𑀪𑀺𑀓𑁆𑀔𑀼𑀦𑀻𑀯𑀺𑀪𑀗𑁆𑀕𑁄

𑁧𑁯𑁬𑁪. 𑀪𑀺𑀓𑁆𑀔𑀼𑀦𑀻𑀦𑀁 𑀳𑀺𑀢𑀢𑁆𑀣𑀸𑀬, 𑀯𑀺𑀪𑀗𑁆𑀕𑀁 𑀬𑀁 𑀚𑀺𑀦𑁄𑀩𑁆𑀭𑀯𑀺;

𑀢𑀲𑁆𑀫𑀺𑀁 𑀅𑀧𑀺 𑀲𑀫𑀸𑀲𑁂𑀦, 𑀓𑀺𑀜𑁆𑀘𑀺𑀫𑀢𑁆𑀢𑀁 𑀪𑀡𑀸𑀫𑀳𑀁.

𑀧𑀸𑀭𑀸𑀚𑀺𑀓𑀓𑀣𑀸

𑁧𑁯𑁬𑁫. 𑀙𑀦𑁆𑀤𑀲𑁄 𑀫𑁂𑀣𑀼𑀦𑀁 𑀥𑀫𑁆𑀫𑀁, 𑀧𑀝𑀺𑀲𑁂𑀯𑁂𑀬𑁆𑀬 𑀬𑀸 𑀧𑀦;

𑀳𑁄𑀢𑀺 𑀧𑀸𑀭𑀸𑀚𑀺𑀓𑀸 𑀦𑀸𑀫, 𑀲𑀫𑀡𑀻 𑀲𑀸 𑀧𑀯𑀼𑀘𑁆𑀘𑀢𑀺.

𑁧𑁯𑁬𑁬. 𑀫𑀦𑀼𑀲𑁆𑀲𑀧𑀼𑀭𑀺𑀲𑀸𑀤𑀻𑀦𑀁, 𑀦𑀯𑀦𑁆𑀦𑀁 𑀬𑀲𑁆𑀲 𑀓𑀲𑁆𑀲𑀘𑀺;

𑀲𑀚𑀻𑀯𑀲𑁆𑀲𑀸𑀧𑁆𑀬𑀚𑀻𑀯𑀲𑁆𑀲, 𑀲𑀦𑁆𑀣𑀢𑀁 𑀯𑀸 𑀅𑀲𑀦𑁆𑀣𑀢𑀁.

𑁧𑁯𑁬𑁭. 𑀅𑀢𑁆𑀢𑀦𑁄 𑀢𑀺𑀯𑀺𑀥𑁂 𑀫𑀕𑁆𑀕𑁂, 𑀬𑁂𑀪𑀼𑀬𑁆𑀬𑀓𑁆𑀔𑀸𑀬𑀺𑀢𑀸𑀤𑀺𑀓𑀁;

𑀅𑀗𑁆𑀕𑀚𑀸𑀢𑀁 𑀧𑀯𑁂𑀲𑁂𑀦𑁆𑀢𑀻, 𑀅𑀮𑁆𑀮𑁄𑀓𑀸𑀲𑁂 𑀧𑀭𑀸𑀚𑀺𑀢𑀸.

𑁧𑁯𑁬𑁮. 𑀇𑀢𑁄 𑀧𑀭𑀫𑀯𑀢𑁆𑀯𑀸𑀯, 𑀲𑀸𑀥𑀸𑀭𑀡𑀯𑀺𑀦𑀺𑀘𑁆𑀙𑀬𑀁;

𑀅𑀲𑀸𑀥𑀸𑀭𑀡𑀫𑁂𑀯𑀸𑀳𑀁, 𑀪𑀡𑀺𑀲𑁆𑀲𑀸𑀫𑀺 𑀲𑀫𑀸𑀲𑀢𑁄.

𑁧𑁯𑁬𑁯. 𑀅𑀥𑀓𑁆𑀔𑀓𑀁 𑀲𑀭𑀻𑀭𑀓𑀁, 𑀬𑀤𑀼𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀁;

𑀲𑀭𑀻𑀭𑀓𑁂𑀦 𑀘𑁂 𑀢𑁂𑀦, 𑀨𑀼𑀲𑁂𑀬𑁆𑀬 𑀪𑀺𑀓𑁆𑀔𑀼𑀦𑀻 𑀧𑀦.

𑁧𑁯𑁭𑁦. 𑀅𑀯𑀲𑁆𑀲𑀼𑀢𑀲𑁆𑀲𑀸𑀯𑀲𑁆𑀲𑀼𑀢𑀸, 𑀫𑀦𑀼𑀲𑁆𑀲𑀧𑀼𑀕𑁆𑀕𑀮𑀲𑁆𑀲 𑀬𑀸;

𑀲𑀭𑀻𑀭𑀫𑀲𑁆𑀲 𑀢𑁂𑀦 𑀯𑀸, 𑀨𑀼𑀝𑁆𑀞𑀸 𑀧𑀸𑀭𑀸𑀚𑀺𑀓𑀸 𑀲𑀺𑀬𑀸.

𑁧𑁯𑁭𑁧. 𑀓𑀧𑁆𑀧𑀭𑀲𑁆𑀲 𑀧𑀦𑀼𑀤𑁆𑀥𑀫𑁆𑀧𑀺, 𑀕𑀳𑀺𑀢𑀁 𑀉𑀩𑁆𑀪𑀚𑀸𑀡𑀼𑀦𑀸;

𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦, 𑀓𑀸𑀬𑁂𑀦𑀸𑀦𑁂𑀦 𑀅𑀢𑁆𑀢𑀦𑁄.

𑁧𑁯𑁭𑁨. 𑀧𑀼𑀭𑀺𑀲𑀲𑁆𑀲 𑀢𑀣𑀸 𑀓𑀸𑀬- 𑀧𑀝𑀺𑀩𑀤𑁆𑀥𑀁 𑀨𑀼𑀲𑀦𑁆𑀢𑀺𑀬𑀸;

𑀢𑀣𑀸 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦- 𑀓𑀸𑀬𑀩𑀤𑁆𑀥𑁂𑀦 𑀅𑀢𑁆𑀢𑀦𑁄.

𑁧𑁯𑁭𑁩. 𑀅𑀯𑀲𑁂𑀲𑁂𑀦 𑀯𑀸 𑀢𑀲𑁆𑀲, 𑀓𑀸𑀬𑀁 𑀓𑀸𑀬𑁂𑀦 𑀅𑀢𑁆𑀢𑀦𑁄;

𑀳𑁄𑀢𑀺 𑀣𑀼𑀮𑁆𑀮𑀘𑁆𑀘𑀬𑀁 𑀢𑀲𑁆𑀲𑀸, 𑀧𑀬𑁄𑀕𑁂 𑀧𑀼𑀭𑀺𑀲𑀲𑁆𑀲 𑀘.

𑁧𑁯𑁭𑁪. 𑀬𑀓𑁆𑀔𑀧𑁂𑀢𑀢𑀺𑀭𑀘𑁆𑀙𑀸𑀦- 𑀧𑀡𑁆𑀟𑀓𑀸𑀦𑀁 𑀅𑀥𑀓𑁆𑀔𑀓𑀁;

𑀉𑀩𑁆𑀪𑀚𑀸𑀡𑀼𑀁 𑀢𑀣𑁂𑀯𑀲𑁆𑀲𑀸, 𑀉𑀪𑀢𑁄𑀯𑀲𑁆𑀲𑀯𑁂 𑀲𑀢𑀺.

𑁧𑁯𑁭𑁫. 𑀏𑀓𑀢𑁄𑀯𑀲𑁆𑀲𑀯𑁂 𑀘𑀸𑀧𑀺, 𑀣𑀼𑀮𑁆𑀮𑀘𑁆𑀘𑀬𑀫𑀼𑀤𑀻𑀭𑀺𑀢𑀁;

𑀅𑀯𑀲𑁂𑀲𑁂 𑀘 𑀲𑀩𑁆𑀩𑀢𑁆𑀣, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑁧𑁯𑁭𑁬. 𑀉𑀩𑁆𑀪𑀓𑁆𑀔𑀓𑀫𑀥𑁄𑀚𑀸𑀡𑀼-𑀫𑀡𑁆𑀟𑀮𑀁 𑀧𑀦 𑀬𑀁 𑀇𑀥;

𑀓𑀧𑁆𑀧𑀭𑀲𑁆𑀲 𑀘 𑀳𑁂𑀝𑁆𑀞𑀸𑀧𑀺, 𑀕𑀢𑀁 𑀏𑀢𑁆𑀣𑁂𑀯 𑀲𑀗𑁆𑀕𑀳𑀁.

𑁧𑁯𑁭𑁭. 𑀓𑁂𑀮𑀸𑀬𑀢𑀺 𑀲𑀘𑁂 𑀪𑀺𑀓𑁆𑀔𑀼, 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀦𑀺𑀬𑀸 𑀧𑀦;

𑀉𑀪𑀺𑀦𑁆𑀦𑀁 𑀓𑀸𑀬𑀲𑀁𑀲𑀕𑁆𑀕-𑀭𑀸𑀕𑁂 𑀲𑀢𑀺 𑀳𑀺 𑀪𑀺𑀓𑁆𑀔𑀼𑀦𑁄.

𑁧𑁯𑁭𑁮. 𑀳𑁄𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁄𑀯, 𑀦𑀸𑀲𑁄 𑀪𑀺𑀓𑁆𑀔𑀼𑀦𑀺𑀬𑀸 𑀲𑀺𑀬𑀸;

𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁄 𑀘, 𑀲𑀘𑁂 𑀪𑀺𑀓𑁆𑀔𑀼𑀦𑀺𑀬𑀸 𑀲𑀺𑀬𑀸.

𑁧𑁯𑁭𑁯. 𑀪𑀺𑀓𑁆𑀔𑀼𑀦𑁄 𑀫𑁂𑀣𑀼𑀦𑁄 𑀭𑀸𑀕𑁄, 𑀕𑁂𑀳𑀧𑁂𑀫𑀫𑁆𑀧𑀺 𑀯𑀸 𑀪𑀯𑁂;

𑀢𑀲𑁆𑀲𑀸 𑀣𑀼𑀮𑁆𑀮𑀘𑁆𑀘𑀬𑀁 𑀯𑀼𑀢𑁆𑀢𑀁, 𑀪𑀺𑀓𑁆𑀔𑀼𑀦𑁄 𑀳𑁄𑀢𑀺 𑀤𑀼𑀓𑁆𑀓𑀝𑀁.

𑁧𑁯𑁮𑁦. 𑀉𑀪𑀺𑀦𑁆𑀦𑀁 𑀫𑁂𑀣𑀼𑀦𑁂 𑀭𑀸𑀕𑁂, 𑀕𑁂𑀳𑀧𑁂𑀫𑁂𑀧𑀺 𑀯𑀸 𑀲𑀢𑀺;

𑀅𑀯𑀺𑀲𑁂𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑀁, 𑀉𑀪𑀺𑀦𑁆𑀦𑀁 𑀤𑀼𑀓𑁆𑀓𑀝𑀁 𑀧𑀦.

𑁧𑁯𑁮𑁧. 𑀬𑀲𑁆𑀲 𑀬𑀢𑁆𑀣 𑀫𑀦𑁄𑀲𑀼𑀤𑁆𑀥𑀁, 𑀢𑀲𑁆𑀲 𑀢𑀢𑁆𑀣 𑀦 𑀤𑁄𑀲𑀢𑀸;

𑀉𑀪𑀺𑀦𑁆𑀦𑀫𑁆𑀧𑀺 𑀅𑀦𑀸𑀧𑀢𑁆𑀢𑀺, 𑀉𑀪𑀺𑀦𑁆𑀦𑀁 𑀘𑀺𑀢𑁆𑀢𑀲𑀼𑀤𑁆𑀥𑀺𑀬𑀸.

𑁧𑁯𑁮𑁨. 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦, 𑀪𑀺𑀦𑁆𑀤𑀺𑀢𑁆𑀯𑀸 𑀧𑀞𑀫𑀁 𑀧𑀦;

𑀧𑀘𑁆𑀙𑀸 𑀤𑀽𑀲𑁂𑀢𑀺 𑀘𑁂 𑀦𑁂𑀯, 𑀳𑁄𑀢𑀺 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑁄.

𑁧𑁯𑁮𑁩. 𑀅𑀣 𑀪𑀺𑀓𑁆𑀔𑀼𑀦𑀺𑀬𑀸 𑀨𑀼𑀝𑁆𑀞𑁄, 𑀲𑀸𑀤𑀺𑀬𑀦𑁆𑀢𑁄𑀯 𑀘𑁂𑀢𑀲𑀸;

𑀦𑀺𑀘𑁆𑀘𑀮𑁄 𑀳𑁄𑀢𑀺 𑀘𑁂 𑀪𑀺𑀓𑁆𑀔𑀼, 𑀦 𑀳𑁄𑀢𑀸𑀧𑀢𑁆𑀢𑀺 𑀪𑀺𑀓𑁆𑀔𑀼𑀦𑁄.

𑁧𑁯𑁮𑁪. 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀦𑀸 𑀨𑀼𑀝𑁆𑀞𑀸, 𑀲𑀘𑁂 𑀳𑁄𑀢𑀺𑀧𑀺 𑀦𑀺𑀘𑁆𑀘𑀮𑀸;

𑀅𑀥𑀺𑀯𑀸𑀲𑁂𑀢𑀺 𑀲𑀫𑁆𑀨𑀲𑁆𑀲𑀁, 𑀢𑀲𑁆𑀲𑀸 𑀧𑀸𑀭𑀸𑀚𑀺𑀓𑀁 𑀲𑀺𑀬𑀸.

𑁧𑁯𑁮𑁫. 𑀢𑀣𑀸 𑀣𑀼𑀮𑁆𑀮𑀘𑁆𑀘𑀬𑀁 𑀔𑁂𑀢𑁆𑀢𑁂, 𑀤𑀼𑀓𑁆𑀓𑀝𑀜𑁆𑀘 𑀯𑀺𑀦𑀺𑀤𑁆𑀤𑀺𑀲𑁂;

𑀯𑀼𑀢𑁆𑀢𑀢𑁆𑀢𑀸 ‘‘𑀓𑀸𑀬𑀲𑀁𑀲𑀕𑁆𑀕𑀁, 𑀲𑀸𑀤𑀺𑀬𑁂𑀬𑁆𑀬𑀸’’𑀢𑀺 𑀲𑀢𑁆𑀣𑀼𑀦𑀸.

𑁧𑁯𑁮𑁬. 𑀢𑀲𑁆𑀲𑀸 𑀓𑁆𑀭𑀺𑀬𑀲𑀫𑀼𑀝𑁆𑀞𑀸𑀦𑀁, 𑀏𑀯𑀁 𑀲𑀢𑀺 𑀦 𑀤𑀺𑀲𑁆𑀲𑀢𑀺;

𑀇𑀤𑀁 𑀢𑀩𑁆𑀩𑀳𑀼𑀮𑁂𑀦𑁂𑀯, 𑀦𑀬𑁂𑀦 𑀧𑀭𑀺𑀤𑀻𑀧𑀺𑀢𑀁.

𑁧𑁯𑁮𑁭. 𑀅𑀦𑀸𑀧𑀢𑁆𑀢𑀺 𑀅𑀲𑀜𑁆𑀘𑀺𑀘𑁆𑀘, 𑀅𑀚𑀸𑀦𑀺𑀢𑁆𑀯𑀸𑀫𑀲𑀦𑁆𑀢𑀺𑀬𑀸;

𑀲𑀢𑀺 𑀆𑀫𑀲𑀦𑁂 𑀢𑀲𑁆𑀲𑀸, 𑀨𑀲𑁆𑀲𑀁 𑀯𑀸𑀲𑀸𑀤𑀺𑀬𑀦𑁆𑀢𑀺𑀬𑀸.

𑁧𑁯𑁮𑁮. 𑀯𑁂𑀤𑀦𑀝𑁆𑀝𑀸𑀬 𑀯𑀸 𑀔𑀺𑀢𑁆𑀢-𑀘𑀺𑀢𑁆𑀢𑀸𑀬𑀼𑀫𑁆𑀫𑀢𑁆𑀢𑀺𑀓𑀸𑀬 𑀯𑀸;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀢𑀼𑀮𑁆𑀬𑀸, 𑀧𑀞𑀫𑀦𑁆𑀢𑀺𑀫𑀯𑀢𑁆𑀣𑀼𑀦𑀸.

𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀓𑀣𑀸.

𑁧𑁯𑁮𑁯. 𑀧𑀸𑀭𑀸𑀚𑀺𑀓𑀢𑁆𑀢𑀁 𑀚𑀸𑀦𑀦𑁆𑀢𑀺, 𑀲𑀮𑀺𑀗𑁆𑀕𑁂 𑀢𑀼 𑀞𑀺𑀢𑀸𑀬 𑀳𑀺;

‘‘𑀦 𑀓𑀲𑁆𑀲𑀘𑀺 𑀧𑀭𑀲𑁆𑀲𑀸𑀳𑀁, 𑀆𑀭𑁄𑀘𑁂𑀲𑁆𑀲𑀸𑀫𑀺 𑀤𑀸𑀦𑀺’’𑀢𑀺.

𑁧𑁯𑁯𑁦. 𑀥𑀼𑀭𑁂 𑀦𑀺𑀓𑁆𑀔𑀺𑀢𑁆𑀢𑀫𑀢𑁆𑀢𑀲𑁆𑀫𑀺𑀁, 𑀲𑀸 𑀘 𑀧𑀸𑀭𑀸𑀚𑀺𑀓𑀸 𑀲𑀺𑀬𑀸;

𑀅𑀬𑀁 𑀯𑀚𑁆𑀚𑀧𑀝𑀺𑀘𑁆𑀙𑀸𑀤𑀺- 𑀦𑀸𑀫𑀺𑀓𑀸 𑀧𑀦 𑀦𑀸𑀫𑀢𑁄.

𑁧𑁯𑁯𑁧. 𑀲𑁂𑀲𑀁 𑀲𑀧𑁆𑀧𑀸𑀡𑀯𑀕𑁆𑀕𑀲𑁆𑀫𑀺𑀁, 𑀤𑀼𑀝𑁆𑀞𑀼𑀮𑁆𑀮𑁂𑀦 𑀲𑀫𑀁 𑀦𑀬𑁂;

𑀯𑀺𑀲𑁂𑀲𑁄 𑀢𑀢𑁆𑀭 𑀧𑀸𑀘𑀺𑀢𑁆𑀢𑀺, 𑀇𑀥 𑀧𑀸𑀭𑀸𑀚𑀺𑀓𑀁 𑀲𑀺𑀬𑀸.

𑀯𑀚𑁆𑀚𑀧𑀝𑀺𑀘𑁆𑀙𑀸𑀤𑀺𑀓𑀣𑀸.

𑁧𑁯𑁯𑁨. 𑀲𑀗𑁆𑀖𑁂𑀦𑀼𑀓𑁆𑀔𑀺𑀢𑁆𑀢𑀓𑁄 𑀪𑀺𑀓𑁆𑀔𑀼, 𑀞𑀺𑀢𑁄 𑀉𑀓𑁆𑀔𑁂𑀧𑀦𑁂 𑀧𑀦;

𑀬𑀁𑀤𑀺𑀝𑁆𑀞𑀺𑀓𑁄 𑀘 𑀲𑁄 𑀢𑀲𑁆𑀲𑀸, 𑀤𑀺𑀝𑁆𑀞𑀺𑀬𑀸 𑀕𑀳𑀡𑁂𑀦 𑀢𑀁.

𑁧𑁯𑁯𑁩. 𑀅𑀦𑀼𑀯𑀢𑁆𑀢𑁂𑀬𑁆𑀬 𑀬𑀸 𑀪𑀺𑀓𑁆𑀔𑀼𑀁, 𑀪𑀺𑀓𑁆𑀔𑀼𑀦𑀻 𑀲𑀸 𑀯𑀺𑀲𑀼𑀫𑁆𑀧𑀺 𑀘;

𑀲𑀗𑁆𑀖𑀫𑀚𑁆𑀛𑁂𑀧𑀺 𑀅𑀜𑁆𑀜𑀸𑀳𑀺, 𑀯𑀼𑀘𑁆𑀘𑀫𑀸𑀦𑀸 𑀢𑀣𑁂𑀯 𑀘.

𑁧𑁯𑁯𑁪. 𑀅𑀘𑀚𑀦𑁆𑀢𑀻𑀯 𑀢𑀁 𑀯𑀢𑁆𑀣𑀼𑀁, 𑀕𑀳𑁂𑀢𑁆𑀯𑀸 𑀬𑀤𑀺 𑀢𑀺𑀝𑁆𑀞𑀢𑀺;

𑀢𑀲𑁆𑀲 𑀓𑀫𑁆𑀫𑀲𑁆𑀲 𑀑𑀲𑀸𑀦𑁂, 𑀉𑀓𑁆𑀔𑀺𑀢𑁆𑀢𑀲𑁆𑀲𑀸𑀦𑀼𑀯𑀢𑁆𑀢𑀺𑀓𑀸.

𑁧𑁯𑁯𑁫. 𑀳𑁄𑀢𑀺 𑀧𑀸𑀭𑀸𑀚𑀺𑀓𑀸𑀧𑀦𑁆𑀦𑀸, 𑀳𑁄𑀢𑀸𑀲𑀸𑀓𑀺𑀬𑀥𑀻𑀢𑀭𑀸;

𑀧𑀼𑀦 𑀅𑀧𑁆𑀧𑀝𑀺𑀲𑀦𑁆𑀥𑁂𑀬𑀸, 𑀤𑁆𑀯𑀺𑀥𑀸 𑀪𑀺𑀦𑁆𑀦𑀸 𑀲𑀺𑀮𑀸 𑀯𑀺𑀬.

𑁧𑁯𑁯𑁬. 𑀅𑀥𑀫𑁆𑀫𑁂 𑀧𑀦 𑀓𑀫𑁆𑀫𑀲𑁆𑀫𑀺𑀁, 𑀦𑀺𑀤𑁆𑀤𑀺𑀝𑁆𑀞𑀁 𑀢𑀺𑀓𑀤𑀼𑀓𑁆𑀓𑀝𑀁;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀩𑁆𑀩𑁂, 𑀯𑀼𑀢𑁆𑀢𑀸 𑀲𑀫𑀦𑀼𑀪𑀸𑀲𑀦𑁂.

𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀺𑀓𑀓𑀣𑀸.

𑁧𑁯𑁯𑁭. 𑀅𑀧𑀸𑀭𑀸𑀚𑀺𑀓𑀔𑁂𑀢𑁆𑀢𑀲𑁆𑀲, 𑀕𑀳𑀡𑀁 𑀬𑀲𑁆𑀲 𑀓𑀲𑁆𑀲𑀘𑀺;

𑀅𑀗𑁆𑀕𑀲𑁆𑀲 𑀧𑀦 𑀢𑀁 𑀳𑀢𑁆𑀣-𑀕𑁆𑀕𑀳𑀡𑀦𑁆𑀢𑀺 𑀧𑀯𑀼𑀘𑁆𑀘𑀢𑀺.

𑁧𑁯𑁯𑁮. 𑀧𑀸𑀭𑀼𑀢𑀲𑁆𑀲 𑀦𑀺𑀯𑀢𑁆𑀣𑀲𑁆𑀲, 𑀕𑀳𑀡𑀁 𑀬𑀲𑁆𑀲 𑀓𑀲𑁆𑀲𑀘𑀺;

𑀏𑀢𑀁 𑀲𑀗𑁆𑀖𑀸𑀝𑀺𑀬𑀸 𑀓𑀡𑁆𑀡-𑀕𑁆𑀕𑀳𑀡𑀦𑁆𑀢𑀺 𑀧𑀯𑀼𑀘𑁆𑀘𑀢𑀺.

𑁧𑁯𑁯𑁯. 𑀓𑀸𑀬𑀲𑀁𑀲𑀕𑁆𑀕𑀲𑀗𑁆𑀔𑀸𑀢-𑀅𑀲𑀤𑁆𑀥𑀫𑁆𑀫𑀲𑁆𑀲 𑀓𑀸𑀭𑀡𑀸;

𑀪𑀺𑀓𑁆𑀔𑀼𑀦𑀻 𑀳𑀢𑁆𑀣𑀧𑀸𑀲𑀲𑁆𑀫𑀺𑀁, 𑀢𑀺𑀝𑁆𑀞𑁂𑀬𑁆𑀬 𑀧𑀼𑀭𑀺𑀲𑀲𑁆𑀲 𑀯𑀸.

𑁨𑁦𑁦𑁦. 𑀲𑀮𑁆𑀮𑀧𑁂𑀬𑁆𑀬 𑀢𑀣𑀸 𑀢𑀢𑁆𑀣, 𑀞𑀢𑁆𑀯𑀸 𑀢𑀼 𑀧𑀼𑀭𑀺𑀲𑁂𑀦 𑀯𑀸;

𑀲𑀗𑁆𑀓𑁂𑀢𑀁 𑀯𑀸𑀧𑀺 𑀕𑀘𑁆𑀙𑁂𑀬𑁆𑀬, 𑀇𑀘𑁆𑀙𑁂𑀬𑁆𑀬𑀸 𑀕𑀫𑀦𑀲𑁆𑀲 𑀯𑀸.

𑁨𑁦𑁦𑁧. 𑀢𑀤𑀢𑁆𑀣𑀸𑀬 𑀧𑀝𑀺𑀘𑁆𑀙𑀦𑁆𑀦-𑀝𑁆𑀞𑀸𑀦𑀜𑁆𑀘 𑀧𑀯𑀺𑀲𑁂𑀬𑁆𑀬 𑀯𑀸;

𑀉𑀧𑀲𑀁𑀳𑀭𑁂𑀬𑁆𑀬 𑀓𑀸𑀬𑀁 𑀯𑀸, 𑀳𑀢𑁆𑀣𑀧𑀸𑀲𑁂 𑀞𑀺𑀢𑀸 𑀧𑀦.

𑁨𑁦𑁦𑁨. 𑀅𑀬𑀫𑀲𑁆𑀲𑀫𑀡𑀻 𑀳𑁄𑀢𑀺, 𑀯𑀺𑀦𑀝𑁆𑀞𑀸 𑀅𑀝𑁆𑀞𑀯𑀢𑁆𑀣𑀼𑀓𑀸;

𑀅𑀪𑀩𑁆𑀩𑀸 𑀧𑀼𑀦𑀭𑀼𑀴𑁆𑀳𑀸𑀬, 𑀙𑀺𑀦𑁆𑀦𑁄 𑀢𑀸𑀮𑁄𑀯 𑀫𑀢𑁆𑀣𑀓𑁂.

𑁨𑁦𑁦𑁩. 𑀅𑀦𑀼𑀮𑁄𑀫𑁂𑀦 𑀯𑀸 𑀯𑀢𑁆𑀣𑀼𑀁, 𑀧𑀝𑀺𑀮𑁄𑀫𑁂𑀦 𑀯𑀸 𑀘𑀼𑀢𑀸;

𑀅𑀝𑁆𑀞𑀫𑀁 𑀧𑀭𑀺𑀧𑀽𑀭𑁂𑀦𑁆𑀢𑀻, 𑀢𑀣𑁂𑀓𑀦𑁆𑀢𑀭𑀺𑀓𑀸𑀬 𑀯𑀸.

𑁨𑁦𑁦𑁪. 𑀅𑀣𑀸𑀤𑀺𑀢𑁄 𑀧𑀦𑁂𑀓𑀁 𑀯𑀸, 𑀤𑁆𑀯𑁂 𑀯𑀸 𑀢𑀻𑀡𑀺𑀧𑀺 𑀲𑀢𑁆𑀢 𑀯𑀸;

𑀲𑀢𑀓𑁆𑀔𑀢𑁆𑀢𑀼𑀫𑁆𑀧𑀺 𑀧𑀽𑀭𑁂𑀦𑁆𑀢𑀻, 𑀦𑁂𑀯 𑀧𑀸𑀭𑀸𑀚𑀺𑀓𑀸 𑀲𑀺𑀬𑀸.

𑁨𑁦𑁦𑁫. 𑀆𑀧𑀢𑁆𑀢𑀺𑀬𑁄 𑀧𑀦𑀸𑀧𑀦𑁆𑀦𑀸, 𑀤𑁂𑀲𑁂𑀢𑁆𑀯𑀸 𑀢𑀸𑀳𑀺 𑀫𑀼𑀘𑁆𑀘𑀢𑀺;

𑀥𑀼𑀭𑀦𑀺𑀓𑁆𑀔𑁂𑀧𑀦𑀁 𑀓𑀢𑁆𑀯𑀸, 𑀤𑁂𑀲𑀺𑀢𑀸 𑀕𑀡𑀦𑀽𑀧𑀺𑀓𑀸.

𑁨𑁦𑁦𑁬. 𑀦 𑀳𑁄𑀢𑀸𑀧𑀢𑁆𑀢𑀺𑀬𑀸 𑀅𑀗𑁆𑀕𑀁, 𑀲𑀉𑀲𑁆𑀲𑀸𑀳𑀸𑀬 𑀤𑁂𑀲𑀺𑀢𑀸;

𑀤𑁂𑀲𑀦𑀸𑀕𑀡𑀦𑀁 𑀦𑁂𑀢𑀺, 𑀤𑁂𑀲𑀺𑀢𑀸𑀧𑀺 𑀅𑀤𑁂𑀲𑀺𑀢𑀸.

𑁨𑁦𑁦𑁭. 𑀅𑀦𑀸𑀧𑀢𑁆𑀢𑀺 𑀅𑀲𑀜𑁆𑀘𑀺𑀘𑁆𑀘, 𑀅𑀚𑀸𑀦𑀺𑀢𑁆𑀯𑀸 𑀓𑀭𑁄𑀦𑁆𑀢𑀺𑀬𑀸;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀩𑁆𑀩𑁂, 𑀅𑀦𑀦𑁆𑀢𑀭𑀲𑀫𑀸 𑀫𑀢𑀸.

𑁨𑁦𑁦𑁮. ‘‘𑀅𑀲𑀤𑁆𑀥𑀫𑁆𑀫𑁄’’𑀢𑀺 𑀦𑀸𑀫𑁂𑀢𑁆𑀣, 𑀓𑀸𑀬𑀲𑀁𑀲𑀕𑁆𑀕𑀦𑀸𑀫𑀓𑁄;

𑀅𑀬𑀫𑀼𑀤𑁆𑀤𑀺𑀲𑀺𑀢𑁄 𑀅𑀢𑁆𑀣𑁄, 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼𑀧𑀺.

𑁨𑁦𑁦𑁯. 𑀯𑀺𑀜𑁆𑀜𑀽 𑀧𑀝𑀺𑀩𑀮𑁄 𑀓𑀸𑀬-𑀲𑀁𑀲𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀢𑀼𑀁;

𑀓𑀸𑀬𑀲𑀁𑀲𑀕𑁆𑀕𑀪𑀸𑀯𑁂 𑀢𑀼, 𑀲𑀸𑀥𑀓𑀁 𑀯𑀘𑀦𑀁 𑀇𑀤𑀁.

𑀅𑀝𑁆𑀞𑀯𑀢𑁆𑀣𑀼𑀓𑀓𑀣𑀸.

𑁨𑁦𑁧𑁦. 𑀅𑀯𑀲𑁆𑀲𑀼𑀢𑀸 𑀧𑀝𑀺𑀘𑁆𑀙𑀸𑀤𑀻, 𑀉𑀓𑁆𑀔𑀺𑀢𑁆𑀢𑀸 𑀅𑀝𑁆𑀞𑀯𑀢𑁆𑀣𑀼𑀓𑀸;

𑀅𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀸, 𑀘𑀢𑀲𑁆𑀲𑁄𑀯 𑀫𑀳𑁂𑀲𑀺𑀦𑀸.

𑀧𑀸𑀭𑀸𑀚𑀺𑀓𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀲𑀗𑁆𑀖𑀸𑀤𑀺𑀲𑁂𑀲𑀓𑀣𑀸

𑁨𑁦𑁧𑁧. 𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀉𑀲𑁆𑀲𑀬𑀯𑀸𑀤𑀸;

𑀅𑀝𑁆𑀝𑀓𑀭𑀻 𑀫𑀼𑀔𑀭𑀻 𑀯𑀺𑀳𑀭𑁂𑀬𑁆𑀬;

𑀬𑁂𑀦 𑀓𑁂𑀦𑀘𑀺 𑀦𑀭𑁂𑀦𑀺𑀥 𑀲𑀤𑁆𑀥𑀺𑀁;

𑀲𑀸 𑀕𑀭𑀼𑀓𑀁 𑀓𑀺𑀭 𑀤𑁄𑀲𑀫𑀼𑀧𑁂𑀢𑀺.

𑁨𑁦𑁧𑁨. 𑀲𑀓𑁆𑀔𑀺𑀁 𑀯𑀸𑀧𑀺 𑀲𑀳𑀸𑀬𑀁 𑀯𑀸, 𑀧𑀭𑀺𑀬𑁂𑀲𑀢𑀺 𑀤𑀼𑀓𑁆𑀓𑀝𑀁;

𑀧𑀤𑁂 𑀧𑀤𑁂 𑀢𑀣𑀸 𑀅𑀝𑁆𑀝𑀁, 𑀓𑀸𑀢𑀼𑀁 𑀕𑀘𑁆𑀙𑀦𑁆𑀢𑀺𑀬𑀸𑀧𑀺 𑀘.

𑁨𑁦𑁧𑁩. 𑀆𑀭𑁄𑀘𑁂𑀢𑀺 𑀲𑀘𑁂 𑀧𑀼𑀩𑁆𑀩𑀁, 𑀪𑀺𑀓𑁆𑀔𑀼𑀦𑀻 𑀅𑀢𑁆𑀢𑀦𑁄 𑀓𑀣𑀁;

𑀤𑀺𑀲𑁆𑀯𑀸 𑀯𑁄𑀳𑀸𑀭𑀺𑀓𑀁 𑀢𑀲𑁆𑀲𑀸, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑁨𑁦𑁧𑁪. 𑀆𑀭𑁄𑀘𑁂𑀢𑀺 𑀲𑀘𑁂 𑀧𑀘𑁆𑀙𑀸, 𑀇𑀢𑀭𑁄 𑀅𑀢𑁆𑀢𑀦𑁄 𑀓𑀣𑀁;

𑀳𑁄𑀢𑀺 𑀪𑀺𑀓𑁆𑀔𑀼𑀦𑀺𑀬𑀸 𑀢𑀲𑁆𑀲𑀸, 𑀣𑀼𑀮𑁆𑀮𑀘𑁆𑀘𑀬𑀫𑀦𑀦𑁆𑀢𑀭𑀁.

𑁨𑁦𑁧𑁫. 𑀆𑀭𑁄𑀘𑁂𑀢𑀺𑀢𑀭𑁄 𑀧𑀼𑀩𑁆𑀩𑀁, 𑀲𑀘𑁂 𑀲𑁄 𑀅𑀢𑁆𑀢𑀦𑁄 𑀓𑀣𑀁;

𑀧𑀘𑁆𑀙𑀸 𑀪𑀺𑀓𑁆𑀔𑀼𑀦𑀻 𑀘𑁂 𑀧𑀼𑀩𑁆𑀩-𑀲𑀤𑀺𑀲𑁄𑀯 𑀯𑀺𑀦𑀺𑀘𑁆𑀙𑀬𑁄.

𑁨𑁦𑁧𑁬. ‘‘𑀆𑀭𑁄𑀘𑁂𑀳𑀻’’𑀢𑀺 𑀯𑀼𑀢𑁆𑀢𑀸 𑀘𑁂, ‘‘𑀓𑀣𑀁 𑀢𑀯 𑀫𑀫𑀸𑀧𑀺 𑀘’’;

𑀆𑀭𑁄𑀘𑁂𑀢𑀼 𑀬𑀣𑀸𑀓𑀸𑀫𑀁, 𑀧𑀞𑀫𑁂 𑀤𑀼𑀓𑁆𑀓𑀝𑀁 𑀲𑀺𑀬𑀸.

𑁨𑁦𑁧𑁭. 𑀤𑀼𑀢𑀺𑀬𑀸𑀭𑁄𑀘𑀦𑁂 𑀢𑀲𑁆𑀲𑀸, 𑀣𑀼𑀮𑁆𑀮𑀘𑁆𑀘𑀬𑀫𑀼𑀤𑀻𑀭𑀺𑀢𑀁;

𑀉𑀧𑀸𑀲𑀓𑁂𑀦 𑀯𑀼𑀢𑁆𑀢𑁂𑀧𑀺, 𑀅𑀬𑀫𑁂𑀯 𑀯𑀺𑀦𑀺𑀘𑁆𑀙𑀬𑁄.

𑁨𑁦𑁧𑁮. 𑀆𑀭𑁄𑀘𑀺𑀢𑀓𑀣𑀁 𑀲𑀼𑀢𑁆𑀯𑀸, 𑀉𑀪𑀺𑀦𑁆𑀦𑀫𑁆𑀧𑀺 𑀬𑀣𑀸 𑀢𑀣𑀸;

𑀯𑀺𑀦𑀺𑀘𑁆𑀙𑀬𑁂 𑀓𑀢𑁂 𑀢𑁂𑀳𑀺, 𑀅𑀝𑁆𑀝𑁂 𑀧𑀦 𑀘 𑀦𑀺𑀝𑁆𑀞𑀺𑀢𑁂.

𑁨𑁦𑁧𑁯. 𑀅𑀝𑁆𑀝𑀲𑁆𑀲 𑀧𑀭𑀺𑀬𑁄𑀲𑀸𑀦𑁂, 𑀚𑀬𑁂 𑀪𑀺𑀓𑁆𑀔𑀼𑀦𑀺𑀬𑀸 𑀧𑀦;

𑀧𑀭𑀸𑀚𑀬𑁂𑀧𑀺 𑀯𑀸 𑀢𑀲𑁆𑀲𑀸, 𑀳𑁄𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀢𑀸.

𑁨𑁦𑁨𑁦. 𑀤𑀽𑀢𑀁 𑀯𑀸𑀧𑀺 𑀧𑀳𑀺𑀡𑀺𑀢𑁆𑀯𑀸, 𑀆𑀕𑀦𑁆𑀢𑁆𑀯𑀸𑀦 𑀲𑀬𑀫𑁆𑀧𑀺 𑀯𑀸;

𑀧𑀘𑁆𑀘𑀢𑁆𑀣𑀺𑀓𑀫𑀦𑀼𑀲𑁆𑀲𑁂𑀳𑀺, 𑀆𑀓𑀟𑁆𑀠𑀻𑀬𑀢𑀺 𑀬𑀸 𑀧𑀦.

𑁨𑁦𑁨𑁧. 𑀆𑀭𑀸𑀫𑁂 𑀧𑀦 𑀅𑀜𑁆𑀜𑁂𑀳𑀺, 𑀅𑀦𑀸𑀘𑀸𑀭𑀁 𑀓𑀢𑀁 𑀲𑀘𑁂;

𑀅𑀦𑁄𑀤𑀺𑀲𑁆𑀲 𑀧𑀭𑀁 𑀓𑀺𑀜𑁆𑀘𑀺, 𑀭𑀓𑁆𑀔𑀁 𑀬𑀸𑀘𑀢𑀺 𑀢𑀢𑁆𑀣 𑀬𑀸.

𑁨𑁦𑁨𑁨. 𑀬𑀸𑀬 𑀓𑀺𑀜𑁆𑀘𑀺 𑀅𑀯𑀼𑀢𑁆𑀢𑀸𑀯, 𑀥𑀫𑁆𑀫𑀝𑁆𑀞𑀸 𑀲𑀬𑀫𑁂𑀯 𑀢𑀼;

𑀲𑀼𑀢𑁆𑀯𑀸 𑀢𑀁 𑀅𑀜𑁆𑀜𑀢𑁄 𑀅𑀝𑁆𑀝𑀁, 𑀦𑀺𑀝𑁆𑀞𑀸𑀧𑁂𑀦𑁆𑀢𑀺 𑀲𑀘𑁂 𑀧𑀦.

𑁨𑁦𑁨𑁩. 𑀢𑀲𑁆𑀲𑀸, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦-𑀫𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸;

𑀓𑀣𑀺𑀦𑁂𑀦 𑀲𑀫𑀼𑀝𑁆𑀞𑀸𑀦𑀁, 𑀢𑀼𑀮𑁆𑀬𑀁 𑀲𑀓𑀺𑀭𑀺𑀬𑀁 𑀇𑀤𑀁.

𑀅𑀝𑁆𑀝𑀓𑀸𑀭𑀺𑀓𑀣𑀸.

𑁨𑁦𑁨𑁪. 𑀚𑀸𑀦𑀦𑁆𑀢𑀻 𑀪𑀺𑀓𑁆𑀔𑀼𑀦𑀻 𑀘𑁄𑀭𑀺𑀁, 𑀯𑀚𑁆𑀛𑀁 𑀯𑀺𑀤𑀺𑀢𑀫𑁂𑀯 𑀬𑀸;

𑀲𑀗𑁆𑀖𑀁 𑀅𑀦𑀧𑀮𑁄𑀓𑁂𑀢𑁆𑀯𑀸, 𑀭𑀸𑀚𑀸𑀦𑀁 𑀕𑀡𑀫𑁂𑀯 𑀯𑀸.

𑁨𑁦𑁨𑁫. 𑀯𑀼𑀝𑁆𑀞𑀸𑀧𑁂𑀬𑁆𑀬 𑀯𑀺𑀦𑀸 𑀓𑀧𑁆𑀧𑀁, 𑀘𑁄𑀭𑀺𑀯𑀼𑀝𑁆𑀞𑀸𑀧𑀦𑀁 𑀧𑀦;

𑀲𑀗𑁆𑀖𑀸𑀤𑀺𑀲𑁂𑀲𑀫𑀸𑀧𑀢𑁆𑀢𑀺-𑀫𑀸𑀧𑀦𑁆𑀦𑀸 𑀦𑀸𑀫 𑀳𑁄𑀢𑀺 𑀲𑀸.

𑁨𑁦𑁨𑁬. 𑀧𑀜𑁆𑀘𑀫𑀸𑀲𑀕𑁆𑀖𑀦𑀁 𑀬𑀸𑀬, 𑀳𑀭𑀺𑀢𑀁 𑀧𑀭𑀲𑀦𑁆𑀢𑀓𑀁;

𑀅𑀢𑀺𑀭𑁂𑀓𑀕𑁆𑀖𑀦𑀁 𑀯𑀸𑀧𑀺, 𑀅𑀬𑀁 ‘‘𑀘𑁄𑀭𑀻’’𑀢𑀺 𑀯𑀼𑀘𑁆𑀘𑀢𑀺.

𑁨𑁦𑁨𑁭. 𑀪𑀺𑀓𑁆𑀔𑀼𑀦𑀻𑀲𑀼 𑀧𑀦𑀜𑁆𑀜𑀸𑀲𑀼, 𑀢𑀺𑀢𑁆𑀣𑀺𑀬𑁂𑀲𑀼𑀧𑀺 𑀯𑀸 𑀢𑀣𑀸;

𑀬𑀸 𑀧𑀩𑁆𑀩𑀚𑀺𑀢𑀧𑀼𑀩𑁆𑀩𑀸 𑀲𑀸, 𑀅𑀬𑀁 ‘‘𑀓𑀧𑁆𑀧𑀸’’𑀢𑀺 𑀯𑀼𑀘𑁆𑀘𑀢𑀺.

𑁨𑁦𑁨𑁮. 𑀯𑀼𑀝𑁆𑀞𑀸𑀧𑁂𑀢𑀺 𑀘 𑀬𑀸 𑀘𑁄𑀭𑀺𑀁, 𑀞𑀧𑁂𑀢𑁆𑀯𑀸 𑀓𑀧𑁆𑀧𑀫𑁂𑀯𑀺𑀤𑀁;

𑀲𑀘𑁂 𑀆𑀘𑀭𑀺𑀦𑀺𑀁 𑀧𑀢𑁆𑀢𑀁, 𑀘𑀻𑀯𑀭𑀁 𑀧𑀭𑀺𑀬𑁂𑀲𑀢𑀺.

𑁨𑁦𑁨𑁯. 𑀲𑀫𑁆𑀫𑀦𑁆𑀦𑀢𑀺 𑀘 𑀲𑀻𑀫𑀁 𑀯𑀸, 𑀢𑀲𑁆𑀲𑀸 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁;

𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁 𑀤𑁆𑀯𑀻𑀳𑀺, 𑀓𑀫𑁆𑀫𑀯𑀸𑀘𑀸𑀳𑀺 𑀘 𑀤𑁆𑀯𑀬𑀁.

𑁨𑁦𑁩𑁦. 𑀣𑀼𑀮𑁆𑀮𑀘𑁆𑀘𑀬𑀲𑁆𑀲, 𑀓𑀫𑁆𑀫𑀦𑁆𑀢𑁂, 𑀕𑀭𑀼𑀓𑀁 𑀦𑀺𑀤𑁆𑀤𑀺𑀲𑁂 𑀩𑀼𑀥𑁄;

𑀕𑀡𑁄 𑀆𑀘𑀭𑀺𑀦𑀻 𑀘𑁂𑀯, 𑀦 𑀘 𑀫𑀼𑀘𑁆𑀘𑀢𑀺 𑀤𑀼𑀓𑁆𑀓𑀝𑀁.

𑁨𑁦𑁩𑁧. 𑀅𑀦𑀸𑀧𑀢𑁆𑀢𑀺 𑀅𑀚𑀸𑀦𑀦𑁆𑀢𑀻, 𑀯𑀼𑀝𑁆𑀞𑀸𑀧𑁂𑀢𑀺, 𑀢𑀣𑁂𑀯 𑀘;

𑀓𑀧𑁆𑀧𑀁 𑀯𑀸 𑀅𑀧𑀮𑁄𑀓𑁂𑀢𑁆𑀯𑀸, 𑀢𑀲𑁆𑀲𑀸 𑀉𑀫𑁆𑀫𑀢𑁆𑀢𑀺𑀓𑀸𑀬 𑀯𑀸.

𑁨𑁦𑁩𑁨. 𑀘𑁄𑀭𑀺𑀯𑀼𑀝𑁆𑀞𑀸𑀧𑀦𑀁 𑀦𑀸𑀫, 𑀚𑀸𑀬𑀢𑁂 𑀯𑀸𑀘𑀘𑀺𑀢𑁆𑀢𑀢𑁄;

𑀓𑀸𑀬𑀯𑀸𑀘𑀸𑀤𑀺𑀢𑁄 𑀘𑁂𑀯, 𑀲𑀘𑀺𑀢𑁆𑀢𑀜𑁆𑀘 𑀓𑁆𑀭𑀺𑀬𑀸𑀓𑁆𑀭𑀺𑀬𑀁.

𑀘𑁄𑀭𑀺𑀯𑀼𑀝𑁆𑀞𑀸𑀧𑀦𑀓𑀣𑀸.