𑁨. 𑀓𑀸𑀮𑀲𑀁𑀲𑀦𑁆𑀤𑀦𑀓𑀣𑀸𑀯𑀡𑁆𑀡𑀦𑀸

𑁨𑁮𑁫. 𑀅𑀢𑀻𑀢𑀸 …𑀧𑁂… 𑀓𑀭𑀺𑀢𑁆𑀯𑀸𑀢𑀺 𑀏𑀢𑁆𑀣𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀅𑀢𑀻𑀢𑀁 𑀅𑀦𑀸𑀕𑀢𑀦𑁆𑀢𑀺 𑀭𑀽𑀧𑀲𑁆𑀲 𑀇𑀫𑀁 𑀯𑀺𑀲𑁂𑀲𑀁, 𑀏𑀯𑀁 𑀯𑀺𑀲𑁂𑀲𑀁 𑀯𑀸 𑀭𑀽𑀧𑀁 𑀅𑀕𑁆𑀕𑀳𑁂𑀢𑁆𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑀸𑀯𑀺𑀲𑁂𑀲𑀯𑀺𑀲𑀺𑀝𑁆𑀞𑀭𑀽𑀧𑀫𑁂𑀯 𑀅𑀧𑁆𑀧𑀺𑀬𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀭𑀽𑀧𑀪𑀸𑀯𑀸𑀦𑀁 𑀲𑀫𑀸𑀦𑀸𑀥𑀺𑀓𑀭𑀡𑀢𑁆𑀢𑀸 𑀏𑀢𑀲𑁆𑀫𑀺𑀁𑀬𑁂𑀯 𑀯𑀺𑀲𑀬𑁂 𑀅𑀧𑁆𑀧𑁂𑀢𑀩𑁆𑀩𑀁, 𑀯𑀘𑀻𑀕𑁄𑀘𑀭𑀁 𑀧𑀸𑀧𑁂𑀢𑀩𑁆𑀩𑀁 𑀲𑀢𑀺𑀧𑀺 𑀦𑁂𑀲𑀁 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀢𑀸𑀲𑀗𑁆𑀔𑀸𑀢𑁂 𑀯𑀺𑀪𑀸𑀕𑁂 𑀢𑀣𑀸𑀧𑀺 𑀅𑀯𑀺𑀪𑀚𑀺𑀢𑀩𑁆𑀩𑀁 𑀓𑀢𑁆𑀯𑀸𑀢𑀺. 𑀬𑀲𑁆𑀫𑀸 𑀧𑀦 𑀧𑀸𑀴𑀺𑀬𑀁 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺 𑀯𑀸 𑀭𑀽𑀧𑀦𑁆𑀢𑀺 𑀯𑀸’’𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀭𑀽𑀧𑀲𑀤𑁆𑀤𑁂𑀳𑀺 𑀢𑀤𑀢𑁆𑀣𑀲𑁆𑀲 𑀯𑀢𑁆𑀢𑀩𑁆𑀩𑀸𑀓𑀸𑀭𑁄 𑀇𑀢𑀺𑀲𑀤𑁆𑀤𑁂𑀳𑀺 𑀤𑀲𑁆𑀲𑀺𑀢𑁄, 𑀢𑀲𑁆𑀫𑀸 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀤𑁆𑀤𑁂𑀦…𑀧𑁂… 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺 𑀆𑀳. 𑀭𑀽𑀧𑀧𑀜𑁆𑀜𑀢𑁆𑀢𑀻𑀢𑀺 𑀭𑀽𑀧𑀸𑀬𑀢𑀦𑀧𑀜𑁆𑀜𑀢𑁆𑀢𑀺. 𑀲𑀸 𑀳𑀺 𑀲𑀪𑀸𑀯𑀥𑀫𑁆𑀫𑀼𑀧𑀸𑀤𑀸𑀦𑀸 𑀢𑀚𑁆𑀚𑀸𑀧𑀜𑁆𑀜𑀢𑁆𑀢𑀺. 𑀢𑁂𑀦𑁂𑀯𑀸𑀳 ‘‘𑀲𑀪𑀸𑀯𑀧𑀭𑀺𑀘𑁆𑀙𑀺𑀦𑁆𑀦𑁂 𑀧𑀯𑀢𑁆𑀢𑀸 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀻’’𑀢𑀺. 𑀭𑀽𑀧𑀲𑀫𑀽𑀳𑀁 𑀉𑀧𑀸𑀤𑀸𑀬𑀸𑀢𑀺 𑀢𑀁𑀢𑀁𑀅𑀢𑁆𑀢𑀧𑀜𑁆𑀜𑀢𑁆𑀢𑀺𑀬𑀸 𑀉𑀧𑀸𑀤𑀸𑀦𑀪𑀽𑀢𑀸𑀦𑀁 𑀅𑀪𑀸𑀯𑀯𑀺𑀪𑀸𑀯𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀫𑀸𑀦𑀸𑀦𑀁 𑀭𑀽𑀧𑀥𑀫𑁆𑀫𑀸𑀦𑀁 𑀲𑀫𑀽𑀳𑀁 𑀉𑀧𑀸𑀤𑀸𑀬. 𑀉𑀧𑀸𑀤𑀸𑀦𑀼𑀧𑀸𑀤𑀸𑀦𑀫𑁆𑀧𑀺 𑀳𑀺 𑀉𑀧𑀸𑀤𑀸𑀦𑀫𑁂𑀯𑀸𑀢𑀺. 𑀢𑀲𑁆𑀫𑀸𑀢𑀺 𑀲𑀫𑀽𑀳𑀼𑀧𑀸𑀤𑀸𑀬𑀸𑀥𑀻𑀦𑀢𑀸𑀬 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀪𑀸𑀯𑀢𑁄. 𑀯𑀺𑀕𑀫𑀸𑀯𑀢𑁆𑀢𑀩𑁆𑀩𑀢𑀸𑀢𑀺 𑀯𑀺𑀕𑀫𑀲𑁆𑀲 𑀯𑀢𑁆𑀣𑀪𑀸𑀯𑀸𑀧𑀕𑀫𑀲𑁆𑀲 𑀅𑀯𑀢𑁆𑀢𑀩𑁆𑀩𑀢𑀸. 𑀦 𑀳𑀺 𑀑𑀤𑀸𑀢𑀢𑀸𑀯𑀺𑀕𑀫𑁂𑀦 𑀅𑀯𑀢𑁆𑀣𑀁 𑀳𑁄𑀢𑀺. 𑀦 𑀧𑀦 𑀬𑀼𑀢𑁆𑀢𑀸 𑀭𑀽𑀧𑀪𑀸𑀯𑀲𑁆𑀲 𑀯𑀺𑀕𑀫𑀸𑀯𑀢𑁆𑀢𑀩𑁆𑀩𑀢𑀸𑀢𑀺 𑀬𑁄𑀚𑀦𑀸. 𑀭𑀽𑀧𑀪𑀸𑀯𑁄𑀢𑀺 𑀘 𑀭𑀽𑀧𑀸𑀬𑀢𑀦𑀲𑀪𑀸𑀯𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀕𑁄𑀘𑀭𑀪𑀸𑀯𑁄. 𑀦 𑀳𑀺 𑀢𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀸𑀯𑀯𑀺𑀕𑀫𑁂 𑀯𑀺𑀕𑀫𑀸𑀯𑀢𑁆𑀢𑀩𑁆𑀩𑀢𑀸 𑀬𑀼𑀢𑁆𑀢𑀸.

𑀓𑀸𑀮𑀲𑀁𑀲𑀦𑁆𑀤𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀘𑀦𑀲𑁄𑀥𑀦𑀯𑀡𑁆𑀡𑀦𑀸

𑁨𑁮𑁮. 𑀅𑀦𑀸𑀕𑀢𑀁 𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀯𑀸𑀢𑀺 𑀏𑀢𑁆𑀣 𑀯𑀸-𑀲𑀤𑁆𑀤𑁄 𑀅𑀦𑀺𑀬𑀫𑀢𑁆𑀣𑁄 𑀬𑀣𑀸 ‘‘𑀔𑀤𑀺𑀭𑁂 𑀯𑀸 𑀩𑀦𑁆𑀥𑀺𑀢𑀩𑁆𑀩𑀁 𑀧𑀮𑀸𑀲𑁂 𑀯𑀸’’𑀢𑀺. 𑀢𑀲𑁆𑀫𑀸 ‘‘𑀳𑀼𑀢𑁆𑀯𑀸 𑀳𑁄𑀢𑀻’’𑀢𑀺 𑀏𑀢𑁆𑀣 𑀳𑁄𑀢𑀺-𑀲𑀤𑁆𑀤𑁄 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀧𑀥𑀸𑀦𑀁 𑀓𑀢𑁆𑀯𑀸 𑀲𑀫𑁆𑀩𑀦𑁆𑀥𑀁 𑀮𑀪𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀦𑀸𑀕𑀢𑀁…𑀧𑁂… 𑀤𑀝𑁆𑀞𑀩𑁆𑀩’’𑀦𑁆𑀢𑀺 𑀆𑀳. 𑀢𑀢𑁆𑀣 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀳𑁄𑀦𑁆𑀢𑀦𑁆𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀚𑀸𑀬𑀫𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀸𑀯𑀁 𑀮𑀪𑀦𑁆𑀢𑀁. 𑀢𑁂𑀦𑀸𑀳 ‘‘𑀢𑀜𑁆𑀜𑁂𑀯 𑀅𑀦𑀸𑀕𑀢𑀁 𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺 𑀮𑀤𑁆𑀥𑀺𑀯𑀲𑁂𑀦𑀸’’𑀢𑀺. 𑀢𑀫𑁆𑀧𑀺 𑀳𑀼𑀢𑁆𑀯𑀸 𑀳𑁄𑀢𑀻𑀢𑀺 𑀬𑀁 𑀅𑀦𑀸𑀕𑀢𑀁 𑀳𑀼𑀢𑁆𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀸𑀯𑀧𑁆𑀧𑀢𑁆𑀢𑀺𑀬𑀸 ‘‘𑀳𑀼𑀢𑁆𑀯𑀸 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁, 𑀓𑀺𑀁 𑀢𑀤𑀧𑀺 𑀧𑀼𑀦 𑀳𑀼𑀢𑁆𑀯𑀸 𑀳𑁄𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀢𑀩𑁆𑀪𑀸𑀯𑀸𑀯𑀺𑀕𑀫𑀢𑁄𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀸𑀯𑀢𑁄 𑀳𑀼𑀢𑁆𑀯𑀸𑀳𑁄𑀢𑀺𑀪𑀸𑀯𑀸𑀦𑀼𑀧𑀕𑀫𑀢𑁄. 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀪𑀸𑀯𑀢𑁄𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑀸𑀬 𑀅𑀪𑀸𑀯𑀢𑁄.

𑀯𑀘𑀦𑀁 𑀅𑀭𑀳𑀢𑀻𑀢𑀺 𑀇𑀫𑀺𑀦𑀸 𑀯𑀘𑀦𑀫𑀢𑁆𑀢𑁂 𑀦 𑀓𑁄𑀘𑀺 𑀤𑁄𑀲𑁄𑀢𑀺 𑀤𑀲𑁆𑀲𑁂𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀤𑀺𑀧𑀺 𑀢𑀲𑁆𑀲 𑀧𑀼𑀦 𑀳𑀼𑀢𑁆𑀯𑀸 𑀪𑀽𑀢𑀲𑁆𑀲 𑀧𑀼𑀦 𑀳𑀼𑀢𑁆𑀯𑀸𑀳𑁄𑀢𑀺𑀪𑀸𑀯𑁄 𑀦𑀢𑁆𑀣𑀺, 𑀧𑀼𑀦𑀧𑁆𑀧𑀼𑀦𑀁 𑀜𑀸𑀧𑁂𑀢𑀩𑁆𑀩𑀢𑀸𑀬 𑀧𑀦 𑀤𑀼𑀢𑀺𑀬𑀁 𑀢𑀢𑁄 𑀧𑀭𑀫𑁆𑀧𑀺 𑀢𑀣𑀸 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀻𑀢𑀺 ‘‘𑀆𑀫𑀦𑁆𑀢𑀸’’𑀢𑀺 𑀧𑀝𑀺𑀚𑀸𑀦𑀸𑀢𑀻𑀢𑀺. 𑀥𑀫𑁆𑀫𑁂𑀢𑀺 𑀲𑀪𑀸𑀯𑀥𑀫𑁆𑀫𑁂. 𑀢𑀧𑁆𑀧𑀝𑀺𑀓𑁆𑀔𑁂𑀧𑀢𑁄 𑀅𑀥𑀫𑁆𑀫𑁂 𑀅𑀪𑀸𑀯𑀥𑀫𑁆𑀫𑁂. 𑀢𑁂𑀦𑀸𑀳 ‘‘𑀲𑀲𑀯𑀺𑀲𑀸𑀡𑁂’’𑀢𑀺.

𑀧𑀝𑀺𑀓𑁆𑀔𑀺𑀢𑁆𑀢𑀦𑀬𑁂𑀦𑀸𑀢𑀺 ‘‘𑀳𑀼𑀢𑁆𑀯𑀸 𑀳𑁄𑀢𑀺, 𑀳𑀼𑀢𑁆𑀯𑀸 𑀳𑁄𑀢𑀻’’𑀢𑀺 𑀏𑀢𑁆𑀣 𑀧𑀼𑀩𑁆𑀩𑁂 𑀬𑀤𑁂𑀢𑀁 𑀢𑀬𑀸 ‘‘𑀅𑀦𑀸𑀕𑀢𑀁 𑀳𑀼𑀢𑁆𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀳𑁄𑀢𑀻’’𑀢𑀺 𑀯𑀤𑀢𑀸 ‘‘𑀢𑀁𑀬𑁂𑀯 𑀅𑀦𑀸𑀕𑀢𑀁 𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦’’𑀦𑁆𑀢𑀺 𑀮𑀤𑁆𑀥𑀺𑀯𑀲𑁂𑀦 ‘‘𑀅𑀦𑀸𑀕𑀢𑀁 𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀯𑀸 𑀳𑀼𑀢𑁆𑀯𑀸 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁, ‘‘𑀓𑀺𑀁 𑀢𑁂 𑀢𑀫𑁆𑀧𑀺 𑀳𑀼𑀢𑁆𑀯𑀸 𑀳𑁄𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁂 𑀬𑁄 𑀧𑀭𑀯𑀸𑀤𑀺𑀦𑀸 𑀳𑀼𑀢𑁆𑀯𑀸 𑀪𑀽𑀢𑀲𑁆𑀲 𑀧𑀼𑀦 𑀳𑀼𑀢𑁆𑀯𑀸𑀅𑀪𑀸𑀯𑀢𑁄 ‘‘𑀦 𑀳𑁂𑀯𑀸’’𑀢𑀺 𑀧𑀝𑀺𑀓𑁆𑀔𑁂𑀧𑁄 𑀓𑀢𑁄, 𑀢𑁂𑀦 𑀧𑀝𑀺𑀓𑁆𑀔𑀺𑀢𑁆𑀢𑀦𑀬𑁂𑀦. 𑀲𑁆𑀯𑀸𑀬𑀁 𑀬𑀤𑁂𑀯 𑀭𑀽𑀧𑀸𑀤𑀺 𑀅𑀦𑀸𑀕𑀢𑀁, 𑀢𑀤𑁂𑀯 𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺 𑀲𑀢𑀺𑀧𑀺 𑀅𑀢𑁆𑀣𑀸𑀪𑁂𑀤𑁂 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺 𑀧𑀦 𑀅𑀢𑁆𑀣𑁂𑀯 𑀓𑀸𑀮𑀪𑁂𑀤𑁄𑀢𑀺 𑀢𑀁𑀓𑀸𑀮𑀪𑁂𑀤𑀯𑀺𑀭𑁄𑀥𑀸𑀬 𑀧𑀝𑀺𑀓𑁆𑀔𑁂𑀧𑁄 𑀧𑀯𑀢𑁆𑀢𑁄𑀢𑀺 𑀆𑀳 ‘‘𑀧𑀝𑀺𑀓𑁆𑀔𑀺𑀢𑁆𑀢𑀦𑀬𑁂𑀦𑀸𑀢𑀺 𑀓𑀸𑀮𑀦𑀸𑀦𑀢𑁆𑀢𑁂𑀦𑀸’’𑀢𑀺. 𑀢𑁂𑀦 𑀳𑀺 𑀲𑁄 𑀅𑀬𑀜𑁆𑀘 𑀧𑀝𑀺𑀓𑁆𑀔𑁂𑀧𑁄 𑀦𑀻𑀢𑁄 𑀧𑀯𑀢𑁆𑀢𑀺𑀢𑁄𑀢𑀺. 𑀧𑀝𑀺𑀜𑁆𑀜𑀸𑀢𑀦𑀬𑁂𑀦𑀸𑀢𑀺 𑀇𑀤𑀫𑁆𑀧𑀺 𑀬𑀣𑀸𑀯𑀼𑀢𑁆𑀢𑀧𑀝𑀺𑀓𑁆𑀔𑁂𑀧𑀸𑀦𑀦𑁆𑀢𑀭𑀁 𑀬𑀁 𑀧𑀝𑀺𑀜𑁆𑀜𑀸𑀢𑀁, 𑀢𑀁 𑀲𑀦𑁆𑀥𑀸𑀬𑀸𑀳. 𑀬𑀣𑀸 𑀳𑀺 𑀲𑀸 𑀧𑀝𑀺𑀜𑁆𑀜𑀸 𑀅𑀢𑁆𑀣𑀸𑀪𑁂𑀤𑁂𑀦 𑀦𑀻𑀢𑀸 𑀧𑀯𑀢𑁆𑀢𑀺𑀢𑀸, 𑀢𑀣𑀸𑀬𑀫𑁆𑀧𑀺. 𑀢𑁂𑀦𑁂𑀯𑀸𑀳 ‘‘𑀅𑀢𑁆𑀣𑀸𑀦𑀸𑀦𑀢𑁆𑀢𑁂𑀦𑀸’’𑀢𑀺, 𑀅𑀦𑀸𑀕𑀢𑀸𑀤𑀺𑀧𑁆𑀧𑀪𑁂𑀤𑀸𑀬 𑀓𑀸𑀮𑀧𑀜𑁆𑀜𑀢𑁆𑀢𑀺𑀬𑀸 𑀉𑀧𑀸𑀤𑀸𑀦𑀪𑀽𑀢𑀲𑁆𑀲 𑀅𑀢𑁆𑀣𑀲𑁆𑀲 𑀅𑀪𑁂𑀤𑁂𑀦𑀸𑀢𑀺 𑀅𑀢𑁆𑀣𑁄. 𑀬𑀣𑀸 𑀉𑀧𑀸𑀤𑀸𑀦𑀪𑀽𑀢𑀭𑀽𑀧𑀸𑀤𑀺𑀅𑀢𑁆𑀣𑀸𑀪𑁂𑀤𑁂𑀧𑀺 𑀢𑁂𑀲𑀁 𑀔𑀡𑀢𑁆𑀢𑀬𑀸𑀦𑀸𑀯𑀢𑁆𑀢𑀺 𑀢𑀁𑀲𑀫𑀗𑁆𑀕𑀺𑀢𑀸 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀸𑀯𑀸𑀯𑀢𑁆𑀢𑀺𑀢𑀸, 𑀢𑀣𑀸 𑀢𑀢𑁆𑀣 𑀯𑀼𑀘𑁆𑀘𑀫𑀸𑀦𑀸 𑀳𑀼𑀢𑁆𑀯𑀸𑀳𑁄𑀢𑀺𑀪𑀸𑀯𑀸 𑀬𑀣𑀸𑀓𑁆𑀓𑀫𑀁 𑀧𑀼𑀭𑀺𑀫𑀧𑀘𑁆𑀙𑀺𑀫𑁂𑀲𑀼 𑀧𑀯𑀢𑁆𑀢𑀺𑀢𑀸 𑀧𑀼𑀭𑀺𑀫𑀧𑀘𑁆𑀙𑀺𑀫𑀓𑀺𑀭𑀺𑀬𑀸𑀢𑀺 𑀓𑀢𑁆𑀯𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀢𑁆𑀣𑀸𑀦𑀸𑀦𑀢𑁆𑀢𑀁…𑀧𑁂… 𑀧𑀝𑀺𑀚𑀸𑀦𑀸𑀢𑀻’’𑀢𑀺 𑀯𑀢𑁆𑀯𑀸 𑀧𑀼𑀦 ‘‘𑀅𑀢𑁆𑀣𑀸𑀦𑀸𑀦𑀢𑁆𑀢𑀫𑁂𑀯 𑀳𑀻’’𑀢𑀺𑀆𑀤𑀺𑀦𑀸 𑀢𑀫𑁂𑀯 𑀅𑀢𑁆𑀣𑀁 𑀲𑀫𑀢𑁆𑀣𑁂𑀢𑀺. 𑀬𑀣𑀸 𑀧𑀦 ‘‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’’𑀦𑁆𑀢𑀺 𑀧𑀝𑀺𑀚𑀸𑀦𑀦𑁆𑀢𑀲𑁆𑀲 𑀚𑀻𑀯𑁄𑀯 𑀲𑀭𑀻𑀭𑀁, 𑀲𑀭𑀻𑀭𑀫𑁂𑀯 𑀚𑀻𑀯𑁄𑀢𑀺 𑀚𑀻𑀯𑀲𑀭𑀻𑀭𑀸𑀦𑀁 𑀅𑀦𑀜𑁆𑀜𑀢𑁆𑀢𑀁 𑀆𑀧𑀚𑁆𑀚𑀢𑀺, 𑀏𑀯𑀁 ‘‘𑀢𑀜𑁆𑀜𑁂𑀯 𑀅𑀦𑀸𑀕𑀢𑀁 𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦’’𑀦𑁆𑀢𑀺 𑀘 𑀧𑀝𑀺𑀚𑀸𑀦𑀦𑁆𑀢𑀲𑁆𑀲 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀅𑀦𑀜𑁆𑀜𑀢𑁆𑀢𑀁 𑀆𑀧𑀦𑁆𑀦𑀦𑁆𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀸𑀕𑀢𑁂𑀲𑀼 𑀯𑀼𑀢𑁆𑀢𑀸 𑀳𑁄𑀢𑀺𑀪𑀸𑀯𑀳𑀼𑀢𑁆𑀯𑀸𑀪𑀸𑀯𑀸 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼𑀧𑀺 𑀆𑀧𑀚𑁆𑀚𑁂𑀬𑁆𑀬𑀼𑀦𑁆𑀢𑀺 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀏𑀯𑀁 𑀲𑀦𑁆𑀢𑁂 𑀅𑀦𑀸𑀕𑀢𑀫𑁆𑀧𑀺 𑀳𑀼𑀢𑁆𑀯𑀸𑀳𑁄𑀢𑀺 𑀦𑀸𑀫, 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁆𑀧𑀺 𑀳𑀼𑀢𑁆𑀯𑀸𑀳𑁄𑀢𑀺𑀬𑁂𑀯 𑀦𑀸𑀫𑀸’’𑀢𑀺.

𑀅𑀦𑀼𑀜𑁆𑀜𑀸𑀢𑀧𑀜𑁆𑀳𑀲𑁆𑀲𑀸𑀢𑀺 ‘‘𑀢𑀜𑁆𑀜𑁂𑀯 𑀅𑀦𑀸𑀕𑀢𑀁 𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺? 𑀆𑀫𑀦𑁆𑀢𑀸’’𑀢𑀺 𑀏𑀯𑀁 𑀅𑀢𑁆𑀣𑀸𑀦𑀸𑀦𑀢𑁆𑀢𑀁 𑀲𑀦𑁆𑀥𑀸𑀬 𑀅𑀦𑀼𑀜𑁆𑀜𑀸𑀢𑀲𑁆𑀲 𑀅𑀢𑁆𑀣𑀲𑁆𑀲. 𑀜𑀸𑀢𑀼𑀁 𑀇𑀘𑁆𑀙𑀺𑀢𑁄 𑀳𑀺 𑀅𑀢𑁆𑀣𑁄 𑀧𑀜𑁆𑀳𑁄. 𑀤𑁄𑀲𑁄 𑀯𑀼𑀢𑁆𑀢𑁄𑀢𑀺 𑀅𑀦𑀸𑀕𑀢𑀁 𑀳𑀼𑀢𑁆𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀽𑀢𑀲𑁆𑀲 𑀧𑀼𑀦 𑀅𑀦𑀸𑀕𑀢𑀁 𑀳𑀼𑀢𑁆𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀸𑀯𑀸𑀧𑀢𑁆𑀢𑀺𑀲𑀗𑁆𑀔𑀸𑀢𑁄 𑀤𑁄𑀲𑁄 𑀯𑀼𑀢𑁆𑀢𑁄 𑀧𑀼𑀭𑀺𑀫𑀦𑀬𑁂. 𑀧𑀘𑁆𑀙𑀺𑀫𑀦𑀬𑁂 𑀧𑀦 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀏𑀓𑁂𑀓𑀲𑁆𑀲 𑀳𑀼𑀢𑁆𑀯𑀸𑀳𑁄𑀢𑀺𑀪𑀸𑀯𑀸𑀧𑀢𑁆𑀢𑀺𑀲𑀗𑁆𑀔𑀸𑀢𑁄 𑀤𑁄𑀲𑁄 𑀯𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀧𑀝𑀺𑀓𑁆𑀔𑀺𑀢𑁆𑀢𑀧𑀜𑁆𑀳𑀦𑁆𑀢𑀺 ‘‘𑀢𑀁𑀬𑁂𑀯 𑀅𑀦𑀸𑀕𑀢𑀁 𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂’’𑀢𑀺 𑀏𑀯𑀁 𑀓𑀸𑀮𑀦𑀸𑀦𑀢𑁆𑀢𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀢𑁆𑀢𑀧𑀜𑁆𑀳𑀁. 𑀢𑁂𑀦𑀸𑀢𑀺 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀳𑁄𑀢𑀺𑀳𑀼𑀢𑁆𑀯𑀸𑀪𑀸𑀯𑀧𑀝𑀺𑀓𑁆𑀔𑁂𑀧𑁂𑀦. 𑀘𑁄𑀤𑁂𑀢𑀻𑀢𑀺 𑀅𑀦𑀸𑀕𑀢𑀁 𑀢𑁂𑀦 𑀳𑁄𑀢𑀺 𑀦𑀸𑀫, 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀢𑁂𑀦 𑀳𑀼𑀢𑁆𑀯𑀸 𑀦𑀸𑀫, 𑀉𑀪𑀬𑀫𑁆𑀧𑀺 𑀅𑀦𑀜𑁆𑀜𑀢𑁆𑀢𑀸 𑀉𑀪𑀬𑀲𑀪𑀸𑀯𑀦𑁆𑀢𑀺 𑀘𑁄𑀤𑁂𑀢𑀺. 𑀏𑀢𑁆𑀣𑀸𑀢𑀺 ‘‘𑀳𑀼𑀢𑁆𑀯𑀸 𑀳𑁄𑀢𑀻’’𑀢𑀺 𑀏𑀢𑀲𑁆𑀫𑀺𑀁 𑀧𑀜𑁆𑀳𑁂 𑀓𑀣𑀁 𑀳𑁄𑀢𑀺 𑀤𑁄𑀲𑁄𑀢𑀺 𑀘𑁄𑀤𑁂𑀢𑀻𑀢𑀺. ‘‘𑀢𑀲𑁆𑀲𑁂𑀯𑀸’’𑀢𑀺 𑀧𑀭𑀺𑀳𑀭𑀢𑀺. 𑀓𑀣𑀁 𑀓𑀢𑁆𑀯𑀸 𑀘𑁄𑀤𑀦𑀸, 𑀓𑀣𑀜𑁆𑀘 𑀓𑀢𑁆𑀯𑀸 𑀧𑀭𑀺𑀳𑀸𑀭𑁄? 𑀅𑀦𑀼𑀚𑀸𑀦𑀦𑀧𑀝𑀺𑀓𑁆𑀔𑁂𑀧𑀸𑀦𑀁 𑀪𑀺𑀦𑁆𑀦𑀯𑀺𑀲𑀬𑀢𑀸𑀬 𑀘𑁄𑀤𑀦𑀸, 𑀅𑀢𑁆𑀣𑀸𑀪𑁂𑀤𑀓𑀸𑀮𑀪𑁂𑀤𑀯𑀺𑀲𑀬𑀢𑁆𑀢𑀸 𑀅𑀪𑀺𑀦𑁆𑀦𑀸𑀥𑀸𑀭𑀢𑀸𑀬 𑀢𑁂𑀲𑀁 𑀧𑀭𑀺𑀳𑀸𑀭𑁄. 𑀢𑀲𑁆𑀲𑁂𑀯𑀸𑀢𑀺 𑀳𑀺 𑀧𑀭𑀯𑀸𑀤𑀺𑀦𑁄 𑀏𑀯𑀸𑀢𑀺 𑀅𑀢𑁆𑀣𑁄.

𑀢𑀤𑀼𑀪𑀬𑀁 𑀕𑀳𑁂𑀢𑁆𑀯𑀸𑀢𑀺 ‘‘𑀢𑀁 𑀅𑀦𑀸𑀕𑀢𑀁 𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦’’𑀦𑁆𑀢𑀺 𑀉𑀪𑀬𑀁 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸. 𑀏𑀓𑁂𑀓𑀦𑁆𑀢𑀺 𑀢𑁂𑀲𑀼 𑀏𑀓𑁂𑀓𑀁. 𑀏𑀓𑁂𑀓𑀫𑁂𑀯𑀸𑀢𑀺 𑀉𑀪𑀬𑀁 𑀏𑀓𑀚𑁆𑀛𑀁 𑀅𑀕𑁆𑀕𑀳𑁂𑀢𑁆𑀯𑀸 𑀏𑀓𑁂𑀓𑀫𑁂𑀯 𑀯𑀺𑀲𑀼𑀁 𑀯𑀺𑀲𑀼𑀁 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 𑀢𑀣𑀸 𑀦 𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄𑀢𑀺 𑀅𑀢𑀺𑀤𑁂𑀲𑀁 𑀓𑀢𑁆𑀯𑀸 𑀲𑀁𑀔𑀺𑀢𑁆𑀢𑀢𑁆𑀢𑀸 𑀢𑀁 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀦𑁆𑀢𑀺 ‘‘𑀅𑀦𑀸𑀕𑀢𑀲𑁆𑀲 𑀳𑀻’’𑀢𑀺𑀆𑀤𑀺𑀦𑀸 𑀯𑀺𑀯𑀭𑀢𑀺. 𑀧𑀝𑀺𑀚𑀸𑀦𑀺𑀢𑀩𑁆𑀩𑀁 𑀲𑀺𑀬𑀸 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀬𑀣𑀸𑀓𑁆𑀓𑀫𑀁 𑀳𑁄𑀢𑀺𑀳𑀼𑀢𑁆𑀯𑀸𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀬𑀤𑁂𑀢𑀁 𑀢𑀬𑀸’’𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑁄 𑀲𑀁𑀯𑀡𑁆𑀡𑀦𑀸𑀦𑀬𑁄 𑀧𑀼𑀭𑀺𑀫𑀦𑀬𑁄, 𑀢𑀢𑁆𑀣 𑀳𑀺 ‘‘𑀬𑀤𑀺 𑀢𑁂 𑀅𑀦𑀸𑀕𑀢𑀁 𑀳𑀼𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀳𑀼𑀢𑁆𑀯𑀸𑀳𑁄𑀢𑀺𑀪𑀸𑀯𑁄 𑀘𑁄𑀤𑀺𑀢𑁄. ‘‘𑀅𑀧𑀭𑁄 𑀦𑀬𑁄’’𑀢𑀺𑀆𑀤𑀺𑀓𑁄 𑀤𑀼𑀢𑀺𑀬𑀦𑀬𑁄. 𑀢𑀢𑁆𑀣 𑀳𑀺 ‘‘𑀅𑀦𑀸𑀕𑀢𑀲𑁆𑀲…𑀧𑁂… 𑀳𑀼𑀢𑁆𑀯𑀸𑀳𑁄𑀢𑀺𑀬𑁂𑀯 𑀦𑀸𑀫𑀸’’𑀢𑀺 𑀅𑀦𑀸𑀕𑀢𑀸𑀤𑀻𑀲𑀼 𑀏𑀓𑁂𑀓𑀲𑁆𑀲 𑀳𑀼𑀢𑁆𑀯𑀸𑀳𑁄𑀢𑀺𑀦𑀸𑀫𑀢𑀸 𑀘𑁄𑀤𑀺𑀢𑀸.

𑀯𑀘𑀦𑀲𑁄𑀥𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀢𑀻𑀢𑀜𑀸𑀡𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁨𑁯𑁦. 𑀓𑀣𑀁 𑀯𑀼𑀘𑁆𑀘𑀢𑀻𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁. 𑀢𑁂𑀦𑀸𑀢𑀺 𑀳𑀺 𑀇𑀫𑀺𑀦𑀸 𑀤𑀼𑀢𑀺𑀬𑀧𑀼𑀘𑁆𑀙𑀸𑀬 ‘‘𑀅𑀢𑀻𑀢𑀁 𑀜𑀸𑀡’’𑀦𑁆𑀢𑀺 𑀇𑀤𑀁 𑀧𑀘𑁆𑀘𑀸𑀫𑀝𑁆𑀞𑀁, 𑀢𑀜𑁆𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀜𑀸𑀡𑀁, 𑀅𑀢𑀻𑀢𑀥𑀫𑁆𑀫𑀸𑀭𑀫𑁆𑀫𑀡𑀢𑀸𑀬 𑀅𑀢𑀻𑀢𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀧𑀼𑀦 𑀧𑀼𑀝𑁆𑀞𑁄 𑀅𑀢𑀻𑀢𑀸𑀭𑀫𑁆𑀫𑀡𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀜𑀸𑀡’’𑀦𑁆𑀢𑀺𑀆𑀤𑀺.

𑀅𑀢𑀻𑀢𑀜𑀸𑀡𑀸𑀤𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀭𑀳𑀦𑁆𑀢𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁨𑁯𑁧. ‘‘𑀅𑀭𑀳𑀁 𑀔𑀻𑀡𑀸𑀲𑀯𑁄’’𑀢𑀺𑀆𑀤𑀺𑀦𑀸 𑀲𑀼𑀢𑁆𑀢𑀯𑀺𑀭𑁄𑀥𑁄 𑀧𑀸𑀓𑀝𑁄𑀢𑀺 𑀇𑀤𑀫𑁂𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀼𑀢𑁆𑀢𑀺𑀯𑀺𑀭𑁄𑀥𑁄…𑀧𑁂… 𑀤𑀝𑁆𑀞𑀩𑁆𑀩𑁄’’𑀢𑀺 𑀆𑀳. 𑀢𑀢𑁆𑀣 𑀅𑀦𑀸𑀦𑀢𑁆𑀢𑀦𑁆𑀢𑀺 𑀅𑀯𑀺𑀲𑁂𑀲𑁄. 𑀏𑀯𑀫𑀸𑀤𑀺𑀓𑁄𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀓𑀢𑀓𑀺𑀘𑁆𑀘𑀢𑀸𑀪𑀸𑀯𑁄 𑀅𑀦𑁄𑀳𑀺𑀢𑀪𑀸𑀭𑀢𑀸𑀢𑀺 𑀏𑀯𑀫𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

𑀅𑀭𑀳𑀦𑁆𑀢𑀸𑀤𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀤𑀲𑁄𑀥𑀦𑀓𑀣𑀸𑀯𑀡𑁆𑀡𑀦𑀸

𑁨𑁯𑁫. 𑀬𑁄 𑀅𑀢𑀻𑀢𑀲𑀤𑁆𑀤𑀸𑀪𑀺𑀥𑁂𑀬𑁆𑀬𑁄 𑀅𑀢𑁆𑀣𑁄, 𑀲𑁄 𑀅𑀢𑁆𑀣𑀺𑀲𑀤𑁆𑀤𑀸𑀪𑀺𑀥𑁂𑀬𑁆𑀬𑁄𑀢𑀺 𑀤𑁆𑀯𑁂𑀧𑀺 𑀲𑀫𑀸𑀦𑀸𑀥𑀺𑀓𑀭𑀡𑀢𑁆𑀣𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀅𑀢𑀻𑀢𑀅𑀢𑁆𑀣𑀺𑀲𑀤𑁆𑀤𑀸𑀦𑀁 𑀏𑀓𑀢𑁆𑀣𑀢𑁆𑀢𑀸’’𑀢𑀺, 𑀦, 𑀅𑀢𑀻𑀢𑀲𑀤𑁆𑀤𑀸𑀪𑀺𑀥𑁂𑀬𑁆𑀬𑀲𑁆𑀲𑁂𑀯 𑀅𑀢𑁆𑀣𑀺𑀲𑀤𑁆𑀤𑀸𑀪𑀺𑀥𑁂𑀬𑁆𑀬𑀢𑁆𑀢𑀸. 𑀢𑁂𑀦𑀸𑀳 ‘‘𑀅𑀢𑁆𑀣𑀺𑀲𑀤𑁆𑀤𑀢𑁆𑀣𑀲𑁆𑀲 𑀘 𑀦𑁆𑀯𑀸𑀢𑀻𑀢𑀪𑀸𑀯𑀢𑁄’’𑀢𑀺. 𑀢𑁂𑀦 𑀓𑀺𑀁 𑀲𑀺𑀤𑁆𑀥𑀦𑁆𑀢𑀺 𑀆𑀳 ‘‘𑀅𑀢𑀻𑀢𑀁 𑀦𑁆𑀯𑀸𑀢𑀻𑀢𑀁, 𑀦𑁆𑀯𑀸𑀢𑀻𑀢𑀜𑁆𑀘 𑀅𑀢𑀻𑀢𑀁 𑀳𑁄𑀢𑀻’’𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀤𑀺 𑀢𑀯 𑀫𑀢𑁂𑀦 𑀅𑀢𑀻𑀢𑀁 𑀅𑀢𑁆𑀣𑀺, 𑀅𑀢𑁆𑀣𑀺 𑀘 𑀦𑁆𑀯𑀸𑀢𑀻𑀢𑀦𑁆𑀢𑀺 𑀅𑀢𑀻𑀢𑀜𑁆𑀘 𑀦𑁄 𑀅𑀢𑀻𑀢𑀁 𑀲𑀺𑀬𑀸, 𑀢𑀣𑀸 𑀅𑀢𑁆𑀣𑀺 𑀦𑁄 𑀅𑀢𑀻𑀢𑀁 𑀅𑀢𑀻𑀢𑀜𑁆𑀘 𑀦𑁄 𑀅𑀢𑀻𑀢𑀁 𑀅𑀢𑀻𑀢𑀁 𑀲𑀺𑀬𑀸𑀢𑀺, 𑀬𑀣𑀸 ‘‘𑀅𑀢𑀻𑀢𑀁 𑀅𑀢𑁆𑀣𑀻’’𑀢𑀺 𑀏𑀢𑁆𑀣 𑀅𑀢𑀻𑀢𑀫𑁂𑀯 𑀅𑀢𑁆𑀣𑀻𑀢𑀺 𑀦𑀸𑀬𑀁 𑀦𑀺𑀬𑀫𑁄 𑀕𑀳𑁂𑀢𑀩𑁆𑀩𑁄 𑀅𑀦𑀢𑀻𑀢𑀲𑁆𑀲𑀧𑀺 𑀅𑀢𑁆𑀣𑀺𑀪𑀸𑀯𑀲𑁆𑀲 𑀇𑀘𑁆𑀙𑀺𑀢𑀢𑁆𑀢𑀸. 𑀢𑁂𑀦𑁂𑀯𑀸𑀳 ‘‘𑀅𑀢𑁆𑀣𑀺 𑀲𑀺𑀬𑀸 𑀅𑀢𑀻𑀢𑀁, 𑀲𑀺𑀬𑀸 𑀦𑁆𑀯𑀸𑀢𑀻𑀢’’𑀦𑁆𑀢𑀺. 𑀬𑁂𑀦 𑀳𑀺 𑀆𑀓𑀸𑀭𑁂𑀦 𑀅𑀢𑀻𑀢𑀲𑁆𑀲 𑀅𑀢𑁆𑀣𑀺𑀪𑀸𑀯𑁄 𑀧𑀭𑀯𑀸𑀤𑀺𑀦𑀸 𑀇𑀘𑁆𑀙𑀺𑀢𑁄, 𑀢𑁂𑀦𑀸𑀓𑀸𑀭𑁂𑀦 𑀅𑀦𑀢𑀻𑀢𑀲𑁆𑀲 𑀅𑀦𑀸𑀕𑀢𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀘 𑀲𑁄 𑀇𑀘𑁆𑀙𑀺𑀢𑁄. 𑀓𑁂𑀦 𑀧𑀦 𑀆𑀓𑀸𑀭𑁂𑀦 𑀇𑀘𑁆𑀙𑀺𑀢𑁄𑀢𑀺? 𑀲𑀗𑁆𑀔𑀢𑀸𑀓𑀸𑀭𑁂𑀦. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑁂𑀦𑀸𑀢𑀻𑀢𑀁 𑀦𑁆𑀯𑀸𑀢𑀻𑀢𑀁, 𑀦𑁆𑀯𑀸𑀢𑀻𑀢𑀁 𑀅𑀢𑀻𑀢’’𑀦𑁆𑀢𑀺. 𑀢𑀲𑁆𑀫𑀸 𑀅𑀢𑀻𑀢𑀁 𑀅𑀢𑁆𑀣𑀺𑀬𑁂𑀯𑀸𑀢𑀺 𑀏𑀯𑀫𑁂𑀢𑁆𑀣 𑀦𑀺𑀬𑀫𑁄 𑀕𑀳𑁂𑀢𑀩𑁆𑀩𑁄. 𑀅𑀢𑁆𑀣𑀺𑀪𑀸𑀯𑁂 𑀳𑀺 𑀅𑀢𑀻𑀢𑀁 𑀦𑀺𑀬𑀫𑀺𑀢𑀁, 𑀦 𑀅𑀢𑀻𑀢𑁂 𑀅𑀢𑁆𑀣𑀺𑀪𑀸𑀯𑁄 𑀦𑀺𑀬𑀫𑀺𑀢𑁄, ‘‘𑀦 𑀧𑀦 𑀦𑀺𑀩𑁆𑀩𑀸𑀦𑀁 𑀅𑀢𑁆𑀣𑀻’’𑀢𑀺 𑀏𑀢𑁆𑀣 𑀧𑀦 𑀦𑀺𑀩𑁆𑀩𑀸𑀦𑀫𑁂𑀯 𑀅𑀢𑁆𑀣𑀻𑀢𑀺 𑀅𑀬𑀫𑁆𑀧𑀺 𑀦𑀺𑀬𑀫𑁄 𑀲𑀫𑁆𑀪𑀯𑀢𑀻𑀢𑀺 𑀲𑁄 𑀏𑀯 𑀕𑀳𑁂𑀢𑀩𑁆𑀩𑁄. 𑀬𑀤𑀺𑀧𑀺 𑀳𑀺 𑀦𑀺𑀩𑁆𑀩𑀸𑀦𑀁 𑀧𑀭𑀫𑀢𑁆𑀣𑀢𑁄 𑀅𑀢𑁆𑀣𑀺𑀪𑀸𑀯𑀁 𑀉𑀧𑀸𑀤𑀸𑀬 𑀉𑀢𑁆𑀢𑀭𑀧𑀤𑀸𑀯𑀥𑀸𑀭𑀡𑀁 𑀮𑀩𑁆𑀪𑀢𑀺 𑀢𑀤𑀜𑁆𑀜𑀲𑁆𑀲𑀧𑀺 𑀅𑀪𑀸𑀯𑀢𑁄, 𑀢𑀣𑀸𑀧𑀺 𑀅𑀲𑀗𑁆𑀔𑀢𑀸𑀓𑀸𑀭𑁂𑀦 𑀅𑀜𑁆𑀜𑀲𑁆𑀲 𑀅𑀦𑀼𑀧𑀮𑀩𑁆𑀪𑀦𑀢𑁄 𑀢𑀣𑀸 𑀦𑀺𑀩𑁆𑀩𑀸𑀦𑀫𑁂𑀯 𑀅𑀢𑁆𑀣𑀻𑀢𑀺 𑀧𑀼𑀭𑀺𑀫𑀧𑀤𑀸𑀯𑀥𑀸𑀭𑀡𑁂 𑀅𑀢𑁆𑀣𑁂 𑀕𑀬𑁆𑀳𑀫𑀸𑀦𑁂 ‘‘𑀅𑀢𑁆𑀣𑀺 𑀲𑀺𑀬𑀸 𑀦𑀺𑀩𑁆𑀩𑀸𑀦𑀁, 𑀲𑀺𑀬𑀸 𑀦𑁄 𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀘𑁄𑀤𑀦𑀸 𑀅𑀦𑁄𑀓𑀸𑀲𑀸. 𑀅𑀢𑀻𑀢𑀸𑀤𑀻𑀲𑀼 𑀧𑀦 𑀧𑀼𑀭𑀺𑀫𑀧𑀤𑀸𑀯𑀥𑀸𑀭𑀡𑀁 𑀧𑀭𑀯𑀸𑀤𑀺𑀦𑀸 𑀦 𑀕𑀳𑀺𑀢𑀦𑁆𑀢𑀺 𑀦𑀢𑁆𑀣𑁂𑀢𑁆𑀣 𑀅𑀢𑀺𑀧𑁆𑀧𑀲𑀗𑁆𑀕𑁄. 𑀅𑀕𑁆𑀕𑀳𑀡𑀜𑁆𑀘𑀲𑁆𑀲 𑀧𑀸𑀴𑀺𑀢𑁄 𑀏𑀯 𑀯𑀺𑀜𑁆𑀜𑀸𑀬𑀢𑀺. 𑀏𑀯𑀫𑁂𑀢𑁆𑀣 𑀅𑀢𑀻𑀢𑀸𑀤𑀻𑀦𑀁 𑀅𑀢𑁆𑀣𑀺𑀢𑀁 𑀯𑀤𑀦𑁆𑀢𑀲𑁆𑀲 𑀧𑀭𑀯𑀸𑀤𑀺𑀲𑁆𑀲𑁂𑀯𑀸𑀬𑀁 𑀇𑀝𑁆𑀞𑀯𑀺𑀖𑀸𑀢𑀤𑁄𑀲𑀸𑀧𑀢𑁆𑀢𑀺, 𑀦 𑀧𑀦 𑀦𑀺𑀩𑁆𑀩𑀸𑀦𑀲𑁆𑀲 𑀅𑀢𑁆𑀣𑀺𑀢𑀁 𑀯𑀤𑀦𑁆𑀢𑀲𑁆𑀲 𑀲𑀓𑀯𑀸𑀤𑀺𑀲𑁆𑀲𑀸𑀢𑀺. 𑀧𑀝𑀺𑀧𑀸𑀤𑀦𑀸 𑀧𑀢𑀺𑀝𑁆𑀞𑀸𑀧𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀏𑀢𑁆𑀣𑀸𑀳 ‘‘𑀅𑀢𑀻𑀢𑀁 𑀅𑀢𑁆𑀣𑀻’’𑀢𑀺𑀆𑀤𑀺𑀦𑀸 𑀓𑀺𑀁 𑀧𑀦𑀸𑀬𑀁 𑀅𑀢𑀻𑀢𑀸𑀦𑀸𑀕𑀢𑀸𑀦𑀁 𑀧𑀭𑀫𑀢𑁆𑀣𑀢𑁄 𑀅𑀢𑁆𑀣𑀺𑀪𑀸𑀯𑁄 𑀅𑀥𑀺𑀧𑁆𑀧𑁂𑀢𑁄, 𑀉𑀤𑀸𑀳𑀼 𑀦 𑀧𑀭𑀫𑀢𑁆𑀣𑀢𑁄. 𑀓𑀺𑀜𑁆𑀘𑁂𑀢𑁆𑀣 𑁋 𑀬𑀤𑀺 𑀢𑀸𑀯 𑀧𑀭𑀫𑀢𑁆𑀣𑀢𑁄, 𑀲𑀩𑁆𑀩𑀓𑀸𑀮𑀁 𑀅𑀢𑁆𑀣𑀺𑀪𑀸𑀯𑀢𑁄 𑀲𑀗𑁆𑀔𑀸𑀭𑀸𑀦𑀁 𑀲𑀲𑁆𑀲𑀢𑀪𑀸𑀯𑁄 𑀆𑀧𑀚𑁆𑀚𑀢𑀺, 𑀦 𑀘 𑀢𑀁 𑀬𑀼𑀢𑁆𑀢𑀁 𑀆𑀕𑀫𑀯𑀺𑀭𑁄𑀥𑀢𑁄 𑀬𑀼𑀢𑁆𑀢𑀺𑀯𑀺𑀭𑁄𑀥𑀢𑁄 𑀘. 𑀅𑀣 𑀦 𑀧𑀭𑀫𑀢𑁆𑀣𑀢𑁄, ‘‘𑀲𑀩𑁆𑀩𑀫𑀢𑁆𑀣𑀻’’𑀢𑀺𑀆𑀤𑀺𑀓𑀸 𑀘𑁄𑀤𑀦𑀸 𑀦𑀺𑀭𑀢𑁆𑀣𑀺𑀓𑀸 𑀲𑀺𑀬𑀸, 𑀦 𑀦𑀺𑀭𑀢𑁆𑀣𑀺𑀓𑀸. 𑀲𑁄 𑀳𑀺 𑀧𑀭𑀯𑀸𑀤𑀻 ‘‘𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢’’𑀦𑁆𑀢𑀺𑀆𑀤𑀺𑀦𑀸 𑀅𑀢𑀻𑀢𑀸𑀦𑀸𑀕𑀢𑀸𑀦𑀫𑁆𑀧𑀺 𑀔𑀦𑁆𑀥𑀪𑀸𑀯𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀅𑀲𑀢𑀺 𑀘 𑀅𑀢𑀻𑀢𑁂 𑀓𑀼𑀲𑀮𑀸𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀆𑀬𑀢𑀺𑀁 𑀨𑀮𑀁 𑀓𑀣𑀁 𑀪𑀯𑁂𑀬𑁆𑀬, 𑀢𑀢𑁆𑀣 𑀘 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀸𑀤𑀺 𑀅𑀦𑀸𑀕𑀢𑁂 𑀘 𑀅𑀦𑀸𑀕𑀢𑀁𑀲𑀜𑀸𑀡𑀸𑀤𑀺 𑀓𑀣𑀁 𑀧𑀯𑀢𑁆𑀢𑁂𑀬𑁆𑀬, 𑀢𑀲𑁆𑀫𑀸 𑀅𑀢𑁆𑀣𑁂𑀯 𑀧𑀭𑀫𑀢𑁆𑀣𑀢𑁄 𑀅𑀢𑀻𑀢𑀸𑀦𑀸𑀕𑀢𑀦𑁆𑀢𑀺 𑀬𑀁 𑀧𑀝𑀺𑀚𑀸𑀦𑀸𑀢𑀺, 𑀢𑀁 𑀲𑀦𑁆𑀥𑀸𑀬 𑀅𑀬𑀁 𑀓𑀢𑀸𑀢𑀺. 𑀏𑀓𑀦𑁆𑀢𑁂𑀦 𑀘𑁂𑀢𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁. 𑀬𑁂𑀧𑀺 ‘‘𑀲𑀩𑁆𑀩𑀁 𑀅𑀢𑁆𑀣𑀻’’𑀢𑀺 𑀯𑀤𑀦𑁆𑀢𑀺 𑀅𑀢𑀻𑀢𑀁 𑀅𑀦𑀸𑀕𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀜𑁆𑀘, 𑀢𑁂 𑀲𑀩𑁆𑀩𑀢𑁆𑀣𑀺𑀯𑀸𑀤𑀸𑀢𑀺.

𑀘𑀢𑀼𑀩𑁆𑀩𑀺𑀥𑀸 𑀘𑁂𑀢𑁂 𑀢𑁂 𑀲𑀩𑁆𑀩𑀢𑁆𑀣𑀺𑀯𑀸𑀤𑀸. 𑀢𑀢𑁆𑀣 𑀓𑁂𑀘𑀺 𑀪𑀸𑀯𑀜𑁆𑀜𑀢𑁆𑀢𑀺𑀓𑀸. 𑀢𑁂 𑀳𑀺 ‘‘𑀬𑀣𑀸 𑀲𑀼𑀯𑀡𑁆𑀡𑀪𑀸𑀚𑀦𑀲𑁆𑀲 𑀪𑀺𑀦𑁆𑀤𑀺𑀢𑁆𑀯𑀸 𑀅𑀜𑁆𑀜𑀣𑀸 𑀓𑀭𑀺𑀬𑀫𑀸𑀦𑀲𑁆𑀲 𑀲𑀡𑁆𑀞𑀸𑀦𑀲𑁆𑀲𑁂𑀯 𑀅𑀜𑁆𑀜𑀣𑀢𑁆𑀢𑀁, 𑀦 𑀯𑀡𑁆𑀡𑀸𑀤𑀻𑀦𑀁, 𑀬𑀣𑀸 𑀘 𑀔𑀻𑀭𑀁 𑀤𑀥𑀺𑀪𑀸𑀯𑁂𑀦 𑀧𑀭𑀺𑀡𑀫𑀦𑁆𑀢𑀁 𑀭𑀲𑀯𑀻𑀭𑀺𑀬𑀯𑀺𑀧𑀸𑀓𑁂 𑀧𑀭𑀺𑀘𑁆𑀘𑀚𑀢𑀺, 𑀦 𑀯𑀡𑁆𑀡𑀁, 𑀏𑀯𑀁 𑀥𑀫𑁆𑀫𑀸𑀧𑀺 𑀅𑀦𑀸𑀕𑀢𑀤𑁆𑀥𑀼𑀦𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀤𑁆𑀥𑀁 𑀲𑀗𑁆𑀓𑀫𑀦𑁆𑀢𑀸 𑀅𑀦𑀸𑀕𑀢𑀪𑀸𑀯𑀫𑁂𑀯 𑀚𑀳𑀦𑁆𑀢𑀺, 𑀦 𑀅𑀢𑁆𑀢𑀦𑁄 𑀲𑀪𑀸𑀯𑀁. 𑀢𑀣𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀤𑁆𑀥𑀼𑀦𑁄 𑀅𑀢𑀻𑀢𑀤𑁆𑀥𑀁 𑀲𑀗𑁆𑀓𑀫𑁂’’𑀢𑀺 𑀯𑀤𑀦𑁆𑀢𑀺. 𑀓𑁂𑀘𑀺 𑀮𑀓𑁆𑀔𑀡𑀜𑁆𑀜𑀢𑁆𑀢𑀺𑀓𑀸, 𑀢𑁂 𑀧𑀦 ‘‘𑀢𑀻𑀲𑀼 𑀅𑀤𑁆𑀥𑀸𑀲𑀼 𑀧𑀯𑀢𑁆𑀢𑀫𑀸𑀦𑁄 𑀥𑀫𑁆𑀫𑁄 𑀅𑀢𑀻𑀢𑁄 𑀅𑀢𑀻𑀢𑀮𑀓𑁆𑀔𑀡𑀬𑀼𑀢𑁆𑀢𑁄, 𑀇𑀢𑀭𑀮𑀓𑁆𑀔𑀡𑁂𑀳𑀺 𑀅𑀬𑀼𑀢𑁆𑀢𑁄. 𑀢𑀣𑀸 𑀅𑀦𑀸𑀕𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀘. 𑀬𑀣𑀸 𑀧𑀼𑀭𑀺𑀲𑁄 𑀏𑀓𑀺𑀲𑁆𑀲𑀸 𑀇𑀢𑁆𑀣𑀺𑀬𑀸 𑀭𑀢𑁆𑀢𑁄 𑀅𑀜𑁆𑀜𑀸𑀲𑀼 𑀅𑀭𑀢𑁆𑀢𑁄’’𑀢𑀺 𑀯𑀤𑀦𑁆𑀢𑀺. 𑀅𑀜𑁆𑀜𑁂 𑀅𑀯𑀢𑁆𑀣𑀜𑁆𑀜𑀢𑁆𑀢𑀺𑀓𑀸, 𑀢𑁂 ‘‘𑀢𑀻𑀲𑀼 𑀅𑀤𑁆𑀥𑀸𑀲𑀼 𑀧𑀯𑀢𑁆𑀢𑀫𑀸𑀦𑁄 𑀥𑀫𑁆𑀫𑁄 𑀢𑀁 𑀢𑀁 𑀅𑀯𑀢𑁆𑀣𑀁 𑀧𑀢𑁆𑀯𑀸 𑀅𑀜𑁆𑀜𑁄 𑀅𑀜𑁆𑀜𑀁 𑀦𑀺𑀤𑁆𑀤𑀺𑀲𑀻𑀬𑀢𑀺 𑀅𑀯𑀢𑁆𑀣𑀦𑁆𑀢𑀭𑀢𑁄, 𑀦 𑀲𑀪𑀸𑀯𑀢𑁄. 𑀬𑀣𑀸 𑀏𑀓𑀁 𑀅𑀓𑁆𑀔𑀁 𑀏𑀓𑀗𑁆𑀕𑁂 𑀦𑀺𑀓𑁆𑀔𑀺𑀢𑁆𑀢𑀁 𑀏𑀓𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀲𑀢𑀗𑁆𑀕𑁂 𑀲𑀢𑀦𑁆𑀢𑀺, 𑀲𑀳𑀲𑁆𑀲𑀗𑁆𑀕𑁂 𑀲𑀳𑀲𑁆𑀲𑀦𑁆𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤’’𑀦𑁆𑀢𑀺. 𑀅𑀧𑀭𑁂 𑀅𑀜𑁆𑀜𑀣𑀜𑁆𑀜𑀢𑁆𑀢𑀺𑀓𑀸, 𑀢𑁂 𑀧𑀦 ‘‘𑀢𑀻𑀲𑀼 𑀅𑀤𑁆𑀥𑀸𑀲𑀼 𑀧𑀯𑀢𑁆𑀢𑀫𑀸𑀦𑁄 𑀥𑀫𑁆𑀫𑁄 𑀢𑀁 𑀢𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀢𑀤𑀜𑁆𑀜𑀲𑀪𑀸𑀯𑁂𑀦 𑀯𑀼𑀘𑁆𑀘𑀢𑀺. 𑀬𑀣𑀸 𑀢𑀁 𑀏𑀓𑀸 𑀇𑀢𑁆𑀣𑀻 𑀫𑀸𑀢𑀸𑀢𑀺 𑀘 𑀯𑀼𑀘𑁆𑀘𑀢𑀺 𑀥𑀻𑀢𑀸’’𑀢𑀺 𑀘. 𑀏𑀯𑀫𑁂𑀢𑁂 𑀘𑀢𑁆𑀢𑀸𑀭𑁄 𑀲𑀩𑁆𑀩𑀢𑁆𑀣𑀺𑀯𑀸𑀤𑀸.

𑀢𑁂𑀲𑀼 𑀧𑀞𑀫𑁄 𑀧𑀭𑀺𑀡𑀸𑀫𑀯𑀸𑀤𑀺𑀢𑀸𑀬 𑀓𑀸𑀧𑀺𑀮𑀧𑀓𑁆𑀔𑀺𑀓𑁂𑀲𑀼 𑀧𑀓𑁆𑀔𑀺𑀧𑀺𑀢𑀩𑁆𑀩𑁄𑀢𑀺. 𑀤𑀼𑀢𑀺𑀬𑀲𑁆𑀲𑀧𑀺 𑀓𑀸𑀮𑀲𑀗𑁆𑀓𑀭𑁄 𑀆𑀧𑀚𑁆𑀚𑀢𑀺 𑀲𑀩𑁆𑀩𑀲𑁆𑀲 𑀲𑀩𑁆𑀩𑀮𑀓𑁆𑀔𑀡𑀬𑁄𑀕𑀢𑁄. 𑀘𑀢𑀼𑀢𑁆𑀣𑀲𑁆𑀲𑀧𑀺 𑀲𑀗𑁆𑀓𑀭𑁄𑀯. 𑀏𑀓𑀲𑁆𑀲𑁂𑀯 𑀥𑀫𑁆𑀫𑀲𑁆𑀲 𑀧𑀯𑀢𑁆𑀢𑀺𑀓𑁆𑀔𑀡𑁂 𑀢𑀬𑁄𑀧𑀺 𑀓𑀸𑀮𑀸 𑀲𑀫𑁄𑀥𑀸𑀦𑀁 𑀕𑀘𑁆𑀙𑀦𑁆𑀢𑀺. 𑀧𑀼𑀭𑀺𑀫𑀧𑀘𑁆𑀙𑀺𑀫𑀓𑁆𑀔𑀡𑀸 𑀳𑀺 𑀅𑀢𑀻𑀢𑀸𑀦𑀸𑀕𑀢𑀸, 𑀫𑀚𑁆𑀛𑀺𑀫𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁄𑀢𑀺. 𑀢𑀢𑀺𑀬𑀲𑁆𑀲 𑀧𑀦 𑀅𑀯𑀢𑁆𑀣𑀜𑁆𑀜𑀢𑁆𑀢𑀺𑀓𑀲𑁆𑀲 𑀦𑀢𑁆𑀣𑀺 𑀲𑀗𑁆𑀓𑀭𑁄 𑀥𑀫𑁆𑀫𑀓𑀺𑀘𑁆𑀘𑁂𑀦 𑀓𑀸𑀮𑀯𑀯𑀢𑁆𑀣𑀸𑀦𑀢𑁄. 𑀥𑀫𑁆𑀫𑁄 𑀳𑀺 𑀲𑀓𑀺𑀘𑁆𑀘𑀓𑁆𑀔𑀡𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑁄, 𑀢𑀢𑁄 𑀧𑀼𑀩𑁆𑀩𑁂 𑀅𑀦𑀸𑀕𑀢𑁄, 𑀧𑀘𑁆𑀙𑀸 𑀅𑀢𑀻𑀢𑁄𑀢𑀺.

𑀢𑀢𑁆𑀣 𑀬𑀤𑀺 𑀅𑀢𑀻𑀢𑀫𑁆𑀧𑀺 𑀥𑀭𑀫𑀸𑀦𑀲𑀪𑀸𑀯𑀢𑀸𑀬 𑀅𑀢𑁆𑀣𑀺 𑀅𑀦𑀸𑀕𑀢𑀫𑁆𑀧𑀺, 𑀓𑀲𑁆𑀫𑀸 𑀢𑀁 𑀅𑀢𑀻𑀢𑀦𑁆𑀢𑀺 𑀯𑀼𑀘𑁆𑀘𑀢𑀺 𑀅𑀦𑀸𑀕𑀢𑀦𑁆𑀢𑀺 𑀯𑀸, 𑀦𑀦𑀼 𑀯𑀼𑀢𑁆𑀢𑀁 ‘‘𑀥𑀫𑁆𑀫𑀓𑀺𑀘𑁆𑀘𑁂𑀦 𑀓𑀸𑀮𑀯𑀯𑀢𑁆𑀣𑀸𑀦𑀢𑁄’’𑀢𑀺. 𑀬𑀤𑀺 𑀏𑀯𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀘𑀓𑁆𑀔𑀼𑀲𑁆𑀲 𑀓𑀺𑀁 𑀓𑀺𑀘𑁆𑀘𑀁, 𑀅𑀦𑀯𑀲𑁂𑀲𑀧𑀘𑁆𑀘𑀬𑀲𑀫𑀯𑀸𑀬𑁂 𑀨𑀮𑀼𑀧𑁆𑀧𑀸𑀤𑀦𑀁. 𑀏𑀯𑀁 𑀲𑀢𑀺 𑀅𑀦𑀸𑀕𑀢𑀲𑁆𑀲𑀧𑀺 𑀘𑀲𑁆𑀲 𑀢𑁂𑀦 𑀪𑀯𑀺𑀢𑀩𑁆𑀩𑀁 𑀅𑀢𑁆𑀣𑀺𑀪𑀸𑀯𑀢𑁄𑀢𑀺 𑀮𑀓𑁆𑀔𑀡𑀲𑀗𑁆𑀓𑀭𑁄 𑀲𑀺𑀬𑀸. 𑀇𑀤𑀜𑁆𑀘𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑁂𑀦𑁂𑀯 𑀲𑀪𑀸𑀯𑁂𑀦 𑀲𑀢𑁄 𑀥𑀫𑁆𑀫𑀲𑁆𑀲 𑀓𑀺𑀘𑁆𑀘𑀁, 𑀓𑀺𑀘𑁆𑀘𑀓𑀭𑀡𑁂 𑀓𑁄 𑀯𑀺𑀩𑀦𑁆𑀥𑁄, 𑀬𑁂𑀦 𑀓𑀤𑀸𑀘𑀺 𑀓𑀭𑁄𑀢𑀺 𑀓𑀤𑀸𑀘𑀺 𑀦 𑀓𑀭𑁄𑀢𑀺 𑀧𑀘𑁆𑀘𑀬𑀲𑀫𑀯𑀸𑀬𑀪𑀸𑀯𑀢𑁄, 𑀓𑀺𑀘𑁆𑀘𑀲𑁆𑀲 𑀲𑀫𑀯𑀸𑀬𑀸𑀪𑀸𑀯𑀢𑁄𑀢𑀺 𑀘𑁂? 𑀢𑀁 𑀦, 𑀦𑀺𑀘𑁆𑀘𑀁 𑀅𑀢𑁆𑀣𑀺𑀪𑀸𑀯𑀲𑁆𑀲 𑀇𑀘𑁆𑀙𑀺𑀢𑀢𑁆𑀢𑀸. 𑀢𑀢𑁄 𑀏𑀯 𑀘 𑀅𑀤𑁆𑀥𑀼𑀦𑀁 𑀅𑀯𑀯𑀢𑁆𑀣𑀸𑀦𑀁. 𑀥𑀫𑁆𑀫𑁄 𑀳𑀺 𑀢𑁂𑀦𑁂𑀯 𑀲𑀪𑀸𑀯𑁂𑀦 𑀯𑀺𑀚𑁆𑀚𑀫𑀸𑀦𑁄 𑀓𑀲𑁆𑀫𑀸 𑀓𑀤𑀸𑀘𑀺 𑀅𑀢𑀻𑀢𑁄𑀢𑀺 𑀯𑀼𑀘𑁆𑀘𑀢𑀺 𑀓𑀤𑀸𑀘𑀺 𑀅𑀦𑀸𑀕𑀢𑁄𑀢𑀺 𑀓𑀸𑀮𑀲𑁆𑀲 𑀯𑀯𑀢𑁆𑀣𑀸𑀦𑀁 𑀦 𑀲𑀺𑀬𑀸. 𑀬𑁄 𑀳𑀺 𑀥𑀫𑁆𑀫𑁄 𑀅𑀚𑀸𑀢𑁄, 𑀲𑁄 𑀅𑀦𑀸𑀕𑀢𑁄. 𑀬𑁄 𑀚𑀸𑀢𑁄 𑀦 𑀘 𑀦𑀺𑀭𑀼𑀤𑁆𑀥𑁄, 𑀲𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁄. 𑀬𑁄 𑀦𑀺𑀭𑀼𑀤𑁆𑀥𑁄, 𑀲𑁄 𑀅𑀢𑀻𑀢𑁄. 𑀇𑀤𑀫𑁂𑀯𑁂𑀢𑁆𑀣 𑀯𑀢𑁆𑀢𑀩𑁆𑀩𑀁. 𑀬𑀤𑀺 𑀬𑀣𑀸 𑀯𑀢𑁆𑀢𑀫𑀸𑀦𑀁 𑀅𑀢𑁆𑀣𑀺, 𑀢𑀣𑀸 𑀅𑀢𑀻𑀢𑀁 𑀅𑀦𑀸𑀕𑀢𑀜𑁆𑀘 𑀅𑀢𑁆𑀣𑀺, 𑀢𑀲𑁆𑀲 𑀢𑀣𑀸 𑀲𑀢𑁄 𑀅𑀚𑀸𑀢𑀢𑀸 𑀦𑀺𑀭𑀼𑀤𑁆𑀥𑀢𑀸 𑀘 𑀓𑁂𑀦 𑀳𑁄𑀢𑀻𑀢𑀺. 𑀢𑁂𑀦𑁂𑀯 𑀳𑀺 𑀲𑀪𑀸𑀯𑁂𑀦 𑀲𑀢𑁄 𑀥𑀫𑁆𑀫𑀲𑁆𑀲 𑀓𑀣𑀫𑀺𑀤𑀁 𑀲𑀺𑀚𑁆𑀛𑀢𑀺 𑀅𑀚𑀸𑀢𑁄𑀢𑀺 𑀯𑀸 𑀦𑀺𑀭𑀼𑀤𑁆𑀥𑁄𑀢𑀺 𑀯𑀸. 𑀓𑀺𑀁 𑀢𑀲𑁆𑀲 𑀧𑀼𑀩𑁆𑀩𑁂 𑀦𑀸𑀳𑁄𑀲𑀺, 𑀬𑀲𑁆𑀲 𑀅𑀪𑀸𑀯𑀢𑁄 𑀅𑀚𑀸𑀢𑁄𑀢𑀺 𑀯𑀼𑀘𑁆𑀘𑀢𑀺, 𑀓𑀺𑀜𑁆𑀘 𑀧𑀘𑁆𑀙𑀸 𑀦𑀢𑁆𑀣𑀺, 𑀬𑀲𑁆𑀲 𑀅𑀪𑀸𑀯𑀢𑁄 𑀦𑀺𑀭𑀼𑀤𑁆𑀥𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 𑀲𑀩𑁆𑀩𑀣𑀸𑀧𑀺 𑀅𑀤𑁆𑀥𑀢𑁆𑀢𑀬𑀁 𑀦 𑀲𑀺𑀚𑁆𑀛𑀢𑀺, 𑀬𑀤𑀺 𑀅𑀳𑀼𑀢𑁆𑀯𑀸 𑀲𑀗𑁆𑀕𑀢𑀺 𑀳𑀼𑀢𑁆𑀯𑀸 𑀘 𑀯𑀺𑀦𑀲𑁆𑀲𑀢𑀻𑀢𑀺 𑀦 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺. 𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀲𑀗𑁆𑀔𑀢𑀮𑀓𑁆𑀔𑀡𑀬𑁄𑀕𑀢𑁄 𑀦 𑀲𑀲𑁆𑀲𑀢𑀪𑀸𑀯𑀧𑁆𑀧𑀲𑀗𑁆𑀕𑁄’’𑀢𑀺, 𑀢𑀬𑀺𑀤𑀁 𑀓𑁂𑀯𑀮𑀁 𑀯𑀸𑀘𑀸𑀯𑀢𑁆𑀣𑀼𑀫𑀢𑁆𑀢𑀁 𑀉𑀤𑀬𑀯𑀬𑀸𑀲𑀫𑁆𑀪𑀯𑀢𑁄, 𑀅𑀢𑁆𑀣𑀺 𑀘 𑀦𑀸𑀫 𑀲𑀩𑁆𑀩𑀤𑀸 𑀲𑁄 𑀥𑀫𑁆𑀫𑁄, 𑀦 𑀘 𑀦𑀺𑀘𑁆𑀘𑁄𑀢𑀺 𑀓𑀼𑀢𑁄𑀬𑀁 𑀯𑀸𑀘𑀸𑀬𑀼𑀢𑁆𑀢𑀺.

𑀲𑀪𑀸𑀯𑁄 𑀲𑀩𑁆𑀩𑀤𑀸 𑀅𑀢𑁆𑀣𑀺, 𑀦𑀺𑀘𑁆𑀘𑁄 𑀥𑀫𑁆𑀫𑁄 𑀦 𑀯𑀼𑀘𑁆𑀘𑀢𑀺;

𑀥𑀫𑁆𑀫𑁄 𑀲𑀪𑀸𑀯𑀢𑁄 𑀦𑀸𑀜𑁆𑀜𑁄, 𑀅𑀳𑁄 𑀥𑀫𑁆𑀫𑁂𑀲𑀼 𑀓𑁄𑀲𑀮𑀁.

𑀬𑀜𑁆𑀘 𑀯𑀼𑀢𑁆𑀢𑀁 ‘‘𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢’’𑀦𑁆𑀢𑀺𑀆𑀤𑀺𑀦𑀸 𑀅𑀢𑀻𑀢𑀸𑀦𑀸𑀕𑀢𑀸𑀦𑀁 𑀔𑀦𑁆𑀥𑀪𑀸𑀯𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀅𑀢𑁆𑀣𑁂𑀯𑀸𑀢𑀺, 𑀯𑀤𑀸𑀫. 𑀅𑀢𑀻𑀢𑀁 𑀪𑀽𑀢𑀧𑀼𑀩𑁆𑀩𑀁, 𑀅𑀦𑀸𑀕𑀢𑀁 𑀬𑀁 𑀲𑀢𑀺 𑀧𑀘𑁆𑀘𑀬𑁂 𑀪𑀯𑀺𑀲𑁆𑀲𑀢𑀺, 𑀢𑀤𑀼𑀪𑀬𑀲𑁆𑀲𑀧𑀺 𑀭𑀼𑀧𑁆𑀧𑀦𑀸𑀤𑀺𑀲𑀪𑀸𑀯𑀸𑀦𑀸𑀢𑀺𑀯𑀢𑁆𑀢𑀦𑀢𑁄 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀪𑀸𑀯𑁄 𑀯𑀼𑀢𑁆𑀢𑁄. 𑀬𑀣𑀸𑀥𑀫𑁆𑀫𑀲𑀪𑀸𑀯𑀸𑀦𑀸𑀢𑀺𑀯𑀢𑁆𑀢𑀦𑀢𑁄 𑀅𑀢𑀻𑀢𑀸 𑀥𑀫𑁆𑀫𑀸 𑀅𑀦𑀸𑀕𑀢𑀸 𑀥𑀫𑁆𑀫𑀸𑀢𑀺, 𑀦 𑀥𑀭𑀫𑀸𑀦𑀲𑀪𑀸𑀯𑀢𑀸𑀬. 𑀓𑁄 𑀘 𑀏𑀯𑀫𑀸𑀳 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀯𑀺𑀬 𑀢𑀁 𑀅𑀢𑁆𑀣𑀻’’𑀢𑀺. 𑀓𑀣𑀁 𑀧𑀦𑁂𑀢𑀁 𑀅𑀢𑁆𑀣𑀻𑀢𑀺? 𑀅𑀢𑀻𑀢𑀸𑀦𑀸𑀕𑀢𑀲𑀪𑀸𑀯𑁂𑀦. 𑀇𑀤𑀁 𑀧𑀦 𑀢𑀯𑁂𑀯 𑀉𑀧𑀝𑁆𑀞𑀺𑀢𑀁, 𑀓𑀣𑀁 𑀢𑀁 𑀅𑀢𑀻𑀢𑀁 𑀅𑀦𑀸𑀕𑀢𑀜𑁆𑀘 𑀯𑀼𑀘𑁆𑀘𑀢𑀺, 𑀬𑀤𑀺 𑀦𑀺𑀘𑁆𑀘𑀓𑀸𑀮𑀁 𑀅𑀢𑁆𑀣𑀻𑀢𑀺.

𑀬𑀁 𑀧𑀦 ‘‘𑀦 𑀢𑀸𑀯 𑀓𑀸𑀮𑀁 𑀓𑀭𑁄𑀢𑀺, 𑀬𑀸𑀯 𑀦 𑀢𑀁 𑀧𑀸𑀧𑀁 𑀩𑁆𑀬𑀦𑁆𑀢𑀻 𑀳𑁄𑀢𑀻’’𑀢𑀺 (𑀫. 𑀦𑀺. 𑁩.𑁨𑁫𑁦) 𑀲𑀼𑀢𑁆𑀢𑁂 𑀯𑀼𑀢𑁆𑀢𑀁, 𑀢𑀁 𑀬𑀲𑁆𑀫𑀺𑀜𑁆𑀘 𑀲𑀦𑁆𑀢𑀸𑀦𑁂 𑀓𑀫𑁆𑀫𑀁 𑀓𑀢𑀽𑀧𑀘𑀺𑀢𑀁, 𑀢𑀢𑁆𑀣 𑀢𑁂𑀦𑀸𑀳𑀺𑀢𑀁 𑀢𑀁𑀨𑀮𑀼𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀅𑀢𑀻𑀢𑀲𑁆𑀲 𑀓𑀫𑁆𑀫𑀲𑁆𑀲 𑀥𑀭𑀫𑀸𑀦𑀲𑀪𑀸𑀯𑀢𑁆𑀢𑀸. 𑀢𑀣𑀸 𑀲𑀢𑀺 𑀲𑀓𑁂𑀦 𑀪𑀸𑀯𑁂𑀦 𑀯𑀺𑀚𑁆𑀚𑀫𑀸𑀦𑀁 𑀓𑀣𑀁 𑀢𑀁 𑀅𑀢𑀻𑀢𑀁 𑀦𑀸𑀫 𑀲𑀺𑀬𑀸. 𑀇𑀢𑁆𑀣𑀜𑁆𑀘𑁂𑀢𑀁 𑀏𑀯𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁, 𑀬𑀁 𑀲𑀗𑁆𑀔𑀸𑀭𑀸 𑀅𑀳𑀼𑀢𑁆𑀯𑀸 𑀲𑀫𑁆𑀪𑀯𑀦𑁆𑀢𑀺, 𑀳𑀼𑀢𑁆𑀯𑀸 𑀧𑀢𑀺𑀯𑁂𑀦𑁆𑀢𑀺 𑀢𑁂𑀲𑀁 𑀉𑀤𑀬𑀢𑁄 𑀧𑀼𑀩𑁆𑀩𑁂 𑀯𑀬𑀢𑁄 𑀘 𑀧𑀘𑁆𑀙𑀸 𑀦 𑀓𑀸𑀘𑀺 𑀞𑀺𑀢𑀺 𑀦𑀸𑀫 𑀅𑀢𑁆𑀣𑀺, 𑀬𑀢𑁄 𑀅𑀢𑀻𑀢𑀸𑀦𑀸𑀕𑀢𑀁 𑀅𑀢𑁆𑀣𑀻𑀢𑀺 𑀯𑀼𑀘𑁆𑀘𑁂𑀬𑁆𑀬. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀅𑀦𑀺𑀥𑀸𑀦𑀕𑀢𑀸 𑀪𑀕𑁆𑀕𑀸, 𑀧𑀼𑀜𑁆𑀚𑁄 𑀦𑀢𑁆𑀣𑀺 𑀅𑀦𑀸𑀕𑀢𑁂;

𑀉𑀧𑁆𑀧𑀦𑁆𑀦𑀸 𑀬𑁂𑀧𑀺 𑀢𑀺𑀝𑁆𑀞𑀦𑁆𑀢𑀺, 𑀆𑀭𑀕𑁆𑀕𑁂 𑀲𑀸𑀲𑀧𑀽𑀧𑀫𑀸’’𑀢𑀺. (𑀫𑀳𑀸𑀦𑀺. 𑁧𑁦, 𑁩𑁯);

𑀬𑀤𑀺 𑀘𑀸𑀦𑀸𑀕𑀢𑀁 𑀧𑀭𑀫𑀢𑁆𑀣𑀢𑁄 𑀲𑀺𑀬𑀸, 𑀅𑀳𑀼𑀢𑁆𑀯𑀸 𑀲𑀫𑁆𑀪𑀯𑀦𑁆𑀢𑀻𑀢𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸. 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑁂 𑀅𑀳𑀼𑀢𑁆𑀯𑀸 𑀲𑀫𑁆𑀪𑀯𑀦𑁆𑀢𑀻𑀢𑀺 𑀘𑁂? 𑀦, 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀫𑀢𑁆𑀢𑀢𑁆𑀢𑀸 𑀓𑀸𑀮𑀲𑁆𑀲. 𑀅𑀣 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 𑀅𑀳𑀼𑀢𑁆𑀯𑀸 𑀲𑀫𑁆𑀪𑀯𑀦𑁆𑀢𑀻𑀢𑀺, 𑀲𑀺𑀤𑁆𑀥𑀫𑁂𑀢𑀁 𑀅𑀦𑀸𑀕𑀢𑀁 𑀧𑀭𑀫𑀢𑁆𑀣𑀢𑁄 𑀦𑀢𑁆𑀣𑀻𑀢𑀺. 𑀬𑀜𑁆𑀘 𑀯𑀼𑀢𑁆𑀢𑀁 ‘‘𑀅𑀲𑀢𑀺 𑀅𑀢𑀻𑀢𑁂 𑀓𑀼𑀲𑀮𑀸𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀆𑀬𑀢𑀺𑀁 𑀨𑀮𑀁 𑀓𑀣𑀁 𑀪𑀯𑁂𑀬𑁆𑀬𑀸’’𑀢𑀺, 𑀦 𑀔𑁄 𑀧𑀦𑁂𑀢𑁆𑀣 𑀅𑀢𑀻𑀢𑀓𑀫𑁆𑀫𑀢𑁄 𑀨𑀮𑀼𑀧𑁆𑀧𑀢𑁆𑀢𑀺 𑀇𑀘𑁆𑀙𑀺𑀢𑀸, 𑀅𑀣 𑀔𑁄 𑀢𑀲𑁆𑀲 𑀓𑀢𑀢𑁆𑀢𑀸 𑀢𑀤𑀸𑀳𑀺𑀢𑀯𑀺𑀲𑁂𑀲𑀢𑁄 𑀲𑀦𑁆𑀢𑀸𑀦𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀓𑀸𑀫𑀸𑀯𑀘𑀭𑀲𑁆𑀲 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀯𑀺𑀧𑀸𑀓𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀻’’𑀢𑀺 (𑀥. 𑀲. 𑁪𑁩𑁧). 𑀬𑀲𑁆𑀲 𑀧𑀦 𑀅𑀢𑀻𑀢𑀸𑀦𑀸𑀕𑀢𑀁 𑀧𑀭𑀫𑀢𑁆𑀣𑀢𑁄 𑀅𑀢𑁆𑀣𑀺, 𑀢𑀲𑁆𑀲 𑀨𑀮𑀁 𑀦𑀺𑀘𑁆𑀘𑀫𑁂𑀯 𑀅𑀢𑁆𑀣𑀻𑀢𑀺 𑀓𑀺𑀁 𑀢𑀢𑁆𑀣 𑀓𑀫𑁆𑀫𑀲𑁆𑀲 𑀲𑀸𑀫𑀢𑁆𑀣𑀺𑀬𑀁. 𑀉𑀧𑁆𑀧𑀸𑀤𑀦𑁂 𑀘𑁂, 𑀲𑀺𑀤𑁆𑀥𑀫𑀺𑀤𑀁 𑀅𑀳𑀼𑀢𑁆𑀯𑀸 𑀪𑀯𑀢𑀻𑀢𑀺. 𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀅𑀲𑀢𑀺 𑀅𑀢𑀻𑀢𑀸𑀦𑀸𑀕𑀢𑁂 𑀓𑀣𑀁 𑀢𑀢𑁆𑀣 𑀜𑀸𑀡𑀁 𑀧𑀯𑀢𑁆𑀢𑁂𑀬𑁆𑀬𑀸’’𑀢𑀺, 𑀬𑀣𑀸 𑀢𑀁 𑀆𑀮𑀫𑁆𑀩𑀡𑀁, 𑀢𑀁 𑀢𑀣𑀸 𑀅𑀢𑁆𑀣𑀺, 𑀓𑀣𑀜𑁆𑀘 𑀢𑀁 𑀆𑀮𑀫𑁆𑀩𑀡𑀁, 𑀅𑀳𑁄𑀲𑀺 𑀪𑀯𑀺𑀲𑁆𑀲𑀢𑀺 𑀘𑀸𑀢𑀺. 𑀦 𑀳𑀺 𑀓𑁄𑀘𑀺 𑀅𑀢𑀻𑀢𑀁 𑀅𑀦𑀼𑀲𑁆𑀲𑀭𑀦𑁆𑀢𑁄 𑀅𑀢𑁆𑀣𑀻𑀢𑀺 𑀅𑀦𑀼𑀲𑁆𑀲𑀭𑀢𑀺, 𑀅𑀣 𑀔𑁄 𑀅𑀳𑁄𑀲𑀻𑀢𑀺. 𑀬𑀣𑀸 𑀧𑀦 𑀯𑀢𑁆𑀢𑀫𑀸𑀦𑀁 𑀆𑀭𑀫𑁆𑀫𑀡𑀁 𑀅𑀦𑀼𑀪𑀽𑀢𑀁, 𑀢𑀣𑀸 𑀢𑀁 𑀅𑀢𑀻𑀢𑀁 𑀅𑀦𑀼𑀲𑁆𑀲𑀭𑀢𑀺. 𑀬𑀣𑀸 𑀘 𑀯𑀢𑁆𑀢𑀫𑀸𑀦𑀁 𑀪𑀯𑀺𑀲𑁆𑀲𑀢𑀺, 𑀢𑀣𑀸 𑀩𑀼𑀤𑁆𑀥𑀸𑀤𑀻𑀳𑀺 𑀕𑀬𑁆𑀳𑀢𑀺. 𑀬𑀤𑀺 𑀘 𑀢𑀁 𑀢𑀣𑁂𑀯 𑀅𑀢𑁆𑀣𑀺, 𑀯𑀢𑁆𑀢𑀫𑀸𑀦𑀫𑁂𑀯 𑀢𑀁 𑀲𑀺𑀬𑀸. 𑀅𑀣 𑀦𑀢𑁆𑀣𑀺, 𑀲𑀺𑀤𑁆𑀥𑀁 ‘‘𑀅𑀲𑀦𑁆𑀢𑀁 𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀁 𑀳𑁄𑀢𑀻’’𑀢𑀺. 𑀯𑀺𑀚𑁆𑀚𑀫𑀸𑀦𑀁 𑀯𑀸 𑀳𑀺 𑀘𑀺𑀢𑁆𑀢𑀲𑀜𑁆𑀜𑀸𑀢𑀁 𑀅𑀯𑀺𑀚𑁆𑀚𑀫𑀸𑀦𑀁 𑀯𑀸 𑀆𑀭𑀫𑁆𑀫𑀡𑀁 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀆𑀭𑀫𑁆𑀫𑀡𑀸, 𑀘𑀺𑀢𑁆𑀢𑀘𑁂𑀢𑀲𑀺𑀓𑀸, 𑀦 𑀯𑀺𑀚𑁆𑀚𑀫𑀸𑀦𑀁𑀬𑁂𑀯 𑀆𑀭𑀩𑁆𑀪 𑀧𑀯𑀢𑁆𑀢𑀦𑀢𑁄, 𑀢𑀲𑁆𑀫𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁂𑀯 𑀥𑀭𑀫𑀸𑀦𑀲𑀪𑀸𑀯𑀁 𑀦 𑀅𑀢𑀻𑀢𑀸𑀦𑀸𑀕𑀢𑀦𑁆𑀢𑀺 𑀦 𑀢𑀺𑀝𑁆𑀞𑀢𑀺 𑀲𑀩𑁆𑀩𑀢𑁆𑀣𑀺𑀯𑀸𑀤𑁄. 𑀓𑁂𑀘𑀺 𑀧𑀦 ‘‘𑀦 𑀅𑀢𑀻𑀢𑀸𑀤𑀻𑀦𑀁 𑀅𑀢𑁆𑀣𑀺𑀢𑀸𑀧𑀝𑀺𑀜𑁆𑀜𑀸𑀬 𑀲𑀩𑁆𑀩𑀢𑁆𑀣𑀺𑀯𑀸𑀤𑀸, 𑀅𑀣 𑀔𑁄 𑀆𑀬𑀢𑀦𑀲𑀩𑁆𑀩𑀲𑁆𑀲 𑀅𑀢𑁆𑀣𑀺𑀢𑀸𑀧𑀝𑀺𑀜𑁆𑀜𑀸𑀬𑀸’’𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀁 𑀫𑀢𑁂𑀦 𑀲𑀩𑁆𑀩𑁂𑀯 𑀲𑀸𑀲𑀦𑀺𑀓𑀸 𑀲𑀩𑁆𑀩𑀢𑁆𑀣𑀺𑀯𑀸𑀤𑀸 𑀲𑀺𑀬𑀼𑀦𑁆𑀢𑀺.

𑀧𑀤𑀲𑁄𑀥𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀩𑁆𑀩𑀫𑀢𑁆𑀣𑀻𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.