𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀓𑀣𑀸𑀯𑀡𑁆𑀡𑀦𑀸

𑁪𑁦𑁫. 𑀆𑀤𑀺𑀦𑀸𑀢𑀺 𑀧𑀞𑀫𑁂𑀦 𑀓𑀸𑀬𑀲𑀗𑁆𑀔𑀸𑀢𑁂𑀦 𑀲𑀫𑀼𑀝𑁆𑀞𑀸𑀦𑁂𑀦.

𑁪𑁦𑁬-𑁭. 𑀤𑀼𑀓𑁆𑀓𑀝𑀸𑀤𑀬𑁄𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀣𑀼𑀮𑁆𑀮𑀘𑁆𑀘𑀬𑀲𑀗𑁆𑀖𑀸𑀤𑀺𑀲𑁂𑀲𑀸 𑀕𑀳𑀺𑀢𑀸. 𑀬𑀣𑀸𑀳 𑁋 ‘‘𑀧𑀬𑁄𑀕𑁂 𑀤𑀼𑀓𑁆𑀓𑀝𑀁. 𑀏𑀓𑀁 𑀧𑀺𑀡𑁆𑀟𑀁 𑀅𑀦𑀸𑀕𑀢𑁂 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀢𑀲𑁆𑀫𑀺𑀁 𑀧𑀺𑀡𑁆𑀟𑁂 𑀆𑀕𑀢𑁂 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲𑀸’’𑀢𑀺 (𑀧𑀭𑀺. 𑁨𑁭𑁭). 𑀯𑀺𑀓𑀸𑀮𑁂 𑀧𑀦 𑀧𑀸𑀘𑀺𑀢𑁆𑀢𑀻𑀢𑀺 𑀯𑀺𑀓𑀸𑀮𑀪𑁄𑀚𑀦𑀧𑀸𑀘𑀺𑀢𑁆𑀢𑀺. 𑀅𑀜𑁆𑀜𑀸𑀢𑀺𑀳𑀢𑁆𑀣𑀢𑁄𑀢𑀺 𑀅𑀜𑁆𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑀸𑀬 𑀳𑀢𑁆𑀣𑀢𑁄. 𑀕𑀳𑁂𑀢𑁆𑀯𑀸𑀢𑀺 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀲𑀳𑀢𑁆𑀣𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸. ‘‘𑀧𑀜𑁆𑀘 𑀇𑀫𑀸 𑀆𑀧𑀢𑁆𑀢𑀺𑀬𑁄’’𑀢𑀺 𑀧𑀤𑀘𑁆𑀙𑁂𑀤𑁄.

𑁪𑁦𑁮. 𑀤𑀼𑀢𑀺𑀬𑁂𑀦𑀸𑀢𑀺 𑀯𑀸𑀘𑀸𑀲𑀗𑁆𑀔𑀸𑀢𑁂𑀦 𑀲𑀫𑀼𑀝𑁆𑀞𑀸𑀦𑁂𑀦.

𑁪𑁦𑁯-𑁧𑁦. 𑀲𑀫𑀸𑀤𑀺𑀲𑀢𑀺 𑀓𑀣𑁂𑀢𑀺 𑀘𑁂. 𑀲𑀩𑁆𑀩𑀣𑀸 𑀯𑀺𑀧𑀦𑁆𑀦𑀦𑁆𑀢𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀢𑀸𑀤𑀺𑀦𑀸 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀯𑀺𑀧𑀦𑁆𑀦𑀧𑁆𑀧𑀤𑁂𑀲𑀁. 𑀓𑀼𑀝𑀺𑀦𑁆𑀢𑀺 𑀲𑀜𑁆𑀜𑀸𑀘𑀺𑀓𑀸𑀬 𑀓𑀼𑀝𑀺𑀁. 𑀬𑀣𑀸𑀳 𑀧𑀭𑀺𑀯𑀸𑀭𑁂 ‘‘𑀢𑀲𑁆𑀲 𑀓𑀼𑀝𑀺𑀁 𑀓𑀭𑁄𑀦𑁆𑀢𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦’’𑀦𑁆𑀢𑀺 (𑀧𑀭𑀺. 𑁨𑁭𑁮). 𑀧𑀤𑀲𑁄𑀥𑀫𑁆𑀫𑀁 𑀫𑀽𑀮𑀁 𑀲𑀫𑀼𑀝𑁆𑀞𑀸𑀦𑀁 𑀬𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸𑀢𑀺 𑀢𑀣𑀸 𑀯𑀼𑀢𑁆𑀢𑀁, 𑀢𑁂𑀦 𑀧𑀤𑀲𑁄𑀥𑀫𑁆𑀫𑀫𑀽𑀮𑁂𑀦, 𑀲𑀳𑀢𑁆𑀣𑁂 𑀘𑁂𑀢𑀁 𑀓𑀭𑀡𑀯𑀘𑀦𑀁.

𑁪𑁧𑁧. 𑀢𑀢𑀺𑀬𑁂𑀦 𑀲𑀫𑀼𑀝𑁆𑀞𑀸𑀦𑁂𑀦𑀸𑀢𑀺 𑀓𑀸𑀬𑀯𑀸𑀘𑀸𑀲𑀗𑁆𑀔𑀸𑀢𑁂𑀦 𑀲𑀫𑀼𑀝𑁆𑀞𑀸𑀦𑁂𑀦.

𑁪𑁧𑁨. 𑀲𑀁𑀯𑀺𑀤𑀳𑀺𑀢𑁆𑀯𑀸𑀦𑀸𑀢𑀺 𑀲𑀤𑁆𑀥𑀺𑀁 𑀯𑀺𑀤𑀳𑀺𑀢𑁆𑀯𑀸, ‘‘𑀓𑀼𑀝𑀺𑀁 𑀓𑀭𑁄𑀫𑀸’’𑀢𑀺 𑀅𑀜𑁆𑀜𑁂𑀳𑀺 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑁆𑀯𑀸𑀢𑀺 𑀅𑀢𑁆𑀣𑁄.

𑁪𑁧𑁩. 𑀯𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸. 𑀪𑀺𑀓𑁆𑀔𑀼𑀦𑀺𑀦𑁆𑀢𑀺 𑀪𑀺𑀓𑁆𑀔𑀽𑀦𑀁 𑀪𑀼𑀜𑁆𑀚𑀦𑀝𑁆𑀞𑀸𑀦𑁂 𑀞𑀢𑁆𑀯𑀸 ‘‘𑀇𑀥 𑀲𑀽𑀧𑀁 𑀤𑁂𑀣, 𑀇𑀥 𑀑𑀤𑀦𑀁 𑀤𑁂𑀣𑀸’’𑀢𑀺 𑀯𑁄𑀲𑀸𑀲𑀫𑀸𑀦𑀁 𑀉𑀧𑀸𑀲𑀓𑀸𑀦𑀁 𑀯𑀢𑁆𑀯𑀸 𑀤𑀸𑀧𑁂𑀦𑁆𑀢𑀺𑀁 𑀪𑀺𑀓𑁆𑀔𑀼𑀦𑀺𑀁. 𑀦 𑀦𑀺𑀯𑀸𑀭𑁂𑀢𑁆𑀯𑀸𑀢𑀺 ‘‘𑀅𑀧𑀲𑀓𑁆𑀓 𑀢𑀸𑀯, 𑀪𑀕𑀺𑀦𑀺, 𑀬𑀸𑀯 𑀪𑀺𑀓𑁆𑀔𑀽 𑀪𑀼𑀜𑁆𑀚𑀦𑁆𑀢𑀻’’𑀢𑀺 𑀅𑀦𑀧𑀲𑀸𑀤𑁂𑀢𑁆𑀯𑀸 𑀪𑀼𑀜𑁆𑀚𑀢𑁄𑀢𑀺 𑀬𑁄𑀚𑀦𑀸.

𑁪𑁧𑁪. 𑀘𑀢𑀼𑀢𑁆𑀣𑁂𑀦 𑀓𑀸𑀬𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁂𑀦 𑀓𑀢𑀺 𑀆𑀧𑀢𑁆𑀢𑀺𑀬𑁄 𑀲𑀺𑀬𑀼𑀦𑁆𑀢𑀺 𑀬𑁄𑀚𑀦𑀸.

𑁪𑁧𑁭. 𑀧𑀜𑁆𑀘𑀫𑁂𑀦𑀸𑀢𑀺 𑀯𑀸𑀘𑀸𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁂𑀦. 𑀯𑀤𑀦𑁆𑀢𑀺 𑀯𑀤𑀦𑁆𑀢𑁄 𑀲𑀫𑀼𑀤𑀸𑀘𑀭𑀦𑁆𑀢𑁄.

𑁪𑁧𑁮. 𑀓𑀼𑀝𑀺𑀦𑁆𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀁, 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁 𑀲𑁂𑀦𑀸𑀲𑀦𑀫𑁆𑀧𑀺 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁.

𑁪𑁧𑁯. 𑀯𑀸𑀘𑁂𑀢𑀺 𑀧𑀤𑀲𑁄 𑀥𑀫𑁆𑀫𑀦𑁆𑀢𑀺 𑀏𑀢𑁆𑀣 ‘‘𑀅𑀦𑀼𑀧𑀲𑀫𑁆𑀧𑀦𑁆𑀦’’𑀦𑁆𑀢𑀺 𑀲𑁂𑀲𑁄. 𑀬𑀣𑀸𑀳 𑁋 ‘‘𑀪𑀺𑀓𑁆𑀔𑀼 𑀅𑀓𑀧𑁆𑀧𑀺𑀬𑀲𑀜𑁆𑀜𑀻 𑀅𑀦𑀼𑀧𑀲𑀫𑁆𑀧𑀦𑁆𑀦𑀁 𑀧𑀤𑀲𑁄 𑀥𑀫𑁆𑀫𑀁 𑀯𑀸𑀘𑁂𑀢𑀻’’𑀢𑀺 (𑀧𑀭𑀺. 𑁨𑁮𑁧). 𑀤𑀯𑀓𑀫𑁆𑀬𑀢𑀸 𑀯𑀤𑀦𑁆𑀢𑀲𑁆𑀲𑀸𑀢𑀺 𑀚𑀸𑀢𑀺𑀆𑀤𑀻𑀳𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀺 𑀓𑀻𑀴𑀸𑀥𑀺𑀧𑁆𑀧𑀸𑀬𑁂𑀦 𑀯𑀤𑀦𑁆𑀢𑀲𑁆𑀲. 𑀤𑀯𑀓𑀫𑁆𑀬𑀢𑀸𑀢𑀺 𑀘 ‘‘𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁨, 𑁨𑁪, 𑁪𑁨𑁨; 𑀅. 𑀦𑀺. 𑁬.𑁫𑁮; 𑁮.𑁯; 𑀫𑀳𑀸𑀦𑀺. 𑁧𑁯𑁯, 𑁨𑁦𑁬; 𑀥. 𑀲. 𑁧𑁩𑁫𑁫; 𑀯𑀺𑀪. 𑁫𑁧𑁮) 𑀯𑀺𑀬 𑀬-𑀓𑀸𑀭𑀮𑁄𑀧𑁂𑀦 𑀦𑀺𑀤𑁆𑀤𑁂𑀲𑁄.

𑁪𑁨𑁦. 𑀙𑀝𑁆𑀞𑁂𑀦 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁂𑀦. 𑀲𑀁𑀯𑀺𑀤𑀳𑀺𑀢𑁆𑀯𑀸𑀦𑀸𑀢𑀺 𑀲𑀁𑀯𑀺𑀥𑀸𑀬, ‘‘𑀢𑁆𑀯𑀜𑁆𑀘 𑀅𑀳𑀜𑁆𑀘 𑀏𑀓𑀢𑁄 𑀅𑀯𑀳𑀭𑀺𑀲𑁆𑀲𑀸𑀫𑀸’’𑀢𑀺 𑀲𑀫𑁆𑀫𑀦𑁆𑀢𑀦𑀁 𑀓𑀢𑁆𑀯𑀸. 𑀪𑀡𑁆𑀟𑀁 𑀳𑀭𑀢𑀻𑀢𑀺 ‘‘𑀪𑀸𑀭𑀺𑀬𑀁 𑀢𑁆𑀯𑀁 𑀏𑀓𑀁 𑀧𑀲𑁆𑀲𑀁 𑀕𑀡𑁆𑀳, 𑀅𑀳𑀁 𑀇𑀫’’𑀦𑁆𑀢𑀺 𑀯𑀢𑁆𑀯𑀸 𑀢𑁂𑀦 𑀲𑀳 𑀞𑀸𑀦𑀸 𑀘𑀸𑀯𑁂𑀢𑀺 𑀘𑁂.

𑁪𑁨𑁩. 𑀇𑀥 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂. 𑀯𑀺𑀫𑀢𑀽𑀧𑀭𑀫𑀁 𑀧𑀭𑀫𑀦𑁆𑀢𑀺 𑀏𑀢𑁆𑀣 ‘‘𑀓𑀧𑁆𑀧𑀺𑀬𑀁 𑀦𑀼 𑀔𑁄, 𑀅𑀓𑀧𑁆𑀧𑀺𑀬’’𑀦𑁆𑀢𑀺 𑀯𑀸 ‘‘𑀆𑀧𑀢𑁆𑀢𑀺 𑀦𑀼 𑀔𑁄, 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀸 ‘‘𑀥𑀫𑁆𑀫𑁄 𑀦𑀼 𑀔𑁄, 𑀅𑀥𑀫𑁆𑀫𑁄’’𑀢𑀺 𑀯𑀸 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀯𑀺𑀯𑀺𑀥𑁂𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸 𑀯𑀺𑀫𑀢𑀺 𑀯𑀺𑀘𑀺𑀓𑀺𑀘𑁆𑀙𑀸 𑀯𑀺𑀫𑀢𑀺. 𑀯𑀺𑀫𑀢𑀺𑀁 𑀉𑀧𑀭𑀫𑁂𑀢𑀺 𑀯𑀺𑀦𑀸𑀲𑁂𑀢𑀻𑀢𑀺 𑀯𑀺𑀫𑀢𑀽𑀧𑀭𑀫𑀁. 𑀧𑀭𑀫𑀁 𑀉𑀢𑁆𑀢𑀫𑀁. 𑀉𑀢𑁆𑀢𑀭𑀦𑁆𑀢𑀺 𑀯𑀺𑀪𑀗𑁆𑀕𑀔𑀦𑁆𑀥𑀓𑀸𑀕𑀢𑀸𑀦𑀁 𑀦𑀺𑀤𑀸𑀦𑀸𑀤𑀺𑀯𑀺𑀦𑀺𑀘𑁆𑀙𑀬𑀸𑀦𑀁 𑀧𑀜𑁆𑀳𑀉𑀢𑁆𑀢𑀭𑀪𑀸𑀯𑁂𑀦 𑀞𑀺𑀢𑀢𑁆𑀢𑀸 𑀉𑀢𑁆𑀢𑀭𑀁. 𑀇𑀫𑀁 𑀉𑀢𑁆𑀢𑀭𑀁 𑀦𑀸𑀫 𑀧𑀓𑀭𑀡𑀁 𑀬𑁄 𑀉𑀢𑁆𑀢𑀭𑀢𑀺 𑀧𑀜𑁆𑀜𑀸𑀬 𑀑𑀕𑀸𑀳𑁂𑀢𑁆𑀯𑀸 𑀧𑀭𑀺𑀬𑁄𑀲𑀸𑀧𑁂𑀢𑀺. 𑀇𑀥 ‘‘𑀉𑀢𑁆𑀢𑀭𑀁 𑀉𑀢𑁆𑀢𑀭’’𑀦𑁆𑀢𑀺 𑀧𑀤𑀤𑁆𑀯𑀬𑁂 𑀏𑀓𑀁 𑀕𑀼𑀡𑀦𑀺𑀤𑀲𑁆𑀲𑀦𑀁, 𑀏𑀓𑀁 𑀲𑀢𑁆𑀣𑀦𑀺𑀤𑀲𑁆𑀲𑀦𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀲𑀼𑀦𑀬𑁂𑀦 𑀬𑀼𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀯𑀺𑀦𑀬𑀁 𑀧𑀺𑀝𑀓𑀁 𑀉𑀢𑁆𑀢𑀭𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀺𑀁 𑀯𑀺𑀲𑀺𑀝𑁆𑀞𑀦𑁆𑀢𑀺 𑀆𑀳 ‘‘𑀲𑀼𑀦𑀬’’𑀦𑁆𑀢𑀺𑀆𑀤𑀺. 𑀲𑀼𑀝𑁆𑀞𑀼 𑀘𑀸𑀭𑀺𑀢𑁆𑀢𑀯𑀸𑀭𑀺𑀢𑁆𑀢𑀤𑀴𑁆𑀳𑀻𑀓𑀭𑀡𑀲𑀺𑀣𑀺𑀮𑀓𑀭𑀡𑀪𑁂𑀤𑀸 𑀧𑀜𑁆𑀜𑀢𑁆𑀢𑀺𑀅𑀦𑀉𑀧𑀜𑁆𑀜𑀢𑁆𑀢𑀸𑀤𑀺𑀦𑀬𑀸 𑀏𑀢𑁆𑀣𑀸𑀢𑀺 𑀲𑀼𑀦𑀬𑁄, 𑀢𑀁. 𑀲𑀼𑀝𑁆𑀞𑀼 𑀦𑀻𑀬𑀢𑀺 𑀯𑀺𑀦𑀺𑀘𑁆𑀙𑀬𑁄 𑀏𑀢𑁂𑀦𑀸𑀢𑀺 𑀲𑀼𑀦𑀬𑁄, 𑀉𑀢𑁆𑀢𑀭𑀯𑀺𑀦𑀺𑀘𑁆𑀙𑀬𑁄, 𑀢𑁂𑀦. 𑀯𑀺𑀦𑀺𑀘𑁆𑀙𑀬𑀸𑀯𑀩𑁄𑀥𑁂𑀦 𑀲𑀁𑀬𑀼𑀢𑁆𑀢𑁄 𑀲𑀫𑀦𑁆𑀦𑀸𑀕𑀢𑁄. 𑀤𑀼𑀓𑁆𑀔𑁂𑀦 𑀉𑀢𑁆𑀢𑀭𑀻𑀬𑀢𑀻𑀢𑀺 𑀤𑀼𑀢𑁆𑀢𑀭𑀁. 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀤𑀻𑀧𑀓𑀢𑁆𑀢𑁂𑀦 𑀲𑀫𑀸𑀥𑀺𑀧𑀜𑁆𑀜𑀸𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀉𑀢𑁆𑀢𑀭𑀧𑁆𑀧𑀢𑁆𑀢𑀺𑀬𑀸 𑀧𑀢𑀺𑀝𑁆𑀞𑀸𑀪𑀸𑀯𑀢𑁄 𑀉𑀢𑁆𑀢𑀭𑀁 𑀉𑀢𑁆𑀢𑀭𑀢𑀺 𑀑𑀕𑀸𑀳𑁂𑀢𑁆𑀯𑀸 𑀧𑀭𑀺𑀬𑁄𑀲𑀸𑀦𑀁 𑀧𑀸𑀧𑀼𑀡𑀸𑀢𑀻𑀢𑀺 𑀅𑀢𑁆𑀣𑁄.

𑀇𑀥 𑀬𑁄 𑀯𑀺𑀫𑀢𑀽𑀧𑀭𑀫𑀁 𑀧𑀭𑀫𑀁 𑀉𑀢𑁆𑀢𑀭𑀁 𑀉𑀢𑁆𑀢𑀭𑀁 𑀦𑀸𑀫 𑀧𑀓𑀭𑀡𑀁 𑀉𑀢𑁆𑀢𑀭𑀢𑀺, 𑀲𑀼𑀦𑀬𑁂𑀦 𑀬𑀼𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀲𑀼𑀦𑀬𑀁 𑀤𑀼𑀢𑁆𑀢𑀭𑀁 𑀉𑀢𑁆𑀢𑀭𑀁 𑀯𑀺𑀦𑀬𑀁 𑀉𑀢𑁆𑀢𑀭𑀢𑀻𑀢𑀺 𑀬𑁄𑀚𑀦𑀸. 𑀘-𑀲𑀤𑁆𑀤𑁂𑀦 𑀲𑀢𑁆𑀣𑀦𑁆𑀢𑀭𑀲𑀫𑀼𑀘𑁆𑀘𑀬𑀢𑁆𑀣𑁂𑀦 𑀇𑀫𑀫𑀢𑁆𑀣𑀁 𑀤𑀻𑀧𑁂𑀢𑀺. 𑀲𑁂𑀬𑁆𑀬𑀣𑀺𑀤𑀁, 𑀇𑀥 𑀬𑁄 𑀲𑀼𑀦𑀬𑀁 𑀤𑀼𑀢𑁆𑀢𑀭𑀁 𑀉𑀢𑁆𑀢𑀭𑀁 𑀯𑀺𑀦𑀬𑀁 𑀉𑀢𑁆𑀢𑀭𑀢𑀺, 𑀲𑀼𑀦𑀬𑁂𑀦 𑀬𑀼𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀯𑀺𑀫𑀢𑀽𑀧𑀭𑀫𑀁 𑀧𑀭𑀫𑀁 𑀉𑀢𑁆𑀢𑀭𑀁 𑀉𑀢𑁆𑀢𑀭𑀁 𑀦𑀸𑀫 𑀧𑀓𑀭𑀡𑀁 𑀉𑀢𑁆𑀢𑀭𑀢𑀻𑀢𑀺. 𑀇𑀫𑀺𑀦𑀸 𑀬𑁄 𑀉𑀢𑁆𑀢𑀭𑀁 𑀚𑀸𑀦𑀸𑀢𑀺, 𑀲𑁄 𑀯𑀺𑀦𑀬𑀁 𑀚𑀸𑀦𑀸𑀢𑀺. 𑀬𑁄 𑀯𑀺𑀦𑀬𑀁 𑀚𑀸𑀦𑀸𑀢𑀺, 𑀲𑁄 𑀉𑀢𑁆𑀢𑀭𑀁 𑀚𑀸𑀦𑀸𑀢𑀻𑀢𑀺 𑀉𑀢𑁆𑀢𑀭𑀧𑀓𑀭𑀡𑀲𑁆𑀲 𑀯𑀺𑀦𑀬𑀧𑀺𑀝𑀓𑀚𑀸𑀦𑀦𑁂 𑀅𑀘𑁆𑀘𑀦𑁆𑀢𑀽𑀧𑀓𑀸𑀭𑀺𑀢𑀸 𑀯𑀺𑀪𑀸𑀯𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀇𑀢𑀺 𑀉𑀢𑁆𑀢𑀭𑁂 𑀮𑀻𑀦𑀢𑁆𑀣𑀧𑀓𑀸𑀲𑀦𑀺𑀬𑀸

𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.