𑁧𑁨. 𑀲𑀢𑁆𑀢𑀲𑀢𑀺𑀓𑀓𑁆𑀔𑀦𑁆𑀥𑀓𑀁

𑀤𑀲𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁪𑁪𑁬. 𑀲𑀢𑁆𑀢𑀲𑀢𑀺𑀓𑀓𑁆𑀔𑀦𑁆𑀥𑀓𑁂 𑀦𑀺𑀓𑁆𑀔𑀺𑀢𑁆𑀢𑀫𑀡𑀺𑀲𑀼𑀯𑀡𑁆𑀡𑀸𑀢𑀺 𑀭𑀽𑀧𑀺𑀬𑀲𑀺𑀓𑁆𑀔𑀸𑀧𑀤𑁂𑀦𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑀫𑀡𑀺𑀲𑀼𑀯𑀡𑁆𑀡𑀸. 𑀢𑀢𑁆𑀣 𑀫𑀡𑀺𑀕𑁆𑀕𑀳𑀡𑁂𑀦 𑀲𑀩𑁆𑀩𑀁 𑀤𑀼𑀓𑁆𑀓𑀝𑀯𑀢𑁆𑀣𑀼, 𑀲𑀼𑀯𑀡𑁆𑀡𑀕𑁆𑀕𑀳𑀡𑁂𑀦 𑀲𑀩𑁆𑀩𑀁 𑀧𑀸𑀘𑀺𑀢𑁆𑀢𑀺𑀬𑀯𑀢𑁆𑀣𑀼 𑀕𑀳𑀺𑀢𑀁 𑀳𑁄𑀢𑀺. 𑀪𑀺𑀓𑁆𑀔𑀕𑁆𑀕𑁂𑀦𑀸𑀢𑀺 𑀪𑀺𑀓𑁆𑀔𑀼𑀕𑀡𑀦𑀸𑀬.

𑁪𑁪𑁭. 𑀉𑀧𑀓𑁆𑀓𑀺𑀮𑁂𑀲𑀸𑀢𑀺 𑀯𑀺𑀭𑁄𑀘𑀺𑀢𑀼𑀁 𑀅𑀤𑀢𑁆𑀯𑀸 𑀉𑀧𑀓𑁆𑀓𑀺𑀮𑀺𑀝𑁆𑀞𑀪𑀸𑀯𑀓𑀭𑀡𑁂𑀦 𑀉𑀧𑀓𑁆𑀓𑀺𑀮𑁂𑀲𑀸. 𑀫𑀳𑀺𑀓𑀸𑀢𑀺 𑀳𑀺𑀫𑀁. 𑀥𑀽𑀫𑁄 𑀘 𑀭𑀚𑁄 𑀘 𑀥𑀽𑀫𑀭𑀚𑁄. 𑀏𑀢𑁆𑀣 𑀧𑀼𑀭𑀺𑀫𑀸 𑀢𑀬𑁄 𑀅𑀲𑀫𑁆𑀧𑀢𑁆𑀢𑀉𑀧𑀓𑁆𑀓𑀺𑀮𑁂𑀲𑀸, 𑀭𑀸𑀳𑀼 𑀧𑀦 𑀲𑀫𑁆𑀧𑀢𑁆𑀢𑀉𑀧𑀓𑁆𑀓𑀺𑀮𑁂𑀲𑀯𑀲𑁂𑀦 𑀓𑀣𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀦 𑀢𑀧𑀦𑁆𑀢𑀺 𑀦 𑀪𑀸𑀲𑀦𑁆𑀢𑀺 𑀦 𑀯𑀺𑀭𑁄𑀘𑀦𑁆𑀢𑀻𑀢𑀺 𑀕𑀼𑀡𑀧𑀢𑀸𑀧𑁂𑀦 𑀦 𑀢𑀧𑀦𑁆𑀢𑀺 𑀕𑀼𑀡𑁄𑀪𑀸𑀲𑁂𑀦 𑀦 𑀪𑀸𑀲𑀦𑁆𑀢𑀺 𑀕𑀼𑀡𑀯𑀺𑀭𑁄𑀘𑀦𑁂𑀦 𑀦 𑀯𑀺𑀭𑁄𑀘𑀦𑁆𑀢𑀺. 𑀲𑀼𑀭𑀸𑀫𑁂𑀭𑀬𑀧𑀸𑀦𑀸 𑀅𑀧𑁆𑀧𑀝𑀺𑀯𑀺𑀭𑀢𑀸𑀢𑀺 𑀧𑀜𑁆𑀘𑀯𑀺𑀥𑀸𑀬 𑀲𑀼𑀭𑀸𑀬 𑀘𑀢𑀼𑀩𑁆𑀩𑀺𑀥𑀲𑁆𑀲 𑀘 𑀫𑁂𑀭𑀬𑀲𑁆𑀲 𑀧𑀸𑀦𑀢𑁄 𑀅𑀯𑀺𑀭𑀢𑀸.

𑀅𑀯𑀺𑀚𑁆𑀚𑀸𑀦𑀺𑀯𑀼𑀝𑀸𑀢𑀺 𑀅𑀯𑀺𑀚𑁆𑀚𑀸𑀬 𑀦𑀺𑀯𑀸𑀭𑀺𑀢𑀸 𑀧𑀺𑀳𑀺𑀢𑀸. 𑀧𑀺𑀬𑀭𑀽𑀧𑀸𑀪𑀺𑀦𑀦𑁆𑀤𑀺𑀦𑁄𑀢𑀺 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁 𑀅𑀪𑀺𑀦𑀦𑁆𑀤𑀫𑀸𑀦𑀸 𑀢𑀼𑀲𑁆𑀲𑀫𑀸𑀦𑀸. 𑀲𑀸𑀤𑀺𑀬𑀦𑁆𑀢𑀻𑀢𑀺 𑀕𑀡𑁆𑀳𑀦𑁆𑀢𑀺. 𑀅𑀯𑀺𑀤𑁆𑀤𑀲𑀽𑀢𑀺 𑀅𑀦𑁆𑀥𑀩𑀸𑀮𑀸. 𑀲𑀭𑀚𑀸𑀢𑀺 𑀲𑀓𑀺𑀮𑁂𑀲𑀭𑀚𑀸. 𑀫𑀕𑀸𑀢𑀺 𑀫𑀺𑀕𑀲𑀤𑀺𑀲𑀸. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀯𑀺𑀲𑀬𑁂 𑀪𑀯𑁂 𑀯𑀸 𑀦𑁂𑀢𑀻𑀢𑀺 𑀦𑁂𑀢𑁆𑀢𑀺, 𑀢𑀡𑁆𑀳𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀸𑀬 𑀲𑀳 𑀯𑀢𑁆𑀢𑀦𑁆𑀢𑀻𑀢𑀺 𑀲𑀦𑁂𑀢𑁆𑀢𑀺𑀓𑀸.

𑁪𑁪𑁮. 𑀢𑀁 𑀧𑀭𑀺𑀲𑀁 𑀏𑀢𑀤𑀯𑁄𑀘𑀸𑀢𑀺 (𑀲𑀁. 𑀦𑀺. 𑀅𑀝𑁆𑀞. 𑁩.𑁪.𑁩𑁬𑁨) 𑀢𑀲𑁆𑀲 𑀓𑀺𑀭 𑀏𑀯𑀁 𑀅𑀳𑁄𑀲𑀺 ‘‘𑀓𑀼𑀮𑀧𑀼𑀢𑁆𑀢𑀸 𑀧𑀩𑁆𑀩𑀚𑀦𑁆𑀢𑀸 𑀧𑀼𑀢𑁆𑀢𑀤𑀸𑀭𑀜𑁆𑀘𑁂𑀯 𑀚𑀸𑀢𑀭𑀽𑀧𑀭𑀚𑀢𑀜𑁆𑀘 𑀧𑀳𑀸𑀬𑁂𑀯 𑀧𑀩𑁆𑀩𑀚𑀦𑁆𑀢𑀺, 𑀦 𑀘 𑀲𑀓𑁆𑀓𑀸 𑀬𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑀸 𑀢𑀁 𑀏𑀢𑁂𑀳𑀺 𑀕𑀸𑀳𑁂𑀢𑀼’’𑀦𑁆𑀢𑀺 𑀦𑀬𑀕𑁆𑀕𑀸𑀳𑁂 𑀞𑀢𑁆𑀯𑀸 𑀏𑀢𑀁 ‘‘𑀫𑀸 𑀅𑀬𑁆𑀬𑀸’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘. 𑀏𑀓𑀁𑀲𑁂𑀦𑁂𑀢𑀦𑁆𑀢𑀺 𑀏𑀢𑀁 𑀧𑀜𑁆𑀘𑀓𑀸𑀫𑀕𑀼𑀡𑀓𑀧𑁆𑀧𑀦𑀁 ‘‘𑀅𑀲𑁆𑀲𑀫𑀡𑀥𑀫𑁆𑀫𑁄 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑀥𑀫𑁆𑀫𑁄’’𑀢𑀺 𑀏𑀓𑀁𑀲𑁂𑀦 𑀥𑀸𑀭𑁂𑀬𑁆𑀬𑀸𑀲𑀺.

𑀢𑀺𑀡𑀦𑁆𑀢𑀺 𑀲𑁂𑀦𑀸𑀲𑀦𑀘𑁆𑀙𑀤𑀦𑀢𑀺𑀡𑀁. 𑀧𑀭𑀺𑀬𑁂𑀲𑀺𑀢𑀩𑁆𑀩𑀦𑁆𑀢𑀺 𑀢𑀺𑀡𑀘𑁆𑀙𑀤𑀦𑁂 𑀯𑀸 𑀇𑀝𑁆𑀞𑀓𑀘𑁆𑀙𑀤𑀦𑁂 𑀯𑀸 𑀕𑁂𑀳𑁂 𑀧𑀮𑀼𑀚𑁆𑀚𑀦𑁆𑀢𑁂 𑀬𑁂𑀳𑀺 𑀢𑀁 𑀓𑀸𑀭𑀺𑀢𑀁, 𑀢𑁂𑀲𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀢𑀼𑀫𑁆𑀳𑁂𑀳𑀺 𑀓𑀸𑀭𑀺𑀢𑀁 𑀲𑁂𑀦𑀸𑀲𑀦𑀁 𑀑𑀯𑀲𑁆𑀲𑀢𑀺, 𑀦 𑀲𑀓𑁆𑀓𑀸 𑀢𑀢𑁆𑀣 𑀯𑀲𑀺𑀢𑀼’’𑀦𑁆𑀢𑀺 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀫𑀦𑀼𑀲𑁆𑀲𑀸 𑀲𑀓𑁆𑀓𑁄𑀦𑁆𑀢𑀸 𑀓𑀭𑀺𑀲𑁆𑀲𑀦𑁆𑀢𑀺, 𑀅𑀲𑀓𑁆𑀓𑁄𑀦𑁆𑀢𑀸 ‘‘𑀢𑀼𑀫𑁆𑀳𑁂 𑀯𑀟𑁆𑀠𑀓𑀻 𑀕𑀳𑁂𑀢𑁆𑀯𑀸 𑀓𑀸𑀭𑀸𑀧𑁂𑀣, 𑀫𑀬𑀁 𑀢𑁂 𑀲𑀜𑁆𑀜𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀯𑀓𑁆𑀔𑀦𑁆𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀓𑀸𑀭𑁂𑀢𑁆𑀯𑀸 𑀢𑁂𑀲𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁, 𑀫𑀦𑀼𑀲𑁆𑀲𑀸 𑀯𑀟𑁆𑀠𑀓𑀻𑀦𑀁 𑀤𑀸𑀢𑀩𑁆𑀩𑀁 𑀤𑀲𑁆𑀲𑀦𑁆𑀢𑀺. 𑀲𑀘𑁂 𑀆𑀯𑀸𑀲𑀲𑀸𑀫𑀺𑀓𑀸 𑀦𑀢𑁆𑀣𑀺, 𑀅𑀜𑁆𑀜𑁂𑀲𑀫𑁆𑀧𑀺 𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑁂𑀦 𑀆𑀭𑁄𑀘𑁂𑀢𑁆𑀯𑀸 𑀓𑀸𑀭𑁂𑀢𑀼𑀁 𑀯𑀝𑁆𑀝𑀢𑀺. 𑀇𑀫𑀁 𑀲𑀦𑁆𑀥𑀸𑀬 ‘‘𑀧𑀭𑀺𑀬𑁂𑀲𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁.

𑀤𑀸𑀭𑀽𑀢𑀺 𑀲𑁂𑀦𑀸𑀲𑀦𑁂 𑀕𑁄𑀧𑀸𑀦𑀲𑀺𑀆𑀤𑀻𑀲𑀼 𑀧𑀮𑀼𑀚𑁆𑀚𑀫𑀸𑀦𑁂𑀲𑀼 𑀢𑀤𑀢𑁆𑀣𑀸𑀬 𑀤𑀸𑀭𑀼 𑀧𑀭𑀺𑀬𑁂𑀲𑀺𑀢𑀩𑁆𑀩𑀁. 𑀲𑀓𑀝𑀦𑁆𑀢𑀺 𑀕𑀺𑀳𑀺𑀯𑀺𑀓𑀝𑀁 𑀯𑀸 𑀢𑀸𑀯𑀓𑀸𑀮𑀺𑀓𑀁 𑀯𑀸 𑀓𑀢𑁆𑀯𑀸 𑀲𑀓𑀝𑀁 𑀧𑀭𑀺𑀬𑁂𑀲𑀺𑀢𑀩𑁆𑀩𑀁. 𑀦 𑀓𑁂𑀯𑀮𑀜𑁆𑀘 𑀲𑀓𑀝𑀫𑁂𑀯, 𑀅𑀜𑁆𑀜𑀫𑁆𑀧𑀺 𑀯𑀸𑀲𑀺𑀨𑀭𑀲𑀼𑀓𑀼𑀤𑀸𑀮𑀸𑀤𑀺𑀉𑀧𑀓𑀭𑀡𑀁 𑀏𑀯𑀁 𑀧𑀭𑀺𑀬𑁂𑀲𑀺𑀢𑀼𑀁 𑀯𑀝𑁆𑀝𑀢𑀺. 𑀧𑀼𑀭𑀺𑀲𑁄𑀢𑀺 𑀳𑀢𑁆𑀣𑀓𑀫𑁆𑀫𑀯𑀲𑁂𑀦 𑀧𑀼𑀭𑀺𑀲𑁄 𑀧𑀭𑀺𑀬𑁂𑀲𑀺𑀢𑀩𑁆𑀩𑁄. 𑀬𑀁 𑀓𑀜𑁆𑀘𑀺 𑀳𑀺 𑀧𑀼𑀭𑀺𑀲𑀁 ‘‘𑀳𑀢𑁆𑀣𑀓𑀫𑁆𑀫𑀁 𑀆𑀯𑀼𑀲𑁄 𑀤𑀲𑁆𑀲𑀲𑀻’’𑀢𑀺 𑀯𑀢𑁆𑀯𑀸 ‘‘𑀤𑀲𑁆𑀲𑀸𑀫𑀺 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀇𑀫𑀲𑁆𑀫𑀺𑀁 𑀇𑀤𑀜𑁆𑀘𑀺𑀤𑀜𑁆𑀘 𑀓𑀭𑁄𑀳𑀻’’𑀢𑀺 𑀬𑀁 𑀇𑀘𑁆𑀙𑀢𑀺, 𑀢𑀁 𑀓𑀸𑀭𑁂𑀢𑀼𑀁 𑀯𑀝𑁆𑀝𑀢𑀺. 𑀦 𑀢𑁆𑀯𑁂𑀯𑀸𑀳𑀁 𑀕𑀸𑀫𑀡𑀺 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦𑀸𑀢𑀺 𑀚𑀸𑀢𑀭𑀽𑀧𑀭𑀚𑀢𑀁 𑀧𑀦𑀸𑀳𑀁 𑀓𑁂𑀦𑀘𑀺𑀧𑀺 𑀓𑀸𑀭𑀡𑁂𑀦 𑀧𑀭𑀺𑀬𑁂𑀲𑀺𑀢𑀩𑁆𑀩𑀦𑁆𑀢𑀺 𑀦 𑀯𑀤𑀸𑀫𑀺.

𑁪𑁪𑁯. 𑀧𑀸𑀧𑀓𑀁 𑀓𑀢𑀦𑁆𑀢𑀺 𑀅𑀲𑀼𑀦𑁆𑀤𑀭𑀁 𑀓𑀢𑀁.

𑁪𑁫𑁦. 𑀅𑀳𑁄𑀕𑀗𑁆𑀕𑁄𑀢𑀺 𑀢𑀲𑁆𑀲 𑀧𑀩𑁆𑀩𑀢𑀲𑁆𑀲 𑀦𑀸𑀫𑀁.

𑁪𑁫𑁧. 𑀧𑀝𑀺𑀓𑀘𑁆𑀘𑁂𑀯 𑀕𑀘𑁆𑀙𑁂𑀬𑁆𑀬𑀦𑁆𑀢𑀺 𑀬𑀢𑁆𑀣 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀼𑀁 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀢𑀢𑁆𑀣 𑀧𑀞𑀫𑀫𑁂𑀯 𑀕𑀘𑁆𑀙𑁂𑀬𑁆𑀬𑀁. 𑀲𑀫𑁆𑀪𑀸𑀯𑁂𑀲𑀼𑀦𑁆𑀢𑀺 𑀧𑀸𑀧𑀼𑀡𑀺𑀁𑀲𑀼.

𑁪𑁫𑁨. 𑀅𑀮𑁄𑀡𑀓𑀁 𑀪𑀯𑀺𑀲𑁆𑀲𑀢𑀻𑀢𑀺 𑀅𑀮𑁄𑀡𑀓𑀁 𑀪𑀢𑁆𑀢𑀁 𑀯𑀸 𑀩𑁆𑀬𑀜𑁆𑀚𑀦𑀁 𑀯𑀸 𑀪𑀯𑀺𑀲𑁆𑀲𑀢𑀺. 𑀆𑀲𑀼𑀢𑀸𑀢𑀺 𑀲𑀩𑁆𑀩𑀲𑀫𑁆𑀪𑀸𑀭𑀲𑀚𑁆𑀚𑀺𑀢𑀸. ‘‘𑀅𑀲𑀼𑀢𑁆𑀢𑀸’’𑀢𑀺 𑀯𑀸 𑀧𑀸𑀞𑁄.

𑁪𑁫𑁩. 𑀉𑀚𑁆𑀚𑀯𑀺𑀁𑀲𑀽𑀢𑀺 𑀦𑀸𑀯𑀁 𑀆𑀭𑀼𑀬𑁆𑀳 𑀧𑀝𑀺𑀲𑁄𑀢𑁂𑀦 𑀕𑀘𑁆𑀙𑀺𑀁𑀲𑀼. 𑀧𑀸𑀘𑀻𑀦𑀓𑀸𑀢𑀺 𑀧𑀸𑀘𑀻𑀦𑀤𑁂𑀲𑀯𑀸𑀲𑀺𑀦𑁄.

𑁪𑁫𑁪. 𑀦𑀦𑀼 𑀢𑁆𑀯𑀁 𑀆𑀯𑀼𑀲𑁄 𑀯𑀼𑀟𑁆𑀠𑁄 𑀯𑀻𑀲𑀢𑀺𑀯𑀲𑁆𑀲𑁄𑀲𑀻𑀢𑀺 𑀦𑀦𑀼 𑀢𑁆𑀯𑀁 𑀆𑀯𑀼𑀲𑁄 𑀯𑀻𑀲𑀢𑀺𑀯𑀲𑁆𑀲𑁄, 𑀦 𑀦𑀺𑀲𑁆𑀲𑀬𑀧𑀝𑀺𑀩𑀤𑁆𑀥𑁄, 𑀓𑀲𑁆𑀫𑀸 𑀢𑀁 𑀣𑁂𑀭𑁄 𑀧𑀡𑀸𑀫𑁂𑀢𑀻𑀢𑀺 𑀤𑀻𑀧𑁂𑀦𑁆𑀢𑀺. 𑀕𑀭𑀼𑀦𑀺𑀲𑁆𑀲𑀬𑀁 𑀕𑀡𑁆𑀳𑀸𑀫𑀸𑀢𑀺 𑀓𑀺𑀜𑁆𑀘𑀸𑀧𑀺 𑀫𑀬𑀁 𑀫𑀳𑀮𑁆𑀮𑀓𑀸, 𑀏𑀢𑀁 𑀧𑀦 𑀣𑁂𑀭𑀁 𑀕𑀭𑀼𑀁 𑀓𑀢𑁆𑀯𑀸 𑀯𑀲𑀺𑀲𑁆𑀲𑀸𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁪𑁫𑁫. 𑀫𑁂𑀢𑁆𑀢𑀸𑀬 𑀭𑀽𑀧𑀸𑀯𑀘𑀭𑀲𑀫𑀸𑀥𑀺𑀫𑀢𑁆𑀢𑀪𑀸𑀯𑀢𑁄 ‘‘𑀓𑀼𑀮𑁆𑀮𑀓𑀯𑀺𑀳𑀸𑀭𑁂𑀦𑀸’’𑀢𑀺 𑀯𑀼𑀢𑁆𑀢𑀁, 𑀔𑀼𑀤𑁆𑀤𑀓𑁂𑀦 𑀯𑀺𑀳𑀸𑀭𑁂𑀦𑀸𑀢𑀺 𑀅𑀢𑁆𑀣𑁄, 𑀔𑀼𑀤𑁆𑀤𑀓𑀢𑀸 𑀘𑀲𑁆𑀲 𑀅𑀕𑀫𑁆𑀪𑀻𑀭𑀪𑀸𑀯𑀢𑁄𑀢𑀺 𑀆𑀳 ‘‘𑀉𑀢𑁆𑀢𑀸𑀦𑀯𑀺𑀳𑀸𑀭𑁂𑀦𑀸’’𑀢𑀺. 𑀲𑀼𑀜𑁆𑀜𑀢𑀸𑀯𑀺𑀳𑀸𑀭𑁂𑀦𑀸𑀢𑀺 𑀲𑀼𑀜𑁆𑀜𑀢𑀸𑀫𑀼𑀔𑁂𑀦 𑀅𑀥𑀺𑀕𑀢𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁪𑁫𑁭. 𑀲𑀼𑀢𑁆𑀢𑀯𑀺𑀪𑀗𑁆𑀕𑁂𑀢𑀺 𑀧𑀤𑀪𑀸𑀚𑀦𑀻𑀬𑁂. 𑀢𑁂𑀦 𑀲𑀤𑁆𑀥𑀺𑀦𑁆𑀢𑀺 𑀧𑀼𑀭𑁂𑀧𑀝𑀺𑀕𑁆𑀕𑀳𑀺𑀢𑀮𑁄𑀡𑁂𑀦 𑀲𑀤𑁆𑀥𑀺𑀁. 𑀦 𑀳𑀺 𑀏𑀢𑁆𑀣 𑀬𑀸𑀯𑀚𑀻𑀯𑀺𑀓𑀁 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑀦𑁆𑀢𑀺 ‘‘𑀓𑀧𑁆𑀧𑀢𑀺 𑀲𑀺𑀗𑁆𑀕𑀺𑀮𑁄𑀡𑀓𑀧𑁆𑀧𑁄’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀲𑀺𑀗𑁆𑀕𑀺𑀮𑁄𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀜𑁆𑀳𑀺 𑀧𑀼𑀭𑁂 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀲𑀺𑀗𑁆𑀕𑁂𑀦 𑀧𑀭𑀺𑀳𑀝𑀁 𑀦 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑀁. 𑀬𑀸𑀯𑀓𑀸𑀮𑀺𑀓𑀫𑁂𑀯 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑀦𑁆𑀢𑀺 𑀲𑀺𑀗𑁆𑀕𑀺𑀮𑁄𑀡𑁂𑀦 𑀫𑀺𑀲𑁆𑀲𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀩𑁆𑀩𑀁 𑀅𑀮𑁄𑀡𑀸𑀫𑀺𑀲𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀉𑀧𑁄𑀲𑀣𑀲𑀁𑀬𑀼𑀢𑁆𑀢𑁂𑀢𑀺 𑀉𑀧𑁄𑀲𑀣𑀧𑀝𑀺𑀲𑀁𑀬𑀼𑀢𑁆𑀢𑁂, 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀢𑀺𑀲𑀭𑀡𑀁 𑀅𑀢𑀺𑀲𑀸𑀭𑁄, 𑀅𑀢𑀺𑀓𑁆𑀓𑀫𑁄. 𑀯𑀺𑀦𑀬𑀲𑁆𑀲 𑀅𑀢𑀺𑀲𑀸𑀭𑁄 𑀯𑀺𑀦𑀬𑀸𑀢𑀺𑀲𑀸𑀭𑁄. 𑀢𑀁 𑀧𑀫𑀸𑀡𑀁 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀤𑀲𑀸𑀬 𑀲𑀤𑁆𑀥𑀺𑀁 𑀦𑀺𑀲𑀻𑀤𑀦𑁂 𑀬𑀁 𑀧𑀫𑀸𑀡𑀁 𑀯𑀼𑀢𑁆𑀢𑀁, 𑀤𑀲𑀸𑀬 𑀯𑀺𑀦𑀸 𑀢𑀁 𑀧𑀫𑀸𑀡𑀁 𑀓𑀭𑁄𑀦𑁆𑀢𑀲𑁆𑀲. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀲𑀢𑁆𑀢𑀲𑀢𑀺𑀓𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑁆𑀯𑀺𑀯𑀕𑁆𑀕𑀲𑀗𑁆𑀕𑀳𑀸𑀢𑀺 𑀘𑀽𑀴𑀯𑀕𑁆𑀕𑀫𑀳𑀸𑀯𑀕𑁆𑀕𑀲𑀗𑁆𑀔𑀸𑀢𑁂𑀳𑀺 𑀤𑁆𑀯𑀻𑀳𑀺 𑀯𑀕𑁆𑀕𑁂𑀳𑀺 𑀲𑀗𑁆𑀕𑀳𑀺𑀢𑀸. 𑀤𑁆𑀯𑀸𑀯𑀻𑀲𑀢𑀺𑀧𑀪𑁂𑀤𑀦𑀸𑀢𑀺 𑀫𑀳𑀸𑀯𑀕𑁆𑀕𑁂 𑀤𑀲, 𑀘𑀽𑀴𑀯𑀕𑁆𑀕𑁂 𑀤𑁆𑀯𑀸𑀤𑀲𑀸𑀢𑀺 𑀏𑀯𑀁 𑀤𑁆𑀯𑀸𑀯𑀻𑀲𑀢𑀺𑀧𑁆𑀧𑀪𑁂𑀤𑀸. 𑀲𑀸𑀲𑀦𑁂𑀢𑀺 𑀲𑀢𑁆𑀣𑀼𑀲𑀸𑀲𑀦𑁂. 𑀬𑁂 𑀔𑀦𑁆𑀥𑀓𑀸 𑀯𑀼𑀢𑁆𑀢𑀸𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀇𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀝𑁆𑀞𑀓𑀣𑀸𑀬 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁

𑀘𑀽𑀴𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀧𑀭𑀺𑀯𑀸𑀭-𑀝𑀻𑀓𑀸

𑀲𑁄𑀴𑀲𑀫𑀳𑀸𑀯𑀸𑀭𑁄

𑀧𑀜𑁆𑀜𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸

𑀯𑀺𑀲𑀼𑀤𑁆𑀥𑀧𑀭𑀺𑀯𑀸𑀭𑀲𑁆𑀲𑀸𑀢𑀺 𑀲𑀩𑁆𑀩𑀲𑁄 𑀧𑀭𑀺𑀲𑀼𑀤𑁆𑀥𑀔𑀻𑀡𑀸𑀲𑀯𑀧𑀭𑀺𑀯𑀸𑀭𑀲𑁆𑀲. 𑀥𑀫𑁆𑀫𑀓𑁆𑀔𑀦𑁆𑀥𑀲𑀭𑀻𑀭𑀲𑁆𑀲𑀸𑀢𑀺 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀲𑀗𑁆𑀔𑀸𑀢𑀥𑀫𑁆𑀫𑀓𑁆𑀔𑀦𑁆𑀥𑀲𑀭𑀻𑀭𑀲𑁆𑀲 𑀲𑀸𑀲𑀦𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲𑀸𑀢𑀺 ‘‘𑀧𑀭𑀺𑀯𑀸𑀭𑁄’’𑀢𑀺 𑀬𑁄 𑀲𑀗𑁆𑀕𑀳𑀁 𑀆𑀭𑀼𑀴𑁆𑀳𑁄, 𑀢𑀲𑁆𑀲. 𑀧𑀼𑀩𑁆𑀩𑀸𑀕𑀢𑀁 𑀦𑀬𑀦𑁆𑀢𑀺 𑀧𑀼𑀩𑁆𑀩𑁂 𑀆𑀕𑀢𑀁 𑀯𑀺𑀦𑀺𑀘𑁆𑀙𑀬𑀁.

𑁧. 𑀧𑀓𑀢𑀢𑁆𑀣𑀧𑀝𑀺𑀦𑀺𑀤𑁆𑀤𑁂𑀲𑁄 𑀢-𑀲𑀤𑁆𑀤𑁄𑀢𑀺 𑀢𑀲𑁆𑀲 ‘‘𑀪𑀕𑀯𑀢𑀸’’𑀢𑀺𑀆𑀤𑀻𑀳𑀺 𑀧𑀤𑁂𑀳𑀺 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑁂𑀦 𑀯𑀼𑀢𑁆𑀢𑀢𑁆𑀣𑀲𑁆𑀲 𑀬𑀸𑀬 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸 𑀪𑀕𑀯𑀸 𑀧𑀓𑀢𑁄 𑀅𑀥𑀺𑀓𑀢𑁄 𑀲𑀼𑀧𑀸𑀓𑀝𑁄 𑀘, 𑀢𑀁 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀁 𑀲𑀤𑁆𑀥𑀺𑀁 𑀬𑀸𑀘𑀦𑀸𑀬 𑀅𑀢𑁆𑀣𑀪𑀸𑀯𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁄 𑀲𑁄…𑀧𑁂… 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀁 𑀧𑀜𑁆𑀜𑀧𑁂𑀲𑀻’’𑀢𑀺 𑀆𑀳. 𑀢𑀢𑁆𑀣 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀦𑁆𑀢𑀺 𑀯𑀺𑀦𑀬𑀪𑀽𑀢𑀁 𑀧𑀜𑁆𑀜𑀢𑁆𑀢𑀺𑀁.

‘‘𑀚𑀸𑀦𑀢𑀸 𑀧𑀲𑁆𑀲𑀢𑀸’’𑀢𑀺 𑀇𑀫𑁂𑀲𑀁 𑀧𑀤𑀸𑀦𑀁 𑀯𑀺𑀦𑀬𑀲𑁆𑀲 𑀅𑀥𑀺𑀓𑀢𑀢𑁆𑀢𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀢𑀸𑀯 𑀅𑀢𑁆𑀣𑀁 𑀬𑁄𑀚𑁂𑀢𑁆𑀯𑀸 𑀇𑀤𑀸𑀦𑀺 𑀲𑀼𑀢𑁆𑀢𑀦𑁆𑀢𑀦𑀬𑁂𑀦 𑀤𑀲𑁆𑀲𑁂𑀦𑁆𑀢𑁄 𑀲𑀢𑀺𑀧𑀺 𑀜𑀸𑀡𑀤𑀲𑁆𑀲𑀦-𑀲𑀤𑁆𑀤𑀸𑀦𑀁 𑀧𑀜𑁆𑀜𑀸𑀯𑁂𑀯𑀘𑀦𑀪𑀸𑀯𑁂 𑀢𑁂𑀦 𑀢𑁂𑀦 𑀯𑀺𑀲𑁂𑀲𑁂𑀦 𑀢𑁂𑀲𑀁 𑀯𑀺𑀲𑀬𑀯𑀺𑀲𑁂𑀲𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀯𑀺𑀚𑁆𑀚𑀢𑁆𑀢𑀬𑀯𑀲𑁂𑀦 𑀅𑀪𑀺𑀜𑁆𑀜𑀸𑀦𑀸𑀯𑀭𑀡𑀜𑀸𑀡𑀯𑀲𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑀁𑀲𑀘𑀓𑁆𑀔𑀼𑀯𑀲𑁂𑀦 𑀧𑀝𑀺𑀯𑁂𑀥𑀤𑁂𑀲𑀦𑀸𑀜𑀸𑀡𑀯𑀲𑁂𑀦 𑀘 𑀅𑀢𑁆𑀣𑀁 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀤𑀻𑀳𑀻𑀢𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀲𑀯𑀓𑁆𑀔𑀬𑀜𑀸𑀡𑁂𑀳𑀺. 𑀧𑀝𑀺𑀯𑁂𑀥𑀧𑀜𑁆𑀜𑀸𑀬𑀸𑀢𑀺 𑀅𑀭𑀺𑀬𑀫𑀕𑁆𑀕𑀧𑀜𑁆𑀜𑀸𑀬. 𑀤𑁂𑀲𑀦𑀸𑀧𑀜𑁆𑀜𑀸𑀬 𑀧𑀲𑁆𑀲𑀢𑀸𑀢𑀺 𑀤𑁂𑀲𑁂𑀢𑀩𑁆𑀩𑀥𑀫𑁆𑀫𑀸𑀦𑀁 𑀤𑁂𑀲𑁂𑀢𑀩𑁆𑀩𑀧𑁆𑀧𑀓𑀸𑀭𑀁 𑀩𑁄𑀥𑀦𑁂𑀬𑁆𑀬𑀧𑀼𑀕𑁆𑀕𑀮𑀸𑀦𑀜𑁆𑀘 𑀆𑀲𑀬𑀸𑀦𑀼𑀲𑀬𑀘𑀭𑀺𑀢𑀸𑀥𑀺𑀫𑀼𑀢𑁆𑀢𑀺𑀆𑀤𑀺𑀪𑁂𑀤𑀁 𑀥𑀫𑁆𑀫𑀁 𑀤𑁂𑀲𑀦𑀸𑀧𑀜𑁆𑀜𑀸𑀬 𑀬𑀸𑀣𑀸𑀯𑀢𑁄 𑀧𑀲𑁆𑀲𑀢𑀸. 𑀅𑀭𑀳𑀢𑀸𑀢𑀺 𑀅𑀭𑀻𑀦𑀁, 𑀅𑀭𑀸𑀦𑀜𑁆𑀘 𑀳𑀢𑀢𑁆𑀢𑀸, 𑀧𑀘𑁆𑀘𑀬𑀸𑀤𑀻𑀦𑀜𑁆𑀘 𑀅𑀭𑀳𑀢𑁆𑀢𑀸 𑀅𑀭𑀳𑀢𑀸. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦𑀸𑀢𑀺 𑀲𑀫𑁆𑀫𑀸 𑀲𑀸𑀫𑀜𑁆𑀘 𑀲𑀘𑁆𑀘𑀸𑀦𑀁 𑀩𑀼𑀤𑁆𑀥𑀢𑁆𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦. 𑀅𑀣 𑀯𑀸 𑀅𑀦𑁆𑀢𑀭𑀸𑀬𑀺𑀓𑀥𑀫𑁆𑀫𑁂 𑀚𑀸𑀦𑀢𑀸, 𑀦𑀺𑀬𑁆𑀬𑀸𑀦𑀺𑀓𑀥𑀫𑁆𑀫𑁂 𑀧𑀲𑁆𑀲𑀢𑀸, 𑀓𑀺𑀮𑁂𑀲𑀸𑀭𑀻𑀦𑀁 𑀳𑀢𑀢𑁆𑀢𑀸 𑀅𑀭𑀳𑀢𑀸, 𑀲𑀫𑁆𑀫𑀸 𑀲𑀸𑀫𑀁 𑀲𑀩𑁆𑀩𑀥𑀫𑁆𑀫𑀸𑀦𑀁 𑀩𑀼𑀤𑁆𑀥𑀢𑁆𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦𑀸𑀢𑀺 𑀏𑀯𑀁 𑀘𑀢𑀼𑀯𑁂𑀲𑀸𑀭𑀚𑁆𑀚𑀯𑀲𑁂𑀦𑀧𑁂𑀢𑁆𑀣 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀅𑀧𑀺𑀘 𑀞𑀸𑀦𑀸𑀝𑁆𑀞𑀸𑀦𑀸𑀤𑀺𑀯𑀺𑀪𑀸𑀕𑀁 𑀚𑀸𑀦𑀢𑀸, 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀲𑁆𑀲𑀢𑀸, 𑀲𑀯𑀸𑀲𑀦𑀆𑀲𑀯𑀸𑀦𑀁 𑀙𑀺𑀦𑁆𑀦𑀢𑁆𑀢𑀸 𑀅𑀭𑀳𑀢𑀸, 𑀅𑀪𑀺𑀜𑁆𑀜𑁂𑀬𑁆𑀬𑀸𑀤𑀺𑀪𑁂𑀤𑁂 𑀥𑀫𑁆𑀫𑁂 𑀅𑀪𑀺𑀜𑁆𑀜𑁂𑀬𑁆𑀬𑀸𑀤𑀺𑀢𑁄 𑀅𑀯𑀺𑀧𑀭𑀻𑀢𑀸𑀯𑀩𑁄𑀥𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦. 𑀅𑀣 𑀯𑀸 𑀢𑀻𑀲𑀼 𑀓𑀸𑀮𑁂𑀲𑀼 𑀅𑀧𑁆𑀧𑀝𑀺𑀳𑀢𑀜𑀸𑀡𑀢𑀸𑀬 𑀚𑀸𑀦𑀢𑀸, 𑀓𑀸𑀬𑀓𑀫𑁆𑀫𑀸𑀤𑀺𑀯𑀲𑁂𑀦 𑀢𑀺𑀡𑁆𑀡𑀫𑁆𑀧𑀺 𑀓𑀫𑁆𑀫𑀸𑀦𑀁 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺𑀢𑁄 𑀲𑀫𑁆𑀫𑀸 𑀓𑀸𑀭𑀺𑀢𑀸𑀬 𑀧𑀲𑁆𑀲𑀢𑀸, 𑀤𑀯𑀸𑀤𑀻𑀦𑀁 𑀅𑀪𑀸𑀯𑀲𑀸𑀥𑀺𑀓𑀸𑀬 𑀧𑀳𑀸𑀦𑀲𑀫𑁆𑀧𑀤𑀸𑀬 𑀅𑀭𑀳𑀢𑀸, 𑀙𑀦𑁆𑀤𑀸𑀤𑀻𑀦𑀁 𑀅𑀳𑀸𑀦𑀺𑀳𑁂𑀢𑀼𑀪𑀽𑀢𑀸𑀬 𑀅𑀓𑁆𑀔𑀬𑀧𑀝𑀺𑀪𑀸𑀦𑀲𑀸𑀥𑀺𑀓𑀸𑀬 𑀲𑀩𑁆𑀩𑀜𑁆𑀜𑀼𑀢𑀸𑀬 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦𑀸𑀢𑀺 𑀏𑀯𑀁 𑀤𑀲𑀩𑀮𑀅𑀝𑁆𑀞𑀸𑀭𑀲𑀸𑀯𑁂𑀡𑀺𑀓𑀩𑀼𑀤𑁆𑀥𑀥𑀫𑁆𑀫𑀯𑀲𑁂𑀦𑀧𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑁨. 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑁂𑀢𑀺 𑀧𑀼𑀘𑁆𑀙𑀸𑀬 𑀯𑀺𑀲𑁆𑀲𑀚𑁆𑀚𑀦𑁂. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑁂. 𑀫𑀚𑁆𑀛𑀺𑀫𑀤𑁂𑀲𑁂𑀬𑁂𑀯 𑀧𑀜𑁆𑀜𑀢𑁆𑀢𑀻𑀢𑀺 𑀢𑀲𑁆𑀫𑀺𑀁𑀬𑁂𑀯 𑀤𑁂𑀲𑁂 𑀬𑀣𑀸𑀯𑀼𑀢𑁆𑀢𑀯𑀢𑁆𑀣𑀼𑀯𑀻𑀢𑀺𑀓𑁆𑀓𑀫𑁂 𑀆𑀧𑀢𑁆𑀢𑀺𑀲𑀫𑁆𑀪𑀯𑀢𑁄. 𑀯𑀺𑀦𑀻𑀢𑀓𑀣𑀸𑀢𑀺 𑀯𑀺𑀦𑀻𑀢𑀯𑀢𑁆𑀣𑀼𑀓𑀣𑀸, 𑀅𑀬𑀫𑁂𑀯 𑀯𑀸 𑀧𑀸𑀞𑁄.

𑀓𑀸𑀬𑁂𑀦 𑀧𑀦 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀻𑀢𑀺 𑀧𑀼𑀩𑁆𑀩𑀪𑀸𑀕𑁂 𑀲𑁂𑀯𑀦𑀘𑀺𑀢𑁆𑀢𑀁 𑀅𑀗𑁆𑀕𑀁 𑀓𑀢𑁆𑀯𑀸 𑀓𑀸𑀬𑀤𑁆𑀯𑀸𑀭𑀲𑀗𑁆𑀔𑀸𑀢𑀯𑀺𑀜𑁆𑀜𑀢𑁆𑀢𑀺𑀁 𑀚𑀦𑀬𑀺𑀢𑁆𑀯𑀸 𑀧𑀯𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑀗𑁆𑀔𑀸𑀢𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀓𑀺𑀜𑁆𑀘𑀸𑀧𑀺 𑀳𑀺 𑀘𑀺𑀢𑁆𑀢𑁂𑀦 𑀲𑀫𑀼𑀝𑁆𑀞𑀸𑀧𑀺𑀢𑀸 𑀯𑀺𑀜𑁆𑀜𑀢𑁆𑀢𑀺, 𑀢𑀣𑀸𑀧𑀺 𑀘𑀺𑀢𑁆𑀢𑁂𑀦 𑀅𑀥𑀺𑀧𑁆𑀧𑁂𑀢𑀲𑁆𑀲 𑀅𑀢𑁆𑀣𑀲𑁆𑀲 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀬𑀸 𑀲𑀸𑀥𑀺𑀢𑀢𑁆𑀢𑀸 ‘‘𑀓𑀸𑀬𑀤𑁆𑀯𑀸𑀭𑁂𑀦 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬𑀸𑀢𑀺 𑀆𑀧𑀦𑁆𑀦𑀸𑀬 𑀆𑀧𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺𑀪𑀸𑀯𑀸𑀧𑀸𑀤𑀦𑀲𑁆𑀲 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀲𑀗𑁆𑀔𑀸𑀢𑀫𑀢𑁆𑀣𑀁 𑀲𑀦𑁆𑀥𑀸𑀬, 𑀦 𑀪𑀡𑁆𑀟𑀦𑀸𑀤𑀺𑀯𑀽𑀧𑀲𑀫𑀁.

𑁩. 𑀧𑁄𑀭𑀸𑀡𑀓𑁂𑀳𑀺 𑀫𑀳𑀸𑀣𑁂𑀭𑁂𑀳𑀻𑀢𑀺 𑀲𑀻𑀳𑀴𑀤𑀻𑀧𑀯𑀸𑀲𑀻𑀳𑀺 𑀫𑀳𑀸𑀣𑁂𑀭𑁂𑀳𑀺. 𑀞𑀧𑀺𑀢𑀸𑀢𑀺 𑀧𑁄𑀢𑁆𑀣𑀓𑀲𑀗𑁆𑀕𑀳𑀸𑀭𑁄𑀳𑀦𑀓𑀸𑀮𑁂 𑀞𑀧𑀺𑀢𑀸. 𑀘𑀢𑀼𑀢𑁆𑀣𑀲𑀗𑁆𑀕𑀻𑀢𑀺𑀲𑀤𑀺𑀲𑀸 𑀳𑀺 𑀧𑁄𑀢𑁆𑀣𑀓𑀸𑀭𑁄𑀳𑀲𑀗𑁆𑀕𑀻𑀢𑀺. 𑀉𑀪𑀢𑁄𑀯𑀺𑀪𑀗𑁆𑀕𑁂 𑀤𑁆𑀯𑀢𑁆𑀢𑀺𑀁𑀲 𑀯𑀸𑀭𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀯.

𑀲𑀫𑀼𑀝𑁆𑀞𑀸𑀦𑀲𑀻𑀲𑀯𑀡𑁆𑀡𑀦𑀸

𑁨𑁫𑁭. 𑀲𑀫𑀼𑀝𑁆𑀞𑀸𑀦𑀓𑀣𑀸𑀬 𑀧𑀦 𑀓𑀭𑀼𑀡𑀸𑀲𑀻𑀢𑀮𑀪𑀸𑀯𑁂𑀦 𑀘𑀦𑁆𑀤𑀲𑀤𑀺𑀲𑀢𑁆𑀢𑀸 ‘‘𑀩𑀼𑀤𑁆𑀥𑀘𑀦𑁆𑀤𑁂’’𑀢𑀺 𑀯𑀼𑀢𑁆𑀢𑀁, 𑀓𑀺𑀮𑁂𑀲𑀢𑀺𑀫𑀺𑀭𑀧𑀳𑀸𑀦𑀢𑁄 ‘‘𑀩𑀼𑀤𑁆𑀥𑀸𑀤𑀺𑀘𑁆𑀘𑁂’’𑀢𑀺 𑀯𑀼𑀢𑁆𑀢𑀁. 𑀧𑀺𑀝𑀓𑁂 𑀢𑀻𑀡𑀺 𑀤𑁂𑀲𑀬𑀻𑀢𑀺 𑀬𑀲𑁆𑀫𑀸 𑀢𑁂 𑀤𑁂𑀲𑀬𑀦𑁆𑀢𑀺, 𑀢𑀲𑁆𑀫𑀸 𑀅𑀗𑁆𑀕𑀺𑀭𑀲𑁄𑀧𑀺 𑀧𑀺𑀝𑀓𑀸𑀦𑀺 𑀢𑀻𑀡𑀺 𑀤𑁂𑀲𑀬𑀺. 𑀢𑀸𑀦𑀺 𑀓𑀢𑀫𑀸𑀦𑀻𑀢𑀺 𑀆𑀳 ‘‘𑀲𑀼𑀢𑁆𑀢𑀦𑁆𑀢’’𑀦𑁆𑀢𑀺𑀆𑀤𑀺. 𑀫𑀳𑀸𑀕𑀼𑀡𑀦𑁆𑀢𑀺 𑀫𑀳𑀸𑀦𑀺𑀲𑀁𑀲𑀁. 𑀏𑀯𑀁 𑀦𑀻𑀬𑀢𑀺 𑀲𑀤𑁆𑀥𑀫𑁆𑀫𑁄, 𑀯𑀺𑀦𑀬𑁄 𑀬𑀤𑀺 𑀢𑀺𑀝𑁆𑀞𑀢𑀻𑀢𑀺 𑀬𑀤𑀺 𑀯𑀺𑀦𑀬𑀧𑀭𑀺𑀬𑀢𑁆𑀢𑀺 𑀅𑀦𑀦𑁆𑀢𑀭𑀳𑀺𑀢𑀸 𑀢𑀺𑀝𑁆𑀞𑀢𑀺 𑀧𑀯𑀢𑁆𑀢𑀢𑀺, 𑀏𑀯𑀁 𑀲𑀢𑀺 𑀧𑀝𑀺𑀧𑀢𑁆𑀢𑀺𑀧𑀝𑀺𑀯𑁂𑀥𑀲𑀤𑁆𑀥𑀫𑁆𑀫𑁄 𑀦𑀻𑀬𑀢𑀺 𑀧𑀯𑀢𑁆𑀢𑀢𑀺. 𑀯𑀺𑀦𑀬𑀧𑀭𑀺𑀬𑀢𑁆𑀢𑀺 𑀧𑀦 𑀓𑀣𑀁 𑀢𑀺𑀝𑁆𑀞𑀢𑀻𑀢𑀺 𑀆𑀳 ‘‘𑀉𑀪𑀢𑁄𑀘𑀸’’𑀢𑀺𑀆𑀤𑀺. 𑀧𑀭𑀺𑀯𑀸𑀭𑁂𑀦 𑀕𑀦𑁆𑀣𑀺𑀢𑀸 𑀢𑀺𑀝𑁆𑀞𑀦𑁆𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑀲𑁆𑀲𑁂𑀯 𑀧𑀭𑀺𑀯𑀸𑀭𑀲𑁆𑀲𑀸𑀢𑀺 𑀢𑀲𑁆𑀫𑀺𑀁𑀬𑁂𑀯 𑀧𑀭𑀺𑀯𑀸𑀭𑁂.

𑀦𑀺𑀬𑀢𑀓𑀢𑀦𑁆𑀢𑀺 𑀓𑀢𑀦𑀺𑀬𑀢𑀁, 𑀦𑀺𑀬𑀫𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀜𑁆𑀜𑁂𑀳𑀺 𑀲𑀤𑁆𑀥𑀺𑀦𑁆𑀢𑀺 𑀲𑁂𑀲𑀲𑀺𑀓𑁆𑀔𑀸𑀧𑀤𑁂𑀳𑀺 𑀲𑀤𑁆𑀥𑀺𑀁. 𑀅𑀲𑀫𑁆𑀪𑀺𑀦𑁆𑀦𑀲𑀫𑀼𑀝𑁆𑀞𑀸𑀦𑀸𑀦𑀻𑀢𑀺 𑀅𑀲𑀗𑁆𑀓𑀭𑀲𑀫𑀼𑀝𑁆𑀞𑀸𑀦𑀸𑀦𑀺.

𑀢𑀲𑁆𑀫𑀸 𑀲𑀺𑀓𑁆𑀔𑁂𑀢𑀺 𑀬𑀲𑁆𑀫𑀸 𑀯𑀺𑀦𑀬𑁂 𑀲𑀢𑀺 𑀲𑀤𑁆𑀥𑀫𑁆𑀫𑁄 𑀢𑀺𑀝𑁆𑀞𑀢𑀺, 𑀯𑀺𑀦𑀬𑁄 𑀘 𑀧𑀭𑀺𑀯𑀸𑀭𑁂𑀦 𑀕𑀦𑁆𑀣𑀺𑀢𑁄 𑀢𑀺𑀝𑁆𑀞𑀢𑀺, 𑀧𑀭𑀺𑀯𑀸𑀭𑁂 𑀘 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀤𑀺𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀲𑀺𑀓𑁆𑀔𑁂𑀬𑁆𑀬 𑀧𑀭𑀺𑀯𑀸𑀭𑀁, 𑀉𑀕𑁆𑀕𑀡𑁆𑀳𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀆𑀤𑀺𑀫𑁆𑀳𑀺 𑀢𑀸𑀯 𑀧𑀼𑀭𑀺𑀫𑀦𑀬𑁂𑀢𑀺 ‘‘𑀙𑀦𑁆𑀦𑀁 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀁 𑀓𑀢𑀺𑀳𑀺 𑀲𑀫𑀼𑀝𑁆𑀞𑀸𑀦𑁂𑀳𑀺 𑀲𑀫𑀼𑀝𑁆𑀞𑀸𑀢𑀻𑀢𑀺 𑀏𑀓𑁂𑀦 𑀲𑀫𑀼𑀝𑁆𑀞𑀸𑀦𑁂𑀦 𑀲𑀫𑀼𑀝𑁆𑀞𑀸𑀢𑀺, 𑀓𑀸𑀬𑀢𑁄 𑀘 𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀻’’𑀢𑀺𑀆𑀤𑀺𑀦𑀸 (𑀧𑀭𑀺. 𑁧𑁮𑁭) 𑀧𑀜𑁆𑀜𑀢𑁆𑀢𑀺𑀯𑀸𑀭𑁂 𑀲𑀓𑀺𑀁 𑀆𑀕𑀢𑀦𑀬𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁.

𑁨𑁫𑁮. 𑀦𑀸𑀦𑀼𑀩𑀦𑁆𑀥𑁂 𑀧𑀯𑀢𑁆𑀢𑀺𑀦𑀺𑀦𑁆𑀢𑀺 ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀯𑀼𑀝𑁆𑀞𑀸𑀧𑀺𑀢𑀁 𑀧𑀯𑀢𑁆𑀢𑀺𑀦𑀺𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀦𑀸𑀦𑀼𑀩𑀦𑁆𑀥𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁧𑁧𑁧𑁧) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀁.

𑁨𑁭𑁦. 𑀅𑀓𑀢𑀦𑁆𑀢𑀺 𑀅𑀜𑁆𑀜𑁂𑀳𑀺 𑀅𑀫𑀺𑀲𑁆𑀲𑀻𑀓𑀢𑀁, 𑀦𑀺𑀬𑀢𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀦𑁆𑀢𑀭𑀧𑁂𑀬𑁆𑀬𑀸𑀮𑀁

𑀓𑀢𑀺𑀧𑀼𑀘𑁆𑀙𑀸𑀯𑀸𑀭𑀯𑀡𑁆𑀡𑀦𑀸

𑁨𑁭𑁧. 𑀯𑁂𑀭𑀁 𑀫𑀡𑀢𑀻𑀢𑀺 𑀭𑀸𑀕𑀸𑀤𑀺𑀯𑁂𑀭𑀁 𑀫𑀡𑀢𑀺 𑀯𑀺𑀦𑀸𑀲𑁂𑀢𑀺. 𑀏𑀢𑀸𑀬𑀸𑀢𑀺 𑀯𑀺𑀭𑀢𑀺𑀬𑀸. 𑀦𑀺𑀬𑁆𑀬𑀸𑀦𑀦𑁆𑀢𑀺 𑀫𑀕𑁆𑀕𑀁. 𑀓𑀸𑀬𑀧𑀸𑀕𑀩𑁆𑀩𑀺𑀬𑀦𑁆𑀢𑀺 𑀓𑀸𑀬𑀧𑀸𑀕𑀩𑁆𑀩𑀺𑀬𑀯𑀲𑁂𑀦 𑀧𑀯𑀢𑁆𑀢𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀁.

𑁨𑁭𑁪. 𑀲𑀸𑀭𑀡𑀻𑀬𑀸𑀢𑀺 𑀲𑀭𑀺𑀢𑀩𑁆𑀩𑀬𑀼𑀢𑁆𑀢𑀸 𑀅𑀦𑀼𑀲𑁆𑀲𑀭𑀡𑀸𑀭𑀳𑀸 𑀅𑀤𑁆𑀥𑀸𑀦𑁂 𑀅𑀢𑀺𑀓𑁆𑀓𑀦𑁆𑀢𑁂𑀧𑀺 𑀦 𑀲𑀫𑁆𑀫𑀼𑀲𑁆𑀲𑀺𑀢𑀩𑁆𑀩𑀸. 𑀫𑀺𑀚𑁆𑀚𑀢𑀺 𑀲𑀺𑀦𑀺𑀬𑁆𑀳𑀢𑀺 𑀏𑀢𑀸𑀬𑀸𑀢𑀺 𑀫𑁂𑀢𑁆𑀢𑀸, 𑀫𑀺𑀢𑁆𑀢𑀪𑀸𑀯𑁄. 𑀫𑁂𑀢𑁆𑀢𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁, 𑀢𑀁 𑀧𑀦 𑀬𑀲𑁆𑀫𑀸 𑀫𑁂𑀢𑁆𑀢𑀸𑀲𑀳𑀕𑀢𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀫𑁂𑀢𑁆𑀢𑀘𑀺𑀢𑁆𑀢𑁂𑀦 𑀓𑀢𑀁 𑀓𑀸𑀬𑀓𑀫𑁆𑀫’’𑀦𑁆𑀢𑀺. 𑀆𑀯𑀻𑀢𑀺 𑀧𑀓𑀸𑀲𑀁. 𑀧𑀓𑀸𑀲𑀪𑀸𑀯𑁄 𑀘𑁂𑀢𑁆𑀣 𑀬𑀁 𑀉𑀤𑁆𑀤𑀺𑀲𑁆𑀲 𑀢𑀁 𑀓𑀸𑀬𑀓𑀫𑁆𑀫𑀁 𑀓𑀭𑀻𑀬𑀢𑀺, 𑀢𑀲𑁆𑀲 𑀲𑀫𑁆𑀫𑀼𑀔𑀪𑀸𑀯𑀢𑁄𑀢𑀺 𑀆𑀳 ‘‘𑀲𑀫𑁆𑀫𑀼𑀔𑀸’’𑀢𑀺. 𑀭𑀳𑁄𑀢𑀺 𑀅𑀧𑀓𑀸𑀲𑀁. 𑀅𑀧𑀓𑀸𑀲𑀢𑀸 𑀘 𑀬𑀁 𑀉𑀤𑁆𑀤𑀺𑀲𑁆𑀲 𑀢𑀁 𑀓𑀫𑁆𑀫𑀁 𑀓𑀭𑀻𑀬𑀢𑀺, 𑀢𑀲𑁆𑀲 𑀅𑀧𑀘𑁆𑀘𑀓𑁆𑀔𑀪𑀸𑀯𑀢𑁄𑀢𑀺 𑀆𑀳 ‘‘𑀧𑀭𑀫𑁆𑀫𑀼𑀔𑀸’’𑀢𑀺. 𑀉𑀪𑀬𑁂𑀳𑀻𑀢𑀺 𑀦𑀯𑀓𑁂𑀳𑀺 𑀣𑁂𑀭𑁂𑀳𑀺 𑀘. 𑀧𑀺𑀬𑀁 𑀧𑀺𑀬𑀸𑀬𑀺𑀢𑀩𑁆𑀩𑀁 𑀓𑀭𑁄𑀢𑀻𑀢𑀺 𑀧𑀺𑀬𑀓𑀭𑀡𑁄. 𑀕𑀭𑀼𑀁 𑀕𑀭𑀼𑀝𑁆𑀞𑀸𑀦𑀺𑀬𑀁 𑀓𑀭𑁄𑀢𑀻𑀢𑀺 𑀕𑀭𑀼𑀓𑀭𑀡𑁄. 𑀲𑀗𑁆𑀕𑀳𑀸𑀬𑀸𑀢𑀺 𑀲𑀗𑁆𑀕𑀳𑀯𑀢𑁆𑀣𑀼𑀯𑀺𑀲𑁂𑀲𑀪𑀸𑀯𑀢𑁄 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀲𑀗𑁆𑀕𑀳𑀡𑀢𑁆𑀣𑀸𑀬. 𑀅𑀯𑀺𑀯𑀸𑀤𑀸𑀬𑀸𑀢𑀺 𑀲𑀗𑁆𑀕𑀳𑀯𑀢𑁆𑀣𑀼𑀪𑀸𑀯𑀢𑁄 𑀏𑀯 𑀦 𑀯𑀺𑀯𑀸𑀤𑀸𑀬. 𑀲𑀢𑀺 𑀘 𑀅𑀯𑀺𑀯𑀸𑀤𑀳𑁂𑀢𑀼𑀪𑀽𑀢𑀲𑀗𑁆𑀕𑀳𑀓𑀢𑁆𑀢𑁂 𑀢𑁂𑀲𑀁 𑀯𑀲𑁂𑀦 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀲𑀫𑀕𑁆𑀕𑀪𑀸𑀯𑁄 𑀪𑁂𑀤𑀸𑀪𑀸𑀯𑁄 𑀲𑀺𑀤𑁆𑀥𑁄𑀬𑁂𑀯𑀸𑀢𑀺 𑀆𑀳 ‘‘𑀲𑀫𑀕𑁆𑀕𑀪𑀸𑀯𑀸𑀬𑀸’’𑀢𑀺𑀆𑀤𑀺.

𑀧𑀕𑁆𑀕𑀬𑁆𑀳 𑀯𑀘𑀦𑀦𑁆𑀢𑀺 𑀓𑁂𑀯𑀮𑀁 ‘‘𑀤𑁂𑀯𑁄’’𑀢𑀺 𑀅𑀯𑀢𑁆𑀯𑀸 ‘‘𑀤𑁂𑀯𑀢𑁆𑀣𑁂𑀭𑁄’’𑀢𑀺 𑀕𑀼𑀡𑁂𑀳𑀺 𑀣𑀺𑀭𑀪𑀸𑀯𑀚𑁄𑀢𑀦𑀁 𑀧𑀕𑁆𑀕𑀡𑁆𑀳𑀺𑀢𑁆𑀯𑀸 𑀉𑀘𑁆𑀘𑀁 𑀓𑀢𑁆𑀯𑀸 𑀯𑀘𑀦𑀁. 𑀫𑀫𑀢𑁆𑀢𑀩𑁄𑀥𑀦𑀯𑀘𑀦𑀁 𑀫𑀫𑀸𑀬𑀦𑀯𑀘𑀦𑀁. 𑀏𑀓𑀦𑁆𑀢𑀢𑀺𑀭𑁄𑀓𑁆𑀔𑀲𑁆𑀲 𑀫𑀦𑁄𑀓𑀫𑁆𑀫𑀲𑁆𑀲 𑀲𑀫𑁆𑀫𑀼𑀔𑀢𑀸 𑀦𑀸𑀫 𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀦𑀯𑀲𑁂𑀦𑁂𑀯 𑀳𑁄𑀢𑀺, 𑀢𑀜𑁆𑀘 𑀔𑁄 𑀮𑁄𑀓𑁂 𑀓𑀸𑀬𑀓𑀫𑁆𑀫𑀦𑁆𑀢𑀺 𑀧𑀸𑀓𑀝𑀁 𑀧𑀜𑁆𑀜𑀸𑀢𑀁 𑀳𑀢𑁆𑀣𑀯𑀺𑀓𑀸𑀭𑀸𑀤𑀺𑀁 𑀅𑀦𑀸𑀫𑀲𑀺𑀢𑁆𑀯𑀸𑀬𑁂𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀬𑀦𑀸𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳. 𑀓𑀸𑀫𑀜𑁆𑀘𑁂𑀢𑁆𑀣 𑀫𑁂𑀢𑁆𑀢𑀸𑀲𑀺𑀦𑁂𑀳𑀲𑀺𑀦𑀺𑀤𑁆𑀥𑀸𑀦𑀁 𑀦𑀬𑀦𑀸𑀦𑀁 𑀉𑀫𑁆𑀫𑀻𑀮𑀦𑀸 𑀧𑀲𑀦𑁆𑀦𑁂𑀦 𑀫𑀼𑀔𑁂𑀦 𑀑𑀮𑁄𑀓𑀦𑀜𑁆𑀘 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀫𑁂𑀯, 𑀬𑀲𑁆𑀲 𑀧𑀦 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀦𑀬𑀦𑀸𑀦𑀁 𑀫𑁂𑀢𑁆𑀢𑀸𑀲𑀺𑀦𑁂𑀳𑀲𑀺𑀦𑀺𑀤𑁆𑀥𑀢𑀸 𑀫𑀼𑀔𑀲𑁆𑀲 𑀘 𑀧𑀲𑀦𑁆𑀦𑀢𑀸, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀦𑀸𑀫𑀸’’𑀢𑀺.

𑀇𑀫𑀸𑀦𑀺 (𑀤𑀻. 𑀦𑀺. 𑀅𑀝𑁆𑀞. 𑁨.𑁧𑁪𑁧; 𑀫. 𑀦𑀺. 𑀅𑀝𑁆𑀞. 𑁧.𑁪𑁯𑁨; 𑀅. 𑀦𑀺. 𑀅𑀝𑁆𑀞. 𑁩.𑁬.𑁧𑁧) 𑀘 𑀫𑁂𑀢𑁆𑀢𑀓𑀸𑀬𑀓𑀫𑁆𑀫𑀸𑀤𑀻𑀦𑀺 𑀧𑀸𑀴𑀺𑀬𑀁 𑀪𑀺𑀓𑁆𑀔𑀽𑀦𑀁 𑀯𑀲𑁂𑀦 𑀆𑀕𑀢𑀸𑀦𑀺 𑀕𑀺𑀳𑀻𑀲𑀼𑀧𑀺 𑀮𑀩𑁆𑀪𑀦𑁆𑀢𑀺𑀬𑁂𑀯. 𑀪𑀺𑀓𑁆𑀔𑀽𑀦𑀜𑁆𑀳𑀺 𑀫𑁂𑀢𑁆𑀢𑀘𑀺𑀢𑁆𑀢𑁂𑀦 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀯𑀢𑁆𑀢𑀸𑀤𑀺𑀆𑀪𑀺𑀲𑀫𑀸𑀘𑀸𑀭𑀺𑀓𑀥𑀫𑁆𑀫𑀧𑀽𑀭𑀡𑀁 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀦𑀸𑀫. 𑀲𑀩𑁆𑀩𑀜𑁆𑀘 𑀅𑀦𑀯𑀚𑁆𑀚𑀓𑀸𑀬𑀓𑀫𑁆𑀫𑀁 𑀆𑀪𑀺𑀲𑀫𑀸𑀘𑀸𑀭𑀺𑀓𑀓𑀫𑁆𑀫𑀦𑁆𑀢𑁄𑀕𑀥𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀕𑀺𑀳𑀻𑀦𑀁 𑀘𑁂𑀢𑀺𑀬𑀯𑀦𑁆𑀤𑀦𑀢𑁆𑀣𑀸𑀬 𑀩𑁄𑀥𑀺𑀯𑀦𑁆𑀤𑀦𑀢𑁆𑀣𑀸𑀬 𑀲𑀗𑁆𑀖𑀦𑀺𑀫𑀦𑁆𑀢𑀦𑀢𑁆𑀣𑀸𑀬 𑀕𑀫𑀦𑀁, 𑀕𑀸𑀫𑀁 𑀯𑀸 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀧𑀘𑁆𑀘𑀼𑀕𑁆𑀕𑀫𑀦𑀁, 𑀧𑀢𑁆𑀢𑀧𑀝𑀺𑀕𑁆𑀕𑀳𑀡𑀁, 𑀆𑀲𑀦𑀧𑀜𑁆𑀜𑀸𑀧𑀦𑀁, 𑀅𑀦𑀼𑀕𑀫𑀦𑀦𑁆𑀢𑀺 𑀏𑀯𑀫𑀸𑀤𑀺𑀓𑀁 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀦𑀸𑀫. 𑀪𑀺𑀓𑁆𑀔𑀽𑀦𑀁 𑀫𑁂𑀢𑁆𑀢𑀘𑀺𑀢𑁆𑀢𑁂𑀦 𑀆𑀘𑀸𑀭𑀧𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀦 𑀓𑀫𑁆𑀫𑀝𑁆𑀞𑀸𑀦𑀓𑀣𑀦 𑀥𑀫𑁆𑀫𑀤𑁂𑀲𑀦𑀸 𑀧𑀭𑀺𑀧𑀼𑀘𑁆𑀙𑀦 𑀅𑀝𑁆𑀞𑀓𑀣𑀸𑀓𑀣𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀫𑀸𑀦𑀁 𑀢𑁂𑀧𑀺𑀝𑀓𑀫𑁆𑀧𑀺 𑀩𑀼𑀤𑁆𑀥𑀯𑀘𑀦𑀁 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁 𑀦𑀸𑀫. 𑀕𑀺𑀳𑀻𑀦𑀁 ‘‘𑀘𑁂𑀢𑀺𑀬𑀯𑀦𑁆𑀤𑀦𑀢𑁆𑀣𑀸𑀬 𑀕𑀘𑁆𑀙𑀸𑀫, 𑀩𑁄𑀥𑀺𑀯𑀦𑁆𑀤𑀦𑀢𑁆𑀣𑀸𑀬 𑀕𑀘𑁆𑀙𑀸𑀫, 𑀥𑀫𑁆𑀫𑀲𑁆𑀲𑀯𑀦𑀁 𑀓𑀭𑀺𑀲𑁆𑀲𑀸𑀫, 𑀤𑀻𑀧𑀫𑀸𑀮𑀸𑀧𑀼𑀧𑁆𑀨𑀧𑀽𑀚𑀁 𑀓𑀭𑀺𑀲𑁆𑀲𑀸𑀫, 𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺 𑀲𑀫𑀸𑀤𑀸𑀬 𑀯𑀢𑁆𑀢𑀺𑀲𑁆𑀲𑀸𑀫, 𑀲𑀮𑀸𑀓𑀪𑀢𑁆𑀢𑀸𑀤𑀻𑀦𑀺 𑀤𑀲𑁆𑀲𑀸𑀫, 𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑀲𑁆𑀲𑀸𑀫, 𑀅𑀚𑁆𑀚 𑀲𑀗𑁆𑀖𑀲𑁆𑀲 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀤𑀲𑁆𑀲𑀸𑀫, 𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀔𑀸𑀤𑀦𑀻𑀬𑀸𑀤𑀻𑀦𑀺 𑀲𑀁𑀯𑀺𑀤𑀳𑀣, 𑀆𑀲𑀦𑀸𑀦𑀺 𑀧𑀜𑁆𑀜𑀧𑁂𑀣, 𑀧𑀸𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀣, 𑀲𑀗𑁆𑀖𑀁 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀆𑀦𑁂𑀣, 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀸𑀧𑁂𑀣, 𑀙𑀦𑁆𑀤𑀚𑀸𑀢𑀸 𑀉𑀲𑁆𑀲𑀸𑀳𑀚𑀸𑀢𑀸 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀭𑁄𑀣𑀸’’𑀢𑀺𑀆𑀤𑀺𑀓𑀣𑀦𑀓𑀸𑀮𑁂 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁 𑀦𑀸𑀫. 𑀪𑀺𑀓𑁆𑀔𑀽𑀦𑀁 𑀧𑀸𑀢𑁄𑀯 𑀉𑀝𑁆𑀞𑀸𑀬 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀘𑁂𑀢𑀺𑀬𑀗𑁆𑀕𑀡𑀯𑀢𑁆𑀢𑀸𑀤𑀻𑀦𑀺 𑀘 𑀓𑀢𑁆𑀯𑀸 𑀯𑀺𑀯𑀺𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽 𑀲𑀼𑀔𑀻 𑀳𑁄𑀦𑁆𑀢𑀼 𑀅𑀯𑁂𑀭𑀸 𑀅𑀩𑁆𑀬𑀸𑀧𑀚𑁆𑀚𑀸’’𑀢𑀺 𑀘𑀺𑀦𑁆𑀢𑀦𑀁 𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀦𑀸𑀫. 𑀕𑀺𑀳𑀻𑀦𑀁 ‘‘𑀅𑀬𑁆𑀬𑀸 𑀲𑀼𑀔𑀻 𑀳𑁄𑀦𑁆𑀢𑀼 𑀅𑀯𑁂𑀭𑀸 𑀅𑀩𑁆𑀬𑀸𑀧𑀚𑁆𑀚𑀸’’𑀢𑀺 𑀘𑀺𑀦𑁆𑀢𑀦𑀁 𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀦𑀸𑀫.

𑀮𑀸𑀪𑀸𑀢𑀺 𑀘𑀻𑀯𑀭𑀸𑀤𑀬𑁄 𑀮𑀤𑁆𑀥𑀧𑀘𑁆𑀘𑀬𑀸. 𑀥𑀫𑁆𑀫𑀺𑀓𑀸𑀢𑀺 𑀓𑀼𑀳𑀦𑀸𑀤𑀺𑀪𑁂𑀤𑀁 𑀫𑀺𑀘𑁆𑀙𑀸𑀚𑀻𑀯𑀁 𑀯𑀚𑁆𑀚𑁂𑀢𑁆𑀯𑀸 𑀥𑀫𑁆𑀫𑁂𑀦 𑀲𑀫𑁂𑀦 𑀪𑀺𑀓𑁆𑀔𑀸𑀘𑀭𑀺𑀬𑀯𑀢𑁆𑀢𑁂𑀦 𑀉𑀧𑁆𑀧𑀦𑁆𑀦𑀸. 𑀅𑀦𑁆𑀢𑀫𑀲𑁄 𑀧𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀫𑀢𑁆𑀢𑀫𑁆𑀧𑀻𑀢𑀺 𑀧𑀘𑁆𑀙𑀺𑀫𑀓𑁄𑀝𑀺𑀬𑀸 𑀧𑀢𑁆𑀢𑁂 𑀧𑀭𑀺𑀬𑀸𑀧𑀦𑁆𑀦𑀁 𑀧𑀢𑁆𑀢𑀲𑁆𑀲 𑀅𑀦𑁆𑀢𑁄𑀕𑀢𑀁 𑀤𑁆𑀯𑀢𑁆𑀢𑀺𑀓𑀝𑀘𑁆𑀙𑀼𑀪𑀺𑀓𑁆𑀔𑀸𑀫𑀢𑁆𑀢𑀫𑁆𑀧𑀺. 𑀤𑁂𑀬𑁆𑀬𑀁 𑀤𑀓𑁆𑀔𑀺𑀡𑁂𑀬𑁆𑀬𑀜𑁆𑀘 𑀅𑀧𑁆𑀧𑀝𑀺𑀯𑀺𑀪𑀢𑁆𑀢𑀁 𑀓𑀢𑁆𑀯𑀸 𑀪𑀼𑀜𑁆𑀚𑀢𑀻𑀢𑀺 𑀅𑀧𑁆𑀧𑀝𑀺𑀯𑀺𑀪𑀢𑁆𑀢𑀪𑁄𑀕𑀻. 𑀏𑀢𑁆𑀣 𑀳𑀺 𑀤𑁆𑀯𑁂 𑀧𑀝𑀺𑀯𑀺𑀪𑀢𑁆𑀢𑀸𑀦𑀺 𑀦𑀸𑀫 𑀆𑀫𑀺𑀲𑀧𑀝𑀺𑀯𑀺𑀪𑀢𑁆𑀢𑀁 𑀧𑀼𑀕𑁆𑀕𑀮𑀧𑀝𑀺𑀯𑀺𑀪𑀢𑁆𑀢𑀜𑁆𑀘. 𑀢𑀢𑁆𑀣 ‘‘𑀏𑀢𑁆𑀢𑀓𑀁 𑀤𑀲𑁆𑀲𑀸𑀫𑀺, 𑀏𑀢𑁆𑀢𑀓𑀁 𑀦 𑀤𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀘𑀺𑀢𑁆𑀢𑁂𑀦 𑀯𑀺𑀪𑀚𑀦𑀁 𑀆𑀫𑀺𑀲𑀧𑀝𑀺𑀯𑀺𑀪𑀢𑁆𑀢𑀁 𑀦𑀸𑀫. ‘‘𑀅𑀲𑀼𑀓𑀲𑁆𑀲 𑀤𑀲𑁆𑀲𑀸𑀫𑀺, 𑀅𑀲𑀼𑀓𑀲𑁆𑀲 𑀦 𑀤𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀘𑀺𑀢𑁆𑀢𑁂𑀦 𑀯𑀺𑀪𑀚𑀦𑀁 𑀧𑀦 𑀧𑀼𑀕𑁆𑀕𑀮𑀧𑀝𑀺𑀯𑀺𑀪𑀢𑁆𑀢𑀁 𑀦𑀸𑀫. 𑀢𑀤𑀼𑀪𑀬𑀫𑁆𑀧𑀺 𑀅𑀓𑀢𑁆𑀯𑀸 𑀬𑁄 𑀅𑀧𑁆𑀧𑀝𑀺𑀯𑀺𑀪𑀢𑁆𑀢𑀁 𑀪𑀼𑀜𑁆𑀚𑀢𑀺, 𑀅𑀬𑀁 𑀅𑀧𑁆𑀧𑀝𑀺𑀯𑀺𑀪𑀢𑁆𑀢𑀪𑁄𑀕𑀻 𑀦𑀸𑀫. 𑀢𑁂𑀦𑀸𑀳 ‘‘𑀦𑁂𑀯 𑀆𑀫𑀺𑀲𑀁 𑀧𑀝𑀺𑀯𑀺𑀪𑀚𑀺𑀢𑁆𑀯𑀸 𑀪𑀼𑀜𑁆𑀚𑀢𑀻’’𑀢𑀺𑀆𑀤𑀺. 𑀅𑀤𑀸𑀢𑀼𑀫𑁆𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀤𑀸𑀢𑀼𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀤𑀸𑀦𑀜𑁆𑀳𑀺 𑀦𑀸𑀫 𑀦 𑀓𑀲𑁆𑀲𑀘𑀺 𑀦𑀺𑀯𑀸𑀭𑀺𑀢𑀁, 𑀢𑁂𑀦 𑀤𑀼𑀲𑁆𑀲𑀻𑀮𑀲𑁆𑀲𑀧𑀺 𑀅𑀢𑁆𑀣𑀺𑀓𑀲𑁆𑀲 𑀲𑀢𑀺 𑀲𑀫𑁆𑀪𑀯𑁂 𑀤𑀸𑀢𑀩𑁆𑀩𑀁, 𑀢𑀜𑁆𑀘 𑀔𑁄 𑀓𑀭𑀼𑀡𑀸𑀬𑀦𑀯𑀲𑁂𑀦, 𑀦 𑀯𑀢𑁆𑀢𑀧𑀽𑀭𑀡𑀯𑀲𑁂𑀦. 𑀲𑀸𑀭𑀡𑀻𑀬𑀥𑀫𑁆𑀫𑀧𑀽𑀭𑀓𑀲𑁆𑀲 𑀅𑀧𑁆𑀧𑀝𑀺𑀯𑀺𑀪𑀢𑁆𑀢𑀪𑁄𑀕𑀺𑀢𑀸𑀬 ‘‘𑀲𑀩𑁆𑀩𑁂𑀲𑀁 𑀤𑀸𑀢𑀩𑁆𑀩𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀕𑀺𑀮𑀸𑀦𑀸𑀤𑀻𑀦𑀁 𑀧𑀦 𑀑𑀤𑀺𑀲𑁆𑀲𑀓𑀁 𑀓𑀢𑁆𑀯𑀸 𑀤𑀸𑀦𑀁 𑀅𑀧𑁆𑀧𑀝𑀺𑀯𑀺𑀪𑀸𑀕𑀧𑀓𑁆𑀔𑀺𑀓𑀁 ‘‘𑀅𑀲𑀼𑀓𑀲𑁆𑀲 𑀦 𑀤𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀓𑁆𑀔𑁂𑀧𑀲𑁆𑀲 𑀅𑀪𑀸𑀯𑀢𑁄. 𑀩𑁆𑀬𑀢𑀺𑀭𑁂𑀓𑀧𑁆𑀧𑀥𑀸𑀦𑁄 𑀳𑀺 𑀧𑀝𑀺𑀯𑀺𑀪𑀸𑀕𑁄. 𑀢𑁂𑀦𑀸𑀳 ‘‘𑀕𑀺𑀮𑀸𑀦𑀕𑀺𑀮𑀸𑀦𑀼𑀧𑀝𑁆𑀞𑀸𑀓…𑀧𑁂… 𑀯𑀺𑀘𑁂𑀬𑁆𑀬 𑀤𑀸𑀢𑀼𑀫𑁆𑀧𑀺 𑀯𑀝𑁆𑀝𑀢𑀻’’𑀢𑀺.

𑀲𑀸𑀥𑀸𑀭𑀡𑀪𑁄𑀕𑀻𑀢𑀺 𑀏𑀢𑁆𑀣 𑀲𑀸𑀥𑀸𑀭𑀡𑀪𑁄𑀕𑀺𑀦𑁄 𑀇𑀤𑀁 𑀮𑀓𑁆𑀔𑀡𑀁 𑁋 𑀬𑀁 𑀬𑀁 𑀧𑀡𑀻𑀢𑀁 𑀮𑀪𑀢𑀺, 𑀢𑀁 𑀢𑀁 𑀦𑁂𑀯 𑀮𑀸𑀪𑁂𑀦 𑀮𑀸𑀪𑀁 𑀦𑀺𑀚𑀺𑀕𑀻𑀲𑀦𑀫𑀼𑀔𑁂𑀦 𑀕𑀺𑀳𑀻𑀦𑀁 𑀤𑁂𑀢𑀺 𑀅𑀢𑁆𑀢𑀦𑁄 𑀆𑀚𑀻𑀯𑀲𑀼𑀤𑁆𑀥𑀺𑀁 𑀭𑀓𑁆𑀔𑀫𑀸𑀦𑁄, 𑀦 𑀅𑀢𑁆𑀢𑀦𑀸𑀯 𑀧𑀭𑀺𑀪𑀼𑀜𑁆𑀚𑀢𑀺 ‘‘𑀫𑀬𑁆𑀳𑀁 𑀅𑀲𑀸𑀥𑀸𑀭𑀡𑀪𑁄𑀕𑀺𑀢𑀸 𑀫𑀸 𑀳𑁄𑀢𑀽’’𑀢𑀺. 𑀢𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑁄 𑀘 ‘‘𑀲𑀗𑁆𑀖𑁂𑀦 𑀲𑀸𑀥𑀸𑀭𑀡𑀁 𑀳𑁄𑀢𑀽’’𑀢𑀺 𑀕𑀳𑁂𑀢𑁆𑀯𑀸 𑀖𑀡𑁆𑀝𑀺𑀁 𑀧𑀳𑀭𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁 𑀲𑀗𑁆𑀖𑀲𑀦𑁆𑀢𑀓𑀁 𑀯𑀺𑀬 𑀧𑀲𑁆𑀲𑀢𑀺. 𑀇𑀫𑀺𑀦𑀸 𑀘 𑀢𑀲𑁆𑀲 𑀮𑀸𑀪𑀲𑁆𑀲 𑀢𑀻𑀲𑀼𑀧𑀺 𑀓𑀸𑀮𑁂𑀲𑀼 𑀲𑀸𑀥𑀸𑀭𑀡𑀢𑁄 𑀞𑀧𑀦𑀁 𑀤𑀲𑁆𑀲𑀺𑀢𑀁. ‘‘𑀢𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑁄 𑀘 𑀲𑀗𑁆𑀖𑁂𑀦 𑀲𑀸𑀥𑀸𑀭𑀡𑀁 𑀳𑁄𑀢𑀽’’𑀢𑀺 𑀇𑀫𑀺𑀦𑀸 𑀧𑀝𑀺𑀕𑁆𑀕𑀳𑀡𑀓𑀸𑀮𑁄 𑀤𑀲𑁆𑀲𑀺𑀢𑁄, ‘‘𑀕𑀳𑁂𑀢𑁆𑀯𑀸…𑀧𑁂… 𑀧𑀲𑁆𑀲𑀢𑀻’’𑀢𑀺 𑀇𑀫𑀺𑀦𑀸 𑀧𑀝𑀺𑀕𑁆𑀕𑀳𑀺𑀢𑀓𑀸𑀮𑁄. 𑀢𑀤𑀼𑀪𑀬𑀁 𑀧𑀦 𑀢𑀸𑀤𑀺𑀲𑁂𑀦 𑀧𑀼𑀩𑁆𑀩𑀪𑀸𑀕𑁂𑀦 𑀯𑀺𑀦𑀸 𑀦 𑀳𑁄𑀢𑀻𑀢𑀺 𑀅𑀢𑁆𑀣𑀲𑀺𑀤𑁆𑀥𑁄 𑀧𑀼𑀭𑀺𑀫𑀓𑀸𑀮𑁄. 𑀢𑀬𑀺𑀤𑀫𑁆𑀧𑀺 𑀧𑀝𑀺𑀕𑁆𑀕𑀳𑀡𑀢𑁄 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 ‘‘𑀲𑀗𑁆𑀖𑁂𑀦 𑀲𑀸𑀥𑀸𑀭𑀡𑀁 𑀳𑁄𑀢𑀽𑀢𑀺 𑀧𑀝𑀺𑀕𑁆𑀕𑀳𑁂𑀲𑁆𑀲𑀸𑀫𑀻’’𑀢𑀺, 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀳𑁄𑀢𑀺 ‘‘𑀲𑀗𑁆𑀖𑁂𑀦 𑀲𑀸𑀥𑀸𑀭𑀡𑀁 𑀳𑁄𑀢𑀽𑀢𑀺 𑀧𑀝𑀺𑀕𑁆𑀕𑀡𑁆𑀳𑀸𑀫𑀻’’𑀢𑀺, 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀳𑁄𑀢𑀺 ‘‘𑀲𑀗𑁆𑀖𑁂𑀦 𑀲𑀸𑀥𑀸𑀭𑀡𑀁 𑀳𑁄𑀢𑀽𑀢𑀺 𑀧𑀝𑀺𑀕𑁆𑀕𑀳𑀺𑀢𑀁 𑀫𑀬𑀸’’𑀢𑀺 𑀏𑀯𑀁 𑀢𑀺𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀁 𑀓𑀢𑁆𑀯𑀸 𑀮𑀤𑁆𑀥𑀮𑀸𑀪𑀁 𑀑𑀲𑀸𑀦𑀮𑀓𑁆𑀔𑀡𑀁 𑀅𑀯𑀺𑀓𑁄𑀧𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀲𑀸𑀥𑀸𑀭𑀡𑀪𑁄𑀕𑀻 𑀅𑀧𑁆𑀧𑀝𑀺𑀯𑀺𑀪𑀢𑁆𑀢𑀪𑁄𑀕𑀻 𑀘 𑀳𑁄𑀢𑀺.

𑀇𑀫𑀁 (𑀤𑀻. 𑀦𑀺. 𑀅𑀝𑁆𑀞. 𑁨.𑁧𑁪𑁧; 𑀫. 𑀦𑀺. 𑀅𑀝𑁆𑀞. 𑁧.𑁪𑁯𑁨; 𑀅. 𑀦𑀺. 𑀅𑀝𑁆𑀞. 𑁩.𑁬.𑁧𑁧) 𑀧𑀦 𑀲𑀸𑀭𑀡𑀻𑀬𑀥𑀫𑁆𑀫𑀁 𑀓𑁄 𑀧𑀽𑀭𑁂𑀢𑀺, 𑀓𑁄 𑀦 𑀧𑀽𑀭𑁂𑀢𑀺? 𑀤𑀼𑀲𑁆𑀲𑀻𑀮𑁄 𑀢𑀸𑀯 𑀦 𑀧𑀽𑀭𑁂𑀢𑀺. 𑀦 𑀳𑀺 𑀢𑀲𑁆𑀲 𑀲𑀦𑁆𑀢𑀓𑀁 𑀲𑀻𑀮𑀯𑀦𑁆𑀢𑁄 𑀕𑀡𑁆𑀳𑀦𑁆𑀢𑀺. 𑀧𑀭𑀺𑀲𑀼𑀤𑁆𑀥𑀲𑀻𑀮𑁄 𑀧𑀦 𑀯𑀢𑁆𑀢𑀁 𑀅𑀔𑀡𑁆𑀟𑁂𑀦𑁆𑀢𑁄 𑀧𑀽𑀭𑁂𑀢𑀺. 𑀢𑀢𑁆𑀭𑀺𑀤𑀁 𑀯𑀢𑁆𑀢𑀁 𑁋 𑀬𑁄 𑀑𑀤𑀺𑀲𑁆𑀲𑀓𑀁 𑀓𑀢𑁆𑀯𑀸 𑀫𑀸𑀢𑀼 𑀯𑀸 𑀧𑀺𑀢𑀼 𑀯𑀸 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀤𑀻𑀦𑀁 𑀯𑀸 𑀤𑁂𑀢𑀺, 𑀲𑁄 𑀤𑀸𑀢𑀩𑁆𑀩𑀁 𑀤𑁂𑀢𑀼, 𑀲𑀸𑀭𑀡𑀻𑀬𑀥𑀫𑁆𑀫𑁄 𑀧𑀦𑀲𑁆𑀲 𑀦 𑀳𑁄𑀢𑀺, 𑀧𑀮𑀺𑀩𑁄𑀥𑀚𑀕𑁆𑀕𑀦𑀁 𑀦𑀸𑀫 𑀳𑁄𑀢𑀺. 𑀲𑀸𑀭𑀡𑀻𑀬𑀥𑀫𑁆𑀫𑁄 𑀳𑀺 𑀫𑀼𑀢𑁆𑀢𑀧𑀮𑀺𑀩𑁄𑀥𑀲𑁆𑀲𑁂𑀯 𑀯𑀝𑁆𑀝𑀢𑀺. 𑀢𑁂𑀦 𑀧𑀦 𑀑𑀤𑀺𑀲𑁆𑀲𑀓𑀁 𑀤𑁂𑀦𑁆𑀢𑁂𑀦 𑀕𑀺𑀮𑀸𑀦𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀆𑀕𑀦𑁆𑀢𑀼𑀓𑀕𑀫𑀺𑀓𑀸𑀦𑀜𑁆𑀘𑁂𑀯 𑀦𑀯𑀧𑀩𑁆𑀩𑀚𑀺𑀢𑀲𑁆𑀲 𑀘 𑀲𑀗𑁆𑀖𑀸𑀝𑀺𑀧𑀢𑁆𑀢𑀕𑁆𑀕𑀳𑀡𑀁 𑀅𑀚𑀸𑀦𑀦𑁆𑀢𑀲𑁆𑀲 𑀤𑀸𑀢𑀩𑁆𑀩𑀁. 𑀏𑀢𑁂𑀲𑀁 𑀤𑀢𑁆𑀯𑀸 𑀅𑀯𑀲𑁂𑀲𑀁 𑀣𑁂𑀭𑀸𑀲𑀦𑀢𑁄 𑀧𑀝𑁆𑀞𑀸𑀬 𑀣𑁄𑀓𑀁 𑀣𑁄𑀓𑀁 𑀅𑀤𑀢𑁆𑀯𑀸 𑀬𑁄 𑀬𑀢𑁆𑀢𑀓𑀁 𑀕𑀡𑁆𑀳𑀸𑀢𑀺, 𑀢𑀲𑁆𑀲 𑀢𑀢𑁆𑀢𑀓𑀁 𑀤𑀸𑀢𑀩𑁆𑀩𑀁. 𑀅𑀯𑀲𑀺𑀝𑁆𑀞𑁂 𑀅𑀲𑀢𑀺 𑀧𑀼𑀦 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀣𑁂𑀭𑀸𑀲𑀦𑀢𑁄 𑀧𑀝𑁆𑀞𑀸𑀬 𑀬𑀁 𑀬𑀁 𑀧𑀡𑀻𑀢𑀁, 𑀢𑀁 𑀢𑀁 𑀤𑀢𑁆𑀯𑀸 𑀲𑁂𑀲𑀁 𑀪𑀼𑀜𑁆𑀚𑀺𑀢𑀩𑁆𑀩𑀁.

𑀅𑀬𑀁 𑀧𑀦 𑀲𑀸𑀭𑀡𑀻𑀬𑀥𑀫𑁆𑀫𑁄 𑀲𑀸𑀭𑀡𑀻𑀬𑀥𑀫𑁆𑀫𑀧𑀽𑀭𑀡𑀯𑀺𑀥𑀺𑀫𑁆𑀳𑀺 𑀲𑀼𑀲𑀺𑀓𑁆𑀔𑀺𑀢𑀸𑀬 𑀧𑀭𑀺𑀲𑀸𑀬 𑀲𑀼𑀧𑀽𑀭𑁄 𑀳𑁄𑀢𑀺. 𑀲𑀼𑀲𑀺𑀓𑁆𑀔𑀺𑀢𑀸𑀬 𑀳𑀺 𑀧𑀭𑀺𑀲𑀸𑀬 𑀬𑁄 𑀅𑀜𑁆𑀜𑀢𑁄 𑀮𑀪𑀢𑀺, 𑀲𑁄 𑀦 𑀕𑀡𑁆𑀳𑀸𑀢𑀺. 𑀅𑀜𑁆𑀜𑀢𑁄 𑀅𑀮𑀪𑀦𑁆𑀢𑁄𑀧𑀺 𑀧𑀫𑀸𑀡𑀬𑀼𑀢𑁆𑀢𑀫𑁂𑀯 𑀕𑀡𑁆𑀳𑀸𑀢𑀺, 𑀦 𑀅𑀢𑀺𑀭𑁂𑀓𑀁. 𑀅𑀬𑀜𑁆𑀘 𑀧𑀦 𑀲𑀸𑀭𑀡𑀻𑀬𑀥𑀫𑁆𑀫𑁄 𑀏𑀯𑀁 𑀧𑀼𑀦𑀧𑁆𑀧𑀼𑀦𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀮𑀤𑁆𑀥𑀁 𑀮𑀤𑁆𑀥𑀁 𑀤𑁂𑀦𑁆𑀢𑀲𑁆𑀲𑀧𑀺 𑀤𑁆𑀯𑀸𑀤𑀲𑀳𑀺 𑀯𑀲𑁆𑀲𑁂𑀳𑀺 𑀧𑀽𑀭𑀢𑀺, 𑀦 𑀢𑀢𑁄 𑀑𑀭𑀁. 𑀲𑀘𑁂 𑀳𑀺 𑀤𑁆𑀯𑀸𑀤𑀲𑀫𑁂𑀧𑀺 𑀯𑀲𑁆𑀲𑁂 𑀲𑀸𑀭𑀡𑀻𑀬𑀥𑀫𑁆𑀫𑀧𑀽𑀭𑀓𑁄 𑀧𑀺𑀡𑁆𑀟𑀧𑀸𑀢𑀧𑀽𑀭𑀁 𑀧𑀢𑁆𑀢𑀁 𑀆𑀲𑀦𑀲𑀸𑀮𑀸𑀬𑀁 𑀞𑀧𑁂𑀢𑁆𑀯𑀸 𑀦𑀳𑀸𑀬𑀺𑀢𑀼𑀁 𑀕𑀘𑁆𑀙𑀢𑀺, 𑀲𑀗𑁆𑀖𑀢𑁆𑀣𑁂𑀭𑁄 𑀘 ‘‘𑀓𑀲𑁆𑀲𑁂𑀲𑁄 𑀧𑀢𑁆𑀢𑁄’’𑀢𑀺 𑀯𑀢𑁆𑀯𑀸 ‘‘𑀲𑀸𑀭𑀡𑀻𑀬𑀥𑀫𑁆𑀫𑀧𑀽𑀭𑀓𑀲𑁆𑀲𑀸’’𑀢𑀺 𑀯𑀼𑀢𑁆𑀢𑁂 ‘‘𑀆𑀳𑀭𑀣 𑀦’’𑀦𑁆𑀢𑀺 𑀲𑀩𑁆𑀩𑀁 𑀧𑀺𑀡𑁆𑀟𑀧𑀸𑀢𑀁 𑀯𑀺𑀘𑀸𑀭𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑁆𑀯𑀸𑀯 𑀭𑀺𑀢𑁆𑀢𑀧𑀢𑁆𑀢𑀁 𑀞𑀧𑁂𑀢𑀺. 𑀅𑀣 𑀲𑁄 𑀪𑀺𑀓𑁆𑀔𑀼 𑀭𑀺𑀢𑁆𑀢𑀧𑀢𑁆𑀢𑀁 𑀤𑀺𑀲𑁆𑀯𑀸 ‘‘𑀫𑀬𑁆𑀳𑀁 𑀅𑀦𑀯𑀲𑁂𑀲𑁂𑀢𑁆𑀯𑀸𑀯 𑀧𑀭𑀺𑀪𑀼𑀜𑁆𑀚𑀺𑀁𑀲𑀽’’𑀢𑀺 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀢𑀺, 𑀲𑀸𑀭𑀡𑀻𑀬𑀥𑀫𑁆𑀫𑁄 𑀪𑀺𑀚𑁆𑀚𑀢𑀺, 𑀧𑀼𑀦 𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀺 𑀧𑀽𑀭𑁂𑀢𑀩𑁆𑀩𑁄 𑀳𑁄𑀢𑀺. 𑀢𑀺𑀢𑁆𑀣𑀺𑀬𑀧𑀭𑀺𑀯𑀸𑀲𑀲𑀤𑀺𑀲𑁄 𑀳𑁂𑀲, 𑀲𑀓𑀺𑀁 𑀔𑀡𑁆𑀟𑁂 𑀚𑀸𑀢𑁂 𑀧𑀼𑀦 𑀧𑀽𑀭𑁂𑀢𑀩𑁆𑀩𑁄𑀯. 𑀬𑁄 𑀧𑀦 ‘‘𑀮𑀸𑀪𑀸 𑀯𑀢 𑀫𑁂, 𑀲𑀼𑀮𑀤𑁆𑀥𑀁 𑀯𑀢 𑀫𑁂, 𑀬𑀲𑁆𑀲 𑀫𑁂 𑀧𑀢𑁆𑀢𑀕𑀢𑀁 𑀅𑀦𑀸𑀧𑀼𑀘𑁆𑀙𑀸𑀯 𑀲𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀧𑀭𑀺𑀪𑀼𑀜𑁆𑀚𑀦𑁆𑀢𑀻’’𑀢𑀺 𑀲𑁄𑀫𑀦𑀲𑁆𑀲𑀁 𑀚𑀦𑁂𑀢𑀺, 𑀢𑀲𑁆𑀲 𑀧𑀼𑀡𑁆𑀡𑁄 𑀦𑀸𑀫 𑀳𑁄𑀢𑀺.

𑀏𑀯𑀁 𑀧𑀽𑀭𑀺𑀢𑀲𑀸𑀭𑀡𑀻𑀬𑀥𑀫𑁆𑀫𑀲𑁆𑀲 𑀧𑀦 𑀦𑁂𑀯 𑀇𑀲𑁆𑀲𑀸, 𑀦 𑀫𑀘𑁆𑀙𑀭𑀺𑀬𑀁 𑀳𑁄𑀢𑀺, 𑀫𑀦𑀼𑀲𑁆𑀲𑀸𑀦𑀁 𑀧𑀺𑀬𑁄 𑀳𑁄𑀢𑀺 𑀲𑀼𑀮𑀪𑀧𑀘𑁆𑀘𑀬𑁄, 𑀧𑀢𑁆𑀢𑀕𑀢𑀫𑀲𑁆𑀲 𑀤𑀺𑀬𑁆𑀬𑀫𑀸𑀦𑀫𑁆𑀧𑀺 𑀦 𑀔𑀻𑀬𑀢𑀺, 𑀪𑀸𑀚𑀦𑀻𑀬𑀪𑀡𑁆𑀟𑀝𑁆𑀞𑀸𑀦𑁂 𑀅𑀕𑁆𑀕𑀪𑀡𑁆𑀟𑀁 𑀮𑀪𑀢𑀺, 𑀪𑀬𑁂 𑀯𑀸 𑀙𑀸𑀢𑀓𑁂 𑀯𑀸 𑀲𑀫𑁆𑀧𑀢𑁆𑀢𑁂 𑀤𑁂𑀯𑀢𑀸 𑀉𑀲𑁆𑀲𑀼𑀓𑁆𑀓𑀁 𑀆𑀧𑀚𑁆𑀚𑀦𑁆𑀢𑀺.

𑀢𑀢𑁆𑀭𑀺𑀫𑀸𑀦𑀺 𑀯𑀢𑁆𑀣𑀽𑀦𑀺 𑁋 𑀮𑁂𑀡𑀕𑀺𑀭𑀺𑀯𑀸𑀲𑀻 𑀢𑀺𑀲𑁆𑀲𑀢𑁆𑀣𑁂𑀭𑁄 𑀓𑀺𑀭 𑀫𑀳𑀸𑀔𑀻𑀭𑀕𑀸𑀫𑀁 𑀉𑀧𑀦𑀺𑀲𑁆𑀲𑀸𑀬 𑀯𑀲𑀢𑀺. 𑀧𑀜𑁆𑀜𑀸𑀲𑀫𑀢𑁆𑀢𑀸 𑀣𑁂𑀭𑀸 𑀦𑀸𑀕𑀤𑀻𑀧𑀁 𑀘𑁂𑀢𑀺𑀬𑀯𑀦𑁆𑀤𑀦𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑀸 𑀔𑀻𑀭𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀓𑀺𑀜𑁆𑀘𑀺 𑀅𑀮𑀤𑁆𑀥𑀸 𑀦𑀺𑀓𑁆𑀔𑀫𑀺𑀁𑀲𑀼. 𑀣𑁂𑀭𑁄 𑀧𑀯𑀺𑀲𑀦𑁆𑀢𑁄 𑀢𑁂 𑀤𑀺𑀲𑁆𑀯𑀸 𑀧𑀼𑀘𑁆𑀙𑀺 ‘‘𑀮𑀤𑁆𑀥𑀁, 𑀪𑀦𑁆𑀢𑁂’’𑀢𑀺. 𑀯𑀺𑀘𑀭𑀺𑀫𑁆𑀳, 𑀆𑀯𑀼𑀲𑁄𑀢𑀺. 𑀲𑁄 𑀅𑀮𑀤𑁆𑀥𑀪𑀸𑀯𑀁 𑀜𑀢𑁆𑀯𑀸 𑀆𑀳 ‘‘𑀪𑀦𑁆𑀢𑁂, 𑀬𑀸𑀯𑀸𑀳𑀁 𑀆𑀕𑀘𑁆𑀙𑀸𑀫𑀺, 𑀢𑀸𑀯 𑀇𑀥𑁂𑀯 𑀳𑁄𑀣𑀸’’𑀢𑀺. 𑀫𑀬𑀁, 𑀆𑀯𑀼𑀲𑁄, 𑀧𑀜𑁆𑀜𑀸𑀲 𑀚𑀦𑀸 𑀧𑀢𑁆𑀢𑀢𑁂𑀫𑀦𑀫𑀢𑁆𑀢𑀫𑁆𑀧𑀺 𑀦 𑀮𑀪𑀺𑀫𑁆𑀳𑀸𑀢𑀺. 𑀪𑀦𑁆𑀢𑁂, 𑀦𑁂𑀯𑀸𑀲𑀺𑀓𑀸 𑀦𑀸𑀫 𑀧𑀝𑀺𑀩𑀮𑀸 𑀳𑁄𑀦𑁆𑀢𑀺, 𑀅𑀮𑀪𑀦𑁆𑀢𑀸𑀧𑀺 𑀪𑀺𑀓𑁆𑀔𑀸𑀘𑀸𑀭𑀫𑀕𑁆𑀕𑀲𑀪𑀸𑀕𑀁 𑀚𑀸𑀦𑀦𑁆𑀢𑀻𑀢𑀺. 𑀣𑁂𑀭𑀸 𑀆𑀕𑀫𑀺𑀁𑀲𑀼. 𑀣𑁂𑀭𑁄 𑀕𑀸𑀫𑀁 𑀧𑀸𑀯𑀺𑀲𑀺. 𑀥𑀼𑀭𑀕𑁂𑀳𑁂𑀬𑁂𑀯 𑀫𑀳𑀸𑀉𑀧𑀸𑀲𑀺𑀓𑀸 𑀔𑀻𑀭𑀪𑀢𑁆𑀢𑀁 𑀲𑀚𑁆𑀚𑁂𑀢𑁆𑀯𑀸 𑀣𑁂𑀭𑀁 𑀑𑀮𑁄𑀓𑀬𑀫𑀸𑀦𑀸 𑀞𑀺𑀢𑀸 𑀣𑁂𑀭𑀲𑁆𑀲 𑀤𑁆𑀯𑀸𑀭𑀁 𑀲𑀫𑁆𑀧𑀢𑁆𑀢𑀲𑁆𑀲𑁂𑀯 𑀧𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀅𑀤𑀸𑀲𑀺. 𑀲𑁄 𑀢𑀁 𑀆𑀤𑀸𑀬 𑀣𑁂𑀭𑀸𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀕𑀡𑁆𑀳𑀣, 𑀪𑀦𑁆𑀢𑁂’’𑀢𑀺 𑀲𑀗𑁆𑀖𑀢𑁆𑀣𑁂𑀭𑀁 𑀆𑀳. 𑀣𑁂𑀭𑁄 ‘‘𑀅𑀫𑁆𑀳𑁂𑀳𑀺 𑀏𑀢𑁆𑀢𑀓𑁂𑀳𑀺 𑀓𑀺𑀜𑁆𑀘𑀺 𑀦 𑀮𑀤𑁆𑀥𑀁, 𑀅𑀬𑀁 𑀲𑀻𑀖𑀫𑁂𑀯 𑀕𑀳𑁂𑀢𑁆𑀯𑀸 𑀆𑀕𑀢𑁄, 𑀓𑀺𑀁 𑀦𑀼 𑀔𑁄’’𑀢𑀺 𑀲𑁂𑀲𑀸𑀦𑀁 𑀫𑀼𑀔𑀁 𑀑𑀮𑁄𑀓𑁂𑀲𑀺. 𑀣𑁂𑀭𑁄 𑀑𑀮𑁄𑀓𑀦𑀸𑀓𑀸𑀭𑁂𑀦𑁂𑀯 𑀜𑀢𑁆𑀯𑀸 ‘‘𑀪𑀦𑁆𑀢𑁂, 𑀥𑀫𑁆𑀫𑁂𑀦 𑀲𑀫𑁂𑀦 𑀮𑀤𑁆𑀥𑁄 𑀧𑀺𑀡𑁆𑀟𑀧𑀸𑀢𑁄, 𑀦𑀺𑀓𑁆𑀓𑀼𑀓𑁆𑀓𑀼𑀘𑁆𑀘𑀸 𑀕𑀡𑁆𑀳𑀣𑀸’’𑀢𑀺𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑁂𑀲𑀁 𑀬𑀸𑀯𑀤𑀢𑁆𑀣𑀁 𑀤𑀢𑁆𑀯𑀸 𑀅𑀢𑁆𑀢𑀦𑀸𑀧𑀺 𑀬𑀸𑀯𑀤𑀢𑁆𑀣𑀁 𑀪𑀼𑀜𑁆𑀚𑀺. 𑀅𑀣 𑀦𑀁 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀣𑁂𑀭𑀸 𑀧𑀼𑀘𑁆𑀙𑀺𑀁𑀲𑀼 ‘‘𑀓𑀤𑀸, 𑀆𑀯𑀼𑀲𑁄, 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀧𑀝𑀺𑀯𑀺𑀚𑁆𑀛𑀻’’𑀢𑀺? 𑀦𑀢𑁆𑀣𑀺 𑀫𑁂, 𑀪𑀦𑁆𑀢𑁂, 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄𑀢𑀺. 𑀛𑀸𑀦𑀮𑀸𑀪𑀻𑀲𑀺 𑀆𑀯𑀼𑀲𑁄𑀢𑀺? 𑀏𑀢𑀫𑁆𑀧𑀺 𑀫𑁂, 𑀪𑀦𑁆𑀢𑁂, 𑀦𑀢𑁆𑀣𑀻𑀢𑀺. 𑀦𑀦𑀼, 𑀆𑀯𑀼𑀲𑁄, 𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺? 𑀲𑀸𑀭𑀡𑀻𑀬𑀥𑀫𑁆𑀫𑁄 𑀫𑁂, 𑀪𑀦𑁆𑀢𑁂, 𑀧𑀽𑀭𑀺𑀢𑁄, 𑀢𑀲𑁆𑀲 𑀫𑁂 𑀧𑀽𑀭𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀘𑁂𑀧𑀺 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀁 𑀳𑁄𑀢𑀺, 𑀧𑀢𑁆𑀢𑀕𑀢𑀁 𑀦 𑀔𑀻𑀬𑀢𑀻𑀢𑀺. 𑀲𑀸𑀥𑀼 𑀲𑀸𑀥𑀼 𑀲𑀧𑁆𑀧𑀼𑀭𑀺𑀲 𑀅𑀦𑀼𑀘𑁆𑀙𑀯𑀺𑀓𑀫𑀺𑀤𑀁 𑀢𑀼𑀬𑁆𑀳𑀦𑁆𑀢𑀺. 𑀇𑀤𑀁 𑀢𑀸𑀯 𑀧𑀢𑁆𑀢𑀕𑀢𑀁 𑀦 𑀔𑀻𑀬𑀢𑀻𑀢𑀺 𑀏𑀢𑁆𑀣 𑀯𑀢𑁆𑀣𑀼.

𑀅𑀬𑀫𑁂𑀯 𑀧𑀦 𑀣𑁂𑀭𑁄 𑀘𑁂𑀢𑀺𑀬𑀧𑀩𑁆𑀩𑀢𑁂 𑀕𑀺𑀭𑀺𑀪𑀡𑁆𑀟𑀫𑀳𑀸𑀧𑀽𑀚𑀸𑀬 𑀤𑀸𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀤𑀸𑀦𑁂 𑀓𑀺𑀁 𑀯𑀭𑀪𑀡𑁆𑀟’’𑀦𑁆𑀢𑀺 𑀧𑀼𑀘𑁆𑀙𑀺. 𑀤𑁆𑀯𑁂 𑀲𑀸𑀝𑀓𑀸, 𑀪𑀦𑁆𑀢𑁂𑀢𑀺. 𑀏𑀢𑁂 𑀫𑀬𑁆𑀳𑀁 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀻𑀢𑀺. 𑀢𑀁 𑀲𑀼𑀢𑁆𑀯𑀸 𑀅𑀫𑀘𑁆𑀘𑁄 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺 ‘‘𑀏𑀓𑁄 𑀤𑀳𑀭𑁄 𑀏𑀯𑀁 𑀯𑀤𑀢𑀻’’𑀢𑀺. ‘‘𑀤𑀳𑀭𑀲𑁆𑀲 𑀏𑀯𑀁 𑀘𑀺𑀢𑁆𑀢𑀁, 𑀫𑀳𑀸𑀣𑁂𑀭𑀸𑀦𑀁 𑀧𑀦 𑀲𑀼𑀔𑀼𑀫𑀸 𑀲𑀸𑀝𑀓𑀸 𑀯𑀝𑁆𑀝𑀦𑁆𑀢𑀻’’𑀢𑀺 𑀯𑀢𑁆𑀯𑀸 ‘‘𑀫𑀳𑀸𑀣𑁂𑀭𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀞𑀧𑁂𑀲𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑁂 𑀧𑀝𑀺𑀧𑀸𑀝𑀺𑀬𑀸 𑀞𑀺𑀢𑁂 𑀤𑁂𑀦𑁆𑀢𑀲𑁆𑀲 𑀫𑀢𑁆𑀣𑀓𑁂 𑀞𑀧𑀺𑀢𑀸𑀧𑀺 𑀢𑁂 𑀲𑀸𑀝𑀓𑀸 𑀳𑀢𑁆𑀣𑀁 𑀦𑀸𑀭𑁄𑀳𑀦𑁆𑀢𑀺, 𑀅𑀜𑁆𑀜𑁂𑀯 𑀆𑀭𑁄𑀳𑀦𑁆𑀢𑀺. 𑀤𑀳𑀭𑀲𑁆𑀲 𑀤𑀸𑀦𑀓𑀸𑀮𑁂 𑀧𑀦 𑀳𑀢𑁆𑀣𑀁 𑀆𑀭𑀼𑀴𑁆𑀳𑀸. 𑀲𑁄 𑀢𑀲𑁆𑀲 𑀳𑀢𑁆𑀣𑁂 𑀞𑀧𑁂𑀢𑁆𑀯𑀸 𑀅𑀫𑀘𑁆𑀘𑀲𑁆𑀲 𑀫𑀼𑀔𑀁 𑀑𑀮𑁄𑀓𑁂𑀢𑁆𑀯𑀸 𑀤𑀳𑀭𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀤𑀸𑀦𑀁 𑀤𑀢𑁆𑀯𑀸 𑀲𑀗𑁆𑀖𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀤𑀳𑀭𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀇𑀫𑀁 𑀥𑀫𑁆𑀫𑀁 𑀓𑀤𑀸 𑀧𑀝𑀺𑀯𑀺𑀚𑁆𑀛𑀺𑀢𑁆𑀣𑀸’’𑀢𑀺 𑀆𑀳. 𑀲𑁄 𑀧𑀭𑀺𑀬𑀸𑀬𑁂𑀦𑀧𑀺 𑀅𑀲𑀦𑁆𑀢𑀁 𑀅𑀯𑀤𑀦𑁆𑀢𑁄 ‘‘𑀦𑀢𑁆𑀣𑀺 𑀫𑀬𑁆𑀳𑀁, 𑀫𑀳𑀸𑀭𑀸𑀚, 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄’’𑀢𑀺 𑀆𑀳. 𑀦𑀦𑀼, 𑀪𑀦𑁆𑀢𑁂, 𑀧𑀼𑀩𑁆𑀩𑁂𑀯 𑀅𑀯𑀘𑀼𑀢𑁆𑀣𑀸𑀢𑀺. 𑀆𑀫 𑀫𑀳𑀸𑀭𑀸𑀚, 𑀲𑀸𑀭𑀡𑀻𑀬𑀥𑀫𑁆𑀫𑀧𑀽𑀭𑀓𑁄 𑀅𑀳𑀁, 𑀢𑀲𑁆𑀲 𑀫𑁂 𑀥𑀫𑁆𑀫𑀲𑁆𑀲 𑀧𑀽𑀭𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀪𑀸𑀚𑀦𑀻𑀬𑀝𑁆𑀞𑀸𑀦𑁂 𑀅𑀕𑁆𑀕𑀪𑀡𑁆𑀟𑀁 𑀧𑀸𑀧𑀼𑀡𑀸𑀢𑀻𑀢𑀺. ‘‘𑀲𑀸𑀥𑀼 𑀲𑀸𑀥𑀼 𑀪𑀦𑁆𑀢𑁂, 𑀅𑀦𑀼𑀘𑁆𑀙𑀯𑀺𑀓𑀫𑀺𑀤𑀁 𑀢𑀼𑀫𑁆𑀳𑀸𑀓’’𑀦𑁆𑀢𑀺 𑀯𑀦𑁆𑀤𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀇𑀤𑀁 𑀪𑀸𑀚𑀦𑀻𑀬𑀝𑁆𑀞𑀸𑀦𑁂 𑀅𑀕𑁆𑀕𑀪𑀡𑁆𑀟𑀁 𑀧𑀸𑀧𑀼𑀡𑀸𑀢𑀻𑀢𑀺 𑀏𑀢𑁆𑀣 𑀯𑀢𑁆𑀣𑀼.

𑀘𑀡𑁆𑀟𑀸𑀮𑀢𑀺𑀲𑁆𑀲𑀪𑀬𑁂𑀦 𑀧𑀦 𑀪𑀸𑀢𑀭𑀕𑀸𑀫𑀯𑀸𑀲𑀺𑀦𑁄 𑀦𑀸𑀕𑀢𑁆𑀣𑁂𑀭𑀺𑀬𑀸 𑀅𑀦𑀸𑀭𑁄𑀘𑁂𑀢𑁆𑀯𑀸𑀯 𑀧𑀮𑀸𑀬𑀺𑀁𑀲𑀼. 𑀣𑁂𑀭𑀻 𑀧𑀘𑁆𑀘𑀽𑀲𑀲𑀫𑀬𑁂 ‘‘𑀅𑀢𑀺 𑀯𑀺𑀬 𑀅𑀧𑁆𑀧𑀦𑀺𑀕𑁆𑀖𑁄𑀲𑁄 𑀕𑀸𑀫𑁄, 𑀉𑀧𑀥𑀸𑀭𑁂𑀣 𑀢𑀸𑀯𑀸’’𑀢𑀺 𑀤𑀳𑀭𑀪𑀺𑀓𑁆𑀔𑀼𑀦𑀺𑀬𑁄 𑀆𑀳. 𑀢𑀸 𑀕𑀦𑁆𑀢𑁆𑀯𑀸 𑀲𑀩𑁆𑀩𑁂𑀲𑀁 𑀕𑀢𑀪𑀸𑀯𑀁 𑀜𑀢𑁆𑀯𑀸 𑀆𑀕𑀫𑁆𑀫 𑀣𑁂𑀭𑀺𑀬𑀸 𑀆𑀭𑁄𑀘𑁂𑀲𑀼𑀁. 𑀲𑀸 𑀲𑀼𑀢𑁆𑀯𑀸 ‘‘𑀫𑀸 𑀢𑀼𑀫𑁆𑀳𑁂 𑀢𑁂𑀲𑀁 𑀕𑀢𑀪𑀸𑀯𑀁 𑀘𑀺𑀦𑁆𑀢𑀬𑀺𑀢𑁆𑀣, 𑀅𑀢𑁆𑀢𑀦𑁄 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀲𑀼𑀬𑁂𑀯 𑀬𑁄𑀕𑀁 𑀓𑀭𑁄𑀣𑀸’’𑀢𑀺 𑀯𑀢𑁆𑀯𑀸 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸𑀬𑀁 𑀧𑀸𑀭𑀼𑀧𑀺𑀢𑁆𑀯𑀸 𑀅𑀢𑁆𑀢𑀤𑁆𑀯𑀸𑀤𑀲𑀫𑀸 𑀕𑀸𑀫𑀤𑁆𑀯𑀸𑀭𑁂 𑀦𑀺𑀕𑁆𑀭𑁄𑀥𑀫𑀽𑀮𑁂 𑀅𑀝𑁆𑀞𑀸𑀲𑀺. 𑀭𑀼𑀓𑁆𑀔𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀤𑁆𑀯𑀸𑀤𑀲𑀦𑁆𑀦𑀫𑁆𑀧𑀺 𑀪𑀺𑀓𑁆𑀔𑀼𑀦𑀻𑀦𑀁 𑀧𑀺𑀡𑁆𑀟𑀧𑀸𑀢𑀁 𑀤𑀢𑁆𑀯𑀸 ‘‘𑀅𑀬𑁆𑀬𑁂 𑀅𑀜𑁆𑀜𑀢𑁆𑀣 𑀫𑀸 𑀕𑀘𑁆𑀙𑀣, 𑀦𑀺𑀘𑁆𑀘𑀁 𑀇𑀥𑁂𑀯 𑀏𑀣𑀸’’𑀢𑀺 𑀆𑀳. 𑀣𑁂𑀭𑀺𑀬𑀸 𑀧𑀦 𑀓𑀦𑀺𑀝𑁆𑀞𑀪𑀸𑀢𑀸 𑀦𑀸𑀕𑀢𑁆𑀣𑁂𑀭𑁄 𑀦𑀸𑀫 𑀅𑀢𑁆𑀣𑀺, 𑀲𑁄 ‘‘𑀫𑀳𑀦𑁆𑀢𑀁 𑀪𑀬𑀁, 𑀦 𑀲𑀓𑁆𑀓𑀸 𑀬𑀸𑀧𑁂𑀢𑀼𑀁, 𑀧𑀭𑀢𑀻𑀭𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀤𑁆𑀯𑀸𑀤𑀲𑀫𑁄 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀸 𑀦𑀺𑀓𑁆𑀔𑀦𑁆𑀢𑁄 ‘‘𑀣𑁂𑀭𑀺𑀁 𑀤𑀺𑀲𑁆𑀯𑀸 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀪𑀸𑀢𑀭𑀕𑀸𑀫𑀁 𑀆𑀕𑀢𑁄. 𑀣𑁂𑀭𑀻 ‘‘𑀣𑁂𑀭𑀸 𑀆𑀕𑀢𑀸’’𑀢𑀺 𑀲𑀼𑀢𑁆𑀯𑀸 𑀢𑁂𑀲𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀓𑀺𑀁 𑀅𑀬𑁆𑀬𑀸’’𑀢𑀺 𑀧𑀼𑀘𑁆𑀙𑀺. 𑀲𑁄 𑀢𑀁 𑀧𑀯𑀢𑁆𑀢𑀺𑀁 𑀆𑀘𑀺𑀓𑁆𑀔𑀺. 𑀲𑀸 ‘‘𑀅𑀚𑁆𑀚 𑀏𑀓𑀤𑀺𑀯𑀲𑀁 𑀯𑀺𑀳𑀸𑀭𑁂 𑀯𑀲𑀺𑀢𑁆𑀯𑀸 𑀲𑁆𑀯𑁂𑀯 𑀕𑀫𑀺𑀲𑁆𑀲𑀣𑀸’’𑀢𑀺 𑀆𑀳. 𑀣𑁂𑀭𑀸 𑀯𑀺𑀳𑀸𑀭𑀁 𑀆𑀕𑀫𑀁𑀲𑀼.

𑀣𑁂𑀭𑀻 𑀧𑀼𑀦𑀤𑀺𑀯𑀲𑁂 𑀭𑀼𑀓𑁆𑀔𑀫𑀽𑀮𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀇𑀫𑀁 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀆𑀳. 𑀣𑁂𑀭𑁄 ‘‘𑀯𑀝𑁆𑀝𑀺𑀲𑁆𑀲𑀢𑀺 𑀣𑁂𑀭𑀻’’𑀢𑀺 𑀯𑀢𑁆𑀯𑀸 𑀢𑀼𑀡𑁆𑀳𑀻 𑀅𑀝𑁆𑀞𑀸𑀲𑀺. 𑀥𑀫𑁆𑀫𑀺𑀓𑁄 𑀢𑀸𑀢 𑀧𑀺𑀡𑁆𑀟𑀧𑀸𑀢𑁄, 𑀓𑀼𑀓𑁆𑀓𑀼𑀘𑁆𑀘𑀁 𑀅𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀣𑀸𑀢𑀺. 𑀯𑀝𑁆𑀝𑀺𑀲𑁆𑀲𑀢𑀺 𑀣𑁂𑀭𑀻𑀢𑀺. 𑀲𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀆𑀓𑀸𑀲𑁂 𑀔𑀺𑀧𑀺. 𑀧𑀢𑁆𑀢𑁄 𑀆𑀓𑀸𑀲𑁂 𑀅𑀝𑁆𑀞𑀸𑀲𑀺. 𑀣𑁂𑀭𑁄 ‘‘𑀲𑀢𑁆𑀢𑀢𑀸𑀮𑀫𑀢𑁆𑀢𑁂 𑀞𑀺𑀢𑀫𑁆𑀧𑀺 𑀪𑀺𑀓𑁆𑀔𑀼𑀦𑀻𑀪𑀢𑁆𑀢𑀫𑁂𑀯 𑀣𑁂𑀭𑀻’’𑀢𑀺 𑀯𑀢𑁆𑀯𑀸 ‘‘𑀪𑀬𑀁 𑀦𑀸𑀫 𑀲𑀩𑁆𑀩𑀓𑀸𑀮𑀁 𑀦 𑀳𑁄𑀢𑀺, 𑀪𑀬𑁂 𑀯𑀽𑀧𑀲𑀦𑁆𑀢𑁂 𑀅𑀭𑀺𑀬𑀯𑀁𑀲𑀁 𑀓𑀣𑀬𑀫𑀸𑀦𑁄 ‘𑀪𑁄 𑀧𑀺𑀡𑁆𑀟𑀧𑀸𑀢𑀺𑀓 𑀪𑀺𑀓𑁆𑀔𑀼𑀦𑀻𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀯𑀻𑀢𑀺𑀦𑀸𑀫𑀬𑀺𑀢𑁆𑀣𑀸’𑀢𑀺 𑀘𑀺𑀢𑁆𑀢𑁂𑀦 𑀅𑀦𑀼𑀯𑀤𑀺𑀬𑀫𑀸𑀦𑁄 𑀲𑀦𑁆𑀣𑀫𑁆𑀪𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀅𑀧𑁆𑀧𑀫𑀢𑁆𑀢𑀸 𑀳𑁄𑀣 𑀣𑁂𑀭𑀺𑀬𑁄’’𑀢𑀺 𑀫𑀕𑁆𑀕𑀁 𑀆𑀭𑀼𑀳𑀺. 𑀭𑀼𑀓𑁆𑀔𑀤𑁂𑀯𑀢𑀸𑀧𑀺 ‘‘𑀲𑀘𑁂 𑀣𑁂𑀭𑁄 𑀣𑁂𑀭𑀺𑀬𑀸 𑀳𑀢𑁆𑀣𑀢𑁄 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀢𑀺, 𑀦 𑀦𑀁 𑀦𑀺𑀯𑀢𑁆𑀢𑁂𑀲𑁆𑀲𑀸𑀫𑀺, 𑀲𑀘𑁂 𑀦 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀢𑀺, 𑀦𑀺𑀯𑀢𑁆𑀢𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑀬𑀫𑀸𑀦𑀸 𑀞𑀢𑁆𑀯𑀸 𑀣𑁂𑀭𑀲𑁆𑀲 𑀕𑀫𑀦𑀁 𑀤𑀺𑀲𑁆𑀯𑀸 𑀭𑀼𑀓𑁆𑀔𑀸 𑀑𑀭𑀼𑀬𑁆𑀳 ‘‘𑀧𑀢𑁆𑀢𑀁, 𑀪𑀦𑁆𑀢𑁂, 𑀤𑁂𑀣𑀸’’𑀢𑀺 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀣𑁂𑀭𑀁 𑀭𑀼𑀓𑁆𑀔𑀫𑀽𑀮𑀁𑀬𑁂𑀯 𑀆𑀦𑁂𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀁 𑀤𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑀁 𑀧𑀝𑀺𑀜𑁆𑀜𑀁 𑀓𑀸𑀭𑁂𑀢𑁆𑀯𑀸 𑀤𑁆𑀯𑀸𑀤𑀲 𑀪𑀺𑀓𑁆𑀔𑀼𑀦𑀺𑀬𑁄 𑀤𑁆𑀯𑀸𑀤𑀲 𑀘 𑀪𑀺𑀓𑁆𑀔𑀽 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀉𑀧𑀝𑁆𑀞𑀳𑀺. 𑀇𑀤𑀁 𑀤𑁂𑀯𑀢𑀸 𑀉𑀲𑁆𑀲𑀼𑀓𑁆𑀓𑀁 𑀆𑀧𑀚𑁆𑀚𑀦𑁆𑀢𑀻𑀢𑀺 𑀏𑀢𑁆𑀣 𑀯𑀢𑁆𑀣𑀼. 𑀢𑀢𑁆𑀭 𑀳𑀺 𑀣𑁂𑀭𑀻 𑀲𑀸𑀭𑀡𑀻𑀬𑀥𑀫𑁆𑀫𑀧𑀽𑀭𑀺𑀓𑀸 𑀅𑀳𑁄𑀲𑀺.

𑀦𑀢𑁆𑀣𑀺 𑀏𑀢𑁂𑀲𑀁 𑀔𑀡𑁆𑀟𑀦𑁆𑀢𑀺 𑀅𑀔𑀡𑁆𑀟𑀸𑀦𑀺, 𑀢𑀁 𑀧𑀦 𑀦𑁂𑀲𑀁 𑀔𑀡𑁆𑀟𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀉𑀧𑀲𑀫𑁆𑀧𑀦𑁆𑀦𑀲𑀻𑀮𑀸𑀦𑀁 𑀉𑀤𑁆𑀤𑁂𑀲𑀓𑁆𑀓𑀫𑁂𑀦 𑀆𑀤𑀺𑀅𑀦𑁆𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦𑀸𑀳 ‘‘𑀲𑀢𑁆𑀢𑀲𑀽’’𑀢𑀺𑀆𑀤𑀺. 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑀻𑀮𑀸𑀦𑀁 𑀧𑀦 𑀲𑀫𑀸𑀤𑀸𑀦𑀓𑁆𑀓𑀫𑁂𑀦𑀧𑀺 𑀆𑀤𑀺𑀅𑀦𑁆𑀢𑀸 𑀮𑀩𑁆𑀪𑀦𑁆𑀢𑀺. 𑀧𑀭𑀺𑀬𑀦𑁆𑀢𑁂 𑀙𑀺𑀦𑁆𑀦𑀲𑀸𑀝𑀓𑁄 𑀯𑀺𑀬𑀸𑀢𑀺 𑀯𑀢𑁆𑀣𑀦𑁆𑀢𑁂 𑀤𑀲𑀦𑁆𑀢𑁂 𑀯𑀸 𑀙𑀺𑀦𑁆𑀦𑀯𑀢𑁆𑀣𑀁 𑀯𑀺𑀬. 𑀯𑀺𑀲𑀤𑀺𑀲𑀼𑀤𑀸𑀳𑀭𑀡𑀜𑁆𑀘𑁂𑀢𑀁 ‘‘𑀅𑀔𑀡𑁆𑀟𑀸𑀦𑀻’’𑀢𑀺 𑀇𑀫𑀲𑁆𑀲 𑀅𑀥𑀺𑀓𑀢𑀢𑁆𑀢𑀸. 𑀏𑀯𑀁 𑀲𑁂𑀲𑀸𑀦𑀺𑀧𑀺 𑀉𑀤𑀸𑀳𑀭𑀡𑀸𑀦𑀺. 𑀔𑀡𑁆𑀟𑀦𑁆𑀢𑀺 𑀔𑀡𑁆𑀟𑀯𑀦𑁆𑀢𑀁, 𑀔𑀡𑁆𑀟𑀺𑀢𑀁 𑀯𑀸. 𑀙𑀺𑀤𑁆𑀤𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀯𑀺𑀲𑀪𑀸𑀕𑀯𑀡𑁆𑀡𑁂𑀦 𑀕𑀸𑀯𑀻 𑀯𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀲𑀪𑀸𑀕𑀯𑀡𑁆𑀡𑁂𑀦 𑀉𑀧𑀟𑁆𑀠𑀁 𑀢𑀢𑀺𑀬𑀪𑀸𑀕𑀁 𑀯𑀸 𑀲𑀫𑁆𑀪𑀺𑀦𑁆𑀦𑀯𑀡𑁆𑀡𑀁 𑀲𑀩𑀮𑀁, 𑀯𑀺𑀲𑀪𑀸𑀕𑀯𑀡𑁆𑀡𑁂𑀳𑁂𑀯 𑀧𑀦 𑀩𑀺𑀦𑁆𑀤𑀽𑀳𑀺 𑀅𑀦𑁆𑀢𑀭𑀦𑁆𑀢𑀭𑀸 𑀯𑀺𑀫𑀺𑀲𑁆𑀲𑀁 𑀓𑀫𑁆𑀫𑀸𑀲𑀁. 𑀅𑀬𑀁 𑀇𑀫𑁂𑀲𑀁 𑀯𑀺𑀲𑁂𑀲𑁄.

𑀪𑀼𑀚𑀺𑀲𑁆𑀲𑀪𑀸𑀯𑀓𑀭𑀡𑀢𑁄𑀢𑀺 𑀢𑀡𑁆𑀳𑀸𑀤𑀸𑀲𑀩𑁆𑀬𑀢𑁄 𑀫𑁄𑀘𑁂𑀢𑁆𑀯𑀸 𑀪𑀼𑀚𑀺𑀲𑁆𑀲𑀪𑀸𑀯𑀓𑀭𑀡𑀢𑁄. 𑀲𑀻𑀮𑀲𑁆𑀲 𑀘 𑀢𑀡𑁆𑀳𑀸𑀤𑀸𑀲𑀩𑁆𑀬𑀢𑁄 𑀫𑁄𑀘𑀦𑀁 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀪𑀸𑀯𑀸𑀧𑀸𑀤𑀦𑀁, 𑀢𑁂𑀦𑀲𑁆𑀲 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀢𑀸 𑀤𑀲𑁆𑀲𑀺𑀢𑀸. ‘‘𑀪𑀼𑀚𑀺𑀲𑁆𑀲𑀪𑀸𑀯𑀓𑀭𑀡𑀢𑁄’’𑀢𑀺 𑀘 𑀇𑀫𑀺𑀦𑀸 𑀪𑀼𑀚𑀺𑀲𑁆𑀲𑀓𑀭𑀸𑀦𑀺 𑀪𑀼𑀚𑀺𑀲𑁆𑀲𑀸𑀦𑀻𑀢𑀺 𑀉𑀢𑁆𑀢𑀭𑀧𑀤𑀮𑁄𑀧𑁂𑀦𑀸𑀬𑀁 𑀦𑀺𑀤𑁆𑀤𑁂𑀲𑁄𑀢𑀺 𑀤𑀲𑁆𑀲𑁂𑀢𑀺. 𑀬𑀲𑁆𑀫𑀸 𑀘 𑀢𑀁𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑁄 𑀲𑁂𑀭𑀻 𑀲𑀬𑀁𑀯𑀲𑀻 𑀪𑀼𑀚𑀺𑀲𑁆𑀲𑁄 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸𑀧𑀺 𑀪𑀼𑀚𑀺𑀲𑁆𑀲𑀸𑀦𑀺. 𑀲𑀼𑀧𑀭𑀺𑀲𑀼𑀤𑁆𑀥𑀪𑀸𑀯𑁂𑀦 𑀧𑀸𑀲𑀁𑀲𑀢𑁆𑀢𑀸 𑀯𑀺𑀜𑁆𑀜𑀼𑀧𑀲𑀢𑁆𑀣𑀸𑀦𑀺. 𑀅𑀯𑀺𑀜𑁆𑀜𑀽𑀦𑀁 𑀧𑀲𑀁𑀲𑀸𑀬 𑀅𑀧𑁆𑀧𑀫𑀸𑀡𑀪𑀸𑀯𑀢𑁄 𑀯𑀺𑀜𑁆𑀜𑀽𑀕𑀳𑀡𑀁 𑀓𑀢𑀁. 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀅𑀧𑀭𑀸𑀫𑀝𑁆𑀞𑀢𑁆𑀢𑀸𑀢𑀺 ‘‘𑀇𑀫𑀺𑀦𑀸𑀳𑀁 𑀲𑀻𑀮𑁂𑀦 𑀤𑁂𑀯𑁄 𑀯𑀸 𑀪𑀯𑀺𑀲𑁆𑀲𑀸𑀫𑀺 𑀤𑁂𑀯𑀜𑁆𑀜𑀢𑀭𑁄 𑀯𑀸’’𑀢𑀺 𑀢𑀡𑁆𑀳𑀸𑀧𑀭𑀸𑀫𑀸𑀲𑁂𑀦 ‘‘𑀇𑀫𑀺𑀦𑀸𑀳𑀁 𑀲𑀻𑀮𑁂𑀦 𑀤𑁂𑀯𑁄 𑀳𑀼𑀢𑁆𑀯𑀸 𑀢𑀢𑁆𑀣 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑁂𑀦 𑀘 𑀅𑀧𑀭𑀸𑀫𑀝𑁆𑀞𑀢𑁆𑀢𑀸. 𑀅𑀣 𑀯𑀸 ‘‘𑀅𑀬𑀁 𑀢𑁂 𑀲𑀻𑀮𑁂𑀲𑀼 𑀤𑀸𑀲𑁄’’𑀢𑀺 𑀘𑀢𑀽𑀲𑀼 𑀯𑀺𑀧𑀢𑁆𑀢𑀻𑀲𑀼 𑀬𑀁 𑀯𑀸 𑀢𑀁 𑀯𑀸 𑀯𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀇𑀫𑀁 𑀦𑀸𑀫 𑀢𑁆𑀯𑀁 𑀆𑀧𑀦𑁆𑀦𑀧𑀼𑀩𑁆𑀩𑁄’’𑀢𑀺 𑀓𑁂𑀦𑀘𑀺 𑀧𑀭𑀸𑀫𑀝𑁆𑀞𑀼𑀁 𑀅𑀦𑀼𑀤𑁆𑀥𑀁𑀲𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀅𑀧𑀭𑀸𑀫𑀝𑁆𑀞𑀸𑀦𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀲𑀻𑀮𑀁 𑀦𑀸𑀫 𑀅𑀯𑀺𑀧𑁆𑀧𑀝𑀺𑀲𑀸𑀭𑀸𑀤𑀺𑀧𑀸𑀭𑀫𑁆𑀧𑀭𑀺𑀬𑁂𑀦 𑀬𑀸𑀯𑀤𑁂𑀯 𑀲𑀫𑀸𑀥𑀺𑀲𑀫𑁆𑀧𑀸𑀤𑀦𑀢𑁆𑀣𑀦𑁆𑀢𑀺 𑀆𑀳 ‘‘𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸𑀦𑀻’’𑀢𑀺. 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀧𑁆𑀧𑀬𑁄𑀚𑀦𑀸𑀦𑀺 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸𑀦𑀺.

𑀲𑀫𑀸𑀦𑀪𑀸𑀯𑁄 𑀲𑀸𑀫𑀜𑁆𑀜𑀁, 𑀧𑀭𑀺𑀧𑀼𑀡𑁆𑀡𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀪𑀸𑀯𑁂𑀦 𑀫𑀚𑁆𑀛𑁂 𑀪𑀺𑀦𑁆𑀦𑀲𑀼𑀯𑀡𑁆𑀡𑀲𑁆𑀲 𑀯𑀺𑀬 𑀪𑁂𑀤𑀸𑀪𑀸𑀯𑀢𑁄 𑀲𑀻𑀮𑁂𑀦 𑀲𑀸𑀫𑀜𑁆𑀜𑀁 𑀲𑀻𑀮𑀲𑀸𑀫𑀜𑁆𑀜𑀁, 𑀢𑀁 𑀕𑀢𑁄 𑀉𑀧𑀕𑀢𑁄𑀢𑀺 𑀲𑀻𑀮𑀲𑀸𑀫𑀜𑁆𑀜𑀕𑀢𑁄. 𑀢𑁂𑀦𑀸𑀳 ‘‘𑀲𑀫𑀸𑀦𑀪𑀸𑀯𑀽𑀧𑀕𑀢𑀲𑀻𑀮𑁄’’𑀢𑀺, 𑀲𑀻𑀮𑀲𑀫𑁆𑀧𑀢𑁆𑀢𑀺𑀬𑀸 𑀲𑀫𑀸𑀦𑀪𑀸𑀯𑀁 𑀉𑀧𑀕𑀢𑀲𑀻𑀮𑁄 𑀲𑀪𑀸𑀕𑀯𑀼𑀢𑁆𑀢𑀺𑀓𑁄𑀢𑀺 𑀅𑀢𑁆𑀣𑁄. 𑀲𑁄𑀢𑀸𑀧𑀦𑁆𑀦𑀸𑀤𑀻𑀦𑀜𑁆𑀳𑀺 𑀲𑀻𑀮𑀁 𑀲𑀫𑀼𑀤𑁆𑀤𑀦𑁆𑀢𑀭𑁂𑀧𑀺 𑀤𑁂𑀯𑀮𑁄𑀓𑁂𑀧𑀺 𑀯𑀲𑀦𑁆𑀢𑀸𑀦𑀁 𑀅𑀜𑁆𑀜𑁂𑀲𑀁 𑀲𑁄𑀢𑀸𑀧𑀦𑁆𑀦𑀸𑀤𑀻𑀦𑀁 𑀲𑀻𑀮𑁂𑀦 𑀲𑀫𑀸𑀦𑀫𑁂𑀯 𑀳𑁄𑀢𑀺, 𑀦𑀢𑁆𑀣𑀺 𑀫𑀕𑁆𑀕𑀲𑀻𑀮𑁂 𑀦𑀸𑀦𑀢𑁆𑀢𑀁. 𑀓𑀸𑀫𑀜𑁆𑀳𑀺 𑀧𑀼𑀣𑀼𑀚𑁆𑀚𑀦𑀸𑀦𑀫𑁆𑀧𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂 𑀦𑀸𑀦𑀢𑁆𑀢𑀁 𑀦 𑀲𑀺𑀬𑀸, 𑀢𑀁 𑀧𑀦 𑀦 𑀏𑀓𑀦𑁆𑀢𑀺𑀓𑀦𑁆𑀢𑀺 𑀇𑀥 𑀦𑀸𑀥𑀺𑀧𑁆𑀧𑁂𑀢𑀁, 𑀫𑀕𑁆𑀕𑀲𑀻𑀮𑀁 𑀧𑀦 𑀏𑀓𑀦𑁆𑀢𑀺𑀓𑀁 𑀦𑀺𑀬𑀢𑀪𑀸𑀯𑀢𑁄𑀢𑀺 𑀢𑀫𑁂𑀯 𑀲𑀦𑁆𑀥𑀸𑀬 ‘‘𑀬𑀸𑀦𑀺 𑀢𑀸𑀦𑀺 𑀲𑀻𑀮𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀬𑀸𑀬𑀦𑁆𑀢𑀺 𑀬𑀸 𑀅𑀬𑀁 𑀫𑀬𑁆𑀳𑀜𑁆𑀘𑁂𑀯 𑀢𑀼𑀫𑁆𑀳𑀸𑀓𑀜𑁆𑀘 𑀧𑀘𑁆𑀘𑀓𑁆𑀔𑀪𑀽𑀢𑀸. 𑀤𑀺𑀝𑁆𑀞𑀻𑀢𑀺 𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺. 𑀦𑀺𑀤𑁆𑀤𑁄𑀲𑀸𑀢𑀺 𑀦𑀺𑀤𑁆𑀥𑀼𑀢𑀤𑁄𑀲𑀸, 𑀲𑀫𑀼𑀘𑁆𑀙𑀺𑀦𑁆𑀦𑀭𑀸𑀕𑀸𑀤𑀺𑀧𑀸𑀧𑀥𑀫𑁆𑀫𑀸𑀢𑀺 𑀅𑀢𑁆𑀣𑁄. 𑀦𑀺𑀬𑁆𑀬𑀸𑀢𑀻𑀢𑀺 𑀯𑀝𑁆𑀝𑀤𑀼𑀓𑁆𑀔𑀢𑁄 𑀦𑀺𑀲𑁆𑀲𑀭𑀢𑀺 𑀦𑀺𑀕𑀘𑁆𑀙𑀢𑀺. 𑀲𑀬𑀁 𑀦𑀺𑀬𑀦𑁆𑀢𑀻𑀬𑁂𑀯 𑀳𑀺 𑀢𑀁𑀫𑀕𑁆𑀕𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑀁 𑀯𑀝𑁆𑀝𑀤𑀼𑀓𑁆𑀔𑀢𑁄 𑀦𑀺𑀬𑁆𑀬𑀸𑀧𑁂𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀬𑀸 𑀲𑀢𑁆𑀣𑀼 𑀅𑀦𑀼𑀲𑀺𑀝𑁆𑀞𑀺, 𑀢𑀁 𑀓𑀭𑁄𑀢𑀻𑀢𑀺 𑀢𑀓𑁆𑀓𑀭𑁄, 𑀢𑀲𑁆𑀲, 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀦𑀓𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀤𑀺𑀝𑁆𑀞𑀺𑀲𑀸𑀫𑀜𑁆𑀜𑀕𑀢𑁄𑀢𑀺 𑀲𑀘𑁆𑀘𑀲𑀫𑁆𑀧𑀝𑀺𑀯𑁂𑀥𑁂𑀦 𑀲𑀫𑀸𑀦𑀤𑀺𑀝𑁆𑀞𑀺𑀪𑀸𑀯𑀁 𑀉𑀧𑀕𑀢𑁄.

𑀓𑀢𑀺𑀧𑀼𑀘𑁆𑀙𑀸𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀙𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀯𑀸𑀭𑀓𑀣𑀸𑀯𑀡𑁆𑀡𑀦𑀸

𑁨𑁭𑁬. 𑀧𑀞𑀫𑁂𑀦 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑁂𑀦𑀸𑀢𑀺𑀆𑀤𑀺 𑀲𑀩𑁆𑀩𑀁 𑀉𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀧𑀸𑀴𑀺𑀁 𑀅𑀦𑀼𑀲𑀸𑀭𑁂𑀦𑁂𑀯 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁.

𑀲𑀫𑀣𑀪𑁂𑀤𑀁

𑀅𑀥𑀺𑀓𑀭𑀡𑀧𑀭𑀺𑀬𑀸𑀬𑀯𑀸𑀭𑀓𑀣𑀸𑀯𑀡𑁆𑀡𑀦𑀸

𑁨𑁯𑁩. 𑀮𑁄𑀪𑁄 𑀧𑀼𑀩𑁆𑀩𑀗𑁆𑀕𑀫𑁄𑀢𑀺𑀆𑀤𑀻𑀲𑀼 𑀧𑀦 𑀮𑁄𑀪𑀳𑁂𑀢𑀼 𑀯𑀺𑀯𑀤𑀦𑀢𑁄 ‘‘𑀮𑁄𑀪𑁄 𑀧𑀼𑀩𑁆𑀩𑀗𑁆𑀕𑀫𑁄’’𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀞𑀸𑀦𑀸𑀦𑀻𑀢𑀺 𑀓𑀸𑀭𑀡𑀸𑀦𑀺. 𑀢𑀺𑀝𑁆𑀞𑀦𑁆𑀢𑀺 𑀏𑀢𑁆𑀣𑀸𑀢𑀺 𑀞𑀸𑀦𑀁. 𑀓𑁂 𑀢𑀺𑀝𑁆𑀞𑀦𑁆𑀢𑀺? 𑀯𑀺𑀯𑀸𑀤𑀸𑀥𑀺𑀓𑀭𑀡𑀸𑀤𑀬𑁄. 𑀯𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀯𑀢𑁆𑀣𑀼. 𑀪𑀯𑀦𑁆𑀢𑀺 𑀏𑀢𑁆𑀣𑀸𑀢𑀺 𑀪𑀽𑀫𑀺. 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀘𑀺𑀢𑁆𑀢𑀲𑀫𑀗𑁆𑀕𑀺𑀦𑁄 𑀯𑀺𑀯𑀤𑀦𑀢𑁄 ‘‘𑀦𑀯 𑀳𑁂𑀢𑀽’’𑀢𑀺 𑀯𑀼𑀢𑁆𑀢𑀁. 𑀤𑁆𑀯𑀸𑀤𑀲 𑀫𑀽𑀮𑀸𑀦𑀻𑀢𑀺 ‘‘𑀓𑁄𑀥𑀦𑁄 𑀳𑁄𑀢𑀺 𑀉𑀧𑀦𑀸𑀳𑀻’’𑀢𑀺𑀆𑀤𑀻𑀦𑀺 𑀤𑁆𑀯𑀸𑀤𑀲 𑀫𑀽𑀮𑀸𑀦𑀺.

𑁨𑁯𑁪-𑁨𑁯𑁫. 𑀇𑀫𑀸𑀦𑁂𑀯 𑀤𑁆𑀯𑀸𑀤𑀲 𑀓𑀸𑀬𑀯𑀸𑀘𑀸𑀳𑀺 𑀲𑀤𑁆𑀥𑀺𑀁 ‘‘𑀘𑀼𑀤𑁆𑀤𑀲 𑀫𑀽𑀮𑀸𑀦𑀻’’𑀢𑀺 𑀯𑀼𑀢𑁆𑀢𑀸𑀦𑀺. 𑀲𑀢𑁆𑀢 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀞𑀸𑀦𑀸𑀦𑀻𑀢𑀺 𑀏𑀢𑁆𑀣 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀲𑁆𑀲 𑀬𑀸 𑀆𑀧𑀢𑁆𑀢𑀺, 𑀢𑀲𑁆𑀲𑀸 𑀧𑀼𑀩𑁆𑀩𑁂 𑀆𑀧𑀦𑁆𑀦𑀸 𑀆𑀧𑀢𑁆𑀢𑀺𑀬𑁄 𑀞𑀸𑀦𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀦𑀢𑁆𑀣𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀓𑀼𑀲𑀮’’𑀦𑁆𑀢𑀺 𑀯𑀘𑀦𑀢𑁄 𑀆𑀧𑀢𑁆𑀢𑀸𑀥𑀺𑀓𑀭𑀡𑁂 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑀯𑀲𑁂𑀦 𑀙 𑀳𑁂𑀢𑀽 𑀯𑀼𑀢𑁆𑀢𑀸. 𑀓𑀼𑀲𑀮𑀘𑀺𑀢𑁆𑀢𑀁 𑀧𑀦 𑀅𑀗𑁆𑀕𑀁 𑀳𑁄𑀢𑀺, 𑀦 𑀳𑁂𑀢𑀼.

𑁨𑁯𑁬. 𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀺 𑀞𑀸𑀦𑀸𑀦𑀻𑀢𑀺 𑀏𑀢𑁆𑀣 ‘‘𑀏𑀯𑀁 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀇𑀢𑀺𑀓𑀢𑁆𑀢𑀩𑁆𑀩𑀢𑀸𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑀧𑀸𑀴𑀺 𑀓𑀫𑁆𑀫𑀁 𑀦𑀸𑀫, 𑀬𑀣𑀸𑀞𑀺𑀢𑀧𑀸𑀴𑀺𑀯𑀲𑁂𑀦 𑀓𑀭𑁄𑀦𑁆𑀢𑀸𑀦𑀁 𑀓𑀺𑀭𑀺𑀬𑀸 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀦𑀸𑀫. 𑀜𑀢𑁆𑀢𑀺𑀜𑀢𑁆𑀢𑀺𑀤𑀼𑀢𑀺𑀬𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀸𑀦𑀺 𑀜𑀢𑁆𑀢𑀺𑀢𑁄 𑀚𑀸𑀬𑀦𑁆𑀢𑀺, 𑀅𑀧𑀮𑁄𑀓𑀦𑀓𑀫𑁆𑀫𑀁 𑀅𑀧𑀮𑁄𑀓𑀦𑀢𑁄𑀯𑀸𑀢𑀺 𑀆𑀳 ‘‘𑀜𑀢𑁆𑀢𑀺𑀢𑁄 𑀯𑀸 𑀅𑀧𑀮𑁄𑀓𑀦𑀢𑁄 𑀯𑀸’’𑀢𑀺. 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀏𑀓𑁂𑀦 𑀲𑀫𑀣𑁂𑀦 𑀲𑀫𑁆𑀫𑀢𑀺, 𑀲𑀫𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀳𑀺 𑀲𑀫𑁂𑀢𑀩𑁆𑀩𑀢𑁆𑀢𑀸 ‘‘𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀲𑀸𑀥𑀸𑀭𑀡𑀸’’𑀢𑀺 𑀯𑀼𑀢𑁆𑀢𑀁.

𑀢𑀩𑁆𑀪𑀸𑀕𑀺𑀬𑀯𑀸𑀭𑀓𑀣𑀸𑀯𑀡𑁆𑀡𑀦𑀸

𑁨𑁯𑁮. 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀢𑀩𑁆𑀪𑀸𑀕𑀺𑀬𑀸𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀯𑀽𑀧𑀲𑀫𑀢𑁄 𑀢𑀧𑁆𑀧𑀓𑁆𑀔𑀺𑀓𑀸.

𑀲𑀫𑀣𑀸 𑀲𑀫𑀣𑀲𑁆𑀲 𑀲𑀸𑀥𑀸𑀭𑀡𑀯𑀸𑀭𑀓𑀣𑀸𑀯𑀡𑁆𑀡𑀦𑀸

𑁨𑁯𑁯. 𑀏𑀓𑀁 𑀅𑀥𑀺𑀓𑀭𑀡𑀁 𑀲𑀩𑁆𑀩𑁂 𑀲𑀫𑀣𑀸 𑀏𑀓𑀢𑁄 𑀳𑀼𑀢𑁆𑀯𑀸 𑀲𑀫𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺 𑀦 𑀲𑀓𑁆𑀓𑁄𑀦𑁆𑀢𑀻𑀢𑀺 𑀧𑀼𑀘𑁆𑀙𑀦𑁆𑀢𑁄 ‘‘𑀲𑀫𑀣𑀸 𑀲𑀫𑀣𑀲𑁆𑀲 𑀲𑀸𑀥𑀸𑀭𑀡𑀸, 𑀲𑀫𑀣𑀸 𑀲𑀫𑀣𑀲𑁆𑀲 𑀅𑀲𑀸𑀥𑀸𑀭𑀡𑀸’’𑀢𑀺 𑀆𑀳. 𑀬𑁂𑀪𑀼𑀬𑁆𑀬𑀲𑀺𑀓𑀸𑀬 𑀲𑀫𑀦𑀁 𑀲𑀫𑁆𑀫𑀼𑀔𑀸𑀯𑀺𑀦𑀬𑀁 𑀯𑀺𑀦𑀸 𑀦 𑀳𑁄𑀢𑀻𑀢𑀺 𑀆𑀳 ‘‘𑀬𑁂𑀪𑀼𑀬𑁆𑀬𑀲𑀺𑀓𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑀲𑁆𑀲 𑀲𑀸𑀥𑀸𑀭𑀡𑀸’’𑀢𑀺. 𑀲𑀢𑀺𑀯𑀺𑀦𑀬𑀸𑀤𑀻𑀳𑀺 𑀲𑀫𑀦𑀲𑁆𑀲 𑀬𑁂𑀪𑀼𑀬𑁆𑀬𑀲𑀺𑀓𑀸𑀬 𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀆𑀳 ‘‘𑀲𑀢𑀺𑀯𑀺𑀦𑀬𑀲𑁆𑀲…𑀧𑁂… 𑀅𑀲𑀸𑀥𑀸𑀭𑀡𑀸’’𑀢𑀺. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀢𑀩𑁆𑀪𑀸𑀕𑀺𑀬𑀯𑀸𑀭𑁂𑀧𑀺 𑀏𑀲𑁂𑀯 𑀦𑀬𑁄.

𑀯𑀺𑀦𑀬𑀯𑀸𑀭𑀓𑀣𑀸𑀯𑀡𑁆𑀡𑀦𑀸

𑁩𑁦𑁨. 𑀲𑀩𑁆𑀩𑁂𑀲𑀫𑁆𑀧𑀺 𑀲𑀫𑀣𑀸𑀦𑀁 𑀯𑀺𑀦𑀬𑀧𑀭𑀺𑀬𑀸𑀬𑁄 𑀮𑀩𑁆𑀪𑀢𑀻𑀢𑀺 ‘‘𑀯𑀺𑀦𑀬𑁄 𑀲𑀫𑁆𑀫𑀼𑀔𑀸𑀯𑀺𑀦𑀬𑁄’’𑀢𑀺𑀆𑀤𑀺𑀦𑀸 𑀯𑀺𑀦𑀬𑀯𑀸𑀭𑁄 𑀉𑀤𑁆𑀥𑀝𑁄. 𑀲𑀺𑀬𑀸 𑀦 𑀲𑀫𑁆𑀫𑀼𑀔𑀸𑀯𑀺𑀦𑀬𑁄𑀢𑀺 𑀏𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑀁 𑀞𑀧𑁂𑀢𑁆𑀯𑀸 𑀲𑀢𑀺𑀯𑀺𑀦𑀬𑀸𑀤𑀬𑁄 𑀲𑁂𑀲𑀲𑀫𑀣𑀸 𑀅𑀥𑀺𑀧𑁆𑀧𑁂𑀢𑀸. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺.

𑀓𑀼𑀲𑀮𑀯𑀸𑀭𑀓𑀣𑀸𑀯𑀡𑁆𑀡𑀦𑀸

𑁩𑁦𑁩. 𑀲𑀗𑁆𑀖𑀲𑁆𑀲 𑀲𑀫𑁆𑀫𑀼𑀔𑀸 𑀧𑀝𑀺𑀜𑁆𑀜𑀸𑀢𑁂 𑀢𑀁 𑀧𑀝𑀺𑀚𑀸𑀦𑀦𑀁 𑀲𑀗𑁆𑀖𑀲𑀫𑁆𑀫𑀼𑀔𑀢𑀸 𑀦𑀸𑀫. 𑀢𑀲𑁆𑀲 𑀧𑀝𑀺𑀚𑀸𑀦𑀦𑀘𑀺𑀢𑁆𑀢𑀁 𑀲𑀦𑁆𑀥𑀸𑀬 ‘‘𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀓𑀼𑀲𑀮𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀦𑀢𑁆𑀣𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀅𑀓𑀼𑀲𑀮𑁄𑀢𑀺 𑀥𑀫𑁆𑀫𑀯𑀺𑀦𑀬𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸𑀳𑀺 𑀢𑀺𑀯𑀗𑁆𑀕𑀺𑀓𑁄 𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀏𑀢𑁂𑀳𑀺 𑀯𑀺𑀦𑀸 𑀦𑀢𑁆𑀣𑀺. 𑀢𑀢𑁆𑀣 𑀓𑀼𑀲𑀮𑀘𑀺𑀢𑁆𑀢𑁂𑀳𑀺 𑀓𑀭𑀡𑀓𑀸𑀮𑁂 𑀓𑀼𑀲𑀮𑁄, 𑀅𑀭𑀳𑀦𑁆𑀢𑁂𑀳𑀺 𑀓𑀭𑀡𑀓𑀸𑀮𑁂 𑀅𑀩𑁆𑀬𑀸𑀓𑀢𑁄. 𑀏𑀢𑁂𑀲𑀁 𑀲𑀗𑁆𑀖𑀲𑀫𑁆𑀫𑀼𑀔𑀢𑀸𑀤𑀻𑀦𑀁 𑀅𑀓𑀼𑀲𑀮𑀧𑀝𑀺𑀧𑀓𑁆𑀔𑀢𑁆𑀢𑀸 𑀅𑀓𑀼𑀲𑀮𑀲𑁆𑀲 𑀲𑀫𑁆𑀪𑀯𑁄 𑀦𑀢𑁆𑀣𑀺, 𑀢𑀲𑁆𑀫𑀸 ‘‘𑀦𑀢𑁆𑀣𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀅𑀓𑀼𑀲𑀮𑁄’’𑀢𑀺 𑀯𑀼𑀢𑁆𑀢𑀁. ‘‘𑀬𑁂𑀪𑀼𑀬𑁆𑀬𑀲𑀺𑀓𑀸 𑀅𑀥𑀫𑁆𑀫𑀯𑀸𑀤𑀻𑀳𑀺 𑀯𑀽𑀧𑀲𑀫𑀦𑀓𑀸𑀮𑁂, 𑀥𑀫𑁆𑀫𑀯𑀸𑀤𑀻𑀦𑀫𑁆𑀧𑀺 𑀅𑀥𑀫𑁆𑀫𑀯𑀸𑀤𑀺𑀫𑁆𑀳𑀺 𑀲𑀮𑀸𑀓𑀕𑁆𑀕𑀸𑀳𑀸𑀧𑀓𑁂 𑀚𑀸𑀢𑁂 𑀅𑀓𑀼𑀲𑀮𑀸. 𑀲𑀢𑀺𑀯𑀺𑀦𑀬𑁄 𑀅𑀦𑀭𑀳𑀢𑁄 𑀲𑀜𑁆𑀘𑀺𑀘𑁆𑀘 𑀲𑀢𑀺𑀯𑀺𑀦𑀬𑀤𑀸𑀦𑁂 𑀅𑀓𑀼𑀲𑀮𑁄. 𑀅𑀫𑀽𑀴𑁆𑀳𑀯𑀺𑀦𑀬𑁄 𑀅𑀦𑀼𑀫𑁆𑀫𑀢𑁆𑀢𑀓𑀲𑁆𑀲 𑀤𑀸𑀦𑁂, 𑀧𑀝𑀺𑀜𑁆𑀜𑀸𑀢𑀓𑀭𑀡𑀁 𑀫𑀽𑀴𑁆𑀳𑀲𑁆𑀲 𑀅𑀚𑀸𑀦𑀢𑁄 𑀧𑀝𑀺𑀜𑁆𑀜𑀸𑀬 𑀓𑀭𑀡𑁂, 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸 𑀲𑀼𑀤𑁆𑀥𑀲𑁆𑀲 𑀓𑀭𑀡𑁂, 𑀢𑀺𑀡𑀯𑀢𑁆𑀣𑀸𑀭𑀓𑀁 𑀫𑀳𑀸𑀓𑀮𑀳𑁂 𑀲𑀜𑁆𑀘𑀺𑀘𑁆𑀘 𑀓𑀭𑀡𑁂 𑀘 𑀅𑀓𑀼𑀲𑀮𑀁. 𑀲𑀩𑁆𑀩𑀢𑁆𑀣 𑀅𑀭𑀳𑀢𑁄 𑀯𑀲𑁂𑀦𑁂𑀯 𑀅𑀩𑁆𑀬𑀸𑀓𑀢’’𑀦𑁆𑀢𑀺 𑀲𑀩𑁆𑀩𑀫𑁂𑀢𑀁 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁.

𑀲𑀫𑀣𑀯𑀸𑀭𑀯𑀺𑀲𑁆𑀲𑀚𑁆𑀚𑀦𑀸𑀯𑀸𑀭𑀓𑀣𑀸𑀯𑀡𑁆𑀡𑀦𑀸

𑁩𑁦𑁪-𑁩𑁦𑁫. 𑀬𑀢𑁆𑀣 𑀬𑁂𑀪𑀼𑀬𑁆𑀬𑀲𑀺𑀓𑀸 𑀮𑀩𑁆𑀪𑀢𑀺, 𑀢𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀮𑀩𑁆𑀪𑀢𑀻𑀢𑀺𑀆𑀤𑀺 𑀧𑀼𑀘𑁆𑀙𑀸. 𑀬𑀲𑁆𑀫𑀺𑀁 𑀲𑀫𑀬𑁂 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘𑀸𑀢𑀺𑀆𑀤𑀺 𑀢𑀲𑁆𑀲𑀸 𑀯𑀺𑀲𑁆𑀲𑀚𑁆𑀚𑀦𑀁, 𑀬𑀲𑁆𑀫𑀺𑀁 𑀲𑀫𑀬𑁂 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀬𑁂𑀪𑀼𑀬𑁆𑀬𑀲𑀺𑀓𑀸𑀬 𑀘 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁆𑀫𑀢𑀺, 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀢𑁆𑀣 𑀬𑁂𑀪𑀼𑀬𑁆𑀬𑀲𑀺𑀓𑀸 𑀮𑀩𑁆𑀪𑀢𑀺, 𑀢𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀮𑀩𑁆𑀪𑀢𑀻𑀢𑀺 𑀏𑀯𑀁 𑀲𑀩𑁆𑀩𑀢𑁆𑀣 𑀲𑀫𑁆𑀩𑀦𑁆𑀥𑁄. 𑀬𑀢𑁆𑀣 𑀧𑀝𑀺𑀜𑁆𑀜𑀸𑀢𑀓𑀭𑀡𑀁 𑀮𑀩𑁆𑀪𑀢𑀺, 𑀢𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀮𑀩𑁆𑀪𑀢𑀻𑀢𑀺 𑀏𑀢𑁆𑀣 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀩𑀳𑀽 𑀯𑀸 𑀪𑀺𑀓𑁆𑀔𑀽 ‘‘𑀇𑀫𑀁 𑀦𑀸𑀫 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁂 𑀲𑀢𑀺 ‘‘𑀆𑀫𑀸’’𑀢𑀺 𑀧𑀝𑀺𑀚𑀸𑀦𑀦𑁂 𑀤𑁆𑀯𑁂𑀧𑀺 𑀧𑀝𑀺𑀜𑁆𑀜𑀸𑀢𑀓𑀭𑀡𑀲𑀫𑁆𑀫𑀼𑀔𑀸𑀯𑀺𑀦𑀬𑀸 𑀮𑀩𑁆𑀪𑀦𑁆𑀢𑀺. 𑀢𑀢𑁆𑀣 ‘‘𑀲𑀗𑁆𑀖𑀲𑀫𑁆𑀫𑀼𑀔𑀢𑀸 𑀥𑀫𑁆𑀫𑀯𑀺𑀦𑀬𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀲𑀫𑁆𑀫𑀼𑀔𑀸𑀯𑀺𑀦𑀬𑁂 𑀲𑀗𑁆𑀖𑀲𑁆𑀲 𑀧𑀼𑀭𑀢𑁄 𑀧𑀝𑀺𑀜𑁆𑀜𑀸𑀢𑀁 𑀘𑁂, 𑀲𑀗𑁆𑀖𑀲𑀫𑁆𑀫𑀼𑀔𑀢𑀸. 𑀢𑀢𑁆𑀣𑁂𑀯 𑀤𑁂𑀲𑀺𑀢𑀁 𑀘𑁂, 𑀥𑀫𑁆𑀫𑀯𑀺𑀦𑀬𑀲𑀫𑁆𑀫𑀼𑀔𑀢𑀸𑀬𑁄𑀧𑀺 𑀮𑀤𑁆𑀥𑀸 𑀳𑁄𑀦𑁆𑀢𑀺. 𑀅𑀣 𑀯𑀺𑀯𑀤𑀦𑁆𑀢𑀸 𑀅𑀜𑁆𑀜𑀫𑀜𑁆𑀜𑀁 𑀧𑀝𑀺𑀚𑀸𑀦𑀦𑁆𑀢𑀺 𑀘𑁂, 𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸. 𑀢𑀲𑁆𑀲𑁂𑀯 𑀲𑀦𑁆𑀢𑀺𑀓𑁂 𑀤𑁂𑀲𑀺𑀢𑀁 𑀘𑁂, 𑀥𑀫𑁆𑀫𑀯𑀺𑀦𑀬𑀲𑀫𑁆𑀫𑀼𑀔𑀢𑀸𑀬𑁄𑀧𑀺 𑀮𑀤𑁆𑀥𑀸 𑀳𑁄𑀦𑁆𑀢𑀺. 𑀏𑀓𑀲𑁆𑀲𑁂𑀯 𑀯𑀸 𑀏𑀓𑀲𑁆𑀲 𑀲𑀦𑁆𑀢𑀺𑀓𑁂 𑀆𑀧𑀢𑁆𑀢𑀺𑀤𑁂𑀲𑀦𑀓𑀸𑀮𑁂 ‘‘𑀧𑀲𑁆𑀲𑀲𑀺, 𑀧𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 𑀢𑀢𑁆𑀣 𑀥𑀫𑁆𑀫𑀯𑀺𑀦𑀬𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸𑀲𑀜𑁆𑀜𑀺𑀢𑁄 𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀘 𑀧𑀝𑀺𑀜𑁆𑀜𑀸𑀢𑀓𑀭𑀡𑀜𑁆𑀘 𑀮𑀤𑁆𑀥𑀁 𑀳𑁄𑀢𑀺.

𑀲𑀁𑀲𑀝𑁆𑀞𑀯𑀸𑀭𑀓𑀣𑀸𑀯𑀡𑁆𑀡𑀦𑀸

𑁩𑁦𑁬. 𑀅𑀥𑀺𑀓𑀭𑀡𑀸𑀦𑀁 𑀯𑀽𑀧𑀲𑀫𑁄𑀯 𑀲𑀫𑀣𑁄 𑀦𑀸𑀫, 𑀢𑀲𑁆𑀫𑀸 𑀅𑀥𑀺𑀓𑀭𑀡𑁂𑀦 𑀯𑀺𑀦𑀸 𑀲𑀫𑀣𑀸 𑀦𑀢𑁆𑀣𑀻𑀢𑀺 𑀆𑀳 ‘‘𑀫𑀸 𑀳𑁂𑀯𑀦𑁆𑀢𑀺𑀲𑁆𑀲 𑀯𑀘𑀦𑀻𑀬𑁄…𑀧𑁂… 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀦𑀸𑀦𑀸𑀓𑀭𑀡𑀁 𑀧𑀜𑁆𑀜𑀸𑀧𑁂𑀢𑀼’’𑀦𑁆𑀢𑀺.

𑀲𑀫𑀣𑀸𑀥𑀺𑀓𑀭𑀡𑀯𑀸𑀭𑀓𑀣𑀸𑀯𑀡𑁆𑀡𑀦𑀸

𑁩𑁦𑁯-𑁩𑁧𑁦. 𑀲𑀫𑀣𑀸 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀻𑀢𑀺𑀆𑀤𑀺 𑀧𑀼𑀘𑁆𑀙𑀸. 𑀲𑀺𑀬𑀸 𑀲𑀫𑀣𑀸 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀻𑀢𑀺𑀆𑀤𑀺 𑀯𑀺𑀲𑁆𑀲𑀚𑁆𑀚𑀦𑀁. 𑀢𑀢𑁆𑀣 𑀲𑀫𑀣𑀸 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀻𑀢𑀺 𑀏𑀢𑁆𑀣 𑀲𑀫𑁆𑀫𑀦𑁆𑀢𑀻𑀢𑀺 𑀲𑀫𑁆𑀧𑀚𑁆𑀚𑀦𑁆𑀢𑀺, 𑀅𑀥𑀺𑀓𑀭𑀡𑀸 𑀯𑀸 𑀧𑀦 𑀲𑀫𑁆𑀫𑀦𑁆𑀢𑀺 𑀯𑀽𑀧𑀲𑀫𑀁 𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀬𑁂𑀪𑀼𑀬𑁆𑀬𑀲𑀺𑀓𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀲𑀫𑁆𑀫𑀢𑀻𑀢𑀺 𑀏𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀲𑀤𑁆𑀥𑀺𑀁 𑀬𑁂𑀪𑀼𑀬𑁆𑀬𑀲𑀺𑀓𑀸 𑀲𑀫𑁆𑀧𑀚𑁆𑀚𑀢𑀺, 𑀦 𑀲𑀢𑀺𑀯𑀺𑀦𑀬𑀸𑀤𑀻𑀳𑀺 𑀲𑀤𑁆𑀥𑀺𑀁 𑀢𑁂𑀲𑀁 𑀢𑀲𑁆𑀲𑀸 𑀅𑀦𑀼𑀧𑀓𑀸𑀭𑀢𑁆𑀢𑀸𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑁩𑁧𑁧. ‘‘𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀯𑀺𑀯𑀸𑀤𑀸𑀥𑀺𑀓𑀭𑀡𑁂𑀦 𑀲𑀫𑁆𑀫𑀢𑀻’’𑀢𑀺 𑀧𑀸𑀞𑁄. ‘‘𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀦 𑀓𑁂𑀦𑀘𑀺 𑀲𑀫𑁆𑀫𑀢𑀻’’𑀢𑀺 𑀳𑀺 𑀅𑀯𑀲𑀸𑀦𑁂 𑀯𑀼𑀢𑁆𑀢𑀢𑁆𑀢𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀲𑀬𑀁 𑀲𑀫𑀣𑁂𑀦 𑀯𑀸 𑀅𑀥𑀺𑀓𑀭𑀡𑁂𑀦 𑀯𑀸 𑀲𑀫𑁂𑀢𑀩𑁆𑀩𑁄 𑀦 𑀳𑁄𑀢𑀺.

𑁩𑁧𑁩. 𑀯𑀺𑀯𑀸𑀤𑀸𑀥𑀺𑀓𑀭𑀡𑀁…𑀧𑁂… 𑀓𑀺𑀘𑁆𑀘𑀸𑀥𑀺𑀓𑀭𑀡𑁂𑀦 𑀲𑀫𑁆𑀫𑀢𑀻𑀢𑀺 𑀏𑀢𑁆𑀣 ‘‘𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂 …𑀧𑁂… 𑀧𑀞𑀫𑀁 𑀲𑀮𑀸𑀓𑀁 𑀦𑀺𑀓𑁆𑀔𑀺𑀧𑀸𑀫𑀻’’𑀢𑀺 𑀏𑀯𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀓𑀺𑀘𑁆𑀘𑀸𑀥𑀺𑀓𑀭𑀡𑁂𑀦 𑀲𑀫𑁆𑀫𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀫𑀼𑀝𑁆𑀞𑀸𑀧𑀦𑀯𑀸𑀭𑀓𑀣𑀸𑀯𑀡𑁆𑀡𑀦𑀸

𑁩𑁧𑁪. 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀦 𑀓𑀢𑀫𑀁 𑀅𑀥𑀺𑀓𑀭𑀡𑀁 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺 ‘‘𑀦𑀸𑀬𑀁 𑀥𑀫𑁆𑀫𑁄’’𑀢𑀺 𑀯𑀼𑀢𑁆𑀢𑀫𑀢𑁆𑀢𑁂𑀦𑁂𑀯 𑀓𑀺𑀜𑁆𑀘𑀺 𑀅𑀥𑀺𑀓𑀭𑀡𑀁 𑀦 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺 𑀅𑀢𑁆𑀣𑁄.

𑀪𑀚𑀢𑀺𑀯𑀸𑀭𑀓𑀣𑀸𑀯𑀡𑁆𑀡𑀦𑀸

𑁩𑁧𑁮-𑁯. 𑀓𑀢𑀫𑀁 𑀅𑀥𑀺𑀓𑀭𑀡𑀁 𑀧𑀭𑀺𑀬𑀸𑀧𑀦𑁆𑀦𑀦𑁆𑀢𑀺 𑀓𑀢𑀫𑀸𑀥𑀺𑀓𑀭𑀡𑀧𑀭𑀺𑀬𑀸𑀧𑀦𑁆𑀦𑀁, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀪𑀚𑀢𑀻𑀢𑀺 𑀧𑀞𑀫𑀼𑀧𑁆𑀧𑀦𑁆𑀦𑀯𑀺𑀯𑀸𑀤𑀁 𑀧𑀘𑁆𑀙𑀸 𑀉𑀧𑁆𑀧𑀦𑁆𑀦𑁄 𑀪𑀚𑀢𑀺. 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀤𑁆𑀯𑁂 𑀲𑀫𑀣𑁂 𑀪𑀚𑀢𑀻𑀢𑀺 ‘‘𑀫𑀁 𑀯𑀽𑀧𑀲𑀫𑁂𑀢𑀼𑀁 𑀲𑀫𑀢𑁆𑀣𑀸 𑀢𑀼𑀫𑁆𑀳𑁂’’𑀢𑀺 𑀯𑀤𑀦𑁆𑀢𑀁 𑀯𑀺𑀬 𑀪𑀚𑀢𑀺. 𑀤𑁆𑀯𑀻𑀳𑀺 𑀲𑀫𑀣𑁂𑀳𑀺 𑀲𑀗𑁆𑀕𑀳𑀺𑀢𑀦𑁆𑀢𑀺 ‘‘𑀫𑀬𑀁 𑀢𑀁 𑀯𑀽𑀧𑀲𑀫𑁂𑀲𑁆𑀲𑀸𑀫𑀸’’𑀢𑀺 𑀯𑀤𑀦𑁆𑀢𑁂𑀳𑀺 𑀯𑀺𑀬 𑀤𑁆𑀯𑀻𑀳𑀺 𑀲𑀫𑀣𑁂𑀳𑀺 𑀲𑀗𑁆𑀕𑀳𑀺𑀢𑀁.

𑀔𑀦𑁆𑀥𑀓𑀧𑀼𑀘𑁆𑀙𑀸𑀯𑀸𑀭𑁄

𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀯𑀡𑁆𑀡𑀦𑀸

𑁩𑁨𑁦. 𑀦𑀺𑀤𑀸𑀦𑁂𑀦 𑀘 𑀦𑀺𑀤𑁆𑀤𑁂𑀲𑁂𑀦 𑀘 𑀲𑀤𑁆𑀥𑀺𑀦𑁆𑀢𑀺 𑀏𑀢𑁆𑀣 𑀦𑀺𑀤𑀸𑀦𑁂𑀦𑀸𑀢𑀺 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀤𑁂𑀲𑀲𑀗𑁆𑀔𑀸𑀢𑁂𑀦 𑀦𑀺𑀤𑀸𑀦𑁂𑀦. 𑀦𑀺𑀤𑁆𑀤𑁂𑀲𑁂𑀦𑀸𑀢𑀺 𑀧𑀼𑀕𑁆𑀕𑀮𑀸𑀤𑀺𑀦𑀺𑀤𑁆𑀤𑁂𑀲𑁂𑀦. 𑀉𑀪𑀬𑁂𑀦𑀧𑀺 𑀢𑀲𑁆𑀲 𑀢𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀯𑀢𑁆𑀣𑀼 𑀤𑀲𑁆𑀲𑀺𑀢𑀁, 𑀢𑀲𑁆𑀫𑀸 𑀯𑀢𑁆𑀣𑀼𑀦𑀸 𑀲𑀤𑁆𑀥𑀺𑀁 𑀔𑀦𑁆𑀥𑀓𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀉𑀧𑀲𑀫𑁆𑀧𑀤𑀓𑁆𑀔𑀦𑁆𑀥𑀓𑁂. 𑀉𑀢𑁆𑀢𑀫𑀸𑀦𑀺 𑀧𑀤𑀸𑀦𑀺 𑀯𑀼𑀢𑁆𑀢𑀸𑀦𑀻𑀢𑀺 ‘‘𑀦, 𑀪𑀺𑀓𑁆𑀔𑀯𑁂, 𑀊𑀦𑀯𑀻𑀲𑀢𑀺𑀯𑀲𑁆𑀲𑁄 𑀧𑀼𑀕𑁆𑀕𑀮𑁄 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁯𑁯, 𑁧𑁨𑁪) 𑀦𑀬𑁂𑀦 𑀉𑀢𑁆𑀢𑀫𑀧𑀤𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀘𑀫𑁆𑀫𑀲𑀁𑀬𑀼𑀢𑁆𑀢𑁂𑀢𑀺 𑀘𑀫𑁆𑀫𑀓𑁆𑀔𑀦𑁆𑀥𑀓𑁂.

𑀏𑀓𑀼𑀢𑁆𑀢𑀭𑀺𑀓𑀦𑀬𑁄

𑀏𑀓𑀓𑀯𑀸𑀭𑀯𑀡𑁆𑀡𑀦𑀸

𑁩𑁨𑁧. 𑀫𑀽𑀮𑀯𑀺𑀲𑀼𑀤𑁆𑀥𑀺𑀬𑀸 𑀅𑀦𑁆𑀢𑀭𑀸𑀧𑀢𑁆𑀢𑀻𑀢𑀺 𑀅𑀦𑁆𑀢𑀭𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀁 𑀓𑀢𑁆𑀯𑀸 𑀞𑀺𑀢𑁂𑀦 𑀆𑀧𑀦𑁆𑀦𑀸. ‘‘𑀅𑀕𑁆𑀖𑀯𑀺𑀲𑀼𑀤𑁆𑀥𑀺𑀬𑀸 𑀅𑀦𑁆𑀢𑀭𑀸𑀧𑀢𑁆𑀢𑀻𑀢𑀺 𑀲𑀫𑁆𑀩𑀳𑀼𑀮𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀢𑁆𑀯𑀸 𑀢𑀸𑀲𑀼 𑀲𑀩𑁆𑀩𑀘𑀺𑀭𑀧𑀝𑀺𑀘𑁆𑀙𑀦𑁆𑀦𑀯𑀲𑁂𑀦 𑀅𑀕𑁆𑀖𑀲𑀫𑁄𑀥𑀸𑀦𑀁 𑀕𑀳𑁂𑀢𑁆𑀯𑀸 𑀯𑀲𑀦𑁆𑀢𑁂𑀦 𑀆𑀧𑀦𑁆𑀦𑀸𑀧𑀢𑁆𑀢𑀻’’𑀢𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀲𑀉𑀲𑁆𑀲𑀸𑀳𑁂𑀦𑁂𑀯 𑀘𑀺𑀢𑁆𑀢𑁂𑀦𑀸𑀢𑀺 ‘‘𑀧𑀼𑀦𑀧𑀺 𑀆𑀧𑀚𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀲𑀉𑀲𑁆𑀲𑀸𑀳𑁂𑀦𑁂𑀯 𑀘𑀺𑀢𑁆𑀢𑁂𑀦. 𑀪𑀺𑀓𑁆𑀔𑀼𑀦𑀻𑀦𑀁 𑀅𑀝𑁆𑀞𑀯𑀢𑁆𑀣𑀼𑀓𑀸𑀬 𑀯𑀲𑁂𑀦 𑀘𑁂𑀢𑀁 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 ‘‘𑀅𑀝𑁆𑀞𑀫𑁂 𑀯𑀢𑁆𑀣𑀼𑀲𑁆𑀫𑀺𑀁 𑀪𑀺𑀓𑁆𑀔𑀼𑀦𑀺𑀬𑀸 𑀧𑀸𑀭𑀸𑀚𑀺𑀓𑀫𑁂𑀯 𑀳𑁄𑀢𑀻’’𑀢𑀺. ‘‘𑀥𑀫𑁆𑀫𑀺𑀓𑀲𑁆𑀲 𑀧𑀝𑀺𑀲𑁆𑀲𑀯𑀲𑁆𑀲 𑀅𑀲𑀘𑁆𑀘𑀸𑀧𑀦𑁂’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀥𑀫𑁆𑀫𑀺𑀓𑀧𑀝𑀺𑀲𑁆𑀲𑀯𑀲𑁆𑀲 𑀯𑀺𑀲𑀁𑀯𑀸𑀤𑁂 𑀤𑀼𑀓𑁆𑀓𑀝𑀁 𑀦 𑀳𑁄𑀢𑀺. ‘‘𑀢𑀼𑀫𑁆𑀳𑁂 𑀯𑀺𑀩𑁆𑀪𑀫𑀣𑀸’’𑀢𑀺 𑀳𑀺 𑀯𑀼𑀢𑁆𑀢𑁂 𑀲𑀼𑀤𑁆𑀥𑀘𑀺𑀢𑁆𑀢𑁄 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀲𑀘𑁂 𑀦 𑀯𑀺𑀩𑁆𑀪𑀫𑀢𑀺, 𑀅𑀦𑀸𑀧𑀢𑁆𑀢𑀺. 𑀏𑀯𑀁 𑀲𑀩𑁆𑀩𑀢𑁆𑀣. 𑀧𑀜𑁆𑀘𑀤𑀲𑀲𑀼 𑀥𑀫𑁆𑀫𑁂𑀲𑀽𑀢𑀺 ‘‘𑀓𑀸𑀮𑁂𑀦 𑀯𑀓𑁆𑀔𑀸𑀫𑀺, 𑀦𑁄 𑀅𑀓𑀸𑀮𑁂𑀦𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑀜𑁆𑀘𑀤𑀲𑀥𑀫𑁆𑀫𑁂𑀲𑀼. 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀼𑀁 𑀪𑀩𑁆𑀩𑀢𑀸𑀬 𑀪𑀩𑁆𑀩𑀸𑀧𑀢𑁆𑀢𑀺𑀓𑀸.

𑀏𑀓𑀓𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀓𑀯𑀸𑀭𑀯𑀡𑁆𑀡𑀦𑀸

𑁩𑁨𑁨. 𑀤𑀼𑀓𑁂𑀲𑀼 𑀦𑀺𑀤𑀳𑀦𑁂𑀢𑀺 𑀆𑀢𑀧𑁂 𑀅𑀢𑀺𑀘𑀺𑀭𑀁 𑀞𑀧𑁂𑀢𑁆𑀯𑀸 𑀦𑀺𑀤𑀳𑀦𑁂. 𑀯𑀢𑁆𑀣𑀼𑀲𑀪𑀸𑀕𑀁 𑀤𑁂𑀲𑁂𑀦𑁆𑀢𑁄 𑀤𑁂𑀲𑁂𑀦𑁆𑀢𑁄 𑀆𑀧𑀚𑁆𑀚𑀢𑀺, 𑀆𑀧𑀦𑁆𑀦𑀁 𑀆𑀧𑀢𑁆𑀢𑀺𑀁 𑀦 𑀤𑁂𑀲𑁂𑀲𑁆𑀲𑀸𑀫𑀻𑀢𑀺 𑀥𑀼𑀭𑀁 𑀦𑀺𑀓𑁆𑀔𑀺𑀧𑀦𑁆𑀢𑁄 𑀦 𑀤𑁂𑀲𑁂𑀦𑁆𑀢𑁄 𑀆𑀧𑀚𑁆𑀚𑀢𑀺. 𑀭𑁄𑀫𑀚𑀦𑀧𑀤𑁂 𑀚𑀸𑀢𑀁 𑀭𑁄𑀫𑀓𑀁. 𑀧𑀓𑁆𑀓𑀸𑀮𑀓𑀦𑁆𑀢𑀺 𑀬𑀯𑀓𑁆𑀔𑀸𑀭𑀁. 𑀅𑀦𑀼𑀜𑁆𑀜𑀸𑀢𑀮𑁄𑀡𑀢𑁆𑀢𑀸 𑀮𑁄𑀡𑀸𑀦𑀺𑀧𑀺 𑀤𑀼𑀓𑁂𑀲𑀼 𑀯𑀼𑀢𑁆𑀢𑀸𑀦𑀺.

𑀤𑀼𑀓𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀺𑀓𑀯𑀸𑀭𑀯𑀡𑁆𑀡𑀦𑀸

𑁩𑁨𑁩. 𑀢𑀺𑀓𑁂𑀲𑀼 𑀯𑀘𑀻𑀲𑀫𑁆𑀧𑀬𑀼𑀢𑁆𑀢𑀁 𑀓𑀸𑀬𑀓𑀺𑀭𑀺𑀬𑀁 𑀓𑀢𑁆𑀯𑀸𑀢𑀺 𑀓𑀸𑀬𑁂𑀦 𑀦𑀺𑀧𑀘𑁆𑀘𑀓𑀸𑀭𑀁 𑀓𑀢𑁆𑀯𑀸. 𑀫𑀼𑀔𑀸𑀮𑀫𑁆𑀩𑀭𑀓𑀭𑀡𑀸𑀤𑀺𑀪𑁂𑀤𑁄𑀢𑀺 𑀫𑀼𑀔𑀪𑁂𑀭𑀺𑀯𑀸𑀤𑀦𑀸𑀤𑀺𑀧𑁆𑀧𑀪𑁂𑀤𑁄. 𑀬𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀯𑀻𑀢𑀺𑀓𑁆𑀓𑀫𑁂 𑀓𑀸𑀬𑀲𑀫𑀼𑀝𑁆𑀞𑀸𑀦𑀸 𑀆𑀧𑀢𑁆𑀢𑀺𑀬𑁄, 𑀢𑀁 𑀓𑀸𑀬𑀤𑁆𑀯𑀸𑀭𑁂 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀁. 𑀉𑀧𑀖𑀸𑀢𑁂𑀢𑀻𑀢𑀺 𑀯𑀺𑀦𑀸𑀲𑁂𑀢𑀺. 𑀦 𑀆𑀤𑀸𑀢𑀩𑁆𑀩𑀦𑁆𑀢𑀺 ‘‘𑀇𑀫𑀲𑁆𑀫𑀸 𑀯𑀺𑀳𑀸𑀭𑀸 𑀧𑀭𑀫𑁆𑀧𑀺 𑀫𑀸 𑀦𑀺𑀓𑁆𑀔𑀫, 𑀯𑀺𑀦𑀬𑀥𑀭𑀸𑀦𑀁 𑀯𑀸 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙 𑀯𑀺𑀦𑀺𑀘𑁆𑀙𑀬𑀁 𑀤𑀸𑀢𑀼’’𑀦𑁆𑀢𑀺 𑀯𑀼𑀢𑁆𑀢𑁂 𑀢𑀲𑁆𑀲 𑀯𑀘𑀦𑀁 𑀦 𑀕𑀳𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑀅𑀓𑀼𑀲𑀮𑀸𑀦𑀺 𑀘𑁂𑀯 𑀫𑀽𑀮𑀸𑀦𑀺 𑀘𑀸𑀢𑀺 𑀅𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀝𑁆𑀞𑁂𑀦 𑀏𑀓𑀦𑁆𑀢𑀸𑀓𑀼𑀲𑀮𑀪𑀸𑀯𑀢𑁄 𑀅𑀓𑀼𑀲𑀮𑀸𑀦𑀺, 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑀸𑀥𑀦𑀢𑁄 𑀫𑀽𑀮𑀸𑀦𑀺, 𑀦 𑀅𑀓𑀼𑀲𑀮𑀪𑀸𑀯𑀲𑀸𑀥𑀦𑀢𑁄. 𑀦 𑀳𑀺 𑀫𑀽𑀮𑀢𑁄 𑀅𑀓𑀼𑀲𑀮𑀸𑀦𑀁 𑀅𑀓𑀼𑀲𑀮𑀪𑀸𑀯𑁄, 𑀓𑀼𑀲𑀮𑀸𑀤𑀻𑀦𑀁 𑀯𑀸 𑀓𑀼𑀲𑀮𑀸𑀤𑀺𑀪𑀸𑀯𑁄. 𑀢𑀣𑀸 𑀘 𑀲𑀢𑀺 𑀫𑁄𑀫𑀽𑀳𑀘𑀺𑀢𑁆𑀢𑀤𑁆𑀯𑀬𑀫𑁄𑀳𑀲𑁆𑀲 𑀅𑀓𑀼𑀲𑀮𑀪𑀸𑀯𑁄 𑀦 𑀲𑀺𑀬𑀸.

𑀤𑀼𑀝𑁆𑀞𑀼 𑀘𑀭𑀺𑀢𑀸𑀦𑀻𑀢𑀺 𑀧𑀘𑁆𑀘𑀬𑀢𑁄 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀢𑁄 𑀧𑀯𑀢𑁆𑀢𑀺𑀆𑀓𑀸𑀭𑀢𑁄 𑀘 𑀦 𑀲𑀼𑀝𑁆𑀞𑀼 𑀅𑀲𑀫𑁆𑀫𑀸𑀧𑀯𑀢𑁆𑀢𑀺𑀢𑀸𑀦𑀺. 𑀯𑀺𑀭𑀽𑀧𑀸𑀦𑀻𑀢𑀺 𑀩𑀻𑀪𑀘𑁆𑀙𑀸𑀦𑀺 𑀲𑀫𑁆𑀧𑀢𑀺 𑀆𑀬𑀢𑀺𑀜𑁆𑀘 𑀅𑀦𑀺𑀝𑁆𑀞𑀭𑀽𑀧𑀢𑁆𑀢𑀸. 𑀲𑀼𑀝𑁆𑀞𑀼 𑀘𑀭𑀺𑀢𑀸𑀦𑀻𑀢𑀺𑀆𑀤𑀻𑀲𑀼 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀤𑁆𑀯𑁂𑀧𑀺 𑀘𑁂𑀢𑁂 𑀢𑀺𑀓𑀸 𑀧𑀡𑁆𑀡𑀢𑁆𑀢𑀺𑀬𑀸 𑀯𑀸 𑀓𑀫𑁆𑀫𑀧𑀣𑁂𑀳𑀺 𑀯𑀸 𑀓𑀣𑁂𑀢𑀩𑁆𑀩𑀸. 𑀧𑀡𑁆𑀡𑀢𑁆𑀢𑀺𑀬𑀸 𑀢𑀸𑀯 𑀓𑀸𑀬𑀤𑁆𑀯𑀸𑀭𑁂 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀲𑁆𑀲 𑀯𑀻𑀢𑀺𑀓𑁆𑀓𑀫𑁄 𑀓𑀸𑀬𑀤𑀼𑀘𑁆𑀘𑀭𑀺𑀢𑀁, 𑀅𑀯𑀻𑀢𑀺𑀓𑁆𑀓𑀫𑁄 𑀓𑀸𑀬𑀲𑀼𑀘𑀭𑀺𑀢𑀁. 𑀯𑀘𑀻𑀤𑁆𑀯𑀸𑀭𑁂 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀲𑁆𑀲 𑀯𑀻𑀢𑀺𑀓𑁆𑀓𑀫𑁄 𑀯𑀘𑀻𑀤𑀼𑀘𑁆𑀘𑀭𑀺𑀢𑀁, 𑀅𑀯𑀻𑀢𑀺𑀓𑁆𑀓𑀫𑁄 𑀯𑀘𑀻𑀲𑀼𑀘𑀭𑀺𑀢𑀁. 𑀉𑀪𑀬𑀢𑁆𑀣 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀲𑁆𑀲 𑀯𑀻𑀢𑀺𑀓𑁆𑀓𑀫𑁄 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀫𑀦𑁄𑀤𑁆𑀯𑀸𑀭𑁂 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀲𑁆𑀲 𑀅𑀪𑀸𑀯𑀢𑁄. 𑀢𑀬𑀺𑀤𑀁 𑀤𑁆𑀯𑀸𑀭𑀤𑁆𑀯𑀬𑁂 𑀅𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀦𑀸𑀬 𑀆𑀧𑀢𑁆𑀢𑀺𑀬𑀸 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸𑀯𑀼𑀢𑁆𑀢𑀸𑀬 𑀆𑀧𑀢𑁆𑀢𑀺𑀬𑀸 𑀅𑀯𑀻𑀢𑀺𑀓𑁆𑀓𑀫𑁄𑀯 𑀫𑀦𑁄𑀲𑀼𑀘𑀭𑀺𑀢𑀁. 𑀅𑀬𑀁 𑀧𑀡𑁆𑀡𑀢𑁆𑀢𑀺𑀓𑀣𑀸.

𑀧𑀸𑀡𑀸𑀢𑀺𑀧𑀸𑀢𑀸𑀤𑀬𑁄 𑀧𑀦 𑀢𑀺𑀲𑁆𑀲𑁄 𑀘𑁂𑀢𑀦𑀸 𑀓𑀸𑀬𑀤𑁆𑀯𑀸𑀭𑁂 𑀯𑀘𑀻𑀤𑁆𑀯𑀸𑀭𑁂𑀧𑀺 𑀉𑀧𑁆𑀧𑀦𑁆𑀦𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀤𑁆𑀯𑀸𑀭𑀦𑁆𑀢𑀭𑁂 𑀉𑀧𑁆𑀧𑀦𑁆𑀦𑀲𑁆𑀲𑀧𑀺 𑀓𑀫𑁆𑀫𑀲𑁆𑀲 𑀲𑀦𑀸𑀫𑀸𑀧𑀭𑀺𑀘𑁆𑀘𑀸𑀕𑀢𑁄 𑀬𑁂𑀪𑀼𑀬𑁆𑀬𑀯𑀼𑀢𑁆𑀢𑀺𑀬𑀸 𑀢𑀩𑁆𑀩𑀳𑀼𑀮𑀯𑀼𑀢𑁆𑀢𑀺𑀬𑀸 𑀘. 𑀢𑁂𑀦𑀸𑀳𑀼 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑁋

‘‘𑀤𑁆𑀯𑀸𑀭𑁂 𑀘𑀭𑀦𑁆𑀢𑀺 𑀓𑀫𑁆𑀫𑀸𑀦𑀺, 𑀦 𑀤𑁆𑀯𑀸𑀭𑀸 𑀤𑁆𑀯𑀸𑀭𑀘𑀸𑀭𑀺𑀦𑁄;

𑀢𑀲𑁆𑀫𑀸 𑀤𑁆𑀯𑀸𑀭𑁂𑀳𑀺 𑀓𑀫𑁆𑀫𑀸𑀦𑀺, 𑀅𑀜𑁆𑀜𑀫𑀜𑁆𑀜𑀁 𑀯𑀯𑀢𑁆𑀣𑀺𑀢𑀸’’𑀢𑀺. (𑀥. 𑀲. 𑀅𑀝𑁆𑀞. 𑀓𑀸𑀫𑀸𑀯𑀘𑀭𑀓𑀼𑀲𑀮 𑀤𑁆𑀯𑀸𑀭𑀓𑀣𑀸, 𑀓𑀸𑀬𑀓𑀫𑁆𑀫𑀤𑁆𑀯𑀸𑀭);

𑀢𑀣𑀸 𑀘𑀢𑀲𑁆𑀲𑁄 𑀫𑀼𑀲𑀸𑀯𑀸𑀤𑀸𑀤𑀺𑀘𑁂𑀢𑀦𑀸 𑀓𑀸𑀬𑀤𑁆𑀯𑀸𑀭𑁂𑀧𑀺 𑀯𑀘𑀻𑀤𑁆𑀯𑀸𑀭𑁂𑀧𑀺 𑀉𑀧𑁆𑀧𑀦𑁆𑀦𑀸 𑀯𑀘𑀻𑀤𑀼𑀘𑁆𑀘𑀭𑀺𑀢𑀁, 𑀅𑀪𑀺𑀚𑁆𑀛𑀸 𑀩𑁆𑀬𑀸𑀧𑀸𑀤𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺 𑀢𑀬𑁄 𑀫𑀦𑁄𑀓𑀫𑁆𑀫𑀪𑀽𑀢𑀸𑀬 𑀘𑁂𑀢𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑀁, 𑀓𑀸𑀬𑀯𑀘𑀻𑀓𑀫𑁆𑀫𑀪𑀽𑀢𑀸𑀬 𑀧𑀦 𑀘𑁂𑀢𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀅𑀪𑀺𑀚𑁆𑀛𑀸𑀤𑀬𑁄 𑀢𑀁𑀢𑀁𑀧𑀓𑁆𑀔𑀺𑀓𑀸 𑀯𑀸 𑀳𑁄𑀦𑁆𑀢𑀺 𑀅𑀩𑁆𑀩𑁄𑀳𑀸𑀭𑀺𑀓𑀸 𑀯𑀸. 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀯𑀺𑀭𑀫𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀸 𑀢𑀺𑀲𑁆𑀲𑁄 𑀘𑁂𑀢𑀦𑀸𑀧𑀺 𑀯𑀺𑀭𑀢𑀺𑀬𑁄𑀧𑀺 𑀓𑀸𑀬𑀲𑀼𑀘𑀭𑀺𑀢𑀁 𑀓𑀸𑀬𑀺𑀓𑀲𑁆𑀲 𑀯𑀻𑀢𑀺𑀓𑁆𑀓𑀫𑀲𑁆𑀲 𑀅𑀓𑀭𑀡𑀯𑀲𑁂𑀦 𑀧𑀯𑀢𑁆𑀢𑀦𑀢𑁄. 𑀓𑀸𑀬𑁂𑀦 𑀧𑀦 𑀲𑀺𑀓𑁆𑀔𑀸𑀧𑀤𑀸𑀦𑀁 𑀲𑀫𑀸𑀤𑀺𑀬𑀫𑀸𑀦𑁂 𑀲𑀻𑀮𑀲𑁆𑀲 𑀓𑀸𑀬𑀲𑀼𑀘𑀭𑀺𑀢𑀪𑀸𑀯𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀫𑀼𑀲𑀸𑀯𑀸𑀤𑀸𑀤𑀻𑀳𑀺 𑀯𑀺𑀭𑀫𑀦𑁆𑀢𑀲𑁆𑀲 𑀘𑀢𑀲𑁆𑀲𑁄 𑀘𑁂𑀢𑀦𑀸𑀧𑀺 𑀯𑀺𑀭𑀢𑀺𑀬𑁄𑀧𑀺 𑀯𑀘𑀻𑀲𑀼𑀘𑀭𑀺𑀢𑀁 𑀯𑀸𑀘𑀲𑀺𑀓𑀲𑁆𑀲 𑀯𑀻𑀢𑀺𑀓𑁆𑀓𑀫𑀲𑁆𑀲 𑀅𑀓𑀭𑀡𑀯𑀲𑁂𑀦 𑀧𑀯𑀢𑁆𑀢𑀦𑀢𑁄. 𑀅𑀦𑀪𑀺𑀚𑁆𑀛𑀸 𑀅𑀩𑁆𑀬𑀸𑀧𑀸𑀤𑁄 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀢𑀬𑁄 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀫𑀦𑁄𑀲𑀼𑀘𑀭𑀺𑀢𑀦𑁆𑀢𑀺 𑀅𑀬𑀁 𑀓𑀫𑁆𑀫𑀧𑀣𑀓𑀣𑀸.

𑀢𑀺𑀓𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀓𑁆𑀓𑀯𑀸𑀭𑀯𑀡𑁆𑀡𑀦𑀸

𑁩𑁨𑁪. 𑀘𑀢𑀼𑀓𑁆𑀓𑁂𑀲𑀼 𑀅𑀦𑀭𑀺𑀬𑀯𑁄𑀳𑀸𑀭𑀸𑀢𑀺 𑀅𑀦𑀭𑀺𑀬𑀸𑀦𑀁 𑀮𑀸𑀫𑀓𑀸𑀦𑀁 𑀯𑁄𑀳𑀸𑀭𑀸 𑀲𑀁𑀯𑁄𑀳𑀸𑀭𑀸 𑀅𑀪𑀺𑀮𑀸𑀧𑀯𑀸𑀘𑀸. 𑀅𑀭𑀺𑀬𑀯𑁄𑀳𑀸𑀭𑀸𑀢𑀺 𑀅𑀭𑀺𑀬𑀸𑀦𑀁 𑀲𑀧𑁆𑀧𑀼𑀭𑀺𑀲𑀸𑀦𑀁 𑀯𑁄𑀳𑀸𑀭𑀸. 𑀤𑀺𑀝𑁆𑀞𑀯𑀸𑀤𑀺𑀢𑀸𑀢𑀺 ‘‘𑀤𑀺𑀝𑁆𑀞𑀁 𑀫𑀬𑀸’’𑀢𑀺 𑀏𑀯𑀁𑀯𑀸𑀤𑀺𑀢𑀸. 𑀏𑀢𑁆𑀣 𑀘 𑀢𑀁𑀢𑀁𑀲𑀫𑀼𑀝𑁆𑀞𑀸𑀧𑀓𑀘𑁂𑀢𑀦𑀸𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀞𑀫𑀓𑀧𑁆𑀧𑀺𑀓𑁂𑀲𑀼 𑀧𑀞𑀫𑀁 𑀧𑀼𑀭𑀺𑀲𑀮𑀺𑀗𑁆𑀕𑀫𑁂𑀯 𑀉𑀧𑁆𑀧𑀚𑁆𑀚𑀢𑀻𑀢𑀺 𑀆𑀳 ‘‘𑀧𑀞𑀫𑀁 𑀉𑀧𑁆𑀧𑀦𑁆𑀦𑀯𑀲𑁂𑀦𑀸’’𑀢𑀺. 𑀧𑀼𑀭𑀺𑀫𑀁 𑀧𑀼𑀭𑀺𑀲𑀮𑀺𑀗𑁆𑀕𑀁 𑀧𑀚𑀳𑀢𑀻𑀢𑀺 𑀬𑀣𑀸𑀯𑀼𑀢𑁆𑀢𑁂𑀦𑀢𑁆𑀣𑁂𑀦 𑀧𑀼𑀩𑁆𑀩𑀗𑁆𑀕𑀫𑀪𑀸𑀯𑀢𑁄 𑀧𑀼𑀭𑀺𑀫𑀲𑀗𑁆𑀔𑀸𑀢𑀁 𑀧𑀼𑀭𑀺𑀲𑀮𑀺𑀗𑁆𑀕𑀁 𑀚𑀳𑀢𑀺. 𑀲𑀢𑀁 𑀢𑀺𑀁𑀲𑀜𑁆𑀘 𑀲𑀺𑀓𑁆𑀔𑀸𑀧𑀤𑀸𑀦𑀻𑀢𑀺 𑀢𑀺𑀁𑀲𑀸𑀥𑀺𑀓𑀸𑀦𑀺 𑀲𑀢𑀁 𑀲𑀺𑀓𑁆𑀔𑀸𑀧𑀤𑀸𑀦𑀺.

𑀪𑀺𑀓𑁆𑀔𑀼𑀲𑁆𑀲 𑀘 𑀪𑀺𑀓𑁆𑀔𑀼𑀦𑀺𑀬𑀸 𑀘 𑀘𑀢𑀽𑀲𑀼 𑀧𑀸𑀭𑀸𑀚𑀺𑀓𑁂𑀲𑀽𑀢𑀺 𑀲𑀸𑀥𑀸𑀭𑀡𑁂𑀲𑀼𑀬𑁂𑀯 𑀘𑀢𑀽𑀲𑀼 𑀧𑀸𑀭𑀸𑀚𑀺𑀓𑁂𑀲𑀼. 𑀧𑀞𑀫𑁄 𑀧𑀜𑁆𑀳𑁄𑀢𑀺 ‘‘𑀅𑀢𑁆𑀣𑀺 𑀯𑀢𑁆𑀣𑀼𑀦𑀸𑀦𑀢𑁆𑀢𑀢𑀸, 𑀦𑁄 𑀆𑀧𑀢𑁆𑀢𑀺𑀦𑀸𑀦𑀢𑁆𑀢𑀢𑀸’’𑀢𑀺 𑀅𑀬𑀁 𑀧𑀜𑁆𑀳𑁄. ‘‘𑀅𑀢𑁆𑀣𑀺 𑀆𑀧𑀢𑁆𑀢𑀺𑀲𑀪𑀸𑀕𑀢𑀸, 𑀦𑁄 𑀯𑀢𑁆𑀣𑀼𑀲𑀪𑀸𑀕𑀢𑀸’’𑀢𑀺 𑀅𑀬𑀁 𑀇𑀥 𑀤𑀼𑀢𑀺𑀬𑁄 𑀦𑀸𑀫.

𑀅𑀦𑀸𑀧𑀢𑁆𑀢𑀺𑀯𑀲𑁆𑀲𑀘𑁆𑀙𑁂𑀤𑀲𑁆𑀲𑀸𑀢𑀺 𑀦𑀢𑁆𑀣𑀺 𑀏𑀢𑀲𑁆𑀫𑀺𑀁 𑀯𑀲𑁆𑀲𑀘𑁆𑀙𑁂𑀤𑁂 𑀆𑀧𑀢𑁆𑀢𑀻𑀢𑀺 𑀅𑀦𑀸𑀧𑀢𑁆𑀢𑀺𑀯𑀲𑁆𑀲𑀘𑁆𑀙𑁂𑀤𑁄, 𑀢𑀲𑁆𑀲, 𑀅𑀦𑀸𑀧𑀢𑁆𑀢𑀺𑀓𑀲𑁆𑀲 𑀯𑀲𑁆𑀲𑀘𑁆𑀙𑁂𑀤𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀫𑀦𑁆𑀢𑀸𑀪𑀸𑀲𑀸𑀢𑀺 𑀫𑀢𑀺𑀬𑀸 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀪𑀸𑀲𑀦𑀢𑁄 𑀅𑀲𑀫𑁆𑀨𑀧𑁆𑀧𑀮𑀸𑀧𑀯𑀸𑀘𑀸 𑀇𑀥 ‘‘𑀫𑀦𑁆𑀢𑀸𑀪𑀸𑀲𑀸’’𑀢𑀺 𑀯𑀼𑀢𑁆𑀢𑀸.

𑀦𑀯𑀫𑀪𑀺𑀓𑁆𑀔𑀼𑀦𑀺𑀢𑁄 𑀧𑀝𑁆𑀞𑀸𑀬 𑀉𑀧𑀚𑁆𑀛𑀸𑀬𑀸𑀧𑀺 𑀅𑀪𑀺𑀯𑀸𑀤𑀦𑀸𑀭𑀳𑀸 𑀦𑁄 𑀧𑀘𑁆𑀘𑀼𑀝𑁆𑀞𑀸𑀦𑀸𑀭𑀳𑀸𑀢𑀺 𑀬𑀲𑁆𑀫𑀸 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀪𑀢𑁆𑀢𑀕𑁆𑀕𑁂 𑀅𑀝𑁆𑀞𑀦𑁆𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀬𑀣𑀸𑀯𑀼𑀟𑁆𑀠𑀁 𑀅𑀯𑀲𑁂𑀲𑀸𑀦𑀁 𑀬𑀣𑀸𑀕𑀢𑀺𑀓’’𑀦𑁆𑀢𑀺 𑀯𑀤𑀦𑁆𑀢𑁂𑀦 𑀪𑀕𑀯𑀢𑀸 𑀪𑀢𑁆𑀢𑀕𑁆𑀕𑁂 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀅𑀝𑁆𑀞𑀦𑁆𑀦𑀁𑀬𑁂𑀯 𑀪𑀺𑀓𑁆𑀔𑀼𑀦𑀻𑀦𑀁 𑀬𑀣𑀸𑀯𑀼𑀟𑁆𑀠𑀁 𑀅𑀦𑀼𑀜𑁆𑀜𑀸𑀢𑀁, 𑀅𑀯𑀲𑁂𑀲𑀸𑀦𑀁 𑀆𑀕𑀢𑀧𑀝𑀺𑀧𑀸𑀝𑀺𑀬𑀸, 𑀢𑀲𑁆𑀫𑀸 𑀦𑀯𑀫𑀪𑀺𑀓𑁆𑀔𑀼𑀦𑀺𑀢𑁄 𑀧𑀝𑁆𑀞𑀸𑀬 𑀲𑀘𑁂 𑀉𑀧𑀚𑁆𑀛𑀸𑀬𑀸𑀧𑀺 𑀪𑀺𑀓𑁆𑀔𑀼𑀦𑀻 𑀧𑀘𑁆𑀙𑀸 𑀆𑀕𑀘𑁆𑀙𑀢𑀺, 𑀦 𑀧𑀘𑁆𑀘𑀼𑀝𑁆𑀞𑀸𑀦𑀸𑀭𑀳𑀸, 𑀬𑀣𑀸𑀦𑀺𑀲𑀺𑀦𑁆𑀦𑀸𑀳𑀺𑀬𑁂𑀯 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀪𑀺𑀯𑀸𑀤𑁂𑀢𑀩𑁆𑀩𑀢𑁆𑀢𑀸 𑀅𑀪𑀺𑀯𑀸𑀤𑀦𑀸𑀭𑀳𑀸. 𑀆𑀤𑀺𑀢𑁄 𑀦𑀺𑀲𑀺𑀦𑁆𑀦𑀸𑀲𑀼 𑀧𑀦 𑀅𑀝𑁆𑀞𑀲𑀼 𑀬𑀸 𑀅𑀩𑁆𑀪𑀦𑁆𑀢𑀭𑀺𑀫𑀸 𑀅𑀜𑁆𑀜𑀸 𑀯𑀼𑀟𑁆𑀠𑀢𑀭𑀸 𑀆𑀕𑀘𑁆𑀙𑀢𑀺, 𑀲𑀸 𑀅𑀢𑁆𑀢𑀦𑁄 𑀦𑀯𑀓𑀢𑀭𑀁 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀦𑀺𑀲𑀻𑀤𑀺𑀢𑀼𑀁 𑀮𑀪𑀢𑀺. 𑀢𑀲𑁆𑀫𑀸 𑀲𑀸 𑀢𑀸𑀳𑀺 𑀅𑀝𑁆𑀞𑀳𑀺 𑀪𑀺𑀓𑁆𑀔𑀼𑀦𑀻𑀳𑀺 𑀧𑀘𑁆𑀘𑀼𑀝𑁆𑀞𑀸𑀦𑀸𑀭𑀳𑀸. 𑀬𑀸 𑀧𑀦 𑀅𑀝𑁆𑀞𑀳𑀺𑀧𑀺 𑀦𑀯𑀓𑀢𑀭𑀸, 𑀲𑀸 𑀲𑀘𑁂𑀧𑀺 𑀲𑀝𑁆𑀞𑀺𑀯𑀲𑁆𑀲𑀸 𑀳𑁄𑀢𑀺, 𑀆𑀕𑀢𑀧𑀝𑀺𑀧𑀸𑀝𑀺𑀬𑀸𑀯 𑀦𑀺𑀲𑀻𑀤𑀺𑀢𑀼𑀁 𑀮𑀪𑀢𑀺.

𑀇𑀥 𑀦 𑀓𑀧𑁆𑀧𑀦𑁆𑀢𑀻𑀢𑀺 𑀯𑀤𑀦𑁆𑀢𑁄𑀢𑀺 𑀧𑀘𑁆𑀘𑀦𑁆𑀢𑀺𑀫𑀚𑀦𑀧𑀤𑁂𑀲𑀼 𑀞𑀢𑁆𑀯𑀸 ‘‘𑀇𑀥 𑀦 𑀓𑀧𑁆𑀧𑀦𑁆𑀢𑀻’’𑀢𑀺 𑀯𑀤𑀦𑁆𑀢𑁄 𑀯𑀺𑀦𑀬𑀸𑀢𑀺𑀲𑀸𑀭𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺. 𑀓𑀧𑁆𑀧𑀺𑀬𑀜𑁆𑀳𑀺 ‘‘𑀦 𑀓𑀧𑁆𑀧𑀢𑀻’’𑀢𑀺 𑀯𑀤𑀦𑁆𑀢𑁄 𑀧𑀜𑁆𑀜𑀢𑁆𑀢𑀁 𑀲𑀫𑀼𑀘𑁆𑀙𑀺𑀦𑁆𑀤𑀢𑀺 𑀦𑀸𑀫. 𑀇𑀥 𑀓𑀧𑁆𑀧𑀦𑁆𑀢𑀻𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀘𑀢𑀼𑀓𑁆𑀓𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀜𑁆𑀘𑀓𑀯𑀸𑀭𑀯𑀡𑁆𑀡𑀦𑀸

𑁩𑁨𑁫. 𑀧𑀜𑁆𑀘𑀓𑁂𑀲𑀼 ‘‘𑀦𑀺𑀫𑀦𑁆𑀢𑀺𑀢𑁄 𑀲𑀪𑀢𑁆𑀢𑁄 𑀲𑀫𑀸𑀦𑁄 𑀲𑀦𑁆𑀢𑀁 𑀪𑀺𑀓𑁆𑀔𑀼𑀁 𑀅𑀦𑀸𑀧𑀼𑀘𑁆𑀙𑀸’’𑀢𑀺 (𑀧𑀸𑀘𑀺. 𑁨𑁯𑁪-𑁨𑁯𑁭) 𑀯𑀘𑀦𑀢𑁄 𑀅𑀓𑀧𑁆𑀧𑀺𑀬𑀦𑀺𑀫𑀦𑁆𑀢𑀦𑀁 𑀲𑀸𑀤𑀺𑀬𑀦𑁆𑀢𑀲𑁆𑀲𑁂𑀯 𑀅𑀦𑀸𑀫𑀦𑁆𑀢𑀘𑀸𑀭𑁄 𑀦 𑀯𑀝𑁆𑀝𑀢𑀻𑀢𑀺 ‘‘𑀧𑀺𑀡𑁆𑀟𑀧𑀸𑀢𑀺𑀓𑀲𑁆𑀲 𑀓𑀧𑁆𑀧𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀕𑀡𑀪𑁄𑀚𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀪𑁄𑀚𑀦𑀦𑁆𑀢𑀺 ‘‘𑀕𑀺𑀮𑀸𑀦𑀲𑀫𑀬𑁄’’𑀢𑀺𑀆𑀤𑀺𑀦𑀸 𑀆𑀪𑁄𑀕𑀁 𑀓𑀢𑁆𑀯𑀸 𑀪𑁄𑀚𑀦𑀁. 𑀅𑀯𑀺𑀓𑀧𑁆𑀧𑀦𑀸𑀢𑀺 ‘‘𑀫𑀬𑁆𑀳𑀁 𑀪𑀢𑁆𑀢𑀧𑀘𑁆𑀘𑀸𑀲𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑀫𑁆𑀫𑀻’’𑀢𑀺 𑀏𑀯𑀁 𑀅𑀯𑀺𑀓𑀧𑁆𑀧𑀦𑀸.

𑀅𑀬𑀲𑀢𑁄 𑀯𑀸 𑀕𑀭𑀳𑀢𑁄 𑀯𑀸𑀢𑀺 𑀏𑀢𑁆𑀣 𑀧𑀭𑀫𑁆𑀫𑀼𑀔𑀸 𑀅𑀕𑀼𑀡𑀯𑀘𑀦𑀁 𑀅𑀬𑀲𑁄. 𑀲𑀫𑁆𑀫𑀼𑀔𑀸 𑀕𑀭𑀳𑀸. 𑀯𑀺𑀬𑀲𑀢𑀻𑀢𑀺 𑀩𑁆𑀬𑀲𑀦𑀁, 𑀳𑀺𑀢𑀲𑀼𑀔𑀁 𑀔𑀺𑀧𑀢𑀺 𑀯𑀺𑀤𑁆𑀥𑀁𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀜𑀸𑀢𑀻𑀦𑀁 𑀩𑁆𑀬𑀲𑀦𑀁 𑀜𑀸𑀢𑀺𑀩𑁆𑀬𑀲𑀦𑀁, 𑀘𑁄𑀭𑀭𑁄𑀕𑀪𑀬𑀸𑀤𑀻𑀳𑀺 𑀜𑀸𑀢𑀺𑀯𑀺𑀦𑀸𑀲𑁄𑀢𑀺 𑀅𑀢𑁆𑀣𑁄. 𑀪𑁄𑀕𑀸𑀦𑀁 𑀩𑁆𑀬𑀲𑀦𑀁 𑀪𑁄𑀕𑀩𑁆𑀬𑀲𑀦𑀁, 𑀭𑀸𑀚𑀘𑁄𑀭𑀸𑀤𑀺𑀯𑀲𑁂𑀦 𑀪𑁄𑀕𑀯𑀺𑀦𑀸𑀲𑁄𑀢𑀺 𑀅𑀢𑁆𑀣𑁄. 𑀭𑁄𑀕𑁄 𑀏𑀯 𑀩𑁆𑀬𑀲𑀦𑀁 𑀭𑁄𑀕𑀩𑁆𑀬𑀲𑀦𑀁. 𑀭𑁄𑀕𑁄 𑀳𑀺 𑀆𑀭𑁄𑀕𑁆𑀬𑀁 𑀩𑁆𑀬𑀲𑀢𑀺 𑀯𑀺𑀦𑀸𑀲𑁂𑀢𑀻𑀢𑀺 𑀩𑁆𑀬𑀲𑀦𑀁. 𑀲𑀻𑀮𑀲𑁆𑀲 𑀩𑁆𑀬𑀲𑀦𑀁 𑀲𑀻𑀮𑀩𑁆𑀬𑀲𑀦𑀁, 𑀤𑀼𑀲𑁆𑀲𑀻𑀮𑁆𑀬𑀲𑁆𑀲𑁂𑀢𑀁 𑀦𑀸𑀫𑀁. 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀯𑀺𑀦𑀸𑀲𑀬𑀫𑀸𑀦𑀸 𑀉𑀧𑁆𑀧𑀦𑁆𑀦𑀸 𑀤𑀺𑀝𑁆𑀞𑀺𑀬𑁂𑀯 𑀩𑁆𑀬𑀲𑀦𑀁 𑀤𑀺𑀝𑁆𑀞𑀺𑀩𑁆𑀬𑀲𑀦𑀁. 𑀜𑀸𑀢𑀺𑀲𑀫𑁆𑀧𑀤𑀸𑀢𑀺 𑀜𑀸𑀢𑀻𑀦𑀁 𑀲𑀫𑁆𑀧𑀤𑀸 𑀧𑀸𑀭𑀺𑀧𑀽𑀭𑀺 𑀩𑀳𑀼𑀪𑀸𑀯𑁄. 𑀪𑁄𑀕𑀲𑀫𑁆𑀧𑀤𑀸𑀬𑀧𑀺 𑀏𑀲𑁂𑀯 𑀦𑀬𑁄. 𑀆𑀭𑁄𑀕𑁆𑀬𑀲𑁆𑀲 𑀲𑀫𑁆𑀧𑀤𑀸 𑀆𑀭𑁄𑀕𑁆𑀬𑀲𑀫𑁆𑀧𑀤𑀸. 𑀧𑀸𑀭𑀺𑀧𑀽𑀭𑀺 𑀤𑀻𑀖𑀭𑀢𑁆𑀢𑀁 𑀅𑀭𑁄𑀕𑀢𑀸. 𑀲𑀻𑀮𑀤𑀺𑀝𑁆𑀞𑀺𑀲𑀫𑁆𑀧𑀤𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀯𑀢𑁆𑀢𑀁 𑀧𑀭𑀺𑀘𑁆𑀙𑀺𑀦𑁆𑀤𑀻𑀢𑀺 𑀢𑀲𑁆𑀫𑀺𑀁 𑀤𑀺𑀯𑀲𑁂 𑀓𑀸𑀢𑀩𑁆𑀩𑀯𑀢𑁆𑀢𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀅𑀝𑁆𑀞 𑀓𑀧𑁆𑀧𑁂 𑀅𑀦𑀼𑀲𑁆𑀲𑀭𑀻𑀢𑀺𑀆𑀤𑀺𑀦𑀸 𑀢𑀲𑁆𑀫𑀺𑀁 𑀔𑀡𑁂 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀁 𑀦𑀺𑀩𑁆𑀩𑀢𑁆𑀢𑁂𑀲𑀻𑀢𑀺 𑀤𑀻𑀧𑁂𑀢𑀺. 𑀜𑀢𑁆𑀢𑀺𑀬𑀸 𑀓𑀫𑁆𑀫𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸𑀢𑀺 𑀜𑀢𑁆𑀢𑀺𑀬𑀸 𑀞𑀧𑀺𑀢𑀸𑀬 𑀅𑀦𑀼𑀲𑁆𑀲𑀸𑀯𑀦𑀓𑀫𑁆𑀫𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀫𑀦𑁆𑀤𑀢𑁆𑀢𑀸 𑀫𑁄𑀫𑀽𑀳𑀢𑁆𑀢𑀸𑀢𑀺 𑀦𑁂𑀯 𑀲𑀫𑀸𑀤𑀸𑀦𑀁 𑀚𑀸𑀦𑀸𑀢𑀺, 𑀦 𑀆𑀦𑀺𑀲𑀁𑀲𑀁, 𑀅𑀢𑁆𑀢𑀦𑁄 𑀧𑀦 𑀫𑀦𑁆𑀤𑀢𑁆𑀢𑀸 𑀫𑁄𑀫𑀽𑀳𑀢𑁆𑀢𑀸 𑀅𑀜𑁆𑀜𑀸𑀡𑁂𑀦𑁂𑀯 𑀆𑀭𑀜𑁆𑀜𑀺𑀓𑁄 𑀳𑁄𑀢𑀺. 𑀧𑀸𑀧𑀺𑀘𑁆𑀙𑁄 𑀇𑀘𑁆𑀙𑀸𑀧𑀓𑀢𑁄𑀢𑀺 ‘‘𑀅𑀭𑀜𑁆𑀜𑁂 𑀫𑁂 𑀯𑀺𑀳𑀭𑀦𑁆𑀢𑀲𑁆𑀲 ‘𑀅𑀬𑀁 𑀆𑀭𑀜𑁆𑀜𑀺𑀓𑁄’𑀢𑀺 𑀘𑀢𑀼𑀧𑁆𑀧𑀘𑁆𑀘𑀬𑀲𑀓𑁆𑀓𑀸𑀭𑀁 𑀓𑀭𑀺𑀲𑁆𑀲𑀦𑁆𑀢𑀺, ‘𑀅𑀬𑀁 𑀪𑀺𑀓𑁆𑀔𑀼 𑀮𑀚𑁆𑀚𑀻 𑀧𑀯𑀺𑀯𑀺𑀢𑁆𑀢𑁄’𑀢𑀺𑀆𑀤𑀻𑀳𑀺 𑀘 𑀕𑀼𑀡𑁂𑀳𑀺 𑀲𑀫𑁆𑀪𑀸𑀯𑁂𑀲𑁆𑀲𑀦𑁆𑀢𑀻’’𑀢𑀺 𑀏𑀯𑀁 𑀧𑀸𑀧𑀺𑀓𑀸𑀬 𑀇𑀘𑁆𑀙𑀸𑀬 𑀞𑀢𑁆𑀯𑀸 𑀢𑀸𑀬 𑀏𑀯 𑀇𑀘𑁆𑀙𑀸𑀬 𑀅𑀪𑀺𑀪𑀽𑀢𑁄 𑀳𑀼𑀢𑁆𑀯𑀸 𑀆𑀭𑀜𑁆𑀜𑀺𑀓𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀅𑀭𑀜𑁆𑀜𑀯𑀸𑀲𑁂𑀦 𑀧𑀘𑁆𑀘𑀬𑀮𑀸𑀪𑀁 𑀧𑀢𑁆𑀣𑀬𑀫𑀸𑀦𑁄’’𑀢𑀺. 𑀉𑀫𑁆𑀫𑀸𑀤𑀯𑀲𑁂𑀦 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀯𑀺𑀳𑀭𑀦𑁆𑀢𑁄 𑀉𑀫𑁆𑀫𑀸𑀤𑀸 𑀘𑀺𑀢𑁆𑀢𑀓𑁆𑀔𑁂𑀧𑀸 𑀆𑀭𑀜𑁆𑀜𑀺𑀓𑁄 𑀦𑀸𑀫 𑀳𑁄𑀢𑀺. 𑀯𑀡𑁆𑀡𑀺𑀢𑀦𑁆𑀢𑀺 𑀇𑀤𑀁 𑀆𑀭𑀜𑁆𑀜𑀺𑀓𑀗𑁆𑀕𑀁 𑀦𑀸𑀫 𑀩𑀼𑀤𑁆𑀥𑁂𑀳𑀺 𑀩𑀼𑀤𑁆𑀥𑀲𑀸𑀯𑀓𑁂𑀳𑀺 𑀘 𑀯𑀡𑁆𑀡𑀺𑀢𑀁 𑀧𑀲𑀢𑁆𑀣𑀦𑁆𑀢𑀺 𑀆𑀭𑀜𑁆𑀜𑀺𑀓𑁄 𑀳𑁄𑀢𑀺.

𑀧𑀜𑁆𑀘𑀓𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀙𑀓𑁆𑀓𑀯𑀸𑀭𑀯𑀡𑁆𑀡𑀦𑀸

𑁩𑁨𑁬. 𑀙𑀓𑁆𑀓𑁂𑀲𑀼 𑀙𑀩𑁆𑀩𑀲𑁆𑀲𑀧𑀭𑀫𑀢𑀸 𑀥𑀸𑀭𑁂𑀢𑀩𑁆𑀩𑀦𑁆𑀢𑀺 𑀧𑀤𑀪𑀸𑀚𑀦𑀁 𑀤𑀲𑁆𑀲𑀺𑀢𑀁. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀙𑀓𑁆𑀓𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀢𑁆𑀢𑀓𑀯𑀸𑀭𑀯𑀡𑁆𑀡𑀦𑀸

𑁩𑁨𑁭. 𑀲𑀢𑁆𑀢𑀓𑁂𑀲𑀼 𑀙𑀓𑁆𑀓𑁂 𑀯𑀼𑀢𑁆𑀢𑀸𑀦𑀺𑀬𑁂𑀯 𑀲𑀢𑁆𑀢𑀓𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀸𑀦𑀻𑀢𑀺 𑀙𑀓𑁆𑀓𑁂 𑀯𑀼𑀢𑁆𑀢𑀘𑀼𑀤𑁆𑀤𑀲𑀧𑀭𑀫𑀸𑀦𑀺 𑀤𑁆𑀯𑀺𑀥𑀸 𑀓𑀢𑁆𑀯𑀸 𑀤𑁆𑀯𑀺𑀦𑁆𑀦𑀁 𑀲𑀢𑁆𑀢𑀓𑀸𑀦𑀁 𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀻𑀢𑀺 𑀆𑀧𑀢𑁆𑀢𑀺𑀁𑀬𑁂𑀯 ‘‘𑀆𑀧𑀢𑁆𑀢𑀻’’𑀢𑀺 𑀚𑀸𑀦𑀸𑀢𑀺. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀆𑀪𑀺𑀘𑁂𑀢𑀲𑀺𑀓𑀸𑀦𑀦𑁆𑀢𑀺 𑀏𑀢𑁆𑀣 (𑀫. 𑀦𑀺. 𑀅𑀝𑁆𑀞. 𑁧.𑁬𑁬) 𑀅𑀪𑀺𑀘𑁂𑀢𑁄𑀢𑀺 𑀧𑀸𑀓𑀢𑀺𑀓𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑁂𑀳𑀺 𑀲𑀼𑀦𑁆𑀤𑀭𑀢𑀸𑀬 𑀧𑀝𑀺𑀧𑀓𑁆𑀔𑀢𑁄 𑀯𑀺𑀲𑀼𑀤𑁆𑀥𑀢𑁆𑀢𑀸 𑀘 𑀅𑀪𑀺𑀓𑁆𑀓𑀦𑁆𑀢𑀁 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑀁 𑀯𑀼𑀘𑁆𑀘𑀢𑀺, 𑀉𑀧𑀘𑀸𑀭𑀚𑁆𑀛𑀸𑀦𑀘𑀺𑀢𑁆𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀪𑀺𑀘𑁂𑀢𑀲𑀺 𑀚𑀸𑀢𑀸𑀦𑀺 𑀆𑀪𑀺𑀘𑁂𑀢𑀲𑀺𑀓𑀸𑀦𑀺, 𑀅𑀪𑀺𑀘𑁂𑀢𑁄𑀲𑀦𑁆𑀦𑀺𑀲𑁆𑀲𑀺𑀢𑀸𑀦𑀻𑀢𑀺 𑀯𑀸 𑀆𑀪𑀺𑀘𑁂𑀢𑀲𑀺𑀓𑀸𑀦𑀺. 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑁂 𑀲𑀼𑀔𑀯𑀺𑀳𑀸𑀭𑀸𑀦𑀁. 𑀤𑀺𑀝𑁆𑀞𑀥𑀫𑁆𑀫𑁄𑀢𑀺 𑀧𑀘𑁆𑀘𑀓𑁆𑀔𑁄 𑀅𑀢𑁆𑀢𑀪𑀸𑀯𑁄 𑀯𑀼𑀘𑁆𑀘𑀢𑀺, 𑀢𑀢𑁆𑀣 𑀲𑀼𑀔𑀯𑀺𑀳𑀸𑀭𑀪𑀽𑀢𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀸𑀦𑀺 𑀳𑀺 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 𑀛𑀸𑀬𑀺𑀦𑁄 𑀇𑀫𑀲𑁆𑀫𑀺𑀜𑁆𑀜𑁂𑀯 𑀅𑀢𑁆𑀢𑀪𑀸𑀯𑁂 𑀅𑀲𑀁𑀓𑀺𑀮𑀺𑀝𑁆𑀞𑀁 𑀦𑁂𑀓𑁆𑀔𑀫𑁆𑀫𑀲𑀼𑀔𑀁 𑀯𑀺𑀦𑁆𑀤𑀦𑁆𑀢𑀺, 𑀢𑀲𑁆𑀫𑀸 ‘‘𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀦𑀺𑀓𑀸𑀫𑀮𑀸𑀪𑀻𑀢𑀺 𑀦𑀺𑀓𑀸𑀫𑁂𑀦 𑀮𑀸𑀪𑀻, 𑀅𑀢𑁆𑀢𑀦𑁄 𑀇𑀘𑁆𑀙𑀸𑀯𑀲𑁂𑀦 𑀮𑀸𑀪𑀻, 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀲𑀫𑀸𑀧𑀚𑁆𑀚𑀺𑀢𑀼𑀁 𑀲𑀫𑀢𑁆𑀣𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀓𑀺𑀘𑁆𑀙𑀮𑀸𑀪𑀻𑀢𑀺 𑀲𑀼𑀔𑁂𑀦𑁂𑀯 𑀧𑀘𑁆𑀘𑀦𑀻𑀓𑀥𑀫𑁆𑀫𑁂 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀲𑀫𑀸𑀧𑀚𑁆𑀚𑀺𑀢𑀼𑀁 𑀲𑀫𑀢𑁆𑀣𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀓𑀲𑀺𑀭𑀮𑀸𑀪𑀻𑀢𑀺 𑀅𑀓𑀲𑀺𑀭𑀸𑀦𑀁 𑀮𑀸𑀪𑀻 𑀯𑀺𑀧𑀼𑀮𑀸𑀦𑀁, 𑀬𑀣𑀸𑀧𑀭𑀺𑀘𑁆𑀙𑁂𑀤𑁂𑀦𑁂𑀯 𑀯𑀼𑀝𑁆𑀞𑀸𑀢𑀼𑀁 𑀲𑀫𑀢𑁆𑀣𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀓𑀘𑁆𑀘𑁄 𑀳𑀺 𑀮𑀸𑀪𑀻𑀬𑁂𑀯 𑀳𑁄𑀢𑀺, 𑀦 𑀧𑀦 𑀲𑀓𑁆𑀓𑁄𑀢𑀺 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀲𑀫𑀸𑀧𑀚𑁆𑀚𑀺𑀢𑀼𑀁. 𑀏𑀓𑀘𑁆𑀘𑁄 𑀲𑀓𑁆𑀓𑁄𑀢𑀺 𑀢𑀣𑀸 𑀲𑀫𑀸𑀧𑀚𑁆𑀚𑀺𑀢𑀼𑀁, 𑀧𑀸𑀭𑀺𑀧𑀦𑁆𑀣𑀺𑀓𑁂 𑀧𑀦 𑀓𑀺𑀘𑁆𑀙𑁂𑀦 𑀯𑀺𑀓𑁆𑀔𑀫𑁆𑀪𑁂𑀢𑀺. 𑀏𑀓𑀘𑁆𑀘𑁄 𑀢𑀣𑀸 𑀘 𑀲𑀫𑀸𑀧𑀚𑁆𑀚𑀢𑀺, 𑀧𑀸𑀭𑀺𑀧𑀦𑁆𑀣𑀺𑀓𑁂 𑀘 𑀅𑀓𑀺𑀘𑁆𑀙𑁂𑀦𑁂𑀯 𑀯𑀺𑀓𑁆𑀔𑀫𑁆𑀪𑁂𑀢𑀺, 𑀦 𑀲𑀓𑁆𑀓𑁄𑀢𑀺 𑀓𑀸𑀮𑀫𑀸𑀦𑀦𑀸𑀴𑀺𑀓𑀬𑀦𑁆𑀢𑀁 𑀯𑀺𑀬 𑀬𑀣𑀸𑀧𑀭𑀺𑀘𑁆𑀙𑁂𑀤𑁂𑀬𑁂𑀯 𑀯𑀼𑀝𑁆𑀞𑀸𑀢𑀼𑀁.

𑀆𑀲𑀯𑀸𑀦𑀁 𑀔𑀬𑀸𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀩𑁆𑀩𑀓𑀺𑀮𑁂𑀲𑀸𑀦𑀁 𑀔𑀬𑀸. 𑀅𑀦𑀸𑀲𑀯𑀦𑁆𑀢𑀺 𑀆𑀲𑀯𑀯𑀺𑀭𑀳𑀺𑀢𑀁. 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀏𑀢𑁆𑀣 𑀘𑁂𑀢𑁄-𑀯𑀘𑀦𑁂𑀦 𑀅𑀭𑀳𑀢𑁆𑀢𑀨𑀮𑀲𑀫𑁆𑀧𑀬𑀼𑀢𑁆𑀢𑁄 𑀲𑀫𑀸𑀥𑀺, 𑀧𑀜𑁆𑀜𑀸-𑀯𑀘𑀦𑁂𑀦 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀘 𑀧𑀜𑁆𑀜𑀸 𑀯𑀼𑀢𑁆𑀢𑀸. 𑀢𑀢𑁆𑀣 𑀘 𑀲𑀫𑀸𑀥𑀺 𑀭𑀸𑀕𑀢𑁄 𑀯𑀺𑀫𑀼𑀢𑁆𑀢𑀢𑁆𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀧𑀜𑁆𑀜𑀸 𑀅𑀯𑀺𑀚𑁆𑀚𑀸𑀬 𑀯𑀺𑀫𑀼𑀢𑁆𑀢𑀢𑁆𑀢𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀬𑁄 𑀳𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀲𑀫𑀸𑀥𑀺, 𑀢𑀤𑀲𑁆𑀲 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 (𑀲𑀁. 𑀦𑀺. 𑁫.𑁫𑁨𑁦). 𑀬𑀸 𑀳𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀜𑁆𑀜𑀸, 𑀢𑀤𑀲𑁆𑀲 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 (𑀲𑀁. 𑀦𑀺. 𑁫.𑁫𑁧𑁬). 𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀻’’𑀢𑀺 (𑀅. 𑀦𑀺. 𑁨.𑁩𑁨). 𑀅𑀧𑀺𑀘𑁂𑀢𑁆𑀣 𑀲𑀫𑀣𑀨𑀮𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀯𑀺𑀧𑀲𑁆𑀲𑀦𑀸𑀨𑀮𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺. 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂. 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸𑀢𑀺 𑀅𑀢𑁆𑀢𑀦𑀸𑀬𑁂𑀯 𑀧𑀜𑁆𑀜𑀸𑀬 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸, 𑀅𑀧𑀭𑀧𑁆𑀧𑀘𑁆𑀘𑀬𑁂𑀦 𑀜𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀼𑀢𑀫𑀬𑀜𑀸𑀡𑀸𑀤𑀺𑀦𑀸 𑀯𑀺𑀬 𑀧𑀭𑀧𑁆𑀧𑀘𑁆𑀘𑀬𑀢𑀁 𑀦𑀬𑀕𑁆𑀕𑀸𑀳𑀜𑁆𑀘 𑀫𑀼𑀜𑁆𑀘𑀺𑀢𑁆𑀯𑀸 𑀧𑀭𑀢𑁄𑀖𑁄𑀲𑀸𑀦𑀼𑀕𑀢𑀪𑀸𑀯𑀦𑀸𑀥𑀺𑀕𑀫𑀪𑀽𑀢𑀸𑀬 𑀅𑀢𑁆𑀢𑀦𑁄𑀬𑁂𑀯 𑀧𑀜𑁆𑀜𑀸𑀬 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸, 𑀦 𑀲𑀬𑀫𑁆𑀪𑀽𑀜𑀸𑀡𑀪𑀽𑀢𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻𑀢𑀺 𑀧𑀸𑀧𑀼𑀡𑀺𑀢𑁆𑀯𑀸 𑀲𑀫𑁆𑀧𑀸𑀤𑁂𑀢𑁆𑀯𑀸 𑀯𑀺𑀳𑀭𑀢𑀺.

𑀲𑀢𑁆𑀢𑀓𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀝𑁆𑀞𑀓𑀯𑀸𑀭𑀯𑀡𑁆𑀡𑀦𑀸

𑁩𑁨𑁮. 𑀅𑀝𑁆𑀞𑀓𑁂𑀲𑀼 𑀅𑀝𑁆𑀞𑀸𑀦𑀺𑀲𑀁𑀲𑁂 𑀲𑀫𑁆𑀧𑀲𑁆𑀲𑀫𑀸𑀦𑁂𑀦𑀸𑀢𑀺 𑁋

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀳𑁄𑀢𑀺, 𑀲𑁄 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺𑀤𑀺𑀝𑁆𑀞𑀺 𑀳𑁄𑀢𑀺, 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀺𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀺, 𑀢𑁂 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀢𑀁 𑀪𑀺𑀓𑁆𑀔𑀼𑀁 𑀏𑀯𑀁 𑀚𑀸𑀦𑀦𑁆𑀢𑀺 ‘𑀅𑀬𑀁 𑀔𑁄 𑀆𑀬𑀲𑁆𑀫𑀸 𑀩𑀳𑀼𑀲𑁆𑀲𑀼𑀢𑁄 𑀆𑀕𑀢𑀸𑀕𑀫𑁄 𑀥𑀫𑁆𑀫𑀥𑀭𑁄 𑀯𑀺𑀦𑀬𑀥𑀭𑁄 𑀫𑀸𑀢𑀺𑀓𑀸𑀥𑀭𑁄 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀫𑁂𑀥𑀸𑀯𑀻 𑀮𑀚𑁆𑀚𑀻 𑀓𑀼𑀓𑁆𑀓𑀼𑀘𑁆𑀘𑀓𑁄 𑀲𑀺𑀓𑁆𑀔𑀸𑀓𑀸𑀫𑁄, 𑀲𑀘𑁂 𑀫𑀬𑀁 𑀇𑀫𑀁 𑀪𑀺𑀓𑁆𑀔𑀼𑀁 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀧𑀺𑀲𑁆𑀲𑀸𑀫, 𑀦 𑀫𑀬𑀁 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀸𑀫, 𑀯𑀺𑀦𑀸 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀸𑀫, 𑀪𑀯𑀺𑀲𑁆𑀲𑀢𑀺 𑀲𑀗𑁆𑀖𑀲𑁆𑀲 𑀢𑀢𑁄𑀦𑀺𑀤𑀸𑀦𑀁 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀲𑀗𑁆𑀖𑀪𑁂𑀤𑁄 𑀲𑀗𑁆𑀖𑀭𑀸𑀚𑀺 𑀲𑀗𑁆𑀖𑀯𑀯𑀢𑁆𑀣𑀸𑀦𑀁 𑀲𑀗𑁆𑀖𑀦𑀸𑀦𑀸𑀓𑀭𑀡’𑀦𑁆𑀢𑀺, 𑀪𑁂𑀤𑀕𑀭𑀼𑀓𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀦 𑀲𑁄 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀧𑀺𑀢𑀩𑁆𑀩𑁄’’𑀢𑀺 (𑀫𑀳𑀸𑀯. 𑁪𑁫𑁩) 𑁋

𑀆𑀤𑀺𑀦𑀸 𑀯𑀼𑀢𑁆𑀢𑀅𑀝𑁆𑀞𑀸𑀦𑀺𑀲𑀁𑀲𑁂 𑀲𑀫𑁆𑀧𑀲𑁆𑀲𑀫𑀸𑀦𑁂𑀦. 𑀢𑁂𑀦 𑀳𑀺 𑀲𑀤𑁆𑀥𑀺𑀁 𑀉𑀧𑁄𑀲𑀣𑀸𑀤𑀺𑀅𑀓𑀭𑀡𑀁 𑀆𑀤𑀻𑀦𑀯𑁄 𑀪𑁂𑀤𑀸𑀬 𑀲𑀁𑀯𑀢𑁆𑀢𑀦𑀢𑁄, 𑀓𑀭𑀡𑀁 𑀆𑀦𑀺𑀲𑀁𑀲𑁄 𑀲𑀸𑀫𑀕𑁆𑀕𑀺𑀬𑀸 𑀲𑀁𑀯𑀢𑁆𑀢𑀦𑀢𑁄. 𑀢𑀲𑁆𑀫𑀸 𑀏𑀢𑁂 𑀅𑀝𑁆𑀞𑀸𑀦𑀺𑀲𑀁𑀲𑁂 𑀲𑀫𑁆𑀧𑀲𑁆𑀲𑀫𑀸𑀦𑁂𑀦 𑀦 𑀲𑁄 𑀪𑀺𑀓𑁆𑀔𑀼 𑀉𑀓𑁆𑀔𑀺𑀧𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄.

𑀤𑀼𑀢𑀺𑀬𑀅𑀝𑁆𑀞𑀓𑁂𑀧𑀺 𑀅𑀝𑁆𑀞𑀸𑀦𑀺𑀲𑀁𑀲𑁂 𑀲𑀫𑁆𑀧𑀲𑁆𑀲𑀫𑀸𑀦𑁂𑀦𑀸𑀢𑀺 𑁋

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀳𑁄𑀢𑀺, 𑀲𑁄 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺𑀤𑀺𑀝𑁆𑀞𑀺 𑀳𑁄𑀢𑀺, 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀺𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀺, 𑀲𑁄 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑁂 𑀪𑀺𑀓𑁆𑀔𑀽 𑀏𑀯𑀁 𑀚𑀸𑀦𑀸𑀢𑀺 ‘𑀇𑀫𑁂 𑀔𑁄 𑀆𑀬𑀲𑁆𑀫𑀦𑁆𑀢𑁄 𑀩𑀳𑀼𑀲𑁆𑀲𑀼𑀢𑀸 𑀆𑀕𑀢𑀸𑀕𑀫𑀸 𑀥𑀫𑁆𑀫𑀥𑀭𑀸 𑀯𑀺𑀦𑀬𑀥𑀭𑀸 𑀫𑀸𑀢𑀺𑀓𑀸𑀥𑀭𑀸 𑀧𑀡𑁆𑀟𑀺𑀢𑀸 𑀩𑁆𑀬𑀢𑁆𑀢𑀸 𑀫𑁂𑀥𑀸𑀯𑀺𑀦𑁄 𑀮𑀚𑁆𑀚𑀺𑀦𑁄 𑀓𑀼𑀓𑁆𑀓𑀼𑀘𑁆𑀘𑀓𑀸 𑀲𑀺𑀓𑁆𑀔𑀸𑀓𑀸𑀫𑀸, 𑀦𑀸𑀮𑀁 𑀫𑀫𑀁 𑀯𑀸 𑀓𑀸𑀭𑀡𑀸 𑀅𑀜𑁆𑀜𑁂𑀲𑀁 𑀯𑀸 𑀓𑀸𑀭𑀡𑀸 𑀙𑀦𑁆𑀤𑀸 𑀤𑁄𑀲𑀸 𑀫𑁄𑀳𑀸 𑀪𑀬𑀸 𑀅𑀕𑀢𑀺𑀁 𑀕𑀦𑁆𑀢𑀼𑀁, 𑀲𑀘𑁂 𑀫𑀁 𑀇𑀫𑁂 𑀪𑀺𑀓𑁆𑀔𑀽 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀧𑀺𑀲𑁆𑀲𑀦𑁆𑀢𑀺, 𑀦 𑀫𑀬𑀸 𑀲𑀤𑁆𑀥𑀺𑀁 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀯𑀺𑀦𑀸 𑀫𑀬𑀸 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀪𑀯𑀺𑀲𑁆𑀲𑀢𑀺 𑀲𑀗𑁆𑀖𑀲𑁆𑀲 𑀢𑀢𑁄𑀦𑀺𑀤𑀸𑀦𑀁 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀲𑀗𑁆𑀖𑀪𑁂𑀤𑁄 𑀲𑀗𑁆𑀖𑀭𑀸𑀚𑀺 𑀲𑀗𑁆𑀖𑀯𑀯𑀢𑁆𑀣𑀸𑀦𑀁 𑀲𑀗𑁆𑀖𑀦𑀸𑀦𑀸𑀓𑀭𑀡’𑀦𑁆𑀢𑀺, 𑀪𑁂𑀤𑀕𑀭𑀼𑀓𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀧𑀭𑁂𑀲𑀫𑁆𑀧𑀺 𑀲𑀤𑁆𑀥𑀸𑀬 𑀲𑀸 𑀆𑀧𑀢𑁆𑀢𑀺 𑀤𑁂𑀲𑁂𑀢𑀩𑁆𑀩𑀸’’𑀢𑀺 (𑀫𑀳𑀸𑀯. 𑁪𑁫𑁩) 𑁋

𑀆𑀤𑀺𑀦𑀸 𑀯𑀼𑀢𑁆𑀢𑀅𑀝𑁆𑀞𑀸𑀦𑀺𑀲𑀁𑀲𑁂 𑀲𑀫𑁆𑀧𑀲𑁆𑀲𑀫𑀸𑀦𑁂𑀦𑀸𑀢𑀺 𑀅𑀢𑁆𑀣𑁄.

𑀧𑀸𑀴𑀺𑀬𑀁 𑀆𑀕𑀢𑁂𑀳𑀺 𑀲𑀢𑁆𑀢𑀳𑀻𑀢𑀺 ‘‘𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 ‘𑀫𑀼𑀲𑀸 𑀪𑀡𑀺𑀲𑁆𑀲’𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 ‘𑀫𑀼𑀲𑀸 𑀪𑀡𑀸𑀫𑀻’𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 ‘𑀫𑀼𑀲𑀸 𑀫𑀬𑀸 𑀪𑀡𑀺𑀢’𑀦𑁆𑀢𑀺 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁, 𑀯𑀺𑀦𑀺𑀥𑀸𑀬 𑀔𑀦𑁆𑀢𑀺𑀁, 𑀯𑀺𑀦𑀺𑀥𑀸𑀬 𑀭𑀼𑀘𑀺𑀁, 𑀯𑀺𑀦𑀺𑀥𑀸𑀬 𑀪𑀸𑀯’’𑀦𑁆𑀢𑀺 (𑀧𑀸𑀭𑀸. 𑁨𑁨𑁦) 𑀏𑀯𑀫𑀸𑀕𑀢𑁂𑀳𑀺 𑀲𑀢𑁆𑀢𑀳𑀺.

𑀅𑀩𑁆𑀭𑀳𑁆𑀫𑀘𑀭𑀺𑀬𑀸𑀢𑀺 𑀅𑀲𑁂𑀝𑁆𑀞𑀘𑀭𑀺𑀬𑀢𑁄. 𑀭𑀢𑁆𑀢𑀺𑀁 𑀦 𑀪𑀼𑀜𑁆𑀚𑁂𑀬𑁆𑀬 𑀯𑀺𑀓𑀸𑀮𑀪𑁄𑀚𑀦𑀦𑁆𑀢𑀺 𑀉𑀧𑁄𑀲𑀣𑀁 𑀉𑀧𑀯𑀼𑀢𑁆𑀣𑁄 𑀭𑀢𑁆𑀢𑀺𑀪𑁄𑀚𑀦𑀜𑁆𑀘 𑀤𑀺𑀯𑀸𑀯𑀺𑀓𑀸𑀮𑀪𑁄𑀚𑀦𑀜𑁆𑀘 𑀦 𑀪𑀼𑀜𑁆𑀚𑁂𑀬𑁆𑀬. 𑀫𑀜𑁆𑀘𑁂 𑀙𑀫𑀸𑀬𑀁𑀯 𑀲𑀬𑁂𑀣 𑀲𑀦𑁆𑀣𑀢𑁂𑀢𑀺 𑀓𑀧𑁆𑀧𑀺𑀬𑀫𑀜𑁆𑀘𑁂 𑀯𑀸 𑀲𑀼𑀥𑀸𑀤𑀺𑀧𑀭𑀺𑀓𑀫𑁆𑀫𑀓𑀢𑀸𑀬 𑀪𑀽𑀫𑀺𑀬𑀁 𑀯𑀸 𑀢𑀺𑀡𑀧𑀡𑁆𑀡𑀧𑀮𑀸𑀮𑀸𑀤𑀻𑀦𑀺 𑀲𑀦𑁆𑀣𑀭𑀺𑀢𑁆𑀯𑀸 𑀓𑀢𑁂 𑀲𑀦𑁆𑀣𑀢𑁂 𑀯𑀸 𑀲𑀬𑁂𑀣𑀸𑀢𑀺 𑀅𑀢𑁆𑀣𑁄. 𑀏𑀢𑀜𑁆𑀳𑀺 𑀅𑀝𑁆𑀞𑀗𑁆𑀕𑀻𑀓𑀫𑀸𑀳𑀼𑀧𑁄𑀲𑀣𑀦𑁆𑀢𑀺 𑀏𑀢𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀅𑀲𑀫𑀸𑀘𑀭𑀦𑁆𑀢𑁂𑀦 𑀉𑀧𑀯𑀼𑀢𑁆𑀣𑀉𑀧𑁄𑀲𑀣𑀁 𑀅𑀝𑁆𑀞𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 ‘‘𑀅𑀝𑁆𑀞𑀗𑁆𑀕𑀺𑀓’’𑀦𑁆𑀢𑀺 𑀯𑀤𑀦𑁆𑀢𑀺.

‘‘𑀅𑀓𑀧𑁆𑀧𑀺𑀬𑀓𑀢𑀁 𑀳𑁄𑀢𑀺 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀓’’𑀦𑁆𑀢𑀺𑀆𑀤𑀬𑁄 𑀅𑀝𑁆𑀞 𑀅𑀦𑀢𑀺𑀭𑀺𑀢𑁆𑀢𑀸 𑀦𑀸𑀫. 𑀲𑀧𑁆𑀧𑀺𑀆𑀤𑀺 𑀅𑀝𑁆𑀞𑀫𑁂 𑀅𑀭𑀼𑀡𑀼𑀕𑁆𑀕𑀫𑀦𑁂 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺. 𑀅𑀝𑁆𑀞𑀓𑀯𑀲𑁂𑀦 𑀬𑁄𑀚𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺 𑀧𑀼𑀭𑀺𑀫𑀸𑀦𑀺 𑀅𑀝𑁆𑀞 𑀏𑀓𑀁 𑀅𑀝𑁆𑀞𑀓𑀁, 𑀢𑀢𑁄 𑀏𑀓𑀁 𑀅𑀧𑀦𑁂𑀢𑁆𑀯𑀸 𑀲𑁂𑀲𑁂𑀲𑀼𑀧𑀺 𑀏𑀓𑁂𑀓𑀁 𑀧𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀅𑀜𑁆𑀜𑀸𑀦𑀺𑀧𑀺 𑀅𑀝𑁆𑀞𑀓𑀸𑀦𑀺 𑀓𑀸𑀢𑀩𑁆𑀩𑀸𑀦𑀻𑀢𑀺 𑀅𑀢𑁆𑀣𑁄.

𑀅𑀝𑁆𑀞𑀓𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀯𑀓𑀯𑀸𑀭𑀯𑀡𑁆𑀡𑀦𑀸

𑁩𑁨𑁯. 𑀦𑀯𑀓𑁂𑀲𑀼 𑀆𑀖𑀸𑀢𑀯𑀢𑁆𑀣𑀽𑀦𑀻𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁩.𑁩𑁪𑁦; 𑀅. 𑀦𑀺. 𑀅𑀝𑁆𑀞. 𑁩.𑁯.𑁨𑁯) 𑀆𑀖𑀸𑀢𑀓𑀸𑀭𑀡𑀸𑀦𑀺. 𑀆𑀖𑀸𑀢𑀧𑀝𑀺𑀯𑀺𑀦𑀬𑀸𑀦𑀻𑀢𑀺 𑀆𑀖𑀸𑀢𑀲𑁆𑀲 𑀧𑀝𑀺𑀯𑀺𑀦𑀬𑀓𑀸𑀭𑀡𑀸𑀦𑀺. 𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸𑀢𑀺 ‘‘𑀢𑀁 𑀅𑀦𑀢𑁆𑀣𑀘𑀭𑀡𑀁 𑀫𑀸 𑀅𑀳𑁄𑀲𑀻’’𑀢𑀺 𑀏𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀓𑀼𑀢𑁄 𑀮𑀩𑁆𑀪𑀸 𑀓𑁂𑀦 𑀓𑀸𑀭𑀡𑁂𑀦 𑀲𑀓𑁆𑀓𑀸 𑀮𑀤𑁆𑀥𑀼𑀁. ‘‘𑀧𑀭𑁄 𑀦𑀸𑀫 𑀧𑀭𑀲𑁆𑀲 𑀅𑀢𑁆𑀢𑀦𑁄 𑀘𑀺𑀢𑁆𑀢𑀭𑀼𑀘𑀺𑀬𑀸 𑀅𑀦𑀢𑁆𑀣𑀁 𑀓𑀭𑁄𑀢𑀻’’𑀢𑀺 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀆𑀖𑀸𑀢𑀁 𑀧𑀝𑀺𑀯𑀺𑀦𑁄𑀤𑁂𑀢𑀺. 𑀅𑀣 𑀯𑀸 𑀲𑀘𑀸𑀳𑀁 𑀧𑀝𑀺𑀓𑁆𑀓𑁄𑀧𑀁 𑀓𑀭𑁂𑀬𑁆𑀬𑀁, 𑀢𑀁 𑀓𑁄𑀧𑀓𑀭𑀡𑀁 𑀏𑀢𑁆𑀣 𑀧𑀼𑀕𑁆𑀕𑀮𑁂 𑀓𑀼𑀢𑁄 𑀮𑀩𑁆𑀪𑀸, 𑀓𑁂𑀦 𑀓𑀸𑀭𑀡𑁂𑀦 𑀮𑀤𑁆𑀥𑀩𑁆𑀩𑀁 𑀦𑀺𑀭𑀢𑁆𑀣𑀓𑀪𑀸𑀯𑀢𑁄𑀢𑀺 𑀅𑀢𑁆𑀣𑁄. 𑀓𑀫𑁆𑀫𑀲𑁆𑀲𑀓𑀸 𑀳𑀺 𑀲𑀢𑁆𑀢𑀸, 𑀢𑁂 𑀓𑀲𑁆𑀲 𑀭𑀼𑀘𑀺𑀬𑀸 𑀤𑀼𑀓𑁆𑀔𑀺𑀢𑀸 𑀲𑀼𑀔𑀺𑀢𑀸 𑀯𑀸 𑀪𑀯𑀦𑁆𑀢𑀺, 𑀢𑀲𑁆𑀫𑀸 𑀓𑁂𑀯𑀮𑀁 𑀢𑀲𑁆𑀫𑀺𑀁 𑀫𑀬𑁆𑀳𑀁 𑀓𑀼𑀚𑁆𑀛𑀦𑀫𑀢𑁆𑀢𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀣 𑀯𑀸 𑀢𑀁 𑀓𑁄𑀧𑀓𑀭𑀡𑀁 𑀏𑀢𑁆𑀣 𑀧𑀼𑀕𑁆𑀕𑀮𑁂 𑀓𑀼𑀢𑁄 𑀮𑀩𑁆𑀪𑀸 𑀧𑀭𑀫𑀢𑁆𑀣𑀢𑁄 𑀓𑀼𑀚𑁆𑀛𑀺𑀢𑀩𑁆𑀩𑀲𑁆𑀲 𑀓𑀼𑀚𑁆𑀛𑀦𑀓𑀲𑁆𑀲 𑀘 𑀅𑀪𑀸𑀯𑀢𑁄. 𑀲𑀗𑁆𑀔𑀸𑀭𑀫𑀢𑁆𑀢𑀜𑁆𑀳𑁂𑀢𑀁 𑀬𑀤𑀺𑀤𑀁 𑀔𑀦𑁆𑀥𑀧𑀜𑁆𑀘𑀓𑀁 𑀬𑀁 ‘‘𑀲𑀢𑁆𑀢𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑁂 𑀘 𑀲𑀗𑁆𑀔𑀸𑀭𑀸 𑀇𑀢𑁆𑀢𑀭𑀓𑀸𑀮𑀸 𑀔𑀡𑀺𑀓𑀸, 𑀓𑀲𑁆𑀲 𑀓𑁄 𑀓𑀼𑀚𑁆𑀛𑀢𑀻𑀢𑀺 𑀅𑀢𑁆𑀣𑁄. ‘‘𑀓𑀼𑀢𑁄 𑀮𑀸𑀪𑀸’’𑀢𑀺𑀧𑀺 𑀧𑀸𑀞𑁄, 𑀲𑀘𑀸𑀳𑀁 𑀏𑀢𑁆𑀣 𑀓𑁄𑀧𑀁 𑀓𑀭𑁂𑀬𑁆𑀬𑀁, 𑀢𑀲𑁆𑀫𑀺𑀁 𑀫𑁂 𑀓𑁄𑀧𑀓𑀭𑀡𑁂 𑀓𑀼𑀢𑁄 𑀮𑀸𑀪𑀸, 𑀮𑀸𑀪𑀸 𑀦𑀸𑀫 𑀓𑁂 𑀲𑀺𑀬𑀼𑀁 𑀅𑀜𑁆𑀜𑀢𑁆𑀭 𑀅𑀦𑀢𑁆𑀣𑀼𑀧𑁆𑀧𑀢𑁆𑀢𑀺𑀢𑁄𑀢𑀺 𑀅𑀢𑁆𑀣𑁄. 𑀇𑀫𑀲𑁆𑀫𑀺𑀜𑁆𑀘 𑀅𑀢𑁆𑀣𑁂 𑀢𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀫𑁂𑀯 𑀳𑁄𑀢𑀺.

𑀢𑀡𑁆𑀳𑀁 𑀧𑀝𑀺𑀘𑁆𑀘𑀸𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁨.𑁧𑁦𑁩; 𑀅. 𑀦𑀺. 𑀅𑀝𑁆𑀞. 𑁩.𑁯.𑁨𑁩) 𑀤𑁆𑀯𑁂 𑀢𑀡𑁆𑀳𑀸 𑀏𑀲𑀦𑀢𑀡𑁆𑀳𑀸 𑀏𑀲𑀺𑀢𑀢𑀡𑁆𑀳𑀸 𑀘. 𑀬𑀸𑀬 𑀢𑀡𑁆𑀳𑀸𑀬 𑀅𑀚𑀧𑀣𑀲𑀗𑁆𑀓𑀼𑀧𑀣𑀸𑀤𑀻𑀦𑀺 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀪𑁄𑀕𑁂 𑀏𑀲𑀢𑀺 𑀕𑀯𑁂𑀲𑀢𑀺, 𑀅𑀬𑀁 𑀏𑀲𑀦𑀢𑀡𑁆𑀳𑀸 𑀦𑀸𑀫. 𑀬𑀸 𑀢𑁂𑀲𑀼 𑀏𑀲𑀺𑀢𑁂𑀲𑀼 𑀕𑀯𑁂𑀲𑀺𑀢𑁂𑀲𑀼 𑀧𑀝𑀺𑀮𑀤𑁆𑀥𑁂𑀲𑀼 𑀢𑀡𑁆𑀳𑀸, 𑀅𑀬𑀁 𑀏𑀲𑀺𑀢𑀢𑀡𑁆𑀳𑀸 𑀦𑀸𑀫. 𑀇𑀥 𑀏𑀲𑀺𑀢𑀢𑀡𑁆𑀳𑀸 𑀤𑀝𑁆𑀞𑀩𑁆𑀩𑀸. 𑀧𑀭𑀺𑀬𑁂𑀲𑀦𑀸𑀢𑀺 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀧𑀭𑀺𑀬𑁂𑀲𑀦𑀸. 𑀲𑀸 𑀳𑀺 𑀏𑀲𑀦𑀢𑀡𑁆𑀳𑀸𑀬 𑀲𑀢𑀺 𑀳𑁄𑀢𑀺. 𑀮𑀸𑀪𑁄𑀢𑀺 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀧𑁆𑀧𑀝𑀺𑀮𑀸𑀪𑁄. 𑀲𑁄 𑀳𑀺 𑀧𑀭𑀺𑀬𑁂𑀲𑀦𑀸𑀬 𑀲𑀢𑀺 𑀳𑁄𑀢𑀺. 𑀯𑀺𑀦𑀺𑀘𑁆𑀙𑀬𑁄 𑀧𑀦 𑀜𑀸𑀡𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀺𑀢𑀓𑁆𑀓𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄. 𑀢𑀢𑁆𑀣 ‘‘𑀲𑀼𑀔𑀯𑀺𑀦𑀺𑀘𑁆𑀙𑀬𑀁 𑀚𑀜𑁆𑀜𑀸, 𑀲𑀼𑀔𑀯𑀺𑀦𑀺𑀘𑁆𑀙𑀬𑀁 𑀜𑀢𑁆𑀯𑀸 𑀅𑀚𑁆𑀛𑀢𑁆𑀢𑀁 𑀲𑀼𑀔𑀫𑀦𑀼𑀬𑀼𑀜𑁆𑀚𑁂𑀬𑁆𑀬𑀸’’𑀢𑀺 (𑀫. 𑀦𑀺. 𑁩.𑁩𑁨𑁩) 𑀅𑀬𑀁 𑀜𑀸𑀡𑀯𑀺𑀦𑀺𑀘𑁆𑀙𑀬𑁄. ‘‘𑀯𑀺𑀦𑀺𑀘𑁆𑀙𑀬𑁄𑀢𑀺 𑀤𑁆𑀯𑁂 𑀯𑀺𑀦𑀺𑀘𑁆𑀙𑀬𑀸 𑀢𑀡𑁆𑀳𑀸𑀯𑀺𑀦𑀺𑀘𑁆𑀙𑀬𑁄 𑀘 𑀤𑀺𑀝𑁆𑀞𑀺𑀯𑀺𑀦𑀺𑀘𑁆𑀙𑀬𑁄 𑀘𑀸’’𑀢𑀺 (𑀫𑀳𑀸𑀦𑀺. 𑁧𑁦𑁨) 𑀏𑀯𑀁 𑀆𑀕𑀢𑀸𑀦𑀺 𑀅𑀝𑁆𑀞𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀢𑀡𑁆𑀳𑀸𑀯𑀺𑀦𑀺𑀘𑁆𑀙𑀬𑁄. 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀬𑁄 𑀤𑀺𑀝𑁆𑀞𑀺𑀯𑀺𑀦𑀺𑀘𑁆𑀙𑀬𑁄. ‘‘𑀙𑀦𑁆𑀤𑁄 𑀔𑁄, 𑀤𑁂𑀯𑀸𑀦𑀫𑀺𑀦𑁆𑀤, 𑀯𑀺𑀢𑀓𑁆𑀓𑀦𑀺𑀤𑀸𑀦𑁄’’𑀢𑀺 (𑀤𑀻. 𑀦𑀺. 𑁨.𑁩𑁫𑁮) 𑀇𑀫𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂 𑀇𑀥 𑀯𑀺𑀦𑀺𑀘𑁆𑀙𑀬𑁄𑀢𑀺 𑀯𑀼𑀢𑁆𑀢𑁄 𑀯𑀺𑀢𑀓𑁆𑀓𑁄𑀬𑁂𑀯 𑀆𑀕𑀢𑁄. 𑀮𑀸𑀪𑀁 𑀮𑀪𑀺𑀢𑁆𑀯𑀸 𑀳𑀺 𑀇𑀝𑁆𑀞𑀸𑀦𑀺𑀝𑁆𑀞𑀁 𑀲𑀼𑀦𑁆𑀤𑀭𑀸𑀲𑀼𑀦𑁆𑀤𑀭𑀜𑁆𑀘 𑀯𑀺𑀢𑀓𑁆𑀓𑁂𑀦 𑀯𑀺𑀦𑀺𑀘𑁆𑀙𑀺𑀦𑀸𑀢𑀺 ‘‘𑀏𑀢𑁆𑀢𑀓𑀁 𑀫𑁂 𑀭𑀽𑀧𑀸𑀭𑀫𑁆𑀫𑀡𑀢𑁆𑀣𑀸𑀬 𑀪𑀯𑀺𑀲𑁆𑀲𑀢𑀺, 𑀏𑀢𑁆𑀢𑀓𑀁 𑀲𑀤𑁆𑀤𑀸𑀭𑀫𑁆𑀫𑀡𑀢𑁆𑀣𑀸𑀬, 𑀏𑀢𑁆𑀢𑀓𑀁 𑀫𑀬𑁆𑀳𑀁 𑀪𑀯𑀺𑀲𑁆𑀲𑀢𑀺, 𑀏𑀢𑁆𑀢𑀓𑀁 𑀧𑀭𑀲𑁆𑀲, 𑀏𑀢𑁆𑀢𑀓𑀁 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀺, 𑀏𑀢𑁆𑀢𑀓𑀁 𑀦𑀺𑀤𑀳𑀺𑀲𑁆𑀲𑀸𑀫𑀻’’𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀮𑀸𑀪𑀁 𑀧𑀝𑀺𑀘𑁆𑀘 𑀯𑀺𑀦𑀺𑀘𑁆𑀙𑀬𑁄’’𑀢𑀺.

𑀙𑀦𑁆𑀤𑀭𑀸𑀕𑁄𑀢𑀺 𑀏𑀯𑀁 𑀅𑀓𑀼𑀲𑀮𑀯𑀺𑀢𑀓𑁆𑀓𑁂𑀦 𑀯𑀺𑀢𑀓𑁆𑀓𑀺𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀤𑀼𑀩𑁆𑀩𑀮𑀭𑀸𑀕𑁄 𑀘 𑀩𑀮𑀯𑀭𑀸𑀕𑁄 𑀘 𑀉𑀧𑁆𑀧𑀚𑁆𑀚𑀢𑀺. 𑀅𑀚𑁆𑀛𑁄𑀲𑀸𑀦𑀦𑁆𑀢𑀺 ‘‘𑀅𑀳𑀁, 𑀫𑀫’’𑀦𑁆𑀢𑀺 𑀩𑀮𑀯𑀲𑀦𑁆𑀦𑀺𑀝𑁆𑀞𑀸𑀦𑀁. 𑀧𑀭𑀺𑀕𑁆𑀕𑀳𑁄𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀧𑀭𑀺𑀕𑁆𑀕𑀳𑀓𑀭𑀡𑀁. 𑀫𑀘𑁆𑀙𑀭𑀺𑀬𑀦𑁆𑀢𑀺 𑀧𑀭𑁂𑀳𑀺 𑀲𑀸𑀥𑀸𑀭𑀡𑀪𑀸𑀯𑀲𑁆𑀲 𑀅𑀲𑀳𑀦𑀢𑀸. 𑀢𑁂𑀦𑁂𑀯𑀲𑁆𑀲 𑀧𑁄𑀭𑀸𑀡𑀸 𑀏𑀯𑀁 𑀯𑀘𑀦𑀢𑁆𑀣𑀁 𑀯𑀤𑀦𑁆𑀢𑀺 ‘‘𑀇𑀤𑀁 𑀅𑀘𑁆𑀙𑀭𑀺𑀬𑀁 𑀫𑀬𑁆𑀳𑁂𑀯 𑀳𑁄𑀢𑀼, 𑀫𑀸 𑀅𑀜𑁆𑀜𑀲𑁆𑀲 𑀅𑀘𑁆𑀙𑀭𑀺𑀬𑀁 𑀳𑁄𑀢𑀽𑀢𑀺 𑀧𑀯𑀢𑁆𑀢𑀢𑁆𑀢𑀸 𑀫𑀘𑁆𑀙𑀭𑀺𑀬𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀆𑀭𑀓𑁆𑀔𑁄𑀢𑀺 𑀤𑁆𑀯𑀸𑀭𑀧𑀺𑀤𑀳𑀦𑀫𑀜𑁆𑀚𑀽𑀲𑀸𑀕𑁄𑀧𑀦𑀸𑀤𑀺𑀯𑀲𑁂𑀦 𑀲𑀼𑀝𑁆𑀞𑀼 𑀭𑀓𑁆𑀔𑀡𑀁. 𑀅𑀥𑀺 𑀓𑀭𑁄𑀢𑀻𑀢𑀺 𑀅𑀥𑀺𑀓𑀭𑀡𑀁, 𑀓𑀸𑀭𑀡𑀲𑁆𑀲𑁂𑀢𑀁 𑀦𑀸𑀫𑀁. 𑀆𑀭𑀓𑁆𑀔𑀸𑀥𑀺𑀓𑀭𑀡𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀁, 𑀆𑀭𑀓𑁆𑀔𑀳𑁂𑀢𑀽𑀢𑀺 𑀅𑀢𑁆𑀣𑁄. 𑀤𑀡𑁆𑀟𑀸𑀤𑀸𑀦𑀸𑀤𑀻𑀲𑀼 𑀧𑀭𑀦𑀺𑀲𑁂𑀥𑀦𑀢𑁆𑀣𑀁 𑀤𑀡𑁆𑀟𑀲𑁆𑀲 𑀆𑀤𑀸𑀦𑀁 𑀤𑀡𑁆𑀟𑀸𑀤𑀸𑀦𑀁. 𑀏𑀓𑀢𑁄𑀥𑀸𑀭𑀸𑀤𑀺𑀦𑁄 𑀲𑀢𑁆𑀣𑀲𑁆𑀲 𑀆𑀤𑀸𑀦𑀁 𑀲𑀢𑁆𑀣𑀸𑀤𑀸𑀦𑀁. 𑀓𑀮𑀳𑁄𑀢𑀺 𑀓𑀸𑀬𑀓𑀮𑀳𑁄𑀧𑀺 𑀯𑀸𑀘𑀸𑀓𑀮𑀳𑁄𑀧𑀺. 𑀧𑀼𑀭𑀺𑀫𑁄 𑀧𑀼𑀭𑀺𑀫𑁄 𑀯𑀺𑀭𑁄𑀥𑁄 𑀯𑀺𑀕𑁆𑀕𑀳𑁄, 𑀧𑀘𑁆𑀙𑀺𑀫𑁄 𑀧𑀘𑁆𑀙𑀺𑀫𑁄 𑀯𑀺𑀯𑀸𑀤𑁄. 𑀢𑀼𑀯𑀁 𑀢𑀼𑀯𑀦𑁆𑀢𑀺 𑀅𑀕𑀸𑀭𑀯𑀯𑀲𑁂𑀦 ‘‘𑀢𑀼𑀯𑀁 𑀢𑀼𑀯’’𑀦𑁆𑀢𑀺 𑀯𑀘𑀦𑀁.

𑀅𑀥𑀺𑀝𑁆𑀞𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀦 𑀯𑀺𑀓𑀧𑁆𑀧𑁂𑀢𑀩𑁆𑀩𑀸𑀦𑀻𑀢𑀺 𑀯𑀺𑀓𑀧𑁆𑀧𑁂𑀦𑁆𑀢𑁂𑀦 𑀅𑀥𑀺𑀝𑁆𑀞𑀸𑀦𑀢𑁄 𑀧𑀼𑀩𑁆𑀩𑁂 𑀯𑀸

𑀯𑀺𑀓𑀧𑁆𑀧𑁂𑀢𑀩𑁆𑀩𑀁, 𑀯𑀺𑀚𑀳𑀺𑀢𑀸𑀥𑀺𑀝𑁆𑀞𑀸𑀦𑀁 𑀯𑀸 𑀧𑀘𑁆𑀙𑀸𑀯𑀺𑀓𑀧𑁆𑀧𑁂𑀢𑀩𑁆𑀩𑀁. 𑀅𑀯𑀺𑀚𑀳𑀺𑀢𑀸𑀥𑀺𑀝𑁆𑀞𑀸𑀦𑀁 𑀧𑀦 𑀦 𑀯𑀺𑀓𑀧𑁆𑀧𑁂𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑀼𑀓𑁆𑀓𑀝𑀯𑀲𑁂𑀦 𑀯𑀼𑀢𑁆𑀢𑀸𑀦𑀻𑀢𑀺 ‘‘𑀯𑀕𑁆𑀕𑀁 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀁 𑀯𑀕𑁆𑀕𑀲𑀜𑁆𑀜𑀻 𑀑𑀯𑀤𑀢𑀻’’𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑁧𑁫𑁦) 𑀦𑀬𑁂𑀦 𑀅𑀥𑀫𑁆𑀫𑀓𑀫𑁆𑀫𑁂 𑀤𑁆𑀯𑁂 𑀦𑀯𑀓𑀸𑀦𑀺 𑀤𑀼𑀓𑁆𑀓𑀝𑀯𑀲𑁂𑀦 𑀯𑀼𑀢𑁆𑀢𑀸𑀦𑀺.

𑀦𑀯𑀓𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀲𑀓𑀯𑀸𑀭𑀯𑀡𑁆𑀡𑀦𑀸

𑁩𑁩𑁦. 𑀤𑀲𑀓𑁂𑀲𑀼 𑀦𑀢𑁆𑀣𑀺 𑀤𑀺𑀦𑁆𑀦𑀦𑁆𑀢𑀺𑀆𑀤𑀺𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸𑀢𑀺 ‘‘𑀦𑀢𑁆𑀣𑀺 𑀤𑀺𑀦𑁆𑀦𑀁, 𑀦𑀢𑁆𑀣𑀺 𑀬𑀺𑀝𑁆𑀞𑀁, 𑀦𑀢𑁆𑀣𑀺 𑀳𑀼𑀢𑀁, 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄, 𑀦𑀢𑁆𑀣𑀺 𑀅𑀬𑀁 𑀮𑁄𑀓𑁄, 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀦𑀢𑁆𑀣𑀺 𑀫𑀸𑀢𑀸, 𑀦𑀢𑁆𑀣𑀺 𑀧𑀺𑀢𑀸, 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀦𑀢𑁆𑀣𑀺 𑀮𑁄𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀫𑁆𑀫𑀕𑁆𑀕𑀢𑀸 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸, 𑀬𑁂 𑀇𑀫𑀜𑁆𑀘 𑀮𑁄𑀓𑀁 𑀧𑀭𑀜𑁆𑀘 𑀮𑁄𑀓𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀦𑁆𑀢𑀻’’𑀢𑀺 (𑀫. 𑀦𑀺. 𑁨.𑁯𑁪, 𑁨𑁨𑁫; 𑁩.𑁯𑁧, 𑁧𑁧𑁬; 𑀲𑀁. 𑀦𑀺. 𑁩.𑁨𑁧𑁦) 𑀏𑀯𑀫𑀸𑀕𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀲𑁆𑀲𑀢𑁄 𑀮𑁄𑀓𑁄𑀢𑀺𑀆𑀤𑀺𑀯𑀲𑁂𑀦𑀸𑀢𑀺 ‘‘𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸, 𑀅𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸, 𑀅𑀦𑁆𑀢𑀯𑀸 𑀮𑁄𑀓𑁄𑀢𑀺 𑀯𑀸, 𑀅𑀦𑀦𑁆𑀢𑀯𑀸 𑀮𑁄𑀓𑁄𑀢𑀺 𑀯𑀸, 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀦𑁆𑀢𑀺 𑀯𑀸, 𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀦𑁆𑀢𑀺 𑀯𑀸, 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸, 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸, 𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸, 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸’’𑀢𑀺 (𑀫. 𑀦𑀺. 𑁧.𑁨𑁬𑁯) 𑀏𑀯𑀫𑀸𑀕𑀢𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀆𑀤𑀬𑁄 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺𑀧𑀭𑀺𑀬𑁄𑀲𑀸𑀦𑀸𑀢𑀺 ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄 𑀫𑀺𑀘𑁆𑀙𑀸𑀯𑀸𑀘𑀸 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑁄 𑀫𑀺𑀘𑁆𑀙𑀸𑀆𑀚𑀻𑀯𑁄 𑀫𑀺𑀘𑁆𑀙𑀸𑀯𑀸𑀬𑀸𑀫𑁄 𑀫𑀺𑀘𑁆𑀙𑀸𑀲𑀢𑀺 𑀫𑀺𑀘𑁆𑀙𑀸𑀲𑀫𑀸𑀥𑀺 𑀫𑀺𑀘𑁆𑀙𑀸𑀜𑀸𑀡𑀁 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀻’’𑀢𑀺 (𑀯𑀺𑀪. 𑁯𑁭𑁦) 𑀏𑀯𑀫𑀸𑀕𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑀢𑁆𑀣 𑀫𑀺𑀘𑁆𑀙𑀸𑀜𑀸𑀡𑀦𑁆𑀢𑀺 𑀧𑀸𑀧𑀓𑀺𑀭𑀺𑀬𑀸𑀲𑀼 𑀉𑀧𑀸𑀬𑀘𑀺𑀦𑁆𑀢𑀸𑀯𑀲𑁂𑀦 𑀧𑀸𑀧𑀓𑀁 𑀓𑀢𑁆𑀯𑀸 ‘‘𑀲𑀼𑀓𑀢𑀁 𑀫𑀬𑀸’’𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀸𑀓𑀸𑀭𑁂𑀦 𑀘 𑀉𑀧𑁆𑀧𑀦𑁆𑀦𑁄 𑀫𑁄𑀳𑁄. 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀻𑀢𑀺 𑀅𑀯𑀺𑀫𑀼𑀢𑁆𑀢𑀲𑁆𑀲𑁂𑀯 𑀲𑀢𑁄 𑀯𑀺𑀫𑀼𑀢𑁆𑀢𑀺𑀲𑀜𑁆𑀜𑀺𑀢𑀸. 𑀲𑀫𑀣𑀓𑁆𑀔𑀦𑁆𑀥𑀓𑁂 𑀦𑀺𑀤𑁆𑀤𑀺𑀝𑁆𑀞𑀸𑀢𑀺 ‘‘𑀑𑀭𑀫𑀢𑁆𑀢𑀓𑀁 𑀅𑀥𑀺𑀓𑀭𑀡𑀁 𑀳𑁄𑀢𑀺, 𑀦 𑀘 𑀕𑀢𑀺𑀕𑀢𑀁, 𑀦 𑀘 𑀲𑀭𑀺𑀢𑀲𑀸𑀭𑀺𑀢’’𑀦𑁆𑀢𑀺𑀆𑀤𑀺𑀦𑀸 (𑀘𑀽𑀴𑀯. 𑁨𑁦𑁪) 𑀦𑀺𑀤𑁆𑀤𑀺𑀝𑁆𑀞𑀸. 𑀲𑀫𑀣𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀸𑀢𑀼𑀭𑀓𑁆𑀔𑀺𑀢𑀸𑀤𑀬𑁄 𑀤𑀲 𑀇𑀢𑁆𑀣𑀺𑀬𑁄. 𑀥𑀦𑀓𑁆𑀓𑀻𑀢𑀸𑀤𑀬𑁄 𑀤𑀲 𑀪𑀭𑀺𑀬𑀸𑀬𑁄.

𑀤𑀲𑀓𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀏𑀓𑀸𑀤𑀲𑀓𑀯𑀸𑀭𑀯𑀡𑁆𑀡𑀦𑀸

𑁩𑁩𑁧. 𑀏𑀓𑀸𑀤𑀲𑀓𑁂𑀲𑀼 𑀦 𑀯𑁄𑀤𑀸𑀬𑀦𑁆𑀢𑀻𑀢𑀺 𑀦 𑀧𑀓𑀸𑀲𑀦𑁆𑀢𑀺. 𑀲𑀼𑀬𑀼𑀢𑁆𑀢𑀬𑀸𑀦𑀲𑀤𑀺𑀲𑀸𑀬 𑀓𑀢𑀸𑀬𑀸𑀢𑀺 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑀸𑀮𑁂 𑀲𑀼𑀔𑁂𑀦 𑀧𑀯𑀢𑁆𑀢𑁂𑀢𑀩𑁆𑀩𑀢𑁆𑀢𑀸 𑀬𑀼𑀢𑁆𑀢𑀬𑀸𑀦𑀁 𑀯𑀺𑀬 𑀓𑀢𑀸𑀬. 𑀬𑀣𑀸 𑀧𑀢𑀺𑀝𑁆𑀞𑀸 𑀳𑁄𑀢𑀻𑀢𑀺 𑀲𑀫𑁆𑀧𑀢𑁆𑀢𑀻𑀦𑀁 𑀬𑀣𑀸 𑀧𑀢𑀺𑀝𑁆𑀞𑀸 𑀳𑁄𑀢𑀺. 𑀅𑀦𑀼 𑀅𑀦𑀼 𑀧𑀯𑀢𑁆𑀢𑀺𑀢𑀸𑀬𑀸𑀢𑀺 𑀪𑀸𑀯𑀦𑀸𑀩𑀳𑀼𑀮𑀻𑀓𑀸𑀭𑁂𑀳𑀺 𑀅𑀦𑀼 𑀅𑀦𑀼 𑀧𑀯𑀢𑁆𑀢𑀺𑀢𑀸𑀬.