𑀏𑀓𑀼𑀢𑁆𑀢𑀭𑀦𑀬𑀓𑀣𑀸𑀯𑀡𑁆𑀡𑀦𑀸

𑁪𑁨𑁪. 𑀇𑀢𑁄 𑀧𑀭𑀦𑁆𑀢𑀺 𑀇𑀢𑁄 𑀲𑀫𑀼𑀝𑁆𑀞𑀸𑀦𑀯𑀺𑀦𑀺𑀘𑁆𑀙𑀬𑀓𑀣𑀸𑀬 𑀧𑀭𑀁. 𑀧𑀭𑀦𑁆𑀢𑀺 𑀉𑀢𑁆𑀢𑀫𑀁. 𑀏𑀓𑀼𑀢𑁆𑀢𑀭𑀁 𑀦𑀬𑀦𑁆𑀢𑀺 𑀏𑀓𑁂𑀓𑀅𑀗𑁆𑀕𑀸𑀢𑀺𑀭𑁂𑀓𑀢𑀸𑀬 𑀏𑀓𑀼𑀢𑁆𑀢𑀭𑀲𑀗𑁆𑀔𑀸𑀢𑀁 𑀏𑀓𑀓𑀤𑀼𑀓𑀸𑀤𑀺𑀦𑀬𑀁.

𑁪𑁨𑁫-𑁭. 𑀓𑁂 𑀆𑀧𑀢𑁆𑀢𑀺𑀓𑀭𑀸 𑀥𑀫𑁆𑀫𑀸…𑀧𑁂… 𑀓𑀸 𑀘𑀸𑀤𑁂𑀲𑀦𑀕𑀸𑀫𑀺𑀦𑀻𑀢𑀺 𑀏𑀓𑁂𑀓𑀧𑀜𑁆𑀳𑀯𑀲𑁂𑀦 𑀉𑀢𑁆𑀢𑀸𑀦𑀢𑁆𑀣𑁄𑀬𑁂𑀯.

𑁪𑁨𑁮. 𑀲𑀫𑀼𑀝𑁆𑀞𑀸𑀦𑀸𑀦𑀻𑀢𑀺 𑀆𑀤𑀺𑀓𑁄 𑀯𑀺𑀲𑁆𑀲𑀚𑁆𑀚𑀦𑀲𑀗𑁆𑀔𑀸𑀢𑁄 𑀉𑀢𑁆𑀢𑀭𑀯𑀸𑀤𑁄. 𑀢𑀢𑁆𑀣 𑀲𑀫𑀼𑀝𑁆𑀞𑀸𑀦𑀸𑀦𑀺…𑀧𑁂… 𑀤𑀻𑀧𑀺𑀢𑀸𑀢𑀺 𑀬𑀲𑁆𑀫𑀸 𑀏𑀢𑁂𑀲𑀁 𑀯𑀲𑁂𑀦 𑀧𑀼𑀕𑁆𑀕𑀮𑁄 𑀆𑀧𑀢𑁆𑀢𑀺𑀁 𑀓𑀭𑁄𑀢𑀺 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 ‘‘𑀆𑀧𑀢𑁆𑀢𑀺𑀓𑀭𑀸’’𑀢𑀺 𑀯𑀼𑀢𑁆𑀢𑀸.

𑁪𑁨𑁯. 𑀢𑀢𑁆𑀣𑀸𑀢𑀺 𑀢𑀸𑀲𑀼 𑀆𑀧𑀢𑁆𑀢𑀻𑀲𑀼. 𑀮𑀳𑀼𑀓𑀸𑀢𑀺 𑀮𑀳𑀼𑀓𑁂𑀦 𑀯𑀺𑀦𑀬𑀓𑀫𑁆𑀫𑁂𑀦 𑀯𑀺𑀲𑀼𑀚𑁆𑀛𑀦𑀢𑁄 𑀮𑀳𑀼𑀓𑀸. 𑀕𑀭𑀼𑀓𑁂𑀦 𑀯𑀺𑀦𑀬𑀓𑀫𑁆𑀫𑁂𑀦 𑀯𑀺𑀲𑀼𑀚𑁆𑀛𑀦𑀢𑁄 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺, 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀅𑀦𑀸𑀧𑀢𑁆𑀢𑀺𑀪𑀸𑀯𑀁 𑀉𑀧𑀦𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁄 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺 𑀘 𑀕𑀭𑀼𑀓𑀸𑀧𑀢𑁆𑀢𑀺 𑀦𑀸𑀫, 𑀢𑀸 𑀧𑀦 𑀮𑀳𑀼𑀓𑀸𑀲𑀼 𑀯𑀼𑀢𑁆𑀢𑀸𑀲𑀼 𑀢𑀩𑁆𑀩𑀺𑀧𑀭𑀺𑀬𑀸𑀬𑀢𑁄 𑀜𑀸𑀢𑀼𑀁 𑀲𑀓𑁆𑀓𑀸𑀢𑀺 𑀯𑀺𑀲𑁆𑀲𑀚𑁆𑀚𑀦𑁂 𑀯𑀺𑀲𑀼𑀁 𑀦 𑀯𑀼𑀢𑁆𑀢𑀸.

𑁪𑁩𑁧. 𑀤𑀼𑀝𑁆𑀞𑀼𑀁 𑀓𑀼𑀘𑁆𑀙𑀺𑀢𑀪𑀸𑀯𑀁 𑀧𑀭𑀫𑀚𑁂𑀕𑀼𑀘𑁆𑀙𑀁 𑀦𑀺𑀦𑁆𑀤𑀦𑀻𑀬𑀪𑀸𑀯𑀁 𑀉𑀮𑀢𑀺 𑀕𑀘𑁆𑀙𑀢𑀻𑀢𑀺 𑀤𑀼𑀝𑁆𑀞𑀼𑀮𑁆𑀮𑀁, 𑀧𑀸𑀭𑀸𑀚𑀺𑀓𑀲𑀗𑁆𑀖𑀸𑀤𑀺𑀲𑁂𑀲𑀁. 𑀢𑁂𑀦𑀸𑀳 ‘‘𑀤𑀼𑀯𑀺𑀥𑀸𑀧𑀢𑁆𑀢𑀺 𑀆𑀤𑀺𑀢𑁄’’𑀢𑀺.

𑁪𑁩𑁨. 𑀧𑀜𑁆𑀘𑀸𑀦𑀦𑁆𑀢𑀭𑀺𑀬𑀲𑀁𑀬𑀼𑀢𑁆𑀢𑀸𑀢𑀺 𑀫𑀸𑀢𑀼𑀖𑀸𑀢𑀓𑀧𑀺𑀢𑀼𑀖𑀸𑀢𑀓𑀅𑀭𑀳𑀦𑁆𑀢𑀖𑀸𑀢𑀓𑁂𑀳𑀺 𑀆𑀧𑀦𑁆𑀦𑀸 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺 𑀘 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑀲𑀗𑁆𑀖𑀪𑁂𑀤𑀓𑀸𑀦𑀁 𑀅𑀪𑀩𑁆𑀩𑀢𑀸𑀳𑁂𑀢𑀼𑀓𑀸 𑀓𑀸𑀬𑀯𑀘𑀻𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀸 𑀅𑀓𑀼𑀲𑀮𑀘𑁂𑀢𑀦𑀸𑀲𑀗𑁆𑀔𑀸𑀢𑀸 𑀧𑀸𑀭𑀸𑀚𑀺𑀓𑀸 𑀘 𑀅𑀦𑀦𑁆𑀢𑀭𑀫𑁂𑀯 𑀅𑀧𑀸𑀬𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀢𑀸𑀬 𑀇𑀫𑁂 𑀧𑀜𑁆𑀘 𑀅𑀦𑀦𑁆𑀢𑀭𑀲𑀁𑀬𑀼𑀢𑁆𑀢𑀸 𑀦𑀸𑀫. 𑀢𑀸 𑀧𑀦 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑁂𑀲𑀼 𑀅𑀦𑁆𑀢𑁄𑀕𑀥𑀢𑁆𑀢𑀸 ‘‘𑀦𑀺𑀬𑀢𑀸’’𑀢𑀺 𑀯𑀼𑀢𑁆𑀢𑀸.

𑀧𑀭𑀺𑀯𑀸𑀭𑁂 (𑀧𑀭𑀺. 𑁩𑁨𑁧) 𑀧𑀦 𑀅𑀜𑁆𑀜𑁂𑀧𑀺 𑀅𑀦𑁆𑀢𑀭𑀸𑀬𑀺𑀓𑀸𑀤𑀻 𑀩𑀳𑀽 𑀏𑀓𑀓𑀸 𑀤𑀲𑁆𑀲𑀺𑀢𑀸, 𑀢𑁂 𑀧𑀦 𑀕𑀦𑁆𑀣𑀪𑀻𑀭𑀼𑀓𑀚𑀦𑀸𑀦𑀼𑀕𑁆𑀕𑀳𑁂𑀦 𑀆𑀘𑀭𑀺𑀬𑁂𑀦 𑀇𑀥 𑀦 𑀤𑀲𑁆𑀲𑀺𑀢𑀸. 𑀅𑀢𑁆𑀣𑀺𑀓𑁂𑀳𑀺 𑀧𑀭𑀺𑀯𑀸𑀭𑁂𑀬𑁂𑀯 (𑀧𑀭𑀺. 𑁩𑁨𑁧) 𑀕𑀳𑁂𑀢𑀩𑁆𑀩𑀸. 𑀏𑀢𑁆𑀣 𑀘 𑀲𑀢𑁆𑀢𑀧𑀺 𑀆𑀧𑀢𑁆𑀢𑀺𑀬𑁄 𑀲𑀜𑁆𑀘𑀺𑀘𑁆𑀘 𑀯𑀻𑀢𑀺𑀓𑁆𑀓𑀦𑁆𑀢𑀸 𑀲𑀕𑁆𑀕𑀦𑁆𑀢𑀭𑀸𑀬𑀜𑁆𑀘𑁂𑀯 𑀫𑁄𑀓𑁆𑀔𑀦𑁆𑀢𑀭𑀸𑀬𑀜𑁆𑀘 𑀓𑀭𑁄𑀦𑁆𑀢𑀻𑀢𑀺 𑀅𑀦𑁆𑀢𑀭𑀸𑀬𑀺𑀓𑀸. 𑀅𑀚𑀸𑀦𑀦𑁆𑀢𑁂𑀦 𑀯𑀻𑀢𑀺𑀓𑁆𑀓𑀦𑁆𑀢𑀸 𑀧𑀦 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀸𑀧𑀢𑁆𑀢𑀺 𑀦𑁂𑀯 𑀲𑀕𑁆𑀕𑀦𑁆𑀢𑀭𑀸𑀬𑀁, 𑀦 𑀫𑁄𑀓𑁆𑀔𑀦𑁆𑀢𑀭𑀸𑀬𑀁 𑀓𑀭𑁄𑀢𑀻𑀢𑀺 𑀅𑀦𑀦𑁆𑀢𑀭𑀸𑀬𑀺𑀓𑀸. 𑀅𑀦𑁆𑀢𑀭𑀸𑀬𑀺𑀓𑀁 𑀆𑀧𑀦𑁆𑀦𑀲𑁆𑀲𑀧𑀺 𑀤𑁂𑀲𑀦𑀸𑀕𑀸𑀫𑀺𑀦𑀺𑀁 𑀤𑁂𑀲𑁂𑀢𑁆𑀯𑀸 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀢𑁄 𑀯𑀼𑀝𑁆𑀞𑀸𑀬 𑀲𑀼𑀤𑁆𑀥𑀺𑀧𑀢𑁆𑀢𑀲𑁆𑀲, 𑀲𑀸𑀫𑀡𑁂𑀭𑀪𑀽𑀫𑀺𑀬𑀁 𑀞𑀺𑀢𑀲𑁆𑀲 𑀘 𑀅𑀯𑀸𑀭𑀺𑀢𑁄 𑀲𑀕𑁆𑀕𑀫𑀕𑁆𑀕𑀫𑁄𑀓𑁆𑀔𑀫𑀕𑁆𑀕𑁄𑀢𑀺.

𑀏𑀓𑀓𑀓𑀣𑀸𑀯𑀡𑁆𑀡𑀦𑀸.

𑁪𑁩𑁫. 𑀅𑀤𑁆𑀥𑀯𑀺𑀳𑀻𑀦𑁄 𑀦𑀸𑀫 𑀊𑀦𑀯𑀻𑀲𑀢𑀺𑀯𑀲𑁆𑀲𑁄. 𑀅𑀗𑁆𑀕𑀯𑀺𑀳𑀻𑀦𑁄 𑀦𑀸𑀫 𑀳𑀢𑁆𑀣𑀘𑁆𑀙𑀺𑀦𑁆𑀦𑀸𑀤𑀺𑀪𑁂𑀤𑁄. 𑀯𑀢𑁆𑀣𑀼𑀯𑀺𑀧𑀦𑁆𑀦𑁄 𑀦𑀸𑀫 𑀧𑀡𑁆𑀟𑀓𑁄, 𑀢𑀺𑀭𑀘𑁆𑀙𑀸𑀦𑀕𑀢𑁄, 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀘. 𑀅𑀯𑀲𑁂𑀲𑀸 𑀣𑁂𑀬𑁆𑀬𑀲𑀁𑀯𑀸𑀲𑀓𑀸𑀤𑀬𑁄 𑀅𑀝𑁆𑀞 𑀅𑀪𑀩𑁆𑀩𑀝𑁆𑀞𑀸𑀦𑀧𑁆𑀧𑀢𑁆𑀢𑀸 𑀤𑀼𑀓𑁆𑀓𑀝𑀓𑀸𑀭𑀺𑀦𑁄 𑀦𑀸𑀫, 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀤𑀼𑀓𑁆𑀓𑀝𑁂𑀦 𑀅𑀢𑁆𑀢𑀦𑁄 𑀓𑀫𑁆𑀫𑁂𑀦 𑀅𑀪𑀩𑁆𑀩𑀝𑁆𑀞𑀸𑀦𑀧𑁆𑀧𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀅𑀧𑀭𑀺𑀧𑀼𑀡𑁆𑀡𑁄𑀢𑀺 𑀅𑀧𑀭𑀺𑀧𑀼𑀡𑁆𑀡𑀧𑀢𑁆𑀢𑀘𑀻𑀯𑀭𑁄. 𑀦𑁄 𑀬𑀸𑀘𑀢𑀻𑀢𑀺 𑀉𑀧𑀲𑀫𑁆𑀧𑀦𑁆𑀦𑀁 𑀦 𑀬𑀸𑀘𑀢𑀺. 𑀧𑀝𑀺𑀲𑀺𑀤𑁆𑀥𑀸𑀢𑀺 ‘‘𑀤𑁆𑀯𑁂 𑀧𑀼𑀕𑁆𑀕𑀮𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀸’’𑀢𑀺𑀆𑀤𑀺𑀦𑀸 (𑀧𑀭𑀺. 𑁩𑁨𑁨) 𑀯𑀸𑀭𑀺𑀢𑀸.

𑁪𑁩𑁬. 𑀳𑀯𑁂𑀢𑀺 𑀏𑀓𑀁𑀲𑀢𑁆𑀣𑁂 𑀦𑀺𑀧𑀸𑀢𑁄. 𑀮𑀤𑁆𑀥𑀲𑀫𑀸𑀧𑀢𑁆𑀢𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀻𑀧𑀺𑀢𑀸 𑀆𑀧𑀢𑁆𑀢𑀺 𑀅𑀢𑁆𑀣𑀺 𑀳𑀯𑁂 𑀅𑀢𑁆𑀣𑁂𑀯. 𑀦𑁄 𑀮𑀤𑁆𑀥𑀲𑀫𑀸𑀧𑀢𑁆𑀢𑀺𑀲𑁆𑀲𑀸𑀢𑀺 𑀅𑀮𑀤𑁆𑀥𑀲𑀫𑀸𑀧𑀢𑁆𑀢𑀺𑀲𑁆𑀲 𑀤𑀻𑀧𑀺𑀢𑀸 𑀆𑀧𑀢𑁆𑀢𑀺 𑀅𑀢𑁆𑀣𑁂𑀯𑀸𑀢𑀺 𑀬𑁄𑀚𑀦𑀸.

𑁪𑁩𑁭. 𑀪𑀽𑀢𑀲𑁆𑀲𑀸𑀢𑀺 𑀅𑀢𑁆𑀢𑀦𑀺 𑀲𑀦𑁆𑀢𑀲𑁆𑀲 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀲𑁆𑀲. 𑀅𑀪𑀽𑀢𑀸𑀭𑁄𑀘𑀦𑀸𑀧𑀢𑁆𑀢𑀻𑀢𑀺 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺. 𑀅𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀦𑀺𑀤𑁆𑀤𑀺𑀲𑁂𑀢𑀺 𑀬𑁄𑀚𑀦𑀸.

𑁪𑁩𑁮. ‘‘𑀅𑀢𑁆𑀣𑀺 𑀲𑀤𑁆𑀥𑀫𑁆𑀫𑀲𑀁𑀬𑀼𑀢𑁆𑀢𑀸’’𑀢𑀺𑀆𑀤𑀻𑀲𑀼 𑀅𑀢𑁆𑀣𑀺-𑀲𑀤𑁆𑀤𑁄 𑀧𑀘𑁆𑀘𑀢𑁆𑀢𑁂𑀓𑀯𑀘𑀦𑀦𑁆𑀢𑁂𑀳𑀺 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄.

𑁪𑁩𑁯. 𑀧𑀤𑀲𑁄𑀥𑀫𑁆𑀫𑀫𑀽𑀮𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 ‘‘𑀉𑀢𑁆𑀢𑀭𑀺𑀙𑀧𑁆𑀧𑀜𑁆𑀘𑀯𑀸𑀘𑀸𑀥𑀫𑁆𑀫𑀤𑁂𑀲𑀦𑀸’’𑀢𑀺 𑀆𑀧𑀢𑁆𑀢𑀻𑀦𑀁 𑀕𑀳𑀡𑀁.

𑁪𑁪𑁦. 𑀪𑁄𑀕𑁂𑀢𑀺 𑀧𑀭𑀺𑀪𑁄𑀕𑁂. ‘‘𑀲𑀧𑀭𑀺𑀓𑁆𑀔𑀸𑀭𑀲𑀁𑀬𑀼𑀢𑀸’’𑀢𑀺 𑀇𑀤𑀜𑁆𑀘 𑀦𑀺𑀤𑀲𑁆𑀲𑀦𑀫𑀢𑁆𑀢𑀁. ‘‘𑀧𑀢𑁆𑀢𑀘𑀻𑀯𑀭𑀸𑀦𑀁 𑀦𑀺𑀲𑁆𑀲𑀚𑁆𑀚𑀦𑁂, 𑀓𑀺𑀮𑀺𑀝𑁆𑀞𑀘𑀻𑀯𑀭𑀸𑀦𑀁 𑀅𑀥𑁄𑀯𑀦𑁂, 𑀫𑀮𑀕𑁆𑀕𑀳𑀺𑀢𑀧𑀢𑁆𑀢𑀲𑁆𑀲 𑀅𑀧𑀘𑀦𑁂’’𑀢𑀺 𑀏𑀯𑀫𑀸𑀤𑀺𑀓𑀸 𑀅𑀬𑀼𑀢𑁆𑀢𑀧𑀭𑀺𑀪𑁄𑀕𑀸 𑀆𑀧𑀢𑁆𑀢𑀺𑀬𑁄𑀧𑀺 𑀲𑀓𑀧𑀭𑀺𑀓𑁆𑀔𑀸𑀭𑀲𑀁𑀬𑀼𑀢𑁆𑀢𑀸𑀬𑁂𑀯.

𑁪𑁪𑁧. 𑀫𑀜𑁆𑀘𑀧𑀻𑀞𑀸𑀤𑀺𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀪𑀺𑀲𑀺𑀆𑀤𑀻𑀦𑀁 𑀕𑀳𑀡𑀁. 𑀅𑀚𑁆𑀛𑁄𑀓𑀸𑀲𑀢𑁆𑀣𑀭𑁂𑀧𑀺 𑀘𑀸𑀢𑀺 𑀅𑀚𑁆𑀛𑁄𑀓𑀸𑀲𑁂 𑀅𑀢𑁆𑀣𑀭𑁂 𑀅𑀢𑁆𑀣𑀭𑀸𑀧𑀦𑁂 𑀲𑀢𑀺. 𑀅𑀦𑀸𑀧𑀼𑀘𑁆𑀙𑀸𑀯 𑀕𑀫𑀦𑁂𑀢𑀺 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸 𑀯𑀸 𑀕𑀫𑀦𑁂. 𑀯𑀸-𑀲𑀤𑁆𑀤𑁂𑀦 𑀅𑀦𑀼𑀤𑁆𑀥𑀭𑀺𑀢𑁆𑀯𑀸 𑀯𑀸 𑀅𑀦𑀼𑀤𑁆𑀥𑀭𑀸𑀧𑁂𑀢𑁆𑀯𑀸 𑀯𑀸 𑀕𑀫𑀦𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀭𑀲𑀦𑁆𑀢𑀓𑀲𑀁𑀬𑀼𑀢𑀸𑀢𑀺 𑀧𑀭𑀧𑀭𑀺𑀓𑁆𑀔𑀸𑀭𑀧𑀝𑀺𑀩𑀤𑁆𑀥𑀸.

𑁪𑁪𑁩. ‘‘𑀲𑀺𑀔𑀭𑀡𑀻𑀲𑀻’’𑀢𑀺 𑀬𑀁 𑀯𑀘𑀦𑀁 𑀲𑀘𑁆𑀘𑀁, 𑀢𑀁 𑀪𑀡𑀢𑁄 𑀕𑀭𑀼𑀓𑀁 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀲𑀗𑁆𑀖𑀸𑀤𑀺𑀲𑁂𑀲𑁄 𑀲𑀺𑀬𑀸𑀢𑀺 𑀬𑁄𑀚𑀦𑀸.

𑁪𑁪𑁫. 𑀕𑀭𑀼𑀓𑀸𑀧𑀢𑁆𑀢𑀻𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺. 𑀪𑀽𑀢𑀲𑁆𑀲𑀸𑀭𑁄𑀘𑀦𑁂𑀢𑀺 𑀪𑀽𑀢𑀲𑁆𑀲 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀲𑁆𑀲 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀆𑀭𑁄𑀘𑀦𑁂. 𑀲𑀘𑁆𑀘𑀁 𑀯𑀤𑀢𑁄𑀢𑀺 𑀲𑀘𑁆𑀘𑀁 𑀯𑀘𑀦𑀁 𑀯𑀤𑀦𑁆𑀢𑀲𑁆𑀲. 𑀮𑀳𑀼𑀓𑀸𑀢𑀺 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺.

𑁪𑁪𑁭. 𑀯𑀺𑀓𑁄𑀧𑁂𑀢𑀼𑀦𑁆𑀢𑀺 𑀯𑀕𑁆𑀕𑀓𑀭𑀡𑁂𑀦 𑀯𑀺𑀓𑁄𑀧𑁂𑀢𑀼𑀁. 𑀳𑀢𑁆𑀣𑀧𑀸𑀲𑀁 𑀚𑀳𑀦𑁆𑀢𑀺 𑀅𑀦𑁆𑀢𑁄𑀲𑀻𑀫𑀸𑀬 𑀏𑀯 𑀳𑀢𑁆𑀣𑀧𑀸𑀲𑀁 𑀚𑀳𑀦𑁆𑀢𑁄, 𑀳𑀢𑁆𑀣𑀧𑀸𑀲𑀁 𑀚𑀳𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀨𑀼𑀲𑁂𑀢𑀺 𑀪𑀽𑀫𑀺𑀕𑀢𑁄 𑀨𑀼𑀲𑁂𑀬𑁆𑀬.

𑁪𑁪𑁮. 𑀯𑁂𑀳𑀸𑀲𑀓𑀼𑀝𑀺𑀬𑀸 𑀉𑀧𑀭𑀺 𑀆𑀳𑀘𑁆𑀘𑀧𑀸𑀤𑀓𑀁 𑀫𑀜𑁆𑀘𑀁 𑀯𑀸 𑀧𑀻𑀞𑀁 𑀯𑀸 𑀅𑀪𑀺𑀦𑀺𑀲𑀻𑀤𑀦𑁆𑀢𑁄 𑀯𑁂𑀳𑀸𑀲𑀕𑀢𑁄 𑀆𑀧𑀚𑁆𑀚𑀢𑀻𑀢𑀺 𑀬𑁄𑀚𑀦𑀸. 𑀲𑀘𑁂 𑀢𑀁 𑀪𑀽𑀫𑀺𑀬𑀁 𑀧𑀜𑁆𑀜𑀧𑁂𑀢𑁆𑀯𑀸 𑀦𑀺𑀲𑀚𑁆𑀚𑁂𑀬𑁆𑀬, 𑀦 𑀆𑀧𑀚𑁆𑀚𑁂𑀬𑁆𑀬. 𑀢𑁂𑀦 𑀯𑀼𑀢𑁆𑀢𑀁 ‘‘𑀦 𑀪𑀽𑀫𑀺𑀢𑁄’’𑀢𑀺.

𑁪𑁪𑁯. 𑀧𑀯𑀺𑀲𑀦𑁆𑀢𑁄𑀢𑀺 𑀆𑀭𑀸𑀫𑀁 𑀧𑀯𑀺𑀲𑀦𑁆𑀢𑁄. 𑀦𑀺𑀓𑁆𑀔𑀫𑀦𑁆𑀢𑀺 𑀢𑀢𑁄 𑀏𑀯 𑀦𑀺𑀓𑁆𑀔𑀫𑀦𑁆𑀢𑁄. 𑀢𑀦𑁆𑀢𑀺 𑀆𑀭𑀸𑀫𑀁.

𑁪𑁫𑁦. 𑀯𑀢𑁆𑀢𑀫𑀧𑀽𑀭𑁂𑀢𑁆𑀯𑀸𑀦𑀸𑀢𑀺 𑀲𑀻𑀲𑀢𑁄 𑀙𑀢𑁆𑀢𑀸𑀧𑀦𑀬𑀦𑀁, 𑀧𑀸𑀤𑀢𑁄 𑀉𑀧𑀸𑀳𑀦𑀸𑀫𑀼𑀜𑁆𑀘𑀦𑀯𑀢𑁆𑀢𑀁 𑀅𑀓𑀢𑁆𑀯𑀸. 𑀦𑀺𑀓𑁆𑀔𑀫𑀦𑁆𑀢𑀺 𑀩𑀳𑀺 𑀦𑀺𑀓𑁆𑀔𑀫𑀦𑁆𑀢𑁄 𑀙𑀢𑁆𑀢𑀼𑀧𑀸𑀳𑀦𑀁 𑀥𑀸𑀭𑁂𑀦𑁆𑀢𑁄𑀧𑀺 𑀦 𑀆𑀧𑀚𑁆𑀚𑀢𑀺.

𑁪𑁫𑁧. ‘‘𑀦𑀺𑀓𑁆𑀔𑀫𑀦𑁆𑀢𑁄’’𑀢𑀺 𑀇𑀤𑀁 ‘‘𑀦𑀺𑀓𑁆𑀔𑀫’’𑀦𑁆𑀢𑀺 𑀏𑀢𑀲𑁆𑀲 𑀅𑀢𑁆𑀣𑀧𑀤𑀁. 𑀧𑀯𑀺𑀲𑀁 𑀦 𑀘𑀸𑀢𑀺 𑀬𑀁 𑀆𑀭𑀸𑀫𑀁 𑀲𑀦𑁆𑀥𑀸𑀬 𑀕𑀢𑁄, 𑀢𑀁 𑀧𑀯𑀺𑀲𑀦𑁆𑀢𑁄 𑀦 𑀆𑀧𑀚𑁆𑀚𑁂𑀬𑁆𑀬.

𑁪𑁫𑁩. 𑀬𑀸 𑀓𑀸𑀘𑀺 𑀪𑀺𑀓𑁆𑀔𑀼𑀦𑀻 𑀅𑀢𑀺𑀕𑀫𑁆𑀪𑀻𑀭𑀁 𑀉𑀤𑀓𑀲𑀼𑀤𑁆𑀥𑀺𑀓𑀁 𑀆𑀤𑀺𑀬𑀦𑁆𑀢𑀻 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀻𑀢𑀺 𑀬𑁄𑀚𑀦𑀸.

𑁪𑁫𑁭. 𑀯𑀢𑁆𑀢𑀁 𑀧𑀦𑀢𑁆𑀢𑀦𑁄𑀢𑀺 𑀬𑀁 𑀅𑀢𑁆𑀢𑀦𑁄 𑀦𑁂𑀢𑁆𑀣𑀸𑀭𑀯𑀢𑁆𑀢𑀁 𑀯𑀼𑀢𑁆𑀢𑀁, 𑀲𑁄 𑀢𑀁 𑀅𑀲𑀫𑀸𑀤𑀺𑀬𑀦𑁆𑀢𑁄𑀯 𑀆𑀧𑀚𑁆𑀚𑀢𑀺 𑀦𑀸𑀫𑀸𑀢𑀺 𑀬𑁄𑀚𑀦𑀸.

𑁪𑁬𑁦. 𑀇𑀢𑀭𑀲𑁆𑀲 𑀆𑀘𑀭𑀺𑀬𑀲𑁆𑀲, 𑀢𑀣𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀘.

𑁪𑁬𑁨. 𑀤𑀤𑀫𑀸𑀦𑁄𑀢𑀺 𑀧𑀸𑀭𑀺𑀯𑀢𑁆𑀢𑀓𑀁 𑀯𑀺𑀦𑀸 𑀤𑀤𑀫𑀸𑀦𑁄.

𑁪𑁬𑁩. 𑀫𑀼𑀤𑀽𑀢𑀺 𑀫𑀼𑀤𑀼𑀧𑀺𑀝𑁆𑀞𑀺𑀓𑁄. ‘‘𑀮𑀫𑁆𑀩𑀻𑀆𑀤𑀺𑀦𑁄’’𑀢𑀺 𑀧𑀤𑀘𑁆𑀙𑁂𑀤𑁄. 𑀆𑀤𑀺-𑀲𑀤𑁆𑀤𑁂𑀦 ‘‘𑀳𑀢𑁆𑀣𑁂𑀦 𑀉𑀧𑀓𑁆𑀓𑀫𑀺𑀢𑁆𑀯𑀸 𑀅𑀲𑀼𑀘𑀺𑀁 𑀫𑁄𑀘𑁂𑀦𑁆𑀢𑀲𑁆𑀲, 𑀊𑀭𑀼𑀦𑀸 𑀅𑀗𑁆𑀕𑀚𑀸𑀢𑀁 𑀧𑁂𑀮𑁆𑀮𑀦𑁆𑀢𑀲𑁆𑀲, 𑀅𑀢𑁆𑀢𑀸𑀦𑀁 𑀯𑀥𑀺𑀢𑁆𑀯𑀸 𑀯𑀥𑀺𑀢𑁆𑀯𑀸 𑀭𑁄𑀤𑀦𑁆𑀢𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑀸 𑀆𑀧𑀢𑁆𑀢𑀻’’𑀢𑀺 𑀏𑀯𑀫𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀅𑀢𑁆𑀢𑀸𑀢𑀺 𑀏𑀢𑁆𑀣 𑀦𑀺𑀲𑁆𑀲𑀺𑀢𑀸𑀢𑀺 𑀉𑀢𑁆𑀢𑀭𑀧𑀤𑀮𑁄𑀧𑁄, 𑀯𑀺𑀪𑀢𑁆𑀢𑀺𑀮𑁄𑀧𑁄 𑀘 𑀦𑀺𑀭𑀼𑀢𑁆𑀢𑀺𑀮𑀓𑁆𑀔𑀡𑁂𑀦 𑀤𑀝𑁆𑀞𑀩𑁆𑀩𑁄. 𑀲𑁂𑀲𑀸𑀢𑀺 𑀫𑁂𑀣𑀼𑀦𑀥𑀫𑁆𑀫𑀓𑀸𑀬𑀲𑀁𑀲𑀕𑁆𑀕𑀧𑀳𑀸𑀭𑀤𑀸𑀦𑀸𑀤𑀻𑀲𑀼 𑀯𑀼𑀢𑁆𑀢𑀸𑀧𑀢𑁆𑀢𑀺. 𑀧𑀭𑀦𑀺𑀲𑁆𑀲𑀺𑀢𑀸𑀢𑀺 𑀧𑀭𑀁 𑀦𑀺𑀲𑁆𑀲𑀸𑀬 𑀆𑀧𑀚𑁆𑀚𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄.

𑁪𑁬𑁫. ‘‘𑀦, 𑀪𑀺𑀓𑁆𑀔𑀯𑁂, 𑀑𑀯𑀸𑀤𑁄 𑀦 𑀕𑀳𑁂𑀢𑀩𑁆𑀩𑁄’’𑀢𑀺 𑀯𑀘𑀦𑀢𑁄 𑀑𑀯𑀸𑀤𑀁 𑀦 𑀕𑀡𑁆𑀳𑀦𑁆𑀢𑁄 𑀦 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑁄 𑀯𑀚𑁆𑀚𑀢𑀁 𑀆𑀧𑀚𑁆𑀚𑀢𑀺 𑀦𑀸𑀫.

𑁪𑁭𑁦. 𑀅𑀭𑀼𑀡𑀼𑀕𑁆𑀕𑁂𑀢𑀺 𑀅𑀭𑀼𑀡𑀼𑀕𑁆𑀕𑀫𑀦𑁂. 𑀦𑀅𑀭𑀼𑀡𑀼𑀕𑁆𑀕𑀫𑁂𑀢𑀺 𑀅𑀭𑀼𑀡𑀼𑀕𑁆𑀕𑀫𑀦𑀢𑁄 𑀅𑀜𑁆𑀜𑀲𑁆𑀫𑀺𑀁 𑀓𑀸𑀮𑁂.

𑁪𑁭𑁧. 𑀏𑀓𑀭𑀢𑁆𑀢𑀸𑀢𑀺𑀓𑁆𑀓𑀫𑁂 𑀙𑀸𑀭𑀢𑁆𑀢𑀸𑀢𑀺𑀓𑁆𑀓𑀫𑁂 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀤𑀲𑀸𑀳𑀸𑀢𑀺𑀓𑁆𑀓𑀫𑁂𑀢𑀺 𑀬𑁄𑀚𑀦𑀸. 𑀆𑀤𑀺-𑀲𑀤𑁆𑀤𑁂𑀦 𑀫𑀸𑀲𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀯𑀼𑀢𑁆𑀢𑀫𑀸𑀧𑀢𑁆𑀢𑀺𑀦𑁆𑀢𑀺 𑀲𑀩𑁆𑀩𑀢𑁆𑀣 𑀦𑀺𑀲𑁆𑀲𑀕𑁆𑀕𑀺𑀬𑁂 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀁. ‘‘𑀆𑀧𑀚𑁆𑀚𑀢𑀺 𑀅𑀭𑀼𑀡𑀼𑀕𑁆𑀕𑀫𑁂’’𑀢𑀺 𑀧𑀤𑀘𑁆𑀙𑁂𑀤𑁄.

𑁪𑁭𑁩. 𑀧𑀭𑀲𑀦𑁆𑀢𑀓𑀁 𑀭𑀼𑀓𑁆𑀔𑀮𑀢𑀸𑀤𑀺𑀁 𑀣𑁂𑀬𑁆𑀬𑀸𑀬 𑀙𑀺𑀦𑁆𑀤𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀁, 𑀙𑀺𑀦𑁆𑀤𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀫𑀢𑁆𑀢𑀁 𑀳𑁄𑀢𑀻𑀢𑀺 𑀆𑀳 ‘‘𑀪𑀽𑀢𑀕𑀸𑀫𑀁 𑀙𑀺𑀦𑁆𑀤𑀦𑁆𑀢𑁄 𑀧𑀸𑀭𑀸𑀚𑀺𑀓𑀜𑁆𑀘 𑀧𑀸𑀘𑀺𑀢𑁆𑀢𑀺𑀜𑁆𑀘 𑀨𑀼𑀲𑁂’’𑀢𑀺.

𑁪𑁭𑁫. 𑀙𑀸𑀤𑁂𑀦𑁆𑀢𑁄 𑀧𑀦𑀸𑀢𑀺 𑀏𑀢𑁆𑀣 ‘‘𑀓𑀸 𑀆𑀧𑀢𑁆𑀢𑀻’’𑀢𑀺 𑀲𑁂𑀲𑁄. 𑀢𑀢𑁆𑀭 𑀆𑀳 ‘‘𑀆𑀧𑀢𑁆𑀢𑀺𑀁 𑀙𑀸𑀤𑁂𑀦𑁆𑀢𑁄 𑀦𑀭𑁄 𑀆𑀧𑀚𑁆𑀚𑀢𑀻’’𑀢𑀺.

𑀅𑀘𑁆𑀙𑀺𑀦𑁆𑀦𑁄𑀢𑀺 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑁄. 𑀦𑀘𑁆𑀙𑀸𑀤𑁂𑀦𑁆𑀢𑁄𑀢𑀺 𑀢𑀺𑀡𑁂𑀦 𑀯𑀸 𑀧𑀡𑁆𑀡𑁂𑀦 𑀯𑀸 𑀲𑀸𑀔𑀸𑀪𑀗𑁆𑀕𑀸𑀤𑀺𑀦𑀸 𑀬𑁂𑀦 𑀓𑁂𑀦𑀘𑀺 𑀅𑀢𑁆𑀢𑀦𑁄 𑀳𑀺𑀭𑀺𑀓𑁄𑀧𑀺𑀦𑀁 𑀅𑀧𑁆𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑁄. 𑀬𑀣𑀸𑀳 𑁋 ‘‘𑀢𑀺𑀡𑁂𑀦 𑀯𑀸 𑀧𑀡𑁆𑀡𑁂𑀦 𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀆𑀕𑀦𑁆𑀢𑀩𑁆𑀩𑀁, 𑀦 𑀢𑁆𑀯𑁂𑀯 𑀦𑀕𑁆𑀕𑁂𑀦 𑀆𑀕𑀦𑁆𑀢𑀩𑁆𑀩𑀁. 𑀬𑁄 𑀆𑀕𑀘𑁆𑀙𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀭𑀸. 𑁫𑁧𑁭).

𑁪𑁭𑁬. 𑀓𑀼𑀲𑀘𑀻𑀭𑀸𑀤𑀺𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀯𑀸𑀓𑀘𑀻𑀭𑀨𑀮𑀓𑀘𑀻𑀭𑀸𑀤𑀻𑀦𑀁 𑀢𑀺𑀢𑁆𑀣𑀺𑀬𑀥𑀚𑀸𑀦𑀁 𑀕𑀳𑀡𑀁. 𑀥𑀸𑀭𑁂𑀦𑁆𑀢𑁄 𑀓𑁄𑀘𑀺 𑀆𑀧𑀚𑁆𑀚𑀢𑀻𑀢𑀺 𑀲𑁂𑀲𑁄. 𑀢𑀢𑁆𑀭𑀸𑀳 𑁋 ‘‘𑀓𑀼𑀲𑀘𑀻𑀭𑀸𑀤𑀻𑀦𑀺 𑀥𑀸𑀭𑁂𑀦𑁆𑀢𑁄 𑀥𑀸𑀭𑁂𑀦𑁆𑀢𑁄 𑀆𑀧𑀚𑁆𑀚𑀢𑀻’’𑀢𑀺 (𑀧𑀭𑀺. 𑀅𑀝𑁆𑀞. 𑁩𑁨𑁨).

𑁪𑁭𑁭. 𑀬𑀁 𑀦𑀺𑀲𑁆𑀲𑀝𑁆𑀞𑀧𑀢𑁆𑀢𑀁 ‘‘𑀅𑀬𑀁 𑀢𑁂 𑀪𑀺𑀓𑁆𑀔𑀼 𑀧𑀢𑁆𑀢𑁄 𑀬𑀸𑀯𑀪𑁂𑀤𑀦𑀸𑀬 𑀥𑀸𑀭𑁂𑀢𑀩𑁆𑀩𑁄’’𑀢𑀺 𑀤𑀺𑀦𑁆𑀦𑀁, 𑀢𑀁 𑀲𑀓𑁆𑀓𑀘𑁆𑀘𑀁 𑀅𑀥𑀸𑀭𑁂𑀦𑁆𑀢𑁄 𑀘 𑀤𑁄𑀲𑀯𑀸 𑀳𑁄𑀢𑀺 𑀆𑀧𑀚𑁆𑀚𑀢𑀺 𑀆𑀧𑀢𑁆𑀢𑀺𑀁. 𑀲𑀘𑀺𑀢𑁆𑀢𑀓𑀸𑀘𑀺𑀢𑁆𑀢𑀓𑀤𑀼𑀓𑀲𑁆𑀲 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀤𑀼𑀓𑀁 𑀬𑀣𑀸𑀓𑁆𑀓𑀫𑀁 𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀲𑀘𑀺𑀢𑁆𑀢𑀓𑀤𑀼𑀓’’𑀦𑁆𑀢𑀺𑀆𑀤𑀺.

𑀤𑀼𑀓𑀓𑀣𑀸𑀯𑀡𑁆𑀡𑀦𑀸.

𑁪𑁭𑁮. 𑀬𑀸 𑀆𑀧𑀢𑁆𑀢𑀺 𑀦𑀸𑀣𑁂 𑀢𑀺𑀝𑁆𑀞𑀦𑁆𑀢𑁂 𑀳𑁄𑀢𑀺, 𑀦𑁄 𑀧𑀭𑀺𑀦𑀺𑀩𑁆𑀩𑀼𑀢𑁂, 𑀲𑀸 𑀆𑀧𑀢𑁆𑀢𑀺 𑀅𑀢𑁆𑀣𑀺. 𑀬𑀸 𑀆𑀧𑀢𑁆𑀢𑀺 𑀦𑀸𑀣𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀳𑁄𑀢𑀺, 𑀦 𑀢𑀼 𑀢𑀺𑀝𑁆𑀞𑀦𑁆𑀢𑁂, 𑀲𑀸𑀧𑀺 𑀅𑀢𑁆𑀣𑀺. 𑀬𑀸 𑀆𑀧𑀢𑁆𑀢𑀺 𑀦𑀸𑀣𑁂 𑀢𑀺𑀝𑁆𑀞𑀦𑁆𑀢𑁂𑀧𑀺 𑀳𑁄𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁂𑀧𑀺, 𑀲𑀸 𑀆𑀧𑀢𑁆𑀢𑀺 𑀅𑀢𑁆𑀣𑀻𑀢𑀺 𑀬𑁄𑀚𑀦𑀸.

𑁪𑁭𑁯. 𑀲𑀸 𑀓𑀢𑀫𑀸𑀢𑀺 𑀆𑀳 ‘‘𑀭𑀼𑀳𑀺𑀭𑀼𑀧𑁆𑀧𑀸𑀤𑀦𑀸𑀧𑀢𑁆𑀢𑀻’’𑀢𑀺𑀆𑀤𑀺. 𑀢𑀢𑁆𑀣 𑀣𑁂𑀭𑀫𑀸𑀯𑀼𑀲𑀯𑀸𑀤𑁂𑀦, 𑀯𑀤𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑁂𑀢𑀺 ‘‘𑀬𑀣𑀸 𑀔𑁄 𑀧𑀦𑀸𑀦𑀦𑁆𑀤, 𑀏𑀢𑀭𑀳𑀺 𑀪𑀺𑀓𑁆𑀔𑀽 𑀅𑀜𑁆𑀜𑀫𑀜𑁆𑀜𑀁 𑀆𑀯𑀼𑀲𑁄𑀯𑀸𑀤𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀦 𑀔𑁄 𑀫𑀫𑀘𑁆𑀘𑀬𑁂𑀦 𑀏𑀯𑀁 𑀲𑀫𑀼𑀤𑀸𑀘𑀭𑀺𑀢𑀩𑁆𑀩𑀁…𑀧𑁂… 𑀦𑀯𑀓𑀢𑀭𑁂𑀦 𑀪𑀺𑀓𑁆𑀔𑀼𑀦𑀸 𑀣𑁂𑀭𑀢𑀭𑁄 𑀪𑀺𑀓𑁆𑀔𑀼 ‘𑀪𑀦𑁆𑀢𑁂’𑀢𑀺 𑀯𑀸 ‘𑀆𑀬𑀲𑁆𑀫𑀸’𑀢𑀺 𑀯𑀸 𑀲𑀫𑀼𑀤𑀸𑀘𑀭𑀺𑀢𑀩𑁆𑀩𑁄’’𑀢𑀺 (𑀤𑀻. 𑀦𑀺. 𑁨.𑁨𑁧𑁬) 𑀯𑀘𑀦𑀢𑁄 𑀣𑁂𑀭𑀁 𑀆𑀯𑀼𑀲𑁄𑀯𑀸𑀤𑁂𑀦 𑀲𑀫𑀼𑀤𑀸𑀘𑀭𑀡𑀧𑀘𑁆𑀘𑀬𑀸 𑀆𑀧𑀢𑁆𑀢𑀺𑀁 𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀆𑀧𑀚𑁆𑀚𑀢𑀺, 𑀦𑁄 𑀢𑀺𑀝𑁆𑀞𑀦𑁆𑀢𑁂𑀢𑀺 𑀅𑀢𑁆𑀣𑁄.

𑁪𑁮𑁧. 𑀓𑀣𑀁 𑀓𑀸𑀮𑁂𑀬𑁂𑀯 𑀆𑀧𑀢𑁆𑀢𑀺 𑀲𑀺𑀬𑀸, 𑀦 𑀯𑀺𑀓𑀸𑀮𑁂. 𑀓𑀣𑀁 𑀯𑀺𑀓𑀸𑀮𑁂𑀬𑁂𑀯 𑀆𑀧𑀢𑁆𑀢𑀺 𑀲𑀺𑀬𑀸, 𑀓𑀸𑀮𑁂 𑀦 𑀲𑀺𑀬𑀸. 𑀓𑀣𑀁 𑀓𑀸𑀮𑁂 𑀘𑁂𑀯 𑀯𑀺𑀓𑀸𑀮𑁂 𑀘𑀸𑀢𑀺 𑀉𑀪𑀬𑀢𑁆𑀣 𑀲𑀺𑀬𑀸𑀢𑀺 𑀧𑀜𑁆𑀳𑁂.

𑁪𑁮𑁨. 𑀬𑀣𑀸𑀓𑁆𑀓𑀫𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀆𑀳 ‘‘𑀪𑀼𑀜𑁆𑀚𑀢𑁄’’𑀢𑀺𑀆𑀤𑀺.

𑁪𑁮𑁩. 𑀅𑀯𑀲𑁂𑀲𑀁 𑀧𑀦 𑀲𑀩𑁆𑀩𑀁 𑀆𑀧𑀢𑁆𑀢𑀺𑀁 𑀓𑀸𑀮𑀯𑀺𑀓𑀸𑀮𑁂𑀲𑀼 𑀲𑀩𑁆𑀩𑀤𑀸 𑀆𑀧𑀚𑁆𑀚𑀢𑀺, 𑀢𑀢𑁆𑀣 𑀘 𑀲𑀁𑀲𑀬𑁄 𑀦𑀢𑁆𑀣𑀻𑀢𑀺 𑀬𑁄𑀚𑀦𑀸.

𑁪𑁮𑁪. ‘‘𑀅𑀢𑁆𑀣𑀸𑀧𑀢𑁆𑀢𑀺 𑀭𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀦𑁄 𑀤𑀺𑀯𑀸, 𑀅𑀢𑁆𑀣𑀸𑀧𑀢𑁆𑀢𑀺 𑀤𑀺𑀯𑀸 𑀆𑀧𑀚𑁆𑀚𑀢𑀺, 𑀦𑁄 𑀭𑀢𑁆𑀢𑀺𑀁, 𑀅𑀢𑁆𑀣𑀸𑀧𑀢𑁆𑀢𑀺 𑀭𑀢𑁆𑀢𑀺𑀜𑁆𑀘𑁂𑀯 𑀆𑀧𑀚𑁆𑀚𑀢𑀺 𑀤𑀺𑀯𑀸 𑀘𑀸’’𑀢𑀺 (𑀧𑀭𑀺. 𑁩𑁨𑁩) 𑀯𑀼𑀢𑁆𑀢𑀁 𑀢𑀺𑀓𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀭𑀢𑁆𑀢𑀺𑀫𑁂𑀯𑀸’’𑀢𑀺𑀆𑀤𑀺.

𑁪𑁮𑁬. 𑀅𑀢𑁆𑀣𑀸𑀧𑀢𑁆𑀢𑀺 𑀤𑀲𑀯𑀲𑁆𑀲𑁄 𑀆𑀧𑀚𑁆𑀚𑀢𑀺, 𑀦𑁄 𑀊𑀦𑀤𑀲𑀯𑀲𑁆𑀲𑁄, 𑀲𑀸 𑀓𑀣𑀁 𑀲𑀺𑀬𑀸. 𑀅𑀢𑁆𑀣𑀸𑀧𑀢𑁆𑀢𑀺 𑀊𑀦𑀤𑀲𑀯𑀲𑁆𑀲𑁄 𑀆𑀧𑀚𑁆𑀚𑀢𑀺, 𑀦𑁄 𑀤𑀲𑀯𑀲𑁆𑀲𑁄, 𑀲𑀸 𑀓𑀣𑀁 𑀳𑁄𑀢𑀺. 𑀅𑀢𑁆𑀣𑀸𑀧𑀢𑁆𑀢𑀺 𑀤𑀲𑀯𑀲𑁆𑀲𑁄𑀧𑀺 𑀆𑀧𑀚𑁆𑀚𑀢𑀺 𑀊𑀦𑀤𑀲𑀯𑀲𑁆𑀲𑁄𑀧𑀻𑀢𑀺 𑀉𑀪𑀬𑀢𑁆𑀣𑀧𑀺 𑀆𑀧𑀢𑁆𑀢𑀺 𑀓𑀣𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑁪𑁮𑁭. 𑀢𑀢𑁆𑀣 𑀯𑀺𑀲𑁆𑀲𑀚𑁆𑀚𑀦𑀫𑀸𑀳 ‘‘𑀉𑀧𑀝𑁆𑀞𑀸𑀧𑁂𑀢𑀻’’𑀢𑀺𑀆𑀤𑀺. ‘‘𑀩𑀸𑀮𑁄’’𑀢𑀺 𑀏𑀢𑀲𑁆𑀲 𑀳𑀺 𑀅𑀢𑁆𑀣𑀧𑀤𑀁 ‘‘𑀅𑀩𑁆𑀬𑀢𑁆𑀢𑁄’’𑀢𑀺.

𑁪𑁮𑁮. 𑀊𑀦𑀤𑀲𑀯𑀲𑁆𑀲𑁄 𑀏𑀯𑀁 ‘‘𑀅𑀳𑀁 𑀧𑀡𑁆𑀟𑀺𑀢𑁄’’𑀢𑀺 𑀧𑀭𑀺𑀲𑀁 𑀕𑀡𑁆𑀳𑀢𑀺, 𑀢𑀣𑀸 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀻𑀢𑀺 𑀬𑁄𑀚𑀦𑀸. ‘‘𑀤𑀲𑀯𑀲𑁆𑀲𑁄 𑀊𑀦𑁄’’𑀢𑀺 𑀧𑀤𑀘𑁆𑀙𑁂𑀤𑁄. 𑀤𑀲𑀯𑀲𑁆𑀲𑁄, 𑀊𑀦𑀤𑀲𑀯𑀲𑁆𑀲𑁄 𑀘𑀸𑀢𑀺 𑀉𑀪𑁄𑀧𑁂𑀢𑁂 𑀧𑀭𑀺𑀲𑀼𑀧𑀝𑁆𑀞𑀸𑀧𑀦𑀸𑀧𑀢𑁆𑀢𑀺𑀢𑁄 𑀅𑀜𑁆𑀜𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀻𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀘 ‘‘𑀆𑀧𑀚𑁆𑀚𑀦𑁆𑀢𑁂’’𑀢𑀺 𑀯𑀢𑁆𑀢𑀩𑁆𑀩𑁂 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀦-𑀓𑀸𑀭𑀮𑁄𑀧𑁄.

𑁪𑁮𑁯. 𑀓𑀣𑀁 𑀓𑀸𑀴𑁂 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀦 𑀚𑀼𑀡𑁆𑀳𑁂, 𑀓𑀣𑀁 𑀚𑀼𑀡𑁆𑀳𑁂 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀦 𑀓𑀸𑀴𑀲𑁆𑀫𑀺𑀁, 𑀓𑀣𑀁 𑀓𑀸𑀴𑁂 𑀘 𑀚𑀼𑀡𑁆𑀳𑁂 𑀘𑀸𑀢𑀺 𑀉𑀪𑀬𑀢𑁆𑀣𑀧𑀺 𑀆𑀧𑀚𑁆𑀚𑀢𑀻𑀢𑀺 𑀬𑁄𑀚𑀦𑀸.

𑁪𑁯𑁦. 𑀯𑀺𑀲𑁆𑀲𑀚𑁆𑀚𑀦𑀫𑀸𑀳 ‘‘𑀯𑀲𑁆𑀲’’𑀦𑁆𑀢𑀺𑀆𑀤𑀺. ‘‘𑀆𑀧𑀚𑁆𑀚𑀢𑁂 𑀅𑀧𑁆𑀧𑀯𑀸𑀭𑁂𑀦𑁆𑀢𑁄’’𑀢𑀺 𑀧𑀤𑀘𑁆𑀙𑁂𑀤𑁄. 𑀚𑀼𑀡𑁆𑀳𑁂𑀢𑀺 𑀧𑀼𑀭𑀺𑀫𑀧𑀓𑁆𑀔𑁂. 𑀓𑀸𑀴𑀓𑁂𑀢𑀺 𑀅𑀧𑀭𑀧𑀓𑁆𑀔𑁂.

𑁪𑁯𑁧. 𑀅𑀯𑀺𑀧𑀢𑁆𑀢𑀺𑀦𑀸𑀢𑀺 𑀘𑀢𑀼𑀩𑁆𑀩𑀺𑀥𑀯𑀺𑀧𑀢𑁆𑀢𑀺𑀭𑀳𑀺𑀢𑀢𑁆𑀢𑀸 𑀅𑀯𑀺𑀧𑀢𑁆𑀢𑀺𑀦𑀸 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀁. 𑀅𑀯𑀲𑁂𑀲𑀦𑁆𑀢𑀺 𑀯𑀲𑁆𑀲𑀁 𑀅𑀦𑀼𑀧𑀕𑀫𑀦𑀸𑀧𑀢𑁆𑀢𑀺𑀬𑀸 𑀘 𑀧𑀯𑀸𑀭𑀡𑀸𑀧𑀢𑁆𑀢𑀺𑀬𑀸 𑀘 𑀅𑀯𑀲𑁂𑀲𑀁 𑀲𑀩𑁆𑀩𑀁 𑀆𑀧𑀢𑁆𑀢𑀺𑀁.

𑁪𑁯𑁨. 𑀯𑀲𑁆𑀲𑀽𑀧𑀕𑀫𑀦𑀁 𑀓𑀸𑀴𑁂 𑀓𑀧𑁆𑀧𑀢𑀺, 𑀚𑀼𑀡𑁆𑀳𑁂 𑀦𑁄 𑀓𑀧𑁆𑀧𑀢𑀺, 𑀧𑀯𑀸𑀭𑀡𑀸 𑀚𑀼𑀡𑁆𑀳𑁂 𑀓𑀧𑁆𑀧𑀢𑀺, 𑀓𑀸𑀴𑁂 𑀦𑁄 𑀓𑀧𑁆𑀧𑀢𑀺, 𑀲𑁂𑀲𑀁 𑀅𑀦𑀼𑀜𑁆𑀜𑀸𑀢𑀁 𑀲𑀩𑁆𑀩𑀁 𑀲𑀗𑁆𑀖𑀓𑀺𑀘𑁆𑀘𑀁 𑀓𑀸𑀴𑁂 𑀘 𑀚𑀼𑀡𑁆𑀳𑁂 𑀘𑀸𑀢𑀺 𑀉𑀪𑀬𑀢𑁆𑀣𑀧𑀺 𑀓𑀧𑁆𑀧𑀢𑀻𑀢𑀺 𑀬𑁄𑀚𑀦𑀸.

𑁪𑁯𑁩. 𑀅𑀢𑁆𑀣𑀸𑀧𑀢𑁆𑀢𑀺 𑀳𑁂𑀫𑀦𑁆𑀢𑁂 𑀳𑁄𑀢𑀺, 𑀇𑀢𑀭𑀉𑀢𑀼𑀤𑁆𑀯𑀬𑁂 𑀕𑀺𑀫𑁆𑀳𑀸𑀦𑀯𑀲𑁆𑀲𑀸𑀦𑀲𑀗𑁆𑀔𑀸𑀢𑁂 𑀦 𑀳𑁄𑀢𑀺, 𑀅𑀢𑁆𑀣𑀸𑀧𑀢𑁆𑀢𑀺 𑀕𑀺𑀫𑁆𑀳𑁂𑀬𑁂𑀯 𑀳𑁄𑀢𑀺, 𑀦 𑀲𑁂𑀲𑁂𑀲𑀼 𑀯𑀲𑁆𑀲𑀸𑀦𑀳𑁂𑀫𑀦𑁆𑀢𑀲𑀗𑁆𑀔𑀸𑀢𑁂𑀲𑀼, 𑀅𑀢𑁆𑀣𑀸𑀧𑀢𑁆𑀢𑀺 𑀯𑀲𑁆𑀲𑁂 𑀳𑁄𑀢𑀺, 𑀦𑁄 𑀇𑀢𑀭𑀤𑁆𑀯𑀬𑁂 𑀳𑁂𑀫𑀦𑁆𑀢𑀕𑀺𑀫𑁆𑀳𑀲𑀗𑁆𑀔𑀸𑀢𑁂𑀢𑀺 𑀬𑁄𑀚𑀦𑀸.

𑁪𑁯𑁪-𑁬. 𑀲𑀸 𑀢𑀺𑀯𑀺𑀥𑀸𑀧𑀺 𑀆𑀧𑀢𑁆𑀢𑀺 𑀓𑀢𑀫𑀸𑀢𑀺 𑀆𑀳 ‘‘𑀤𑀺𑀦𑁂 𑀧𑀸𑀝𑀺𑀧𑀤𑀓𑁆𑀔𑀸𑀢𑁂’’𑀢𑀺𑀆𑀤𑀺. 𑀢𑀢𑁆𑀣 𑀤𑀺𑀦𑁂…𑀧𑁂… 𑀧𑀼𑀡𑁆𑀡𑀫𑀸𑀲𑀺𑀬𑀸𑀢𑀺 𑀅𑀧𑀭𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸𑀲𑀺𑀬𑀸 𑀓𑀸𑀴𑀧𑀓𑁆𑀔𑀧𑀸𑀝𑀺𑀧𑀤𑀤𑀺𑀯𑀲𑁂 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀯𑀺𑀓𑀧𑁆𑀧𑁂𑀢𑁆𑀯𑀸 𑀞𑀧𑀺𑀢𑀁 𑀧𑀦 𑀢𑀁 𑀯𑀲𑁆𑀲𑀲𑀸𑀝𑀺𑀓𑀘𑀻𑀯𑀭𑀁 𑀲𑀘𑁂 𑀳𑁂𑀫𑀦𑁆𑀢𑁂 𑀦𑀺𑀯𑀸𑀲𑁂𑀢𑀺, 𑀳𑁂𑀫𑀦𑁆𑀢𑁂 𑀆𑀧𑀚𑁆𑀚𑀢𑀻𑀢𑀺 𑀬𑁄𑀚𑀦𑀸.

𑀧𑀘𑁆𑀙𑀺𑀫𑁂𑀢𑀺 𑀏𑀢𑁆𑀣 𑀲𑀸𑀫𑀺𑀯𑀘𑀦𑀧𑁆𑀧𑀲𑀗𑁆𑀕𑁂 𑀪𑀼𑀫𑁆𑀫𑀁. 𑀧𑀘𑁆𑀙𑀺𑀫𑀲𑁆𑀲 𑀓𑀢𑁆𑀢𑀺𑀓𑀲𑁆𑀲 𑀬𑀲𑁆𑀫𑀺𑀁 𑀧𑀼𑀡𑁆𑀡𑀫𑁂 𑀤𑀺𑀯𑀲𑁂 𑀯𑀲𑁆𑀲𑀺𑀓𑀲𑀸𑀝𑀺𑀓𑀘𑀻𑀯𑀭𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑀩𑁆𑀩𑀁, 𑀢𑀲𑁆𑀫𑀺𑀁 𑀤𑀺𑀯𑀲𑁂 𑀢𑀁 𑀅𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸𑀯 𑀧𑀸𑀝𑀺𑀧𑀤𑁂 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀦𑁆𑀢𑁄 𑀅𑀧𑀘𑁆𑀘𑀼𑀤𑁆𑀥𑀭𑀡𑀧𑀘𑁆𑀘𑀬𑀸 𑀆𑀧𑀢𑁆𑀢𑀺 𑀳𑁂𑀫𑀦𑁆𑀢𑁂𑀬𑁂𑀯 𑀆𑀧𑀚𑁆𑀚𑀢𑀺, 𑀇𑀢𑀭𑁂 𑀕𑀺𑀫𑁆𑀳𑀸𑀦𑀯𑀲𑁆𑀲𑀸𑀦𑀉𑀢𑀼𑀤𑁆𑀯𑀬𑁂 𑀦 𑀆𑀧𑀚𑁆𑀚𑀢𑀻𑀢𑀺 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀬𑀁 (𑀧𑀭𑀺. 𑀅𑀝𑁆𑀞. 𑁩𑁨𑁩) 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺 𑀬𑁄𑀚𑀦𑀸. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀯𑀲𑁆𑀲𑀸𑀦𑀁 𑀘𑀢𑀼𑀫𑀸𑀲𑀁 𑀅𑀥𑀺𑀝𑁆𑀞𑀸𑀢𑀼𑀁, 𑀢𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑀼’’𑀦𑁆𑀢𑀺 (𑀫𑀳𑀸𑀯. 𑁩𑁫𑁮) 𑀯𑀼𑀢𑁆𑀢𑀧𑀸𑀴𑀺𑀬𑀸 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀯𑀘𑀦𑀲𑁆𑀲 𑀅𑀯𑀺𑀭𑀼𑀚𑁆𑀛𑀦𑀢𑁄 ‘‘𑀢𑀫𑁆𑀧𑀺 𑀲𑀼𑀯𑀼𑀢𑁆𑀢’’𑀦𑁆𑀢𑀺 (𑀧𑀭𑀺. 𑀅𑀝𑁆𑀞. 𑁩𑁨𑁩) 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀼𑀢𑁆𑀢𑀢𑁆𑀢𑀸 ‘‘𑀳𑁂𑀫𑀦𑁆𑀢𑁂 𑀆𑀧𑀚𑁆𑀚𑀢𑀻’’𑀢𑀺 𑀯𑀘𑀦𑀲𑁆𑀲 𑀉𑀪𑀬𑀫𑁆𑀧𑀺 𑀅𑀢𑁆𑀣𑁄 𑀳𑁄𑀢𑀻𑀢𑀺 𑀕𑀳𑁂𑀢𑀩𑁆𑀩𑀁.

𑁪𑁯𑁭. 𑀕𑀺𑀫𑁆𑀳𑀸𑀦𑀫𑀸𑀲𑀸𑀦𑀁 𑀲𑀫𑁆𑀩𑀦𑁆𑀥𑀺𑀦𑀺 𑀕𑀺𑀫𑁆𑀳𑀺𑀓𑁂 𑀉𑀢𑀼𑀫𑁆𑀳𑀺. 𑀫𑀸𑀲𑀢𑁄 𑀅𑀢𑀺𑀭𑁂𑀓𑁄 𑀅𑀢𑀺𑀭𑁂𑀓𑀫𑀸𑀲𑁄𑀢𑀺 𑀓𑀢𑁆𑀯𑀸 𑀅𑀢𑀺𑀭𑁂𑀓𑀫𑀸𑀲𑁄 𑀓𑀸𑀮𑁄 𑀲𑁂𑀲𑁄𑀢𑀺 𑀯𑀢𑁆𑀢𑀩𑁆𑀩𑁂 𑀓𑀸𑀮𑁂. 𑀧𑀭𑀺𑀬𑁂𑀲𑀦𑁆𑀢𑁄𑀢𑀺 𑀅𑀜𑁆𑀜𑀸𑀢𑀺𑀓𑀅𑀧𑁆𑀧𑀯𑀸𑀭𑀺𑀢𑀝𑁆𑀞𑀸𑀦𑀢𑁄 𑀲𑀢𑀼𑀧𑁆𑀧𑀸𑀤𑀓𑀭𑀡𑁂𑀦 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀧𑀭𑀺𑀬𑁂𑀲𑀦𑁆𑀢𑁄 𑀘 𑀅𑀢𑀺𑀭𑁂𑀓𑀫𑀸𑀲𑁄 𑀲𑁂𑀲𑁄𑀢𑀺 𑀓𑀢𑁆𑀯𑀸 𑀦𑀺𑀯𑀸𑀲𑁂𑀦𑁆𑀢𑁄 𑀘 𑀕𑀺𑀫𑁆𑀳𑁂 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. ‘‘𑀦 𑀢𑀼 𑀏𑀯 𑀇𑀢𑀭𑀉𑀢𑀼𑀤𑁆𑀯𑀬𑁂’’𑀢𑀺 𑀧𑀤𑀘𑁆𑀙𑁂𑀤𑁄. 𑀕𑀺𑀫𑁆𑀳𑁂 𑀧𑀭𑀺𑀬𑁂𑀲𑀦𑁆𑀢𑁄 𑀧𑀼𑀭𑀺𑀫𑀫𑀸𑀲𑀢𑁆𑀢𑀬𑁂 𑀆𑀧𑀚𑁆𑀚𑀢𑀻𑀢𑀺 𑀓𑀢𑁆𑀯𑀸 𑀦𑀺𑀯𑀸𑀲𑁂𑀦𑁆𑀢𑁄 𑀅𑀟𑁆𑀠𑀫𑀸𑀲𑀸𑀥𑀺𑀓𑁂 𑀕𑀺𑀫𑁆𑀳𑀫𑀸𑀲𑀢𑁆𑀢𑀬𑁂 𑀆𑀧𑀚𑁆𑀚𑀢𑀺. 𑀦𑀺𑀲𑁆𑀲𑀦𑁆𑀤𑁂𑀳𑁂 ‘‘𑀕𑀺𑀫𑁆𑀳𑀸𑀦𑀁 𑀧𑀘𑁆𑀙𑀺𑀫𑀫𑀸𑀲𑀢𑁄 𑀧𑀼𑀭𑀺𑀫𑁂𑀲𑀼 𑀲𑀢𑁆𑀢𑀲𑀼 𑀫𑀸𑀲𑁂𑀲𑀽’’𑀢𑀺 𑀯𑀼𑀢𑁆𑀢𑀁, 𑀢𑀤𑀬𑀼𑀢𑁆𑀢𑀁 ‘‘𑀕𑀺𑀫𑁆𑀳𑀸𑀦𑁂𑀬𑁂𑀯 𑀆𑀧𑀚𑁆𑀚𑀢𑀻’’𑀢𑀺 𑀕𑀺𑀫𑁆𑀳𑀸𑀧𑀢𑁆𑀢𑀺𑀬𑀸 𑀤𑀲𑁆𑀲𑀺𑀢𑀢𑁆𑀢𑀸, ‘‘𑀇𑀢𑀭𑀉𑀢𑀼𑀤𑁆𑀯𑀬𑁂’’𑀢𑀺 𑀧𑀝𑀺𑀲𑀺𑀤𑁆𑀥𑀢𑁆𑀢𑀸 𑀘. 𑀏𑀢𑁆𑀣 𑀘 𑀕𑀸𑀣𑀸𑀬 𑀧𑀭𑀺𑀬𑁂𑀲𑀦𑀸𑀧𑀢𑁆𑀢𑀺𑀬𑀸𑀬𑁂𑀯 𑀤𑀲𑁆𑀲𑀦𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀦𑁆𑀢𑀺 𑀓𑀢𑁆𑀯𑀸 𑀦𑀺𑀯𑀸𑀲𑀦𑀸𑀧𑀢𑁆𑀢𑀺𑀬𑀸 𑀘 𑀕𑀺𑀫𑁆𑀳𑁂𑀬𑁂𑀯 𑀲𑀫𑁆𑀪𑀯𑁄𑀢𑀺 𑀲𑀸𑀧𑀺 𑀤𑀲𑁆𑀲𑀺𑀢𑀸.

𑁪𑁯𑁮. 𑀇𑀥 𑀧𑀦 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀬𑁄 𑀪𑀺𑀓𑁆𑀔𑀼 𑀯𑀲𑁆𑀲𑀺𑀓𑀲𑀸𑀝𑀺𑀓𑀘𑀻𑀯𑀭𑁂 𑀯𑀺𑀚𑁆𑀚𑀫𑀸𑀦𑁂 𑀦𑀕𑁆𑀕𑁄 𑀓𑀸𑀬𑀁 𑀑𑀯𑀲𑁆𑀲𑀸𑀧𑁂𑀢𑀺, 𑀲𑁄 𑀳𑀯𑁂 𑀏𑀓𑀁𑀲𑁂𑀦 𑀯𑀲𑁆𑀲𑁂 𑀯𑀲𑁆𑀲𑀸𑀦𑀉𑀢𑀼𑀫𑁆𑀳𑀺 𑀆𑀧𑀚𑁆𑀚𑀢𑀻𑀢𑀺 𑀬𑁄𑀚𑀦𑀸.

𑁪𑁯𑁯. ‘‘𑀅𑀢𑁆𑀣𑀸𑀧𑀢𑁆𑀢𑀺 𑀲𑀗𑁆𑀖𑁄 𑀆𑀧𑀚𑁆𑀚𑀢𑀺, 𑀦 𑀕𑀡𑁄 𑀦 𑀧𑀼𑀕𑁆𑀕𑀮𑁄, 𑀅𑀢𑁆𑀣𑀸𑀧𑀢𑁆𑀢𑀺 𑀕𑀡𑁄 𑀆𑀧𑀚𑁆𑀚𑀢𑀺, 𑀦 𑀲𑀗𑁆𑀖𑁄 𑀦 𑀧𑀼𑀕𑁆𑀕𑀮𑁄, 𑀅𑀢𑁆𑀣𑀸𑀧𑀢𑁆𑀢𑀺 𑀧𑀼𑀕𑁆𑀕𑀮𑁄 𑀆𑀧𑀚𑁆𑀚𑀢𑀺, 𑀦 𑀲𑀗𑁆𑀖𑁄 𑀦 𑀕𑀡𑁄’’𑀢𑀺 (𑀧𑀭𑀺. 𑁩𑁨𑁩) 𑀯𑀼𑀢𑁆𑀢𑀢𑁆𑀢𑀺𑀓𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀆𑀧𑀚𑁆𑀚𑀢𑀺 𑀳𑀺 𑀲𑀗𑁆𑀖𑁄𑀯𑀸’’𑀢𑀺𑀆𑀤𑀺.

𑁫𑁦𑁦. 𑀓𑀣𑀫𑀸𑀧𑀚𑁆𑀚𑀢𑀻𑀢𑀺 𑀆𑀳 ‘‘𑀅𑀥𑀺𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺. 𑀅𑀥𑀺𑀝𑁆𑀞𑀸𑀦𑀦𑁆𑀢𑀺 𑀅𑀥𑀺𑀝𑁆𑀞𑀸𑀦𑀼𑀧𑁄𑀲𑀣𑀁 𑀓𑀭𑁄𑀦𑁆𑀢𑁄 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀁 𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀥 𑀅𑀢𑁆𑀢𑀦𑁄 𑀬𑀣𑀸𑀧𑀢𑁆𑀢𑀫𑀼𑀧𑁄𑀲𑀣𑀁 𑀅𑀓𑀢𑁆𑀯𑀸 𑀅𑀧𑀢𑁆𑀢𑀉𑀧𑁄𑀲𑀣𑀓𑀭𑀡𑀁 𑀆𑀧𑀚𑁆𑀚𑀺𑀢𑀩𑁆𑀩𑀸𑀧𑀢𑁆𑀢𑀺𑀤𑀲𑁆𑀲𑀦𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸, 𑀅𑀢𑁆𑀢𑀓𑀭𑀡𑀤𑁄𑀲𑀲𑁆𑀲 𑀯𑀺𑀲𑀼𑀁 𑀯𑀺𑀲𑀼𑀁 𑀯𑀓𑁆𑀔𑀫𑀸𑀦𑀢𑁆𑀢𑀸 𑀘 𑀦 𑀕𑀡𑁄 𑀦 𑀘 𑀧𑀼𑀕𑁆𑀕𑀮𑁄𑀢𑀺 𑀏𑀢𑁆𑀣 𑀅𑀥𑀺𑀝𑁆𑀞𑀸𑀦𑀁 𑀓𑀭𑁄𑀦𑁆𑀢𑁄 𑀧𑀼𑀕𑁆𑀕𑀮𑁄 𑀘 𑀧𑀸𑀭𑀺𑀲𑀼𑀤𑁆𑀥𑀺𑀁 𑀓𑀭𑁄𑀦𑁆𑀢𑁄 𑀕𑀡𑁄 𑀘 𑀦𑀸𑀧𑀚𑁆𑀚𑀢𑀻𑀢𑀺 𑀬𑀣𑀸𑀮𑀸𑀪𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀬𑀣𑀸𑀓𑁆𑀓𑀫𑀁 𑀬𑁄𑀚𑀦𑀁 𑀓𑀭𑁄𑀫𑀻𑀢𑀺 𑀯𑀺𑀧𑀭𑀺𑀬𑀸𑀬𑀯𑀺𑀓𑀧𑁆𑀧𑁄 𑀦 𑀓𑀸𑀢𑀩𑁆𑀩𑁄. 𑀏𑀯𑀫𑀼𑀧𑀭𑀺𑀧𑀺 𑀯𑀺𑀧𑀭𑀺𑀬𑀸𑀬𑀯𑀺𑀧𑀓𑁆𑀔𑀁 𑀓𑀢𑁆𑀯𑀸 𑀬𑀣𑀸𑀮𑀸𑀪𑀬𑁄𑀚𑀦𑀸𑀯 𑀓𑀸𑀢𑀩𑁆𑀩𑀸.

𑁫𑁦𑁧. ‘‘𑀉𑀧𑁄𑀲𑀣’’𑀦𑁆𑀢𑀺 𑀇𑀤𑀁 ‘‘𑀲𑀼𑀢𑁆𑀢𑀼𑀤𑁆𑀤𑁂𑀲𑀫𑀥𑀺𑀝𑁆𑀞𑀸𑀦’’𑀦𑁆𑀢𑀺 𑀧𑀤𑁂𑀳𑀺 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀁.

𑁫𑁦𑁨. 𑀲𑀼𑀢𑁆𑀢𑀼𑀤𑁆𑀤𑁂𑀲𑀁 𑀓𑀭𑁄𑀦𑁆𑀢𑁄 𑀯𑀸𑀢𑀺 𑀏𑀢𑁆𑀣 𑀯𑀸-𑀲𑀤𑁆𑀤𑁂𑀦 𑀧𑀸𑀭𑀺𑀲𑀼𑀤𑁆𑀥𑀺𑀁 𑀕𑀡𑁆𑀳𑀸𑀢𑀺. 𑀲𑀼𑀢𑁆𑀢𑀼𑀤𑁆𑀤𑁂𑀲𑀁, 𑀧𑀸𑀭𑀺𑀲𑀼𑀤𑁆𑀥𑀺𑀁 𑀯𑀸 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑁄 𑀧𑀼𑀕𑁆𑀕𑀮𑁄 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀲𑀼𑀢𑁆𑀢𑀼𑀤𑁆𑀤𑁂𑀲𑀁 𑀓𑀭𑁄𑀦𑁆𑀢𑁄 𑀲𑀗𑁆𑀖𑁄 𑀘 𑀦𑀸𑀧𑀚𑁆𑀚𑀢𑀺, 𑀧𑀸𑀭𑀺𑀲𑀼𑀤𑁆𑀥𑀺𑀁 𑀓𑀭𑁄𑀦𑁆𑀢𑁄 𑀕𑀡𑁄 𑀘 𑀦 𑀆𑀧𑀚𑁆𑀚𑀢𑀻𑀢𑀺 𑀬𑁄𑀚𑀦𑀸.

𑁫𑁦𑁩. 𑀓𑀣𑀁 𑀧𑀦 𑀕𑀺𑀮𑀸𑀦𑁄𑀯 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀦 𑀅𑀕𑀺𑀮𑀸𑀦𑁄, 𑀓𑀣𑀁 𑀅𑀕𑀺𑀮𑀸𑀦𑁄𑀯 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀦𑁄 𑀕𑀺𑀮𑀸𑀦𑁄, 𑀓𑀣𑀁 𑀕𑀺𑀮𑀸𑀦𑁄 𑀘 𑀅𑀕𑀺𑀮𑀸𑀦𑁄 𑀘 𑀉𑀪𑁄𑀧𑀺 𑀆𑀧𑀚𑁆𑀚𑀦𑁆𑀢𑀻𑀢𑀺 𑀬𑁄𑀚𑀦𑀸.

𑁫𑁦𑁪. 𑀬𑁄 𑀧𑀦 𑀅𑀓𑀮𑁆𑀮𑀓𑁄 𑀕𑀺𑀮𑀸𑀦𑁄 𑀅𑀜𑁆𑀜𑁂𑀦 𑀧𑀦 𑀪𑁂𑀲𑀚𑁆𑀚𑁂𑀦 𑀅𑀢𑁆𑀣𑁂 𑀲𑀢𑀺 𑀢𑀤𑀜𑁆𑀜𑀁 𑀢𑀢𑁄 𑀅𑀜𑁆𑀜𑀁 𑀪𑁂𑀲𑀚𑁆𑀚𑀁 𑀯𑀺𑀜𑁆𑀜𑀸𑀧𑁂𑀢𑀺, 𑀲𑁄 𑀆𑀧𑀚𑁆𑀚𑀢𑀺 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀦𑁆𑀢𑀺 𑀬𑁄𑀚𑀦𑀸.

𑁫𑁦𑁫. 𑀪𑁂𑀲𑀚𑁆𑀚𑁂𑀦 𑀅𑀢𑁆𑀣𑁂 𑀅𑀯𑀺𑀚𑁆𑀚𑀫𑀸𑀦𑁂𑀧𑀺 𑀲𑀘𑁂 𑀪𑁂𑀲𑀚𑁆𑀚𑀁 𑀯𑀺𑀜𑁆𑀜𑀸𑀧𑁂𑀢𑀺, 𑀅𑀕𑀺𑀮𑀸𑀦𑁄𑀯 𑀯𑀺𑀜𑁆𑀜𑀢𑁆𑀢𑀺𑀧𑀘𑁆𑀘𑀬𑀸 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀲𑁂𑀲𑀁 𑀧𑀦 𑀆𑀧𑀢𑁆𑀢𑀺𑀁 𑀕𑀺𑀮𑀸𑀦𑀅𑀕𑀺𑀮𑀸𑀦𑀸 𑀉𑀪𑁄𑀧𑀺 𑀆𑀧𑀚𑁆𑀚𑀦𑁆𑀢𑀺.

𑁫𑁦𑁬. 𑀅𑀢𑁆𑀣𑀸𑀧𑀢𑁆𑀢𑀺 𑀅𑀦𑁆𑀢𑁄𑀯 𑀆𑀧𑀚𑁆𑀚𑀢𑀺, 𑀦 𑀩𑀳𑀺𑀤𑁆𑀥𑀸, 𑀢𑀣𑀸 𑀅𑀢𑁆𑀣𑀸𑀧𑀢𑁆𑀢𑀺 𑀩𑀳𑀺 𑀏𑀯 𑀆𑀧𑀚𑁆𑀚𑀢𑀺, 𑀦 𑀅𑀦𑁆𑀢𑁄, 𑀅𑀢𑁆𑀣𑀸𑀧𑀢𑁆𑀢𑀺 𑀅𑀦𑁆𑀢𑁄, 𑀩𑀳𑀺𑀤𑁆𑀥𑀸𑀢𑀺 𑀉𑀪𑀬𑀢𑁆𑀣𑀧𑀺 𑀆𑀧𑀚𑁆𑀚𑀢𑀻𑀢𑀺 𑀬𑁄𑀚𑀦𑀸.

𑁫𑁦𑁭. 𑀓𑁂𑀯𑀮𑀁 𑀅𑀦𑁆𑀢𑁄𑀬𑁂𑀯 𑀆𑀧𑀚𑁆𑀚𑀢𑀻𑀢𑀺 𑀬𑁄𑀚𑀦𑀸.

𑁫𑁦𑁮. 𑀫𑀜𑁆𑀘𑀸𑀤𑀺𑀦𑁆𑀢𑀺 𑀲𑀗𑁆𑀖𑀺𑀓𑀫𑀜𑁆𑀘𑀸𑀤𑀺𑀁.

𑁫𑁦𑁯. ‘‘𑀅𑀦𑁆𑀢𑁄𑀲𑀻𑀫𑀸𑀬 𑀏𑀯 𑀆𑀧𑀢𑁆𑀢𑀺’’𑀦𑁆𑀢𑀺 𑀧𑀤𑀘𑁆𑀙𑁂𑀤𑁄. 𑀓𑀣𑀁 𑀅𑀦𑁆𑀢𑁄𑀲𑀻𑀫𑀸𑀬 𑀏𑀯 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀦𑁂𑀯 𑀩𑀳𑀺𑀲𑀻𑀫𑀸𑀬 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀓𑀣𑀁 𑀩𑀳𑀺𑀲𑀻𑀫𑀸𑀬 𑀏𑀯 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀦𑁄 𑀅𑀦𑁆𑀢𑁄𑀲𑀻𑀫𑀸𑀬 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀓𑀣𑀁 𑀅𑀦𑁆𑀢𑁄𑀲𑀻𑀫𑀸𑀬 𑀘 𑀩𑀳𑀺𑀲𑀻𑀫𑀸𑀬 𑀘𑀸𑀢𑀺 𑀉𑀪𑀬𑀢𑁆𑀣𑀧𑀺 𑀆𑀧𑀚𑁆𑀚𑀢𑀻𑀢𑀺 𑀬𑁄𑀚𑀦𑀸.

𑁫𑁧𑁦. 𑀲𑀙𑀢𑁆𑀢𑀼𑀧𑀸𑀳𑀦𑁄 𑀪𑀺𑀓𑁆𑀔𑀽𑀢𑀺 𑀙𑀢𑁆𑀢𑀼𑀧𑀸𑀳𑀦𑀲𑀳𑀺𑀢𑁄 𑀆𑀕𑀦𑁆𑀢𑀼𑀓𑁄 𑀪𑀺𑀓𑁆𑀔𑀼. 𑀧𑀯𑀺𑀲𑀦𑁆𑀢𑁄 𑀢𑀧𑁄𑀥𑀦𑁄𑀢𑀺 𑀆𑀕𑀦𑁆𑀢𑀼𑀓𑀯𑀢𑁆𑀢𑀁 𑀅𑀤𑀲𑁆𑀲𑁂𑀢𑁆𑀯𑀸 𑀲𑀗𑁆𑀖𑀸𑀭𑀸𑀫𑀁 𑀧𑀯𑀺𑀲𑀦𑁆𑀢𑁄.

𑁫𑁧𑁧. ‘‘𑀉𑀧𑀘𑀸𑀭𑀲𑁆𑀲 𑀅𑀢𑀺𑀓𑁆𑀓𑀫𑁂’’𑀢𑀺 𑀧𑀤𑀘𑁆𑀙𑁂𑀤𑁄.

𑁫𑁧𑁨. 𑀲𑁂𑀲𑀁 𑀲𑀩𑁆𑀩𑀁 𑀆𑀧𑀢𑁆𑀢𑀺𑀁 𑀅𑀦𑁆𑀢𑁄𑀲𑀻𑀫𑀸𑀬 𑀘 𑀩𑀳𑀺𑀲𑀻𑀫𑀸𑀬 𑀘 𑀆𑀧𑀚𑁆𑀚𑀢𑀻𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 𑀯𑀲𑁆𑀲𑀘𑁆𑀙𑁂𑀤𑀸𑀧𑀢𑁆𑀢𑀺𑀁 𑀩𑀳𑀺𑀲𑀻𑀫𑀸𑀕𑀢𑁄 𑀆𑀧𑀚𑁆𑀚𑀢𑀺, 𑀪𑀺𑀓𑁆𑀔𑀼𑀦𑀻𑀆𑀭𑀸𑀫𑀧𑀯𑁂𑀲𑀦𑀸𑀧𑀢𑁆𑀢𑀺𑀁 𑀅𑀦𑁆𑀢𑁄𑀲𑀻𑀫𑀸𑀬 𑀆𑀧𑀚𑁆𑀚𑀢𑀺, 𑀢𑀤𑀼𑀪𑀬𑀁 𑀧𑀦 𑀆𑀕𑀦𑁆𑀢𑀼𑀓𑀕𑀫𑀺𑀓𑀯𑀢𑁆𑀢𑀪𑁂𑀤𑀸𑀧𑀢𑁆𑀢𑀻𑀳𑀺 𑀏𑀓𑀧𑀭𑀺𑀘𑁆𑀙𑁂𑀤𑀦𑁆𑀢𑀺 𑀉𑀧𑀮𑀓𑁆𑀔𑀡𑀢𑁄 𑀏𑀢𑁂𑀦𑁂𑀯 𑀯𑀺𑀜𑁆𑀜𑀸𑀬𑀢𑀻𑀢𑀺 𑀯𑀺𑀲𑀼𑀁 𑀦 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀏𑀯𑀁 𑀲𑀩𑁆𑀩𑀢𑁆𑀣 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀺𑀓𑀓𑀣𑀸𑀯𑀡𑁆𑀡𑀦𑀸.

𑁫𑁧𑁫. 𑀯𑀘𑀻𑀤𑁆𑀯𑀸𑀭𑀺𑀓𑀫𑀸𑀧𑀢𑁆𑀢𑀺𑀦𑁆𑀢𑀺 𑀫𑀼𑀲𑀸𑀯𑀸𑀤𑀧𑁂𑀲𑀼𑀜𑁆𑀜𑀳𑀭𑀡𑀸𑀤𑀺𑀯𑀲𑁂𑀦 𑀯𑀘𑀻𑀤𑁆𑀯𑀸𑀭𑁂 𑀆𑀧𑀚𑁆𑀚𑀺𑀢𑀩𑁆𑀩𑀸𑀧𑀢𑁆𑀢𑀺𑀁. 𑀧𑀭𑀯𑀸𑀘𑀸𑀬 𑀲𑀼𑀚𑁆𑀛𑀢𑀻𑀢𑀺 𑀲𑀗𑁆𑀖𑀫𑀚𑁆𑀛𑁂 𑀏𑀓𑀯𑀸𑀘𑀺𑀓𑀸𑀬 𑀢𑀺𑀡𑀯𑀢𑁆𑀣𑀸𑀭𑀓𑀓𑀫𑁆𑀫𑀯𑀸𑀘𑀸𑀬 𑀲𑀼𑀚𑁆𑀛𑀢𑀺.

𑁫𑁧𑁬. 𑀯𑀚𑁆𑀚𑀫𑁂𑀯 𑀯𑀚𑁆𑀚𑀢𑀸, 𑀢𑀁, 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀅𑀢𑁆𑀣𑁄.

𑁫𑁧𑁮-𑁯. 𑀢𑀁 𑀤𑁂𑀲𑁂𑀢𑁆𑀯𑀸 𑀯𑀺𑀲𑀼𑀚𑁆𑀛𑀦𑁆𑀢𑁄𑀢𑀺 𑀢𑀁 𑀤𑁂𑀲𑁂𑀢𑁆𑀯𑀸 𑀯𑀺𑀲𑀼𑀤𑁆𑀥𑁄 𑀳𑁄𑀦𑁆𑀢𑁄. 𑀬𑀸𑀯𑀢𑀢𑀺𑀬𑀓𑀁 𑀧𑀦𑀸𑀢𑀺 𑀬𑀸𑀯𑀢𑀢𑀺𑀬𑁂𑀦 𑀲𑀫𑀦𑀼𑀪𑀸𑀲𑀦𑀓𑀫𑁆𑀫𑁂𑀦 𑀆𑀧𑀦𑁆𑀦𑀁 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀁 𑀧𑀦. 𑀧𑀭𑀺𑀯𑀸𑀲𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀫𑀸𑀦𑀢𑁆𑀢𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀅𑀩𑁆𑀪𑀸𑀦𑀸𑀦𑀺 𑀕𑀳𑀺𑀢𑀸𑀦𑀺.

𑁫𑁨𑁨. 𑀓𑀸𑀬𑀤𑁆𑀯𑀸𑀭𑀺𑀓𑀫𑀸𑀧𑀢𑁆𑀢𑀺𑀦𑁆𑀢𑀺 𑀓𑀸𑀬𑀤𑁆𑀯𑀸𑀭𑁂𑀦 𑀆𑀧𑀚𑁆𑀚𑀺𑀢𑀩𑁆𑀩𑀁 𑀧𑀳𑀸𑀭𑀤𑀸𑀦𑀸𑀤𑀺𑀆𑀧𑀢𑁆𑀢𑀺𑀁.

𑁫𑁨𑁩. 𑀓𑀸𑀬𑁂𑀦𑁂𑀯 𑀯𑀺𑀲𑀼𑀚𑁆𑀛𑀢𑀻𑀢𑀺 𑀢𑀺𑀡𑀯𑀢𑁆𑀣𑀸𑀭𑀓𑀁 𑀕𑀦𑁆𑀢𑁆𑀯𑀸 𑀓𑀸𑀬𑀲𑀸𑀫𑀕𑁆𑀕𑀺𑀁 𑀤𑁂𑀦𑁆𑀢𑁄 𑀯𑀺𑀲𑀼𑀚𑁆𑀛𑀢𑀺.

𑁫𑁨𑁬. 𑀬𑁄 𑀲𑀼𑀢𑁆𑀢𑁄 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀲𑁄 𑀓𑀣𑀁 𑀧𑀝𑀺𑀩𑀼𑀤𑁆𑀥𑁄 𑀯𑀺𑀲𑀼𑀚𑁆𑀛𑀢𑀺. 𑀬𑁄 𑀧𑀝𑀺𑀩𑀼𑀤𑁆𑀥𑁄𑀯 𑀆𑀧𑀦𑁆𑀦𑁄, 𑀲𑁄 𑀓𑀣𑀁 𑀲𑀼𑀢𑁆𑀢𑁄 𑀲𑀼𑀚𑁆𑀛𑀢𑀻𑀢𑀺 𑀬𑁄𑀚𑀦𑀸.

𑁫𑁨𑁮. 𑀲𑀕𑀸𑀭𑀲𑁂𑀬𑁆𑀬𑀓𑀸𑀤𑀺𑀦𑁆𑀢𑀺 𑀫𑀸𑀢𑀼𑀕𑀸𑀫𑁂𑀦 𑀲𑀳𑀲𑁂𑀬𑁆𑀬𑀸𑀤𑀺𑀆𑀧𑀢𑁆𑀢𑀺𑀁.

𑁫𑁨𑁯. 𑀚𑀕𑁆𑀕𑀦𑁆𑀢𑁄𑀢𑀺 𑀚𑀸𑀕𑀭𑀦𑁆𑀢𑁄 𑀦𑀺𑀤𑁆𑀤𑀁 𑀯𑀺𑀦𑁄𑀤𑁂𑀦𑁆𑀢𑁄.

𑁫𑁩𑁧. 𑀧𑀝𑀺𑀩𑀼𑀤𑁆𑀥𑁄𑀢𑀺 𑀅𑀦𑀺𑀤𑁆𑀤𑀸𑀬𑀦𑁆𑀢𑁄.

𑁫𑁩𑁨. 𑀅𑀘𑀺𑀢𑁆𑀢𑁄𑀢𑀺 ‘‘𑀲𑀺𑀓𑁆𑀔𑀸𑀧𑀤𑀁 𑀯𑀻𑀢𑀺𑀓𑁆𑀓𑀫𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀸 𑀪𑀸𑀯𑁂𑀦 𑀅𑀘𑀺𑀢𑁆𑀢𑁄.

𑁫𑁩𑁫. 𑀲𑀘𑀺𑀢𑁆𑀢𑀓𑀸𑀧𑀢𑁆𑀢𑀺𑀦𑁆𑀢𑀺 𑀯𑀺𑀓𑀸𑀮𑀪𑁄𑀚𑀦𑀸𑀤𑀺𑀆𑀧𑀢𑁆𑀢𑀺𑀁. 𑀢𑀺𑀡𑀯𑀢𑁆𑀣𑀸𑀭𑁂 𑀲𑀬𑀦𑁆𑀢𑁄 𑀦𑀺𑀤𑁆𑀤𑀸𑀬𑀦𑁆𑀢𑁄 𑀢𑀺𑀡𑀯𑀢𑁆𑀣𑀸𑀭𑀓𑀓𑀫𑁆𑀫𑁂 𑀓𑀭𑀺𑀬𑀫𑀸𑀦𑁂 ‘‘𑀇𑀫𑀺𑀦𑀸𑀳𑀁 𑀓𑀫𑁆𑀫𑁂𑀦 𑀆𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀫𑀻’’𑀢𑀺 𑀘𑀺𑀢𑁆𑀢𑀭𑀳𑀺𑀢𑁄 𑀯𑀼𑀝𑁆𑀞𑀳𑀦𑁆𑀢𑁄 𑀅𑀘𑀺𑀢𑁆𑀢𑀓𑁄 𑀯𑀺𑀲𑀼𑀚𑁆𑀛𑀢𑀺.

𑁫𑁩𑁬. 𑀧𑀘𑁆𑀙𑀺𑀫𑀁 𑀢𑀼 𑀧𑀤𑀤𑁆𑀯𑀬𑀦𑁆𑀢𑀺 𑁋

‘‘𑀆𑀧𑀚𑁆𑀚𑀺𑀢𑁆𑀯𑀸 𑀅𑀘𑀺𑀢𑁆𑀢𑁄𑀯, 𑀅𑀘𑀺𑀢𑁆𑀢𑁄𑀯 𑀯𑀺𑀲𑀼𑀚𑁆𑀛𑀢𑀺;

𑀆𑀧𑀚𑁆𑀚𑀺𑀢𑁆𑀯𑀸 𑀲𑀘𑀺𑀢𑁆𑀢𑁄𑀯, 𑀲𑀘𑀺𑀢𑁆𑀢𑁄𑀯 𑀯𑀺𑀲𑀼𑀚𑁆𑀛𑀢𑀻’’𑀢𑀺. 𑁋

𑀧𑀤𑀤𑁆𑀯𑀬𑀁. 𑀅𑀫𑀺𑀲𑁆𑀲𑁂𑀢𑁆𑀯𑀸𑀢𑀺 𑀅𑀘𑀺𑀢𑁆𑀢𑀲𑀘𑀺𑀢𑁆𑀢𑀧𑀤𑁂𑀳𑀺 𑀏𑀯𑀫𑁂𑀯 𑀫𑀺𑀲𑁆𑀲𑀁 𑀅𑀓𑀢𑁆𑀯𑀸. 𑀏𑀢𑁆𑀣𑀸𑀢𑀺 𑀧𑀼𑀭𑀺𑀫𑀧𑀤𑀤𑁆𑀯𑀬𑁂. 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦𑀸𑀢𑀺 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦.

𑁫𑁩𑁯. 𑀓𑀫𑁆𑀫𑀢𑁄𑀢𑀺 𑀲𑀫𑀦𑀼𑀪𑀸𑀲𑀦𑀓𑀫𑁆𑀫𑀢𑁄.

𑁫𑁪𑁦. 𑀆𑀧𑀚𑁆𑀚𑀺𑀢𑁆𑀯𑀸 𑀅𑀓𑀫𑁆𑀫𑀢𑁄𑀢𑀺 𑀲𑀫𑀦𑀼𑀪𑀸𑀲𑀦𑀓𑀫𑁆𑀫𑀁 𑀯𑀺𑀦𑀸𑀯 𑀆𑀧𑀚𑁆𑀚𑀺𑀢𑁆𑀯𑀸.

𑁫𑁪𑁧. 𑀲𑀫𑀦𑀼𑀪𑀸𑀲𑀦𑁂 𑀆𑀧𑀚𑁆𑀚𑀺𑀢𑀩𑁆𑀩𑀁 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀁 𑀲𑀫𑀦𑀼𑀪𑀸𑀲𑀦𑀫𑀸𑀳 𑀓𑀸𑀭𑀡𑀽𑀧𑀘𑀸𑀭𑁂𑀦.

𑁫𑁪𑁨. 𑀅𑀯𑀲𑁂𑀲𑀦𑁆𑀢𑀺 𑀫𑀼𑀲𑀸𑀯𑀸𑀤𑀧𑀸𑀘𑀺𑀢𑁆𑀢𑀺𑀬𑀸𑀤𑀺𑀓𑀁.

𑁫𑁪𑁩. 𑀯𑀺𑀲𑀼𑀚𑁆𑀛𑀢𑀺 𑀅𑀲𑀫𑁆𑀫𑀼𑀔𑀸𑀢𑀺 𑀲𑀗𑁆𑀖𑀲𑁆𑀲 𑀅𑀲𑀫𑁆𑀫𑀼𑀔𑀸 𑀯𑀺𑀲𑀼𑀚𑁆𑀛𑀢𑀺. 𑀇𑀤𑀜𑁆𑀘 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘𑁂𑀯 𑀧𑀝𑀺𑀜𑁆𑀜𑀸𑀢𑀓𑀭𑀡𑁂𑀦 𑀘 𑀲𑀫𑁂𑀦𑁆𑀢𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸𑀬 𑀲𑀩𑁆𑀪𑀸𑀯𑁂𑀧𑀺 𑀲𑀗𑁆𑀖𑀲𑁆𑀲 𑀅𑀲𑀫𑁆𑀫𑀼𑀔𑀢𑀸𑀬 𑀆𑀧𑀚𑁆𑀚𑀢𑀺 𑀯𑀸 𑀯𑀺𑀲𑀼𑀚𑁆𑀛𑀢𑀺 𑀯𑀸𑀢𑀺 ‘‘𑀅𑀲𑀫𑁆𑀫𑀼𑀔𑀸’’𑀢𑀺 𑀯𑀼𑀢𑁆𑀢𑀁.

𑁫𑁫𑁧. ‘‘𑀅𑀘𑀺𑀢𑁆𑀢𑀓𑀘𑀢𑀼𑀓𑁆𑀓𑀁 𑀅𑀚𑀸𑀦𑀦𑁆𑀢𑀘𑀢𑀼𑀓𑁆𑀓’’𑀦𑁆𑀢𑀺 𑀓𑀼𑀲𑀮𑀢𑁆𑀢𑀺𑀓𑀨𑀲𑁆𑀲𑀧𑀜𑁆𑀘𑀓𑀸𑀤𑀺𑀯𑁄𑀳𑀸𑀭𑁄 𑀯𑀺𑀬 𑀆𑀤𑀺𑀧𑀤𑀯𑀲𑁂𑀦 𑀯𑀼𑀢𑁆𑀢𑁄.

𑁫𑁫𑁨-𑁩. 𑀅𑀢𑁆𑀣𑀸𑀧𑀢𑁆𑀢𑀺 𑀆𑀕𑀦𑁆𑀢𑀼𑀓𑁄 𑀆𑀧𑀚𑁆𑀚𑀢𑀺, 𑀦 𑀘𑁂𑀢𑀭𑁄 𑀆𑀯𑀸𑀲𑀺𑀓𑁄 𑀆𑀧𑀚𑁆𑀚𑀢𑀺, 𑀅𑀢𑁆𑀣𑀸𑀧𑀢𑁆𑀢𑀺 𑀆𑀯𑀸𑀲𑀺𑀓𑁄𑀯 𑀆𑀧𑀚𑁆𑀚𑀢𑀺, 𑀦 𑀘𑁂𑀢𑀭𑁄 𑀆𑀕𑀦𑁆𑀢𑀼𑀓𑁄 𑀆𑀧𑀚𑁆𑀚𑀢𑀺, 𑀅𑀢𑁆𑀣𑀸𑀧𑀢𑁆𑀢𑀺 𑀆𑀕𑀦𑁆𑀢𑀼𑀓𑁄 𑀘 𑀆𑀯𑀸𑀲𑀺𑀓𑁄 𑀘 𑀢𑁂 𑀉𑀪𑁄𑀧𑀺 𑀆𑀧𑀚𑁆𑀚𑀦𑁆𑀢𑀺, 𑀉𑀪𑁄 𑀲𑁂𑀲𑀁 𑀦 𑀆𑀧𑀚𑁆𑀚𑀦𑁆𑀢𑀺 𑀅𑀢𑁆𑀣𑀻𑀢𑀺 𑀬𑁄𑀚𑀦𑀸.

𑁫𑁫𑁫. 𑀇𑀢𑀭𑁄𑀢𑀺 𑀆𑀯𑀸𑀲𑀺𑀓𑁄. 𑀆𑀯𑀸𑀲𑀯𑀢𑁆𑀢𑀦𑁆𑀢𑀺 𑀆𑀯𑀸𑀲𑀺𑀓𑁂𑀦 𑀆𑀕𑀦𑁆𑀢𑀼𑀓𑀲𑁆𑀲 𑀓𑀸𑀢𑀩𑁆𑀩𑀯𑀢𑁆𑀢𑀁. 𑀆𑀯𑀸𑀲𑀻𑀢𑀺 𑀆𑀯𑀸𑀲𑀺𑀓𑁄.

𑁫𑁫𑁬. 𑀦 𑀘𑁂𑀯𑀸𑀕𑀦𑁆𑀢𑀼𑀓𑁄𑀢𑀺 𑀢𑀁 𑀆𑀯𑀸𑀲𑀺𑀓𑀯𑀢𑁆𑀢𑀁 𑀅𑀓𑀭𑁄𑀦𑁆𑀢𑁄 𑀆𑀕𑀦𑁆𑀢𑀼𑀓𑁄 𑀦 𑀘𑁂𑀯 𑀆𑀧𑀚𑁆𑀚𑀢𑀺. 𑀲𑁂𑀲𑀁 𑀓𑀸𑀬𑀯𑀘𑀻𑀤𑁆𑀯𑀸𑀭𑀺𑀓𑀁 𑀆𑀧𑀢𑁆𑀢𑀺𑀁. 𑀉𑀪𑁄𑀧𑀺 𑀆𑀕𑀦𑁆𑀢𑀼𑀓𑀆𑀯𑀸𑀲𑀺𑀓𑀸. 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀦𑀁 𑀅𑀲𑀸𑀥𑀸𑀭𑀡𑀁 𑀆𑀧𑀢𑁆𑀢𑀺𑀁 𑀦 𑀆𑀧𑀚𑁆𑀚𑀦𑁆𑀢𑀺.

𑁫𑁫𑁭. 𑀯𑀢𑁆𑀣𑀼𑀦𑀸𑀦𑀢𑁆𑀢𑀢𑀸𑀢𑀺 𑀯𑀻𑀢𑀺𑀓𑁆𑀓𑀫𑀦𑀸𑀦𑀢𑁆𑀢𑀢𑀸. 𑀆𑀧𑀢𑁆𑀢𑀺𑀦𑀸𑀦𑀢𑁆𑀢𑀢𑀸𑀢𑀺 𑀧𑀸𑀭𑀸𑀚𑀺𑀓𑀸𑀤𑀻𑀦𑀁 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀅𑀜𑁆𑀜𑀫𑀜𑁆𑀜𑀦𑀸𑀦𑀢𑁆𑀢𑀢𑀸.

𑁫𑁬𑁩. ‘‘𑀧𑀸𑀭𑀸𑀚𑀺𑀓𑀸𑀦𑀁…𑀧𑁂… 𑀦𑀸𑀦𑀪𑀸𑀯𑁄’’𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀲𑀗𑁆𑀖𑀸𑀤𑀺𑀲𑁂𑀲𑀸𑀦𑀁 𑀅𑀦𑀺𑀬𑀢𑀸𑀤𑀻𑀳𑀺 𑀯𑀢𑁆𑀣𑀼𑀦𑀸𑀦𑀢𑀸𑀬 𑀘𑁂𑀯 𑀆𑀧𑀢𑁆𑀢𑀺𑀦𑀸𑀦𑀢𑀸𑀬 𑀘 𑀮𑀩𑁆𑀪𑀫𑀸𑀦𑀢𑁆𑀢𑀸.

𑁫𑁬𑁫. 𑀅𑀬𑀫𑁂𑀯 𑀯𑀺𑀦𑀺𑀘𑁆𑀙𑀬𑁄𑀢𑀺 𑀦 𑀓𑁂𑀯𑀮𑀁 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀻𑀲𑀼𑀬𑁂𑀯 𑀲𑀸𑀥𑀸𑀭𑀡𑀸𑀧𑀢𑁆𑀢𑀺𑀬𑁄 𑀏𑀓𑀢𑁄 𑀘 𑀯𑀺𑀲𑀼𑀜𑁆𑀘 𑀆𑀧𑀚𑁆𑀚𑀦𑁆𑀢𑀸𑀦𑀁 𑀬𑀣𑀸𑀯𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑁄, 𑀅𑀣 𑀔𑁄 𑀅𑀯𑀲𑁂𑀲𑀲𑀸𑀥𑀸𑀭𑀡𑀸𑀧𑀢𑁆𑀢𑀺𑀬𑁄𑀧𑀺 𑀯𑀼𑀢𑁆𑀢𑀦𑀬𑁂𑀦 𑀆𑀧𑀚𑁆𑀚𑀢𑀺, 𑀅𑀬𑀫𑁂𑀯 𑀯𑀺𑀦𑀺𑀘𑁆𑀙𑀬𑁄 𑀬𑁄𑀚𑁂𑀢𑀩𑁆𑀩𑁄.

𑁫𑁭𑁭. 𑀆𑀤𑀺𑀬𑀦𑁆𑀢𑁄 𑀕𑀡𑁆𑀳𑀦𑁆𑀢𑁄. 𑀧𑀬𑁄𑀚𑁂𑀦𑁆𑀢𑁄𑀢𑀺 𑀕𑀡𑁆𑀳𑀸𑀧𑁂𑀦𑁆𑀢𑁄.

𑁫𑁭𑁯. 𑀊𑀦𑀓𑀁 𑀧𑀸𑀤𑀁…𑀧𑁂… 𑀮𑀳𑀼𑀁 𑀨𑀼𑀲𑁂𑀢𑀺 𑀣𑀼𑀮𑁆𑀮𑀘𑁆𑀘𑀬𑀁, 𑀤𑀼𑀓𑁆𑀓𑀝𑀜𑁆𑀘 𑀲𑀦𑁆𑀥𑀸𑀬𑀸𑀳.

𑁫𑁮𑁦. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦, 𑀲𑁂𑀲𑀓𑀫𑁆𑀧𑀺 𑀧𑀤𑀢𑁆𑀢𑀬𑀦𑁆𑀢𑀺 𑀬𑁄 𑀅𑀬𑀁 𑀧𑀞𑀫𑀯𑀺𑀦𑀺𑀘𑁆𑀙𑀬𑁂 𑀯𑀼𑀢𑁆𑀢𑀦𑀬𑁄, 𑀏𑀢𑁂𑀦𑁂𑀯 𑀦𑀬𑁂𑀦 𑀊𑀦𑀧𑀸𑀤𑀁 𑀆𑀤𑀺𑀬𑀦𑁆𑀢𑁄 𑀮𑀳𑀼𑀓𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀧𑀸𑀤𑀁 𑀯𑀸 𑀅𑀢𑀺𑀭𑁂𑀓𑀧𑀸𑀤𑀁 𑀯𑀸 𑀕𑀳𑀡𑀢𑁆𑀣𑀁 𑀆𑀡𑀸𑀧𑁂𑀦𑁆𑀢𑁄 𑀕𑀭𑀼𑀁 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀧𑀸𑀤𑀁 𑀯𑀸 𑀅𑀢𑀺𑀭𑁂𑀓𑀧𑀸𑀤𑀁 𑀯𑀸 𑀕𑀡𑁆𑀳𑀦𑁆𑀢𑁄 𑀘 𑀕𑀳𑀡𑀢𑁆𑀣𑀸𑀬 𑀆𑀡𑀸𑀧𑁂𑀦𑁆𑀢𑁄 𑀘 𑀕𑀭𑀼𑀓𑁂 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑀁𑀬𑁂𑀯 𑀢𑀺𑀝𑁆𑀞𑀢𑀺, 𑀊𑀦𑀧𑀸𑀤𑀁 𑀕𑀡𑁆𑀳𑀦𑁆𑀢𑁄 𑀘 𑀕𑀳𑀡𑀢𑁆𑀣𑀸𑀬 𑀆𑀡𑀸𑀧𑁂𑀦𑁆𑀢𑁄 𑀘 𑀮𑀳𑀼𑀓𑁂 𑀣𑀼𑀮𑁆𑀮𑀘𑁆𑀘𑀬𑁂, 𑀤𑀼𑀓𑁆𑀓𑀝𑁂 𑀯𑀸 𑀢𑀺𑀝𑁆𑀞𑀢𑀻𑀢𑀺 𑀏𑀯𑀁 𑀲𑁂𑀲𑀓𑀫𑁆𑀧𑀺 𑀇𑀫𑀁 𑀧𑀤𑀢𑁆𑀢𑀬𑀁. 𑀅𑀢𑁆𑀣𑀲𑀫𑁆𑀪𑀯𑀢𑁄𑀬𑁂𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀲𑀫𑁆𑀪𑀯𑀯𑀲𑁂𑀦𑁂𑀯.

𑁫𑁮𑁧-𑁨. 𑀓𑀣𑀁 𑀓𑀸𑀮𑁂𑀬𑁂𑀯 𑀆𑀧𑀢𑁆𑀢𑀺 𑀲𑀺𑀬𑀸, 𑀦𑁄 𑀯𑀺𑀓𑀸𑀮𑁂, 𑀯𑀺𑀓𑀸𑀮𑁂𑀬𑁂𑀯 𑀆𑀧𑀢𑁆𑀢𑀺 𑀲𑀺𑀬𑀸, 𑀦 𑀘 𑀓𑀸𑀮𑁂, 𑀅𑀢𑁆𑀣𑀸𑀧𑀢𑁆𑀢𑀺 𑀓𑀸𑀮𑁂 𑀘 𑀧𑀓𑀸𑀲𑀺𑀢𑀸 𑀯𑀺𑀓𑀸𑀮𑁂 𑀘, 𑀅𑀢𑁆𑀣𑀸𑀧𑀢𑁆𑀢𑀺 𑀦𑁂𑀯 𑀓𑀸𑀮𑁂 𑀘 𑀧𑀓𑀸𑀲𑀺𑀢𑀸 𑀦𑁂𑀯 𑀯𑀺𑀓𑀸𑀮𑁂 𑀘𑀸𑀢𑀺 𑀬𑁄𑀚𑀦𑀸.

𑁫𑁮𑁬-𑁭. 𑀓𑀸𑀮𑁂 𑀧𑀝𑀺𑀕𑁆𑀕𑀳𑀺𑀢𑀁 𑀓𑀺𑀁 𑀓𑀸𑀮𑁂 𑀓𑀧𑁆𑀧𑀢𑀺 𑀯𑀺𑀓𑀸𑀮𑁂 𑀢𑀼 𑀦𑁄 𑀓𑀧𑁆𑀧𑀢𑀺, 𑀯𑀺𑀓𑀸𑀮𑁂 𑀕𑀳𑀺𑀢𑀁 𑀓𑀺𑀁 𑀯𑀺𑀓𑀸𑀮𑁂 𑀓𑀧𑁆𑀧𑀢𑀺, 𑀦𑁄 𑀓𑀸𑀮𑁂 𑀓𑀧𑁆𑀧𑀢𑀺, 𑀓𑀸𑀮𑁂 𑀘 𑀯𑀺𑀓𑀸𑀮𑁂 𑀘 𑀧𑀝𑀺𑀕𑁆𑀕𑀳𑀺𑀢𑀁 𑀓𑀺𑀁 𑀦𑀸𑀫 𑀓𑀸𑀮𑁂 𑀘 𑀯𑀺𑀓𑀸𑀮𑁂 𑀘 𑀓𑀧𑁆𑀧𑀢𑀺, 𑀓𑀸𑀮𑁂 𑀘 𑀯𑀺𑀓𑀸𑀮𑁂 𑀘 𑀧𑀝𑀺𑀕𑁆𑀕𑀳𑀺𑀢𑀁 𑀓𑀺𑀁 𑀦𑀸𑀫 𑀓𑀸𑀮𑁂 𑀘 𑀯𑀺𑀓𑀸𑀮𑁂 𑀘 𑀦 𑀓𑀧𑁆𑀧𑀢𑀺, 𑀯𑀤 𑀪𑀤𑁆𑀭𑀫𑀼𑀔𑀸𑀢𑀺 𑀬𑁄𑀚𑀦𑀸.

𑁫𑁮𑁯. 𑀯𑀺𑀓𑀸𑀮𑁂𑀬𑁂𑀯 𑀓𑀧𑁆𑀧𑀢𑀺, 𑀅𑀧𑀭𑀚𑁆𑀚𑀼 𑀓𑀸𑀮𑁂𑀧𑀺 𑀦 𑀓𑀧𑁆𑀧𑀢𑀻𑀢𑀺 𑀬𑁄𑀚𑀦𑀸.

𑁫𑁯𑁨. 𑀓𑀼𑀮𑀤𑀽𑀲𑀦𑀓𑀫𑁆𑀫𑀸𑀤𑀺𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀪𑀽𑀢𑀸𑀭𑁄𑀘𑀦𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀯𑀺𑀜𑁆𑀜𑀢𑁆𑀢𑀺𑀓𑀼𑀳𑀦𑀸𑀤𑀻𑀦𑀁 𑀲𑀗𑁆𑀕𑀳𑁄.

𑁫𑁯𑁩-𑁪. 𑀓𑀢𑀫𑀸 𑀆𑀧𑀢𑁆𑀢𑀺 𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀤𑁂𑀲𑁂𑀲𑀼 𑀆𑀧𑀚𑁆𑀚𑀢𑀺, 𑀦 𑀫𑀚𑁆𑀛𑀺𑀫𑁂, 𑀓𑀢𑀫𑀸 𑀆𑀧𑀢𑁆𑀢𑀺 𑀫𑀚𑁆𑀛𑀺𑀫𑁂 𑀧𑀦 𑀤𑁂𑀲𑀲𑁆𑀫𑀺𑀁 𑀆𑀧𑀚𑁆𑀚𑀢𑀺, 𑀦 𑀘 𑀧𑀘𑁆𑀘𑀦𑁆𑀢𑀺𑀫𑁂𑀲𑀼, 𑀓𑀢𑀫𑀸 𑀆𑀧𑀢𑁆𑀢𑀺 𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀘𑁂𑀯 𑀤𑁂𑀲𑁂𑀲𑀼 𑀆𑀧𑀚𑁆𑀚𑀢𑀺 𑀫𑀚𑁆𑀛𑀺𑀫𑁂 𑀘, 𑀓𑀢𑀫𑀸 𑀆𑀧𑀢𑁆𑀢𑀺 𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀘𑁂𑀯 𑀤𑁂𑀲𑁂𑀲𑀼 𑀦 𑀆𑀧𑀚𑁆𑀚𑀢𑀺 𑀦 𑀫𑀚𑁆𑀛𑀺𑀫𑁂 𑀘𑀸𑀢𑀺 𑀬𑁄𑀚𑀦𑀸.

𑁫𑁯𑁬. ‘‘𑀲𑁄 𑀕𑀼𑀡𑀗𑁆𑀕𑀼𑀡𑀼𑀧𑀸𑀳𑀦’’𑀦𑁆𑀢𑀺 𑀧𑀤𑀘𑁆𑀙𑁂𑀤𑁄. 𑀲𑁄 𑀪𑀺𑀓𑁆𑀔𑀽𑀢𑀺 𑀅𑀢𑁆𑀣𑁄.

𑁫𑁯𑁯. 𑀏𑀯𑀁 ‘‘𑀆𑀧𑀚𑁆𑀚𑀢𑀺, 𑀦𑀸𑀧𑀚𑁆𑀚𑀢𑀻’’𑀢𑀺 𑀧𑀤𑀯𑀲𑁂𑀦 𑀧𑀘𑁆𑀘𑀦𑁆𑀢𑀺𑀫𑀘𑀢𑀼𑀓𑁆𑀓𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀦𑁂𑀯 𑀓𑀧𑁆𑀧𑀢𑀺, 𑀦 𑀓𑀧𑁆𑀧𑀢𑀻’’𑀢𑀺 𑀧𑀤𑀯𑀲𑁂𑀦 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀧𑀘𑁆𑀘𑀦𑁆𑀢𑀺𑀫𑁂𑀲𑀽’’𑀢𑀺𑀆𑀤𑀺.

𑁬𑁦𑁧. 𑀯𑀼𑀢𑁆𑀢𑀦𑁆𑀢𑀺 ‘‘𑀕𑀡𑁂𑀦 𑀧𑀜𑁆𑀘𑀯𑀕𑁆𑀕𑁂𑀦𑀸’’𑀢𑀺𑀆𑀤𑀺𑀕𑀸𑀣𑀸𑀬 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁.

𑁬𑁦𑁩. 𑀏𑀯𑀁 𑀯𑀢𑁆𑀢𑀼𑀦𑁆𑀢𑀺 ‘‘𑀦 𑀓𑀧𑁆𑀧𑀢𑀻’’𑀢𑀺 𑀯𑀢𑁆𑀢𑀼𑀁. 𑀧𑀜𑁆𑀘𑀮𑁄𑀡𑀸𑀤𑀺𑀓𑀦𑁆𑀢𑀺 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀮𑁄𑀡𑀸𑀦𑀻’’𑀢𑀺𑀆𑀤𑀺.

𑁬𑁦𑁮. 𑀅𑀦𑀼𑀜𑁆𑀜𑀸𑀢𑀝𑁆𑀞𑀸𑀦𑀲𑁆𑀲 𑀅𑀦𑁆𑀢𑁄 𑀦𑁄 𑀆𑀧𑀚𑁆𑀚𑀢𑀺, 𑀢𑀁 𑀅𑀢𑀺𑀓𑁆𑀓𑀫𑀦𑁆𑀢𑁄 𑀩𑀳𑀺𑀬𑁂𑀯 𑀘 𑀆𑀧𑀚𑁆𑀚𑀢𑀻𑀢𑀺 𑀬𑁄𑀚𑀦𑀸.

𑁬𑁧𑁨. 𑀲𑁂𑀓𑁆𑀔𑀧𑀜𑁆𑀜𑀢𑁆𑀢𑀻𑀢𑀺 𑀲𑁂𑀔𑀺𑀬𑀧𑀜𑁆𑀜𑀢𑁆𑀢𑀺.

𑁬𑁧𑁩. 𑀅𑀕𑀡𑀸𑀢𑀺 𑀅𑀤𑀼𑀢𑀺𑀬𑀸. 𑀏𑀢𑁆𑀣 𑀳𑀺 𑀏𑀓𑀸𑀧𑀺 𑀕𑀡𑁄 𑀦𑀸𑀫.

𑁬𑁧𑁪. 𑀉𑀪𑀬𑀢𑁆𑀣𑀧𑀺 𑀅𑀲𑀸𑀥𑀸𑀭𑀡𑀫𑀸𑀧𑀢𑁆𑀢𑀺𑀦𑁆𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀦𑀺𑀬𑀢𑀸𑀧𑀜𑁆𑀜𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁬𑁧𑁬. 𑀕𑀺𑀮𑀸𑀦𑁄 𑀘 𑀦𑀸𑀧𑀚𑁆𑀚𑀢𑀺, 𑀅𑀕𑀺𑀮𑀸𑀦𑁄 𑀘 𑀦𑀸𑀧𑀚𑁆𑀚𑀢𑀻𑀢𑀺 𑀏𑀯𑀁 𑀉𑀪𑁄𑀧𑀺 𑀦𑀸𑀧𑀚𑁆𑀚𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀢𑀺𑀓𑀸𑀤𑀻𑀲𑀼 𑀤𑀲𑁆𑀲𑀺𑀢𑀸𑀦𑀁 𑀧𑀤𑀸𑀦𑀁 𑀘𑀢𑀼𑀓𑁆𑀓𑀸𑀤𑀺𑀤𑀲𑁆𑀲𑀦𑀯𑀲𑁂𑀦 𑀧𑀼𑀦𑀧𑁆𑀧𑀼𑀦𑀁 𑀕𑀳𑀡𑀁.

𑁬𑁧𑁮. ‘‘𑀆𑀧𑀚𑁆𑀚𑀢𑀺 𑀅𑀕𑀺𑀮𑀸𑀦𑁄𑀯𑀸’’𑀢𑀺 𑀧𑀤𑀘𑁆𑀙𑁂𑀤𑁄.

𑀘𑀢𑀼𑀓𑁆𑀓𑀓𑀣𑀸𑀯𑀡𑁆𑀡𑀦𑀸.

𑁬𑁨𑁦. ‘‘𑀕𑀭𑀼𑀣𑀼𑀮𑁆𑀮𑀘𑁆𑀘𑀬’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀕𑀭𑀼’’𑀦𑁆𑀢𑀺 𑀦𑀺𑀕𑁆𑀕𑀳𑀻𑀢𑀸𑀕𑀫𑁄.

𑁬𑁨𑁧. 𑀧𑀜𑁆𑀘 𑀓𑀣𑀺𑀦𑀸𑀦𑀺𑀲𑀁𑀲𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀬𑁂𑀯.

𑁬𑁨𑁬. 𑀅𑀕𑁆𑀕𑀺𑀲𑀢𑁆𑀣𑀦𑀔𑀓𑁆𑀓𑀦𑁆𑀢𑀦𑁆𑀢𑀺 𑀅𑀕𑁆𑀕𑀺𑀲𑀢𑁆𑀣𑀦𑀔𑁂𑀳𑀺 𑀅𑀓𑁆𑀓𑀦𑁆𑀢𑀁 𑀨𑀼𑀝𑁆𑀞𑀁, 𑀧𑀳𑀝𑀦𑁆𑀢𑀺 𑀅𑀢𑁆𑀣𑁄. 𑀅𑀩𑀻𑀚𑀦𑁆𑀢𑀺 𑀦𑁄𑀩𑀻𑀚𑀁. 𑀉𑀩𑁆𑀩𑀝𑁆𑀝𑀩𑀻𑀚𑀓𑀦𑁆𑀢𑀺 𑀦𑀺𑀩𑁆𑀩𑀝𑁆𑀝𑀩𑀻𑀚𑀓𑀁.

𑁬𑁨𑁮. 𑀧𑀯𑀸𑀭𑀡𑀸𑀧𑀻𑀢𑀺 𑀧𑀝𑀺𑀓𑁆𑀔𑁂𑀧𑀧𑀯𑀸𑀭𑀡𑀸𑀧𑀺. 𑀑𑀤𑀦𑀸𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀢𑁆𑀢𑀼𑀓𑀼𑀫𑁆𑀫𑀸𑀲𑀫𑀘𑁆𑀙𑀫𑀁𑀲𑀸𑀦𑀁 𑀕𑀳𑀡𑀁. 𑀓𑀸𑀬𑀸𑀤𑀺𑀕𑀳𑀡𑁂𑀦𑀸𑀢𑀺 𑀓𑀸𑀬𑁂𑀦 𑀯𑀸 𑀓𑀸𑀬𑀧𑀝𑀺𑀩𑀤𑁆𑀥𑁂𑀦 𑀯𑀸 𑀕𑀳𑀡𑁂𑀦. ‘‘𑀤𑀸𑀢𑀼𑀓𑀸𑀫𑀸𑀪𑀺𑀳𑀸𑀭𑁄 𑀘, 𑀳𑀢𑁆𑀣𑀧𑀸𑀲𑁂𑀭𑀡𑀓𑁆𑀔𑀫’’𑀦𑁆𑀢𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀅𑀗𑁆𑀕𑁂𑀳𑀺 𑀲𑀤𑁆𑀥𑀺𑀁 𑀢𑁂𑀲𑀁 𑀤𑁆𑀯𑀺𑀦𑁆𑀦𑀫𑁂𑀓𑀁 𑀕𑀳𑁂𑀢𑁆𑀯𑀸 𑀧𑀝𑀺𑀕𑁆𑀕𑀳𑀡𑀸 𑀧𑀜𑁆𑀘𑁂𑀯 𑀳𑁄𑀦𑁆𑀢𑀺.

𑁬𑁨𑁯-𑁩𑁦. 𑀯𑀺𑀦𑀬𑀜𑁆𑀜𑀼𑀓𑀲𑁆𑀫𑀺𑀦𑁆𑀢𑀺 𑀯𑀺𑀦𑀬𑀥𑀭𑁂 𑀧𑀼𑀕𑁆𑀕𑀮𑁂. 𑀲𑀓𑀜𑁆𑀘 𑀲𑀻𑀮𑀦𑁆𑀢𑀺 𑀅𑀢𑁆𑀢𑀦𑁄 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀜𑁆𑀘. 𑀲𑀼𑀭𑀓𑁆𑀔𑀺𑀢𑀁 𑀳𑁄𑀢𑀻𑀢𑀺 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀸𑀦𑀁 𑀯𑀺𑀚𑀸𑀦𑀦𑁆𑀢𑀢𑀸𑀬 𑀅𑀲𑁂𑀯𑀺𑀢𑀩𑁆𑀩𑀁 𑀧𑀳𑀸𑀬 𑀲𑁂𑀯𑀺𑀢𑀩𑁆𑀩𑀁𑀬𑁂𑀯 𑀲𑁂𑀯𑀦𑀯𑀲𑁂𑀦 𑀲𑀼𑀝𑁆𑀞𑀼 𑀭𑀓𑁆𑀔𑀺𑀢𑀁 𑀳𑁄𑀢𑀺. 𑀓𑀼𑀓𑁆𑀓𑀼𑀘𑁆𑀘𑀫𑀜𑁆𑀜𑀲𑁆𑀲 𑀦𑀺𑀭𑀸𑀓𑀭𑁄𑀢𑀻𑀢𑀺 𑀅𑀜𑁆𑀜𑀲𑁆𑀲 𑀲𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀯𑀺𑀲𑀬𑁂 𑀉𑀧𑁆𑀧𑀦𑁆𑀦𑀁 𑀓𑀼𑀓𑁆𑀓𑀼𑀘𑁆𑀘𑀁 𑀦𑀺𑀯𑀸𑀭𑁂𑀢𑀺. 𑀯𑀺𑀲𑀸𑀭𑀤𑁄 𑀪𑀸𑀲𑀢𑀺 𑀲𑀗𑁆𑀖𑀫𑀚𑁆𑀛𑁂𑀢𑀺 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀸𑀦𑀁 𑀯𑀺𑀦𑀺𑀘𑁆𑀙𑀬𑀓𑀣𑀸𑀬 𑀉𑀧𑁆𑀧𑀦𑁆𑀦𑀸𑀬 𑀦𑀺𑀭𑀸𑀲𑀗𑁆𑀓𑁄 𑀦𑀺𑀩𑁆𑀪𑀬𑁄 𑀯𑁄𑀳𑀭𑀢𑀺. 𑀯𑁂𑀭𑀺𑀪𑀺𑀓𑁆𑀔𑀽𑀢𑀺 𑀅𑀢𑁆𑀢𑀧𑀘𑁆𑀘𑀢𑁆𑀣𑀺𑀓𑁂 𑀧𑀼𑀕𑁆𑀕𑀮𑁂. 𑀥𑀫𑁆𑀫𑀲𑁆𑀲 𑀘𑁂𑀯 𑀞𑀺𑀢𑀺𑀬𑀸 𑀧𑀯𑀢𑁆𑀢𑁄𑀢𑀺 ‘‘𑀯𑀺𑀦𑀬𑁄 𑀦𑀸𑀫 𑀲𑀸𑀲𑀦𑀲𑁆𑀲 𑀆𑀬𑀼, 𑀯𑀺𑀦𑀬𑁂 𑀞𑀺𑀢𑁂 𑀲𑀸𑀲𑀦𑀁 𑀞𑀺𑀢𑀁 𑀳𑁄𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸; 𑀤𑀻. 𑀦𑀺. 𑀅𑀝𑁆𑀞. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸; 𑀔𑀼. 𑀧𑀸. 𑀅𑀝𑁆𑀞. 𑁫.𑀫𑀗𑁆𑀕𑀮𑀲𑀼𑀢𑁆𑀢𑀯𑀡𑁆𑀡𑀦𑀸; 𑀣𑁂𑀭𑀕𑀸. 𑀅𑀝𑁆𑀞. 𑁧.𑁨𑁫𑁧) 𑀯𑀘𑀦𑀢𑁄 𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀬𑀸 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺. 𑀢𑀲𑁆𑀫𑀸 𑀓𑀸𑀭𑀡𑀸. 𑀢𑀢𑁆𑀣 𑀯𑀺𑀦𑀬𑀜𑁆𑀜𑀼𑀪𑀸𑀯𑁂. 𑀥𑀻𑀭𑁄 𑀧𑀜𑁆𑀜𑀯𑀸 𑀪𑀺𑀓𑁆𑀔𑀼.

𑀧𑀜𑁆𑀘𑀓𑀓𑀣𑀸𑀯𑀡𑁆𑀡𑀦𑀸.

𑁬𑁩𑁧-𑁨. 𑀙𑀴𑀪𑀺𑀜𑁆𑀜𑁂𑀦𑀸𑀢𑀺 𑀙 𑀅𑀪𑀺𑀜𑁆𑀜𑀸 𑀏𑀢𑀲𑁆𑀲𑀸𑀢𑀺 𑀙𑀴𑀪𑀺𑀜𑁆𑀜𑁄, 𑀢𑁂𑀦. 𑀅𑀢𑀺𑀓𑁆𑀓𑀦𑁆𑀢𑀧𑀫𑀸𑀡𑀁 𑀫𑀜𑁆𑀘𑀧𑀻𑀞𑀁, 𑀅𑀢𑀺𑀓𑁆𑀓𑀦𑁆𑀢𑀧𑀫𑀸𑀡𑀁 𑀦𑀺𑀲𑀻𑀤𑀦𑀜𑁆𑀘 𑀢𑀣𑀸 𑀅𑀢𑀺𑀓𑁆𑀓𑀦𑁆𑀢𑀧𑀫𑀸𑀡𑀁 𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀺𑀯𑀲𑁆𑀲𑀲𑀸𑀝𑀺𑀓𑀘𑀻𑀯𑀭𑀜𑁆𑀘 𑀲𑀼𑀕𑀢𑀲𑁆𑀲 𑀘𑀻𑀯𑀭𑁂 𑀧𑀫𑀸𑀡𑀺𑀓𑀘𑀻𑀯𑀭𑀦𑁆𑀢𑀺 𑀙.

𑁬𑁩𑁩-𑁪. 𑀅𑀜𑁆𑀜𑀸𑀡𑀜𑁆𑀘 𑀓𑀼𑀓𑁆𑀓𑀼𑀘𑁆𑀘𑀜𑁆𑀘 𑀅𑀜𑁆𑀜𑀸𑀡𑀓𑀼𑀓𑁆𑀓𑀼𑀘𑁆𑀘𑀸, 𑀢𑁂𑀳𑀺, 𑀅𑀜𑁆𑀜𑀸𑀡𑀢𑀸𑀬 𑀘𑁂𑀯 𑀓𑀼𑀓𑁆𑀓𑀼𑀘𑁆𑀘𑀧𑀓𑀢𑀢𑀸𑀬 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀧𑀭𑀻𑀢𑀸𑀬 𑀲𑀜𑁆𑀜𑀸𑀬 𑀓𑀧𑁆𑀧𑀺𑀬𑁂 𑀅𑀓𑀧𑁆𑀧𑀺𑀬𑀲𑀜𑁆𑀜𑀸𑀬, 𑀅𑀓𑀧𑁆𑀧𑀺𑀬𑁂 𑀓𑀧𑁆𑀧𑀺𑀬𑀲𑀜𑁆𑀜𑀸𑀬.

𑀢𑀢𑁆𑀣 𑀓𑀣𑀁 𑀅𑀮𑀚𑁆𑀚𑀺𑀢𑀸𑀬 𑀆𑀧𑀚𑁆𑀚𑀢𑀺? 𑀅𑀓𑀧𑁆𑀧𑀺𑀬𑀪𑀸𑀯𑀁 𑀚𑀸𑀦𑀦𑁆𑀢𑁄𑀬𑁂𑀯 𑀫𑀤𑁆𑀤𑀺𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑀁 𑀓𑀭𑁄𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸). 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀲𑀜𑁆𑀘𑀺𑀘𑁆𑀘 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺;

𑀆𑀧𑀢𑁆𑀢𑀺𑀁 𑀧𑀭𑀺𑀕𑀽𑀳𑀢𑀺;

𑀅𑀕𑀢𑀺𑀕𑀫𑀦𑀜𑁆𑀘 𑀕𑀘𑁆𑀙𑀢𑀺;

𑀏𑀤𑀺𑀲𑁄 𑀯𑀼𑀘𑁆𑀘𑀢𑀺 𑀅𑀮𑀚𑁆𑀚𑀻 𑀧𑀼𑀕𑁆𑀕𑀮𑁄’’𑀢𑀺. (𑀧𑀭𑀺. 𑁩𑁫𑁯);

𑀓𑀣𑀁 𑀅𑀜𑁆𑀜𑀸𑀡𑀢𑀸𑀬 𑀆𑀧𑀚𑁆𑀚𑀢𑀺? 𑀅𑀜𑁆𑀜𑀸𑀡𑀧𑀼𑀕𑁆𑀕𑀮𑁄 𑀫𑀦𑁆𑀤𑁄 𑀫𑁄𑀫𑀽𑀳𑁄 𑀓𑀢𑁆𑀢𑀩𑁆𑀩𑀸𑀓𑀢𑁆𑀢𑀩𑁆𑀩𑀁 𑀅𑀚𑀸𑀦𑀦𑁆𑀢𑁄 𑀅𑀓𑀢𑁆𑀢𑀩𑁆𑀩𑀁 𑀓𑀭𑁄𑀢𑀺, 𑀓𑀢𑁆𑀢𑀩𑁆𑀩𑀁 𑀯𑀺𑀭𑀸𑀥𑁂𑀢𑀺. 𑀏𑀯𑀁 𑀅𑀜𑁆𑀜𑀸𑀡𑀢𑀸𑀬 𑀆𑀧𑀚𑁆𑀚𑀢𑀺.

𑀓𑀣𑀁 𑀓𑀼𑀓𑁆𑀓𑀼𑀘𑁆𑀘𑀧𑀓𑀢𑀢𑀸𑀬 𑀆𑀧𑀚𑁆𑀚𑀢𑀺? 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀁 𑀦𑀺𑀲𑁆𑀲𑀸𑀬 𑀓𑀼𑀓𑁆𑀓𑀼𑀘𑁆𑀘𑁂 𑀉𑀧𑁆𑀧𑀦𑁆𑀦𑁂 𑀯𑀺𑀦𑀬𑀥𑀭𑀁 𑀧𑀼𑀘𑁆𑀙𑀺𑀢𑁆𑀯𑀸 𑀓𑀧𑁆𑀧𑀺𑀬𑀁 𑀘𑁂, 𑀓𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀅𑀓𑀧𑁆𑀧𑀺𑀬𑀁 𑀘𑁂, 𑀦 𑀓𑀢𑁆𑀢𑀩𑁆𑀩𑀁, 𑀅𑀬𑀁 𑀧𑀦 ‘‘𑀯𑀝𑁆𑀝𑀢𑀻’’𑀢𑀺 𑀫𑀤𑁆𑀤𑀺𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑀢𑀺𑀬𑁂𑀯. 𑀏𑀯𑀁 𑀓𑀼𑀓𑁆𑀓𑀼𑀘𑁆𑀘𑀧𑀓𑀢𑀢𑀸𑀬 𑀆𑀧𑀚𑁆𑀚𑀢𑀺.

𑀓𑀣𑀁 𑀓𑀧𑁆𑀧𑀺𑀬𑁂 𑀅𑀓𑀧𑁆𑀧𑀺𑀬𑀲𑀜𑁆𑀜𑀸𑀬 𑀆𑀧𑀚𑁆𑀚𑀢𑀺? 𑀲𑀽𑀓𑀭𑀫𑀁𑀲𑀁 ‘‘𑀅𑀘𑁆𑀙𑀫𑀁𑀲’’𑀦𑁆𑀢𑀺 𑀔𑀸𑀤𑀢𑀺, 𑀓𑀸𑀮𑁂 𑀯𑀺𑀓𑀸𑀮𑀲𑀜𑁆𑀜𑀸𑀬 𑀪𑀼𑀜𑁆𑀚𑀢𑀺. 𑀏𑀯𑀁 𑀓𑀧𑁆𑀧𑀺𑀬𑁂 𑀅𑀓𑀧𑁆𑀧𑀺𑀬𑀲𑀜𑁆𑀜𑀸𑀬 𑀆𑀧𑀚𑁆𑀚𑀢𑀺.

𑀓𑀣𑀁 𑀅𑀓𑀧𑁆𑀧𑀺𑀬𑁂 𑀓𑀧𑁆𑀧𑀺𑀬𑀲𑀜𑁆𑀜𑀸𑀬 𑀆𑀧𑀚𑁆𑀚𑀢𑀺? 𑀅𑀘𑁆𑀙𑀫𑀁𑀲𑀁 ‘‘𑀲𑀽𑀓𑀭𑀫𑀁𑀲’’𑀦𑁆𑀢𑀺 𑀔𑀸𑀤𑀢𑀺, 𑀯𑀺𑀓𑀸𑀮𑁂 𑀓𑀸𑀮𑀲𑀜𑁆𑀜𑀸𑀬 𑀪𑀼𑀜𑁆𑀚𑀢𑀺. 𑀏𑀯𑀁 𑀅𑀓𑀧𑁆𑀧𑀺𑀬𑁂 𑀓𑀧𑁆𑀧𑀺𑀬𑀲𑀜𑁆𑀜𑀸𑀬 𑀆𑀧𑀚𑁆𑀚𑀢𑀺.

𑀓𑀣𑀁 𑀲𑀢𑀺𑀲𑀫𑁆𑀫𑁄𑀲𑀸𑀬 𑀆𑀧𑀚𑁆𑀚𑀢𑀺? 𑀲𑀳𑀲𑁂𑀬𑁆𑀬𑀘𑀻𑀯𑀭𑀯𑀺𑀧𑁆𑀧𑀯𑀸𑀲𑀸𑀤𑀻𑀦𑀺 𑀲𑀢𑀺𑀲𑀫𑁆𑀫𑁄𑀲𑀸𑀬 𑀆𑀧𑀚𑁆𑀚𑀢𑀺.

𑁬𑁩𑁫-𑁮. ‘‘𑀪𑀺𑀓𑁆𑀔𑀼𑀦𑀸 𑀉𑀧𑀝𑁆𑀞𑀧𑁂𑀢𑀩𑁆𑀩𑁄’’𑀢𑀺 𑀧𑀤𑀘𑁆𑀙𑁂𑀤𑁄. 𑀥𑀫𑁆𑀫𑀘𑀓𑁆𑀔𑀼𑀦𑀸𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀲𑀗𑁆𑀔𑀸𑀢𑁄 𑀧𑀝𑀺𑀧𑀢𑁆𑀢𑀺𑀥𑀫𑁆𑀫𑁄𑀯 𑀘𑀓𑁆𑀔𑀼 𑀏𑀢𑀲𑁆𑀲𑀸𑀢𑀺 𑀥𑀫𑁆𑀫𑀘𑀓𑁆𑀔𑀼, 𑀢𑁂𑀦 𑀙𑀳𑀺 𑀅𑀗𑁆𑀕𑁂𑀳𑀺 𑀬𑀼𑀢𑁆𑀢𑁂𑀦 𑀥𑀫𑁆𑀫𑀘𑀓𑁆𑀔𑀼𑀦𑀸 𑀧𑀦 𑀪𑀺𑀓𑁆𑀔𑀼𑀦𑀸 𑀉𑀧𑀲𑀫𑁆𑀧𑀸𑀤𑀦𑀸 𑀓𑀸𑀢𑀩𑁆𑀩𑀸, 𑀦𑀺𑀲𑁆𑀲𑀬𑁄 𑀘𑁂𑀯 𑀤𑀸𑀢𑀩𑁆𑀩𑁄, 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀅𑀦𑀸𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀕𑀭𑀼𑀁 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀮𑀳𑀼𑀁 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀻𑀢𑀺 𑀬𑁄𑀚𑀦𑀸. 𑀅𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀪𑀬𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀸𑀦𑀺 𑀯𑀺𑀢𑁆𑀣𑀸𑀭𑀸 𑀲𑁆𑀯𑀸𑀕𑀢𑀸𑀦𑀺 𑀪𑀯𑀦𑁆𑀢𑀺, 𑀅𑀢𑁆𑀣𑀢𑁄 𑀲𑀼𑀯𑀺𑀪𑀢𑁆𑀢𑀸𑀦𑀺 𑀪𑀯𑀦𑁆𑀢𑀺, 𑀲𑀼𑀢𑁆𑀢𑀲𑁄 𑀅𑀦𑀼𑀩𑁆𑀬𑀜𑁆𑀚𑀦𑀲𑁄 𑀲𑀼𑀯𑀺𑀦𑀺𑀘𑁆𑀙𑀺𑀢𑀸𑀦𑀺 𑀪𑀯𑀦𑁆𑀢𑀺, 𑀤𑀲𑀯𑀲𑁆𑀲𑁄 𑀯𑀸 𑀳𑁄𑀢𑀺, 𑀅𑀢𑀺𑀭𑁂𑀓𑀤𑀲𑀯𑀲𑁆𑀲𑁄 𑀯𑀸𑀢𑀺 𑀬𑁄𑀚𑀦𑀸.

𑀙𑀓𑁆𑀓𑀓𑀣𑀸𑀯𑀡𑁆𑀡𑀦𑀸.

𑁬𑁩𑁯. 𑀲𑀢𑁆𑀢 𑀲𑀸𑀫𑀻𑀘𑀺𑀬𑁄 𑀯𑀼𑀢𑁆𑀢𑀸𑀢𑀺 ‘‘𑀲𑁄 𑀘 𑀪𑀺𑀓𑁆𑀔𑀼 𑀅𑀦𑀩𑁆𑀪𑀺𑀢𑁄, 𑀢𑁂 𑀘 𑀪𑀺𑀓𑁆𑀔𑀽 𑀕𑀸𑀭𑀬𑁆𑀳𑀸, 𑀅𑀬𑀁 𑀢𑀢𑁆𑀣 𑀲𑀸𑀫𑀻𑀘𑀺, 𑀬𑀼𑀜𑁆𑀚𑀦𑁆𑀢𑀸𑀬𑀲𑁆𑀫𑀦𑁆𑀢𑁄 𑀲𑀓𑀁, 𑀫𑀸 𑀯𑁄 𑀲𑀓𑀁 𑀯𑀺𑀦𑀲𑁆𑀲𑀸𑀢𑀺 𑀅𑀬𑀁 𑀢𑀢𑁆𑀣 𑀲𑀸𑀫𑀻𑀘𑀺, 𑀅𑀬𑀁 𑀢𑁂 𑀪𑀺𑀓𑁆𑀔𑀼 𑀧𑀢𑁆𑀢𑁄 𑀬𑀸𑀯 𑀪𑁂𑀤𑀦𑀸𑀬 𑀥𑀸𑀭𑁂𑀢𑀩𑁆𑀩𑁄𑀢𑀺, 𑀅𑀬𑀁 𑀢𑀢𑁆𑀣 𑀲𑀸𑀫𑀻𑀘𑀺, 𑀢𑀢𑁄 𑀦𑀻𑀳𑀭𑀺𑀢𑁆𑀯𑀸 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀲𑀁𑀯𑀺𑀪𑀚𑀺𑀢𑀩𑁆𑀩𑀁, 𑀅𑀬𑀁 𑀢𑀢𑁆𑀣 𑀲𑀸𑀫𑀻𑀘𑀺, 𑀅𑀜𑁆𑀜𑀸𑀢𑀩𑁆𑀩𑀁 𑀧𑀭𑀺𑀧𑀼𑀘𑁆𑀙𑀺𑀢𑀩𑁆𑀩𑀁 𑀧𑀭𑀺𑀧𑀜𑁆𑀳𑀺𑀢𑀩𑁆𑀩𑀁, 𑀅𑀬𑀁 𑀢𑀢𑁆𑀣 𑀲𑀸𑀫𑀻𑀘𑀺, 𑀬𑀲𑁆𑀲 𑀪𑀯𑀺𑀲𑁆𑀲𑀢𑀺, 𑀲𑁄 𑀳𑀭𑀺𑀲𑁆𑀲𑀢𑀻𑀢𑀺, 𑀅𑀬𑀁 𑀢𑀢𑁆𑀣 𑀲𑀸𑀫𑀻𑀘𑀻’’𑀢𑀺 𑀙 𑀲𑀸𑀫𑀻𑀘𑀺𑀬𑁄 𑀪𑀺𑀓𑁆𑀔𑀼𑀧𑀸𑀢𑀺𑀫𑁄𑀓𑁆𑀔𑁂𑀯𑀼𑀢𑁆𑀢𑀸, ‘‘𑀲𑀸 𑀘 𑀪𑀺𑀓𑁆𑀔𑀼𑀦𑀻 𑀅𑀦𑀩𑁆𑀪𑀺𑀢𑀸, 𑀢𑀸 𑀘 𑀪𑀺𑀓𑁆𑀔𑀼𑀦𑀺𑀬𑁄 𑀕𑀸𑀭𑀬𑁆𑀳𑀸, 𑀅𑀬𑀁 𑀢𑀢𑁆𑀣 𑀲𑀸𑀫𑀻𑀘𑀻’’𑀢𑀺 𑀪𑀺𑀓𑁆𑀔𑀼𑀦𑀺𑀧𑀸𑀢𑀺𑀫𑁄𑀓𑁆𑀔𑁂 𑀯𑀼𑀢𑁆𑀢𑀸𑀬 𑀲𑀤𑁆𑀥𑀺𑀁 𑀲𑀢𑁆𑀢 𑀲𑀸𑀫𑀻𑀘𑀺𑀬𑁄 𑀯𑀼𑀢𑁆𑀢𑀸. 𑀲𑀢𑁆𑀢𑁂𑀯 𑀲𑀫𑀣𑀸𑀧𑀺 𑀘𑀸𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑀸𑀤𑀺𑀲𑀫𑀣𑀸𑀧𑀺 𑀲𑀢𑁆𑀢𑁂𑀯 𑀯𑀼𑀢𑁆𑀢𑀸. 𑀧𑀜𑁆𑀜𑀢𑁆𑀢𑀸𑀧𑀢𑁆𑀢𑀺𑀬𑁄 𑀲𑀢𑁆𑀢𑀸𑀢𑀺 𑀧𑀸𑀭𑀸𑀚𑀺𑀓𑀸𑀤𑀬𑁄 𑀧𑀜𑁆𑀜𑀢𑁆𑀢𑀸𑀧𑀢𑁆𑀢𑀺𑀬𑁄 𑀲𑀢𑁆𑀢 𑀯𑀼𑀢𑁆𑀢𑀸. 𑀲𑀢𑁆𑀢𑀩𑁄𑀚𑁆𑀛𑀗𑁆𑀕𑀤𑀲𑁆𑀲𑀺𑀦𑀸𑀢𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀬𑁄 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀬𑀸𑀣𑀸𑀯𑀢𑁄 𑀧𑀲𑁆𑀲𑀦𑁆𑀢𑁂𑀦 𑀪𑀕𑀯𑀢𑀸.

𑀲𑀢𑁆𑀢𑀓𑀓𑀣𑀸𑀯𑀡𑁆𑀡𑀦𑀸.

𑁬𑁪𑁦-𑁧. 𑀇𑀥 𑀓𑀼𑀮𑀤𑀽𑀲𑀓𑁄 𑀪𑀺𑀓𑁆𑀔𑀼 𑀆𑀚𑀻𑀯𑀲𑁆𑀲𑁂𑀯 𑀓𑀸𑀭𑀡𑀸 𑀧𑀼𑀧𑁆𑀨𑁂𑀦, 𑀨𑀮𑁂𑀦, 𑀘𑀼𑀡𑁆𑀡𑁂𑀦, 𑀫𑀢𑁆𑀢𑀺𑀓𑀸𑀬, 𑀤𑀦𑁆𑀢𑀓𑀝𑁆𑀞𑁂𑀳𑀺, 𑀯𑁂𑀴𑀼𑀬𑀸, 𑀯𑁂𑀚𑁆𑀚𑀺𑀓𑀸𑀬, 𑀚𑀗𑁆𑀖𑀧𑁂𑀲𑀦𑀺𑀓𑁂𑀦𑀸𑀢𑀺 𑀇𑀫𑁂𑀳𑀺 𑀅𑀝𑁆𑀞𑀳𑀺 𑀆𑀓𑀸𑀭𑁂𑀳𑀺 𑀓𑀼𑀮𑀸𑀦𑀺 𑀤𑀽𑀲𑁂𑀢𑀻𑀢𑀺 𑀬𑁄𑀚𑀦𑀸. ‘‘𑀧𑀼𑀧𑁆𑀨𑁂𑀦𑀸’’𑀢𑀺𑀆𑀤𑀺𑀦𑀸 𑀧𑀼𑀧𑁆𑀨𑀸𑀤𑀺𑀦𑀸 𑀤𑀸𑀦𑀫𑁂𑀯 𑀉𑀧𑀮𑀓𑁆𑀔𑀡𑀢𑁄 𑀤𑀲𑁆𑀲𑁂𑀢𑀺. 𑀧𑀼𑀧𑁆𑀨𑁂𑀦𑀸𑀢𑀺 𑀧𑀼𑀧𑁆𑀨𑀤𑀸𑀦𑁂𑀦𑀸𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀧𑀼𑀧𑁆𑀨𑀤𑀸𑀦𑀸𑀤𑀬𑁄 𑀓𑀼𑀮𑀤𑀽𑀲𑀦𑁂 𑀯𑀼𑀢𑁆𑀢𑀸.

𑁬𑁪𑁨-𑁫. ‘‘𑀅𑀝𑁆𑀞𑀥𑀸𑀦𑀢𑀺𑀭𑀺𑀢𑁆𑀢𑀸𑀧𑀺, 𑀅𑀢𑀺𑀭𑀺𑀢𑁆𑀢𑀸𑀧𑀺 𑀅𑀝𑁆𑀞𑀥𑀸’’𑀢𑀺𑀤𑁆𑀯𑀻𑀲𑀼 𑀅𑀝𑁆𑀞𑀓𑁂𑀲𑀼 𑀅𑀝𑁆𑀞 𑀅𑀦𑀢𑀺𑀭𑀺𑀢𑁆𑀢𑁂 𑀢𑀸𑀯 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀓𑀧𑁆𑀧𑀺𑀬𑀓𑀢𑀜𑁆𑀘𑁂𑀯𑀸’’𑀢𑀺𑀆𑀤𑀺. 𑀕𑀺𑀮𑀸𑀦𑀸𑀦𑀢𑀺𑀭𑀺𑀢𑁆𑀢𑀓𑀦𑁆𑀢𑀺 𑀦𑀺𑀤𑁆𑀤𑀺𑀝𑁆𑀞𑀸 𑀇𑀫𑁂 𑀅𑀝𑁆𑀞𑁂𑀯 𑀅𑀦𑀢𑀺𑀭𑀺𑀢𑁆𑀢𑀓𑀸 𑀜𑁂𑀬𑁆𑀬𑀸𑀢𑀺 𑀬𑁄𑀚𑀦𑀸. 𑀅𑀓𑀧𑁆𑀧𑀺𑀬𑀓𑀢𑀸𑀤𑀬𑁄 𑀧𑀯𑀸𑀭𑀡𑀲𑀺𑀓𑁆𑀔𑀸𑀧𑀤𑀓𑀣𑀸𑀯𑀡𑁆𑀡𑀦𑀸𑀬 𑀯𑀼𑀢𑁆𑀢𑀸.

𑁬𑁪𑁬. 𑀜𑀸𑀢𑀜𑀢𑁆𑀢𑀺𑀲𑀽𑀢𑀺 𑀜𑀸𑀢𑀤𑀼𑀓𑁆𑀓𑀝𑀁, 𑀜𑀢𑁆𑀢𑀺𑀤𑀼𑀓𑁆𑀓𑀝𑀜𑁆𑀘. 𑀧𑀝𑀺𑀲𑀸𑀯𑀦𑁂𑀢𑀺 𑀧𑀝𑀺𑀲𑁆𑀲𑀯𑁂. 𑀅𑀝𑁆𑀞𑀤𑀼𑀓𑁆𑀓𑀝𑀸𑀦𑀁 𑀯𑀺𑀦𑀺𑀘𑁆𑀙𑀬𑁄 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀓𑀣𑀸𑀯𑀡𑁆𑀡𑀦𑀸𑀬 𑀯𑀼𑀢𑁆𑀢𑁄.

𑁬𑁪𑁮-𑁯. 𑀏𑀳𑀺𑀪𑀺𑀓𑁆𑀔𑀽𑀧𑀲𑀫𑁆𑀧𑀤𑀸𑀢𑀺 𑀬𑀲𑀓𑀼𑀮𑀧𑀼𑀢𑁆𑀢𑀸𑀤𑀻𑀦𑀁 ‘‘𑀏𑀳𑀺 𑀪𑀺𑀓𑁆𑀔𑀽’’𑀢𑀺 𑀯𑀘𑀦𑁂𑀦 𑀪𑀕𑀯𑀢𑀸 𑀤𑀺𑀦𑁆𑀦𑀉𑀧𑀲𑀫𑁆𑀧𑀤𑀸. 𑀲𑀭𑀡𑀕𑀫𑀦𑁂𑀦 𑀘𑀸𑀢𑀺 𑀧𑀞𑀫𑀩𑁄𑀥𑀺𑀬𑀁 𑀢𑀻𑀳𑀺 𑀲𑀭𑀡𑀕𑀫𑀦𑁂𑀳𑀺 𑀅𑀦𑀼𑀜𑁆𑀜𑀸𑀢𑀉𑀧𑀲𑀫𑁆𑀧𑀤𑀸. 𑀧𑀜𑁆𑀳𑀸𑀩𑁆𑀬𑀸𑀓𑀭𑀡𑁄𑀯𑀸𑀤𑀸𑀢𑀺 𑀲𑁄𑀧𑀸𑀓𑀲𑁆𑀲 𑀧𑀜𑁆𑀳𑀸𑀩𑁆𑀬𑀸𑀓𑀭𑀡𑁄𑀧𑀲𑀫𑁆𑀧𑀤𑀸, 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀤𑀺𑀦𑁆𑀦𑀑𑀯𑀸𑀤𑀧𑀝𑀺𑀕𑁆𑀕𑀳𑀡𑁄𑀧𑀲𑀫𑁆𑀧𑀤𑀸 𑀘. 𑀕𑀭𑀼𑀥𑀫𑁆𑀫𑀧𑀝𑀺𑀕𑁆𑀕𑀳𑁄𑀢𑀺 𑀫𑀳𑀸𑀧𑀚𑀸𑀧𑀢𑀺𑀬𑀸 𑀕𑁄𑀢𑀫𑀺𑀬𑀸 𑀅𑀦𑀼𑀜𑁆𑀜𑀸𑀢𑀕𑀭𑀼𑀥𑀫𑁆𑀫𑀧𑀝𑀺𑀕𑁆𑀕𑀳𑀡𑁄𑀧𑀲𑀫𑁆𑀧𑀤𑀸.

𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀓𑀫𑁆𑀫𑁂𑀦𑀸𑀢𑀺 𑀇𑀤𑀸𑀦𑀺 𑀪𑀺𑀓𑁆𑀔𑀼𑀉𑀧𑀲𑀫𑁆𑀧𑀤𑀸. 𑀅𑀝𑁆𑀞𑀯𑀸𑀘𑀺𑀓𑀸𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀲𑀦𑁆𑀢𑀺𑀓𑁂 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀓𑀫𑁆𑀫𑁂𑀦, 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀓𑀫𑁆𑀫𑁂𑀦𑀸𑀢𑀺 𑀅𑀝𑁆𑀞𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 𑀪𑀺𑀓𑁆𑀔𑀼𑀦𑀻𑀦𑀁 𑀉𑀧𑀲𑀫𑁆𑀧𑀤𑀸 𑀅𑀝𑁆𑀞𑀯𑀸𑀘𑀺𑀓𑀸 𑀦𑀸𑀫. 𑀤𑀽𑀢𑁂𑀦 𑀪𑀺𑀓𑁆𑀔𑀼𑀦𑀻𑀦𑀦𑁆𑀢𑀺 𑀅𑀟𑁆𑀠𑀓𑀸𑀲𑀺𑀬𑀸 𑀕𑀡𑀺𑀓𑀸𑀬 𑀅𑀦𑀼𑀜𑁆𑀜𑀸𑀢𑀸 𑀪𑀺𑀓𑁆𑀔𑀼𑀦𑀻𑀦𑀁 𑀤𑀽𑀢𑁂𑀦 𑀉𑀧𑀲𑀫𑁆𑀧𑀤𑀸.

𑁬𑁫𑁦. 𑀲𑀼𑀤𑁆𑀥𑀤𑀺𑀝𑁆𑀞𑀺𑀦𑀸𑀢𑀺 𑀲𑀼𑀝𑁆𑀞𑀼 𑀲𑀯𑀸𑀲𑀦𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑁂𑀦 𑀧𑀭𑀺𑀲𑀼𑀤𑁆𑀥𑀸 𑀲𑀫𑀦𑁆𑀢𑀘𑀓𑁆𑀔𑀼𑀲𑀗𑁆𑀔𑀸𑀢𑀸 𑀤𑀺𑀝𑁆𑀞𑀺 𑀏𑀢𑀲𑁆𑀲𑀸𑀢𑀺 𑀲𑀼𑀤𑁆𑀥𑀤𑀺𑀝𑁆𑀞𑀺, 𑀢𑁂𑀦 𑀲𑀫𑀦𑁆𑀢𑀘𑀓𑁆𑀔𑀼𑀦𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦.

𑁬𑁫𑁧. 𑀧𑀸𑀧𑀺𑀘𑁆𑀙𑀸 𑀦𑀸𑀫 𑀅𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀺𑀘𑁆𑀙𑀸.

𑁬𑁫𑁨-𑁩. 𑀦 𑀘 𑀫𑀚𑁆𑀚𑀧𑁄 𑀲𑀺𑀬𑀸𑀢𑀺 𑀫𑀚𑁆𑀚𑀧𑁄 𑀦 𑀲𑀺𑀬𑀸 𑀫𑀚𑁆𑀚𑀁 𑀧𑀺𑀯𑀦𑁆𑀢𑁄 𑀦 𑀪𑀯𑁂𑀬𑁆𑀬, 𑀫𑀚𑁆𑀚𑀁 𑀦 𑀧𑀺𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀅𑀩𑁆𑀭𑀳𑁆𑀫𑀘𑀭𑀺𑀬𑀸𑀢𑀺 (𑀅. 𑀦𑀺. 𑀅𑀝𑁆𑀞. 𑁨.𑁩.𑁭𑁧) 𑀅𑀲𑁂𑀝𑁆𑀞𑀘𑀭𑀺𑀬𑀢𑁄 𑀫𑁂𑀣𑀼𑀦𑀸 𑀯𑀺𑀭𑀫𑁂𑀬𑁆𑀬. 𑀭𑀢𑁆𑀢𑀺𑀁 𑀦 𑀪𑀼𑀜𑁆𑀚𑁂𑀬𑁆𑀬 𑀯𑀺𑀓𑀸𑀮𑀪𑁄𑀚𑀦𑀦𑁆𑀢𑀺 𑀉𑀧𑁄𑀲𑀣𑀁 𑀉𑀧𑀯𑀼𑀢𑁆𑀣𑁄 𑀭𑀢𑁆𑀢𑀺𑀪𑁄𑀚𑀦𑀜𑁆𑀘 𑀤𑀺𑀯𑀸𑀯𑀺𑀓𑀸𑀮𑀪𑁄𑀚𑀦𑀜𑁆𑀘 𑀦 𑀪𑀼𑀜𑁆𑀚𑁂𑀬𑁆𑀬. 𑀦 𑀘 𑀕𑀦𑁆𑀥𑀫𑀸𑀘𑀭𑁂𑀢𑀺 𑀕𑀦𑁆𑀥𑀜𑁆𑀘 𑀦 𑀯𑀺𑀮𑀺𑀫𑁆𑀧𑁂𑀬𑁆𑀬. 𑀫𑀜𑁆𑀘𑁂 𑀙𑀫𑀸𑀬𑀁 𑀯 𑀲𑀬𑁂𑀣 𑀲𑀦𑁆𑀣𑀢𑁂𑀢𑀺 𑀓𑀧𑁆𑀧𑀺𑀬𑀫𑀜𑁆𑀘𑁂 𑀯𑀸 𑀲𑀼𑀥𑀸𑀤𑀺𑀧𑀭𑀺𑀓𑀫𑁆𑀫𑀓𑀢𑀸𑀬 𑀪𑀽𑀫𑀺𑀬𑀸 𑀯𑀸 𑀢𑀺𑀡𑀧𑀡𑁆𑀡𑀧𑀮𑀸𑀮𑀸𑀤𑀻𑀦𑀺 𑀲𑀦𑁆𑀣𑀭𑀺𑀢𑁆𑀯𑀸 𑀓𑀢𑁂 𑀲𑀦𑁆𑀣𑀢𑁂 𑀯𑀸 𑀲𑀬𑁂𑀣𑀸𑀢𑀺 𑀅𑀢𑁆𑀣𑁄. 𑀏𑀢𑀜𑁆𑀳𑀺 𑀅𑀝𑁆𑀞𑀗𑁆𑀕𑀺𑀓𑀫𑀸𑀳𑀼𑀧𑁄𑀲𑀣𑀦𑁆𑀢𑀺 𑀏𑀢𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀅𑀲𑀫𑀸𑀘𑀭𑀦𑁆𑀢𑁂𑀦 𑀉𑀧𑀯𑀼𑀢𑁆𑀣𑀁 𑀉𑀧𑁄𑀲𑀣𑀁 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 ‘‘𑀅𑀝𑁆𑀞𑀗𑁆𑀕𑀺𑀓’’𑀦𑁆𑀢𑀺 𑀯𑀤𑀦𑁆𑀢𑀺. 𑀤𑀼𑀓𑁆𑀔𑀦𑁆𑀢𑀕𑀼𑀦𑀸𑀢𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀁 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀁 𑀕𑀢𑁂𑀦 𑀧𑀢𑁆𑀢𑁂𑀦 𑀩𑀼𑀤𑁆𑀥𑁂𑀦 𑀧𑀓𑀸𑀲𑀺𑀢𑀦𑁆𑀢𑀺 𑀬𑁄𑀚𑀦𑀸.

𑁬𑁫𑁪. 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀪𑀺𑀓𑁆𑀔𑀼𑀦𑁄 𑀅𑀝𑁆𑀞𑀗𑁆𑀕𑀸𑀦𑀺 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀣𑀸𑀯𑀡𑁆𑀡𑀦𑀸𑀬 𑀤𑀲𑁆𑀲𑀺𑀢𑀸𑀦𑁂𑀯.

𑀅𑀝𑁆𑀞𑀓𑀓𑀣𑀸𑀯𑀡𑁆𑀡𑀦𑀸.

𑁬𑁫𑁫. 𑀪𑁄𑀚𑀦𑀸𑀦𑀺 𑀧𑀡𑀻𑀢𑀸𑀦𑀺 𑀦𑀯 𑀯𑀼𑀢𑁆𑀢𑀸𑀦𑀻𑀢𑀺 𑀧𑀡𑀻𑀢𑀸𑀦𑀺 𑀳𑀺 𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀸𑀦𑀺. 𑀤𑀲𑀲𑀼 𑀅𑀓𑀧𑁆𑀧𑀺𑀬𑀫𑀁𑀲𑁂𑀲𑀼 𑀫𑀦𑀼𑀲𑁆𑀲𑀫𑀁𑀲𑀯𑀚𑁆𑀚𑀺𑀢𑀸𑀦𑀺 𑀦𑀯 𑀫𑀁𑀲𑀸𑀦𑀺 𑀔𑀸𑀤𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺 𑀬𑁄𑀚𑀦𑀸.

𑁬𑁫𑁬. 𑀧𑀸𑀢𑀺𑀫𑁄𑀓𑁆𑀔…𑀧𑁂… 𑀧𑀭𑀺𑀤𑀻𑀧𑀺𑀢𑀸𑀢𑀺 𑀪𑀺𑀓𑁆𑀔𑀽𑀦𑀁 𑀧𑀜𑁆𑀘𑀼𑀤𑁆𑀤𑁂𑀲𑀸, 𑀪𑀺𑀓𑁆𑀔𑀼𑀦𑀻𑀦𑀁 𑀅𑀦𑀺𑀬𑀢𑀼𑀤𑁆𑀤𑁂𑀲𑁂𑀳𑀺 𑀯𑀺𑀦𑀸 𑀘𑀢𑁆𑀢𑀸𑀭𑁄𑀢𑀺 𑀉𑀤𑁆𑀤𑁂𑀲𑀸 𑀦𑀯 𑀤𑀻𑀧𑀺𑀢𑀸. 𑀉𑀧𑁄𑀲𑀣𑀸 𑀦𑀯𑁂𑀯𑀸𑀢𑀺 𑀤𑀺𑀯𑀲𑀯𑀲𑁂𑀦 𑀢𑀬𑁄, 𑀓𑀸𑀭𑀓𑀯𑀲𑁂𑀦 𑀢𑀬𑁄, 𑀓𑀭𑀡𑀯𑀲𑁂𑀦 𑀢𑀬𑁄𑀢𑀺 𑀦𑀯 𑀉𑀧𑁄𑀲𑀣𑀸. 𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂. 𑀲𑀗𑁆𑀖𑁄 𑀦𑀯𑀳𑀺 𑀪𑀺𑀚𑁆𑀚𑀢𑀻𑀢𑀺 𑀦𑀯𑀳𑀺 𑀧𑀼𑀕𑁆𑀕𑀮𑁂𑀳𑀺 𑀲𑀗𑁆𑀖𑁄 𑀪𑀺𑀚𑁆𑀚𑀢𑀻𑀢𑀺 𑀬𑁄𑀚𑀦𑀸. 𑀬𑀣𑀸𑀳 𑁋