𑀪𑀺𑀓𑁆𑀔𑀼𑀦𑀻𑀯𑀺𑀪𑀗𑁆𑀕𑁄

𑁧𑁭𑁦. 𑀪𑀺𑀓𑁆𑀔𑀽𑀦𑀁 𑀧𑀸𑀝𑀯𑀢𑁆𑀣𑀸𑀬, 𑀯𑀺𑀦𑀬𑀲𑁆𑀲 𑀯𑀺𑀦𑀺𑀘𑁆𑀙𑀬𑁂;

𑀪𑀺𑀓𑁆𑀔𑀼𑀦𑀻𑀦𑀁 𑀯𑀺𑀪𑀗𑁆𑀕𑁄𑀧𑀺, 𑀓𑀺𑀜𑁆𑀘𑀺𑀫𑀢𑁆𑀢𑀁 𑀪𑀡𑀸𑀫𑀳𑀁.

𑁧𑁭𑁧. 𑀅𑀯𑀲𑁆𑀲𑀼𑀢𑀲𑁆𑀲 𑀧𑁄𑀲𑀲𑁆𑀲, 𑀪𑀺𑀓𑁆𑀔𑀼𑀦𑀻𑀧𑀺 𑀅𑀯𑀲𑁆𑀲𑀼𑀢𑀸;

𑀦𑀦𑁆𑀤𑀦𑁆𑀢𑀻 𑀓𑀸𑀬𑀲𑀁𑀲𑀕𑁆𑀕𑀁, 𑀓𑀢𑀺 𑀆𑀧𑀢𑁆𑀢𑀺𑀬𑁄 𑀨𑀼𑀲𑁂;

𑁧𑁭𑁨. 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀉𑀩𑁆𑀪-𑀚𑀸𑀡𑀼𑀲𑁆𑀲𑀸𑀥𑀓𑁆𑀔𑀓𑀲𑁆𑀲 𑀘;

𑀳𑁄𑀢𑀺 𑀧𑀸𑀭𑀸𑀚𑀺𑀓𑀁 𑀢𑀲𑁆𑀲𑀸, 𑀕𑀳𑀡𑀁 𑀲𑀸𑀤𑀺𑀬𑀦𑁆𑀢𑀺𑀬𑀸.

𑁧𑁭𑁩. 𑀉𑀩𑁆𑀪𑀓𑁆𑀔𑀓𑀁 𑀅𑀥𑁄𑀚𑀸𑀡𑀼-𑀕𑀳𑀡𑀁 𑀲𑀸𑀤𑀺𑀬𑀦𑁆𑀢𑀺𑀬𑀸;

𑀣𑀼𑀮𑁆𑀮𑀘𑁆𑀘𑀬𑀁 𑀲𑀺𑀬𑀸, 𑀓𑀸𑀬-𑀧𑀝𑀺𑀩𑀤𑁆𑀥𑁂 𑀢𑀼 𑀤𑀼𑀓𑁆𑀓𑀝𑀁.

𑁧𑁭𑁪. 𑀙𑀸𑀤𑁂𑀦𑁆𑀢𑀻 𑀪𑀺𑀓𑁆𑀔𑀼𑀦𑀻 𑀯𑀚𑁆𑀚𑀁, 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀨𑀼𑀲𑁂;

𑀚𑀸𑀦𑀁 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁, 𑀙𑀸𑀤𑁂𑀦𑁆𑀢𑀻 𑀲𑀸 𑀧𑀭𑀸𑀚𑀺𑀓𑀸.

𑁧𑁭𑁫. 𑀣𑀼𑀮𑁆𑀮𑀘𑁆𑀘𑀬𑀁 𑀯𑁂𑀫𑀢𑀺𑀓𑀸, 𑀧𑀝𑀺𑀘𑁆𑀙𑀸𑀤𑁂𑀢𑀺 𑀘𑁂 𑀧𑀦;

𑀅𑀣𑀸𑀘𑀸𑀭𑀯𑀺𑀧𑀢𑁆𑀢𑀺𑀁 𑀘𑁂, 𑀧𑀝𑀺𑀘𑁆𑀙𑀸𑀤𑁂𑀢𑀺 𑀤𑀼𑀓𑁆𑀓𑀝𑀁.

𑁧𑁭𑁬. 𑀦𑀺𑀲𑁆𑀲𑀚𑁆𑀚𑀦𑁆𑀢𑀻 𑀦 𑀢𑀁 𑀮𑀤𑁆𑀥𑀺𑀁, 𑀉𑀓𑁆𑀔𑀺𑀢𑁆𑀢𑀲𑁆𑀲𑀸𑀦𑀼𑀯𑀢𑁆𑀢𑀺𑀓𑀸;

𑀲𑀫𑀦𑀼𑀪𑀸𑀲𑀦𑀸𑀬𑁂𑀯, 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀨𑀼𑀲𑁂.

𑁧𑁭𑁭. 𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁, 𑀤𑁆𑀯𑀻𑀳𑀺, 𑀓𑀫𑁆𑀫𑀯𑀸𑀘𑀸𑀳𑀺 𑀣𑀼𑀮𑁆𑀮𑀢𑀸;

𑀓𑀫𑁆𑀫𑀯𑀸𑀘𑀸𑀬 𑀑𑀲𑀸𑀦𑁂, 𑀧𑀸𑀭𑀸𑀚𑀺𑀓𑀫𑀼𑀤𑀻𑀭𑀺𑀢𑀁.

𑁧𑁭𑁮. 𑀧𑀽𑀭𑁂𑀦𑁆𑀢𑀻 𑀅𑀝𑁆𑀞𑀫𑀁 𑀯𑀢𑁆𑀣𑀼𑀁, 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀨𑀼𑀲𑁂;

𑀧𑀼𑀭𑀺𑀲𑁂𑀦𑀺𑀥𑀸𑀕𑀘𑁆𑀙𑀸𑀢𑀺, 𑀯𑀼𑀢𑁆𑀢𑀸𑀕𑀘𑁆𑀙𑀢𑀺 𑀤𑀼𑀓𑁆𑀓𑀝𑀁.

𑁧𑁭𑁯. 𑀣𑀼𑀮𑁆𑀮𑀘𑁆𑀘𑀬𑀁 𑀢𑀼 𑀧𑁄𑀲𑀲𑁆𑀲, 𑀳𑀢𑁆𑀣𑀧𑀸𑀲𑀧𑁆𑀧𑀯𑁂𑀲𑀦𑁂;

𑀧𑀽𑀭𑁂𑀦𑁆𑀢𑀻 𑀅𑀝𑁆𑀞𑀫𑀁 𑀯𑀢𑁆𑀣𑀼𑀁, 𑀲𑀫𑀡𑀻 𑀲𑀸 𑀧𑀭𑀸𑀚𑀺𑀢𑀸.

𑀧𑀸𑀭𑀸𑀚𑀺𑀓𑀓𑀣𑀸.

𑁧𑁮𑁦. 𑀉𑀲𑁆𑀲𑀬𑀯𑀸𑀤𑀺𑀓𑀸 𑀅𑀝𑁆𑀝𑀁, 𑀓𑀭𑁄𑀦𑁆𑀢𑀻 𑀢𑀺𑀯𑀺𑀥𑀁 𑀨𑀼𑀲𑁂;

𑀏𑀓𑀲𑁆𑀲𑀸𑀭𑁄𑀘𑀦𑁂 𑀢𑀲𑁆𑀲𑀸, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑁧𑁮𑁧. 𑀤𑀼𑀢𑀺𑀬𑀸𑀭𑁄𑀘𑀦𑁂 𑀢𑀲𑁆𑀲𑀸, 𑀣𑀼𑀮𑁆𑀮𑀘𑁆𑀘𑀬𑀫𑀼𑀤𑀻𑀭𑀺𑀢𑀁;

𑀅𑀝𑁆𑀝𑀲𑁆𑀲 𑀧𑀭𑀺𑀬𑁄𑀲𑀸𑀦𑁂, 𑀳𑁄𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀢𑀸.

𑁧𑁮𑁨. 𑀘𑁄𑀭𑀺𑀯𑀼𑀝𑁆𑀞𑀸𑀧𑀺𑀓𑀸 𑀯𑀸𑀧𑀺, 𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁 𑀨𑀼𑀲𑁂;

𑀤𑁆𑀯𑀻𑀳𑀺 𑀣𑀼𑀮𑁆𑀮𑀘𑁆𑀘𑀬𑀁 𑀓𑀫𑁆𑀫-𑀯𑀸𑀘𑁄𑀲𑀸𑀦𑁂 𑀕𑀭𑀼𑀁 𑀲𑀺𑀬𑀸.

𑁧𑁮𑁩. 𑀏𑀓𑀸 𑀕𑀸𑀫𑀦𑁆𑀢𑀭𑀁 𑀕𑀘𑁆𑀙𑁂, 𑀕𑀫𑀦𑁂 𑀤𑀼𑀓𑁆𑀓𑀝𑀁 𑀲𑀺𑀬𑀸;

𑀧𑀭𑀺𑀓𑁆𑀔𑁂𑀧𑁂 𑀅𑀢𑀺𑀓𑁆𑀓𑀦𑁆𑀢𑁂, 𑀧𑀸𑀤𑁂𑀦 𑀧𑀞𑀫𑁂𑀦 𑀢𑀼.

𑁧𑁮𑁪. 𑀳𑁄𑀢𑀺 𑀣𑀼𑀮𑁆𑀮𑀘𑁆𑀘𑀬𑀸𑀧𑀢𑁆𑀢𑀺, 𑀢𑀲𑁆𑀲𑀸 𑀲𑀫𑀡𑀺𑀬𑀸 𑀧𑀦;

𑀤𑀼𑀢𑀺𑀬𑁂𑀦 𑀅𑀢𑀺𑀓𑁆𑀓𑀦𑁆𑀢𑁂, 𑀕𑀭𑀼𑀓𑁂 𑀧𑀦 𑀢𑀺𑀝𑁆𑀞𑀢𑀺.

𑁧𑁮𑁫. 𑀘𑀢𑀼𑀢𑁆𑀣𑁂 𑀤𑀼𑀢𑀺𑀬𑁂 𑀯𑀼𑀢𑁆𑀢-𑀲𑀤𑀺𑀲𑁄𑀯 𑀯𑀺𑀦𑀺𑀘𑁆𑀙𑀬𑁄;

𑀆𑀧𑀢𑁆𑀢𑀻𑀦𑀁 𑀧𑀪𑁂𑀤𑁂 𑀢𑀼, 𑀓𑀸𑀘𑀺 𑀦𑀢𑁆𑀣𑀺 𑀯𑀺𑀲𑁂𑀲𑀢𑀸.

𑁧𑁮𑁬. 𑀅𑀯𑀲𑁆𑀲𑀼𑀢𑀸 𑀲𑀬𑀁 𑀳𑀼𑀢𑁆𑀯𑀸, 𑀢𑀸𑀤𑀺𑀲𑀲𑁆𑀲𑁂𑀯 𑀳𑀢𑁆𑀣𑀢𑁄;

𑀕𑀳𑁂𑀢𑁆𑀯𑀸 𑀧𑀦 𑀪𑀼𑀜𑁆𑀚𑀦𑁆𑀢𑀻, 𑀪𑁄𑀚𑀦𑀸𑀤𑀻𑀲𑀼 𑀓𑀺𑀜𑁆𑀘𑀺𑀧𑀺.

𑁧𑁮𑁭. 𑀨𑀼𑀲𑁂 𑀆𑀧𑀢𑁆𑀢𑀺𑀬𑁄 𑀢𑀺𑀲𑁆𑀲𑁄, 𑀪𑁄𑀚𑀦𑀸𑀤𑀻𑀲𑀼 𑀓𑀺𑀜𑁆𑀘𑀺𑀧𑀺;

𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺𑀬𑀸 𑀢𑀲𑁆𑀲𑀸, 𑀳𑁄𑀢𑀺 𑀣𑀼𑀮𑁆𑀮𑀘𑁆𑀘𑀬𑀁 𑀧𑀦.

𑁧𑁮𑁮. 𑀅𑀚𑁆𑀛𑁄𑀳𑀸𑀭𑁂𑀲𑀼 𑀲𑀩𑁆𑀩𑁂𑀲𑀼, 𑀳𑁄𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀢𑀸;

𑀉𑀤𑀓𑀁 𑀤𑀦𑁆𑀢𑀧𑁄𑀦𑀁 𑀯𑀸, 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀤𑀼𑀓𑁆𑀓𑀝𑀁.

𑁧𑁮𑁯. ‘‘𑀲𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀢𑁆𑀯𑀁, 𑀔𑀸𑀤 𑀯𑀸 𑀪𑀼𑀜𑁆𑀚 𑀯𑀸’’𑀢𑀺𑀧𑀺;

𑀉𑀬𑁆𑀬𑁄𑀚𑁂𑀦𑁆𑀢𑀻 𑀧𑀦𑁂𑀯𑀁 𑀢𑀼, 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀨𑀼𑀲𑁂.

𑁧𑁯𑁦. 𑀤𑀼𑀓𑁆𑀓𑀝𑀁 𑀯𑀘𑀦𑁂 𑀢𑀲𑁆𑀲𑀸, ‘‘𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀕𑀡𑁆𑀳𑀢𑀺;

𑀅𑀚𑁆𑀛𑁄𑀳𑀸𑀭𑁂𑀲𑀼 𑀲𑀩𑁆𑀩𑁂𑀲𑀼, 𑀢𑀲𑁆𑀲𑀸 𑀣𑀼𑀮𑁆𑀮𑀘𑁆𑀘𑀬𑀁 𑀲𑀺𑀬𑀸.

𑁧𑁯𑁧. 𑀪𑁄𑀚𑀦𑀲𑁆𑀲 𑀧𑀦𑁄𑀲𑀸𑀦𑁂, 𑀳𑁄𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀢𑀸;

𑀉𑀬𑁆𑀬𑁄𑀚𑁂𑀢𑀺 𑀘 𑀬𑀸 𑀢𑀲𑁆𑀲𑀸, 𑀇𑀫𑀸 𑀢𑀺𑀲𑁆𑀲𑁄𑀢𑀺 𑀤𑀻𑀧𑀬𑁂.

𑁧𑁯𑁨. 𑀲𑀢𑁆𑀢𑀫𑁂 𑀅𑀝𑁆𑀞𑀫𑁂 𑀘𑀸𑀧𑀺, 𑀦𑀯𑀫𑁂 𑀤𑀲𑀫𑁂𑀧𑀺 𑀘;

𑀘𑁄𑀭𑀺𑀯𑀼𑀝𑁆𑀞𑀸𑀧𑀦𑁂𑀦𑁂𑀯, 𑀲𑀫𑀸𑀦𑁄𑀯 𑀯𑀺𑀦𑀺𑀘𑁆𑀙𑀬𑁄.

𑀲𑀗𑁆𑀖𑀸𑀤𑀺𑀲𑁂𑀲𑀓𑀣𑀸.

𑁧𑁯𑁩. 𑀧𑀢𑁆𑀢𑀲𑀦𑁆𑀦𑀺𑀘𑀬𑀁 𑀬𑀺𑀳, 𑀓𑀭𑁄𑀦𑁆𑀢𑀻 𑀪𑀺𑀓𑁆𑀔𑀼𑀦𑀻 𑀧𑀦;

𑀏𑀓𑀁 𑀦𑀺𑀲𑁆𑀲𑀕𑁆𑀕𑀺𑀬𑀁𑀬𑁂𑀯, 𑀨𑀼𑀲𑁂 𑀧𑀸𑀘𑀺𑀢𑁆𑀢𑀺𑀬𑀁 𑀢𑀼 𑀲𑀸.

𑁧𑁯𑁪. 𑀅𑀓𑀸𑀮𑀘𑀻𑀯𑀭𑀁 𑀓𑀸𑀮-𑀘𑀻𑀯𑀭𑀁 𑀪𑀸𑀚𑀸𑀧𑁂𑀦𑁆𑀢𑀺𑀬𑀸;

𑀧𑀬𑁄𑀕𑁂 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀮𑀸𑀪𑁂 𑀦𑀺𑀲𑁆𑀲𑀕𑁆𑀕𑀺𑀬𑀁 𑀲𑀺𑀬𑀸.

𑁧𑁯𑁫. 𑀘𑀻𑀯𑀭𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸, 𑀅𑀘𑁆𑀙𑀺𑀦𑁆𑀤𑀢𑀺 𑀲𑀘𑁂 𑀧𑀦;

𑀧𑀬𑁄𑀕𑁂 𑀤𑀼𑀓𑁆𑀓𑀝𑀁, 𑀙𑀺𑀦𑁆𑀦𑁂, 𑀢𑀲𑁆𑀲𑀸 𑀦𑀺𑀲𑁆𑀲𑀕𑁆𑀕𑀺𑀬𑀁 𑀲𑀺𑀬𑀸.

𑁧𑁯𑁬. 𑀯𑀺𑀜𑁆𑀜𑀸𑀧𑁂𑀢𑁆𑀯𑀸𑀯 𑀅𑀜𑁆𑀜𑀁 𑀘𑁂, 𑀯𑀺𑀜𑁆𑀜𑀸𑀧𑁂𑀢𑀺 𑀢𑀢𑁄 𑀧𑀭𑀁;

𑀧𑀬𑁄𑀕𑁂 𑀤𑀼𑀓𑁆𑀓𑀝𑀁, 𑀯𑀺𑀜𑁆𑀜𑀸-𑀧𑀺𑀢𑁂 𑀦𑀺𑀲𑁆𑀲𑀕𑁆𑀕𑀺𑀬𑀁 𑀲𑀺𑀬𑀸.

𑁧𑁯𑁭. 𑀘𑁂𑀢𑀸𑀧𑁂𑀢𑁆𑀯𑀸 𑀳𑀺 𑀅𑀜𑁆𑀜𑀁 𑀘𑁂, 𑀘𑁂𑀢𑀸𑀧𑁂𑀢𑀺 𑀢𑀢𑁄 𑀧𑀭𑀁;

𑀧𑀬𑁄𑀕𑁂 𑀤𑀼𑀓𑁆𑀓𑀝𑀁, 𑀘𑁂𑀢𑀸-𑀧𑀺𑀢𑁂 𑀦𑀺𑀲𑁆𑀲𑀕𑁆𑀕𑀺𑀬𑀁 𑀲𑀺𑀬𑀸.

𑁧𑁯𑁮. 𑀏𑀯𑀫𑁂𑀯 𑀘 𑀲𑁂𑀲𑁂𑀲𑀼, 𑀙𑀝𑁆𑀞𑀸𑀤𑀻𑀲𑀼 𑀘 𑀲𑀢𑁆𑀢𑀲𑀼;

𑀅𑀦𑀦𑁆𑀢𑀭𑀲𑀫𑀸𑀦𑁄𑀯, 𑀆𑀧𑀢𑁆𑀢𑀻𑀦𑀁 𑀯𑀺𑀦𑀺𑀘𑁆𑀙𑀬𑁄.

𑀦𑀺𑀲𑁆𑀲𑀕𑁆𑀕𑀺𑀬𑀓𑀣𑀸.

𑁧𑁯𑁯. 𑀮𑀲𑀼𑀡𑀁 𑀔𑀸𑀤𑀢𑀺 𑀤𑁆𑀯𑁂 𑀘𑁂, 𑀤𑀼𑀓𑁆𑀓𑀝𑀁 𑀕𑀳𑀡𑁂 𑀲𑀺𑀬𑀸;

𑀅𑀚𑁆𑀛𑁄𑀳𑀸𑀭𑀧𑀬𑁄𑀕𑁂𑀲𑀼, 𑀧𑀸𑀘𑀺𑀢𑁆𑀢𑀺 𑀧𑀭𑀺𑀬𑀸𑀧𑀼𑀢𑀸.

𑁨𑁦𑁦. 𑀲𑀁𑀳𑀭𑀸𑀧𑁂𑀦𑁆𑀢𑀺𑀬𑀸 𑀮𑁄𑀫𑀁, 𑀲𑀫𑁆𑀩𑀸𑀥𑁂 𑀤𑁆𑀯𑁂𑀯 𑀳𑁄𑀦𑁆𑀢𑀺 𑀳𑀺;

𑀧𑀬𑁄𑀕𑁂 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀳𑁄𑀢𑀺 𑀧𑀸𑀘𑀺𑀢𑁆𑀢𑀺 𑀲𑀁𑀳𑀝𑁂.

𑁨𑁦𑁧. 𑀓𑀭𑁄𑀦𑁆𑀢𑀻 𑀢𑀮𑀖𑀸𑀢𑀁 𑀢𑀼, 𑀤𑁆𑀯𑁂 𑀧𑀦𑀸𑀧𑀢𑁆𑀢𑀺𑀬𑁄 𑀨𑀼𑀲𑁂;

𑀧𑀬𑁄𑀕𑁂 𑀤𑀼𑀓𑁆𑀓𑀝𑀁 𑀳𑁄𑀢𑀺, 𑀓𑀢𑁂 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸.

𑁨𑁦𑁨. 𑀚𑀢𑀼𑀦𑀸 𑀫𑀝𑁆𑀞𑀓𑀁 𑀓𑀺𑀜𑁆𑀘𑀺, 𑀲𑀸𑀤𑀺𑀬𑀦𑁆𑀢𑀻 𑀤𑀼𑀯𑁂 𑀨𑀼𑀲𑁂;

𑀧𑀬𑁄𑀕𑁂 𑀤𑀼𑀓𑁆𑀓𑀝𑀸𑀤𑀺𑀦𑁆𑀦𑁂, 𑀢𑀲𑁆𑀲𑀸 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸.

𑁨𑁦𑁩. 𑀧𑀜𑁆𑀘𑀫𑀁 𑀢𑀼 𑀘𑀢𑀼𑀢𑁆𑀣𑁂𑀦, 𑀲𑀫𑀸𑀦𑀫𑀺𑀢𑀺 𑀤𑀻𑀧𑀬𑁂;

𑀆𑀧𑀢𑁆𑀢𑀻𑀦𑀁 𑀯𑀺𑀪𑀸𑀕𑀲𑁆𑀫𑀺𑀁, 𑀯𑀺𑀲𑁂𑀲𑁄 𑀦𑀢𑁆𑀣𑀺 𑀓𑁄𑀘𑀺𑀧𑀺.

𑁨𑁦𑁪. 𑀪𑀺𑀓𑁆𑀔𑀼𑀲𑁆𑀲 𑀪𑀼𑀜𑁆𑀚𑀫𑀸𑀦𑀲𑁆𑀲, 𑀧𑀸𑀦𑀻𑀬𑁂𑀦𑀼𑀧𑀢𑀺𑀝𑁆𑀞𑀢𑀺;

𑀳𑀢𑁆𑀣𑀧𑀸𑀲𑁂 𑀢𑀼 𑀧𑀸𑀘𑀺𑀢𑁆𑀢𑀺, 𑀳𑀺𑀢𑁆𑀯𑀸 𑀢𑀺𑀝𑁆𑀞𑀢𑀺 𑀤𑀼𑀓𑁆𑀓𑀝𑀁.

𑁨𑁦𑁫. 𑀯𑀺𑀜𑁆𑀜𑀸𑀧𑁂𑀢𑁆𑀯𑀸𑀫𑀓𑀁 𑀥𑀜𑁆𑀜𑀁, ‘‘𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀕𑀡𑁆𑀳𑀢𑀺;

𑀤𑀼𑀓𑁆𑀓𑀝𑀁 𑀳𑁄𑀢𑀺 𑀧𑀸𑀘𑀺𑀢𑁆𑀢𑀺, 𑀅𑀚𑁆𑀛𑁄𑀳𑀸𑀭𑁂𑀲𑀼 𑀤𑀻𑀧𑀬𑁂.

𑁨𑁦𑁬. 𑀉𑀘𑁆𑀘𑀸𑀭𑀸𑀤𑀺𑀁 𑀢𑀺𑀭𑁄𑀓𑀼𑀝𑁆𑀝𑁂, 𑀙𑀟𑁆𑀟𑁂𑀦𑁆𑀢𑀻 𑀤𑁆𑀯𑁂 𑀨𑀼𑀲𑁂 𑀳𑀯𑁂;

𑀧𑀬𑁄𑀕𑁂 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀧𑀸𑀘𑀺𑀢𑁆𑀢𑀺 𑀙𑀟𑁆𑀟𑀺𑀢𑁂 𑀲𑀺𑀬𑀸.

𑁨𑁦𑁭. 𑀉𑀘𑁆𑀘𑀸𑀭𑀸𑀤𑀺𑀘𑀢𑀼𑀓𑁆𑀓𑀁 𑀢𑀼, 𑀙𑀟𑁆𑀟𑁂𑀢𑀺 𑀳𑀭𑀺𑀢𑁂 𑀲𑀘𑁂;

𑀧𑀬𑁄𑀕𑁂 𑀤𑀼𑀓𑁆𑀓𑀝𑀁 𑀢𑀲𑁆𑀲𑀸, 𑀧𑀸𑀘𑀺𑀢𑁆𑀢𑀺 𑀙𑀟𑁆𑀟𑀺𑀢𑁂 𑀲𑀺𑀬𑀸.

𑁨𑁦𑁮. 𑀦𑀘𑁆𑀘𑀸𑀤𑀺𑀁 𑀤𑀲𑁆𑀲𑀦𑀢𑁆𑀣𑀸𑀬, 𑀲𑀘𑁂 𑀕𑀘𑁆𑀙𑀢𑀺 𑀤𑀼𑀓𑁆𑀓𑀝𑀁;

𑀧𑀲𑁆𑀲𑀦𑁆𑀢𑀺𑀬𑀸𑀧𑀺 𑀧𑀸𑀘𑀺𑀢𑁆𑀢𑀺, 𑀢𑀣𑁂𑀯 𑀘 𑀲𑀼𑀡𑀦𑁆𑀢𑀺𑀬𑀸.

𑀮𑀲𑀼𑀡𑀯𑀕𑁆𑀕𑁄 𑀧𑀞𑀫𑁄.

𑁨𑁦𑁯. 𑀧𑀞𑀫𑁂 𑀤𑀼𑀢𑀺𑀬𑁂 𑀘𑁂𑀯, 𑀢𑀢𑀺𑀬𑁂 𑀘 𑀘𑀢𑀼𑀢𑁆𑀣𑀓𑁂;

𑀢𑀼𑀮𑁆𑀬𑁄 𑀮𑀲𑀼𑀡𑀯𑀕𑁆𑀕𑀲𑁆𑀲, 𑀙𑀝𑁆𑀞𑁂𑀦𑀺𑀥 𑀯𑀺𑀦𑀺𑀘𑁆𑀙𑀬𑁄.

𑁨𑁧𑁦. 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑁆𑀫, 𑀦𑀺𑀲𑀻𑀤𑀺𑀢𑁆𑀯𑀸 𑀧𑀦𑀸𑀲𑀦𑁂;

𑀲𑀸𑀫𑀺𑀓𑁂 𑀢𑀼 𑀅𑀦𑀸𑀧𑀼𑀘𑁆𑀙𑀸, 𑀧𑀓𑁆𑀓𑀫𑀦𑁆𑀢𑀻 𑀤𑀼𑀯𑁂 𑀨𑀼𑀲𑁂.

𑁨𑁧𑁧. 𑀧𑀞𑀫𑁂𑀦 𑀘 𑀧𑀸𑀤𑁂𑀦, 𑀅𑀦𑁄𑀯𑀲𑁆𑀲𑀫𑀢𑀺𑀓𑁆𑀓𑀫𑁂;

𑀤𑀼𑀓𑁆𑀓𑀝𑀁 𑀳𑁄𑀢𑀺, 𑀧𑀸𑀘𑀺𑀢𑁆𑀢𑀺, 𑀤𑀼𑀢𑀺𑀬𑀸𑀢𑀺𑀓𑁆𑀓𑀫𑁂 𑀲𑀺𑀬𑀸.

𑁨𑁧𑁨. 𑀲𑀸𑀫𑀺𑀓𑁂 𑀢𑀼 𑀅𑀦𑀸𑀧𑀼𑀘𑁆𑀙𑀸, 𑀆𑀲𑀦𑁂 𑀘𑁂 𑀦𑀺𑀲𑀻𑀤𑀢𑀺;

𑀧𑀬𑁄𑀕𑁂 𑀤𑀼𑀓𑁆𑀓𑀝𑀁 𑀳𑁄𑀢𑀺, 𑀧𑀸𑀘𑀺𑀢𑁆𑀢𑀺 𑀘 𑀦𑀺𑀲𑀻𑀤𑀺𑀢𑁂.

𑁨𑁧𑁩. 𑀙𑀝𑁆𑀞𑁂𑀦 𑀲𑀢𑁆𑀢𑀫𑀁 𑀲𑀩𑁆𑀩𑀁, 𑀲𑀫𑀸𑀦𑀁 𑀅𑀝𑁆𑀞𑀫𑁂 𑀧𑀦;

𑀧𑀬𑁄𑀕𑁂 𑀤𑀼𑀓𑁆𑀓𑀝𑀁, 𑀉𑀚𑁆𑀛𑀸-𑀧𑀺𑀢𑁂 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸.

𑁨𑁧𑁪. 𑀅𑀢𑁆𑀢𑀸𑀦𑀁 𑀘𑀸𑀪𑀺𑀲𑀧𑁆𑀧𑁂𑀦𑁆𑀢𑀻, 𑀤𑁆𑀯𑁂 𑀨𑀼𑀲𑁂 𑀦𑀺𑀭𑀬𑀸𑀤𑀺𑀦𑀸;

𑀧𑀬𑁄𑀕𑁂 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀧𑀸𑀘𑀺𑀢𑁆𑀢𑀺 𑀅𑀪𑀺𑀲𑀧𑁆𑀧𑀺𑀢𑁂.

𑁨𑁧𑁫. 𑀯𑀥𑀺𑀢𑁆𑀯𑀸 𑀧𑀦 𑀅𑀢𑁆𑀢𑀸𑀦𑀁, 𑀭𑁄𑀤𑀦𑁆𑀢𑀻 𑀢𑀼 𑀤𑀼𑀯𑁂 𑀨𑀼𑀲𑁂;

𑀯𑀥𑀢𑀺 𑀭𑁄𑀤𑀢𑀺 𑀧𑀸𑀘𑀺𑀢𑁆𑀢𑀺, 𑀓𑀭𑁄𑀢𑁂𑀓𑀁 𑀢𑀼 𑀤𑀼𑀓𑁆𑀓𑀝𑀁.

𑀭𑀢𑁆𑀢𑀦𑁆𑀥𑀓𑀸𑀭𑀯𑀕𑁆𑀕𑁄 𑀤𑀼𑀢𑀺𑀬𑁄.

𑁨𑁧𑁬. 𑀦𑀕𑁆𑀕𑀸 𑀦𑁆𑀳𑀸𑀬𑀢𑀺 𑀤𑁆𑀯𑁂 𑀘𑁂𑀯, 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁 𑀲𑀺𑀬𑀸;

𑀦𑁆𑀳𑀸𑀦𑀲𑁆𑀲 𑀧𑀭𑀺𑀬𑁄𑀲𑀸𑀦𑁂, 𑀢𑀲𑁆𑀲𑀸 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸.

𑁨𑁧𑁭. 𑀓𑀸𑀭𑀸𑀧𑁂𑀢𑀺 𑀧𑀫𑀸𑀡𑀸𑀢𑀺-𑀓𑁆𑀓𑀦𑁆𑀢𑀁 𑀉𑀤𑀓𑀲𑀸𑀝𑀺𑀓𑀁;

𑀧𑀬𑁄𑀕𑁂 𑀤𑀼𑀓𑁆𑀓𑀝𑀁, 𑀓𑀸𑀭𑀸-𑀧𑀺𑀢𑁂 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸.

𑁨𑁧𑁮. 𑀘𑀻𑀯𑀭𑀁 𑀢𑀼 𑀯𑀺𑀲𑀺𑀩𑁆𑀩𑁂𑀢𑁆𑀯𑀸, 𑀯𑀺𑀲𑀺𑀩𑁆𑀩𑀸𑀧𑁂𑀢𑁆𑀯 𑀯𑀸 𑀧𑀦;

𑀦𑁂𑀯 𑀲𑀺𑀩𑁆𑀩𑀦𑁆𑀢𑀺𑀬𑀸 𑀯𑀼𑀢𑁆𑀢-𑀫𑁂𑀓𑀁 𑀧𑀸𑀘𑀺𑀢𑁆𑀢𑀺𑀬𑀁 𑀧𑀦.

𑁨𑁧𑁯. 𑀧𑀜𑁆𑀘𑀸𑀳𑀺𑀓𑀁 𑀢𑀼 𑀲𑀗𑁆𑀖𑀸𑀝𑀺-𑀘𑀸𑀭𑀁 𑀧𑀦 𑀅𑀢𑀺𑀓𑁆𑀓𑀫𑁂;

𑀏𑀓𑀸𑀯𑀲𑁆𑀲𑀸 𑀧𑀦𑀸𑀧𑀢𑁆𑀢𑀺, 𑀧𑀸𑀘𑀺𑀢𑁆𑀢𑀺 𑀧𑀭𑀺𑀤𑀻𑀧𑀺𑀢𑀸.

𑁨𑁨𑁦. 𑀲𑀘𑁂 𑀲𑀗𑁆𑀓𑀫𑀦𑀻𑀬𑀁 𑀢𑀼, 𑀥𑀸𑀭𑁂𑀢𑀺 𑀧𑀦 𑀘𑀻𑀯𑀭𑀁;

𑀧𑀬𑁄𑀕𑁂 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀧𑀸𑀘𑀺𑀢𑁆𑀢𑀺 𑀧𑀦 𑀥𑀸𑀭𑀺𑀢𑁂.

𑁨𑁨𑁧. 𑀕𑀡𑀘𑀻𑀯𑀭𑀮𑀸𑀪𑀲𑁆𑀲, 𑀅𑀦𑁆𑀢𑀭𑀸𑀬𑀁 𑀓𑀭𑁄𑀢𑀺 𑀘𑁂;

𑀧𑀬𑁄𑀕𑁂 𑀤𑀼𑀓𑁆𑀓𑀝𑀁 𑀳𑁄𑀢𑀺, 𑀓𑀢𑁂 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸.

𑁨𑁨𑁨. 𑀯𑀺𑀪𑀗𑁆𑀕𑀁 𑀧𑀝𑀺𑀩𑀸𑀳𑀦𑁆𑀢𑀻, 𑀘𑀻𑀯𑀭𑀸𑀦𑀁 𑀢𑀼 𑀥𑀫𑁆𑀫𑀺𑀓𑀁;

𑀧𑀬𑁄𑀕𑁂 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀧𑀸𑀘𑀺𑀢𑁆𑀢𑀺 𑀧𑀝𑀺𑀩𑀸𑀳𑀺𑀢𑁂.

𑁨𑁨𑁩. 𑀅𑀕𑀸𑀭𑀺𑀓𑀸𑀤𑀺𑀦𑁄 𑀤𑁂𑀢𑀺, 𑀲𑀘𑁂 𑀲𑀫𑀡𑀘𑀻𑀯𑀭𑀁;

𑀧𑀬𑁄𑀕𑁂 𑀤𑀼𑀓𑁆𑀓𑀝𑀁, 𑀤𑀺𑀦𑁆𑀦𑁂, 𑀧𑀸𑀘𑀺𑀢𑁆𑀢𑀺 𑀧𑀭𑀺𑀬𑀸𑀧𑀼𑀢𑀸.

𑁨𑁨𑁪. 𑀘𑀻𑀯𑀭𑁂 𑀤𑀼𑀩𑁆𑀩𑀮𑀸𑀲𑀸𑀬, 𑀓𑀸𑀮𑀁 𑀘𑁂 𑀲𑀫𑀢𑀺𑀓𑁆𑀓𑀫𑁂;

𑀧𑀬𑁄𑀕𑁂 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀧𑀸𑀘𑀺𑀢𑁆𑀢𑀺 𑀲𑀫𑀢𑀺𑀓𑁆𑀓𑀫𑁂.

𑁨𑁨𑁫. 𑀥𑀫𑁆𑀫𑀺𑀓𑀁 𑀓𑀣𑀺𑀦𑀼𑀤𑁆𑀥𑀸𑀭𑀁, 𑀧𑀝𑀺𑀩𑀸𑀳𑀦𑁆𑀢𑀺𑀬𑀸 𑀤𑀼𑀯𑁂;

𑀧𑀬𑁄𑀕𑁂 𑀤𑀼𑀓𑁆𑀓𑀝𑀁 𑀳𑁄𑀢𑀺, 𑀧𑀸𑀘𑀺𑀢𑁆𑀢𑀺 𑀧𑀝𑀺𑀩𑀸𑀳𑀺𑀢𑁂.

𑀦𑁆𑀳𑀸𑀦𑀯𑀕𑁆𑀕𑁄 𑀢𑀢𑀺𑀬𑁄.

𑁨𑁨𑁬. 𑀤𑀼𑀯𑁂 𑀪𑀺𑀓𑁆𑀔𑀼𑀦𑀺𑀬𑁄 𑀏𑀓-𑀫𑀜𑁆𑀘𑀲𑁆𑀫𑀺𑀁 𑀘𑁂 𑀢𑀼𑀯𑀝𑁆𑀝𑁂𑀬𑁆𑀬𑀼𑀁;

𑀧𑀬𑁄𑀕𑁂 𑀤𑀼𑀓𑁆𑀓𑀝𑀁 𑀢𑀸𑀲𑀁, 𑀦𑀺𑀧𑀦𑁆𑀦𑁂 𑀇𑀢𑀭𑀁 𑀲𑀺𑀬𑀸.

𑁨𑁨𑁭. 𑀤𑀼𑀢𑀺𑀬𑀁 𑀧𑀞𑀫𑁂𑀦𑁂𑀯, 𑀲𑀤𑀺𑀲𑀁 𑀢𑀢𑀺𑀬𑁂 𑀧𑀦;

𑀧𑀬𑁄𑀕𑁂 𑀤𑀼𑀓𑁆𑀓𑀝𑀁 𑀳𑁄𑀢𑀺, 𑀓𑀢𑁂 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸.

𑁨𑁨𑁮. 𑀦𑀼𑀧𑀝𑁆𑀞𑀸𑀧𑁂𑀦𑁆𑀢𑀺𑀬𑀸 𑀯𑀸𑀧𑀺, 𑀤𑀼𑀓𑁆𑀔𑀺𑀢𑀁 𑀲𑀳𑀚𑀻𑀯𑀺𑀦𑀺𑀁;

𑀏𑀓𑀸𑀬𑁂𑀯 𑀧𑀦𑀸𑀧𑀢𑁆𑀢𑀺, 𑀧𑀸𑀘𑀺𑀢𑁆𑀢𑀺 𑀧𑀭𑀺𑀤𑀻𑀧𑀺𑀢𑀸.

𑁨𑁨𑁯. 𑀲𑀘𑁂 𑀉𑀧𑀲𑁆𑀲𑀬𑀁 𑀤𑀢𑁆𑀯𑀸, 𑀦𑀺𑀓𑁆𑀓𑀟𑁆𑀠𑀢𑀺 𑀘 𑀪𑀺𑀓𑁆𑀔𑀼𑀦𑀺𑀁;

𑀧𑀬𑁄𑀕𑁂 𑀤𑀼𑀓𑁆𑀓𑀝𑀁 𑀢𑀲𑁆𑀲𑀸, 𑀳𑁄𑀢𑀺 𑀧𑀸𑀘𑀺𑀢𑁆𑀢𑀺 𑀓𑀟𑁆𑀠𑀺𑀢𑁂.

𑁨𑁩𑁦. 𑀙𑀝𑁆𑀞𑁂 𑀧𑀦 𑀘 𑀲𑀁𑀲𑀝𑁆𑀞𑀸, 𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁 𑀨𑀼𑀲𑁂;

𑀓𑀫𑁆𑀫𑀯𑀸𑀘𑀸𑀬 𑀑𑀲𑀸𑀦𑁂, 𑀧𑀸𑀘𑀺𑀢𑁆𑀢𑀺 𑀧𑀭𑀺𑀤𑀻𑀧𑀺𑀢𑀸.

𑁨𑁩𑁧. 𑀅𑀦𑁆𑀢𑁄𑀭𑀝𑁆𑀞𑁂 𑀢𑀼 𑀲𑀸𑀲𑀗𑁆𑀓𑁂, 𑀘𑀸𑀭𑀺𑀓𑀁 𑀢𑀼 𑀘𑀭𑀦𑁆𑀢𑀺𑀬𑀸;

𑀧𑀬𑁄𑀕𑁂 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀧𑀝𑀺𑀧𑀦𑁆𑀦𑀸𑀬 𑀲𑁂𑀲𑀓𑀁.

𑁨𑁩𑁨. 𑀅𑀝𑁆𑀞𑀫𑀁 𑀦𑀯𑀫𑀜𑁆𑀘𑁂𑀯, 𑀲𑀢𑁆𑀢𑀫𑁂𑀦 𑀲𑀫𑀁 𑀫𑀢𑀁;

𑀤𑀲𑀫𑁂 𑀧𑀦 𑀏𑀓𑀸𑀯, 𑀧𑀸𑀘𑀺𑀢𑁆𑀢𑀺 𑀧𑀭𑀺𑀤𑀻𑀧𑀺𑀢𑀸.

𑀢𑀼𑀯𑀝𑁆𑀝𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

𑁨𑁩𑁩. 𑀭𑀸𑀚𑀸𑀕𑀸𑀭𑀸𑀤𑀺𑀓𑀁 𑀲𑀩𑁆𑀩𑀁, 𑀤𑀲𑁆𑀲𑀦𑀢𑁆𑀣𑀸𑀬 𑀕𑀘𑁆𑀙𑀢𑀺;

𑀧𑀬𑁄𑀕𑁂 𑀤𑀼𑀓𑁆𑀓𑀝𑀁 𑀢𑀲𑁆𑀲𑀸, 𑀧𑀸𑀘𑀺𑀢𑁆𑀢𑀺 𑀬𑀤𑀺 𑀧𑀲𑁆𑀲𑀢𑀺.

𑁨𑁩𑁪. 𑀆𑀲𑀦𑁆𑀤𑀺𑀁 𑀯𑀸𑀧𑀺 𑀧𑀮𑁆𑀮𑀗𑁆𑀓𑀁, 𑀧𑀭𑀺𑀪𑀼𑀜𑁆𑀚𑀦𑁆𑀢𑀺𑀬𑀸 𑀤𑀼𑀯𑁂;

𑀧𑀬𑁄𑀕𑁂 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀪𑀼𑀢𑁆𑀢𑁂 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸.

𑁨𑁩𑁫. 𑀲𑀼𑀢𑁆𑀢𑀁 𑀓𑀦𑁆𑀢𑀦𑁆𑀢𑀺𑀬𑀸 𑀤𑁆𑀯𑁂𑀯, 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁 𑀫𑀢𑀁;

𑀉𑀚𑁆𑀚𑀯𑀼𑀚𑁆𑀚𑀯𑀦𑁂 𑀢𑀲𑁆𑀲𑀸, 𑀧𑀸𑀘𑀺𑀢𑁆𑀢𑀺 𑀲𑀫𑀼𑀤𑀸𑀳𑀭𑁂.

𑁨𑁩𑁬. 𑀯𑁂𑀬𑁆𑀬𑀸𑀯𑀘𑁆𑀘𑀁 𑀕𑀺𑀳𑀻𑀦𑀁 𑀢𑀼, 𑀤𑁆𑀯𑁂𑀯 𑀳𑁄𑀦𑁆𑀢𑀺 𑀓𑀭𑁄𑀦𑁆𑀢𑀺𑀬𑀸;

𑀧𑀬𑁄𑀕𑁂 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀓𑀢𑁂 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸.

𑁨𑁩𑁭. 𑀧𑀜𑁆𑀘𑀫𑁂 𑀧𑀦 𑀏𑀓𑀸𑀯, 𑀧𑀸𑀘𑀺𑀢𑁆𑀢𑀺 𑀧𑀭𑀺𑀤𑀻𑀧𑀺𑀢𑀸;

𑀧𑀬𑁄𑀕𑁂 𑀤𑀼𑀓𑁆𑀓𑀝𑀁 𑀙𑀝𑁆𑀞𑁂, 𑀤𑀺𑀦𑁆𑀦𑁂 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸.

𑁨𑁩𑁮. 𑀲𑀢𑁆𑀢𑀫𑀁 𑀤𑀼𑀢𑀺𑀬𑁂𑀦𑁂𑀯, 𑀲𑀫𑀸𑀧𑀢𑁆𑀢𑀺𑀧𑀪𑁂𑀤𑀢𑁄;

𑀅𑀝𑁆𑀞𑀫𑀁 𑀤𑀼𑀢𑀺𑀬𑁂 𑀯𑀕𑁆𑀕𑁂, 𑀧𑀜𑁆𑀘𑀫𑁂𑀦 𑀲𑀫𑀁 𑀫𑀢𑀁.

𑁨𑁩𑁯. 𑀢𑀺𑀭𑀘𑁆𑀙𑀸𑀦𑀕𑀢𑀁 𑀯𑀺𑀚𑁆𑀚𑀁, 𑀤𑁆𑀯𑁂𑀯 𑀳𑁄𑀦𑁆𑀢𑀺 𑀧𑀞𑀦𑁆𑀢𑀺𑀬𑀸;

𑀧𑀬𑁄𑀕𑁂 𑀤𑀼𑀓𑁆𑀓𑀝𑀁 𑀳𑁄𑀢𑀺, 𑀧𑀸𑀘𑀺𑀢𑁆𑀢𑀺 𑀳𑀺 𑀧𑀤𑁂 𑀧𑀤𑁂.

𑁨𑁪𑁦. 𑀤𑀲𑀫𑀁 𑀦𑀯𑀫𑁂𑀦𑁂𑀯, 𑀲𑀫𑀸𑀦𑀁 𑀲𑀩𑁆𑀩𑀣𑀸 𑀧𑀦;

‘‘𑀧𑀭𑀺𑀬𑀸𑀧𑀼𑀡𑀸𑀢𑀺, 𑀯𑀸𑀘𑁂𑀢𑀺’’, 𑀧𑀤𑀫𑀢𑁆𑀢𑀁 𑀯𑀺𑀲𑁂𑀲𑀓𑀁.