𑀅𑀧𑀭𑀤𑀼𑀢𑀺𑀬𑀕𑀸𑀣𑀸𑀲𑀗𑁆𑀕𑀡𑀺𑀓𑀁

𑀓𑀸𑀬𑀺𑀓𑀸𑀤𑀺𑀆𑀧𑀢𑁆𑀢𑀺𑀯𑀡𑁆𑀡𑀦𑀸

𑁪𑁭𑁪. 𑀯𑀺𑀦𑀬𑁂 𑀕𑀭𑀼𑀓𑀸 𑀯𑀺𑀦𑀬𑀕𑀭𑀼𑀓𑀸. 𑀓𑀺𑀜𑁆𑀘𑀸𑀧𑀺 𑀇𑀤𑀁 𑀤𑁆𑀯𑀻𑀲𑀼 𑀕𑀸𑀣𑀸𑀲𑀼 𑀆𑀕𑀢𑀁, 𑀅𑀜𑁆𑀜𑁂𑀳𑀺 𑀧𑀦 𑀫𑀺𑀲𑁆𑀲𑁂𑀢𑁆𑀯𑀸 𑀯𑀼𑀢𑁆𑀢𑀪𑀸𑀯𑀢𑁄 𑀦𑀸𑀦𑀸𑀓𑀭𑀡𑀁 𑀧𑀘𑁆𑀘𑁂𑀢𑀩𑁆𑀩𑀁.

𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸𑀤𑀺𑀯𑀡𑁆𑀡𑀦𑀸

𑁪𑁭𑁫. 𑀤𑁆𑀯𑁂 𑀲𑀁𑀯𑀸𑀲𑀓𑀪𑀽𑀫𑀺𑀬𑁄𑀢𑀺 𑀏𑀢𑁆𑀣 𑀪𑀽𑀫𑀻𑀢𑀺 𑀅𑀯𑀢𑁆𑀣𑀸. 𑀅𑀗𑁆𑀕𑀳𑀻𑀦𑀢𑀸 𑀓𑀸𑀭𑀡𑀯𑁂𑀓𑀮𑁆𑀮𑀯𑀲𑁂𑀦𑀧𑀺 𑀯𑁂𑀤𑀺𑀢𑀩𑁆𑀩𑀸𑀢𑀺 𑀆𑀳 ‘‘𑀅𑀧𑀺𑀘𑁂𑀢𑁆𑀣𑀸’’𑀢𑀺𑀆𑀤𑀺. 𑀏𑀲 𑀦𑀬𑁄𑀢𑀺 ‘‘𑀅𑀧𑀺𑀘𑁂𑀢𑁆𑀣𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁄. 𑀯𑀦𑀧𑁆𑀧𑀢𑀺𑀁 𑀙𑀺𑀦𑁆𑀤𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀦𑁆𑀢𑀺 𑀅𑀤𑀺𑀦𑁆𑀦𑀸𑀤𑀸𑀦𑁂 𑀯𑀦𑀧𑁆𑀧𑀢𑀺𑀓𑀣𑀸𑀬 𑀆𑀕𑀢𑀁 𑀧𑀭𑀲𑀦𑁆𑀢𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀯𑀺𑀲𑁆𑀲𑀝𑁆𑀞𑀺𑀙𑀟𑁆𑀟𑀦𑁂𑀢𑀺 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀫𑁄𑀘𑀦𑁂. 𑀤𑀼𑀓𑁆𑀓𑀝𑀸 𑀓𑀢𑀸𑀢𑀺 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁. 𑀧𑀞𑀫𑀲𑀺𑀓𑁆𑀔𑀸𑀧𑀤𑀫𑁆𑀳𑀺𑀬𑁂𑀯𑀸𑀢𑀺 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀯𑀕𑁆𑀕𑀲𑁆𑀲 𑀧𑀞𑀫𑀲𑀺𑀓𑁆𑀔𑀸𑀧𑀤𑁂𑀬𑁂𑀯. 𑀆𑀫𑀓𑀥𑀜𑁆𑀜𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀺𑀬𑀸 𑀧𑀼𑀩𑁆𑀩𑀧𑀬𑁄𑀕𑁂 𑀤𑀼𑀓𑁆𑀓𑀝𑀁, 𑀅𑀚𑁆𑀛𑁄𑀳𑀸𑀭𑁂 𑀧𑀸𑀘𑀺𑀢𑁆𑀢𑀺𑀬𑀁.

𑀧𑀸𑀘𑀺𑀢𑁆𑀢𑀺𑀬𑀯𑀡𑁆𑀡𑀦𑀸

𑁪𑁭𑁬. 𑀅𑀩𑁆𑀪𑀼𑀡𑁆𑀳𑀲𑀻𑀮𑁄𑀢𑀺 𑀅𑀪𑀺𑀦𑀯𑀲𑀻𑀮𑁄.

𑁪𑁭𑁮. 𑀅𑀲𑀼𑀢𑁆𑀢𑀓𑀦𑁆𑀢𑀺 𑀲𑀼𑀢𑁆𑀢𑀯𑀺𑀭𑀳𑀺𑀢𑀁, 𑀲𑀼𑀢𑁆𑀢𑀢𑁄 𑀅𑀧𑀦𑀻𑀢𑀁 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄.