𑀘𑀽𑀴𑀯𑀕𑁆𑀕𑁄

𑀧𑀸𑀭𑀺𑀯𑀸𑀲𑀺𑀓𑀓𑁆𑀔𑀦𑁆𑀥𑀓𑀓𑀣𑀸

𑁨𑁭𑁪𑁮. 𑀢𑀚𑁆𑀚𑀦𑀻𑀬𑀁 𑀦𑀺𑀬𑀲𑁆𑀲𑀜𑁆𑀘, 𑀧𑀩𑁆𑀩𑀸𑀚𑀁 𑀧𑀝𑀺𑀲𑀸𑀭𑀡𑀁;

𑀢𑀺𑀯𑀺𑀥𑀼𑀓𑁆𑀔𑁂𑀧𑀦𑀜𑁆𑀘𑀸𑀢𑀺, 𑀲𑀢𑁆𑀢 𑀓𑀫𑁆𑀫𑀸𑀦𑀺 𑀤𑀻𑀧𑀬𑁂.

𑁨𑁭𑁪𑁯. 𑀢𑁂𑀘𑀢𑁆𑀢𑀸𑀮𑀻𑀲 𑀯𑀢𑁆𑀢𑀸𑀦𑀺, 𑀔𑀦𑁆𑀥𑀓𑁂 𑀓𑀫𑁆𑀫𑀲𑀜𑁆𑀜𑀺𑀢𑁂;

𑀦𑀯𑀸𑀥𑀺𑀓𑀸𑀦𑀺 𑀢𑀺𑀁𑀲𑁂𑀯, 𑀔𑀦𑁆𑀥𑀓𑁂 𑀢𑀤𑀦𑀦𑁆𑀢𑀭𑁂.

𑁨𑁭𑁫𑁦. 𑀏𑀯𑀁 𑀲𑀩𑁆𑀩𑀸𑀦𑀺 𑀯𑀢𑁆𑀢𑀸𑀦𑀺, 𑀤𑁆𑀯𑀸𑀲𑀻𑀢𑁂𑀯 𑀫𑀳𑁂𑀲𑀺𑀦𑀸;

𑀳𑁄𑀦𑁆𑀢𑀺 𑀔𑀦𑁆𑀥𑀓𑀯𑀢𑁆𑀢𑀸𑀦𑀺, 𑀕𑀳𑀺𑀢𑀸𑀕𑀳𑀡𑁂𑀦 𑀢𑀼.

𑁨𑁭𑁫𑁧. 𑀧𑀸𑀭𑀺𑀯𑀸𑀲𑀜𑁆𑀘 𑀯𑀢𑁆𑀢𑀜𑁆𑀘, 𑀲𑀫𑀸𑀤𑀺𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀭𑀢𑁆𑀢𑀺𑀘𑁆𑀙𑁂𑀤𑁄 𑀓𑀣𑀁 𑀯𑀼𑀢𑁆𑀢𑁄, 𑀯𑀢𑁆𑀢𑀪𑁂𑀤𑁄 𑀓𑀣𑀁 𑀪𑀯𑁂?

𑁨𑁭𑁫𑁨. 𑀲𑀳𑀯𑀸𑀲𑁄 𑀯𑀺𑀦𑀸𑀯𑀸𑀲𑁄, 𑀅𑀦𑀸𑀭𑁄𑀘𑀦𑀫𑁂𑀯 𑀘;

𑀧𑀸𑀭𑀺𑀯𑀸𑀲𑀺𑀓𑀪𑀺𑀓𑁆𑀔𑀼𑀲𑁆𑀲, 𑀭𑀢𑁆𑀢𑀺𑀘𑁆𑀙𑁂𑀤𑁄 𑀘 𑀤𑀼𑀓𑁆𑀓𑀝𑀁.

𑁨𑁭𑁫𑁩. 𑀏𑀓𑀘𑁆𑀙𑀦𑁆𑀦𑁂 𑀧𑀦𑀸𑀯𑀸𑀲𑁂, 𑀧𑀓𑀢𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸;

𑀦𑀺𑀯𑀸𑀲𑁄 𑀤𑀓𑀧𑀸𑀢𑁂𑀦, 𑀉𑀓𑁆𑀔𑀺𑀢𑁆𑀢𑀲𑁆𑀲 𑀦𑀺𑀯𑀸𑀭𑀺𑀢𑁄.

𑁨𑁭𑁫𑁪. 𑀧𑀸𑀭𑀺𑀯𑀸𑀲𑀺𑀓𑀪𑀺𑀓𑁆𑀔𑀼𑀲𑁆𑀲, 𑀅𑀦𑁆𑀢𑁄𑀬𑁂𑀯 𑀦 𑀮𑀩𑁆𑀪𑀢𑀺;

𑀇𑀘𑁆𑀘𑁂𑀯𑀁 𑀧𑀦 𑀦𑀺𑀤𑁆𑀤𑀺𑀝𑁆𑀞𑀁, 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦.

𑁨𑁭𑁫𑁫. ‘‘𑀅𑀯𑀺𑀲𑁂𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑀁, 𑀫𑀳𑀸𑀅𑀝𑁆𑀞𑀓𑀣𑀸𑀤𑀺𑀲𑀼;

𑀉𑀪𑀺𑀦𑁆𑀦𑀁 𑀤𑀓𑀧𑀸𑀢𑁂𑀦, 𑀦𑀺𑀯𑀸𑀲𑁄 𑀯𑀸𑀭𑀺𑀢𑁄’’𑀢𑀺 𑀳𑀺.

𑁨𑁭𑁫𑁬. 𑀅𑀪𑀺𑀓𑁆𑀔𑀼𑀓𑁂 𑀧𑀦𑀸𑀯𑀸𑀲𑁂, 𑀅𑀦𑀸𑀯𑀸𑀲𑁂𑀧𑀺 𑀓𑀢𑁆𑀣𑀘𑀺;

𑀯𑀺𑀧𑁆𑀧𑀯𑀸𑀲𑀁 𑀯𑀲𑀦𑁆𑀢𑀲𑁆𑀲, 𑀭𑀢𑁆𑀢𑀺𑀘𑁆𑀙𑁂𑀤𑁄 𑀘 𑀤𑀼𑀓𑁆𑀓𑀝𑀁.

𑁨𑁭𑁫𑁭. 𑀧𑀸𑀭𑀺𑀯𑀸𑀲𑀺𑀓𑀪𑀺𑀓𑁆𑀔𑀼𑀲𑁆𑀲, 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸𑀦 𑀢𑀗𑁆𑀔𑀡𑁂;

𑀦𑀸𑀭𑁄𑀘𑁂𑀦𑁆𑀢𑀲𑁆𑀲 𑀘𑁂𑀢𑀲𑁆𑀲, 𑀭𑀢𑁆𑀢𑀺𑀘𑁆𑀙𑁂𑀤𑁄 𑀘 𑀤𑀼𑀓𑁆𑀓𑀝𑀁.

𑁨𑁭𑁫𑁮. 𑀧𑀜𑁆𑀘𑁂𑀯 𑀘 𑀬𑀣𑀸𑀯𑀼𑀟𑁆𑀠𑀁, 𑀮𑀪𑀢𑁂 𑀧𑀸𑀭𑀺𑀯𑀸𑀲𑀺𑀓𑁄;

𑀓𑀸𑀢𑀼𑀁 𑀢𑀢𑁆𑀣𑁂𑀯 𑀘 𑀞𑀢𑁆𑀯𑀸, 𑀉𑀧𑁄𑀲𑀣𑀧𑀯𑀸𑀭𑀡𑀁.

𑁨𑁭𑁫𑁯. 𑀯𑀲𑁆𑀲𑀲𑀸𑀝𑀺𑀁 𑀬𑀣𑀸𑀯𑀼𑀟𑁆𑀠𑀁, 𑀤𑁂𑀦𑁆𑀢𑀺 𑀘𑁂 𑀲𑀗𑁆𑀖𑀤𑀸𑀬𑀓𑀸;

𑀑𑀡𑁄𑀚𑀦𑀁 𑀢𑀣𑀸 𑀪𑀢𑁆𑀢𑀁, 𑀮𑀪𑀢𑁂 𑀧𑀜𑁆𑀘𑀺𑀫𑁂 𑀧𑀦.

𑀧𑀸𑀭𑀺𑀯𑀸𑀲𑀺𑀓𑀓𑁆𑀔𑀦𑁆𑀥𑀓𑀓𑀣𑀸.

𑀲𑀫𑀣𑀓𑁆𑀔𑀦𑁆𑀥𑀓𑀓𑀣𑀸

𑁨𑁭𑁬𑁦. 𑀯𑀺𑀯𑀸𑀤𑀸𑀥𑀸𑀭𑀢𑀸 𑀘𑀸𑀦𑀼-𑀯𑀸𑀤𑀸𑀥𑀺𑀓𑀭𑀡𑀫𑁆𑀧𑀺 𑀘;

𑀆𑀧𑀢𑁆𑀢𑀸𑀥𑀸𑀭𑀢𑀸 𑀘𑁂𑀯, 𑀓𑀺𑀘𑁆𑀘𑀸𑀥𑀺𑀓𑀭𑀡𑀫𑁆𑀧𑀺 𑀘.

𑁨𑁭𑁬𑁧. 𑀏𑀢𑀸𑀦𑀺 𑀧𑀦 𑀘𑀢𑁆𑀢𑀸𑀭𑀺, 𑀯𑀼𑀢𑁆𑀢𑀸𑀦𑀺 𑀘 𑀫𑀳𑁂𑀲𑀺𑀦𑀸;

𑀪𑁂𑀤𑀓𑀸𑀭𑀓𑀯𑀢𑁆𑀣𑀽𑀦𑀺, 𑀯𑀺𑀯𑀸𑀤𑁄 𑀢𑀢𑁆𑀣 𑀦𑀺𑀲𑁆𑀲𑀺𑀢𑁄.

𑁨𑁭𑁬𑁨. 𑀯𑀺𑀧𑀢𑁆𑀢𑀺𑀬𑁄 𑀘𑀢𑀲𑁆𑀲𑁄𑀯, 𑀅𑀦𑀼𑀯𑀸𑀤𑁄 𑀉𑀧𑀸𑀕𑀢𑁄;

𑀆𑀧𑀢𑁆𑀢𑀸𑀥𑀸𑀭𑀢𑀸 𑀦𑀸𑀫, 𑀲𑀢𑁆𑀢 𑀆𑀧𑀢𑁆𑀢𑀺𑀬𑁄 𑀫𑀢𑀸.

𑁨𑁭𑁬𑁩. 𑀲𑀗𑁆𑀖𑀓𑀺𑀘𑁆𑀘𑀸𑀦𑀺 𑀦𑀺𑀲𑁆𑀲𑀸𑀬, 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀲𑀺𑀬𑀸;

𑀏𑀢𑁂𑀲𑀁 𑀢𑀼 𑀘𑀢𑀼𑀦𑁆𑀦𑀫𑁆𑀧𑀺, 𑀲𑀫𑀢𑁆𑀢𑀸 𑀲𑀫𑀣𑀸 𑀫𑀢𑀸.

𑁨𑁭𑁬𑁪. 𑀲𑀫𑁆𑀫𑀼𑀔𑀸 𑀲𑀢𑀺 𑀘𑀸𑀫𑀽𑀴𑁆𑀳𑁄, 𑀧𑀝𑀺𑀜𑁆𑀜𑀸𑀯𑀺𑀦𑀬𑁄𑀧𑀺 𑀘;

𑀢𑀲𑁆𑀲𑀧𑀸𑀧𑀺𑀬𑀲𑀻 𑀘𑁂𑀯, 𑀢𑀣𑀸 𑀬𑁂𑀪𑀼𑀬𑁆𑀬𑀲𑀻𑀧𑀺 𑀘.

𑁨𑁭𑁬𑁫. 𑀢𑀺𑀡𑀯𑀢𑁆𑀣𑀸𑀭𑀓𑁄 𑀘𑁂𑀯, 𑀲𑀢𑁆𑀢𑀫𑁄 𑀯𑀺𑀦𑀬𑁄 𑀫𑀢𑁄;

𑀲𑀢𑁆𑀢𑀺𑀫𑁂 𑀲𑀫𑀣𑀸 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸.

𑁨𑁭𑁬𑁬. 𑀯𑀺𑀯𑀸𑀤𑁄 𑀲𑀫𑁆𑀫𑀢𑀺 𑀤𑁆𑀯𑀻𑀳𑀺, 𑀅𑀦𑀼𑀯𑀸𑀤𑁄 𑀘𑀢𑀽𑀳𑀺 𑀘;

𑀆𑀧𑀢𑁆𑀢𑀺 𑀧𑀦 𑀢𑀻𑀳𑁂𑀯, 𑀓𑀺𑀘𑁆𑀘𑀫𑁂𑀓𑁂𑀦 𑀲𑀫𑁆𑀫𑀢𑀺.

𑁨𑁭𑁬𑁭. 𑀙𑀝𑁆𑀞𑁂𑀦 𑀧𑀞𑀫𑁂𑀦𑀸𑀧𑀺, 𑀯𑀺𑀯𑀸𑀤𑁄 𑀏𑀢𑁆𑀣 𑀲𑀫𑁆𑀫𑀢𑀺;

𑀲𑀫𑁆𑀫𑀼𑀔𑀸𑀯𑀺𑀦𑀬𑀸𑀤𑀻𑀳𑀺, 𑀅𑀦𑀼𑀧𑀼𑀩𑁆𑀩𑁂𑀦 𑀢𑀻𑀳𑀺𑀧𑀺.

𑁨𑁭𑁬𑁮. 𑀢𑀣𑁂𑀯 𑀧𑀜𑁆𑀘𑀫𑁂𑀦𑀸𑀧𑀺, 𑀅𑀦𑀼𑀯𑀸𑀤𑁄 𑀳𑀺 𑀲𑀫𑁆𑀫𑀢𑀺;

𑀲𑀫𑁆𑀫𑀼𑀔𑁂𑀦 𑀧𑀝𑀺𑀜𑁆𑀜𑀸𑀬, 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀘.

𑁨𑁭𑁬𑁯. 𑀆𑀧𑀢𑁆𑀢𑀽𑀧𑀲𑀫𑀁 𑀬𑀸𑀢𑀺, 𑀢𑀻𑀳𑁂𑀯 𑀲𑀫𑀣𑁂𑀳𑀺 𑀲𑀸;

𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦𑁂𑀯, 𑀓𑀺𑀘𑁆𑀘𑀫𑁂𑀓𑁂𑀦 𑀲𑀫𑁆𑀫𑀢𑀺.

𑁨𑁭𑁭𑁦. 𑀬𑁂𑀪𑀼𑀬𑁆𑀬𑀲𑀺𑀓𑀓𑀫𑁆𑀫𑁂 𑀢𑀼, 𑀲𑀮𑀸𑀓𑀁 𑀕𑀸𑀳𑀬𑁂 𑀩𑀼𑀥𑁄;

𑀕𑀽𑀴𑁆𑀳𑁂𑀦 𑀯𑀺𑀯𑀝𑁂𑀦𑀸𑀧𑀺, 𑀓𑀡𑁆𑀡𑀚𑀧𑁆𑀧𑁂𑀦 𑀯𑀸 𑀧𑀦.

𑁨𑁭𑁭𑁧. 𑀅𑀮𑀚𑁆𑀚𑀼𑀲𑁆𑀲𑀤𑁂 𑀕𑀽𑀴𑁆𑀳𑁂𑀦, 𑀯𑀺𑀯𑀝𑁂𑀦𑁂𑀯 𑀮𑀚𑁆𑀚𑀺𑀲𑀼;

𑀩𑀸𑀮𑁂𑀲𑀼 𑀓𑀡𑁆𑀡𑀚𑀧𑁆𑀧𑁂𑀦, 𑀲𑀮𑀸𑀓𑀁 𑀕𑀸𑀳𑀬𑁂 𑀩𑀼𑀥𑁄.

𑁨𑁭𑁭𑁨. 𑀮𑀚𑁆𑀚𑀻 𑀅𑀮𑀚𑁆𑀚𑀻 𑀩𑀸𑀮𑁄𑀢𑀺, 𑀓𑁂𑀦 𑀲𑀓𑁆𑀓𑀸 𑀯𑀺𑀚𑀸𑀦𑀺𑀢𑀼𑀁?

𑀲𑀓𑁂𑀦 𑀓𑀫𑁆𑀫𑀼𑀦𑀸𑀬𑁂𑀯, 𑀢𑁂𑀦 𑀲𑀓𑁆𑀓𑀸 𑀯𑀺𑀚𑀸𑀦𑀺𑀢𑀼𑀁.

𑁨𑁭𑁭𑁩. 𑀆𑀧𑀚𑁆𑀚𑀢𑀺 𑀘 𑀲𑀜𑁆𑀘𑀺𑀘𑁆𑀘, 𑀆𑀧𑀢𑁆𑀢𑀺𑀁 𑀧𑀭𑀺𑀕𑀽𑀳𑀢𑀺;

𑀙𑀦𑁆𑀤𑀸𑀤𑀺𑀅𑀕𑀢𑀺𑀁 𑀬𑀸𑀢𑀺, 𑀅𑀮𑀚𑁆𑀚𑀻 𑀏𑀤𑀺𑀲𑁄 𑀲𑀺𑀬𑀸.

𑁨𑁭𑁭𑁪. 𑀦𑀸𑀧𑀚𑁆𑀚𑀢𑀺 𑀘 𑀲𑀜𑁆𑀘𑀺𑀘𑁆𑀘, 𑀆𑀧𑀢𑁆𑀢𑀺𑀁 𑀦 𑀘 𑀕𑀽𑀳𑀢𑀺;

𑀦 𑀕𑀘𑁆𑀙𑀢𑀺𑀕𑀢𑀺𑀜𑁆𑀘𑀸𑀧𑀺, 𑀏𑀤𑀺𑀲𑁄 𑀮𑀚𑁆𑀚𑀺 𑀧𑀼𑀕𑁆𑀕𑀮𑁄.

𑁨𑁭𑁭𑁫. 𑀤𑀼𑀘𑁆𑀘𑀺𑀦𑁆𑀢𑀺𑀢𑁄 𑀘 𑀤𑀼𑀩𑁆𑀪𑀸𑀲𑀻, 𑀢𑀣𑀸 𑀤𑀼𑀓𑁆𑀓𑀝𑀓𑀸𑀭𑀺𑀓𑁄;

𑀏𑀤𑀺𑀲𑁄 𑀧𑀦 ‘‘𑀩𑀸𑀮𑁄’’𑀢𑀺, 𑀮𑀓𑁆𑀔𑀡𑁂𑀦𑁂𑀯 𑀜𑀸𑀬𑀢𑀺.

𑁨𑁭𑁭𑁬. 𑀢𑀺𑀥𑀸 𑀲𑀮𑀸𑀓𑀕𑀸𑀳𑁂𑀦, 𑀩𑀳𑀼𑀓𑀸 𑀥𑀫𑁆𑀫𑀯𑀸𑀤𑀺𑀦𑁄;

𑀬𑁂𑀪𑀼𑀬𑁆𑀬𑀲𑀺𑀓𑀓𑀫𑁆𑀫𑁂𑀦, 𑀓𑀢𑁆𑀢𑀩𑁆𑀩𑀦𑁆𑀢𑀺 𑀚𑀺𑀦𑁄𑀩𑁆𑀭𑀯𑀺.

𑁨𑁭𑁭𑁭. 𑀅𑀮𑀚𑁆𑀚𑀻 𑀲𑀸𑀦𑀼𑀯𑀸𑀤𑁄 𑀘, 𑀅𑀲𑀼𑀘𑀻 𑀓𑀫𑁆𑀫𑀢𑁄 𑀘 𑀬𑁄;

𑀢𑀲𑁆𑀲𑀧𑀸𑀧𑀺𑀬𑀲𑀻𑀓𑀫𑁆𑀫-𑀬𑁄𑀕𑁆𑀕𑁄 𑀲𑁄 𑀳𑁄𑀢𑀺 𑀧𑀼𑀕𑁆𑀕𑀮𑁄.

𑁨𑁭𑁭𑁮. 𑀪𑀡𑁆𑀟𑀦𑁂 𑀓𑀮𑀳𑁂 𑀚𑀸𑀢𑁂, 𑀯𑀺𑀯𑀸𑀤𑀲𑁆𑀫𑀺𑀁 𑀅𑀦𑀧𑁆𑀧𑀓𑁂;

𑀩𑀳𑀼𑀅𑀲𑁆𑀲𑀸𑀫𑀡𑁂 𑀘𑀺𑀡𑁆𑀡𑁂, 𑀅𑀦𑀕𑁆𑀕𑁂𑀧𑀺 𑀘 𑀪𑀲𑁆𑀲𑀓𑁂.

𑁨𑁭𑁭𑁯. 𑀫𑀽𑀮𑀫𑀽𑀮𑀁 𑀕𑀯𑁂𑀲𑀦𑁆𑀢𑀁, 𑀳𑁄𑀢𑀺 𑀯𑀸𑀴𑀜𑁆𑀘 𑀓𑀓𑁆𑀔𑀴𑀁;

𑀢𑀺𑀡𑀯𑀢𑁆𑀣𑀸𑀭𑀓𑁂𑀦𑁂𑀯, 𑀓𑀸𑀢𑀩𑁆𑀩𑀦𑁆𑀢𑀺 𑀧𑀓𑀸𑀲𑀺𑀢𑀁.

𑁨𑁭𑁮𑁦. 𑀬𑀣𑀸 𑀘 𑀢𑀺𑀡𑀧𑀡𑁆𑀡𑁂𑀦, 𑀙𑀦𑁆𑀦𑀁 𑀕𑀽𑀣𑀜𑁆𑀘 𑀫𑀼𑀢𑁆𑀢𑀓𑀁;

𑀦 𑀘 𑀯𑀸𑀬𑀢𑀺 𑀤𑀼𑀕𑁆𑀕𑀦𑁆𑀥𑀁, 𑀯𑀽𑀧𑀲𑀫𑁆𑀫𑀢𑀺 𑀢𑀗𑁆𑀔𑀡𑁂.

𑁨𑁭𑁮𑁧. 𑀞𑀧𑁂𑀢𑁆𑀯𑀸 𑀣𑀼𑀮𑁆𑀮𑀯𑀚𑁆𑀚𑀜𑁆𑀘, 𑀕𑀺𑀳𑀻𑀳𑀺 𑀧𑀝𑀺𑀲𑀁𑀬𑀼𑀢𑀁;

𑀤𑀺𑀝𑁆𑀞𑀸𑀯𑀺𑀓𑀫𑁆𑀫𑀺𑀓𑀜𑁆𑀘𑁂𑀯, 𑀬𑁄 𑀘 𑀢𑀢𑁆𑀣 𑀦 𑀳𑁄𑀢𑀺 𑀢𑀁.

𑁨𑁭𑁮𑁨. 𑀲𑁂𑀲𑀸𑀬𑀸𑀧𑀢𑁆𑀢𑀺𑀬𑀸 𑀬𑀸𑀯, 𑀉𑀧𑀲𑀫𑁆𑀧𑀤𑀫𑀸𑀴𑀢𑁄;

𑀲𑀼𑀤𑁆𑀥𑁄 𑀳𑁄𑀢𑀺 𑀦𑀺𑀭𑀸𑀧𑀢𑁆𑀢𑀺, 𑀢𑀺𑀡𑀯𑀢𑁆𑀣𑀸𑀭𑀓𑁂 𑀢𑀣𑀸.

𑀲𑀫𑀣𑀓𑁆𑀔𑀦𑁆𑀥𑀓𑀓𑀣𑀸.

𑀔𑀼𑀤𑁆𑀤𑀓𑀯𑀢𑁆𑀣𑀼𑀓𑁆𑀔𑀦𑁆𑀥𑀓𑀓𑀣𑀸

𑁨𑁭𑁮𑁩. 𑀭𑀼𑀓𑁆𑀔𑁂 𑀯𑀸 𑀧𑀦 𑀓𑀼𑀝𑁆𑀝𑁂𑀯𑀸, 𑀅𑀝𑁆𑀝𑀸𑀦𑁂 𑀣𑀫𑁆𑀪𑀓𑁂𑀲𑀼 𑀯𑀸;

𑀦𑁆𑀳𑀸𑀬𑀫𑀸𑀦𑁄 𑀲𑀓𑀁 𑀓𑀸𑀬𑀁, 𑀉𑀕𑁆𑀖𑀁𑀲𑁂𑀬𑁆𑀬𑀲𑁆𑀲 𑀤𑀼𑀓𑁆𑀓𑀝𑀁.

𑁨𑁭𑁮𑁪. 𑀓𑀸𑀬𑀁 𑀕𑀦𑁆𑀥𑀩𑁆𑀩𑀳𑀢𑁆𑀣𑁂𑀦, 𑀓𑀼𑀭𑀼𑀯𑀺𑀦𑁆𑀤𑀓𑀲𑀼𑀢𑁆𑀢𑀺𑀬𑀸;

𑀫𑀮𑁆𑀮𑀓𑁂𑀦 𑀦 𑀖𑀁𑀲𑁂𑀬𑁆𑀬, 𑀦𑀸𑀜𑁆𑀜𑀫𑀜𑁆𑀜𑀜𑁆𑀘 𑀓𑀸𑀬𑀢𑁄.

𑁨𑁭𑁮𑁫. 𑀅𑀓𑀢𑀁 𑀫𑀮𑁆𑀮𑀓𑀁 𑀦𑀸𑀫, 𑀕𑀺𑀮𑀸𑀦𑀲𑁆𑀲𑁂𑀯 𑀯𑀝𑁆𑀝𑀢𑀺;

𑀓𑀢𑀁 𑀢𑀁 𑀫𑀮𑁆𑀮𑀓𑀁 𑀦𑀸𑀫, 𑀲𑀩𑁆𑀩𑁂𑀲𑀫𑁆𑀧𑀺 𑀦 𑀯𑀝𑁆𑀝𑀢𑀺.

𑁨𑁭𑁮𑁬. 𑀓𑀧𑀸𑀮𑀺𑀝𑁆𑀞𑀓𑀔𑀡𑁆𑀟𑀸𑀦𑀺, 𑀲𑀩𑁆𑀩𑀲𑁆𑀲 𑀧𑀼𑀣𑀼𑀧𑀸𑀡𑀺𑀓𑀁;

𑀕𑀺𑀮𑀸𑀦𑀲𑁆𑀲𑀸𑀕𑀺𑀮𑀸𑀦𑀲𑁆𑀲, 𑀯𑀢𑁆𑀣𑀯𑀝𑁆𑀝𑀺 𑀘 𑀯𑀝𑁆𑀝𑀢𑀺.

𑁨𑁭𑁮𑁭. 𑀯𑀼𑀢𑁆𑀢𑀸 𑀨𑁂𑀡𑀓𑀧𑀸𑀲𑀸𑀡-𑀓𑀣𑀮𑀸 𑀧𑀸𑀤𑀖𑀁𑀲𑀦𑁂;

𑀯𑀝𑁆𑀝𑀁 𑀯𑀸 𑀘𑀢𑀼𑀭𑀲𑁆𑀲𑀁 𑀯𑀸, 𑀓𑀢𑀓𑀁 𑀦 𑀘 𑀯𑀝𑁆𑀝𑀢𑀺.

𑁨𑁭𑁮𑁮. 𑀬𑀁 𑀓𑀺𑀜𑁆𑀘𑀺𑀧𑀺 𑀅𑀮𑀗𑁆𑀓𑀸𑀭𑀁, 𑀥𑀸𑀭𑁂𑀦𑁆𑀢𑀲𑁆𑀲𑀧𑀺 𑀤𑀼𑀓𑁆𑀓𑀝𑀁;

𑀳𑁄𑀢𑀺 𑀅𑀦𑁆𑀢𑀫𑀲𑁄 𑀢𑀸𑀮-𑀧𑀡𑁆𑀡𑀫𑀢𑁆𑀢𑀫𑁆𑀧𑀺 𑀪𑀺𑀓𑁆𑀔𑀼𑀦𑁄.

𑁨𑁭𑁮𑁯. 𑀑𑀲𑀡𑁆𑀳𑁂𑀬𑁆𑀬 𑀲𑀓𑁂 𑀓𑁂𑀲𑁂, 𑀬𑁄 𑀳𑀢𑁆𑀣𑀨𑀡𑀓𑁂𑀦 𑀯𑀸;

𑀨𑀡𑀓𑁂𑀦𑀧𑀺 𑀓𑁄𑀘𑁆𑀙𑁂𑀦, 𑀤𑀼𑀓𑁆𑀓𑀝𑀁 𑀢𑀲𑁆𑀲 𑀦𑀺𑀤𑁆𑀤𑀺𑀲𑁂.

𑁨𑁭𑁯𑁦. 𑀲𑀺𑀢𑁆𑀣𑀢𑁂𑀮𑁄𑀤𑀢𑁂𑀮𑁂𑀳𑀺, 𑀫𑀡𑁆𑀟𑀦𑀢𑁆𑀣𑀁 𑀦 𑀯𑀝𑁆𑀝𑀢𑀺;

𑀅𑀦𑀼𑀮𑁄𑀫𑀦𑀺𑀧𑀸𑀢𑀢𑁆𑀣𑀁, 𑀉𑀤𑁆𑀥𑀁𑀮𑁄𑀫𑁂𑀦 𑀪𑀺𑀓𑁆𑀔𑀼𑀦𑀸.

𑁨𑁭𑁯𑁧. 𑀳𑀢𑁆𑀣𑀁 𑀢𑁂𑀮𑁂𑀦 𑀢𑁂𑀫𑁂𑀢𑁆𑀯𑀸, 𑀧𑀼𑀜𑁆𑀙𑀺𑀢𑀩𑁆𑀩𑀸 𑀲𑀺𑀭𑁄𑀭𑀼𑀳𑀸;

𑀯𑀝𑁆𑀝𑀢𑀼𑀡𑁆𑀳𑀸𑀪𑀺𑀢𑀢𑁆𑀢𑀲𑁆𑀲, 𑀅𑀮𑁆𑀮𑀳𑀢𑁆𑀣𑁂𑀦 𑀧𑀼𑀜𑁆𑀙𑀺𑀢𑀼𑀁.

𑁨𑁭𑁯𑁨. 𑀆𑀤𑀸𑀲𑁂 𑀉𑀤𑀧𑀢𑁆𑀢𑁂 𑀯𑀸, 𑀬𑀢𑁆𑀣 𑀓𑀢𑁆𑀣𑀘𑀺 𑀅𑀢𑁆𑀢𑀦𑁄;

𑀫𑀼𑀔𑀩𑀺𑀫𑁆𑀩𑀁 𑀯𑀺𑀦𑀸 𑀳𑁂𑀢𑀼𑀁, 𑀑𑀮𑁄𑀓𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑁨𑁭𑁯𑁩. ‘‘𑀲𑀜𑁆𑀙𑀯𑀺𑀁 𑀢𑀼 𑀫𑀼𑀔𑀁, 𑀦𑁄’’𑀢𑀺, 𑀤𑀝𑁆𑀞𑀼𑀫𑀸𑀩𑀸𑀥𑀧𑀘𑁆𑀘𑀬𑀸;

‘‘𑀚𑀺𑀡𑁆𑀡𑁄 𑀦𑁄’’𑀢𑀸𑀬𑀼𑀲𑀗𑁆𑀔𑀸𑀭-𑀚𑀸𑀦𑀦𑀢𑁆𑀣𑀜𑁆𑀘 𑀯𑀝𑁆𑀝𑀢𑀺.

𑁨𑁭𑁯𑁪. 𑀦𑀘𑁆𑀘𑀁 𑀯𑀸 𑀧𑀦 𑀕𑀻𑀢𑀁 𑀯𑀸, 𑀯𑀸𑀤𑀺𑀢𑀁 𑀯𑀸𑀧𑀺 𑀪𑀺𑀓𑁆𑀔𑀼𑀦𑁄;

𑀤𑀝𑁆𑀞𑀼𑀁 𑀯𑀸 𑀧𑀦 𑀲𑁄𑀢𑀼𑀁 𑀯𑀸, 𑀕𑀘𑁆𑀙𑀢𑁄 𑀳𑁄𑀢𑀺 𑀤𑀼𑀓𑁆𑀓𑀝𑀁.

𑁨𑁭𑁯𑁫. 𑀤𑀝𑁆𑀞𑀼𑀫𑀦𑁆𑀢𑀫𑀲𑁄 𑀫𑁄𑀭-𑀦𑀘𑁆𑀘𑀫𑁆𑀧𑀺 𑀘 𑀦 𑀯𑀝𑁆𑀝𑀢𑀺;

𑀲𑁄𑀢𑀼𑀫𑀦𑁆𑀢𑀫𑀲𑁄 𑀤𑀦𑁆𑀢-𑀕𑀻𑀢𑀫𑁆𑀧𑀺 𑀘 𑀦 𑀯𑀝𑁆𑀝𑀢𑀺.

𑁨𑁭𑁯𑁬. 𑀦𑀘𑁆𑀘𑀦𑁆𑀢𑀲𑁆𑀲 𑀲𑀬𑀁 𑀯𑀸𑀧𑀺, 𑀦𑀘𑁆𑀘𑀸𑀧𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁;

𑀅𑀦𑀸𑀧𑀢𑁆𑀢𑀦𑁆𑀢𑀭𑀸𑀭𑀸𑀫𑁂, 𑀞𑀢𑁆𑀯𑀸 𑀲𑀼𑀡𑀸𑀢𑀺 𑀧𑀲𑁆𑀲𑀢𑀺.

𑁨𑁭𑁯𑁭. ‘‘𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀦𑀘𑁆𑀘𑀁 𑀯𑀸, 𑀕𑀻𑀢𑀁 𑀯𑀸 𑀧𑀦 𑀯𑀸𑀤𑀺𑀢𑀁;

𑀯𑀺𑀳𑀸𑀭𑀢𑁄 𑀯𑀺𑀳𑀸𑀭𑀁 𑀯𑀸, 𑀕𑀘𑁆𑀙𑀢𑁄 𑀳𑁄𑀢𑀺 𑀤𑀼𑀓𑁆𑀓𑀝𑀁.

𑁨𑁭𑁯𑁮. 𑀆𑀧𑀢𑁆𑀢𑀦𑁆𑀢𑁄𑀯𑀺𑀳𑀸𑀭𑁂𑀧𑀺, 𑀉𑀝𑁆𑀞𑀳𑀺𑀢𑁆𑀯𑀸𑀦 𑀕𑀘𑁆𑀙𑀢𑁄;

𑀞𑀢𑁆𑀯𑀸 𑀕𑀻𑀯𑀁 𑀧𑀲𑀸𑀭𑁂𑀢𑁆𑀯𑀸, 𑀧𑀲𑁆𑀲𑀢𑁄𑀧𑀺 𑀘 𑀯𑀻𑀣𑀺𑀬𑀁.

𑁨𑁭𑁯𑁯. 𑀓𑁂𑀲𑀸 𑀤𑀻𑀖𑀸 𑀦 𑀥𑀸𑀭𑁂𑀬𑁆𑀬𑀸, 𑀬𑁄 𑀥𑀸𑀭𑁂𑀬𑁆𑀬𑀲𑁆𑀲 𑀤𑀼𑀓𑁆𑀓𑀝𑀁;

𑀤𑁆𑀯𑀗𑁆𑀕𑀼𑀮𑀁 𑀯𑀸 𑀤𑀼𑀫𑀸𑀲𑀁 𑀯𑀸, 𑀢𑀢𑁄 𑀉𑀤𑁆𑀥𑀁 𑀦 𑀯𑀝𑁆𑀝𑀢𑀺.

𑁨𑁮𑁦𑁦. 𑀦𑀔𑁂 𑀦𑀸𑀲𑀺𑀓𑀮𑁄𑀫𑀸𑀦𑀺, 𑀤𑀻𑀖𑀸𑀦𑀺 𑀦 𑀢𑀼 𑀥𑀸𑀭𑀬𑁂;

𑀦 𑀘 𑀯𑀻𑀲𑀢𑀺𑀫𑀝𑁆𑀞𑀁 𑀯𑀸, 𑀓𑀸𑀢𑀼𑀁 𑀯𑀝𑁆𑀝𑀢𑀺 𑀪𑀺𑀓𑁆𑀔𑀼𑀦𑁄.

𑁨𑁮𑁦𑁧. 𑀓𑀧𑁆𑀧𑀸𑀧𑁂𑀬𑁆𑀬 𑀯𑀺𑀲𑀼𑀁 𑀫𑀲𑁆𑀲𑀼𑀁, 𑀤𑀸𑀞𑀺𑀓𑀁 𑀯𑀸 𑀞𑀧𑁂𑀬𑁆𑀬 𑀬𑁄;

𑀲𑀁𑀳𑀭𑀸𑀧𑁂𑀬𑁆𑀬 𑀯𑀸 𑀮𑁄𑀫𑀁, 𑀲𑀫𑁆𑀩𑀸𑀥𑁂 𑀢𑀲𑁆𑀲 𑀤𑀼𑀓𑁆𑀓𑀝𑀁.

𑁨𑁮𑁦𑁨. 𑀙𑀺𑀦𑁆𑀤𑀢𑁄 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀓𑁂𑀲𑁂 𑀓𑀢𑁆𑀢𑀭𑀺𑀓𑀸𑀬 𑀯𑀸;

𑀅𑀕𑀺𑀮𑀸𑀦𑀲𑁆𑀲 𑀅𑀜𑁆𑀜𑁂𑀦, 𑀙𑀺𑀦𑁆𑀤𑀸𑀧𑁂𑀦𑁆𑀢𑀲𑁆𑀲 𑀯𑀸 𑀢𑀣𑀸.

𑁨𑁮𑁦𑁩. 𑀙𑀺𑀦𑁆𑀤𑀢𑁄 𑀅𑀢𑁆𑀢𑀦𑁄 𑀅𑀗𑁆𑀕-𑀚𑀸𑀢𑀁 𑀣𑀼𑀮𑁆𑀮𑀘𑁆𑀘𑀬𑀁 𑀲𑀺𑀬𑀸;

𑀲𑁂𑀲𑀗𑁆𑀕𑀙𑁂𑀤𑀦𑁂 𑀅𑀢𑁆𑀢-𑀯𑀥𑁂 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑁨𑁮𑁦𑁪. 𑀅𑀳𑀺𑀓𑀻𑀝𑀸𑀤𑀺𑀤𑀝𑁆𑀞𑀲𑁆𑀲, 𑀢𑀸𑀤𑀺𑀲𑀸𑀩𑀸𑀥𑀧𑀘𑁆𑀘𑀬𑀸;

𑀦 𑀤𑁄𑀲𑁄 𑀙𑀺𑀦𑁆𑀤𑀢𑁄 𑀅𑀗𑁆𑀕𑀁, 𑀫𑁄𑀘𑁂𑀦𑁆𑀢𑀲𑁆𑀲 𑀘 𑀮𑁄𑀳𑀺𑀢𑀁.

𑁨𑁮𑁦𑁫. 𑀅𑀧𑀭𑀺𑀲𑁆𑀲𑀸𑀯𑀦𑁄 𑀫𑀕𑁆𑀕𑀁, 𑀲𑀘𑁂 𑀕𑀘𑁆𑀙𑀢𑀺 𑀤𑀼𑀓𑁆𑀓𑀝𑀁;

𑀬𑀸𑀘𑀫𑀸𑀦𑀲𑁆𑀲 𑀯𑀸 𑀫𑀕𑁆𑀕𑁂, 𑀢𑀣𑁂𑀯𑀸𑀤𑀤𑀢𑁄𑀧𑀺 𑀢𑀁.

𑁨𑁮𑁦𑁬. 𑀦 𑀪𑀼𑀜𑁆𑀚𑁂 𑀦 𑀧𑀺𑀯𑁂 𑀦𑀕𑁆𑀕𑁄, 𑀦 𑀔𑀸𑀤𑁂 𑀦 𑀘 𑀲𑀸𑀬𑀬𑁂;

𑀦 𑀤𑀤𑁂 𑀦 𑀘 𑀕𑀡𑁆𑀳𑁂𑀬𑁆𑀬, 𑀦 𑀕𑀘𑁆𑀙𑁂𑀬𑁆𑀬𑀧𑀺 𑀅𑀜𑁆𑀚𑀲𑀁.

𑁨𑁮𑁦𑁭. 𑀯𑀦𑁆𑀤𑀺𑀢𑀩𑁆𑀩𑀁 𑀦 𑀦𑀕𑁆𑀕𑁂𑀦, 𑀯𑀦𑁆𑀤𑀸𑀧𑁂𑀢𑀩𑁆𑀩𑀫𑁂𑀯 𑀯𑀸;

𑀧𑀭𑀺𑀓𑀫𑁆𑀫𑀁 𑀦 𑀓𑀸𑀢𑀩𑁆𑀩𑀁, 𑀦 𑀦𑀕𑁆𑀕𑁂𑀦 𑀘 𑀓𑀸𑀭𑀬𑁂.

𑁨𑁮𑁦𑁮. 𑀧𑀭𑀺𑀓𑀫𑁆𑀫𑁂 𑀧𑀝𑀺𑀘𑁆𑀙𑀸𑀤𑀻, 𑀢𑀺𑀲𑁆𑀲𑁄 𑀚𑀦𑁆𑀢𑀸𑀖𑀭𑀸𑀤𑀺𑀓𑀸;

𑀯𑀼𑀢𑁆𑀢𑀸, 𑀯𑀢𑁆𑀣𑀧𑀝𑀺𑀘𑁆𑀙𑀸𑀤𑀻, 𑀲𑀩𑁆𑀩𑀢𑁆𑀣 𑀧𑀦 𑀯𑀝𑁆𑀝𑀢𑀺.

𑁨𑁮𑁦𑁯. 𑀬𑀢𑁆𑀣 𑀓𑀢𑁆𑀣𑀘𑀺 𑀧𑁂𑀴𑀸𑀬𑀁, 𑀪𑀼𑀜𑁆𑀚𑀺𑀢𑀼𑀁 𑀦 𑀘 𑀯𑀝𑁆𑀝𑀢𑀺;

𑀏𑀓𑀢𑁄 𑀪𑀼𑀜𑁆𑀚𑀢𑁄 𑀳𑁄𑀢𑀺, 𑀤𑀼𑀓𑁆𑀓𑀝𑀁 𑀏𑀓𑀪𑀸𑀚𑀦𑁂.

𑁨𑁮𑁧𑁦. 𑀏𑀓𑀧𑀸𑀯𑀼𑀭𑀡𑀸 𑀏𑀓-𑀢𑁆𑀣𑀭𑀡𑀸 𑀯𑀸 𑀦𑀺𑀧𑀚𑁆𑀚𑀭𑁂;

𑀏𑀓𑀫𑀜𑁆𑀘𑁂𑀧𑀺 𑀯𑀸 𑀢𑁂𑀲𑀁, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑁨𑁮𑁧𑁧. 𑀦 𑀦𑀺𑀲𑀻𑀤𑁂𑀬𑁆𑀬 𑀲𑀗𑁆𑀖𑀸𑀝𑀺-𑀧𑀮𑁆𑀮𑀢𑁆𑀣𑀺𑀓𑀫𑀼𑀧𑀸𑀕𑀢𑁄;

𑀓𑀺𑀜𑁆𑀘𑀺 𑀓𑀻𑀴𑀁 𑀦 𑀓𑀻𑀴𑁂𑀬𑁆𑀬, 𑀧𑀮𑀺𑀢𑀁 𑀦 𑀘 𑀕𑀸𑀳𑀬𑁂.

𑁨𑁮𑁧𑁨. 𑀪𑀫𑀼𑀓𑀸𑀬 𑀦𑀮𑀸𑀝𑁂 𑀯𑀸, 𑀤𑀸𑀞𑀺𑀓𑀸𑀬𑀧𑀺 𑀉𑀕𑁆𑀕𑀢𑀁;

𑀢𑀸𑀤𑀺𑀲𑀁 𑀧𑀮𑀺𑀢𑀁 𑀘𑀜𑁆𑀜𑀁, 𑀕𑀸𑀳𑀸𑀧𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀺.

𑁨𑁮𑁧𑁩. 𑀅𑀕𑀺𑀮𑀸𑀦𑁄 𑀲𑀘𑁂 𑀪𑀺𑀓𑁆𑀔𑀼, 𑀙𑀢𑁆𑀢𑀁 𑀥𑀸𑀭𑁂𑀬𑁆𑀬 𑀤𑀼𑀓𑁆𑀓𑀝𑀁;

𑀅𑀢𑁆𑀢𑀦𑁄 𑀘𑀻𑀯𑀭𑀸𑀤𑀻𑀦𑀁, 𑀕𑀼𑀢𑁆𑀢𑀢𑁆𑀣𑀁 𑀧𑀦 𑀯𑀝𑁆𑀝𑀢𑀺.

𑁨𑁮𑁧𑁪. 𑀳𑀢𑁆𑀣𑀺𑀲𑁄𑀡𑁆𑀟𑀁 𑀘𑀢𑀼𑀓𑁆𑀓𑀡𑁆𑀡𑀁, 𑀯𑀲𑀦𑀁 𑀫𑀘𑁆𑀙𑀯𑀸𑀴𑀓𑀁;

𑀯𑁂𑀮𑁆𑀮𑀺𑀬𑀁 𑀢𑀸𑀮𑀯𑀡𑁆𑀝𑀜𑁆𑀘, 𑀦𑀺𑀯𑀸𑀲𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑁨𑁮𑁧𑁫. 𑀕𑀳𑀺𑀧𑀸𑀭𑀼𑀧𑀦𑀁 𑀯𑀸𑀧𑀺, 𑀧𑀸𑀭𑀼𑀧𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁;

𑀦𑀺𑀯𑀸𑀲𑀦𑁂 𑀧𑀸𑀭𑀼𑀧𑀦𑁂, 𑀧𑀭𑀺𑀫𑀡𑁆𑀟𑀮𑀢𑀸 𑀫𑀢𑀸.

𑁨𑁮𑁧𑁬. 𑀮𑁄𑀓𑀸𑀬𑀢𑀁 𑀦 𑀯𑀸𑀘𑁂𑀬𑁆𑀬, 𑀦 𑀘 𑀢𑀁 𑀧𑀭𑀺𑀬𑀸𑀧𑀼𑀡𑁂;

𑀦 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸 𑀯𑀸, 𑀯𑀸𑀘𑁂𑀢𑀩𑁆𑀩𑀸𑀯 𑀪𑀺𑀓𑁆𑀔𑀼𑀦𑀸.

𑁨𑁮𑁧𑁭. 𑀦 𑀘 𑀯𑀝𑁆𑀝𑀢𑀺 𑀥𑀸𑀭𑁂𑀢𑀼𑀁, 𑀲𑀩𑁆𑀩𑀸 𑀘𑀸𑀫𑀭𑀺𑀩𑀻𑀚𑀦𑀻;

𑀦 𑀘𑀸𑀮𑀺𑀫𑁆𑀧𑁂𑀬𑁆𑀬 𑀤𑀸𑀬𑀁 𑀯𑀸, 𑀦 𑀘 𑀮𑀜𑁆𑀚𑁂 𑀫𑀼𑀔𑀫𑁆𑀧𑀺 𑀘.

𑁨𑁮𑁧𑁮. 𑀦 𑀯𑀳𑁂 𑀉𑀪𑀢𑁄𑀓𑀸𑀚𑀁, 𑀯𑀝𑁆𑀝𑀢𑀦𑁆𑀢𑀭𑀓𑀸𑀚𑀓𑀁;

𑀲𑀻𑀲𑀓𑁆𑀔𑀦𑁆𑀥𑀓𑀝𑁄𑀮𑀫𑁆𑀩-𑀪𑀸𑀭𑁂 𑀤𑁄𑀲𑁄 𑀦 𑀯𑀺𑀚𑁆𑀚𑀢𑀺.

𑁨𑁮𑁧𑁯. 𑀅𑀝𑁆𑀞𑀗𑁆𑀕𑀼𑀮𑀸𑀤𑀺𑀓𑀁 𑀪𑀺𑀓𑁆𑀔𑀼, 𑀧𑀘𑁆𑀙𑀺𑀫𑀁 𑀘𑀢𑀼𑀭𑀗𑁆𑀕𑀼𑀮𑀸;

𑀔𑀸𑀤𑀢𑁄 𑀤𑀦𑁆𑀢𑀓𑀝𑁆𑀞𑀜𑁆𑀘, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.