𑀓𑀣𑀸𑀯𑀢𑁆𑀣𑀼𑀧𑀓𑀭𑀡-𑀅𑀦𑀼𑀝𑀻𑀓𑀸

𑀕𑀦𑁆𑀣𑀸𑀭𑀫𑁆𑀪𑀯𑀡𑁆𑀡𑀦𑀸

𑀲𑀫𑀼𑀤𑀸𑀬𑁂 𑀏𑀓𑀤𑁂𑀲𑀸 𑀅𑀦𑁆𑀢𑁄𑀕𑀥𑀸𑀢𑀺 𑀲𑀫𑀼𑀤𑀸𑀬𑁄 𑀢𑁂𑀲𑀁 𑀅𑀥𑀺𑀝𑁆𑀞𑀸𑀦𑀪𑀸𑀯𑁂𑀦 𑀯𑀼𑀢𑁆𑀢𑁄 𑀬𑀣𑀸 ‘‘𑀭𑀼𑀓𑁆𑀔𑁂 𑀲𑀸𑀔𑀸’’𑀢𑀺 𑀤𑀲𑁆𑀲𑁂𑀢𑀺 ‘‘𑀓𑀣𑀸𑀲𑀫𑀼𑀤𑀸𑀬𑀲𑁆𑀲𑀸’’𑀢𑀺𑀆𑀤𑀺𑀦𑀸. 𑀢𑀢𑁆𑀣 𑀓𑀣𑀸𑀦𑀦𑁆𑀢𑀺 𑀢𑀺𑀲𑁆𑀲𑁄 𑀓𑀣𑀸 𑀯𑀸𑀤𑁄 𑀚𑀧𑁆𑀧𑁄 𑀯𑀺𑀢𑀡𑁆𑀟𑀸𑀢𑀺. 𑀢𑁂𑀲𑀼 𑀬𑁂𑀦 𑀧𑀫𑀸𑀡𑀢𑀓𑁆𑀓𑁂𑀳𑀺 𑀧𑀓𑁆𑀔𑀧𑀝𑀺𑀧𑀓𑁆𑀔𑀸𑀦𑀁 𑀧𑀢𑀺𑀝𑁆𑀞𑀸𑀧𑀦𑀧𑀝𑀺𑀓𑁆𑀔𑁂𑀧𑀸 𑀳𑁄𑀦𑁆𑀢𑀺, 𑀲𑁄 𑀯𑀸𑀤𑁄. 𑀏𑀓𑀸𑀥𑀺𑀓𑀭𑀡𑀸 𑀳𑀺 𑀅𑀜𑁆𑀜𑀫𑀜𑁆𑀜𑀯𑀺𑀭𑀼𑀤𑁆𑀥𑀸 𑀥𑀫𑁆𑀫𑀸 𑀧𑀓𑁆𑀔𑀧𑀝𑀺𑀧𑀓𑁆𑀔𑀸 𑀬𑀣𑀸 ‘‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸, 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺 (𑀤𑀻. 𑀦𑀺. 𑁧.𑁬𑁫). 𑀦𑀸𑀦𑀸𑀥𑀺𑀓𑀭𑀡𑀸 𑀧𑀦 𑀅𑀜𑁆𑀜𑀫𑀜𑁆𑀜𑀯𑀺𑀭𑀼𑀤𑁆𑀥𑀸𑀧𑀺 𑀧𑀓𑁆𑀔𑀧𑀝𑀺𑀧𑀓𑁆𑀔𑀸 𑀦𑀸𑀫 𑀦 𑀳𑁄𑀦𑁆𑀢𑀺 𑀬𑀣𑀸 ‘‘𑀅𑀦𑀺𑀘𑁆𑀘𑀁 𑀭𑀽𑀧𑀁, 𑀦𑀺𑀘𑁆𑀘𑀁 𑀦𑀺𑀩𑁆𑀩𑀸𑀦’’𑀦𑁆𑀢𑀺. 𑀬𑁂𑀦 𑀙𑀮𑀚𑀸𑀢𑀺𑀦𑀺𑀕𑁆𑀕𑀳𑀝𑁆𑀞𑀸𑀦𑁂𑀳𑀺 𑀧𑀓𑁆𑀔𑀧𑀝𑀺𑀧𑀓𑁆𑀔𑀸𑀦𑀁 𑀧𑀢𑀺𑀝𑁆𑀞𑀸𑀧𑀦𑀁 𑀧𑀝𑀺𑀓𑁆𑀔𑁂𑀧𑀸𑀭𑀫𑁆𑀪𑁄, 𑀲𑁄 𑀚𑀧𑁆𑀧𑁄. 𑀆𑀭𑀫𑁆𑀪𑀫𑀢𑁆𑀢𑀫𑁂𑀯𑁂𑀢𑁆𑀣, 𑀦 𑀅𑀢𑁆𑀣𑀲𑀺𑀤𑁆𑀥𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀆𑀭𑀫𑁆𑀪𑀕𑁆𑀕𑀳𑀡𑀁. 𑀬𑀸𑀬 𑀧𑀦 𑀙𑀮𑀚𑀸𑀢𑀺𑀦𑀺𑀕𑁆𑀕𑀳𑀝𑁆𑀞𑀸𑀦𑁂𑀳𑀺 𑀧𑀝𑀺𑀧𑀓𑁆𑀔𑀧𑀝𑀺𑀓𑁆𑀔𑁂𑀧𑀸𑀬 𑀯𑀸𑀬𑀫𑀦𑁆𑀢𑀺, 𑀲𑀸 𑀯𑀺𑀢𑀡𑁆𑀟𑀸. 𑀢𑀢𑁆𑀣 𑀅𑀢𑁆𑀣𑀯𑀺𑀓𑀧𑁆𑀧𑀼𑀧𑀧𑀢𑁆𑀢𑀺𑀬𑀸 𑀯𑀘𑀦𑀯𑀺𑀖𑀸𑀢𑁄 𑀙𑀮𑀁 𑀬𑀣𑀸 ‘‘𑀦𑀯𑀓𑀫𑁆𑀩𑀮𑁄𑀬𑀁 𑀧𑀼𑀭𑀺𑀲𑁄, 𑀭𑀸𑀚𑀸 𑀦𑁄 𑀲𑀓𑁆𑀔𑀻’’𑀢𑀺 𑀏𑀯𑀫𑀸𑀤𑀺. 𑀤𑀽𑀲𑀦𑀪𑀸𑀲𑀸 𑀚𑀸𑀢𑀬𑁄, 𑀉𑀢𑁆𑀢𑀭𑀧𑀢𑀺𑀭𑀽𑀧𑀓𑀸𑀢𑀺 𑀅𑀢𑁆𑀣𑁄. 𑀦𑀺𑀕𑁆𑀕𑀳𑀝𑁆𑀞𑀸𑀦𑀸𑀦𑀺 𑀧𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀦𑁆𑀢𑀺. 𑀏𑀯𑀁 𑀯𑀸𑀤𑀚𑀧𑁆𑀧𑀯𑀺𑀢𑀡𑁆𑀟𑀧𑁆𑀧𑀪𑁂𑀤𑀸𑀲𑀼 𑀢𑀻𑀲𑀼 𑀓𑀣𑀸𑀲𑀼 𑀇𑀥 𑀯𑀸𑀤𑀓𑀣𑀸 ‘‘𑀓𑀣𑀸’’𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀲𑀸 𑀘 𑀔𑁄 𑀅𑀯𑀺𑀧𑀭𑀻𑀢𑀥𑀫𑁆𑀫𑀢𑀸𑀬 𑀧𑀢𑀺𑀝𑁆𑀞𑀸𑀧𑀦𑀯𑀲𑁂𑀦, 𑀦 𑀯𑀺𑀕𑁆𑀕𑀸𑀳𑀺𑀓𑀓𑀣𑀸𑀪𑀸𑀯𑁂𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀫𑀸𑀢𑀺𑀓𑀸𑀞𑀧𑀦𑁂𑀦𑁂𑀯𑀸𑀢𑀺 𑀉𑀤𑁆𑀤𑁂𑀲𑀤𑁂𑀲𑀦𑀸𑀬 𑀏𑀯. 𑀞𑀧𑀺𑀢𑀲𑁆𑀲𑀸𑀢𑀺 𑀤𑁂𑀲𑀺𑀢𑀲𑁆𑀲. 𑀤𑁂𑀲𑀦𑀸 𑀳𑀺 𑀤𑁂𑀲𑁂𑀢𑀩𑁆𑀩𑀫𑀢𑁆𑀣𑀁 𑀯𑀺𑀦𑁂𑀬𑁆𑀬𑀲𑀦𑁆𑀢𑀸𑀦𑁂𑀲𑀼 𑀞𑀧𑀦𑀢𑁄 𑀦𑀺𑀓𑁆𑀔𑀺𑀧𑀦𑀢𑁄 𑀞𑀧𑀦𑀁, 𑀦𑀺𑀓𑁆𑀔𑁂𑀧𑁄𑀢𑀺 𑀘 𑀯𑀼𑀘𑁆𑀘𑀢𑀺.

𑀕𑀦𑁆𑀣𑀸𑀭𑀫𑁆𑀪𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀤𑀸𑀦𑀓𑀣𑀸𑀯𑀡𑁆𑀡𑀦𑀸

𑀧𑀭𑀺𑀦𑀺𑀩𑁆𑀩𑀸𑀦𑀫𑁂𑀯 …𑀧𑁂… 𑀯𑀼𑀢𑁆𑀢𑀁. 𑀅𑀪𑀺𑀦𑁆𑀦𑀲𑀪𑀸𑀯𑀫𑁆𑀧𑀺 𑀳𑀺 𑀅𑀢𑁆𑀣𑀁 𑀢𑀤𑀜𑁆𑀜𑀥𑀫𑁆𑀫𑀢𑁄 𑀯𑀺𑀲𑁂𑀲𑀸𑀯𑀩𑁄𑀥𑀦𑀢𑁆𑀣𑀁 𑀅𑀜𑁆𑀜𑀁 𑀯𑀺𑀬 𑀓𑀢𑁆𑀯𑀸 𑀯𑁄𑀳𑀭𑀦𑁆𑀢𑀺 𑀬𑀣𑀸 ‘‘𑀅𑀢𑁆𑀢𑀦𑁄 𑀲𑀪𑀸𑀯𑀁 𑀥𑀸𑀭𑁂𑀦𑁆𑀢𑀻𑀢𑀺 𑀥𑀫𑁆𑀫𑀸’’𑀢𑀺 (𑀥. 𑀲. 𑀅𑀝𑁆𑀞. 𑁧). 𑀲𑀸𑀢𑀺 𑀅𑀲𑀗𑁆𑀔𑀢𑀸 𑀥𑀸𑀢𑀼. 𑀓𑀭𑀡𑀪𑀸𑀯𑁂𑀦 𑀯𑀼𑀢𑁆𑀢𑀸 𑀬𑀣𑀸𑀯𑀼𑀢𑁆𑀢𑀲𑁆𑀲 𑀉𑀧𑀲𑀫𑀲𑁆𑀲 𑀲𑀸𑀥𑀓𑀢𑀫𑀪𑀸𑀯𑀁 𑀲𑀦𑁆𑀥𑀸𑀬. 𑀥𑀫𑁆𑀫𑀯𑀸𑀤𑀻…𑀧𑁂… 𑀤𑀼𑀩𑁆𑀩𑀮𑀢𑀸 𑀯𑀼𑀢𑁆𑀢𑀸 𑀢𑀣𑀸𑀭𑀽𑀧𑀸𑀬 𑀧𑀜𑁆𑀜𑀸𑀬 𑀪𑀸𑀯𑁂 𑀢𑀸𑀤𑀺𑀲𑀸𑀦𑀁 𑀧𑀓𑁆𑀔𑀪𑀸𑀯𑀸𑀪𑀸𑀯𑀢𑁄. 𑀮𑀤𑁆𑀥𑀺𑀬𑀸𑀢𑀺 ‘‘𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦, 𑀧𑀭𑀺𑀳𑀸𑀬𑀢𑀺 𑀅𑀭𑀳𑀸 𑀅𑀭𑀳𑀢𑁆𑀢𑀸’’𑀢𑀺𑀆𑀤𑀺𑀮𑀤𑁆𑀥𑀺𑀬𑀸. 𑀲𑀼𑀢𑁆𑀢𑀦𑁆𑀢𑁂𑀳𑀻𑀢𑀺 𑀤𑁂𑀯𑀢𑀸𑀲𑀁𑀬𑀼𑀢𑁆𑀢𑀸𑀤𑀻𑀳𑀺. 𑀮𑀺𑀗𑁆𑀕𑀸𑀓𑀧𑁆𑀧𑀪𑁂𑀤𑀁 𑀧𑀭𑀢𑁄 𑀲𑀬𑀫𑁂𑀯 𑀯𑀓𑁆𑀔𑀢𑀺.

𑀪𑀺𑀦𑁆𑀤𑀺𑀢𑁆𑀯𑀸 𑀫𑀽𑀮𑀲𑀗𑁆𑀕𑀳𑀦𑁆𑀢𑀺 𑀫𑀽𑀮𑀲𑀗𑁆𑀕𑀻𑀢𑀺𑀁 𑀯𑀺𑀦𑀸𑀲𑁂𑀢𑁆𑀯𑀸, 𑀪𑁂𑀤𑀁 𑀯𑀸 𑀓𑀢𑁆𑀯𑀸 𑀬𑀣𑀸 𑀲𑀸 𑀞𑀺𑀢𑀸, 𑀢𑀢𑁄 𑀅𑀜𑁆𑀜𑀣𑀸 𑀓𑀢𑁆𑀯𑀸. 𑀲𑀗𑁆𑀕𑀳𑀺𑀢𑀢𑁄 𑀯𑀸 𑀅𑀜𑁆𑀜𑀢𑁆𑀭𑀸𑀢𑀺 𑀫𑀽𑀮𑀲𑀗𑁆𑀕𑀻𑀢𑀺𑀬𑀸 𑀲𑀗𑁆𑀕𑀳𑀺𑀢𑀢𑁄 𑀅𑀜𑁆𑀜𑀢𑁆𑀭. 𑀢𑁂𑀦𑀸𑀳 ‘‘𑀅𑀲𑀗𑁆𑀕𑀳𑀺𑀢𑀁 𑀲𑀼𑀢𑁆𑀢’’𑀦𑁆𑀢𑀺. 𑀦𑀻𑀢𑀢𑁆𑀣𑀁 𑀬𑀣𑀸𑀭𑀼𑀢𑀯𑀲𑁂𑀦 𑀯𑀺𑀜𑁆𑀜𑁂𑀬𑁆𑀬𑀢𑁆𑀣𑀢𑁆𑀢𑀸. 𑀦𑁂𑀬𑁆𑀬𑀢𑁆𑀣𑀁 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀸𑀤𑀺𑀯𑀲𑁂𑀦 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀢𑁆𑀣𑀢𑁆𑀢𑀸. 𑀢𑀻𑀳𑀺 𑀞𑀸𑀦𑁂𑀳𑀻𑀢𑀺 ‘‘𑀲𑀽𑀭𑀸 𑀲𑀢𑀺𑀫𑀦𑁆𑀢𑁄 𑀇𑀥 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄’’𑀢𑀺 (𑀅. 𑀦𑀺. 𑁯.𑁨𑁧) 𑀏𑀯𑀁 𑀯𑀼𑀢𑁆𑀢𑁂𑀳𑀺 𑀢𑀻𑀳𑀺 𑀓𑀸𑀭𑀡𑁂𑀳𑀺. 𑀅𑀜𑁆𑀜𑀁 𑀲𑀦𑁆𑀥𑀸𑀬 𑀪𑀡𑀺𑀢𑀦𑁆𑀢𑀺 𑀏𑀓𑀁 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀁 𑀲𑀦𑁆𑀥𑀸𑀬 𑀪𑀡𑀺𑀢𑀁. 𑀅𑀜𑁆𑀜𑀁 𑀅𑀢𑁆𑀣𑀁 𑀞𑀧𑀬𑀺𑀁𑀲𑀽𑀢𑀺 𑀲𑀩𑁆𑀩𑀲𑁆𑀲𑀧𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀲𑁆𑀲 𑀯𑀲𑁂𑀦 ‘‘𑀦𑀢𑁆𑀣𑀺 𑀤𑁂𑀯𑁂𑀲𑀼 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄’’𑀢𑀺𑀆𑀤𑀺𑀓𑀁 (𑀓𑀣𑀸. 𑁨𑁬𑁯) 𑀅𑀜𑁆𑀜𑀁 𑀅𑀢𑁆𑀣𑀁 𑀞𑀧𑀬𑀺𑀁𑀲𑀼. 𑀲𑀼𑀢𑁆𑀢𑀜𑁆𑀘 𑀅𑀜𑁆𑀜𑀁 𑀲𑀦𑁆𑀥𑀸𑀬 𑀪𑀡𑀺𑀢𑀁 𑀢𑀢𑁄 𑀅𑀜𑁆𑀜𑀁 𑀲𑀦𑁆𑀥𑀸𑀬 𑀪𑀡𑀺𑀢𑀁 𑀓𑀢𑁆𑀯𑀸 𑀞𑀧𑀬𑀺𑀁𑀲𑀼, 𑀢𑀲𑁆𑀲 𑀅𑀢𑁆𑀣𑀜𑁆𑀘 𑀅𑀜𑁆𑀜𑀁 𑀞𑀧𑀬𑀺𑀁𑀲𑀽𑀢𑀺 𑀏𑀯𑀫𑁂𑀢𑁆𑀣 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀼𑀜𑁆𑀜𑀢𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀦𑀺𑀘𑁆𑀘𑀢𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀕𑀫𑁆𑀪𑀻𑀭𑀁 𑀏𑀓𑀤𑁂𑀲𑀁 𑀫𑀳𑀸𑀧𑀤𑁂𑀲𑀧𑀭𑀺𑀯𑀸𑀭𑀸𑀤𑀺𑀁. 𑀏𑀓𑀘𑁆𑀘𑁂 𑀲𑀓𑀮𑀁 𑀅𑀪𑀺𑀥𑀫𑁆𑀫𑀁 𑀯𑀺𑀲𑁆𑀲𑀚𑁆𑀚𑀺𑀁𑀲𑀼 𑀙𑀟𑁆𑀟𑀬𑀺𑀁𑀲𑀼 𑀲𑁂𑀬𑁆𑀬𑀣𑀸𑀧𑀺 𑀲𑀼𑀢𑁆𑀢𑀦𑁆𑀢𑀺𑀓𑀸. 𑀢𑁂 𑀳𑀺 𑀢𑀁 𑀦 𑀚𑀺𑀦𑀯𑀘𑀦𑀦𑁆𑀢𑀺 𑀯𑀤𑀦𑁆𑀢𑀺. 𑀓𑀣𑀸𑀯𑀢𑁆𑀣𑀼𑀲𑁆𑀲 𑀲𑀯𑀺𑀯𑀸𑀤𑀢𑁆𑀢𑁂𑀢𑀺𑀆𑀤𑀺 𑀳𑁂𑀝𑁆𑀞𑀸 𑀦𑀺𑀤𑀸𑀦𑀝𑁆𑀞𑀓𑀣𑀸𑀬 𑀆𑀕𑀢𑀦𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑁂𑀘𑀺 𑀧𑀦 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀬𑀸𑀧𑀺 𑀲𑀯𑀺𑀯𑀸𑀤𑀢𑁆𑀢𑀁 𑀫𑀜𑁆𑀜𑀦𑁆𑀢𑀺. ‘‘𑀢𑀢𑀺𑀬𑀲𑀗𑁆𑀕𑀻𑀢𑀺𑀢𑁄 𑀧𑀼𑀩𑁆𑀩𑁂 𑀧𑀯𑀢𑁆𑀢𑀫𑀸𑀦𑀸𑀦𑀁 𑀯𑀲𑁂𑀦𑀸’’𑀢𑀺 𑀇𑀤𑀁 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀢𑀢𑀺𑀬𑀲𑀗𑁆𑀕𑀻𑀢𑀺𑀢𑁄 𑀧𑀼𑀩𑁆𑀩𑁂𑀧𑀺 𑀢𑀁 𑀫𑀸𑀢𑀺𑀓𑀸𑀭𑀽𑀧𑁂𑀦 𑀧𑀯𑀢𑁆𑀢𑀢𑁂𑀯? 𑀦𑀺𑀤𑁆𑀤𑁂𑀲𑀁 𑀯𑀸 𑀲𑀦𑁆𑀥𑀸𑀬 𑀢𑀣𑀸 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀜𑁆𑀜𑀸𑀦𑀻𑀢𑀺 𑀅𑀜𑁆𑀜𑀸𑀓𑀸𑀭𑀸𑀦𑀺 𑀅𑀪𑀺𑀥𑀫𑁆𑀫𑀧𑀓𑀭𑀡𑀸𑀤𑀻𑀦𑀺 𑀅𑀓𑀭𑀺𑀁𑀲𑀼, 𑀧𑀯𑀢𑁆𑀢𑀦𑁆𑀢𑀸𑀦𑀺𑀧𑀺 𑀢𑀸𑀦𑀺 𑀅𑀜𑁆𑀜𑀣𑀸 𑀓𑀢𑁆𑀯𑀸 𑀧𑀞𑀺𑀁𑀲𑀽𑀢𑀺 𑀅𑀢𑁆𑀣𑁄. 𑀫𑀜𑁆𑀚𑀼𑀲𑀺𑀭𑀻𑀢𑀺 𑀇𑀤𑀁 𑀓𑀲𑁆𑀫𑀸 𑀯𑀼𑀢𑁆𑀢𑀁. 𑀦 𑀳𑀺 𑀢𑀁 𑀦𑀸𑀫𑀁 𑀧𑀺𑀝𑀓𑀢𑁆𑀢𑀬𑀁 𑀅𑀦𑀼𑀯𑀢𑁆𑀢𑀦𑁆𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀕𑀬𑁆𑀳𑀢𑀺? 𑀇𑀢𑀭𑁂𑀳𑀺 𑀕𑀬𑁆𑀳𑀫𑀸𑀦𑀫𑁆𑀧𑀺 𑀯𑀸 𑀲𑀸𑀲𑀦𑀺𑀓𑀧𑀭𑀺𑀜𑁆𑀜𑁂𑀳𑀺 𑀦 𑀲𑀸𑀲𑀦𑀸𑀯𑀘𑀭𑀁 𑀕𑀬𑁆𑀳𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀦𑀺𑀓𑀸𑀬𑀦𑀸𑀫𑀦𑁆𑀢𑀺 𑀫𑀳𑀸𑀲𑀗𑁆𑀖𑀺𑀓𑀸𑀤𑀺𑀦𑀺𑀓𑀸𑀬𑀦𑀸𑀫𑀁, 𑀤𑀼𑀢𑁆𑀢𑀕𑀼𑀢𑁆𑀢𑀸𑀤𑀺𑀯𑀕𑁆𑀕𑀦𑀸𑀫𑀜𑁆𑀘.

𑀲𑀗𑁆𑀓𑀦𑁆𑀢𑀺𑀓𑀸𑀦𑀁 𑀪𑁂𑀤𑁄 𑀲𑀼𑀢𑁆𑀢𑀯𑀸𑀤𑀻𑀢𑀺 𑀲𑀗𑁆𑀓𑀦𑁆𑀢𑀺𑀓𑀸𑀦𑀁 𑀅𑀦𑀦𑁆𑀢𑀭𑁂 𑀏𑀓𑁄 𑀦𑀺𑀓𑀸𑀬𑀪𑁂𑀤𑁄 𑀲𑀼𑀢𑁆𑀢𑀯𑀸𑀤𑀻 𑀦𑀸𑀫 𑀪𑀺𑀚𑁆𑀚𑀺𑀢𑁆𑀣. 𑀲𑀳𑀸𑀢𑀺 𑀏𑀓𑀚𑁆𑀛𑀁 𑀓𑀢𑁆𑀯𑀸, 𑀕𑀡𑀺𑀬𑀫𑀸𑀦𑀸𑀢𑀺 𑀅𑀢𑁆𑀣𑁄.

𑀉𑀧𑁆𑀧𑀦𑁆𑀦𑁂 𑀯𑀸𑀤𑁂 𑀲𑀦𑁆𑀥𑀸𑀬𑀸𑀢𑀺 𑀢𑀢𑀺𑀬𑀲𑀗𑁆𑀕𑀻𑀢𑀺𑀓𑀸𑀮𑁂 𑀉𑀧𑁆𑀧𑀦𑁆𑀦𑁂 𑀯𑀸𑀤𑁂 𑀲𑀦𑁆𑀥𑀸𑀬. 𑀉𑀧𑁆𑀧𑀚𑁆𑀚𑀦𑀓𑁂𑀢𑀺 𑀢𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀲𑀤𑁆𑀥𑀫𑁆𑀫𑀦𑁆𑀢𑀭𑀥𑀸𑀦𑀸 𑀏𑀢𑁆𑀣𑀦𑁆𑀢𑀭𑁂 𑀉𑀧𑁆𑀧𑀚𑁆𑀚𑀦𑀓𑁂. 𑀲𑀼𑀢𑁆𑀢𑀲𑀳𑀲𑁆𑀲𑀸𑀳𑀭𑀡𑀜𑁆𑀘𑁂𑀢𑁆𑀣 𑀧𑀭𑀯𑀸𑀤𑀪𑀜𑁆𑀚𑀦𑀢𑁆𑀣𑀜𑁆𑀘 𑀲𑀓𑀯𑀸𑀤𑀧𑀢𑀺𑀝𑁆𑀞𑀸𑀧𑀦𑀢𑁆𑀣𑀜𑁆𑀘. 𑀲𑀼𑀢𑁆𑀢𑁂𑀓𑀤𑁂𑀲𑁄𑀧𑀺 𑀳𑀺 ‘‘𑀲𑀼𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺 𑀲𑀫𑀼𑀤𑀸𑀬𑀯𑁄𑀳𑀸𑀭𑀲𑁆𑀲 𑀅𑀯𑀬𑀯𑁂𑀲𑀼𑀧𑀺 𑀤𑀺𑀲𑁆𑀲𑀦𑀢𑁄 𑀬𑀣𑀸 ‘‘𑀧𑀝𑁄 𑀤𑀟𑁆𑀠𑁄, 𑀲𑀫𑀼𑀤𑁆𑀤𑁄 𑀤𑀺𑀝𑁆𑀞𑁄’’𑀢𑀺 𑀘. 𑀢𑁂 𑀧𑀦𑁂𑀢𑁆𑀣 𑀲𑀼𑀢𑁆𑀢𑀧𑀤𑁂𑀲𑀸 ‘‘𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄’’𑀢𑀺𑀆𑀤𑀺𑀦𑀸 𑀆𑀕𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀦𑀺𑀤𑀸𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀳𑀸𑀯𑀕𑁆𑀕𑁄

𑁧. 𑀧𑀼𑀕𑁆𑀕𑀮𑀓𑀣𑀸

𑁧. 𑀲𑀼𑀤𑁆𑀥𑀲𑀘𑁆𑀘𑀺𑀓𑀝𑁆𑀞𑁄

𑁧. 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀯𑀡𑁆𑀡𑀦𑀸

𑁧. 𑀲𑀫𑁆𑀩𑀭𑀸𑀤𑀻𑀳𑀺 𑀧𑀓𑀧𑁆𑀧𑀺𑀢𑀯𑀺𑀚𑁆𑀚𑀸, 𑀢𑀣𑀸𑀪𑀺𑀲𑀗𑁆𑀔𑀢𑀸𑀦𑀺 𑀑𑀲𑀥𑀸𑀦𑀺 𑀘 ‘‘𑀫𑀸𑀬𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀇𑀥 𑀧𑀦 𑀫𑀸𑀬𑀸𑀬 𑀆𑀳𑀺𑀢𑀯𑀺𑀲𑁂𑀲𑀸 𑀅𑀪𑀽𑀢𑀜𑁆𑀜𑁂𑀬𑁆𑀬𑀸𑀓𑀸𑀭𑀸 𑀅𑀥𑀺𑀧𑁆𑀧𑁂𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀸𑀬𑀸𑀬 𑀅𑀫𑀡𑀺𑀆𑀤𑀬𑁄 𑀫𑀡𑀺𑀆𑀤𑀺𑀆𑀓𑀸𑀭𑁂𑀦 𑀤𑀺𑀲𑁆𑀲𑀫𑀸𑀦𑀸 𑀫𑀸𑀬𑀸𑀢𑀺 𑀯𑀼𑀢𑁆𑀢𑀸’’𑀢𑀺 𑀆𑀳. 𑀲𑀘𑁆𑀘𑀜𑁆𑀜𑁂𑀯 𑀲𑀘𑁆𑀘𑀺𑀓𑀁, 𑀲𑁄 𑀏𑀯 𑀅𑀢𑁆𑀣𑁄 𑀅𑀯𑀺𑀧𑀭𑀻𑀢𑀲𑁆𑀲 𑀜𑀸𑀡𑀲𑁆𑀲 𑀯𑀺𑀲𑀬𑀪𑀸𑀯𑀝𑁆𑀞𑁂𑀦𑀸𑀢𑀺 𑀲𑀘𑁆𑀘𑀺𑀓𑀝𑁆𑀞𑁄. 𑀢𑁂𑀦𑀸𑀳 ‘‘𑀪𑀽𑀢𑀝𑁆𑀞𑁄’’𑀢𑀺. 𑀅𑀯𑀺𑀧𑀭𑀻𑀢𑀪𑀸𑀯𑀢𑁄 𑀏𑀯 𑀧𑀭𑀫𑁄 𑀧𑀥𑀸𑀦𑁄 𑀅𑀢𑁆𑀣𑁄𑀢𑀺 𑀧𑀭𑀫𑀢𑁆𑀣𑁄, 𑀜𑀸𑀡𑀲𑁆𑀲 𑀧𑀘𑁆𑀘𑀓𑁆𑀔𑀪𑀽𑀢𑁄 𑀥𑀫𑁆𑀫𑀸𑀦𑀁 𑀅𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀲𑀪𑀸𑀯𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀉𑀢𑁆𑀢𑀫𑀢𑁆𑀣𑁄’’𑀢𑀺.

𑀅𑀢𑁆𑀣𑀻𑀢𑀺 𑀯𑀘𑀦𑀲𑀸𑀫𑀜𑁆𑀜𑁂𑀦𑀸𑀢𑀺 ‘‘𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁯𑁬; 𑀓𑀣𑀸. 𑁨𑁨) ‘‘𑀅𑀢𑁆𑀣𑀻’’𑀢𑀺 𑀧𑀯𑀢𑁆𑀢𑀯𑀘𑀦𑀲𑀸𑀫𑀜𑁆𑀜𑁂𑀦. 𑀅𑀢𑁆𑀣𑀯𑀺𑀓𑀧𑁆𑀧𑀼𑀧𑀧𑀢𑁆𑀢𑀺𑀬𑀸 𑀯𑀘𑀦𑀯𑀺𑀖𑀸𑀢𑁄 𑀙𑀮𑀦𑁆𑀢𑀺 𑀯𑀤𑀦𑁆𑀢𑀺. 𑀧𑀢𑀺𑀝𑁆𑀞𑀁 𑀧𑀘𑁆𑀙𑀺𑀦𑁆𑀤𑀦𑁆𑀢𑁄𑀢𑀺 𑀳𑁂𑀢𑀼𑀁 𑀤𑀽𑀲𑁂𑀦𑁆𑀢𑁄, 𑀅𑀳𑁂𑀢𑀼𑀁 𑀓𑀭𑁄𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀳𑁂𑀢𑀼 𑀳𑀺 𑀧𑀝𑀺𑀜𑁆𑀜𑀸𑀬 𑀧𑀢𑀺𑀝𑁆𑀞𑀸𑀧𑀦𑀢𑁄 𑀧𑀢𑀺𑀝𑁆𑀞𑀸, 𑀢𑀁 𑀧𑀦 𑀳𑁂𑀢𑀼𑀁 𑀅𑀢𑁆𑀣𑀫𑀢𑁆𑀢𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀤𑀺 𑀲𑀘𑁆𑀘𑀺𑀓𑀝𑁆𑀞𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀧𑀬𑁄𑀕𑀢𑁄 𑀧𑀦 𑀤𑀽𑀲𑀦𑁂𑀦 𑀲𑀤𑁆𑀥𑀺𑀁 𑀧𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀑𑀓𑀸𑀲𑀁 𑀅𑀤𑀤𑀫𑀸𑀦𑁄𑀢𑀺 𑀬𑀣𑀸𑀦𑀼𑀭𑀽𑀧𑀁 𑀬𑀼𑀢𑁆𑀢𑀺𑀁 𑀯𑀢𑁆𑀢𑀼𑀁 𑀅𑀯𑀲𑀭𑀁 𑀅𑀤𑁂𑀦𑁆𑀢𑁄. 𑀅𑀣 𑀯𑀸 𑀧𑀢𑀺𑀝𑁆𑀞𑀁 𑀧𑀘𑁆𑀙𑀺𑀦𑁆𑀤𑀦𑁆𑀢𑁄, 𑀧𑀝𑀺𑀜𑁆𑀜𑀁 𑀏𑀯 𑀧𑀭𑀺𑀯𑀢𑁆𑀢𑁂𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀉𑀧𑀮𑀩𑁆𑀪𑀢𑀺 𑀧𑀼𑀕𑁆𑀕𑀮𑁄𑀢𑀺 𑀳𑀺 𑀲𑀓𑀯𑀸𑀤𑀺𑀁 𑀉𑀤𑁆𑀤𑀺𑀲𑁆𑀲 𑀧𑀭𑀯𑀸𑀤𑀺𑀦𑁄 𑀧𑀝𑀺𑀜𑁆𑀜𑀸𑀯 𑀦 𑀬𑀼𑀢𑁆𑀢𑀸 𑀅𑀧𑁆𑀧𑀲𑀺𑀤𑁆𑀥𑀢𑁆𑀢𑀸 𑀯𑀺𑀲𑁂𑀲𑀺𑀢𑀩𑁆𑀩𑀲𑁆𑀲. 𑀢𑁂𑀦𑁂𑀯𑀸𑀳 ‘‘𑀅𑀦𑀼𑀧𑀮𑀩𑁆𑀪𑀦𑁂𑀬𑁆𑀬𑀢𑁄 𑀦 𑀢𑀯 𑀯𑀸𑀤𑁄 𑀢𑀺𑀝𑁆𑀞𑀢𑀻𑀢𑀺 𑀦𑀺𑀯𑀢𑁆𑀢𑁂𑀦𑁆𑀢𑁄’’𑀢𑀺. 𑀭𑀽𑀧𑀜𑁆𑀘 𑀉𑀧𑀮𑀩𑁆𑀪𑀢𑀺…𑀧𑁂… 𑀤𑀲𑁆𑀲𑁂𑀢𑀻𑀢𑀺 𑀏𑀢𑁂𑀦 𑀧𑀭𑀯𑀸𑀤𑀺𑀦𑀸 𑀅𑀥𑀺𑀧𑁆𑀧𑁂𑀢𑀳𑁂𑀢𑀼𑀦𑁄 𑀯𑀺𑀧𑀭𑀻𑀢𑀢𑁆𑀣𑀲𑀸𑀥𑀓𑀢𑁆𑀢𑀁 𑀤𑀲𑁆𑀲𑁂𑀢𑀺.

𑀉𑀧𑀮𑀩𑁆𑀪𑀫𑀸𑀦𑀁 𑀦𑀸𑀫 𑀳𑁄𑀢𑀻𑀢𑀺 𑀆𑀓𑀸𑀭𑀢𑁄 𑀢𑀁𑀆𑀓𑀸𑀭𑀯𑀦𑁆𑀢𑀸𑀦𑀁 𑀅𑀦𑀜𑁆𑀜𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀜𑁆𑀜𑀣𑀸𑀢𑀺 𑀆𑀓𑀸𑀭, 𑀆𑀓𑀸𑀭𑀯𑀦𑁆𑀢𑀸𑀦𑀁 𑀪𑁂𑀤𑁂. 𑀏𑀢𑀺𑀲𑁆𑀲𑀸𑀢𑀺 ‘‘𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀝𑁆𑀞𑁂𑀦𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀸𑀬 𑀤𑀼𑀢𑀺𑀬𑀧𑀼𑀘𑁆𑀙𑀸𑀬. 𑀏𑀲 𑀯𑀺𑀲𑁂𑀲𑁄𑀢𑀺 𑀬𑁄 𑀬𑀣𑀸𑀯𑀼𑀢𑁆𑀢𑁄 𑀤𑁆𑀯𑀺𑀦𑁆𑀦𑀁 𑀧𑀼𑀘𑁆𑀙𑀸𑀦𑀁 𑀯𑀺𑀲𑀬𑀲𑁆𑀲 𑀲𑀪𑀸𑀯𑀸𑀓𑀸𑀭𑀪𑁂𑀤𑁄, 𑀏𑀲 𑀤𑁆𑀯𑀺𑀦𑁆𑀦𑀁 𑀧𑀼𑀘𑁆𑀙𑀸𑀦𑀁 𑀯𑀺𑀲𑁂𑀲𑁄. 𑀲𑀪𑀸𑀯𑀥𑀫𑁆𑀫𑀸𑀦𑀁 𑀲𑀸𑀫𑀜𑁆𑀜𑀮𑀓𑁆𑀔𑀡𑁂𑀦 𑀅𑀪𑀺𑀦𑁆𑀦𑀸𑀦𑀫𑁆𑀧𑀺 𑀲𑀮𑀓𑁆𑀔𑀡𑀢𑁄 𑀪𑁂𑀤𑁄𑀬𑁂𑀯𑀸𑀢𑀺 𑀅𑀜𑁆𑀜𑀥𑀫𑁆𑀫𑀲𑁆𑀲 𑀅𑀜𑁆𑀜𑁂𑀦𑀸𑀓𑀸𑀭𑁂𑀦 𑀦 𑀓𑀤𑀸𑀘𑀺𑀧𑀺 𑀉𑀧𑀮𑀩𑁆𑀪𑁄 𑀪𑀯𑁂𑀬𑁆𑀬. 𑀬𑀤𑀺 𑀲𑀺𑀬𑀸, 𑀅𑀜𑁆𑀜𑀢𑁆𑀢𑀫𑁂𑀯 𑀦 𑀲𑀺𑀬𑀸𑀢𑀺 𑀭𑀼𑀧𑁆𑀧𑀦𑀸𑀤𑀺𑀲𑀧𑀘𑁆𑀘𑀬𑀸𑀤𑀺𑀆𑀓𑀸𑀭𑁂𑀦 𑀅𑀦𑀼𑀧𑀮𑀩𑁆𑀪𑀫𑀸𑀦𑁄𑀧𑀺 𑀧𑀼𑀕𑁆𑀕𑀮𑁄 𑀅𑀢𑁆𑀢𑀦𑁄 𑀪𑀽𑀢𑀲𑀪𑀸𑀯𑀝𑁆𑀞𑁂𑀦 𑀉𑀧𑀮𑀩𑁆𑀪𑀢𑁂𑀯𑀸𑀢𑀺 𑀯𑀤𑀦𑁆𑀢𑀁 𑀧𑀭𑀯𑀸𑀤𑀺𑀦𑀁 𑀧𑀢𑀺 ‘‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄’’𑀢𑀺𑀆𑀤𑀺 𑀘𑁄𑀤𑀦𑀸 𑀅𑀦𑁄𑀓𑀸𑀲𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀣𑀸 𑀧𑀦…𑀧𑁂… 𑀦𑀺𑀕𑁆𑀕𑀳𑁄 𑀘 𑀦 𑀓𑀸𑀢𑀩𑁆𑀩𑁄’’𑀢𑀺. 𑀢𑀢𑁆𑀣 𑀦𑀺𑀕𑁆𑀕𑀳𑁄𑀢𑀺 ‘‘𑀆𑀚𑀸𑀦𑀸𑀳𑀺 𑀦𑀺𑀕𑁆𑀕𑀳’’𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀦𑀺𑀕𑁆𑀕𑀳𑁄, 𑀧𑀭𑀸𑀚𑀬𑀸𑀭𑁄𑀧𑀦𑁂𑀦 𑀧𑀭𑀯𑀸𑀤𑀺𑀦𑁄 𑀦𑀺𑀕𑁆𑀕𑀡𑁆𑀳𑀦𑀦𑁆𑀢𑀺 𑀅𑀢𑁆𑀣𑁄.

𑀲𑁆𑀯𑀸𑀬𑀁 𑀧𑀦 𑀬𑀲𑁆𑀫𑀸 𑀢𑀲𑁆𑀲 𑀯𑀸𑀤𑀸𑀧𑀭𑀸𑀥𑀳𑁂𑀢𑀼𑀓𑁄, 𑀢𑀲𑁆𑀫𑀸 𑀢𑀁 𑀤𑀲𑁆𑀲𑁂𑀢𑀼𑀁 𑀅𑀝𑁆𑀞𑀓𑀣𑀸𑀬𑀁 𑀤𑁄𑀲𑀸𑀧𑀭𑀸𑀥𑀧𑀭𑀺𑀬𑀸𑀬𑁂𑀳𑀺 𑀯𑀺𑀪𑀸𑀯𑀺𑀢𑁄. 𑀅𑀯𑀚𑀸𑀦𑀦𑀜𑁆𑀳𑁂𑀢𑁆𑀣 𑀦𑀺𑀕𑁆𑀕𑀳𑀝𑁆𑀞𑀸𑀦𑀁. 𑀢𑀣𑀸 𑀳𑀺 𑀧𑀝𑀺𑀜𑁆𑀜𑀸𑀳𑀸𑀦𑀺, 𑀧𑀝𑀺𑀜𑁆𑀜𑀸𑀦𑁆𑀢𑀭𑀁, 𑀧𑀝𑀺𑀜𑁆𑀜𑀸𑀯𑀺𑀭𑁄𑀥𑁄, 𑀧𑀝𑀺𑀜𑁆𑀜𑀸𑀲𑀜𑁆𑀜𑀸𑀲𑁄, 𑀳𑁂𑀢𑁆𑀯𑀦𑁆𑀢𑀭𑀁, 𑀅𑀢𑁆𑀣𑀦𑁆𑀢𑀭𑀁, 𑀦𑀺𑀭𑀢𑁆𑀣𑀓𑀁, 𑀅𑀯𑀺𑀜𑁆𑀜𑀸𑀢𑀢𑁆𑀣𑀁, 𑀅𑀲𑀫𑁆𑀩𑀦𑁆𑀥𑀢𑁆𑀣𑀁, 𑀅𑀧𑁆𑀧𑀢𑁆𑀢𑀓𑀸𑀮𑀁, 𑀊𑀦𑀁, 𑀅𑀥𑀺𑀓𑀁, 𑀧𑀼𑀦𑀭𑀼𑀢𑁆𑀢𑀁, 𑀅𑀦𑀦𑀼𑀪𑀸𑀲𑀦𑀁, 𑀅𑀯𑀺𑀜𑁆𑀜𑀸𑀢𑀁, 𑀅𑀧𑁆𑀧𑀝𑀺𑀪𑀸, 𑀯𑀺𑀓𑁆𑀔𑁂𑀧𑁄, 𑀫𑀢𑀸𑀦𑀼𑀜𑁆𑀜𑀸, 𑀅𑀦𑀼𑀬𑀼𑀜𑁆𑀚𑀺𑀢𑀩𑁆𑀩𑀲𑁆𑀲 𑀉𑀧𑁂𑀓𑁆𑀔𑀦𑀁, 𑀅𑀦𑀦𑀼𑀬𑀼𑀜𑁆𑀚𑀺𑀢𑀩𑁆𑀩𑀲𑁆𑀲 𑀅𑀦𑀼𑀬𑁄𑀕𑁄, 𑀅𑀧𑀲𑀺𑀤𑁆𑀥𑀦𑁆𑀢𑀭𑀁, 𑀳𑁂𑀢𑁆𑀯𑀸𑀪𑀸𑀲𑀸 𑀘𑀸𑀢𑀺 𑀤𑁆𑀯𑀸𑀯𑀻𑀲𑀢𑀺 𑀦𑀺𑀕𑁆𑀕𑀳𑀝𑁆𑀞𑀸𑀦𑀸𑀦𑀺 𑀜𑀸𑀬𑀯𑀸𑀤𑀺𑀦𑁄 𑀯𑀤𑀦𑁆𑀢𑀺.

𑀢𑀢𑁆𑀣 𑀯𑀺𑀲𑀤𑀺𑀲𑀽𑀤𑀸𑀳𑀭𑀡𑀥𑀫𑁆𑀫𑀸𑀦𑀼𑀚𑀸𑀦𑀦𑀁 𑀧𑀞𑀫𑀼𑀤𑀸𑀳𑀭𑀡𑁂 𑀧𑀝𑀺𑀜𑁆𑀜𑀸𑀳𑀸𑀦𑀺. 𑀧𑀝𑀺𑀜𑁆𑀜𑀸𑀢𑀢𑁆𑀣𑀧𑀝𑀺𑀲𑁂𑀥𑁂 𑀢𑀤𑀜𑁆𑀜𑀢𑁆𑀣𑀦𑀺𑀤𑁆𑀤𑁂𑀲𑁄 𑀧𑀝𑀺𑀜𑁆𑀜𑀸𑀦𑁆𑀢𑀭𑀁. 𑀧𑀝𑀺𑀜𑁆𑀜𑀸𑀯𑀺𑀭𑀼𑀤𑁆𑀥𑀳𑁂𑀢𑀼𑀓𑀺𑀢𑁆𑀢𑀦𑀁 𑀧𑀝𑀺𑀜𑁆𑀜𑀸𑀯𑀺𑀭𑁄𑀥𑁄. 𑀧𑀝𑀺𑀜𑁆𑀜𑀸𑀢𑀢𑁆𑀣𑀸𑀧𑀦𑀬𑀦𑀁 𑀧𑀝𑀺𑀜𑁆𑀜𑀸𑀲𑀜𑁆𑀜𑀸𑀲𑁄. 𑀅𑀯𑀺𑀲𑁂𑀲𑀯𑀼𑀢𑁆𑀢𑁂 𑀳𑁂𑀢𑀼𑀫𑁆𑀳𑀺 𑀧𑀝𑀺𑀲𑀺𑀤𑁆𑀥𑁂 𑀯𑀺𑀲𑁂𑀲𑀳𑁂𑀢𑀼𑀓𑀣𑀦𑀁 𑀳𑁂𑀢𑁆𑀯𑀦𑁆𑀢𑀭𑀁. 𑀅𑀥𑀺𑀓𑀢𑀢𑁆𑀣𑀸𑀦𑀼𑀧𑀬𑁄𑀕𑀺𑀅𑀢𑁆𑀣𑀓𑀣𑀦𑀁 𑀅𑀢𑁆𑀣𑀦𑁆𑀢𑀭𑀁. 𑀫𑀸𑀢𑀺𑀓𑀸𑀧𑀸𑀞𑁄 𑀯𑀺𑀬 𑀅𑀢𑁆𑀣𑀳𑀻𑀦𑀁 𑀦𑀺𑀭𑀢𑁆𑀣𑀓𑀁. 𑀢𑀺𑀓𑁆𑀔𑀢𑁆𑀢𑀼𑀁 𑀯𑀼𑀢𑁆𑀢𑀫𑁆𑀧𑀺 𑀲𑀓𑁆𑀔𑀺𑀧𑀝𑀺𑀯𑀸𑀤𑀻𑀳𑀺 𑀅𑀯𑀺𑀤𑀺𑀢𑀁 𑀅𑀯𑀺𑀜𑁆𑀜𑀸𑀢𑀢𑁆𑀣𑀁. 𑀧𑀼𑀩𑁆𑀩𑀸𑀧𑀭𑀯𑀲𑁂𑀦 𑀲𑀫𑁆𑀩𑀦𑁆𑀥𑀭𑀳𑀺𑀢𑀁 𑀅𑀲𑀫𑁆𑀩𑀦𑁆𑀥𑀢𑁆𑀣𑀁. 𑀅𑀯𑀬𑀯𑀯𑀺𑀧𑀮𑁆𑀮𑀸𑀲𑀯𑀘𑀦𑀁 𑀅𑀧𑁆𑀧𑀢𑁆𑀢𑀓𑀸𑀮𑀁. 𑀅𑀯𑀬𑀯𑀯𑀺𑀓𑀮𑀁 𑀊𑀦𑀁. 𑀅𑀥𑀺𑀓𑀳𑁂𑀢𑀽𑀤𑀸𑀳𑀭𑀡𑀁 𑀅𑀥𑀺𑀓𑀁. 𑀞𑀧𑁂𑀢𑁆𑀯𑀸 𑀅𑀦𑀼𑀯𑀸𑀤𑀁 𑀲𑀤𑁆𑀤𑀢𑁆𑀣𑀸𑀦𑀁 𑀧𑀼𑀦𑀧𑁆𑀧𑀼𑀦𑀁 𑀯𑀘𑀦𑀁 𑀅𑀢𑁆𑀣𑀸𑀧𑀦𑁆𑀦𑀯𑀘𑀦𑀜𑁆𑀘 𑀧𑀼𑀦𑀭𑀼𑀢𑁆𑀢𑀁. 𑀧𑀭𑀺𑀲𑀸𑀬 𑀯𑀺𑀤𑀺𑀢𑀲𑁆𑀲 𑀢𑀻𑀳𑀺 𑀯𑀼𑀢𑁆𑀢𑀲𑁆𑀲 𑀅𑀧𑀘𑁆𑀘𑀼𑀤𑀸𑀳𑀸𑀭𑁄 𑀅𑀦𑀦𑀼𑀪𑀸𑀲𑀦𑀁. 𑀬𑀁 𑀯𑀸𑀤𑀺𑀦𑀸 𑀯𑀼𑀢𑁆𑀢𑀁 𑀧𑀭𑀺𑀲𑀸𑀬 𑀯𑀺𑀜𑁆𑀜𑀸𑀢𑀁 𑀧𑀝𑀺𑀯𑀸𑀤𑀺𑀦𑀸 𑀤𑀼𑀯𑀺𑀜𑁆𑀜𑀸𑀢𑀁, 𑀢𑀁 𑀅𑀯𑀺𑀜𑁆𑀜𑀸𑀢𑀁. 𑀢𑀁𑀯𑀸𑀤𑀺𑀦𑀸 𑀯𑀢𑁆𑀢𑀩𑁆𑀩𑁂 𑀯𑀼𑀢𑁆𑀢𑁂 𑀧𑀭𑀯𑀸𑀤𑀺𑀦𑁄 𑀧𑀝𑀺𑀯𑀘𑀦𑀲𑁆𑀲 𑀅𑀦𑀼𑀧𑀝𑁆𑀞𑀸𑀦𑀁 𑀅𑀧𑁆𑀧𑀝𑀺𑀪𑀸. 𑀓𑀺𑀘𑁆𑀘𑀦𑁆𑀢𑀭𑀧𑁆𑀧𑀲𑀗𑁆𑀕𑁂𑀦 𑀓𑀣𑀸𑀯𑀺𑀘𑁆𑀙𑀺𑀦𑁆𑀤𑀦𑀁 𑀯𑀺𑀓𑁆𑀔𑁂𑀧𑁄. 𑀅𑀢𑁆𑀢𑀦𑁄 𑀤𑁄𑀲𑀸𑀦𑀼𑀚𑀸𑀦𑀦𑁂𑀦 𑀧𑀭𑀧𑀓𑁆𑀔𑀲𑁆𑀲 𑀤𑁄𑀲𑀧𑁆𑀧𑀲𑀜𑁆𑀚𑀦𑀁 𑀧𑀭𑀫𑀢𑀸𑀦𑀼𑀚𑀸𑀦𑀦𑀁 𑀫𑀢𑀸𑀦𑀼𑀜𑁆𑀜𑀸. 𑀦𑀺𑀕𑁆𑀕𑀳𑀧𑁆𑀧𑀢𑁆𑀢𑀲𑁆𑀲 𑀦𑀺𑀕𑁆𑀕𑀡𑁆𑀳𑀦𑀁 𑀅𑀦𑀼𑀬𑀼𑀜𑁆𑀚𑀺𑀢𑀩𑁆𑀩𑀲𑁆𑀲 𑀉𑀧𑁂𑀓𑁆𑀔𑀦𑀁. 𑀲𑀫𑁆𑀧𑀢𑁆𑀢𑀦𑀺𑀕𑁆𑀕𑀳𑀲𑁆𑀲 𑀅𑀦𑀺𑀕𑁆𑀕𑀳𑀝𑁆𑀞𑀸𑀦𑁂 𑀘 𑀦𑀺𑀕𑁆𑀕𑀡𑁆𑀳𑀦𑀁 𑀅𑀦𑀼𑀬𑀼𑀜𑁆𑀚𑀺𑀢𑀩𑁆𑀩𑀲𑁆𑀲 𑀅𑀦𑀼𑀬𑁄𑀕𑁄. 𑀏𑀓𑀁 𑀲𑀺𑀤𑁆𑀥𑀦𑁆𑀢𑀫𑀦𑀼𑀚𑀸𑀦𑀺𑀢𑁆𑀯𑀸 𑀅𑀦𑀺𑀬𑀫𑀢𑁄 𑀢𑀤𑀜𑁆𑀜𑀲𑀺𑀤𑁆𑀥𑀦𑁆𑀢𑀓𑀣𑀸𑀧𑁆𑀧𑀲𑀜𑁆𑀚𑀦𑀁 𑀅𑀧𑀲𑀺𑀤𑁆𑀥𑀦𑁆𑀢𑀭𑀁. 𑀅𑀲𑀺𑀤𑁆𑀥𑀸 𑀅𑀦𑁂𑀓𑀦𑁆𑀢𑀺𑀓𑀸 𑀯𑀺𑀭𑀼𑀤𑁆𑀥𑀸 𑀘 𑀳𑁂𑀢𑁆𑀯𑀸𑀪𑀸𑀲𑀸, 𑀳𑁂𑀢𑀼𑀧𑀢𑀺𑀭𑀽𑀧𑀓𑀸𑀢𑀺 𑀅𑀢𑁆𑀣𑁄. 𑀢𑁂𑀲𑀜𑁆𑀘 𑀓𑀣𑀦𑀁 𑀦𑀺𑀕𑁆𑀕𑀳𑀝𑁆𑀞𑀸𑀦𑀦𑁆𑀢𑀺.

𑀇𑀫𑁂𑀲𑀼 𑀤𑁆𑀯𑀸𑀯𑀻𑀲𑀢𑀺𑀬𑀸 𑀦𑀺𑀕𑁆𑀕𑀳𑀝𑁆𑀞𑀸𑀦𑁂𑀲𑀼 𑀇𑀤𑀁 𑀧𑀝𑀺𑀜𑁆𑀜𑀸𑀬 𑀅𑀧𑀦𑀬𑀦𑀢𑁄 𑀲𑀬𑀫𑁂𑀯 𑀧𑀘𑁆𑀘𑀓𑁆𑀔𑀸𑀦𑀢𑁄 𑀧𑀝𑀺𑀜𑁆𑀜𑀸𑀲𑀜𑁆𑀜𑀸𑀲𑁄 𑀦𑀸𑀫 𑀦𑀺𑀕𑁆𑀕𑀳𑀝𑁆𑀞𑀸𑀦𑀁. 𑀢𑁂𑀦𑁂𑀯𑀸𑀳 ‘‘𑀅𑀯𑀚𑀸𑀦𑀦𑁂𑀦𑁂𑀯 𑀦𑀺𑀕𑁆𑀕𑀳𑀁 𑀤𑀲𑁆𑀲𑁂𑀢𑀻’’𑀢𑀺. 𑀅𑀲𑀺𑀤𑁆𑀥𑀢𑁆𑀢𑀸𑀢𑀺 𑀏𑀢𑁂𑀦 𑀧𑀘𑁆𑀘𑀓𑁆𑀔𑀢𑁄 𑀅𑀦𑀼𑀫𑀸𑀦𑀢𑁄 𑀘 𑀧𑀼𑀕𑁆𑀕𑀮𑀲𑁆𑀲 𑀅𑀦𑀼𑀧𑀮𑀩𑁆𑀪𑀫𑀸𑀳. 𑀦 𑀳𑀺 𑀲𑁄 𑀧𑀘𑁆𑀘𑀓𑁆𑀔𑀢𑁄 𑀉𑀧𑀮𑀩𑁆𑀪𑀢𑀺. 𑀬𑀤𑀺 𑀉𑀧𑀮𑀩𑁆𑀪𑁂𑀬𑁆𑀬, 𑀯𑀺𑀯𑀸𑀤𑁄 𑀏𑀯 𑀦 𑀲𑀺𑀬𑀸, 𑀅𑀦𑀼𑀫𑀸𑀦𑀫𑁆𑀧𑀺 𑀢𑀸𑀤𑀺𑀲𑀁 𑀦𑀢𑁆𑀣𑀺, 𑀬𑁂𑀦 𑀧𑀼𑀕𑁆𑀕𑀮𑀁 𑀅𑀦𑀼𑀫𑀺𑀦𑁂𑀬𑁆𑀬𑀼𑀁. 𑀢𑀣𑀸 𑀳𑀺 𑀢𑀁 𑀲𑀸𑀲𑀦𑀺𑀓𑁄 𑀧𑀼𑀕𑁆𑀕𑀮𑀯𑀸𑀤𑀻 𑀯𑀤𑁂𑀬𑁆𑀬 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺, 𑀅𑀢𑁆𑀣𑀺 𑀧𑀼𑀕𑁆𑀕𑀮𑁄’’𑀢𑀺 𑀪𑀕𑀯𑀢𑀸 𑀯𑀼𑀢𑁆𑀢𑀢𑁆𑀢𑀸 𑀭𑀽𑀧𑀯𑁂𑀤𑀦𑀸𑀤𑀺 𑀯𑀺𑀬. 𑀬𑀜𑁆𑀳𑀺 𑀪𑀕𑀯𑀢𑀸 ‘‘𑀅𑀢𑁆𑀣𑀻’’𑀢𑀺 𑀬𑀤𑀺 𑀯𑀼𑀢𑁆𑀢𑀁, 𑀢𑀁 𑀧𑀭𑀫𑀢𑁆𑀣𑀢𑁄 𑀅𑀢𑁆𑀣𑀺 𑀬𑀣𑀸 𑀢𑀁 𑀭𑀽𑀧𑀁 𑀯𑁂𑀤𑀦𑀸 𑀲𑀜𑁆𑀜𑀸 𑀲𑀗𑁆𑀔𑀸𑀭𑀸 𑀯𑀺𑀜𑁆𑀜𑀸𑀡𑀁. 𑀬𑀁 𑀧𑀦 𑀧𑀭𑀫𑀢𑁆𑀣𑀢𑁄 𑀦𑀢𑁆𑀣𑀺, 𑀦 𑀢𑀁 𑀪𑀕𑀯𑀢𑀸 ‘‘𑀅𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀁 𑀬𑀣𑀸 𑀢𑀁 𑀧𑀓𑀢𑀺𑀯𑀸𑀤𑀺𑀆𑀤𑀻𑀦𑀁 𑀧𑀓𑀢𑀺𑀆𑀤𑀻𑀢𑀺, 𑀢𑀁 𑀫𑀺𑀘𑁆𑀙𑀸. 𑀏𑀢𑁆𑀣 𑀳𑀺 𑀬𑀤𑀺 𑀯𑁄𑀳𑀸𑀭𑀢𑁄 𑀧𑀼𑀕𑁆𑀕𑀮𑀲𑁆𑀲 𑀅𑀢𑁆𑀣𑀺𑀪𑀸𑀯𑁄 𑀅𑀥𑀺𑀧𑁆𑀧𑁂𑀢𑁄, 𑀲𑀺𑀤𑁆𑀥𑀁 𑀲𑀸𑀥𑀦𑀁, 𑀅𑀣 𑀧𑀭𑀫𑀢𑁆𑀣𑀢𑁄, 𑀅𑀲𑀺𑀤𑁆𑀥𑁄 𑀳𑁂𑀢𑀼 𑀢𑀣𑀸 𑀅𑀯𑀼𑀢𑁆𑀢𑀢𑁆𑀢𑀸. 𑀯𑀺𑀭𑀼𑀤𑁆𑀥𑁄 𑀘 𑀢𑀲𑁆𑀲 𑀅𑀦𑀺𑀘𑁆𑀘𑀲𑀗𑁆𑀔𑀢𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸𑀤𑀺𑀪𑀸𑀯𑀸𑀲𑀸𑀥𑀦𑀢𑁄 𑀭𑀽𑀧𑀯𑁂𑀤𑀦𑀸𑀤𑀻𑀲𑀼 𑀢𑀣𑀸 𑀤𑀺𑀝𑁆𑀞𑀢𑁆𑀢𑀸𑀢𑀺𑀆𑀤𑀺𑀦𑀸 𑀢𑀲𑁆𑀲 𑀅𑀳𑁂𑀢𑀼𑀓𑀪𑀸𑀯𑀲𑁆𑀲𑁂𑀯 𑀧𑀸𑀓𑀝𑀪𑀸𑀯𑀢𑁄.

𑀬𑀁 𑀧𑀦 𑀩𑀸𑀳𑀺𑀭𑀓𑀸 𑀧𑀼𑀣𑀼 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀯𑀤𑀦𑁆𑀢𑀺. 𑀅𑀢𑁆𑀣𑁂𑀯 𑀘 𑀧𑀭𑀫𑀢𑁆𑀣𑀢𑁄 𑀅𑀢𑁆𑀢𑀸 𑀜𑀸𑀡𑀸𑀪𑀺𑀥𑀸𑀦𑀲𑁆𑀲 𑀧𑀯𑀢𑁆𑀢𑀺𑀬𑀸 𑀦𑀺𑀫𑀺𑀢𑁆𑀢𑀪𑀸𑀯𑀢𑁄 𑀭𑀽𑀧𑀸𑀤𑀺 𑀯𑀺𑀬. 𑀅𑀣 𑀯𑀸 𑀅𑀢𑁆𑀢𑀸𑀢𑀺𑀭𑀺𑀢𑁆𑀢𑀧𑀤𑀢𑁆𑀣𑀦𑁆𑀢𑀭𑁄 𑀭𑀽𑀧𑀓𑁆𑀔𑀦𑁆𑀥𑁄 𑀔𑀦𑁆𑀥𑀲𑀪𑀸𑀯𑀢𑁆𑀢𑀸 𑀬𑀣𑀸 𑀢𑀁 𑀇𑀢𑀭𑀓𑁆𑀔𑀦𑁆𑀥𑀸. 𑀬𑀜𑁆𑀳𑁂𑀢𑁆𑀣 𑀧𑀤𑀢𑁆𑀣𑀦𑁆𑀢𑀭𑀁, 𑀲𑁄 𑀧𑀼𑀕𑁆𑀕𑀮𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀢𑁆𑀣 𑀘 𑀧𑀼𑀭𑀺𑀫𑀲𑁆𑀲 𑀳𑁂𑀢𑀼𑀦𑁄 𑀧𑀜𑁆𑀜𑀢𑁆𑀢𑀺𑀬𑀸 𑀅𑀦𑁂𑀓𑀦𑁆𑀢𑀺𑀓𑀢𑀸 𑀅𑀲𑀺𑀤𑁆𑀥𑀢𑀸 𑀘. 𑀦 𑀳𑀺 𑀅𑀲𑀢𑁄 𑀲𑀓𑀯𑀸𑀤𑀺𑀦𑀁 𑀧𑀢𑀺 𑀧𑀭𑀫𑀢𑁆𑀣𑀢𑁄 𑀜𑀸𑀡𑀸𑀪𑀺𑀥𑀸𑀦𑀧𑁆𑀧𑀯𑀢𑁆𑀢𑀺𑀬𑀸 𑀦𑀺𑀫𑀺𑀢𑁆𑀢𑀪𑀸𑀯𑁄 𑀲𑀺𑀚𑁆𑀛𑀢𑀺. 𑀯𑁄𑀳𑀸𑀭𑀢𑁄 𑀘𑁂, 𑀢𑀤𑀲𑀺𑀤𑁆𑀥𑀲𑀸𑀥𑀦𑀢𑀸 𑀭𑀽𑀧𑀸𑀤𑀺𑀲𑀪𑀸𑀯𑀯𑀺𑀦𑀺𑀫𑀼𑀢𑁆𑀢𑀭𑀽𑀧𑁄𑀧𑀺 𑀧𑀼𑀕𑁆𑀕𑀮𑁄 𑀦 𑀳𑁄𑀢𑀻𑀢𑀺 𑀏𑀯𑀫𑀸𑀤𑀺𑀯𑀺𑀭𑀼𑀤𑁆𑀥𑀢𑁆𑀣𑀢𑀸. 𑀧𑀘𑁆𑀙𑀺𑀫𑀲𑁆𑀲 𑀧𑀦 𑀳𑁂𑀢𑀼𑀦𑁄 𑀲𑀸𑀥𑁂𑀢𑀩𑁆𑀩𑀢𑁆𑀣𑀲𑀸𑀫𑀜𑁆𑀜𑀧𑀭𑀺𑀕𑁆𑀕𑀳𑁂 𑀲𑀺𑀤𑁆𑀥𑀲𑀸𑀥𑀦𑀢𑀸, 𑀭𑀽𑀧𑀓𑁆𑀔𑀦𑁆𑀥𑀢𑁄 𑀧𑀤𑀢𑁆𑀣𑀦𑁆𑀢𑀭𑀢𑁄 𑀧𑀭𑀫𑀢𑁆𑀣𑀦𑁆𑀢𑀭𑀪𑀽𑀢𑀯𑁂𑀤𑀦𑀸𑀤𑀺𑀲𑀫𑁆𑀪𑀯𑀲𑁆𑀲 𑀇𑀘𑁆𑀙𑀺𑀢𑀢𑁆𑀢𑀸 𑀘. 𑀢𑀩𑁆𑀩𑀺𑀲𑁂𑀲𑀧𑀭𑀺𑀕𑁆𑀕𑀳𑁂 𑀘 𑀲𑀓𑀯𑀸𑀤𑀺𑀦𑀁 𑀧𑀢𑀺 𑀉𑀤𑀸𑀳𑀭𑀡𑀸𑀪𑀸𑀯𑁄 𑀧𑀭𑀧𑀭𑀺𑀓𑀧𑁆𑀧𑀺𑀢𑀚𑀻𑀯𑀧𑀤𑀢𑁆𑀣𑀯𑀺𑀭𑀳𑀢𑁄. 𑀇𑀢𑀭𑀓𑁆𑀔𑀦𑁆𑀥𑀸𑀦𑀁 𑀯𑁂𑀤𑀦𑀸𑀤𑀺𑀯𑀺𑀦𑀺𑀫𑀼𑀢𑁆𑀢𑀉𑀪𑀬𑀲𑀺𑀤𑁆𑀥𑀚𑀻𑀯𑀧𑀤𑀢𑁆𑀣𑀲𑀳𑀺𑀢𑁄𑀧𑀺 𑀭𑀽𑀧𑀓𑁆𑀔𑀦𑁆𑀥𑁄 𑀦 𑀳𑁄𑀢𑀺 𑀇𑀢𑀭𑀓𑁆𑀔𑀦𑁆𑀥𑀸 𑀯𑀺𑀬𑀸𑀢𑀺 𑀯𑀺𑀭𑀼𑀤𑁆𑀥𑀢𑁆𑀣𑀢𑀸 𑀘.

𑀬𑀁 𑀧𑀦 𑀓𑀸𑀡𑀸𑀤𑀸 ‘‘𑀲𑀼𑀔𑀸𑀤𑀻𑀦𑀁 𑀦𑀺𑀲𑁆𑀲𑀬𑀪𑀸𑀯𑀢𑁄’’𑀢𑀺 𑀅𑀦𑀼𑀫𑀸𑀦𑀁 𑀯𑀤𑀦𑁆𑀢𑀺, 𑀢𑁂 𑀇𑀤𑀁 𑀯𑀢𑁆𑀢𑀩𑁆𑀩𑀸 𑁋 𑀓𑀺𑀁 𑀲𑀼𑀔𑀸𑀤𑀻𑀦𑀁 𑀅𑀢𑁆𑀢𑀦𑀺 𑀧𑀝𑀺𑀩𑀤𑁆𑀥𑀁 𑀬𑀢𑁄 𑀲𑀼𑀔𑀸𑀤𑀺𑀦𑀺𑀲𑁆𑀲𑀬𑀢𑀸𑀬 𑀅𑀢𑁆𑀢𑀸 𑀅𑀦𑀼𑀫𑀻𑀬𑀢𑀺. 𑀬𑀤𑀺 𑀉𑀧𑁆𑀧𑀸𑀤𑁄, 𑀏𑀯𑀁 𑀲𑀦𑁆𑀢𑁂 𑀲𑀩𑁆𑀩𑁂𑀧𑀺 𑀲𑀼𑀔𑀸𑀤𑀬𑁄 𑀏𑀓𑀢𑁄 𑀏𑀯 𑀪𑀯𑁂𑀬𑁆𑀬𑀼𑀁 𑀓𑀸𑀭𑀡𑀲𑁆𑀲 𑀲𑀦𑁆𑀦𑀺𑀳𑀺𑀢𑀪𑀸𑀯𑀢𑁄 𑀅𑀜𑁆𑀜𑀦𑀺𑀭𑀧𑁂𑀓𑁆𑀔𑀢𑁄 𑀘. 𑀅𑀣 𑀅𑀜𑁆𑀜𑀫𑁆𑀧𑀺 𑀓𑀺𑀜𑁆𑀘𑀺 𑀇𑀦𑁆𑀤𑁆𑀭𑀺𑀬𑀸𑀤𑀺𑀓𑀸𑀭𑀡𑀦𑁆𑀢𑀭𑀫𑀧𑁂𑀓𑁆𑀔𑀺𑀢𑀩𑁆𑀩𑀁, 𑀢𑀤𑁂𑀯 𑀳𑁄𑀢𑀼 𑀓𑀸𑀭𑀡𑀁, 𑀓𑀺𑀫𑀜𑁆𑀜𑁂𑀦 𑀅𑀤𑀺𑀝𑁆𑀞𑀲𑀸𑀫𑀢𑁆𑀣𑀺𑀬𑁂𑀦 𑀧𑀭𑀺𑀓𑀧𑁆𑀧𑀺𑀢𑁂𑀦 𑀧𑀬𑁄𑀚𑀦𑀁. 𑀅𑀣 𑀧𑀦 𑀢𑁂𑀲𑀁 𑀅𑀢𑁆𑀢𑀸𑀥𑀻𑀦𑀸 𑀯𑀼𑀢𑁆𑀢𑀻𑀢𑀺 𑀯𑀤𑁂𑀬𑁆𑀬𑀼𑀁, 𑀏𑀯𑀫𑁆𑀧𑀺 𑀦 𑀲𑀺𑀚𑁆𑀛𑀢𑀺 𑀉𑀤𑀸𑀳𑀭𑀡𑀸𑀪𑀸𑀯𑀢𑁄. 𑀦 𑀳𑀺 𑀭𑀽𑀧𑀸𑀤𑀺𑀯𑀺𑀦𑀺𑀫𑀼𑀢𑁆𑀢𑁄 𑀢𑀸𑀤𑀺𑀲𑁄 𑀓𑁄𑀘𑀺 𑀲𑀪𑀸𑀯𑀥𑀫𑁆𑀫𑁄 𑀲𑀼𑀔𑀸𑀤𑀺𑀲𑀦𑁆𑀦𑀺𑀲𑁆𑀲𑀬𑀪𑀽𑀢𑁄 𑀅𑀢𑁆𑀣𑀺, 𑀬𑀢𑁄 𑀅𑀢𑁆𑀢𑀦𑁄 𑀅𑀢𑁆𑀢𑀢𑁆𑀣𑀲𑀺𑀤𑁆𑀥𑀺𑀬𑀸 𑀉𑀤𑀸𑀳𑀭𑀡𑀁 𑀅𑀧𑀤𑀺𑀲𑁂𑀬𑁆𑀬𑀼𑀁. 𑀇𑀫𑀺𑀦𑀸 𑀦𑀬𑁂𑀦 𑀅𑀲𑀫𑀸𑀲𑀧𑀤𑀸𑀪𑀺𑀥𑁂𑀬𑁆𑀬𑀢𑁆𑀢𑀸𑀢𑀺𑀆𑀤𑀻𑀦𑀫𑁆𑀧𑀺 𑀅𑀬𑀼𑀢𑁆𑀢𑀢𑁆𑀢𑀸 𑀦𑀺𑀯𑀸𑀭𑁂𑀢𑀩𑁆𑀩𑀸. 𑀢𑀣𑀸 ‘‘𑀅𑀜𑁆𑀜𑀲𑁆𑀲 𑀲𑀘𑁆𑀘𑀺𑀓𑀝𑁆𑀞𑀲𑁆𑀲 𑀅𑀲𑀺𑀤𑁆𑀥𑀢𑁆𑀢𑀸’’𑀢𑀺 𑀇𑀫𑀺𑀦𑀸 𑀘 𑀧𑀓𑀢𑀺𑀅𑀡𑀼𑀆𑀤𑀻𑀦𑀫𑁆𑀧𑀺 𑀩𑀸𑀳𑀺𑀭𑀧𑀭𑀺𑀓𑀧𑁆𑀧𑀺𑀢𑀸𑀦𑀁 𑀅𑀲𑀺𑀤𑁆𑀥𑀢𑀸 𑀯𑀼𑀢𑁆𑀢𑀸𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑀣𑀁 𑀧𑀦 𑀢𑁂𑀲𑀁 𑀅𑀲𑀺𑀤𑁆𑀥𑀻𑀢𑀺? 𑀧𑀫𑀸𑀡𑁂𑀦 𑀅𑀦𑀼𑀧𑀮𑀩𑁆𑀪𑀦𑀢𑁄. 𑀦 𑀳𑀺 𑀧𑀘𑁆𑀘𑀓𑁆𑀔𑀢𑁄 𑀧𑀓𑀢𑀺 𑀲𑀺𑀤𑁆𑀥𑀸 𑀓𑀧𑀺𑀮𑀲𑁆𑀲𑀧𑀺 𑀇𑀲𑀺𑀦𑁄 𑀢𑀲𑁆𑀲 𑀅𑀧𑀘𑁆𑀘𑀓𑁆𑀔𑀪𑀸𑀯𑀲𑁆𑀲 𑀓𑀸𑀧𑀺𑀮𑁂𑀳𑀺 𑀅𑀦𑀼𑀜𑁆𑀜𑀸𑀬𑀫𑀸𑀦𑀢𑁆𑀢𑀸.

𑀬𑀁 𑀧𑀦 ‘‘𑀅𑀢𑁆𑀣𑀺 𑀧𑀥𑀸𑀦𑀁 𑀪𑁂𑀤𑀸𑀦𑀁 𑀅𑀦𑁆𑀯𑀬𑀤𑀲𑁆𑀲𑀦𑀢𑁄 𑀲𑀓𑀮𑀓𑀮𑀸𑀧𑀫𑀢𑁆𑀢𑀁 𑀯𑀺𑀬𑀸’’𑀢𑀺 𑀢𑁂 𑀅𑀦𑀼𑀫𑀸𑀦𑀁 𑀯𑀤𑀦𑁆𑀢𑀺. 𑀇𑀫𑀺𑀦𑀸 𑀳𑀺 𑀪𑁂𑀤𑀸𑀦𑀁 𑀲𑀢𑁆𑀯𑀸𑀤𑀻𑀦𑀁 𑀯𑀺𑀚𑁆𑀚𑀫𑀸𑀦𑀧𑀥𑀸𑀦𑀢𑀸 𑀧𑀝𑀺𑀜𑁆𑀜𑀸𑀢𑀸. 𑀏𑀢𑁆𑀣 𑀘 𑀯𑀼𑀘𑁆𑀘𑀢𑁂 𑁋 𑀲𑀓𑀮𑀸𑀤𑀻𑀦𑀁 𑀧𑀥𑀸𑀦𑀁 𑀢𑀩𑁆𑀩𑀺𑀪𑀸𑀕𑁂𑀳𑀺 𑀓𑀺𑀁 𑀅𑀜𑁆𑀜𑀢𑁆𑀢𑀁, 𑀉𑀤𑀸𑀳𑀼 𑀅𑀦𑀜𑁆𑀜𑀦𑁆𑀢𑀺, 𑀓𑀺𑀜𑁆𑀘𑁂𑀢𑁆𑀣 𑀬𑀤𑀺 𑀅𑀜𑁆𑀜𑀢𑁆𑀢𑀁, 𑀲𑀩𑁆𑀩𑁄 𑀮𑁄𑀓𑁄 𑀧𑀥𑀸𑀦𑀫𑀬𑁄𑀢𑀺 𑀲𑀫𑀬𑀯𑀺𑀭𑁄𑀥𑁄 𑀲𑀺𑀬𑀸, 𑀲𑀡𑁆𑀞𑀸𑀦𑀪𑁂𑀤𑁂𑀦 𑀅𑀜𑁆𑀜𑀢𑁆𑀣 𑀧𑀝𑀺𑀚𑀸𑀦𑀦𑀢𑁄 𑀦 𑀤𑁄𑀲𑁄𑀢𑀺 𑀘𑁂? 𑀢𑀁 𑀦, 𑀯𑀮𑀬𑀓𑀝𑀓𑀸𑀤𑀺𑀲𑀡𑁆𑀞𑀸𑀦𑀪𑁂𑀤𑁂𑀧𑀺 𑀓𑀦𑀓𑀸𑀪𑁂𑀤𑀤𑀲𑁆𑀲𑀦𑀢𑁄. 𑀦 𑀳𑀺 𑀲𑀡𑁆𑀞𑀸𑀦𑀁 𑀯𑀢𑁆𑀣𑀼𑀪𑁂𑀤𑀦𑀺𑀫𑀺𑀢𑁆𑀢𑀁 𑀢𑀲𑁆𑀲 𑀅𑀦𑀼𑀧𑀸𑀤𑀸𑀦𑀢𑁆𑀢𑀸. 𑀬𑀁 𑀬𑀲𑁆𑀲 𑀪𑁂𑀤𑀦𑀺𑀫𑀺𑀢𑁆𑀢𑀁, 𑀦 𑀢𑀁 𑀢𑀲𑁆𑀲 𑀅𑀦𑀼𑀧𑀸𑀤𑀸𑀦𑀁 𑀬𑀣𑀸 𑀲𑀼𑀯𑀡𑁆𑀡𑀫𑀢𑁆𑀢𑀺𑀓𑀸𑀤𑀺𑀖𑀝𑀸𑀤𑀻𑀦𑀁 𑀲𑀼𑀯𑀡𑁆𑀡𑀖𑀝𑁄 𑀫𑀢𑁆𑀢𑀺𑀓𑀸𑀖𑀝𑁄 𑀓𑁄𑀲𑁂𑀬𑁆𑀬𑀧𑀝𑁄 𑀓𑀧𑁆𑀧𑀸𑀲𑀧𑀝𑁄𑀢𑀺 𑀘 𑀲𑀸𑀥𑁂𑀢𑀩𑁆𑀩𑀥𑀫𑁆𑀫𑀭𑀳𑀺𑀢𑀜𑁆𑀘 𑀉𑀤𑀸𑀳𑀭𑀡𑀁. 𑀦 𑀳𑀺 𑀧𑀥𑀸𑀦𑁂𑀓𑀓𑀸𑀭𑀡𑀧𑀼𑀩𑁆𑀩𑀓𑀢𑁆𑀢𑀁 𑀲𑀓𑀮𑀸𑀤𑀻𑀦𑀁 𑀧𑀓𑀢𑀺𑀯𑀸𑀤𑀺𑀦𑁄 𑀲𑀺𑀤𑁆𑀥𑀁, 𑀦𑀸𑀧𑀺 𑀓𑀸𑀧𑀺𑀮𑀸𑀦𑀁 𑀓𑀣𑀜𑁆𑀘𑀺 𑀅𑀜𑁆𑀜𑀢𑁆𑀢𑀸𑀦𑀼𑀚𑀸𑀦𑀦𑀢𑁄. 𑀅𑀦𑀜𑁆𑀜𑀢𑁆𑀢𑁂 𑀧𑀦 𑀉𑀤𑀸𑀳𑀭𑀡𑀸𑀪𑀸𑀯𑁄. 𑀦 𑀳𑀺 𑀢𑀤𑁂𑀯 𑀲𑀸𑀥𑁂𑀢𑀩𑁆𑀩𑀁 𑀢𑀤𑁂𑀯 𑀘 𑀉𑀤𑀸𑀳𑀭𑀡𑀁 𑀬𑀼𑀢𑁆𑀢𑀁, 𑀅𑀦𑁆𑀯𑀬𑀤𑀲𑁆𑀲𑀦𑀫𑁆𑀧𑀺 𑀅𑀲𑀺𑀤𑁆𑀥𑀁. 𑀦 𑀳𑀺 𑀢𑀤𑁂𑀯 𑀢𑁂𑀦 𑀅𑀦𑁆𑀯𑀺𑀢𑀁 𑀬𑀼𑀚𑁆𑀚𑀢𑀺. 𑀧𑀥𑀸𑀦𑁂𑀦 𑀅𑀦𑁆𑀯𑀬𑀤𑀲𑁆𑀲𑀦𑀫𑁆𑀧𑀺 𑀅𑀲𑀺𑀤𑁆𑀥𑀁 𑀧𑀭𑀯𑀸𑀤𑀺𑀦𑁄𑀢𑀺 𑀕𑀼𑀡𑀲𑁆𑀲 𑀧𑀥𑀸𑀦𑀲𑁆𑀲 𑀅𑀦𑀦𑀼𑀚𑀸𑀦𑀦𑀢𑁄. 𑀅𑀣 𑀬𑀁 𑀓𑀺𑀜𑁆𑀘𑀺 𑀓𑀸𑀭𑀡𑀁 𑀧𑀥𑀸𑀦𑀁 ‘‘𑀧𑀥𑀻𑀬𑀢𑀺 𑀏𑀢𑁆𑀣 𑀨𑀮’’𑀦𑁆𑀢𑀺, 𑀏𑀯𑀫𑁆𑀧𑀺 𑀅𑀲𑀺𑀤𑁆𑀥𑀫𑁂𑀯 𑀓𑀸𑀭𑀡𑁂 𑀨𑀮𑀲𑁆𑀲 𑀅𑀢𑁆𑀣𑀺𑀪𑀸𑀯𑀸𑀦𑀦𑀼𑀚𑀸𑀦𑀦𑀢𑁄, 𑀳𑁂𑀢𑀼𑀦𑁄 𑀘 𑀅𑀲𑀺𑀤𑁆𑀥𑀦𑀺𑀲𑁆𑀲𑀬𑀢𑀸𑀧𑀭𑀸𑀪𑀺𑀫𑀢𑀪𑁂𑀤𑀸𑀦𑀦𑀼𑀚𑀸𑀦𑀦𑀢𑁄. 𑀅𑀣 𑀯𑀺𑀲𑁂𑀲𑁂𑀦 𑀓𑀸𑀭𑀡𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸 𑀨𑀮𑀲𑁆𑀲 𑀲𑀸𑀥𑀻𑀬𑀢𑀺, 𑀦 𑀓𑀺𑀜𑁆𑀘𑀺 𑀯𑀺𑀭𑀼𑀤𑁆𑀥𑀁 𑀥𑀫𑁆𑀫𑀸𑀦𑀁 𑀬𑀣𑀸𑀲𑀓𑀁 𑀧𑀘𑁆𑀘𑀬𑁂𑀦 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀢𑁆𑀢𑀺𑀬𑀸 𑀇𑀘𑁆𑀙𑀺𑀢𑀢𑁆𑀢𑀸𑀢𑀺.

𑀅𑀧𑀺𑀘 𑀧𑀓𑀢𑀺𑀯𑀸𑀤𑀺𑀦𑁄 ‘‘𑀲𑀢𑁆𑀯𑀭𑀚𑀢𑀫𑀲𑀗𑁆𑀔𑀸𑀢𑀸𑀦𑀁 𑀢𑀺𑀡𑁆𑀡𑀁 𑀕𑀼𑀡𑀸𑀦𑀁 𑀲𑀫𑀪𑀸𑀯𑁄 𑀧𑀓𑀢𑀺, 𑀲𑀸 𑀘 𑀦𑀺𑀘𑁆𑀘𑀸 𑀲𑀢𑁆𑀯𑀸𑀤𑀺𑀯𑀺𑀲𑀫𑀲𑀪𑀸𑀯𑀢𑁄 𑀅𑀦𑀺𑀘𑁆𑀘𑀢𑁄 𑀫𑀳𑀢𑀸𑀤𑀺𑀯𑀺𑀓𑀸𑀭𑀢𑁄 𑀅𑀦𑀜𑁆𑀜𑀸’’𑀢𑀺 𑀧𑀝𑀺𑀚𑀸𑀦𑀦𑁆𑀢𑀺. 𑀲𑀸 𑀢𑁂𑀲𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀧𑀓𑀢𑀺 𑀦 𑀲𑀺𑀚𑁆𑀛𑀢𑀺 𑀢𑀢𑁄 𑀯𑀺𑀭𑀼𑀤𑁆𑀥𑀲𑀪𑀸𑀯𑀢𑁄 𑀯𑀺𑀓𑀸𑀭𑀢𑁄 𑀅𑀦𑀜𑁆𑀜𑀢𑁆𑀢𑀸. 𑀦 𑀳𑀺 𑀅𑀲𑁆𑀲𑀲𑁆𑀲 𑀯𑀺𑀲𑀸𑀡𑀁 𑀤𑀻𑀖𑀁, 𑀢𑀜𑁆𑀘 𑀭𑀲𑁆𑀲𑀢𑁄 𑀕𑁄𑀯𑀺𑀲𑀸𑀡𑀢𑁄 𑀅𑀦𑀜𑁆𑀜𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑀁 𑀲𑀺𑀚𑁆𑀛𑀢𑀺. 𑀓𑀺𑀜𑁆𑀘 𑀪𑀺𑀬𑁆𑀬𑁄? 𑀢𑀺𑀡𑁆𑀡𑀁 𑀏𑀓𑀪𑀸𑀯𑀸𑀪𑀸𑀯𑀢𑁄. 𑀲𑀢𑁆𑀯𑀸𑀤𑀺𑀕𑀼𑀡𑀢𑁆𑀢𑀬𑀢𑁄 𑀳𑀺 𑀧𑀓𑀢𑀺𑀬𑀸 𑀅𑀦𑀜𑁆𑀜𑀢𑁆𑀢𑀁 𑀇𑀘𑁆𑀙𑀦𑁆𑀢𑀸𑀦𑀁 𑀢𑁂𑀲𑀁 𑀲𑀢𑁆𑀯𑀸𑀤𑀻𑀦𑀫𑁆𑀧𑀺 𑀧𑀓𑀢𑀺𑀬𑀸 𑀅𑀦𑀜𑁆𑀜𑀢𑁆𑀢𑀁 𑀆𑀧𑀚𑁆𑀚𑀢𑀺, 𑀦 𑀘 𑀬𑀼𑀢𑁆𑀢𑀁 𑀢𑀺𑀡𑁆𑀡𑀁 𑀏𑀓𑀪𑀸𑀯𑁄𑀢𑀺. 𑀏𑀯𑀫𑁆𑀧𑀺 𑀧𑀓𑀢𑀺 𑀦 𑀲𑀺𑀚𑁆𑀛𑀢𑀺. 𑀓𑀣𑀁? 𑀅𑀦𑁂𑀓𑀤𑁄𑀲𑀸𑀧𑀢𑁆𑀢𑀺𑀢𑁄. 𑀬𑀤𑀺 𑀳𑀺 𑀩𑁆𑀬𑀢𑁆𑀢𑀲𑀪𑀸𑀯𑀢𑁄 𑀯𑀺𑀓𑀸𑀭𑀢𑁄 𑀅𑀩𑁆𑀬𑀢𑁆𑀢𑀲𑀪𑀸𑀯𑀸 𑀧𑀓𑀢𑀺 𑀅𑀦𑀜𑁆𑀜𑀸, 𑀏𑀯𑀁 𑀲𑀦𑁆𑀢𑁂 𑀳𑁂𑀢𑀼𑀫𑀦𑁆𑀢𑀢𑀸 𑀅𑀦𑀺𑀘𑁆𑀘𑀢𑀸 𑀅𑀩𑁆𑀬𑀸𑀧𑀺𑀢𑀸 𑀲𑀓𑀺𑀭𑀺𑀬𑀢𑀸 𑀅𑀦𑁂𑀓𑀢𑀸 𑀦𑀺𑀲𑁆𑀲𑀺𑀢𑀢𑀸 𑀮𑀺𑀗𑁆𑀕𑀢𑀸 𑀲𑀸𑀯𑀬𑀯𑀢𑀸 𑀧𑀭𑀢𑀦𑁆𑀢𑁆𑀭𑀢𑀸𑀢𑀺 𑀏𑀯𑀫𑀸𑀤𑀬𑁄 𑀅𑀦𑁂𑀓𑁂 𑀤𑁄𑀲𑀸 𑀧𑀓𑀢𑀺𑀬𑀸 𑀆𑀧𑀚𑁆𑀚𑀦𑁆𑀢𑀺, 𑀦 𑀚𑀸𑀢𑀺𑀯𑀺𑀓𑀸𑀭𑀢𑁄 𑀅𑀦𑀜𑁆𑀜𑀸 𑀧𑀝𑀺𑀚𑀸𑀦𑀺𑀢𑀩𑁆𑀩𑀸. 𑀢𑀣𑀸 𑀘 𑀲𑀢𑀺 𑀲𑀫𑀬𑀯𑀺𑀭𑁄𑀥𑁄𑀢𑀺 𑀓𑀧𑁆𑀧𑀦𑀸𑀫𑀢𑁆𑀢𑀁 𑀧𑀓𑀢𑀻𑀢𑀺 𑀅𑀲𑀺𑀤𑁆𑀥𑀸 𑀲𑀸𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁.

𑀧𑀓𑀢𑀺𑀬𑀸 𑀘 𑀅𑀲𑀺𑀤𑁆𑀥𑀸𑀬 𑀢𑀁𑀦𑀺𑀫𑀺𑀢𑁆𑀢𑀓𑀪𑀸𑀯𑁂𑀦 𑀯𑀼𑀘𑁆𑀘𑀫𑀸𑀦𑀸 𑀫𑀳𑀢𑀸𑀤𑀬𑁄𑀧𑀺 𑀅𑀲𑀺𑀤𑁆𑀥𑀸 𑀏𑀯. 𑀬𑀣𑀸 𑀘 𑀧𑀓𑀢𑀺 𑀫𑀳𑀢𑀸𑀤𑀬𑁄 𑀘, 𑀏𑀯𑀁 𑀇𑀲𑁆𑀲𑀭𑀧𑀚𑀸𑀧𑀢𑀺𑀧𑀼𑀭𑀺𑀲𑀓𑀸𑀮𑀲𑀪𑀸𑀯𑀦𑀺𑀬𑀢𑀺𑀬𑀤𑀺𑀘𑁆𑀙𑀸𑀤𑀬𑁄𑀧𑀺. 𑀏𑀢𑁂𑀲𑀼 𑀳𑀺 𑀇𑀲𑁆𑀲𑀭𑁄 𑀢𑀸𑀯 𑀦 𑀲𑀺𑀚𑁆𑀛𑀢𑀺 𑀉𑀧𑀓𑀸𑀭𑀲𑁆𑀲 𑀅𑀤𑀲𑁆𑀲𑀦𑀢𑁄. 𑀲𑀢𑁆𑀢𑀸𑀦𑀜𑁆𑀳𑀺 𑀚𑀸𑀢𑀺𑀬𑀁 𑀫𑀸𑀢𑀸𑀧𑀺𑀢𑀽𑀦𑀁 𑀩𑀻𑀚𑀔𑁂𑀢𑁆𑀢𑀪𑀸𑀯𑁂𑀦 𑀓𑀫𑁆𑀫𑀲𑁆𑀲 𑀳𑀻𑀦𑀢𑀸𑀤𑀺𑀯𑀺𑀪𑀸𑀕𑀓𑀭𑀡𑁂𑀦, 𑀢𑀢𑁄 𑀧𑀭𑀜𑁆𑀘 𑀉𑀢𑀼𑀆𑀳𑀸𑀭𑀸𑀦𑀁 𑀩𑁆𑀭𑀽𑀳𑀦𑀼𑀧𑀢𑁆𑀣𑀫𑁆𑀪𑀦𑁂𑀦, 𑀇𑀦𑁆𑀤𑁆𑀭𑀺𑀬𑀸𑀦𑀁 𑀤𑀲𑁆𑀲𑀦𑀸𑀤𑀺𑀓𑀺𑀘𑁆𑀘𑀲𑀸𑀥𑀦𑁂𑀦 𑀉𑀧𑀓𑀸𑀭𑁄 𑀤𑀺𑀲𑁆𑀲𑀢𑀺, 𑀦, 𑀏𑀯𑀫𑀺𑀲𑁆𑀲𑀭𑀲𑁆𑀲. 𑀳𑀻𑀦𑀢𑀸𑀤𑀺𑀯𑀺𑀪𑀸𑀕𑀓𑀭𑀡𑀫𑀺𑀲𑁆𑀲𑀭𑀲𑁆𑀲𑀸𑀢𑀺 𑀘𑁂? 𑀢𑀁 𑀦, 𑀅𑀲𑀺𑀤𑁆𑀥𑀢𑁆𑀢𑀸. 𑀬𑀣𑀸𑀯𑀼𑀢𑁆𑀢𑁄 𑀉𑀧𑀓𑀸𑀭𑀯𑀺𑀲𑁂𑀲𑁄 𑀇𑀲𑁆𑀲𑀭𑀦𑀺𑀫𑁆𑀫𑀺𑀢𑁄, 𑀦 𑀓𑀫𑁆𑀫𑀼𑀦𑀸𑀢𑀺 𑀲𑀸𑀥𑀦𑀻𑀬𑀫𑁂𑀢𑀁. 𑀇𑀢𑀭𑀢𑁆𑀭𑀸𑀧𑀺 𑀲𑀫𑀸𑀦𑀫𑁂𑀢𑀦𑁆𑀢𑀺 𑀘𑁂? 𑀦, 𑀓𑀫𑁆𑀫𑀢𑁄 𑀨𑀮𑀦𑀺𑀬𑀫𑀲𑀺𑀤𑁆𑀥𑀢𑁆𑀢𑀸. 𑀲𑀢𑀺 𑀳𑀺 𑀓𑀢𑀽𑀧𑀘𑀺𑀢𑁂 𑀓𑀫𑁆𑀫𑀲𑁆𑀫𑀺𑀁 𑀢𑀢𑁆𑀣 𑀬𑀁 𑀅𑀓𑀼𑀲𑀮𑀁, 𑀢𑀢𑁄 𑀳𑀻𑀦𑀢𑀸, 𑀬𑀁 𑀓𑀼𑀲𑀮𑀁, 𑀢𑀢𑁄 𑀧𑀡𑀻𑀢𑀢𑀸𑀢𑀺 𑀲𑀺𑀤𑁆𑀥𑀫𑁂𑀢𑀁. 𑀇𑀲𑁆𑀲𑀭𑀯𑀸𑀤𑀺𑀦𑀸𑀧𑀺 𑀳𑀺 𑀦 𑀲𑀓𑁆𑀓𑀸 𑀓𑀫𑁆𑀫𑀁 𑀧𑀝𑀺𑀓𑁆𑀔𑀺𑀧𑀺𑀢𑀼𑀁.

𑀅𑀧𑀺𑀘𑁂𑀢𑀲𑁆𑀲 𑀮𑁄𑀓𑀯𑀺𑀘𑀺𑀢𑁆𑀢𑀲𑁆𑀲 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀪𑀸𑀯𑁂 𑀩𑀳𑀽 𑀤𑁄𑀲𑀸 𑀲𑀫𑁆𑀪𑀯𑀦𑁆𑀢𑀺. 𑀓𑀣𑀁? 𑀬𑀤𑀺 𑀲𑀩𑁆𑀩𑀫𑀺𑀤𑀁 𑀮𑁄𑀓𑀯𑀺𑀘𑀺𑀢𑁆𑀢𑀁 𑀇𑀲𑁆𑀲𑀭𑀦𑀺𑀫𑁆𑀫𑀺𑀢𑀁, 𑀲𑀳𑁂𑀯 𑀯𑀘𑀦𑁂𑀦 𑀧𑀯𑀢𑁆𑀢𑀺𑀢𑀩𑁆𑀩𑀁, 𑀦 𑀓𑀫𑁂𑀦. 𑀦 𑀳𑀺 𑀲𑀦𑁆𑀦𑀺𑀳𑀺𑀢𑀓𑀸𑀭𑀡𑀸𑀦𑀁 𑀨𑀮𑀸𑀦𑀁 𑀓𑀫𑁂𑀦 𑀉𑀧𑁆𑀧𑀢𑁆𑀢𑀺 𑀬𑀼𑀢𑁆𑀢𑀸, 𑀓𑀸𑀭𑀡𑀦𑁆𑀢𑀭𑀸𑀧𑁂𑀓𑁆𑀔𑀸𑀬 𑀇𑀲𑁆𑀲𑀭𑀲𑁆𑀲 𑀲𑀸𑀫𑀢𑁆𑀣𑀺𑀬𑀳𑀸𑀦𑀺. 𑀘𑀓𑁆𑀔𑀸𑀤𑀻𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀲𑀼 𑀓𑀸𑀭𑀡𑀪𑀸𑀯𑁄 𑀦 𑀬𑀼𑀢𑁆𑀢𑁄. 𑀓𑀭𑁄𑀢𑀻𑀢𑀺 𑀳𑀺 𑀓𑀸𑀭𑀡𑀦𑁆𑀢𑀺. 𑀇𑀲𑁆𑀲𑀭𑁄 𑀏𑀯 𑀘 𑀓𑀸𑀭𑀓𑁄𑀢𑀺 𑀲𑀩𑁆𑀩𑀓𑀸𑀭𑀡𑀸𑀦𑀁 𑀓𑀸𑀭𑀡𑀪𑀸𑀯𑀳𑀸𑀦𑀺. 𑀬𑁂𑀳𑀺 𑀧𑀼𑀣𑀼𑀯𑀺𑀲𑁂𑀲𑁂𑀳𑀺 𑀇𑀲𑁆𑀲𑀭𑁄 𑀧𑀲𑀻𑀤𑁂𑀬𑁆𑀬, 𑀢𑁂𑀲𑀜𑁆𑀘 𑀲𑀬𑀁𑀓𑀸𑀭𑀢𑀸 𑀆𑀧𑀚𑁆𑀚𑀢𑀺, 𑀢𑀣𑀸 𑀲𑀩𑁆𑀩𑁂𑀲𑀁 𑀳𑁂𑀢𑀼𑀓𑀸𑀦𑀁 𑀓𑀸𑀭𑀡𑀪𑀸𑀯𑁄. 𑀬𑀜𑁆𑀚𑁂𑀢𑀁 𑀦𑀺𑀫𑁆𑀫𑀸𑀦𑀁, 𑀢𑀜𑁆𑀘𑀲𑁆𑀲 𑀅𑀢𑁆𑀢𑀤𑀢𑁆𑀣𑀁 𑀯𑀸 𑀲𑀺𑀬𑀸, 𑀧𑀭𑀢𑁆𑀣𑀁 𑀯𑀸 𑀲𑀺𑀬𑀸. 𑀅𑀢𑁆𑀢𑀤𑀢𑁆𑀣𑀢𑀸𑀬𑀁 𑀅𑀢𑁆𑀢𑀦𑁄 𑀇𑀲𑁆𑀲𑀭𑀪𑀸𑀯𑀳𑀸𑀦𑀺 𑀅𑀓𑀢𑀓𑀺𑀘𑁆𑀘𑀢𑀸𑀬 𑀇𑀲𑀺𑀢𑀸𑀯𑀲𑀺𑀢𑀸𑀪𑀸𑀯𑀢𑁄. 𑀢𑁂𑀦 𑀯𑀸 𑀦𑀺𑀫𑁆𑀫𑀺𑀢𑁂𑀦 𑀬𑀁 𑀅𑀢𑁆𑀢𑀦𑁄 𑀓𑀸𑀢𑀩𑁆𑀩𑀁, 𑀢𑀁 𑀓𑀲𑁆𑀫𑀸 𑀲𑀬𑀫𑁂𑀯 𑀦 𑀓𑀭𑁄𑀢𑀺. 𑀧𑀭𑀢𑁆𑀣𑀢𑀸𑀬𑀁 𑀧𑀦 𑀧𑀭𑁄 𑀦𑀸𑀫𑁂𑀢𑁆𑀣 𑀮𑁄𑀓𑁄 𑀏𑀯𑀸𑀢𑀺 𑀓𑀺𑀫𑀢𑁆𑀣𑀺𑀬𑀁 𑀢𑀲𑁆𑀲 𑀦𑀺𑀭𑀬𑀸𑀤𑀺𑀭𑁄𑀕𑀸𑀤𑀺𑀯𑀺𑀲𑀸𑀤𑀺𑀦𑀺𑀫𑁆𑀫𑀸𑀦𑀁. 𑀬𑀸 𑀘𑀲𑁆𑀲 𑀇𑀲𑁆𑀲𑀭𑀢𑀸, 𑀲𑀸 𑀲𑀬𑀁𑀓𑀢𑀸 𑀯𑀸 𑀲𑀺𑀬𑀸 𑀧𑀭𑀁𑀓𑀢𑀸 𑀯𑀸 𑀅𑀳𑁂𑀢𑀼𑀓𑀸 𑀯𑀸. 𑀢𑀢𑁆𑀣 𑀲𑀬𑀁𑀓𑀢𑀸 𑀘𑁂, 𑀢𑀢𑁄 𑀧𑀼𑀩𑁆𑀩𑁂 𑀅𑀦𑀺𑀲𑁆𑀲𑀭𑀪𑀸𑀯𑀸𑀧𑀢𑁆𑀢𑀺. 𑀧𑀭𑀁𑀓𑀢𑀸 𑀘𑁂, 𑀧𑀘𑁆𑀙𑀸𑀧𑀺 𑀅𑀦𑀺𑀲𑁆𑀲𑀭𑀪𑀸𑀯𑀸𑀧𑀢𑁆𑀢𑀺 𑀲𑀉𑀢𑁆𑀢𑀭𑀢𑀸 𑀘 𑀲𑀺𑀬𑀸. 𑀅𑀳𑁂𑀢𑀼𑀓𑀸 𑀘𑁂, 𑀦 𑀓𑀲𑁆𑀲𑀘𑀺 𑀅𑀦𑀺𑀲𑁆𑀲𑀭𑀢𑀸𑀢𑀺 𑀏𑀯𑀫𑀺𑀲𑁆𑀲𑀭𑀲𑁆𑀲𑀧𑀺 𑀅𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸.

𑀬𑀣𑀸 𑀘 𑀇𑀲𑁆𑀲𑀭𑁄, 𑀏𑀯𑀁 𑀧𑀚𑀸𑀧𑀢𑀺 𑀧𑀼𑀭𑀺𑀲𑁄 𑀘. 𑀦𑀸𑀫𑀫𑀢𑁆𑀢𑀫𑁂𑀯 𑀳𑁂𑀢𑁆𑀣 𑀯𑀺𑀲𑁂𑀲𑁄. 𑀢𑁂𑀳𑀺 𑀯𑀸𑀤𑀻𑀳𑀺 𑀧𑀓𑀧𑁆𑀧𑀺𑀢𑀁 𑀬𑀤𑀺𑀤𑀁 ‘‘𑀧𑀚𑀸𑀧𑀢𑀺 𑀧𑀼𑀭𑀺𑀲𑁄’’𑀢𑀺. 𑀢𑀁𑀦𑀺𑀫𑀺𑀢𑁆𑀢𑀓𑀁 𑀧𑀦 𑀮𑁄𑀓𑀧𑁆𑀧𑀯𑀢𑁆𑀢𑀺𑀁 𑀇𑀘𑁆𑀙𑀦𑁆𑀢𑀸𑀦𑀁 𑀧𑀚𑀸𑀧𑀢𑀺𑀯𑀸𑀤𑁂 𑀧𑀼𑀭𑀺𑀲𑀯𑀸𑀤𑁂 𑀘 𑀇𑀲𑁆𑀲𑀭𑀯𑀸𑀤𑁂 𑀯𑀺𑀬 𑀤𑁄𑀲𑀸 𑀅𑀲𑀺𑀤𑁆𑀥𑀺 𑀘 𑀯𑀺𑀥𑀸𑀢𑀩𑁆𑀩𑀸. 𑀬𑀣𑀸 𑀘𑁂𑀢𑁂 𑀇𑀲𑁆𑀲𑀭𑀸𑀤𑀬𑁄, 𑀏𑀯𑀁 𑀓𑀸𑀮𑁄𑀧𑀺 𑀅𑀲𑀺𑀤𑁆𑀥𑁄 𑀮𑀓𑁆𑀔𑀡𑀸𑀪𑀸𑀯𑀢𑁄. 𑀧𑀭𑀫𑀢𑁆𑀣𑀢𑁄 𑀳𑀺 𑀯𑀺𑀚𑁆𑀚𑀫𑀸𑀦𑀸𑀦𑀁 𑀥𑀫𑁆𑀫𑀸𑀦𑀁 𑀲𑀪𑀸𑀯𑀲𑀗𑁆𑀔𑀸𑀢𑀁 𑀮𑀓𑁆𑀔𑀡𑀁 𑀉𑀧𑀮𑀩𑁆𑀪𑀢𑀺. 𑀬𑀣𑀸 𑀧𑀣𑀯𑀺𑀬𑀸 𑀓𑀣𑀺𑀦𑀢𑀸, 𑀦 𑀏𑀯𑀁 𑀓𑀸𑀮𑀲𑁆𑀲, 𑀢𑀲𑁆𑀫𑀸 𑀦𑀢𑁆𑀣𑀺 𑀧𑀭𑀫𑀢𑁆𑀣𑀢𑁄 𑀓𑀸𑀮𑁄𑀢𑀺. 𑀓𑀸𑀮𑀯𑀸𑀤𑀻 𑀧𑀦𑀸𑀳 ‘‘𑀯𑀢𑁆𑀢𑀦𑀸𑀮𑀓𑁆𑀔𑀡𑁄 𑀓𑀸𑀮𑁄’’𑀢𑀺. 𑀲𑁄 𑀯𑀢𑁆𑀢𑀩𑁆𑀩𑁄 ‘‘𑀓𑀸 𑀧𑀦𑀸𑀬𑀁 𑀯𑀢𑁆𑀢𑀦𑀸’’𑀢𑀺. 𑀲𑁄 𑀆𑀳 ‘‘𑀲𑀫𑀬𑀫𑀼𑀳𑀼𑀢𑁆𑀢𑀸𑀤𑀻𑀦𑀁 𑀧𑀯𑀢𑁆𑀢𑀻’’𑀢𑀺. 𑀢𑀫𑁆𑀧𑀺 𑀦, 𑀭𑀽𑀧𑀸𑀤𑀻𑀳𑀺 𑀅𑀢𑁆𑀣𑀦𑁆𑀢𑀭𑀪𑀸𑀯𑁂𑀦 𑀅𑀦𑀺𑀤𑁆𑀥𑀸𑀭𑀺𑀢𑀢𑁆𑀢𑀸. 𑀧𑀭𑀫𑀢𑁆𑀣𑀢𑁄 𑀳𑀺 𑀅𑀦𑀺𑀤𑁆𑀥𑀸𑀭𑀺𑀢𑀲𑀪𑀸𑀯𑀲𑁆𑀲 𑀯𑀢𑁆𑀢𑀦𑀸𑀮𑀓𑁆𑀔𑀡𑀢𑀸𑀬𑀁 𑀲𑀲𑀯𑀺𑀲𑀸𑀡𑀸𑀤𑀻𑀦𑀫𑁆𑀧𑀺 𑀢𑀁𑀮𑀓𑁆𑀔𑀡𑀢𑀸 𑀆𑀧𑀚𑁆𑀚𑁂𑀬𑁆𑀬.

𑀬𑀁 𑀧𑀦 𑀯𑀤𑀦𑁆𑀢𑀺 𑀓𑀸𑀡𑀸𑀤𑀸 ‘‘𑀅𑀧𑀭𑀲𑁆𑀫𑀺𑀁 𑀅𑀧𑀭𑀁 𑀬𑀼𑀕𑀧𑀤𑀺 𑀘𑀺𑀭𑀁 𑀔𑀺𑀧𑁆𑀧𑀫𑀺𑀢𑀺 𑀓𑀸𑀮𑀮𑀺𑀗𑁆𑀕𑀸𑀦𑀻𑀢𑀺 𑀮𑀺𑀗𑁆𑀕𑀲𑀩𑁆𑀪𑀸𑀯𑀢𑁄 𑀅𑀢𑁆𑀣𑀺 𑀓𑀸𑀮𑁄’’𑀢𑀺, 𑀢𑀁 𑀅𑀬𑀼𑀢𑁆𑀢𑀁 𑀮𑀺𑀗𑁆𑀕𑀺𑀦𑁄 𑀅𑀦𑀼𑀧𑀮𑀩𑁆𑀪𑀫𑀸𑀦𑀢𑁆𑀢𑀸. 𑀲𑀺𑀤𑁆𑀥𑀲𑀫𑁆𑀩𑀦𑁆𑀥𑁂𑀲𑀼 𑀳𑀺 𑀮𑀺𑀗𑁆𑀕𑁂𑀲𑀼 𑀮𑀺𑀗𑁆𑀕𑀫𑀢𑁆𑀢𑀕𑁆𑀕𑀳𑀡𑁂𑀦 𑀮𑀺𑀗𑁆𑀕𑀺𑀦𑀺 𑀅𑀯𑀩𑁄𑀥𑁄 𑀪𑀯𑁂𑀬𑁆𑀬. 𑀦 𑀘 𑀓𑁂𑀦𑀘𑀺 𑀅𑀯𑀺𑀧𑀭𑀻𑀢𑀘𑁂𑀢𑀲𑀸 𑀢𑁂𑀦 𑀮𑀺𑀗𑁆𑀕𑁂𑀦 𑀲𑀳 𑀓𑀤𑀸𑀘𑀺 𑀓𑀸𑀮𑀲𑀗𑁆𑀔𑀸𑀢𑁄 𑀮𑀺𑀗𑁆𑀕𑀻 𑀕𑀳𑀺𑀢𑀧𑀼𑀩𑁆𑀩𑁄𑀢𑀺. 𑀅𑀢𑁄 𑀦 𑀬𑀼𑀢𑁆𑀢𑀁 ‘‘𑀮𑀺𑀗𑁆𑀕𑀲𑀩𑁆𑀪𑀸𑀯𑀢𑁄 𑀅𑀢𑁆𑀣𑀺 𑀓𑀸𑀮𑁄’’𑀢𑀺. ‘‘𑀅𑀧𑀭𑀲𑁆𑀫𑀺𑀁 𑀅𑀧𑀭’’𑀦𑁆𑀢𑀺𑀆𑀤𑀺𑀓𑀲𑁆𑀲 𑀯𑀺𑀲𑁂𑀲𑀲𑁆𑀲 𑀦𑀺𑀫𑀺𑀢𑁆𑀢𑀪𑀸𑀯𑀢𑁄 𑀬𑀼𑀢𑁆𑀢𑀦𑁆𑀢𑀺 𑀘𑁂? 𑀦, 𑀧𑀞𑀫𑀚𑀸𑀢𑀢𑀸𑀤𑀺𑀦𑀺𑀫𑀺𑀢𑁆𑀢𑀓𑀢𑁆𑀢𑀸 𑀢𑀲𑁆𑀲. 𑀦 𑀘 𑀧𑀞𑀫𑀚𑀸𑀢𑀢𑀸𑀤𑀺 𑀦𑀸𑀫 𑀓𑁄𑀘𑀺 𑀥𑀫𑁆𑀫𑁄 𑀅𑀢𑁆𑀣𑀺 𑀅𑀜𑁆𑀜𑀢𑁆𑀭 𑀲𑀫𑀜𑁆𑀜𑀸𑀫𑀢𑁆𑀢𑀢𑁄𑀢𑀺 𑀦𑀢𑁆𑀣𑁂𑀯 𑀧𑀭𑀫𑀢𑁆𑀣𑀢𑁄 𑀓𑀸𑀮𑁄. 𑀓𑀺𑀜𑁆𑀘 𑀪𑀺𑀬𑁆𑀬𑁄, 𑀩𑀳𑀽𑀦𑀁 𑀏𑀓𑀪𑀸𑀯𑀸𑀧𑀢𑁆𑀢𑀺𑀢𑁄. 𑀅𑀢𑀻𑀢𑀸𑀤𑀺𑀯𑀺𑀪𑀸𑀕𑁂𑀦 𑀳𑀺 𑀮𑁄𑀓𑀲𑀫𑀜𑁆𑀜𑀸𑀯𑀲𑁂𑀦 𑀩𑀳𑀽 𑀓𑀸𑀮𑀪𑁂𑀤𑀸. 𑀢𑁆𑀯𑀜𑁆𑀘𑁂𑀢𑀁 𑀏𑀓𑀁 𑀯𑀤𑀲𑀻𑀢𑀺 𑀩𑀳𑀽𑀦𑀁 𑀏𑀓𑀪𑀸𑀯𑀸𑀪𑀸𑀯𑀢𑁄 𑀦𑀢𑁆𑀣𑁂𑀯 𑀧𑀭𑀫𑀢𑁆𑀣𑀢𑁄 𑀓𑀸𑀮𑁄. 𑀢𑀣𑀸 𑀏𑀓𑀲𑁆𑀲 𑀅𑀦𑁂𑀓𑀪𑀸𑀯𑀸𑀧𑀢𑁆𑀢𑀺𑀢𑁄. 𑀬𑁄 𑀳𑀺 𑀅𑀬𑀁 𑀅𑀚𑁆𑀚 𑀯𑀢𑁆𑀢𑀫𑀸𑀦𑀓𑀸𑀮𑁄, 𑀲𑁄 𑀳𑀺𑀬𑁆𑀬𑁄 𑀅𑀦𑀸𑀕𑀢𑁄 𑀅𑀳𑁄𑀲𑀺, 𑀲𑁆𑀯𑁂 𑀅𑀢𑀻𑀢𑁄 𑀪𑀯𑀺𑀲𑁆𑀲𑀢𑀺. 𑀳𑀺𑀬𑁆𑀬𑁄 𑀘 𑀯𑀢𑁆𑀢𑀫𑀸𑀦𑁄 𑀅𑀚𑁆𑀚 𑀅𑀢𑀻𑀢𑁄 𑀅𑀳𑁄𑀲𑀺, 𑀢𑀣𑀸 𑀲𑁆𑀯𑁂 𑀯𑀢𑁆𑀢𑀫𑀸𑀦𑁄𑀧𑀺 𑀅𑀧𑀭𑀚𑁆𑀚. 𑀦 𑀘𑁂𑀓𑀲𑀪𑀸𑀯𑀲𑁆𑀲 𑀅𑀦𑁂𑀓𑀲𑀪𑀸𑀯𑀢𑀸 𑀬𑀼𑀢𑁆𑀢𑀸𑀢𑀺 𑀅𑀲𑀺𑀤𑁆𑀥𑁄 𑀧𑀭𑀫𑀢𑁆𑀣𑀢𑁄 𑀓𑀸𑀮𑁄. 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀁 𑀧𑀦 𑀉𑀧𑀸𑀤𑀸𑀬 𑀓𑀧𑁆𑀧𑀦𑀸𑀫𑀢𑁆𑀢𑀲𑀺𑀤𑁆𑀥𑀸𑀬 𑀮𑁄𑀓𑀲𑀫𑀜𑁆𑀜𑀸𑀬 𑀅𑀢𑀻𑀢𑀸𑀤𑀺𑀯𑀺𑀪𑀸𑀕𑀢𑁄 𑀯𑁄𑀳𑀭𑀻𑀬𑀢𑀻𑀢𑀺 𑀯𑁄𑀳𑀸𑀭𑀫𑀢𑁆𑀢𑀓𑁄𑀢𑀺 𑀤𑀝𑁆𑀞𑀩𑁆𑀩𑁄.

𑀲𑀪𑀸𑀯𑀦𑀺𑀬𑀢𑀺𑀬𑀤𑀺𑀘𑁆𑀙𑀸𑀤𑀬𑁄𑀧𑀺 𑀅𑀲𑀺𑀤𑁆𑀥𑀸. 𑀓𑀺𑀁 𑀓𑀸𑀭𑀡𑀸? 𑀮𑀓𑁆𑀔𑀡𑀸𑀪𑀸𑀯𑀸. 𑀦 𑀳𑀺 𑀲𑀪𑀸𑀯𑀢𑁄 𑀦𑀺𑀬𑀢𑀺𑀬𑀤𑀺𑀘𑁆𑀙𑀸 𑀲𑀫𑁆𑀪𑀯𑀢𑀺. 𑀅𑀜𑁆𑀜𑀣𑀸 𑀏𑀯𑀁𑀯𑀺𑀥𑁄 𑀓𑁄𑀘𑀺 𑀪𑀸𑀯𑁄 𑀅𑀢𑁆𑀣𑀺 𑀘𑁂, 𑀢𑁂𑀲𑀁 𑀲𑀪𑀸𑀯𑀲𑀗𑁆𑀔𑀸𑀢𑁂𑀦 𑀮𑀓𑁆𑀔𑀡𑁂𑀦 𑀪𑀯𑀺𑀢𑀩𑁆𑀩𑀁, 𑀧𑀢𑀺𑀝𑁆𑀞𑀸𑀧𑀓𑀳𑁂𑀢𑀼𑀦𑀸 𑀘 𑀦 𑀘𑀢𑁆𑀣𑀺. 𑀓𑁂𑀯𑀮𑀁 𑀧𑀦𑁂𑀢𑁂 𑀯𑀸𑀤𑀸 𑀯𑀺𑀫𑀤𑁆𑀤𑀺𑀬𑀫𑀸𑀦𑀸 𑀅𑀳𑁂𑀢𑀼𑀯𑀸𑀤𑁂 𑀏𑀯 𑀢𑀺𑀝𑁆𑀞𑀦𑁆𑀢𑀺, 𑀦 𑀘𑀸𑀳𑁂𑀢𑀼𑀓𑀁 𑀮𑁄𑀓𑀯𑀺𑀘𑀺𑀢𑁆𑀢𑀁 𑀯𑀺𑀲𑁂𑀲𑀸𑀪𑀸𑀯𑀧𑁆𑀧𑀲𑀗𑁆𑀕𑀢𑁄. 𑀅𑀳𑁂𑀢𑀼𑀓𑀪𑀸𑀯𑁂 𑀳𑀺 𑀧𑀯𑀢𑁆𑀢𑀺𑀬𑀸 𑀬𑁆𑀯𑀸𑀬𑀁 𑀦𑀭𑀲𑀼𑀭𑀦𑀺𑀭𑀬𑀢𑀺𑀭𑀘𑁆𑀙𑀸𑀦𑀸𑀤𑀻𑀲𑀼 𑀇𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀯𑀺𑀲𑁂𑀲𑁄, 𑀢𑀲𑁆𑀲 𑀅𑀪𑀸𑀯𑁄 𑀆𑀧𑀚𑁆𑀚𑀢𑀺, 𑀦 𑀘𑀸𑀬𑀁 𑀧𑀡𑁆𑀟𑀺𑀢𑁂𑀳𑀺 𑀇𑀘𑁆𑀙𑀺𑀢𑁄. 𑀓𑀺𑀜𑁆𑀘? 𑀤𑀺𑀝𑁆𑀞𑀪𑀸𑀯𑀢𑁄. 𑀤𑀺𑀝𑁆𑀞𑀸 𑀳𑀺 𑀘𑀓𑁆𑀔𑀸𑀤𑀺𑀢𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀩𑀻𑀚𑀸𑀤𑀺𑀢𑁄 𑀅𑀗𑁆𑀓𑀼𑀭𑀸𑀤𑀻𑀦𑀁 𑀧𑀯𑀢𑁆𑀢𑀺, 𑀢𑀲𑁆𑀫𑀸𑀧𑀺 𑀳𑁂𑀢𑀼𑀢𑁄𑀯𑀸𑀬𑀁 𑀧𑀯𑀢𑁆𑀢𑀺. 𑀢𑀣𑀸 𑀧𑀼𑀭𑁂 𑀧𑀘𑁆𑀙𑀸 𑀘 𑀅𑀪𑀸𑀯𑀢𑁄. 𑀬𑀢𑁄 𑀬𑀢𑁄 𑀳𑀺 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀢𑁄 𑀬𑀁 𑀬𑀁 𑀨𑀮𑀁 𑀦𑀺𑀩𑁆𑀩𑀢𑁆𑀢𑀢𑀺, 𑀢𑀢𑁄 𑀧𑀼𑀩𑁆𑀩𑁂 𑀧𑀘𑁆𑀙𑀸 𑀘 𑀦 𑀢𑀲𑁆𑀲 𑀦𑀺𑀩𑁆𑀩𑀢𑁆𑀢𑀺 𑀲𑀫𑁆𑀪𑀯𑀢𑀺, 𑀓𑀺𑀜𑁆𑀘 𑀩𑀳𑀼𑀦𑀸. 𑀬𑀤𑀺 𑀅𑀳𑁂𑀢𑀼𑀢𑁄 𑀧𑀯𑀢𑁆𑀢𑀺 𑀲𑀺𑀬𑀸, 𑀅𑀳𑁂𑀢𑀼𑀓𑀸 𑀧𑀯𑀢𑁆𑀢𑀻𑀢𑀺 𑀇𑀫𑀸𑀧𑀺 𑀯𑀸𑀘𑀸 𑀬𑀣𑀸𑀲𑀓𑀧𑀘𑁆𑀘𑀬𑀲𑀫𑀯𑀸𑀬𑀢𑁄 𑀧𑀼𑀭𑁂 𑀧𑀘𑁆𑀙𑀸 𑀘 𑀪𑀯𑁂𑀬𑁆𑀬𑀼𑀁, 𑀦 𑀘 𑀪𑀯𑀦𑁆𑀢𑀺 𑀅𑀮𑀤𑁆𑀥𑀧𑁆𑀧𑀘𑁆𑀘𑀬𑀢𑁆𑀢𑀸, 𑀫𑀚𑁆𑀛𑁂 𑀏𑀯 𑀘 𑀪𑀯𑀦𑁆𑀢𑀺 𑀮𑀤𑁆𑀥𑀧𑁆𑀧𑀘𑁆𑀘𑀬𑀢𑁆𑀢𑀸. 𑀏𑀯𑀁 𑀲𑀩𑁆𑀩𑁂𑀧𑀺 𑀲𑀗𑁆𑀔𑀢𑀸 𑀥𑀫𑁆𑀫𑀸𑀢𑀺 𑀦 𑀲𑀺𑀚𑁆𑀛𑀢𑀺 𑀅𑀳𑁂𑀢𑀼𑀯𑀸𑀤𑁄. 𑀢𑀲𑁆𑀫𑀺𑀜𑁆𑀘 𑀅𑀲𑀺𑀤𑁆𑀥𑁂 𑀧𑀯𑀢𑁆𑀢𑀺𑀬𑀸 𑀅𑀳𑁂𑀢𑀼𑀪𑀸𑀯𑁄 𑀯𑀺𑀬 𑀅𑀳𑁂𑀢𑀼𑀧𑀭𑀺𑀬𑀸𑀬𑀯𑀺𑀲𑁂𑀲𑀪𑀽𑀢𑀸 𑀲𑀪𑀸𑀯𑀦𑀺𑀬𑀢𑀺𑀬𑀤𑀺𑀘𑁆𑀙𑀸𑀤𑀬𑁄𑀧𑀺 𑀅𑀲𑀺𑀤𑁆𑀥𑀸 𑀏𑀯 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀬𑀁 𑀧𑀦 𑀓𑀸𑀡𑀸𑀤𑀸 ‘‘𑀧𑀭𑀫𑀸𑀡𑀯𑁄 𑀦𑀺𑀘𑁆𑀘𑀸, 𑀢𑁂𑀳𑀺 𑀤𑁆𑀯𑀺𑀅𑀡𑀼𑀓𑀸𑀤𑀺𑀨𑀮𑀁 𑀦𑀺𑀩𑁆𑀩𑀢𑁆𑀢𑀢𑀺, 𑀢𑀜𑁆𑀘 𑀅𑀦𑀺𑀘𑁆𑀘𑀁, 𑀢𑀲𑁆𑀲 𑀯𑀲𑁂𑀦𑁂𑀢𑀁 𑀮𑁄𑀓𑀯𑀺𑀘𑀺𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀫𑁆𑀧𑀺 𑀫𑀺𑀘𑁆𑀙𑀸𑀧𑀭𑀺𑀓𑀧𑁆𑀧𑀫𑀢𑁆𑀢𑀁. 𑀦 𑀳𑀺 𑀧𑀭𑀫𑀸𑀡𑀯𑁄 𑀦𑀸𑀫 𑀲𑀦𑁆𑀢𑀺 𑀅𑀜𑁆𑀜𑀢𑁆𑀭 𑀪𑀽𑀢𑀲𑀗𑁆𑀖𑀸𑀢𑀸. 𑀲𑁄 𑀧𑀦 𑀅𑀦𑀺𑀘𑁆𑀘𑁄𑀯, 𑀦 𑀘 𑀦𑀺𑀘𑁆𑀘𑀢𑁄 𑀅𑀦𑀺𑀘𑁆𑀘𑀲𑁆𑀲 𑀦𑀺𑀩𑁆𑀩𑀢𑁆𑀢𑀺 𑀬𑀼𑀢𑁆𑀢𑀸 𑀢𑀲𑁆𑀲 𑀓𑀸𑀭𑀡𑀪𑀸𑀯𑀸𑀦𑀼𑀧𑀧𑀢𑁆𑀢𑀺𑀢𑁄 𑀢𑀣𑀸 𑀅𑀤𑀲𑁆𑀲𑀦𑀢𑁄 𑀘. 𑀬𑀤𑀺 𑀘 𑀲𑁄 𑀓𑀲𑁆𑀲𑀘𑀺 𑀓𑀸𑀭𑀡𑀪𑀸𑀯𑀁 𑀕𑀘𑁆𑀙𑁂𑀬𑁆𑀬, 𑀅𑀦𑀺𑀘𑁆𑀘𑁄 𑀏𑀯 𑀲𑀺𑀬𑀸 𑀯𑀺𑀓𑀸𑀭𑀸𑀧𑀢𑁆𑀢𑀺𑀢𑁄. 𑀦 𑀘𑀸𑀬𑀁 𑀲𑀫𑁆𑀪𑀯𑁄 𑀅𑀢𑁆𑀣𑀺, 𑀬𑀁 𑀯𑀺𑀓𑀸𑀭𑀁 𑀅𑀦𑀸𑀧𑀚𑁆𑀚𑀦𑁆𑀢𑀫𑁂𑀯 𑀓𑀸𑀭𑀡𑀁 𑀨𑀮𑀁 𑀦𑀺𑀩𑁆𑀩𑀢𑁆𑀢𑁂𑀬𑁆𑀬𑀸𑀢𑀺. 𑀯𑀺𑀓𑀸𑀭𑀜𑁆𑀘𑁂 𑀆𑀧𑀚𑁆𑀚𑀢𑀺, 𑀓𑀼𑀢𑀲𑁆𑀲 𑀦𑀺𑀘𑁆𑀘𑀢𑀸𑀯𑀓𑀸𑀲𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀧𑀭𑀫𑀸𑀡𑀯𑁄 𑀲𑀢𑁆𑀢𑀸 𑀅𑀦𑀺𑀘𑁆𑀘𑀸, 𑀅𑀜𑁆𑀜𑁂𑀧𑀺 𑀦𑀺𑀘𑁆𑀘𑀸𑀤𑀺𑀪𑀸𑀯𑁂𑀦 𑀩𑀸𑀳𑀺𑀭𑀓𑁂𑀳𑀺 𑀧𑀭𑀺𑀓𑀧𑁆𑀧𑀺𑀢𑀸 𑀅𑀲𑀺𑀤𑁆𑀥𑀸 𑀏𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀥𑀫𑁆𑀫𑀧𑁆𑀧𑀪𑁂𑀤𑀢𑁄 𑀧𑀦 𑀅𑀜𑁆𑀜𑀲𑁆𑀲 𑀲𑀘𑁆𑀘𑀺𑀓𑀝𑁆𑀞𑀲𑁆𑀲 𑀅𑀲𑀺𑀤𑁆𑀥𑀢𑁆𑀢𑀸’’𑀢𑀺.

𑀏𑀢𑁆𑀣𑀸𑀳 ‘‘𑀬𑀤𑀺 𑀧𑀭𑀫𑀢𑁆𑀣𑀢𑁄 𑀧𑀼𑀕𑁆𑀕𑀮𑁄 𑀦 𑀉𑀧𑀮𑀩𑁆𑀪𑀢𑀺, 𑀏𑀯𑀁 𑀧𑀦 𑀧𑀼𑀕𑁆𑀕𑀮𑁂 𑀅𑀦𑀼𑀧𑀮𑀩𑁆𑀪𑀫𑀸𑀦𑁂 𑀅𑀣 𑀓𑀲𑁆𑀫𑀸 𑀪𑀕𑀯𑀸 ‘𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄’𑀢𑀺 (𑀅. 𑀦𑀺. 𑁪.𑁯𑁫; 𑀓𑀣𑀸. 𑁨𑁨), ‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺’𑀦𑁆𑀢𑀺 (𑀅. 𑀦𑀺. 𑁪.𑁯𑁫; 𑀓𑀣𑀸. 𑁨𑁨) 𑀘 𑀢𑀢𑁆𑀣 𑀢𑀢𑁆𑀣 𑀧𑀼𑀕𑁆𑀕𑀮𑀲𑁆𑀲 𑀅𑀢𑁆𑀣𑀺𑀪𑀸𑀯𑀁 𑀧𑀯𑁂𑀤𑁂𑀲𑀻’’𑀢𑀺. 𑀯𑀺𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀲𑁂𑀦. 𑀢𑀣𑀸 𑀢𑀣𑀸 𑀯𑀺𑀦𑁂𑀢𑀩𑁆𑀩𑀸𑀦𑀜𑁆𑀳𑀺 𑀧𑀼𑀕𑁆𑀕𑀮𑀸𑀦𑀁 𑀅𑀚𑁆𑀛𑀸𑀲𑀬𑀯𑀲𑁂𑀦 𑀯𑀺𑀦𑁂𑀬𑁆𑀬𑀤𑀫𑀦𑀓𑀼𑀲𑀮𑁄 𑀲𑀢𑁆𑀣𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀮𑁄𑀓𑀲𑀫𑀜𑁆𑀜𑀸𑀦𑀼𑀭𑀽𑀧𑀁 𑀢𑀢𑁆𑀣 𑀢𑀢𑁆𑀣 𑀧𑀼𑀕𑁆𑀕𑀮𑀕𑁆𑀕𑀳𑀡𑀁 𑀓𑀭𑁄𑀢𑀺, 𑀦 𑀧𑀭𑀫𑀢𑁆𑀣𑀢𑁄 𑀧𑀼𑀕𑁆𑀕𑀮𑀲𑁆𑀲 𑀅𑀢𑁆𑀣𑀺𑀪𑀸𑀯𑀢𑁄.

𑀅𑀧𑀺𑀘 𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀺 𑀪𑀕𑀯𑀸 𑀧𑀼𑀕𑁆𑀕𑀮𑀓𑀣𑀁 𑀓𑀣𑁂𑀢𑀺 𑀳𑀺𑀭𑁄𑀢𑁆𑀢𑀧𑁆𑀧𑀤𑀻𑀧𑀦𑀢𑁆𑀣𑀁, 𑀓𑀫𑁆𑀫𑀲𑁆𑀲𑀓𑀢𑀸𑀤𑀻𑀧𑀦𑀢𑁆𑀣𑀁, 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑀤𑀻𑀧𑀦𑀢𑁆𑀣𑀁, 𑀆𑀦𑀦𑁆𑀢𑀭𑀺𑀬𑀤𑀻𑀧𑀦𑀢𑁆𑀣𑀁, 𑀩𑁆𑀭𑀳𑁆𑀫𑀯𑀺𑀳𑀸𑀭𑀤𑀻𑀧𑀦𑀢𑁆𑀣𑀁, 𑀧𑀼𑀩𑁆𑀩𑁂𑀦𑀺𑀯𑀸𑀲𑀤𑀻𑀧𑀦𑀢𑁆𑀣𑀁, 𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺𑀤𑀻𑀧𑀦𑀢𑁆𑀣𑀁, 𑀮𑁄𑀓𑀲𑀫𑁆𑀫𑀼𑀢𑀺𑀬𑀸 𑀅𑀧𑁆𑀧𑀳𑀸𑀦𑀢𑁆𑀣𑀜𑁆𑀘𑀸𑀢𑀺. ‘‘𑀔𑀦𑁆𑀥𑀸 𑀥𑀸𑀢𑀽 𑀆𑀬𑀢𑀦𑀸𑀦𑀺 𑀳𑀺𑀭𑀻𑀬𑀦𑁆𑀢𑀺 𑀑𑀢𑁆𑀢𑀧𑁆𑀧𑀦𑁆𑀢𑀻’’𑀢𑀺 𑀳𑀺 𑀯𑀼𑀢𑁆𑀢𑁂 𑀫𑀳𑀸𑀚𑀦𑁄 𑀦 𑀚𑀸𑀦𑀸𑀢𑀺, 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺, 𑀧𑀝𑀺𑀲𑀢𑁆𑀢𑀼 𑀯𑀸 𑀳𑁄𑀢𑀺 ‘‘𑀓𑀺𑀫𑀺𑀤𑀁 𑀔𑀦𑁆𑀥𑀸 𑀥𑀸𑀢𑀽 𑀆𑀬𑀢𑀦𑀸𑀦𑀺 𑀳𑀺𑀭𑀻𑀬𑀦𑁆𑀢𑀺 𑀑𑀢𑁆𑀢𑀧𑁆𑀧𑀦𑁆𑀢𑀺 𑀦𑀸𑀫𑀸’’𑀢𑀺. ‘‘𑀇𑀢𑁆𑀣𑀻 𑀳𑀺𑀭𑀻𑀬𑀢𑀺 𑀑𑀢𑁆𑀢𑀧𑁆𑀧𑀢𑀺, 𑀧𑀼𑀭𑀺𑀲𑁄, 𑀔𑀢𑁆𑀢𑀺𑀬𑁄, 𑀩𑁆𑀭𑀸𑀳𑁆𑀫𑀡𑁄’’𑀢𑀺 𑀧𑀦 𑀯𑀼𑀢𑁆𑀢𑁂 𑀚𑀸𑀦𑀸𑀢𑀺, 𑀦 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺, 𑀦 𑀧𑀝𑀺𑀲𑀢𑁆𑀢𑀼 𑀳𑁄𑀢𑀺, 𑀢𑀲𑁆𑀫𑀸 𑀪𑀕𑀯𑀸 𑀳𑀺𑀭𑁄𑀢𑁆𑀢𑀧𑁆𑀧𑀤𑀻𑀧𑀦𑀢𑁆𑀣𑀁 𑀧𑀼𑀕𑁆𑀕𑀮𑀓𑀣𑀁 𑀓𑀣𑁂𑀢𑀺. ‘‘𑀔𑀦𑁆𑀥𑀸 𑀓𑀫𑁆𑀫𑀲𑁆𑀲𑀓𑀸, 𑀥𑀸𑀢𑀼𑀬𑁄 𑀆𑀬𑀢𑀦𑀸𑀦𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀲𑁆𑀫𑀸 𑀓𑀫𑁆𑀫𑀲𑁆𑀲𑀓𑀢𑀸𑀤𑀻𑀧𑀦𑀢𑁆𑀣𑀫𑁆𑀧𑀺 𑀧𑀼𑀕𑁆𑀕𑀮𑀓𑀣𑀁 𑀓𑀣𑁂𑀢𑀺. ‘‘𑀯𑁂𑀴𑀼𑀯𑀦𑀸𑀤𑀬𑁄 𑀫𑀳𑀸𑀯𑀺𑀳𑀸𑀭𑀸 𑀔𑀦𑁆𑀥𑁂𑀳𑀺 𑀓𑀸𑀭𑀸𑀧𑀺𑀢𑀸, 𑀥𑀸𑀢𑀽𑀳𑀺, 𑀆𑀬𑀢𑀦𑁂𑀳𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀣𑀸 ‘‘𑀔𑀦𑁆𑀥𑀸 𑀫𑀸𑀢𑀭𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀦𑁆𑀢𑀺, 𑀧𑀺𑀢𑀭𑀁, 𑀅𑀭𑀳𑀦𑁆𑀢𑀁, 𑀭𑀼𑀳𑀺𑀭𑀼𑀧𑁆𑀧𑀸𑀤𑀓𑀫𑁆𑀫𑀁, 𑀲𑀗𑁆𑀖𑀪𑁂𑀤𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀥𑀸𑀢𑀼𑀬𑁄, 𑀆𑀬𑀢𑀦𑀸𑀦𑀻’’𑀢𑀺 𑀯𑀼𑀢𑁆𑀢𑁂𑀧𑀺, ‘‘𑀔𑀦𑁆𑀥𑀸 𑀫𑁂𑀢𑁆𑀢𑀸𑀬𑀦𑁆𑀢𑀺, 𑀥𑀸𑀢𑀼𑀬𑁄, 𑀆𑀬𑀢𑀦𑀸𑀦𑀻’’𑀢𑀺 𑀯𑀼𑀢𑁆𑀢𑁂𑀧𑀺, ‘‘𑀔𑀦𑁆𑀥𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀦𑁆𑀢𑀺, 𑀥𑀸𑀢𑀼𑀬𑁄, 𑀆𑀬𑀢𑀦𑀸𑀦𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀲𑁆𑀫𑀸 𑀪𑀕𑀯𑀸 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑀤𑀻𑀧𑀦𑀢𑁆𑀣𑀁 𑀆𑀦𑀦𑁆𑀢𑀭𑀺𑀬𑀤𑀻𑀧𑀦𑀢𑁆𑀣𑀁 𑀩𑁆𑀭𑀳𑁆𑀫𑀯𑀺𑀳𑀸𑀭𑀤𑀻𑀧𑀦𑀢𑁆𑀣𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀤𑀻𑀧𑀦𑀢𑁆𑀣𑀜𑁆𑀘 𑀧𑀼𑀕𑁆𑀕𑀮𑀓𑀣𑀁 𑀓𑀣𑁂𑀢𑀺. ‘‘𑀔𑀦𑁆𑀥𑀸 𑀤𑀸𑀦𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺, 𑀥𑀸𑀢𑀼𑀬𑁄, 𑀆𑀬𑀢𑀦𑀸𑀦𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀫𑀳𑀸𑀚𑀦𑁄 𑀦 𑀚𑀸𑀦𑀸𑀢𑀺, 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺, 𑀧𑀝𑀺𑀲𑀢𑁆𑀢𑀼 𑀯𑀸 𑀳𑁄𑀢𑀺 ‘‘𑀓𑀺𑀫𑀺𑀤𑀁 𑀔𑀦𑁆𑀥𑀸 𑀥𑀸𑀢𑀽 𑀆𑀬𑀢𑀦𑀸𑀦𑀺 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺 𑀦𑀸𑀫𑀸’’𑀢𑀺. ‘‘𑀧𑀼𑀕𑁆𑀕𑀮𑁄 𑀧𑀝𑀺𑀕𑁆𑀕𑀡𑁆𑀳𑀸𑀢𑀻’’𑀢𑀺 𑀧𑀦 𑀯𑀼𑀢𑁆𑀢𑁂 𑀚𑀸𑀦𑀸𑀢𑀺, 𑀦 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺, 𑀦 𑀧𑀝𑀺𑀲𑀢𑁆𑀢𑀼 𑀳𑁄𑀢𑀺, 𑀢𑀲𑁆𑀫𑀸 𑀪𑀕𑀯𑀸 𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺𑀤𑀻𑀧𑀦𑀢𑁆𑀣𑀁 𑀧𑀼𑀕𑁆𑀕𑀮𑀓𑀣𑀁 𑀓𑀣𑁂𑀢𑀺. 𑀮𑁄𑀓𑀲𑀫𑁆𑀫𑀼𑀢𑀺𑀜𑁆𑀘 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀦𑀧𑁆𑀧𑀚𑀳𑀦𑁆𑀢𑀺 𑀮𑁄𑀓𑀲𑀫𑀜𑁆𑀜𑀸𑀬 𑀮𑁄𑀓𑀸𑀪𑀺𑀮𑀸𑀧𑁂 𑀞𑀺𑀢𑀸𑀬𑁂𑀯 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺, 𑀢𑀲𑁆𑀫𑀸 𑀪𑀕𑀯𑀸 𑀮𑁄𑀓𑀲𑀫𑁆𑀫𑀼𑀢𑀺𑀬𑀸 𑀅𑀧𑁆𑀧𑀳𑀸𑀦𑀢𑁆𑀣𑀫𑁆𑀧𑀺 𑀧𑀼𑀕𑁆𑀕𑀮𑀓𑀣𑀁 𑀓𑀣𑁂𑀢𑀻𑀢𑀺 𑀇𑀫𑁂𑀳𑀺 𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀺 𑀪𑀕𑀯𑀸 𑀧𑀼𑀕𑁆𑀕𑀮𑀓𑀣𑀁 𑀓𑀣𑁂𑀢𑀺, 𑀦 𑀧𑀭𑀫𑀢𑁆𑀣𑀢𑁄 𑀧𑀼𑀕𑁆𑀕𑀮𑀲𑁆𑀲 𑀅𑀢𑁆𑀣𑀺𑀪𑀸𑀯𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀥𑀫𑁆𑀫𑀧𑁆𑀧𑀪𑁂𑀤𑀸𑀓𑀸𑀭𑁂𑀦𑁂𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑀭𑀽𑀧𑀸𑀤𑀺𑀥𑀫𑁆𑀫𑀧𑁆𑀧𑀪𑁂𑀤𑀢𑁄 𑀅𑀜𑁆𑀜𑀲𑁆𑀲 𑀲𑀘𑁆𑀘𑀺𑀓𑀝𑁆𑀞𑀲𑁆𑀲 𑀅𑀲𑀺𑀤𑁆𑀥𑀢𑁆𑀢𑀸 𑀭𑀽𑀧𑀸𑀤𑀺𑀥𑀫𑁆𑀫𑀧𑁆𑀧𑀪𑁂𑀤𑀸𑀓𑀸𑀭𑁂𑀦𑁂𑀯 𑀧𑀼𑀕𑁆𑀕𑀮𑀲𑁆𑀲 𑀉𑀧𑀮𑀤𑁆𑀥𑀺𑀬𑀸 𑀪𑀯𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦 ‘‘𑀓𑀺𑀁 𑀢𑀯 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀫𑀸𑀦𑁄 𑀭𑀼𑀧𑁆𑀧𑀦𑀸𑀓𑀸𑀭𑁂𑀦 𑀉𑀧𑀮𑀩𑁆𑀪𑀢𑀺, 𑀉𑀤𑀸𑀳𑀼 𑀅𑀦𑀼𑀪𑀯𑀦𑀲𑀜𑁆𑀚𑀸𑀦𑀦𑀸𑀪𑀺𑀲𑀗𑁆𑀔𑀭𑀡𑀯𑀺𑀚𑀸𑀦𑀦𑁂𑀲𑀼 𑀅𑀜𑁆𑀜𑀢𑀭𑀸𑀓𑀸𑀭𑁂𑀦𑀸’’𑀢𑀺 𑀤𑀲𑁆𑀲𑁂𑀢𑀺 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀲𑁆𑀲 𑀲𑀪𑀸𑀯𑀥𑀫𑁆𑀫𑀲𑁆𑀲 𑀮𑁄𑀓𑁂 𑀅𑀪𑀸𑀯𑀢𑁄. 𑀅𑀯𑀺𑀲𑁂𑀲𑀯𑀺𑀲𑁂𑀲𑁂𑀳𑀺 𑀧𑀼𑀕𑁆𑀕𑀮𑀽𑀧𑀮𑀩𑁆𑀪𑀲𑁆𑀲 𑀧𑀝𑀺𑀜𑁆𑀜𑀸𑀧𑀝𑀺𑀓𑁆𑀔𑁂𑀧𑀧𑀓𑁆𑀔𑀸 𑀅𑀦𑀼𑀚𑀸𑀦𑀦𑀸𑀯𑀚𑀸𑀦𑀦𑀧𑀓𑁆𑀔𑀸. 𑀬𑀤𑀺𑀧𑀺𑀫𑁂 𑀤𑁆𑀯𑁂𑀧𑀺 𑀧𑀓𑁆𑀔𑀸 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀦𑀬𑁂𑀲𑀼 𑀮𑀩𑁆𑀪𑀦𑁆𑀢𑀺, 𑀆𑀤𑀺𑀢𑁄 𑀧𑀦 𑀧𑀞𑀫𑀁 𑀞𑀧𑁂𑀢𑁆𑀯𑀸 𑀧𑀯𑀢𑁆𑀢𑁄 𑀧𑀞𑀫𑀦𑀬𑁄, 𑀇𑀢𑀭𑁄 𑀤𑀼𑀢𑀺𑀬𑀦𑁆𑀢𑀺 𑀇𑀫𑀁 𑀦𑁂𑀲𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀦𑀼𑀚𑀸𑀦𑀦𑀸…𑀧𑁂… 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀆𑀳. 𑀬𑀣𑀸𑀥𑀺𑀓𑀢𑀸𑀬 𑀮𑀤𑁆𑀥𑀺𑀬𑀸 𑀅𑀦𑀼𑀮𑁄𑀫𑀦𑀢𑁄 𑀘𑁂𑀢𑁆𑀣 𑀧𑀞𑀫𑁄 𑀦𑀬𑁄 𑀅𑀦𑀼𑀮𑁄𑀫𑀧𑀓𑁆𑀔𑁄, 𑀢𑀩𑁆𑀩𑀺𑀮𑁄𑀫𑀦𑀢𑁄 𑀇𑀢𑀭𑁄 𑀧𑀝𑀺𑀮𑁄𑀫𑀧𑀓𑁆𑀔𑁄𑀢𑀺 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀢𑁂𑀦 𑀯𑀢 𑀭𑁂𑀢𑀺 𑀏𑀢𑁆𑀣 𑀢𑁂𑀦𑀸𑀢𑀺 𑀓𑀸𑀭𑀡𑀯𑀘𑀦𑀁. 𑀬𑁂𑀦 𑀧𑀼𑀕𑁆𑀕𑀮𑀽𑀧𑀮𑀩𑁆𑀪𑁄 𑀧𑀢𑀺𑀝𑁆𑀞𑀧𑀻𑀬𑀢𑀺, 𑀢𑁂𑀦 𑀳𑁂𑀢𑀼𑀦𑀸. 𑀲𑁆𑀯𑀸𑀬𑀁 𑀳𑁂𑀢𑀼 𑀲𑀸𑀲𑀦𑀺𑀓𑀲𑁆𑀲 𑀩𑀸𑀳𑀺𑀭𑀓𑀲𑁆𑀲 𑀘 𑀯𑀲𑁂𑀦 𑀳𑁂𑀝𑁆𑀞𑀸 𑀤𑀲𑁆𑀲𑀺𑀢𑁄 𑀏𑀯. 𑀳𑁂𑀢𑀼𑀧𑀢𑀺𑀭𑀽𑀧𑀓𑁂 𑀘𑀸𑀬𑀁 𑀳𑁂𑀢𑀼𑀲𑀫𑀜𑁆𑀜𑀸 𑀧𑀭𑀫𑀢𑁆𑀣𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀳𑁂𑀝𑁆𑀞𑀸 ‘‘𑀆𑀚𑀸𑀦𑀸𑀳𑀺 𑀦𑀺𑀕𑁆𑀕𑀳’’𑀦𑁆𑀢𑀺 𑀦𑀺𑀕𑁆𑀕𑀳𑀲𑁆𑀲 𑀲𑀜𑁆𑀜𑀸𑀧𑀦𑀫𑀢𑁆𑀢𑀁 𑀓𑀢𑀁, 𑀢𑀁 𑀇𑀤𑀸𑀦𑀺 ‘‘𑀬𑀁 𑀢𑀢𑁆𑀣 𑀯𑀤𑁂𑀲𑀻’’𑀢𑀺𑀆𑀤𑀺𑀦𑀸 𑀦𑀺𑀕𑀫𑀦𑀭𑀽𑀧𑁂𑀦 𑀫𑀺𑀘𑁆𑀙𑀸𑀪𑀸𑀯𑀤𑀲𑁆𑀲𑀦𑁂𑀦 𑀘 𑀯𑀺𑀪𑀸𑀯𑀺𑀬𑀫𑀸𑀦𑀁 𑀧𑀸𑀓𑀝𑀪𑀸𑀯𑀓𑀭𑀡𑀢𑁄 𑀆𑀭𑁄𑀧𑀺𑀢𑀁 𑀧𑀢𑀺𑀝𑁆𑀞𑀸𑀧𑀺𑀢𑀁 𑀳𑁄𑀢𑀻𑀢𑀺 𑀅𑀝𑁆𑀞𑀓𑀣𑀸𑀬𑀁 ‘‘𑀆𑀭𑁄𑀧𑀺𑀢𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁.

𑀏𑀢𑁆𑀣 𑀘 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻’’𑀢𑀺 𑀧𑀝𑀺𑀜𑁆𑀜𑀸𑀯𑀬𑀯𑁄 𑀲𑀭𑀽𑀧𑁂𑀦𑁂𑀯 𑀤𑀲𑁆𑀲𑀺𑀢𑁄. ‘‘𑀢𑁂𑀦𑀸’’𑀢𑀺 𑀇𑀫𑀺𑀦𑀸 𑀲𑀸𑀫𑀜𑁆𑀜𑀢𑁄 𑀳𑁂𑀢𑀸𑀯𑀬𑀯𑁄 𑀤𑀲𑁆𑀲𑀺𑀢𑁄. 𑀬𑁆𑀯𑀸𑀬𑀁 𑀬𑀲𑁆𑀫𑀸 𑀧𑀝𑀺𑀜𑁆𑀜𑀸𑀥𑀫𑁆𑀫𑁄 𑀳𑀼𑀢𑁆𑀯𑀸 𑀲𑀤𑀺𑀲𑀧𑀓𑁆𑀔𑁂 𑀯𑀺𑀚𑁆𑀚𑀫𑀸𑀦𑁄, 𑀯𑀺𑀲𑀤𑀺𑀲𑀧𑀓𑁆𑀔𑁂 𑀅𑀯𑀺𑀚𑁆𑀚𑀫𑀸𑀦𑁄𑀬𑁂𑀯 𑀳𑁂𑀢𑀼 𑀮𑀓𑁆𑀔𑀡𑀽𑀧𑀧𑀦𑁆𑀦𑁄 𑀦𑀸𑀫 𑀳𑁄𑀢𑀺, 𑀦 𑀇𑀢𑀭𑁄, 𑀢𑀲𑁆𑀫𑀸 𑀬𑀢𑁆𑀣 𑀲𑁄 𑀯𑀺𑀚𑁆𑀚𑀢𑀺 𑀦 𑀯𑀺𑀚𑁆𑀚𑀢𑀺 𑀘, 𑀲𑁄 𑀲𑀤𑀺𑀲𑀸𑀲𑀤𑀺𑀲𑀪𑀸𑀯𑀪𑀺𑀦𑁆𑀦𑁄 𑀤𑀼𑀯𑀺𑀥𑁄 𑀤𑀺𑀝𑁆𑀞𑀦𑁆𑀢𑀸𑀯𑀬𑀯𑁄. 𑀬𑀣𑀸 𑀭𑀽𑀧𑀸𑀤𑀺 𑀉𑀧𑀮𑀩𑁆𑀪𑀢𑀺, 𑀢𑀣𑀸 𑀧𑀼𑀕𑁆𑀕𑀮𑁄. 𑀬𑀣𑀸 𑀘 𑀲𑀲𑀯𑀺𑀲𑀸𑀡𑀁 𑀦 𑀉𑀧𑀮𑀩𑁆𑀪𑀢𑀺, 𑀦 𑀢𑀣𑀸 𑀧𑀼𑀕𑁆𑀕𑀮𑁄𑀢𑀺 𑀉𑀧𑀦𑀬𑁄. 𑀲𑁆𑀯𑀸𑀬𑀁 ‘‘𑀯𑀢𑁆𑀢𑀩𑁆𑀩𑁂 𑀔𑁄 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺 𑀇𑀫𑀸𑀬 𑀧𑀸𑀴𑀺𑀬𑀸 𑀤𑀻𑀧𑀺𑀢𑁄, 𑀬𑁄 𑀅𑀝𑁆𑀞𑀓𑀣𑀸𑀬𑀁 𑀲𑀤𑁆𑀥𑀺𑀁 𑀳𑁂𑀢𑀼𑀤𑀸𑀳𑀭𑀡𑁂𑀳𑀺 ‘‘𑀧𑀸𑀧𑀦𑀸’’𑀢𑀺 𑀯𑀼𑀢𑁆𑀢𑁄. 𑀦𑀺𑀕𑀫𑀦𑀁 𑀧𑀸𑀴𑀺𑀬𑀁 𑀲𑀭𑀽𑀧𑁂𑀦𑁂𑀯 𑀆𑀕𑀢𑀁, 𑀬𑀸 𑀅𑀝𑁆𑀞𑀓𑀣𑀸𑀬𑀁 ‘‘𑀭𑁄𑀧𑀦𑀸’’𑀢𑀺 𑀯𑀼𑀢𑁆𑀢𑀸𑀢𑀺. 𑀏𑀯𑀁 𑀧𑁄𑀭𑀸𑀡𑁂𑀦 𑀜𑀸𑀬𑀓𑁆𑀓𑀫𑁂𑀦 𑀲𑀸𑀥𑀦𑀸𑀯𑀬𑀯𑀸 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀸.

𑀇𑀤𑀸𑀦𑀺 𑀯𑀢𑁆𑀢𑀦𑁂𑀦 𑀧𑀭𑀧𑀓𑁆𑀔𑀼𑀧𑀮𑀓𑁆𑀔𑀺𑀢𑁂 𑀳𑁂𑀢𑀼𑀤𑀸𑀳𑀭𑀡𑁂 𑀅𑀦𑁆𑀯𑀬𑀩𑁆𑀬𑀢𑀺𑀭𑁂𑀓𑀤𑀲𑁆𑀲𑀦𑀯𑀲𑁂𑀦 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀲𑀸𑀥𑀦𑀧𑀬𑁄𑀕𑁄 𑀬𑁄𑀚𑁂𑀢𑀩𑁆𑀩𑁄. 𑀓𑀸𑀭𑀡𑀁 𑀯𑀢𑁆𑀢𑀩𑁆𑀩𑀦𑁆𑀢𑀺 𑀓𑀺𑀫𑁂𑀢𑁆𑀣 𑀯𑀢𑁆𑀢𑀩𑁆𑀩𑀁. 𑀳𑁂𑀢𑀼𑀤𑀸𑀳𑀭𑀡𑁂𑀳𑀺𑀬𑁂𑀯 𑀳𑀺 𑀲𑀧𑀭𑀧𑀓𑁆𑀔𑀸𑀦𑀁 𑀲𑀸𑀥𑀦𑀁 𑀤𑀽𑀲𑀦𑀁 𑀯𑀸, 𑀦 𑀧𑀝𑀺𑀜𑁆𑀜𑀸𑀬, 𑀢𑀲𑁆𑀲𑀸 𑀲𑀸𑀥𑁂𑀢𑀩𑁆𑀩𑀸𑀤𑀺𑀪𑀸𑀯𑀢𑁄. 𑀢𑀁 𑀧𑀦 𑀤𑁆𑀯𑀬𑀁 ‘‘𑀢𑁂𑀦 𑀯𑀢 𑀭𑁂’’𑀢𑀺𑀆𑀤𑀺𑀧𑀸𑀴𑀺𑀬𑀸 𑀯𑀺𑀪𑀸𑀯𑀺𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀸𑀧𑀦𑀸𑀭𑁄𑀧𑀦𑀸𑀲𑀻𑀲𑁂𑀦 𑀤𑀲𑁆𑀲𑀺𑀢𑀁. 𑀧𑀝𑀺𑀜𑁆𑀜𑀸𑀞𑀧𑀦𑀸 𑀧𑀦 𑀢𑁂𑀲𑀁 𑀯𑀺𑀲𑀬𑀤𑀲𑁆𑀲𑀦𑀁 𑀓𑀣𑀸𑀬𑀁 𑀢𑀁𑀫𑀽𑀮𑀢𑀸𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀬𑀁 𑀧𑀦 𑀯𑀓𑁆𑀔𑀢𑀻’’𑀢𑀺𑀆𑀤𑀺. 𑀢𑁂𑀦𑁂𑀯 𑀘 𑀅𑀝𑁆𑀞𑀓𑀣𑀸𑀬𑀁 ‘‘𑀇𑀤𑀁 𑀅𑀦𑀼𑀮𑁄𑀫…𑀧𑁂… 𑀏𑀓𑀁 𑀘𑀢𑀼𑀓𑁆𑀓𑀁 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀯𑀓𑁆𑀔𑀢𑀺. 𑀢𑀣𑀸 𑀘𑀸𑀳 ‘‘𑀬𑀣𑀸 𑀧𑀦 𑀢𑀢𑁆𑀣𑀸’’𑀢𑀺𑀆𑀤𑀺. 𑀦𑀺𑀕𑁆𑀕𑀳𑁄𑀯 𑀯𑀺𑀲𑀼𑀁 𑀯𑀼𑀢𑁆𑀢𑁄, 𑀦 𑀧𑀝𑀺𑀓𑀫𑁆𑀫𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀲𑀼𑀁 𑀯𑀼𑀢𑁆𑀢𑁄𑀢𑀺 𑀘 𑀧𑀸𑀧𑀦𑀸𑀭𑁄𑀧𑀦𑀸𑀳𑀺 𑀅𑀲𑀫𑁆𑀫𑀺𑀲𑁆𑀲𑀁 𑀓𑀢𑁆𑀯𑀸 𑀯𑀺𑀲𑀼𑀁 𑀅𑀗𑁆𑀕𑀪𑀸𑀯𑁂𑀦 𑀯𑀼𑀢𑁆𑀢𑁄, 𑀦 𑀢𑀤𑀜𑁆𑀜𑀢𑀭𑁄 𑀯𑀺𑀬 𑀢𑀤𑀦𑁆𑀢𑁄𑀕𑀥𑀪𑀸𑀯𑁂𑀦 𑀯𑀼𑀢𑁆𑀢𑁄, 𑀦𑀸𑀧𑀺 𑀞𑀧𑀦𑀸 𑀯𑀺𑀬 𑀅𑀕𑀡𑀦𑀼𑀧𑀕𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀬𑁂 𑀧𑀦𑀸𑀢𑀺 𑀧𑀤𑀓𑀸𑀭𑁂 𑀲𑀦𑁆𑀥𑀸𑀬𑀸𑀳. 𑀤𑀼𑀢𑀺𑀬𑁂…𑀧𑁂… 𑀆𑀧𑀚𑁆𑀚𑀢𑀺 𑀢𑀢𑁆𑀣 𑀦𑀺𑀕𑁆𑀕𑀳𑀲𑁆𑀲 𑀅𑀬𑀣𑀸𑀪𑀽𑀢𑀢𑁆𑀢𑀸 𑀧𑀝𑀺𑀓𑀫𑁆𑀫𑀲𑁆𑀲 𑀘 𑀬𑀣𑀸𑀪𑀽𑀢𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨. 𑀧𑀭𑀫𑀢𑁆𑀣𑀢𑁄 𑀧𑀼𑀕𑁆𑀕𑀮𑀁 𑀦𑀸𑀦𑀼𑀚𑀸𑀦𑀸𑀢𑀺, 𑀯𑁄𑀳𑀸𑀭𑀢𑁄 𑀧𑀦 𑀅𑀦𑀼𑀚𑀸𑀦𑀸𑀢𑀻𑀢𑀺 𑀲𑀓𑀯𑀸𑀤𑀺𑀫𑀢𑀁 𑀚𑀸𑀦𑀦𑁆𑀢𑁂𑀦𑀧𑀺 𑀧𑀭𑀯𑀸𑀤𑀺𑀦𑀸 𑀙𑀮𑀯𑀲𑁂𑀦 𑀯𑀺𑀪𑀸𑀕𑀁 𑀅𑀓𑀢𑁆𑀯𑀸 ‘‘𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺 𑀧𑀼𑀘𑁆𑀙𑀸𑀬 𑀓𑀢𑀸𑀬 𑀲𑀓𑀯𑀸𑀤𑀻 𑀢𑀢𑁆𑀣 𑀅𑀬𑀁 𑀧𑀼𑀕𑁆𑀕𑀮𑀯𑀸𑀤𑀻, 𑀇𑀫𑀲𑁆𑀲 𑀮𑀤𑁆𑀥𑀺 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀸𑀢𑀺 𑀧𑀭𑀫𑀢𑁆𑀣𑀲𑀘𑁆𑀘𑀁 𑀲𑀦𑁆𑀥𑀸𑀬𑀸𑀳 ‘‘𑀆𑀫𑀦𑁆𑀢𑀸’’𑀢𑀺. ‘‘𑀦 𑀉𑀧𑀮𑀩𑁆𑀪𑀢𑀻’’𑀢𑀺 𑀳𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀼𑀦 𑀇𑀢𑀭𑁄 𑀲𑀫𑁆𑀫𑀼𑀢𑀺𑀲𑀘𑁆𑀘𑀁 𑀲𑀦𑁆𑀥𑀸𑀬 ‘‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑁄 𑀮𑁄𑀓𑀯𑁄𑀳𑀸𑀭𑀲𑀺𑀤𑁆𑀥𑁄 𑀲𑀘𑁆𑀘𑀺𑀓𑀝𑁆𑀞𑁄, 𑀢𑀢𑁄 𑀏𑀯 𑀓𑁂𑀦𑀘𑀺 𑀅𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀢𑁄 𑀧𑀭𑀫𑀢𑁆𑀣𑀢𑁄 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀻𑀢𑀺. 𑀧𑀼𑀦 𑀲𑀓𑀯𑀸𑀤𑀻 𑀧𑀼𑀩𑁆𑀩𑁂 𑀧𑀭𑀫𑀢𑁆𑀣𑀲𑀘𑁆𑀘𑀯𑀲𑁂𑀦 𑀧𑀼𑀕𑁆𑀕𑀮𑁂 𑀧𑀝𑀺𑀓𑁆𑀔𑀺𑀢𑁆𑀢𑁂 𑀇𑀤𑀸𑀦𑀺 𑀲𑀫𑁆𑀫𑀼𑀢𑀺𑀲𑀘𑁆𑀘𑀯𑀲𑁂𑀦𑀸𑀬𑀁 𑀧𑀼𑀘𑁆𑀙𑀸𑀢𑀺 𑀫𑀦𑁆𑀢𑁆𑀯𑀸 𑀢𑀁 𑀅𑀧𑁆𑀧𑀝𑀺𑀓𑁆𑀔𑀺𑀧𑀦𑁆𑀢𑁄 ‘‘𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂’’𑀢𑀺 𑀆𑀳. 𑀢𑁂𑀦𑀸𑀳 ‘‘𑀅𑀢𑁆𑀢𑀦𑀸 𑀅𑀥𑀺𑀧𑁆𑀧𑁂𑀢𑀁 𑀲𑀘𑁆𑀘𑀺𑀓𑀝𑁆𑀞𑀫𑁂𑀯𑀸𑀢𑀺 𑀲𑀫𑁆𑀫𑀼𑀢𑀺𑀲𑀘𑁆𑀘𑀁 𑀲𑀦𑁆𑀥𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄’’𑀢𑀺. 𑀏𑀯𑀫𑀯𑀝𑁆𑀞𑀺𑀢𑁂 ‘‘𑀬𑀤𑀺 𑀧𑀭𑀯𑀸𑀤𑀺𑀦𑀸…𑀧𑁂… 𑀦𑀸𑀭𑀪𑀺𑀢𑀩𑁆𑀩𑀸’’𑀢𑀺 𑀇𑀤𑀁 𑀦 𑀯𑀢𑁆𑀢𑀩𑁆𑀩𑀁 𑀧𑀞𑀫𑀧𑀼𑀘𑁆𑀙𑀸𑀬 𑀧𑀭𑀫𑀢𑁆𑀣𑀲𑀘𑁆𑀘𑀲𑁆𑀲 𑀲𑀘𑁆𑀘𑀺𑀓𑀝𑁆𑀞𑁄𑀢𑀺 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. ‘‘𑀅𑀣 𑀲𑀓𑀯𑀸𑀤𑀺𑀦𑀸…𑀧𑁂… 𑀆𑀧𑀚𑁆𑀚𑀢𑀻’’𑀢𑀺 𑀇𑀤𑀫𑁆𑀧𑀺 𑀦 𑀯𑀢𑁆𑀢𑀩𑁆𑀩𑀁 𑀤𑀼𑀢𑀺𑀬𑀧𑀼𑀘𑁆𑀙𑀸𑀬 𑀲𑀫𑁆𑀫𑀼𑀢𑀺𑀲𑀘𑁆𑀘𑀲𑁆𑀲 𑀲𑀘𑁆𑀘𑀺𑀓𑀝𑁆𑀞𑁄𑀢𑀺 𑀅𑀥𑀺𑀧𑁆𑀧𑁂𑀢𑀢𑁆𑀢𑀸.

𑀬𑀤𑀺 𑀉𑀪𑀬𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀇𑀤𑀁 𑀬𑀤𑀺 𑀧𑀞𑀫𑀧𑀼𑀘𑁆𑀙𑀁 𑀲𑀦𑁆𑀥𑀸𑀬, 𑀢𑀤𑀬𑀼𑀢𑁆𑀢𑀁 𑀢𑀲𑁆𑀲𑀸 𑀧𑀭𑀫𑀢𑁆𑀣𑀲𑀘𑁆𑀘𑀲𑁆𑀲𑁂𑀯 𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸. 𑀅𑀣 𑀤𑀼𑀢𑀺𑀬𑀧𑀼𑀘𑁆𑀙𑀁 𑀲𑀦𑁆𑀥𑀸𑀬, 𑀢𑀲𑁆𑀲𑀸 𑀲𑀫𑁆𑀫𑀼𑀢𑀺𑀲𑀘𑁆𑀘𑀯𑀲𑁂𑀦 𑀧𑀞𑀫𑀢𑁆𑀣𑀁 𑀯𑀢𑁆𑀯𑀸 𑀧𑀼𑀦 𑀫𑀺𑀲𑁆𑀲𑀓𑀯𑀲𑁂𑀦 𑀯𑀢𑁆𑀢𑀼𑀁 ‘‘𑀲𑀫𑁆𑀫𑀼𑀢𑀺𑀲𑀘𑁆𑀘𑀧𑀭𑀫𑀢𑁆𑀣𑀲𑀘𑁆𑀘𑀸𑀦𑀺 𑀯𑀸 𑀏𑀓𑀢𑁄 𑀓𑀢𑁆𑀯𑀸𑀧𑀺 𑀏𑀯𑀫𑀸𑀳𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑀫𑁆𑀧𑀺 𑀦 𑀯𑀢𑁆𑀢𑀩𑁆𑀩𑀫𑁂𑀯. 𑀤𑁆𑀯𑁂𑀧𑀺 𑀲𑀘𑁆𑀘𑀸𑀦𑀻𑀢𑀺 𑀲𑀫𑁆𑀫𑀼𑀢𑀺𑀧𑀭𑀫𑀢𑁆𑀣𑀲𑀘𑁆𑀘𑀸𑀦𑀺. 𑀢𑁂𑀲𑀼 𑀧𑀭𑀫𑀢𑁆𑀣𑀲𑀘𑁆𑀘𑀲𑁆𑀲𑁂𑀯 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀪𑀸𑀯𑁄, 𑀇𑀢𑀭𑀲𑁆𑀲 𑀉𑀧𑀘𑀸𑀭𑁂𑀦. 𑀢𑀣𑀸 𑀘 𑀯𑀼𑀢𑁆𑀢𑀁 ‘‘𑀫𑀸𑀬𑀸 𑀫𑀭𑀻𑀘𑀺…𑀧𑁂… 𑀉𑀢𑁆𑀢𑀫𑀝𑁆𑀞𑁄’’𑀢𑀺. 𑀢𑀲𑁆𑀫𑀸 𑀲𑀫𑁆𑀫𑀼𑀢𑀺𑀲𑀘𑁆𑀘𑀯𑀲𑁂𑀦 𑀉𑀧𑀮𑀤𑁆𑀥𑀺𑀁 𑀇𑀘𑁆𑀙𑀦𑁆𑀢𑁂𑀦𑀧𑀺 𑀧𑀭𑀫𑀢𑁆𑀣𑀲𑀘𑁆𑀘𑀯𑀲𑁂𑀦 𑀅𑀦𑀺𑀘𑁆𑀙𑀦𑀢𑁄 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺𑀆𑀤𑀺𑀦𑀸 𑀅𑀦𑀼𑀬𑁄𑀕𑁄 𑀬𑀼𑀢𑁆𑀢𑁄. ‘‘𑀧𑀥𑀸𑀦𑀧𑁆𑀧𑀥𑀸𑀦𑁂𑀲𑀼 𑀧𑀥𑀸𑀦𑁂 𑀓𑀺𑀘𑁆𑀘𑀲𑀺𑀤𑁆𑀥𑀻’’𑀢𑀺 𑀏𑀢𑁂𑀦𑁂𑀯 ‘‘𑀦 𑀘 𑀲𑀘𑁆𑀘𑀺𑀓𑀝𑁆𑀞𑁂𑀓𑀤𑁂𑀲𑁂𑀦 𑀅𑀦𑀼𑀬𑁄𑀕𑁄’’𑀢𑀺𑀆𑀤𑀺 𑀦𑀺𑀯𑀢𑁆𑀢𑀺𑀢𑀜𑁆𑀘 𑀳𑁄𑀢𑀺 𑀲𑀘𑁆𑀘𑀺𑀓𑀝𑁆𑀞𑁂𑀓𑀤𑁂𑀲𑀪𑀸𑀯𑀲𑁆𑀲𑁂𑀯 𑀅𑀲𑀺𑀤𑁆𑀥𑀢𑁆𑀢𑀸. 𑀦𑀸𑀲𑁆𑀲 𑀧𑀭𑀫𑀢𑁆𑀣𑀲𑀘𑁆𑀘𑀢𑀸 𑀅𑀦𑀼𑀬𑀼𑀜𑁆𑀚𑀺𑀢𑀩𑁆𑀩𑀸𑀢𑀺 𑀅𑀲𑁆𑀲 𑀲𑀘𑁆𑀘𑀺𑀓𑀝𑁆𑀞𑀲𑁆𑀲 𑀧𑀭𑀫𑀢𑁆𑀣𑀲𑀘𑁆𑀘𑀢𑀸 𑀧𑀭𑀯𑀸𑀤𑀺𑀦𑀸 𑀦 𑀅𑀦𑀼𑀬𑀼𑀜𑁆𑀚𑀺𑀢𑀩𑁆𑀩𑀸 ‘‘𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺 𑀲𑀓𑀯𑀸𑀤𑀺𑀦𑁄𑀧𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀢𑁄 𑀢𑀲𑁆𑀲 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑁄𑀳𑀭𑀺𑀢𑀲𑀘𑁆𑀘𑀺𑀓𑀝𑁆𑀞𑀲𑁆𑀲 𑀅𑀢𑁆𑀢𑀦𑀸 𑀅𑀥𑀺𑀧𑁆𑀧𑁂𑀢𑀲𑀘𑁆𑀘𑀺𑀓𑀝𑁆𑀞𑀢𑀸𑀧𑀺 𑀬𑀼𑀢𑁆𑀢𑀸 𑀢𑀲𑁆𑀲 𑀢𑁂𑀦 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀲𑁆𑀯𑀸𑀬𑀫𑀢𑁆𑀣𑁄 𑀳𑁂𑀝𑁆𑀞𑀸 𑀤𑀲𑁆𑀲𑀺𑀢𑁄𑀬𑁂𑀯. 𑀯𑀼𑀢𑁆𑀢𑀦𑀬𑁄𑀯 𑀤𑁄𑀲𑁄𑀢𑀺 ‘‘𑀤𑁆𑀯𑁂𑀧𑀺 𑀲𑀘𑁆𑀘𑀸𑀦𑀻’’𑀢𑀺𑀆𑀤𑀺𑀦𑀸 𑀅𑀦𑀦𑁆𑀢𑀭𑀫𑁂𑀯 𑀯𑀼𑀢𑁆𑀢𑀁 𑀲𑀦𑁆𑀥𑀸𑀬𑀸𑀳. 𑀢𑀲𑁆𑀲 𑀧𑀦 𑀅𑀤𑁄𑀲𑀪𑀸𑀯𑁄 𑀤𑀲𑁆𑀲𑀺𑀢𑁄𑀬𑁂𑀯. 𑀅𑀣 𑀦 𑀇𑀢𑀺 𑀅𑀣 𑀦 𑀪𑀽𑀢𑀲𑀪𑀸𑀯𑀢𑁆𑀣𑁂𑀦 𑀉𑀧𑀮𑀩𑁆𑀪𑁂𑀬𑁆𑀬𑀸𑀢𑀺 𑀬𑁄𑀚𑀦𑀸. 𑀯𑀢𑁆𑀢𑀩𑁆𑀩𑁄𑀢𑀺 𑀬𑀤𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 ‘‘𑀬𑁄 𑀮𑁄𑀓𑀯𑁄𑀳𑀸𑀭𑀲𑀺𑀤𑁆𑀥𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯, 𑀢𑀲𑁆𑀫𑀸 𑀏𑀢𑁆𑀣 ‘‘𑀧𑀭𑀫𑀢𑁆𑀣𑀢𑁄 𑀧𑀼𑀕𑁆𑀕𑀮𑀁 𑀦𑀸𑀦𑀼𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸 𑀅𑀥𑀺𑀧𑁆𑀧𑀸𑀬𑀫𑀕𑁆𑀕𑀦𑀁 𑀤𑀝𑁆𑀞𑀩𑁆𑀩𑀁.

𑀅𑀦𑀼𑀜𑁆𑀜𑁂𑀬𑁆𑀬𑀫𑁂𑀢𑀁 𑀲𑀺𑀬𑀸𑀢𑀺 𑀏𑀢𑀁 𑀅𑀦𑀼𑀧𑀮𑀩𑁆𑀪𑀦𑀁 𑀧𑀞𑀫𑀧𑀼𑀘𑁆𑀙𑀸𑀬𑀁 𑀯𑀺𑀬 𑀤𑀼𑀢𑀺𑀬𑀧𑀼𑀘𑁆𑀙𑀸𑀬𑀫𑁆𑀧𑀺 𑀅𑀦𑀼𑀚𑀸𑀦𑀺𑀢𑀩𑁆𑀩𑀁 𑀲𑀺𑀬𑀸. 𑀦 𑀯𑀸 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀣 𑀯𑀸 𑀓𑀺𑀜𑁆𑀘𑀺 𑀦 𑀯𑀢𑁆𑀢𑀩𑁆𑀩𑀁 𑀞𑀧𑀦𑀻𑀬𑀢𑁆𑀢𑀸 𑀧𑀜𑁆𑀳𑀲𑁆𑀲. 𑀢𑀣𑀸 𑀳𑀺𑀲𑁆𑀲 𑀞𑀧𑀦𑀻𑀬𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸 𑀳𑀻’’𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣 𑀘 𑀓𑀸𑀫𑀁 𑀲𑀘𑁆𑀘𑀤𑁆𑀯𑀬𑀸𑀓𑀸𑀭𑁂𑀦 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺, 𑀲𑀫𑁆𑀫𑀼𑀢𑀺𑀬𑀸𑀓𑀸𑀭𑁂𑀦 𑀧𑀦 𑀦𑀼𑀧𑀮𑀩𑁆𑀪𑀢𑀻𑀢𑀺 𑀉𑀧𑀮𑀩𑁆𑀪𑀦𑀪𑀸𑀯𑀲𑁆𑀲 𑀯𑀲𑁂𑀦 𑀧𑀝𑀺𑀓𑁆𑀔𑁂𑀧𑁄 𑀓𑀢𑁄𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀤𑀝𑁆𑀞𑀩𑁆𑀩𑁄. 𑀅𑀦𑀼𑀜𑁆𑀜𑀸𑀢𑀁 𑀧𑀝𑀺𑀓𑁆𑀔𑀺𑀢𑁆𑀢𑀜𑁆𑀘𑀸𑀢𑀺 𑀧𑀞𑀫𑀧𑀼𑀘𑁆𑀙𑀸𑀬𑀁 𑀅𑀦𑀼𑀜𑁆𑀜𑀸𑀢𑀁, 𑀤𑀼𑀢𑀺𑀬𑀧𑀼𑀘𑁆𑀙𑀸𑀬𑀁 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀏𑀢𑀁 𑀙𑀮𑀯𑀸𑀤𑀁 𑀦𑀺𑀲𑁆𑀲𑀸𑀬𑀸𑀢𑀺 𑀏𑀢𑀁 𑀏𑀓𑀁𑀬𑁂𑀯 𑀯𑀢𑁆𑀣𑀼𑀁 𑀉𑀤𑁆𑀤𑀺𑀲𑁆𑀲 𑀅𑀦𑀼𑀚𑀸𑀦𑀦𑀧𑀝𑀺𑀓𑁆𑀔𑀺𑀧𑀦𑀸𑀓𑀸𑀭𑀁 𑀙𑀮𑀯𑀘𑀦𑀁 𑀦𑀺𑀲𑁆𑀲𑀸𑀬. 𑀢𑁆𑀯𑀁 𑀦𑀺𑀕𑁆𑀕𑀳𑁂𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀲𑀫𑁆𑀪𑀯𑀦𑁆𑀢𑀲𑁆𑀲 𑀲𑀸𑀫𑀜𑁆𑀜𑁂𑀦𑀸𑀢𑀺 𑀦𑀺𑀕𑁆𑀕𑀳𑀝𑁆𑀞𑀸𑀦𑀪𑀸𑀯𑁂𑀦 𑀲𑀫𑁆𑀪𑀯𑀦𑁆𑀢𑀲𑁆𑀲 𑀅𑀦𑀼𑀮𑁄𑀫𑀦𑀬𑁂𑀦 𑀅𑀦𑀼𑀚𑀸𑀦𑀦𑀧𑀝𑀺𑀓𑁆𑀔𑁂𑀧𑀲𑁆𑀲 𑀲𑀫𑀸𑀦𑀪𑀸𑀯𑁂𑀦. 𑀅𑀲𑀫𑁆𑀪𑀯𑀦𑁆𑀢𑀲𑁆𑀲 𑀓𑀧𑁆𑀧𑀦𑀦𑁆𑀢𑀺 𑀧𑀘𑁆𑀘𑀦𑀻𑀓𑀦𑀬𑁂𑀦 𑀢𑀲𑁆𑀲 𑀦𑀺𑀕𑁆𑀕𑀳𑀝𑁆𑀞𑀸𑀦𑀪𑀸𑀯𑁂𑀦 𑀅𑀲𑀫𑁆𑀪𑀯𑀦𑁆𑀢𑀲𑁆𑀲 𑀢𑀣𑀸 𑀓𑀧𑁆𑀧𑀦𑀁 𑀲𑀁𑀯𑀺𑀥𑀸𑀦𑀁 𑀙𑀮𑀯𑀸𑀤𑁄 𑀪𑀯𑀺𑀢𑀼𑀁 𑀅𑀭𑀳𑀢𑀺. ‘‘𑀅𑀢𑁆𑀣𑀯𑀺𑀓𑀧𑁆𑀧𑀼𑀧𑀧𑀢𑁆𑀢𑀺𑀬𑀸 𑀯𑀘𑀦𑀯𑀺𑀖𑀸𑀢𑁄 𑀙𑀮’’𑀦𑁆𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀢𑁂𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑀓𑀧𑁆𑀧𑀦𑀁 𑀙𑀮𑀯𑀸𑀤𑁄𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀯𑀘𑀦𑀲𑀸𑀫𑀜𑁆𑀜𑀫𑀢𑁆𑀢𑀁 𑀓𑀧𑁆𑀧𑀺𑀢𑀁 𑀙𑀮𑀁 𑀯𑀤𑀢𑀺 𑀏𑀢𑁂𑀦𑀸𑀢𑀺 𑀙𑀮𑀯𑀸𑀤𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀙𑀮𑀯𑀸𑀤𑀲𑁆𑀲 𑀓𑀸𑀭𑀡𑀢𑁆𑀢𑀸 𑀙𑀮𑀯𑀸𑀤𑁄’’𑀢𑀺. 𑀯𑀘𑀦𑀲𑀸𑀫𑀜𑁆𑀜𑀫𑀢𑁆𑀢𑀁 𑀅𑀢𑁆𑀣𑀪𑀽𑀢𑀁 𑀢𑀤𑀢𑁆𑀣𑀁 𑀙𑀮𑀯𑀸𑀤𑀁 𑀦𑀺𑀲𑁆𑀲𑀸𑀬. ‘‘𑀯𑀺𑀘𑀸𑀭𑁂𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁, 𑀓𑀺𑀫𑁂𑀢𑁆𑀣 𑀯𑀺𑀘𑀸𑀭𑁂𑀢𑀩𑁆𑀩𑀁. 𑀬𑀤𑀺𑀧𑀺 𑀧𑀓𑁆𑀔𑀲𑁆𑀲 𑀞𑀧𑀦𑀸𑀫𑀽𑀮𑀓𑀁 𑀅𑀦𑀼𑀚𑀸𑀦𑀦𑀸𑀯𑀚𑀸𑀦𑀦𑀸𑀦𑀁 𑀫𑀺𑀘𑁆𑀙𑀸𑀪𑀸𑀯𑀤𑀲𑁆𑀲𑀦𑀁 𑀢𑀩𑁆𑀩𑀺𑀲𑀬𑀢𑁆𑀢𑀸, 𑀧𑀸𑀧𑀦𑀸𑀭𑁄𑀧𑀦𑀸𑀳𑀺 𑀏𑀯 𑀧𑀦 𑀲𑁄 𑀯𑀺𑀪𑀸𑀯𑀻𑀬𑀢𑀺, 𑀦 𑀞𑀧𑀦𑀸𑀬𑀸𑀢𑀺 𑀧𑀸𑀓𑀝𑁄𑀬𑀫𑀢𑁆𑀣𑁄.

𑁪-𑁫. 𑀢𑁂𑀦𑀸𑀢𑀺 𑀲𑀓𑀯𑀸𑀤𑀺𑀦𑀸. 𑀢𑁂𑀦 𑀦𑀺𑀬𑀸𑀫𑁂𑀦𑀸𑀢𑀺 𑀬𑁂𑀦 𑀦𑀺𑀬𑀸𑀫𑁂𑀦 𑀲𑀓𑀯𑀸𑀤𑀺𑀦𑀸 𑀘𑀢𑀽𑀳𑀺 𑀧𑀸𑀧𑀦𑀸𑀭𑁄𑀧𑀦𑀸𑀳𑀺𑀲𑁆𑀲 𑀦𑀺𑀕𑁆𑀕𑀳𑁄 𑀓𑀢𑁄, 𑀢𑁂𑀦 𑀦𑀺𑀬𑀸𑀫𑁂𑀦 𑀦𑀬𑁂𑀦. 𑀲𑁄 𑀦𑀺𑀕𑁆𑀕𑀳𑁄 𑀤𑀼𑀓𑁆𑀓𑀝𑁄 𑀅𑀦𑀺𑀕𑁆𑀕𑀳𑁄𑀬𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀦𑀺𑀕𑁆𑀕𑀳𑀪𑀸𑀯𑀲𑁆𑀲 𑀯𑀸 𑀉𑀧𑀕𑀫𑀺𑀢𑀢𑁆𑀢𑀸’’𑀢𑀺, 𑀧𑀸𑀧𑀺𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀏𑀯𑀫𑁂𑀯𑀸𑀢𑀺 𑀬𑀣𑀸 ‘‘𑀢𑀬𑀸 𑀫𑀫 𑀓𑀢𑁄 𑀦𑀺𑀕𑁆𑀕𑀳𑁄’’𑀢𑀺𑀆𑀤𑀺𑀦𑀸 𑀅𑀦𑀺𑀕𑁆𑀕𑀳𑀪𑀸𑀯𑀽𑀧𑀦𑀬𑁄 𑀯𑀼𑀢𑁆𑀢𑁄, 𑀏𑀯𑀫𑁂𑀯. 𑀏𑀢𑀲𑁆𑀲𑀸𑀢𑀺 ‘‘𑀢𑁂𑀦 𑀳𑀻’’𑀢𑀺𑀆𑀤𑀺𑀦𑀸 𑀇𑀫𑀸𑀬 𑀧𑀸𑀴𑀺𑀬𑀸 𑀯𑀼𑀢𑁆𑀢𑀲𑁆𑀲.

𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀘𑁆𑀘𑀦𑀻𑀓𑀸𑀦𑀼𑀮𑁄𑀫𑀯𑀡𑁆𑀡𑀦𑀸

𑁭-𑁧𑁦. 𑀅𑀜𑁆𑀜𑁂𑀦𑀸𑀢𑀺 𑀲𑀫𑁆𑀫𑀼𑀢𑀺𑀲𑀘𑁆𑀘𑀪𑀽𑀢𑁂𑀦. 𑀧𑀭𑀲𑁆𑀲𑀸𑀢𑀺 𑀲𑀓𑀯𑀸𑀤𑀺𑀦𑁄. 𑀲𑁄 𑀳𑀺 𑀧𑀭𑀯𑀸𑀤𑀺𑀦𑀸 𑀧𑀭𑁄 𑀦𑀸𑀫 𑀳𑁄𑀢𑀺. 𑀧𑀝𑀺𑀜𑁆𑀜𑀸𑀧𑀝𑀺𑀓𑁆𑀔𑁂𑀧𑀸𑀦𑀁 𑀪𑀺𑀦𑁆𑀦𑀯𑀺𑀲𑀬𑀢𑁆𑀢𑀸 ‘‘𑀅𑀯𑀺𑀭𑁄𑀥𑀺𑀢𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀅𑀪𑀺𑀦𑁆𑀦𑀸𑀥𑀺𑀓𑀭𑀡𑀁 𑀯𑀺𑀬 𑀳𑀺 𑀅𑀪𑀺𑀦𑁆𑀦𑀯𑀺𑀲𑀬𑀫𑁂𑀯 𑀯𑀺𑀭𑀼𑀤𑁆𑀥𑀁 𑀦𑀸𑀫 𑀲𑀺𑀬𑀸, 𑀦 𑀇𑀢𑀭𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀦 𑀳𑀺…𑀧𑁂… 𑀆𑀧𑀚𑁆𑀚𑀢𑀻’’𑀢𑀺 𑀆𑀳. 𑀬𑀤𑀺 𑀏𑀯𑀁 𑀓𑀣𑀫𑀺𑀤𑀁 𑀦𑀺𑀕𑁆𑀕𑀳𑀝𑁆𑀞𑀸𑀦𑀁 𑀚𑀸𑀢𑀦𑁆𑀢𑀺 𑀆𑀳 ‘‘𑀅𑀢𑁆𑀢𑀦𑁄 𑀧𑀦𑀸’’𑀢𑀺𑀆𑀤𑀺. 𑀢𑁂𑀦 𑀧𑀝𑀺𑀜𑁆𑀜𑀸𑀦𑁆𑀢𑀭𑀁 𑀦𑀸𑀫 𑀅𑀜𑁆𑀜𑀫𑁂𑀯𑁂𑀢𑀁 𑀦𑀺𑀕𑁆𑀕𑀳𑀝𑁆𑀞𑀸𑀦𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀧𑀘𑁆𑀘𑀦𑀻𑀓𑀸𑀦𑀼𑀮𑁄𑀫𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀼𑀤𑁆𑀥𑀲𑀘𑁆𑀘𑀺𑀓𑀝𑁆𑀞𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀑𑀓𑀸𑀲𑀲𑀘𑁆𑀘𑀺𑀓𑀝𑁆𑀞𑁄

𑁧. 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀯𑀡𑁆𑀡𑀦𑀸

𑁧𑁧. 𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑀁 𑀯𑀺𑀲𑁂𑀲𑀦𑀺𑀯𑀺𑀝𑁆𑀞𑀁 𑀳𑁄𑀢𑀻𑀢𑀺 𑀆𑀳 ‘‘𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑀲𑁆𑀫𑀺𑀁 𑀲𑀭𑀻𑀭𑁂𑀢𑀺 𑀅𑀬𑀫𑀢𑁆𑀣𑁄’’𑀢𑀺. 𑀲𑀸𑀫𑀜𑁆𑀜𑀚𑁄𑀢𑀦𑀸 𑀳𑀺 𑀯𑀺𑀲𑁂𑀲𑁂 𑀅𑀯𑀢𑀺𑀝𑁆𑀞𑀢𑀻𑀢𑀺 𑀯𑀺𑀲𑁂𑀲𑀢𑁆𑀣𑀺𑀦𑀸 𑀯𑀺𑀲𑁂𑀲𑁄 𑀅𑀦𑀼𑀧𑀬𑀼𑀚𑁆𑀚𑀺𑀢𑀩𑁆𑀩𑁄𑀢𑀺. 𑀏𑀢𑁂𑀦𑀸𑀢𑀺 𑀤𑁂𑀲𑀯𑀲𑁂𑀦 𑀲𑀩𑁆𑀩𑀢𑁆𑀣 𑀧𑀝𑀺𑀓𑁆𑀔𑁂𑀧𑀯𑀘𑀦𑁂𑀦.

𑁩. 𑀓𑀸𑀮𑀲𑀘𑁆𑀘𑀺𑀓𑀝𑁆𑀞𑁄

𑁧. 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀯𑀡𑁆𑀡𑀦𑀸

𑁧𑁨. 𑀫𑀚𑁆𑀛𑀺𑀫𑀚𑀸𑀢𑀺𑀓𑀸𑀮𑁂𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑁆𑀢𑀪𑀸𑀯𑀓𑀸𑀮𑁂. 𑀅𑀢𑁆𑀢𑀪𑀸𑀯𑁄 𑀳𑀺 𑀇𑀥 ‘‘𑀚𑀸𑀢𑀻’’𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀢𑀢𑁄 𑀅𑀢𑀻𑀢𑁄 𑀧𑀼𑀭𑀺𑀫𑀚𑀸𑀢𑀺𑀓𑀸𑀮𑁄, 𑀅𑀦𑀸𑀕𑀢𑁄 𑀧𑀘𑁆𑀙𑀺𑀫𑀚𑀸𑀢𑀺𑀓𑀸𑀮𑁄. 𑀇𑀫𑁂𑀲𑀼 𑀢𑀻𑀲𑀽𑀢𑀺 𑀲𑀩𑁆𑀩𑀢𑁆𑀣, 𑀲𑀩𑁆𑀩𑀤𑀸, 𑀲𑀩𑁆𑀩𑁂𑀲𑀽𑀢𑀺 𑀇𑀫𑁂𑀲𑀼 𑀢𑀻𑀲𑀼 𑀦𑀬𑁂𑀲𑀼. 𑀧𑀸𑀞𑀲𑁆𑀲 𑀲𑀁𑀔𑀺𑀢𑁆𑀢𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀢𑀺 𑀢𑀁 𑀞𑀧𑁂𑀢𑁆𑀯𑀸 𑀅𑀢𑁆𑀣𑀲𑁆𑀲 𑀲𑀤𑀺𑀲𑀢𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀇𑀥𑀸𑀧𑀺 𑀳𑀺…𑀧𑁂… 𑀬𑁄𑀚𑁂𑀢𑀩𑁆𑀩’’𑀦𑁆𑀢𑀺 𑀆𑀳. 𑀏𑀢𑁆𑀣𑀸𑀧𑀺 ‘‘𑀦 𑀓𑁂𑀦𑀘𑀺 𑀲𑀪𑀸𑀯𑁂𑀦 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻’’𑀢𑀺 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄 𑀳𑁄𑀢𑀺. 𑀦 𑀳𑀺 𑀓𑁂𑀦𑀘𑀺 𑀲𑀪𑀸𑀯𑁂𑀦 𑀉𑀧𑀮𑀩𑁆𑀪𑀫𑀸𑀦𑀲𑁆𑀲 𑀲𑀓𑀮𑁂𑀓𑀤𑁂𑀲𑀯𑀺𑀦𑀺𑀫𑀼𑀢𑁆𑀢𑁄 𑀧𑀯𑀢𑁆𑀢𑀺𑀓𑀸𑀮𑁄 𑀦𑀸𑀫 𑀅𑀢𑁆𑀣𑀻𑀢𑀺.

𑁪. 𑀅𑀯𑀬𑀯𑀲𑀘𑁆𑀘𑀺𑀓𑀝𑁆𑀞𑁄

𑁧. 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀯𑀡𑁆𑀡𑀦𑀸

𑁧𑁩. 𑀢𑀢𑀺𑀬𑀦𑀬𑁂 𑀦 𑀲𑀩𑁆𑀩𑁂𑀓𑀥𑀫𑁆𑀫𑀯𑀺𑀦𑀺𑀫𑀼𑀢𑁆𑀢𑀁 𑀧𑀯𑀢𑁆𑀢𑀺𑀝𑁆𑀞𑀸𑀦𑀁 𑀦𑀸𑀫 𑀅𑀢𑁆𑀣𑀻𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀑𑀓𑀸𑀲𑀸𑀤𑀺𑀲𑀘𑁆𑀘𑀺𑀓𑀝𑁆𑀞𑁄

𑁨. 𑀧𑀘𑁆𑀘𑀦𑀻𑀓𑀸𑀦𑀼𑀮𑁄𑀫𑀯𑀡𑁆𑀡𑀦𑀸

𑁧𑁪. 𑀅𑀦𑀼𑀮𑁄𑀫𑀧𑀜𑁆𑀘𑀓𑀲𑁆𑀲𑀸𑀢𑀺𑀆𑀤𑀺𑀫𑁆𑀳𑀺 𑀅𑀝𑁆𑀞𑀓𑀣𑀸𑀯𑀘𑀦𑁂. 𑀧𑀼𑀦 𑀢𑀢𑁆𑀣𑀸𑀢𑀺 𑀬𑀣𑀸𑀯𑀼𑀢𑁆𑀢𑁂 𑀅𑀝𑁆𑀞𑀓𑀣𑀸𑀯𑀘𑀦𑁂, 𑀢𑁂𑀲𑀼 𑀯𑀸 𑀅𑀦𑀼𑀮𑁄𑀫𑀧𑀜𑁆𑀘𑀓𑀧𑀘𑁆𑀘𑀦𑀻𑀓𑁂𑀲𑀼. 𑀲𑀩𑁆𑀩𑀢𑁆𑀣 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀻𑀢𑀺𑀆𑀤𑀺𑀓𑀲𑁆𑀲 𑀧𑀸𑀞𑀧𑁆𑀧𑀤𑁂𑀲𑀲𑁆𑀲 𑀅𑀢𑁆𑀣𑁄 ‘‘𑀲𑀭𑀻𑀭𑀁 𑀲𑀦𑁆𑀥𑀸𑀬𑀸’’𑀢𑀺𑀆𑀤𑀺𑀦𑀸 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄 𑀅𑀢𑁆𑀣𑁄. 𑀧𑀝𑀺𑀓𑀫𑁆𑀫𑀸𑀤𑀺𑀧𑀸𑀴𑀺𑀦𑁆𑀢𑀺 𑀧𑀝𑀺𑀓𑀫𑁆𑀫𑀦𑀺𑀕𑁆𑀕𑀳𑀉𑀧𑀦𑀬𑀦𑀦𑀺𑀕𑀫𑀦𑀧𑀸𑀴𑀺𑀁. 𑀢𑀻𑀲𑀼 𑀫𑀼𑀔𑁂𑀲𑀽𑀢𑀺 ‘‘𑀲𑀩𑁆𑀩𑀢𑁆𑀣𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀲𑀼 𑀢𑀻𑀲𑀼 𑀯𑀸𑀤𑀫𑀼𑀔𑁂𑀲𑀼. 𑀧𑀘𑁆𑀘𑀦𑀻𑀓𑀲𑁆𑀲 𑀧𑀸𑀴𑀺 𑀯𑀼𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀦𑁆𑀢𑀺 𑀧𑀸𑀴𑀺𑀁. 𑀲𑀗𑁆𑀔𑀺𑀧𑀺𑀢𑁆𑀯𑀸 𑀆𑀕𑀢𑀢𑁆𑀢𑀸 𑀲𑀭𑀽𑀧𑁂𑀦 𑀅𑀯𑀼𑀢𑁆𑀢𑁂. 𑀲𑀼𑀤𑁆𑀥𑀺𑀓…𑀧𑁂… 𑀯𑀼𑀢𑁆𑀢𑀁 𑀳𑁄𑀢𑀺 𑀢𑀢𑁆𑀣 ‘‘𑀲𑀩𑁆𑀩𑀢𑁆𑀣𑀸’’𑀢𑀺𑀆𑀤𑀺𑀦𑀸 𑀲𑀭𑀻𑀭𑀸𑀤𑀺𑀦𑁄 𑀧𑀭𑀸𑀫𑀲𑀦𑀁 𑀦𑀢𑁆𑀣𑀺, 𑀇𑀥 𑀅𑀢𑁆𑀣𑀻𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄, 𑀅𑀜𑁆𑀜𑀁 𑀲𑀫𑀸𑀦𑀦𑁆𑀢𑀺.

𑀲𑀘𑁆𑀘𑀺𑀓𑀝𑁆𑀞𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀼𑀤𑁆𑀥𑀺𑀓𑀲𑀁𑀲𑀦𑁆𑀤𑀦𑀯𑀡𑁆𑀡𑀦𑀸

𑁧𑁭-𑁨𑁭. 𑀲𑀘𑁆𑀘𑀺𑀓𑀝𑁆𑀞𑀲𑁆𑀲, 𑀲𑀘𑁆𑀘𑀺𑀓𑀝𑁆𑀞𑁂 𑀯𑀸 𑀲𑀁𑀲𑀦𑁆𑀤𑀦𑀁 𑀲𑀘𑁆𑀘𑀺𑀓𑀝𑁆𑀞𑀲𑀁𑀲𑀦𑁆𑀤𑀦𑀦𑁆𑀢𑀺 𑀲𑀫𑀸𑀲𑀤𑁆𑀯𑀬𑀁 𑀪𑀯𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀘𑁆𑀘𑀺𑀓𑀝𑁆𑀞𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀘𑁆𑀘𑀺𑀓𑀝𑁆𑀞𑀲𑁆𑀲 𑀧𑀼𑀕𑁆𑀕𑀮𑀲𑁆𑀲𑀸𑀢𑀺 𑀲𑀘𑁆𑀘𑀺𑀓𑀝𑁆𑀞𑀲𑀪𑀸𑀯𑀲𑁆𑀲 𑀧𑀭𑀫𑀢𑁆𑀣𑀢𑁄 𑀯𑀺𑀚𑁆𑀚𑀫𑀸𑀦𑀲𑀪𑀸𑀯𑀲𑁆𑀲 𑀧𑀼𑀕𑁆𑀕𑀮𑀲𑁆𑀲. 𑀭𑀽𑀧𑀸𑀤𑀻𑀳𑀺 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀦𑀦𑁆𑀢𑀺 𑀲𑀘𑁆𑀘𑀺𑀓𑀝𑁆𑀞𑀢𑀸𑀲𑀸𑀫𑀜𑁆𑀜𑁂𑀦 𑀭𑀽𑀧𑀸𑀤𑀻𑀳𑀺 𑀲𑀫𑀻𑀓𑀭𑀡𑀁. 𑀲𑀘𑁆𑀘𑀺𑀓𑀝𑁆𑀞𑁂𑀢𑀺 𑀲𑀘𑁆𑀘𑀺𑀓𑀝𑁆𑀞𑀳𑁂𑀢𑀼, 𑀢𑀢𑁆𑀣 𑀯𑀸 𑀢𑀁 𑀅𑀥𑀺𑀝𑁆𑀞𑀸𑀦𑀁 𑀓𑀢𑁆𑀯𑀸. ‘‘𑀢𑀼𑀮𑁆𑀬𑀬𑁄𑀕𑁂 𑀲𑀫𑀼𑀘𑁆𑀘𑀬𑁄’’𑀢𑀺 𑀲𑀫𑀼𑀘𑁆𑀘𑀬𑀢𑁆𑀣𑀢𑁆𑀢𑀸 𑀏𑀯 𑀘-𑀓𑀸𑀭𑀲𑁆𑀲 𑀲𑀘𑁆𑀘𑀺𑀓𑀝𑁆𑀞𑁂𑀦 𑀉𑀧𑀮𑀤𑁆𑀥𑀺𑀲𑀸𑀫𑀜𑁆𑀜𑁂𑀦 𑀇𑀥 𑀭𑀽𑀧𑀫𑀸𑀳𑀝𑀦𑁆𑀢𑀺 𑀢𑀲𑁆𑀲 𑀉𑀤𑀸𑀳𑀝𑀪𑀸𑀯𑁄 𑀬𑀼𑀢𑁆𑀢𑁄𑀢𑀺 ‘‘𑀬𑀣𑀸𑀭𑀽𑀧’’𑀦𑁆𑀢𑀺 𑀦𑀺𑀤𑀲𑁆𑀲𑀦𑀯𑀲𑁂𑀦 𑀅𑀢𑁆𑀣𑁄 𑀯𑀼𑀢𑁆𑀢𑁄, 𑀅𑀜𑁆𑀜𑀣𑀸 𑀇𑀥 𑀭𑀽𑀧𑀲𑁆𑀲 𑀆𑀳𑀭𑀡𑀫𑁂𑀯 𑀓𑀺𑀫𑀢𑁆𑀣𑀺𑀬𑀁. 𑀏𑀯𑀁 𑀲𑁂𑀲𑀥𑀫𑁆𑀫𑁂𑀲𑀼𑀧𑀺. 𑀬𑀸 𑀧𑀦𑁂𑀢𑁆𑀣 𑀅𑀜𑁆𑀜𑀢𑁆𑀢𑀧𑀼𑀘𑁆𑀙𑀸, 𑀲𑀸𑀧𑀺 𑀦𑀺𑀤𑀲𑁆𑀲𑀦𑀢𑁆𑀣𑀁 𑀉𑀧𑀩𑁆𑀭𑀽𑀳𑁂𑀢𑀺 𑀅𑀜𑁆𑀜𑀢𑁆𑀢𑀦𑀺𑀩𑀦𑁆𑀥𑀦𑀢𑁆𑀢𑀸 𑀢𑀲𑁆𑀲. 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑁂 𑀧𑀦 𑀦𑀺𑀤𑀲𑁆𑀲𑀦𑀢𑁆𑀣𑁄 𑀕𑀸𑀳𑀻𑀬𑀢𑀻𑀢𑀺 𑀇𑀫𑀲𑁆𑀫𑀺𑀁 𑀲𑀼𑀤𑁆𑀥𑀺𑀓𑀲𑀁𑀲𑀦𑁆𑀤𑀦𑁂 𑀓𑁂𑀯𑀮𑀁 𑀲𑀫𑀼𑀘𑁆𑀘𑀬𑀯𑀲𑁂𑀦𑁂𑀯 𑀅𑀢𑁆𑀣𑀤𑀲𑁆𑀲𑀦𑀁 𑀬𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀭𑀽𑀧𑀸𑀤𑀻𑀦𑀺 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀢𑁆𑀢𑀸 𑀧𑀼𑀕𑁆𑀕𑀮𑀲𑁆𑀲 𑀲𑁄 𑀢𑁂𑀳𑀺 𑀅𑀜𑁆𑀜𑁄, 𑀅𑀦𑀜𑁆𑀜𑁄 𑀘𑀸𑀢𑀺 𑀦 𑀯𑀢𑁆𑀢𑀩𑁆𑀩𑁄𑀢𑀺 𑀅𑀬𑀁 𑀲𑀸𑀲𑀦𑀓𑁆𑀓𑀫𑁄𑀢𑀺 𑀆𑀳 ‘‘𑀭𑀽𑀧𑀸𑀤𑀻𑀳𑀺…𑀧𑁂… 𑀲𑀫𑀬𑁄’’𑀢𑀺. 𑀅𑀦𑀼𑀜𑁆𑀜𑀸𑀬𑀫𑀸𑀦𑁂𑀢𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀼𑀢𑁆𑀢𑁂 𑀘 𑀅𑀧𑁆𑀧𑀝𑀺𑀓𑁆𑀔𑀺𑀧𑀺𑀬𑀫𑀸𑀦𑁂. 𑀅𑀬𑀜𑁆𑀘 𑀅𑀢𑁆𑀣𑁄 𑀲𑀸𑀲𑀦𑀺𑀓𑀲𑁆𑀲 𑀧𑀭𑀯𑀸𑀤𑀺𑀦𑁄 𑀯𑀲𑁂𑀦 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

‘‘𑀆𑀚𑀸𑀦𑀸𑀳𑀺 𑀦𑀺𑀕𑁆𑀕𑀳’’𑀦𑁆𑀢𑀺 𑀧𑀸𑀞𑁄 𑀤𑀺𑀝𑁆𑀞𑁄 𑀪𑀯𑀺𑀲𑁆𑀲𑀢𑀺, 𑀅𑀜𑁆𑀜𑀣𑀸 ‘‘𑀧𑀝𑀺𑀮𑁄𑀫𑀧𑀜𑁆𑀘𑀓𑀸𑀦𑀺 𑀤𑀲𑁆𑀲𑀺𑀢𑀸𑀦𑀺, 𑀧𑀝𑀺𑀓𑀫𑁆𑀫𑀘𑀢𑀼𑀓𑁆𑀓𑀸𑀤𑀻𑀦𑀺 𑀲𑀁𑀔𑀺𑀢𑁆𑀢𑀸𑀦𑀻’’𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀘𑁄𑀤𑀦𑀸𑀬 𑀯𑀺𑀦𑀸 𑀧𑀭𑀯𑀸𑀤𑀺𑀦𑁄 𑀧𑀝𑀺𑀚𑀸𑀦𑀸𑀧𑀦𑀁 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 ‘‘𑀧𑀝𑀺𑀚𑀸𑀦𑀸𑀧𑀦𑀢𑁆𑀣𑀦𑁆𑀢𑀺…𑀧𑁂… 𑀘𑁄𑀤𑀦𑀢𑁆𑀣’’𑀦𑁆𑀢𑀺. 𑀘𑁄𑀤𑀦𑀸𑀧𑀼𑀩𑁆𑀩𑀓𑀜𑁆𑀳𑀺 𑀢𑀲𑁆𑀲 𑀧𑀝𑀺𑀚𑀸𑀦𑀸𑀧𑀦𑀁. 𑀢𑁂𑀦 𑀨𑀮𑀯𑁄𑀳𑀸𑀭𑁂𑀦 𑀓𑀸𑀭𑀡𑀁 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀅𑀩𑁆𑀬𑀸𑀓𑀢𑀢𑁆𑀢𑀸𑀢𑀺 𑀅𑀩𑁆𑀬𑀸𑀓𑀭𑀡𑀻𑀬𑀢𑁆𑀢𑀸, 𑀪𑀕𑀯𑀢𑀸 𑀯𑀸 𑀦 𑀩𑁆𑀬𑀸𑀓𑀢𑀢𑁆𑀢𑀸. 𑀬𑀤𑀺 𑀞𑀧𑀦𑀻𑀬𑀢𑁆𑀢𑀸 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀦𑁆𑀢𑀺 𑀇𑀫𑀲𑁆𑀫𑀺𑀁 𑀧𑀘𑁆𑀘𑀦𑀻𑀓𑀦𑀬𑁂 𑀞𑀧𑀦𑀻𑀬𑀢𑁆𑀢𑀸 𑀧𑀜𑁆𑀳𑀲𑁆𑀲 𑀲𑀓𑀯𑀸𑀤𑀺𑀦𑀸 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀧𑀭𑁂𑀦𑀧𑀻𑀢𑀺 𑀧𑀭𑀯𑀸𑀤𑀺𑀦𑀸𑀧𑀺 𑀞𑀧𑀦𑀻𑀬𑀢𑁆𑀢𑀸 𑀮𑀤𑁆𑀥𑀺𑀫𑁂𑀯 𑀦𑀺𑀲𑁆𑀲𑀸𑀬 𑀅𑀦𑀼𑀮𑁄𑀫𑀦𑀬𑁂 𑀧𑀝𑀺𑀓𑁆𑀔𑁂𑀧𑁄 𑀓𑀢𑁄𑀢𑀺 𑀅𑀬𑀫𑁂𑀢𑁆𑀣 𑀲𑀼𑀤𑁆𑀥𑀺𑀓𑀲𑀁𑀲𑀦𑁆𑀤𑀦𑀸𑀬 𑀅𑀥𑀺𑀧𑁆𑀧𑀸𑀬𑁄 𑀬𑀼𑀢𑁆𑀢𑁄 𑀅𑀦𑀼𑀮𑁄𑀫𑁂𑀧𑀺 𑀭𑀽𑀧𑀸𑀤𑀻𑀳𑀺 𑀅𑀜𑁆𑀜𑀢𑁆𑀢𑀘𑁄𑀤𑀦𑀸𑀬𑀫𑁂𑀯 𑀧𑀭𑀯𑀸𑀤𑀺𑀦𑀸 𑀧𑀝𑀺𑀓𑁆𑀔𑁂𑀧𑀲𑁆𑀲 𑀓𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑀼𑀤𑁆𑀥𑀺𑀓𑀲𑀁𑀲𑀦𑁆𑀤𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀯𑀡𑁆𑀡𑀦𑀸

𑁨𑁮-𑁩𑁬. 𑀉𑀧𑀮𑀤𑁆𑀥𑀺𑀲𑀸𑀫𑀜𑁆𑀜𑁂𑀦 𑀅𑀜𑁆𑀜𑀢𑁆𑀢𑀧𑀼𑀘𑁆𑀙𑀸 𑀘𑀸𑀢𑀺 𑀇𑀫𑀺𑀦𑀸 𑀤𑁆𑀯𑀬𑀫𑁆𑀧𑀺 𑀉𑀤𑁆𑀥𑀭𑀢𑀺 𑀉𑀧𑀮𑀤𑁆𑀥𑀺𑀲𑀸𑀫𑀜𑁆𑀜𑁂𑀦 𑀅𑀜𑁆𑀜𑀢𑁆𑀢𑀧𑀼𑀘𑁆𑀙𑀸, 𑀉𑀧𑀮𑀤𑁆𑀥𑀺𑀲𑀸𑀫𑀜𑁆𑀜𑁂𑀦 𑀧𑀼𑀘𑁆𑀙𑀸 𑀘𑀸𑀢𑀺. 𑀢𑀢𑁆𑀣 𑀧𑀘𑁆𑀙𑀺𑀫𑀁 𑀲𑀦𑁆𑀥𑀸𑀬𑀸𑀳 ‘‘𑀤𑁆𑀯𑀺𑀦𑁆𑀦𑀁 𑀲𑀫𑀸𑀦𑀢𑀸’’𑀢𑀺𑀆𑀤𑀺. 𑀢𑀲𑁆𑀲𑀢𑁆𑀣𑁄 𑁋 𑀤𑁆𑀯𑀺𑀦𑁆𑀦𑀁 𑀭𑀽𑀧𑀯𑁂𑀤𑀦𑀸𑀦𑀁 𑀯𑀺𑀬 𑀭𑀽𑀧𑀧𑀼𑀕𑁆𑀕𑀮𑀸𑀦𑀁 𑀲𑀘𑁆𑀘𑀺𑀓𑀝𑁆𑀞𑁂𑀦 𑀲𑀫𑀸𑀦𑀢𑀸 𑀢𑁂𑀲𑀁 𑀅𑀜𑁆𑀜𑀢𑁆𑀢𑀲𑁆𑀲 𑀓𑀸𑀭𑀡𑀁 𑀬𑀼𑀢𑁆𑀢𑀁 𑀦 𑀳𑁄𑀢𑀺. 𑀅𑀣 𑀔𑁄…𑀧𑁂… 𑀉𑀧𑀮𑀩𑁆𑀪𑀦𑀻𑀬𑀢𑀸𑀢𑀺 𑀇𑀤𑀜𑁆𑀘 𑀲𑀁𑀲𑀦𑁆𑀤𑀦𑀁 𑀯𑀺𑀘𑀸𑀭𑁂𑀢𑀩𑁆𑀩𑀁. 𑀅𑀬𑀁 𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀤𑀺 𑀲𑀘𑁆𑀘𑀺𑀓𑀝𑁆𑀞𑀲𑀸𑀫𑀜𑁆𑀜𑁂𑀦 𑀭𑀽𑀧𑀧𑀼𑀕𑁆𑀕𑀮𑀸𑀦𑀁 𑀉𑀧𑀮𑀤𑁆𑀥𑀺𑀲𑀸𑀫𑀜𑁆𑀜𑀁 𑀇𑀘𑁆𑀙𑀺𑀢𑀁, 𑀢𑁂𑀦𑁂𑀯 𑀦𑁂𑀲𑀁 𑀅𑀜𑁆𑀜𑀢𑁆𑀢𑀫𑁆𑀧𑀺 𑀇𑀘𑁆𑀙𑀺𑀢𑀩𑁆𑀩𑀁. 𑀅𑀣 𑀧𑀭𑀫𑀢𑁆𑀣𑀯𑁄𑀳𑀸𑀭𑀪𑁂𑀤𑀢𑁄 𑀢𑁂𑀲𑀁 𑀅𑀜𑁆𑀜𑀢𑁆𑀢𑀁 𑀦 𑀇𑀘𑁆𑀙𑀺𑀢𑀁, 𑀢𑀢𑁄 𑀏𑀯 𑀉𑀧𑀮𑀤𑁆𑀥𑀺𑀲𑀸𑀫𑀜𑁆𑀜𑀫𑁆𑀧𑀺 𑀦 𑀇𑀘𑁆𑀙𑀺𑀢𑀩𑁆𑀩𑀦𑁆𑀢𑀺.

𑁩𑁭-𑁪𑁫. 𑀉𑀧𑀮𑀤𑁆𑀥𑀻𑀢𑀺 𑀧𑀼𑀕𑁆𑀕𑀮𑀲𑁆𑀲 𑀉𑀧𑀮𑀤𑁆𑀥𑀺 𑀯𑀺𑀚𑁆𑀚𑀫𑀸𑀦𑀢𑀸. ‘‘𑀧𑀝𑀺𑀓𑀫𑁆𑀫𑀧𑀜𑁆𑀘𑀓’’𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺 𑀬𑁄𑀚𑀦𑀸.

𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀘𑀢𑀼𑀓𑁆𑀓𑀦𑀬𑀲𑀁𑀲𑀦𑁆𑀤𑀦𑀯𑀡𑁆𑀡𑀦𑀸

𑁪𑁬-𑁫𑁨. 𑀏𑀓𑀥𑀫𑁆𑀫𑀢𑁄𑀧𑀻𑀢𑀺 𑀲𑀢𑁆𑀢𑀧𑀜𑁆𑀜𑀸𑀲𑀸𑀬 𑀲𑀘𑁆𑀘𑀺𑀓𑀝𑁆𑀞𑁂𑀲𑀼 𑀏𑀓𑀥𑀫𑁆𑀫𑀢𑁄𑀧𑀺. 𑀏𑀢𑁂𑀦 𑀢𑀢𑁄 𑀲𑀩𑁆𑀩𑀢𑁄𑀧𑀺 𑀧𑀼𑀕𑁆𑀕𑀮𑀲𑁆𑀲 𑀅𑀜𑁆𑀜𑀢𑁆𑀢𑀸𑀦𑀦𑀼𑀚𑀸𑀦𑀦𑀁 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀓𑀮𑀁 𑀧𑀭𑀫𑀢𑁆𑀣𑀲𑀘𑁆𑀘𑀁 𑀲𑀦𑁆𑀥𑀸𑀬𑀸’’𑀢𑀺. 𑀭𑀽𑀧𑀸𑀤𑀺𑀏𑀓𑁂𑀓𑀥𑀫𑁆𑀫𑀯𑀲𑁂𑀦 𑀦𑀸𑀦𑀼𑀬𑀼𑀜𑁆𑀚𑀺𑀢𑀩𑁆𑀩𑁄 𑀅𑀯𑀬𑀯𑀩𑁆𑀬𑀢𑀺𑀭𑁂𑀓𑁂𑀦 𑀲𑀫𑀼𑀤𑀸𑀬𑀲𑁆𑀲 𑀅𑀪𑀸𑀯𑀢𑁄. 𑀬𑀲𑁆𑀫𑀸 𑀧𑀦 𑀲𑀫𑀼𑀤𑀸𑀬𑀸𑀯𑀬𑀯𑀸 𑀪𑀺𑀦𑁆𑀦𑀲𑀪𑀸𑀯𑀸, 𑀢𑀲𑁆𑀫𑀸 ‘‘𑀲𑀫𑀼𑀤𑀸𑀬𑀢𑁄…𑀧𑁂… 𑀦𑀺𑀕𑁆𑀕𑀳𑀸𑀭𑀳𑁄 𑀲𑀺𑀬𑀸’’𑀢𑀺 𑀧𑀭𑀯𑀸𑀤𑀺𑀦𑁄 𑀆𑀲𑀗𑁆𑀓𑀫𑀸𑀳. 𑀏𑀢𑀁 𑀯𑀘𑀦𑁄𑀓𑀸𑀲𑀦𑁆𑀢𑀺 𑀬𑀤𑀺𑀧𑀺 𑀲𑀢𑁆𑀢𑀧𑀜𑁆𑀜𑀸𑀲𑀥𑀫𑁆𑀫𑀲𑀫𑀼𑀤𑀸𑀬𑀢𑁄 𑀧𑀼𑀕𑁆𑀕𑀮𑀲𑁆𑀲 𑀅𑀜𑁆𑀜𑀢𑁆𑀢𑀁 𑀦 𑀇𑀘𑁆𑀙𑀢𑀺 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀲𑁆𑀲 𑀲𑀘𑁆𑀘𑀺𑀓𑀝𑁆𑀞𑀲𑁆𑀲 𑀅𑀪𑀸𑀯𑀢𑁄, 𑀢𑀤𑁂𑀓𑀤𑁂𑀲𑀢𑁄 𑀧𑀦𑀲𑁆𑀲 𑀅𑀦𑀜𑁆𑀜𑀢𑁆𑀢𑀫𑁆𑀧𑀺 𑀦 𑀇𑀘𑁆𑀙𑀢𑁂𑀯. 𑀦 𑀳𑀺 𑀲𑀫𑀼𑀤𑀸𑀬𑁄 𑀅𑀯𑀬𑀯𑁄 𑀳𑁄𑀢𑀻𑀢𑀺. 𑀢𑀲𑁆𑀫𑀸 ‘‘𑀢𑀁 𑀧𑀝𑀺𑀓𑁆𑀔𑀺𑀧𑀢𑁄 𑀓𑀺𑀁 𑀦𑀺𑀕𑁆𑀕𑀳𑀝𑁆𑀞𑀸𑀦𑀦𑁆𑀢𑀺 𑀯𑀢𑁆𑀢𑀼𑀁 𑀫𑀸 𑀮𑀩𑁆𑀪𑁂𑀣𑀸’’𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀬𑀜𑁆𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀭𑀽𑀧𑀸𑀤𑀺𑀥𑀫𑁆𑀫𑀧𑁆𑀧𑀪𑁂𑀤𑀯𑀺𑀪𑀸𑀕𑀫𑀼𑀔𑁂𑀦𑁂𑀯 𑀅𑀦𑀯𑀲𑁂𑀲𑀢𑁄 𑀧𑀼𑀕𑁆𑀕𑀮𑁄𑀢𑀺 𑀕𑀳𑀡𑀸𑀓𑀸𑀭𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑁄 𑀧𑀞𑀫𑀯𑀺𑀓𑀧𑁆𑀧𑁄, 𑀤𑀼𑀢𑀺𑀬𑁄 𑀧𑀦 𑀅𑀯𑀺𑀪𑀸𑀕𑀢𑁄 𑀧𑀭𑀫𑀢𑁆𑀣𑀲𑀘𑁆𑀘𑀪𑀸𑀯𑀲𑀸𑀫𑀜𑁆𑀜𑁂𑀦𑀸𑀢𑀺 𑀅𑀬𑀁 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀯𑀺𑀓𑀧𑁆𑀧𑀸𑀦𑀁 𑀯𑀺𑀲𑁂𑀲𑁄. 𑀇𑀢𑀻𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀧𑀭𑀸𑀫𑀲𑀦𑀦𑁆𑀢𑀺 𑀆𑀳 ‘‘𑀏𑀯’’𑀦𑁆𑀢𑀺.

𑀲𑀪𑀸𑀯𑀯𑀺𑀦𑀺𑀩𑁆𑀪𑁄𑀕𑀢𑁄𑀢𑀺 𑀲𑀪𑀸𑀯𑁂𑀦 𑀯𑀺𑀦𑀺𑀩𑁆𑀪𑀼𑀚𑁆𑀚𑀺𑀢𑀩𑁆𑀩𑀢𑁄. 𑀲𑀪𑀸𑀯𑀪𑀺𑀦𑁆𑀦𑁄 𑀳𑀺 𑀥𑀫𑁆𑀫𑁄 𑀢𑀤𑀜𑁆𑀜𑀥𑀫𑁆𑀫𑀢𑁄 𑀯𑀺𑀦𑀺𑀩𑁆𑀪𑁄𑀕𑀁 𑀮𑀪𑀢𑀺. 𑀢𑁂𑀦𑀸𑀳 ‘‘𑀭𑀽𑀧𑀢𑁄 𑀅𑀜𑁆𑀜𑀲𑀪𑀸𑀕𑀢𑁆𑀢𑀸’’𑀢𑀺. 𑀭𑀽𑀧𑀯𑀚𑁆𑀚𑁂𑀢𑀺 𑀭𑀽𑀧𑀥𑀫𑁆𑀫𑀯𑀚𑁆𑀚𑁂. 𑀢𑀻𑀲𑀼𑀧𑀻𑀢𑀺 ‘‘𑀭𑀽𑀧𑀲𑁆𑀫𑀺𑀁 𑀧𑀼𑀕𑁆𑀕𑀮𑁄, 𑀅𑀜𑁆𑀜𑀢𑁆𑀭 𑀭𑀽𑀧𑀸, 𑀧𑀼𑀕𑁆𑀕𑀮𑀲𑁆𑀫𑀺𑀁 𑀭𑀽𑀧’’𑀦𑁆𑀢𑀺 𑀇𑀫𑁂𑀲𑀼 𑀏𑀯𑀁 𑀧𑀯𑀢𑁆𑀢𑁂𑀲𑀼 𑀢𑀻𑀲𑀼𑀧𑀺 𑀅𑀦𑀼𑀬𑁄𑀕𑁂𑀲𑀼. 𑀲𑀸𑀲𑀦𑀺𑀓𑁄 𑀏𑀯𑀸𑀬𑀁 𑀧𑀼𑀕𑁆𑀕𑀮𑀯𑀸𑀤𑀻𑀢𑀺 𑀓𑀢𑁆𑀯𑀸 𑀆𑀳 ‘‘𑀦 𑀳𑀺 𑀲𑁄 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀁 𑀇𑀘𑁆𑀙𑀢𑀻’’𑀢𑀺. ‘‘𑀭𑀽𑀧𑀯𑀸’’𑀢𑀺 𑀇𑀫𑀺𑀦𑀸 𑀭𑀽𑀧𑁂𑀦 𑀲𑀓𑀺𑀜𑁆𑀘𑀦𑀢𑀸𑀯 𑀜𑀸𑀧𑀻𑀬𑀢𑀺, 𑀦 𑀭𑀽𑀧𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀢𑀺 𑀆𑀳 ‘‘𑀅𑀜𑁆𑀜𑀢𑁆𑀭 𑀭𑀽𑀧𑀸𑀢𑀺 𑀏𑀢𑁆𑀣 𑀘 𑀭𑀽𑀧𑀯𑀸 𑀧𑀼𑀕𑁆𑀕𑀮𑁄𑀢𑀺 𑀅𑀬𑀫𑀢𑁆𑀣𑁄 𑀲𑀗𑁆𑀕𑀳𑀺𑀢𑁄’’𑀢𑀺.

𑀘𑀢𑀼𑀓𑁆𑀓𑀦𑀬𑀲𑀁𑀲𑀦𑁆𑀤𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑀸 𑀘 𑀲𑀁𑀲𑀦𑁆𑀤𑀦𑀓𑀣𑀸𑀯𑀡𑁆𑀡𑀦𑀸.

𑁮. 𑀮𑀓𑁆𑀔𑀡𑀬𑀼𑀢𑁆𑀢𑀺𑀯𑀡𑁆𑀡𑀦𑀸

𑁫𑁪. 𑀮𑀓𑁆𑀔𑀡𑀬𑀼𑀢𑁆𑀢𑀺𑀓𑀣𑀸𑀬𑀁 ‘‘𑀙𑀮𑀯𑀲𑁂𑀦 𑀧𑀦 𑀯𑀢𑁆𑀢𑀩𑁆𑀩𑀁 𑀆𑀚𑀸𑀦𑀸𑀳𑀺 𑀦𑀺𑀕𑁆𑀕𑀳’’𑀦𑁆𑀢𑀺 𑀧𑀸𑀞𑁄 𑀕𑀳𑁂𑀢𑀩𑁆𑀩𑁄.

𑀮𑀓𑁆𑀔𑀡𑀬𑀼𑀢𑁆𑀢𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀯𑀘𑀦𑀲𑁄𑀥𑀦𑀯𑀡𑁆𑀡𑀦𑀸

𑁫𑁫-𑁫𑁯. 𑀧𑀤𑀤𑁆𑀯𑀬𑀲𑁆𑀲 𑀅𑀢𑁆𑀣𑀢𑁄 𑀏𑀓𑀢𑁆𑀢𑁂𑀢𑀺 𑀧𑀤𑀤𑁆𑀯𑀬𑀲𑁆𑀲 𑀏𑀓𑀢𑁆𑀢𑀢𑁆𑀣𑁂 𑀲𑀢𑀻𑀢𑀺 𑀅𑀢𑁆𑀣𑁄. 𑀧𑀭𑀺𑀓𑀧𑁆𑀧𑀯𑀘𑀦𑀜𑁆𑀳𑁂𑀢𑀁 𑀤𑁄𑀲𑀤𑀲𑁆𑀲𑀦𑀢𑁆𑀣𑀁 ‘‘𑀏𑀯𑀁 𑀲𑀦𑁆𑀢𑁂 𑀅𑀬𑀁 𑀤𑁄𑀲𑁄’’𑀢𑀺. 𑀢𑀬𑀺𑀤𑀁 𑀏𑀓𑀢𑁆𑀢𑀁 𑀉𑀧𑀮𑀩𑁆𑀪𑀢𑀺 𑀏𑀯𑀸𑀢𑀺 𑀧𑀘𑁆𑀙𑀺𑀫𑀧𑀤𑀸𑀯𑀥𑀸𑀭𑀡𑀁 𑀯𑁂𑀤𑀺𑀢𑀩𑁆𑀩𑀁. ‘‘𑀓𑁂𑀳𑀺𑀘𑀺 𑀧𑀼𑀕𑁆𑀕𑀮𑁄 𑀓𑁂𑀳𑀺𑀘𑀺 𑀦 𑀧𑀼𑀕𑁆𑀕𑀮𑁄’’𑀢𑀺 𑀩𑁆𑀬𑀪𑀺𑀘𑀸𑀭𑀤𑀲𑁆𑀲𑀦𑀢𑁄 𑀧𑀭𑁂𑀦 𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑀦𑁆𑀢𑀺 𑀓𑀢𑁆𑀯𑀸 𑀢𑀫𑁂𑀯 𑀅𑀲𑀫𑁆𑀧𑀝𑀺𑀘𑁆𑀙𑀺𑀢𑀢𑁆𑀢𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀧𑀼𑀕𑁆𑀕𑀮𑀲𑁆𑀲 𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀯𑀺𑀪𑀚𑀺𑀢𑀩𑁆𑀩𑀢𑀦𑁆𑀢𑀺 ‘‘𑀉𑀧𑀮𑀩𑁆𑀪𑀢𑀺 𑀘𑀸’’𑀢𑀺 𑀏𑀯𑀁 𑀅𑀯𑀺𑀪𑀚𑀺𑀢𑀩𑁆𑀩𑀢𑀁. 𑀯𑀺𑀪𑀚𑀺𑀢𑀩𑁆𑀩𑀢𑀦𑁆𑀢𑀺 ‘‘𑀧𑀼𑀕𑁆𑀕𑀮𑁄 𑀘 𑀢𑀤𑀜𑁆𑀜𑀜𑁆𑀘 𑀉𑀧𑀮𑀩𑁆𑀪𑀢𑀻’’𑀢𑀺 𑀏𑀯𑀁 𑀯𑀺𑀪𑀚𑀺𑀢𑀩𑁆𑀩𑀢𑀁. 𑀏𑀢𑁂𑀦 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀏𑀯𑀸’’𑀢𑀺 𑀧𑀘𑁆𑀙𑀺𑀫𑀧𑀤𑀸𑀯𑀥𑀸𑀭𑀡𑀁 𑀯𑁂𑀤𑀺𑀢𑀩𑁆𑀩𑀁, 𑀦 ‘‘𑀧𑀼𑀕𑁆𑀕𑀮𑁄 𑀏𑀯 𑀉𑀧𑀮𑀩𑁆𑀪𑀢𑀻’’𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀢𑀁 𑀯𑀺𑀪𑀸𑀕𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀁 𑀯𑀺𑀪𑀚𑀺𑀢𑀩𑁆𑀩𑀸𑀯𑀺𑀪𑀚𑀺𑀢𑀩𑁆𑀩𑀁 𑀯𑀺𑀪𑀸𑀕𑀁 𑀯𑀤𑀢𑁄 𑀲𑀓𑀯𑀸𑀤𑀺𑀦𑁄, 𑀅𑀜𑁆𑀜𑀲𑁆𑀲 𑀯𑀸 𑀓𑀲𑁆𑀲𑀘𑀺. 𑀏𑀢𑀲𑁆𑀲𑀸𑀢𑀺 𑀧𑀭𑀯𑀸𑀤𑀺𑀦𑁄. 𑀬𑀣𑀸𑀯𑀼𑀢𑁆𑀢𑀯𑀺𑀪𑀸𑀕𑀦𑁆𑀢𑀺 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺…𑀧𑁂… 𑀓𑁂𑀳𑀺𑀘𑀺 𑀦 𑀧𑀼𑀕𑁆𑀕𑀮𑁄’’𑀢𑀺 𑀏𑀯𑀁 𑀧𑀸𑀴𑀺𑀬𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀯𑀺𑀪𑀸𑀕𑀁. 𑀬𑀣𑀸𑀆𑀧𑀸𑀤𑀺𑀢𑁂𑀦𑀸𑀢𑀺 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻𑀢𑀺 𑀧𑀤𑀤𑁆𑀯𑀬𑀲𑁆𑀲 𑀅𑀢𑁆𑀣𑀢𑁄 𑀏𑀓𑀢𑁆𑀢𑁂’’𑀢𑀺𑀆𑀤𑀺𑀦𑀸 𑀆𑀧𑀸𑀤𑀺𑀢𑀧𑁆𑀧𑀓𑀸𑀭𑁂𑀦. 𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀬𑀤𑀺𑀧𑀺 𑀢𑁂𑀦 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀏𑀯 𑀯𑀼𑀘𑁆𑀘𑀢𑀺, 𑀉𑀧𑀮𑀩𑁆𑀪𑀢𑀻𑀢𑀺 𑀧𑀦 𑀧𑀼𑀕𑁆𑀕𑀮𑁄 𑀏𑀯 𑀦 𑀯𑀼𑀘𑁆𑀘𑀢𑀺, 𑀅𑀣 𑀔𑁄 𑀅𑀜𑁆𑀜𑁄𑀧𑀺, 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑁂𑀦 𑀧𑀲𑀗𑁆𑀕𑁂𑀦 𑀦 𑀪𑀯𑀺𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀫𑀕𑁆𑀕𑀺𑀢𑀩𑁆𑀩𑁄 𑀏𑀢𑁆𑀣 𑀅𑀥𑀺𑀧𑁆𑀧𑀸𑀬𑁄’’𑀢𑀺.

𑁬𑁦. 𑀅𑀢𑁆𑀣𑀢𑁄 𑀧𑀼𑀕𑁆𑀕𑀮𑁄 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺 𑀅𑀢𑁆𑀢𑀲𑀼𑀜𑁆𑀜𑀢𑀸𑀤𑀲𑁆𑀲𑀦𑁂𑀦 𑀅𑀦𑀢𑁆𑀢𑀮𑀓𑁆𑀔𑀡𑀲𑁆𑀲 𑀯𑀺𑀳𑀺𑀢𑀢𑁆𑀢𑀸.

𑀯𑀘𑀦𑀲𑁄𑀥𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀧𑀜𑁆𑀜𑀢𑁆𑀢𑀸𑀦𑀼𑀬𑁄𑀕𑀯𑀡𑁆𑀡𑀦𑀸

𑁬𑁧-𑁬𑁬. 𑀭𑀽𑀧𑀓𑀸𑀬𑀸𑀯𑀺𑀭𑀳𑀁 𑀲𑀦𑁆𑀥𑀸𑀬 𑀆𑀳, 𑀦 𑀭𑀽𑀧𑀢𑀡𑁆𑀳𑀸𑀲𑀩𑁆𑀪𑀸𑀯𑀁. 𑀢𑀣𑀸 𑀲𑀢𑀺 𑀅𑀦𑁂𑀓𑀦𑁆𑀢𑀺𑀓𑀢𑁆𑀢𑀸 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀫𑁂𑀯 𑀲𑀺𑀬𑀸, 𑀦 𑀅𑀦𑀼𑀚𑀸𑀦𑀺𑀢𑀩𑁆𑀩𑀦𑁆𑀢𑀺. ‘‘𑀅𑀢𑁆𑀣𑀺𑀢𑀸𑀬𑀸’’𑀢𑀺 𑀆𑀳𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀸𑀫𑀻𑀪𑀸𑀯𑀲𑁆𑀲 𑀅𑀦𑁂𑀓𑀦𑁆𑀢𑀺𑀓𑀢𑁆𑀢𑀸 𑀓𑀲𑁆𑀲𑀘𑀺 𑀓𑀸𑀫𑀥𑀸𑀢𑀽𑀧𑀧𑀦𑁆𑀦𑀲𑁆𑀲 𑀓𑀸𑀫𑀥𑀸𑀢𑀼𑀬𑀸 𑀆𑀬𑀢𑁆𑀢𑀢𑁆𑀢𑀸𑀪𑀸𑀯𑀢𑁄 𑀘 𑀓𑀤𑀸𑀘𑀺 𑀪𑀸𑀯𑀲𑁆𑀲𑁂𑀯𑀸𑀢𑀺 𑀬𑁄𑀚𑀦𑀸.

𑁬𑁭. 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀬𑀸𑀢𑀺 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑁂𑀲𑀦𑀸𑀬. 𑀲𑀸 𑀳𑀺 𑀓𑀸𑀬𑀓𑀸𑀬𑀸𑀦𑀼𑀧𑀲𑁆𑀲𑀻𑀦𑀁 𑀯𑀺𑀪𑀸𑀕𑀕𑁆𑀕𑀳𑀡𑀲𑁆𑀲 𑀓𑀸𑀭𑀡𑀪𑀽𑀢𑀸, 𑀓𑀸𑀬𑀸𑀦𑀼𑀧𑀲𑁆𑀲𑀦𑀸 𑀏𑀯 𑀯𑀸. 𑀏𑀯𑀁𑀮𑀤𑁆𑀥𑀺𑀓𑀢𑁆𑀢𑀸𑀢𑀺 𑀅𑀜𑁆𑀜𑁄 𑀓𑀸𑀬𑁄 𑀅𑀜𑁆𑀜𑁄 𑀧𑀼𑀕𑁆𑀕𑀮𑁄𑀢𑀺 𑀏𑀯𑀁𑀮𑀤𑁆𑀥𑀺𑀓𑀢𑁆𑀢𑀸. 𑀆𑀳𑀘𑁆𑀘 𑀪𑀸𑀲𑀺𑀢𑀦𑁆𑀢𑀺 𑀞𑀸𑀦𑀓𑀭𑀡𑀸𑀦𑀺 𑀆𑀳𑀦𑁆𑀢𑁆𑀯𑀸 𑀓𑀣𑀺𑀢𑀁, 𑀪𑀕𑀯𑀢𑀸 𑀲𑀸𑀫𑀁 𑀤𑁂𑀲𑀺𑀢𑀦𑁆𑀢𑀺 𑀅𑀢𑁆𑀣𑁄.

𑀧𑀜𑁆𑀜𑀢𑁆𑀢𑀸𑀦𑀼𑀬𑁄𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀕𑀢𑀺𑀅𑀦𑀼𑀬𑁄𑀕𑀯𑀡𑁆𑀡𑀦𑀸

𑁬𑁯-𑁭𑁨. 𑀬𑀸𑀦𑀺𑀲𑁆𑀲 𑀲𑀼𑀢𑁆𑀢𑀸𑀦𑀺 𑀦𑀺𑀲𑁆𑀲𑀸𑀬 𑀮𑀤𑁆𑀥𑀺 𑀉𑀧𑁆𑀧𑀦𑁆𑀦𑀸, 𑀢𑁂𑀲𑀁 𑀤𑀲𑁆𑀲𑀦𑀢𑁄 𑀧𑀭𑀢𑁄 ‘‘𑀢𑁂𑀦 𑀳𑀺 𑀧𑀼𑀕𑁆𑀕𑀮𑁄 𑀲𑀦𑁆𑀥𑀸𑀯𑀢𑀻’’𑀢𑀺𑀆𑀤𑀺𑀦𑀸 𑀧𑀸𑀴𑀺 𑀆𑀕𑀢𑀸, 𑀧𑀼𑀭𑀢𑁄 𑀧𑀦 ‘‘𑀦 𑀯𑀢𑁆𑀢𑀩𑁆𑀩𑀁 𑀧𑀼𑀕𑁆𑀕𑀮𑁄 𑀲𑀦𑁆𑀥𑀸𑀯𑀢𑀻’’𑀢𑀺𑀆𑀤𑀺𑀦𑀸, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀤𑀲𑁆𑀲𑁂𑀦𑁆𑀢𑁄…𑀧𑁂… 𑀪𑀯𑀺𑀢𑀩𑁆𑀩’’𑀦𑁆𑀢𑀺. 𑀤𑀲𑁆𑀲𑁂𑀢𑁆𑀯𑀸𑀢𑀺 𑀯𑀸 𑀯𑀢𑁆𑀢𑀩𑁆𑀩𑀦𑁆𑀢𑀺 ‘‘𑀬𑀸𑀦𑀺𑀲𑁆𑀲…𑀧𑁂… 𑀢𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 ‘𑀢𑁂𑀦 𑀳𑀺 𑀧𑀼𑀕𑁆𑀕𑀮𑁄 𑀲𑀦𑁆𑀥𑀸𑀯𑀢𑀻’𑀢𑀺𑀆𑀤𑀺𑀫𑀸𑀳𑀸’’𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀤𑀲𑁆𑀲𑁂𑀦𑁆𑀢𑁄𑀢𑀺 𑀯𑀸 𑀇𑀤𑀁 𑀤𑀲𑁆𑀲𑀦𑀓𑀺𑀭𑀺𑀬𑀸𑀬 𑀦 𑀯𑀢𑁆𑀢𑀫𑀸𑀦𑀢𑀸𑀫𑀢𑁆𑀢𑀯𑀘𑀦𑀁, 𑀅𑀣 𑀔𑁄 𑀢𑀲𑁆𑀲𑀸 𑀮𑀓𑁆𑀔𑀡𑀢𑁆𑀣𑀯𑀘𑀦𑀁, 𑀳𑁂𑀢𑀼𑀪𑀸𑀯𑀯𑀘𑀦𑀁 𑀯𑀸𑀢𑀺 𑀦 𑀓𑁄𑀘𑀺 𑀤𑁄𑀲𑁄.

𑁯𑁧. 𑀲𑁄 𑀯𑀢𑁆𑀢𑀩𑁆𑀩𑁄𑀢𑀺 𑀲𑁄 𑀚𑀻𑀯𑀲𑀭𑀻𑀭𑀸𑀦𑀁 𑀅𑀦𑀜𑁆𑀜𑀢𑀸𑀧𑀚𑁆𑀚𑀦𑀸𑀓𑀸𑀭𑁄 𑀯𑀢𑁆𑀢𑀩𑁆𑀩𑁄, 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀭𑀽𑀧𑀻 𑀅𑀢𑁆𑀢𑀸’’𑀢𑀺 𑀇𑀫𑀺𑀲𑁆𑀲𑀸 𑀮𑀤𑁆𑀥𑀺𑀬𑀸 𑀯𑀲𑁂𑀦 ‘‘𑀬𑁂𑀦 𑀭𑀽𑀧𑀲𑀗𑁆𑀔𑀸𑀢𑁂𑀦 𑀅𑀢𑁆𑀢𑀦𑁄 𑀲𑀪𑀸𑀯𑀪𑀽𑀢𑁂𑀦 𑀲𑀭𑀻𑀭𑁂𑀦 𑀲𑀤𑁆𑀥𑀺𑀁 𑀕𑀘𑁆𑀙𑀢𑀻’’𑀢𑀺 𑀏𑀯𑀁 𑀧𑀦 𑀅𑀢𑁆𑀣𑁂 𑀲𑀢𑀺 𑀲𑁄 𑀆𑀓𑀸𑀭𑁄 𑀯𑀼𑀢𑁆𑀢𑁄 𑀏𑀯 𑀳𑁄𑀢𑀺, 𑀢𑀣𑀸 𑀘 𑀲𑀢𑀺 ‘‘𑀭𑀽𑀧𑀁 𑀧𑀼𑀕𑁆𑀕𑀮𑁄𑀢𑀺 𑀅𑀦𑀦𑀼𑀜𑁆𑀜𑀸𑀢𑀢𑁆𑀢𑀸’’𑀢𑀺 𑀏𑀯𑀫𑁆𑀧𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸. 𑀬𑀲𑁆𑀫𑀸 𑀧𑀦 ‘‘𑀇𑀥 𑀲𑀭𑀻𑀭𑀦𑀺𑀓𑁆𑀔𑁂𑀧𑀸’’𑀢𑀺 𑀅𑀦𑀦𑁆𑀢𑀭𑀁 𑀯𑀓𑁆𑀔𑀢𑀺, 𑀢𑀲𑁆𑀫𑀸 ‘‘𑀲𑁄 𑀯𑀢𑁆𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁. 𑀦𑀺𑀭𑀬𑀽𑀧𑀕𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀦𑁆𑀢𑀭𑀸𑀪𑀯𑀁 𑀦 𑀇𑀘𑁆𑀙𑀢𑀻𑀢𑀺 𑀇𑀤𑀁 𑀧𑀼𑀭𑀸𑀢𑀦𑀸𑀦𑀁 𑀅𑀦𑁆𑀢𑀭𑀸𑀪𑀯𑀯𑀸𑀤𑀻𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀥𑀼𑀦𑀸𑀢𑀦𑀸 𑀧𑀦 ‘‘𑀉𑀤𑁆𑀥𑀁𑀧𑀸𑀤𑁄 𑀢𑀼 𑀦𑀸𑀭𑀓𑁄’’𑀢𑀺 𑀯𑀤𑀦𑁆𑀢𑀸 𑀢𑀲𑁆𑀲𑀧𑀺 𑀅𑀦𑁆𑀢𑀭𑀸𑀪𑀯𑀁 𑀇𑀘𑁆𑀙𑀦𑁆𑀢𑁂𑀯, 𑀓𑁂𑀘𑀺 𑀧𑀦 𑀅𑀲𑀜𑁆𑀜𑀽𑀧𑀕𑀸𑀦𑀁. 𑀅𑀭𑀽𑀧𑀽𑀧𑀕𑀸𑀦𑀁 𑀧𑀦 𑀲𑀩𑁆𑀩𑁂𑀧𑀺 𑀦 𑀇𑀘𑁆𑀙𑀦𑁆𑀢𑀺. 𑀢𑀢𑁆𑀣 𑀬𑁂 ‘‘𑀲𑀜𑁆𑀜𑀼𑀧𑁆𑀧𑀸𑀤𑀸 𑀘 𑀧𑀦 𑀢𑁂 𑀤𑁂𑀯𑀸 𑀢𑀫𑁆𑀳𑀸 𑀓𑀸𑀬𑀸 𑀘𑀯𑀦𑁆𑀢𑀻’’𑀢𑀺 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑀁 𑀫𑀺𑀘𑁆𑀙𑀸 𑀕𑀳𑁂𑀢𑁆𑀯𑀸 𑀘𑀼𑀢𑀽𑀧𑀧𑀸𑀢𑀓𑀸𑀮𑁂𑀲𑀼 𑀅𑀲𑀜𑁆𑀜𑀻𑀦𑀁 𑀲𑀜𑁆𑀜𑀸 𑀅𑀢𑁆𑀣𑀻𑀢𑀺 𑀅𑀦𑁆𑀢𑀭𑀸𑀪𑀯𑀢𑁄𑀯 𑀅𑀲𑀜𑁆𑀜𑀽𑀧𑀧𑀢𑁆𑀢𑀺𑀁 𑀇𑀘𑁆𑀙𑀦𑁆𑀢𑀺, 𑀢𑀤𑀜𑁆𑀜𑁂𑀲𑀁 𑀯𑀲𑁂𑀦 ‘‘𑀲𑀯𑁂𑀤𑀦𑁄…𑀧𑁂… 𑀧𑀝𑀺𑀓𑁆𑀔𑀺𑀧𑀢𑀻’’𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁂 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀓𑁂 𑀧𑀦𑁂𑀯𑀁 𑀇𑀘𑁆𑀙𑀦𑁆𑀢𑀺? 𑀲𑀩𑁆𑀩𑀢𑁆𑀣𑀺𑀯𑀸𑀤𑀻𑀲𑀼 𑀏𑀓𑀘𑁆𑀘𑁂.

𑁯𑁨. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂 𑀪𑀯𑁂, 𑀅𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀯𑀸 𑀲𑀜𑁆𑀜𑀸 𑀅𑀢𑁆𑀣𑀻𑀢𑀺 𑀇𑀘𑁆𑀙𑀦𑁆𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀢𑁄 𑀲𑁄 𑀲𑀜𑁆𑀜𑀸𑀪𑀯𑁂𑀦 𑀅𑀲𑀗𑁆𑀕𑀳𑀺𑀢𑁄, 𑀪𑀯𑀦𑁆𑀢𑀭𑀪𑀸𑀯𑁂𑀦 𑀘 𑀲𑀗𑁆𑀕𑀳𑀺𑀢𑁄.

𑁯𑁩. 𑀇𑀦𑁆𑀥𑀦𑀼𑀧𑀸𑀤𑀸𑀦𑁄 𑀅𑀕𑁆𑀕𑀺 𑀯𑀺𑀬 𑀇𑀦𑁆𑀥𑀦𑁂𑀦 𑀭𑀽𑀧𑀸𑀤𑀺𑀉𑀧𑀸𑀤𑀸𑀦𑁄 𑀧𑀼𑀕𑁆𑀕𑀮𑁄 𑀭𑀽𑀧𑀸𑀤𑀺𑀦𑀸 𑀯𑀺𑀦𑀸 𑀦𑀢𑁆𑀣𑀻𑀢𑀺 𑀏𑀢𑁆𑀣 𑀅𑀬𑀫𑀥𑀺𑀧𑁆𑀧𑀸𑀬𑀯𑀺𑀪𑀸𑀯𑀦𑀸 𑁋 𑀬𑀣𑀸 𑀦 𑀯𑀺𑀦𑀸 𑀇𑀦𑁆𑀥𑀦𑁂𑀦 𑀅𑀕𑁆𑀕𑀺 𑀧𑀜𑁆𑀜𑀸𑀧𑀻𑀬𑀢𑀺, 𑀦 𑀘 𑀢𑀁 𑀅𑀜𑁆𑀜𑀁 𑀇𑀦𑁆𑀥𑀦𑀢𑁄 𑀲𑀓𑁆𑀓𑀸 𑀧𑀝𑀺𑀚𑀸𑀦𑀺𑀢𑀼𑀁, 𑀦𑀸𑀧𑀺 𑀅𑀦𑀜𑁆𑀜𑀁. 𑀬𑀤𑀺 𑀳𑀺 𑀅𑀜𑁆𑀜𑀁 𑀲𑀺𑀬𑀸, 𑀦 𑀉𑀡𑁆𑀳𑀁 𑀇𑀦𑁆𑀥𑀦𑀁 𑀲𑀺𑀬𑀸, 𑀅𑀣 𑀅𑀦𑀜𑁆𑀜𑀁, 𑀦𑀺𑀤𑀳𑀺𑀢𑀩𑁆𑀩𑀁𑀬𑁂𑀯 𑀤𑀸𑀳𑀓𑀁 𑀲𑀺𑀬𑀸, 𑀏𑀯𑀁 𑀦 𑀯𑀺𑀦𑀸 𑀭𑀽𑀧𑀸𑀤𑀻𑀳𑀺 𑀧𑀼𑀕𑁆𑀕𑀮𑁄 𑀧𑀜𑁆𑀜𑀸𑀧𑀻𑀬𑀢𑀺, 𑀦 𑀘 𑀢𑁂𑀳𑀺 𑀅𑀜𑁆𑀜𑁄, 𑀦𑀸𑀧𑀺 𑀅𑀦𑀜𑁆𑀜𑁄 𑀲𑀲𑁆𑀲𑀢𑀼𑀘𑁆𑀙𑁂𑀤𑀪𑀸𑀯𑀧𑁆𑀧𑀲𑀗𑁆𑀕𑀢𑁄𑀢𑀺 𑀧𑀭𑀯𑀸𑀤𑀺𑀦𑁄 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀣 𑀬𑀤𑀺 𑀅𑀕𑁆𑀕𑀺𑀦𑁆𑀥𑀦𑁄𑀧𑀫𑀸 𑀮𑁄𑀓𑀯𑁄𑀳𑀸𑀭𑁂𑀦 𑀯𑀼𑀢𑁆𑀢𑀸, 𑀅𑀧𑀴𑀺𑀢𑁆𑀢𑀁 𑀓𑀝𑁆𑀞𑀸𑀤𑀺𑀇𑀦𑁆𑀥𑀦𑀁 𑀦𑀺𑀤𑀳𑀺𑀢𑀩𑁆𑀩𑀜𑁆𑀘, 𑀧𑀴𑀺𑀢𑁆𑀢𑀁 𑀪𑀸𑀲𑀼𑀭𑀼𑀡𑁆𑀳𑀁 𑀅𑀕𑁆𑀕𑀺𑀤𑀸𑀳𑀓𑀜𑁆𑀘, 𑀢𑀜𑁆𑀘 𑀑𑀚𑀝𑁆𑀞𑀫𑀓𑀭𑀽𑀧𑀁 𑀧𑀩𑀦𑁆𑀥𑀯𑀲𑁂𑀦 𑀧𑀯𑀢𑁆𑀢𑀁 𑀅𑀦𑀺𑀘𑁆𑀘𑀁 𑀲𑀗𑁆𑀔𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁. 𑀬𑀤𑀺 𑀏𑀯𑀁 𑀧𑀼𑀕𑁆𑀕𑀮𑁄 𑀭𑀽𑀧𑀸𑀤𑀻𑀳𑀺 𑀅𑀜𑁆𑀜𑁄 𑀅𑀦𑀺𑀘𑁆𑀘𑁄 𑀘 𑀆𑀧𑀦𑁆𑀦𑁄, 𑀅𑀣 𑀧𑀭𑀫𑀢𑁆𑀣𑀢𑁄 𑀘, 𑀢𑀲𑁆𑀫𑀺𑀁𑀬𑁂𑀯 𑀓𑀝𑁆𑀞𑀸𑀤𑀺𑀲𑀜𑁆𑀜𑀺𑀢𑁂 𑀭𑀽𑀧𑀲𑀗𑁆𑀔𑀸𑀢𑀧𑀴𑀺𑀢𑁆𑀢𑁂 𑀬𑀁 𑀉𑀲𑀼𑀫𑀁 𑀲𑁄 𑀅𑀕𑁆𑀕𑀺 𑀢𑀁𑀲𑀳𑀚𑀸𑀢𑀸𑀦𑀺 𑀢𑀻𑀡𑀺𑀪𑀽𑀢𑀸𑀦𑀺 𑀇𑀦𑁆𑀥𑀦𑀁. 𑀏𑀯𑀫𑁆𑀧𑀺 𑀲𑀺𑀤𑁆𑀥𑀁 𑀮𑀓𑁆𑀔𑀡𑀪𑁂𑀤𑀢𑁄 𑀅𑀕𑁆𑀕𑀺𑀦𑁆𑀥𑀦𑀸𑀦𑀁 𑀅𑀜𑁆𑀜𑀢𑁆𑀢𑀦𑁆𑀢𑀺 𑀅𑀕𑁆𑀕𑀺 𑀯𑀺𑀬 𑀇𑀦𑁆𑀥𑀦𑀢𑁄 𑀭𑀽𑀧𑀸𑀤𑀻𑀳𑀺 𑀅𑀜𑁆𑀜𑁄 𑀧𑀼𑀕𑁆𑀕𑀮𑁄 𑀅𑀦𑀺𑀘𑁆𑀘𑁄 𑀘 𑀆𑀧𑀚𑁆𑀚𑀢𑀻𑀢𑀺.

𑀕𑀢𑀺𑀅𑀦𑀼𑀬𑁄𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀸𑀦𑀼𑀬𑁄𑀕𑀯𑀡𑁆𑀡𑀦𑀸

𑁯𑁭. 𑀦𑀻𑀮𑀕𑀼𑀡𑀬𑁄𑀕𑀢𑁄 𑀦𑀻𑀮𑁄, 𑀦𑀻𑀮𑁄 𑀏𑀯 𑀦𑀻𑀮𑀓𑁄, 𑀢𑀲𑁆𑀲, 𑀅𑀬𑀁 𑀧𑀦𑀲𑁆𑀲 𑀦𑀻𑀮𑀧𑀜𑁆𑀜𑀢𑁆𑀢𑀺 𑀦𑀻𑀮𑀭𑀽𑀧𑀼𑀧𑀸𑀤𑀸𑀦𑀸𑀢𑀺 𑀆𑀳 ‘‘𑀦𑀻𑀮𑀁…𑀧𑁂… 𑀧𑀜𑁆𑀜𑀢𑁆𑀢𑀻’’𑀢𑀺. 𑀏𑀯𑀁 𑀧𑀦 𑀧𑀸𑀞𑁂 𑀞𑀺𑀢𑁂 𑀦𑀻𑀮𑀁 𑀉𑀧𑀸𑀤𑀸𑀬 𑀦𑀻𑀮𑁄𑀢𑀺 𑀓𑀣𑀫𑀬𑀁 𑀧𑀤𑀼𑀤𑁆𑀥𑀸𑀭𑁄𑀢𑀺 𑀆𑀳 ‘‘𑀦𑀻𑀮𑀁 𑀭𑀽𑀧𑀁…𑀧𑁂… 𑀏𑀢𑁆𑀣 𑀬𑁄 𑀧𑀼𑀝𑁆𑀞𑁄 𑀦𑀻𑀮𑀁 𑀉𑀧𑀸𑀤𑀸𑀬 𑀦𑀻𑀮𑁄’’𑀢𑀺. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀯𑀘𑀦𑁂. 𑀢𑀤𑀸𑀤𑀻𑀲𑀽𑀢𑀺 ‘‘𑀧𑀻𑀢𑀁 𑀭𑀽𑀧𑀁 𑀉𑀧𑀸𑀤𑀸𑀬𑀸’’𑀢𑀺𑀆𑀤𑀺𑀓𑀁 𑀅𑀝𑁆𑀞𑀓𑀣𑀸𑀬𑀁 𑀆𑀤𑀺-𑀲𑀤𑁆𑀤𑁂𑀦 𑀕𑀳𑀺𑀢𑀫𑁂𑀯 𑀢𑀤𑀢𑁆𑀣𑀤𑀲𑁆𑀲𑀦𑀯𑀲𑁂𑀦 𑀕𑀡𑁆𑀳𑀸𑀢𑀺.

𑁯𑁮. 𑀯𑀼𑀢𑁆𑀢𑀦𑁆𑀢𑀺 ‘‘𑀫𑀕𑁆𑀕𑀓𑀼𑀲𑀮𑁄’’𑀢𑀺𑀆𑀤𑀻𑀲𑀼 𑀙𑁂𑀓𑀝𑁆𑀞𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑀼𑀲𑀮𑀧𑀜𑁆𑀜𑀢𑁆𑀢𑀺𑀁 𑀓𑀼𑀲𑀮𑀯𑁄𑀳𑀸𑀭𑀁.

𑁧𑁧𑁨. 𑀧𑀼𑀩𑁆𑀩𑀧𑀓𑁆𑀔𑀁 𑀤𑀲𑁆𑀲𑁂𑀢𑁆𑀯𑀸 𑀉𑀢𑁆𑀢𑀭𑀫𑀸𑀳𑀸𑀢𑀺 𑀧𑀭𑀯𑀸𑀤𑀻 𑀧𑀼𑀩𑁆𑀩𑀧𑀓𑁆𑀔𑀁 𑀤𑀲𑁆𑀲𑁂𑀢𑁆𑀯𑀸 𑀲𑀓𑀯𑀸𑀤𑀺𑀲𑁆𑀲 𑀉𑀢𑁆𑀢𑀭𑀫𑀸𑀳.

𑁧𑁧𑁫. ‘‘𑀭𑀽𑀧𑀁 𑀭𑀽𑀧𑀯𑀸’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀁 𑀧𑀭𑀯𑀸𑀤𑀺𑀯𑀸𑀤𑀁 𑀪𑀺𑀦𑁆𑀤𑀺𑀢𑀼𑀁 ‘‘𑀬𑀣𑀸 𑀦 𑀦𑀺𑀕𑀴𑁄 𑀦𑁂𑀕𑀴𑀺𑀓𑁄’’𑀢𑀺𑀆𑀤𑀺𑀦𑀸 𑀲𑀓𑀯𑀸𑀤𑀺𑀯𑀸𑀤𑁄 𑀆𑀭𑀤𑁆𑀥𑁄𑀢𑀺 𑀆𑀳 ‘‘𑀬𑀲𑁆𑀲 𑀭𑀽𑀧𑀁 𑀲𑁄 𑀭𑀽𑀧𑀯𑀸𑀢𑀺 𑀉𑀢𑁆𑀢𑀭𑀧𑀓𑁆𑀔𑁂 𑀯𑀼𑀢𑁆𑀢𑀁 𑀯𑀘𑀦𑀁 𑀉𑀤𑁆𑀥𑀭𑀺𑀢𑁆𑀯𑀸’’𑀢𑀺.

𑁧𑁧𑁮. 𑀯𑀺𑀜𑁆𑀜𑀸𑀡𑀦𑀺𑀲𑁆𑀲𑀬𑀪𑀸𑀯𑀽𑀧𑀕𑀫𑀦𑀦𑁆𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀲𑁆𑀲𑀬𑀪𑀸𑀯𑀽𑀧𑀕𑀫𑀦𑀁. 𑀢𑀬𑀺𑀤𑀁 𑀯𑀺𑀲𑁂𑀲𑀦𑀁 𑀘𑀓𑁆𑀔𑀼𑀲𑁆𑀲𑀸𑀢𑀺 𑀇𑀫𑀺𑀦𑀸𑀯 𑀲𑀺𑀤𑁆𑀥𑀦𑁆𑀢𑀺 𑀦 𑀓𑀢𑀁 𑀤𑀝𑁆𑀞𑀩𑁆𑀩𑀁.

𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀸𑀦𑀼𑀬𑁄𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁩. 𑀧𑀼𑀭𑀺𑀲𑀓𑀸𑀭𑀸𑀦𑀼𑀬𑁄𑀕𑀯𑀡𑁆𑀡𑀦𑀸

𑁧𑁨𑁩. 𑀓𑀫𑁆𑀫𑀸𑀦𑀦𑁆𑀢𑀺 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀸𑀦𑀁. 𑀢𑀕𑁆𑀕𑀳𑀡𑁂𑀦𑁂𑀯 𑀳𑀺 𑀢𑀁𑀢𑀁𑀓𑀺𑀘𑁆𑀘𑀓𑀭𑀡𑀻𑀬𑁂 𑀓𑀺𑀭𑀺𑀬𑀸𑀦𑀫𑁆𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀦𑀺𑀧𑁆𑀨𑀸𑀤𑀓𑀧𑁆𑀧𑀬𑁄𑀚𑀓𑀪𑀸𑀯𑁂𑀦𑀸𑀢𑀺 𑀓𑀸𑀭𑀓𑀓𑀸𑀭𑀸𑀧𑀓𑀪𑀸𑀯𑁂𑀦.

𑁧𑁨𑁫. 𑀓𑀫𑁆𑀫𑀓𑀸𑀭𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀬𑁄 𑀅𑀜𑁆𑀜𑁄 𑀧𑀼𑀕𑁆𑀕𑀮𑁄 𑀓𑀸𑀭𑀓𑁄. 𑀢𑁂𑀦𑀧𑀻𑀢𑀺 𑀓𑀸𑀭𑀓𑀓𑀸𑀭𑀓𑁂𑀦𑀧𑀺. 𑀢𑀲𑁆𑀲𑀸𑀢𑀺 𑀓𑀸𑀭𑀓𑀓𑀸𑀭𑀓𑀲𑁆𑀲. 𑀅𑀜𑁆𑀜𑀦𑁆𑀢𑀺 𑀅𑀜𑁆𑀜𑀁 𑀓𑀫𑁆𑀫𑀁. 𑀏𑀯𑀦𑁆𑀢𑀺 𑀇𑀫𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦. 𑀢𑁂𑀳𑀺 𑀢𑁂𑀳𑀺 𑀓𑀸𑀭𑀓𑁂𑀳𑀺 𑀧𑀼𑀕𑁆𑀕𑀮𑀸 𑀯𑀺𑀬 𑀅𑀜𑁆𑀜𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑀻𑀬𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀓𑀫𑁆𑀫𑀯𑀝𑁆𑀝𑀲𑁆𑀲 𑀅𑀦𑀼𑀧𑀘𑁆𑀙𑁂𑀤𑀁 𑀯𑀤𑀦𑁆𑀢𑀻’’𑀢𑀺. 𑀏𑀯𑀁 𑀲𑀦𑁆𑀢𑁂 𑀧𑀼𑀕𑁆𑀕𑀮𑀲𑁆𑀲 𑀓𑀸𑀭𑀓𑁄, 𑀓𑀫𑁆𑀫𑀲𑁆𑀲 𑀓𑀸𑀭𑀓𑁄𑀢𑀺 𑀅𑀬𑀁 𑀯𑀺𑀪𑀸𑀕𑁄 𑀇𑀥 𑀅𑀦𑀸𑀫𑀝𑁆𑀞𑁄 𑀳𑁄𑀢𑀺, 𑀢𑀣𑀸 𑀘 𑀲𑀢𑀺 𑀓𑀸𑀭𑀓𑀧𑀭𑀫𑁆𑀧𑀭𑀸𑀬 𑀯𑀘𑀦𑀁 𑀯𑀺𑀭𑀼𑀚𑁆𑀛𑁂𑀬𑁆𑀬𑀸𑀢𑀺 𑀆𑀳 ‘‘𑀧𑀼𑀕𑁆𑀕𑀮𑀲𑁆𑀲…𑀧𑁂… 𑀯𑀺𑀘𑀸𑀭𑁂𑀢𑀩𑁆𑀩𑀫𑁂𑀢’’𑀦𑁆𑀢𑀺. 𑀢𑀲𑁆𑀲 𑀓𑀸𑀭𑀓𑀦𑁆𑀢𑀺 𑀧𑀼𑀕𑁆𑀕𑀮𑀲𑁆𑀲 𑀓𑀸𑀭𑀓𑀁. 𑀇𑀤𑀜𑁆𑀘𑀸𑀢𑀺 𑀦 𑀓𑁂𑀯𑀮𑀁 𑀧𑀼𑀕𑁆𑀕𑀮𑀓𑀸𑀭𑀓𑀲𑁆𑀲 𑀓𑀫𑁆𑀫𑀓𑀸𑀭𑀓𑀢𑀸𑀧𑀢𑁆𑀢𑀺𑀬𑁂𑀯 𑀤𑁄𑀲𑁄, 𑀅𑀣 𑀔𑁄 𑀇𑀤𑀁 𑀓𑀫𑁆𑀫𑀓𑀸𑀭𑀓𑀢𑀸𑀬 𑀓𑀸𑀭𑀓𑀧𑀭𑀫𑁆𑀧𑀭𑀸𑀧𑀚𑁆𑀚𑀦𑀫𑁆𑀧𑀺 𑀯𑀺𑀘𑀸𑀭𑁂𑀢𑀩𑁆𑀩𑀁, 𑀦 𑀬𑀼𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀧𑀼𑀕𑁆𑀕𑀮𑀸𑀦𑀜𑁆𑀳𑀺 𑀧𑀝𑀺𑀧𑀸𑀝𑀺𑀬𑀸 𑀓𑀸𑀭𑀓𑀪𑀸𑀯𑁄 𑀓𑀸𑀭𑀓𑀧𑀭𑀫𑁆𑀧𑀭𑀸.

𑁧𑁭𑁦. 𑀏𑀓𑁄 𑀅𑀦𑁆𑀢𑁄𑀢𑀺 ‘‘𑀕𑀸𑀳𑁄’’𑀢𑀺 𑀲𑀲𑁆𑀲𑀢𑀕𑀸𑀳𑀲𑀗𑁆𑀔𑀸𑀢𑁄 𑀅𑀦𑁆𑀢𑁄𑀢𑀺 𑀅𑀢𑁆𑀣𑁄.

𑁧𑁭𑁬. 𑀲𑀺𑀬𑀸 𑀅𑀜𑁆𑀜𑁄, 𑀲𑀺𑀬𑀸 𑀅𑀦𑀜𑁆𑀜𑁄, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑁄 ‘‘𑀅𑀜𑁆𑀜𑁄𑀢𑀺 𑀯𑀸 𑀅𑀦𑀜𑁆𑀜𑁄𑀢𑀺 𑀯𑀸’’𑀢𑀺, 𑀏𑀯𑀁 𑀧𑀯𑀢𑁆𑀢𑀦𑀺𑀕𑀡𑁆𑀞𑀯𑀸𑀤𑀲𑀤𑀺𑀲𑀢𑁆𑀢𑀸 𑀲𑁄 𑀏𑀯 𑀏𑀓𑁄 𑀦𑁂𑀯 𑀲𑁄 𑀳𑁄𑀢𑀺, 𑀦 𑀅𑀜𑁆𑀜𑁄𑀢𑀺 𑀮𑀤𑁆𑀥𑀺𑀫𑀢𑁆𑀢𑀁. 𑀢𑁂𑀦𑀸𑀳 ‘‘𑀇𑀤𑀁 𑀧𑀦 𑀦𑀢𑁆𑀣𑁂𑀯𑀸’’𑀢𑀺. 𑀧𑀭𑀲𑁆𑀲 𑀇𑀘𑁆𑀙𑀸𑀯𑀲𑁂𑀦𑁂𑀯𑀸𑀢𑀺 𑀧𑀭𑀯𑀸𑀤𑀺𑀦𑁄 𑀮𑀤𑁆𑀥𑀺𑀯𑀲𑁂𑀦𑁂𑀯. 𑀏𑀓𑀁 𑀅𑀦𑀺𑀘𑁆𑀙𑀦𑁆𑀢𑀲𑁆𑀲𑀸𑀢𑀺 𑀏𑀓𑀁 ‘‘𑀲𑁄 𑀓𑀭𑁄𑀢𑀺, 𑀲𑁄 𑀧𑀝𑀺𑀲𑀁𑀯𑁂𑀤𑁂𑀢𑀻’’𑀢𑀺 𑀕𑀳𑀡𑀁 𑀲𑀲𑁆𑀲𑀢𑀤𑀺𑀝𑁆𑀞𑀺𑀪𑀬𑁂𑀦 𑀧𑀝𑀺𑀓𑁆𑀔𑀺𑀧𑀦𑁆𑀢𑀲𑁆𑀲 𑀇𑀢𑀭𑀁 𑀉𑀘𑁆𑀙𑁂𑀤𑀕𑁆𑀕𑀳𑀡𑀁 𑀆𑀧𑀦𑁆𑀦𑀁. 𑀢𑀜𑁆𑀘 𑀧𑀝𑀺𑀓𑁆𑀔𑀺𑀧𑀦𑁆𑀢𑀲𑁆𑀲 𑀅𑀜𑁆𑀜𑀁 𑀫𑀺𑀲𑁆𑀲𑀓𑀁 𑀦𑀺𑀘𑁆𑀘𑀸𑀦𑀺𑀘𑁆𑀘𑀕𑁆𑀕𑀳𑀡𑀁, 𑀯𑀺𑀓𑁆𑀔𑁂𑀧𑀕𑁆𑀕𑀳𑀡𑀜𑁆𑀘 𑀆𑀧𑀦𑁆𑀦𑀁. 𑀓𑀸𑀭𑀓𑀯𑁂𑀤𑀓𑀺𑀘𑁆𑀙𑀸𑀬 𑀞𑀢𑁆𑀯𑀸𑀢𑀺 𑀲𑁆𑀯𑁂𑀯 𑀓𑀸𑀭𑀓𑁄 𑀯𑁂𑀤𑀓𑁄 𑀘𑀸𑀢𑀺 𑀇𑀫𑀲𑁆𑀫𑀺𑀁 𑀆𑀤𑀸𑀬𑁂 𑀞𑀢𑁆𑀯𑀸. 𑀢𑀁𑀢𑀁𑀅𑀦𑀺𑀘𑁆𑀙𑀸𑀬𑀸𑀢𑀺 𑀢𑀲𑁆𑀲 𑀢𑀲𑁆𑀲 𑀯𑀸𑀤𑀲𑁆𑀲 𑀅𑀲𑀫𑁆𑀧𑀝𑀺𑀘𑁆𑀙𑀦𑁂𑀦. 𑀆𑀧𑀦𑁆𑀦𑀯𑀲𑁂𑀦𑀧𑀻𑀢𑀺 𑀆𑀧𑀦𑁆𑀦𑀕𑀸𑀳𑀯𑀲𑁂𑀦𑀧𑀺 𑀅𑀬𑀁 𑀅𑀦𑀼𑀬𑁄𑀕𑁄 𑀯𑀼𑀢𑁆𑀢𑁄𑀢𑀺 𑀬𑁄𑀚𑀦𑀸. 𑀲𑀩𑁆𑀩𑁂𑀲𑀁 𑀆𑀧𑀦𑁆𑀦𑀢𑁆𑀢𑀸𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀲𑀩𑁆𑀩𑁂𑀲𑀁 𑀯𑀺𑀓𑀧𑁆𑀧𑀸𑀦𑀁 𑀅𑀦𑀼𑀓𑁆𑀓𑀫𑁂𑀦 𑀆𑀧𑀦𑁆𑀦𑀢𑁆𑀢𑀸 𑀦𑀸𑀬𑀫𑀦𑀼𑀬𑁄𑀕𑁄 𑀓𑀢𑁄𑀢𑀺 𑀬𑁄𑀚𑀦𑀸. 𑀏𑀓𑁂𑀓𑀲𑁆𑀲𑁂𑀯𑀸𑀢𑀺 𑀢𑁂𑀲𑀼 𑀯𑀺𑀲𑀼𑀁 𑀯𑀺𑀲𑀼𑀁 𑀏𑀓𑁂𑀓𑀲𑁆𑀲𑁂𑀯 𑀆𑀧𑀦𑁆𑀦𑀢𑁆𑀢𑀸. 𑀢𑀦𑁆𑀢𑀺𑀯𑀲𑁂𑀦 𑀧𑀦 𑀢𑁂 𑀯𑀺𑀓𑀧𑁆𑀧𑀸 𑀏𑀓𑀚𑁆𑀛𑀁 𑀤𑀲𑁆𑀲𑁂𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀓𑀢𑁄 𑀬𑁄𑀚𑁂𑀢𑀩𑁆𑀩𑀁 𑀘𑀢𑀼𑀦𑁆𑀦𑀫𑁆𑀧𑀺 𑀧𑀜𑁆𑀳𑀸𑀦𑀁 𑀏𑀓𑀢𑁄 𑀧𑀼𑀝𑁆𑀞𑀢𑁆𑀢𑀸.

𑀧𑀼𑀭𑀺𑀲𑀓𑀸𑀭𑀸𑀦𑀼𑀬𑁄𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀮𑁆𑀬𑀸𑀡𑀯𑀕𑁆𑀕𑁄 𑀦𑀺𑀝𑁆𑀞𑀺𑀢𑁄.

𑁧𑁪. 𑀅𑀪𑀺𑀜𑁆𑀜𑀸𑀦𑀼𑀬𑁄𑀕𑀯𑀡𑁆𑀡𑀦𑀸

𑁧𑁯𑁩. 𑀯𑀺𑀓𑀼𑀩𑁆𑀩𑀢𑀻𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄, 𑀧𑀓𑀸𑀭𑀢𑁆𑀣𑁄 𑀯𑀸. 𑀢𑁂𑀦 ‘‘𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀲𑀤𑁆𑀤𑀁 𑀲𑀼𑀡𑀸𑀢𑀻’’𑀢𑀺𑀆𑀤𑀺𑀓𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀪𑀺𑀜𑁆𑀜𑀸𑀦𑀼𑀬𑁄𑀕𑁄 𑀤𑀝𑁆𑀞𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀢𑀤𑀪𑀺𑀜𑁆𑀜𑀸𑀯𑀢𑁄𑀢𑀺 𑀆𑀲𑀯𑀓𑁆𑀔𑀬𑀸𑀪𑀺𑀜𑁆𑀜𑀸𑀯𑀢𑁄. 𑀅𑀭𑀳𑀢𑁄 𑀲𑀸𑀥𑀦𑀦𑁆𑀢𑀺 𑀅𑀭𑀳𑀢𑁄 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦 𑀧𑀼𑀕𑁆𑀕𑀮𑀢𑁆𑀢𑀸𑀪𑀸𑀯𑀲𑀸𑀥𑀦𑀁. 𑀢𑀩𑁆𑀪𑀸𑀯𑀲𑁆𑀲𑀸𑀢𑀺 𑀅𑀭𑀳𑀢𑁆𑀢𑀲𑁆𑀲. 𑀅𑀭𑀳𑀢𑁆𑀢𑀥𑀸𑀭𑀸𑀦𑀜𑁆𑀳𑀺 𑀔𑀦𑁆𑀥𑀸 𑀦𑀸𑀫 𑀧𑀼𑀕𑁆𑀕𑀮𑀢𑁆𑀢𑀁 𑀢𑀲𑁆𑀲𑀧𑀺 𑀳𑁄𑀢𑀻𑀢𑀺.

𑀅𑀪𑀺𑀜𑁆𑀜𑀸𑀦𑀼𑀬𑁄𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁫-𑁧𑁮. 𑀜𑀸𑀢𑀓𑀸𑀦𑀼𑀬𑁄𑀕𑀸𑀤𑀺𑀯𑀡𑁆𑀡𑀦𑀸

𑁨𑁦𑁯. 𑀢𑀢𑀺𑀬𑀓𑁄𑀝𑀺𑀪𑀽𑀢𑀲𑁆𑀲𑀸𑀢𑀺 𑀢𑀢𑀺𑀬𑀓𑁄𑀝𑀺𑀲𑀪𑀸𑀯𑀲𑁆𑀲 𑀲𑀗𑁆𑀔𑀢𑀸𑀲𑀗𑁆𑀔𑀢𑀯𑀺𑀦𑀺𑀫𑀼𑀢𑁆𑀢𑀲𑀪𑀸𑀯𑀲𑁆𑀲. 𑀲𑀪𑀸𑀯𑀲𑁆𑀲𑀸𑀢𑀺 𑀘 𑀲𑀪𑀸𑀯𑀥𑀫𑁆𑀫𑀲𑁆𑀲. 𑀮𑀤𑁆𑀥𑀺𑀁 𑀦𑀺𑀕𑀽𑀳𑀺𑀢𑁆𑀯𑀸𑀢𑀺 𑀧𑀼𑀕𑁆𑀕𑀮𑁄 𑀦𑁂𑀯 𑀲𑀗𑁆𑀔𑀢𑁄, 𑀦𑀸𑀲𑀗𑁆𑀔𑀢𑁄𑀢𑀺 𑀮𑀤𑁆𑀥𑀺𑀁 𑀅𑀯𑀺𑀪𑀸𑀯𑁂𑀢𑁆𑀯𑀸.

𑀜𑀸𑀢𑀓𑀸𑀦𑀼𑀬𑁄𑀕𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁯. 𑀧𑀝𑀺𑀯𑁂𑀥𑀸𑀦𑀼𑀬𑁄𑀕𑀸𑀤𑀺𑀯𑀡𑁆𑀡𑀦𑀸

𑁨𑁧𑁮. 𑀧𑀚𑀸𑀦𑀦𑀁 𑀦𑀸𑀫 𑀦 𑀳𑁄𑀢𑀺 𑀦𑀺𑀩𑁆𑀩𑀺𑀤𑀸𑀤𑀻𑀦𑀁 𑀅𑀧𑁆𑀧𑀘𑁆𑀘𑀬𑀢𑁆𑀢𑀸. 𑀧𑀭𑀺𑀘𑁆𑀙𑁂𑀤𑀦𑀲𑀫𑀢𑁆𑀣𑀢𑀜𑁆𑀘 𑀤𑀲𑁆𑀲𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁨𑁮. 𑀲𑀳𑀭𑀽𑀧𑀪𑀸𑀯𑁄 𑀭𑀽𑀧𑁂𑀦 𑀲𑀫𑀗𑁆𑀕𑀺𑀢𑀸, 𑀯𑀺𑀦𑀸𑀭𑀽𑀧𑀪𑀸𑀯𑁄 𑀢𑀢𑁄 𑀯𑀺𑀦𑀺𑀲𑁆𑀲𑀝𑀢𑀸𑀢𑀺 𑀢𑀤𑀼𑀪𑀬𑀁 𑀭𑀽𑀧𑀲𑁆𑀲 𑀅𑀩𑁆𑀪𑀦𑁆𑀢𑀭𑀕𑀫𑀦𑀁 𑀩𑀳𑀺𑀦𑀺𑀓𑁆𑀔𑀫𑀦𑀜𑁆𑀘 𑀳𑁄𑀢𑀺. 𑀢𑀲𑁆𑀫𑀸 𑀢𑀁 𑀤𑁆𑀯𑀬𑀁 𑀲𑀳𑀭𑀽𑀧𑀪𑀸𑀯𑀯𑀺𑀦𑀸𑀭𑀽𑀧𑀪𑀸𑀯𑀸𑀦𑀁 𑀮𑀓𑁆𑀔𑀡𑀯𑀘𑀦𑀦𑁆𑀢𑀺 𑀯𑀼𑀢𑁆𑀢𑀁.

𑁨𑁩𑁭. 𑀑𑀴𑀸𑀭𑀺𑀓𑁄𑀢𑀺 𑀣𑀽𑀮𑁄. 𑀆𑀳𑀺𑀢𑁄 𑀅𑀳𑀁 𑀫𑀸𑀦𑁄 𑀏𑀢𑁆𑀣𑀸𑀢𑀺 𑀅𑀢𑁆𑀢𑀸, 𑀅𑀢𑁆𑀢𑀪𑀸𑀯𑁄. 𑀲𑁄 𑀏𑀯 𑀬𑀣𑀸𑀲𑀓𑀁 𑀓𑀫𑁆𑀫𑀼𑀦𑀸 𑀧𑀝𑀺𑀮𑀪𑀺𑀢𑀩𑁆𑀩𑀢𑁄 𑀧𑀝𑀺𑀮𑀸𑀪𑁄. 𑀧𑀤𑀤𑁆𑀯𑀬𑁂𑀦𑀧𑀺 𑀓𑀸𑀫𑀸𑀯𑀘𑀭𑀢𑁆𑀢𑀪𑀸𑀯𑁄 𑀓𑀣𑀺𑀢𑁄. 𑀫𑀦𑁄𑀫𑀬𑁄 𑀅𑀢𑁆𑀢𑀧𑀝𑀺𑀮𑀸𑀪𑁄 𑀭𑀽𑀧𑀸𑀯𑀘𑀭𑀢𑁆𑀢𑀪𑀸𑀯𑁄. 𑀲𑁄 𑀳𑀺 𑀛𑀸𑀦𑀫𑀦𑁂𑀦 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀫𑀦𑁄𑀫𑀬𑁄. 𑀅𑀭𑀽𑀧𑁄 𑀅𑀢𑁆𑀢𑀧𑀝𑀺𑀮𑀸𑀪𑁄𑀢𑀺 𑀅𑀭𑀽𑀧𑀸𑀯𑀘𑀭𑀢𑁆𑀢𑀪𑀸𑀯𑁄. 𑀲𑁄 𑀳𑀺 𑀭𑀽𑀧𑁂𑀦 𑀅𑀫𑀺𑀲𑁆𑀲𑀺𑀢𑀢𑁆𑀢𑀸 𑀅𑀭𑀽𑀧𑁄𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀅𑀢𑁆𑀢𑀸’’𑀢𑀺 𑀧𑀦 𑀚𑀻𑀯𑁂 𑀮𑁄𑀓𑀯𑁄𑀳𑀸𑀭𑁄 𑀦𑀺𑀭𑀼𑀴𑁆𑀳𑁄, 𑀅𑀲𑀢𑀺𑀧𑀺 𑀚𑀻𑀯𑁂 𑀢𑀣𑀸𑀦𑀺𑀭𑀼𑀴𑁆𑀳𑀁 𑀮𑁄𑀓𑀯𑁄𑀳𑀸𑀭𑀁 𑀕𑀳𑁂𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀧𑀺 𑀯𑁄𑀳𑀭𑀦𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀢𑀺 𑀇𑀫𑀸 𑀮𑁄𑀓𑀲𑁆𑀲 𑀲𑀫𑀜𑁆𑀜𑀸, 𑀬𑀸𑀳𑀺 𑀢𑀣𑀸𑀕𑀢𑁄 𑀯𑁄𑀳𑀭𑀢𑀻’’𑀢𑀺 𑀯𑀢𑁆𑀯𑀸 𑀇𑀤𑀸𑀦𑀺 𑀬𑀣𑀸 𑀯𑁄𑀳𑀭𑀦𑁆𑀢𑀺, 𑀢𑀁 𑀧𑀓𑀸𑀭𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀅𑀧𑀭𑀸𑀫𑀲’’𑀦𑁆𑀢𑀺𑀆𑀤𑀺𑀫𑀸𑀳.

𑀧𑀘𑁆𑀘𑀢𑁆𑀢𑀲𑀸𑀫𑀜𑁆𑀜𑀮𑀓𑁆𑀔𑀡𑀯𑀲𑁂𑀦𑀸𑀢𑀺 𑀓𑀓𑁆𑀔𑀴𑀨𑀼𑀲𑀦𑀸𑀤𑀺𑀲𑀮𑀓𑁆𑀔𑀡𑀯𑀲𑁂𑀦 𑀅𑀦𑀺𑀘𑁆𑀘𑀢𑀸𑀤𑀺𑀲𑀸𑀫𑀜𑁆𑀜𑀮𑀓𑁆𑀔𑀡𑀯𑀲𑁂𑀦 𑀘. 𑀇𑀫𑀺𑀦𑀸𑀢𑀺 ‘‘𑀧𑀘𑁆𑀘𑀢𑁆𑀢𑀲𑀸𑀫𑀜𑁆𑀜𑀮𑀓𑁆𑀔𑀡𑀯𑀲𑁂𑀦𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀦 𑀧𑀭𑀫𑀢𑁆𑀣𑀢𑁄 𑀧𑀼𑀕𑁆𑀕𑀮𑀸𑀪𑀸𑀯𑀯𑀘𑀦𑁂𑀦. 𑀇𑀢𑁄 𑀧𑀼𑀭𑀺𑀫𑀸𑀢𑀺 𑀢𑀢𑁆𑀣 𑀢𑀢𑁆𑀣 𑀲𑀓𑀯𑀸𑀤𑀺𑀧𑀝𑀺𑀓𑁆𑀔𑁂𑀧𑀸𑀤𑀺𑀯𑀺𑀪𑀸𑀯𑀦𑀯𑀲𑁂𑀦 𑀧𑀯𑀢𑁆𑀢𑀸 𑀇𑀢𑁄 𑀅𑀢𑁆𑀣𑀲𑀁𑀯𑀡𑁆𑀡𑀦𑀢𑁄 𑀧𑀼𑀭𑀺𑀫𑀸. 𑀇𑀫𑀺𑀦𑀸𑀢𑀺 𑀯𑀸 ‘‘𑀬𑀣𑀸 𑀭𑀽𑀧𑀸𑀤𑀬𑁄 𑀥𑀫𑁆𑀫𑀸’’𑀢𑀺𑀆𑀤𑀺𑀦𑀸 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀯𑀘𑀦𑁂𑀦. 𑀬𑀣𑀸 𑀘𑀸𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀢𑁆𑀣𑁄. 𑀢𑁂𑀦 𑀲𑀫𑀜𑁆𑀜𑀸𑀦𑀢𑀺𑀥𑀸𑀯𑀦𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀧𑀭𑀸𑀫𑀸𑀲𑁄 𑀘 𑀦 𑀳𑁄𑀢𑀺 𑀚𑀦𑀧𑀤𑀦𑀺𑀭𑀼𑀢𑁆𑀢𑀺𑀬𑀸 𑀅𑀪𑀺𑀦𑀺𑀯𑀺𑀲𑀺𑀢𑀩𑁆𑀩𑀢𑁄, 𑀬𑀣𑀸 𑀘 𑀲𑀫𑀜𑁆𑀜𑀸𑀢𑀺𑀥𑀸𑀯𑀦𑀁 𑀦 𑀳𑁄𑀢𑀺, 𑀏𑀯𑀁 𑀇𑀢𑁄 𑀧𑀼𑀭𑀺𑀫𑀸 𑀘 𑀅𑀢𑁆𑀣𑀯𑀡𑁆𑀡𑀦𑀸 𑀬𑁄𑀚𑁂𑀢𑀩𑁆𑀩𑀸. 𑀲𑀫𑀜𑁆𑀜𑀸𑀢𑀺𑀥𑀸𑀯𑀦𑁂 𑀳𑀺 𑀲𑀢𑀺 𑀲𑀩𑁆𑀩𑀮𑁄𑀓𑀯𑁄𑀳𑀸𑀭𑀽𑀧𑀘𑁆𑀙𑁂𑀤𑁄 𑀲𑀺𑀬𑀸𑀢𑀺.

𑀢𑀲𑁆𑀫𑀸 𑀲𑀘𑁆𑀘𑀦𑁆𑀢𑀺 𑀬𑀲𑁆𑀫𑀸 𑀢𑀢𑁆𑀣 𑀧𑀭𑀫𑀢𑁆𑀣𑀸𑀓𑀸𑀭𑀁 𑀅𑀦𑀸𑀭𑁄𑀧𑁂𑀢𑁆𑀯𑀸 𑀲𑀫𑀜𑁆𑀜𑀁 𑀦𑀸𑀢𑀺𑀥𑀸𑀯𑀦𑁆𑀢𑁄 𑀓𑁂𑀯𑀮𑀁 𑀮𑁄𑀓𑀲𑀫𑁆𑀫𑀼𑀢𑀺𑀬𑀸𑀯 𑀯𑁄𑀳𑀭𑀢𑀺, 𑀢𑀲𑁆𑀫𑀸 𑀲𑀘𑁆𑀘𑀁 𑀧𑀭𑁂𑀲𑀁 𑀅𑀯𑀺𑀲𑀁𑀯𑀸𑀤𑀦𑀢𑁄. 𑀢𑀣𑀓𑀸𑀭𑀡𑀦𑁆𑀢𑀺 𑀢𑀣𑁄 𑀅𑀯𑀺𑀢𑀣𑁄 𑀥𑀫𑁆𑀫𑀲𑀪𑀸𑀯𑁄 𑀓𑀸𑀭𑀡𑀁 𑀧𑀯𑀢𑁆𑀢𑀺𑀳𑁂𑀢𑀼 𑀏𑀢𑀲𑁆𑀲𑀸𑀢𑀺 𑀢𑀣𑀓𑀸𑀭𑀡𑀁, 𑀧𑀭𑀫𑀢𑁆𑀣𑀯𑀘𑀦𑀁, 𑀅𑀯𑀺𑀧𑀭𑀻𑀢𑀥𑀫𑁆𑀫𑀲𑀪𑀸𑀯𑀯𑀺𑀲𑀬𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀥𑀫𑁆𑀫𑀸𑀦𑀁 𑀢𑀣𑀢𑀸𑀬 𑀧𑀯𑀢𑁆𑀢’’𑀦𑁆𑀢𑀺.

𑀧𑀝𑀺𑀯𑁂𑀥𑀸𑀦𑀼𑀬𑁄𑀕𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀼𑀕𑁆𑀕𑀮𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀭𑀺𑀳𑀸𑀦𑀺𑀓𑀣𑀸

𑁧. 𑀯𑀸𑀤𑀬𑀼𑀢𑁆𑀢𑀺𑀧𑀭𑀺𑀳𑀸𑀦𑀺𑀓𑀣𑀸𑀯𑀡𑁆𑀡𑀦𑀸

𑁨𑁩𑁯. 𑀇𑀤𑀁 𑀲𑀼𑀢𑁆𑀢𑀦𑁆𑀢𑀺 𑀇𑀤𑀁 𑀮𑀓𑁆𑀔𑀡𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑀫𑀬𑀯𑀺𑀫𑀼𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺 (𑀅. 𑀦𑀺. 𑁫.𑁧𑁪𑁯-𑁧𑁫𑁦) 𑀇𑀤𑀫𑁆𑀧𑀺 𑀳𑀺 𑀲𑀼𑀢𑁆𑀢𑀁 𑀅𑀦𑀸𑀕𑀸𑀫𑀺𑀆𑀤𑀻𑀦𑀁𑀬𑁂𑀯 𑀧𑀭𑀺𑀳𑀸𑀦𑀺𑀦𑀺𑀲𑁆𑀲𑀬𑁄, 𑀦 𑀅𑀭𑀳𑀢𑁄. 𑀲𑀫𑀬𑀯𑀺𑀫𑀼𑀢𑁆𑀢𑁄𑀢𑀺 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀲𑁂𑀓𑁆𑀔𑀲𑁆𑀲𑁂𑀢𑀁 𑀦𑀸𑀫𑀁. 𑀬𑀣𑀸𑀳 𑁋

‘‘𑀓𑀢𑀫𑁄 𑀘 𑀧𑀼𑀕𑁆𑀕𑀮𑁄 𑀲𑀫𑀬𑀯𑀺𑀫𑀼𑀢𑁆𑀢𑁄? 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀓𑀸𑀮𑁂𑀦 𑀓𑀸𑀮𑀁 𑀲𑀫𑀬𑁂𑀦 𑀲𑀫𑀬𑀁 𑀅𑀝𑁆𑀞 𑀯𑀺𑀫𑁄𑀓𑁆𑀔𑁂 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀏𑀓𑀘𑁆𑀘𑁂 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀲𑀫𑀬𑀯𑀺𑀫𑀼𑀢𑁆𑀢𑁄’’𑀢𑀺 (𑀧𑀼. 𑀧. 𑁧).

‘‘𑀧𑀭𑀺𑀳𑀸𑀦𑀺𑀥𑀫𑁆𑀫𑁄’’𑀢𑀺 𑀘 𑀧𑀼𑀣𑀼𑀚𑁆𑀚𑀦𑁄 𑀘 𑀏𑀓𑀘𑁆𑀘𑁄 𑀘 𑀲𑁂𑀓𑁆𑀔𑁄 𑀅𑀥𑀺𑀧𑁆𑀧𑁂𑀢𑁄, 𑀦 𑀅𑀭𑀳𑀸𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀬𑀣𑀸𑀤𑀲𑁆𑀲𑀺𑀢𑀸𑀦𑀺 𑀲𑀼𑀢𑁆𑀢𑀸𑀦𑀺 𑀅𑀦𑀸𑀕𑀸𑀫𑀺𑀆𑀤𑀻𑀦𑀁 𑀧𑀭𑀺𑀳𑀸𑀦𑀺𑀮𑀤𑁆𑀥𑀺𑀬𑀸 𑀦𑀺𑀲𑁆𑀲𑀬𑁄, 𑀦 𑀅𑀭𑀳𑀢𑁄, 𑀢𑀲𑁆𑀫𑀸. 𑀢𑀁 𑀦𑀺𑀲𑁆𑀲𑀸𑀬 𑀢𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀬𑀲𑁆𑀫𑀸 ‘‘𑀅𑀭𑀳𑀢𑁄𑀧𑀻’’𑀢𑀺 𑀏𑀢𑁆𑀣 𑀅𑀭𑀳𑀢𑁄𑀧𑀺 𑀧𑀭𑀺𑀳𑀸𑀦𑀺, 𑀓𑁄 𑀧𑀦 𑀯𑀸𑀤𑁄 𑀅𑀦𑀸𑀕𑀸𑀫𑀺𑀆𑀤𑀻𑀦𑀦𑁆𑀢𑀺 𑀅𑀬𑀫𑀢𑁆𑀣𑁄 𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀧𑀺-𑀲𑀤𑁆𑀤𑀲𑀫𑁆𑀧𑀺𑀡𑁆𑀟𑀺𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀭𑀳𑀢𑁄𑀧𑀺…𑀧𑁂… 𑀬𑁄𑀚𑁂𑀢𑀩𑁆𑀩’’𑀦𑁆𑀢𑀺 𑀆𑀳. 𑀬𑀲𑁆𑀫𑀸 𑀯𑀸 𑀓𑀸𑀫𑀜𑁆𑀘𑁂𑀢𑁆𑀣 𑀤𑀼𑀢𑀺𑀬𑀲𑀼𑀢𑁆𑀢𑀁 𑀲𑁂𑀓𑁆𑀔𑀯𑀲𑁂𑀦 𑀆𑀕𑀢𑀁, 𑀧𑀞𑀫𑀢𑀢𑀺𑀬𑀲𑀼𑀢𑁆𑀢𑀸𑀦𑀺 𑀧𑀦 𑀅𑀲𑁂𑀓𑁆𑀔𑀯𑀲𑁂𑀦𑀧𑀺 𑀆𑀕𑀢𑀸𑀦𑀻𑀢𑀺 𑀢𑁂𑀲𑀁 𑀮𑀤𑁆𑀥𑀺, 𑀢𑀲𑁆𑀫𑀸 ‘‘𑀅𑀭𑀳𑀢𑁄𑀧𑀻’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀇𑀤𑀁 𑀲𑀼𑀢𑁆𑀢𑀁 𑀅𑀭𑀳𑀢𑁄’’𑀢𑀺𑀆𑀤𑀺.

𑀢𑀢𑀺𑀬𑀲𑁆𑀫𑀺𑀦𑁆𑀢𑀺 ‘‘𑀲𑀩𑁆𑀩𑁂𑀲𑀜𑁆𑀜𑁂𑀯 𑀅𑀭𑀳𑀦𑁆𑀢𑀸𑀦𑀁 𑀧𑀭𑀺𑀳𑀸𑀦𑀻’’𑀢𑀺 𑀏𑀢𑀲𑁆𑀫𑀺𑀁 𑀧𑀜𑁆𑀳𑁂. 𑀲𑁄 𑀳𑀺 ‘‘𑀲𑀩𑁆𑀩𑁂𑀯 𑀅𑀭𑀳𑀦𑁆𑀢𑁄’’𑀢𑀺𑀆𑀤𑀺𑀦𑀸 𑀆𑀕𑀢𑁂𑀲𑀼 𑀢𑀢𑀺𑀬𑁄 𑀧𑀜𑁆𑀳𑁄. 𑀢𑁂𑀲𑀦𑁆𑀢𑀺 𑀫𑀼𑀤𑀺𑀦𑁆𑀤𑁆𑀭𑀺𑀬𑀸𑀦𑀁. 𑀢𑀢𑀺𑀬𑀲𑁆𑀫𑀺𑀫𑁆𑀧𑀻𑀢𑀺 𑀧𑀺-𑀲𑀤𑁆𑀤𑁄 𑀯𑀼𑀢𑁆𑀢𑀢𑁆𑀣𑀲𑀫𑀼𑀘𑁆𑀘𑀬𑁄. 𑀢𑁂𑀦 𑀧𑀞𑀫𑀧𑀜𑁆𑀳𑀁 𑀲𑀫𑀼𑀘𑁆𑀘𑀺𑀦𑁄𑀢𑀺 ‘‘𑀢𑀢𑁆𑀣𑀧𑀺 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀸 𑀅𑀥𑀺𑀧𑁆𑀧𑁂𑀢𑀸’’𑀢𑀺.

𑀲𑁄𑀬𑁂𑀯 𑀦 𑀧𑀭𑀺𑀳𑀸𑀬𑀢𑀻𑀢𑀺 𑀲𑁄𑀢𑀸𑀧𑀦𑁆𑀦𑁄𑀬𑁂𑀯 𑀲𑁄𑀢𑀸𑀧𑀦𑁆𑀦𑀪𑀸𑀯𑀢𑁄 𑀦 𑀧𑀭𑀺𑀳𑀸𑀬𑀢𑀻𑀢𑀺 𑀅𑀢𑁆𑀣𑁄. 𑀦 𑀘𑁂𑀢𑁆𑀣 𑀲𑀓𑀤𑀸𑀕𑀸𑀫𑀺𑀪𑀸𑀯𑀸𑀧𑀢𑁆𑀢𑀺𑀬𑀸 𑀲𑁄𑀢𑀸𑀧𑀦𑁆𑀦𑀪𑀸𑀯𑀸𑀧𑀕𑀫𑁄 𑀧𑀭𑀺𑀳𑀸𑀦𑀺 𑀳𑁄𑀢𑀺 𑀯𑀺𑀲𑁂𑀲𑀸𑀥𑀺𑀕𑀫𑀪𑀸𑀯𑀢𑁄. 𑀧𑀢𑁆𑀢𑀯𑀺𑀲𑁂𑀲𑀢𑁄 𑀳𑀺 𑀧𑀭𑀺𑀳𑀸𑀦𑀻𑀢𑀺. 𑀇𑀢𑀭𑁂𑀢𑀺 𑀲𑀓𑀤𑀸𑀕𑀸𑀫𑀺𑀆𑀤𑀺𑀓𑀸. 𑀉𑀧𑀭𑀺𑀫𑀕𑁆𑀕𑀢𑁆𑀣𑀸𑀬𑀸𑀢𑀺 𑀉𑀧𑀭𑀺𑀫𑀕𑁆𑀕𑀢𑁆𑀢𑀬𑀧𑀝𑀺𑀮𑀸𑀪𑀢𑁆𑀣𑀸𑀬 ‘‘𑀦𑀺𑀬𑀢𑁄’’𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀅𑀕𑁆𑀕𑀳𑁂𑀢𑁆𑀯𑀸.

𑀯𑀸𑀤𑀬𑀼𑀢𑁆𑀢𑀺𑀧𑀭𑀺𑀳𑀸𑀦𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀭𑀺𑀬𑀧𑀼𑀕𑁆𑀕𑀮𑀲𑀁𑀲𑀦𑁆𑀤𑀦𑀧𑀭𑀺𑀳𑀸𑀦𑀺𑀓𑀣𑀸𑀯𑀡𑁆𑀡𑀦𑀸

𑁨𑁪𑁧. 𑀢𑀢𑁄𑀢𑀺 𑀅𑀭𑀳𑀢𑁆𑀢𑀢𑁄. 𑀢𑀢𑁆𑀣𑀸𑀢𑀺 𑀤𑀲𑁆𑀲𑀦𑀫𑀕𑁆𑀕𑀨𑀮𑁂. 𑀯𑀸𑀬𑀸𑀫𑁂𑀦𑀸𑀢𑀺 𑀯𑀺𑀧𑀲𑁆𑀲𑀦𑀼𑀲𑁆𑀲𑀸𑀳𑀦𑁂𑀦. 𑀢𑀤𑀦𑀦𑁆𑀢𑀭𑀦𑁆𑀢𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀦𑀦𑁆𑀢𑀭𑀁. 𑀧𑀞𑀫𑀁 𑀤𑀲𑁆𑀲𑀦𑀫𑀕𑁆𑀕𑀨𑀮𑀸𑀦𑀦𑁆𑀢𑀭𑀁 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀢𑀢𑁄 𑀧𑀭𑀺𑀳𑀻𑀦𑁄 𑀧𑀼𑀦 𑀯𑀸𑀬𑀫𑀦𑁆𑀢𑁄 𑀢𑀤𑀦𑀦𑁆𑀢𑀭𑀁 𑀦 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀻𑀢𑀺 𑀓𑀸 𑀏𑀢𑁆𑀣 𑀬𑀼𑀢𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀭𑀯𑀸𑀤𑀻 𑀦𑀸𑀫 𑀬𑀼𑀢𑁆𑀢𑀫𑁆𑀧𑀺 𑀯𑀤𑀢𑀺 𑀅𑀬𑀼𑀢𑁆𑀢𑀫𑁆𑀧𑀻𑀢𑀺 𑀓𑀺𑀁 𑀢𑀲𑁆𑀲 𑀯𑀸𑀤𑁂 𑀬𑀼𑀢𑁆𑀢𑀺𑀕𑀯𑁂𑀲𑀦𑀸𑀬𑀸𑀢𑀺 𑀧𑀦 𑀤𑀝𑁆𑀞𑀩𑁆𑀩𑀁. 𑀅𑀧𑀭𑀺𑀳𑀸𑀦𑀲𑀪𑀸𑀯𑁄 𑀪𑀸𑀯𑀦𑀸𑀫𑀕𑁆𑀕𑁄 𑀅𑀭𑀺𑀬𑀫𑀕𑁆𑀕𑀢𑁆𑀢𑀸 𑀤𑀲𑁆𑀲𑀦𑀸𑀤𑀲𑁆𑀲𑀦𑀫𑀕𑁆𑀕𑁄 𑀯𑀺𑀬. 𑀦 𑀘𑁂𑀢𑁆𑀣 𑀅𑀲𑀺𑀤𑁆𑀥𑀢𑀸𑀲𑀗𑁆𑀓𑀸 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀲𑁆𑀲 𑀧𑀭𑀲𑁆𑀲𑀧𑀺 𑀅𑀭𑀺𑀬𑀫𑀕𑁆𑀕𑀪𑀸𑀯𑀲𑁆𑀲 𑀲𑀺𑀤𑁆𑀥𑀢𑁆𑀢𑀸, 𑀦𑀸𑀧𑀺 𑀮𑁄𑀓𑀺𑀬𑀫𑀕𑁆𑀕𑁂𑀦 𑀅𑀦𑁂𑀓𑀦𑁆𑀢𑀺𑀓𑀢𑀸 𑀅𑀭𑀺𑀬𑀲𑀤𑁆𑀤𑁂𑀦 𑀯𑀺𑀲𑁂𑀲𑀺𑀢𑀢𑁆𑀢𑀸. 𑀢𑀣𑀸 𑀦 𑀯𑀺𑀭𑀼𑀤𑁆𑀥𑀢𑀸 𑀤𑀼𑀢𑀺𑀬𑀫𑀕𑁆𑀕𑀸𑀤𑀻𑀦𑀁 𑀪𑀸𑀯𑀦𑀸𑀫𑀕𑁆𑀕𑀪𑀸𑀯𑀲𑁆𑀲 𑀑𑀴𑀸𑀭𑀺𑀓𑀓𑀺𑀮𑁂𑀲𑀧𑁆𑀧𑀳𑀸𑀦𑀸𑀤𑀻𑀦𑀜𑁆𑀘 𑀧𑀭𑀲𑁆𑀲𑀧𑀺 𑀆𑀕𑀫𑀢𑁄 𑀲𑀺𑀤𑁆𑀥𑀢𑁆𑀢𑀸.

𑀅𑀭𑀺𑀬𑀧𑀼𑀕𑁆𑀕𑀮𑀲𑀁𑀲𑀦𑁆𑀤𑀦𑀧𑀭𑀺𑀳𑀸𑀦𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀼𑀢𑁆𑀢𑀲𑀸𑀥𑀦𑀧𑀭𑀺𑀳𑀸𑀦𑀺𑀓𑀣𑀸𑀯𑀡𑁆𑀡𑀦𑀸

𑁨𑁬𑁫. 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀅𑀝𑁆𑀞𑀓𑀣𑀸𑀬𑀁 ‘‘𑀧𑀢𑁆𑀢𑀺, 𑀨𑀼𑀲𑀦𑀸’’𑀢𑀺 𑀘 𑀧𑀘𑁆𑀘𑀓𑁆𑀔𑀢𑁄 𑀅𑀥𑀺𑀕𑀫𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀧𑀢𑁆𑀢𑀩𑁆𑀩𑀁 𑀯𑀤𑀢𑀻𑀢𑀺 𑀆𑀳 𑀨𑀼𑀲𑀦𑀸𑀭𑀳’’𑀦𑁆𑀢𑀺.

𑁨𑁬𑁭. 𑀓𑀢𑀲𑀦𑁆𑀦𑀺𑀝𑁆𑀞𑀸𑀦𑀲𑁆𑀲𑀸𑀢𑀺 𑀇𑀫𑀲𑁆𑀫𑀺𑀁 𑀲𑀢𑁆𑀢𑀸𑀳𑁂 𑀫𑀸𑀲𑁂 𑀉𑀢𑀼𑀫𑁆𑀳𑀺 𑀅𑀦𑁆𑀢𑁄𑀯𑀲𑁆𑀲𑁂 𑀯𑀸 𑀅𑀜𑁆𑀜𑀁 𑀆𑀭𑀸𑀥𑁂𑀲𑁆𑀲𑀸𑀫𑀻𑀢𑀺 𑀓𑀢𑀦𑀺𑀘𑁆𑀙𑀬𑀲𑁆𑀲.

𑀲𑀼𑀢𑁆𑀢𑀲𑀸𑀥𑀦𑀧𑀭𑀺𑀳𑀸𑀦𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀭𑀺𑀳𑀸𑀦𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀩𑁆𑀭𑀳𑁆𑀫𑀘𑀭𑀺𑀬𑀓𑀣𑀸

𑁧. 𑀲𑀼𑀤𑁆𑀥𑀩𑁆𑀭𑀳𑁆𑀫𑀘𑀭𑀺𑀬𑀓𑀣𑀸𑀯𑀡𑁆𑀡𑀦𑀸

𑁨𑁬𑁯. 𑀳𑁂𑀝𑁆𑀞𑀸𑀧𑀻𑀢𑀺 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺𑀤𑁂𑀯𑁂𑀳𑀺 𑀳𑁂𑀝𑁆𑀞𑀸𑀧𑀺. 𑀫𑀕𑁆𑀕𑀪𑀸𑀯𑀦𑀫𑁆𑀧𑀺 𑀦 𑀇𑀘𑁆𑀙𑀦𑁆𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀺 ‘‘𑀇𑀥 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄’’𑀢𑀺 𑀇𑀫𑀺𑀦𑀸 ‘‘𑀤𑁆𑀯𑁂𑀧𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀸 𑀦𑀢𑁆𑀣𑀺 𑀤𑁂𑀯𑁂𑀲𑀽𑀢𑀺 𑀉𑀧𑀮𑀤𑁆𑀥𑀺𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸.

𑁨𑁭𑁦. 𑀢𑀲𑁆𑀲𑁂𑀯𑀸𑀢𑀺 𑀧𑀭𑀯𑀸𑀤𑀺𑀦𑁄 𑀏𑀯. 𑀧𑀼𑀕𑁆𑀕𑀮𑀯𑀲𑁂𑀦𑀸𑀢𑀺 ‘‘𑀕𑀺𑀳𑀻𑀦𑀜𑁆𑀘𑁂𑀯 𑀏𑀓𑀘𑁆𑀘𑀸𑀦𑀜𑁆𑀘 𑀤𑁂𑀯𑀸𑀦’’𑀦𑁆𑀢𑀺 𑀏𑀯𑀁 𑀧𑀼𑀕𑁆𑀕𑀮𑀯𑀲𑁂𑀦. 𑀢𑀲𑁆𑀲𑀸𑀢𑀺 𑀧𑀭𑀯𑀸𑀤𑀺𑀦𑁄. 𑀧𑀝𑀺𑀓𑁆𑀔𑁂𑀧𑁄 𑀦 𑀬𑀼𑀢𑁆𑀢𑁄𑀢𑀺 𑀏𑀯𑀁 𑀧𑀼𑀕𑁆𑀕𑀮𑀯𑀲𑁂𑀦 𑀅𑀢𑁆𑀣𑀬𑁄𑀚𑀦𑀸 𑀦 𑀬𑀼𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀧𑀦 𑀓𑀢𑀸𑀧𑀺 𑀅𑀢𑁆𑀣𑀯𑀡𑁆𑀡𑀦𑀸 𑀑𑀓𑀸𑀲𑀯𑀲𑁂𑀦 𑀧𑀭𑀺𑀘𑁆𑀙𑀺𑀚𑁆𑀚𑀢𑀻𑀢𑀺 𑀦𑀸𑀬𑀁 𑀤𑁄𑀲𑁄. 𑀢𑀲𑁆𑀲𑀸𑀬𑀁 𑀅𑀥𑀺𑀧𑁆𑀧𑀸𑀬𑁄𑀢𑀺 𑀅𑀬𑀁 ‘‘𑀕𑀺𑀳𑀻𑀦𑀜𑁆𑀘𑁂𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁄 𑀢𑀲𑁆𑀲 𑀧𑀭𑀯𑀸𑀤𑀺𑀦𑁄 𑀬𑀤𑀺 𑀅𑀥𑀺𑀧𑁆𑀧𑀸𑀬𑁄, 𑀏𑀯𑀁 𑀲𑀜𑁆𑀜𑀸𑀬 𑀧𑀭𑀯𑀸𑀤𑀺𑀦𑁄 𑀲𑀓𑀯𑀸𑀤𑀺𑀦𑀸 𑀲𑀫𑀸𑀦𑀸𑀤𑀸𑀬𑁄𑀢𑀺 𑀦 𑀦𑀺𑀕𑁆𑀕𑀳𑀸𑀭𑀳𑁄 𑀲𑀺𑀬𑀸. 𑀢𑁂𑀦𑀸𑀳 ‘‘𑀲𑀓…𑀧𑁂… 𑀢𑀩𑁆𑀩𑁄’’𑀢𑀺. 𑀧𑀞𑀫𑀁 𑀧𑀦 𑀅𑀦𑀼𑀚𑀸𑀦𑀺𑀢𑁆𑀯𑀸 𑀧𑀘𑁆𑀙𑀸 𑀧𑀝𑀺𑀓𑁆𑀔𑁂𑀧𑁂𑀦𑁂𑀯 𑀦𑀺𑀕𑁆𑀕𑀳𑁂𑀢𑀩𑁆𑀩𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀓𑁂𑀘𑀺 ‘‘𑀬𑀢𑁆𑀣 𑀦𑀢𑁆𑀣𑀺 𑀧𑀩𑁆𑀩𑀚𑁆𑀚𑀸, 𑀦𑀢𑁆𑀣𑀺 𑀢𑀢𑁆𑀣 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺 𑀧𑀼𑀘𑁆𑀙𑀸𑀬 𑀏𑀓𑀘𑁆𑀘𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀫𑀕𑁆𑀕𑀧𑁆𑀧𑀝𑀺𑀯𑁂𑀥𑀁 𑀲𑀦𑁆𑀥𑀸𑀬 𑀧𑀭𑀯𑀸𑀤𑀺𑀦𑁄 𑀧𑀝𑀺𑀓𑁆𑀔𑁂𑀧𑁄. 𑀬𑀤𑀺𑀧𑀺 𑀲𑁄 𑀤𑁂𑀯𑀸𑀦𑀁 𑀫𑀕𑁆𑀕𑀧𑁆𑀧𑀝𑀺𑀮𑀸𑀪𑀁 𑀦 𑀇𑀘𑁆𑀙𑀢𑀺, 𑀲𑀫𑁆𑀪𑀯𑀦𑁆𑀢𑀁 𑀧𑀦 𑀲𑀩𑁆𑀩𑀁 𑀤𑀲𑁆𑀲𑁂𑀢𑀼𑀁 𑀅𑀝𑁆𑀞𑀓𑀣𑀸𑀬𑀁 ‘𑀕𑀺𑀳𑀻𑀦’𑀫𑀺𑀘𑁆𑀘𑁂𑀯 𑀅𑀯𑀢𑁆𑀯𑀸 ‘𑀏𑀓𑀘𑁆𑀘𑀸𑀦𑀜𑁆𑀘 𑀤𑁂𑀯𑀸𑀦’𑀦𑁆𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁 ‘‘𑀲𑀦𑁆𑀥𑀸𑀬𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸, 𑀧𑀼𑀭𑀺𑀫𑁄𑀬𑁂𑀯𑀢𑁆𑀣𑁄 𑀬𑀼𑀢𑁆𑀢𑁄.

𑀲𑀼𑀤𑁆𑀥𑀩𑁆𑀭𑀳𑁆𑀫𑀘𑀭𑀺𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀁𑀲𑀦𑁆𑀤𑀦𑀩𑁆𑀭𑀳𑁆𑀫𑀘𑀭𑀺𑀬𑀓𑀣𑀸𑀯𑀡𑁆𑀡𑀦𑀸

𑁨𑁭𑁩. 𑀭𑀽𑀧𑀸𑀯𑀘𑀭𑀫𑀕𑁆𑀕𑁂𑀦𑀸𑀢𑀺 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑁂𑀦. 𑀢𑀜𑁆𑀳𑀺 𑀭𑀽𑀧𑀪𑀯𑀽𑀧𑀧𑀢𑁆𑀢𑀺𑀬𑀸 𑀉𑀧𑀸𑀬𑀪𑀸𑀯𑀢𑁄 𑀫𑀕𑁆𑀕𑁄𑀢𑀺 𑀯𑀼𑀢𑁆𑀢𑁄. 𑀬𑀣𑀸𑀳 ‘‘𑀭𑀽𑀧𑀼𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀻’’𑀢𑀺 (𑀥. 𑀲. 𑁧𑁬𑁦). 𑀇𑀤𑀦𑁆𑀢𑀺 𑀇𑀤𑀁 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀁. ‘‘𑀇𑀥𑀯𑀺𑀳𑀸𑀬𑀦𑀺𑀝𑁆𑀞𑀳𑁂𑀢𑀼𑀪𑀽𑀢𑁄 𑀭𑀽𑀧𑀸𑀯𑀘𑀭𑀫𑀕𑁆𑀕𑁄’’𑀢𑀺𑀆𑀤𑀺𑀓𑀁 𑀤𑀻𑀧𑁂𑀦𑁆𑀢𑀁 𑀯𑀘𑀦𑀁 𑀅𑀦𑀸𑀕𑀸𑀫𑀺𑀫𑀕𑁆𑀕𑀲𑁆𑀲 𑀢𑀩𑁆𑀪𑀸𑀯𑀤𑀻𑀧𑀓𑁂𑀦 ‘‘𑀇𑀥 𑀪𑀸𑀯𑀺𑀢𑀫𑀕𑁆𑀕𑁄’’𑀢𑀺𑀆𑀤𑀺𑀓𑁂𑀦 𑀓𑀣𑀁 𑀲𑀫𑁂𑀢𑀻𑀢𑀺 𑀘𑁄𑀤𑁂𑀢𑁆𑀯𑀸 𑀬𑀣𑀸 𑀲𑀫𑁂𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀩𑁆𑀩𑁂 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀧𑀼𑀩𑁆𑀩𑁂’’𑀢𑀺 𑀇𑀫𑀺𑀦𑀸 ‘‘𑀇𑀥 𑀪𑀸𑀯𑀺𑀢𑀫𑀕𑁆𑀕𑁄’’𑀢𑀺𑀆𑀤𑀺𑀓𑀁 𑀯𑀤𑀦𑁆𑀢𑀺, 𑀇𑀥𑀸𑀧𑀺 𑀧𑀦 ‘‘𑀭𑀽𑀧𑀸𑀯𑀘𑀭𑀫𑀕𑁆𑀕𑁂𑀦𑀸’’𑀢𑀺𑀆𑀤𑀺𑀓𑀁. 𑀢𑀢𑁆𑀣 𑀅𑀦𑀸𑀕𑀸𑀫𑀻 𑀏𑀯𑀸𑀢𑀺 𑀅𑀦𑀸𑀕𑀸𑀫𑀺𑀨𑀮𑀝𑁆𑀞𑁄 𑀏𑀯. 𑀛𑀸𑀦𑀸𑀦𑀸𑀕𑀸𑀫𑀻𑀢𑀺 𑀅𑀲𑀫𑀼𑀘𑁆𑀙𑀺𑀦𑁆𑀦𑀚𑁆𑀛𑀢𑁆𑀢𑀲𑀁𑀬𑁄𑀚𑀦𑁄𑀧𑀺 𑀭𑀽𑀧𑀪𑀯𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑀫𑀕𑁆𑀕𑀁 𑀪𑀸𑀯𑁂𑀢𑁆𑀯𑀸 𑀢𑀢𑁆𑀣𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀦𑀢𑁄. 𑀅𑀥𑀺𑀧𑁆𑀧𑀸𑀬𑁄𑀢𑀺 𑀬𑀣𑀸𑀯𑀼𑀢𑁆𑀢𑁄 𑀤𑁆𑀯𑀺𑀦𑁆𑀦𑀁 𑀅𑀝𑁆𑀞𑀓𑀣𑀸𑀯𑀘𑀦𑀸𑀦𑀁 𑀅𑀯𑀺𑀭𑁄𑀥𑀤𑀻𑀧𑀓𑁄 𑀅𑀥𑀺𑀧𑁆𑀧𑀸𑀬𑁄.

𑀇𑀥𑀸𑀢𑀺 𑀓𑀸𑀫𑀮𑁄𑀓𑁂. 𑀢𑀢𑁆𑀣𑀸𑀢𑀺 𑀩𑁆𑀭𑀳𑁆𑀫𑀮𑁄𑀓𑁂. 𑀏𑀢𑁆𑀣 𑀘 𑀧𑀭𑀯𑀸𑀤𑀻 𑀏𑀯𑀁 𑀧𑀼𑀘𑁆𑀙𑀺𑀢𑀩𑁆𑀩𑁄 ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀞𑀸𑀦𑁂𑀳𑀻’’𑀢𑀺 𑀲𑀼𑀢𑁆𑀢𑀁 𑀓𑀺𑀁 𑀬𑀣𑀸𑀭𑀼𑀢𑀯𑀲𑁂𑀦 𑀕𑀳𑁂𑀢𑀩𑁆𑀩𑀢𑁆𑀣𑀁, 𑀉𑀤𑀸𑀳𑀼 𑀲𑀦𑁆𑀥𑀸𑀬𑀪𑀸𑀲𑀺𑀢𑀦𑁆𑀢𑀺? 𑀢𑀢𑁆𑀣 𑀚𑀸𑀦𑀫𑀸𑀦𑁄 𑀲𑀦𑁆𑀥𑀸𑀬𑀪𑀸𑀲𑀺𑀢𑀦𑁆𑀢𑀺 𑀯𑀤𑁂𑀬𑁆𑀬. 𑀅𑀜𑁆𑀜𑀣𑀸 ‘‘𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺𑀤𑁂𑀯𑁂 𑀉𑀧𑀸𑀤𑀸𑀬𑀸’’𑀢𑀺𑀆𑀤𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸 ‘‘𑀤𑁂𑀯𑁂 𑀘 𑀢𑀸𑀯𑀢𑀺𑀁𑀲𑁂’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀬𑀣𑀸 𑀳𑀺 𑀢𑀲𑁆𑀲 ‘‘𑀲𑁂𑀬𑁆𑀬𑀣𑀸𑀧𑀺 𑀤𑁂𑀯𑁂𑀳𑀺 𑀢𑀸𑀯𑀢𑀺𑀁𑀲𑁂𑀳𑀺 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑁆𑀯𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀲𑀓𑁆𑀓𑀁 𑀤𑁂𑀯𑀭𑀸𑀚𑀸𑀦𑀁 𑀉𑀧𑀸𑀤𑀸𑀬 𑀓𑀸𑀫𑀸𑀯𑀘𑀭𑀤𑁂𑀯𑁂𑀲𑀼 𑀢𑀸𑀯𑀢𑀺𑀁𑀲𑀤𑁂𑀯𑀸 𑀧𑀸𑀓𑀝𑀸 𑀧𑀜𑁆𑀜𑀸𑀢𑀸𑀢𑀺 𑀢𑁂𑀲𑀁 𑀕𑀳𑀡𑀁, 𑀦 𑀢𑁂𑀬𑁂𑀯 𑀅𑀥𑀺𑀧𑁆𑀧𑁂𑀢𑀸𑀢𑀺 𑀲𑀼𑀢𑁆𑀢𑀧𑀤𑀲𑁆𑀲 𑀲𑀦𑁆𑀥𑀸𑀬𑀪𑀸𑀲𑀺𑀢𑀢𑁆𑀣𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁, 𑀏𑀯𑀁 ‘‘𑀇𑀥 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄’’𑀢𑀺 𑀏𑀢𑁆𑀣𑀸𑀧𑀺 𑀅𑀦𑀯𑀚𑁆𑀚𑀲𑀼𑀔𑀅𑀩𑁆𑀬𑀸𑀲𑁂𑀓𑀲𑀼𑀔𑀦𑁂𑀓𑁆𑀔𑀫𑁆𑀫𑀲𑀼𑀔𑀸𑀤𑀺𑀲𑀦𑁆𑀦𑀺𑀲𑁆𑀲𑀬𑀪𑀸𑀯𑁂𑀦 𑀫𑀳𑀸𑀦𑀺𑀲𑀁𑀲𑀢𑀸𑀬 𑀲𑀸𑀲𑀦𑁂 𑀧𑀩𑁆𑀩𑀚𑁆𑀚𑀸 ‘‘𑀇𑀥 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄’’𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀅𑀥𑀺𑀧𑁆𑀧𑁂𑀢𑀸. 𑀲𑀸 𑀳𑀺 𑀉𑀢𑁆𑀢𑀭𑀓𑀼𑀭𑀼𑀓𑀸𑀦𑀁 𑀤𑁂𑀯𑀸𑀦𑀜𑁆𑀘 𑀅𑀦𑁄𑀓𑀸𑀲𑀪𑀸𑀯𑀢𑁄 𑀤𑀼𑀓𑁆𑀓𑀭𑀸 𑀤𑀼𑀮𑁆𑀮𑀪𑀸 𑀘. 𑀢𑀢𑁆𑀣 𑀲𑀽𑀭𑀺𑀬𑀧𑀭𑀺𑀯𑀢𑁆𑀢𑀸𑀤𑀻𑀳𑀺𑀧𑀺 𑀤𑁂𑀯𑁂𑀲𑀼 𑀫𑀕𑁆𑀕𑀧𑀝𑀺𑀮𑀸𑀪𑀸𑀬 𑀅𑀢𑁆𑀣𑀺𑀢𑀸 𑀯𑀺𑀪𑀸𑀯𑁂𑀢𑀩𑁆𑀩𑀸, 𑀉𑀢𑁆𑀢𑀭𑀓𑀼𑀭𑀼𑀓𑀸𑀦𑀁 𑀧𑀦 𑀯𑀺𑀲𑁂𑀲𑀸𑀦𑀥𑀺𑀕𑀫𑀪𑀸𑀯𑁄 𑀉𑀪𑀺𑀦𑁆𑀦𑀫𑁆𑀧𑀺 𑀇𑀘𑁆𑀙𑀺𑀢𑁄 𑀏𑀯𑀸𑀢𑀺.

𑀲𑀁𑀲𑀦𑁆𑀤𑀦𑀩𑁆𑀭𑀳𑁆𑀫𑀘𑀭𑀺𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀩𑁆𑀭𑀳𑁆𑀫𑀘𑀭𑀺𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀑𑀥𑀺𑀲𑁄𑀓𑀣𑀸𑀯𑀡𑁆𑀡𑀦𑀸

𑁨𑁭𑁪. 𑀑𑀥𑀺𑀲𑁄𑀢𑀺 𑀪𑀸𑀕𑀲𑁄, 𑀪𑀸𑀕𑁂𑀦𑀸𑀢𑀺 𑀅𑀢𑁆𑀣𑁄. 𑀪𑀸𑀕𑁄 𑀦𑀸𑀫 𑀬𑀲𑁆𑀫𑀸 𑀏𑀓𑀤𑁂𑀲𑁄 𑀳𑁄𑀢𑀺, 𑀢𑀲𑁆𑀫𑀸 ‘‘𑀏𑀓𑀤𑁂𑀲𑁂𑀦 𑀏𑀓𑀤𑁂𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀤𑀺 𑀘𑀢𑀼𑀦𑁆𑀦𑀁 𑀫𑀕𑁆𑀕𑀸𑀦𑀁 𑀯𑀲𑁂𑀦 𑀲𑀫𑀼𑀤𑀬𑀧𑀓𑁆𑀔𑀺𑀓𑀲𑁆𑀲 𑀓𑀺𑀮𑁂𑀲𑀕𑀡𑀲𑁆𑀲 𑀘𑀢𑀼𑀪𑀸𑀕𑁂𑀳𑀺 𑀧𑀳𑀸𑀦𑀁 ‘‘𑀑𑀥𑀺𑀲𑁄 𑀧𑀳𑀸𑀦’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁, 𑀇𑀘𑁆𑀙𑀺𑀢𑀫𑁂𑀯𑁂𑀢𑀁 𑀲𑀓𑀯𑀸𑀤𑀺𑀲𑁆𑀲 ‘‘𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀤𑀺𑀝𑁆𑀞𑀺𑀕𑀢𑀸𑀦𑀁 𑀧𑀳𑀸𑀦𑀸𑀬𑀸’’𑀢𑀺 𑀘 𑀆𑀤𑀺𑀯𑀘𑀦𑀢𑁄. 𑀬𑀲𑁆𑀫𑀸 𑀧𑀦 𑀫𑀕𑁆𑀕𑁄 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀦𑀸𑀦𑀸𑀪𑀺𑀲𑀫𑀬𑀯𑀲𑁂𑀦 𑀓𑀺𑀘𑁆𑀘𑀓𑀭𑁄, 𑀦 𑀏𑀓𑀸𑀪𑀺𑀲𑀫𑀬𑀯𑀲𑁂𑀦𑀸𑀢𑀺 𑀧𑀭𑀯𑀸𑀤𑀺𑀦𑁄 𑀮𑀤𑁆𑀥𑀺, 𑀢𑀲𑁆𑀫𑀸 𑀬𑀣𑀸 ‘‘𑀫𑀕𑁆𑀕𑁄 𑀓𑀸𑀮𑁂𑀦 𑀤𑀼𑀓𑁆𑀔𑀁 𑀧𑀭𑀺𑀚𑀸𑀦𑀸𑀢𑀺, 𑀓𑀸𑀮𑁂𑀦 𑀲𑀫𑀼𑀤𑀬𑀁 𑀧𑀚𑀳𑀢𑀻’’𑀢𑀺𑀆𑀤𑀺𑀦𑀸 𑀦𑀸𑀦𑀓𑁆𑀔𑀡𑀯𑀲𑁂𑀦 𑀲𑀘𑁆𑀘𑁂𑀲𑀼 𑀧𑀯𑀢𑁆𑀢𑀢𑀻𑀢𑀺 𑀇𑀘𑁆𑀙𑀺𑀢𑁄, 𑀏𑀯𑀁 𑀧𑀘𑁆𑀘𑁂𑀓𑀫𑁆𑀧𑀺 𑀦𑀸𑀦𑀓𑁆𑀔𑀡𑀯𑀲𑁂𑀦 𑀧𑀯𑀢𑁆𑀢𑁂𑀬𑁆𑀬. 𑀢𑀣𑀸 𑀲𑀢𑀺 𑀤𑀼𑀓𑁆𑀔𑀸𑀤𑀻𑀦𑀁 𑀏𑀓𑀤𑁂𑀲𑀏𑀓𑀤𑁂𑀲𑀫𑁂𑀯 𑀧𑀭𑀺𑀚𑀸𑀦𑀸𑀢𑀺 𑀧𑀚𑀳𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀧𑀸𑀴𑀺𑀬𑀁 ‘‘𑀲𑁄𑀢𑀸𑀧𑀢𑁆𑀢𑀺…𑀧𑁂… 𑀏𑀓𑀤𑁂𑀲𑁂 𑀧𑀚𑀳𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀢𑀺 𑀳𑀺 𑀦𑀸𑀦𑀸𑀪𑀺𑀲𑀫𑀬𑁂 𑀧𑀞𑀫𑀫𑀕𑁆𑀕𑀸𑀤𑀻𑀳𑀺 𑀧𑀳𑀸𑀢𑀩𑁆𑀩𑀸𑀦𑀁 𑀲𑀁𑀬𑁄𑀚𑀦𑀢𑁆𑀢𑀬𑀸𑀤𑀻𑀦𑀁 𑀤𑀼𑀓𑁆𑀔𑀤𑀲𑁆𑀲𑀦𑀸𑀤𑀻𑀳𑀺 𑀏𑀓𑀤𑁂𑀲𑀏𑀓𑀤𑁂𑀲𑀧𑁆𑀧𑀳𑀸𑀦𑀁 𑀲𑀺𑀬𑀸𑀢𑀺 𑀏𑀓𑀤𑁂𑀲𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀝𑁆𑀞𑀸𑀤𑀺𑀢𑀸, 𑀢𑀢𑁄 𑀏𑀯 𑀏𑀓𑀤𑁂𑀲𑀲𑁄𑀢𑀸𑀧𑀦𑁆𑀦𑀸𑀤𑀺𑀢𑀸 𑀘 𑀆𑀧𑀚𑁆𑀚𑀢𑀺 𑀅𑀦𑀦𑁆𑀢𑀭𑀨𑀮𑀢𑁆𑀢𑀸 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀸𑀦𑀁, 𑀦 𑀘 𑀢𑀁 𑀬𑀼𑀢𑁆𑀢𑀁. 𑀦 𑀳𑀺 𑀓𑀸𑀮𑀪𑁂𑀤𑁂𑀦 𑀯𑀺𑀦𑀸 𑀲𑁄 𑀏𑀯 𑀲𑁄𑀢𑀸𑀧𑀦𑁆𑀦𑁄, 𑀅𑀲𑁄𑀢𑀸𑀧𑀦𑁆𑀦𑁄 𑀘𑀸𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁. 𑀢𑁂𑀦𑀸𑀳 ‘‘𑀏𑀓𑀤𑁂𑀲𑀁 𑀲𑁄𑀢𑀸𑀧𑀦𑁆𑀦𑁄, 𑀏𑀓𑀤𑁂𑀲𑀁 𑀦 𑀲𑁄𑀢𑀸𑀧𑀦𑁆𑀦𑁄’’𑀢𑀺𑀆𑀤𑀺.

𑀅𑀧𑀺𑀘𑀸𑀬𑀁 𑀦𑀸𑀦𑀸𑀪𑀺𑀲𑀫𑀬𑀯𑀸𑀤𑀻 𑀏𑀯𑀁 𑀧𑀼𑀘𑁆𑀙𑀺𑀢𑀩𑁆𑀩𑁄 ‘‘𑀫𑀕𑁆𑀕𑀜𑀸𑀡𑀁 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀦𑁆𑀢𑀁 𑀓𑀺𑀁 𑀆𑀭𑀫𑁆𑀫𑀡𑀢𑁄 𑀧𑀝𑀺𑀯𑀺𑀚𑁆𑀛𑀢𑀺, 𑀉𑀤𑀸𑀳𑀼 𑀓𑀺𑀘𑁆𑀘𑀢𑁄’’𑀢𑀺. 𑀬𑀤𑀺 𑀆𑀭𑀫𑁆𑀫𑀡𑀢𑁄𑀢𑀺 𑀯𑀤𑁂𑀬𑁆𑀬, 𑀢𑀲𑁆𑀲 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲 𑀯𑀺𑀬 𑀤𑀼𑀓𑁆𑀔𑀲𑀫𑀼𑀤𑀬𑀸𑀦𑀁 𑀅𑀘𑁆𑀘𑀦𑁆𑀢𑀧𑀭𑀺𑀘𑁆𑀙𑁂𑀤𑀲𑀫𑀼𑀘𑁆𑀙𑁂𑀤𑀸 𑀦 𑀬𑀼𑀢𑁆𑀢𑀸 𑀢𑀢𑁄 𑀅𑀦𑀺𑀲𑁆𑀲𑀝𑀢𑁆𑀢𑀸, 𑀢𑀣𑀸 𑀫𑀕𑁆𑀕𑀤𑀲𑁆𑀲𑀦𑀁. 𑀦 𑀳𑀺 𑀲𑀬𑀫𑁂𑀯 𑀅𑀢𑁆𑀢𑀸𑀦𑀁 𑀆𑀭𑀩𑁆𑀪 𑀧𑀯𑀢𑁆𑀢𑀢𑀻𑀢𑀺 𑀬𑀼𑀢𑁆𑀢𑀁, 𑀫𑀕𑁆𑀕𑀦𑁆𑀢𑀭𑀧𑀭𑀺𑀓𑀧𑁆𑀧𑀦𑀸𑀬𑀁 𑀅𑀦𑀯𑀝𑁆𑀞𑀸𑀦𑀁 𑀆𑀧𑀚𑁆𑀚𑀢𑀻𑀢𑀺, 𑀢𑀲𑁆𑀫𑀸 𑀢𑀻𑀡𑀺 𑀲𑀘𑁆𑀘𑀸𑀦𑀺 𑀓𑀺𑀘𑁆𑀘𑀢𑁄, 𑀦𑀺𑀭𑁄𑀥𑀁 𑀓𑀺𑀘𑁆𑀘𑀢𑁄 𑀆𑀭𑀫𑁆𑀫𑀡𑀢𑁄 𑀘 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀏𑀯𑀫𑀲𑀫𑁆𑀫𑁄𑀳𑀢𑁄 𑀧𑀝𑀺𑀯𑀺𑀚𑁆𑀛𑀦𑁆𑀢𑀲𑁆𑀲 𑀫𑀕𑁆𑀕𑀜𑀸𑀡𑀲𑁆𑀲 𑀦𑀢𑁆𑀣𑁂𑀯 𑀦𑀸𑀦𑀸𑀪𑀺𑀲𑀫𑀬𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀬𑁄, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀁 𑀧𑀲𑁆𑀲𑀢𑀺, 𑀤𑀼𑀓𑁆𑀔𑀲𑀫𑀼𑀤𑀬𑀫𑁆𑀧𑀺 𑀲𑁄 𑀧𑀲𑁆𑀲𑀢𑀻’’𑀢𑀺𑀆𑀤𑀺. 𑀦 𑀘𑁂𑀢𑀁 𑀓𑀸𑀮𑀦𑁆𑀢𑀭𑀤𑀲𑁆𑀲𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀬𑁄 𑀦𑀼 𑀔𑁄, 𑀆𑀯𑀼𑀲𑁄, 𑀤𑀼𑀓𑁆𑀔𑀁 𑀧𑀲𑁆𑀲𑀢𑀺, 𑀤𑀼𑀓𑁆𑀔𑀲𑀫𑀼𑀤𑀬𑀫𑁆𑀧𑀺 𑀲𑁄 𑀧𑀲𑁆𑀲𑀢𑀺, 𑀤𑀼𑀓𑁆𑀔𑀦𑀺𑀭𑁄𑀥𑀫𑁆𑀧𑀺…𑀧𑁂… 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑀝𑀺𑀧𑀤𑀫𑁆𑀧𑀺 𑀲𑁄 𑀧𑀲𑁆𑀲𑀢𑀻’’𑀢𑀺 (𑀲𑀁. 𑀦𑀺. 𑁫.𑁧𑁧𑁦𑁦) 𑀏𑀓𑀲𑀘𑁆𑀘𑀤𑀲𑁆𑀲𑀦𑀲𑀫𑀗𑁆𑀕𑀺𑀦𑁄 𑀅𑀜𑁆𑀜𑀲𑀘𑁆𑀘𑀤𑀲𑁆𑀲𑀦𑀲𑀫𑀗𑁆𑀕𑀺𑀪𑀸𑀯𑀯𑀺𑀘𑀸𑀭𑀡𑀸𑀬𑀁 𑀢𑀤𑀢𑁆𑀣𑀲𑀸𑀥𑀦𑀢𑁆𑀣𑀁 𑀆𑀬𑀲𑁆𑀫𑀢𑀸 𑀕𑀯𑀁𑀧𑀢𑀺𑀢𑁆𑀣𑁂𑀭𑁂𑀦 𑀆𑀪𑀢𑀢𑁆𑀢𑀸 𑀧𑀘𑁆𑀘𑁂𑀓𑀜𑁆𑀘 𑀲𑀘𑁆𑀘𑀢𑁆𑀢𑀬𑀤𑀲𑁆𑀲𑀦𑀲𑁆𑀲 𑀬𑁄𑀚𑀺𑀢𑀢𑁆𑀢𑀸. 𑀅𑀜𑁆𑀜𑀣𑀸 𑀧𑀼𑀭𑀺𑀫𑀤𑀺𑀝𑁆𑀞𑀲𑁆𑀲 𑀧𑀼𑀦 𑀅𑀤𑀲𑁆𑀲𑀦𑀢𑁄 𑀲𑀫𑀼𑀤𑀬𑀸𑀤𑀺𑀤𑀲𑁆𑀲𑀦𑁂 𑀤𑀼𑀓𑁆𑀔𑀸𑀤𑀺𑀤𑀲𑁆𑀲𑀦𑀫𑀬𑁄𑀚𑀦𑀻𑀬𑀁 𑀲𑀺𑀬𑀸. 𑀦 𑀳𑀺 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀮𑁄𑀓𑀺𑀬𑀫𑀕𑁆𑀕𑁄 𑀯𑀺𑀬 𑀓𑀢𑀓𑀸𑀭𑀺𑀪𑀸𑀯𑁂𑀦 𑀧𑀯𑀢𑁆𑀢𑀢𑀺 𑀲𑀫𑀼𑀘𑁆𑀙𑁂𑀤𑀓𑀢𑁆𑀢𑀸. 𑀢𑀣𑀸 𑀬𑁄𑀚𑀦𑁂 𑀘 𑀲𑀩𑁆𑀩𑀁 𑀤𑀲𑁆𑀲𑀦𑀁 𑀤𑀲𑁆𑀲𑀦𑀦𑁆𑀢𑀭𑀧𑀭𑀦𑁆𑀢𑀺 𑀤𑀲𑁆𑀲𑀦𑀸𑀦𑀼𑀧𑀭𑀫𑁄 𑀲𑀺𑀬𑀸. 𑀏𑀯𑀁 𑀆𑀕𑀫𑀢𑁄 𑀬𑀼𑀢𑁆𑀢𑀺𑀢𑁄 𑀘 𑀦𑀸𑀦𑀸𑀪𑀺𑀲𑀫𑀬𑀲𑁆𑀲 𑀅𑀲𑀫𑁆𑀪𑀯𑀢𑁄 𑀧𑀘𑁆𑀘𑁂𑀓𑀁 𑀫𑀕𑁆𑀕𑀸𑀦𑀁 𑀑𑀥𑀺𑀲𑁄 𑀧𑀳𑀸𑀦𑀁 𑀦𑀢𑁆𑀣𑀻𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁.

𑀑𑀥𑀺𑀲𑁄𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀚𑀳𑀢𑀺𑀓𑀣𑀸𑀯𑀡𑁆𑀡𑀦𑀸

𑁧. 𑀦𑀲𑀼𑀢𑁆𑀢𑀸𑀳𑀭𑀡𑀓𑀣𑀸𑀯𑀡𑁆𑀡𑀦𑀸