𑀲𑀸𑀥𑀸𑀭𑀡𑀸𑀲𑀸𑀥𑀸𑀭𑀡𑀓𑀣𑀸𑀯𑀡𑁆𑀡𑀦𑀸

𑁭𑁭𑁯-𑁮𑁦. 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀸𑀦𑀦𑁆𑀢𑀺 𑀉𑀪𑀢𑁄𑀯𑀺𑀪𑀗𑁆𑀕𑀸𑀕𑀢𑀸𑀦𑀁 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀸𑀦𑀁. 𑀪𑀺𑀓𑁆𑀔𑀽𑀳𑀺 𑀪𑀺𑀓𑁆𑀔𑀼𑀦𑀻𑀳𑀻𑀢𑀺 𑀉𑀪𑀬𑀢𑁆𑀣 𑀲𑀳𑀢𑁆𑀣𑁂 𑀓𑀭𑀡𑀯𑀘𑀦𑀁. 𑀪𑀺𑀓𑁆𑀔𑀽𑀳𑀺 𑀪𑀺𑀓𑁆𑀔𑀼𑀦𑀻𑀦𑀜𑁆𑀘, 𑀪𑀺𑀓𑁆𑀔𑀼𑀦𑀻𑀳𑀺 𑀪𑀺𑀓𑁆𑀔𑀽𑀦𑀜𑁆𑀘𑀸𑀢𑀺 𑀉𑀪𑀬𑀢𑁆𑀣 𑀅𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀜𑁆𑀘, 𑀢𑀣𑀸 𑀪𑀺𑀓𑁆𑀔𑀽𑀳𑀺 𑀪𑀺𑀓𑁆𑀔𑀼𑀦𑀻𑀦𑀜𑁆𑀘, 𑀪𑀺𑀓𑁆𑀔𑀼𑀦𑀻𑀳𑀺 𑀪𑀺𑀓𑁆𑀔𑀽𑀦𑀜𑁆𑀘𑀸𑀢𑀺 𑀉𑀪𑀬𑀢𑁆𑀣 𑀲𑀸𑀥𑀸𑀭𑀡𑀲𑀺𑀓𑁆𑀔𑀸𑀧𑀤𑀜𑁆𑀘 𑀅𑀳𑀁 𑀯𑀓𑁆𑀔𑀸𑀫𑀻𑀢𑀺 𑀬𑁄𑀚𑀦𑀸. 𑀲𑀫𑀸𑀳𑀺𑀢𑀸𑀢𑀺 𑀏𑀓𑀕𑁆𑀕𑀘𑀺𑀢𑁆𑀢𑀸. 𑀢𑀁 𑀫𑀬𑀸 𑀯𑀼𑀘𑁆𑀘𑀫𑀸𑀦𑀁 𑀦𑀺𑀤𑀸𑀦𑀸𑀤𑀺𑀦𑀬𑀁. 𑀲𑀼𑀡𑀸𑀣𑀸𑀢𑀺 𑀲𑁄𑀢𑀼𑀚𑀦𑀁 𑀲𑀓𑁆𑀓𑀘𑁆𑀘𑀲𑀯𑀦𑁂 𑀦𑀺𑀬𑁄𑀚𑁂𑀢𑀺.

𑁭𑁮𑁧. ‘‘𑀦𑀺𑀤𑀸𑀦’’𑀦𑁆𑀢𑀺𑀆𑀤𑀺𑀕𑀸𑀣𑀸 𑀯𑀼𑀢𑁆𑀢𑀢𑁆𑀣𑀸𑀯.

𑁭𑁮𑁨-𑁩. ‘‘𑀓𑀢𑀺 𑀯𑁂𑀲𑀸𑀮𑀺𑀬𑀸’’𑀢𑀺𑀆𑀤𑀺 𑀧𑀼𑀘𑁆𑀙𑀸𑀕𑀸𑀣𑀸 𑀉𑀢𑁆𑀢𑀸𑀦𑀢𑁆𑀣𑀸𑀬𑁂𑀯.

𑁭𑁮𑁬. ‘‘𑀤𑀲 𑀯𑁂𑀲𑀸𑀮𑀺𑀬𑀸’’𑀢𑀺𑀆𑀤𑀺𑀯𑀺𑀲𑁆𑀲𑀚𑁆𑀚𑀦𑀕𑀸𑀣𑀸𑀦𑀁 ‘‘𑀫𑁂𑀣𑀼𑀦’’𑀦𑁆𑀢𑀺𑀆𑀤𑀬𑁄 𑀦𑀺𑀤𑁆𑀤𑁂𑀲𑀯𑀲𑁂𑀦 𑀯𑀼𑀢𑁆𑀢𑀸. 𑀯𑀺𑀕𑁆𑀕𑀳𑁄𑀢𑀺 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀁 𑀧𑀸𑀭𑀸𑀚𑀺𑀓𑀁. 𑀘𑀢𑀼𑀢𑁆𑀣𑀦𑁆𑀢𑀺𑀫𑀯𑀢𑁆𑀣𑀼𑀓𑀦𑁆𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀧𑀸𑀭𑀸𑀚𑀺𑀓𑀁. 𑀅𑀢𑀺𑀭𑁂𑀓𑀘𑀻𑀯𑀭𑀦𑁆𑀢𑀺 𑀧𑀞𑀫𑀓𑀣𑀺𑀦𑀁. 𑀲𑀼𑀤𑁆𑀥𑀓𑀸𑀴𑀓𑁂𑀴𑀓𑀮𑁄𑀫𑀓𑀦𑁆𑀢𑀺 𑀏𑀴𑀓𑀮𑁄𑀫𑀯𑀕𑁆𑀕𑁂 𑀤𑀼𑀢𑀺𑀬𑀁.

𑁭𑁮𑁭. 𑀪𑀽𑀢𑀦𑁆𑀢𑀺 𑀧𑀞𑀫𑁂 𑀫𑀼𑀲𑀸𑀯𑀸𑀤𑀯𑀕𑁆𑀕𑁂 𑀅𑀝𑁆𑀞𑀫𑀁. 𑀧𑀭𑀫𑁆𑀧𑀭𑀜𑁆𑀘𑁂𑀯𑀸𑀢𑀺 𑀧𑀭𑀫𑁆𑀧𑀭𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀁. 𑀫𑀼𑀔𑀤𑁆𑀯𑀸𑀭𑀦𑁆𑀢𑀺 𑀘𑀢𑀼𑀢𑁆𑀣𑁂 𑀪𑁄𑀚𑀦𑀯𑀕𑁆𑀕𑁂 𑀤𑀲𑀫𑀁. 𑀪𑀺𑀓𑁆𑀔𑀼𑀦𑀻𑀲𑀼 𑀘 𑀅𑀓𑁆𑀓𑁄𑀲𑁄𑀢𑀺 𑀪𑀺𑀓𑁆𑀔𑀼𑀦𑀺𑀧𑀸𑀢𑀺𑀫𑁄𑀓𑁆𑀔𑁂 𑀙𑀝𑁆𑀞𑁂 𑀆𑀭𑀸𑀫𑀯𑀕𑁆𑀕𑁂 𑀤𑀼𑀢𑀺𑀬𑀁.

𑁭𑁮𑁮. 𑀤𑁆𑀯𑁂 𑀅𑀦𑀼𑀤𑁆𑀥𑀁𑀲𑀦𑀸𑀦𑀻𑀢𑀺 𑀅𑀝𑁆𑀞𑀫𑀦𑀯𑀫𑀲𑀗𑁆𑀖𑀸𑀤𑀺𑀲𑁂𑀲𑀸. 𑀘𑀻𑀯𑀭𑀲𑁆𑀲 𑀧𑀝𑀺𑀕𑁆𑀕𑀳𑁄𑀢𑀺 𑀘𑀻𑀯𑀭𑀯𑀕𑁆𑀕𑁂 𑀧𑀜𑁆𑀘𑀫𑀁.

𑁭𑁮𑁯. 𑀭𑀽𑀧𑀺𑀬𑀦𑁆𑀢𑀺 𑀏𑀴𑀓𑀮𑁄𑀫𑀯𑀕𑁆𑀕𑁂 𑀅𑀝𑁆𑀞𑀫𑀁. 𑀲𑀼𑀢𑁆𑀢𑀯𑀺𑀜𑁆𑀜𑀢𑁆𑀢𑀻𑀢𑀺 𑀧𑀢𑁆𑀢𑀯𑀕𑁆𑀕𑁂 𑀙𑀝𑁆𑀞𑀁. 𑀉𑀚𑁆𑀛𑀸𑀧𑀦𑀦𑁆𑀢𑀺 𑀤𑀼𑀢𑀺𑀬𑁂 𑀪𑀽𑀢𑀕𑀸𑀫𑀯𑀕𑁆𑀕𑁂 𑀢𑀢𑀺𑀬𑀁. 𑀧𑀭𑀺𑀧𑀸𑀘𑀺𑀢𑀧𑀺𑀡𑁆𑀟𑁄𑀢𑀺 𑀢𑀢𑀺𑀬𑁂 𑀑𑀯𑀸𑀤𑀯𑀕𑁆𑀕𑁂 𑀦𑀯𑀫𑀁. 𑀢𑀣𑁂𑀯 𑀕𑀡𑀪𑁄𑀚𑀦𑀦𑁆𑀢𑀺 𑀘𑀢𑀼𑀢𑁆𑀣𑁂 𑀪𑁄𑀚𑀦𑀯𑀕𑁆𑀕𑁂 𑀤𑀼𑀢𑀺𑀬𑀁.

𑁭𑁯𑁦. 𑀯𑀺𑀓𑀸𑀮𑁂 𑀪𑁄𑀚𑀦𑀜𑁆𑀘𑁂𑀯𑀸𑀢𑀺 𑀢𑀢𑁆𑀣𑁂𑀯 𑀲𑀢𑁆𑀢𑀫𑀁. 𑀘𑀸𑀭𑀺𑀢𑁆𑀢𑀦𑁆𑀢𑀺 𑀅𑀘𑁂𑀮𑀓𑀯𑀕𑁆𑀕𑁂 𑀧𑀜𑁆𑀘𑀫𑁂 𑀙𑀝𑁆𑀞𑀁. 𑀦𑁆𑀳𑀸𑀦𑀦𑁆𑀢𑀺 𑀲𑀼𑀭𑀸𑀧𑀸𑀦𑀯𑀕𑁆𑀕𑁂 𑀙𑀝𑁆𑀞𑁂 𑀲𑀢𑁆𑀢𑀫𑀁. 𑀊𑀦𑀯𑀻𑀲𑀢𑀺𑀯𑀲𑁆𑀲𑀦𑁆𑀢𑀺 𑀲𑀢𑁆𑀢𑀫𑁂 𑀲𑀧𑁆𑀧𑀸𑀡𑀓𑀯𑀕𑁆𑀕𑁂 𑀧𑀜𑁆𑀘𑀫𑀁. 𑀤𑀢𑁆𑀯𑀸 𑀲𑀗𑁆𑀖𑁂𑀦 𑀘𑀻𑀯𑀭𑀦𑁆𑀢𑀺 𑀅𑀝𑁆𑀞𑀫𑁂 𑀲𑀳𑀥𑀫𑁆𑀫𑀺𑀓𑀯𑀕𑁆𑀕𑁂 𑀦𑀯𑀫𑀁.

𑁭𑁯𑁧. 𑀯𑁄𑀲𑀸𑀲𑀦𑁆𑀢𑀻𑀢𑀺 𑀤𑀼𑀢𑀺𑀬𑀁 𑀪𑀺𑀓𑁆𑀔𑀼𑀧𑀸𑀝𑀺𑀤𑁂𑀲𑀦𑀻𑀬𑀁. 𑀦𑀘𑁆𑀘𑀁 𑀯𑀸 𑀕𑀻𑀢𑀁 𑀯𑀸𑀢𑀺 𑀧𑀞𑀫𑁂 𑀮𑀲𑀼𑀡𑀯𑀕𑁆𑀕𑁂 𑀤𑀲𑀫𑀁. 𑀘𑀸𑀭𑀺𑀓𑀤𑁆𑀯𑀬𑀦𑁆𑀢𑀺 𑀘𑀢𑀼𑀢𑁆𑀣𑁂 𑀢𑀼𑀯𑀝𑁆𑀝𑀯𑀕𑁆𑀕𑁂 𑀲𑀢𑁆𑀢𑀫𑀝𑁆𑀞𑀫𑀸𑀦𑀺. 𑀙𑀦𑁆𑀤𑀤𑀸𑀦𑁂𑀦𑀸𑀢𑀺 𑀅𑀝𑁆𑀞𑀫𑁂 𑀓𑀼𑀫𑀸𑀭𑀺𑀪𑀽𑀢𑀯𑀕𑁆𑀕𑁂 𑀏𑀓𑀸𑀤𑀲𑀫𑀁. ‘‘𑀙𑀦𑁆𑀤𑀤𑀸𑀦𑁂𑀢𑀻’’𑀢𑀺 𑀯𑀸 𑀧𑀸𑀞𑁄. ‘‘𑀙𑀦𑁆𑀤𑀤𑀸𑀦𑀁 𑀇𑀢𑀺 𑀇𑀫𑁂’’𑀢𑀺 𑀧𑀤𑀘𑁆𑀙𑁂𑀤𑁄.

𑁭𑁯𑁨. 𑀓𑀼𑀝𑀻𑀢𑀺 𑀙𑀝𑁆𑀞𑁄 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀓𑁄𑀲𑀺𑀬𑀦𑁆𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑁂𑀲𑀼 𑀤𑀼𑀢𑀺𑀬𑁂 𑀏𑀴𑀓𑀮𑁄𑀫𑀯𑀕𑁆𑀕𑁂 𑀧𑀞𑀫𑀁. 𑀲𑁂𑀬𑁆𑀬𑀦𑁆𑀢𑀺 𑀫𑀼𑀲𑀸𑀯𑀸𑀤𑀯𑀕𑁆𑀕𑁂 𑀧𑀜𑁆𑀘𑀫𑀁. 𑀧𑀣𑀯𑀻𑀢𑀺 𑀫𑀼𑀲𑀸𑀯𑀸𑀤𑀯𑀕𑁆𑀕𑁂 𑀤𑀲𑀫𑀁. 𑀪𑀽𑀢𑀕𑀸𑀫𑀓𑀦𑁆𑀢𑀺 𑀪𑀽𑀢𑀕𑀸𑀫𑀯𑀕𑁆𑀕𑁂 𑀤𑀼𑀢𑀺𑀬𑁂 𑀧𑀞𑀫𑀁. 𑀲𑀧𑁆𑀧𑀸𑀡𑀓𑀜𑁆𑀘 𑀲𑀺𑀜𑁆𑀘𑀦𑁆𑀢𑀻𑀢𑀺 𑀪𑀽𑀢𑀕𑀸𑀫𑀯𑀕𑁆𑀕𑁂 𑀤𑀲𑀫𑀁.

𑁮𑁦𑁦. 𑀙𑀊𑀦𑀸𑀦𑀺 𑀢𑀻𑀡𑁂𑀯 𑀲𑀢𑀸𑀦𑀻𑀢𑀺 𑀙𑀳𑀺 𑀊𑀦𑀸𑀦𑀺 𑀢𑀻𑀡𑁂𑀯 𑀲𑀢𑀸𑀦𑀺, 𑀘𑀢𑀼𑀦𑀯𑀼𑀢𑀸𑀥𑀺𑀓𑀸𑀦𑀺 𑀤𑁆𑀯𑀺𑀲𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀲𑀫𑀘𑁂𑀢𑀲𑀸𑀢𑀺 𑁋

‘‘𑀯𑀥𑀓𑁂 𑀤𑁂𑀯𑀤𑀢𑁆𑀢𑀫𑁆𑀳𑀺, 𑀘𑁄𑀭𑁂 𑀅𑀗𑁆𑀕𑀼𑀮𑀺𑀫𑀸𑀮𑀓𑁂;

𑀥𑀦𑀧𑀸𑀮𑁂 𑀭𑀸𑀳𑀼𑀮𑁂 𑀘, 𑀲𑀩𑁆𑀩𑀢𑁆𑀣 𑀲𑀫𑀫𑀸𑀦𑀲𑁄’’𑀢𑀺. (𑀫𑀺. 𑀧. 𑁬.𑁬.𑁫; 𑀥. 𑀧. 𑀅𑀝𑁆𑀞. 𑁧.𑁧𑁬 𑀤𑁂𑀯𑀤𑀢𑁆𑀢𑀯𑀢𑁆𑀣𑀼; 𑀇𑀢𑀺𑀯𑀼. 𑀅𑀝𑁆𑀞. 𑁧𑁦𑁦) 𑁋

𑀯𑀘𑀦𑀢𑁄 𑀲𑀩𑁆𑀩𑁂𑀲𑀼 𑀳𑀺𑀢𑀸𑀳𑀺𑀢𑁂𑀲𑀼, 𑀮𑀸𑀪𑀸𑀮𑀸𑀪𑀸𑀤𑀻𑀲𑀼 𑀘 𑀅𑀝𑁆𑀞𑀲𑀼 𑀮𑁄𑀓𑀥𑀫𑁆𑀫𑁂𑀲𑀼 𑀦𑀺𑀩𑁆𑀩𑀺𑀓𑀸𑀭𑀢𑀸𑀬 𑀘 𑀲𑀫𑀸𑀦𑀘𑀺𑀢𑁆𑀢𑁂𑀦 𑀢𑀣𑀸𑀕𑀢𑁂𑀦.

𑀯𑀼𑀢𑁆𑀢𑀸𑀯𑀲𑁂𑀲𑀸𑀢𑀺 𑀯𑁂𑀲𑀸𑀮𑀺𑀬𑀸𑀤𑀻𑀲𑀼 𑀙𑀲𑀼 𑀦𑀕𑀭𑁂𑀲𑀼 𑀯𑀼𑀢𑁆𑀢𑁂𑀳𑀺 𑀅𑀯𑀲𑀺𑀝𑁆𑀞𑀸𑀦𑀺. 𑀇𑀫𑁂 𑀲𑀩𑁆𑀩𑁂 𑀇𑀫𑀸𑀦𑀺 𑀲𑀩𑁆𑀩𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀸𑀯𑀢𑁆𑀣𑀺𑀬𑀁 𑀓𑀢𑀸𑀦𑀺 𑀪𑀯𑀦𑁆𑀢𑀺, 𑀧𑀜𑁆𑀜𑀢𑁆𑀢𑀸𑀦𑀺 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁮𑁦𑁧. 𑀧𑀸𑀭𑀸𑀚𑀺𑀓𑀸𑀦𑀺 𑀘𑀢𑁆𑀢𑀸𑀭𑀻𑀢𑀺 𑀯𑁂𑀲𑀸𑀮𑀺𑀬𑀁 𑀯𑀼𑀢𑁆𑀢𑀁 𑀫𑁂𑀣𑀼𑀦𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁, 𑀭𑀸𑀚𑀕𑀳𑁂 𑀅𑀤𑀺𑀦𑁆𑀦𑀸𑀤𑀸𑀦𑀦𑁆𑀢𑀺 𑀘𑀢𑁆𑀢𑀸𑀭𑀺. 𑀲𑀢𑁆𑀢 𑀲𑀗𑁆𑀖𑀸𑀤𑀺𑀲𑁂𑀲𑀓𑀸𑀢𑀺 𑀭𑀸𑀚𑀕𑀳𑁂 𑀯𑀼𑀢𑁆𑀢𑀸 𑀤𑁆𑀯𑁂 𑀅𑀦𑀼𑀤𑁆𑀥𑀁𑀲𑀦𑀸, 𑀤𑁆𑀯𑁂 𑀘 𑀪𑁂𑀤𑀸, 𑀆𑀴𑀯𑀺𑀬𑀁 𑀓𑀼𑀝𑀺𑀓𑀸𑀭𑁄, 𑀓𑁄𑀲𑀫𑁆𑀩𑀺𑀬𑀁 𑀫𑀳𑀮𑁆𑀮𑀓𑀯𑀺𑀳𑀸𑀭𑁄, 𑀤𑁄𑀯𑀘𑀲𑁆𑀲𑀦𑁆𑀢𑀺 𑀲𑀢𑁆𑀢. 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺 𑀅𑀝𑁆𑀞𑁂𑀯𑀸𑀢𑀺 𑀯𑁂𑀲𑀸𑀮𑀺𑀬𑀁 𑀅𑀢𑀺𑀭𑁂𑀓𑀘𑀻𑀯𑀭𑀁, 𑀓𑀸𑀴𑀓𑀏𑀴𑀓𑀮𑁄𑀫𑀁, 𑀭𑀸𑀚𑀕𑀳𑁂 𑀘𑀻𑀯𑀭𑀧𑀝𑀺𑀕𑁆𑀕𑀳𑀡𑀁, 𑀭𑀽𑀧𑀺𑀬𑀧𑀝𑀺𑀕𑁆𑀕𑀳𑀡𑀁, 𑀲𑀼𑀢𑁆𑀢𑀯𑀺𑀜𑁆𑀜𑀢𑁆𑀢𑀺, 𑀆𑀴𑀯𑀺𑀬𑀁 𑀓𑁄𑀲𑀺𑀬𑀫𑀺𑀲𑁆𑀲𑀓𑀁, 𑀓𑀧𑀺𑀮𑀯𑀢𑁆𑀣𑀼𑀫𑁆𑀳𑀺 𑀏𑀴𑀓𑀮𑁄𑀫𑀥𑁄𑀯𑀦𑀁, 𑀊𑀦𑀧𑀜𑁆𑀘𑀩𑀦𑁆𑀥𑀦𑀦𑁆𑀢𑀺 𑀅𑀝𑁆𑀞.

𑀤𑁆𑀯𑀢𑁆𑀢𑀺𑀁𑀲𑁂𑀯 𑀘 𑀔𑀼𑀤𑁆𑀤𑀓𑀸𑀢𑀺 𑀯𑁂𑀲𑀸𑀮𑀺𑀬𑀁 𑀪𑀽𑀢𑀸𑀭𑁄𑀘𑀦𑀁, 𑀧𑀭𑀫𑁆𑀧𑀭𑀪𑁄𑀚𑀦𑀁, 𑀅𑀧𑁆𑀧𑀝𑀺𑀕𑁆𑀕𑀳𑀡𑀁, 𑀅𑀘𑁂𑀮𑀓𑀁, ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀁 𑀅𑀓𑁆𑀓𑁄𑀲𑁂𑀬𑁆𑀬𑀸’’𑀢𑀺 𑀧𑀜𑁆𑀘, 𑀭𑀸𑀚𑀕𑀳𑁂 𑀉𑀚𑁆𑀛𑀸𑀧𑀦𑀓𑀁, 𑀪𑀺𑀓𑁆𑀔𑀼𑀦𑀺𑀧𑀭𑀺𑀧𑀸𑀘𑀺𑀢𑀧𑀺𑀡𑁆𑀟𑁄, 𑀕𑀡𑀪𑁄𑀚𑀦𑀁, 𑀯𑀺𑀓𑀸𑀮𑀪𑁄𑀚𑀦𑀁, ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀦𑀺𑀫𑀦𑁆𑀢𑀺𑀢𑁄’’𑀢𑀺𑀆𑀤𑀺 𑀘, ‘‘𑀑𑀭𑁂𑀦𑀟𑁆𑀠𑀫𑀸𑀲𑀁 𑀦𑀳𑀸𑀬𑁂𑀬𑁆𑀬𑀸’’𑀢𑀺, 𑀊𑀦𑀯𑀻𑀲𑀢𑀺𑀯𑀲𑁆𑀲𑀁, ‘‘𑀲𑀫𑀕𑁆𑀕𑁂𑀦 𑀲𑀗𑁆𑀖𑁂𑀦 𑀘𑀻𑀯𑀭𑀁 𑀤𑀢𑁆𑀯𑀸’’𑀢𑀺 𑀪𑀺𑀓𑁆𑀔𑀽𑀦𑀁 𑀅𑀝𑁆𑀞, 𑀪𑀺𑀓𑁆𑀔𑀼𑀦𑀻𑀦𑀁 𑀧𑀦 ‘‘𑀦𑀘𑁆𑀘𑀁 𑀯𑀸 𑀕𑀻𑀢𑀁 𑀯𑀸’’𑀢𑀺𑀆𑀤𑀺 𑀘, ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀅𑀦𑁆𑀢𑁄𑀯𑀲𑁆𑀲’’𑀦𑁆𑀢𑀺𑀆𑀤𑀺 𑀘, ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀯𑀲𑁆𑀲𑀁𑀯𑀼𑀢𑁆𑀣𑀸’’𑀢𑀺𑀆𑀤𑀺 𑀘𑀸𑀢𑀺 𑀤𑁆𑀯𑀬𑀁, ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀧𑀸𑀭𑀺𑀯𑀸𑀲𑀺𑀓𑀙𑀦𑁆𑀤𑀤𑀸𑀦𑁂𑀦𑀸’’𑀢𑀺𑀆𑀤𑀺 𑀘𑀸𑀢𑀺 𑀘𑀢𑁆𑀢𑀸𑀭𑀺, 𑀆𑀴𑀯𑀺𑀬𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀉𑀢𑁆𑀢𑀭𑀺 𑀤𑀺𑀭𑀢𑁆𑀢𑀢𑀺𑀭𑀢𑁆𑀢𑀁, ‘‘𑀧𑀣𑀯𑀺𑀁 𑀔𑀡𑁂𑀬𑁆𑀬 𑀯𑀸’’𑀢𑀺𑀆𑀤𑀺, 𑀪𑀽𑀢𑀕𑀸𑀫𑀧𑀸𑀢𑀩𑁆𑀬𑀢𑀸𑀬, ‘‘𑀚𑀸𑀦𑀁 𑀲𑀧𑁆𑀧𑀸𑀡𑀓𑀁 𑀉𑀤𑀓’’𑀦𑁆𑀢𑀺 𑀘𑀢𑁆𑀢𑀸𑀭𑀺, 𑀓𑁄𑀲𑀫𑁆𑀩𑀺𑀬𑀁 𑀅𑀜𑁆𑀜𑀯𑀸𑀤𑀓𑁂 𑀯𑀺𑀳𑁂𑀲𑀓𑁂, 𑀬𑀸𑀯𑀤𑁆𑀯𑀸𑀭𑀓𑁄𑀲𑀸 𑀅𑀕𑁆𑀕𑀴𑀝𑁆𑀞𑀧𑀦𑀸𑀬, 𑀲𑀼𑀭𑀸𑀫𑁂𑀭𑀬𑀧𑀸𑀦𑁂, 𑀅𑀦𑀸𑀤𑀭𑀺𑀬𑁂, ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀳𑀺 𑀲𑀳𑀥𑀫𑁆𑀫𑀺𑀓’’𑀦𑁆𑀢𑀺𑀆𑀤𑀺 𑀘𑀸𑀢𑀺 𑀧𑀜𑁆𑀘, 𑀓𑀧𑀺𑀮𑀯𑀢𑁆𑀣𑀼𑀫𑁆𑀳𑀺 ‘‘𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀕𑀦𑁆𑀢𑁆𑀯𑀸’’𑀢𑀺𑀆𑀤𑀺, ‘‘𑀅𑀕𑀺𑀮𑀸𑀦𑁂𑀦 𑀪𑀺𑀓𑁆𑀔𑀼𑀦𑀸 𑀘𑀸𑀢𑀼𑀫𑀸𑀲’’𑀦𑁆𑀢𑀺𑀆𑀤𑀺, ‘‘𑀅𑀝𑁆𑀞𑀺𑀫𑀬𑀁 𑀯𑀸 𑀤𑀦𑁆𑀢𑀫𑀬𑀁 𑀯𑀸’’𑀢𑀺𑀆𑀤𑀺 𑀢𑀻𑀡𑀺 𑀪𑀺𑀓𑁆𑀔𑀽𑀦𑀁, 𑀪𑀺𑀓𑁆𑀔𑀼𑀦𑀻𑀦𑀁 𑀧𑀦 ‘‘𑀉𑀤𑀓𑀲𑀼𑀤𑁆𑀥𑀺𑀓𑀁 𑀧𑀦𑀸’’𑀢𑀺𑀆𑀤𑀺, ‘‘𑀑𑀯𑀸𑀤𑀸𑀬 𑀯𑀸’’𑀢𑀺𑀆𑀤𑀻𑀢𑀺 𑀤𑁆𑀯𑁂, 𑀪𑀕𑁆𑀕𑁂𑀲𑀼 ‘‘𑀅𑀕𑀺𑀮𑀸𑀦𑁄 𑀯𑀺𑀲𑀺𑀩𑁆𑀩𑀦𑀸𑀧𑁂𑀓𑁆𑀔𑁄’’𑀢𑀺𑀆𑀤𑀺 𑀏𑀓𑀦𑁆𑀢𑀺 𑀏𑀢𑀸𑀦𑀺 𑀩𑀸𑀢𑁆𑀢𑀺𑀁𑀲𑁂𑀯 𑀧𑀸𑀘𑀺𑀢𑁆𑀢𑀺𑀬𑀸𑀦𑀺.

𑁮𑁦𑁨. 𑀤𑁆𑀯𑁂 𑀕𑀸𑀭𑀬𑁆𑀳𑀸𑀢𑀺 ‘‘𑀪𑀺𑀓𑁆𑀔𑀼 𑀧𑀦𑁂𑀯 𑀓𑀼𑀮𑁂𑀲𑀽’’𑀢𑀺𑀆𑀤𑀺, ‘‘𑀬𑀸𑀦𑀺 𑀔𑁄 𑀧𑀦 𑀢𑀸𑀦𑀺 𑀆𑀭𑀜𑁆𑀜𑀓𑀸𑀦𑀻’’𑀢𑀺𑀆𑀤𑀺 𑀘𑀸𑀢𑀺 𑀤𑁆𑀯𑁂 𑀧𑀸𑀝𑀺𑀤𑁂𑀲𑀦𑀻𑀬𑀸. 𑀢𑀬𑁄 𑀲𑁂𑀔𑀸𑀢𑀺 𑀓𑁄𑀲𑀫𑁆𑀩𑀺𑀬𑀁 𑀦 𑀲𑀼𑀭𑀼𑀲𑀼𑀭𑀼𑀓𑀸𑀭𑀓𑀁, 𑀪𑀕𑁆𑀕𑁂𑀲𑀼 𑀦 𑀲𑀸𑀫𑀺𑀲𑁂𑀦 𑀳𑀢𑁆𑀣𑁂𑀦 𑀧𑀸𑀦𑀻𑀬𑀣𑀸𑀮𑀓𑀁, 𑀦 𑀲𑀲𑀺𑀢𑁆𑀣𑀓𑀁 𑀧𑀢𑁆𑀢𑀥𑁄𑀯𑀦𑀦𑁆𑀢𑀺 𑀢𑀻𑀡𑀺 𑀲𑁂𑀔𑀺𑀬𑀸𑀦𑀺. 𑀙𑀧𑁆𑀧𑀜𑁆𑀜𑀸𑀲𑁂𑀯 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀺𑀡𑁆𑀟𑀺𑀢𑀸𑀦𑀺 𑀯𑁂𑀲𑀸𑀮𑀺𑀬𑀸𑀤𑀻𑀲𑀼 𑀙𑀲𑀼 𑀦𑀕𑀭𑁂𑀲𑀼 𑀧𑀜𑁆𑀜𑀢𑁆𑀢𑀸𑀦𑀺 𑀪𑀯𑀦𑁆𑀢𑀻𑀢𑀺 𑀬𑁄𑀚𑀦𑀸.

𑁮𑁦𑁩. 𑀲𑀢𑁆𑀢𑀲𑀼 𑀦𑀕𑀭𑁂𑀲𑀼 𑀧𑀜𑁆𑀜𑀢𑁆𑀢𑀸𑀦𑀺 𑀏𑀢𑀸𑀦𑀺 𑀲𑀩𑁆𑀩𑀸𑀦𑁂𑀯 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀦 𑀅𑀟𑁆𑀠𑀼𑀟𑁆𑀠𑀸𑀦𑀺 𑀲𑀢𑀸𑀦𑁂𑀯 𑀪𑀯𑀦𑁆𑀢𑀺. 𑀲𑀸𑀯𑀢𑁆𑀣𑀺𑀬𑀁 𑀧𑀜𑁆𑀜𑀢𑁆𑀢𑁂𑀳𑀺 𑀘𑀢𑀼𑀦𑀯𑀼𑀢𑀸𑀥𑀺𑀓𑀤𑁆𑀯𑀺𑀲𑀢𑀲𑀺𑀓𑁆𑀔𑀸𑀧𑀤𑁂𑀳𑀺 𑀲𑀤𑁆𑀥𑀺𑀁 𑀙𑀲𑀼 𑀦𑀕𑀭𑁂𑀲𑀼 𑀧𑀜𑁆𑀜𑀢𑁆𑀢𑀸𑀦𑀺 𑀙𑀧𑀜𑁆𑀜𑀸𑀲 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀜𑁆𑀜𑀸𑀲𑀸𑀥𑀺𑀓𑀸𑀦𑀺 𑀢𑀻𑀡𑀺 𑀲𑀢𑀸𑀦𑀺 𑀪𑀯𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀟𑁆𑀠𑁂𑀦 𑀘𑀢𑀼𑀢𑁆𑀣𑀁 𑀬𑁂𑀲𑀁 𑀢𑀸𑀦𑀺 𑀅𑀟𑁆𑀠𑀼𑀟𑁆𑀠𑀸𑀦𑀺.

𑁮𑁦𑁪-𑁧𑁦. 𑀏𑀯𑀁 𑀦𑀺𑀤𑀸𑀦𑀯𑀲𑁂𑀦 𑀦𑀕𑀭𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀦𑀺𑀤𑀸𑀦𑀫𑀜𑁆𑀜𑀫𑀲𑁂𑀲𑁂𑀢𑁆𑀯𑀸 𑀉𑀪𑀢𑁄𑀯𑀺𑀪𑀗𑁆𑀕𑀸𑀕𑀢𑀸𑀦𑀁 𑀲𑀩𑁆𑀩𑁂𑀲𑀁 𑀲𑀺𑀓𑁆𑀔𑀸𑀧𑀤𑀸𑀦𑀁 𑀓𑁂𑀯𑀮𑀁 𑀧𑀺𑀡𑁆𑀟𑀯𑀲𑁂𑀦 𑀕𑀡𑀦𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀲𑀺𑀓𑁆𑀔𑀸𑀧𑀤𑀸𑀦𑀺 𑀪𑀺𑀓𑁆𑀔𑀽𑀦’’𑀦𑁆𑀢𑀺𑀆𑀤𑀺.

𑁮𑁧𑁧. 𑀏𑀯𑀁 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀸𑀦𑀁 𑀦𑀺𑀤𑀸𑀦𑀜𑁆𑀘 𑀕𑀡𑀦𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀲𑀸𑀥𑀸𑀭𑀡𑀸𑀦𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀙𑀘𑀢𑁆𑀢𑀸𑀮𑀻𑀲𑀸’’𑀢𑀺𑀆𑀤𑀺. 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀳𑀺 𑀅𑀲𑀸𑀥𑀸𑀭𑀡𑀪𑀸𑀯𑀁 𑀫𑀳𑁂𑀲𑀺𑀦𑀸 𑀕𑀫𑀺𑀢𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀙𑀘𑀢𑁆𑀢𑀸𑀮𑀻𑀲𑁂𑀯 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀇𑀫𑀺𑀦𑀸 𑀉𑀤𑁆𑀤𑁂𑀲𑀫𑀸𑀳.

𑁮𑁧𑁪. ‘‘𑀙 𑀘 𑀲𑀗𑁆𑀖𑀸𑀤𑀺𑀲𑁂𑀲𑀸’’𑀢𑀺𑀆𑀤𑀻𑀳𑀺 𑀤𑁆𑀯𑀻𑀳𑀺 𑀕𑀸𑀣𑀸𑀳𑀺 𑀦𑀺𑀤𑁆𑀤𑁂𑀲𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀯𑀺𑀲𑁆𑀲𑀝𑁆𑀞𑀻’’𑀢𑀺𑀆𑀤𑀺𑀦𑀸 𑀧𑀝𑀺𑀦𑀺𑀤𑁆𑀤𑁂𑀲𑀫𑀸𑀳.

𑁮𑁧𑁫. ‘‘𑀦𑀺𑀲𑁆𑀲𑀕𑁆𑀕𑀺𑀬𑁂 𑀆𑀤𑀺𑀯𑀕𑁆𑀕𑀲𑁆𑀫𑀺’’𑀦𑁆𑀢𑀺 𑀧𑀤𑀘𑁆𑀙𑁂𑀤𑁄. 𑀥𑁄𑀯𑀦𑀦𑁆𑀢𑀺 𑀅𑀜𑁆𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀘𑀻𑀯𑀭𑀥𑁄𑀯𑀦𑀁. 𑀧𑀝𑀺𑀕𑁆𑀕𑀳𑁄𑀢𑀺 𑀢𑀲𑁆𑀲𑀸𑀬𑁂𑀯 𑀳𑀢𑁆𑀣𑀢𑁄 𑀘𑀻𑀯𑀭𑀧𑀝𑀺𑀕𑁆𑀕𑀳𑀡𑀁.

𑁮𑁧𑁬. 𑀆𑀭𑀜𑁆𑀜𑀦𑁆𑀢𑀺 𑀏𑀓𑀽𑀦𑀢𑀺𑀁𑀲𑀢𑀺𑀫𑀁 𑀲𑀺𑀓𑁆𑀔𑀸𑀧𑀤𑀁.

𑁮𑁧𑁭. 𑀪𑀺𑀓𑁆𑀔𑀽𑀦𑀁, 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀯𑀼𑀢𑁆𑀢𑀸𑀦𑀺 𑀲𑀩𑁆𑀩𑀸𑀦𑀺 𑀧𑀸𑀘𑀺𑀢𑁆𑀢𑀺𑀬𑀸𑀦𑀺 𑀕𑀡𑀦𑀸𑀯𑀲𑀸 𑀅𑀝𑁆𑀞𑀸𑀲𑀻𑀢𑀺𑀲𑀢𑀁 𑀪𑀯𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀅𑀝𑁆𑀞𑀸𑀲𑀻𑀢𑀺𑀲𑀢𑀦𑁆𑀢𑀺 𑀪𑀺𑀓𑁆𑀔𑀼𑀦𑀺𑀧𑀸𑀢𑀺𑀫𑁄𑀓𑁆𑀔𑀸𑀕𑀢𑀁 𑀙𑀲𑀝𑁆𑀞𑀺𑀲𑀢𑀧𑀸𑀘𑀺𑀢𑁆𑀢𑀺𑀬𑀁 𑀯𑀓𑁆𑀔𑀫𑀸𑀦𑁂𑀳𑀺 𑀪𑀺𑀓𑁆𑀔𑀼𑀦𑀺𑀬𑀢𑁂𑀳𑀺 𑀩𑀸𑀯𑀻𑀲𑀢𑀺𑀧𑀸𑀘𑀺𑀢𑁆𑀢𑀺𑀬𑁂𑀳𑀺 𑀲𑀤𑁆𑀥𑀺𑀁 𑀅𑀝𑁆𑀞𑀸𑀲𑀻𑀢𑀺𑀲𑀢𑀁 𑀳𑁄𑀢𑀺. 𑀢𑀢𑁄𑀢𑀺 𑀅𑀝𑁆𑀞𑀸𑀲𑀻𑀢𑀸𑀥𑀺𑀓𑀲𑀢𑀧𑀸𑀘𑀺𑀢𑁆𑀢𑀺𑀬𑀢𑁄 𑀦𑀺𑀤𑁆𑀥𑀸𑀭𑀺𑀢𑀸𑀦𑀺 𑀏𑀢𑀸𑀦𑀺 𑀤𑁆𑀯𑀸𑀯𑀻𑀲𑀢𑀺 𑀔𑀼𑀤𑁆𑀤𑀓𑀸𑀦𑀺 𑀪𑀺𑀓𑁆𑀔𑀽𑀦𑀁 𑀧𑀸𑀢𑀺𑀫𑁄𑀓𑁆𑀔𑀓𑁂 𑀪𑀯𑀦𑁆𑀢𑀻𑀢𑀺 𑀬𑁄𑀚𑀦𑀸.

𑁮𑁧𑁮. 𑀪𑀺𑀓𑁆𑀔𑀼𑀦𑀺𑀯𑀕𑁆𑀕𑁄𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀑𑀯𑀸𑀤𑀯𑀕𑁆𑀕𑁄. 𑀧𑀭𑀫𑁆𑀧𑀭𑀪𑁄𑀚𑀦𑁂 𑀧𑀜𑁆𑀜𑀢𑁆𑀢𑀁 𑀲𑀺𑀓𑁆𑀔𑀸𑀧𑀤𑀁 𑀧𑀭𑀫𑁆𑀧𑀭𑀪𑁄𑀚𑀦𑀁, 𑀧𑀭𑀫𑁆𑀧𑀭𑀪𑁄𑀚𑀦𑁂𑀦 𑀲𑀳 𑀯𑀢𑁆𑀢𑀢𑀻𑀢𑀺 𑀲𑀧𑀭𑀫𑁆𑀧𑀭𑀪𑁄𑀚𑀦𑁄.

𑁮𑁨𑁨. ‘‘𑀏𑀓𑀢𑁄 𑀧𑀦 𑀧𑀜𑁆𑀜𑀢𑁆𑀢𑀸’’𑀢𑀺𑀆𑀤𑀺 𑀦𑀺𑀕𑀫𑀦𑀁. 𑀪𑀺𑀓𑁆𑀔𑀼𑀦𑀻𑀳𑀺 𑀅𑀲𑀸𑀥𑀸𑀭𑀡𑀢𑀁 𑀕𑀢𑀸 𑀏𑀓𑀢𑁄𑀯 𑀧𑀜𑁆𑀜𑀢𑁆𑀢𑀸 𑀇𑀫𑁂 𑀇𑀫𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀺𑀡𑁆𑀟𑀺𑀢𑀸𑀦𑀺 𑀙𑀘𑀢𑁆𑀢𑀸𑀮𑀻𑀲 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸.

𑁮𑁨𑁩. 𑀫𑀳𑁂𑀲𑀺𑀦𑀸 𑀪𑀺𑀓𑁆𑀔𑀽𑀳𑀺 𑀅𑀲𑀸𑀥𑀸𑀭𑀡𑀪𑀸𑀯𑀁 𑀕𑀫𑀺𑀢𑀸𑀦𑀺 𑀪𑀺𑀓𑁆𑀔𑀼𑀦𑀻𑀦𑀁 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀭𑀺𑀧𑀺𑀡𑁆𑀟𑀺𑀢𑀸𑀦𑀺 𑀲𑀢𑀁, 𑀢𑀺𑀁𑀲 𑀘 𑀪𑀯𑀦𑁆𑀢𑀻𑀢𑀺 𑀬𑁄𑀚𑀦𑀸.

𑁮𑁨𑁪. 𑀏𑀯𑀁 𑀉𑀤𑁆𑀤𑀺𑀝𑁆𑀞𑀸𑀦𑀁 𑀦𑀺𑀤𑁆𑀤𑁂𑀲𑀫𑀸𑀳 ‘‘𑀧𑀸𑀭𑀸𑀚𑀺𑀓𑀸𑀦𑀻’’𑀢𑀺𑀆𑀤𑀺𑀦𑀸. 𑀧𑀸𑀭𑀸𑀚𑀺𑀓𑀸𑀦𑀺 𑀘𑀢𑁆𑀢𑀸𑀭𑀻𑀢𑀺 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀺𑀓𑀯𑀚𑁆𑀚𑀧𑀝𑀺𑀘𑁆𑀙𑀸𑀤𑀺𑀓𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀺𑀓𑀅𑀝𑁆𑀞𑀯𑀢𑁆𑀣𑀼𑀓𑀲𑀗𑁆𑀔𑀸𑀢𑀸𑀦𑀺 𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺.

𑁮𑁨𑁬. 𑀤𑁆𑀯𑀻𑀳𑀺 𑀕𑀸𑀣𑀸𑀳𑀺 𑀦𑀺𑀤𑁆𑀤𑀺𑀝𑁆𑀞𑀸𑀦𑀁 𑀧𑀝𑀺𑀦𑀺𑀤𑁆𑀤𑁂𑀲𑁄 ‘‘𑀪𑀺𑀓𑁆𑀔𑀼𑀦𑀻𑀦𑀁 𑀢𑀼 𑀲𑀗𑁆𑀖𑀸𑀤𑀺𑀲𑁂𑀲𑁂𑀳𑀻’’𑀢𑀺𑀆𑀤𑀺. 𑀘𑀢𑀼𑀦𑁆𑀦𑀁 𑀧𑀸𑀭𑀸𑀚𑀺𑀓𑀸𑀦𑀁 𑀉𑀤𑁆𑀤𑁂𑀲𑀯𑀲𑁂𑀦𑁂𑀯 𑀧𑀸𑀓𑀝𑀢𑁆𑀢𑀸 𑀧𑀝𑀺𑀦𑀺𑀤𑁆𑀤𑁂𑀲𑁂 𑀅𑀕𑁆𑀕𑀳𑀡𑀁. 𑀆𑀤𑀺𑀢𑁄 𑀙𑀸𑀢𑀺 𑀉𑀲𑁆𑀲𑀬𑀯𑀸𑀤𑀺𑀓𑀸𑀤𑀬𑁄 𑀙 𑀲𑀗𑁆𑀖𑀸𑀤𑀺𑀲𑁂𑀲𑀸. ‘‘𑀆𑀤𑀺𑀢𑁄’’𑀢𑀺 𑀇𑀤𑀁 ‘‘𑀬𑀸𑀯𑀢𑀢𑀺𑀬𑀓𑀸’’𑀢𑀺 𑀇𑀫𑀺𑀦𑀸𑀧𑀺 𑀬𑁄𑀚𑁂𑀢𑀩𑁆𑀩𑀁, 𑀅𑀝𑁆𑀞𑀲𑀼 𑀬𑀸𑀯𑀢𑀢𑀺𑀬𑀓𑁂𑀲𑀼 𑀧𑀼𑀭𑀺𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀺𑀓𑁆𑀔𑀸𑀧𑀤𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁮𑁨𑁭. 𑀲𑀢𑁆𑀢𑀜𑁆𑀜𑀤𑀢𑁆𑀣𑀺𑀓𑀸𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀜𑁆𑀜𑀤𑀢𑁆𑀣𑀺𑀓𑀲𑀺𑀓𑁆𑀔𑀸𑀧𑀤𑀢𑁄 𑀧𑀘𑁆𑀙𑀺𑀫𑀸𑀦𑀺 𑀘𑀢𑁆𑀢𑀸𑀭𑀺, 𑀧𑀼𑀭𑀺𑀫𑀸𑀦𑀺 ‘‘𑀅𑀜𑁆𑀜𑀁 𑀯𑀺𑀜𑁆𑀜𑀸𑀧𑁂𑀬𑁆𑀬, 𑀅𑀜𑁆𑀜𑀁 𑀘𑁂𑀢𑀸𑀧𑁂𑀬𑁆𑀬𑀸’’𑀢𑀺 𑀤𑁆𑀯𑁂 𑀘 𑀕𑀳𑀺𑀢𑀸𑀦𑀺. 𑀧𑀢𑁆𑀢𑁄 𑀘𑁂𑀯𑀸𑀢𑀺 𑀧𑀞𑀫𑀁 𑀧𑀢𑁆𑀢𑀲𑀦𑁆𑀦𑀺𑀘𑀬𑀲𑀺𑀓𑁆𑀔𑀸𑀧𑀤𑀫𑀸𑀳. 𑀤𑀼𑀢𑀺𑀬𑀯𑀕𑁆𑀕𑁂 𑀧𑀼𑀭𑀺𑀫𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀁 ‘‘𑀕𑀭𑀼𑀁 𑀮𑀳𑀼’’𑀦𑁆𑀢𑀺 𑀇𑀫𑀺𑀦𑀸 𑀕𑀳𑀺𑀢𑀁.

𑁮𑁨𑁮. 𑀇𑀥 𑀪𑀺𑀓𑁆𑀔𑀼𑀦𑀺𑀧𑀸𑀢𑀺𑀫𑁄𑀓𑁆𑀔𑁂 𑀏𑀢𑀸𑀦𑀺 𑀧𑀦 𑀤𑁆𑀯𑀸𑀤𑀲𑁂𑀯 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺 𑀲𑀢𑁆𑀣𑀸𑀭𑀸 𑀪𑀺𑀓𑁆𑀔𑀼𑀦𑀻𑀦𑀁 𑀯𑀲𑁂𑀦 𑀏𑀓𑀢𑁄 𑀧𑀜𑁆𑀜𑀢𑁆𑀢𑀸𑀦𑀻𑀢𑀺 𑀬𑁄𑀚𑀦𑀸.

𑁮𑁨𑁯-𑁩𑁦. ‘‘𑀲𑀩𑁆𑀩𑁂𑀯 𑀕𑀡𑀦𑀸𑀯𑀲𑀸’’𑀢𑀺𑀆𑀤𑀺 𑀦𑀺𑀕𑀫𑀦𑀁. 𑀪𑀺𑀓𑁆𑀔𑀽𑀳𑀺 𑀅𑀲𑀸𑀥𑀸𑀭𑀡𑀢𑀁 𑀕𑀢𑀸 𑀪𑀺𑀓𑁆𑀔𑀼𑀦𑀻𑀦𑀁 𑀏𑀓𑀢𑁄 𑀧𑀜𑁆𑀜𑀢𑁆𑀢𑀸 𑀲𑀢𑀁, 𑀢𑀺𑀁𑀲 𑀪𑀯𑀦𑁆𑀢𑀻𑀢𑀺 𑀬𑁄𑀚𑀦𑀸.

𑁮𑁩𑁧-𑁩. ‘‘𑀅𑀲𑀸𑀥𑀸𑀭𑀡𑀸 𑀉𑀪𑀺𑀦𑁆𑀦’’𑀦𑁆𑀢𑀺 𑀧𑀤𑀘𑁆𑀙𑁂𑀤𑁄. 𑀉𑀪𑀺𑀦𑁆𑀦𑀁 𑀅𑀲𑀸𑀥𑀸𑀭𑀡𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀢𑀜𑁆𑀘 𑀲𑀢𑁆𑀢𑀢𑀺 𑀘 𑀙 𑀘 𑀪𑀯𑀦𑁆𑀢𑀺. 𑀏𑀯𑀫𑀼𑀤𑁆𑀤𑀺𑀝𑁆𑀞𑀸𑀦𑀁 𑀦𑀺𑀤𑁆𑀤𑁂𑀲𑁄 ‘‘𑀧𑀸𑀭𑀸𑀚𑀺𑀓𑀸𑀦𑀺 𑀘𑀢𑁆𑀢𑀸𑀭𑀻’’𑀢𑀺𑀆𑀤𑀺. 𑀪𑀺𑀓𑁆𑀔𑀽𑀳𑀺 𑀅𑀲𑀸𑀥𑀸𑀭𑀡𑀸𑀦𑀺 𑀪𑀺𑀓𑁆𑀔𑀼𑀦𑀻𑀦𑀁 𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺. 𑀤𑀲𑀘𑁆𑀙 𑀘𑀸𑀢𑀺 𑀪𑀺𑀓𑁆𑀔𑀽𑀳𑀺 𑀅𑀲𑀸𑀥𑀸𑀭𑀡𑀸𑀦𑀺 𑀪𑀺𑀓𑁆𑀔𑀼𑀦𑀻𑀦𑀁 𑀲𑀗𑁆𑀖𑀸𑀤𑀺𑀲𑁂𑀲𑀸 𑀤𑀲, 𑀪𑀺𑀓𑁆𑀔𑀼𑀦𑀻𑀳𑀺 𑀅𑀲𑀸𑀥𑀸𑀭𑀡𑀸𑀦𑀺 𑀪𑀺𑀓𑁆𑀔𑀽𑀦𑀁 𑀯𑀺𑀲𑁆𑀲𑀝𑁆𑀞𑀺𑀆𑀤𑀺𑀓𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀙 𑀘𑀸𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀸 𑀲𑁄𑀴𑀲.

𑀅𑀦𑀺𑀬𑀢𑀸 𑀤𑀼𑀯𑁂 𑀘𑁂𑀯𑀸𑀢𑀺 𑀪𑀺𑀓𑁆𑀔𑀼𑀦𑀻𑀳𑀺 𑀅𑀲𑀸𑀥𑀸𑀭𑀡𑀸𑀦𑀺 𑀪𑀺𑀓𑁆𑀔𑀽𑀦𑀁 𑀅𑀦𑀺𑀬𑀢𑀸 𑀤𑁆𑀯𑁂 𑀘. 𑀦𑀺𑀲𑁆𑀲𑀕𑁆𑀕𑀸 𑀘𑀢𑀼𑀯𑀻𑀲𑀢𑀻𑀢𑀺 𑀪𑀺𑀓𑁆𑀔𑀼𑀦𑀻𑀳𑀺 𑀅𑀲𑀸𑀥𑀸𑀭𑀡𑀸𑀦𑀺 𑀪𑀺𑀓𑁆𑀔𑀽𑀦𑀁 𑀤𑁆𑀯𑀸𑀤𑀲, 𑀪𑀺𑀓𑁆𑀔𑀽𑀳𑀺 𑀅𑀲𑀸𑀥𑀸𑀭𑀡𑀸𑀦𑀺 𑀪𑀺𑀓𑁆𑀔𑀼𑀦𑀻𑀦𑀁 𑀤𑁆𑀯𑀸𑀤𑀲𑀸𑀢𑀺 𑀏𑀯𑀁 𑀦𑀺𑀲𑁆𑀲𑀕𑁆𑀕𑀺𑀬𑀸 𑀘𑀢𑀼𑀯𑀻𑀲𑀢𑀺 𑀘. 𑀲𑀢𑀁 𑀅𑀝𑁆𑀞𑀸𑀭𑀲 𑀔𑀼𑀤𑁆𑀤𑀓𑀸𑀢𑀺 𑀪𑀺𑀓𑁆𑀔𑀼𑀦𑀻𑀳𑀺 𑀅𑀲𑀸𑀥𑀸𑀭𑀡𑀸𑀦𑀺 𑀪𑀺𑀓𑁆𑀔𑀽𑀦𑀁 𑀩𑀸𑀯𑀻𑀲𑀢𑀺, 𑀪𑀺𑀓𑁆𑀔𑀽𑀳𑀺 𑀅𑀲𑀸𑀥𑀸𑀭𑀡𑀸𑀦𑀺 𑀪𑀺𑀓𑁆𑀔𑀼𑀦𑀻𑀦𑀁 𑀙𑀦𑁆𑀦𑀯𑀼𑀢𑀻𑀢𑀺 𑀅𑀝𑁆𑀞𑀸𑀭𑀲𑀸𑀥𑀺𑀓𑀲𑀢𑀁 𑀔𑀼𑀤𑁆𑀤𑀓𑀸𑀦𑀺 𑀘. 𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀅𑀲𑀸𑀥𑀸𑀭𑀡𑀲𑀗𑁆𑀕𑀳𑁂.

𑀤𑁆𑀯𑀸𑀤𑀲𑁂𑀯 𑀘 𑀕𑀸𑀭𑀬𑁆𑀳𑀸𑀢𑀺 𑀪𑀺𑀓𑁆𑀔𑀼𑀦𑀻𑀳𑀺 𑀅𑀲𑀸𑀥𑀸𑀭𑀡𑀸𑀦𑀺 𑀪𑀺𑀓𑁆𑀔𑀽𑀦𑀁 𑀘𑀢𑁆𑀢𑀸𑀭𑀺, 𑀪𑀺𑀓𑁆𑀔𑀽𑀳𑀺 𑀅𑀲𑀸𑀥𑀸𑀭𑀡𑀸𑀦𑀺 𑀪𑀺𑀓𑁆𑀔𑀼𑀦𑀻𑀦𑀁 𑀅𑀝𑁆𑀞𑀸𑀢𑀺 𑀏𑀢𑁂 𑀧𑀸𑀝𑀺𑀤𑁂𑀲𑀦𑀻𑀬𑀸 𑀘𑀸𑀢𑀺 𑀇𑀫𑁂 𑀙𑀲𑀢𑁆𑀢𑀢𑀺𑀅𑀥𑀺𑀓𑀸𑀦𑀺 𑀲𑀢𑀲𑀺𑀓𑁆𑀔𑀸𑀧𑀤𑀸𑀦𑀺 𑀉𑀪𑀺𑀦𑁆𑀦𑀫𑁆𑀧𑀺 𑀅𑀲𑀸𑀥𑀸𑀭𑀡𑀸𑀦𑀻𑀢𑀺 𑀬𑁄𑀚𑀦𑀸.

𑁮𑁩𑁪. 𑀉𑀪𑀺𑀦𑁆𑀦𑀫𑁆𑀧𑀺 𑀲𑀸𑀥𑀸𑀭𑀡𑀸𑀦𑀺 𑀲𑀢𑁆𑀣𑀼𑀦𑀸 𑀧𑀜𑁆𑀜𑀢𑁆𑀢𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀢𑀜𑁆𑀘 𑀲𑀢𑁆𑀢𑀢𑀺 𑀘 𑀘𑀢𑁆𑀢𑀸𑀭𑀺 𑀘 𑀪𑀯𑀦𑁆𑀢𑀻𑀢𑀺 𑀧𑀓𑀸𑀲𑀺𑀢𑀸𑀢𑀺 𑀬𑁄𑀚𑀦𑀸.

𑁮𑁩𑁫-𑁬. 𑀧𑀸𑀭𑀸𑀚𑀺𑀓𑀸𑀦𑀺 𑀘𑀢𑁆𑀢𑀸𑀭𑀻𑀢𑀺 𑀫𑁂𑀣𑀼𑀦𑀅𑀤𑀺𑀦𑁆𑀦𑀸𑀤𑀸𑀦𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀧𑀸𑀭𑀸𑀚𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀘. 𑀲𑀢𑁆𑀢 𑀲𑀗𑁆𑀖𑀸𑀤𑀺𑀲𑁂𑀲𑀓𑀸𑀢𑀺 𑀲𑀜𑁆𑀘𑀭𑀺𑀢𑁆𑀢𑀅𑀫𑀽𑀮𑀓𑀅𑀜𑁆𑀜𑀪𑀸𑀕𑀺𑀬𑀸, 𑀘𑀢𑁆𑀢𑀸𑀭𑁄 𑀬𑀸𑀯𑀢𑀢𑀺𑀬𑀓𑀸 𑀘𑀸𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀸 𑀲𑀢𑁆𑀢 𑀘. 𑀅𑀝𑁆𑀞𑀸𑀭𑀲 𑀘 𑀦𑀺𑀲𑁆𑀲𑀕𑁆𑀕𑀸𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑁂𑀲𑀼 𑀧𑀞𑀫𑁂 𑀘𑀻𑀯𑀭𑀯𑀕𑁆𑀕𑁂 𑀥𑁄𑀯𑀦𑀧𑀝𑀺𑀕𑁆𑀕𑀳𑀡𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀯𑀚𑁆𑀚𑀺𑀢𑀸𑀦𑀺 𑀅𑀝𑁆𑀞, 𑀏𑀴𑀓𑀮𑁄𑀫𑀯𑀕𑁆𑀕𑁂 𑀅𑀝𑁆𑀞𑀫𑀦𑀯𑀫𑀤𑀲𑀫𑀸𑀦𑀻𑀢𑀺 𑀢𑀬𑁄, 𑀧𑀢𑁆𑀢𑀯𑀕𑁆𑀕𑁂 𑀧𑀞𑀫𑀧𑀢𑁆𑀢𑀯𑀲𑁆𑀲𑀺𑀓𑀲𑀸𑀝𑀺𑀓𑀆𑀭𑀜𑁆𑀜𑀓𑀲𑀺𑀓𑁆𑀔𑀸𑀧𑀤𑀢𑁆𑀢𑀬𑀲𑁆𑀲 𑀯𑀚𑁆𑀚𑀺𑀢𑀸𑀦𑀺 𑀲𑀢𑁆𑀢 𑀘𑀸𑀢𑀺 𑀇𑀫𑀸𑀦𑀺 𑀅𑀝𑁆𑀞𑀸𑀭𑀲 𑀦𑀺𑀲𑁆𑀲𑀕𑁆𑀕𑀺𑀬𑀲𑀺𑀓𑁆𑀔𑀸𑀧𑀤𑀸𑀦𑀺 𑀘. 𑀲𑀫𑀲𑀢𑁆𑀢𑀢𑀺 𑀔𑀼𑀤𑁆𑀤𑀓𑀸𑀢𑀺 𑁋

‘‘𑀲𑀩𑁆𑀩𑁄 𑀪𑀺𑀓𑁆𑀔𑀼𑀦𑀺𑀯𑀕𑁆𑀕𑁄𑀧𑀺…𑀧𑁂… 𑀤𑁆𑀯𑀸𑀯𑀻𑀲𑀢𑀺 𑀪𑀯𑀦𑁆𑀢𑀺 𑀳𑀻’’𑀢𑀺. (𑀉. 𑀯𑀺. 𑁮𑁧𑁮-𑁮𑁨𑁧) 𑁋

𑀯𑀼𑀢𑁆𑀢𑀸 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀳𑀺 𑀅𑀲𑀸𑀥𑀸𑀭𑀡𑀸𑀢𑀺 𑀇𑀫𑁂𑀳𑀺 𑀩𑀸𑀯𑀻𑀲𑀢𑀺𑀧𑀸𑀘𑀺𑀢𑁆𑀢𑀺𑀬𑁂𑀳𑀺 𑀯𑀚𑁆𑀚𑀺𑀢𑀸𑀦𑀺 𑀅𑀯𑀲𑁂𑀲𑀸𑀦𑀺 𑀲𑀢𑁆𑀢𑀢𑀺 𑀧𑀸𑀘𑀺𑀢𑁆𑀢𑀺𑀬𑀸𑀦𑀺 𑀘 𑀉𑀪𑀬𑀲𑀸𑀥𑀸𑀭𑀡𑀯𑀲𑁂𑀦 𑀧𑀜𑁆𑀜𑀢𑁆𑀢𑀸𑀦𑀺. 𑀧𑀜𑁆𑀘𑀲𑀢𑁆𑀢𑀢𑀺 𑀲𑁂𑀔𑀺𑀬𑀸𑀧𑀺 𑀘𑀸𑀢𑀺 𑀉𑀪𑀺𑀦𑁆𑀦𑀁 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀦𑀁 𑀲𑀫𑀲𑀺𑀓𑁆𑀔𑀢𑀸 𑀲𑀸𑀥𑀸𑀭𑀡𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀩𑁆𑀩𑀲𑁄 𑀲𑀢𑀁, 𑀲𑀢𑁆𑀢𑀢𑀺, 𑀘𑀢𑁆𑀢𑀸𑀭𑀺 𑀘 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸.

𑀇𑀢𑀺 𑀉𑀢𑁆𑀢𑀭𑁂 𑀮𑀻𑀦𑀢𑁆𑀣𑀧𑀓𑀸𑀲𑀦𑀺𑀬𑀸

𑀲𑀸𑀥𑀸𑀭𑀡𑀸𑀲𑀸𑀥𑀸𑀭𑀡𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.