𑀮𑀓𑁆𑀔𑀡𑀓𑀣𑀸𑀯𑀡𑁆𑀡𑀦𑀸

𑁮𑁩𑁭. 𑀇𑀢𑁄𑀢𑀺 𑀲𑀸𑀥𑀸𑀭𑀡𑀸𑀲𑀸𑀥𑀸𑀭𑀡𑀓𑀣𑀸𑀬 𑀧𑀭𑀁. 𑀲𑀩𑁆𑀩𑀕𑀦𑁆𑀢𑀺 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀲𑀸𑀥𑀸𑀭𑀡𑀁. 𑀯𑀤𑀢𑁄 𑀫𑁂𑀢𑀺 𑀯𑀤𑀢𑁄 𑀫𑀫 𑀯𑀘𑀦𑀁. 𑀦𑀺𑀩𑁄𑀥𑀣𑀸𑀢𑀺 𑀦𑀺𑀲𑀸𑀫𑁂𑀣, 𑀏𑀓𑀕𑁆𑀕𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀲𑀼𑀡𑀸𑀣𑀸𑀢𑀺 𑀅𑀢𑁆𑀣𑁄.

𑁮𑁩𑁮-𑁯. ‘‘𑀯𑀺𑀧𑀢𑁆𑀢𑀺 𑀆𑀧𑀢𑁆𑀢𑀺 𑀅𑀦𑀸𑀧𑀢𑁆𑀢𑀻’’𑀢𑀺 𑀧𑀤𑀘𑁆𑀙𑁂𑀤𑁄. ‘‘𑀆𑀡𑀢𑁆𑀢𑀺 𑀅𑀗𑁆𑀕’’𑀦𑁆𑀢𑀺 𑀧𑀤𑀘𑁆𑀙𑁂𑀤𑁄. 𑀯𑀚𑁆𑀚𑀓𑀫𑁆𑀫𑀧𑀪𑁂𑀤𑀓𑀦𑁆𑀢𑀺 𑀯𑀚𑁆𑀚𑀧𑀪𑁂𑀤𑀓𑀁 𑀓𑀫𑁆𑀫𑀧𑀪𑁂𑀤𑀓𑀁. 𑀢𑀺𑀓𑀤𑁆𑀯𑀬𑀦𑁆𑀢𑀺 𑀓𑀼𑀲𑀮𑀢𑁆𑀢𑀺𑀓𑀯𑁂𑀤𑀦𑀸𑀢𑁆𑀢𑀺𑀓𑀤𑁆𑀯𑀬𑀁. 𑀲𑀩𑁆𑀩𑀢𑁆𑀣𑀸𑀢𑀺 𑀇𑀤𑀁 𑀧𑀦 𑀲𑀢𑁆𑀢𑀭𑀲𑀯𑀺𑀥𑀲𑀩𑁆𑀩𑀲𑀸𑀥𑀸𑀭𑀡𑀮𑀓𑁆𑀔𑀡𑀁. 𑀲𑀩𑁆𑀩𑀢𑁆𑀣 𑀲𑀩𑁆𑀩𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼.

𑁮𑁪𑁦. 𑀇𑀥 𑀇𑀫𑀲𑁆𑀫𑀺𑀁 𑀲𑀢𑁆𑀢𑀭𑀲𑀯𑀺𑀥𑁂 𑀬𑀁 𑀮𑀓𑁆𑀔𑀡𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀁, 𑀬𑀜𑁆𑀘 𑀉𑀢𑁆𑀢𑀸𑀦𑀁, 𑀢𑀁 𑀲𑀩𑁆𑀩𑀁 𑀯𑀚𑁆𑀚𑁂𑀢𑁆𑀯𑀸 𑀅𑀢𑁆𑀣𑀚𑁄𑀢𑀦𑀁 𑀅𑀢𑁆𑀣𑀧𑁆𑀧𑀓𑀸𑀲𑀦𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀬𑁄𑀚𑀦𑀸.

𑁮𑁪𑁧. 𑀦𑀺𑀤𑀸𑀦𑀁 𑀦𑀸𑀫 𑀭𑀸𑀚𑀕𑀳𑀸𑀤𑀺𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑀸𑀦𑀺 𑀲𑀢𑁆𑀢 𑀦𑀕𑀭𑀸𑀦𑀺, 𑀢𑀁 𑀧𑀼𑀩𑁆𑀩𑁂 𑀤𑀲𑁆𑀲𑀺𑀢𑀦𑁆𑀢𑀺 𑀅𑀯𑀲𑀺𑀝𑁆𑀞𑀸𑀦𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀧𑀼𑀕𑁆𑀕𑀮𑁄’’𑀢𑀺𑀆𑀤𑀺. 𑀧𑀼𑀕𑁆𑀕𑀮𑁄 𑀦𑀸𑀫 𑀓𑀢𑀫𑁄? 𑀬𑀁 𑀬𑀁 𑀪𑀺𑀓𑁆𑀔𑀼𑀦𑀺𑀁, 𑀪𑀺𑀓𑁆𑀔𑀼𑀜𑁆𑀘 𑀆𑀭𑀩𑁆𑀪 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁, 𑀅𑀬𑀁 𑀪𑀺𑀓𑁆𑀔𑀼𑀦𑀻 𑀘 𑀪𑀺𑀓𑁆𑀔𑀼 𑀘 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀆𑀤𑀺𑀓𑀫𑁆𑀫𑀺𑀓𑁄 𑀧𑀼𑀕𑁆𑀕𑀮𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀬𑁄𑀚𑀦𑀸.

𑁮𑁪𑁨. 𑀥𑀦𑀺𑀬𑀸𑀤𑀬𑁄𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽, 𑀯𑀕𑁆𑀕𑀼𑀫𑀼𑀤𑀸𑀢𑀻𑀭𑀺𑀬𑀸 𑀪𑀺𑀓𑁆𑀔𑀽, 𑀲𑁂𑀬𑁆𑀬𑀲𑀓𑁄, 𑀉𑀤𑀸𑀬𑀻, 𑀆𑀴𑀯𑀓𑀸 𑀪𑀺𑀓𑁆𑀔𑀽, 𑀙𑀦𑁆𑀦𑁄, 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀸, 𑀤𑁂𑀯𑀤𑀢𑁆𑀢𑁄, 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸 𑀪𑀺𑀓𑁆𑀔𑀽, 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽, 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄, 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼, 𑀳𑀢𑁆𑀣𑀓𑁄 𑀲𑀓𑁆𑀬𑀧𑀼𑀢𑁆𑀢𑁄, 𑀅𑀦𑀼𑀭𑀼𑀤𑁆𑀥𑁄, 𑀲𑀢𑁆𑀢𑀭𑀲𑀯𑀕𑁆𑀕𑀺𑀬𑀸 𑀪𑀺𑀓𑁆𑀔𑀽, 𑀘𑀽𑀴𑀧𑀦𑁆𑀣𑀓𑁄, 𑀩𑁂𑀮𑀝𑁆𑀞𑀲𑀻𑀲𑁄, 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄, 𑀲𑀸𑀕𑀢𑀢𑁆𑀣𑁂𑀭𑁄, 𑀅𑀭𑀺𑀝𑁆𑀞𑁄 𑀪𑀺𑀓𑁆𑀔𑀼, 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄𑀢𑀺 𑀇𑀫𑁂 𑀏𑀓𑀯𑀻𑀲𑀢𑀺 𑀲𑀗𑁆𑀕𑀳𑀺𑀢𑀸.

𑁮𑁪𑁩. 𑀣𑀼𑀮𑁆𑀮𑀦𑀦𑁆𑀤𑀸𑀤𑀬𑁄𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀼𑀦𑁆𑀤𑀭𑀻𑀦𑀦𑁆𑀤𑀸, 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑁄, 𑀅𑀜𑁆𑀜𑀢𑀭𑀸 𑀪𑀺𑀓𑁆𑀔𑀼𑀦𑀻, 𑀘𑀡𑁆𑀟𑀓𑀸𑀴𑀻, 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀼𑀦𑀺𑀬𑁄, 𑀤𑁆𑀯𑁂 𑀪𑀺𑀓𑁆𑀔𑀼𑀦𑀺𑀬𑁄𑀢𑀺 𑀙𑀬𑀺𑀫𑁂 𑀲𑀗𑁆𑀕𑀳𑀺𑀢𑀸. 𑀲𑀩𑁆𑀩𑁂𑀢𑀺 𑀉𑀪𑀬𑀧𑀸𑀢𑀺𑀫𑁄𑀓𑁆𑀔𑁂 𑀆𑀤𑀺𑀓𑀫𑁆𑀫𑀺𑀓𑀸 𑀲𑀩𑁆𑀩𑁂 𑀧𑀼𑀕𑁆𑀕𑀮𑀸.

𑁮𑁪𑁪. 𑀯𑀢𑁆𑀣𑀽𑀢𑀺 𑀯𑀢𑁆𑀣𑀼 𑀦𑀸𑀫 𑀲𑀼𑀤𑀺𑀦𑁆𑀦𑀸𑀤𑀺𑀦𑁄 𑀢𑀲𑁆𑀲 𑀢𑀲𑁆𑀲𑁂𑀯 𑀧𑀼𑀕𑁆𑀕𑀮𑀲𑁆𑀲 𑀫𑁂𑀣𑀼𑀦𑀸𑀤𑀺𑀓𑀲𑁆𑀲 𑀘 𑀯𑀢𑁆𑀣𑀼𑀦𑁄 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀅𑀚𑁆𑀛𑀸𑀘𑀸𑀭𑁄 𑀯𑀻𑀢𑀺𑀓𑁆𑀓𑀫𑁄 𑀧𑀯𑀼𑀘𑁆𑀘𑀢𑀻𑀢𑀺 𑀬𑁄𑀚𑀦𑀸.

𑁮𑁪𑁫-𑁬. 𑀓𑁂𑀯𑀮𑀸 𑀫𑀽𑀮𑀪𑀽𑀢𑀸 𑀧𑀜𑁆𑀜𑀢𑁆𑀢𑀺. 𑀅𑀦𑀼 𑀘 𑀅𑀦𑀼𑀧𑁆𑀧𑀦𑁆𑀦𑁄 𑀘 𑀲𑀩𑁆𑀩𑀢𑁆𑀣 𑀘 𑀧𑀤𑁂𑀲𑁄 𑀘 𑀅𑀦𑁆𑀯𑀦𑀼𑀧𑁆𑀧𑀦𑁆𑀦𑀲𑀩𑁆𑀩𑀢𑁆𑀣𑀧𑀤𑁂𑀲𑀸, 𑀢𑁂𑀬𑁂𑀯 𑀧𑀤𑀸𑀦𑀺 𑀅𑀦𑁆𑀯𑀦𑀼𑀧𑁆𑀧𑀦𑁆𑀦𑀲𑀩𑁆𑀩𑀢𑁆𑀣𑀧𑀤𑁂𑀲𑀧𑀤𑀸𑀦𑀺, 𑀢𑀸𑀦𑀺 𑀧𑀼𑀩𑁆𑀩𑀓𑀸𑀦𑀺 𑀬𑀸𑀲𑀁 𑀧𑀜𑁆𑀜𑀢𑁆𑀢𑀻𑀦𑀁 𑀢𑀸 𑀅𑀦𑁆𑀯𑀦𑀼𑀧𑁆𑀧𑀦𑁆𑀦𑀲𑀩𑁆𑀩𑀢𑁆𑀣𑀧𑀤𑁂𑀲𑀧𑀤𑀧𑀼𑀩𑁆𑀩𑀺𑀓𑀸. 𑀢𑀣𑁂𑀯 𑀲𑀸 𑀧𑀜𑁆𑀜𑀢𑁆𑀢𑀻𑀢𑀺 𑀬𑁄𑀚𑀦𑀸. 𑀅𑀦𑀼𑀧𑀜𑁆𑀜𑀢𑁆𑀢𑀺 𑀅𑀦𑀼𑀧𑁆𑀧𑀦𑁆𑀦𑀧𑀜𑁆𑀜𑀢𑁆𑀢𑀺 𑀲𑀩𑁆𑀩𑀢𑁆𑀣𑀧𑀜𑁆𑀜𑀢𑁆𑀢𑀺 𑀧𑀤𑁂𑀲𑀧𑀜𑁆𑀜𑀢𑁆𑀢𑀺 𑀳𑁄𑀢𑀺. 𑀏𑀓𑀢𑁄 𑀉𑀪𑀢𑁄 𑀧𑀼𑀩𑁆𑀩𑀸 𑀓𑀣𑁂𑀯 𑀲𑀸 𑀧𑀜𑁆𑀜𑀢𑁆𑀢𑀻𑀢𑀺 𑀬𑁄𑀚𑀦𑀸. 𑀏𑀓𑀢𑁄𑀧𑀤𑀁 𑀉𑀪𑀢𑁄𑀧𑀤𑀜𑁆𑀘 𑀧𑀼𑀩𑁆𑀩𑀫𑀲𑁆𑀲𑀸𑀢𑀺 𑀏𑀓𑀢𑁄𑀉𑀪𑀢𑁄𑀧𑀼𑀩𑁆𑀩𑀸, 𑀏𑀓𑀢𑁄𑀧𑀜𑁆𑀜𑀢𑁆𑀢𑀺 𑀉𑀪𑀢𑁄𑀧𑀜𑁆𑀜𑀢𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁮𑁪𑁭. 𑀢𑀢𑁆𑀣 𑀦𑀯𑀥𑀸𑀲𑀼 𑀧𑀜𑁆𑀜𑀢𑁆𑀢𑀻𑀲𑀼. 𑀧𑀜𑁆𑀜𑀢𑁆𑀢𑀺 𑀦𑀸𑀫 𑀓𑀢𑀫𑀸𑀢𑀺 𑀆𑀳 ‘‘𑀬𑁄 𑀫𑁂𑀣𑀼𑀦’’𑀦𑁆𑀢𑀺𑀆𑀤𑀺. ‘‘𑀬𑁄 𑀪𑀺𑀓𑁆𑀔𑀼 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑁂𑀬𑁆𑀬𑀸’’𑀢𑀺 𑀘 ‘‘𑀬𑁄 𑀪𑀺𑀓𑁆𑀔𑀼 𑀅𑀤𑀺𑀦𑁆𑀦𑀁 𑀆𑀤𑀺𑀬𑁂𑀬𑁆𑀬𑀸’’𑀢𑀺 𑀘 𑀏𑀯𑀫𑀸𑀤𑀺𑀓𑀸 𑀲𑀺𑀓𑁆𑀔𑀸𑀧𑀤𑀲𑁆𑀲 𑀫𑀽𑀮𑀪𑀽𑀢𑀸 𑀧𑀜𑁆𑀜𑀢𑁆𑀢𑀺 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑁮𑁪𑁮. 𑀇𑀘𑁆𑀘𑁂𑀯𑀫𑀸𑀤𑀺𑀓𑀸𑀢𑀺 𑀆𑀤𑀺-𑀲𑀤𑁆𑀤𑁂𑀦 ‘‘𑀲𑀺𑀓𑁆𑀔𑀁 𑀅𑀧𑀘𑁆𑀘𑀓𑁆𑀔𑀸𑀬 𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸’’𑀢𑀺 𑀘 ‘‘𑀕𑀸𑀫𑀸 𑀯𑀸 𑀅𑀭𑀜𑁆𑀜𑀸 𑀯𑀸’’𑀢𑀺 𑀘 𑀏𑀯𑀫𑀸𑀤𑀻𑀦𑀁 𑀲𑀗𑁆𑀕𑀳𑁄.

𑁮𑁪𑁯. 𑀯𑀚𑁆𑀚𑀓𑁂 𑀅𑀦𑀼𑀧𑁆𑀧𑀦𑁆𑀦𑁂𑀬𑁂𑀯 𑀧𑀜𑁆𑀜𑀢𑁆𑀢𑀸 𑀅𑀦𑀼𑀧𑁆𑀧𑀦𑁆𑀦𑀧𑀜𑁆𑀜𑀢𑁆𑀢𑀺, 𑀲𑀸 𑀅𑀦𑀼𑀧𑁆𑀧𑀦𑁆𑀦𑀧𑀜𑁆𑀜𑀢𑁆𑀢𑀺.

𑁮𑁫𑁦-𑁧. 𑀕𑀼𑀡𑀗𑁆𑀕𑀼𑀡𑀼𑀧𑀸𑀳𑀦𑀲𑀺𑀓𑁆𑀔𑀸𑀧𑀤𑁂𑀦 𑀲𑀳 𑀘𑀫𑁆𑀫𑀢𑁆𑀣𑀭𑀡𑀲𑀺𑀓𑁆𑀔𑀸𑀧𑀤𑀜𑁆𑀘 𑀥𑀼𑀯𑀦𑁆𑀳𑀸𑀦𑀁 𑀥𑀼𑀯𑀦𑀳𑀸𑀦𑀲𑀺𑀓𑁆𑀔𑀸𑀧𑀤𑀁, 𑀧𑀜𑁆𑀘𑀯𑀕𑁆𑀕𑁂𑀦 𑀉𑀧𑀲𑀫𑁆𑀧𑀸𑀤𑀦𑀲𑀺𑀓𑁆𑀔𑀸𑀧𑀤𑀜𑁆𑀘𑀸𑀢𑀺 𑀏𑀲𑀸 𑀘𑀢𑀼𑀩𑁆𑀩𑀺𑀥𑀸 𑀧𑀜𑁆𑀜𑀢𑁆𑀢𑀺 𑀧𑀤𑁂𑀲𑀧𑀜𑁆𑀜𑀢𑁆𑀢𑀺 𑀦𑀸𑀫𑀸𑀢𑀺 𑀯𑀼𑀢𑁆𑀢𑀸𑀢𑀺 𑀬𑁄𑀚𑀦𑀸. 𑀫𑀚𑁆𑀛𑀺𑀫𑀤𑁂𑀲𑀲𑁆𑀫𑀺𑀁𑀬𑁂𑀯 𑀳𑁄𑀢𑀻𑀢𑀺 𑀫𑀚𑁆𑀛𑀺𑀫𑀤𑁂𑀲𑀲𑁆𑀫𑀺𑀁𑀬𑁂𑀯 𑀆𑀧𑀢𑁆𑀢𑀺𑀓𑀭𑀸 𑀳𑁄𑀢𑀺. 𑀦 𑀅𑀜𑁆𑀜𑀢𑁄𑀢𑀺 𑀦 𑀅𑀜𑁆𑀜𑀢𑁆𑀭 𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀤𑁂𑀲𑀦𑁆𑀢𑀭𑁂 𑀞𑀸𑀦𑁂.

𑁮𑁫𑁨. 𑀇𑀢𑁄𑀢𑀺 𑀘𑀢𑀼𑀩𑁆𑀩𑀺𑀥𑀧𑀤𑁂𑀲𑀧𑀜𑁆𑀜𑀢𑁆𑀢𑀺𑀢𑁄. 𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀺𑀪𑁂𑀤𑁂. 𑀲𑀸𑀥𑀸𑀭𑀡𑀤𑀼𑀓𑀸𑀤𑀺𑀓𑀦𑁆𑀢𑀺 𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺 𑀅𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺, 𑀏𑀓𑀢𑁄𑀧𑀜𑁆𑀜𑀢𑁆𑀢𑀺 𑀉𑀪𑀢𑁄𑀧𑀜𑁆𑀜𑀢𑁆𑀢𑀻𑀢𑀺 𑀤𑀼𑀓𑀤𑁆𑀯𑀬𑀁. 𑀅𑀢𑁆𑀣𑀢𑁄 𑀏𑀓𑀫𑁂𑀯𑀸𑀢𑀺 𑀅𑀢𑁆𑀣𑀢𑁄 𑀅𑀜𑁆𑀜𑀫𑀜𑁆𑀜𑀲𑀫𑀸𑀦𑀫𑁂𑀯. 𑀯𑀺𑀧𑀢𑁆𑀢𑀸𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀯𑀺𑀦𑀺𑀘𑁆𑀙𑀬𑁄 𑀯𑀺𑀢𑁆𑀣𑀸𑀭𑀺𑀢𑁄𑀢𑀺 𑀇𑀥 𑀦 𑀤𑀲𑁆𑀲𑀺𑀢𑁄. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑁄 𑁋 𑀯𑀺𑀧𑀢𑁆𑀢𑀻𑀢𑀺 𑀲𑀻𑀮𑀆𑀘𑀸𑀭𑀤𑀺𑀝𑁆𑀞𑀺𑀆𑀚𑀻𑀯𑀯𑀺𑀧𑀢𑁆𑀢𑀻𑀦𑀁 𑀅𑀜𑁆𑀜𑀢𑀭𑀸. 𑀆𑀧𑀢𑁆𑀢𑀻𑀢𑀺 𑀧𑀼𑀩𑁆𑀩𑀧𑀬𑁄𑀕𑀸𑀤𑀺𑀯𑀲𑁂𑀦 𑀆𑀧𑀢𑁆𑀢𑀺𑀪𑁂𑀤𑁄. 𑀅𑀦𑀸𑀧𑀢𑁆𑀢𑀻𑀢𑀺 𑀅𑀚𑀸𑀦𑀦𑀸𑀤𑀺𑀯𑀲𑁂𑀦 𑀅𑀦𑀸𑀧𑀢𑁆𑀢𑀺.

𑁮𑁫𑁩. 𑀆𑀧𑀢𑁆𑀢𑀺 𑀧𑀦 𑀲𑀸𑀡𑀢𑁆𑀢𑀺𑀓𑀸𑀧𑀺 𑀳𑁄𑀢𑀺, 𑀅𑀦𑀸𑀡𑀢𑁆𑀢𑀺𑀓𑀸𑀧𑀺 𑀳𑁄𑀢𑀻𑀢𑀺 𑀬𑁄𑀚𑀦𑀸. ‘‘𑀆𑀡𑀢𑁆𑀢𑀻𑀢𑀺 𑀘 𑀦𑀸𑀫𑁂𑀲𑀸 𑀆𑀡𑀸𑀧𑀦𑀸’’𑀢𑀺 𑀇𑀫𑀺𑀦𑀸 𑀆𑀡𑀢𑁆𑀢𑀺-𑀲𑀤𑁆𑀤𑀲𑁆𑀲 𑀲𑀪𑀸𑀯𑀲𑀸𑀥𑀸𑀭𑀡𑀢𑁆𑀢𑀸𑀢𑀺 𑀇𑀥𑀸𑀳.

𑁮𑁫𑁪. 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑁂𑀲𑀼𑀧𑀺 𑀲𑀩𑁆𑀩𑀸𑀲𑀁 𑀆𑀧𑀢𑁆𑀢𑀻𑀦𑀁 𑀲𑀩𑁆𑀩𑁄 𑀧𑀦 𑀅𑀗𑁆𑀕𑀪𑁂𑀤𑁄𑀧𑀺 𑀯𑀺𑀪𑀸𑀯𑀺𑀦𑀸 𑀜𑀸𑀢𑀩𑁆𑀩𑁄𑀢𑀺 𑀬𑁄𑀚𑀦𑀸.

𑁮𑁫𑁬. ‘‘𑀲𑀸 𑀘 𑀅𑀓𑁆𑀭𑀺𑀬𑀲𑀫𑀼𑀝𑁆𑀞𑀸𑀦𑀸’’𑀢𑀺 𑀧𑀤𑀘𑁆𑀙𑁂𑀤𑁄. 𑀓𑀸𑀬𑁂𑀦, 𑀯𑀸𑀘𑀸𑀬 𑀯𑀸 𑀤𑀲𑀸𑀳𑀩𑁆𑀪𑀦𑁆𑀢𑀭𑁂 𑀅𑀢𑀺𑀭𑁂𑀓𑀘𑀻𑀯𑀭𑀲𑁆𑀲 𑀅𑀦𑀥𑀺𑀝𑁆𑀞𑀸𑀦𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀁 𑀳𑁄𑀢𑀻𑀢𑀺 ‘‘𑀧𑀞𑀫𑁂 𑀓𑀣𑀺𑀦𑁂 𑀯𑀺𑀬𑀸’’𑀢𑀺 𑀉𑀤𑀸𑀳𑀭𑀡𑀁 𑀓𑀢𑀁.

𑁮𑁫𑁭. 𑀓𑁆𑀭𑀺𑀬𑀸𑀓𑁆𑀭𑀺𑀬𑀢𑁄 𑀳𑁄𑀢𑀻𑀢𑀺 𑀓𑀺𑀭𑀺𑀬𑀢𑁄 𑀘 𑀅𑀓𑀺𑀭𑀺𑀬𑀢𑁄 𑀘 𑀳𑁄𑀢𑀺. 𑀢𑀢𑁆𑀣 𑀉𑀤𑀸𑀳𑀭𑀡𑀫𑀸𑀳 ‘‘𑀘𑀻𑀯𑀭𑀕𑁆𑀕𑀳𑀡𑁂 𑀯𑀺𑀬𑀸’’𑀢𑀺. 𑀅𑀜𑁆𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀳𑀢𑁆𑀣𑀢𑁄 𑀘𑀻𑀯𑀭𑀕𑁆𑀕𑀳𑀡𑀁 𑀓𑁆𑀭𑀺𑀬𑀸, 𑀧𑀸𑀭𑀺𑀯𑀢𑁆𑀢𑀓𑀲𑁆𑀲 𑀅𑀤𑀸𑀦𑀁 𑀅𑀓𑁆𑀭𑀺𑀬𑀸𑀢𑀺 𑀏𑀯𑀁 𑀓𑀺𑀭𑀺𑀬𑀸𑀬 𑀘𑁂𑀯 𑀅𑀓𑀺𑀭𑀺𑀬𑀸𑀬 𑀘 𑀇𑀫𑀁 𑀆𑀧𑀚𑁆𑀚𑀢𑀺.

𑁮𑁫𑁮. 𑀲𑀺𑀬𑀸 𑀧𑀦 𑀓𑀭𑁄𑀦𑁆𑀢𑀲𑁆𑀲 𑀅𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀬𑀸 𑀧𑀦 𑀆𑀧𑀢𑁆𑀢𑀺 𑀲𑀺𑀬𑀸 𑀓𑀭𑁄𑀦𑁆𑀢𑀲𑁆𑀲, 𑀲𑀺𑀬𑀸 𑀅𑀓𑀭𑁄𑀦𑁆𑀢𑀲𑁆𑀲 𑀳𑁄𑀢𑀺, 𑀅𑀬𑀁 𑀲𑀺𑀬𑀸 𑀓𑀺𑀭𑀺𑀬𑀢𑁄, 𑀲𑀺𑀬𑀸 𑀅𑀓𑀺𑀭𑀺𑀬𑀢𑁄 𑀲𑀫𑀼𑀝𑁆𑀞𑀸𑀢𑀺. 𑀲𑀺𑀬𑀸𑀢𑀺 𑀘 𑀓𑀤𑀸𑀘𑀺-𑀲𑀤𑁆𑀤𑀢𑁆𑀣𑁂 𑀦𑀺𑀧𑀸𑀢𑁄. 𑀅𑀢𑁆𑀭𑁄𑀤𑀸𑀳𑀭𑀡𑀫𑀸𑀳 ‘‘𑀭𑀽𑀧𑀺𑀬𑁄𑀕𑁆𑀕𑀳𑀡𑁂 𑀯𑀺𑀬𑀸’’𑀢𑀺. 𑀭𑀽𑀧𑀺𑀬𑀲𑁆𑀲 𑀉𑀕𑁆𑀕𑀳𑀡𑁂, 𑀉𑀕𑁆𑀕𑀡𑁆𑀳𑀸𑀧𑀦𑁂 𑀲𑀺𑀬𑀸 𑀓𑀤𑀸𑀘𑀺 𑀓𑀺𑀭𑀺𑀬𑀢𑁄 𑀲𑀫𑀼𑀝𑁆𑀞𑀸𑀢𑀺, 𑀉𑀧𑀦𑀺𑀓𑁆𑀔𑀺𑀢𑁆𑀢𑀲𑁆𑀲 𑀲𑀸𑀤𑀺𑀬𑀦𑁂 𑀓𑀸𑀬𑀯𑀸𑀘𑀸𑀳𑀺 𑀓𑀸𑀢𑀩𑁆𑀩𑀲𑁆𑀲 𑀅𑀓𑀭𑀡𑁂𑀦 𑀓𑀤𑀸𑀘𑀺 𑀅𑀓𑀭𑁄𑀦𑁆𑀢𑀲𑁆𑀲 𑀳𑁄𑀢𑀻𑀢𑀺.

𑁮𑁫𑁯. 𑀬𑀸 𑀓𑀭𑁄𑀢𑁄 𑀅𑀓𑀼𑀩𑁆𑀩𑀢𑁄, 𑀓𑀤𑀸𑀘𑀺 𑀓𑀭𑁄𑀦𑁆𑀢𑀲𑁆𑀲 𑀘 𑀳𑁄𑀢𑀺, 𑀲𑀸 𑀆𑀧𑀢𑁆𑀢𑀺 𑀲𑀺𑀬𑀸 𑀓𑀺𑀭𑀺𑀬𑀸𑀓𑀺𑀭𑀺𑀬𑀢𑁄, 𑀲𑀺𑀬𑀸 𑀓𑀺𑀭𑀺𑀬𑀢𑁄𑀧𑀺 𑀘 𑀳𑁄𑀢𑀻𑀢𑀺 𑀬𑁄𑀚𑀦𑀸. ‘‘𑀓𑀼𑀝𑀺𑀓𑀸𑀭𑀸𑀧𑀢𑁆𑀢𑀺 𑀯𑀺𑀬𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀸 𑀳𑀺 𑀯𑀢𑁆𑀣𑀼𑀁 𑀤𑁂𑀲𑀸𑀧𑁂𑀢𑁆𑀯𑀸 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀓𑀭𑁄𑀢𑁄 𑀓𑀺𑀭𑀺𑀬𑀢𑁄 𑀲𑀫𑀼𑀝𑁆𑀞𑀸𑀢𑀺, 𑀅𑀤𑁂𑀲𑀸𑀧𑁂𑀢𑁆𑀯𑀸 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁, 𑀧𑀫𑀸𑀡𑀬𑀼𑀢𑁆𑀢𑀁 𑀯𑀸 𑀓𑀭𑁄𑀢𑁄 𑀓𑀺𑀭𑀺𑀬𑀸𑀓𑀺𑀭𑀺𑀬𑀢𑁄 𑀲𑀫𑀼𑀝𑁆𑀞𑀸𑀢𑀺.

𑁮𑁬𑁧. 𑀬𑀢𑁄 𑀆𑀧𑀢𑁆𑀢𑀺𑀢𑁄. 𑀅𑀬𑀁 𑀆𑀧𑀢𑁆𑀢𑀺. 𑀲𑀜𑁆𑀜𑀸𑀬 𑀓𑀭𑀡𑀪𑀽𑀢𑀸𑀬 𑀯𑀺𑀫𑁄𑀓𑁆𑀔𑁄 𑀏𑀢𑀸𑀬𑀸𑀢𑀺 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀸. 𑀏𑀢𑁆𑀣 𑀘 𑀯𑀻𑀢𑀺𑀓𑁆𑀓𑀫𑀲𑀜𑁆𑀜𑀸 𑀅𑀯𑀺𑀚𑁆𑀚𑀫𑀸𑀦𑀸𑀧𑀺 𑀆𑀧𑀢𑁆𑀢𑀺𑀬𑀸 𑀯𑀺𑀫𑀼𑀘𑁆𑀘𑀦𑀲𑁆𑀲 𑀲𑀸𑀥𑀓𑀢𑀫𑀝𑁆𑀞𑁂𑀦 𑀕𑀳𑀺𑀢𑀸. 𑀬𑀣𑀸 𑀯𑀼𑀝𑁆𑀞𑀺𑀬𑀸 𑀅𑀪𑀸𑀯𑁂𑀦 𑀚𑀸𑀢𑀁 𑀤𑀼𑀩𑁆𑀪𑀺𑀓𑁆𑀔𑀁 ‘‘𑀯𑀼𑀝𑁆𑀞𑀺𑀓𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀁 𑀲𑀘𑀺𑀢𑁆𑀢𑀓𑀸𑀧𑀢𑁆𑀢𑀺.

𑁮𑁬𑁨-𑁪. 𑀇𑀢𑀭𑀸 𑀧𑀦 𑀅𑀘𑀺𑀢𑁆𑀢𑀓𑀸𑀧𑀢𑁆𑀢𑀺. 𑀯𑀻𑀢𑀺𑀓𑁆𑀓𑀫𑀲𑀜𑁆𑀜𑀸𑀬 𑀅𑀪𑀸𑀯𑁂𑀦 𑀦𑀢𑁆𑀣𑀺 𑀯𑀺𑀫𑁄𑀓𑁆𑀔𑁄 𑀏𑀢𑀸𑀬𑀸𑀢𑀺 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀸. 𑀲𑀼𑀘𑀺𑀢𑁆𑀢𑁂𑀦 𑀲𑀯𑀸𑀲𑀦𑀓𑀺𑀮𑁂𑀲𑀧𑁆𑀧𑀳𑀸𑀦𑁂𑀦, 𑀲𑀓𑀮𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀲𑀫𑁆𑀧𑀬𑁄𑀕𑁂𑀦 𑀘 𑀲𑀼𑀦𑁆𑀤𑀭𑀘𑀺𑀢𑁆𑀢𑁂𑀦 𑀪𑀕𑀯𑀢𑀸 𑀧𑀓𑀸𑀲𑀺𑀢𑀸 𑀲𑀩𑁆𑀩𑀸𑀯 𑀆𑀧𑀢𑁆𑀢𑀺 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀤𑀼𑀯𑀺𑀥𑀸 𑀲𑀺𑀬𑀼𑀦𑁆𑀢𑀺 𑀬𑁄𑀚𑀦𑀸. 𑀲𑀘𑀺𑀢𑁆𑀢𑀓𑀲𑀫𑀼𑀝𑁆𑀞𑀸𑀦𑀯𑀲𑁂𑀦 𑀧𑀦𑀸𑀢𑀺 𑀲𑀘𑀺𑀢𑁆𑀢𑀓𑀲𑀫𑀼𑀝𑁆𑀞𑀸𑀦𑀯𑀲𑁂𑀦𑁂𑀯. 𑀲𑀘𑀺𑀢𑁆𑀢𑀓𑀫𑀺𑀲𑁆𑀲𑀓𑀯𑀺𑀯𑀚𑁆𑀚𑀦𑀢𑁆𑀣𑀸𑀬 𑀧𑀦-𑀲𑀤𑁆𑀤𑁄 𑀏𑀯𑀓𑀸𑀭𑀢𑁆𑀣𑁄 𑀯𑀼𑀢𑁆𑀢𑁄.

𑀬𑀸 𑀲𑀘𑀺𑀢𑁆𑀢𑀓𑁂𑀳𑀺 𑀯𑀸 𑀅𑀘𑀺𑀢𑁆𑀢𑀓𑀫𑀺𑀲𑁆𑀲𑀓𑀲𑀫𑀼𑀝𑁆𑀞𑀸𑀦𑀯𑀲𑁂𑀦 𑀯𑀸 𑀲𑀫𑀼𑀝𑁆𑀞𑀸𑀢𑀺, 𑀅𑀬𑀁 𑀅𑀘𑀺𑀢𑁆𑀢𑀓𑀸.

𑁮𑁬𑁫. 𑀲𑀼𑀯𑀺𑀚𑁆𑀚𑁂𑀦𑀸𑀢𑀺 𑀲𑁄𑀪𑀫𑀸𑀦𑀸𑀳𑀺 𑀢𑀻𑀳𑀺 𑀯𑀺𑀚𑁆𑀚𑀸𑀳𑀺 𑀯𑀸 𑀅𑀝𑁆𑀞𑀳𑀺 𑀯𑀸 𑀯𑀺𑀚𑁆𑀚𑀸𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀼𑀯𑀺𑀚𑁆𑀚𑁂𑀦. 𑀅𑀦𑀯𑀚𑁆𑀚𑁂𑀦𑀸𑀢𑀺 𑀲𑀯𑀸𑀲𑀦𑀓𑀺𑀮𑁂𑀲𑀸𑀯𑀚𑁆𑀚𑀭𑀳𑀺𑀢𑀢𑁆𑀢𑀸 𑀅𑀦𑀯𑀚𑁆𑀚𑁂𑀦 𑀪𑀕𑀯𑀢𑀸. 𑀮𑁄𑀓𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀢𑁄 𑀮𑁄𑀓𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀯𑀲𑁂𑀦 𑀲𑀩𑁆𑀩𑀸𑀯 𑀆𑀧𑀢𑁆𑀢𑀺𑀬𑁄 𑀯𑀚𑁆𑀚𑀯𑀲𑁂𑀦 𑀤𑀼𑀯𑀺𑀥𑀸 𑀤𑀼𑀓𑀸 𑀯𑀼𑀢𑁆𑀢𑀸𑀢𑀺 𑀬𑁄𑀚𑀦𑀸.

𑁮𑁬𑁬. 𑀬𑀲𑁆𑀲𑀸 𑀲𑀘𑀺𑀢𑁆𑀢𑀓𑁂 𑀧𑀓𑁆𑀔𑁂, 𑀘𑀺𑀢𑁆𑀢𑀁 𑀅𑀓𑀼𑀲𑀮𑀁 𑀲𑀺𑀬𑀸𑀢𑀺 𑀬𑀲𑁆𑀲𑀸 𑀲𑀘𑀺𑀢𑁆𑀢𑀓𑀸𑀘𑀺𑀢𑁆𑀢𑀓𑀲𑀫𑀼𑀝𑁆𑀞𑀸𑀦𑀸𑀬 𑀅𑀘𑀺𑀢𑁆𑀢𑀓𑀸𑀬 𑀲𑀼𑀭𑀸𑀧𑀸𑀦𑀸𑀤𑀺𑀆𑀧𑀢𑁆𑀢𑀺𑀬𑀸 𑀲𑀘𑀺𑀢𑁆𑀢𑀓𑀲𑀫𑀼𑀝𑁆𑀞𑀸𑀦𑀧𑀓𑁆𑀔𑁂 𑀘𑀺𑀢𑁆𑀢𑀁 𑀅𑀓𑀼𑀲𑀮𑀫𑁂𑀯 𑀳𑁄𑀢𑀺, 𑀅𑀬𑀁 𑀮𑁄𑀓𑀯𑀚𑁆𑀚𑀸 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀲𑀸 𑀧𑀦 𑀲𑀘𑀺𑀢𑁆𑀢𑀓𑀲𑀫𑀼𑀝𑁆𑀞𑀸𑀦𑀸𑀬 𑀧𑀞𑀫𑀧𑀸𑀭𑀸𑀚𑀺𑀓𑀸𑀤𑀺𑀆𑀧𑀢𑁆𑀢𑀺𑀬𑀸 𑀘𑀺𑀢𑁆𑀢𑀁 𑀅𑀓𑀼𑀲𑀮𑀫𑁂𑀯 𑀳𑁄𑀢𑀺, 𑀢𑀲𑁆𑀲𑀸 𑀮𑁄𑀓𑀯𑀚𑁆𑀚𑀢𑀸𑀬 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀅𑀘𑀺𑀢𑁆𑀢𑀓𑀸𑀧𑀺 𑀯𑀸 𑀆𑀧𑀢𑁆𑀢𑀺 𑀲𑀘𑀺𑀢𑁆𑀢𑀓𑀧𑀓𑁆𑀔𑁂 𑀓𑀼𑀲𑀮𑀘𑀺𑀢𑁆𑀢𑁂 𑀲𑀢𑀺 𑀮𑁄𑀓𑀯𑀚𑁆𑀚𑀢𑀸𑀬 𑀲𑀺𑀤𑁆𑀥𑀸𑀬 𑀅𑀘𑀺𑀢𑁆𑀢𑀓𑀧𑀓𑁆𑀔𑁂𑀧𑀺 𑀮𑁄𑀓𑀯𑀚𑁆𑀚𑁄 𑀳𑁄𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀅𑀓𑀼𑀲𑀮𑀘𑀺𑀢𑁆𑀢𑁂𑀦𑁂𑀯 𑀆𑀧𑀚𑁆𑀚𑀺𑀢𑀩𑁆𑀩𑀸𑀬 𑀆𑀧𑀢𑁆𑀢𑀺𑀬𑀸 𑀮𑁄𑀓𑀯𑀚𑁆𑀚𑀢𑀸𑀢𑀺 𑀲𑀸 𑀯𑀺𑀲𑀼𑀁 𑀦 𑀯𑀼𑀢𑁆𑀢𑀸.

𑀬𑀲𑁆𑀫𑀸 𑀧𑀦 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀸𑀬 𑀯𑀢𑁆𑀣𑀼𑀯𑀻𑀢𑀺𑀓𑁆𑀓𑀫𑀯𑀚𑁆𑀚𑀸 𑀲𑀺𑀬𑀸 𑀓𑀼𑀲𑀮𑀁, 𑀲𑀺𑀬𑀸 𑀅𑀩𑁆𑀬𑀸𑀓𑀢𑀁, 𑀢𑀲𑁆𑀫𑀸 𑀢𑀲𑁆𑀲𑀸 𑀲𑀘𑀺𑀢𑁆𑀢𑀓𑀧𑀓𑁆𑀔𑁂 𑀘𑀺𑀢𑁆𑀢𑀁 𑀓𑀼𑀲𑀮𑀫𑁂𑀯𑀸𑀢𑀺 𑀅𑀬𑀁 𑀦𑀺𑀬𑀫𑁄 𑀦𑀢𑁆𑀣𑀻𑀢𑀺 𑀆𑀳 ‘‘𑀲𑁂𑀲𑀸 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀓𑀸’’𑀢𑀺. ‘‘𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀓𑀸’’𑀢𑀺 𑀇𑀫𑀺𑀦𑀸 𑀘 𑀮𑀓𑁆𑀔𑀡𑁂𑀦 𑀯𑀢𑁆𑀣𑀼𑀯𑀺𑀚𑀸𑀦𑀦𑀘𑀺𑀢𑁆𑀢𑁂𑀦 𑀲𑀘𑀺𑀢𑁆𑀢𑀓𑀧𑀓𑁆𑀔𑁂 𑀘𑀺𑀢𑁆𑀢𑀁 𑀲𑀺𑀬𑀸 𑀓𑀼𑀲𑀮𑀁, 𑀲𑀺𑀬𑀸 𑀅𑀓𑀼𑀲𑀮𑀁, 𑀲𑀺𑀬𑀸 𑀅𑀩𑁆𑀬𑀸𑀓𑀢𑀁, 𑀢𑀲𑁆𑀫𑀸 𑀢𑀲𑁆𑀲𑀸 𑀲𑀘𑀺𑀢𑁆𑀢𑀓𑀧𑀓𑁆𑀔𑁂 𑀘𑀺𑀢𑁆𑀢𑀁 𑀅𑀓𑀼𑀲𑀮𑀫𑁂𑀯𑀸𑀢𑀺 𑀅𑀬𑀁 𑀦𑀺𑀬𑀫𑁄 𑀦𑀢𑁆𑀣𑀻𑀢𑀺 𑀆𑀳.

𑁮𑁬𑁭. 𑀓𑀸𑀬𑀤𑁆𑀯𑀸𑀭𑁂𑀦 𑀆𑀧𑀚𑁆𑀚𑀺𑀢𑀩𑁆𑀩𑀸 𑀓𑀸𑀬𑀓𑀫𑁆𑀫𑀁. 𑀉𑀪𑀬𑀢𑁆𑀣 𑀆𑀧𑀚𑁆𑀚𑀺𑀢𑀩𑁆𑀩𑀸 𑀢𑀤𑀼𑀪𑀬𑀁 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁. 𑀫𑀦𑁄𑀤𑁆𑀯𑀸𑀭𑁂 𑀆𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀻𑀢𑀺 𑀫𑀦𑁄𑀓𑀫𑁆𑀫𑀁 𑀦 𑀯𑀼𑀢𑁆𑀢𑀁. ‘‘𑀫𑀦𑁄𑀤𑁆𑀯𑀸𑀭𑁂 𑀆𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀻𑀢𑀺 𑀘 𑀇𑀤𑀁 𑀬𑁂𑀪𑀼𑀬𑁆𑀬𑀯𑀲𑁂𑀦 𑀯𑀼𑀢𑁆𑀢𑀁 𑀉𑀧𑀦𑀺𑀓𑁆𑀔𑀺𑀢𑁆𑀢𑀲𑀸𑀤𑀺𑀬𑀦𑀸𑀤𑀻𑀲𑀼 𑀫𑀦𑁄𑀤𑁆𑀯𑀸𑀭𑁂𑀧𑀺 𑀆𑀧𑀢𑁆𑀢𑀺𑀲𑀫𑁆𑀪𑀯𑀢𑁄’’𑀢𑀺 𑀆𑀘𑀭𑀺𑀬𑀸.

𑁮𑁬𑁮-𑁯. 𑀓𑀼𑀲𑀮𑀸𑀤𑀺𑀢𑀺𑀓𑀤𑁆𑀯𑀬𑀦𑁆𑀢𑀺 𑀓𑀼𑀲𑀮𑀢𑁆𑀢𑀺𑀓𑀜𑁆𑀘𑁂𑀯 𑀯𑁂𑀤𑀦𑀸𑀢𑁆𑀢𑀺𑀓𑀜𑁆𑀘. 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑁄 𑀓𑀼𑀲𑀮𑀸𑀓𑀼𑀲𑀮𑀘𑀺𑀢𑁆𑀢𑁄, 𑀢𑀣𑀸 𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑁄 𑀯𑀸 𑀳𑀼𑀢𑁆𑀯𑀸 𑀆𑀧𑀚𑁆𑀚𑀢𑀻𑀢𑀺 𑀬𑁄𑀚𑀦𑀸.

𑀤𑀼𑀓𑁆𑀔𑀸𑀤𑀺𑀲𑀁𑀬𑀼𑀢𑁄𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀉𑀧𑁂𑀓𑁆𑀔𑀸𑀯𑁂𑀤𑀦𑀸𑀲𑀫𑀗𑁆𑀕𑀺𑀦𑁄 𑀲𑀗𑁆𑀕𑀳𑁄. 𑀏𑀯𑀁 𑀲𑀦𑁆𑀢𑁂𑀧𑀺 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑁂𑀲𑀼 𑀅𑀓𑀼𑀲𑀮𑀘𑀺𑀢𑁆𑀢𑀯𑀲𑁂𑀦 𑀏𑀓𑀁 𑀘𑀺𑀢𑁆𑀢𑀁, 𑀓𑀼𑀲𑀮𑀸𑀩𑁆𑀬𑀸𑀓𑀢𑀯𑀲𑁂𑀦 𑀤𑁆𑀯𑁂 𑀘𑀺𑀢𑁆𑀢𑀸𑀦𑀺, 𑀲𑀩𑁆𑀩𑁂𑀲𑀁 𑀯𑀲𑁂𑀦 𑀢𑀻𑀡𑀺 𑀘𑀺𑀢𑁆𑀢𑀸𑀦𑀺. 𑀤𑀼𑀓𑁆𑀔𑀯𑁂𑀤𑀦𑀸𑀯𑀲𑁂𑀦 𑀏𑀓𑀸 𑀯𑁂𑀤𑀦𑀸, 𑀲𑀼𑀔𑀉𑀧𑁂𑀓𑁆𑀔𑀸𑀯𑀲𑁂𑀦 𑀤𑁆𑀯𑁂, 𑀲𑀩𑁆𑀩𑀸𑀲𑀁 𑀯𑀲𑁂𑀦 𑀢𑀺𑀲𑁆𑀲𑁄 𑀯𑁂𑀤𑀦𑀸𑀢𑀺 𑀅𑀬𑀫𑁂𑀯 𑀪𑁂𑀤𑁄 𑀮𑀩𑁆𑀪𑀢𑀺, 𑀦 𑀅𑀜𑁆𑀜𑁄 𑀪𑁂𑀤𑁄.

𑀓𑀼𑀲𑀮𑀢𑁆𑀢𑀺𑀓𑀁 𑀲𑀘𑁂𑀧𑀺 𑀕𑀳𑀺𑀢𑀁, 𑀦 𑀧𑀦 𑀲𑀩𑁆𑀩𑁂𑀲𑀫𑁂𑀯 𑀘𑀺𑀢𑁆𑀢𑀸𑀦𑀁 𑀯𑀲𑁂𑀦 𑀮𑀩𑁆𑀪𑀢𑀺, 𑀅𑀣 𑀔𑁄 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑀸𑀦𑀁 𑀩𑀸𑀢𑁆𑀢𑀺𑀁𑀲𑀘𑀺𑀢𑁆𑀢𑀸𑀦𑀫𑁂𑀯 𑀯𑀲𑁂𑀦 𑀮𑀩𑁆𑀪𑀢𑀺. 𑀩𑀸𑀢𑁆𑀢𑀺𑀁𑀲𑁂𑀯 𑀳𑀺 𑀘𑀺𑀢𑁆𑀢𑀸𑀦𑀺 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑀸𑀦𑀺. 𑀤𑁆𑀯𑀸𑀤𑀲 𑀅𑀓𑀼𑀲𑀮𑀸𑀦𑀺, 𑀅𑀝𑁆𑀞 𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀦𑀺, 𑀤𑀲 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺, 𑀓𑀼𑀲𑀮𑀢𑁄, 𑀓𑀺𑀭𑀺𑀬𑀢𑁄 𑀘 𑀤𑁆𑀯𑁂 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑀸𑀦𑀺 𑀘𑀸𑀢𑀺 𑀏𑀯𑀁 𑀩𑀸𑀢𑁆𑀢𑀺𑀁𑀲𑀘𑀺𑀢𑁆𑀢𑁂𑀳𑀺 𑀲𑀫𑀼𑀝𑁆𑀞𑀺𑀢𑀸𑀧𑀺 𑀆𑀧𑀢𑁆𑀢𑀺 𑀅𑀓𑀼𑀲𑀮𑀸 𑀯𑀸 𑀳𑁄𑀢𑀺 𑀅𑀩𑁆𑀬𑀸𑀓𑀢𑀸 𑀯𑀸, 𑀦𑀢𑁆𑀣𑀺 𑀆𑀧𑀢𑁆𑀢𑀺 𑀓𑀼𑀲𑀮𑀁. 𑀬𑀣𑀸𑀳 𑀲𑀫𑀣𑀓𑁆𑀔𑀦𑁆𑀥𑀓𑁂 ‘‘𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀲𑀺𑀬𑀸 𑀅𑀓𑀼𑀲𑀮𑀁 𑀲𑀺𑀬𑀸 𑀅𑀩𑁆𑀬𑀸𑀓𑀢𑀁, 𑀦𑀢𑁆𑀣𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀓𑀼𑀲𑀮’’𑀦𑁆𑀢𑀺 (𑀘𑀽𑀴𑀯. 𑁨𑁨𑁨; 𑀧𑀭𑀺. 𑁩𑁦𑁩). 𑀅𑀬𑀁 𑀧𑀦 𑀧𑀸𑀞𑁄 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄, 𑀦 𑀮𑁄𑀓𑀯𑀚𑁆𑀚𑀁. 𑀬𑀲𑁆𑀫𑀺𑀜𑁆𑀳𑀺 𑀧𑀣𑀯𑀺𑀔𑀡𑀦𑀪𑀽𑀢𑀕𑀸𑀫𑀧𑀸𑀢𑀩𑁆𑀬𑀢𑀸𑀤𑀺𑀓𑁂 𑀆𑀧𑀢𑁆𑀢𑀸𑀥𑀺𑀓𑀭𑀡𑁂 𑀓𑀼𑀲𑀮𑀘𑀺𑀢𑁆𑀢𑀁 𑀅𑀗𑁆𑀕𑀁 𑀳𑁄𑀢𑀺, 𑀢𑀲𑁆𑀫𑀺𑀜𑁆𑀘 𑀲𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁 ‘‘𑀦𑀢𑁆𑀣𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀓𑀼𑀲𑀮’’𑀦𑁆𑀢𑀺. 𑀢𑀲𑁆𑀫𑀸 𑀦𑀬𑀺𑀤𑀁 𑀅𑀗𑁆𑀕𑀧𑀳𑁄𑀦𑀓𑀘𑀺𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀁 𑀢𑀸𑀯 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀮𑁄𑀓𑀯𑀚𑁆𑀚𑀁, 𑀢𑀁 𑀏𑀓𑀦𑁆𑀢𑀢𑁄 𑀅𑀓𑀼𑀲𑀮𑀫𑁂𑀯. 𑀢𑀢𑁆𑀣 ‘‘𑀲𑀺𑀬𑀸 𑀅𑀓𑀼𑀲𑀮’’𑀦𑁆𑀢𑀺 𑀯𑀺𑀓𑀧𑁆𑀧𑁄 𑀦𑀢𑁆𑀣𑀺. 𑀬𑀁 𑀧𑀦 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀢𑀁 𑀬𑀲𑁆𑀫𑀸 𑀲𑀜𑁆𑀘𑀺𑀘𑁆𑀘 ‘‘𑀇𑀫𑀁 𑀆𑀧𑀢𑁆𑀢𑀺𑀁 𑀯𑀻𑀢𑀺𑀓𑁆𑀓𑀫𑀸𑀫𑀻’’𑀢𑀺 𑀯𑀻𑀢𑀺𑀓𑁆𑀓𑀫𑀦𑁆𑀢𑀲𑁆𑀲𑁂𑀯 𑀅𑀓𑀼𑀲𑀮𑀁 𑀳𑁄𑀢𑀺, 𑀅𑀲𑀜𑁆𑀘𑀺𑀘𑁆𑀘 𑀧𑀦 𑀓𑀺𑀜𑁆𑀘𑀺 𑀅𑀚𑀸𑀦𑀦𑁆𑀢𑀲𑁆𑀲 𑀲𑀳𑀲𑁂𑀬𑁆𑀬𑀸𑀤𑀺𑀯𑀲𑁂𑀦 𑀆𑀧𑀚𑁆𑀚𑀦𑀢𑁄 𑀅𑀩𑁆𑀬𑀸𑀓𑀢𑀁 𑀳𑁄𑀢𑀺, 𑀢𑀲𑁆𑀫𑀸 𑀢𑀢𑁆𑀣 𑀲𑀜𑁆𑀘𑀺𑀘𑁆𑀘𑀸𑀲𑀜𑁆𑀘𑀺𑀘𑁆𑀘𑀯𑀲𑁂𑀦 𑀇𑀫𑀁 𑀯𑀺𑀓𑀧𑁆𑀧𑀪𑀸𑀯𑀁 𑀲𑀦𑁆𑀥𑀸𑀬 𑀇𑀤𑀁 𑀯𑀼𑀢𑁆𑀢𑀁 ‘‘𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀲𑀺𑀬𑀸 𑀅𑀓𑀼𑀲𑀮𑀁 𑀲𑀺𑀬𑀸 𑀅𑀩𑁆𑀬𑀸𑀓𑀢𑀁, 𑀦𑀢𑁆𑀣𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀓𑀼𑀲𑀮’’𑀦𑁆𑀢𑀺. 𑀲𑀘𑁂 𑀧𑀦 ‘‘𑀬𑀁 𑀓𑀼𑀲𑀮𑀘𑀺𑀢𑁆𑀢𑁄 𑀆𑀧𑀚𑁆𑀚𑀢𑀺, 𑀇𑀤𑀁 𑀯𑀼𑀘𑁆𑀘𑀢𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀓𑀼𑀲𑀮’’𑀦𑁆𑀢𑀺 𑀯𑀤𑁂𑀬𑁆𑀬, 𑀅𑀘𑀺𑀢𑁆𑀢𑀓𑀸𑀦𑀁 𑀏𑀴𑀓𑀮𑁄𑀫𑀧𑀤𑀲𑁄𑀥𑀫𑁆𑀫𑀸𑀤𑀺𑀲𑀫𑀼𑀝𑁆𑀞𑀸𑀦𑀸𑀦𑀫𑁆𑀧𑀺 𑀓𑀼𑀲𑀮𑀘𑀺𑀢𑁆𑀢𑀁 𑀆𑀧𑀚𑁆𑀚𑁂𑀬𑁆𑀬, 𑀦 𑀘 𑀢𑀢𑁆𑀣 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀓𑀼𑀲𑀮𑀘𑀺𑀢𑁆𑀢𑀁 𑀆𑀧𑀢𑁆𑀢𑀺𑀬𑀸 𑀅𑀗𑁆𑀕𑀁, 𑀓𑀸𑀬𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀯𑀲𑁂𑀦 𑀧𑀦 𑀘𑀮𑀺𑀢𑀧𑀯𑀢𑁆𑀢𑀸𑀦𑀁 𑀓𑀸𑀬𑀯𑀸𑀘𑀸𑀦𑀁 𑀅𑀜𑁆𑀜𑀢𑀭𑀫𑁂𑀯 𑀅𑀗𑁆𑀕𑀁, 𑀢𑀜𑁆𑀘 𑀭𑀽𑀧𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀅𑀩𑁆𑀬𑀸𑀓𑀢𑀦𑁆𑀢𑀺.

𑁮𑁭𑁦. 𑀇𑀤𑀁 𑀢𑀼 𑀮𑀓𑁆𑀔𑀡𑀦𑁆𑀢𑀺 𑀇𑀤𑀁 𑀦𑀺𑀤𑀸𑀦𑀸𑀤𑀺𑀲𑀸𑀥𑀸𑀭𑀡𑀯𑀺𑀦𑀺𑀘𑁆𑀙𑀬𑀮𑀓𑁆𑀔𑀡𑀁.

𑁮𑁭𑁧. ‘‘𑀢𑀭𑀼’’𑀦𑁆𑀢𑀺𑀆𑀤𑀺𑀕𑀸𑀣𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀢𑁆𑀣𑀸𑀯. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀢𑀢𑁆𑀣 ‘‘𑀤𑁆𑀯𑀬𑀗𑁆𑀓𑀼𑀭’’𑀦𑁆𑀢𑀺 𑀯𑀼𑀢𑁆𑀢𑀁, 𑀇𑀥 ‘‘𑀘𑀢𑀼𑀲𑁆𑀲𑀺𑀔’’𑀦𑁆𑀢𑀺. 𑀢𑀢𑁆𑀣 ‘‘𑀤𑁆𑀯𑀬𑀗𑁆𑀓𑀼𑀭’’𑀦𑁆𑀢𑀺 𑀮𑁄𑀓𑀯𑀚𑁆𑀚𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀸𑀦𑀁 𑀕𑀳𑀡𑀁, 𑀇𑀥 𑀘𑀢𑀼𑀲𑁆𑀲𑀺𑀔𑀦𑁆𑀢𑀺 𑀘𑀢𑀼𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀁. 𑀘𑀢𑁆𑀢𑀸𑀭𑁄 𑀲𑀻𑀔𑀸 𑀅𑀗𑁆𑀓𑀼𑀭𑀸 𑀏𑀢𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄. 𑀢𑀢𑁆𑀣 𑀯𑀺𑀧𑀢𑁆𑀢𑀺 ‘‘𑀲𑀢𑁆𑀢𑀨𑀮’’𑀦𑁆𑀢𑀺 𑀲𑀢𑁆𑀢𑀨𑀮𑁂𑀲𑀼 𑀅𑀦𑁆𑀢𑁄𑀕𑀥𑀸, 𑀇𑀥 𑀯𑀺𑀧𑀢𑁆𑀢𑀺𑀝𑁆𑀞𑀸𑀦𑁂 𑀯𑀚𑁆𑀚𑀁 𑀕𑀳𑁂𑀢𑁆𑀯𑀸 𑀲𑀢𑁆𑀢𑀨𑀮𑀸𑀦𑀺.

𑁮𑁭𑁨. 𑀅𑀦𑀼𑀢𑁆𑀢𑀭𑀢𑀁 𑀕𑀢𑀁 𑀅𑀢𑁆𑀢𑀦𑀸 𑀉𑀢𑁆𑀢𑀭𑀲𑁆𑀲 𑀉𑀢𑁆𑀢𑀫𑀲𑁆𑀲 𑀓𑀲𑁆𑀲𑀘𑀺 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀇𑀫𑀁 𑀉𑀢𑁆𑀢𑀭𑀁 𑀉𑀢𑁆𑀢𑀭𑀁 𑀦𑀸𑀫 𑀧𑀓𑀭𑀡𑀁 𑀬𑁄 𑀣𑁂𑀭𑀦𑀯𑀫𑀚𑁆𑀛𑀺𑀫𑁂𑀲𑀼 𑀅𑀜𑁆𑀜𑀢𑀭𑁄 𑀧𑀭𑀺𑀬𑀸𑀧𑀼𑀡𑀸𑀢𑀺 𑀧𑀸𑀞𑀲𑁆𑀲 𑀧𑀕𑀼𑀡𑀯𑀸𑀘𑀼𑀕𑁆𑀕𑀢𑀓𑀭𑀡𑁂𑀦 𑀅𑀥𑀻𑀬𑀢𑀺, 𑀧𑀭𑀺𑀧𑀼𑀘𑁆𑀙𑀢𑀺 𑀅𑀢𑁆𑀣𑀜𑁆𑀘 𑀅𑀢𑁆𑀣𑀯𑀡𑁆𑀡𑀦𑀁 𑀲𑀼𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀉𑀕𑁆𑀕𑀳𑁂𑀢𑁆𑀯𑀸 𑀫𑀦𑀲𑀸 𑀧𑁂𑀓𑁆𑀔𑀺𑀢𑁆𑀯𑀸 𑀧𑀜𑁆𑀜𑀸𑀬 𑀲𑀼𑀧𑁆𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀥𑀸𑀭𑁂𑀢𑀺, 𑀲𑁄 𑀘 𑀪𑀺𑀓𑁆𑀔𑀼 𑀘-𑀲𑀤𑁆𑀤𑁂𑀦 𑀏𑀯𑀫𑁂𑀯 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 𑀬𑁄 𑀪𑀺𑀓𑁆𑀔𑀼 𑀬𑀼𑀢𑁆𑀢𑁄, 𑀲𑁄 𑀘 𑀓𑀸𑀬𑀯𑀸𑀘𑀯𑀺𑀦𑀬𑁂 𑀓𑀸𑀬𑀯𑀸𑀘𑀸𑀯𑀻𑀢𑀺𑀓𑁆𑀓𑀫𑀸𑀦𑀁 𑀯𑀺𑀦𑀬𑀦𑁂 𑀲𑀁𑀯𑀭𑀡𑁂 𑀯𑀺𑀦𑀬𑁂 𑀯𑀺𑀦𑀬𑀧𑀺𑀝𑀓𑁂 𑀅𑀦𑀼𑀢𑁆𑀢𑀭𑀢𑀁 𑀉𑀧𑀬𑀸𑀢𑀺 𑀅𑀢𑁆𑀢𑀦𑁄 𑀉𑀢𑁆𑀢𑀭𑀺𑀢𑀭𑀲𑁆𑀲 𑀅𑀯𑀺𑀚𑁆𑀚𑀫𑀸𑀦𑀢𑀁 𑀉𑀧𑀕𑀘𑁆𑀙𑀢𑀺. 𑀏𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀉𑀢𑁆𑀢𑀭𑀢𑁄’’𑀢𑀺, 𑀧𑀕𑀼𑀡𑀯𑀸𑀘𑀼𑀕𑁆𑀕𑀢𑀓𑀭𑀡𑁂𑀦 𑀅𑀥𑀻𑀢𑁂𑀦 𑀅𑀢𑁆𑀣𑀯𑀡𑁆𑀡𑀦𑀁 𑀲𑀼𑀢𑁆𑀯𑀸 𑀥𑀸𑀭𑀡𑁂𑀦 𑀲𑀼𑀝𑁆𑀞𑀼 𑀥𑀸𑀭𑀺𑀢𑁂𑀦 𑀇𑀫𑀺𑀦𑀸 𑀉𑀢𑁆𑀢𑀭𑀧𑀓𑀭𑀡𑁂𑀦 𑀳𑁂𑀢𑀼𑀪𑀽𑀢𑁂𑀦𑀸𑀢𑀺 𑀅𑀢𑁆𑀣𑁄.

𑀇𑀢𑀺 𑀉𑀢𑁆𑀢𑀭𑁂 𑀮𑀻𑀦𑀢𑁆𑀣𑀧𑀓𑀸𑀲𑀦𑀺𑀬𑀸

𑀮𑀓𑁆𑀔𑀡𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.