𑁧. 𑀯𑀸𑀤𑀬𑀼𑀢𑁆𑀢𑀺𑀯𑀡𑁆𑀡𑀦𑀸

𑁨𑁮𑁨. 𑀲𑀩𑁆𑀩𑀁 𑀅𑀢𑁆𑀣𑀻𑀢𑀺 𑀏𑀢𑁆𑀣 𑀬𑀲𑁆𑀫𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀯𑀺𑀬 𑀅𑀢𑀻𑀢𑀸𑀦𑀸𑀕𑀢𑀫𑁆𑀧𑀺 𑀥𑀭𑀫𑀸𑀦𑀲𑀪𑀸𑀯𑀦𑁆𑀢𑀺 𑀧𑀭𑀯𑀸𑀤𑀺𑀦𑁄 𑀮𑀤𑁆𑀥𑀺, 𑀢𑀲𑁆𑀫𑀸 𑀲𑀩𑁆𑀩𑀦𑁆𑀢𑀺 𑀓𑀸𑀮𑀯𑀺𑀪𑀸𑀕𑀢𑁄 𑀅𑀢𑀻𑀢𑀸𑀤𑀺𑀪𑁂𑀤𑀁 𑀲𑀩𑁆𑀩𑀁. 𑀲𑁄 𑀧𑀦 ‘‘𑀬𑀫𑁆𑀧𑀺 𑀦𑀢𑁆𑀣𑀺, 𑀢𑀫𑁆𑀧𑀺 𑀅𑀢𑁆𑀣𑀻’’𑀢𑀺 𑀓𑀸𑀮𑀯𑀺𑀫𑀼𑀢𑁆𑀢𑀲𑁆𑀲 𑀯𑀲𑁂𑀦 𑀅𑀦𑀼𑀬𑁄𑀕𑁄, 𑀢𑀁 𑀅𑀢𑀺𑀧𑁆𑀧𑀲𑀗𑁆𑀕𑀤𑀲𑁆𑀲𑀦𑀯𑀲𑁂𑀦 𑀧𑀭𑀯𑀸𑀤𑀺𑀧𑀝𑀺𑀜𑁆𑀜𑀸𑀬 𑀤𑁄𑀲𑀸𑀭𑁄𑀧𑀦𑀁. 𑀦𑀬𑀤𑀲𑁆𑀲𑀦𑀁 𑀯𑀸 𑀅𑀢𑀻𑀢𑀸𑀦𑀸𑀕𑀢𑀸𑀦𑀁 𑀦𑀢𑁆𑀣𑀺𑀪𑀸𑀯𑀲𑁆𑀲. 𑀅𑀢𑁆𑀣𑀻𑀢𑀺 𑀧𑀦 𑀅𑀬𑀁 𑀅𑀢𑁆𑀣𑀺𑀪𑀸𑀯𑁄 𑀬𑀲𑁆𑀫𑀸 𑀤𑁂𑀲𑀓𑀸𑀮𑀸𑀓𑀸𑀭𑀥𑀫𑁆𑀫𑁂𑀳𑀺 𑀯𑀺𑀦𑀸 𑀦 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀢𑀸𑀯 𑀢𑁂𑀳𑀺 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀅𑀦𑀼𑀬𑁄𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀩𑁆𑀩𑀢𑁆𑀣 𑀲𑀩𑁆𑀩𑀫𑀢𑁆𑀣𑀻’’𑀢𑀺𑀆𑀤𑀺𑀦𑀸 𑀧𑀸𑀴𑀺 𑀧𑀯𑀢𑁆𑀢𑀸. 𑀢𑀢𑁆𑀣 𑀬𑀤𑀺𑀧𑀺 𑀲𑀩𑁆𑀩𑀢𑁆𑀣𑀸𑀢𑀺 𑀇𑀤𑀁 𑀲𑀸𑀫𑀜𑁆𑀜𑀯𑀘𑀦𑀁, 𑀢𑀁 𑀧𑀦 𑀬𑀲𑁆𑀫𑀸 𑀯𑀺𑀲𑁂𑀲𑀦𑀺𑀯𑀺𑀝𑁆𑀞𑀁 𑀳𑁄𑀢𑀺, 𑀧𑀭𑀢𑁄 𑀘 𑀲𑀩𑁆𑀩𑁂𑀲𑀽𑀢𑀺 𑀥𑀫𑁆𑀫𑀸 𑀯𑀺𑀪𑀸𑀕𑀢𑁄 𑀯𑀼𑀘𑁆𑀘𑀦𑁆𑀢𑀺, 𑀢𑀲𑁆𑀫𑀸 𑀑𑀴𑀸𑀭𑀺𑀓𑀲𑁆𑀲 𑀧𑀸𑀓𑀝𑀲𑁆𑀲 𑀭𑀽𑀧𑀥𑀫𑁆𑀫𑀲𑀫𑀼𑀤𑀸𑀬𑀲𑁆𑀲 𑀯𑀲𑁂𑀦 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑀲𑁆𑀫𑀺𑀁 𑀲𑀭𑀻𑀭𑁂’’𑀢𑀺 𑀯𑀼𑀢𑁆𑀢𑀁, 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀯𑀸 𑀏𑀢𑀁 𑀤𑀝𑁆𑀞𑀩𑁆𑀩𑀁. 𑀢𑀣𑀸 𑀘 𑀓𑀸𑀡𑀸𑀤𑀓𑀸𑀧𑀺𑀮𑁂𑀳𑀺 𑀧𑀝𑀺𑀜𑁆𑀜𑀸𑀬𑀫𑀸𑀦𑀸 𑀆𑀓𑀸𑀲𑀓𑀸𑀮𑀸𑀤𑀺𑀲𑀢𑁆𑀢𑀧𑀓𑀢𑀺𑀧𑀼𑀭𑀺𑀲𑀸 𑀯𑀺𑀬 𑀧𑀭𑀯𑀸𑀤𑀺𑀦𑀸 𑀧𑀝𑀺𑀜𑁆𑀜𑀸𑀬𑀫𑀸𑀦𑀁 𑀲𑀩𑁆𑀩𑀁 𑀲𑀩𑁆𑀩𑀩𑁆𑀬𑀸𑀧𑀻𑀢𑀺 𑀆𑀧𑀦𑁆𑀦𑀫𑁂𑀯 𑀳𑁄𑀢𑀻𑀢𑀺. ‘‘𑀲𑀩𑁆𑀩𑀢𑁆𑀣 𑀲𑀭𑀻𑀭𑁂’’𑀢𑀺 𑀘 ‘‘𑀢𑀺𑀮𑁂 𑀢𑁂𑀮’’𑀦𑁆𑀢𑀺 𑀯𑀺𑀬 𑀩𑁆𑀬𑀸𑀧𑀦𑁂 𑀪𑀼𑀫𑁆𑀫𑀦𑁆𑀢𑀺 𑀲𑀭𑀻𑀭𑀧𑀭𑀺𑀬𑀸𑀧𑀦𑁆𑀦𑁂𑀦 𑀲𑀩𑁆𑀩𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀲𑀺𑀭𑀲𑀺 𑀧𑀸𑀤𑀸…𑀧𑁂… 𑀅𑀢𑁆𑀣𑁄’’𑀢𑀺.

𑀲𑀩𑁆𑀩𑀲𑁆𑀫𑀺𑀁 𑀓𑀸𑀮𑁂 𑀲𑀩𑁆𑀩𑀫𑀢𑁆𑀣𑀻𑀢𑀺 𑀬𑁄𑀚𑀦𑀸. 𑀏𑀢𑀲𑁆𑀫𑀺𑀁 𑀧𑀓𑁆𑀔𑁂𑀬𑁂𑀯𑀲𑁆𑀲 𑀅𑀜𑁆𑀜𑀯𑀸𑀤𑁄 𑀧𑀭𑀺𑀤𑀻𑀧𑀺𑀢𑁄 𑀲𑀺𑀬𑀸 ‘‘𑀬𑀁 𑀅𑀢𑁆𑀣𑀺, 𑀅𑀢𑁆𑀣𑁂𑀯 𑀢𑀁, 𑀬𑀁 𑀦𑀢𑁆𑀣𑀺, 𑀦𑀢𑁆𑀣𑁂𑀯 𑀢𑀁, 𑀅𑀲𑀢𑁄 𑀦𑀢𑁆𑀣𑀺 𑀲𑀫𑁆𑀪𑀯𑁄, 𑀲𑀢𑁄 𑀦𑀢𑁆𑀣𑀺 𑀯𑀺𑀦𑀸𑀲𑁄’’𑀢𑀺. 𑀏𑀯𑀁 𑀲𑀩𑁆𑀩𑁂𑀦𑀸𑀓𑀸𑀭𑁂𑀦 𑀲𑀩𑁆𑀩𑀁 𑀲𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀲𑀩𑁆𑀩𑀁 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀫𑁂𑀳𑀺 𑀧𑀦 𑀧𑀓𑁆𑀔𑁂𑀳𑀺 ‘‘𑀲𑀩𑁆𑀩𑀁 𑀲𑀩𑁆𑀩𑀲𑀪𑀸𑀯𑀁, 𑀅𑀦𑁂𑀓𑀲𑀢𑁆𑀢𑀺𑀦𑀺𑀘𑀺𑀢𑀸𑀪𑀸𑀯𑀸 𑀅𑀲𑀢𑁄 𑀦𑀢𑁆𑀣𑀺 𑀲𑀫𑁆𑀪𑀯𑁄’’𑀢𑀺 𑀯𑀸𑀤𑁄 𑀧𑀭𑀺𑀤𑀻𑀧𑀺𑀢𑁄 𑀲𑀺𑀬𑀸. 𑀬𑁄𑀕𑀭𑀳𑀺𑀢𑀦𑁆𑀢𑀺 𑀓𑁂𑀦𑀘𑀺 𑀬𑀼𑀢𑁆𑀢𑀸𑀬𑀼𑀢𑁆𑀢𑀮𑀓𑁆𑀔𑀡𑀲𑀁𑀬𑁄𑀕𑀭𑀳𑀺𑀢𑀁. 𑀢𑀁 𑀧𑀦 𑀏𑀓𑀲𑀪𑀸𑀯𑀦𑁆𑀢𑀺 𑀲𑀁𑀬𑁄𑀕𑀭𑀳𑀺𑀢𑀁 𑀦𑀸𑀫 𑀅𑀢𑁆𑀣𑀢𑁄 𑀏𑀓𑀲𑀪𑀸𑀯𑀁, 𑀏𑀓𑀥𑀫𑁆𑀫𑁄𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀤𑁂𑀯𑀯𑀸𑀤𑀻𑀦𑀁 𑀩𑁆𑀭𑀳𑁆𑀫𑀤𑀲𑁆𑀲𑀦𑀁 𑀅𑀢𑁆𑀣𑁂𑀯𑀸𑀢𑀺𑀯𑀸𑀤𑁄 𑀧𑀭𑀺𑀤𑀻𑀧𑀺𑀢𑁄 𑀲𑀺𑀬𑀸. 𑀅𑀢𑁆𑀣𑀻𑀢𑀺 𑀧𑀼𑀘𑁆𑀙𑀢𑀻𑀢𑀺 𑀬𑀤𑀺 𑀲𑀩𑁆𑀩𑀫𑀢𑁆𑀣𑀻𑀢𑀺 𑀢𑀯 𑀯𑀸𑀤𑁄, 𑀬𑀣𑀸𑀯𑀼𑀢𑁆𑀢𑀸𑀬 𑀫𑀫 𑀤𑀺𑀝𑁆𑀞𑀺𑀬𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀪𑀸𑀯𑁄 𑀅𑀢𑁆𑀣𑀻𑀢𑀺 𑀏𑀓𑀦𑁆𑀢𑁂𑀦 𑀢𑀬𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑁄, 𑀢𑀲𑁆𑀫𑀸 ‘‘𑀓𑀺𑀁 𑀲𑁄 𑀅𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀢𑀻𑀢𑀺 𑀅𑀢𑁆𑀣𑁄.

𑀯𑀸𑀤𑀬𑀼𑀢𑁆𑀢𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.