𑀲𑀫𑀼𑀝𑁆𑀞𑀸𑀦𑀲𑀻𑀲𑀓𑀣𑀸𑀯𑀡𑁆𑀡𑀦𑀸

𑁩𑁨𑁫-𑁬. 𑀫𑀳𑁂𑀲𑀺𑀦𑀸 𑀤𑁆𑀯𑀻𑀲𑀼 𑀯𑀺𑀪𑀗𑁆𑀕𑁂𑀲𑀼 𑀧𑀜𑁆𑀜𑀢𑁆𑀢𑀸𑀦𑀺 𑀬𑀸𑀦𑀺 𑀧𑀸𑀭𑀸𑀚𑀺𑀓𑀸𑀤𑀻𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀉𑀧𑁄𑀲𑀣𑁂 𑀉𑀤𑁆𑀤𑀺𑀲𑀦𑁆𑀢𑀺, 𑀢𑁂𑀲𑀁 𑀲𑀺𑀓𑁆𑀔𑀸𑀧𑀤𑀸𑀦𑀁 𑀲𑀫𑀼𑀝𑁆𑀞𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀝𑀯𑀢𑁆𑀣𑀸𑀬 𑀇𑀢𑁄 𑀧𑀭𑀁 𑀧𑀯𑀓𑁆𑀔𑀸𑀫𑀺, 𑀢𑀁 𑀲𑀫𑀸𑀳𑀺𑀢𑀸 𑀲𑀼𑀡𑀸𑀣𑀸𑀢𑀺 𑀬𑁄𑀚𑀦𑀸.

𑁩𑁨𑁭. 𑀓𑀸𑀬𑁄 𑀘 𑀯𑀸𑀘𑀸 𑀘 𑀓𑀸𑀬𑀯𑀸𑀘𑀸 𑀘𑀸𑀢𑀺 𑀅𑀘𑀺𑀢𑁆𑀢𑀓𑀸𑀦𑀺 𑀬𑀸𑀦𑀺 𑀢𑀻𑀡𑀺 𑀲𑀫𑀼𑀝𑁆𑀞𑀸𑀦𑀸𑀦𑀺, 𑀢𑀸𑀦𑁂𑀯 𑀘𑀺𑀢𑁆𑀢𑁂𑀦 𑀧𑀘𑁆𑀘𑁂𑀓𑀁 𑀬𑁄𑀚𑀺𑀢𑀸𑀦𑀺 𑀲𑀘𑀺𑀢𑁆𑀢𑀓𑀸𑀦𑀺 𑀢𑀻𑀡𑀺 𑀲𑀫𑀼𑀝𑁆𑀞𑀸𑀦𑀸𑀦𑀺 𑀳𑁄𑀦𑁆𑀢𑀻𑀢𑀺 𑀏𑀯𑀫𑁂𑀯 𑀲𑀫𑀼𑀝𑁆𑀞𑀸𑀦𑀁 𑀧𑀼𑀭𑀺𑀫𑀸𑀦𑀁 𑀤𑁆𑀯𑀺𑀦𑁆𑀦𑀁 𑀯𑀲𑁂𑀦 𑀏𑀓𑀗𑁆𑀕𑀺𑀓𑀁, 𑀢𑀢𑀺𑀬𑀘𑀢𑀼𑀢𑁆𑀣𑀧𑀜𑁆𑀘𑀫𑀸𑀦𑀁 𑀯𑀲𑁂𑀦 𑀤𑁆𑀯𑀗𑁆𑀕𑀺𑀓𑀁, 𑀙𑀝𑁆𑀞𑀲𑁆𑀲 𑀯𑀲𑁂𑀦 𑀢𑀺𑀯𑀗𑁆𑀕𑀺𑀓𑀜𑁆𑀘𑀸𑀢𑀺 𑀏𑀯𑀁 𑀙𑀥𑀸 𑀲𑀫𑀼𑀝𑁆𑀞𑀸𑀦𑀯𑀺𑀥𑀺𑀁 𑀯𑀤𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀓𑀸𑀬𑁄, 𑀯𑀸𑀘𑀸𑀢𑀺 𑀏𑀓𑀗𑁆𑀕𑀺𑀓𑀁 𑀤𑁆𑀯𑀬𑀁, 𑀓𑀸𑀬𑀯𑀸𑀘𑀸, 𑀓𑀸𑀬𑀘𑀺𑀢𑁆𑀢𑀁, 𑀯𑀸𑀘𑀸𑀘𑀺𑀢𑁆𑀢𑀦𑁆𑀢𑀺 𑀤𑀼𑀯𑀗𑁆𑀕𑀺𑀓𑀢𑁆𑀢𑀬𑀁, 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀦𑁆𑀢𑀺 𑀅𑀗𑁆𑀕𑀪𑁂𑀤𑁂𑀦 𑀢𑀺𑀯𑀺𑀥𑀫𑁆𑀧𑀺 𑀅𑀯𑀬𑀯𑀪𑁂𑀤𑁂𑀦 𑀲𑀫𑀼𑀝𑁆𑀞𑀸𑀦𑀪𑁂𑀤𑀯𑀺𑀥𑀺𑀁 𑀙𑀧𑁆𑀧𑀓𑀸𑀭𑀁 𑀯𑀤𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁩𑁨𑁮. 𑀢𑁂𑀲𑀼 𑀙𑀲𑀼 𑀲𑀫𑀼𑀝𑁆𑀞𑀸𑀦𑁂𑀲𑀼 𑀏𑀓𑁂𑀦 𑀯𑀸 𑀲𑀫𑀼𑀝𑁆𑀞𑀸𑀦𑁂𑀦 𑀤𑁆𑀯𑀻𑀳𑀺 𑀯𑀸 𑀢𑀻𑀳𑀺 𑀯𑀸 𑀘𑀢𑀽𑀳𑀺 𑀯𑀸 𑀙𑀳𑀺 𑀯𑀸 𑀲𑀫𑀼𑀝𑁆𑀞𑀸𑀦𑁂𑀳𑀺 𑀦𑀸𑀦𑀸 𑀆𑀧𑀢𑁆𑀢𑀺𑀬𑁄 𑀚𑀸𑀬𑀭𑁂𑀢𑀺 𑀲𑀫𑁆𑀩𑀦𑁆𑀥𑁄.

𑁩𑁨𑁯. 𑀢𑀢𑁆𑀣 𑀢𑀸𑀲𑀼 𑀦𑀸𑀦𑀸𑀧𑀢𑁆𑀢𑀻𑀲𑀼. 𑀧𑀜𑁆𑀘 𑀲𑀫𑀼𑀝𑁆𑀞𑀸𑀦𑀸𑀦𑀺 𑀏𑀢𑀺𑀲𑁆𑀲𑀸𑀢𑀺 𑀧𑀜𑁆𑀘𑀲𑀫𑀼𑀝𑁆𑀞𑀸𑀦𑀸, 𑀏𑀯𑀭𑀽𑀧𑀸 𑀓𑀸𑀘𑀺 𑀆𑀧𑀢𑁆𑀢𑀺 𑀦 𑀯𑀺𑀚𑁆𑀚𑀢𑀺. 𑀏𑀓𑀫𑁂𑀓𑀁 𑀲𑀫𑀼𑀝𑁆𑀞𑀸𑀦𑀁 𑀬𑀸𑀲𑀦𑁆𑀢𑀺 𑀯𑀺𑀕𑁆𑀕𑀳𑁄. 𑀧𑀘𑁆𑀙𑀺𑀫𑁂𑀳𑁂𑀯 𑀢𑀻𑀳𑀺𑀧𑀻𑀢𑀺 𑀲𑀘𑀺𑀢𑁆𑀢𑀓𑁂𑀳𑁂𑀯 𑀢𑀻𑀳𑀺 𑀲𑀫𑀼𑀝𑁆𑀞𑀸𑀦𑁂𑀳𑀺, 𑀬𑀸 𑀆𑀧𑀢𑁆𑀢𑀺 𑀏𑀓𑀲𑀫𑀼𑀝𑁆𑀞𑀸𑀦𑀸 𑀳𑁄𑀢𑀺, 𑀲𑀸 𑀲𑀘𑀺𑀢𑁆𑀢𑀓𑀸𑀦𑀁 𑀢𑀺𑀡𑁆𑀡𑀫𑀜𑁆𑀜𑀢𑀭𑁂𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁩𑁩𑁦-𑁧. 𑀢𑀢𑀺𑀬𑀘𑁆𑀙𑀝𑁆𑀞𑀢𑁄𑀧𑀺 𑀘𑀸𑀢𑀺 𑀓𑀸𑀬𑀯𑀸𑀘𑀢𑁄, 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘. 𑀘𑀢𑀼𑀢𑁆𑀣𑀘𑁆𑀙𑀝𑁆𑀞𑀢𑁄 𑀘𑁂𑀯𑀸𑀢𑀺 𑀓𑀸𑀬𑀘𑀺𑀢𑁆𑀢𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘. 𑀧𑀜𑁆𑀘𑀫𑀘𑁆𑀙𑀝𑁆𑀞𑀢𑁄𑀧𑀺 𑀘𑀸𑀢𑀺 𑀯𑀸𑀘𑀸𑀘𑀺𑀢𑁆𑀢𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘. ‘‘𑀓𑀸𑀬𑀢𑁄 𑀓𑀸𑀬𑀘𑀺𑀢𑁆𑀢𑀢𑁄’’𑀢𑀺 𑀧𑀞𑀫𑀁 𑀤𑁆𑀯𑀺𑀲𑀫𑀼𑀝𑁆𑀞𑀸𑀦𑀁, ‘‘𑀯𑀸𑀘𑀢𑁄 𑀯𑀸𑀘𑀸𑀘𑀺𑀢𑁆𑀢𑀢𑁄’’𑀢𑀺 𑀤𑀼𑀢𑀺𑀬𑀁, ‘‘𑀓𑀸𑀬𑀯𑀸𑀘𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄’’𑀢𑀺 𑀢𑀢𑀺𑀬𑀁, ‘‘𑀓𑀸𑀬𑀘𑀺𑀢𑁆𑀢𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄’’𑀢𑀺 𑀘𑀢𑀼𑀢𑁆𑀣𑀁, ‘‘𑀯𑀸𑀘𑀸𑀘𑀺𑀢𑁆𑀢𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄’’𑀢𑀺 𑀧𑀜𑁆𑀘𑀫𑀁 𑀤𑁆𑀯𑀺𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀏𑀯𑀁 𑀧𑀜𑁆𑀘𑀥𑀸 𑀏𑀯 𑀞𑀺𑀢𑁂𑀳𑀺 𑀤𑁆𑀯𑀻𑀳𑀺 𑀲𑀫𑀼𑀝𑁆𑀞𑀸𑀦𑁂𑀳𑀺 𑀏𑀲𑀸 𑀤𑁆𑀯𑀺𑀲𑀫𑀼𑀝𑁆𑀞𑀸𑀦𑀸𑀧𑀢𑁆𑀢𑀺 𑀚𑀸𑀬𑀢𑁂 𑀲𑀫𑀼𑀝𑁆𑀞𑀸𑀢𑀺. 𑀦 𑀅𑀜𑁆𑀜𑀢𑁄𑀢𑀺 𑀓𑀸𑀬𑀢𑁄 𑀯𑀸𑀘𑀢𑁄𑀢𑀺 𑀏𑀓𑀁, 𑀯𑀸𑀘𑀢𑁄 𑀓𑀸𑀬𑀯𑀸𑀘𑀢𑁄𑀢𑀺 𑀏𑀓𑀦𑁆𑀢𑀺 𑀏𑀯𑀁 𑀬𑀣𑀸𑀯𑀼𑀢𑁆𑀢𑀓𑁆𑀓𑀫𑀯𑀺𑀧𑀭𑀺𑀬𑀸𑀬𑁂𑀦 𑀬𑁄𑀚𑀺𑀢𑁂𑀳𑀺 𑀅𑀜𑁆𑀜𑁂𑀳𑀺 𑀲𑀫𑀼𑀝𑁆𑀞𑀸𑀦𑁂𑀳𑀺 𑀦 𑀲𑀫𑀼𑀝𑁆𑀞𑀸𑀢𑀺.

𑁩𑁩𑁨. 𑀧𑀞𑀫𑁂𑀳𑀺 𑀘 𑀢𑀻𑀳𑀻𑀢𑀺 ‘‘𑀓𑀸𑀬𑀢𑁄, 𑀯𑀸𑀘𑀢𑁄, 𑀓𑀸𑀬𑀯𑀸𑀘𑀢𑁄’’𑀢𑀺 𑀧𑀞𑀫𑀁 𑀦𑀺𑀤𑁆𑀤𑀺𑀝𑁆𑀞𑁂𑀳𑀺 𑀢𑀻𑀳𑀺 𑀅𑀘𑀺𑀢𑁆𑀢𑀓𑀲𑀫𑀼𑀝𑁆𑀞𑀸𑀦𑁂𑀳𑀺. 𑀧𑀘𑁆𑀙𑀺𑀫𑁂𑀳𑀺 𑀘𑀸𑀢𑀺 ‘‘𑀓𑀸𑀬𑀘𑀺𑀢𑁆𑀢𑀢𑁄, 𑀯𑀸𑀘𑀸𑀘𑀺𑀢𑁆𑀢𑀢𑁄, 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄’’𑀢𑀺 𑀏𑀯𑀁 𑀧𑀘𑁆𑀙𑀸 𑀯𑀼𑀢𑁆𑀢𑁂𑀳𑀺 𑀲𑀘𑀺𑀢𑁆𑀢𑀓𑁂𑀳𑀺 𑀢𑀻𑀳𑀺 𑀲𑀫𑀼𑀝𑁆𑀞𑀸𑀦𑁂𑀳𑀺. 𑀦 𑀅𑀜𑁆𑀜𑀢𑁄𑀢𑀺 ‘‘𑀓𑀸𑀬𑀢𑁄, 𑀯𑀸𑀘𑀢𑁄, 𑀓𑀸𑀬𑀘𑀺𑀢𑁆𑀢𑀢𑁄, 𑀯𑀸𑀘𑀢𑁄, 𑀓𑀸𑀬𑀯𑀸𑀘𑀢𑁄, 𑀓𑀸𑀬𑀘𑀺𑀢𑁆𑀢𑀢𑁄’’𑀢𑀺 𑀏𑀯𑀁 𑀯𑀼𑀢𑁆𑀢𑀯𑀺𑀧𑀮𑁆𑀮𑀸𑀲𑀢𑁄 𑀅𑀜𑁆𑀜𑁂𑀳𑀺 𑀢𑀻𑀳𑀺 𑀲𑀫𑀼𑀝𑁆𑀞𑀸𑀦𑁂𑀳𑀺 𑀦 𑀲𑀫𑀼𑀝𑁆𑀞𑀸𑀢𑀺.

𑁩𑁩𑁩-𑁪. 𑀧𑀞𑀫𑀸 𑀢𑀢𑀺𑀬𑀸 𑀘𑁂𑀯, 𑀘𑀢𑀼𑀢𑁆𑀣𑀘𑁆𑀙𑀝𑁆𑀞𑀢𑁄𑀧𑀺 𑀘𑀸𑀢𑀺 𑀓𑀸𑀬𑀢𑁄, 𑀓𑀸𑀬𑀯𑀸𑀘𑀢𑁄, 𑀓𑀸𑀬𑀘𑀺𑀢𑁆𑀢𑀢𑁄, 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄𑀢𑀺 𑀏𑀢𑁂𑀳𑀺 𑀘𑀢𑀽𑀳𑀺 𑀲𑀫𑀼𑀝𑁆𑀞𑀸𑀦𑁂𑀳𑀺 𑀘𑁂𑀯. 𑀤𑀼𑀢𑀺𑀬𑀸…𑀧𑁂… 𑀘𑁆𑀙𑀝𑁆𑀞𑀢𑁄𑀧𑀺 𑀘𑀸𑀢𑀺 𑀯𑀸𑀘𑀢𑁄, 𑀓𑀸𑀬𑀯𑀸𑀘𑀢𑁄, 𑀯𑀸𑀘𑀸𑀘𑀺𑀢𑁆𑀢𑀢𑁄, 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄𑀢𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀘𑀸𑀢𑀺 𑀘𑀢𑀼𑀲𑀫𑀼𑀝𑁆𑀞𑀸𑀦𑁂𑀦𑀸𑀧𑀢𑁆𑀢𑀺.

𑀲𑀸 𑀏𑀯𑀁 𑀤𑁆𑀯𑀺𑀥𑀸 𑀞𑀺𑀢𑁂𑀳𑀺 𑀘𑀢𑀽𑀳𑀺 𑀲𑀫𑀼𑀝𑁆𑀞𑀸𑀦𑁂𑀳𑀺 𑀚𑀸𑀬𑀢𑁂. 𑀦 𑀧𑀦𑀜𑁆𑀜𑀢𑁄𑀢𑀺 ‘‘𑀓𑀸𑀬𑀢𑁄, 𑀯𑀸𑀘𑀢𑁄, 𑀓𑀸𑀬𑀯𑀸𑀘𑀢𑁄, 𑀓𑀸𑀬𑀘𑀺𑀢𑁆𑀢𑀢𑁄’’𑀢𑀺 𑀏𑀯𑀫𑀸𑀤𑀺𑀦𑀸 𑀯𑀺𑀧𑀮𑁆𑀮𑀸𑀲𑀦𑀬𑁂𑀦 𑀬𑁄𑀚𑀺𑀢𑁂𑀳𑀺 𑀘𑀢𑀽𑀳𑀺 𑀲𑀫𑀼𑀝𑁆𑀞𑀸𑀦𑁂𑀳𑀺 𑀦 𑀲𑀫𑀼𑀝𑁆𑀞𑀸𑀢𑀺. 𑀙 𑀲𑀫𑀼𑀝𑁆𑀞𑀸𑀦𑀸𑀦𑀺 𑀬𑀲𑁆𑀲𑀸 𑀲𑀸 𑀙𑀲𑀫𑀼𑀝𑁆𑀞𑀸𑀦𑀸. 𑀲𑀘𑀺𑀢𑁆𑀢𑀓𑁂𑀳𑀺 𑀢𑀻𑀳𑀺, 𑀅𑀘𑀺𑀢𑁆𑀢𑀓𑁂𑀳𑀺 𑀢𑀻𑀳𑀻𑀢𑀺 𑀙𑀳𑀺 𑀏𑀯 𑀲𑀫𑀼𑀝𑁆𑀞𑀸𑀦𑁂𑀳𑀺 𑀲𑀫𑀼𑀝𑁆𑀞𑀸𑀢𑀻𑀢𑀺. 𑀧𑀓𑀸𑀭𑀦𑁆𑀢𑀭𑀸𑀪𑀸𑀯𑀸 𑀇𑀥 ‘‘𑀦 𑀅𑀜𑁆𑀜𑀢𑁄’’𑀢𑀺 𑀦 𑀯𑀼𑀢𑁆𑀢𑀁.

𑀆𑀳 𑀘 𑀅𑀝𑁆𑀞𑀓𑀣𑀸𑀘𑀭𑀺𑀬𑁄 𑀫𑀸𑀢𑀺𑀓𑀝𑁆𑀞𑀓𑀣𑀸𑀬𑀁.

𑁩𑁩𑁫. 𑀲𑀫𑀼𑀝𑁆𑀞𑀸𑀢𑀺 𑀏𑀢𑀲𑁆𑀫𑀸𑀢𑀺 𑀲𑀫𑀼𑀝𑁆𑀞𑀸𑀦𑀁, 𑀓𑀸𑀬𑀸𑀤𑀺 𑀙𑀩𑁆𑀩𑀺𑀥𑀁, 𑀏𑀓𑀁 𑀲𑀫𑀼𑀝𑁆𑀞𑀸𑀦𑀁 𑀓𑀸𑀭𑀡𑀁 𑀬𑀲𑁆𑀲𑀸 𑀲𑀸 𑀏𑀓𑀲𑀫𑀼𑀝𑁆𑀞𑀸𑀦𑀸. 𑀧𑀓𑀸𑀭𑀦𑁆𑀢𑀭𑀸𑀪𑀸𑀯𑀸 𑀢𑀺𑀥𑀸. 𑀓𑀣𑀁? 𑀲𑀘𑀺𑀢𑁆𑀢𑀓𑀸𑀦𑀁 𑀢𑀺𑀡𑁆𑀡𑀁 𑀲𑀫𑀼𑀝𑁆𑀞𑀸𑀦𑀸𑀦𑀁 𑀯𑀲𑁂𑀦 𑀢𑀺𑀯𑀺𑀥𑀸. 𑀤𑁆𑀯𑀻𑀳𑀺 𑀲𑀫𑀼𑀝𑁆𑀞𑀸𑀦𑁂𑀳𑀺 𑀲𑀫𑀼𑀝𑁆𑀞𑀺𑀢𑀸 𑀤𑁆𑀯𑀺𑀲𑀫𑀼𑀝𑁆𑀞𑀺𑀢𑀸, 𑀤𑁆𑀯𑀺𑀲𑀫𑀼𑀝𑁆𑀞𑀸𑀦𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀜𑁆𑀘𑀥𑀸𑀢𑀺 𑀯𑀼𑀢𑁆𑀢𑀦𑀬𑁂𑀦 𑀧𑀜𑁆𑀘𑀧𑁆𑀧𑀓𑀸𑀭𑀸. 𑀢𑀻𑀡𑀺 𑀲𑀫𑀼𑀝𑁆𑀞𑀸𑀦𑀸𑀦𑀺 𑀬𑀲𑁆𑀲𑀸 𑀲𑀸 𑀢𑀺𑀲𑀫𑀼𑀝𑁆𑀞𑀸𑀦𑀸, 𑀘𑀢𑁆𑀢𑀸𑀭𑀺 𑀲𑀫𑀼𑀝𑁆𑀞𑀸𑀦𑀸𑀦𑀺 𑀬𑀲𑁆𑀲𑀸 𑀲𑀸 𑀘𑀢𑀼𑀭𑀼𑀝𑁆𑀞𑀸𑀦𑀸, 𑀢𑀺𑀲𑀫𑀼𑀝𑁆𑀞𑀸𑀦𑀸 𑀘 𑀘𑀢𑀼𑀭𑀼𑀝𑁆𑀞𑀸𑀦𑀸 𑀘 𑀢𑀺𑀘𑀢𑀼𑀭𑀼𑀝𑁆𑀞𑀸𑀦𑀸𑀢𑀺 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑁄, 𑀢𑀺𑀲𑀫𑀼𑀝𑁆𑀞𑀸𑀦𑀸 𑀤𑁆𑀯𑀺𑀥𑀸 𑀯𑀺𑀪𑀢𑁆𑀢𑀸, 𑀘𑀢𑀼𑀲𑀫𑀼𑀝𑁆𑀞𑀸𑀦𑀸 𑀘 𑀤𑁆𑀯𑀺𑀥𑀸 𑀏𑀯 𑀯𑀺𑀪𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀙𑀳𑀺 𑀲𑀫𑀼𑀝𑁆𑀞𑀸𑀦𑁂𑀳𑀺 𑀲𑀫𑀼𑀝𑁆𑀞𑀺𑀢𑀸 𑀙𑀲𑀫𑀼𑀝𑁆𑀞𑀺𑀢𑀸, 𑀙𑀲𑀫𑀼𑀝𑁆𑀞𑀸𑀦𑀸𑀢𑀺 𑀅𑀢𑁆𑀣𑁄. 𑀏𑀓𑀥𑀸𑀢𑀺 𑀧𑀓𑀸𑀭𑀦𑁆𑀢𑀭𑀸𑀪𑀸𑀯𑀸 𑀏𑀓𑀥𑀸𑀯 𑀞𑀺𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁩𑁩𑁬. 𑀲𑀩𑁆𑀩𑀸 𑀆𑀧𑀢𑁆𑀢𑀺𑀬𑁄 𑀲𑀫𑀼𑀝𑁆𑀞𑀸𑀦𑀯𑀺𑀲𑁂𑀲𑀢𑁄 𑀏𑀯𑀁 𑀢𑁂𑀭𑀲𑀥𑀸 𑀞𑀺𑀢𑀸𑀦𑀁 𑀲𑀫𑀼𑀝𑁆𑀞𑀸𑀦𑀪𑁂𑀤𑀸𑀦𑀁 𑀦𑀸𑀦𑀢𑁆𑀢𑀢𑁄 𑀢𑁂𑀳𑀺 𑀲𑀫𑀼𑀝𑁆𑀞𑀺𑀢𑀸𑀦𑀁 𑀧𑀞𑀫𑀁 𑀧𑀜𑁆𑀜𑀢𑁆𑀢𑀢𑁆𑀢𑀸 𑀲𑀻𑀲𑀪𑀽𑀢𑀸𑀦𑀁 𑀲𑀺𑀓𑁆𑀔𑀸𑀧𑀤𑀸𑀦𑀁 𑀯𑀲𑁂𑀦 𑀢𑁂𑀭𑀲𑁂𑀯 𑀦𑀸𑀫𑀸𑀦𑀺 𑀮𑀪𑀦𑁆𑀢𑀺, 𑀢𑀸𑀦𑀺 𑀇𑀢𑁄 𑀧𑀭𑀁 𑀯𑀓𑁆𑀔𑀸𑀫𑀻𑀢𑀺 𑀬𑁄𑀚𑀦𑀸.

𑁩𑁩𑁭. 𑀧𑀞𑀫𑀦𑁆𑀢𑀺𑀫𑀯𑀢𑁆𑀣𑀼𑀜𑁆𑀘𑀸𑀢𑀺 𑀧𑀞𑀫𑀧𑀸𑀭𑀸𑀚𑀺𑀓𑀲𑀫𑀼𑀝𑁆𑀞𑀸𑀦𑀁. 𑀤𑀼𑀢𑀺𑀬𑀦𑁆𑀢𑀺 𑀅𑀤𑀺𑀦𑁆𑀦𑀸𑀤𑀸𑀦𑀲𑀫𑀼𑀝𑁆𑀞𑀸𑀦𑀁. 𑀲𑀜𑁆𑀘𑀭𑀺𑀢𑁆𑀢𑀓𑀦𑁆𑀢𑀺 𑀲𑀜𑁆𑀘𑀭𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁. 𑀲𑀫𑀦𑀼𑀪𑀸𑀲𑀦𑀦𑁆𑀢𑀺 𑀲𑀫𑀦𑀼𑀪𑀸𑀲𑀦𑀲𑀫𑀼𑀝𑁆𑀞𑀸𑀦𑀁. ‘‘𑀓𑀣𑀺𑀦𑀁 𑀏𑀴𑀓𑀮𑁄𑀫𑀓’’𑀦𑁆𑀢𑀺 𑀧𑀤𑀘𑁆𑀙𑁂𑀤𑁄, 𑀓𑀣𑀺𑀦𑀲𑀫𑀼𑀝𑁆𑀞𑀸𑀦𑀁 𑀏𑀴𑀓𑀮𑁄𑀫𑀲𑀫𑀼𑀝𑁆𑀞𑀸𑀦𑀜𑁆𑀘.

𑁩𑁩𑁮. 𑀧𑀤𑀲𑁄𑀥𑀫𑁆𑀫𑀦𑁆𑀢𑀺 𑀧𑀤𑀲𑁄𑀥𑀫𑁆𑀫𑀲𑀫𑀼𑀝𑁆𑀞𑀸𑀦𑀁. 𑀅𑀤𑁆𑀥𑀸𑀦𑀁 𑀣𑁂𑀬𑁆𑀬𑀲𑀢𑁆𑀣𑀦𑁆𑀢𑀺 𑀅𑀤𑁆𑀥𑀸𑀦𑀲𑀫𑀼𑀝𑁆𑀞𑀸𑀦𑀁 𑀣𑁂𑀬𑁆𑀬𑀲𑀢𑁆𑀣𑀲𑀫𑀼𑀝𑁆𑀞𑀸𑀦𑀁. 𑀤𑁂𑀲𑀦𑀸𑀢𑀺 𑀥𑀫𑁆𑀫𑀤𑁂𑀲𑀦𑀸𑀲𑀫𑀼𑀝𑁆𑀞𑀸𑀦𑀁. 𑀪𑀽𑀢𑀸𑀭𑁄𑀘𑀦𑀓𑀦𑁆𑀢𑀺 𑀪𑀽𑀢𑀸𑀭𑁄𑀘𑀦𑀲𑀫𑀼𑀝𑁆𑀞𑀸𑀦𑀁. 𑀘𑁄𑀭𑀺𑀯𑀼𑀝𑁆𑀞𑀸𑀧𑀦𑀦𑁆𑀢𑀺 𑀘𑁄𑀭𑀺𑀯𑀼𑀝𑁆𑀞𑀸𑀧𑀦𑀲𑀫𑀼𑀝𑁆𑀞𑀸𑀦𑀁.

𑁩𑁩𑁯. 𑀅𑀦𑀦𑀼𑀜𑁆𑀜𑀸𑀢𑀓𑀜𑁆𑀘𑀸𑀢𑀺 𑀅𑀦𑀦𑀼𑀜𑁆𑀜𑀸𑀢𑀓𑀲𑀫𑀼𑀝𑁆𑀞𑀸𑀦𑀜𑁆𑀘𑀸𑀢𑀺 𑀏𑀢𑀸𑀦𑀺 𑀢𑁂𑀭𑀲 𑀢𑁂𑀳𑀺 𑀲𑀫𑀼𑀝𑁆𑀞𑀸𑀦𑁂𑀳𑀺 𑀲𑀫𑀼𑀝𑁆𑀞𑀺𑀢𑀸𑀦𑀁 𑀢𑁂𑀲𑀁 𑀲𑀺𑀓𑁆𑀔𑀸𑀧𑀤𑀸𑀦𑀁 𑀧𑀞𑀫𑀁 𑀧𑀞𑀫𑀁 𑀦𑀺𑀤𑁆𑀤𑀺𑀝𑁆𑀞𑀸𑀦𑀁 𑀧𑀞𑀫𑀧𑀸𑀭𑀸𑀚𑀺𑀓𑀸𑀤𑀺𑀲𑀺𑀓𑁆𑀔𑀸𑀧𑀤𑀲𑀫𑀼𑀝𑁆𑀞𑀸𑀦𑀸𑀦𑀁 𑀇𑀢𑀭𑁂𑀲𑀁 𑀧𑀼𑀩𑁆𑀩𑀗𑁆𑀕𑀫𑀪𑀸𑀯𑀢𑁄 ‘‘𑀲𑀻𑀲𑀸𑀦𑀻’’𑀢𑀺 𑀯𑀼𑀢𑁆𑀢𑀸𑀦𑀺. 𑀬𑀣𑀸𑀳 𑀧𑀭𑀺𑀯𑀸𑀭𑀝𑁆𑀞𑀓𑀣𑀸𑀬𑀁 ‘‘𑀧𑀞𑀫𑀧𑀸𑀭𑀸𑀚𑀺𑀓𑀁 𑀦𑀸𑀫 𑀏𑀓𑀁 𑀲𑀫𑀼𑀝𑁆𑀞𑀸𑀦𑀲𑀻𑀲𑀁, 𑀲𑁂𑀲𑀸𑀦𑀺 𑀢𑁂𑀦 𑀲𑀤𑀺𑀲𑀸𑀦𑀻’’𑀢𑀺𑀆𑀤𑀺 (𑀧𑀭𑀺. 𑀅𑀝𑁆𑀞. 𑁨𑁫𑁮). 𑀢𑁂𑀭𑀲𑁂𑀢𑁂 𑀲𑀫𑀼𑀝𑁆𑀞𑀸𑀦𑀦𑀬𑀸𑀢𑀺 𑀏𑀢𑁂 𑀲𑀻𑀲𑀯𑀲𑁂𑀦 𑀤𑀲𑁆𑀲𑀺𑀢𑀸 𑀢𑁂𑀭𑀲 𑀲𑀫𑀼𑀝𑁆𑀞𑀸𑀦𑀦𑀬𑀸. 𑀯𑀺𑀜𑁆𑀜𑀽𑀳𑀺 𑀉𑀧𑀸𑀮𑀺𑀢𑁆𑀣𑁂𑀭𑀸𑀤𑀻𑀳𑀺.

𑁩𑁪𑁦. 𑀢𑀢𑁆𑀣 𑀢𑁂𑀭𑀲𑀲𑀼 𑀲𑀫𑀼𑀝𑁆𑀞𑀸𑀦𑀲𑀻𑀲𑁂𑀲𑀼. 𑀬𑀸𑀢𑀺 𑀬𑀸 𑀧𑀦 𑀆𑀧𑀢𑁆𑀢𑀺. 𑀆𑀤𑀺𑀧𑀸𑀭𑀸𑀚𑀺𑀓𑀼𑀝𑁆𑀞𑀸𑀦𑀸𑀢𑀺 𑀧𑀞𑀫𑀧𑀸𑀭𑀸𑀚𑀺𑀓𑀲𑀫𑀼𑀝𑁆𑀞𑀸𑀦𑀸.

𑁩𑁪𑁧. 𑀅𑀤𑀺𑀦𑁆𑀦𑀸𑀤𑀸𑀦-𑀲𑀤𑁆𑀤𑁄 𑀧𑀼𑀩𑁆𑀩𑀓𑁄 𑀧𑀞𑀫𑁄 𑀏𑀢𑀺𑀲𑁆𑀲𑀸 𑀢𑀁𑀲𑀫𑀼𑀝𑁆𑀞𑀸𑀦𑀸𑀧𑀢𑁆𑀢𑀺𑀬𑀸𑀢𑀺 𑀅𑀤𑀺𑀦𑁆𑀦𑀸𑀤𑀸𑀦𑀧𑀼𑀩𑁆𑀩𑀓𑀸, 𑀅𑀤𑀺𑀦𑁆𑀦𑀸𑀤𑀸𑀦𑀲𑀫𑀼𑀝𑁆𑀞𑀸𑀦𑀸𑀢𑀺 𑀉𑀤𑁆𑀤𑀺𑀝𑁆𑀞𑀸𑀢𑀺 𑀬𑁄𑀚𑀦𑀸.

𑁩𑁪𑁨. 𑀚𑀸𑀢𑀽𑀢𑀺 𑀏𑀓𑀁𑀲𑁂𑀦.

𑁩𑁪𑁩. 𑀅𑀬𑀁 𑀲𑀫𑀼𑀝𑁆𑀞𑀸𑀦𑀯𑀲𑁂𑀦 ‘‘𑀲𑀫𑀦𑀼𑀪𑀸𑀲𑀦𑀸𑀲𑀫𑀼𑀝𑁆𑀞𑀸𑀦𑀸’’𑀢𑀺 𑀯𑀼𑀢𑁆𑀢𑀸𑀢𑀺 𑀬𑁄𑀚𑀦𑀸.

𑁩𑁪𑁪. 𑀓𑀣𑀺𑀦-𑀲𑀤𑁆𑀤𑁄 𑀉𑀧𑀧𑀤𑁄 𑀬𑀲𑁆𑀲𑀸 𑀢𑀁𑀲𑀫𑀼𑀝𑁆𑀞𑀸𑀦𑀸𑀬 𑀆𑀧𑀢𑁆𑀢𑀺𑀬𑀸 𑀲𑀸 𑀓𑀣𑀺𑀦𑀼𑀧𑀧𑀤𑀸, 𑀓𑀣𑀺𑀦𑀲𑀫𑀼𑀝𑁆𑀞𑀸𑀦𑀸𑀢𑀺 𑀫𑀢𑀸 𑀜𑀸𑀢𑀸, 𑀅𑀬𑀁 𑀲𑀫𑀼𑀝𑁆𑀞𑀸𑀦𑀯𑀲𑁂𑀦 ‘‘𑀓𑀣𑀺𑀦𑀲𑀫𑀼𑀝𑁆𑀞𑀸𑀦𑀸’’𑀢𑀺 𑀜𑀸𑀢𑀸𑀢𑀺 𑀅𑀢𑁆𑀣𑁄.

𑁩𑁪𑁫. 𑀏𑀴𑀓𑀮𑁄𑀫-𑀲𑀤𑁆𑀤𑁄 𑀆𑀤𑀺 𑀬𑀲𑁆𑀲𑀸 𑀢𑀁𑀲𑀫𑀼𑀝𑁆𑀞𑀸𑀦𑀸𑀧𑀢𑁆𑀢𑀺𑀬𑀸 𑀲𑀸 𑀏𑀴𑀓𑀮𑁄𑀫𑀸𑀤𑀺𑀲𑀫𑀼𑀝𑁆𑀞𑀸𑀦𑀸𑀢𑀺 𑀅𑀢𑁆𑀣𑁄.

𑁩𑁪𑁯. 𑀏𑀢𑁆𑀣 𑀲𑀫𑀼𑀝𑁆𑀞𑀸𑀦𑁂𑀲𑀼.

𑁩𑁫𑁦. 𑀪𑀽𑀢𑀸𑀭𑁄𑀘𑀦-𑀲𑀤𑁆𑀤𑁄 𑀧𑀼𑀩𑁆𑀩𑀪𑀸𑀕𑁄 𑀏𑀢𑀺𑀲𑁆𑀲𑀸 𑀢𑀁𑀲𑀫𑀼𑀝𑁆𑀞𑀸𑀦𑀸𑀬 𑀆𑀧𑀢𑁆𑀢𑀺𑀬𑀸𑀢𑀺 𑀪𑀽𑀢𑀸𑀭𑁄𑀘𑀦𑀧𑀼𑀩𑁆𑀩𑀓𑀸, 𑀪𑀽𑀢𑀸𑀭𑁄𑀘𑀦𑀲𑀫𑀼𑀝𑁆𑀞𑀸𑀦𑀸𑀢𑀺 𑀅𑀢𑁆𑀣𑁄.

𑁩𑁫𑁧. 𑀲𑀫𑀼𑀝𑁆𑀞𑀸𑀦𑀁 𑀲𑀫𑀼𑀝𑁆𑀞𑀺𑀢𑀁, 𑀘𑁄𑀭𑀺𑀯𑀼𑀝𑁆𑀞𑀸𑀧𑀦𑀁 𑀲𑀫𑀼𑀝𑁆𑀞𑀺𑀢𑀁 𑀬𑀲𑁆𑀲𑀸 𑀲𑀸 𑀘𑁄𑀭𑀺𑀯𑀼𑀝𑁆𑀞𑀸𑀧𑀦𑀲𑀫𑀼𑀝𑁆𑀞𑀺𑀢𑀸, 𑀘𑁄𑀭𑀺𑀯𑀼𑀝𑁆𑀞𑀸𑀧𑀦𑀲𑀫𑀼𑀝𑁆𑀞𑀸𑀦𑀸𑀢𑀺 𑀅𑀢𑁆𑀣𑁄.

𑁩𑁫𑁩. 𑀢𑀢𑁆𑀣𑀸𑀢𑀺 𑀢𑁂𑀭𑀲𑀲𑀫𑀼𑀝𑁆𑀞𑀸𑀦𑀲𑀻𑀲𑁂𑀲𑀼, ‘‘𑀲𑀫𑀼𑀝𑁆𑀞𑀸𑀦𑀁 𑀲𑀘𑀺𑀢𑁆𑀢𑀓’’𑀦𑁆𑀢𑀺 𑀇𑀤𑀁 ‘‘𑀧𑀞𑀫’’𑀦𑁆𑀢𑀺𑀆𑀤𑀻𑀳𑀺 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀁. 𑀧𑀞𑀫𑀁 𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀧𑀞𑀫𑀧𑀸𑀭𑀸𑀚𑀺𑀓𑀲𑀫𑀼𑀝𑁆𑀞𑀸𑀦𑀁. 𑀤𑀼𑀢𑀺𑀬𑀁 𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀅𑀤𑀺𑀦𑁆𑀦𑀸𑀤𑀸𑀦𑀲𑀫𑀼𑀝𑁆𑀞𑀸𑀦𑀁. 𑀘𑀢𑀼𑀢𑁆𑀣𑀁 𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀲𑀫𑀦𑀼𑀪𑀸𑀲𑀦𑀲𑀫𑀼𑀝𑁆𑀞𑀸𑀦𑀁. 𑀦𑀯𑀫𑀁 𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀣𑁂𑀬𑁆𑀬𑀲𑀢𑁆𑀣𑀲𑀫𑀼𑀝𑁆𑀞𑀸𑀦𑀁. 𑀤𑀲𑀫𑀁 𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀥𑀫𑁆𑀫𑀤𑁂𑀲𑀦𑀸𑀲𑀫𑀼𑀝𑁆𑀞𑀸𑀦𑀁. 𑀤𑁆𑀯𑀸𑀤𑀲𑀫𑀁 𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀘𑁄𑀭𑀺𑀯𑀼𑀝𑁆𑀞𑀸𑀧𑀦𑀲𑀫𑀼𑀝𑁆𑀞𑀸𑀦𑀁.

𑁩𑁫𑁪. 𑀲𑀫𑀼𑀝𑁆𑀞𑀸𑀦𑁂𑀢𑀺 𑀲𑀫𑀼𑀝𑁆𑀞𑀸𑀦𑀲𑀻𑀲𑁂. 𑀲𑀤𑀺𑀲𑀸𑀢𑀺 𑀢𑁂𑀦 𑀢𑁂𑀦 𑀲𑀫𑀼𑀝𑁆𑀞𑀸𑀦𑀲𑀻𑀲𑁂𑀦 𑀲𑀫𑀼𑀝𑁆𑀞𑀸𑀦𑀸 𑀆𑀧𑀢𑁆𑀢𑀺𑀬𑁄. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀫𑀼𑀝𑁆𑀞𑀸𑀦𑀯𑀺𑀦𑀺𑀘𑁆𑀙𑀬𑁂. 𑀤𑀺𑀲𑁆𑀲𑀭𑁂𑀢𑀺 𑀤𑀺𑀲𑁆𑀲𑀦𑁆𑀢𑁂, 𑀤𑀺𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀇𑀥 𑀤𑀺𑀲𑁆𑀲𑀭𑁂𑀢𑀺 𑀇𑀥 𑀉𑀪𑀢𑁄𑀯𑀺𑀪𑀗𑁆𑀕𑁂 𑀏𑀢𑁂𑀲𑀼 𑀢𑁂𑀭𑀲𑀲𑀫𑀼𑀝𑁆𑀞𑀸𑀦𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀅𑀜𑁆𑀜𑀸𑀦𑀺𑀧𑀺 𑀲𑀤𑀺𑀲𑀸𑀦𑀺 𑀲𑀫𑀼𑀝𑁆𑀞𑀸𑀦𑀸𑀦𑀺 𑀤𑀺𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺 𑀢𑀸𑀦𑀺 𑀲𑀭𑀽𑀧𑀢𑁄 𑀦𑀺𑀤𑀲𑁆𑀲𑁂𑀢𑀼𑀫𑀸𑀳 ‘‘𑀲𑀼𑀓𑁆𑀓𑀜𑁆𑀘𑀸’’𑀢𑀺𑀆𑀤𑀺. 𑀢𑀢𑁆𑀣 𑀲𑀼𑀓𑁆𑀓𑀦𑁆𑀢𑀺 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀲𑀺𑀓𑁆𑀔𑀸𑀧𑀤𑀁. 𑀏𑀲 𑀦𑀬𑁄 ‘‘𑀓𑀸𑀬𑀲𑀁𑀲𑀕𑁆𑀕𑁄’’𑀢𑀺𑀆𑀤𑀻𑀲𑀼𑀧𑀺. 𑀬𑀤𑁂𑀢𑁆𑀣 𑀤𑀼𑀯𑀺𑀜𑁆𑀜𑁂𑀬𑁆𑀬𑀁, 𑀢𑀁 𑀯𑀓𑁆𑀔𑀸𑀫.

𑁩𑁫𑁫. 𑀧𑀼𑀩𑁆𑀩𑀼𑀧𑀧𑀭𑀺𑀧𑀸𑀓𑁄 𑀘𑀸𑀢𑀺 ‘‘𑀚𑀸𑀦𑀁 𑀧𑀼𑀩𑁆𑀩𑀼𑀧𑀕𑀢𑀁 𑀪𑀺𑀓𑁆𑀔𑀼’’𑀦𑁆𑀢𑀺 (𑀧𑀸𑀘𑀺. 𑁧𑁨𑁦) 𑀲𑀺𑀓𑁆𑀔𑀸𑀧𑀤𑀜𑁆𑀘 ‘‘𑀪𑀺𑀓𑁆𑀔𑀼𑀦𑀺𑀧𑀭𑀺𑀧𑀸𑀘𑀺𑀢’’𑀦𑁆𑀢𑀺 (𑀧𑀸𑀘𑀺. 𑁧𑁯𑁨, 𑁧𑁯𑁪) 𑀧𑀺𑀡𑁆𑀟𑀧𑀸𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀭𑀳𑁄 𑀪𑀺𑀓𑁆𑀔𑀼𑀦𑀺𑀬𑀸𑀲𑀳𑀸𑀢𑀺 𑀪𑀺𑀓𑁆𑀔𑀼𑀦𑀺𑀬𑀸 𑀲𑀤𑁆𑀥𑀺𑀁 𑀭𑀳𑁄 𑀦𑀺𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑀜𑁆𑀘. 𑀲𑀪𑁄𑀚𑀦𑁂, 𑀭𑀳𑁄 𑀤𑁆𑀯𑁂 𑀘𑀸𑀢𑀺 𑀲𑀪𑁄𑀚𑀦𑁂 𑀓𑀼𑀮𑁂 𑀅𑀦𑀼𑀧𑀔𑀚𑁆𑀚𑀲𑀺𑀓𑁆𑀔𑀸𑀧𑀤𑀜𑁆𑀘 𑀤𑁆𑀯𑁂 𑀭𑀳𑁄𑀦𑀺𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑀸𑀦𑀺 𑀘. 𑀅𑀗𑁆𑀕𑀼𑀮𑀻 𑀉𑀤𑀓𑁂 𑀳𑀲𑀦𑁆𑀢𑀺 𑀅𑀗𑁆𑀕𑀼𑀮𑀺𑀧𑀢𑁄𑀤𑀜𑁆𑀘 𑀉𑀤𑀓𑀳𑀲𑀥𑀫𑁆𑀫𑀲𑀺𑀓𑁆𑀔𑀸𑀧𑀤𑀜𑁆𑀘.

𑁩𑁫𑁬. 𑀧𑀳𑀸𑀭𑁂 𑀉𑀕𑁆𑀕𑀺𑀭𑁂 𑀘𑁂𑀯𑀸𑀢𑀺 𑀧𑀳𑀸𑀭𑀤𑀸𑀦𑀲𑀺𑀓𑁆𑀔𑀸𑀧𑀤𑀜𑁆𑀘 𑀢𑀮𑀲𑀢𑁆𑀢𑀺𑀉𑀕𑁆𑀕𑀺𑀭𑀡𑀲𑀺𑀓𑁆𑀔𑀸𑀧𑀤𑀜𑁆𑀘. 𑀢𑁂𑀧𑀜𑁆𑀜𑀸𑀲𑀸 𑀘 𑀲𑁂𑀔𑀺𑀬𑀸𑀢𑀺 𑀧𑀜𑁆𑀘𑀲𑀢𑁆𑀢𑀢𑀺𑀲𑁂𑀔𑀺𑀬𑀸𑀲𑀼 𑀯𑀓𑁆𑀔𑀫𑀸𑀦𑀸𑀦𑀺 𑀉𑀚𑁆𑀚𑀕𑁆𑀖𑀺𑀓𑀸𑀤𑀻𑀦𑀺 𑀲𑀫𑀦𑀼𑀪𑀸𑀲𑀦𑀲𑀫𑀼𑀝𑁆𑀞𑀸𑀦𑀸𑀦𑀺 𑀤𑀲, 𑀙𑀢𑁆𑀢𑀧𑀸𑀡𑀺𑀆𑀤𑀻𑀦𑀺 𑀥𑀫𑁆𑀫𑀤𑁂𑀲𑀦𑀸𑀲𑀫𑀼𑀝𑁆𑀞𑀸𑀦𑀸𑀦𑀺 𑀏𑀓𑀸𑀤𑀲, 𑀣𑁂𑀬𑁆𑀬𑀲𑀢𑁆𑀣𑀲𑀫𑀼𑀝𑁆𑀞𑀸𑀦𑀁, 𑀲𑀽𑀧𑁄𑀤𑀦𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀜𑁆𑀘𑀸𑀢𑀺 𑀩𑀸𑀯𑀻𑀲𑀢𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀞𑀧𑁂𑀢𑁆𑀯𑀸 𑀧𑀭𑀺𑀫𑀡𑁆𑀟𑀮𑀦𑀺𑀯𑀸𑀲𑀦𑀸𑀤𑀻𑀦𑀺 𑀇𑀢𑀭𑀸𑀦𑀺 𑀢𑁂𑀧𑀜𑁆𑀜𑀸𑀲 𑀲𑁂𑀔𑀺𑀬𑀲𑀺𑀓𑁆𑀔𑀸𑀧𑀤𑀸𑀦𑀺 𑀘. 𑀅𑀥𑀓𑁆𑀔𑀓𑀼𑀩𑁆𑀪𑀚𑀸𑀡𑀼𑀜𑁆𑀘𑀸𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀅𑀥𑀓𑁆𑀔𑀓𑀉𑀩𑁆𑀪𑀚𑀸𑀡𑀼𑀲𑀺𑀓𑁆𑀔𑀸𑀧𑀤𑀜𑁆𑀘. 𑀕𑀸𑀫𑀦𑁆𑀢𑀭𑀫𑀯𑀲𑁆𑀲𑀼𑀢𑀸𑀢𑀺 𑀕𑀸𑀫𑀦𑁆𑀢𑀭𑀕𑀫𑀦𑀁, 𑀅𑀯𑀲𑁆𑀲𑀼𑀢𑀲𑁆𑀲 𑀳𑀢𑁆𑀣𑀢𑁄 𑀔𑀸𑀤𑀦𑀻𑀬𑀕𑁆𑀕𑀳𑀡𑀲𑀺𑀓𑁆𑀔𑀸𑀧𑀤𑀜𑁆𑀘.

𑁩𑁫𑁭-𑁮. 𑀢𑀮𑀫𑀝𑁆𑀞𑀼𑀤𑀲𑀼𑀤𑁆𑀥𑀺 𑀘𑀸𑀢𑀺 𑀢𑀮𑀖𑀸𑀢𑀁, 𑀚𑀢𑀼𑀫𑀝𑁆𑀞𑀁, 𑀉𑀤𑀓𑀲𑀼𑀤𑁆𑀥𑀺𑀓𑀸𑀤𑀺𑀬𑀦𑀜𑁆𑀘. 𑀯𑀲𑁆𑀲𑀁𑀯𑀼𑀢𑁆𑀣𑀸𑀢𑀺 ‘‘𑀯𑀲𑁆𑀲𑀁𑀯𑀼𑀢𑁆𑀣𑀸…𑀧𑁂… 𑀙𑀧𑁆𑀧𑀜𑁆𑀘𑀬𑁄𑀚𑀦𑀸𑀦𑀻’’𑀢𑀺 (𑀧𑀸𑀘𑀺. 𑁯𑁭𑁪) 𑀲𑀺𑀓𑁆𑀔𑀸𑀧𑀤𑀜𑁆𑀘. 𑀑𑀯𑀸𑀤𑀸𑀬 𑀦 𑀕𑀘𑁆𑀙𑀦𑁆𑀢𑀻𑀢𑀺 𑀑𑀯𑀸𑀤𑀸𑀬 𑀅𑀕𑀫𑀦𑀲𑀺𑀓𑁆𑀔𑀸𑀧𑀤𑀜𑁆𑀘. 𑀦𑀸𑀦𑀼𑀩𑀦𑁆𑀥𑁂 𑀧𑀯𑀢𑁆𑀢𑀺𑀦𑀺𑀦𑁆𑀢𑀺 ‘‘𑀯𑀼𑀝𑁆𑀞𑀸𑀧𑀺𑀢𑀁 𑀧𑀯𑀢𑁆𑀢𑀺𑀦𑀺𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀦𑀸𑀦𑀼𑀩𑀦𑁆𑀥𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁧𑁧𑁧𑁨) 𑀲𑀺𑀓𑁆𑀔𑀸𑀧𑀤𑀜𑁆𑀘𑀸𑀢𑀺 𑀉𑀪𑀢𑁄𑀯𑀺𑀪𑀗𑁆𑀕𑁂 𑀦𑀺𑀤𑁆𑀤𑀺𑀝𑁆𑀞𑀸 𑀇𑀫𑁂 𑀧𑀜𑁆𑀘𑀲𑀢𑁆𑀢𑀢𑀺 𑀥𑀫𑁆𑀫𑀸 𑀓𑀸𑀬𑀘𑀺𑀢𑁆𑀢𑀲𑀫𑀼𑀝𑁆𑀞𑀺𑀢𑀸 𑀫𑁂𑀣𑀼𑀦𑁂𑀦 𑀲𑀫𑀸 𑀏𑀓𑀲𑀫𑀼𑀝𑁆𑀞𑀸𑀦𑀸 𑀫𑀢𑀸𑀢𑀺 𑀬𑁄𑀚𑀦𑀸.

𑀏𑀢𑁆𑀣 𑀘 𑀧𑀸𑀴𑀺𑀬𑀁 ‘‘𑀙𑀲𑀢𑁆𑀢𑀢𑀻’’𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄 𑀲𑀫𑀼𑀝𑁆𑀞𑀸𑀦𑀲𑀺𑀓𑁆𑀔𑀸𑀧𑀤𑁂𑀦 𑀲𑀳 𑀤𑀲𑁆𑀲𑀺𑀢𑁄. 𑀇𑀥 𑀧𑀦 𑀢𑀁 𑀯𑀺𑀦𑀸 𑀢𑀁𑀲𑀤𑀺𑀲𑀸𑀦𑀫𑁂𑀯 𑀕𑀡𑀦𑀸 𑀤𑀲𑁆𑀲𑀺𑀢𑀸. 𑀢𑁂𑀦𑁂𑀯 𑀧𑀞𑀫𑀁 𑀲𑀫𑀼𑀝𑁆𑀞𑀸𑀦𑀲𑀻𑀲𑀁 𑀧𑀸𑀴𑀺𑀬𑀁 𑀕𑀡𑀦𑀸𑀬𑀧𑀺 𑀤𑀲𑁆𑀲𑀺𑀢𑀁, 𑀇𑀥𑁂𑀯 𑀦 𑀤𑀲𑁆𑀲𑀺𑀢𑀁. 𑀉𑀧𑀭𑀺 𑀓𑀢𑁆𑀣𑀘𑀺 𑀲𑀫𑀼𑀝𑁆𑀞𑀸𑀦𑀲𑀻𑀲𑀲𑁆𑀲 𑀤𑀲𑁆𑀲𑀦𑀁 𑀧𑀦𑁂𑀢𑁆𑀣 𑀯𑀓𑁆𑀔𑀫𑀸𑀦𑀸𑀦𑀁 𑀢𑀁𑀲𑀤𑀺𑀲𑀪𑀸𑀯𑀤𑀲𑁆𑀲𑀦𑀢𑁆𑀣𑀁, 𑀕𑀡𑀦𑀸𑀬 𑀯𑀓𑁆𑀔𑀫𑀸𑀦𑀸𑀬 𑀅𑀦𑁆𑀢𑁄𑀕𑀥𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀢𑁂𑀦𑁂𑀯 𑀢𑀢𑁆𑀣𑀧𑀺 𑀢𑀁 𑀯𑀺𑀦𑀸 𑀕𑀡𑀦𑀁 𑀯𑀓𑁆𑀔𑀢𑀺.

𑀧𑀞𑀫𑀧𑀸𑀭𑀸𑀚𑀺𑀓𑀲𑀫𑀼𑀝𑁆𑀞𑀸𑀦𑀯𑀡𑁆𑀡𑀦𑀸.

𑁩𑁫𑁯. 𑀯𑀺𑀕𑁆𑀕𑀳𑀦𑁆𑀢𑀺 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀲𑀺𑀓𑁆𑀔𑀸𑀧𑀤𑀁. 𑀉𑀢𑁆𑀢𑀭𑀺 𑀘𑁂𑀯𑀸𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀲𑀺𑀓𑁆𑀔𑀸𑀧𑀤𑀜𑁆𑀘. 𑀤𑀼𑀝𑁆𑀞𑀼𑀮𑁆𑀮𑀦𑁆𑀢𑀺 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀲𑀺𑀓𑁆𑀔𑀸𑀧𑀤𑀁. 𑀅𑀢𑁆𑀢𑀓𑀸𑀫𑀢𑀸𑀢𑀺 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀲𑀺𑀓𑁆𑀔𑀸𑀧𑀤𑀜𑁆𑀘. 𑀤𑀼𑀝𑁆𑀞𑀤𑁄𑀲𑀸 𑀤𑀼𑀯𑁂 𑀘𑁂𑀯𑀸𑀢𑀺 𑀤𑁆𑀯𑁂 𑀤𑀼𑀝𑁆𑀞𑀤𑁄𑀲𑀲𑀺𑀓𑁆𑀔𑀸𑀧𑀤𑀸𑀦𑀺 𑀘. 𑀤𑀼𑀢𑀺𑀬𑀸𑀦𑀺𑀬𑀢𑁄𑀧𑀺 𑀘𑀸𑀢𑀺 𑀤𑀼𑀢𑀺𑀬𑀅𑀦𑀺𑀬𑀢𑀲𑀺𑀓𑁆𑀔𑀸𑀧𑀤𑀜𑁆𑀘.

𑁩𑁬𑁦. 𑀅𑀘𑁆𑀙𑀺𑀦𑁆𑀤𑀦𑀜𑁆𑀘𑀸𑀢𑀺 𑀲𑀸𑀫𑀁 𑀘𑀻𑀯𑀭𑀁 𑀤𑀢𑁆𑀯𑀸 𑀅𑀘𑁆𑀙𑀺𑀦𑁆𑀤𑀦𑀜𑁆𑀘. 𑀧𑀭𑀺𑀡𑀸𑀫𑁄𑀢𑀺 𑀲𑀗𑁆𑀖𑀺𑀓𑀮𑀸𑀪𑀲𑁆𑀲 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑀦𑀜𑁆𑀘. 𑀫𑀼𑀲𑀸𑀑𑀫𑀲𑀧𑁂𑀲𑀼𑀡𑀸𑀢𑀺 𑀫𑀼𑀲𑀸𑀯𑀸𑀤𑁄 𑀘 𑀑𑀫𑀲𑀯𑀸𑀤𑁄 𑀘 𑀪𑀺𑀓𑁆𑀔𑀼𑀧𑁂𑀲𑀼𑀜𑁆𑀜𑀜𑁆𑀘. 𑀤𑀼𑀝𑁆𑀞𑀼𑀮𑁆𑀮𑀸𑀭𑁄𑀘𑀦𑀜𑁆𑀘𑁂𑀯𑀸𑀢𑀺 𑀤𑀼𑀝𑁆𑀞𑀼𑀮𑁆𑀮𑀸𑀧𑀢𑁆𑀢𑀺𑀆𑀭𑁄𑀘𑀦𑀲𑀺𑀓𑁆𑀔𑀸𑀧𑀤𑀜𑁆𑀘. 𑀧𑀣𑀯𑀻𑀔𑀡𑀦𑀫𑁆𑀧𑀺 𑀘𑀸𑀢𑀺 𑀧𑀣𑀯𑀻𑀔𑀡𑀦𑀲𑀺𑀓𑁆𑀔𑀸𑀧𑀤𑀜𑁆𑀘.

𑁩𑁬𑁧. 𑀪𑀽𑀢𑀕𑀸𑀫𑀜𑁆𑀘 𑀯𑀸𑀤𑁄 𑀘𑀸𑀢𑀺 𑀪𑀽𑀢𑀕𑀸𑀫𑀲𑀺𑀓𑁆𑀔𑀸𑀧𑀤𑀁, 𑀅𑀜𑁆𑀜𑀯𑀸𑀤𑀓𑀲𑀺𑀓𑁆𑀔𑀸𑀧𑀤𑀜𑁆𑀘. 𑀉𑀚𑁆𑀛𑀸𑀧𑀦𑀓𑀫𑁂𑀯 𑀘𑀸𑀢𑀺 𑀉𑀚𑁆𑀛𑀸𑀧𑀦𑀓𑀲𑀺𑀓𑁆𑀔𑀸𑀧𑀤𑀜𑁆𑀘. 𑀦𑀺𑀓𑁆𑀓𑀟𑁆𑀠𑁄 𑀲𑀺𑀜𑁆𑀘𑀦𑀜𑁆𑀘𑁂𑀯𑀸𑀢𑀺 𑀯𑀺𑀳𑀸𑀭𑀢𑁄 𑀦𑀺𑀓𑁆𑀓𑀟𑁆𑀠𑀦𑀜𑁆𑀘 𑀉𑀤𑀓𑁂 𑀢𑀺𑀡𑀸𑀤𑀺𑀲𑀺𑀜𑁆𑀘𑀦𑀜𑁆𑀘. 𑀆𑀫𑀺𑀲𑀳𑁂𑀢𑀼 𑀘𑀸𑀢𑀺 𑀆𑀫𑀺𑀲𑀳𑁂𑀢𑀼 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀸𑀤𑀲𑀺𑀓𑁆𑀔𑀸𑀧𑀤𑀜𑁆𑀘.

𑁩𑁬𑁨. 𑀪𑀼𑀢𑁆𑀢𑀸𑀯𑀺𑀦𑁆𑀢𑀺 𑀪𑀼𑀢𑁆𑀢𑀸𑀯𑀺𑀁 𑀅𑀦𑀢𑀺𑀭𑀺𑀢𑁆𑀢𑁂𑀦 𑀔𑀸𑀤𑀦𑀻𑀬𑀸𑀤𑀺𑀦𑀸 𑀧𑀯𑀸𑀭𑀡𑀲𑀺𑀓𑁆𑀔𑀸𑀧𑀤𑀜𑁆𑀘. 𑀏𑀳𑀦𑀸𑀤𑀭𑀺𑀦𑁆𑀢𑀺 ‘‘𑀏𑀳𑀸𑀯𑀼𑀲𑁄, 𑀕𑀸𑀫𑀁 𑀯𑀸’’𑀢𑀺 (𑀧𑀸𑀘𑀺. 𑁨𑁭𑁫) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘 𑀅𑀦𑀸𑀤𑀭𑀺𑀬𑀲𑀺𑀓𑁆𑀔𑀸𑀧𑀤𑀜𑁆𑀘. 𑀪𑀺𑀁𑀲𑀸𑀧𑀦𑀫𑁂𑀯 𑀘𑀸𑀢𑀺 𑀪𑀺𑀓𑁆𑀔𑀼𑀪𑀺𑀁𑀲𑀦𑀓𑀜𑁆𑀘. 𑀅𑀧𑀦𑀺𑀥𑁂𑀬𑁆𑀬𑀸𑀢𑀺 𑀧𑀢𑁆𑀢𑀸𑀤𑀺𑀅𑀧𑀦𑀺𑀥𑀸𑀦𑀲𑀺𑀓𑁆𑀔𑀸𑀧𑀤𑀜𑁆𑀘. 𑀲𑀜𑁆𑀘𑀺𑀘𑁆𑀘 𑀧𑀸𑀡𑀦𑁆𑀢𑀺 𑀲𑀜𑁆𑀘𑀺𑀘𑁆𑀘 𑀧𑀸𑀡𑀁 𑀚𑀻𑀯𑀺𑀢𑀸𑀯𑁄𑀭𑁄𑀧𑀦𑀜𑁆𑀘. 𑀲𑀧𑁆𑀧𑀸𑀡𑀓𑀫𑁆𑀧𑀺 𑀘𑀸𑀢𑀺 𑀚𑀸𑀦𑀁 𑀲𑀧𑁆𑀧𑀸𑀡𑀓𑀉𑀤𑀓𑀲𑀺𑀓𑁆𑀔𑀸𑀧𑀤𑀜𑁆𑀘.

𑁩𑁬𑁩. 𑀉𑀓𑁆𑀓𑁄𑀝𑀦𑀜𑁆𑀘𑀸𑀢𑀺 𑀧𑀼𑀦𑀓𑀫𑁆𑀫𑀸𑀬 𑀉𑀓𑁆𑀓𑁄𑀝𑀦𑀜𑁆𑀘. 𑀊𑀦𑁄𑀢𑀺 𑀊𑀦𑀯𑀻𑀲𑀢𑀺𑀯𑀲𑁆𑀲𑀲𑀺𑀓𑁆𑀔𑀸𑀧𑀤𑀜𑁆𑀘. 𑀲𑀁𑀯𑀸𑀲𑁄𑀢𑀺 𑀉𑀓𑁆𑀔𑀺𑀢𑁆𑀢𑀓𑁂𑀦 𑀲𑀤𑁆𑀥𑀺𑀁 𑀲𑀁𑀯𑀸𑀲𑀲𑀺𑀓𑁆𑀔𑀸𑀧𑀤𑀜𑁆𑀘. 𑀦𑀸𑀲𑀦𑁂 𑀘𑀸𑀢𑀺 𑀦𑀸𑀲𑀺𑀢𑀓𑀲𑀸𑀫𑀡𑁂𑀭𑀲𑀫𑁆𑀪𑁄𑀕𑀲𑀺𑀓𑁆𑀔𑀸𑀧𑀤𑀜𑁆𑀘. 𑀲𑀳𑀥𑀫𑁆𑀫𑀺𑀓𑀦𑁆𑀢𑀺 𑀲𑀳𑀥𑀫𑁆𑀫𑀺𑀓𑀁 𑀯𑀼𑀘𑁆𑀘𑀫𑀸𑀦𑀲𑀺𑀓𑁆𑀔𑀸𑀧𑀤𑀜𑁆𑀘. 𑀯𑀺𑀮𑁂𑀔𑀸 𑀘𑀸𑀢𑀺 ‘‘𑀯𑀺𑀮𑁂𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺 (𑀧𑀸𑀘𑀺. 𑁪𑁩𑁯) 𑀆𑀕𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀫𑁄𑀳𑀦𑀸𑀢𑀺 𑀫𑁄𑀳𑀦𑀲𑀺𑀓𑁆𑀔𑀸𑀧𑀤𑀜𑁆𑀘. 𑀅𑀫𑀽𑀮𑀓𑁂𑀦 𑀘𑀸𑀢𑀺 𑀅𑀫𑀽𑀮𑀓𑁂𑀦 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀅𑀦𑀼𑀤𑁆𑀥𑀁𑀲𑀦𑀲𑀺𑀓𑁆𑀔𑀸𑀧𑀤𑀜𑁆𑀘.

𑁩𑁬𑁪. 𑀓𑀼𑀓𑁆𑀓𑀼𑀘𑁆𑀘𑀁 𑀔𑀻𑀬𑀦𑀁 𑀤𑀢𑁆𑀯𑀸𑀢𑀺 𑀓𑀼𑀓𑁆𑀓𑀼𑀘𑁆𑀘𑀉𑀧𑁆𑀧𑀸𑀤𑀦𑀜𑁆𑀘 𑀥𑀫𑁆𑀫𑀺𑀓𑀸𑀦𑀁 𑀓𑀫𑁆𑀫𑀸𑀦𑀁 𑀙𑀦𑁆𑀤𑀁 𑀤𑀢𑁆𑀯𑀸 𑀔𑀻𑀬𑀦𑀜𑁆𑀘 𑀘𑀻𑀯𑀭𑀁 𑀤𑀢𑁆𑀯𑀸 𑀔𑀻𑀬𑀦𑀜𑁆𑀘. 𑀧𑀭𑀺𑀡𑀸𑀫𑁂𑀬𑁆𑀬 𑀧𑀼𑀕𑁆𑀕𑀮𑁂𑀢𑀺 𑀲𑀗𑁆𑀖𑀺𑀓𑀁 𑀮𑀸𑀪𑀁 𑀧𑀼𑀕𑁆𑀕𑀮𑀲𑁆𑀲 𑀧𑀭𑀺𑀡𑀸𑀫𑀦𑀲𑀺𑀓𑁆𑀔𑀸𑀧𑀤𑀜𑁆𑀘. 𑀓𑀺𑀁 𑀢𑁂, 𑀅𑀓𑀸𑀮𑀁, 𑀅𑀘𑁆𑀙𑀺𑀦𑁆𑀤𑁂𑀢𑀺 ‘‘𑀓𑀺𑀁 𑀢𑁂, 𑀅𑀬𑁆𑀬𑁂, 𑀏𑀲𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀓𑀭𑀺𑀲𑁆𑀲𑀢𑀻’’𑀢𑀺 (𑀧𑀸𑀘𑀺. 𑁭𑁦𑁫) 𑀆𑀕𑀢𑀲𑀺𑀓𑁆𑀔𑀸𑀧𑀤𑀜𑁆𑀘 𑀅𑀓𑀸𑀮𑀘𑀻𑀯𑀭𑀁 ‘‘𑀓𑀸𑀮𑀘𑀻𑀯𑀭’’𑀦𑁆𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀪𑀸𑀚𑀦𑀲𑀺𑀓𑁆𑀔𑀸𑀧𑀤𑀜𑁆𑀘 𑀪𑀺𑀓𑁆𑀔𑀼𑀦𑀺𑀬𑀸 𑀲𑀤𑁆𑀥𑀺𑀁 𑀘𑀻𑀯𑀭𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀅𑀘𑁆𑀙𑀺𑀦𑁆𑀤𑀦𑀲𑀺𑀓𑁆𑀔𑀸𑀧𑀤𑀜𑁆𑀘. 𑀤𑀼𑀕𑁆𑀕𑀳𑀦𑀺𑀭𑀬𑁂𑀦 𑀘𑀸𑀢𑀺 𑀤𑀼𑀕𑁆𑀕𑀳𑀺𑀢𑁂𑀦 𑀤𑀼𑀧𑀥𑀸𑀭𑀺𑀢𑁂𑀦 𑀧𑀭𑀁 𑀉𑀚𑁆𑀛𑀸𑀧𑀦𑀲𑀺𑀓𑁆𑀔𑀸𑀧𑀤𑀜𑁆𑀘 𑀦𑀺𑀭𑀬𑁂𑀦 𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀯𑀸 𑀅𑀪𑀺𑀲𑀧𑀦𑀲𑀺𑀓𑁆𑀔𑀸𑀧𑀤𑀜𑁆𑀘.

𑁩𑁬𑁫. 𑀕𑀡𑀲𑁆𑀲 𑀘𑀸𑀢𑀺 ‘‘𑀕𑀡𑀲𑁆𑀲 𑀘𑀻𑀯𑀭𑀮𑀸𑀪𑀁 𑀅𑀦𑁆𑀢𑀭𑀸𑀬𑀁 𑀓𑀭𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁯𑁦𑁮) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀯𑀺𑀪𑀗𑁆𑀕𑀜𑁆𑀘𑀸𑀢𑀺 ‘‘𑀥𑀫𑁆𑀫𑀺𑀓𑀁 𑀘𑀻𑀯𑀭𑀯𑀺𑀪𑀗𑁆𑀕𑀁 𑀧𑀝𑀺𑀩𑀸𑀳𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁯𑁧𑁨) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀤𑀼𑀩𑁆𑀩𑀮𑀸𑀲𑀸 𑀢𑀣𑁂𑀯 𑀘𑀸𑀢𑀺 ‘‘𑀤𑀼𑀩𑁆𑀩𑀮𑀘𑀻𑀯𑀭𑀧𑀘𑁆𑀘𑀸𑀲𑀸𑀬 𑀘𑀻𑀯𑀭𑀓𑀸𑀮𑀲𑀫𑀬𑀁 𑀅𑀢𑀺𑀓𑁆𑀓𑀸𑀫𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁯𑁨𑁧) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀥𑀫𑁆𑀫𑀺𑀓𑀁 𑀓𑀣𑀺𑀦𑀼𑀤𑁆𑀥𑀸𑀭𑀦𑁆𑀢𑀺 ‘‘𑀥𑀫𑁆𑀫𑀺𑀓𑀁 𑀓𑀣𑀺𑀦𑀼𑀤𑁆𑀥𑀸𑀭𑀁 𑀧𑀝𑀺𑀩𑀸𑀳𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁯𑁨𑁮) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀲𑀜𑁆𑀘𑀺𑀘𑁆𑀘𑀸𑀨𑀸𑀲𑀼𑀫𑁂𑀯 𑀘𑀸𑀢𑀺 ‘‘𑀪𑀺𑀓𑁆𑀔𑀼𑀦𑀺𑀬𑀸 𑀲𑀜𑁆𑀘𑀺𑀘𑁆𑀘 𑀅𑀨𑀸𑀲𑀼𑀁 𑀓𑀭𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁯𑁪𑁨) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘.

𑁩𑁬𑁬. 𑀲𑀬𑀁 𑀉𑀧𑀲𑁆𑀲𑀬𑀁 𑀤𑀢𑁆𑀯𑀸𑀢𑀺 ‘‘𑀪𑀺𑀓𑁆𑀔𑀼𑀦𑀺𑀬𑀸 𑀉𑀧𑀲𑁆𑀲𑀬𑀁 𑀤𑀢𑁆𑀯𑀸 𑀓𑀼𑀧𑀺𑀢𑀸 𑀅𑀦𑀢𑁆𑀢𑀫𑀦𑀸 𑀦𑀺𑀓𑁆𑀓𑀟𑁆𑀠𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁯𑁫𑁧) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀅𑀓𑁆𑀓𑁄𑀲𑁂𑀬𑁆𑀬 𑀘𑀸𑀢𑀺 ‘‘𑀪𑀺𑀓𑁆𑀔𑀼𑀁 𑀅𑀓𑁆𑀓𑁄𑀲𑁂𑀬𑁆𑀬 𑀯𑀸 𑀧𑀭𑀺𑀪𑀸𑀲𑁂𑀬𑁆𑀬 𑀯𑀸’’𑀢𑀺 (𑀧𑀸𑀘𑀺. 𑁧𑁦𑁨𑁯) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀘𑀡𑁆𑀟𑀺𑀓𑀸𑀢𑀺 ‘‘𑀘𑀡𑁆𑀟𑀻𑀓𑀢𑀸 𑀕𑀡𑀁 𑀧𑀭𑀺𑀪𑀸𑀲𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁧𑁦𑁩𑁪) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀓𑀼𑀮𑀫𑀘𑁆𑀙𑀭𑀺𑀦𑀻 𑀅𑀲𑁆𑀲𑀸𑀢𑀺 ‘‘𑀓𑀼𑀮𑀫𑀘𑁆𑀙𑀭𑀺𑀦𑀻 𑀅𑀲𑁆𑀲𑀸’’𑀢𑀺 (𑀧𑀸𑀘𑀺. 𑁧𑁦𑁪𑁩) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀕𑀩𑁆𑀪𑀺𑀦𑀺𑀁 𑀯𑀼𑀝𑁆𑀞𑀸𑀧𑁂𑀬𑁆𑀬 𑀘𑀸𑀢𑀺 ‘‘𑀕𑀩𑁆𑀪𑀺𑀦𑀺𑀁 𑀯𑀼𑀝𑁆𑀞𑀸𑀧𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁧𑁦𑁬𑁮) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘.

𑁩𑁬𑁭. 𑀧𑀸𑀬𑀦𑁆𑀢𑀺𑀦𑁆𑀢𑀺 ‘‘𑀧𑀸𑀬𑀦𑁆𑀢𑀺𑀁 𑀯𑀼𑀝𑁆𑀞𑀸𑀧𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁧𑁦𑁭𑁩) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀤𑁆𑀯𑁂 𑀘 𑀯𑀲𑁆𑀲𑀸𑀦𑀻𑀢𑀺 ‘‘𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀅𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀲𑀺𑀓𑁆𑀔𑀫𑀸𑀦𑀁 𑀯𑀼𑀝𑁆𑀞𑀸𑀧𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁧𑁦𑁮𑁦) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀲𑀗𑁆𑀖𑁂𑀦𑀸𑀲𑀫𑁆𑀫𑀢𑀦𑁆𑀢𑀺 ‘‘𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀲𑀺𑀓𑁆𑀔𑀫𑀸𑀦𑀁 𑀲𑀗𑁆𑀖𑁂𑀦 𑀅𑀲𑀫𑁆𑀫𑀢𑀁 𑀯𑀼𑀝𑁆𑀞𑀸𑀧𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁧𑁦𑁮𑁬) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀢𑀺𑀲𑁆𑀲𑁄 𑀕𑀺𑀳𑀺𑀕𑀢𑀸 𑀯𑀼𑀢𑁆𑀢𑀸𑀢𑀺 ‘‘𑀊𑀦𑀤𑁆𑀯𑀸𑀤𑀲𑀯𑀲𑁆𑀲𑀁 𑀕𑀺𑀳𑀺𑀕𑀢𑀁 (𑀧𑀸𑀘𑀺. 𑁧𑁦𑁯𑁧), 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀁 𑀕𑀺𑀳𑀺𑀕𑀢𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀅𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 (𑀧𑀸𑀘𑀺. 𑁧𑁦𑁯𑁭), 𑀤𑁆𑀯𑁂𑀯𑀲𑁆𑀲𑀸𑀦𑀺 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀲𑀗𑁆𑀖𑁂𑀦 𑀅𑀲𑀫𑁆𑀫𑀢’’𑀦𑁆𑀢𑀺 (𑀧𑀸𑀘𑀺. 𑁧𑁧𑁦𑁩) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀸𑀦𑀺 𑀘. 𑀢𑀺𑀲𑁆𑀲𑁄𑀬𑁂𑀯 𑀓𑀼𑀫𑀸𑀭𑀺𑀓𑀸𑀢𑀺 ‘‘𑀊𑀦𑀯𑀻𑀲𑀢𑀺𑀯𑀲𑁆𑀲𑀁 𑀓𑀼𑀫𑀸𑀭𑀺𑀪𑀽𑀢’’𑀦𑁆𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑁧𑁧𑁨𑁦) 𑀦𑀬𑁂𑀦 𑀯𑀼𑀢𑁆𑀢𑀸 𑀢𑀺𑀲𑁆𑀲𑁄 𑀘.

𑁩𑁬𑁮. 𑀊𑀦𑀤𑁆𑀯𑀸𑀤𑀲𑀯𑀲𑁆𑀲𑀸 𑀤𑁆𑀯𑁂𑀢𑀺 ‘‘𑀊𑀦𑀤𑁆𑀯𑀸𑀤𑀲𑀯𑀲𑁆𑀲𑀸 𑀯𑀼𑀝𑁆𑀞𑀸𑀧𑁂𑀬𑁆𑀬 (𑀧𑀸𑀘𑀺. 𑁧𑁧𑁩𑁭), 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸 𑀲𑀗𑁆𑀖𑁂𑀦 𑀅𑀲𑀫𑁆𑀫𑀢𑀸 𑀯𑀼𑀝𑁆𑀞𑀸𑀧𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁧𑁧𑁪𑁨) 𑀯𑀼𑀢𑁆𑀢𑀸𑀦𑀺 𑀤𑁆𑀯𑁂 𑀲𑀺𑀓𑁆𑀔𑀸𑀧𑀤𑀸𑀦𑀺 𑀘. 𑀅𑀮𑀁 𑀢𑀸𑀯 𑀢𑁂𑀢𑀺 ‘‘𑀅𑀮𑀁 𑀢𑀸𑀯 𑀢𑁂, 𑀅𑀬𑁆𑀬𑁂, 𑀯𑀼𑀝𑁆𑀞𑀸𑀧𑀺𑀢𑁂𑀦𑀸’’𑀢𑀺 (𑀧𑀸𑀘𑀺. 𑁧𑁧𑁪𑁭) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀲𑁄𑀓𑀸𑀯𑀲𑁆𑀲𑀸𑀢𑀺 ‘‘𑀘𑀡𑁆𑀟𑀺𑀁 𑀲𑁄𑀓𑀸𑀯𑀸𑀲𑀁 𑀲𑀺𑀓𑁆𑀔𑀫𑀸𑀦𑀁 𑀯𑀼𑀝𑁆𑀞𑀸𑀧𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁧𑁧𑁫𑁯) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀧𑀸𑀭𑀺𑀯𑀸𑀲𑀺𑀓𑀘𑁆𑀙𑀦𑁆𑀤𑀤𑀸𑀦𑀢𑁄𑀢𑀺 ‘‘𑀧𑀸𑀭𑀺𑀯𑀸𑀲𑀺𑀓𑀙𑀦𑁆𑀤𑀤𑀸𑀦𑁂𑀦 𑀲𑀺𑀓𑁆𑀔𑀫𑀸𑀦𑀁 𑀯𑀼𑀝𑁆𑀞𑀸𑀧𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁧𑁧𑁬𑁭) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘.

𑁩𑁬𑁯. 𑀅𑀦𑀼𑀯𑀲𑁆𑀲𑀁 𑀤𑀼𑀯𑁂 𑀘𑀸𑀢𑀺 ‘‘𑀅𑀦𑀼𑀯𑀲𑁆𑀲𑀁 𑀯𑀼𑀝𑁆𑀞𑀸𑀧𑁂𑀬𑁆𑀬 (𑀧𑀸𑀘𑀺. 𑁧𑁧𑁭𑁧), 𑀏𑀓𑀁 𑀯𑀲𑁆𑀲𑀁 𑀤𑁆𑀯𑁂 𑀯𑀼𑀝𑁆𑀞𑀸𑀧𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁧𑁧𑁭𑁫) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀸𑀦𑀺 𑀘𑀸𑀢𑀺 𑀏𑀓𑀽𑀦𑀲𑀢𑁆𑀢𑀢𑀺 𑀲𑀺𑀓𑁆𑀔𑀸𑀧𑀤𑀸𑀦𑀺. 𑀅𑀤𑀺𑀦𑁆𑀦𑀸𑀤𑀸𑀦𑀢𑀼𑀮𑁆𑀬𑀢𑁆𑀢𑀸𑀢𑀺 𑀅𑀤𑀺𑀦𑁆𑀦𑀸𑀤𑀸𑀦𑁂𑀦 𑀲𑀫𑀸𑀦𑀲𑀫𑀼𑀝𑁆𑀞𑀸𑀦𑀢𑁆𑀢𑀸. 𑀢𑀺𑀲𑀫𑀼𑀝𑁆𑀞𑀸𑀦𑀺𑀓𑀸 𑀓𑀢𑀸𑀢𑀺 𑀲𑀘𑀺𑀢𑁆𑀢𑀓𑁂𑀳𑀺 𑀢𑀻𑀳𑀺 𑀲𑀫𑀼𑀝𑁆𑀞𑀸𑀦𑁂𑀳𑀺 𑀲𑀫𑀼𑀝𑁆𑀞𑀳𑀦𑁆𑀢𑀻𑀢𑀺 𑀯𑀼𑀢𑁆𑀢𑀸.

𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀲𑀫𑀼𑀝𑁆𑀞𑀸𑀦𑀯𑀡𑁆𑀡𑀦𑀸.

𑁩𑁭𑁦. 𑀲𑀜𑁆𑀘𑀭𑀺𑀓𑀼𑀝𑀺𑀫𑀳𑀮𑁆𑀮𑀓𑀦𑁆𑀢𑀺 𑀲𑀜𑁆𑀘𑀭𑀺𑀢𑁆𑀢𑀁, 𑀲𑀜𑁆𑀜𑀸𑀘𑀺𑀓𑀸𑀬 𑀓𑀼𑀝𑀺𑀓𑀭𑀡𑀁, 𑀫𑀳𑀮𑁆𑀮𑀓𑀯𑀺𑀳𑀸𑀭𑀓𑀭𑀡𑀜𑁆𑀘. 𑀥𑁄𑀯𑀸𑀧𑀦𑀜𑁆𑀘 𑀧𑀝𑀺𑀕𑁆𑀕𑀳𑁄𑀢𑀺 𑀅𑀜𑁆𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀧𑀼𑀭𑀸𑀡𑀘𑀻𑀯𑀭𑀥𑁄𑀯𑀸𑀧𑀦𑀜𑁆𑀘 𑀘𑀻𑀯𑀭𑀧𑀝𑀺𑀕𑁆𑀕𑀳𑀡𑀜𑁆𑀘. 𑀘𑀻𑀯𑀭𑀲𑁆𑀲 𑀘 𑀯𑀺𑀜𑁆𑀜𑀢𑁆𑀢𑀺𑀦𑁆𑀢𑀺 𑀅𑀜𑁆𑀜𑀸𑀢𑀓𑀁 𑀕𑀳𑀧𑀢𑀺𑀁 𑀯𑀸 𑀕𑀳𑀧𑀢𑀸𑀦𑀺𑀁 𑀯𑀸 𑀘𑀻𑀯𑀭𑀯𑀺𑀜𑁆𑀜𑀸𑀧𑀦𑀲𑀺𑀓𑁆𑀔𑀸𑀧𑀤𑀜𑁆𑀘. 𑀕𑀳𑀡𑀜𑁆𑀘 𑀢𑀤𑀼𑀢𑁆𑀢𑀭𑀺𑀦𑁆𑀢𑀺 𑀢𑀤𑀼𑀢𑁆𑀢𑀭𑀺𑀲𑀸𑀤𑀺𑀬𑀦𑀲𑀺𑀓𑁆𑀔𑀸𑀧𑀤𑀜𑁆𑀘.

𑁩𑁭𑁧. 𑀉𑀧𑀓𑁆𑀔𑀝𑀤𑁆𑀯𑀬𑀜𑁆𑀘𑁂𑀯𑀸𑀢𑀺 ‘‘𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀁 𑀉𑀧𑀓𑁆𑀔𑀝𑀁 𑀳𑁄𑀢𑀻’’𑀢𑀺 (𑀧𑀸𑀭𑀸. 𑁫𑁨𑁮) 𑀆𑀕𑀢𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀜𑁆𑀘. 𑀢𑀣𑀸 𑀤𑀽𑀢𑁂𑀦 𑀘𑀻𑀯𑀭𑀦𑁆𑀢𑀺 𑀤𑀽𑀢𑁂𑀦𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀧𑀳𑀺𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀓𑁄𑀲𑀺𑀬𑀦𑁆𑀢𑀺 𑀓𑁄𑀲𑀺𑀬𑀫𑀺𑀲𑁆𑀲𑀓𑀲𑀺𑀓𑁆𑀔𑀸𑀧𑀤𑀜𑁆𑀘. 𑀲𑀼𑀤𑁆𑀥𑀓𑀸𑀴𑀸𑀦𑀦𑁆𑀢𑀺 ‘‘𑀲𑀼𑀤𑁆𑀥𑀓𑀸𑀴𑀓𑀸𑀦’’𑀦𑁆𑀢𑀺𑀆𑀤𑀺𑀲𑀺𑀓𑁆𑀔𑀸𑀧𑀤𑀜𑁆𑀘 (𑀧𑀸𑀭𑀸. 𑁫𑁪𑁮). 𑀤𑁆𑀯𑁂 𑀪𑀸𑀕𑀸𑀤𑀸𑀦𑀫𑁂𑀯 𑀘𑀸𑀢𑀺 ‘‘𑀤𑁆𑀯𑁂 𑀪𑀸𑀕𑀸 𑀆𑀤𑀸𑀢𑀩𑁆𑀩𑀸’’𑀢𑀺 (𑀧𑀸𑀭𑀸. 𑁫𑁫𑁩) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘.

𑁩𑁭𑁨. 𑀙𑀩𑁆𑀩𑀲𑁆𑀲𑀸𑀦𑀻𑀢𑀺 𑀙𑀩𑁆𑀩𑀲𑁆𑀲𑀸𑀦𑀺 𑀥𑀸𑀭𑀡𑀲𑀺𑀓𑁆𑀔𑀸𑀧𑀤𑀜𑁆𑀘. 𑀧𑀼𑀭𑀸𑀡𑀲𑁆𑀲𑀸𑀢𑀺 ‘‘𑀧𑀼𑀭𑀸𑀡𑀲𑀦𑁆𑀣𑀢𑀲𑁆𑀲𑀸’’𑀢𑀺 (𑀧𑀸𑀭𑀸. 𑁫𑁬𑁭) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀮𑁄𑀫𑀥𑁄𑀯𑀸𑀧𑀦𑀫𑁆𑀧𑀺 𑀘𑀸𑀢𑀺 𑀏𑀴𑀓𑀮𑁄𑀫𑀥𑁄𑀯𑀸𑀧𑀦𑀲𑀺𑀓𑁆𑀔𑀸𑀧𑀤𑀜𑁆𑀘. 𑀭𑀽𑀧𑀺𑀬𑀲𑁆𑀲 𑀧𑀝𑀺𑀕𑁆𑀕𑀸𑀳𑁄𑀢𑀺 𑀭𑀽𑀧𑀺𑀬𑀧𑀝𑀺𑀕𑁆𑀕𑀳𑀡𑀲𑀺𑀓𑁆𑀔𑀸𑀧𑀤𑀜𑁆𑀘. 𑀉𑀪𑁄 𑀦𑀸𑀦𑀧𑁆𑀧𑀓𑀸𑀭𑀓𑀸𑀢𑀺 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀓𑀬𑀯𑀺𑀓𑁆𑀓𑀬𑀲𑀺𑀓𑁆𑀔𑀸𑀧𑀤𑀸𑀦𑀺 𑀘.

𑁩𑁭𑁩. 𑀊𑀦𑀩𑀦𑁆𑀥𑀦𑀧𑀢𑁆𑀢𑁄 𑀘𑀸𑀢𑀺 𑀊𑀦𑀧𑀜𑁆𑀘𑀩𑀦𑁆𑀥𑀦𑀧𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀯𑀲𑁆𑀲𑀲𑀸𑀝𑀺𑀓𑀲𑀼𑀢𑁆𑀢𑀓𑀦𑁆𑀢𑀺 𑀯𑀲𑁆𑀲𑀺𑀓𑀲𑀸𑀝𑀺𑀓𑀲𑀺𑀓𑁆𑀔𑀸𑀧𑀤𑀜𑁆𑀘 𑀲𑀼𑀢𑁆𑀢𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀘𑀻𑀯𑀭𑀓𑀸𑀭𑀸𑀧𑀦𑀲𑀺𑀓𑁆𑀔𑀸𑀧𑀤𑀜𑁆𑀘. 𑀯𑀺𑀓𑀧𑁆𑀧𑀸𑀧𑀚𑁆𑀚𑀦𑀦𑁆𑀢𑀺 𑀢𑀦𑁆𑀢𑀯𑀸𑀬𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀘𑀻𑀯𑀭𑁂 𑀯𑀺𑀓𑀧𑁆𑀧𑀸𑀧𑀚𑁆𑀚𑀦𑀜𑁆𑀘. 𑀬𑀸𑀯 𑀤𑁆𑀯𑀸𑀭𑀤𑀸𑀦𑀜𑁆𑀘 𑀲𑀺𑀩𑁆𑀩𑀦𑀦𑁆𑀢𑀺 ‘‘𑀬𑀸𑀯 𑀤𑁆𑀯𑀸𑀭𑀓𑁄𑀲𑀸 𑀅𑀕𑁆𑀕𑀴𑀝𑁆𑀞𑀧𑀦𑀸𑀬𑀸’’𑀢𑀺 (𑀧𑀸𑀘𑀺. 𑁧𑁩𑁫) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘 ‘‘𑀅𑀜𑁆𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀘𑀻𑀯𑀭𑀁 𑀤𑀤𑁂𑀬𑁆𑀬 (𑀧𑀸𑀘𑀺. 𑁧𑁭𑁧), 𑀘𑀻𑀯𑀭𑀁 𑀲𑀺𑀩𑁆𑀩𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁧𑁭𑁬) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀜𑁆𑀘.

𑁩𑁭𑁪. 𑀧𑀽𑀯𑁂𑀳𑀻𑀢𑀺 𑀧𑀽𑀯𑁂𑀳𑀺 𑀯𑀸 𑀫𑀦𑁆𑀣𑁂𑀳𑀺 𑀯𑀸 𑀅𑀪𑀺𑀳𑀝𑁆𑀞𑀼𑀁 𑀧𑀯𑀸𑀭𑀡𑀲𑀺𑀓𑁆𑀔𑀸𑀧𑀤𑀜𑁆𑀘. 𑀧𑀘𑁆𑀘𑀬𑁄𑀢𑀺 𑀘𑀢𑀼𑀫𑀸𑀲𑀧𑀘𑁆𑀘𑀬𑀧𑀯𑀸𑀭𑀡𑀲𑀺𑀓𑁆𑀔𑀸𑀧𑀤𑀜𑁆𑀘. 𑀚𑁄𑀢𑀻𑀢𑀺 𑀚𑁄𑀢𑀺𑀬𑀸 𑀲𑀫𑀸𑀤𑀳𑀦𑀲𑀺𑀓𑁆𑀔𑀸𑀧𑀤𑀜𑁆𑀘. 𑀭𑀢𑀦𑀦𑁆𑀢𑀺 𑀭𑀢𑀦𑀲𑀺𑀓𑁆𑀔𑀸𑀧𑀤𑀜𑁆𑀘. 𑀲𑀽𑀘𑀺…𑀧𑁂… 𑀲𑀼𑀕𑀢𑀲𑁆𑀲 𑀘𑀸𑀢𑀺 𑀲𑀽𑀘𑀺𑀖𑀭𑀲𑀺𑀓𑁆𑀔𑀸𑀧𑀤𑀸𑀤𑀻𑀦𑀺 𑀲𑀢𑁆𑀢 𑀲𑀺𑀓𑁆𑀔𑀸𑀧𑀤𑀸𑀦𑀺 𑀘.

𑁩𑁭𑁫. 𑀅𑀜𑁆𑀜𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸 𑀘𑀸𑀢𑀺 ‘‘𑀅𑀜𑁆𑀜𑀁 𑀯𑀺𑀜𑁆𑀜𑀸𑀧𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁭𑁪𑁯) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀅𑀜𑁆𑀜𑀁 𑀘𑁂𑀢𑀸𑀧𑀦𑀫𑁆𑀧𑀺 𑀘𑀸𑀢𑀺 ‘‘𑀅𑀜𑁆𑀜𑀁 𑀘𑁂𑀢𑀸𑀧𑁂𑀢𑁆𑀯𑀸 𑀅𑀜𑁆𑀜𑀁 𑀘𑁂𑀢𑀸𑀧𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁭𑁪𑁯) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀲𑀗𑁆𑀖𑀺𑀓𑁂𑀦 𑀤𑀼𑀯𑁂 𑀯𑀼𑀢𑁆𑀢𑀸𑀢𑀺 ‘‘𑀲𑀗𑁆𑀖𑀺𑀓𑁂𑀦 𑀅𑀜𑁆𑀜𑀁 𑀘𑁂𑀢𑀸𑀧𑁂𑀬𑁆𑀬 (𑀧𑀸𑀘𑀺. 𑁭𑁫𑁯), 𑀲𑀗𑁆𑀖𑀺𑀓𑁂𑀦 𑀲𑀜𑁆𑀜𑀸𑀘𑀺𑀓𑁂𑀦 𑀅𑀜𑁆𑀜𑀁 𑀘𑁂𑀢𑀸𑀧𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁭𑁬𑁪) 𑀯𑀼𑀢𑁆𑀢𑀸𑀦𑀺 𑀤𑁆𑀯𑁂 𑀲𑀺𑀓𑁆𑀔𑀸𑀧𑀤𑀸𑀦𑀺 𑀘. 𑀤𑁆𑀯𑁂 𑀫𑀳𑀸𑀚𑀦𑀺𑀓𑁂𑀦𑀸𑀢𑀺 ‘‘𑀫𑀳𑀸𑀚𑀦𑀺𑀓𑁂𑀦 𑀅𑀜𑁆𑀜𑀁 𑀘𑁂𑀢𑀸𑀧𑁂𑀬𑁆𑀬 (𑀧𑀸𑀘𑀺. 𑁭𑁬𑁯), 𑀫𑀳𑀸𑀚𑀦𑀺𑀓𑁂𑀦 𑀲𑀜𑁆𑀜𑀸𑀘𑀺𑀓𑁂𑀦 𑀅𑀜𑁆𑀜𑀁 𑀘𑁂𑀢𑀸𑀧𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁭𑁭𑁪) 𑀯𑀼𑀢𑁆𑀢𑀸𑀦𑀺 𑀤𑁆𑀯𑁂 𑀲𑀺𑀓𑁆𑀔𑀸𑀧𑀤𑀸𑀦𑀺 𑀘.

𑁩𑁭𑁬. 𑀢𑀣𑀸 𑀧𑀼𑀕𑁆𑀕𑀮𑀺𑀓𑁂𑀦𑁂𑀓𑀦𑁆𑀢𑀺 ‘‘𑀧𑀼𑀕𑁆𑀕𑀮𑀺𑀓𑁂𑀦 𑀲𑀜𑁆𑀜𑀸𑀘𑀺𑀓𑁂𑀦 𑀅𑀜𑁆𑀜𑀁 𑀘𑁂𑀢𑀸𑀧𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁭𑁭𑁯) 𑀯𑀼𑀢𑁆𑀢𑀫𑁂𑀓𑀲𑀺𑀓𑁆𑀔𑀸𑀧𑀤𑀜𑁆𑀘. 𑀕𑀭𑀼𑀧𑀸𑀯𑀼𑀭𑀡𑀦𑁆𑀢𑀺 𑀕𑀭𑀼𑀧𑀸𑀯𑀼𑀭𑀡𑀘𑁂𑀢𑀸𑀧𑀦𑀲𑀺𑀓𑁆𑀔𑀸𑀧𑀤𑀜𑁆𑀘. 𑀮𑀳𑀼𑀦𑁆𑀢𑀺 𑀮𑀳𑀼𑀧𑀸𑀯𑀼𑀭𑀡𑀘𑁂𑀢𑀸𑀧𑀦𑀲𑀺𑀓𑁆𑀔𑀸𑀧𑀤𑀁. ‘‘𑀯𑀺𑀖𑀸𑀲𑀸 𑀉𑀤𑀲𑀸𑀝𑀺 𑀘𑀸’’𑀢𑀺 𑀧𑀤𑀘𑁆𑀙𑁂𑀤𑁄. 𑀤𑁆𑀯𑁂 𑀯𑀺𑀖𑀸𑀲𑀸𑀢𑀺 ‘‘𑀉𑀘𑁆𑀘𑀸𑀭𑀁 𑀯𑀸 𑀧𑀲𑁆𑀲𑀸𑀯𑀁 𑀯𑀸 𑀲𑀗𑁆𑀓𑀸𑀭𑀁 𑀯𑀸 𑀯𑀺𑀖𑀸𑀲𑀁 𑀯𑀸 𑀢𑀺𑀭𑁄𑀓𑀼𑀝𑁆𑀝𑁂 𑀯𑀸 𑀢𑀺𑀭𑁄𑀧𑀸𑀓𑀸𑀭𑁂 𑀯𑀸 𑀙𑀟𑁆𑀟𑁂𑀬𑁆𑀬 𑀯𑀸 𑀙𑀟𑁆𑀟𑀸𑀧𑁂𑀬𑁆𑀬 𑀯𑀸 (𑀧𑀸𑀘𑀺. 𑁮𑁨𑁫), 𑀳𑀭𑀺𑀢𑁂 𑀙𑀟𑁆𑀟𑁂𑀬𑁆𑀬 𑀯𑀸 𑀙𑀟𑁆𑀟𑀸𑀧𑁂𑀬𑁆𑀬 𑀯𑀸’’𑀢𑀺 (𑀧𑀸𑀘𑀺. 𑁮𑁨𑁯) 𑀏𑀯𑀁 𑀯𑀼𑀢𑁆𑀢𑀸𑀦𑀺 𑀤𑁆𑀯𑁂 𑀯𑀺𑀖𑀸𑀲𑀲𑀺𑀓𑁆𑀔𑀸𑀧𑀤𑀸𑀦𑀺 𑀘. 𑀉𑀤𑀲𑀸𑀝𑀺 𑀘𑀸𑀢𑀺 𑀉𑀤𑀓𑀲𑀸𑀝𑀺𑀓𑀲𑀺𑀓𑁆𑀔𑀸𑀧𑀤𑀜𑁆𑀘. 𑀢𑀣𑀸 𑀲𑀫𑀡𑀘𑀻𑀯𑀭𑀦𑁆𑀢𑀺 𑀢𑀣𑀸 ‘‘𑀲𑀫𑀡𑀘𑀻𑀯𑀭𑀁 𑀤𑀤𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁯𑁧𑁭) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘𑀸𑀢𑀺.

𑁩𑁭𑁭. 𑀇𑀢𑀺 𑀏𑀢𑁂 𑀏𑀓𑀽𑀦𑀧𑀡𑁆𑀡𑀸𑀲 𑀥𑀫𑁆𑀫𑀸 𑀤𑀼𑀓𑁆𑀔𑀦𑁆𑀢𑀤𑀲𑁆𑀲𑀺𑀦𑀸 𑀪𑀕𑀯𑀢𑀸 𑀙𑀲𑀫𑀼𑀝𑁆𑀞𑀸𑀦𑀺𑀓𑀸 𑀢𑁂𑀬𑁂𑀯 𑀲𑀜𑁆𑀘𑀭𑀺𑀢𑁆𑀢𑀲𑀫𑀸 𑀲𑀜𑁆𑀘𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑁂𑀦 𑀲𑀫𑀸 𑀓𑀢𑀸 𑀅𑀦𑀼𑀫𑀢𑀸 𑀧𑀜𑁆𑀜𑀢𑁆𑀢𑀸𑀢𑀺 𑀬𑁄𑀚𑀦𑀸.

𑀲𑀜𑁆𑀘𑀭𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀯𑀡𑁆𑀡𑀦𑀸.

𑁩𑁭𑁮. 𑀲𑀗𑁆𑀖𑀪𑁂𑀤𑁄𑀢𑀺 𑀲𑀗𑁆𑀖𑀪𑁂𑀤𑀲𑀺𑀓𑁆𑀔𑀸𑀧𑀤𑀜𑁆𑀘. 𑀪𑁂𑀤𑀸𑀦𑀼𑀯𑀢𑁆𑀢𑀤𑀼𑀩𑁆𑀩𑀘𑀤𑀽𑀲𑀓𑀸𑀢𑀺 𑀪𑁂𑀤𑀸𑀦𑀼𑀯𑀢𑁆𑀢𑀓𑀤𑀼𑀩𑁆𑀩𑀘𑀓𑀼𑀮𑀤𑀽𑀲𑀓𑀲𑀺𑀓𑁆𑀔𑀸𑀧𑀤𑀸𑀦𑀺 𑀘. 𑀤𑀼𑀝𑁆𑀞𑀼𑀮𑁆𑀮𑀘𑁆𑀙𑀸𑀤𑀦𑀦𑁆𑀢𑀺 𑀤𑀼𑀝𑁆𑀞𑀼𑀮𑁆𑀮𑀧𑀝𑀺𑀘𑁆𑀙𑀸𑀤𑀦𑀲𑀺𑀓𑁆𑀔𑀸𑀧𑀤𑀜𑁆𑀘. 𑀤𑀺𑀝𑁆𑀞𑀻𑀢𑀺 𑀤𑀺𑀝𑁆𑀞𑀺𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑀲𑀺𑀓𑁆𑀔𑀸𑀧𑀤𑀜𑁆𑀘. 𑀙𑀦𑁆𑀤𑀉𑀚𑁆𑀚𑀕𑁆𑀖𑀺𑀓𑀸 𑀤𑀼𑀯𑁂𑀢𑀺 𑀙𑀦𑁆𑀤𑀁𑀅𑀤𑀢𑁆𑀯𑀸𑀕𑀫𑀦𑀲𑀺𑀓𑁆𑀔𑀸𑀧𑀤𑀜𑁆𑀘 𑀉𑀚𑁆𑀚𑀕𑁆𑀖𑀺𑀓𑀸𑀬 𑀅𑀦𑁆𑀢𑀭𑀖𑀭𑁂 𑀕𑀫𑀦𑀦𑀺𑀲𑀻𑀤𑀦𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀜𑁆𑀘.

𑁩𑁭𑁯. 𑀅𑀧𑁆𑀧𑀲𑀤𑁆𑀤𑀸 𑀤𑀼𑀯𑁂 𑀯𑀼𑀢𑁆𑀢𑀸𑀢𑀺 ‘‘𑀅𑀧𑁆𑀧𑀲𑀤𑁆𑀤𑁄 𑀅𑀦𑁆𑀢𑀭𑀖𑀭𑁂 𑀕𑀫𑀺𑀲𑁆𑀲𑀸𑀫𑀺, 𑀦𑀺𑀲𑀻𑀤𑀺𑀲𑁆𑀲𑀸𑀫𑀻’’𑀢𑀺 (𑀧𑀸𑀘𑀺. 𑁫𑁮𑁮, 𑁫𑁮𑁯) 𑀯𑀼𑀢𑁆𑀢𑀸𑀦𑀺 𑀤𑁆𑀯𑁂 𑀲𑀺𑀓𑁆𑀔𑀸𑀧𑀤𑀸𑀦𑀺 𑀘. 𑀦 𑀩𑁆𑀬𑀸𑀳𑀭𑁂𑀢𑀺 ‘‘𑀦 𑀲𑀓𑀩𑀴𑁂𑀦 𑀫𑀼𑀔𑁂𑀦 𑀩𑁆𑀬𑀸𑀳𑀭𑀺𑀲𑁆𑀲𑀸𑀫𑀻’’𑀢𑀺 (𑀧𑀸𑀘𑀺. 𑁬𑁧𑁯) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀙𑀫𑀸, 𑀦𑀻𑀘𑀸𑀲𑀦𑁂, 𑀞𑀸𑀦𑀦𑁆𑀢𑀺 ‘‘𑀙𑀫𑀸𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 (𑀧𑀸𑀘𑀺. 𑁬𑁪𑁫), 𑀦𑀻𑀘𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 (𑀧𑀸𑀘𑀺. 𑁬𑁪𑁭), 𑀞𑀺𑀢𑁄 𑀦𑀺𑀲𑀺𑀦𑁆𑀦𑀲𑁆𑀲𑀸’’𑀢𑀺 (𑀧𑀸𑀘𑀺. 𑁬𑁪𑁮) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀧𑀘𑁆𑀙𑀢𑁄 𑀉𑀧𑁆𑀧𑀣𑁂𑀦 𑀘𑀸𑀢𑀺 ‘‘𑀧𑀘𑁆𑀙𑀢𑁄 𑀕𑀘𑁆𑀙𑀦𑁆𑀢𑁄 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑀲𑁆𑀲 (𑀧𑀸𑀘𑀺. 𑁬𑁪𑁯), 𑀉𑀧𑁆𑀧𑀣𑁂𑀦 𑀕𑀘𑁆𑀙𑀦𑁆𑀢𑁄 𑀧𑀣𑁂𑀦 𑀕𑀘𑁆𑀙𑀦𑁆𑀢𑀲𑁆𑀲𑀸’’𑀢𑀺 (𑀧𑀸𑀘𑀺. 𑁬𑁫𑁦) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀜𑁆𑀘.

𑁩𑁮𑁦. 𑀯𑀚𑁆𑀚𑀘𑁆𑀙𑀸𑀤𑀸𑀢𑀺 𑀯𑀚𑁆𑀚𑀢𑁄 𑀧𑀝𑀺𑀘𑁆𑀙𑀸𑀤𑀦𑀲𑀺𑀓𑁆𑀔𑀸𑀧𑀤𑀜𑁆𑀘. 𑀅𑀦𑀼𑀯𑀢𑁆𑀢𑀸 𑀘𑀸𑀢𑀺 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀦𑀲𑀺𑀓𑁆𑀔𑀸𑀧𑀤𑀜𑁆𑀘. 𑀕𑀳𑀡𑀦𑁆𑀢𑀺 ‘‘𑀳𑀢𑁆𑀣𑀕𑁆𑀕𑀳𑀡𑀁 𑀯𑀸 𑀲𑀸𑀤𑀺𑀬𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁬𑁭𑁫) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀑𑀲𑀸𑀭𑁂𑀬𑁆𑀬 𑀘𑀸𑀢𑀺 ‘‘𑀅𑀦𑀧𑀮𑁄𑀓𑁂𑀢𑁆𑀯𑀸 𑀓𑀸𑀭𑀓𑀲𑀗𑁆𑀖𑀁 𑀅𑀦𑀜𑁆𑀜𑀸𑀬 𑀕𑀡𑀲𑁆𑀲 𑀙𑀦𑁆𑀤𑀁 𑀑𑀲𑀸𑀭𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁬𑁯𑁫) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀧𑀘𑁆𑀘𑀓𑁆𑀔𑀸𑀫𑀻𑀢𑀺 𑀲𑀺𑀓𑁆𑀔𑀸 𑀘𑀸𑀢𑀺 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀸𑀘𑀺𑀓𑁆𑀔𑀸𑀫𑀻’’𑀢𑀺 (𑀧𑀸𑀘𑀺. 𑁭𑁧𑁦) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀢𑀣𑀸 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀘𑀸𑀢𑀺 ‘‘𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀅𑀥𑀺𑀓𑀭𑀡𑁂 𑀧𑀘𑁆𑀘𑀸𑀓𑀢𑀸’’𑀢𑀺 (𑀧𑀸𑀘𑀺. 𑁭𑁧𑁬) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘.

𑁩𑁮𑁧. 𑀲𑀁𑀲𑀝𑁆𑀞𑀸 𑀤𑁆𑀯𑁂 𑀘𑀸𑀢𑀺 ‘‘𑀪𑀺𑀓𑁆𑀔𑀼𑀦𑀺𑀬𑁄 𑀧𑀦𑁂𑀯 𑀲𑀁𑀲𑀝𑁆𑀞𑀸 𑀯𑀺𑀳𑀭𑀦𑁆𑀢𑀻’’𑀢𑀺 (𑀧𑀸𑀘𑀺. 𑁭𑁨𑁨) 𑀘 ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀏𑀯𑀁 𑀯𑀤𑁂𑀬𑁆𑀬 𑀲𑀁𑀲𑀝𑁆𑀞𑀸𑀯, 𑀅𑀬𑁆𑀬𑁂, 𑀢𑀼𑀫𑁆𑀳𑁂 𑀯𑀺𑀳𑀭𑀣𑀸’’𑀢𑀺𑀆𑀤𑀺𑀯𑀘𑀦𑀁 (𑀧𑀸𑀘𑀺. 𑁭𑁨𑁮) 𑀧𑀝𑀺𑀘𑁆𑀘 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀜𑁆𑀘. 𑀯𑀥𑀺𑀢𑁆𑀯𑀸 𑀘𑀸𑀢𑀺 ‘‘𑀅𑀢𑁆𑀢𑀸𑀦𑀁 𑀯𑀥𑀺𑀢𑁆𑀯𑀸 𑀯𑀥𑀺𑀢𑁆𑀯𑀸 𑀭𑁄𑀤𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁮𑁮𑁦) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀯𑀺𑀲𑀺𑀩𑁆𑀩𑁂𑀢𑁆𑀯𑀸 𑀘𑀸𑀢𑀺 ‘‘𑀪𑀺𑀓𑁆𑀔𑀼𑀦𑀺𑀬𑀸 𑀘𑀻𑀯𑀭𑀁 𑀯𑀺𑀲𑀺𑀩𑁆𑀩𑁂𑀢𑁆𑀯𑀸 𑀯𑀸 𑀯𑀺𑀲𑀺𑀩𑁆𑀩𑀸𑀧𑁂𑀢𑁆𑀯𑀸 𑀯𑀸’’𑀢𑀺 (𑀧𑀸𑀘𑀺. 𑁮𑁯𑁩) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀤𑀼𑀓𑁆𑀔𑀺𑀢𑀦𑁆𑀢𑀺 ‘‘𑀤𑀼𑀓𑁆𑀔𑀺𑀢𑀁 𑀲𑀳𑀚𑀻𑀯𑀺𑀦𑀺’’𑀦𑁆𑀢𑀺 (𑀧𑀸𑀘𑀺. 𑁯𑁪𑁭) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀧𑀼𑀦𑀤𑁂𑀯 𑀘 𑀲𑀁𑀲𑀝𑁆𑀞𑀸𑀢𑀺 ‘‘𑀲𑀁𑀲𑀝𑁆𑀞𑀸 𑀯𑀺𑀳𑀭𑁂𑀬𑁆𑀬 𑀕𑀳𑀧𑀢𑀺𑀦𑀸 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑁂𑀦 𑀯𑀸’’𑀢𑀺 (𑀧𑀸𑀘𑀺. 𑁯𑁫𑁬) 𑀏𑀯𑀁 𑀧𑀼𑀦 𑀯𑀼𑀢𑁆𑀢𑀲𑀁𑀲𑀝𑁆𑀞𑀲𑀺𑀓𑁆𑀔𑀸𑀧𑀤𑀜𑁆𑀘. 𑀦𑁂𑀯 𑀯𑀽𑀧𑀲𑀫𑁂𑀬𑁆𑀬 𑀘𑀸𑀢𑀺 ‘‘‘𑀏𑀳𑀸𑀬𑁆𑀬𑁂, 𑀇𑀫𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀳𑀻’𑀢𑀺 (𑀧𑀸𑀘𑀺. 𑁯𑁯𑁫) 𑀯𑀼𑀘𑁆𑀘𑀫𑀸𑀦𑀸 ‘𑀲𑀸𑀥𑀽’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀲𑀸 𑀧𑀘𑁆𑀙𑀸 𑀅𑀦𑀦𑁆𑀢𑀭𑀸𑀬𑀺𑀓𑀺𑀦𑀻 𑀦𑁂𑀯 𑀯𑀽𑀧𑀲𑀫𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘.

𑁩𑁮𑁨. 𑀚𑀸𑀦𑀁 𑀲𑀪𑀺𑀓𑁆𑀔𑀼𑀓𑀸𑀭𑀸𑀫𑀦𑁆𑀢𑀺 ‘‘𑀚𑀸𑀦𑀁 𑀲𑀪𑀺𑀓𑁆𑀔𑀼𑀓𑀁 𑀆𑀭𑀸𑀫𑀁 𑀅𑀦𑀸𑀧𑀼𑀘𑁆𑀙𑀸 𑀧𑀯𑀺𑀲𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁧𑁦𑁨𑁪) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀢𑀣𑁂𑀯 𑀦 𑀧𑀯𑀸𑀭𑀬𑁂𑀢𑀺 ‘‘𑀉𑀪𑀢𑁄𑀲𑀗𑁆𑀖𑁂 𑀢𑀻𑀳𑀺 𑀞𑀸𑀦𑁂𑀳𑀺 𑀦 𑀧𑀯𑀸𑀭𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁧𑁦𑁫𑁧) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀢𑀣𑀸 𑀅𑀦𑁆𑀯𑀤𑁆𑀥𑀫𑀸𑀲𑀜𑁆𑀘𑀸𑀢𑀺 ‘‘𑀅𑀦𑁆𑀯𑀤𑁆𑀥𑀫𑀸𑀲𑀁 𑀪𑀺𑀓𑁆𑀔𑀼𑀦𑀺𑀬𑀸 𑀪𑀺𑀓𑁆𑀔𑀼𑀲𑀗𑁆𑀖𑀢𑁄 𑀤𑁆𑀯𑁂 𑀥𑀫𑁆𑀫𑀸 𑀧𑀘𑁆𑀘𑀸𑀲𑀻𑀲𑀺𑀢𑀩𑁆𑀩𑀸’’𑀢𑀺 (𑀧𑀸𑀘𑀺. 𑁧𑁦𑁫𑁯) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀲𑀳𑀚𑀻𑀯𑀺𑀦𑀺𑀬𑁄 𑀤𑀼𑀯𑁂𑀢𑀺 ‘‘𑀲𑀳𑀚𑀻𑀯𑀺𑀦𑀺𑀁 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀦𑁂𑀯 𑀅𑀦𑀼𑀕𑁆𑀕𑀡𑁆𑀳𑁂𑀬𑁆𑀬 (𑀧𑀸𑀘𑀺. 𑁧𑁧𑁦𑁮), 𑀲𑀳𑀚𑀻𑀯𑀺𑀦𑀺𑀁 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀦𑁂𑀯 𑀯𑀽𑀧𑀓𑀸𑀲𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁧𑁧𑁧𑁬) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀜𑁆𑀘.

𑁩𑁮𑁩-𑁪. 𑀲𑀘𑁂 𑀫𑁂 𑀘𑀻𑀯𑀭𑀁 𑀅𑀬𑁆𑀬𑁂𑀢𑀺 ‘‘𑀲𑀘𑁂 𑀫𑁂 𑀢𑁆𑀯𑀁, 𑀅𑀬𑁆𑀬𑁂, 𑀘𑀻𑀯𑀭𑀁 𑀤𑀲𑁆𑀲𑀲𑀺, 𑀏𑀯𑀸𑀳𑀁 𑀢𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀻’’𑀢𑀺 (𑀧𑀸𑀘𑀺. 𑁧𑁧𑁫𑁧) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀅𑀦𑀼𑀩𑀦𑁆𑀥𑀺𑀲𑁆𑀲𑀲𑀻𑀢𑀺 ‘‘𑀲𑀘𑁂 𑀫𑀁 𑀢𑁆𑀯𑀁, 𑀅𑀬𑁆𑀬𑁂, 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀅𑀦𑀼𑀩𑀦𑁆𑀥𑀺𑀲𑁆𑀲𑀲𑀺, 𑀏𑀯𑀸𑀳𑀁 𑀢𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀻’’𑀢𑀺 (𑀧𑀸𑀘𑀺. 𑁧𑁧𑁫𑁫) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀅𑀲𑀫𑁂𑀦 𑀲𑀫𑁆𑀩𑀼𑀤𑁆𑀥𑁂𑀦 𑀧𑀓𑀸𑀲𑀺𑀢𑀸 𑀇𑀫𑁂 𑀲𑀢𑁆𑀢𑀢𑀺𑀁𑀲 𑀥𑀫𑁆𑀫𑀸 𑀲𑀩𑁆𑀩𑁂 𑀓𑀸𑀬𑀯𑀸𑀘𑀸𑀤𑀺𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀏𑀓𑀲𑀫𑀼𑀝𑁆𑀞𑀸𑀦𑀸 𑀓𑀢𑀸 𑀲𑀫𑀦𑀼𑀪𑀸𑀲𑀦𑀸 𑀲𑀺𑀬𑀼𑀁 𑀲𑀫𑀼𑀝𑁆𑀞𑀸𑀦𑀢𑁄 𑀲𑀫𑀦𑀼𑀪𑀸𑀲𑀦𑀲𑀺𑀓𑁆𑀔𑀸𑀧𑀤𑁂𑀦 𑀲𑀤𑀺𑀲𑀸 𑀲𑀺𑀬𑀼𑀦𑁆𑀢𑀺 𑀬𑁄𑀚𑀦𑀸.

𑀲𑀫𑀦𑀼𑀪𑀸𑀲𑀦𑀲𑀫𑀼𑀝𑁆𑀞𑀸𑀦𑀯𑀡𑁆𑀡𑀦𑀸.

𑁩𑁮𑁫. 𑀓𑀣𑀺𑀦𑀸𑀦𑀺 𑀘 𑀢𑀻𑀡𑀻𑀢𑀺 ‘‘𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺𑀁 𑀪𑀺𑀓𑁆𑀔𑀼𑀦𑀸 𑀉𑀩𑁆𑀪𑀢𑀲𑁆𑀫𑀺𑀁 𑀓𑀣𑀺𑀦𑁂’’𑀢𑀺 (𑀧𑀸𑀭𑀸. 𑁪𑁬𑁨) 𑀯𑀼𑀢𑁆𑀢𑀸𑀦𑀺 𑀆𑀤𑀺𑀢𑁄 𑀢𑀻𑀡𑀺 𑀲𑀺𑀓𑁆𑀔𑀸𑀧𑀤𑀸𑀦𑀺. 𑀧𑀢𑁆𑀢𑁄𑀢𑀺 ‘‘𑀤𑀲𑀸𑀳𑀧𑀭𑀫𑀁 𑀅𑀢𑀺𑀭𑁂𑀓𑀧𑀢𑁆𑀢𑁄’’𑀢𑀺 (𑀧𑀸𑀭𑀸. 𑁬𑁦𑁧) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀪𑁂𑀲𑀚𑁆𑀚𑀫𑁂𑀯 𑀘𑀸𑀢𑀺 ‘‘𑀧𑀝𑀺𑀲𑀸𑀬𑀦𑀻𑀬𑀸𑀦𑀺 𑀪𑁂𑀲𑀚𑁆𑀚𑀸𑀦𑀻’’𑀢𑀺 (𑀧𑀸𑀭𑀸. 𑁬𑁨𑁨) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀅𑀘𑁆𑀘𑁂𑀓𑀫𑁆𑀧𑀺 𑀘𑀸𑀢𑀺 𑀅𑀘𑁆𑀘𑁂𑀓𑀲𑀺𑀓𑁆𑀔𑀸𑀧𑀤𑀜𑁆𑀘. 𑀲𑀸𑀲𑀗𑁆𑀓𑀦𑁆𑀢𑀺 𑀢𑀤𑀦𑀦𑁆𑀢𑀭𑀫𑁂𑀯 𑀲𑀸𑀲𑀗𑁆𑀓𑀲𑀺𑀓𑁆𑀔𑀸𑀧𑀤𑀜𑁆𑀘. 𑀧𑀓𑁆𑀓𑀫𑀦𑁆𑀢𑀤𑁆𑀯𑀬𑀫𑁆𑀧𑀺 𑀘𑀸𑀢𑀺 ‘‘𑀢𑀁 𑀧𑀓𑁆𑀓𑀫𑀦𑁆𑀢𑁄 𑀦𑁂𑀯 𑀉𑀤𑁆𑀥𑀭𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁧𑁦𑁯, 𑁧𑁧𑁫) 𑀪𑀽𑀢𑀕𑀸𑀫𑀯𑀕𑁆𑀕𑁂 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀜𑁆𑀘.

𑁩𑁮𑁬. 𑀢𑀣𑀸 𑀉𑀧𑀲𑁆𑀲𑀬𑀁 𑀕𑀦𑁆𑀢𑁆𑀯𑀸𑀢𑀺 ‘‘𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁧𑁫𑁮) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀧𑀭𑀫𑁆𑀧𑀭𑀁 𑀪𑁄𑀚𑀦𑀦𑁆𑀢𑀺 ‘‘𑀧𑀭𑀫𑁆𑀧𑀭𑀪𑁄𑀚𑀦𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁨𑁨𑁧) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀅𑀦𑀢𑀺𑀭𑀺𑀢𑁆𑀢𑀦𑁆𑀢𑀺 ‘‘𑀅𑀦𑀢𑀺𑀭𑀺𑀢𑁆𑀢𑀁 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸’’𑀢𑀺 (𑀧𑀸𑀘𑀺. 𑁨𑁩𑁮) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀲𑀪𑀢𑁆𑀢𑁄𑀢𑀺 ‘‘𑀦𑀺𑀫𑀦𑁆𑀢𑀺𑀢𑁄 𑀲𑀪𑀢𑁆𑀢𑁄 𑀲𑀫𑀸𑀦𑁄’’𑀢𑀺 (𑀧𑀸𑀘𑀺. 𑁨𑁯𑁯) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀯𑀺𑀓𑀧𑁆𑀧𑁂𑀢𑁆𑀯𑀸 𑀢𑀣𑁂𑀯 𑀘𑀸𑀢𑀺 ‘‘𑀘𑀻𑀯𑀭𑀁 𑀯𑀺𑀓𑀧𑁆𑀧𑁂𑀢𑁆𑀯𑀸’’𑀢𑀺 (𑀧𑀸𑀘𑀺. 𑁩𑁭𑁩) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘.

𑁩𑁮𑁭. 𑀭𑀜𑁆𑀜𑁄𑀢𑀺 ‘‘𑀭𑀜𑁆𑀜𑁄 𑀔𑀢𑁆𑀢𑀺𑀬𑀲𑁆𑀲𑀸’’𑀢𑀺 (𑀧𑀸𑀘𑀺. 𑁪𑁯𑁮) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀯𑀺𑀓𑀸𑀮𑁂𑀢𑀺 ‘‘𑀯𑀺𑀓𑀸𑀮𑁂 𑀕𑀸𑀫𑀁 𑀧𑀯𑀺𑀲𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁫𑁦𑁯-𑁫𑁧𑁨) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀯𑁄𑀲𑀸𑀲𑀸𑀢𑀺 ‘‘𑀯𑁄𑀲𑀸𑀲𑀫𑀸𑀦𑀭𑀽𑀧𑀸 𑀞𑀺𑀢𑀸’’𑀢𑀺 (𑀧𑀸𑀘𑀺. 𑁫𑁫𑁮) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. ‘‘𑀆𑀭𑀜𑁆𑀜𑀓𑁂 𑀉𑀲𑁆𑀲𑀬𑀯𑀸𑀤𑀺𑀓𑀸’’𑀢𑀺 𑀧𑀤𑀘𑁆𑀙𑁂𑀤𑁄. 𑀆𑀭𑀜𑁆𑀜𑀓𑁂𑀢𑀺 ‘‘𑀢𑀣𑀸𑀭𑀽𑀧𑁂𑀲𑀼 𑀆𑀭𑀜𑁆𑀜𑀓𑁂𑀲𑀼 𑀲𑁂𑀦𑀸𑀲𑀦𑁂𑀲𑀼 𑀧𑀼𑀩𑁆𑀩𑁂 𑀅𑀧𑁆𑀧𑀝𑀺𑀲𑀁𑀯𑀺𑀤𑀺𑀢’’𑀦𑁆𑀢𑀺 (𑀧𑀸𑀘𑀺. 𑁫𑁭𑁦) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀉𑀲𑁆𑀲𑀬𑀯𑀸𑀤𑀺𑀓𑀸𑀢𑀺 ‘‘𑀉𑀲𑁆𑀲𑀬𑀯𑀸𑀤𑀺𑀓𑀸 𑀯𑀺𑀳𑀭𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁬𑁭𑁯) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀧𑀢𑁆𑀢𑀲𑀦𑁆𑀦𑀺𑀘𑀬𑀜𑁆𑀘𑁂𑀯𑀸𑀢𑀺 ‘‘𑀧𑀢𑁆𑀢𑀲𑀦𑁆𑀦𑀺𑀘𑀬𑀁 𑀓𑀭𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁭𑁩𑁪) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀧𑀼𑀭𑁂, 𑀧𑀘𑁆𑀙𑀸, 𑀯𑀺𑀓𑀸𑀮𑀓𑁂𑀢𑀺 ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀧𑀼𑀭𑁂𑀪𑀢𑁆𑀢𑀁 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀺𑀢𑁆𑀯𑀸’’𑀢𑀺 (𑀧𑀸𑀘𑀺. 𑁮𑁫𑁫) 𑀘 ‘‘𑀧𑀘𑁆𑀙𑀸𑀪𑀢𑁆𑀢𑀁 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀺𑀢𑁆𑀯𑀸’’𑀢𑀺 (𑀧𑀸𑀘𑀺. 𑁮𑁬𑁦) 𑀘 ‘‘𑀯𑀺𑀓𑀸𑀮𑁂 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀺𑀢𑁆𑀯𑀸’’𑀢𑀺 (𑀧𑀸𑀘𑀺. 𑁮𑁬𑁫) 𑀘 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀢𑁆𑀢𑀬𑀜𑁆𑀘.

𑁩𑁮𑁮-𑁯. 𑀧𑀜𑁆𑀘𑀸𑀳𑀺𑀓𑀦𑁆𑀢𑀺 ‘‘𑀧𑀜𑁆𑀘𑀸𑀳𑀺𑀓𑀁 𑀲𑀗𑁆𑀖𑀸𑀝𑀺𑀘𑀸𑀭𑀁 𑀅𑀢𑀺𑀓𑁆𑀓𑀫𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁮𑁯𑁮) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀲𑀗𑁆𑀓𑀫𑀦𑀺𑀦𑁆𑀢𑀺 ‘‘𑀘𑀻𑀯𑀭𑀲𑀗𑁆𑀓𑀫𑀦𑀻𑀬𑀁 𑀥𑀸𑀭𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁯𑁦𑁩) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀢𑀣𑀸 𑀆𑀯𑀲𑀣𑀤𑁆𑀯𑀬𑀦𑁆𑀢𑀺 ‘‘𑀆𑀯𑀲𑀣𑀘𑀻𑀯𑀭𑀁 𑀅𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑁂𑀬𑁆𑀬 (𑀧𑀸𑀘𑀺. 𑁧𑁦𑁦𑁪), 𑀆𑀯𑀲𑀣𑀁 𑀅𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀘𑀸𑀭𑀺𑀓𑀁 𑀧𑀓𑁆𑀓𑀫𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁧𑁦𑁦𑁯) 𑀏𑀯𑀁 𑀆𑀯𑀲𑀣𑁂𑀦 𑀲𑀤𑁆𑀥𑀺𑀁 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀜𑁆𑀘. 𑀧𑀲𑀸𑀔𑁂𑀢𑀺 ‘‘𑀧𑀲𑀸𑀔𑁂 𑀚𑀸𑀢𑀁 𑀕𑀡𑁆𑀟𑀁 𑀯𑀸’’𑀢𑀺 (𑀧𑀸𑀘𑀺. 𑁧𑁦𑁬𑁩) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀆𑀲𑀦𑁂 𑀘𑀸𑀢𑀺 ‘‘𑀪𑀺𑀓𑁆𑀔𑀼𑀲𑁆𑀲 𑀧𑀼𑀭𑀢𑁄 𑀅𑀦𑀸𑀧𑀼𑀘𑁆𑀙𑀸 𑀆𑀲𑀦𑁂 𑀦𑀺𑀲𑀻𑀤𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁧𑁨𑁧𑁫) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘𑀸𑀢𑀺 𑀇𑀫𑁂 𑀧𑀦 𑀏𑀓𑀽𑀦𑀢𑀺𑀁𑀲 𑀥𑀫𑁆𑀫𑀸 𑀓𑀸𑀬𑀯𑀸𑀘𑀢𑁄, 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀦𑀢𑁄 𑀲𑀩𑁆𑀩𑁂 𑀤𑁆𑀯𑀺𑀲𑀫𑀼𑀝𑁆𑀞𑀸𑀦𑀺𑀓𑀸, 𑀢𑀢𑁄𑀬𑁂𑀯 𑀓𑀣𑀺𑀦𑀲𑀫𑁆𑀪𑀯𑀸 𑀓𑀣𑀺𑀦𑀲𑀫𑀼𑀝𑁆𑀞𑀸𑀦𑀸 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸.

𑀓𑀣𑀺𑀦𑀲𑀫𑀼𑀝𑁆𑀞𑀸𑀦𑀯𑀡𑁆𑀡𑀦𑀸.

𑁩𑁯𑁦. 𑀤𑁆𑀯𑁂 𑀲𑁂𑀬𑁆𑀬𑀸𑀢𑀺 𑀤𑁆𑀯𑁂 𑀲𑀳𑀲𑁂𑀬𑁆𑀬𑀲𑀺𑀓𑁆𑀔𑀸𑀧𑀤𑀸𑀦𑀺 𑀘. 𑀆𑀳𑀘𑁆𑀘𑀧𑀸𑀤𑁄 𑀘𑀸𑀢𑀺 𑀆𑀳𑀘𑁆𑀘𑀧𑀸𑀤𑀓𑀲𑀺𑀓𑁆𑀔𑀸𑀧𑀤𑀜𑁆𑀘. 𑀧𑀺𑀡𑁆𑀟𑀜𑁆𑀘𑀸𑀢𑀺 𑀆𑀯𑀲𑀣𑀧𑀺𑀡𑁆𑀟𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀜𑁆𑀘. 𑀕𑀡𑀪𑁄𑀚𑀦𑀦𑁆𑀢𑀺 𑀕𑀡𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀜𑁆𑀘. 𑀯𑀺𑀓𑀸𑀮𑁂𑀢𑀺 𑀯𑀺𑀓𑀸𑀮𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀜𑁆𑀘. 𑀲𑀦𑁆𑀦𑀺𑀥𑀺𑀜𑁆𑀘𑁂𑀯𑀸𑀢𑀺 𑀲𑀦𑁆𑀦𑀺𑀥𑀺𑀓𑀸𑀭𑀓𑀲𑀺𑀓𑁆𑀔𑀸𑀧𑀤𑀜𑁆𑀘. 𑀤𑀦𑁆𑀢𑀧𑁄𑀦𑀦𑁆𑀢𑀺 𑀤𑀦𑁆𑀢𑀧𑁄𑀦𑀲𑀺𑀓𑁆𑀔𑀸𑀧𑀤𑀜𑁆𑀘. 𑀅𑀘𑁂𑀮𑀓𑀦𑁆𑀢𑀺 𑀅𑀘𑁂𑀮𑀓𑀲𑀺𑀓𑁆𑀔𑀸𑀧𑀤𑀜𑁆𑀘.

𑁩𑁯𑁧. 𑀉𑀬𑁆𑀬𑀼𑀢𑁆𑀢𑀜𑁆𑀘𑀸𑀢𑀺 ‘‘𑀉𑀬𑁆𑀬𑀼𑀢𑁆𑀢𑀁 𑀲𑁂𑀦𑀁 𑀤𑀲𑁆𑀲𑀦𑀸𑀬 𑀕𑀘𑁆𑀙𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁩𑁧𑁧) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. ‘‘𑀯𑀲𑁂 𑀉𑀬𑁆𑀬𑁄𑀥𑀺’’𑀦𑁆𑀢𑀺 𑀧𑀤𑀘𑁆𑀙𑁂𑀤𑁄. 𑀯𑀲𑁂𑀢𑀺 ‘‘𑀲𑁂𑀦𑀸𑀬 𑀯𑀲𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁩𑁧𑁮) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀉𑀬𑁆𑀬𑁄𑀥𑀺𑀦𑁆𑀢𑀺 ‘‘𑀉𑀬𑁆𑀬𑁄𑀥𑀺𑀓𑀁 𑀯𑀸…𑀧𑁂… 𑀅𑀦𑀻𑀓𑀤𑀲𑁆𑀲𑀦𑀁 𑀯𑀸 𑀕𑀘𑁆𑀙𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁩𑁨𑁩) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀲𑀼𑀭𑀸𑀢𑀺 𑀲𑀼𑀭𑀸𑀧𑀸𑀦𑀲𑀺𑀓𑁆𑀔𑀸𑀧𑀤𑀜𑁆𑀘. 𑀑𑀭𑁂𑀦 𑀦𑁆𑀳𑀸𑀬𑀦𑀦𑁆𑀢𑀺 𑀑𑀭𑁂𑀦𑀤𑁆𑀥𑀫𑀸𑀲𑀦𑀳𑀸𑀬𑀦𑀲𑀺𑀓𑁆𑀔𑀸𑀧𑀤𑀜𑁆𑀘. 𑀤𑀼𑀩𑁆𑀩𑀡𑁆𑀡𑀓𑀭𑀡𑀜𑁆𑀘𑁂𑀯𑀸𑀢𑀺 ‘‘𑀢𑀺𑀡𑁆𑀡𑀁 𑀤𑀼𑀩𑁆𑀩𑀡𑁆𑀡𑀓𑀭𑀡𑀸𑀦’’𑀦𑁆𑀢𑀺 (𑀧𑀸𑀘𑀺. 𑁩𑁬𑁮) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀧𑀸𑀝𑀺𑀤𑁂𑀲𑀦𑀻𑀬𑀤𑁆𑀯𑀬𑀦𑁆𑀢𑀺 𑀯𑀼𑀢𑁆𑀢𑀸𑀯𑀲𑁂𑀲𑀁 𑀧𑀸𑀝𑀺𑀤𑁂𑀲𑀦𑀻𑀬𑀤𑁆𑀯𑀬𑀜𑁆𑀘.

𑁩𑁯𑁨. 𑀮𑀲𑀼𑀡𑀦𑁆𑀢𑀺 𑀮𑀲𑀼𑀡𑀲𑀺𑀓𑁆𑀔𑀸𑀧𑀤𑀜𑁆𑀘. 𑀉𑀧𑀢𑀺𑀝𑁆𑀞𑁂𑀬𑁆𑀬𑀸𑀢𑀺 ‘‘𑀪𑀺𑀓𑁆𑀔𑀼𑀲𑁆𑀲 𑀪𑀼𑀜𑁆𑀚𑀦𑁆𑀢𑀲𑁆𑀲 𑀧𑀸𑀦𑀻𑀬𑁂𑀦 𑀯𑀸 𑀯𑀺𑀥𑀽𑀧𑀦𑁂𑀦 𑀯𑀸 𑀉𑀧𑀢𑀺𑀝𑁆𑀞𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁮𑁧𑁬) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀦𑀘𑁆𑀘𑀤𑀲𑁆𑀲𑀦𑀫𑁂𑀯 𑀘𑀸𑀢𑀺 ‘‘𑀦𑀘𑁆𑀘𑀁 𑀯𑀸 𑀕𑀻𑀢𑀁 𑀯𑀸 𑀯𑀸𑀤𑀺𑀢𑀁 𑀯𑀸 𑀤𑀲𑁆𑀲𑀦𑀸𑀬 𑀕𑀘𑁆𑀙𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁮𑁩𑁪) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀦𑀕𑁆𑀕𑀦𑁆𑀢𑀺 ‘‘𑀦𑀕𑁆𑀕𑀸 𑀦𑀳𑀸𑀬𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁮𑁮𑁪) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀅𑀢𑁆𑀣𑀭𑀡𑀦𑁆𑀢𑀺 ‘‘𑀏𑀓𑀢𑁆𑀣𑀭𑀡𑀧𑀸𑀯𑀼𑀭𑀡𑀸 𑀢𑀼𑀯𑀝𑁆𑀝𑁂𑀬𑁆𑀬𑀼’’𑀦𑁆𑀢𑀺 (𑀧𑀸𑀘𑀺. 𑁯𑁩𑁭) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀫𑀜𑁆𑀘𑁂𑀢𑀺 ‘‘𑀏𑀓𑀫𑀜𑁆𑀘𑁂 𑀢𑀼𑀯𑀝𑁆𑀝𑁂𑀬𑁆𑀬𑀼’’𑀦𑁆𑀢𑀺 (𑀧𑀸𑀘𑀺. 𑁯𑁩𑁩) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀅𑀦𑁆𑀢𑁄𑀭𑀝𑁆𑀞𑁂𑀢𑀺 ‘‘𑀅𑀦𑁆𑀢𑁄𑀭𑀝𑁆𑀞𑁂 𑀲𑀸𑀲𑀗𑁆𑀓𑀲𑀫𑁆𑀫𑀢𑁂’’𑀢𑀺 (𑀧𑀸𑀘𑀺. 𑁯𑁬𑁨) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀢𑀣𑀸 𑀩𑀳𑀻𑀢𑀺 ‘‘𑀢𑀺𑀭𑁄𑀭𑀝𑁆𑀞𑁂 𑀲𑀸𑀲𑀗𑁆𑀓𑀲𑀫𑁆𑀫𑀢𑁂’’𑀢𑀺 (𑀧𑀸𑀘𑀺. 𑁯𑁬𑁬) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘.

𑁩𑁯𑁩. 𑀅𑀦𑁆𑀢𑁄𑀯𑀲𑁆𑀲𑀦𑁆𑀢𑀺 ‘‘𑀅𑀦𑁆𑀢𑁄𑀯𑀲𑁆𑀲𑀁 𑀘𑀸𑀭𑀺𑀓𑀁 𑀘𑀭𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁯𑁭𑁦) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀅𑀕𑀸𑀭𑀜𑁆𑀘𑀸𑀢𑀺 ‘‘𑀭𑀸𑀚𑀸𑀕𑀸𑀭𑀁 𑀯𑀸 𑀘𑀺𑀢𑁆𑀢𑀸𑀕𑀸𑀭𑀁 𑀯𑀸…𑀧𑁂… 𑀧𑁄𑀓𑁆𑀔𑀭𑀡𑀺𑀁 𑀯𑀸 𑀤𑀲𑁆𑀲𑀦𑀸𑀬 𑀕𑀘𑁆𑀙𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁯𑁭𑁮) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀆𑀲𑀦𑁆𑀤𑀺𑀦𑁆𑀢𑀺 ‘‘𑀆𑀲𑀦𑁆𑀤𑀺𑀁 𑀯𑀸 𑀧𑀮𑁆𑀮𑀗𑁆𑀓𑀁 𑀯𑀸 𑀧𑀭𑀺𑀪𑀼𑀜𑁆𑀚𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁯𑁮𑁩) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀲𑀼𑀢𑁆𑀢𑀓𑀦𑁆𑀢𑀦𑀦𑁆𑀢𑀺 ‘‘𑀲𑀼𑀢𑁆𑀢𑀁 𑀓𑀦𑁆𑀢𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁯𑁮𑁭) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀯𑁂𑀬𑁆𑀬𑀸𑀯𑀘𑁆𑀘𑀦𑁆𑀢𑀺 ‘‘𑀕𑀺𑀳𑀺𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀭𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁯𑁯𑁧) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀲𑀳𑀢𑁆𑀣𑀸 𑀘𑀸𑀢𑀺 ‘‘𑀅𑀕𑀸𑀭𑀺𑀓𑀲𑁆𑀲 𑀯𑀸 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀯𑀸 𑀧𑀭𑀺𑀩𑁆𑀩𑀸𑀚𑀺𑀓𑀸𑀬 𑀯𑀸 𑀲𑀳𑀢𑁆𑀣𑀸 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀤𑀤𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁧𑁦𑁦𑁦) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀆𑀯𑀸𑀲𑁂 𑀘 𑀅𑀪𑀺𑀓𑁆𑀔𑀼𑀓𑁂𑀢𑀺 ‘‘𑀅𑀪𑀺𑀓𑁆𑀔𑀼𑀓𑁂 𑀆𑀯𑀸𑀲𑁂 𑀯𑀲𑁆𑀲𑀁 𑀯𑀲𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁧𑁦𑁪𑁭) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘.

𑁩𑁯𑁪. 𑀙𑀢𑁆𑀢𑀦𑁆𑀢𑀺 ‘‘𑀙𑀢𑁆𑀢𑀼𑀧𑀸𑀳𑀦𑀁 𑀥𑀸𑀭𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁧𑁧𑁭𑁮) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀬𑀸𑀦𑀜𑁆𑀘𑀸𑀢𑀺 ‘‘𑀬𑀸𑀦𑁂𑀦 𑀬𑀸𑀬𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁧𑁧𑁮𑁬) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀲𑀗𑁆𑀖𑀸𑀡𑀺𑀦𑁆𑀢𑀺 ‘‘𑀲𑀗𑁆𑀖𑀸𑀡𑀺𑀁 𑀥𑀸𑀭𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁧𑁧𑁯𑁧) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀅𑀮𑀗𑁆𑀓𑀸𑀭𑀦𑁆𑀢𑀺 ‘‘𑀇𑀢𑁆𑀣𑀸𑀮𑀗𑁆𑀓𑀸𑀭𑀁 𑀥𑀸𑀭𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁧𑁧𑁯𑁫) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀕𑀦𑁆𑀥𑀯𑀸𑀲𑀺𑀢𑀦𑁆𑀢𑀺 ‘‘𑀕𑀦𑁆𑀥𑀯𑀡𑁆𑀡𑀓𑁂𑀦 𑀦𑀳𑀸𑀬𑁂𑀬𑁆𑀬 (𑀧𑀸𑀘𑀺. 𑁧𑁧𑁯𑁯), 𑀯𑀸𑀲𑀺𑀢𑀓𑁂𑀦 𑀧𑀺𑀜𑁆𑀜𑀸𑀓𑁂𑀦 𑀦𑀳𑀸𑀬𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁧𑁨𑁦𑁩) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀜𑁆𑀘. ‘‘𑀪𑀺𑀓𑁆𑀔𑀼𑀦𑀻…𑀧𑁂… 𑀕𑀺𑀳𑀺𑀦𑀺𑀬𑀸’’𑀢𑀺 𑀏𑀢𑁂𑀦 ‘‘𑀪𑀺𑀓𑁆𑀔𑀼𑀦𑀺𑀬𑀸 𑀉𑀫𑁆𑀫𑀤𑁆𑀤𑀸𑀧𑁂𑀬𑁆𑀬𑀸’’𑀢𑀺𑀆𑀤𑀻𑀦𑀺 (𑀧𑀸𑀘𑀺. 𑁧𑁨𑁦𑁭) 𑀘𑀢𑁆𑀢𑀸𑀭𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀯𑀼𑀢𑁆𑀢𑀸𑀦𑀺.

𑁩𑁯𑁫. 𑀢𑀣𑀸𑀲𑀁𑀓𑀘𑁆𑀘𑀺𑀓𑀸𑀢𑀺 ‘‘𑀅𑀲𑀁𑀓𑀘𑁆𑀘𑀺𑀓𑀸 𑀕𑀸𑀫𑀁 𑀧𑀯𑀺𑀲𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁧𑁨𑁨𑁫) 𑀏𑀯𑀁 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀇𑀫𑁂 𑀧𑀦 𑀢𑁂𑀘𑀢𑁆𑀢𑀸𑀮𑀻𑀲 𑀥𑀫𑁆𑀫𑀸 𑀲𑀩𑁆𑀩𑁂 𑀓𑀸𑀬𑀘𑀺𑀢𑁆𑀢𑀯𑀲𑁂𑀦 𑀤𑁆𑀯𑀺𑀲𑀫𑀼𑀝𑁆𑀞𑀸𑀦𑀺𑀓𑀸. 𑀏𑀴𑀓𑀮𑁄𑀫𑁂𑀦 𑀲𑀫𑀼𑀝𑁆𑀞𑀸𑀦𑀢𑁄 𑀲𑀫𑀸 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸.

𑀏𑀴𑀓𑀮𑁄𑀫𑀲𑀫𑀼𑀝𑁆𑀞𑀸𑀦𑀯𑀡𑁆𑀡𑀦𑀸.

𑁩𑁯𑁬-𑁭. 𑀅𑀜𑁆𑀜𑀢𑁆𑀭𑀸𑀢𑀺 ‘‘𑀫𑀸𑀢𑀼𑀕𑀸𑀫𑀲𑁆𑀲 𑀉𑀢𑁆𑀢𑀭𑀺𑀙𑀧𑁆𑀧𑀜𑁆𑀘𑀯𑀸𑀘𑀸𑀳𑀺 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬 𑀅𑀜𑁆𑀜𑀢𑁆𑀭 𑀯𑀺𑀜𑁆𑀜𑀼𑀦𑀸 𑀧𑀼𑀭𑀺𑀲𑀯𑀺𑀕𑁆𑀕𑀳𑁂𑀦𑀸’’𑀢𑀺 (𑀧𑀸𑀘𑀺. 𑁬𑁩) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀅𑀲𑀫𑁆𑀫𑀢𑁄 𑀘𑁂𑀯𑀸𑀢𑀺 ‘‘𑀅𑀲𑀫𑁆𑀫𑀢𑁄 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁧𑁪𑁬) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀢𑀣𑀸 𑀅𑀢𑁆𑀣𑀗𑁆𑀕𑀢𑁂𑀦 𑀘𑀸𑀢𑀺 ‘‘𑀅𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁧𑁫𑁪) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸 𑀤𑁆𑀯𑁂 𑀯𑀼𑀢𑁆𑀢𑀸𑀢𑀺 ‘‘𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀁 𑀧𑀭𑀺𑀬𑀸𑀧𑀼𑀡𑁂𑀬𑁆𑀬, 𑀯𑀸𑀘𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁧𑁦𑁧𑁪, 𑁧𑁦𑁧𑁮) 𑀏𑀯𑀁 𑀯𑀼𑀢𑁆𑀢𑀸𑀦𑀺 𑀤𑁆𑀯𑁂 𑀲𑀺𑀓𑁆𑀔𑀸𑀧𑀤𑀸𑀦𑀺 𑀘. 𑀅𑀦𑁄𑀓𑀸𑀲𑀓𑀢𑀫𑁆𑀧𑀺 𑀘𑀸𑀢𑀺 ‘‘𑀅𑀦𑁄𑀓𑀸𑀲𑀓𑀢𑀁 𑀪𑀺𑀓𑁆𑀔𑀼𑀁 𑀧𑀜𑁆𑀳𑀁 𑀧𑀼𑀘𑁆𑀙𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁧𑁨𑁨𑁦) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘𑀸𑀢𑀺 𑀇𑀫𑁂 𑀧𑀦 𑀲𑀩𑁆𑀩𑁂 𑀙 𑀥𑀫𑁆𑀫𑀸 𑀯𑀸𑀘𑀢𑁄, 𑀯𑀸𑀘𑀸𑀘𑀺𑀢𑁆𑀢𑀢𑁄 𑀘𑀸𑀢𑀺 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀲𑀫𑀼𑀝𑁆𑀞𑀸𑀦𑁂𑀳𑀺 𑀲𑀫𑀼𑀝𑁆𑀞𑀸𑀦𑀺𑀓𑀸 𑀳𑁄𑀦𑁆𑀢𑀺. 𑀧𑀤𑀲𑁄𑀥𑀫𑁆𑀫𑀢𑀼𑀮𑁆𑀬𑀢𑀸 𑀅𑀬𑀫𑁂𑀢𑁂𑀲𑀁 𑀧𑀤𑀲𑁄𑀥𑀫𑁆𑀫𑁂𑀦 𑀲𑀤𑀺𑀲𑀪𑀸𑀯𑁄𑀢𑀺 𑀬𑁄𑀚𑀦𑀸.

𑀧𑀤𑀲𑁄𑀥𑀫𑁆𑀫𑀲𑀫𑀼𑀝𑁆𑀞𑀸𑀦𑀯𑀡𑁆𑀡𑀦𑀸.

𑁩𑁯𑁮-𑁯. 𑀏𑀓𑀦𑁆𑀢𑀺 ‘‘𑀪𑀺𑀓𑁆𑀔𑀼𑀦𑀺𑀬𑀸 𑀲𑀤𑁆𑀥𑀺𑀁 𑀲𑀁𑀯𑀺𑀥𑀸𑀬 𑀏𑀓𑀤𑁆𑀥𑀸𑀦𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁧𑁮𑁦) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀦𑀸𑀯𑀦𑁆𑀢𑀺 ‘‘𑀏𑀓𑀦𑀸𑀯𑀁 𑀅𑀪𑀺𑀭𑀼𑀳𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁧𑁮𑁮) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀧𑀡𑀻𑀢𑀜𑁆𑀘𑀸𑀢𑀺 ‘‘𑀧𑀡𑀻𑀢𑀪𑁄𑀚𑀦𑀸𑀦𑀺 𑀅𑀕𑀺𑀮𑀸𑀦𑁄 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸𑀪𑀼𑀜𑁆𑀚𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁨𑁫𑁯) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀲𑀁𑀯𑀺𑀥𑀸𑀦𑀜𑁆𑀘𑀸𑀢𑀺 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀲𑀁𑀯𑀺𑀥𑀸𑀬 𑀕𑀫𑀦𑀲𑀺𑀓𑁆𑀔𑀸𑀧𑀤𑀜𑁆𑀘. 𑀲𑀁𑀳𑀭𑁂𑀢𑀺 ‘‘𑀲𑀫𑁆𑀩𑀸𑀥𑁂 𑀮𑁄𑀫𑀁 𑀲𑀁𑀳𑀭𑀸𑀧𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁭𑁯𑁯) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀥𑀜𑁆𑀜𑀦𑁆𑀢𑀺 ‘‘𑀆𑀫𑀓𑀥𑀜𑁆𑀜𑀁 𑀯𑀺𑀜𑁆𑀜𑀢𑁆𑀯𑀸 𑀯𑀸’’𑀢𑀺 (𑀧𑀸𑀘𑀺. 𑁮𑁨𑁧) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀦𑀺𑀫𑀦𑁆𑀢𑀺𑀢𑀸 𑀘𑁂𑀯𑀸𑀢𑀺 ‘‘𑀦𑀺𑀫𑀦𑁆𑀢𑀺𑀢𑀸 𑀯𑀸 𑀧𑀯𑀸𑀭𑀺𑀢𑀸 𑀯𑀸 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀔𑀸𑀤𑁂𑀬𑁆𑀬 𑀯𑀸 𑀪𑀼𑀜𑁆𑀚𑁂𑀬𑁆𑀬 𑀯𑀸’’𑀢𑀺 (𑀧𑀸𑀘𑀺. 𑁧𑁦𑁩𑁮) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀧𑀸𑀝𑀺𑀤𑁂𑀲𑀦𑀺𑀬𑀝𑁆𑀞𑀓𑀦𑁆𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀯𑀼𑀢𑁆𑀢𑀸 𑀅𑀝𑁆𑀞 𑀧𑀸𑀝𑀺𑀤𑁂𑀲𑀦𑀻𑀬𑀸 𑀘𑁂𑀢𑀺 𑀩𑀼𑀤𑁆𑀥𑀲𑁂𑀝𑁆𑀞𑁂𑀦 𑀧𑀜𑁆𑀜𑀢𑁆𑀢𑀸 𑀏𑀢𑀸 𑀘𑀼𑀤𑁆𑀤𑀲 𑀲𑀺𑀓𑁆𑀔𑀸 𑀘𑀢𑀼𑀲𑀫𑀼𑀝𑁆𑀞𑀸𑀦𑀸 𑀓𑀸𑀬𑀢𑁄, 𑀓𑀸𑀬𑀯𑀸𑀘𑀢𑁄, 𑀓𑀸𑀬𑀘𑀺𑀢𑁆𑀢𑀢𑁄, 𑀯𑀸𑀘𑀸𑀘𑀺𑀢𑁆𑀢𑀢𑁄 𑀘𑀸𑀢𑀺 𑀘𑀢𑀽𑀳𑀺 𑀲𑀫𑀼𑀝𑁆𑀞𑀸𑀦𑁂𑀳𑀺 𑀲𑀫𑀼𑀝𑁆𑀞𑀳𑀦𑁆𑀢𑀺. 𑀲𑀫𑀼𑀝𑁆𑀞𑀸𑀦𑀢𑁄 𑀅𑀤𑁆𑀥𑀸𑀦𑁂𑀦 𑀅𑀤𑁆𑀥𑀸𑀦𑀲𑀺𑀓𑁆𑀔𑀸𑀧𑀤𑁂𑀦 𑀲𑀫𑀸 𑀳𑁄𑀦𑁆𑀢𑀻𑀢𑀺 𑀫𑀢𑀸𑀢𑀺 𑀬𑁄𑀚𑀦𑀸.

𑀅𑀤𑁆𑀥𑀸𑀦𑀲𑀫𑀼𑀝𑁆𑀞𑀸𑀦𑀯𑀡𑁆𑀡𑀦𑀸.

𑁪𑁦𑁦-𑁧. 𑀲𑀼𑀢𑀺𑀦𑁆𑀢𑀺 𑀉𑀧𑀲𑁆𑀲𑀼𑀢𑀺𑀢𑀺𑀝𑁆𑀞𑀦𑀲𑀺𑀓𑁆𑀔𑀸𑀧𑀤𑀜𑁆𑀘. 𑀲𑀽𑀧𑀸𑀤𑀺𑀯𑀺𑀜𑁆𑀜𑀢𑁆𑀢𑀺𑀦𑁆𑀢𑀺 𑀲𑀽𑀧𑁄𑀤𑀦𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀜𑁆𑀘. 𑀅𑀦𑁆𑀥𑀓𑀸𑀭𑁂𑀢𑀺 ‘‘𑀭𑀢𑁆𑀢𑀦𑁆𑀥𑀓𑀸𑀭𑁂 𑀅𑀧𑁆𑀧𑀤𑀻𑀧𑁂’’𑀢𑀺 (𑀧𑀸𑀘𑀺. 𑁮𑁩𑁯) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀢𑀣𑁂𑀯 𑀘 𑀧𑀝𑀺𑀘𑁆𑀙𑀦𑁆𑀦𑁂𑀢𑀺 ‘‘𑀧𑀝𑀺𑀘𑁆𑀙𑀦𑁆𑀦𑁂 𑀑𑀓𑀸𑀲𑁂’’𑀢𑀺 (𑀧𑀸𑀘𑀺. 𑁮𑁪𑁩) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀑𑀓𑀸𑀲𑁂𑀢𑀺 ‘‘𑀅𑀚𑁆𑀛𑁄𑀓𑀸𑀲𑁂 𑀧𑀼𑀭𑀺𑀲𑁂𑀦 𑀲𑀤𑁆𑀥𑀺’’𑀦𑁆𑀢𑀺 (𑀧𑀸𑀘𑀺. 𑁮𑁪𑁭) 𑀏𑀯𑀁 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀩𑁆𑀬𑀽𑀳𑁂 𑀘𑀸𑀢𑀺 𑀢𑀤𑀦𑀦𑁆𑀢𑀭𑀫𑁂𑀯 ‘‘𑀭𑀣𑀺𑀓𑀸𑀬 𑀯𑀸 𑀩𑁆𑀬𑀽𑀳𑁂 𑀯𑀸 𑀲𑀺𑀗𑁆𑀖𑀸𑀝𑀓𑁂 𑀯𑀸 𑀧𑀼𑀭𑀺𑀲𑁂𑀦 𑀲𑀤𑁆𑀥𑀺’’𑀦𑁆𑀢𑀺 (𑀧𑀸𑀘𑀺. 𑁮𑁫𑁧) 𑀆𑀕𑀢𑀲𑀺𑀓𑁆𑀔𑀸𑀧𑀤𑀜𑁆𑀘𑀸𑀢𑀺 𑀇𑀫𑁂 𑀲𑀩𑁆𑀩𑁂𑀧𑀺 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀸 𑀤𑁂𑀲𑀺𑀢𑀸 𑀙 𑀥𑀫𑁆𑀫𑀸 𑀘𑀢𑀼𑀢𑁆𑀣𑀘𑁆𑀙𑀝𑁆𑀞𑀢𑁄 𑀓𑀸𑀬𑀘𑀺𑀢𑁆𑀢𑀢𑁄, 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀳𑀦𑁆𑀢𑀸 𑀣𑁂𑀬𑁆𑀬𑀲𑀢𑁆𑀣𑀲𑀫𑀼𑀝𑁆𑀞𑀸𑀦𑀸 𑀣𑁂𑀬𑁆𑀬𑀲𑀢𑁆𑀣𑀲𑀺𑀓𑁆𑀔𑀸𑀧𑀤𑁂𑀦 𑀲𑀫𑀸𑀦𑀲𑀫𑀼𑀝𑁆𑀞𑀸𑀦𑀸 𑀲𑀺𑀬𑀼𑀦𑁆𑀢𑀺 𑀬𑁄𑀚𑀦𑀸.

𑀣𑁂𑀬𑁆𑀬𑀲𑀢𑁆𑀣𑀲𑀫𑀼𑀝𑁆𑀞𑀸𑀦𑀯𑀡𑁆𑀡𑀦𑀸.

𑁪𑁦𑁨. 𑀙𑀢𑁆𑀢, 𑀤𑀡𑁆𑀟𑀓𑀭𑀲𑁆𑀲𑀸𑀧𑀻𑀢𑀺 ‘‘𑀦 𑀙𑀢𑁆𑀢𑀧𑀸𑀡𑀺𑀲𑁆𑀲 𑀤𑀡𑁆𑀟𑀧𑀸𑀡𑀺𑀲𑁆𑀲𑀸’’𑀢𑀺 (𑀧𑀸𑀘𑀺. 𑁬𑁩𑁫) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀜𑁆𑀘. 𑀲𑀢𑁆𑀣𑀸𑀯𑀼𑀥𑀓𑀭𑀲𑁆𑀲𑀸𑀧𑀻𑀢𑀺 ‘‘𑀦 𑀲𑀢𑁆𑀣𑀧𑀸𑀡𑀺𑀲𑁆𑀲 (𑀧𑀸𑀘𑀺. 𑁬𑁩𑁬), 𑀦 𑀆𑀯𑀼𑀥𑀧𑀸𑀡𑀺𑀲𑁆𑀲𑀸’’𑀢𑀺 (𑀧𑀸𑀘𑀺. 𑁬𑁩𑁭) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀜𑁆𑀘. 𑀧𑀸𑀤𑀼𑀓𑀽𑀧𑀸𑀳𑀦𑀸, 𑀬𑀸𑀦𑀦𑁆𑀢𑀺 ‘‘𑀦 𑀧𑀸𑀤𑀼𑀓𑀸𑀭𑀼𑀴𑁆𑀳𑀲𑁆𑀲 (𑀧𑀸𑀘𑀺. 𑁬𑁩𑁮), 𑀦 𑀉𑀧𑀸𑀳𑀦𑀸𑀭𑀼𑀴𑁆𑀳𑀲𑁆𑀲 (𑀧𑀸𑀘𑀺. 𑁬𑁩𑁯), 𑀦 𑀬𑀸𑀦𑀕𑀢𑀲𑁆𑀲𑀸’’𑀢𑀺 (𑀧𑀸𑀘𑀺. 𑁬𑁪𑁦) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀢𑁆𑀢𑀬𑀜𑁆𑀘. 𑀲𑁂𑀬𑁆𑀬𑀸, 𑀧𑀮𑁆𑀮𑀢𑁆𑀣𑀺𑀓𑀸𑀬 𑀘𑀸𑀢𑀺 ‘‘𑀦 𑀲𑀬𑀦𑀕𑀢𑀲𑁆𑀲 (𑀧𑀸𑀘𑀺. 𑁬𑁪𑁧), 𑀦 𑀧𑀮𑁆𑀮𑀢𑁆𑀣𑀺𑀓𑀸𑀬 𑀦𑀺𑀲𑀺𑀦𑁆𑀦𑀲𑁆𑀲𑀸’’𑀢𑀺 (𑀧𑀸𑀘𑀺. 𑁬𑁪𑁨) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀜𑁆𑀘.

𑁪𑁦𑁩. 𑀯𑁂𑀞𑀺𑀢𑁄𑀕𑀼𑀡𑁆𑀞𑀺𑀢𑁄 𑀘𑀸𑀢𑀺 ‘‘𑀦 𑀯𑁂𑀞𑀺𑀢𑀲𑀻𑀲𑀲𑁆𑀲 (𑀧𑀸𑀘𑀺. 𑁬𑁪𑁩), 𑀦 𑀑𑀕𑀼𑀡𑁆𑀞𑀺𑀢𑀲𑀻𑀲𑀲𑁆𑀲𑀸’’𑀢𑀺 (𑀧𑀸𑀘𑀺. 𑁬𑁪𑁪) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀜𑁆𑀘𑀸𑀢𑀺 𑀦𑀺𑀤𑀲𑁆𑀲𑀺𑀢𑀸 𑀲𑀩𑁆𑀩𑁂 𑀏𑀓𑀸𑀤𑀲 𑀥𑀫𑁆𑀫𑀸 𑀯𑀸𑀘𑀸𑀘𑀺𑀢𑁆𑀢𑀲𑀗𑁆𑀔𑀸𑀢𑁂𑀦 𑀏𑀓𑁂𑀦 𑀲𑀫𑀼𑀝𑁆𑀞𑀸𑀦𑁂𑀦 𑀲𑀫𑀼𑀝𑁆𑀞𑀺𑀢𑀸 𑀥𑀫𑁆𑀫𑀤𑁂𑀲𑀦𑀲𑀫𑀼𑀝𑁆𑀞𑀸𑀦𑀸𑀢𑀺 𑀲𑀜𑁆𑀜𑀺𑀢𑀸 𑀲𑀮𑁆𑀮𑀓𑁆𑀔𑀺𑀢𑀸𑀢𑀺 𑀬𑁄𑀚𑀦𑀸.

𑀥𑀫𑁆𑀫𑀤𑁂𑀲𑀦𑀲𑀫𑀼𑀝𑁆𑀞𑀸𑀦𑀯𑀡𑁆𑀡𑀦𑀸.

𑁪𑁦𑁪. 𑀏𑀯𑀁 𑀢𑀸𑀯 𑀲𑀫𑁆𑀪𑀺𑀦𑁆𑀦𑀲𑀫𑀼𑀝𑁆𑀞𑀸𑀦𑀁 𑀯𑁂𑀤𑀺𑀢𑀩𑁆𑀩𑀁, 𑀦𑀺𑀬𑀢𑀲𑀫𑀼𑀝𑁆𑀞𑀸𑀦𑀁 𑀢𑀺𑀯𑀺𑀥𑀁, 𑀢𑀁 𑀏𑀓𑀲𑁆𑀲𑁂𑀯 𑀲𑀺𑀓𑁆𑀔𑀸𑀧𑀤𑀲𑁆𑀲 𑀳𑁄𑀢𑀻𑀢𑀺 𑀯𑀺𑀲𑀼𑀁𑀬𑁂𑀯 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀪𑀽𑀢𑀸𑀭𑁄𑀘𑀦𑀓𑀜𑁆𑀘𑁂𑀯𑀸’’𑀢𑀺𑀆𑀤𑀺. 𑀪𑀽𑀢𑀸𑀭𑁄𑀘𑀦𑀓𑀜𑁆𑀘𑁂𑀯𑀸𑀢𑀺 𑀢𑀻𑀳𑀺 𑀅𑀘𑀺𑀢𑁆𑀢𑀓𑀲𑀫𑀼𑀝𑁆𑀞𑀸𑀦𑁂𑀳𑀺 𑀲𑀫𑀼𑀝𑁆𑀞𑀺𑀢𑀁 𑀪𑀽𑀢𑀸𑀭𑁄𑀘𑀦𑀲𑀺𑀓𑁆𑀔𑀸𑀧𑀤𑀜𑁆𑀘. 𑀘𑁄𑀭𑀺𑀯𑀼𑀝𑁆𑀞𑀸𑀧𑀦𑀫𑁆𑀧𑀺 𑀘𑀸𑀢𑀺 𑀯𑀸𑀘𑀸𑀘𑀺𑀢𑁆𑀢𑀢𑁄, 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘𑀸𑀢𑀺 𑀤𑁆𑀯𑀻𑀳𑀺 𑀲𑀫𑀼𑀝𑁆𑀞𑀺𑀢𑀁 𑀘𑁄𑀭𑀺𑀯𑀼𑀝𑁆𑀞𑀸𑀧𑀦𑀲𑀺𑀓𑁆𑀔𑀸𑀧𑀤𑀜𑁆𑀘. 𑀅𑀦𑀦𑀼𑀜𑁆𑀜𑀸𑀢𑀫𑁂𑀯 𑀅𑀦𑀦𑀼𑀜𑁆𑀜𑀸𑀢𑀫𑀢𑁆𑀢𑀁. 𑀅𑀦𑀦𑀼𑀜𑁆𑀜𑀸𑀢𑀫𑀢𑁆𑀢𑀦𑁆𑀢𑀺 𑀯𑀸𑀘𑀢𑁄, 𑀓𑀸𑀬𑀯𑀸𑀘𑀢𑁄, 𑀯𑀸𑀘𑀸𑀘𑀺𑀢𑁆𑀢𑀢𑁄, 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘𑀸𑀢𑀺 𑀘𑀢𑀽𑀳𑀺 𑀲𑀫𑀼𑀝𑁆𑀞𑀺𑀢𑀁 𑀅𑀦𑀦𑀼𑀜𑁆𑀜𑀸𑀢𑀲𑀺𑀓𑁆𑀔𑀸𑀧𑀤𑀜𑁆𑀘𑀸𑀢𑀺. 𑀇𑀤𑀁 𑀢𑀬𑀦𑁆𑀢𑀺 𑀇𑀤𑀁 𑀲𑀺𑀓𑁆𑀔𑀸𑀧𑀤𑀢𑁆𑀢𑀬𑀁. 𑀅𑀲𑀫𑁆𑀪𑀺𑀦𑁆𑀦𑀦𑁆𑀢𑀺 𑀓𑁂𑀦𑀘𑀺 𑀅𑀜𑁆𑀜𑁂𑀦 𑀲𑀺𑀓𑁆𑀔𑀸𑀧𑀤𑁂𑀦 𑀅𑀲𑀫𑁆𑀫𑀺𑀲𑁆𑀲𑀲𑀫𑀼𑀝𑁆𑀞𑀸𑀦𑀁.

𑀇𑀢𑀺 𑀉𑀢𑁆𑀢𑀭𑁂 𑀮𑀻𑀦𑀢𑁆𑀣𑀧𑀓𑀸𑀲𑀦𑀺𑀬𑀸

𑀲𑀫𑀼𑀝𑁆𑀞𑀸𑀦𑀲𑀻𑀲𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.