𑀧𑀸𑀝𑀺𑀤𑁂𑀲𑀦𑀻𑀬𑀓𑀣𑀸

𑁧𑁮𑁩𑁦. 𑀬𑁄 𑀘𑀦𑁆𑀢𑀭𑀖𑀭𑀁 𑀪𑀺𑀓𑁆𑀔𑀼, 𑀧𑀯𑀺𑀝𑁆𑀞𑀸𑀬 𑀢𑀼 𑀳𑀢𑁆𑀣𑀢𑁄;

𑀅𑀜𑁆𑀜𑀸𑀢𑀺𑀓𑀸𑀬 𑀬𑀁 𑀓𑀺𑀜𑁆𑀘𑀺, 𑀢𑀲𑁆𑀲 𑀪𑀺𑀓𑁆𑀔𑀼𑀦𑀺𑀬𑀸 𑀧𑀦.

𑁧𑁮𑁩𑁧. 𑀲𑀳𑀢𑁆𑀣𑀸 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬, 𑀔𑀸𑀤𑀦𑀁 𑀪𑁄𑀚𑀦𑀫𑁆𑀧𑀺 𑀯𑀸;

𑀕𑀳𑀡𑁂 𑀤𑀼𑀓𑁆𑀓𑀝𑀁 𑀪𑁄𑀕𑁂, 𑀧𑀸𑀝𑀺𑀤𑁂𑀲𑀦𑀺𑀬𑀁 𑀲𑀺𑀬𑀸.

𑁧𑁮𑁩𑁨. 𑀭𑀣𑀺𑀓𑀸𑀬𑀧𑀺 𑀯𑀸 𑀩𑁆𑀬𑀽𑀳𑁂, 𑀲𑀦𑁆𑀥𑀺𑀲𑀺𑀗𑁆𑀖𑀸𑀝𑀓𑁂𑀲𑀼 𑀯𑀸;

𑀳𑀢𑁆𑀣𑀺𑀲𑀸𑀮𑀸𑀤𑀺𑀓𑁂 𑀞𑀢𑁆𑀯𑀸, 𑀕𑀡𑁆𑀳𑀢𑁄𑀧𑀺 𑀅𑀬𑀁 𑀦𑀬𑁄.

𑁧𑁮𑁩𑁩. 𑀭𑀣𑀺𑀓𑀸𑀬 𑀲𑀘𑁂 𑀞𑀢𑁆𑀯𑀸, 𑀤𑁂𑀢𑀺 𑀪𑀺𑀓𑁆𑀔𑀼𑀦𑀺 𑀪𑁄𑀚𑀦𑀁;

𑀆𑀧𑀢𑁆𑀢𑀺 𑀅𑀦𑁆𑀢𑀭𑀸𑀭𑀸𑀫𑁂, 𑀞𑀢𑁆𑀯𑀸 𑀕𑀡𑁆𑀳𑀸𑀢𑀺 𑀪𑀺𑀓𑁆𑀔𑀼 𑀘𑁂.

𑁧𑁮𑁩𑁪. 𑀏𑀢𑁆𑀣𑀦𑁆𑀢𑀭𑀖𑀭𑀁 𑀢𑀲𑁆𑀲𑀸, 𑀧𑀯𑀺𑀝𑁆𑀞𑀸𑀬 𑀳𑀺 𑀯𑀸𑀓𑁆𑀬𑀢𑁄;

𑀪𑀺𑀓𑁆𑀔𑀼𑀲𑁆𑀲 𑀘 𑀞𑀺𑀢𑀝𑁆𑀞𑀸𑀦𑀁, 𑀦𑀧𑁆𑀧𑀫𑀸𑀡𑀦𑁆𑀢𑀺 𑀯𑀡𑁆𑀡𑀺𑀢𑀁.

𑁧𑁮𑁩𑁫. 𑀢𑀲𑁆𑀫𑀸 𑀪𑀺𑀓𑁆𑀔𑀼𑀦𑀺𑀬𑀸 𑀞𑀢𑁆𑀯𑀸, 𑀆𑀭𑀸𑀫𑀸𑀤𑀻𑀲𑀼 𑀤𑁂𑀦𑁆𑀢𑀺𑀬𑀸;

𑀯𑀻𑀣𑀺𑀬𑀸𑀤𑀻𑀲𑀼 𑀘𑁂 𑀞𑀢𑁆𑀯𑀸, 𑀦 𑀤𑁄𑀲𑁄 𑀧𑀝𑀺𑀕𑀡𑁆𑀳𑀢𑁄.

𑁧𑁮𑁩𑁬. 𑀬𑀸𑀫𑀓𑀸𑀮𑀺𑀓𑀲𑀢𑁆𑀢𑀸𑀳-𑀓𑀸𑀮𑀺𑀓𑀁 𑀬𑀸𑀯𑀚𑀻𑀯𑀺𑀓𑀁;

𑀆𑀳𑀸𑀭𑀢𑁆𑀣𑀸𑀬 𑀕𑀳𑀡𑁂, 𑀅𑀚𑁆𑀛𑁄𑀳𑀸𑀭𑁂 𑀘 𑀤𑀼𑀓𑁆𑀓𑀝𑀁.

𑁧𑁮𑁩𑁭. 𑀆𑀫𑀺𑀲𑁂𑀦 𑀅𑀲𑀫𑁆𑀪𑀺𑀦𑁆𑀦-𑀭𑀲𑀁 𑀲𑀦𑁆𑀥𑀸𑀬 𑀪𑀸𑀲𑀺𑀢𑀁;

𑀧𑀸𑀝𑀺𑀤𑁂𑀲𑀦𑀺𑀬𑀸𑀧𑀢𑁆𑀢𑀺, 𑀲𑀫𑁆𑀪𑀺𑀦𑁆𑀦𑁂𑀓𑀭𑀲𑁂 𑀲𑀺𑀬𑀸.

𑁧𑁮𑁩𑁮. 𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦-𑀳𑀢𑁆𑀣𑀢𑁄 𑀧𑀝𑀺𑀕𑀡𑁆𑀳𑀢𑁄;

𑀓𑀸𑀮𑀺𑀓𑀸𑀦𑀁 𑀘𑀢𑀼𑀦𑁆𑀦𑀫𑁆𑀧𑀺, 𑀆𑀳𑀸𑀭𑀢𑁆𑀣𑀸𑀬 𑀤𑀼𑀓𑁆𑀓𑀝𑀁.

𑁧𑁮𑁩𑁯. 𑀜𑀸𑀢𑀺𑀓𑀸𑀬𑀧𑀺 𑀅𑀜𑁆𑀜𑀸𑀢𑀺-𑀲𑀜𑁆𑀜𑀺𑀦𑁄 𑀯𑀺𑀫𑀢𑀺𑀲𑁆𑀲 𑀯𑀸;

𑀤𑀼𑀓𑁆𑀓𑀝𑀁 𑀜𑀸𑀢𑀺𑀲𑀜𑁆𑀜𑀺𑀲𑁆𑀲, 𑀢𑀣𑀸 𑀅𑀜𑁆𑀜𑀸𑀢𑀺𑀓𑀸𑀬 𑀯𑀸.

𑁧𑁮𑁪𑁦. 𑀤𑀸𑀧𑁂𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺, 𑀤𑀤𑀫𑀸𑀦𑀸𑀬 𑀯𑀸 𑀧𑀦;

𑀦𑀺𑀓𑁆𑀔𑀺𑀧𑀺𑀢𑁆𑀯𑀸𑀦𑁆𑀢𑀭𑀸𑀭𑀸𑀫𑀸-𑀤𑀻𑀲𑀼 𑀞𑀢𑁆𑀯𑀸𑀧𑀺 𑀤𑁂𑀦𑁆𑀢𑀺𑀬𑀸.

𑁧𑁮𑁪𑁧. 𑀕𑀸𑀫𑀢𑁄 𑀦𑀻𑀳𑀭𑀺𑀢𑁆𑀯𑀸 𑀯𑀸, 𑀤𑁂𑀢𑀺 𑀘𑁂 𑀩𑀳𑀺 𑀯𑀝𑁆𑀝𑀢𑀺;

‘‘𑀧𑀘𑁆𑀘𑀬𑁂 𑀲𑀢𑀺 𑀪𑀼𑀜𑁆𑀚𑀸’’𑀢𑀺, 𑀤𑁂𑀢𑀺 𑀘𑁂 𑀓𑀸𑀮𑀺𑀓𑀢𑁆𑀢𑀬𑀁.

𑁧𑁮𑁪𑁨. 𑀳𑀢𑁆𑀣𑀢𑁄 𑀲𑀸𑀫𑀡𑁂𑀭𑀻𑀦𑀁, 𑀲𑀺𑀓𑁆𑀔𑀫𑀸𑀦𑀸𑀬 𑀯𑀸 𑀢𑀣𑀸;

𑀇𑀤𑀁 𑀏𑀴𑀓𑀮𑁄𑀫𑁂𑀦, 𑀲𑀫𑀼𑀝𑁆𑀞𑀸𑀦𑀁 𑀲𑀫𑀁 𑀫𑀢𑀁.

𑀧𑀞𑀫𑀧𑀸𑀝𑀺𑀤𑁂𑀲𑀦𑀻𑀬𑀓𑀣𑀸.

𑁧𑁮𑁪𑁩. 𑀅𑀯𑀼𑀢𑁆𑀢𑁂 ‘‘𑀅𑀧𑀲𑀓𑁆𑀓𑀸’’𑀢𑀺, 𑀏𑀓𑁂𑀦𑀸𑀧𑀺 𑀘 𑀪𑀺𑀓𑁆𑀔𑀼𑀦𑀸;

𑀲𑀘𑁂𑀚𑁆𑀛𑁄𑀳𑀭𑀡𑀢𑁆𑀣𑀸𑀬, 𑀆𑀫𑀺𑀲𑀁 𑀧𑀝𑀺𑀕𑀡𑁆𑀳𑀢𑀺.

𑁧𑁮𑁪𑁪. 𑀕𑀳𑀡𑁂 𑀤𑀼𑀓𑁆𑀓𑀝𑀁 𑀪𑁄𑀕𑁂, 𑀧𑀸𑀝𑀺𑀤𑁂𑀲𑀦𑀺𑀬𑀁 𑀲𑀺𑀬𑀸;

𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀁, 𑀦 𑀯𑀸𑀭𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑁧𑁮𑁪𑁫. 𑀢𑀣𑁂𑀯𑀸𑀦𑀼𑀧𑀲𑀫𑁆𑀧𑀦𑁆𑀦𑀸-𑀬𑀼𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀺𑀦𑁄;

𑀢𑀢𑁆𑀣 𑀯𑁂𑀫𑀢𑀺𑀓𑀲𑁆𑀲𑀸𑀧𑀺, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑁧𑁮𑁪𑁬. 𑀅𑀦𑀸𑀧𑀢𑁆𑀢𑀺𑀢𑁆𑀢𑀦𑁄 𑀪𑀢𑁆𑀢𑀁, 𑀧𑀤𑀸𑀧𑁂𑀢𑀺 𑀦 𑀤𑁂𑀢𑀺 𑀘𑁂;

𑀢𑀣𑀸 𑀅𑀜𑁆𑀜𑀲𑁆𑀲 𑀪𑀢𑁆𑀢𑀁 𑀯𑀸, 𑀦 𑀤𑀸𑀧𑁂𑀢𑀺 𑀧𑀤𑁂𑀢𑀺 𑀘𑁂.

𑁧𑁮𑁪𑁭. 𑀬𑀁 𑀦 𑀤𑀺𑀦𑁆𑀦𑀁 𑀢𑀁 𑀤𑀸𑀧𑁂𑀢𑀺, 𑀦 𑀤𑀺𑀦𑁆𑀦𑀁 𑀬𑀢𑁆𑀣 𑀯𑀸𑀧𑀺 𑀘;

𑀢𑀢𑁆𑀣 𑀢𑀫𑁆𑀧𑀺 𑀘 𑀲𑀩𑁆𑀩𑁂𑀲𑀁, 𑀲𑀫𑀁 𑀤𑀸𑀧𑁂𑀢𑀺 𑀪𑀺𑀓𑁆𑀔𑀼𑀦𑀻.

𑁧𑁮𑁪𑁮. 𑀯𑁄𑀲𑀸𑀲𑀦𑁆𑀢𑀻 𑀞𑀺𑀢𑀸 𑀲𑀺𑀓𑁆𑀔-𑀫𑀸𑀦𑀸 𑀯𑀸 𑀲𑀸𑀫𑀡𑁂𑀭𑀺𑀓𑀸;

𑀪𑁄𑀚𑀦𑀸𑀦𑀺 𑀘 𑀧𑀜𑁆𑀘𑁂𑀯, 𑀯𑀺𑀦𑀸, 𑀉𑀫𑁆𑀫𑀢𑁆𑀢𑀓𑀸𑀤𑀺𑀦𑁄.

𑁧𑁮𑁪𑁯. 𑀓𑀣𑀺𑀦𑁂𑀦 𑀲𑀫𑀼𑀝𑁆𑀞𑀸𑀦𑀁, 𑀲𑀫𑀸𑀦𑀦𑁆𑀢𑀺 𑀧𑀓𑀸𑀲𑀺𑀢𑀁;

𑀓𑁆𑀭𑀺𑀬𑀸𑀓𑁆𑀭𑀺𑀬𑀫𑀺𑀤𑀁 𑀯𑀼𑀢𑁆𑀢𑀁, 𑀢𑀺𑀘𑀺𑀢𑁆𑀢𑀜𑁆𑀘 𑀢𑀺𑀯𑁂𑀤𑀦𑀁.

𑀤𑀼𑀢𑀺𑀬𑀧𑀸𑀝𑀺𑀤𑁂𑀲𑀦𑀻𑀬𑀓𑀣𑀸.

𑁧𑁮𑁫𑁦. 𑀲𑁂𑀓𑁆𑀔𑀦𑁆𑀢𑀺 𑀲𑀫𑁆𑀫𑀢𑁂 𑀪𑀺𑀓𑁆𑀔𑀼, 𑀮𑀤𑁆𑀥𑀲𑀫𑁆𑀫𑀼𑀢𑀺𑀓𑁂 𑀓𑀼𑀮𑁂;

𑀖𑀭𑀽𑀧𑀘𑀸𑀭𑁄𑀓𑁆𑀓𑀫𑀦𑀸, 𑀧𑀼𑀩𑁆𑀩𑁂𑀯 𑀅𑀦𑀺𑀫𑀦𑁆𑀢𑀺𑀢𑁄.

𑁧𑁮𑁫𑁧. 𑀅𑀕𑀺𑀮𑀸𑀦𑁄 𑀕𑀳𑁂𑀢𑁆𑀯𑀸 𑀘𑁂, 𑀧𑀭𑀺𑀪𑀼𑀜𑁆𑀚𑁂𑀬𑁆𑀬 𑀆𑀫𑀺𑀲𑀁;

𑀕𑀳𑀡𑁂 𑀤𑀼𑀓𑁆𑀓𑀝𑀁 𑀪𑁄𑀕𑁂, 𑀧𑀸𑀝𑀺𑀤𑁂𑀲𑀦𑀺𑀬𑀁 𑀲𑀺𑀬𑀸.

𑁧𑁮𑁫𑁨. 𑀬𑀸𑀫𑀓𑀸𑀮𑀺𑀓𑀲𑀢𑁆𑀢𑀸𑀳-𑀓𑀸𑀮𑀺𑀓𑁂 𑀬𑀸𑀯𑀚𑀻𑀯𑀺𑀓𑁂;

𑀕𑀳𑀡𑁂 𑀧𑀭𑀺𑀪𑁄𑀕𑁂 𑀘, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑁧𑁮𑁫𑁩. 𑀅𑀲𑁂𑀓𑁆𑀔𑀲𑀫𑁆𑀫𑀢𑁂 𑀲𑁂𑀓𑁆𑀔-𑀲𑀫𑁆𑀫𑀢𑀦𑁆𑀢𑀺 𑀘 𑀲𑀜𑁆𑀜𑀺𑀦𑁄;

𑀢𑀢𑁆𑀣 𑀯𑁂𑀫𑀢𑀺𑀓𑀲𑁆𑀲𑀸𑀧𑀺, 𑀢𑀣𑁂𑀯 𑀧𑀭𑀺𑀤𑀻𑀧𑀺𑀢𑀁.

𑁧𑁮𑁫𑁪. 𑀅𑀦𑀸𑀧𑀢𑁆𑀢𑀺 𑀕𑀺𑀮𑀸𑀦𑀲𑁆𑀲, 𑀕𑀺𑀮𑀸𑀦𑀲𑁆𑀲𑀸𑀯𑀲𑁂𑀲𑀓𑁂;

𑀦𑀺𑀫𑀦𑁆𑀢𑀺𑀢𑀲𑁆𑀲 𑀯𑀸 𑀪𑀺𑀓𑁆𑀔𑀸, 𑀅𑀜𑁆𑀜𑁂𑀲𑀁 𑀢𑀢𑁆𑀣 𑀤𑀻𑀬𑀢𑀺.

𑁧𑁮𑁫𑁫. 𑀖𑀭𑀢𑁄 𑀦𑀻𑀳𑀭𑀺𑀢𑁆𑀯𑀸 𑀯𑀸, 𑀤𑁂𑀦𑁆𑀢𑀺 𑀘𑁂 𑀬𑀢𑁆𑀣 𑀓𑀢𑁆𑀣𑀘𑀺;

𑀦𑀺𑀘𑁆𑀘𑀪𑀢𑁆𑀢𑀸𑀤𑀺𑀓𑁂 𑀯𑀸𑀧𑀺, 𑀢𑀣𑀸 𑀉𑀫𑁆𑀫𑀢𑁆𑀢𑀓𑀸𑀤𑀺𑀦𑁄.

𑁧𑁮𑁫𑁬. 𑀅𑀦𑀸𑀕𑀢𑁂 𑀳𑀺 𑀪𑀺𑀓𑁆𑀔𑀼𑀫𑁆𑀳𑀺, 𑀖𑀭𑀢𑁄 𑀧𑀞𑀫𑀁 𑀧𑀦;

𑀦𑀻𑀳𑀭𑀺𑀢𑁆𑀯𑀸 𑀲𑀘𑁂 𑀤𑁆𑀯𑀸𑀭𑁂, 𑀲𑀫𑁆𑀧𑀢𑁆𑀢𑁂 𑀤𑁂𑀦𑁆𑀢𑀺 𑀯𑀝𑁆𑀝𑀢𑀺.

𑁧𑁮𑁫𑁭. 𑀪𑀺𑀓𑁆𑀔𑀼𑀁 𑀧𑀦 𑀘 𑀤𑀺𑀲𑁆𑀯𑀸𑀯, 𑀦𑀻𑀳𑀭𑀺𑀢𑁆𑀯𑀸𑀦 𑀕𑁂𑀳𑀢𑁄;

𑀦 𑀯𑀝𑁆𑀝𑀢𑀺 𑀲𑀘𑁂 𑀤𑁂𑀦𑁆𑀢𑀺, 𑀲𑀫𑀼𑀝𑁆𑀞𑀸𑀦𑁂𑀴𑀓𑀽𑀧𑀫𑀁.

𑀢𑀢𑀺𑀬𑀧𑀸𑀝𑀺𑀤𑁂𑀲𑀦𑀻𑀬𑀓𑀣𑀸.

𑁧𑁮𑁫𑁮. 𑀕𑀳𑀝𑁆𑀞𑁂𑀦𑀸𑀕𑀳𑀝𑁆𑀞𑁂𑀦, 𑀇𑀢𑁆𑀣𑀺𑀬𑀸 𑀧𑀼𑀭𑀺𑀲𑁂𑀦 𑀯𑀸;

𑀆𑀭𑀸𑀫𑀁 𑀉𑀧𑀘𑀸𑀭𑀁 𑀯𑀸, 𑀧𑀯𑀺𑀲𑀺𑀢𑁆𑀯𑀸 𑀲𑀘𑁂 𑀧𑀦.

𑁧𑁮𑁫𑁯. ‘‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀢𑁂 𑀪𑀢𑁆𑀢𑀁, 𑀬𑀸𑀕𑀼 𑀯𑀸 𑀆𑀳𑀭𑀻𑀬𑀢𑀺’’;

𑀏𑀯𑀫𑀸𑀭𑁄𑀘𑀺𑀢𑀁 𑀯𑀼𑀢𑁆𑀢𑀁, 𑀧𑀝𑀺𑀲𑀁𑀯𑀺𑀤𑀺𑀢𑀦𑁆𑀢𑀺 𑀳𑀺.

𑁧𑁮𑁬𑁦. 𑀆𑀳𑀭𑀻𑀬𑀢𑀼 𑀢𑀁 𑀧𑀘𑁆𑀙𑀸, 𑀬𑀣𑀸𑀭𑁄𑀘𑀺𑀢𑀫𑁂𑀯 𑀯𑀸;

𑀢𑀲𑁆𑀲 𑀯𑀸 𑀧𑀭𑀺𑀯𑀸𑀭𑀫𑁆𑀧𑀺, 𑀅𑀜𑁆𑀜𑀁 𑀓𑀢𑁆𑀯𑀸 𑀩𑀳𑀼𑀁 𑀧𑀦.

𑁧𑁮𑁬𑁧. 𑀬𑀸𑀕𑀼𑀬𑀸 𑀯𑀺𑀤𑀺𑀢𑀁 𑀓𑀢𑁆𑀯𑀸, 𑀧𑀽𑀯𑀁 𑀪𑀢𑁆𑀢𑀁 𑀳𑀭𑀦𑁆𑀢𑀺 𑀘𑁂;

𑀇𑀤𑀫𑁆𑀧𑀺 𑀯𑀺𑀤𑀺𑀢𑀁 𑀯𑀼𑀢𑁆𑀢𑀁, 𑀯𑀝𑁆𑀝𑀢𑀻𑀢𑀺 𑀓𑀼𑀭𑀼𑀦𑁆𑀤𑀺𑀬𑀁.

𑁧𑁮𑁬𑁨. 𑀓𑀼𑀮𑀸𑀦𑀺 𑀧𑀦 𑀅𑀜𑁆𑀜𑀸𑀦𑀺, 𑀤𑁂𑀬𑁆𑀬𑀥𑀫𑁆𑀫𑀁 𑀧𑀦𑀢𑁆𑀢𑀦𑁄;

𑀳𑀭𑀦𑁆𑀢𑀺 𑀢𑁂𑀦 𑀲𑀤𑁆𑀥𑀺𑀁 𑀘𑁂, 𑀲𑀩𑁆𑀩𑀁 𑀯𑀝𑁆𑀝𑀢𑀺 𑀢𑀫𑁆𑀧𑀺 𑀘.

𑁧𑁮𑁬𑁩. 𑀅𑀦𑀸𑀭𑁄𑀘𑀺𑀢𑀫𑁂𑀯𑀁 𑀬𑀁, 𑀬𑀁 𑀆𑀭𑀸𑀫𑀫𑀦𑀸𑀪𑀢𑀁;

𑀢𑀁 𑀅𑀲𑀁𑀯𑀺𑀤𑀺𑀢𑀁 𑀦𑀸𑀫, 𑀲𑀳𑀥𑀫𑁆𑀫𑀺𑀓𑀜𑀸𑀧𑀺𑀢𑀁.

𑁧𑁮𑁬𑁪. 𑀬𑀁 𑀅𑀲𑀁𑀯𑀺𑀤𑀺𑀢𑀁 𑀓𑀢𑁆𑀯𑀸, 𑀆𑀪𑀢𑀁 𑀧𑀦 𑀢𑀁 𑀩𑀳𑀺;

𑀆𑀭𑀸𑀫𑀁 𑀧𑀦 𑀧𑁂𑀲𑁂𑀢𑁆𑀯𑀸, 𑀓𑀸𑀭𑀸𑀧𑁂𑀢𑁆𑀯𑀸 𑀢𑀫𑀸𑀳𑀭𑁂.

𑁧𑁮𑁬𑁫. 𑀕𑀦𑁆𑀢𑁆𑀯𑀸 𑀯𑀸 𑀅𑀦𑁆𑀢𑀭𑀸𑀫𑀕𑁆𑀕𑁂, 𑀕𑀳𑁂𑀢𑀩𑁆𑀩𑀁 𑀢𑀼 𑀪𑀺𑀓𑁆𑀔𑀼𑀦𑀸;

𑀲𑀘𑁂 𑀏𑀯𑀫𑀓𑀢𑁆𑀯𑀸 𑀢𑀁, 𑀆𑀭𑀸𑀫𑁂 𑀉𑀧𑀘𑀸𑀭𑀢𑁄.

𑁧𑁮𑁬𑁬. 𑀕𑀳𑁂𑀢𑁆𑀯𑀸𑀚𑁆𑀛𑁄𑀳𑀭𑀦𑁆𑀢𑀲𑁆𑀲, 𑀕𑀳𑀡𑁂 𑀤𑀼𑀓𑁆𑀓𑀝𑀁 𑀲𑀺𑀬𑀸;

𑀅𑀚𑁆𑀛𑁄𑀳𑀸𑀭𑀧𑀬𑁄𑀕𑁂𑀲𑀼, 𑀧𑀸𑀝𑀺𑀤𑁂𑀲𑀦𑀺𑀬𑀁 𑀫𑀢𑀁.

𑁧𑁮𑁬𑁭. 𑀧𑀝𑀺𑀲𑀁𑀯𑀺𑀤𑀺𑀢𑁂𑀬𑁂𑀯, 𑀅𑀲𑀁𑀯𑀺𑀤𑀺𑀢𑀲𑀜𑁆𑀜𑀺𑀦𑁄;

𑀢𑀢𑁆𑀣 𑀯𑁂𑀫𑀢𑀺𑀓𑀲𑁆𑀲𑀸𑀧𑀺, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑁧𑁮𑁬𑁮. 𑀧𑀝𑀺𑀲𑀁𑀯𑀺𑀤𑀺𑀢𑁂 𑀢𑀲𑁆𑀲, 𑀕𑀺𑀮𑀸𑀦𑀲𑁆𑀲𑀸𑀯𑀲𑁂𑀲𑀓𑁂;

𑀩𑀳𑀸𑀭𑀸𑀫𑁂 𑀕𑀳𑁂𑀢𑁆𑀯𑀸 𑀯𑀸, 𑀅𑀦𑁆𑀢𑁄𑀬𑁂𑀯𑀲𑁆𑀲 𑀪𑀼𑀜𑁆𑀚𑀢𑁄.

𑁧𑁮𑁬𑁯. 𑀢𑀢𑁆𑀣𑀚𑀸𑀢𑀨𑀮𑀸𑀤𑀻𑀦𑀺, 𑀅𑀦𑀸𑀧𑀢𑁆𑀢𑁂𑀯 𑀔𑀸𑀤𑀢𑁄;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀩𑁆𑀩𑁂, 𑀓𑀣𑀺𑀦𑁂𑀦 𑀲𑀫𑀸 𑀫𑀢𑀸.

𑀘𑀢𑀼𑀢𑁆𑀣𑀧𑀸𑀝𑀺𑀤𑁂𑀲𑀦𑀻𑀬𑀓𑀣𑀸.

𑀇𑀢𑀺 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 𑀧𑀸𑀝𑀺𑀤𑁂𑀲𑀦𑀻𑀬𑀓𑀣𑀸 𑀦𑀺𑀝𑁆𑀞𑀺𑀢𑀸.