𑀲𑁂𑀤𑀫𑁄𑀘𑀦𑀕𑀸𑀣𑀸

𑀅𑀯𑀺𑀧𑁆𑀧𑀯𑀸𑀲𑀸𑀤𑀺𑀧𑀜𑁆𑀳𑀯𑀡𑁆𑀡𑀦𑀸

𑁪𑁭𑁯. 𑀲𑁂𑀤𑀫𑁄𑀘𑀦𑀕𑀸𑀣𑀸𑀲𑀼 𑀢𑀳𑀺𑀦𑁆𑀢𑀺 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂. ‘‘𑀅𑀓𑀧𑁆𑀧𑀺𑀬𑀲𑀫𑁆𑀪𑁄𑀕𑁄 𑀦𑀸𑀫 𑀫𑁂𑀣𑀼𑀦𑀥𑀫𑁆𑀫𑀸𑀤𑀻’’𑀢𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀏𑀲𑀸 𑀧𑀜𑁆𑀳𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁, 𑀏𑀲𑁄 𑀧𑀜𑁆𑀳𑁄 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑁄𑀢𑀺 𑀅𑀢𑁆𑀣𑁄.

𑀤𑀲𑀸𑀢𑀺 𑀅𑀯𑀦𑁆𑀤𑀺𑀬𑁂 𑀤𑀲. 𑀏𑀓𑀸𑀤𑀲𑀸𑀢𑀺 𑀧𑀡𑁆𑀟𑀓𑀸𑀤𑀬𑁄 𑀏𑀓𑀸𑀤𑀲. 𑀉𑀩𑁆𑀪𑀓𑁆𑀔𑀓𑁂 𑀦 𑀯𑀤𑀸𑀫𑀻𑀢𑀺 𑀇𑀫𑀺𑀦𑀸 𑀫𑀼𑀔𑁂 𑀫𑁂𑀣𑀼𑀦𑀥𑀫𑁆𑀫𑀸𑀪𑀸𑀯𑀁 𑀤𑀻𑀧𑁂𑀢𑀺. 𑀅𑀥𑁄𑀦𑀸𑀪𑀺𑀁 𑀯𑀺𑀯𑀚𑁆𑀚𑀺𑀬𑀸𑀢𑀺 𑀇𑀫𑀺𑀦𑀸 𑀯𑀘𑁆𑀘𑀫𑀕𑁆𑀕𑀧𑀲𑁆𑀲𑀸𑀯𑀫𑀕𑁆𑀕𑁂𑀲𑀼.

𑀕𑀸𑀫𑀦𑁆𑀢𑀭𑀧𑀭𑀺𑀬𑀸𑀧𑀦𑁆𑀦𑀁 𑀦𑀤𑀻𑀧𑀸𑀭𑀁 𑀑𑀓𑁆𑀓𑀦𑁆𑀢𑀪𑀺𑀓𑁆𑀔𑀼𑀦𑀺𑀁 𑀲𑀦𑁆𑀥𑀸𑀬𑀸𑀢𑀺 𑀏𑀢𑁆𑀣 𑀦𑀤𑀻 𑀪𑀺𑀓𑁆𑀔𑀼𑀦𑀺𑀬𑀸 𑀕𑀸𑀫𑀧𑀭𑀺𑀬𑀸𑀧𑀦𑁆𑀦𑀸, 𑀧𑀭𑀢𑀻𑀭𑀁 𑀕𑀸𑀫𑀦𑁆𑀢𑀭𑀧𑀭𑀺𑀬𑀸𑀧𑀦𑁆𑀦𑀁. 𑀢𑀢𑁆𑀣 𑀧𑀭𑀢𑀻𑀭𑁂 𑀧𑀞𑀫𑀮𑁂𑀟𑁆𑀟𑀼𑀧𑀸𑀢𑀧𑁆𑀧𑀫𑀸𑀡𑁄 𑀕𑀸𑀫𑀽𑀧𑀘𑀸𑀭𑁄 𑀦𑀤𑀻𑀧𑀭𑀺𑀬𑀦𑁆𑀢𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑁄, 𑀢𑀲𑁆𑀫𑀸 𑀧𑀭𑀢𑀻𑀭𑁂 𑀭𑀢𑀦𑀫𑀢𑁆𑀢𑀫𑁆𑀧𑀺 𑀅𑀭𑀜𑁆𑀜𑀁 𑀦𑀢𑁆𑀣𑀺, 𑀧𑀭𑀢𑀻𑀭𑀜𑁆𑀘 𑀢𑀺𑀡𑀸𑀤𑀻𑀳𑀺 𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸 𑀤𑀲𑁆𑀲𑀦𑀽𑀧𑀘𑀸𑀭𑀯𑀺𑀭𑀳𑀺𑀢𑀁 𑀓𑀭𑁄𑀢𑀺. 𑀢𑀢𑁆𑀣 𑀅𑀢𑁆𑀢𑀦𑁄 𑀕𑀸𑀫𑁂 𑀆𑀧𑀢𑁆𑀢𑀺 𑀦𑀢𑁆𑀣𑀺, 𑀧𑀭𑀢𑀻𑀭𑁂 𑀧𑀦 𑀧𑀞𑀫𑀮𑁂𑀟𑁆𑀟𑀼𑀧𑀸𑀢𑀲𑀗𑁆𑀔𑀸𑀢𑁂 𑀕𑀸𑀫𑀽𑀧𑀘𑀸𑀭𑁂𑀬𑁂𑀯 𑀧𑀸𑀤𑀁 𑀞𑀧𑁂𑀢𑀺. 𑀅𑀦𑁆𑀢𑀭𑁂 𑀅𑀪𑀺𑀥𑀫𑁆𑀫𑁂 𑀯𑀼𑀢𑁆𑀢𑀦𑀬𑁂𑀦 𑀅𑀭𑀜𑁆𑀜𑀪𑀽𑀢𑀁 𑀲𑀓𑀕𑀸𑀫𑀁 𑀅𑀢𑀺𑀓𑁆𑀓𑀫𑀢𑀺 𑀦𑀸𑀫, 𑀢𑀲𑁆𑀫𑀸 𑀕𑀡𑀫𑁆𑀳𑀸 𑀑𑀳𑀻𑀬𑀦𑀸 𑀦𑀸𑀫 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀸 𑀦𑀸𑀫 𑀫𑀳𑀸𑀧𑀚𑀸𑀧𑀢𑀺𑀧𑀫𑀼𑀔𑀸 𑀧𑀜𑁆𑀘𑀲𑀢𑀲𑀸𑀓𑀺𑀦𑀺𑀬𑁄 𑀪𑀺𑀓𑁆𑀔𑀼𑀦𑀺𑀬𑁄. 𑀫𑀳𑀸𑀧𑀚𑀸𑀧𑀢𑀺𑀧𑀺 𑀳𑀺 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀤𑀺𑀦𑁆𑀦𑀑𑀯𑀸𑀤𑀲𑁆𑀲 𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀉𑀧𑀲𑀫𑁆𑀧𑀦𑁆𑀦𑀸 𑀦𑀸𑀫.

𑀧𑀸𑀭𑀸𑀚𑀺𑀓𑀸𑀤𑀺𑀧𑀜𑁆𑀳𑀯𑀡𑁆𑀡𑀦𑀸

𑁪𑁮𑁦. 𑀲𑀳 𑀤𑀼𑀲𑁆𑀲𑁂𑀦 𑀫𑁂𑀣𑀼𑀦𑀯𑀻𑀢𑀺𑀓𑁆𑀓𑀫𑀲𑁆𑀲 𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 ‘‘𑀤𑀼𑀲𑁆𑀲𑀓𑀼𑀝𑀺𑀆𑀤𑀻𑀦𑀺 𑀲𑀦𑁆𑀥𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸𑀢𑀺 ‘‘𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑁂 𑀲𑀢𑀺 𑀧𑀝𑀺𑀕𑁆𑀕𑀳𑀡𑀲𑁆𑀲 𑀯𑀺𑀚𑀳𑀦𑀢𑁄 𑀲𑀸𑀫𑀁 𑀕𑀳𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸.

𑁪𑁮𑁧. 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀦𑀺𑀕𑁆𑀭𑁄𑀥𑀲𑀤𑀺𑀲𑀦𑁆𑀢𑀺 𑀬𑁄𑀚𑀦𑀤𑁆𑀯𑀺𑀬𑁄𑀚𑀦𑀸𑀤𑀺𑀧𑀭𑀫𑀁 𑀫𑀳𑀸𑀦𑀺𑀕𑁆𑀭𑁄𑀥𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀲𑁂𑀤𑀫𑁄𑀘𑀦𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.