𑀫𑀳𑀸𑀯𑀺𑀪𑀗𑁆𑀕𑀲𑀗𑁆𑀕𑀳𑀓𑀣𑀸

𑁪. 𑀫𑁂𑀣𑀼𑀦𑀁 𑀧𑀝𑀺𑀲𑁂𑀯𑀦𑁆𑀢𑁄, 𑀓𑀢𑀺 𑀆𑀧𑀢𑁆𑀢𑀺𑀬𑁄 𑀨𑀼𑀲𑁂;

𑀫𑁂𑀣𑀼𑀦𑀁 𑀧𑀝𑀺𑀲𑁂𑀯𑀦𑁆𑀢𑁄, 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀨𑀼𑀲𑁂.

𑁫. 𑀪𑀯𑁂 𑀧𑀸𑀭𑀸𑀚𑀺𑀓𑀁 𑀔𑁂𑀢𑁆𑀢𑁂, 𑀬𑁂𑀪𑀼𑀬𑁆𑀬𑀓𑁆𑀔𑀸𑀬𑀺𑀢𑁂 𑀧𑀦;

𑀣𑀼𑀮𑁆𑀮𑀘𑁆𑀘𑀬𑀁 𑀫𑀼𑀔𑁂 𑀯𑀝𑁆𑀝-𑀓𑀢𑁂 𑀯𑀼𑀢𑁆𑀢𑀁 𑀢𑀼 𑀤𑀼𑀓𑁆𑀓𑀝𑀁.

𑁬. 𑀅𑀤𑀺𑀦𑁆𑀦𑀁 𑀆𑀤𑀺𑀬𑀦𑁆𑀢𑁄 𑀬𑁄;

𑀓𑀢𑀺 𑀆𑀧𑀢𑁆𑀢𑀺𑀬𑁄 𑀨𑀼𑀲𑁂;

𑀅𑀤𑀺𑀦𑁆𑀦𑀁 𑀆𑀤𑀺𑀬𑀦𑁆𑀢𑁄 𑀲𑁄;

𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀨𑀼𑀲𑁂.

𑁭. 𑀧𑀜𑁆𑀘𑀫𑀸𑀲𑀕𑁆𑀖𑀦𑁂 𑀯𑀸𑀧𑀺, 𑀅𑀥𑀺𑀓𑁂 𑀯𑀸 𑀧𑀭𑀸𑀚𑀬𑁄;

𑀫𑀸𑀲𑁂 𑀯𑀸 𑀤𑀼𑀓𑁆𑀓𑀝𑀁 𑀊𑀦𑁂, 𑀫𑀚𑁆𑀛𑁂 𑀣𑀼𑀮𑁆𑀮𑀘𑁆𑀘𑀬𑀁 𑀢𑀢𑁄.

𑁮. 𑀫𑀦𑀼𑀲𑁆𑀲𑀚𑀸𑀢𑀺𑀁 𑀫𑀸𑀭𑁂𑀦𑁆𑀢𑁄;

𑀓𑀢𑀺 𑀆𑀧𑀢𑁆𑀢𑀺𑀬𑁄 𑀨𑀼𑀲𑁂;

𑀫𑀦𑀼𑀲𑁆𑀲𑀚𑀸𑀢𑀺𑀁 𑀫𑀸𑀭𑁂𑀦𑁆𑀢𑁄;

𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀨𑀼𑀲𑁂.

𑁯. 𑀫𑀦𑀼𑀲𑁆𑀲𑀫𑀼𑀤𑁆𑀤𑀺𑀲𑁆𑀲𑁄𑀧𑀸𑀢𑀁, 𑀔𑀡𑀦𑁂 𑀤𑀼𑀓𑁆𑀓𑀝𑀁 𑀲𑀺𑀬𑀸;

𑀤𑀼𑀓𑁆𑀔𑁂 𑀣𑀼𑀮𑁆𑀮𑀘𑁆𑀘𑀬𑀁 𑀚𑀸𑀢𑁂, 𑀫𑀢𑁂 𑀧𑀸𑀭𑀸𑀚𑀺𑀓𑀁 𑀲𑀺𑀬𑀸.

𑁧𑁦. 𑀅𑀲𑀦𑁆𑀢𑀁 𑀉𑀢𑁆𑀢𑀭𑀺𑀁 𑀥𑀫𑁆𑀫𑀁, 𑀯𑀤𑀫𑀢𑁆𑀢𑀽𑀧𑀦𑀸𑀬𑀺𑀓𑀁;

𑀓𑀢𑀺 𑀆𑀧𑀚𑁆𑀚𑀢𑀸𑀧𑀢𑁆𑀢𑀻? 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀨𑀼𑀲𑁂.

𑁧𑁧. 𑀅𑀲𑀦𑁆𑀢𑀁 𑀉𑀢𑁆𑀢𑀭𑀺𑀁 𑀥𑀫𑁆𑀫𑀁, 𑀪𑀡𑀦𑁆𑀢𑀲𑁆𑀲 𑀧𑀭𑀸𑀚𑀬𑁄;

𑀣𑀼𑀮𑁆𑀮𑀘𑁆𑀘𑀬𑀁 𑀧𑀭𑀺𑀬𑀸𑀬𑁂, 𑀜𑀸𑀢𑁂, 𑀦𑁄 𑀘𑁂 𑀢𑀼 𑀤𑀼𑀓𑁆𑀓𑀝𑀁.

𑀧𑀸𑀭𑀸𑀚𑀺𑀓𑀓𑀣𑀸.

𑁧𑁨. 𑀪𑀡 𑀲𑀼𑀓𑁆𑀓𑀁 𑀯𑀺𑀫𑁄𑀘𑁂𑀦𑁆𑀢𑁄;

𑀓𑀢𑀺 𑀆𑀧𑀢𑁆𑀢𑀺𑀬𑁄 𑀨𑀼𑀲𑁂;

𑀲𑀼𑀡 𑀲𑀼𑀓𑁆𑀓𑀁 𑀯𑀺𑀫𑁄𑀘𑁂𑀦𑁆𑀢𑁄;

𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀨𑀼𑀲𑁂.

𑁧𑁩. 𑀕𑀭𑀼𑀓𑀁 𑀬𑀤𑀺 𑀘𑁂𑀢𑁂𑀢𑀺, 𑀉𑀧𑀓𑁆𑀓𑀫𑀢𑀺 𑀫𑀼𑀘𑁆𑀘𑀢𑀺;

𑀤𑁆𑀯𑀗𑁆𑀕𑁂 𑀣𑀼𑀮𑁆𑀮𑀘𑁆𑀘𑀬𑀁 𑀯𑀼𑀢𑁆𑀢𑀁, 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁 𑀲𑀺𑀬𑀸.

𑁧𑁪. 𑀇𑀢𑁄 𑀧𑀝𑁆𑀞𑀸𑀬 𑀫𑀼𑀜𑁆𑀘𑀺𑀢𑁆𑀯𑀸, 𑀧𑀜𑁆𑀳𑀸𑀧𑀼𑀘𑁆𑀙𑀦𑀫𑀢𑁆𑀢𑀓𑀁;

𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦𑁂𑀯, 𑀳𑁄𑀢𑀺 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄.

𑁧𑁫. 𑀇𑀢𑁆𑀣𑀺𑀬𑀸 𑀓𑀸𑀬𑀲𑀁𑀲𑀕𑁆𑀕𑁂, 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀨𑀼𑀲𑁂;

𑀆𑀫𑀲𑀦𑁆𑀢𑀲𑁆𑀲 𑀓𑀸𑀬𑁂𑀦, 𑀓𑀸𑀬𑀁 𑀢𑀼 𑀕𑀭𑀼𑀓𑀁 𑀲𑀺𑀬𑀸.

𑁧𑁬. 𑀓𑀸𑀬𑁂𑀦 𑀓𑀸𑀬𑀩𑀤𑁆𑀥𑀁 𑀢𑀼, 𑀨𑀼𑀲𑀁 𑀣𑀼𑀮𑁆𑀮𑀘𑁆𑀘𑀬𑀁 𑀨𑀼𑀲𑁂;

𑀧𑀝𑀺𑀩𑀤𑁆𑀥𑁂𑀦 𑀓𑀸𑀬𑁂𑀦, 𑀧𑀝𑀺𑀩𑀤𑁆𑀥𑁂 𑀢𑀼 𑀤𑀼𑀓𑁆𑀓𑀝𑀁.

𑁧𑁭. 𑀇𑀢𑁆𑀣𑀺𑀁 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀳𑀺, 𑀢𑀺𑀲𑁆𑀲𑁄 𑀑𑀪𑀸𑀲𑀢𑁄 𑀲𑀺𑀬𑀼𑀁;

𑀯𑀡𑁆𑀡𑀸𑀯𑀡𑁆𑀡𑀁 𑀯𑀤𑀁 𑀤𑁆𑀯𑀺𑀦𑁆𑀦𑀁, 𑀫𑀕𑁆𑀕𑀸𑀦𑀁 𑀕𑀭𑀼𑀓𑀁 𑀨𑀼𑀲𑁂.

𑁧𑁮. 𑀯𑀡𑁆𑀡𑀸𑀤𑀺𑀪𑀜𑁆𑀜𑁂 𑀆𑀤𑀺𑀲𑁆𑀲, 𑀉𑀩𑁆𑀪𑀚𑀸𑀡𑀼𑀫𑀥𑀓𑁆𑀔𑀓𑀁;

𑀳𑁄𑀢𑀺 𑀣𑀼𑀮𑁆𑀮𑀘𑁆𑀘𑀬𑀁, 𑀓𑀸𑀬-𑀧𑀝𑀺𑀩𑀤𑁆𑀥𑁂 𑀢𑀼 𑀤𑀼𑀓𑁆𑀓𑀝𑀁.

𑁧𑁯. 𑀅𑀢𑁆𑀢𑀓𑀸𑀫𑀘𑀭𑀺𑀬𑀸𑀬, 𑀯𑀤𑀢𑁄 𑀯𑀡𑁆𑀡𑀫𑀺𑀢𑁆𑀣𑀺𑀬𑀸;

𑀲𑀦𑁆𑀢𑀺𑀓𑁂 𑀕𑀭𑀼𑀓𑀁 𑀳𑁄𑀢𑀺, 𑀲𑀘𑁂 𑀚𑀸𑀦𑀸𑀢𑀺 𑀲𑀸 𑀧𑀦.

𑁨𑁦. 𑀲𑀦𑁆𑀢𑀺𑀓𑁂 𑀧𑀡𑁆𑀟𑀓𑀲𑁆𑀲𑀸𑀧𑀺, 𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁 𑀲𑀺𑀬𑀸;

𑀢𑀺𑀭𑀘𑁆𑀙𑀸𑀦𑀕𑀢𑀲𑁆𑀲𑀸𑀧𑀺, 𑀲𑀦𑁆𑀢𑀺𑀓𑁂 𑀤𑀼𑀓𑁆𑀓𑀝𑀁 𑀫𑀢𑀁.

𑁨𑁧. 𑀧𑀝𑀺𑀕𑁆𑀕𑀡𑁆𑀳𑀦𑀯𑀻𑀫𑀁𑀲𑀸, 𑀧𑀘𑁆𑀘𑀸𑀳𑀭𑀡𑀓𑀢𑁆𑀢𑀺𑀓𑁂;

𑀲𑀜𑁆𑀘𑀭𑀺𑀢𑁆𑀢𑀁 𑀲𑀫𑀸𑀧𑀦𑁆𑀦𑁂, 𑀕𑀭𑀼𑀓𑀁 𑀦𑀺𑀤𑁆𑀤𑀺𑀲𑁂 𑀩𑀼𑀥𑁄.

𑁨𑁨. 𑀢𑀲𑁆𑀲 𑀤𑁆𑀯𑀗𑁆𑀕𑀲𑀫𑀸𑀬𑁄𑀕𑁂, 𑀳𑁄𑀢𑀺 𑀣𑀼𑀮𑁆𑀮𑀘𑁆𑀘𑀬𑀁 𑀢𑀣𑀸;

𑀅𑀗𑁆𑀕𑁂 𑀲𑀢𑀺 𑀧𑀦𑁂𑀓𑀲𑁆𑀫𑀺𑀁, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑁨𑁩. 𑀲𑀁𑀬𑀸𑀘𑀺𑀓𑀸𑀬 𑀘 𑀓𑀼𑀝𑀺𑀁;

𑀯𑀺𑀳𑀸𑀭𑀜𑁆𑀘 𑀫𑀳𑀮𑁆𑀮𑀓𑀁;

𑀓𑀸𑀭𑀸𑀧𑁂𑀢𑀺 𑀲𑀘𑁂 𑀪𑀺𑀓𑁆𑀔𑀼;

𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀨𑀼𑀲𑁂.

𑁨𑁪. 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀏𑀓𑀧𑀺𑀡𑁆𑀟𑁂 𑀅𑀦𑀸𑀕𑀢𑁂;

𑀳𑁄𑀢𑀺 𑀣𑀼𑀮𑁆𑀮𑀘𑁆𑀘𑀬𑀁, 𑀢𑀲𑁆𑀫𑀺𑀁, 𑀧𑀺𑀡𑁆𑀟𑁂 𑀕𑀭𑀼𑀓𑀫𑀸𑀕𑀢𑁂.

𑁨𑁫. 𑀧𑀸𑀭𑀸𑀚𑀺𑀓𑁂𑀦 𑀥𑀫𑁆𑀫𑁂𑀦, 𑀪𑀺𑀓𑁆𑀔𑀼𑀁 𑀅𑀫𑀽𑀮𑀓𑁂𑀦𑀺𑀥;

𑀅𑀦𑀼𑀤𑁆𑀥𑀁𑀲𑁂𑀢𑀺 𑀬𑁄 𑀢𑀲𑁆𑀲, 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀲𑀺𑀬𑀼𑀁.

𑁨𑁬. 𑀑𑀓𑀸𑀲𑀁 𑀦 𑀘 𑀓𑀸𑀭𑁂𑀢𑁆𑀯𑀸, 𑀳𑀼𑀢𑁆𑀯𑀸 𑀘𑀸𑀯𑀦𑀘𑁂𑀢𑀦𑁄;

𑀲𑀘𑁂 𑀘𑁄𑀤𑁂𑀢𑀺 𑀲𑀗𑁆𑀖𑀸𑀤𑀺-𑀲𑁂𑀲𑁂𑀦 𑀲𑀳 𑀤𑀼𑀓𑁆𑀓𑀝𑀁.

𑁨𑁭. 𑀑𑀓𑀸𑀲𑀁 𑀧𑀦 𑀓𑀸𑀭𑁂𑀢𑁆𑀯𑀸, 𑀳𑀼𑀢𑁆𑀯𑀸 𑀅𑀓𑁆𑀓𑁄𑀲𑀘𑁂𑀢𑀦𑁄;

𑀘𑁄𑀤𑁂𑀢𑀺 𑀑𑀫𑀲𑀯𑀸𑀤𑁂, 𑀧𑀸𑀘𑀺𑀢𑁆𑀢𑀺𑀁 𑀧𑀭𑀺𑀤𑀻𑀧𑀬𑁂.

𑁨𑁮. 𑀅𑀦𑀦𑁆𑀢𑀭𑀲𑀫𑀸𑀦𑁄𑀯, 𑀦𑀯𑀫𑁂 𑀅𑀜𑁆𑀜𑀪𑀸𑀕𑀺𑀬𑁂;

𑀲𑀩𑁆𑀩𑁄 𑀆𑀧𑀢𑁆𑀢𑀺𑀪𑁂𑀤𑁄 𑀳𑀺, 𑀦𑀢𑁆𑀣𑀺 𑀓𑀸𑀘𑀺 𑀯𑀺𑀲𑁂𑀲𑀢𑀸.

𑁨𑁯. 𑀲𑀗𑁆𑀖𑀲𑁆𑀲 𑀪𑁂𑀤𑀓𑁄 𑀪𑀺𑀓𑁆𑀔𑀼, 𑀬𑀸𑀯𑀢𑀢𑀺𑀬𑀓𑀁 𑀧𑀦;

𑀲𑀫𑀦𑀼𑀪𑀸𑀲𑀦𑀸𑀬𑁂𑀯, 𑀕𑀸𑀳𑀁 𑀦 𑀧𑀝𑀺𑀦𑀺𑀲𑁆𑀲𑀚𑀁.

𑁩𑁦. 𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁, 𑀤𑁆𑀯𑀻𑀳𑀺, 𑀓𑀫𑁆𑀫𑀯𑀸𑀘𑀸𑀳𑀺 𑀣𑀼𑀮𑁆𑀮𑀢𑀁;

𑀓𑀫𑁆𑀫𑀯𑀸𑀘𑀸𑀬 𑀑𑀲𑀸𑀦𑁂, 𑀆𑀧𑀢𑁆𑀢𑀺 𑀕𑀭𑀼𑀓𑀁 𑀲𑀺𑀬𑀸.

𑁩𑁧. 𑀪𑁂𑀤𑀸𑀦𑀼𑀯𑀢𑁆𑀢𑀓𑁂 𑀘𑁂𑀯, 𑀤𑀼𑀩𑁆𑀩𑀘𑁂 𑀓𑀼𑀮𑀤𑀽𑀲𑀓𑁂;

𑀲𑀗𑁆𑀖𑀪𑁂𑀤𑀓𑀢𑀼𑀮𑁆𑀬𑁄𑀯, 𑀳𑁄𑀢𑀺 𑀆𑀧𑀢𑁆𑀢𑀺𑀦𑀺𑀘𑁆𑀙𑀬𑁄.

𑀲𑀗𑁆𑀖𑀸𑀤𑀺𑀲𑁂𑀲𑀓𑀣𑀸.

𑁩𑁨. 𑀅𑀢𑀺𑀓𑁆𑀓𑀫𑀦𑁆𑀢𑁄 𑀅𑀢𑀺𑀭𑁂𑀓𑀘𑀻𑀯𑀭𑀁;

𑀤𑀲𑀸𑀳𑀫𑀸𑀧𑀚𑁆𑀚𑀢𑀺 𑀏𑀓𑀫𑁂𑀯;

𑀦𑀺𑀲𑁆𑀲𑀕𑁆𑀕𑀺𑀧𑀸𑀘𑀺𑀢𑁆𑀢𑀺𑀬𑀫𑁂𑀓𑀭𑀢𑁆𑀢𑀺𑀁;

𑀢𑀺𑀘𑀻𑀯𑀭𑁂𑀦𑀸𑀧𑀺 𑀯𑀺𑀦𑀸 𑀯𑀲𑀦𑁆𑀢𑁄.

𑁩𑁩. 𑀫𑀸𑀲𑀁 𑀅𑀢𑀺𑀓𑁆𑀓𑀫𑀦𑁆𑀢𑁄 𑀳𑀺, 𑀕𑀳𑁂𑀢𑁆𑀯𑀸 𑀓𑀸𑀮𑀘𑀻𑀯𑀭𑀁;

𑀏𑀓𑀁 𑀆𑀧𑀚𑁆𑀚𑀢𑀸𑀧𑀢𑁆𑀢𑀺𑀁, 𑀦𑀺𑀲𑁆𑀲𑀕𑁆𑀕𑀺𑀬𑀫𑀼𑀤𑀻𑀭𑀺𑀢𑀁.

𑁩𑁪. 𑀅𑀜𑁆𑀜𑀸𑀢𑀺𑀓𑀸𑀬 𑀬𑀁 𑀓𑀺𑀜𑁆𑀘𑀺;

𑀧𑀼𑀭𑀸𑀡𑀘𑀻𑀯𑀭𑀁 𑀧𑀦;

𑀥𑁄𑀯𑀸𑀧𑁂𑀢𑀺 𑀲𑀘𑁂 𑀢𑀲𑁆𑀲;

𑀳𑁄𑀦𑁆𑀢𑀺 𑀆𑀧𑀢𑁆𑀢𑀺𑀬𑁄 𑀤𑀼𑀯𑁂.

𑁩𑁫. 𑀥𑁄𑀯𑀸𑀧𑁂𑀢𑀺 𑀧𑀬𑁄𑀕𑀲𑁆𑀫𑀺𑀁, 𑀤𑀼𑀓𑁆𑀓𑀝𑀁 𑀲𑀫𑀼𑀤𑀸𑀳𑀝𑀁;

𑀦𑀺𑀲𑁆𑀲𑀕𑁆𑀕𑀺𑀬𑀸𑀯 𑀧𑀸𑀘𑀺𑀢𑁆𑀢𑀺, 𑀳𑁄𑀢𑀺 𑀥𑁄𑀯𑀸𑀧𑀺𑀢𑁂 𑀧𑀦.

𑁩𑁬. 𑀅𑀜𑁆𑀜𑀸𑀢𑀺𑀓𑀸𑀬 𑀳𑀢𑁆𑀣𑀫𑁆𑀳𑀸, 𑀘𑀻𑀯𑀭𑀁 𑀧𑀝𑀺𑀕𑀡𑁆𑀳𑀢𑁄;

𑀕𑀳𑀡𑁂 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀧𑀸𑀘𑀺𑀢𑁆𑀢𑀺 𑀕𑀳𑀺𑀢𑁂 𑀲𑀺𑀬𑀸.

𑁩𑁭. 𑀅𑀜𑁆𑀜𑀸𑀢𑀓𑀁 𑀕𑀳𑀧𑀢𑀺𑀁, 𑀕𑀳𑀧𑀢𑀸𑀦𑀺𑀫𑁂𑀯 𑀯𑀸;

𑀘𑀻𑀯𑀭𑀁 𑀯𑀺𑀜𑁆𑀜𑀸𑀧𑁂𑀦𑁆𑀢𑁄 𑀤𑁆𑀯𑁂, 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀬𑁄 𑀨𑀼𑀲𑁂.

𑁩𑁮. 𑀯𑀺𑀜𑁆𑀜𑀸𑀧𑁂𑀢𑀺 𑀧𑀬𑁄𑀕𑀲𑁆𑀫𑀺𑀁, 𑀤𑀼𑀓𑁆𑀓𑀝𑀁 𑀧𑀭𑀺𑀓𑀺𑀢𑁆𑀢𑀺𑀢𑀁;

𑀯𑀺𑀜𑁆𑀜𑀸𑀧𑀺𑀢𑁂 𑀘 𑀦𑀺𑀲𑁆𑀲𑀕𑁆𑀕𑀺, 𑀧𑀸𑀘𑀺𑀢𑁆𑀢𑀺 𑀧𑀭𑀺𑀬𑀸𑀧𑀼𑀢𑀸.

𑁩𑁯. 𑀪𑀺𑀓𑁆𑀔𑀼 𑀘𑀻𑀯𑀭𑀫𑀜𑁆𑀜𑀸𑀢𑀺𑀁, 𑀯𑀺𑀜𑁆𑀜𑀸𑀧𑁂𑀦𑁆𑀢𑁄 𑀢𑀤𑀼𑀢𑁆𑀢𑀭𑀺𑀁;

𑀧𑀬𑁄𑀕𑁂 𑀤𑀼𑀓𑁆𑀓𑀝𑀁, 𑀯𑀺𑀜𑁆𑀜𑀸-𑀧𑀺𑀢𑁂 𑀦𑀺𑀲𑁆𑀲𑀕𑁆𑀕𑀺𑀬𑀁 𑀨𑀼𑀲𑁂.

𑁪𑁦. 𑀅𑀜𑁆𑀜𑀸𑀢𑀓𑀁 𑀓𑀜𑁆𑀘𑀺 𑀉𑀧𑀸𑀲𑀓𑀁 𑀯𑀸;

𑀉𑀧𑀸𑀲𑀺𑀓𑀁 𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸;

𑀧𑀼𑀩𑁆𑀩𑁂𑀯 𑀳𑀼𑀢𑁆𑀯𑀸 𑀧𑀦 𑀅𑀧𑁆𑀧𑀯𑀸𑀭𑀺𑀢𑁄;

𑀯𑀢𑁆𑀣𑁂 𑀯𑀺𑀓𑀧𑁆𑀧𑀁 𑀧𑀝𑀺𑀧𑀚𑁆𑀚𑀫𑀸𑀦𑁄.

𑁪𑁧. 𑀤𑀼𑀯𑁂 𑀆𑀧𑀚𑁆𑀚𑀢𑀸𑀧𑀢𑁆𑀢𑀻, 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁 𑀲𑀺𑀬𑀸;

𑀯𑀺𑀓𑀧𑁆𑀧𑀁 𑀧𑀦 𑀆𑀧𑀦𑁆𑀦𑁂, 𑀦𑀺𑀲𑁆𑀲𑀕𑁆𑀕𑀺𑀬𑀫𑀼𑀤𑀻𑀭𑀺𑀢𑀁.

𑁪𑁨. 𑀅𑀜𑁆𑀜𑀸𑀢𑀺𑀁 𑀉𑀧𑀲𑀗𑁆𑀓𑀫𑁆𑀫, 𑀧𑀼𑀩𑁆𑀩𑁂𑀬𑁂𑀯𑀧𑁆𑀧𑀯𑀸𑀭𑀺𑀢𑁄;

𑀯𑀺𑀓𑀧𑁆𑀧𑀁 𑀘𑀻𑀯𑀭𑁂 𑀪𑀺𑀓𑁆𑀔𑀼, 𑀆𑀧𑀚𑁆𑀚𑀦𑁆𑀢𑁄 𑀤𑀼𑀯𑁂 𑀨𑀼𑀲𑁂.

𑁪𑁩. 𑀢𑀣𑀸𑀢𑀺𑀭𑁂𑀓𑀢𑀺𑀓𑁆𑀔𑀢𑁆𑀢𑀼𑀁, 𑀘𑁄𑀤𑀦𑀸𑀬 𑀘 𑀪𑀺𑀓𑁆𑀔𑀼 𑀘𑁂;

𑀕𑀦𑁆𑀢𑁆𑀯𑀸𑀢𑀺𑀭𑁂𑀓𑀙𑀓𑁆𑀔𑀢𑁆𑀢𑀼𑀁, 𑀞𑀸𑀦𑁂𑀦𑀧𑀺 𑀘 𑀘𑀻𑀯𑀭𑀁.

𑁪𑁪. 𑀦𑀺𑀧𑁆𑀨𑀸𑀤𑁂𑀢𑀺 𑀲𑀘𑁂 𑀢𑀲𑁆𑀲, 𑀳𑁄𑀦𑁆𑀢𑀺 𑀆𑀧𑀢𑁆𑀢𑀺𑀬𑁄 𑀤𑀼𑀯𑁂;

𑀧𑀬𑁄𑀕𑁂 𑀤𑀼𑀓𑁆𑀓𑀝𑀁, 𑀢𑀲𑁆𑀲, 𑀮𑀸𑀪𑁂 𑀦𑀺𑀲𑁆𑀲𑀕𑁆𑀕𑀺𑀬𑀁 𑀲𑀺𑀬𑀸.

𑀓𑀣𑀺𑀦𑀯𑀕𑁆𑀕𑁄 𑀧𑀞𑀫𑁄.

𑁪𑁫. 𑀤𑁄𑀲𑀸 𑀓𑁄𑀲𑀺𑀬𑀯𑀕𑁆𑀕𑀲𑁆𑀲, 𑀤𑁆𑀯𑁂𑀤𑁆𑀯𑁂𑀆𑀤𑀻𑀲𑀼 𑀧𑀜𑁆𑀘𑀲𑀼;

𑀧𑀬𑁄𑀕𑁂 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀮𑀸𑀪𑁂 𑀦𑀺𑀲𑁆𑀲𑀕𑁆𑀕𑀺𑀬𑀁 𑀲𑀺𑀬𑀸.

𑁪𑁬. 𑀕𑀳𑁂𑀢𑁆𑀯𑁂𑀴𑀓𑀮𑁄𑀫𑀸𑀦𑀺, 𑀢𑀺𑀬𑁄𑀚𑀦𑀫𑀢𑀺𑀓𑁆𑀓𑀫𑀁;

𑀤𑀼𑀓𑁆𑀓𑀝𑀁 𑀧𑀞𑀫𑁂 𑀧𑀸𑀤𑁂, 𑀦𑀺𑀲𑁆𑀲𑀕𑁆𑀕𑀺𑀁 𑀤𑀼𑀢𑀺𑀬𑁂 𑀨𑀼𑀲𑁂.

𑁪𑁭. 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀦𑀺𑀬𑀜𑁆𑀜𑀸𑀬, 𑀥𑁄𑀯𑀸𑀧𑁂𑀢𑁂𑀴𑀮𑁄𑀫𑀓𑀁;

𑀧𑀬𑁄𑀕𑁂 𑀤𑀼𑀓𑁆𑀓𑀝𑀁, 𑀢𑀲𑁆𑀲, 𑀥𑁄𑀢𑁂 𑀦𑀺𑀲𑁆𑀲𑀕𑁆𑀕𑀺𑀬𑀁 𑀲𑀺𑀬𑀸.

𑁪𑁮. 𑀭𑀽𑀧𑀺𑀬𑀁 𑀧𑀝𑀺𑀕𑀡𑁆𑀳𑀦𑁆𑀢𑁄, 𑀤𑁆𑀯𑁂 𑀧𑀦𑀸𑀧𑀢𑁆𑀢𑀺𑀬𑁄 𑀨𑀼𑀲𑁂;

𑀧𑀬𑁄𑀕𑁂 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀦𑀺𑀲𑁆𑀲𑀕𑁆𑀕𑀺 𑀕𑀳𑀺𑀢𑁂 𑀲𑀺𑀬𑀸.

𑁪𑁯. 𑀦𑀸𑀦𑀸𑀓𑀸𑀭𑀁 𑀲𑀫𑀸𑀧𑀚𑁆𑀚𑀁, 𑀲𑀁𑀯𑁄𑀳𑀸𑀭𑀜𑁆𑀘 𑀭𑀽𑀧𑀺𑀬𑁂;

𑀲𑀫𑀸𑀧𑀦𑁆𑀦𑁂 𑀘 𑀦𑀺𑀲𑁆𑀲𑀕𑁆𑀕𑀺𑀁, 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁 𑀨𑀼𑀲𑁂.

𑁫𑁦. 𑀦𑀸𑀦𑀧𑁆𑀧𑀓𑀸𑀭𑀓𑀁 𑀪𑀺𑀓𑁆𑀔𑀼, 𑀆𑀧𑀚𑁆𑀚𑁂 𑀓𑀬𑀯𑀺𑀓𑁆𑀓𑀬𑀁;

𑀧𑀬𑁄𑀕𑁂 𑀤𑀼𑀓𑁆𑀓𑀝𑀁, 𑀢𑀲𑁆𑀫𑀺𑀁, 𑀓𑀢𑁂 𑀦𑀺𑀲𑁆𑀲𑀕𑁆𑀕𑀺𑀬𑀁 𑀨𑀼𑀲𑁂.

𑀓𑁄𑀲𑀺𑀬𑀯𑀕𑁆𑀕𑁄 𑀤𑀼𑀢𑀺𑀬𑁄.

𑁫𑁧. 𑀧𑀢𑁆𑀢𑀁 𑀅𑀢𑀺𑀓𑁆𑀓𑀫𑁂𑀦𑁆𑀢𑀲𑁆𑀲, 𑀤𑀲𑀸𑀳𑀫𑀢𑀺𑀭𑁂𑀓𑀓𑀁;

𑀢𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑀸𑀧𑀢𑁆𑀢𑀺, 𑀳𑁄𑀢𑀺 𑀏𑀓𑀸𑀯 𑀪𑀺𑀓𑁆𑀔𑀼𑀦𑁄.

𑁫𑁨. 𑀅𑀧𑀜𑁆𑀘𑀩𑀦𑁆𑀥𑀦𑁂 𑀧𑀢𑁆𑀢𑁂, 𑀯𑀺𑀚𑁆𑀚𑀫𑀸𑀦𑁂𑀧𑀺 𑀪𑀺𑀓𑁆𑀔𑀼𑀦𑁄;

𑀅𑀜𑁆𑀜𑀁 𑀧𑀦 𑀦𑀯𑀁 𑀧𑀢𑁆𑀢𑀁, 𑀘𑁂𑀢𑀸𑀧𑁂𑀢𑀺 𑀲𑀘𑁂 𑀧𑀦.

𑁫𑁩. 𑀤𑁆𑀯𑁂 𑀧𑀦𑀸𑀧𑀢𑁆𑀢𑀺𑀬𑁄 𑀪𑀺𑀓𑁆𑀔𑀼, 𑀆𑀧𑀚𑁆𑀚𑀢𑀺, 𑀦 𑀲𑀁𑀲𑀬𑁄;

𑀧𑀬𑁄𑀕𑁂 𑀤𑀼𑀓𑁆𑀓𑀝𑀁, 𑀢𑀲𑁆𑀲, 𑀮𑀸𑀪𑁂 𑀦𑀺𑀲𑁆𑀲𑀕𑁆𑀕𑀺𑀬𑀁 𑀨𑀼𑀲𑁂.

𑁫𑁪. 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀪𑁂𑀲𑀚𑁆𑀚𑀁, 𑀲𑀢𑁆𑀢𑀸𑀳𑀁 𑀬𑁄 𑀅𑀢𑀺𑀓𑁆𑀓𑀫𑁂;

𑀏𑀓𑀁 𑀦𑀺𑀲𑁆𑀲𑀕𑁆𑀕𑀺𑀬𑀸𑀧𑀢𑁆𑀢𑀺𑀁, 𑀆𑀧𑀚𑁆𑀚𑀢𑀺 𑀳𑀺 𑀲𑁄 𑀧𑀦.

𑁫𑁫. 𑀅𑀓𑀸𑀮𑁂 𑀧𑀭𑀺𑀬𑁂𑀲𑀦𑁆𑀢𑁄, 𑀯𑀲𑁆𑀲𑀲𑀸𑀝𑀺𑀓𑀘𑀻𑀯𑀭𑀁;

𑀧𑀬𑁄𑀕𑁂 𑀤𑀼𑀓𑁆𑀓𑀝𑀁, 𑀢𑀲𑁆𑀲, 𑀮𑀸𑀪𑁂 𑀦𑀺𑀲𑁆𑀲𑀕𑁆𑀕𑀺𑀬𑀁 𑀨𑀼𑀲𑁂.

𑁫𑁬. 𑀪𑀺𑀓𑁆𑀔𑀼𑀦𑁄 𑀘𑀻𑀯𑀭𑀁 𑀤𑀢𑁆𑀯𑀸, 𑀅𑀘𑁆𑀙𑀺𑀦𑁆𑀤𑀦𑁆𑀢𑁄 𑀤𑀼𑀯𑁂 𑀨𑀼𑀲𑁂;

𑀧𑀬𑁄𑀕𑁂 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀳𑀝𑁂 𑀦𑀺𑀲𑁆𑀲𑀕𑁆𑀕𑀺𑀬𑀁 𑀲𑀺𑀬𑀸.

𑁫𑁭. 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀲𑀬𑀁 𑀲𑀼𑀢𑁆𑀢𑀁, 𑀢𑀦𑁆𑀢𑀯𑀸𑀬𑁂𑀳𑀺 𑀘𑀻𑀯𑀭𑀁;

𑀯𑀸𑀬𑀸𑀧𑁂𑀢𑀺 𑀲𑀘𑁂 𑀪𑀺𑀓𑁆𑀔𑀼, 𑀤𑁆𑀯𑁂 𑀧𑀦𑀸𑀧𑀢𑁆𑀢𑀺𑀬𑁄 𑀨𑀼𑀲𑁂.

𑁫𑁮. 𑀬𑁄 𑀧𑀦𑀜𑁆𑀜𑀸𑀢𑀓𑀲𑁆𑀲𑁂𑀯, 𑀢𑀦𑁆𑀢𑀯𑀸𑀬𑁂 𑀲𑀫𑁂𑀘𑁆𑀘 𑀘𑁂;

𑀯𑀺𑀓𑀧𑁆𑀧𑀁 𑀘𑀻𑀯𑀭𑁂 𑀪𑀺𑀓𑁆𑀔𑀼, 𑀆𑀧𑀚𑁆𑀚𑀁 𑀅𑀧𑁆𑀧𑀯𑀸𑀭𑀺𑀢𑁄.

𑁫𑁯. 𑀤𑁆𑀯𑁂 𑀧𑀦𑀸𑀧𑀢𑁆𑀢𑀺𑀬𑁄 𑀲𑁄 𑀳𑀺, 𑀆𑀧𑀚𑁆𑀚𑀢𑀺, 𑀦 𑀲𑀁𑀲𑀬𑁄;

𑀧𑀬𑁄𑀕𑁂 𑀤𑀼𑀓𑁆𑀓𑀝𑀁, 𑀢𑀲𑁆𑀲, 𑀮𑀸𑀪𑁂 𑀦𑀺𑀲𑁆𑀲𑀕𑁆𑀕𑀺𑀬𑀁 𑀲𑀺𑀬𑀸.

𑁬𑁦. 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀅𑀘𑁆𑀘𑁂𑀓-𑀲𑀜𑁆𑀜𑀺𑀢𑀁 𑀧𑀦 𑀘𑀻𑀯𑀭𑀁;

𑀓𑀸𑀮𑀁 𑀅𑀢𑀺𑀓𑁆𑀓𑀫𑁂𑀦𑁆𑀢𑁄 𑀢𑀁, 𑀏𑀓𑀁 𑀦𑀺𑀲𑁆𑀲𑀕𑁆𑀕𑀺𑀬𑀁 𑀨𑀼𑀲𑁂.

𑁬𑁧. 𑀢𑀺𑀡𑁆𑀡𑀫𑀜𑁆𑀜𑀢𑀭𑀁 𑀯𑀢𑁆𑀣𑀁, 𑀦𑀺𑀤𑀳𑀺𑀢𑁆𑀯𑀸 𑀖𑀭𑁂𑀥𑀺𑀓𑀁;

𑀙𑀸𑀭𑀢𑁆𑀢𑀢𑁄 𑀯𑀺𑀦𑀸 𑀢𑁂𑀦, 𑀯𑀲𑀁 𑀦𑀺𑀲𑁆𑀲𑀕𑁆𑀕𑀺𑀬𑀁 𑀨𑀼𑀲𑁂.

𑁬𑁨. 𑀚𑀸𑀦𑀁 𑀧𑀭𑀺𑀡𑀢𑀁 𑀮𑀸𑀪𑀁, 𑀲𑀗𑁆𑀖𑀺𑀓𑀁 𑀅𑀢𑁆𑀢𑀦𑁄 𑀧𑀦;

𑀧𑀭𑀺𑀡𑀸𑀫𑁂𑀢𑀺 𑀘𑁂 𑀪𑀺𑀓𑁆𑀔𑀼, 𑀤𑁆𑀯𑁂 𑀧𑀦𑀸𑀧𑀢𑁆𑀢𑀺𑀬𑁄 𑀨𑀼𑀲𑁂.

𑁬𑁩. 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁 𑀳𑁄𑀢𑀺, 𑀦𑀺𑀲𑁆𑀲𑀕𑁆𑀕𑀺 𑀧𑀭𑀺𑀡𑀸𑀫𑀺𑀢𑁂;

𑀲𑀩𑁆𑀩𑀢𑁆𑀣 𑀅𑀧𑁆𑀧𑀦𑀸𑀯𑀸𑀭-𑀧𑀭𑀺𑀳𑀸𑀦𑀺 𑀓𑀢𑀸 𑀫𑀬𑀸.

𑀧𑀢𑁆𑀢𑀯𑀕𑁆𑀕𑁄 𑀢𑀢𑀺𑀬𑁄.

𑀢𑀺𑀁𑀲𑀦𑀺𑀲𑁆𑀲𑀕𑁆𑀕𑀺𑀬𑀓𑀣𑀸.

𑁬𑁪. 𑀯𑀤𑀦𑁆𑀢𑀲𑁆𑀲 𑀫𑀼𑀲𑀸𑀯𑀸𑀤𑀁, 𑀧𑀜𑁆𑀘 𑀆𑀧𑀢𑁆𑀢𑀺𑀬𑁄 𑀲𑀺𑀬𑀼𑀁;

𑀫𑀦𑀼𑀲𑁆𑀲𑀼𑀢𑁆𑀢𑀭𑀺𑀥𑀫𑁆𑀫𑁂 𑀢𑀼, 𑀅𑀪𑀽𑀢𑀲𑁆𑀫𑀺𑀁 𑀧𑀭𑀸𑀚𑀬𑁄.

𑁬𑁫. 𑀘𑁄𑀤𑀦𑀸𑀬 𑀕𑀭𑀼𑀁 𑀪𑀺𑀓𑁆𑀔𑀼𑀁, 𑀅𑀫𑀽𑀮𑀦𑁆𑀢𑀺𑀫𑀯𑀢𑁆𑀣𑀼𑀦𑀸;

𑀧𑀭𑀺𑀬𑀸𑀬𑀯𑀘𑀦𑁂 𑀜𑀸𑀢𑁂, 𑀣𑀼𑀮𑁆𑀮𑀘𑁆𑀘𑀬𑀫𑀼𑀤𑀻𑀭𑀺𑀢𑀁.

𑁬𑁬. 𑀦𑁄 𑀘𑁂 𑀧𑀝𑀺𑀯𑀺𑀚𑀸𑀦𑀸𑀢𑀺, 𑀤𑀼𑀓𑁆𑀓𑀝𑀁 𑀲𑀫𑀼𑀤𑀸𑀳𑀝𑀁;

𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂, 𑀧𑀸𑀘𑀺𑀢𑁆𑀢𑀺 𑀧𑀭𑀺𑀤𑀻𑀧𑀺𑀢𑀸.

𑁬𑁭. 𑀆𑀧𑀢𑁆𑀢𑀺𑀬𑁄 𑀤𑀼𑀯𑁂 𑀯𑀼𑀢𑁆𑀢𑀸, 𑀪𑀺𑀓𑁆𑀔𑀼𑀲𑁆𑀲𑁄𑀫𑀲𑀢𑁄 𑀧𑀦;

𑀧𑀸𑀘𑀺𑀢𑁆𑀢𑀺 𑀉𑀧𑀲𑀫𑁆𑀧𑀦𑁆𑀦𑀁, 𑀤𑀼𑀓𑁆𑀓𑀝𑀁 𑀇𑀢𑀭𑀁 𑀲𑀺𑀬𑀸.

𑁬𑁮. 𑀧𑁂𑀲𑀼𑀜𑁆𑀜𑀳𑀭𑀡𑁂 𑀤𑁆𑀯𑁂𑀧𑀺, 𑀳𑁄𑀦𑁆𑀢𑀺, 𑀧𑀸𑀘𑀺𑀢𑁆𑀢𑀺𑀬𑀁 𑀧𑀦;