𑀲𑁂𑀤𑀫𑁄𑀘𑀦𑀓𑀣𑀸𑀯𑀡𑁆𑀡𑀦𑀸

𑁬𑁭𑁯. 𑀲𑀼𑀡𑀢𑀁 𑀲𑀼𑀡𑀦𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀝𑀼𑀪𑀸𑀯𑀓𑀭𑀸 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 𑀧𑀜𑁆𑀜𑀸𑀓𑁄𑀲𑀮𑁆𑀮𑀲𑀸𑀥𑀺𑀓𑀸 𑀢𑀢𑁄𑀬𑁂𑀯 𑀯𑀭𑀸 𑀉𑀢𑁆𑀢𑀫𑀸. 𑀲𑁂𑀤𑀫𑁄𑀘𑀦𑀕𑀸𑀣𑀸𑀬𑁄𑀢𑀺 𑀅𑀢𑁆𑀣𑀧𑀘𑁆𑀘𑀢𑁆𑀣𑀺𑀓𑀸𑀦𑀁, 𑀲𑀸𑀲𑀦𑀧𑀘𑁆𑀘𑀢𑁆𑀣𑀺𑀓𑀸𑀦𑀜𑁆𑀘 𑀯𑀺𑀲𑁆𑀲𑀚𑁆𑀚𑁂𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀪𑀸𑀯𑁂𑀦 𑀘𑀺𑀦𑁆𑀢𑀬𑀦𑁆𑀢𑀲𑁆𑀲 𑀔𑀺𑀦𑁆𑀦𑀲𑀭𑀻𑀭𑀸 𑀲𑁂𑀤𑁂 𑀫𑁄𑀘𑁂𑀦𑁆𑀢𑀻𑀢𑀺 𑀲𑁂𑀤𑀫𑁄𑀘𑀦𑀸. 𑀅𑀢𑁆𑀣𑀸𑀦𑀼𑀕𑀢𑀧𑀜𑁆𑀳𑀸 𑀉𑀧𑀸𑀮𑀺𑀢𑁆𑀣𑁂𑀭𑁂𑀦 𑀞𑀧𑀺𑀢𑀸 𑀧𑀜𑁆𑀳𑀕𑀸𑀣𑀸𑀬𑁄, 𑀢𑀧𑁆𑀧𑀝𑀺𑀩𑀤𑁆𑀥𑀸 𑀯𑀺𑀲𑁆𑀲𑀚𑁆𑀚𑀦𑀕𑀸𑀣𑀸𑀬𑁄 𑀘 𑀇𑀢𑁄 𑀧𑀭𑀁 𑀯𑀓𑁆𑀔𑀸𑀫𑀻𑀢𑀺 𑀬𑁄𑀚𑀦𑀸.

𑁬𑁮𑁧. 𑀓𑀩𑀦𑁆𑀥𑀁 𑀦𑀸𑀫 𑀅𑀲𑀻𑀲𑀁 𑀉𑀭𑀲𑀺 𑀚𑀸𑀢𑀅𑀓𑁆𑀔𑀺𑀫𑀼𑀔𑀲𑀭𑀻𑀭𑀁. 𑀬𑀣𑀸𑀳 𑁋 ‘‘𑀅𑀲𑀻𑀲𑀓𑀁 𑀓𑀩𑀦𑁆𑀥𑀁, 𑀬𑀲𑁆𑀲 𑀉𑀭𑁂 𑀅𑀓𑁆𑀔𑀻𑀦𑀺 𑀘𑁂𑀯 𑀫𑀼𑀔𑀜𑁆𑀘 𑀳𑁄𑀢𑀻’’𑀢𑀺 (𑀧𑀭𑀺. 𑀅𑀝𑁆𑀞. 𑁪𑁭𑁯). 𑀫𑀼𑀔𑁂𑀦 𑀓𑀭𑀡𑀪𑀽𑀢𑁂𑀦. 𑀓𑀢𑁆𑀯𑀸𑀢𑀺 𑀲𑁂𑀯𑀺𑀢𑁆𑀯𑀸.

𑁬𑁮𑁨. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀣𑀁 𑀧𑀸𑀭𑀸𑀚𑀺𑀓𑁄 𑀲𑀺𑀬𑀸 𑀧𑀸𑀭𑀸𑀚𑀺𑀓𑀥𑀫𑁆𑀫𑁄 𑀓𑀣𑀁 𑀲𑀺𑀬𑀸.

𑁬𑁮𑁪. 𑀓𑀺𑀜𑁆𑀘𑀻𑀢𑀺 𑀧𑀸𑀤𑀁 𑀯𑀸 𑀧𑀸𑀤𑀸𑀭𑀳𑀁 𑀯𑀸 𑀧𑀭𑀲𑀦𑁆𑀢𑀓𑀁. 𑀧𑀭𑀜𑁆𑀘 𑀦 𑀲𑀫𑀸𑀤𑀧𑁂𑀢𑀺 ‘‘𑀅𑀫𑀼𑀓𑀲𑁆𑀲 𑀇𑀢𑁆𑀣𑀦𑁆𑀦𑀸𑀫𑀁 𑀪𑀡𑁆𑀟𑀁 𑀅𑀯𑀳𑀭𑀸𑀳𑀻’’𑀢𑀺 𑀧𑀭𑀁 𑀦 𑀆𑀡𑀸𑀧𑁂𑀬𑁆𑀬.

𑁬𑁮𑁫. 𑀧𑀭𑀲𑁆𑀲 𑀓𑀺𑀜𑁆𑀘𑀺 𑀦𑀸𑀤𑀺𑀬𑀦𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀡𑀢𑁆𑀢𑀺𑀜𑁆𑀘𑀸𑀢𑀺 𑀘-𑀲𑀤𑁆𑀤𑁂𑀦 𑀲𑀁𑀯𑀺𑀥𑀸𑀦𑀁, 𑀲𑀗𑁆𑀓𑁂𑀢𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺.

𑁬𑁮𑁬. 𑀕𑀭𑀼𑀓𑀁 𑀪𑀡𑁆𑀟𑀦𑁆𑀢𑀺 𑀧𑀸𑀤𑀕𑁆𑀖𑀦𑀓𑀪𑀸𑀯𑁂𑀦 𑀕𑀭𑀼𑀪𑀡𑁆𑀟𑀁. ‘‘𑀧𑀭𑀺𑀓𑁆𑀔𑀸𑀭’’𑀦𑁆𑀢𑀺 𑀏𑀢𑀲𑁆𑀲 𑀯𑀺𑀲𑁂𑀲𑀦𑀁. 𑀧𑀭𑀲𑁆𑀲 𑀧𑀭𑀺𑀓𑁆𑀔𑀸𑀭𑀦𑁆𑀢𑀺 𑀧𑀭𑀲𑀦𑁆𑀢𑀓𑀁 𑀬𑀁 𑀓𑀺𑀜𑁆𑀘𑀺 𑀧𑀭𑀺𑀓𑁆𑀔𑀸𑀭𑀁.

𑁬𑁯𑁨. 𑀫𑀦𑀼𑀲𑁆𑀲𑀼𑀢𑁆𑀢𑀭𑀺𑀓𑁂 𑀥𑀫𑁆𑀫𑁂𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀯𑀺𑀲𑀬𑁂. 𑀓𑀢𑀺𑀓𑀁 𑀓𑀢𑁆𑀯𑀸𑀦𑀸𑀢𑀺 ‘‘𑀏𑀯𑀁 𑀦𑀺𑀲𑀺𑀦𑁆𑀦𑁂 𑀏𑀯𑀁 𑀞𑀺𑀢𑁂 𑀏𑀯𑀁 𑀕𑀫𑀦𑁂 𑀅𑀢𑁆𑀣𑀁 𑀆𑀯𑀺𑀓𑀭𑁄𑀢𑀻’’𑀢𑀺𑀆𑀤𑀺𑀁 𑀓𑀢𑁆𑀯𑀸. 𑀲𑀫𑁆𑀪𑀸𑀯𑀦𑀸𑀥𑀺𑀧𑁆𑀧𑀸𑀬𑁄𑀢𑀺 ‘‘𑀅𑀭𑀳𑀸’’𑀢𑀺 𑀕𑀳𑁂𑀢𑁆𑀯𑀸 𑀫𑀳𑀸𑀲𑀫𑁆𑀪𑀸𑀯𑀦𑀁 𑀓𑀭𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄 𑀳𑀼𑀢𑁆𑀯𑀸. 𑀅𑀢𑀺𑀓𑁆𑀓𑀫𑀢𑀺 𑀘𑁂𑀢𑀺 𑀢𑀣𑀸 𑀓𑀢𑀁 𑀓𑀢𑀺𑀓𑀁 𑀅𑀢𑀺𑀓𑁆𑀓𑀫𑀢𑀺 𑀘𑁂, 𑀢𑀣𑀸𑀭𑀽𑀧𑀁 𑀦𑀺𑀲𑀚𑁆𑀚𑀁 𑀯𑀸 𑀞𑀸𑀦𑀁 𑀯𑀸 𑀕𑀫𑀦𑀁 𑀯𑀸 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀘𑀼𑀢𑁄𑀢𑀺 𑀢𑀣𑀸𑀭𑀽𑀧𑀁 𑀦𑀺𑀲𑀚𑁆𑀚𑀸𑀤𑀺𑀁 𑀤𑀺𑀲𑁆𑀯𑀸 𑀓𑁂𑀦𑀘𑀺 𑀫𑀦𑀼𑀲𑁆𑀲𑀚𑀸𑀢𑀺𑀓𑁂𑀦 ‘‘𑀅𑀭𑀳𑀸’’𑀢𑀺 𑀢𑀗𑁆𑀔𑀡𑁂 𑀜𑀸𑀢𑁂 𑀲𑁄 𑀧𑀼𑀕𑁆𑀕𑀮𑁄 𑀧𑀸𑀭𑀸𑀚𑀺𑀓𑀁 𑀆𑀧𑀚𑁆𑀚𑀢𑀺.

𑁬𑁯𑁩. 𑀏𑀓𑀯𑀢𑁆𑀣𑀼𑀓𑀸 𑀓𑀣𑀁 𑀪𑀯𑁂𑀬𑁆𑀬𑀼𑀦𑁆𑀢𑀺 𑀬𑁄𑀚𑀦𑀸.

𑁬𑁯𑁪. 𑀇𑀢𑁆𑀣𑀺𑀬𑀸𑀢𑀺 𑀏𑀓𑀺𑀲𑁆𑀲𑀸 𑀇𑀢𑁆𑀣𑀺𑀬𑀸. 𑀧𑀝𑀺𑀧𑀚𑁆𑀚𑀦𑁆𑀢𑁄𑀢𑀺 𑀏𑀓𑀓𑁆𑀔𑀡𑁂 𑀅𑀜𑁆𑀜𑁂𑀦 𑀧𑀼𑀭𑀺𑀲𑁂𑀦 𑀯𑀼𑀢𑁆𑀢𑀲𑀸𑀲𑀦𑀁 𑀯𑀢𑁆𑀯𑀸, 𑀇𑀫𑀺𑀦𑀸 𑀘 ‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀯𑀻𑀫𑀁𑀲𑀢𑀻’’𑀢𑀺 𑀅𑀗𑁆𑀕𑀤𑁆𑀯𑀬𑀲𑁆𑀲 𑀧𑀼𑀭𑀺𑀫𑀲𑀺𑀤𑁆𑀥𑀢𑀁 𑀤𑀻𑀧𑁂𑀢𑀺 𑀇𑀫𑀲𑁆𑀲 𑀧𑀘𑁆𑀘𑀸𑀳𑀭𑀡𑀓𑀢𑀜𑁆𑀘. 𑀓𑀸𑀬𑀲𑀁𑀲𑀕𑁆𑀕𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀤𑀼𑀝𑁆𑀞𑀼𑀮𑁆𑀮𑀁 𑀯𑀢𑁆𑀯𑀸 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀯𑀡𑁆𑀡𑀁 𑀪𑀡𑀦𑁆𑀢𑁄.

𑁬𑁯𑁫. 𑀬𑀣𑀸𑀯𑀼𑀢𑁆𑀢𑀁 𑀯𑀢𑁆𑀢𑀁 𑀅𑀘𑀭𑀺𑀢𑁆𑀯𑀸𑀢𑀺 𑀪𑀕𑀯𑀢𑀸 𑀯𑀼𑀢𑁆𑀢𑀁 𑀧𑀭𑀺𑀯𑀸𑀲𑀸𑀤𑀺𑀯𑀢𑁆𑀢𑀁 𑀅𑀘𑀭𑀺𑀢𑁆𑀯𑀸.

𑁬𑁯𑁬. 𑀪𑀺𑀓𑁆𑀔𑀼𑀦𑀻𑀳𑀺 𑀅𑀲𑀸𑀥𑀸𑀭𑀡𑀲𑀺𑀓𑁆𑀔𑀸𑀧𑀤𑀢𑁆𑀢𑀸 𑀆𑀳 ‘‘𑀦𑀢𑁆𑀣𑀺 𑀲𑀗𑁆𑀖𑀸𑀤𑀺𑀲𑁂𑀲𑀢𑀸’’𑀢𑀺.

𑁬𑁯𑁭. 𑀬𑁂𑀦 𑀓𑀼𑀤𑁆𑀥𑁄 𑀧𑀲𑀁𑀲𑀺𑀢𑁄𑀢𑀺 𑀏𑀢𑁆𑀣 ‘‘𑀦𑀺𑀦𑁆𑀤𑀺𑀢𑁄 𑀘𑀸’’𑀢𑀺 𑀲𑁂𑀲𑁄.

𑁬𑁯𑁮. 𑀢𑀺𑀢𑁆𑀣𑀺𑀬𑀸𑀦𑀁 𑀯𑀡𑁆𑀡𑀫𑁆𑀳𑀺 𑀪𑀜𑁆𑀜𑀫𑀸𑀦𑁂 𑀬𑁄 𑀓𑀼𑀚𑁆𑀛𑀢𑀺, 𑀲𑁄 𑀆𑀭𑀸𑀥𑀓𑁄𑀢𑀺 𑀬𑁄𑀚𑀦𑀸, 𑀧𑀭𑀺𑀢𑁄𑀲𑀺𑀢𑁄 𑀧𑀲𑀁𑀲𑀺𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀩𑁆𑀩𑀚𑁆𑀚𑀁 𑀮𑀪𑀺𑀢𑁆𑀯𑀸 𑀢𑀺𑀢𑁆𑀣𑀺𑀬𑀸𑀦𑀁 𑀯𑀡𑁆𑀡𑀲𑁆𑀫𑀺𑀁 𑀪𑀜𑁆𑀜𑀫𑀸𑀦𑁂 𑀲𑀼𑀢𑁆𑀯𑀸 𑀲𑀘𑁂 𑀓𑀼𑀧𑁆𑀧𑀢𑀺 𑀅𑀦𑀢𑁆𑀢𑀫𑀦𑀁 𑀓𑀭𑁄𑀢𑀺, 𑀆𑀭𑀸𑀥𑀓𑁄 𑀲𑀗𑁆𑀖𑀸𑀭𑀸𑀥𑀓𑁄 𑀲𑀗𑁆𑀖𑀁 𑀧𑀭𑀺𑀢𑁄𑀲𑁂𑀦𑁆𑀢𑁄 𑀳𑁄𑀢𑀺, 𑀲𑀫𑁆𑀩𑀼𑀤𑁆𑀥𑀲𑁆𑀲 𑀯𑀡𑁆𑀡𑀲𑁆𑀫𑀺𑀁 𑀪𑀜𑁆𑀜𑀫𑀸𑀦𑁂 𑀬𑀤𑀺 𑀓𑀼𑀚𑁆𑀛𑀢𑀺, 𑀦𑀺𑀦𑁆𑀤𑀺𑀢𑁄𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀲𑀫𑁆𑀩𑀼𑀤𑁆𑀥𑀲𑁆𑀲𑀸𑀢𑀺 𑀉𑀧𑀮𑀓𑁆𑀔𑀡𑀁.

𑁭𑁦𑁧. 𑀕𑀳𑁂𑀢𑁆𑀯𑀸𑀢𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸.

𑁭𑁫𑁧. ‘‘𑀦 𑀭𑀢𑁆𑀢𑀘𑀺𑀢𑁆𑀢𑁄’’𑀢𑀺𑀆𑀤𑀺𑀦𑀸 𑀧𑀼𑀭𑀺𑀫𑀸𑀦𑀁 𑀢𑀺𑀡𑁆𑀡𑀁 𑀧𑀸𑀭𑀸𑀚𑀺𑀓𑀸𑀦𑀁 𑀯𑀻𑀢𑀺𑀓𑁆𑀓𑀫𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑀲𑁆𑀲𑀸𑀧𑀺 𑀅𑀪𑀸𑀯𑀁 𑀤𑀻𑀧𑁂𑀢𑀺. 𑀫𑀭𑀡𑀸𑀬𑀸𑀢𑀺 𑀏𑀢𑁆𑀣 ‘‘𑀫𑀦𑀼𑀲𑁆𑀲𑀚𑀸𑀢𑀺𑀓𑀲𑁆𑀲𑀸’’𑀢𑀺 𑀇𑀤𑀁 𑀧𑀸𑀭𑀸𑀚𑀺𑀓𑀧𑀓𑀭𑀡𑀢𑁄𑀯 𑀮𑀩𑁆𑀪𑀢𑀺. 𑀢𑀲𑁆𑀲𑀸𑀢𑀺 𑀓𑀺𑀜𑁆𑀘𑀺 𑀤𑁂𑀦𑁆𑀢𑀲𑁆𑀲. 𑀢𑀦𑁆𑀢𑀺 𑀢𑀣𑀸 𑀤𑀻𑀬𑀫𑀸𑀦𑀁.

𑁭𑁫𑁨. ‘‘𑀧𑀭𑀸𑀚𑀬𑁄’’𑀢𑀺 𑀇𑀤𑀁 𑀅𑀪𑀩𑁆𑀩𑀧𑀼𑀕𑁆𑀕𑀮𑁂𑀲𑀼 𑀲𑀗𑁆𑀖𑀪𑁂𑀤𑀓𑀲𑁆𑀲 𑀅𑀦𑁆𑀢𑁄𑀕𑀥𑀢𑁆𑀢𑀸 𑀯𑀼𑀢𑁆𑀢𑀁. 𑀲𑀮𑀸𑀓𑀕𑁆𑀕𑀸𑀳𑁂𑀦𑀸𑀧𑀺 𑀲𑀗𑁆𑀖𑀁 𑀪𑀺𑀦𑁆𑀤𑀦𑁆𑀢𑁄 𑀲𑀗𑁆𑀖𑀪𑁂𑀤𑀓𑁄𑀯 𑀳𑁄𑀢𑀺.

𑁭𑁫𑁩. 𑀅𑀤𑁆𑀥𑀬𑁄𑀚𑀦𑁂 𑀬𑀁 𑀢𑀺𑀡𑁆𑀡𑀁 𑀘𑀻𑀯𑀭𑀸𑀦𑀁 𑀅𑀜𑁆𑀜𑀢𑀭𑀁 𑀏𑀓𑀁 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸𑀦𑀸𑀢𑀺 𑀬𑁄𑀚𑀦𑀸.

𑁭𑁫𑁪. 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀦𑀺𑀕𑁆𑀭𑁄𑀥𑀲𑀤𑀺𑀲𑁂 𑀭𑀼𑀓𑁆𑀔𑀫𑀽𑀮𑀓𑁂 𑀢𑀺𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀤𑁆𑀥𑀬𑁄𑀚𑀦𑁂 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀦𑁆𑀢𑀲𑁆𑀲𑀸𑀢𑀺 𑀬𑁄𑀚𑀦𑀸.

𑁭𑁫𑁫. 𑀓𑀸𑀬𑀺𑀓𑀸 𑀦𑀸𑀦𑀸𑀯𑀢𑁆𑀣𑀼𑀓𑀸𑀬𑁄 𑀲𑀫𑁆𑀩𑀳𑀼𑀮𑀸 𑀆𑀧𑀢𑁆𑀢𑀺𑀬𑁄 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀏𑀓𑀓𑁆𑀔𑀡𑁂 𑀓𑀣𑀁 𑀨𑀼𑀲𑁂𑀢𑀺 𑀬𑁄𑀚𑀦𑀸.

𑁭𑁫𑁭. 𑀯𑀸𑀘𑀲𑀺𑀓𑀸 𑀦 𑀓𑀸𑀬𑀺𑀓𑀸 𑀦𑀸𑀦𑀸𑀯𑀢𑁆𑀣𑀼𑀓𑀸𑀬𑁄 𑀲𑀫𑁆𑀩𑀳𑀼𑀮𑀸 𑀆𑀧𑀢𑁆𑀢𑀺𑀬𑁄 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀏𑀓𑀓𑁆𑀔𑀡𑁂 𑀓𑀣𑀁 𑀨𑀼𑀲𑁂𑀢𑀺 𑀬𑁄𑀚𑀦𑀸.

𑁭𑁫𑁮. 𑀯𑀺𑀦𑀬𑀦𑀲𑀢𑁆𑀣𑁂𑀢𑀺 𑀯𑀺𑀦𑀬𑀧𑀺𑀝𑀓𑁂. 𑀢𑀲𑁆𑀲 𑀪𑀺𑀓𑁆𑀔𑀼𑀲𑁆𑀲.

𑁭𑁫𑁯. ‘‘𑀇𑀢𑁆𑀣𑀺𑀬𑀸’’𑀢𑀺𑀆𑀤𑀻𑀲𑀼 𑀲𑀳𑀢𑁆𑀣𑁂 𑀓𑀭𑀡𑀯𑀘𑀦𑀁. 𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑁂𑀦 𑀯𑀸 𑀧𑀡𑁆𑀟𑀓𑁂𑀦 𑀯𑀸 𑀦𑀺𑀫𑀺𑀢𑁆𑀢𑀓𑁂 𑀫𑁂𑀣𑀼𑀦𑀁 𑀦 𑀲𑁂𑀯𑀦𑁆𑀢𑁄 𑀦 𑀧𑀝𑀺𑀲𑁂𑀯𑀦𑁆𑀢𑁄 𑀫𑁂𑀣𑀼𑀦𑀧𑀘𑁆𑀘𑀬𑀸 𑀘𑀼𑀢𑁄𑀢𑀺 𑀬𑁄𑀚𑀦𑀸.

𑁭𑁬𑁦. 𑀓𑀸𑀬𑀲𑀁𑀲𑀕𑁆𑀕𑁄𑀬𑁂𑀯 𑀓𑀸𑀬𑀲𑀁𑀲𑀕𑁆𑀕𑀢𑀸, 𑀢𑀁 𑀆𑀧𑀦𑁆𑀦𑀸. 𑀅𑀝𑁆𑀞𑀯𑀢𑁆𑀣𑀼𑀓𑀁 𑀙𑁂𑀚𑁆𑀚𑀦𑁆𑀢𑀺 𑀏𑀯𑀁𑀦𑀸𑀫𑀓𑀁 𑀧𑀸𑀭𑀸𑀚𑀺𑀓𑀁.

𑁭𑁬𑁨. 𑀲𑀫𑀬𑁂 𑀧𑀺𑀝𑁆𑀞𑀺𑀲𑀜𑁆𑀜𑀺𑀢𑁂𑀢𑀺 𑀕𑀺𑀫𑁆𑀳𑀸𑀦𑀁 𑀧𑀘𑁆𑀙𑀺𑀫𑀫𑀸𑀲𑀲𑁆𑀲 𑀧𑀞𑀫𑀤𑀺𑀯𑀲𑀢𑁄 𑀬𑀸𑀯 𑀳𑁂𑀫𑀦𑁆𑀢𑀲𑁆𑀲 𑀧𑀞𑀫𑀤𑀺𑀯𑀲𑁄, 𑀏𑀢𑁆𑀣𑀦𑁆𑀢𑀭𑁂 𑀲𑀢𑁆𑀢𑀫𑀸𑀲𑀫𑀢𑁆𑀢𑁂 𑀧𑀺𑀝𑁆𑀞𑀺𑀲𑀜𑁆𑀜𑀺𑀢𑁂 𑀲𑀫𑀬𑁂. ‘‘𑀫𑀸𑀢𑀼𑀬𑀸𑀧𑀺 𑀘𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀫𑀸𑀢𑀭𑀫𑁆𑀧𑀺 𑀘𑀸’’𑀢𑀺 𑀯𑀼𑀢𑁆𑀢𑀁. 𑀲𑁄𑀬𑁂𑀯 𑀯𑀸 𑀧𑀸𑀞𑁄.

𑁭𑁬𑁪. ‘‘𑀅𑀯𑀲𑁆𑀲𑀼𑀢𑀳𑀢𑁆𑀣𑀢𑁄 𑀳𑀺 𑀧𑀺𑀡𑁆𑀟𑀁 𑀕𑀳𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲 𑀯𑀢𑁆𑀣𑀼𑀫𑀸𑀳, 𑀮𑀲𑀼𑀡𑀦𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲 𑀯𑀢𑁆𑀣𑀼𑀁, 𑀫𑀦𑀼𑀲𑁆𑀲𑀫𑀁𑀲𑀦𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀯𑀢𑁆𑀣𑀼𑀁, 𑀅𑀓𑀧𑁆𑀧𑀫𑀜𑁆𑀜𑀦𑁆𑀢𑀺 𑀤𑀼𑀓𑁆𑀓𑀝𑀯𑀢𑁆𑀣𑀼𑀁. 𑀅𑀓𑀧𑁆𑀧𑀫𑀜𑁆𑀜𑀦𑁆𑀢𑀺 𑀏𑀢𑁆𑀣 ‘‘𑀫𑀁𑀲’’𑀦𑁆𑀢𑀺 𑀲𑁂𑀲𑁄. ‘‘𑀲𑀩𑁆𑀩𑁂 𑀏𑀓𑀢𑁄’’𑀢𑀺 𑀧𑀤𑀘𑁆𑀙𑁂𑀤𑁄. 𑀏𑀓𑀢𑁄𑀢𑀺 𑀏𑀢𑁆𑀣 ‘‘𑀫𑀤𑁆𑀤𑀺𑀢𑁆𑀯𑀸’’𑀢𑀺 𑀲𑁂𑀲𑁄, 𑀅𑀓𑀧𑁆𑀧𑀺𑀬𑀫𑀁𑀲𑁂𑀳𑀺 𑀲𑀤𑁆𑀥𑀺𑀁 𑀏𑀓𑀢𑁄 𑀫𑀤𑁆𑀤𑀺𑀢𑁆𑀯𑀸 𑀔𑀸𑀤𑀢𑀻𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀫𑁂𑀢𑀁 ‘‘𑀕𑀳𑁂𑀢𑁆𑀯𑀸, 𑀫𑀤𑁆𑀤𑀺𑀢𑁆𑀯𑀸, 𑀔𑀸𑀤𑀢𑀻’’𑀢𑀺 𑀓𑀺𑀭𑀺𑀬𑀸𑀦𑀁 𑀓𑀫𑁆𑀫𑀯𑀘𑀦𑀁. 𑀫𑀦𑀼𑀲𑁆𑀲𑀫𑀁𑀲𑀜𑁆𑀘𑀸𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁄 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄 𑀳𑁄𑀢𑀺. 𑀢𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀦𑀺𑀬𑀸. 𑀲𑀗𑁆𑀖𑀸𑀤𑀺𑀲𑁂𑀲𑀧𑀸𑀘𑀺𑀢𑁆𑀢𑀺𑀬𑀤𑀼𑀓𑁆𑀓𑀝𑀧𑀸𑀝𑀺𑀤𑁂𑀲𑀦𑀻𑀬𑀣𑀼𑀮𑁆𑀮𑀘𑁆𑀘𑀬𑀸𑀦𑀺 𑀏𑀓𑀓𑁆𑀔𑀡𑁂 𑀳𑁄𑀦𑁆𑀢𑀺.

𑁭𑁬𑁫. ‘‘𑀧𑀼𑀕𑁆𑀕𑀮𑁄 𑀏𑀓𑁄’’𑀢𑀺 𑀧𑀤𑀘𑁆𑀙𑁂𑀤𑁄. 𑀤𑁆𑀯𑁂𑀧𑀺 𑀘 𑀧𑀼𑀡𑁆𑀡𑀯𑀲𑁆𑀲𑀸𑀢𑀺 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀸 𑀘 𑀤𑁆𑀯𑁂 𑀲𑀸𑀫𑀡𑁂𑀭𑀸. 𑀏𑀓𑀸𑀯 𑀢𑁂𑀲𑀁 𑀧𑀦 𑀓𑀫𑁆𑀫𑀯𑀸𑀘𑀸𑀢𑀺 𑀢𑁂𑀲𑀁 𑀉𑀪𑀺𑀦𑁆𑀦𑀁 𑀲𑀸𑀫𑀡𑁂𑀭𑀸𑀦𑀁 𑀏𑀓𑁂𑀦 𑀆𑀘𑀭𑀺𑀬𑁂𑀦 𑀏𑀓𑀸𑀯 𑀉𑀧𑀲𑀫𑁆𑀧𑀤𑀓𑀫𑁆𑀫𑀯𑀸𑀘𑀸 𑀓𑀢𑀸. 𑀏𑀓𑀲𑁆𑀲𑀸𑀢𑀺 𑀏𑀓𑀲𑁆𑀲𑀸𑀧𑀺 𑀲𑀸𑀫𑀡𑁂𑀭𑀲𑁆𑀲. 𑀓𑀫𑁆𑀫𑀦𑁆𑀢𑀺 𑀉𑀧𑀲𑀫𑁆𑀧𑀤𑀓𑀫𑁆𑀫𑀁. 𑀦 𑀭𑀽𑀳𑀢𑁂𑀢𑀺 𑀦 𑀲𑀫𑁆𑀧𑀚𑁆𑀚𑀢𑀺, 𑀓𑀺𑀫𑁂𑀢𑁆𑀣 𑀓𑀸𑀭𑀡𑀁, 𑀯𑀤 𑀪𑀤𑁆𑀤𑀫𑀼𑀔𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁭𑁬𑁬. 𑀫𑀳𑀺𑀤𑁆𑀥𑀺𑀓𑁂𑀲𑀽𑀢𑀺 𑀤𑁆𑀯𑀻𑀲𑀼 𑀲𑀸𑀫𑀡𑁂𑀭𑁂𑀲𑀼. 𑀲𑀘𑁂 𑀧𑀦 𑀏𑀓𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀆𑀓𑀸𑀲𑀕𑁄 𑀆𑀓𑀸𑀲𑀝𑁆𑀞𑁄 𑀳𑁄𑀢𑀺, 𑀆𑀓𑀸𑀲𑀕𑀢𑀲𑁆𑀲𑁂𑀯 𑀓𑀢𑀁 𑀢𑀁 𑀉𑀧𑀲𑀫𑁆𑀧𑀤𑀓𑀫𑁆𑀫𑀁 𑀦𑁂𑀯 𑀭𑀽𑀳𑀢𑀺 𑀦𑁂𑀯 𑀲𑀫𑁆𑀧𑀚𑁆𑀚𑀢𑀺, 𑀪𑀽𑀫𑀺𑀕𑀢𑀲𑁆𑀲 𑀭𑀽𑀳𑀢𑀻𑀢𑀺 𑀬𑁄𑀚𑀦𑀸.

𑁭𑁬𑁭. 𑀇𑀤𑁆𑀥𑀺𑀬𑀸 𑀆𑀓𑀸𑀲𑁂 𑀞𑀺𑀢𑁂𑀦 𑀲𑀗𑁆𑀖𑁂𑀦 𑀪𑀽𑀫𑀺𑀕𑀢𑀲𑁆𑀲 𑀲𑀸𑀫𑀡𑁂𑀭𑀲𑁆𑀲 𑀉𑀧𑀲𑀫𑁆𑀧𑀤𑀓𑀫𑁆𑀫𑀁 𑀦 𑀓𑀸𑀢𑀩𑁆𑀩𑀁. 𑀬𑀤𑀺 𑀓𑀭𑁄𑀢𑀺, 𑀓𑀼𑀧𑁆𑀧𑀢𑀻𑀢𑀺 𑀬𑁄𑀚𑀦𑀸. 𑀇𑀤𑀜𑁆𑀘 𑀲𑀩𑁆𑀩𑀓𑀫𑁆𑀫𑀸𑀦𑀁 𑀲𑀸𑀥𑀸𑀭𑀡𑀮𑀓𑁆𑀔𑀡𑀁. 𑀬𑀣𑀸𑀳 𑁋 ‘‘𑀲𑀗𑁆𑀖𑁂𑀦𑀸𑀧𑀺 𑀆𑀓𑀸𑀲𑁂 𑀦𑀺𑀲𑀻𑀤𑀺𑀢𑁆𑀯𑀸 𑀪𑀽𑀫𑀺𑀕𑀢𑀲𑁆𑀲 𑀓𑀫𑁆𑀫𑀁 𑀦 𑀓𑀸𑀢𑀩𑁆𑀩𑀁. 𑀲𑀘𑁂 𑀓𑀭𑁄𑀢𑀺, 𑀓𑀼𑀧𑁆𑀧𑀢𑀻’’𑀢𑀺 (𑀧𑀭𑀺. 𑀅𑀝𑁆𑀞. 𑁪𑁮𑁧).

𑁭𑁬𑁮. 𑀯𑀢𑁆𑀣𑀁 𑀓𑀧𑁆𑀧𑀓𑀢𑀜𑁆𑀘 𑀦 𑀳𑁄𑀢𑀺, 𑀭𑀢𑁆𑀢𑀜𑁆𑀘 𑀦 𑀳𑁄𑀢𑀺, 𑀓𑁂𑀲𑀓𑀫𑁆𑀩𑀮𑀸𑀤𑀺 𑀅𑀓𑀧𑁆𑀧𑀺𑀬𑀜𑁆𑀘 𑀳𑁄𑀢𑀺, 𑀦𑀺𑀯𑀢𑁆𑀣𑀲𑁆𑀲 𑀧𑀦𑀸𑀧𑀢𑁆𑀢𑀺 𑀢𑀁 𑀧𑀦 𑀦𑀺𑀯𑀢𑁆𑀣𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀧𑀢𑁆𑀢𑀺 𑀳𑁄𑀢𑀺. 𑀅𑀦𑀸𑀧𑀢𑁆𑀢𑀺 𑀓𑀣𑀁 𑀲𑀺𑀬𑀸, 𑀯𑀤 𑀪𑀤𑁆𑀤𑀫𑀼𑀔𑀸𑀢𑀺 𑀬𑁄𑀚𑀦𑀸.

𑁭𑁬𑁯. 𑀏𑀢𑁆𑀣 𑀏𑀢𑀲𑁆𑀫𑀺𑀁 𑀅𑀓𑀧𑁆𑀧𑀺𑀬𑀯𑀢𑁆𑀣𑀼𑀥𑀸𑀭𑀡𑁂 𑀢𑀦𑁆𑀦𑀺𑀫𑀺𑀢𑁆𑀢𑀁. 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑀸𑀧𑀢𑁆𑀢𑀺 𑀲𑀺𑀬𑀸𑀢𑀺 𑀬𑁄𑀚𑀦𑀸. ‘‘𑀓𑀺𑀜𑁆𑀘𑀺𑀧𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀲𑀫𑀢𑁆𑀣𑁂𑀢𑀺. 𑀅𑀲𑁆𑀲 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀅𑀓𑀧𑁆𑀧𑀺𑀬𑀁 𑀦𑀸𑀫 𑀓𑀺𑀜𑁆𑀘𑀺𑀧𑀺 𑀘𑀻𑀯𑀭𑀁 𑀦 𑀯𑀺𑀚𑁆𑀚𑀢𑀺, 𑀢𑀲𑁆𑀫𑀸 𑀅𑀦𑀸𑀧𑀢𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁭𑁭𑁦. 𑀓𑀼𑀢𑁄𑀧𑀺 𑀘 𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑀢𑁄 𑀪𑁄𑀚𑀦𑀲𑁆𑀲 𑀓𑀺𑀜𑁆𑀘𑀺 𑀦 𑀕𑀡𑁆𑀳𑀢𑀺, 𑀪𑁄𑀚𑀦𑀢𑁄 𑀓𑀺𑀜𑁆𑀘𑀺𑀧𑀺 𑀲𑀬𑀫𑁆𑀧𑀺 𑀓𑀲𑁆𑀲𑀘𑀺 𑀧𑀼𑀭𑀺𑀲𑀲𑁆𑀲 𑀦 𑀤𑁂𑀢𑀺, 𑀢𑀣𑀸𑀧𑀺 𑀕𑀭𑀼𑀓𑀁 𑀯𑀚𑁆𑀚𑀁 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀁 𑀉𑀧𑁂𑀢𑀺 𑀆𑀧𑀚𑁆𑀚𑀢𑀺, 𑀢𑀁 𑀓𑀣𑀫𑀸𑀧𑀚𑁆𑀚𑀢𑀺, 𑀢𑁆𑀯𑀁 𑀬𑀤𑀺 𑀯𑀺𑀦𑀬𑁂 𑀓𑀼𑀲𑀮𑁄 𑀅𑀲𑀺, 𑀫𑁂 𑀫𑀬𑁆𑀳𑀁 𑀯𑀤 𑀏𑀢𑀁 𑀓𑀸𑀭𑀡𑀁 𑀓𑀣𑁂𑀳𑀻𑀢𑀺 𑀬𑁄𑀚𑀦𑀸. 𑀳𑀯𑁂𑀢𑀺 𑀦𑀺𑀧𑀸𑀢𑀫𑀢𑁆𑀢𑀁.

𑁭𑁭𑁧. 𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀅𑀜𑁆𑀜𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 ‘‘𑀇𑀗𑁆𑀖, 𑀅𑀬𑁆𑀬𑁂, 𑀬𑀁 𑀢𑁂 𑀏𑀲𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀤𑁂𑀢𑀺 𑀔𑀸𑀤𑀦𑀻𑀬𑀁 𑀯𑀸’’𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑁭𑁦𑁫) 𑀲𑀗𑁆𑀖𑀸𑀤𑀺𑀲𑁂𑀲𑀫𑀸𑀢𑀺𑀓𑀸𑀬 𑀯𑀼𑀢𑁆𑀢𑀦𑀬𑁂𑀦 𑀉𑀬𑁆𑀬𑁄𑀚𑀺𑀢𑀸 𑀅𑀯𑀲𑁆𑀲𑀼𑀢𑀫𑁆𑀳𑀸 𑀧𑀼𑀭𑀺𑀲𑀧𑀼𑀕𑁆𑀕𑀮𑀸 𑀬𑀁 𑀓𑀺𑀜𑁆𑀘𑀺 𑀪𑁄𑀚𑀦𑀁 𑀆𑀤𑀸𑀬 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀲𑀘𑁂 𑀪𑀼𑀜𑁆𑀚𑀢𑀺, 𑀲𑀸 𑀢𑀣𑀸 𑀪𑀼𑀜𑁆𑀚𑀦𑁆𑀢𑀻 𑀬𑀸𑀬 𑀉𑀬𑁆𑀬𑁄𑀚𑀺𑀢𑀸 𑀪𑀼𑀜𑁆𑀚𑀢𑀺, 𑀢𑀲𑁆𑀲𑀸 𑀉𑀬𑁆𑀬𑁄𑀚𑀺𑀓𑀸𑀬 𑀥𑀻𑀭𑀸 𑀯𑀺𑀦𑀬𑀥𑀭𑀸 𑀧𑀡𑁆𑀟𑀺𑀢𑀸 𑀲𑀗𑁆𑀖𑀸𑀤𑀺𑀲𑁂𑀲𑀁 𑀓𑀣𑀬𑀦𑁆𑀢𑀺 𑀢𑀲𑁆𑀲𑀸 𑀉𑀬𑁆𑀬𑁄𑀚𑀺𑀢𑀸𑀬 𑀪𑁄𑀚𑀦𑀧𑀭𑀺𑀬𑁄𑀲𑀸𑀦𑁂 𑀉𑀬𑁆𑀬𑁄𑀚𑀺𑀓𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑀁 𑀯𑀤𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀬𑀣𑀸𑀳 𑁋 ‘‘𑀢𑀲𑁆𑀲𑀸 𑀳𑀺 𑀪𑁄𑀚𑀦𑀧𑀭𑀺𑀬𑁄𑀲𑀸𑀦𑁂 𑀉𑀬𑁆𑀬𑁄𑀚𑀺𑀓𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑁄 𑀳𑁄𑀢𑀻’’𑀢𑀺 (𑀧𑀭𑀺. 𑀅𑀝𑁆𑀞. 𑁪𑁮𑁧).

𑁭𑁭𑁨. 𑀢𑀁 𑀓𑀣𑀁 𑀬𑀤𑀺 𑀩𑀼𑀚𑁆𑀛𑀲𑀺 𑀚𑀸𑀦𑀸𑀲𑀺, 𑀲𑀸𑀥𑀼𑀓𑀁 𑀩𑁆𑀭𑀽𑀳𑀺 𑀓𑀣𑁂𑀳𑀻𑀢𑀺 𑀬𑁄𑀚𑀦𑀸.

𑁭𑁭𑁩. 𑀦𑀺𑀲𑁂𑀯𑀺𑀢𑁂𑀢𑀺 𑀢𑀸𑀬 𑀉𑀬𑁆𑀬𑁄𑀚𑀺𑀢𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀢𑀲𑁆𑀲 𑀧𑀼𑀭𑀺𑀲𑀧𑀼𑀕𑁆𑀕𑀮𑀲𑁆𑀲 𑀳𑀢𑁆𑀣𑀢𑁄 𑀧𑀝𑀺𑀕𑁆𑀕𑀳𑀺𑀢𑁂 𑀢𑀲𑁆𑀫𑀺𑀁 𑀤𑀦𑁆𑀢𑀧𑁄𑀦𑁂 𑀧𑀭𑀺𑀪𑀼𑀢𑁆𑀢𑁂 𑀉𑀬𑁆𑀬𑁄𑀚𑀺𑀓𑀸 𑀮𑀳𑀼𑀯𑀚𑁆𑀚𑀁 𑀆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄.

𑁭𑁭𑁫. ‘‘𑀉𑀓𑁆𑀔𑀺𑀢𑁆𑀢𑀓𑁄’’𑀢𑀺 𑀇𑀫𑀺𑀦𑀸 𑀆𑀧𑀢𑁆𑀢𑀺𑀯𑀚𑁆𑀚𑀫𑀸𑀳. 𑀬𑀣𑀸𑀳 𑁋 ‘‘𑀢𑁂𑀦 𑀳𑀺 𑀲𑀤𑁆𑀥𑀺𑀁 𑀯𑀺𑀦𑀬𑀓𑀫𑁆𑀫𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑁄 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀚𑁆𑀚𑀺𑀢𑁆𑀯𑀸 𑀙𑀸𑀤𑁂𑀦𑁆𑀢𑁄 𑀯𑀚𑁆𑀚𑀁 𑀦 𑀨𑀼𑀲𑀢𑀻’’𑀢𑀺.

𑁭𑁭𑁬. 𑀲𑀧𑁆𑀧𑀸𑀡𑀧𑁆𑀧𑀸𑀡𑀚𑀦𑁆𑀢𑀺 𑀲𑀧𑁆𑀧𑀸𑀡𑀓𑁂 𑀘 𑀅𑀧𑁆𑀧𑀸𑀡𑀓𑁂 𑀘 𑀚𑀸𑀢𑀁. 𑀦𑁂𑀯 𑀚𑀗𑁆𑀕𑀫𑀦𑁆𑀢𑀺 𑀧𑀸𑀤𑁂𑀳𑀺 𑀪𑀽𑀫𑀺𑀬𑀁 𑀦𑁂𑀯 𑀘𑀭𑀦𑁆𑀢𑀁. 𑀦 𑀯𑀺𑀳𑀗𑁆𑀕𑀫𑀦𑁆𑀢𑀺 𑀆𑀓𑀸𑀲𑁂 𑀧𑀓𑁆𑀔𑀁 𑀧𑀲𑀸𑀭𑁂𑀢𑁆𑀯𑀸 𑀦 𑀘𑀭𑀦𑁆𑀢𑀁. 𑀤𑁆𑀯𑀺𑀚𑀦𑁆𑀢𑀺 𑀤𑁆𑀯𑀻𑀳𑀺 𑀧𑀘𑁆𑀘𑀬𑁂𑀳𑀺, 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀸 𑀚𑀸𑀢𑀢𑁆𑀢𑀸 𑀤𑁆𑀯𑀺𑀚𑀁. 𑀓𑀦𑁆𑀢𑀦𑁆𑀢𑀺 𑀫𑀦𑁄𑀳𑀭𑀁. 𑀅𑀓𑀦𑁆𑀢𑀦𑁆𑀢𑀺 𑀅𑀫𑀦𑁄𑀳𑀭𑀁.

𑁭𑁭𑁭. 𑀲𑀧𑁆𑀧𑀸𑀡𑀚𑁄 𑀲𑀤𑁆𑀤𑁄 𑀘𑀺𑀢𑁆𑀢𑀚𑁄 𑀯𑀼𑀢𑁆𑀢𑁄, 𑀅𑀧𑁆𑀧𑀸𑀡𑀚𑁄 𑀉𑀢𑀼𑀚𑁄 𑀲𑀤𑁆𑀤𑁄 𑀯𑀼𑀢𑁆𑀢𑁄, 𑀲𑁄 𑀧𑀦 𑀤𑁆𑀯𑀻𑀳𑁂𑀯 𑀧𑀘𑁆𑀘𑀬𑁂𑀳𑀺 𑀚𑀸𑀢𑀢𑁆𑀢𑀸 ‘‘𑀤𑁆𑀯𑀺𑀚𑁄’’𑀢𑀺 𑀫𑀢𑁄𑀢𑀺 𑀬𑁄𑀚𑀦𑀸.

𑁭𑁭𑁮. ‘‘𑀯𑀺𑀦𑀬𑁂’’𑀢𑀺𑀆𑀤𑀺𑀕𑀸𑀣𑀸 𑀯𑀡𑁆𑀡𑀺𑀢𑀢𑁆𑀣𑀸𑀬𑁂𑀯.

𑀇𑀢𑀺 𑀉𑀢𑁆𑀢𑀭𑁂 𑀮𑀻𑀦𑀢𑁆𑀣𑀧𑀓𑀸𑀲𑀦𑀺𑀬𑀸

𑀲𑁂𑀤𑀫𑁄𑀘𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.