫𑁆𑀫𑀸 𑀕𑀬𑁆𑀳𑀦𑁆𑀢𑀻𑀢𑀺 𑀬𑀣𑀸𑀯𑀼𑀢𑁆𑀢𑁄 𑀦𑀬𑁄. 𑀏𑀢𑁆𑀣𑁂𑀯𑀸𑀢𑀺 ‘‘𑀲𑁂𑀦𑀸𑀲𑀦𑀫𑁆𑀧𑀺 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀏𑀢𑀲𑁆𑀫𑀺𑀁𑀬𑁂𑀯 𑀯𑀘𑀦𑁂. 𑀓𑀣𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀧𑀓𑀢𑀽𑀧𑀦𑀺𑀲𑁆𑀲𑀬𑀪𑀸𑀯𑁄𑀢𑀺 𑀘𑁄𑀤𑀦𑀸𑀬 ‘‘𑀯𑀓𑁆𑀔𑀢𑀻’’𑀢𑀺𑀆𑀤𑀺𑀦𑀸 𑀆𑀕𑀫𑀁 𑀤𑀲𑁆𑀲𑁂𑀢𑁆𑀯𑀸 𑀬𑀼𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀫𑁆𑀧𑀺𑀘 𑀢𑀸𑀤𑀺𑀲𑀸𑀦𑀁 𑀧𑀼𑀩𑁆𑀩𑁂 𑀧𑀓𑀢𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀢𑀸𑀤𑀺𑀲𑀸𑀦𑀦𑁆𑀢𑀺 𑀬𑀸𑀤𑀺𑀲𑀸 𑀉𑀢𑀼𑀆𑀤𑀬𑁄 𑀧𑀘𑁆𑀘𑀼𑀧𑀝𑁆𑀞𑀺𑀢𑀸, 𑀢𑀸𑀤𑀺𑀲𑀸𑀦𑀁 𑀢𑀢𑁄 𑀧𑀼𑀩𑁆𑀩𑁂 𑀧𑀼𑀭𑁂𑀢𑀭𑀁 𑀧𑀓𑀢𑀢𑁆𑀢𑀸 𑀧𑀓𑀢𑀽𑀧𑀦𑀺𑀲𑁆𑀲𑀬𑀬𑁄𑀕𑁆𑀬𑀢𑀸𑀬 𑀆𑀧𑀸𑀤𑀺𑀢𑀢𑁆𑀢𑀸.

𑀓𑀲𑀺𑀡𑀸𑀤𑀻𑀦𑀫𑁆𑀧𑀺 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀢𑀸 𑀲𑀫𑁆𑀪𑀯𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 ‘𑀏𑀓𑀘𑁆𑀘𑀸𑀬𑀸’𑀢𑀺 𑀆𑀳𑀸’’𑀢𑀺. 𑀢𑀣𑀸 𑀳𑀺 ‘‘𑀓𑀲𑀺𑀡𑀫𑀡𑁆𑀟𑀮𑀁 𑀤𑀺𑀲𑁆𑀯𑀸’’𑀢𑀺𑀆𑀤𑀺𑀦𑀸 𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑀪𑀸𑀯𑁄 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁄.

𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀫𑁆𑀧𑀺 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀺, 𑀧𑀕𑁂𑀯 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀓𑀼𑀲𑀮𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀁 𑀧𑀦 𑀬𑀣𑀸 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀫𑀺𑀁 𑀓𑀲𑀺𑀡𑀸𑀤𑀺𑀫𑁆𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀦𑀼𑀧𑁆𑀧𑀦𑁆𑀦𑀛𑀸𑀦𑀼𑀧𑁆𑀧𑀸𑀤𑀦𑁂𑀢𑀺 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀁 𑀲𑀦𑁆𑀥𑀸𑀬𑀸𑀳, 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑁂 𑀧𑀦 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀢𑀤𑀼𑀧𑁆𑀧𑀸𑀤𑀓𑀓𑀼𑀲𑀮𑀸𑀦𑀦𑁆𑀢𑀺 𑀢𑀲𑁆𑀲 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀲𑁆𑀲 𑀉𑀧𑁆𑀧𑀸𑀤𑀓𑀓𑀼𑀲𑀮𑀸𑀦𑀁, 𑀭𑀽𑀧𑀸𑀯𑀘𑀭𑀓𑀼𑀲𑀮𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀧𑀝𑀺𑀲𑀦𑁆𑀥𑀺𑀦𑀺𑀬𑀸𑀫𑀓𑀲𑁆𑀲𑀸𑀢𑀺 𑀭𑀽𑀧𑀸𑀯𑀘𑀭𑀧𑀝𑀺𑀲𑀦𑁆𑀥𑀺𑀦𑀺𑀬𑀸𑀫𑀓𑀲𑁆𑀲. 𑀘𑀼𑀢𑀺𑀢𑁄𑀢𑀺 𑀭𑀽𑀧𑀸𑀯𑀘𑀭𑀧𑀝𑀺𑀲𑀦𑁆𑀥𑀺𑀬𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀽𑀢𑀸𑀬 𑀘𑀼𑀢𑀺𑀬𑀸. 𑀧𑀼𑀭𑀺𑀫𑀚𑀯𑀦𑀲𑁆𑀲 𑀯𑀲𑁂𑀦𑀸𑀢𑀺 𑀘𑀼𑀢𑀺𑀬𑀸 𑀆𑀲𑀦𑁆𑀦𑀚𑀯𑀦𑀪𑀸𑀯𑁂𑀦. 𑀭𑀽𑀧𑀸𑀯𑀘𑀭𑀓𑀼𑀲𑀮𑀁 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀲𑁆𑀲𑀸𑀢𑀺 𑀏𑀢𑁆𑀣𑀸𑀧𑀺 ‘‘𑀢𑀤𑀼𑀧𑁆𑀧𑀸𑀤𑀓𑀓𑀼𑀲𑀮𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀬𑀣𑀸 𑀘 ‘‘𑀭𑀽𑀧𑀸𑀯𑀘𑀭𑀓𑀼𑀲𑀮𑀁 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀲𑁆𑀲 𑀉𑀧𑀦𑀺𑀲𑁆𑀲𑀬𑁄’’𑀢𑀺 𑀯𑀼𑀢𑁆𑀢𑀁, 𑀏𑀯𑀁 ‘‘𑀓𑀸𑀫𑀸𑀯𑀘𑀭𑀓𑀼𑀲𑀮𑀫𑁆𑀧𑀺 𑀢𑀤𑀼𑀧𑁆𑀧𑀸𑀤𑀓𑀓𑀼𑀲𑀮𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀲𑁆𑀲 𑀢𑁂𑀪𑀽𑀫𑀓𑀓𑀼𑀲𑀮𑀸𑀦𑀫𑁆𑀧𑀺 𑀧𑀸𑀤𑀓𑀸𑀤𑀺𑀯𑀲𑁂𑀦 𑀉𑀧𑀦𑀺𑀲𑁆𑀲𑀬𑀪𑀸𑀯𑁄 𑀧𑀸𑀓𑀝𑁄𑀬𑁂𑀯, 𑀢𑀣𑀸 𑀢𑀁𑀢𑀁𑀪𑀽𑀫𑀓𑀓𑀼𑀲𑀮𑀸𑀦𑀁 𑀢𑀁𑀢𑀁𑀪𑀽𑀫𑀓𑀓𑀺𑀭𑀺𑀬𑀸𑀦𑀁, 𑀓𑀸𑀫𑀸𑀯𑀘𑀭𑀓𑀼𑀲𑀮𑀲𑁆𑀲 𑀭𑀽𑀧𑀸𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀸𑀦𑀁, 𑀭𑀽𑀧𑀸𑀯𑀘𑀭𑀓𑀼𑀲𑀮𑀲𑁆𑀲 𑀅𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀸𑀬 𑀉𑀧𑀦𑀺𑀲𑁆𑀲𑀬𑀪𑀸𑀯𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀯𑀁 𑀧𑀘𑁆𑀘𑁂𑀓𑀁…𑀧𑁂… 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀆𑀳. ‘‘𑀲𑀤𑁆𑀥𑀁 𑀉𑀧𑀦𑀺𑀲𑁆𑀲𑀸𑀬 𑀤𑀸𑀦𑀁 𑀤𑁂𑀢𑀻’’𑀢𑀺𑀆𑀤𑀺𑀦𑀸 𑀧𑀓𑀢𑀽𑀧𑀦𑀺𑀲𑁆𑀲𑀬𑁄 𑀉𑀤𑁆𑀤𑁂𑀲𑀯𑀲𑁂𑀦𑁂𑀯 𑀧𑀸𑀞𑁄 𑀆𑀕𑀢𑁄, 𑀦 𑀯𑀺𑀪𑀚𑀦𑀯𑀲𑁂𑀦𑀸𑀢𑀺 𑀆𑀳 ‘‘𑀧𑀸𑀴𑀺𑀬𑀫𑁆𑀧𑀺…𑀧𑁂… 𑀯𑀺𑀲𑁆𑀲𑀚𑁆𑀚𑀺𑀢𑁄’’𑀢𑀺. 𑀓𑀼𑀲𑀮𑀢𑁆𑀢𑀺𑀓𑀸𑀤𑀻𑀲𑀼 𑀅𑀦𑀼𑀮𑁄𑀫𑀸𑀤𑀺𑀪𑁂𑀤𑀪𑀺𑀦𑁆𑀦𑀢𑁆𑀢𑀸 𑀧𑀜𑁆𑀳𑀸𑀯𑀸𑀭𑁂𑀲𑀽𑀢𑀺 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄.

𑀮𑁄𑀓𑀼𑀢𑁆𑀢𑀭𑀦𑀺𑀩𑁆𑀩𑀢𑁆𑀢𑀦𑀁 𑀉𑀧𑀦𑀺𑀲𑁆𑀲𑀸𑀬 𑀧𑀭𑀲𑁆𑀲 𑀲𑀺𑀦𑁂𑀳𑀼𑀧𑁆𑀧𑀸𑀤𑀦𑁂 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸 𑀉𑀧𑀦𑀺𑀲𑁆𑀲𑀬𑁄 𑀯𑀺𑀬 𑀳𑁄𑀦𑁆𑀢𑀻𑀢𑀺 𑀅𑀬𑀫𑁂𑀢𑁆𑀣 𑀮𑁂𑀲𑁄, 𑀪𑀸𑀯𑀺𑀦𑁄 𑀧𑀦 𑀮𑁄𑀓𑀼𑀢𑁆𑀢𑀭𑀲𑁆𑀲 𑀅𑀓𑀼𑀲𑀮𑀸𑀦𑀁 𑀉𑀧𑀦𑀺𑀲𑁆𑀲𑀬𑀢𑀸 𑀲𑀫𑁆𑀪𑀯𑀢𑀻𑀢𑀺 𑀆𑀳 ‘‘𑀦 𑀇𑀤𑀁 𑀲𑀸𑀭𑀢𑁄 𑀤𑀝𑁆𑀞𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄’’𑀢𑀺. 𑀭𑀽𑀧𑀸𑀯𑀘𑀭𑀸𑀤𑀺𑀓𑀼𑀲𑀮𑀸𑀦𑀦𑁆𑀢𑀺 𑀭𑀽𑀧𑀸𑀭𑀽𑀧𑀸𑀯𑀘𑀭𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀸𑀦𑀁 𑀉𑀧𑁆𑀧𑀸𑀤𑀺𑀬𑀫𑀸𑀦𑀲𑁆𑀲 𑀭𑀽𑀧𑀸𑀯𑀘𑀭𑀓𑀼𑀲𑀮𑀲𑁆𑀲𑀸𑀢𑀺 𑀬𑁄𑀚𑀦𑀸. 𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀲𑁆𑀲 𑀘 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑁄 𑀉𑀧𑀦𑀺𑀲𑁆𑀲𑀬𑁄 𑀓𑀣𑀦𑁆𑀢𑀺 𑀆𑀳 ‘‘𑀧𑀼𑀩𑁆𑀩𑁂 𑀦𑀺𑀯𑀼𑀢𑁆𑀣𑀸𑀤𑀻𑀲𑀼…𑀧𑁂… 𑀅𑀭𑀳𑀢𑁄’’𑀢𑀺. 𑀢𑀁 𑀢𑀁 𑀯𑀺𑀧𑀸𑀓𑀁 𑀧𑀢𑁆𑀣𑁂𑀦𑁆𑀢𑁄 𑀢𑀲𑁆𑀲 𑀢𑀲𑁆𑀲 𑀯𑀺𑀧𑀸𑀓𑀲𑁆𑀲 𑀳𑁂𑀢𑀼𑀪𑀽𑀢𑀁 𑀓𑀼𑀲𑀮𑀁 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀯𑀺𑀧𑀸𑀓𑀸𑀦𑀁 𑀓𑀼𑀲𑀮𑀽𑀧𑀦𑀺𑀲𑁆𑀲𑀬𑀢𑀸𑀢𑀺 𑀆𑀳 ‘‘𑀘𑀢𑀼𑀪𑀽𑀫𑀓𑀸…𑀧𑁂… 𑀉𑀧𑀦𑀺𑀲𑁆𑀲𑀬𑁄’’𑀢𑀺. 𑀮𑁄𑀓𑀺𑀬𑀓𑀼𑀲𑀮𑀸𑀦𑀁 𑀧𑀦 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀸 𑀉𑀧𑀦𑀺𑀲𑁆𑀲𑀬𑁄 𑀦 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀤𑀺𑀧𑀻’’𑀢𑀺𑀆𑀤𑀺𑀫𑀸𑀳. 𑀢𑁂𑀦𑁂𑀯 𑀳𑀺 ‘‘𑀢𑀣𑀸 𑀢𑁂𑀪𑀽𑀫𑀓𑀯𑀺𑀧𑀸𑀓𑁄’’𑀢𑀺 𑀢𑁂𑀪𑀽𑀫𑀓𑀕𑁆𑀕𑀳𑀡𑀁 𑀓𑀢𑀁. 𑀢𑀢𑁆𑀣 𑀢𑁂𑀦𑀸𑀢𑀺 𑀅𑀦𑀸𑀕𑀸𑀫𑀺𑀦𑀸. 𑀢𑀦𑁆𑀢𑀺 𑀅𑀭𑀳𑀢𑁆𑀢𑀨𑀮𑀁. 𑀢𑀲𑁆𑀫𑀸𑀢𑀺 𑀅𑀤𑀺𑀝𑁆𑀞𑀧𑀼𑀩𑁆𑀩𑀢𑁆𑀢𑀸. 𑀢𑀸𑀦𑀺 𑀯𑀺𑀬𑀸𑀢𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀦𑀺 𑀯𑀺𑀬. 𑀢𑁂𑀲𑀦𑁆𑀢𑀺 𑀧𑀼𑀣𑀼𑀚𑁆𑀚𑀦𑀸𑀤𑀻𑀦𑀁. 𑀇𑀫𑀲𑁆𑀲𑀸𑀢𑀺 𑀅𑀦𑀸𑀕𑀸𑀫𑀺𑀦𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀧𑀼𑀣𑀼𑀚𑁆𑀚𑀦𑀸𑀤𑀻𑀦𑀁 𑀲𑀦𑁆𑀢𑀸𑀦𑁂 𑀛𑀸𑀦𑀸𑀤𑀻𑀦𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀁 𑀦 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀅𑀦𑀼𑀧𑀮𑀤𑁆𑀥𑀧𑀼𑀩𑁆𑀩𑀢𑁆𑀢𑀸, 𑀏𑀯𑀁 𑀅𑀦𑀸𑀕𑀸𑀫𑀺𑀦𑁄 𑀛𑀸𑀦𑀸𑀤𑀻𑀦𑀁 𑀅𑀕𑁆𑀕𑀨𑀮𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀅𑀤𑀺𑀝𑁆𑀞𑀧𑀼𑀩𑁆𑀩𑀢𑁆𑀢𑀸. 𑀢𑁂𑀦𑀸𑀳 ‘‘𑀉𑀧𑀮𑀤𑁆𑀥𑀧𑀼𑀩𑁆𑀩𑀲𑀤𑀺𑀲𑀫𑁂𑀯 𑀳𑀺 𑀅𑀦𑀸𑀕𑀢𑀫𑁆𑀧𑀺 𑀉𑀧𑀦𑀺𑀲𑁆𑀲𑀬𑁄’’𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀳𑁂𑀝𑁆𑀞𑀺𑀫𑀨𑀮𑀸𑀦𑀁 𑀓𑀼𑀲𑀮𑀽𑀧𑀦𑀺𑀲𑁆𑀲𑀬𑀢𑀸 𑀯𑀼𑀢𑁆𑀢𑀸 𑀏𑀯.

𑀬𑀣𑀸 𑀯𑀺𑀧𑀸𑀓𑀸 𑀓𑀼𑀲𑀮𑀸𑀦𑀁, 𑀏𑀯𑀁 𑀓𑀺𑀭𑀺𑀬𑀸𑀧𑀺 𑀢𑁂𑀲𑀁 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀻𑀢𑀺 𑀢𑀁 𑀦𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀺𑀭𑀺𑀬𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀤𑀺’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀘𑀢𑀼𑀪𑀽𑀫𑀓𑀓𑀼𑀲𑀮𑀲𑁆𑀲𑀧𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀻𑀢𑀺 𑀏𑀢𑁆𑀣 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺, 𑀢𑀤𑀢𑁆𑀣𑀁 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀧𑀯𑀢𑁆𑀢𑁂𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀢𑀦𑁆𑀢𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁. 𑀅𑀓𑀼𑀲𑀮𑀲𑁆𑀲 𑀘 𑀘𑀢𑀼𑀪𑀽𑀫𑀓𑀯𑀺𑀧𑀸𑀓𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄𑀢𑀺 𑀬𑁄𑀚𑀦𑀸. 𑀏𑀯𑀁 𑀓𑀺𑀭𑀺𑀬𑀲𑁆𑀲𑀧𑀻𑀢𑀺 𑀬𑀣𑀸 𑀓𑀼𑀲𑀮𑀲𑁆𑀲 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑁆𑀲 𑀯𑀲𑁂𑀦 𑀉𑀧𑀦𑀺𑀲𑁆𑀲𑀬𑁄 𑀯𑀼𑀢𑁆𑀢𑁄, 𑀏𑀯𑀁 𑀓𑀺𑀭𑀺𑀬𑀲𑁆𑀲𑀧𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑁆𑀲 𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀲𑁄 𑀳𑀺 𑀢𑀁 𑀉𑀧𑀦𑀺𑀲𑁆𑀲𑀸𑀬 𑀭𑀸𑀕𑀸𑀤𑀺𑀉𑀧𑁆𑀧𑀸𑀤𑀦𑁂 𑀅𑀓𑀼𑀲𑀮𑀲𑁆𑀲 𑀯𑀼𑀢𑁆𑀢𑀦𑀬𑁂𑀦 𑀓𑀼𑀲𑀮𑀸𑀓𑀼𑀲𑀮𑀽𑀧𑀦𑀺𑀲𑁆𑀲𑀬𑀪𑀸𑀯𑀫𑀼𑀔𑁂𑀦 𑀘𑀢𑀼𑀪𑀽𑀫𑀓𑀯𑀺𑀧𑀸𑀓𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀺𑀬𑁂𑀯. 𑀬𑀤𑀺 𑀓𑀺𑀭𑀺𑀬𑀲𑀗𑁆𑀔𑀸𑀢𑁄…𑀧𑁂… 𑀳𑁄𑀢𑀺𑀬𑁂𑀯, 𑀅𑀣 𑀓𑀲𑁆𑀫𑀸 𑀧𑀓𑀢𑀽𑀧𑀦𑀺𑀲𑁆𑀲𑀬𑀯𑀺𑀪𑀚𑀦𑁂 𑀓𑀺𑀭𑀺𑀬𑀸 𑀦 𑀕𑀳𑀺𑀢𑀸, 𑀉𑀢𑀼𑀪𑁄𑀚𑀦𑀲𑁂𑀦𑀸𑀲𑀦𑀸𑀦𑀺𑀬𑁂𑀯 𑀕𑀳𑀺𑀢𑀸𑀦𑀻𑀢𑀺 𑀆𑀳 ‘‘𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑁂𑀲𑀼…𑀧𑁂… 𑀦𑀬𑀤𑀲𑁆𑀲𑀦𑀫𑀢𑁆𑀢𑀫𑁂𑀯𑀸’’𑀢𑀺. 𑀏𑀯𑀫𑀸𑀤𑀺𑀓𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀲𑀳𑀚𑀸𑀢𑁄 𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀦 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀸’’𑀢𑀺 𑀏𑀯𑀫𑀸𑀤𑀺𑀓𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀉𑀧𑀦𑀺𑀲𑁆𑀲𑀬𑀧𑀭𑀺𑀬𑀸𑀬𑁄 𑀉𑀧𑀦𑀺𑀲𑀲𑀤𑁆𑀤𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀯𑀺𑀜𑁆𑀜𑀸𑀡𑀽𑀧𑀦𑀺𑀲𑀁 𑀦𑀸𑀫𑀭𑀽𑀧𑀁, 𑀦𑀸𑀫𑀭𑀽𑀧𑀽𑀧𑀦𑀺𑀲𑀜𑁆𑀘 𑀲𑀴𑀸𑀬𑀢𑀦𑀦𑁆𑀢𑀺𑀆𑀤𑀺𑀓𑁂𑀦𑀸’’𑀢𑀺. 𑀏𑀢𑁆𑀣 𑀳𑀺 𑀯𑀺𑀜𑁆𑀜𑀸𑀡𑀲𑁆𑀲 𑀦𑀸𑀫𑀭𑀽𑀧𑀸𑀦𑀁 𑀨𑀲𑁆𑀲𑀭𑀽𑀧𑀸𑀤𑀻𑀦𑀁 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀜𑁆𑀘 𑀉𑀧𑀦𑀺𑀲𑁆𑀲𑀬𑀪𑀸𑀯𑁄 𑀯𑀼𑀢𑁆𑀢𑁄𑀢𑀺.

𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁦. 𑀤𑀲𑁆𑀲𑀺𑀢𑀫𑁂𑀯 𑀦𑀬𑀤𑀲𑁆𑀲𑀦𑀯𑀲𑁂𑀦𑀸𑀢𑀺 𑀬𑁄𑀚𑀦𑀸. 𑀬𑀤𑀺 𑀤𑀲𑁆𑀲𑀺𑀢𑀫𑁂𑀯, 𑀓𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑀸𑀯𑀲𑁂𑀲𑀯𑀲𑁂𑀦 𑀤𑁂𑀲𑀦𑀸 𑀓𑀢𑀸’’𑀢𑀺 𑀆𑀳 ‘‘𑀲𑀭𑀽𑀧𑁂𑀦 𑀅𑀤𑀲𑁆𑀲𑀺𑀢𑀢𑁆𑀢𑀸’’𑀢𑀺. ‘‘𑀬𑀁 𑀬𑀁 𑀥𑀫𑁆𑀫𑀁 𑀧𑀼𑀭𑁂𑀚𑀸𑀢𑀁 𑀆𑀭𑀩𑁆𑀪 𑀬𑁂 𑀬𑁂 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸, 𑀢𑁂 𑀢𑁂 𑀥𑀫𑁆𑀫𑀸 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀏𑀯𑀁 𑀲𑀭𑀽𑀧𑁂𑀦 𑀧𑀸𑀴𑀺𑀬𑀁 𑀅𑀤𑀲𑁆𑀲𑀺𑀢𑀢𑁆𑀢𑀸. 𑀇𑀤𑁆𑀥𑀺𑀯𑀺𑀥𑀸𑀪𑀺𑀜𑁆𑀜𑀸𑀬 𑀘𑀸𑀢𑀺 𑀘-𑀲𑀤𑁆𑀤𑁂𑀦 𑀘𑀼𑀢𑀽𑀧𑀧𑀸𑀢𑀜𑀸𑀡𑀲𑁆𑀲𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀢𑀲𑁆𑀲𑀧𑀺 𑀳𑀺 𑀭𑀽𑀧𑀥𑀫𑁆𑀫𑀸𑀭𑀫𑁆𑀫𑀡𑀓𑀸𑀮𑁂 𑀅𑀝𑁆𑀞𑀸𑀭𑀲𑀲𑀼 𑀬𑀁 𑀓𑀺𑀜𑁆𑀘𑀺 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀁 𑀳𑁄𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀢𑁆𑀢𑀸. ‘‘𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂’’𑀢𑀺 𑀳𑀺 𑀯𑀼𑀢𑁆𑀢𑀁. 𑀤𑀺𑀩𑁆𑀩𑀘𑀓𑁆𑀔𑀼𑀤𑀺𑀩𑁆𑀩𑀲𑁄𑀢𑀜𑀸𑀡𑁂𑀲𑀼 𑀘 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺.

𑀇𑀢𑀭𑀲𑁆𑀲𑀧𑀺 𑀅𑀪𑀸𑀯𑀸𑀢𑀺 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀲𑁆𑀲𑀧𑀺 𑀅𑀪𑀸𑀯𑀸 𑀅𑀕𑁆𑀕𑀳𑀡𑀁 𑀧𑀝𑀺𑀲𑀦𑁆𑀥𑀺𑀪𑀸𑀯𑀺𑀦𑁄𑀢𑀺 𑀬𑁄𑀚𑀦𑀸. 𑀲𑀢𑀺𑀧𑀺 𑀓𑀲𑁆𑀲𑀘𑀺 𑀧𑀝𑀺𑀲𑀦𑁆𑀥𑀺𑀪𑀸𑀯𑀺𑀦𑁄 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑁂 𑀯𑀺𑀪𑀽𑀢𑀁 𑀧𑀦 𑀓𑀢𑁆𑀯𑀸 𑀆𑀭𑀫𑁆𑀫𑀡𑀓𑀭𑀡𑀸𑀪𑀸𑀯𑀢𑁄 𑀅𑀯𑀺𑀚𑁆𑀚𑀫𑀸𑀦𑀲𑀤𑀺𑀲𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀇𑀢𑀭𑀲𑁆𑀲𑀧𑀺 𑀅𑀪𑀸𑀯𑀸’’𑀢𑀺. 𑀢𑁂𑀦𑁂𑀯𑀸𑀳 ‘‘𑀧𑀝𑀺𑀲𑀦𑁆𑀥𑀺𑀬𑀸 𑀯𑀺𑀬 𑀅𑀧𑀭𑀺𑀩𑁆𑀬𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀆𑀭𑀫𑁆𑀫𑀡𑀫𑀢𑁆𑀢𑀪𑀸𑀯𑀢𑁄’’𑀢𑀺. 𑀲𑀦𑁆𑀢𑀻𑀭𑀡𑀪𑀸𑀯𑀺𑀦𑁄 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸𑀧𑀺 𑀏𑀓𑀦𑁆𑀢𑁂𑀦𑁂𑀯 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀭𑀽𑀧𑀸𑀤𑀻𑀦𑀺 𑀧𑀜𑁆𑀘𑀸𑀭𑀫𑁆𑀫𑀡𑀸𑀦𑀻𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀘 ‘‘𑀫𑀦𑁄𑀥𑀸𑀢𑀽𑀦𑀜𑁆𑀘𑀸’’𑀢𑀺𑀆𑀤𑀺 ‘‘𑀢𑀤𑀸𑀭𑀫𑁆𑀫𑀡𑀪𑀸𑀯𑀺𑀦𑁄’’𑀢𑀺 𑀧𑀤𑀲𑁆𑀲 𑀧𑀼𑀭𑀢𑁄 𑀯𑀢𑁆𑀢𑀩𑁆𑀩𑁄, 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀮𑀺𑀔𑀺𑀢𑀁.

𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁧. 𑀦𑀺𑀭𑀯𑀲𑁂𑀲𑀤𑀲𑁆𑀲𑀺𑀢𑀧𑀼𑀭𑁂𑀚𑀸𑀢𑀤𑀲𑁆𑀲𑀦𑀯𑀲𑁂𑀦𑀸𑀢𑀺 ‘‘𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀢𑀺𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀓𑀸𑀬𑀲𑁆𑀲𑀸’’𑀢𑀺 𑀏𑀯𑀁 𑀦𑀺𑀭𑀯𑀲𑁂𑀲𑀢𑁄 𑀤𑀲𑁆𑀲𑀺𑀢𑀲𑁆𑀲 𑀧𑀼𑀭𑁂𑀚𑀸𑀢𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲 𑀤𑀲𑁆𑀲𑀦𑀯𑀲𑁂𑀦. 𑀧𑀘𑁆𑀘𑀬𑀸 𑀳𑀺 𑀇𑀥 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀸, 𑀢𑁂𑀲𑀼 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑁄 𑀘 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀓𑀸𑀬𑀲𑁆𑀲 𑀧𑀘𑁆𑀘𑀬𑁄, 𑀦 𑀇𑀢𑀭𑁄. 𑀢𑁂𑀦𑁂𑀯𑀸𑀳 ‘‘𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑁄 𑀧𑀦 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀲𑁆𑀲 𑀦 𑀳𑁄𑀢𑀻’’𑀢𑀺, 𑀢𑀲𑁆𑀫𑀸 ‘‘𑀢𑀲𑁆𑀲𑁂𑀯𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀬𑀣𑀸𑀭𑀳𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀆𑀲𑁂𑀯𑀦𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁨. 𑀧𑀓𑀸𑀭𑁂𑀳𑀺 𑀕𑀼𑀡𑀺𑀢𑀁 𑀧𑀕𑀼𑀡𑀁, 𑀩𑀳𑀼𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀺𑀬𑀸 𑀪𑀸𑀯𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀢𑀺𑀲𑀬𑁂𑀦 𑀧𑀕𑀼𑀡𑀁 𑀧𑀕𑀼𑀡𑀢𑀭𑀁, 𑀢𑀢𑁄𑀬𑁂𑀯 𑀩𑀮𑀯𑀢𑀭𑀁. 𑀢𑀲𑁆𑀲 𑀪𑀸𑀯𑁄, 𑀢𑁂𑀦 𑀧𑀕𑀼𑀡𑀢𑀭𑀩𑀮𑀯𑀢𑀭𑀪𑀸𑀯𑁂𑀦 𑀯𑀺𑀲𑀺𑀝𑁆𑀞𑀁 𑀯𑀺𑀲𑁂𑀲𑀧𑁆𑀧𑀢𑁆𑀢𑀁. 𑀲𑁆𑀯𑀸𑀬𑀁 𑀯𑀺𑀲𑁂𑀲𑁄 𑀯𑀺𑀧𑀸𑀓𑁂 𑀦𑀢𑁆𑀣𑀻𑀢𑀺 𑀆𑀳 ‘‘𑀏𑀢𑁂𑀦 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀢𑁄 𑀯𑀺𑀲𑁂𑀲𑁂𑀢𑀻’’𑀢𑀺.

𑀆𑀲𑁂𑀯𑀦𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁩. 𑀓𑀫𑁆𑀫𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁩. 𑀏𑀯𑀁𑀲𑀪𑀸𑀯𑀸𑀢𑀺 𑀓𑀫𑁆𑀫𑀧𑀘𑁆𑀘𑀬𑁂𑀦 𑀉𑀧𑀓𑀸𑀭𑀓𑀲𑀪𑀸𑀯𑀸. 𑀲𑀫𑀢𑁆𑀣𑀢𑀸𑀢𑀺 𑀆𑀦𑀼𑀪𑀸𑀯𑁄. 𑀢𑀲𑁆𑀲𑀸𑀢𑀺 𑀯𑀺𑀧𑀸𑀓𑀓𑁆𑀔𑀦𑁆𑀥𑀓𑀝𑀢𑁆𑀢𑀸𑀭𑀽𑀧𑀲𑀗𑁆𑀔𑀸𑀢𑀲𑁆𑀲 𑀨𑀮𑀲𑁆𑀲. 𑀓𑀫𑁆𑀫𑀧𑀘𑁆𑀘𑀬𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑀪𑀸𑀯𑁄 𑀯𑀼𑀢𑁆𑀢𑁄. 𑀏𑀓𑀯𑁄𑀓𑀸𑀭𑁂 𑀭𑀽𑀧𑀫𑁆𑀧𑀻𑀢𑀺 𑀏𑀓𑀯𑁄𑀓𑀸𑀭𑁂𑀧𑀺 𑀭𑀽𑀧𑀁 𑀦 𑀚𑀦𑁂𑀢𑀺, 𑀧𑀕𑁂𑀯 𑀘𑀢𑀼𑀯𑁄𑀓𑀸𑀭𑁂𑀢𑀺 𑀅𑀢𑁆𑀣𑁄.

𑀓𑀫𑁆𑀫𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁪. 𑀯𑀺𑀧𑀸𑀓𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁪. 𑀬𑀣𑀸 𑀳𑀺 𑀭𑀽𑀧𑀪𑀯𑁂 𑀲𑀜𑁆𑀜𑀻𑀦𑀁 𑀢𑀁𑀦𑀺𑀩𑁆𑀩𑀢𑁆𑀢𑀺𑀢𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁂𑀦𑁂𑀯 𑀭𑀽𑀧𑀼𑀧𑁆𑀧𑀢𑁆𑀢𑀺, 𑀏𑀯𑀁 𑀅𑀲𑀜𑁆𑀜𑀻𑀦𑀫𑁆𑀧𑀻𑀢𑀺 𑀢𑀢𑁆𑀣 𑀓𑀸𑀫𑀸𑀯𑀘𑀭𑀓𑀫𑁆𑀫𑀼𑀦𑀸 𑀬𑀣𑀸 𑀯𑀺𑀧𑀸𑀓𑀸𑀦𑀼𑀭𑀽𑀧𑀸𑀦𑀁 𑀧𑀘𑁆𑀘𑀬𑁄 𑀳𑁄𑀦𑁆𑀢𑁄 𑀓𑁂𑀲𑀜𑁆𑀘𑀺𑀬𑁂𑀯 𑀳𑁄𑀢𑀺, 𑀦 𑀲𑀩𑁆𑀩𑁂𑀲𑀁, 𑀓𑀢𑁆𑀣𑀘𑀺𑀬𑁂𑀯 𑀳𑁄𑀢𑀺, 𑀦 𑀲𑀩𑁆𑀩𑀢𑁆𑀣, 𑀦 𑀏𑀯𑀁 𑀯𑀺𑀧𑀸𑀓𑀸𑀦𑀦𑁆𑀢𑀺 𑀆𑀳 ‘‘𑀏𑀓𑀦𑁆𑀢𑁂𑀦𑀸’’𑀢𑀺. 𑀢𑁂𑀲𑀁 𑀯𑀲𑁂𑀦𑀸𑀢𑀺 𑀢𑁂𑀲𑀁 𑀯𑀺𑀧𑀸𑀓𑀧𑀘𑁆𑀘𑀬𑀮𑀸𑀪𑀻𑀦𑀁 𑀯𑀺𑀧𑀸𑀓𑀓𑁆𑀔𑀦𑁆𑀥𑀸𑀦𑀁 𑀯𑀲𑁂𑀦. 𑀦 𑀳𑀻𑀢𑀺𑀆𑀤𑀺𑀦𑀸 ‘‘𑀏𑀓𑀦𑁆𑀢𑁂𑀦𑀸’’𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀩𑁆𑀬𑀢𑀺𑀭𑁂𑀓𑀢𑁄 𑀯𑀺𑀪𑀸𑀯𑁂𑀢𑀺. 𑀪𑀽𑀫𑀺𑀤𑁆𑀯𑀬𑀯𑀺𑀧𑀸𑀓𑁄𑀢𑀺 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑁄 𑀆𑀭𑀼𑀧𑁆𑀧𑁂 𑀭𑀽𑀧𑀲𑁆𑀲 𑀦 𑀳𑀺 𑀧𑀘𑁆𑀘𑀬𑁄𑀢𑀺 𑀬𑁄𑀚𑀦𑀸.

𑀯𑀺𑀧𑀸𑀓𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁫. 𑀆𑀳𑀸𑀭𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁫. 𑀓𑁂𑀯𑀮𑀸𑀬 𑀑𑀚𑀸𑀬 𑀅𑀚𑁆𑀛𑁄𑀳𑀭𑀡𑀲𑁆𑀲 𑀅𑀪𑀸𑀯𑀸 ‘‘𑀅𑀲𑀺𑀢𑀧𑀻𑀢𑀸𑀤𑀺𑀯𑀢𑁆𑀣𑀽𑀳𑀺 𑀲𑀳 𑀅𑀚𑁆𑀛𑁄𑀳𑀭𑀺𑀢𑁄𑀯𑀸’’𑀢𑀺 𑀯𑀼𑀢𑁆𑀢𑀁. 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀧𑁆𑀧𑀪𑁂𑀤𑁂 𑀅𑀲𑀺𑀢𑁂 𑀢𑀸𑀯 𑀓𑀩𑀴𑀻𑀓𑀸𑀭𑀢𑀸 𑀳𑁄𑀢𑀼, 𑀧𑀸𑀢𑀩𑁆𑀩𑀸𑀤𑀺𑀓𑁂 𑀧𑀦 𑀓𑀣𑀦𑁆𑀢𑀺 𑀆𑀳 ‘‘𑀧𑀸𑀢𑀩𑁆𑀩…𑀧𑁂… 𑀳𑁄𑀦𑁆𑀢𑀻’’𑀢𑀺. 𑀬𑁂𑀪𑀼𑀬𑁆𑀬𑀯𑀲𑁂𑀦 𑀯𑀸 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀦𑀼𑀧𑀸𑀮𑀓𑁄𑀢𑀺 𑀉𑀧𑀢𑁆𑀣𑀫𑁆𑀪𑀓𑁄. 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀲𑁆𑀲 𑀓𑀸𑀬𑀲𑁆𑀲 𑀆𑀳𑀸𑀭𑀧𑀘𑁆𑀘𑀬𑀪𑀸𑀯𑁄 𑀓𑀩𑀴𑀻𑀓𑀸𑀭𑀸𑀳𑀸𑀭𑀲𑁆𑀲 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑁄. 𑀓𑀲𑁆𑀫𑀸𑀢𑀺 𑀘𑁂? 𑀏𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀦 𑀳𑀻’’𑀢𑀺𑀆𑀤𑀺𑀦𑀸. 𑀲𑀢𑀺 𑀳𑀺 𑀧𑀘𑁆𑀘𑀬𑀪𑀸𑀯𑁂 ‘‘𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁄 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀲𑁆𑀲 𑀓𑀸𑀬𑀲𑁆𑀲 𑀆𑀳𑀸𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀦 𑀧𑀦 𑀯𑀼𑀢𑁆𑀢𑀁, 𑀦𑁄𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀲𑁆𑀲 𑀧𑀦 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀢𑀺𑀯𑀺𑀥𑁄𑀧𑀺…𑀧𑁂… 𑀯𑀼𑀢𑁆𑀢𑁄’’𑀢𑀺.

𑀆𑀳𑀸𑀭𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁬. 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁬. ‘‘𑀫𑀺𑀲𑁆𑀲𑀓𑀢𑁆𑀢𑀸’’𑀢𑀺 𑀇𑀤𑀁 𑀇𑀦𑁆𑀤𑁆𑀭𑀺𑀬𑀢𑀸𑀬 𑀭𑀽𑀧𑀸𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀦𑀁 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀤𑁂𑀲𑀺𑀢𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀫𑀺𑀲𑁆𑀲𑀓𑀢𑁆𑀢𑀸𑀢𑀺 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀫𑀺𑀲𑁆𑀲𑀓𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀅𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀯𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀬𑀣𑀸 𑀧𑀜𑁆𑀳𑀸𑀧𑀼𑀘𑁆𑀙𑀓𑁂 𑀅𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀫𑀺𑀲𑁆𑀲𑀓𑀢𑁆𑀢𑀸 𑀦 𑀕𑀳𑀺𑀢𑀁, 𑀦 𑀏𑀯𑀫𑀺𑀥 𑀅𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀅𑀕𑁆𑀕𑀳𑀺𑀢𑀦𑁆𑀢𑀺 𑀅𑀢𑁆𑀣𑁄.

𑀅𑀭𑀽𑀧𑀸𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀧𑀘𑁆𑀘𑀬𑀦𑁆𑀢𑀭𑀸𑀧𑁂𑀓𑁆𑀔𑀸𑀦𑀺 𑀆𑀯𑀚𑁆𑀚𑀦𑀸𑀭𑀫𑁆𑀫𑀡𑀸𑀤𑀺𑀅𑀜𑁆𑀜𑀧𑀘𑁆𑀘𑀬𑀲𑀸𑀧𑁂𑀓𑁆𑀔𑀸𑀦𑀺 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀸 𑀲𑀺𑀬𑀼𑀁 𑀘𑀓𑁆𑀔𑀸𑀤𑀻𑀦𑀁 𑀭𑀽𑀧𑀸𑀭𑀽𑀧𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀓𑀤𑀸𑀘𑀺𑀧𑀺 𑀅𑀯𑀺𑀦𑀺𑀩𑁆𑀪𑀼𑀢𑁆𑀢𑀪𑀸𑀯𑀲𑁆𑀲 𑀅𑀪𑀸𑀯𑀢𑁄, 𑀧𑀘𑁆𑀘𑀬𑀦𑁆𑀢𑀭𑀲𑀫𑁄𑀥𑀸𑀦𑀸𑀧𑁂𑀓𑁆𑀔𑀢𑀸𑀬 𑀘. 𑀬𑁄 𑀧𑀦 𑀦𑀺𑀭𑀧𑁂𑀓𑁆𑀔𑁄𑀢𑀺 𑀬𑀣𑀸 𑀘𑀓𑁆𑀔𑀸𑀤𑀻𑀦𑀺 𑀧𑀘𑁆𑀘𑀬𑀦𑁆𑀢𑀭𑁂𑀲𑀼 𑀲𑀸𑀧𑁂𑀓𑁆𑀔𑀸𑀦𑀺, 𑀏𑀯𑀁 𑀲𑀸𑀧𑁂𑀓𑁆𑀔𑁄 𑀅𑀳𑀼𑀢𑁆𑀯𑀸 𑀬𑁄 𑀢𑀢𑁆𑀣 𑀦𑀺𑀭𑀧𑁂𑀓𑁆𑀔𑁄 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄 𑀳𑁄𑀢𑀺 𑀅𑀯𑀺𑀦𑀺𑀩𑁆𑀪𑀼𑀢𑁆𑀢𑀥𑀫𑁆𑀫𑀸𑀦𑀁 𑀬𑀣𑀸 𑀤𑀼𑀯𑀺𑀥𑀫𑁆𑀧𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀲𑁄 𑀅𑀢𑁆𑀢𑀦𑁄…𑀧𑁂… 𑀦𑀢𑁆𑀣𑀻𑀢𑀺 𑀬𑁄𑀚𑀦𑀸. 𑀅𑀯𑀺𑀦𑀺𑀩𑁆𑀪𑀼𑀢𑁆𑀢𑀸𑀦𑀁 𑀢𑁂𑀲𑀫𑁆𑀧𑀺 𑀮𑀺𑀗𑁆𑀕𑀸𑀤𑀻𑀦𑀁 𑀲𑀺𑀬𑀼𑀁 𑀯𑀺𑀦𑀺𑀩𑁆𑀪𑀼𑀢𑁆𑀢𑀸𑀦𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀢𑀸𑀪𑀸𑀯𑀲𑁆𑀲 𑀅𑀤𑀺𑀝𑁆𑀞𑀢𑁆𑀢𑀸. 𑀦𑀦𑀼 𑀘𑀓𑁆𑀔𑀸𑀤𑀻𑀦𑀁 𑀯𑀺𑀦𑀺𑀩𑁆𑀪𑀼𑀢𑁆𑀢𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀪𑀸𑀯𑁄 𑀤𑀺𑀝𑁆𑀞𑁄𑀢𑀺? 𑀲𑀘𑁆𑀘𑀁 𑀤𑀺𑀝𑁆𑀞𑁄, 𑀦 𑀧𑀦 𑀲𑁄 𑀲𑀫𑀸𑀦𑀚𑀸𑀢𑀺𑀬𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀳𑀻’’𑀢𑀺𑀆𑀤𑀺𑀫𑀸𑀳. 𑀲𑀢𑀺 𑀘𑁂𑀯𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀲𑀫𑀸𑀦𑀚𑀸𑀢𑀺𑀬𑀁𑀬𑁂𑀯 𑀅𑀯𑀺𑀦𑀺𑀩𑁆𑀪𑀼𑀢𑁆𑀢𑀲𑁆𑀲 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀪𑀸𑀯𑁂 𑀲𑀢𑀺 𑀇𑀢𑁆𑀣𑀺𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑁂𑀳𑀺 𑀲𑀤𑁆𑀥𑀺𑀁. 𑀲𑀳𑀬𑁄𑀕𑁂 𑀳𑀺 𑀇𑀤𑀁 𑀓𑀭𑀡𑀯𑀘𑀦𑀁. 𑀬𑀤𑀺𑀧𑀺 𑀇𑀢𑁆𑀣𑀺𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀮𑀺𑀗𑁆𑀕𑀸𑀤𑀻𑀦𑀁 𑀓𑀮𑀮𑀸𑀤𑀺𑀓𑀸𑀮𑁂 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀢𑀁 𑀦 𑀨𑀭𑁂𑀬𑁆𑀬𑀼𑀁 𑀢𑁂𑀲𑀁 𑀢𑀤𑀸 𑀅𑀪𑀸𑀯𑀢𑁄. 𑀬𑁂 𑀧𑀦 𑀭𑀽𑀧𑀥𑀫𑁆𑀫𑀸 𑀢𑀤𑀸 𑀲𑀦𑁆𑀢𑀺, 𑀢𑁂𑀳𑀺 𑀅𑀯𑀺𑀦𑀺𑀩𑁆𑀪𑀼𑀢𑁆𑀢𑀸𑀯, 𑀢𑁂𑀲𑀁 𑀓𑀲𑁆𑀫𑀸 𑀦 𑀨𑀭𑀦𑁆𑀢𑀻𑀢𑀺 𑀆𑀳 ‘‘𑀅𑀜𑁆𑀜𑁂𑀲𑀁 𑀧𑀦𑀸’’𑀢𑀺𑀆𑀤𑀺. 𑀅𑀩𑀻𑀚𑀪𑀸𑀯𑀢𑁄 𑀅𑀦𑀺𑀫𑀺𑀢𑁆𑀢𑀪𑀸𑀯𑀢𑁄. 𑀢𑀤𑀦𑀼𑀭𑀽𑀧𑀸𑀦𑀦𑁆𑀢𑀺 𑀓𑀮𑀮𑀸𑀤𑀺𑀅𑀯𑀢𑁆𑀣𑀸𑀦𑀼𑀭𑀽𑀧𑀸𑀦𑀁 𑀅𑀢𑁆𑀣𑀺𑀢𑀁 𑀇𑀘𑁆𑀙𑀦𑁆𑀢𑀺, 𑀬𑀢𑁄 ‘‘𑀇𑀢𑁆𑀣𑀻, 𑀧𑀼𑀭𑀺𑀲𑁄’’𑀢𑀺 𑀧𑀓𑀢𑀺𑀯𑀺𑀪𑀸𑀕𑁄 𑀯𑀺𑀜𑁆𑀜𑀸𑀬𑀢𑀻𑀢𑀺 𑀢𑁂𑀲𑀁 𑀅𑀥𑀺𑀧𑁆𑀧𑀸𑀬𑁄.

𑀓𑀼𑀲𑀮𑀚𑀸𑀢𑀺𑀬𑀦𑁆𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁. 𑀬𑁂 𑀧𑀦 ‘‘𑀓𑀼𑀲𑀮𑀚𑀸𑀢𑀺𑀓’’𑀦𑁆𑀢𑀺 𑀧𑀞𑀦𑁆𑀢𑀺, 𑀢𑁂𑀲𑀁 𑀧𑀘𑁆𑀘𑀢𑁆𑀢𑁂𑀓𑀯𑀘𑀦𑀁. 𑀯𑀺𑀲𑀼𑀁 𑀏𑀓𑀚𑀸𑀢𑀺 𑀯𑀸 𑀪𑀽𑀫𑀺 𑀯𑀸 𑀦 𑀳𑁄𑀢𑀺 𑀢𑀤𑁂𑀓𑀤𑁂𑀲𑀪𑀸𑀯𑀢𑁄. 𑀳𑁂𑀢𑀼𑀆𑀤𑀻𑀲𑀼𑀧𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 ‘‘𑀅𑀓𑀼𑀲𑀮𑀸𑀳𑀸𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄’’𑀢𑀺 𑀏𑀯𑀫𑀸𑀤𑀺𑀓𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀏𑀲 𑀦𑀬𑁄𑀢𑀺 𑀬𑁆𑀯𑀸𑀬𑀁 ‘‘𑀪𑀽𑀫𑀺𑀯𑀲𑁂𑀦 𑀯𑀼𑀢𑁆𑀢𑁂𑀲𑀽’’𑀢𑀺𑀆𑀤𑀺𑀦𑀸 𑀅𑀭𑀽𑀧𑁂 𑀅𑀮𑀩𑁆𑀪𑀫𑀸𑀦𑀲𑁆𑀲 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀲𑁆𑀲 𑀅𑀝𑁆𑀞𑀧𑀦𑁂 𑀅𑀢𑁆𑀣𑀦𑀬𑁄 𑀯𑀼𑀢𑁆𑀢𑁄, 𑀏𑀲 𑀦𑀬𑁄 𑀬𑁄𑀚𑁂𑀢𑀩𑁆𑀩𑁄𑀢𑀺. 𑀢𑀣𑀸 𑀅𑀧𑀭𑀺𑀬𑀸𑀧𑀦𑁆𑀦𑀓𑀼𑀲𑀮𑀳𑁂𑀢𑀼, 𑀢𑀣𑀸 𑀅𑀓𑀼𑀲𑀮𑀳𑁂𑀢𑀽𑀢𑀺 𑀏𑀢𑁆𑀣𑀸𑀧𑀺 𑀧𑀞𑀫𑀸𑀧𑀭𑀺𑀬𑀸𑀧𑀦𑁆𑀦𑀓𑀼𑀲𑀮𑀳𑁂𑀢𑀼 𑀤𑁄𑀫𑀦𑀲𑁆𑀲𑀲𑀳𑀕𑀢𑀸𑀓𑀼𑀲𑀮𑀳𑁂𑀢𑀼 𑀘 𑀯𑀺𑀲𑀼𑀁 𑀏𑀓𑀚𑀸𑀢𑀺 𑀪𑀽𑀫𑀺 𑀯𑀸 𑀦 𑀳𑁄𑀦𑁆𑀢𑀻𑀢𑀺 𑀆𑀭𑀼𑀧𑁆𑀧𑁂 𑀅𑀮𑀩𑁆𑀪𑀫𑀸𑀦𑀸𑀧𑀺 𑀯𑀺𑀲𑀼𑀁 𑀦 𑀞𑀧𑀺𑀢𑀸𑀢𑀺 𑀬𑁄𑀚𑁂𑀢𑀩𑁆𑀩𑁄. 𑀏𑀲 𑀦𑀬𑁄 ‘‘𑀅𑀓𑀼𑀲𑀮𑀸𑀳𑀸𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄’’𑀢𑀺 𑀏𑀯𑀫𑀸𑀤𑀻𑀲𑀼.

𑀲𑀢𑀺 𑀲𑀳𑀚𑀸𑀢𑀧𑀘𑁆𑀘𑀬𑀢𑁆𑀢𑁂 𑀉𑀧𑁆𑀧𑀸𑀤𑀓𑁆𑀔𑀡𑁂𑀧𑀺 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀢𑀸 𑀲𑀺𑀬𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀲𑀳𑀚𑀸𑀢𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑀁 𑀲𑀦𑁆𑀥𑀸𑀬𑀸’’𑀢𑀺. 𑀯𑀼𑀢𑁆𑀢𑀜𑁆𑀳𑀺 ‘‘𑀉𑀧𑁆𑀧𑀚𑁆𑀚𑀫𑀸𑀦𑁄 𑀲𑀳 𑀉𑀧𑁆𑀧𑀚𑁆𑀚𑀫𑀸𑀦𑀪𑀸𑀯𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀲𑀳𑀚𑀸𑀢𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑀅𑀝𑁆𑀞. 𑀧𑀘𑁆𑀘𑀬𑀼𑀤𑁆𑀤𑁂𑀲𑀯𑀡𑁆𑀡𑀦𑀸). 𑀢𑀲𑁆𑀲 𑀧𑀦 𑀲𑀳𑀚𑀸𑀢𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑁄 𑀬𑀤𑀺𑀧𑀺 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀳𑀚𑀸𑀢𑀧𑀘𑁆𑀘𑀬𑀢𑀸 𑀧𑀦 𑀢𑀲𑁆𑀲 𑀦𑀢𑁆𑀣𑀻’’𑀢𑀺 𑀲𑀭𑀽𑀧𑁂𑀦𑁂𑀯 𑀤𑀲𑁆𑀲𑀺𑀢𑁄, 𑀢𑀣𑀸𑀧𑀺 𑀢𑀁 𑀅𑀦𑀦𑀼𑀚𑀸𑀦𑀦𑁆𑀢𑁄 ‘‘𑀉𑀧𑁆𑀧𑀸𑀤…𑀧𑁂… 𑀦𑀺𑀯𑀸𑀭𑁂𑀢𑀼’’𑀦𑁆𑀢𑀺 𑀯𑀢𑁆𑀯𑀸 ‘‘𑀯𑀓𑁆𑀔𑀢𑀻’’𑀢𑀺𑀆𑀤𑀺𑀦𑀸 𑀢𑀫𑀢𑁆𑀣𑀁 𑀲𑀫𑀢𑁆𑀣𑁂𑀢𑀺. 𑀓𑀫𑁆𑀫𑀧𑀘𑁆𑀘𑀬𑀲𑀤𑀺𑀲𑀦𑁆𑀢𑀺 𑀳𑀺 𑀏𑀢𑁂𑀦 𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀧𑀘𑁆𑀘𑀬𑀪𑀸𑀯𑁄 𑀧𑀓𑀸𑀲𑀺𑀢𑁄. 𑀧𑀯𑀢𑁆𑀢𑁂𑀘𑀸𑀢𑀺 𑀘-𑀲𑀤𑁆𑀤𑁂𑀦 𑀧𑀝𑀺𑀲𑀦𑁆𑀥𑀺𑀬𑀜𑁆𑀘 𑀓𑀝𑀢𑁆𑀢𑀸𑀭𑀽𑀧𑀲𑁆𑀲 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀢𑁄 𑀅𑀜𑁆𑀜𑁄 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄 𑀦 𑀳𑀺 𑀅𑀢𑁆𑀣𑀻𑀢𑀺 𑀬𑁄𑀚𑀦𑀸. 𑀧𑀝𑀺𑀘𑁆𑀘𑀯𑀸𑀭𑀸𑀤𑀬𑁄 𑀲𑀫𑁆𑀧𑀬𑀼𑀢𑁆𑀢𑀯𑀸𑀭𑀧𑀭𑀺𑀬𑁄𑀲𑀸𑀦𑀸 𑀙 𑀯𑀸𑀭𑀸 𑀉𑀧𑁆𑀧𑀸𑀤𑀓𑁆𑀔𑀡𑀫𑁂𑀯 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀸 ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺𑀆𑀤𑀺𑀦𑀸, 𑀦 𑀞𑀺𑀢𑀺𑀓𑁆𑀔𑀡𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀜𑁆𑀘 𑀓𑀢𑁆𑀯𑀸𑀢𑀺 𑀉𑀧𑁆𑀧𑀸𑀤𑀓𑁆𑀔𑀡𑀫𑁂𑀯 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀢𑁆𑀢𑀸. 𑀏𑀢𑁂𑀲𑀽𑀢𑀺 𑀬𑀣𑀸𑀯𑀼𑀢𑁆𑀢𑁂𑀲𑀼 𑀙𑀲𑀼 𑀯𑀸𑀭𑁂𑀲𑀼. 𑀓𑁂𑀘𑀺 𑀧𑀦 ‘‘𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀦𑀼𑀧𑀸𑀮𑀦𑀁 𑀉𑀧𑁆𑀧𑀸𑀤𑀓𑁆𑀔𑀡𑁂 𑀦 𑀧𑀸𑀓𑀝𑀁 𑀩𑀮𑀯𑀜𑁆𑀘 𑀬𑀣𑀸 𑀞𑀺𑀢𑀺𑀓𑁆𑀔𑀡𑁂 𑀧𑀘𑁆𑀙𑀸𑀚𑀸𑀢𑀸𑀤𑀺𑀧𑀘𑁆𑀘𑀬𑀮𑀸𑀪𑀢𑁄 𑀣𑀺𑀭𑀪𑀸𑀯𑀧𑁆𑀧𑀢𑁆𑀢𑀺𑀬𑀸𑀲𑁆𑀲 𑀢𑀁 𑀧𑀸𑀓𑀝𑀁 𑀩𑀮𑀯𑀜𑁆𑀘, 𑀢𑀲𑁆𑀫𑀸 ‘𑀞𑀺𑀢𑀺𑀓𑁆𑀔𑀡𑁂’𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺.

𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁭. 𑀛𑀸𑀦𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁭. 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀲𑀗𑁆𑀔𑀸𑀢𑀸𑀦𑀻𑀢𑀺 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀸𑀦𑀺, 𑀛𑀸𑀦𑀗𑁆𑀕𑀪𑀸𑀯𑀯𑀺𑀲𑁂𑀲𑀦𑀢𑁄 𑀯𑀸 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀪𑀽𑀢𑀸𑀦𑁂𑀯 𑀲𑀼𑀔𑀤𑀼𑀓𑁆𑀔𑀸𑀦𑀺 𑀛𑀸𑀦𑀗𑁆𑀕𑀸𑀦𑀺, 𑀦 𑀇𑀢𑀭𑀲𑀼𑀔𑀤𑀼𑀓𑁆𑀔𑀸𑀦𑀻𑀢𑀺 𑀛𑀸𑀦𑀗𑁆𑀕𑀪𑀽𑀢𑀸𑀦𑀁𑀬𑁂𑀯 𑀲𑀼𑀔𑀤𑀼𑀓𑁆𑀔𑀸𑀦𑀁 𑀛𑀸𑀦𑀗𑁆𑀕𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀕𑁆𑀕𑀳𑀡𑀁 𑀓𑀢𑀁. 𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀫𑁂𑀯 ‘‘𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑁂𑀲𑀽’’𑀢𑀺𑀆𑀤𑀺𑀦𑀸 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀸𑀯𑁂𑀢𑀺, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀢𑁂𑀦𑀸𑀢𑀺 𑀯𑀺𑀲𑁂𑀲𑀦𑀪𑀽𑀢𑁂𑀦 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀕𑁆𑀕𑀳𑀡𑁂𑀦.

𑀅𑀪𑀺𑀦𑀺𑀧𑀸𑀢𑀫𑀢𑁆𑀢𑀢𑁆𑀢𑀸𑀢𑀺 𑀆𑀭𑀫𑁆𑀫𑀡𑀓𑀭𑀡𑀫𑀢𑁆𑀢𑀪𑀸𑀯𑀢𑁄. 𑀘𑀺𑀦𑁆𑀢𑀦𑀸𑀧𑀯𑀢𑁆𑀢𑀺𑀬𑀸 𑀉𑀧𑀦𑀺𑀚𑁆𑀛𑀸𑀬𑀦𑀧𑀯𑀢𑁆𑀢𑀺𑀬𑀸. 𑀬𑀣𑀸𑀯𑀼𑀢𑁆𑀢𑁂𑀦𑁂𑀯 𑀓𑀸𑀭𑀡𑁂𑀦𑀸𑀢𑀺 ‘‘𑀉𑀧𑀦𑀺𑀚𑁆𑀛𑀸𑀦𑀸𑀓𑀸𑀭𑀲𑁆𑀲 𑀅𑀪𑀸𑀯𑀢𑁄’’𑀢𑀺 𑀏𑀢𑁂𑀦 𑀓𑀸𑀭𑀡𑁂𑀦. 𑀧𑀼𑀩𑁆𑀩𑁂𑀢𑀺𑀆𑀤𑀺𑀢𑁄. 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺 𑀯𑀚𑁆𑀚𑀺𑀢𑀸𑀦𑀻𑀢𑀺 𑀲𑀢𑁆𑀢𑀲𑀼 𑀅𑀗𑁆𑀕𑁂𑀲𑀼 𑀤𑀲𑁆𑀲𑀺𑀬𑀫𑀸𑀦𑁂𑀲𑀼 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺 𑀯𑀚𑁆𑀚𑀺𑀢𑀸𑀦𑀺. 𑀅𑀝𑁆𑀞𑀓𑀣𑀸 𑀳𑁂𑀲𑀸𑀢𑀺 𑀮𑁂𑀲𑁂𑀦 𑀅𑀧𑀓𑀸𑀲𑁂𑀢𑀩𑁆𑀩𑀢𑀸𑀬 𑀓𑀸𑀭𑀡𑀫𑀸𑀳. 𑀢𑀻𑀲𑀼𑀧𑀺 𑀏𑀓𑀫𑁂𑀯 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀁𑀲𑀫𑀸𑀦𑀮𑀓𑁆𑀔𑀡𑀢𑀸𑀬 𑀇𑀢𑀭𑁂𑀲𑀁 𑀢𑀺𑀡𑁆𑀡𑀫𑁆𑀧𑀺 𑀕𑀳𑀡𑀁 𑀳𑁄𑀢𑀻𑀢𑀺. 𑀢𑀺𑀡𑁆𑀡𑀁 𑀧𑀦 𑀯𑀘𑀦𑁂𑀦𑀸𑀢𑀺 𑀉𑀧𑁂𑀓𑁆𑀔𑀸𑀲𑀼𑀔𑀤𑀼𑀓𑁆𑀔𑀸𑀦𑀁 𑀅𑀛𑀸𑀦𑀗𑁆𑀕𑀢𑀸𑀤𑀲𑁆𑀲𑀦𑀢𑁆𑀣𑁂𑀦 𑀯𑀘𑀦𑁂𑀦. 𑀢𑀢𑁄 𑀉𑀧𑁂𑀓𑁆𑀔𑀸𑀤𑀺𑀢𑁄 𑀅𑀜𑁆𑀜𑀲𑁆𑀲 𑀥𑀫𑁆𑀫𑀲𑁆𑀲 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬 𑀛𑀸𑀦𑀗𑁆𑀕𑀦𑁆𑀢𑀺 𑀉𑀤𑁆𑀥𑀝𑀪𑀸𑀯𑁄 𑀆𑀧𑀚𑁆𑀚𑀢𑀺 𑀅𑀛𑀸𑀦𑀗𑁆𑀕𑁂𑀲𑀼 𑀅𑀕𑁆𑀕𑀳𑀺𑀢𑀢𑁆𑀢𑀸. 𑀬𑀣𑀸𑀯𑀼𑀢𑁆𑀢𑀓𑀸𑀭𑀡𑀢𑁄𑀢𑀺 ‘‘𑀉𑀧𑀦𑀺𑀚𑁆𑀛𑀸𑀦𑀸𑀓𑀸𑀭𑀲𑁆𑀲 𑀅𑀪𑀸𑀯𑀢𑁄’’𑀢𑀺 𑀯𑀼𑀢𑁆𑀢𑀓𑀸𑀭𑀡𑀢𑁄 𑀅𑀜𑁆𑀜𑁂𑀦 𑀓𑀸𑀭𑀡𑁂𑀦 𑀅𑀦𑀼𑀤𑁆𑀥𑀝𑀪𑀸𑀯𑁄 𑀯𑀸 𑀆𑀧𑀚𑁆𑀚𑀢𑀺 𑀅𑀦𑀼𑀧𑀦𑀺𑀚𑁆𑀛𑀸𑀬𑀦𑀲𑀪𑀸𑀯𑁂𑀳𑀺 𑀲𑀤𑁆𑀥𑀺𑀁 𑀅𑀕𑁆𑀕𑀳𑀺𑀢𑀢𑁆𑀢𑀸 𑀉𑀧𑀦𑀺𑀚𑁆𑀛𑀸𑀬𑀦𑀸𑀓𑀸𑀭𑀪𑀸𑀯𑀢𑁄 𑀅𑀜𑁆𑀜𑁂𑀦𑁂𑀯 𑀓𑀸𑀭𑀡𑁂𑀦 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬 𑀧𑀸𑀴𑀺𑀬𑀁 𑀅𑀦𑀼𑀤𑁆𑀥𑀝𑀪𑀸𑀯𑁄 𑀆𑀧𑀚𑁆𑀚𑀢𑀺. 𑀢𑀁𑀤𑁄𑀲𑀧𑀭𑀺𑀳𑀭𑀡𑀢𑁆𑀣𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀤𑁄𑀲𑀯𑀺𑀦𑀺𑀫𑁄𑀘𑀦𑀢𑁆𑀣𑀁.

𑀬𑁂 𑀧𑀦𑀸𑀢𑀺𑀆𑀤𑀺 𑀧𑀤𑀓𑀸𑀭𑀫𑀢𑁆𑀢𑀤𑀲𑁆𑀲𑀦𑀁. 𑀲𑁄𑀫𑀦𑀲𑁆𑀲𑀸𑀤𑀻𑀳𑀻𑀢𑀺 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀛𑀸𑀦𑀗𑁆𑀕𑀼𑀧𑁂𑀓𑁆𑀔𑀸𑀳𑀺. 𑀅𑀯𑀺𑀪𑀽𑀢𑀪𑀸𑀯𑁄 𑀉𑀧𑁂𑀓𑁆𑀔𑀦𑀁. 𑀉𑀧𑁂𑀓𑁆𑀔𑀸 𑀳𑀺 𑀅𑀯𑀺𑀪𑀽𑀢𑀓𑀺𑀘𑁆𑀘𑀸 𑀯𑀼𑀢𑁆𑀢𑀸. 𑀲𑀫𑀸𑀦𑀸𑀦𑀁 𑀓𑁂𑀲𑀁? 𑀲𑀼𑀔𑀸𑀤𑀻𑀦𑀁, 𑀓𑁂𑀳𑀺? 𑀲𑁄𑀫𑀦𑀲𑁆𑀲𑀸𑀤𑀻𑀳𑀺, 𑀓𑀣𑀁? 𑀲𑀼𑀔…𑀧𑁂… 𑀬𑀼𑀢𑁆𑀢𑀢𑀸𑀢𑀺 𑀬𑁄𑀚𑀦𑀸. 𑀦 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬𑀸𑀢𑀺 𑀲𑀼𑀔𑀸𑀤𑀻𑀳𑀺, 𑀢𑀤𑀜𑁆𑀜𑁂𑀳𑀺 𑀅𑀪𑀺𑀦𑀺𑀭𑁄𑀧𑀦𑀸𑀤𑀻𑀳𑀺 𑀘 𑀅𑀦𑀺𑀦𑁆𑀤𑁆𑀭𑀺𑀬𑀓𑀺𑀘𑁆𑀘𑀢𑀸𑀬 𑀘 𑀅𑀦𑀼𑀧𑀦𑀺𑀚𑁆𑀛𑀸𑀬𑀦𑀓𑀺𑀘𑁆𑀘𑀢𑀸𑀬 𑀘 𑀅𑀲𑀫𑀸𑀦𑀢𑀸𑀬 𑀧𑀜𑁆𑀘𑀯𑀺𑀜𑁆𑀜𑀸𑀡𑁂𑀲𑀼 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬 𑀛𑀸𑀦𑀗𑁆𑀕𑀦𑁆𑀢𑀺 𑀅𑀦𑀼𑀤𑁆𑀥𑀝𑀪𑀸𑀯𑁂 𑀓𑀸𑀭𑀡𑀁 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺. 𑀲𑀸𑀢𑀺 𑀘𑀺𑀢𑁆𑀢𑁂𑀓𑀕𑁆𑀕𑀢𑀸. 𑀏𑀢𑁆𑀣𑀸𑀢𑀺 ‘‘𑀉𑀧𑁂𑀓𑁆𑀔𑀸𑀲𑀼𑀔𑀤𑀼𑀓𑁆𑀔𑀸𑀦𑀻’’𑀢𑀺 𑀏𑀢𑀲𑁆𑀫𑀺𑀁 𑀅𑀝𑁆𑀞𑀓𑀣𑀸𑀯𑀘𑀦𑁂 𑀦 𑀕𑀳𑀺𑀢𑀸. 𑀯𑀺𑀘𑀺𑀓𑀺𑀘𑁆𑀙𑀸𑀬𑀼𑀢𑁆𑀢𑀫𑀦𑁄𑀥𑀸𑀢𑀼𑀆𑀤𑀻𑀲𑀽𑀢𑀺 𑀯𑀺𑀘𑀺𑀓𑀺𑀘𑁆𑀙𑀸𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂 𑀫𑀦𑁄𑀥𑀸𑀢𑀼𑀬𑀸 𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀻𑀲𑀼 𑀘. 𑀢𑀲𑁆𑀲𑀸𑀧𑀺 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬𑀧𑀺.

𑀛𑀸𑀦𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁮. 𑀫𑀕𑁆𑀕𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁮. 𑀤𑀼𑀯𑀺𑀥𑀫𑁆𑀧𑀺 𑀲𑀗𑁆𑀓𑀧𑁆𑀧𑀦𑁆𑀢𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄𑀢𑀺 𑀘 𑀏𑀯𑀁 𑀅𑀦𑀯𑀚𑁆𑀚𑀲𑀸𑀯𑀚𑁆𑀚𑀪𑁂𑀤𑁂𑀦 𑀤𑀼𑀯𑀺𑀥𑀫𑁆𑀧𑀺. 𑀯𑀻𑀭𑀺𑀬𑀁 𑀲𑀫𑀸𑀥𑀺𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀯𑀺𑀢𑀓𑁆𑀓𑀸𑀤𑀺𑀪𑀸𑀯𑀲𑀸𑀫𑀜𑁆𑀜𑁂𑀦 𑀲𑀳 𑀕𑀳𑁂𑀢𑁆𑀯𑀸, 𑀏𑀓𑁂𑀓𑀫𑁂𑀯 𑀓𑀢𑁆𑀯𑀸 𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀳𑀺 𑀫𑀺𑀘𑁆𑀙𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀚𑀻𑀯𑁂𑀳𑀺. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀫𑀕𑁆𑀕𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 𑀮𑀩𑁆𑀪𑀫𑀸𑀦𑀸𑀦𑀺 𑀘 𑀫𑀕𑁆𑀕𑀧𑀘𑁆𑀘𑀬𑀪𑀸𑀯𑀢𑁄, 𑀘-𑀲𑀤𑁆𑀤𑁂𑀦 𑀅𑀮𑀩𑁆𑀪𑀫𑀸𑀦𑀸𑀦𑀺 𑀘 𑀫𑀕𑁆𑀕𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑀸. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀯𑀼𑀢𑁆𑀢𑀸𑀦𑀻𑀢𑀺 𑀆𑀳 ‘‘𑀫𑀕𑁆𑀕𑀗𑁆𑀕𑀯𑀘𑀦𑀲𑀸𑀫𑀜𑁆𑀜𑁂𑀦𑀸’’𑀢𑀺. 𑀏𑀯𑀁 𑀧𑀭𑀺𑀬𑀸𑀬𑀦𑀺𑀤𑁆𑀤𑁂𑀲𑁄 𑀇𑀥 𑀓𑀺𑀫𑀢𑁆𑀣𑀺𑀬𑁄𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀏𑀯𑀜𑁆𑀳𑀺 𑀲𑀼𑀢𑁆𑀢𑀯𑁄𑀳𑀸𑀭𑁄𑀧𑀺 𑀤𑀲𑁆𑀲𑀺𑀢𑁄 𑀳𑁄𑀢𑀻’’𑀢𑀺. 𑀏𑀯𑀁 𑀧𑀦 𑀤𑀲𑁆𑀲𑁂𑀦𑁆𑀢𑁂𑀦𑀸𑀢𑀺 𑀧𑀭𑀫𑀢𑁆𑀣𑀢𑁄 𑀅𑀫𑀕𑁆𑀕𑀗𑁆𑀕𑀸𑀦𑀺𑀧𑀺 𑀲𑀼𑀢𑁆𑀢𑁂 𑀫𑀕𑁆𑀕𑀗𑁆𑀕𑀯𑁄𑀳𑀸𑀭𑀲𑀺𑀤𑁆𑀥𑀺𑀬𑀸 𑀇𑀥 𑀫𑀕𑁆𑀕𑀗𑁆𑀕𑁂𑀳𑀺 𑀲𑀳 𑀤𑀲𑁆𑀲𑁂𑀦𑁆𑀢𑁂𑀦. 𑀉𑀤𑁆𑀥𑀭𑀺𑀢𑁆𑀯𑀸𑀢𑀺 𑀧𑀤𑀼𑀤𑁆𑀥𑀸𑀭𑀁 𑀓𑀢𑁆𑀯𑀸. 𑀇𑀤𑀸𑀦𑀺 𑀫𑀺𑀘𑁆𑀙𑀸𑀯𑀸𑀘𑀸𑀤𑀻𑀳𑀺 𑀲𑀤𑁆𑀥𑀺𑀁 𑀤𑁆𑀯𑀸𑀤𑀲𑀗𑁆𑀕𑀸𑀦𑀺 𑀦 𑀤𑀲𑁆𑀲𑁂𑀢𑀩𑁆𑀩𑀸𑀦𑀺, 𑀓𑀲𑁆𑀫𑀸𑀢𑀺 𑀘𑁂𑀢𑀺 𑀆𑀳 ‘‘𑀦 𑀳𑀺 𑀧𑀸𑀴𑀺𑀬𑀁…𑀧𑁂… 𑀯𑀢𑁆𑀢𑀩𑁆𑀩𑁄’’𑀢𑀺. 𑀢𑀧𑁆𑀧𑀝𑀺𑀧𑀓𑁆𑀔𑀪𑀸𑀯𑀢𑁄𑀬𑁂𑀯 𑀫𑀺𑀘𑁆𑀙𑀸𑀫𑀕𑁆𑀕𑀗𑁆𑀕𑀸𑀦𑀺, 𑀦 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀆𑀤𑀬𑁄 𑀯𑀺𑀬 𑀲𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀭𑀺𑀬𑀸𑀬𑀦𑀺𑀧𑁆𑀧𑀭𑀺𑀬𑀸𑀬𑀫𑀕𑁆𑀕𑀗𑁆𑀕𑀤𑀲𑁆𑀲𑀦𑀢𑁆𑀣𑁂𑀧𑀺 𑀅𑀢𑁆𑀣𑀯𑀘𑀦𑁂 𑀏𑀯𑀁 𑀦 𑀯𑀢𑁆𑀢𑀩𑁆𑀩𑀫𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀭𑀺𑀬𑀸𑀬…𑀧𑁂… 𑀅𑀥𑀺𑀓𑀭𑀡𑀸𑀦𑀻’’𑀢𑀺 𑀆𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑀣𑀸 ‘‘𑀅𑀜𑁆𑀜𑀪𑀸𑀕𑀺𑀬𑀲𑁆𑀲 𑀅𑀥𑀺𑀓𑀭𑀡𑀲𑁆𑀲𑀸’’𑀢𑀺 𑀏𑀢𑁆𑀣 𑀧𑀸𑀴𑀺𑀕𑀢𑀅𑀥𑀺𑀓𑀭𑀡𑀲𑀤𑁆𑀤𑀧𑀢𑀺𑀭𑀽𑀧𑀓𑁄 𑀅𑀜𑁆𑀜𑁄 𑀅𑀥𑀺𑀓𑀭𑀡𑀲𑀤𑁆𑀤𑁄 𑀧𑀸𑀴𑀺𑀕𑀢𑀢𑀤𑀜𑁆𑀜𑀲𑀸𑀥𑀸𑀭𑀡𑀢𑀸𑀬 𑀉𑀪𑀬𑀧𑀤𑀢𑁆𑀣𑁄 𑀉𑀤𑁆𑀥𑀝𑁄 ‘‘𑀅𑀥𑀺𑀓𑀭𑀡𑀁 𑀦𑀸𑀫 𑀘𑀢𑁆𑀢𑀸𑀭𑀺 𑀅𑀥𑀺𑀓𑀭𑀡𑀸𑀦𑀻’’𑀢𑀺, 𑀏𑀯𑀫𑀺𑀥𑀸𑀧𑀺 𑀦𑀺𑀧𑁆𑀧𑀭𑀺𑀬𑀸𑀬𑀁 𑀇𑀢𑀭𑀜𑁆𑀘 𑀫𑀕𑁆𑀕𑀗𑁆𑀕𑀁 𑀤𑀲𑁆𑀲𑁂𑀢𑀼𑀓𑀸𑀫𑁂𑀦 𑀧𑀸𑀴𑀺𑀕𑀢𑀢𑀤𑀜𑁆𑀜𑀲𑀸𑀥𑀸𑀭𑀡𑁄 𑀫𑀕𑁆𑀕𑀗𑁆𑀕𑀲𑀤𑁆𑀤𑁄 𑀉𑀤𑁆𑀥𑀭𑀺𑀢𑀩𑁆𑀩𑁄 𑀲𑀺𑀬𑀸, 𑀢𑀣𑀸 𑀦 𑀓𑀢𑀦𑁆𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀧𑀸𑀴𑀺𑀕𑀢𑁄𑀬𑁂𑀯 𑀫𑀕𑁆𑀕𑀗𑁆𑀕𑀲𑀤𑁆𑀤𑁄 𑀉𑀤𑁆𑀥𑀝𑁄, 𑀦 𑀢𑀤𑀜𑁆𑀜𑀲𑀸𑀥𑀸𑀭𑀡𑁄, 𑀦 𑀘 𑀅𑀢𑁆𑀣𑀼𑀤𑁆𑀥𑀸𑀭𑀫𑀼𑀔𑁂𑀦 𑀅𑀥𑀺𑀧𑁆𑀧𑁂𑀢𑀢𑁆𑀣𑁄 𑀦𑀺𑀬𑀫𑀺𑀢𑁄, 𑀢𑀲𑁆𑀫𑀸. 𑀢𑁂𑀲𑀽𑀢𑀺 𑀅𑀳𑁂𑀢𑀼𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼. ‘‘𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑀸𑀥𑀬𑁄’’𑀢𑀺 𑀏𑀢𑁆𑀣 𑀲𑀗𑁆𑀓𑀧𑁆𑀧𑀯𑀸𑀬𑀸𑀫𑀲𑀫𑀸𑀥𑀬𑁄 𑀲𑀫𑁆𑀫𑀸𑀫𑀺𑀘𑁆𑀙𑀸𑀲𑀤𑁆𑀤𑁂𑀳𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀬𑁄 𑀬𑀣𑀸𑀯𑀼𑀢𑁆𑀢𑀸 𑀲𑀦𑁆𑀢𑀻’’𑀢𑀺. 𑀲𑀗𑁆𑀓𑀧𑁆𑀧𑀯𑀸𑀬𑀸𑀫𑀲𑀫𑀸𑀥𑀺𑀧𑁆𑀧𑀢𑁆𑀢𑀸 𑀧𑀦 𑀢𑀢𑁆𑀣 𑀓𑁂𑀘𑀺 𑀲𑀦𑁆𑀢𑀺𑀬𑁂𑀯𑀸𑀢𑀺. 𑀅𑀣 𑀯𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀬𑁄𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀺𑀓𑁂 𑀅𑀦𑀯𑀲𑁂𑀲𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀬𑀣𑀸𑀯𑀼𑀢𑁆𑀢𑀸’’𑀢𑀺. 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀦𑀺𑀬𑀫𑀦𑀢𑁆𑀣𑀢𑁆𑀢𑀸 𑀦 𑀯𑀺𑀲𑁂𑀲𑀦𑀢𑁆𑀣𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀫𑀕𑁆𑀕𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨𑁦. 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁦. 𑀲𑀫𑁆𑀧𑀬𑁄𑀕𑀸𑀲𑀗𑁆𑀓𑀸𑀯𑀢𑁆𑀣𑀼𑀪𑀽𑀢𑁄𑀢𑀺 𑀲𑀫𑁆𑀧𑀬𑁄𑀕𑀸𑀲𑀗𑁆𑀓𑀸𑀬 𑀅𑀥𑀺𑀝𑁆𑀞𑀸𑀦𑀪𑀽𑀢𑁄. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀭𑀽𑀧𑀺𑀦𑁄 𑀳𑀺 𑀔𑀦𑁆𑀥𑀸 𑀘𑀓𑁆𑀔𑀸𑀤𑀻𑀦𑀁 𑀯𑀢𑁆𑀣𑀽𑀦𑀁 𑀅𑀩𑁆𑀪𑀦𑁆𑀢𑀭𑀢𑁄 𑀦𑀺𑀓𑁆𑀔𑀫𑀦𑁆𑀢𑀸 𑀯𑀺𑀬 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺.

𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨𑁧. 𑀅𑀢𑁆𑀣𑀺𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁧. 𑀬𑀲𑁆𑀫𑀺𑀁 𑀲𑀢𑀺 𑀬𑀁 𑀳𑁄𑀢𑀺, 𑀅𑀲𑀢𑀺 𑀘 𑀦 𑀳𑁄𑀢𑀺, 𑀲𑁄 𑀢𑀲𑁆𑀲 𑀧𑀘𑁆𑀘𑀬𑁄𑀢𑀺 𑀬𑀤𑀺𑀤𑀁 𑀲𑀫𑀸𑀲𑀢𑁄 𑀧𑀘𑁆𑀘𑀬𑀮𑀓𑁆𑀔𑀡𑀁 𑀬𑀁 𑀲𑀦𑁆𑀥𑀸𑀬 𑀲𑀼𑀢𑁆𑀢𑁂 𑀯𑀼𑀢𑁆𑀢𑀁 ‘‘𑀇𑀫𑀲𑁆𑀫𑀺𑀁 𑀲𑀢𑀺 𑀇𑀤𑀁 𑀳𑁄𑀢𑀺, 𑀇𑀫𑀲𑁆𑀫𑀺𑀁 𑀅𑀲𑀢𑀺 𑀇𑀤𑀁 𑀦 𑀳𑁄𑀢𑀻’’𑀢𑀺, 𑀢𑀬𑀺𑀤𑀁 𑀅𑀢𑁆𑀣𑀺𑀧𑀘𑁆𑀘𑀬𑁂 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁄 𑀳𑀻’’𑀢𑀺𑀆𑀤𑀺𑀁 𑀯𑀢𑁆𑀯𑀸 𑀅𑀬𑀜𑁆𑀘 𑀦𑀬𑁄 𑀦𑀺𑀩𑁆𑀩𑀸𑀦𑁂 𑀦 𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀦𑀺𑀩𑁆𑀩𑀸𑀦𑀁 𑀅𑀢𑁆𑀣𑀺𑀧𑀘𑁆𑀘𑀬𑀪𑀸𑀯𑁂𑀦 𑀦 𑀉𑀤𑁆𑀥𑀝𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀦𑀺𑀩𑁆𑀩𑀸𑀦𑀜𑁆𑀘…𑀧𑁂… 𑀉𑀧𑀓𑀸𑀭𑀓𑀁 𑀳𑁄𑀢𑀻’’𑀢𑀺 𑀆𑀳. 𑀢𑁂𑀦 𑀧𑀘𑁆𑀘𑀬𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀪𑀸𑀯𑁄 𑀯𑀺𑀲𑁂𑀲𑀢𑁄 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀧𑀸𑀓𑀝𑁄 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀦𑀢𑁆𑀣𑀺𑀪𑀸𑀯𑁄𑀧𑀓𑀸𑀭𑀓𑀢𑀸𑀯𑀺𑀭𑀼𑀤𑁆𑀥𑁄𑀢𑀺 𑀦𑀢𑁆𑀣𑀺𑀧𑀘𑁆𑀘𑀬𑀪𑀸𑀯𑀯𑀺𑀭𑀼𑀤𑁆𑀥𑁄. 𑀯𑀺𑀕𑀢𑀸𑀯𑀺𑀕𑀢𑀧𑀘𑁆𑀘𑀬𑀸 𑀯𑀺𑀬 𑀳𑀺 𑀅𑀜𑁆𑀜𑀫𑀜𑁆𑀜𑀁 𑀉𑀚𑀼𑀧𑀘𑁆𑀘𑀦𑀻𑀓𑀪𑀸𑀯𑁂𑀦 𑀞𑀺𑀢𑀸 𑀦𑀢𑁆𑀣𑀺𑀅𑀢𑁆𑀣𑀺𑀧𑀘𑁆𑀘𑀬𑀸. 𑀦 𑀦𑀺𑀩𑁆𑀩𑀸𑀦𑀁 𑀅𑀢𑁆𑀣𑀺𑀧𑀘𑁆𑀘𑀬𑁄 𑀦𑀢𑁆𑀣𑀺𑀪𑀸𑀯𑁄𑀧𑀓𑀸𑀭𑀓𑀢𑀸𑀅𑀯𑀺𑀭𑁄𑀥𑀢𑁄. 𑀬𑁂 𑀳𑀺 𑀅𑀢𑁆𑀣𑀺𑀧𑀘𑁆𑀘𑀬𑀥𑀫𑁆𑀫𑀸, 𑀢𑁂 𑀦𑀢𑁆𑀣𑀺𑀪𑀸𑀯𑁄𑀧𑀓𑀸𑀭𑀓𑀢𑀸𑀯𑀺𑀭𑀼𑀤𑁆𑀥𑀸 𑀏𑀯 𑀤𑀺𑀝𑁆𑀞𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑀢𑀺 𑀘 𑀉𑀧𑁆𑀧𑀦𑁆𑀦𑀢𑁆𑀢𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀬𑁂𑀲𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀸𑀢𑀺 𑀬𑁄𑀚𑀦𑀸. 𑀏𑀓𑀢𑁄𑀢𑀺 𑀲𑀳. 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑀢𑁄𑀢𑀺 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑀢𑁄. 𑀢𑀤𑀪𑀸𑀯𑁄𑀢𑀺 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑁄. 𑀏𑀢𑁂𑀲𑀦𑁆𑀢𑀺 𑀅𑀢𑁆𑀣𑀺𑀧𑀘𑁆𑀘𑀬𑀢𑀸𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸𑀦𑀁 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀸𑀦𑀁. 𑀥𑀫𑁆𑀫𑀲𑀪𑀸𑀯𑀯𑀲𑁂𑀦𑀸𑀢𑀺 𑀥𑀫𑁆𑀫𑀢𑀸𑀯𑀲𑁂𑀦. 𑀥𑀫𑁆𑀫𑀢𑀸 𑀳𑁂𑀲𑀸, 𑀬𑀤𑀺𑀤𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀳𑀺 𑀲𑀳 𑀧𑀼𑀭𑁂𑀢𑀭𑀁 𑀧𑀘𑁆𑀙𑀸 𑀘 𑀮𑀩𑁆𑀪𑀫𑀸𑀦𑀸 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀸 𑀢𑁂𑀲𑀁 𑀅𑀢𑁆𑀣𑀺𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀸𑀢𑀺. 𑀬𑀣𑀸 𑀯𑀸 𑀘𑀓𑁆𑀔𑀸𑀤𑀺𑀤𑁆𑀯𑀸𑀭𑀸𑀦𑀁 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀸𑀦𑀁 𑀲𑀢𑀺𑀧𑀺 𑀦𑀺𑀬𑀢𑀯𑀼𑀢𑁆𑀢𑀺𑀢𑀸𑀬 𑀤𑁆𑀯𑀸𑀭𑀸𑀭𑀫𑁆𑀫𑀡𑀢𑁄 𑀯𑀺𑀜𑁆𑀜𑀸𑀡𑀲𑁆𑀲 𑀙𑀩𑁆𑀩𑀺𑀥𑀪𑀸𑀯𑁂 𑀆𑀭𑀫𑁆𑀫𑀡𑀫𑀦𑀸𑀫𑀲𑀺𑀢𑁆𑀯𑀸, 𑀤𑁆𑀯𑀸𑀭𑀢𑁄 𑀤𑁆𑀯𑀸𑀭𑀫𑀦𑀸𑀫𑀲𑀺𑀢𑁆𑀯𑀸 𑀆𑀭𑀫𑁆𑀫𑀡𑀢𑁄 𑀙𑀩𑁆𑀩𑀺𑀥𑀢𑀸 𑀯𑀼𑀘𑁆𑀘𑀢𑀺, 𑀏𑀯𑀫𑀺𑀥𑀸𑀧𑀺 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀸𑀦𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀳𑀺 𑀲𑀢𑀺𑀧𑀺 𑀲𑀳𑀚𑀸𑀢𑀸𑀤𑀺𑀪𑀸𑀯𑁂 𑀅𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀯𑀲𑁂𑀦 𑀲𑀳𑀚𑀸𑀢𑀸𑀤𑀺𑀪𑁂𑀤𑀪𑀺𑀦𑁆𑀦𑀲𑁆𑀲 𑀅𑀢𑁆𑀣𑀺𑀧𑀘𑁆𑀘𑀬𑀲𑁆𑀲 𑀤𑀲𑁆𑀲𑀺𑀢𑀢𑁆𑀢𑀸 𑀧𑀜𑁆𑀳𑀸𑀯𑀸𑀭𑁂 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀸𑀦𑀁 𑀯𑀲𑁂𑀦 𑀆𑀕𑀢𑁂 𑀘𑀢𑀼𑀢𑁆𑀣𑀧𑀜𑁆𑀘𑀫𑀓𑁄𑀝𑁆𑀞𑀸𑀲𑀪𑀽𑀢𑁂 𑀅𑀢𑁆𑀣𑀺𑀧𑀘𑁆𑀘𑀬𑀯𑀺𑀲𑁂𑀲𑁂 𑀲𑀳𑀚𑀸𑀢𑀸𑀤𑀺𑀪𑁂𑀤𑀁 𑀆𑀫𑀲𑀺𑀢𑀼𑀁 𑀦 𑀮𑀩𑁆𑀪𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀆𑀳𑀸𑀭𑁄 𑀇𑀦𑁆𑀤𑁆𑀭𑀺𑀬𑀜𑁆𑀘 𑀲𑀳𑀚𑀸𑀢𑀸𑀤𑀺𑀪𑁂𑀤𑀁 𑀦 𑀮𑀪𑀢𑀻’’𑀢𑀺 𑀯𑀼𑀢𑁆𑀢𑀁, 𑀦 𑀧𑀦 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑁂𑀲𑀼 𑀲𑀳𑀚𑀸𑀢𑀸𑀤𑀺𑀪𑀸𑀯𑀲𑁆𑀲 𑀅𑀪𑀸𑀯𑀢𑁄. 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀅𑀢𑁆𑀣𑀺𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨𑁨-𑁨𑁩-𑁨𑁪. 𑀦𑀢𑁆𑀣𑀺𑀯𑀺𑀕𑀢𑀅𑀯𑀺𑀕𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁨-𑁨𑁩. 𑀏𑀢𑁆𑀣𑀸𑀢𑀺 𑀦𑀢𑁆𑀣𑀺𑀧𑀘𑁆𑀘𑀬𑁂. 𑀦𑀸𑀦𑀦𑁆𑀢𑀺 𑀦𑀸𑀦𑀢𑁆𑀢𑀁. 𑀏𑀢𑁂𑀦𑀸𑀢𑀺 𑀅𑀦𑀦𑁆𑀢𑀭𑀧𑀘𑁆𑀘𑀬𑀢𑁄 𑀦𑀢𑁆𑀣𑀺𑀧𑀘𑁆𑀘𑀬𑀲𑁆𑀲 𑀯𑀺𑀲𑁂𑀲𑀫𑀢𑁆𑀢𑀤𑀻𑀧𑀦𑁂𑀦 ‘‘𑀧𑀘𑁆𑀘𑀬𑀮𑀓𑁆𑀔𑀡𑀫𑁂𑀯 𑀳𑁂𑀢𑁆𑀣 𑀦𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦. 𑀅𑀢𑁆𑀣𑁄𑀢𑀺 𑀥𑀫𑁆𑀫𑁄. 𑀩𑁆𑀬𑀜𑁆𑀚𑀦𑀲𑀗𑁆𑀕𑀳𑀺𑀢𑁂𑀢𑀺 ‘‘𑀦𑀢𑁆𑀣𑀺𑀧𑀘𑁆𑀘𑀬𑁄 𑀯𑀺𑀕𑀢𑀧𑀘𑁆𑀘𑀬𑁄’’𑀢𑀺 𑀏𑀯𑀫𑀸𑀤𑀺𑀩𑁆𑀬𑀜𑁆𑀚𑀦𑁂𑀦 𑀲𑀗𑁆𑀕𑀳𑀺𑀢𑁂. 𑀧𑀘𑁆𑀘𑀬𑀮𑀓𑁆𑀔𑀡𑀫𑀢𑁆𑀢𑁂𑀢𑀺 𑀏𑀢𑁆𑀣 𑀧𑀯𑀢𑁆𑀢𑀺𑀑𑀓𑀸𑀲𑀤𑀸𑀦𑁂𑀦 𑀉𑀧𑀓𑀸𑀭𑀓𑀸 𑀅𑀭𑀽𑀧𑀥𑀫𑁆𑀫𑀸, 𑀯𑀺𑀕𑀢𑀪𑀸𑀯𑁂𑀦 𑀉𑀧𑀓𑀸𑀭𑀓𑀸𑀢𑀺 𑀏𑀯𑀫𑀸𑀤𑀺𑀓𑁂 𑀧𑀘𑁆𑀘𑀬𑀸𑀦𑀁 𑀮𑀓𑁆𑀔𑀡𑀫𑀢𑁆𑀢𑁂.

𑀦𑀢𑁆𑀣𑀺𑀯𑀺𑀕𑀢𑀅𑀯𑀺𑀕𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀧𑀓𑀺𑀡𑁆𑀡𑀓𑀯𑀺𑀦𑀺𑀘𑁆𑀙𑀬𑀓𑀣𑀸𑀯𑀡𑁆𑀡𑀦𑀸

𑀆𑀤𑀺𑀫𑀧𑀸𑀞𑁄𑀢𑀺 𑀧𑀼𑀭𑀺𑀫𑀧𑀸𑀞𑁄. 𑀢𑀣𑀸 𑀘 𑀲𑀢𑀻𑀢𑀺 𑀤𑁄𑀲𑀲𑁆𑀲𑀧𑀺 𑀲𑀢𑁆𑀢𑀭𑀲𑀳𑀺 𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑀪𑀸𑀯𑁂 𑀲𑀢𑀺. 𑀅𑀥𑀺𑀧𑀢𑀺𑀧𑀘𑁆𑀘𑀬𑀪𑀸𑀯𑁄𑀧𑀺𑀲𑁆𑀲 𑀅𑀦𑀼𑀜𑁆𑀜𑀸𑀢𑁄 𑀳𑁄𑀢𑀻𑀢𑀺 𑀆𑀳 ‘‘𑀤𑁄𑀲𑀲𑁆𑀲𑀧𑀺 𑀕𑀭𑀼𑀓𑀭𑀡𑀁 𑀧𑀸𑀴𑀺𑀬𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸’’𑀢𑀺. ‘‘𑀲𑁂𑀲𑀸𑀦’’𑀦𑁆𑀢𑀺 𑀯𑀘𑀦𑁂𑀦𑁂𑀯 𑀦𑀺𑀯𑀸𑀭𑀺𑀢𑁄𑀢𑀺 𑀓𑀤𑀸𑀘𑀺 𑀆𑀲𑀗𑁆𑀓𑁂𑀬𑁆𑀬𑀸𑀢𑀺 𑀢𑀁𑀦𑀺𑀯𑀢𑁆𑀢𑀦𑀢𑁆𑀣𑀫𑀸𑀳 ‘‘𑀦 𑀘 𑀲𑁂𑀲𑀸𑀦’’𑀦𑁆𑀢𑀺𑀆𑀤𑀺. 𑀧𑀼𑀭𑁂𑀚𑀸𑀢𑀸𑀤𑀻𑀳𑀻𑀢𑀺 𑀧𑀼𑀭𑁂𑀚𑀸𑀢𑀓𑀫𑁆𑀫𑀸𑀳𑀸𑀭𑀛𑀸𑀦𑀺𑀦𑁆𑀤𑁆𑀭𑀺𑀬𑀫𑀕𑁆𑀕𑀯𑀺𑀧𑀸𑀓𑀧𑀘𑁆𑀘𑀬𑁂𑀳𑀺. 𑀢𑀦𑁆𑀦𑀺𑀯𑀸𑀭𑀡𑀢𑁆𑀣𑀦𑁆𑀢𑀺 𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀤𑁄𑀲𑀲𑁆𑀲 𑀦𑀺𑀯𑀸𑀭𑀡𑀢𑁆𑀣𑀁. 𑀯𑀺𑀲𑀼𑀜𑁆𑀘 𑀅𑀕𑁆𑀕𑀳𑁂𑀢𑁆𑀯𑀸𑀢𑀺 𑀮𑁄𑀪𑀫𑁄𑀳𑀸 𑀯𑀺𑀧𑀸𑀓𑀧𑀘𑁆𑀘𑀬𑀸𑀧𑀺 𑀦 𑀳𑁄𑀦𑁆𑀢𑀺, 𑀢𑀣𑀸 𑀤𑁄𑀲𑁄𑀢𑀺 𑀏𑀯𑀁 𑀯𑀺𑀲𑀼𑀜𑁆𑀘 𑀅𑀕𑁆𑀕𑀳𑁂𑀢𑁆𑀯𑀸. 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀆𑀭𑀫𑁆𑀫𑀡𑀸𑀤𑀺𑀧𑀘𑁆𑀘𑀬𑁄 𑀳𑁄𑀦𑁆𑀢𑀁𑀬𑁂𑀯 𑀧𑀣𑀯𑀻𑀆𑀤𑀺𑀲𑀪𑀸𑀯𑀢𑁆𑀢𑀸 𑀅𑀢𑁆𑀢𑀦𑀸 𑀲𑀳𑀚𑀸𑀢𑀸𑀦𑀁 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀸 𑀳𑁄𑀦𑁆𑀢𑀺𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀲𑁆𑀲 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀪𑀸𑀯𑀁 𑀤𑀲𑁆𑀲𑁂𑀢𑀻’’𑀢𑀺. ‘‘𑀲𑀩𑁆𑀩𑀥𑀫𑁆𑀫𑀸𑀦’’𑀦𑁆𑀢𑀺 ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑁂 𑀲𑀩𑁆𑀩𑀥𑀫𑁆𑀫𑁂 𑀲𑀦𑁆𑀥𑀸𑀬𑀸𑀳 ‘‘𑀲𑀩𑁆𑀩𑀥𑀫𑁆𑀫𑀸𑀦𑀁 𑀬𑀣𑀸𑀬𑁄𑀕𑀁 𑀳𑁂𑀢𑀸𑀤𑀺𑀧𑀘𑁆𑀘𑀬𑀪𑀸𑀯𑀁 𑀤𑀲𑁆𑀲𑁂𑀢𑀻’’𑀢𑀺. 𑀦 𑀳𑀺 𑀏𑀢𑀁…𑀧𑁂… 𑀪𑀸𑀯𑀤𑀲𑁆𑀲𑀦𑀁, 𑀅𑀣 𑀔𑁄 𑀏𑀓𑀥𑀫𑁆𑀫𑀲𑁆𑀲 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑀤𑀲𑁆𑀲𑀦𑀁, 𑀢𑀲𑁆𑀫𑀸 ‘‘𑀏𑀢𑁂𑀦 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀭𑀽𑀧𑀸𑀤𑀻𑀦𑀦𑁆𑀢𑀺 𑀭𑀽𑀧𑀸𑀬𑀢𑀦𑀸𑀤𑀻𑀦𑀁.

𑀪𑁂𑀤𑀸𑀢𑀺 𑀯𑀺𑀲𑁂𑀲𑀸. 𑀪𑁂𑀤𑀁 𑀅𑀦𑀸𑀫𑀲𑀺𑀢𑁆𑀯𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀆𑀤𑀺𑀯𑀺𑀲𑁂𑀲𑀁 𑀅𑀕𑁆𑀕𑀳𑁂𑀢𑁆𑀯𑀸. 𑀢𑁂 𑀏𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑀯𑀺𑀲𑁂𑀲𑀸𑀦𑀁 𑀲𑀸𑀫𑀜𑁆𑀜𑀪𑀽𑀢𑁂 𑀔𑀦𑁆𑀥𑁂 𑀏𑀯. 𑀬𑀁 𑀲𑀦𑁆𑀥𑀸𑀬 ‘‘𑀏𑀯𑀁 𑀦 𑀲𑀓𑁆𑀓𑀸 𑀯𑀢𑁆𑀢𑀼’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀦 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀝𑁆𑀞𑀸𑀦𑀲𑀁𑀯𑀡𑁆𑀡𑀦𑀸 𑀳𑁂𑀲𑀸𑀢𑀺 𑀏𑀢𑁂𑀦 𑀲𑀼𑀢𑁆𑀢𑁂 𑀯𑀼𑀢𑁆𑀢𑀧𑀭𑀺𑀬𑀸𑀬𑀫𑀕𑁆𑀕𑀪𑀸𑀯𑁂𑀦𑁂𑀢𑁆𑀣 𑀦 𑀲𑀓𑁆𑀓𑀸 𑀫𑀺𑀘𑁆𑀙𑀸𑀯𑀸𑀘𑀸𑀤𑀻𑀦𑀁 𑀫𑀕𑁆𑀕𑀧𑀘𑁆𑀘𑀬𑀁 𑀯𑀢𑁆𑀢𑀼𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀲𑁂𑀲𑀧𑀘𑁆𑀘𑀬𑀪𑀸𑀯𑁄𑀢𑀺 𑀫𑀕𑁆𑀕𑀧𑀘𑁆𑀘𑀬𑀁 𑀞𑀧𑁂𑀢𑁆𑀯𑀸 𑀬𑀣𑀸𑀯𑀼𑀢𑁆𑀢𑁂𑀳𑀺 𑀲𑁂𑀲𑁂𑀳𑀺 𑀅𑀝𑁆𑀞𑀸𑀭𑀲𑀳𑀺 𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑀪𑀸𑀯𑁄. 𑀅𑀥𑀺𑀧𑀢𑀺𑀧𑀘𑁆𑀘𑀬𑁄 𑀦 𑀳𑁄𑀢𑀻𑀢𑀺 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀘𑁆𑀘𑀬𑁄 𑀦 𑀳𑁄𑀢𑀺. 𑀢𑀦𑁆𑀢𑀺 𑀯𑀺𑀘𑀺𑀓𑀺𑀘𑁆𑀙𑀁. 𑀢𑀢𑁆𑀣𑀸𑀢𑀺 𑀬𑀣𑀸𑀯𑀼𑀢𑁆𑀢𑁂𑀲𑀼 𑀅𑀳𑀺𑀭𑀺𑀓𑀸𑀤𑀻𑀲𑀼.

𑀤𑀲𑀥𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀧𑀼𑀦 𑀢𑀣𑀸 𑀳𑀤𑀬𑀯𑀢𑁆𑀣𑀼𑀦𑁆𑀢𑀺 𑀇𑀤𑀁 𑀅𑀢𑁆𑀣𑀫𑀢𑁆𑀢𑀯𑀘𑀦𑀁. 𑀧𑀸𑀞𑁄 𑀧𑀦 ‘‘𑀳𑀤𑀬𑀯𑀢𑁆𑀣𑀼 𑀢𑁂𑀲𑀜𑁆𑀘𑁂𑀯 𑀯𑀺𑀧𑁆𑀧𑀬𑀼𑀢𑁆𑀢𑀲𑁆𑀲 𑀘 𑀯𑀲𑁂𑀦 𑀤𑀲𑀥𑀸 𑀧𑀘𑁆𑀘𑀬𑁄 𑀳𑁄𑀢𑀻’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀸𑀬𑀢𑀦𑀫𑀢𑁆𑀢𑀫𑁂𑀯𑀸𑀢𑀺 𑀇𑀤𑀁 𑀭𑀽𑀧𑀸𑀤𑀻𑀦𑀁 𑀲𑀳𑀚𑀸𑀢𑀧𑀘𑁆𑀘𑀬𑀢𑀸𑀬 𑀯𑀺𑀬 𑀦𑀺𑀲𑁆𑀲𑀬𑀧𑀘𑁆𑀘𑀬𑀢𑀸𑀬 𑀘 𑀅𑀪𑀸𑀯𑀢𑁄, 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀢𑀸𑀬 𑀘 𑀪𑀸𑀯𑀢𑁄 𑀯𑀼𑀢𑁆𑀢𑀁. 𑀏𑀢𑀸𑀦𑀻𑀢𑀺 𑀬𑀣𑀸𑀯𑀼𑀢𑁆𑀢𑀸𑀦𑀺 𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀸𑀭𑀫𑁆𑀫𑀡𑀸𑀦𑀺. 𑀲𑀩𑁆𑀩𑀸𑀢𑀺𑀓𑁆𑀓𑀦𑁆𑀢𑀧𑀘𑁆𑀘𑀬𑀸𑀧𑁂𑀓𑁆𑀔𑀸𑀢𑀺 ‘‘𑀏𑀓𑀥𑀫𑁆𑀫𑀲𑁆𑀲 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑀢𑁄’’𑀢𑀺 𑀏𑀢𑀲𑁆𑀫𑀺𑀁 𑀯𑀺𑀘𑀸𑀭𑁂 𑀳𑁂𑀢𑀼𑀆𑀤𑀺𑀅𑀢𑀺𑀓𑁆𑀓𑀦𑁆𑀢𑀧𑀘𑁆𑀘𑀬𑀸𑀧𑁂𑀓𑁆𑀔𑀸 𑀏𑀢𑁂𑀲𑀁 𑀭𑀽𑀧𑀸𑀤𑀻𑀦𑀁 𑀅𑀧𑀼𑀩𑁆𑀩𑀢𑀸 𑀦𑀢𑁆𑀣𑀺, 𑀅𑀣 𑀔𑁄 𑀆𑀭𑀫𑁆𑀫𑀡𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀸𑀧𑁂𑀓𑁆𑀔𑀸. 𑀦 𑀳𑀺 𑀭𑀽𑀧𑀸𑀤𑀻𑀦𑀺 𑀳𑁂𑀢𑀼𑀲𑀳𑀚𑀸𑀢𑀸𑀥𑀺𑀧𑀢𑀺𑀆𑀤𑀺𑀯𑀲𑁂𑀦 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺. 𑀢𑀲𑁆𑀲𑀸𑀢𑀺 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀪𑀸𑀯𑀢𑁄 𑀅𑀧𑀼𑀩𑁆𑀩𑀢𑀸, 𑀢𑀲𑁆𑀫𑀸 𑀢𑀁 𑀏𑀓𑀽𑀦𑀯𑀻𑀲𑀢𑀺𑀯𑀺𑀥𑁄 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀢𑁆𑀢𑀥𑀸 𑀧𑀘𑁆𑀘𑀬𑀪𑀸𑀯𑁄 𑀬𑁄𑀚𑁂𑀢𑀩𑁆𑀩𑁄, 𑀦 𑀳𑀺 𑀑𑀚𑀸 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀦 𑀳𑁄𑀢𑀻𑀢𑀺.

𑀅𑀢𑁆𑀣𑁄𑀢𑀺 𑀯𑀸 𑀳𑁂𑀢𑀼𑀆𑀤𑀺𑀥𑀫𑁆𑀫𑀸𑀦𑀁 𑀲𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀳𑀺 𑀅𑀢𑁆𑀢𑀦𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀳𑀺 𑀅𑀭𑀡𑀻𑀬𑀢𑁄 𑀉𑀧𑀕𑀦𑁆𑀢𑀩𑁆𑀩𑀢𑁄, 𑀜𑀸𑀡𑁂𑀦 𑀯𑀸 𑀜𑀸𑀢𑀩𑁆𑀩𑀢𑁄 ‘‘𑀅𑀢𑁆𑀣𑁄’’𑀢𑀺 𑀯𑀼𑀘𑁆𑀘𑀢𑀺. 𑀆𑀓𑀸𑀭𑁄𑀢𑀺 𑀢𑀲𑁆𑀲𑁂𑀯 𑀧𑀯𑀢𑁆𑀢𑀺𑀆𑀓𑀸𑀭𑁄, 𑀬𑁂𑀦 𑀅𑀢𑁆𑀢𑀦𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀧𑀘𑁆𑀘𑀬𑀪𑀸𑀯𑀁 𑀉𑀧𑀕𑀘𑁆𑀙𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑀁 𑀧𑀦 𑀯𑀺𑀧𑁆𑀧𑀬𑀼𑀢𑁆𑀢𑀁. ‘‘𑀲𑀢𑁆𑀢𑀳𑀸𑀓𑀸𑀭𑁂𑀳𑀻’’𑀢𑀺 𑀧𑀞𑀸𑀦𑀲𑁆𑀲 𑀓𑀸𑀭𑀡𑀫𑀸𑀳 ‘‘𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁄 𑀳𑀻’’𑀢𑀺𑀆𑀤𑀺𑀦𑀸.

𑀬𑀁 𑀓𑀫𑁆𑀫𑀧𑀘𑁆𑀘𑀬𑁄…𑀧𑁂… 𑀤𑀝𑁆𑀞𑀩𑁆𑀩𑀁 𑀆𑀲𑁂𑀯𑀦𑀓𑀫𑁆𑀫𑀧𑀘𑁆𑀘𑀬𑀸𑀦𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲 𑀅𑀦𑀦𑁆𑀢𑀭𑀝𑁆𑀞𑀸𑀦𑀢𑀸𑀬. 𑀲𑀳𑀚𑀸𑀢𑀫𑁆𑀧𑀺 𑀳𑀺 𑀅𑀦𑀦𑁆𑀢𑀭𑀫𑁂𑀯𑀸𑀢𑀺. 𑀓𑁄𑀘𑀺 𑀧𑀦𑁂𑀢𑁆𑀣𑀸𑀢𑀺 𑀏𑀢𑁆𑀣 𑀏𑀢𑀲𑁆𑀫𑀺𑀁 𑀧𑀓𑀢𑀽𑀧𑀦𑀺𑀲𑁆𑀲𑀬𑀲𑀫𑀼𑀤𑀸𑀬𑁂 𑀓𑁄𑀘𑀺 𑀢𑀤𑁂𑀓𑀤𑁂𑀲𑀪𑀽𑀢𑁄 𑀓𑀫𑁆𑀫𑀲𑀪𑀸𑀯𑁄 𑀧𑀓𑀢𑀽𑀧𑀦𑀺𑀲𑁆𑀲𑀬𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀣𑀸𑀢𑀺 ‘‘𑀬𑀤𑀺𑀤𑀁 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑁂 𑀧𑀦𑁂𑀢𑁆𑀣 𑀇𑀦𑁆𑀤𑁆𑀭𑀺𑀬𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀢𑀸 𑀦 𑀮𑀩𑁆𑀪𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀺𑀁, 𑀢𑀲𑁆𑀫𑀺𑀁 𑀯𑀸 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀕𑁆𑀕𑀳𑀡𑁂. 𑀯𑀢𑁆𑀣𑀼𑀲𑁆𑀲 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀢𑀸 𑀮𑀩𑁆𑀪𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀸. 𑀦 𑀳𑀺 𑀆𑀭𑀫𑁆𑀫𑀡𑀪𑀽𑀢𑀁 𑀯𑀢𑁆𑀣𑀼 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀳𑁄𑀢𑀺, 𑀅𑀣 𑀔𑁄 𑀦𑀺𑀲𑁆𑀲𑀬𑀪𑀽𑀢𑀫𑁂𑀯𑀸𑀢𑀺. 𑀇𑀢𑁄 𑀉𑀢𑁆𑀢𑀭𑀻𑀢𑀺 𑀏𑀢𑁆𑀣 ‘‘𑀇𑀢𑁄’’𑀢𑀺 𑀇𑀤𑀁 𑀧𑀘𑁆𑀘𑀸𑀫𑀲𑀦𑀁 𑀧𑀼𑀭𑁂𑀚𑀸𑀢𑀁 𑀯𑀸 𑀲𑀦𑁆𑀥𑀸𑀬 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀁 𑀯𑀸. 𑀢𑀢𑁆𑀣 𑀧𑀞𑀫𑀦𑀬𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀧𑀼𑀭𑁂𑀚𑀸𑀢𑀢𑁄 𑀧𑀭𑀢𑁄𑀧𑀻’’𑀢𑀺. 𑀢𑁂𑀦 𑀓𑀫𑁆𑀫𑀸𑀤𑀺𑀧𑀘𑁆𑀘𑀬𑁂𑀲𑀼𑀧𑀺 𑀯𑀓𑁆𑀔𑀫𑀸𑀦𑁂𑀲𑀼 𑀮𑀩𑁆𑀪𑀫𑀸𑀦𑀸𑀮𑀩𑁆𑀪𑀫𑀸𑀦𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑀼𑀢𑀺𑀬𑀁 𑀧𑀦 𑀦𑀬𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀅𑀝𑁆𑀞𑀓𑀣𑀸𑀬𑀁 𑀆𑀕𑀢𑀯𑀲𑁂𑀦 𑀯𑀼𑀢𑁆𑀢𑀁 ‘‘𑀇𑀢𑁄 𑀯𑀸 𑀇𑀦𑁆𑀤𑁆𑀭𑀺𑀬𑀯𑀺𑀧𑁆𑀧𑀬𑀼𑀢𑁆𑀢𑀢𑁄’’𑀢𑀺, 𑀅𑀢𑁆𑀢𑀦𑀸 𑀯𑀼𑀢𑁆𑀢𑀦𑀬𑁂𑀦 𑀧𑀦 ‘‘𑀦𑀺𑀲𑁆𑀲𑀬𑀺𑀦𑁆𑀤𑁆𑀭𑀺𑀬𑀯𑀺𑀧𑁆𑀧𑀬𑀼𑀢𑁆𑀢𑀢𑁄 𑀯𑀸’’𑀢𑀺. 𑀢𑀢𑁆𑀣 𑀯𑀢𑁆𑀢𑀩𑁆𑀩𑀁 𑀲𑀬𑀫𑁂𑀯𑀸𑀳 ‘‘𑀆𑀭𑀫𑁆𑀫𑀡𑀸𑀥𑀺𑀧𑀢𑀻’’𑀢𑀺𑀆𑀤𑀺. 𑀓𑀫𑁆𑀫𑀸𑀤𑀻𑀲𑀼 𑀮𑀩𑁆𑀪𑀫𑀸𑀦𑀸𑀮𑀩𑁆𑀪𑀫𑀸𑀦𑀁 𑀦 𑀯𑀓𑁆𑀔𑀢𑀺 ‘‘𑀇𑀢𑁄 𑀉𑀢𑁆𑀢𑀭𑀻’’𑀢𑀺𑀆𑀤𑀺𑀦𑀸 𑀧𑀕𑁂𑀯 𑀅𑀢𑀺𑀤𑁂𑀲𑀲𑁆𑀲 𑀓𑀢𑀢𑁆𑀢𑀸, 𑀢𑀲𑁆𑀫𑀸 𑀧𑀼𑀭𑀺𑀫𑁄𑀬𑁂𑀯 𑀧𑀼𑀭𑁂𑀚𑀸𑀢𑀢𑁄𑀧𑀻𑀢𑀺 𑀯𑀼𑀢𑁆𑀢𑀅𑀢𑁆𑀣𑁄𑀬𑁂𑀯 𑀅𑀥𑀺𑀧𑁆𑀧𑁂𑀢𑁄.

‘‘𑀫𑀕𑁆𑀕𑀧𑀘𑁆𑀘𑀬𑀢𑀁 𑀅𑀯𑀺𑀚𑀳𑀦𑁆𑀢𑁄𑀯𑀸’’𑀢𑀺 𑀇𑀫𑀺𑀦𑀸 𑀘 𑀫𑀕𑁆𑀕𑀧𑀘𑁆𑀘𑀬𑁄 𑀯𑀼𑀢𑁆𑀢𑁄𑀢𑀺 ‘‘𑀫𑀕𑁆𑀕𑀯𑀚𑁆𑀚𑀸𑀦𑀁 𑀦𑀯𑀦𑁆𑀦’’𑀦𑁆𑀢𑀺 𑀯𑀼𑀢𑁆𑀢𑀁 𑀧𑀘𑁆𑀙𑀺𑀫𑀧𑀸𑀞𑁂, 𑀧𑀼𑀭𑀺𑀫𑀧𑀸𑀞𑁂 𑀧𑀦 ‘‘𑀫𑀕𑁆𑀕𑀧𑀘𑁆𑀘𑀬𑀢𑀁 𑀅𑀯𑀺𑀚𑀳𑀦𑁆𑀢𑁄𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀏𑀯 𑀫𑀕𑁆𑀕𑀧𑀘𑁆𑀘𑀬𑁂𑀦 𑀲𑀤𑁆𑀥𑀺𑀁 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀸 𑀕𑀳𑁂𑀢𑀩𑁆𑀩𑀸𑀢𑀺 ‘‘𑀤𑀲𑀦𑁆𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀘𑁆𑀙𑀺𑀫𑀧𑀸𑀞𑁂 ‘‘𑀏𑀓𑀸𑀤𑀲𑀳𑀸𑀓𑀸𑀭𑁂𑀳𑀻’’𑀢𑀺 𑀯𑀢𑁆𑀢𑀩𑁆𑀩𑀁, 𑀧𑀼𑀭𑀺𑀫𑀧𑀸𑀞𑁂 ‘‘𑀤𑁆𑀯𑀸𑀤𑀲𑀳𑀻’’𑀢𑀺.

𑀲𑀫𑀦𑀦𑁆𑀢𑀭𑀦𑀺𑀭𑀼𑀤𑁆𑀥𑀢𑀸𑀬 𑀆𑀭𑀫𑁆𑀫𑀡𑀪𑀸𑀯𑁂𑀦 𑀘𑀸𑀢𑀺 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀯𑀺𑀲𑁂𑀲𑀫𑀦𑀸𑀫𑀲𑀺𑀢𑁆𑀯𑀸 𑀓𑁂𑀯𑀮𑀁 𑀲𑀫𑀦𑀦𑁆𑀢𑀭𑀦𑀺𑀭𑀼𑀤𑁆𑀥𑀢𑀸𑀬 𑀆𑀭𑀫𑁆𑀫𑀡𑀪𑀸𑀯𑁂𑀦, 𑀦 𑀘 𑀲𑀫𑀦𑀦𑁆𑀢𑀭𑀦𑀺𑀭𑀼𑀤𑁆𑀥𑀢𑀸𑀆𑀭𑀫𑁆𑀫𑀡𑀪𑀸𑀯𑀲𑀸𑀫𑀜𑁆𑀜𑁂𑀦𑀸𑀢𑀺 𑀅𑀢𑁆𑀣𑁄. ‘‘𑀇𑀫𑀺𑀦𑀸 𑀉𑀧𑀸𑀬𑁂𑀦𑀸’’𑀢𑀺 𑀧𑀘𑁆𑀘𑀬𑀲𑀪𑀸𑀕𑀢𑀸𑀤𑀲𑁆𑀲𑀦𑁂𑀦 𑀧𑀘𑁆𑀘𑀬𑀯𑀺𑀲𑀪𑀸𑀕𑀢𑀸𑀤𑀲𑁆𑀲𑀦𑁂𑀦 𑀘 𑀯𑀼𑀢𑁆𑀢𑀁 𑀧𑀤𑀤𑁆𑀯𑀬𑀁 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀧𑀤𑀼𑀤𑁆𑀥𑀸𑀭𑁄 𑀓𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀳𑁂𑀢𑀼𑀆𑀤𑀻𑀦𑀁 𑀲𑀳𑀚𑀸𑀢𑀸𑀦𑀁…𑀧𑁂… 𑀬𑁄𑀚𑁂𑀢𑀩𑁆𑀩𑀸’’𑀢𑀺 𑀆𑀳. 𑀳𑁂𑀢𑀼𑀆𑀭𑀫𑁆𑀫𑀡𑀸𑀤𑀻𑀦𑀁 𑀲𑀳𑀚𑀸𑀢𑀸𑀲𑀳𑀚𑀸𑀢𑀪𑀸𑀯𑁂𑀦 𑀅𑀜𑁆𑀜𑀫𑀜𑁆𑀜𑀯𑀺𑀲𑀪𑀸𑀕𑀢𑀸𑀢𑀺 𑀬𑁄𑀚𑀦𑀸. 𑀏𑀯𑀫𑀸𑀤𑀺𑀦𑀸𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀧𑀼𑀭𑁂𑀚𑀸𑀢𑀸𑀦𑀁 𑀘𑀓𑁆𑀔𑀸𑀤𑀻𑀦𑀁 𑀭𑀽𑀧𑀸𑀤𑀻𑀦𑀜𑁆𑀘 𑀧𑀼𑀭𑁂𑀚𑀸𑀢𑀪𑀸𑀯𑁂𑀦 𑀲𑀪𑀸𑀕𑀢𑀸, 𑀧𑀯𑀢𑁆𑀢𑀺𑀬𑀁 𑀯𑀢𑁆𑀣𑀼𑀔𑀦𑁆𑀥𑀸𑀤𑀻𑀦𑀁 𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀸𑀦𑀁 𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀪𑀸𑀯𑁂𑀦 𑀯𑀺𑀲𑀪𑀸𑀕𑀢𑀸𑀢𑀺 𑀏𑀯𑀫𑀸𑀤𑀻𑀦𑀫𑁆𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀳𑁂𑀢𑀼𑀦𑀳𑁂𑀢𑀼𑀆𑀤𑀺𑀪𑀸𑀯𑀢𑁄𑀧𑀺 𑀘𑁂𑀢𑁆𑀣 𑀬𑀼𑀕𑀴𑀓𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄. 𑀳𑁂𑀢𑀼𑀧𑀘𑁆𑀘𑀬𑁄 𑀳𑀺 𑀳𑁂𑀢𑀼𑀪𑀸𑀯𑁂𑀦 𑀧𑀘𑁆𑀘𑀬𑁄, 𑀇𑀢𑀭𑁂 𑀢𑀤𑀜𑁆𑀜𑀪𑀸𑀯𑁂𑀦. 𑀏𑀯𑀫𑀺𑀢𑀭𑁂𑀲𑀼𑀧𑀺 𑀬𑀣𑀸𑀭𑀳𑀁 𑀬𑀼𑀕𑀴𑀓𑀢𑁄 𑀯𑁂𑀤𑀺𑀢𑀩𑁆𑀩𑁄.

𑀉𑀪𑀬𑀧𑁆𑀧𑀥𑀸𑀦𑀢𑀸𑀢𑀺 𑀚𑀦𑀦𑁄𑀧𑀢𑁆𑀣𑀫𑁆𑀪𑀦𑀧𑁆𑀧𑀥𑀸𑀦𑀢𑀸. 𑀞𑀸𑀦𑀦𑁆𑀢𑀺 𑀧𑀤𑀲𑁆𑀲 𑀅𑀢𑁆𑀣𑀯𑀘𑀦𑀁 𑀓𑀸𑀭𑀡𑀪𑀸𑀯𑁄𑀢𑀺 𑀯𑀺𑀦𑀸𑀧𑀺 𑀪𑀸𑀯𑀧𑀘𑁆𑀘𑀬𑀁 𑀪𑀸𑀯𑀧𑀘𑁆𑀘𑀬𑀲𑁆𑀲 𑀅𑀢𑁆𑀣𑁄 𑀜𑀸𑀬𑀢𑀻𑀢𑀺. 𑀉𑀧𑀦𑀺𑀲𑁆𑀲𑀬𑀁 𑀪𑀺𑀦𑁆𑀤𑀦𑁆𑀢𑁂𑀦𑀸𑀢𑀺 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀧𑀓𑀢𑀽𑀧𑀦𑀺𑀲𑁆𑀲𑀬𑀯𑀺𑀪𑀸𑀕𑁂𑀦 𑀯𑀺𑀪𑀚𑀦𑁆𑀢𑁂𑀦. 𑀢𑀬𑁄𑀧𑀺 𑀉𑀧𑀦𑀺𑀲𑁆𑀲𑀬𑀸 𑀯𑀢𑁆𑀢𑀩𑁆𑀩𑀸 𑀉𑀧𑀦𑀺𑀲𑁆𑀲𑀬𑀯𑀺𑀪𑀸𑀕𑀪𑀸𑀯𑀢𑁄. 𑀉𑀧𑀦𑀺𑀲𑁆𑀲𑀬𑀕𑁆𑀕𑀳𑀡𑀫𑁂𑀯 𑀓𑀸𑀢𑀩𑁆𑀩𑀁 𑀲𑀸𑀫𑀜𑁆𑀜𑀭𑀽𑀧𑁂𑀦. 𑀢𑀢𑁆𑀣𑀸𑀢𑀺 𑀏𑀯𑀫𑀯𑀝𑁆𑀞𑀺𑀢𑁂 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀧𑀓𑀢𑀽𑀧𑀦𑀺𑀲𑁆𑀲𑀬𑁄𑀢𑀺 𑀪𑀺𑀦𑁆𑀤𑀦𑀁 𑀯𑀺𑀪𑀸𑀕𑀓𑀭𑀡𑀁 𑀬𑀤𑀺 𑀧𑀓𑀢𑀽𑀧𑀦𑀺𑀲𑁆𑀲𑀬𑀲𑁆𑀲 𑀭𑀽𑀧𑀸𑀦𑀁 𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑀤𑀲𑁆𑀲𑀦𑀢𑁆𑀣𑀁, 𑀦𑀦𑀼 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀸𑀧𑀺 𑀭𑀽𑀧𑀸𑀦𑀁 𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀺𑀬𑁂𑀯𑀸𑀢𑀺? 𑀲𑀘𑁆𑀘𑀁 𑀦 𑀳𑁄𑀦𑁆𑀢𑀺, 𑀢𑁂 𑀧𑀦 𑀤𑀲𑁆𑀲𑀺𑀢𑀦𑀬𑀸𑀢𑀺 𑀢𑀤𑁂𑀓𑀤𑁂𑀲𑁂𑀦 𑀇𑀢𑀭𑀫𑁆𑀧𑀺 𑀤𑀲𑁆𑀲𑀺𑀢𑀫𑁂𑀯 𑀳𑁄𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀆𑀭𑀫𑁆𑀫𑀡𑀁…𑀧𑁂… 𑀤𑀝𑁆𑀞𑀩𑁆𑀩’’𑀦𑁆𑀢𑀺 𑀆𑀳. 𑀢𑀁𑀲𑀫𑀸𑀦𑀕𑀢𑀺𑀓𑀢𑁆𑀢𑀸𑀢𑀺 𑀢𑁂𑀳𑀺 𑀅𑀦𑀦𑁆𑀢𑀭𑀸𑀤𑀻𑀳𑀺 𑀲𑀫𑀸𑀦𑀕𑀢𑀺𑀓𑀢𑁆𑀢𑀸 𑀅𑀭𑀽𑀧𑀸𑀦𑀁𑀬𑁂𑀯 𑀧𑀘𑁆𑀘𑀬𑀪𑀸𑀯𑀢𑁄. 𑀢𑀦𑁆𑀢𑀺 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀁. 𑀢𑀢𑁆𑀣𑀸𑀢𑀺 𑀅𑀦𑀦𑁆𑀢𑀭𑀸𑀤𑀻𑀲𑀼 𑀧𑀞𑀺𑀢𑁆𑀯𑀸.

𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀧𑀓𑀺𑀡𑁆𑀡𑀓𑀯𑀺𑀦𑀺𑀘𑁆𑀙𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.