𑀲𑁂𑀔𑀺𑀬𑀓𑀣𑀸

𑁧𑁮𑁭𑁦. 𑀬𑁄 𑀅𑀦𑀸𑀤𑀭𑀺𑀬𑁂𑀦𑁂𑀯, 𑀧𑀼𑀭𑀢𑁄 𑀧𑀘𑁆𑀙𑀢𑁄𑀧𑀺 𑀯𑀸;

𑀑𑀮𑀫𑁆𑀩𑁂𑀢𑁆𑀯𑀸 𑀦𑀺𑀯𑀸𑀲𑁂𑀬𑁆𑀬, 𑀢𑀲𑁆𑀲 𑀘𑀸𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑁧𑁮𑁭𑁧. 𑀳𑀢𑁆𑀣𑀺𑀲𑁄𑀡𑁆𑀟𑀸𑀤𑀺𑀢𑀼𑀮𑁆𑀬𑀁 𑀢𑀼, 𑀦𑀺𑀯𑀸𑀲𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁;

𑀆𑀧𑀢𑁆𑀢𑀺𑀪𑀻𑀭𑀼𑀦𑀸 𑀦𑀺𑀘𑁆𑀘𑀁, 𑀯𑀢𑁆𑀣𑀩𑁆𑀩𑀁 𑀧𑀭𑀺𑀫𑀡𑁆𑀟𑀮𑀁.

𑁧𑁮𑁭𑁨. 𑀚𑀸𑀡𑀼𑀫𑀡𑁆𑀟𑀮𑀢𑁄 𑀳𑁂𑀝𑁆𑀞𑀸, 𑀅𑀝𑁆𑀞𑀗𑁆𑀕𑀼𑀮𑀧𑁆𑀧𑀫𑀸𑀡𑀓𑀁;

𑀑𑀢𑀸𑀭𑁂𑀢𑁆𑀯𑀸 𑀦𑀺𑀯𑀢𑁆𑀣𑀩𑁆𑀩𑀁, 𑀢𑀢𑁄 𑀊𑀦𑀁 𑀦 𑀯𑀝𑁆𑀝𑀢𑀺.

𑁧𑁮𑁭𑁩. 𑀅𑀲𑀜𑁆𑀘𑀺𑀘𑁆𑀘𑀸𑀲𑀢𑀺𑀲𑁆𑀲𑀸𑀧𑀺, 𑀅𑀚𑀸𑀦𑀦𑁆𑀢𑀲𑁆𑀲 𑀓𑁂𑀯𑀮𑀁;

𑀅𑀦𑀸𑀧𑀢𑁆𑀢𑀺 𑀕𑀺𑀮𑀸𑀦𑀲𑁆𑀲𑀸-𑀧𑀤𑀸𑀲𑀼𑀫𑁆𑀫𑀢𑁆𑀢𑀓𑀸𑀤𑀺𑀦𑁄.

𑀧𑀭𑀺𑀫𑀡𑁆𑀟𑀮𑀓𑀣𑀸.

𑁧𑁮𑁭𑁪. 𑀉𑀪𑁄 𑀓𑁄𑀡𑁂 𑀲𑀫𑀁 𑀓𑀢𑁆𑀯𑀸, 𑀲𑀸𑀤𑀭𑀁 𑀧𑀭𑀺𑀫𑀡𑁆𑀟𑀮𑀁;

𑀓𑀢𑁆𑀯𑀸 𑀧𑀸𑀭𑀼𑀧𑀺𑀢𑀩𑁆𑀩𑁂𑀯𑀁, 𑀅𑀓𑀭𑁄𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑁧𑁮𑁭𑁫. 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀁 𑀢𑀼, 𑀇𑀤𑀁 𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀁;

𑀢𑀲𑁆𑀫𑀸 𑀖𑀭𑁂 𑀯𑀺𑀳𑀸𑀭𑁂 𑀯𑀸, 𑀓𑀢𑁆𑀢𑀩𑁆𑀩𑀁 𑀧𑀭𑀺𑀫𑀡𑁆𑀟𑀮𑀁.

𑀤𑀼𑀢𑀺𑀬𑀁.

𑁧𑁮𑁭𑁬. 𑀕𑀡𑁆𑀞𑀺𑀓𑀁 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸, 𑀓𑀢𑁆𑀯𑀸 𑀓𑁄𑀡𑁂 𑀉𑀪𑁄 𑀲𑀫𑀁;

𑀙𑀸𑀤𑁂𑀢𑁆𑀯𑀸 𑀫𑀡𑀺𑀩𑀦𑁆𑀥𑀜𑁆𑀘, 𑀕𑀦𑁆𑀢𑀩𑁆𑀩𑀁 𑀕𑀻𑀯𑀫𑁂𑀯 𑀘.

𑁧𑁮𑁭𑁭. 𑀢𑀣𑀸 𑀅𑀓𑀢𑁆𑀯𑀸 𑀪𑀺𑀓𑁆𑀔𑀼𑀲𑁆𑀲, 𑀚𑀢𑁆𑀢𑀽𑀦𑀺𑀧𑀺 𑀉𑀭𑀫𑁆𑀧𑀺 𑀘;

𑀯𑀺𑀯𑀭𑀺𑀢𑁆𑀯𑀸 𑀬𑀣𑀸𑀓𑀸𑀫𑀁, 𑀕𑀘𑁆𑀙𑀢𑁄 𑀳𑁄𑀢𑀺 𑀤𑀼𑀓𑁆𑀓𑀝𑀁.

𑀢𑀢𑀺𑀬𑀁.

𑁧𑁮𑁭𑁮. 𑀕𑀮𑀯𑀸𑀝𑀓𑀢𑁄 𑀉𑀤𑁆𑀥𑀁, 𑀲𑀻𑀲𑀜𑁆𑀘 𑀫𑀡𑀺𑀩𑀦𑁆𑀥𑀢𑁄;

𑀳𑀢𑁆𑀣𑁂 𑀧𑀺𑀡𑁆𑀟𑀺𑀓𑀫𑀁𑀲𑀫𑁆𑀳𑀸, 𑀳𑁂𑀝𑁆𑀞𑀸 𑀧𑀸𑀤𑁂 𑀉𑀪𑁄𑀧𑀺 𑀘.

𑁧𑁮𑁭𑁯. 𑀯𑀺𑀯𑀭𑀺𑀢𑁆𑀯𑀸𑀯𑀲𑁂𑀲𑀜𑁆𑀘, 𑀙𑀸𑀤𑁂𑀢𑁆𑀯𑀸 𑀘𑁂 𑀦𑀺𑀲𑀻𑀤𑀢𑀺;

𑀳𑁄𑀢𑀺 𑀲𑁄 𑀲𑀼𑀧𑁆𑀧𑀝𑀺𑀘𑁆𑀙𑀦𑁆𑀦𑁄, 𑀤𑁄𑀲𑁄 𑀯𑀸𑀲𑀽𑀧𑀕𑀲𑁆𑀲 𑀦.

𑀘𑀢𑀼𑀢𑁆𑀣𑀁.

𑁧𑁮𑁮𑁦. 𑀳𑀢𑁆𑀣𑀁 𑀯𑀸 𑀧𑀦 𑀧𑀸𑀤𑀁 𑀯𑀸, 𑀅𑀘𑀸𑀮𑁂𑀦𑁆𑀢𑁂𑀦 𑀪𑀺𑀓𑁆𑀔𑀼𑀦𑀸;

𑀲𑀼𑀯𑀺𑀦𑀻𑀢𑁂𑀦 𑀕𑀦𑁆𑀢𑀩𑁆𑀩𑀁, 𑀙𑀝𑁆𑀞𑁂 𑀦𑀢𑁆𑀣𑀺 𑀯𑀺𑀲𑁂𑀲𑀢𑀸.

𑀧𑀜𑁆𑀘𑀫𑀙𑀝𑁆𑀞𑀸𑀦𑀺.

𑁧𑁮𑁮𑁧. 𑀲𑀢𑀻𑀫𑀢𑀸𑀯𑀺𑀓𑀸𑀭𑁂𑀦, 𑀬𑀼𑀕𑀫𑀢𑁆𑀢𑀜𑁆𑀘 𑀧𑁂𑀓𑁆𑀔𑀺𑀦𑀸;

𑀲𑀼𑀲𑀁𑀯𑀼𑀢𑁂𑀦 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀼𑀦𑁄𑀓𑁆𑀔𑀺𑀢𑁆𑀢𑀘𑀓𑁆𑀔𑀼𑀦𑀸.

𑁧𑁮𑁮𑁨. 𑀬𑀢𑁆𑀣 𑀓𑀢𑁆𑀣𑀘𑀺 𑀳𑀺 𑀝𑁆𑀞𑀸𑀦𑁂, 𑀏𑀓𑀲𑁆𑀫𑀺𑀁 𑀅𑀦𑁆𑀢𑀭𑁂 𑀖𑀭𑁂;

𑀞𑀢𑁆𑀯𑀸 𑀧𑀭𑀺𑀲𑁆𑀲𑀬𑀸𑀪𑀸𑀯𑀁, 𑀑𑀮𑁄𑀓𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀺.

𑁧𑁮𑁮𑁩. 𑀬𑁄 𑀅𑀦𑀸𑀤𑀭𑀺𑀬𑀁 𑀓𑀢𑁆𑀯𑀸, 𑀑𑀮𑁄𑀓𑁂𑀦𑁆𑀢𑁄 𑀢𑀳𑀺𑀁 𑀢𑀳𑀺𑀁;

𑀲𑀘𑁂𑀦𑁆𑀢𑀭𑀖𑀭𑁂 𑀬𑀸𑀢𑀺, 𑀤𑀼𑀓𑁆𑀓𑀝𑀁 𑀅𑀝𑁆𑀞𑀫𑀁 𑀢𑀣𑀸.

𑀲𑀢𑁆𑀢𑀫𑀝𑁆𑀞𑀫𑀸𑀦𑀺.

𑁧𑁮𑁮𑁪. 𑀏𑀓𑀢𑁄 𑀉𑀪𑀢𑁄 𑀯𑀸𑀧𑀺, 𑀳𑀼𑀢𑁆𑀯𑀸 𑀉𑀓𑁆𑀔𑀺𑀢𑁆𑀢𑀘𑀻𑀯𑀭𑁄;

𑀇𑀦𑁆𑀤𑀔𑀻𑀮𑀓𑀢𑁄 𑀅𑀦𑁆𑀢𑁄, 𑀕𑀘𑁆𑀙𑀢𑁄 𑀳𑁄𑀢𑀺 𑀤𑀼𑀓𑁆𑀓𑀝𑀁.

𑀦𑀯𑀫𑀁.

𑁧𑁮𑁮𑁫. 𑀢𑀣𑀸 𑀦𑀺𑀲𑀺𑀦𑁆𑀦𑀓𑀸𑀮𑁂𑀧𑀺, 𑀦𑀻𑀳𑀭𑀦𑁆𑀢𑁂𑀦 𑀓𑀼𑀡𑁆𑀟𑀺𑀓𑀁;

𑀅𑀦𑀼𑀓𑁆𑀔𑀺𑀧𑀺𑀢𑁆𑀯𑀸 𑀤𑀸𑀢𑀩𑁆𑀩𑀸, 𑀤𑁄𑀲𑁄 𑀯𑀸𑀲𑀽𑀧𑀕𑀲𑁆𑀲 𑀦.

𑀤𑀲𑀫𑀁.

𑀧𑀞𑀫𑁄 𑀯𑀕𑁆𑀕𑁄.

𑁧𑁮𑁮𑁬. 𑀦 𑀯𑀝𑁆𑀝𑀢𑀺 𑀳𑀲𑀦𑁆𑀢𑁂𑀦, 𑀕𑀦𑁆𑀢𑀼𑀜𑁆𑀘𑁂𑀯 𑀦𑀺𑀲𑀻𑀤𑀺𑀢𑀼𑀁;

𑀯𑀢𑁆𑀣𑀼𑀲𑁆𑀫𑀺𑀁 𑀳𑀲𑀦𑀻𑀬𑀲𑁆𑀫𑀺𑀁, 𑀲𑀺𑀢𑀫𑀢𑁆𑀢𑀁 𑀢𑀼 𑀯𑀝𑁆𑀝𑀢𑀺.

𑀧𑀞𑀫𑀤𑀼𑀢𑀺𑀬𑀸𑀦𑀺.

𑁧𑁮𑁮𑁭. 𑀅𑀧𑁆𑀧𑀲𑀤𑁆𑀤𑁂𑀦 𑀕𑀦𑁆𑀢𑀩𑁆𑀩𑀁, 𑀘𑀢𑀼𑀢𑁆𑀣𑁂𑀧𑀺 𑀅𑀬𑀁 𑀦𑀬𑁄;

𑀫𑀳𑀸𑀲𑀤𑁆𑀤𑀁 𑀓𑀭𑁄𑀦𑁆𑀢𑀲𑁆𑀲, 𑀉𑀪𑀬𑀢𑁆𑀣𑀸𑀧𑀺 𑀤𑀼𑀓𑁆𑀓𑀝𑀁.

𑀢𑀢𑀺𑀬𑀘𑀢𑀼𑀢𑁆𑀣𑀸𑀦𑀺.

𑁧𑁮𑁮𑁮. 𑀓𑀸𑀬𑀧𑁆𑀧𑀘𑀸𑀮𑀓𑀁 𑀓𑀢𑁆𑀯𑀸, 𑀩𑀸𑀳𑀼𑀲𑀻𑀲𑀧𑁆𑀧𑀘𑀸𑀮𑀓𑀁;

𑀕𑀘𑁆𑀙𑀢𑁄 𑀤𑀼𑀓𑁆𑀓𑀝𑀁 𑀳𑁄𑀢𑀺, 𑀢𑀣𑁂𑀯 𑀘 𑀦𑀺𑀲𑀻𑀤𑀢𑁄.

𑁧𑁮𑁮𑁯. 𑀓𑀸𑀬𑀁 𑀩𑀸𑀳𑀼𑀜𑁆𑀘 𑀲𑀻𑀲𑀜𑁆𑀘, 𑀧𑀕𑁆𑀕𑀳𑁂𑀢𑁆𑀯𑀸 𑀉𑀚𑀼𑀁 𑀧𑀦;

𑀕𑀦𑁆𑀢𑀩𑁆𑀩𑀫𑀸𑀲𑀺𑀢𑀩𑁆𑀩𑀜𑁆𑀘, 𑀲𑀫𑁂𑀦𑀺𑀭𑀺𑀬𑀸𑀧𑀣𑁂𑀦 𑀢𑀼.

𑁧𑁮𑁯𑁦. 𑀦𑀺𑀲𑀻𑀤𑀦𑁂𑀦 𑀬𑀼𑀢𑁆𑀢𑁂𑀲𑀼, 𑀢𑀻𑀲𑀼 𑀯𑀸𑀲𑀽𑀧𑀕𑀲𑁆𑀲 𑀳𑀺;

𑀅𑀦𑀸𑀧𑀢𑁆𑀢𑀻𑀢𑀺 𑀜𑀸𑀢𑀩𑁆𑀩𑀁, 𑀯𑀺𑀜𑁆𑀜𑀼𑀦𑀸 𑀯𑀺𑀦𑀬𑀜𑁆𑀜𑀼𑀦𑀸.

𑀤𑀼𑀢𑀺𑀬𑁄 𑀯𑀕𑁆𑀕𑁄.

𑁧𑁮𑁯𑁧. 𑀔𑀫𑁆𑀪𑀁 𑀓𑀢𑁆𑀯𑀸 𑀲𑀲𑀻𑀲𑀁 𑀯𑀸, 𑀧𑀸𑀭𑀼𑀧𑀺𑀢𑁆𑀯𑀸𑀦 𑀕𑀘𑁆𑀙𑀢𑁄;

𑀤𑀼𑀓𑁆𑀓𑀝𑀁 𑀫𑀼𑀦𑀺𑀦𑀸 𑀯𑀼𑀢𑁆𑀢𑀁, 𑀢𑀣𑀸 𑀉𑀓𑁆𑀓𑀼𑀝𑀺𑀓𑀸𑀬 𑀯𑀸.

𑁧𑁮𑁯𑁨. 𑀳𑀢𑁆𑀣𑀧𑀮𑁆𑀮𑀢𑁆𑀣𑀺𑀓𑀸𑀬𑀸𑀧𑀺, 𑀤𑀼𑀲𑁆𑀲𑀧𑀮𑁆𑀮𑀢𑁆𑀣𑀺𑀓𑀸𑀬 𑀯𑀸;

𑀢𑀲𑁆𑀲𑀦𑁆𑀢𑀭𑀖𑀭𑁂 𑀳𑁄𑀢𑀺, 𑀦𑀺𑀲𑀻𑀤𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑁧𑁮𑁯𑁩. 𑀤𑀼𑀢𑀺𑀬𑁂 𑀘 𑀘𑀢𑀼𑀢𑁆𑀣𑁂 𑀘, 𑀙𑀝𑁆𑀞𑁂 𑀯𑀸𑀲𑀽𑀧𑀕𑀲𑁆𑀲 𑀢𑀼;

𑀅𑀦𑀸𑀧𑀢𑁆𑀢𑀻𑀢𑀺 𑀲𑀸𑀭𑀼𑀧𑁆𑀧𑀸, 𑀙𑀩𑁆𑀩𑀻𑀲𑀢𑀺 𑀧𑀓𑀸𑀲𑀺𑀢𑀸.

𑀙𑀝𑁆𑀞𑀁.

𑁧𑁮𑁯𑁪. 𑀲𑀓𑁆𑀓𑀘𑁆𑀘𑀁 𑀲𑀢𑀺𑀬𑀼𑀢𑁆𑀢𑁂𑀦, 𑀪𑀺𑀓𑁆𑀔𑀼𑀦𑀸 𑀧𑀢𑁆𑀢𑀲𑀜𑁆𑀜𑀺𑀦𑀸;

𑀧𑀺𑀡𑁆𑀟𑀧𑀸𑀢𑁄 𑀕𑀳𑁂𑀢𑀩𑁆𑀩𑁄, 𑀲𑀫𑀲𑀽𑀧𑁄𑀯 𑀯𑀺𑀜𑁆𑀜𑀼𑀦𑀸.

𑁧𑁮𑁯𑁫. 𑀲𑀽𑀧𑁄 𑀪𑀢𑁆𑀢𑀘𑀢𑀼𑀩𑁆𑀪𑀸𑀕𑁄, ‘‘𑀲𑀫𑀲𑀽𑀧𑁄’’𑀢𑀺 𑀯𑀼𑀘𑁆𑀘𑀢𑀺;

𑀫𑀼𑀕𑁆𑀕𑀫𑀸𑀲𑀓𑀼𑀮𑀢𑁆𑀣𑀸𑀦𑀁, 𑀲𑀽𑀧𑁄 ‘‘𑀲𑀽𑀧𑁄’’𑀢𑀺 𑀯𑀼𑀘𑁆𑀘𑀢𑀺.

𑁧𑁮𑁯𑁬. 𑀅𑀦𑀸𑀧𑀢𑁆𑀢𑀺 𑀅𑀲𑀜𑁆𑀘𑀺𑀘𑁆𑀘, 𑀕𑀺𑀮𑀸𑀦𑀲𑁆𑀲 𑀭𑀲𑁂𑀭𑀲𑁂;

𑀢𑀣𑁂𑀯 𑀜𑀸𑀢𑀓𑀸𑀤𑀻𑀦𑀁, 𑀅𑀜𑁆𑀜𑀢𑁆𑀣𑀸𑀬 𑀥𑀦𑁂𑀦 𑀯𑀸.

𑀲𑀢𑁆𑀢𑀫𑀝𑁆𑀞𑀫𑀦𑀯𑀫𑀸𑀦𑀺.

𑁧𑁮𑁯𑁭. 𑀅𑀦𑁆𑀢𑁄𑀮𑁂𑀔𑀸𑀧𑀫𑀸𑀡𑁂𑀦, 𑀧𑀢𑁆𑀢𑀲𑁆𑀲 𑀫𑀼𑀔𑀯𑀝𑁆𑀝𑀺𑀬𑀸;

𑀧𑀽𑀭𑀺𑀢𑁄𑀯 𑀕𑀳𑁂𑀢𑀩𑁆𑀩𑁄, 𑀅𑀥𑀺𑀝𑁆𑀞𑀸𑀦𑀽𑀧𑀕𑀲𑁆𑀲 𑀢𑀼.

𑁧𑁮𑁯𑁮. 𑀢𑀢𑁆𑀣 𑀣𑀽𑀧𑀻𑀓𑀢𑀁 𑀓𑀢𑁆𑀯𑀸, 𑀕𑀡𑁆𑀳𑀢𑁄 𑀬𑀸𑀯𑀓𑀸𑀮𑀺𑀓𑀁;

𑀬𑀁 𑀓𑀺𑀜𑁆𑀘𑀺 𑀧𑀦 𑀪𑀺𑀓𑁆𑀔𑀼𑀲𑁆𑀲, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑁧𑁮𑁯𑁯. 𑀅𑀥𑀺𑀝𑁆𑀞𑀸𑀦𑀽𑀧𑀕𑁂 𑀧𑀢𑁆𑀢𑁂, 𑀓𑀸𑀮𑀺𑀓𑀢𑁆𑀢𑀬𑀫𑁂𑀯 𑀘;

𑀲𑁂𑀲𑁂 𑀣𑀽𑀧𑀻𑀓𑀢𑀁 𑀲𑀩𑁆𑀩𑀁, 𑀯𑀝𑁆𑀝𑀢𑁂𑀯 𑀦 𑀲𑀁𑀲𑀬𑁄.

𑁧𑁯𑁦𑁦. 𑀤𑁆𑀯𑀻𑀲𑀼 𑀧𑀢𑁆𑀢𑁂𑀲𑀼 𑀪𑀢𑁆𑀢𑀁 𑀢𑀼, 𑀕𑀳𑁂𑀢𑁆𑀯𑀸 𑀧𑀢𑁆𑀢𑀫𑁂𑀓𑀓𑀁;

𑀧𑀽𑀭𑁂𑀢𑁆𑀯𑀸 𑀬𑀤𑀺 𑀧𑁂𑀲𑁂𑀢𑀺, 𑀪𑀺𑀓𑁆𑀔𑀽𑀦𑀁 𑀧𑀦 𑀯𑀝𑁆𑀝𑀢𑀺.

𑁧𑁯𑁦𑁧. 𑀧𑀢𑁆𑀢𑁂 𑀧𑀓𑁆𑀔𑀺𑀧𑁆𑀧𑀫𑀸𑀦𑀁 𑀬𑀁, 𑀉𑀘𑁆𑀙𑀼𑀔𑀡𑁆𑀟𑀨𑀮𑀸𑀤𑀺𑀓𑀁;

𑀑𑀭𑁄𑀳𑀢𑀺 𑀲𑀘𑁂 𑀳𑁂𑀝𑁆𑀞𑀸, 𑀦 𑀢𑀁 𑀣𑀽𑀧𑀻𑀓𑀢𑀁 𑀲𑀺𑀬𑀸.

𑁧𑁯𑁦𑁨. 𑀧𑀼𑀧𑁆𑀨𑀢𑀓𑁆𑀓𑁄𑀮𑀓𑀸𑀤𑀻𑀦𑀁, 𑀞𑀧𑁂𑀢𑁆𑀯𑀸 𑀘𑁂 𑀯𑀝𑀁𑀲𑀓𑀁;

𑀤𑀺𑀦𑁆𑀦𑀁 𑀅𑀬𑀸𑀯𑀓𑀸𑀮𑀺𑀢𑁆𑀢𑀸, 𑀦 𑀢𑀁 𑀣𑀽𑀧𑀻𑀓𑀢𑀁 𑀲𑀺𑀬𑀸.

𑁧𑁯𑁦𑁩. 𑀯𑀝𑀁𑀲𑀓𑀁 𑀢𑀼 𑀧𑀽𑀯𑀲𑁆𑀲, 𑀞𑀧𑁂𑀢𑁆𑀯𑀸 𑀑𑀤𑀦𑁄𑀧𑀭𑀺;

𑀧𑀺𑀡𑁆𑀟𑀧𑀸𑀢𑀁 𑀲𑀘𑁂 𑀤𑁂𑀦𑁆𑀢𑀺, 𑀇𑀤𑀁 𑀣𑀽𑀧𑀻𑀓𑀢𑀁 𑀲𑀺𑀬𑀸.

𑁧𑁯𑁦𑁪. 𑀪𑀢𑁆𑀢𑀲𑁆𑀲𑀽𑀧𑀭𑀺 𑀧𑀡𑁆𑀡𑀁 𑀯𑀸, 𑀣𑀸𑀮𑀓𑀁 𑀯𑀸𑀧𑀺 𑀓𑀺𑀜𑁆𑀘𑀺𑀧𑀺;

𑀞𑀧𑁂𑀢𑁆𑀯𑀸 𑀧𑀭𑀺𑀧𑀽𑀭𑁂𑀢𑁆𑀯𑀸, 𑀲𑀘𑁂 𑀕𑀡𑁆𑀳𑀸𑀢𑀺 𑀯𑀝𑁆𑀝𑀢𑀺.

𑁧𑁯𑁦𑁫. 𑀧𑀝𑀺𑀕𑁆𑀕𑀳𑁂𑀢𑀼𑀫𑁂𑀯𑀲𑁆𑀲, 𑀢𑀁 𑀢𑀼 𑀲𑀩𑁆𑀩𑀁 𑀦 𑀯𑀝𑁆𑀝𑀢𑀺;

𑀕𑀳𑀺𑀢𑀁 𑀲𑀼𑀕𑀳𑀺𑀢𑀁, 𑀧𑀘𑁆𑀙𑀸, 𑀪𑀼𑀜𑁆𑀚𑀺𑀢𑀩𑁆𑀩𑀁 𑀬𑀣𑀸𑀲𑀼𑀔𑀁.

𑀢𑀢𑀺𑀬𑁄 𑀯𑀕𑁆𑀕𑁄.

𑁧𑁯𑁦𑁬. 𑀧𑀞𑀫𑀁 𑀤𑀼𑀢𑀺𑀬𑀁 𑀯𑀼𑀢𑁆𑀢-𑀦𑀬𑀁 𑀢𑀼 𑀢𑀢𑀺𑀬𑁂 𑀧𑀦;

𑀉𑀧𑀭𑁄𑀥𑀺𑀫𑀤𑀲𑁆𑀲𑁂𑀢𑁆𑀯𑀸, 𑀪𑁄𑀢𑁆𑀢𑀩𑁆𑀩𑀁 𑀧𑀝𑀺𑀧𑀸𑀝𑀺𑀬𑀸.

𑁧𑁯𑁦𑁭. 𑀅𑀜𑁆𑀜𑁂𑀲𑀁 𑀅𑀢𑁆𑀢𑀦𑁄 𑀪𑀢𑁆𑀢𑀁, 𑀆𑀓𑀺𑀭𑀁 𑀧𑀦 𑀪𑀸𑀚𑀦𑁂;

𑀦𑀢𑁆𑀣𑁄𑀫𑀲𑀢𑀺 𑀘𑁂 𑀤𑁄𑀲𑁄, 𑀢𑀣𑀸 𑀉𑀢𑁆𑀢𑀭𑀺𑀪𑀗𑁆𑀕𑀓𑀁.

𑀢𑀢𑀺𑀬𑀁.

𑁧𑁯𑁦𑁮. 𑀘𑀢𑀼𑀢𑁆𑀣𑁂 𑀬𑀁 𑀢𑀼 𑀯𑀢𑁆𑀢𑀩𑁆𑀩𑀁, 𑀯𑀼𑀢𑁆𑀢𑀁 𑀧𑀼𑀩𑁆𑀩𑁂 𑀅𑀲𑁂𑀲𑀢𑁄;

𑀧𑀜𑁆𑀘𑀫𑁂 𑀫𑀢𑁆𑀣𑀓𑀁 𑀤𑁄𑀲𑁄, 𑀫𑀤𑁆𑀤𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑁄.

𑁧𑁯𑁦𑁯. 𑀅𑀦𑀸𑀧𑀢𑁆𑀢𑀺 𑀕𑀺𑀮𑀸𑀦𑀲𑁆𑀲, 𑀧𑀭𑀺𑀢𑁆𑀢𑁂𑀧𑀺 𑀘 𑀲𑁂𑀲𑀓𑁂;

𑀏𑀓𑀢𑁄 𑀧𑀦 𑀫𑀤𑁆𑀤𑀺𑀢𑁆𑀯𑀸, 𑀲𑀁𑀓𑀟𑁆𑀠𑀺𑀢𑁆𑀯𑀸𑀦 𑀪𑀼𑀜𑁆𑀚𑀢𑁄.

𑀘𑀢𑀼𑀢𑁆𑀣𑀧𑀜𑁆𑀘𑀫𑀸𑀦𑀺.

𑁧𑁯𑁧𑁦. 𑀬𑁄 𑀪𑀺𑀬𑁆𑀬𑁄𑀓𑀫𑁆𑀬𑀢𑀸𑀳𑁂𑀢𑀼, 𑀲𑀽𑀧𑀁 𑀯𑀸 𑀩𑁆𑀬𑀜𑁆𑀚𑀦𑀫𑁆𑀧𑀺 𑀯𑀸;

𑀧𑀝𑀺𑀘𑁆𑀙𑀸𑀤𑁂𑀬𑁆𑀬 𑀪𑀢𑁆𑀢𑁂𑀦, 𑀢𑀲𑁆𑀲 𑀘𑀸𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀙𑀝𑁆𑀞𑀁.

𑁧𑁯𑁧𑁧. 𑀯𑀺𑀜𑁆𑀜𑀢𑁆𑀢𑀺𑀬𑀁 𑀢𑀼 𑀯𑀢𑁆𑀢𑀩𑁆𑀩𑀁, 𑀅𑀧𑀼𑀩𑁆𑀩𑀁 𑀦𑀢𑁆𑀣𑀺 𑀓𑀺𑀜𑁆𑀘𑀺𑀧𑀺;

𑀅𑀝𑁆𑀞𑀫𑁂 𑀧𑀦 𑀉𑀚𑁆𑀛𑀸𑀦𑁂, 𑀕𑀺𑀮𑀸𑀦𑁄𑀧𑀺 𑀦 𑀫𑀼𑀘𑁆𑀘𑀢𑀺.

𑁧𑁯𑁧𑁨. ‘‘𑀤𑀲𑁆𑀲𑀸𑀫𑀺 𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺, 𑀑𑀮𑁄𑀓𑁂𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀅𑀦𑀸𑀧𑀢𑁆𑀢𑀻𑀢𑀺 𑀜𑀸𑀢𑀩𑁆𑀩𑀁, 𑀦 𑀘 𑀉𑀚𑁆𑀛𑀸𑀦𑀲𑀜𑁆𑀜𑀺𑀦𑁄.

𑀅𑀝𑁆𑀞𑀫𑀁.

𑁧𑁯𑁧𑁩. 𑀫𑀳𑀦𑁆𑀢𑀁 𑀧𑀦 𑀫𑁄𑀭𑀡𑁆𑀟𑀁, 𑀓𑀼𑀓𑁆𑀓𑀼𑀝𑀡𑁆𑀟𑀜𑁆𑀘 𑀔𑀼𑀤𑁆𑀤𑀓𑀁;

𑀢𑁂𑀲𑀁 𑀫𑀚𑁆𑀛𑀧𑁆𑀧𑀫𑀸𑀡𑁂𑀦, 𑀓𑀢𑁆𑀢𑀩𑁆𑀩𑁄 𑀓𑀩𑀴𑁄 𑀧𑀦.

𑁧𑁯𑁧𑁪. 𑀔𑀚𑁆𑀚𑀓𑁂 𑀧𑀦 𑀲𑀩𑁆𑀩𑀢𑁆𑀣, 𑀫𑀽𑀮𑀔𑀸𑀤𑀦𑀺𑀬𑀸𑀤𑀺𑀓𑁂;

𑀨𑀮𑀸𑀨𑀮𑁂 𑀅𑀦𑀸𑀧𑀢𑁆𑀢𑀺, 𑀕𑀺𑀮𑀸𑀦𑀼𑀫𑁆𑀫𑀢𑁆𑀢𑀓𑀸𑀤𑀺𑀦𑁄.

𑀦𑀯𑀫𑀁.

𑁧𑁯𑁧𑁫. 𑀅𑀤𑀻𑀖𑁄 𑀧𑀦 𑀓𑀸𑀢𑀩𑁆𑀩𑁄, 𑀆𑀮𑁄𑀧𑁄 𑀧𑀭𑀺𑀫𑀡𑁆𑀟𑀮𑁄;

𑀔𑀚𑁆𑀚𑀢𑀼𑀢𑁆𑀢𑀭𑀺𑀪𑀗𑁆𑀕𑀲𑁆𑀫𑀺𑀁, 𑀅𑀦𑀸𑀧𑀢𑁆𑀢𑀺 𑀨𑀮𑀸𑀨𑀮𑁂.

𑀤𑀲𑀫𑀁.

𑀘𑀢𑀼𑀢𑁆𑀣𑁄 𑀯𑀕𑁆𑀕𑁄.

𑁧𑁯𑁧𑁬. 𑀅𑀦𑀸𑀳𑀝𑁂 𑀫𑀼𑀔𑀤𑁆𑀯𑀸𑀭𑀁, 𑀅𑀧𑁆𑀧𑀢𑁆𑀢𑁂 𑀓𑀩𑀴𑁂 𑀧𑀦;

𑀅𑀢𑁆𑀢𑀦𑁄 𑀘 𑀫𑀼𑀔𑀤𑁆𑀯𑀸𑀭𑀁, 𑀯𑀺𑀯𑀭𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑀧𑀞𑀫𑀁.

𑁧𑁯𑁧𑁭. 𑀫𑀼𑀔𑁂 𑀘 𑀲𑀓𑀮𑀁 𑀳𑀢𑁆𑀣𑀁, 𑀧𑀓𑁆𑀔𑀺𑀧𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁;

𑀫𑀼𑀔𑁂 𑀘 𑀓𑀩𑀴𑀁 𑀓𑀢𑁆𑀯𑀸, 𑀓𑀣𑁂𑀢𑀼𑀁 𑀦 𑀘 𑀯𑀝𑁆𑀝𑀢𑀺.

𑁧𑁯𑁧𑁮. 𑀯𑀘𑀦𑀁 𑀬𑀢𑁆𑀢𑀓𑁂𑀦𑀲𑁆𑀲, 𑀧𑀭𑀺𑀧𑀼𑀡𑁆𑀡𑀁 𑀦 𑀳𑁄𑀢𑀺 𑀳𑀺;

𑀫𑀼𑀔𑀲𑁆𑀫𑀺𑀁𑀢𑀢𑁆𑀢𑀓𑁂 𑀲𑀦𑁆𑀢𑁂, 𑀩𑁆𑀬𑀸𑀳𑀭𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑁧𑁯𑁧𑁯. 𑀫𑀼𑀔𑁂 𑀳𑀭𑀻𑀢𑀓𑀸𑀤𑀻𑀦𑀺, 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀣𑁂𑀢𑀺 𑀬𑁄;

𑀯𑀘𑀦𑀁 𑀧𑀭𑀺𑀧𑀼𑀡𑁆𑀡𑀁 𑀘𑁂, 𑀓𑀣𑁂𑀢𑀼𑀁 𑀧𑀦 𑀯𑀝𑁆𑀝𑀢𑀺.

𑀤𑀼𑀢𑀺𑀬𑀢𑀢𑀺𑀬𑀸𑀦𑀺.

𑁧𑁯𑁨𑁦. 𑀬𑁄 𑀧𑀺𑀡𑁆𑀟𑀼𑀓𑁆𑀔𑁂𑀧𑀓𑀁 𑀪𑀺𑀓𑁆𑀔𑀼, 𑀓𑀩𑀴𑀘𑁆𑀙𑁂𑀤𑀓𑀫𑁆𑀧𑀺 𑀯𑀸;

𑀫𑀓𑁆𑀓𑀝𑁄 𑀯𑀺𑀬 𑀕𑀡𑁆𑀟𑁂 𑀯𑀸, 𑀓𑀢𑁆𑀯𑀸 𑀪𑀼𑀜𑁆𑀚𑁂𑀬𑁆𑀬 𑀤𑀼𑀓𑁆𑀓𑀝𑀁.

𑀘𑀢𑀼𑀢𑁆𑀣𑀧𑀜𑁆𑀘𑀫𑀙𑀝𑁆𑀞𑀸𑀦𑀺.

𑁧𑁯𑁨𑁧. 𑀦𑀺𑀤𑁆𑀥𑀼𑀦𑀺𑀢𑁆𑀯𑀸𑀦 𑀳𑀢𑁆𑀣𑀁 𑀯𑀸, 𑀪𑀢𑁆𑀢𑀁 𑀲𑀺𑀢𑁆𑀣𑀸𑀯𑀓𑀸𑀭𑀓𑀁;

𑀚𑀺𑀯𑁆𑀳𑀸𑀦𑀺𑀘𑁆𑀙𑀸𑀭𑀓𑀁 𑀯𑀸𑀧𑀺, 𑀢𑀣𑀸 ‘‘𑀘𑀧𑀼 𑀘𑀧𑀽’’𑀢𑀺 𑀯𑀸.

𑁧𑁯𑁨𑁨. 𑀅𑀦𑀸𑀤𑀭𑀯𑀲𑁂𑀦𑁂𑀯, 𑀪𑀼𑀜𑁆𑀚𑀢𑁄 𑀳𑁄𑀢𑀺 𑀤𑀼𑀓𑁆𑀓𑀝𑀁;

𑀲𑀢𑁆𑀢𑀫𑁂 𑀅𑀝𑁆𑀞𑀫𑁂 𑀦𑀢𑁆𑀣𑀺, 𑀤𑁄𑀲𑁄 𑀓𑀘𑀯𑀭𑀼𑀚𑁆𑀛𑀦𑁂.

𑀲𑀢𑁆𑀢𑀫𑀤𑀲𑀫𑀸𑀦𑀺.

𑀧𑀜𑁆𑀘𑀫𑁄 𑀯𑀕𑁆𑀕𑁄.

𑁧𑁯𑁨𑁩. 𑀓𑀢𑁆𑀯𑀸 𑀏𑀯𑀁 𑀦 𑀪𑁄𑀢𑁆𑀢𑀩𑁆𑀩𑀁, 𑀲𑀤𑁆𑀤𑀁 ‘‘𑀲𑀼𑀭𑀼 𑀲𑀼𑀭𑀽’’𑀢𑀺 𑀘;

𑀳𑀢𑁆𑀣𑀦𑀺𑀮𑁆𑀮𑁂𑀳𑀓𑀁 𑀯𑀸𑀧𑀺, 𑀦 𑀘 𑀯𑀝𑁆𑀝𑀢𑀺 𑀪𑀼𑀜𑁆𑀚𑀺𑀢𑀼𑀁.

𑁧𑁯𑁨𑁪. 𑀨𑀸𑀡𑀺𑀢𑀁 𑀖𑀦𑀬𑀸𑀕𑀼𑀁 𑀯𑀸, 𑀕𑀳𑁂𑀢𑁆𑀯𑀸 𑀅𑀗𑁆𑀕𑀼𑀮𑀻𑀳𑀺 𑀢𑀁;

𑀫𑀼𑀔𑁂 𑀅𑀗𑁆𑀕𑀼𑀮𑀺𑀬𑁄 𑀪𑁄𑀢𑁆𑀢𑀼𑀁, 𑀧𑀯𑁂𑀲𑁂𑀢𑁆𑀯𑀸𑀧𑀺 𑀯𑀝𑁆𑀝𑀢𑀺.

𑁧𑁯𑁨𑁫. 𑀦 𑀧𑀢𑁆𑀢𑁄 𑀮𑁂𑀳𑀺𑀢𑀩𑁆𑀩𑁄𑀯, 𑀏𑀓𑀸𑀬𑀗𑁆𑀕𑀼𑀮𑀺𑀓𑀸𑀬 𑀯𑀸;

𑀏𑀓𑀑𑀝𑁆𑀞𑁄𑀧𑀺 𑀚𑀺𑀯𑁆𑀳𑀸𑀬, 𑀦 𑀘 𑀦𑀺𑀮𑁆𑀮𑁂𑀳𑀺𑀢𑀩𑁆𑀩𑀓𑁄.

𑀘𑀢𑀼𑀢𑁆𑀣𑀁.

𑁧𑁯𑁨𑁬. 𑀲𑀸𑀫𑀺𑀲𑁂𑀦 𑀢𑀼 𑀳𑀢𑁆𑀣𑁂𑀦, 𑀦 𑀘 𑀧𑀸𑀦𑀻𑀬𑀣𑀸𑀮𑀓𑀁;

𑀕𑀳𑁂𑀢𑀩𑁆𑀩𑀁, 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀧𑀝𑀺𑀓𑁆𑀓𑀽𑀮𑀯𑀲𑁂𑀦 𑀳𑀺.

𑁧𑁯𑁨𑁭. 𑀧𑀼𑀕𑁆𑀕𑀮𑀲𑁆𑀲 𑀘 𑀲𑀗𑁆𑀖𑀲𑁆𑀲, 𑀕𑀳𑀝𑁆𑀞𑀲𑁆𑀲𑀢𑁆𑀢𑀦𑁄𑀧𑀺 𑀘;

𑀲𑀦𑁆𑀢𑀓𑁄 𑀧𑀦 𑀲𑀗𑁆𑀔𑁄 𑀯𑀸, 𑀲𑀭𑀸𑀯𑀁 𑀯𑀸𑀧𑀺 𑀣𑀸𑀮𑀓𑀁.

𑁧𑁯𑁨𑁮. 𑀢𑀲𑁆𑀫𑀸 𑀦 𑀘 𑀕𑀳𑁂𑀢𑀩𑁆𑀩𑀁, 𑀕𑀡𑁆𑀳𑀢𑁄 𑀳𑁄𑀢𑀺 𑀤𑀼𑀓𑁆𑀓𑀝𑀁;

𑀅𑀦𑀸𑀫𑀺𑀲𑁂𑀦 𑀳𑀢𑁆𑀣𑁂𑀦, 𑀕𑀳𑀡𑀁 𑀧𑀦 𑀯𑀝𑁆𑀝𑀢𑀺.

𑀧𑀜𑁆𑀘𑀫𑀁.

𑁧𑁯𑁨𑁯. 𑀉𑀤𑁆𑀥𑀭𑀺𑀢𑁆𑀯𑀸𑀧𑀺 𑀪𑀺𑀦𑁆𑀤𑀺𑀢𑁆𑀯𑀸, 𑀕𑀳𑁂𑀢𑁆𑀯𑀸 𑀯𑀸 𑀧𑀝𑀺𑀕𑁆𑀕𑀳𑁂;

𑀦𑀻𑀳𑀭𑀺𑀢𑁆𑀯𑀸 𑀅𑀦𑀸𑀧𑀢𑁆𑀢𑀺, 𑀙𑀟𑁆𑀟𑁂𑀦𑁆𑀢𑀲𑁆𑀲 𑀖𑀭𑀸 𑀩𑀳𑀺.