𑀲𑀩𑁆𑀩𑀲𑀗𑁆𑀓𑀮𑀦𑀦𑀬𑀓𑀣𑀸𑀯𑀡𑁆𑀡𑀦𑀸

𑁮𑁭𑁩. 𑀧𑀭𑀺𑀯𑀸𑀭𑁂 𑀫𑀼𑀔𑀸𑀕𑀢𑀸 𑀓𑀢𑁆𑀣𑀧𑀜𑁆𑀜𑀢𑁆𑀢𑀺𑀯𑀸𑀭𑀸𑀤𑀬𑁄 𑀅𑀝𑁆𑀞 𑀯𑀸𑀭𑀸, 𑀢𑁂𑀬𑁂𑀯 𑀧𑀘𑁆𑀘𑀬-𑀲𑀤𑁆𑀤𑁂𑀦 𑀬𑁄𑀚𑁂𑀢𑁆𑀯𑀸 𑀯𑀼𑀢𑁆𑀢𑀸 𑀅𑀝𑁆𑀞𑀧𑀘𑁆𑀘𑀬𑀯𑀸𑀭𑀸𑀢𑀺 𑀯𑀺𑀪𑀗𑁆𑀕𑀤𑁆𑀯𑀬𑁂 𑀯𑀺𑀲𑀼𑀁 𑀯𑀺𑀲𑀼𑀁 𑀤𑀲𑁆𑀲𑀺𑀢𑀸 𑀲𑁄𑀴𑀲 𑀧𑀭𑀺𑀯𑀸𑀭𑀸 𑀅𑀲𑁆𑀲𑀸𑀢𑀺 𑀲𑁄𑀴𑀲𑀧𑀭𑀺𑀯𑀸𑀭𑁄, 𑀢𑀲𑁆𑀲 𑀲𑁄𑀴𑀲𑀧𑀭𑀺𑀯𑀸𑀭𑀲𑁆𑀲. 𑀲𑀩𑁆𑀩𑀁 𑀲𑀗𑁆𑀓𑀮𑀦𑀁 𑀦𑀬𑀦𑁆𑀢𑀺 𑀲𑀩𑁆𑀩𑁂𑀲𑀁 𑀯𑀼𑀢𑁆𑀢𑀸𑀦𑀁 𑀲𑀗𑁆𑀓𑀮𑀦𑀦𑀬𑀸𑀦𑀁 𑀲𑀗𑁆𑀕𑀳𑁂𑀢𑀩𑁆𑀩𑀢𑁄 𑀲𑀩𑁆𑀩𑀁 𑀲𑀗𑁆𑀓𑀮𑀪𑁂𑀤𑀦𑀁 𑀦𑀬𑀁.

𑁮𑁭𑁫. 𑀓𑀸𑀬𑀺𑀓𑀸 𑀙𑀩𑁆𑀩𑀺𑀥𑀸𑀢𑀺 𑀧𑀞𑀫𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺, 𑀓𑀼𑀝𑀺𑀓𑀭𑀡𑁂 𑀧𑀬𑁄𑀕𑁂 𑀤𑀼𑀓𑁆𑀓𑀝𑀸𑀧𑀢𑁆𑀢𑀺, 𑀏𑀓𑀁 𑀧𑀺𑀡𑁆𑀟𑀁 𑀅𑀦𑀸𑀕𑀢𑁂 𑀣𑀼𑀮𑁆𑀮𑀘𑁆𑀘𑀬𑀸𑀧𑀢𑁆𑀢𑀺, 𑀢𑀲𑁆𑀫𑀺𑀁 𑀆𑀕𑀢𑁂 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺, 𑀯𑀺𑀓𑀸𑀮𑀪𑁄𑀚𑀦𑁂 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺, 𑀧𑀞𑀫𑀧𑀸𑀝𑀺𑀤𑁂𑀲𑀦𑀻𑀬𑀸𑀧𑀢𑁆𑀢𑀻𑀢𑀺 𑀙𑀩𑁆𑀩𑀺𑀥𑀸.

𑀢𑀣𑀸 𑀯𑀸𑀘𑀲𑀺𑀓𑀸𑀧𑀺 𑀘𑀸𑀢𑀺 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀸, 𑀓𑀼𑀝𑀺𑀬𑀸 𑀓𑀸𑀭𑀸𑀧𑀦𑁂 𑀧𑀼𑀩𑁆𑀩𑀕𑀢𑀺𑀬𑁄, 𑀧𑀤𑀲𑁄𑀥𑀫𑁆𑀫𑀧𑀸𑀘𑀺𑀢𑁆𑀢𑀺𑀬𑀁, 𑀤𑀯𑀓𑀫𑁆𑀬𑀢𑀸𑀬 𑀳𑀻𑀦𑁂𑀦 𑀔𑀼𑀁𑀲𑀦𑀁, 𑀢𑀲𑁆𑀲 𑀤𑀼𑀩𑁆𑀪𑀸𑀲𑀺𑀢𑀦𑁆𑀢𑀺 𑀢𑀣𑀸 𑀙𑀩𑁆𑀩𑀺𑀥𑀸.

𑀙𑀸𑀤𑁂𑀦𑁆𑀢𑀲𑁆𑀲 𑀘 𑀢𑀺𑀲𑁆𑀲𑁄𑀢𑀺 𑀪𑀺𑀓𑁆𑀔𑀼𑀦𑀺𑀬𑀸 𑀯𑀚𑁆𑀚𑀧𑀝𑀺𑀘𑁆𑀙𑀸𑀤𑀺𑀓𑀸𑀬 𑀧𑀸𑀭𑀸𑀚𑀺𑀓𑀁, 𑀪𑀺𑀓𑁆𑀔𑀼𑀦𑁄 𑀲𑀗𑁆𑀖𑀸𑀤𑀺𑀲𑁂𑀲𑀙𑀸𑀤𑀦𑁂 𑀧𑀸𑀘𑀺𑀢𑁆𑀢𑀺𑀬𑀁, 𑀅𑀢𑁆𑀢𑀦𑁄 𑀤𑀼𑀝𑁆𑀞𑀼𑀮𑁆𑀮𑀘𑁆𑀙𑀸𑀤𑀦𑁂 𑀤𑀼𑀓𑁆𑀓𑀝𑀦𑁆𑀢𑀺 𑀢𑀺𑀲𑁆𑀲𑁄 𑀘.

𑀧𑀜𑁆𑀘 𑀲𑀁𑀲𑀕𑁆𑀕𑀧𑀘𑁆𑀘𑀬𑀸𑀢𑀺 𑀓𑀸𑀬𑀲𑀁𑀲𑀕𑁆𑀕𑁂 𑀪𑀺𑀓𑁆𑀔𑀼𑀦𑀺𑀬𑀸 𑀧𑀸𑀭𑀸𑀚𑀺𑀓𑀁, 𑀪𑀺𑀓𑁆𑀔𑀼𑀦𑁄 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀓𑀸𑀬𑁂𑀦 𑀓𑀸𑀬𑀧𑀝𑀺𑀩𑀤𑁆𑀥𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀓𑀸𑀬𑀧𑀝𑀺𑀩𑀤𑁆𑀥𑁂 𑀤𑀼𑀓𑁆𑀓𑀝𑀁, 𑀅𑀗𑁆𑀕𑀼𑀮𑀺𑀧𑀢𑁄𑀤𑀓𑁂 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀓𑀸𑀬𑀲𑀁𑀲𑀕𑁆𑀕𑀧𑀘𑁆𑀘𑀬𑀸 𑀧𑀜𑁆𑀘 𑀆𑀧𑀢𑁆𑀢𑀺𑀬𑁄.

𑁮𑁭𑁭. 𑀪𑀺𑀓𑁆𑀔𑀼𑀦𑀺𑀬𑀸 𑀯𑀚𑁆𑀚𑀧𑀝𑀺𑀘𑁆𑀙𑀸𑀤𑀺𑀓𑀸𑀬 𑀧𑀸𑀭𑀸𑀚𑀺𑀓𑀁, 𑀪𑀺𑀓𑁆𑀔𑀼𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑀧𑀝𑀺𑀘𑁆𑀙𑀸𑀤𑀓𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀤𑀼𑀝𑁆𑀞𑀼𑀮𑁆𑀮𑀘𑁆𑀙𑀸𑀤𑀦𑁂 𑀤𑀼𑀯𑁂.

𑁮𑁭𑁯. ‘‘𑀕𑀸𑀫𑀦𑁆𑀢𑀭𑁂 𑀘𑀢𑀲𑁆𑀲𑁄𑀯𑀸’’𑀢𑀺𑀆𑀤𑀺 𑀧𑀝𑀺𑀦𑀺𑀤𑁆𑀤𑁂𑀲𑀢𑁄 𑀘 𑀯𑀺𑀜𑁆𑀜𑀸𑀬𑀢𑀺.

𑁮𑁮𑁧. 𑀯𑀚𑀦𑁆𑀢𑀺𑀬𑀸𑀢𑀺 𑀕𑀘𑁆𑀙𑀦𑁆𑀢𑀺𑀬𑀸.

𑁮𑁮𑁫. 𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀭𑀢𑁆𑀢𑀦𑁆𑀥𑀓𑀸𑀭𑁂 𑀅𑀧𑁆𑀧𑀤𑀻𑀧𑁂 𑀳𑀢𑁆𑀣𑀧𑀸𑀲𑁂 𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁 𑀬𑀤𑀺 𑀲𑀮𑁆𑀮𑀧𑁂𑀬𑁆𑀬, 𑀢𑀲𑁆𑀲𑀸 𑀧𑀸𑀘𑀺𑀢𑁆𑀢𑀺. 𑀤𑀽𑀭𑁂 𑀞𑀺𑀢𑀸 𑀳𑀢𑁆𑀣𑀧𑀸𑀲𑀁 𑀯𑀺𑀚𑀳𑀺𑀢𑁆𑀯𑀸 𑀞𑀺𑀢𑀸 𑀯𑀤𑁂𑀬𑁆𑀬 𑀘𑁂, 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀬𑁄𑀚𑀦𑀸.

𑁮𑁮𑁬. 𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀙𑀦𑁆𑀦𑁂 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑁂 𑀤𑀺𑀯𑀸 𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁 𑀅𑀲𑁆𑀲 𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑀧𑀸𑀲𑁂 𑀞𑀺𑀢𑀸 𑀯𑀤𑁂𑀬𑁆𑀬 𑀲𑀮𑁆𑀮𑀧𑁂𑀬𑁆𑀬, 𑀢𑀲𑁆𑀲𑀸 𑀧𑀸𑀘𑀺𑀢𑁆𑀢𑀺. 𑀳𑀢𑁆𑀣𑀧𑀸𑀲𑀁 𑀯𑀺𑀚𑀳𑀺𑀢𑁆𑀯𑀸 𑀯𑀤𑁂𑀬𑁆𑀬 𑀘𑁂, 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀬𑁄𑀚𑀦𑀸.

𑁮𑁯𑁧. 𑀲𑀦𑀺𑀲𑁆𑀲𑀕𑁆𑀕𑀸 𑀘 𑀧𑀸𑀘𑀺𑀢𑁆𑀢𑀻𑀢𑀺 𑀦𑀺𑀲𑁆𑀲𑀚𑁆𑀚𑀦𑀯𑀺𑀦𑀬𑀓𑀫𑁆𑀫𑀲𑀳𑀺𑀢𑀸𑀬𑁂𑀯 𑀧𑀸𑀘𑀺𑀢𑁆𑀢𑀺.

𑁮𑁯𑁩. 𑀇𑀥 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂.

𑁮𑁯𑁬. 𑀤𑀼𑀯𑀺𑀦𑁆𑀦𑀦𑁆𑀢𑀺 𑀤𑁆𑀯𑀺𑀦𑁆𑀦𑀁.

𑁮𑁯𑁮. 𑀲𑀫𑀸𑀦𑀲𑀁𑀯𑀸𑀲𑀓𑀪𑀽𑀫𑀺 𑀦𑀸𑀫 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀫𑀸𑀦𑀮𑀤𑁆𑀥𑀺𑀓𑀲𑁆𑀲 𑀏𑀓𑀲𑀻𑀫𑀸𑀬𑀁 𑀞𑀺𑀢𑀪𑀸𑀯𑁄. 𑀦𑀸𑀦𑀸𑀧𑀤𑀁 𑀧𑀼𑀩𑁆𑀩𑀁 𑀏𑀢𑀺𑀲𑁆𑀲𑀸𑀢𑀺 𑀦𑀸𑀦𑀸𑀧𑀤𑀧𑀼𑀩𑁆𑀩𑀺𑀓𑀸, 𑀦𑀸𑀦𑀸𑀲𑀁𑀯𑀸𑀲𑀓𑀪𑀽𑀫𑀻𑀢𑀺 𑀅𑀢𑁆𑀣𑁄. 𑀉𑀓𑁆𑀔𑀺𑀢𑁆𑀢𑀦𑀸𑀦𑀸𑀮𑀤𑁆𑀥𑀺𑀓𑀦𑀸𑀦𑀸𑀲𑀻𑀫𑀕𑀢𑀸 𑀦𑀸𑀦𑀸𑀲𑀁𑀯𑀸𑀲𑀓𑀪𑀽𑀫𑀺. 𑀇𑀫𑀸 𑀤𑁆𑀯𑁂𑀬𑁂𑀯 𑀲𑀁𑀯𑀸𑀲𑀓𑀪𑀽𑀫𑀺𑀬𑁄 𑀳𑀺 𑀫𑀳𑁂𑀲𑀺𑀦𑀸 𑀓𑀸𑀭𑀼𑀡𑀺𑀓𑁂𑀦 𑀯𑀼𑀢𑁆𑀢𑀸𑀢𑀺 𑀬𑁄𑀚𑀦𑀸.

𑁮𑁯𑁯. 𑀤𑀼𑀯𑀺𑀦𑁆𑀦𑀦𑁆𑀢𑀺 𑀧𑀸𑀭𑀺𑀯𑀸𑀲𑀺𑀓𑀫𑀸𑀦𑀢𑁆𑀢𑀘𑀸𑀭𑀻𑀦𑀁 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁. 𑀤𑁆𑀯𑀬𑀸𑀢𑀻𑀢𑁂𑀦𑀸𑀢𑀺 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀲𑀗𑁆𑀔𑀸𑀢𑀁 𑀅𑀦𑁆𑀢𑀤𑁆𑀯𑀬𑀁 𑀅𑀢𑀺𑀓𑁆𑀓𑀫𑁆𑀫 𑀫𑀚𑁆𑀛𑀺𑀫𑀸𑀬 𑀧𑀝𑀺𑀧𑀤𑀸𑀬 𑀞𑀺𑀢𑁂𑀦. 𑀅𑀣 𑀯𑀸 𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑁆𑀯𑀬𑀁 𑀅𑀢𑀺𑀓𑁆𑀓𑀦𑁆𑀢𑁂𑀦.

𑁯𑁦𑁦. ‘‘𑀤𑁆𑀯𑀗𑁆𑀕𑀼𑀮𑀧𑀩𑁆𑀩𑀧𑀭𑀫𑀁 𑀆𑀤𑀸𑀢𑀩𑁆𑀩’’𑀦𑁆𑀢𑀺 𑀘 𑀢𑀣𑁂𑀯 ‘‘𑀤𑁆𑀯𑀗𑁆𑀕𑀼𑀮𑀁 𑀯𑀸 𑀤𑀼𑀫𑀸𑀲𑀁 𑀯𑀸’’𑀢𑀺 𑀘 𑀤𑁆𑀯𑀗𑁆𑀕𑀼𑀮𑀸 𑀤𑀼𑀯𑁂 𑀧𑀜𑁆𑀜𑀢𑁆𑀢𑀸𑀢𑀺 𑀬𑁄𑀚𑀦𑀸.

𑁯𑁦𑁫. 𑀆𑀡𑀢𑁆𑀢𑀺𑀬𑀸 𑀫𑀦𑀼𑀲𑁆𑀲𑀫𑀸𑀭𑀡𑀁, 𑀆𑀡𑀢𑁆𑀢𑀺𑀬𑀸 𑀅𑀤𑀺𑀦𑁆𑀦𑀸𑀤𑀸𑀦𑀫𑁆𑀧𑀻𑀢𑀺 𑀬𑁄𑀚𑀦𑀸.

𑁯𑁦𑁭. 𑀢𑀺𑀲𑁆𑀲𑁄 𑀑𑀪𑀸𑀲𑀦𑀸𑀬𑀺𑀫𑀸𑀢𑀺 𑀇𑀫𑀸 𑀢𑀺𑀲𑁆𑀲𑁄 𑀫𑁂𑀣𑀼𑀦𑀸𑀥𑀺𑀧𑁆𑀧𑀸𑀬𑀧𑁆𑀧𑀓𑀸𑀲𑀦𑀸.

𑁯𑁦𑁮. 𑀲𑀗𑁆𑀖𑀸𑀤𑀺𑀲𑁂𑀲𑁄 𑀏𑀯 𑀲𑀗𑁆𑀖𑀸𑀤𑀺𑀲𑁂𑀲𑀢𑀸.

𑁯𑁧𑁦. 𑀯𑀦𑀧𑁆𑀧𑀢𑀺 𑀦𑀸𑀫 𑀧𑀼𑀧𑁆𑀨𑀁 𑀯𑀺𑀦𑀸 𑀨𑀮𑀦𑁆𑀢𑀻 𑀦𑀺𑀕𑁆𑀭𑁄𑀥𑀉𑀤𑀼𑀫𑁆𑀩𑀭𑀅𑀲𑁆𑀲𑀢𑁆𑀣𑀧𑀺𑀮𑀓𑁆𑀔𑀓𑀸𑀤𑀺𑀭𑀼𑀓𑁆𑀔𑀚𑀸𑀢𑀺, 𑀇𑀥 𑀧𑀦 𑀯𑀦𑀚𑁂𑀝𑁆𑀞𑁄 𑀭𑀓𑁆𑀔𑀺𑀢𑀕𑁄𑀧𑀺𑀢𑀘𑁂𑀢𑀺𑀬𑀭𑀼𑀓𑁆𑀔𑁄 𑀯𑀦𑀧𑁆𑀧𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀣𑀼𑀮𑁆𑀮𑀢𑀸𑀢𑀺 𑀣𑀼𑀮𑁆𑀮𑀘𑁆𑀘𑀬𑀁.

𑁯𑁧𑁨. 𑀯𑀺𑀲𑁆𑀲𑀝𑁆𑀞𑀻𑀢𑀺 𑀯𑀺𑀲𑁆𑀲𑀚𑁆𑀚𑀺 𑀲𑀫𑁆𑀪𑀯𑀥𑀸𑀢𑀼. 𑀙𑀟𑁆𑀟𑀦𑁂𑀢𑀺 𑀉𑀧𑀓𑁆𑀓𑀫𑀺𑀢𑁆𑀯𑀸 𑀫𑁄𑀘𑀦𑁂. ‘‘𑀳𑀭𑀺𑀢𑁂 𑀉𑀘𑁆𑀘𑀸𑀭𑀁 𑀧𑀲𑁆𑀲𑀸𑀯𑀁 𑀙𑀟𑁆𑀟𑀦𑁂’’𑀢𑀺 𑀧𑀤𑀘𑁆𑀙𑁂𑀤𑁄.

𑁯𑁧𑁩. 𑀓𑀺𑀁 𑀧𑀫𑀸𑀡𑀫𑁂𑀢𑀸𑀲𑀦𑁆𑀢𑀺 𑀓𑀺𑀢𑁆𑀢𑀓𑀸.

𑁯𑁧𑁫. 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀦𑀺𑀬𑀸 𑀲𑀤𑁆𑀥𑀺𑀦𑁆𑀢𑀺 𑀏𑀢𑁆𑀣 𑀪𑀺𑀓𑁆𑀔𑀽𑀢𑀺 𑀲𑀸𑀫𑀺𑀯𑀘𑀦𑀧𑁆𑀧𑀲𑀗𑁆𑀕𑁂 𑀧𑀘𑁆𑀘𑀢𑁆𑀢𑀁, 𑀪𑀺𑀓𑁆𑀔𑀼𑀦𑁄𑀢𑀺 𑀅𑀢𑁆𑀣𑁄. 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀯𑀸 𑀯𑀡𑁆𑀡𑀮𑁄𑀧𑁄.

𑁯𑁧𑁮. 𑀤𑀼𑀢𑀺𑀬𑀸𑀬 𑀳𑀢𑁆𑀣𑀧𑀸𑀲𑀓𑀁.

𑁯𑁨𑁨. ‘‘𑀬𑀸𑀯𑀢𑀢𑀺𑀬𑀓𑁂 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄’’𑀢𑀺 (𑀧𑀭𑀺. 𑀅𑀝𑁆𑀞. 𑁪𑁭𑁬 𑀅𑀢𑁆𑀣𑀢𑁄 𑀲𑀫𑀸𑀦𑀁) 𑀧𑀤𑀲𑁆𑀲 𑀦𑀺𑀤𑁆𑀤𑁂𑀲𑁂 ‘‘𑀣𑀼𑀮𑁆𑀮𑀘𑁆𑀘𑀬𑀁 𑀲𑀺𑀬𑀸 𑀲𑀗𑁆𑀖-𑀪𑁂𑀤𑀓𑀲𑁆𑀲𑀸𑀦𑀼𑀯𑀢𑁆𑀢𑀺𑀦𑁄’’𑀢𑀺 𑀧𑀞𑀦𑁆𑀢𑀺. ‘‘𑀢𑀺𑀡𑁆𑀡𑀁 𑀲𑀗𑁆𑀖𑀪𑁂𑀤𑀸𑀦𑀼𑀯𑀢𑁆𑀢𑀸𑀓𑀸𑀦𑀁 𑀓𑁄𑀓𑀸𑀮𑀺𑀓𑀸𑀤𑀻𑀦𑀁 𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀢𑀣𑀸 𑀧𑀸𑀞𑁄 𑀦 𑀕𑀳𑁂𑀢𑀩𑁆𑀩𑁄.

𑁯𑁨𑁩. 𑀬𑀸𑀯𑀢𑀢𑀺𑀬𑀓𑁂𑀢𑀺 𑀢𑀺𑀡𑁆𑀡𑀁 𑀧𑀽𑀭𑀡𑀻 𑀢𑀢𑀺𑀬𑀸, 𑀓𑀫𑁆𑀫𑀯𑀸𑀘𑀸, 𑀬𑀸𑀯𑀢𑀢𑀺𑀬𑀸𑀬 𑀓𑀫𑁆𑀫𑀯𑀸𑀘𑀸𑀬 𑀧𑀭𑀺𑀬𑁄𑀲𑀸𑀦𑁂 𑀆𑀧𑀚𑁆𑀚𑀺𑀢𑀩𑁆𑀩𑀸 𑀆𑀧𑀢𑁆𑀢𑀺 𑀬𑀸𑀯𑀢𑀢𑀺𑀬𑀓𑀸 𑀦𑀸𑀫.

𑁯𑁨𑁬. ‘‘𑀅𑀯𑀲𑁆𑀲𑀼𑀢𑀲𑁆𑀲…𑀧𑁂… 𑀓𑀺𑀜𑁆𑀘𑀻’’𑀢𑀺 𑀇𑀤𑀁 𑀕𑀭𑀼𑀓𑀸𑀧𑀢𑁆𑀢𑀺𑀬𑀸 𑀯𑀢𑁆𑀣𑀼𑀤𑀲𑁆𑀲𑀦𑀁. ‘‘𑀲𑀩𑁆𑀩𑀁 𑀫𑀁𑀲𑀁 𑀅𑀓𑀧𑁆𑀧𑀺𑀬’’𑀦𑁆𑀢𑀺 𑀇𑀤𑀁 𑀣𑀼𑀮𑁆𑀮𑀘𑁆𑀘𑀬𑀤𑀼𑀓𑁆𑀓𑀝𑀸𑀦𑀁 𑀯𑀢𑁆𑀣𑀼𑀤𑀲𑁆𑀲𑀦𑀁.

𑁯𑁨𑁭. ‘‘𑀯𑀺𑀜𑁆𑀜𑀸𑀧𑁂𑀢𑁆𑀯𑀸𑀦…𑀧𑁂… 𑀪𑁄𑀚𑀦𑀫𑁆𑀧𑀺 𑀘𑀸’’𑀢𑀺 𑀇𑀤𑀁 𑀧𑀸𑀝𑀺𑀤𑁂𑀲𑀦𑀻𑀬𑀯𑀢𑁆𑀣𑀼𑀤𑀲𑁆𑀲𑀦𑀁. ‘‘𑀮𑀲𑀼𑀡𑀫𑁆𑀧𑀺 𑀘𑀸’’𑀢𑀺 𑀇𑀤𑀁 𑀧𑀸𑀘𑀺𑀢𑁆𑀢𑀺𑀬𑀯𑀢𑁆𑀣𑀼𑀤𑀲𑁆𑀲𑀦𑀁. ‘‘𑀏𑀓𑀢𑁄 𑀅𑀚𑁆𑀛𑁄𑀳𑀭𑀦𑁆𑀢𑀺𑀬𑀸’’𑀢𑀺 𑀧𑀤𑀘𑁆𑀙𑁂𑀤𑁄.

𑁯𑁩𑁦. 𑀭𑀢𑁆𑀢𑀘𑀺𑀢𑁆𑀢𑁂𑀦 𑀇𑀢𑁆𑀣𑀺𑀬𑀸 𑀅𑀗𑁆𑀕𑀚𑀸𑀢𑀁 𑀑𑀮𑁄𑀓𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸.

𑁯𑁩𑁧. 𑀲𑀫𑁆𑀫𑀸𑀯𑀢𑁆𑀢𑀦𑀸𑀯 𑀲𑀫𑁆𑀫𑀸𑀯𑀢𑁆𑀢𑀦𑀓𑀸. 𑀢𑁂𑀘𑀢𑁆𑀢𑀸𑀮𑀻𑀲 𑀯𑀢𑁆𑀢𑀦𑀸 𑀤𑁆𑀯𑀸𑀲𑀻𑀢𑀺𑀓𑁆𑀔𑀦𑁆𑀥𑀓𑀯𑀢𑁆𑀢𑀸𑀦𑀁 𑀧𑀭𑀺𑀧𑀽𑀭𑀡𑀝𑁆𑀞𑀸𑀦𑁂 𑀤𑀲𑁆𑀲𑀺𑀢𑀸.

𑁯𑁩𑁨. 𑀅𑀤𑀲𑁆𑀲𑀦𑀅𑀧𑀝𑀺𑀓𑀫𑁆𑀫𑁂 𑀆𑀧𑀦𑁆𑀦𑀸𑀧𑀢𑁆𑀢𑀺𑀬𑀸 𑀤𑀼𑀯𑁂 𑀧𑀼𑀕𑁆𑀕𑀮𑀸, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀆𑀧𑀦𑁆𑀦𑀸𑀧𑀢𑁆𑀢𑀺𑀬𑀸 𑀏𑀓𑁄𑀢𑀺 𑀇𑀫𑁂 𑀢𑀬𑁄 𑀉𑀓𑁆𑀔𑀺𑀢𑁆𑀢𑀧𑀼𑀕𑁆𑀕𑀮𑀸.

𑁯𑁩𑁪. 𑀤𑀽𑀲𑀓𑁄𑀢𑀺 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑁄. 𑀓𑀡𑁆𑀝𑀓𑁄𑀢𑀺 𑀓𑀡𑁆𑀝𑀓𑀲𑀸𑀫𑀡𑁂𑀭𑁄.

𑁯𑁩𑁭. 𑀤𑀤𑁂𑀬𑁆𑀬𑀘𑁆𑀘𑁂𑀯𑀫𑀸𑀤𑀺𑀓𑀸𑀢𑀺 𑀜𑀢𑁆𑀢𑀺𑀓𑀸𑀮𑁂 ‘‘𑀲𑀗𑁆𑀖𑁄 𑀤𑀤𑁂𑀬𑁆𑀬𑀸’’𑀢𑀺𑀆𑀤𑀺𑀪𑁂𑀤𑀸 𑀜𑀢𑁆𑀢𑀺𑀓𑀧𑁆𑀧𑀦𑀸, 𑀜𑀢𑁆𑀢𑀺𑀓𑀺𑀭𑀺𑀬𑀸𑀢𑀺 𑀅𑀢𑁆𑀣𑁄. 𑀤𑁂𑀢𑀺 𑀲𑀗𑁆𑀖𑁄 𑀓𑀭𑁄𑀢𑀻𑀢𑀺𑀆𑀤𑀻𑀢𑀺 𑀓𑀫𑁆𑀫𑀯𑀸𑀘𑀸𑀓𑀸𑀮𑁂 ‘‘𑀲𑀗𑁆𑀖𑁄 𑀤𑁂𑀢𑀻’’𑀢𑀺 𑀯𑀸 ‘‘𑀓𑀭𑁄𑀢𑀻’’𑀢𑀺 𑀯𑀸 𑀆𑀤𑀺𑀪𑁂𑀤𑀸 𑀯𑀘𑀦𑀓𑀫𑁆𑀫𑀲𑁆𑀲 𑀅𑀦𑀺𑀝𑁆𑀞𑀺𑀢𑀢𑁆𑀢𑀸 𑀯𑀺𑀧𑁆𑀧𑀓𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀦𑀸𑀫 𑀲𑀺𑀬𑀸.

𑁯𑁩𑁮. 𑀤𑀺𑀦𑁆𑀦𑀁 𑀓𑀢𑀁 𑀧𑀦𑀺𑀘𑁆𑀘𑀸𑀤𑀻𑀢𑀺 𑀓𑀫𑁆𑀫𑀯𑀸𑀘𑀸𑀬 𑀦𑀺𑀝𑁆𑀞𑀺𑀢𑀸𑀬 ‘‘𑀤𑀺𑀦𑁆𑀦𑀁 𑀲𑀗𑁆𑀖𑁂𑀦𑀸’’𑀢𑀺 𑀯𑀸 ‘‘𑀓𑀢𑀁 𑀲𑀗𑁆𑀖𑁂𑀦𑀸’’𑀢𑀺 𑀯𑀸𑀢𑀺𑀆𑀤𑀺𑀯𑀘𑀦𑀁 𑀅𑀢𑀻𑀢𑀓𑀭𑀡𑀁 𑀦𑀸𑀫 𑀲𑀺𑀬𑀸.

𑁯𑁩𑁯. 𑀲𑀗𑁆𑀖𑁂𑀢𑀺 𑀲𑀗𑁆𑀖𑀫𑀚𑁆𑀛𑁂.

‘‘𑀓𑀸𑀭𑀡𑁂𑀳𑀺 𑀧𑀦 𑀤𑁆𑀯𑀻𑀳𑀺, 𑀲𑀗𑁆𑀖𑁄 𑀪𑀺𑀚𑁆𑀚𑀢𑀺 𑀦𑀜𑁆𑀜𑀣𑀸’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 ‘‘𑀧𑀜𑁆𑀘𑀳𑀼𑀧𑀸𑀮𑀺, 𑀆𑀓𑀸𑀭𑁂𑀳𑀺 𑀲𑀗𑁆𑀖𑁄 𑀪𑀺𑀚𑁆𑀚𑀢𑀺. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀓𑀫𑁆𑀫𑁂𑀦, 𑀉𑀤𑁆𑀤𑁂𑀲𑁂𑀦, 𑀯𑁄𑀳𑀭𑀦𑁆𑀢𑁄, 𑀅𑀦𑀼𑀲𑁆𑀲𑀸𑀯𑀦𑁂𑀦, 𑀲𑀮𑀸𑀓𑀕𑁆𑀕𑀸𑀳𑁂𑀦𑀸’’𑀢𑀺 (𑀧𑀭𑀺. 𑁪𑁫𑁮) 𑀯𑀼𑀢𑁆𑀢𑀢𑁆𑀢𑀸, 𑀅𑀝𑁆𑀞𑀓𑀣𑀸𑀬𑀜𑁆𑀘 (𑀧𑀭𑀺. 𑀅𑀝𑁆𑀞. 𑁪𑁫𑁮) ‘‘𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀻’’𑀢𑀺 𑀯𑀘𑀦𑀢𑁄 𑀘 𑀇𑀥 𑀇𑀫𑁂𑀳𑀺 𑀤𑁆𑀯𑀻𑀳𑁂𑀯 𑀓𑀸𑀭𑀡𑁂𑀳𑀺 𑀲𑀗𑁆𑀖𑀪𑁂𑀤𑀓𑀣𑀦𑀁 𑀅𑀬𑀼𑀢𑁆𑀢𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀦𑀸𑀬𑀼𑀢𑁆𑀢𑀁 𑀧𑀼𑀩𑁆𑀩𑀧𑀬𑁄𑀕𑀓𑀸𑀭𑀓𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸. 𑀢𑀣𑀸 𑀳𑀺 𑀅𑀝𑁆𑀞𑀓𑀣𑀸𑀬𑀁 𑁋

‘‘𑀓𑀫𑁆𑀫𑁂𑀦𑀸𑀢𑀺 𑀅𑀧𑀮𑁄𑀓𑀦𑀸𑀤𑀻𑀲𑀼 𑀘𑀢𑀽𑀲𑀼 𑀓𑀫𑁆𑀫𑁂𑀲𑀼 𑀅𑀜𑁆𑀜𑀢𑀭𑁂𑀦 𑀓𑀫𑁆𑀫𑁂𑀦. 𑀉𑀤𑁆𑀤𑁂𑀲𑁂𑀦𑀸𑀢𑀺 𑀧𑀜𑁆𑀘𑀲𑀼 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁂𑀲𑀼 𑀅𑀜𑁆𑀜𑀢𑀭𑁂𑀦 𑀉𑀤𑁆𑀤𑁂𑀲𑁂𑀦. 𑀯𑁄𑀳𑀭𑀦𑁆𑀢𑁄𑀢𑀺 𑀓𑀣𑀬𑀦𑁆𑀢𑁄, 𑀢𑀸𑀳𑀺 𑀢𑀸𑀳𑀺 𑀉𑀧𑀧𑀢𑁆𑀢𑀻𑀳𑀺 ‘𑀅𑀥𑀫𑁆𑀫𑀁 𑀥𑀫𑁆𑀫𑁄’𑀢𑀺𑀆𑀤𑀻𑀦𑀺 𑀅𑀝𑁆𑀞𑀸𑀭𑀲 𑀪𑁂𑀤𑀓𑀭𑀯𑀢𑁆𑀣𑀽𑀦𑀺 𑀤𑀻𑀧𑁂𑀦𑁆𑀢𑁄. 𑀅𑀦𑀼𑀲𑁆𑀲𑀸𑀯𑀦𑁂𑀦𑀸𑀢𑀺 ‘𑀦𑀦𑀼 𑀢𑀼𑀫𑁆𑀳𑁂 𑀚𑀸𑀦𑀸𑀣 𑀫𑀬𑁆𑀳𑀁 𑀉𑀘𑁆𑀘𑀸𑀓𑀼𑀮𑀸 𑀧𑀩𑁆𑀩𑀚𑀺𑀢𑀪𑀸𑀯𑀁, 𑀩𑀳𑀼𑀲𑁆𑀲𑀼𑀢𑀪𑀸𑀯𑀜𑁆𑀘, 𑀫𑀸𑀤𑀺𑀲𑁄 𑀦𑀸𑀫 𑀉𑀤𑁆𑀥𑀫𑁆𑀫𑀁 𑀉𑀩𑁆𑀩𑀺𑀦𑀬𑀁 𑀲𑀢𑁆𑀣𑀼𑀲𑀸𑀲𑀦𑀁 𑀓𑀭𑁂𑀬𑁆𑀬𑀸𑀢𑀺 𑀘𑀺𑀢𑁆𑀢𑁂 𑀉𑀧𑁆𑀧𑀸𑀤𑁂𑀢𑀼𑀁 𑀢𑀼𑀫𑁆𑀳𑀸𑀓𑀁 𑀬𑀼𑀢𑁆𑀢𑀁, 𑀓𑀺𑀁 𑀫𑀬𑁆𑀳𑀁 𑀅𑀯𑀻𑀘𑀺 𑀦𑀻𑀮𑀼𑀧𑁆𑀧𑀮𑀯𑀦𑀫𑀺𑀯 𑀲𑀻𑀢𑀮𑁄, 𑀓𑀺𑀫𑀳𑀁 𑀅𑀧𑀸𑀬𑀢𑁄 𑀦 𑀪𑀸𑀬𑀸𑀫𑀻’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀓𑀡𑁆𑀡𑀫𑀽𑀮𑁂 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀅𑀦𑀼𑀲𑁆𑀲𑀸𑀯𑀦𑁂𑀦. 𑀲𑀮𑀸𑀓𑀕𑁆𑀕𑀸𑀳𑁂𑀦𑀸𑀢𑀺 𑀏𑀯𑀁 𑀅𑀦𑀼𑀲𑁆𑀲𑀸𑀯𑁂𑀢𑁆𑀯𑀸 𑀢𑁂𑀲𑀁 𑀘𑀺𑀢𑁆𑀢𑀁 𑀉𑀧𑀢𑁆𑀣𑀫𑁆𑀪𑁂𑀢𑁆𑀯𑀸 𑀅𑀦𑀺𑀯𑀢𑁆𑀢𑀺𑀥𑀫𑁆𑀫𑁂 𑀓𑀢𑁆𑀯𑀸 ‘𑀕𑀡𑁆𑀳𑀣 𑀇𑀫𑀁 𑀲𑀮𑀸𑀓’𑀦𑁆𑀢𑀺 𑀲𑀮𑀸𑀓𑀕𑁆𑀕𑀸𑀳𑁂𑀦.

‘‘𑀏𑀢𑁆𑀣 𑀘 𑀓𑀫𑁆𑀫𑀫𑁂𑀯, 𑀉𑀤𑁆𑀤𑁂𑀲𑁄 𑀯𑀸 𑀧𑀫𑀸𑀡𑀁, 𑀯𑁄𑀳𑀸𑀭𑀸𑀦𑀼𑀲𑁆𑀲𑀸𑀯𑀦𑀲𑀮𑀸𑀓𑀕𑁆𑀕𑀸𑀳𑀸 𑀧𑀦 𑀧𑀼𑀩𑁆𑀩𑀪𑀸𑀕𑀸. 𑀅𑀝𑁆𑀞𑀸𑀭𑀲𑀯𑀢𑁆𑀣𑀼𑀤𑀻𑀧𑀦𑀯𑀲𑁂𑀦 𑀳𑀺 𑀯𑁄𑀳𑀭𑀦𑁆𑀢𑁂 𑀢𑀢𑁆𑀣 𑀭𑀼𑀘𑀺𑀚𑀦𑀦𑀢𑁆𑀣𑀁 𑀅𑀦𑀼𑀲𑁆𑀲𑀸𑀯𑁂𑀢𑁆𑀯𑀸 𑀲𑀮𑀸𑀓𑀸𑀬 𑀕𑀳𑀺𑀢𑀸𑀬𑀧𑀺 𑀅𑀪𑀺𑀦𑁆𑀦𑁄𑀯 𑀳𑁄𑀢𑀺 𑀲𑀗𑁆𑀖𑁄. 𑀬𑀤𑀸 𑀧𑀦 𑀏𑀯𑀁 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑁂 𑀯𑀸 𑀲𑀮𑀸𑀓𑀁 𑀕𑀸𑀳𑁂𑀢𑁆𑀯𑀸 𑀆𑀯𑁂𑀡𑀺𑀓𑀁 𑀓𑀫𑁆𑀫𑀁 𑀯𑀸 𑀉𑀤𑁆𑀤𑁂𑀲𑀁 𑀯𑀸 𑀓𑀭𑁄𑀢𑀺, 𑀢𑀤𑀸 𑀲𑀗𑁆𑀖𑁄 𑀪𑀺𑀦𑁆𑀦𑁄 𑀦𑀸𑀫 𑀳𑁄𑀢𑀻’’𑀢𑀺 (𑀧𑀭𑀺. 𑀅𑀝𑁆𑀞. 𑁪𑁫𑁮) 𑁋

𑀯𑀼𑀢𑁆𑀢𑀢𑁆𑀢𑀸 𑀲𑀮𑀸𑀓𑀕𑁆𑀕𑀸𑀳𑀓𑀫𑁆𑀫𑀸𑀦𑀺 𑀤𑁆𑀯𑁂 𑀧𑀥𑀸𑀦𑀓𑀸𑀭𑀡𑀸𑀦𑀻𑀢𑀺 𑀇𑀥 𑀢𑀸𑀦𑁂𑀯 𑀤𑀲𑁆𑀲𑀺𑀢𑀸𑀦𑀺.

𑀦𑀦𑀼 𑀘 𑀲𑀮𑀸𑀓𑀕𑁆𑀕𑀸𑀳𑁄𑀧𑀺 𑀲𑀗𑁆𑀖𑀪𑁂𑀤𑀲𑁆𑀲 𑀧𑀼𑀩𑁆𑀩𑀪𑀸𑀕𑁄 𑀯𑀼𑀢𑁆𑀢𑁄, 𑀉𑀤𑁆𑀤𑁂𑀲𑀓𑀫𑁆𑀫𑀸𑀦𑁂𑀯 𑀧𑀥𑀸𑀦𑀪𑀸𑀯𑁂𑀦 𑀯𑀼𑀢𑁆𑀢𑀸𑀦𑀺, 𑀢𑀲𑁆𑀫𑀸 𑀓𑀣𑀫𑀲𑁆𑀲 𑀲𑀮𑀸𑀓𑀕𑁆𑀕𑀸𑀳𑀲𑁆𑀲 𑀧𑀥𑀸𑀦𑀓𑀸𑀭𑀡𑀪𑀸𑀯𑁄𑀢𑀺? 𑀯𑀼𑀘𑁆𑀘𑀢𑁂 𑁋 𑀉𑀤𑁆𑀤𑁂𑀲𑀓𑀫𑁆𑀫𑀸𑀦𑀺𑀧𑀺 𑀲𑀮𑀸𑀓𑀕𑁆𑀕𑀸𑀳𑁂 𑀲𑀺𑀤𑁆𑀥𑁂 𑀅𑀯𑀲𑁆𑀲𑀫𑁆𑀪𑀯𑀦𑀢𑁄 𑀅𑀢𑁆𑀣𑀲𑀸𑀥𑀦𑀧𑀬𑁄𑀕𑁂𑀦 𑀯𑀺𑀦𑀸 𑀅𑀲𑀺𑀤𑁆𑀥𑀸𑀦𑁂𑀯 𑀳𑁄𑀦𑁆𑀢𑀻𑀢𑀺 𑀲𑁄 𑀧𑀥𑀸𑀦𑀪𑀸𑀯𑁂𑀦 𑀇𑀥 𑀕𑀳𑀺𑀢𑁄, 𑀉𑀤𑁆𑀤𑁂𑀲𑁄 𑀧𑀦 𑀧𑀜𑁆𑀜𑀢𑁆𑀢𑀓𑀫𑁆𑀫𑀧𑀼𑀩𑁆𑀩𑀗𑁆𑀕𑀫𑀢𑁆𑀢𑀸 𑀓𑀫𑁆𑀫𑁂𑀦𑁂𑀯 𑀲𑀗𑁆𑀕𑀳𑀺𑀢𑁄𑀢𑀺 𑀇𑀥 𑀯𑀺𑀲𑀼𑀁 𑀦 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑁯𑁪𑁧. 𑀧𑀬𑀼𑀢𑁆𑀢𑀸𑀬𑀼𑀢𑁆𑀢𑀯𑀸𑀘𑀸𑀬𑀸𑀢𑀺 𑀧𑀘𑁆𑀘𑀬𑀼𑀧𑁆𑀧𑀸𑀤𑀦𑀢𑁆𑀣𑀸𑀬 𑀧𑀬𑀼𑀢𑁆𑀢𑀸 𑀘 𑀲𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀪𑀸𑀯𑀲𑁆𑀲 𑀅𑀬𑀼𑀢𑁆𑀢𑀸 𑀅𑀦𑀦𑀼𑀭𑀽𑀧𑀸 𑀘𑀸𑀢𑀺 𑀧𑀬𑀼𑀢𑁆𑀢𑀸𑀬𑀼𑀢𑁆𑀢𑀸, 𑀲𑀸𑀬𑁂𑀯 𑀯𑀸𑀘𑀸𑀢𑀺 𑀧𑀬𑀼𑀢𑁆𑀢𑀸𑀬𑀼𑀢𑁆𑀢𑀯𑀸𑀘𑀸, 𑀢𑀸𑀬.

𑁯𑁪𑁪. 𑀬𑀸 𑀪𑀺𑀓𑁆𑀔𑀼𑀦𑀻 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀢𑀲𑁆𑀲𑀸 𑀘 𑀧𑀸𑀝𑀺𑀤𑁂𑀲𑀦𑀻𑀬𑀁 𑀲𑀺𑀬𑀸𑀢𑀺 𑀬𑁄𑀚𑀦𑀸.

𑁯𑁪𑁫. 𑀅𑀦𑀸𑀫𑀬𑁄𑀢𑀺 𑀅𑀕𑀺𑀮𑀸𑀦𑁄.

𑁯𑁪𑁬. ‘‘𑀤𑀲𑀲𑀢𑀸𑀦𑀻’’𑀢𑀺𑀆𑀤𑀺𑀕𑀸𑀣𑀸𑀬 𑀭𑀢𑁆𑀢𑀻𑀦𑀦𑁆𑀢𑀺 𑀏𑀢𑁆𑀣 ‘‘𑀲𑀢’’𑀦𑁆𑀢𑀺 𑀲𑁂𑀲𑁄. 𑀙𑀸𑀤𑀦𑀓𑀺𑀭𑀺𑀬𑀸𑀬 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁. 𑀤𑀲𑀲𑀢𑀸𑀦𑀺 𑀆𑀧𑀢𑁆𑀢𑀺𑀬𑁄 𑀭𑀢𑁆𑀢𑀻𑀦𑀁 𑀲𑀢𑀁 𑀙𑀸𑀤𑁂𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀏𑀯𑀁 𑀓𑀢𑁆𑀢𑀩𑁆𑀩𑀬𑁄𑀚𑀦𑀸𑀬𑀁 𑁋

‘‘𑀤𑀲 𑀲𑀢𑀁 𑀭𑀢𑁆𑀢𑀺𑀲𑀢𑀁, 𑀆𑀧𑀢𑁆𑀢𑀺𑀬𑁄 𑀙𑀸𑀤𑀬𑀺𑀢𑁆𑀯𑀸𑀦;

𑀤𑀲 𑀭𑀢𑁆𑀢𑀺𑀬𑁄 𑀯𑀲𑀺𑀢𑁆𑀯𑀸𑀦, 𑀫𑀼𑀘𑁆𑀘𑁂𑀬𑁆𑀬 𑀧𑀸𑀭𑀺𑀯𑀸𑀲𑀺𑀓𑁄’’𑀢𑀺. (𑀧𑀭𑀺. 𑁪𑁭𑁭) 𑁋

𑀅𑀬𑀁 𑀧𑀭𑀺𑀯𑀸𑀭𑀕𑀸𑀣𑀸𑀧𑀫𑀸𑀡𑀁. 𑀏𑀓𑀤𑀺𑀯𑀲𑀁 𑀲𑀢𑀁𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀢𑁆𑀯𑀸 𑀤𑀲𑀤𑀺𑀯𑀲𑁂 𑀙𑀸𑀤𑀦𑀯𑀲𑁂𑀦 𑀲𑀢𑀁𑀤𑀺𑀯𑀲𑁂 𑀲𑀳𑀲𑁆𑀲𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀬𑁄 𑀙𑀸𑀤𑀬𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑁄 𑀤𑀲𑀤𑀺𑀯𑀲𑁂 𑀲𑀢𑀁 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀢𑁆𑀯𑀸 𑀤𑀲𑀤𑀺𑀯𑀲𑁂 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀢𑁂𑀦 𑀭𑀢𑁆𑀢𑀺𑀲𑀢𑀁 𑀆𑀧𑀢𑁆𑀢𑀺𑀲𑀳𑀲𑁆𑀲𑀁 𑀧𑀝𑀺𑀘𑁆𑀙𑀸𑀤𑀺𑀢𑀁 𑀳𑁄𑀢𑀻𑀢𑀺. 𑀤𑀲 𑀭𑀢𑁆𑀢𑀺𑀬𑁄 𑀯𑀲𑀺𑀢𑁆𑀯𑀸𑀦𑀸𑀢𑀺 ‘‘𑀲𑀩𑁆𑀩𑀸𑀯 𑀢𑀸 𑀆𑀧𑀢𑁆𑀢𑀺𑀬𑁄 𑀤𑀲𑀸𑀳𑀧𑀝𑀺𑀘𑁆𑀙𑀦𑁆𑀦𑀸’’𑀢𑀺 𑀧𑀭𑀺𑀯𑀸𑀲𑀁 𑀬𑀸𑀘𑀺𑀢𑁆𑀯𑀸 𑀤𑀲 𑀭𑀢𑁆𑀢𑀺𑀬𑁄 𑀯𑀲𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀫𑀼𑀘𑁆𑀘𑁂𑀬𑁆𑀬 𑀧𑀸𑀭𑀺𑀯𑀸𑀲𑀺𑀓𑁄𑀢𑀺 𑀧𑀭𑀺𑀯𑀸𑀲𑀁 𑀯𑀲𑀦𑁆𑀢𑁄 𑀪𑀺𑀓𑁆𑀔𑀼 𑀅𑀢𑁆𑀢𑀦𑀸 𑀯𑀲𑀺𑀢𑀩𑁆𑀩𑀧𑀭𑀺𑀯𑀸𑀲𑀢𑁄 𑀫𑀼𑀘𑁆𑀘𑁂𑀬𑁆𑀬, 𑀫𑀼𑀢𑁆𑀢𑁄 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑁯𑁪𑁭. 𑀧𑀸𑀭𑀸𑀚𑀺𑀓𑀸𑀦𑀺 𑀅𑀝𑁆𑀞𑁂𑀯𑀸𑀢𑀺 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦. 𑀢𑁂𑀯𑀻𑀲 𑀕𑀭𑀼𑀓𑀸𑀢𑀺 𑀪𑀺𑀓𑁆𑀔𑀽𑀳𑀺 𑀅𑀲𑀸𑀥𑀸𑀭𑀡𑀸 𑀪𑀺𑀓𑁆𑀔𑀼𑀦𑀻𑀦𑀁 𑀤𑀲, 𑀪𑀺𑀓𑁆𑀔𑀼𑀦𑀻𑀳𑀺 𑀅𑀲𑀸𑀥𑀸𑀭𑀡𑀸 𑀪𑀺𑀓𑁆𑀔𑀽𑀦𑀁 𑀙, 𑀉𑀪𑀺𑀦𑁆𑀦𑀁 𑀲𑀸𑀥𑀸𑀭𑀡𑀸 𑀲𑀢𑁆𑀢𑀸𑀢𑀺 𑀏𑀯𑀁 𑀢𑁂𑀯𑀻𑀲 𑀲𑀗𑁆𑀖𑀸𑀤𑀺𑀲𑁂𑀲𑀸.

𑁯𑁪𑁮. 𑀯𑀼𑀢𑁆𑀢𑀸𑀦𑀻𑀢𑀺 𑀬𑀣𑀸𑀯𑀼𑀢𑁆𑀢𑀸𑀦𑀺 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺. 𑀤𑁆𑀯𑁂𑀘𑀢𑁆𑀢𑀸𑀮𑀻𑀲 𑀳𑁄𑀦𑁆𑀢𑀻𑀢𑀺 𑀪𑀺𑀓𑁆𑀔𑀼𑀯𑀺𑀪𑀗𑁆𑀕𑀸𑀕𑀢𑀸 𑀢𑀺𑀁𑀲, 𑀪𑀺𑀓𑁆𑀔𑀽𑀳𑀺 𑀅𑀲𑀸𑀥𑀸𑀭𑀡𑀸 𑀪𑀺𑀓𑁆𑀔𑀼𑀦𑀻𑀦𑀁 𑀆𑀤𑀺𑀢𑁄 𑀤𑁆𑀯𑀸𑀤𑀲 𑀘𑀸𑀢𑀺 𑀤𑁆𑀯𑀸𑀘𑀢𑁆𑀢𑀸𑀮𑀻𑀲 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺 𑀳𑁄𑀦𑁆𑀢𑀺. 𑀅𑀝𑁆𑀞𑀸𑀲𑀻𑀢𑀺𑀲𑀢𑀁 𑀧𑀸𑀘𑀺𑀢𑁆𑀢𑀺𑀬𑀸 𑀧𑀼𑀩𑁆𑀩𑁂 𑀤𑀲𑁆𑀲𑀺𑀢𑀸𑀯.

𑁯𑁪𑁯. 𑀲𑀼𑀲𑀺𑀓𑁆𑀔𑁂𑀦𑀸𑀢𑀺 𑀲𑀼𑀝𑁆𑀞𑀼 𑀲𑀺𑀓𑁆𑀔𑀺𑀢𑀅𑀥𑀺𑀲𑀻𑀮𑀸𑀤𑀺𑀢𑀺𑀯𑀺𑀥𑀲𑀺𑀓𑁆𑀔𑁂𑀦 𑀪𑀕𑀯𑀢𑀸.

𑁯𑁫𑁦. 𑀲𑀼𑀧𑀜𑁆𑀜𑁂𑀦𑀸𑀢𑀺 𑀲𑁄𑀪𑀡𑀸 𑀤𑀲𑀩𑀮𑀘𑀢𑀼𑀯𑁂𑀲𑀸𑀭𑀚𑁆𑀚𑀙𑀅𑀲𑀸𑀥𑀸𑀭𑀡𑀸𑀤𑀬𑁄 𑀧𑀜𑁆𑀜𑀸 𑀬𑀲𑁆𑀲 𑀲𑁄 𑀲𑀼𑀧𑀜𑁆𑀜𑁄, 𑀢𑁂𑀦. 𑀬𑀲𑀲𑁆𑀲𑀺𑀦𑀸𑀢𑀺 𑀅𑀝𑁆𑀞𑀅𑀭𑀺𑀬𑀧𑀼𑀕𑁆𑀕𑀮𑀲𑀫𑀽𑀳𑀲𑀗𑁆𑀔𑀸𑀢𑀧𑀭𑀺𑀯𑀸𑀭𑀬𑀲𑀸 𑀘 𑀲𑀩𑁆𑀩𑀮𑁄𑀓𑀩𑁆𑀬𑀸𑀧𑀓𑀕𑀼𑀡𑀖𑁄𑀲𑀲𑀗𑁆𑀔𑀸𑀢𑀓𑀺𑀢𑁆𑀢𑀺𑀬𑀲𑀸 𑀘 𑀢𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀬𑀲𑀲𑁆𑀲𑀺𑀦𑀸. 𑀅𑀟𑁆𑀠𑀼𑀟𑁆𑀠𑀸𑀦𑀺 𑀲𑀢𑀸𑀦𑀺 𑀪𑀯𑀦𑁆𑀢𑀻𑀢𑀺 𑀬𑀣𑀸𑀤𑀲𑁆𑀲𑀺𑀢𑀕𑀡𑀦𑀸𑀬 𑀧𑀺𑀡𑁆𑀟𑀯𑀲𑁂𑀦 𑀧𑀜𑁆𑀜𑀸𑀲𑀸𑀥𑀺𑀓𑀸𑀦𑀺 𑀢𑀻𑀡𑀺 𑀲𑀢𑀸𑀦𑀺 𑀪𑀯𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀼𑀧𑀜𑁆𑀜𑁂𑀦 𑀬𑀲𑀲𑁆𑀲𑀺𑀦𑀸 𑀕𑁄𑀢𑀫𑁂𑀦 𑀧𑀜𑁆𑀜𑀢𑁆𑀢𑀸𑀦𑀺 𑀲𑀩𑁆𑀩𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀅𑀟𑁆𑀠𑀼𑀟𑁆𑀠𑀸𑀦𑀺 𑀲𑀢𑀸𑀦𑀺 𑀪𑀯𑀦𑁆𑀢𑀻𑀢𑀺 𑀬𑁄𑀚𑀦𑀸.

𑁯𑁫𑁧. 𑀏𑀢𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀬𑁄 𑀲𑀸𑀭𑀪𑀽𑀢𑁄 𑀯𑀺𑀦𑀺𑀘𑁆𑀙𑀬𑁄 𑀯𑀢𑁆𑀢𑀩𑁆𑀩𑁄, 𑀲𑁄 𑀲𑀓𑀮𑁄 𑀫𑀬𑀸 𑀲𑀫𑀸𑀲𑁂𑀦 𑀲𑀩𑁆𑀩𑀣𑀸 𑀲𑀩𑁆𑀩𑀸𑀓𑀸𑀭𑁂𑀦 𑀯𑀼𑀢𑁆𑀢𑁄𑀢𑀺 𑀬𑁄𑀚𑀦𑀸.

𑁯𑁫𑁨. 𑀇𑀤𑀁 𑀉𑀢𑁆𑀢𑀭𑀁 𑀦𑀸𑀫 𑀧𑀓𑀭𑀡𑀁.

𑁯𑁫𑁩. 𑀢𑀲𑁆𑀫𑀸𑀢𑀺 𑀫𑀬𑀸 𑀯𑀺𑀘𑀸𑀭𑁂𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸𑀯. 𑀅𑀢𑁆𑀣𑁂𑀢𑀺 𑀯𑀘𑀦𑀢𑁆𑀣𑀪𑀸𑀯𑀢𑁆𑀣𑀸𑀤𑀺𑀪𑁂𑀤𑁂 𑀅𑀢𑁆𑀣𑁂 𑀯𑀸. 𑀅𑀓𑁆𑀔𑀭𑀩𑀦𑁆𑀥𑁂 𑀯𑀸𑀢𑀺 𑀅𑀓𑁆𑀔𑀭𑀲𑀗𑁆𑀔𑀸𑀢𑀧𑀤𑀩𑀦𑁆𑀥𑁂 𑀯𑀸. 𑀯𑀺𑀜𑁆𑀜𑀸𑀲𑀲𑁆𑀲 𑀓𑀫𑁂𑀧𑀺 𑀯𑀸𑀢𑀺 𑀉𑀤𑁆𑀤𑁂𑀲𑀯𑀲𑁂𑀦 𑀕𑀦𑁆𑀣𑀦𑀺𑀓𑁆𑀔𑁂𑀧𑀲𑁆𑀲 𑀓𑀫𑁂𑀧𑀺. 𑀓𑀗𑁆𑀔𑀸 𑀦 𑀓𑀸𑀢𑀩𑁆𑀩𑀸𑀢𑀺 ‘‘𑀬𑀣𑀸𑀅𑀥𑀺𑀧𑁆𑀧𑁂𑀢𑀲𑁆𑀲 𑀇𑀤𑀁 𑀯𑀸𑀘𑀓𑀁 𑀦𑀼 𑀔𑁄, 𑀅𑀯𑀸𑀘𑀓’’𑀦𑁆𑀢𑀺 𑀯𑀸 ‘‘𑀇𑀤𑀫𑀬𑀼𑀢𑁆𑀢𑀁 𑀦𑀼 𑀔𑁄, 𑀬𑀼𑀢𑁆𑀢’’𑀦𑁆𑀢𑀺 𑀯𑀸 ‘‘𑀇𑀤𑀫𑀥𑀺𑀓𑀁 𑀦𑀼 𑀔𑁄, 𑀊𑀦’’𑀦𑁆𑀢𑀺 𑀯𑀸 ‘‘𑀇𑀤𑀫𑀖𑀝𑁆𑀝𑀺𑀢𑀓𑁆𑀓𑀫𑀁 𑀦𑀼 𑀔𑁄, 𑀖𑀝𑁆𑀝𑀺𑀢𑀓𑁆𑀓𑀫’’𑀦𑁆𑀢𑀺 𑀯𑀸 ‘‘𑀇𑀤𑀁 𑀯𑀺𑀭𑀼𑀤𑁆𑀥𑀲𑀫𑀬𑀁 𑀦𑀼 𑀔𑁄, 𑀅𑀯𑀺𑀭𑀼𑀤𑁆𑀥𑀲𑀫𑀬’’𑀦𑁆𑀢𑀺 𑀯𑀸 ‘‘𑀇𑀤𑀁 𑀤𑀼𑀭𑀼𑀢𑁆𑀢𑀁 𑀦𑀼 𑀔𑁄, 𑀲𑀼𑀯𑀼𑀢𑁆𑀢’’𑀦𑁆𑀢𑀺 𑀯𑀸 ‘‘𑀇𑀤𑀁 𑀲𑀢𑁆𑀣𑀓𑀁 𑀦𑀼 𑀔𑁄, 𑀦𑀺𑀭𑀢𑁆𑀣𑀓’’𑀦𑁆𑀢𑀺 𑀯𑀸 𑀓𑀗𑁆𑀔𑀸 𑀯𑀺𑀫𑀢𑀺 𑀬𑁂𑀦 𑀓𑁂𑀦𑀘𑀺 𑀦 𑀓𑀸𑀢𑀩𑁆𑀩𑀸. 𑀩𑀳𑀼𑀫𑀸𑀦𑀢𑀸𑀢𑀺 ‘‘𑀯𑀺𑀦𑀬𑁄 𑀲𑀁𑀯𑀭𑀢𑁆𑀣𑀸𑀬𑀸’’𑀢𑀺𑀆𑀤𑀺𑀦𑀸 (𑀧𑀭𑀺. 𑁩𑁬𑁬) 𑀦𑀺𑀤𑁆𑀤𑀺𑀝𑁆𑀞𑀧𑀬𑁄𑀚𑀦𑀧𑀭𑀫𑁆𑀧𑀭𑀸𑀬 𑀫𑀽𑀮𑀓𑀸𑀭𑀡𑀢𑁆𑀢𑀸 𑀫𑀳𑀢𑀻 𑀲𑀫𑁆𑀫𑀸𑀦𑀸 𑀓𑀸𑀢𑀩𑁆𑀩𑀸𑀢𑀺 𑀅𑀢𑁆𑀣𑁄.

𑁯𑁫𑁪. 𑀬𑁄 𑀪𑀺𑀓𑁆𑀔𑀼 𑀲𑀉𑀢𑁆𑀢𑀭𑀁 𑀉𑀢𑁆𑀢𑀭𑀧𑀓𑀭𑀡𑁂𑀦 𑀲𑀳𑀺𑀢𑀁 𑀯𑀺𑀦𑀬𑀲𑁆𑀲𑀯𑀺𑀦𑀺𑀘𑁆𑀙𑀬𑀁 𑀦𑀸𑀫 𑀧𑀓𑀭𑀡𑀁 𑀚𑀸𑀦𑀸𑀢𑀺 𑀥𑀫𑁆𑀫𑀢𑁄 𑀘𑁂𑀯 𑀅𑀢𑁆𑀣𑀢𑁄 𑀘 𑀯𑀺𑀦𑀺𑀘𑁆𑀙𑀬𑀢𑁄 𑀘 𑀲𑀩𑁆𑀩𑀣𑀸 𑀅𑀯𑀩𑀼𑀚𑁆𑀛𑀢𑀺, 𑀲𑁄 𑀪𑀺𑀓𑁆𑀔𑀼 𑀅𑀢𑁆𑀢𑀦𑀸 𑀲𑀺𑀓𑁆𑀔𑀺𑀢𑀩𑁆𑀩𑀸𑀬 𑀲𑀺𑀓𑁆𑀔𑀸𑀬 𑀲𑀩𑁆𑀩𑀲𑁄 𑀯𑀺𑀜𑁆𑀜𑀸𑀢𑀢𑁆𑀢𑀸 𑀲𑀺𑀓𑁆𑀔𑀸𑀧𑀓𑁂𑀦 𑀆𑀘𑀭𑀺𑀬𑁂𑀦 𑀯𑀺𑀦𑀸𑀧𑀺 𑀲𑀺𑀓𑁆𑀔𑀺𑀢𑀼𑀁 𑀲𑀫𑀢𑁆𑀣𑁄𑀢𑀺. 𑀦𑀺𑀲𑁆𑀲𑀬𑀁 𑀯𑀺𑀫𑀼𑀜𑁆𑀘𑀺𑀢𑁆𑀯𑀸𑀢𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂 𑀦𑀺𑀲𑁆𑀲𑀸𑀬 𑀯𑀸𑀲𑀁 𑀫𑀼𑀜𑁆𑀘𑀺𑀢𑁆𑀯𑀸. 𑀬𑀣𑀸𑀓𑀸𑀫𑀗𑁆𑀕𑀢𑁄 𑀲𑀺𑀬𑀸𑀢𑀺 𑀬𑀸𑀤𑀺𑀲𑀸 𑀬𑀸𑀤𑀺𑀲𑀸 𑀅𑀢𑁆𑀢𑀦𑀸 𑀕𑀸𑀫𑀺𑀢𑀸, 𑀢𑀢𑁆𑀣 𑀢𑀢𑁆𑀣 𑀕𑀫𑀦𑀸𑀭𑀳𑁄 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑁯𑁫𑁫. 𑀦𑀺𑀲𑁆𑀲𑀬𑀁 𑀤𑀸𑀢𑀼𑀓𑀸𑀫𑁂𑀦. 𑀲𑀳 𑀯𑀺𑀪𑀗𑁆𑀕𑁂𑀦 𑀲𑀯𑀺𑀪𑀗𑁆𑀕𑀁. 𑀲𑀳 𑀫𑀸𑀢𑀺𑀓𑀸𑀬 𑀲𑀫𑀸𑀢𑀺𑀓𑀁. 𑀇𑀤𑀁 𑀲𑀉𑀢𑁆𑀢𑀭𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀧𑀓𑀭𑀡𑀁 𑀲𑀼𑀝𑁆𑀞𑀼 𑀯𑀸𑀘𑀼𑀕𑁆𑀕𑀢𑀁 𑀓𑀢𑁆𑀯𑀸 𑀕𑀦𑁆𑀣𑀢𑁄 𑀲𑀼𑀝𑁆𑀞𑀼 𑀧𑀕𑀼𑀡𑀁 𑀯𑀸𑀘𑀼𑀕𑁆𑀕𑀢𑀁 𑀓𑀢𑁆𑀯𑀸 𑀅𑀢𑁆𑀣𑀢𑁄, 𑀯𑀺𑀦𑀺𑀘𑁆𑀙𑀬𑀢𑁄 𑀘 𑀲𑀫𑁆𑀫𑀸 𑀚𑀸𑀦𑀺𑀢𑁆𑀯𑀸 𑀏𑀯𑀁 𑀤𑀸𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸.

𑁯𑁫𑁬-𑁭. 𑀬𑁄 𑀪𑀺𑀓𑁆𑀔𑀼 𑀇𑀫𑀁 𑀲𑀉𑀢𑁆𑀢𑀭𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀧𑀓𑀭𑀡𑀁 𑀯𑀸𑀘𑀸𑀬 𑀧𑀞𑀢𑀺, 𑀫𑀦𑀲𑀸 𑀘𑀺𑀦𑁆𑀢𑁂𑀢𑀺, 𑀅𑀜𑁆𑀜𑁂𑀳𑀺 𑀯𑀼𑀘𑁆𑀘𑀫𑀸𑀦𑀁 𑀲𑀼𑀡𑀸𑀢𑀺, 𑀅𑀢𑁆𑀣𑀁 𑀧𑀭𑀺𑀧𑀼𑀘𑁆𑀙𑀢𑀺, 𑀧𑀭𑀁 𑀯𑀸𑀘𑁂𑀢𑀺, 𑀦𑀺𑀘𑁆𑀘𑀁 𑀅𑀢𑁆𑀣𑀁 𑀉𑀧𑀧𑀭𑀺𑀓𑁆𑀔𑀢𑀺 𑀬𑀣𑀸𑀧𑀭𑀺𑀧𑀼𑀘𑁆𑀙𑀺𑀢𑀫𑀢𑁆𑀣𑀁 𑀳𑁂𑀢𑀼𑀉𑀤𑀸𑀳𑀭𑀡𑀧𑀯𑀢𑁆𑀢𑀺𑀯𑀲𑁂𑀦 𑀉𑀧𑀕𑀦𑁆𑀢𑁆𑀯𑀸 𑀲𑀫𑀦𑁆𑀢𑀢𑁄 𑀇𑀓𑁆𑀔𑀢𑀺 𑀧𑀜𑁆𑀜𑀸𑀬 𑀦𑀺𑀬𑀫𑁂𑀢𑀺 𑀯𑀯𑀢𑁆𑀣𑀧𑁂𑀢𑀺, 𑀢𑀲𑁆𑀲 𑀧𑀦 𑀪𑀺𑀓𑁆𑀔𑀼𑀲𑁆𑀲 𑀯𑀺𑀦𑀬𑀦𑀺𑀲𑁆𑀲𑀺𑀢𑀸 𑀲𑀩𑁆𑀩𑁂𑀯 𑀅𑀢𑁆𑀣𑀸 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀸𑀤𑀺𑀧𑀪𑁂𑀤𑀸 𑀲𑀩𑁆𑀩𑁂 𑀅𑀢𑁆𑀣𑀸 𑀳𑀢𑁆𑀣𑁂 𑀆𑀫𑀮𑀓𑀁 𑀯𑀺𑀬 𑀓𑀭𑀢𑀮𑁂 𑀅𑀫𑀮𑀫𑀡𑀺𑀭𑀢𑀦𑀁 𑀯𑀺𑀬 𑀉𑀧𑀝𑁆𑀞𑀳𑀦𑁆𑀢𑀺 𑀧𑀸𑀓𑀝𑀸 𑀪𑀯𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀦𑀢𑁆𑀣𑀺 𑀏𑀢𑀲𑁆𑀲 𑀫𑀮𑀦𑁆𑀢𑀺 𑀅𑀫𑀮𑀁, 𑀅𑀫𑀮𑀫𑁂𑀯 𑀆𑀫𑀮𑀓𑀦𑁆𑀢𑀺 𑀫𑀡𑀺𑀭𑀢𑀦𑀁 𑀯𑀼𑀘𑁆𑀘𑀢𑀺.

𑁯𑁫𑁮. 𑀦𑀢𑁆𑀣𑀺 𑀏𑀢𑁂𑀲𑀁 𑀩𑀼𑀤𑁆𑀥𑀻𑀢𑀺 𑀅𑀩𑀼𑀤𑁆𑀥𑀻, 𑀅𑀩𑀼𑀤𑁆𑀥𑀻 𑀘 𑀢𑁂 𑀚𑀦𑀸 𑀘𑀸𑀢𑀺 𑀅𑀩𑀼𑀤𑁆𑀥𑀺𑀚𑀦𑀸, 𑀅𑀩𑀼𑀤𑁆𑀥𑀺𑀚𑀦𑀸𑀦𑀁 𑀲𑀸𑀭𑀁 𑀅𑀯𑀲𑀸𑀭𑀁 𑀑𑀲𑀻𑀤𑀦𑀁 𑀤𑀤𑀸𑀢𑀺 𑀆𑀤𑀤𑀸𑀢𑀺 𑀓𑀭𑁄𑀢𑀻𑀢𑀺 𑀅𑀩𑀼𑀤𑁆𑀥𑀺𑀚𑀦𑀲𑀸𑀭𑀤𑀁, 𑀩𑀼𑀤𑁆𑀥𑀺𑀯𑀺𑀭𑀳𑀺𑀢𑀸𑀦𑀁 𑀅𑀕𑀸𑀥𑀁 𑀕𑀫𑁆𑀪𑀻𑀭𑀁. 𑀢𑁂𑀳𑀺 𑀅𑀮𑀤𑁆𑀥𑀧𑀢𑀺𑀝𑁆𑀞𑀁 𑀅𑀫𑀢𑀲𑀸𑀕𑀭𑀁 𑀲𑀤𑁆𑀤𑀢𑁆𑀣𑀭𑀲𑀸𑀫𑀢𑀲𑁆𑀲, 𑀦𑀺𑀩𑁆𑀩𑀸𑀦𑀸𑀫𑀢𑀲𑁆𑀲 𑀯𑀸 𑀧𑀝𑀺𑀮𑀸𑀪𑀓𑀸𑀭𑀡𑀢𑁆𑀢𑀸 𑀲𑀸𑀕𑀭𑀲𑀤𑀺𑀲𑀁 𑀧𑀭𑀫𑀁 𑀉𑀢𑁆𑀢𑀫𑀁 𑀇𑀫𑀁 𑀉𑀢𑁆𑀢𑀭𑀁 𑀲𑀸𑀕𑀭𑀁 𑀆𑀲𑀦𑁆𑀦𑀧𑀘𑁆𑀘𑀓𑁆𑀔𑀁 𑀉𑀢𑁆𑀢𑀭𑀧𑀓𑀭𑀡𑀲𑀗𑁆𑀔𑀸𑀢𑀁 𑀲𑀫𑀼𑀤𑁆𑀤𑀲𑀸𑀕𑀭𑀁 𑀲𑀸𑀭𑀤𑁄 𑀳𑀼𑀢𑁆𑀯𑀸 𑀉𑀢𑁆𑀢𑀭𑀁 𑀉𑀢𑁆𑀢𑀭𑀦𑁆𑀢𑁄 𑀧𑀭𑀺𑀬𑁄𑀲𑀸𑀧𑁂𑀦𑁆𑀢𑁄 𑀦𑀭𑁄 𑀪𑀺𑀓𑁆𑀔𑀼 𑀳𑀺 𑀬𑀲𑁆𑀫𑀸 𑀯𑀺𑀦𑀬𑀧𑀸𑀭𑀕𑁄 𑀯𑀺𑀦𑀬𑀧𑀺𑀝𑀓𑀲𑁆𑀲 𑀧𑀭𑀺𑀬𑀦𑁆𑀢𑀁 𑀕𑀢𑁄 𑀳𑀼𑀢𑁆𑀯𑀸 𑀧𑀸𑀭𑀕𑁄 𑀧𑀸𑀭𑀁 𑀲𑀁𑀲𑀸𑀭𑀲𑁆𑀲 𑀧𑀸𑀭𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀸𑀦𑀁 𑀕𑀘𑁆𑀙𑀦𑁆𑀢𑁄 𑀲𑀺𑀬𑀸 𑀪𑀯𑁂𑀬𑁆𑀬𑀸𑀢𑀺 𑀬𑁄𑀚𑀦𑀸.

𑁯𑁫𑁯. 𑀅𑀢𑁄𑀢𑀺 𑀢𑀲𑁆𑀫𑀸𑀤𑁂𑀯 𑀓𑀸𑀭𑀡𑀸 𑀅𑀯𑀧𑀽𑀭𑀢𑁄𑀭𑀢𑁄 𑀧𑀸𑀧𑀧𑀽𑀭𑀢𑁄 𑀦𑀺𑀭𑀸𑀲𑀗𑁆𑀓𑀢𑀸𑀬 𑀑𑀭𑀢𑁄 𑀦𑀺𑀯𑀢𑁆𑀢𑁄 𑀧𑀸𑀧𑀪𑀻𑀭𑀼𑀓𑁄 𑀦𑀭𑁄 𑀢𑀫𑀁 𑀯𑀺𑀥𑀽𑀬 𑀧𑀸𑀧𑀪𑀻𑀭𑀼𑀓𑀢𑀸𑀬 𑀏𑀯 𑀘𑀺𑀢𑁆𑀢𑀧𑀭𑀺𑀬𑀼𑀝𑁆𑀞𑀸𑀦𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀁 𑀫𑁄𑀳𑀦𑁆𑀥𑀓𑀸𑀭𑀁 𑀢𑀤𑀗𑁆𑀕𑀧𑀳𑀸𑀦𑀯𑀲𑁂𑀦 𑀯𑀺𑀥𑀫𑁂𑀢𑁆𑀯𑀸. 𑀲𑀩𑁆𑀩𑀗𑁆𑀕𑀡𑀓𑀫𑁆𑀫𑀤𑀁 𑀲𑀩𑁆𑀩𑁂𑀲𑀁 𑀭𑀸𑀕𑀸𑀤𑀻𑀦𑀁 𑀅𑀗𑁆𑀕𑀡𑀸𑀦𑀁 𑀓𑀫𑁆𑀫𑀁 𑀢𑀤𑀗𑁆𑀕𑀸𑀤𑀺𑀧𑀳𑀸𑀦𑀁 𑀤𑀤𑀸𑀢𑀺 𑀆𑀯𑀳𑀢𑀻𑀢𑀺 ‘‘𑀲𑀩𑁆𑀩𑀗𑁆𑀕𑀡𑀓𑀫𑁆𑀫𑀤’’𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀲𑀼𑀔𑀲𑁆𑀲 𑀧𑀤𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑁆𑀲 𑀲𑀼𑀔𑀲𑁆𑀲 𑀓𑀸𑀭𑀡𑀁 𑀕𑀼𑀡𑀲𑀁𑀳𑀺𑀢𑀁 𑀲𑀻𑀮𑀸𑀤𑀻𑀳𑀺 𑀅𑀢𑁆𑀣𑀪𑀽𑀢𑁂𑀳𑀺 𑀕𑀼𑀡𑁂𑀳𑀺 𑀲𑀁𑀳𑀺𑀢𑀁 𑀬𑀼𑀢𑁆𑀢𑀁 𑀕𑀼𑀡𑀧𑁆𑀧𑀓𑀸𑀲𑀓𑀁 𑀳𑀺𑀢𑀁 𑀅𑀫𑀢𑁄𑀲𑀥𑀁 𑀯𑀺𑀬 𑀲𑀩𑁆𑀩𑀤𑁄𑀲𑀲𑀩𑁆𑀩𑀩𑁆𑀬𑀸𑀥𑀺𑀭𑀳𑀺𑀢𑀢𑀸𑀬 𑀅𑀚𑀭𑀸𑀅𑀫𑀢𑀸𑀤𑀺𑀕𑀼𑀡𑀸𑀯𑀳𑀢𑁆𑀢𑀸 𑀳𑀺𑀢𑀁 𑀇𑀫𑀁 𑀉𑀢𑁆𑀢𑀭𑀁 𑀦𑀸𑀫 𑀧𑀓𑀭𑀡𑀁 𑀲𑀓𑁆𑀓𑀘𑁆𑀘𑀁 𑀆𑀤𑀭𑁄 𑀳𑀼𑀢𑁆𑀯𑀸 𑀦𑀺𑀘𑁆𑀘𑀁 𑀲𑀢𑀢𑀁 𑀲𑀺𑀓𑁆𑀔𑁂 ‘‘𑀏𑀯𑀁 𑀧𑀭𑀺𑀘𑀬𑀦𑁆𑀢𑀁 𑀓𑀭𑁄𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀓𑀦𑁆𑀢𑁂𑀦 𑀬𑀣𑀸𑀯𑀼𑀢𑁆𑀢𑀧𑀬𑁄𑀚𑀦𑀲𑀸𑀥𑀦𑀬𑁄𑀕𑁆𑀕𑀁 𑀓𑀢𑁆𑀯𑀸 𑀅𑀚𑁆𑀛𑁂𑀦𑀸𑀤𑀺𑀯𑀲𑁂𑀦 𑀲𑀺𑀓𑁆𑀔𑁂𑀬𑁆𑀬 𑀏𑀯, 𑀦 𑀅𑀚𑁆𑀛𑀼𑀧𑁂𑀓𑁆𑀔𑀓𑁄 𑀪𑀯𑁂𑀬𑁆𑀬𑀸𑀢𑀺 𑀬𑁄𑀚𑀦𑀸.

𑁯𑁬𑁦. 𑀧𑀝𑀼𑀪𑀸𑀯𑀓𑀭𑁂 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀧𑀽𑀭𑀡𑁂, 𑀲𑀸𑀲𑀦𑀧𑀘𑁆𑀘𑀢𑁆𑀣𑀺𑀓𑀸𑀪𑀺𑀪𑀯𑀦𑁂 𑀘 𑀧𑀝𑀼𑀪𑀸𑀯𑀁 𑀙𑁂𑀓𑀢𑁆𑀢𑀁 𑀯𑁂𑀲𑀸𑀭𑀚𑁆𑀚𑀁 𑀓𑀭𑁄𑀢𑀺 𑀅𑀢𑁆𑀢𑀸𑀦𑀁 𑀥𑀸𑀭𑁂𑀦𑁆𑀢𑀸𑀦𑀁 𑀮𑀚𑁆𑀚𑀺𑀧𑀼𑀕𑁆𑀕𑀮𑀸𑀦𑀦𑁆𑀢𑀺 𑀧𑀝𑀼𑀪𑀸𑀯𑀓𑀭𑁂 𑀧𑀭𑀫𑁂 𑀢𑀢𑁄𑀬𑁂𑀯 𑀉𑀢𑁆𑀢𑀫𑁂 𑀧𑀺𑀝𑀓𑁂 𑀯𑀺𑀦𑀬𑀧𑀺𑀝𑀓𑁂 𑀧𑀝𑀼𑀢𑀁 𑀧𑀸𑀝𑀯𑀁 𑀧𑀜𑁆𑀜𑀸𑀓𑁄𑀲𑀮𑁆𑀮𑀁 𑀅𑀪𑀺𑀧𑀢𑁆𑀣𑀬𑀦𑁆𑀢𑁂𑀦 𑀧𑀝𑀼𑀦𑀸 𑀬𑀢𑀺𑀦𑀸 𑀦𑀺𑀫𑁆𑀫𑀮𑀧𑁆𑀧𑀯𑀢𑁆𑀢𑀺𑀓𑁂𑀦 𑀧𑀝𑀼𑀦𑀸 𑀯𑀺𑀥𑀺𑀦𑀸 𑀙𑁂𑀓𑁂𑀦 𑀲𑀸𑀭𑁂𑀦 𑀯𑀺𑀥𑀸𑀦𑁂𑀦 𑀇𑀤𑀁 𑀲𑀉𑀢𑁆𑀢𑀭𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀧𑀓𑀭𑀡𑀁 𑀲𑀢𑀢𑀁 𑀦𑀺𑀭𑀦𑁆𑀢𑀭𑀁 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑀁 𑀉𑀕𑁆𑀕𑀳𑀡𑀥𑀸𑀭𑀡𑀧𑀭𑀺𑀧𑀼𑀘𑁆𑀙𑀸𑀘𑀺𑀦𑁆𑀢𑀦𑀸𑀤𑀺𑀯𑀲𑁂𑀦 𑀲𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸.

𑀇𑀢𑀺 𑀉𑀢𑁆𑀢𑀭𑁂 𑀮𑀻𑀦𑀢𑁆𑀣𑀧𑀓𑀸𑀲𑀦𑀺𑀬𑀸

𑀲𑀩𑁆𑀩𑀲𑀗𑁆𑀓𑀮𑀦𑀦𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀕𑀫𑀦𑀓𑀣𑀸𑀯𑀡𑁆𑀡𑀦𑀸

𑁯𑁬𑁧-𑁩. 𑀫𑀳𑁂𑀲𑀺𑀦𑁄 𑀢𑀺𑀯𑀺𑀥𑀲𑁆𑀲𑀸𑀧𑀺 𑀲𑀸𑀲𑀦𑀲𑁆𑀲 𑀲𑀼𑀘𑀺𑀭𑀝𑁆𑀞𑀺𑀢𑀺𑀓𑀸𑀫𑁂𑀦 𑀅𑀢𑀺𑀘𑀺𑀭𑀓𑀸𑀮𑀧𑁆𑀧𑀯𑀢𑁆𑀢𑀺𑀁 𑀇𑀘𑁆𑀙𑀦𑁆𑀢𑁂𑀦 𑀥𑀻𑀫𑀢𑀸 𑀧𑀲𑀢𑁆𑀣𑀢𑀭𑀜𑀸𑀡𑁂𑀦 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀮𑀸𑀪𑀲𑀓𑁆𑀓𑀸𑀭𑀦𑀺𑀭𑀧𑁂𑀓𑁆𑀔𑀢𑀸𑀬 𑀧𑀭𑀺𑀲𑀼𑀤𑁆𑀥𑀚𑁆𑀛𑀸𑀲𑀬𑁂𑀦 𑀩𑀼𑀤𑁆𑀥𑀤𑀢𑁆𑀢𑁂𑀦 𑀩𑀼𑀤𑁆𑀥𑀤𑀢𑁆𑀢𑀸𑀪𑀺𑀥𑀸𑀦𑁂𑀦 𑀆𑀘𑀭𑀺𑀬𑀯𑀭𑁂𑀦 𑀭𑀘𑀺𑀢𑁄.

𑀧𑀚𑁆𑀚𑀯𑀲𑁂𑀦 𑀕𑀦𑁆𑀣𑀢𑁄, 𑀅𑀢𑁆𑀣𑀢𑁄 𑀘𑁂𑀯 𑀧𑀭𑀫𑀼𑀢𑁆𑀢𑀭𑁄 𑀉𑀢𑁆𑀢𑀭𑁄 𑀯𑀺𑀦𑀺𑀘𑁆𑀙𑀬𑁄 𑀅𑀦𑁆𑀢𑀭𑀸𑀬𑀁 𑀅𑀦𑁆𑀢𑀭𑁂𑀦 𑀅𑀚𑁆𑀛𑀢𑁆𑀢𑀺𑀓𑀁, 𑀩𑀸𑀳𑀺𑀭𑀁 𑀯𑀸 𑀅𑀦𑁆𑀢𑀭𑀸𑀬𑀁 𑀯𑀺𑀦𑀸 𑀬𑀣𑀸 𑀲𑀺𑀤𑁆𑀥𑀺𑀁 𑀉𑀧𑀸𑀕𑀢𑁄 𑀧𑀭𑀺𑀦𑀺𑀝𑁆𑀞𑀸𑀦𑀁 𑀧𑀢𑁆𑀢𑁄, 𑀢𑀣𑀸 𑀲𑀢𑁆𑀢𑀸𑀦𑀁 𑀥𑀫𑁆𑀫𑀲𑀁𑀬𑀼𑀢𑀸 𑀓𑀼𑀲𑀮𑀽𑀧𑀲𑀁𑀳𑀺𑀢𑀸 𑀲𑀗𑁆𑀓𑀧𑁆𑀧𑀸 𑀫𑀦𑁄𑀭𑀣𑀸 𑀲𑀺𑀚𑁆𑀛𑀦𑁆𑀢𑀼 𑀅𑀦𑁆𑀢𑀭𑀸𑀬𑀁 𑀯𑀺𑀦𑀸 𑀦𑀺𑀧𑁆𑀧𑀚𑁆𑀚𑀦𑁆𑀢𑀼, 𑀏𑀢𑁂𑀦 𑀉𑀢𑁆𑀢𑀭𑀯𑀺𑀦𑀺𑀘𑁆𑀙𑀬𑀭𑀘𑀦𑀸𑀫𑀬𑁂𑀦 𑀫𑀳𑀢𑀸 𑀧𑀼𑀜𑁆𑀜𑁄𑀤𑀬𑁂𑀦 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀚𑀦𑀁 𑀭𑀜𑁆𑀚𑁂𑀢𑀻𑀢𑀺 ‘‘𑀭𑀸𑀚𑀸’’𑀢𑀺 𑀲𑀗𑁆𑀔𑀁 𑀕𑀢𑁄 𑀫𑀳𑀻𑀧𑀸𑀮𑁄 𑀫𑀳𑀺𑀁 𑀧𑀣𑀯𑀺𑀲𑀦𑁆𑀦𑀺𑀲𑁆𑀲𑀺𑀢𑀁 𑀚𑀦𑀓𑀸𑀬𑀁 𑀲𑀫𑁆𑀫𑀸 𑀜𑀸𑀬𑁂𑀦 𑀤𑀲 𑀭𑀸𑀚𑀥𑀫𑁆𑀫𑁂 𑀅𑀓𑁄𑀧𑁂𑀦𑁆𑀢𑁄 𑀧𑀸𑀮𑁂𑀢𑀼. 𑀤𑁂𑀯𑁄 𑀧𑀚𑁆𑀚𑀼𑀦𑁆𑀦𑁄 𑀓𑀸𑀮𑁂 𑀣𑀸𑀯𑀭𑀚𑀗𑁆𑀕𑀫𑀸𑀦𑀁 𑀉𑀧𑀬𑁄𑀕𑀸𑀭𑀳𑀓𑀸𑀮𑁂 𑀲𑀫𑁆𑀫𑀸 𑀧𑀯𑀲𑁆𑀲𑀢𑀼 𑀅𑀯𑀼𑀝𑁆𑀞𑀺𑀅𑀢𑀺𑀯𑀼𑀝𑁆𑀞𑀺𑀓𑀁 𑀅𑀓𑀢𑁆𑀯𑀸 𑀲𑀫𑁆𑀫𑀸 𑀧𑀯𑀘𑁆𑀙𑀢𑀼.

𑁯𑁬𑁪. 𑀲𑁂𑀮𑀺𑀦𑁆𑀤𑁄 𑀲𑀺𑀦𑁂𑀭𑀼𑀧𑀩𑁆𑀩𑀢𑀭𑀸𑀚𑀸 𑀬𑀸𑀯 𑀢𑀺𑀝𑁆𑀞𑀢𑀺 𑀬𑀸𑀯 𑀮𑁄𑀓𑁂 𑀧𑀯𑀢𑁆𑀢𑀢𑀺, 𑀘𑀦𑁆𑀤𑁄 𑀲𑀓𑀮𑀚𑀦𑀧𑀤𑀦𑀬𑀦𑀲𑀸𑀬𑀦𑁄 𑀬𑀸𑀯 𑀯𑀺𑀭𑁄𑀘𑀢𑀺 𑀬𑀸𑀯 𑀅𑀢𑁆𑀢𑀦𑁄 𑀲𑀪𑀸𑀯𑀁 𑀚𑁄𑀢𑁂𑀢𑀺, 𑀢𑀸𑀯 𑀬𑀲𑀲𑁆𑀲𑀺𑀦𑁄 𑀕𑁄𑀢𑀫𑀲𑁆𑀲 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀤𑁆𑀥𑀫𑁆𑀫𑁄 𑀧𑀭𑀺𑀬𑀢𑁆𑀢𑀺𑀧𑀝𑀺𑀧𑀢𑁆𑀢𑀺𑀧𑀝𑀺𑀯𑁂𑀥𑀯𑀲𑁂𑀦 𑀢𑀺𑀯𑀺𑀥𑁄 𑀲𑀤𑁆𑀥𑀫𑁆𑀫𑁄 𑀢𑀺𑀝𑁆𑀞𑀢𑀼 𑀧𑀯𑀢𑁆𑀢𑀢𑀼.

𑁯𑁬𑁫. 𑀲𑀻𑀳𑀸𑀤𑀻𑀦𑀁, 𑀤𑀸𑀳𑀸𑀤𑀻𑀦𑀜𑁆𑀘 𑀩𑀸𑀳𑀺𑀭𑀚𑁆𑀛𑀢𑁆𑀢𑀺𑀓𑀸𑀦𑀁 𑀧𑀭𑀺𑀲𑁆𑀲𑀬𑀸𑀦𑀁 𑀔𑀫𑀦𑀁 𑀲𑀳𑀦𑀁 𑀅𑀪𑀺𑀪𑀯𑀺𑀢𑁆𑀯𑀸 𑀧𑀯𑀢𑁆𑀢𑀦𑀁 𑀔𑀦𑁆𑀢𑀺. 𑀲𑁄𑀭𑀘𑁆𑀘𑀦𑁆𑀢𑀺 𑀲𑁄𑀪𑀦𑁂 𑀭𑀢𑁄𑀢𑀺 𑀲𑀼𑀭𑀢𑁄, 𑀲𑀼𑀭𑀢𑀲𑁆𑀲 𑀪𑀸𑀯𑁄 𑀲𑁄𑀭𑀘𑁆𑀘𑀁. 𑀲𑀼𑀦𑁆𑀤𑀭𑀁 𑀅𑀔𑀡𑁆𑀟𑀢𑀸𑀤𑀺𑀕𑀼𑀡𑀲𑀫𑀦𑁆𑀦𑀸𑀕𑀢𑀁 𑀲𑀻𑀮𑀁 𑀅𑀲𑁆𑀲𑀸𑀢𑀺 𑀲𑀼𑀲𑀻𑀮𑁄. 𑀲𑀼𑀲𑀻𑀮𑀲𑁆𑀲 𑀪𑀸𑀯𑁄.

𑀦𑀺𑀕𑀫𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀢𑁆𑀢𑀭𑀯𑀺𑀦𑀺𑀘𑁆𑀙𑀬𑀝𑀻𑀓𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀯𑀺𑀦𑀬𑀢𑁆𑀣𑀲𑀸𑀭𑀲𑀦𑁆𑀤𑀻𑀧𑀦𑀻 𑀦𑀸𑀫 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀯𑀡𑁆𑀡𑀦𑀸,

𑀮𑀻𑀦𑀢𑁆𑀣𑀧𑀓𑀸𑀲𑀦𑀻 𑀦𑀸𑀫 𑀉𑀢𑁆𑀢𑀭𑀯𑀺𑀦𑀺𑀘𑁆𑀙𑀬𑀯𑀡𑁆𑀡𑀦𑀸 𑀘

𑀲𑀫𑀢𑁆𑀢𑀸.

𑀧𑀘𑁆𑀙𑀸 𑀞𑀧𑀺𑀢𑀕𑀸𑀣𑀸𑀬𑁄

𑀣𑁂𑀭𑁂𑀦 𑀣𑀺𑀭𑀘𑀺𑀢𑁆𑀢𑁂𑀦, 𑀲𑀸𑀲𑀦𑀼𑀚𑁆𑀚𑁄𑀢𑀦𑀢𑁆𑀣𑀺𑀦𑀸;

𑀧𑀼𑀜𑁆𑀜𑀯𑀸 𑀜𑀸𑀡𑀯𑀸 𑀲𑀻𑀮𑀻, 𑀲𑀼𑀳𑀚𑁆𑀚𑁄 𑀫𑀼𑀤𑀼𑀓𑁄 𑀢𑀣𑀸.

𑀬𑁄 𑀲𑀻𑀳𑀴𑀸𑀭𑀺𑀫𑀤𑁆𑀤𑁂𑀲𑀼, 𑀘𑀦𑁆𑀤𑀺𑀫𑀸 𑀲𑀽𑀭𑀺𑀬𑁄 𑀯𑀺𑀬;

𑀧𑀸𑀓𑀝𑁄 𑀲𑀻𑀯𑀮𑀺𑀢𑁆𑀣𑁂𑀭𑁄, 𑀫𑀳𑀸𑀢𑁂𑀚𑁄 𑀫𑀳𑀸𑀬𑀲𑁄.

𑀢𑁂𑀦 𑀦𑀻𑀢𑀸 𑀲𑀻𑀳𑀴𑀸 𑀬𑀸, 𑀇𑀥 𑀧𑀢𑁆𑀢𑀸 𑀲𑀼𑀥𑀻𑀫𑀢𑀸;

𑀏𑀲𑀸 𑀲𑀁𑀯𑀡𑁆𑀡𑀦𑀸 𑀲𑀻𑀳-𑀴𑀓𑁆𑀔𑀭𑁂𑀦 𑀲𑀼𑀮𑀺𑀓𑁆𑀔𑀺𑀢𑀸.

𑀭𑁂𑀯𑀢𑁄 𑀇𑀢𑀺 𑀦𑀸𑀫𑁂𑀦, 𑀣𑁂𑀭𑁂𑀦 𑀣𑀺𑀭𑀘𑁂𑀢𑀲𑀸;

𑀅𑀭𑀺𑀫𑀤𑁆𑀤𑀺𑀓𑁂 𑀭𑀓𑁆𑀔𑀦𑁆𑀢𑁂𑀦, 𑀧𑀭𑀺𑀯𑀢𑁆𑀢𑁂𑀢𑁆𑀯𑀸𑀦 𑀲𑀸𑀥𑀼𑀓𑀁.

𑀮𑀺𑀔𑀸𑀧𑀺𑀢𑀸 𑀳𑀺𑀢𑀢𑁆𑀣𑀸𑀬, 𑀪𑀺𑀓𑁆𑀔𑀽𑀦𑀁 𑀅𑀭𑀺𑀫𑀤𑁆𑀤𑀺𑀓𑁂;

𑀏𑀲𑀸 𑀲𑀁𑀯𑀡𑁆𑀡𑀦𑀸 𑀲𑀼𑀝𑁆𑀞𑀼, 𑀲𑀦𑁆𑀦𑀺𑀝𑁆𑀞𑀸𑀦𑀫𑀼𑀧𑀸𑀕𑀢𑀸;

𑀢𑀣𑁂𑀯 𑀲𑀩𑁆𑀩𑀲𑀢𑁆𑀢𑀸𑀦𑀁, 𑀲𑀩𑁆𑀩𑀢𑁆𑀣𑁄 𑀘 𑀲𑀫𑀺𑀚𑁆𑀛𑀢𑀽𑀢𑀺.