𑀧𑀜𑁆𑀘𑀯𑀕𑁆𑀕𑁄

𑀓𑀫𑁆𑀫𑀯𑀕𑁆𑀕𑀯𑀡𑁆𑀡𑀦𑀸

𑁪𑁮𑁩. 𑀓𑀫𑁆𑀫𑀯𑀕𑁆𑀕𑁂 𑀉𑀫𑁆𑀫𑀢𑁆𑀢𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀫𑁆𑀫𑀢𑁆𑀢𑀓𑀲𑀫𑁆𑀫𑀼𑀢𑀺 𑀉𑀫𑁆𑀫𑀢𑁆𑀢𑀓𑁂 𑀬𑀸𑀘𑀺𑀢𑁆𑀯𑀸 𑀕𑀢𑁂 𑀅𑀲𑀫𑁆𑀫𑀼𑀔𑀸𑀧𑀺 𑀤𑀸𑀢𑀼𑀁 𑀯𑀝𑁆𑀝𑀢𑀺, 𑀢𑀢𑁆𑀣 𑀦𑀺𑀲𑀺𑀦𑁆𑀦𑁂𑀧𑀺 𑀦 𑀓𑀼𑀧𑁆𑀧𑀢𑀺 𑀦𑀺𑀬𑀫𑀸𑀪𑀸𑀯𑀢𑁄. 𑀅𑀲𑀫𑁆𑀫𑀼𑀔𑀸 𑀓𑀢𑁂 𑀧𑀦 𑀤𑁄𑀲𑀸𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀲𑀫𑁆𑀫𑀼𑀔𑀸𑀓𑀢𑀁 𑀲𑀼𑀓𑀢𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀤𑀽𑀢𑁂𑀦 𑀉𑀧𑀲𑀫𑁆𑀧𑀤𑀸 𑀧𑀦 𑀲𑀫𑁆𑀫𑀼𑀔𑀸 𑀓𑀸𑀢𑀼𑀁 𑀦 𑀲𑀓𑁆𑀓𑀸 𑀓𑀫𑁆𑀫𑀯𑀸𑀘𑀸𑀦𑀸𑀦𑀢𑁆𑀢𑀲𑀫𑁆𑀪𑀯𑀢𑁄. 𑀧𑀢𑁆𑀢𑀦𑀺𑀓𑁆𑀓𑀼𑀚𑁆𑀚𑀦𑀸𑀤𑀬𑁄 𑀳𑀢𑁆𑀣𑀧𑀸𑀲𑀢𑁄 𑀅𑀧𑀦𑀻𑀢𑀫𑀢𑁆𑀢𑁂𑀧𑀺 𑀓𑀸𑀢𑀼𑀁 𑀯𑀝𑁆𑀝𑀦𑁆𑀢𑀺. 𑀲𑀗𑁆𑀖𑀲𑀫𑁆𑀫𑀼𑀔𑀢𑀸𑀢𑀺𑀆𑀤𑀻𑀲𑀼 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸, 𑀢𑁂 𑀆𑀕𑀢𑀸 𑀳𑁄𑀦𑁆𑀢𑀺, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀆𑀳𑀝𑁄 𑀳𑁄𑀢𑀺, 𑀲𑀫𑁆𑀫𑀼𑀔𑀻𑀪𑀽𑀢𑀸 𑀦 𑀧𑀝𑀺𑀓𑁆𑀓𑁄𑀲𑀦𑁆𑀢𑀺, 𑀅𑀬𑀁 𑀲𑀗𑁆𑀖𑀲𑀫𑁆𑀫𑀼𑀔𑀢𑀸. 𑀬𑁂𑀦 𑀥𑀫𑁆𑀫𑁂𑀦 𑀬𑁂𑀦 𑀯𑀺𑀦𑀬𑁂𑀦 𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦 𑀲𑀗𑁆𑀖𑁄 𑀓𑀫𑁆𑀫𑀁 𑀓𑀭𑁄𑀢𑀺, 𑀅𑀬𑀁 𑀥𑀫𑁆𑀫𑀲𑀫𑁆𑀫𑀼𑀔𑀢𑀸. 𑀢𑀢𑁆𑀣 𑀥𑀫𑁆𑀫𑁄𑀢𑀺 𑀪𑀽𑀢𑀁 𑀯𑀢𑁆𑀣𑀼. 𑀯𑀺𑀦𑀬𑁄𑀢𑀺 𑀘𑁄𑀤𑀦𑀸 𑀘𑁂𑀯 𑀲𑀸𑀭𑀡𑀸 𑀘. 𑀲𑀢𑁆𑀣𑀼𑀲𑀸𑀲𑀦𑀁 𑀦𑀸𑀫 𑀜𑀢𑁆𑀢𑀺𑀲𑀫𑁆𑀧𑀤𑀸 𑀘𑁂𑀯 𑀅𑀦𑀼𑀲𑁆𑀲𑀸𑀯𑀦𑀲𑀫𑁆𑀧𑀤𑀸 𑀘. 𑀬𑀲𑁆𑀲 𑀲𑀗𑁆𑀖𑁄 𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀲𑁆𑀲 𑀲𑀫𑁆𑀫𑀼𑀔𑀪𑀸𑀯𑁄 𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸. 𑀓𑀢𑁆𑀢𑀺𑀓𑀫𑀸𑀲𑀲𑁆𑀲 𑀧𑀯𑀸𑀭𑀡𑀫𑀸𑀲𑀢𑁆𑀢𑀸 ‘‘𑀞𑀧𑁂𑀢𑁆𑀯𑀸 𑀓𑀢𑁆𑀢𑀺𑀓𑀫𑀸𑀲’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀘𑁆𑀘𑀼𑀓𑁆𑀓𑀟𑁆𑀠𑀺𑀢𑁆𑀯𑀸 𑀞𑀧𑀺𑀢𑀤𑀺𑀯𑀲𑁄 𑀘𑀸𑀢𑀺 𑀓𑀸𑀴𑀧𑀓𑁆𑀔𑁂 𑀘𑀸𑀢𑀼𑀤𑁆𑀤𑀲𑀺𑀁 𑀯𑀸 𑀧𑀦𑁆𑀦𑀭𑀲𑀺𑀁 𑀯𑀸 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀤𑁆𑀯𑁂 𑀘 𑀧𑀼𑀡𑁆𑀡𑀫𑀸𑀲𑀺𑀬𑁄𑀢𑀺 𑀧𑀞𑀫𑀧𑀘𑁆𑀙𑀺𑀫𑀯𑀲𑁆𑀲𑀽𑀧𑀕𑀢𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁.

𑁪𑁮𑁫. 𑀞𑀸𑀦𑀓𑀭𑀡𑀸𑀦𑀺 𑀲𑀺𑀣𑀺𑀮𑀸𑀦𑀺 𑀓𑀢𑁆𑀯𑀸 𑀉𑀘𑁆𑀘𑀸𑀭𑁂𑀢𑀩𑁆𑀩𑀁 𑀅𑀓𑁆𑀔𑀭𑀁 𑀲𑀺𑀣𑀺𑀮𑀁, 𑀢𑀸𑀦𑀺𑀬𑁂𑀯 𑀥𑀦𑀺𑀢𑀸𑀦𑀺 𑀅𑀲𑀺𑀣𑀺𑀮𑀸𑀦𑀺 𑀓𑀢𑁆𑀯𑀸 𑀉𑀘𑁆𑀘𑀸𑀭𑁂𑀢𑀩𑁆𑀩𑀁 𑀅𑀓𑁆𑀔𑀭𑀁 𑀥𑀦𑀺𑀢𑀁. 𑀤𑁆𑀯𑀺𑀫𑀢𑁆𑀢𑀓𑀸𑀮𑀁 𑀤𑀻𑀖𑀁, 𑀏𑀓𑀫𑀢𑁆𑀢𑀓𑀸𑀮𑀁 𑀭𑀲𑁆𑀲𑀁. 𑀤𑀲𑀥𑀸 𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀺𑀬𑀸 𑀧𑀪𑁂𑀤𑁄𑀢𑀺 𑀏𑀯𑀁 𑀲𑀺𑀣𑀺𑀮𑀸𑀤𑀺𑀯𑀲𑁂𑀦 𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀺𑀬𑀸 𑀅𑀓𑁆𑀔𑀭𑀼𑀧𑁆𑀧𑀸𑀤𑀓𑀘𑀺𑀢𑁆𑀢𑀲𑁆𑀲 𑀤𑀲𑀧𑁆𑀧𑀓𑀸𑀭𑁂𑀦 𑀧𑀪𑁂𑀤𑁄. 𑀲𑀩𑁆𑀩𑀸𑀦𑀺 𑀳𑀺 𑀅𑀓𑁆𑀔𑀭𑀸𑀦𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀺 𑀬𑀣𑀸𑀥𑀺𑀧𑁆𑀧𑁂𑀢𑀢𑁆𑀣𑀩𑁆𑀬𑀜𑁆𑀚𑀦𑀢𑁄 𑀩𑁆𑀬𑀜𑁆𑀚𑀦𑀸𑀦𑀺 𑀘. 𑀲𑀁𑀬𑁄𑀕𑁄 𑀧𑀭𑁄 𑀏𑀢𑀲𑁆𑀫𑀸𑀢𑀺 𑀲𑀁𑀬𑁄𑀕𑀧𑀭𑁄, 𑀦 𑀲𑀁𑀬𑁄𑀕𑀧𑀭𑁄 𑀅𑀲𑀁𑀬𑁄𑀕𑀧𑀭𑁄. 𑀆𑀬𑀲𑁆𑀫𑀢𑁄 𑀩𑀼𑀤𑁆𑀥𑀭𑀓𑁆𑀔𑀺𑀢𑀣𑁂𑀭𑀲𑁆𑀲 𑀬𑀲𑁆𑀲 𑀦 𑀔𑀫𑀢𑀻𑀢𑀺 𑀏𑀢𑁆𑀣 𑀢-𑀓𑀸𑀭 𑀦-𑀓𑀸𑀭𑀲𑀳𑀺𑀢𑀸𑀓𑀸𑀭𑁄 𑀅𑀲𑀁𑀬𑁄𑀕𑀧𑀭𑁄. 𑀓𑀭𑀡𑀸𑀦𑀻𑀢𑀺 𑀓𑀡𑁆𑀞𑀸𑀤𑀻𑀦𑀺.

𑁪𑁮𑁮. 𑀅𑀦𑀼𑀓𑁆𑀔𑀺𑀢𑁆𑀢𑀸 𑀧𑀸𑀭𑀸𑀚𑀺𑀓𑀁 𑀅𑀦𑀸𑀧𑀦𑁆𑀦𑀸 𑀘 𑀧𑀓𑀢𑀢𑁆𑀢𑀸𑀢𑀺 𑀆𑀳 ‘‘𑀧𑀓𑀢𑀢𑁆𑀢𑀸 𑀅𑀦𑀼𑀓𑁆𑀔𑀺𑀢𑁆𑀢𑀸’’𑀢𑀺𑀆𑀤𑀺. 𑀢𑀢𑁆𑀣 𑀅𑀦𑀺𑀲𑁆𑀲𑀸𑀭𑀺𑀢𑀸𑀢𑀺 𑀧𑀼𑀭𑀺𑀫𑀧𑀤𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀧𑀭𑀺𑀲𑀼𑀤𑁆𑀥𑀲𑀻𑀮𑀸𑀢𑀺 𑀧𑀸𑀭𑀸𑀚𑀺𑀓𑀁 𑀅𑀦𑀸𑀧𑀦𑁆𑀦𑀸. 𑀦 𑀢𑁂𑀲𑀁 𑀙𑀦𑁆𑀤𑁄 𑀯𑀸 𑀧𑀸𑀭𑀺𑀲𑀼𑀤𑁆𑀥𑀺 𑀯𑀸 𑀏𑀢𑀻𑀢𑀺 𑀢𑀻𑀲𑀼 𑀤𑁆𑀯𑀻𑀲𑀼 𑀯𑀸 𑀦𑀺𑀲𑀺𑀦𑁆𑀦𑁂𑀲𑀼 𑀏𑀓𑀲𑁆𑀲 𑀯𑀸 𑀤𑁆𑀯𑀺𑀦𑁆𑀦𑀁 𑀯𑀸 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺 𑀆𑀳𑀝𑀸𑀧𑀺 𑀅𑀦𑀸𑀳𑀝𑀸𑀯 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀧𑀮𑁄𑀓𑀦𑀓𑀫𑁆𑀫𑀓𑀣𑀸𑀯𑀡𑁆𑀡𑀦𑀸

𑁪𑁯𑁫-𑁪𑁯𑁬. 𑀓𑀸𑀬𑀲𑀫𑁆𑀪𑁄𑀕𑀲𑀸𑀫𑀕𑁆𑀕𑀻𑀢𑀺 𑀲𑀳𑀲𑁂𑀬𑁆𑀬𑀧𑀝𑀺𑀕𑁆𑀕𑀳𑀡𑀸𑀤𑀺. 𑀲𑁄 𑀭𑀢𑁄𑀢𑀺 𑀲𑀼𑀪𑁂 𑀭𑀢𑁄. 𑀲𑀼𑀝𑁆𑀞𑀼 𑀑𑀭𑀢𑁄𑀢𑀺 𑀯𑀸 𑀲𑁄𑀭𑀢𑁄. 𑀦𑀺𑀯𑀸𑀢𑀯𑀼𑀢𑁆𑀢𑀻𑀢𑀺 𑀦𑀻𑀘𑀯𑀼𑀢𑁆𑀢𑀺. 𑀧𑀝𑀺𑀲𑀗𑁆𑀔𑀸𑀢𑀺 𑀧𑀝𑀺𑀲𑀗𑁆𑀔𑀸𑀬 𑀜𑀸𑀡𑁂𑀦 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸. 𑀬𑀁 𑀢𑀁 𑀅𑀯𑀦𑁆𑀤𑀺𑀬𑀓𑀫𑁆𑀫𑀁 𑀅𑀦𑀼𑀜𑁆𑀜𑀸𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀫𑀲𑁆𑀲 𑀅𑀧𑀮𑁄𑀓𑀦𑀓𑀫𑁆𑀫𑀲𑁆𑀲 𑀞𑀸𑀦𑀁 𑀳𑁄𑀢𑀻𑀢𑀺 𑀏𑀯𑀫𑁆𑀧𑀺 𑀅𑀧𑀮𑁄𑀓𑀦𑀓𑀫𑁆𑀫𑀁 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀓𑀫𑁆𑀫𑀫𑁂𑀯 𑀮𑀓𑁆𑀔𑀡𑀦𑁆𑀢𑀺 𑀓𑀫𑁆𑀫𑀮𑀓𑁆𑀔𑀡𑀁. 𑀑𑀲𑀸𑀭𑀡𑀦𑀺𑀲𑁆𑀲𑀸𑀭𑀡𑀪𑀡𑁆𑀟𑀼𑀓𑀫𑁆𑀫𑀸𑀤𑀬𑁄 𑀯𑀺𑀬 𑀓𑀫𑁆𑀫𑀜𑁆𑀘 𑀳𑀼𑀢𑁆𑀯𑀸 𑀅𑀜𑁆𑀜𑀜𑁆𑀘 𑀦𑀸𑀫𑀁 𑀦 𑀮𑀪𑀢𑀺, 𑀓𑀫𑁆𑀫𑀫𑁂𑀯 𑀳𑀼𑀢𑁆𑀯𑀸 𑀉𑀧𑀮𑀓𑁆𑀔𑀻𑀬𑀢𑀻𑀢𑀺 ‘‘𑀓𑀫𑁆𑀫𑀮𑀓𑁆𑀔𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀏𑀢𑀫𑁆𑀧𑀺 𑀓𑀫𑁆𑀫𑀮𑀓𑁆𑀔𑀡𑀫𑁂𑀯𑀸𑀢𑀺 𑀯𑀼𑀢𑁆𑀢𑀓𑀫𑁆𑀫𑀮𑀓𑁆𑀔𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀚𑀺𑀡𑁆𑀡𑀘𑀻𑀯𑀭𑀦𑀝𑁆𑀞𑀘𑀻𑀯𑀭𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀡𑀧𑀮𑀺𑀩𑁄𑀥𑀫𑁆𑀧𑀻𑀢𑀺 𑀇𑀡𑀫𑁂𑀯 𑀧𑀮𑀺𑀩𑁄𑀥𑁄 𑀇𑀡𑀧𑀮𑀺𑀩𑁄𑀥𑁄, 𑀢𑀫𑁆𑀧𑀺 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀢𑀸𑀤𑀺𑀲𑀁 𑀪𑀺𑀓𑁆𑀔𑀼𑀁 𑀇𑀡𑀸𑀬𑀺𑀓𑀸 𑀧𑀮𑀺𑀩𑀼𑀦𑁆𑀥𑀦𑁆𑀢𑀺, 𑀢𑀢𑁆𑀭𑀼𑀧𑁆𑀧𑀸𑀤𑀢𑁄𑀧𑀺 𑀢𑀲𑁆𑀲 𑀇𑀡𑀁 𑀲𑁄𑀥𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀙𑀢𑁆𑀢𑀁 𑀯𑀸 𑀯𑁂𑀤𑀺𑀓𑀁 𑀯𑀸𑀢𑀺 𑀏𑀢𑁆𑀣 𑀯𑁂𑀤𑀺𑀓𑀸𑀢𑀺 𑀘𑁂𑀢𑀺𑀬𑀲𑁆𑀲 𑀉𑀧𑀭𑀺 𑀘𑀢𑀼𑀭𑀲𑁆𑀲𑀘𑀬𑁄 𑀯𑀼𑀘𑁆𑀘𑀢𑀺. 𑀙𑀢𑁆𑀢𑀦𑁆𑀢𑀺 𑀢𑀢𑁄 𑀉𑀤𑁆𑀥𑀁 𑀯𑀮𑀬𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀓𑀢𑁄 𑀅𑀕𑁆𑀕𑀘𑀬𑁄 𑀯𑀼𑀘𑁆𑀘𑀢𑀺. 𑀘𑁂𑀢𑀺𑀬𑀲𑁆𑀲 𑀉𑀧𑀦𑀺𑀓𑁆𑀔𑁂𑀧𑀢𑁄𑀢𑀺 𑀘𑁂𑀢𑀺𑀬𑁂 𑀦𑀯𑀓𑀫𑁆𑀫𑀢𑁆𑀢𑀸𑀬 𑀉𑀧𑀦𑀺𑀓𑁆𑀔𑀺𑀢𑁆𑀢𑀢𑁄, 𑀘𑁂𑀢𑀺𑀬𑀲𑀦𑁆𑀢𑀓𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀜𑁆𑀜𑀸 𑀓𑀢𑀺𑀓𑀸 𑀓𑀸𑀢𑀩𑁆𑀩𑀸𑀢𑀺 𑀧𑀼𑀭𑀺𑀫𑀓𑀢𑀺𑀓𑀸𑀬 𑀅𑀲𑀗𑁆𑀕𑀳𑀺𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀢𑁂𑀳𑀻𑀢𑀺 𑀬𑁂𑀲𑀁 𑀧𑀼𑀕𑁆𑀕𑀮𑀺𑀓𑀝𑁆𑀞𑀸𑀦𑁂 𑀢𑀺𑀝𑁆𑀞𑀦𑁆𑀢𑀺, 𑀢𑁂𑀳𑀺. 𑀤𑀲𑀪𑀸𑀕𑀦𑁆𑀢𑀺 𑀤𑀲𑀫𑀪𑀸𑀕𑀁. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂. 𑀫𑀽𑀮𑁂𑀢𑀺 𑀧𑀼𑀩𑁆𑀩𑁂. ‘‘𑀇𑀢𑁄 𑀧𑀝𑁆𑀞𑀸𑀬 𑀪𑀸𑀚𑁂𑀢𑁆𑀯𑀸 𑀔𑀸𑀤𑀦𑁆𑀢𑀽’’𑀢𑀺 𑀯𑀘𑀦𑁂𑀦𑁂𑀯 𑀬𑀣𑀸𑀲𑀼𑀔𑀁 𑀧𑀭𑀺𑀪𑁄𑀕𑁄 𑀧𑀝𑀺𑀓𑁆𑀔𑀺𑀢𑁆𑀢𑁄 𑀳𑁄𑀢𑀻𑀢𑀺 𑀆𑀳 ‘‘𑀧𑀼𑀭𑀺𑀫𑀓𑀢𑀺𑀓𑀸 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀻’’𑀢𑀺.

𑀅𑀦𑀼𑀯𑀺𑀘𑀭𑀺𑀢𑁆𑀯𑀸𑀢𑀺 𑀧𑀘𑁆𑀙𑀢𑁄 𑀧𑀘𑁆𑀙𑀢𑁄 𑀕𑀦𑁆𑀢𑁆𑀯𑀸. 𑀅𑀧𑀘𑁆𑀘𑀸𑀲𑀻𑀲𑀦𑁆𑀢𑁂𑀦𑀸𑀢𑀺 𑀢𑁂𑀲𑀁 𑀲𑀦𑁆𑀢𑀺𑀓𑀸

𑀧𑀘𑁆𑀘𑀬𑀁 𑀅𑀧𑀘𑁆𑀘𑀸𑀲𑀻𑀲𑀦𑁆𑀢𑁂𑀦. 𑀫𑀽𑀮𑀪𑀸𑀕𑀦𑁆𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀢𑀺 ‘‘𑀤𑀲𑀪𑀸𑀕𑀫𑀢𑁆𑀢’’𑀦𑁆𑀢𑀺. 𑀅𑀓𑀢𑀸𑀯𑀸𑀲𑀁 𑀯𑀸 𑀓𑀢𑁆𑀯𑀸𑀢𑀺 𑀢𑀢𑁄 𑀉𑀧𑁆𑀧𑀦𑁆𑀦𑀆𑀬𑁂𑀦 𑀓𑀢𑁆𑀯𑀸. 𑀚𑀕𑁆𑀕𑀺𑀢𑀓𑀸𑀮𑁂 𑀘 𑀦 𑀯𑀸𑀭𑁂𑀢𑀩𑁆𑀩𑀸𑀢𑀺 𑀚𑀕𑁆𑀕𑀺𑀢𑀸𑀦𑀁 𑀧𑀼𑀧𑁆𑀨𑀨𑀮𑀪𑀭𑀺𑀢𑀓𑀸𑀮𑁂 𑀦 𑀯𑀸𑀭𑁂𑀢𑀩𑁆𑀩𑀸. 𑀚𑀕𑁆𑀕𑀦𑀓𑀸𑀮𑁂𑀢𑀺 𑀚𑀕𑁆𑀕𑀺𑀢𑀼𑀁 𑀆𑀭𑀤𑁆𑀥𑀓𑀸𑀮𑁂. 𑀜𑀢𑁆𑀢𑀺𑀓𑀫𑁆𑀫𑀝𑁆𑀞𑀸𑀦𑀪𑁂𑀤𑁂𑀢𑀺 𑀜𑀢𑁆𑀢𑀺𑀓𑀫𑁆𑀫𑀲𑁆𑀲 𑀞𑀸𑀦𑀪𑁂𑀤𑁂.

𑀓𑀫𑁆𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀧𑀜𑁆𑀜𑀢𑁆𑀢𑁂 𑀧𑀜𑁆𑀜𑀢𑁆𑀢𑀯𑀕𑁆𑀕𑀯𑀡𑁆𑀡𑀦𑀸

𑁫𑁦𑁦. 𑀲𑀢𑁆𑀢 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀧𑀜𑁆𑀜𑀢𑁆𑀢𑀁 𑀦𑀸𑀫𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀓𑀼𑀲𑀦𑁆𑀥𑀓𑁄𑀡𑀸𑀕𑀫𑀦𑀓𑀲𑁆𑀲𑀧𑀸 𑀏𑀯 𑀲𑀢𑁆𑀢 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂 𑀧𑀜𑁆𑀜𑀧𑁂𑀲𑀼𑀁, 𑀯𑀺𑀧𑀲𑁆𑀲𑀻𑀆𑀤𑀬𑁄 𑀧𑀦 𑀑𑀯𑀸𑀤𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀁𑀲𑀼, 𑀦 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑀼𑀦𑁆𑀢𑀺 𑀆𑀳 ‘‘𑀓𑀓𑀼𑀲𑀦𑁆𑀥𑀜𑁆𑀘…𑀧𑁂… 𑀅𑀦𑁆𑀢𑀭𑀸 𑀓𑁂𑀦𑀘𑀺 𑀅𑀧𑀜𑁆𑀜𑀢𑁆𑀢𑁂 𑀲𑀺𑀓𑁆𑀔𑀸𑀧𑀤𑁂’’𑀢𑀺. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀇𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀝𑁆𑀞𑀓𑀣𑀸𑀬 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁

𑀧𑀭𑀺𑀯𑀸𑀭𑀝𑁆𑀞𑀓𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀦𑀺𑀕𑀫𑀦𑀓𑀣𑀸𑀯𑀡𑁆𑀡𑀦𑀸

𑀅𑀯𑀲𑀸𑀦𑀕𑀸𑀣𑀸𑀲𑀼 𑀧𑀦 𑀅𑀬𑀫𑀢𑁆𑀣𑁄. 𑀯𑀺𑀪𑀢𑁆𑀢𑀤𑁂𑀲𑀦𑀦𑁆𑀢𑀺 𑀉𑀪𑀢𑁄𑀯𑀺𑀪𑀗𑁆𑀕𑀔𑀦𑁆𑀥𑀓𑀧𑀭𑀺𑀯𑀸𑀭𑁂𑀳𑀺 𑀯𑀺𑀪𑀢𑁆𑀢𑀤𑁂𑀲𑀦𑀁 𑀯𑀺𑀦𑀬𑀧𑀺𑀝𑀓𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀯𑀺𑀦𑀬𑀲𑁆𑀲.

𑀢𑀢𑁆𑀭𑀺𑀤𑀦𑁆𑀢𑀺𑀆𑀤𑀺 𑀧𑀞𑀫𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀲𑀢𑁆𑀣𑀼𑀫𑀳𑀸𑀩𑁄𑀥𑀺𑀯𑀺𑀪𑀽𑀲𑀺𑀢𑁄𑀢𑀺 𑀲𑀢𑁆𑀣𑀼𑀦𑀸 𑀧𑀭𑀺𑀪𑀼𑀢𑁆𑀢𑀫𑀳𑀸𑀩𑁄𑀥𑀺𑀯𑀺𑀪𑀽𑀲𑀺𑀢𑁄 𑀫𑀡𑁆𑀟𑀺𑀢𑁄, 𑀢𑀲𑁆𑀲 𑀫𑀳𑀸𑀯𑀺𑀳𑀸𑀭𑀲𑁆𑀲 𑀤𑀓𑁆𑀔𑀺𑀡𑀪𑀸𑀕𑁂 𑀉𑀢𑁆𑀢𑀫𑀁 𑀬𑀁 𑀧𑀥𑀸𑀦𑀖𑀭𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀧𑀥𑀸𑀦𑀖𑀭𑀦𑁆𑀢𑀺 𑀢𑀁𑀦𑀸𑀫𑀓𑀁 𑀧𑀭𑀺𑀯𑁂𑀡𑀁. 𑀲𑀼𑀘𑀺𑀘𑀸𑀭𑀺𑀢𑁆𑀢𑀲𑀻𑀮𑁂𑀦, 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑁂𑀯𑀺𑀢𑀦𑁆𑀢𑀺 𑀇𑀤𑀫𑁆𑀧𑀺 𑀧𑀥𑀸𑀦𑀖𑀭𑀯𑀺𑀲𑁂𑀲𑀦𑀁.

𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀧𑀥𑀸𑀦𑀖𑀭𑁂. 𑀘𑀸𑀭𑀼𑀧𑀸𑀓𑀸𑀭𑀲𑀜𑁆𑀘𑀺𑀢𑀦𑁆𑀢𑀺 𑀫𑀦𑀸𑀧𑁂𑀦 𑀧𑀸𑀓𑀸𑀭𑁂𑀦 𑀧𑀭𑀺𑀓𑁆𑀔𑀺𑀢𑁆𑀢𑀁. 𑀲𑀻𑀢𑀘𑁆𑀙𑀸𑀬𑀢𑀭𑀽𑀧𑁂𑀢𑀦𑁆𑀢𑀺 𑀖𑀦𑀦𑀺𑀘𑀺𑀢𑀧𑀢𑁆𑀢𑀲𑀜𑁆𑀙𑀦𑁆𑀦𑀲𑀸𑀔𑀸𑀧𑀲𑀸𑀔𑀢𑀸𑀬 𑀲𑀻𑀢𑀘𑁆𑀙𑀸𑀬𑁂𑀳𑀺 𑀭𑀼𑀓𑁆𑀔𑁂𑀳𑀺 𑀉𑀧𑁂𑀢𑀁. 𑀯𑀺𑀓𑀲𑀺𑀢𑀓𑀫𑀮𑀓𑀼𑀯𑀮𑀬𑀧𑀼𑀡𑁆𑀟𑀭𑀻𑀓𑀲𑁄𑀕𑀦𑁆𑀥𑀺𑀓𑀸𑀤𑀺𑀧𑀼𑀧𑁆𑀨𑀲𑀜𑁆𑀙𑀦𑁆𑀦𑀫𑀥𑀼𑀭𑀲𑀻𑀢𑀮𑀼𑀤𑀓𑀧𑀼𑀡𑁆𑀡𑀢𑀸𑀬 𑀲𑀫𑁆𑀧𑀦𑁆𑀦𑀸 𑀲𑀮𑀺𑀮𑀸𑀲𑀬𑀸 𑀅𑀲𑁆𑀲𑀸𑀢𑀺 𑀲𑀫𑁆𑀧𑀦𑁆𑀦𑀲𑀮𑀺𑀮𑀸𑀲𑀬𑁄. 𑀉𑀤𑁆𑀤𑀺𑀲𑀺𑀢𑁆𑀯𑀸𑀢𑀺 𑀩𑀼𑀤𑁆𑀥𑀲𑀺𑀭𑀺𑀁 𑀦𑀸𑀫 𑀣𑁂𑀭𑀁 𑀦𑀺𑀲𑁆𑀲𑀸𑀬, 𑀢𑀲𑁆𑀲 𑀅𑀚𑁆𑀛𑁂𑀲𑀦𑀁 𑀦𑀺𑀲𑁆𑀲𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀤𑁆𑀥𑀸𑀢𑀺 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑀸𑀤𑀻𑀳𑀺 𑀇𑀤𑁆𑀥𑀸 𑀨𑀻𑀢𑀸 𑀧𑀭𑀺𑀧𑀼𑀡𑁆𑀡𑀸.

𑀲𑀺𑀭𑀺𑀦𑀺𑀯𑀸𑀲𑀲𑁆𑀲𑀸𑀢𑀺 𑀲𑀺𑀭𑀺𑀬𑀸 𑀦𑀺𑀯𑀸𑀲𑀝𑁆𑀞𑀸𑀦𑀪𑀽𑀢𑀲𑁆𑀲. 𑀚𑀬𑀲𑀁𑀯𑀘𑁆𑀙𑀭𑁂𑀢𑀺 𑀚𑀬𑀧𑁆𑀧𑀢𑁆𑀢𑀲𑀁𑀯𑀘𑁆𑀙𑀭𑁂. 𑀅𑀬𑀦𑁆𑀢𑀺 𑀣𑁂𑀭𑀁 𑀩𑀼𑀤𑁆𑀥𑀲𑀺𑀭𑀺𑀁 𑀉𑀤𑁆𑀤𑀺𑀲𑁆𑀲 𑀬𑀸 𑀯𑀺𑀦𑀬𑀯𑀡𑁆𑀡𑀦𑀸 𑀆𑀭𑀤𑁆𑀥𑀸, 𑀅𑀬𑀁. 𑀥𑀫𑁆𑀫𑀽𑀧𑀲𑀁𑀳𑀺𑀢𑀸𑀢𑀺 𑀓𑀼𑀲𑀮𑀲𑀦𑁆𑀦𑀺𑀲𑁆𑀲𑀺𑀢𑀸. 𑀇𑀤𑀸𑀦𑀺 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀅𑀘𑁆𑀘𑀦𑁆𑀢𑀲𑀼𑀔𑀸𑀥𑀺𑀕𑀫𑀸𑀬 𑀅𑀢𑁆𑀢𑀦𑁄 𑀧𑀼𑀜𑁆𑀜𑀁 𑀧𑀭𑀺𑀡𑀸𑀫𑁂𑀦𑁆𑀢𑁄 ‘‘𑀘𑀺𑀭𑀝𑁆𑀞𑀺𑀢𑀢𑁆𑀣 𑀥𑀫𑁆𑀫𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀫𑀸𑀘𑀺𑀢𑀦𑁆𑀢𑀺 𑀉𑀧𑀘𑀺𑀢𑀁. 𑀲𑀩𑁆𑀩𑀲𑁆𑀲 𑀆𑀦𑀼𑀪𑀸𑀯𑁂𑀦𑀸𑀢𑀺 𑀲𑀩𑁆𑀩𑀲𑁆𑀲 𑀢𑀲𑁆𑀲 𑀧𑀼𑀜𑁆𑀜𑀲𑁆𑀲 𑀢𑁂𑀚𑁂𑀦. 𑀲𑀩𑁆𑀩𑁂𑀧𑀺 𑀧𑀸𑀡𑀺𑀦𑁄𑀢𑀺 𑀓𑀸𑀫𑀸𑀯𑀘𑀭𑀸𑀤𑀺𑀪𑁂𑀤𑀸 𑀲𑀩𑁆𑀩𑁂 𑀲𑀢𑁆𑀢𑀸. 𑀲𑀤𑁆𑀥𑀫𑁆𑀫𑀭𑀲𑀲𑁂𑀯𑀺𑀦𑁄𑀢𑀺 𑀬𑀣𑀸𑀭𑀳𑀁 𑀩𑁄𑀥𑀺𑀢𑁆𑀢𑀬𑀸𑀥𑀺𑀕𑀫𑀯𑀲𑁂𑀦 𑀲𑀤𑁆𑀥𑀫𑁆𑀫𑀭𑀲𑀲𑁂𑀯𑀺𑀦𑁄 𑀪𑀯𑀦𑁆𑀢𑀼. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀦𑀺𑀕𑀫𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀕𑀫𑀦𑀓𑀣𑀸

𑀏𑀢𑁆𑀢𑀸𑀯𑀢𑀸 𑀘 𑁋

𑀯𑀺𑀦𑀬𑁂 𑀧𑀸𑀝𑀯𑀢𑁆𑀣𑀸𑀬, 𑀲𑀸𑀲𑀦𑀲𑁆𑀲 𑀘 𑀯𑀼𑀟𑁆𑀠𑀺𑀬𑀸;

𑀯𑀡𑁆𑀡𑀦𑀸 𑀬𑀸 𑀲𑀫𑀸𑀭𑀤𑁆𑀥𑀸, 𑀯𑀺𑀦𑀬𑀝𑁆𑀞𑀓𑀣𑀸𑀬 𑀲𑀸.

𑀲𑀸𑀭𑀢𑁆𑀣𑀤𑀻𑀧𑀦𑀻 𑀦𑀸𑀫, 𑀲𑀩𑁆𑀩𑀲𑁄 𑀧𑀭𑀺𑀦𑀺𑀝𑁆𑀞𑀺𑀢𑀸;

𑀢𑀺𑀁𑀲𑀲𑀳𑀲𑁆𑀲𑀫𑀢𑁆𑀢𑁂𑀳𑀺, 𑀕𑀦𑁆𑀣𑁂𑀳𑀺 𑀧𑀭𑀺𑀫𑀸𑀡𑀢𑁄.

𑀅𑀚𑁆𑀛𑁂𑀲𑀺𑀢𑁄 𑀦𑀭𑀺𑀦𑁆𑀤𑁂𑀦, 𑀲𑁄𑀳𑀁 𑀧𑀭𑀓𑁆𑀓𑀫𑀩𑀸𑀳𑀼𑀦𑀸;

𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀓𑀸𑀫𑁂𑀦, 𑀲𑀸𑀲𑀦𑀼𑀚𑁆𑀚𑁄𑀢𑀓𑀸𑀭𑀺𑀦𑀸.

𑀢𑁂𑀦𑁂𑀯 𑀓𑀸𑀭𑀺𑀢𑁂 𑀭𑀫𑁆𑀫𑁂, 𑀧𑀸𑀲𑀸𑀤𑀲𑀢𑀫𑀡𑁆𑀟𑀺𑀢𑁂;

𑀦𑀸𑀦𑀸𑀤𑀼𑀫𑀕𑀡𑀸𑀓𑀺𑀡𑁆𑀡𑁂, 𑀪𑀸𑀯𑀦𑀸𑀪𑀺𑀭𑀢𑀸𑀮𑀬𑁂.

𑀲𑀻𑀢𑀮𑀽𑀤𑀓𑀲𑀫𑁆𑀧𑀦𑁆𑀦𑁂, 𑀯𑀲𑀁 𑀚𑁂𑀢𑀯𑀦𑁂 𑀇𑀫𑀁;

𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑀁, 𑀅𑀓𑀸𑀲𑀺𑀁 𑀲𑀼𑀯𑀺𑀦𑀺𑀘𑁆𑀙𑀬𑀁.

𑀬𑀁 𑀲𑀺𑀤𑁆𑀥𑀁 𑀇𑀫𑀺𑀦𑀸 𑀧𑀼𑀜𑁆𑀜𑀁, 𑀬𑀁 𑀘𑀜𑁆𑀜𑀁 𑀧𑀲𑀼𑀢𑀁 𑀫𑀬𑀸;

𑀏𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦, 𑀤𑀼𑀢𑀺𑀬𑁂 𑀅𑀢𑁆𑀢𑀲𑀫𑁆𑀪𑀯𑁂.

𑀢𑀸𑀯𑀢𑀺𑀁𑀲𑁂 𑀧𑀫𑁄𑀤𑁂𑀦𑁆𑀢𑁄, 𑀲𑀻𑀮𑀸𑀘𑀸𑀭𑀕𑀼𑀡𑁂 𑀭𑀢𑁄;

𑀅𑀮𑀕𑁆𑀕𑁄 𑀧𑀜𑁆𑀘𑀓𑀸𑀫𑁂𑀲𑀼, 𑀧𑀢𑁆𑀯𑀸𑀦 𑀧𑀞𑀫𑀁 𑀨𑀮𑀁.

𑀅𑀦𑁆𑀢𑀺𑀫𑁂 𑀅𑀢𑁆𑀢𑀪𑀸𑀯𑀫𑁆𑀳𑀺, 𑀫𑁂𑀢𑁆𑀢𑁂𑀬𑁆𑀬𑀁 𑀫𑀼𑀦𑀺𑀧𑀼𑀗𑁆𑀕𑀯𑀁;

𑀮𑁄𑀓𑀕𑁆𑀕𑀧𑀼𑀕𑁆𑀕𑀮𑀁 𑀦𑀸𑀣𑀁, 𑀲𑀩𑁆𑀩𑀲𑀢𑁆𑀢𑀳𑀺𑀢𑁂 𑀭𑀢𑀁.

𑀤𑀺𑀲𑁆𑀯𑀸𑀦 𑀢𑀲𑁆𑀲 𑀥𑀻𑀭𑀲𑁆𑀲, 𑀲𑀼𑀢𑁆𑀯𑀸 𑀲𑀤𑁆𑀥𑀫𑁆𑀫𑀤𑁂𑀲𑀦𑀁;

𑀅𑀥𑀺𑀕𑀦𑁆𑀢𑁆𑀯𑀸 𑀨𑀮𑀁 𑀅𑀕𑁆𑀕𑀁, 𑀲𑁄𑀪𑁂𑀬𑁆𑀬𑀁 𑀚𑀺𑀦𑀲𑀸𑀲𑀦𑀁.

𑀲𑀤𑀸 𑀭𑀓𑁆𑀔𑀦𑁆𑀢𑀼 𑀭𑀸𑀚𑀸𑀦𑁄, 𑀥𑀫𑁆𑀫𑁂𑀦𑁂𑀯 𑀇𑀫𑀁 𑀧𑀚𑀁;

𑀦𑀺𑀭𑀢𑀸 𑀧𑀼𑀜𑁆𑀜𑀓𑀫𑁆𑀫𑁂𑀲𑀼, 𑀚𑁄𑀢𑁂𑀦𑁆𑀢𑀼 𑀚𑀺𑀦𑀲𑀸𑀲𑀦𑀁.

𑀇𑀫𑁂 𑀘 𑀧𑀸𑀡𑀺𑀦𑁄 𑀲𑀩𑁆𑀩𑁂, 𑀲𑀩𑁆𑀩𑀤𑀸 𑀦𑀺𑀭𑀼𑀧𑀤𑁆𑀤𑀯𑀸;

𑀦𑀺𑀘𑁆𑀘𑀁 𑀓𑀮𑁆𑀬𑀸𑀡𑀲𑀗𑁆𑀓𑀧𑁆𑀧𑀸, 𑀧𑀧𑁆𑀧𑁄𑀦𑁆𑀢𑀼 𑀅𑀫𑀢𑀁 𑀧𑀤𑀦𑁆𑀢𑀺.

𑀲𑀸𑀭𑀢𑁆𑀣𑀤𑀻𑀧𑀦𑀻 𑀦𑀸𑀫 𑀯𑀺𑀦𑀬𑀝𑀻𑀓𑀸 𑀦𑀺𑀝𑁆𑀞𑀺𑀢𑀸.