𑀫𑀳𑀸𑀯𑀕𑁆𑀕𑁄

𑀫𑀳𑀸𑀔𑀦𑁆𑀥𑀓𑀓𑀣𑀸

𑀧𑀩𑁆𑀩𑀚𑁆𑀚𑀸𑀓𑀣𑀸

𑁨𑁪𑁪𑁪. 𑀲𑀻𑀮𑀓𑁆𑀔𑀦𑁆𑀥𑀸𑀤𑀺𑀬𑀼𑀢𑁆𑀢𑁂𑀦, 𑀲𑀼𑀪𑀓𑁆𑀔𑀦𑁆𑀥𑁂𑀦 𑀤𑁂𑀲𑀺𑀢𑁂;

𑀔𑀦𑁆𑀥𑀓𑁂𑀧𑀺 𑀧𑀯𑀓𑁆𑀔𑀸𑀫𑀺, 𑀲𑀫𑀸𑀲𑁂𑀦 𑀯𑀺𑀦𑀺𑀘𑁆𑀙𑀬𑀁.

𑁨𑁪𑁪𑁫. 𑀫𑀸𑀢𑀭𑀸 𑀅𑀦𑀦𑀼𑀜𑁆𑀜𑀸𑀢𑀁, 𑀧𑀺𑀢𑀭𑀸 𑀯𑀸𑀧𑀺 𑀪𑀺𑀓𑁆𑀔𑀼𑀦𑁄;

𑀪𑀡𑁆𑀟𑀼𑀓𑀫𑁆𑀫𑀫𑀧𑀼𑀘𑁆𑀙𑀺𑀢𑁆𑀯𑀸, 𑀧𑀩𑁆𑀩𑀸𑀚𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑁨𑁪𑁪𑁬. 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀬, 𑀲𑀬𑀁 𑀘𑁂 𑀩𑁆𑀬𑀸𑀯𑀝𑁄 𑀲𑀺𑀬𑀸;

𑀤𑀳𑀭𑁄 𑀆𑀡𑀸𑀧𑁂𑀢𑀩𑁆𑀩𑁄, 𑀧𑀩𑁆𑀩𑀸𑀚𑁂𑀢𑁆𑀯𑀸𑀦𑀬𑀸𑀢𑀺 𑀘.

𑁨𑁪𑁪𑁭. 𑀉𑀧𑀚𑁆𑀛𑀸𑀬𑀫𑀣𑀼𑀤𑁆𑀤𑀺𑀲𑁆𑀲, 𑀅𑀯𑀼𑀢𑁆𑀢𑁄 𑀤𑀳𑀭𑁄 𑀧𑀦;

𑀧𑀩𑁆𑀩𑀸𑀚𑁂𑀢𑀺 𑀲𑀘𑁂 𑀢𑀁 𑀲𑁄, 𑀲𑀬𑀫𑁂𑀯𑀸𑀧𑀺 𑀯𑀝𑁆𑀝𑀢𑀺.

𑁨𑁪𑁪𑁮. 𑀲𑀸𑀫𑀡𑁂𑀭𑁄𑀧𑀺 𑀯𑀢𑁆𑀢𑀩𑁆𑀩𑁄, 𑀤𑀳𑀭𑁄 𑀦𑀢𑁆𑀣𑀺 𑀢𑀢𑁆𑀣 𑀘𑁂;

‘‘𑀔𑀡𑁆𑀟𑀲𑀻𑀫𑀫𑀺𑀫𑀁 𑀦𑁂𑀢𑁆𑀯𑀸, 𑀧𑀩𑁆𑀩𑀸𑀚𑁂𑀢𑁆𑀯𑀸𑀦𑀬𑀸’’𑀢𑀺 𑀘.

𑁨𑁪𑁪𑁯. 𑀲𑀭𑀡𑀸𑀦𑀺 𑀧𑀦𑁂𑀢𑀲𑁆𑀲, 𑀤𑀸𑀢𑀩𑁆𑀩𑀸𑀦𑁂𑀯 𑀅𑀢𑁆𑀢𑀦𑀸;

𑀏𑀯𑀫𑁆𑀧𑀺 𑀪𑀺𑀓𑁆𑀔𑀼𑀦𑀸𑀬𑁂𑀯, 𑀳𑁄𑀢𑀺 𑀧𑀩𑁆𑀩𑀸𑀚𑀺𑀢𑁄 𑀦𑀭𑁄.

𑁨𑁪𑁫𑁦. 𑀧𑀼𑀭𑀺𑀲𑀁 𑀪𑀺𑀓𑁆𑀔𑀼𑀢𑁄 𑀅𑀜𑁆𑀜𑁄, 𑀧𑀩𑁆𑀩𑀸𑀚𑁂𑀢𑀺 𑀦 𑀯𑀝𑁆𑀝𑀢𑀺;

𑀇𑀢𑁆𑀣𑀺𑀁 𑀪𑀺𑀓𑁆𑀔𑀼𑀦𑀺𑀢𑁄 𑀅𑀜𑁆𑀜𑁄, 𑀧𑀩𑁆𑀩𑀸𑀚𑁂𑀢𑀺 𑀦 𑀯𑀝𑁆𑀝𑀢𑀺.

𑁨𑁪𑁫𑁧. 𑀲𑀸𑀫𑀡𑁂𑀭𑁄𑀧𑀺 𑀯𑀸 𑀤𑀸𑀢𑀼𑀁, 𑀲𑀸𑀫𑀡𑁂𑀭𑀻𑀧𑀺 𑀯𑀸 𑀢𑀣𑀸;

𑀆𑀡𑀢𑁆𑀢𑀺𑀬𑀸 𑀉𑀪𑀺𑀦𑁆𑀦𑀫𑁆𑀧𑀺, 𑀓𑀸𑀲𑀸𑀬𑀸𑀦𑀺 𑀮𑀪𑀦𑁆𑀢𑀺 𑀢𑁂.

𑁨𑁪𑁫𑁨. 𑀲𑀬𑀫𑁂𑀯 𑀘 𑀬𑀁 𑀓𑀺𑀜𑁆𑀘𑀺, 𑀧𑀩𑁆𑀩𑀸𑀚𑁂𑀦𑁆𑀢𑁂𑀦 𑀪𑀺𑀓𑁆𑀔𑀼𑀦𑀸;

𑀓𑁂𑀲𑀸𑀧𑀦𑀬𑀦𑀁 𑀓𑀢𑁆𑀯𑀸, 𑀧𑀞𑀫𑀁 𑀉𑀤𑀓𑁂 𑀧𑀼𑀦.

𑁨𑁪𑁫𑁩. 𑀦𑁆𑀳𑀸𑀧𑁂𑀢𑀩𑁆𑀩𑁄 𑀲𑀺𑀬𑀸 𑀲𑀼𑀝𑁆𑀞𑀼, 𑀖𑀁𑀲𑀺𑀢𑁆𑀯𑀸 𑀕𑁄𑀫𑀬𑀸𑀤𑀺𑀦𑀸;

𑀲𑀭𑀻𑀭𑁂 𑀧𑀻𑀴𑀓𑀸 𑀯𑀸𑀧𑀺, 𑀓𑀘𑁆𑀙𑀼 𑀯𑀸 𑀢𑀲𑁆𑀲 𑀳𑁄𑀦𑁆𑀢𑀺 𑀘𑁂.

𑁨𑁪𑁫𑁪. 𑀫𑀸𑀢𑀸 𑀬𑀣𑀸 𑀦𑀺𑀬𑀁𑀧𑀼𑀢𑁆𑀢𑀁, 𑀦 𑀚𑀺𑀕𑀼𑀘𑁆𑀙𑀢𑀺 𑀲𑀩𑁆𑀩𑀲𑁄;

𑀦𑁆𑀳𑀸𑀧𑁂𑀢𑀩𑁆𑀩𑁄𑀯 𑀬𑀢𑀺𑀦𑀸, 𑀢𑀣𑁂𑀯 𑀅𑀚𑀺𑀕𑀼𑀘𑁆𑀙𑀢𑀸.

𑁨𑁪𑁫𑁫. 𑀓𑀲𑁆𑀫𑀸? 𑀧𑀦𑁂𑀢𑁆𑀢𑀓𑁂𑀦𑀸𑀧𑀺, 𑀉𑀧𑀓𑀸𑀭𑁂𑀦 𑀲𑀸𑀲𑀦𑁂;

𑀲𑁄 𑀲𑀤𑀸 𑀩𑀮𑀯𑀲𑁆𑀦𑁂𑀳𑁄, 𑀳𑁄𑀢𑀼𑀧𑀚𑁆𑀛𑀸𑀬𑀓𑀸𑀤𑀺𑀲𑀼.

𑁨𑁪𑁫𑁬. 𑀯𑀺𑀦𑁄𑀤𑁂𑀢𑁆𑀯𑀸 𑀧𑀦𑀼𑀧𑁆𑀧𑀦𑁆𑀦𑀁, 𑀉𑀓𑁆𑀓𑀡𑁆𑀞𑀁 𑀓𑀼𑀮𑀧𑀼𑀢𑁆𑀢𑀓𑀸;

𑀲𑀺𑀓𑁆𑀔𑀸𑀬𑁄 𑀧𑀭𑀺𑀧𑀽𑀭𑁂𑀢𑁆𑀯𑀸, 𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀦𑁆𑀢𑀺 𑀳𑀺.

𑁨𑁪𑁫𑁭. 𑀕𑀦𑁆𑀥𑀘𑀼𑀡𑁆𑀡𑁂𑀦 𑀯𑀸 𑀧𑀘𑁆𑀙𑀸, 𑀘𑀼𑀡𑁆𑀡𑁂𑀦𑀧𑀺 𑀳𑀮𑀺𑀤𑁆𑀤𑀺𑀬𑀸;

𑀲𑀭𑀻𑀭𑀁 𑀢𑀲𑁆𑀲 𑀲𑀻𑀲𑀜𑁆𑀘, 𑀉𑀩𑁆𑀩𑀝𑁆𑀝𑁂𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁.

𑁨𑁪𑁫𑁮. 𑀕𑀺𑀳𑀺𑀕𑀦𑁆𑀥𑀁 𑀯𑀺𑀦𑁄𑀤𑁂𑀢𑁆𑀯𑀸, 𑀓𑀸𑀲𑀸𑀬𑀸𑀦𑀺 𑀧𑀦𑁂𑀓𑀢𑁄;

𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀲𑀓𑀺𑀁 𑀯𑀸𑀧𑀺, 𑀤𑀸𑀢𑀩𑁆𑀩𑀸𑀦𑀺𑀲𑁆𑀲 𑀪𑀺𑀓𑁆𑀔𑀼𑀦𑀸.

𑁨𑁪𑁫𑁯. 𑀅𑀣 𑀳𑀢𑁆𑀣𑁂𑀧𑀺 𑀯𑀸 𑀢𑀲𑁆𑀲, 𑀅𑀤𑀢𑁆𑀯𑀸 𑀲𑀬𑀫𑁂𑀯 𑀢𑀁;

𑀅𑀘𑁆𑀙𑀸𑀤𑁂𑀢𑀺 𑀉𑀧𑀚𑁆𑀛𑀸𑀬𑁄, 𑀯𑀝𑁆𑀝𑀢𑀸𑀘𑀭𑀺𑀬𑁄𑀧𑀺 𑀯𑀸.

𑁨𑁪𑁬𑁦. 𑀦𑀺𑀯𑀸𑀲𑁂𑀢𑀺 𑀅𑀦𑀸𑀡𑀢𑁆𑀢𑁄, 𑀲𑁄 𑀧𑀸𑀭𑀼𑀧𑀢𑀺 𑀯𑀸 𑀲𑀬𑀁;

𑀅𑀧𑀦𑁂𑀢𑁆𑀯𑀸 𑀢𑀢𑁄 𑀲𑀩𑁆𑀩𑀁, 𑀧𑀼𑀦 𑀤𑀸𑀢𑀩𑁆𑀩𑀫𑁂𑀯 𑀢𑀁.

𑁨𑁪𑁬𑁧. 𑀪𑀺𑀓𑁆𑀔𑀼𑀦𑀸 𑀢𑀼 𑀲𑀳𑀢𑁆𑀣𑁂𑀦, 𑀢𑀣𑀸 𑀆𑀡𑀢𑁆𑀢𑀺𑀬𑀸𑀧𑀺 𑀯𑀸;

𑀤𑀺𑀦𑁆𑀦𑀁 𑀯𑀝𑁆𑀝𑀢𑀺 𑀓𑀸𑀲𑀸𑀯𑀁, 𑀦𑀸𑀤𑀺𑀦𑁆𑀦𑀁 𑀧𑀦 𑀯𑀝𑁆𑀝𑀢𑀺.

𑁨𑁪𑁬𑁨. 𑀢𑀲𑁆𑀲𑁂𑀯 𑀲𑀦𑁆𑀢𑀓𑀁 𑀯𑀸𑀧𑀺, 𑀓𑀸 𑀓𑀣𑀸 𑀅𑀢𑁆𑀢𑀲𑀦𑁆𑀢𑀓𑁂;

𑀯𑀦𑁆𑀤𑀸𑀧𑁂𑀢𑁆𑀯𑀸 𑀢𑀢𑁆𑀣 𑀪𑀺𑀓𑁆𑀔𑀽, 𑀓𑀸𑀭𑀸𑀧𑁂𑀢𑁆𑀯𑀸𑀦 𑀉𑀓𑁆𑀓𑀼𑀝𑀺𑀁.

𑁨𑁪𑁬𑁩. 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑀸𑀧𑁂𑀢𑁆𑀯𑀸, 𑀤𑀸𑀢𑀩𑁆𑀩𑀁 𑀲𑀭𑀡𑀢𑁆𑀢𑀬𑀁;

𑀧𑀝𑀺𑀧𑀸𑀝𑀺𑀯𑀲𑁂𑀦𑁂𑀯, 𑀦 𑀘 𑀉𑀧𑁆𑀧𑀝𑀺𑀧𑀸𑀝𑀺𑀬𑀸.

𑁨𑁪𑁬𑁪. 𑀲𑀘𑁂 𑀏𑀓𑀧𑀤𑀁 𑀯𑀸𑀧𑀺, 𑀤𑁂𑀢𑀺 𑀏𑀓𑀓𑁆𑀔𑀭𑀫𑁆𑀧𑀺 𑀯𑀸;

𑀧𑀝𑀺𑀧𑀸𑀝𑀺𑀁 𑀯𑀺𑀭𑀚𑁆𑀛𑀺𑀢𑁆𑀯𑀸, 𑀕𑀳𑀺𑀢𑀁 𑀘𑁂 𑀦 𑀯𑀝𑁆𑀝𑀢𑀺.

𑁨𑁪𑁬𑁫. 𑀢𑀺𑀓𑁆𑀔𑀢𑁆𑀢𑀼𑀁 𑀬𑀤𑀺 𑀯𑀸 𑀤𑁂𑀢𑀺, 𑀩𑀼𑀤𑁆𑀥𑀁 𑀲𑀭𑀡𑀫𑁂𑀯 𑀯𑀸;

𑀢𑀣𑀸 𑀲𑁂𑀲𑁂𑀲𑀼 𑀘𑁂𑀯𑀫𑁆𑀧𑀺, 𑀦 𑀤𑀺𑀦𑁆𑀦𑀸𑀦𑁂𑀯 𑀳𑁄𑀦𑁆𑀢𑀺 𑀳𑀺.

𑁨𑁪𑁬𑁬. 𑀓𑀢𑁆𑀯𑀸𑀦𑀼𑀦𑀸𑀲𑀺𑀓𑀦𑁆𑀢𑀸𑀦𑀺, 𑀏𑀓𑀸𑀩𑀤𑁆𑀥𑀸𑀦𑀺 𑀯𑀸 𑀧𑀦;

𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀣 𑀫-𑀦𑁆𑀢𑀸𑀦𑀺, 𑀤𑀸𑀢𑀩𑁆𑀩𑀸𑀦𑀺 𑀯𑀺𑀚𑀸𑀦𑀢𑀸.

𑁨𑁪𑁬𑁭. 𑀉𑀧𑀲𑀫𑁆𑀧𑀤𑀓𑀫𑁆𑀫𑀁 𑀢𑀼, 𑀏𑀓𑀢𑁄𑀲𑀼𑀤𑁆𑀥𑀺𑀬𑀸 𑀲𑀺𑀬𑀸;

𑀦 𑀳𑁄𑀢𑀺 𑀧𑀦 𑀧𑀩𑁆𑀩𑀚𑁆𑀚𑀸, 𑀉𑀪𑀢𑁄𑀲𑀼𑀤𑁆𑀥𑀺𑀬𑀸 𑀯𑀺𑀦𑀸.

𑁨𑁪𑁬𑁮. 𑀢𑀲𑁆𑀫𑀸 𑀆𑀘𑀭𑀺𑀬𑁂𑀦𑀸𑀧𑀺, 𑀢𑀣𑀸𑀦𑁆𑀢𑁂𑀯𑀸𑀲𑀺𑀓𑁂𑀦𑀧𑀺;

𑀩𑀼-𑀤𑁆𑀥-𑀓𑀸𑀭𑀸𑀤𑀬𑁄 𑀯𑀡𑁆𑀡𑀸, 𑀞𑀸𑀦𑀓𑀭𑀡𑀲𑀫𑁆𑀧𑀤𑀁.

𑁨𑁪𑁬𑁯. 𑀅𑀳𑀸𑀧𑁂𑀦𑁆𑀢𑁂𑀦 𑀯𑀢𑁆𑀢𑀩𑁆𑀩𑀸, 𑀧𑀩𑁆𑀩𑀚𑁆𑀚𑀸𑀕𑀼𑀡𑀫𑀺𑀘𑁆𑀙𑀢𑀸;

𑀏𑀓𑀯𑀡𑁆𑀡𑀯𑀺𑀦𑀸𑀲𑁂𑀦, 𑀧𑀩𑁆𑀩𑀚𑁆𑀚𑀸 𑀳𑀺 𑀦 𑀭𑀽𑀳𑀢𑀺.

𑁨𑁪𑁭𑁦. 𑀬𑀤𑀺 𑀲𑀺𑀤𑁆𑀥𑀸𑀧𑀺 𑀧𑀩𑁆𑀩𑀚𑁆𑀚𑀸, 𑀲𑀭𑀡𑀸𑀕𑀫𑀦𑀢𑁄𑀯 𑀳𑀺;

𑀤𑀸𑀢𑀩𑁆𑀩𑀸 𑀤𑀲 𑀲𑀻𑀮𑀸𑀦𑀺, 𑀧𑀽𑀭𑀡𑀢𑁆𑀣𑀸𑀬 𑀪𑀺𑀓𑁆𑀔𑀼𑀦𑀸.

𑀧𑀩𑁆𑀩𑀚𑁆𑀚𑀸𑀓𑀣𑀸.

𑁨𑁪𑁭𑁧. 𑀉𑀧𑀚𑁆𑀛𑀸𑀬𑀫𑀣𑀸𑀘𑀭𑀺𑀬𑀁, 𑀦𑀺𑀲𑁆𑀲𑀸𑀬 𑀯𑀲𑀢𑀸 𑀧𑀦;

𑀓𑀢𑁆𑀢𑀩𑁆𑀩𑀸𑀦𑁂𑀯 𑀯𑀢𑁆𑀢𑀸𑀦𑀺, 𑀧𑀺𑀬𑀲𑀻𑀮𑁂𑀦 𑀪𑀺𑀓𑁆𑀔𑀼𑀦𑀸.

𑁨𑁪𑁭𑁨. 𑀆𑀲𑀦𑀁 𑀧𑀜𑁆𑀜𑀧𑁂𑀢𑀩𑁆𑀩𑀁, 𑀤𑀦𑁆𑀢𑀓𑀝𑁆𑀞𑀁 𑀫𑀼𑀔𑁄𑀤𑀓𑀁;

𑀤𑀸𑀢𑀩𑁆𑀩𑀁 𑀢𑀲𑁆𑀲 𑀓𑀸𑀮𑁂𑀦, 𑀲𑀘𑁂 𑀬𑀸𑀕𑀼 𑀪𑀯𑀺𑀲𑁆𑀲𑀢𑀺.

𑁨𑁪𑁭𑁩. 𑀬𑀸𑀕𑀼 𑀢𑀲𑁆𑀲𑀼𑀧𑀦𑁂𑀢𑀩𑁆𑀩𑀸, 𑀲𑀗𑁆𑀖𑀢𑁄 𑀓𑀼𑀮𑀢𑁄𑀧𑀺 𑀯𑀸;

𑀧𑀢𑁆𑀢𑁂 𑀯𑀢𑁆𑀢𑀜𑁆𑀘 𑀓𑀸𑀢𑀩𑁆𑀩𑀁, 𑀯𑀢𑁆𑀢𑀁 𑀕𑀸𑀫𑀧𑁆𑀧𑀯𑁂𑀲𑀦𑁂.

𑁨𑁪𑁭𑁪. 𑀘𑀻𑀯𑀭𑁂 𑀬𑀸𑀦𑀺 𑀯𑀢𑁆𑀢𑀸𑀦𑀺, 𑀯𑀼𑀢𑁆𑀢𑀸𑀦𑀺 𑀳𑀺 𑀫𑀳𑁂𑀲𑀺𑀦𑀸;

𑀲𑁂𑀦𑀸𑀲𑀦𑁂 𑀢𑀣𑀸 𑀧𑀸𑀤-𑀧𑀻𑀞𑀓𑀣𑀮𑀺𑀓𑀸𑀤𑀺𑀲𑀼.

𑁨𑁪𑁭𑁫. 𑀏𑀯𑀫𑀸𑀤𑀻𑀦𑀺 𑀯𑀢𑁆𑀢𑀸𑀦𑀺, 𑀲𑀩𑁆𑀩𑀸𑀦𑀺 𑀧𑀦 𑀭𑁄𑀕𑀢𑁄;

𑀯𑀼𑀝𑁆𑀞𑀸𑀦𑀸𑀕𑀫𑀦𑀦𑁆𑀢𑀸𑀦𑀺, 𑀲𑀢𑁆𑀢𑀢𑀺𑀁𑀲𑀲𑀢𑀁 𑀲𑀺𑀬𑀼𑀁.

𑁨𑁪𑁭𑁬. 𑀯𑀢𑁆𑀢𑀪𑁂𑀤𑁂𑀦 𑀲𑀩𑁆𑀩𑀢𑁆𑀣, 𑀤𑀼𑀓𑁆𑀓𑀝𑀁 𑀢𑀼 𑀧𑀓𑀸𑀲𑀺𑀢𑀁;

𑀅𑀦𑀸𑀤𑀭𑀯𑀲𑁂𑀦𑁂𑀯, 𑀅𑀓𑀭𑁄𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄.

𑀉𑀧𑀚𑁆𑀛𑀸𑀬𑀸𑀘𑀭𑀺𑀬𑀯𑀢𑁆𑀢𑀓𑀣𑀸.

𑁨𑁪𑁭𑁭. 𑀉𑀧𑀚𑁆𑀛𑀸𑀬𑀲𑁆𑀲 𑀯𑀢𑁆𑀢𑀸𑀦𑀺, 𑀢𑀣𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂;

𑀲𑀢𑀁 𑀢𑁂𑀭𑀲 𑀳𑁄𑀦𑁆𑀢𑁂𑀯, 𑀢𑀣𑀸𑀦𑁆𑀢𑁂𑀯𑀸𑀲𑀺𑀓𑁂𑀧𑀺 𑀘.

𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀦𑁆𑀢𑁂𑀯𑀸𑀲𑀺𑀓𑀯𑀢𑁆𑀢𑀓𑀣𑀸.

𑁨𑁪𑁭𑁮. 𑀧𑀓𑁆𑀓𑀦𑁆𑀢𑁂 𑀯𑀸𑀧𑀺 𑀯𑀺𑀩𑁆𑀪𑀦𑁆𑀢𑁂, 𑀧𑀓𑁆𑀔𑀲𑀗𑁆𑀓𑀦𑁆𑀢𑀓𑁂 𑀫𑀢𑁂;

𑀆𑀡𑀢𑁆𑀢𑀺𑀬𑀸 𑀉𑀧𑀚𑁆𑀛𑀸𑀬𑀸, 𑀧𑀲𑁆𑀲𑀫𑁆𑀪𑀢𑀺 𑀘 𑀦𑀺𑀲𑁆𑀲𑀬𑁄.

𑁨𑁪𑁭𑁯. 𑀳𑁄𑀢𑀺 𑀆𑀘𑀭𑀺𑀬𑀫𑁆𑀳𑀸𑀧𑀺, 𑀙𑀥𑀸 𑀦𑀺𑀲𑁆𑀲𑀬𑀪𑁂𑀤𑀦𑀁;

𑀧𑀓𑁆𑀓𑀦𑁆𑀢𑁂 𑀯𑀸𑀧𑀺 𑀯𑀺𑀩𑁆𑀪𑀦𑁆𑀢𑁂, 𑀧𑀓𑁆𑀔𑀲𑀗𑁆𑀓𑀦𑁆𑀢𑀓𑁂 𑀫𑀢𑁂.

𑁨𑁪𑁮𑁦. 𑀆𑀡𑀢𑁆𑀢𑀺𑀬𑀁 𑀉𑀪𑀺𑀦𑁆𑀦𑀫𑁆𑀧𑀺, 𑀥𑀼𑀭𑀦𑀺𑀓𑁆𑀔𑁂𑀧𑀦𑁂𑀧𑀺 𑀘;

𑀏𑀓𑁂𑀓𑀲𑁆𑀲 𑀉𑀪𑀺𑀦𑁆𑀦𑀁 𑀯𑀸, 𑀦𑀸𑀮𑀬𑁂 𑀲𑀢𑀺 𑀪𑀺𑀚𑁆𑀚𑀢𑀺.

𑁨𑁪𑁮𑁧. 𑀉𑀧𑀚𑁆𑀛𑀸𑀬𑀲𑀫𑁄𑀥𑀸𑀦-𑀕𑀢𑀲𑁆𑀲𑀸𑀧𑀺 𑀘 𑀪𑀺𑀚𑁆𑀚𑀢𑀺;

𑀤𑀲𑁆𑀲𑀦𑀁 𑀲𑀯𑀦𑀜𑁆𑀘𑀸𑀢𑀺, 𑀲𑀫𑁄𑀥𑀸𑀦𑀁 𑀤𑁆𑀯𑀺𑀥𑀸 𑀫𑀢𑀁.

𑁨𑁪𑁮𑁨. 𑀅𑀤𑁆𑀥𑀺𑀓𑀲𑁆𑀲 𑀕𑀺𑀮𑀸𑀦𑀲𑁆𑀲, 𑀕𑀺𑀮𑀸𑀦𑀼𑀧𑀝𑁆𑀞𑀓𑀲𑁆𑀲 𑀘;

𑀬𑀸𑀘𑀺𑀢𑀲𑁆𑀲 𑀦 𑀤𑁄𑀲𑁄𑀯, 𑀯𑀲𑀺𑀢𑀼𑀁 𑀦𑀺𑀲𑁆𑀲𑀬𑀁 𑀯𑀺𑀦𑀸.

𑁨𑁪𑁮𑁩. 𑀚𑀸𑀦𑀢𑀸 𑀅𑀢𑁆𑀢𑀦𑁄 𑀘𑁂𑀯, 𑀯𑀦𑁂 𑀨𑀸𑀲𑀼𑀯𑀺𑀳𑀸𑀭𑀢𑀁;

𑀲𑀪𑀸𑀕𑁂 𑀤𑀸𑀬𑀓𑁂𑀲𑀦𑁆𑀢𑁂, 𑀯𑀲𑀺𑀢𑀼𑀫𑁆𑀧𑀺 𑀘 𑀯𑀝𑁆𑀝𑀢𑀺.

𑀦𑀺𑀲𑁆𑀲𑀬𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀓𑀣𑀸.

𑁨𑁪𑁮𑁪. 𑀓𑀼𑀝𑁆𑀞𑀺𑀁 𑀕𑀡𑁆𑀟𑀺𑀁 𑀓𑀺𑀮𑀸𑀲𑀺𑀜𑁆𑀘, 𑀲𑁄𑀲𑀺𑀜𑁆𑀘 𑀅𑀧𑀫𑀸𑀭𑀺𑀓𑀁;

𑀢𑀣𑀸 𑀭𑀸𑀚𑀪𑀝𑀁 𑀘𑁄𑀭𑀁, 𑀮𑀺𑀔𑀺𑀢𑀁 𑀓𑀸𑀭𑀪𑁂𑀤𑀓𑀁.

𑁨𑁪𑁮𑁫. 𑀓𑀲𑀸𑀳𑀢𑀁 𑀦𑀭𑀜𑁆𑀘𑁂𑀯, 𑀧𑀼𑀭𑀺𑀲𑀁 𑀮𑀓𑁆𑀔𑀡𑀸𑀳𑀢𑀁;

𑀇𑀡𑀸𑀬𑀺𑀓𑀜𑁆𑀘 𑀤𑀸𑀲𑀜𑁆𑀘, 𑀧𑀩𑁆𑀩𑀸𑀚𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑁨𑁪𑁮𑁬. 𑀳𑀢𑁆𑀣𑀘𑁆𑀙𑀺𑀦𑁆𑀦𑀫𑀴𑀘𑁆𑀙𑀺𑀦𑁆𑀦𑀁, 𑀧𑀸𑀤𑀘𑁆𑀙𑀺𑀦𑁆𑀦𑀜𑁆𑀘 𑀧𑀼𑀕𑁆𑀕𑀮𑀁;

𑀓𑀡𑁆𑀡𑀦𑀸𑀲𑀗𑁆𑀕𑀼𑀮𑀺𑀘𑁆𑀙𑀺𑀦𑁆𑀦𑀁, 𑀓𑀡𑁆𑀟𑀭𑀘𑁆𑀙𑀺𑀦𑁆𑀦𑀫𑁂𑀯 𑀘.

𑁨𑁪𑁮𑁭. 𑀓𑀸𑀡𑀁 𑀓𑀼𑀡𑀺𑀜𑁆𑀘 𑀔𑀼𑀚𑁆𑀚𑀜𑁆𑀘, 𑀯𑀸𑀫𑀦𑀁 𑀨𑀡𑀳𑀢𑁆𑀣𑀓𑀁;

𑀔𑀜𑁆𑀚𑀁 𑀧𑀓𑁆𑀔𑀳𑀢𑀜𑁆𑀘𑁂𑀯, 𑀲𑀻𑀧𑀤𑀺𑀁 𑀧𑀸𑀧𑀭𑁄𑀕𑀺𑀦𑀁.

𑁨𑁪𑁮𑁮. 𑀚𑀭𑀸𑀬 𑀤𑀼𑀩𑁆𑀩𑀮𑀁 𑀅𑀦𑁆𑀥𑀁, 𑀩𑀥𑀺𑀭𑀜𑁆𑀘𑁂𑀯 𑀫𑀫𑁆𑀫𑀦𑀁;

𑀧𑀻𑀞𑀲𑀧𑁆𑀧𑀺𑀁 𑀢𑀣𑀸 𑀫𑀽𑀕𑀁, 𑀧𑀩𑁆𑀩𑀸𑀚𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑁨𑁪𑁮𑁯. 𑀅𑀢𑀺𑀤𑀻𑀖𑁄𑀢𑀺𑀭𑀲𑁆𑀲𑁄 𑀯𑀸, 𑀅𑀢𑀺𑀓𑀸𑀮𑁄𑀧𑀺 𑀯𑀸 𑀢𑀣𑀸;

𑀅𑀘𑁆𑀘𑁄𑀤𑀸𑀢𑁄𑀧𑀺 𑀯𑀸 𑀫𑀝𑁆𑀞-𑀢𑀫𑁆𑀩𑀮𑁄𑀳𑀦𑀺𑀤𑀲𑁆𑀲𑀦𑁄.

𑁨𑁪𑁯𑁦. 𑀅𑀢𑀺𑀣𑀽𑀮𑁄 𑀅𑀢𑀺𑀓𑀺𑀲𑁆𑀲𑁄, 𑀫𑀳𑀸𑀲𑀻𑀲𑁄𑀧𑀺 𑀯𑀸 𑀢𑀣𑀸;

𑀅𑀢𑀺𑀔𑀼𑀤𑁆𑀤𑀓𑀲𑀻𑀲𑁂𑀦, 𑀲𑀳𑀺𑀢𑁂𑀦 𑀬𑀼𑀢𑁆𑀢𑁄𑀧𑀺 𑀯𑀸.

𑁨𑁪𑁯𑁧. 𑀓𑀼𑀝𑀓𑀼𑀝𑀓𑀲𑀻𑀲𑁄 𑀯𑀸, 𑀢𑀣𑀸 𑀲𑀺𑀔𑀭𑀲𑀻𑀲𑀓𑁄;

𑀯𑁂𑀴𑀼𑀦𑀸𑀴𑀺𑀲𑀫𑀸𑀦𑁂𑀦, 𑀲𑀻𑀲𑁂𑀦 𑀘 𑀬𑀼𑀢𑁄 𑀦𑀭𑁄.

𑁨𑁪𑁯𑁨. 𑀓𑀧𑁆𑀧𑀲𑀻𑀲𑁄𑀧𑀺 𑀧𑀩𑁆𑀪𑀸𑀭-𑀲𑀻𑀲𑁄 𑀯𑀸 𑀯𑀡𑀲𑀻𑀲𑀓𑁄;

𑀢𑀣𑀸 𑀓𑀡𑁆𑀡𑀺𑀓𑀓𑁂𑀲𑁄 𑀯𑀸, 𑀣𑀽𑀮𑀓𑁂𑀲𑁄𑀧𑀺 𑀯𑀸 𑀢𑀣𑀸.

𑁨𑁪𑁯𑁩. 𑀧𑀽𑀢𑀺𑀦𑀺𑀮𑁆𑀮𑁄𑀫𑀲𑀻𑀲𑁄 𑀯𑀸, 𑀚𑀸𑀢𑀺𑀧𑀡𑁆𑀟𑀭𑀓𑁂𑀲𑀓𑁄;

𑀚𑀸𑀢𑀺𑀬𑀸 𑀢𑀫𑁆𑀩𑀓𑁂𑀲𑁄 𑀯𑀸, 𑀢𑀣𑁂𑀯𑀸𑀯𑀝𑁆𑀝𑀲𑀻𑀲𑀓𑁄.

𑁨𑁪𑁯𑁪. 𑀲𑀻𑀲𑀮𑁄𑀫𑁂𑀓𑀩𑀤𑁆𑀥𑁂𑀳𑀺, 𑀪𑀫𑀼𑀓𑁂𑀳𑀺 𑀬𑀼𑀢𑁄𑀧𑀺 𑀯𑀸;

𑀲𑀫𑁆𑀩𑀤𑁆𑀥𑀪𑀫𑀼𑀓𑁄 𑀯𑀸𑀧𑀺, 𑀦𑀺𑀮𑁆𑀮𑁄𑀫𑀪𑀫𑀼𑀓𑁄𑀧𑀺 𑀯𑀸.

𑁨𑁪𑁯𑁫. 𑀫𑀳𑀦𑁆𑀢𑀔𑀼𑀤𑁆𑀤𑀦𑁂𑀢𑁆𑀢𑁄 𑀯𑀸, 𑀢𑀣𑀸 𑀯𑀺𑀲𑀫𑀮𑁄𑀘𑀦𑁄;

𑀓𑁂𑀓𑀭𑁄 𑀯𑀸𑀧𑀺 𑀕𑀫𑁆𑀪𑀻𑀭-𑀦𑁂𑀢𑁆𑀢𑁄 𑀯𑀺𑀲𑀫𑀘𑀓𑁆𑀓𑀮𑁄.

𑁨𑁪𑁯𑁬. 𑀚𑀢𑀼𑀫𑀽𑀲𑀺𑀓𑀓𑀡𑁆𑀡𑁄 𑀯𑀸, 𑀳𑀢𑁆𑀣𑀺𑀓𑀡𑁆𑀡𑁄𑀧𑀺 𑀯𑀸 𑀧𑀦;

𑀙𑀺𑀤𑁆𑀤𑀫𑀢𑁆𑀢𑀓𑀓𑀡𑁆𑀡𑁄 𑀯𑀸, 𑀢𑀣𑁂𑀯𑀸𑀯𑀺𑀤𑁆𑀥𑀓𑀡𑁆𑀡𑀓𑁄.

𑁨𑁪𑁯𑁭. 𑀢𑀣𑀸 𑀝𑀗𑁆𑀓𑀺𑀢𑀓𑀡𑁆𑀡𑁄 𑀯𑀸, 𑀧𑀽𑀢𑀺𑀓𑀡𑁆𑀡𑁄𑀧𑀺 𑀯𑀸 𑀧𑀦;

𑀬𑁄𑀦𑀓𑀸𑀤𑀺𑀧𑁆𑀧𑀪𑁂𑀤𑁄𑀧𑀺, 𑀦𑀸𑀬𑀁 𑀧𑀭𑀺𑀲𑀤𑀽𑀲𑀓𑁄.

𑁨𑁪𑁯𑁮. 𑀅𑀢𑀺𑀧𑀺𑀗𑁆𑀕𑀮𑀦𑁂𑀢𑁆𑀢𑁄 𑀯𑀸, 𑀢𑀣𑀸 𑀦𑀺𑀧𑁆𑀧𑀔𑀼𑀫𑀓𑁆𑀔𑀺 𑀯𑀸;

𑀅𑀲𑁆𑀲𑀼𑀧𑀕𑁆𑀖𑀭𑀦𑁂𑀢𑁆𑀢𑁄 𑀯𑀸, 𑀧𑀓𑁆𑀓𑀧𑀼𑀧𑁆𑀨𑀺𑀢𑀮𑁄𑀘𑀦𑁄.

𑁨𑁪𑁯𑁯. 𑀢𑀣𑁂𑀯 𑀘 𑀫𑀳𑀸𑀦𑀸𑀲𑁄, 𑀅𑀢𑀺𑀔𑀼𑀤𑁆𑀤𑀓𑀦𑀸𑀲𑀺𑀓𑁄;

𑀢𑀣𑀸 𑀘𑀺𑀧𑀺𑀝𑀦𑀸𑀲𑁄 𑀯𑀸, 𑀦𑀭𑁄 𑀓𑀼𑀝𑀺𑀮𑀦𑀸𑀲𑀺𑀓𑁄.

𑁨𑁫𑁦𑁦. 𑀦𑀺𑀘𑁆𑀘𑀯𑀺𑀲𑁆𑀲𑀯𑀦𑀸𑀲𑁄 𑀯𑀸, 𑀬𑁄 𑀯𑀸 𑀧𑀦 𑀫𑀳𑀸𑀫𑀼𑀔𑁄;

𑀯𑀗𑁆𑀓𑀪𑀺𑀦𑁆𑀦𑀫𑀼𑀔𑁄 𑀯𑀸𑀧𑀺, 𑀫𑀳𑀸𑀑𑀝𑁆𑀞𑁄𑀧𑀺 𑀯𑀸 𑀧𑀦.

𑁨𑁫𑁦𑁧. 𑀢𑀣𑀸 𑀢𑀦𑀼𑀓𑀑𑀝𑁆𑀞𑁄 𑀯𑀸, 𑀯𑀺𑀧𑀼𑀮𑀼𑀢𑁆𑀢𑀭𑀑𑀝𑁆𑀞𑀓𑁄;

𑀑𑀝𑁆𑀞𑀙𑀺𑀦𑁆𑀦𑁄𑀧𑀺 𑀉𑀧𑁆𑀧𑀓𑁆𑀓-𑀫𑀼𑀔𑁄 𑀏𑀴𑀫𑀼𑀔𑁄𑀧𑀺 𑀯𑀸.

𑁨𑁫𑁦𑁨. 𑀲𑀗𑁆𑀔𑀢𑀼𑀡𑁆𑀟𑁄𑀧𑀺 𑀤𑀼𑀕𑁆𑀕𑀦𑁆𑀥-𑀫𑀼𑀔𑁄 𑀯𑀸 𑀧𑀦 𑀧𑀼𑀕𑁆𑀕𑀮𑁄;

𑀫𑀳𑀸𑀤𑀦𑁆𑀢𑁄𑀧𑀺 𑀅𑀘𑁆𑀘𑀦𑁆𑀢𑀁, 𑀢𑀣𑀸 𑀅𑀲𑀼𑀭𑀤𑀦𑁆𑀢𑀓𑁄.

𑁨𑁫𑁦𑁩. 𑀳𑁂𑀝𑁆𑀞𑀸 𑀉𑀧𑀭𑀺𑀢𑁄 𑀯𑀸𑀧𑀺, 𑀩𑀳𑀺𑀦𑀺𑀓𑁆𑀔𑀦𑁆𑀢𑀤𑀦𑁆𑀢𑀓𑁄;

𑀅𑀤𑀦𑁆𑀢𑁄 𑀧𑀽𑀢𑀺𑀤𑀦𑁆𑀢𑁄 𑀯𑀸, 𑀅𑀢𑀺𑀔𑀼𑀤𑁆𑀤𑀓𑀤𑀦𑁆𑀢𑀓𑁄.

𑁨𑁫𑁦𑁪. 𑀬𑀲𑁆𑀲 𑀤𑀦𑁆𑀢𑀦𑁆𑀢𑀭𑁂 𑀤𑀦𑁆𑀢𑁄, 𑀓𑀸𑀴𑀓𑀤𑀦𑁆𑀢𑀲𑀦𑁆𑀦𑀺𑀪𑁄;

𑀲𑀼𑀔𑀼𑀫𑁄𑀯 𑀞𑀺𑀢𑁄, 𑀢𑀁 𑀘𑁂, 𑀧𑀩𑁆𑀩𑀸𑀚𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀺.

𑁨𑁫𑁦𑁫. 𑀬𑁄 𑀫𑀳𑀸𑀳𑀦𑀼𑀓𑁄 𑀧𑁄𑀲𑁄;

𑀤𑀻𑀖𑁂𑀦 𑀳𑀦𑀼𑀦𑀸 𑀬𑀼𑀢𑁄;

𑀘𑀺𑀧𑀺𑀝𑀳𑀦𑀼𑀓𑁄 𑀯𑀸𑀧𑀺;

𑀭𑀲𑁆𑀲𑁂𑀦 𑀳𑀦𑀼𑀦𑀸 𑀬𑀼𑀢𑁄.

𑁨𑁫𑁦𑁬. 𑀦𑀺𑀫𑁆𑀫𑀲𑁆𑀲𑀼𑀤𑀸𑀞𑀺𑀓𑁄 𑀯𑀸𑀧𑀺, 𑀅𑀢𑀺𑀤𑀻𑀖𑀕𑀮𑁄𑀧𑀺 𑀯𑀸;

𑀅𑀢𑀺𑀭𑀲𑁆𑀲𑀕𑀮𑁄𑀧𑀺 𑀯𑀸, 𑀪𑀺𑀦𑁆𑀦𑀕𑀡𑁆𑀞𑀺𑀕𑀮𑁄𑀧𑀺 𑀯𑀸.

𑁨𑁫𑁦𑁭. 𑀢𑀣𑀸 𑀪𑀝𑁆𑀞𑀁𑀲𑀓𑀽𑀝𑁄 𑀯𑀸, 𑀪𑀺𑀦𑁆𑀦𑀧𑀺𑀝𑁆𑀞𑀺𑀉𑀭𑁄𑀧𑀺 𑀯𑀸;

𑀲𑀼𑀤𑀻𑀖𑀭𑀲𑁆𑀲𑀳𑀢𑁆𑀣𑁄 𑀯𑀸, 𑀓𑀘𑁆𑀙𑀼𑀓𑀡𑁆𑀟𑀼𑀲𑀫𑀸𑀬𑀼𑀢𑁄.

𑁨𑁫𑁦𑁮. 𑀫𑀳𑀸𑀦𑀺𑀲𑀤𑀫𑀁𑀲𑁄 𑀯𑀸, 𑀉𑀤𑁆𑀥𑀦𑀕𑁆𑀕𑀼𑀧𑀫𑀸𑀬𑀼𑀢𑁄;

𑀯𑀸𑀢𑀡𑁆𑀟𑀺𑀓𑁄 𑀫𑀳𑀸𑀊𑀭𑀼, 𑀲𑀗𑁆𑀖𑀝𑁆𑀝𑀦𑀓𑀚𑀸𑀡𑀼𑀓𑁄.

𑁨𑁫𑁦𑁯. 𑀪𑀺𑀦𑁆𑀦𑀚𑀸𑀡𑀼 𑀫𑀳𑀸𑀚𑀸𑀡𑀼, 𑀤𑀻𑀖𑀚𑀗𑁆𑀖𑁄 𑀯𑀺𑀚𑀗𑁆𑀖𑀓𑁄;

𑀯𑀺𑀓𑀝𑁄 𑀯𑀸𑀧𑀺 𑀧𑀡𑁆𑀳𑁄 𑀯𑀸, 𑀢𑀣𑀸 𑀉𑀩𑁆𑀩𑀤𑁆𑀥𑀧𑀺𑀡𑁆𑀟𑀺𑀓𑁄.

𑁨𑁫𑁧𑁦. 𑀬𑀝𑁆𑀞𑀺𑀚𑀗𑁆𑀖𑁄 𑀫𑀳𑀸𑀚𑀗𑁆𑀖𑁄, 𑀫𑀳𑀸𑀧𑀸𑀤𑁄𑀧𑀺 𑀬𑁄 𑀦𑀭𑁄;

𑀢𑀣𑀸 𑀧𑀺𑀝𑁆𑀞𑀺𑀓𑀧𑀸𑀤𑁄 𑀯𑀸, 𑀫𑀳𑀸𑀧𑀡𑁆𑀳𑀺𑀧𑀺 𑀯𑀸 𑀧𑀦.

𑁨𑁫𑁧𑁧. 𑀯𑀗𑁆𑀓𑀧𑀸𑀤𑁄 𑀦𑀭𑁄 𑀬𑁄 𑀯𑀸, 𑀕𑀡𑁆𑀞𑀺𑀓𑀗𑁆𑀕𑀼𑀮𑀺𑀓𑁄𑀧𑀺 𑀯𑀸;

𑀬𑁄 𑀧𑀦𑀦𑁆𑀥𑀦𑀔𑁄 𑀯𑀸𑀧𑀺, 𑀓𑀸𑀴𑀧𑀽𑀢𑀺𑀦𑀔𑁄𑀧𑀺 𑀘.

𑁨𑁫𑁧𑁨. 𑀇𑀘𑁆𑀘𑁂𑀯𑀫𑀸𑀤𑀺𑀓𑀁 𑀓𑀜𑁆𑀘𑀺, 𑀦𑀭𑀁 𑀧𑀭𑀺𑀲𑀤𑀽𑀲𑀓𑀁;

𑀧𑀩𑁆𑀩𑀸𑀚𑁂𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀲𑁆𑀲, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀧𑀭𑀺𑀲𑀤𑀽𑀲𑀓𑀓𑀣𑀸.

𑁨𑁫𑁧𑁩. ‘‘𑀲𑀸𑀫𑀡𑁂𑀭𑀚𑁆𑀚 𑀫𑀸 𑀔𑀸𑀤, 𑀫𑀸 𑀪𑀼𑀜𑁆𑀚 𑀘 𑀧𑀺𑀯𑀸’’𑀢𑀺 𑀘;

𑀦𑀺𑀯𑀸𑀭𑁂𑀦𑁆𑀢𑀲𑁆𑀲 𑀆𑀳𑀸𑀭𑀁, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.